ਤਾਜਾ ਖ਼ਬਰਾਂ


ਹਰਦੀਪ ਸਿੰਘ ਪੁਰੀ ਹੋਣਗੇ ਅੰਮ੍ਰਿਤਸਰ ਤੋਂ ਭਾਜਪਾ ਉਮੀਦਵਾਰ
. . .  45 minutes ago
ਨਵੀਂ ਦਿੱਲੀ, 21 ਅਪ੍ਰੈਲ - ਭਾਰਤੀ ਜਨਤਾ ਪਾਰਟੀ ਵੱਲੋਂ ਅੱਜ ਲੋਕ ਸਭਾ ਚੋਣਾਂ ਲਈ 7 ਹੋਰ ਉਮੀਦਵਾਰਾਂ ਦੀ ਸੂਚੀ ਜਾਰੀ ਕੀਤੀ ਗਈ, ਜਿਸ ਵਿਚ ਅੰਮ੍ਰਿਤਸਰ ਲੋਕ-ਸਭਾ ਹਲਕੇ ਤੋਂ ਕੇਂਦਰੀ ਮੰਤਰੀ ਹਰਦੀਪ ਸਿੰਘ ਪੁਰੀ...
ਆਈ.ਪੀ.ਐੱਲ : 2019 - ਟਾਸ ਜਿੱਤ ਕੇ ਚੇਨਈ ਵੱਲੋਂ ਬੈਂਗਲੌਰ ਨੂੰ ਪਹਿਲਾ ਬੱਲੇਬਾਜ਼ੀ ਦਾ ਸੱਦਾ
. . .  about 1 hour ago
ਆਈ.ਪੀ.ਐੱਲ : 2019 - ਹੈਦਰਾਬਾਦ ਨੇ ਕੋਲਕਾਤਾ ਨੂੰ 9 ਵਿਕਟਾਂ ਨਾਲ ਦਿੱਤੀ ਕਰਾਰੀ ਹਾਰ
. . .  about 1 hour ago
ਸ੍ਰੀਲੰਕਾ 'ਚ ਧਮਾਕਿਆਂ ਕਾਰਨ ਮੌਤਾਂ ਦੀ ਗਿਣਤੀ ਵੱਧ ਕੇ ਹੋਈ 207
. . .  about 1 hour ago
ਕੋਲੰਬੋ, 21 ਅਪ੍ਰੈਲ - ਸ੍ਰੀਲੰਕਾ ਦੀ ਰਾਜਧਾਨੀ ਕੋਲੰਬੋ ਸਮੇਤ ਕਈ ਸ਼ਹਿਰਾਂ 'ਚ ਅੱਜ ਈਸਟਰ ਮੌਕੇ ਚਰਚਾਂ ਅਤੇ ਹੋਟਲਾਂ 'ਚ ਹੋਏ ਅੱਠ ਬੰਬ ਧਮਾਕਿਆਂ 'ਚ ਹੁਣ ਤੱਕ...
ਅੱਗ ਲੱਗਣ ਨਾਲ 15 ਏਕੜ ਕਣਕ ਸੜ ਕੇ ਸੁਆਹ
. . .  about 2 hours ago
ਤਲਵੰਡੀ ਭਾਈ, 21 ਅਪ੍ਰੈਲ (ਕੁਲਜਿੰਦਰ ਸਿੰਘ ਗਿੱਲ) - ਤਲਵੰਡੀ ਭਾਈ ਵਿਖੇ ਖੇਤਾਂ 'ਚ ਲੱਗੀ ਅੱਗ ਕਾਰਨ 4 ਕਿਸਾਨਾਂ ਦੀ 15 ਏਕੜ ਕਣਕ ਦੀ ਫਸਲ ਸੜ ਕੇ ਸੁਆਹ ਹੋ ਗਈ। ਅੱਗ ਬੁਝਾਉਣ...
13 ਸਾਲਾ ਲੜਕੀ ਨਾਲ ਜਬਰ ਜਨਾਹ ਕਰਨ ਵਾਲੇ ਦੋਸ਼ੀ ਨੂੰ ਗ੍ਰਿਫ਼ਤਾਰ ਕਰਕੇ ਜੇਲ੍ਹ ਭੇਜਿਆ
. . .  about 2 hours ago
ਫ਼ਤਹਿਗੜ੍ਹ ਸਾਹਿਬ, 21 ਅਪ੍ਰੈਲ (ਅਰੁਣ ਆਹੂਜਾ)- ਨੇੜਲੇ ਪਿੰਡ ਰਾਮਦਾਸ ਨਗਰ 'ਚ 13 ਸਾਲਾ ਨਾਬਾਲਗ ਲੜਕੀ ਨਾਲ ਜਬਰ ਜਨਾਹ ਕਰਨ ਵਾਲੇ ਨੌਜਵਾਨ ਨੂੰ ਅੱਜ ਸਰਹਿੰਦ ਪੁਲਿਸ ਨੇ ਗ੍ਰਿਫ਼ਤਾਰ ਕਰ ਲਿਆ ਹੈ। ਇਸ ਬਾਰੇ ਜਾਣਕਾਰੀ ਦਿੰਦਿਆਂ ਥਾਣਾ ਸਰਹਿੰਦ ਦੇ...
ਅੱਠ ਧਮਾਕਿਆਂ ਕਾਰਨ ਸ੍ਰੀਲੰਕਾ 'ਚ 188 ਲੋਕਾਂ ਦੀ ਮੌਤ, 500 ਤੋਂ ਵੱਧ ਜ਼ਖ਼ਮੀ
. . .  about 3 hours ago
ਕੋਲੰਬੋ, 21 ਅਪ੍ਰੈਲ- ਸ੍ਰੀਲੰਕਾ ਦੀ ਰਾਜਧਾਨੀ ਕੋਲੰਬੋ ਸਮੇਤ ਕਈ ਸ਼ਹਿਰਾਂ 'ਚ ਅੱਜ ਈਸਟਰ ਮੌਕੇ ਚਰਚਾਂ ਅਤੇ ਹੋਟਲਾਂ 'ਚ ਹੋਏ ਅੱਠ ਬੰਬ ਧਮਾਕਿਆਂ 'ਚ ਹੁਣ ਤੱਕ 188 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਧਮਾਕਿਆਂ ਕਾਰਨ 500 ਤੋਂ ਵੱਧ ਲੋਕ ਜ਼ਖ਼ਮੀ ਹੋਏ ਹਨ, ਜਿਨ੍ਹਾਂ ਨੂੰ ਵੱਖ-ਵੱਖ...
ਵਾਰਾਣਸੀ ਤੋਂ ਮੋਦੀ ਵਿਰੁੱਧ ਚੋਣ ਲੜਨ 'ਤੇ ਪ੍ਰਿਅੰਕਾ ਨੇ ਕਿਹਾ- ਕਾਂਗਰਸ ਪ੍ਰਧਾਨ ਕਹਿਣਗੇ ਤਾਂ ਖ਼ੁਸ਼ੀ ਨਾਲ ਲੜਾਂਗੀ
. . .  about 3 hours ago
ਤਿਰੂਵਨੰਤਪੁਰਮ, 21 ਅਪ੍ਰੈਲ- ਕਾਂਗਰਸ ਦੀ ਜਨਰਲ ਸਕੱਤਰ ਪ੍ਰਿਅੰਕਾ ਗਾਂਧੀ ਵਾਡਰਾ ਵਲੋਂ ਪ੍ਰਧਾਨ ਮੰਤਰੀ ਮੋਦੀ ਵਿਰੁੱਧ ਵਾਰਾਣਸੀ ਤੋਂ ਚੋਣ ਲੜਨ ਦੀਆਂ ਅਟਕਲਾਂ ਫਿਰ ਤੇਜ਼ ਹੋ ਗਈਆਂ ਹਨ। ਚੋਣ ਪ੍ਰਚਾਰ ਕਰਨ ਲਈ ਕੇਰਲ ਦੇ ਵਾਇਨਾਡ 'ਚ ਪਹੁੰਚੀ ਪ੍ਰਿਅੰਕਾ ਗਾਂਧੀ...
ਅਕਾਲੀ ਦਲ ਨੂੰ ਛੱਡ ਕਾਂਗਰਸ 'ਚ ਸ਼ਾਮਲ ਹੋਏ 50 ਪਰਿਵਾਰ
. . .  about 3 hours ago
ਨਾਭਾ, 21 ਅਪ੍ਰੈਲ (ਕਰਮਜੀਤ ਸਿੰਘ)- ਪਿੰਡ ਅੱਚਲ ਦੇ ਸਾਬਕਾ ਸਰਪੰਚ ਜਸਵਿੰਦਰ ਸਿੰਘ ਅਤੇ ਮੌਜੂਦਾ ਸਰਪੰਚ ਯਾਦਵਿੰਦਰ ਸਿੰਘ ਦੇ ਨਾਲ ਅੱਜ 50 ਪਰਿਵਾਰ ਸ਼੍ਰੋਮਣੀ ਅਕਾਲੀ ਦਲ ਨੂੰ ਛੱਡ ਕੇ ਕਾਂਗਰਸ 'ਚ ਸ਼ਾਮਲ ਹੋ ਗਏ। ਉਕਤ ਪਰਿਵਾਰਾਂ ਨੇ ਬਲਵਿੰਦਰ ਬਿੱਟੂ ਢੀਗੀਂ...
ਨਹੀਂ ਰਹੇ ਸਾਬਕਾ ਵਿਧਾਇਕ ਕਰਨੈਲ ਸਿੰਘ ਡੋਡ
. . .  about 3 hours ago
ਫ਼ਰੀਦਕੋਟ, 21 ਅਪ੍ਰੈਲ (ਜਸਵੰਤ ਪੁਰਬਾ, ਸਰਬਜੀਤ ਸਿੰਘ)- ਫ਼ਰੀਦਕੋਟ ਦੇ ਸਾਬਕਾ ਵਿਧਾਇਕ ਅਤੇ ਦਸਮੇਸ਼ ਵਿੱਦਿਅਕ ਤੇ ਸਿਹਤ ਸੰਸਥਾਵਾਂ ਦੇ ਬਾਨੀ ਕਰਨੈਲ ਸਿੰਘ ਡੋਡ ਦਾ ਅੱਜ ਉਨ੍ਹਾਂ ਦੇ ਗ੍ਰਹਿ ਚੰਡੀਗੜ੍ਹ ਵਿਖੇ ਦੇਹਾਂਤ ਹੋ ਗਿਆ। ਉਨ੍ਹਾਂ ਦਾ ਅੰਤਿਮ ਸਸਕਾਰ...
ਹੋਰ ਖ਼ਬਰਾਂ..
ਜਲੰਧਰ : ਬੁਧਵਾਰ 19 ਮੱਘਰ ਨਾਨਕਸ਼ਾਹੀ ਸੰਮਤ 545
ਵਿਚਾਰ ਪ੍ਰਵਾਹ: ਭਾਰਤ ਵਾਸੀ ਉੱਠਦੇ ਜਲਦੀ ਹਨ ਪਰ ਜਾਗਦੇ ਦੇਰ ਨਾਲ ਹਨ। -ਨਰਿੰਦਰ ਸਿੰਘ ਕਪੂਰ

ਪਰਵਾਸੀ ਸਮਸਿਆਵਾਂ

5-11-2013

'ਮਾਤ-ਭਾਸ਼ਾ ਨਾਲ ਪਿਆਰ ਜ਼ਰੂਰੀ ਹੈ'
ਮੈਂ ਪੰਜਾਬ 'ਚ ਪੈਦਾ ਹੋਇਆ ਤੇ ਇਥੇ ਹੀ ਪੜ੍ਹਿਆ। ਪਰ ਮੈਂ ਅੱਜ ਜਦੋਂ ਪੰਜਾਬ 'ਚ ਪੰਜਾਬੀ ਤੇ ਅੰਗਰੇਜ਼ੀ ਦੀ ਖਿਚੜੀ ਵੇਖਦਾ ਹਾਂ ਤਾਂ ਬਹੁਤ ਉਦਾਸ ਹੁੰਦਾ ਹਾਂ। ਪੰਜਾਬੀ ਹੁਣ ਪੰਜਾਬੀ ਨਹੀਂ ਰਹੀ ਹੈ ਤੇ ਸਲਾਦ ਬਣ ਗਈ ਹੈ। ਅੱਜ ਦੀ ਪੀੜ੍ਹੀ ਅਸਲੀ ਪੰਜਾਬੀ ਨੂੰ ਹਮੇਸ਼ਾ ਲਈ ਭੁੱਲ ਜਾਵੇਗੀ ਤੇ ਇਸ ਸਭ ਦੇ ਜ਼ਿੰਮੇਵਾਰ ਅਸੀਂ ਹੋਵਾਂਗੇ। ਮੈਨੂੰ ਲੱਗਦਾ ਹੈ ਕਿ ਪੰਜਾਬੀ, ਅੰਗਰੇਜ਼ੀ ਦੇ ਪ੍ਰਭਾਵ ਅਧੀਨ ਹੈ। ਦੂਜੇ ਸ਼ਬਦਾਂ 'ਚ ਅਸੀਂ ਆਪਣੀ ਪਛਾਣ ਵੀ ਗੁਆ ਬੈਠਾਂਗੇ। ਇਸ ਲਈ ਮੇਰੀ ਸਭ ਨੂੰ ਬੇਨਤੀ ਹੈ ਕਿ ਪੰਜਾਬੀ ਭਾਸ਼ਾ ਦਾ ਪ੍ਰਯੋਗ ਕੀਤਾ ਜਾਵੇ। ਦੂਜੀਆਂ ਭਾਸ਼ਾਵਾਂ ਸਿੱਖਣਾ ਚੰਗੀ ਗੱਲ ਹੈ ਪਰ ਆਪਣੀ ਮਾਤ-ਭਾਸ਼ਾ ਨਾਲ ਵੀ ਪਿਆਰ ਜ਼ਰੂਰੀ ਹੈ।

ਚਰਨਜੀਤ ਮੇਹਰ
ਆਸਟ੍ਰੇਲੀਆ।
Email: charanjitmehar@gmail.com

 

29-10-2013

 ਪੰਜਾਬ ਸਰਕਾਰ ਪ੍ਰਵਾਸੀ ਭਾਰਤੀਆਂ ਦੀ ਹੁੰਦੀ ਖੱਜਲ-ਖੁਆਰੀ ਨੂੰ ਰੋਕੇ
ਇਸ ਵਿਚ ਕੋਈ ਸ਼ੱਕ ਨਹੀਂ ਹੈ ਕਿ ਸਰਕਾਰ ਦੀ ਅਫਸਰਸ਼ਾਹੀ ਪ੍ਰਵਾਸੀ ਭਾਰਤੀਆਂ ਦੀਆਂ ਪ੍ਰਾਪਰਟੀਆਂ ਨੂੰ ਨਿਸ਼ਾਨਾ ਬਣਾਉਂਦੀ ਹੈ। ਇਹ ਭ੍ਰਿਸ਼ਟ ਲੋਕ ਪ੍ਰਵਾਸੀ ਭਾਰਤੀਆਂ ਨੂੰ ਝੂਠੇ ਮਾਮਲਿਆਂ 'ਚ ਉਲਝਾਉਂਦੇ ਹਨ ਤਾਂ ਜੋ ਇਨ੍ਹਾਂ ਦੀਆਂ ਜਾਇਦਾਦਾਂ 'ਤੇ ਕਬਜ਼ਾ ਜਮਾਇਆ ਜਾ ਸਕੇ। ਜਦੋਂ ਕੋਈ ਵਿਅਕਤੀ ਐਨ. ਆਰ. ਆਈ. ਬਣ ਜਾਂਦਾ ਹੈ ਤਾਂ ਉਸ ਦੇ ਰਿਸ਼ਤੇਦਾਰ, ਯਾਰ-ਮਿੱਤਰ ਤੇ ਅਧਿਕਾਰੀ ਲੋਕ ਉਸ ਦੀ ਜਾਇਦਾਦ ਨੂੰ ਹੜੱਪਣ ਦੀਆਂ ਤਰਕੀਬਾਂ ਗੰਢਣ ਲਗਦੇ ਹਨ। ਕਿਉਂਕਿ ਉਹ ਜਾਣਦੇ ਹਨ ਕਿ ਇਸ ਨੇ ਹੁਣ ਜਲਦੀ ਕਿਤੇ ਨਹੀਂ ਆਉਣਾ ਅਤੇ ਮੌਜੂਦਾ ਆਨਲਾਈਨ ਸ਼ਿਕਾਇਤ ਦਰਜ ਕਰਾਉਣ ਦਾ ਜੋ ਸਿਸਟਮ ਹੈ, ਉਹ ਬਿਲਕੁਲ ਮਦਦਗਾਰ ਸਾਬਤ ਨਹੀਂ ਹੋ ਰਿਹਾ, ਕਿਉਂਕਿ ਉਸ ਸ਼ਿਕਾਇਤ ਦਾ ਕੋਈ ਸਟੇਟਸ ਨੰਬਰ, ਰਜਿਸਟ੍ਰੇਸ਼ਨ ਨੰਬਰ, ਰਸੀਦ ਤੇ ਕੋਈ ਸ਼ਿਕਾਇਤ ਨੰਬਰ ਵੀ ਨਹੀਂ ਦਿੱਤਾ ਜਾਂਦਾ। ਜੇ ਫਿਰ ਵੀ ਇਥੇ ਕੋਈ ਜਾਂਚ ਹੁੰਦੀ ਹੈ ਤਾਂ ਜਾਂਚ ਬਿਲਕੁਲ ਪੜਤਾਲੀਆ ਅਫਸਰ 'ਤੇ ਨਿਰਭਰ ਹੁੰਦੀ ਹੈ ਅਤੇ ਇਸ ਚੀਜ਼ ਦੀ ਵੀ ਕੋਈ ਗਾਰੰਟੀ ਨਹੀਂ ਹੁੰਦੀ ਕਿ ਪੜਤਾਲੀਆ ਅਫਸਰ ਕਿਸੇ ਸਥਾਨਕ ਆਗੂ ਦੇ ਪ੍ਰਭਾਵ 'ਚ ਨਾ ਆਏ ਅਤੇ ਜਾਂਚ ਦਾ ਕੋਈ ਸਿੱਟਾ ਹੀ ਨਹੀਂ ਨਿਕਲਦਾ। ਇਸ ਤਰ੍ਹਾਂ ਆਨਲਾਈਨ ਸਿਸਟਮ ਨੂੰ ਮਜ਼ਬੂਤ ਅਤੇ ਪਾਰਦਰਸ਼ੀ ਬਣਾਉਣ ਦੀ ਜ਼ਰੂਰਤ ਹੈ। ਇਸ ਲਈ ਸਰਕਾਰ ਅੱਗੇ ਬੇਨਤੀ ਹੈ ਕਿ ਉਹ ਅਜਿਹੇ ਭ੍ਰਿਸ਼ਟ ਅਧਿਕਾਰੀਆਂ ਤੋਂ ਪ੍ਰਵਾਸੀ ਭਾਰਤੀਆਂ ਦੀ ਹੁੰਦੀ ਖੱਜਲ-ਖੁਆਰੀ ਨੂੰ ਰੋਕੇ।

ਤਰਲੋਕ ਸਿੰਘ ਵਿਰਦੀ
Email : virdiusa@gmail.com

ਪੰਜਾਬ ਸਰਕਾਰ ਲੋਕਾਂ ਦੀਆਂ ਬੁਨਿਆਦੀ ਜ਼ਰੂਰਤਾਂ ਦਾ ਖਿਆਲ ਰੱਖੇ
ਇਕ ਅਜਿਹੀ ਖ਼ਬਰ ਪੜ੍ਹ ਕੇ ਬਹੁਤ ਦੁੱਖ ਮਹਿਸੂਸ ਹੋਇਆ ਕਿ ਪੰਜਾਬ ਦੇ ਇਕ ਪਿੰਡ ਮਾਜਰੀ ਦੇ ਟਿਊਬਵੈੱਲ ਦਾ ਬਿਜਲੀ ਕੁਨੈਕਸ਼ਨ ਇਸ ਕਰਕੇ ਕੱਟ ਦਿੱਤਾ ਗਿਆ ਕਿਉਂਕਿ ਉਸ ਦੇ ਬਿਜਲੀ ਦੇ ਬਿੱਲ ਦੀ ਅਦਾਇਗੀ ਨਹੀਂ ਸੀ ਹੋਈ ਪਰ ਸੋਚਣ ਵਾਲੀ ਗੱਲ ਇਹ ਹੈ ਕਿ ਪਾਣੀ ਦੀ ਸਪਲਾਈ ਤਾਂ ਪੰਜਾਬ ਸਰਕਾਰ ਹੀ ਕਰਦੀ ਹੈ ਤੇ ਫਿਰ ਵੀ ਬਿਜਲੀ ਦਾ ਕੁਨੈਕਸ਼ਨ ਕੱਟ ਦਿੱਤਾ ਗਿਆ ਅਤੇ 4 ਪਿੰਡਾਂ ਦੇ ਲੋਕਾਂ ਨੂੰ ਪਾਣੀ ਲਈ ਤਰਸਾਇਆ ਗਿਆ ਜਦਕਿ ਉਨ੍ਹਾਂ ਦਾ ਕੋਈ ਕਸੂਰ ਵੀ ਨਹੀਂ ਸੀ। ਪਾਣੀ ਅਤੇ ਬਿਜਲੀ ਦੀ ਸਪਲਾਈ ਕਰਨੀ ਸਰਕਾਰ ਦੀ ਜ਼ਿੰਮੇਵਾਰੀ ਹੈ ਅਤੇ ਪਾਣੀ ਲੋਕਾਂ ਦੀ ਬੁਨਿਆਦੀ ਜ਼ਰੂਰਤ ਹੈ। ਸਰਕਾਰ ਅਜਿਹੇ ਲੋਕਾਂ ਨਾਲ ਸਖ਼ਤੀ ਨਾਲ ਨਿਪਟੇ ਜੋ ਅਜਿਹੀਆਂ ਹਰਕਤਾਂ ਕਰਕੇ ਲੋਕਾਂ ਨੂੰ ਪ੍ਰੇਸ਼ਾਨ ਕਰਦੇ ਹਨ।

ਪਰਮਪਾਲ ਸਿੰਘ
ਇੰਗਲੈਂਡ
Email : paligandhi@gmail.com

ਅੰਮ੍ਰਿਤਸਰ ਤੋਂ ਸ਼ਾਰਜਾਹ ਦੀ ਫਲਾਈਟ ਦੁਬਾਰਾ ਸ਼ੁਰੂ ਕੀਤੀ ਜਾਵੇ
ਬੇਨਤੀ ਹੈ ਕਿ ਅੰਮ੍ਰਿਤਸਰ ਤੋਂ ਸ਼ਾਰਜਾਹ ਫਲਾਈਟ ਬੰਦ ਹੋਏ ਨੂੰ ਇਕ ਸਾਲ ਦਾ ਅਰਸਾ ਹੋ ਗਿਆ ਹੈ। ਇਸ ਰੂਟ ਦੇ ਯਾਤਰੀਆਂ ਨੂੰ ਬਹੁਤ ਮੁਸ਼ਕਿਲ ਪੇਸ਼ ਆ ਰਹੀ ਹੈ। ਇਸ ਕਰਕੇ ਸਾਡੀ ਸਰਕਾਰਾਂ ਅੱਗੇ ਬੇਨਤੀ ਹੈ ਕਿ ਉਹ ਇਸ ਪਾਸੇ ਵਿਸ਼ੇਸ਼ ਧਿਆਨ ਦੇਣ।

ਸ਼ਹਿਬਾਜ਼ ਸਿੰਘ
ਸ਼ਾਰਜਾਹ
Email : shehbazsandhar@yahoo.com

12-10-2013

ਜ਼ਮੀਨਾਂ ਨੂੰ ਨਿਯਮਬੱਧ ਕਰਾਉਣ ਲਈ ਪੰਜਾਬ ਸਰਕਾਰ ਲੋਕਾਂ ਨੂੰ ਭੰਬਲ-ਭੂਸੇ 'ਚ ਨਾ ਰੱਖੇ
ਪੰਜਾਬ ਸਰਕਾਰ ਜਨਤਾ ਨੂੰ ਭੰਬਲ-ਭੂਸੇ 'ਚ ਰੱਖ ਰਹੀ ਹੈ। ਇਹ ਸਹੀ ਹੈ ਕਿ ਜ਼ਮੀਨਾਂ ਨੂੰ ਨਿਯਮਬੱਧ ਕਰਨ ਲਈ ਆਨਲਾਈਨ ਵਿਵਸਥਾ ਹੈ। ਪਰ ਉਹ ਵੈੱਬਸਾਈਟ ਕਿਹੜੀ ਹੈ, ਜਿਥੇ ਪ੍ਰਵਾਸੀ ਪੰਜਾਬੀ ਵੀਰ ਫਾਰਮ ਭਰਨ ਅਤੇ ਆਨਲਾਈਨ ਫੀਸ ਭਰਨ ਲਈ ਜਾ ਸਕਣ। ਮੈਂ ਪੰਜਾਬ ਸਰਕਾਰ ਅੱਗੇ ਬੇਨਤੀ ਕਰਦਾ ਹਾਂ ਕਿ ਉਹ ਉਸ ਵੈੱਬਸਾਈਟ ਦਾ ਨਾਂਅ ਦੱਸੇ ਜਿਥੇ ਪ੍ਰਵਾਸੀ ਭਾਰਤੀ ਫਾਰਮ ਭਰ ਸਕੇ ਅਤੇ ਕ੍ਰੈਡਿਟ ਕਾਰਡ ਰਾਹੀਂ ਪੈਸੇ ਵੀ ਭਰ ਸਕੇ।

ਗੁਰਬਚਨ ਸਿੰਘ
Email : gurbachansingh538@yahoo.com

2013-10-09

  ਭਾਰਤ 'ਚ ਅਬਾਦੀ ਦੀ ਸਮੱਸਿਆ
ਭਾਰਤ 'ਚ 1952 ਤੋਂ ਹੀ ਪਰਿਵਾਰ ਨਿਯੋਜਨ ਦੀਆਂ ਸਕੀਮਾਂ ਹੋਂਦ ਵਿਚ ਆ ਗਈਆਂ ਸਨ, ਪਰ ਕੋਈ ਵੀ ਸਰਕਾਰ ਇਨ੍ਹਾਂ ਨੂੰ ਇਮਾਨਦਾਰੀ ਨਾਲ ਲਾਗੂ ਨਹੀਂ ਕਰ ਸਕੀ ਜਾਂ ਇੰਝ ਕਹਿ ਲਉ ਕਿ ਕਰਨਾ ਹੀ ਨਹੀਂ ਚਾਹੁੰਦੀ ਸੀ। ਕੇਵਲ ਵੋਟ ਬੈਂਕ ਕਰਕੇ 'ਹਮ ਦੋ ਹਮਾਰੇ ਦੋ' ਵਾਲੀ ਸਕੀਮ ਜੇਕਰ ਸਹੀ ਤਰੀਕੇ ਨਾਲ ਚਲਾਈ ਜਾਂਦੀ ਤਾਂ ਅੱਜ ਅਬਾਦੀ ਕੰਟਰੋਲ 'ਚ ਹੁੰਦੀ। ਆਮ ਜਨਤਾ ਨੂੰ ਇਸ ਬਾਰੇ ਜਾਗਰੂਕ ਕਰਨਾ ਚਾਹੀਦਾ ਹੈ। ਗਰੀਬ ਪਰਿਵਾਰਾਂ ਨੂੰ ਪਰਿਵਾਰ ਨਿਯੋਜਨ ਸਕੀਮਾਂ ਬਾਰੇ ਜਾਣਕਾਰੀ ਦਿੱਤੀ ਜਾਣੀ ਚਾਹੀਦੀ ਹੈ। ਅਬਾਦੀ ਨੂੰ ਕੰਟਰੋਲ ਕਰਕੇ ਹੀ ਦੇਸ਼ ਤਰੱਕੀ ਕਰ ਸਕਦਾ ਹੈ। ਸੋ ਸਾਰਿਆਂ ਤੱਕ ਇਹ ਸੁਨੇਹਾ ਪਹੁੰਚਾਉਣ ਦੀ ਲੋੜ ਹੈ ਕਿ ਛੋਟਾ ਪਰਿਵਾਰ ਸੁਖੀ ਪਰਿਵਾਰ ਹੁੰਦਾ ਹੈ।

ਪਰਮਪਾਲ ਸਿੰਘ
ਇੰਗਲੈਂਡ।
Email: paligandhi@gmail.com

7-10-2013

 ਮਾਲੇਰਕੋਟਲੇ ਘਟਨਾ ਦੇ ਦੋਸ਼ੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਜਾਵੇ
ਪਿਛਲੇ ਦਿਨੀਂ ਪੰਜਾਬ 'ਚ ਇਕ ਦਰਦਨਾਕ ਘਟਨਾ ਵਾਪਰੀ, ਮਾਲੇਰਕੋਟਲਾ ਵਿਖੇ ਇਕ 13-14 ਸਾਲਾਂ ਦੇ ਲੜਕੇ ਨੂੰ ਅੱਗ ਲਗਾ ਦਿੱਤੀ ਗਈ, ਜਿਸ ਕਾਰਨ ਉਸ ਦੀ ਮੌਤ ਹੋ ਗਈ। ਅਜੇ ਤੱਕ ਪੰਜਾਬ ਪੁਲਿਸ ਨੇ ਇਸ ਘਟਨਾ ਨਾਲ ਸਬੰਧਤ ਕਿਸੇ ਵੀ ਦੋਸ਼ੀ ਨੂੰ ਗ੍ਰਿਫ਼ਤਾਰ ਨਹੀਂ ਕੀਤਾ। ਪੰਜਾਬ ਸਰਕਾਰ ਅਤੇ ਪੁਲਿਸ ਪ੍ਰਸ਼ਾਸਨ ਲਈ ਇਹ ਬਹੁਤ ਬੁਰੀ ਗੱਲ ਹੈ।

ਨਰੇਸ਼ ਕੁਮਾਰ ਗੌਤਮ
ਸਕਾਟਲੈਂਡ
Email : nareshkumargautam@ymail.com

ਸਿਆਸਤਦਾਨਾਂ ਨੂੰ ਸਜ਼ਾ ਦੇਣ 'ਚ ਦੇਰੀ ਕਿਉਂ ਹੁੰਦੀ ਹੈ?
ਲਾਲੂ ਪ੍ਰਸਾਦ ਯਾਦਵ ਨੂੰ 17 ਸਾਲ ਬਾਅਦ ਸਜ਼ਾ ਮਿਲੀ ਹੈ ਅਤੇ ਇਕ ਕਾਂਗਰਸ ਦੇ ਹੀ ਸਾਬਕਾ ਮੰਤਰੀ ਨੂੰ 22 ਸਾਲਾਂ ਬਾਅਦ। ਅਦਾਲਤ ਵੱਲੋਂ ਇਨ੍ਹਾਂ 'ਤੇ ਫ਼ੈਸਲਾ ਲੈਣ ਨੂੰ ਏਨਾ ਜ਼ਿਆਦਾ ਸਮਾਂ ਲੱਗ ਗਿਆ ਹੈ ਕਿ ਫਿਰ ਵੀ ਭਾਰਤ ਦੀ ਜਨਤਾ ਖੁਸ਼ ਹੈ। ਕੀ ਇਨ੍ਹਾਂ 'ਤੇ ਫ਼ੈਸਲਾ ਜਲਦੀ ਨਹੀਂ ਸੀ ਆ ਸਕਦਾ? ਅੱਜ ਦੀ ਨੌਜਵਾਨ ਪੀੜ੍ਹੀ ਨੂੰ ਇਹੀ ਨਹੀਂ ਪਤਾ ਹੋਣਾ ਕਿ ਇਨ੍ਹਾਂ ਦੋਵਾਂ ਆਗੂਆਂ ਨੇ ਕਿਸ ਜ਼ਮਾਨੇ ਵਿਚ ਘੁਟਾਲੇ ਕੀਤੇ ਸਨ। ਕਮਾਲ ਦਾ ਹੈ ਭਾਰਤ ਦਾ ਸਿਸਟਮ। ਸੋਚਣ ਵਾਲੀ ਗੱਲ ਹੈ ਕਿ ਸਰਕਾਰ ਦੇ ਮੰਤਰੀਆਂ ਜਾਂ ਸਾਬਕਾ ਮੰਤਰੀਆਂ ਨੂੰ ਘੁਟਾਲਿਆਂ ਕਾਰਨ ਜੋ ਸਜ਼ਾ ਮਿਲਦੀ ਹੈ, ਉਸ 'ਚ ਏਨੀ ਜ਼ਿਆਦਾ ਦੇਰੀ ਕਿਉਂ ਹੁੰਦੀ ਹੈ? ਪਰ 1984 ਦੇ ਸਿੱਖ ਵਿਰੋਧੀ ਦੰਗਿਆਂ ਦੇ ਦੋਸ਼ੀਆਂ ਨੂੰ ਅੱਜ ਤੱਕ ਕੋਈ ਸਜ਼ਾ ਨਹੀਂ ਹੋਈ, ਬੱਸ ਤਰੀਕਾਂ ਹੀ ਪੈਂਦੀਆਂ ਜਾ ਰਹੀਆਂ ਹਨ ਅਤੇ ਸਿਆਸਤਦਾਨਾਂ ਵੱਲੋਂ ਵੋਟਰਾਂ ਨੂੰ ਲੁਭਾਉਣ ਵਾਸਤੇ ਹੀ ਦਾਗ਼ੀ ਕਾਨੂੰਨ ਘਾੜਿਆਂ 'ਤੇ ਆਰਡੀਨੈਂਸ ਵਾਲੀ ਖੇਡ ਖੇਡੀ ਜਾ ਰਹੀ ਹੈ।

ਪਰਮਪਾਲ ਸਿੰਘ
ਇੰਗਲੈਂਡ
Email : paligandhi@gmail.com

ਇਟਲੀ ਦੀ ਮਾੜੀ ਹਾਲਤ
ਇਟਲੀ 'ਚ ਅੱਜਕਲ੍ਹ ਬੜੇ ਮਾੜੇ ਹਾਲਾਤ ਹਨ। 6 ਲੱਖ ਇਟਾਲੀਅਨ ਲੋਕ ਘਰਾਂ 'ਚ ਬੇਰੁਜ਼ਗਾਰ ਬੈਠੇ ਹੋਏ ਹਨ। ਸਰਕਾਰ ਕੰਗਾਲ ਹੋ ਚੁੱਕੀ ਹੈ। ਸਿਹਤ ਸਹੂਲਤਾਂ ਲਈ ਕੋਈ ਪੈਸਾ ਨਹੀਂ ਹੈ। ਸਰਕਾਰ ਦੂਸਰੇ ਦੇਸ਼ਾਂ ਤੋਂ ਲੋਕਾਂ ਨੂੰ ਸੱਦ ਕੇ ਟੈਕਸ ਇਕੱਠਾ ਕਰ ਰਹੀ ਹੈ। ਇਥੇ ਇੰਗਲਿਸ਼ ਨਹੀਂ ਚਲਦੀ। ਮੁੱਖ ਬੋਲੀ ਇਟਾਲੀਅਨ ਹੀ ਹੈ। ਇਟਲੀ 'ਚ ਰੋਜ਼ਗਾਰ ਲੱਭਣਾ ਬਹੁਤ ਔਖਾ ਹੋ ਗਿਆ ਹੈ। ਮੇਰੀ ਪੰਜਾਬੀ ਭਰਾਵਾਂ ਅਤੇ ਭੈਣਾਂ ਨੂੰ ਅਪੀਲ ਹੈ ਕਿ ਇਟਲੀ ਵੱਲ ਪੇਪਰ ਭਰ ਕੇ ਵੀ ਨਾ ਆਉ। ਹੋਰ ਅੰਗਰੇਜ਼ ਦੇਸ਼ਾਂ ਵੱਲ ਧਿਆਨ ਕੇਂਦਰਿਤ ਕਰੋ ਜਾਂ ਫਿਰ ਭਾਰਤ 'ਚ ਹੀ ਮਿਹਨਤ ਕਰਨ 'ਚ ਸਮਝਦਾਰੀ ਹੈ।

ਰਣਦੀਪ ਕੌਰ
ਇਟਲੀ
Email : bhinderpalk@yahoo.com

2-10-2013

 ਸਿੱਧੂ ਦਾ ਮਰਨ ਵਰਤ ਇਕ ਡਰਾਮਾ
ਸਿੱਧੂ ਦਾ ਮਰਨ ਵਰਤ ਕੇਵਲ ਇਕ ਡਰਾਮੇ ਤੋਂ ਵੱਧ ਹੋਰ ਕੁਝ ਨਹੀਂ ਹੈ। ਇਨ੍ਹਾਂ ਲੋਕਾਂ ਨੂੰ ਪਤਾ ਹੈ ਕਿ ਇਨ੍ਹਾਂ ਨੂੰ ਕੋਈ ਮਰਨ ਨਹੀਂ ਦੇਵੇਗਾ। ਇਹ ਲੋਕ ਸ਼ਹੀਦਾਂ ਵਰਗਾ ਜਜ਼ਬਾ ਨਹੀਂ ਰੱਖਦੇ। ਕਮੇਡੀ ਸ਼ੋਅ ਦੇ ਜੱਜ ਬਣ ਕੇ ਇਹ ਦੇਸ਼ ਨੂੰ ਕਿਸੇ ਪਾਸੇ ਨਹੀਂ ਲਾ ਸਕਦੇ। ਇਸ ਲਈ ਜਨਤਾ ਨੂੰ ਇਨ੍ਹਾਂ ਸਿਆਸਤਦਾਨਾਂ ਦੇ ਡਰਾਮਿਆਂ ਨੂੰ ਸਮਝਣ ਦੀ ਲੋੜ ਹੈ।

ਅਮਨ, ਯੂ. ਏ. ਈ.
ਡੁੱਬਈ
Email: shinroxy@yahoo.com

26-9-2013

 ਬਾਬਿਆਂ ਨੂੰ ਆਪਣੀ ਬੋਲ-ਬਾਣੀ 'ਤੇ ਕਾਬੂ ਰੱਖਣਾ ਚਾਹੀਦਾ ਹੈ
ਸਤਿਕਾਰਯੋਗ ਸੰਪਾਦਕ ਜੀ, ਆਪ ਜੀ ਨੇ ਪਾਠਕਾਂ ਦੇ ਵਿਚਾਰ ਸਾਂਝੇ ਕਰਨ ਲਈ ਜੋ ਸੰਪਾਦਕ ਦੇ ਨਾਂਅ ਕਾਲਮ ਸ਼ੁਰੂ ਕੀਤਾ ਹੈ, ਉਹ ਬਹੁਤ ਸ਼ਲਾਘਾਯੋਗ ਕਦਮ ਹੈ। 'ਅਜੀਤ' ਵਿਚ ਖ਼ਬਰ ਲੱਗੀ ਸੀ ਕਿ ਬਾਬਾ ਰਾਮਦੇਵ ਜੀ ਨੂੰ ਇੰਗਲੈਂਡ ਦੇ ਏਅਰਪੋਰਟ 'ਤੇ ਰੋਕ ਕੇ ਪੁੱਛਗਿੱਛ ਕੀਤੀ ਗਈ ਸੀ ਅਤੇ ਬਾਬੇ ਨੇ ਗੁੱਸੇ ਵਿਚ ਆ ਕੇ ਕਿਹਾ ਕਿ ਜਿਹੜੀ ਵਿਦੇਸ਼ੀ ਔਰਤ ਦਿੱਲੀ ਵਿਚ ਬੈਠੀ ਹੈ, ਇਸ ਦੇ ਪਿੱਛੇ ਉਸ ਦਾ ਹੱਥ ਹੈ। ਵਾਹ ਜੀ ਵਾਹ ਨਾਂਅ ਸਵਾਮੀ ਰਾਮਦੇਵ ਅਤੇ ਬੋਲ ਕਿੰਨੇ ਕੌੜੇ ਹਨ। ਪਹਿਲੀ ਗੱਲ ਹੈ ਕਿ ਸੋਨੀਆ ਗਾਂਧੀ ਹੁਣ ਵਿਦੇਸ਼ੀ ਨਹੀਂ ਰਹੀ, ਉਹ ਭਾਰਤ ਦੀ ਨਾਗਰਿਕ ਹੈ। ਬਾਬਾ ਰਾਮਦੇਵ ਇਕ ਪ੍ਰਸਿੱਧ ਯੋਗਾ ਮਾਹਰ ਹਨ ਜਾਂ ਗੁਰੂ ਹਨ ਅਤੇ ਇਨ੍ਹਾਂ ਨੇ ਕਈ ਲੋਕਾਂ ਦੀਆਂ ਬਿਮਾਰੀਆਂ ਯੋਗਾ ਨਾਲ ਠੀਕ ਵੀ ਕੀਤੀਆਂ ਹਨ। ਇਸ ਲਈ ਬਾਬਾ ਜੀ ਨੂੰ ਬੇਨਤੀ ਹੈ ਕਿ ਗੁੱਸੇ ਵਿਚ ਆ ਕੇ ਮਾੜੇ ਬੋਲ ਨਹੀਂ ਬੋਲਣੇ ਚਾਹੀਦੇ। ਸੰਤਾਂ-ਮਹਾਪੁਰਸ਼ਾਂ ਨੂੰ ਗੁੱਸਾ ਕਰਨਾ ਨਹੀਂ ਸੋਭਦਾ।

ਆਤਮਾ ਸਿੰਘ ਬਰਾੜ
ਇੰਗਲੈਂਡ
Email : atmabrar@yahoo.com

ਪਿੰਡ ਦੀ ਸਾਰ ਲਈ ਜਾਵੇ
ਮੈਂ ਕੁਝ ਦਿਨ ਪਹਿਲਾਂ ਜ਼ਿਲ੍ਹਾ ਮੁਹਾਲੀ ਦੇ ਪਿੰਡ ਕੈਲੋਂ ਵਿਖੇ ਸੀ। ਉਸ ਪਿੰਡ ਦੀ ਹਾਲਤ ਬਹੁਤ ਤਰਸਯੋਗ ਬਣੀ ਹੋਈ ਹੈ। ਪੰਚਾਇਤੀ ਚੋਣਾਂ ਦੌਰਾਨ ਕਾਂਗਰਸ ਪਾਰਟੀ ਜਿੱਤਣ ਕਾਰਨ ਉਸ ਪਿੰਡ ਨੂੰ ਕੋਈ ਵੀ ਗ੍ਰਾਂਟ ਜਾਂ ਮੱਦਦ ਨਹੀਂ ਪਹੁੰਚ ਰਹੀ। ਕੋਈ ਵੀ ਪਾਰਟੀ ਪਿੰਡ ਦੇ ਵਿਕਾਸ ਲਈ ਯੋਗਦਾਨ ਨਹੀਂ ਪਾ ਰਹੀ ਹੈ। ਮੇਰੀ ਉੱਪ-ਮੁੱਖ ਮੰਤਰੀ ਸ: ਸੁਖਬੀਰ ਸਿੰਘ ਬਾਦਲ ਨੂੰ ਬੇਨਤੀ ਹੈ ਕਿ ਉਹ ਇਸ ਪਿੰਡ ਦੀ ਪੰਚਾਇਤ ਦੀ ਮਦਦ ਕਰਨ।

ਰਾਜ ਕੁਮਾਰ
ਸਵੀਡਨ
Email : dr-rajkumar@live.com

22-9-2013

 ਰਾਜਨੀਤਕ ਪਾਰਟੀਆਂ ਆਪਣੀ ਆਮਦਨ ਦੇ ਸਾਧਨਾਂ ਤੇ ਖਰਚਿਆਂ ਲਈ ਜਵਾਬਦੇਹ ਹਨ
ਭਾਰਤ ਦੇ ਆਮਦਨ ਟੈਕਸ ਕਾਨੂੰਨ ਅਨੁਸਾਰ ਸਾਰੀਆਂ ਰਾਜਨੀਤਕ ਪਾਰਟੀਆਂ ਆਪਣੀ ਆਮਦਨ ਦੇ ਸਾਧਨਾਂ ਤੇ ਖਰਚਿਆਂ ਲਈ ਜਵਾਬਦੇਹ ਹਨ ਤਾਂ ਕਿ ਭਾਰਤ ਦੇ ਸੂਚਨਾ ਅਧਿਕਾਰ ਕਾਨੂੰਨ ਅਨੁਸਾਰ ਆਮ ਲੋਕਾਂ ਨੂੰ ਵੀ ਇਸ ਬਾਰੇ ਜਾਣਕਾਰੀ ਮਿਲ ਸਕੇ। ਆਮ ਲੋਕਾਂ ਨੂੰ ਇਹ ਸਾਰੀ ਜਾਣਕਾਰੀ ਮਿਲਣ ਨਾਲ ਰਾਜਨੀਤੀ ਵਿਚੋਂ ਭ੍ਰਿਸ਼ਟਾਚਾਰ ਨੂੰ ਘੱਟ ਕੀਤਾ ਜਾ ਸਕਦਾ ਹੈ।

ਜੀ. ਐਸ. ਮਨਕੂ
Email : sgur@ymail.com

19-9-2013

 ਦਿੱਲੀ ਦੇ ਸੇਵਾ-ਮੁਕਤ ਅਫ਼ਸਰ ਨੂੰ ਸਨਮਾਨਿਤ ਕਰਨ ਦੀ ਅਪੀਲ
ਸੇਵਾ-ਮੁਕਤ ਐਡੀਸ਼ਨਲ ਕਮਿਸ਼ਨਰ ਦਿੱਲੀ ਪੁਲਿਸ ਅਫ਼ਸਰ ਸ੍ਰੀ ਐਲ. ਆਰ. ਮੁੰਦਰਾ ਨੇ ਰੋਪੜ 'ਚ ਪੈਂਦੇ ਹਵੇਲੀ ਕਲਾਂ ਵਿਖੇ ਬਜ਼ੁਰਗਾਂ ਲਈ ਬਿਰਧ ਘਰ ਖੋਲ੍ਹਿਆ ਹੈ। ਪੰਜਾਬ ਸਰਕਾਰ ਨੂੰ ਸਨਿਮਰ ਬੇਨਤੀ ਹੈ ਕਿ ਉਨ੍ਹਾਂ ਨੂੰ ਇਸ ਕਾਰਜ ਲਈ ਜ਼ਰੂਰ ਸਨਮਾਨਿਤ ਕੀਤਾ ਜਾਵੇ। ਸ੍ਰੀ ਮੁੰਦਰਾ ਇਹ ਸਲਾਹੁਣਯੋਗ ਕਾਰਜ ਬਿਨਾਂ ਕਿਸੇ ਸਰਕਾਰੀ ਮਦਦ ਤੋਂ ਕਰ ਰਹੇ ਹਨ। ਉਸ ਬਿਰਧ ਘਰ ਵਿਚ ਬੇਘਰ ਲੋਕ ਬਜ਼ੁਰਗ ਅਤੇ ਉਹ ਲੋਕ ਜੋ ਪਰਿਵਾਰਾਂ ਵੱਲੋਂ ਪੀੜਤ ਹਨ, ਉਨ੍ਹਾਂ ਨੂੰ ਮੁਫ਼ਤ ਵਿਚ ਭੋਜਨ ਅਤੇ ਰਿਹਾਇਸ਼ ਦਿੱਤੀ ਜਾਂਦੀ ਹੈ। ਸੋ ਮੇਰੀ ਪੰਜਾਬ ਸਰਕਾਰ ਅਤੇ ਪੰਜਾਬ ਵਾਸੀਆਂ ਨੂੰ ਬੇਨਤੀ ਹੈ ਕਿ ਉਹ ਇਨ੍ਹਾਂ ਪੀੜਤ ਲੋਕਾਂ ਵਾਸਤੇ ਕੁਝ ਕਰਨ ਅਤੇ ਸਰਕਾਰਾਂ ਇਸ ਨਾਲ ਸੰਬੰਧਿਤ ਕੋਈ ਠੋਸ ਕਾਨੂੰਨ ਲੈ ਕੇ ਆਉਣ।

ਨਰੇਸ਼ ਕੁਮਾਰ ਗੌਤਮ
ਸਕਾਟਲੈਂਡ, ਯੂ. ਕੇ.।
ਈਮੇਲ : nareshkumargautam@ymail.com

18-9-2013

ਦਿੱਲੀ ਸਮੂਹਿਕ ਜਬਰ ਜਨਾਹ ਦੇ ਨਾਬਾਲਗ ਦੋਸ਼ੀ ਨੂੰ ਵੀ ਸਖ਼ਤ ਸਜ਼ਾ ਦਿੱਤੀ ਜਾਵੇ

ਅੱਜ ਹਰ ਔਰਤ ਖੁਸ਼ ਹੈ ਕਿ ਦਿੱਲੀ ਸਮੂਹਿਕ ਜਬਰ ਜਨਾਹ ਦੇ ਦੋਸ਼ੀਆਂ ਨੂੰ ਫਾਂਸੀ ਦੀ ਸਜ਼ਾ ਮਿਲਣ 'ਤੇ ਜਿਵੇਂ ਹਰ ਇਕ ਔਰਤ ਨੂੰ ਇਨਸਾਫ ਮਿਲਿਆ ਹੈ। ਅਸੀਂ ਇਸ ਫੈਸਲੇ 'ਤੇ ਬਹੁਤ ਖੁਸ਼ ਹਾਂ। ਸਾਨੂੰ ਆਪਣੀਆਂ ਮਾਵਾਂ, ਭੈਣਾਂ ਅਤੇ ਹਰ ਔਰਤ ਦੀ ਇੱਜ਼ਤ ਕਰਨੀ ਚਾਹੀਦੀ ਹੈ। ਦਿੱਲੀ ਸਮੂਹਿਕ ਜਬਰ ਜਨਾਹ ਦੇ ਨਾਬਾਲਗ ਦੋਸ਼ੀ ਨੂੰ ਵੀ ਫਾਂਸੀ ਦੀ ਸਜ਼ਾ ਦੇਣੀ ਚਾਹੀਦੀ ਹੈ, ਨਹੀਂ ਤਾਂ ਹੋਰ ਨਾਬਾਲਗ ਵੀ ਅਜਿਹਾ ਅਪਰਾਧ ਕਰਕੇ ਨਾਬਾਲਗਾਂ ਪ੍ਰਤੀ ਬਣੇ ਕਾਨੂੰਨਾਂ ਦਾ ਫਾਇਦਾ ਲੈਂਦੇ ਰਹਿਣਗੇ। ਇਸ ਲਈ ਇਸ ਨਾਬਾਲਗ ਦੋਸ਼ੀ ਨੂੰ ਵੀ ਛੱਡਣਾ ਨਹੀਂ ਚਾਹੀਦਾ।

ਰਾਜਵੰਤ
ਅਮਰੀਕਾ,
Raj_sandhu667@hotmail.com

14-9-2013

  ਨਿੱਜੀ ਵਿਦਿਅਕ ਅਦਾਰਿਆਂ 'ਚ ਕਰਮਚਾਰੀਆਂ ਦਾ ਸ਼ੋਸ਼ਣ ਬੰਦ ਕੀਤਾ ਜਾਵੇ।
ਮੈਂ, ਨਿੱਜੀ ਵਿਦਿਅਕ ਅਦਾਰਿਆਂ ਖਾਸ ਕਰਕੇ ਸੀ.ਬੀ.ਐਸ.ਈ. ਮਾਨਤਾ ਪ੍ਰਾਪਤ ਸਕੂਲਾਂ 'ਚ ਕਰਮਚਾਰੀਆਂ ਨਾਲ ਹੁੰਦੇ ਸ਼ੋਸ਼ਣ ਬਾਰੇ ਆਪਣੇ ਵਿਚਾਰ ਸਾਂਝੇ ਕਰਨਾ ਚਾਹੁੰਦਾ ਹਾਂ। ਕੁਝ ਅਜਿਹੇ ਸਕੂਲ ਹਨ ਜੋ ਆਪਣੇ ਕਰਮਚਾਰੀਆਂ ਨੂੰ ਢੁੱਕਵੀਂ ਤਨਖਾਹ ਨਹੀਂ ਦਿੰਦੇ। ਲੁਧਿਆਣੇ ਵਰਗੇ ਸ਼ਹਿਰ 'ਚ ਕੁਝ ਸਕੂਲ ਆਪਣੇ ਕਰਮਚਾਰੀਆਂ ਨੂੰ 15 ਅਗਸਤ ਦੀ ਛੁੱਟੀ ਵੀ ਨਹੀਂ ਮਨਾਉਣ ਦਿੰਦੇ। ਉਹ ਆਪਣੇ ਕਰਮਚਾਰੀਆਂ ਨੂੰ ਕਦੇ ਛੁੱਟੀ ਨਹੀਂ ਦਿੰਦੇ। ਸਰਕਾਰ ਨੂੰ ਚਾਹੀਦਾ ਹੈ ਕਿ ਅਜਿਹੇ ਸਕੂਲਾਂ ਵਿਰੁੱਧ ਸਖ਼ਤ ਤੋਂ ਸਖ਼ਤ ਕਾਰਵਾਈ ਕੀਤੀ ਜਾਵੇ।

ਅਰਸ਼ ਪਾਂਡੇ
ਜਮਾਲਪੁਰ, ਲੁਧਿਆਣਾ
alokp1977@gmail.com

ਕੌਣ ਲਵੇਗਾ ਗਰੀਬਾਂ ਦੀ ਸਾਰ
ਸਭ ਤੋਂ ਮਾੜੀ ਖ਼ਬਰ ਇਹ ਹੈ ਕਿ ਗੁਜਰਾਤ 'ਚ ਸਿੱਖ ਕਿਸਾਨਾਂ ਨੂੰ ਹਾਈਕੋਰਟ ਦੇ ਫੈਸਲੇ ਦੇ ਬਾਵਜੂਦ, ਮੋਦੀ ਵੱਲੋਂ ਉਜਾੜਨ ਦੇ ਯਤਨਾਂ ਦੇ ਬਾਵਜੂਦ, ਪੰਜਾਬ ਦੇ ਮੁੱਖ ਮੰਤਰੀ ਸ : ਬਾਦਲ ਵੱਲੋਂ ਉਨ੍ਹਾਂ ਨਾਲ ਹੱਥ ਮਿਲਾਇਆ ਤੇ ਉਨ੍ਹਾਂ ਨੂੰ ਸ਼ਾਬਾਸ਼ ਦਿੱਤੀ ਗਈ। ਜੇਕਰ ਮੋਦੀ ਪ੍ਰਧਾਨ ਮੰਤਰੀ ਬਣੇ ਤਾਂ ਸਿੱਖਾਂ, ਈਸਾਈਆਂ, ਬੋਧੀਆ, ਜੈਨੀਆਂ ਤੇ ਮੁਸਲਮਾਨਾਂ ਦੀ ਨੀਂਦ ਹਰਾਮ ਹੋਵੇਗੀ। ਆਰ.ਐਸ.ਐਸ. ਤੇ ਇਸ ਨਾਲ ਜੁੜੀਆਂ ਫਿਰਕੂ ਜਥੇਬੰਦੀਆਂ ਹਿੰਦੀ, ਹਿੰਦੂ ਤੇ ਹਿੰਦੁਸਤਾਨ ਦੀ ਹੀ ਬੱਲੇ-ਬੱਲੇ ਹੋਵੇਗੀ। ਇਸ ਤੋਂ ਇਲਾਵਾ ਮੈਂ ਇਹ ਕਹਿਣਾ ਚਾਹੁੰਦਾ ਹਾਂ ਕਿ ਬੱਸਾਂ ਦੇ ਕਿਰਾਏ ਵਧਣੇ, ਦਵਾਈਆਂ ਦੇ ਮੁੱਲ ਵਧਣੇ ਤੇ ਪਿੰਡ-ਪਿੰਡ ਸ਼ਰਾਬ ਦੇ ਠੇਕੇ ਖੁੱਲ੍ਹਣੇ ਗਰੀਬਾਂ ਲਈ ਖਰਾਬ ਹਨ ਤੇ ਇਹ ਘੱਟ ਹੋਣੇ ਚਾਹੀਦੇ ਹਨ।

ਆਤਮਾ ਸਿੰਘ ਬਰਾੜ
ਬਰਕਸ ਇੰਗਲੈਂਡ
atmabrar@yahoo.com

12-9-2013

ਗ੍ਰਿਫ਼ਤਾਰੀ ਦੌਰਾਨ ਅਪਰਾਧੀਆਂ ਦੇ ਚਿਹਰੇ ਢਕੇ ਨਾ ਜਾਣ
ਮੈਂ ਰੋਜ਼ਾਨਾ 'ਅਜੀਤ' ਅਖ਼ਬਾਰ ਪੜ੍ਹਦਾ ਹਾਂ। ਮੈਨੂੰ ਉਸ ਵਕਤ ਬਹੁਤ ਬੁਰਾ ਲਗਦਾ ਹੈ ਜਦੋਂ ਪੁਲਿਸ ਅਪਰਾਧੀਆਂ ਨੂੰ ਗ੍ਰਿਫ਼ਤਾਰ ਕਰਦੀ ਹੈ ਤਾਂ ਉਨ੍ਹਾਂ ਦੇ ਮੂੰਹ ਕੱਪੜਿਆਂ ਨਾਲ ਢਕੇ ਹੁੰਦੇ ਹਨ। ਅਸੀਂ ਉਸ ਦੌਰਾਨ ਪੁਲਿਸ ਅਫ਼ਸਰਾਂ ਜਾਂ ਪੁਲਿਸ ਕਰਮਚਾਰੀਆਂ ਦੇ ਚਿਹਰੇ ਨਹੀਂ ਦੇਖਣਾ ਚਾਹੁੰਦੇ ਬਲਕਿ ਆਮ ਲੋਕ ਤਾਂ ਅਪਰਾਧੀਆਂ ਦੇ ਚਿਹਰੇ ਦੇਖਣਾ ਚਾਹੁੰਦੇ ਹਨ ਤਾਂ ਜੋ ਅਪਰਾਧੀਆਂ ਨੂੰ ਆਸਾਨੀ ਨਾਲ ਜਾਣਿਆ ਪਛਾਣਿਆ ਜਾ ਸਕੇ।

ਗੁਰਦਿਤਾਰ ਸਿੰਘ ਗਿੱਲ
ਕੈਨੇਡਾ।
gurmeetgill19@gmail.com

10-9-2013

 ਕਦੋਂ ਹੋਵੇਗਾ ਪੰਜਾਬ ਨਸ਼ਾ ਮੁਕਤ
ਪੰਜਾਬ ਦਾ ਨਸ਼ਿਆਂ ਨਾਲ ਬੁਰਾ ਹਾਲ ਹੈ। ਇਕ ਪੀੜ੍ਹੀ ਤਾਂ ਤਬਾਹ ਹੋ ਚੁੱਕੀ ਹੈ ਹੁਣ ਕ੍ਰਿਪਾ ਕਰਕੇ ਦੂਜੀ ਪੀੜ੍ਹੀ ਨੂੰ ਤਬਾਹ ਹੋਣ ਤੋਂ ਬਚਾਅ ਲਉ। ਉਮੀਦ ਦੀ ਕਿਰਨ ਤਾਂ ਘੱਟ ਹੀ ਨਜ਼ਰ ਆਉਂਦੀ ਹੈ, ਪਰ ਫਿਰ ਵੀ ਪੰਜਾਬ ਨੂੰ ਨਸ਼ਿਆਂ ਤੋਂ ਮੁਕਤ ਕਰਾਉਣ ਦਾ ਕੋਈ ਯਤਨ ਕਰੋ।

ਪਿੰਦਰ ਸੰਧੂ
ਸਿਡਨੀ, ਆਸਟ੍ਰੇਲੀਆ।
manjitsandhu30@yahoo.com

8-9-2013

 ਜਬਰ-ਜਨਾਹ ਕਰਨ ਵਾਲਿਆਂ ਨੂੰ ਦਿੱਤੀ ਜਾਵੇ ਫਾਂਸੀ
ਅਸੀਂ ਹਰ ਰੋਜ਼ ਭਾਰਤ 'ਚ ਜਬਰ-ਜਨਾਹ ਦੀਆਂ ਖ਼ਬਰਾਂ ਪੜ੍ਹਦੇ ਹਾਂ। ਬੱਚੀਆਂ ਨਾਲ ਬਹੁਤ ਹੀ ਸ਼ਰਮਨਾਕ ਕਾਰਾ ਹੁੰਦਾ ਹੈ। ਕੀ ਇਸ ਤਰ੍ਹਾਂ ਦਾ ਕਾਨੂੰਨ ਨਹੀਂ ਬਣ ਸਕਦਾ ਕਿ ਅਜਿਹਾ ਕਰਨ ਵਾਲਿਆਂ ਨੂੰ ਫਾਂਸੀ ਦਿੱਤੀ ਜਾਵੇ। ਅਰਬ ਦੇਸ਼ਾਂ 'ਚ ਇਹੀ ਕਾਨੂੰਨ ਹੈ, ਇਸ ਲਈ ਉਥੇ ਅਜਿਹੀਆਂ ਸ਼ਰਮਨਾਕ ਖ਼ਬਰਾਂ ਸੁਣਨ ਨੂੰ ਨਹੀਂ ਮਿਲਦੀਆਂ। ਮੈਨੂੰ ਇਸ ਬਾਰੇ ਸੋਚ ਕੇ ਸ਼ਰਮ ਆਉਂਦੀ ਹੈ।

raj_sandhu667@hotmail.com
arlington TX, U.S.A.

4-9-2013

ਕੀ ਆਸਾ ਰਾਮ ਕਾਨੂੰਨ ਤੋਂ ਉੱਪਰ ਹੈ?
ਆਸਾ ਰਾਮ ਨਾਲ ਵਿਸ਼ੇਸ਼ ਸਲੂਕ ਕਿਉਂ ਕੀਤਾ ਜਾ ਰਿਹਾ ਹੈ। ਇਸ ਤਰ੍ਹਾਂ ਪ੍ਰਤੀਤ ਹੋ ਰਿਹਾ ਜਿਵੇਂ ਉਹ ਕਾਨੂੰਨ ਤੋਂ ਉੱਪਰ ਹੋਵੇ। ਸਰਕਾਰ ਵੀ ਉਸ ਨੂੰ ਹੱਥ ਪਾਉਣ ਤੋਂ ਝਿਜਕ ਰਹੀ ਹੈ। ਆਸਾ ਰਾਮ ਜਬਰ ਜਨਾਹ ਦਾ ਦੋਸ਼ੀ ਹੈ। ਉਸ ਨੂੰ ਸਖ਼ਤ ਤੋਂ ਸਖ਼ਤ ਸਜ਼ਾ ਦਿੱਤੀ ਜਾਵੇ।

ਸੁਰਿੰਦਰ
Email : s_saini123@yahoo.com

2013-08-24

ਸਕਾਰਾਤਮਕ ਲੇਖ ਲਿਖਣ ਲਈ ਬੇਨਤੀ
ਮੈਂ ਅਮਰੀਕਾ ਵਿਖੇ ਰਹਿੰਦਾ ਹਾਂ। ਪੰਜਾਬ ਅਤੇ ਹੋਰ ਦੇਸ਼-ਵਿਦੇਸ਼ ਦੀਆਂ ਖ਼ਬਰਾਂ ਦੀ ਜਾਣਕਾਰੀ ਲਈ ਮੈਂ ਸਿਰਫ਼ 'ਅਜੀਤ' 'ਤੇ ਹੀ ਭਰੋਸਾ ਰੱਖਦਾ ਹਾਂ। ਇਸ ਲਈ ਮੈਂ ਕੋਈ ਹੋਰ ਪੰਜਾਬੀ ਅਖ਼ਬਾਰ ਨਹੀਂ ਪੜ੍ਹਦਾ। ਮੇਰੇ ਮਨ 'ਚ ਇਕ ਪ੍ਰਸ਼ਨ ਸੀ ਕਿ ਸੰਪਾਦਕੀ ਪੰਨੇ 'ਚ ਸਵਰਾਜ ਸਿੰਘ ਅਕਸਰ ਲੇਖ ਲਿਖਦੇ ਹਨ। ਸ਼ਾਇਦ ਉਹ ਆਪ ਅਮਰੀਕਾ 'ਚ ਹੀ ਰਹਿੰਦੇ ਹਨ। ਪਰ ਉਨ੍ਹਾਂ ਦਾ ਲੇਖ ਹਮੇਸ਼ਾ ਅਮਰੀਕਾ ਦੇ ਖਿਲਾਫ਼ ਹੀ ਹੁੰਦਾ ਹੈ। ਹੋ ਸਕਦਾ ਹੈ ਕਿ ਉਹ ਕਾਮਰੇਡ ਹੋਣ ਜਾਂ ਕੋਈ ਹੋਰ ਮਸਲਾ ਹੈ। ਇਸ ਲਈ ਉਨ੍ਹਾਂ ਅੱਗੇ ਬੇਨਤੀ ਹੈ ਕਿ ਉਹ ਕੁਝ ਸਕਾਰਾਤਮਕ ਲੇਖ ਲਿਖਣ।

ਪੀ. ਐਸ. ਧਮਰਾਇਤ
ਅਮਰੀਕਾ।
ਈਮੇਲ : Ps.dhamrait@yahoo.com.

 

22-8-2013

ਭਾਰਤ ਦੀ ਕਰੰਸੀ ਨੂੰ ਬਦਲ ਦਿੱਤਾ ਜਾਵੇ
ਜੇ ਭਾਰਤ ਦੀ ਕਰੰਸੀ ਨੂੰ ਬਦਲ ਦਿੱਤਾ ਜਾਵੇ ਤਾਂ ਸਾਰੇ ਲੋਕਾਂ ਕੋਲ ਮੌਜੂਦਾ ਕਰੰਸੀ ਹੈ ਉਸ ਨੂੰ ਲੋਕ ਬਦਲਣ ਲਈ ਬੈਂਕ ਜਾਣਗੇ, ਜਿਸ ਦੇ ਨਾਲ ਨਤੀਜਾ ਇਹ ਨਿਕਲੇਗਾ ਕਿ ਜੋ ਵਿਦੇਸ਼ਾਂ 'ਚ ਪੈਸੇ ਜਮ੍ਹਾਂ ਹਨ ਉਸ ਨੂੰ ਬਦਲਣ ਲਈ ਪੈਸੇ ਬੈਂਕਾਂ ਤੋਂ ਬਾਹਰ ਕਢਵਾਉਣੇ ਪੈਣਗੇ। ਇਸ ਤਰ੍ਹਾਂ ਕਰਨ ਨਾਲ ਸਾਰਾ ਕਾਲਾ ਧਨ ਕਾਨੂੰਨੀ ਹੋ ਜਾਵੇਗਾ। ਕਿਉਂਕਿ ਸਾਰੇ ਜਾਣਦੇ ਹਨ ਭਾਰਤ ਇਕ ਗਰੀਬ ਮੁਲਕ ਨਹੀਂ ਹੈ।

ਨਵਪ੍ਰੀਤ ਸਿੰਘ
ਈਮੇਲ : love_preet143342@yahoo.co.in

15-8-2013

ਭਾਰਤ ਸਰਕਾਰ ਨੂੰ ਫ਼ਿਲਪਾਈਨਜ਼ 'ਚ ਵੱਸਦੇ ਪੰਜਾਬੀਆਂ ਦੀਆਂ ਮੁਸ਼ਕਿਲਾਂ ਵੱਲ ਧਿਆਨ ਦੇਣਾ ਚਾਹੀਦੈ
ਇਕ ਬੇਨਤੀ ਕਰਦਾ ਹਾਂ ਕਿ ਅਸੀਂ ਫਿਲਪਾਈਨਜ਼ 'ਚ ਰਹਿੰਦੇ ਹਾਂ। ਇਥੋਂ ਦੇ ਲੋਕ ਬਿਨਾਂ ਕਿਸੇ ਗੱਲ ਦੇ ਰੋਜ਼ ਪੰਜਾਬੀਆਂ ਨੂੰ ਲੁੱਟਦੇ ਹਨ। ਜੇ ਕੋਈ ਕੁਝ ਨਹੀਂ ਦਿੰਦਾ ਤਾਂ ਉਹ ਉਸ ਨੂੰ ਮਾਰ ਵੀ ਦਿੰਦੇ ਹਨ ਅਤੇ ਲੁੱਟ-ਮਾਰ ਕਰਕੇ ਭੱਜ ਜਾਂਦੇ ਹਨ। ਅਜਿਹੀਆਂ ਖ਼ਬਰਾਂ ਆਮ ਹੀ ਪੰਜਾਬ 'ਚ ਆਉਂਦੀਆਂ ਹਨ ਪਰ ਇਥੋਂ ਦੀ ਸਰਕਾਰ ਅਜਿਹੇ ਲੋਕਾਂ ਦਾ ਹੀ ਸਾਥ ਦੇ ਰਹੀ ਹੈ। ਇਸ ਲਈ ਅਜਿਹੀਆਂ ਘਟਨਾਵਾਂ 'ਚ ਵਾਧਾ ਹੀ ਹੁੰਦਾ ਜਾ ਰਿਹਾ ਹੈ। ਇਸ ਲਈ ਸਾਡੀ ਭਾਰਤ ਸਰਕਾਰ ਤੋਂ ਮੰਗ ਹੈ ਕਿ ਉਹ ਫਿਲਪਾਈਨਜ਼ ਵੱਸਦੇ ਪੰਜਾਬੀਆਂ ਲਈ ਕੁਝ ਕਰਨ ਤਾਂ ਜੋ ਪੰਜਾਬੀ ਇਥੇ ਆਪਣਾ ਕੰਮ-ਕਾਰ ਵਧੀਆ ਚਲਾ ਸਕਣ ਅਤੇ ਅਸੀਂ ਤੁਹਾਨੂੰ ਵੀ ਬੇਨਤੀ ਕਰਦੇ ਹਾਂ ਕਿ ਤੁਸੀਂ ਆਪਣੇ ਅਖ਼ਬਾਰ 'ਚ ਅਜਿਹਾ ਲੇਖ ਛਾਪੋ ਜਿਸ ਨਾਲ ਇਸ ਮੁਸੀਬਤ ਦਾ ਹੱਲ ਲੱਭਿਆ ਜਾ ਸਕੇ।

ਪਰਮਿੰਦਰ ਸਿੰਘ ਮਨੀਲਾ
E-mail: Punjab.ravinder@yahoo.com

14-8-2013

ਆਸਟ੍ਰੇਲੀਆ ਆਉਣ ਤੋਂ ਪਹਿਲਾਂ ਇਕ ਵਾਰ ਜ਼ਰੂਰ ਸੋਚੋ
ਆਸਟ੍ਰੇਲੀਆ ਇਕ ਵਧੀਆ ਦੇਸ਼ ਹੈ। ਇਥੇ ਮਾਹੌਲ ਤੇ ਵਾਤਾਵਰਨ ਵਧੀਆ ਹੈ। ਪਰ ਅੱਜਕਲ੍ਹ ਇਮੀਗਰੇਸ਼ਨ ਰੂਲਜ਼ ਬਹੁਤ ਬਦਲ ਗਏ ਹਨ। ਇਥੋਂ ਦੀ ਸਰਕਾਰ ਸਿਰਫ ਸਕਿਲਡ ਵਰਕਰਜ਼ ਨੂੰ ਹੀ ਤਰਜੀਹ ਦਿੰਦੀ ਹੈ। ਜੇ ਤੁਸੀਂ ਸਟੂਡੈਂਟ ਵੀਜ਼ੇ 'ਤੇ ਆਉਣਾ ਹੈ ਤੇ ਬਾਅਦ 'ਚ ਪੱਕੇ ਹੋਣਾ ਹੈ ਤਾਂ ਦੋ ਚੀਜ਼ਾਂ ਬਹੁਤ ਜ਼ਰੂਰੀ ਹਨ। ਇਕ ਵਧੀਆ ਕੋਰਸ ਜੋ ਪੀ. ਆਰ. ਲਿਸਟ 'ਚ ਹੋਵੇ ਤੇ ਦੂਜੀ ਚੰਗੀ ਅੰਗਰੇਜ਼ੀ, ਤਾਂ ਜੋ ਤੁਸੀਂ ਆਈਲੈਟਸ ਚੰਗੇ ਨੰਬਰਾਂ ਨਾਲ ਪਾਸ ਕਰ ਸਕੋ। ਏਜੰਟ ਦੇ ਪਿੱਛੇ ਲੱਗ ਕੇ ਨਾ ਆਇਓ। ਆਪਣੇ ਤੌਰ 'ਤੇ ਵੀ ਥੋੜ੍ਹੀ ਜਾਂਚ-ਪੜਤਾਲ ਕਰੋ, ਇਥੇ ਆਉਣ ਤੋਂ ਪਹਿਲਾਂ।

ਪਰਮਿੰਦਰ ਸੰਧੂ
ਮੈਲਬੌਰਨ।
Email: parminder57980@gmail.com

 

10-8-2013

 ਭਾਰਤ 'ਤੇ ਕਦੋਂ ਤੱਕ ਹੁੰਦੇ ਰਹਿਣਗੇ ਪਾਕਿਸਤਾਨੀ ਹਮਲੇ
ਮੇਰੀ ਬੇਨਤੀ ਹੈ ਕਿ ਸਾਡੇ ਹਿੰਦੁਸਤਾਨ 'ਚ ਸਾਡੇ ਹਿੰਦੁਸਤਾਨੀ ਫੌਜੀ ਨੌਜਵਾਨਾਂ 'ਤੇ ਪਾਕਿਸਤਾਨ ਕਦੋਂ ਤੱਕ ਜਾਨ ਲੇਵਾ ਹਮਲੇ ਕਰਦਾ ਰਹੇਗਾ। ਪਾਕਿਸਤਾਨ ਇਕ ਚਿੜੀ ਦੇ ਪਰ ਜਿੱਡਾ ਹੈ। ਸਾਡੀ ਭਾਰਤ ਸਰਕਾਰ ਇਨ੍ਹਾਂ ਦੇ ਪਰ ਕੱਟ ਸਕਦੀ ਹੈ, ਤਾਂ ਜੋ ਪਾਕਿਸਤਾਨ ਭਾਰਤ ਦੀ ਹਵਾ ਵੱਲ ਵੀ ਨਾ ਵੇਖ ਸਕੇ। ਭਾਰਤ ਸਰਕਾਰ ਤਾਂ ਥੋੜ੍ਹਾ ਜਿਹਾ ਮੁੱਦਾ ਚੁੱਕ ਕੇ ਆਪਣੇ ਘਰ ਜਾ ਕੇ ਸੌਂ ਜਾਂਦੀ ਹੈ ਪਰ ਜੋ ਮੇਰੇ ਹਿੰਦੁਸਤਾਨੀ ਨੌਜਵਾਨ ਸ਼ਹੀਦ ਹੋ ਜਾਂਦੇ ਹਨ, ਉਨ੍ਹਾਂ ਬਾਰੇ ਕੋਈ ਨਹੀਂ ਸੋਚਦਾ। ਆਖਿਰ ਇਹ ਕਦੋਂ ਤੱਕ ਚੱਲੇਗਾ, ਇਸ ਦਾ ਜਵਾਬ ਕੌਣ ਦੇਵੇਗਾ।

-ਵਰਿੰਦਰ ਸਿੰਘ
ਏਥਨਜ਼ (ਗ੍ਰੀਸ)
Email : varinderh@rocketmail.com

ਪੰਜਾਬ ਨੂੰ ਕੀਤਾ ਜਾਵੇ ਨਸ਼ਾ ਮੁਕਤ
ਮੈਂ ਤੁਹਾਡੀ 'ਅਜੀਤ ਹਰਿਆਵਲ ਲਹਿਰ' ਦੀ ਪ੍ਰਸੰਸਾ ਕਰਦਾ ਹਾਂ। ਪਰ ਜੇਕਰ ਪੰਜਾਬ 'ਚ ਨਸ਼ਾ ਇਸੇ ਤਰ੍ਹਾਂ ਜਾਰੀ ਰਹੇਗਾ ਤਾਂ ਕੋਈ ਵੀ ਇਸ ਹਰਿਆਵਲ ਲਹਿਰ ਨੂੰ ਮਾਨਣ ਲਈ ਨਹੀਂ ਹੋਵੇਗਾ। ਕ੍ਰਿਪਾ ਕਰਕੇ ਪੰਜਾਬ ਨੂੰ ਨਸ਼ਾ ਮੁਕਤ ਕਰਨ ਦੀ ਜ਼ਿੰਮੇਵਾਰੀ ਲਵੋ। ਤੁਸੀਂ ਹੀ ਹੋ ਜੋ ਇਸ ਨੂੰ ਮੁਮਕਿਨ ਕਰ ਸਕਦੇ ਹੋ। ਇਹ ਮਨੁੱਖਤਾ ਦੀ ਵੱਡੀ ਸੇਵਾ ਹੈ। ਹਰਿਆਵਲ ਲਹਿਰ ਵਾਂਗ ਪੰਜਾਬ ਨੂੰ ਨਸ਼ਾ ਮੁਕਤ ਕਰਨ ਲਈ ਅਗਲੀ ਪੀੜ੍ਹੀ ਤੁਹਾਨੂੰ ਯਾਦ ਰੱਖੇਗੀ।
ਤੁਸੀਂ ਇਸ ਲਈ ਇਕ ਹੈਲਪ ਲਾਈਨ ਸ਼ੁਰੂ ਕਰ ਸਕਦੇ ਹੋ। ਜੋ ਵੀ ਕੋਈ ਨਸ਼ੇ ਦਾ ਕਾਰੋਬਾਰ ਕਰਦਾ ਹੈ, ਉਸ ਦੀ ਜਾਣਕਾਰੀ ਤੁਹਾਡੇ ਇਸ ਨੰਬਰ 'ਤੇ ਦਿੱਤੀ ਜਾਵੇ। ਇਸ ਤੋਂ ਬਾਅਦ ਛਾਣਬੀਣ ਕਰਕੇ ਤੁਸੀਂ ਇਹ ਸਾਰਾ ਕੁਝ ਆਪਣੇ ਅਖ਼ਬਾਰ 'ਚ ਛਾਪ ਸਕਦੇ ਹੋ। ਇਸ ਨੂੰ ਸ਼ੁਰੂ ਕਰਨ ਲਈ ਤੁਹਾਡੀ ਸਹਾਇਤਾ ਦੀ ਲੋੜ ਹੈ। ਸਮਾਜ ਦੇ ਆਗੂ ਹੋਣ ਦੇ ਨਾਤੇ ਕ੍ਰਿਪਾ ਕਰਕੇ ਕੁਝ ਕਰੋ।

-ਪਰਮਜੀਤ ਸਿੰਘ
ਮੋਹਕਮਪੁਰਾ, ਅੰਮ੍ਰਿਤਸਰ
Email : paramjitsinghkamboj@gmail.com

8-8-2013

 ਰਾਜ ਸਭਾ 'ਚ ਸਚਿਨ
ਟੈਲੀਵਿਜ਼ਨ 'ਤੇ ਇਹ ਖ਼ਬਰ ਵਾਰ-ਵਾਰ ਦਿਖਾਈ ਗਈ ਕਿ ਸਚਿਨ ਤੇਂਦੁਲਕਰ ਰਾਜ ਸਭਾ ਵਿਚ ਪਹਿਲੀ ਵਾਰ ਹਾਜ਼ਰ ਹੋਏ ਅਤੇ ਉਸ ਨੇ ਪ੍ਰਧਾਨ ਮੰਤਰੀ ਨਾਲ ਗੱਲਬਾਤ ਵੀ ਕੀਤੀ। ਮੈਂ ਸਮਝਦਾ ਹਾਂ ਕਿ ਇਹ ਠੀਕ ਹੈ ਕਿ ਸਚਿਨ ਇਕ ਚੰਗਾ ਖਿਡਾਰੀ ਹੈ ਪਰ ਇਹ ਸਿਆਸਤ ਦੀ ਦੁਨੀਆ ਹੈ। ਜਿਨ੍ਹਾਂ ਵੱਲੋਂ ਉਸ ਨੂੰ ਰਾਜ ਸਭਾ ਦਾ ਮੈਂਬਰ ਨਾਮਜ਼ਦ ਕੀਤਾ ਗਿਆ, ਉਹ ਉਸ ਦੀ ਵਰਤੋਂ ਕਰਨ ਦੀ ਵੀ ਕੋਸ਼ਿਸ਼ ਕਰਨਗੇ। ਇਹ ਨਾ ਹੋਵੇ ਕਿ ਸਿਆਸਤਦਾਨਾਂ ਦੇ ਹੱਥਾਂ ਦੀ ਕਠਪੁਤਲੀ ਬਣ ਕੇ ਰਹਿ ਜਾਵੇ।

-ਪਰਮਪਾਲ ਸਿੰਘ
ਬਰਤਾਨੀਆ
paligandhi@gmail.com

ਪਾਰਟੀ ਬਦਲਣ ਵਾਲੇ
ਕਾਂਗਰਸ ਅਤੇ ਦੂਜੀਆਂ ਪਾਰਟੀਆਂ ਵਿਚਲੇ ਕਈ ਆਗੂ ਸ਼ਾਇਦ ਅਕਾਲੀਆਂ ਦੇ ਡਰ ਕਰਕੇ ਹੀ ਅਕਾਲੀ ਦਲ ਵਿਚ ਸ਼ਾਮਿਲ ਹੋ ਗਏ ਹਨ। ਅਜਿਹੇ ਲੋਕਾਂ ਬਾਰੇ ਵੀ ਸੁਣਨ ਨੂੰ ਮਿਲਦਾ ਹੈ ਜੋ ਕੋਰੇ ਮੌਕਾਪ੍ਰਸਤ ਹਨ ਅਤੇ ਕਿਸੇ ਠੋਸ ਨਿੱਜੀ ਸ਼ਖ਼ਸੀਅਤ ਦੇ ਮਾਲਕ ਨਾ ਹੋਣ ਕਰਕੇ ਨਿੱਜੀ ਸੁਆਰਥਾਂ ਲਈ ਆਪਣੀਆਂ ਪਾਰਟੀਆਂ ਛੱਡ ਕੇ ਅਕਾਲੀ ਦਲ ਵਿਚ ਸ਼ਾਮਿਲ ਹੋ ਗਏ ਹਨ।

-ਹਰਦੇਵ ਸਿੰਘ
ਉਂਟਾਰੀਓ (ਕੈਨੇਡਾ)
maghroo53@gmail.com

30-7-2013

ਬੇਨਤੀ
ਮੈਂ ਹਰ ਰੋਜ਼ 'ਅਜੀਤ' ਅਖ਼ਬਾਰ ਇੰਟਰਨੈੱਟ 'ਤੇ ਪੜ੍ਹਦਾ ਹਾਂ। ਇਸ ਵਿਚ ਚੰਗੀ ਜਾਣਕਾਰੀ ਹੁੰਦੀ ਹੈ। ਮੈਂ ਇਸ ਚਿੱਠੀ ਰਾਹੀਂ ਉਨ੍ਹਾਂ ਵੀਰਾਂ ਨੂੰ ਬੇਨਤੀ ਕਰਨਾ ਚਾਹੁੰਦਾ ਹਾਂ, ਜੋ ਯੂ-ਟਿਊਬ 'ਤੇ ਜਾਤ-ਪਾਤ ਨੂੰ ਉਤਸ਼ਾਹਿਤ ਕਰਨ ਵਾਲੀਆਂ ਟਿੱਪਣੀਆਂ ਫੈਲਾਅ ਰਹੇ ਹਨ। ਸਾਨੂੰ ਸਭ ਨੂੰ ਅਜਿਹੀਆਂ ਹਰਕਤਾਂ ਤੋਂ ਗੁਰੇਜ਼ ਕਰਨਾ ਚਾਹੀਦਾ ਹੈ।

-ਵਰਿੰਦਰ ਸਿੰਘ ਹੀਰ
ਗ੍ਰੀਸ
varinderh@rocketmail.com

ਲੀਡਰਾਂ ਦੇ ਬਿਆਨ
ਲੀਡਰਾਂ ਦੇ ਉਨ੍ਹਾਂ ਬਿਆਨਾਂ ਨੇ ਇਹ ਚਿੱਠੀ ਲਿਖਣ ਲਈ ਮਜਬੂਰ ਕਰ ਦਿੱਤਾ ਹੈ, ਜਿਨ੍ਹਾਂ ਵਿਚ 5 ਰੁਪਏ ਜਾਂ ਇਕ ਰੁਪਏ ਵਿਚ ਪੇਟ ਭਰਨ ਦੀਆਂ ਗੱਲਾਂ ਕਰਕੇ ਗਰੀਬਾਂ ਦਾ ਮਜ਼ਾਕ ਉਡਾਇਆ ਜਾ ਰਿਹਾ ਹੈ। ਯੋਜਨਾ ਕਮਿਸ਼ਨ ਦੇ 28 ਰੁਪਏ ਵਿਚ ਗੁਜ਼ਾਰਾ ਹੋਣ ਦੇ ਦਾਅਵੇ ਵੀ ਅਸਲੀਅਤ ਤੋਂ ਦੂਰ ਹਨ। ਗਰੀਬੀ ਨੂੰ ਖ਼ਤਮ ਕਰਨ ਦੇ ਦਾਅਵੇ ਪਿਛਲੇ ਕਈ ਦਹਾਕਿਆਂ ਤੋਂ ਕੀਤੇ ਜਾ ਰਹੇ ਹਨ ਪਰ ਗਰੀਬੀ ਵਿਚ ਵਾਧਾ ਹੋ ਰਿਹਾ ਹੈ। 'ਅਜੀਤ' ਵਿਚ ਕਿਰਨ ਬੇਦੀ ਵੱਲੋਂ ਤੇਜ਼ਾਬ ਕਾਰਨ ਵਾਪਰਦੀਆਂ ਘਟਨਾਵਾਂ ਬਾਰੇ ਲੇਖ ਪੜ੍ਹਿਆ। ਤੇਜ਼ਾਬ ਦੀ ਦੁਰਵਰਤੋਂ ਨੂੰ ਰੋਕਣ ਲਈ ਸਖ਼ਤ ਕਾਨੂੰਨ ਬਣਾਏ ਜਾਣੇ ਚਾਹੀਦੇ ਹਨ। ਤੇਜ਼ਾਬ ਦੀ ਪ੍ਰਚੂਨ ਵਿਕਰੀ 'ਤੇ ਪਾਬੰਦੀ ਲੱਗਣੀ ਚਾਹੀਦੀ ਹੈ। ਇਸ ਦੀ ਸਨਅਤੀ ਵਰਤੋਂ ਲਈ ਲਾਇਸੈਂਸ ਹੋਣਾ ਚਾਹੀਦਾ ਹੈ।

-ਪਰਮਪਾਲ ਸਿੰਘ
ਬਰਤਾਨੀਆ
paligandhi@gmail.com

13-7-2013

ਚੋਣਾਂ ਕਾਰਨ ਖੋਰਾ
ਪੰਚਾਇਤ ਚੋਣਾਂ ਸਬੰਧੀ ਡੀ. ਆਰ. ਧਵਨ ਦਾ ਲੇਖ ਪੜ੍ਹਿਆ ਕਿ ਕਿਵੇਂ ਸਾਡੇ ਸੱਭਿਆਚਾਰ ਨੂੰ ਇਨ੍ਹਾਂ ਚੋਣਾਂ ਨੇ ਖੋਰਾ ਲਾਇਆ ਹੈ। ਸਾਡੀ ਸਭ ਦੀ ਨੈਤਿਕ ਜ਼ਿੰਮੇਵਾਰੀ ਹੈ ਕਿ ਪੰਜਾਬੀਅਤ ਦੀ ਰਾਖੀ ਕਰੀਏ। ਪੰਜਾਬ ਅਤੇ ਬੰਗਾਲ ਹੀ ਦੋ ਅਜਿਹੇ ਸੂਬੇ ਹਨ ਕਿ ਜੇ ਇਥੇ ਗਿਰਾਵਟ ਆ ਗਈ ਤਾਂ ਭਾਰਤ ਵਿਚ ਗਿਰਾਵਟ ਆਉਂਦਿਆਂ ਵੀ ਦੇਰ ਨਹੀਂ ਲੱਗੇਗੀ।

-ਖੁਰਾਣਾ
ਕੈਲੀਫੋਰਨੀਆ (ਅਮਰੀਕਾ)
gullu45@yahoo.com

ਰਾਹਤ ਪ੍ਰਬੰਧਾਂ ਦੀ ਗੱਲ
'ਅਜੀਤ' ਦੇ ਸੰਪਾਦਕੀ ਸਫ਼ੇ 'ਤੇ ਦਰਬਾਰਾ ਸਿੰਘ ਵੱਲੋਂ ਭਾਰਤ ਦੇ ਆਫ਼ਤ ਰਾਹਤ ਪ੍ਰਬੰਧ ਬਾਰੇ ਲਿਖੇ ਲੇਖ ਤੋਂ ਪਤਾ ਲੱਗਾ ਕਿ ਭਾਰਤ ਵਿਚ ਇਹ ਪ੍ਰਬੰਧ ਸਹੀ ਤਰ੍ਹਾਂ ਸਥਾਪਿਤ ਹੀ ਨਹੀਂ ਹੋ ਰਿਹਾ। ਇਸ ਨੂੰ ਲਾਗੂ ਕਰਨਾ ਤਾਂ ਦੂਰ ਦੀ ਗੱਲ ਹੈ। ਉਤਰਾਖੰਡ ਤ੍ਰਾਸਦੀ ਵੇਲੇ ਸਾਡੇ ਅਧਿਕਾਰੀਆਂ ਨੂੰ ਇਹ ਸਮਝ ਨਹੀਂ ਸੀ ਆ ਰਹੀ ਕਿ ਲੋਕਾਂ ਨੂੰ ਪ੍ਰਭਾਵਿਤ ਖੇਤਰਾਂ 'ਚੋਂ ਕਿਵੇਂ ਕੱਢਣਾ ਹੈ। ਇਸ ਸਬੰਧੀ ਨਿਰੰਤਰ ਪੇਸ਼ਕਦਮੀਆਂ ਕੀਤੀਆਂ ਜਾਂਦੀਆਂ ਰਹਿਣੀਆਂ ਚਾਹੀਦੀਆਂ ਹਨ।

-ਨਵਰੂਜ
ਮੈਲਬੌਰਨ (ਆਸਟਰੇਲੀਆ)
navrooz@navrooz.com

21-6-2013

 ਆਵਾਜਾਈ ਬਾਰੇ ਲੇਖ
18 ਜੂਨ ਦੇ ਅੰਕ ਵਿਚ ਆਵਾਜਾਈ ਬਾਰੇ ਛਪਿਆ ਲੇਖ ਬੜਾ ਪ੍ਰਭਾਵਸ਼ਾਲੀ ਸੀ। ਸਰਕਾਰ ਨੂੰ ਡਰਾਈਵਿੰਗ ਲਾਇਸੰਸ ਕਰਨ ਦੇ ਨਿਯਮ ਸੋਧਣ ਦੀ ਲੋੜ ਹੈ। ਇਸ ਨਾਲ ਅਨੇਕਾਂ ਜਾਨਾਂ ਬਚਾਈਆਂ ਜਾ ਸਕਦੀਆਂ ਹਨ।

-ਗੁਰਦੀਪ ਸਿੰਘ
ਕੈਲੀਫੋਰਨੀਆ (ਅਮਰੀਕਾ)
deol.gurdeep@gmail.com

ਸ਼ਰਧਾਂਜਲੀ
ਮੈਂ ਕਾਮਰੇਡ ਸਤਪਾਲ ਡਾਂਗ ਨੂੰ ਸ਼ਰਧਾ ਦੇ ਫੁੱਲ ਭੇਟ ਕਰਦਾ ਹਾਂ। ਉਹ ਇਕ ਪ੍ਰਤੀਬੱਧ ਕਮਿਊਨਿਸਟ ਸਨ। ਮੈਂ ਇਕ ਵਾਰ ਉਨ੍ਹਾਂ ਨੂੰ ਅਤੇ ਉਨ੍ਹਾਂ ਦੀ ਪਤਨੀ ਵਿਮਲਾ ਡਾਂਗ ਨੂੰ ਛੇਹਰਟਾ ਵਿਚ ਮਿਲਿਆ ਸਾਂ। ਉਹ ਦੋਵੇਂ ਬੇਹੱਦ ਇਮਾਨਦਾਰ ਆਗੂ ਸਨ। ਅਸੀਂ ਸਾਰੇ ਕਾਮਰੇਡ ਡਾਂਗ ਨੂੰ ਯਾਦ ਕਰਦੇ ਰਹਾਂਗੇ।

-ਅਮਰਜੀਤ ਸਿੰਘ ਗੁਰਾਇਆ
ਗ੍ਰਿਫਥ (ਆਸਟਰੇਲੀਆ)
amarjitsingh41@yahoo.com.au

19-6-2013

 ਅਮੀਰ ਸੂਬਾ ਪੰਜਾਬ

ਪੰਜਾਬ ਇਕ ਅਮੀਰ ਸੂਬਾ ਹੈ, ਜਿਸ 'ਤੇ ਕੁਦਰਤ ਦੀਆਂ ਵੱਡੀਆਂ ਨਿਹਮਤਾਂ ਹਨ। ਮੈਂ ਪੰਜਾਬ ਦੀ ਧੀ ਹੋਣ ਦੇ ਨਾਤੇ ਸਰਕਾਰ ਨੂੰ ਅਪੀਲ ਕਰਨਾ ਚਾਹੁੰਦੀ ਹਾਂ ਕਿ ਉਹ ਹਰ ਪੱਖੋਂ ਇਸ ਦੀ ਬਿਹਤਰੀ ਲਈ ਨੀਤੀਆਂ ਬਣਾ ਕੇ ਉਨ੍ਹਾਂ 'ਤੇ ਅਮਲ ਕਰੇ। ਮੈਨੂੰ ਉਮੀਦ ਹੈ ਕਿ ਸਾਰੇ ਪੰਜਾਬੀਆਂ ਨੂੰ ਉਨ੍ਹਾਂ ਦੇ ਬਣਦੇ ਹੱਕ ਮਿਲਦੇ ਰਹਿਣਗੇ।

-ਗੁਰਦੀਪ ਕੌਰ
ਕੈਲੀਫੋਰਨੀਆ, ਅਮਰੀਕਾ
roopmahilpur@rediffmail.com

ਸੜਕ ਹਾਦਸੇ ਰੋਕਣ ਲਈ

ਮੈਂ ਭਾਰਤ ਦੇ ਆਵਾਜਾਈ ਪ੍ਰਬੰਧ ਸਬੰਧੀ ਕੁਝ ਸੁਝਾਅ ਦੇਣਾ ਚਾਹੁੰਦਾ ਹਾਂ। ਭਾਰਤ ਦੀਆਂ ਸੜਕਾਂ 'ਤੇ ਤਕਰੀਬਨ ਹਰ ਮਿੰਟ ਬਾਅਦ ਕੋਈ ਨਾ ਕੋਈ ਹਾਦਸਾ ਵਾਪਰਦਾ ਹੈ। ਅਸੀਂ ਸਾਰੇ ਜਾਣਦੇ ਹਾਂ ਕਿ ਡਰਾਈਵਿੰਗ ਲਾਇਸੰਸ ਜਾਰੀ ਕਰਨ ਸਮੇਂ ਵਾਹਨ ਚਲਾਉਣ ਦਾ ਟੈਸਟ ਲੈਣ ਦਾ ਕੋਈ ਢੁਕਵਾਂ ਤੇ ਸਖ਼ਤ ਪ੍ਰਬੰਧ ਨਹੀਂ ਹੈ। ਨਾ ਹੀ ਟ੍ਰੈਫਿਕ ਨਿਯਮਾਂ ਬਾਰੇ ਕੋਈ ਢੁਕਵੀਂ ਸਿੱਖਿਆ ਦਿੱਤੀ ਜਾਂਦੀ ਹੈ। ਜੇ ਆਵਾਜਾਈ ਵਿਭਾਗ 5-10 ਸਫ਼ਿਆਂ ਦਾ ਛੋਟਾ ਜਿਹਾ ਕਿਤਾਬਚਾ ਛਪਵਾਏ, ਜਿਸ ਵਿਚ ਆਵਾਜਾਈ ਅਤੇ ਸੜਕੀ ਨਿਯਮਾਂ, ਜ਼ਿੰਮੇਵਾਰੀਆਂ, ਸੰਕੇਤਾਂ ਅਤੇ ਵਾਹਨ ਚਲਾਉਣ ਸਬੰਧੀ ਹੋਰ ਸਾਵਧਾਨੀਆਂ ਦੀ ਜਾਣਕਾਰੀ ਹੋਵੇ ਤਾਂ ਇਹ ਸੜਕ ਹਾਦਸਿਆਂ ਨੂੰ ਰੋਕਣ ਲਈ ਮਦਦਗਾਰ ਹੋ ਸਕਦਾ ਹੈ। ਇਸ ਦੀ ਕੀਮਤ ਏਨੀ ਘੱਟ ਹੋਵੇ ਕਿ ਹਰ ਕੋਈ ਇਸ ਨੂੰ ਖਰੀਦ ਸਕੇ। ਹਰੇਕ ਵਾਹਨ ਚਾਲਕ ਲਈ ਇਹ ਕਿਤਾਬਚਾ ਰੱਖਣਾ ਜ਼ਰੂਰੀ ਹੋਵੇ। ਅਜਿਹਾ ਪ੍ਰਬੰਧ ਹੋਵੇ ਕਿ ਟ੍ਰੈਫਿਕ ਅਧਿਕਾਰੀ ਜਾਂ ਪੁਲਿਸ ਕਿਸੇ ਵੀ ਵਾਹਨ ਚਾਲਕ ਨੂੰ ਰੋਕ ਕੇ ਇਸ ਕਿਤਾਬਚੇ ਤੋਂ ਸਵਾਲ ਪੁੱਛ ਸਕੇ। ਇਸ ਇਕੱਲੇ ਪ੍ਰਬੰਧ ਨਾਲ ਹੀ ਸੜਕ ਹਾਦਸਿਆਂ ਨੂੰ ਕਾਫੀ ਠੱਲ੍ਹ ਪਾਈ ਜਾ ਸਕੇਗੀ।

-ਅਮਰਿੰਦਰ
ਮੈਲਬੌਰਨ (ਆਸਟਰੇਲੀਆ)
panditkhosa@hotmail.com

ਉਡਾਣਾਂ ਸ਼ੁਰੂ ਕੀਤੀਆਂ ਜਾਣ

ਸਾਡੇ ਵੱਲੋਂ ਸਰਕਾਰ ਨੂੰ ਬੇਨਤੀ ਹੈ ਕਿ ਅੰਮ੍ਰਿਤਸਰ ਦੇ ਸ੍ਰੀ ਰਾਮਦਾਸ ਹਵਾਈ ਅੱਡੇ ਤੋਂ ਜੋ ਉਡਾਣਾਂ ਬੰਦ ਕੀਤੀਆਂ ਗਈਆਂ ਸਨ, ਉਨ੍ਹਾਂ ਨੂੰ ਸ਼ੁਰੂ ਕੀਤਾ ਜਾਵੇ। ਸਿੰਗਾਪੁਰ ਤੋਂ ਅੰਮ੍ਰਿਤਸਰ ਅਤੇ ਮਨੀਲਾ ਤੋਂ ਅੰਮ੍ਰਿਤਸਰ ਦੀਆਂ ਕੌਮਾਂਤਰੀ ਹਵਾਈ ਉਡਾਣਾਂ ਸ਼ੁਰੂ ਕੀਤੀਆਂ ਜਾਣੀਆਂ ਚਾਹੀਦੀਆਂ ਹਨ। ਇਹ ਲੱਖਾਂ ਪੰਜਾਬੀਆਂ ਨਾਲ ਜੁੜੀ ਮੰਗ ਹੈ।

-ਰਾਜਾ
ਡੈਲਾਕਰੂਜ਼ (ਫਿਲੀਪੀਨਜ਼)
karamjitsingh50@yahoo.com

ਯੂਨੀਵਰਸਿਟੀ ਧਿਆਨ ਦੇਵੇ

ਮੇਰੀ ਬੇਟੀ ਨੇ ਇਸ ਸਾਲ 12ਵੀਂ ਤੱਕ ਦੀ ਪੜ੍ਹਾਈ ਮੁਕੰਮਲ ਕਰ ਲਈ ਹੈ। ਉਹ ਪੰਜਾਬ ਤੋਂ ਐਮ.ਬੀ.ਬੀ.ਐਸ. ਕਰਨਾ ਚਾਹੁੰਦੀ ਹੈ। ਅਸੀਂ ਪਿਛਲੇ 10 ਮਹੀਨੇ ਤੋਂ ਬਾਬਾ ਫ਼ਰੀਦ ਯੂਨੀਵਰਸਿਟੀ ਦੀ ਵੈੱਬਸਾਈਟ ਨਾਲ ਜੁੜੇ ਰਹੇ ਹਾਂ। ਭਾਰਤ ਵਿਚਲੇ ਮੇਰੇ ਮਾਤਾ-ਪਿਤਾ ਵੀ ਉਦੋਂ ਤੋਂ ਹੀ ਯੂਨੀਵਰਸਿਟੀ ਦੇ ਸੰਪਰਕ ਵਿਚ ਹਨ ਅਤੇ ਕਈ ਵਾਰੀ ਯੂਨੀਵਰਸਿਟੀ ਦਾਖਲੇ ਦਾ ਪਤਾ ਕਰਨ ਲਈ ਜਾ ਵੀ ਚੁੱਕੇ ਹਨ। ਯੂਨੀਵਰਸਿਟੀ ਵੱਲੋਂ ਐਨ.ਆਰ.ਆਈ. ਵਿਦਿਆਰਥੀਆਂ ਦੇ ਦਾਖ਼ਲੇ ਲਈ ਐਂਟਰੈਂਸ ਟੈਸਟ ਦਾ ਕੋਈ ਇਸ਼ਤਿਹਾਰ ਨਹੀਂ ਦਿੱਤਾ ਗਿਆ। ਸਨਿਚਰਵਾਰ ਨੂੰ ਜਦੋਂ ਐਨ.ਆਰ.ਆਈ. ਵਿਦਿਆਰਥੀਆਂ ਦੇ ਦਾਖਲੇ ਲਈ ਸੂਚਨਾ ਜਾਰੀ ਕੀਤੀ ਗਈ ਤਾਂ ਐਨ.ਈ.ਈ.ਟੀ. ਦੇ ਅੰਕ ਅਤੇ ਐਡਮਿਟ ਕਾਰਡ ਦਾ ਨੰਬਰ ਦੇਣ ਲਈ ਕਿਹਾ ਗਿਆ। ਇਹ ਬਿਲਕੁਲ ਗ਼ਲਤ ਗੱਲ ਹੈ ਕਿਉਂਕਿ ਪਹਿਲਾਂ ਐਨ.ਆਰ.ਆਈ. ਵਿਦਿਆਰਥੀਆਂ ਨੂੰ ਐਨ.ਈ.ਈ.ਟੀ. ਵਿਚ ਬੈਠਣ ਲਈ ਕਿਹਾ ਹੀ ਨਹੀਂ ਗਿਆ।

-ਜੈਕੀਰਤ ਸਿੰਘ
ਮੈਲਬੌਰਨ (ਆਸਟਰੇਲੀਆ)
jaikirat@hotmail.com

28-5-2013

ਚੋਣਾਂ ਬਾਰੇ ਸੁਝਾਅ
ਮੈਂ ਕਹਿਣਾ ਚਾਹੁੰਦਾ ਹਾਂ ਕਿ ਸਿਰਫ ਪੰਚਾਇਤਾਂ ਦੀਆਂ ਚੋਣਾਂ ਹੀ ਹੋਣੀਆਂ ਚਾਹੀਦੀਆਂ ਹਨ। ਅੱਗੋਂ ਪੰਚਾਇਤ ਮੈਂਬਰ ਜ਼ਿਲ੍ਹਾ ਪ੍ਰੀਸ਼ਦ ਅਤੇ ਬਲਾਕ ਸੰਮਤੀ ਦੇ ਮੈਂਬਰਾਂ ਦੀ ਚੋਣ ਕਰਨ, ਜਿਵੇਂ ਕਿ ਪਹਿਲਾਂ ਹੁੰਦਾ ਸੀ। ਜ਼ਿਲ੍ਹਾ ਪ੍ਰੀਸ਼ਦ ਅਤੇ ਬਲਾਕ ਸੰਮਤੀ ਦੀਆਂ ਸਿੱਧੀਆਂ ਚੋਣਾਂ ਕਰਾਉਣੀਆਂ ਜਨਤਕ ਧਨ ਦੀ ਬਰਬਾਦੀ ਹੈ। ਇਸ ਨਾਲ ਪਿੰਡਾਂ ਵਿਚ ਦੁਸ਼ਮਣੀਆਂ ਹੀ ਪੈਦਾ ਹੁੰਦੀਆਂ ਹਨ।

-ਦਰਸ਼ਨ ਸਿੰਘ ਧਾਲੀਵਾਲ
ਕੈਲਗਰੀ (ਕੈਨੇਡਾ)
darshan1840@gmail.com

ਕ੍ਰਿਕਟ 'ਚ ਸੱਟੇਬਾਜ਼ੀ
'ਅਜੀਤ ਹਰਿਆਵਲ ਲਹਿਰ' ਬਾਰੇ ਪੜ੍ਹਿਆ। ਇਸ ਉੱਦਮ ਲਈ ਤੁਸੀਂ ਵਧਾਈ ਦੇ ਪਾਤਰ ਹੋ। ਕ੍ਰਿਕਟ ਵਿਚ ਸੱਟੇਬਾਜ਼ੀ ਦੀਆਂ ਖ਼ਬਰਾਂ ਕਈ ਦਿਨਾਂ ਤੋਂ ਆ ਰਹੀਆਂ ਹਨ। ਭਾਰਤ ਵਿਚ ਸੱਟੇਬਾਜ਼ੀ ਗ਼ੈਰ-ਕਾਨੂੰਨੀ ਹੈ ਜਦੋਂ ਕਿ ਪੱਛਮੀ ਵਿਚ ਇਹ ਗ਼ੈਰ-ਕਾਨੂੰਨੀ ਨਹੀਂ। ਬਕਾਇਦਾ ਕੰਪਨੀਆਂ ਇਸ ਨੂੰ ਚਲਾਉਂਦੀਆਂ ਹਨ। ਸਭ ਕੁਝ ਕਾਨੂੰਨੀ ਤਰੀਕੇ ਨਾਲ ਹੁੰਦਾ ਹੈ ਅਤੇ ਸਰਕਾਰ ਨੂੰ ਕਰੋੜਾਂ ਦਾ ਟੈਕਸ ਵੀ ਮਿਲਦਾ ਹੈ। ਫਿਰ ਭਾਰਤ ਵਿਚ ਅਜਿਹਾ ਕਿਉਂ ਨਹੀਂ ਲਾਗੂ ਹੋ ਸਕਦਾ? ਯੂਰਪ ਵਿਚ ਅਨੇਕਾਂ ਖੇਡਾਂ 'ਤੇ ਲੋਕ ਖੁੱਲ੍ਹੇਆਮ ਸ਼ਰਤਾਂ ਲਾਉਂਦੇ ਹਨ। ਜੇ ਇਹੀ ਪ੍ਰਬੰਧ ਭਾਰਤ ਵਿਚ ਵੀ ਲਾਗੂ ਹੋ ਜਾਵੇ ਤਾਂ ਸਰਕਾਰ ਨੂੰ ਟੈਕਸ ਵੀ ਆਵੇਗਾ ਅਤੇ ਇਸ ਤਰ੍ਹਾਂ ਦੀਆਂ ਘਟਨਾਵਾਂ ਨੂੰ ਵੀ ਠੱਲ੍ਹ ਪੈ ਜਾਵੇਗੀ। ਜਿਥੋਂ ਤੱਕ ਮੈਚ ਫਿਕਸਿੰਗ ਦੀ ਗੱਲ ਹੈ, ਇਹ ਤਾਂ ਬਹੁਤ ਪਹਿਲਾਂ ਤੋਂ ਹੋ ਰਹੀ ਲਗਦੀ ਹੈ।

-ਪਰਮਪੌਲ ਸਿੰਘ
ਬਰਤਾਨੀਆ
paligandhi@gmail.com

ਸਿੱਖੀ ਦੇ ਪ੍ਰਚਾਰ ਦੀ ਲੋੜ
ਖ਼ਬਰ ਪੜ੍ਹੀ ਕਿ ਇਕ ਸਿੱਖ ਫਿਨਲੈਂਡ ਵਿਚ ਪੱਗ ਦੇ ਮਸਲੇ ਕਾਰਨ ਦੁਖੀ ਹੈ। ਮੈਂ ਪਹਿਲਾਂ ਵੀ ਬੇਨਤੀ ਕਰ ਚੁੱਕਾ ਹਾਂ ਕਿ ਯਾਦਗਾਰਾਂ ਉਤੇ ਕਰੋੜ ਰੁਪਏ ਖਰਚਣ ਦੀ ਥਾਂ ਸਿੱਖ ਇਤਿਹਾਸ ਨੂੰ ਭਾਰਤੀ ਅਤੇ ਵਿਦੇਸ਼ੀ ਭਾਸ਼ਾਵਾਂ ਵਿਚ ਛਾਪ ਕੇ ਸਿੱਖੀ ਦਾ ਪ੍ਰਚਾਰ ਕੀਤਾ ਜਾਵੇ ਤਾਂ ਸਿੱਖ ਕੌਮ ਨੂੰ ਆਉਂਦੀਆਂ ਮੁਸ਼ਕਿਲਾਂ ਤੋਂ ਰਾਹਤ ਮਿਲ ਸਕਦੀ ਹੈ। ਬਰਾਡ ਸ਼ਾਅ, ਪਰਲ ਐਸ. ਬਕ, ਟੋਇਨਬੀ ਅਤੇ ਹੋਰ ਸੰਸਾਰ ਪ੍ਰਸਿੱਧ ਲੇਖਕ ਸਿੱਖ ਧਰਮ ਨੂੰ ਸੰਸਾਰ ਦਾ ਆਧੁਨਿਕ ਧਰਮ ਲਿਖ ਚੁੱਕੇ ਹਨ। ਪਰ ਅਫ਼ਸੋਸ ਹੈ ਕਿ ਸਿੱਖ ਆਗੂ ਸਿੱਖੀ ਦਾ ਪ੍ਰਚਾਰ ਕਰਨ ਵੱਲ ਲੋੜੀਂਦਾ ਧਿਆਨ ਨਹੀਂ ਦੇ ਰਹੇ।

-ਆਤਮਾ ਸਿੰਘ ਬਰਾੜ
(ਯੂ. ਕੇ.)
atmabrar@yahoo.com

11-6-2013

 'ਪ੍ਰੀਵਿਲਜ ਕਾਰਡ'
ਪੰਜਾਬ ਸਰਕਾਰ ਨੇ ਪ੍ਰਵਾਸੀ ਪੰਜਾਬੀਆਂ ਲਈ ਪ੍ਰੀਵਿਲਜ ਕਾਰਡ ਸ਼ੁਰੂ ਕੀਤੇ ਹਨ ਪਰ ਇਨ੍ਹਾਂ ਨੂੰ ਬਣਾਉਣ ਦਾ ਅਮਲ ਬਹੁਤ ਮੱਠਾ ਹੈ। ਸਾਨੂੰ ਅਰਜ਼ੀ ਦਿੱਤਿਆਂ ਨੂੰ ਤਿੰਨ ਮਹੀਨੇ ਹੋ ਗਏ ਹਨ, ਅਜੇ ਤੱਕ ਕੋਈ ਹੁੰਗਾਰਾ ਨਹੀਂ ਮਿਲਿਆ। ਇਸ ਸਬੰਧੀ ਕਾਰਵਾਈ ਤੇਜ਼ ਕਰਨ ਦੀ ਲੋੜ ਹੈ।

-ਨਰੇਸ਼ ਕੁਮਾਰ ਗੌਤਮ
ਸਕਾਟਲੈਂਡ (ਬਰਤਾਨੀਆ)
nareshkumargautam@ymail.com

4-6-2013

 ਨਸ਼ਿਆਂ ਵਿਰੁੱਧ ਸੰਪਾਦਕੀ
ਪੰਜਾਬ ਵਿਚ ਨਸ਼ਿਆਂ ਦੀ ਵਿਕਰੀ ਖਿਲਾਫ਼ ਤੁਹਾਡੇ ਵੱਲੋਂ ਪਿਛਲੇ ਦਿਨੀਂ ਲਿਖਿਆ ਗਿਆ ਸੰਪਾਦਕੀ ਬੇਹੱਦ ਵਧੀਆ ਸੀ। ਪੰਜਾਬ ਸਰਕਾਰ ਇਸ ਰੁਝਾਨ 'ਤੇ ਰੋਕ ਲਾਉਣ ਵਿਚ ਅਸਫਲ ਰਹੀ ਹੈ। ਮੈਂ ਸਮਝਦਾ ਹਾਂ ਕਿ ਇਸ ਲਈ ਲੋਕਾਂ ਦੇ ਚੁਣੇ ਹੋਏ ਨੁਮਾਇੰਦਿਆਂ ਨੂੰ ਜਵਾਬਦੇਹ ਬਣਾਉਣਾ ਚਾਹੀਦਾ ਹੈ ਕਿ ਉਹ ਇਸ ਰੁਝਾਨ 'ਤੇ ਰੋਕ ਲਾਉਣ ਸਮੇਤ ਆਪਣੇ ਹਲਕੇ ਦੇ ਨਾਗਰਿਕਾਂ ਦੀ ਸੁਰੱਖਿਆ ਯਕੀਨੀ ਬਣਾਉਣ ਅਤੇ ਉਨ੍ਹਾਂ ਨੂੰ ਲੋੜੀਂਦੀਆਂ ਸਹੂਲਤਾਂ ਮੁਹੱਈਆ ਕਰਾਉਣ ਸਬੰਧੀ ਲੋੜੀਂਦੀ ਭੂਮਿਕਾ ਨਿਭਾਉਂਦੇ ਹਨ ਜਾਂ ਨਹੀਂ। ਉਮੀਦ ਹੈ ਕਿ ਆਉਂਦੀਆਂ ਲੋਕ ਸਭਾ ਚੋਣਾਂ ਅਤੇ ਪੰਚਾਇਤ ਚੋਣਾਂ ਵਿਚ ਲੋਕ ਜਾਗਰੂਕਤਾ ਤੋਂ ਕੰਮ ਲੈਂਦੇ ਹੋਏ ਆਪਣੇ ਸੱਚੇ ਨੁਮਾਇੰਦਿਆਂ ਦੀ ਚੋਣ ਕਰਨਗੇ। ਲੋਕਾਂ ਨੂੰ ਸ਼ਿਕਾਇਤਾਂ ਕਰਨ ਦੀ ਥਾਂ ਆਪਣੇ ਸਹੀ ਨੁਮਾਇੰਦੇ ਚੁਣ ਕੇ ਅੱਗੇ ਲਿਆਉਣੇ ਚਾਹੀਦੇ ਹਨ।

-ਕੌਰ ਸਿੰਘ ਸਿੱਧੂ
ਕੈਨੇਡਾ
rivereastpharmacy@hotmail.com

ਨਾਂਹ-ਪੱਖੀ ਪਹੁੰਚ ਕਿਉਂ?
ਮੈਂ ਭਾਰਤ ਦੇ ਸ਼ਹਿਰੀ ਹਵਾਬਾਜ਼ੀ ਮੰਤਰੀ ਨੂੰ ਅਪੀਲ ਕਰਦਾ ਹਾਂ ਕਿ ਉਹ ਅੰਮ੍ਰਿਤਸਰ ਹਵਾਈ ਅੱਡੇ ਵੱਲ ਉਚੇਚਾ ਧਿਆਨ ਦੇਣ, ਜੋ ਪਿਛਲੇ ਕਈ ਸਾਲਾਂ ਤੋਂ ਨਜ਼ਰਅੰਦਾਜ਼ ਕੀਤਾ ਜਾ ਰਿਹਾ ਹੈ। ਇਥੋਂ ਉਡਾਣਾਂ ਦੀ ਗਿਣਤੀ ਵਧਾਈ ਜਾਣੀ ਚਾਹੀਦੀ ਹੈ। ਦੱਖਣ ਦੇ ਹਵਾਈ ਅੱਡਿਆਂ ਤੋਂ ਅਰਬ ਦੇਸ਼ਾਂ ਨੂੰ ਬਹੁਤ ਸਾਰੀਆਂ ਉਡਾਣਾਂ ਜਾਂਦੀਆਂ ਹਨ। ਪਰ ਅੰਮ੍ਰਿਤਸਰ ਜਾਂ ਚੰਡੀਗੜ੍ਹ ਦੇ ਹਵਾਈ ਅੱਡਿਆਂ ਤੋਂ ਅਰਬ ਖੇਤਰ ਦੀਆਂ ਉਡਾਣਾਂ ਸਬੰਧੀ ਲਗਾਤਾਰ ਨਾਂਹ-ਪੱਖੀ ਪਹੁੰਚ ਅਪਣਾਈ ਜਾ ਰਹੀ ਹੈ। ਇਥੋਂ ਨਵੀਆਂ ਉਡਾਣਾਂ ਸ਼ੁਰੂ ਹੋਣੀਆਂ ਚਾਹੀਦੀਆਂ ਹਨ।

-ਜੀ. ਐਸ. ਮਣਕੂ
ਸੰਯੁਕਤ ਅਰਬ ਅਮੀਰਾਤ
sgur@ymail.com

ਸ਼੍ਰੋਮਣੀ ਕਮੇਟੀ ਨੂੰ ਅਪੀਲ
ਮੈਂ ਸ਼੍ਰੋਮਣੀ ਕਮੇਟੀ ਨੂੰ ਅਪੀਲ ਕਰਨਾ ਚਾਹੁੰਦਾ ਹਾਂ ਕਿ ਸ੍ਰੀ ਅਨੰਦਪੁਰ ਸਾਹਿਬ ਵਿਚ ਮੈਡੀਕਲ ਅਤੇ ਇੰਜੀਨੀਅਰਿੰਗ ਕਾਲਜ ਖੋਲ੍ਹਿਆ ਜਾਵੇ। ਇਸ ਦੇ ਨਾਲ ਹੀ ਭਦੌੜ ਸਾਹਿਬ ਵਿਚ ਮਿੰਨੀ ਹਸਪਤਾਲ ਖੋਲ੍ਹਿਆ ਜਾਵੇ। ਅਨੰਦਪੁਰ ਸਾਹਿਬ ਹੁਣ ਜ਼ਿਲ੍ਹਾ ਬਣ ਚੁੱਕਾ ਹੈ ਅਤੇ ਪੰਜਾਬ ਦਾ ਇਤਿਹਾਸਕ ਸ਼ਹਿਰ ਹੈ। ਇਸੇ ਤਰ੍ਹਾਂ ਨੰਗਲ ਡੈਮ ਨੇੜੇ ਪੈਂਦੇ ਭਦੌੜ ਸਾਹਿਬ ਦੇ ਇਲਾਕੇ ਵਿਚ ਸਿਹਤ ਸਹੂਲਤਾਂ ਦੀ ਘਾਟ ਹੈ।

-ਨਰੇਸ਼ ਕੁਮਾਰ ਗੌਤਮ
ਸਕਾਟਲੈਂਡ (ਬਰਤਾਨੀਆ)
nareshkumargautam@ymail.com

ਪੱਕਾ ਹੋਣਾ ਮੁਸ਼ਕਿਲ
ਆਸਟਰੇਲੀਆ ਵਿਚ ਪੱਕਾ ਹੋਣਾ ਬਹੁਤ ਮੁਸ਼ਕਿਲ ਹੈ। ਆਸਟਰੇਲੀਆਈ ਸਰਕਾਰ ਆਪਣੇ ਕਾਨੂੰਨ ਸਖ਼ਤ ਕਰ ਰਹੀ ਹੈ। ਹੁਣ ਪੱਕੇ ਹੋਣ ਲਈ ਉਚੇਰੀ ਯੋਗਤਾ ਅਤੇ ਕੰਮ ਦਾ ਚੰਗਾ ਤਜਰਬਾ ਚਾਹੀਦਾ ਹੈ। ਸਾਡੇ ਲੋਕ ਪਹਿਲਾਂ ਪੱਕੇ ਹੋਣ ਲਈ ਬਹੁਤ ਨਾਜਾਇਜ਼ ਤਰੀਕੇ ਵਰਤਦੇ ਰਹੇ ਹਨ। ਇਸੇ ਲਈ ਸਰਕਾਰ ਹੁਣ ਸਖ਼ਤ ਕਾਨੂੰਨ ਬਣਾ ਰਹੀ ਹੈ। ਸਰਕਾਰ ਹੁਣ ਸਿਰਫ ਉਚੇਰੀ ਯੋਗਤਾ ਵਾਲੇ ਲੋਕਾਂ ਨੂੰ ਹੀ ਤਰਜੀਹ ਦਿੰਦੀ ਹੈ। ਜੇ ਤੁਸੀਂ ਚੰਗੀ ਪੜ੍ਹਾਈ ਕੀਤੀ ਹੈ ਅਤੇ ਤੁਹਾਡੀ ਅੰਗਰੇਜ਼ੀ ਵਧੀਆ ਹੈ ਤਾਂ ਤੁਹਾਨੂੰ ਚਿੰਤਾ ਕਰਨ ਦੀ ਕੋਈ ਲੋੜ ਨਹੀਂ ਪਰ ਕਦੇ ਵੀ ਪੱਕੇ ਹੋਣ ਲਈ ਗ਼ਲਤ ਤਰੀਕਾ ਨਾ ਅਪਣਾਇਓ, ਕਿਉਂਕਿ ਇਸ ਨਾਲ ਬਾਕੀਆਂ ਲਈ ਵੀ ਮੁਸ਼ਕਿਲ ਖੜ੍ਹੀ ਹੁੰਦੀ ਹੈ।

-ਪਰਮਿੰਦਰ ਸਿੰਘ ਸਿੱਧੂ
ਮੈਲਬੌਰਨ (ਆਸਟਰੇਲੀਆ)
parminder57980@gmail.com

22-5-2013

 ਸਪੇਨ ਨਾ ਆਓ

ਮੈਂ 'ਅਜੀਤ' ਦਾ ਧੰਨਵਾਦੀ ਹਾਂ ਕਿ ਇਹ ਭਾਰਤ ਅਤੇ ਪੰਜਾਬ ਦੀਆਂ ਖ਼ਬਰਾਂ ਤੋਂ ਸਾਨੂੰ ਜਾਣੂ ਕਰਵਾਉਂਦਾ ਹੈ। ਮੈਂ ਸਾਰੇ ਪੰਜਾਬੀ ਵੀਰਾਂ ਨੂੰ ਇਹ ਵੀ ਕਹਿਣਾ ਚਾਹੁੰਦਾ ਹਾਂ ਕਿ ਉਹ ਸਪੇਨ ਨਾ ਆਉਣ ਕਿਉਂਕਿ ਇਥੇ ਕੋਈ ਕੰਮ ਨਹੀਂ ਹੈ। ਸੋ, ਇਥੇ ਆਉਣ ਲਈ ਆਪਣੀਆਂ ਜ਼ਮੀਨਾਂ ਨਾ ਵੇਚੋ ਅਤੇ ਪੈਸੇ ਬਰਬਾਦ ਨਾ ਕਰੋ। ਧੰਨਵਾਦ

-ਪੁਸ਼ਪਿੰਦਰ ਪਾਲ ਗੌਤਮ
ਸਪੇਨ
pushpinderpalg@hotmail.com

ਟ੍ਰੈਕਟਰ ਟੋਚਨ ਮੁਕਾਬਲੇ

ਮੈਨੂੰ ਇੰਟਰਨੈੱਟ ਰਾਹੀਂ ਪਤਾ ਲੱਗਾ ਕਿ ਪੰਜਾਬ ਦੇ ਪੇਂਡੂ ਖੇਡ ਮੇਲਿਆਂ ਵਿਚ ਟ੍ਰੈਕਟਰ ਟੋਚਨ ਮੁਕਾਬਲਿਆਂ ਦਾ ਖ਼ਤਰਨਾਕ ਰੁਝਾਨ ਚੱਲ ਰਿਹਾ ਹੈ। ਇਹ ਖੇਡ ਮੇਲਿਆਂ ਵਿਚ ਬੜਾ ਪ੍ਰਚਲਿਤ ਮੁਕਾਬਲਾ ਹੈ ਪਰ ਇਹ ਬੇਹੱਦ ਖ਼ਤਰਨਾਕ ਹੈ। ਸੈਂਕੜੇ ਲੋਕ ਮੁਕਾਬਲੇ ਵਾਲੇ ਟ੍ਰੈਕਟਰਾਂ ਦੁਆਲੇ ਜੁੜੇ ਹੁੰਦੇ ਹਨ। ਬਾਕੀ ਪੰਜਾਬੀਆਂ ਵਾਂਗ ਮੈਂ ਵੀ ਪੰਜਾਬ ਦੀ ਭਲਾਈ ਲੋਚਦਾ ਹਾਂ। ਮੇਰੀ ਖੇਡ ਮੇਲਿਆਂ ਦੇ ਪ੍ਰਬੰਧਕਾਂ ਨੂੰ ਅਪੀਲ ਹੈ ਕਿ ਅਜਿਹੇ ਮੁਕਾਬਲੇ ਨਾ ਕਰਵਾਏ ਜਾਣ ਕਿਉਂਕਿ ਇਨ੍ਹਾਂ ਕਾਰਨ ਬੜੇ ਭਾਰੀ ਹਾਦਸੇ ਹੋ ਸਕਦੇ ਹਨ। ਇਸ ਬਾਰੇ ਸਾਨੂੰ ਸਾਰਿਆਂ ਨੂੰ ਜਾਗਰੂਕਤਾ ਪੈਦਾ ਕਰਨੀ ਚਾਹੀਦੀ ਹੈ। ਅਜਿਹੇ ਮੁਕਾਬਲੇ ਬੰਦ ਹੋਣੇ ਚਾਹੀਦੇ ਹਨ।

-ਅਮਨਦੀਪ ਸਿੰਘ
ਲਿਚੈਸਟਰ (ਯੂ. ਕੇ.)
amanhanjra@hotmail.co.uk

ਭਾਰਤੀ ਨਿਆਂ ਪ੍ਰਣਾਲੀ

ਭਾਰਤ ਦੀ ਨਿਆਂ ਪ੍ਰਣਾਲੀ ਲਈ ਬੜੀ ਸ਼ਰਮਨਾਕ ਗੱਲ ਹੈ ਕਿ ਸੰਜੇ ਦੱਤ ਨੂੰ ਉਹ ਹਥਿਆਰ ਰੱਖਣ ਬਦਲੇ ਸਜ਼ਾ ਭੁਗਤਣੀ ਪੈ ਰਹੀ ਹੈ, ਜੋ ਉਸ ਨੇ ਕਦੇ ਕਿਸੇ ਖਿਲਾਫ਼ ਨਹੀਂ ਵਰਤਿਆ। ਦੂਜੇ ਪਾਸੇ ਸੱਜਣ ਕੁਮਾਰ ਅਤੇ ਜਗਦੀਸ਼ ਟਾਈਟਲਰ ਵਰਗੇ ਲੋਕ ਆਜ਼ਾਦ ਘੁੰਮ ਰਹੇ ਹਨ, ਜੋ 1984 ਵਿਚ ਹੋਏ ਹਜ਼ਾਰਾਂ ਸਿੱਖਾਂ ਦੇ ਕਤਲੇਆਮ ਦੇ ਦੋਸ਼ੀ ਹਨ।

-ਸਤਵਿੰਦਰ ਸਿੰਘ
ਕੈਨੇਡਾ
satkhunkhun@hotmail.com

ਪੰਜਾਬੀ ਫ਼ਿਲਮਾਂ

ਪੰਜਾਬੀ ਫ਼ਿਲਮਾਂ ਵੀ ਬਾਲੀਵੁੱਡ ਦੀ ਤਰਜ਼ 'ਤੇ ਛੇਤੀ-ਛੇਤੀ ਪੈਸੇ ਕਮਾਉਣ ਵੱਲ ਤੁਰ ਪਈਆਂ ਹਨ। ਡਾਇਰੈਕਟਰ ਮਨਮੋਹਣ ਸਿੰਘ ਦੇ ਉੱਦਮ ਨਾਲ ਕੁਝ ਸਾਲ ਪਹਿਲਾਂ ਚੰਗੇ ਮਿਆਰ ਵਾਲੀਆਂ ਪੰਜਾਬੀਆਂ ਫ਼ਿਲਮਾਂ ਬਣਨੀਆਂ ਸ਼ੁਰੂ ਹੋਈਆਂ ਸਨ, ਜੋ ਕਿ ਕਾਫੀ ਚੰਗੀਆਂ ਸਨ ਪਰ ਹੁਣ ਤਾਂ ਪੰਜਾਬੀ ਫ਼ਿਲਮਾਂ ਦੇ ਪ੍ਰੋਡਿਊਸਰਾਂ ਦੀ ਭਰਮਾਰ ਨਜ਼ਰ ਆਉਣ ਲੱਗੀ ਹੈ, ਜਿਸ ਕਾਰਨ ਫ਼ਿਲਮਾਂ ਦਾ ਮਿਆਰ ਵੀ ਉਹ ਨਹੀਂ ਰਿਹਾ, ਨਾ ਹੀ ਚੰਗੀ ਕਹਾਣੀ ਹੁੰਦੀ ਹੈ। ਬਹੁਤੀਆਂ ਅਜਿਹੀਆਂ ਫ਼ਿਲਮਾਂ ਵਿਚ ਬੱਸ ਗਾਲਾਂ ਹੀ ਨਜ਼ਰ ਆਉਂਦੀਆਂ ਹਨ। ਜਿਸ ਪੰਜਾਬੀ ਵਿਰਸੇ ਦੀਆਂ ਅਸੀਂ ਗੱਲਾਂ ਕਰਦੇ ਹਾਂ, ਇਹ ਫ਼ਿਲਮਾਂ ਉਸ ਤੋਂ ਕੋਹਾਂ ਦੂਰ ਜਾਪਦੀਆਂ ਹਨ। ਕੁਝ ਫ਼ਿਲਮਾਂ 'ਚ ਬਿਲਕੁਲ ਬਾਲੀਵੁੱਡ ਦੀ ਤਰਜ਼ 'ਤੇ ਨੰਗੇਜ਼ ਅਤੇ ਅਸ਼ਲੀਲਤਾ ਪਰੋਸੀ ਜਾ ਰਹੀ ਹੈ। ਪੰਜਾਬੀ ਸੱਭਿਆਚਾਰ ਨੂੰ ਬਚਾਉਣ ਲਈ ਇਸ ਪਾਸੇ ਤੁਰੰਤ ਧਿਆਨ ਦੇਣ ਦੀ ਲੋੜ ਹੈ।

-ਪਰਮਪੌਲ ਸਿੰਘ
ਯੂ. ਕੇ.
paligandhi@gmail.com

13-4-2013

 ਆਬਾਦੀ ਦੀ ਸਮੱਸਿਆ
ਪਿਛਲੇ ਦਿਨੀਂ 'ਅਜੀਤ' ਵਿਚ ਡਾ: ਮਨਜੀਤ ਸਿੰਘ ਕੰਗ ਵੱਲੋਂ ਵਧਦੀ ਆਬਾਦੀ ਬਾਰੇ ਲਿਖਿਆ ਲੇਖ, ਪੜ੍ਹਿਆ। ਇਹ ਬੇਹੱਦ ਸੂਚਨਾ ਭਰਪੂਰ ਸਮੱਗਰੀ ਸੀ। ਭਾਰਤੀ ਸਿਆਸਤਦਾਨਾਂ, ਸੰਘੀ ਸਰਕਾਰ ਅਤੇ ਸੂਬਾਈ ਸਰਕਾਰਾਂ ਨੂੰ ਇਸ ਮਸਲੇ ਸਬੰਧੀ ਢੁਕਵੇਂ ਕਦਮ ਉਠਾਉਣੇ ਚਾਹੀਦੇ ਹਨ। ਮੈਨੂੰ ਆਸ ਹੈ ਕਿ ਭਾਰਤ ਦੇ ਜਾਗਰੂਕ ਲੋਕ ਸਿਆਸੀ ਪਾਰਟੀਆਂ 'ਤੇ ਇਹ ਮਸਲਾ ਆਪਣੇ ਸਿਆਸੀ ਏਜੰਡੇ ਵਿਚ ਸ਼ਾਮਿਲ ਕਰਨ ਲਈ ਦਬਾਅ ਬਣਾਉਣਗੇ। ਯੋਜਨਾਬੰਦੀ ਕੀਤੀ ਜਾਣੀ ਚਾਹੀਦੀ ਹੈ ਕਿ ਇਸ ਵਿਆਪਕ ਸਮੱਸਿਆ ਦਾ ਹੱਲ ਕਿਵੇਂ ਕੀਤਾ ਜਾਵੇ। ਔਰਤ ਸੁਰੱਖਿਆ ਸਬੰਧੀ ਬਣਨ ਵਾਲੇ ਕਾਨੂੰਨ ਬਾਰੇ ਲਿਖਿਆ ਸੰਪਾਦਕੀ ਲੇਖ ਵੀ ਸ਼ਲਾਘਾਯੋਗ ਸੀ।

-ਕੌਰ ਸਿੰਘ ਸਿੱਧੂ
ਵਿਨੀਪੈਗ, ਮੈਨੀਟੋਬਾ (ਕੈਨੇਡਾ)
rivereastpharmacy@hotmail.com

ਜਾਗਰੂਕਤਾ ਦੀ ਲੋੜ

ਪਿਛਲੇ ਦਿਨੀਂ ਉਸ ਖ਼ਬਰ ਬਾਰੇ ਟਿੱਪਣੀ ਪੜ੍ਹੀ, ਜਿਸ ਵਿਚ ਇਕ ਔਰਤ ਨੇ ਆਪਣੀਆਂ ਤਿੰਨ ਧੀਆਂ ਸਮੇਤ ਇਸ ਕਰਕੇ ਨਹਿਰ ਵਿਚ ਛਾਲ ਮਾਰ ਦਿੱਤੀ ਸੀ ਕਿਉਂਕਿ ਉਹ ਮੁੰਡੇ ਨੂੰ ਜਨਮ ਨਹੀਂ ਸੀ ਦੇ ਸਕੀ। ਇਸ ਖ਼ਬਰ ਬਾਰੇ ਟਿੱਪਣੀ ਕਰਦਿਆਂ ਲਿਖਿਆ ਗਿਆ ਸੀ ਕਿ ਸਾਨੂੰ ਔਰਤਾਂ ਸਬੰਧੀ ਆਪਣੀ ਸੋਚ ਬਦਲਣ ਦੀ ਲੋੜ ਹੈ। ਪਰ ਮੈਂ ਸਮਝਦਾ ਹਾਂ ਕਿ ਇਸ ਦੇ ਨਾਲ-ਨਾਲ ਸਮਾਜ ਵਿਚ ਇਸ ਗੱਲ ਦੀ ਵੀ ਜਾਗਰੂਕਤਾ ਲਿਆਉਣ ਦੀ ਲੋੜ ਹੈ ਕਿ ਮੁੰਡਾ ਹੋਵੇਗਾ ਜਾਂ ਕੁੜੀ, ਇਹ ਔਰਤ 'ਤੇ ਨਿਰਭਰ ਨਹੀਂ ਕਰਦਾ, ਸਗੋਂ ਮਰਦ 'ਤੇ ਨਿਰਭਰ ਕਰਦਾ ਹੈ। ਫਿਰ ਇਸ ਗੱਲ ਲਈ ਔਰਤ ਨੂੰ ਕਿਉਂ ਜ਼ਿੰਮੇਵਾਰ ਠਹਿਰਾਇਆ ਜਾਂਦਾ ਹੈ। ਸਾਨੂੰ ਪਤਾ ਹੋਣਾ ਚਾਹੀਦਾ ਹੈ ਕਿ ਔਰਤ ਵਿਚ ਇਕੋ ਤਰ੍ਹਾਂ ਦੇ ਕ੍ਰੋਮੋਸੋਮ ਹੁੰਦੇ ਹਨ ਜਦ ਕਿ ਮਰਦ ਵਿਚ ਦੋ ਤਰ੍ਹਾਂ ਦੇ ਅਤੇ ਮੁੰਡੇ ਜਾਂ ਕੁੜੀ ਦੇ ਜਨਮ ਲਈ ਪਿਤਾ ਦੇ ਕ੍ਰੋਮੋਸੋਮ ਹੀ ਜ਼ਿੰਮੇਵਾਰ ਹੁੰਦੇ ਹਨ। ਸਰਕਾਰ ਨੂੰ ਇਸ ਗੱਲ ਸਬੰਧੀ ਵੱਡੇ ਪੱਧਰ 'ਤੇ ਪ੍ਰਚਾਰ ਕਰਨਾ ਚਾਹੀਦਾ ਹੈ ਤਾਂ ਕਿ ਸਮਾਜ ਦੇ ਸਾਰੇ ਵਰਗਾਂ ਨੂੰ ਇਸ ਬਾਰੇ ਪਤਾ ਲੱਗ ਸਕੇ ਅਤੇ ਮੰਦਭਾਗੀਆਂ ਘਟਨਾਵਾਂ ਨਾ ਵਾਪਰਨ। ਅਜਿਹੇ ਪ੍ਰਚਾਰ ਲਈ ਵੱਡੇ ਪੱਧਰ 'ਤੇ ਬੈਨਰ ਲਗਵਾਏ ਜਾ ਸਕਦੇ ਹਨ, ਟੈਲੀਵਿਜ਼ਨ, ਅਖ਼ਬਾਰਾਂ ਅਤੇ ਹੋਰ ਮੀਡੀਆ ਸਾਧਨਾਂ ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ।

-ਪਰਮਪੌਲ ਸਿੰਘ
ਬਰਤਾਨੀਆ
paligandhi@gmail.com

ਸਮਾਜ ਦਾ ਹਾਲ

ਦਿੱਲੀ ਵਾਲੀ ਘਿਨਾਉਣੀ ਘਟਨਾ ਤੋਂ ਬਾਅਦ ਜਬਰ-ਜਨਾਹ ਦੀਆਂ ਅਨੇਕਾਂ ਘਟਨਾਵਾਂ ਸਾਹਮਣੇ ਆ ਰਹੀਆਂ ਹਨ। ਸਾਡੇ ਸਮਾਜ ਲਈ ਇਹ ਬੇਹੱਦ ਸ਼ਰਮਿੰਦਗੀ ਵਾਲੀ ਗੱਲ ਹੈ। ਇਸ ਤੋਂ ਇਲਾਵਾ ਛੇੜਛਾੜ, ਪ੍ਰੇਮੀ ਨਾਲ ਰਲ ਕੇ ਪਤੀ ਦੀ ਹੱਤਿਆ, ਪੁਲਿਸ ਵੱਲੋਂ ਲੜਕੀ ਦੀ ਕੁੱਟਮਾਰ ਆਦਿ ਵਰਗੀਆਂ ਅਨੇਕਾਂ ਖ਼ਬਰਾਂ ਪੜ੍ਹਨ ਨੂੰ ਮਿਲਦੀਆਂ ਹਨ। ਸਮਝ ਨਹੀਂ ਆਉਂਦੀ ਸਾਡੇ ਸਮਾਜ ਨੂੰ ਕੀ ਹੋ ਗਿਆ ਹੈ। ਕਦੋਂ ਨਿਕਲੇਗਾ ਨਸ਼ਿਆਂ ਅਤੇ ਬਦਸਲੂਕੀਆਂ 'ਚੋਂ ਸਾਡਾ ਪੰਜਾਬ?

-ਗੁਰਪ੍ਰੀਤ ਸਿੰਘ
ਨੇੜੇ ਕ੍ਰਿਕਟ ਸਟੇਡੀਅਮ, ਸ਼ਾਰਜਾਹ (ਸੰਯੁਕਤ ਅਰਬ ਅਮੀਰਾਤ)
bohemia631@gmail.com

ਬੇਨਤੀ

ਮੇਰੀ ਬੇਨਤੀ ਹੈ ਕਿ ਯੂਰਪ ਵਿਚ ਜਦੋਂ ਵੀ ਕੋਈ ਪੰਜਾਬੀ ਬੇਘਰਾ ਮਿਲੇ ਤਾਂ ਸਾਰੇ ਪ੍ਰਵਾਸੀ ਪੰਜਾਬੀ ਵੀਰਾਂ ਨੂੰ ਉਸ ਦੀ ਮਦਦ ਕਰਨੀ ਚਾਹੀਦੀ ਹੈ। ਇਹ ਸਾਡਾ ਸਭ ਦਾ ਫਰਜ਼ ਬਣਦਾ ਹੈ। ਪਰਮਾਤਮਾ ਸਭ ਦਾ ਭਲਾ ਕਰੇ।

-ਜਗਦੇਵ ਗੁਰਦੀਪ
ਸਵਿਟਜ਼ਰਲੈਂਡ
verru78@yahoo.com






Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX