ਤਾਜਾ ਖ਼ਬਰਾਂ


ਭਾਰਤ ਸ੍ਰੀਲੰਕਾ ਨਾਗਪੁਰ ਟੈੱਸਟ ਮੈਚ : ਸ੍ਰੀਲੰਕਾ ਨੇ ਜਿੱਤੀ ਟਾਸ, ਪਹਿਲਾ ਬੱਲੇਬਾਜੀ ਦਾ ਫੈਸਲਾ
. . .  14 minutes ago
ਬੱਸ ਨੂੰ ਲੱਗੀ ਅੱਗ, ਦੋ ਮੌਤਾਂ
. . .  32 minutes ago
ਕੋਲਹਾਪੁਰ, 24 ਨਵੰਬਰ - ਮਹਾਰਾਸ਼ਟਰ ਦੇ ਕੋਲਹਾਪੁਰ ਨੇੜੇ ਬੱਸ 'ਚ ਸ਼ਾਰਟ ਸਰਕਟ ਹੋਣ ਕਾਰਨ ਉਸ ਵਿਚ ਅੱਗ ਲੱਗ ਗਈ ਜਿਸ ਕਾਰਨ ਇਸ ਹਾਦਸੇ ਵਿਚ ਦੋ ਲੋਕਾਂ ਦੀ ਮੌਤ ਹੋ ਗਈ...
ਦੂਸਰੇ ਟੈੱਸਟ ਮੈਚ ਨੂੰ ਜਿੱਤਣ ਦੇ ਇਰਾਦੇ ਨਾਲ ਉੱਤਰੇਗੀ ਭਾਰਤੀ ਟੀਮ
. . .  47 minutes ago
ਨਾਗਪੁਰ, 24 ਨਵੰਬਰ - ਪਹਿਲੇ ਟੈੱਸਟ 'ਚ ਮੀਂਹ ਕਾਰਨ ਜਿੱਤ ਤੋਂ ਵਾਂਝੀ ਰਹੀ ਭਾਰਤੀ ਕ੍ਰਿਕਟ ਟੀਮ ਅੱਜ ਨਾਗਪੁਰ 'ਚ ਸ੍ਰੀਲੰਕਾ ਖਿਲਾਫ ਸੀਰੀਜ਼ ਦਾ ਦੂਸਰਾ ਟੈੱਸਟ ਮੈਚ ਖੇਡੇਗੀ। ਪਹਿਲਾ ਮੈਚ ਡਰਾਅ ਰਹਿਣ ਦੇ ਬਾਅਦ ਭਾਰਤੀ ਕ੍ਰਿਕਟ ਟੀਮ ਦੀ ਦੂਸਰੇ ਟੈੱਸਟ ਮੈਚ ਨੂੰ ਜਿੱਤਣ....
ਚਿਤਰਕੂਟ ਟਰੇਨ ਹਾਦਸਾ : ਟਰੇਨ ਪਟੜੀ ਤੋਂ ਉਤਰੀ, ਤਿੰਨ ਮੌਤਾਂ, 9 ਜ਼ਖਮੀ
. . .  about 1 hour ago
ਚਿਤਰਕੂਟ, 24 ਨਵੰਬਰ - ਉਤਰ ਪ੍ਰਦੇਸ਼ ਦੇ ਚਿਤਰਕੂਟ ਦੇ ਕੋਲ ਹੋਏ ਇਕ ਟਰੇਨ ਹਾਦਸੇ 'ਚ ਤਿੰਨ ਲੋਕਾਂ ਦੀ ਮੌਤ ਹੋ ਗਈ ਤੇ 9 ਜ਼ਖਮੀ ਹੋ ਗਏ ਹਨ। ਇਹ ਹਾਦਸਾ ਮਾਨੀਕਪੁਰ ਸਟੇਸ਼ਨ 'ਤੇ ਹੋਇਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਵਾਸਕੋ ਡੀ ਗਾਮਾ ਪਟਨਾ ਐਕਸਪ੍ਰੈਸ...
ਕਾਂਗਰਸੀ ਆਗੂਆਂ ਨੇ ਸ੍ਰੀਲੰਕਾ ਦੇ ਪ੍ਰਧਾਨ ਮੰਤਰੀ ਨਾਲ ਕੀਤੀ ਮੁਲਾਕਾਤ
. . .  1 day ago
ਨਵੀਂ ਦਿੱਲੀ, 23 ਨਵੰਬਰ- ਕਾਂਗਰਸ ਦੇ ਸੀਨੀਅਰ ਆਗੂਆਂ ਜਿਨ੍ਹਾਂ 'ਚ , ਸਾਬਕਾ ਪ੍ਰਧਾਨ ਮੰਤਰੀ ਡਾ.ਮਨਮੋਹਨ ਸਿੰਘ, ਕਾਂਗਰਸ ਪ੍ਰਧਾਨ ਸੋਨੀਆ ਗਾਂਧੀ, ਰਾਹੁਲ ਗਾਂਧੀ ਤੇ ਅਨੰਦ ਸ਼ਰਮਾ ਸ਼ਾਮਲ ਸਨ ਨੇ ਸ੍ਰੀ ਲੰਕਾ ਦੇ ਪ੍ਰਧਾਨ ਮੰਤਰੀ ਰਨਿਲ ਵਿਕਰਮੇਸਿੰਘੇ...
ਪ੍ਰਧਾਨ ਮੰਤਰੀ 27 ਤੇ 29 ਨੂੰ ਕਰਨਗੇ ਗੁਜਰਾਤ 'ਚ ਚੋਣ ਪ੍ਰਚਾਰ
. . .  1 day ago
ਨਵੀਂ ਦਿੱਲੀ, 23 ਨਵੰਬਰ- ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ 27 ਤੇ 29 ਨਵੰਬਰ ਨੂੰ ਸੂਰਤ ਤੇ ਨਵਸਾਰੀ ਵਿਖੇ ਚੋਣ ਰੈਲੀਆਂ ਨੂੰ ਸੰਬੋਧਨ...
ਗੈਂਗਸਟਰ ਵਿੱਕੀ ਗੌਂਡਰ ਦੀ ਖ਼ਬਰ ਮਿਲਦੇ ਹੀ ਪੰਡੋਰੀ ਮਹੰਤਾਂ ਖੇਤਰ ਹੋਇਆ ਪੁਲਿਸ ਛਾਉਣੀ 'ਚ ਤਬਦੀਲ
. . .  1 day ago
ਪੁਰਾਣਾ ਸ਼ਾਲਾ, 23 ਨਵੰਬਰ (ਗੁਰਵਿੰਦਰ ਸਿੰਘ ਗੁਰਾਇਆ)- ਜ਼ਿਲ੍ਹਾ ਗੁਰਦਾਸਪੁਰ ਦੇ ਛੰਭ ਖੇਤਰ ਨਾਲ ਲੱਗਦੇ ਉਤਰੀ ਭਾਰਤ ਦੇ ਪ੍ਰਸਿੱਧ ਇਤਿਹਾਸਿਕ ਤੀਰਥ ਸਥਾਨ ਪੰਡੋਰੀ ਧਾਮ ਨੇੜੇ ਖ਼ਤਰਨਾਕ ਗੈਂਗਸਟਰ ਕੁਲਵਿੰਦਰ ਸਿੰਘ ਉਰਫ਼ ਵਿੱਕੀ ਗੌਂਡਰ ਦੇ ਹੋਣ...
ਗੁਜਰਾਤ ਕਾਂਗਰਸ ਦੀ ਪ੍ਰਧਾਨਗੀ ਤੋਂ ਮੇਰੇ ਅਸਤੀਫ਼ੇ ਦੀ ਖ਼ਬਰ ਝੂਠ- ਸੋਲੰਕੀ
. . .  1 day ago
ਗਾਂਧੀਨਗਰ, 23 ਨਵੰਬਰ- ਗੁਜਰਾਤ ਕਾਂਗਰਸ ਦੇ ਪ੍ਰਧਾਨ ਭਰਤ ਸਿੰਘ ਸੋਲੰਕੀ ਨੇ ਕਿਹਾ ਕਿ ਸੋਸ਼ਲ ਮੀਡੀਆ 'ਤੇ ਉਨ੍ਹਾਂ ਦੇ ਅਸਤੀਫ਼ੇ ਬਾਰੇ ਫੈਲਾਈ ਜਾ ਰਹੀ ਖ਼ਬਰ ਝੂਠ ਹੈ। ਸੋਲੰਕੀ ਨੇ ਕਿਹਾ ਕਿ ਭਾਜਪਾ ਪ੍ਰੇਸ਼ਾਨ ਹੈ ਤੇ ਇਸ ਤਰ੍ਹਾਂ ਦੀਆਂ ਅਫ਼ਵਾਹਾਂ ਫੈਲਾਅ...
ਕੈਬਿਨਟ ਕਮੇਟੀ ਦੀ ਕੱਲ੍ਹ 10 ਵਜੇ ਹੋਵੇਗੀ ਮੀਟਿੰਗ
. . .  1 day ago
ਫਲਾਈਓਵਰ ਤੋਂ ਬੱਸ ਡਿੱਗੀ, 2 ਦੀ ਮੌਤ, 31 ਜ਼ਖ਼ਮੀ
. . .  1 day ago
ਹੋਰ ਖ਼ਬਰਾਂ..
ਜਲੰਧਰ : ਬੁਧਵਾਰ 29 ਭਾਦੋਂ ਸੰਮਤ 549
ਵਿਚਾਰ ਪ੍ਰਵਾਹ: ਤੁਸੀਂ ਸਿੱਖਿਆ ਵਾਸਤੇ ਵਾਤਾਵਰਨ ਬਣਾਓ, ਬਾਕੀ ਕੰਮ ਸਿੱਖਿਆ ਖ਼ੁਦ ਹੀ ਕਰ ਦੇਵੇਗੀ। -ਵਿਨੋਬਾ ਭਾਵੇ
  •     Confirm Target Language  

ਤੁਹਾਡੇ ਖ਼ਤ

12-09-2017

 ਗੁਰੂ ਗ੍ਰੰਥ ਸਾਹਿਬ ਦੀ ਵਿਚਾਰਧਾਰਾ
ਪੰਜਾਬ 'ਚ ਅਕਸਰ ਹੀ ਸਮੇਂ-ਸਮੇਂ 'ਤੇ ਅੰਧ-ਵਿਸ਼ਵਾਸ ਨਾਲ ਜੁੜੀਆਂ ਅਫ਼ਵਾਹਾਂ ਵੱਡੀ ਗਿਣਤੀ 'ਚ ਫੈਲਦੀਆਂ ਰਹਿੰਦੀਆਂ ਹਨ। ਅਜਿਹੀਆਂ ਘਟਨਾਵਾਂ ਨੂੰ ਕੁਝ ਸ਼ਾਤਰ ਦਿਮਾਗ ਲੋਕ ਆਪਣਾ ਤੋਰੀ ਫੁਲਕਾ ਚਲਦਾ ਰੱਖਣ ਲਈ ਅੰਧ-ਵਿਸ਼ਵਾਸ ਨਾਲ ਜੋੜ ਕੇ ਇਸ ਕਦਰ ਪੇਸ਼ ਕਰਦੇ ਹਨ, ਜਿਸ ਦਾ ਖ਼ਾਸ ਕਰਕੇ ਬਹੁਤਾ ਅਸਰ ਆਮ ਲੋਕਾਂ 'ਤੇ ਪੈਂਦਾ ਹੈ, ਜੋ ਅਜਿਹੀਆਂ ਘਟਨਾਵਾਂ ਦੀ ਘੋਖ ਕਰਨ ਦੀ ਬਜਾਏ ਹੱਦੋਂ ਵੱਧ ਘਬਰਾ ਜਾਂਦੇ ਹਨ। ਸਿੱਟੇ ਵਜੋਂ ਜਿਵੇਂ ਵੀ ਕੋਈ ਇਨ੍ਹਾਂ ਨੂੰ ਕਹਿੰਦਾ ਹੈ, ਇਹ ਉਵੇਂ ਹੀ ਕਰਨ ਨੂੰ ਤਿਆਰ ਹੋ ਜਾਂਦੇ ਹਨ। ਅੱਜ ਪੰਜਾਬ ਦੇ ਬਹੁਤੇ ਪਿੰਡਾਂ ਦੇ ਘਰਾਂ ਦੇ ਮੁੱਖ ਗੇਟਾਂ 'ਤੇ ਨਿੰਮ ਦੇ ਪੱਤੇ ਵਗੈਰਾ ਟੰਗੇ ਆਮ ਦੇਖੇ ਜਾ ਸਕਦੇ ਹਨ। ਇਥੇ ਸਵਾਲ ਉੱਠਦਾ ਹੈ ਕਿ ਅਜਿਹਾ ਸਭ ਵਿਗਿਆਨਕ ਚੇਤਨਾ ਦੀ ਘਾਟ ਕਾਰਨ ਹੋ ਰਿਹਾ ਹੈ। ਸਿੱਟੇ ਵਜੋਂ ਦੁਨੀਆ ਦਾ ਵੱਡਾ ਹਿੱਸਾ ਮਾਨਸਿਕ ਰੋਗੀ ਬਣਦਾ ਜਾ ਰਿਹਾ ਹੈ। ਅੱਜ ਮਨੁੱਖ ਨੂੰ ਪ੍ਰਭਾਵੀ ਚੇਤਨਾ ਦੀ ਲੋੜ ਹੈ। ਉਹ ਚੇਤਨਾ ਜੋ ਸਾਨੂੰ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਤੋਂ ਮਿਲਦੀ ਹੈ। ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਵਿਚਾਰਧਾਰਾ ਸਾਨੂੰ ਗੈਬੀ ਸ਼ਕਤੀਆਂ ਤੇ ਅੰਧ-ਵਿਸ਼ਵਾਸਾਂ ਤੋਂ ਮੁਕਤ ਜੀਵਨ ਜਿਊਣ ਦੀ ਪ੍ਰੇਰਨਾ ਦਿੰਦੀ ਹੈ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

ਲਾਪਰਵਾਹੀ
ਦਸ ਦਿਨਾਂ ਵਿਚ ਫਿਰ ਤੀਸਰਾ ਹਾਦਸਾ, ਨਾਗਪੁਰ ਮੁੰਬਈ ਦੁਰੰਤੋ ਐਕਸਪ੍ਰੈਸ ਮਹਾਰਾਸ਼ਟਰ ਦੇ ਟਿਟਵਾਲਾ ਖੇਤਰ ਵਿਖੇ ਪੰਜ ਡੱਬੇ ਇੰਜਣ ਸਮੇਤ ਸਵੇਰੇ ਕਰੀਬ 6.40 ਵਜੇ ਲੀਹੋਂ ਲੈ ਗਏ ਹਨ। ਲਾਪਰਵਾਹੀ ਦਾ ਨਾਂਅ ਦੇ ਕੇ ਕਸੂਰਵਾਰ ਕਰਮਚਾਰੀਆਂ ਨੂੰ ਸਸਪੈਂਡ ਜਾਂ ਬਦਲੀ ਕਰ ਦਿੱਤੀ ਜਾਂਦੀ ਹੈ ਜਾਂ ਛੁੱਟੀ 'ਤੇ ਭੇਜ ਦਿੱਤਾ ਜਾਂਦਾ ਹੈ। ਮਰਨ ਵਾਲੇ ਅਤੇ ਜ਼ਖ਼ਮੀ ਵਿਅਕਤੀਆਂ ਨੂੰ ਮੁਆਵਜ਼ਾ ਦੇ ਕੇ ਗੋਂਗਲੂਆਂ ਤੋਂ ਮਿੱਟੀ ਝਾੜ ਦਿੱਤੀ ਜਾਂਦੀ ਹੈ।
ਦਿਨ-ਬ-ਦਿਨ ਰੇਲਵੇ ਹਾਦਸਿਆਂ ਨੂੰ ਦੇਖ ਕੇ ਲੋੜ ਹੈ ਲਾਪਰਵਾਹੀ ਨੂੰ ਕਤਲ ਜਾਂ ਦੰਡਯੋਗ ਮਨੁੱਖੀ ਹੱਤਿਆ ਦੀ ਪਰਿਭਾਸ਼ਾ ਵਿਚ ਜੋੜ ਕੇ ਸੰਸਦ ਵਿਚ ਕਾਨੂੰਨ ਪਾਸ ਕਰਨ ਦੀ ਤਾਂ ਜੋ ਕਸੂਰਵਾਰ ਵਿਅਕਤੀਆਂ ਦੇ ਖਿਲਾਫ਼ ਮੁਕੱਦਮਾ ਦਰਜ ਕਰਕੇ ਉਨ੍ਹਾਂ ਨੂੰ ਵੱਧ ਤੋਂ ਵੱਧ ਸਜ਼ਾਵਾਂ ਦਿੱਤੀਆਂ ਜਾਣ। ਇਸ ਤਰ੍ਹਾਂ ਹਰ ਇਕ ਵਿਅਕਤੀ ਨੂੰ ਕਾਨੂੰਨ ਦਾ ਡਰ ਹੋਵੇਗਾ ਅਤੇ ਇਹੋ ਜਿਹੀਆਂ ਘਟਨਾਵਾਂ 'ਤੇ ਰੋਕ ਲੱਗੇਗੀ।

-ਗੁਰਮੀਤ ਸਿੰਘ ਵੇਰਕਾ
(ਐਮ.ਏ. ਪੁਲਿਸ ਐਡਮਨਿਸਟ੍ਰੈਸ਼ਨ)
ਰਿਟਾਇਰਡ ਇੰਸਪੈਕਟਰ।

ਭ੍ਰਿਸ਼ਟਾਚਾਰ
ਭਾਰਤ ਵਿਚ ਰਾਜਨੀਤਕ, ਅਫ਼ਸਰਸ਼ਾਹੀ, ਕਾਰਪੋਰੇਟ ਅਤੇ ਪੇਸ਼ਾਜਨਕ ਭ੍ਰਿਸ਼ਟਾਚਾਰ ਇਕ ਗੰਭੀਰ ਸਮੱਸਿਆ ਹੈ ਅਤੇ ਨਵੀਆਂ ਆਰਥਿਕ ਨੀਤੀਆਂ ਅਤੇ ਉਦਾਰੀਕਰਨ ਨੇ ਇਸ ਨੂੰ ਹੋਰ ਵੀ ਹੁਲਾਰਾ ਦਿੱਤਾ ਹੈ। ਇਕ ਸਰਵੇਖਣ ਅਨੁਸਾਰ ਇਹ 100 ਫ਼ੀਸਦੀ ਦੀ ਰਫ਼ਤਾਰ ਨਾਲ ਵਧ ਰਿਹਾ ਹੈ। ਸਭ ਤੋਂ ਦੁੱਖ ਦੀ ਗੱਲ ਇਹ ਹੈ ਕਿ ਪਿਛਲੇ ਸਾਲ ਕੁਝ ਸਮੇਂ ਤੋਂ ਇਹ ਗੱਲ ਜਗ-ਜ਼ਾਹਰ ਹੋ ਚੁੱਕੀ ਹੈ ਕਿ ਭਾਰਤ ਦੀ ਸਰਕਾਰ ਅਜਿਹੇ ਮੰਤਰੀਆਂ, ਅਫ਼ਸਰਾਂ ਤੇ ਵਿਚੋਲਿਆਂ ਨਾਲ ਭਰੀ ਪਈ ਹੈ, ਜਿਨ੍ਹਾਂ ਦੇ ਸਬੰਧ ਹੇਠ ਕਈ-ਕਈ ਲੱਖ ਕਰੋੜ ਰੁਪਏ ਦੇ ਘੁਟਾਲੇ ਹੋਏ ਹਨ। ਇਸ ਕਰਕੇ ਹਰ ਕੋਈ ਇਕ ਭੰਬਲਭੂਸੇ ਦਾ ਸ਼ਿਕਾਰ ਹੈ ਤੇ ਲੋਕਾਂ ਨੂੰ ਹਨੇਰੇ ਵਿਚ ਰੱਖ ਕੇ ਸਿਆਸਤ ਦੇ ਭ੍ਰਿਸ਼ਟਾਚਾਰ ਦੇ ਖਿਡਾਰੀ ਤੇ ਅਫ਼ਸਰ ਮੌਜਾਂ ਲੈ ਰਹੇ ਹਨ।

-ਸ਼ਿਵਾਨੀ
ਐਚ.ਐਮ.ਵੀ., ਜਲੰਧਰ।

11-09-2017

 ਰਿਸ਼ਤਿਆਂ ਦਾ ਘਾਣ
ਪਦਾਰਥਵਾਦੀ ਸੋਚ ਨੇ ਸਾਡੇ ਰਿਸ਼ਤਿਆਂ ਨਾਤਿਆਂ ਤੇ ਭਾਈਚਾਰਕ ਸਾਂਝ ਨੂੰ ਬੁਰੀ ਤਰ੍ਹਾਂ ਪ੍ਰਭਾਵਿਤ ਕੀਤਾ ਹੈ। ਅੱਜ ਪੈਸੇ ਦੀ ਅੰਨ੍ਹੀ ਦੌੜ ਮਗਰ ਲੱਗ ਕੇ ਆਪਣਾ ਅਮੀਰ ਵਿਰਸਾ ਗਵਾ ਲਿਆ ਹੈ। ਅੱਜ ਸਕੂਲਾਂ, ਕਾਲਜਾਂ ਵਿਚ ਨੈਤਿਕ ਸਿੱਖਿਆ ਵਿਚ ਵੀ ਨਿਘਾਰ ਆ ਗਿਆ ਹੈ। ਜਿਸ ਕਰਕੇ ਅਧਿਆਪਕਾਂ ਦਾ ਸਤਿਕਾਰ ਵੀ ਘਟ ਗਿਆ ਹੈ। ਖਾਣ-ਪੀਣ, ਪਹਿਨਣ ਅਤੇ ਰਹਿਣ-ਸਹਿਣ ਦੇ ਢੰਗਾਂ ਵਿਚੋਂ ਸਾਦਗੀ ਖਤਮ ਹੋ ਗਈ ਹੈ। ਸਿਹਤ ਪੱਖੋਂ ਵੀ ਬੇਜਾਨ ਜਿਹੇ ਲੱਗ ਰਹੇ ਹਾਂ। ਅੱਜ ਸਾਰਿਆਂ ਨੂੰ ਇਕੱਲਤਾ ਨੇ ਘੇਰ ਲਿਆ ਹੈ। ਬਜ਼ੁਰਗ ਨਵੀਂ ਪੀੜ੍ਹੀ ਦੀਆਂ ਆਦਤਾਂ ਤੋਂ ਪ੍ਰੇਸ਼ਾਨ ਕਿਸੇ ਨੂੰ ਝਿੜਕ ਜਾਂ ਸਲਾਹ ਵੀ ਨਹੀਂ ਦੇ ਸਕਦੇ। ਜਿਸ ਕਰਕੇ ਸਾਡਾ ਪਰਿਵਾਰਕ ਢਾਂਚਾ ਵਿਗੜ ਗਿਆ ਹੈ। ਤਰੱਕੀ ਵੀ ਜ਼ਰੂਰੀ ਹੈ, ਪੈਸਾ ਕਮਾਉਣਾ ਵੀ ਜ਼ਰੂਰੀ ਹੈ ਪਰ ਪਰਿਵਾਰਕ ਸਾਂਝ ਅਤੇ ਰਿਸ਼ਤੇ ਨਾਤਿਆਂ ਨੂੰ ਕਾਇਮ ਰੱਖਣਾ ਅੱਜ ਵੀ ਵੱਡੀ ਜ਼ਰੂਰਤ ਹੈ।


-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।


ਕੇਹੇ ਸਮਾਜ ਵਿਚ...
'ਮੀਡੀਆ ਨੇ ਵਿਖਾਇਆ ਸ਼ੀਸ਼ਾ : ਕੇਹੇ ਸਮਾਜ ਵਿਚ ਰਹਿ ਰਹੇ ਹਾਂ ਅਸੀਂ' ਇਕ ਮਾਰਗ ਦਰਸ਼ਕ ਲੱਗਿਆ। ਪ੍ਰਿੰਟ ਅਤੇ ਇਲੈਕਟ੍ਰਾਨਿਕ ਮੀਡੀਆ ਨੇ ਬਹੁਤ ਤਰੱਕੀ ਕੀਤੀ ਹੈ ਅਤੇ ਉਹ ਪਲ ਪਲ ਦੀਆਂ ਖ਼ਬਰਾਂ ਸਾਡੇ ਸਾਹਮਣੇ ਲਿਆਉਂਦੇ ਹਨ। ਪੱਤਰਕਾਰਾਂ ਦਾ ਕਾਰਜ ਕੋਈ ਸੁਖਾਲਾ ਨਹੀਂ ਹੁੰਦਾ ਬਹੁਤ ਹੀ ਮੁਸ਼ਕਿਲ ਭਰਿਆ ਹੁੰਦਾ ਹੈ। ਦੇਸ਼ ਵਿਚ ਆਪ-ਹੁਦਰੀਆਂ ਅਤੇ ਮਨਮਰਜ਼ੀਆਂ ਦਾ ਸਿਲਸਿਲਾ ਬਾਦਸਤੂਰ ਜਾਰੀ ਹੈ, ਜਿਹੜਾ ਚਿੰਤਾ ਦਾ ਵਿਸ਼ਾ ਹੈ। ਦੇਸ਼ ਦੀ ਵਿਗੜੀ ਹੋਈ ਸਥਿਤੀ ਨੂੰ ਨਕੇਲ ਪਾਉਣੀ ਬਹੁਤ ਜ਼ਰੂਰੀ ਹੈ ਅਤੇ ਸਮੇਂ ਦੀ ਲੋੜ ਹੈ। ਸੁਧਾਰਾਂ ਲਈ ਲਗਾਤਾਰ ਹੰਭਲੇ ਮਾਰਨ ਦੀ ਜ਼ਰੂਰਤ ਹੈ।


-ਜਸਪਾਲ ਸਿੰਘ ਲੋਹਾਮ
29/166, ਗਲੀ ਹਜ਼ਾਰਾ ਸਿੰਘ, ਮੋਗਾ।


ਬਿਰਖਾਂ ਬਾਝ ਨਾ...
ਬੀਤੇ ਦਿਨੀਂ ਮੈਗਜ਼ੀਨ 'ਚ ਡਾ: ਬਲਵਿੰਦਰ ਸਿੰਘ ਲੱਖੇਵਾਲੀ ਵੱਲੋਂ ਲਿਖਿਆ ਲੇਖ 'ਬਿਰਖਾਂ ਬਾਝ ਨਾ ਸੋਂਹਦੀ ਧਰਤੀ...' ਪੜ੍ਹਿਆ ਮਨ ਬਾਗੋਬਾਗ ਹੋ ਗਿਆ। ਉਨ੍ਹਾਂ ਨੇ ਰੁੱਖਾਂ ਦੀ ਮਹੱਤਤਾ ਬਾਰੇ ਬਾਖੂਬੀ ਲਿਖਿਆ ਹੈ। ਅੱਜ ਮਨੁੱਖ ਧਰਤੀ ਉਤੇ ਬਹੁਮੰਜ਼ਲੀ ਇਮਾਰਤਾਂ, ਇੱਟਾਂ, ਪੱਥਰਾਂ ਨਾਲ ਬਣਾ ਕੇ, ਖੜ੍ਹੀਆਂ ਕਰਕੇ ਖੁਸ਼ੀ ਮਨਾ ਰਿਹਾ ਹੈ ਪ੍ਰੰਤੂ ਧਰਤੀ ਦਾ ਅਸਲੀ ਸ਼ਿੰਗਾਰ ਤਾਂ ਰੁੱਖ ਹਨ। ਜ਼ਿੰਦਗੀ ਦੀ ਦੌੜ-ਭੱਜ ਵਿਚ ਅਸੀਂ ਕੁਦਰਤ ਦੇ ਇਨ੍ਹਾਂ ਬਹੁਮੁੱਲੇ ਤੋਹਫਿਆਂ ਨੂੰ ਵਿਸਾਰਦੇ ਜਾ ਰਹੇ ਹਾਂ। ਪ੍ਰਸਿੱਧ ਵਿਦਵਾਨ ਸੁਰਜੀਤ ਪਾਤਰ ਦੇ ਬੋਲ ਹਨ 'ਏਹੋ ਹੈ ਮੇਰੀ ਮੈਅਕਸ਼ੀ, ਏਸੇ 'ਚ ਮਸਤ ਹਾਂ, ਪੌਣਾਂ 'ਚੋਂ ਜ਼ਹਿਰ ਪੀ ਰਿਹਾ ਹਾਂ, ਮੈਂ ਦਰੱਖਤ ਹਾਂ।' ਬਰਸਾਤ ਦਾ ਮੌਸਮ ਹੈ ਇਸ ਮੌਸਮ 'ਚ ਹਰੇਕ ਮਨੁੱਖ ਨੂੰ ਇਕ ਪੌਦਾ ਜ਼ਰੂਰ ਲਗਾਉਣਾ ਚਾਹੀਦਾ ਹੈ। ਉਸ ਦੀ ਸਾਂਭ-ਸੰਭਾਲ ਵੀ ਕਰਨੀ ਚਾਹੀਦੀ ਹੈ। ਇਹੀ ਸਾਡਾ ਸਭ ਦਾ ਫ਼ਰਜ਼ ਹੈ, ਇਹੀ ਸਭ ਤੋਂ ਵੱਡਾ ਪੁੰਨ ਹੈ।


-ਮਾ: ਦੇਵ ਰਾਜ ਖੁੰਡਾ
ਰਾਮ ਸ਼ਰਮਨ ਕਾਲੋਨੀ, ਗੁਰਦਾਸਪੁਰ।

08-09-2017

 ਨਵਾਂ ਉਪਕਰਨ
ਪਿਛਲੇ ਦਿਨੀਂ ਸਰਕਾਰ ਨੇ ਫ਼ੈਸਲਾ ਕੀਤਾ ਸੀ ਕਿ ਝੋਨੇ ਦੀ ਕਟਾਈ ਲਈ ਝੋਨੇ ਦੀ ਪਰਾਲੀ ਨੂੰ ਸਾੜਨ ਦੀ ਥਾਂ ਕੁਤਰਾ ਕਰਨ ਲਈ ਮੌਜੂਦਾ ਕੰਬਾਈਨਾਂ ਨਾਲ ਐਸ.ਐਮ.ਐਸ. ਨਾਂਅ ਦਾ ਉਪਕਰਨ ਲਗਾਇਆ ਜਾਵੇ, ਜਿਸ ਉੱਪਰ ਤਕਰੀਬਨ ਡੇਢ ਦੋ ਲੱਖ ਰੁਪਏ ਦਾ ਖਰਚ ਆਉਂਦਾ ਹੈ। ਕਿਸਾਨਾਂ ਦਾ ਕਹਿਣਾ ਹੈ ਕਿ ਇਹ ਉਪਕਰਨ ਪੁਰਾਣੀਆਂ ਕੰਬਾਈਨਾਂ ਨਾਲ ਲਗਾਉਣ ਨਾਲ ਕਿਸਾਨਾਂ ਦਾ ਨੁਕਸਾਨ ਹੋਣਾ ਤੈਅ ਹੈ ਅਤੇ ਇਸ ਨਾਲ ਮਸ਼ੀਨ ਦੀ ਝੋਨਾ ਕੱਟਣ ਦੀ ਸਮਰੱਥਾ ਵੀ ਘਟ ਜਾਵੇਗੀ ਅਤੇ ਕਿਸਾਨਾਂ ਦਾ ਦੋ ਤੋਂ ਢਾਈ ਕੁਇੰਟਲ ਝੋਨੇ ਦਾ ਪ੍ਰਤੀ ਏਕੜ ਨਾਲ ਨੁਕਸਾਨ ਹੋਵੇਗਾ ਅਤੇ ਪੁਰਾਣੀਆਂ ਮਸ਼ੀਨਾਂ ਦੇ ਚੱਲਣ ਵਿਚ ਵੀ ਉਨ੍ਹਾਂ ਨੂੰ ਪ੍ਰੇਸ਼ਾਨੀ ਆਏਗੀ ਅਤੇ ਡੀਜ਼ਲ ਆਦਿ ਦਾ ਖਰਚਾ ਵੀ ਵਧ ਜਾਏਗਾ, ਜਿਸ ਦਾ ਸਿੱਧਾ ਅਸਰ ਕਿਸਾਨਾਂ 'ਤੇ ਪਵੇਗਾ ਜੋ ਕਿ ਆਪਣੇ ਝੋਨੇ ਦੀ ਕਟਾਈ ਕਿਰਾਏ 'ਤੇ ਕਰਾਉਂਦੇ ਹਨ। ਐਨ.ਜੀ.ਟੀ. ਨੇ ਇਥੋਂ ਤੱਕ ਵੀ ਕਿਹਾ ਹੈ ਕਿ ਸਿਰਫ ਪੰਜਾਬ ਦੇ ਕਿਸਾਨਾਂ 'ਤੇ ਹੀ ਇਹ ਉਪਕਰਨ ਲਗਾਉਣ ਦਾ ਕਿਉਂ ਦਬਾਅ ਪਾਇਆ ਜਾ ਰਿਹਾ ਹੈ, ਜਦੋਂ ਕਿ ਹੋਰਾਂ ਸੂਬਿਆਂ ਨੂੰ ਛੋਟ ਦਿੱਤੀ ਗਈ ਹੈ। ਸੋ, ਇਸ ਸਬੰਧੀ ਸਰਕਾਰ ਨੂੰ ਗੰਭੀਰਤਾ ਨਾਲ ਫ਼ੈਸਲਾ ਲੈਣ ਦੀ ਲੋੜ ਹੈ ਕਿ ਜੇਕਰ ਪਰਾਲੀ ਨੂੰ ਸਾੜਨ ਨੂੰ ਪੂਰੀ ਤਰ੍ਹਾਂ ਰੋਕਣ ਲਈ ਝੋਨੇ ਦੀ ਕਟਾਈ ਲਈ ਕੰਬਾਈਨਾਂ ਨਾਲ ਇਹ ਉਪਕਰਨ ਜ਼ਰੂਰੀ ਲਗਾਉਣਾ ਹੈ ਤਾਂ ਕਿਸਾਨਾਂ ਨੂੰ ਇਸ ਦੇ ਖਰਚੇ ਲਈ ਮਾਲੀ ਮਦਦ ਜ਼ਰੂਰ ਕਰਨੀ ਚਾਹੀਦੀ ਹੈ।

-ਅਮਰੀਕ ਸਿੰਘ ਚੀਮਾ
ਸ਼ਾਹਬਾਦੀਆ, ਜਲੰਧਰ।

ਸਖ਼ਤ ਕਾਰਵਾਈ ਦੀ ਲੋੜ
ਇਕ ਪਾਸੇ ਡਿਜੀਟਲ ਭਾਰਤ ਦੀ ਗੱਲ ਹੋ ਰਹੀ ਹੈ ਤੇ ਦੂਜੇ ਪਾਸੇ ਇਹੋ ਜਿਹੇ ਹਾਲਾਤ, ਇਵੇਂ ਦੇ ਬਾਬੇ ਤਾਂ ਭਾਰਤ ਵਿਚ ਹਜ਼ਾਰਾਂ ਦੀ ਗਿਣਤੀ ਵਿਚ ਹੈ, ਫਿਰ ਲੋਕਾਂ ਲਈ ਤਾਂ ਇਸ ਨੂੰ ਮੁਸ਼ਕਿਲਾਂ ਵਿਚ ਪਾਉਣਾ ਹੀ ਕਿਹਾ ਜਾ ਸਕਦਾ ਹੈ। ਹਜ਼ਾਰਾਂ ਕਰੋੜਾਂ ਦਾ ਨੁਕਸਾਨ ਹੈ। ਇਕ ਅਖ਼ਬਾਰ ਵਿਚ ਅਨੁਮਾਨ ਲਗਾ ਕੇ ਦੱਸਿਆ ਗਿਆ ਕਿ ਜੋ ਸੇਵਾਵਾਂ ਠੱਪ ਹੋਈਆਂ, ਉਸ ਨਾਲ ਲਗਪਗ ਇਕ ਹਜ਼ਾਰ ਕਰੋੜ ਦਾ ਨੁਕਸਾਨ ਹੋਵੇਗਾ, ਪੰਜ ਸੌ ਕਰੋੜ ਸੈਨਿਕ ਬਲਾਂ ਤੇ ਹੋਰ ਪ੍ਰਬੰਧਾਂ 'ਤੇ ਹੋ ਜਾਏਗਾ। ਇਹ ਸਿਆਸਤ ਦੀ ਦੇਣ ਹੈ, ਚੋਣਾਂ ਵੇਲੇ ਇਨ੍ਹਾਂ ਬਾਬਾ ਗੁਰੂਆਂ ਕੋਲੋਂ ਵੋਟਾਂ ਲੈਣ ਲਈ ਨੇਤਾ ਜਾਂਦੇ ਹਨ। ਫਿਰ ਇਹ ਵੋਟਾਂ ਬਾਬੇ ਦੇ ਕਹਿਣ 'ਤੇ ਭੁਗਤਦੀਆਂ ਵੀ ਹਨ। ਕਿਉਂ ਧਰਮ ਨੂੰ ਸਿਆਸਤ ਨਾਲ ਜੋੜਿਆ ਜਾ ਰਿਹਾ ਹੈ? ਧਰਮ ਗੁਰੂ ਦਾ ਆਪਣਾ ਵੱਖਰਾ ਸਥਾਨ ਹੈ, ਲੋਕਾਂ ਵਿਚ ਉਸ ਪ੍ਰਤੀ ਸ਼ਰਧਾ ਹੁੰਦੀ ਹੈ। ਸਿਆਸਤ ਵਾਸਤੇ ਉਨ੍ਹਾਂ ਦੀ ਸ਼ਰਧਾ ਨੂੰ ਵਰਤਣਾ ਵੀ ਗ਼ਲਤ ਹੈ। ਪੁਲਿਸ ਤੇ ਪ੍ਰਸ਼ਾਸਨ ਨੂੰ ਵੀ ਨੇਤਾਵਾਂ ਵੱਲੋਂ ਆਪਣੀ ਮਰਜ਼ੀ ਨਾਲ ਵਰਤਣਾ, ਸਮੁੱਚੇ ਢਾਂਜੇ ਨੂੰ ਲੰਗੜਾ ਕਰ ਰਿਹਾ ਹੈ। ਹਕੀਕਤ ਹੈ ਪੁਲਿਸ ਤੇ ਪ੍ਰਸ਼ਾਸਨ ਨੂੰ ਪਹਿਲਾਂ ਗ਼ਲਤ ਤਰੀਕੇ ਨਾਲ ਵਰਤਿਆ ਜਾਂਦਾ ਹੈ ਤੇ ਫਿਰ ਉਸ ਨੂੰ ਕੋਸਿਆ ਜਾਂਦਾ ਹੈ। ਬੇਹੱਦ ਅਫ਼ਸੋਸਜਨਕ ਹੈ ਜੋ ਵੀ ਹੋਇਆ। ਮਾਹਰਾਂ, ਬੁੱਧੀਜੀਵੀਆਂ, ਉੱਚ ਅਦਾਲਤ ਅਤੇ ਸਰਬਉੱਚ ਅਦਾਲਤ ਨੂੰ ਇਸ ਉੱਪਰ ਸਖ਼ਤ ਕਾਰਵਾਈ ਕਰਨੀ ਚਾਹੀਦੀ ਹੈ।

-ਪ੍ਰਭਜੋਤ ਕੌਰ ਢਿੱਲੋਂ।

 

07-09-2017

 ਕਿਸਾਨ ਯੂਨੀਅਨ
ਸਾਡੀਆਂ ਕਿਸਾਨ ਯੂਨੀਅਨਾਂ ਕਿਸਾਨਾਂ ਦੇ ਹੱਕ 'ਚ ਧਰਨੇ, ਰੇਲਾਂ ਰੋਕ ਕੇ ਆਦਿ ਆਪਣੀਆਂ ਮੰਗਾਂ ਮੰਨਵਾਉਣ ਦਾ ਯਤਨ ਕਰਦੀਆਂ ਹਨ। ਉਧਰ ਸਰਕਾਰਾਂ ਵੀ ਟੀ.ਵੀ., ਅਖ਼ਬਾਰ, ਰੇਡੀਓ 'ਚ ਸਾਰਾ ਦਿਨ ਕਿਸਾਨਾਂ ਦਾ ਹੀ ਗੁਣਗਾਣ ਕਰਦੀਆਂ ਹਨ ਪਰ ਏਨੀ ਭੱਜ-ਦੌੜ ਕਰਕੇ ਕਿਸਾਨਾਂ ਨੂੰ ਉਨ੍ਹਾਂ ਦੀ ਆਫਤ ਨਾਲ ਨੁਕਸਾਨੀ ਫ਼ਸਲ ਦਾ ਕੋਈ ਪੈਸਾ ਨਹੀਂ ਮਿਲਦਾ। 15-16 ਸਾਲ ਦੀ ਗੱਲ ਹੈ, ਇਕ ਕਿਸਾਨ ਯੂਨੀਅਨ ਦਾ ਵੱਡਾ ਨੇਤਾ ਪੰਜਾਬ 'ਚੋਂ ਲਗਪਗ 5000 ਕਿਸਾਨ ਇਕੱਠੇ ਕਰਕੇ ਦਿੱਲੀ ਲੈ ਗਿਆ। ਉਹ ਲੀਡਰ 4-5 ਆਪਣੇ ਖ਼ਾਸ ਬੰਦੇ ਲੈ ਕੇ ਰਾਸ਼ਟਰਪਤੀ ਪਤਾ ਨਹੀਂ ਪ੍ਰਧਾਨ ਮੰਤਰੀ ਕੋਲ ਗਿਆ ਫਿਰ 8-10 ਘੰਟੇ ਬਾਅਦ ਆ ਕੇ ਕਹਿੰਦਾ ਕਿਸਾਨ ਭਰਾਵੋ, ਤੁਹਾਨੂੰ ਵਧਾਈਆਂ ਕਿਉਂਕਿ ਮੈਨੂੰ ਸਰਕਾਰ ਨੇ ਰਾਜ ਸਭਾ ਦਾ ਮੈਂਬਰ ਨਿਯੁਕਤ ਕਰ ਦਿੱਤਾ ਹੈ। ਭੋਲੇ ਕਿਸਾਨਾਂ ਨੇ ਤਾੜੀਆਂ ਜੈਕਾਰੇ ਛੱਡ ਤੇ ਪਿੰਡ ਨੂੰ ਮੁੜ ਪਏ। ਕਿਸੇ ਨੇ ਨਹੀਂ ਪੁੱਛਿਆ ਕਿ ਕੀ ਕਰਨ ਆਏ ਸੀ ਤੇ ਕੀ ਕਰਕੇ ਚੱਲੇ ਹਾਂ। ਕਿਸਾਨਾਂ ਨੂੰ ਇਹ ਕਿਉਂ ਨਹੀਂ ਪਤਾ ਲਗਦਾ ਕਿ ਕੁੱਤੀ ਚੋਰ ਨਾਲ ਰਲੀ ਹੋਈ ਹੈ। ਨਹੀਂ, ਕਦੇ ਤਾਂ ਕੁਝ ਪੱਲੇ ਪਵੇ।


-ਮੱਘਰ ਸਿੰਘ
ਪਿੰਡ ਦੰਦਰਾਲਾ ਖਰੋਡ, ਪਟਿਆਲਾ।


ਮਨੁੱਖੀ ਤਸਕਰੀ
ਮਨੁੱਖੀ ਤਸਕਰੀ ਵਿਚ ਛੋਟੀ ਉਮਰ ਦੇ ਬੱਚੇ ਜ਼ਿਆਦਾ ਸ਼ਿਕਾਰ ਬਣ ਰਹੇ ਹਨ। ਲੜਕੀਆਂ ਨੂੰ ਗਾਇਬ ਕਰਨ ਤੋਂ ਬਾਅਦ ਉਨ੍ਹਾਂ ਨੂੰ ਦੇਹ ਵਪਾਰ ਦੇ ਧੰਦੇ ਵਾਲੇ ਕੋਠਿਆਂ 'ਤੇ ਪਹੁੰਚਾ ਦਿੱਤਾ ਜਾਂਦਾ ਹੈ, ਜਿਥੇ ਬੱਚੇ ਦੀ ਵੱਡੀ ਕੀਮਤ ਵਸੂਲ ਕੀਤੀ ਜਾਂਦੀ ਹੈ। ਪੈਸੇ ਦਾ ਲਾਲਚ ਪਤਾ ਨਹੀਂ ਕਦੋਂ ਮਨੁੱਖ ਅੰਦਰ ਸ਼ੈਤਾਨ ਜਗ੍ਹਾ ਦੇਵੇ ਅਤੇ ਉਹ ਕਿਸੇ ਮਾਸੂਮ ਨੂੰ ਆਪਣਾ ਨਿਸ਼ਾਨਾ ਬਣਾ ਲਵੇ। ਬੱਚਿਆਂ ਦਾ ਗੁਆਚਣਾ ਜਿਸ ਤਰ੍ਹਾਂ ਵਧ ਰਿਹਾ ਹੈ, ਇਹ ਬਹੁਤ ਚਿੰਤਾਜਨਕ ਗੱਲ ਹੈ, ਕਿਉਂਕਿ ਅਗਵਾ ਕਰਕੇ ਬੱਚਿਆਂ ਦੇ ਮਾਂ-ਬਾਪ ਤੋਂ ਫਿਰੌਤੀ ਵਸੂਲਣੀ, ਬੱਚਿਆਂ ਦੇ ਗੁਰਦੇ, ਲੀਵਰ, ਅੱਖਾਂ ਅਤੇ ਹੋਰ ਅੰਗ ਕੱਢ ਕੇ ਵੇਚ ਦੇਣੇ ਜਾਂ ਹੋਰ ਖ਼ਤਰਨਾਕ ਕੰਮਾਂ ਵਿਚ ਲਾ ਦੇਣਾ। ਇਸ ਕਰਕੇ ਮਾਸੂਮ ਬੱਚਿਆਂ ਨੂੰ ਅਪਰਾਧੀਆਂ ਤੋਂ ਬਚਾ ਕੇ ਰੱਖਣ ਲਈ ਮਾਂ-ਬਾਪ ਨੂੰ ਸਾਵਧਾਨ ਰਹਿਣ ਦੀ ਲੋੜ ਹੈ। ਇਸ ਦੇ ਨਾਲ ਬੱਚਿਆਂ ਨੂੰ ਇਹ ਵੀ ਦੱਸਦੇ ਰਹਿਣਾ ਚਾਹੀਦਾ ਹੈ ਕਿ ਉਹ ਕਿਸੇ ਅਣਜਾਣ ਵਿਅਕਤੀ ਦੇ ਨਾਲ ਇੱਧਰ-ਉੱਧਰ ਜਾਣ ਤੋਂ ਇਨਕਾਰ ਕਰਨ।


-ਪ੍ਰਸ਼ੋਤਮ ਪੱਤੋ
ਪਿੰਡ ਤੇ ਡਾਕ: ਪੱਤੋ ਹੀਰਾ ਸਿੰਘ (ਮੋਗਾ)।


ਇਕ ਫ਼ੌਜੀ ਦਾ ਸੁਨੇਹਾ
ਇਹ ਸੁਨੇਹਾ ਇਕ ਫ਼ੌਜੀ ਜਵਾਨ ਰਾਤ ਸਮੇਂ ਆਪਣੇ ਦੇਸ਼ ਵਾਸੀਆਂ ਨੂੰ ਦਿੰਦਾ ਹੈ ਤਾਂ ਜਵਾਨਾਂ ਪ੍ਰਤੀ ਮਾਣ ਮਹਿਸੂਸ ਹੁੰਦਾ ਹੈ। ਇਸ ਸੁਨੇਹੇ ਦਾ ਅੰਤਰੀਵ ਭਾਵ ਇਹ ਹੈ ਕਿ ਅਸੀਂ ਆਪਣੇ ਦੇਸ਼ ਅੰਦਰ ਬੇਫ਼ਿਕਰ ਹੋ ਕੇ ਸਿਰਫ ਆਪਣੇ ਫ਼ੌਜੀ ਜਵਾਨਾਂ ਕਰਕੇ ਹੀ ਸੌਂਦੇ ਹਾਂ। ਸਾਡਾ ਗੁਆਂਢ ਚੰਦਰਾ ਹੈ, ਇਸੇ ਲਈ ਸਾਡਾ ਜਵਾਨ ਸਾਡੀ ਖ਼ੈਰੀਅਤ ਮੰਗਦਾ ਹੋਇਆ ਬੰਦੂਕ ਦੀ ਨੋਕ ਦੁਸ਼ਮਣ ਵੱਲ ਕਰਕੇ ਰਾਤਾਂ ਝਾਕਦਾ ਹੈ। ਫ਼ੌਜੀ ਦੀ ਦੇਸ਼-ਭਗਤੀ, ਇਮਾਨਦਾਰੀ, ਸਮੇਂ ਦੀ ਪਾਬੰਦੀ ਅਤੇ ਦੇਸ਼ ਦੇ ਦੁਸ਼ਮਣ ਨੂੰ ਜਵਾਬ ਦੇਣਾ ਹੀ ਮਾਣ-ਮੱਤਾ ਸੁਨੇਹਾ ਹੈ। ਸਾਡਾ ਅਮੀਰ ਸੱਭਿਆਚਾਰ, ਸੱਭਿਅਤਾ, ਰਿਵਾਜ਼ ਅਤੇ ਚਾਅ ਮਲਾਰ ਮਾਨਣ ਲਈ ਸਾਡੇ ਸਰਹੱਦੀ ਰੱਖਵਾਲਿਆਂ ਦਾ ਸਾਡੇ ਲਈ ਵੱਡਾ ਯੋਗਦਾਨ ਹੈ। ਉਹ ਵਤਨ ਵਾਸੀਆਂ ਨੂੰ ਸ਼ੁੱਭ ਰਾਤਰੀ ਆਖ ਕੇ ਆਪਣੀ ਨਜ਼ਰ ਅਤੇ ਨੋਕ ਦੁਸ਼ਮਣ ਵੱਲ ਕਰ ਲੈਂਦਾ ਹੈ। ਸਿੱਜਦਾ ਹੈ, ਫ਼ੌਜੀ ਜਵਾਨ ਨੂੰ ਜਿਨ੍ਹਾਂ 'ਤੇ ਭਾਰਤ ਮਾਤਾ ਨੂੰ ਮਾਣ ਹੈ ਅਤੇ ਵਤਨ ਵਾਸੀਆਂ ਨੂੰ ਆਪਣੇ ਫ਼ੌਜੀ ਵੀਰ 'ਤੇ ਸਵੈਮਾਣ ਹੈ। ਜੈ ਜਵਾਨ!


-ਸੁਖਪਾਲ ਸਿੰਘ ਗਿੱਲ
ਅਬਿਆਣਾ ਕਲਾਂ।


ਬਾਬਿਆਂ ਤੋਂ ਬਚੋ
ਮੇਰੀ ਬੜੀ ਨਿਮਰ ਸਲਾਹ ਹੈ ਉਨ੍ਹਾਂ ਲੋਕਾਂ ਨੂੰ ਜਿਹੜੇ ਡੇਰਿਆਂ ਵਿਚ ਖੱਜਲ-ਖੁਆਰ ਹੁੰਦੇ ਹਨ। ਜਿਹੜਾ ਵਿਸ਼ਵਾਸ ਲੈ ਕੇ ਲੋਕ ਡੇਰਿਆਂ ਨੂੰ ਭੱਜਦੇ ਹਨ, ਉਸੇ ਵਿਸ਼ਵਾਸ ਨਾਲ ਆਪਣੇ ਘਰ ਦੀ ਚਾਰਦੀਵਾਰੀ ਦਾ ਨਿਰਮਾਣ ਕਰਨ। ਕਿਸੇ ਦੇਹਧਾਰੀ ਦੀ ਚਾਕਰੀ ਲਈ ਜੋ ਸ਼ਰਧਾ ਰੱਖਦੇ ਹਨ, ਉਹੀ ਸ਼ਰਧਾ ਦੀ ਪੱਖੀ ਆਪਣੇ ਘਰ ਦੇ ਜੀਆਂ ਦੀ ਖੁਸ਼ੀ ਲਈ ਝੱਲਣ। ਸੇਵਾ ਭਾਵਨਾ ਦੀ ਪੂਰਤੀ ਲਈ ਆਪਣੇ ਬਜ਼ੁਰਗਾਂ ਨੂੰ ਚੁਣਨ, ਬੱਚਿਆਂ ਦੇ ਭਵਿੱਖ ਨੂੰ ਉੱਦਮ ਦੇ ਲੜ ਲਾਉਣ। ਪਿਆਰ ਦੇ ਭਾਵਾਂ ਦੀ ਅਗਰਬੱਤੀ ਘਰ ਵਿਚ ਜਲਾਉਣ, ਘਰ ਦਾ ਵਾਤਾਵਰਨ ਪਵਿੱਤਰ ਹੋ ਜਾਵੇਗਾ। ਹਰ ਮਨੁੱਖ ਆਪਣੇ ਚੌਗਿਰਦੇ ਤੇ ਘਰ ਦੇ ਵਿਹੜੇ ਵਿਚ ਵਫ਼ਾਦਾਰੀ ਤੇ ਮੁਹੱਬਤੀ ਬੂਟੇ ਲਾਵੇ ਤਾਂ ਆਲੇ-ਦੁਆਲੇ ਵਾਹਿਗੁਰੂ ਦੀ ਮਿਹਰ ਨਾਲ ਖੁਸ਼ੀਆਂ ਦੀ ਮਹਿਕ ਆਵੇਗੀ।


-ਪੁਨਰਦੀਪ ਕੌਰ ਜੌਹਲ
ਆਸਟਰੇਲੀਆ।

06-09-2017

 ਹਾਮਿਦ ਅੰਸਾਰੀ ਦੀ ਵਿਚਾਰਧਾਰਾ

ਹਮਦਰਦ ਜੀ ਨੇ ਆਪਣੀ ਸੰਪਾਦਕੀ ਵਿਚ ਸ੍ਰੀ ਹਾਮਿਦ ਅੰਸਾਰੀ ਦੇ ਬਿਆਨ ਦੀ ਵਿਆਖਿਆ ਕਰਦਿਆਂ ਕਈ ਪੱਖਾਂ 'ਤੇ ਰੌਸ਼ਨੀ ਪਾਈ ਹੈ। ਅੰਸਾਰੀ ਜੀ ਨੇ ਆਪਣੀ ਭਾਵਨਾ ਪ੍ਰਗਟ ਕਰਦਿਆਂ ਬਿਆਨ ਕੀਤਾ ਹੈ ਕਿ ਭਾਰਤ ਵਿਚ ਘੱਟ-ਗਿਣਤੀਆਂ ਅਸੁਰੱਖਿਅਤ ਮਹਿਸੂਸ ਕਰ ਰਹੀਆਂ ਹਨ। ਡੰਗਰਾਂ ਦੀ ਖ਼ਰੀਦੋ ਫ਼ਰੋਖ਼ਤ ਅਤੇ ਗਊ ਮਾਸ ਦੀ ਆੜ ਵਿਚ ਬੇਸ਼ੱਕ ਅਫ਼ਵਾਹ ਹੀ ਹੋਵੇ, ਕਿੰਨੇ ਮੁਸਲਿਮ ਭਾਈਚਾਰੇ ਦੇ ਲੋਕਾਂ ਦੀ ਕੁੱਟਮਾਰ ਤੇ ਕਤਲ ਹੋਏ ਹਨ। ਗੁਜਰਾਤ ਦੰਗਿਆਂ ਵਿਚ ਬਹੁਗਿਣਤੀ ਬੇਕਸੂਰ ਮੁਸਲਮਾਨ ਕਤਲ ਗੀਤੇ ਗਏ ਤੇ ਸਾੜਫੂਕ ਹੋਈ। ਕੀ ਉਹ ਭਾਰਤ ਦੇ ਨਾਗਰਿਕ ਨਹੀਂ ਸਨ? ਘੱਟ-ਗਿਣਤੀ ਸਿੱਖ ਆਜ਼ਾਦੀ ਪ੍ਰਾਪਤੀ ਵਿਚ 80 ਫ਼ੀਸਦੀ ਹਿੱਸਾ ਪਾਉਣ ਵਾਲਿਆਂ ਨੂੰ ਭਾਰਤ ਆਜ਼ਾਦ ਹੁੰਦਿਆਂ ਹੀ ਜਰਾਇਮ ਪੇਸ਼ਾ ਕਰਾਰ ਦੇ ਦਿੱਤਾ ਗਿਆ ਸੀ। ਨਵੰਬਰ 1984 ਵਿਚ ਸਿੱਖਾਂ ਦਾ ਕਤਲੇਆਮ ਸਭ ਦੁਨੀਆ ਜਾਣਦੀ ਹੈ। ਇਹ ਸਭ ਘੋਰ ਅਪਰਾਧ ਕਰਾਉਣ ਵਾਲੇ ਕੌਣ ਸਨ? ਫਿਰ ਘੱਟ-ਗਿਣਤੀਆਂ ਨੂੰ ਸੁਰੱਖਿਅਤ ਕਿਵੇਂ ਕਹਿ ਸਕਦੇ ਹਾਂ।

-ਮਾ: ਮਹਿੰਦਰ ਸਿੰਘ ਸਿੱਧੂ
ਸਿੱਧਵਾਂ ਕਲਾਂ, ਜ਼ਿਲ੍ਹਾ ਲੁਧਿਆਣਾ।

ਪੰਜਾਬ ਨਾਲ ਮਤਰੇਈ ਮਾਂ ਵਾਲਾ ਸਲੂਕ

ਪਿਛਲੇ ਦਿਨੀਂ 'ਅਜੀਤ' ਦੇ ਸੰਪਾਦਕੀ ਅਤੇ ਹਰਜਿੰਦਰ ਸਿੰਘ ਲਾਲ ਦੇ ਲੇਖ ਨੇ ਸਾਫ਼ ਤਸਵੀਰ ਪੇਸ਼ ਕੀਤੀ ਹੈ। ਲੱਗਦਾ ਹੈ ਕਿ ਉੱਤਰ-ਪੂਰਬੀ ਅਤੇ ਪਹਾੜੀ ਰਾਜਾਂ ਦੇ ਉਦਯੋਗਾਂ ਲਈ ਦੋ ਦਹਾਕਿਆਂ ਤੋਂ ਲਾਗੂ ਟੈਕਸ ਰਿਆਇਤਾਂ ਦਾ ਕੇਂਦਰ ਵਲੋਂ ਸੰਨ 2027 ਤੱਕ ਲਈ ਐਲਾਨਿਆ ਵਾਧਾ ਸਿਆਸੀ ਮੰਤਵ ਦਾ ਹਿੱਸਾ ਹੈ। ਕਿਉਂਕਿ ਹਿਮਾਚਲ ਪ੍ਰਦੇਸ਼, ਮੇਘਾਲਿਆ, ਨਾਗਾਲੈਂਡ, ਤ੍ਰਿਪੁਰਾ ਅਤੇ ਮਿਜ਼ੋਰਮ ਸੰਨ 2018 ਵਿਚ ਅਤੇ ਸਿੱਕਮ ਤੇ ਅਰੁਣਾਚਲ ਪ੍ਰਦੇਸ਼ ਵੀ ਪੌਣੇ ਦੋ ਕੁ ਸਾਲ ਵਿਚ ਚੋਣ ਮੇਲਾ ਲਾਉਣ ਜਾ ਰਹੇ ਹਨ। ਜੀ.ਐਸ.ਟੀ. ਕੁੰਡੇ ਦੇ ਅੜਿੱਕੇ ਨੂੰ ਟੈਕਸ ਛੋਟ ਰਿਫੰਡ ਅਧੀਨ ਸੁਲਝਾ ਲਿਆ ਜਾਣਾ ਹੈ। ਪੰਜਾਬ ਦੇ ਉਦਯੋਗਿਕ ਅਦਾਰੇ ਵੀ ਟੈਕਸ ਛੋਟਾਂ ਵਾਲੇ ਰਾਜਾਂ ਵੱਲ ਰੁਖ਼ ਕਰਨਗੇ। ਪਹਿਲਾਂ ਵੀ ਪੰਜਾਬ ਦੇ ਉਦਯੋਗ ਨੂੰ ਮਾਰ ਪੈਂਦੀ ਆ ਰਹੀ ਹੈ ਅਤੇ ਇਥੋਂ ਤੱਕ ਕਿ ਸੰਤਾਪ ਦੇ ਸ਼ਿਕਾਰ ਪੰਜਾਬ ਦੇ ਸਰਹੱਦੀ ਜ਼ਿਲ੍ਹੇ ਤੇ ਕੰਢੀ ਖੇਤਰਾਂ ਨੂੰ ਐਸੀਆਂ ਰਿਆਇਤਾਂ ਤੋਂ ਵਾਂਝਾ ਰੱਖਿਆ ਗਿਆ ਹੈ। ਪੰਜਾਬ ਨੂੰ ਬਚਾਉਣ ਲਈ ਇਹ ਸੰਘਰਸ਼ ਕਿਸੇ ਇਕ ਕੌਮ ਨਾਲ ਜਾਂ ਇਕ ਧਰਮ ਨਾਲ ਜੁੜ ਜਾਂਦਾ ਹੈ ਅਤੇ ਆਰਥਿਕ ਮੁੱਦਾ ਗੁਆਚ ਜਾਂਦਾ ਹੈ। ਵਧੀਕੀਆਂ ਤੇ ਦੁਸ਼ਵਾਰੀਆਂ ਹੱਥੋਂ ਗਰਮਾਏ ਲਹੂ ਪੰਜਾਬ ਲਈ ਕੋਈ ਵੀ ਲਾਹਾ ਪ੍ਰਾਪਤ ਨਹੀਂ ਕਰ ਸਕੇ ਹਨ। ਨੌਜਵਾਨੋਂ ਜਿਸਮਾਨੀ ਲੜਾਈ ਲਈ ਬਿਲਕੁਲ ਨਾ ਸੋਚਿਉ। ਸਿਰ ਦੇਣ ਦੀ ਥਾਂ ਸਿਰਾਂ ਨਾਲ ਸੋਚ ਕੇ ਸਰਦਾਰੀਆਂ ਕਾਇਮ ਕਰਿਉ। ਸੰਜਮ ਤੇ ਸਿਆਣਪ ਨਾਲ ਹੱਕ ਲੈਣ ਦੀ ਜੁਗਤ ਲੱਭੋ ਤੇ ਜੁਗ ਜੁਗ ਜੀਓ।

-ਕੁਲਵੰਤ ਕੌਰ
ਆਫ਼ਿਸ ਮੈਨੇਜਮੈਂਟ ਐਂਡ ਸੈਕ੍ਰੇਟੇਰੀਅਲ ਪ੍ਰੈਕਟਿਸ ਵਿਭਾਗ
ਗੁਰੂ ਨਾਨਕ ਖ਼ਾਲਸਾ ਕਾਲਜ, ਡਰੋਲੀ ਕਲਾਂ, ਜਲੰਧਰ।

ਕਿਸਾਨਾਂ ਦੀ ਲੁੱਟ

ਵਿਸ਼ਵ ਪੱਧਰ 'ਤੇ ਡੀਜ਼ਲ 106 ਡਾਲਰ ਪ੍ਰਤੀ ਬੈਰਲ ਤੋਂ ਘਟ ਕੇ 45.64 ਡਾਲਰ ਪ੍ਰਤੀ ਬੈਰਲ ਰਹਿ ਗਿਆ ਹੈ। ਡੀ.ਏ.ਪੀ. 650 ਡਾਲਰ ਟਨ ਤੋਂ ਘਟ ਕੇ 370 ਡਾਲਰ ਰਹਿ ਗਈ, ਅਮੋਨੀਆ, ਸਲਫਰ, ਯੂਰੀਆ ਆਦਿ ਦੇ ਭਾਅ ਵਿਚ ਵਿਸ਼ਵ ਮੰਡੀ ਵਿਚ ਭਾਰੀ ਗਿਰਾਵਟ ਆਈ ਪਰ ਭਾਰਤ ਸਰਕਾਰ ਨੇ ਇਸ ਘਟੇ ਭਾਅ ਦਾ ਕਿਸਾਨਾਂ ਨੂੰ ਕੋਈ ਫ਼ਾਇਦਾ ਨਹੀਂ ਹੋਣ ਦਿੱਤਾ। ਉਲਟਾ ਖਾਦ ਉੱਤੇ ਸਬਸਿਡੀ 2012-13 'ਚ 70000 ਕਰੋੜ ਰੁਪਏ ਸੀ, ਹੁਣ ਨਾਨ ਯੂਰੀਆ ਖਾਦਾਂ ਉੱਤੇ 36088 ਕਰੋੜ ਤੋਂ ਘਟਾ ਕੇ 2016-17 ਵਿਚ 19000 ਕਰੋੜ ਰੁਪਏ ਰਹਿ ਗਈ ਹੈ, ਜਦੋਂ ਕਿ ਯੂਰੀਆ ਖਾਦ ਉੱਤੇ ਜੋ ਸਬਸਿਡੀ 33924 ਕਰੋੜ ਰੁਪਏ ਵਧ ਕੇ 51000 ਕਰੋੜ ਹੋ ਗਈ ਹੈ। ਖਾਦਾਂ ਦੀਆਂ ਕੀਮਤਾਂ ਨੂੰ ਜੀ.ਐਸ.ਟੀ. ਤੋਂ ਪਹਿਲਾਂ ਸਥਿਰ ਰੱਖਿਆ ਪਰ ਵਿਸ਼ਵ ਮੰਡੀ ਤੋਂ ਸਸਤੇ ਭਾਅ ਖ਼ਰੀਦ ਕੇ ਉਨ੍ਹਾਂ ਉੱਤੇ ਦਿੱਤੀ ਜਾਣ ਵਾਲੀ ਸਬਸਿਡੀ ਬਚਾਅ ਕੇ ਆਪਣਾ ਖਜ਼ਾਨਾ ਭਰ ਲਿਆ। ਜਿਥੇ ਕਿਸਾਨਾਂ ਨੂੰ ਸਰਕਾਰੀ ਮਦਦ ਦੀ ਸਖ਼ਤ ਲੋੜ ਹੈ ਸਰਕਾਰ ਉਨ੍ਹਾਂ ਨੂੰ ਲੁੱਟ ਕੇ ਧਨਾਢਾਂ ਦੇ ਘਰ ਭਰ ਰਹੀ ਹੈ। ਕਿਸਾਨਾਂ ਦੇ ਮਸੀਹਾ ਅਖਵਾਉਣ ਵਾਲੇ ਕਿਸੇ ਵੀ ਵਿਅਕਤੀ ਨੇ ਇਹ ਮੁੱਦਾ ਨਹੀਂ ਉਠਾਇਆ।

-ਜਸਕਰਨ ਲੰਡੇ
ਪਿੰਡ ਤੇ ਡਾਕ: ਲੰਡੇ, ਜ਼ਿਲ੍ਹਾ ਮੋਗਾ।

05-09-2017

 ਅਧਿਆਪਕ ਦਾ ਸਨਮਾਨ

ਭਾਰਤ ਇਕ ਬਹੁਤ ਜ਼ਿਆਦਾ ਗੁਰੂ ਅਰਾਧਨਾ ਵਾਲਾ ਦੇਸ਼ ਹੈ। ਪੁਰਾਣੇ ਸਮੇਂ ਵਿਚ ਵਿਦਿਆਰਥੀ ਗੁਰੂਕੁਲ ਵਿਚ ਪੜ੍ਹਨ ਜਾਇਆ ਕਰਦੇ ਸਨ ਅਤੇ ਆਪਣੇ ਗੁਰੂ ਭਾਵ ਅਧਿਆਪਕ ਦੇ ਹੁਕਮ ਦੀ ਪਾਲਣਾ ਕਰਨਾ ਆਪਣਾ ਫਰਜ਼ ਸਮਝਦੇ ਸਨ। ਇਸ ਦੀ ਇਕ ਮਿਸਾਲ ਇਹ ਹੈ ਕਿ ਇਕਲਵਿਆ ਦਾ ਆਪਣਾ ਅੰਗੂਠਾ ਗੁਰੂ-ਦਖਸ਼ਣਾ ਦੇ ਰੂਪ ਵਿਚ ਆਪਣੇ ਗੁਰੂ ਦਰੋਣਾਚਾਰੀਆ ਨੂੰ ਭੇਟ ਕਰਨਾ ਅਤੇ ਇਸ ਤਰ੍ਹਾਂ ਦੀਆਂ ਅਨੇਕਾਂ ਮਿਸਾਲਾਂ ਨਾਲ ਇਤਿਹਾਸ ਭਰਿਆ ਪਿਆ ਹੈ। ਪੂਰੇ ਭਾਰਤ ਵਿਚ 5 ਸਤੰਬਰ ਨੂੰ ਅਧਿਆਪਕ ਦਿਵਸ ਵਜੋਂ ਮਨਾਇਆ ਜਾਂਦਾ ਹੈ। ਇਸ ਦਿਨ ਦੀ ਮਹੱਤਤਾ ਇਸ ਕਰਕੇ ਵੀ ਹੈ ਕਿਉਂਕਿ ਭਾਰਤ ਦੇ ਪਹਿਲੇ ਉਪ-ਰਾਸ਼ਟਰਪਤੀ ਅਤੇ ਦੂਸਰੇ ਰਾਸ਼ਟਰਪਤੀ ਡਾਕਟਰ ਸਰਵਪੱਲੀ ਰਾਧਾਕ੍ਰਿਸ਼ਨਨ ਦਾ ਜਨਮ ਦਿਨ ਹੁੰਦਾ ਹੈ ਅਤੇ ਉਹ ਵੀ ਇਕ ਅਧਿਆਪਕ ਸਨ। ਉਨ੍ਹਾਂ ਆਪਣੇ ਉੱਚ ਅਹੁਦਿਆਂ 'ਤੇ ਰਹਿੰਦੇ ਹੋਏ ਬਹੁਤ ਸਾਰੇ ਮਾਨਵ ਭਲਾਈ ਦੇ ਕਾਰਜ ਕੀਤੇ ਅਤੇ ਭਾਰਤ ਅੰਦਰ ਸਿੱਖਿਆ ਦੇ ਮਿਆਰ ਨੂੰ ਉੱਚਾ ਚੁੱਕਣ ਵਿਚ ਅਹਿਮ ਰੋਲ ਅਦਾ ਕੀਤਾ। ਆਓ! ਆਪਾਂ ਸਾਰੇ ਮਿਲ ਕੇ ਅਧਿਆਪਕ ਦਿਵਸ ਦੇ ਮੌਕੇ 'ਤੇ ਸਮਾਜ ਵਿਚਲੇ ਅਧਿਆਪਕਾਂ ਨੂੰ ਬਣਦਾ ਸਤਿਕਾਰ ਦੇਈਏ ਕਿਉਂਕਿ ਅਧਿਆਪਕ ਹੀ ਰਾਸ਼ਟਰ ਦਾ ਨਿਰਮਾਣ ਕਰਦੇ ਹਨ।

-ਬਲਜੀਤ ਕੌਰ 'ਜੱਸੀ'
ਕੇ.ਐਮ.ਵੀ. ਕਾਲਜ, ਜਲੰਧਰ।

ਕੇਂਦਰੀ ਸਿਹਤ ਮੰਤਰਾਲੇ ਦੇ ਧਿਆਨ ਹਿਤ

ਅਸੀਂ ਚਿੰਤਪੁਰਨੀ ਮੈਡੀਕਲ ਕਾਲਜ, ਬੁੰਗਾਲ, ਪਠਾਨਕੋਟ ਦੇ ਐਮ.ਬੀ.ਬੀ.ਐਸ. ਦੇ ਪਹਿਲੇ ਅਤੇ ਤੀਜੇ ਸਾਲ ਦੇ ਵਿਦਿਆਰਥੀ ਤੁਹਾਨੂੰ ਪੱਤਰ ਲਿਖ ਰਹੇ ਹਾਂ।ਸਾਡਾ ਮੈਡੀਕਲ ਕਾਲਜ, ਜੋ ਕਿ 2011 ਵਿਚ ਖੁੱਲ੍ਹਿਆ ਸੀ, ਅਜੇ ਵੀ ਐਮ.ਸੀ.ਆਈ. (ਮੈਡੀਕਲ ਕੌਂਸਲ ਆਫ ਇੰਡੀਆ) ਤੋਂ ਮਾਨਤਾ ਪ੍ਰਾਪਤ ਨਹੀਂ ਕਰ ਸਕਿਆ। ਇਸੇ ਹੀ ਕਾਲਜ ਦੇ ਵਿਦਿਆਰਥੀਆਂ ਦਾ ਪਹਿਲਾ ਬੈਚ (ਸਾਡਾ ਸੀਨੀਅਰ ਬੈਚ) ਅਜੇ ਤੱਕ ਐਮ.ਸੀ.ਆਈ. ਤੋਂ ਮਾਨਤਾ ਦੀ ਉਡੀਕ ਕਰ ਰਿਹਾ ਹੈ। ਭਾਰਤ ਸਰਕਾਰ ਅਤੇ ਸਿਹਤ ਮੰਤਰਾਲੇ ਤੇ ਡੀ.ਈ.ਐਲ.ਐਚ.ਆਈ. ਨੂੰ ਬੇਨਤੀ ਹੈ ਕਿ ਸਾਡੀ ਐਮ.ਬੀ.ਬੀ.ਐਸ. ਦੀ ਡਿਗਰੀ ਦੀ ਐਮ.ਸੀ.ਆਈ. ਤੋਂ ਮਾਨਤਾ ਦਿਵਾਉਣ ਵਿਚ ਮਦਦ ਕਰਨ, ਤਾਂ ਜੋ ਅਸੀਂ ਆਪਣੀ ਡਿਗਰੀ ਵਕਤ ਸਿਰ ਪ੍ਰਾਪਤ ਕਰਕੇ ਭਾਰਤ ਦੇ ਗ਼ਰੀਬ ਅਤੇ ਜ਼ਰੂਰਤਮੰਦ ਲੋਕਾਂ ਦੀ ਸੇਵਾ ਕਰ ਸਕੀਏ।

ਆਪ ਜੀ ਦੇ ਸ਼ੁੱਭਚਿੰਤਕ
ਚਿੰਤਪੁਰਨੀ ਮੈਡੀਕਲ ਕਾਲਜ ਦੇ ਵਿਦਿਆਰਥੀ।

ਸੁਪਨੇ ਵੇਚਣ ਵਾਲੇ

ਪਿਛਲੇ ਦਿਨੀਂ ਨੌਜਵਾਨ ਲੇਖਕ ਸਵਰਨ ਸਿੰਘ ਟਹਿਣਾ ਦਾ ਸੰਪਾਦਕੀ ਸਫ਼ੇ 'ਤੇ 'ਜੱਟਾਂ ਦੇ ਸੁਪਨੇ ਵੇਚਣ ਵਾਲੇ ਕਲਾਕਾਰਾਂ ਦੀ ਸੋਚ ਨੂੰ ਵੰਗਾਰਦੇ ਗੀਤ' ਸਿਰਲੇਖ ਅਧੀਨ ਲੇਖ ਪੜ੍ਹਿਆ, ਜੋ ਬਹੁਤ ਚੰਗਾ ਲੱਗਾ। ਸੱਭਿਆਚਾਰ ਦੇ ਅਖ਼ੌਤੀ ਰਾਖੇ ਜਾਂ ਸੇਵਾ ਦੇ ਨਾਂਅ 'ਤੇ ਫੋਕੀ ਸ਼ੁਹਰਤ ਖੱਟਣ ਲਈ ਗਾਇਕ ਅਤੇ ਗੀਤਕਾਰਾਂ ਨੇ ਕਿਸਾਨ ਦੀ ਅਸਲ ਜ਼ਿੰਦਗੀ ਤੋਂ ਕਿਤੇ ਦੂਰ ਦੀਆਂ ਗੱਲਾਂ ਕਰਕੇ ਕਿਸਾਨਾਂ ਦੇ ਅਸਲ ਦਰਦ ਨੂੰ ਅੱਖੋਂ ਪਰੋਖੇ ਕੀਤਾ ਹੈ। ਲੇਖਕ ਨੇ ਕੁਝ ਗੀਤਾਂ ਦੀਆਂ ਉਦਾਹਰਨਾਂ ਦੇ ਕੇ ਮੌਜੂਦਾ ਗੀਤਕਾਰ ਅਤੇ ਗਾਇਕਾਂ 'ਤੇ ਕਰਾਰੀ ਚੋਟ ਕੀਤੀ ਹੈ ਜੋ ਅਸਲੀਅਤ ਨੂੰ ਛੁਪਾ ਕੇ ਕਿਸਾਨ ਖ਼ਾਸਕਰ ਨੌਜਵਾਨਾਂ ਨੂੰ ਕੁਰਾਹੇ ਪਾਉਣ 'ਤੇ ਲੱਗੇ ਹੋਏ ਹਨ।

-ਸਤਨਾਮ ਸਿੰਘ ਮੱਟੂ

04-09-2017

 ਪੱਤਰਕੀਟਨਾਸ਼ਕਾਂ ਦੀ ਵਰਤੋਂ
ਭਾਰਤ ਦੇ ਕੁਲ ਖੇਤੀਬਾੜੀ ਅਧੀਨ ਰਕਬੇ ਵਿਚ ਪੰਜਾਬ ਦਾ ਰਕਬਾ ਕਰੀਬ 2 ਫੀਸਦੀ ਬਣਦਾ ਹੈ ਪਰ ਕੀਟਨਾਸ਼ਕ ਦਵਾਈਆਂ ਦੀ ਵਰਤੋਂ ਦੇ ਮਾਮਲੇ ਵਿਚ ਪੰਜਾਬ 'ਚ ਵਰਤੀਆਂ ਜਾਣ ਵਾਲੀਆਂ ਕੀਟਨਾਸ਼ਕ ਦਵਾਈਆਂ ਕੁੱਲ ਭਾਰਤ ਵਿਚ ਵਰਤੀਆਂ ਜਾਣ ਵਾਲੀਆਂ ਕੀਟਨਾਸ਼ਕ ਦਵਾਈਆਂ ਦਾ 15 ਤੋਂ 18 ਫੀਸਦੀ ਹਿੱਸਾ ਬਣਦੀਆਂ ਹਨ। ਕਿਸਾਨ ਇਸ ਗੱਲ ਤੋਂ ਅਣਜਾਣ ਹਨ ਕਿ ਇਨ੍ਹਾਂ ਜ਼ਹਿਰੀਲੀਆਂ ਦਵਾਈਆਂ ਦੇ ਅੰਸ਼ ਕੁਝ ਨਾ ਕੁਝ ਮਾਤਰਾ 'ਚ ਖਾਣ ਵਾਲੀਆਂ ਵਸਤਾਂ ਜ਼ਰੀਏ ਮਨੁੱਖੀ ਸਰੀਰ ਵਿਚ ਪ੍ਰਵੇਸ਼ ਕਰਕੇ ਹਰ ਮਨੁੱਖ ਲਈ ਕੈਂਸਰ ਦੀ ਸੌਗਾਤ ਵੰਡਣ ਦਾ ਜ਼ਰੀਆ ਵੀ ਬਣ ਰਹੇ ਹਨ। ਕਈ ਕੀਟਨਾਸ਼ਕ ਦਵਾਈਆਂ ਬਣਾਉਣ ਵਾਲੀਆਂ ਕੰਪਨੀਆਂ ਦਾ ਇਕੋ-ਇਕ ਮਕਸਦ ਆਪਣੇ ਉਤਪਾਦਾਂ ਦੀ ਵੱਧ ਤੋਂ ਵੱਧ ਵਿਕਰੀ ਕਰਨਾ ਹੈ। ਸਰਕਾਰ ਅਤੇ ਖੇਤੀਬਾੜੀ ਮਹਿਕਮੇ ਨੂੰ ਕੀਟਨਾਸ਼ਕ ਦਵਾਈਆਂ ਦੀ ਅੰਨ੍ਹੇਵਾਹ ਵਰਤੋਂ ਨੂੰ ਘੱਟ ਕਰਨ ਲਈ ਕਿਸਾਨਾਂ ਨੂੰ ਵੱਧ ਤੋਂ ਵੱਧ ਜਾਗਰੂਕ ਕਰਨਾ ਚਾਹੀਦਾ ਹੈ ਅਤੇ ਕਿਸਾਨ ਭਰਾਵਾਂ ਨੂੰ ਵੀ ਇਨ੍ਹਾਂ ਦੀ ਵਰਤੋਂ ਘੱਟ ਤੋਂ ਘੱਟ ਮਾਤਰਾ ਵਿਚ ਕਰਨੀ ਚਾਹੀਦੀ ਹੈ।


-ਸਰਵਣ ਸਿੰਘ ਭੰਗਲਾਂ,
ਸਮਰਾਲਾ।


ਭਾਈਚਾਰਕ ਸਾਂਝ
ਪਿਛਲੇ ਦਿਨੀਂ 'ਲੋਕ ਮੰਚ' ਸਫ਼ੇ 'ਤੇ ਮਾਣਯੋਗ ਲੇਖਕ ਲੱਖਾ ਸਹਿਜਪਾਲ ਦੌਧਰ ਦਾ ਲੇਖ 'ਘਟ ਰਹੀ ਭਾਈਚਾਰਕ ਸਾਂਝ' ਪੜ੍ਹਿਆ ਚੰਗਾ ਲੱਗਾ। ਦੋ ਕੁ ਦਹਾਕ ਪਿੱਛੇ ਵੱਲ ਝਾਤ ਮਾਰੀਏ ਤਾਂ ਸੋਚ ਕੇ ਸਭ ਹੈਰਾਨ ਤਾਂ ਹੋਣੋਂ ਨਹੀਂ ਰਹਿ ਸਕਦੇ। ਉਨ੍ਹਾਂ ਸਮਿਆਂ ਨੂੰ ਆਪਾਂ ਸਾਰਿਆਂ ਹੰਢਾਇਆ ਹੋਇਆ ਹੈ ਕਿੰਨਾ ਪਿਆਰ ਸੀ ਸਾਰੇ ਰਿਸ਼ਤਿਆਂ ਵਿਚ, ਖਿੱਚ ਸੀ। ਬਹੁਤਾ ਸਮਾਂ ਅੱਜ ਮੋਬਾਈਲਾਂ ਦੀ ਵਰਤੋਂ ਵਿਚ ਗੁਜ਼ਾਰ ਦਿੰਦੇ ਹਾਂ ਜਦ ਕੰਮਾਂ ਤੋਂ ਫੁਰਸਤ ਮਿਲੇ, ਝੱਟ ਮੋਬਾਈਲ ਵਿਚ ਰੁਝ ਜਾਂਦੇ ਹਾਂ ਜਦੋਂ ਕਿ ਵੇਹਲਾ ਸਮਾਂ ਪਰਿਵਾਰ ਜਾਂ ਰਿਸ਼ਤੇਦਾਰਾਂ ਦੇ ਬਾਰੇ ਸੋਚਣਾ ਚਾਹੀਦਾ ਹੈ। ਉਨ੍ਹਾਂ ਸਮਿਆਂ 'ਚ ਵਾਕਿਆ ਪ੍ਰਾਹੁਣਾਚਾਰੀ 'ਚ ਕਿੰਨਾ ਚਾਅ ਹੁੰਦਾ ਸੀ। ਅੱਜ ਵਾਕਿਆ ਹੀ ਮਨੁੱਖ ਮੋਬਾਈਲ ਆਦਿ ਦੀ ਪਕੜ ਵਿਚ ਪੂਰੀ ਤਰ੍ਹਾਂ ਜਕੜਿਆ ਗਿਆ ਹੈ।


-ਮਾ: ਦੇਵ ਰਾਜ ਖੁੰਡਾ,
ਸ੍ਰੀ ਰਾਮਸਰ ਕਾਲੋਨੀ, ਗੁਰਦਾਸਪੁਰ।


ਤਰਸਯੋਗ ਹਾਲਤ

ਸੰਪਾਦਕੀ ਪੰਨੇ 'ਤੇ ਯਾਦਵਿੰਦਰ ਸਿੰਘ ਸਤਕੋਹਾ ਦਾ ਲੇਖ ਮਿਆਰੀ ਨਹੀਂ ਹਨ ਪੰਜਾਬ ਦੀਆਂ ਸੜਕਾਂ ਬਹੁਤ ਵਧੀਆ ਲੇਖ ਸੀ। ਲੇਖਕ ਨੇ ਸ਼ਾਹਰਾਗ ਸੜਕਾਂ ਦੀ ਜ਼ਿਆਦਾ ਗੱਲ ਕੀਤੀ ਹੈ ਜੋ ਵਿਦੇਸ਼ਾਂ ਵਿਚ ਬਹੁਤ ਹੀ ਸਪੀਡ ਲਈ ਬਣੀਆਂ ਹਨ। ਉਨ੍ਹਾਂ 'ਤੇ ਘੱਟ ਸਪੀਡ ਵਾਲਾ ਕੋਈ ਸਾਧਨ ਨਹੀਂ ਚਲਦਾ, ਨਾ ਹੀ ਕੋਈ ਪਸ਼ੂ ਆਦਿ ਸੜਕ 'ਤੇ ਚੜ੍ਹ ਸਕਦਾ ਹੈ। ਸਾਡੇ ਦੇਸ਼ ਵਿਚ ਹਰ ਸੜਕ 'ਤੇ ਪਸ਼ੂ, ਸਾਈਕਲ, ਰੇੜਾ ਆਦਿ ਚਲਦੇ ਹਨ। ਦੂਜਾ ਪੰਜਾਬ ਦੇ ਪਿੰਡਾਂ ਦੀਆਂ ਸੜਕਾਂ ਦੀ ਹਾਲਤ ਤਾਂ ਬਹੁਤ ਹੀ ਤਰਸਯੋਗ ਬਣੀ ਹੋਈ ਹੈ। ਕੋਈ ਸੜਕਾਂ 'ਤੇ ਤਾਂ ਰੂੜੀਆਂ ਦੇ ਢੇਰ ਲੱਗੇ ਪਏ ਹਨ। ਟੁੱਟੀਆਂ ਸੜਕਾਂ ਹਾਦਸਿਆਂ ਦਾ ਕਾਰਨ ਬਣਦੀਆਂ ਹਨ। ਸ਼ਾਹਰਾਹ ਲੁਧਿਆਣਾ ਤੋਂ ਫਿਰੋਜ਼ਪੁਰ ਬਣਦੀ ਨੂੰ ਕਈ ਸਾਲ ਹੋ ਗਏ ਹਨ ਜੋ ਹਾਲੇ ਤੱਕ ਪੂਰੀ ਨਹੀਂ ਹੋਈ, ਅਜਿਹੀ ਸੜਕ 'ਤੇ ਚੱਲਣਾ ਮੌਤ ਨੂੰ ਸੱਦਾ ਦੇਣ ਵਾਲੀ ਗੱਲ ਹੈ। ਇਨ੍ਹਾਂ ਸੜਕਾਂ ਦਾ ਕੰਮ ਜਲਦੀ ਤੋਂ ਜਲਦੀ ਪੂਰਾ ਕੀਤਾ ਜਾਵੇ।


-ਜਸਕਰਨ ਲੰਡੇ
ਪਿੰਡ ਤੇ ਡਾਕ: ਲੰਡੇ, ਜ਼ਿਲ੍ਹਾ ਮੋਗਾ।

30-08-2017

 ਪੱਤਰਮਾਪੇ ਬਿਰਧ ਆਸ਼ਰਮਾਂ ਹਵਾਲੇ
ਐਤਵਾਰ ਦੇ 'ਅਜੀਤ ਮੈਗਜ਼ੀਨ' ਦੇ 'ਦਿਲਚਸਪੀਆਂ' ਅੰਕ ਵਿਚ 'ਮਾਪੇ ਬਿਰਧ ਆਸ਼ਰਮਾਂ' ਲੇਖਕ ਡਾ: ਹਰਪਾਲ ਸਿੰਘ ਪੰਨੂੰ ਦੀ ਮਿੰਨੀ ਕਹਾਣੀ ਪੜ੍ਹ ਕੇ ਮਨ 'ਚ ਇਕ ਤਸਵੀਰ ਉੱਭਰ ਕੇ ਆਈ ਕਿ ਬਜ਼ੁਰਗਾਂ ਨੂੰ ਘਰ ਦਾ ਤਾਲਾ ਕਹਿ ਕੇ ਇਕੱਲਿਆਂ ਵਿਆਹ ਸ਼ਾਦੀ ਜਾਂ ਯਾਤਰਾ 'ਤੇ ਨਵੀਂ ਪੀੜ੍ਹੀ ਚਲੀ ਜਾਂਦੀ ਹੈ ਤੇ ਡੰਗਰਾਂ ਦੀ ਰਾਖੀ ਲਈ ਕਮਰਾ ਦੇ ਕੇ ਨਿਵਾਜਿਆ ਜਾਂਦਾ ਹੈ। ਅੱਜ ਕਈ ਬਜ਼ੁਰਗਾਂ ਦੀ ਹਾਲਤ ਵੇਖੀ ਨਹੀਂ ਜਾਂਦੀ। ਇਕ ਨੂੰਹ ਨੇ ਬਜ਼ੁਰਗ ਨੂੰ ਧਮਕੀ ਦਿੱਤੀ ਕਿ ਰੋਟੀ ਜਿਹੋ-ਜਿਹੀ ਮਿਲਦੀ ਹੈ ਖਾਈ ਜਾਹ, ਨਹੀਂ ਤਾਂ ਘਰੋਂ ਕੱਢ ਦੇਵਾਂਗੀ। ਮਾਣਯੋਗ ਸੁਪਰੀਮ ਕੋਰਟ ਨੇ ਅਜਿਹੇ ਆਪ-ਹੁਦਰੇ ਨੂੰਹ-ਪੁੱਤ ਦੇ ਵਿਰੁੱਧ ਸਜ਼ਾ ਦੇ ਨਿਯਮ ਬਣਾਏ ਹਨ ਪਰ ਫਿਰ ਵੀ ਮਾਪਿਆਂ ਨੂੰ ਬੇਇੱਜ਼ਤ ਕਰਨ ਤੋਂ ਨੂੰਹ -ਪੁੱਤ ਬਾਜ਼ ਨਹੀ ਆ ਰਹੇ। ਇਸ ਕਹਾਣੀ ਤੋਂ ਪਾਕਿਸਤਾਨ ਦੇ ਈਦੀ ਬਾਰੇ ਪੜ੍ਹ ਕੇ ਹੋਰ ਗਿਆਨ ਮਿਲਿਆ ਹੈ ਤੇ ਨੌਜਵਾਨ ਪੀੜ੍ਹੀ ਨੂੰ ਬਜ਼ੁਰਗਾਂ ਦੀ ਸੇਵਾ ਕਰ ਰਹੇ ਈਦੀ ਤੋਂ ਸਿੱਖਿਆ ਲੈਣੀ ਚਾਹੀਦੀ ਹੈ ਕਿ ਕਿਵੇਂ ਬਜ਼ੁਰਗਾਂ ਦੇ ਲਈ ਬਿਰਧ ਆਸ਼ਰਮ ਖੋਲ੍ਹ ਕੇ ਪੁੰਨ ਦਾ ਕੰਮ ਕਰ ਰਹੇ ਹਨ।


-ਮਾ: ਜਗੀਰ ਸਿੰਘ ਸਫਰੀ
ਸਠਿਆਲਾ (ਅੰਮ੍ਰਿਤਸਰ)।


ਹਮਸਾਏ, ਮਾਂ ਪਿਓ ਜਾਏ
ਸਿਆਣਿਆਂ ਦਾ ਕਥਨ ਹੈ ਕਿ ਕੁੜਮ ਕੁਪੱਤੇ ਬਣੋ ਪਰ ਗੁਆਂਢ ਕੁਪੱਤੇ ਕਦੀ ਨਾ ਬਣੋ। ਔਖੇ-ਸੌਖੇ ਵੇਲੇ ਰਿਸ਼ਤੇਦਾਰ ਤਾਂ ਦੇਰ ਨਾਲ ਪੁੱਜਣਗੇ ਪਰ ਗੁਆਂਢੀ ਤਾਂ ਆਵਾਜ਼ ਦਿੱਤਿਆਂ ਹੀ ਉਸੇ ਵੇਲੇ ਹਾਜ਼ਰ ਹੋ ਸਕਦਾ ਹੈ। ਸਾਡੇ ਜੀਵਨ ਵਿਚ ਮੁਸ਼ਕਿਲਾਂ ਤਾਂ ਕਦੀ ਵੀ ਆ ਸਕਦੀਆਂ ਹਨ। ਗੁਆਂਢੀਆਂ ਦਾ ਆਪਸੀ ਪਿਆਰ ਇਕ ਚੰਗੇ ਅਤੇ ਸਿਹਤਮੰਦ ਸਮਾਜ ਦੀ ਸਿਰਜਣਾ ਦਾ ਪ੍ਰਤੀਕ ਹੈ। ਇਸੇ ਤਰ੍ਹਾਂ ਹੀ ਅਗਰ ਦੋ ਗੁਆਂਢੀ ਮੁਲਕਾਂ ਦਾ ਆਪਸ ਵਿਚ ਚੰਗਾ ਮੇਲਜੋਲ ਹੈ ਤਾਂ ਉਹ ਵੀ ਦਿਨ ਦੁੱਗਣੀ ਰਾਤ ਚੌਗੁਣੀ ਤਰੱਕੀ ਕਰ ਸਕਦੇ ਹਨ। ਇਹ ਬਦਕਿਸਮਤੀ ਵਾਲੀ ਗੱਲ ਹੈ ਕਿ ਸਾਡੇ ਦੋਵੇਂ ਗੁਆਂਢੀ ਦੇਸ਼ ਚੀਨ ਅਤੇ ਪਾਕਿਸਤਾਨ ਦੁਸ਼ਮਣੀ ਵਾਲਾ ਰਵੱਈਆ ਅਪਣਾਈ ਰੱਖਦੇ ਹਨ, ਜਿਸ ਤੋਂ ਕੁਝ ਵੀ ਪ੍ਰਾਪਤ ਹੋਣ ਵਾਲਾ ਨਹੀਂ।


-ਮਾ: ਮਹਿੰਦਰ ਸਿੰਘ ਬਾਜਵਾ।


ਪ੍ਰਸੰਸਾਯੋਗ ਕੰਮ
ਪੰਜਾਬ ਦੇ ਸਿੱਖਿਆ ਮੰਤਰੀ ਸ੍ਰੀਮਤੀ ਅਰੁਣਾ ਚੌਧਰੀ ਦੁਆਰਾ ਪੰਜਾਬ ਦੇ ਵਿਦਿਆਰਥੀਆਂ ਦੇ ਪੱਖ ਵਿਚ ਇਕ ਪ੍ਰਸੰਸਾਯੋਗ ਕਦਮ ਉਠਾਉਂਦੇ ਹੋਏ ਉਨ੍ਹਾਂ ਨੂੰ ਸਕੂਲ ਪੱਧਰ 'ਤੇ ਹੀ ਆਪਣੇ ਨਾਂਅ, ਜਨਮ ਮਿਤੀ ਆਦਿ ਗ਼ਲਤੀਆਂ ਨੂੰ ਠੀਕ ਕਰਵਾਉਣ ਲਈ ਸਕੂਲ ਦੇ ਮੁਖੀ ਨੂੰ ਸ਼ਕਤੀ ਸੌਂਪ ਕੇ ਇਕ ਵੱਡਾ ਕਦਮ ਉਠਾਇਆ ਹੈ। ਸਕੂਲ ਪੱਧਰ 'ਤੇ ਹੋਣ ਵਾਲੀਆਂ ਇਨ੍ਹਾਂ ਗ਼ਲਤੀਆਂ ਨੂੰ ਦਰੁੱਸਤ ਕਰਵਾਉਣ ਲਈ ਸਕੂਲ ਪੱਧਰ ਤੋਂ ਲੈ ਕੇ ਡੀ.ਪੀ.ਆਈ. ਦਫ਼ਤਰ ਤੱਕ ਅਨੇਕਾਂ ਚੱਕਰ ਲਾਉਣੇ ਪੈਂਦੇ ਸਨ। ਇਨ੍ਹਾਂ ਅਸ਼ੁੱਧੀਆਂ ਨੂੰ ਠੀਕ ਕਰਵਾਉਣ ਲਈ ਧਨ ਅਤੇ ਸਮੇਂ ਦੀ ਬਰਬਾਦੀ ਅਲੱਗ ਹੁੰਦੀ ਹੈ। ਸਕੂਲ ਮੁਖੀ ਨੂੰ ਇਨ੍ਹਾਂ ਅਸ਼ੁੱਧੀਆਂ ਨੂੰ ਠੀਕ ਕਰਨ ਦੀ ਸ਼ਕਤੀ ਸੌਂਪ ਕੇ ਪੰਜਾਬ ਸਿੱਖਿਆ ਮੰਤਰੀ ਨੇ ਇਕ ਵੱਡਾ ਪ੍ਰਸੰਸਾਯੋਗ ਕੰਮ ਕੀਤਾ ਹੈ।


-ਸਤਿਆ ਪਾਲ ਅਰੋੜਾ
ਸੇਵਾ-ਮੁਕਤ ਅਧਿਆਪਕ।

29-08-2017

 ਅਸਲ ਵਾਰਸ
ਕੋਈ ਵੀ ਰੁਤਬਾ ਸੰਸਥਾ ਵਾਰਸਾਂ ਤੋਂ ਬਿਨਾਂ ਅਧੂਰਾ ਹੁੰਦਾ ਹੈ। ਇਸੇ ਪ੍ਰਸੰਗ ਵਿਚ ਪੰਜਾਬ ਸਰਕਾਰ ਨੇ ਪੰਜਾਬ ਕਲਾ ਪ੍ਰੀਸ਼ਦ ਦਾ ਮੁਖੀ ਸੁਰਜੀਤ ਪਾਤਰ ਨੂੰ ਬਣਾ ਕੇ ਕਲਾ ਪ੍ਰੀਸ਼ਦ ਨੂੰ ਅਸਲ ਵਾਰਸਾਂ ਦੇ ਹਵਾਲੇ ਕੀਤਾ ਹੈ। ਇਹ ਵੀ ਨਹੀਂ ਕਿਹਾ ਜਾ ਸਕਦਾ ਕਿ ਪਹਿਲੇ ਚੈਅਰਮੇਨ ਅਧੂਰੇ ਸਨ, ਉਨ੍ਹਾਂ ਸਾਰਿਆਂ ਨੇ ਵੀ ਬਣਦਾ ਯੋਗਦਾਨ ਪਾਇਆ। ਸਭ ਤੋਂ ਵੱਡਾ ਪਹਿਲੂ ਇਹ ਰਿਹਾ ਕਿ ਬੇਲੋੜੇ ਬੋਝ ਅਤੇ ਫਾਲਤੂ ਦੇ ਡਰਾਮਿਆਂ ਤੋਂ ਪਰ੍ਹੇ ਹਟ ਕੇ ਪੰਜਾਬ ਸਰਕਾਰ ਨੇ ਹੀਰੇ ਦੀ ਪਛਾਣ ਕਰਕੇ ਉਸ ਦੇ ਘਰ ਤੱਕ ਪਹੁੰਚ ਕੀਤੀ। ਡਾ: ਸੁਰਜੀਤ ਪਾਤਰ ਦੇ ਆਉਣ ਨਾਲ ਪੰਜਾਬ ਕਲਾ ਪ੍ਰੀਸ਼ਦ ਵਿਚ ਨਵੇਂ ਅਧਿਆਏ ਦੀ ਸ਼ੁਰੂਆਤ ਹੋਈ ਹੈ। ਉਨ੍ਹਾਂ ਵਲੋਂ ਕਲਾ ਪ੍ਰੇਮੀਆਂ ਨੂੰ ਭਰੋਸਾ ਵੀ ਦਿੱਤਾ ਗਿਆ ਹੈ ਕਿ ਉਹ ਸੱਭਿਆਚਾਰ ਨੂੰ ਪ੍ਰਫੁੱਲਤ ਕਰਨਗੇ।

-ਸੁਖਪਾਲ ਸਿੰਘ ਗਿੱਲ।

ਖੇਤੀ ਕਰਜ਼ਾ ਮੁਆਫ਼ੀ
ਖੇਤੀ ਵਾਸਤੇ ਲਏ ਕਰਜ਼ੇ ਦੀ ਚਰਚਾ ਕਾਫੀ ਚੱਲ ਰਹੀ ਹੈ। ਕਈ ਸੂਬਾ ਸਰਕਾਰਾਂ ਨੇ ਤਾਂ ਕਰਜ਼ੇ ਮੁਆਫ਼ ਕਰ ਦਿੱਤੇ। ਜ਼ਿਮੀਂਦਾਰਾਂ ਦੀ ਮੌਜੂਦਾ ਹਾਲਤ ਇਹ ਹੈ ਕਿ ਸਾਲ 2017 ਜ਼ਿਮੀਂਦਾਰਾਂ ਵਾਸਤੇ ਮੁੱਢ ਤੋਂ ਹੀ ਮਾੜਾ ਰਿਹਾ। ਮਟਰ, ਗੋਭੀ, ਗਾਜਰਾਂ, ਆਲੂ ਅਤੇ ਟਮਾਟਰ ਸਭ ਕੌਡੀਆਂ ਭਾਅ ਵਿਕੇ। ਕਿਸਾਨਾਂ ਨੂੰ ਤੁੜਾਈ ਵੀ ਨਹੀਂ ਵਾਪਸ ਹੋਈ। ਫ਼ਸਲਾਂ ਖੇਤ ਦੇ ਵਿਚੇ ਹੀ ਵਾਹੁਣੀਆਂ ਪਈਆਂ। ਘਰਾਂ ਦਾ ਖਰਚਾ ਚਲਾਉਣਾ ਮੁਸ਼ਕਿਲ ਹੋ ਗਿਆ। ਹੁਣ ਤੱਕ ਕੇਂਦਰ ਸਰਕਾਰ ਨੇ ਕਣਕ, ਝੋਨਾ ਅਤੇ ਗੰਨੇ ਦਾ ਘੱਟੋ-ਘੱਟ ਸਮਰਥਨ ਮੁੱਲ ਤੈਅ ਕੀਤਾ ਹੈ। ਜੇਕਰ ਕੁਝ ਦਾਲਾਂ ਦਾ ਸਮਰਥਨ ਮੁੱਲ ਵੀ ਤੈਅ ਕੀਤਾ ਹੈ ਤਾਂ ਉਹ ਵੀ ਨਿਰਧਾਰਤ ਮੁੱਲ ਤੋਂ ਹੇਠਾਂ ਵਿਕ ਰਹੀਆਂ ਹਨ। ਜੇਕਰ ਜ਼ਿਮੀਂਦਾਰਾਂ ਦੀ ਫ਼ਸਲ ਦਾ ਮੁੱਲ ਮੰਡੀ ਵਿਚ ਨਹੀਂ ਮਿਲ ਰਿਹਾ ਤੇ ਕਰਜ਼ਾ ਲੈ ਕੇ ਉਗਾਈ ਫ਼ਸਲ ਤੋਂ ਪੈਸੇ ਦੀ ਵਸੂਲੀ ਨਹੀਂ ਹੁੰਦੀ ਤਾਂ ਜ਼ਿਮੀਂਦਾਰ ਬੈਂਕਾਂ ਤੋਂ ਲਏ ਕਰਜ਼ੇ ਨੂੰ ਕਿਵੇਂ ਵਾਪਸ ਕਰੇਗਾ ਤਾਂ ਫਿਰ ਕਰਜ਼ਾ ਮੁਆਫ਼ੀ ਬਣਦੀ ਹੀ ਹੈ।

-ਸਰਬਜੀਤ ਸਿੰਘ
126, ਮੋਹਨ ਵਿਹਾਰ, ਜਲੰਧਰ।

ਦਫਾ 144
ਇਹ ਇਨਸਾਨੀ ਫ਼ਿਤਰਤ ਹੈ ਕਿ ਮਨੁੱਖ ਹੋਣ ਦੇ ਨਾਤੇ ਅਸੀਂ ਦੂਜਿਆਂ ਦੀਆਂ ਭਾਵਨਾਵਾਂ ਦਾ ਖਿਆਲ ਰੱਖੀਏ। ਇਕ ਸੱਭਿਅਕ ਸਮਾਜ ਦਾ ਨਿਰਮਾਣ ਕਰੀਏ। ਇਹ ਅਕਸਰ ਹੀ ਦੇਖਣ ਨੂੰ ਮਿਲਦਾ ਹੈ ਕਿ ਕਾਨੂੰਨ ਵਿਵਸਥਾ ਨੂੰ ਬਣਾਈ ਰੱਖਣ ਲਈ ਪ੍ਰਸ਼ਾਸਨ ਵੱਲੋਂ ਸਮੇਂ-ਸਮੇਂ 'ਤੇ ਪਾਬੰਦੀਆਂ ਦਾ ਐਲਾਨ ਕੀਤਾ ਜਾਂਦਾ ਹੈ। ਜ਼ਿਲ੍ਹੇ ਵਿਚ ਦਫ਼ਾ 144 ਤਹਿਤ ਲਾਊਡ ਸਪੀਕਰ ਉੱਚੀ ਆਵਾਜ਼ ਵਿਚ ਨਾ ਵਜਾਉਣਾ, ਬੱਸਾਂ ਵਿਚ ਅਸ਼ਲੀਲ ਗਾਣੇ ਤੇ ਫ਼ਿਲਮਾਂ ਨਾ ਦਿਖਾਉਣਾ, ਗੱਡੀਆਂ ਮੋਟਰਾਂ ਦੇ ਪ੍ਰੈਸ਼ਰ ਹਾਰਨਾਂ 'ਤੇ ਪਾਬੰਦੀ ਲਗਾਉਣਾ, ਅਜਿਹੀਆਂ ਪਾਬੰਦੀਆਂ ਅੱਜ ਮਜ਼ਾਕ ਬਣ ਕੇ ਰਹਿ ਗਈਆਂ ਹਨ। ਸਾਡਾ ਗ਼ਰੀਬ ਜਿਹਾ ਗੁਆਂਢੀ ਦੇਸ਼ ਆਪਣੇ ਦੇਸ਼ ਦੇ ਨਾਗਰਿਕਾਂ ਨੂੰ ਇਹ ਸਮਝਾਉਣ ਵਿਚ ਸਫਲ ਰਿਹਾ ਹੈ ਕਿ ਸਾਡਾ ਦੇਸ਼ ਆਪਣੇ ਘਰ ਵਾਂਗ ਹੀ ਹੈ। 'ਕਾਠਮੰਡੂ' ਵਰਗੇ ਸ਼ਹਿਰ ਵਿਚ ਥੁੱਕਣਾ ਤੇ ਹਾਰਨ ਵਜਾਉਣਾ ਸਖ਼ਤ ਮਨ੍ਹਾਂ ਹੈ। ਮਨਾਹੀ ਦੀ ਉਲੰਘਣਾ ਤੇ ਤੁਰੰਤ ਜੁਰਮਾਨਾ ਵਸੂਲਿਆ ਜਾਂਦਾ ਹੈ। ਸਾਨੂੰ ਵੀ ਚਾਹੀਦਾ ਹੈ ਕਿ ਅਜਿਹੇ ਸੱਭਿਅਕ ਨਿਯਮ ਅਪਣਾ ਕੇ ਧਾਰਾ 144 ਤੋੜਨ 'ਤੇ ਤੁਰੰਤ ਜੁਰਮਾਨਾ ਵਸੂਲਿਆ ਜਾਵੇ।

-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀਖਾਸ, ਤਹਿ: ਮੁਕੇਰੀਆਂ, ਹੁਸ਼ਿਆਰਪੁਰ।

28-08-2017

 ਪੱਤਰਨਸ਼ੇ ਅਤੇ ਸਮਾਜ
ਅਜੋਕੇ ਸਮੇਂ ਸਾਡੇ ਸਮਾਜ ਵਿਚ ਅਨੇਕਾਂ ਬੁਰਾਈਆਂ/ਕੁਰੀਤੀਆਂ ਪਾਈਆਂ ਜਾ ਰਹੀਆਂ ਹਨ। ਇਨ੍ਹਾਂ ਵਿਚੋਂ ਹੀ ਇਕ ਬੁਰਾਈ ਹੈ 'ਨਸ਼ੇ', ਜਿਸ ਨੇ ਸਮਾਜ ਉਪਰ ਗਹਿਰਾ ਦੁਰਪ੍ਰਭਾਵ ਪਾਇਆ ਹੈ ਅਤੇ ਸਮਾਜਿਕ ਸਿਹਤ ਨੂੰ ਕਮਜ਼ੋਰ ਤੇ ਖੋਖਲਾ ਕਰ ਦਿੱਤਾ ਹੈ। ਭਾਵੇਂ ਬੇਰੁਜ਼ਗਾਰੀ ਅਤੇ ਅਨਪੜ੍ਹਤਾ ਨਸ਼ਿਆਂ ਦੇ ਮੁੱਖ ਕਾਰਨ ਹਨ ਪਰ ਕਿਸੇ ਕੰਮ ਵਿਚ ਮਿਲੀ ਅਸਫ਼ਲਤਾ ਕਾਰਨ ਪੈਦਾ ਹੋਈ ਹੀਣਭਾਵਨਾ ਵੀ ਇਨ੍ਹਾਂ ਦਾ (ਨਸ਼ਿਆਂ ਦਾ) ਇਕ ਕਾਰਨ ਆਖਿਆ ਜਾ ਸਕਦਾ ਹੈ। ਨਸ਼ਿਆਂ ਦੇ ਆਦੀ ਵਿਅਕਤੀ ਪਾਸੋਂ ਸਮਾਜ ਸੇਵਾ ਜਾਂ ਦੇਸ਼ ਸੇਵਾ ਦੀ ਕੋਈ ਆਸ ਨਹੀਂ ਰੱਖੀ ਜਾ ਸਕਦੀ। ਨਸ਼ਿਆਂ ਦੇ ਵਰਤਾਰੇ ਨੂੰ ਰੋਕਣ ਦੀ ਹਰ ਸੰਭਵ ਕੋਸ਼ਿਸ਼ ਹੋਣੀ ਚਾਹੀਦੀ ਹੈ ਤਾਂ ਇਕ ਸੱਭਿਅਕ ਸਮਾਜ ਦੀ ਸਿਰਜਣਾ ਕੀਤੀ ਜਾ ਸਕੇ।


-ਜਗਤਾਰ ਸਿੰਘ ਝੋਜੜ
ਜ਼ਿਲ੍ਹਾ ਕਚਹਿਰੀਆਂ, ਹੁਸ਼ਿਆਰਪੁਰ।


ਮੀਡੀਆ ਜ਼ਿੰਮੇਵਾਰੀ ਤੋਂ ਕੰਮ ਲਵੇ
21ਵੀਂ ਸਦੀ ਸਹੀ ਮਾਅਨਿਆਂ ਵਿਚ ਵਿਗਿਆਨ ਦੀ ਸਦੀ ਹੈ ਪਰ ਇਸ ਵਿਚ ਜਦੋਂ ਕੋਈ ਅੰਧ-ਵਿਸ਼ਵਾਸ ਨਾਲ ਜੁੜੀ ਖ਼ਬਰ ਪੜ੍ਹਨ-ਸੁਣਨ ਨੂੰ ਮਿਲਦੀ ਹੈ ਤਾਂ ਬੇਹੱਦ ਦੁੱਖ ਦੇ ਨਾਲ-ਨਾਲ ਹੈਰਾਨੀ ਵੀ ਹੁੰਦੀ ਹੈ। ਪਿਛਲੇ ਦਿਨਾਂ ਤੋਂ ਪੰਜਾਬ-ਹਰਿਆਣਾ 'ਚ ਖਾਸ ਕਰਕੇ ਔਰਤਾਂ ਦੇ ਰਹੱਸਮਈ ਢੰਗ ਨਾਲ ਵਾਲ ਕੱਟਣ ਦੀਆਂ ਘਟਨਾਵਾਂ ਨੂੰ ਪ੍ਰਿੰਟ ਤੇ ਇਲੈਕਟ੍ਰਾਨਿਕ ਮੀਡੀਆ ਦੇ ਇਕ ਹਿੱਸੇ ਵੱਲੋਂ ਬੇਹੱਦ ਮਸਾਲਾ ਲਾ-ਲਾ ਪੇਸ਼ ਕੀਤਾ ਜਾ ਰਿਹਾ ਹੈ। ਪੱਤਰਕਾਰੀ ਮਿਆਰੀ ਹੋਣੀ ਚਾਹੀਦੀ ਹੈ। ਪੱਤਰਕਾਰੀ 21ਵੀਂ ਸਦੀ ਦੇ ਹਾਣ ਦੀ ਹੋਣ ਦੀ ਚਾਹੀਦੀ ਹੈ। ਅਸਲ ਵਿਚ ਹੋਣਾ ਤਾਂ ਇਹ ਚਾਹੀਦਾ ਹੈ ਕਿ ਵਹਿਮਾਂ-ਭਰਮਾਂ ਨੂੰ ਤੂਲ ਦਿੰਦੀ ਖ਼ਬਰ ਦੀ ਪ੍ਰਕਾਸ਼ਨਾ ਤੋਂ ਗੁਰੇਜ਼ ਹੀ ਕੀਤਾ ਜਾਵੇ। ਇਸ ਦੇ ਨਾਲ ਹੀ ਅੱਜ ਇਹ ਵੀ ਜ਼ਰੂਰੀ ਹੈ ਕਿ ਆਮ ਲੋਕਾਂ ਵਿਚ ਵਿਗਿਆਨਕ ਚੇਤਨਾ ਪੈਦਾ ਕੀਤੀ ਜਾਵੇ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਜ਼ਿਲ੍ਹਾ ਲੁਧਿਆਣਾ।

25-08-2017

 ਰੁੱਖ ਅਤੇ ਮਨੁੱਖ
ਸਾਡੇ ਦੇਸ਼ ਦੀ ਪਵਿੱਤਰ ਧਰਤੀ ਨੂੰ ਦੁਨੀਆ ਦੇ ਦੇਸ਼ ਵੀ ਵੱਖਰੀ ਤਰ੍ਹਾਂ ਦੀ ਧਰਤੀ ਮੰਨਦੇ ਹਨ, ਜਿਥੇ ਅਨੇਕਾਂ ਮਹਾਂਪੁਰਸ਼ਾਂ ਨੇ ਜਨਮ ਲਿਆ। ਉਨ੍ਹਾਂ ਵੀ ਇਸ ਦੇਸ਼ ਦੀ ਮਿੱਟੀ ਦੀ ਆਪਣੇ ਢੰਗ ਨਾਲ ਸੇਵਾ ਕੀਤੀ ਸੀ। ਕਿਉਂਕਿ ਇਹ ਧਰਤੀ ਬਨਸਪਤੀ, ਖੁਸ਼ਬੂਦਾਰ ਰੁੱਖਾਂ, ਬੋਹੜਾਂ, ਪਿੱਪਲਾਂ ਅਤੇ ਅਨੇਕਾਂ ਸਜਾਵਟੀ ਫੁੱਲਾਂ ਭਰੇ ਪੌਦਿਆਂ ਨਾਲ ਭਰੀ ਤੇ ਹਰੀ-ਭਰੀ ਚਾਰੇ ਪਾਸੇ ਦਿਖਾਈ ਦਿੰਦੀ ਸੀ। ਭਾਵ ਸਾਡੇ ਦੇਸ਼ ਦੀ ਧਰਤੀ 'ਤੇ ਕੁਦਰਤ ਪੂਰੀ ਮਿਹਰਬਾਨ ਸੀ। ਅਫ਼ਸੋਸ ਅੱਜ ਧਰਤੀ 'ਤੇ ਰੁੱਖਾਂ, ਜੰਗਲਾਂ ਦੀ ਧੜਾਧੜ ਕਟਾਈ ਕਾਰਨ ਵਾਤਾਵਰਨ ਪੂਰੀ ਤਰ੍ਹਾਂ ਦੂਸ਼ਿਤ ਤੇ ਪ੍ਰਭਾਵਿਤ ਹੋ ਰਿਹਾ ਹੈ। ਇਕ ਤਾਂ ਰੁੱਖ ਧਰਤੀ ਮਾਂ ਦਾ ਸ਼ਿੰਗਾਰ ਹਨ, ਦੂਜੇ ਪਾਸੇ ਸਮੁੱਚਾ ਮਨੁੱਖੀ ਤਾਣਾ-ਬਾਣਾ ਰੁੱਖਾਂ 'ਤੇ ਨਿਰਭਰ ਹੈ। ਇਸ ਵਿਚ ਕੋਈ ਦੋ ਰਾਵਾਂ ਨਹੀਂ ਜੇ ਧਰਤੀ 'ਤੇ ਰੁੱਖ ਹਨ ਤਾਂ ਮਨੁੱਖ ਹਨ। ਵਾਤਾਵਰਨ ਦੀ ਸ਼ੁੱਧਤਾ ਲਈ ਨਵੇਂ ਹੋਰ ਪੌਦੇ ਲਗਾ ਕੇ ਆਪਣਾ ਬਣਦਾ ਹਿੱਸਾ ਪਾਈਏ।

-ਮਾ: ਦੇਵਰਾਜ ਖੁੰਡਾ
ਸ੍ਰੀ ਰਾਮ ਸ਼ਰਨਮ ਕਾਲੋਨੀ, ਗੁਰਦਾਸਪੁਰ।

ਸੂਰਜੀ ਊਰਜਾ ਵਰਤਣ ਦੀ ਲੋੜ
ਕੁਦਰਤ ਨੇ ਸਾਨੂੰ ਬੇਸ਼ਕੀਮਤੀ ਵਸਤਾਂ ਦੇ ਕੇ ਨਿਵਾਜਿਆ ਹੈ। ਊਰਜਾ ਦਾ ਪ੍ਰਮੁੱਖ ਸੋਮਾ ਸੂਰਜੀ ਊਰਜਾ ਵੀ ਉਨ੍ਹਾਂ ਵਿਚੋਂ ਇਕ ਹੈ। ਅੱਜ ਵਧਦੇ ਪ੍ਰਦੂਸ਼ਣ ਅਤੇ ਘਟਦੇ ਹੋਰ ਕੁਦਰਤੀ ਸੋਮਿਆਂ ਦੇ ਸੰਦਰਭ ਵਿਚ ਸੂਰਜੀ ਊਰਜਾ ਇਕ ਮਹੱਤਵਪੂਰਨ ਬਦਲ ਹੋ ਸਕਦਾ ਹੈ। ਅੱਜ ਲੋੜ ਹੈ ਕਿ ਇਸ ਮਹਾਨ ਕੁਦਰਤੀ ਦਾਤ ਦੀ ਵਰਤੋਂ ਨੂੰ ਪਹਿਲ ਦੇ ਕੇ ਵਾਤਾਵਰਨ ਅਤੇ ਕੁਦਰਤੀ ਸੋਮਿਆਂ ਨੂੰ ਬਚਾਈਏ।

-ਮਾ: ਸੰਜੀਵ ਧਰਮਾਣੀ
ਪਿੰਡ ਸੱਧੇਵਾਲ, ਸ੍ਰੀ ਅਨੰਦਪੁਰ ਸਾਹਿਬ।

ਸਹੀ ਕਦਮ
ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਇਕ ਸੈਨਿਕ ਨਾਲ ਕੀਤੀ ਜ਼ਿਆਦਤੀ ਨੂੰ ਬੜੀ ਗੰਭੀਰਤਾ ਨਾਲ ਲੈਂਦੇ ਹੋਏ ਪੁਲਿਸ ਮੁਲਾਜ਼ਮਾਂ 'ਤੇ ਕਾਰਵਾਈ ਕੀਤੀ ਹੈ। ਬੇਹੱਦ ਵਧੀਆ ਕਦਮ ਹੈ। ਮੈਨੂੰ ਹੈਰਾਨੀ ਹੁੰਦੀ ਹੈ ਕਿ ਇਨ੍ਹਾਂ ਦੇ ਆਪਣੇ ਕੰਮ, ਜਿਨ੍ਹਾਂ ਦੀ ਇਹ ਤਨਖਾਹ ਲੈਂਦੇ ਹਨ, ਸੁਖ ਸਹੂਲਤਾਂ ਮਾਣਦੇ ਹਨ, ਉਹ ਵੀ ਨਹੀਂ ਕਰ ਸਕਦੇ। ਇੱਜ਼ਤ ਕਰਨੀ ਸੈਨਿਕਾਂ ਦੀ ਤਾਂ ਇਕ ਪਾਸੇ, ਇਹ ਉਨ੍ਹਾਂ ਦਾ ਮਜ਼ਾਕ ਉਡਾਉਂਦੇ ਹਨ ਕਿ ਫ਼ੌਜੀ ਹੈ ਜਿਸ ਤਰ੍ਹਾਂ ਕੰਮ ਕਰਵਾਉਣਾ ਚਾਹੁੰਦਾ ਹੈ, ਸਾਰੀ ਛੁੱਟੀ ਕੱਟ ਲਵੇਗਾ ਪਰ ਕੰਮ ਨਹੀਂ ਹੋਏਗਾ। ਬਦਕਿਸਮਤੀ ਵੇਖੋ ਕਿ ਸਿਆਚਿੰਨ੍ਹ ਦੀ ਠੰਢ ਵਿਚ ਦੁਸ਼ਮਣਾਂ ਤੋਂ ਨਾ ਹਾਰਨ ਵਾਲਾ ਸੈਨਿਕ, ਉਨ੍ਹਾਂ ਤੋਂ ਹਾਰ ਜਾਂਦਾ ਹੈ ਜਿਨ੍ਹਾਂ ਦੀ ਹਿਫ਼ਾਜ਼ਤ ਲਈ ਉਹ ਮਨਫ਼ੀ ਤਾਪਮਾਨ ਵਿਚ ਇਮਾਨਦਾਰੀ ਨਾਲ ਡਿਊਟੀ ਦਿੰਦਾ ਹੈ। ਇੱਕਾ-ਦੁੱਕਾ ਅਫਸਰਾਂ, ਅਧਿਕਾਰੀਆਂ, ਕਰਮਚਾਰੀਆਂ ਤੇ ਮੁਲਾਜ਼ਮਾਂ ਨੂੰ ਛੱਡ ਕੇ ਕਿਸੇ ਵੀ ਵਿਭਾਗ ਤੇ ਕਿਸੇ ਵੀ ਦਫ਼ਤਰ ਵਿਚ ਕੰਮ ਹੁੰਦਾ ਹੀ ਨਹੀਂ। ਬਿਲਡਰਾਂ ਤੋਂ ਮੋਟੀਆਂ ਰਕਮਾਂ ਲੈ ਕੇ ਪ੍ਰਾਜੈਕਟਾਂ ਵਿਚ ਕਮੀਆਂ ਪੇਸ਼ੀਆਂ ਵੱਲ ਧਿਆਨ ਹੀ ਨਹੀਂ ਦਿੰਦੇ। ਸ਼ਿਕਾਇਤ ਕਰੋ ਤਾਂ ਅਜਿਹੇ ਭੰਬਲਭੂਸੇ ਵਿਚ ਪਾਉਂਦੇ ਹਨ ਕਿ ਖੂਨ ਦੇ ਹੰਝੂ ਰੁਆ ਦਿੰਦੇ ਹਨ। ਸਰਕਾਰ ਨੂੰ ਇਹ ਗੰਧਲੇ ਤੇ ਭ੍ਰਿਸ਼ਟ ਸਿਸਟਮ ਨੂੰ ਸੁਧਾਰਨ ਵੱਲ ਤਵਜੋਂ ਗੰਭੀਰਤਾ ਨਾਲ ਦੇਣੀ ਚਾਹੀਦੀ ਹੈ। ਇਸ ਸੈਨਿਕ ਵਰਗੇ ਹਜ਼ਾਰਾਂ ਸੈਨਿਕ ਤੇ ਲੱਖਾਂ ਲੋਕ ਇਸ ਸਮੱਸਿਆ ਦਾ ਸਾਹਮਣਾ ਕਰ ਰਹੇ ਹਨ।

-ਪ੍ਰਭਜੋਤ ਕੌਰ ਢਿੱਲੋਂ।

24-08-2017

 ਫ਼ੌਜੀ ਵੀਰਾਂ ਦਾ ਸਨਮਾਨ
ਸਾਲ ਬਾਅਦ ਜਦ ਵੀ ਕਾਰਗਿਲ ਵਿਜੈ ਦਿਵਸ ਆਉਂਦਾ ਹੈ, ਦੇਸ਼ ਭਗਤ ਲੋਕਾਂ ਦੀਆਂ ਅੱਖਾਂ ਨਮ ਹੋ ਜਾਂਦੀਆਂ ਹਨ। ਸਰਕਾਰ ਨੇ ਭਾਵੇਂ ਸ਼ਹੀਦਾਂ ਦੇ ਨਾਂਅ 'ਤੇ ਗੈਸ ਏਜੰਸੀਆਂ, ਪੈਟਰੋਲ ਪੰਪ ਅਤੇ ਹੋਰ ਸਹੂਲਤਾਂ ਦਿੱਤੀਆਂ ਪਰ ਕਈ ਪਰਿਵਾਰ ਅਜੇ ਵੀ ਸਹੂਲਤਾਂ ਤੋਂ ਸੱਖਣੇ ਹਨ। ਨਿਗੂਣੀਆਂ ਪੈਨਸ਼ਨਾਂ ਨਾਲ ਗੁਜ਼ਾਰਾ ਵੀ ਮੁਸ਼ਕਿਲ ਨਾਲ ਹੋ ਰਿਹਾ ਹੈ। ਸਰਕਾਰਾਂ ਤੇ ਖ਼ੁਦਗਰਜ਼ ਲੋਕ ਉਨ੍ਹਾਂ ਸ਼ਹੀਦਾਂ ਦੀਆਂ ਦਿੱਤੀਆਂ ਕੁਰਬਾਨੀਆਂ ਨੂੰ ਭੁਲ ਗਏ ਹਨ। ਅੱਜ ਸਾਬਕਾ ਫ਼ੌਜੀ ਅਤੇ ਸ਼ਹੀਦਾਂ ਦੀਆਂ ਵਿਧਵਾਵਾਂ ਪੈਨਸ਼ਨਾਂ ਦੀਆਂ ਊਣਤਾਈਆਂ ਤੇ 7ਵੇਂ ਤਨਖਾਹ ਕਮਿਸ਼ਨ ਨੂੰ ਲਾਗੂ ਕਰਾਉਣ ਲਈ ਸੰਘਰਸ਼ ਦੇ ਰਾਹ ਪਏ ਹੋਏ ਹਨ। ਸਾਨੂੰ ਸਾਰੇ ਦੇਸ਼ਵਾਸੀਆਂ ਨੂੰ ਉਨ੍ਹਾਂ ਬਹਾਦਰ ਯੋਧਿਆਂ ਦੀਆਂ ਕੁਰਬਾਨੀਆਂ ਨੂੰ ਅੱਖੋਂ ਪਰੋਖੇ ਨਹੀਂ ਕਰਨਾ ਚਾਹੀਦਾ। ਮੈਂ ਵੀ ਫਖ਼ਰ ਮਹਿਸੂਸ ਕਰਦਾ ਹਾਂ ਕਿਉਂਕਿ ਮੇਰੇ ਦੋੋਵੇਂ ਬੇਟੇ ਸਰੱਹਦਾਂ ਦੀ ਰਾਖੀ ਕਰ ਰਹੇ ਹਨ।


-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।


ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ
ਸੰਪਾਦਕੀ ਲੇਖ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਪੜ੍ਹ ਕੇ ਤਸਵੀਰ ਸਾਫ਼ ਨਜ਼ਰ ਆਈ ਹੈ ਕਿ ਪੰਜਾਬ ਸੂਬੇ ਦੇ ਨੌਜਵਾਨਾਂ ਦੀ ਨਸ਼ੇ ਦੀ ਆਦਤ ਜਿਉਂ ਦੀ ਤਿਉਂ ਹੈ। ਜਦ ਪੰਜਾਬ ਵਿਚ ਕਾਂਗਰਸ ਸਰਕਾਰ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਬਣੇ ਤਾਂ ਪੰਜਾਬ ਦੇ ਲੋਕਾਂ ਦੀ ਆਸ ਜਾਗੀ ਕਿ ਪੰਜਾਬ ਹੁਣ ਨਸ਼ਾ ਮੁਕਤ ਹੋ ਜਾਵੇਗਾ। ਅੱਜ ਵੀ ਪਿੰਡਾਂ ਵਿਚ ਨੌਜਵਾਨ ਨਸ਼ੇ ਦੇ ਸ਼ਿਕਾਰ ਹਨ। ਉਨ੍ਹਾਂ ਨੂੰ ਦੁਕਾਨਾਂ ਤੋਂ ਸਰਿੰਜਾਂ ਤੇ ਨਸ਼ੀਲੇ ਕੈਪਸੂਲ ਅਤੇ ਗੋਲੀਆ ਲੈਂਦੇ ਵੇਖਿਆ ਜਾ ਸਕਦਾ ਹੈ। ਕੈਪਟਨ ਸਰਕਾਰ ਨਸ਼ਾ ਬੰਦ ਕਰਵਾਉਣ ਵਿਚ ਢਿੱਲੀ ਪੈ ਰਹੀ ਹੈ। ਪੰਜਾਬ ਦੇ ਪਿੰਡਾਂ ਅਤੇ ਸ਼ਹਿਰਾਂ ਵਿਚ ਆਏ ਦਿਨ ਲੁੱਟਾਂ-ਖੋਹਾਂ ਹੋ ਰਹੀਆ ਹਨ ਤੇ ਕੇਵਲ ਨਸ਼ੇ ਦੀ ਪੂਰਤੀ ਲਈ ਰਾਹਗੀਰਾਂ ਨੂੰ ਲੁੱਟਿਆ ਜਾ ਰਿਹਾ ਹੈ ਤੇ ਪੁਿਲਸ ਲੁਟੇਰਿਆਂ ਤੇ ਚੋਰੀ ਦੀਆਂ ਵਾਰਦਾਤਾਂ ਦੇ ਖਿਲਾਫ਼ ਐਫ.ਆਈ.ਆਰ. ਦਰਜ ਕਰਨ ਤੋਂ ਕੰਨੀ ਕਤਰਾਉਂਦੀ ਹੈ।


-ਮਾ: ਜਗੀਰ ਸਿੰਘ ਸਫ਼ਰੀ
ਸਠਿਆਲਾ (ਅੰਮ੍ਰਿਤਸਰ)।


ਪੰਜਾਬੀ ਭਾਸ਼ਾ ਦੀ ਦੁਰਗਤੀ
ਮਾਣਯੋਗ ਸਿੱਖਿਆ ਮੰਤਰੀ ਅਰੁਣਾ ਚੌਧਰੀ ਜੀ! ਮੈਂ ਤੁਹਾਡਾ ਪੰਜਾਬੀ ਭਾਸ਼ਾ ਦੀ ਹੋ ਰਹੀ ਦੁਰਗਤੀ ਵੱਲ ਧਿਆਨ ਦਿਵਾਉਣਾ ਚਾਹੁੰਦਾ ਹਾਂ। ਜਦੋਂ ਤੋਂ ਗਿਆਨੀ, ਓ.ਟੀ. ਵਿਚੋਂ ਪੰਜਾਬੀ ਅਧਿਆਪਕਾਂ ਦੀ ਚੋਣ ਬੰਦ ਕੀਤੀ ਹੈ, ਉਦੋਂ ਤੋਂ ਹੀ ਪੰਜਾਬੀ ਦੀ ਪੜ੍ਹਾਈ ਦਾ ਨਿਘਾਰ ਹੋ ਰਿਹਾ ਹੈ। ਲਾਹਨਤ ਹੈ ਕਿ ਅਸੀਂ ਪੰਜਾਬ, ਪੰਜਾਬੀ ਅਤੇ ਪੰਜਾਬੀਅਤ ਲਈ ਕੁਝ ਵੀ ਨਹੀਂ ਕਰ ਸਕੇ। ਅਜੇ ਵੀ ਮੌਕਾ ਹੈ ਡੁੱਲ੍ਹੇ ਬੇਰਾਂ ਦਾ ਕੁਝ ਨਹੀਂ ਵਿਗੜਿਆ ਅਤੇ ਅਸੀਂ ਪੰਜਾਬੀ ਅਧਿਆਪਕਾਂ ਦੀ ਚੋਣ ਵੇਲੇ ਕੁਝ ਚੁਕੰਨੇ ਹੋਈਏ ਤਾਂ ਜੋ ਪੰਜਾਬੀ ਦੀ ਪ੍ਰਫੁੱਲਤਾ ਲਈ ਚੰਗੇ ਅਧਿਆਪਕ ਅੱਗੇ ਲਿਆ ਸਕੀਏ।


-ਮਾ: ਅਜੀਤ ਸਿੰਘ ਚੜਿੱਕ।


ਹਵਾ ਪ੍ਰਦੂਸ਼ਣ
ਮੈਂ ਤੁਹਾਡੇ ਧਿਆਨ 'ਚ ਵਧ ਰਹੇ ਹਵਾ ਪ੍ਰਦੂਸ਼ਣ ਨੂੰ ਲਿਆਉਣਾ ਚਾਹੁੰਦੀ ਹਾਂ। ਦਿਨੋ-ਦਿਨ ਸੜਕੀ ਆਵਾਜਾਈ ਅਤੇ ਉਦਯੋਗਿਕ ਇਕਾਈਆਂ ਵੱਲੋਂ ਹਵਾ ਨੂੰ ਪ੍ਰਦੂਸ਼ਿਤ ਕੀਤਾ ਜਾ ਰਿਹਾ ਹੈ, ਜਿਸ ਕਾਰਨ ਸਾਹ, ਅੱਖਾਂ ਅਤੇ ਚਮੜੀ ਦੇ ਰੋਗਾਂ 'ਚ ਵਾਧਾ ਹੋ ਰਿਹਾ ਹੈ। ਬੇਨਤੀ ਹੈ ਕਿ ਸਾਨੂੰ ਸਾਰਿਆਂ ਨੂੰ ਰਲ ਕੇ ਵਾਤਾਵਰਨ ਨੂੰ ਬਚਾਉਣ ਲਈ ਕਦਮ ਉਠਾਉਣੇ ਚਾਹੀਦੇ ਹਨ ਤਾਂ ਜੋ ਭਵਿੱਖ 'ਚ ਸੁਰੱਖਿਅਤ ਅਤੇ ਸਾਫ਼-ਸੁਥਰਾ ਮਾਹੌਲ ਸਿਰਜਿਆ ਜਾਵੇ।


-ਹਰਪ੍ਰੀਤ ਕੌਰ
ਜਮਾਤ ਅੱਠਵੀਂ।

23-08-2017

 ਦਰਦਨਾਕ ਹਾਦਸਾ
ਗੋਰਖਪੁਰ ਵਿਚ 63 ਬੱਚਿਆਂ ਦੀ ਮੌਤ ਦਾ ਕਿੱਸਾ ਸਾਹਮਣੇ ਆਇਆ ਹੈ। ਇਹ ਇਕ ਬਹੁਤ ਹੀ ਦਰਦਨਾਕ ਅਤੇ ਸ਼ਰਮਨਾਕ ਹਾਦਸਾ ਹੈ। ਸਰਕਾਰੀ ਹਸਪਤਾਲ, ਜਿਥੇ ਕਿ ਗ਼ਰੀਬਾਂ ਦਾ ਇਲਾਜ ਮੁਫ਼ਤ ਹੁੰਦਾ ਹੈ, ਉਥੇ ਸਰਕਾਰ ਵੱਲੋਂ ਪੈਸੇ ਨਾ ਦਿੱਤੇ ਜਾਣ ਕਾਰਨ ਆਕਸੀਜਨ ਸਪਲਾਈ ਬੰਦ ਕਰ ਦਿੱਤੀ ਗਈ, ਜਿਸ ਦੇ ਕਾਰਨ ਕਈ ਬੱਚਿਆਂ ਦੀ ਜਾਨ ਚਲੀ ਗਈ। ਮੇਰੀ ਨਜ਼ਰ ਵਿਚ ਇਹ ਯੋਗੀ ਸਰਕਾਰ ਵਾਸਤੇ ਇਕ ਬਹੁਤ ਹੀ ਨਮੋਸ਼ੀਜਨਕ ਘਟਨਾ ਹੈ। ਆਖਰ ਕਿਉਂ ਸਰਕਾਰ ਪੈਸਾ ਨਹੀਂ ਦੇ ਸਕੀ, ਇਹ ਜਾਣਦੇ ਹੋਏ ਵੀ ਕਿ ਗੋਰਖਪੁਰ ਯੋਗੀ ਅਦਿੱਤਿਆਨਾਥ ਦਾ ਹਲਕਾ ਹੈ। ਕੀ ਕਾਰਨ ਹੋ ਸਕਦਾ ਹੈ। ਯੋਗੀ ਅਦਿੱਤਿਆਨਾਥ 1998 ਤੋਂ ਬਾਅਦ ਗੋਰਖਪੁਰ ਹਲਕੇ ਤੋਂ ਤਿੰਨ ਵਾਰ ਜਿੱਤ ਚੁੱਕੇ ਹਨ। ਜੇ ਉਨ੍ਹਾਂ ਦੇ ਆਪਣੇ ਹਲਕੇ ਵਿਚ ਇਹ ਹਾਲ ਹੈ ਤਾਂ ਅਸੀਂ ਕੀ ਉਮੀਦ ਕਰ ਸਕਦੇ ਹਾਂ ਕਿ ਬਾਕੀ ਸੂਬੇ ਵਿਚ ਕੀ ਹਾਲ ਹੋਵੇਗਾ। ਸ਼ੁਰੂਆਤ ਤੋਂ ਹੀ ਯੋਗੀ ਦੀ ਸਰਕਾਰ ਚੰਗਾ ਕਰ ਰਹੀ ਸੀ ਪਰ ਇਸ ਘਟਨਾ ਤੋਂ ਬਾਅਦ ਲੋਕੀਂ ਯੋਗੀ ਸਰਕਾਰ ਤੋਂ ਬਹੁਤ ਨਿਰਾਸ਼ ਹੋਣਗੇ।


-ਵੇਦਾਂਤ ਰਾਜੇਸ਼
ਬੀ.ਏ.-ਜੇ.ਐਮ.ਸੀ., ਡੀ.ਏ.ਵੀ. ਕਾਲਜ, ਅੰਮ੍ਰਿਤਸਰ।


ਸੱਚ ਦਾ ਸ਼ੀਸ਼ਾ
ਪਿਛਲੇ ਦਿਨਾਂ ਦੀ ਸੰਪਾਦਕੀ ਪੰਜਾਬ ਨਾਲ ਬੇਇਨਸਾਫ਼ੀ ਵਿਚ ਅਸਲੀਅਤ ਪੇਸ਼ ਕਰਨ ਦੇ ਨਾਲ ਹੀ ਕੇਂਦਰ ਸਰਕਾਰ ਨੂੰ ਸੱਚ ਦਾ ਸ਼ੀਸ਼ਾ ਵਿਖਾਇਆ ਗਿਆ ਹੈ। ਇਸ ਵਿਚ ਅੰਕੜਿਆਂ ਸਹਿਤ ਦੱਸਿਆ ਗਿਆ ਹੈ ਕਿ ਉੱਤਰ ਪੂਰਬੀ ਅਤੇ ਪਹਾੜੀ ਰਾਜਾਂ ਦੇ ਉਦਯੋਗਾਂ ਲਈ ਟੈਕਸ ਰਿਆਇਤਾਂ ਵਿਚ ਸਾਲ 2027 ਤੱਕ ਕੀਤੇ ਵਾਧੇ ਨਾਲ ਪੰਜਾਬ ਨਾਲ ਬੇਇਨਸਾਫ਼ੀ ਹੋਈ ਹੈ। ਇਹ ਵੀ ਸੋਚਣਾ ਹੋਵੇਗਾ ਕਿ ਇਸ ਦਾ ਪੰਜਾਬ ਅਤੇ ਹਰਿਆਣਾ ਵਰਗੇ ਸੂਬਿਆਂ ਉੱਪਰ ਕੀ ਅਸਰ ਪਵੇਗਾ? ਇਸ ਕਾਰਨ ਪਹਿਲਾਂ ਹੀ ਪੰਜਾਬ ਵਿਚ ਵੱਡੀ ਗਿਣਤੀ ਸਨਅਤੀ ਇਕਾਈਆਂ ਬੰਦ ਹੋ ਗਈਆਂ ਹਨ ਅਤੇ ਅਨੇਕਾਂ ਹੋਰ ਬੰਦ ਹੋਣ ਕੰਢੇ ਹਨ। ਪੰਜਾਬ ਦੀ ਆਰਥਿਕਤਾ ਉਪਰ ਵੱਡਾ ਅਸਰ ਪਿਆ ਹੈ ਅਤੇ ਬੇਰੁਜ਼ਗਾਰੀ ਵਧੀ ਹੈ। ਇਸ ਦੇ ਨਾਲ ਹੀ ਇਸ ਸੰਪਾਦਕੀ ਦੇ ਅਖੀਰ ਵਿਚ ਬਿਲਕੁਲ ਸੱਚ ਲਿਖਿਆ ਹੈ ਕਿ ਸਨਅਤੀ ਖੇਤਰ ਵਿਚ ਪਛੜੇ ਪੰਜਾਬ ਦੀ ਸਥਿਤੀ ਕਿਸੇ ਵੱਡੇ ਦੁਖਾਂਤ ਨੂੰ ਜਨਮ ਦੇ ਸਕਦੀ ਹੈ।


-ਜਗਮੋਹਨ ਸਿੰਘ ਲੱਕੀ।


ਸਮਾਜਿਕ ਨਿਯਮਾਂਵਲੀ
ਰਾਜਨੀਤੀ ਵਿਚ ਵਿਰੋਧ ਆਮ ਗੱਲ ਹੈ ਪਰ ਇਸ ਵਿਰੋਧ ਨੂੰ ਘਰ ਦੇ ਚੁੱਲ੍ਹੇ ਤੱਕ ਲੈ ਕੇ ਆਉਣਾ ਗ਼ਲਤ ਹੈ। ਮਾਤਾ ਦੇ ਦਿਹਾਂਤ ਪਿੱਛੋਂ ਮਹਾਰਾਜਾ ਅਮਰਿੰਦਰ ਸਿੰਘ ਦੇ ਘਰ ਘੁੱਪ ਹਨੇਰਾ ਹੋ ਗਿਆ ਹੈ। ਜਿਹੜੇ ਲੋਕ ਮਾਵਾਂ ਗੁਆ ਚੁੱਕੇ ਹਨ, ਉਹ ਇਸ ਦਰਦ ਨੂੰ ਜਾਣਦੇ ਹਨ। ਦੁੱਖ ਦੀ ਘੜੀ ਵਿਚ ਸਮਾਜੀ ਕਦਰਾਂ-ਕੀਮਤਾਂ ਤੋਂ ਜਾਣੂ ਹੋਣਾ ਹਰ ਪ੍ਰਾਣੀ ਦਾ ਫ਼ਰਜ਼ ਹੈ। ਇਸ ਲਈ ਸਮਾਜਿਕ ਨਿਯਮਾਂਵਲੀ ਵਿਚ ਰਹਿ ਕੇ ਬਾਦਲ ਪਰਿਵਾਰ ਨੇ ਉੱਚਾ ਸੁਨੇਹਾ ਦਿੱਤਾ ਹੈ। ਰਾਜ ਮਾਤਾ ਆਪਣੇ ਪਰਿਵਾਰ ਲਈ ਸਹਿਜ ਅਤੇ ਸਿਆਣਪ ਦੀ ਮੂਰਤ ਸੀ, ਜਿਸ ਦੇ ਜਾਣ ਨਾਲ ਪਰਿਵਾਰ ਵਿਚ ਹਨੇਰਾ ਛਾ ਗਿਆ। ਲੋੜ ਹੈ ਹਰ ਪੰਜਾਬੀ ਨੂੰ ਖ਼ਾਸ ਤੌਰ 'ਤੇ ਸ਼ਰੀਕ ਰਾਜਨੀਤਕਾਂ ਨੂੰ ਦੁੱਖ ਦੀ ਘੜੀ ਵਿਚ ਸ਼ਰੀਕ ਹੋ ਕੇ ਸਮਾਜਿਕ ਨਿਯਮਾਂਵਲੀ ਅਪਣਾਉਣ ਦੀ ਹੈ। ਆਖਰ ਮਾਂ ਤਾਂ ਮਾਂ ਹੁੰਦੀ ਹੈ।


-ਸੁਖਪਾਲ ਸਿੰਘ
ਅਬਿਆਣਾ ਕਲਾਂ।

22-08-2017

 ਸਰਕਾਰੀ ਖਜ਼ਾਨੇ ਦੀ ਲੁੱਟ ਰੋਕੋ
ਪੰਜਾਬ 'ਚ ਮੋਤੀਆਂ ਵਾਲੀ ਸਰਕਾਰ, ਖਰਚੇ ਸ਼ਾਹਾਨਾ, ਸਰਕਾਰ ਸਲਾਹਕਾਰਾਂ ਤੇ ਓ. ਐੱਸ. ਡੀਜ਼ ਦੀਆਂ ਨਿਯੁਕਤੀ 'ਤੇ ਪ੍ਰਤੀ ਮਹੀਨਾ 30 ਲੱਖ ਰੁਪਏ ਨਾਜਾਇਜ਼ ਉਡਾ ਰਹੀ ਹੈ। ਉਥੇ ਪੁਲਿਸ ਵਿਭਾਗ 'ਚ ਉੱਚ ਅਧਿਕਾਰੀਆਂ ਦੀ ਭਰਮਾਰ ਹੈ। ਇਸ ਵੇਲੇ ਪੰਜਾਬ ਵਿਚ ਡੀ. ਜੀ. ਪੀ. ਦੀ ਗਿਣਤੀ 11 ਤੇ ਏ. ਡੀ. ਜੀ. ਪੀ. ਦੀ ਗਿਣਤੀ 10 ਹੈ, ਜਦੋਂ ਕਿ ਇੰਡੀਅਨ ਪੁਲਿਸ ਸਰਵਿਸ ਦੇ ਰੂਲਜ਼ ਅਨੁਸਾਰ ਪੰਜਾਬ ਵਿਚ 2 ਡੀ.ਜੀ.ਪੀ. ਦੇ ਅਹੁਦਿਆਂ ਨੂੰ ਪ੍ਰਵਾਨਗੀ ਦਿੱਤੀ ਗਈ ਹੈ। ਸੂਬਾ ਸਰਕਾਰ ਇਸ ਤੋਂ ਇਲਾਵਾ ਦੋ ਹੋਰ ਡੀ. ਜੀ. ਪੀ. ਦੇ ਅਹੁਦਿਆਂ 'ਤੇ ਅਫਸਰਾਂ ਦੀ ਤਾਇਨਾਤੀ ਕਰ ਸਕਦੀ ਹੈ ਪਰ ਪੰਜਾਬ ਸਰਕਾਰ ਨੇ ਨਿਯਮਾਂ ਨੂੰ ਛਿੱਕੇ ਟੰਗ ਕੇ 11 ਡੀ. ਜੀ. ਪੀ. ਬਣਾ ਦਿੱਤੇ ਹਨ। ਇਨ੍ਹਾਂ ਅਫਸਰਾਂ ਨੂੰ ਦੋਵੇਂ ਹੱਥੀਂ ਖਜ਼ਾਨਾ ਲੁਟਾਇਆ ਜਾ ਰਿਹਾ ਹੈ ਪਰ ਇਸ ਵਿਸ਼ੇ 'ਤੇ ਸਾਡੇ ਖਜ਼ਾਨਾ ਮੰਤਰੀ ਦੀ ਚੁੱਪ ਕਈ ਸਵਾਲ ਖੜ੍ਹੇ ਕਰਦੀ ਹੈ।

-ਜਸਕਰਨ ਲੰਡੇ,
ਪਿੰਡ ਤੇ ਡਾਕ: ਲੰਡੇ, ਜ਼ਿਲ੍ਹਾ ਮੋਗਾ।

ਮੀਡੀਆ ਦੀ ਤਾਕਤ
ਵਿਕਾਸ ਬਰਾਲਾ ਅਤੇ ਵਰਣਿਕਾ ਚੰਡੀਗੜ੍ਹ ਕੇਸ ਨੂੰ ਨਵੀਂ ਰੰਗਤ ਦੇਣ ਵਿਚ ਮੀਡੀਏ ਨੇ ਬਿਨਾਂ ਕਿਸੇ ਰਾਜਨੀਤਕ ਪੱਖਪਾਤ ਦੇ ਆਪਣੀ ਬਣਦੀ ਭੂਮਿਕਾ ਨੂੰ ਨਿਭਾਇਆ ਹੈ, ਜਿਸ ਕਾਰਨ ਸ਼ਾਇਦ ਅੱਜ ਕੁੰਡੂ ਪਰਿਵਾਰ ਨੂੰ ਅਤੇ ਪੀੜਤ ਲੜਕੀ ਨੂੰ ਇਨਸਾਫ ਲਈ ਕਾਨੂੰਨ 'ਤੇ ਭਰੋਸਾ ਬੱਝਾ। ਪੁਲਿਸ ਪ੍ਰਸ਼ਾਸਨ ਦਾ ਪਹਿਲਾਂ ਦਾ ਵਤੀਰਾ ਅਤੇ ਹੁਣ ਦਾ ਰਵੱਈਆ ਕਿਤੇ ਨਾ ਕਿਤੇ ਮਹਿਕਮੇ ਨੂੰ ਸਵਾਲਾਂ ਦੇ ਘੇਰੇ ਵਿਚ ਲੈਂਦਾ ਹੈ। ਸ਼ਾਇਦ ਮੀਡੀਆ ਨੇ ਪ੍ਰਸ਼ਾਸਨ ਨੂੰ ਰਾਜਨੀਤਕ ਦਖਲਅੰਦਾਜ਼ੀ ਤੋਂ ਉੱਪਰ ਉੱਠ ਕੇ ਕੇਸ ਨੂੰ ਨਜਿੱਠਣ ਲਈ ਮਜਬੂਰ ਕੀਤਾ। ਐੱਨ. ਡੀ. ਟੀ. ਵੀ. ਨੂੰ ਆਈ.ਏ.ਐੱਸ. ਅਧਿਕਾਰੀ ਵੀ. ਐੱਸ. ਕੁੰਡੂ ਵੱਲੋਂ ਦਿੱਤੀ ਇੰਟਰਵਿਊ ਸਪੱਸ਼ਟ ਕਰਦੀ ਹੈ ਕਿ ਉਨ੍ਹਾਂ ਦਾ ਮੀਡੀਏ ਪ੍ਰਤੀ ਰਵੱਈਆ ਭਰੋਸੇ ਵਾਲਾ ਰਿਹਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਮੀਡੀਏ ਦੀ ਬਦੌਲਤ ਅੱਜ ਕੇਸ ਨੂੰ ਨਵਾਂ ਤੇ ਸਪੱਸ਼ਟ ਚਿਹਰਾ ਮਿਲਿਆ ਹੈ। ਉਧਰ ਵਰਣਿਕਾ ਦਾ ਕਹਿਣਾ ਹੈ ਕਿ ਹੁਣ ਇਹ ਸਿਰਫ ਉਸ ਦੀ ਲੜਾਈ ਨਹੀਂ, ਸਗੋਂ ਹੁਣ ਇਹ ਦੇਸ਼ ਦੀ ਹਰ ਔਰਤ ਦੀ ਲੜਾਈ ਹੈ, ਤਾਂ ਜੋ ਕਿਸੇ ਵੀ ਔਰਤ ਨੂੰ ਬਾਹਰ ਨਿਕਲਣ ਤੋਂ ਪਹਿਲਾਂ ਘੜੀ ਦੀ ਸੂਈ ਵੱਲ ਨਾ ਦੇਖਣਾ ਪਵੇ। ਇਸ ਕੇਸ ਵਿਚ ਮੀਡੀਏ ਵੱਲੋਂ ਕੀਤਾ ਫੇਰਬਦਲ ਇਸ ਗੱਲ ਦਾ ਪ੍ਰਤੀਕ ਸਾਬਤ ਹੁੰਦਾ ਹੈ ਕਿ ਮੀਡੀਆ ਸਾਡੀ ਜ਼ਿੰਦਗੀ ਦਾ ਅਟੁੱਟ ਅੰਗ ਬਣ ਚੁੱਕਾ ਹੈ।

-ਅਰਮਿੰਦਰ ਸਿੰਘ ਮਾਨ

ਕੀਟਨਾਸ਼ਕਾਂ ਦੀ ਅੰਨ੍ਹੇਵਾਹ ਵਰਤੋਂ
ਭਾਰਤ ਦੇ ਕੁਲ ਖੇਤੀਬਾੜੀ ਅਧੀਨ ਰਕਬੇ ਵਿਚ ਪੰਜਾਬ ਦਾ ਰਕਬਾ ਕਰੀਬ 2 ਫੀਸਦੀ ਬਣਦਾ ਹੈ ਪਰ ਕੀਟਨਾਸ਼ਕ ਦਵਾਈਆਂ ਦੀ ਵਰਤੋਂ ਦੇ ਮਾਮਲੇ ਵਿਚ ਪੰਜਾਬ 'ਚ ਵਰਤੀਆਂ ਜਾਣ ਵਾਲੀਆਂ ਕੀਟਨਾਸ਼ਕ ਦਵਾਈਆਂ ਕੁੱਲ ਭਾਰਤ ਵਿਚ ਵਰਤੀਆਂ ਜਾਣ ਵਾਲੀਆਂ ਕੀਟਨਾਸ਼ਕ ਦਵਾਈਆਂ ਦਾ 15 ਤੋਂ 18 ਫੀਸਦੀ ਹਿੱਸਾ ਬਣਦੀਆਂ ਹਨ। ਕਿਸਾਨ ਇਸ ਗੱਲ ਤੋਂ ਅਣਜਾਣ ਹਨ ਕਿ ਇਨ੍ਹਾਂ ਜ਼ਹਿਰੀਲੀਆਂ ਦਵਾਈਆਂ ਦੇ ਅੰਸ਼ ਕੁਝ ਨਾ ਕੁਝ ਮਾਤਰਾ 'ਚ ਖਾਣ ਵਾਲੀਆਂ ਵਸਤਾਂ ਜ਼ਰੀਏ ਮਨੁੱਖੀ ਸਰੀਰ ਵਿਚ ਪ੍ਰਵੇਸ਼ ਕਰਕੇ ਹਰ ਮਨੁੱਖ ਲਈ ਕੈਂਸਰ ਦੀ ਸੌਗਾਤ ਵੰਡਣ ਦਾ ਜ਼ਰੀਆ ਵੀ ਬਣ ਰਹੇ ਹਨ। ਕਈ ਕੀਟਨਾਸ਼ਕ ਦਵਾਈਆਂ ਬਣਾਉਣ ਵਾਲੀਆਂ ਕੰਪਨੀਆਂ ਦਾ ਇਕੋ-ਇਕ ਮਕਸਦ ਆਪਣੇ ਉਤਪਾਦਾਂ ਦੀ ਵੱਧ ਤੋਂ ਵੱਧ ਵਿਕਰੀ ਕਰਨਾ ਹੈ। ਸਰਕਾਰ ਅਤੇ ਖੇਤੀਬਾੜੀ ਮਹਿਕਮੇ ਨੂੰ ਕੀਟਨਾਸ਼ਕ ਦਵਾਈਆਂ ਦੀ ਅੰਨ੍ਹੇਵਾਹ ਵਰਤੋਂ ਨੂੰ ਘੱਟ ਕਰਨ ਲਈ ਕਿਸਾਨਾਂ ਨੂੰ ਵੱਧ ਤੋਂ ਵੱਧ ਜਾਗਰੂਕ ਕਰਨਾ ਚਾਹੀਦਾ ਹੈ ਅਤੇ ਕਿਸਾਨ ਭਰਾਵਾਂ ਨੂੰ ਵੀ ਇਨ੍ਹਾਂ ਦੀ ਵਰਤੋਂ ਘੱਟ ਤੋਂ ਘੱਟ ਮਾਤਰਾ ਵਿਚ ਕਰਨੀ ਚਾਹੀਦੀ ਹੈ, ਨਹੀਂ ਤਾਂ ਆਉਣ ਵਾਲੇ ਸਮੇਂ ਵਿਚ ਨਤੀਜੇ ਇਸ ਤੋਂ ਵੀ ਜ਼ਿਆਦਾ ਘਾਤਕ ਹੋਣਗੇ।

-ਸਰਵਣ ਸਿੰਘ ਭੰਗਲਾਂ,
ਸਮਰਾਲਾ।

21-08-2017

 ਪੰਜਾਬ ਤੇ ਹਿਸਾਬ
'ਪੰਜਾਬ ਨਾਲ ਬੇਇਨਸਾਫ਼ੀ' ਸੰਪਾਦਕੀ ਅਤੇ 'ਪਹਾੜੀ ਰਾਜਾਂ ਨੂੰ ਰਿਆਇਤਾਂ ਦੇਣ ਪਿੱਛੇ ਹੈ ਸਿਆਸੀ ਮੰਤਵ', ਹਰਜਿੰਦਰ ਸਿੰਘ ਲਾਲ ਦਾ ਲੇਖ ਪੜ੍ਹ ਕੇ ਮਹਿਸੂਸ ਹੋਇਆ ਹੈ ਕਿ ਪੰਜਾਬ ਨੂੰ ਹਮੇਸ਼ਾ ਹੀ ਬੇਗਾਨਗੀ ਦਾ ਅਹਿਸਾਸ ਕਰਵਾਇਆ ਜਾਂਦਾ ਹੈ। ਪੰਜਾਬ ਦੀਆਂ ਸਨਅਤੀ ਇਕਾਈਆਂ ਬੰਦ ਹੋਈਆਂ ਅਤੇ ਹੋ ਰਹੀਆਂ ਹਨ, ਕਿਉਂਕਿ ਇਨ੍ਹਾਂ ਰਾਜਾਂ ਦੇ ਮੁਕਾਬਲੇ ਵਿਚ ਮਹਿੰਗੇ ਭਾਅ ਬਣੀ ਵਸਤ ਮਹਿੰਗੇ ਭਾਅ ਹੀ ਵੇਚਣੀ ਹੁੰਦੀ ਹੈ। ਖ਼ਰੀਦਦਾਰ ਸਸਤੀ ਮੰਡੀ ਵਿਚ ਜਾਵੇਗਾ, ਇਹ ਕੁਦਰਤੀ ਹੈ। ਮਾਹਿਰਾਂ ਨੂੰ ਇਕ ਆਸ ਦੀ ਕਿਰਨ ਨਜ਼ਰ ਆ ਰਹੀ ਸੀ ਕਿ ਪਿਛਲੇ ਦੋ ਦਹਾਕਿਆਂ ਤੋਂ ਹਿਮਾਚਲ ਪ੍ਰਦੇਸ਼ ਅਤੇ ਉੱਤਰਾਖੰਡ ਵਿਚ ਚੱਲ ਰਹੀਆਂ ਟੈਕਸ ਸਹੂਲਤਾਂ ਦੇ ਖ਼ਤਮ ਹੋਣ ਦਾ ਸਮਾਂ ਨੇੜੇ ਹੈ। ਸਨਅਤਕਾਰ ਪੰਜਾਬ ਵੱਲ ਮੁੜ ਆਵੇਗਾ। ਪੰਜਾਬ ਸਰਕਾਰ ਵੱਲੋਂ ਸਨਅਤਾਂ ਲਈ 5 ਰੁਪਏ ਪ੍ਰਤੀ ਯੂਨਿਟ ਬਿਜਲੀ ਦੇਣ ਦਾ ਐਲਾਨ ਹੋਰ ਉਤਸ਼ਾਹ ਭਰਨਾ ਵਾਲਾ ਸੀ ਪਰ ਕੇਂਦਰ ਵੱਲੋਂ ਉੱਤਰ-ਪੂਰਬੀ ਰਾਜਾਂ ਦੇ ਪਹਾੜੀ ਰਾਜਾਂ ਨੂੰ ਦਿੱਤੀਆਂ ਟੈਕਸ ਰਿਆਇਤਾਂ ਵਿਚ ਹੋਰ 10 ਸਾਲ ਲਈ ਵਾਧਾ ਕਰਕੇ ਆਸ 'ਤੇ ਪਾਣੀ ਫੇਰ ਦਿੱਤਾ ਗਿਆ ਹੈ। ਪੰਜਾਬ ਲਈ ਹਮੇਸ਼ਾ ਵੱਖਰਾ ਹਿਸਾਬ ਤੇ ਵੱਖਰਾ ਫਾਰਮੂਲਾ ਕਿਉਂ ਲਾਇਆ ਜਾਂਦਾ ਹੈ, ਇਸ ਦਾ ਉੱਤਰ ਉਕਰਨਾ ਪਵੇਗਾ।


-ਰਸ਼ਪਾਲ ਸਿੰਘ,
ਸ਼ੁਭ ਕਰਮਨ ਸੁਸਾਇਟੀ, ਹੁਸ਼ਿਆਰਪੁਰ।


ਘਟੀਆ ਸਿਆਸਤ ਬੰਦ ਹੋਵੇ

ਯੂ. ਪੀ. ਵਿਚ 73 ਬੱਚਿਆਂ ਦੀ ਮੌਤ ਖ਼ੌਫਨਾਕ ਖ਼ਬਰ ਸੀ ਪਰ ਸਾਡੇ ਸਿਸਟਮ ਨੂੰ ਚਲਾਉਣ ਵਾਲਿਆਂ ਵਾਸਤੇ ਇਹ ਕੁਝ ਵੀ ਨਹੀਂ। ਸਜ਼ਾ ਸਾਰਿਆਂ ਨੂੰ ਮਿਲਣੀ ਚਾਹੀਦੀ ਹੈ ਪਰ ਸਾਡੇ ਦੇਸ਼ ਦੀ ਬਦਕਿਸਮਤੀ ਹੈ ਕਿ ਇਥੇ ਹਿਰਨ ਨੂੰ ਮਾਰਨ ਵਾਲੇ 'ਤੇ ਕੇਸ ਚੱਲ ਸਕਦਾ ਹੈ ਪਰ ਬੱਚਿਆਂ ਦੇ ਮਰਨ 'ਤੇ ਕਿਸੇ ਦੀ ਇਨਸਾਨੀਅਤ ਨਹੀਂ ਜਾਗੀ। ਇਕ ਦਿਨ ਕੋਈ ਚੈਨਲ 'ਤੇ ਕਹਿ ਰਿਹਾ ਸੀ, 'ਅੱਜ ਤਾਂ ਸਿਰਫ ਸੱਤ ਬੱਚੇ ਮਰੇ ਹਨ।' ਇਸ ਇਕ ਵਾਕ ਵਿਚੋਂ ਇਨ੍ਹਾਂ ਦੀ ਇਨਸਾਨੀਅਤ, ਲੋਕਾਂ ਪ੍ਰਤੀ ਸੋਚ ਤੇ ਕੁਰਸੀਆਂ ਦੀ ਤਾਕਤ ਦਾ ਹੰਕਾਰ ਵਿਖਾਈ ਦੇ ਗਿਆ।
ਕਾਹਦੀ ਆਜ਼ਾਦੀ, ਕਾਹਦਾ ਵਿਕਾਸ ਤੇ ਕਿਹੜਾ ਵਿਕਾਸ? ਲੋਕਾਂ ਨੂੰ ਮੁਢਲੀਆਂ ਸਹੂਲਤਾਂ ਨਹੀਂ ਤੇ ਡਿਜੀਟਲ ਇੰਡੀਆ ਬਣਾ ਕੇ ਕਿਹਨੂੰ ਲਾਭ ਦੇਣਾ? ਕਿਉਂ ਮੰਤਰੀ ਵਿਦੇਸ਼ਾਂ ਵਿਚ ਇਲਾਜ ਲਈ ਜਾਂਦੇ ਹਨ? ਕਿਉਂ ਇਨ੍ਹਾਂ ਨੂੰ ਸਕਿਉਰਿਟੀ ਚਾਹੀਦੀ ਹੈ? ਸ਼ਰਮ ਆਉਂਦੀ ਹੈ ਤੇ ਆਪਣੀ ਗ਼ਲਤੀ ਦਾ ਅਹਿਸਾਸ ਹੁੰਦਾ ਹੈ ਕਿ ਅਸੀਂ ਕਿਸ ਤਰ੍ਹਾਂ ਦੇ ਬੰਦੇ ਚੁਣ ਕੇ ਸਰਕਾਰ ਬਣਾਉਣ ਲਈ ਭੇਜਦੇ ਹਾਂ? ਮਿਹਰਬਾਨੀ ਕਰਕੇ ਏਨੀ ਗੰਦੀ ਤੇ ਘਟੀਆ ਸਿਆਸਤ ਨਾ ਕਰੋ। ਜਿੰਨੀ ਦੇਰ ਤੱਕ ਸਜ਼ਾਵਾਂ ਤੇ ਫੈਸਲੇ ਜਲਦੀ ਨਹੀਂ ਲਏ ਜਾਂਦੇ, ਮੰਦਭਾਗੀਆਂ ਘਟਨਾਵਾਂ ਨੂੰ ਰੋਕਣਾ ਮੁਸ਼ਕਿਲ ਹੈ।


-ਪ੍ਰਭਜੋਤ ਕੌਰ ਢਿੱਲੋਂ


ਅੰਧ-ਵਿਸ਼ਵਾਸ

ਪਿਛਲੇ ਦੋ ਮਹੀਨਿਆਂ ਤੋਂ ਇਕ ਅਫਵਾਹ ਫੈਲਾਈ ਜਾ ਰਹੀ ਹੈ ਕਿ ਕੋਈ ਗੈਬੀ ਸ਼ਕਤੀ ਸੁੱਤੇ ਪਏ, ਤੁਰਦੇ-ਫਿਰਦੇ, ਕੰਮਕਾਰ ਕਰਦੇ ਆਦਮੀ, ਔਰਤ ਅਤੇ ਬੱਚੇ ਦੇ ਸਿਰ ਤੋਂ ਵਾਲ ਕੱਟ ਜਾਂਦੀ ਹੈ। ਪਰ ਉਸ ਸ਼ਕਤੀ ਦਾ ਪਤਾ ਨਹੀਂ ਲੱਗ ਸਕਿਆ। ਵੱਖ-ਵੱਖ ਤਰ੍ਹਾਂ ਦੇ ਅਨੁਮਾਨ ਲਗਾਏ ਜਾ ਰਹੇ ਹਨ। ਸਾਡੇ ਬਾਬੇ, ਤਾਂਤਰਿਕ, ਸਿਆਣੇ ਅਤੇ ਵਹਿਮੀ ਲੋਕ ਆਪਣੇ-ਆਪਣੇ ਢੰਗ ਨਾਲ ਲੋਕਾਂ ਨੂੰ ਗੁਮਰਾਹ ਕਰ ਰਹੇ ਹਨ। ਬੜਾ ਅਫ਼ਸੋਸ ਹੁੰਦਾ ਜਦ ਅਸੀਂ 21ਵੀਂ ਸਦੀ ਦੇ ਵਿਚ ਪਹੁੰਚ ਕੇ ਭਾਰਤ ਨੂੰ ਸੁਪਰਪਾਵਰ ਬਣਾਉਣ ਦੀ ਗੱਲ ਕਰਦੇ ਹਾਂ ਪਰ ਸਾਡੀ ਜਨਤਾ ਹਾਲੇ ਵੀ ਅੰਧਵਿਸ਼ਵਾਸ ਵਿਚ ਬੁਰੀ ਤਰ੍ਹਾਂ ਖੁੱਭੀ ਹੋਈ ਹੈ। ਸ਼ਰਾਰਤੀ ਦਿਮਾਗ ਵਾਲੇ ਲੋਕ ਇਸ ਤਰ੍ਹਾਂ ਦੀਆਂ ਅਫਵਾਹਾਂ ਫੈਲਾਅ ਕੇ ਆਪਣੀ ਰੋਟੀ ਸੇਕ ਰਹੇ ਹਨ, ਇਨ੍ਹਾਂ ਤੋਂ ਬਚੋ।


-ਜਗਰੂਪ ਸਿੰਘ,
ਥੇਹ ਕਲੰਦਰ (ਫਾਜ਼ਿਲਕਾ)।

18-08-2017

 ਡੋਕਲਾਮ ਬਾਰੂਦ ਦੀ ਢੇਰੀ
ਪਿਛਲੇ ਦਿਨੀਂ 'ਅਜੀਤ' ਦੇ ਸੰਪਾਦਕੀ 'ਗੱਲਬਾਤ ਹੀ ਹੈ ਬਿਹਤਰ ਬਦਲ' ਨੇ ਹਫ਼ਤਿਆਂ ਦੇ ਚਲੇ ਆ ਰਹੇ ਰੇੜਕੇ 'ਡੋਕਲਾਮ' ਦੀ ਵਿਸਥਾਰ ਤੇ ਅਰਥ ਭਰਪੂਰ ਜਾਣਕਾਰੀ ਦਿੱਤੀ ਹੈ। ਦਿਨ-ਬਦਿਨ ਦੋਵਾਂ ਪਾਸਿਆਂ ਤੋਂ ਹੋ ਰਹੀ ਬਿਆਨਬਾਜ਼ੀ ਯੁੱਧ ਵਰਗਾ ਮਾਹੌਲ ਸਿਰਜ ਰਹੀ ਹੈ, ਜਿਸ ਤੋਂ ਸੁਭਾਵਿਕ ਹੀ ਪੂਰੀ ਲੋਕਾਈ ਮਾਯੂਸ ਨਜ਼ਰ ਆ ਰਹੀ ਹੈ। 'ਡੋਕਲਾਮ' ਬਾਰੂਦ ਦੀ ਉਹ ਢੇਰੀ ਪ੍ਰਤੀਤ ਹੋ ਰਹੀ ਹੈ ਜੋ ਇਕ ਤੀਲੀ ਨਾਲ ਦੋ ਗੁਆਂਢੀ ਮੁਲਕਾਂ ਨੂੰ ਨੇਸਤੋਨਾਬੂਦ ਕਰ ਸਕਦੀ ਹੈ। ਸੋ, ਲੋੜ ਹੈ ਇਸ ਮਸਲੇ ਨੂੰ ਸਿਰ ਜੋੜ ਕੇ ਹੀ ਨਿਬੇੜਨ ਦੀਆਂ ਕੋਸ਼ਿਸ਼ਾਂ ਕੀਤੀਆਂ ਜਾਣ ਤਾਂ ਜੋ ਲੋਕ ਦਹਿਸ਼ਤ ਦੇ ਮਾਹੌਲ ਤੋਂ ਬਾਹਰ ਆ ਸਕਣ।

-ਅੰਮ੍ਰਿਤਪਾਲ ਸਿੰਘ ਮੇਘਾਣੀਆਂ
ਸਰਕਾਰੀ ਮਿਡਲ ਸਕੂਲ ਚੌਰਵਾਲਾ (ਫ਼ਤਹਿਗੜ੍ਹ ਸਾਹਿਬ)।

ਧਾਰਮਿਕ/ਰਾਜਸੀ ਸਰਗਰਮੀਆਂ
ਧਾਰਮਿਕ ਸਮਾਗਮ ਵਿਚ ਕਥਾ, ਕੀਰਤਨ ਸੁਣ ਕੇ ਸੰਗਤਾਂ ਵਾਹਿਗੁਰੂ-ਵਾਹਿਗੁਰੂ ਕਰਦੀਆਂ ਘਰਾਂ ਨੂੰ ਵਾਪਸ ਜਾਂਦੀਆਂ ਹਨ ਜਿਸ ਨਾਲ ਸਾਡੀ ਧਾਰਮਿਕ ਬਿਰਤੀ ਬਣੀ ਰਹਿੰਦੀ ਹੈ ਤੇ ਬਣੀ ਰਹਿਣੀ ਵੀ ਚਾਹੀਦੀ ਹੈ। ਪਰ ਸਾਡੇ ਇਹ ਰੁਝਾਨ ਬਣ ਗਿਆ ਹੈ ਕਿ ਜਿਥੇ ਵੀ ਧਾਰਮਿਕ ਸਮਾਗਮ ਹੋਣ, ਉਥੇ ਰਾਜਸੀ ਪਾਰਟੀਆਂ ਇਕੱਠ ਦਾ ਗ਼ਲਤ ਫਾਇਦਾ ਉਠਾਉਂਦੀਆਂ ਹਨ। ਚਾਹੀਦਾ ਇਹ ਹੈ ਕਿ ਸਾਡੀ ਧਾਰਮਿਕ ਸੰਸਥਾ, ਸ਼੍ਰੋ: ਗੁ: ਪ੍ਰੰ: ਕਮੇਟੀ, ਇਸ ਰੁਝਾਨ ਨੂੰ ਬੰਦ ਕਰਵਾਏ। ਚਾਹੇ ਕੋਈ ਵੀ ਪਾਰਟੀ ਹੋਵੇ, ਉਸ ਨੂੰ ਉਥੇ ਧਾਰਮਿਕ ਜਗ੍ਹਾ 'ਤੇ ਕੋਈ ਵੀ ਕਾਨਫ਼ਰੰਸ ਨਾ ਕਰਨ ਦੇਵੇ। ਮੱਥਾ ਟੇਕਣ ਹਰ ਵਰਗ ਦਾ ਬੰਦਾ ਆਉਂਦਾ ਹੈ ਤਾਂ ਚਾਹੀਦਾ ਇਹ ਹੈ ਕਿ ਇਥੋਂ ਕੁਝ ਸਿੱਖਿਆ ਲੈ ਕੇ ਜਾਵੇ, ਨਾ ਕਿ ਇਕ-ਦੂਜੇ ਦੀ ਪਾਰਟੀ ਨੂੰ ਗਾਲ੍ਹਾਂ ਕੱਢਦਾ ਮੁੜੇ।

-ਹਰਜਿੰਦਰਪਾਲ ਸਿੰਘ ਬਾਜਵਾ
536, ਗਲੀ 5-ਬੀ, ਵਿਜੇ ਨਗਰ, ਹੁਸ਼ਿਆਰਪੁਰ

ਭ੍ਰਿਸ਼ਟਾਚਾਰ ਦਾ ਖ਼ਾਤਮਾ
ਪਿਛਲੇ ਦਿਨੀਂ ਸੰਪਾਦਕੀ ਪੰਨੇ 'ਤੇ ਲੇਖ 'ਆਜ਼ਾਦੀ ਦਾ ਸੰਘਰਸ਼' ਪੜ੍ਹਿਆ, ਜਿਸ ਵਿਚ ਫ਼ਿਰਕੂਵਾਦ, ਬੇਰੁਜ਼ਗਾਰੀ, ਭ੍ਰਿਸ਼ਟਾਚਾਰ, ਗ਼ਰੀਬੀ ਵਰਗੇ ਗੰਭੀਰ ਮੁੱਦਿਆਂ ਦੀ ਗੱਲ ਕੀਤੀ ਗਈ ਸੀ। ਇਹ ਚੁਣੌਤੀਆਂ ਦੇਸ਼ ਦੇ ਅੱਗੇ ਹਨ ਅਤੇ ਇਨ੍ਹਾਂ ਨੂੰ ਤਕੜੇ ਹੋ ਕੇ ਨਜਿੱਠਣ ਦੀ ਲੋੜ ਹੈ। ਭ੍ਰਿਸ਼ਟਾਚਾਰ ਕੈਂਸਰ ਰੂਪੀ ਜੰਜਾਲ ਹੈ ਜਿਹੜਾ ਲਗਾਤਾਰ ਵਧਦਾ ਜਾ ਰਿਹਾ ਹੈ। ਇਹ ਅਹਿਮ ਸਮੱਸਿਆ ਹੈ। ਦੇਸ਼ ਦੀ ਤਰੱਕੀ ਵਿਚ ਭ੍ਰਿਸ਼ਟਾਚਾਰ ਬਹੁਤ ਵੱਡੀ ਰੁਕਾਵਟ ਹੈ, ਦੇਸ਼ ਅਤੇ ਨਾਗਰਿਕਾਂ ਨੂੰ ਇਸ ਦੀ ਕੀਮਤ ਚੁਕਾਉਣੀ ਪੈ ਰਹੀ ਹੈ। ਵੱਡੇ-ਛੋਟੇ ਭ੍ਰਿਸ਼ਟਾਚਾਰੀਆਂ ਨੂੰ ਕਾਬੂ ਕਰਨ ਦੀ ਲੋੜ ਹੈ। ਆਮ ਨਾਗਰਿਕ ਸੁਚੇਤ ਹੋਣ। ਦਲਾਲਾਂ ਅਤੇ ਭ੍ਰਿਸ਼ਟਾਚਾਰੀਆਂ ਦਾ ਤਾਣਾ-ਬਾਣਾ ਖ਼ਤਮ ਕੀਤਾ ਜਾਵੇ। ਭ੍ਰਿਸ਼ਟਾਚਾਰ ਵਿਰੋਧੀ ਮੁਹਿੰਮ ਵੱਡੇ ਪੱਧਰ 'ਤੇ ਵਿੱਢਣ ਦੀ ਲੋੜ ਹੈ। ਇਹ ਲੇਖ ਸ਼ਲਾਘਾਯੋਗ ਸੀ।

-ਜਸਪਾਲ ਸਿੰਘ ਲੋਹਾਮ
#29/166 ਗਲੀ ਹਜ਼ਾਰਾ ਸਿੰਘ, ਮੋਗਾ।

17-08-2017

 ਰਸੋਈ ਦਾ ਬਜਟ
ਲੋਕ ਹਿਤੈਸ਼ੀ ਸਰਕਾਰ ਦਾ ਮੁਢਲਾ ਫ਼ਰਜ਼ ਬਣਦਾ ਹੈ ਕਿ ਹਰ ਪਰਿਵਾਰ ਦੀ ਰਸੋਈ ਦੇ ਬਜਟ ਦਾ ਖਿਆਲ ਰੱਖੇ। ਪਰ ਸਰਕਾਰ ਨੇ ਜੀ.ਐਸ.ਟੀ. ਰਾਹੀਂ ਰਸੋਈ ਦਾ ਬਜਟ ਵਿਗਾੜ ਦਿੱਤਾ ਹੈ। ਬਹੁਤ ਸਾਰੇ ਪਦਾਰਥਾਂ 'ਤੇ ਜੀ.ਐਸ.ਟੀ. ਦੀ ਉੱਚੀ ਦਰ ਨੇ ਹਰ ਸੁਆਣੀ ਦੀ ਚਿੰਤਾ ਵਧਾ ਦਿੱਤੀ ਹੈ। ਰਹਿੰਦੀ ਕਸਰ ਕੇਂਦਰ ਸਰਕਾਰ ਵੱਲੋਂ ਰਸੋਈ ਗੈਸ 'ਤੇ ਸਬਸਿਡੀ ਖ਼ਤਮ ਕਰਨ ਦੇ ਤਾਜ਼ਾ ਫ਼ੈਸਲੇ ਨੇ ਪੂਰੀ ਕਰ ਦਿੱਤੀ ਹੈ। ਅਜਿਹੇ ਫ਼ੈਸਲੇ ਕਲਿਆਣਕਾਰੀ ਰਾਜ ਦੇ ਸੰਕਲਪ ਦੇ ਉਲਟ ਹਨ। ਪਹਿਲਾਂ ਹੀ ਸਾਡੇ ਸਮਾਜ ਦੇ ਮਿਹਨਤਕਸ਼ ਵਰਗ ਨੂੰ ਦੋ ਡੰਗ ਦੀ ਰੋਟੀ ਦੇ ਲਾਲੇ ਪਏ ਹੋਏ ਹਨ। ਸੋ, ਸਰਕਾਰ ਨੂੰ ਪਹਿਲ ਦੇ ਆਧਾਰ 'ਤੇ ਇਸ ਅਹਿਮ ਪਹਿਲੂ ਬਾਰੇ ਵਿਚਾਰ ਕੇ ਰਸੋਈ ਦੇ ਬਜਟ ਨੂੰ ਘਟਾਉਣ ਲਈ ਠੋਸ ਕਦਮ ਚੁੱਕਣੇ ਚਾਹੀਦੇ ਹਨ।

-ਮਹਿੰਦਰ ਕੌਰ ਢਿੱਲੋਂ
ਪ੍ਰਿੰ: ਦਸਮੇਸ਼ ਪਬਲਿਕ ਸੀ.ਸੈ. ਸਕੂਲ, ਬਿਲਾਸਪੁਰ (ਮੋਗਾ)।

ਅਵਾਰਾ ਕੁੱਤੇ
ਅਵਾਰਾ ਕੁੱਤਿਆਂ ਨੇ ਆਮ ਲੋਕਾਂ ਦੀ ਜ਼ਿੰਦਗੀ ਬੇਹਾਲ ਕੀਤੀ ਹੋਈ ਹੈ। ਕੁਝ ਸਮਾਂ ਪਹਿਲਾਂ ਇਕ ਚਾਰ ਸਾਲ ਦੇ ਬੱਚੇ ਨੂੰ ਖਾ ਗਏ, ਜੋ ਕਿ ਮਾਪਿਆਂ ਦਾ ਇਕਲੌਤਾ ਬੇਟਾ ਸੀ। ਕੀ ਇਹ ਕਤਲ ਨਹੀਂ ਹੈ? ਇਸ ਕਤਲ ਦਾ ਪਰਚਾ ਕਿਸ 'ਤੇ ਦਰਜ ਹੋਵੇ। ਕਿਸੇ ਕੁੱਤੇ ਉੱਪਰ ਜਾਂ ਕਿਸੇ ਪ੍ਰਸ਼ਾਸਨਿਕ ਅਧਿਕਾਰੀ 'ਤੇ ਜਾਂ ਫਿਰ ਕਿਸੇ ਮੰਤਰੀ 'ਤੇ। ਜਦੋਂ ਇਨ੍ਹਾਂ ਕੁੱਤਿਆਂ ਦਾ ਕਹਿਰ ਵਾਪਰਦਾ ਹੈ ਤਾਂ ਇਕ-ਦੋ ਦਿਨ ਖ਼ਬਰਾਂ ਆਉਂਦੀਆਂ ਹਨ। ਸਰਕਾਰ ਨੂੰ ਬੇਨਤੀ ਹੈ ਕਿ ਇਸ ਦਾ ਕੋਈ ਪੱਕਾ ਹੱਲ ਕੱਢਿਆ ਜਾਵੇ ਜਾਂ ਇਹ ਜੋ ਕੁੱਤੇ ਅੱਤਵਾਦ ਦੀਆਂ ਫ਼ੌਜਾਂ ਵਾਂਗ ਫਿਰਦੇ ਹਨ, ਇਨ੍ਹਾਂ ਨੂੰ ਦਵਾਈ ਪਾ ਕੇ ਮਾਰਨ ਦੀ ਇਜਾਜ਼ਤ ਦਿੱਤੀ ਜਾਵੇ।

-ਡਾ: ਕੇਵਲ ਸਿੰਘ ਰੰਧਾਵਾ
ਪਿੰਡ ਹਰਸ਼ਾ ਛੀਨਾ (ਉੱਚਾ ਕਿਲ੍ਹਾ), ਤਹਿ: ਅਜਨਾਲਾ, ਜ਼ਿਲ੍ਹਾ ਅੰਮ੍ਰਿਤਸਰ।

ਨਿਯਮਬੱਧ ਹੋਣਾ
ਦੁਨੀਆ ਵਿਚ ਕਿਸੇ ਵੀ ਸੰਸਥਾ ਨੂੰ ਦੇਖ ਲਈਏ ਹਰੇਕ ਦੇ ਆਪਣੇ ਕੁਝ ਨਿਯਮ ਹੁੰਦੇ ਹਨ, ਜਿਨ੍ਹਾਂ ਅਨੁਸਾਰ ਉਸ ਸੰਸਥਾ ਦੇ ਜੋ ਕਰਮਚਾਰੀ ਹਨ, ਉਨ੍ਹਾਂ ਦੇ ਕਾਰਜ ਕਰਨੇ ਹੁੰਦੇ ਹਨ। ਜੋ ਵਿਦਿਆਰਥੀ, ਸਕੂਲ, ਕਾਲਜ ਦੇ ਨਿਯਮ ਅਨੁਸਾਰ ਚਲਦਾ ਹੈ, ਜ਼ਰੂਰ ਸਫਲਤਾ ਪ੍ਰਾਪਤ ਕਰਦਾ ਹੈ। ਜਿਵੇਂ ਸੜਕ 'ਤੇ ਚੱਲਣ ਦੇ ਕੁਝ ਨਿਯਮ ਹਨ, ਜੋ ਮਨੁੱਖ ਉਨ੍ਹਾਂ ਦੀ ਉਲੰਘਣਾ ਕਰਦੇ ਹਨ, ਉਹ ਸੁਭਾਵਿਕ ਹੀ ਹੈ ਕਿ ਦੁਰਘਟਨਾਵਾਂ ਦਾ ਸ਼ਿਕਾਰ ਹੋ ਜਾਂਦੇ ਹਨ। ਉਹ ਮੰਜ਼ਿਲ ਨੂੰ ਪ੍ਰਾਪਤ ਨਹੀਂ ਕਰ ਪਾਉਂਦੇ ਪਰ ਜੋ ਇਨ੍ਹਾਂ ਨਿਯਮਾਂ ਦੀ ਪਾਲਣ ਕਰਦਾ ਹੈ, ਉਹ ਹਮੇਸ਼ਾ ਦੁਰਘਟਨਾਵਾਂ ਤੋਂ ਬਚ ਆਪਣੀ ਮੰਜ਼ਿਲ 'ਤੇ ਪਹੁੰਚ ਜਾਂਦਾ ਹੈ। ਸੋ, ਇਸੇ ਤਰ੍ਹਾਂ ਜ਼ਿੰਦਗੀ ਦੇ ਕੁਝ ਨਿਯਮ ਹਨ ਜੋ ਇਨ੍ਹਾਂ ਨਿਯਮਾਂ ਦੀ ਪਾਲਣਾ ਕਰਦੇ ਹੋਏ ਜੀਵਨ ਬਤੀਤ ਕਰਦੇ ਹਨ, ਉਨ੍ਹਾਂ ਦੇ ਪੈਰ ਸਫਲਤਾ ਆਪ ਚੁੰਮਦੀ ਹੈ।

-ਨਵਜੋਤ ਸਿੰਘ ਰੰਧਾਵਾ
ਖਡੂਰ ਸਾਹਿਬ।

ਕਾਨੂੰਨ ਦੀਆਂ ਖ਼ਾਮੀਆਂ
ਔਰਤਾਂ 'ਤੇ ਜ਼ੁਲਮ ਬਦਸਤੂਰ ਜਾਰੀ ਹਨ। ਹਿਮਾਚਲ ਦਾ ਗੁੜੀਆ ਕਾਂਡ ਹੋਵੇ, ਤਲਵੰਡੀ ਸਾਬੋ ਵਿਖੇ ਸਕੂਲ ਵਿਦਿਆਰਥਣ 'ਤੇ ਕਾਤਲਾਨਾ ਹਮਲਾ ਜਾਂ ਕਪੂਰਥਲਾ ਵਿਖੇ ਮਹਿਲਾ ਜੱਜ ਦੇ ਹੱਥੋਂ ਮੋਬਾਈਲ ਖੋਹਣ ਦੀ ਘਟਨਾ ਹੋਵੇ। ਲੁੱਟ ਜਾਂ ਨਸ਼ਾ ਤਸਕਰੀ, ਰੁਕਣ ਦਾ ਨਾਂਅ ਹੀ ਨਹੀਂ ਲੈ ਰਹੇ। ਆਮ ਆਦਮੀ ਦਾ ਜੀਣਾ ਮੁਹਾਲ ਹੋ ਰਿਹਾ ਹੈ। ਐਫ.ਆਈ.ਆਰ. ਦਰਜ ਕਰਾਉਣ ਲਈ ਸੜਕਾਂ ਜਾਮ ਕਰਨੀਆਂ ਪੈਂਦੀਆਂ ਹਨ। ਦੋਸ਼ੀਆਂ ਨੂੰ ਫੜਨ 'ਚ ਦੇਰੀ ਆਦਿ ਦੀਆਂ ਗੰਭੀਰ ਘਟਨਾਵਾਂ ਕਾਰਨ ਦੋਸ਼ੀਆਂ ਨੂੰ ਬਲ ਮਿਲਦਾ ਹੈ। ਲਗਦਾ ਹੈ ਕਿ ਸਿਆਸੀ ਪ੍ਰਭਾਵ ਅਤੇ ਪੈਸੇ ਦੀ ਵਰਤੋਂ ਦੀ ਮਜ਼ਲੂਮਾਂ ਨੂੰ ਇਨਸਾਫ਼ ਲੈਣ ਵਿਚ ਰੁਕਾਵਟ ਪਾਉਂਦੇ ਹਨ।

-ਮਾ: ਮਹਿੰਦਰ ਸਿੰਘ ਬਾਜਵਾ।

15-08-2017

 ਮੋਬਾਈਲ ਅਤੇ ਨੌਜਵਾਨ ਪੀੜ੍ਹੀ
ਦਹਾਕਾ ਕੁ ਪਹਿਲਾਂ ਤੋਂ ਸ਼ੁਰੂ ਹੋਇਆ ਮੋਬਾਈਲ ਦਾ ਯੁੱਗ ਬੇਸ਼ੱਕ ਸਾਡੀਆਂ ਜ਼ਰੂਰਤਾਂ ਦਾ ਹਿੱਸਾ ਬਣ ਚੁੱਕਾ ਹੈ। ਨੈੱਟਵਰਕ ਕੰਪਨੀਆਂ ਵੱਲੋਂ ਦਿੱਤੀਆਂ ਜਾਂਦੀਆਂ ਸਸਤੇ ਹੋਣ ਦੀਆਂ ਸਹੂਲਤਾਂ ਆਮ ਜਨਤਾ ਦੀ ਜ਼ਰੂਰਤ ਬਣ ਚੁੱਕੀਆਂ ਹਨ। ਮੋਬਾਈਲ ਫੋਨ ਵਿਚ ਚੱਲ ਰਹੇ ਐਪਸ ਜਿਵੇਂ ਫੇਸਬੁੱਕ, ਵਟਸ-ਐਪ, ਜੀ-ਮੇਲ, ਇੰਸਟਾਗ੍ਰਾਮ ਆਦਿ ਉੱਪਰ ਆਪਣੀ ਫੋਕੀ ਸ਼ੋਹਰਤ ਲਈ ਅਲੱਗ-ਅਲੱਗ ਤਰ੍ਹਾਂ ਦੇ ਪੋਜ ਬਣਾ ਕੇ ਸੈਲਫੀਆਂ ਕਲਿਕ ਕਰਕੇ ਪਾ ਰਹੇ ਹਨ ਅਤੇ ਕੁਝ ਲੋਕ ਸੈਲਫੀਆਂ ਦੇ ਚੱਕਰ ਵਿਚ ਆਪਣੀ ਜਾਨ ਤੱਕ ਗੁਆ ਚੁੱਕੇ ਹਨ। ਜਿਨ੍ਹਾਂ ਨੌਜਵਾਨਾਂ ਦੇ ਹੱਥਾਂ ਵਿਚ ਖੇਡਾਂ ਵਿਚ ਪ੍ਰਾਪਤ ਕੀਤੇ ਇਨਾਮ ਹੋਣੇ ਚਾਹੀਦੇ ਹਨ। ਅੱਜ ਉਨ੍ਹਾਂ ਦੇ ਹੱਥਾਂ ਵਿਚ ਪਿਸਤੌਲ-ਬੰਦੂਕਾਂ ਆਦਿ ਹੁੰਦੀਆਂ ਹਨ ਜਾਂ ਮਹਿੰਗੀਆਂ ਗੱਡੀਆਂ, ਚਾਹੇ ਉਹ ਕਿਸੇ ਹੋਰ ਦੀਆਂ ਹੀ ਕਿਉਂ ਨਾ ਹੋਣ। ਫੋਟੋਆਂ ਖਿੱਚ ਕੇ ਫੇਸਬੁੱਕ, ਵਟਸਐਪ 'ਤੇ ਪਾਈਆਂ ਜਾਂਦੀਆਂ ਹਨ। ਅੱਜ ਪੜ੍ਹਨ ਵਾਲੇ ਵਿਦਿਆਰਥੀਆਂ ਨੂੰ ਪੇਪਰ ਵਿਚੋਂ ਪਾਸ ਹੋਣ ਦੀ ਓਨੀ ਫ਼ਿਕਰ ਨਹੀਂ ਹੁੰਦੀ ਜਿੰਨੀ ਇਹ ਉਤਸੁਕਤਾ ਹੁੰਦੀ ਹੈ ਕਿ ਕਿਹੜੀ ਕੰਪਨੀ ਕਦੋਂ ਨਵਾਂ ਫੋਨ ਲਾਂਚ ਕਰ ਰਹੀ ਹੈ। ਇਸ ਫੋਕੀ ਸ਼ੋਹਰਤ ਨੂੰ ਛੱਡ ਕੇ ਨੌਜਵਾਨ ਵਰਗ ਪੜ੍ਹਾਈ ਅਤੇ ਖੇਡਾਂ ਵੱਲ ਜ਼ਿਆਦਾ ਧਿਆਨ ਦੇਵੇ ਤੇ ਪੰਜਾਬ ਦਾ ਨਾਂਅ ਰੌਸ਼ਨ ਕਰੇ।

-ਪਰਮਜੀਤ ਸਿੰਘ ਬੁੱਟਰ
ਪਿੰਡ ਕੋਟਲਾ ਖੁਰਦ, ਜ਼ਿਲ੍ਹਾ ਗੁਰਦਾਸਪੁਰ।

ਸਰਕਾਰ ਦੇ ਧਿਆਨ ਹਿਤ
ਪੰਜਾਬ ਸਰਕਾਰ ਦੇ ਲਗਪਗ 5 ਮਹੀਨੇ ਪੂਰੇ ਹੋਣ ਤੋਂ ਬਾਅਦ ਵੀ ਬੁਢਾਪਾ, ਵਿਧਵਾ ਅਤੇ ਅੰਗਹੀਣ ਪੈਨਸ਼ਨਾਂ ਵੱਲ ਕੋਈ ਧਿਆਨ ਨਹੀਂ ਦਿੱਤਾ। ਮੀਡੀਆ ਦੁਆਰਾ ਸਰਕਾਰ ਦੇ ਧਿਆਨ ਵਿਚ ਲਿਆਉਣਾ ਜ਼ਰੂਰੀ ਹੈ ਕਿ ਸਰਕਾਰ ਹੋਰ ਕੰਮਾਂ ਦੇ ਨਾਲ-ਨਾਲ ਪੈਨਸ਼ਨਾਂ ਦਾ ਕੰਮ ਪਹਿਲ ਦੇ ਆਧਾਰ 'ਤੇ ਕਰੇ। ਕਿਉਂਕਿ ਵੱਡੀ ਤਦਾਦ ਵਿਚ ਲਾਭਪਾਤਰੀ ਪੈਨਸ਼ਨਾਂ 'ਤੇ ਹੀ ਨਿਰਭਰ ਹਨ। ਸਰਕਾਰ ਨੇ ਅਜੇ ਤੱਕ ਇਸ ਬਾਰੇ ਵੀ ਕੋਈ ਖੁੱਲ੍ਹ ਕੇ ਬਿਆਨ ਨਹੀਂ ਦਿੱਤਾ ਕਿ ਆਟਾ-ਦਾਲ ਸਕੀਮ ਕਦੋਂ ਤੱਕ ਲੋੜਵੰਦਾਂ ਤੱਕ ਪਹੁੰਚ ਜਾਵੇਗੀ। ਬਾਕੀ ਇਹ ਜ਼ਰੂਰੀ ਹੈ ਕਿ ਅਕਾਲੀ ਦਲ ਦੀ ਸਰਕਾਰ ਨੇ ਜੋ ਨੀਲੇ ਕਾਰਡ ਬਣਾਏ ਸੀ, ਉਨ੍ਹਾਂ ਵਿਚ ਕਾਫੀ ਹੱਦ ਤੱਕ ਨਾਜਾਇਜ਼ ਕਾਰਡ ਵੀ ਬਣੇ ਹੋਏ ਹਨ। ਆਟਾ-ਦਾਲ ਵੰਡਣ ਦੇ ਨਾਲ-ਨਾਲ ਪੜਚੋਲ ਕਰ ਨਾਜਾਇਜ਼ ਬਣੇ ਨੀਲੇ ਕਾਰਡ ਵੀ ਬੰਦ ਕੀਤੇ ਜਾਣ।

-ਸੁਖਵਿੰਦਰ ਕਲੇਰ ਬੱਸੀਆਂ
ਪਿੰਡ ਤੇ ਡਾਕ: ਬੱਸੀਆਂ, ਜ਼ਿਲ੍ਹਾ ਲੁਧਿਆਣਾ।

ਸਾਂਝੇ ਪਰਿਵਾਰ
ਬੀਤੇ ਦਿਨ ਲੋਕ ਮੰਚ ਸਫ਼ੇ 'ਤੇ ਲੇਖਕ ਮੁਹੰਮਦ ਬਸ਼ੀਰ ਦਾ ਲੇਖ 'ਰਿਸ਼ਤਿਆਂ ਵਿਚ ਘਟਿਆ ਨਿੱਘ' ਪੜ੍ਹਿਆ, ਵਧੀਆ ਲੱਗਾ। ਵਾਕਿਆ ਪਦਾਰਥਵਾਦ ਦੀ ਚੱਲ ਰਹੀ ਹਨੇਰੀ ਵਿਚ ਅਸੀਂ ਬਹੁਤ ਕੀਮਤੀ ਤੇ ਅਤੀ ਨਜ਼ਦੀਕੀ ਰਿਸ਼ਤਿਆਂ ਨੂੰ ਭੰਗ ਦੇ ਭਾਅ ਹੀ ਗੁਆ ਦਿੱਤਾ। ਪਿਆਰ ਦੀਆਂ ਗੰਢਾਂ ਢਿੱਲੀਆਂ ਹੋ ਗਈਆਂ। ਸਾਡੇ ਸਮਾਜ 'ਚ ਇਖਲਾਕੀ ਗਿਰਾਵਟ ਆ ਚੁੱਕੀ ਹੈ। ਸਹਿਣਸ਼ੀਲਤਾ, ਪਿਆਰ, ਇਮਾਨਦਾਰੀ, ਵੱਡਿਆਂ ਦਾ ਸਤਿਕਾਰ, ਮਿਹਨਤ ਤੇ ਸਾਕਾਰਤਮਿਕ ਸੋਚ ਵਰਗੇ ਗੁਣ ਸਾਨੂੰ ਸਾਂਝੇ ਪਰਿਵਾਰਾਂ ਵਿਚ ਰਹਿ ਕੇ ਸਿੱਖਣ ਨੂੰ ਮਿਲਦੇ ਸਨ। ਇਕ ਤਰ੍ਹਾਂ ਨਾਲ ਸੰਯੁਕਤ ਪਰਿਵਾਰ ਬੱਚੇ ਲਈ ਪਹਿਲਾ ਸਕੂਲ ਹੁੰਦਾ ਸੀ। ਕੁੱਲ ਮਿਲਾ ਕੇ ਰਿਸ਼ਤਿਆਂ ਦੇ ਨਿੱਘ ਲਈ ਹਊਮੈ ਦਾ ਤਿਆਗ ਜ਼ਰੂਰੀ ਹੈ। ਸ਼ਾਂਤਮਈ ਵਾਤਾਵਰਨ ਸਿਰਜ, ਸਾਂਝੇ ਪਰਿਵਾਰ ਨੂੰ ਮੁੜ ਸੁਰਜੀਤ ਕਰਨ ਦੀ ਸੰਭਵ ਕੋਸ਼ਿਸ਼ ਕਰਨੀ ਬਣਦੀ ਹੈ।

-ਮਾ: ਦੇਵ ਰਾਜ ਖੁੰਡਾ
ਰਾਮ ਸ਼ਰਨਮ ਕਾਲੋਨੀ, ਗੁਰਦਾਸਪੁਰ।

ਸਿੱਖਿਆ ਸੁਧਾਰ
ਜਿਸ ਤਰ੍ਹਾਂ ਇਕ ਛੋਟੇ ਬੱਚੇ ਨੂੰ ਵਧਣ-ਫੁੱਲਣ ਲਈ ਵਧੀਆ ਖੁਰਾਕ ਅਤੇ ਸੂਰਜ ਦੀ ਰੌਸ਼ਨੀ ਦੀ ਜ਼ਰੂਰਤ ਹੈ, ਉਸੇ ਤਰ੍ਹਾਂ ਹੀ ਅੱਜ ਸਿੱਖਿਆ ਵਿਭਾਗ ਦੇ ਬੁਨਿਆਦੀ ਢਾਂਚੇ ਅਤੇ ਇਸ ਨੂੰ ਵਿਗਿਆਨਕ ਲੀਹਾਂ ਉੱਪਰ ਤੋਰਨ ਦੀ ਜ਼ਰੂਰਤ ਹੈ। ਸ੍ਰੀ ਕ੍ਰਿਸ਼ਨ ਕੁਮਾਰ ਆਈ.ਏ.ਐਸ. ਦੀ ਬਤੌਰ ਸਕੱਤਰ ਪੰਜਾਬ ਸਿੱਖਿਆ ਵਿਭਾਗ ਵਿਚ ਨਿਯੁਕਤੀ ਸਿੱਖਿਆ ਸੁਧਾਰਾਂ ਲਈ ਇਕ ਵਧੀਆ ਸ਼ਗਨ ਮੰਨਿਆ ਜਾਂਦਾ ਹੈ। ਉਨ੍ਹਾਂ ਨੇ ਪਲੇਠੇ ਸੰਬੋਧਨ ਰਾਹੀਂ ਆਪਣੇ ਇਰਾਦੇ ਸਾਫ਼ ਕਰ ਦਿੱਤੇ ਹਨ। ਇਸ ਪਵਿੱਤਰ ਪੇਸ਼ੇ ਨੂੰ ਰਾਜਨੀਤਕ ਗ੍ਰਹਿਣ ਨਹੀਂ ਲੱਗਣਾ ਚਾਹੀਦਾ। ਅੱਜ ਸਮੇਂ ਦੀ ਜ਼ਰੂਰਤ ਹੈ ਕਿ ਸਿੱਖਿਆ ਵਿਭਾਗ ਪੰਜਾਬ ਵਧੇ ਫੁੱਲੇ ਅਤੇ ਹਮੇਸ਼ਾ ਦੀ ਤਰ੍ਹਾਂ ਪੂਰੇ ਦੇਸ਼ ਦੀ ਅਗਵਾਈ ਕਰੇ।

-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀਖਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

14-08-2017

 ਅਫ਼ਵਾਹਾਂ ਅਤੇ ਡਰਾਮੇਬਾਜ਼ੀਆਂ
ਰਾਜਸਥਾਨ ਦੇ ਰੇਤਲੇ ਟਿੱਬਿਆਂ ਵਿਚੋਂ ਉਠੀਆਂ ਔਰਤਾਂ ਦੇ ਵਾਲ ਕੱਟੇ ਜਾਣ ਦੀਆਂ ਡਰਾਮੇਬਾਜ਼ੀਆਂ ਨੇ ਹੁਣ ਪੰਜਾਬ ਦੇ ਪਿੰਡਾਂ ਅਤੇ ਸ਼ਹਿਰਾਂ ਵਿਚ ਦੀ ਹੁੰਦੀਆਂ ਆਰਥਿਕ ਪੱਖੋਂ ਕਮਜ਼ੋਰ ਅਤੇ ਅਨਪੜ੍ਹਤਾ ਦੇ ਸ਼ਿਕਾਰ ਲੋਕਾਂ ਦੇ ਘਰਾਂ ਵਿਚ ਦਸਤਕ ਦੇ ਦਿੱਤੀ ਹੈ। ਦੁੱਖ ਦੀ ਗੱਲ ਤਾਂ ਇਹ ਹੈ ਕਿ ਅਜਿਹੀਆਂ ਅਫ਼ਵਾਹਾਂ ਅਤੇ ਡਰਾਮੇਬਾਜ਼ੀਆਂ ਹੁੰਦੀਆਂ ਸੁਣ ਕੇ ਪੰਜਾਬ ਦਾ ਪੜ੍ਹਿਆ-ਲਿਖਿਆ ਵਰਗ ਵੀ ਖ਼ਾਮੋਸ਼ ਬੈਠਾ ਹੈ। ਬੀਤੇ ਸਮੇਂ ਵਿਚ ਲੋਕਾਂ ਨੇ ਘਿਓ ਤੋਰੀਆਂ ਵਿਚ ਸੱਪ ਦੀ ਫੋਟੋ ਦਿਸਣੀ, ਦੋਹਤਿਆਂ ਦੀ ਸਲਾਮਤੀ ਲਈ ਨਾਨੀਆਂ ਵੱਲੋਂ ਠੂਠੀਆਂ ਲੈ ਕੇ ਜਾਣਾ ਅਤੇ ਮੂਰਤੀਆਂ ਨੇ ਦੁੱਧ ਪੀਣਾ ਆਦਿ ਅਨੇਕਾਂ ਅਫ਼ਵਾਹਾਂ ਨੰਗੇ ਪਿੰਡੇ 'ਤੇ ਹੰਢਾਈਆਂ ਹਨ। ਲੋੜ ਹੈ ਸੂਝਵਾਨ ਲੋਕਾਂ ਨੂੰ ਅਜਿਹੇ ਅੰਧ-ਵਿਸ਼ਵਾਸ ਦੇ ਟੋਏ ਨੂੰ ਭਰਨ ਦੀ, ਤਾਂ ਕਿ ਕੱਲ੍ਹ ਨੂੰ ਕੋਈ ਨਵੀਂ ਅਫ਼ਵਾਹ ਜਨਮ ਨਾ ਲੈ ਸਕੇ।


-ਅੰਗਰੇਜ਼ ਸਿੰਘ ਬਰਾੜ
ਪਿੰਡ ਤੇ ਡਾਕ: ਫੇਰੋਕੇ, ਤਹਿਸੀਲ ਜ਼ੀਰਾ, (ਫਿਰੋਜ਼ਪੁਰ)।


ਚੂਹਿਆਂ ਦੀ ਭਰਮਾਰ
ਕਿਸਾਨ ਨੂੰ ਕਦੇ ਅਵਾਰਾ ਪਸ਼ੂਆਂ, ਕਦੇ ਅਵਾਰਾ ਸੂਰ, ਕਦੇ ਅਵਾਰਾ ਕੁੱਤੇ ਤੇ ਕਦੇ ਕੋਈ ਹੋਰ ਜਾਨਵਰ ਤੰਗ ਕਰਦੇ ਹਨ। ਇਸ ਵਾਰ ਖੇਤਾਂ ਵਿਚ ਚੂਹਿਆਂ ਦੀ ਭਰਮਾਰ ਹੈ। ਜਿਹੜੇ ਖੇਤ ਵਿਚ ਉੱਗੀ ਹਰ ਤਰ੍ਹਾਂ ਦੀ ਫ਼ਸਲ ਹਰਾ-ਚਾਰਾ, ਨਰਮਾ, ਝੋਨਾ, ਬਾਸਮਤੀ ਆਦਿ ਦਾ ਬਹੁਤ ਨੁਕਸਾਨ ਕਰਦੇ ਹਨ। ਝੋਨੇ, ਬਾਸਮਤੀ ਨੂੰ ਚੂਹਿਆਂ ਤੋਂ ਬਚਾਉਣ ਲਈ ਕਿਸਾਨ ਝੋਨੇ ਦੀ ਫ਼ਸਲ ਵਿਚ ਜ਼ਿਆਦਾ ਪਾਣੀ ਲਗਾ ਰਹੇ ਹਨ। ਕੁਝ ਸਾਲ ਪਹਿਲਾਂ ਚੂਹਿਆਂ ਨੂੰ ਮਾਰਨ ਲਈ ਖੇਤੀਬਾੜੀ ਵਿਭਾਗ ਕਿਸਾਨਾਂ ਨੂੰ ਮੁਫ਼ਤ ਦਵਾਈ ਦਿੰਦਾ ਹੁੰਦਾ ਸੀ। ਪਰ ਪਿਛਲੇ ਕੁਝ ਅਰਸੇ ਦੌਰਾਨ ਸਰਕਾਰ ਦਾ ਇਸ ਪਾਸੇ ਧਿਆਨ ਹੀ ਨਹੀਂ ਹੈ।


-ਜਸਕਰਨ ਲੰਡੇ
ਪਿੰਡ ਤੇ ਡਾਕ: ਲੰਡੇ, ਜ਼ਿਲ੍ਹਾ ਮੋਗਾ।


ਸੰਭਲ ਕੇ ਚੱਲਣ ਦੀ ਲੋੜ
ਪਿਛਲੇ ਦਿਨੀਂ 'ਅਜੀਤ' ਦੇ ਸੰਪਾਦਕੀ 'ਚ ਕੈਪਟਨ ਸਰਕਾਰ ਨੂੰ ਸਹੀ ਸਮੇਂ 'ਤੇ ਸਹੀ ਸਲਾਹ ਦਿੱਤੀ ਹੈ ਕਿ ਮੁਫ਼ਤਖੋਰੀ ਪੰਜਾਬ ਦੀ ਮਾਲੀ ਸਿਹਤ ਲਈ ਠੀਕ ਨਹੀਂ ਹੈ। ਵੈਸੇ ਵੀ ਨੀਲੇ-ਪੀਲੇ ਕਾਰਡ ਧਾਰਕਾਂ ਨੇ ਕੰਮ ਕਰਨਾ ਛੱਡ ਦਿੱਤਾ ਹੈ। ਜੇਕਰ ਕੈਪਟਨ ਸੋਚਦੇ ਹਨ ਕਿ ਮੁਫ਼ਤ ਦੇ ਗੱਫੇ ਪਾਰਟੀ ਨੂੰ ਮਜ਼ਬੂਤ ਕਰਨਗੇ ਤਾਂ ਉਹ ਵੱਡਾ ਭੁਲੇਖਾ ਪਾਲ ਰਹੇ ਹਨ। ਹਰੇਕ ਘਰ ਦੇ ਇਕ ਪੜ੍ਹੇ-ਲਿਖੇ ਬੇਰੁਜ਼ਗਾਰ ਨੂੰ ਸਰਕਾਰੀ ਨੌਕਰੀ ਦੇਵੇ। ਮਜ਼ਦੂਰਾਂ ਨੂੰ ਸਨਅਤੀ ਖੇਤਰ 'ਚ ਕੰਮ ਦਿੱਤਾ ਜਾਵੇ। ਨੀਲੇ-ਪੀਲੇ ਕਾਰਡ ਧਾਰਕਾਂ ਨੂੰ ਕੰਮ ਕਰਨ ਲਈ ਪ੍ਰੇਰਿਆ ਜਾਵੇ। ਇਹ ਸਭ ਕਰਨ ਨਾਲ ਪੰਜਾਬ ਮਜ਼ਬੂਤ ਹੋਵੇਗਾ।


-ਕੇ. ਕੇ. ਸਿੰਘ ਖਮਾਣੋਂ
ਵਾਰਡ ਨੰ: 1, ਖਮਾਣੋਂ, ਤਹਿ: ਤੇ ਡਾਕ: ਖਮਾਣੋਂ, ਜ਼ਿਲ੍ਹਾ ਫਤਹਿਗੜ੍ਹ ਸਾਹਿਬ।


ਵਿਦੇਸ਼ ਜਾਣ ਦਾ ਰੁਝਾਨ
ਤਾਜ਼ਾ ਅੰਕੜਿਆਂ ਅਨੁਸਾਰ ਸੂਬੇ ਦੇ 70 ਫ਼ੀਸਦੀ ਵਿਦਿਆਰਥੀ ਵਿਦੇਸ਼ਾਂ ਵਿਚ ਪੜ੍ਹਨ ਦੇ ਨਾਂਅ 'ਤੇ ਰੋਜ਼ੀ-ਰੋਟੀ ਕਮਾਉਣ ਲਈ ਮਜਬੂਰ ਹਨ, ਪ੍ਰੰਤੂ ਸੂਬਾ ਸਰਕਾਰ ਹੱਥ 'ਤੇ ਹੱਥ ਧਰੀ ਬੈਠੀ ਹੈ। ਵਿਦੇਸ਼ੀਂ ਪੜ੍ਹਾਈ ਕਰਨ ਦੇ ਨਾਂਅ 'ਤੇ ਜਿਸ ਤਰ੍ਹਾਂ ਨੌਜਵਾਨ ਊਰਜਾ ਅਤੇ ਧਨ ਵਿਦੇਸ਼ਾਂ ਵੱਲ ਤੁਰਿਆ ਜਾ ਰਿਹਾ ਹੈ, ਇਕ ਵੱਡੀ ਚਿੰਤਾ ਦਾ ਵਿਸ਼ਾ ਹੈ। ਦੇਸ਼ ਦੀ ਜਵਾਨੀ ਨੂੰ ਕਿਰਤ ਸੱਭਿਆਚਾਰ ਨਾਲ ਜੋੜਨ ਲਈ ਸੂਬਾ ਸਰਕਾਰ ਨੂੰ ਲੋੜੀਂਦੇ ਪ੍ਰਬੰਧ ਕਰਨ ਦੀ ਲੋੜ ਹੈ। ਪਰਵਾਸ ਕਰਨਾ ਕੋਈ ਮਾੜੀ ਗੱਲ ਨਹੀਂ, ਪ੍ਰੰਤੂ ਦੇਸ਼ ਦੀ ਆਜ਼ਾਦੀ ਵਿਚ ਸਭ ਤੋਂ ਵੱਧ ਯੋਗਦਾਨ ਪਾਉਣ ਵਾਲੇ ਸੂਬੇ ਦੇ ਨੌਜਵਾਨ ਐਨੇ ਨਿਰਾਸ਼ ਹੋ ਗਏ ਹਨ ਕਿ ਆਪਣੇ ਹੱਥੀਂ ਆਪਣੇ ਲਈ ਪਿੰਜਰਾ ਬਣਾ ਰਹੇ ਹਨ।


-ਸਿਮਰਨ ਔਲਖ
ਪਿੰਡ ਸੀਰਵਾਲੀ (ਸ੍ਰੀ ਮੁਕਤਸਰ ਸਾਹਿਬ)।

08-08-2017

ਚੀਨੀ ਸਾਮਾਨ ਦਾ ਬਾਈਕਾਟ
ਆਪਣੀ ਵਿਸ਼ਾਲ ਫ਼ੌਜ ਦਾ ਖਰਚ ਚਲਾਉਣ ਲਈ ਚੀਨ ਵਿਦੇਸ਼ਾਂ ਵਿਚ ਘਟੀਆ ਮਿਆਰ ਦਾ ਸਮਾਨ ਵੇਚ ਕੇ ਆਪਣੀ ਆਮਦਨ ਵਿਚ ਵਾਧਾ ਕਰ ਰਿਹਾ ਹੈ। ਭਾਰਤ ਵਰਗੇ ਵਿਸ਼ਾਲ ਦੇਸ਼ ਵਿਚ ਉਸਦਾ ਕਾਰੋਬਾਰ ਵੱਡੇ ਪੈਮਾਨੇ 'ਤੇ ਫੈਲਿਆ ਹੋਇਆ ਹੈ। ਦੂਜੇ ਪਾਸੇ ਸਰਹੱਦ ਉੱਪਰ ਉਹ ਸਾਨੂੰ ਅੱਖਾਂ ਵੀ ਦਿਖਾ ਰਿਹਾ ਹੈ। ਨਿੱਤ ਦਿਨ ਹਮਲੇ ਦੀਆਂ ਧਮਕੀਆਂ ਵੀ ਦਿੰਦਾ ਹੈ। ਭਾਰਤ ਵਿਚ ਹੋ ਰਹੀ ਉਸ ਦੀ ਕਰੋੜਾਂ ਦੀ ਲੁੱਟ ਨੂੰ ਰੋਕਣ ਲਈ ਹਰ ਭਾਰਤੀ ਦਾ ਇਹ ਫ਼ਰਜ਼ ਬਣਦਾ ਹੈ ਕਿ ਉਹ ਚੀਨ ਦੇ ਬਣੇ ਸਾਮਾਨ ਦਾ ਬਾਈਕਾਟ ਕਰਨ। ਇਸ ਨਾਲ ਹੀ ਉਸ ਦੀ ਫ਼ੌਜ ਦਾ ਲੱਕ ਤੋੜਿਆ ਜਾ ਸਕਦਾ ਹੈ।

-ਕੇ.ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀ ਖਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

ਦਰੱਖਤਾਂ ਦੀ ਕਟਾਈ
ਪੰਜਾਬ ਦੇ ਸਿਰ ਤੋਂ ਸੰਘਣੀ ਛਾਂ ਖੋਹਣ ਦੇ ਲਈ ਅਸੀਂ ਸਾਰੇ ਇਕ ਦੂਜੇ ਨੂੰ ਦੋਸ਼ੀ ਠਹਿਰਾਉਣ ਤੋਂ ਇਲਾਵਾ ਕੁਝ ਵੀ ਨਹੀਂ ਕਰ ਰਹੇ। ਹਜ਼ਾਰਾਂ ਦਰੱਖਤ ਇਸ ਅਨੋਖੇ ਵਿਕਾਸ ਦੀ ਭੇਟ ਚੜ੍ਹ ਰਹੇ ਹਨ। ਸਰਕਾਰਾਂ ਕੋਈ ਬਦਲਵਾਂ ਹੱਲ ਲੱਭਣ ਤੋਂ ਅਸਮਰੱਥ ਜਾਪ ਰਹੀਆਂ ਹਨ। ਕਿਸਾਨ ਵੀਰ ਵੀ ਫਸਲ ਦੀ ਰਹਿੰਦ-ਖੂੰਹਦ ਨੂੰ ਅੱਗ ਲਾਉਣ ਸਮੇਂ ਮਨੁੱਖ ਨੂੰ ਜੀਵ ਦਾਨ ਬਖਸ਼ਣ ਵਾਲੇ ਇਸ ਆਕਸੀਜਨ ਰੂਪੀ ਬੂਟੇ ਨੂੰ ਵੀ ਅੱਗ ਦੇ ਹਵਾਲੇ ਕਰ ਦਿੰਦੇ ਹਨ। ਪਿੰਡਾਂ ਦੇ ਆਗੂਆਂ ਤੇ ਪੰਚਾਇਤ ਮੁਖੀਆਂ ਨੂੰ ਚਾਹੀਦਾ ਹੈ ਕਿ ਉਹ ਲੋਕਾਂ ਦੇ ਨਕਾਰੇ ਹੋਏ ਲੀਡਰਾਂ ਦੇ ਏ.ਸੀ. ਕਮਰਿਆਂ ਦੀ ਠੰਢਕ ਨੂੰ ਵਿਸਾਰ ਕੇ ਇਨ੍ਹਾਂ ਕਤਲ ਹੋ ਰਹੇ ਬੇਜ਼ੁਬਾਨ ਜੀਵਨ ਦਾਤਿਆਂ ਵੱਲ ਵੀ ਧਿਆਨ ਦੇਣ ਤਾਂ ਕਿ ਅਸੀਂ ਅਤੇ ਅਗਲੀ ਪੀੜ੍ਹੀ ਕੁਦਰਤ ਦੇ ਕਹਿਰ ਤੋਂ ਬਚ ਸਕੇ ਅਤੇ ਪੰਜਾਬ ਮੁੜ ਹਰਿਆਲੀ ਵੱਲ ਪਰਤ ਆਵੇ।

-ਮਨਜਿੰਦਰ ਸਿੰਘ ਸਰੌਂਦ
ਮਾਲੇਰਕੋਟਲਾ।

ਜੀ.ਐਸ.ਟੀ. ਤੋਂ ਛੋਟ ਹੋਵੇ
ਕੁਝ ਦਿਨ ਪਹਿਲਾਂ ਕੇਂਦਰ ਸਰਕਾਰ ਵੱਲੋਂ ਪੂਰੇ ਦੇਸ਼ ਅੰਦਰ ਵੱਖ-ਵੱਖ ਵਸਤੂਆਂ 'ਤੇ ਜੀ.ਐਸ.ਟੀ. ਟੈਕਸ ਦੀ ਸ਼ੁਰੂਆਤ ਕਰਕੇ ਇਕ ਨਵੇਂ ਟੈਕਸ ਨੂੰ ਲਾਗੂ ਕਰ ਦਿੱਤਾ ਹੈ। ਭਾਵੇਂ ਇਸ ਟੈਕਸ ਨੂੰ ਪੂਰਨ ਰੂਪ ਵਿਚ ਲਾਗੂ ਕੀਤਾ ਗਿਆ ਹੈ ਪਰ ਗੁਰੂ ਘਰਾਂ ਅੰਦਰ ਚਲਦੇ ਲੰਗਰ ਦੀਆਂ ਵਸਤੂਆਂ ਨੂੰ ਕੇਂਦਰ ਸਰਕਾਰ ਦੁਆਰਾ ਛੋਟ ਦਿੱਤੀ ਜਾਣੀ ਚਾਹੀਦੀ ਹੈ। ਗਰੀਬ ਅਤੇ ਲੋੜਵੰਦ ਗੁਰਦੁਆਰਾ ਸਾਹਿਬ ਦੇ ਲੰਗਰ ਵਿਚ ਆਪਣੀ ਭੁੱਖ ਮਿਟਾ ਲੈਂਦਾ ਹੈ। ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਵੀ ਲਗਾਤਾਰ ਲੰਗਰ ਦੇ ਸਮਾਨ ਨੂੰ ਜੀ.ਐਸ.ਟੀ. ਮੁਕਤ ਕਰਨ ਦੀ ਮੰਗ ਕੀਤੀ ਜਾ ਰਹੀ ਹੈ। ਇਸ ਲਈ ਕੇਂਦਰ ਸਰਕਾਰ ਇਸ ਮੰਗ ਨੂੰ ਪੂਰਾ ਕਰਕੇ ਗੁਰੂ ਘਰਾਂ ਦੇ ਲੰਗਰ ਨੂੰ ਜੀ.ਐਸ.ਟੀ. ਤੋਂ ਬਾਹਰ ਕਰੇ ਤਾਂ ਕਿ ਕਿਸੇ ਵੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੂੰ ਲੰਗਰ ਚਲਾਉਣ ਵਿਚ ਮੁਸ਼ਕਿਲ ਪੇਸ਼ ਨਾ ਆਵੇ।

-ਸੁਖਰਾਜ ਸਿੰਘ ਚਹਿਲ
ਧਨੌਲਾ-148105 (ਬਰਨਾਲਾ)

03-08-2017

 ਪੰਜਾਬੀ ਜ਼ਬਾਨ
ਪਿਛਲੇ ਦਿਨੀਂ 'ਅਜੀਤ' ਵਿਚ ਇਹ ਖ਼ਬਰ 'ਸ੍ਰੀ ਨਨਕਾਣਾ ਸਾਹਿਬ 'ਚ ਲਿਖ ਕੇ ਲਾਏ ਹੋਰਡਿੰਗ ਬਣੇ ਖਿੱਚ ਦਾ ਕੇਂਦਰ' ਪੜ੍ਹ ਕੇ ਬੇਹੱਦ ਖੁਸ਼ੀ ਹੋਈ। ਪਾਕਿਸਤਾਨ ਵਿਚ ਸੂਬਾ ਸਰਕਾਰ ਦੇ ਹੁਕਮ ਤੇ ਐਮ.ਪੀ.ਏ. ਅਤੇ ਚੇਅਰਮੈਨ ਸਟੈਂਡਿੰਗ ਕਮੇਟੀ ਬਰਾਏ ਇਨਸਾਨੀ ਹਕੂਕ ਸ: ਰਮੇਸ਼ ਸਿੰਘ ਅਰੋੜਾ ਵੱਲੋਂ ਨਨਕਾਣਾ ਸਾਹਿਬ ਨੂੰ ਜਾਂਦੇ ਮੁੱਖ ਰਸਤੇ ਉੱਪਰ ਗੁਰਮੁਖੀ 'ਚ ਲਿਖ ਕੇ ਲਗਵਾਏ ਸੂਚਨਾ ਬੋਰਡ ਖਿੱਚ ਦਾ ਕੇਂਦਰ ਬਣੇ ਹੋਏ ਹਨ। ਪਰ ਕੁਝ ਦਿਨ ਪਹਿਲਾਂ ਮੌਜੂਦਾ ਪੰਜਾਬ ਸਰਕਾਰ ਵੱਲੋਂ ਫੁਰਮਾਨ ਆਇਆ ਹੈ ਕਿ ਪ੍ਰਾਈਵੇਟ ਸਕੂਲਾਂ ਵਾਂਗ ਸਰਕਾਰੀ ਸਕੂਲਾਂ ਵਿਚ ਵੀ ਸਿੱਖਿਆ ਦਾ ਮਾਧਿਅਮ ਅੰਗਰੇਜ਼ੀ ਭਾਸ਼ਾ ਨੂੰ ਬਣਾਇਆ ਜਾਵੇਗਾ। ਇਹ ਗੱਲ ਮੰਨਣਯੋਗ ਹੈ ਕਿ ਅੱਜ ਅੰਗਰੇਜ਼ੀ ਭਾਸ਼ਾ ਦੀ ਅੰਤਰਰਾਸ਼ਟਰੀ ਪੱਧਰ 'ਤੇ ਲੋੜ ਹੈ ਪਰ ਕੀ ਇਸ ਨੂੰ ਵਧੀਆ ਤਰੀਕੇ ਨਾਲ ਇਕ ਵਿਸ਼ੇ ਦੇ ਤੌਰ 'ਤੇ ਨਹੀਂ ਪੜ੍ਹਾਇਆ ਜਾ ਸਕਦਾ। ਪੰਜਾਬ ਵਿਚ ਸਿੱਖਿਆ ਦਾ ਮਾਧਿਅਮ ਪੰਜਾਬੀ ਨੂੰ ਛੱਡ ਕੇ ਅੰਗਰੇਜ਼ੀ ਕਰਨਾ ਤੁਗਲਕੀ ਫੁਰਮਾਨ ਤੋਂ ਘੱਟ ਨਹੀਂ ਹੋਵੇਗਾ।


-ਮਾ: ਜਸਪਿੰਦਰ ਸਿੰਘ ਗਿੱਲ
ਪਿੰਡ ਉਬੋਕੇ, ਤਹਿ: ਪੱਟੀ (ਤਰਨ ਤਾਰਨ)।


ਮੈਡੀਕਲ ਸਟੋਰ
ਦੇਸ਼ ਅੰਦਰ ਹਜ਼ਾਰਾਂ ਦੇ ਲਗਪਗ ਅਜਿਹੀਆਂ ਦਵਾਈਆਂ ਵੇਚੀਆਂ ਜਾ ਰਹੀਆਂ ਹਨ, ਜਿਨ੍ਹਾਂ 'ਤੇ ਵਿਸ਼ਵ ਦੇ ਕਈ ਦੇਸ਼ ਪਾਬੰਦੀ ਲਾ ਚੁੱਕੇ ਹਨ। ਸ਼ਹਿਰਾਂ ਤੇ ਪਿੰਡਾਂ ਵਿਚ ਬਿਨਾਂ ਡਿਗਰੀ ਅਤੇ ਲਾਇਸੈਂਸ ਤੋਂ ਸੈਂਕੜੇ ਮੈਡੀਕਲ ਸਟੋਰ ਕੰਮ ਕਰ ਰਹੇ ਹਨ, ਜਿਨ੍ਹਾਂ ਦਾ ਸਿਹਤ ਵਿਭਾਗ ਕੋਲ ਕੋਈ ਰਿਕਾਰਡ ਨਹੀਂ। ਇਸ ਕਰਕੇ ਹੀ ਇਨ੍ਹਾਂ ਸਟੋਰਾਂ 'ਤੇ ਨਸ਼ੀਲੀਆਂ ਦਵਾਈਆਂ ਦਾ ਕਾਰੋਬਾਰ ਕਰਕੇ ਨੌਜਵਾਨਾਂ ਦੀਆਂ ਜ਼ਿੰਦਗੀ ਨਾਲ ਖਿਲਵਾੜ ਕੀਤਾ ਜਾ ਰਿਹਾ ਹੈ। ਅੰਤਰਰਾਸ਼ਟਰੀ ਅਤੇ ਰਾਸ਼ਟਰੀ ਪੱਧਰ 'ਤੇ ਨਸ਼ੀਲੀਆਂ ਦਵਾਈਆਂ ਵਿਰੁੱਧ ਚਲਾਈਆਂ ਜਾ ਰਹੀਆਂ ਮੁਹਿੰਮਾਂ ਅਤੇ ਚੁੱਕੇ ਜਾ ਰਹੇ ਸਖ਼ਤ ਕਦਮਾਂ ਦੇ ਬਾਵਜੂਦ ਇਨ੍ਹਾਂ ਨਸ਼ੀਲੀਆਂ ਦਵਾਈਆਂ ਦਾ ਕਾਰੋਬਾਰ ਰੁਕਣ ਦਾ ਨਾਂਅ ਨਹੀਂ ਲੈ ਰਿਹਾ। ਦੇਸ਼ ਪੱਧਰ 'ਤੇ ਵਧ-ਫੁਲ ਰਹੇ ਇਸ ਕਾਰੋਬਾਰ ਨੂੰ ਰੋਕਣ ਲਈ ਅੱਗੇ ਆਉਣ ਦੀ ਲੋੜ ਹੈ।


-ਪ੍ਰਸ਼ੋਤਮ ਪੱਤੋ
ਪਿੰਡ ਤੇ ਡਾਕ: ਪੱਤੋ ਹੀਰਾ ਸਿੰਘ (ਮੋਗਾ)।


ਲਿਖਣਾ ਇਕ ਕਲਾ
ਕੋਈ ਸਮਾਂ ਹੁੰਦਾ ਸੀ ਕਿ ਖ਼ਤਾਂ ਦੀ ਹਰ ਪਾਸੇ ਸਰਦਾਰੀ ਹੁੰਦੀ ਸੀ। ਖ਼ਤ ਲਿਖਣ ਵਾਲੇ ਨੂੰ ਜੋ ਖੁਸ਼ੀ ਹਾਸਲ ਹੁੰਦੀ ਸੀ, ਉਸੇ ਖੁਸ਼ੀ ਦਾ ਅਹਿਸਾਸ ਮਿਲਣ ਵਾਲੇ ਨੂੰ ਵੀ ਹੁੰਦਾ ਸੀ। ਖ਼ਤ ਲਿਖਣਾ ਵੀ ਇਕ ਕਲਾ ਹੈ। ਕਿਉਂਕਿ ਹੁਣ ਸੁਨੇਹੇ ਦੇਣ ਅਤੇ ਰਾਜ਼ੀ ਖੁਸ਼ੀ ਲੈਣ-ਦੇਣ ਦੇ ਆਧੁਨਿਕ ਸਾਧਨ ਆ ਗਏ ਹਨ ਤਾਂ ਹੁਣ ਸਰਕਾਰੀ ਖ਼ਤ ਹੀ ਆਉਂਦੇ ਹਨ। ਪੁਰਾਣੇ ਸਮੇਂ ਵਿਚ ਰੇਡੀਓ ਨੂੰ ਖ਼ਤ ਲਿਖ ਕੇ ਆਪਣੀ ਫਰਮਾਇਸ਼ ਪੂਰੀ ਕਰਵਾਉਣੀ ਵੀ ਬਹੁਤ ਲੋਕਾਂ ਦਾ ਸ਼ੋਕ ਸੀ। ਜੇਕਰ ਕਿਸੇ ਨਾਲ ਗੱਲਬਾਤ ਕਰਨੀ ਔਖੀ ਜਾਪਦੀ ਹੋਵੇ, ਉਸ ਨੂੰ ਖ਼ਤ ਰਾਹੀਂ ਆਪਣੇ ਜਜ਼ਬਾਤ ਅਤੇ ਭਾਸ਼ਾ ਨਾਲ ਆਸਾਨੀ ਨਾਲ ਪ੍ਰਗਟ ਕੀਤਾ ਜਾ ਸਕਦਾ ਹੈ।


-ਅਰਸ਼ਪ੍ਰੀਤ ਸਿੰਘ
ਪਿੰਡ ਸਮਾਧ ਭਾਈ, ਮੋਗਾ।

02-08-2017

 ਪੱਤਰਮਨੁੱਖਤਾ 'ਤੇ ਅਹਿਸਾਨ
ਪਿਛਲੇ ਦਿਨੀਂ ਪੰਘੂੜਾ ਘਰ ਵਿਚ ਇਕ ਨਵਜੰਮੀ ਬੱਚੀ ਕਿਸੇ ਵੱਲੋਂ ਪਹੁੰਚਾਈ ਗਈ। ਮੈਡੀਕਲ ਚੈੱਕਅੱਪ ਤੋਂ ਬਾਅਦ ਪਤਾ ਲੱਗਾ ਕਿ ਬੱਚੀ ਦੀ ਦੋਵਾਂ ਅੱਖਾਂ ਦੀ ਰੌਸ਼ਨੀ ਨਹੀਂ ਹੈ। 'ਅਜੀਤ' ਵਿਚ ਇਹ ਖ਼ਬਰ ਪੜ੍ਹ ਕੇ ਅਤਿਅੰਤ ਖੁਸ਼ੀ ਹੋਈ ਕਿ ਪ੍ਰਸਿੱਧ ਖੂਨਦਾਨੀ, ਨੈਸ਼ਨਲ ਐਵਾਰਡੀ ਐਡਵੋਕੇਟ ਰਘਬੀਰ ਸਿੰਘ ਤੂਰ ਨੇ ਆਪਣੀ ਇਕ ਅੱਖ, ਉਪਰੋਕਤ ਬੱਚੀ ਨੂੰ ਦੇਣ ਦਾ ਐਲਾਨ ਕੀਤਾ। ਮਰਨ ਉਪਰੰਤ ਅੱਖਾਂ ਦਾ ਦਾਨ ਕਰਨਾ ਵੀ ਉੱਤਮ ਦਰਜੇ ਦਾ ਦਾਨ ਹੈ, ਪਰ ਜਿਊਂਦੇ ਜੀਅ ਆਪਣੀ ਇਕ ਅੱਖ, ਮਜਬੂਰ ਬੱਚੇ ਨੂੰ ਦੇਣੀ ਤਾਂ ਰੱਬ ਨੂੰ ਮੁੱਲ ਲੈਣ ਵਾਲੀ ਗੱਲ ਹੈ। ਅਸੀਂ ਆਪਣੇ ਵੱਲੋਂ ਤੂਰ ਸਾਹਿਬ ਦੇ ਜਜ਼ਬੇ ਨੂੰ ਸਲਾਮ ਕਰਦੇ ਹਾਂ। ਨਿਰਸੰਦੇਹ, ਉਨ੍ਹਾਂ ਦੀ ਇਹ ਕੁਰਬਾਨੀ ਸਮੁੱਚੀ ਮਨੁੱਖਤਾ ਸਿਰ ਅਹਿਸਾਨ ਹੈ।


-ਪ੍ਰੀਤ ਸਿੰਘ ਸੰਦਲ (ਕਵੀਸ਼ਰ)
ਪਿੰਡ ਮਕਸੂਦੜਾ, ਤਹਿ: ਪਾਇਲ (ਲੁਧਿਆਣਾ)।


ਫ਼ੌਜ ਦਾ ਰੁਤਬਾ
ਬ੍ਰਿਗੇਡੀਅਰ ਕਾਹਲੋਂ ਵੱਲੋਂ ਕਾਰਗਿਲ ਯੁੱਧ ਬਾਰੇ ਲਿਖੇ ਲੇਖ ਤੇ ਉਨ੍ਹਾਂ ਵੱਲੋਂ ਕਹੀ ਗਈ ਹਰ ਗੱਲ 'ਤੇ ਗ਼ੌਰ ਕਰਨਾ ਬਣਦਾ ਹੈ। ਹਕੀਕਤ ਇਹ ਹੈ ਕਿ ਇਹ ਬਾਬੂਸ਼ਾਹੀ ਤੇ ਨੇਤਾ ਦਫ਼ਤਰਾਂ ਵਿਚ ਬੈਠ ਕੇ ਸਿਰਫ ਨੀਤੀਆਂ ਬਣਾਉਂਦੇ ਹਨ ਤੇ ਭਾਸ਼ਣ ਦਿੰਦੇ ਹਨ। ਫ਼ੌਜ ਵਾਸਤੇ ਕੁਝ ਵੀ ਕਰਨ ਤੇ ਸੋਚਣ ਲਈ ਇਨ੍ਹਾਂ ਕੋਲ ਨਾ ਵਕਤ ਹੈ ਤੇ ਨਾ ਹੀ ਕੁਝ ਕਰਨ ਦੀ ਨੀਅਤ। ਕਿਸੇ ਵੀ ਜਗ੍ਹਾ ਕੰਮ ਵਿਚ ਗੰਭੀਰਤਾ ਨਹੀਂ ਵਿਖਾਈ ਦਿੰਦੀ। ਫ਼ੌਜ ਦਾ ਰੁਤਬਾ ਜਿਸ ਤਰ੍ਹਾਂ ਹੇਠਾਂ ਡੇਗਿਆ ਜਾ ਰਿਹਾ ਹੈ, ਉਸ ਦੇ ਨਾਲ ਸੈਨਿਕਾਂ ਦਾ ਮਨੋਬਲ ਵੀ ਹੇਠਾਂ ਡਿਗਣਾ ਸੁਭਾਵਿਕ ਹੈ। ਬਾਬੂਸ਼ਾਹੀ ਆਪਣੇ-ਆਪ ਦੀ ਦੇਖਭਾਲ ਕਰਦੀ ਹੈ ਤੇ ਮੰਤਰੀਆਂ ਦੀ। ਕਿਸੇ ਦੂਜੇ ਨੂੰ ਵੀ ਕੋਈ ਸਹੂਲਤ ਦੇਣੀ ਹੁੰਦੀ ਹੈ ਤਾਂ ਫਾਈਲਾਂ ਅੱਗੇ ਤੁਰਦੀਆਂ ਹੀ ਨਹੀਂ। ਬਿਲਕੁਲ ਦਰੁਸਤ ਕਿਹਾ ਗਿਆ ਹੈ ਲੇਖ ਵਿਚ ਕਿ ਫ਼ੌਜ ਨੂੰ ਤਨਖਾਹ, ਭੱਤੇ ਸਭ ਬੜੇ ਰੋ-ਰੋ ਕੇ ਦਿੱਤੇ ਜਾਂਦੇ ਹਨ। ਅਜੇ ਤੱਕ ਸੱਤਵੇਂ ਤਨਖਾਹ ਕਮਿਸ਼ਨ ਦਾ ਪੱਲਾ ਨਹੀਂ ਫੜਾਇਆ। ਹਰ ਦੇਸ਼ ਵਿਚ ਫ਼ੌਜ ਦਾ ਰੁਤਬਾ ਸਭ ਤੋਂ ਉੱਪਰ ਤੇ ਹਰ ਕੋਈ ਇਸ ਨੂੰ ਬੇਹੱਦ ਸਤਿਕਾਰ ਕਰਦਾ ਹੈ।


-ਪ੍ਰਭਜੋਤ ਕੌਰ ਢਿੱਲੋਂ।


ਖ਼ੁਦਕੁਸ਼ੀਆਂ
ਰੋਜ਼ਾਨਾ ਹੀ ਅਖ਼ਬਾਰ ਵਿਚ ਕਿਸਾਨਾਂ ਦੀਆਂ ਖ਼ੁਦਕੁਸ਼ੀਆਂ ਬਾਰੇ ਪੜ੍ਹ ਕੇ ਮਨ ਦੁਖੀ ਹੋ ਉੱਠਦਾ ਹੈ। ਪਿਛਲੇ ਦਿਨੀਂ ਤਾਂ ਇਕੱਠਿਆਂ ਹੀ 6 ਕਿਸਾਨਾਂ ਵੱਲੋਂ ਖ਼ੁਦਕੁਸ਼ੀ ਕਰਕੇ ਮਨ ਬਹੁਤ ਬੇਚੈਨ ਹੋਇਆ ਹੈ। ਕਿਸਾਨਾਂ ਬਾਰੇ ਸਿਰਫ ਸਰਕਾਰਾਂ ਪੱਲਾਂ ਹੀ ਝਾੜਦੀਆਂ ਨਜ਼ਰ ਆਈਆਂ ਹਨ, ਕੋਈ ਠੋਸ ਉਪਰਾਲਾ ਹੀ ਨਹੀਂ ਕੀਤਾ ਜਾ ਰਿਹਾ, ਜਿਸ ਕਾਰਨ ਇਹ ਪੇਚੀਦਾ ਮਸਲਾ ਹੱਲ ਹੋ ਸਕੇ। ਕਿਸਾਨ ਕਰਜ਼ਾ ਜ਼ਮੀਨ ਨੂੰ ਵਾਹੁਣ ਵਾਸਤੇ ਲਵੇ ਨਾ ਕਿ ਹੋਰ ਕੰਮਾਂ ਵਾਸਤੇ। ਸਾਨੂੰ ਤਾਂ ਇਹ ਵੀ ਸਮਝ ਨਹੀਂ ਆਉਂਦੀ, ਇਕ ਰੇਹੜੀ ਵਾਲਾ, ਇਕ ਮਜ਼ਦੂਰ ਵੀ ਟੱਬਰ ਪਾਲ ਰਿਹਾ ਹੈ। ਮੌਜੂਦਾ ਸਰਕਾਰ ਵੱਲੋਂ ਇਨ੍ਹਾਂ ਕਿਸਾਨਾਂ ਬਾਰੇ ਜਲਦ ਸੋਚਿਆ ਜਾਵੇ। ਜਿੰਨਾ ਕੁ ਕਰਜ਼ੇ ਦੀ ਪੰਡ ਹੌਲੀ ਕਰ ਸਕਦੀ ਹੈ, ਸਰਕਾਰ ਕਰੇ ਤਾਂ ਕਿ ਕਿਸਾਨ ਖ਼ੁਦਕੁਸ਼ੀ ਦੇ ਰਾਹ ਹੀ ਨਾ ਪਵੇ।


-ਹਰਜਿੰਦਰ ਪਾਲ ਸਿੰਘ ਬਾਜਵਾ
536, ਗਲੀ 5-ਬੀ, ਵਿਜੇ ਨਗਰ, ਹੁਸ਼ਿਆਰਪੁਰ।

1-08-2017

 ਚੌਧਰ ਦੀ ਲਾਲਸਾ
ਸਿਆਣੇ ਕਹਿੰਦੇ ਹਨ ਕਿ ਚੌਧਰਪੁਣਾ ਤਾਂ ਮਾੜਾ ਹੁੰਦਾ ਹੈ। ਅਸਲ ਵਿਚ ਚੌਧਰਪੁਣਾ ਸ਼ਬਦ ਹੀ ਮਾੜਾ ਹੈ। ਲਗਦਾ ਹੈ ਕਿ ਜਿਵੇਂ ਚੌਧਰਪੁਣੇ ਨੂੰ ਬਹੁਤੇ ਲੋਕਾਂ ਨੇ ਸਰੀਰ ਦਾ ਇਕ ਜ਼ਰੂਰੀ ਅੰਗ ਬਣਾ ਲਿਆ ਹੋਵੇ। ਸਿਆਣੇ ਤਾਂ ਕਹਿੰਦੇ ਹਨ ਕਿ ਜਿੰਨਾ ਅਜਿਹੀ ਭਾਵਨਾ ਤੋਂ ਬਚਿਆ ਜਾਵੇ, ਓਨਾ ਹੀ ਚੰਗਾ ਹੈ। ਕਿਉਂਕਿ ਇਸ ਚੌਧਰਪੁਣੇ ਨੇ ਕਈ ਹੱਸਦੇ-ਵਸਦੇ ਘਰ ਉਜਾੜ ਕੇ ਰੱਖ ਦਿੱਤੇ ਹਨ। ਦੁੱਖ ਇਸ ਗੱਲ ਦਾ ਹੈ ਕਿ ਅੱਜ ਬਹੁਤੇ ਲੋਕ ਚੌਧਰਪੁਣੇ ਵਰਗੀ ਮਾੜੀ ਮਾਨਸਿਕਤਾ ਦੇ ਗੁਲਾਮ ਹੋ ਕੇ ਰਹਿ ਗਏ ਹਨ। ਇਹ ਵੀ ਸੱਚ ਹੈ ਕਿ ਇਸ ਬੁਰਾਈ ਦਾ ਬਹੁਤਾ ਸ਼ਿਕਾਰ ਪੜ੍ਹਿਆ-ਲਿਖਿਆ ਤਬਕਾ ਹੀ ਹੋ ਰਿਹਾ ਹੈ। ਅੱਜ ਲੋੜ ਹੈ ਕਿ ਅਜਿਹੀ ਭਟਕਣਾ 'ਚੋਂ ਨਿਕਲ ਕੇ ਜੀਵਨ ਦੇ ਹਰ ਪਹਿਲੂ ਨੂੰ ਬਰੀਕੀ ਨਾਲ ਘੋਖਿਆ-ਵਿਚਾਰਿਆ ਜਾਵੇ। ਸਾਡਾ ਹਰ ਕਦਮ ਜੀਵਨ ਜਾਚ ਸਿੱਖਣ ਵੱਲ ਹੋਣਾ ਚਾਹੀਦਾ ਹੈ। ਅਖੀਰ ਇਹੀ ਕਹਾਂਗੇ ਕਿ ਜੀਵਨ ਦੇ ਹਰ ਪਲ ਦਾ ਅਨੰਦ ਲਿਆ ਜਾਵੇ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

ਹੱਲ ਕੱਢਿਆ ਜਾਵੇ
ਪਲਾਸਟਿਕ ਦੀਆਂ ਥੈਲੀਆਂ ਦਾ ਪ੍ਰਯੋਗ ਸਾਧਾਰਨ ਸਮੱਸਿਆ ਦੇ ਰੂਪ ਵਿਚ ਦੇਖਣਾ ਵੱਡੀ ਭੁੱਲ ਹੈ। ਇਹ ਦਿੱਕਤ ਧਰਤੀ ਅਤੇ ਸਾਡੀ ਹੋਂਦ ਨਾਲ ਜੁੜੀ ਹੈ। ਬੇਸ਼ੱਕ ਸਰਕਾਰ ਵੱਲੋਂ ਇਸ ਉੱਪਰ ਰੋਕ ਲਾਈ ਗਈ ਹੈ ਪਰ ਫਿਰ ਵੀ ਇਸ ਦਾ ਕੋਈ ਸਥਾਈ ਹੱਲ ਨਹੀਂ ਹੋ ਸਕਿਆ ਸਗੋਂ ਇਸ ਦੀ ਵਿੱਕਰੀ ਲਗਾਤਾਰ ਵਧ ਰਹੀ ਹੈ। ਜਦੋਂ ਤੱਕ ਸਰਕਾਰ ਅਤੇ ਲੋਕ ਇਸ ਗੰਭੀਰ ਮਸਲੇ ਪ੍ਰਤੀ ਜਾਗਰੂਕ ਨਹੀਂ ਹੁੰਦੇ, ਉਦੋਂ ਤੱਕ ਇਸ ਸਮੱਸਿਆ ਦਾ ਹੱਲ ਸੰਭਵ ਨਹੀਂ ਹੋ ਸਕਦਾ।

-ਸੇਵਾ ਰਾਮ ਸਿੰਗਲਾ
1120, ਤਿੰਨ ਫੇਜ਼, ਮਾਡਲ ਟਾਊਨ, ਬਠਿੰਡਾ।

ਬੂਟਿਆਂ ਦੀ ਸਾਂਭ-ਸੰਭਾਲ
ਅਕਸਰ ਅਖ਼ਬਾਰਾਂ ਵਿਚ ਬੂਟੇ ਲਾਉਣ ਦੀਆਂ ਖ਼ਬਰਾਂ ਆਉਂਦੀਆਂ ਹੀ ਰਹਿੰਦੀਆਂ ਹਨ। ਕਈ ਵਾਰ ਅਸੀਂ ਵੇਖਦੇ ਹਾਂ ਕਿ ਫੋਟੋ ਖਿਚਵਾਉਣ ਵਾਲੇ ਜਿਸ ਬੂਟੇ ਨੂੰ ਰੰਗਦਾਰ ਸ਼ਾਵਰ ਨਾਲ ਪਾਣੀ ਪਾਇਆ ਗਿਆ, ਉਹੀ ਬੂਟਾ ਬਾਅਦ 'ਚ ਬਿਨਾਂ ਪਾਣੀ ਤੋਂ ਖੜਸੁੱਕ ਹੋ ਕੇ ਮਰ ਜਾਂਦਾ ਹੈ। ਅੱਜ ਕਿਤੇ ਵੀ ਇਹ ਸੁਣਨ ਵਿਚ ਨਹੀਂ ਆਇਆ ਕਿ ਪਿਛਲੇ ਸਾਲ ਲਾਏ ਬੂਟਿਆਂ ਦੀ ਸੰਭਾਲ ਕੀਤੀ ਗਈ ਜਾਂ ਕਿੰਨੇ ਬੂਟੇ ਪੂਰੀ ਤਰ੍ਹਾਂ ਚੱਲੇ ਕਿੰਨੇ ਮਰੇ। ਇਸ ਬਰਸਾਤ ਰੁੱਤ ਵਿਚ ਵੱਧ ਤੋਂ ਵੱਧ ਰੁੱਖ ਲਾਓ ਪਰ ਉਨ੍ਹਾਂ ਦੀ ਸੰਭਾਲ ਨੂੰ ਆਪਣੇ-ਆਪਣੇ ਨਿੱਜੀ ਤੌਰ 'ਤੇ ਯਕੀਨੀ ਬਣਾਓ ਫਿਰ ਹੀ ਤੁਹਾਡਾ ਬੂਟੇ ਲਾਉਣਾ ਸਫਲ ਹੈ। ਕਈ ਵਾਰ ਸਾਡੇ ਘਰਾਂ ਦੇ ਨਜ਼ਦੀਕ ਬੂਟੇ ਲੱਗੇ ਹੁੰਦੇ ਹਨ। ਜੇਕਰ ਅਸੀਂ ਆਪਣੇ ਫਰਜ਼ ਸਮਝਦੇ ਹੋਏ ਪਾਣੀ ਦੇਈਏ ਤਾਂ ਯਕੀਨ ਕਰੋ ਥੋੜ੍ਹੇ ਸਮੇਂ ਵਿਚ ਬੂਟੇ ਰੁੱਖ ਬਣਨ ਵੱਲ ਵਧਣੇ ਸ਼ੁਰੂ ਹੋ ਜਾਣਗੇ।

-ਜਸਬੀਰ ਦੱਧਾਹੂਰ
ਪਿੰਡ ਤੇ ਡਾਕ: ਦੱਧਾਹੂਰ, ਤਹਿ: ਰਾਏਕੋਟ, ਜ਼ਿਲ੍ਹਾ ਲੁਧਿਆਣਾ।

31-07-2017

 ਰੋਕਣਾ ਜ਼ਰੂਰੀ
ਵਿਸ਼ਵ ਆਬਾਦੀ ਦਿਵਸ 'ਤੇ ਵਿਸ਼ੇਸ਼ ਲੇਖ ਵਿਚ ਡਾ: ਰਣਜੀਤ ਸਿੰਘ ਨੇ ਬਹੁਤ ਹੀ ਵਧੀਆ ਲੇਖ ਲਿਖਿਆ ਹੈ ਜੋ ਕਿ ਕਾਬਲੇ ਤਾਰੀਫ਼ ਹੈ। ਲੇਖ ਵਿਚ ਡਾ: ਸਾਹਿਬ ਨੇ ਜ਼ਿਕਰ ਕੀਤਾ ਹੈ ਕਿ ਸਾਡੇ ਦੇਸ਼ ਕੋਲ ਨੌਜਵਾਨ ਸ਼ਕਤੀ ਦੁਨੀਆ ਦੇ ਦੂਜੇ ਦੇਸ਼ਾਂ ਦੇ ਮੁਕਾਬਲੇ ਕਾਫੀ ਹੈ। ਆਬਾਦੀ ਵਧਣ ਕਾਰਨ ਮੁਢਲੀਆਂ ਲੋੜਾਂ ਵੀ ਘਟ ਰਹੀਆਂ ਹਨ। ਆਉਣ ਵਾਲੇ ਸਮੇਂ ਵਿਚ ਪੀਣ ਵਾਲਾ ਪਾਣੀ, ਅਨਾਜ ਅਤੇ ਪ੍ਰਦੂਸ਼ਣ ਆਦਿ ਦੀਆਂ ਸਮੱਸਿਆਵਾਂ ਮੂੰਹ ਅੱਡੀ ਖੜ੍ਹੀਆਂ ਹਨ। ਇਸ ਲਈ ਸਰਕਾਰ ਨੂੰ ਪਹਿਲ ਦੇ ਆਧਾਰ 'ਤੇ ਆਬਾਦੀ ਕੰਟਰੋਲ ਕਰਨ ਵੱਲ ਧਿਆਨ ਦੇਣਾ ਚਾਹੀਦਾ ਹੈ। ਸਾਡੇ ਧਾਰਮਿਕ ਆਗੂਆਂ ਅਤੇ ਰਾਜਨੀਤਕ ਆਗੂਆਂ ਨੂੰ ਨਿੱਜਵਾਦ ਨੂੰ ਪਿੱਛੇ ਕਰਕੇ ਦੇਸ਼ ਦੇ ਭਲੇ ਲਈ ਯਤਨ ਕਰਨੇ ਚਾਹੀਦੇ ਹਨ।


-ਗੁਰਚਰਨ ਸਿੰਘ ਉੱਪਲ।


ਵੇਲੇ ਦੀ ਨਮਾਜ਼ ਕੁਵੇਲੇ...
ਸਿੱਖਿਆ ਦਾ ਅਧਿਕਾਰ ਕਾਨੂੰਨ 2009 ਦੇਸ਼ ਦੇ ਸਾਰੇ 6 ਤੋਂ 14 ਸਾਲ ਦੇ ਬੱਚਿਆਂ ਲਈ ਲਾਜ਼ਮੀ ਅਤੇ ਮੁਫ਼ਤ ਸਿੱਖਿਆ ਦੀ ਗੱਲ ਕਰਦਾ ਹੈ ਪ੍ਰੰਤੂ ਪੰਜਾਬ ਸਿੱਖਿਆ ਵਿਭਾਗ ਆਪਣੀ ਗ਼ੈਰ-ਯੋਜਨਾਬੰਦੀ ਕਾਰਨ ਆਪਣੇ ਰਾਜ ਦੇ ਬੱਚਿਆਂ ਦਾ ਨੁਕਸਾਨ ਕਰ ਰਿਹਾ ਹੈ। ਰਾਜ ਦੇ ਸਕੂਲਾਂ ਵਿਚ ਆਮ ਬਦਲੀਆਂ ਜੂਨ ਤੱਕ ਗਰਮੀਆਂ ਦੀਆਂ ਛੁੱਟੀਆਂ ਵਿਚ ਹੋਣੀਆਂ ਚਾਹੀਦੀਆਂ ਹਨ ਪ੍ਰੰਤੂ ਇਸ ਵਾਰ ਬਦਲੀਆਂ ਜੁਲਾਈ ਮਹੀਨੇ ਦੌਰਾਨ ਕੀਤੀਆਂ ਜਾ ਰਹੀਆਂ ਹਨ। ਇਸ ਦੇ ਬਾਵਜੂਦ ਰਾਜ ਦੇ ਬਹੁਤ ਸਾਰੇ ਸਕੂਲਾਂ ਦੀਆਂ ਖਾਲੀ ਅਸਾਮੀਆਂ ਪੂਰਾ ਸੈਸ਼ਨ ਹੀ ਖਾਲੀ ਰਹਿਣਗੀਆਂ। ਐਲੀਮੈਂਟਰੀ ਪੱਧਰ ਤੱਕ ਵਿਦਿਆਰਥੀਆਂ ਨੂੰ ਦਿੱਤੀਆਂ ਜਾਣ ਵਾਲੀਆਂ ਮੁਫ਼ਤ ਕਿਤਾਬਾਂ ਵੀ ਸਮੇਂ ਸਿਰ ਵਿਦਿਆਰਥੀਆਂ ਨੂੰ ਪ੍ਰਾਪਤ ਨਹੀਂ ਹੋ ਰਹੀਆਂ ਹਨ।


-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀਖਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।


ਕਥਾਵਾਚਕ ਬਾਬੇ
ਅੱਜ ਕਿਸਾਨ, ਮਜ਼ਦੂਰ, ਮੁਲਾਜ਼ਮ, ਵਪਾਰੀ ਹਰ ਵਰਗ ਸਰਕਾਰਾਂ ਦੇ ਕੰਮ ਤੋਂ ਦੁਖੀ ਹੈ। ਇਸ ਮਾਨਸਿਕ ਪ੍ਰੇਸ਼ਾਨੀ ਤੋਂ ਰਾਹਤ ਲਈ ਤੇ ਮਨ ਨੂੰ ਸ਼ਾਂਤ ਕਰਨ ਲਈ ਲੋਕ ਸਰਕਾਰ ਤੋਂ ਨਿਆਂ ਲੈਣ ਦੀ ਬਜਾਏ ਉਹ ਧਰਮ ਅਸਥਾਨਾਂ ਵੱਲ ਹੋ ਤੁਰੇ ਹਨ। ਲੋਕ ਆਪਣੇ ਧਾਰਮਿਕ ਮਸਲੇ ਸਰਕਾਰਾਂ ਤੋਂ ਹੱਲ ਕਰਾਉਣ ਲਈ ਕਿਸੇ ਜਥੇਬੰਦੀ ਨਾਲ ਨਹੀਂ ਜੁੜਦੇ। ਮੇਰੀ ਉਨ੍ਹਾਂ ਸ਼ਰਧਾਲੂਆਂ ਨੂੰ ਬੇਨਤੀ ਹੈ ਕਿ ਤੁਸੀਂ ਉਨ੍ਹਾਂ ਬਾਬਿਆਂ ਦੀ ਅਗਵਾਈ 'ਚ ਹੁੰਦੇ ਇਕੱਠਾਂ ਨੂੰ ਇਨ੍ਹਾਂ ਦੀਵਾਨਾਂ ਨੂੰ ਹੁਣ ਧਰਨਿਆਂ, ਮੁਜ਼ਾਹਰਿਆਂ ਦਾ ਰੂਪ ਦੇ ਦਿਓ। ਪਹਿਲਾਂ ਵੀ ਸਾਰੇ ਗੁਰੂ ਸਾਹਿਬਾਨ ਵੀ ਲੋਕਾਂ ਦੇ ਹੱਕਾਂ ਦੀ ਖਾਤਰ ਸਰਕਾਰਾਂ ਨਾਲ ਟੱਕਰ ਲੈਂਦੇ ਰਹੇ ਹਨ।


-ਗੁਰਾਂਦਿੱਤਾ ਸੰਧੂ।


ਬਜ਼ੁਰਗਾਂ ਦੀ ਭੂਮਿਕਾ
ਬੀਤੇ ਦਿਨ 'ਅਜੀਤ' ਦੇ ਨਾਰੀ ਸੰਸਾਰ ਪੰਨੇ 'ਤੇ ਮਾਣਯੋਗ ਲੇਖਿਕਾ ਪ੍ਰੋ: ਕੁਲਜੀਤ ਕੌਰ ਅਠਵਾਲ ਦਾ ਲੇਖ 'ਬੱਚਿਆਂ ਦੇ ਪਾਲਣ-ਪੋਸ਼ਣ ਵਿਚ ਬਜ਼ੁਰਗਾਂ ਦੀ ਭੂਮਿਕਾ' ਪੜ੍ਹਿਆ, ਬੇਹੱਦ ਪਸੰਦ ਆਇਆ। ਮੈਂ ਖ਼ੁਦ ਸਾਰਾ ਦਿਨ ਆਪਣੀ ਪਿਆਰੀ ਪੋਤੀ ਦੇ ਨਾਲ ਬਿਤਾਉਂਦਾ ਹਾਂ, ਜੋ ਢਾਈ ਕੁ ਸਾਲਾਂ ਦੀ ਹੈ। ਅਸੀਂ ਦੋਵੇਂ ਸਾਰਾ ਦਿਨ ਬਹੁਤ ਹੀ ਅਨੰਦਮਈ ਜੀਵਨ ਗੁਜ਼ਾਰਦੇ ਹਾਂ। ਮੇਰਾ ਸਭ ਕਹਿਣ ਦਾ ਭਾਵ ਹੈ ਕਿ ਲੇਖਿਕਾ ਦੇ ਲੇਖ ਅਨੁਸਾਰ ਹੀ ਅਸੀਂ ਦੋਵੇਂ ਸਾਰਾ ਦਿਨ ਵਿਚਰਦੇ ਹਾਂ। ਮਾਣਯੋਗ ਲੇਖਕਾ ਦਾ ਲੇਖ ਮੈਨੂੰ ਇਸ ਕਰਕੇ ਵੀ ਬਹੁਤ ਪਸੰਦ ਆਇਆ ਕਿਉਂਕਿ ਲਗਪਗ ਮੇਰੇ 'ਤੇ ਢੁੱਕਦਾ ਹੈ। ਭਾਵ ਹਰ ਬਜ਼ੁਰਗ ਦਾਦਾ-ਦਾਦੀ ਨਾਨਾ-ਨਾਨੀ 'ਤੇ ਜ਼ਰੂਰ ਢੁੱਕਦਾ ਹੋਵੇਗਾ। ਬਜ਼ੁਰਗ ਬੜਾ ਕੀਮਤੀ ਖਜ਼ਾਨਾ ਹੁੰਦੇ ਹਨ। ਉਹ ਆਪਣੇ ਚੰਗੇ ਗੁਣ, ਸੰਸਕਾਰ ਆਪਣੇ ਪੋਤੇ-ਪੋਤੀਆਂ, ਦੋਹਤੇ-ਦੋਹਤੀਆਂ ਅੰਦਰ ਭਰਨ ਦਾ ਅਕਸਰ ਯਤਨ ਕਰਦੇ ਹਨ। ਚੰਗੇ ਸੰਸਕਾਰਾਂ ਦੀ ਬੁਨਿਆਦ ਬੱਚਿਆਂ ਦੀ ਬਜ਼ੁਰਗਾਂ ਦੀ ਸੰਗਤ ਨਾਲ ਹੀ ਬਣ ਸਕਦੀ ਹੈ।


-ਮਾ: ਦੇਵਰਾਜ ਖੁੰਡਾ
ਸ੍ਰੀ ਰਾਮ ਸ਼ਰਨਮ ਕਾਲੋਨੀ, ਗੁਰਦਾਸਪੁਰ।

27-07-2017

 ਪੱਤਰਚੰਗਾ ਫ਼ੈਸਲਾ
ਪਿੰਡਾਂ 'ਚ ਲੱਗੇ ਨੀਂਹ-ਪੱਥਰਾਂ ਨੂੰ ਵਿਰੋਧੀ ਵਿਅਕਤੀ ਜਾਂ ਪਾਰਟੀ ਵਰਕਰਾਂ ਵੱਲੋਂ ਰੰਜ਼ਿਸ਼ ਤਹਿਤ ਤੋੜਨ ਤੇ ਪੁੁਲਿਸ ਠਾਣਿਆਂ 'ਚ ਸ਼ਿਕਾਇਤਾਂ ਦਰਜ ਹੋਈਆਂ ਸਨ। ਪੰਜਾਬ ਸਰਕਾਰ ਵੱਲੋਂ ਉਦਘਾਟਨੀ ਪੱਥਰ 'ਚ ਵਿਧਾਇਕਾਂ ਦਾ ਨਾਂਅ ਨਾ ਲਿਖਣ ਦਾ ਲਿਆ ਫ਼ੈਸਲਾ ਦਰੁਸਤ ਹੈ। ਸਮੇਂ-ਸਮੇਂ ਸਰਕਾਰਾਂ ਦੇ ਵਿਧਾਇਕਾਂ ਵੱਲੋਂ ਪਿੰਡਾਂ ਵਿਚ ਸੰਪਰਕ ਸੜਕਾਂ ਦੇ ਨੀਂਹ-ਪੱਥਰ ਵਿਕਾਸ ਦੇ ਨਾਂਅ 'ਤੇ ਰੱਖੇੇ ਗਏ ਪਰ ਵਿਕਾਸ ਤਾਂ ਨਜ਼ਰ ਨਹੀਂ ਆਏ ਪਰ ਨੀਂਹ-ਪੱਥਰ ਚਿੱਟਾ ਹਾਥੀ ਬਣ ਕੇ ਰਹਿ ਗਏ। ਨੀਂਹ-ਪੱਥਰਾਂ 'ਤੇ ਉਨ੍ਹਾਂ ਵਿਅਕਤੀਆਂ ਦਾ ਨਾਂਅ ਹੋਣਾ ਚਾਹੀਦਾ ਹੈ, ਜੋ ਲੋਕ ਬੁੱਧੀਜੀਵੀ ਹੋਣ, ਜਿਹੜੇ ਸਮਾਜ ਸੇਵਕ ਲੋਕ ਭਲਾਈ ਦਾ ਕੰਮ ਕਰਦੇ ਹਨ, ਉਨ੍ਹਾਂ ਲੋਕਾਂ ਨੂੰ ਉਦਘਾਟਨੀ ਪੱਥਰਾਂ 'ਚ ਸ਼ਾਮਿਲ ਕਰਨਾ ਚਾਹੀਦਾ ਹੈ।


-ਮਾਸਟਰ ਜਗੀਰ ਸਿੰਘ ਸਫਰੀ
ਸਠਿਆਲਾ (ਅੰਮ੍ਰਿਤਸਰ)।


ਪੰਜਾਬ ਸਰਕਾਰ 'ਤੇ ਉਮੀਦਾਂ
ਲੋਕ ਵੋਟਾਂ ਪਾ ਕੇ ਆਪਣੀ ਪਸੰਦ ਦੀ ਸਰਕਾਰ ਚੁਣਦੇ ਹਨ ਅਤੇ ਆਸ ਕਰਦੇ ਹਨ ਕਿ ਸਰਕਾਰ ਬਣਨ ਤੋਂ ਬਾਅਦ ਇਹ ਸਾਡੀਆਂ ਮੁਸੀਬਤਾਂ ਦੀ ਲੜੀ ਨੂੰ ਕੁਝ ਛੋਟਾ ਕਰੇਗੀ। ਬੜੇ ਉਤਸਾਹ ਨਾਲ ਲੱਖਾਂ ਨੌਜਵਾਨਾਂ ਨੇ ਕਾਂਗਰਸ ਦੀ ਹਰ ਘਰ ਨੌਕਰੀ ਦਾ ਫਾਰਮ ਅਪਲਾਈ ਕੀਤੇ ਸਨ ਪਰ ਸਰਕਾਰ ਦਾ ਅੱਜ ਤੱਕ ਕੋਈ ਵੀ ਨੌਕਰੀ ਦੇਣ ਦਾ ਵਾਅਦਾ ਸਿਰੇ ਨਹੀਂ ਚੜ੍ਹਿਆ। ਅੱਜ ਲੱਖਾਂ ਨੌਜਵਾਨਾਂ ਦੀਆਂ ਆਸਾਂ ਸਰਕਾਰ 'ਤੇ ਟਿਕੀਆਂ ਹੋਈਆਂ ਹਨ ਕਿ ਕਦੋਂ ਸਰਕਾਰ ਉਨ੍ਹਾਂ ਦੇ ਸੁਪਨਿਆਂ ਨੂੰ ਬੂਰ ਪਾਵੇਗੀ। ਇਸੇ ਤਰ੍ਹਾਂ ਹੀ ਬਜ਼ੁਰਗਾਂ ਦੀਆਂ ਬਹੁਤ ਸਾਰੀਆਂ ਆਸਾਂ ਸਰਕਾਰ ਨਾਲ ਜੁੜੀਆਂ ਹੋਈਆਂ ਹਨ, ਉਨ੍ਹਾਂ ਦਾ ਵੀ ਸਰਕਾਰ ਚੇਤਾ ਆਪਣੇ ਧਿਆਨ ਵਿਚ ਜ਼ਰੂਰ ਰੱਖੇ। ਕਿਸਾਨਾਂ ਦਾ ਕਰਜ਼ਾ ਤਾਂ ਮੁਆਫ਼ ਕਰਨ ਦਾ ਐਲਾਨ ਤਾਂ ਕਰ ਦਿੱਤਾ ਗਿਆ ਹੈ ਪਰ ਇਸ ਨੂੰ ਸਹੀ ਢੰਗ ਨਾਲ ਨੇਪਰੇ ਚਾੜ੍ਹਨ ਦੀ ਵੀ ਲੋੜ ਹੈ। ਇਸ ਲਈ ਸਰਕਾਰ ਨੂੰ ਚਾਹੀਦਾ ਹੈ ਕਿ ਉਹ ਮੁੜ ਪੰਜਾਬ ਨੂੰ ਸੋਨੇ ਦੀ ਚਿੜੀ ਬਣਾਉਣ ਲਈ ਵੱਧ ਤੋਂ ਵੱਧ ਰੁਜ਼ਗਾਰ ਦੇ ਸਾਧਨ ਪੈਦਾ ਕਰੇ ਤਾਂ ਜੋ ਪੰਜਾਬ ਦੀ ਨਸ਼ਿਆਂ ਵਿਚ ਗਲਤਾਨ ਹੋ ਰਹੀ ਨੌਜਵਾਨ ਪੀੜ੍ਹੀ ਨੂੰ ਬਚਾਇਆ ਜਾ ਸਕੇ।


-ਨਰਿੰਦਰ ਸਿੰਘ ਚੌਹਾਨ
ਪਿੰਡ ਬਠੋਈ ਕਲਾਂ, ਜ਼ਿਲ੍ਹਾ ਪਟਿਆਲਾ।


ਬੱਚੇ, ਮਾਪੇ ਅਤੇ ਲਾਇਬ੍ਰੇਰੀ
ਵਿਦਵਾਨ ਵਿਅਕਤੀ ਲਈ ਇਹ ਪੂਰੀ ਦੁਨੀਆ ਗਿਆਨ ਦਾ ਵੱਡਾ ਸਮੁੰਦਰ ਹੈ। ਅਮਰੀਕਾ ਦੇ ਵਿਦਵਾਨ ਲੇਖਕ ਰੇਅ ਬਰੇਡਬਰੀ ਨੇ ਲਿਖਿਆ ਹੈ, ਬਿਨਾਂ ਲਾਇਬ੍ਰੇਰੀਆਂ ਤੋਂ ਅਸੀਂ ਕੀ ਹਾਂ, ਸਾਡਾ ਨਾ ਕੋਈ ਭੂਤਕਾਲ ਤੇ ਨਾ ਹੀ ਕੋਈ ਭਵਿੱਖ ਕਾਲ ਹੈ। ਇਸ ਵਿਚ ਕੋਈ ਦੋ ਰਾਏ ਨਹੀਂ ਕਿ ਸਕੂਲਾਂ ਖ਼ਾਸ ਕਰ ਸਰਕਾਰੀ ਸਕੂਲਾਂ ਵਿਚ ਇਨ੍ਹਾਂ ਦੀ ਵਰਤੋਂ ਨਾ ਦੇ ਬਰਾਬਰ ਹੈ। ਜੇ ਪੱਕੀ ਲਾਇਬ੍ਰੇਰੀਅਨ ਦੀ ਅਸਾਮੀ ਸਕੂਲਾਂ ਵਿਚ ਲਾਗੂ ਹੋਵੇ ਤੇ ਹਰ ਕਲਾਸ ਦਾ ਫਰੀ ਪੀਰੀਅਡ ਲਾਇਬ੍ਰੇਰੀ ਨਾਲ ਜੋੜਿਆ ਜਾਵੇ ਜਿਸ ਕਰਕੇ ਬੱਚਿਆਂ ਦੀ ਰੁਚੀ ਦੇ ਨਾਲੋ-ਨਾਲ ਬੌਧਿਕ ਪੱਧਰ ਵੀ ਉੱਚਾ ਚੁੱਕ ਸਕਦੇ ਹਾਂ। ਵਿਡੰਬਨਾ ਇਹ ਵੀ ਹੈ ਕਿ ਅਕਸਰ ਅਸੀਂ ਦੇਖਦੇ ਹਾਂ ਮਾਪੇ ਘਰੇ ਪੜ੍ਹਾਉਣ ਸਮੇਂ ਬੱਚੇ ਸਾਹਮਣੇ ਖ਼ੁਦ ਸੋਸ਼ਲ ਮੀਡੀਆ ਵਿਚ ਵਿਅਸਥ ਰਹਿੰਦੇ ਹਨ। ਸਰਕਾਰ ਵੱਲੋਂ ਵੀ ਦਿੱਤੀਆਂ ਜਾਂਦੀਆਂ ਗਰਾਂਟਾਂ ਨਾਲ ਸਕੂਲਾਂ ਵਿਚ ਕਿਤਾਬ ਘਰ ਦੇ ਨਾਂਅ ਤੇ ਖੜ੍ਹੇ ਚਿੱਟੇ ਹਾਥੀਆਂ 'ਤੇ ਲਗਾਮ ਕੱਸਣੀ ਚਾਹੀਦੀ ਹੈ। ਅੱਜ ਵੀ ਕੁਝ ਅਗਾਂਹ ਵਧੂ ਸੰਸਥਾਵਾਂ ਸਕੂਲਾਂ ਕਾਲਜਾਂ ਵਿਚ ਮੁਫ਼ਤ ਕਿਤਾਬਾਂ ਵੰਡ ਕੇ ਸਾਹਿਤਕ ਰੁਚੀ ਦਾ ਘੇਰਾ ਵਧਾਉਣ ਲਈ ਤਤਪਰ ਹਨ। ਸਰਕਾਰ, ਮਾਪੇ ਤੇ ਅਧਿਆਪਕਾਂ ਨੂੰ ਇਨ੍ਹਾਂ ਨਾਲ ਸਾਂਝੀਆਂ ਕਮੇਟੀਆਂ ਗਠਤ ਕਰਕੇ ਵਿੱਦਿਆ ਦੇ ਚਾਨਣ ਦਾ ਹੋਰ ਫੈਲਾਉਣਾ ਚਾਹੀਦਾ ਹੈ।


-ਐਡਵੋਕੇਟ ਰਵਿੰਦਰ ਸਿੰਘ ਧਾਲੀਵਾਲ
ਪਿੰਡ ਨੱਥੂ ਮਾਜਰਾ, ਜ਼ਿਲ੍ਹਾ ਸੰਗਰੂਰ।

26-07-2017

 ਕੰਨਾਂ ਦੇ ਕੱਚੇ

ਪੰਜਾਬ ਦੇ ਤਕਰੀਬਨ ਹਰ ਇਕ ਪਿੰਡ ਵਿਚ ਹਰ ਤਰ੍ਹਾਂ ਦੇ ਲੋਕ ਰਹਿੰਦੇ ਹਨ, ਜਿਨ੍ਹਾਂ ਵਿਚ ਕੁਝ ਗਰਮ, ਕੁਝ ਨਰਮ, ਕੋਈ ਸੱਚਾ, ਕੋਈ ਝੂਠਾ, ਕੋਈ ਗਾਲੜੀ ਅਤੇ ਕਈ ਬੇਹੱਦ ਸ਼ਾਂਤ ਸੁਭਾਅ ਦੇ ਮਾਲਕ ਹੁੰਦੇ ਹਨ। ਇਨ੍ਹਾਂ ਸਭ ਤੋਂ ਇਲਾਵਾ ਹਰੇਕ ਪਿੰਡ ਵਿਚ ਕੁਝ ਅਜਿਹੇ ਵੀ ਲੋਕ ਹੁੰਦੇ ਹਨ, ਜੋ ਕਿਸੇ ਦੁਆਰਾ ਆਖੀ ਕਿਸੇ ਗੱਲ ਦੀ ਬਿਨਾਂ ਜਾਂਚ ਪੜਤਾਲ ਕੀਤੇ ਉਸ 'ਤੇ ਯਕੀਨ ਕਰ ਲੈਂਦੇ ਹਨ। ਪੇਂਡੂ ਭਾਸ਼ਾ ਵਿਚ ਅਜਿਹੇ ਲੋਕਾਂ ਨੂੰ 'ਕੰਨਾਂ ਦੇ ਕੱਚੇ' ਨਾਂਅ ਨਾਲ ਜਾਣਿਆ ਜਾਂਦਾ ਹੈ। ਅਸੀਂ ਅਕਸਰ ਹੀ ਦੇਖਦੇ ਹਾਂ ਕਿ ਲੋਕਾਂ ਵੱਲੋਂ ਕਿਸੇ ਦੀ ਸੁਣੀ-ਸੁਣਾਈ ਗੱਲ ਨੂੰ ਸੱਚ ਮੰਨ ਕੇ ਬਿਨਾਂ ਸੋਚੇ ਸਮਝੇ ਆਪਣੇ ਸਕਿਆਂ ਭਰਾਵਾਂ, ਆਂਢ-ਗੁਆਂਢ ਜਾਂ ਰਿਸ਼ਤੇਦਾਰਾਂ ਨਾਲ ਮੂੰਹ ਮੋਟੇ ਕਰ ਲਏ ਜਾਂਦੇ ਹਨ। ਕਈ ਵਾਰ ਗ਼ਲਤਫਹਿਮੀ ਵਿਚ ਚੁੱਕਿਆ ਸਾਡਾ ਇਕ ਹੀ ਕਦਮ ਸਾਲਾਂ ਦੀ ਬਣੀ ਬਣਾਈ ਨੂੰ ਤਹਿਸ-ਨਹਿਸ ਕਰਨ ਲਈ ਕਾਫੀ ਹੋ ਨਿਬੜਦਾ ਹੈ।

-ਰਾਜਾ ਗਿੱਲ (ਚੜਿੱਕ)।

ਪ੍ਰੇਰਨਾ ਦਾ ਕਮਾਲ

ਮਨੁੱਖ ਦੇ ਜੀਵਨ ਵਿਚ ਪ੍ਰੇਰਨਾ ਦੀ ਬਹੁਤ ਅਹਿਮੀਅਤ ਹੈ, ਹਰ ਵੱਡਾ ਕੰਮ ਪ੍ਰੇਰਿਤ ਹੋ ਕੇ ਹੀ ਕੀਤਾ ਜਾਂਦਾ ਹੈ। ਵਿਦਿਆਰਥੀਆਂ ਨੂੰ ਪ੍ਰੇਰਿਤ ਕਰਨਾ ਸਾਡਾ ਫਰਜ਼ ਹੈ। ਜ਼ਰੂਰਤ ਹੈ ਅਜਿਹੇ ਸਾਹਿਤ ਨੂੰ ਪ੍ਰਫੁੱਲਿਤ ਕੀਤਾ ਜਾਵੇ ਤਾਂ ਜੋ ਸਮਾਜ ਵਿਚ ਸਾਕਾਰਾਤਮਕ ਸੋਚ ਦਿੱਤੀ ਜਾ ਸਕੇ। ਮੈਂ ਜ਼ਿਕਰ ਕਰਨਾ ਚਾਹਾਂਗਾ ਕਿ ਪ੍ਰੋ: ਡੀ.ਸੀ. ਸ਼ਰਮਾ ਦੇ ਲੇਖਾਂ ਦੀ ਜੋ ਚੰਗੀ ਪ੍ਰੇਰਨਾ ਦਿੰਦੇ ਹਨ। ਇਸ ਦੇ ਨਾਲ-ਨਾਲ ਲੇਖਕ ਤਰਨਜੀਤ ਸਿੰਘ ਰੰਧਾਵਾ ਵੱਲੋਂ ਅਜੀਤ ਮੈਗਜ਼ੀਨ ਵਿਚ ਛਾਪੇ ਲੇਖ 'ਪ੍ਰੇਰਨਾ ਦਾ ਕਮਾਲ' ਅਤੇ 'ਆਕਰਸ਼ਣ ਦਾ ਰਹੱਸ' ਲਾਹੇਵੰਦ ਅਤੇ ਸ਼ਲਾਘਾਯੋਗ ਹਨ। ਅਸੀਂ ਉਮੀਦ ਕਰਦੇ ਹਾਂ ਕਿ ਅੱਗੇ ਤੋਂ ਵੀ ਅਜਿਹਾ ਸਾਕਾਰਾਤਮਿਕ ਨਜ਼ਰੀਆ ਅਤੇ ਹੌਸਲਾ, ਪ੍ਰੇਰਨਾ ਦੇਣ ਵਾਲੇ ਲੇਖ ਆਪ ਜੀ ਵੱਲੋਂ ਸਾਨੂੰ ਪੜ੍ਹਨ ਲਈ ਮਿਲਣਗੇ।

-ਜਗਮੀਤ ਸਿੰਘ
ਜਲੰਧਰ।

ਖੇਡਾਂ ਅਤੇ ਨਸ਼ੇ

ਅਕਸਰ ਹਰੇਕ ਖੇਤਰ ਵਿਚ ਖੇਡਾਂ ਹੁੰਦੀਆਂ ਹਨ। ਇਨ੍ਹਾਂ ਵਿਚ ਵੱਖ-ਵੱਖ ਤਰ੍ਹਾਂ ਦੇ ਮੁਕਾਬਲੇ ਕਰਵਾਏ ਜਾਂਦੇ ਹਨ। ਖੇਡਾਂ ਤਾਂ ਸਹੀ ਹਨ ਪਰ ਇਨ੍ਹਾਂ ਖੇਡਾਂ ਵਿਚ ਖੇਡਣ ਅਤੇ ਖਿਡਾਉਣ ਵਾਲੇ ਕੁਝ ਠੀਕ ਨਹੀਂ ਜਾਪਦੇ। ਅਕਸਰ ਖੇਡਾਂ ਵਿਚ ਹੁੰਦਾ ਹੈ ਕਿ ਕਈ ਕੋਚ ਨਸ਼ਾ ਕਰਵਾਉਂਦੇ ਅਤੇ ਕਈ ਖਿਡਾਰੀ ਵੀ ਨਸ਼ਾ ਕਰਕੇ ਖੇਡਦੇ ਹਨ। ਹੁਣ ਤੱਕ ਦੇ ਰਿਕਾਰਡ ਅਨੁਸਾਰ ਨਸ਼ਾ ਕਰਕੇ ਖੇਡਣ ਵਾਲੇ ਬਹੁਤ ਖਿਡਾਰੀ ਆਪਣੀ ਜਾਨ ਤੋਂ ਵੀ ਹੱਥ ਧੋ ਚੁੱਕੇ ਹਨ। ਖੇਡਾਂ ਆਪਣੀ ਸਿਹਤ ਨੂੰ ਠੀਕ ਰੱਖਣ ਲਈ ਹੁੰਦੀਆਂ ਹਨ, ਨਾ ਕਿ ਸਿਹਤ ਖਰਾਬ ਕਰਨ ਲਈ। ਨਸ਼ਿਆਂ ਨਾਲ ਤਾਂ ਸਰੀਰ ਖੋਖਲਾ ਹੋ ਜਾਂਦਾ ਹੈ। ਇਸ ਲਈ ਲੋੜ ਹੈ, ਹਰ ਇਕ ਖੇਡ ਵਿਚ ਡੋਪ ਟੈਸਟ ਹੋਣਾ ਚਾਹੀਦਾ ਹੈ ਅਤੇ ਖਿਡਾਰੀਆਂ ਅਤੇ ਕੋਚਾਂ ਨੂੰ ਵੀ ਸਮਝਣ ਦੀ ਲੋੜ ਹੈ ਕਿ ਉਹ ਨਸ਼ੇ ਤੋਂ ਦੂਰੀ ਬਣਾ ਕੇ ਰੱਖਣ।

-ਅਕਾਸ਼ਦੀਪ ਸਿੰਘ
ਪਿੰਡ ਸੀਰਵਾਲੀ (ਸ੍ਰੀ ਮੁਕਤਸਰ ਸਾਹਿਬ)।

ਗੁਮਰਾਹਕੁੰਨ ਅੰਕੜੇ

ਪਿਛਲੇ ਦਿਨੀਂ ਡਾ: ਸਤਿੰਦਰਪਾਲ ਸਿੰਘ ਬਰਾੜ ਹੁਰਾਂ ਦਾ ਖੇਤੀ ਕਰਜ਼ੇ ਦੀ ਮੁਆਫ਼ੀ ਅਤੇ ਕਿਸਾਨਾਂ ਦੀ ਦਸ਼ਾ-ਦਿਸ਼ਾ ਬਾਰੇ ਲੇਖ ਪੜ੍ਹਿਆ, ਜਿਸ ਵਿਚ ਕਿਸਾਨਾਂ ਨੂੰ ਬਹੁਤ ਅਮੀਰ ਦਰਸਾਉਣ ਲਈ ਡਾ: ਸਾਹਿਬ ਲਿਖਦੇ ਹਨ ਕਿ ਕਣਕ, ਝੋਨੇ ਲਈ ਬੀਜ, ਖਾਦ, ਕੀਟਨਾਸ਼ਕ, ਡੀਜ਼ਲ, ਮਜ਼ਦੂਰੀ ਅਤੇ ਮਸ਼ੀਨਰੀ ਮੁਰੰਮਤ ਉੱਪਰ ਪ੍ਰਤੀ ਏਕੜ ਕੁੱਲ ਲਾਗਤ 25-30 ਹਜ਼ਾਰ ਕੱਢ ਕੇ ਸਾਲਾਨਾ ਕਮਾਈ 40-50 ਹਜ਼ਾਰ ਪ੍ਰਤੀ ਏਕੜ ਹੈ। ਮੈਂ ਇਕ ਕਿਸਾਨ ਹੋਣ ਦੇ ਨਾਤੇ ਇਹ ਗੱਲ ਦਾਅਵੇ ਨਾਲ ਕਹਿੰਦਾ ਹਾਂ ਕਿ ਕਿਸਾਨ ਦੀ ਸਾਲਾਨਾ ਕਮਾਈ ਪ੍ਰਤੀ ਏਕੜ ਕਦੇ ਵੀ 12-15 ਹਜ਼ਾਰ ਤੋਂ ਵੱਧ ਨਹੀਂ ਹੋ ਸਕਦੀ। ਜੇਕਰ ਦੱਸੇ ਅੰਕੜੇ ਸੱਚ ਹੁੰਦੇ ਤਾਂ ਅੱਜ ਕਿਸਾਨ ਖ਼ੁਦਕੁਸ਼ੀਆਂ ਨਾ ਕਰਦੇ।

-ਲੱਖੀ ਗਿੱਲ ਧਨਾਨਸੂ
ਪਿੰਡ ਤੇ ਡਾਕ: ਧਨਾਨਸੂ, ਜ਼ਿਲ੍ਹਾ ਲੁਧਿਆਣਾ।

 

25-07-2017

 ਨਕਲ
ਅੱਜ ਦੇ ਵਿਦਿਆਰਥੀਆਂ ਵਿਚ ਨਕਲ ਦਾ ਜ਼ਹਿਰ ਏਨਾ ਫੈਲ ਗਿਆ ਹੈ, ਜਿਸ ਕਾਰਨ ਉਨ੍ਹਾਂ ਦਾ ਭਵਿੱਖ ਖ਼ਤਰੇ ਵਿਚ ਦਿਖਾਈ ਦਿੰਦਾ ਹੈ। ਨਕਲ ਦੇ ਸਿਰ 'ਤੇ ਵਿਦਿਆਰਥੀ ਇਮਤਿਹਾਨਾਂ ਵਿਚੋਂ ਤਾਂ ਪਾਸ ਹੋ ਜਾਂਦੇ ਹਨ ਪਰ ਜ਼ਿੰਦਗੀ ਦੇ ਇਮਤਿਹਾਨ 'ਚੋਂ ਹਮੇਸ਼ਾ ਫੇਲ੍ਹ ਰਹਿੰਦੇ ਹਨ। ਇਸ ਦੀ ਉਦਾਹਰਨ ਸਾਨੂੰ ਮੈਰੀਟੋਰੀਅਸ ਸਕੂਲ ਦਾਖ਼ਲਾ ਪ੍ਰੀਖਿਆ ਦੇ ਮਾੜੇ ਨਤੀਜਿਆਂ ਤੋਂ ਮਿਲਦੀ ਹੈ, ਜਿਸ ਵਿਚ 4837 ਵਿਦਿਆਰਥੀਆਂ ਵਿਚੋਂ ਕੇਵਲ 2775 ਵਿਦਿਆਰਥੀ ਹੀ ਸਫਲ ਹੋ ਸਕੇ ਅਤੇ 1300 ਦੇ ਕਰੀਬ ਸੀਟਾਂ ਖਾਲੀ ਰਹਿ ਗਈਆਂ। ਹੁਣ ਇਨ੍ਹਾਂ ਵਿਦਿਆਰਥੀਆਂ ਨੂੰ ਦੁਬਾਰਾ ਮੌਕਾ ਦੇਣ ਦੀ ਥਾਂ 'ਤੇ ਪ੍ਰਾਈਵੇਟ ਸਕੂਲਾਂ ਵਿਚ ਪੜ੍ਹਦੇ ਮੱਧ ਵਰਗੀ ਪਰਿਵਾਰਾਂ ਦੇ ਬੱਚਿਆਂ ਨੂੰ ਪ੍ਰੀਖਿਆ ਦੇਣ ਦਾ ਇਕ ਮੌਕਾ ਦਿੱਤਾ ਜਾਵੇ, ਤਾਂ ਕਿ ਉਹ ਵੀ ਆਪਣੀ ਕਾਬਲੀਅਤ ਨੂੰ ਸਾਬਤ ਕਰ ਸਕਣ ਅਤੇ ਅਸਫ਼ਲ ਰਹਿਣ ਵਾਲੇ ਵਿਦਿਆਰਥੀ ਵੀ ਇਨ੍ਹਾਂ ਨਤੀਜਿਆਂ ਤੋਂ ਸਬਕ ਲੈ ਕੇ ਭਵਿੱਖ ਵਿਚ ਨਕਲ ਨਾ ਮਾਰਨ ਅਤੇ ਮਿਹਨਤ ਕਰਨ ਦੀ ਪ੍ਰੇਰਣਾ ਲੈ ਸਕਣ।

-ਸਿਮਰਨ ਔਲਖ
ਪਿੰਡ ਸੀਰਵਾਲੀ (ਸ੍ਰੀ ਮੁਕਤਸਰ ਸਾਹਿਬ)।

ਰੁੱਖ ਲਗਾਓ
ਆਮ ਕਰਕੇ ਪਿੰਡਾਂ ਅਤੇ ਸ਼ਹਿਰਾਂ ਵਿਚ ਸਮਾਜ-ਸੇਵੀ ਲੋਕਾਂ ਵੱਲੋਂ ਪੰਛੀਆਂ ਦੇ ਰਹਿਣ ਲਈ ਲੱਕੜੀ ਦੇ ਆਲ੍ਹਣੇ ਤਿਆਰ ਕਰਵਾ ਕੇ ਖੰਭਿਆਂ ਅਤੇ ਇਮਾਰਤਾਂ ਉੱਪਰ ਤਪਦੀ ਧੁੱਪ ਵਿਚ ਲਗਾਏ ਜਾ ਰਹੇ ਹਨ। ਜ਼ਿਕਰਯੋਗ ਹੈ ਕਿ ਇਨ੍ਹਾਂ ਆਲ੍ਹਣਿਆਂ ਨੂੰ ਲਗਾਉਣ ਦੀ ਨੌਬਤ ਰੁੱਖਾਂ ਦੀ ਧੜਾਧੜ ਪੁਟਾਈ ਕਾਰਨ ਅਤੇ ਕੱਚੇ ਘਰਾਂ ਦੀ ਥਾਂ ਮਾਰਬਲਾਂ ਵਾਲੀਆਂ ਆਲੀਸ਼ਾਨ ਕੋਠੀਆਂ ਬਣ ਜਾਣ ਕਾਰਨ ਆਈ ਹੈ। ਜੇਕਰ ਆਲ੍ਹਣਿਆਂ ਨਾਲੋਂ ਅਸੀਂ ਵੱਧ ਤੋਂ ਵੱਧ ਰੁੱਖਾਂ ਦੀ ਪੈਦਾਵਾਰ ਕਰੀਏ ਤਾਂ ਉਹ ਜ਼ਿਆਦਾ ਚੰਗਾ ਹੈ ਕਿਉਂਕਿ ਵਾਤਾਵਰਨ ਦੀ ਸ਼ੁੱਧਤਾ ਅਤੇ ਰੁੱਖਾਂ ਦੀ ਛਾਂ ਹੇਠ ਮੌਸਮ ਦੇ ਅਨੁਕੂਲ ਆਲ੍ਹਣੇ ਤਾਂ ਹਿੰਮਤੀ ਪੰਛੀ ਖ਼ੁਦ ਆਪਣੀ ਪਸੰਦ ਦੇ ਬਣਾ ਲੈਣਗੇ। ਸੋ, ਆਲ੍ਹਣੇ ਲਗਾ ਕੇ ਪੰਛੀਆਂ ਨੂੰ ਆਲਸੀ ਬਣਾਉਣ ਦੀ ਥਾਂ ਖੁੱਲ੍ਹੇ ਮਾਹੌਲ ਵਿਚ ਆਜ਼ਾਦੀ ਨਾਲ ਰਹਿਣ ਦਾ ਹੌਸਲਾ ਤੇ ਹਿੰਮਤ ਦੇਣੀ ਚਾਹੀਦੀ ਹੈ।

-ਕੁਲਵਿੰਦਰ ਸਿੰਘ ਨਿਜ਼ਾਮਪੁਰ
ਮਲੌਦ।

ਜੀਵਨ ਬੀਮਾ ਯੋਜਨਾ
ਪੰਜਾਬ ਸਰਕਾਰ ਨੇ ਸਰਕਾਰੀ ਕਰਮਚਾਰੀਆਂ ਤੇ ਪੈਨਸ਼ਨਰਾਂ ਵਾਸਤੇ ਇਕ ਜੀਵਨ ਬੀਮਾ ਯੋਜਨਾ ਲਾਗੂ ਕੀਤੀ ਸੀ ਜਿਸ ਨਾਲ ਕਰਮਚਾਰੀਆਂ ਨੂੰ ਇਸ ਯੋਜਨਾ ਦਾ ਕਾਫੀ ਲਾਭ ਮਿਲਿਆ ਸੀ ਅਤੇ ਇਸ ਦੀ ਸ਼ਲਾਘਾ ਵੀ ਹੋਈ ਸੀ, ਪ੍ਰੰਤੂ ਹੁਣ ਇਹ ਯੋਜਨਾ ਬੰਦ ਕਰ ਦਿੱਤੀ ਗਈ ਹੈ। ਪੁਲਿਸ ਦੀ ਡਿਊਟੀ 24 ਘੰਟੇ ਹੋਣ ਕਰਕੇ ਡਿਊਟੀ ਦੀ ਕੋਈ ਸੀਮਾ ਨਹੀਂ ਹੈ। ਪੁਲਿਸ ਕਰਮਚਾਰੀ ਜ਼ਿਆਦਾ ਬਿਮਾਰੀਆਂ ਵਿਚ ਗ੍ਰਸਤ ਹੋਣ ਕਰਕੇ ਜੀਵਨ ਬੀਮਾ ਕੰਪਨੀਆਂ ਵੀ ਇਨ੍ਹਾਂ ਦਾ ਬੀਮਾ ਕਰਨ ਤੋਂ ਗੁਰੇਜ਼ ਕਰਦੀਆਂ ਹਨ। ਅਜਿਹੀ ਸਹੂਲਤ ਫ਼ੌਜੀਆਂ ਨੂੰ ਹਰ ਹਸਪਤਾਲ ਵਿਚ ਮਿਲ ਰਹੀ ਹੈ। ਸਰਕਾਰ ਨੂੰ ਇਸ ਬਾਰੇ ਸੰਜੀਦਗੀ ਨਾਲ ਵਿਚਾਰ ਕਰਨੀ ਚਾਹੀਦੀ ਹੈ।

-ਗੁਰਮੀਤ ਸਿੰਘ ਵੇਰਕਾ
ਸੇਵਾ-ਮੁਕਤ ਇੰਸਪੈਕਟਰ।

20-07-2017

 ਸਾਜ਼ਿਸ਼ਾਂ
ਪਿਛਲੇ ਦਿਨੀਂ 'ਅਜੀਤ' ਅਖ਼ਬਾਰ ਵਿਚ ਪ੍ਰੋ: ਅਭੈ ਕੁਮਾਰ ਦੂਬੇ ਦਾ ਲੇਖ 'ਅੰਬੇਡਕਰਵਾਦੀਆਂ ਨੂੰ ਬਦਲਣੀ ਪਵੇਗੀ ਆਪਣੀ ਰਣਨੀਤੀ' ਜਿੱਥੇ ਦਲਿਤ ਨੇਤਾਵਾਂ ਨੂੰ ਹਲੂਣਾ ਦੇਣ ਵਾਲਾ ਹੈ, ਉੱਥੇ ਆਮ ਦਲਿਤਾਂ ਅੰਦਰ ਨਵ-ਚੇਤਨਾ ਪੈਦਾ ਕਰਨ ਵਾਲਾ ਹੈ। ਸਾਫ਼ ਸ਼ੀਸ਼ਾ ਵਿਖਾਇਆ ਹੈ ਕਿ ਪ੍ਰਧਾਨ ਮੰਤਰੀ ਸ੍ਰੀ ਨਰਿੰਦਰ ਮੋਦੀ ਨੂੰ ਦੇਸ਼ ਦੇ ਪਹਿਲੇ ਪਛੜੇ ਵਰਗ ਦੇ ਨੇਤਾ ਦੇ ਰੂਪ ਵਿਚ ਉਭਾਰਨ ਦੀ ਕੋਸ਼ਿਸ਼ ਚੱਲ ਰਹੀ ਹੈ। ਸੰਘ ਪਰਿਵਾਰ ਨੇ ਦਲਿਤ ਅਤੇ ਪਛੜੇ ਪ੍ਰਤੀਕਾਂ ਨੂੰ ਰਾਜਨੀਤੀ ਖਾਤਰ ਹੜੱਪ ਲਿਆ ਹੈ। ਫੂਲੇ ਅਤੇ ਅੰਬੇਡਕਰ ਨੂੰ ਹਿੰਦੂ ਸੁਧਾਰਕ ਵੀ ਐਲਾਨ ਦਿੱਤਾ ਹੈ। ਭੀਮ ਸੈਨਾ ਵਲੋਂ 'ਦ ਗ੍ਰੇਟ ਚਮਾਰ' ਦੇ ਫ਼ਿਕਰੇ ਦਾ ਹਮਲਾਵਰ ਇਸਤੇਮਾਲ ਭਾਜਪਾ ਦੇ ਪੱਖ ਵਿਚ ਜਾ ਰਿਹਾ ਹੈ। ਲੋਹੀਆਵਾਦੀ ਅਤੇ ਅੰਬੇਡਕਰਵਾਦੀ ਸ਼ੈਲੀ ਦੀ ਸਮਾਜਿਕ ਨਿਆਂ ਦੀ ਰਾਜਨੀਤੀ ਨੇ ਆਪਣੀ ਸਾਖ਼ ਲਗਾਤਾਰ ਗੁਆਈ ਹੈ। ਲੇਖਕ ਨੇ ਅਹਿਮ ਸਵਾਲ ਲਿਖ ਦਿੱਤਾ ਹੈ ਕਿ ਕੀ ਇਹ ਸ਼ਕਤੀਆਂ ਹਿੰਦੂਤਵ ਦੇ ਜੇਤੂ ਰੱਥ ਨੂੰ ਇਕ ਵਾਰ ਫਿਰ ਰੋਕ ਸਕਣਗੀਆਂ?


-ਰਸ਼ਪਾਲ ਸਿੰਘ
ਐਸ.ਜੇ.ਐਸ. ਨਗਰ, ਹੁਸ਼ਿਆਰਪੁਰ।


ਫ਼ਿਰਕਾਪ੍ਰਸਤੀ ਦਾ ਨਾਗ
ਫ਼ਿਰਕਾਪ੍ਰਸਤੀ ਦੇ ਜ਼ਹਿਰੀਲੇ ਨਾਗ ਨੇ ਦੁਨੀਆ ਦੇ ਲੱਖਾਂ ਵਿਅਕਤੀਆਂ ਨੂੰ ਡਸਿਆ ਹੈ। ਵਿਕਸਤ ਦੇਸ਼ਾਂ ਨੇ ਇਸ ਫਨੀਅਰ ਨੂੰ ਕੀਲ ਪਟਾਰੀ ਵਿਚ ਪਾ ਕੇ ਵਿਕਾਸ ਦੀਆਂ ਉੱਚੀਆਂ ਮੰਜ਼ਿਲਾਂ ਨੂੰ ਸਰ ਕਰ ਲਿਆ। ਪਰ ਵਿਕਾਸਸ਼ੀਲ ਦੇਸ਼ਾਂ ਲਈ ਇਹ ਅਜੇ ਵੀ ਵੱਡੀ ਚੁਣੌਤੀ ਬਣੀ ਹੋਈ ਹੈ। ਸਾਡੇ ਰਾਜਸੀ ਨੇਤਾ ਸੱਤਾ ਪ੍ਰਾਪਤੀ ਲਈ ਫ਼ਿਰਕੂ ਪੱਤੇ ਦੀ ਖੁੱਲ੍ਹ ਕੇ ਵਰਤੋਂ ਕਰ ਰਹੇ ਹਨ। ਵਿਅਕਤੀ ਦੀ ਪਛਾਣ ਉਸ ਦੇ ਮਜ਼ਹਬ ਦੇ ਆਧਾਰ 'ਤੇ ਕੀਤੀ ਜਾ ਰਹੀ ਹੈ ਨਾ ਕਿ ਉਸ ਦੀ ਕਾਬਲੀਅਤ ਦੇ ਆਧਾਰ 'ਤੇ। ਦਰਅਸਲ ਸਾਡੇ ਸਿਆਸੀ ਪ੍ਰਭੂ ਲੋਕਾਂ ਦਾ ਧਿਆਨ ਅਸਲ ਮੁੱਦਿਆਂ ਅਤੇ ਆਰਥਿਕ ਸਮੱਸਿਆਵਾਂ ਤੋਂ ਹਟਾਉਣ ਲਈ ਸਮੇਂ-ਸਮੇਂ ਫ਼ਿਰਕੂ ਪੱਤਿਆਂ ਦੀ ਬੇਦਰੇਗ ਵਰਤੋਂ ਕਰਦੇ ਹਨ ਜੋ ਕਿ ਬੇਹੱਦ ਮੰਦਭਾਗੀ ਗੱਲ ਹੈ। ਸਮੇਂ ਦੀ ਲੋੜ ਹੈ ਕਿ ਸਾਡੇ ਰਾਸ਼ਟਰ ਦੇ ਲੋਕ ਜਾਗਰੂਕ ਹੋ ਕੇ ਸੌੜੀ ਸੋਚ ਦੀਆਂ ਵਲਗਣਾਂ ਤੋਂ ਬਾਹਰ ਨਿਕਲ ਕੇ ਨਵੇਂ ਭਾਰਤ ਦੀ ਸਿਰਜਣਾ ਵਿਚ ਜੁਟ ਜਾਣ।


-ਪ੍ਰਿੰ: ਭੁਪਿੰਦਰ ਸਿੰਘ ਢਿੱਲੋਂ
ਦੀਪਗੜ੍ਹ (ਬਰਨਾਲਾ)।


ਮੁਆਫ਼ੀ ਦੀ ਆਸ
ਮੁੱਖ ਮੰਤਰੀ ਜੀ ਦਾ ਟੀ.ਵੀ. 'ਤੇ ਭਾਸ਼ਣ ਸੁਣ ਕੇ ਅਤੇ ਅਖ਼ਬਾਰਾਂ ਵਿਚ ਪੜ੍ਹ ਕੇ ਪੰਜਾਬ ਦੇ ਬਹੁਗਿਣਤੀ ਕਿਸਾਨਾਂ ਨੇ ਕਰਜ਼ਾ ਨਹੀਂ ਮੋੜਿਆ ਕਿ ਸਭ ਮੁਆਫ਼ ਹੋ ਜਾਏਗਾ। ਛਮਾਹੀ ਦਾ ਸਮਾਂ ਲੰਘ ਜਾਣ ਕਰਕੇ ਸੁਸਾਇਟੀ ਤੇ ਬੈਂਕਾਂ ਵਾਲਿਆਂ ਨੇ ਵਿਆਜ ਦਰ ਵੀ ਵਧ ਲਾਈ ਹੈ ਅਤੇ ਲੇਟ ਹੋਣ ਕਰਕੇ ਵਿਆਜ ਵੀ ਕਾਫੀ ਵਧ ਗਿਆ ਹੈ। ਕਈ ਖਾਦ ਵੀ ਸਮੇਂ ਸਿਰ ਨਹੀਂ ਚੁੱਕ ਸਕੇ। ਕਰਜ਼ਾ ਮੁਆਫ਼ੀ ਦੀ ਆਸ ਵਿਚ ਹੋਰ ਵਾਧੂ ਰਗੜਾ ਖਾ ਬੈਠੇ ਹਾਂ।


-ਮਾ: ਮਹਿੰਦਰ ਸਿੰਘ ਸਿੱਧੂ
ਸਿੱਧਵਾਂ ਕਲਾਂ, ਜ਼ਿਲ੍ਹਾ ਲੁਧਿਆਣਾ।

19-07-2017

 ਭਵਿੱਖ ਬਾਰੇ ਸੋਚੋ
ਸੰਪਾਦਕੀ ਸਫ਼ੇ 'ਤੇ ਛਪੇ ਸਵਰਨ ਸਿੰਘ ਟਹਿਣਾ ਦਾ ਲੇਖ 'ਲੋਕ ਨੁਮਾਇੰਦੇ ਪੰਜਾਬ ਦੇ ਭਵਿੱਖ ਬਾਰੇ ਸੋਚਣ' ਬਹੁਤ ਹੀ ਧਿਆਨ ਦੇਣ ਵਾਲਾ ਵਿਸ਼ਾ ਹੈ। ਲੇਖਕ ਨੇ ਇਹ ਗੱਲ ਬਿਲਕੁਲ ਸੱਚ ਆਖੀ ਹੈ ਕਿ ਵਿਧਾਨ ਸਭਾ ਵਿਚ ਹੋ ਰਹੀਆਂ ਹਰਕਤਾਂ ਦਾ ਬੱਚਿਆਂ ਅਤੇ ਨੌਜਵਾਨਾਂ ਦੀ ਮਾਨਸਿਕਤਾ 'ਤੇ ਬਹੁਤ ਅਸਰ ਪੈ ਰਿਹਾ ਹੈ ਅਤੇ ਇਕ ਵਿਦਿਆਰਥੀ ਹੋਣ ਦੇ ਨਾਤੇ ਇਹ ਗੱਲ ਮੈਂ ਚੰਗੀ ਤਰ੍ਹਾਂ ਸਮਝ ਸਕਦੀ ਹਾਂ। ਸੈਕੰਡਰੀ ਪੱਧਰ ਦੇ ਵਿਦਿਆਰਥੀਆਂ ਨੂੰ ਉਨ੍ਹਾਂ ਦੇ ਸਿਲੇਬਸ ਵਿਚ ਇਕ ਬਿੱਲ ਕਾਨੂੰਨ ਕਿਵੇਂ ਬਣਦਾ ਹੈ, ਬਾਰੇ ਦੱਸਿਆ ਜਾਂਦਾ ਹੈ। ਜਦੋਂ ਅਸੀਂ ਕਿਤਾਬਾਂ ਵਿਚ ਕੁਝ ਹੋਰ ਪੜ੍ਹਦੇ ਹਾਂ ਅਤੇ ਹਕੀਕਤ ਵਿਚ ਕੁਝ ਹੋਰ ਦੇਖਦੇ ਹਾਂ ਤਾਂ ਆਮ ਜਿਹੀ ਗੱਲ ਹੈ ਕਿ ਅਸੀਂ ਆਪਣੇ ਦੇਸ਼ ਦੇ ਕਾਨੂੰਨ ਵਿਚ ਕਿੰਨਾ ਕੁ ਵਿਸ਼ਵਾਸ ਕਰਾਂਗੇ। ਇਸ ਕਾਰਨ ਹੀ ਸਾਡੇ ਨੌਜਵਾਨ ਕਾਨੂੰਨ ਦੀਆਂ ਧੱਜੀਆਂ ਉਡਾ ਰਹੇ ਹਨ ਅਤੇ ਉਨ੍ਹਾਂ ਵਿਚ ਅਪਰਾਧਾਂ ਦੀ ਬਿਰਤੀ ਵਧ ਰਹੀ ਹੈ।


-ਸਿਮਰਨ ਔਲਖ
ਸੀਰਵਾਲੀ (ਸ੍ਰੀ ਮੁਕਤਸਰ ਸਾਹਿਬ।)


ਚੋਰਾਂ ਦੀ ਦਹਿਸ਼ਤ
ਪਟਿਆਲਾ ਜ਼ਿਲ੍ਹੇ ਦੇ ਹਲਕਾ ਸਮਾਣਾ ਦੇ ਕਸਬਾ ਡਕਾਲਾ ਅੰਦਰ ਅੱਜਕਲ੍ਹ ਚੋਰਾਂ ਨੇ ਪੂਰੀ ਦਹਿਸ਼ਤ ਫਲਾਈ ਹੋਈ ਹੈ। ਪਿਛਲੇ ਇਕ ਮਹੀਨੇ ਦੌਰਾਨ ਕਸਬੇ ਅੰਦਰ ਅੱਧੀ ਦਰਜਨ ਦੇ ਕਰੀਬ ਚੋਰੀ ਦੀਆਂ ਵਾਰਦਾਤਾਂ ਵਾਪਰ ਚੁੱਕੀਆਂ ਹਨ। ਇੱਧਰ ਪੁਲਿਸ ਜਾਂਚ ਦੀ ਗੱਲ ਕਹਿ ਕੇ ਆਪਣੀ ਜ਼ਿੰਮੇਵਾਰੀ ਤੋਂ ਭੱਜਦੀ ਲੱਗ ਰਹੀ ਹੈ, ਕਿਉਂਕਿ ਅੱਜ ਤੱਕ ਪੁਲਿਸ ਨੂੰ ਕਿਸੇ ਵੀ ਚੋਰੀ ਦਾ ਕੋਈ ਵੀ ਸੁਰਾਗ ਨਹੀਂ ਮਿਲਿਆ ਹੈ। ਲੋਕਾਂ ਨੇ ਸਰਕਾਰ ਤੋਂ ਵੀ ਮੰਗ ਕੀਤੀ ਹੈ ਕਿ ਪੁਲਿਸ ਪ੍ਰਸ਼ਾਸਨ ਇਨ੍ਹਾਂ ਵਾਰਦਾਤਾਂ ਤੋਂ ਆਮ ਜਨਤਾ ਨੂੰ ਨਿਜਾਤ ਦਿਵਾਵੇ।


-ਨਰਿੰਦਰ ਸਿੰਘ ਚੌਹਾਨ
ਪਿੰਡ ਬਠੋਈ ਕਲਾਂ।


ਕਰਜ਼ਾ ਮੁਆਫ਼ੀ
ਪੰਜਾਬ ਸਰਕਾਰ ਨੇ ਵਿਧਾਨ ਸਭਾ ਦੇ ਬਜਟ ਸੈਸ਼ਨ ਵਿਚ ਕਿਸਾਨਾਂ ਸਿਰ ਚੜ੍ਹੇ 90 ਹਜ਼ਾਰ ਕਰੋੜ ਦੇ ਕਰਜ਼ ਵਿਚੋਂ 10 ਲੱਖ ਕਿਸਾਨਾਂ ਦੇ ਸਿਰਫ 1500 ਕਰੋੜ ਮੁਆਫ਼ ਕਰਨ ਦੀ ਗੱਲ ਕਹੀ ਹੈ। ਇਸ ਤੁਛ ਜਿਹੀ ਰਕਮ ਨਾਲ ਤਾਂ ਸਿਰਫ ਸਾਰੇ ਬੈਂਕਾਂ ਨੂੰ ਕੁਝ ਮਹੀਨਿਆਂ ਦਾ ਵਿਆਜ ਹੀ ਅਦਾ ਕੀਤਾ ਜਾ ਸਕਦਾ ਹੈ। ਲਾਭਪਾਤਰੀ ਕਿਸਾਨਾਂ ਦੀ ਸ਼ਨਾਖਤ ਕਰਕੇ ਸਰਕਾਰ ਤਰਫੋਂ ਪ੍ਰਮਾਣ ਪੱਤਰ ਜਾਰੀ ਕੀਤੇ ਜਾਣ। ਸਾਡੇ ਸਰਕਾਰੀ ਗ਼ੈਰ-ਸਰਕਾਰੀ ਬੈਂਕ ਕਿਸਾਨਾਂ ਦੀ ਗਹਿਣੇ ਕੀਤੀ ਜ਼ਮੀਨ ਦੇ ਮਾਲਕੀ ਹੱਕ ਕਿਸਾਨਾਂ ਨੂੰ ਵਾਪਸ ਦੇਣ ਕਿਉਂਕਿ ਹੁਣ 5 ਏਕੜ ਤੱਕ ਕਿਸਾਨਾਂ ਦਾ ਕਰਜ਼ਾ ਐਲਾਨ ਮੁਤਾਬਿਕ ਸਰਕਾਰ ਨੇ ਅਦਾ ਕਰਨਾ ਹੈ, ਕਿਸਾਨਾਂ ਨੇ ਨਹੀਂ।


-ਲੱਖੀ ਗਿੱਲ ਧਨਾਨਸੂ।


ਸਕੂਲ ਲਾਇਬ੍ਰੇਰੀ
ਹਰ ਸਰਕਾਰੀ ਅਤੇ ਗ਼ੈਰ-ਸਰਕਾਰੀ ਸਕੂਲ ਵਿਚ ਬੇਅੰਤ ਪੁਸਤਕਾਂ ਵਿਦਿਆਰਥੀਆਂ ਦੇ ਪੜ੍ਹਨ ਵਾਸਤੇ ਪਈਆਂ ਹਨ। ਉਨ੍ਹਾਂ ਪੁਸਤਕਾਂ ਵਿਚ ਇਤਿਹਾਸ, ਵਿਗਿਆਨ, ਕਵਿਤਾਵਾਂ, ਨਾਵਲ, ਨਾਟਕ ਆਦਿ ਹਨ, ਜਿਨ੍ਹਾਂ ਨੂੰ ਪੜ੍ਹ ਕੇ ਵਿਦਿਆਰਥੀ ਚੰਗੇ ਲਿਖਾਰੀ ਬਣ ਸਕਦੇ ਹਨ। ਪਰ ਕਿਤਾਬਾਂ ਅਲਮਾਰੀਆਂ ਵਿਚ ਪਈਆਂ ਹੋਣ ਕਰਕੇ ਸਿਉਂਕ ਦੀ ਭੇਟ ਚੜ੍ਹ ਜਾਂਦੀਆਂ ਹਨ। ਬੱਚਿਆਂ 'ਚ ਕਿਤਾਬਾਂ ਪੜ੍ਹਨ ਦਾ ਸ਼ੌਕ ਪੈਦਾ ਕਰਨਾ ਚਾਹੀਦਾ ਹੈ। ਸਿੱਖਿਆ ਵਿਭਾਗ ਇਸ ਪਾਸੇ ਪੂਰਾ ਧਿਆਨ ਦੇਵੇ।


-ਜਸਵੰਤ ਸਿੰਘ
ਲੋਹਾਮ ਨਗਰ, ਮੋਗਾ।

18/07/2017

 ਡੀਜ਼ਲ ਪੈਟਰੋਲ ਦੀਆਂ ਕੀਮਤਾਂ
ਡੀਜ਼ਲ ਪੈਟਰੋਲ ਦੀਆਂ ਭਾਰੀ ਭਰਕਮ ਕੀਮਤਾਂ ਨੇ ਹਰ ਵਰਗ ਨੂੰ ਪ੍ਰਭਾਵਿਤ ਕੀਤਾ ਹੈ, ਕਿਉਂਕਿ ਇਸ ਦੀ ਵਰਤੋਂ ਅਜੋਕੇ ਸਮੇਂ ਅੰਦਰ ਤਕਰੀਬਨ ਹਰ ਵਿਅਕਤੀ ਕਰਦਾ ਹੈ। ਕੇਂਦਰ ਸਰਕਾਰ ਨੇ 'ਇਕ ਦੇਸ਼ ਇਕ ਟੈਕਸ' ਦਾ ਖੂਬ ਢਿੰਡੋਰਾ ਪਿੱਟਿਆ ਹੈ। ਦਰਅਸਲ ਕੇਂਦਰ ਅਤੇ ਸੂਬਾ ਸਰਕਾਰਾਂ ਨੇ ਟੈਕਸਾਂ ਦੇ ਰਾਹੀਂ ਲੋਕਾਂ ਉੱਪਰ ਭਾਰੀ ਬੋਝ ਪਾਇਆ ਹੋਇਆ ਹੈ। ਹੈਰਾਨੀ ਦੀ ਗੱਲ ਹੈ ਕਿ ਕੌਮਾਂਤਰੀ ਪੱਧਰ 'ਤੇ ਕੱਚੇ ਤੇਲ ਦੀਆਂ ਕੀਮਤਾਂ 'ਚ ਗਿਰਾਵਟ ਆ ਰਹੀ ਹੈ। ਲੋੜ ਹੈ ਕਿ ਕਲਿਆਣਕਾਰੀ ਰਾਜ ਦੇ ਸਿਧਾਂਤ 'ਤੇ ਪਹਿਰਾ ਦਿੰਦਿਆਂ ਭਾਰਤ ਸਰਕਾਰ ਤੁਰੰਤ ਡੀਜ਼ਲ ਪੈਟਰੋਲ ਦੀਆਂ ਕੀਮਤਾਂ ਨੂੰ ਜੀ.ਐਸ.ਟੀ. ਦੇ ਦਾਇਰੇ ਵਿਚ ਲਿਆ ਕੇ ਲੋਕਾਂ ਨੂੰ ਰਾਹਤ ਦੇਵੇ। ਸਰਕਾਰ ਦੀ ਇਸ ਤਰ੍ਹਾਂ ਦੀ ਦੋਗਲੀ ਨੀਤੀ ਕਾਰਨ ਜੀ.ਐਸ.ਟੀ. ਪ੍ਰਤੀ ਵੀ ਸ਼ੰਕੇ ਉਪਜਣ ਲੱਗੇ ਹਨ।

-ਪ੍ਰਿੰ: ਮਹਿੰਦਰ ਕੌਰ ਢਿੱਲੋਂ
ਬਿਲਾਸਪੁਰ (ਮੋਗਾ)।

ਬੇਸੁਆਦੀ ਚਾਹ
ਪਹਿਲਾਂ ਆਮ ਢਾਬੇ ਉਪਰ ਚਾਹ ਦਾ ਕੱਪ ਸਿਰਫ 10 ਰੁਪਏ ਵਿਚ ਮਿਲ ਜਾਂਦਾ ਸੀ ਪਰ ਹੁਣ ਜੀ. ਐਸ. ਟੀ. ਲਾਗੂ ਹੋਣ ਕਰਕੇ ਚਾਹ ਪੱਤੀ ਤੇ ਚੀਨੀ ਮਹਿੰਗੇ ਹੋ ਗਏ ਹਨ ਅਤੇ ਢਾਬਿਆਂ ਵਾਲਿਆਂ ਨੇ ਚਾਹ ਦਾ ਕੱਪ 15 ਰੁਪਏ ਦਾ ਵੇਚਣਾ ਸ਼ੁਰੂ ਕਰ ਦਿਤਾ ਹੈ। ਹੁਣ ਤਾਂ ਲੋਕ ਇਕ ਦੂਜੇ ਨੂੰ ਮਿਲਣ ਸਮੇਂ ਚਾਹ ਦੀ ਸੁਲਾਹ ਮਾਰਨ ਤੋਂ ਵੀ ਗੁਰੇਜ਼ ਕਰਨ ਲੱਗ ਪਏ ਹਨ।
ਆਮ ਲੋਕਾਂ ਦਾ ਕਹਿਣਾ ਹੈ ਕਿ ਕੁਝ ਸਰਕਾਰੀ ਸਹਾਇਤਾ ਪ੍ਰਾਪਤ ਜਥੇਬੰਦੀਆਂ ਅਤੇ ਸਰਕਾਰ ਦੇ ਝੋਲੀ ਚੁੱਕ ਇਹ ਪ੍ਰਚਾਰ ਕਰ ਰਹੇ ਹਨ ਕਿ ਜੀ. ਐਸ. ਟੀ. ਲਾਗੂ ਹੋਣ ਨਾਲ ਬਹੁਤ ਸਾਰਾ ਸਮਾਨ ਸਸਤਾ ਹੋ ਗਿਆ ਹੈ ਪਰ ਅਸਲੀਅਤ ਇਸ ਤੋਂ ਉਲਟ ਹੈ, ਜੀ. ਐਸ. ਟੀ. ਲਾਗੂ ਹੋਣ ਕਾਰਨ ਹਰ ਸਮਾਨ ਹੀ ਮਹਿੰਗਾ ਹੋ ਗਿਆ ਹੈ।

-ਜਗਮੋਹਨ ਸਿੰਘ ਲੱਕੀ
ਲੱਕੀ ਨਿਵਾਸ, 61 ਏ ਵਿਦਿਆ ਨਗਰ ਪਟਿਆਲਾ।

ਅਸ਼ਲੀਲਤਾ ਅਤੇ ਸਮਾਜ
ਅਜੋਕੇ ਸਮੇਂ ਸਾਡੇ ਸਮਾਜ ਨੂੰ ਅਨੇਕਾਂ ਬੁਰਾਈਆਂ, ਕੁਰੀਤੀਆਂ ਨੇ ਘੇਰ ਰੱਖਿਆ ਹੈ ਜੋ ਕਿ ਸਮਾਜਿਕ ਸਿਹਤ ਨੂੰ ਲੱਕੜ ਦੇ ਘੁਣ ਵਾਂਗ ਖੋਖਲਾ ਤੇ ਕਮਜ਼ੋਰ ਕਰ ਰਹੀਆਂ ਹਨ। ਇਨ੍ਹਾਂ ਬੁਰਾਈਆਂ ਵਿਚ ਨਸ਼ੇ, ਫੈਸ਼ਨ, ਦਾਜ, ਮਾਦਾ ਭਰੂਣ ਹੱਤਿਆ ਆਦਿ ਸ਼ਾਮਿਲ ਹਨ ਤੇ ਇਨ੍ਹਾਂ ਵਿਚੋਂ ਇਕ ਬੁਰਾਈ ਹੈ 'ਅਸ਼ਲੀਲਤਾ', ਜਿਸ ਨੇ ਸਮਾਡੇ ਸਮਾਜ ਉੱਪਰ ਗਹਿਰਾ ਦੁਰਪ੍ਰਭਾਵ ਪਾਇਆ ਹੋਇਆ ਹੈ। ਮੀਡੀਆ ਚਾਹੇ ਬਿਜਲਈ ਹੋਵੇ ਜਾਂ ਪ੍ਰਿੰਟ ਹੋਵੇ, ਅਸ਼ਲੀਲਤਾ ਦੇ ਵਾਧੇ ਵਿਚ ਪ੍ਰਮੁੱਖ ਰੋਲ ਅਦਾ ਕਰ ਰਿਹਾ ਹੈ। ਸਿੱਟੇ ਵਜੋਂ ਸਮਾਜ ਦਾ ਅਹਿਮ ਅੰਗ ਨੌਜਵਾਨ ਵਰਗ ਇਸ ਸਮਾਜਿਕ ਬੁਰਾਈ (ਅਸ਼ਲੀਲਤਾ) ਦਾ ਜ਼ਿਆਦਾ ਸ਼ਿਕਾਰ ਹੋ ਰਿਹਾ ਹੈ। ਸੋ, ਇਸ ਵਰਤਾਰੇ ਨੂੰ ਰੋਕਣ ਲਈ ਸਮਾਜ ਦੇ ਜਾਗਰੂਕ ਲੋਕਾਂ ਤੋਂ ਇਲਾਵਾ ਪ੍ਰਮੁੱਖ ਧਿਰ ਸਰਕਾਰ ਨੂੰ ਉਚੇਚਾ ਧਿਆਨ ਦੇ ਕੇ ਢੁਕਵੇਂ ਕਦਮ ਉਠਾਉਣੇ ਚਾਹੀਦੇ ਹਨ।

-ਜਗਤਾਰ ਸਿੰਘ ਝੋਜੜ
ਜ਼ਿਲ੍ਹਾ ਕਚਹਿਰੀਆਂ, ਹੁਸ਼ਿਆਰਪੁਰ।

17/07/2017

 ਪੱਤਰਕਾਬਲ-ਏ-ਤਾਰੀਫ਼
ਪਿਛਲੇ ਦਿਨੀਂ ਸੰਪਾਦਕੀ ਸਫ਼ੇ 'ਤੇ ਛਪੇ ਲੇਖ 'ਕਿੰਨੇ ਕੁ ਸੰਤੁਸ਼ਟ ਹਨ ਵਿਦੇਸ਼ਾਂ ਵਿਚ ਪੰਜਾਬੀ' ਜਿਥੇ ਕੈਨੇਡਾ ਵਰਗੇ ਵਿਕਸਿਤ ਦੇਸ਼ ਦੇ ਵਸਨੀਕਾਂ ਦੀ ਸਰਮਾਏਦਾਰਾਨਾ ਵਿਵਸਥਾ ਅਧੀਨ ਨਿੱਘਰਦੀ ਹਾਲਤ ਨੂੰ ਬਿਆਨ ਕਰਦਾ ਸੀ, ਉਥੇ ਪੰਜਾਬੀ ਭਾਈਚਾਰੇ ਦੀ ਉਦਾਸੀ ਤੇ ਬਹੁ-ਪਰਤੀ ਸਮੱਸਿਆਵਾਂ ਨਾਲ ਜੂਝ ਰਹੀ ਸਥਿਤੀ ਦਾ ਸ਼ੀਸ਼ਾ ਵੀ ਸੀ। ਪੂਰਬ ਦੇ ਫਲਸਫ਼ੇ ਨੇ ਜੀਵਨ ਨੂੰ ਸੁਚੱਜਾ ਤੇ ਅਰਥਪੂਰਨ ਬਣਾਉਣ ਦਾ ਸੰਕਲਪ ਪੇਸ਼ ਕੀਤਾ ਹੈ ਪਰ ਪੱਛਮੀ ਚਮਕ ਨੇ ਮਨੁੱਖ ਨੂੰ ਕੇਵਲ ਆਪਣੇ ਵੱਲ ਖਿੱਚ ਕੇ ਜ਼ਿੰਦਗੀ ਦੇ ਅਸਲ ਮਨੋਰਥ ਤੋਂ ਤੋੜਿਆ ਹੈ। ਮਨੁੱਖ ਅੰਦਰ ਪਨਪਦੀ ਅਸੰਤੁਸ਼ਟੀ ਦੀ ਭਾਵਨਾ ਨੇ ਉਸ ਨੂੰ ਸੁਆਰਥੀ ਤੇ ਲਾਲਚੀ ਬਣਾਇਆ ਹੈ ਜੋ ਕਿ ਕੇਵਲ ਤੇ ਕੇਵਲ ਸਰਮਾਏਦਾਰੀ ਦੀ ਹੀ ਦੇਣ ਹੈ। ਲੇਖਕ ਮੁਤਾਬਿਕ ਪੱਛਮੀ ਸਰਮਾਏਦਾਰੀ ਵਿਚ ਸਵਰਗ ਦੀ ਪ੍ਰਾਪਤੀ ਨਾ ਹੋਣ ਦੀ ਗੱਲ ਬਿਲਕੁਲ ਠੀਕ ਤੇ ਵਿਅੰਗਾਤਮਿਕ ਰੂਪ ਵਿਚ ਬੇਹੱਦ ਵਿਚਾਰਨਯੋਗ ਤੇ ਗੰਭੀਰ ਟਿੱਪਣੀ ਸੀ।


-ਬਿਕਰਮਜੀਤ ਸਿੰਘ ਜੀਤ
ਅੰਮ੍ਰਿਤਸਰ।


ਪ੍ਰਾਇਮਰੀ ਸਿੱਖਿਆ
ਬੀਤੇ ਦਿਨੀਂ ਪਰਮਜੀਤ ਸਿੰਘ ਢੀਂਗਰਾ ਦਾ ਲੇਖ 'ਉੱਚਿਤ ਨਹੀਂ ਹੈ ਪ੍ਰਾਇਮਰੀ ਸਿੱਖਿਆ ਅੰਗਰੇਜ਼ੀ ਵਿਚ ਦੇਣ ਦਾ ਫ਼ੈਸਲਾ' ਸਲਾਹੁਣਯੋਗ ਸੀ। ਮੈਂ ਉਨ੍ਹਾਂ ਦੇ ਵਿਚਾਰ ਨਾਲ ਸਹਿਮਤ ਹਾਂ ਕਿ ਪੰਜਵੀਂ ਕਲਾਸ ਪਾਸ ਕਰਨ ਤੱਕ ਬੱਚੇ ਨੂੰ ਆਪਣੀ ਮਾਂ-ਬੋਲੀ ਤਾਂ ਚੰਗੀ ਤਰ੍ਹਾਂ ਪੜ੍ਹਨੀ ਤੇ ਲਿਖਣੀ ਆਉਣੀ ਚਾਹੀਦੀ ਹੈ। ਟਰੱਕ ਤਿੰਨ ਅੱਖਰਾਂ ਦਾ ਸ਼ਬਦ ਹੈ, ਰਾਰੇ 'ਤੇ ਟਿੱਪੀ ਪੈ ਗਈ ਤਾਂ ਸਮਾਨ ਪਾਉਣ ਵਾਲਾ ਟਰੰਕ ਹੈ, ਜੇ ਰਾਰੇ 'ਤੇ ਅੱਧਕ ਪੈ ਗਿਆ ਤਾਂ ਭਾਰ ਢੋਣ ਵਾਲਾ ਟਰੱਕ ਹੈ। ਮੈਂ ਬਹੁਤ ਸਾਰੇ ਪੰਜਵੀਂ ਪਾਸ ਬੱਚੇ ਪੰਜਾਬੀ ਪੜ੍ਹਨ ਵਿਚ ਕਮਜ਼ੋਰ ਵੇਖੇ ਹਨ। ਅੰਗਰੇਜ਼ੀ ਅਧਿਆਪਨ ਵਾਲੇ ਸਕੂਲਾਂ ਵਿਚ ਪੜ੍ਹੇ ਅੰਗਰੇਜ਼ੀ ਵਿਚ ਮਾਹਿਰ ਬੱਚੇ ਪੰਜਾਬੀ ਦੇ ਮਹਾਨ ਵਿਦਵਾਨ ਸਾਹਿਤਕਾਰਾਂ ਬਾਰੇ ਮੈਂ ਅਣਜਾਣ ਵੇਖੇ ਹਨ। ਅੱਜ ਵੀ ਬਹੁਤ ਸਾਰੇ ਲੋਕ 59, 69, 79 ਅਤੇ 89 ਦਾ ਭੁਲੇਖਾ ਖਾਂਦੇ ਹਨ।


-ਦੀਪਕ ਤੇਜਾ
ਪਿੰਡ ਬਵਾਣੀਆਂ, ਤਹਿ: ਗਿੱਦਗੜਬਾਹਾ, ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ।


ਗਿਆਨ ਵਧਾਊ ਲੇਖ
'ਅਜੀਤ ਮੈਗਜ਼ੀਨ' 'ਚ ਛਪੇ ਤਿੰਨੇ ਹੀ ਲੇਖ 'ਕੀ ਭਾਰਤ-ਪਾਕਿ ਰਿਸ਼ਤੇ ਸੁਧਰ ਸਕਦੇ ਹਨ?' ਅਮਰਜੀਤ ਸਿੰਘ ਹੇਅਰ ਦੁਆਰਾ ਲਿਖਤ, ਭਾਰਤ ਪਾਕਿਸਤਾਨ ਨਾਲ ਗੱਲਬਾਤ ਉਦੋਂ ਤੱਕ ਕਰਨ ਲਈ ਤਿਆਰ ਨਹੀਂ ਜਿੰਨਾ ਚਿਰ ਉਸ ਦੀ ਧਰਤੀ ਤੋਂ ਉਪਜਿਆ ਆਤੰਕਵਾਦ ਬੰਦ ਨਹੀਂ ਹੁੰਦਾ, ਇਹ ਤਾਂ ਉਹ ਗੱਲ ਹੋਈ 'ਨਾ ਨੌਂ ਮਣ ਤੇਲ ਹੋਵੇ ਤੇ ਨਾ ਰਾਧਾ ਨੱਚੇ' ਰੱਬ ਕਰੇ 14 ਅਗਸਤ, 2017 ਨੂੰ ਅਮਨਪਸੰਦ ਲੋਕਾਂ ਦੀਆਂ ਵਾਹਗਾ ਸਰਹੱਦ 'ਤੇ ਜਲਾਈਆਂ ਜਾਣ ਵਾਲੀਆਂ ਮੋਮਬੱਤੀਆਂ ਦਾ ਚਾਨਣ ਭਾਰਤੀਆਂ ਅਤੇ ਪਾਕਿਸਤਾਨੀਆਂ ਦੇ ਦਿਮਾਗਾਂ ਵਿਚ ਛਾਏ ਹਨੇਰੇ ਨੂੰ ਦੂਰ ਕਰ ਦੇਵੇ। ਡਾ: ਬਲਵਿੰਦਰ ਸਿੰਘ ਲੱਖੇਵਾਲੀ ਦੁਆਰਾ ਲਿਖਤ, 'ਬਿਰਖਾਂ ਬਾਝ ਨਾ ਸੋਂਹਦੀ ਧਰਤੀ, ਭਾਵੇਂ ਲੱਖ ਹਵੇਲੀਆਂ ਖੜ੍ਹੀਆਂ', ਸੁਰਜੀਤ ਪਾਤਰ ਦੀਆਂ ਲਾਈਨਾਂ 'ਏਹੋ ਹੈ ਮੇਰੀ ਮੈਅਕਸ਼ੀ, ਏਸੇ 'ਚ ਮਸਤ ਹਾਂ, ਪੌਣਾਂ 'ਚੋਂ ਜ਼ਹਿਰਾਂ ਪੀ ਰਿਹਾ ਹਾਂ, ਮੈਂ ਦਰੱਖਤ ਹਾਂ।' 'ਸਾਡੇ ਬਣਵਾਨਸ ਨਾਲ ਸਬੰਧ ਹਕੀਕਤ ਜਾਂ ਵਹਿਮ', ਡਾ: ਸੁਰਜੀਤ ਸਿੰਘ ਦੁਆਰਾ ਲਿਖਤ, ਮਨੁੱਖ ਦੀ ਉਤਪਤੀ ਦੇ ਸਿਧਾਂਤ ਦੇ ਉਪਰੰਤ ਡਾਰਵਿਨ ਨੇ ਸਾਨੂੰ ਪ੍ਰਾਣੀਆਂ ਦੀ ਸਫ਼ ਵਿਚ ਸ਼ਾਮਿਲ ਕਰ ਦਿੱਤਾ। ਸਾਰੇ ਹੀ ਲੇਖ ਬੇਹੱਦ ਗਿਆਨਵਰਧਕ ਤੇ ਰੌਚਿਕ ਸਨ।


-ਡਾ: ਅਮਰਜੀਤ ਸਿੰਘ ਮਾਨ
ਸੰਗਰੂਰ।

14/07/2017

 ਅੱਤਵਾਦੀਆਂ ਦੀ ਦਰਿੰਦਗੀ
ਪਿਛਲੇ ਦਿਨੀਂ ਦੱਖਣੀ ਕਸ਼ਮੀਰ 'ਚ ਅਨੰਤਨਾਗ ਤੇ ਬਦੇਗੂ 'ਚ ਅੱਤਵਾਦੀਆਂ ਨੇ ਅਮਰਨਾਥ ਸ਼ਰਧਾਲੂਆਂ ਅਤੇ ਸੁਰੱਖਿਆ ਬਲਾਂ ਦੇ ਕਾਫ਼ਲੇ 'ਤੇ ਕਾਤਲਾਨਾ ਹਮਲਾ ਕੀਤਾ। ਅੰਨ੍ਹੇਵਾਹ ਚਲਾਈ ਗੋਲੀ ਦੌਰਾਨ ਬੱਸ 'ਚ ਸਵਾਰ ਛੇ ਸ਼ਰਧਾਲੂਆਂ ਦੀ ਮੌਤ ਹੋ ਗਈ ਜਦ ਕਿ 12 ਸ਼ਰਧਾਲੂ ਅਤੇ ਪੁਲਿਸ ਮੁਲਾਜ਼ਮ ਜ਼ਖਮੀ ਹੋ ਗਏ। ਹਮਲੇ ਤੋਂ ਬਾਅਦ ਅੱਤਵਾਦੀ ਮੋਟਰਸਾਈਕਲਾਂ 'ਤੇ ਸਵਾਰ ਹੋ ਕੇ ਭੱਜ ਨਿਕਲੇ। ਇਹ ਘਿਨਾਉਣੀ ਅਤੇ ਦਿਲ ਕੰਬਾਉਣ ਵਾਲੀ ਘਟਨਾ ਨੇ ਹਰ ਭਾਰਤੀ ਨਾਗਰਿਕ ਦਾ ਦਿਲ ਵਲੂੰਧਰ ਕੇ ਰੱਖ ਦਿੱਤਾ। ਇਸ ਘਟਨਾ ਦੀ ਵਿਸ਼ਵ ਭਰ ਵਿਚ ਅਲੋਚਨਾ ਕੀਤੀ ਗਈ ਹੈ। ਹੁਣ ਵਕਤ ਆ ਗਿਆ ਹੈ ਕਿ ਪੂਰੇ ਵਿਸ਼ਵ ਨੂੰ ਇਨ੍ਹਾਂ ਦੇ ਵਿਰੁੱਧ ਇਕ ਝੰਡੇ ਥੱਲੇ ਖਲੋ ਕੇ ਆਵਾਜ਼ ਬੁਲੰਦ ਕਰਨ ਦੀ ਲੋੜ ਹੈ। ਜੋ ਲੋਕ ਅਤੇ ਮੁਲਕ ਇਨ੍ਹਾਂ ਨੂੰ ਸ਼ਹਿ ਅਤੇ ਪਨਾਹ ਦੇ ਰਹੇ ਹਨ ਉਨ੍ਹਾਂ ਦਾ ਬਾਈਕਾਟ ਕਰਨਾ ਚਾਹੀਦਾ ਹੈ। ਪੈਰਾ ਮਿਲਟਰੀ ਫੋਰਸ ਤੇ ਪੁਲਿਸ ਨੂੰ ਵਧੇਰੇ ਅਧਿਕਾਰ ਦੇ ਕੇ ਉਨ੍ਹਾਂ ਦਾ ਮਨੋਬਲ ਵਧਾਉਣਾ ਸਮੇਂ ਦੀ ਜ਼ਰੂਰਤ ਹੈ।

-ਗੁਰਮੀਤ ਸਿੰਘ ਵੇਰਕਾ
ਰਿਟਾਇਰਡ ਇੰਸਪੈਕਟਰ।

ਜੰਗ ਕਿਸੇ ਮਸਲੇ ਦਾ ਹੱਲ ਨਹੀਂ ਹੁੰਦੀ
ਭਾਰਤ-ਚੀਨ ਵਿਵਾਦ ਅੱਜ ਸਾਰੀਆਂ ਅਖ਼ਬਾਰਾਂ ਦੀਆਂ ਸੁਰਖੀਆਂ ਬਣਿਆ ਹੋਇਆ ਹੈ। ਦੋਵਾਂ ਦੇਸ਼ਾਂ ਦੇ ਵਿਦੇਸ਼ ਮੰਤਰੀਆਂ ਵੱਲੋਂ ਇਕ-ਦੂਜੇ 'ਤੇ ਸਰਹੱਦਾਂ ਦੀਆਂ ਉਲੰਘਣਾਵਾਂ ਦਾ ਦੋਸ਼ ਮੜ੍ਹਿਆ ਜਾ ਰਿਹਾ ਹੈ। ਇਕ-ਦੂਜੇ ਨੂੰ ਨਤੀਜਿਆਂ ਦੇ ਭੁਗਤਣ ਦੀਆਂ ਧਮਕੀਆਂ ਵੀ ਮਿਲ ਰਹੀਆਂ ਹਨ। ਅੱਜ ਤੱਕ ਕਿਸੇ ਦੇਸ਼ ਨੇ ਵੀ ਜੰਗਾਂ ਤੋਂ ਕੁਝ ਨਹੀਂ ਖੱਟਿਆ। ਜੰਗਾਂ ਤਬਾਹੀ ਦਾ ਕਾਰਨ ਬਣਦੀਆਂ ਹਨ। ਹੀਰੋਸ਼ੀਮਾ, ਨਾਗਾਸਾਕੀ ਤੇ ਪਹਿਲੀਆਂ ਦੋ ਸੰਸਾਰ ਜੰਗਾਂ ਦਾ ਸੰਤਾਪ ਅਜੇ ਤੱਕ ਲੋਕ ਭੋਗ ਰਹੇ ਹਨ। ਅੱਜ ਹਰੇਕ ਦੇਸ਼ ਕੋਲ ਮਾਰੂ ਹਥਿਆਰ ਹਨ, ਰਤਾ ਜਿੰਨੀ ਵੀ ਕੁਤਾਹੀ ਨਾਲ ਹੱਸਦੀ-ਵਸਦੀ ਦੁਨੀਆ ਰਾਖ ਦਾ ਢੇਰ ਹੋ ਸਕਦੀ ਹੈ। ਵਿਵਾਦਾਂ ਦਾ ਹੱਲ ਮਿਲ-ਬੈਠ ਕੇ ਸੁਲਝਾਇਆ ਜਾ ਸਕਦਾ ਹੈ। ਅੱਜ ਸੰਸਾਰ ਨੂੰ ਅਮਨ ਸ਼ਾਂਤੀ ਦੀ ਲੋੜ ਹੈ। ਅਸਲ੍ਹੇ ਦੇ ਵਪਾਰੀ ਤਾਂ ਜੰਗਾਂ-ਯੁੱਧਾਂ ਚਾਹੁੰਦੇ ਹੀ ਹਨ।

-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ

ਰੁੱਖ ਲਗਾਓ
ਵਾਤਾਵਰਨ ਵਿਚ ਫ਼ਸਲਾਂ ਦੀ ਰਹਿੰਦ-ਖੂੰਹਦ ਨੂੰ ਅੱਗ, ਫੈਕਟਰੀਆਂ, ਮੋਟਰ ਗੱਡੀਆਂ ਦਾ ਜ਼ਹਿਰੀਲਾ ਧੂੰਆਂ ਤੇ ਦਰੱਖਤਾਂ ਦੀ ਅੰਨ੍ਹੇਵਾਹ ਕਟਾਈ ਕਾਰਨ ਧਰਤੀ ਦਾ ਤਾਪਮਾਨ ਹਰ ਸਾਲ ਵਧਦਾ ਜਾਂਦਾ ਹੈ। ਨਤੀਜੇ ਵਜੋਂ ਬਾਰਿਸ਼ਾਂ ਨਾ-ਮਾਤਰ ਹੋਣ ਤੇ ਟੋਭੇ-ਤਲਾਅ ਸੁੱਕਣ ਕਾਰਨ ਜੀਵ-ਜੰਤੂਆਂ ਦਾ ਜਿਊਣਾ ਮੁਹਾਲ ਹੋ ਜਾਂਦਾ ਹੈ। ਬਰਸਾਤਾਂ ਦਾ ਮੌਸਮ ਸ਼ੁਰੂ ਹੋ ਚੁੱਕਾ ਹੈ। ਇਨ੍ਹਾਂ ਦਿਨਾਂ 'ਚ ਲਗਾਏ ਪੌਦੇ ਜਲਦੀ ਹੀ ਜੜ੍ਹ ਫੜ ਲੈਂਦੇ ਹਨ ਤੇ ਛੇਤੀ ਵਧਦੇ ਫੁੱਲਦੇ ਹਨ। ਲੋੜ ਹੈ ਇਕ-ਇਕ ਬੂਟਾ ਲਗਾ ਕੇ ਸ਼ੁਰੂਆਤ ਕਰਨ ਦੀ।

-ਪਿਆਰਾ ਸਿੰਘ ਮਾਸਟਰ
ਨਕੋਦਰ।

13/07/2017

 ਕਿਸਾਨਾਂ ਦੀਆਂ ਸਮੱਸਿਆਵਾਂ ਤੇ ਕਰਜ਼ਾ
ਕਿਸਾਨ ਅੱਜ ਆਰਥਿਕ ਸੰਕਟ ਨਾਲ ਜੂਝ ਰਿਹਾ ਹੈ। ਬਹੁਤ ਹੀ ਅਫ਼ਸੋਸ ਦੀ ਗੱਲ ਹੈ ਕਿ ਸਮੁੱਚੀ ਲੋਕਾਈ ਦਾ ਢਿੱਡ ਭਰਨ ਵਾਲਾ ਅੱਜ ਭੁੱਖੇ ਢਿੱਡ ਖ਼ੁਦਕੁਸ਼ੀਆਂ ਕਰ ਰਿਹਾ ਹੈ। ਮੌਤ ਨੂੰ ਗਲ ਲਾਉਣਾ ਸੌਖਾ ਨਹੀਂ ਹੁੰਦਾ। ਕੀ ਕਦੇ ਕਿਸੇ ਸਨਅਤਕਾਰ ਜਾਂ ਵਪਾਰੀ ਨੇ ਆਰਥਿਕ ਸੰਕਟ 'ਚ ਗੁਜ਼ਰਦਿਆਂ ਖ਼ੁਦਕੁਸ਼ੀ ਕੀਤੀ ਹੈ? ਕਿਸਾਨੀ ਜਿਣਸਾਂ ਦੇ ਭਾਅ ਓਨੀ ਤੇਜ਼ੀ ਨਾਲ ਨਹੀਂ ਵਧਦੇ, ਜਿੰਨੀ ਤੇਜ਼ੀ ਨਾਲ ਖੇਤੀ ਲਾਗਤ ਭਾਵ ਬੀਜ, ਦਵਾਈਆਂ, ਮਸ਼ੀਨਰੀ, ਖਾਦਾਂ ਆਦਿ ਦੇ ਭਾਅ ਵਧਦੇ ਹਨ। ਸਰਕਾਰ ਦਾ ਇਨ੍ਹਾਂ 'ਤੇ ਕੋਈ ਕੰਟਰੋਲ ਨਹੀਂ। ਕਿਸਾਨ ਜਥੇਬੰਦੀਆਂ ਨੂੰ ਖੇਤੀ ਮਸ਼ੀਨਰੀ ਬਣਾਉਣ ਵਾਲੇ ਅਤੇ ਦਵਾਈਆਂ, ਖਾਦਾਂ ਆਦਿ ਕੰਪਨੀਆਂ ਵਿਰੁੱਧ ਵੀ ਮੋਰਚੇ ਲਾਉਣੇ ਚਾਹੀਦੇ ਹਨ। ਸਰਕਾਰ ਦਾ ਫ਼ਰਜ਼ ਬਣਦਾ ਹੈ ਕਿ ਉਹ ਈਮਾਨਦਾਰ ਅਫ਼ਸਰਾਂ ਨੂੰ ਸਰਵੇਅ ਕਰਨ ਲਈ ਲਾਏ ਕਿ ਕਿਹੜੇ ਕਿਸਾਨਾਂ ਦਾ ਕਰਜ਼ਾ ਮੁਆਫ਼ ਕਰਨਾ ਹੈ। ਕਿਸਾਨ ਦੇਸ਼ ਦੀ ਰੀੜ੍ਹ ਦੀ ਹੱਡੀ ਹੁੰਦਾ ਹੈ। ਕਿਸਾਨ ਬਚੇਗਾ ਤਾਂ ਦੇਸ਼ ਬਚੇਗਾ। ਸਰਕਾਰਾਂ ਹੁਣ ਨਾ ਜਾਗਣਗੀਆਂ ਤਾਂ ਕਦੋਂ ਜਾਗਣਗੀਆਂ।


-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।


ਚੁਕੰਨੇ ਰਹਿਣ ਦੀ ਲੋੜ
ਪੂਰੀ ਦੁਨੀਆ ਜਾਣਦੀ ਹੈ ਕਿ ਪਾਣੀ ਇਕ ਅਜਿਹਾ ਸਰੋਤ ਹੈ ਜਿਸ ਨੂੰ ਖ਼ਤਮ ਹੋਣ ਤੋਂ ਬਾਅਦ ਮੁੜ ਕਿਸੇ ਵੀ ਤਕਨੀਕ ਨਾਲ ਦੁਬਾਰਾ ਪੈਦਾ ਨਹੀਂ ਕੀਤਾ ਜਾ ਸਕਦਾ। ਪਾਣੀ ਤੋਂ ਬਿਨਾਂ ਜੀਵਨ ਸੰਭਵ ਨਹੀਂ ਹੈ। ਪਰ ਫਿਰ ਵੀ ਪਾਣੀ ਦੀ ਬਰਬਾਦੀ ਵੱਡੀ ਪੱਧਰ 'ਤੇ ਕੀਤੀ ਜਾ ਰਹੀ ਹੈ। ਅੱਜ ਪੰਜਾਬ ਦੇ ਅੰਕੜੇ ਦੱਸਦੇ ਹਨ ਕਿ ਪੰਜਾਬ ਦੇ ਤਕਰੀਬਨ 25 ਬਲਾਕਾਂ ਦਾ ਡੇਢ ਮੀਟਰ ਪਾਣੀ ਦਾ ਪੱਧਰ ਹੇਠਾਂ ਚਲਾ ਗਿਆ ਹੈ ਜਦ ਕਿ ਲੁਧਿਆਣੇ ਜ਼ਿਲ੍ਹੇ ਦਾ 1.29 ਮੀਟਰ ਪਾਣੀ ਹੇਠਾਂ ਚਲਾ ਗਿਆ ਦੱਸਿਆ ਜਾ ਰਿਹਾ ਹੈ। ਇਹ ਅੰਕੜੇ ਅੱਜ ਸਾਨੂੰ ਗੰਭੀਰ ਹੋਣ ਦੀ ਚਿਤਾਵਨੀ ਦੇ ਰਹੇ ਹਨ। ਪੰਜ ਆਬਾਂ ਵਾਲਾ ਪੰਜਾਬ ਅੱਜ ਢਾਈ ਆਬਾਂ ਦਾ ਹੀ ਰਹਿ ਗਿਆ ਹੈ, ਜਦ ਕਿ ਇਨ੍ਹਾਂ ਢਾਈ ਆਬਾਂ ਨੂੰ ਵੀ ਖੋਹਣ ਲਈ ਪੰਜਾਬ ਵਿਰੋਧੀ ਤਾਕਤਾਂ ਤਰਲੋ-ਮੱਛੀ ਹੋਈਆਂ ਪਈਆਂ ਹਨ, ਜਿਨ੍ਹਾਂ ਤੋਂ ਪੰਜਾਬੀਆਂ ਨੂੰ ਚੁਕੰਨੇ ਰਹਿਣ ਦੀ ਲੋੜ ਹੈ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।


ਮਹਿੰਗੀ ਰੇਤਾ
ਪੰਜਾਬ ਵਿਚ ਅੱਜ ਆਮ ਲੋਕਾਂ ਲਈ ਘਰ ਬਣਾਉਣਾ ਬੇਹੱਦ ਮੁਸ਼ਕਿਲ ਹੋ ਗਿਆ ਹੈ ਕਿਉਂਕਿ ਅੱਜ ਰੇਤ ਦੇ ਭਾਅ ਅਸਮਾਨ ਨੂੰ ਛੂੰਹਦੇ ਨਜ਼ਰ ਆ ਰਹੇ ਹਨ। ਅਕਾਲੀ-ਭਾਜਪਾ ਸਰਕਾਰ ਸਮੇਂ ਵੀ ਰੇਤਾ ਦੀ ਕਾਲਾਬਾਜ਼ਾਰੀ ਦਾ ਮਸਲਾ ਚਰਚਾ ਦਾ ਵਿਸ਼ਾ ਬਣਿਆ ਰਿਹਾ ਸੀ। ਵਿਧਾਨ ਸਭਾ ਚੋਣਾਂ ਦੌਰਾਨ ਭਾਵੇਂ ਕਾਂਗਰਸ ਪਾਰਟੀ ਵੱਲੋਂ ਉਨ੍ਹਾਂ ਦੀ ਸਰਕਾਰ ਆਉਣ 'ਤੇ ਰੇਤਾ ਦੇ ਭਾਅ ਆਮ ਲੋਕਾਂ ਦੀ ਪਹੁੰਚ ਵਿਚ ਕਰਨ ਦੇ ਵੱਡੇ-ਵੱਡੇ ਦਾਅਵੇ ਕੀਤੇ ਗਏ ਸਨ ਪਰ ਅੱਜ ਤਿੰਨ ਮਹੀਨੇ ਤੋਂ ਵੱਧ ਸਮਾਂ ਬੀਤਣ ਦੇ ਬਾਵਜੂਦ ਸਰਕਾਰ ਰੇਤਾ ਦੀ ਕੀਮਤ ਨੂੰ ਘੱਟ ਕਰਨ ਵਿਚ ਨਾਕਾਮ ਨਜ਼ਰ ਆ ਰਹੀ ਹੈ। ਆਏ ਦਿਨ ਰੇਤ ਦੇ ਵਧ ਰਹੇ ਭਾਅ ਲੋਕਾਂ ਲਈ ਭਾਰੀ ਮੁਸ਼ਕਿਲਾਂ ਪੈਦਾ ਕਰ ਰਹੇ ਹਨ। ਸੋ, ਸਰਕਾਰ ਨੂੰ ਲੋਕਾਂ ਅਤੇ ਵਿਰੋਧੀ ਧਿਰ ਦੇ ਵਿਦਰੋਹ ਤੋਂ ਬਚਣ ਲਈ ਰੇਤ ਦੀਆਂ ਕੀਮਤਾਂ ਨੂੰ ਆਮ ਬੰਦੇ ਦੀ ਪਹੁੰਚ ਵਿਚ ਕਰਨ ਲਈ ਕੋਈ ਠੋਸ ਨੀਤੀ ਜ਼ਰੂਰ ਘੜਨੀ ਚਾਹੀਦੀ ਹੈ ਤਾਂ ਜੋ ਹਰ ਕਿਸੇ ਨੂੰ ਆਪਣੀ ਮੁਢਲੀ ਜ਼ਰੂਰਤ ਘਰ ਬਣਾਉਣ ਵਿਚ ਆਸਾਨੀ ਹੋ ਸਕੇ।


-ਰਾਜਾ ਗਿੱਲ (ਚੜਿੱਕ)

12/07/2017

 ਕਾਂਗਰਸ ਸਰਕਾਰ ਦੇ ਸੌ ਦਿਨ
ਸੌ ਦਿਨ ਪੂਰੇ ਹੋਣ 'ਤੇ ਕਾਂਗਰਸ ਸਰਕਾਰ ਦੇ ਝੂਠੇ ਵਾਅਦਿਆਂ ਦੀ ਫੂਕ ਵੀ ਨਿਕਲ ਚੁੱਕੀ ਹੈ। ਆਮ ਨਾਗਰਿਕ ਤੋਂ ਸ਼ੁੱਧ ਪਾਣੀ ਅਤੇ ਬਿਜਲੀ ਆਦਿ ਦੀ ਸਹੂਲਤ ਖੁੱਸ ਚੁੱਕੀ ਹੈ। ਸਰਕਾਰ ਵੱਲੋਂ ਨਸ਼ਾ ਬੰਦ ਕਰਨ ਦੇ ਨਾਂਅ 'ਤੇ ਆਰ.ਐਮ.ਪੀ. ਡਾਕਟਰਾਂ ਦੀਆਂ ਦੁਕਾਨਾਂ ਤਾਂ ਬੰਦ ਕਰ ਦਿੱਤੀਆਂ ਗਈਆਂ ਪਰ ਆਮ ਲੋਕਾਂ ਲਈ ਸਿਹਤ ਸਹੂਲਤ ਦਾ ਕੋਈ ਉਪਰਾਲਾ ਨਹੀਂ ਕੀਤਾ ਗਿਆ। ਸਿੱਖਿਆ ਮੰਤਰੀ ਅਰੁਣਾ ਚੌਧਰੀ ਨੂੰ ਕਹਿਣਾ ਚਾਹੁੰਦੇ ਹਾਂ ਕਿ ਕੈਪਟਨ ਸਾਹਿਬ ਦੇ ਨਕਸ਼ੇ ਕਦਮ 'ਤੇ ਚਲ ਕੇ ਪੰਜਾਬੀ ਭਾਸ਼ਾ ਦੀ ਸੰਘੀ ਨਾ ਘੁੱਟੀ ਜਾਵੇ।


-ਲਖਵੀਰ ਕੌਰ
ਪਿੰਡ ਸੀਰਵਾਲੀ (ਮੁਕਤਸਰ)।


ਰੇਲਵੇ ਦਾ ਵਿਸਥਾਰ ਜ਼ਰੂਰੀ
ਦੇਸ਼ ਦੀ ਆਰਥਿਕਤਾ, ਸੁਰੱਖਿਆ ਸਥਿਤੀ ਅਤੇ ਆਪਸੀ ਨੇੜਤਾ ਵਧਾਉਣ ਲਈ ਰੇਲਵੇ ਦਾ ਹੋਰ ਵਿਸਥਾਰ ਕਰਨਾ ਬਹੁਤ ਹੀ ਉੱਤਮ ਹੋ ਸਕਦਾ ਹੈ। ਇਕ ਤਾਂ ਇਸ ਨਾਲ ਜਨ-ਸਾਧਾਰਨ ਨੂੰ ਰੁਜ਼ਗਾਰ ਮੁਹੱਈਆ ਹੋਵੇਗਾ, ਦੂਸਰਾ ਸੈਰ-ਸਪਾਟਾ ਉਦਯੋਗ ਵੀ ਪ੍ਰਫੁਲਿਤ ਹੋ ਸਕਦਾ ਹੈ, ਖ਼ਾਸ ਤੌਰ 'ਤੇ ਪਹਾੜੀ ਰਾਜਾਂ ਵਿਚ ਰੇਲਵੇ ਦਾ ਵਿਸਥਾਰ ਹੋਣਾ ਅਤਿ ਜ਼ਰੂਰੀ ਹੈ ਅਤੇ ਪ੍ਰਮੁੱਖ ਸ਼ਹਿਰ ਆਪਸ ਵਿਚ ਜੁੜਨ ਨਾਲ ਦੇਸ਼ ਦੀ ਆਰਥਿਕਤਾ, ਸੁਰੱਖਿਆ ਆਦਿ ਵੀ ਹੋਰ ਵਧੇਰੇ ਮਜ਼ਬੂਤ ਹੋਵੇਗੀ ਅਤੇ ਕਿਸੇ ਵੀ ਸੰਕਟ ਭਰੀ ਸਥਿਤੀ ਜਾਂ ਕੁਦਰਤੀ ਆਫ਼ਤਾਂ ਸਮੇਂ ਰੇਲਵੇ ਦਾ ਵਿਸਥਾਰ ਬਹੁਤ ਜ਼ਿਆਦਾ ਸਹਾਇਕ ਸਿੱਧ ਹੋ ਸਕਦਾ ਹੈ।


-ਮਾਸਟਰ ਸੰਜੀਵ ਧਰਮਾਣੀ
ਪਿੰਡ ਸੱਧੇਵਾਲ, ਡਾਕ: ਗੰਗੂਵਾਲ (ਸ੍ਰੀ ਅਨੰਦਪੁਰ ਸਾਹਿਬ)।


ਲੋਕਤੰਤਰ ਦੇ ਮੰਦਿਰ ਦੀ ਖਿੜਕੀ 'ਚੋਂ....!
ਭਾਰਤ ਦੁਨੀਆ ਦਾ ਵੱਡਾ ਲੋਕਤੰਤਰੀ ਦੇਸ਼ ਹੈ, ਜਿੱਥੇ ਲੋਕਾਂ ਨੂੰ ਆਪਣੀ ਇੱਛਾ ਅਤੇ ਮਰਜ਼ੀ ਅਨੁਸਾਰ ਆਪਣੇ ਨੁਮਾਇੰਦੇ ਚੁਣਨ ਦਾ ਸੰਪੂਰਨ ਸੰਵਿਧਾਨਕ ਅਧਿਕਾਰ ਪ੍ਰਾਪਤ ਹੈ। ਵਿਧਾਨ ਸਭਾ ਦੀਆਂ ਇਮਾਰਤਾਂ ਨੂੰ ਅਸੀਂ ਲੋਕਤੰਤਰ ਦਾ ਵੱਡਾ ਮੰਦਿਰ ਮੰਨਦੇ ਹਾਂ। ਪਰ ਜਦੋਂ ਲੋਕਤੰਤਰੀ ਮੰਦਿਰਾਂ ਦੀ ਖਿੜਕੀ 'ਚੋਂ ਅੰਦਰ ਝਾਤ ਮਾਰ ਕੇ ਦੇਖਦੇ ਹਾਂ ਤਾਂ ਇਸ ਤਰ੍ਹਾਂ ਲਗਦਾ ਹੈ ਜਿਵੇਂ ਅਸੀਂ ਕਿਸੇ ਜੰਗ ਦੇ ਮੈਦਾਨ ਦਾ ਦ੍ਰਿਸ਼ ਦੇਖ ਰਹੇ ਹੋਈਏ। ਸਾਡੇ ਦੇਸ਼ ਦੀਆਂ ਵਿਧਾਨ ਸਭਾਵਾਂ ਵਿਚ ਅਜਿਹੇ ਦ੍ਰਿਸ਼ ਆਮ ਵਰਤਾਰਾ ਬਣਦੇ ਜਾ ਰਹੇੇ ਹਨ। ਲੋਕਾਂ ਦੇ ਕਰੋੜਾਂ ਰੁਪਈਏ ਇਕ-ਇਕ ਸੈਸ਼ਨ ਵਿਚ ਬਿਨਾਂ ਸਾਰਥਿਕ ਨਤੀਜਿਆਂ ਦੇ ਸਵਾਹ ਕਰ ਦਿੱਤੇ ਜਾਂਦੇ ਹਨ ਅਤੇ ਲੋਕਾਂ ਦੀ ਆਸ ਦਾ ਬੂਰ ਫਲ਼ ਬਣਨ ਤੋਂ ਪਹਿਲਾਂ ਹੀ ਕਿਰ ਜਾਂਦਾ ਹੈ। ਇਸ ਤਰ੍ਹਾਂ ਪ੍ਰਤੀਤ ਹੁੰਦਾ ਹੈ ਜਿਵੇਂ ਲੋਕਤੰਤਰ ਦੇ ਅਸਲੀ ਅਰਥ ਗੁਆਚ ਗਏ ਹੋਣ। ਪਰ ਸਾਡੇ ਨੁਮਾਇੰਦਿਆਂ ਨੂੰ ਗੰਭੀਰਤਾ, ਸੰਜਮ ਅਤੇ ਸਲੀਕੇ ਤੋਂ ਕੰਮ ਲੈਣਾ ਚਾਹੀਦਾ ਹੈ ਤਾਂ ਜੋ ਲੋਕਤੰਤਰੀ ਮੰਦਿਰਾਂ ਦੀ ਪਵਿੱਤਰਤਾ ਅਤੇ ਲੋਕਤੰਤਰ ਦੀ ਭਰੋਸੇਯੋਗਤਾ ਬਣੀ ਰਹੇ।


-ਸੁਖਵੀਰ ਘੁਮਾਣ ਦਿੜ੍ਹਬਾ।

11-07-2017

 ਨਵੀਂ ਸੱਭਿਆਚਾਰਕ ਨੀਤੀ

ਸਾਡੀ ਸੱਭਿਅਤਾ, ਸਾਰਾ ਵਿਰਸਾ, ਜਿਸ 'ਤੇ ਅਸੀਂ ਮਾਣ ਕਰਿਆ ਕਰਦੇ ਸਾਂ, ਅੱਜ ਉਹ ਅਲੋਪ ਹੁੰਦੇ ਜਾ ਰਹੇ ਹਨ। ਜਿਥੇ ਅਸੀਂ ਮਾਂ-ਬੋਲੀ ਨੂੰ ਮਨੋਂ ਵਿਸਾਰ ਰਹੇ ਹਾਂ, ਉਥੋਂ ਅਸੀਂ ਮਨੁੱਖੀ ਕਦਰਾਂ-ਕੀਮਤਾਂ ਤੋਂ ਵੀ ਦੂਰ ਹੁੰਦੇ ਜਾ ਰਹੇ ਹਾਂ। ਸਰਕਾਰ ਵੱਲੋਂ ਸੱਭਿਆਚਾਰ ਅਤੇ ਵਿਰਸੇ ਨੂੰ ਬਚਾਉਣ ਲਈ ਕੀਤੀ ਗਈ ਪਹਿਲਕਦਮੀ ਸ਼ਲਾਘਾਯੋਗ ਹੈ। ਦੇਖਣ ਵਾਲੀ ਗੱਲ ਇਹ ਹੈ ਕਿ ਇਸ 'ਤੇ ਸੱਚੇ ਦਿਲੋਂ ਅਮਲ ਹੁੰਦਾ ਹੈ ਜਾਂ ਨਹੀਂ। ਜੇ ਚੰਗਾ ਲਿਖਣ ਵਾਲੇ, ਚੰਗਾ ਗਾਉਣ ਵਾਲੇ ਅਤੇ ਵਧੀਆ ਫ਼ਿਲਮਾਉਣ ਵਾਲੇ ਲੋਕਾਂ ਨੂੰ ਉਤਸ਼ਾਹਤ ਕੀਤਾ ਜਾਂਦਾ ਹੈ ਤਾਂ ਇਹ ਆਪਣੀ ਸੱਭਿਅਤਾ ਤੇ ਵਿਰਸੇ ਨੂੰ ਬਚਾਉਣ ਵੱਲ ਵਧੀਆ ਕਦਮ ਹੋਵੇਗਾ। ਇਤਿਹਾਸਕ ਅਤੇ ਧਾਰਮਿਕ ਵਿਰਾਸਤ ਨੂੰ ਬਚਾਉਣਾ ਵੀ ਤਾਂ ਸਾਡੇ ਸੱਭਿਆਚਾਰ ਦਾ ਹਿੱਸਾ ਹੈ। ਆਪਣੇ ਸੱਭਿਆਚਾਰਕ ਵਿਰਸੇ ਨੂੰ ਬਚਾਈ ਰੱਖਣ ਲਈ ਸਰਕਾਰਾਂ ਦੀ ਪਹਿਲਕਦਮੀ ਦੇ ਨਾਲ-ਨਾਲ ਲੋਕਾਂ ਦਾ ਸਹਿਯੋਗ ਵੀ ਜ਼ਰੂਰੀ ਹੈ।

-ਸਮਿੱਤਰ ਸਿੰਘ
#142, ਦਸਮੇਸ਼ ਨਗਰ, ਝੁੰਗੀਆਂ ਰੋਡ, ਖਰੜ।

ਜਾਤਪਾਤ ਦੇ ਨਾਂਅ 'ਤੇ

ਪਿਛਲੇ ਦਿਨੀਂ ਉੱਤਰ ਪ੍ਰਦੇਸ਼ ਦੇ ਸਹਾਰਨਪੁਰ ਨਜ਼ਦੀਕ ਜਾਤ ਬਰਾਦਰੀ ਦੇ ਨਾਂਅ 'ਤੇ ਵੱਡੀ ਪੱਧਰ 'ਤੇ ਮਾਰਧਾੜ ਕਰਕੇ ਮਾਹੌਲ ਵਿਗਾੜਿਆ ਗਿਆ। ਗੁਰੂ ਸਾਹਿਬਾਨਾਂ ਤੇ ਮਹਾਨ ਭਗਤਾਂ ਨੇ ਜਾਤ-ਪਾਤ ਨੂੰ ਮਿਟਾਉਣ ਲਈ ਬੜੇ ਯਤਨ ਕੀਤੇ। ਪਰ ਦੁੱਖ ਹੈ ਕਿ ਉਨ੍ਹਾਂ ਦੇ ਯਤਨ ਬਹੁਤੇ ਸਫਲ ਨਹੀਂ ਹੋਏ। ਪਿਛਲੇ ਲੰਮੇ ਸਮੇਂ ਤੋਂ ਸਿਆਸਤਦਾਨ ਧਰਮਾਂ-ਜਾਤਾਂ ਦੇ ਨਾਂਅ 'ਤੇ ਰੱਜ ਕੇ ਸਿਆਸਤ ਕਰਦੇ ਆ ਰਹੇ ਹਨ। ਇਸ ਤੋਂ ਵੀ ਚਿੰਤਾਜਨਕ ਗੱਲ ਇਹ ਹੈ ਕਿ ਅੱਜ ਜਾਤ ਦੇ ਨਾਂਅ 'ਤੇ ਮਰਦਮਸ਼ੁਮਾਰੀਆਂ ਕਰਵਾਈਆਂ ਜਾਣ ਲੱਗੀਆਂ ਹਨ। ਇਹ ਵਰਤਾਰਾ ਜਿੱਥੇ ਬਹੁਤੇ ਭਾਈਚਾਰਿਆਂ 'ਚ ਨਫ਼ਰਤਾਂ ਪੈਦਾ ਕਰ ਰਿਹਾ ਹੈ, ਉਥੇ ਅਜਿਹਾ ਕਰਨਾ ਸੰਵਿਧਾਨ ਦੇ ਵੀ ਉਲਟ ਹੈ। ਭਾਰਤੀ ਸਮਾਜ ਵਿਚੋਂ ਜਾਤ-ਪਾਤ ਵਰਗੀ ਬੁਰਾਈ ਨੂੰ ਖ਼ਤਮ ਕਰਨ ਲਈ ਵੱਡੇ ਪੱਧਰ 'ਤੇ ਯਤਨ ਆਰੰਭ ਕਰਨੇ ਚਾਹੀਦੇ ਹਨ। ਅਜਿਹਾ ਕਰਨ ਨਾਲ ਹੀ ਰਾਸ਼ਟਰ ਦੇ ਹਿਤ ਸੁਰੱਖਿਅਤ ਰਹਿ ਸਕਦੇ ਹਨ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

ਦੋਸ਼ੀ ਕੌਣ?

'ਖੇਡ ਜਗਤ' ਅੰਕ ਵਿਚ ਪ੍ਰੋ: ਪਰਮਜੀਤ ਸਿੰਘ ਰੰਧਾਵਾ ਦਾ ਲੇਖ 'ਕੀ ਦੋਸ਼ੀ ਸਾਡੇ ਚੋਣਕਾਰ ਜਾਂ ਵਿਦੇਸ਼ੀ ਕੋਚ?' ਕੌੜੀ ਸਚਾਈ ਬਿਆਨ ਕਰਦਾ ਹੈ। ਇਹ ਸਚਾਈ ਸਿਰਫ ਕੌਮੀ ਹਾਕੀ ਟੀਮ ਦੀ ਹੀ ਨਹੀਂ, ਸਗੋਂ ਭਾਰਤ ਵਿਚ ਹਰ ਖੇਡ ਦੀ ਹੀ ਹੈ। ਇਥੇ ਸਕੂਲਾਂ ਦੇ ਮੁਕਾਬਲਿਆਂ ਤੋਂ ਹੀ ਜੁਗਾੜੀ ਲੋਕ ਆਪਣਾ ਜੁਗਾੜ ਲਾਉਣ ਲੱਗ ਜਾਂਦੇ ਹਨ, ਜਿਨ੍ਹਾਂ ਨੂੰ ਖੇਡਾਂ ਅਤੇ ਦੇਸ਼ ਦੀ ਇੱਜ਼ਤ ਨਾਲੋਂ ਨਿੱਜੀ ਹਿਤ ਪਿਆਰੇ ਹੁੰਦੇ ਹਨ। ਕੁਝ ਬਹੁਤ ਹੀ ਸਿਦਕੀ ਲੰਮਾ ਸੰਘਰਸ਼ ਤਾਂ ਕਰਦੇ ਹਨ ਪਰ ਉਨ੍ਹਾਂ ਦਾ ਮੁੱਲ ਨਹੀਂ ਪੈਂਦਾ। ਇਸ ਲਈ ਅੱਜ ਲੋੜ ਹੈ, ਇਨ੍ਹਾਂ ਜੁਗਾੜੀ ਲੋਕਾਂ 'ਤੇ ਸ਼ਿਕੰਜਾ ਕੱਸਣ ਦੀ, ਤਾਂ ਕਿ ਸਾਡੀ ਕੌਮੀ ਖੇਡ ਹਾਕੀ ਬੁਲੰਦੀ ਵੱਲ ਜਾ ਸਕੇ।

-ਸਿਮਰਨ ਔਲਖ
ਪਿੰਡ ਸੀਰਵਾਲੀ
(ਸ੍ਰੀ ਮੁਕਤਸਰ ਸਾਹਿਬ)।

10-07-2017

 ਕਿਤਾਬਾਂ ਸਾਡੀਆਂ ਹਮਸਫ਼ਰ
ਬੀਤੇ ਦਿਨੀਂ ਸੰਪਾਦਕੀ ਪੰਨੇ 'ਤੇ ਮਾਣਯੋਗ ਲੇਖਕ ਤਰਨਜੀਤ ਸਿੰਘ ਰੰਧਾਵਾ ਦਾ ਆਰਟੀਕਲ 'ਕਿਤਾਬਾਂ ਸਾਡੀਆਂ ਹਮਸਫ਼ਰ' ਪੜ੍ਹਿਆ, ਬਹੁਤ ਹੀ ਲਾਹੇਵੰਦ ਸੀ। ਲੇਖਕ ਅਨੁਸਾਰ ਕਿਤਾਬਾਂ ਸਾਡੇ ਜੀਵਨ ਵਿਚ ਅਹਿਮ ਸਥਾਨ ਰੱਖਦੀਆਂ ਹਨ। ਉਹ ਅਥਾਹ ਗਿਆਨ ਭੰਡਾਰ ਹੋਣ ਕਾਰਨ ਸਾਨੂੰ ਚੰਗਾ ਜੀਵਨ ਆਚਰਣ, ਨੈਤਿਕ ਅਤੇ ਅਗਾਂਹਵਧੂ ਸੋਚ ਪ੍ਰਦਾਨ ਕਰਦੀਆਂ ਹਨ। ਕਿਤਾਬਾਂ ਪੜ੍ਹਨ ਨਾਲ ਮਾਨਸਿਕ ਤਣਾਅ ਤੋਂ ਨਿਜਾਤ ਮਿਲਦੀ ਹੈ। ਇਹ ਸਾਡੇ ਸ਼ਬਦ ਭੰਡਾਰ ਵਿਚ ਵਾਧਾ ਕਰਦੀਆਂ ਹਨ। ਸਾਡੇ ਰਹਿਬਰਾਂ ਨੇ ਵੀ ਕਿਤਾਬਾਂ ਦੀ ਮਹੱਤਤਾ ਨੂੰ ਬਹੁਤ ਉੱਚਾ ਦੱਸਿਆ ਹੈ। ਇਨ੍ਹਾਂ ਨੂੰ ਪੜ੍ਹਨ ਨਾਲ ਮਨੁੱਖ ਅੰਦਰ ਗਿਆਨ ਦਾ ਪ੍ਰਵਾਹ ਚਲਦਾ ਹੈ ਤੇ ਦਲੀਲ ਨਾਲ ਗੱਲ ਕਰਨ ਦੀ ਸਮਰੱਥਾ ਤੇ ਸਮਝ ਆਉਂਦੀ ਹੈ। ਕਿਤਾਬਾਂ 'ਤੇ ਲਗਾਇਆ ਧਨ ਅਤੇ ਸਮਾਂ ਕਦੇ ਬਰਬਾਦ ਨਹੀਂ ਹੁੰਦਾ। ਚੰਗੀਆਂ ਪੁਸਤਕਾਂ ਸਾਡਾ ਬਹੁਤ ਹੀ ਕੀਮਤੀ ਖਜ਼ਾਨਾ ਹਨ।

-ਮਾ: ਦੇਵ ਰਾਜ ਖੁੰਡਾ
ਰਾਮ ਸ਼ਰਨਮ ਕਾਲੋਨੀ, ਗੁਰਦਾਸਪੁਰ।

ਦੋਸਤੀ ਤੱਕ ਦਾ ਸਫ਼ਰ
ਇਹ ਜ਼ਰੂਰੀ ਨਹੀਂ ਕਿ ਦੋਸਤੀ ਸਿਰਫ਼ ਹਮਉਮਰ ਨਾਲ ਹੀ ਹੋ ਸਕਦੀ ਹੈ। ਦੋਸਤ ਦੀ ਖਾਸੀਅਤ ਇਹ ਹੁੰਦੀ ਹੈ ਕਿ ਦੋਸਤ ਸਾਨੂੰ ਸਮਝਣ ਵਾਲਾ ਹੋਵੇ। ਸੱਚਾ ਦੋਸਤ ਮਿਲਣਾ ਮੁਸ਼ਕਿਲ ਹੁੰਦਾ ਹੈ। ਅੱਜ ਦੇ ਸਮੇਂ ਵਿਚ ਲੋਕਾਂ ਨੇ ਦੋਸਤੀ ਦੇ ਅਰਥਾਂ ਨੂੰ ਹੀ ਬਦਲ ਕੇ ਰੱਖ ਦਿੱਤਾ ਹੈ। ਅਸਲ ਦੋਸਤ ਉਹ ਹੁੰਦਾ ਹੈ ਜੋ ਮੁਸ਼ਕਿਲ ਸਮੇਂ ਵਿਚ ਕੰਮ ਆਵੇ। ਸੁੱਖ ਵਿਚ ਹਿੱਸਾ ਪਾਉਣ ਤਾਂ ਸੱਤ ਬੇਗਾਨੇ ਵੀ ਆ ਜਾਂਦੇ ਹਨ। ਸੱਚਾ ਦੋਸਤ ਉਹੀ ਹੁੰਦਾ ਹੈ ਜੋ ਕੋਲ ਰਹਿ ਕੇ ਸਾਨੂੰ ਸਾਡੀਆਂ ਬੁਰਾਈਆਂ ਤੋਂ ਜਾਣੂ ਕਰਵਾਏ। ਨਹੀਂ ਤਾਂ ਤੋਹਮਤਾਂ ਤਾਂ ਦੁਸ਼ਮਣ ਵੀ ਲਗਾ ਲੈਂਦੇ ਨੇ।

-ਗਗਨ ਬਰਾੜ
ਸ੍ਰੀ ਮੁਕਤਸਰ ਸਾਹਿਬ।

ਨੇਤਾਵਾਂ ਦੀ ਅਮੀਰੀ
ਬੇਸ਼ੱਕ ਅੱਜ ਵੀ ਸਾਡੇ ਦੇਸ਼ ਵਿਚ ਉੱਚੇ-ਸੁੱਚੇ ਆਚਰਣ ਵਾਲੇ ਨੇਤਾਵਾਂ ਦੀ ਘਾਟ ਨਹੀਂ ਹੈ ਪਰ ਬਹੁ-ਗਿਣਤੀ ਭ੍ਰਿਸ਼ਟ ਨੇਤਾਵਾਂ ਦੀ ਹੀ ਹੈ। ਸਾਡੇ ਇਹ ਲੀਡਰ ਦਿਨੋ-ਦਿਨ ਅਮੀਰ ਹੋ ਰਹੇ ਹਨ। 1980 ਦੇ ਦਹਾਕੇ ਵਿਚ ਕਈ ਲੀਡਰਾਂ ਦੀ ਨਿੱਜੀ ਜਾਇਦਾਦ ਹਜ਼ਾਰਾਂ, ਲੱਖਾਂ ਵਿਚ ਸੀ ਜੋ ਕਿ ਅੱਜ ਕਰੋੜਾਂ, ਅਰਬਾਂ ਵਿਚ ਹੋ ਚੁੱਕੀ ਹੈ। ਇਹ ਲੋਕ ਕੁਝ ਸਮੇਂ ਵਿਚ ਹੀ ਵੱਡੀਆਂ ਕੰਪਨੀਆਂ, ਟਰਾਂਸਪੋਰਟਾਂ ਪੈਟਰੋਲ ਪੰਪਾਂ ਆਦਿ ਦੇ ਮਾਲਕ ਬਣ ਚੁੱਕੇ ਹਨ। ਸਾਡਾ ਇਨਕਮ ਟੈਕਸ ਵਿਭਾਗ ਅਤੇ ਜਾਂਚ ਏਜੰਸੀਆਂ ਇਨ੍ਹਾਂ ਭ੍ਰਿਸ਼ਟ ਲੀਡਰਾਂ ਤੇ ਇਨ੍ਹਾਂ ਦੀ ਆਮਦਨ ਦੇ ਸਾਧਨਾਂ ਬਾਰੇ ਕਿਉਂ ਨਹੀਂ ਪੁੱਛਦੀਆਂ? ਇਹ ਵੀ ਪੜਤਾਲ ਕਰਨ ਕਿ ਇਨ੍ਹਾਂ ਨੇ ਵੱਡੇ ਸ਼ਹਿਰਾਂ ਵਿਚ ਕੋਠੀਆਂ ਅਤੇ ਵੱਡੀਆਂ ਗੱਡੀਆਂ ਕਿਹੜੇ ਪੈਸੇ ਨਾਲ ਖਰੀਦੀਆਂ ਹਨ। ਦੇਸ਼ ਵਿਚੋਂ ਭ੍ਰਿਸ਼ਟਾਚਾਰ ਖਤਮ ਕਰਨ ਲਈ ਕਾਨੂੰਨ ਨੂੰ ਸਖਤਾਈ ਨਾਲ ਲਾਗੂ ਕਰਨਾ ਪਵੇਗਾ ਅਤੇ ਦੋਸ਼ੀਆਂ ਨੂੰ ਸਜ਼ਾ ਵੀ ਦੇਣੀ ਹੋਵੇਗੀ।

-ਲੱਖੀ ਗਿੱਲ ਧਨਾਨਸੂ

ਜਾਤ-ਪਾਤ
ਇਕ ਜੁਲਾਈ ਦੇ ਅੰਕ ਵਿਚ ਛਪਿਆ ਪੂਰਨ ਚੰਦ ਸਰੀਨ ਦਾ ਲੇਖ 'ਅਜੇ ਵੀ ਜਾਤ-ਪਾਤ ਤੋਂ ਉਭਰ ਨਹੀਂ ਸਕਿਆ ਦੇਸ਼' ਬਹੁਤ ਪਸੰਦ ਆਇਆ। ਅਸਲੀਅਤ ਵਿਚ, ਅੱਜ ਸੰਵਿਧਾਨ ਵਿਚ ਰਹਿ ਗਈਆਂ ਕਮਜ਼ੋਰੀਆਂ ਵਿਚ ਸੋਧ ਕਰਨੀ ਚਾਹੀਦੀ ਹੈ। ਜਾਤ-ਪਾਤ ਦੇ ਨਾਂਅ 'ਤੇ ਹੁੰਦੀ ਹਿੰਸਾ ਅਤੇ ਰਾਖਵਾਂਕਰਨ ਨੂੰ ਖਤਮ ਕਰਨ ਦੀ ਲੋੜ ਹੈ ਤਾਂ ਕਿ ਸਾਰੇ ਦੇਸ਼ ਵਾਸੀ ਬਰਾਬਰ ਦੇ ਅਧਿਕਾਰਾਂ ਨੂੰ ਮਾਣ ਸਕਣ। ਸ੍ਰੀ ਨਰਿੰਦਰ ਮੋਦੀ ਵੱਡੇ ਫੈਸਲੇ ਲੈਣ ਵਾਲੇ ਪ੍ਰਧਾਨ ਮੰਤਰੀ ਵਜੋਂ ਮਸ਼ਹੂਰ ਹਨ ਤੇ ਸਾਨੂੰ ਆਸ ਹੈ ਕਿ ਉਹ ਇਸ ਬਾਰੇ ਛੇਤੀ ਕੋਈ ਫ਼ੈਸਲਾ ਲੈਣਗੇ।

-ਸਿਮਰਨ ਔਲਖ
ਪਿੰਡ ਸੀਰਵਾਲੀ (ਸ੍ਰੀ ਮੁਕਤਸਰ ਸਾਹਿਬ।

06/07/2017

 ਜਮਹੂਰੀਅਤ ਦਾ ਜਨਾਜ਼ਾ
ਲੋਕਤੰਤਰੀ ਵਿਵਸਥਾ ਅੰਦਰ ਲੋਕਾਂ ਦੇ ਚੁਣੇ ਹੋਏ ਪ੍ਰਤੀਨਿਧ ਵਿਧਾਨ ਸਭਾ 'ਚ ਜਾ ਕੇ ਲੋਕ ਮਸਲੇ ਉਠਾਉਣ ਦੇ ਫ਼ਰਜ਼ ਅਦਾ ਕਰਦੇ ਹਨ ਪਰ ਪੰਜਾਬ ਦੇ ਲੋਕਾਂ ਨੂੰ ਜੰਗ ਦਾ ਅਖਾੜਾ ਬਣੀ ਵਿਧਾਨ ਸਭਾ ਦੇ ਦ੍ਰਿਸ਼ਾਂ ਨੇ ਬੇਹੱਦ ਨਿਰਾਸ਼ ਕੀਤਾ ਹੈ। ਸੱਤ ਦਹਾਕੇ ਬੀਤਣ ਦੇ ਬਾਵਜੂਦ ਸਾਡਾ ਲੋਕਤੰਤਰ ਅਜੇ ਬਚਪਨ ਦੀਆਂ ਦਹਿਲੀਜ਼ਾਂ ਟੱਪਿਆ ਵੀ ਨਹੀਂ ਜਾਪਦਾ। ਵਿਸ਼ਵ ਦੇ ਸਭ ਤੋਂ ਵੱਡੇ ਲੋਕਤੰਤਰ ਦੇ ਦਾਅਵੇ ਮਿੱਟੀ 'ਚ ਮਿਲੇ ਜਾਪ ਰਹੇ ਹਨ।
ਆਖਰ ਦੇਸ਼ ਦੇ ਲੋਕ ਕਦੋਂ ਤੱਕ ਅਜਿਹਾ ਤਮਾਸ਼ਾ ਚੁੱਪ-ਚਾਪ ਦੇਖਦੇ ਰਹਿਣਗੇ। ਸੋ, ਸਮੇਂ ਦੀ ਅਹਿਮ ਲੋੜ ਹੈ ਕਿ ਲੋਕਾਂ ਦੇ ਪ੍ਰਤੀਨਿਧਾਂ ਲਈ ਸਦਨਾਂ ਅੰਦਰ ਬਣਦੇ ਸਤਿਕਾਰ ਦੀ ਵਿਵਸਥਾ ਕੀਤੀ ਜਾਵੇ ਅਤੇ ਸਦਨ ਚਲਾਉਣ ਦੀ ਜ਼ਿੰਮੇਵਾਰੀ ਹੰਢੇ ਵਰਤੇ ਲੋਕ ਪ੍ਰਤੀਨਿਧਾਂ ਦੇ ਸਪੁਰਦ ਕੀਤੀ ਜਾਵੇ। ਹਰ ਪਾਰਟੀ ਦੇ ਕਾਰਕੁੰਨਾਂ ਨੂੰ ਸੰਜਮ ਅਤੇ ਸਹਿਣਸ਼ੀਲਤਾ ਦਾ ਪੱਲਾ ਘੁੱਟ ਕੇ ਫੜਨ ਦੀ ਵੀ ਜ਼ਰੂਰਤ ਹੈ।


-ਪ੍ਰਿੰ: ਭੁਪਿੰਦਰ ਸਿੰਘ ਢਿੱਲੋਂ
ਦੀਪਗੜ੍ਹ (ਬਰਨਾਲਾ)।


ਵਿਧਾਨ ਸਭਾ ਦਾ ਸਿੱਧਾ ਪ੍ਰਸਾਰਨ
ਚੋਣਾਂ ਦੌਰਾਨ ਲੋਕਾਂ ਨੂੰ ਸਬਜ਼ਬਾਗ ਦਿਖਾ ਕੇ ਲੀਡਰ ਸੱਤਾ ਪ੍ਰਾਪਤ ਕਰਦੇ ਹਨ ਪਰ ਸੱਤਾ ਪ੍ਰਾਪਤੀ ਤੋਂ ਬਾਅਦ ਜਿਥੇ ਬੈਠ ਕੇ ਲੀਡਰਾਂ ਵੱਲੋਂ ਸੂਬੇ ਦੀ ਬਿਹਤਰੀ, ਕਿਸਾਨੀ ਤੇ ਜਵਾਨੀ ਦੀ ਭਲਾਈ ਲਈ ਵਿਉਂਤਬੰਦੀ ਕਰਨੀ ਹੁੰਦੀ ਹੈ, ਉਸ ਜਗ੍ਹਾ ਨੂੰ ਲੀਡਰਾਂ ਵੱਲੋਂ ਜੰਗ ਦਾ ਮੈਦਾਨ ਬਣਾਇਆ ਜਾ ਰਿਹਾ ਹੈ। ਬੀਤੇ ਦਿਨੀਂ ਵਿਧਾਨ ਸਭਾ 'ਚ ਜੋ ਕੁਝ ਹੋਇਆ, ਉਸ ਨਾਲ ਸਮੁੱਚੇ ਸੂਬੇ ਦੇ ਲੋਕ ਮਨਾਂ ਵਿਚ ਮਾਯੂਸੀ ਛਾਈ ਹੋਈ ਹੈ। ਲੋਕ ਦੇਖਣਾ ਚਾਹੁੰਦੇ ਹਨ ਕਿ ਆਖਰ ਵਿਧਾਨ ਸਭਾ ਅੰਦਰ ਉਨ੍ਹਾਂ ਵੱਲੋਂ ਚੁਣੇ ਲੀਡਰ ਕੀ ਕਰਦੇ ਹਨ।
ਭਵਿੱਖ ਵਿਚ ਵਿਧਾਨ ਸਭਾ ਦੀ ਸਮੁੱਚੀ ਕਾਰਵਾਈ ਦਾ ਟੀ.ਵੀ. 'ਤੇ ਸਿੱਧਾ ਪ੍ਰਸਾਰਨ ਕੀਤਾ ਜਾਵੇ ਤਾਂ ਜੋ ਲੋਕ ਵੀ ਦੇਖ ਸਕਣ ਕਿ ਉਨ੍ਹਾਂ ਦੇ ਚੁਣੇ ਲੀਡਰ ਲੋਕ ਹਿੱਤਾਂ ਦੀ ਗੱਲ ਕਰਦੇ ਵੀ ਹਨ ਜਾਂ ਨਹੀਂ। ਅਜਿਹਾ ਕਰਨ ਨਾਲ ਲੋਕ ਚੰਗੇ-ਮਾੜੇ ਦੀ ਪਹਿਚਾਣ ਕਰ ਲੈਣਗੇ ਤੇ ਭਵਿੱਖ ਵਿਚ ਸੋਚ ਸਮਝ ਕੇ ਮਤਦਾਨ ਕਰਨਗੇ।


-ਰਵਿੰਦਰ ਕਸਾਣਾ ਸੂਰਾਪੁਰੀ
ਕਾਠਗੜ੍ਹ।


ਗ਼ਰੀਬਾਂ ਦਾ ਕਰਜ਼ਾ ਮੁਆਫ਼ ਹੋਵੇ
ਪੰਜਾਬ ਸਰਕਾਰ ਵੱਲੋਂ ਬਜਟ ਸੈਸ਼ਨ ਵਿਚ ਕੀਤੇ ਗਏ ਕਰਜ਼ਾ ਮੁਆਫ਼ੀ ਦੇ ਐਲਾਨ ਨਾਲ ਛੋਟੇ ਕਿਸਾਨਾਂ ਨੂੰ ਬਹੁਤ ਵੱਡੀ ਰਾਹਤ ਮਿਲਣ ਦੀ ਉਮੀਦ ਹੈ। ਸਰਕਾਰ ਦਾ ਇਹ ਇਕ ਸ਼ਲਾਘਾਯੋਗ ਕਦਮ ਹੈ। ਅਸੀਂ ਇਥੇ ਨਾਲ ਹੀ ਸਰਕਾਰ ਦਾ ਧਿਆਨ ਉਨ੍ਹਾਂ ਗਰੀਬ ਮਜ਼ਦੂਰਾਂ ਵੱਲ ਵੀ ਦੁਆਉਣਾ ਚਾਹੁੰਦੇ ਹਾਂ, ਜਿਨ੍ਹਾਂ ਨੇ ਬੈਂਕਾਂ ਤੋਂ ਥੋੜ੍ਹਾ ਬਹੁਤ ਕਰਜ਼ਾ ਲਿਆ ਹੈ ਪਰ ਵਾਪਸ ਕਰਨ ਦੇ ਸਮਰੱਥ ਨਹੀਂ। ਕੀ ਇਹ ਇਨ੍ਹਾਂ ਗ਼ਰੀਬ ਮਜ਼ਦੂਰਾਂ ਨਾਲ ਬੇਇਨਸਾਫ਼ੀ ਨਹੀਂ?
ਇਹ ਗ਼ਰੀਬ ਅਨਪੜ੍ਹ ਮਜ਼ਦੂਰ ਆਪਣੀ ਆਵਾਜ਼ ਬੁਲੰਦ ਨਹੀਂ ਕਰ ਸਕਦੇ। ਗ਼ਰੀਬ ਮਜ਼ਦੂਰਾਂ ਦੇ ਹਿੱਤਾਂ ਦੀ ਰਾਖੀ ਕਰਨ ਵਾਲੀਆਂ ਸੰਸਥਾਵਾਂ ਯੂਨੀਅਨਾਂ ਨੂੰ ਬੇਨਤੀ ਹੈ ਕਿ ਉਹ ਵੀ ਮਜ਼ਦੂਰਾਂ ਦੀ ਮੰਗ ਪੰਜਾਬ ਸਰਕਾਰ ਅੱਗੇ ਰੱਖਣ ਦੀ ਕ੍ਰਿਪਾਲਤਾ ਕਰਨ।


-ਪਰਮਿੰਦਰ ਸਿੰਘ

05/07/2017

 ਗੰਭੀਰਤਾ ਦੀ ਲੋੜ
ਪਿਛਲੇ ਦਿਨੀਂ ਇਕ ਮਹਿਲਾ ਪੁਲਿਸ ਮੁਲਾਜ਼ਮ ਵੱਲੋਂ ਆਤਮ-ਹੱਤਿਆ ਕਰ ਲੈਣਾ ਸਮੁੱਚੇ ਪੁਲਿਸ ਪ੍ਰਸ਼ਾਸਨ ਲਈ ਵੱਡੀ ਸ਼ਰਮ ਵਾਲੀ ਗੱਲ ਹੈ। ਪਿਛਲੇ ਲੰਮੇ ਸਮੇਂ ਤੋਂ ਇਹ ਕਿਹਾ ਜਾਣ ਲੱਗਾ ਹੈ ਕਿ ਪੁਲਿਸ ਪ੍ਰਸ਼ਾਸਨ 'ਚ ਮਾੜੇ ਆਚਰਨ ਵਾਲੇ ਲੋਕ ਘੁਸਪੈਠ ਕਰ ਚੁੱਕੇ ਹਨ। ਆਤਮ-ਹੱਤਿਆ ਬੰਦਾ ਉਦੋਂ ਕਰਦਾ ਹੈ ਜਦੋਂ ਉਹ ਇਨਸਾਫ਼ ਦੀ ਆਸ ਛੱਡ ਦੇਵੇ ਜਾਂ ਕਿਸੇ ਵੱਲੋਂ ਡਾਢਾ ਪ੍ਰੇਸ਼ਾਨ ਕਰ ਦਿੱਤਾ ਗਿਆ ਹੋਵੇ। ਇਸ ਲੜਕੀ ਨੂੰ ਉਸ ਸਿਰ ਫਿਰੇ ਮੁਨਸ਼ੀ ਵੱਲੋਂ ਕਿੰਨਾ ਕੁ ਤੰਗ ਪ੍ਰੇਸ਼ਾਨ ਤੇ ਮਾਨਸਿਕ ਤਸੀਹੇ ਦਿੱਤੇ ਗਏ ਹੋਣਗੇ ਕਿ ਉਸ ਨੇ ਮੌਤ ਨੂੰ ਹੀ ਗਲੇ ਲਾਉਣਾ ਬਿਹਤਰ ਸਮਝਿਆ। ਸਵਾਲ ਉਠਦਾ ਹੈ ਕਿ ਜਦ ਉਸ ਨੇ ਉੱਚ ਅਧਿਕਾਰੀਆਂ ਕੋਲ ਸ਼ਿਕਾਇਤ ਕੀਤੀ ਤਾਂ ਉਸ ਨੂੰ ਪੂਰੀ ਗੰਭੀਰਤਾ ਨਾਲ ਕਿਉਂ ਨਾ ਲਿਆ ਗਿਆ? ਅਮਨਪ੍ਰੀਤ ਕੌਰ ਦੀ ਤਰ੍ਹਾਂ ਹੋਰ ਮਹਿਲਾਵਾਂ ਪੁਲਿਸ ਪ੍ਰਸ਼ਾਸਨ ਵਿਚ ਘੁਟਣ ਮਹਿਸੂਸ ਕਰਦੀਆਂ ਹੋਣਗੀਆਂ? ਦੂਜੇ ਪਾਸੇ ਦੋਸ਼ੀ ਮੰਨੇ ਜਾਂਦੇ ਮੁਨਸ਼ੀ ਦੇ ਘਰ ਵਾਲੀ ਦਾ ਕਹਿਣਾ ਹੈ ਕਿ ਜੇ ਉਸ ਦਾ ਪਤੀ ਦੋਸ਼ੀ ਹੈ ਤਾਂ ਉਸ ਨੂੰ ਮਿਸਾਲੀ ਸਜ਼ਾ ਦਿੱਤੀ ਜਾਵੇ ਕਿਉਂਕਿ ਇਕ ਔਰਤ ਹੀ ਦੂਜੀ ਔਰਤ ਦੀ ਵੇਦਨਾ ਸਮਝ ਸਕਦੀ ਹੈ। ਉਪਰੋਕਤ ਘਟਨਾ ਨੂੰ ਪੂਰੀ ਗੰਭੀਰਤਾ ਨਾਲ ਲਿਆ ਜਾਵੇ ਤਾਂ ਕਿ ਪੁਲਿਸ ਪ੍ਰਸ਼ਾਸਨ 'ਚ ਅਜਿਹੀ ਘਟਨਾ ਮੁੜ ਨਾ ਵਾਪਰੇ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਜ਼ਿਲ੍ਹਾ ਲੁਧਿਆਣਾ।


ਸ਼ਲਾਘਾਯੋਗ ਕਦਮ
ਪਿਛਲੇ ਦਿਨੀਂ ਪੰਜਾਬ ਦੀ ਕੈਪਟਨ ਸਰਕਾਰ ਨੇ ਪੰਚਾਇਤਾਂ ਅਤੇ ਸਥਾਨਕ ਸਰਕਾਰਾਂ ਵਿਚ ਔਰਤਾਂ ਦੀ 50 ਫ਼ੀਸਦੀ ਰਾਖਵੇਂਕਰਨ ਦੀ ਘੋਸ਼ਣਾ ਕੀਤੀ। ਔਰਤਾਂ ਦੇ ਸਸ਼ਕਤੀਕਰਨ ਲਈ ਇਹ ਇਕ ਸ਼ਲਾਘਾਯੋਗ ਫੈਸਲਾ ਹੈ। ਕਈ ਵਾਰ ਦੇਖਿਆ ਜਾਂਦਾ ਹੈ, ਪੰਚ ਜਾਂ ਸਰਪੰਚ ਔਰਤ ਦਾ ਪਤੀ ਜਾਂ ਪੁੱਤਰ ਹੀ ਪੰਚਾਇਤ ਵਿਚ ਪੰਚ ਜਾਂ ਸਰਪੰਚ ਦਾ ਰੋਲ ਅਦਾ ਕਰਦੇ ਹਨ। ਦਲਿਤ ਔਰਤਾਂ ਦੇ ਸਬੰਧ ਵਿਚ ਤਾਂ ਸਥਿਤੀ ਹੋਰ ਵੀ ਨਿਮੋਸ਼ੀਜਨਕ ਹੈ। ਅਜਿਹੀ ਸਥਿਤੀ ਵਿਚ ਰਾਖਵਾਂਕਰਨ, ਮਖੌਲ ਤੋਂ ਵੱਧ ਕੁਝ ਵੀ ਮਾਅਨਾ ਨਹੀਂ ਰਖਾਉਂਦਾ। ਔਰਤਾਂ ਲਈ ਪੰਜਾਹ ਫ਼ੀਸਦੀ ਰਾਖਵਾਂਕਰਨ ਪੰਚਾਇਤਾਂ ਵਿਚ ਹੀ ਨਹੀਂ ਸਗੋਂ ਵਿਧਾਨ ਸਭਾਵਾਂ ਅਤੇ ਲੋਕ ਸਭਾ ਵਿਚ ਵੀ ਹੋਣਾ ਚਾਹੀਦਾ ਹੈ। ਭਾਵੇਂ ਅਜਿਹਾ ਕਰਨਾ ਪੰਜਾਬ ਸਰਕਾਰ ਦੇ ਹੱਥ ਵਿਚ ਨਹੀਂ ਪਰ ਸਰਬਸੰਮਤੀ ਨਾਲ ਮਤਾ ਪਾਸ ਕਰਕੇ ਉਹ ਇਕ ਚੰਗਾ ਕਦਮ ਜ਼ਰੂਰ ਪੁੱਟ ਸਕਦੀ ਹੈ।


-ਪ੍ਰੀਤ ਸਿੰਘ ਸੰਦਲ (ਕਵੀਸ਼ਰ)
ਪਿੰਡ ਮਕਸੂਦੜਾ, ਤਹਿ: ਪਾਇਲ, ਜ਼ਿਲ੍ਹਾ ਲੁਧਿਆਣਾ।


ਕਰਜ਼ਾ ਮੁਆਫ਼ੀ ਦਾ ਫ਼ੈਸਲਾ
ਪੰਜਾਬ ਵਿਚ ਕਿਸਾਨਾਂ ਦੀਆਂ ਹਰ ਰੋਜ਼ ਹੋ ਰਹੀਆਂ ਆਤਮ-ਹੱਤਿਆਵਾਂ ਨੂੰ ਰੋਕਣ ਲਈ ਸਰਕਾਰ ਨੇ 2 ਲੱਖ ਤੱਕ ਦਾ ਕਰਜ਼ਾ ਮੁਆਫ਼ ਕਰ ਦਿੱਤਾ ਹੈ, ਜਿਸ ਨਾਲ 10.25 ਲੱਖ ਦਰਮਿਆਨੇ ਤੇ 8.75 ਲੱਖ ਪੰਜ ਏਕੜ ਵਾਲੇ ਕਿਸਾਨਾਂ ਨੂੰ ਰਾਹਤ ਮਿਲੇਗੀ। ਇਸ ਦੇ ਨਾਲ ਹੀ ਆਤਮਦਾਹ ਕਰ ਚੁੱਕੇ ਕਿਸਾਨਾਂ ਦਾ ਕਰਜ਼ਾ ਮੁਆਫ਼ ਕਰਨ ਦਾ ਵੀ ਐਲਾਨ ਕੀਤਾ ਗਿਆ ਹੈ। ਦੇਸ਼ ਦੇ ਕਿਸੇ ਵੀ ਰਾਜ ਵਿਚ ਕਿਸੇ ਵੀ ਸਰਕਾਰ ਦੁਆਰਾ ਲਿਆ ਗਿਆ ਇਹ ਇਕ ਪਹਿਲਾ ਇਤਿਹਾਸਕ ਫ਼ੈਸਲਾ ਹੋਏਗਾ। ਕਰਜ਼ੇ ਕਾਰਨ ਕਈ ਘਰਾਂ ਦੇ ਕਮਾਊ ਪੁੱਤ ਇਸ ਫਾਨੀ ਦੁਨੀਆ ਨੂੰ ਅਲਵਿਦਾ ਕਹਿ ਗਏ। ਕਰਜ਼ੇ ਵਿਚ ਡੁੱਬੇ ਕਿਸਾਨਾਂ ਦੀ ਬਾਂਹ ਫੜ ਸਰਕਾਰ ਨੇ ਕਈ ਕੀਮਤੀ ਜਾਨਾਂ ਬਚਾਅ ਲਈਆਂ।


-ਮਾ: ਪਿਆਰਾ ਸਿੰਘ
ਨਕੋਦਰ।

04/07/2017

 'ਪੱਗ' ਨੂੰ ਤਮਾਸ਼ਾ ਨਾ ਬਣਾਓ
ਪੰਜਾਬ ਵਿਧਾਨ ਸਭਾ ਬਜਟ ਸੈਸ਼ਨ ਦੌਰਾਨ ਜੋ ਕੁਝ ਵੀ ਵਾਪਰਿਆ ਹੈ, ਉਹ ਬਹੁਤ ਹੀ ਨਿੰਦਣਯੋਗ ਹੈ। ਸਪੀਕਰ ਦੇ ਹੁਕਮ ਅਨੁਸਾਰ ਆਮ ਆਦਮੀ ਪਾਰਟੀ ਦੇ ਵਿਧਾਇਕਾਂ ਨੂੰ ਸਦਨ ਵਿਚੋਂ ਕੱਢਣ ਸਮੇਂ ਇਕ ਵਿਧਾਇਕ ਦੀ ਪੱਗ ਉੱਤਰ ਗਈ, ਜਿਸ ਨੂੰ ਅਕਾਲੀ ਵਿਧਾਇਕਾਂ ਦੁਆਰਾ ਚੁੱਕ ਲਿਆ ਗਿਆ, ਚੁੱਕ ਤਾਂ ਇਸ ਨੂੰ ਸੱਤਾਧਾਰੀ ਪਾਰਟੀ ਦੇ ਵਿਧਾਇਕ ਵੀ ਸਕਦੇ ਸਨ ਪਰ ਉਨ੍ਹਾਂ ਨੇ ਸ਼ਾਇਦ ਲੋੜ ਮਹਿਸੂਸ ਨਹੀਂ ਕੀਤੀ। ਹੁਣ ਕੁਝ ਨਿੱਜੀ ਟੀ.ਵੀ. ਚੈਨਲਾਂ ਵੱਲੋਂ ਇਸ ਨੂੰ ਭਖਦਾ ਮੁੱਦਾ ਬਣਾ ਕੇ ਪੇਸ਼ ਕੀਤਾ ਜਾ ਰਿਹਾ ਹੈ ਅਤੇ ਇਕਪਾਸੜ ਬਹਿਸ ਕਰਵਾਈ ਜਾ ਰਹੀ ਹੈ। ਅਜਿਹਾ ਲਗਦਾ ਹੈ ਜਿਵੇਂ ਪੱਗ ਦਾ ਤਮਾਸ਼ਾ ਬਣਾਇਆ ਜਾ ਰਿਹਾ ਹੋਵੇ। ਜਦ ਕਿਸੇ ਦੇ ਮਨ ਨੂੰ ਦੁੱਖ ਲੱਗਦਾ ਹੈ, ਉਹ ਰੋਂਦਾ ਹੈ ਅਤੇ ਹਮਦਰਦੀ ਪ੍ਰਗਟ ਕਰਨ ਵਾਲੇ ਹਮਦਰਦੀ ਵੀ ਪ੍ਰਗਟ ਕਰਦੇ ਹਨ। ਕੁਝ ਸੱਚੀ ਵੀ ਕਰਦੇ ਹਨ ਅਤੇ ਕੁਝ ਝੂਠੀ ਮੂਠੀ ਵੀ ਕਰਦੇ ਹਨ ਪਰ ਝੂਠੀ ਵਾਲਿਆਂ ਨੂੰ ਵੀ ਕੋਈ ਬੁਰਾ ਨਹੀਂ ਕਹਿੰਦਾ, ਇਹ ਸਾਡੇ ਸਮਾਜਿਕ ਮੁੱਲ ਹਨ। ਪਰ ਕੁਝ ਟੀ.ਵੀ. ਚੈਨਲਾਂ ਵੱਲੋਂ ਇਕਪਾਸੜ ਬਹਿਸ ਕਰਵਾ ਕੇ ਪੱਗ ਦੇ ਹੱਕ ਵਿਚ ਗੱਲ ਕਰਨ ਵਾਲਿਆਂ ਨੂੰ ਹੀ ਨਿਸ਼ਾਨਾ ਬਣਾਇਆ ਜਾ ਰਿਹਾ ਹੈ। ਹਜ਼ਾਰਾਂ ਲੋਕ ਪੱਗਾਂ ਬੰਨ੍ਹਦੇ ਹਨ ਅਤੇ ਬੰਨ੍ਹਣ ਵਾਲਿਆਂ ਤੋਂ ਕਿਤੇ ਜ਼ਿਆਦਾ ਇਸ ਦੀ ਕਦਰ ਕਰਦੇ ਹਨ। ਇਹ ਵੀ ਠੀਕ ਹੈ ਗਲੀ-ਮੁਹੱਲਿਆਂ ਵਿਚ ਹੋਣ ਵਾਲੀਆਂ ਲੜਾਈਆਂ ਵਿਚ ਬਹੁਤ ਵਾਰੀ ਲੋਕਾਂ ਦੀ ਪੱਗ ਲੱਥ ਜਾਂਦੀ ਹੈ ਪਰ ਇਨ੍ਹਾਂ ਘਟਨਾਵਾਂ ਨੂੰ ਆਧਾਰ ਬਣਾ ਕੇ 'ਪੰਜਾਬ ਵਿਧਾਨ ਸਭਾ' ਜਿਥੇ ਸੁਰੱਖਿਆ ਦੇ ਅਹਿਮ ਪੁਖਤਾ ਇੰਤਜ਼ਾਮ ਹਨ, ਵਿਚ 'ਲੱਥੀ ਪੱਗ' ਨੂੰ ਜਾਇਜ਼ ਨਹੀਂ ਠਹਿਰਾਇਆ ਜਾ ਸਕਦਾ।

-ਸਿਕੰਦਰ ਸਿੰਘ ਨਿਆਮੀਵਾਲਾ।

ਲੇਖਕਾਂ ਨੂੰ ਵੀ ਮਿਲੇ ਬਣਦਾ ਮਾਣ-ਸਤਿਕਾਰ
ਲੇਖਕ ਸਮਾਜ ਦਾ ਸ਼ੀਸ਼ਾ ਹੁੰਦੇ ਹਨ, ਜੋ ਆਪਣੇ ਦੁਆਰਾ ਲਿਖੀਆਂ ਕਹਾਣੀਆਂ, ਕਾਵਿ-ਵਿਅੰਗਾਂ, ਨਾਵਲਾਂ, ਗ਼ਜ਼ਲਾਂ, ਲੇਖਾਂ, ਕਵਿਤਾ ਅਤੇ ਗੀਤਾਂ ਰਾਹੀਂ ਜਿਥੇ ਸਭ ਦਾ ਮਨੋਰੰਜਨ ਕਰਦੇ ਹਨ, ਉਥੇ ਆਪਣੀਆਂ ਇਨ੍ਹਾਂ ਲਿਖਤਾਂ ਰਾਹੀਂ ਸਮਾਜ ਵਿਚ ਬੜਾ ਕੁਝ ਚੰਗਾ ਕਰਨ ਦਾ ਯਤਨ ਵੀ ਕਰਦੇ ਰਹਿੰਦੇ ਹਨ। ਆਪਣੀਆਂ ਇਨ੍ਹਾਂ ਲਿਖਤਾਂ ਰਾਹੀਂ ਬੜੀ ਮਿਹਨਤ ਨਾਲ ਜਿਥੇ ਇਹ ਲੇਖਕ ਸਮਾਜ ਵਿਚ ਵਾਪਰ ਰਹੇ ਹਰ ਚੰਗੇ-ਮਾੜੇ ਪੱਖਾਂ ਨੂੰ ਉਜਾਗਰ ਕਰਦੇ ਹਨ, ਉਥੇ ਆਮ ਲੋਕਾਂ ਦੀਆਂ ਮੁਸ਼ਕਿਲਾਂ ਨੂੰ ਵੀ ਸਰਕਾਰਾਂ ਤੱਕ ਪਹੁੰਚਾਉਣ ਲਈ ਹਮੇਸ਼ਾ ਤਤਪਰ ਰਹਿੰਦੇ ਹਨ। ਇਸ ਤਰ੍ਹਾਂ ਲੰਮਾ ਸਮਾਂ ਆਪਣੀਆਂ ਲਿਖਤਾਂ ਰਾਹੀਂ ਸਮਾਜ ਭਲਾਈ ਦਾ ਕੰਮ ਕਰਨ ਵਾਲੇ ਅਨੇਕਾਂ ਲੇਖਕ ਕਈ ਵਾਰ ਆਪਣੀ ਪਿਛਲੀ ਉਮਰੇ ਕੰਮ ਕਰਨ ਤੋਂ ਅਸਮਰਥ ਹੋ ਜਾਣ ਕਾਰਨ ਆਪਣੀ ਕਮਜ਼ੋਰ ਹੋਈ ਆਰਥਿਕ ਸਥਿਤੀ ਵਿਚ ਆਪਣੇ ਇਸ ਸ਼ੌਕ ਨੂੰ ਸਮਾਂ ਰਹਿੰਦੇ ਹੀ ਦਫ਼ਨ ਕਰ ਬੈਠਦੇ ਹਨ। ਸੋ, ਸਰਕਾਰ ਨੂੰ ਸਮਾਜ ਦੀ ਭਲਾਈ ਵਿਚ ਅਹਿਮ ਯੋਗਦਾਨ ਪਾਉਣ ਵਾਲੇ ਇਨ੍ਹਾਂ ਲੇਖਕਾਂ ਪ੍ਰਤੀ ਵਿਸ਼ੇਸ਼ ਮਾਪਦੰਡ ਤਹਿ ਕਰਕੇ ਕੋਈ ਭੱਤਾ ਜਾਂ ਪੈਨਸ਼ਨ ਆਦਿ ਦੀ ਵਿਵਸਥਾ ਜ਼ਰੂਰ ਕਰਨੀ ਚਾਹੀਦੀ ਹੈ ਤਾਂ ਜੋ ਇਨ੍ਹਾਂ ਲੇਖਕਾਂ ਦਾ ਸ਼ੌਕ ਅਤੇ ਸਮਾਜ ਵਿਚੋਂ ਮਿਲਦਾ ਮਾਣ-ਸਤਿਕਾਰ ਜ਼ਿੰਦਗੀ ਦੇ ਆਖਰੀ ਸਾਹਾਂ ਤੱਕ ਬਰਕਰਾਰ ਰਹਿ ਸਕੇ।

-ਰਾਜਾ ਗਿੱਲ (ਚੜਿੱਕ)।

30/06/2017

 ਵਿਦਿਅਕ ਢਾਂਚੇ 'ਚ ਵਿਭਾਗੀ ਸੁਧਾਰ ਦੀ ਲੋੜ
ਉਂਜ ਸਭ ਸਰਕਾਰਾਂ ਆਪਣੇ ਰਾਜ ਕਾਲ ਦੌਰਾਨ ਵਿੱਦਿਆ, ਸਿਹਤ ਤੇ ਰੁਜ਼ਗਾਰ ਦੀਆਂ ਸਹੂਲਤਾਂ ਦੇਣ ਦਾ ਖੂਬ ਢੰਡੋਰਾ ਪਿੱਟਦੀਆਂ ਹਨ ਪਰ ਸੁਧਾਰ ਦੇ ਨਾਂਅ 'ਤੇ ਸਭ ਸਕੂਲਾਂ ਨੂੰ ਧਮਕੀ-ਨੁਮਾ ਪੱਤਰ ਜਾਂ ਸਿਆਸੀ ਲਾਰਿਆਂ ਤੋਂ ਜ਼ਿਆਦਾ ਕੁਝ ਨਹੀਂ ਹੁੰਦਾ। ਇਸ ਨਾਲੋਂ ਚੰਗਾ ਹੈ ਕਿ ਹਕੀਕਤ ਵਿਚ ਸਿੱਖਿਆ ਦੇ ਵਿਭਾਗੀ ਤੇ ਵਿਦਿਅਕ ਕੰਮਾਂ ਨੂੰ ਤਰੀਕੇ ਨਾਲ ਵੰਡਣ ਲਈ ਸਬੰਧਤ ਮਾਹਿਰਾਂ ਦੀਆਂ ਕਮੇਟੀਆਂ ਗਠਨ ਹੋਣ, ਜਿਸ ਵਿਚ ਅਧਿਆਪਕ, ਲੇਖਕ, ਯੂਨੀਵਰਸਿਟੀ ਵਿਚਲੇ ਵਿਸ਼ਾ ਮਾਹਿਰਾਂ ਦੀ ਸਲਾਹ ਨਾਲ ਸੰਜੀਦਾ ਫ਼ੈਸਲੇ ਲਏ ਜਾਣ। ਪੂਰਾ ਸਾਲ ਦੋਇਮ ਦਰਜੇ ਦੀ ਰਾਜਨੀਤੀ ਕਰਕੇ ਅੰਤ ਮਾੜੇ ਨਤੀਜਿਆਂ ਤੋਂ ਬਾਅਦ ਹੀ ਆਲੋਚਨਾ ਕਰਨਾ ਕੋਈ ਤਰੱਕੀ ਲਈ ਰਾਹ ਦਸੇਰਾ ਨਹੀਂ। ਸਕੂਲਾਂ ਵਿਚ ਅਸਾਮੀਆਂ ਖਾਲੀ ਪਈਆਂ ਹਨ, ਸਰਕਾਰ ਦੀ ਗੰਭੀਰਤਾ ਇਸ ਗੱਲ ਤੋਂ ਵੀ ਸਾਫ਼ ਦਿਖਾਈ ਦਿੰਦੀ ਹੈ ਕਿ ਠੇਕੇ 'ਤੇ ਰੱਖੇ ਅਧਿਆਪਕ ਪਿਛਲੇ 6 ਮਹੀਨਿਆਂ ਤੋਂ ਤਨਖਾਹ ਤੋਂ ਵਿਰਵੇ ਹਨ। ਅਜਿਹੀ ਵਿਗੜੀ ਆਰਥਿਕ ਦਸ਼ਾ ਵਿਚ ਜੇ ਵਿਅਕਤੀ ਆਪਣੇ ਅਧਿਆਪਨ ਦੇ ਕਿੱਤੇ 'ਤੇ ਹੀ ਨਿਰਭਰ ਹੋਵੇ, ਕਿਸ ਤਰ੍ਹਾਂ ਇਕਾਗਰਤਾ ਨਾਲ ਪੜ੍ਹਾ ਸਕੇਗਾ, ਜਦੋਂ ਕਿ ਯੂਰਪ ਅਤੇ ਅਮਰੀਕਾ ਵਰਗੇ ਦੇਸ਼ਾਂ ਵਿਚ ਸਕੂਲੀ ਅਧਿਆਪਕਾਂ ਨੂੰ ਚੰਗੀ ਤਨਖਾਹ ਦਿੱਤੀ ਜਾਂਦੀ ਹੈ ਤਾਂ ਜੋ ਉਹ ਬੱਚਿਆਂ ਨੂੰ ਬਿਨਾਂ ਕਿਸੇ ਮਾਨਸਿਕ ਤੇ ਆਰਥਿਕ ਦਬਾਅ ਤੋਂ ਚੰਗੀ ਸਿੱਖਿਆ ਦੇ ਸਕਣ। ਸਰਕਾਰ ਨੂੰ ਪੱਕੀ ਭਰਤੀ, ਸਕੂਲਾਂ ਵਿਚ ਪੂਰਾ ਸਾਜ਼ੋ-ਸਾਮਾਨ ਅਤੇ ਸਮੇਂ-ਸਮੇਂ 'ਤੇ ਬਦਲ ਰਹੇ ਪੜ੍ਹਾਉਣ ਦੇ ਤਰੀਕਿਆਂ ਲਈ ਰਿਫਰੈਸ਼ਰ ਕੋਰਸ ਆਦਿ ਦਾ ਅਧਿਆਪਕਾਂ ਲਈ ਪ੍ਰਬੰਧ ਕਰਨਾ ਚਾਹੀਦਾ ਹੈ।


-ਐਡਵੋਕੇਟ ਰਵਿੰਦਰ ਸਿੰਘ ਧਾਲੀਵਾਲ
ਪਿੰਡ ਨੱਥੂ ਮਾਜਰਾ, ਜ਼ਿਲ੍ਹਾ ਸੰਗਰੂਰ।

28/06/2017

ਬਾਬੂਆਂ 'ਤੇ ਬਾਜ਼ ਅੱਖ
ਅੱਜ ਪੰਜਾਬ ਦੇ ਬਹੁਤੇ ਸਰਕਾਰੀ ਤੇ ਗ਼ੈਰ-ਸਰਕਾਰੀ ਅਦਾਰਿਆਂ ਵਿਚ ਫੈਲ ਚੁੱਕੇ ਭ੍ਰਿਸ਼ਟਾਚਾਰ ਤੇ ਰਿਸ਼ਵਤਖੋਰੀ ਨੂੰ ਜੜੋਂ੍ਹ ਖ਼ਤਮ ਕਰਨ ਲਈ ਅਤੇ ਡਿਊਟੀ ਪ੍ਰਤੀ ਅਵੇਸਲਾਪਨ ਦਿਖਾਉਣ ਵਾਲੇ ਬਾਬੂਆਂ 'ਤੇ ਵਿਜੀਲੈਂਸ ਬਿਊਰੋ ਪੰਜਾਬ ਵੱਲੋਂ ਬਾਜ਼ ਅੱਖ ਰੱਖੀ ਜਾ ਰਹੀ ਹੈ। ਹੋਣਾਂ ਤਾਂ ਇਹ ਚਾਹੀਦਾ ਹੈ ਕਿ ਸਰਕਾਰੀ ਬਾਬੂਆਂ 'ਤੇ ਚਲਦੇ ਕੇਸ ਸੇਵਾ-ਮੁਕਤੀ ਤੋਂ ਬਾਅਦ ਵੀ ਜਾਰੀ ਰਹਿਣ।
ਭ੍ਰਿਸ਼ਟ ਕਰਮਚਾਰੀਆਂ ਦੀ ਸੰਪਤੀ ਤੱਕ ਜ਼ਬਤ ਕੀਤੀ ਜਾਵੇ। ਕਰਮਚਾਰੀਆਂ ਨਾਲ ਸਬੰਧ ਰੱਖਦਾ ਇਕ ਕਾਨੂੰਨ 1988 ਵਿਚ ਬਣਿਆ ਸੀ ਤਾਂ ਕਿ ਭ੍ਰਿਸ਼ਟ ਕਰਮਚਾਰੀਆਂ 'ਚ ਡਰ ਪੈਦਾ ਕੀਤਾ ਜਾ ਸਕੇ। ਪਰ ਬਹੁਤੀ ਥਾਈਂ ਅਜਿਹਾ ਨਹੀਂ ਹੋਇਆ। ਲਗਦਾ ਹੈ ਕਿ ਇਹ ਕਾਨੂੰਨ ਆਪਣਾ ਪ੍ਰਭਾਵ ਨਹੀਂ ਛੱਡ ਸਕਿਆ। ਅੱਜ ਇਸ ਕਾਨੂੰਨ ਵਿਚ ਸੋਧ ਕਰਨ ਦੀ ਲੋੜ ਭਾਸਦੀ ਹੈ। ਜੇਕਰ ਵਿਜੀਲੈਂਸ ਬਿਊਰੋ ਪੰਜਾਬ ਆਪਣੀ ਮੁਹਿੰਮ ਇਮਾਨਦਾਰੀ ਤੇ ਜ਼ਿੰਮੇਵਾਰੀ ਨਾਲ ਨਿਭਾਉਂਦਾ ਹੈ ਤਾਂ ਬਿਨਾਂ ਸ਼ੱਕ ਭ੍ਰਿਸ਼ਟਾਚਾਰ ਤੇ ਰਿਸ਼ਵਤਖੋਰੀ ਤੋਂ ਪੰਜਾਬੀਆਂ ਨੂੰ ਵੱਡੀ ਰਾਹਤ ਮਿਲ ਸਕਦੀ ਹੈ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ : ਘੁਡਾਣੀ ਕਲਾਂ, ਲੁਧਿਆਣਾ।

27/06/2017

 13ਵੀਂ ਤਨਖਾਹ ਸਬੰਧੀ
ਪੰਜਾਬ ਸਰਕਾਰ ਨੇ ਜੋ ਪੁਲਿਸ ਮੁਲਾਜ਼ਮ ਦਫ਼ਤਰਾਂ ਵਿਚ ਕੰਮ ਕਰਦੇ ਹਨ, ਉਨ੍ਹਾਂ ਦੀ ਤੇਹਰਵੀਂ ਤਨਖਾਹ ਬੰਦ ਕਰਨ ਦਾ ਜੋ ਫ਼ੈਸਲਾ ਲਿਆ ਹੈ, ਬਾਰੇ ਵਿਚਾਰ ਕਰਨ ਦੀ ਸਰਕਾਰ ਨੂੰ ਸੰਜੀਦਗੀ ਨਾਲ ਲੋੜ ਹੈ, ਕਿਉਂਕਿ ਪੁਲਿਸ ਦੀ ਡਿਊਟੀ 24 ਘੰਟੇ ਦੀ ਹੈ। ਸਾਰੀ ਉਮਰ ਨੌਕਰੀ ਤਣਾਅ ਵਿਚ ਹੀ ਲੰਘ ਜਾਂਦੀ ਹੈ ਤੇ ਆਪਣੇ ਬੱਚਿਆਂ ਦੀ ਵੀ ਚੰਗੀ ਤਰ੍ਹਾਂ ਸਾਂਭ ਸੰਭਾਲ ਨਹੀਂ ਹੁੰਦੀ ਅਤੇ ਨਾ ਹੀ ਉਨ੍ਹਾਂ ਦੀ ਪੜ੍ਹਾਈ ਵੱਲ ਧਿਆਨ ਦਿੱਤਾ ਜਾਂਦਾ ਹੈ। ਪੁਲਿਸ ਦੇ ਖਾਣ ਪੀਣ ਦਾ ਕੋਈ ਟਾਈਮ ਟੇਬਲ ਨਹੀਂ ਹੈ। ਸਿਖਰ ਦੁਪਹਿਰ ਵਿਚ ਪੁਲਿਸ ਮੁਲਾਜ਼ਮ ਨੂੰ ਇਕ ਲੱਤ 'ਤੇ ਖੜ੍ਹੇ ਰਹਿ ਕੇ ਅਲਰਟ ਹੋ ਕੇ ਡਿਊਟੀ ਕਰਨੀ ਪੈਂਦੀ ਹੈ ਜਦੋਂ ਕਿ ਸਿਵਲ ਦੇ ਮੁਲਾਜ਼ਮ ਏ.ਸੀ. ਕਮਰਿਆਂ ਵਿਚ ਬਹਿ ਕੇ ਨੌਂ ਤੋਂ ਪੰਜ ਡਿਊਟੀ ਕਰਦੇ ਹਨ। ਇਨ੍ਹਾਂ ਸਾਰੀਆਂ ਗੱਲਾਂ ਨੂੰ ਮੁੱਖ ਰੱਖ ਕੇ ਹੀ ਸਰਕਾਰਾਂ ਨੇ ਪੁਲਿਸ ਮੁਲਾਜ਼ਮ ਦੀ ਤੇਹਰਵੀਂ ਤਨਖਾਹ ਲਗਾਈ ਸੀ। ਇਨ੍ਹਾਂ ਦੀ ਦਫ਼ਤਰ ਤੋਂ ਡਿਊਟੀ ਤੋਂ ਬਾਅਦ ਵੀ ਅਤੇ ਐਤਵਾਰ ਵਾਲੇ ਦਿਨ ਵੀ ਅਤੇ ਗਜ਼ਟਿਡ ਛੁੱਟੀ ਵਾਲੇ ਦਿਨ ਵੀ ਵੀ.ਆਈ.ਪੀ. ਡਿਊਟੀ, ਲਾਅ ਐਂਡ ਆਰਡਰ ਡਿਊਟੀ ਅਤੇ ਐਮਰਜੈਂਸੀ ਡਿਊਟੀ ਲਗਾ ਦਿੱਤੀ ਜਾਂਦੀ ਹੈ। ਸਰਕਾਰ ਨੂੰ ਇਸ ਨੂੰ ਸੰਜੀਦਗੀ ਨਾਲ ਲੈ ਕੇ ਇਹ ਹੁਕਮ ਵਾਪਸ ਲੈਣਾ ਚਾਹੀਦਾ ਹੈ ਅਤੇ ਮੁਲਾਜ਼ਮਾਂ ਦੀ ਪਰੇਡ ਦੀ ਜਗ੍ਹਾ ਉਨ੍ਹਾਂ ਪਾਸੋਂ ਯੋਗਾ ਕਰਾਉਣਾ ਚਾਹੀਦਾ ਹੈ ਤਾਂ ਜੋ ਯੋਗਾ ਕਰਕੇ ਉਨ੍ਹਾਂ ਦਾ ਤਣਾਅ ਘਟਾਇਆ ਜਾ ਸਕੇ ਅਤੇ ਬਿਮਾਰੀਆਂ ਤੋਂ ਵੀ ਛੁਟਕਾਰਾ ਦਿਵਾਇਆ ਜਾ ਸਕੇ।

ਗੁਰਮੀਤ ਸਿੰਘ ਵੇਰਕਾ।

26/06/2017

 ਸਿੱਖਿਆ ਪ੍ਰਣਾਲੀ 'ਚ ਨਿਘਾਰ
ਸਭ ਤੋਂ ਅਹਿਮ ਜ਼ਰੂਰਤ ਸਿੱਖਿਆ ਅਧਿਕਾਰ ਐਕਟ ਦੀਆਂ ਦੋਸ਼ਪੂਰਨ ਧਾਰਾਵਾਂ ਦਾ ਮੰਥਨ ਕਰਕੇ, ਉਨ੍ਹਾਂ ਨੂੰ ਸੋਧਣਾ ਹੈ। ਅਜਿਹੇ ਬੱਚੇ ਵੀ ਅੱਠਵੀਂ ਪਾਸ ਕਰਨ ਦਾ ਪ੍ਰਮਾਣ ਪੱਤਰ ਲਈ ਫਿਰਦੇ ਹਨ, ਜਿਨ੍ਹਾਂ ਨੂੰ ਪੰਜਾਬੀ ਵਿਚ ਸਧਾਰਨ ਅਰਜ਼ੀ ਨਹੀਂ ਲਿਖਣੀ ਆਉਂਦੀ ਅਤੇ ਨਾ ਹੀ ਗਣਿਤ ਦੀ ਮੁਢਲੀ ਜੋੜ-ਘਟਾਓ ਆਉਂਦੀ ਹੈ। ਇਸ ਐਕਟ ਰਾਹੀਂ ਸਿਰਫ਼ ਬੱਚਿਆਂ ਦੀ ਗਿਣਤੀ ਹੀ ਸਕੂਲਾਂ 'ਚ ਵਧਾ ਕੇ ਦਰਸਾਈ ਜਾ ਸਕਦੀ ਹੈ। ਇਸ ਪ੍ਰਤੀ ਨਾ ਸਾਡਾ ਸਮਾਜ ਅਤੇ ਨਾ ਹੀ ਸਰਕਾਰ ਸੰਜੀਦਾ ਹੈ। ਆਖਰ ਕਦੋਂ ਤੱਕ ਅਸੀਂ ਥੁੱਕੀਂ ਵੜੇ ਪਕਾ ਕੇ ਗ਼ਰੀਬ ਪਰਿਵਾਰਾਂ ਦੇ ਬੱਚਿਆਂ ਦੇ ਭਵਿੱਖ ਨਾਲ ਖਿਲਵਾੜ ਕਰਦੇ ਰਹਾਂਗੇ।

ਪ੍ਰਿੰ: ਭੁਪਿੰਦਰ ਸਿੰਘ ਢਿੱਲੋਂ
ਦੀਪਗੜ੍ਹ (ਬਰਨਾਲਾ)।

ਅਨਪੜ੍ਹ ਸਾਥੋਂ ਚੰਗੇ
ਪੰਜਾਬ 'ਚ ਜਿੰਨੇ ਲੋਕ ਵੱਧ ਪੜ੍ਹ-ਲਿਖ ਰਹੇ ਹਨ, ਉਨੇ ਹੀ ਵੱਡੀ ਪੱਧਰ 'ਤੇ ਲੋਕਾਂ ਦੀ ਸਿਆਣਪ 'ਤੇ ਠੂਠਾ ਮੂਧਾ ਵੱਜਦਾ ਨਜ਼ਰ ਆ ਰਿਹਾ ਹੈ। ਸਹਿਣ-ਸ਼ਕਤੀ ਘੱਟ ਹੋਣ ਕਰਕੇ ਲੋਕਾਂ 'ਚ ਆਪਸੀ ਹੋ ਰਹੇ ਲੜਾਈ-ਝਗੜਿਆਂ ਦੀ ਗੱਲ ਥਾਣੇ ਤੋਂ ਕਚਹਿਰੀਆਂ ਤੱਕ ਪੁੱਜਣਾ ਆਮ ਗੱਲ ਬਣਦੀ ਜਾ ਰਹੀ ਹੈ। ਦੂਸਰੇ ਪਾਸੇ ਪੰਜਾਬ ਵਿਚ ਉਹ ਜਮਾਂਦਰੂ ਅਨਪੜ੍ਹ ਲੋਕ ਵੀ ਵਸਦੇ ਹਨ, ਜਿਨ੍ਹਾਂ ਨੇ ਥਾਣੇ-ਕਚਹਿਰੀ ਦਾ ਮੂੰਹ ਤੱਕ ਨਹੀਂ ਦੇਖਿਆ। ਇਹ ਲੋਕ ਹਨ ਗੱਡੀਆਂ ਵਾਲੇ ਵਣਜਾਰੇ, ਜੋ ਹਾੜ੍ਹੀ-ਸਾਉਣੀ ਦੇ ਸਮੇਂ 'ਚ ਪਿੰਡਾਂ ਦੀਆਂ ਸਾਂਝੀਆਂ ਥਾਵਾਂ 'ਤੇ ਬੈਠ ਕੇ ਕਿਸਾਨਾਂ ਨੂੰ ਹੱਥੀਂ ਕੰਮ ਕਰਨ ਵਾਲੇ ਔਜਾਰ ਆਦਿ ਬਣਾ ਕੇ ਦਿੰਦੇ ਹਨ। ਇਹ ਲੋਕ ਦੱਸਦੇ ਹਨ ਕਿ ਇਨ੍ਹਾਂ ਦੇ ਪੁਰਖਿਆਂ ਤੋਂ ਲੈ ਕੇ ਅੱਜ ਤੱਕ ਕਬੀਲੇ ਦੇ ਲੋਕਾਂ ਨੇ ਕਦੇ ਥਾਣੇ-ਕਚਹਿਰੀ ਦਾ ਮੂੰਹ ਤੱਕ ਨਹੀਂ ਵੇਖਿਆ। ਪੰਚਾਇਤ ਦੇ ਕੀਤੇ ਫ਼ੈਸਲੇ ਨੂੰ ਕਬੀਲੇ ਦੇ ਲੋਕ ਖਿੜੇ ਮੱਥੇ ਪ੍ਰਵਾਨ ਕਰ ਲੈਂਦੇ ਹਨ।
ਪਿਛਲੇ ਦਿਨੀਂ 'ਅਜੀਤ' ਵਿਚ ਇਹ ਜਾਣਕਾਰੀ ਪੜ੍ਹ ਕੇ ਸਾਡੇ ਪੜ੍ਹੇ-ਲਿਖੇ ਵਰਗ ਨੂੰ ਸੋਚਣਾ ਚਾਹੀਦਾ ਹੈ ਕਿ ਅਸੀਂ ਵਿਕਸਿਤ, ਖੁਸ਼ਹਾਲ, ਗਿਆਨ ਰੂਪੀ ਤੀਜੀ ਅੱਖ ਦੇ ਮਾਲਕ ਪੰਜਾਬ ਵਾਸੀ ਇਨ੍ਹਾਂ ਕਦਬੁੱਤ ਵਾਲੇ ਅਨਪੜ੍ਹ ਲੋਕਾਂ ਸਾਹਮਣੇ ਕਿੰਨੇ ਬੌਣੇ ਹਾਂ।

-ਪ੍ਰਿੰ: ਗੁਰਬਚਨ ਸਿੰਘ ਲਾਲੀ
ਪੀ.ਈ.ਐਸ.-ਏ, ਲੇਖਕ ਮੰਚ ਪੱਟੀ।

ਨਾਨਕੇ ਪਿੰਡ ਦਾ ਚਾਅ
ਪਿਛਲੇ ਦਿਨੀਂ 'ਅਜੀਤ' ਦੇ ਲੋਕ ਮੰਚ 'ਚ ਰਾਜਾ ਗਿੱਲ ਦਾ ਲੇਖ 'ਅਲੋਪ ਹੋ ਰਿਹਾ ਛੁੱਟੀਆਂ 'ਚ ਨਾਨਕੇ ਪਿੰਡ ਜਾਣ ਦਾ ਚਾਅ' ਬੇਹੱਦ ਪਸੰਦ ਆਇਆ। ਭਾਵੇਂ ਲੇਖਕ ਨੇ ਕੇਵਲ ਆਪਣੀ ਹੱਡਬੀਤੀ ਦੱਸੀ ਪਰ ਇੰਜ ਲੱਗਦਾ ਸੀ ਜਿਵੇਂ ਉਹ ਮੇਰੀ ਗੱਲ ਕਰਦੇ ਹੋਣ। ਬਿਲਕੁਲ ਸਚਾਈ ਹੈ ਇਹੀ ਜੇ ਮੌਜੂਦਾ ਦੌਰ ਦੀ ਗੱਲ ਕਰੀਏ ਸੰਚਾਰ ਦੇ ਸਾਧਨਾਂ ਮੋਬਾਈਲਾਂ ਆਦਿ ਨੇ ਸਾਡੇ ਸਾਰੇ ਨਜ਼ਦੀਕੀ ਤੋਂ ਨਜ਼ਦੀਕੀ ਰਿਸ਼ਤਿਆਂ ਨੂੰ ਪੂਰੀ ਤਰ੍ਹਾਂ ਬਦਲ ਕੇ ਰੱਖ ਦਿੱਤਾ ਹੈ। ਇਹ ਸਾਰਾ ਕੁਝ ਉਂਜ ਦੋ ਕੁ ਦਹਾਕਿਆਂ ਤੋਂ ਹੀ ਸ਼ੁਰੂ ਹੋਇਆ ਹੈ। ਪਹਿਲਾਂ ਅਜਿਹਾ ਨਹੀਂ ਸੀ ਹੁੰਦਾ, ਪਹਿਲਾਂ ਸਾਰੇ ਰਿਸ਼ਤਿਆਂ ਵਿਚ ਹੀ ਖਿੱਚ ਹੁੰਦੀ ਸੀ। ਖਾਸ ਕਰਕੇ ਛੁੱਟੀਆਂ ਹੋਣ ਤੋਂ ਪਹਿਲਾਂ ਹੀ ਨਾਨਕੇ ਜਾਣ ਦੀਆਂ ਤਿਆਰੀਆਂ ਸ਼ੁਰੂ ਹੋ ਜਾਂਦੀਆਂ ਸਨ। ਉਦੋਂ ਟੈਲੀਫੋਨ ਆਦਿ ਕੋਈ ਸਾਧਨ ਨਹੀਂ ਹੁੰਦੇ ਸਨ। ਚਿੱਠੀਆਂ-ਪੱਤਰਾਂ ਰਾਹੀਂ ਸਾਰਾ ਕੁਝ ਹੋਣਾ। ਵਾਕਿਆ ਹੀ ਉਹ ਦਿਨ ਬੜੇ ਪਿਆਰੇ ਸਨ। ਆਧੁਨਿਕ ਸੰਚਾਰ ਸਾਧਨ ਬੇਸ਼ੱਕ ਅੱਜ ਦੇ ਦੌਰ 'ਚ ਬਹੁਤ ਜ਼ਰੂਰੀ ਹਨ ਪ੍ਰੰਤੂ ਇਨ੍ਹਾਂ ਦੇ ਚਲਦਿਆਂ ਸਾਰੇ ਰਿਸ਼ਤਿਆਂ 'ਚ ਮਿਠਾਸ ਵੀ ਬਣੀ ਰਹਿਣੀ ਜ਼ਰੂਰੀ ਹੈ।

-ਮਾ: ਦੇਵ ਰਾਜ ਖੁੰਡਾ
ਰਾਮ ਸ਼ਰਨਮ ਕਾਲੋਨੀ, ਗੁਰਦਾਸਪੁਰ।

22/06/2017

 ਪੱਤਰਸਿੱਖੀ ਦੇ ਅਸੂਲ...
ਸ: ਤਰਲੋਚਨ ਸਿੰਘ ਦਾ ਲੇਖ 'ਪੰਜਾਬ ਵਿਚ ਅਮਨ ਕਿਸੇ ਇਕ ਪੁਲਿਸ ਅਫ਼ਸਰ ਦੀ ਦੇਣ ਨਹੀਂ' ਪ੍ਰਕਾਸ਼ਿਤ ਹੋਇਆ। ਕੇ.ਪੀ.ਐਸ. ਗਿੱਲ 1988-90 ਵਿਚ ਪੰਜਾਬ ਦਾ ਡਾਇਰੈਕਟਰ ਜਨਰਲ ਰਿਹਾ ਪ੍ਰੰਤੂ ਸ਼ਾਂਤੀ ਨਹੀਂ ਲਿਆ ਸਕਿਆ। ਇਸ ਵਿਚ ਕੋਈ ਸ਼ੱਕ ਨਹੀਂ ਕਿ ਉਹ ਕਾਬਲ ਪ੍ਰਬੰਧਕ ਸੀ। ਸ਼ਾਂਤੀ ਚੁਣੀ ਹੋਈ ਸਰਕਾਰ ਦੇ ਆਉਣ ਤੋਂ ਬਾਅਦ ਆਈ ਹੈ। ਲੇਖ ਵਿਚ ਲਿਖਿਆ ਗਿਆ ਹੈ ਪੰਜਾਬ ਦੇ ਹਾਲਾਤ ਬਲਿਊ ਸਟਾਰ ਅਪ੍ਰੇਸ਼ਨ ਤੋਂ ਬਾਅਦ ਵਿਗੜੇ ਸਨ, ਕਿਉਂਕਿ ਪੰਜਾਬੀਆਂ ਦੀਆਂ ਭਾਵਨਾਵਾਂ ਜ਼ਖ਼ਮੀ ਹੋਈਆਂ ਸਨ। ਜਿਹੜੀ ਗੱਲ ਲੇਖ ਵਿਚ ਗਿੱਲ ਨੂੰ ਪੱਕਾ ਸਿੱਖ ਹੋਣ ਬਾਰੇ ਲਿਖੀ ਹੈ, ਮੈਂ ਉਸ ਨਾਲ ਸਹਿਮਤ ਨਹੀਂ। ਦਾੜ੍ਹੀ ਰੱਖਣਾ ਸਿੱਖੀ ਨਹੀਂ ਪ੍ਰੰਤੂ ਸਿੱਖੀ ਦੇ ਅਸੂਲਾਂ ਤੇ ਚਲਣਾ ਸਿੱਖੀ ਹੈ। ਉਂਜ ਤਰਲੋਚਨ ਸਿੰਘ ਨੇ ਦਲੇਰੀ ਕਰਕੇ ਸਚਾਈ ਸਾਹਮਣੇ ਲਿਆਉਣ ਦੀ ਕੋਸ਼ਿਸ਼ ਕੀਤੀ ਹੈ, ਚੰਗੀ ਗੱਲ ਹੈ।


-ਉਜਾਗਰ ਸਿੰਘ
ਪਟਿਆਲਾ।


ਕਿਸਾਨ ਤੇ ਪਾਣੀ
ਕਰੀਬ 1970 ਵਿਚ ਪੰਜਾਬ ਦਾ ਕਿਸਾਨ ਟਿਊਬਵੈੱਲ ਇੰਜਣ ਨਾਲ ਸਿੰਚਾਈ ਕਰਨ ਲੱਗਿਆ ਸੀ। ਉਸ ਸਮੇਂ ਪਾਣੀ ਦਾ ਪੱਧਰ ਕਾਫੀ ਉੱਚਾ ਸੀ। ਪਰ ਹੁਣ ਸਥਿਤੀ ਏਨੀ ਵਿਗੜ ਚੁੱਕੀ ਹੈ ਕਿ 50-100 ਫੁੱਟ ਤੱਕ ਵੀ ਸਾਫ਼ ਪਾਣੀ ਨਹੀਂ ਮਿਲਦਾ। ਲੋੜ ਹੈ ਕਿ ਕਿਸਾਨ ਵੀਰ ਬਦਲ ਰਹੇ ਹਾਲਾਤ ਨੂੰ ਸਮਝਣ ਅਤੇ ਪਾਣੀ ਬਚਾਉਣ ਲਈ ਉਪਰਾਲੇ ਕਰਨ। ਜਿਵੇਂ ਕਿ ਜ਼ਿਆਦਾ ਤੋਂ ਜ਼ਿਆਦਾ ਵਰਤੋਂ ਨਹਿਰੀ ਪਾਣੀ ਦੀ ਕੀਤੀ ਜਾਵੇ। ਪਿੰਡਾਂ ਦੇ ਛੱਪੜ, ਟੋਬੇ ਆਦਿ ਸਾਫ਼ ਕੀਤੇ ਜਾਣੇ ਚਾਹੀਦੇ ਹਨ ਤਾਂ ਜੋ ਮੀਂਹ ਦਾ ਜ਼ਿਆਦਾ ਪਾਣੀ ਇਨ੍ਹਾਂ ਵਿਚ ਇਕੱਠਾ ਕੀਤਾ ਜਾ ਸਕੇ। ਝੋਨੇ ਹੇਠਲਾ ਰਕਬਾ ਘੱਟ ਕਰਕੇ ਹੋਰ ਫ਼ਸਲਾਂ ਦੀ ਬਿਜਾਈ ਕਰਨੀ ਚਾਹੀਦੀ ਹੈ। ਅੱਜ ਲੋੜ ਹੈ ਕਿ ਅਨਮੋਲ ਰਤਨ ਪਾਣੀ ਨੂੰ ਬਚਾਉਣ ਲਈ ਵੱਧ ਤੋਂ ਵੱਧ ਉਪਰਾਲੇ ਕਰੀਏ।


-ਪਰਮਜੀਤ ਸਿੰਘ ਬੁੱਟਰ
ਪਿੰਡ ਕੋਟਲਾ ਖੁਰਦ, ਗੁਰਦਾਸਪੁਰ।


ਨਿੰਦਣਯੋਗ ਘਟਨਾ
ਇਕ ਔਰਤ ਪੁਲਿਸ ਮੁਲਾਜ਼ਮ ਅਮਨਪ੍ਰੀਤ ਕੌਰ ਵੱਲੋਂ ਖ਼ਦਕੁਸ਼ੀ ਕਰ ਲੈਣੀ ਇਕ ਬਹੁਤ ਹੀ ਨਿੰਦਣਯੋਗ ਘਟਨਾ ਹੈ। ਸਾਡੇ ਦੇਸ਼ ਵਿਚ ਅਜਿਹੇ ਕਈ ਦਰਿੰਦੇ ਪੈਦਾ ਹੋ ਗਏ ਹਨ, ਜੋ ਆਪਣੇ ਦਫ਼ਤਰ ਵਿਚ ਕੰਮ ਕਰਦੀ ਔਰਤ ਨੂੰ ਆਪਣੇ ਚੁੰਗਲ ਵਿਚ ਫਸਾਉਣ ਲਈ ਸਦਾ ਤੰਗ-ਪ੍ਰੇਸ਼ਾਨ ਕਰਦੇ ਰਹਿੰਦੇ ਹਨ। ਪੁਲਿਸ ਮੁਲਾਜ਼ਮਾਂ ਵੱਲੋਂ ਅਜਿਹੀ ਹਰਕਤ ਕਰਨ ਨਾਲ ਹੁਣ ਲੋਕਾਂ ਦਾ ਪੁਲਿਸ ਤੋਂ ਵਿਸ਼ਵਾਸ ਉੱਠ ਜਾਵੇਗਾ ਤੇ ਹੁਣ ਮਾਪੇ ਆਪਣੀਆਂ ਕੁੜੀਆਂ ਨੂੰ ਪੁਲਿਸ ਵਿਚ ਭਰਤੀ ਕਰਵਾਉਣ ਤੋਂ ਵੀ ਡਰਨਗੇ। ਕਲੰਕਤ ਹੋ ਚੁੱਕੇ ਪੁਲਿਸ ਪ੍ਰਸ਼ਾਸਨ ਨੂੰ ਬਚਾਉਣ ਲਈ ਸਰਕਾਰ ਨੂੰ ਬਿਨਾਂ ਦੇਰੀ ਕੀਤਿਆਂ ਅਜਿਹੇ ਵਿਅਕਤੀਆਂ ਨੂੰ ਫਾਂਸੀ ਦੀ ਸਜ਼ਾ ਦੇਣੀ ਚਾਹੀਦੀ ਹੈ ਤਾਂ ਕਿ ਆਉਣ ਵਾਲੇ ਸਮੇਂ ਵਿਚ ਕੋਈ ਵੀ ਵਿਅਕਤੀ ਅਜਿਹੀ ਹਰਕਤ ਕਰਨ ਦੀ ਜੁਰਅਤ ਨਾ ਕਰੇ।


-ਸ਼ਮਸ਼ੇਰ ਸਿੰਘ ਸੋਹੀ
ਪਿੰਡ ਸੋਹੀਆਂ, ਡਾਕ: ਚੀਮਾਂ ਖੁੱਡੀ
ਜ਼ਿਲ੍ਹਾ ਗੁਰਦਾਸਪੁਰ।

20/06/2017

 ਵਧ ਰਹੇ ਗੈਂਗਰੇਪ ਦੇ ਮਾਮਲੇ

ਅੱਜਕਲ੍ਹ ਸਾਡੇ ਭਾਰਤ ਦੇਸ਼ ਦੇ ਹਰੇਕ ਰਾਜ ਵਿਚ ਔਰਤਾਂ ਨਾਲ ਜ਼ਿਆਦਤੀਆਂ ਦਿਨੋ-ਦਿਨ ਵਧ ਰਹੀਆਂ ਹਨ। ਉਨ੍ਹਾਂ ਨਾਲ ਗੈਂਗਰੇਪ ਵਰਗੇ ਘਟੀਆ ਕਰਮ ਕੀਤੇ ਜਾ ਰਹੇ ਹਨ ਜੋ ਕਿ ਸਮੁੱਚੀ ਮਾਨਵਤਾ ਦੇ ਹਿਰਦਿਆਂ ਨੂੰ ਵਲੂੰਧਰਦੇ ਹਨ। ਅਜਿਹੀਆਂ ਘਟਨਾਵਾਂ ਵਾਪਰਨ ਕਾਰਨ ਹਰੇਕ ਮਾਂ-ਪਿਓ ਆਪਣੀ ਧੀ ਦੀ ਰੱਖਿਆ ਪ੍ਰਤੀ ਮੂੰਹ ਵਿਚ ਉਂਗਲ ਪਾ ਕੇ ਸੋਚਣ ਲਈ ਮਜਬੂਰ ਹੋ ਜਾਂਦਾ ਹੈ। ਸਭ ਤੋਂ ਵੱਧ ਸਰਕਾਰ ਦੀ ਹੀ ਜ਼ਿੰਮੇਵਾਰੀ ਬਣਦੀ ਹੈ ਕਿ ਅਜਿਹੇ ਮਾਨਵਤਾ ਦੇ ਦੋਸ਼ੀਆਂ ਨੂੰ ਕਰੜੀ ਤੋਂ ਕਰੜੀ ਸਜ਼ਾ ਦਿੱਤੀ ਜਾਵੇ ਤਾਂ ਹੀ ਅੱਜ ਦੀ ਬਾਲੜੀ ਅਤੇ ਅੱਜ ਦੀ ਨਾਰੀ ਆਪਣੇ-ਆਪ ਨੂੰ ਕੁਝ ਸੁਰੱਖਿਅਤ ਮਹਿਸੂਸ ਕਰ ਸਕਦੀ ਹੈ ਅਤੇ ਖੁੱਲ੍ਹ ਕੇ ਪੂਰੀ ਈਮਾਨਦਾਰੀ ਨਾਲ ਦੇਸ਼ ਪ੍ਰਤੀ ਆਪਣੇ ਫ਼ਰਜ਼ ਨਿਭਾਉਣ ਦੇ ਸਮਰੱਥ ਹੋ ਸਕਦੀ ਹੈ।

-ਜਸਪ੍ਰੀਤ ਕੌਰ ਸ਼ੰਕਰ
ਲੁਧਿਆਣਾ।

ਘਟ ਰਿਹਾ ਮੋਹ-ਪਿਆਰ

ਨਰੋਈਆਂ ਕਦਰਾਂ-ਕੀਮਤਾਂ ਹੀ ਸਮਾਜ ਨੂੰ ਆਪਸ ਵਿਚ ਜੋੜੀ ਰੱਖਦੀਆਂ ਹਨ। ਅੱਜ ਜੇ ਸਾਡਾ ਸਮਾਜ ਕਈ ਤਰ੍ਹਾਂ ਦੀਆਂ ਮੁਸ਼ਕਿਲਾਂ ਜਾਂ ਉਲਝਣਾਂ ਵਿਚ ਘਿਰ ਰਿਹਾ ਹੈ ਤਾਂ ਸਾਨੂੰ ਇਸ ਬਾਰੇ ਜ਼ਰੂਰ ਸੋਚਣਾ ਪਵੇਗਾ। ਕਹਿਣ ਨੂੰ ਤਾਂ ਪਿੰਡਾਂ ਵਿਚ ਵੀ ਸ਼ਹਿਰਾਂ ਵਾਲੀਆਂ ਸਹੂਲਤਾਂ ਮਿਲ ਰਹੀਆਂ ਹਨ ਪਰ ਫਿਰ ਵੀ ਦਿਮਾਗੀ ਸਕੂਨ ਨਹੀਂ ਮਿਲ ਰਿਹਾ। ਕੀ ਕਦੀ ਸੋਚਿਆ ਹੈ ਕਿ ਅਜਿਹਾ ਕਿਉਂ ਹੋ ਰਿਹਾ ਹੈ। ਕਿਉਂ ਅਸੀਂ ਆਪਸੀ ਰਿਸ਼ਤਿਆਂ ਵੱਲ ਪਿੱਠ ਕਰ ਲਈ ਹੈ। ਦਰਅਸਲ ਪਦਾਰਥਵਾਦੀ ਸੋਚ ਨੇ ਹਰ ਇਕ ਨੂੰ ਘੇਰ ਲਿਆ ਹੈ। 'ਕੀ ਕਰੀਏ ਵਿਹਲ ਹੀ ਨਹੀਂ ਮਿਲਦਾ' ਅਕਸਰ ਇਹ ਸ਼ਬਦ ਹੀ ਇਕ ਦੂਜੇ ਤੋਂ ਸੁਣਨ ਨੂੰ ਮਿਲਦੇ ਹਨ। ਕੋਈ ਸਮਾਂ ਸੀ ਜਦੋਂ ਅਸੀਂ ਆਪਣੇ ਦੁੱਖ-ਸੁੱਖ ਆਪਸ ਵਿਚ ਵੰਡ ਲੈਂਦੇ ਸਾਂ। ਵੱਡੀਆਂ-ਵੱਡੀਆਂ ਸਮੱਸਿਆਵਾਂ ਦਾ ਵੀ ਮਿਲ-ਬੈਠ ਕੇ ਹੱਲ ਕੱਢ ਲਿਆ ਜਾਂਦਾ ਸੀ। ਅੱਜ ਛੋਟੀ ਜਿਹੀ ਗੱਲ ਵੀ ਮੁਸੀਬਤ ਬਣ ਜਾਂਦੀ ਹੈ, ਕਿਉਂਕਿ ਅਸੀਂ ਇਕੱਲਤਾ ਆਪਣੇ ਗਲ ਪਾ ਲਈ ਹੈ। ਹਉਕੇ ਲੈਣਾ ਸਿੱਖ ਲਿਆ ਹੈ। ਕਈ ਵਾਰ ਸੋਚਦਾ ਹਾਂ ਕਿ ਹਮੇਸ਼ਾ ਦੁੱਖ-ਸੁਖ ਵਿਚ ਚੜ੍ਹਦੀ ਕਲਾ ਵਿਚ ਰਹਿਣ ਵਾਲਿਆਂ ਦੇ ਚਿਹਰਿਆਂ ਨੂੰ ਕਿਹੜਾ ਗ੍ਰਹਿਣ ਲੱਗ ਗਿਆ ਹੈ। ਅੱਜ ਦੇ ਸਮੇਂ 'ਚ ਆਪਸੀ ਪਿਆਰ ਹੀ ਸਮਾਜ ਨੂੰ ਜੋੜ ਕੇ ਰੱਖ ਸਕਦਾ ਹੈ।

-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।

ਕੁਰਾਹੇ ਪਾ ਰਹੀ ਗਾਇਕੀ

ਪਿਛਲੇ ਕਾਫੀ ਸਮੇਂ ਤੋਂ ਪੰਜਾਬੀ ਗਾਇਕੀ ਅੰਦਰ ਲੱਚਰਤਾ ਤੇ ਨੰਗੇਜ ਵਾਲੀ ਘਟੀਆ ਗਾਇਕੀ ਆਰੰਭ ਹੋ ਚੁੱਕੀ ਹੈ। ਪਰ ਹੁਣ ਜਾਣਬੁੱਝ ਕੇ ਪੰਜਾਬੀ ਗੀਤਾਂ ਦੀਆਂ ਵੀਡੀਓ ਦੇ ਫਿਲਮਾਂਕਣ ਦੇ ਰੂਪ ਵਿਚ ਇਹ ਸਭ ਕੁਝ ਧੜੱਲੇ ਨਾਲ ਵਿਖਾਇਆ ਵੀ ਜਾ ਰਿਹਾ ਹੈ। ਕਈ ਗੀਤਾਂ 'ਤੇ ਤਾਂ ਸਿੱਧੀ ਹੀ ਉਂਗਲ ਉੱਠ ਰਹੀ ਹੈ। ਪਰ ਅਜਿਹੇ ਗਾਇਕ ਕਹਿ ਰਹੇ ਹਨ ਕਿ ਪੰਜਾਬੀ ਬੋਲੀ ਤੇ ਸੰਗੀਤ ਦੀ ਸੇਵਾ ਕਰ ਰਹੇ ਹਾਂ, ਅਸੀਂ ਜ਼ਮੀਰ ਮਾਰ ਕੇ ਇਹ ਸਭ ਕੁਝ ਸੁਣੀ ਵੀ ਜਾ ਰਹੇ ਹਾਂ। ਪੰਜਾਬ ਦੀ ਜਵਾਨੀ ਕਾਫੀ ਹੱਦ ਤੱਕ ਪੰਜਾਬੀ ਗੀਤਾਂ ਨੇ ਕੁਰਾਹੇ ਪਾ ਦਿੱਤੀ ਹੈ। ਅੱਜ ਧੜਾਧੜ ਚੱਲ ਰਹੇ ਲੱਚਰ ਗੀਤ ਬੰਦ ਕੀਤੇ ਜਾਣੇ ਚਾਹੀਦੇ ਹਨ। ਸਾਨੂੰ ਚਾਹੀਦਾ ਹੈ ਕਿ ਸਹੀ ਤੇ ਸਮਝਦਾਰ ਸਰੋਤੇ-ਦਰਸ਼ਕ ਬਣ ਕੇ ਘਟੀਆ ਤੇ ਲਚਰ ਗੀਤਾਂ ਨੂੰ ਨਾ ਪਸੰਦ ਕਰੀਏ।

-ਬਲਬੀਰ ਸਿੰਘ ਬੱਬੀ
ਪਿੰਡ ਤੱਖਰਾਂ (ਲੁਧਿਆਣਾ)।

16/06/2017

 ਕਿਸਾਨ ਦੀ ਤਰਾਸਦੀ
ਦੇਸ਼ ਦਾ ਅੰਨਦਾਤਾ ਕਿਸਾਨ ਗੰਭੀਰ ਸੰਕਟ ਵਿਚੋਂ ਲੰਘ ਰਿਹਾ ਹੈ। ਵੱਡਾ ਵੋਟ ਬੈਂਕ ਹੋਣ ਕਾਰਨ ਸਾਰੇ ਸਿਆਸੀ ਦਲਾਂ ਨੇ ਇਸ ਵਰਗ ਨੂੰ ਚੋਣਾਂ ਮੌਕੇ ਖੂਬ ਸਬਜ਼ਬਾਗ ਦਿਖਾਏ ਹਨ। ਰੋਜ਼ਾਨਾ ਅਖ਼ਬਾਰਾਂ ਦੀਆਂ ਸੁਰਖੀਆਂ ਬਣਦੀਆਂ ਕਿਸਾਨਾਂ ਦੀਆਂ ਖ਼ੁਦਕੁਸ਼ੀਆਂ ਸਰਕਾਰਾਂ ਦੀ ਗ਼ੈਰ-ਸੰਜੀਦਗੀ ਅਤੇ ਸਹੀ ਸੇਧ ਦੀ ਘਾਟ ਦਾ ਭਾਂਡਾ ਚੌਰਾਹੇ 'ਚ ਭੰਨ ਰਹੀਆਂ ਹਨ। ਕਿਸੇ ਵੀ ਸਿਆਸੀ ਦਲ ਨੇ ਕਰਜ਼ੇ ਦੀ ਪੰਡ ਦੇ ਕਾਰਨਾਂ ਦਾ ਵਿਸ਼ਲੇਸ਼ਣ ਕਰਨ ਅਤੇ ਇਸ ਨੂੰ ਹੌਲੀ ਕਰਨ ਦਾ ਪੈਗ਼ਾਮ ਦੇਣ ਦੀ ਜ਼ਹਿਮਤ ਨਹੀਂ ਉਠਾਈ। ਕਿਸੇ ਪਾਸੇ ਤੋਂ ਇਸ ਦਾ ਠੋਸ ਹੱਲ ਕੱਢਣ ਦੇ ਸੰਜੀਦਾ ਯਤਨਾਂ ਦੀ ਸੂਹ ਨਹੀਂ ਮਿਲ ਰਹੀ। ਜੇ ਕਿਸਾਨ ਨਾ ਰਿਹਾ ਤਾਂ ਸਮਾਜ ਦੀ ਰੀੜ੍ਹ ਦੀ ਹੱਡੀ ਟੁੱਟ ਜਾਏਗੀ। ਫਿਰ ਸਮਾਜਿਕ ਅਰਾਜਕਤਾ ਦੀ ਪੈਦਾਇਸ਼ ਨੂੰ ਰੋਕ ਸਕਣਾ ਸਰਕਾਰਾਂ ਦੇ ਵੱਸ ਵਿਚ ਨਹੀਂ ਰਹਿਣਾ।


-ਪ੍ਰਿੰਸੀਪਲ ਭੁਪਿੰਦਰ ਸਿੰਘ ਢਿੱਲੋਂ
ਪਿੰਡ ਦੀਪਗੜ੍ਹ (ਬਰਨਾਲਾ)।


ਮਾਂ-ਬੋਲੀ ਹੋਈ ਦਰਕਿਨਾਰ
ਪੰਜਾਬ ਵਿਚ ਸਰਕਾਰੀ ਵਕੀਲਾਂ ਦੀ ਭਰਤੀ ਵਿਚ 'ਪੰਜਾਬੀ ਲਾਜ਼ਮੀ' ਦੀ ਸ਼ਰਤ ਖ਼ਤਮ ਦੀ ਖ਼ਬਰ ਪੜ੍ਹੀ। ਪਿਛਲੀ ਸਰਕਾਰ ਵੱਲੋਂ ਪੰਜਾਬ ਵਿਚ ਹਰ ਮਹਿਕਮੇ 'ਚ ਪੰਜਾਬੀ ਲਾਗੂ ਕਰਕੇ ਪੰਜਾਬੀ ਮਾਂ ਬੋਲੀ ਨੂੰ ਉੱਚਾ ਦਰਜਾ ਦਿੱਤਾ ਗਿਆ ਸੀ। ਬਾਹਰਲੇ ਦੇਸ਼ਾਂ ਵਿਚ ਕਿਸੇ ਭਾਰਤੀ 'ਤੇ ਕੇਸ ਅਦਾਲਤ ਵਿਚ ਚਲਦਾ ਹੈ ਤਾਂ ਉਸ ਨੂੰ ਆਪਣੀ ਮਾਤ ਭਾਸ਼ਾ ਵਿਚ ਗੱਲ ਕਰਨ ਦਾ ਮੌਕਾ ਦਿੱਤਾ ਜਾਂਦਾ ਹੈ। ਪਿੰਡਾਂ ਦੇ ਬਹੁਤੇ ਲੋਕ ਘੱਟ ਹੀ ਪੜ੍ਹੇ-ਲਿਖੇ ਹੁੰਦੇ ਹਨ ਪਰ ਉਨ੍ਹਾਂ ਦੇ ਜ਼ਿਆਦਾ ਕੇਸ ਅਦਾਲਤਾਂ ਵਿਚ ਚਲ ਰਹੇ ਹਨ। ਕੋਈ ਵਿਅਕਤੀ ਵਕੀਲਾਂ ਵੱਲੋਂ ਅਦਾਲਤ ਵਿਚ ਕੋਈ ਪਟੀਸ਼ਨ ਦਾਇਰ ਕਰਦਾ ਹੈ ਤਾਂ ਉਸ ਨੂੰ ਬਿਆਨ ਦੀ ਕਾਪੀ ਅੰਗੇਰਜ਼ੀ 'ਚ ਜਦ ਮਿਲੇਗੀ ਤਾਂ ਉਹ ਕਿਵੇਂ ਪੜ੍ਹੇਗਾ। ਮਾਣਯੋਗ ਅਦਾਲਤ ਵਿਚ ਹਰ ਭਾਸ਼ਾ ਦਾ ਸਤਿਕਾਰ ਹੋਣਾ ਚਾਹੀਦਾ ਹੈ। ਪੰਜਾਬੀ ਲੇਖਕ ਪੰਜਾਬੀ ਮਾਂ-ਬੋਲੀ ਪ੍ਰਤੀ ਪੰਜਾਬੀ ਸਾਹਿਤ ਸਭਾਵਾਂ ਬਣਾ ਕੇ ਵੱਡਾ ਯੋਗਦਾਨ ਪਾ ਰਹੇ ਹਨ ਪਰ ਮੌਜੂਦਾ ਸਰਕਾਰ ਵੀ ਪੰਜਾਬੀ ਭਾਸ਼ਾ ਪ੍ਰਤੀ ਆਪਣੀ ਜ਼ਿੰਮੇਵਾਰੀ ਨੂੰ ਸਮਝੇ।


-ਮਾਸਟਰ ਜਗੀਰ ਸਿੰਘ ਸਫਰੀ
ਪਿੰਡ ਸਠਿਆਲਾ (ਅੰਮ੍ਰਿਤਸਰ)।


ਸੜਕ ਦੁਰਘਟਨਾਵਾਂ
ਪੰਜਾਬ ਵਿਚ ਸੜਕ ਦੁਰਘਟਨਾਵਾਂ ਦਾ ਵਰਤਾਰਾ ਆਮ ਹੀ ਹੋ ਗਿਆ ਹੈ। ਸਭ ਤੋਂ ਵੱਡਾ ਕਾਰਨ ਤੇਜ਼ ਰਫ਼ਤਾਰ ਗੱਡੀ ਚਲਾਉਣਾ ਮੰਨਿਆ ਜਾ ਸਕਦਾ ਹੈ। ਪਰ ਪਿਛਲੇ ਦੋ-ਤਿੰਨ ਦਿਨਾਂ ਤੋਂ ਧਾਰਮਿਕ ਅਸਥਾਨਾਂ 'ਤੇ ਆਉਣ-ਜਾਣ ਵਾਲੀਆਂ ਗੱਡੀਆਂ ਦੇ ਦੁਰਘਟਨਾਗ੍ਰਸਤ ਹੋਣ ਦੀਆਂ ਖ਼ਬਰਾਂ ਅਖ਼ਬਾਰਾਂ ਵਿਚ ਪੜ੍ਹਨ ਨੂੰ ਆ ਰਹੀਆਂ ਹਨ, ਜਿਸ ਵਿਚ ਕਈ ਲੋਕ ਜ਼ਖ਼ਮੀ ਹੋਏ ਤੇ ਕਈ ਮਰ ਗਏ। ਇਸ ਦੇ ਕਾਰਨ ਓਵਰਲੋਡਿੰਗ, ਲੰਮੀ ਯਾਤਰਾ ਦੀ ਥਕਾਵਟ ਤੇ ਉਨੀਂਦਰਾਪਨ ਜਾਂ ਅਣਗਹਿਲੀ ਵੀ ਹੋ ਸਕਦੇ ਹਨ। ਪਰ ਅਫ਼ਸੋਸ ਤੇ ਦੁੱਖ ਇਸ ਗੱਲ ਦਾ ਹੈ ਕਿ ਅਜਿਹੇ ਹਾਦਸੇ ਰੁਕ ਨਹੀਂ ਰਹੇ ਤੇ ਨਾ ਹੀ ਸਰਕਾਰ ਰੋਕਣ ਲਈ ਆਵਾਜਾਈ ਨਿਯਮਾਂ ਪ੍ਰਤੀ ਅਜੇ ਤੱਕ ਸੰਜੀਦਾ ਹੈ।


-ਪਿਆਰਾ ਸਿੰਘ
ਨਕੋਦਰ।

13/06/2017

 ਗਰੀਨ ਟ੍ਰਿਬਿਊਨਲ ਤੇ ਕਿਸਾਨ

ਵਾਤਾਵਰਨ ਦੀ ਸਾਂਭ-ਸੰਭਾਲ ਲਈ 'ਕੌਮੀ ਗਰੀਨ ਟ੍ਰਿਬਿਊਨਲ' ਵੱਲੋਂ ਖੇਤਾਂ ਵਿਚਲੀ ਰਹਿੰਦ-ਖੂੰਹਦ ਨੂੰ ਸਾੜਨ 'ਤੇ ਪਾਬੰਦੀ ਲਗਾਈ ਗਈ ਹੈ। ਪੂਰੇ ਪੰਜਾਬ ਵਿਚ ਨਜ਼ਰ ਰੱਖਣ ਲਈ 'ਪੰਜਾਬ ਰਿਮੋਟ ਸੈਸਿੰਗ ਕੇਂਦਰ' ਲੁਧਿਆਣਾ ਵਿਚ ਸਥਾਪਿਤ ਕੀਤਾ ਗਿਆ ਹੈ। ਜੰਗਲਾਤ ਵਿਭਾਗ ਦੇ ਕਰਮਚਾਰੀਆਂ ਵਾਲੇ ਸਰੇਆਮ ਨੈਸ਼ਨਲ ਹਾਈਵੇ 'ਤੇ ਡਿਵਾਈਡਰਾਂ ਉੱਪਰ ਲਗਾਈਆਂ ਅੱਗਾਂ ਨਜ਼ਰ ਨਹੀਂ ਆਉਂਦੀਆਂ ਜੋ ਖ਼ੂਬਸੂਰਤ ਹਰੇ ਭਰੇ ਫੁੱਲਾਂ ਨਾਲ ਲੱਦੇ ਕਨੇਰ ਦੇ ਰੁੱਖਾਂ ਨੂੰ ਖ਼ਤਮ ਕਰ ਰਹੀਆਂ ਹਨ? ਕੀ ਸਰਕਾਰੀ ਅੱਗ ਦੁਆਰਾ ਪ੍ਰਦੂਸ਼ਣ ਨਹੀਂ ਫੈਲਦਾ? ਪੰਜਾਬ ਵਿਚ ਬਹੁਤ ਸਾਰੀਆਂ ਸਨਅਤੀ ਇਕਾਈਆਂ ਹਨ ਜੋ ਸਾਰਾ ਸਾਲ ਪ੍ਰਦੂਸ਼ਣ ਫੈਲਾਉਂਦੀਆਂ ਹਨ। ਇਸ ਤੋਂ ਇਲਾਵਾ ਬਹੁਤ ਸਾਰੇ ਪੁਰਾਣੇ ਵਾਹਨ ਵੀ ਨਿਤ ਇਹ ਸਾਰਾ ਕੁਝ ਕੌਮੀ ਗਰੀਨ ਟ੍ਰਿਬਿਊਨਲ ਨੂੰ ਨਜ਼ਰ ਨਹੀਂ ਆਉਂਦਾ? ਜੇਕਰ ਅੱਜ ਹਵਾ ਵਿਚੋਂ ਆਕਸੀਜਨ ਦੀ ਮਾਤਰਾ ਲਗਾਤਾਰ ਘਟ ਰਹੀ ਹੈ ਤਾਂ ਇਸ ਦਾ ਕਾਰਨ ਸਿਰਫ਼ ਸੂਬੇ ਦੇ ਕਿਸਾਨ ਨਹੀਂ ਹੋਰ ਵੀ ਬਹੁਤ ਸਾਰੇ ਕਾਰਨ ਹਨ। ਕੌਮੀ ਗ੍ਰੀਨ ਟ੍ਰਿਬਿਊਨਲ ਨੂੰ ਚਾਹੀਦਾ ਹੈ ਕਿ ਉਸ ਵਿਭਾਗ ਦੀ ਖ਼ਬਰ ਵੀ ਲਵੇ ਜਿਸ ਦਾ ਮੁੱਖ ਕੰਮ ਹੀ ਬੂਟੇ ਲਗਾਉਣਾ ਹੈ, ਬੂਟੇ ਸਾੜਨਾ ਨਹੀਂ। ਪੰਜਾਬ ਸਰਕਾਰ ਨੂੰ ਵੀ ਤੁਰੰਤ ਇਸ ਵੱਲ ਧਿਆਨ ਦੇਣਾ ਚਾਹੀਦਾ ਹੈ।

-ਕੇ. ਐੱਸ. ਅਮਰ
ਪਿੰਡ ਤੇ ਡਾਕ: ਕੋਟਲੀਖ਼ਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

ਸੜਕ ਹਾਦਸੇ

ਲਗਪਗ ਹਰ ਦਿਨ ਸਵੇਰੇ ਜਦੋਂ ਆਪਣੇ ਆਲੇ-ਦੁਆਲੇ ਦੀ ਖ਼ਬਰਸਾਰ ਲੈਣ ਲਈ ਅਖ਼ਬਾਰ ਚੁੱਕੀਦਾ ਹੈ ਤਾਂ ਮੁੱਖ ਪੰਨੇ 'ਤੇ ਹੀ ਸੜਕ ਹਾਦਸੇ ਦੀ ਕੋਈ ਨਾ ਕੋਈ ਖ਼ਬਰ ਜ਼ਰੂਰ ਪੜ੍ਹਨ ਨੂੰ ਮਿਲਦੀ ਹੈ। ਪਿਛਲੇ ਦਿਨੀਂ ਸਾਡੇ ਬੜੇ ਹੀ ਅਜ਼ੀਜ਼ ਸ: ਅਵਤਾਰ ਸਿੰਘ ਪਮਾਲ (ਲੈਕਚਰਾਰ ਫਿਜ਼ੀਕਲ ਐਜੂਕੇਸ਼ਨ) ਇਕ ਸੜਕੀ ਹਾਦਸੇ ਦੀ ਭੇਟ ਚੜ੍ਹ ਗਏ। ਕੀ ਕਸੂਰ ਸੀ ਉਸ ਵੀਰ ਦਾ ਜੋ ਆਪਣੀ ਸਾਈਡ 'ਤੇ ਅਰਾਮ ਨਾਲ ਸਕੂਟਰ 'ਤੇ ਜਾ ਰਿਹਾ ਸੀ ਅਤੇ ਪਿੱਛੋਂ ਦੀ ਆ ਰਹੀ ਤੇਜ਼ ਰਫ਼ਤਾਰ ਕਾਰ ਨੇ ਆ ਦਰੜਿਆ। ਟ੍ਰੈਫ਼ਿਕ ਵਿਭਾਗ ਨੂੰ ਸਖ਼ਤੀ ਨਾਲ ਟ੍ਰੈਫ਼ਿਕ ਨਿਯਮਾਂ ਸਬੰਧੀ ਕਾਨੂੰਨ ਨੂੰ ਲਾਗੂ ਕੀਤਾ ਜਾਣਾ ਚਾਹੀਦਾ ਹੈ। ਆਮ ਲੋਕਾਂ ਨੂੰ ਵੀ ਇਸ ਪ੍ਰਤੀ ਸੁਚੇਤ ਹੋ ਕੇ ਟ੍ਰੈਫਿਕ ਵਿਭਾਗ ਦਾ ਸਾਥ ਦੇਣਾ ਬਣਦਾ ਹੈ। ਘੱਟ ਉਮਰ ਦੇ ਬੱਚਿਆਂ ਨੂੰ ਸੜਕ 'ਤੇ ਵਹੀਕਲ ਨਹੀਂ ਵਰਤਣ ਦੇਣਾ ਚਾਹੀਦਾ। ਮੈਨੂੰ ਉਮੀਦ ਹੀ ਨਹੀਂ ਸਗੋਂ ਪੂਰਾ ਯਕੀਨ ਹੈ ਕਿ ਜੇਕਰ ਹਰ ਇਨਸਾਨ ਸੜਕ 'ਤੇ ਚਲਦਿਆਂ ਟ੍ਰੈਫਿਕ ਨਿਯਮਾਂ ਨੂੰ ਧਿਆਨ ਵਿਚ ਕਿ ਵਹੀਕਲ ਚਲਾਵੇ ਅਤੇ ਟ੍ਰੈਫਿਕ ਵਿਭਾਗ ਨਿਯਮ ਤੋੜਨ ਵਾਲਿਆਂ ਨਾਲ ਸਖ਼ਤੀ ਨਾਲ ਪੇਸ਼ ਆਵੇ ਤਾਂ ਕਿਸੇ ਵੀ ਘਰ ਦਾ ਕੋਈ ਜੀਅ ਅਜਾਈਂ ਨਹੀਂ ਜਾਵੇਗਾ।

-ਬਲਦੇਵ ਸਿੰਘ ਸ਼ੇਖੂਪੁਰਾ
ਕੰਪਿਊਟਰ ਅਧਿਆਪਕ, ਸਰਕਾਰੀ ਹਾਈ ਸਕੂਲ ਜੱਸੋਵਾਲ ਕੁਲਾਰ (ਲੁਧਿਆਣਾ)।

ਤਿੰਨ ਤਲਾਕ

ਭਾਰਤੀ ਸੰਵਿਧਾਨ, ਭਾਰਤ ਦੇ ਹਰ ਸ਼ਹਿਰੀ ਨੂੰ, ਭਾਵੇਂ ਉਹ ਕਿਸੇ ਵੀ ਕੌਮ, ਮਜ਼੍ਹਬ ਜਾਂ ਜਾਤੀ ਨਾਲ ਸਬੰਧ ਰੱਖਦਾ ਹੋਵੇ, ਲਿਖਣ ਅਤੇ ਬੋਲਣ ਦੀ ਆਜ਼ਾਦੀ ਦਿੰਦਾ ਹੈ। ਇਸ ਦੇ ਨਾਲ ਹੀ ਔਰਤਾਂ ਨੂੰ ਅਪਮਾਨਜਨਕ ਕਰਨ ਵਾਲੀਆਂ ਕਾਰਵਾਈਆਂ ਜਾਂ ਕੰਮਾਂ ਨੂੰ ਰੋਕਣ ਲਈ ਵੀ ਵਚਨਬੱਧ ਹੈ। ਕਿਸੇ ਵੀ ਧਰਮ ਦੀਆਂ ਔਰਤਾਂ 'ਤੇ ਜਦੋਂ ਜ਼ਿਆਦਤੀ ਹੁੰਦੀ ਹੈ ਤਾਂ ਨਿਆਂ ਪਾਲਿਕਾ ਜਾਂ ਸਰਕਾਰ ਨੂੰ ਫੌਰੀ ਤੌਰ 'ਤੇ ਬਿਨਾਂ ਕਿਸੇ ਪੱਖਪਾਤ ਤੋਂ ਉਨ੍ਹਾਂ ਦੀ ਸੁਣਵਾਈ ਕੀਤੀ ਜਾਣੀ ਜ਼ਰੂਰੀ ਹੈ। ਬੱਸ ਜਦੋਂ ਮਰਜ਼ੀ ਤਿੰਨ ਤਲਾਕ ਕਹਿ ਕੇ ਔਰਤ ਨੂੰ ਸਦਾ ਲਈ ਨਰਕ ਵਾਲੀ ਜ਼ਿੰਦਗੀ ਵਿਚ ਧੱਕਾ ਦੇ ਦੇਣਾ ਔਰਤ ਦੀ ਹੋਂਦ ਦਾ ਅਪਮਾਨ ਹੈ, ਖ਼ਾਸ ਕਰਕੇ ਭਾਰਤ ਵਰਗੇ ਦੇਸ਼ ਵਿਚ ਜਿਥੇ ਘਰੇਲੂ ਔਰਤਾਂ ਬਹੁਗਿਣਤੀ ਵਿਚ ਹਨ। ਇਸ ਪਰੰਪਰਾ ਨੂੰ ਖ਼ਤਮ ਕਰਨ ਦੀ ਲੋੜ ਹੈ ਤਾਂ ਜੋ ਔਰਤਾਂ ਵੀ ਸੁਖ ਦਾ ਜੀਵਨ ਬਤੀਤ ਕਰ ਸਕਣ।
-ਮਹਿੰਦਰ ਸਿੰਘ ਬਾਜਵਾ

ਪਿੰਡ ਮਸੀਤਾਂ, ਜ਼ਿਲ੍ਹਾ ਕਪੂਰਥਲਾ।

13/06/2017

 ਸ: ਤਰਲੋਚਨ ਸਿੰਘ ਦੇ ਨਾਂਅ
ਪਿਛਲੇ ਦਿਨੀਂ ਸ: ਤਰਲੋਚਨ ਸਿੰਘ ਦਾ ਕੇ.ਪੀ.ਐਸ. ਗਿੱਲ ਸਬੰਧੀ ਇਕ ਲੇਖ 'ਅਜੀਤ' ਵਿਚ ਛਪਿਆ ਸੀ, ਇਸ ਸਬੰਧੀ ਭਾਜਪਾ ਆਗੂ ਸ੍ਰੀਮਤੀ ਲਕਸ਼ਮੀ ਕਾਂਤਾ ਚਾਵਲਾ ਦਾ ਪ੍ਰਤੀਕਰਮ ਸਾਨੂੰ ਪੁੱਜਾ ਹੈ, ਜਿਸ ਨੂੰ ਇਨ੍ਹਾਂ ਕਾਲਮਾਂ ਵਿਚ ਪ੍ਰਕਾਸ਼ਿਤ ਕਰ ਰਹੇ ਹਾਂ। ਂਸੰਪਾਦਕ
ਸਾਰੇ ਜਾਣਦੇ ਹਨ ਕਿ ਤੁਸੀਂ ਬੁੱਧੀਜੀਵੀ ਹੋ, ਵਿਦਵਾਨ ਹੋ। ਪੰਜਾਬ ਵਿਚ ਕਾਲੇ ਦਿਨ ਤੁਹਾਡੇ ਸਾਹਮਣੇ ਹੀ ਆਏ ਅਤੇ ਖ਼ਤਮ ਹੋਏ। ਤੁਹਾਡਾ ਇਹ ਲਿਖਣਾ ਤਾਂ ਸਹੀ ਹੋ ਸਕਦਾ ਹੈ ਕਿ ਕਿਸੇ ਇਕ ਪੁਲਿਸ ਅਫ਼ਸਰ ਨੂੰ ਸਾਰਾ ਸਿਹਰਾ ਨਹੀਂ ਦਿੱਤਾ ਜਾਣਾ ਚਾਹੀਦਾ, ਜਿਵੇਂ ਕਿ ਕੇ.ਪੀ.ਐਸ. ਗਿੱਲ ਨੂੰ ਦਿੱਤਾ ਜਾ ਰਿਹਾ ਹੈ ਪਰ ਕਿਤੇ ਵੀ ਤੁਸੀਂ ਇਕ ਸ਼ਬਦ ਉਨ੍ਹਾਂ ਲਈ ਨਹੀਂ ਲਿਖਿਆ ਜੋ ਬੱਸਾਂ ਅਤੇ ਗੱਡੀਆਂ ਤੋਂ ਕੱਢ ਕੇ ਮਾਰੇ ਗਏ, ਪਟਿਆਲਾ ਦੇ ਕਾਲਜ ਵਿਚ ਵਿਦਿਆਰਥੀਆਂ ਦੇ ਕਤਲ ਹੋਏ। ਰੋਪੜ ਵਿਚ ਨਹਿਰ ਦੇ ਕੰਢੇ ਮਜ਼ਦੂਰਾਂ ਦਾ ਕਤਲ ਕੀਤਾ ਗਿਆ। ਅੰਮ੍ਰਿਤਸਰ ਚੌਕ ਘੰਟਾਘਰ ਵਿਚ ਸੈਂਕੜੇ ਲੋਕਾਂ ਨੂੰ ਜ਼ਖ਼ਮੀ ਕੀਤਾ ਗਿਆ ਅਤੇ ਮਾਰ ਦਿੱਤਾ ਗਿਆ। ਪੰਜਾਬ ਵਿਚ ਬੇਕਸੂਰਾਂ ਦਾ ਕਿੰਨਾ ਖੂਨ ਵਹਾਇਆ ਗਿਆ, ਨਿਸਚਤ ਹੀ ਤੁਸੀਂ ਆਪਣੀਆਂ ਅੱਖਾਂ ਨਾਲ ਦੇਖਿਆ ਹੋਵੇਗਾ। ਹੈਰਾਨੀ ਹੈ ਕਿ ਕੌਮੀ ਮਨੁੱਖੀ ਅਧਿਕਾਰ ਕਮਿਸ਼ਨ ਦਾ ਮੈਂਬਰ ਰਹਿਣ ਵਾਲਾ ਇਕ ਬੁੱਧੀਜੀਵੀ ਉਨ੍ਹਾਂ ਦੇ ਹੰਝੂ ਪੂੰਝਣ ਕਦੇ ਨਹੀਂ ਆਇਆ ਜੋ ਬੇਕਸੂਰ ਘਰਾਂ, ਦੁਕਾਨਾਂ, ਬਾਜ਼ਾਰਾਂ ਵਿਚੋਂ ਖਿੱਚ-ਖਿੱਚ ਕੇ ਗੋਲੀਆਂ ਨਾਲ ਭੁੰਨ ਦਿੱਤੇ। ਬੇਕਸੂਰ ਦੀ ਮੌਤ ਦੁਖਦਾਈ ਹੈ। ਚਾਹੇ ਪੁਲਿਸ ਦੇ ਹੱਥੋਂ ਹੋਵੇ ਜਾਂ ਅੱਤਵਾਦੀਆਂ ਦੇ ਹੱਥੋਂ, ਪਰ ਇਕ ਪੱਖੀ ਫ਼ੈਸਲਾ ਤੁਹਾਡੇ ਵਰਗੇ ਵਿਅਕਤੀਆਂ ਦੀ ਕਲਮ ਤੋਂ ਸ਼ੋਭਾ ਨਹੀਂ ਦਿੰਦਾ। ਇਹ ਤਾਂ ਤੁਹਾਨੂੰ ਵੀ ਮੰਨਣਾ ਪਵੇਗਾ ਕਿ ਜਿਸ ਸਮੇਂ ਬੇਅੰਤ ਸਿੰਘ ਦੀ ਸਰਕਾਰ ਆਈ, ਉਸੇ ਸਮੇਂ ਸ੍ਰੀ ਗਿੱਲ ਨੇ ਕੰਮ ਸ਼ੁਰੂ ਕੀਤਾ। ਜੇ ਬੇਅੰਤ ਸਿੰਘ ਕੇ.ਪੀ.ਐਸ. ਗਿੱਲ ਨੂੰ ਨਾ ਚਾਹੁੰਦੇ ਤਾਂ 1993 ਤੋਂ ਬਾਅਦ 1995 ਤੱਕ ਉਨ੍ਹਾਂ ਨੂੰ ਸੇਵਾ ਵਿਚ ਕਿਉਂ ਰੱਖਦੇ? ਅਫ਼ਸੋਸ ਹੈ ਕਿ ਸ੍ਰੀ ਗਿੱਲ ਨੂੰ ਉਹ ਅਧਿਕਾਰ ਵੀ ਨਾ ਦੇਣ ਦਾ ਐਲਾਨ ਹੋ ਗਿਆ ਜੋ ਇਕ ਸਿੱਖ ਦੇ ਨਾਤੇ ਉਨ੍ਹਾਂ ਦਾ ਅਧਿਕਾਰ ਸੀ ਕਿ ਸਿੱਖ ਮਰਿਆਦਾ ਅਨੁਸਾਰ ਉਨ੍ਹਾਂ ਦੀਆਂ ਅੰਤਿਮ ਰਸਮਾਂ ਹੋਣ। ਚੰਗਾ ਲੱਗਾ ਤੁਸੀਂ ਇਸ ਦੀ ਨਿੰਦਾ ਕੀਤੀ ਹੈ।

-ਲਕਸ਼ਮੀ ਕਾਂਤਾ ਚਾਵਲਾ।

ਕੀ ਹੁਣ ਦੇਸ਼ ਲਾਲ ਪਰੀ ਦੀ ਕਮਾਈ ਨਾਲ ਚੱਲੇਗਾ?
ਇਹ ਚਰਚਾ ਜ਼ੋਰਾਂ 'ਤੇ ਹੈ ਕਿ ਸ਼ਰਾਬ ਦੀ ਵਿੱਕਰੀ ਬਿਨਾਂ ਸਰਕਾਰਾਂ ਚੱਲ ਹੀ ਨਹੀਂ ਸਕਦੀਆਂ। ਇਸ ਸੰਦਰਭ ਵਿਚ ਸਵਾਲ ਪੈਦਾ ਹੁੰਦਾ ਹੈ ਕਿ ਕੀ ਸਰਕਾਰਾਂ ਕੋਲ ਕੋਈ ਅਜਿਹਾ ਅਰਥ-ਸ਼ਾਸਤਰ ਹੈ ਹੀ ਨਹੀਂ ਹੈ, ਜੋ ਸ਼ਰਾਬ ਦੇ ਪਾਣੀ ਬਿਨਾਂ ਦੇਸ਼ ਨੂੰ ਚਲਾ ਸਕੇ? ਵਿਦਵਾਨ ਤਾਂ ਇਹ ਕਹਿੰਦੇ ਹਨ ਕਿ ਏਨੇ ਬੰਦੇ ਸਮੁੰਦਰ ਵਿਚ ਡੁੱਬ ਕੇ ਨਹੀਂ ਮਰੇ, ਜਿੰਨੇ ਸ਼ਰਾਬ ਵਿਚ ਡੁੱਬ ਕੇ ਮਰਦੇ ਹਨ। ਸ਼ਰਾਬ ਪੀੜਤ ਪਰਿਵਾਰ ਰੀਂਘ-ਰੀਂਘ ਜ਼ਿੰਦਗੀ ਜੀਅ ਰਹੇ ਹਨ। ਧਰਮ ਬਦਲੇ ਮਰ ਮਿਟ ਜਾਣ ਵਾਲੇ ਆਪਣੇ ਧਰਮ-ਸ਼ਾਸਤਰ ਨੂੰ ਕਿਉਂ ਪਿੱਠ ਵਿਖਾ ਰਹੇ ਹਨ, ਜਿਹੜਾ ਸ਼ਰਾਬ ਅਤੇ ਨਸ਼ਿਆਂ ਦੀ ਵਰਤੋਂ ਵਿਰੁੱਧ ਕੂਕਦਾ ਹੈ? ਨੀਤੀ ਸ਼ਾਸਤਰ ਉਸ ਸਮਾਜ ਨੂੰ ਪਾਪੀ ਆਖਦੇ ਹਨ ਜਿਹੜਾ ਕੇਵਲ ਮਾਇਆ ਬਦਲੇ ਘਟੀਆ ਵਪਾਰ ਤੇ ਦੁਰਵਿਹਾਰ ਕਰਦਾ ਹੈ। ਇਹ ਚਿੰਤਾ ਦਾ ਵਿਸ਼ਾ ਹੈ। ਆਉ, ਚਿੰਤਨ ਕਰੀਏ ਤੇ ਦੇਸ਼ ਨੂੰ ਚਲਾਉਣ ਦੀ ਸਹੀ ਸਿਹਤਮੰਦ ਦਿਸ਼ਾ ਵਲ ਨੂੰ ਚੱਲੀਏ।

-ਕੁਲਵੰਤ ਕੌਰ
ਗੁਰੂ ਨਾਨਕ ਖਾਲਸਾ ਕਾਲਜ ਡਰੋਲੀ (ਜਲੰਧਰ)।

12/06/2017

 ਨਸ਼ਾ ਖ਼ਤਮ ਹੋਵੇ
ਪਿਛਲੇ ਦਿਨੀਂ 'ਅਜੀਤ' ਦੇ ਸੰਪਾਦਕੀ ਸਫੇ 'ਤੇ 'ਵਿਸ਼ਵ ਪੱਧਰ 'ਤੇ ਤੰਬਾਕੂ ਮੁਕਤ ਦਿਵਸ' ਸਬੰਧੀ ਜਸਵਿੰਦਰ ਸਿੰਘ ਸਹੋਤਾ ਦਾ ਲੇਖ ਛਪਿਆ। ਅੰਕੜਿਆਂ ਅਤੇ ਤੱਥਾਂ 'ਤੇ ਆਧਾਰਿਤ ਤੰਬਾਕੂ ਦੇ ਸੇਵਨ ਕਾਰਨ ਸਿਹਤ 'ਤੇ ਪੈਣ ਵਾਲੇ ਮਾੜੇ ਪ੍ਰਭਾਵਾਂ ਦਾ ਜ਼ਿਕਰ ਸਲਾਹੁਣਯੋਗ ਸੀ ਪ੍ਰੰਤੂ ਬੁੱਧੀਜੀਵੀਆਂ ਵੱਲੋਂ ਆਪਣੀਆਂ ਲਿਖਤਾਂ ਰਾਹੀਂ ਤੰਬਾਕੂ ਦੇ ਸੇਵਨ ਨੂੰ ਬਹੁਤ ਹੀ ਮਾੜਾ ਤੇ ਅਤਿ ਨਿੰਦਣਯੋਗ ਕਿਹਾ ਗਿਆ ਪਰ ਗੱਲ ਉਥੇ ਦੀ ਉਥੇ ਖੜ੍ਹੀ ਦਿਖਾਈ ਦਿੰਦੀ ਹੈ। ਸੋ, ਕੁੱਲ ਮਿਲਾ ਕੇ ਤੰਬਾਕੂ ਦੇ ਉਤਪਾਦਨ 'ਤੇ ਅਤੇ ਤੰਬਾਕੂ ਤੋਂ ਬਣੇ ਅਨੇਕਾਂ ਪਦਾਰਥਾਂ ਜੋ ਬਜ਼ਾਰਾਂ ਵਿਚ ਵਿਕਦੇ ਹਨ, ਉਤੇ ਪੂਰਨ ਤੌਰ 'ਤੇ ਪਾਬੰਦੀ ਲੱਗਣੀ ਚਾਹੀਦੀ ਹੈ, ਤਾਂ ਹੀ ਤੰਬਾਕੂ ਦੇ ਨਸ਼ੇ ਨੂੰ ਖਤਮ ਕੀਤਾ ਜਾ ਸਕਦਾ ਹੈ।


-ਮਾ: ਦੇਵ ਰਾਜ ਖੁੰਡਾ
ਰਾਮ ਸ਼ਰਨਮ ਕਾਲੋਨੀ, ਗੁਰਦਾਸਪੁਰ।


ਵਿਦਿਆਰਥੀਆਂ ਵਿਚ ਅਸਹਿਣਸ਼ੀਲਤਾ
ਕੁਝ ਕੁ ਦਿਨ ਪਹਿਲਾਂ 12ਵੀਂ ਅਤੇ ਦਸਵੀਂ ਦਾ ਨਤੀਜਾ ਐਲਾਨਿਆ ਗਿਆ। ਨਾਕਾਮਯਾਬੀ ਮਿਲਣ 'ਤੇ ਕੁਝ ਵਿਦਿਆਰਥੀਆਂ ਦੁਆਰਾ ਖੁਦਕੁਸ਼ੀ ਕਰ ਲਈ ਗਈ। ਇਸ ਦੁਖਦਾਈ ਘਟਨਾ ਤੋਂ ਜ਼ਾਹਿਰ ਹੈ ਕਿ ਵਿਦਿਆਰਥੀ ਜੀਵਨ ਵਿਚੋਂ ਸਹਿਣਸ਼ੀਲਤਾ ਖਤਮ ਹੋ ਚੁੱਕੀ ਹੈ ਜੋ ਕਿ ਸਮਾਜ ਅਤੇ ਮਨੁੱਖਤਾ ਲਈ ਖਤਰਨਾਕ ਹੈ। ਸਿੱਖਿਆ ਦੀ ਨੀਂਹ ਮਾਤਾ-ਪਿਤਾ ਦੁਆਰਾ ਰੱਖਣੀ ਚਾਹੀਦੀ ਹੈ ਕਿਉਂਕਿ ਮਾਪੇ ਬੱਚੇ ਦੇ ਮੁਢਲੇ ਅਧਿਆਪਕ ਹੁੰਦੇ ਹਨ ਅਤੇ ਅਧਿਆਪਕ ਦੁਆਰਾ ਇਸ ਉਤੇ ਉਸਾਰੀ ਕਰਨੀ ਚਾਹੀਦੀ ਹੈ। ਬੱਚਿਆਂ ਨੂੰ ਚੰਗੇ ਮਾੜੇ ਹਾਲਾਤ ਦਾ ਮੁਕਾਬਲਾ ਕਰਨ ਦੇ ਯੋਗ ਬਣਾਉਣਾ ਅਤੇ ਮਿਹਨਤ ਕਰਦੇ ਰਹਿਣ ਦੀ ਪ੍ਰੇਰਨਾ ਦਿੰਦੇ ਰਹਿਣਾ ਚਾਹੀਦਾ ਹੈ ਤਾਂ ਜੋ ਬੱਚਾ ਕਿਸੇ ਵੀ ਮੁਸ਼ਕਿਲ ਤੋਂ ਭੱਜਣ ਜਾਂ ਖੁਦਕੁਸ਼ੀ ਕਰਨ ਦੀ ਬਜਾਏ ਇਸਦਾ ਬਹਾਦਰੀ ਨਾਲ ਸਾਹਮਣਾ ਕਰੇ।


-ਅੰਮ੍ਰਿਤਪਾਲ ਸਿੰਘ ਸੰਧੂ
ਪਿੰਡ ਤੇ ਡਾਕ: ਬਾੜੀਆਂ ਕਲਾਂ।


ਸਰਕਾਰ ਸੁਚੱਜੀ ਵਿਉਂਤਬੰਦੀ ਕਰੇ
ਆਮ ਲੋਕਾਂ ਨੂੰ ਦਰਪੇਸ਼ ਮੁਸ਼ਕਿਲਾਂ 'ਚੋਂ ਲੰਘਣਾ ਪੈ ਰਿਹਾ ਹੈ ਕਿਉਂਕਿ ਰੇਤਾ ਦਾ ਮੁੱਲ ਤਾਂ ਸੀਮੈਂਟ ਤੋਂ ਵੀ ਅਗਾਂਹ ਲੰਘਦਾ ਜਾ ਰਿਹਾ ਹੈ। ਧੜੱਲੇਦਾਰ ਲੋਕ ਤਾਂ ਇਸ ਦੀ ਖਰੀਦ ਕਰੀ ਜਾਂਦੇ ਹਨ ਪਰ ਸਧਾਰਨ ਲੋਕਾਂ ਦੀ ਪਹੁੰਚ ਤੋਂ ਬਾਹਰ ਹੁੰਦੀ ਜਾ ਰਹੀ ਰੇਤਾ ਬੜਾ ਵੱਡਾ ਮਸਲਾ ਹੈ। ਨਿਖੇਧੀ ਇਸ ਗੱਲ ਦੀ ਹੈ ਕਿ ਨਿਲਾਮ ਕੀਤੀਆਂ ਖੱਡਾਂ 'ਚੋਂ ਸਰਕਾਰ ਆਪਣਾ ਤਾਂ ਮੁਆਵਜ਼ਾ ਪ੍ਰਾਪਤ ਕਰ ਲੈਂਦੀ ਹੈ ਪਰ ਆਮ ਲੋਕ ਠੇਕੇਦਾਰਾਂ ਦੀ ਮਨਮਰਜ਼ੀ ਦੇ ਰੇਟਾਂ ਦੇ ਧੱਕੇ ਚੜ੍ਹਦੇ ਹਨ। ਪਹਿਲਾਂ ਸਰਕਾਰ ਰੇਤਾ-ਬਜਰੀ ਦਾ ਵਾਜਬ ਮੁੱਲ ਨਿਸਚਿਤ ਕਰੇ, ਜਿਹੜਾ ਸਾਧਾਰਨ ਲੋਕਾਈ ਦੀ ਪਹੁੰਚ ਬਣ ਸਕੇ। ਸੋ, ਜ਼ਰੂਰਤ ਹੈ, ਸਮੇਂ ਦੀ ਸਰਕਾਰ ਵੱਲੋਂ ਸੁਚੱਜੀ ਵਿਉਂਤਬੰਦੀ ਕੀਤੀ ਜਾਵੇ, ਤਾਂ ਜੋ ਰੇਤਾ-ਬਜਰੀ ਆਮ ਲੋਕਾਂ ਦੀ ਪਹੁੰਚ ਤੋਂ ਬਾਹਰ ਨਾ ਜਾਵੇ।


-ਕਮਲਜੀਤ ਸਿੰਘ
ਪਿੰਡ ਤੇ ਡਾਕ: ਮੱਲ੍ਹੀਆਂ (ਕਰਤਾਰਪੁਰ), ਜ਼ਿਲ੍ਹਾ ਜਲੰਧਰ।

08/06/2017

 ਕਿੰਨੇ ਸੋਹਣੇ ਦਿਨ ਸਨ
75ਵਿਆਂ ਨੂੰ ਢੁਕੇ ਇਕ ਬਜ਼ੁਰਗ ਨੇ ਅਜੋਕੇ ਪੰਜਾਬ ਦੇ ਹਾਲਾਤ 'ਤੇ ਲੰਮਾ ਹਉਕਾ ਲੈਂਦਿਆ ਸੋਹਣੇ ਦਿਨਾਂ ਬਾਰੇ ਦੱਸਦਿਆਂ ਕਿਹਾ ਕਿ ਸਾਡੇ ਸਮੇਂ ਕਣਕ-ਮੱਕੀ, ਨਰਮੇ-ਕਪਾਹ, ਕਮਾਦ, ਮੂੰਗਫਲੀ, ਸਰ੍ਹੋਂ, ਅਰਹਰ ਆਦਿ ਹਰ ਫ਼ਸਲ ਹੋਇਆ ਕਰਦੀ ਸੀ। ਉਨ੍ਹਾਂ ਅੱਗੇ ਦੱਸਦਿਆਂ ਕਿਹਾ ਕਿ ਉਸ ਸਮੇਂ ਹਰ ਕਿਸਾਨ ਦੀ ਮੋਟਰ 'ਤੇ ਘੁਲਾੜੀ ਦਾ ਚੱਲਣਾ, ਮੱਕੀ ਦੀ ਰੋਟੀ-ਸਰ੍ਹੋਂ ਦਾ ਸਾਗ, ਕਣਕ ਦੀ ਰੋਟੀ-ਹਾਰੇ ਦੀ ਦਾਲ, ਕਾੜਨੀ ਦੀ ਲੱਸੀ-ਦਹੀਂ, ਮਿਰਚ, ਔਲੇ ਤੇ ਅਦਰਕ ਦਾ ਆਚਾਰ ਬਹੁਤ ਸਵਾਦੀ ਹੁੰਦਾ ਸੀ।
ਘਰ-ਘਰ ਬਲਦੇ ਚੁੱਲ੍ਹੇ ਵੱਖਰਾ ਹੀ ਸਕੂਨ ਦਿੰਦੇ ਸਨ। ਖੇਤਾਂ 'ਚ ਮੂਲੀ, ਸ਼ਲਗਮ, ਗਾਜਰ ਤੇ ਹੋਰ ਕਈ ਕੁਝ ਆਮ ਹੁੰਦੇ ਸਨ। ਮੂੰਗਫਲੀ ਤੇ ਸ਼ਕਰਕੰਦੀ ਭੁੰਨ ਕੇ ਖਾਂਦੇ ਰਹਿੰਦੇ ਸੀ। ਦਿਨ-ਰਾਤ ਖੇਤਾਂ 'ਚ ਕੰਮ ਕਰਦਿਆਂ ਕਦੇ ਬਿਮਾਰ ਨਹੀਂ ਸੀ ਹੋਏ। ਤਾਜ਼ੀ ਆਬੋ-ਹਵਾ ਹੁੰਦੀ ਸੀ, ਮਿੱਠਾ ਸਰਬਤ ਵਰਗਾ ਪਾਣੀ ਹੁੰਦਾ ਸੀ। ਬਜ਼ੁਰਗ ਹਓਕਾ ਲੈਂਦਾ ਅੱਗੇ ਕਹਿੰਦਾ ਕਿ ਜੇ ਅੱਜ ਸਾਡੇ ਸਮੇਂ ਦਾ ਪੰਜਾਬ ਹੁੰਦਾ ਤਾਂ ਕਿਸਾਨ ਖ਼ੁਦਕੁਸ਼ੀ ਨਾ ਕਰਦਾ, ਪੰਜਾਬੀ ਨਸ਼ਈ ਨਾ ਹੁੰਦਾ। ਵਾਕਿਆ ਹੀ ਉਹ ਕਿੰਨੇ ਸੋਹਣੇ ਦਿਨ ਸੀ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।


ਬੰਬ ਧਮਾਕੇ
ਇਰਾਕ ਅਤੇ ਕਾਬੁਲ ਦੇਸ਼ਾਂ 'ਚ ਅੱਤਵਾਦੀਆਂ ਵੱਲੋਂ ਬੰਬ ਧਮਾਕਿਆਂ ਰਾਹੀਂ ਬੜੀ ਕਰੂਰਤ ਤੇ ਬੇਰਹਿਮੀ ਨਾਲ ਮਨੁੱਖਤਾ ਦਾ ਖੂਨ ਵਹਾਏ ਜਾਣ ਦੀਆਂ ਮੰਦਭਾਗੀਆਂ ਖ਼ਬਰਾਂ ਪੜ੍ਹਨ ਨੂੰ ਮਿਲੀਆਂ, ਜਿਨ੍ਹਾਂ ਨੇ ਸਾਨੂੰ ਧੁਰ ਅੰਦਰ ਤੱਕ ਝੰਜੋੜ ਕੇ ਰੱਖ ਦਿੱਤਾ। ਅਜਿਹੇ ਬੁਰੇ ਤੇ ਗ਼ੈਰ-ਮਨੁੱਖੀ ਕੰਮਾਂ ਨੂੰ ਅੰਜਾਮ ਦੇਣ ਵਾਲੇ ਇਹ ਕਾਫਰ ਲੋਕ ਕਿੰਨੇ ਬੇਰਹਿਮ, ਬੁਝਦਿਲ ਤੇ ਬੇਕਿਰਕ ਹੋਣਗੇ, ਜਿਨ੍ਹਾਂ ਨੂੰ ਨਾ ਇਨਸਾਨੀਅਤ ਨਾਲ ਪਿਆਰ ਅਤੇ ਨਾ ਹੀ ਖ਼ੁਦਾ ਦਾ ਕੋਈ ਖੌਫ਼ ਹੈ। ਇਹ ਬੰਬ ਧਮਾਕੇ ਰੂਪੀ ਕੋਝੇ ਕਾਰੇ ਕਰਨ ਵਾਲੇ ਇਨਸਾਨੀਅਤ ਵਿਹੂਣੇ ਖੂੰਖਾਰ ਦਹਿਸ਼ਤਗਰਦਾਂ ਦੀ ਜਿੰਨੀ ਵੀ ਨਿੰਦਾ ਕੀਤੀ ਜਾਵੇ ਥੋੜ੍ਹੀ ਹੈ। ਪ੍ਰਭੂ ਅਜਿਹੇ ਮਨੁੱਖਤਾ ਦਾ ਘਾਣ ਕਰਨ ਵਾਲੇ ਦਹਿਸ਼ਤੀਆਂ ਨੂੰ ਅਕਲ ਬਖਸ਼ੇ ਤਾਂ ਜੋ ਅਗਾਂਹ ਨੂੰ ਕੋਈ ਅਜਿਹੀ ਦਿਲ-ਕੰਬਾਊ ਤੇ ਲੋਕ ਉਜਾੜੂ ਘਟਨਾ ਨਾ ਵਾਪਰੇ।


-ਯਸ਼ ਪੱਤੋ
ਪਿੰਡ ਪੱਤੋ ਹੀਰਾ ਸਿੰਘ, ਤਹਿ: ਨਿਹਾਲ ਸਿੰਘ ਵਾਲਾ (ਮੋਗਾ)।


ਸਮੇਂ ਦੀ ਲੋੜ
ਬੇਨਤੀ ਹੈ ਉਨ੍ਹਾਂ ਵਿਦਵਾਨਾਂ ਅਤੇ ਬੁੱਧੀਜੀਵੀਆਂ ਅਤੇ ਲੇਖਕਾਂ ਨੂੰ ਕਿ ਉਹ ਸਾਰਾ ਧਿਆਨ ਪੰਜਾਬ ਦੇ ਵਿਗੜਦੇ ਹਲਾਤ 'ਤੇ ਕੇਂਦਰਿਤ ਕਰਨ। ਮਨੋਰੰਜਨ ਦੇ ਕਿੱਸੇ ਛੱਡ ਕੇ ਪੰਜਾਬ ਦੀ ਆਰਥਿਕਤਾ ਦਾ ਕੀ ਹਾਲ ਹੈ, ਨਸ਼ਾ, ਬੇਰੁਜ਼ਗਾਰੀ, ਲੁੱਟ-ਖੋਹ, ਘਪਲੇਬਾਜ਼ੀ, ਕਿਸੇ ਪਾਸੇ ਕੋਈ ਮਸਲਾ ਹੱਲ ਨਹੀਂ ਹੋਇਆ। ਅਜਿਹੇ ਹਲਾਤ 1980 ਵਿਚ ਬਣ ਗਏ ਸੀ ਜਦੋਂ ਆਰਥਿਕ ਮਸਲੇ, ਧਾਰਮਿਕ ਮਸਲੇ ਬਣ ਗਏ ਸੀ। ਇਸ ਕਰਕੇ ਜੋ ਤਬਾਹੀ 90 ਦੇ ਦਹਾਕੇ 'ਚ ਹੋਈ, ਉਹ ਹੁਣ ਨਾ ਹੋਵੇ।


-ਗੁਰਾਂਦਿੱਤਾ ਸਿੰਘ ਸੰਧੂ

07/06/2017

  ਪਾਣੀ ਦੀ ਦੁਰਵਰਤੋਂ ਨੂੰ ਰੋਕੇ ਸਰਕਾਰ
ਮਨੁੱਖ ਕੋਲ ਜਿਹੜੀ ਚੀਜ਼ ਬਹੁਤ ਹੋਵੇ ਉਸ ਦੀ ਕਦਰ ਮਨੁੱਖ ਘੱਟ ਹੀ ਕਰਦਾ ਹੈ। ਜਿਵੇਂ ਪੰਜਾਬ ਵਿਚ ਹਾਲ ਦੀ ਘੜੀ ਪੀਣ ਵਾਲੇ ਸਾਫ਼ ਪਾਣੀ ਦੀ ਕੋਈ ਕਮੀ ਨਹੀਂ। ਬਹੁਤ ਥੋੜ੍ਹੇ ਜਾਗਰੂਕ ਲੋਕ ਹਨ ਜਿਨ੍ਹਾਂ ਨੇ ਟੈਂਕੀ ਭਰ ਜਾਣ ਦੀ ਸੂਚਨਾ ਦੇਣ ਵਾਲਾ ਅਲਾਰਮ ਲਗਾਇਆ ਹੈ ਜਦਕਿ ਬਹੁਗਿਣਤੀ ਲੋਕ ਇਹ ਅਲਾਰਮ ਨਹੀਂ ਲਗਾਉਂਦੇ ਜਿਸ ਨਾਲ ਟੈਂਕੀ ਭਰਨ ਤੋਂ ਬਾਅਦ ਕੀਮਤੀ ਪਾਣੀ ਬਰਬਾਦ ਹੁੰਦਾ ਰਹਿੰਦਾ ਹੈ। ਕੀ ਸਰਕਾਰ ਅਤੇ ਨਗਰ ਨਿਗਮਾਂ ਇਸ ਗੰਭੀਰ ਮਸਲੇ ਦੇ ਹੱਲ ਲਈ ਕੋਈ ਠੋਸ ਕਾਰਵਾਈ ਕਰਨਗੀਆਂ। ਇਸ ਨਾਲ ਲੋੜਵੰਦਾਂ ਨੂੰ ਪਾਣੀ ਮਿਲਣ ਵਿਚ ਸਹਾਇਤਾ ਮਿਲੇਗੀ।


-ਗੁਲਸ਼ਨ ਕੁਮਾਰ
ਕਿਸ਼ਨਪੁਰਾ, ਜਲੰਧਰ ਸ਼ਹਿਰ।


ਸੋਚਣ ਦੀ ਲੋੜ

ਪਿਛਲੇ ਦਿਨੀਂ ਬਲਬੀਰ ਸਿੰਘ ਰਾਜੇਵਾਲ ਦਾ ਲੇਖ 'ਕਿਸਾਨਾਂ ਨੂੰ ਖੁਦਕੁਸ਼ੀਆਂ ਦਾ ਰਾਹ ਛੱਡ ਕੇ ਖੁਦ ਹੱਲ ਲੱਭਣਾ ਪਊ' ਬਹੁਤ ਵਧੀਆ ਸੀ। ਜੇਕਰ ਕਿਸਾਨ ਸਬਜ਼ੀਆਂ ਜਾਂ ਕਣਕ-ਝੋਨੇ ਤੋਂ ਬਿਨਾਂ ਕੋਈ ਹੋਰ ਫਸਲ ਬੀਜ ਵੀ ਲੈਂਦਾ ਹੈ ਤਾਂ ਠੀਕ ਮੰਡੀਕਰਨ ਦੀ ਅਣਹੋਂਦ ਕਾਰਨ ਕਿਸਾਨ ਨੂੰ ਨੁਕਸਾਨ ਹੀ ਹੁੰਦਾ ਹੈ। ਜਦੋਂ ਤੱਕ ਕਿਸਾਨ ਪੈਦਾਵਾਰ ਨੂੰ ਸਿੱਧਾ ਖਪਤਕਾਰ ਤੱਕ ਪਹੁੰਚਾਉਣ ਵੱਲ ਭਾਵ ਮੰਡੀਕਰਨ ਵੱਲ ਢੁਕਦਾ ਧਿਆਨ ਨਹੀਂ ਦੇਵੇਗਾ, ਉਦੋਂ ਤੱਕ ਕਿਸਾਨ ਦੀ ਮੌਜੂਦਾ ਆਰਥਿਕ ਹਾਲਤ ਵਿਚ ਕੋਈ ਬਹੁਤੀ ਤਬਦੀਲੀ ਨਹੀਂ ਆਵੇਗੀ।
ਦੂਸਰਾ ਜੇਕਰ ਘਰ ਵਿਚ ਬਿਮਾਰੀ ਲਈ ਕਰਜ਼ਾ ਲੈਣਾ ਪੈ ਜਾਵੇ ਉਹ ਤਾਂ ਅਲੱਗ ਗੱਲ ਹੈ। ਅੰਤ ਵਿਚ ਮੈਂ ਇਹੀ ਕਹਾਂਗਾ ਕਿ ਖੁਦਕੁਸ਼ੀ ਕਰਨ ਤੋਂ ਪਹਿਲਾਂ ਵਿਅਕਤੀ ਨੂੰ ਇਹ ਜ਼ਰੂਰ ਸੋਚਣਾ ਚਾਹੀਦਾ ਹੈ ਕਿ ਜਿਸ ਸਮੱਸਿਆ ਨਾਲ ਅਸੀਂ ਦੋਵੇਂ ਪਤੀ-ਪਤਨੀ ਨਹੀਂ ਲੜ ਸਕਦੇ, ਉਸ ਲੜਾਈ ਨੂੰ ਮੇਰੀ ਪਤਨੀ ਇਕੱਲੀ ਕਿਵੇਂ ਲੜੇਗੀ, ਜਾਂ ਮੇਰੇ ਖੁਦਕੁਸ਼ੀ ਕਰਨ ਦਾ ਮੇਰੇ ਬੱਚਿਆਂ ਦੀ ਮਾਨਸਿਕਤਾ 'ਤੇ ਕੀ ਅਸਰ ਹੋਵੇਗਾ?

-ਬਿਕਰਮਜੀਤ ਸਿੰਘ
ਭਾਦਸੋਂ (ਪਟਿਆਲਾ)।


ਚਿੰਤਾ ਦਾ ਵਿਸ਼ਾ

12ਵੀਂ ਜਮਾਤ ਦੇ ਨਤੀਜਿਆਂ ਦੀ ਪਾਸ ਦਰ ਪਿਛਲੇ ਸਾਲ ਨਾਲੋਂ 14.41 ਫ਼ੀਸਦੀ ਘਟਣਾ ਗੰਭੀਰ ਚਿੰਤਾ ਅਤੇ ਚਿੰਤਨ ਦਾ ਵਿਸ਼ਾ ਹੈ। ਨਤੀਜਿਆਂ 'ਚ ਆਈ ਗਿਰਾਵਟ ਦਾ ਕਾਰਨ ਕਾਫ਼ੀ ਹੱਦ ਤੱਕ ਸਿੱਖਿਆ ਸਿਸਟਮ ਨੂੰ ਵੀ ਮੰਨਿਆ ਜਾ ਸਕਦਾ ਹੈ। ਪਰ ਪਿਛਲੇ ਸਾਲਾਂ ਦੌਰਾਨ ਸ਼ੁਰੂ ਹੋਏ ਸੀ.ਸੀ.ਈ. ਸਿਸਟਮ ਤੇ ਅੱਠਵੀਂ ਤੱਕ ਫੇਲ੍ਹ ਨਾ ਕਰਨ ਦੀ ਨੀਤੀ ਨੇ ਬੱਚਿਆਂ ਦੇ ਮਨਾਂ 'ਚੋਂ ਇਮਤਿਹਾਨਾਂ ਦਾ ਡਰ ਕੱਢ ਦਿੱਤਾ ਹੈ।
ਬੱਚੇ ਇਮਤਿਹਾਨਾਂ ਨੂੰ ਰਸਮੀ ਤੌਰ 'ਤੇ ਲੈਣ ਲੱਗੇ ਹਨ। ਗਰੇਡ ਸਿਸਟਮ ਨੇ ਬੱਚਿਆਂ 'ਚ ਮੁਕਾਬਲੇ ਦੀ ਭਾਵਨਾ ਘਟਾਈ ਹੈ। ਉਪਰੋਕਤ ਕਾਰਨਾਂ ਕਰਕੇ ਅੱਗੇ ਜਾ ਕੇ ਪਾਸ ਦਰ ਘਟਣੀ ਸੁਭਾਵਿਕ ਹੀ ਹੈ। ਅੱਠਵੀਂ ਤੱਕ ਫੇਲ੍ਹ ਨਾ ਕਰਨ ਦਾ ਸਿਸਟਮ ਬੰਦ ਹੋਣਾ ਚਾਹੀਦਾ ਹੈ। ਸੀ.ਬੀ.ਐਸ.ਈ. ਦੀ ਤਰਜ਼ 'ਤੇ ਸਾਲਾਨਾ ਪ੍ਰੀਖਿਆ ਪ੍ਰਣਾਲੀ ਮੁੜ ਸ਼ੁਰੂ ਕਰਨ ਤੇ ਗੌਰ ਕਰਨੀ ਬਣਦੀ ਹੈ। ਨਹੀਂ ਤਾਂ ਮੁਕਾਬਲੇਬਾਜ਼ੀ ਦੇ ਯੁੱਗ ਵਿਚ ਸਰਕਾਰੀ ਸਿੱਖਿਆਤੰਤਰ ਬਹੁਤਾ ਚਿਰ ਨਹੀਂ ਟਿਕ ਸਕੇਗਾ।

-ਬਲਵੀਰ ਸਿੰਘ ਵਾਸੀਆ

06/06/2017

 ਪਾਸ ਪ੍ਰਤੀਸ਼ਤ ਘਟਨਾ ਦੁਖਦਾਇਕ
ਪਿਛਲੇ ਦਿਨੀਂ ਪੰਜਾਬ ਸਕੂਲ ਸਿੱਖਿਆ ਬੋਰਡ ਵੱਲੋਂ ਮਾਰਚ 2017 ਦਾ ਬਾਰ੍ਹਵੀਂ ਤੇ ਦਸਵੀਂ ਜਮਾਤ ਦਾ ਨਤੀਜਾ ਐਲਾਨ ਦਿੱਤਾ ਗਿਆ ਹੈ। ਦੋਵੇਂ ਜਮਾਤਾਂ ਦੇ ਕੁੜੀਆਂ ਦੇ ਹੱਕ 'ਚ ਆਏ ਨਤੀਜਿਆਂ ਨੇ ਸਪੱਸ਼ਟ ਕਰ ਦਿੱਤਾ ਹੈ ਕਿ ਕੁੜੀਆਂ ਲਗਨ ਨਾਲ ਪੜ੍ਹਾਈ ਕਰ ਰਹੀਆਂ ਹਨ। ਪਰ ਇਸ ਵਾਰ ਜਿਸ ਤਰ੍ਹਾਂ ਦੋਵੇਂ ਜਮਾਤਾਂ ਦੀ ਪਾਸ ਪ੍ਰਤੀਸ਼ਤ ਘਟੀ ਹੈ, ਉਹ ਹੈਰਾਨੀਜਨਕ ਤੇ ਪ੍ਰੇਸ਼ਾਨ ਕਰਨ ਵਾਲੀ ਹੈ। ਵਾਧੂ ਅੰਕਾਂ ਨੂੰ ਛੱਡ ਕੇ ਵੀ ਪਾਸ ਪ੍ਰਤੀਸ਼ਤ ਦਾ ਘਟਣਾ ਸੋਚਣ ਲਈ ਮਜਬੂਰ ਕਰਦਾ ਹੈ। ਇਸ ਦੀ ਘੋਖ ਕਰਨੀ ਬਣਦੀ ਹੈ। ਬਹੁਤਾ ਕਰਕੇ ਅੱਜ ਦੋਸ਼ੀ ਸੋਸ਼ਲ ਮੀਡੀਆ ਨੈੱਟਵਰਕ ਨੂੰ ਮੰਨਿਆ ਜਾ ਰਿਹਾ ਹੈ। ਵਿਦਿਆਰਥੀ ਸਿਰਫ ਪੜ੍ਹਾਈ ਨੂੰ ਤਰਜੀਹ ਦੇਣ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

ਕਿਸਾਨ ਪੱਖੀ ਯੋਜਨਾਵਾਂ ਦੀ ਲੋੜ
ਤਾਜ਼ਾ ਅੰਕੜਿਆਂ ਮੁਤਾਬਿਕ ਪੰਜਾਬ ਦੇ ਲਗਪਗ 30 ਲੱਖ ਕਿਸਾਨ 62000 ਕਰੋੜ ਦੇ ਕਰਜ਼ਾਈ ਹਨ। ਸਰਕਾਰੀ ਨੀਤੀਆਂ ਸਰਮਾਏਦਾਰੀ ਪੱਖੀ ਹਨ। ਕਿਸਾਨ ਦੀ ਕੋਈ ਬਾਂਹ ਨਹੀਂ ਫੜਦੀ। ਸਵਾਮੀਨਾਥਨ ਕਮਿਸ਼ਨ ਦੀਆਂ ਰਿਪੋਰਟਾਂ ਕੇਵਲ ਕਾਗਜ਼ੀ ਦਸਤਾਵੇਜ਼ ਬਣ ਕੇ ਅਲਮਾਰੀਆਂ ਦਾ ਸ਼ਿੰਗਾਰ ਬਣੀਆਂ ਹੋਈਆਂ ਹਨ। ਫਸਲੀ ਬੀਮਾ ਯੋਜਨਾਵਾਂ ਅਧੂਰੀਆਂ ਹਨ। ਪੂਰੇ ਦੇਸ਼ ਨੂੰ ਪਾਲਣ ਵਾਲਾ ਕਿਸਾਨ ਅੱਜ ਆਪਣਾ ਟੱਬਰ ਪਾਲਣ ਤੋਂ ਵੀ ਅਸਮਰੱਥ ਦਿਖਾਈ ਦੇ ਰਿਹਾ ਹੈ। ਕੀ ਸੱਤਾ ਦਾ ਸੁੱਖ ਭੋਗਣ ਵਾਲੇ ਰਾਜਸੀ ਨੇਤਾ ਵਾਤਾਅਨੁਕੂਲ ਕਮਰਿਆਂ ਵਿਚੋਂ ਨਿਕਲ ਕੇ ਕਰਜ਼ੇ ਨਾਲ ਸਤਾਏ ਕਿਸਾਨ ਦੀ ਬਾਂਹ ਫੜਨਗੇ? ਇਹ ਤਾਂ ਆਉਣ ਵਾਲਾ ਸਮਾਂ ਹੀ ਦੱਸੇਗਾ।

-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀ ਖ਼ਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

ਆਉ! ਕੁਦਰਤ ਪ੍ਰਤੀ ਇਮਾਨਦਾਰ ਹੋਈਏ
ਸਾਡੇ ਹੀ ਵਿਗਾੜੇ ਹੋਏ ਕੁਦਰਤੀ ਪ੍ਰਬੰਧ ਵਿਚ ਜਦੋਂ ਅਸੀਂ ਖੁਦ ਘੁਟਣ ਮਹਿਸੂਸ ਕਰਦੇ ਹਾਂ ਤਾਂ ਸਾਡੀ ਅੱਖ ਰਤਾ ਕੁ ਖੁੱਲ੍ਹਦੀ ਹੈ ਕਿ ਕੁਦਰਤੀ ਨਿਆਮਤਾਂ ਨਾਲ ਭਰਪੂਰ ਇਕੋ ਇਕ ਗ੍ਰਹਿ ਨੂੰ ਅਸੀਂ ਸਹੂਲਤਾਂ ਸੰਪੰਨ ਬਣਾਉਣ ਦੇ ਚੱਕਰ ਵਿਚ ਜੀਣ ਜੋਗਾ ਵੀ ਨਹੀਂ ਰਹਿਣ ਦੇ ਰਹੇ ਤਾਂ ਇਸ ਦੀ ਸਾਂਭ-ਸੰਭਾਲ ਦਾ ਖਿਆਲ ਵੀ ਜ਼ਰੂਰ ਮਨ ਦਰਵਾਜ਼ੇ 'ਤੇ ਆ ਖੜ੍ਹਦਾ ਹੈ।
ਰੁੱਖ ਲਗਾਉਣੇ ਹਰ ਮਨੁੱਖੀ ਸੁਭਾਅ ਦਾ ਅੰਗ ਬਣਨਾ ਚਾਹੀਦਾ ਹੈ। ਸਕੂਲਾਂ, ਕਾਲਜਾਂ ਵਿਚ ਵਾਤਾਵਰਨ ਵਿਸ਼ਾ ਕੇਵਲ ਅੰਕ ਹਾਸਲ ਕਰਨ ਦਾ ਜ਼ਰੀਆ ਨਹੀਂ ਹੋਣਾ ਚਾਹੀਦਾ, ਸਗੋਂ ਇਸ ਨੂੰ ਨਵੀਂ ਪੀੜ੍ਹੀ ਨੂੰ ਕੁਦਰਤ ਨਾਲ ਜੋੜਨ ਦੇ ਢੰਗ ਵਜੋਂ ਵਰਤਣ ਦੀ ਲੋੜ ਹੈ ਤਾਂ ਹੀ ਕੁਦਰਤ ਤੇ ਮਨੁੱਖ ਦੇ ਵਧ ਰਹੇ ਪਾੜੇ ਨੂੰ ਪੂਰਿਆ ਜਾ ਸਕਦਾ ਹੈ। ਕੁਦਰਤ ਸਾਡੀ ਪਾਲਣਹਾਰ ਹੈ, ਇਸ ਦੀ ਮਹੱਤਤਾ ਸਮਝਦਿਆਂ ਮਨੁੱਖ ਨੂੰ ਆਪਣੀਆਂ ਤਬਾਹਕੁਨ ਰੁਚੀਆਂ ਨੂੰ ਮੋੜਾ ਦੇਣਾ ਹੀ ਪਵੇਗਾ। ਆਓ ਆਪਣੇ ਕੁਦਰਤ ਪ੍ਰਤੀ ਫ਼ਰਜ਼ਾਂ ਨੂੰ ਨਿਭਾਈਏ ਤੇ ਮੌਸਮੀ ਦਰਸ਼ਕਾਂ ਦੀ ਥਾਂ ਕੁਦਰਤ ਦੇ ਇਮਾਨਦਾਰ ਪ੍ਰਸੰਸਕ ਬਣੀਏ।

-ਬਲਵਿੰਦਰ ਸਿੰਘ ਸਮਾਘ
ਸ੍ਰੀ ਮੁਕਤਸਰ ਸਾਹਿਬ।

05/06/2017

 ਅਸਲ ਛਬੀਲ
ਅਸੀਂ ਪਿੰਡ ਦੇ ਨੌਜਵਾਨ ਛਬੀਲ ਲਈ ਉਗਰਾਹੀ ਕਰਦੇ-ਕਰਦੇ ਜਦੋਂ ਪਿੰਡ ਦੀ ਫਿਰਨੀ ਦੇ ਬਾਹਰਵਾਰ ਬਜ਼ੁਰਗ ਬਾਬੇ ਸੰਤੇ ਦੇ ਘਰ ਪੁੱਜੇ ਤਾਂ ਸਾਨੂੰ ਬਾਬੇ ਨੇ ਕਿਹਾ, 'ਮੇਰਾ ਇਕ ਸੁਝਾਅ ਹੈ, ਮੰਨਿਓ ਭਾਵੇਂ ਨਾ ਮੰਨਿਓ। ਲੋਕ ਪਾਣੀ ਪੀਂਦੇ ਘੱਟ ਅਤੇ ਖਰਾਬ ਜ਼ਿਆਦਾ ਕਰਦੇ ਹਨ। ਜੇਕਰ ਤੁਸੀਂ ਸੱਚਮੁੱਚ ਹੀ ਅਸਲੀ ਸੇਵਾ ਵਾਲਾ ਕੰਮ ਕਰਨਾ ਚਾਹੁੰਦੇ ਹੋ ਤਾਂ ਆਪਣੇ ਪਿੰਡ ਦੇ ਸਰਕਾਰੀ ਸਕੂਲ ਤੇ ਹਸਪਤਾਲ ਜਾਓ ਤੇ ਚਿਰਾਂ ਤੋਂ ਬੰਦ ਪਏ ਪੱਖੇ ਠੀਕ ਕਰਵਾ ਦਿਓ। ਸਕੂਲ ਦੇ ਬੱਚੇ ਅਤੇ ਦੂਰ ਤੋਂ ਆਏ ਹੋਏ ਮਰੀਜ਼ ਤੁਹਾਨੂੰ ਹਰ ਗਰਮੀ ਦੇ ਮੌਸਮ ਵਿਚ ਅਸੀਸਾਂ ਦਿਆ ਕਰਨਗੇ। ਇਕ ਠੰਢੇ ਪਾਣੀ ਵਾਲਾ ਵਾਟਰ ਕੂਲਰ ਸਕੂਲ 'ਚ ਲਗਵਾ ਦਿਓ। ਕੁਝ ਛਾਂਦਾਰ ਬੂਟੇ ਲਗਵਾ ਦਿਓ ਤਾਂ ਕਿ ਵਾਤਾਵਰਨ ਸਾਫ਼-ਸੁਥਰਾ ਹੋ ਸਕੇ, ਪੰਛੀ ਆਪਣਾ ਰੈਣ-ਬਸੇਰਾ ਬਣਾਉਣ ਅਤੇ ਅਸੀਂ ਆਉਣ ਵਾਲੇ ਸਮੇਂ ਗਰਮੀ ਤੋਂ ਕੁਝ ਰਾਹਤ ਮਹਿਸੂਸ ਕਰ ਸਕੀਏ। ਬਜ਼ੁਰਗ ਬਾਪੂ ਜੀ ਦੀ ਸਿੱਖਿਆ ਸੁਣ ਕੇ ਸੱਚਮੁਚ ਇੰਜ ਲੱਗ ਰਿਹਾ ਸੀ ਕਿ ਜਿਵੇਂ ਸਾਨੂੰ ਛਬੀਲ ਦਾ ਅਸਲੀ ਅਰਥ ਲੱਭ ਪਿਆ ਹੋਵੇ।

-ਜਸਵੰਤ ਸਿੰਘ ਰੌਲੀ
ਸਰਕਾਰੀ ਐਲੀਮੈਂਟਰੀ ਸਕੂਲ ਬਾਠ ਕਲਾਂ (ਜਲੰਧਰ)

ਸਿੱਖਿਆ ਦਾ ਵਪਾਰੀਕਰਨ
ਪੰਜਾਬ ਸਕੂਲ ਸਿੱਖਿਆ ਬੋਰਡ ਦੇ ਅਨੁਸਾਰ 12ਵੀਂ ਦੇ ਨਤੀਜੇ 'ਚੋਂ 62 ਹਜ਼ਾਰ 916 ਦੇ ਕਰੀਬ ਵਿਦਿਆਰਥੀਆਂ ਦੀ ਕੰਪਾਰਟਮੈਂਟ ਅਤੇ 10ਵੀਂ ਦੇ ਨਤੀਜੇ 'ਚੋਂ 94 ਹਜ਼ਾਰ 271 ਦੇ ਕਰੀਬ ਵਿਦਿਆਰਥੀਆਂ ਦੀ ਕੰਪਾਰਟਮੈਂਟ ਆਈ ਹੈ। ਫਿਰ ਦੁਬਾਰਾ ਪੇਪਰ ਦੇਣ ਲਈ 10ਵੀਂ ਦੀ ਫੀਸ 1050 ਰੁਪਏ ਤੇ ਬਾਰ੍ਹਵੀਂ ਦੀ ਫੀਸ 1350 ਰੁਪਏ ਦੇ ਹਿਸਾਬ ਨਾਲ ਕੁੱਲ ਫੀਸ ਦੀ ਰਾਸ਼ੀ 18 ਕਰੋੜ 30 ਲੱਖ 21 ਹਜ਼ਾਰ ਦੇ ਕਰੀਬ ਬਣਦੀ ਹੈ। ਸਿੱਖਿਆ ਬੋਰਡ ਅਤੇ ਮੌਜੂਦਾ ਸਰਕਾਰ ਨੂੰ ਚਾਹੀਦਾ ਹੈ ਕਿ ਰੀਅਪੀਅਰ ਵਾਲੇ ਵਿਦਿਆਰਥੀਆਂ ਦੀ ਪੇਪਰ ਫੀਸ ਕਾਫੀ ਹੱਦ ਤੱਕ ਘਟਾ ਕੇ ਉਨ੍ਹਾਂ ਨੂੰ ਆਪਣਾ ਭਵਿੱਖ ਅਤੇ ਸਮਾਜ ਸਿਰਜਣ ਦਾ ਇਕ ਵਧੀਆ ਮੌਕਾ ਦਿੱਤਾ ਜਾਵੇ ਤਾਂ ਜੋ ਇਹ ਬੱਚੇ ਆਪਣੇ ਮਾਪਿਆਂ 'ਤੇ ਬੋਝ ਨਾ ਬਣਨ ਤੇ ਮਾਪੇ ਇਨ੍ਹਾਂ ਦੀ ਫੀਸ ਆਸਾਨੀ ਨਾਲ ਭਰ ਸਕਣ।

-ਤਰਸੇਮ ਮਹਿਤੋ
ਪਿੰਡ ਬਈਏਵਾਲ, ਜ਼ਿਲ੍ਹਾ ਸੰਗਰੂਰ।

ਅੰਧ-ਵਿਸ਼ਵਾਸ
21ਵੀਂ ਸਦੀ ਦਾ ਮਨੁੱਖ ਮੋਬਾਈਲ ਕ੍ਰਾਂਤੀ ਦੇ ਯੁੱਗ ਵਿਚ ਰਹਿ ਰਿਹਾ ਹੈ। ਸੋਸ਼ਲ ਸਾਈਟਾਂ ਨੇ ਪੂਰੀ ਦੁਨੀਆ ਨੂੰ ਇਕ ਪਿੰਡ ਵਿਚ ਤਬਦੀਲ ਕਰ ਦਿੱਤਾ ਹੈ। ਇਨ੍ਹਾਂ ਸੋਸ਼ਲ ਸਾਈਟਾਂ ਨੇ ਭਾਵੇਂ ਮਨੁੱਖੀ ਗਿਆਨ-ਵਿਗਿਆਨ ਦੀ ਜਾਣਕਾਰੀ ਦੇ ਦਰਵਾਜ਼ੇ ਖੋਲ੍ਹ ਦਿੱਤੇ ਹਨ ਪਰ ਅੱਜ ਦੇ ਵਿਗਿਆਨਕ ਯੁੱਗ ਵਿਚ ਮੋਬਾਈਲ ਫੋਨ ਦੀ ਵਰਤੋਂ ਕਰਦੇ ਪੜ੍ਹੇ-ਲਿਖੇ ਇਨਸਾਨ ਵੀ ਅੰਧ-ਵਿਸ਼ਵਾਸ ਦੀ ਜਕੜ ਤੋਂ ਖਹਿੜਾ ਨਹੀਂ ਛੁਡਾ ਸਕੇ। ਇਸ ਤਰ੍ਹਾਂ ਦੇ ਬਹੁ-ਗਿਣਤੀ ਮੈਸੇਜ਼ ਵੀਡੀਓ ਕਲਿੱਪ ਕੰਪਿਊਟਰ ਦੁਆਰਾ ਐਡਿਟ ਕਰਕੇ ਪਾਏ ਜਾਂਦੇ ਹਨ, ਜੋ ਸੱਚ ਹੋਣ ਦਾ ਭੁਲੇਖਾ ਪਾਉਂਦੇ ਹਨ। ਅੱਜ ਦੇ ਮਨੁੱਖ ਨੂੰ ਇਨ੍ਹਾਂ ਭਰਮ ਫੈਲਾਓ ਪੋਸਟਾਂ ਜਾਂ ਵੀਡੀਓ ਕਲਿੱਪਾਂ ਤੋਂ ਵਧੇਰੇ ਸੁਚੇਤ ਹੋਣ ਦੀ ਲੋੜ ਹੈ।

-ਸੁਖਵੀਰ ਘੁਮਾਣ ਦਿੜ੍ਹਬਾ

02/06/2017

 ਨੌਜਵਾਨਾਂ ਵੱਲੋਂ ਖ਼ੁਦਕੁਸ਼ੀਆਂ ਦਾ ਰੁਝਾਨ
ਕਿਸਾਨ ਖ਼ੁਦਕੁਸ਼ੀਆਂ ਦਾ ਮੁੱਦਾ ਕਈ ਸਾਲਾਂ ਤੋਂ ਮੀਡੀਆ ਵਿਚ ਛਾਇਆ ਹੋਇਆ ਹੈ। ਪਰ ਕੁਝ ਅਰਸੇ ਤੋਂ ਨੌਜਵਾਨਾਂ ਵੱਲੋਂ ਖ਼ੁਦਕੁਸ਼ੀਆਂ ਦਾ ਰੁਝਾਨ ਵੀ ਵਧਦਾ ਜਾ ਰਿਹਾ ਹੈ। ਪਿਛਲੇ ਦਿਨੀਂ 12ਵੀਂ ਅਤੇ 10ਵੀਂ ਜਮਾਤਾਂ ਦੇ ਆਏ ਨਤੀਜਿਆਂ ਵਿਚ ਅਸਫਲ ਰਹਿਣ ਵਾਲੇ ਜਾਂ ਘੱਟ ਨੰਬਰ ਪ੍ਰਾਪਤ ਕਰਨ ਵਾਲੇ ਕੁਝ ਵਿਦਿਆਰਥੀਆਂ ਨੇ ਖ਼ੁਦਕੁਸ਼ੀਆਂ ਕੀਤੀਆਂ ਹਨ। ਹੁਣ ਸਵਾਲ ਇਹ ਪੈਦਾ ਹੁੰਦਾ ਹੈ ਕਿ ਇਹ ਉਮਰ ਤਾਂ ਜ਼ਿੰਦਗੀ ਨੂੰ ਮਾਨਣ ਦੀ ਹੁੰਦੀ ਹੈ, ਜੋਸ਼ ਨਾਲ ਕੰਮ ਕਰਨ ਦੀ ਹੁੰਦੀ ਹੈ, ਮੰਜ਼ਿਲਾਂ ਸਰ ਕਰਨ ਦੀ ਹੁੰਦੀ ਹੈ, ਮੁਸ਼ਕਿਲਾਂ ਨੂੰ ਚੁਣੌਤੀ ਦੇਣ ਦੀ ਹੁੰਦੀ ਹੈ ਅਤੇ ਸੁਪਨੇ ਦੇਖਣ ਅਤੇ ਸਾਕਾਰ ਕਰਨ ਦੀ ਹੁੰਦੀ ਹੈ, ਫਿਰ ਇਸ ਉਮਰ ਵਿਚ ਏਨੀ ਨਿਰਾਸ਼ਾ ਕਿਉਂ? ਸਰਕਾਰਾਂ ਕੋਲ ਤਾਂ ਅਜਿਹੇ ਮੁੱਦਿਆਂ ਲਈ ਸਮਾਂ ਹੀ ਨਹੀਂ ਹੁੰਦਾ। ਜੇ ਸਾਡਾ ਨੌਜਵਾਨ ਹੀ ਨਿਰਾਸ਼ਾ ਦੇ ਆਲਮ ਵਿਚ ਚਲਾ ਗਿਆ, ਫਿਰ ਦੇਸ਼ ਤਰੱਕੀ ਕਿਵੇਂ ਕਰੇਗਾ? ਸੋ ਲੋੜ ਹੈ ਇਸ ਮੁੱਦੇ ਵੱਲ ਤੁਰੰਤ ਧਿਆਨ ਦੇਣ ਦੀ, ਵਰਨਾ ਸੱਪ ਲੰਘਣ ਤੋਂ ਬਾਅਦ ਲੀਹ ਕੁੱਟਣ ਦਾ ਕੋਈ ਫਾਇਦਾ ਨਹੀਂ ਹੋਵੇਗਾ।


-ਜਸਵੀਰ ਸਿੰਘ ਭਲੂਰੀਆ
ਪਿੰਡ ਤੇ ਡਾਕ: ਭਲੂਰ (ਮੋਗਾ)।


ਲੋਕ ਸਭਾ ਦੇ ਮਹਿਲਾ ਸਪੀਕਰ ਅਤੇ ਉਨ੍ਹਾਂ ਦਾ ਕਾਰਜ ਕਾਲ
ਆਜ਼ਾਦੀ ਤੋਂ ਬਾਅਦ ਪਹਿਲੀ ਲੋਕ ਸਭਾ ਚੋਣ 25 ਅਕਤੂਬਰ 1951 ਤੋਂ 21 ਫਰਵਰੀ 1952 ਦੌਰਾਨ ਆਜ਼ਾਦ ਭਾਰਤ ਦੇ ਪਹਿਲੇ ਚੋਣ ਕਮਿਸ਼ਨਰ ਸੁਕੁਮਰ ਸੇਨ ਦੀ ਦੇਖ ਰੇਖ ਵਿਚ ਹੋਈ ਜੋ ਕਿ ਚੁਣੌਤੀ ਭਰਿਆ ਕੰਮ ਸੀ। ਲੋਕ ਸਭਾ ਦੇ ਸਪੀਕਰ ਦੀ ਭੂਮਿਕਾ ਮਹੱਤਵਪੂਰਨ ਹੁੰਦੀ ਹੈ। ਉਸ ਨੇ ਲੋਕ ਸਭਾ ਦੀ ਕਾਰਵਾਈ ਚਲਾਉਣੀ ਹੁੰਦੀ ਹੈ। ਉਸ ਦੀ ਚੋਣ ਲੋਕ ਸਭਾ ਮੈਂਬਰਾਂ ਵਿਚੋਂ ਤਕਰੀਬਨ ਆਮ ਸਹਿਮਤੀ ਨਾਲ ਕੀਤੀ ਜਾਂਦੀ ਹੈ। ਸੰਸਦ ਦੇ ਇਸ ਸਦਨ ਦੀ ਮਾਣ-ਮਰਿਆਦਾ ਨੂੰ ਕਾਇਮ ਰੱਖਣਾ ਉਸ ਦਾ ਕੰਮ ਹੈ। ਉਸ ਨੇ ਲੋਕ ਸਭਾ ਦੀ ਕਾਰਵਾਈ ਨਿਰਪੱਖ ਢੰਗ ਨਾਲ ਚਲਾਉਣੀ ਹੁੰਦੀ ਹੈ। ਕੋਈ ਵੀ ਮੈਂਬਰ ਉਸ ਦੀ ਇਜ਼ਾਜਤ ਬਿਨਾਂ ਸਦਨ ਵਿਚ ਬੋਲ ਨਹੀਂ ਸਕਦਾ। ਸਪੀਕਰ ਦਾ ਰੁਤਬਾ ਚੀਫ ਜਸਟਿਸ ਦੇ ਬਰਾਬਰ ਦਾ ਹੈ। ਪਹਿਲੀ ਮਹਿਲਾ ਸਪੀਕਰ ਮੀਰਾ ਕੁਮਾਰ (ਇੰਡੀਅਨ ਨੈਸ਼ਨਲ ਕਾਂਗਰਸ ਪਾਰਟੀ) ਬਤੌਰ 16ਵੇਂ ਸਪੀਕਰ ਵਜੋਂ 4 ਜੂਨ 2009 ਤੋਂ 4 ਜੂਨ 2014 ਤੱਕ ਸਫਲਤਾਪੂਰਨ ਸੇਵਾ ਨਿਭਾ ਚੁੱਕੇ ਹਨ। ਹੁਣ ਤੱਕ ਸਤਾਰਾਂ ਲੋਕ ਸਭਾ ਚੋਣਾਂ ਹੋ ਚੁੱਕੀਆਂ ਹਨ। ਹੁਣ ਸ੍ਰੀਮਤੀ ਸੁਮਿੱਤਰਾ ਮਹਾਜਨ (ਭਾਰਤੀ ਜਨਤਾ ਪਾਰਟੀ) ਦੂਜੀ ਮਹਿਲਾ ਹਨ, ਜੋ ਸਤਾਰ੍ਹਵੀਂ ਲੋਕ ਸਭਾ ਸਪੀਕਰ ਦੀ ਸੇਵਾ ਨਿਭਾਅ ਰਹੇ ਹਨ।


-ਮੇਜਰ ਸਿੰਘ ਨਾਭਾ
#208, ਗੁਰੂ ਤੇਗ ਬਹਾਦਰ ਨਗਰ, ਨਾਭਾ (ਪਟਿਆਲਾ)।


ਸਾਡੀ ਰਸੋਈ
'ਸਾਡੀ ਰਸੋਈ' ਰਾਹੀਂ ਗ਼ਰੀਬਾਂ ਅਤੇ ਲੋੜਵੰਦਾਂ ਨੂੰ ਰਿਆਇਤ ਕੀਮਤ 'ਤੇ ਖਾਣਾ ਦੇਣ ਲਈ ਜੋ ਉਪਰਾਲਾ ਨਵਾਂਸ਼ਹਿਰ ਵਿਚ ਹੋਇਆ, ਬਹੁਤ ਹੀ ਸ਼ਲਾਘਾਯੋਗ ਕਦਮ ਹੈ। ਅੱਜ ਦੇ ਹਾਲਾਤ ਵਿਚ ਬਹੁਤ ਸਾਰੇ ਅਜਿਹੇ ਕੇਸ ਹੋ ਚੁੱਕੇ ਹਨ, ਜੋ ਰੋਟੀ ਨਾ ਮਿਲਣ ਦੇ ਦੁੱਖੋਂ ਮਰੇ ਹਨ। ਚੰਗਾ ਹੋਵੇਗਾ ਜੇਕਰ ਇਹ ਸਕੀਮ ਟਿਫਨ-ਡੱਬਾ ਸਿਸਟਮ ਰਾਹੀਂ ਲੋੜੀਂਦੇ ਘਰਾਂ ਤੱਕ ਖਾਣਾ ਮੁਹੱਈਆ ਕੀਤਾ ਜਾਵੇ ਤਾਂ ਕਿ ਇਹ ਸਮਾਜ ਸੇਵਾ ਸਰਕਾਰੀ ਸੇਵਾ ਵਿਚ ਬਦਲ ਜਾਵੇ। ਕਿਰਪਾ ਕਰਕੇ ਹੋਟਲਾਂ, ਦੁਕਾਨਦਾਰਾਂ ਵੱਲੋਂ ਕੀਤੀ ਜਾ ਰਹੀ ਲੁੱਟ 'ਤੇ ਕਾਬੂ ਪਾਇਆ ਜਾਵੇ।


-ਸੁਪਰਡੈਂਟ ਰਘਬੀਰ ਸਿੰਘ ਬੈਂਸ
ਮੋ: 94633-64101.


ਬੋਰਡ ਪ੍ਰੀਖਿਆਵਾਂ ਦਾ ਸੱਚ
ਜੇਕਰ ਦਸਵੀਂ ਅਤੇ ਬਾਰ੍ਹਵੀਂ ਦੀਆਂ ਪ੍ਰੀਖਿਆਵਾਂ ਨਕਲ ਰਹਿਤ ਹੁੰਦੀਆਂ ਤਾਂ ਨਤੀਜਾ ਕਦੇ ਵੀ 20 ਫ਼ੀਸਦੀ ਤੋਂ ਵੱਧ ਨਹੀਂ ਸੀ ਹੋ ਸਕਦਾ। ਕਿਸੇ ਵੀ ਦੇਸ਼ ਦੀ ਤਰੱਕੀ ਦਾ ਮੁੱਢ ਉਸ ਦੀ ਸਿੱਖਿਆ ਪ੍ਰਣਾਲੀ ਤੋਂ ਬੱਝਦਾ ਹੈ। ਬੋਰਡ ਨੂੰ ਚਾਹੀਦਾ ਹੈ ਕਿ ਉਹ ਨੌਵੀਂ ਤੇ ਗਿਆਰਵੀਂ ਦੀਆਂ ਪ੍ਰੀਖਿਆਵਾਂ ਵੀ ਆਪਣੇ ਹੱਥ ਵਿਚ ਲੈ ਲਵੇ। ਵਿਦਿਆਰਥੀਆਂ ਨੂੰ ਪੜ੍ਹਨ ਦੀ ਆਦਤ ਪਵੇਗੀ, ਸਾਫ਼-ਸੁਥਰੇ ਰੌਸ਼ਨ ਦਿਮਾਗ ਵਿਦਿਆਰਥੀ ਕਾਲਜਾਂ ਵਿਚ ਪਹੁੰਚਣਗੇ। ਸਰਕਾਰ ਸੰਜੀਦਾ ਹੋਵੇ, ਪ੍ਰੀਖਿਆਵਾਂ ਸਖ਼ਤ ਨਿਗਰਾਨੀ ਹੇਠ ਹੋਣ ਤਾਂ ਜੋ ਨਕਲ ਰੂਪੀ ਕੋਹੜ ਨੂੰ ਸਮਾਜ ਵਿਚੋਂ ਕੱਢਿਆ ਜਾ ਸਕੇ।


-ਬਲਦੇਵ ਸਿੰਘ
ਬਟਾਲਾ, ਮੋ: 98720-84105.

01/06/2017

 ਪਾਣੀ ਦਾ ਡਿੱਗਦਾ ਪੱਧਰ
ਮਨੁੱਖ ਪਾਣੀ ਦੀ ਕਦਰ ਨਾ ਕਰਦਾ ਹੋਇਆ ਆਪਣੇ ਪੈਰੀਂ ਆਪ ਕੁਹਾੜਾ ਮਾਰ ਰਿਹਾ ਹੈ। ਅੱਜ ਜੋ ਪਾਣੀ ਦੀ ਦੁਰਵਰਤੋਂ ਹੋ ਰਹੀ ਹੈ, ਉਸ ਦੇ ਸਿੱਟੇ ਬਹੁਤ ਭਿਆਨਕ ਹੋਣਗੇ। ਪਵਿੱਤਰ ਗੁਰਬਾਣੀ ਵਿਚ ਹਵਾ ਨੂੰ ਗੁਰੂ ਅਤੇ ਪਾਣੀ ਨੂੰ ਪਿਤਾ ਕਿਹਾ ਗਿਆ ਹੈ ਪਰ ਮਨੁੱਖ ਹਵਾ ਅਤੇ ਪਾਣੀ ਦੋਵਾਂ ਨੂੰ ਹੀ ਦੂਸ਼ਿਤ ਕਰ ਰਿਹਾ ਹੈ। ਧਰਤੀ ਹੇਠਲੇ ਪਾਣੀ ਦੇ ਡਿਗਦੇ ਪੱਧਰ ਨੂੰ ਧਿਆਨ 'ਚ ਰੱਖਦਿਆਂ ਮਨੁੱਖ ਨੂੰ ਸੋਚ ਵਿਚਾਰ ਕਰਨੀ ਚਾਹੀਦੀ ਹੈ। ਜੇਕਰ ਮਨੁੱਖ ਇਸ ਤਰ੍ਹਾਂ ਧਰਤੀ ਹੇਠਲੇ ਪਾਣੀ ਨੂੰ ਖ਼ਤਮ ਕਰਦਾ ਰਿਹਾ ਤਾਂ ਉਹ ਦਿਨ ਦੂਰ ਨਹੀਂ ਜਦੋਂ ਸਾਡੇ ਕੋਲ ਧਰਤੀ ਹੇਠੋਂ ਪਾਣੀ ਕੱਢਣ ਦੇ ਸਾਰੇ ਸਾਧਨ ਵੀ ਖ਼ਤਮ ਹੋ ਜਾਣਗੇ।


-ਸੁਖਵਿੰਦਰ ਕਲੇਰ ਬੱਸੀਆਂ
ਪਿੰਡ ਤੇ ਡਾਕ: ਬੱਸੀਆਂ, ਜ਼ਿਲ੍ਹਾ ਲੁਧਿਆਣਾ।


ਸਰਕਾਰੀ ਹਸਪਤਾਲਾਂ ਦੀ ਅਸਲੀ ਤਸਵੀਰ
ਸਰਕਾਰੀ ਹਸਪਤਾਲਾਂ ਦੀ ਜੋ ਹਾਲਤ ਹੈ, ਉਸ ਬਾਰੇ ਕੁਝ ਵੀ ਲੁਕਿਆ ਹੋਇਆ ਨਹੀਂ। ਟੁੱਟੇ ਭੱਜੇ, ਗੰਦਗੀ ਭਰਪੂਰ, ਡਾਕਟਰਾਂ ਤੋਂ ਸੱਖਣੇ, ਸਟਾਫ ਦਾ ਕੁਝ ਅਤਾ ਪਤਾ ਨਹੀਂ ਤੇ ਦਵਾਈਆਂ-ਰਹਿਤ, ਇਹ ਹੈ ਸਰਕਾਰੀ ਹਸਪਤਾਲਾਂ ਦੀ ਅਸਲੀ ਤਸਵੀਰ। ਜੇ ਪ੍ਰਾਈਵੇਟ ਹਸਪਤਾਲਾਂ ਵਿਚ ਮਹਿੰਗੇ ਇਲਾਜ ਕਰਵਾਉਣੇ ਹਨ ਤਾਂ ਸਰਕਾਰਾਂ ਚੁਣਨ ਦਾ ਕੀ ਫਾਇਦਾ? ਟੈਕਸ ਦੇਣ ਦਾ ਕੀ ਲਾਭ? ਬਜਟ ਵਿਚ ਪੈਸਾ ਰੱਖਿਆ ਕਿੱਥੇ ਜਾਂਦਾ ਹੈ? ਪਰ ਬਦਕਿਸਮਤੀ ਕੋਈ ਧਿਰ ਜਵਾਬ ਦੇਣ ਵਾਸਤੇ ਤਿਆਰ ਨਹੀਂ। ਪ੍ਰਾਈਵੇਟ ਡਾਕਟਰਾਂ ਨੇ ਤਾਂ ਅਜਿਹਾ ਮਕੜ ਜਾਲ ਵਿਛਾਇਆ ਹੈ ਕਿ ਬੰਦਾ ਮਜਬੂਰੀ ਵਿਚ ਅਜਿਹਾ ਫਸਦਾ ਹੈ ਕਿ ਉਸ ਦੀ ਹਾਲਤ ਉੱਜੜਿਆਂ ਵਰਗੀ ਹੋ ਜਾਂਦੀ ਹੈ। ਲੋਕਾਂ ਦੀ ਪ੍ਰਾਈਵੇਟ ਹਸਪਤਾਲਾਂ ਵਿਚ ਹੋ ਰਹੀ ਲੁੱਟ ਦੀ ਜ਼ਿੰਮੇਵਾਰ ਸਰਕਾਰ ਹੈ। ਸਿਹਤ ਸਹੂਲਤਾਂ ਜਿਵੇਂ ਹਰ ਹਸਪਤਾਲ ਵਿਚ ਡਾਕਟਰਾਂ ਦਾ ਹੋਣਾ, ਸਟਾਫ ਦਾ ਹੋਣਾ, ਦਵਾਈਆਂ ਦਾ ਹੋਣਾ, ਸਾਫ਼-ਸਫ਼ਾਈ ਆਦਿ ਸਰਕਾਰ ਦੀ ਜ਼ਿੰਮੇਵਾਰੀ ਹੈ। ਜੋ ਸਰਕਾਰਾਂ ਆਪਣੇ ਨਾਗਰਿਕਾਂ ਨੂੰ ਸਿਹਤ ਸਹੂਲਤਾਂ ਹੀ ਨਹੀਂ ਦੇ ਸਕਦੀ ਹੈ, ਉਸ ਦੀ ਗੰਭੀਰਤਾ ਸਭ ਦੇ ਸਾਹਮਣੇ ਹੀ ਹੈ।


-ਪ੍ਰਭਜੋਤ ਕੌਰ ਢਿੱਲੋਂ
ਮੋ: 98150-30221.


ਸ਼ਰਾਬ ਫੈਕਟਰੀਆਂ ਦਾ ਪਾਣੀ

ਹੁਸ਼ਿਆਰਪੁਰ ਜ਼ਿਲ੍ਹੇ ਨਾਲ ਸਬੰਧਤ ਰਿਪੋਰਟ 'ਅਜੀਤ' ਵਿਚ ਪੜ੍ਹੀ, ਜਿਸ ਵਿਚ ਸ਼ਰਾਬ ਫੈਕਟਰੀਆਂ ਦੇ ਗੰਦੇ ਪਾਣੀ ਬਾਰੇ ਚਿੰਤਾ ਪ੍ਰਗਟ ਕਰ ਸੱਚ ਲੋਕਾਂ ਸਾਹਮਣੇ ਰੱਖਿਆ ਗਿਆ। ਇਹ ਤਾਂ ਇਕੱਲੇ ਇਸ ਇਲੱਕੇ ਦੀ ਹੀ ਤ੍ਰਾਸਦੀ ਪੜ੍ਹੀ ਹੈ, ਹੋਰ ਅਣਗਿਣਤ ਸ਼ਰਾਬ ਦੀਆਂ ਫੈਕਟਰੀਆਂ ਪੰਜਾਬ ਦੀ ਧਰਤੀ 'ਤੇ ਲੱਗ ਚੁੱਕੀਆਂ ਹਨ ਤੇ ਸਾਰੇ ਹੀ ਇਲਾਕਿਆਂ ਵਿਚ ਵਾਤਾਵਰਨ ਪੱਖੋਂ ਤਰਥੱਲੀ ਮਚਾ ਰਹੀਆਂ ਹਨ। ਧਰਤੀ ਹੇਠਲਾ ਪਾਣੀ ਅਨੇਕਾਂ ਕਾਰਨਾਂ ਕਰਕੇ ਪਹਿਲਾਂ ਹੀ ਜ਼ਹਿਰੀਲਾ ਹੋ ਚੁੱਕਾ ਹੈ ਤੇ ਉੱਪਰੋਂ ਅਜਿਹੇ ਨਵੇਂ ਸਾਧਨਾਂ ਕਰਕੇ ਰਹਿੰਦੀ ਕਸਰ ਨਿਕਲ ਜਾਵੇਗੀ। ਇਸ ਨਾਲ ਪੰਜਾਬ ਦਾ ਭਵਿੱਖ ਵਿਗੜਦਾ ਹੀ ਜਾ ਰਿਹਾ ਹੈ। ਅਨੇਕਾਂ ਫੈਕਟਰੀਆਂ, ਪ੍ਰਦੂਸ਼ਣ ਸਬੰਧੀ ਮਾਪਦੰਡ 'ਤੇ ਸਹੀ ਨਹੀਂ ਉਤਰਦੀਆਂ ਤੇ ਪੰਜਾਬ ਪ੍ਰਦੂਸ਼ਣ ਕੰਟਰੋਲ ਬੋਰਡ ਵੀ ਸਹੀ ਜ਼ਿੰਮੇਵਾਰੀ ਨਹੀਂ ਨਿਭਾਅ ਰਿਹਾ। ਸਾਡੀ ਬੇਨਤੀ ਹੈ ਕਿ ਪੰਜਾਬ ਦੇ ਪਾਣੀਆਂ ਵਿਚ ਜ਼ਹਿਰ ਘੁਲਣ ਤੋਂ ਰੋਕੀ ਜਾਵੇ ਤਾਂ ਕਿ ਪੰਜਾਬ ਜੀਵਤ ਰਹਿ ਸਕੇ।


-ਬਲਬੀਰ ਸਿੰਘ ਬੱਬੀ
ਪਿੰਡ ਤੱਖਰਾਂ (ਲੁਧਿਆਣਾ)।

30/05/2017

 ਆਪਣੇ ਫ਼ਰਜ਼ ਪਛਾਣੀਏ
ਅਸੀਂ ਹਰ ਦੋਸ਼ ਸਰਕਾਰਾਂ ਸਿਰ ਮੜ੍ਹ ਆਪ ਸੁਰਖਰੂ ਹੋ ਜਾਂਦੇ ਹਾਂ ਪਰ ਆਪਣੇ ਮੁਢਲੇ ਫ਼ਰਜ਼ ਪਛਾਨਣ ਵਿਚ ਵੱਡੀ ਕੁਤਾਹੀ ਵਰਤਦੇ ਹਾਂ। ਹੁਣ ਸਰਕਾਰ ਨੇ ਵਾਤਾਵਰਨ ਬਚਾਉਣ ਹਿਤ ਕਣਕ ਦੇ ਨਾੜ ਨੂੰ ਅੱਗ ਲਾਉਣ 'ਤੇ ਪਾਬੰਦੀ ਲਾਈ ਪਰ ਰਾਤ-ਬਰਾਤੇ ਨਾੜ ਸਾੜ ਉਲੰਘਣਾ ਕੀਤੀ ਗਈ ਕਿ ਵਹਾਈ 'ਤੇ ਵੱਧ ਖਰਚ ਆਉਂਦਾ ਹੈ। ਸਰਕਾਰ ਨੇ ਪਿੰਡਾਂ ਵਿਚ ਪਾਣੀ ਵਾਲੀਆਂ ਮੋਟਰਾਂ ਸਾਡੀ ਸਹੂਲਤ ਲਈ ਲਗਵਾਈਆਂ ਤਾਂ ਕਿ ਡੂੰਘੇ ਪਾਣੀ ਕਾਰਨ ਅਵਾਮ ਨੂੰ ਪ੍ਰੇਸ਼ਾਨੀ ਨਾ ਹੋਵੇ ਪਰ ਅਸੀਂ ਪਾਣੀ ਬੇਲੋੜਾ ਅਜਾਈਂ ਵਹਾ ਰਹੇ ਹਾਂ। ਐਨ.ਜੀ.ਟੀ. (ਨੈਸ਼ਨਲ ਗਰੀਨ ਟ੍ਰਿਬਿਊਨਲ) ਨੇ ਨਿਰਦੇਸ਼ ਦਿੱਤੇ ਕਿ ਬਿਨਾਂ ਮਨਜ਼ੂਰੀ ਰੁੱਖਾਂ ਦੀ ਕਟਾਈ ਨਹੀਂ ਪਰ ਅਸੀਂ ਤਾਂ ਖੇਤਾਂ ਵਿਚ ਇੱਕਾ-ਦੁੱਕਾ ਦਰੱਖਤਾਂ ਦੀਆਂ ਜੜ੍ਹਾਂ 'ਤੇ ਵੀ ਕੁਹਾੜਾ ਚਲਾ ਦਿੱਤਾ ਕਿ ਇਹ ਫ਼ਸਲਾਂ ਨੂੰ ਮਾਰ ਕਰਦੇ ਹਨ। ਜੇ ਅਸੀਂ ਆਪਣੀ-ਆਪਣੀ ਜ਼ਿੰਮੇਵਾਰੀ ਨੂੰ ਪਛਾਣਾਂਗੇ ਨਹੀਂ ਤਾਂ ਪਛਤਾਵੇਂ ਬਿਨਾਂ ਕੁਝ ਪੱਲੇ ਨਹੀਂ ਬਚੇਗਾ।

-ਜਸਬੀਰ ਦੱਧਾਹੂਰ
ਪਿੰਡ ਤੇ ਡਾਕ: ਦੱਧਾਹੂਰ, ਜ਼ਿਲ੍ਹਾ ਲੁਧਿਆਣਾ।

ਪਾਣੀ ਦੀ ਬੱਚਤ ਕਰੋ
ਪਾਣੀ ਨੂੰ ਬਚਾਉਣ ਲਈ ਪਾਣੀ ਦੀ ਸੰਜਮ ਨਾਲ ਕੀਤੀ ਵਰਤੋਂ ਅਤੇ ਮੁੜ ਜੰਗਲ ਲਗਾ ਕੇ ਮੋਹਲੇਧਾਰ ਬਾਰਿਸ਼ਾਂ ਦਾ ਮੌਸਮ ਪੈਦਾ ਕਰਕੇ ਪਾਣੀ ਬਚਾਇਆ ਜਾ ਸਕਦਾ ਹੈ। ਘਰਾਂ ਵਿਚ ਬੁਰਸ਼ ਕਰਨ ਤੇ ਨਹਾਉਣ, ਕੱਪੜੇ ਧੋਣ ਤੇ ਰਸੋਈਆਂ ਵਿਚ ਪਾਣੀ ਬਾਲਟੀਆਂ ਜਾਂ ਟੱਬ ਭਰ ਕੇ ਵਰਤਣਾ ਚਾਹੀਦਾ ਹੈ। ਖੇਤਾਂ ਵਿਚ ਸਿੰਜਾਈ ਲਈ ਤੁਪਕਾ ਸਕੀਮ ਅਪਣਾਉਣੀ ਚਾਹੀਦੀ ਹੈ। ਜੇਕਰ ਸਰਕਾਰ ਸਾਫ਼ ਕੀਤਾ ਨਹਿਰੀ ਪਾਣੀ ਘਰਾਂ ਅਤੇ ਕਾਰਖਾਨਿਆਂ ਨੂੰ ਨਹਾਉਣ ਤੇ ਕੱਪੜੇ ਧੋਣ ਲਈ ਸਪਲਾਈ ਕਰ ਸਕੇ ਤਾਂ ਪੀਣ ਵਾਲਾ ਧਰਤੀ ਹੇਠਲਾ ਪਾਣੀ ਹੋਰ ਬਚ ਸਕਦਾ ਹੈ। ਕਿਸਾਨਾਂ ਨੂੰ ਝੋਨੇ ਦੀ ਥਾਂ ਮੱਕੀ ਤੇ ਕਮਾਦ ਵਰਗੀਆਂ ਫ਼ਸਲਾਂ ਬੀਜਣ ਲਈ ਉਤਸ਼ਾਹਤ ਕਰਨਾ ਚਾਹੀਦਾ ਹੈ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਗੁਰੂ ਨਾਨਕ ਵਾੜਾ, ਅੰਮ੍ਰਿਤਸਰ।

ਮਾਂ ਰੱਬ ਦਾ ਦੂਜਾ ਰੂਪ
ਮਾਂ ਦਿਵਸ ਮਨਾਉਣ ਦੀਆਂ ਖ਼ਬਰਾਂ ਪੜ੍ਹਦਿਆਂ-ਪੜ੍ਹਦਿਆਂ ਜੋ ਖਿਆਲ ਮਨ 'ਚ ਆਇਆ ਪਾਠਕਾਂ ਨਾਲ ਸਾਂਝਾ ਕਰ ਰਿਹਾ ਹਾਂ। ਇਕ ਆਦਮੀ ਦੂਜੇ ਨੂੰ ਪੁੱਛਦਾ ਕੀ ਤੂੰ ਰੱਬ ਵੇਖਿਆ ਹੈ? ਦੂਜਾ ਅੱਗੋਂ ਜਵਾਬ ਦਿੰਦਾ, ਮੈਂ ਰੱਬ ਵੇਖਿਆ ਤਾਂ ਨਹੀਂ ਪਰ ਲਗਦਾ ਮੇਰੀ ਮਾਂ ਵਰਗਾ ਹੋਣਾ। ਸੱਚਮੁੱਚ ਇਸ ਧਰਤੀ 'ਤੇ ਜੇ ਰੱਬ ਦਾ ਕੋਈ ਵਜੂਦ ਵੇਖਣ ਨੂੰ ਮਿਲਦਾ ਹੈ ਤਾਂ ਉਹ ਹੈ 'ਮਾਂ'। ਰੱਬ ਹੈ ਇਕ ਖਿਆਲ ਦਾ ਨਾਂਅ ਪਰ ਮਾਂ ਹੈ ਇਕ ਪਿਆਰ ਦਾ ਨਾਂਅ। ਰੱਬ ਹੈ ਸ੍ਰਿਸ਼ਟੀ ਸਿਰਜਣਹਾਰ, ਐਪਰ ਮਾਂ ਹੈ ਪਾਲਣਹਾਰ। ਮਾਂ-ਮਾਂ ਕਰਦਾ ਬੱਚਾ ਪਲਦਾ, ਮਾਂ-ਮਾਂ ਕਰਦਾ ਜੋਬਨ ਫੜਦਾ। ਪਾਲ-ਪਾਲ ਮਾਂ ਵੱਡਾ ਕਰਦੀ, ਦੁੱਖ-ਸੁੱਖ ਆਪਣੇ ਸਿਰ 'ਤੇ ਜਰਦੀ। ਰਿਸ਼ੀ-ਮੁਨੀ ਅਵਤਾਰ ਕਹਾਏ, ਮਾਂ ਨੇ ਹੀ ਸਭ ਗੋਦ ਖਿਡਾਏ। ਮਾਂ ਦੇ ਪਿਆਰ ਦਾ ਅਜਬ ਨਜ਼ਾਰਾ, ਨਾ ਮਾਂ ਵਰਗਾ ਕੋਈ ਹੋਰ ਸਹਾਰਾ। ਕੀ-ਕੀ ਮਾਂ ਦੀ ਸਿਫ਼ਤ ਸੁਣਾਵਾਂ, ਮਨ ਭਰ ਆਉਂਦਾ ਕੀ ਬਤਲਾਵਾਂ। ਹੁਕਮਾ ਮੇਰੀ ਮਾਂ ਹੁੰਦੀ ਸੀ, ਠੰਢੀ-ਮਿੱਠੀ ਜਿਹਦੀ ਛਾਂ ਹੁੰਦੀ ਸੀ। ਬਾਰਿਸ਼ ਕਹਿ ਜਦ ਆਵਾਜ਼ ਲਗਾਵੇ, ਇੰਜ ਲਗਦਾ ਸੀ ਕੋਈ ਰੱਬ ਬੁਲਾਵੇ। ਇਸੇ ਖਿਆਲ 'ਚ ਹੈ ਇਹ ਲਿਖਿਆ, ਮਾਂ ਵਰਗਾ ਨੀ ਕੋਈ ਦਿਖਿਆ। ਲਿਖਤ ਮੇਰੀ 'ਚ ਇਹੋ ਸਬੂਤ, ਮਾਂ ਹੈ ਰੱਬ ਦਾ ਦੂਜਾ ਰੂਪ।

-ਬਨਾਰਸੀ ਦਾਸ ਅਧਿਆਪਕ
ਰੱਤੇਵਾਲ (ਨਵਾਂਸ਼ਹਿਰ)।

29/05/2017

 ਰਸਾਤਲ ਵੱਲ ਜਾ ਰਹੀ ਸਿੱਖਿਆ
ਬੋਰਡ ਦੀਆਂ ਜਮਾਤਾਂ ਦੇ ਨਤੀਜੇ ਬੇਹੱਦ ਨਿਰਾਸ਼ਾਜਨਕ ਰਹੇ ਹਨ। ਦਸਵੀਂ ਜਮਾਤ ਦੇ 14 ਹਜ਼ਾਰ ਬੱਚਿਆਂ ਦਾ ਮਾਤ ਭਾਸ਼ਾ ਪੰਜਾਬੀ ਦੇ ਵਿਸ਼ੇ 'ਚੋਂ ਫੇਲ੍ਹ ਹੋ ਜਾਣਾ ਬੇਹੱਦ ਮਾੜਾ ਪੱਖ ਕਿਹਾ ਜਾ ਸਕਦਾ ਹੈ। ਦਿਨੋ ਦਿਨ ਰਸਾਤਲ ਵੱਲ ਜਾ ਰਹੀ ਸਰਕਾਰੀ ਸਕੂਲਾਂ ਦੀ ਸਿੱਖਿਆ ਦਾ ਮਾਮਲਾ ਬੇਹੱਦ ਗੰਭੀਰ ਹੈ। ਸਰਕਾਰੀ ਸਕੂਲਾਂ ਦੇ ਕੇਵਲ 24 ਵਿਦਿਆਰਥੀਆਂ ਦਾ ਪੰਜਾਬ ਦੀ ਮੈਰਿਟ 'ਚ ਆਉਣਾ ਸਰਕਾਰੀ ਸਕੂਲਾਂ ਦੀ ਕਾਰਗੁਜ਼ਾਰੀ 'ਤੇ ਸਵਾਲ ਖੜ੍ਹੇ ਕਰਦਾ ਹੈ। ਅਧਿਆਪਕ ਵਰਗ ਮਾੜੇ ਨਤੀਜਿਆਂ ਲਈ ਰਾਈਟ-ਟੂ ਐਜੂਕੇਸ਼ਨ ਕਾਨੂੰਨ ਅਤੇ ਅਧਿਆਪਕਾਂ ਤੋਂ ਲਏ ਜਾਂਦੇ ਬੇਲੋੜੇ ਕੰਮਾਂ ਨੂੰ ਜ਼ਿੰਮੇਵਾਰ ਠਹਿਰਾ ਰਿਹਾ ਹੈ। ਅਜੋਕੇ ਸਮੇਂ ਸਰਕਾਰੀ ਸਕੂਲਾਂ 'ਚ ਕੇਵਲ ਲੋੜਵੰਦ ਜਾਂ ਆਰਥਿਕ ਤੌਰ 'ਤੇ ਕਮਜ਼ੋਰ ਵਰਗਾਂ ਦੇ ਬੱਚੇ ਹੀ ਸਿੱਖਿਆ ਲੈ ਰਹੇ ਹਨ। ਇਕ ਦੂਜੇ ਸਿਰ ਦੋਸ਼ ਮੜ੍ਹ ਕੇ ਇਸ ਸਮੱਸਿਆ ਤੋਂ ਮੁਕਤ ਨਹੀਂ ਹੋਇਆ ਜਾ ਸਕਦਾ।


-ਸੁਖਵੀਰ ਘੁਮਾਣ ਦਿੜ੍ਹਬਾ


ਕਿਸਾਨੀ...
ਸਾਡੇ ਦੇਸ਼ ਵਿਚ ਕੋਈ ਕਾਰਖਾਨੇ ਵਿਚ ਜੇ ਕੋਈ ਚੀਜ਼ ਤਿਆਰ ਕਰਦਾ ਹੈ ਤਾਂ ਉਹ ਇਕ ਕਿਲੋ ਕੱਚਾ ਮਾਲ ਲੈ ਕੇ ਉਸ ਤੋਂ ਘੱਟ ਵਜ਼ਨ ਦੀ ਚੀਜ਼ ਤਿਆਰ ਕਰਦਾ ਹੈ। ਜਿਵੇਂ ਇਕ ਕਿਲੋ ਲੋਹਾ ਜਾਂ ਪਲਾਸਟਿਕ ਲੈ ਕੇ ਉਹਦਾ ਕਾਰਖਾਨਾ 900 ਜਾਂ 800 ਗਰਾਮ ਦੀ ਚੀਜ਼ ਤਿਆਰ ਕਰਦਾ ਹੈ। ਦੂਜੇ ਪਾਸੇ ਕਿਸਾਨ ਦਾ ਕਾਰਖਾਨਾ (ਖੇਤ) ਇਕ ਕਿਲੋ ਬੀਜ ਲੈ ਕੇ 50 ਜਾਂ 60 ਕਿਲੋ ਬਣਾ ਦਿੰਦਾ ਹੈ। ਘੱਟ ਮਾਲ ਤਿਆਰ ਕਰਨ ਵਾਲਾ ਅਮੀਰ ਹੋਈ ਜਾਂਦਾ ਹੈ ਤੇ 60 ਗਣਾਂ ਵੱਧ ਤਿਆਰ ਕਰਨ ਵਾਲਾ ਕਰਜ਼ਾਈ ਹੋਈ ਜਾਂਦਾ ਹੈ। ਸਾਡੇ ਦੇਸ਼ ਦੀ ਖੇਤੀ ਨੀਤੀ ਵੱਲ ਸਰਕਾਰ ਧਿਆਨ ਦੇਵੇ, ਮਰਦੀ ਕਿਸਾਨੀ ਨੂੰ ਬਚਾਵੇ।


-ਗੁਰਾਂਦਿੱਤਾ ਸੰਧੂ
ਮੋਬਾਈਲ : 98760-47435.


ਇਕ ਪੱਖ
ਪਿਛਲੇ ਦਿਨੀਂ 'ਅਜੀਤ' ਵਿਚ ਲੇਖ 'ਲੋਕਾਂ ਦਾ ਸਰਕਾਰੀ ਸਕੂਲਾਂ ਵਿਚ ਵਿਸ਼ਵਾਸ ਹੋ ਸਕਦਾ ਹੈ ਬਹਾਲ' ਪੜ੍ਹਿਆ। ਕੇਵਲ ਇਕ ਹੀ ਪੱਖ ਉਜਾਗਰ ਕੀਤਾ ਗਿਆ ਹੈ, ਜਿਸ ਨਾਲ ਮੈਂ ਪੂਰਨ ਤੌਰ 'ਤੇ ਸਹਿਮਤ ਨਹੀਂ ਹਾਂ। ਕੇਵਲ ਅਧਿਆਪਕ ਹੀ ਕਿਉਂ, ਹਰ ਸਰਕਾਰੀ ਮੁਲਾਜ਼ਮ, ਅਫਸਰ, ਮੰਤਰੀ, ਨੇਤਾ ਜੋ ਸਰਕਾਰੀ ਖਜ਼ਾਨੇ ਵਿਚੋਂ ਤਨਖਾਹ ਲੈ ਰਿਹਾ ਹੈ, ਉਹ ਆਪਣੇ ਬੱਚੇ ਸਰਕਾਰੀ ਸਕੂਲਾਂ ਵਿਚ ਲਾਉਣ ਲਈ ਪਾਬੰਦ ਹੋਵੇ। ਫਿਰ ਇਨ੍ਹਾਂ ਸਰਕਾਰੀ ਸਕੂਲਾਂ ਵਿਚ ਕਿਸੇ ਅਧਿਆਪਕ ਦੀ ਗ਼ੈਰ-ਵਿਦਿਅਕ ਕੰਮਾਂ ਜਿਵੇਂ ਬੀ.ਐਲ.ਓ., ਮਰਦਮਸ਼ੁਮਾਰੀ ਅਤੇ ਹੋਰ ਅਨੇਕਾਂ ਡਾਟੇ ਇਕੱਠੇ ਕਰਨ 'ਤੇ ਡਿਊਟੀ ਵੀ ਨਹੀਂ ਲੱਗੇਗੀ।


-ਗੁਰਦਿਆਲ ਰਾਹੀ
ਮੋਬਾਈਲ : 94646-16539.


ਮੋਦੀ ਸਰਕਾਰ ਦੇ ਤਿੰਨ ਸਾਲ
ਮੋਦੀ ਸਰਕਾਰ ਦੇ ਤਿੰਨ ਸਾਲਾਂ ਦਾ ਲੇਖਾ-ਜੋਖਾ, ਜਿਸ ਵਿਚ ਹਰ ਵਰਗ ਦੀਆਂ ਸਮੱਸਿਆਵਾਂ ਅਤੇ ਵਿਚਾਰ ਪੜ੍ਹੇ। ਪਰ ਕੁਝ ਸਮੱਸਿਆਵਾਂ ਅਜਿਹੀਆਂ ਹਨ ਜਿਨ੍ਹਾਂ ਨੂੰ ਜਾਣ ਕੇ ਬਟਾਲਾ ਵਾਸੀ ਅਤੇ ਲੋਕ ਜ਼ਰੂਰ ਸਹਿਮਤ ਹੋਣਗੇ। ਸਭ ਤੋਂ ਵੱਡੀ ਸਮੱਸਿਆ ਸੜਕੀ ਆਵਾਜਾਈ ਦੀ ਹੈ। ਪਠਾਨਕੋਟ ਤੋਂ ਮਹਿਤਾ ਚੌਕ ਬਿਆਸ ਜਾਣ ਲਈ ਅੱਜ ਵੀ ਸ਼ਹਿਰ ਵਿਚੋਂ ਦੀ ਹੀ ਲੰਘਣਾ ਪੈਂਦਾ ਹੈ। ਪਠਾਨਕੋਟ ਰੋਡ ਤੋਂ ਮਹਿਤਾ-ਬਿਆਸ ਰੋਡ ਲਈ ਬਾਈਪਾਸ ਤਿਆਰ ਕੀਤਾ ਜਾਵੇ ਤਾਂ ਜੋ ਭਾਰੀ ਵਾਹਨ ਬਾਈਪਾਸ ਜਾਣ। ਸਰਕਾਰ ਨੂੰ ਚਾਹੀਦਾ ਹੈ ਕਿ ਬਟਾਲੇ ਸ਼ਹਿਰ ਨੂੰ ਇਕ ਵੱਡੀ ਸਨਅਤ ਵਜੋਂ ਵਿਕਸਤ ਕੀਤਾ ਜਾਵੇ।


-ਪਰਮਜੀਤ ਸਿੰਘ
ਮੋਬਾਈਲ : 94642-41024.

26/05/2017

 ਜਬਰ-ਜਨਾਹ ਦੀਆਂ ਘਟਨਾਵਾਂ
ਦਸੰਬਰ 2012 'ਚ ਦਿੱਲੀ ਵਿਚ ਵਾਪਰੇ 'ਦਾਮਨੀ ਜਬਰ-ਜਨਾਹ ਦੁਖਾਂਤ' ਤੋਂ ਬਾਅਦ ਪੂਰੇ ਹਿੰਦੁਸਤਾਨ ਵਿਚ ਉੱਠੇ ਗੁੱਸੇ ਦੇ ਅੱਗੇ ਭਾਰਤ ਦੀ ਸੰਸਦ ਨੇ ਝੁੱਕ ਕੇ ਆਈ.ਪੀ.ਸੀ, ਸੀ.ਆਰ.ਪੀ.ਸੀ ਅਤੇ ਐਵੀਡੈਂਸ ਐਕਟ ਵਿਚ ਔਰਤਾਂ ਸਬੰਧੀ ਧਾਰਾ ਫ਼ੌਜਦਾਰੀ ਕਾਨੂੰਨ (ਤਰਮੀਮ ਐਕਟ 2013) ਪਾਸ ਕਰਕੇ ਕਾਨੂੰਨੀ ਪਰਿਭਾਸ਼ਾ ਅਤੇ ਜ਼ਾਬਤੇ ਨੂੰ ਵਿਆਪਕ ਤੌਰ 'ਤੇ ਬਦਲ ਦਿੱਤਾ ਸੀ ਅਤੇ ਸਜ਼ਾ ਨੂੰ ਹੋਰ ਸਖ਼ਤ ਕਰ ਦਿੱਤਾ ਸੀ। ਜਿਹੜੇ-ਜਿਹੜੇ ਹਿਸਾਬ ਨਾਲ ਜੁਰਮਾਂ ਵਿਚ ਵਾਧਾ ਹੋਇਆ, ਉਸੇ ਹਿਸਾਬ ਨਾਲ ਆਈ.ਪੀ.ਸੀ. ਦੀਆਂ ਨਵੀਆਂ ਧਾਰਾਵਾਂ ਵਿਚ ਸੋਧ ਕੀਤੀ ਗਈ। ਇਸੇ ਤਰ੍ਹਾਂ ਸੀ.ਆਰ.ਪੀ.ਸੀ. ਵਿਚ ਵੀ ਨਵੀਆਂ ਧਾਰਾਵਾਂ ਸ਼ਾਮਿਲ ਕੀਤੀਆਂ ਗਈਆਂ। ਪ੍ਰੰਤੂ ਨਵੇਂ ਕਾਨੂੰਨ ਦੇ ਬਦਲਣ ਦੇ ਨਾਲ ਵੀ ਇਹ ਸਥਿਤੀ ਠੀਕ ਹੁੰਦੀ ਨਜ਼ਰ ਨਹੀਂ ਆ ਰਹੀ ਅਤੇ ਰੋਜ਼ਾਨਾ ਅਖ਼ਬਾਰਾਂ, ਟੈਲੀਵਿਜ਼ਨ ਵਿਚ ਇਸ ਘਿਨੌਣੇ ਜੁਰਮ ਦੀਆਂ ਖ਼ਬਰਾਂ ਆ ਰਹੀਆਂ ਹਨ।
ਕਾਨੂੰਨ ਵਿਚ ਸੋਧ ਤਾਂ ਕਰ ਦਿੱਤੀ ਗਈ, ਪ੍ਰੰਤੂ ਇਸ ਦੇ ਪਿੱਛੇ ਕੀ ਕਾਰਨ ਹਨ, ਨੂੰ ਕਿਸੇ ਨੇ ਵੀ ਘੋਖਣ ਦੀ ਕੋਸ਼ਿਸ਼ ਨਹੀਂ ਕੀਤੀ। ਨਸ਼ਿਆਂ ਦਾ ਨੌਜਵਾਨਾਂ ਵੱਲੋਂ ਵਧੇਰੇ ਸੇਵਨ ਅਤੇ ਮਾਂ-ਪਿਉ ਛੋਟੇ-ਛੋਟੇ ਬੱਚਿਆਂ ਨੂੰ ਅਤੇ ਜਵਾਨ ਬੱਚਿਆਂ ਨੂੰ ਮੋਬਾਈਲ ਲੈ ਕੇ ਦੇ ਦਿੰਦੇ ਹਨ, ਜੋ ਇਹ ਨੌਜਵਾਨ ਬੱਚੇ ਮੋਬਾਈਲ ਉੱਪਰ ਗੰਦੀਆਂ ਫ਼ਿਲਮਾਂ ਦੇਖਦੇ ਹਨ, ਜਿਸ ਨਾਲ ਉਨ੍ਹਾਂ ਦੀ ਕਾਮ ਵਾਸ਼ਨਾ ਭੜਕਦੀ ਹੈ ਅਤੇ ਉਹ ਕਾਮ ਵਾਸ਼ਨਾ ਵਿਚ ਅੰਨ੍ਹੇ ਹੋਏ ਇਹ ਕਾਰਾ ਕਰੀ ਜਾ ਰਹੇ ਹਨ। ਇਸ ਦਾ ਕੀ ਨਤੀਜਾ ਨਿਕਲੇਗਾ ਬਿਨਾਂ ਸੋਚੇ ਇਹ ਕਾਰਾ ਬੇਖੌਫ਼ ਕਰੀ ਜਾ ਰਹੇ ਹਨ। ਪਹਿਲਾਂ ਬੱਚੇ ਦਸਵੀਂ-ਗਿਆਰਵੀਂ ਕਲਾਸ ਵਿਚ ਪੜ੍ਹਦੇ ਸੀ ਤੇ ਮੁੰਡੇ-ਕੁੜੀਆਂ ਇਕੱਠੇ ਖੇਡਦੇ ਸੀ। ਉਨ੍ਹਾਂ ਨੂੰ ਇਸ ਪ੍ਰਤੀ ਕੋਈ ਜਾਣਕਾਰੀ ਨਹੀਂ ਹੁੰਦੀ ਸੀ ਤੇ ਨਾ ਹੀ ਉਨ੍ਹਾਂ ਦਾ ਇਨ੍ਹਾਂ ਗੰਦੀਆਂ ਹਰਕਤਾਂ ਵੱਲ ਝੁਕਾਅ ਹੁੰਦਾ ਸੀ। ਜੇ ਅਜਿਹਾ ਹਾਲ ਰਿਹਾ ਤਾਂ ਤੁਹਾਨੂੰ ਪੇਟੀ ਬੰਦ ਫੋਰਸਾਂ ਵਿਚ ਭਰਤੀ ਲਈ ਨੌਜਵਾਨ ਮੁੰਡੇ ਨਹੀਂ ਮਿਲਣਗੇ, ਜੋ ਕਿ ਬਹੁਤ ਹੀ ਵੱਡੀ ਚਿੰਤਾ ਦਾ ਵਿਸ਼ਾ ਹੈ। ਇਸ ਪ੍ਰਤੀ ਸਰਕਾਰਾਂ ਨੂੰ ਸੁਚੇਤ ਹੋਣ ਦੀ ਲੋੜ ਹੈ ਅਤੇ ਸਮਾਜਿਕ ਜਥੇਬੰਦੀਆਂ ਅਤੇ ਬੁੱਧੀਜੀਵੀਆਂ ਨੂੰ ਸੰਜੀਦਗੀ ਨਾਲ ਗ਼ੌਰ ਕਰਨ ਦੀ ਲੋੜ ਹੈ ਅਤੇ ਸਕੂਲਾਂ-ਕਾਲਜਾਂ ਵਿਚ ਸੈਮੀਨਾਰ ਲਗਾ ਕੇ ਨੌਜਵਾਨ ਪੀੜ੍ਹੀ ਨੂੰ ਜਾਗਰੂਕ ਕਰਨ ਦੀ ਲੋੜ ਹੈ।

-ਗੁਰਮੀਤ ਸਿੰਘ ਵੇਰਕਾ
ਮੋਬ: 98786-00221

ਕਦੋਂ ਬਣੇਗਾ ਸਵੱਛ ਭਾਰਤ
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੱਲੋਂ ਚਲਾਈ ਗਈ ਸਵੱਛ ਭਾਰਤ ਮੁਹਿੰਮ ਕਿੱਧਰੇ ਠੱਪ ਹੋ ਗਈ ਲਗਦੀ ਹੈ। ਪ੍ਰਧਾਨ ਮੰਤਰੀ ਵੱਲੋਂ ਰਾਸ਼ਟਰਪਿਤਾ ਮਹਾਤਮਾ ਗਾਂਧੀ ਦੀ ਦੀ ਜੈਅੰਤੀ ਮੌਕੇ ਸਵੱਛ ਭਾਰਤ ਮੁਹਿੰਮ ਦਾ ਐਲਾਨ ਕੀਤਾ ਗਿਆ ਸੀ। ਗਾਂਧੀ ਜੀ ਦਾ ਕਥਨ ਸੀ ਕਿ ਭਾਰਤ ਦਾ ਭਵਿੱਖ ਪਿੰਡਾਂ ਵਿਚ ਵਸਦਾ ਹੈ। ਕੀ ਗਾਂਧੀ ਜੀ ਦਾ ਸੁਪਨਾ ਪਿੰਡਾਂ ਵਿਚ ਪੂਰਾ ਹੋ ਸਕਦਾ ਹੈ, ਜਿਥੇ ਸਵੱਛ ਭਾਰਤ ਤਾਂ ਦੂਰ ਦੀ ਗੱਲ, ਆਮ ਲੋਕਾਂ ਦਾ ਜਿਊਣਾ ਵੀ ਦੂਭਰ ਹੈ। ਜਿਥੇ ਦੇਸ਼ ਦੀ ਆਜ਼ਾਦੀ ਤੋਂ ਕਰੀਬ 70 ਸਾਲ ਬਾਅਦ ਵੀ ਲੋਕ ਮੁਢਲੀਆਂ ਸਹੂਲਤਾਂ ਤੋਂ ਵਾਂਝੇ ਹਨ। ਅਫ਼ਸਰਸ਼ਾਹੀ ਸਿਸਟਮ ਆਪਣੇ ਢਿੱਡ ਭਰਨ ਲਈ ਖਾਨਾਪੂਰਤੀ ਕਰੀ ਜਾਂਦਾ ਹੈ। ਅਰਬਾਂ ਰੁਪਏ ਸਵੱਛ ਭਾਰਤ ਦੇ ਨਾਂਅ 'ਤੇ ਖਰਚੇ ਜਾ ਰਹੇ ਹਨ ਪਰ ਸਵੱਛ ਭਾਰਤ ਦੀ ਕੋਈ ਤਸਵੀਰ ਨਜ਼ਰ ਨਹੀਂ ਆ ਰਹੀ। ਸਰਕਾਰ ਇਨ੍ਹਾਂ ਸਰਕਾਰੀ ਅਫਸਰਾਂ ਦੇ ਹੱਥਾਂ ਵਿਚ ਕਮਾਂਡ ਦੇਣ ਦੀ ਬਜਾਏ ਪ੍ਰਾਈਵੇਟ ਕੰਪਨੀਆਂ ਨਾਲ ਸਮਝੌਤਾ ਕਰਕੇ ਸਵੱਛ ਭਾਰਤ ਦਾ ਸੁਪਨਾ ਪੂਰਾ ਕਰ ਸਕਦੀ ਹੈ।

-ਪੰਮਾ ਬਘੌਰੀਆ
ਪਿੰਡ ਬਘੌਰਾ, ਨਵਾਂਸ਼ਹਿਰ।

25/05/2017

 ਵਿਦਿਆਰਥੀਆਂ ਦੀਆਂ ਪ੍ਰੇਸ਼ਾਨੀਆਂ
ਵਿਦਿਆਰਥੀਆਂ ਨੂੰ ਤਾਂ ਸਕੂਲ ਵਿਚ ਦਾਖ਼ਲਾ ਲੈਂਦਿਆਂ ਹੀ ਪ੍ਰੇਸ਼ਾਨੀਆਂ ਘੇਰ ਲੈਂਦੀਆਂ ਹਨ। ਸਰਕਾਰੀ ਸਕੂਲਾਂ ਵਿਚ ਹੋਣ ਤਾਂ ਉੱਥੇ ਦੀਆਂ ਸੁੱਖ ਸਹੂਲਤਾਂ ਤੇ ਪੜ੍ਹਾਈ ਦੇ ਸਾਧਨਾਂ ਦੀ ਘਾਟ ਦਾ ਸਾਹਮਣਾ ਕਰਦੇ ਹਨ। ਪ੍ਰਾਈਵੇਟ ਸਕੂਲਾਂ ਵਿਚ ਸਹੂਲਤਾਂ ਦੇ ਨਾਂਅ ਹੇਠ ਸਾਲਾਨਾ ਫ਼ੀਸਾਂ, ਦਾਖ਼ਲਾ ਫੀਸਾਂ, ਵੈਨ ਫ਼ੀਸਾਂ, ਸਮਾਰਟ ਕਲਾਸ ਫ਼ੀਸਾਂ, ਕੰਪਿਊਟਰ ਫ਼ੀਸਾਂ ਅਤੇ ਵਪਾਰੀ ਪਹੁੰਚ ਹੇਠ ਕਿਤਾਬਾਂ-ਕਾਪੀਆਂ, ਸਟੇਸ਼ਨਰੀ ਤੇ ਵਰਦੀਆਂ ਆਦਿ ਲਈ ਹੁੰਦੀ ਲੁੱਟ ਨੂੰ ਅੱਖੀਂ ਤੱਕਦੇ ਹਨ। ਫਿਰ ਬੋਝ ਪੜ੍ਹਾਈ ਦੇ ਨੰਬਰਾਂ ਦਾ ਅਤੇ ਅਸੈਸਮੈਂਟ ਦੇ ਕਿੱਸੇ ਵੱਖਰੇ ਹੁੰਦੇ ਹਨ। ਹੱਸਣਾ-ਖੇਡਣਾ ਤਾਂ ਨਕਲੀ ਜਿਹਾ ਹੀ ਹਿੱਸੇ ਆਉਂਦਾ ਹੈ। ਕਾਲਜ ਜਾਣ ਤੋਂ ਪਹਿਲਾਂ ਅਤੇ ਬਾਅਦ ਵਿਚ ਟਿਊਸ਼ਨਾਂ ਵੀ ਪੜ੍ਹਨੀਆਂ ਹੁੰਦੀਆਂ ਹਨ। ਵਿਦਿਆਰਥੀਆਂ ਕੋਲ ਸਮੇਂ ਦੀ ਬੜੀ ਤੰਗੀ ਹੁੰਦੀ ਹੈ। ਅਕਸਰ ਭੋਜਨ ਵੀ ਸਹੀ ਢੰਗ ਨਾਲ ਨਹੀਂ ਕੀਤਾ ਹੁੰਦਾ। ਸੋ, ਸਾਧਾਰਨ ਵਿਦਿਆਰਥੀਆਂ ਨੂੰ ਤੰਗ ਕਰਨ ਵਾਲੇ ਰਵੱਈਏ ਅਸਾਧਾਰਨ ਘਟਨਾਵਾਂ ਨੂੰ ਜਨਮ ਦਿੰਦੇ ਹਨ। ਵਿਦਿਆਰਥੀਆਂ ਅੰਦਰ ਸਵੈ-ਮਾਣ ਭਰਿਆ ਜਾਣਾ ਚਾਹੀਦਾ ਹੈ ਕਿਉਂਕਿ ਕੱਲ੍ਹ ਉਨ੍ਹਾਂ ਨੇ ਹੀ ਪ੍ਰਸ਼ਾਸਨ ਦਾ ਅੰਗ ਬਣਨਾ ਹੈ।


-ਰਸ਼ਪਾਲ ਸਿੰਘ ਸੋਸ਼ਿਆਲੋਜਿਸਟ
ਚੇਅਰਮੈਨ ਸ਼ੁਭ ਕਰਮਨ ਸੁਸਾਇਟੀ
ਟਾਂਡਾ ਰੋਡ, ਹੁਸ਼ਿਆਰਪੁਰ।


...ਚੋਰ ਦੀ ਮਾਂ ਨੂੰ ਮਾਰੋ

ਹਾਲ ਹੀ ਵਿਚ ਆਏ 12ਵੀਂ ਦੇ ਨਤੀਜਿਆਂ ਕਾਰਨ ਪੰਜਾਬ ਸਿੱਖਿਆ ਵਿਭਾਗ ਫਿਰ ਚਰਚਾ ਵਿਚ ਹੈ। ਸਭ ਤੋਂ ਜ਼ਿਆਦਾ ਨਿੰਦਣਯੋਗ ਗੱਲ ਇਹ ਹੈ ਕਿ ਸਿਰਫ ਮਾਂ-ਬੋਲੀ ਪੰਜਾਬੀ ਵਿਸ਼ੇ ਵਿਚੋਂ ਹੀ ਲਗਪਗ 15 ਹਜ਼ਾਰ ਵਿਦਿਆਰਥੀ ਫੇਲ੍ਹ ਹੋ ਗਏ ਹਨ। ਮਾਮਲੇ ਦੀ ਜੜ੍ਹ ਵਿਚ ਜਾਣ ਦੀ ਬਜਾਏ 20 ਫ਼ੀਸਦੀ ਤੋਂ ਘੱਟ ਨਤੀਜਾ ਦੇਣ ਵਾਲੇ ਅਧਿਆਪਕਾਂ ਖਿਲਾਫ਼ ਵਿਭਾਗੀ ਕਾਰਵਾਈ ਦੇ ਹੁਕਮ ਦਿੱਤੇ ਗਏ ਹਨ। ਪੰਜਾਬੀ ਦਾ ਮੁਹਾਵਰਾ ਹੈ ਕਿ 'ਚੋਰ ਨੂੰ ਨਾ ਮਾਰੋ ਚੋਰ ਦੀ ਮਾਂ ਨੂੰ ਮਾਰੋ।' ਜੇਕਰ ਪੰਜਾਬੀ ਲੈਕਚਰਾਰ ਵਿਸ਼ਾ ਮਾਹਿਰ ਨਹੀਂ ਹੋ ਸਕਦੇ ਅਤੇ ਉਹ ਵਿਦਿਆਰਥੀਆਂ ਨਾਲ ਨਿਆਂ ਵੀ ਨਹੀਂ ਕਰ ਸਕਦੇ, ਫਿਰ ਨਤੀਜੇ ਵਧੀਆ ਹੋਣ ਦੀ ਆਸ ਕਿਵੇਂ ਰੱਖੀ ਜਾ ਸਕਦੀ ਹੈ। 20 ਸਾਲ ਤੱਕ ਮੈਥ, ਸਾਇੰਸ, ਐਸ.ਐਸ., ਹਿੰਦੀ, ਅੰਗਰੇਜ਼ੀ ਅਤੇ ਸਰੀਰਕ ਸਿੱਖਿਆ ਪੜ੍ਹਾਉਣ ਵਾਲੇ ਨੂੰ ਜੇ ਤੁਸੀਂ ਉਸ ਦੀ ਸੇਵਾ ਦਾ ਲਾਭ ਦੇਣਾ ਚਾਹੁੰਦੇ ਹੋ ਤਾਂ ਇਹ ਉਸ ਦੇ ਵਿਸ਼ੇ ਵਿਚ ਹੀ ਹੋਵੇ ਨਾ ਕਿ ਕੇਵਲ ਪੰਜਾਬੀ ਦੀ ਐਮ.ਏ. ਕਰਨ ਨਾਲ ਉਸ ਨੂੰ ਪੰਜਾਬੀ ਲੈਕਚਰਾਰ ਬਣਾ ਦਿੱਤਾ ਜਾਵੇ। ਵਿਸ਼ੇ ਦਾ ਮਾਹਿਰ ਅਧਿਆਪਕ ਹੀ ਵਿਸ਼ੇ ਨਾਲ ਇਨਸਾਫ਼ ਕਰ ਸਕਦਾ ਹੈ, ਦੂਜਾ ਵਿਸ਼ਾ ਮਾਹਿਰ ਨਹੀਂ। ਮੇਰੀ ਸਿੱਖਿਆ ਮੰਤਰੀ ਸਾਹਿਬਾ ਨੂੰ ਬੇਨਤੀ ਹੈ ਕਿ ਭਾਸ਼ਾ ਅਧਿਆਪਕਾ ਦਾ ਮਾਣ ਸਤਿਕਾਰ ਕਾਇਮ ਰੱਖਿਆ ਜਾਵੇ। ਸਿੱਖਿਆ ਵਿਭਾਗ ਵਿਚਾਲੇ ਇਹੋ ਜਿਹੇ ਪੁਰਾਣੇ ਨਿਯਮਾਂ ਨੂੰ ਤੁਰੰਤ ਬਦਲਿਆ ਜਾਵੇ। ਇਸ ਨਾਲ ਹੀ ਅਸੀਂ ਪੰਜਾਬੀ ਮਾਂ-ਬੋਲੀ ਦਾ ਸਤਿਕਾਰ ਕਾਇਮ ਰੱਖ ਸਕਦੇ ਹਾਂ।


-ਮਾਸਟਰ ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀਖਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

24/05/2017

ਭੁੱਖਮਰੀ ਦੀ ਮਾਰ
ਪਿਛਲੇ ਦਿਨੀਂ ਸੰਯੁਕਤ ਰਾਸ਼ਟਰ ਦੀ ਇਕ ਰਿਪੋਰਟ ਅਨੁਸਾਰ ਭਾਰਤ ਵਿਚ ਹਰ ਸਾਲ ਪੰਜ ਸਾਲ ਤੋਂ ਘੱਟ ਉਮਰ ਦੇ ਲਗਪਗ ਦਸ ਲੱਖ ਬੱਚਿਆਂ ਦੀ ਮੌਤ ਭੁੱਖਮਰੀ ਨਾਲ ਹੋ ਜਾਂਦੀ ਹੈ। ਭਾਰਤ ਵਿਸ਼ਵ ਸ਼ਕਤੀ ਬਣਨ ਜਾ ਰਿਹਾ ਹੈ। ਚਾਹੁੰਦੇ ਤਾਂ ਅਸੀਂ ਵੀ ਹਾਂ ਕਿ ਭਾਰਤ ਮਹਾਂਸ਼ਕਤੀ ਬਣੇ ਪਰ ਇਹ ਸ਼ਕਤੀ ਦੇਸ਼ ਦੇ ਉਨ੍ਹਾਂ ਨਾਗਰਿਕਾਂ ਲਈ ਕੋਈ ਮਾਅਨੇ ਨਹੀਂ ਰੱਖਦੀ, ਜਿਹੜੇ ਦਿਨ-ਰਾਤ ਹੱਡ ਭੰਨਵੀਂ ਮਿਹਨਤ ਕਰਕੇ ਵੀ ਭੁੱਖੇ ਪੇਟ ਸੌਣ ਲਈ ਮਜਬੂਰ ਹਨ। ਪਿਛਲੇ ਲੰਮੇ ਸਮੇਂ ਤੋਂ ਖੁਰਾਕੀ ਵਸਤਾਂ ਦੀਆਂ ਕੀਮਤਾਂ ਅਮਰ ਵੇਲ ਵਾਂਗ ਵਧਦੀਆਂ ਹੀ ਜਾ ਰਹੀਆਂ ਹਨ। ਇਨ੍ਹਾਂ ਖੁਰਾਕੀ ਵਸਤਾਂ ਦੀਆਂ ਕੀਮਤਾਂ ਨੂੰ ਸਥਿਰ ਕਰਨ ਲਈ ਕੋਈ ਸਾਰਥਿਕ ਯਤਨ ਨਹੀਂ ਹੋ ਰਹੇ। ਅੱਜ ਵੱਡੀ ਗਿਣਤੀ ਗੁਰਬਤ ਭਰਿਆ ਜੀਵਨ ਜਿਊਣ ਲਈ ਮਜਬੂਰ ਹੈ। ਇਸ ਗੱਲ ਵਿਚ ਪੂਰਨ ਸਚਾਈ ਹੈ ਕਿ ਅੱਜ ਭਾਰਤ ਅਨਾਜ ਪੱਖੋਂ ਆਤਮ-ਨਿਰਭਰ ਹੋ ਗਿਆ ਹੈ ਤੇ ਆਰਥਿਕ ਪੱਖੋਂ ਵੀ ਮਜ਼ਬੂਤ ਹੁੰਦਾ ਜਾ ਰਿਹਾ ਹੈ। ਇਸ ਦੇ ਬਾਵਜੂਦ ਭੁੱਖਮਰੀ ਨਾਲ ਬੱਚਿਆਂ ਦੀ ਮੌਤ ਦਰ ਦਾ ਪ੍ਰਤੀ ਸਾਲ ਵਧਦੇ ਜਾਣਾ ਭਾਰਤ ਦੇ ਅਕਸ ਨੂੰ ਵੱਡਾ ਧੱਬਾ ਲਾ ਰਿਹਾ ਹੈ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।


ਔਰਤਾਂ ਨਜ਼ਰ-ਅੰਦਾਜ਼ ਕਿਉਂ?
21ਵੀਂ ਸਦੀ ਵਿਚ ਵੀ ਔਰਤਾਂ ਨੂੰ ਅਤੀਤ ਸਮੇਂ ਵਾਂਗ ਹੀ ਜ਼ੁਲਮ ਦਾ ਟਾਕਰਾ ਕਰਨਾ ਪੈ ਰਿਹਾ ਹੈ। ਸੰਪਾਦਕੀ ਲੇਖ ਵਿਚ ਹਮਦਰਦ ਜੀ ਨੇ ਔਰਤਾਂ ਪ੍ਰਤੀ ਬਹੁਤ ਸੋਹਣਾ ਲਿਖਿਆ ਕਿ ਕਿਸ ਤਰ੍ਹਾਂ ਨਾਲ ਔਰਤ ਸ਼ੁਰੂ ਤੋਂ ਹੀ ਹਰ ਪਾਸਿਓਂ ਸੱਖਣੇਪਣ ਦਾ ਸੰਤਾਪ ਹੰਢਾਉਦੀ ਆ ਰਹੀ ਹੈ ਤੇ ਸਤੀ ਪ੍ਰਤੀ ਵਰਗੀਆਂ ਅਲਾਮਤਾਂ ਵਿਚੋਂ ਗੁਜ਼ਰਦੀ ਆ ਰਹੀ ਇਸ ਔਰਤ ਨੂੰ ਅੱਜ ਵੀ ਸੁੱਖ ਦਾ ਸਾਹ ਨਹੀਂ ਮਿਲਿਆ। ਤਿੰਨ ਤਲਾਕ ਦੇ ਮੁੱਦੇ 'ਤੇ ਵੀ ਅੱਜ ਇਨ੍ਹਾਂ ਵੱਲੋਂ ਇਹੀ ਇਨਸਾਫ਼ ਮੰਗਿਆ ਜਾ ਰਿਹਾ ਹੈ ਕਿ ਉਸ ਨੂੰ ਪੁਰਾਤਨ ਪਰੰਪਰਾਵਾਂ 'ਚੋਂ ਬਾਹਰ ਕੱਢ ਕੇ ਇਨਸਾਫ਼ ਦਿੱਤਾ ਜਾਵੇ, ਤਾਂ ਕਿ ਉਹ ਮਰਦ ਦੇ ਬਰਾਬਰ ਖੜ੍ਹੀ ਹੋ ਸਕੇ। ਇਸ ਮੁੱਦੇ 'ਤੇ ਜਿਥੇ ਮੁਸਲਿਮ ਸਮਾਜ ਨੂੰ ਅੱਗੇ ਆਉਣ ਦੀ ਲੋੜ ਹੈ, ਉੱਥੇ ਹੀ ਇਨਸਾਨੀਅਤ ਨਾਤੇ ਸਾਰਿਆਂ ਨੂੰ ਔਰਤਾਂ ਲਈ ਨਿਆਂ ਦਿਵਾਉਣ ਵਿਚ ਸਾਥ ਦੇਣਾ ਚਾਹੀਦਾ ਹੈ। ਕਰਟਿਸ ਅਨੁਸਾਰ ਔਰਤ ਦੇ ਸਨਮਾਨ ਨਾਲ ਸੱਭਿਅਤਾ ਦੀ ਪਛਾਣ ਹੁੰਦੀ ਹੈ। ਅੱਜ ਸਾਨੂੰ ਸਾਰਿਆਂ ਨੂੰ ਲੋੜ ਹੈ ਕਿ ਔਰਤ ਦੀ ਪੀੜਾ ਨੂੰ ਸਮਝ ਕੇ ਪੀੜਤ ਔਰਤਾਂ ਦੀ ਗਿਣਤੀ ਨੂੰ ਘਟਾਇਆ ਜਾਵੇ।


-ਰਵਿੰਦਰ ਸਿੰਘ ਰੇਸ਼ਮ
ਪਿੰਡ-ਉਮਰਪੁਰਾ (ਨੱਥੂਮਾਜਰਾ), ਸੰਗਰੂਰ।


ਵਿਗੜ ਰਿਹਾ ਅਮਨ ਕਾਨੂੰਨ
ਸਤਿਕਾਰਯੋਗ ਮੁੱਖ ਸੰਪਾਦਕ ਸਾਹਿਬ ਡਾ: ਬਰਜਿੰਦਰ ਸਿੰਘ ਹਮਦਰਦ ਹੁਰਾਂ ਦੀ ਕਲਮ ਤੋਂ ਲਿਖਿਆ ਸੰਪਾਦਕੀ ਲੇਖ 'ਵਿਗੜ ਰਿਹਾ ਅਮਨ ਕਾਨੂੰਨ-ਇਕ ਚੁਣੌਤੀ' ਕਾਫੀ ਜਾਣਕਾਰੀ ਭਰਪੂਰ ਸੀ। ਵਾਕਿਆ ਹੀ ਪੰਜਾਬ ਵਿਚ ਕੈਪਟਨ ਅਮਰਿੰਦਰ ਸਿੰਘ ਦੀ ਅਗਵਾਈ 'ਚ ਬਣੀ ਕਾਂਗਰਸ ਦੀ ਸਰਕਾਰ ਸਾਹਮਣੇ ਇਕ ਨਹੀਂ ਅਨੇਕਾਂ ਹੀ ਚੁਣੌਤੀਆਂ ਹਨ, ਜਿਵੇਂ ਨਸ਼ੇ, ਬੇਰੁਜ਼ਗਾਰੀ, ਗੈਂਗਸਟਰ, ਟ੍ਰੈਫਿਕ ਆਦਿ। ਪੰਜਾਬ ਦੇ ਵਿਗੜੇ ਹੋਏ ਹਾਲਾਤ ਨਾਲ ਨਜਿੱਠਣ ਵਾਸਤੇ ਵਿਰੋਧੀ ਪਾਰਟੀਆਂ ਨੂੰ ਵੀ ਸਰਕਾਰ ਦਾ ਸਾਥ ਦੇਣਾ ਚਾਹੀਦਾ ਹੈ। ਜਦ ਵੀ ਕਾਂਗਰਸ ਸਰਕਾਰ ਹੋਂਦ ਵਿਚ ਆਈ ਹੈ, ਕਾਫੀ ਥਾਵਾਂ ਤੋਂ ਅਜਿਹੀਆਂ ਮਨਹੂਸ ਖ਼ਬਰਾਂ ਪੜ੍ਹਨ-ਸੁਣਨ ਨੂੰ ਮਿਲ ਰਹੀਆਂ ਹਨ ਜੋ ਕਾਂਗਰਸੀ ਵਰਕਰਾਂ ਵੱਲੋਂ ਵਿਰੋਧੀ ਪਾਰਟੀਆਂ ਦੇ ਵਰਕਰਾਂ ਨਾਲ ਧੱਕੇਸ਼ਾਹੀਆਂ ਕੀਤੀਆਂ ਜਾ ਰਹੀਆਂ ਹਨ। ਇਸ ਸਬੰਧੀ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਆਪਣੀ ਪਾਰਟੀ ਦੇ ਵਰਕਰਾਂ ਨੂੰ ਅਜਿਹੀਆਂ ਘਟਨਾਵਾਂ ਕਰਨ ਤੋਂ ਵਰਜਣ ਤਾਂ ਜੋ ਪੰਜਾਬ ਵਿਚ ਸ਼ਾਂਤੀ ਅਤੇ ਭਾਈਚਾਰਕ ਸਾਂਝ ਬਣੀ ਰਹੇ ਅਤੇ ਪੰਜਾਬ ਦੀ ਤਰੱਕੀ ਲਈ ਯਤਨ ਕੀਤੇ ਜਾਣ।


-ਅਜਮੇਰ ਸਿੰਘ ਬੱਲ
ਪਿੰਡ ਤੇ ਡਾਕ: ਬੁਤਾਲਾ, ਤਹਿ: ਬਾਬਾ ਬਕਾਲਾ ਸਾਹਿਬ, ਜ਼ਿਲ੍ਹਾ ਅੰਮ੍ਰਿਤਸਰ।

23/05/2017

 ਕਿਸਾਨਾਂ ਦੀਆਂ ਖ਼ੁਦਕੁਸ਼ੀਆਂ

ਕਿਸਾਨਾਂ ਦੀਆਂ ਖ਼ੁਦਕੁਸ਼ੀਆਂ ਦਾ ਸਿਲਸਿਲਾ ਲਗਾਤਾਰ ਵਧਦਾ ਜਾ ਰਿਹਾ ਹੈ। ਰੋਜ਼ਾਨਾ ਅਖ਼ਬਾਰਾਂ ਸੁਰਖੀਆਂ ਨਾਲ ਭਰੀਆਂ ਹੁੰਦੀਆਂ ਹਨ। ਆਰਥਿਕ ਤੰਗੀ ਦੇ ਚਲਦਿਆਂ ਕਿਸਾਨਾਂ ਵੱਲੋਂ ਖ਼ੁਦਕੁਸ਼ੀ ਦੀਆਂ ਖ਼ਬਰਾਂ ਪੜ੍ਹ ਕੇ ਬਹੁਤ ਹੀ ਦੁੱਖ ਹੋਇਆ, ਜੋ ਦਿਲ ਨੂੰ ਅੰਦਰੇ ਹੀ ਅੰਦਰੇ ਵਲੂੰਧਰਾ ਗਿਆ। ਵਾਰ-ਵਾਰ ਖਿਆਲ ਆ ਰਿਹਾ ਸੀ ਕਿ ਮਰਨ ਨੂੰ ਕੀਹਦਾ ਦਿਲ ਕਰਦਾ ਹੈ। ਮਨੁੱਖਾ ਜਨਮ ਗੁਰੂ ਦੀ ਦਿੱਤੀ ਹੋਈ ਬਹੁਤ ਵੱਡੀ ਦੇਣ ਹੈ ਅਤੇ ਇਹ ਕਰਮਾਂ ਨਾਲ ਹੀ ਮਿਲਦਾ ਹੈ। ਖ਼ੁਦਕੁਸ਼ੀ ਬੁਜ਼ਦਿਲੀ ਦਾ ਨਾਂਅ ਹੈ, ਜੋ ਸਾਡੇ ਗੁਰੂਆਂ ਨੇ ਵੀ ਇਸ ਪ੍ਰਤੀ ਆਵਾਜ਼ ਉਠਾਈ ਸੀ। ਇਨਸਾਨ ਨੂੰ ਖ਼ੁਦਕੁਸ਼ੀ ਕਰਨ ਤੋਂ ਪਹਿਲਾਂ ਇਕ ਵਾਰੀ ਆਪਣੇ ਦਿਮਾਗ ਨਾਲ ਸੋਚ ਲੈਣਾ ਚਹੀਦਾ ਹੈ ਕਿ ਉਹ ਤਾਂ ਅਜਿਹਾ ਕਰਕੇ ਆਪਣੀਆਂ ਜ਼ਿੰਮੇਵਾਰੀਆਂ ਤੋਂ ਭੱਜਦਾ ਹੋਇਆ ਸੰਸਾਰ ਤੋਂ ਛੁਟਕਾਰਾ ਪਾ ਗਿਆ ਤੇ ਆਪਣੇ ਪਰਿਵਾਰ ਨੂੰ ਕਿਸ ਦੇ ਸਹਾਰੇ ਛੱਡ ਚੱਲਿਆ? ਜੋ ਉਸ ਦੇ ਸਹਾਰੇ 'ਤੇ ਨਿਰਭਰ ਕਰਦੇ ਸੀ ਕਿ ਅਜਿਹਾ ਕਰਕੇ ਉਨ੍ਹਾਂ ਦਾ ਕਰਜ਼ਾ ਮਾਫ਼ ਹੋ ਜਾਵੇਗਾ। ਉਹ ਤਾਂ ਆਪਣੇ ਪਰਿਵਾਰ ਨੂੰ ਸਾਰੀ ਉਮਰ ਦੇ ਅੱਥਰੂ ਕੇਰਨ ਲਈ ਛੱਡ ਗਿਆ। ਜੇਕਰ ਇਨਸਾਨ 'ਤੇ ਕੋਈ ਮੁਸੀਬਤ ਆਉਂਦੀ ਹੈ ਤਾਂ ਉਸ ਦਾ ਡਟ ਕੇ ਮੁਕਾਬਲਾ ਕਰਨਾ ਚਾਹੀਦਾ ਹੈ। ਨਵੀਂ ਸਰਕਾਰ ਬੜੀ ਸੰਜੀਦਗੀ ਦੇ ਨਾਲ ਕਰਜ਼ੇ ਮਾਫ਼ ਕਰਨ ਬਾਰੇ ਸੋਚ ਰਹੀ ਹੈ। ਸਰਕਾਰ ਨੇ ਜੋ ਕਮੇਟੀ ਗਠਿਤ ਕੀਤੀ ਹੈ, ਉਸ ਨੂੰ ਨਿਰਦੇਸ਼ ਦੇ ਕੇ ਜਲਦੀ ਤੋਂ ਜਲਦੀ ਰਿਪੋਰਟ ਹਾਸਲ ਕਰਕੇ ਤੁਰੰਤ ਕਿਸਾਨਾਂ ਦੇ ਕਰਜ਼ੇ ਮਾਫ਼ ਕਰਨ ਦਾ ਯਤਨ ਕਰਨਾ ਚਾਹੀਦਾ ਹੈ ਅਤੇ ਕਿਸਾਨਾਂ ਨੂੰ ਵੀ ਚਾਹੀਦਾ ਹੈ ਕਿ ਕਿਸਾਨੀ ਦੇ ਮਕਸਦ ਲਈ ਲਿਆ ਕਰਜ਼ਾ ਉਸੇ ਮਕਸਦ ਦੇ ਲਈ ਇਸਤੇਮਾਲ ਕੀਤਾ ਜਾਵੇ ਨਾ ਕਿ ਵਿਆਹ ਸ਼ਾਦੀਆਂ ਦੀ ਝੂਠੀ ਸ਼ੋਹਰਤ ਵਾਸਤੇ ਵਰਤ ਲਿਆ ਜਾਵੇ। ਕਿਸਾਨਾਂ ਦਾ ਜੋ ਫ਼ਸਲਾਂ ਦਾ ਨੁਕਸਾਨ ਹੋਇਆ ਹੈ, ਉਸ ਦੀ ਜਲਦੀ ਤੋਂ ਜਲਦੀ ਸਰਕਾਰ ਨੂੰ ਭਰਪਾਈ ਕਰਕੇ ਕਿਸਾਨਾਂ ਨੂੰ ਵੱਧ ਤੋਂ ਵੱਧ ਮੁਆਵਜ਼ਾ ਦੇਣਾ ਚਾਹੀਦਾ ਹੈ ਅਤੇ ਝੋਨੇ ਦੀ ਜਿਣਸ ਦਾ ਵਾਜਬ ਭਾਅ ਦਿਵਾ ਕੇ ਜੋ ਕਿਸਾਨਾਂ ਵੱਲੋਂ ਲਗਾਤਾਰ ਖ਼ੁਦਕੁਸ਼ੀਆਂ ਕੀਤੀਆਂ ਜਾ ਰਹੀਆਂ ਹਨ, ਨੂੰ ਠੱਲ੍ਹ ਪਾਈ ਜਾ ਸਕਦੀ ਹੈ। ਇਸ ਪ੍ਰਤੀ ਸਰਕਾਰ ਨੂੰ ਗੰਭੀਰਤਾ ਨਾਲ ਸੋਚਣ ਦੀ ਲੋੜ ਹੈ।

-ਗੁਰਮੀਤ ਸਿੰਘ ਵੇਰਕਾ
ਮੋ: 9878600221

ਕਾਨੂੰਨ 'ਚ ਸੋਧ ਜ਼ਰੂਰੀ

\ਦਿੱਲੀ ਦੇ ਨਿਰਭੈਅ ਕੇਸ ਵਿਚ 6 'ਚੋਂ ਇਕ ਖ਼ੁਦਕੁਸ਼ੀ ਕਰ ਗਿਆ, 4 ਨੂੰ ਮੌਤ ਦੀ ਸਜ਼ਾ ਹੋਈ ਤੇ ਇਕ ਨੂੰ ਨਾਬਾਲਗ ਕਰਕੇ ਸਿਰਫ 3 ਸਾਲ ਦੀ ਸਜ਼ਾ ਹੋਈ ਤੇ ਸਜ਼ਾ ਕੱਟ ਕੇ ਉਹ ਰਿਹਾਅ ਵੀ ਹੋ ਚੁੱਕਾ ਹੋਵੇਗਾ। ਇਨ੍ਹਾਂ ਦਰਿੰਦਿਆਂ ਨੇ ਉਸ ਲੜਕੀ ਨਾਲ ਜਿਹੜਾ ਜੁਰਮ ਕੀਤਾ, ਇਨਸਾਨੀਅਤ ਵੀ ਸ਼ਰਮਸ਼ਾਰ ਹੋ ਗਈ।
ਫਿਰ ਇਕ ਦੋਸ਼ੀ ਦਾ ਨਾਬਾਲਗ ਕਰਕੇ ਬਚ ਨਿਕਲਣਾ, ਸਮਾਜ ਲਈ ਬੜਾ ਚਿੰਤਾ ਦਾ ਵਿਸ਼ਾ ਹੈ। ਜੇ ਉਹ ਨਾਬਾਲਗ ਹੁੰਦੇ ਹੋਏ ਘਿਨਾਉਣਾ ਜੁਰਮ ਕਰ ਸਕਦਾ ਹੈ ਤਾਂ ਉਸ ਦੀ ਸਜ਼ਾ ਕਿਉਂ ਨਹੀਂ ਭੁਗਤ ਸਕਦਾ? ਉਹ ਸਜ਼ਾ ਦਾ ਬਰਾਬਰ ਹਿੱਸੇਦਾਰ ਹੋਣਾ ਚਾਹੀਦਾ ਸੀ। ਇਹ ਹੋ ਸਕਦਾ ਹੈ, ਸਜ਼ਾ ਮੁਅੱਤਲ ਰੱਖੀ ਜਾਏ ਤੇ ਜਦੋਂ ਉਹ ਬਾਲਗ ਹੋ ਜਾਵੇ ਤਾਂ ਉਹ ਸਜ਼ਾ ਲਾਗੂ ਕੀਤੀ ਜਾਵੇ। ਇਸ ਲਈ ਕਾਨੂੰਨ ਵਿਚ ਜ਼ਰੂਰੀ ਸੋਧ ਸਰਕਾਰ ਨੂੰ ਕਰਨੀ ਚਾਹੀਦੀ ਹੈ, ਤਾਂ ਜੋ ਇਹੋ ਜਿਹੇ ਜੁਰਮਾਂ ਨੂੰ ਨੱਥ ਪਾਈ ਜਾ ਸਕੇ।

-ਰਘਬੀਰ ਸਿੰਘ ਚੀਮਾ
ਪਿੰਡ ਤੇ ਡਾਕ: ਚੀਮਾ ਖੁੱਡੀ, ਜ਼ਿਲ੍ਹਾ ਗੁਰਦਾਸਪੁਰ।

18/05/2017

 ਅੱਗ ਦੀਆਂ ਮਾਰਾਂ
ਹਰ ਵਾਰ ਦੀ ਤਰ੍ਹਾਂ ਇਸ ਵਾਰ ਵੀ ਪੂਰੇ ਪੰਜਾਬ ਅੰਦਰ ਅਨੇਕਾਂ ਥਾਵਾਂ 'ਤੇ ਕਿਸਾਨਾਂ ਦੀ ਪੱਕੀ ਕਣਕ ਨੂੰ ਅੱਗ ਲੱਗਣ ਦੀਆਂ ਘਟਨਾਵਾਂ ਸਾਹਮਣੇ ਆਈਆਂ ਹਨ। ਖੇਤਾਂ ਵਿਚ ਖੜ੍ਹੀ ਕਣਕ ਨੂੰ ਅੱਗ ਲੱਗਣ ਦੇ ਕਈ ਕਾਰਨ ਸਾਹਮਣੇ ਆਉਂਦੇ ਹਨ। ਪਰ ਮੁੱਖ ਕਾਰਨ ਖੇਤਾਂ ਉੱਪਰੋਂ ਗੁਜ਼ਰਦੀਆਂ ਬਿਜਲੀ ਦੀਆਂ ਤਾਰਾਂ ਦਾ ਸ਼ਾਰਟ ਸਰਕਟ ਹੀ ਮੰਨਿਆ ਜਾਂਦਾ ਹੈ। ਥਾਂ-ਥਾਂ ਲੱਗੀਆਂ ਇਨ੍ਹਾਂ ਅੱਗਾਂ ਕਾਰਨ ਜਿਥੇ ਪ੍ਰਭਾਵਿਤ ਕਿਸਾਨਾਂ ਨੂੰ ਭਾਰੀ ਨੁਕਸਾਨ ਹੋਇਆ ਹੈ, ਉਥੇ ਉਨ੍ਹਾਂ ਕੋਲ ਇਸ ਨੁਕਸਾਨ ਦੀ ਪੂਰਤੀ ਦਾ ਕੋਈ ਹੋਰ ਬਦਲ ਵੀ ਨਹੀਂ ਹੈ। ਬਹੁਤ ਸਾਰੇ ਕਿਸਾਨ ਤਾਂ ਇਸ ਤਰ੍ਹਾਂ ਦੇ ਵੀ ਹਨ ਜਿਨ੍ਹਾਂ ਦੇ ਪੂਰੇ ਦੇ ਪੂਰੇ ਖੇਤ ਅੱਗ ਵਿਚ ਸੜ ਜਾਣ ਕਾਰਨ ਉਹ ਆਪਣੇ ਖਾਣ ਲਈ ਦਾਣੇ ਅਤੇ ਪਸ਼ੂਆਂ ਲਈ ਤੂੜੀ ਤੋਂ ਮੁਥਾਜ ਨਜ਼ਰ ਆ ਰਹੇ ਹਨ। ਸੋ, ਸਰਕਾਰ ਨੂੰ ਜਿਥੇ ਕਿਸਾਨਾਂ ਦੇ ਫ਼ਸਲੀ ਬੀਮੇ ਦਾ ਮੁਕੰਮਲ ਅਤੇ ਸੌਖਾ ਤਰੀਕਾ ਯਕੀਨੀ ਬਣਾਉਣਾ ਚਾਹੀਦਾ ਹੈ, ਉਥੇ ਅਜਿਹੀਆਂ ਘਟਨਾਵਾਂ ਵਿਚ ਪ੍ਰਭਾਵਿਤ ਹੋਏ ਕਿਸਾਨਾਂ ਦੀ ਵਿਸ਼ੇਸ਼ ਜਾਂਚ ਕਰਕੇ ਵੱਧ ਤੋਂ ਵੱਧ ਰਾਹਤ ਦੇਣ ਲਈ ਉਪਰਾਲੇ ਯਕੀਨੀ ਬਣਾਉਣੇ ਚਾਹੀਦੇ ਹਨ ਤਾਂ ਕਿ ਆਪਣਾ ਸਭ ਕੁਝ ਗੁਆ ਬੈਠੇ ਕਿਸਾਨਾਂ ਨੂੰ ਕੁਝ ਸਹਾਰਾ ਮਿਲ ਸਕੇ।


-ਰਾਜਾ ਗਿੱਲ (ਚੜਿੱਕ)
ਮੋ: 94654-11585.


ਕਾਂਗਰਸ ਦਾ ਸਿਆਸੀ ਮਿਜਾਜ਼
ਪੰਜਾਬ ਦੇ ਚੋਣ ਨਤੀਜਿਆਂ ਤੋਂ ਬਾਅਦ ਕਾਂਗਰਸ ਦੇ ਸਿਆਸੀ ਮਿਜਾਜ਼ ਵਿਚ ਆਈ ਤਬਦੀਲੀ ਰਾਸ਼ਟਰੀ ਪੱਧਰ ਲਈ ਵੀ ਸ਼ੁੱਭ ਜਾਪਦੀ ਹੈ। ਸਿਰਫ ਫ਼ਰਮਾਨ ਦੇਣ ਨਾਲੋਂ ਰਾਜ ਦੇ ਸਥਾਨਕ ਆਗੂਆਂ ਨਾਲ ਵਿਚਾਰ ਕਰਕੇ ਚਲਾਈ ਸਿਆਸੀ ਲਹਿਰ ਦੇ ਨਾਲ ਅੱਜ ਕਾਂਗਰਸ ਆਪਣੀ ਸਾਖ ਬਚਾਉਣ ਵਿਚ ਕਾਮਯਾਬ ਰਹੀ। ਜੋ ਪਿਛਲੇ 10 ਸਾਲਾਂ ਤੋਂ ਪੰਜਾਬ ਵਿਚ ਹਾਸ਼ੀਏ 'ਤੇ ਪਹੁੰਚੀ ਕਾਂਗਰਸ ਹੁਣ ਇਸ ਬਦਲੀ ਸਿਆਸੀ ਫਿਜ਼ਾ ਨੂੰ ਆਪਣੇ ਪੱਖ ਵਿਚ ਹੋਰ ਉਭਾਰਨ ਲਈ ਕੋਈ ਵੀ ਤੀਰ ਖਾਲੀ ਨਹੀਂ ਜਾਣ ਦੇਣਾ ਚਾਹੁੰਦੀ। ਕਿਉਂਕਿ 2012 ਦੀਆਂ ਚੋਣਾਂ ਵਿਚ ਆਪੋ-ਧਾਪੀ ਕਾਰਨ ਇਕ ਤੀਜੀ ਪਾਰਟੀ ਵੱਲੋਂ ਵੱਧ ਵੋਟਾਂ ਲੈ ਜਾਣ ਕਾਰਨ ਕੈਪਟਨ ਸਰਕਾਰ ਬਣਾਉਣ ਤੋਂ ਖੁੰਝ ਗਏ ਸਨ ਜਦੋਂ ਕਿ ਵੋਟ ਪ੍ਰਤੀਸ਼ਤ ਤੇ ਸੀਟਾਂ 'ਤੇ ਜਿੱਤ ਲਗਪਗ ਅਕਾਲੀਆਂ ਦੇ ਬਰਾਬਰ ਹੀ ਸੀ। ਨਵੇਂ ਪ੍ਰਧਾਨ ਦੀ ਹਾਈ ਕਮਾਨ ਵੱਲੋਂ ਕੀਤੀ ਚੋਣ ਤੇ ਵੱਡੇ ਆਗੂਆਂ ਵੱਲੋਂ ਵਿਰੋਧ ਨਾ ਕਰਨਾ ਵੀ ਪੰਜਾਬੀਆਂ ਵੱਲੋਂ ਮਿਲੇ ਫਤਵੇ ਦੇ ਸਨਮਾਨ ਬਰਾਬਰ ਹੈ। ਪਹਿਲਾਂ ਕੈਪਟਨ ਵੱਲੋਂ ਅਤੇ ਹੁਣ ਜਾਖੜ ਵੱਲੋਂ ਆਪਣੇ ਤਾਜਪੋਸ਼ੀ ਸਮੇਂ ਸਾਦੇ ਸਮਾਗਮਾਂ ਦੀ ਰੀਤ ਵੀ ਕਾਬਲ-ਏ-ਤਾਰੀਫ਼ ਹੈ। ਉਂਜ ਭਾਵੇਂ ਇਸ ਪਿੱਛੇ ਆ ਰਹੀਆਂ ਲੋਕ ਸਭਾ ਚੋਣਾਂ ਵਿਚ ਹਿੰਦੂ ਸਿੱਖ ਵੋਟ ਨੂੰ ਜੋੜ ਕੇ ਰੱਖਣ ਦੀ ਸਿਆਸੀ ਰੀਝ ਹੀ ਹੋਵੇ । ਪਰ ਸ਼ਾਂਤੀ ਨਾਲ ਪ੍ਰਧਾਨ ਦੀ ਹੋਈ ਚੋਣ ਨੇ ਪਾਰਟੀ ਦਾ ਕੱਦ ਹੋਰ ਉੱਚਾ ਕਰ ਦਿੱਤਾ ਹੈ। ਸਿਆਸੀ ਸੂਝ, ਖੇਤਰੀ ਆਧਾਰ ਤੇ ਬੇਦਾਗ ਨਵੇਂ ਪ੍ਰਧਾਨ ਦੀ ਘੋਸ਼ਣਾ ਤੋਂ ਲੈ ਕੇ ਹੁਣ ਤੱਕ ਕਿਸੇ ਵਿਰੋਧੀ ਵੱਲੋਂ ਕੋਈ ਵੀ ਟਿੱਪਣੀ ਨਾ ਕਰਨਾ ਆਪਣੇ ਆਪ ਵਿਚ ਸਿਆਸੀ ਬੁਲੰਦੀ ਤੈਅ ਹੁੰਦੀ ਹੈ।
ਸੱਤਾ ਸੰਭਾਲਣ ਤੋਂ ਬਾਅਦ ਵੀ ਕੈਪਟਨ ਵੱਲੋਂ ਸਭ ਪਾਰਟੀ ਮੈਂਬਰਾਂ ਨੂੰ ਕਲਾਵੇ ਵਿਚ ਲੈ ਕੇ ਚੱਲਣਾ ਤੇ ਤਿੱਖੀ ਬਿਆਨਬਾਜ਼ੀ ਨਾਲੋਂ ਕੰਮ ਨੂੰ ਦਿੱਤੀ ਜਾ ਰਹੀ ਤਰਜੀਹ ਵਾਲੇ ਬਦਲੇ ਰੰਗ ਕਾਰਨ ਲੋਕਾਂ ਨੂੰ ਚੋਣ ਮੈਨੀਫੈਸਟੋ ਵਿਚ ਕੀਤੇ ਵਾਅਦਿਆਂ ਨੂੰ ਵੀ ਬੂਰ ਪੈਂਦਾ ਨਜ਼ਰ ਆ ਰਿਹਾ ਹੈ, ਚੰਗਾ ਹੋਵੇ ਇਸੇ ਦੌਰਾਨ ਕਿਸਾਨ ਲਈ ਹਰਿਆਲੀ ਤੇ ਨੌਜਵਾਨਾਂ ਦੇ ਚਿਹਰਿਆਂ ਦੀ ਲਾਲੀ ਵਾਪਸ ਲਿਆਉਣ ਲਈ ਕੁਝ ਸਾਰਥਕ ਯੋਜਨਾਵਾਂ ਜਲਦ ਉਲੀਕੀਆਂ ਜਾਣ ਤਾਂ ਜੋ ਨਿੱਤ ਦਿਹਾੜੇ ਕਰਜ਼ੇ ਕਾਰਨ ਵਧ ਰਹੀਆਂ ਖ਼ੁਦਕੁਸ਼ੀਆਂ ਅਤੇ ਨਸ਼ਿਆਂ ਕਾਰਨ ਨੌਜਵਾਨਾਂ ਦੀਆਂ ਹੋ ਰਹੀਆਂ ਮੌਤਾਂ ਦੇ ਅੰਕੜਿਆਂ ਨੂੰ ਠੱਲ੍ਹਿਆ ਜਾ ਸਕੇ। ਸਮੇਂ ਦੀ ਜ਼ਰਰੂਤ ਹੈ ਕਿ ਪਿਛਲੀ ਹਕੂਮਤ ਦੀਆਂ ਆਪਹੁਦਰੀਆਂ 'ਤੇ ਮਿੱਟੀ ਪਾ ਕੇ ਵਿਹਲੇ ਫਿਰ ਰਹੇ ਪਾੜ੍ਹਿਆਂ ਨੂੰ ਰੁਜ਼ਗਾਰ ਤੇ ਆਮ ਲੋਕਾਂ ਨੂੰ ਆਪਣੇ ਕੰਮ ਕਰਨ ਦੀ ਪੂਰਨ ਆਜ਼ਾਦੀ ਮਿਲ ਸਕੇ ਅਤੇ ਪੰਜਾਬ ਮੁੜ ਆਪਣੀ ਆਰਥਿਕ ਮਜ਼ਬੂਤੀ ਦੁਨੀਆ ਨੂੰ ਦਿਖਾ ਸਕੇ।


-ਐਡਵੋਕੇਟ ਰਵਿੰਦਰ ਸਿੰਘ ਧਾਲੀਵਾਲ
ਪਿੰਡ ਨੱਥੂ ਮਾਜਰਾ, ਜ਼ਿਲ੍ਹਾ ਸੰਗਰੂਰ।

17/05/2017

 ਕੁੜੀਆਂ ਦੀ ਬੱਲੇ-ਬੱਲੇ
ਇਸ ਸਾਲ ਪੰਜਾਬ ਸਕੂਲ ਸਿੱਖਿਆ ਬੋਰਡ ਵੱਲੋਂ ਐਲਾਨੇ ਗਏ 12ਵੀਂ ਦੇ ਨਤੀਜਿਆਂ ਵਿਚ ਕੁੜੀਆਂ ਬਾਜ਼ੀ ਮਾਰ ਗਈਆਂ ਹਨ। ਜਿਥੇ ਕੁੜੀਆਂ ਦੀ ਪਾਸ ਫ਼ੀਸਦੀ 72.59 ਰਹੀ, ਉਥੇ ਮੁੰਡੇ ਪਛੜ ਕੇ 54.42 ਫ਼ੀਸਦੀ 'ਤੇ ਪਹੁੰਚ ਗਏ। ਪਹਿਲੇ ਤਿੰਨ ਸਥਾਨ ਵੀ ਕੁੜੀਆਂ ਨੇ ਹਾਸਲ ਕੀਤੇ। ਲੜਕੀਆਂ ਵਧਾਈ ਦੀਆਂ ਪਾਤਰ ਹਨ, ਜਿਨ੍ਹਾਂ ਨੇ ਇਹ ਪੁਜ਼ੀਸ਼ਨਾਂ ਹਾਸਲ ਕਰਕੇ ਨਾ ਸਿਰਫ ਆਪਣੇ ਮਾਂ-ਬਾਪ ਦਾ ਹੀ ਸਿਰ ਉੱਚਾ ਕੀਤਾ, ਸਗੋਂ ਸਮਾਜ ਵਿਚ ਇਸਤਰੀ ਜਾਤੀ ਦਾ ਮਾਣ ਵੀ ਵਧਾਇਆ ਹੈ। ਇਸਤਰੀ ਜਾਤੀ ਨੇ ਜੇ ਮਰਦ ਪ੍ਰਧਾਨ ਸਮਾਜ ਵਿਚ ਆਪਣੀ ਬਰਾਬਰ ਦੀ ਜਗ੍ਹਾ ਬਣਾਉਣੀ ਹੈ ਤਾਂ ਧਰਤੀ ਤੋਂ ਅੰਬਰ ਤੱਕ ਆਪਣੀ ਯੋਗਤਾ ਨੂੰ ਸਿੱਧ ਕਰਨਾ ਪਵੇਗਾ। ਆਪਣੇ-ਆਪ ਨੂੰ ਗਲੈਮਰ ਤੇ ਫੈਸ਼ਨ ਦੀ ਦੁਨੀਆ ਤੋਂ ਥੋੜ੍ਹਾ ਵੱਖਰਾ ਕਰਨਾ ਪਵੇਗਾ। ਹੁਣ ਮੁੰਡਿਆਂ ਨੂੰ ਪੜ੍ਹਾਈ ਵਿਚ ਮੈਰਿਟ ਹਾਸਲ ਕਰਨ ਲਈ ਕੁੜੀਆਂ ਤੋਂ ਸੇਧ ਲੈਣੀ ਹੋਵੇਗੀ। ਆਪਣੀ ਮੰਜ਼ਿਲ 'ਤੇ ਪਹੁੰਚਣ ਲਈ ਦ੍ਰਿੜ੍ਹ ਵਿਸ਼ਵਾਸ, ਸੰਕਲਪ, ਨੇਕ ਇਰਾਦਾ, ਸਬਰ ਤੇ ਸੰਤੋਖ ਅਹਿਮ ਰੋਲ ਅਦਾ ਕਰਦੇ ਹਨ।


-ਸਮਿੱਤਰ ਸਿੰਘ 'ਦੋਸਤ'
142, ਦਸਮੇਸ਼ ਨਗਰ, ਖਰੜ (ਮੁਹਾਲੀ)।


ਭਾਰਤ ਸਖ਼ਤੀ ਵਰਤੇ

ਬੀਤੇ ਦਿਨ ਗੁਆਂਢੀ ਮੁਲਕ ਪਾਕਿਸਤਾਨ ਵੱਲੋਂ ਕ੍ਰਿਸ਼ਨਾ ਘਾਟੀ ਸੈਕਟਰ ਵਿਚ ਕੰਟਰੋਲ ਰੇਖਾ ਪਾਰ ਕਰਕੇ ਘਿਨਾਉਣੀ ਵਾਰਦਾਤ ਨੂੰ ਅੰਜਾਮ ਦਿੱਤਾ ਗਿਆ ਜੋ ਬੇਹੱਦ ਸ਼ਰਮਨਾਕ, ਅਤਿ ਨਿੰਦਣਯੋਗ ਹੈ। ਭਾਰਤ ਦੇਸ਼ ਜੋ ਆਪਣੇ ਗੁਆਂਢੀ ਮੁਲਕਾਂ ਨਾਲ ਦੋਸਤਾਨਾ ਸਬੰਧ ਚਾਹੁੰਦਾ ਹੈ, ਇਸ ਦਾ ਮਤਲਬ ਉਹ ਗ਼ਲਤ ਕੱਢ ਰਹੇ ਹਨ। ਸਾਡੇ ਗੁਰੂਆਂ-ਰਹਿਬਰਾਂ ਨੇ ਵੀ ਬੁਲੰਦ ਆਵਾਜ਼ 'ਚ ਕਿਹਾ ਸੀ ਕਿ ਜ਼ੁਲਮ ਕਰਨਾ ਵੀ ਪਾਪ ਹੈ ਤੇ ਹੱਦ ਤੋਂ ਵੱਧ ਜ਼ੁਲਮ ਸਹਿਣਾ ਵੀ ਪਾਪ ਹੈ। ਬੇਸ਼ੱਕ ਭਾਰਤ ਵੀ ਜਵਾਬੀ ਕਾਰਵਾਈ ਰਾਹੀਂ ਉਨ੍ਹਾਂ ਨੂੰ ਸਬਕ ਸਿਖਾ ਰਿਹਾ ਹੈ ਪਰ ਉਸ ਨੂੰ ਅਜਿਹੀ ਜਵਾਬੀ ਕਾਰਵਾਈ ਨਾਲ ਜ਼ਿਆਦਾ ਫ਼ਰਕ ਨਹੀਂ ਪੈ ਰਿਹਾ। ਜੋ ਦਿਲ ਕੰਬਾਊ ਵਾਰਦਾਤ ਪਾਕਿ ਸੈਨਾ ਵੱਲੋਂ ਭਾਰਤੀ ਨੌਜਵਾਨਾਂ ਦੇ ਸਿਰ ਕਲਮ ਕਰਕੇ ਕੀਤੀ ਗਈ ਹੈ, ਸਮੁੱਚੀ ਦੁਨੀਆ ਦੇ ਇਨਸਾਫ਼-ਪਸੰਦ ਦੇਸ਼ਾਂ ਵੱਲੋਂ ਪਾਕਿ ਦੀ ਖੁੱਲ੍ਹ ਕੇ ਨਿੰਦਾ ਕਰਨੀ ਬਣਦੀ ਹੈ। ਭਾਰਤ ਨੂੰ ਵੀ ਕੁਝ ਸਖ਼ਤੀ ਨਾਲ ਪੇਸ਼ ਆਉਣਾ ਬਣਦਾ ਹੈ।


-ਮਾਸਟਰ ਦੇਵਰਾਜ ਖੁੰਡਾ
ਰਾਮ ਸ਼ਰਨਮ ਕਾਲੋਨੀ, ਗੁਰਦਾਸਪੁਰ।


ਸਿੱਖਿਅਕ ਯੋਗਤਾ ਦੀ ਲੋੜ
ਭਾਰਤ ਵਿਚ ਪ੍ਰਾਪਰਟੀ ਡੀਲਰ ਅਤੇ ਨੇਤਾ ਬਣਨ ਦੀ ਕੋਈ ਨਿਸਚਤ ਯੋਗਤਾ ਨਹੀਂ। ਨਾ ਹੀ ਜ਼ਾਬਤੇ ਦੀ ਅਤੇ ਨਾ ਹੀ ਕਿਸੇ ਸਿੱਖਿਆ ਯੋਗਤਾ ਦੀ ਲੋੜ ਹੈ। ਨਵੇਂ ਕਾਨੂੰਨ ਵਿਚ ਪ੍ਰਾਪਰਟੀ ਡੀਲਰ ਅਤੇ ਨੇਤਾ ਬਣਨ ਦੀ ਸਿੱਖਿਅਕ ਯੋਗਤਾ ਅਤੇ ਨਿਯਮ ਸ਼ਰਤਾਂ ਤੈਅ ਕਰ ਦਿੱਤੀਆਂ ਜਾਣ ਤਾਂ ਇਹ ਲੋਕਾਂ ਲਈ ਲਾਹੇਵੰਦ ਹੋ ਸਕਦਾ ਹੈ। ਅਨਪੜ੍ਹ ਵਿਅਕਤੀ ਨੂੰ ਲੋਕਾਂ ਵੱਲੋਂ ਵੋਟਾਂ ਪਾ ਕੇ ਜਿਤਾ ਦੇਣਾ ਘਾਟੇ ਦਾ ਸੌਦਾ ਹੈ। ਬਿਨਾਂ ਤਜਰਬੇ ਅਤੇ ਸਿੱਖਿਅਕ ਯੋਗਤਾ ਤੋਂ ਪ੍ਰਾਪਰਟੀ ਡੀਲਰ ਜਾਂ ਨੇਤਾ ਬਣਨਾ ਸਹੀ ਗੱਲ ਨਹੀਂ ਹੈ। ਦੇਸ਼ ਤਾਂ ਹੀ ਤਰੱਕੀ ਕਰੇਗਾ ਜੇ ਤਜਰਬੇਕਾਰ ਅਤੇ ਸਿੱਖਿਅਕ ਲੋਕ ਅੱਗੇ ਆਉਣਗੇ।


-ਹਰਜਿੰਦਰ ਪਾਲ ਸਿੰਘ
ਜਵੱਦੀ ਕਲਾਂ, ਲੁਧਿਆਣਾ।

16/05/2017

 ਧੀ ਖ਼ਤਮ, ਧਰਤੀ ਖ਼ਤਮ
'ਧੀ ਖ਼ਤਮ, ਧਰਤੀ ਖ਼ਤਮ' ਲੇਖ ਪੜ੍ਹ ਕੇ ਇਹ ਮਹਿਸੂਸ ਕੀਤਾ ਹੈ ਕਿ ਇਕ ਔਰਤ ਤੋਂ ਬਿਨਾਂ ਸਮਾਜ ਨਹੀਂ ਬਣ ਸਕਦਾ। ਪਰਮਾਤਮਾ ਨੇ ਹਰੇਕ ਜੀਵ, ਪੰਛੀ, ਜਾਨਵਰ ਅਤੇ ਇਨਸਾਨ ਵਿਚ ਨਰ ਅਤੇ ਮਾਦਾ ਪੈਦੇ ਕੀਤੇ ਹਨ ਤਾਂ ਕਿ ਧਰਤੀ ਦਾ ਸੰਤੁਲਨ ਬਣਿਆ ਰਹਿ ਸਕੇ। ਕਿਤਾਬਾਂ ਵਿਚ ਪੜ੍ਹਿਆ ਹੈ ਕਿ ਮਨੁੱਖ 40 ਲੱਖ ਸਾਲ ਪਹਿਲਾਂ ਧਰਤੀ 'ਤੇ ਪੈਦਾ ਹੋਇਆ ਹੈ। ਅੱਜ ਇਨਸਾਨ ਧੀ ਨੂੰ ਪੈਦਾ ਕਰਨ ਤੇ ਔਰਤ ਜਾਤੀ ਨੂੰ ਮਾਰਨ 'ਤੇ ਤੁਲਿਆ ਹੋਇਆ ਹੈ। ਪਿੰਡਾਂ ਤੇ ਸ਼ਹਿਰਾਂ ਵਿਚ ਤਲਾਕ ਹੋ ਰਹੇ ਹਨ। ਹਰ ਧਰਮ ਵਿਚ ਧੀਆਂ ਨੂੰ ਪੈਦਾ ਕਰਨ 'ਤੇ ਘਰ ਵਿਚ ਕਲੇਸ਼ ਹੁੰਦਾ ਹੈ ਤੇ ਨੌਬਤ ਤਲਾਕ ਤੱਕ ਆ ਜਾਂਦੀ ਹੈ। ਦਾਜ ਦੇ ਲਾਲਚੀ ਅੱਜ ਦੀਆਂ ਧੀਆਂ ਨੂੰ ਸਾੜ ਰਹੇ ਹਨ। ਧੀ ਨੂੰ ਜੰਮਣ ਤੋਂ ਪਹਿਲਾਂ ਹੀ ਖ਼ਤਮ ਕਰ ਦੇਣਾ ਸਮਾਜ ਦੇ ਮੱਥੇ 'ਤੇ ਵੱਡਾ ਕਲੰਕ ਹੈ। ਦਾਜ ਦੇ ਲਾਲਚੀਆਂ ਤੇ ਭਰੂਣ ਹੱਤਿਆ ਕਰਨ ਵਾਲਿਆਂ ਨੂੰ ਫਾਂਸੀ ਦੀ ਸਜ਼ਾ ਦਾ ਹੁਕਮ ਹੋਣਾ ਚਾਹੀਦਾ ਹੈ। ਆਤਿਸ਼ ਜੀ ਨੇ ਠੀਕ ਲਿਖਿਆ ਹੈ ਕਿ ਜਿਸ ਦਿਨ ਔਰਤ ਨਹੀਂ ਰਹੇਗੀ, ਧਰਤੀ ਵੀ ਖ਼ਤਮ ਹੋ ਜਾਵੇਗੀ।

-ਮਾਸਟਰ ਜਗੀਰ ਸਿੰਘ ਸਫ਼ਰੀ
ਸਠਿਆਲਾ (ਅੰਮ੍ਰਿਤਸਰ)।

ਆਵਾਰਾ ਡੰਗਰ-ਪਸ਼ੂ
ਅੱਜਕਲ੍ਹ ਆਵਾਰਾ ਪਸ਼ੂ ਮੁਹੱਲਿਆਂ, ਸੜਕਾਂ ਵਿਚ ਭੁੱਖਣਭਾਣੇ, ਗੰਦ-ਮੰਦ ਵਿਚ ਮੂੰਹ ਮਾਰਦੇ ਅਤੇ ਚਾਰੇ ਪਾਸੇ ਗੰਦ ਪਾਉਂਦੇ ਫਿਰਦੇ ਆਮ ਵੇਖੇ ਜਾ ਸਕਦੇ ਹਨ। ਫ਼ਸਲਾਂ ਦੇ ਉਜਾੜੇ, ਸੜਕ ਹਾਦਸੇ ਅਤੇ ਹੋਰ ਜਾਨੀ-ਮਾਲੀ ਨੁਕਸਾਨ ਦਾ ਸਬੱਬ ਵੀ ਕਈ ਵਾਰ ਇਹ ਪ੍ਰਾਣੀ ਬਣ ਚੁੱਕੇ ਹਨ। ਅਵਾਰਾ ਕੁੱਤਿਆਂ ਦਾ ਮਾਸੂਮ ਬੱਚਿਆਂ ਨੂੰ ਨੋਚ-ਨੋਚ ਕੇ ਖਾ ਜਾਣਾ, ਕਈ ਬਜ਼ੁਰਗ ਅਤੇ ਨੌਜਵਾਨਾਂ ਨੂੰ ਵੱਢਣਾ ਅਤੇ ਜ਼ਖ਼ਮੀ ਕਰਨ ਦੀਆਂ ਘਟਨਾਵਾਂ ਬਹੁਤ ਵਾਰ ਵਾਪਰ ਚੁੱਕੀਆਂ ਹਨ। ਹਮੇਸ਼ਾ ਇਨ੍ਹਾਂ ਤੋਂ ਖ਼ਤਰਾ ਬਣਿਆ ਹੋਇਆ ਹੈ ਅਤੇ ਲੋਕ ਡਰ-ਭੈਅ ਹੇਠ ਜਿਊਣ ਲਈ ਮਜਬੂਰ ਹਨ। ਸਰਕਾਰ ਅਤੇ ਪ੍ਰਸ਼ਾਸਨ ਇਸ ਗੰਭੀਰ ਮਸਲੇ ਦਾ ਕੋਈ ਠੋਸ ਹੱਲ ਜਲਦੀ ਕਰੇ। ਲੋਕ ਵੀ ਸਰਕਾਰਾਂ ਅਤੇ ਪ੍ਰਸ਼ਾਸਨ 'ਤੇ ਦਬਾਅ ਬਣਾਉਣ ਲਈ ਅੱਗੇ ਆਉਣ।

-ਅਜੀਤ ਪ੍ਰਦੇਸੀ
ਰੋਪੜ।

ਭ੍ਰਿਸ਼ਟਾਚਾਰ ਦਾ ਖ਼ਾਤਮਾ
ਚੋਣਾਂ ਤੋਂ ਪਹਿਲਾਂ ਹਰ ਪਾਰਟੀ ਆਪਣੇ ਮਨੋਰਥ ਪੱਤਰ ਵਿਚ ਪਹਿਲੀ ਗੱਲ ਇਹ ਲਿਖਦੀ ਹੈ ਕਿ ਭ੍ਰਿਸ਼ਟਾਚਾਰ ਜੜ੍ਹ ਤੋਂ ਖ਼ਤਮ ਕੀਤਾ ਜਾਵੇਗਾ। ਭ੍ਰਿਸ਼ਟਾਚਾਰ ਉੱਪਰੋਂ ਸ਼ੁਰੂ ਹੁੰਦਾ ਹੈ ਤੇ ਪੈਸਾ ਹਰ ਮਹਿਕਮੇ ਵਿਚ ਹੇਠੋਂ ਉੱਪਰ ਤੱਕ ਜਾਂਦਾ ਹੈ। ਇਸ ਪ੍ਰਣਾਲੀ ਨੂੰ 'ਸੰਤਰੀ ਤੇ ਮੰਤਰੀ' ਕਹਿੰਦੇ ਹਨ। ਜਦੋਂ ਹਿੱਸਾ ਪੱਤੀ ਧੁਰ ਉੱਪਰ ਤੱਕ ਚਲਦੀ ਹੈ ਤਾਂ ਖ਼ਾਤਮਾ ਕਿਸ ਨੇ ਕਰਨਾ ਹੈ। ਦੇਸ਼ ਵਿਚ ਰਿਸ਼ਵਤਖੋਰੀ ਵਿਰੋਧੀ ਕਈ ਏਜੰਸੀਆਂ ਕੰਮ ਕਰ ਰਹੀਆਂ ਹਨ। ਇਹ ਵੀ ਪੜ੍ਹਦੇ-ਸੁਣਦੇ ਹਾਂ ਕਿ ਰਿਸ਼ਵਤ ਲੈਂਦਾ ਚਪੜਾਸੀ, ਕਲਰਕ, ਸਿਪਾਹੀ, ਪਟਵਾਰੀ ਜਾਂ ਕੋਈ ਛੋਟਾ ਅਫ਼ਸਰ ਫੜਿਆ ਗਿਆ ਹੈ। ਕਈ ਵੱਡੇ ਅਹੁਦੇਦਾਰ ਜਾਂਚ ਦੇ ਘੇਰੇ ਵਿਚ ਤਾਂ ਆ ਜਾਂਦੇ ਹਨ, ਘਪਲੇ ਵੀ ਕਰੋੜਾਂ-ਅਰਬਾਂ ਦੇ ਸਪੱਸ਼ਟ ਹੋ ਜਾਂਦੇ ਹਨ ਪਰ ਕਿਸੇ ਨੂੰ ਸਜ਼ਾ ਨਹੀਂ ਹੁੰਦੀ। ਜੇ ਲੋਕਾਂ ਦੇ ਅੱਖੀਂ ਘੱਟਾ ਪਾਉਣ ਨੂੰ ਕੋਈ ਅੰਦਰ ਹੋਇਆ ਵੀ ਤਾਂ ਸਭ ਸਹੂਲਤਾਂ, ਸਪੈਸ਼ਲ ਭੋਜਨ ਤੇ ਜੇਲ੍ਹ ਸੁਪਰਡੈਂਟ ਨਾਲ ਪੂਰੀ ਸਾਂਝ ਹੁੰਦੀ ਹੈ। ਕੇਸ ਦਾ ਪਤਾ ਹੀ ਨਹੀਂ ਲਗਦਾ ਕਦੋਂ ਤੇ ਕਿਵੇਂ ਖ਼ਤਮ ਹੋ ਗਿਆ। ਜਿੰਨੀ ਦੇਰ ਘੁਟਾਲੇ ਖ਼ਤਮ ਨਹੀਂ ਹੁੰਦੇ, ਕਸੂਰਵਾਰ ਨੂੰ ਸਜ਼ਾ ਨਹੀਂ ਹੁੰਦੀ, ਭ੍ਰਿਸ਼ਟਾਚਾਰ ਦਾ ਖ਼ਾਤਮਾ ਨਹੀਂ ਹੋ ਸਕਦਾ।

-ਮਾ: ਮਹਿੰਦਰ ਸਿੰਘ ਸਿੱਧੂ
ਸਿੱਧਵਾਂ ਕਲਾਂ, ਜ਼ਿਲ੍ਹਾ ਲੁਧਿਆਣਾ।

15/05/2017

 ਬੱਚਿਆਂ ਪ੍ਰਤੀ ਸੁਚੇਤ
ਗਰਮੀ ਦਾ ਮੌਸਮ ਸ਼ੁਰੂ ਹੋ ਚੁੱਕਾ ਹੈ। ਗਰਮੀ ਤੋਂ ਬਚਣ ਲਈ ਬੱਚਿਆਂ ਦਾ ਝੁਕਾਅ ਪਾਣੀ ਵੱਲ ਹੋ ਜਾਂਦਾ ਹੈ। ਗਰਮੀ 'ਚ ਮਾਪਿਆਂ ਦੀ ਜ਼ਿੰਮੇਵਾਰੀ ਵਧ ਜਾਂਦੀ ਹੈ, ਕਿਉਂਕਿ ਬੱਚੇ ਗਰਮੀ 'ਚ ਖਾਸ ਕਰਕੇ ਜੂਨ ਦੀਆਂ ਛੁੱਟੀਆਂ 'ਚ ਆਪਣੇ ਸਾਥੀਆਂ ਨਾਲ ਨਹਿਰਾਂ, ਸੂਏ, ਛੱਪੜਾਂ ਆਦਿ ਵਿਚ ਨਹਾਉਣ ਲਈ ਚਲੇ ਜਾਂਦੇ ਹਨ, ਤੈਰਨਾ ਨਾ ਆਉਣ ਦੇ ਕਾਰਨ ਉਹ ਡੁੱਬ ਵੀ ਜਾਂਦੇ ਨੇ। ਬੱਚਿਆਂ ਦੀ ਅਣਗਹਿਲੀ ਕਾਰਨ ਜਾਨੀ ਨੁਕਸਾਨ ਹੋ ਜਾਂਦਾ ਹੈ, ਜਿਸ ਦਾ ਘਾਟਾ ਕਦੇ ਪੂਰਾ ਨਹੀਂ ਹੁੰਦਾ। ਬੱਚੇ ਅਣਭੋਲ ਹੁੰਦੇ ਹਨ ਤੇ ਅਕਸਰ ਉਹ ਆਪਣੇ ਸਾਥੀਆਂ ਨਾਲ ਝੁੰਡ ਬਣਾ ਕੇ ਖਾਸ ਕਰ ਪਿੰਡਾਂ ਵਿਚ ਦੂਰ ਛੱਪੜਾਂ, ਸੂਇਆਂ, ਨਹਿਰਾਂ 'ਤੇ ਨਹਾਉਣ ਚਲੇ ਜਾਂਦੇ ਹਨ, ਜਿਥੇ ਉਹ ਪਾਣੀ ਦੇ ਤੇਜ਼ ਵਹਾਅ ਵਿਚ ਡੁੱਬ ਜਾਂਦੇ ਹਨ। ਆਓ! ਆਪਣੇ ਬੱਚਿਆਂ ਪ੍ਰਤੀ ਸੁਹਿਰਦ ਹੋਈਏ ਤੇ ਉਨ੍ਹਾਂ ਨੂੰ ਅਜਿਹੀ ਅਣਗਹਿਲੀ ਕਰਨ ਤੋਂ ਵਰਜੀਏ, ਤਾਂ ਕਿ ਪਾਣੀ ਵਿਚ ਡੁੱਬਣ ਦੀਆਂ ਘਟਨਾਵਾਂ ਕਾਰਨ ਹੋ ਰਹੇ ਜਾਨੀ ਨੁਕਸਾਨ ਤੋਂ ਬਚਾਅ ਹੋ ਸਕੇ। ਜ਼ਿੰਦਗੀ ਇਕ ਕੁਦਰਤ ਦੁਆਰਾ ਬਖਸ਼ਿਆ ਅਨਮੋਲ ਤੋਹਫ਼ਾ ਹੈ, ਇਸ ਦੀ ਕਦਰ ਕਰੋ, ਨਾ ਕਿ ਅਣਦੇਖੀ।


-ਜਸਬੀਰ ਦੱਧਾਹੂਰ,
ਪਿੰਡ ਤੇ ਡਾਕ: ਦੱਧਾਹੂਰ, ਤਹਿ: ਰਾਏਕੋਟ (ਲੁਧਿਆਣਾ)।


ਕਣਕ-ਅਗਨੀ ਕਾਂਡ
ਹਰ ਰੋਜ਼ ਜਦ ਕਿਸੇ ਕਿਸਾਨ ਦੀ ਪੱਕੀ ਕਣਕ ਦੀ ਫਸਲ ਅੱਗ ਨਾਲ ਸੜਨ ਦੀ ਖ਼ਬਰ ਪੜ੍ਹਦੇ ਹਾਂ ਤਾਂ ਹਰ ਇਨਸਾਨ ਦੇ ਹਿਰਦੇ ਨੂੰ ਬਹੁਤ ਠੇਸ ਪਹੁੰਚਦੀ ਹੈ। ਕਿਉਂਕਿ ਦੇਸ਼ ਦਾ ਅੰਨਦਾਤਾ ਕਿਸਾਨ ਆਪਣੀ ਫਸਲ ਨੂੰ ਪੁੱਤਰਾਂ ਵਾਂਗ ਪਾਲਦਾ ਹੈ। ਉਸ ਦੇ ਪਰਿਵਾਰ ਦਾ ਅਤੇ ਸਾਡੇ ਦੇਸ਼ ਦਾ ਭਵਿੱਖ ਉਸ ਦੀ ਫਸਲ 'ਤੇ ਨਿਰਭਰ ਹੁੰਦਾ ਹੈ। ਇਸ ਵਾਰ ਹਜ਼ਾਰਾਂ ਏਕੜ ਕਣਕ ਅਤੇ ਨਾੜ ਸੜ ਕੇ ਸੁਆਹ ਹੋਇਆ ਹੈ। ਕਾਰਨ ਚਾਹੇ ਕੁਝ ਵੀ ਹੋਵੇ ਪਰ ਇਹ ਸਾਡੇ ਲਈ ਸ਼ੁੱਭ ਸੰਕੇਤ ਨਹੀਂ ਹੈ, ਕਿਉਂਕਿ ਕਿਸਾਨ ਪਹਿਲਾਂ ਹੀ ਆਰਥਿਕ ਤੌਰ 'ਤੇ ਮੰਦਹਾਲੀ ਦਾ ਸ਼ਿਕਾਰ ਹਨ। ਇਸ ਲਈ ਪੀੜਤ ਕਿਸਾਨਾਂ ਨੂੰ ਯੋਗ ਮੁਆਵਜ਼ੇ ਦੀ ਲੋੜ ਹੈ। ਸਰਕਾਰ ਨੂੰ ਚਾਹੀਦਾ ਹੈ ਕਿ ਉਹ ਫਸਲ ਦੀ ਸੁਰੱਖਿਆ ਲਈ ਪੇਂਡੂ ਖੇਤਰ ਵਿਚ ਬਲਾਕ ਪੱਧਰ 'ਤੇ ਫਾਇਰ ਬ੍ਰਿਗੇਡ ਗੱਡੀਆਂ ਦਾ ਇੰਤਜ਼ਾਮ ਕਰੇ ਅਤੇ ਪਿੰਡ-ਪਿੰਡ ਖੇਤੀਬਾੜੀ ਸੁਸਾਇਟੀਆਂ ਵਿਚ ਪਾਣੀ ਵਾਲੀਆਂ ਟੈਂਕੀਆਂ ਆਦਿ ਦਾ ਪ੍ਰਬੰਧ ਕਰੇ। ਬਿਜਲੀ ਮਹਿਕਮੇ ਨੂੰ ਵੀ ਪਹਿਲਾਂ ਤੋਂ ਹੀ ਪੁਖਤਾ ਪ੍ਰਬੰਧ ਕਰਨੇ ਚਾਹੀਦੇ ਹਨ ਤਾਂ ਕਿ ਅੱਗੇ ਤੋਂ ਕੋਈ ਅਜਿਹੀ ਮੰਦਭਾਗੀ ਘਟਨਾ ਨਾ ਵਾਪਰੇ।


-ਲੱਖੀ ਗਿੱਲ ਧਨਾਨਸੂ
ਮੋਬਾ: 88726-60007


ਪੁਸਤਕ ਸੱਭਿਆਚਾਰ
ਟੀ.ਵੀ. ਵਟਸਐਪ ਅਤੇ ਫੇਸਬੁੱਕ ਆਦਿ ਤੱਟ-ਫੱਟ ਵਾਲਾ ਵਰਤਾਰਾ ਹੈ। ਇਨ੍ਹਾਂ ਨੂੰ ਪੜ੍ਹਨ ਉਪਰੰਤ ਡਿਲੀਟ ਕਰਨਾ ਪੈਂਦਾ ਹੈ, ਕਿਉਂਕਿ ਇਨ੍ਹਾਂ ਸਾਰਿਆਂ ਨੂੰ ਫੋਨ ਵਿਚ ਸਮਾਉਣ ਦੀ ਸਮਰੱਥਾ ਵੀ ਥੋੜ੍ਹੀ ਹੁੰਦੀ ਹੈ। ਇਹ ਅਲਮਾਰੀ ਵਿਚ ਬੰਦ ਪਈਆਂ ਵੀ ਤੁਹਾਨੂੰ ਆਵਾਜ਼ਾਂ ਮਾਰਦੀਆਂ ਰਹਿੰਦੀਆਂ ਹਨ। ਇਹ ਗੱਲ ਵੱਖਰੀ ਹੈ ਕਿ ਤੁਸੀਂ ਆਪਣੇ ਕੰਨ ਤੇ ਅੱਖਾਂ ਬੰਦ ਰੱਖੋ। ਕਿਤਾਬਾਂ ਦੇ ਨਾਲ-ਨਾਲ ਸਾਹਿਤਕ ਰਸਾਲਿਆਂ ਦੀ ਉਮਰ ਵੀ ਲੰਮੀ ਹੁੰਦੀ ਹੈ। ਮੈਂ ਅੱਜ ਤੱਕ ਪੁਰਾਣੇ ਮੈਗਜ਼ੀਨ ਸਾਂਭ ਕੇ ਰੱਖੇ ਹੋਏ ਹਨ। ਸਮਾਂ ਮਿਲਣ 'ਤੇ ਪੜ੍ਹ ਵੀ ਲੈਂਦਾ ਹਾਂ। ਅਸੀਂ ਪੁਸਤਕਾਂ ਤੋਂ ਦੂਰ ਹੋਈ ਜਾ ਰਹੇ ਹਾਂ। ਨਵੀਂ ਪੀੜ੍ਹੀ ਲਾਇਬ੍ਰੇਰੀਆਂ ਵੱਲ ਝਾਕਦੀ ਵੀ ਨਹੀਂ। ਉਹ ਪੁਸਤਕਾਂ ਪੜ੍ਹਨਾ ਫਜ਼ੂਲ ਕੰਮ ਸਮਝਦੀ ਹੈ। ਪੁਸਤਕਾਂ ਪੜ੍ਹਨਾ ਤੇ ਹੋਰਾਂ ਨੂੰ ਪੁਸਤਕਾਂ ਸੰਗ ਲਾਉਣਾ ਪੁੰਨ ਦਾ ਕੰਮ ਹੈ। ਜਿਹੜੇ ਪੁਸਤਕਾਂ ਪੜ੍ਹਦੇ ਹਨ, ਉਹ ਲਿਖਣ ਪ੍ਰਕਿਰਿਆ ਵੱਲ ਝੁਕ ਰਹੇ ਹਨ। ਪੁਸਤਕ ਕੋਲ ਪਈ ਨਿੱਘ ਦਿੰਦੀ ਹੈ। ਕਿਸੇ ਨੇ ਠੀਕ ਹੀ ਕਿਹਾ ਹੈ-'ਦੋਸਤ ਛੱਡ ਕੇ ਜਾ ਸਕਦਾ ਹੈ, ਪੁਸਤਕ ਨਹੀਂ।' ਕਿੰਨੇ ਹੀ ਮਹਾਨ ਲਿਖਾਰੀ ਹੋਏ ਹਨ, ਜੇ ਉਹ ਚੰਗੀਆਂ ਕਿਤਾਬਾਂ ਨਾ ਪੜ੍ਹਦੇ ਤਾਂ ਅੱਜ ਉਹ ਮਹਾਨ ਲੇਖਕ ਨਾ ਹੁੰਦੇ। ਪੁਸਤਕ ਸੱਭਿਆਚਾਰ ਨੂੰ ਫੈਲਾਉਣ ਦੀ ਅੱਜ ਬਹੁਤ ਲੋੜ ਹੈ। ਮੈਂ ਕਿਸੇ ਸ਼ਾਇਰ ਦੇ ਸ਼ਿਅਰ ਨਾਲ ਗੱਲ ਖ਼ਤਮ ਕਰਦਾ ਹਾਂ-
ਮੈਂ ਕੁਝ ਕਿਤਾਬਾਂ ਕਿਰਾਏ ਦੇ ਘਰ 'ਚ ਜਦ ਧਰੀਆਂ,
ਤਾਂ ਮਾਲਕ ਪੁੱਛਦੈ, ਤੇਰਾ ਸਮਾਨ ਕਿਥੇ ਹੈ।


-ਜਗਤਾਰ ਗਿੱਲ,
ਬੱਲ ਸਚੰਦਰ, ਅੰਮ੍ਰਿਤਸਰ।

11/05/2017

 ਲਾਲ ਬੱਤੀਆਂ
ਗੱਡੀਆਂ ਤੋਂ ਲਾਲ ਬੱਤੀ ਹਟਾਉਣਾ ਇਕ ਸ਼ਲਾਘਾਯੋਗ ਕਦਮ ਹੈ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਕਿਹਾ ਹੈ ਕਿ ਲਾਲ ਬੱਤੀ ਗੱਡੀ ਤੋਂ ਹੀ ਨਹੀਂ ਮਨ 'ਚੋਂ ਵੀ ਹਟਾ ਦਿਓ। ਗੱਡੀ ਤੋਂ ਲਾਲ ਬੱਤੀ ਤਾਂ ਆਡਰ ਦਿੱਤਿਆਂ ਹਟ ਜਾਏਗੀ ਪਰ ਹੋਰ ਜਗ ਰਹੀਆਂ ਲਾਲ ਬੱਤੀਆਂ ਨੂੰ ਬੰਦ ਕਰਨ ਲਈ ਕਦੋਂ ਸੋਚਣਾ ਹੈ? ਪਹਿਲੀ ਲਾਲ ਬੱਤੀ ਵਧ ਰਹੀ ਜਨਸੰਖਿਆ ਦੀ ਜਿਹੜੀ ਦਿਨੋਂ-ਦਿਨ ਹੋਰ ਗੂੜ੍ਹੀ ਹੋ ਰਹੀ ਹੈ। ਦੂਜੀ ਲਾਲ ਬੱਤੀ ਵਧ ਰਹੀ ਬੇਰੁਜ਼ਗਾਰੀ ਦੀ ਜਿਹੜੀ ਦੇਸ਼ ਦੇ ਨੌਜਵਾਨਾਂ ਨੂੰ ਨਸ਼ਿਆਂ, ਚੋਰੀਆਂ ਅਤੇ ਡਕੈਤੀਆਂ ਵੱਲ ਧੱਕ ਰਹੀ ਹੈ। ਤੀਜੀ ਲਾਲ ਬੱਤੀ ਅੱਤਵਾਦ ਦੀ ਜਿਹੜੀ ਪੂਰੇ ਭਾਰਤ 'ਤੇ ਮੰਡਰਾ ਰਹੀ ਹੈ। ਸੁਰੱਖਿਆ ਬਲਾਂ ਦੀਆਂ ਦਰਦਨਾਕ ਸ਼ਹਾਦਤਾਂ ਹੋ ਰਹੀਆਂ ਹਨ। ਚੌਥੀ ਲਾਲ ਬੱਤੀ ਰਿਸ਼ਵਤਖੋਰੀ ਦੀ ਜੋ ਭਾਰਤ ਨੂੰ ਘੁਣ ਵਾਂਗ ਖਾ ਰਹੀ ਹੈ। ਪੰਜਵੀਂ ਲਾਲ ਬੱਤੀ ਧਰਮ ਦੇ ਨਾਂਅ 'ਤੇ ਹੋ ਰਹੀਆਂ ਲੜਾਈਆਂ ਦੀ, ਜਿਸ ਨੇ ਆਪਸੀ ਭਾਈਚਾਰੇ ਨੂੰ ਖੇਰੂੰ-ਖੇਰੂੰ ਕਰਕੇ ਰੱਖ ਦਿੱਤਾ ਹੈ। ਇਨ੍ਹਾਂ ਲਾਲ ਬੱਤੀਆਂ ਦੇ ਸਾਹਮਣੇ ਤਾਂ ਗੱਡੀ 'ਤੇ ਲੱਗੀ ਲਾਲ ਬੱਤੀ ਕੁਝ ਵੀ ਨਹੀਂ। ਲੋੜ ਹੈ ਇਨ੍ਹਾਂ ਲਾਲ ਬੱਤੀਆਂ ਨੂੰ ਬੰਦ ਕਰਨ ਦੀ।


-ਸਰਬਜੀਤ ਸਿੰਘ, ਜਲੰਧਰ।


ਸਚਾਈ ਭਰਿਆ ਲੇਖ
ਪਿਛਲੇ ਦਿਨੀਂ ਦੋ ਕਿਸ਼ਤਾਂ ਵਿਚ 'ਬੇਮੁਹਾਰ ਹੋ ਗਈਆਂ ਹਨ ਬਾਜ਼ਾਰੂ ਕੀਮਤਾਂ' ਸਿਰਲੇਖ ਹੇਠ ਛਪਿਆ ਸਤਨਾਮ ਸਿੰਘ ਮਾਣਕ ਦਾ ਲੇਖ ਬਹੁਤ ਹੀ ਪ੍ਰਭਾਵਸ਼ਾਲੀ ਸੀ। ਸਮੇਂ-ਸਮੇਂ ਦੀਆਂ ਸਰਕਾਰਾਂ ਦੀਆਂ ਨੀਤੀਆਂ ਅਤੇ ਨੀਅਤਾਂ ਦਾ ਬਾਖੂਬੀ ਵਰਨਣ ਕੀਤਾ ਹੈ। ਨਰਸਿਮ੍ਹਾ ਰਾਓ ਦੇ ਪ੍ਰਧਾਨ ਮੰਤਰੀ ਹੁੰਦਿਆਂ ਅਤੇ ਵਿੱਤ ਮੰਤਰੀ ਡਾ: ਮਨਮੋਹਨ ਸਿੰਘ ਵੇਲੇ ਸਰਕਾਰ ਨੇ ਨਿੱਜੀਕਰਨ ਅਤੇ ਉਦਾਰਵਾਦੀ ਨੀਤੀਆਂ ਧਾਰਨ ਕੀਤੀਆਂ। ਸਿੱਟੇ ਵਜੋਂ ਹਰ ਖੇਤਰ ਵਿਚ ਲੋਕਾਂ ਦੇ ਹਿਤ ਨਦਾਰਦ ਕਰ ਦਿੱਤੇ ਗਏ। ਧਨਾਢ ਅਤੇ ਵਪਾਰੀ ਵਰਗ ਨੇ ਮੱਧ ਵਰਗ ਦਾ ਰੱਜ ਕੇ ਸ਼ੋਸ਼ਣ ਕੀਤਾ। ਸਿਹਤ ਅਤੇ ਸਿੱਖਿਆ ਵਰਗੀਆਂ ਬੁਨਿਆਦੀ ਸਹੂਲਤਾਂ ਵੀ ਆਮ ਲੋਕਾਂ ਦੀ ਪਹੁੰਚ ਤੋਂ ਬਾਹਰ ਹੋ ਗਈਆਂ। ਮਹਿੰਗਾਈ ਛਾਲਾਂ ਮਾਰ-ਮਾਰ ਵੱਧ ਗਈ। ਹਰ ਖੇਤਰ 'ਤੇ ਜਿਵੇਂ ਕਿ ਰੇਤਾ, ਬਜਰੀ, ਕੇਬਲ, ਟਰਾਂਸਪੋਰਟ ਆਦਿ 'ਤੇ ਤਾਕਤਵਰ ਲੋਕਾਂ ਨੇ ਕਬਜ਼ਾ ਕਰ ਲਿਆ ਹੈ।


-ਜਗਤਾਰ ਸਿੰਘ ਰੁਲਦੂਵਾਲਾ
ਹੈਲਥ ਇੰਸਪੈਕਟਰ ਅਮਰਗੜ੍ਹ (ਸੰਗਰੂਰ)।


ਅਵਾਰਾ ਕੁੱਤਿਆਂ ਦੀ ਸਮੱਸਿਆ
ਅਖ਼ਬਾਰ ਵਿਚ ਕੁੱਤਿਆਂ ਦੇ ਖੌਫ਼ ਬਾਰੇ ਪੜ੍ਹਨ ਨੂੰ ਮਿਲਿਆ। ਇਸ ਤੋਂ ਵੱਧ ਬਦਕਿਸਮਤੀ ਕੀ ਹੋ ਸਕਦੀ ਹੈ ਕਿ ਕੁੱਤਿਆਂ ਵੱਲੋਂ ਲੋਕਾਂ ਨੂੰ ਨੋਚ-ਨੋਚ ਕੇ ਖਾਧਾ ਜਾ ਰਿਹਾ ਅਤੇ ਸਰਕਾਰਾਂ ਖਾਮੋਸ਼ ਹਨ। ਜਦੋਂ ਅਵਾਰਾ ਕੁੱਤਿਆਂ 'ਤੇ ਕੋਈ ਕੰਟਰੋਲ ਕਰਨ ਦਾ ਪ੍ਰਬੰਧ ਨਹੀਂ, ਇਨ੍ਹਾਂ ਨੂੰ ਕਿੱਥੇ ਤੇ ਕਿਵੇਂ ਰੱਖਣਾ ਹੈ ਤਾਂ ਅਵਾਰਾ ਕੁੱਤਿਆਂ ਨੂੰ ਖੁੱਲ੍ਹੇ ਫਿਰਨ ਦੇਣਾ ਕਿੱਥੋਂ ਦੀ ਸਿਆਣਪ ਹੈ। ਪਹਿਲਾਂ ਸਿਹਤ ਵਿਭਾਗ ਵੱਲੋਂ ਅਵਾਰਾ ਕੁੱਤਿਆਂ ਨੂੰ ਮਾਰ ਕੇ ਦਫ਼ਨਾਇਆ ਜਾਂਦਾ ਸੀ। ਹੁਣ ਤਾਂ ਝੁੰਡਾ ਦੇ ਝੁੰਡ ਗਲੀਆਂ, ਸੜਕਾਂ 'ਤੇ ਘੁੰਮ ਰਹੇ ਹਨ। ਨਸਬੰਦੀ ਦਾ ਜੋ ਹਾਲ ਹੋਇਆ, ਉਹ ਕਿਸੇ ਤੋਂ ਲੁਕਿਆ-ਛਿਪਿਆ ਨਹੀਂ। ਕਾਗਜ਼ਾਂ ਵਿਚ ਜੋ ਹੈ, ਉਸ ਤੋਂ ਬਾਹਰ ਆ ਕੇ ਜ਼ਮੀਨੀ ਹਕੀਕਤ ਜਾਣੋ, ਉਹ ਅਸਲੀਅਤ ਬਿਆਨ ਕਰੇਗੀ। ਲੋਕਾਂ ਦੇ ਹਿਤਾਂ ਦੀ ਜਦੋਂ ਗੱਲ ਹੁੰਦੀ ਹੈ ਤਾਂ ਪੈਸੇ ਦੀ ਘਾਟ ਦੱਸੀ ਜਾਂਦੀ ਹੈ। ਮਹੀਨੇ ਵਿਚ ਇਕ ਮੰਤਰੀ, ਵਿਧਾਇਕ ਜਾਂ ਸਕੱਤਰ ਲੱਖਾਂ ਰੁਪਏ ਦਾ ਡੀਜ਼ਲ ਸਰਕਾਰੀ ਖਜ਼ਾਨੇ ਵਿਚੋਂ ਵਰਤ ਲਵੇ ਤਾਂ ਪੈਸੇ ਦੀ ਸਮੱਸਿਆ ਕੋਈ ਨਹੀਂ ਹੁੰਦੀ। ਜੇਕਰ ਬੰਦੇ ਦੇ ਜਿਊਣ ਦੀ ਰਾਖੀ ਸਰਕਾਰ ਤੇ ਪ੍ਰਸ਼ਾਸਨ ਨਹੀਂ ਕਰ ਸਕਦਾ ਤਾਂ ਏਨੇ ਵੱਡੇ ਤਾਮ-ਝਾਮ ਬਣਾਉਣ ਦੀ ਜ਼ਰੂਰਤ ਹੀ ਕੀ ਹੈ? ਜੰਗਲਾਂ ਵਿਚ ਰਹਿੰਦਾ ਮਨੁੱਖ ਆਪਣੇ ਹਿਸਾਬ ਨਾਲ ਆਪਣੀ ਹਿਫ਼ਾਜ਼ਤ ਕਰ ਹੀ ਲੈਂਦਾ ਸੀ। ਜਿਹੜੇ ਕਾਨੂੰਨ ਬਣਾ ਰਹੇ ਨੇ, ਉਨ੍ਹਾਂ ਦੇ ਘਰਾਂ ਤੇ ਉਨ੍ਹਾਂ ਦੇ ਪਰਿਵਾਰ ਏਨੇ ਸੁਰੱਖਿਆ ਗਾਰਡਾਂ ਨਾਲ ਘੁੰਮਦੇ ਹਨ ਕਿ ਉਹ ਕੀ ਜਾਨਣ ਕੁੱਤੇ ਦੇ ਵੱਢੇ ਦਾ ਦਰਦ, ਨੋਚ-ਨੋਚ ਖਾਧੇ ਜਾਣ ਦੀ ਤਕਲੀਫ਼। ਸਰਕਾਰ ਗੰਭੀਰ ਹੋਏ ਤਾਂ ਪ੍ਰਸ਼ਾਸਨ ਵੀ ਸੁਚੇਤ ਹੋਏਗਾ। ਅਖ਼ਬਾਰਾਂ ਵਿਚ ਅਵਾਰਾ ਕੁੱਤਿਆਂ ਦੀ ਸਮੱਸਿਆ ਪੜ੍ਹ ਕੇ ਮੇਰਾ ਵੀ ਇਹ ਹੀ ਸਵਾਲ ਹੈ ਕਿ ਇਹ ਸਮੱਸਿਆ ਹੱਲ ਕਿਉਂ ਨਹੀਂ ਕੀਤੀ ਜਾਂਦੀ? ਇਸ ਨਾਲ ਹੋਏ ਨੁਕਸਾਨ ਦਾ ਜ਼ਿੰਮੇਵਾਰ ਕੌਣ ਹੈ?


-ਪ੍ਰਭਜੋਤ ਕੌਰ ਢਿੱਲੋਂ
ਮੋ: 98150-30221

10-4-2017

 ਸਰਕਾਰ ਦੀ ਬੇਰੁਖ਼ੀ

ਕਿਸਾਨ ਦੀ ਹਾਲਤ ਦਿਨ-ਬਦਿਨ ਵਿਗੜਦੀ ਜਾ ਰਹੀ ਹੈ। ਉਦਯੋਗਪਤੀਆਂ ਦੇ ਕਰਜ਼ਿਆਂ ਦੀ ਸਮੱਸਿਆ ਨੂੰ ਇਕ ਖਾਸ ਵਿਧੀ ਨਾਲ ਸੁਲਝਾ ਲਿਆ ਜਾਂਦਾ ਹੈ ਪਰ ਕਿਸਾਨਾਂ ਵਾਸਤੇ ਝੱਜੂ ਪੈ ਜਾਂਦਾ ਹੈ। ਕਿਉਂ ਕਿਸਾਨਾਂ ਦੀਆਂ ਸਮੱਸਿਆਵਾਂ ਸਮਝ ਨਹੀਂ ਆਉਂਦੀਆਂ? ਕਿਉਂ ਇਸ ਦਾ ਪੱਕਾ ਹੱਲ ਨਹੀਂ ਲੱਭਿਆ ਜਾ ਰਿਹਾ? ਕਿਉਂ ਖ਼ੁਦਕੁਸ਼ੀ ਕਰਨ ਲਈ ਮਜਬੂਰ ਹੋ ਰਿਹਾ ਹੈ ਕਿਸਾਨ? ਸੁਪਰੀਮ ਕੋਰਟ ਨੇ ਵੀ ਇਸ 'ਤੇ ਚਿੰਤਾ ਜ਼ਾਹਰ ਕੀਤੀ ਹੈ ਪਰ ਇਸ ਬਾਰੇ ਕੋਈ ਵੀ ਸਰਕਾਰ ਗੰਭੀਰ ਨਹੀਂ ਹੈ। ਜਿਸ ਤਰ੍ਹਾਂ ਕਿਸਾਨ ਜੰਤਰ ਮੰਤਰ 'ਤੇ ਧਰਨਾ ਦੇ ਰਹੇ ਹਨ, ਸਰਕਾਰ ਦੀ ਬੇਰੁਖ਼ੀ ਸਹੀ ਨਹੀਂ ਲਗਦੀ। ਬੜੀ ਹੈਰਾਨੀ ਹੁੰਦੀ ਹੈ ਜਦੋਂ ਕਿਸਾਨ ਨੂੰ ਆਲੂ ਦਾ ਭਾਅ ਇਕ ਰੁਪਏ ਤੱਕ ਮਿਲਦਾ ਹੈ ਅਤੇ ਗਾਹਕਾਂ ਨੂੰ ਆਲੂ ਉਸ ਸਮੇਂ ਵੀ ਬਾਜ਼ਾਰ ਵਿਚ 8-9 ਰੁਪਏ ਮਿਲ ਰਿਹਾ ਹੁੰਦਾ ਹੈ। ਸਬਜ਼ੀਆਂ ਦੀ ਵੀ ਇੰਜ ਹੀ ਦੁਰਦਸ਼ਾ ਕੀਤੀ ਜਾਂਦੀ ਹੈ। ਕਿਸਾਨ ਨੂੰ ਕੁਦਰਤ ਵੀ ਮਾਰ ਜਾਂਦੀ ਹੈ, ਬੇਮੌਸਮਾ ਮੀਂਹ, ਗੜੇ, ਝੱਖੜ ਉਸ ਦੀ ਮਿਹਨਤ ਨੂੰ ਤਹਿਸ-ਨਹਿਸ ਕਰ ਦਿੰਦੇ ਹਨ। ਮੁਆਵਜ਼ੇ ਦੇ ਨਾਂਅ 'ਤੇ ਜੋ ਧਾਂਦਲੀਆਂ ਹੁੰਦੀਆਂ ਹਨ, ਉਹ ਕਿਸੇ ਤੋਂ ਵੀ ਲੁਕੀਆਂ ਨਹੀਂ।
ਕਿਸਾਨੀ ਦਾ ਧੰਦਾ ਹੀ ਅਜਿਹਾ ਹੈ, ਜਿਸ ਵਿਚ ਮਾਲਕ ਆਪਣੀ ਚੀਜ਼ ਦਾ ਮੁੱਲ ਖ਼ੁਦ ਨਹੀਂ ਤੈਅ ਕਰ ਸਕਦਾ। ਸੂਈ ਤੋਂ ਲੈ ਕੇ ਜਹਾਜ਼ ਬਣਾਉਣ ਵਾਲਾ ਆਪਣੀ ਚੀਜ਼ ਦੀ ਕੀਮਤ ਤੇ ਮੁਨਾਫ਼ਾ ਖ਼ੁਦ ਤੈਅ ਕਰਦਾ ਹੈ। ਬਹੁਤੀ ਵਾਰ ਇਹ ਸਵਾਲ ਉੱਠਦਾ ਹੈ ਕਿ ਕਿਸਾਨ ਵਿਆਹ 'ਤੇ ਖਰਚਾ ਬਹੁਤ ਕਰਦੇ ਨੇ, ਇਸ ਗੱਲ ਨਾਲ ਮੈਂ ਵੀ ਸਹਿਮਤ ਹਾਂ ਪਰ ਜਿਵੇਂ ਦੇ ਸਮਾਜ ਦੇ ਹਾਲਾਤ ਬਣੇ ਹੋਏ ਹਨ, ਉਨ੍ਹਾਂ ਵਿਚ ਕਿਸਾਨਾਂ ਨੂੰ ਵੱਖਰਾ ਕਿਵੇਂ ਕਰ ਸਕਦੇ ਹਾਂ। ਬੱਚਿਆਂ ਦੀ ਪੜ੍ਹਾਈ 'ਤੇ ਜੋ ਖਰਚਾ ਹੋ ਰਿਹਾ ਹੈ, ਉਸ ਨੂੰ ਉਹ ਕਿਵੇਂ ਘੱਟ ਕਰ ਸਕਦਾ ਹੈ। ਪੜ੍ਹਾਈ ਤੋਂ ਬਾਅਦ ਬੱਚੇ ਨਾ ਤਾਂ ਖੇਤੀ ਕਰਦੇ ਹਨ ਅਤੇ ਨਾ ਹੀ ਨੌਕਰੀ ਮਿਲਦੀ ਹੈ। ਮਹਿੰਗਾਈ, ਬੇਰੁਜ਼ਗਾਰੀ, ਰਿਸ਼ਵਤ ਤੇ ਭ੍ਰਿਸ਼ਟਾਚਾਰ ਨੇ ਇਸ ਵਰਗ ਦਾ ਵੀ ਲੱਕ ਤੋੜਿਆ ਹੋਇਆ ਹੈ। ਕਿਸਾਨ ਸਭ ਦਾ ਪੇਟ ਭਰਦਾ ਹੈ ਪਰ ਉਸ ਦਾ ਖਿਆਲ ਰੱਖਣ ਵਾਲਾ ਕੋਈ ਨਹੀਂ। ਇਸ ਤੋਂ ਵੱਡੀ ਅਣਗਹਿਲੀ ਤੇ ਗ਼ੈਰ-ਜ਼ਿੰਮੇਵਾਰੀ ਵਾਲੀ ਹਰਕਤ ਹੋਰ ਕੀ ਹੋ ਸਕਦੀ ਹੈ। ਸਵਾਮੀਨਾਥਨ ਰਿਪੋਰਟ 'ਤੇ ਗ਼ੌਰ ਕਿਉਂ ਨਹੀਂ ਹੋ ਰਿਹਾ।

-ਪ੍ਰਭਜੋਤ ਕੌਰ ਢਿੱਲੋਂ
ਸੰਪਰਕ : 98150-30221.

ਲੋਕ ਕੀ ਚਾਹੁੰਦੇ ਹਨ?

ਪਿਛਲੇ ਦਿਨੀਂ ਡਾ: ਸ਼ਿਆਮ ਸੁੰਦਰ ਦੀਪਤੀ ਹੁਰਾਂ ਦਾ ਲੇਖ 'ਲੋਕਾਂ ਦੀ ਮਾਨਸਿਕਤਾ ਨੂੰ ਸਮਝਣ ਸਿਆਸੀ ਦਲ' ਪੜ੍ਹਿਆ। ਦਰਅਸਲ ਦੇਸ਼ ਆਜ਼ਾਦ ਹੁੰਦਿਆ ਹੀ ਸਾਡੇ ਰਾਜਨੀਤੀਵਾਨਾਂ ਨੇ ਲੋਕਾਂ ਦੇ ਬੁਨਿਆਦੀ ਮੁੱਦਿਆਂ ਵੱਲ ਘੱਟ ਹੀ ਧਿਆਨ ਦਿੱਤਾ ਹੈ, ਜੇ ਧਿਆਨ ਦਿੱਤਾ ਹੁੰਦਾ ਤਾਂ ਦੇਸ਼ ਦੀ ਅਜਿਹੀ ਦੁਰਦਸ਼ਾ ਨਾ ਹੁੰਦੀ। ਇਹ ਠੀਕ ਹੈ ਕਿ ਤਰੱਕੀ ਹੋਈ ਹੈ ਪਰ ਜੋ ਤਰੱਕੀ ਵਿਖਾਈ ਦੇ ਰਹੀ ਹੈ, ਉਸ ਨਾਲ ਆਮ ਆਦਮੀ ਦਾ ਕੋਈ ਲੈਣ-ਦੇਣ ਨਹੀਂ ਹੈ। ਲੋਕ ਚਾਹੁੰਦੇ ਹਨ ਕਿ ਸਿਹਤ ਸਹੂਲਤਾਂ, ਚੰਗੀ ਵਿੱਦਿਆ, ਵਧੀਆ ਰਹਿਣ-ਸਹਿਣ, ਭ੍ਰਿਸ਼ਟਾਚਾਰ ਮੁਕਤ ਪ੍ਰਸ਼ਾਸਨ, ਖੁਸ਼ਹਾਲ ਕਿਰਸਾਨੀ, ਦੇਸ਼ ਦੀ ਤਰੱਕੀ ਤੇ ਰੁਜ਼ਗਾਰ ਲਈ ਸਨਅਤਾਂ, ਪੜ੍ਹੀ-ਲਿਖੀ ਜਵਾਨੀ ਲਈ ਚੰਗੀਆਂ ਸਰਕਾਰੀ ਤੇ ਗ਼ੈਰ-ਸਰਕਾਰੀ ਨੌਕਰੀਆਂ ਆਦਿ ਬੁਨਿਆਦੀ ਲੋੜਾਂ ਪੂਰੀਆਂ ਹੋਣ। ਰਾਜਨੀਤੀਵਾਨਾਂ ਨੂੰ ਹੁਣ ਲੋਕਾਂ ਦੀ ਮਾਨਸਿਕਤਾ ਨੂੰ ਸਮਝ ਲੈਣਾ ਚਾਹੀਦਾ ਹੈ। ਹੋਰ ਲਾਰਿਆਂ ਨਾਲ ਸਮਾਂ ਨਹੀਂ ਲੰਘਾਉਣਾ ਚਾਹੀਦਾ।

-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।

09/05/2017

ਸਿੱਖ ਨਸਲਕੁਸ਼ੀ

ਪਿਛਲੇ ਦਿਨੀਂ ਕੈਨੇਡਾ ਦੀ ਉਂਟਾਰੀਓ ਅਸੈਂਬਲੀ ਨੇ 1984 ਵਿਚ ਭਾਰਤ ਦੀ ਰਾਜਧਾਨੀ ਦਿੱਲੀ ਵਿਚ ਯੋਜਨਾਬੱਧ ਤਰੀਕੇ ਨਾਲ ਸਿੱਖਾਂ ਦੇ ਕੀਤੇ ਗਏ ਕਤਲੇਆਮ ਨੂੰ ਸਿੱਖ ਨਸਲਕੁਸ਼ੀ ਕਹਿਣ 'ਤੇ ਭਾਰਤ ਦੇ ਰੱਖਿਆ ਮੰਤਰੀ ਅਰੁਣ ਜੇਤਲੀ ਨੇ ਸਖ਼ਤ ਇਤਰਾਜ਼ ਕੀਤਾ, ਜਦੋਂ ਕਿ ਭਾਜਪਾ ਦੇ ਪ੍ਰਕਾਸ਼ ਜਾਵਡੇਕਰ ਅਤੇ ਰਾਜਨਾਥ ਸਿੰਘ ਵੱਡੇ ਆਗੂ '84 ਕਤਲੇਆਮ ਨੂੰ ਪਹਿਲਾਂ ਹੀ ਸਿੱਖ ਨਸਲਕੁਸ਼ੀ ਕਹਿ ਚੁੱਕੇ ਹਨ। ਫਿਰ ਸ੍ਰੀ ਜੇਤਲੀ ਨੂੰ ਇਸ ਮੁੱਦੇ 'ਤੇ ਭਾਰਤ ਅਤੇ ਕੈਨੇਡਾ ਦੇ ਰਾਜਨੀਤਕ ਸਬੰਧ ਵਿਗੜਨ ਤੱਕ ਦੀ ਗੱਲ ਕਹਿਣੀ ਪਈ। ਜੇਕਰ '84 ਕਤਲੇਆਮ ਦਾ ਮਸਲਾ ਅੰਤਰਰਾਸ਼ਟਰੀ ਪੱਧਰ 'ਤੇ ਉੱਠਿਆ ਤਾਂ ਹੋ ਸਕਦਾ ਸਿੱਖਾਂ ਦੇ ਕਾਤਲਾਂ ਨੂੰ ਨਾ ਚਾਹੁੰਦੇ ਹੋਏ ਵੀ ਸਜ਼ਾਵਾਂ ਦੇਣੀਆਂ ਪੈਣ। ਭਾਜਪਾ ਨੂੰ ਡਰ ਹੈ ਕਿ ਹੋ ਸਕਦਾ ਹੈ ਅਜਿਹਾ ਕਰਨ ਨਾਲ ਹਿੰਦੂ ਵੋਟਾਂ ਉਹਦੇ ਨਾਲੋਂ ਟੁੱਟ ਜਾਣ। ਕੀ ਪੰਜਾਬ ਜਾਂ ਸਿੱਖ ਵੋਟਰ ਭਾਜਪਾ ਲਈ ਕੋਈ ਮਾਅਨੇ ਨਹੀਂ ਰੱਖਦੇ? ਇਸ ਮਾਮਲੇ 'ਤੇ ਆਮ ਆਦਮੀ ਪਾਰਟੀ ਵੱਲੋਂ ਭਾਜਪਾ ਦਾ ਜ਼ੋਰਦਾਰ ਵਿਰੋਧ ਕੀਤਾ ਗਿਆ। ਪ੍ਰੰਤੂ ਸਿੱਖਾਂ ਦੀ ਪ੍ਰਤੀਨਿਧ ਕਹਾਉਣ ਵਾਲੀ ਪਾਰਟੀ ਦੀ ਚੁੱਪ ਕੇਵਲ ਚੁੱਭਦੀ ਹੀ ਨਹੀਂ, ਸਗੋਂ ਕਈ ਤਰ੍ਹਾਂ ਦੇ ਸ਼ੰਕੇ ਵੀ ਖੜ੍ਹੇ ਕਰਦੀ ਹੈ।

-ਪ੍ਰੀਤ ਸਿੰਘ ਸੰਦਲ
ਪਿੰਡ ਮਕਸੂਦੜਾ, ਤਹਿ: ਪਾਇਲ (ਲੁਧਿਆਣਾ)।

ਕਿਸਾਨ ਬਨਾਮ ਸਰਕਾਰੀ ਫ਼ੈਸਲੇ

ਪਿਛਲੇ ਲੰਮੇ ਸਮੇਂ ਤੋਂ ਫ਼ਸਲਾਂ ਦੀ ਰਹਿੰਦ-ਖੂੰਹਦ ਨੂੰ ਨਾ ਸਾੜਨ ਬਾਰੇ ਬਹਿਸ ਹੁੰਦੀ ਰਹੀ ਹੈ ਅਤੇ ਇਸ ਵਾਰ ਇਸ ਨੂੰ ਸਖ਼ਤੀ ਨਾਲ ਲਾਗੂ ਵੀ ਕਰ ਦਿੱਤਾ ਗਿਆ। ਬੇਸ਼ੱਕ ਫ਼ੈਸਲਾ ਵਾਤਾਵਰਨ ਹਿਤੈਸ਼ੀ ਹੈ ਪ੍ਰੰਤੂ ਕੀ ਕਿਸਾਨੀ ਜੋ ਕਿ ਪਹਿਲਾਂ ਹੀ ਕਰਜ਼ੇ ਵਿਚ ਫਸੀ ਹੋਈ ਹੈ, ਆਰਥਿਕ ਤੌਰ 'ਤੇ ਵੱਧ ਵਹਾਈ ਦੇ ਖਰਚ ਨੂੰ ਸਹਿਣ ਕਰ ਪਾਏਗੀ? ਕੀ ਸਰਕਾਰ ਨੇ ਝੋਨੇ ਦੇ ਆਗਾਮੀ ਸੀਜ਼ਨ ਦੌਰਾਨ ਝੋਨੇ ਦੀ ਵਿਆਪਕ ਪਰਾਲੀ ਨਾਲ ਨਜਿੱਠਣ ਲਈ ਕੋਈ ਪ੍ਰਬੰਧ ਕੀਤੇ ਹਨ? ਕਿਸਾਨ ਸਰਕਾਰ ਤੋਂ ਮੁਨਕਰ ਨਹੀਂ ਪ੍ਰੰਤੂ ਉਨ੍ਹਾਂ ਨੂੰ ਇਸ ਸਮੱਸਿਆ ਨਾਲ ਨਜਿੱਠਣ ਲਈ ਲੋੜੀਂਦੇ ਵਸੀਲੇ ਪ੍ਰਦਾਨ ਕੀਤੇ ਜਾਣ। ਪ੍ਰਦੂਸ਼ਣ ਨਾਲ ਨਜਿੱਠਣ ਲਈ ਕੇਵਲ ਕਿਸਾਨ ਹੀ ਕਿਉਂ, ਉਦਯੋਗਾਂ 'ਤੇ ਵੀ ਸ਼ਿਕੰਜਾ ਕੱਸੋ। ਪ੍ਰਦੂਸ਼ਣ ਲਈ ਉਦਯੋਗ ਵੀ ਜ਼ਿੰਮੇਵਾਰ ਹਨ। ਸਰਕਾਰ ਨੂੰ ਚਾਹੀਦਾ ਹੈ ਕਿ ਲੋੜੀਂਦੇ ਪ੍ਰਬੰਧ ਕਰੇ।

-ਮਨਦੀਪ ਸਿਵੀਆ
ਪਿੰਡ ਤੇ ਡਾਕ: ਜੋੜਕੀ ਅੰਧੇਵਾਲੀ, ਜ਼ਿਲ੍ਹਾ ਫਾਜ਼ਿਲਕਾ।

ਪੰਜਾਬ ਦੀ ਸਰਪਲੱਸ ਬਿਜਲੀ

ਪੰਜਾਬ ਦੀ ਮੌਜੂਦਾ ਸਰਕਾਰ ਦੇ ਮੁੱਖ ਮੰਤਰੀ ਕੇਂਦਰ ਦੀ ਮੋਦੀ ਸਰਕਾਰ ਨੂੰ ਬੇਨਤੀ ਕਰ ਰਹੇ ਹਨ ਕਿ ਪੰਜਾਬ ਵਿਚ ਬਿਜਲੀ ਸਰਪਲਸ ਹੈ ਅਤੇ ਇਸ ਨੂੰ ਪਾਕਿਸਤਾਨ ਅਤੇ ਨਿਪਾਲ ਨੂੰ ਵੇਚਣ ਦੀ ਪ੍ਰਵਾਨਗੀ ਦਿੱਤੀ ਜਾਵੇ, ਜੋ ਕਿ ਬਹੁਤ ਹੀ ਸੁਚੱਜਾ, ਸੁਚਾਰੂ ਅਤੇ ਖੁਸ਼ਹਾਲੀ ਦਾ ਪ੍ਰਤੀਕ ਹੈ। ਪ੍ਰੰਤੂ ਬਿਜਲੀ ਦੂਸਰੇ ਦੇਸ਼ਾਂ ਨੂੰ ਵੇਚਣ ਤੋਂ ਪਹਿਲਾਂ ਇਹ ਤਸੱਲੀ ਕਰ ਲੈਣੀ ਚਾਹੀਦੀ ਹੈ ਕਿ ਪੰਜਾਬ ਕੋਲ ਬਿਜਲੀ ਵਾਕਿਆ ਹੀ ਸਰਪਲੱਸ ਹੈ। ਜੇਕਰ ਸਚਮੁੱਚ ਬਿਜਲੀ ਸਰਪਲੱਸ ਹੈ ਤਾਂ ਕਿਸਾਨਾਂ ਨੂੰ ਖੇਤੀ ਲਈ ਝੋਨੇ ਦੇ ਸੀਜ਼ਨ ਵਿਚ 8 ਘੰਟੇ ਕਿਉਂ ਸਪਲਾਈ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਨੂੰ 24 ਘੰਟੇ ਬਿਜਲੀ ਪਹਿਲਾਂ ਦਿੱਤੀ ਜਾਵੇ ਅਤੇ ਸਨਅਤਾਂ ਨੂੰ ਪੂਰੀ ਬਿਜਲੀ ਪਹਿਲਾਂ ਦਿੱਤੀ ਜਾਣੀ ਚਾਹੀਦੀ ਹੈ, ਤਾਂ ਜੋ ਕਿਸਾਨ ਅਤੇ ਸਨਅਤਕਾਰ ਦੇਸ਼ ਦੀ ਖੁਸ਼ਹਾਲੀ ਵਿਚ ਹੋਰ ਯੋਗਦਾਨ ਪਾ ਸਕਣ। ਇਸ ਲਈ ਪਹਿਲਾਂ ਪੰਜਾਬ ਦੀ ਮੰਗ ਪੂਰੀ ਕੀਤੀ ਜਾਵੇ ਅਤੇ ਜੇਕਰ ਫਿਰ ਵੀ ਬਿਜਲੀ ਸਰਪਲੱਸ ਹੈ ਤਾਂ ਇਸ ਨੂੰ ਵੇਚਣ ਵਿਚ ਕੋਈ ਹਰਜ਼ ਨਹੀਂ ਹੈ। ਅਜਿਹਾ ਕਰਨ ਨਾਲ ਪੰਜਾਬ ਅਤੇ ਭਾਰਤ ਦਾ ਮਾਣ ਹੋਰ ਵਧੇਗਾ।

-ਅਮਰੀਕ ਸਿੰਘ ਚੀਮਾ
ਸ਼ਾਹਬਾਦੀਆ, 15 ਰਮਨੀਕ ਨਗਰ, ਮਿੱਠਾਪੁਰ ਰੋਡ, ਜਲੰਧਰ।

05/05/2017

 ਗ਼ਲਤ ਫ਼ੈਸਲੇ
ਸਿੱਖਿਆ ਵਿਚ ਸੁਧਾਰ ਕਰਨ ਲਈ ਪੰਜਾਬ ਦਾ ਸਿੱਖਿਆ ਵਿਭਾਗ ਬਹੁਤ ਯਤਨਸ਼ੀਲ ਹੈ। ਫਿਰ ਵੀ ਵਿਦਿਆਰਥੀਆਂ ਦੀ ਗਿਣਤੀ ਨਹੀਂ ਵਧ ਰਹੀ। ਇਸ ਦਾ ਸਭ ਤੋਂ ਵੱਡਾ ਕਾਰਨ ਅਧਿਆਪਕਾਂ ਦੀ ਕਮੀ ਹੈ। ਪੜ੍ਹਾਈ ਦੇ ਦਿਨਾਂ 'ਚ ਅਧਿਆਪਕਾਂ ਦੇ ਸੈਮੀਨਾਰ ਲਗਾ ਦਿੱਤੇ ਜਾਂਦੇ ਹਨ, ਜਦੋਂ ਕਿ ਜਨਵਰੀ ਤੋਂ ਲੈ ਕੇ ਮਾਰਚ ਦੇ ਅਖੀਰ ਤੱਕ ਕੋਈ ਸੈਮੀਨਾਰ ਨਹੀਂ ਲੱਗਣਾ ਚਾਹੀਦਾ। ਕੁਝ ਹੋਰ ਫ਼ੈਸਲੇ ਜਿਵੇਂ ਅਧਿਆਪਕਾਂ ਦੀ ਰੋਜ਼ਾਨਾ ਕੰਮ ਕਾਜ ਦੀ ਡਾਇਰੀ ਵਿਦਿਆਰਥੀ ਲਿਖਣਗੇ। ਬੱਚਿਆਂ ਨੂੰ ਛੁੱਟੀ ਪਹਿਲਾਂ ਹੋਵੇਗੀ ਅਤੇ ਅਧਿਆਪਕ ਅੱਧਾ ਪੌਣਾ ਘੰਟਾ ਸਕੂਲ 'ਚ ਹੀ ਬੈਠਣਗੇ। ਪੰਜਵੀਂ ਅਤੇ ਅੱਠਵੀਂ ਸ਼੍ਰੇਣੀ ਵਿਚੋਂ ਕੋਈ ਵੀ ਵਿਦਿਆਰਥੀ ਫੇਲ੍ਹ ਨਾ ਕਰਨ ਵਾਲਾ ਫ਼ੈਸਲਾ ਵਿਦਿਆਰਥੀਆਂ ਦੀ ਜ਼ਿੰਦਗੀ ਤਬਾਹ ਕਰਨ ਵਾਲਾ ਫ਼ੈਸਲਾ ਸੀ। ਰਾਜ ਸਰਕਾਰ ਨੂੰ ਚਾਹੀਦਾ ਹੈ ਕਿ ਸਿੱਖਿਆ ਦਾ ਪ੍ਰਬੰਧ ਸਿੱਖਿਆ ਸ਼ਾਸਤਰੀਆਂ ਦੇ ਹਵਾਲੇ ਕਰੇ ਤਾਂ ਜੋ ਸਕੂਲਾਂ ਨੂੰ ਸੁਚਾਰੂ ਢੰਗ ਨਾਲ ਚਲਾਇਆ ਜਾ ਸਕੇ।

-ਮਹਿੰਦਰ ਸਿੰਘ ਬਾਜਵਾ
ਪਿੰਡ ਮਸੀਤਾਂ, ਜ਼ਿਲ੍ਹਾ ਕਪੂਰਥਲਾ।

ਨਵੀਂ ਟਰਾਂਸਪੋਰਟ ਨੀਤੀ
ਪੰਜਾਬ ਸਰਕਾਰ ਵੱਲੋਂ ਨਵੀਂ ਟਰਾਂਸਪੋਰਟ ਨੀਤੀ ਬਣਾਉਣ 'ਤੇ ਵਿਚਾਰ ਹੋਈ ਹੈ। ਪੰਜਾਬ ਦੀਆਂ ਸੜਕਾਂ 'ਤੇ ਰੋਡਵੇਜ਼ ਜਾਂ ਪੈਪਸੂ ਰੋਡ ਟਰਾਂਸਪੋਰਟ ਤਾਂ ਬਹੁਤ ਹੀ ਘੱਟ ਨਜ਼ਰ ਆਉਂਦੀ ਹੈ। ਪਿੰਡਾਂ ਦੇ ਰੂਟਾਂ 'ਤੇ 1980 ਦੇ ਕਰੀਬ ਰੋਡਵੇਜ਼ ਦੀਆਂ ਬੱਸਾਂ ਜਾਂਦੀਆਂ ਸਨ ਪਰ ਅੱਜ ਰੋਡਵੇਜ਼ ਦੀ ਬੱਸ ਹੁਣ ਨਜ਼ਰ ਨਹੀਂ ਆਉਂਦੀ। ਸਭ ਪਾਸੇ ਮਿੰਨੀ ਬੱਸਾਂ ਦਾ ਬੋਲਬਾਲਾ ਹੈ। ਬੱਸ ਦਾ ਮਾਲਕ ਕੋਈ ਹੁੰਦਾ ਹੈ ਤੇ ਪਰਮਿਟ ਦਾ ਮਾਲਕ ਕੋਈ ਹੋਰ। ਜਿਨ੍ਹਾਂ ਲੋਕਾਂ ਦਾ ਸਿਆਸੀ ਕੱਦ ਉੱਚਾ ਹੁੰਦਾ ਹੈ, ਉਹ ਲੋਕ ਬਿਨਾਂ ਪਰਮਿਟ ਤੋਂ ਕਮਾਈ ਕਰ ਰਹੇ ਹਨ। ਨਿੱਜੀ ਟਰਾਂਸਪੋਰਟਰ ਅੱਜ ਮਾਲੋਮਾਲ ਹਨ ਤੇ ਸਰਕਾਰੀ ਬੱਸਾਂ ਨੂੰ ਕਮਾਈ ਘੱਟ ਹੋਣ ਨਾਲ ਖਜ਼ਾਨੇ ਨੂੰ ਧੱਕਾ ਲੱਗਾ ਹੈ। ਜੇਕਰ ਸਰਕਾਰ ਪਿਡਾਂ ਨੂੰ ਰੋਡਵੇਜ਼ ਦੀਆਂ ਮਿੰਨੀ ਬੱਸਾਂ ਲਗਾ ਦੇਵੇ ਤਾਂ ਸਰਕਾਰ ਨੂੰ ਜਿੱਥੇ ਕਮਾਈ ਹੋਵੇਗੀ, ਉੱਥੇ ਨੌਜਵਾਨਾਂ ਨੂੰ ਰੁਜ਼ਗਾਰ ਵੀ ਮਿਲ ਸਕਦਾ ਹੈ। ਜੇਕਰ ਪੰਜਾਬ ਸਰਕਾਰ ਰੋਡਵੇਜ਼, ਪੈਪਸੂ ਬੱਸਾਂ ਨੂੰ ਸੁਚੱਜੇ ਢੰਗ ਨਾਲ ਚਲਾਵੇ ਤਾਂ ਪੰਜਾਬ ਦਾ ਖਜ਼ਾਨਾ ਮਾਲੋਮਾਲ ਹੋ ਸਕਦਾ ਹੈ, ਜੇ ਪੰਜਾਬ ਸਰਕਾਰ ਨਿੱਜੀ ਕੰਪਨੀ ਦੇ ਟਰਾਂਸਪੋਰਟਰ ਨੂੰ ਘੁਸਪੈਠ ਤੋਂ ਰੋਕਣ ਵਿਚ ਸਫਲ ਹੁੰਦੀ ਹੈ।

-ਮਾਸਟਰ ਜਗੀਰ ਸਿੰਘ ਸਫਰੀ
ਸਠਿਆਲਾ (ਅੰਮ੍ਰਿਤਸਰ)।

ਜੇ ਨਾ ਮਨੋਂ ਮੁਕਾਈਏ
ਹਜ਼ਰਤ ਬੁੱਲ੍ਹੇ ਸ਼ਾਹ ਨੇ ਤੱਤ ਕੱਢ ਕੇ ਕਿਹਾ ਹੈ, 'ਮੱਕੇ ਗਿਆਂ ਗੱਲ ਮੁਕਦੀ ਨਾਹੀਂ, ਜੇ ਨ ਮਨੋਂ ਮੁਕਾਈਏ'। ਪੰਜਾਬ ਸਰਕਾਰ ਅਤੇ ਕੇਂਦਰ ਸਰਕਾਰ ਨੇ ਵੀ.ਆਈ.ਪੀ. ਕਲਚਰ ਖ਼ਤਮ ਕਰਨ ਲਈ ਜੋ ਕਦਮ ਉਠਾਇਆ, ਸ਼ਲਾਘਾਯੋਗ ਹੈ। ਪ੍ਰੰਤੂ ਇਹ ਕੇਵਲ ਲਾਲ ਬੱਤੀ ਤੇ ਹੂਟਰ ਹਟਾਉਣ ਨਾਲ ਖ਼ਤਮ ਨਹੀਂ ਹੋਣਾ। ਸਾਡੇ ਵਿਧਾਇਕ ਤਾਂ ਸਟੇਜਾਂ 'ਤੇ ਖਲੋ ਕੇ ਪੁਲਿਸ ਨੂੰ ਜ਼ਬਰਦਸਤ ਐਲਾਨੀਆਂ ਧਮਕੀਆਂ ਦਿੰਦੇ ਹਨ। ਇਕ ਵਿਧਾਇਕ ਦਾ ਸਮਰਥਕ ਧੁੱਪ ਵਿਚ ਖੜ੍ਹੇ ਡਿਊਟੀ ਦੇ ਰਹੇ ਪੁਲਿਸ ਕਰਮਚਾਰੀ ਨੂੰ ਗੱਡੀ ਰੋਕਣ ਦਾ ਇਸ਼ਾਰਾ ਕਰਨ 'ਤੇ ਅੱਗ ਬਬੂਲਾ ਹੋ ਕੇ ਕੁੱਟਣ ਤੱਕ ਜਾਂਦਾ ਸੀ ਕਿ ਗੱਡੀ ਨੂੰ ਰੋਕਿਆ ਕਿਉਂ ਹੈ। ਅਜਿਹੇ ਤਾਨਾਸ਼ਾਹ ਸਲੂਕ ਕਰਨ ਵਾਲਿਆਂ ਦੀਆਂ ਹੋਰ ਵੀ ਖ਼ਬਰਾਂ ਪੜ੍ਹਨ ਨੂੰ ਮਿਲੀਆਂ ਹਨ। ਜਿੰਨਾ ਚਿਰ ਸਾਡੇ ਸ਼ਾਸਕਾਂ, ਆਗੂਆਂ ਤੇ ਅਫ਼ਸਰਾਂ ਦੇ ਮਨ ਵਿਚੋਂ ਸੱਤਾ ਦਾ ਗਰੂਰ, ਅਹੁਦੇ ਦੀ ਸ਼ਕਤੀ ਤੇ ਕੁਰਸੀਆਂ ਦੇ ਨਸ਼ੇ ਵਿਚੋਂ ਤੁਗਲਕੀ ਫਰਮਾਨ ਨਹੀਂ ਜਾਂਦੇ ਅਤੇ ਸੇਵਾ ਭਾਵ ਦਾ ਜਜ਼ਬਾ ਨਹੀਂ ਆਉਂਦਾ, ਵੀ.ਆਈ.ਪੀ. ਸੱਭਿਆਚਾਰ ਨਹੀਂ ਜਾਏਗਾ।

-ਮਾ: ਮਹਿੰਦਰ ਸਿੰਘ ਸਿੱਧੂ
ਸਿੱਧਵਾਂ ਕਲਾਂ, ਜ਼ਿਲ੍ਹਾ ਲੁਧਿਆਣਾ।

04/05/2017

 ਆਪਣੇ ਫ਼ਰਜ਼ ਪਛਾਣੋ
ਪ੍ਰਦੂਸ਼ਣ ਦੀ ਗੱਲ ਤਾਂ ਹਰ ਕੋਈ ਕਰਦਾ ਹੈ, ਬਹਿਸ ਵੀ ਚੈਨਲਾਂ 'ਤੇ ਵੇਖਣ ਨੂੰ ਮਿਲ ਜਾਂਦੀ ਹੈ। ਜੇ ਨੇਤਾ ਤੇ ਪ੍ਰਸ਼ਾਸਨ, ਜਿਵੇਂ ਦੀਆਂ ਗੱਲਾਂ ਕਰਦੇ ਹਨ ਤਾਂ ਹੱਲ ਵੀ ਨਿਕਲ ਆਏ ਪਰ ਹੈਰਾਨੀ ਵਾਲੀ ਤੇ ਸਭ ਤੋਂ ਵੱਧ ਚਿੰਤਾ ਦੀ ਗੱਲ ਇਹ ਹੈ ਕਿ ਲੋਕ ਆਪਣੀ ਜ਼ਿੰਮੇਵਾਰੀ ਕਿਉਂ ਨਹੀਂ ਨਿਭਾਉਂਦੇ। ਹਰ ਜਗ੍ਹਾ ਪ੍ਰਦੂਸ਼ਣ ਜਿਵੇਂ ਪਾਣੀ ਪ੍ਰਦੂਸ਼ਿਤ, ਹਵਾ ਪ੍ਰਦੂਸ਼ਿਤ, ਆਵਾਜ਼ ਦਾ ਪ੍ਰਦੂਸ਼ਣ, ਖਾਣ ਵਾਲੀਆਂ ਚੀਜ਼ਾਂ ਵਿਚ ਮਿਲਾਵਟ, ਫਲਾਂ, ਸਬਜ਼ੀਆਂ 'ਤੇ ਸਪਰੇਅ ਤੇ ਪਕਾਉਣ ਵਾਸਤੇ ਪਾਊਡਰ, ਦਵਾਈਆਂ ਨਕਲੀ, ਗੱਲ ਕੀ ਸਭ ਕੁਝ ਵਿਚ ਗੜਬੜ। ਜਵਾਬਦੇਹੀ ਕਿਸ ਦੀ ਹੋਵੇ? ਢੇਰ ਸਾਰੇ ਵਿਭਾਗ ਇਨ੍ਹਾਂ 'ਤੇ ਨਕੇਲ ਕੱਸਣ ਲਈ ਬਣੇ ਹੋਏ ਹਨ। ਫਿਰ ਚੂਕ ਕਿਉਂ? ਗੱਲ ਕਰੀਏ ਕਿ ਕਿਵੇਂ ਤੇ ਕਿਉਂ ਉਦਯੋਗਿਕ ਇਕਾਈਆਂ ਗੰਦਾ ਪਾਣੀ ਤੇ ਰਹਿੰਦ-ਖੂੰਹਦ ਨਦੀਆਂ, ਨਾਲਿਆਂ ਤੇ ਦਰਿਆਵਾਂ ਵਿਚ ਸੁੱਟ ਰਹੇ ਹਨ। ਪ੍ਰਦੂਸ਼ਣ ਕੰਟਰੋਲ ਬੋਰਡ ਨੂੰ ਇਹ ਕਿਉਂ ਨਹੀਂ ਸਮਝ ਆ ਰਹੀ? ਲੋਕਾਂ ਦੀ ਜ਼ਿੰਦਗੀ ਨਾਲ ਤਾਂ ਉਹ ਮਜ਼ਾਕ ਕਰ ਰਹੇ ਹਨ। ਹਵਾ ਦਾ ਵੀ ਬੁਰਾ ਹਾਲ ਹੈ। ਦੋਸ਼ੀ ਉਹ ਵੀ ਹਨ ਜੋ ਗ਼ਲਤ ਕੰਮ ਕਰਦੇ ਹਨ ਤੇ ਗੁਨਾਹ ਉਹ ਵੀ ਕਰ ਰਹੇ ਹਨ ਜੋ ਆਪਣੀ ਜ਼ਿੰਮੇਵਾਰੀ ਨਹੀਂ ਨਿਭਾਅ ਰਹੇ। ਜੇ ਲੋਕਾਂ ਦੀਆਂ ਮੁਸ਼ਕਿਲਾਂ ਹੱਲ ਨਹੀਂ ਕਰਨੀਆਂ ਤਾਂ ਫਿਰ ਇਹ ਵਿਭਾਗ ਕਿਸ ਕੰਮ ਦੇ। ਏਨੇ ਵੀ ਸਵਾਰਥੀ ਨਾ ਬਣੋ ਕਿ ਲੋਕਾਂ ਦੀ ਜ਼ਿੰਦਗੀ ਖ਼ਤਮ ਕਰਨ ਦੇ ਭਾਗੀਦਾਰ ਬਣ ਜਾਓ। ਹਰ ਇਕ ਦੀ ਜ਼ਿੰਦਗੀ ਅਨਮੋਲ ਹੈ।

-ਪ੍ਰਭਜੋਤ ਕੌਰ ਢਿੱਲੋਂ
ਮੋ: 98150-30221

ਰੁੱਖ ਲਾਓ, ਸੁੱਖ ਪਾਓ
'ਪਾਣੀ ਮੁੱਕੂ ਤਾਂ ਵੇਖੀ ਜਾਊ' ਦੇ ਸਿਰਲੇਖ ਹੇਠ ਇਕ ਲੇਖ ਪਿਛਲੇ ਦਿਨੀਂ 'ਅਜੀਤ' ਵਿਚ ਛਪਿਆ ਸੀ। ਇਸ ਲੇਖ ਦੇ ਪ੍ਰਤੀਕਰਮ ਵਿਚ ਬਹੁਤ ਸਾਰੀਆਂ ਫੋਨ ਕਾਲਾਂ ਦਾ ਸਿਲਸਿਲਾ ਜਾਰੀ ਰਿਹਾ। ਕਈਆਂ ਨੇ ਨਵੇਂ ਰੁੱਖ ਲਗਾਉਣ ਬਾਰੇ ਕਿਹਾ ਕਿ ਲੋਕਾਂ ਨੂੰ ਆਪਣੇ ਘਰਾਂ ਵਿਚ ਅੰਗੂਰਾਂ ਦੀ ਇਕ ਵੇਲ ਤੇ ਪਪੀਤੇ ਦੇ ਪੌਦੇ ਲਗਾਉਣ ਪਿੱਛੋਂ ਹਰੇਕ ਟਿਊਬਵੈੱਲ ਉੱਤੇ ਪੰਜ-ਪੰਜ ਰੁੱਖ ਲਗਾਉਣੇ ਚਾਹੀਦੇ ਹਨ। ਇਸ ਪਿੱਛੋਂ ਪਿੰਡਾਂ ਦੀਆਂ ਫਿਰਨੀਆਂ 'ਤੇ ਪਹੁੰਚ ਮਾਰਗਾਂ 'ਤੇ ਛਾਂਦਾਰ ਰੁੱਖ ਲਗਾਉਣੇ ਤੇ ਪਾਲਣੇ ਚਾਹੀਦੇ ਹਨ। ਸੜਕਾਂ ਉੱਤੇ ਰੁੱਖ ਲਗਾਉਣ ਲਈ ਇਲਾਕੇ ਦੇ ਐਮ.ਐਲ.ਏ. ਦੀ ਸਹਾਇਤਾ ਲੈਣੀ ਚਾਹੀਦੀ ਹੈ। ਕੁਝ ਲੋਕਾਂ ਨੇ ਬਿਜਲੀ ਅੱਠ ਘੰਟੇ ਨਾ ਮਿਲਣ ਦਾ ਸ਼ਿਕਵਾ ਕੀਤਾ ਹੈ। ਕਈਆਂ ਨੇ ਕਿਹਾ ਹੈ ਕਿ ਬਿਜਲੀ ਮਹਿਕਮੇ ਨੂੰ ਨਵੀਆਂ ਲਾਈਨਾਂ ਸਮੇਤ ਹਰੇਕ ਕੰਮ ਖੁਦ ਕਰਨਾ ਚਾਹੀਦਾ ਹੈ।
ਲੋਕਾਂ ਦੀ ਚੁਣੀ ਹੋਈ ਹਰੇਕ ਸਰਕਾਰ ਦਾ ਫ਼ਰਜ਼ ਬਣਦਾ ਹੈ ਕਿ ਉਹ ਲੋਕਾਂ ਦੇ ਗਿਲੇ-ਸ਼ਿਕਵੇ ਦੂਰ ਕਰੇ। ਸਰਕਾਰੀ ਨੌਕਰੀ ਦੌਰਾਨ ਲੋਕ ਸੇਵਾ ਦਾ ਇਕ ਸੁਨਹਿਰੀ ਮੌਕਾ ਮਿਲਦਾ ਹੈ। ਜਿਹੜੇ ਅਫ਼ਸਰ ਤੇ ਕਰਮਚਾਰੀ ਲੋਕ ਸੇਵਾ ਨੂੰ ਸੱਚੇ ਦਿਲੋਂ ਆਪਣਾ ਲੈਂਦੇ ਹਨ, ਉਨ੍ਹਾਂ ਦਾ ਸੇਵਾ ਮੁਕਤੀ ਤੋਂ ਬਾਅਦ ਦਾ ਸਮਾਂ ਲੰਮਾ ਤੇ ਹੁਸੀਨ ਹੁੰਦਾ ਹੈ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਗੁਰੂ ਨਾਨਕ ਵਾੜਾ, ਅੰਮ੍ਰਿਤਸਰ।

03/05/2017

 ਨਿੱਜੀ ਸਕੂਲਾਂ ਦੀ ਲੁੱਟ
ਪੂਰੇ ਪੰਜਾਬ ਭਰ ਵਿਚ ਭਾਵੇਂ ਕਿ ਸਕੂਲਾਂ ਵਿਚ ਦਾਖ਼ਲਿਆਂ ਦਾ ਦੌਰ ਚੱਲ ਰਿਹਾ ਹੈ ਪਰ ਪ੍ਰਸ਼ਾਸਨ ਦੀ ਨਲਾਇਕੀ ਕਾਰਨ ਪ੍ਰਾਈਵੇਟ ਸਕੂਲਾਂ ਅਤੇ ਸੀ.ਬੀ.ਐਸ.ਸੀ. ਪੈਟਰਨ ਸਕੂਲਾਂ ਵਿਚ ਦਾਖ਼ਲਾ ਫੀਸਾਂ ਵੱਧ ਹੋਣ ਦੇ ਬਾਵਜੂਦ ਮਾਪਿਆਂ ਨੂੰ ਬੇਵਸ ਹੋ ਕੇ ਲੁੱਟ ਦਾ ਸ਼ਿਕਾਰ ਹੋਣਾ ਪੈ ਰਿਹਾ ਹੈ। ਵੱਖ-ਵੱਖ ਸਕੂਲਾਂ ਵਿਚ ਵਿਦਿਆਰਥੀਆਂ ਅਤੇ ਮਾਪਿਆਂ ਵੱਲੋਂ ਵੱਡੇ ਪੱਧਰ 'ਤੇ ਹੋ ਰਹੀ ਅੰਨੀ ਲੁੱਟ ਦੇ ਖਿਲਾਫ਼ ਰੈਲੀਆਂ ਅਤੇ ਮੁਜ਼ਾਹਰੇ ਕੀਤੇ ਜਾ ਰਹੇ ਹਨ। ਸਕੂਲਾਂ ਵਿਚ ਵਾਧੂ ਫੀਸ ਨੂੰ ਸਾਲਾਨਾ ਫੀਸ (ਐਨੂਅਲ ਫੀਸ) ਦਾ ਨਾਂਅ ਦੇ ਕੇ ਸਿੱਧੇ ਤੌਰ 'ਤੇ ਮਾਪਿਆਂ ਦੀ ਲੁੱਟ ਕੀਤੀ ਜਾ ਰਹੀ ਹੈ।
ਇਸੇ ਤਰ੍ਹਾਂ ਅੰਨਾ ਵੰਡੇ ਰਿਓੜੀਆਂ ਮੁੜ-ਮੁੜ ਆਪਣਿਆਂ ਨੂੰ ਦੀ ਅਖੌਤ ਖਮਾਣੋਂ ਦੇ ਇਕ ਸੀ.ਬੀ.ਐਸ.ਸੀ. ਪੈਟਰਨ 'ਤੇ ਬਿਲਕੁਲ ਢੁਕਦੀ ਹੈ, ਕਿਉਂਕਿ ਹੋਏ ਹੁਕਮਾਂ ਅਨੁਸਾਰ ਕੋਈ ਵੀ ਸਕੂਲ ਆਪਣੇ ਦਾਇਰੇ ਅੰਦਰ ਕਿਤਾਬਾਂ ਅਤੇ ਵਰਦੀਆਂ ਨਹੀਂ ਵੇਚ ਸਕਦਾ ਪਰ ਇਥੋਂ ਦੇ ਇਕ ਸਕੂਲ ਦੀ ਮੈਨੇਜਮੈਂਟ ਕਮੇਟੀ ਦੇ ਮੈਂਬਰ ਹੀ ਆਪਣੀਆਂ ਦੁਕਾਨਾਂ 'ਤੇ ਵਰਦੀਆਂ, ਬੈਲਟਾਂ ਅਤੇ ਟਾਈਆਂ ਆਦਿ ਵੇਚ ਰਹੇ ਹਨ ਅਤੇ ਪ੍ਰਸ਼ਾਸਨ ਮੂਕ-ਦਰਸ਼ਕ ਬਣ ਕੇ ਇਹ ਤਮਾਸ਼ਾ ਵੇਖ ਰਿਹਾ ਹੈ। ਜਦੋਂ ਕਿ ਪ੍ਰਸ਼ਾਸਨ ਦਾ ਆਪਣਾ ਨੈਤਿਕ ਫਰਜ਼ ਬਣਦਾ ਹੈ ਕਿ ਸਿੱਖਿਆ ਦੇ ਖੇਤਰ ਵਿਚ ਸ਼ਰੇਆਮ ਹੋ ਰਹੀ ਅੰਨੀ ਲੁੱਟ ਨੂੰ ਤੁਰੰਤ ਬੰਦ ਕਰਵਾ ਕੇ ਇਨ੍ਹਾਂ ਨਿੱਜੀ ਸੰਸਥਾਵਾਂ ਦੀ ਇੰਨਕੁਆਰੀ ਕਰਵਾ ਕੇ ਬਣਦੀ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇ ਤਾਂ ਜੋ ਆਮ ਲੋਕਾਂ ਨੂੰ ਆ ਰਹੀ ਇਸ ਮੁਸ਼ਕਿਲ ਤੋਂ ਰਾਹਤ ਮਿਲ ਸਕੇ।


-ਸਕੂਲੀ ਬੱਚਿਆਂ ਦੇ ਮਾਪੇ
ਖਮਾਣੋਂ।


ਸਾਡਾ ਹੱਕ
ਪੰਜਾਬ ਦੀ ਹਰ ਪਾਰਟੀ ਨੇ ਚੋਣ ਮੈਨੀਫੈਸਟੋ ਵਿਚ ਲੋਕਾਂ ਨਾਲ ਵਾਅਦਾ ਕੀਤਾ ਸੀ ਕਿ ਅਸੀਂ ਜਿੱਤਣ ਤੋਂ ਬਾਅਦ ਹਰ ਇਕ ਪਰਿਵਾਰ ਲਈ ਪੀਣ ਵਾਲਾ ਸਾਫ਼ ਪਾਣੀ ਮੁਹੱਈਆ ਕਰਵਾਵਾਂਗੇ ਅਤੇ ਬੇਘਰੇ ਗਰੀਬ ਪਰਿਵਾਰਾਂ ਨੂੰ 4 ਮਰਲੇ ਦੇ ਪਲਾਟਾਂ 'ਤੇ ਅਤੇ ਮਕਾਨ ਬਣਵਾ ਕੇ ਦੇਵਾਂਗੇ। ਪਰ ਵੇਖਣ ਵਿਚ ਇਹ ਆਇਆ ਹੈ ਕਿ ਜਿੰਨੇ ਵੀ ਦੂਸਰੇ ਸੂਬਿਆਂ ਤੋਂ ਪੰਜਾਬ ਆ ਕੇ ਵਸੇ ਹਨ, ਉਨ੍ਹਾਂ ਲੋਕਾਂ ਦੇ ਫਾਰਮ ਜ਼ਿਆਦਾਤਰ ਭਰੇ ਗਏ ਹਨ, ਇਹ ਪੰਜਾਬ ਦੇ ਗਰੀਬ ਵਰਗ ਨਾਲ ਇਕ ਬੇਇਨਸਾਫ਼ੀ ਹੈ। ਕਿਉਂਕਿ ਪੰਜਾਬ ਦਾ ਗਰੀਬ ਤਾਂ ਫਿਰ ਆਪਣੇ ਹੱਕ ਤੋਂ ਵਾਂਝਾ ਰਹਿ ਗਿਆ ਹੈ। ਕਿਰਪਾ ਕਰਕੇ ਜੋ ਪਰਿਵਾਰ ਪੰਜਾਬ ਦੇ ਵਾਸੀ ਹਨ, ਇਸ ਸਕੀਮ ਦਾ ਲਾਭ ਉਨ੍ਹਾਂ ਪਰਿਵਾਰਾਂ ਨੂੰ ਪਹਿਲ ਦੇ ਆਧਾਰ 'ਤੇ ਦਿੱਤਾ ਜਾਵੇ ਤਾਂ ਕਿ ਇਹ ਪਰਿਵਾਰ ਆਪਣਾ ਹੱਕ ਲੈ ਸਕਣ।


-ਦੀਦਾਰ ਖਾਨ ਧਬਲਾਨ
ਪਿੰਡ ਤੇ ਡਾਕ: ਧਬਲਾਨ, ਜ਼ਿਲ੍ਹਾ : ਪਟਿਆਲਾ।


ਸਾਦਗੀ ਅਤੇ ਸੰਵੇਦਨਸ਼ੀਲਤਾ
ਸਾਦਗੀ, ਸਾਦਾਪਣ, ਸਫ਼ਾਈ, ਸਚਾਈ, ਸੁਥਰਾਪਣ ਵਿਚੋਂ ਸਾਡੀ ਝਲਕ ਚਮਕਦੀ ਹੈ। ਆਧੁਨਿਕਤਾ ਦੇ ਦੌਰ 'ਚ ਫੋਕੀ ਟੌਹਰ, ਫੁਕਰੇਪਣ ਤੇ ਬਨਾਉਟੀ ਦਿਖਾਵੇ ਨੇ ਸਾਦਕੀ ਉੱਪਰ ਬੜੇ ਮਾਰੂ ਅਸਰ ਪਾਏ ਹਨ। ਵਾਧੂ ਖਰਚਾ ਸਾਦਗੀ ਦਾ ਦੋਖੀ ਹੈ, ਜੋ ਸਮਾਜ ਦੀ ਸਿਹਤ ਨੂੰ ਖਰਾਬ ਕਰਦਾ ਹੈ। ਸਾਦਗੀ ਦਾ ਆਪਣਾ ਇਕ ਸੁਹੱਪਣ ਹੁੰਦਾ ਹੈ, ਸਲੀਕਾ ਹੁੰਦਾ ਹੈ, ਸੁਹਜ ਤੇ ਸੁਆਦ ਹੁੰਦਾ ਹੈ। ਸਾਦਗੀ ਵਿਚੋਂ ਸਪੱਸ਼ਟਤਾ ਉਪਜਦੀ ਹੈ ਅਤੇ ਸਾਨੂੰ ਸਮਰਥਾਵਾਨ ਬਣਾਉਂਦੀ ਆਪਣਿਆਂ ਨਾਲ ਜੋੜਦੀ ਹੈ। ਸਾਦਾ ਭੋਜਨ ਸਿਹਤਮੰਦ ਸਮਾਜ ਦੀ ਸਿਰਜਣਾ 'ਚ ਚੰਗਾ ਹੁੰਦਾ ਹੈ। ਸਾਦਗੀ, ਸਿਆਣੇ ਤੇ ਸਾਊ ਲੋਕਾਂ ਦਾ ਸੰਗ੍ਰਹਿ ਸਿਰਜਦੀ ਹੈ। ਸਾਦਗੀ ਦੇ ਸਾਥ ਨਾਲ ਮੇਲ-ਮਿਲਾਪ ਵਧਦਾ ਹੈ। ਸਾਦਗੀ ਨਾਲ ਕੀਤੀ ਸੇਵਾ ਸਾਨੂੰ ਸਕੂਨ, ਅਨੰਦਮਈ ਮਾਹੌਲ ਅਤੇ ਸਨੇਹਸ਼ੀਲਤਾ ਪ੍ਰਦਾਨ ਕਰਦੀ ਹੈ। ਸਾਦਗੀ 'ਚੋਂ ਸੰਜਮ ਉਪਜਦਾ ਹੈ।


-ਸਨੇਹਇੰਦਰ ਮੀਲੂ ਫਰੌਰ
ਮੋ: 93163-17356

02/05/2017

ਜਾਗੋ, ਨਸ਼ੇ ਤਿਆਗੋ
ਸ਼ਰਾਬ ਦੇ ਨਸ਼ੇ ਦੀ ਕਈ ਤਾਰੀਫ਼ ਕਰਦੇ ਹਨ, ਪਰ ਉਨ੍ਹਾਂ ਨੂੰ ਇਹ ਗੱਲ ਬਿਲਕੁਲ ਵੀ ਯਾਦ ਨਹੀਂ ਰਹਿੰਦੀ ਕਿ ਇਸ ਭੈੜੇ ਨਸ਼ੇ ਦੀ ਬਦੌਲਤ ਕਿੰਨੇ ਘਰ ਉਜੜੇ ਤੇ ਕਿੰਨੀਆਂ ਸਾਡੀਆਂ ਧੀਆਂ ਭੈਣਾਂ ਘਰ ਤੋਂ ਬੇਘਰ ਹੋਈਆਂ। ਬਹੁਤ ਸਾਰੇ ਕਲਾਕਾਰ ਜਾਂ ਫ਼ਿਲਮੀ ਅਦਾਕਾਰ ਆਪਣੇ ਗੀਤਾਂ ਤੇ ਫ਼ਿਲਮਾਂ ਵਿਚ ਸ਼ਰਾਬ ਦੀ ਝਲਕ ਜ਼ਰੂਰ ਵਿਖਾਉਂਦੇ ਹਨ। ਜਿਵੇਂ ਠੇਕੇ 'ਤੇ ਬੈਠੇ ਨੌਜਵਾਨਾਂ ਨੂੰ ਪੀਂਦੇ ਹੋਏ ਦਿਖਾਉਣਾ। ਉਹ ਆਪਣੀ ਫ਼ਿਲਮ ਨੂੰ ਮਸ਼ਹੂਰ ਕਰਨ ਲਈ ਬਹੁਤ ਸਾਰੇ ਪਾਪੜ ਵੇਲਦੇ ਹਨ, ਜਿਸ ਦਾ ਪ੍ਰਭਾਵ ਸਾਡੀ ਆਉਣ ਵਾਲੀ ਪੀੜ੍ਹੀ 'ਤੇ ਪੈਂਦਾ ਹੈ। ਜਿਵੇਂ ਕਿ ਸਿਆਣੇ ਕਹਿੰਦੇ ਨੇ ਕਿ 'ਖਰਬੂਜ਼ੇ ਨੂੰ ਵੇਖ ਕੇ ਭਾਈ ਖਰਬੂਜ਼ਾ ਵੀ ਰੰਗ ਫੜ ਲੈਂਦਾ ਹੈ'। ਇਸ ਤਰ੍ਹਾਂ ਸਾਨੂੰ ਸਾਡੇ ਬੱਚਿਆਂ ਦਾ ਵੀ ਡਰ ਹੈ ਉਹ ਵੀ ਉਸ ਚੀਜ਼ ਦੀ ਨਕਲ ਕਰਦੇ-ਕਰਦੇ ਵਿਆਹਾਂ ਸ਼ਾਦੀਆਂ ਵਿਚ ਇਸ ਚੀਜ਼ ਦਾ ਇਸਤੇਮਾਲ ਨਾ ਕਰਨ ਲੱਗ ਜਾਣ। ਕੁਝ ਲੋਕ ਤਾਂ ਇਹ ਵੀ ਆਖਦੇ ਨੇ ਕਿ ਭਾਈ ਜਿਸ ਵਿਆਹ 'ਚ ਸ਼ਰਾਬ ਹੀ ਨਾ ਹੋਵੇ ਉਹ ਵਿਆਹ ਫਿਰ ਕਾਹਦਾ ਹੋਇਆ। ਬਹੁਤ ਸਾਰੀਆਂ ਸੜਕਾਂ ਦੇ ਉਤੇ ਵੱਡੇ-ਵੱਡੇ ਅੱਖਰਾਂ ਵਿਚ ਲਿਖਿਆ ਹੁੰਦਾ ਹੈ ਕਿ 'ਸ਼ਰਾਬ ਤੇ ਡਰਾਈਵਿੰਗ ਦਾ ਕੋਈ ਮੇਲ ਨਹੀ', ਇਨ੍ਹਾਂ ਨਸ਼ਿਆਂ ਦੀ ਵਰਤੋਂ ਕਾਰਨ ਹੀ ਸੜਕਾਂ ਉਤੇ ਤਰ੍ਹਾਂ-ਤਰ੍ਹਾਂ ਦੇ ਹਾਦਸੇ ਵਾਪਰਦੇ ਹਨ। ਅਣਗਹਿਲੀ ਕਾਰਨ ਸਾਡੇ ਸਕੂਲੀ ਬੱਚਿਆਂ ਦੀ ਚੱਤੋਂ ਪੈਰ ਜਾਨ ਖ਼ਤਰੇ ਵਿਚ ਰਹਿੰਦੀ ਹੈ ਅਤੇ ਕਈ ਗ਼ਰੀਬ ਸਾਈਕਲਾਂ 'ਤੇ ਜਾਣ ਵਾਲੇ ਬਿਨਾਂ ਗੱਲ ਤੋਂ ਹੀ ਇਨ੍ਹਾਂ ਦੀ ਲਪੇਟ ਵਿਚ ਆ ਜਾਂਦੇ ਹਨ। ਪਰ ਡਰਾਈਵਰ ਵੀਰ ਫਿਰ ਵੀ ਸਮਝਣ ਦੀ ਕੋਸ਼ਿਸ਼ ਨਹੀਂ ਕਰਦੇ। ਕਿੰਨੀਆਂ ਮਾਵਾਂ ਦੇ ਪੁੱਤ ਇਨ੍ਹਾਂ ਨਸ਼ਿਆਂ ਕਾਰਨ ਮੌਤ ਦੀ ਝੋਲੀ 'ਚ ਜਾ ਪੈਂਦੇ ਹਨ ਪਰ ਕਦੇ ਉਨ੍ਹਾਂ ਮਾਵਾਂ ਦੇ ਦਿਲਾਂ ਨੂੰ ਪੁੱਛ ਕੇ ਵੇਖਿਓ ਕਿ ਉਨ੍ਹਾਂ ਤੁਹਾਡਾ ਪਾਲਣ ਪੋਸ਼ਣ ਕਰਕੇ ਤੁਹਾਨੂੰ ਕਿਵੇਂ ਵੱਡੇ ਕੀਤੇ ਸੀ।

-ਸਾਹਿਬ ਸਿੰਘ ਸ਼ੱਬੀ ਸਵਾੜਾ
ਜ਼ਿਲ੍ਹਾ ਮੁਹਾਲੀ, ਤਹਿ: ਖਰੜ, ਡਾਕ: ਲਾਂਡਰਾਂ।

ਕਿਸਾਨੀ ਖ਼ੁਦਕੁਸ਼ੀਆਂ
ਭਾਰਤ ਦੇ ਖੁਸ਼ਹਾਲ ਸੂਬੇ ਪੰਜਾਬ ਵਿਚ ਅੱਜ ਰੋਜ਼ਾਨਾ ਖ਼ੁਦਕੁਸ਼ੀਆਂ ਹੋ ਰਹੀਆਂ ਹਨ। ਅੰਨਦਾਤਾ ਕਹਾਉਣ ਵਾਲਾ ਪੰਜਾਬ ਅੱਜ ਖ਼ੁਦਕੁਸ਼ੀਆਂ ਦਾ ਅੱਡਾ ਬਣ ਕੇ ਰਹਿ ਗਿਆ ਹੈ। ਮਜ਼ਦੂਰਾਂ ਦੇ ਮੁਕਾਬਲੇ ਕਿਸਾਨਾਂ ਵੱਲੋਂ ਜ਼ਿਆਦਾ ਖ਼ੁਦਕੁਸ਼ੀਆਂ ਕੀਤੀਆਂ ਜਾ ਰਹੀਆਂ ਹਨ। ਜਟ ਕਿਸਾਨ ਵਧੀਆ ਜ਼ਿੰਦਗੀ ਜਿਊਣ ਲਈ ਅਤੇ ਸਮਾਜ ਵਿਚ ਆਪਣੀ ਟੌਹਰ ਬਣਾਉਣ ਲਈ ਬੈਂਕਾਂ ਅਤੇ ਆੜ੍ਹਤੀਆਂ ਤੋਂ ਕਰਜ਼ੇ ਚੁੱਕਦੇ ਹਨ। ਖੇਤੀ ਦਾ ਘਾਟੇਵੰਦਾ ਧੰਦਾ ਹੋਣ ਕਾਰਨ ਅਤੇ ਸਰਕਾਰਾਂ ਦੀਆਂ ਕਿਸਾਨ-ਮਾਰੂ ਨੀਤੀਆਂ ਕਰਕੇ ਕਰਜ਼ੇ ਦੀ ਪੰਡ ਦਿਨੋ-ਦਿਨ ਭਾਰੀ ਹੁੰਦੀ ਜਾਂਦੀ ਹੈ। ਬਹੁਤੇ ਕਿਸਾਨ ਸਿਰਫ ਖੇਤੀਬਾੜੀ ਉੱਤੇ ਹੀ ਨਿਰਭਰ ਹਨ ਤੇ ਹੋਰ ਛੋਟੇ ਮੋਟੇ ਸਹਾਇਕ ਧੰਦੇ ਨਹੀਂ ਕਰਦੇ, ਇਹ ਗੱਲ ਉਨ੍ਹਾਂ ਦੀ ਖ਼ੁਦਕੁਸ਼ੀ ਦਾ ਕਾਰਨ ਬਣਦੀ ਹੈ। ਕਿਉਂਕਿ ਪੰਜਾਬ ਦੇ ਬਹੁਗਿਣਤੀ ਕਿਸਾਨਾਂ ਕੋਲ ਸਿਰਫ ਇਕ ਤੋਂ ਦੋ ਢਾਈ ਏਕੜ ਹੀ ਜ਼ਮੀਨ ਹੈ। ਏਨੀ ਥੋੜ੍ਹੀ ਜ਼ਮੀਨ ਵਿਚੋਂ ਪਰਿਵਾਰ ਦਾ ਪਾਲਣ-ਪੋਸ਼ਣ ਕਰਨਾ ਕਰਜ਼ੇ ਨੂੰ ਜਨਮ ਦਿੰਦਾ ਹੈ। ਸੋ, ਸਰਕਾਰਾਂ ਨੂੰ ਚਾਹੀਦਾ ਹੈ ਕਿ ਉਹ ਖੇਤੀ ਜਿਣਸਾਂ ਦੇ ਸਹੀ ਮੁੱਲ ਨਿਰਧਾਰਤ ਕਰਕੇ ਉਨ੍ਹਾਂ ਦਾ ਵਧੀਆ ਮੰਡੀਕਰਨ ਕਰਵਾਉਣ। ਕਿਸਾਨਾਂ ਨੂੰ ਬਹੁਤੇ ਕਰਜ਼ੇ ਦੇਣ ਦੀ ਬਜਾਏ ਉਨ੍ਹਾਂ ਲਈ ਰੁਜ਼ਗਾਰ ਦੇ ਵਸੀਲੇ ਪੈਦਾ ਕੀਤੇ ਜਾਣ। ਰੁਜ਼ਗਾਰ ਦੇ ਵਸੀਲੇ ਨਾ ਹੋਣ ਕਾਰਨ ਮਜਬੂਰੀਵਸ ਕਿਸਾਨ ਕਰਜ਼ਾ ਚੁੱਕਦੇ ਹਨ। ਖੇਤੀ ਆਧਾਰਿਤ ਵੱਧ ਤੋਂ ਵੱਧ ਸਨਅਤਾਂ ਲਾਈਆਂ ਜਾਣੀਆਂ ਚਾਹੀਦੀਆਂ ਹਨ। ਸਾਡੀਆਂ ਸਰਕਾਰਾਂ ਕੋਲ ਪੈਸੇ ਦੀ ਘਾਟ ਨਹੀਂ ਸਗੋਂ ਚੰਗੀਆਂ ਨੀਤੀਆਂ ਦੀ ਘਾਟ ਹੈ।

-ਮਾ: ਜਸਪਿੰਦਰ ਸਿੰਘ ਗਿੱਲ
ਪਿੰਡ ਉਬੋਕੇ, ਤਹਿ: ਪੱਟੀ (ਤਰਨ ਤਾਰਨ)।

28/04/2017

 ਵਕਤ ਤਾਂ ਗੁਜ਼ਰ ਹੀ ਜਾਣਾ ਹੈ
ਪਿਛਲੇ ਦਿਨੀਂ ਸੰਪਾਦਕੀ ਸਫ਼ੇ 'ਤੇ ਮੈਡਮ ਬੱਬੂ ਤੀਰ ਦਾ ਕਾਲਮ 'ਵਕਤ ਤਾਂ ਗੁਜ਼ਰ ਹੀ ਜਾਣਾ ਹੈ' ਪੜ੍ਹਿਆ। ਇਸ ਕਾਲਮ ਵਿਚ ਬੜੇ ਹੀ ਸਾਰਥਿਕ ਤਰੀਕੇ ਨਾਲ ਇਹ ਸਮਝਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਕਿ ਜ਼ਿੰਦਾਦਿਲੀ ਹਰ ਇਨਸਾਨ ਨੂੰ ਅੱਗੇ ਵਧਣ ਲਈ ਸਹਾਈ ਹੁੰਦੀ ਹੈ। ਸਾਡੇ ਬੜੇ ਹੀ ਅਜ਼ੀਜ਼ ਸ: ਗੁਰਨਾਮ ਸਿੰਘ ਤੀਰ (ਚਾਚਾ ਚੰਡੀਗੜ੍ਹੀਆ) ਦੀ ਜ਼ਿੰਦਗੀ ਦੇ ਹਿੱਸੇ ਦਾ ਇਸ ਕਾਲਮ ਵਿਚ ਇਕ ਉਦਾਹਰਨ ਵਜੋਂ ਜ਼ਿਕਰ ਕੀਤਾ ਗਿਆ, ਜੋ ਵਿਸ਼ੇ ਨਾਲ ਬਾਖੂਬੀ ਮੇਲ ਖਾਂਦਾ ਸੀ। ਚਾਚਾ ਚੰਡੀਗੜ੍ਹੀਆ ਜੀ ਨੂੰ ਨਹੀਂ ਸੀ ਪਤਾ ਕਿ 15 ਅਪ੍ਰੈਲ ਉਨ੍ਹਾਂ ਦੀ ਜ਼ਿੰਦਗੀ ਦਾ ਆਖਰੀ ਦਿਨ ਹੋਵੇਗਾ ਪਰ ਉਨ੍ਹਾਂ ਦੀ ਜ਼ਿੰਦਾਦਿਲੀ ਇਸ ਗੱਲ ਨੂੰ ਜ਼ਾਹਿਰ ਕਰਦੀ ਹੈ ਕਿ ਉਨ੍ਹਾਂ ਵਿਚ ਇਸ ਵਿਸਾਖੀ ਨੂੰ ਮਨਾਉਣ ਦੀ ਇਕ ਉਮੀਦ ਹੀ ਉਨ੍ਹਾਂ ਦਾ ਜ਼ਜ਼ਬਾ ਸੀ। ਕਿਸੇ ਇਨਸਾਨ ਨੂੰ ਨਹੀਂ ਪਤਾ ਕਿ ਉਸ ਨੇ ਆਖਰੀ ਸਾਹ ਕਦੋਂ ਤੇ ਕਿਥੇ ਲੈਣਾ ਹੈ। ਪਰ ਇਹ ਸੋਚ ਇਨਸਾਨ ਨੂੰ ਅੱਗੇ ਵਧਦੇ ਹੋਏ ਜ਼ਿੰਦਗੀ ਬਤੀਤ ਕਰਨ ਲਈ ਪ੍ਰੇਰਦੀ ਹੈ ਕਿ 'ਜੇ ਵਕਤ ਬੁਰਾ ਆਇਆ ਹੈ ਤਾਂ ਕੀ ਗੱਲ ਹੈ, ਵਕਤ ਚੰਗਾ ਵੀ ਜ਼ਰੂਰ ਆਵੇਗਾ'। ਇਸ ਦੇ ਉਲਟ ਜੇਕਰ ਇਹੀ ਸੋਚ-ਸੋਚ ਕੇ ਹਰ ਦਿਨ ਬਤੀਤ ਕਰੀ ਜਾਈਏ ਕਿ 'ਬਹੁਤ ਬੁਰਾ ਵਕਤ ਹੈ, ਹੁਣ ਜ਼ਿੰਦਗੀ ਦਾ ਕੀ ਜਿਊਣਾ ਹੈ ਤਾਂ ਜ਼ਿੰਦਗੀ ਉੱਥੇ ਹੀ ਰੁਕ ਜਾਂਦੀ ਹੈ। ਕਹਿਣ ਤੋਂ ਭਾਵ ਜ਼ਿੰਦਗੀ ਦੁੱਖ ਅਤੇ ਸੁੱਖ ਦਾ ਸੁਮੇਲ ਹੈ। ਜੇਕਰ ਅੱਜ ਦੁੱਖ ਆਇਆ ਹੈ ਤਾਂ ਇਹ ਸੋਚੋ ਕਿ ਕੱਲ੍ਹ ਨੂੰ ਜ਼ਰੂਰ ਕੋਈ ਸੁੱਖ ਤੁਹਾਡੀ ਦਹਿਲੀਜ਼ 'ਤੇ ਦਸਤਕ ਦੇਵੇਗਾ। ਤੁਹਾਡੀ ਸਕਾਰਾਤਮਕ ਸੋਚ ਹੀ ਤੁਹਾਨੂੰ ਸਫਲਤਾ ਦਾ ਰਾਹ ਦਿਖਾਉਂਦੀ ਹੈ। ਵਕਤਕ ਦੇ ਰੁਕਦਾ ਨਹੀਂ, ਚੰਗਾ ਹੋਵੇ ਜਾਂ ਬੁਰਾ, ਵਕਤ ਤਾਂ ਗੁਜ਼ਰ ਹੀ ਜਾਣਾ ਹੈ।

-ਬਲਦੇਵ ਸਿੰਘ ਸ਼ੇਖੂਪੁਰਾ
ਕੰਪਿਊਟਰ ਅਧਿਆਪਕ ਸ.ਹ.ਸ. ਜੱਸੋਵਾਲ ਕੁਲਾਰ (ਲੁਧਿਆਣਾ)।

ਨਾੜ ਨੂੰ ਅੱਗ ਨਾ ਲਾਈ ਜਾਵੇ
ਪਿਛਲੇ ਦਿਨੀਂ 'ਅਜੀਤ' ਵਿਚ ਛਪੇ ਲੋਕ ਮੰਚ ਵਿਚ ਨਾੜ ਨੂੰ ਅੱਗ ਲਗਾਉਣ ਬਾਰੇ ਵੱਖ-ਵੱਖ ਲੇਖਕਾਂ ਵੱਲੋਂ ਕਿਸਾਨਾਂ ਨੂੰ ਸੁਝਾਅ ਦੇਣ ਵਾਲੀ ਚਰਚਾ ਸ਼ਲਾਘਾ ਯੋਗ ਹੈ। ਇਸ ਵਿਚ ਲੇਖਕ ਡਾ: ਅਮਰੀਕ ਸਿੰਘ ਵੱਲੋਂ ਕਣਕ ਦੇ ਨਾੜ ਦੀ ਸੰਭਾਲ ਬਾਰੇ ਕਿਸਾਨਾਂ ਨੂੰ ਵਿਸਥਾਰ ਨਾਲ ਸੁਝਾਅ ਦਿੱਤੇ ਗਏ ਹਨ ਜੋ ਸ਼ਾਲਾਘਾ ਯੋਗ ਹਨ। ਕਿਸਾਨਾਂ ਨੂੰ ਜ਼ਿਲ੍ਹਾ ਗੁਰਦਾਸਪੁਰ ਦੇ ਪਿੰਡ ਸੱਲੋਪੁਰ ਦੇ ਸਟੇਟ ਐਵਾਰਡੀ ਕਿਸਾਨ ਗੁਰਦਿਆਲ ਸਿੰਘ ਦੀ ਮਿਹਨਤ ਬਾਰੇ ਸੁਝਾਅ ਦਿੱਤਾ ਗਿਆ ਹੈ ਕਿ ਉਸ ਨੇ ਪਿਛਲੇ 4-5 ਸਾਲਾਂ ਵਿਚ ਕਣਕ ਦੀ ਕਟਾਈ ਕਰਕੇ ਤੂੜੀ ਬਣਾਉਣ ਉਪਰੰਤ ਸਣ ਜਾਂ ਜੰਤਰ ਬੀਜ ਤੇ ਹਰੀ ਖਾਦ ਤਿਆਰ ਕੀਤੀ। ਉਨ੍ਹਾਂ ਦਾ ਤਰਜਬਾ ਇਹ ਹੈ ਕਿ ਖੇਤ 'ਚ ਹਰੀ ਖਾਦ ਬਣਾਉਣ ਨਾਲ ਰਸਾਇਣਕ ਖਾਦਾਂ ਦੀ ਖਪਤ ਅੱਧੀ ਰਹਿ ਜਾਂਦੀ ਹੈ ਅਤੇ ਕੀੜਿਆਂ, ਬਿਮਾਰੀਆਂ ਦਾ ਹਮਲਾ ਨਾ ਹੋਣ ਕਾਰਨ ਰਸਾਇਣਕ ਦਵਾਈਆਂ 'ਤੇ ਹੋਣ ਵਾਲੇ ਖਰਚੇ ਵਿਚ ਕਮੀ ਆਉਂਦੀ ਹੈ। ਇਸ ਤਰ੍ਹਾਂ ਮਾ: ਸੰਜੀਵ ਸਿੰਘ, ਬਲਜੀਤ ਸਿੰਘ ਢਿੱਲੋਂ, ਰਾਜਵਿੰਦਰ ਰੋਂਤਾ, ਮਾਣਕ ਸਿੰਘ ਖੋਸਾ ਆਦਿ ਅਤੇ ਊਧਮ ਸਿੰਘ ਸ਼ੌਕੀ ਨੇ ਕਵਿਤਾ 'ਲਾਵੋ ਨਾ ਨਾੜ ਨੂੰ ਅੱਗ' ਰਾਹੀਂ ਕਿਸਾਨਾਂ ਨੂੰ ਜਾਗ੍ਰਿਤ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ। ਲੋਕ ਮੰਚ ਗੁਣਾਂ ਨਾਲ ਭਰਪੂਰ ਹੈ। ਕਿਸਾਨਾਂ ਲਈ ਵਰਦਾਨ ਸਾਬਤ ਹੋਵੇਗਾ ਜੇ ਲੋਕ ਮੰਚ ਵਾਲਾ ਪਰਚਾ ਸਾਂਭ ਕੇ ਰੱਖ ਲਿਆ ਜਾਵੇ।

-ਮਾਸਟਰ ਜਗੀਰ ਸਿੰਘ ਸਫਰੀ
ਸਠਿਆਲਾ (ਅੰਮ੍ਰਿਤਸਰ)।

26/04/2017

 ਕਿਸਾਨ ਖ਼ੁਦਕੁਸ਼ੀਆਂ ਦਾ ਹੱਲ
ਕਰਜ਼ੇ ਦੀ ਪੰਡ ਭਾਰੀ ਹੋਣ ਕਰਕੇ, ਖੇਤੀ ਤੇ ਲਾਗਤ ਖਰਚੇ ਵਧਣ ਕਰਕੇ, ਜਿਣਸਾਂ ਦਾ ਝਾੜ ਘਟਣ ਤੇ ਵਾਜਬ ਮੁੱਲ ਨਾ ਮਿਲਣ ਕਰਕੇ ਕਿਸਾਨ ਸਮਾਜ ਵਿਚ ਹੋਣ ਵਾਲੀ ਬੇਇੱਜ਼ਤੀ ਤੇ ਜ਼ਮੀਨ ਦੀ ਕੁਰਕੀ ਦੇ ਡਰੋਂ ਖੁਦਕੁਸ਼ੀ ਕਰਨ ਲਈ ਮਜਬੂਰ ਹੋ ਰਿਹਾ ਹੈ। ਸਰਕਾਰ ਨੂੰ ਚਾਹੀਦਾ ਹੈ ਕਿ ਕਿਸਾਨ ਖ਼ੁਦਕੁਸ਼ੀਆਂ ਨੂੰ ਰੋਕਣ ਲਈ ਸਵਾਮੀਨਾਥਨ ਕਮਿਸ਼ਨ ਦੀ ਰਿਪੋਰਟ ਨੂੰ ਬਿਨਾਂ ਦੇਰੀ ਲਾਗੂ ਕੀਤਾ ਜਾਵੇ, ਫ਼ਸਲਾਂ ਦੇ ਭਾਅ ਲਾਗਤ ਕੀਮਤ ਸੂਚਕ ਅੰਕ ਨੂੰ ਸਾਹਮਣੇ ਰੱਖ ਕੇ ਹੀ ਮਿੱਥੇ ਜਾਣ, ਛੋਟੇ ਕਿਸਾਨਾਂ ਨੂੰ ਘੱਟ ਵਿਆਜ 'ਤੇ ਕਰਜ਼ਾ ਦਿੱਤਾ ਜਾਵੇ ਤੇ ਇਕ ਟਿਊਬਵੈੱਲ ਸਰਕਾਰੀ ਖਰਚੇ 'ਤੇ ਲਗਾ ਕੇ ਦਿੱਤਾ ਜਾਵੇ, ਫ਼ਸਲ ਨੁਕਸਾਨੀ ਜਾਣ 'ਤੇ 100 ਫ਼ੀਸਦੀ ਫ਼ਸਲੀ ਬੀਮੇ ਦੀ ਸਕੀਮ ਲਿਆਂਦੀ ਜਾਵੇ, ਕਿਸਾਨ ਦੇ ਪਰਿਵਾਰ, ਮਾਲ ਡੰਗਰ ਦੇ ਮੁਫ਼ਤ ਇਲਾਜ ਦਾ ਬੀਮਾ ਕੀਤਾ ਜਾਵੇ ਤੇ ਛੋਟੇ ਕਿਸਾਨਾਂ ਨੂੰ ਵਾਜਬ ਕਿਰਾਏ 'ਤੇ ਖੇਤੀ ਸੰਦ ਦਿੱਤੇ ਜਾਣ। ਫ਼ਸਲੀ ਖਾਦਾਂ ਸਬਸਿਡੀ ਤੇ ਘੱਟ ਮੁੱਲ 'ਤੇ ਦਿੱਤੀਆਂ ਜਾਣ, ਡੀਜ਼ਲ ਦੇ ਭਾਅ ਘੱਟ ਕੀਤੇ ਜਾਣ, ਕਿਸਾਨ ਨੂੰ ਫ਼ਸਲ ਬੀਜਣ ਲਈ ਪੈਸੇ ਦਿੱਤੇ ਜਾਣ ਤੇ ਉਸ ਦੇ ਪਰਿਵਾਰ ਦੇ ਇਕ ਮੈਂਬਰ ਨੂੰ ਸਰਕਾਰੀ ਨੌਕਰੀ ਦਿੱਤੀ ਜਾਵੇ। ਕਿਸਾਨ ਨੂੰ ਖੁਦ ਵੀ ਚਾਹੀਦਾ ਹੈ ਕਿ ਇਸ ਸਮੱਸਿਆ 'ਚੋਂ ਨਿਕਲਣ ਲਈ ਖੇਤੀ ਦਾ ਜ਼ਿਆਦਾ ਕੰਮ ਲੇਬਰ ਤੋਂ ਕਰਾਉਣ ਦੀ ਬਜਾਏ ਆਪ ਕਰਨ ਨੂੰ ਤਰਜੀਹ ਦੇਵੇ ਤੇ ਵਿਆਹ ਸ਼ਾਦੀਆਂ, ਕੋਠੀਆਂ ਉਸਾਰਨ, ਟਰੈਕਟਰ ਖਰੀਦਣ, ਮਰਨ ਜੰਮਣੇ ਅਤੇ ਹੋਰ ਸਮਾਜਿਕ ਰਸਮਾਂ 'ਤੇ ਘੱਟ ਤੋਂ ਘੱਟ ਖਰਚ ਕਰੇ ਤੇ ਬੈਂਕਾਂ, ਆੜ੍ਹਤੀਆਂ ਤੋਂ ਬੇਲੋੜਾ ਕਰਜ਼ਾ ਚੁੱਕਣ ਤੋਂ ਬਚੇ।


-ਸ਼ਮਸ਼ੇਰ ਸਿੰਘ ਸੋਹੀ
ਪਿੰਡ ਸੋਹੀਆਂ, ਡਾਕ: ਚੀਮਾ ਖੁੱਡੀ, ਜ਼ਿਲ੍ਹਾ ਗੁਰਦਾਸਪੁਰ।


ਵੀ.ਆਈ.ਪੀ. ਸੱਭਿਆਚਾਰ

ਪੰਜਾਬ ਵਿਚ ਨਵੀਂ ਬਣੀ ਕਾਂਗਰਸ ਸਰਕਾਰ ਨੇ ਵੀ.ਆਈ.ਪੀ. ਸੱਭਿਆਚਾਰ ਖ਼ਤਮ ਕਰਨ ਲਈ ਜੋ ਕਦਮ ਚੁੱਕਿਆ ਹੈ। ਵੀ.ਆਈ.ਪੀ. ਕਲਚਰ ਤੋਂ ਪੰਜਾਬ ਦੇ ਲੋਕ ਸੱਚਮੁੱਚ ਹੀ ਬਹੁਤ ਔਖੇ ਸਨ। ਸਾਰੇ ਲੋਕ ਚਾਹੁੰਦੇ ਹਨ ਕਿ ਸਾਡੇ ਲੀਡਰ ਸਾਨੂੰ ਆਸਾਨੀ ਨਾਲ ਮਿਲਣ। ਪਰ ਸਾਡੇ ਲੀਡਰ ਜਿੱਤ ਕੇ ਹਮੇਸ਼ਾ ਲੋਕਾਂ ਤੋਂ ਦੂਰ ਰਹਿੰਦੇ ਹਨ। ਇਸ ਤੋਂ ਇਲਾਵਾ ਸਰਕਾਰੀ ਅਮਲਾ ਵੀ ਲੀਡਰਾਂ ਦੀਆਂ ਵੀ.ਆਈ.ਪੀ. ਡਿਊਟੀਆਂ ਵਿਚ ਹੀ ਉਲਝਿਆ ਰਹਿੰਦਾ ਹੈ। ਹੁਣ ਕਾਫੀ ਪੁਲਿਸ ਮੁਲਾਜ਼ਮ ਵੀ ਵਾਪਸ ਬੁਲਾਏ ਹਨ ਜੋ ਵੀ.ਆਈ.ਪੀ. ਦੀਆਂ ਸੁਰੱਖਿਆ ਵਿਚ ਲੱਗੇ ਹੋਏ ਸਨ। ਲਾਲ ਬੱਤੀਆਂ ਅਤੇ ਹੂਟਰਾਂ ਦੀਆਂ ਆਵਾਜ਼ਾਂ ਤੋਂ ਸਾਰੇ ਲੋਕ ਤੰਗ ਹਨ। ਜੇਕਰ ਕਾਂਗਰਸ ਦੀ ਸਰਕਾਰ ਵੀ.ਆਈ.ਪੀ. ਸੱਭਿਆਚਾਰ ਨੂੰ ਜੜ੍ਹੋਂ ਖ਼ਤਮ ਕਰ ਦੇਵੇ ਤਾਂ ਸਾਰੇ ਲੋਕ ਕਾਂਗਰਸ ਪਾਰਟੀ ਦੀ ਸਰਕਾਰ ਦਾ ਹਰ ਪੱਖ ਤੋਂ ਸਾਥ ਦੇਣ ਲਈ ਤਿਆਰ ਰਹਿਣਗੇ। ਜੇਕਰ ਪੰਜਾਬ ਦਾ ਪੈਸਾ ਵਾਧੂ ਖਰਚ ਹੋਣ ਤੋਂ ਕਾਂਗਰਸ ਸਰਕਾਰ ਬਚਾ ਸਕੇਗੀ ਤਾਂ ਫਿਰ ਪੰਜਾਬ ਸਿਰ ਚੜ੍ਹੇ ਕਰਜ਼ੇ ਦਾ ਬੋਝ ਘਟਾਇਆ ਜਾ ਸਕੇਗਾ ਅਤੇ ਪੰਜਾਬ ਨੂੰ ਕਰਜ਼ਾ-ਮੁਕਤ ਸੂਬਾ ਬਣਾ ਕੇ ਫਿਰ ਤੋਂ ਖੁਸ਼ਹਾਲ ਸੂਬਾ ਬਣਾਇਆ ਜਾ ਸਕਦਾ ਹੈ।


-ਸੁਖਰਾਜ ਚਹਿਲ ਧਨੌਲਾ
ਮੋਬਾਈਲ : 97810-48055.


ਮਨ ਕੀ ਬਾਤ

'ਮਨ ਕੀ ਬਾਤ' ਵਿਚ ਪ੍ਰਧਾਨ ਮੰਤਰੀ ਸ੍ਰੀ ਨਰਿੰਦਰ ਮੋਦੀ ਨੇ ਦੇਸ਼ ਦੇ ਨੌਜਵਾਨਾਂ ਨੂੰ ਅਪੀਲ ਕਰਦੇ ਹੋਏ ਦੇਸ਼ ਦੇ ਲੋਕਾਂ ਨਾਲ ਇਹ ਗੱਲ ਸਾਂਝੀ ਕੀਤੀ ਹੈ ਕਿ ਅਧਿਆਤਮਿਕ ਗੁਰੂ ਰਵਿੰਦਰ ਨਾਥ ਟੈਗੋਰ ਵੱਲੋਂ ਜੋ ਪ੍ਰੇਰਨਾ ਸ਼ਹੀਦ ਭਗਤ ਸਿੰਘ ਨੂੰ 12 ਸਾਲ ਦੀ ਉਮਰ ਵਿਚ ਦਿੱਤੀ ਗਈ ਸੀ ਅਤੇ ਉਸ ਕਾਰਨ ਹੀ ਉਹ 23 ਸਾਲ ਦੀ ਅੱਲੜ੍ਹ ਉਮਰ ਵਿਚ ਦੇਸ਼ ਦੇ ਸ਼ਹੀਦ ਬਣ ਗਏ। ਅੱਜ ਦੇਸ਼ ਦੇ ਨੌਜਵਾਨਾਂ ਨੂੰ ਸ਼ਹੀਦ ਭਗਤ ਸਿੰਘ, ਰਾਜਗੁਰੂ ਤੇ ਸੁਖਦੇਵ ਦੀ ਸਮਾਧੀ 'ਤੇ ਜਾਣਾ ਚਾਹੀਦਾ ਹੈ। ਬਿਨਾਂ ਸ਼ੱਕ ਪ੍ਰਧਾਨ ਮੰਤਰੀ ਦਾ ਸੰਦੇਸ਼ ਪ੍ਰੇਰਨਾਦਾਇਕ ਹੈ, ਉਹ ਵੀ ਸ਼ਹੀਦ ਭਗਤ ਸਿੰਘ ਅਤੇ ਉਸ ਦੇ ਸਾਥੀਆਂ ਨੂੰ ਦੇਸ਼ ਦੇ ਸ਼ਹੀਦ ਮੰਨਦੇ ਹਨ, ਜੋ ਸਮੁੱਚੇ ਦੇਸ਼ ਦੀ ਖਾਤਰ ਹੀ ਕੁਰਬਾਨ ਹੋਏ ਸਨ। ਪ੍ਰੰਤੂ ਮਾਣਯੋਗ ਪ੍ਰਧਾਨ ਮੰਤਰੀ ਨੂੰ ਇਸ ਅਤੀ ਸੰਵੇਦਨਸ਼ੀਲ ਸਵਾਲ ਦਾ ਜਵਾਬ ਜ਼ਰੂਰ ਦੇਣਾ ਚਾਹੀਦਾ ਹੈ ਕਿ ਉਨ੍ਹਾਂ ਨੂੰ ਅੰਤਰਰਾਸ਼ਟਰੀ ਹਵਾਈ ਅੱਡੇ ਮੁਹਾਲੀ ਦਾ ਨਾਂਅ ਸ਼ਹੀਦ ਭਗਤ ਸਿੰਘ ਦੇ ਨਾਂਅ 'ਤੇ ਰੱਖਣ ਦਾ ਕੀ ਇਤਰਾਜ਼ ਹੈ? ਕੀ ਸ਼ਹੀਦਾਂ ਦੇ ਨਾਵਾਂ 'ਤੇ ਵੀ ਹਮੇਸ਼ਾ ਸਿਆਸਤ ਹੁੰਦੀ ਰਹੇਗੀ?


-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀ ਖਾਸ, ਤਹਿ: ਮੁਕੇਰੀਆਂ, ਹੁਸ਼ਿਆਰਪੁਰ।

25/04/2017

 ਕਿਸਾਨ ਲੁੱਟ ਤੋਂ ਬਚਣ
ਅੱਜ ਦਾ ਕਿਸਾਨ ਭਾਵੇਂ ਹੁਣ ਪੜ੍ਹ-ਲਿਖ ਵੀ ਗਿਆ ਹੈ ਪਰ ਫਿਰ ਵੀ ਉਹ ਲੁੱਟ ਦਾ ਸ਼ਿਕਾਰ ਹੋ ਜਾਂਦਾ ਹੈ। ਜੇਕਰ ਕਿਸਾਨ ਛੋਟੀਆਂ-ਛੋਟੀਆਂ ਗੱਲਾਂ ਵੱਲ ਧਿਆਨ ਦੇਵੇ ਤਾਂ ਉਹ ਇਸ ਘਾਟੇ ਤੋਂ ਬਚ ਸਕਦਾ ਹੈ। ਜਿਵੇਂ ਕਿ ਅਸੀਂ ਜਾਣਦੇ ਹਾਂ ਕਿ ਮੰਡੀ 'ਚ ਕਣਕ ਦੀ ਟਰਾਲੀ ਉਤਾਰਨ, ਕਣਕ ਸਾਫ਼ ਕਰਨ, ਕਣਕ ਦੀ ਭਰਾਈ ਆਦਿ ਸਭ ਖਰਚੇ ਕਿਸਾਨ ਨੂੰ ਸਹਿਣ ਕਰਨੇ ਪੈਂਦੇ ਹਨ। ਪਰ ਇਹ ਕਿਸਾਨ ਦੀ ਜਾਣਕਾਰੀ ਲਈ ਦੱਸਣਾ ਜ਼ਰੂਰੀ ਹੈ ਕਿ ਜੇਕਰ ਉਸ ਦੀ ਟਰਾਲੀ ਲਿਫਟ ਵਾਲੀ ਹੈ ਤਾਂ ਉਸ ਦਾ ਕਣਕ ਟਰਾਲੀ ਵਿਚੋਂ ਉਤਾਰਨ ਦਾ ਖਰਚਾ ਬਚ ਸਕਦਾ ਹੈ। ਇਸ ਤਰ੍ਹਾਂ ਹੀ ਜੇਕਰ ਕੋਈ ਕਿਸਾਨ ਆਪਣੇ ਘਰ ਤੋਂ ਹੀ ਕਣਕ ਪੂਰੀ ਤਰ੍ਹਾਂ ਸਾਫ਼ ਕਰਕੇ ਲੈ ਕੇ ਆਉਂਦਾ ਹੈ ਤਾਂ ਉਸ ਨੂੰ ਛਣਾਈ ਦਾ ਖਰਚਾ ਸਹਿਣ ਨਹੀਂ ਕਰਨਾ ਪੈਂਦਾ, ਉਹ ਇਸ ਖਰਚੇ ਤੋਂ ਵੀ ਬਚ ਸਕਦਾ ਹੈ।
ਇਸ ਤਰ੍ਹਾਂ ਕਈ ਵਾਰ ਕਣਕ ਦੀ ਭਰਾਈ ਵੇਲੇ ਕਿਸਾਨ ਨੂੰ ਕੰਡਾ ਨਹੀਂ ਵਿਖਾਇਆ ਜਾਂਦਾ ਪਰ ਹਦਾਇਤਾਂ ਅਨੁਸਾਰ ਕਿਸਾਨ ਨੂੰ ਕੰਡਾ ਵਿਖਾਉਣਾ ਜ਼ਰੂਰੀ ਹੈ। ਕਈ ਵਾਰ ਇਹ ਬਹਾਨਾ ਲਗਾ ਕੇ ਵੱਧ ਫ਼ਸਲ ਤੋਲੀ ਜਾਂਦੀ ਹੈ ਕਿ ਤੁਹਾਡੀ ਫ਼ਸਲ ਗਿੱਲੀ ਹੈ। ਇਸ ਤਰ੍ਹਾਂ ਦੀ ਕੋਈ ਹਦਾਇਤ ਨਹੀਂ ਹੈ ਕਿ ਕਿਸੇ ਕਿਸਾਨ ਦੀ ਫ਼ਸਲ ਦੀ ਤੁਲਾਈ ਨਿਸਚਿਤ ਮਾਤਰਾ ਤੋਂ ਵੱਧ ਕੀਤੀ ਜਾਵੇ, ਬਰਦਾਨੇ ਦਾ ਨਿਸਚਿਤ ਭਾਰ ਅਤੇ ਫ਼ਸਲ ਦੀ ਭਰਤੀ ਅਨੁਸਾਰ ਹੀ ਤੁਲਾਈ ਕਰਨ ਦੀ ਸਖ਼ਤ ਹਦਾਇਤ ਹੁੰਦੀ ਹੈ। ਕਈ ਵਾਰ ਤੁਲਾਈ ਵੇਲੇ ਲੇਬਰ ਵੱਲੋਂ ਕਣਕ ਦੀ ਖਿੱਲਰੀ ਮਾਤਰਾ ਉੱਪਰ ਬੋਰੀਆਂ ਲਗਾਈਆਂ ਜਾਂਦੀਆਂ ਹਨ, ਕਿਸਾਨ ਇਸ ਸਬੰਧੀ ਆੜ੍ਹਤੀਏ ਨੂੰ ਸ਼ਿਕਾਇਤ ਕਰ ਸਕਦਾ ਹੈ। ਇਸ ਤੋਂ ਇਲਾਵਾ ਜੇਕਰ ਕਿਸਾਨ ਦੀ ਫ਼ਸਲ ਦੀ ਕੋਈ ਚੋਰੀ ਕਰਦਾ ਹੈ ਤਾਂ ਉਸ ਦੀ ਸ਼ਿਕਾਇਤ ਵੀ ਮੰਡੀ ਬੋਰਡ ਨੂੰ ਕੀਤੀ ਜਾਂਦੀ ਹੈ। ਸਭ ਤੋਂ ਵੱਡੀ ਲੁੱਟ ਕਿਸਾਨ ਦੀ ਉਸ ਵੇਲੇ ਹੁੰਦੀ ਹੈ ਜਦ ਆੜ੍ਹਤੀਆ ਉਸ ਨੂੰ ਇਹ ਕਹਿੰਦਾ ਹੈ ਕਿ ਪ੍ਰਤੀ ਗੱਟਾ ਕੁਝ ਰੁਪਏ ਉਸ ਨੂੰ ਦਿੱਤੇ ਜਾਣ ਤਾਂ ਕਿ ਉਹ ਉੱਚ ਅਧਿਕਾਰੀਆਂ ਤੱਕ ਰਕਮ ਪਹੁੰਚਾ ਸਕੇ। ਇਹ ਆਮ ਤੌਰ 'ਤੇ ਵੇਖਿਆ ਗਿਆ ਕਿ ਆੜ੍ਹਤੀਆ ਕਈ ਤਰ੍ਹਾਂ ਦੇ ਬਹਾਨੇ ਲਗਾ ਕੇ ਕਿਸਾਨ ਤੋਂ ਪ੍ਰਤੀ ਗੱਟਾ ਕੁਝ ਰੁਪਏ ਪ੍ਰਾਪਤ ਕਰਦਾ ਹੈ। ਇਥੇ ਕਿਸਾਨ ਦਾ ਫ਼ਰਜ਼ ਹੈ ਕਿ ਉਹ ਕੋਈ ਪੈਸਾ ਕਿਸੇ ਨੂੰ ਨਾ ਦੇਵੇ ਅਤੇ ਫਾਰਮ 'ਜੇ' ਅਨੁਸਾਰ ਹੀ ਆੜ੍ਹਤੀਏ ਤੋਂ ਰੁਪਏ ਪ੍ਰਾਪਤ ਕਰੇ। ਜੇਕਰ ਉਸ ਦੀ ਕੋਈ ਰਕਮ ਕੱਟੇ ਤਾਂ ਇਸ ਦੀ ਸ਼ਿਕਾਇਤ ਉੱਚ ਅਧਿਕਾਰੀਆਂ ਨੂੰ ਜ਼ਰੂਰ ਕੀਤੀ ਜਾਵੇ।

-ਸੁਖਵਿੰਦਰ ਸਿੰਘ 'ਅੱਕੂਮਸਤੇ ਕੇ'
ਫਿਰੋਜ਼ਪੁਰ।

ਵੀ.ਆਈ.ਪੀ. ਸੱਭਿਆਚਾਰ
ਪੰਜਾਬ ਵਿਚ ਨਵੀਂ ਬਣੀ ਕਾਂਗਰਸ ਸਰਕਾਰ ਨੇ ਵੀ.ਆਈ.ਪੀ. ਸੱਭਿਆਚਾਰ ਖ਼ਤਮ ਕਰਨ ਲਈ ਜੋ ਕਦਮ ਚੁੱਕਿਆ ਹੈ। ਇਹ ਬਹੁਤ ਸ਼ਲਾਘਾਯੋਗ ਹੈ, ਕਿਉਂਕਿ ਪੰਜਾਬ ਦਾ ਬਹੁਤ ਸਾਰਾ ਪੈਸਾ ਅਜਾਈਂ ਹੀ ਵੀ.ਆਈ.ਪੀ. ਸੱਭਿਆਚਾਰ ਤੇ ਪਾਣੀ ਵਾਂਗੂੰ ਵਹਾਇਆ ਜਾਂਦਾ ਹੈ। ਵੀ.ਆਈ.ਪੀ. ਕਲਚਰ ਤੋਂ ਪੰਜਾਬ ਦੇ ਲੋਕ ਸੱਚਮੁੱਚ ਹੀ ਬਹੁਤ ਔਖੇ ਸਨ। ਸਾਰੇ ਲੋਕ ਚਾਹੁੰਦੇ ਹਨ ਕਿ ਸਾਡੇ ਲੀਡਰ ਸਾਨੂੰ ਆਸਾਨੀ ਨਾਲ ਮਿਲਣ। ਪਰ ਸਾਡੇ ਲੀਡਰ ਜਿੱਤ ਕੇ ਹਮੇਸ਼ਾ ਲੋਕਾਂ ਤੋਂ ਦੂਰ ਰਹਿੰਦੇ ਹਨ। ਜਦੋਂ ਕਿਤੇ ਉਹ ਆਪਣੇ ਇਲਾਕਿਆਂ ਵਿਚ ਆਉਂਦੇ ਹਨ ਤਾਂ ਫਿਰ ਸਕਿਊਰਿਟੀ ਵਾਲੇ ਮਿਲਣ ਨਹੀਂ ਦਿੰਦੇ। ਇਸ ਤੋਂ ਇਲਾਵਾ ਸਰਕਾਰੀ ਅਮਲਾ ਵੀ ਲੀਡਰਾਂ ਦੀਆਂ ਵੀ.ਆਈ.ਪੀ. ਡਿਊਟੀਆਂ ਵਿਚ ਹੀ ਉਲਝਿਆ ਰਹਿੰਦਾ ਹੈ। ਹੁਣ ਕਾਫੀ ਪੁਲਿਸ ਮੁਲਾਜ਼ਮ ਵੀ ਵਾਪਸ ਬੁਲਾਏ ਹਨ ਜੋ ਵੀ.ਆਈ.ਪੀ. ਦੀਆਂ ਸੁਰੱਖਿਆ ਵਿਚ ਲੱਗੇ ਹੋਏ ਸਨ। ਲਾਲ ਬੱਤੀਆਂ ਅਤੇ ਹੂਟਰਾਂ ਦੀਆਂ ਆਵਾਜ਼ਾਂ ਤੋਂ ਸਾਰੇ ਲੋਕ ਤੰਗ ਹਨ। ਜੇਕਰ ਕਾਂਗਰਸ ਦੀ ਸਰਕਾਰ ਵੀ.ਆਈ.ਪੀ. ਸੱਭਿਆਚਾਰ ਨੂੰ ਜੜ੍ਹੋਂ ਖ਼ਤਮ ਕਰ ਦੇਵੇ ਤਾਂ ਸਾਰੇ ਲੋਕ ਕਾਂਗਰਸ ਪਾਰਟੀ ਦੀ ਸਰਕਾਰ ਦਾ ਹਰ ਪੱਖ ਤੋਂ ਸਾਥ ਦੇਣ ਲਈ ਤਿਆਰ ਰਹਿਣਗੇ। ਜੇਕਰ ਪੰਜਾਬ ਦਾ ਪੈਸਾ ਵਾਧੂ ਖਰਚ ਹੋਣ ਤੋਂ ਕਾਂਗਰਸ ਸਰਕਾਰ ਬਚਾ ਸਕੇਗੀ ਤਾਂ ਫਿਰ ਪੰਜਾਬ ਸਿਰ ਚੜ੍ਹੇ ਕਰਜ਼ੇ ਦਾ ਬੋਝ ਘਟਾਇਆ ਜਾ ਸਕੇਗਾ ਅਤੇ ਪੰਜਾਬ ਨੂੰ ਕਰਜ਼ਾ-ਮੁਕਤ ਸੂਬਾ ਬਣਾ ਕੇ ਫਿਰ ਤੋਂ ਖੁਸ਼ਹਾਲ ਸੂਬਾ ਬਣਾਇਆ ਜਾ ਸਕਦਾ ਹੈ।

-ਸੁਖਰਾਜ ਚਹਿਲ ਧਨੌਲਾ
ਮੋਬਾਈਲ : 97810-48055.

24/04/2017

 ਪਿੰਗਲਵਾੜੇ ਦੇ ਬੱਚੇ
ਇਨਸਾਨੀਅਤ ਦੇ ਮਹਾਨ ਪੂਜਕ ਭਗਤ ਪੂਰਨ ਸਿੰਘ ਜੀ ਨੇ ਸਿੱਖ ਧਰਮ ਵਿਚਲੇ ਸੇਵਾ ਦੇ ਸੰਕਲਪ ਨੂੰ ਸਮਝ ਕੇ ਆਪਣੀ ਜ਼ਿੰਦਗੀ ਲੂਲੇ-ਲੰਗੜੇ ਤੇ ਬੇਸਹਾਰਾ ਲੋਕਾਂ ਦੇ ਲੇਖੇ ਲਾਈ ਤੇ ਪਿੰਗਲਵਾੜੇ ਜਿਹੀ ਮਹਾਨ ਸੰਸਥਾ ਦੀ ਸਥਾਪਨਾ ਕੀਤੀ। ਪਿਛਲੇ ਦਿਨੀਂ ਇਹ ਸੁਣ ਕੇ ਬੜੀ ਖੁਸ਼ੀ ਹੋਈ ਕਿ ਪਿੰਗਲਵਾੜਾ ਦੇ ਬੱਚਿਆਂ ਨੇ ਅੰਤਰਰਾਸ਼ਟਰੀ ਖੇਡਾਂ ਵਿਚ ਮੱਲਾਂ ਮਾਰ ਕੇ ਸੋਨੇ ਦੇ ਤਗਮੇ ਜਿਤੇ। ਪਿੰਗਲਵਾੜੇ 'ਚ ਚੰਗੀ ਪੜ੍ਹਾਈ, ਚੰਗੀ ਖੁਰਾਕ ਤੇ ਚੰਗੀ ਅਗਵਾਈ ਵਿਚ ਇਨ੍ਹਾਂ ਬੱਚਿਆਂ ਨੇ ਭਾਰਤ, ਪੰਜਾਬ ਖਾਸ ਕਰਕੇ ਪਿੰਗਲਵਾੜੇ ਦਾ ਨਾਂਅ ਰੌਸ਼ਨ ਕੀਤਾ ਹੈ। ਭਗਤ ਜੀ ਨੇ ਜੋ ਸੋਚ ਕੇ ਪਿੰਗਲਵਾੜੇ ਦੀ ਸਥਾਪਨਾ ਕੀਤੀ ਸੀ, ਇਹ ਹੁਣ ਉਸ ਤੋਂ ਵੀ ਅੱਗੇ ਨਿਕਲ ਚੁੱਕਾ ਹੈ, ਜੋ ਸਾਡੇ ਲਈ ਮਾਣ ਵਾਲੀ ਗੱਲ ਹੈ। ਸਾਨੂੰ ਜਿਥੇ ਇਹੋ ਜਿਹੀਆਂ ਚੰਗੀਆਂ ਸੰਸਥਾਵਾਂ ਨਾਲ ਜੁੜ ਕੇ ਕੁਝ ਮਦਦ ਕਰਨੀ ਚਾਹੀਦੀ ਹੈ, ਉਥੇ ਆਪਣੀ ਜੀਵਨ ਜੁਗਤ ਲਈ ਸੇਧ ਵੀ ਲੈਣੀ ਜ਼ਰੂਰੀ ਹੈ। ਇਹ ਸੰਸਥਾ ਖਾਸ ਕਰ ਦਾਨੀ ਸੱਜਣਾਂ ਦੇ ਸਹਿਯੋਗ ਨਾਲ ਚੱਲਦੀ ਹੈ ਤੇ ਬਹੁਤ ਤਰੱਕੀਆਂ ਕਰ ਰਹੀ ਹੈ। ਸਰਕਾਰਾਂ ਨੂੰ ਇਹੋ ਜਿਹੀਆਂ ਸੰਸਥਾਵਾਂ ਦੀ ਵੱਧ ਤੋਂ ਵੱਧ ਮਦਦ ਕਰਨੀ ਚਾਹੀਦੀ ਹੈ। ਅਸੀਂ ਬੱਚਿਆਂ ਦੇ ਜਿੱਤਣ 'ਤੇ ਬੀਬੀ ਇੰਦਰਜੀਤ ਕੌਰ ਤੇ ਪਿੰਗਲਵਾੜੇ ਨਾਲ ਜੁੜੀ ਹਰ ਰੂਹ ਨੂੰ ਮੁਬਾਰਕਾਂ ਦਿੰਦੇ ਹਾਂ।


-ਬਲਬੀਰ ਸਿੰਘ ਬੱਬੀ
ਪਿੰਡ ਤੱਖਰਾਂ, ਜ਼ਿਲ੍ਹਾ ਲੁਧਿਆਣਾ।
ਮੋ: 92175-92531.


ਅੰਮ੍ਰਿਤਸਰ-ਟੋਰਾਂਟੋ ਸਿੱਧੀ ਉਡਾਣ

ਕੈਨੇਡਾ ਅਤੇ ਅਮਰੀਕਾ ਦੇ ਸ਼ਹਿਰਾਂ ਲਈ ਅੰਮ੍ਰਿਤਸਰ-ਟੋਰਾਂਟੋ ਏਅਰ ਇੰਡੀਆ ਦੀ ਸਿੱਧੀ ਉਡਾਣ ਪਿਛਲੇ ਸੱਤਾਂ ਸਾਲਾਂ ਤੋਂ ਬੰਦ ਪਈ ਹੈ। ਇਹ ਉਡਾਣ ਇਕ ਖਾਸ ਕੰਪਨੀ ਦੀਆਂ 150 ਲਗਜ਼ਰੀ ਬੱਸਾਂ ਨੂੰ ਲਾਭ ਪਹੁੰਚਾਉਣ ਦੇ ਮਨਸ਼ੇ ਨਾਲ ਬੰਦ ਕੀਤੀ ਗਈ ਸੀ। ਪੰਜਾਬੀਆਂ ਅਤੇ ਪੰਜਾਬੀ ਪ੍ਰਵਾਸੀਆਂ ਨਾਲ ਇਹ ਵੱਡੀ ਬੇਇਨਸਾਫ਼ੀ ਹੋਈ ਸੀ। ਉਨ੍ਹਾਂ ਨੂੰ ਪੰਜਾਬ ਦੇ ਪਿੰਡਾਂ ਅਤੇ ਸ਼ਹਿਰਾਂ ਵਿਚ ਆਉਣ-ਜਾਣ ਲਈ ਦਿੱਲੀ ਤੋਂ ਕੋਈ ਫਲਾਈਟ ਲੈਣੀ ਪੈਂਦੀ ਸੀ। ਇਹ ਫਲਾਈਟ ਲੈਣ ਲਈ ਉਨ੍ਹਾਂ ਨੂੰ 15 ਘੰਟੇ ਦੀ ਖੱਜਲ-ਖੁਆਰੀ ਝੱਲਣੀ ਪੈਂਦੀ ਸੀ। ਇਸ ਦੇ ਨਾਲ ਹੀ ਸ੍ਰੀ ਹਰਿਮੰਦਰ ਸਾਹਿਬ ਦੇ ਦਰਸ਼ਨ ਇਸ਼ਨਾਨ ਦੀ ਇੱਛਾ ਵੀ ਪੂਰੀ ਨਹੀਂ ਹੁੰਦੀ ਸੀ। ਸੋ, ਹੁਣ ਬੰਦ ਪਈ ਏਅਰ ਇੰਡੀਆ ਦੀ ਉਕਤ ਫਲਾਈਟ ਨੂੰ ਮੁੜ ਚਾਲੂ ਕਰਵਾ ਕੇ ਨਵਜੋਤ ਸਿੰਘ ਸਿੱਧੂ ਨੂੰ ਆਪਣਾ ਵਾਅਦਾ ਪੂਰਾ ਕਰਨਾ ਚਾਹੀਦਾ ਹੈ। ਏਅਰ ਇੰਡੀਆ ਦੀ ਉਕਤ ਫਲਾਈਟ ਇਕ ਲਾਹੇਵੰਦਾ ਸੌਦਾ ਹੈ ਅਤੇ ਪੰਜਾਬ ਵਾਸੀਆਂ ਤੇ ਪ੍ਰਵਾਸੀਆਂ ਦੇ ਹਿਤ ਵਿਚ ਹੈ।


-ਇੰਜ: ਕੁਲਦੀਪ ਸਿੰਘ ਤੇ ਸਾਥੀ
ਅੰਮ੍ਰਿਤਸਰ।

 

ਡੀ.ਜੇ. ਦਾ ਸ਼ੋਰ
ਵਿਆਹਾਂ-ਸ਼ਾਦੀਆਂ, ਪਾਰਟੀਆਂ ਵਿਚ ਰਾਤ ਨੂੰ ਡੀ.ਜੇ. ਲਗਾਏ ਜਾਂਦੇ ਹਨ, ਜੋ ਵਿਦਿਆਰਥੀਆਂ ਲਈ, ਦਿਲ ਦੇ ਮਰੀਜ਼ਾਂ ਲਈ, ਬਲੱਡ ਪ੍ਰੈਸ਼ਰ ਦੇ ਮਰੀਜ਼ਾਂ ਲਈ ਬੜੇ ਘਾਤਕ ਸਾਬਤ ਹੁੰਦੇ ਹਨ। ਇਨ੍ਹਾਂ ਕਾਰਨ ਵਿਦਿਆਰਥੀਆਂ ਦੀ ਪੜ੍ਹਾਈ ਵਿਚ ਵਿਘਨ ਪੈਂਦਾ ਹੈ। ਮਾਂ-ਬਾਪ ਬੱਚਿਆਂ ਦੀਆਂ ਲੱਖਾਂ ਰੁਪਏ ਫੀਸਾਂ ਭਰਦੇ ਹਨ। ਬੱਚੇ ਸਾਰਾ ਸਾਲ ਲਗਨ, ਮਿਹਨਤ ਨਾਲ ਆਪਣੇ ਪੇਪਰਾਂ ਦੀਆਂ ਤਿਆਰੀ ਕਰਦੇ ਹਨ ਪਰ ਕਈ ਵਾਰ ਡੀ.ਜੇ. ਉਨ੍ਹਾਂ ਦੀ ਪੜ੍ਹਾਈ ਵਿਚ ਵਿਘਨ ਦਾ ਕਾਰਨ ਬਣਦੇ ਹਨ। ਭਾਵੇਂ ਅਦਾਲਤ ਵੱਲੋਂ ਡੀ.ਜੇ. ਉੱਪਰ ਸਖ਼ਤੀ ਕੀਤੀ ਗਈ ਹੈ ਪਰ ਫਿਰ ਵੀ ਡੀ.ਜੇ. ਦੇਰ ਰਾਤ ਤੱਕ ਸ਼ਰੇਆਮ ਚਲਦੇ ਰਹਿੰਦੇ ਹਨ। ਸਰਕਾਰ ਨੇ ਸ਼ੋਰ ਪ੍ਰਦੂਸ਼ਣ ਨੂੰ ਘਟਾਉਣ ਲਈ ਨਿਯਮ ਵੀ ਬਣਾਏ ਹੋਏ ਹਨ ਪਰ ਇਨ੍ਹਾਂ ਨਿਯਮਾਂ ਦੀ ਕੋਈ ਪ੍ਰਵਾਹ ਨਹੀਂ ਕਰਦਾ। ਇਨ੍ਹਾਂ ਨੂੰ ਬੰਦ ਕਰਵਾਉਣ ਲਈ ਸਰਕਾਰ ਵੱਲੋਂ ਸਖ਼ਤ ਕਦਮ ਚੁੱਕਣੇ ਚਾਹੀਦੇ ਹਨ।


-ਰਾਜਵੰਤ ਸਿੰਘ ਰਾਜੂ
ਰਾਏਕੋਟ।

21/04/2017

 ਸੜਕੀ ਅੱਤਵਾਦ
ਅੱਜ ਸਾਡੇ ਦੇਸ਼ ਵਿਚ ਰੋਜ਼ਾਨਾ ਅਨੇਕਾਂ ਸੜਕ ਹਾਦਸੇ ਵਾਪਰ ਰਹੇ ਹਨ। ਅਸੀਂ ਆਪਣੇ ਰੋਜ਼ਮਰਾ ਦੇ ਸਫ਼ਰ ਦੌਰਾਨ ਦੇਖਦੇ ਹਾਂ ਕਿ ਸ਼ਾਇਦ ਹੀ ਅੱਜ ਕੋਈ ਅਜਿਹੀ ਸੜਕ ਹੋਵੇਗੀ, ਜਿਸ ਉੱਪਰ ਐਕਸੀਡੈਂਟ ਦੇ ਰੂਪ ਵਿਚ ਸੜਕੀ ਅੱਤਵਾਦ ਆਪਣਾ ਫਨ ਖਿਲਾਰੀ ਨਜ਼ਰ ਨਹੀਂ ਆਏਗਾ। ਇਨ੍ਹਾਂ ਹੋ ਰਹੇ ਸੜਕੀ ਹਾਦਸਿਆਂ ਵਿਚ ਰੋਜ਼ਾਨਾ ਕੀਮਤੀ ਜਾਨਾਂ ਮੌਤ ਦੇ ਮੂੰਹ ਜਾ ਰਹੀਆਂ ਹਨ। ਇਨ੍ਹਾਂ ਸੜਕੀ ਹਾਦਸਿਆਂ ਲਈ ਜਿਥੇ ਖਸਤਾ ਹੋਈਆਂ ਸੜਕਾਂ ਜ਼ਿੰਮੇਵਾਰ ਹਨ, ਉਥੇ ਖ਼ੁਦ ਸਾਡੇ ਵੱਲੋਂ ਵਰਤੀ ਜਾਂਦੀ ਅਣਗਹਿਲੀ ਨੂੰ ਵੀ ਅੱਖੋਂ ਪਰੋਖੇ ਨਹੀਂ ਕੀਤਾ ਜਾ ਸਕਦਾ। ਅੱਜ ਭਰੇ ਬਾਜ਼ਾਰਾਂ ਵਿਚ 15-15 ਸਾਲ ਦੇ ਲੜਕੇ/ਲੜਕੀਆਂ ਜਿਨ੍ਹਾਂ ਦੇ ਪੂਰੀ ਤਰ੍ਹਾਂ ਥੱਲੇ ਪੈਰ ਵੀ ਨਹੀਂ ਲਗਦੇ, ਮੋਟਰ ਸਾਈਕਲਾਂ, ਸਕੂਟਰੀਆਂ ਗੱਡੀਆਂ ਤੇਜ਼ ਰਫ਼ਤਾਰ ਦੌੜਾਉਂਦੇ ਆਮ ਹੀ ਦੇਖੇ ਜਾ ਸਕਦੇ ਹਨ, ਜਿਨ੍ਹਾਂ ਕੋਲ ਕੋਈ ਡਰਾਈਵਿੰਗ ਲਾਇਸੰਸ ਵੀ ਨਹੀਂ ਹੁੰਦਾ ਹੈ। ਇਸ ਤਰ੍ਹਾਂ ਬਹੁਤ ਸਾਰੇ ਲੋਕਾਂ ਵੱਲੋਂ ਸ਼ਰਾਬ ਆਦਿ ਦੇ ਨਸ਼ੇ ਵਿਚ ਟੁੰਨ ਹੋ ਕੇ ਜਾਂ ਡਰਾਈਵਿੰਗ ਕਰਦੇ ਸਮੇਂ ਮੋਬਾਈਲ ਦੀ ਵਰਤੋਂ ਕੀਤੀ ਜਾਂਦੀ ਹੈ। ਅਜਿਹੇ ਲੋਕਾਂ ਦੀ ਇਸ ਤਰ੍ਹਾਂ ਦੀ ਅਣਗਹਿਲੀ ਕਦੋਂ ਕਿਸੇ ਸਾਹਮਣੇ ਤੋਂ ਆ ਰਹੇ ਬੇਕਸੂਰ ਦੀਆਂ ਲੱਤਾਂ ਤੋੜ ਦੇਵੇ, ਕੋਈ ਪਤਾ ਨਹੀਂ ਚਲਦਾ। ਸੋ, ਸਰਕਾਰ ਨੂੰ ਜਿਥੇ ਡਰਾਈਵਿੰਗ ਲਾਇਸੰਸ ਬਣਾਉਣ ਦੀ ਪ੍ਰਕਿਰਿਆ ਬੇਹੱਦ ਸਖ਼ਤ ਕਰਨੀ ਚਾਹੀਦੀ ਹੈ, ਉਥੇ ਟ੍ਰੈਫਿਕ ਨਿਯਮਾਂ ਦੀਆਂ ਧੱਜੀਆਂ ਉਡਾਉਣ ਵਾਲਿਆਂ ਖਿਲਾਫ਼ ਵੀ ਕਾਰਵਾਈ ਯਕੀਨੀ ਬਣਾਉਣੀ ਚਾਹੀਦੀ ਹੈ ਤਾਂ ਜੋ ਕਿਸੇ ਵੀ ਕੀਤੀ ਹੋਈ ਅਣਗਹਿਲੀ ਕਿਸੇ ਹੋਰ ਲਈ ਮੁਸੀਬਤ ਦਾ ਕਾਰਨ ਨਾ ਬਣ ਸਕੇ।


-ਰਾਜਾ ਗਿੱਲ (ਚੜਿੱਕ)
ਮੋ: 94654-11585.


ਬੱਚਿਆਂ ਨਾਲ ਭਾਵਨਾਤਮਕ ਸਾਂਝ ਜ਼ਰੂਰੀ
ਬੱਚੇ ਦੀ ਜ਼ਿੰਦਗੀ ਦੇ ਸ਼ੁਰੂਆਤੀ ਸਾਲਾਂ ਵਿਚ ਭਾਵਨਾਵਾਂ ਬਹੁਤੀਆਂ ਤੀਬਰ ਨਹੀਂ ਹੁੰਦੀਆ ਪਰ ਜਿਵੇਂ-ਜਿਵੇਂ ਉਹ ਬਚਪਨ ਵਿਚੋਂ ਨਿਕਲ ਕੇ ਕਿਸ਼ੋਰ ਅਵਸਥਾ (13-18 ਸਾਲ) ਵੱਲ ਵਧਦਾ ਹੈ, ਉਸ ਦੀਆਂ ਭਾਵਨਾਵਾਂ ਗੁੰਝਲਦਾਰ ਅਤੇ ਆਪ-ਮੁਹਾਰੀਆਂ ਹੋਣ ਲਗਦੀਆਂ ਹਨ। ਇਹ ਇਕ ਅਜਿਹਾ ਪੜਾਅ ਹੈ ਜਿਸ ਵਿਚ ਭਾਵਨਾਵਾਂ ਦੇ ਵਹਾਅ ਨੂੰ ਬੱਚਾ ਸਾਂਭ ਨਹੀਂ ਸਕਦਾ। ਇਨ੍ਹਾਂ ਦੇ ਵਹਿਣ ਵਿਚ ਵਹਿੰਦਾ ਚਲਾ ਜਾਂਦਾ ਹੈ। ਉਸ ਦਾ ਵਿਵਹਾਰ ਸਥਿਰ ਨਹੀਂ ਹੁੰਦਾ। ਕਦੇ ਬਹੁਤ ਜ਼ਿਆਦਾ ਖੁਸ਼ ਅਤੇ ਕਦੀ ਹੱਦੋਂ ਵੱਧ ਦੁਖੀ ਹੋਣਾ, ਉਸ ਦੇ ਸੁਭਾਅ ਦਾ ਅੰਗ ਬਣ ਜਾਂਦਾ ਹੈ। ਇਸ ਸਮੇਂ ਉਸ ਨੂੰ ਆਪਣੇ ਮਾਪਿਆਂ ਨਾਲ ਭਾਵਨਾਤਮਕ ਸਾਂਝ ਦੀ ਲੋੜ ਹੁੰਦੀ ਹੈ ਬਸ਼ਰਤੇ ਮਾਪੇ ਆਪਣੇ ਬੱਚੇ ਲਈ ਹਊਆ ਨਾ ਬਣਨ ਅਤੇ ਉਹ ਬੱਚੇ ਦੀੇ ਮਾਨਸਿਕ ਹਾਲਤ ਸਮਝਦੇ ਹੋਏ ਕਾਮਯਾਬੀ ਵਿਚ ਖੁਸ਼ ਹੋਣ ਅਤੇ ਨਾਕਾਮਯਾਬੀ ਵਿਚ ਉਸ ਨੂੰ ਹੌਸਲਾ ਦੇਣ। ਪਰ ਜੇਕਰ ਬੱਚਿਆਂ ਨਾਲ ਮਾਪੇ ਦੋਸਤੀਪੂਰਨ ਵਿਵਹਾਰ ਨਹੀਂ ਕਰਦੇ ਅਤੇ ਬੱਚੇ ਦੇ ਮਨ ਵਿਚ ਆਪਣੇ ਪ੍ਰਤੀ ਡਰ ਪੈਦਾ ਕਰੀ ਰੱਖਦੇ ਹਨ ਤਾਂ ਬੱਚਾ ਆਪਣੀ ਸਮੱਸਿਆ ਉਨ੍ਹਾਂ ਨਾਲ ਸਾਂਝੀ ਨਾ ਕਰਦੇ ਹੋਏ ਦੱਬਿਆ ਘੁੱਟਿਆ ਮਹਿਸੂਸ ਕਰੇਗਾ ਅਤੇ ਮਾਨਸਿਕ ਪ੍ਰੇਸ਼ਾਨੀ ਜਾਂ ਤਣਾਅ ਦਾ ਸ਼ਿਕਾਰ ਹੋ ਜਾਵੇਗਾ। ਦੇਖਣ ਵਿਚ ਆਇਆ ਹੈ ਕਿ ਅਜਿਹੀ ਸਥਿਤੀ ਵਿਚ ਬੱਚੇ ਕਿਸੇ ਗ਼ਲਤ ਘਟਨਾ ਨੂੰ ਅੰਜਾਮ ਦੇ ਦਿੰਦੇ ਹਨ। ਇਸ ਲਈ ਬੱਚਿਆਂ ਨਾਲ ਮਾਪਿਆਂ ਦੀ ਭਾਵਨਾਤਮਕ ਸਾਂਝ ਹੋਣੀ ਚਾਹੀਦੀ ਹੈ। ਜਿਵੇਂ ਬੱਚੇ ਆਪਣੇ ਦੋਸਤਾਂ ਨਾਲ ਹਰ ਗੱਲ ਸਾਂਝੀ ਕਰ ਲੈਂਦੇ ਹਨ। ਇਸੇ ਤਰ੍ਹਾਂ ਇਸ ਉਮਰੇ ਮਾਪਿਆਂ ਨੂੰ ਉਮਰ ਦੀ ਨਜ਼ਾਕਤ ਨੂੰ ਸਮਝਦੇ ਹੋਏ ਬੱਚਿਆਂ ਨਾਲ ਸਬੰਧਾਂ ਵਿੱਚ ਪਾਰਦਰਸ਼ਤਾ ਲਿਆਉਣੀ ਚਾਹੀਦੀ ਹੈ ਤਾਂ ਜੋ ਬੱਚੇ ਆਪਣੀ ਹਰ ਗੱਲ ਆਪਣੇ ਮਾਪਿਆਂ ਨਾਲ ਸਾਂਝੀ ਕਰ ਸਕਣ।


-ਅੰਮ੍ਰਿਤਪਾਲ ਸਿੰਘ ਸੰਧੂ
ਪਿੰਡ ਤੇ ਡਾਕਖਾਨਾ ਬਾੜੀਆਂ ਕਲਾਂ
ਜ਼ਿਲ੍ਹਾ ਹੁਸ਼ਿਆਰਪੁਰ।

20/04/2017

 ਸਿਰਫ ਅਧਿਆਪਕ ਹੀ ਕਿਉਂ ਨਿਸ਼ਾਨਾ ਬਣਨ
ਪਿਛਲੇ ਦਿਨੀਂ ਸੰਪਾਦਕੀ ਸਫ਼ੇ 'ਤੇ ਪ੍ਰੋ: ਰਣਜੀਤ ਸਿੰਘ ਧਨੋਆ ਦਾ ਲੇਖ 'ਦਮ ਤੋੜ ਰਹੀ ਹੈ ਸਾਡੀ ਸਰਕਾਰੀ ਪ੍ਰਾਇਮਰੀ ਸਿੱਖਿਆ' ਪੜ੍ਹਨ ਦਾ ਮੌਕਾ ਮਿਲਿਆ। ਇਸ ਵਿਚ ਲੇਖਕ ਨੇ ਸਿੱਖਿਆ ਅਧਿਕਾਰ ਐਕਟ ਦੀਆਂ ਜ਼ਮੀਨੀ ਹਕੀਕਤਾਂ ਨੂੰ ਵਧੀਆ ਢੰਗ ਨਾਲ ਬਿਆਨਿਆ ਹੈ, ਜਿਵੇਂ ਕਿ ਅੱਠਵੀਂ ਤੱਕ ਫੇਲ੍ਹ ਨਾ ਕਰਨ ਦੀ ਨੀਤੀ ਅਤੇ ਉਮਰ ਅਨੁਸਾਰ ਬੱਚੇ ਨੂੰ ਜਮਾਤ 'ਚ ਦਾਖ਼ਲ ਕਰਨ ਦੀ ਨੀਤੀ ਦੇ ਨੁਕਸਾਨ ਬਾਰੇ ਜ਼ਿਕਰ ਕੀਤਾ ਹੈ। ਪਰ ਲੇਖਕ ਨੇ ਸਰਕਾਰੀ ਸਕੂਲਾਂ ਦੇ ਅਧਿਆਪਕਾਂ ਦੀ ਆਪਣੇ ਸਕੂਲਾਂ ਪ੍ਰਤੀ ਬੇਭਰੋਸਗੀ ਦਾ ਜੋ ਜ਼ਿਕਰ ਕੀਤਾ ਹੈ, ਉਸ ਨਾਲ ਸਹਿਮਤ ਨਹੀਂ ਹਾਂ।
ਲੇਖਕ ਨੇ ਇਲਾਹਾਬਾਦ ਹਾਈ ਕੋਰਟ ਦੇ ਫ਼ੈਸਲੇ ਦਾ ਜ਼ਿਕਰ ਕੀਤਾ ਹੈ, ਮੈਂ ਉਸ ਨਾਲ ਸਹਿਮਤ ਹਾਂ ਕਿ ਜਿਹੜਾ ਵੀ ਵਿਅਕਤੀ/ਮੁਲਾਜ਼ਮ ਸਰਕਾਰੀ ਖਜ਼ਾਨੇ 'ਚੋਂ ਤਨਖਾਹ ਲੈਂਦਾ ਹੈ, ਉਸ ਦਾ ਬੱਚਾ ਸਰਕਾਰੀ ਸਕੂਲ 'ਚ ਪੜ੍ਹੇਗਾ। ਜਿਸ ਦਿਨ ਇਹੋ ਜਿਹੇ ਫ਼ੈਸਲੇ ਹਕੀਕੀ ਰੂਪ 'ਚ ਲਾਗੂ ਹੋ ਜਾਣਗੇ ਤਾਂ ਸਭ ਤੋਂ ਵੱਧ ਖੁਸ਼ੀ ਅਧਿਆਪਕ ਵਰਗ ਨੂੰ ਹੋਵੇਗੀ ਤੇ ਸਾਰੇ ਅਧਿਆਪਕ ਪਹਿਲ ਦੇ ਆਧਾਰ 'ਤੇ ਆਪਣੇ ਬੱਚੇ ਸਰਕਾਰੀ ਸਕੂਲਾਂ 'ਚ ਲਾਉਣਗੇ। ਜਦੋਂ ਸਿਸਟਮ 'ਤੇ ਕਾਬਜ਼ ਲੋਕ ਹੀ ਸਿੱਖਿਆ ਨੂੰ ਵੇਚਣ ਵੱਟਣ ਵਾਲੀ ਵਸਤ ਸਮਝ ਕੇ ਨੀਤੀਆਂ ਬਣਾਉਣਗੇ ਤਾਂ ਅਧਿਆਪਕ ਵਰਗ ਵੀ ਇਸ ਦੀ ਲਪੇਟ 'ਚ ਆਏਗਾ। ਬਾਕੀ ਲੇਖਕ ਨੇ ਕ੍ਰਿਸ਼ਨ ਕੁਮਾਰ ਵਰਗੇ ਅਫਸਰ ਸਾਹਿਬਾਨ ਦੀ ਗੱਲ ਕੀਤੀ ਹੈ, ਉਹ ਕਾਬਲੇ ਤਾਰੀਫ਼ ਸੀ ਪਰ ਜਦੋਂ ਉਨ੍ਹਾਂ ਵਰਗਾ ਸਿੱਖਿਆ ਸੁਧਾਰਕ ਅਫ਼ਸਰ ਇਸ ਸਿਸਟਮ ਦੇ ਫਿੱਟ ਨਹੀਂ ਬੈਠਦਾ ਤਾਂ ਉਸ ਨੂੰ ਵੀ ਬਦਲ ਦਿੱਤਾ ਜਾਂਦਾ ਹੈ। ਜਦੋਂ ਸਿਸਟਮ ਹੀ ਸੁਧਾਰ ਨਹੀਂ ਚਾਹੁੰਦਾ ਤਾਂ ਸਿਰਫ ਅਧਿਆਪਕ ਵਰਗ 'ਤੇ ਉਂਗਲ ਉਠਾਉਣੀ ਕਿਸੇ ਤਰ੍ਹਾਂ ਜਾਇਜ਼ ਨਹੀਂ।


-ਬਲਵੀਰ ਸਿੰਘ ਬਾਸੀਆਂ
ਮੋ: 8437600371


ਭ੍ਰਿਸ਼ਟਾਚਾਰ ਤੋਂ ਮਿਲੇ ਨਿਜਾਤ

ਪਿਛਲੇ ਦਿਨੀਂ ਸੰਗਰੂਰ ਪੁਲਿਸ ਵਿਭਾਗ ਦੇ ਰਿਸ਼ਵਤ ਮਾਮਲੇ ਬਾਰੇ ਪੜ੍ਹਿਆ, ਹਰ ਵਿਭਾਗ ਵਿਚ ਕੁਝ ਇਕ ਅਫ਼ਸਰਾਂ, ਅਧਿਕਾਰੀਆਂ ਤੇ ਕਰਮਚਾਰੀਆਂ ਨੂੰ ਛੱਡ ਕੇ, ਰਿਸ਼ਵਤ ਨੂੰ ਆਪਣਾ ਹੱਕ ਮੰਨਦੇ ਹਨ। ਅਗਰ ਪੰਜਾਬ ਸਰਕਾਰ ਰਿਸ਼ਵਤ ਤੇ ਭ੍ਰਿਸ਼ਟਾਚਾਰ ਨੂੰ ਕਾਬੂ ਕਰਨ ਵਿਚ ਸਫਲ ਹੋ ਜਾਂਦੀ ਹੈ ਤਾਂ ਬਹੁਤ ਕੁਝ ਥਾਂ ਸਿਰ ਆਪਣੇ ਆਪ ਆ ਜਾਵੇਗਾ। ਜਿਨ੍ਹਾਂ ਵਿਭਾਗਾਂ ਨਾਲ ਆਮ ਬੰਦੇ ਦਾ ਵਾਹ ਵਾਸਤਾ ਪੈਣਾ ਹੀ ਪੈਣਾ ਹੈ, ਉਨ੍ਹਾਂ ਵਿਚ ਮਾਲ ਮਹਿਕਮਾ ਤੇ ਪੁਲਿਸ ਵਿਭਾਗ ਅਹਿਮ ਹਨ। ਇਥੇ ਗੜਬੜੀ ਦੇ ਮੌਕੇ ਵੀ ਵੱਧ ਹਨ, ਜਿਨ੍ਹਾਂ ਲੋਕਾਂ ਨੇ ਗੜਬੜੀ ਕਰਨੀ ਹੁੰਦੀ ਹੈ, ਉਨ੍ਹਾਂ ਨੂੰ ਅਜਿਹੇ ਲੋਕ ਮਿਲ ਹੀ ਜਾਂਦੇ ਹਨ। ਫਿਰ ਸ਼ੁਰੂ ਹੁੰਦਾ ਹੈ ਝੂਠੀਆਂ ਵਸੀਅਤਾਂ ਬਣਾਉਣ ਦਾ ਸਿਲਸਿਲਾ ਝੂਠੇ ਕਾਗਜ਼ਾਤ ਬਣਾਉਣ ਦਾ ਕੰਮ ਤੇ ਸ਼ਰੀਫ ਲੋਕਾਂ ਨੂੰ ਤੰਗ ਕਰਨ, ਉਨ੍ਹਾਂ ਦੀਆਂ ਜ਼ਮੀਨਾਂ ਹਥਿਆਉਣ ਦਾ ਸਿਲਸਿਲਾ। ਪੁਲਿਸ ਵਿਚ ਵੀ ਸ਼ਿਕਾਇਤ ਦਰਜ ਕਰਵਾਉਣੀ ਬੇਹੱਦ ਔਖੀ ਹੁੰਦੀ ਹੈ।
ਅਗਰ ਸਰਕਾਰ ਇਹ ਧਾਰ ਲਵੇ ਕਿ ਜਿਹੜੇ ਰਿਸ਼ਵਤ ਲੈ ਕੇ ਗ਼ਲਤ ਨੂੰ ਠੀਕ ਤੇ ਠੀਕ ਨੂੰ ਗ਼ਲਤ ਕਰਦੇ ਹਨ, ਸਖ਼ਤ ਸਜ਼ਾ ਅਜਿਹੀ ਦੇਵੇ ਕਿ ਦੂਸਰੇ ਅਜਿਹਾ ਕੰਮ ਕਰਨ ਤੋਂ ਪਹਿਲਾਂ, ਇਕ ਵਾਰ ਨਹੀਂ ਸੌ ਵਾਰ ਸੋਚਣ। ਜਿਸ ਨੇ ਅਜਿਹਾ ਕੰਮ ਰਿਸ਼ਵਤ ਦੇ ਕੇ ਕਰਵਾਇਆ ਹੋਵੇ, ਉਸ ਨੂੰ ਵੀ ਸਜ਼ਾ ਦਿੱਤੀ ਜਾਵੇ। ਸਮਾਜ ਵਿਚ ਸਾਰੇ ਚੰਗੇ ਨਹੀਂ ਹੁੰਦੇ ਤੇ ਸਾਰੇ ਬੁਰੇ ਨਹੀਂ ਹੁੰਦੇ, ਪਰ ਇਸ ਵੇਲੇ ਸੰਤੁਲਨ ਵਿਗੜਿਆ ਹੋਇਆ ਹੈ। ਪੰਜਾਬ ਦੇ ਲੋਕ ਸਰਕਾਰ ਤੋਂ ਇਹ ਉਮੀਦ ਲਗਾ ਕੇ ਬੈਠੇ ਹੋਏ ਹਨ ਕਿ ਰਿਸ਼ਵਤਖੋਰੀ ਤੇ ਭ੍ਰਿਸ਼ਟਾਚਾਰ ਤੋਂ ਉਨ੍ਹਾਂ ਨੂੰ ਨਿਜ਼ਾਤ ਮਿਲੇ।
ਪੰਜਾਬ ਦੇ ਲੋਕ ਸਰਕਾਰ ਦੇ ਨਾਲ ਹਨ। ਅਖ਼ਬਾਰਾਂ ਤੇ ਚੈਨਲਾਂ ਨੂੰ ਵੀ ਆਪਣੀ ਭੂਮਿਕਾ ਵਧੀਆ ਤਰੀਕੇ ਨਾਲ ਨਿਭਾਉਣੀ ਚਾਹੀਦੀ ਹੈ। ਲੋਕਾਂ ਦੀ ਆਵਾਜ਼ ਬਣੇ ਮੀਡੀਆ। ਸਰਕਾਰ ਵਾਸਤੇ ਇਹ ਚੁਣੌਤੀ ਹੈ। ਲੋਕਾਂ ਵੱਲੋਂ ਕੀਤੀਆਂ ਜਾਂਦੀਆਂ ਸ਼ਿਕਾਇਤਾਂ 'ਤੇ ਸਰਕਾਰ ਉਨ੍ਹਾਂ ਕਰਮਚਾਰੀਆਂ ਤੇ ਅਧਿਕਾਰੀਆਂ 'ਤੇ ਸ਼ਿਕੰਜਾ ਕੱਸੇ। ਸਾਫ਼ ਸੁਥਰੇ ਸਮਾਜ ਵਾਸਤੇ ਇਹ ਕਦਮ ਸਰਕਾਰ ਵੱਲੋਂ ਪੁੱਟਣੇ ਵਕਤ ਦੀ ਮੰਗ ਹੈ।


-ਪ੍ਰਭਜੋਤ ਕੌਰ ਢਿੱਲੋਂ
ਮੋ: 98150-30221.

19/04/2017

 ਘਟ ਰਹੀ ਹਰਿਆਵਲ
ਅੱਜ ਦੇ ਵਾਤਾਵਰਨ ਦਾ ਦ੍ਰਿਸ਼ ਸਾਡੀ ਗੁਰਬਾਣੀ ਤੋਂ ਬਿਲਕੁੱਲ ਉਲਟ ਜਾਪਦਾ ਹੈ-ਪਵਣੁ ਗੁਰੂ ਪਾਣੀ ਪਿਤਾ ਮਾਤਾ ਧਰਤਿ ਮਹਤੁ॥ ਗੁਰਮਤਿ ਮਰਯਾਦਾ ਦੇ ਉਲਟ ਅਸੀਂ ਆਪਣੀ ਹਵਾ ਨੂੰ ਫੈਕਟਰੀਆਂ, ਵਾਹਨਾਂ ਅਤੇ ਜ਼ਹਿਰੀਲੀਆਂ ਗੈਸਾਂ ਨਾਲ ਪ੍ਰਦੂਸ਼ਿਤ ਕਰ ਰਹੇ ਹਾਂ। ਪਾਣੀ ਨੂੰ ਬੇਹੱਦ ਗੰਧਲਾ ਕਰ ਰਹੇ ਹਾਂ। ਮਿੱਟੀ ਵਿਚਲੇ ਜ਼ਰੂਰੀ ਤੱਤਾਂ ਨੂੰ ਖ਼ਤਮ ਕਰਕੇ ਮਾਰੂ ਰਸਾਇਣਾਂ ਨਾਲ ਭਰਪੂਰ ਬਣਾ ਰਹੇ ਹਾਂ। ਅਜਿਹਾ ਕਰਨ ਦੇ ਬਾਵਜੂਦ ਅਸੀਂ ਬੇਧਿਆਨੇ ਅਤੇ ਬੇਪ੍ਰਵਾਹ ਹੋ ਰਹੇ ਹਾਂ। ਅਸੀਂ ਇਹ ਸਭ ਕਰਨ ਦੇ ਬਾਵਜੂਦ ਅਜਿਹਾ ਹੀ ਕਹਿੰਦੇ ਹਾਂ ਕਿ ਕੁਦਰਤ ਕਿਉਂ ਸਾਡੇ ਉੱਤੇ ਮਿਹਰਬਾਨ ਨਹੀਂ ਰਹੀ? ਤੇਜ਼ੀ ਨਾਲ ਹੋ ਰਿਹਾ ਸ਼ਹਿਰੀਕਰਨ ਅਤੇ ਮਸ਼ੀਨੀਕਰਨ ਸਾਡੀਆਂ ਤਰਜੀਹਾਂ ਤਾਂ ਬਦਲ ਰਿਹਾ ਹੈ, ਪਰ ਸਾਡੀ ਧਰਤੀ ਵਿਚ ਵੀ ਵਿਗਾੜઠਪਾ ਰਿਹਾ ਹੈ। ਸਾਡੀ ਲਾਪਰਵਾਹੀ ਅਤੇ ਬੇਪਰਵਾਹੀ ਕਾਰਨ ਸਮੁੱਚੀ ਹਰਿਆਵਲ ਹੀ ਘਟ ਰਹੀ ਹੈ। ਅਬਾਦੀ ਦੇ ਜ਼ਿਆਦਾ ਵਧਣ ਕਾਰਨ ਜਨਸੰਖਿਆ ਵਿਸਫੋਟ ਹੋਣ ਦਾ ਡਰ ਵਧ ਰਿਹਾ ਹੈ। ਦਰੱਖਤਾਂ ਦੀ ਕਟਾਈ ਕਾਰਨ ਹਰਿਆਵਲ ਅਤੇ ਆਕਸੀਜਨ ਘਟ ਰਹੀ ਹੈ। ਇਸ ਦੇ ਉਲਟ ਪ੍ਰਦੂਸ਼ਣ ਅਤੇ ਕਾਰਬਨ ਡਾਈਆਕਸਾਈਡ ਦੀ ਮਾਤਰਾ ਵਧ ਰਹੀ ਹੈ।
ਇਹ ਮਸਲਾ ਕੌਮਾਂਤਰੀ ਪੱਧਰ 'ਤੇ ਵੀ ਏਨਾ ਗੰਭੀਰ ਹੋ ਚੁੱਕਾ ਹੈ ਕਿ ਇਸ ਸਬੰਧੀ ਲੋਕਾਂ ਵਿਚ ਚੇਤਨਾ ਪੈਦਾ ਕੀਤੀ ਜਾ ਰਹੀ ਹੈ। 1972 ਵਿਚ ਸੰਯੁਕਤ ਰਾਸ਼ਟਰ ਸੰਘ ਦੁਆਰਾ ਸਟਾਕਹੋਮ ਵਿਚ ਵਾਤਾਵਰਨ ਸੰਭਾਲઠਲਈ ਕਾਨਫ਼ਰੰਸ ਵੀ ਕੀਤੀ ਗਈ ਸੀ। ਇਸ ਕਰਕੇ 5 ਜੂਨ ਨੂੰ ਵਾਤਾਵਰਨ ਦਿਵਸ ਮਨਾਇਆ ਜਾਂਦਾ ਹੈ।
ਅੰਤ ਸਾਨੂੰ ਇਹ ਹੀ ਉਪਰਾਲੇ ਕਰਨੇ ਚਾਹੀਦੇ ਹਨ, ਜਿਸ ਨਾਲ ਬਦਲਦੀ ਹਰਿਆਵਲ ਦੇ ਦ੍ਰਿਸ਼ ਨੂੰ ਮੁੜ ਪਹਿਲਾਂ ਵਾਂਗ ਖੁਸ਼ਹਾਲ ਅਤੇ ਜਿਊਣਯੋਗ ਕੀਤਾ ਜਾ ਸਕੇ। ਸਾਨੂੰ ਸਾਰਿਆਂ ਨੂੰ ਸਿਹਤਮੰਦ, ਸੁਚੇਤ ਅਤੇ ਉਸਾਰੂ ਯਤਨਾਂ ਦੁਆਰਾ ਆਪਣੀ ਹਰਿਆਵਲ ਨੂੰ ਵਧਾਉਣ ਵਿਚ ਯੋਗਦਾਨ ਪਾਉਣਾ ਚਾਹੀਦਾ ਹੈ।


-ਹੋਮਪ੍ਰੀਤ ਕੌਰ,
ਗੁਰੂ ਨਾਨਕ ਕਾਲਜ ਫਾਰ ਗਰਲਜ਼, ਸ੍ਰੀ ਮੁਕਤਸਰ ਸਾਹਿਬ।


ਮਾਇਕ ਮਦਦ ਦੀ ਲੋੜ
ਪਿਛਲੇ ਦਿਨੀਂ 'ਅਜੀਤ' ਵਿਚ ਪ੍ਰਕਾਸ਼ਿਤ ਆਜ਼ਾਦੀ ਵਾਸਤੇ ਚੱਲ ਰਹੇ ਜ਼ੋਰਦਾਰ ਕੌਮੀ ਸੰਘਰਸ਼ ਦੌਰਾਨ ਵਿਦੇਸ਼ੀ ਅੰਗਰੇਜ਼ੀ ਸਰਕਾਰ ਵੱਲੋਂ ਵਰਤਾਏ ਗਏ ਘੋਰ ਜ਼ੁਲਮੀ ਸਾਕੇ ਦੀ ਰਿਪੋਰਟ ਨੇ ਜਿਥੇ ਅੱਖਾਂ ਨਮ ਕੀਤੀਆਂ, ਉਥੇ ਦੋ ਸ਼ਹੀਦਾਂ ਦੀਆਂ ਸੁਪਤਨੀਆਂ ਇਸ ਕਾਂਡ 'ਚ ਸਰਕਾਰ ਵੱਲੋਂ ਸ਼ਹੀਦਾਂ ਦੇ ਵਾਰਸਾਂ ਨੂੰ ਐਲਾਨੀ ਗਈ ਸਹਾਇਤਾ ਰਾਸ਼ੀ ਨੂੰ ਠੁਕਰਾਉਣ ਵਾਲੀਆਂ ਔਰਤਾਂ ਬੀਬੀ ਅਤਰ ਕੌਰ ਅਤੇ ਬੀਬੀ ਰਤਨ ਦੇਈ ਦੇ ਕੌਮੀ ਗੌਰਵ ਨੂੰ ਬਰਕਰਾਰ ਰੱਖਣ ਹਿਤ ਸਿਦਕ ਤੇ ਅਥਾਹ ਸੰਘਰਸ਼ ਬਾਰੇ ਪੜ੍ਹ ਕੇ ਮੈਨੂੰ ਹੀ ਨਹੀਂ, ਸਗੋਂ ਸਭਨਾਂ ਪਾਠਕਾਂ ਨੂੰ ਭਰਪੂਰ ਮਾਣ ਹੋਣਾ ਸੁਭਾਵਿਕ ਹੈ ਅਜਿਹੇ ਪਰਿਵਾਰਾਂ ਦੇ ਮੌਜੂਦਾ ਮਜਬੂਰ ਜੀਆਂ ਦੀ ਉਨ੍ਹਾਂ ਦਾ ਸਵੈਮਾਣ ਕਾਇਮ ਰੱਖਦਿਆਂ ਮਾਇਕ ਤੇ ਹੋਰ ਲੋੜੀਂਦੀ ਮਦਦ ਕਰਨਾ ਮੌਜੂਦਾ ਸਰਕਾਰ ਦਾ ਕੌਮੀ ਫ਼ਰਜ਼ ਹੈ। ਅਣਖੀਲੇ ਲੋਕ ਖ਼ੁਦ ਸਾਡੇ ਅੱਗੇ ਕਦੇ ਵੀ ਮਦਦ ਲਈ ਹੱਥ ਨਹੀਂ ਫੈਲਾਉਣਗੇ।


-ਸੁਰਿੰਦਰ ਸਿੰਘ ਨਿਮਾਣਾ
ਅੰਮ੍ਰਿਤਸਰ।

18/04/2017

 ਧਰਤੀ ਨਾਲ ਧੱਕੇਸ਼ਾਹੀ ਬੰਦ ਕਰੋ
ਧਰਤੀ ਦਇਆਵਾਨ ਹੈ, ਫ਼ਸਲਾਂ ਤੇ ਨਸਲਾਂ ਲਈ ਵਰਦਾਨ ਹੈ। ਭਵਿੱਖ ਲਈ ਧਰਤੀ ਦੀ ਸਿਹਤ ਤੇ ਸੁੰਦਰਤਾ ਲਈ ਚਿੰਤਾ ਤੇ ਚਿੰਤਨ ਦੀ ਲੋੜ ਹੈ। ਸਹਿਜ ਤੇ ਧੀਰਜ ਨਾਲ ਧਰਤੀ ਦੀ ਤਪਸ਼ ਨੂੰ ਇਸ 'ਤੇ ਵਧ ਰਹੇ ਭਾਰ ਨੂੰ ਘਟਾਓ। ਧਰਤੀ ਕਰਕੇ ਹੀ ਅਸੀਂ ਧਨੀ ਹਾਂ। ਧਰਤੀ ਸਾਨੂੰ ਸਿਹਤ ਤੇ ਸ਼ਕਤੀ ਦਿੰਦੀ ਹੈ। ਸਾਡਾ ਜੀਵਨ, ਪ੍ਰਕਿਰਤੀ ਕਰਕੇ ਹੀ ਹੈ। ਜਿਥੇ ਜੀਵਨ ਜਿਊਂਦਾ ਹੋਵੇ, ਜਾਗਦਾ ਹੋਵੇ, ਉਗਦਾ ਹੋਵੇ, ਉਥੇ ਅੱਗਾਂ ਦਾ ਕੀ ਕੰਮ, ਧਰਤੀ ਮਾਂ ਤਾਂ ਧੀਆਂ ਵਰਗੀਆਂ ਫ਼ਸਲਾਂ ਨੂੰ ਜਨਮ ਦਿੰਦੀ ਹੈ। ਉਸ ਦੀ ਕੁੱਖ ਨੂੰ ਬਾਂਝ ਨਾ ਕਰੋ। ਧਰਤੀ ਦੀ ਚਾਦਰ 'ਤੇ ਕੋਈ ਧੱਬਾ ਨਾ ਲਾਓ। ਸਗੋਂ ਇਸ ਨੂੰ ਰੁੱਖਾਂ ਨਾਲ, ਫੁੱਲਾਂ ਨਾਲ ਫਲਾਂ ਕੁਦਰਤੀ ਵਸਤਾਂ ਨਾਲ ਸਜਾਓ, ਚਮਕਾਓ ਤੇ ਸ਼ਿੰਗਾਰੋ, ਫਿਰ ਦੇਖੋ ਨਤੀਜੇ ਕਿੰਨੇ ਵਧੀਆ ਹੋਣਗੇ। ਨਕਲੀ ਤੇ ਬਨਾਉਟੀਪਣ ਤੋਂ ਦੂਰੀਆਂ ਕਰਕੇ, ਕਾਦਰ ਦੀ ਕੁਦਰਤ ਨਾਲ ਸਾਂਝਾਂ ਪਾਓ। ਪ੍ਰਕਿਰਤੀ ਨਾਲ ਪਾਕਿ ਮੁਹੱਬਤਾਂ ਪਾ ਕੇ ਧਰਤੀ ਨਾਲ ਹੁੰਦੀ ਧੱਕੇਸ਼ਾਹੀ ਨੂੰ ਬੰਦ ਕਰੋ। ਅੱਜ ਲਾਈ ਅੱਗ ਨਾਲ ਸਾਡਾ ਅੱਗਾ ਸੁਆਹ ਬਣ ਜਾਵੇਗਾ। ਕੁਦਰਤ ਦੀ ਰਜ਼ਾ ਵਿਚ ਰਹਿਣ ਵਾਲੇ ਜੀਵ-ਜੰਤੂਆਂ ਦੀ ਮਿੱਤਰਤਾ ਨੂੰ ਪਛਾਣੋ। ਧਰਤੀ ਦੀਆਂ ਸ਼ਕਤੀਆਂ ਦੀ ਕਿਰਪਾ ਦਾ ਅਨੰਦ ਮਾਣੋ। ਅਮੀਨ!

-ਸਨੇਹਇੰਦਰ ਮੀਲੂ ਫਰੌਰ
ਮੋ: 93163-17356.

ਅਖ਼ਬਾਰਾਂ ਤੇ ਕਿਤਾਬਾਂ ਲਾਜ਼ਮੀ ਪੜ੍ਹੋ
ਪਿਛਲੇ ਦਿਨੀਂ ਮੈਗਜ਼ੀਨ ਅੰਕ ਵਿਚ ਡਾ: ਹਰਨੇਕ ਸਿੰਘ ਕੋਮਲ ਦਾ ਲੇਖ 'ਪੁਸਤਕ ਪ੍ਰੇਮ ਤੋਂ ਸੱਖਣੇ ਹੋ ਰਹੇ ਲੋਕ' ਪੜ੍ਹਨਯੋਗ ਸੀ। ਜ਼ਿਆਦਾਤਰ ਲੋਕ ਸਕੂਲ ਜਾਂ ਕਾਲਜ ਪੜ੍ਹਨ ਤੋਂ ਬਾਅਦ ਪੁਸਤਕ ਪੜ੍ਹਨੀ ਹੀ ਬੰਦ ਕਰ ਦਿੰਦੇ ਹਨ। ਕਈ ਲੋਕ ਏਨੇ ਆਲਸੀ ਹੁੰਦੇ ਹਨ ਕਿ ਉਹ ਅਖ਼ਬਾਰ ਵੀ ਨਹੀਂ ਪੜ੍ਹਦੇ। ਢਾਣੀ ਵਿਚ ਬੈਠੇ ਲੋਕ ਦੂਜੇ ਨੂੰ ਕਹਿਣਗੇ ਖ਼ਬਰ ਪੜ੍ਹ ਕੇ ਸੁਣਾ ਦੇ। ਬਹੁਤੇ ਲੋਕਾਂ ਨੂੰ ਜਦੋਂ ਪੁੱਛਦੇ ਹਾਂ ਕਿ ਤੁਸੀਂ ਘਰ ਕੋਈ ਅਖ਼ਬਾਰ ਲਗਵਾਇਆ ਹੈ ਤਾਂ ਜਵਾਬ ਦੇਣਗੇ ਹੁਣ ਤੇ ਐਨੇ ਟੀ.ਵੀ. ਚੈਨਲ ਹਨ, ਬਸ ਉਸ ਤੋਂ ਖ਼ਬਰਾਂ ਦੇਖ ਲਈ ਦੀਆਂ ਹਨ। ਅਖ਼ਬਾਰ ਤੇ ਪੁਸਤਕ ਬਗੈਰ ਮਨੁੱਖ ਦਾ ਜੀਵਨ ਅਧੂਰਾ ਹੈ। ਅਸੀਂ ਕੋਈ ਵੀ ਕੰਮ ਸਿੱਖਣਾ ਹੋਵੇ ਤਾਂ ਵੀ ਪੁਸਤਕ ਦਾ ਸਹਾਰਾ ਲੈਂਦੇ ਹਾਂ। ਜੋ ਲੋਕ ਪੁਸਤਕ ਜਾਂ ਅਖ਼ਬਾਰ ਨਹੀਂ ਪੜ੍ਹਦੇ, ਉਹ ਸਮਾਜ ਵਿਚ ਕਾਫੀ ਪਛੜ ਜਾਂਦੇ ਹਨ। ਜ਼ਿਆਦਾ ਤੋਂ ਜ਼ਿਆਦਾ ਲਾਇਬ੍ਰੇਰੀਆਂ ਖੋਲ੍ਹਣ ਦਾ ਪ੍ਰਚਾਰ ਤੇ ਸਹਾਇਤਾ ਵੀ ਕਰਨੀ ਚਾਹੀਦੀ ਹੈ। ਪੜ੍ਹਨਾ ਹੀ ਜ਼ਿੰਦਗੀ ਹੈ।

-ਹਰਜਿੰਦਰਪਾਲ ਸਿੰਘ
ਜਵੱਦੀ ਕਲਾਂ, ਲੁਧਿਆਣਾ।

ਈ.ਡੀ. ਦੀ ਕਾਰਵਾਈ
ਪੰਜਾਬ ਵਿਚ ਨਸ਼ਿਆਂ ਦਾ ਜੋ ਬੋਲਬਾਲਾ ਹੈ, ਉਸ ਦਾ ਰੌਲਾ-ਰੱਪਾ ਤਾਂ ਲੰਮੇ ਸਮੇਂ ਤੋਂ ਪੈ ਰਿਹਾ ਸੀ ਪਰ ਸਿਆਸੀ ਕਾਰਨਾਂ ਕਰਕੇ ਸ਼ਾਇਦ ਇਸ ਨੂੰ ਬਹੁਤੇ ਮੰਨਦੇ ਨਹੀਂ ਸਨ। ਹਾਲਾਂ ਕਿ ਨਸ਼ਿਆਂ ਦੇ ਸਬੰਧ ਵਿਚ ਜੋ ਕੁਝ ਪੰਜਾਬ ਦੀ ਧਰਤੀ 'ਤੇ ਵਾਪਰ ਰਿਹਾ ਹੈ, ਉਹ ਕਿਸੇ ਤੋਂ ਲੁਕਿਆ-ਛਿਪਿਆ ਵੀ ਨਹੀਂ ਹੈ। ਅਨੇਕਾਂ ਜਵਾਨੀਆਂ, ਅਨੇਕਾਂ ਘਰ ਨਸ਼ਾ ਰੂਪੀ ਦੈਂਤ ਨੇ ਤਬਾਹ ਕਰ ਦਿੱਤੇ ਹਨ ਪਰ ਕਾਰਵਾਈ ਬਹੁਤ ਹੌਲੀ ਜਾਂ ਗ਼ਲਤ ਹੋਈ। ਪਿਛਲੇ ਦਿਨੀਂ ਪੰਜਾਬ ਦੇ ਈ.ਡੀ. ਵਿਭਾਗ ਨੇ 62 ਕਰੋੜ ਦੀ ਜਾਇਦਾਦ ਜ਼ਬਤ ਉਨ੍ਹਾਂ ਦੀ ਕੀਤੀ ਹੈ, ਜਿਨ੍ਹਾਂ ਦਾ ਨਾਂਅ ਨਸ਼ੇ ਦੇ ਕਾਰੋਬਾਰ ਨਾਲ ਜੁੜਦਾ ਸੀ। ਜੇ ਹੁਣ ਇਸ ਮਸਲੇ 'ਤੇ ਈ.ਡੀ. ਨੇ ਆਜ਼ਾਦ ਹੋ ਕੇ ਕਾਰਵਾਈ ਕੀਤੀ ਹੈ ਤਾਂ ਅਸੀਂ ਤਹਿ ਦਿਲੋਂ ਇਸ ਦਾ ਸਵਾਗਤ ਕਰਦੇ ਹਾਂ ਤੇ ਉਨ੍ਹਾਂ ਦੇ ਸ਼ੁਕਰਗੁਜ਼ਾਰ ਵੀ ਹਾਂ ਤਾਂ ਕਿ ਇਸ ਨਸ਼ੇ ਕਾਰਨ ਹੋਣ ਵਾਲੇ ਹੋਰ ਨੁਕਸਾਨ ਨੂੰ ਠੱਲ੍ਹ ਪਾਈ ਜਾ ਸਕੇ। ਸ਼ਾਇਦ ਸਰਕਾਰ ਦੀ ਸਖ਼ਤੀ ਨਾਲ ਨਸ਼ਾ ਰੁਕ ਸਕੇ ਤੇ ਪੰਜਾਬ ਦੀ ਜਵਾਨੀ ਬਚਾਈ ਜਾ ਸਕੇ ਤੇ ਪੰਜਾਬ ਬਚਦਾ ਰਹਿ ਕੇ ਵਸਦਾ ਰਹਿ ਸਕੇ।

-ਬਲਬੀਰ ਸਿੰਘ ਬੱਬੀ
ਪਿੰਡ ਤੱਖਰਾਂ, ਲੁਧਿਆਣਾ।

14/04/2017

 ਭਾਸ਼ਾ ਦਾ ਸਤਿਕਾਰ ਹੋਵੇ
ਪੰਜਾਬ ਵਿਚ ਬਣੀ ਨਵੀਂ ਸਰਕਾਰ 'ਚ ਪੰਜਾਬ ਦੀ ਸਿੱਖਿਆ ਤੇ ਭਾਸ਼ਾ ਬਾਰੇ ਰਾਜ ਮੰਤਰੀ ਸ੍ਰੀਮਤੀ ਅਰੁਣਾ ਚੌਧਰੀ ਦਾ ਅਸੀਂ ਦਿਲੋਂ ਸਤਿਕਾਰ ਕਰਦੇ ਹਾਂ। ਪਰ ਉਦੋਂ ਦੁੱਖ ਹੋਇਆ ਜਦੋਂ ਉਨ੍ਹਾਂ ਨੇ ਵਜ਼ਾਰਤੀ ਅਹੁਦੇ ਦੀ ਸਹੁੰ ਹਿੰਦੀ ਭਾਸ਼ਾ 'ਚ ਅਤੇ ਵਿਧਾਨ ਸਭਾ 'ਚ ਵਿਧਾਇਕਾ ਵਜੋਂ ਸਹੁੰ ਅੰਗਰੇਜ਼ੀ ਵਿਚ ਚੁੱਕੀ। ਸ਼ਾਇਦ ਅਜਿਹਾ ਕਰਕੇ ਉਨ੍ਹਾਂ ਨੇ ਆਪਣੀ ਸ਼ਾਨ ਤੇ ਵਡੱਪਣ ਸਮਝਿਆ ਹੋਵੇਗਾ। ਸਵਾਲ ਇਹ ਉੱਠਦਾ ਹੈ ਕਿ ਵੋਟਾਂ ਤਾਂ ਤੁਸੀਂ ਪੰਜਾਬੀਆਂ ਕੋਲੋਂ ਪੰਜਾਬੀ ਭਾਸ਼ਾ 'ਚ ਮੰਗੀਆਂ ਪਰ ਚੁਣੇ ਜਾਣ ਤੋਂ ਤੁਰੰਤ ਬਾਅਦ ਪੰਜਾਬੀ ਭਾਸ਼ਾ ਤੋਂ ਬੇਮੁਖ ਕਿਵੇਂ ਹੋ ਗਏ? ਸਾਨੂੰ ਇਹ ਯਾਦ ਰੱਖਣਾ ਚਾਹੀਦਾ ਹੈ ਕਿ ਪੰਜਾਬੀ ਸੂਬਾ ਭਾਸ਼ਾ ਦੇ ਆਧਾਰ 'ਤੇ ਪੰਜਾਬੀਆਂ ਦੇ ਵੱਡੇ ਸੰਘਰਸ਼ਾਂ ਤੋਂ ਬਾਅਦ ਹੋਂਦ ਵਿਚ ਆਇਆ ਸੀ। ਇਸੇ ਤਰ੍ਹਾਂ ਪਿਛਲੇ ਲੰਮੇ ਸਮੇਂ ਤੋਂ ਪੰਜਾਬੀ ਲੇਖਕ ਪੰਜਾਬੀ ਭਾਸ਼ਾ ਨੂੰ ਸੂਬੇ ਵਿਚ ਰਾਜ ਭਾਸ਼ਾ ਦਾ ਦਰਜਾ ਦਿਵਾਉਣ ਲਈ ਜੱਦੋ-ਜਹਿਦ ਕਰਦੇ ਆ ਰਹੇ ਹਨ। ਸਾਨੂੰ ਪੰਜਾਬੀ ਹੋਣ ਤੇ ਪੰਜਾਬੀ ਬੋਲਣ 'ਤੇ ਮਾਣ ਮਹਿਸੂਸ ਹੋਣਾ ਚਾਹੀਦਾ ਹੈ। ਪੰਜਾਬੀ ਭਾਸ਼ਾ ਦੀ ਦੁਰਦਸ਼ਾ ਨੂੰ ਸਵੀਕਾਰਿਆ ਨਹੀਂ ਜਾ ਸਕਦਾ। ਅੱਜ ਪੰਜਾਬ ਸਰਕਾਰ ਤੋਂ ਪੰਜਾਬੀ ਹਿਤੈਸ਼ੀਆਂ ਦੀ ਪੁਰਜ਼ੋਰ ਮੰਗ ਹੈ ਕਿ ਪੰਜਾਬੀ ਭਾਸ਼ਾ ਦੇ ਸਤਿਕਾਰ ਨੂੰ ਹਰ ਹਾਲ ਕਾਇਮ ਰੱਖਿਆ ਜਾਵੇ।


-ਬੰਤ ਸਿੰਘ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।


ਮਨੁੱਖੀ ਵਿਹਾਰ
ਇਸ ਵਿਚ ਕੋਈ ਸ਼ੱਕ ਨਹੀਂ ਕਿ ਪੰਜਾਬੀਆਂ ਨੂੰ ਸਾਰੇ ਸੰਸਾਰ ਵਿਚ ਇਨ੍ਹਾਂ ਦੇ ਖੁੱਲ੍ਹੇ-ਡੁੱਲ੍ਹੇ ਸੁਭਾਅ ਅਤੇ ਮਿਲਣਸਾਰ ਵਿਹਾਰ ਕਰਕੇ ਜਾਣਿਆ ਜਾਂਦਾ ਹੈ। ਪੰਜਾਬੀਆਂ ਦਾ ਖੁੱਲ੍ਹੇ-ਡੁੱਲ੍ਹੇ ਅਤੇ ਮਿਲਣਸਾਰ ਸੁਭਾਅ ਵਾਲੀ ਖਾਸੀਅਤ ਹੀ ਇਨ੍ਹਾਂ ਨੂੰ ਹੋਰਨਾਂ ਪ੍ਰਾਂਤਾਂ ਦੇ ਲੋਕਾਂ ਨਾਲੋਂ ਅਲੱਗ ਕਰਦੀ ਆਈ ਹੈ, ਪਰ ਮੌਜੂਦਾ ਸਮੇਂ ਦੀ ਜੇ ਗੱਲ ਕਰੀਏ ਤਾ ਰੋਜ਼ਾਨਾ ਜ਼ਿੰਦਗੀ ਵਿਚ ਪੰਜਾਬੀਆਂ ਦਾ ਵਿਹਾਰ ਲੜਾਕੂ ਬਣ ਚੁੱਕਾ ਹੈ। ਸਹਿਣਸ਼ੀਲਤਾ ਖ਼ਤਮ ਹੋ ਚੁੱਕੀ ਹੈ, ਇਕ-ਦੂਜੇ ਪ੍ਰਤੀ ਆਦਰ ਸਤਿਕਾਰ ਦੀ ਭਾਵਨਾ ਵੀ ਦਮ ਤੋੜਦੀ ਜਾਪਦੀ ਹੈ। ਜਦੋਂ ਧਾਰਮਿਕ ਸਮਾਗਮ ਹੁੰਦੇ ਹਨ ਤਾਂ ਉੱਥੇ ਸੇਵਾ ਕਰਨ ਵਾਲੇ ਪੰਜਾਬੀਆਂ ਦਾ ਸੁਭਾਅ ਬੇਹੱਦ ਨਿਮਰਤਾ, ਸਹਿਣਸ਼ੀਲਤਾ ਅਤੇ ਸਤਿਕਾਰ ਭਾਵਨਾ ਨਾਲ ਭਰਿਆ ਹੁੰਦਾ ਹੈ। ਇਸ ਮੌਕੇ ਇਨ੍ਹਾਂ ਨੂੰ ਦੇਖ ਕੇ ਇੰਜ ਪ੍ਰਤੀਤ ਹੁੰਦਾ ਹੈ ਕਿ ਜਿਵੇਂ ਇਨ੍ਹਾਂ ਤੋਂ ਚੰਗੇ ਵਿਹਾਰ ਵਾਲਾ ਵਿਅਕਤੀ ਹੋ ਹੀ ਨਹੀਂ ਸਕਦਾ, ਪਰ ਜੇਕਰ ਇਨ੍ਹਾਂ ਹੀ ਪੰਜਾਬੀਆਂ ਦਾ ਵਿਹਾਰ ਜਨਤਕ ਸਥਾਨਾਂ, ਟ੍ਰੈਫਿਕ ਵਾਲੇ ਸਥਾਨਾਂ, ਬੱਤੀਆਂ ਵਾਲੇ ਚੌਕਾਂ, ਪਾਰਕਿੰਗ ਵਾਲੇ ਸਥਾਨਾਂ ਆਦਿ ਉੱਤੇ ਦੇਖਿਆ ਜਾਵੇ ਤਾਂ ਇਸ ਮੌਕੇ ਸਹਿਣਸ਼ੀਲਤਾ, ਬੋਲੀ, ਨਿਮਰਤਾ, ਲਿਆਕਤ ਆਦਿ ਸਭ ਕੁਝ ਮਨਫ਼ੀ ਹੋ ਚੁੱਕਾ ਨਜ਼ਰ ਆਉਂਦਾ ਹੈ। ਇਕ ਮਿੰਟ ਵਿਚ ਹੀ ਨਿੱਕੀ ਜਿਹੀ ਗੱਲ 'ਤੇ ਝਗੜੇ ਦਾ ਵਾਤਾਵਰਨ ਪੈਦਾ ਕਰ ਲਿਆ ਜਾਂਦਾ ਹੈ। ਕਿੰਨਾ ਚੰਗਾ ਹੋਵੇ ਜੇਕਰ ਧਾਰਮਿਕ ਸਥਾਨਾਂ ਦੇ ਨਾਲ-ਨਾਲ ਜਨਤਕ ਸਥਾਨਾਂ ਅਤੇ ਰੋਜ਼ਾਨਾ ਜ਼ਿੰਦਗੀ ਵਿਚ ਵੀ ਪੰਜਾਬੀਆਂ ਦਾ ਵਿਹਾਰ ਏਨਾ ਚੰਗਾ ਬਣ ਜਾਵੇ ਕਿ ਉਨ੍ਹਾਂ ਸਥਾਨਾਂ 'ਤੇ ਮੌਜੂਦ ਬੱਚੇ ਵੀ ਕੁਝ ਨਵਾਂ ਅਤੇ ਵਧੀਆ ਸਿੱਖਣ ਅਤੇ ਸਾਡੇ ਸਮਾਜ ਲਈ ਚੰਗੀ ਉਦਾਹਰਣ ਬਣ ਜਾਣ।


-ਕੁਲਵੰਤ ਸਿੰਘ ਲੋਹਗੜ੍ਹ
ਜ਼ਿਲ੍ਹਾ ਬਰਨਾਲਾ।

13/04/2017

 ਬੱਚਿਆਂ ਦਾ ਬਚਪਨ ਗਿਆ
ਪਿਛਲੇ ਦਿਨੀਂ ਲਖਵਿੰਦਰ ਸਿੰਘ ਰਈਆ ਦਾ ਉਸਾਰੂ ਲੇਖ 'ਲੋੜ ਹੈ ਸਿੱਖਿਆ ਰੂਪੀ ਅੰਗੂਰ ਨੂੰ ਮਿੱਠਾ ਕਰਨ ਦੀ' ਸਿਰਲੇਖ ਹੇਠ ਪੜ੍ਹਿਆ। ਇਹ ਗੱਲ ਚਿੱਟੇ ਦਿਨ ਵਾਂਗ ਸਾਫ਼ ਹੈ ਕਿ ਬੱਚਿਆਂ ਦਾ ਬਚਪਨ ਪੜ੍ਹਾਈ ਨਾਂਅ ਦੇ ਲਫ਼ਜ਼ ਨੇ ਨਿਗਲ ਲਿਆ ਹੈ। ਅਜੇ ਬੱਚਾ 2+ ਦਾ ਹੁੰਦਾ ਹੀ ਹੈ ਕਿ ਕੰਪੀਟੀਸ਼ਨ ਦੀ ਦੌੜ ਦੌੜਦਾ ਸਮਾਜ ਉਨ੍ਹਾਂ ਨੂੰ ਸਕੂਲ ਵਿਚ ਭਰਤੀ ਕਰਵਾ ਦਿੰਦਾ ਹੈ। ਉਨ੍ਹਾਂ ਦੀਆਂ ਕਿਤਾਬਾਂ ਤੇ ਬੈਗ ਦਾ ਭਾਰ ਉਨ੍ਹਾਂ ਦੇ ਖ਼ੁਦ ਦੇ ਭਾਰ ਤੋਂ ਵੱਧ ਹੁੰਦਾ ਹੈ। ਸਕੂਲ ਸਮਾਂ ਪੜ੍ਹਾਈ, ਟਿਊਸ਼ਨ ਪੜ੍ਹਾਈ ਫਿਰ ਰਹਿੰਦੀ ਕਸਰ ਘਰ ਆ ਕੇ ਫਿਰ ਪੜ੍ਹਾਈ। ਬੇਸ਼ੱਕ ਤਰੱਕੀ ਲਈ ਉੱਚ ਵਿੱਦਿਆ ਬਹੁਤ ਜ਼ਰੂਰੀ ਹੈ ਪਰ ਅਜੋਕੇ ਸਮੇਂ ਵਿਚ ਬੱਚਾ ਜਿਥੇ ਸਰੀਰਕ ਤੌਰ 'ਤੇ ਕਮਜ਼ੋਰ ਹੋ ਰਿਹਾ ਹੈ, ਉਥੇ ਮਾਨਸਿਕ ਤੌਰ 'ਤੇ ਵੀ ਉਸ 'ਤੇ ਮਾੜਾ ਪ੍ਰਭਾਵ ਪੈ ਰਿਹਾ ਹੈ। ਸਰਕਾਰਾਂ ਨੂੰ ਬੱਚਿਆਂ ਦੇ ਵਿਕਾਸ ਹਿਤ ਉਸਾਰੂ ਨੀਤੀਆਂ ਅਪਣਾਉਣੀਆਂ ਚਾਹੀਦੀਆਂ ਹਨ। ਲੇਖ ਉਸਾਰੂ ਤੇ ਗਿਆਨਬੱਧ ਹੋ ਨਿਬੜਿਆ।


-ਮਨਜੀਤ ਸਿੰਘ ਭਾਮ
ਸੂਬਾ ਪ੍ਰਧਾਨ, ਮਨੁੱਖੀ ਅਧਿਕਾਰ ਸੰਗਠਨ, ਪੰਜਾਬ।


ਨਿੱਜੀ ਸਕੂਲਾਂ ਵੱਲੋਂ ਲੁੱਟ
ਸਕੂਲਾਂ ਵਿਚ ਨਵੀਆਂ ਜਮਾਤਾਂ ਸ਼ੁਰੂ ਹੋ ਗਈਆਂ ਹਨ। ਮਿਹਨਤੀ ਲੋਕਾਂ ਵਿਚ ਆਪਣੇ ਬੱਚਿਆਂ ਦੇ ਦਾਖ਼ਲੇ, ਫੀਸਾਂ, ਕਿਤਾਬਾਂ, ਵਰਦੀਆਂ ਆਦਿ ਲਈ ਫ਼ਿਕਰ ਬਣਿਆ ਹੋਇਆ ਹੈ। ਅੱਜ ਹਰ ਕੋਈ ਚਾਹੁੰਦਾ ਹੈ ਕਿ ਮੇਰਾ ਬੱਚਾ ਚੰਗੇ ਸਕੂਲ ਵਿਚ ਚੰਗੀ ਸਿੱਖਿਆ ਹਾਸਲ ਕਰੇ। ਵਿੱਦਿਆ ਦੇ ਨਾਂਅ 'ਤੇ ਨਿੱਜੀ ਸਕੂਲਾਂ ਨੇ ਲੁੱਟ ਮਚਾ ਰੱਖੀ ਹੈ। 50 ਫ਼ੀਸਦੀ ਵਰਦੀਆਂ, ਕਿਤਾਬਾਂ ਆਦਿ 'ਚੋਂ ਕਮਿਸ਼ਨ, ਸਾਰਾ ਸਾਲ ਫੰਕਸ਼ਨਾਂ ਦੇ ਨਾਂਅ 'ਤੇ ਲੁੱਟ। ਹੱਦੋਂ ਵੱਧ ਪੇਪਰਾਂ ਦੇ ਪੈਸੇ। ਹੈ ਕੋਈ ਇਨ੍ਹਾਂ ਨੂੰ ਪੁੱਛਣ ਵਾਲਾ? ਸਰਕਾਰ ਚੁੱਪ ਧਾਰੀ ਬੈਠੀ ਹੈ। ਸਾਰਾ ਸਾਲ ਬੱਚੇ ਟਿਊਸ਼ਨਾਂ ਪੜ੍ਹਦੇ ਨੇ। ਖੇਡਣ ਮੱਲ੍ਹਣ ਲਈ ਬੱਚਿਆਂ ਕੋਲ ਸਮਾਂ ਨਹੀਂ ਰਿਹਾ। ਸਰੀਰਕ ਵਿਕਾਸ ਕੀ ਹੋਵੇ? ਬੱਚੇ ਤਾਂ ਉਸੇ ਸਕੂਲ 'ਚ ਹੀ ਅਗਲੀਆਂ ਜਮਾਤਾਂ ਵਿਚ ਹੋਏ ਹਨ ਫਿਰ ਦਾਖ਼ਲਾ ਕਾਹਦਾ? ਦੋ ਮਹੀਨੇ ਬੱਚਿਆਂ ਨੂੰ ਛੁੱਟੀਆਂ, ਵੈਨ ਚਾਰਜਿਜ਼ ਪੂਰੇ। ਵਿੱਦਿਆ ਦੇ ਨਾਂਅ 'ਤੇ ਲੁੱਟ ਬੰਦ ਹੋਣੀ ਚਾਹੀਦੀ ਹੈ। ਸਰਕਾਰ ਨੂੰ ਵੀ ਚਾਹੀਦਾ ਹੈ ਕਿ ਸਰਕਾਰੀ ਸਕੂਲਾਂ ਦੀ ਦਸ਼ਾ ਸੁਧਾਰਨ ਦਾ ਯਤਨ ਕਰੇ।

-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।

ਭ੍ਰਿਸ਼ਟਾਚਾਰ ਅਤੇ ਸਮਾਜ
ਅਜੋਕੇ ਸਮੇਂ ਸਾਡਾ ਸਮਾਜ ਅਨੇਕਾਂ ਬੁਰਾਈਆਂ, ਕੁਰੀਤੀਆਂ, ਜਿਵੇਂ ਦਾਜ, ਨਸ਼ੇ, ਅਸ਼ਲੀਲਤਾ ਤੇ ਮਾਦਾ ਭਰੂਣ ਹੱਤਿਆ ਆਦਿ ਦਾ ਸ਼ਿਕਾਰ ਹੋ ਚੁੱਕਾ ਹੈ, ਜਿਸ ਕਰਕੇ ਸਾਡੇ ਸਮਾਜ ਦੀ ਤੰਦਰੁਸਤੀ ਖ਼ਤਰੇ ਵਿਚ ਹੈ। ਇਨ੍ਹਾਂ ਬੁਰਾਈਆਂ ਵਿਚੋਂ ਹੀ ਇਕ ਬੁਰਾਈ ਹੈ ਭ੍ਰਿਸ਼ਟਾਚਾਰ ਜਾਂ ਰਿਸ਼ਵਤ। ਬਿਨਾਂ ਸ਼ੱਕ ਇਸ ਸਮਾਜਿਕ ਬੁਰਾਈ ਨੇ ਸਾਡੇ ਸਮਾਜ ਉੱਪਰ ਬੜਾ ਮਾੜਾ ਪ੍ਰਭਾਵ ਪਾਇਆ ਹੈ। ਇੰਜ ਜਾਪਦਾ ਹੈ ਕਿ ਅਜੋਕਾ ਸਮਾਜ ਇਸ ਭ੍ਰਿਸ਼ਟਾਚਾਰ ਰੂਪੀ ਦੈਂਤ ਨੂੰ ਕਾਬੂ ਕਰਨ ਤੋਂ ਅਸਮਰੱਥ ਹੁੰਦਾ ਜਾ ਰਿਹਾ ਹੈ, ਜੋ ਕਿ ਡਾਢੀ ਚਿੰਤਾ ਦਾ ਵਿਸ਼ਾ ਹੈ। ਜੇਕਰ ਅਸੀਂ ਕਿਸੇ ਬੁਰਾਈ ਦੇ ਖਿਲਾਫ਼ ਸੰਘਰਸ਼ ਨਹੀਂ ਕਰ ਸਕਦੇ, ਆਵਾਜ਼ ਬੁਲੰਦ ਨਹੀਂ ਕਰ ਸਕਦੇ ਤਾਂ ਘੱਟੋ-ਘੱਟ ਉਸ ਬੁਰਾਈ ਨੂੰ ਨਫ਼ਰਤ ਤਾਂ ਕਰ ਹੀ ਸਕਦੇ ਹਾਂ। ਅਜਿਹਾ ਕਰਨਾ ਸਮੇਂ ਦੀ ਮੰਗ ਹੀ ਨਹੀਂ, ਬਲਕਿ ਵੱਡੀ ਲੋੜ ਵੀ ਹੈ ਅਤੇ ਅਜਿਹਾ ਕਰਕੇ ਹੀ ਅਸੀਂ ਸਮਾਜ ਦਾ ਤੇ ਦੇਸ਼ ਦਾ ਭਵਿੱਖ ਉੱਜਵਲ ਕਰ ਸਕਦੇ ਹਾਂ।


-ਜਗਤਾਰ ਸਿੰਘ ਝੋਜੜ
ਜ਼ਿਲ੍ਹਾ ਕਚਹਿਰੀਆਂ, ਹੁਸ਼ਿਆਰਪੁਰ।

12/04/2017

 ਪਹਿਲਾਂ ਪੇਟ ਪੂਜਾ
ਰਾਮ ਮੰਦਿਰ ਦੇ ਵਿਵਾਦ ਦੇ ਸਬੰਧ ਵਿਚ ਜੋ ਹਮਦਰਦ ਸਾਹਿਬ ਨੇ ਆਪਣੀ ਸੰਪਾਦਕੀ ਵਿਚ ਵਿਚਾਰ ਦਿੱਤੇ ਹਨ, ਬਿਲਕੁਲ ਸਹੀ ਤਜਵੀਜ਼ ਪੇਸ਼ ਕੀਤੀ ਹੈ। ਜਿਹੜੇ ਕਚਹਿਰੀਆਂ ਅਤੇ ਆਪਸੀ ਸਮਝੌਤਿਆਂ ਦੇ ਚੱਕਰ ਵਿਚ ਅਸੀਂ ਅੱਜ ਪਏ ਹੋਏ ਹਾਂ, ਇਹ 6 ਦਸੰਬਰ 1992 ਤੋਂ ਪਹਿਲਾਂ ਵਿਚਾਰੇ ਜਾਣੇ ਚਾਹੀਦੇ ਸਨ।
ਪਹਿਲੀ ਗੱਲ ਤਾਂ ਇਹ ਹੈ ਕਿ ਬਾਬਰੀ ਮਸਜਿਦ ਢਾਹੇ ਜਾਣਾ ਧਰਮ-ਨਿਰਪੱਖਤਾ, ਸੰਵਿਧਾਨ ਅਤੇ ਕਾਨੂੰਨ 'ਤੇ ਜ਼ਬਰਦਸਤ ਚੋਟ ਹੈ। ਮਸਲਾ ਇਸ ਕਦਰ ਪੇਚੀਦਾ ਹੈ ਕਿ ਸੌਖਾ ਹੱਲ ਨਜ਼ਰ ਹੀ ਨਹੀਂ ਆਉਂਦਾ। ਇਸ ਵਿਵਾਦ ਨਾਲ ਆਮ ਲੋਕਾਂ ਦਾ ਕੋਈ ਸਰੋਕਾਰ ਨਹੀਂ ਹੈ। ਉੱਚ ਦਰਜੇ ਦੇ ਸਿਆਸਤਦਾਨ ਤੇ ਵੱਡੇ ਧਾਰਮਿਕ ਆਗੂਆਂ ਨੂੰ ਉਨ੍ਹਾਂ ਕਰੋੜਾਂ ਲੋਕਾਂ ਦੇ ਜੀਵਨ ਬਾਰੇ ਅਨੁਭਵ ਹੀ ਨਹੀਂ ਹੈ, ਜੋ ਭੁੱਖ ਨਾਲ ਘੁਲ ਰਹੇ ਹਨ।
ਬੰਗਲਿਆਂ ਤੇ ਕਾਰਾਂ ਵਾਲਿਆਂ ਨੂੰ ਗ਼ਰੀਬੀ ਦਾ ਕੀ ਪਤਾ ਹੈ। ਇਹ ਬਹੁਗਿਣਤੀ ਬੇਘਰੇ ਤੇ ਬੇਰੁਜ਼ਗਾਰ ਲੋਕਾਂ ਨੂੰ ਮੰਦਿਰ, ਮਸਜਿਦ ਦੀ ਪੂਜਾ ਨਾਲੋਂ ਪੇਟ ਪੂਜਾ ਸਭ ਤੋਂ ਅਹਿਮ ਤੇ ਅਵੱਸ਼ਕ ਹੈ। ਇਹ ਵੀ ਭਾਰਤ ਮਹਾਨ ਦੇ ਨਾਗਰਿਕ ਹਨ। 'ਗ਼ਰੀਬੀ ਹਟਾਓ' ਦਾ ਨਾਅਰਾ ਸੁਣਦਿਆਂ-ਸੁਣਦਿਆਂ ਲਗਪਗ ਅੱਧੀ ਸਦੀ ਬੀਤ ਗਈ ਹੈ। ਪ੍ਰੰਤੂ ਗ਼ਰੀਬੀ ਤੇਜ਼ ਰਫ਼ਤਾਰ ਨਾਲ ਵਧ ਰਹੀ ਹੈ।


ਮਾ: ਮਹਿੰਦਰ ਸਿੰਘ ਸਿੱਧੂ
ਸਿੱਧਵਾਂ ਕਲਾਂ, ਜ਼ਿਲ੍ਹਾ ਲੁਧਿਆਣਾ।


ਟੈਕਸ ਦੇਣ ਬਾਰੇ
ਟੈਕਸ ਨਾ ਦੇਣ ਕਰਕੇ ਸਰਕਾਰਾਂ ਹਾਲੋਂ ਬੇਹਾਲ ਹੋ ਜਾਂਦੀਆਂ ਹਨ। ਜਿਨ੍ਹਾਂ ਵਿਚੋਂ ਪੰਜਾਬ ਸਰਕਾਰ ਹੈ, ਜਿਸ ਦਾ ਬੁਰਾ ਹਾਲ ਹੋਇਆ ਪਿਆ ਹੈ। ਸਭ ਤੋਂ ਪਹਿਲਾਂ ਅਸੀਂ ਗ਼ਲਤੀ ਇਹ ਕੀਤੀ ਕਿ ਜੋ ਚੁੰਗੀਆਂ ਖ਼ਤਮ ਕਰ ਦਿੱਤੀਆਂ, ਸਾਡੇ ਵਿਚੋਂ ਅੰਗਰੇਜ਼ ਤਾਂ ਚਲੇ ਗਏ ਪਰ ਕਈ ਕੰਮ ਉਹ ਅਜਿਹਾ ਕਰ ਗਏ ਸਨ, ਜਿਨ੍ਹਾਂ ਨੂੰ ਸਾਨੂੰ ਬੰਦ ਨਹੀਂ ਕਰਨਾ ਚਾਹੀਦਾ ਸੀ। ਕਿਉਂਕਿ ਚੁੰਗੀਆਂ ਦੀ ਆਮਦਨ ਤੋਂ ਹੀ ਸ਼ਹਿਰਾਂ ਵਿਚ, ਗਲੀਆਂ, ਨਾਲੀਆਂ, ਲਾਈਟਾਂ ਦਾ ਕੰਮ ਚਲਦਾ ਸੀ। ਇਹ ਬੰਦ ਕਰਕੇ ਸ਼ਹਿਰਾਂ ਦੀ ਆਮਦਨ ਘਟ ਗਈ।
ਇਸ ਤੋਂ ਇਲਾਵਾ ਸਿੱਧੂ ਸਾਹਿਬ ਮੰਤਰੀ ਸਥਾਨਕ ਸਰਕਾਰਾਂ ਦਾ ਬਿਆਨ ਆਇਆ ਸੀ ਕਿ ਥੋੜ੍ਹੇ-ਬਹੁਤੇ ਟੈਕਸ ਲਾਉਣੇ ਹੀ ਪੈਣੇ ਹਨ। ਦਰਅਸਲ ਟੈਕਸਾਂ ਬਗੈਰ ਕੰਮ ਨਹੀਂ ਚਲਦਾ ਹੁੰਦਾ। ਜੇ ਸਰਕਾਰ ਟਿਊਬਵੈੱਲ ਲਾ ਕੇ ਪਾਣੀ ਦਿੰਦੀ ਹੈ ਤਾਂ ਸਾਡਾ ਵੀ ਫ਼ਰਜ਼ ਬਣਦਾ ਹੈ ਕਿ ਪਾਣੀ ਦਾ ਬਿੱਲ ਦੇਈਏ। ਕਿਉਂਕਿ 100-150 ਰੁਪਏ ਨਾਲ ਕਿਸੇ ਨੂੰ ਫ਼ਰਕ ਨਹੀਂ ਪੈਣ ਵਾਲਾ। ਇਸੇ ਤਰ੍ਹਾਂ ਪਲਾਟ ਦੇ ਹਿਸਾਬ ਨਾਲ ਹਾਊਸ ਟੈਕਸ ਲੱਗ ਜਾਣਾ ਚਾਹੀਦਾ ਹੈ। ਇਸ ਨਾਲ ਕਮੇਟੀਆਂ, ਕਾਰਪੋਰੇਸ਼ਨਾਂ ਨੂੰ ਕੁਝ ਨਾ ਕੁਝ ਮਦਦ ਮਿਲੇਗੀ ਹੀ।
ਸਿਆਣੇ ਕਹਿੰਦੇ ਹਨ ਕਿ ਬੂੰਦ-ਬੂੰਦ ਨਾਲ ਘੜਾ ਭਰ ਜਾਂਦਾ ਹੈ। ਉਂਜ ਕੋਈ ਵੀ ਚੀਜ਼ ਮੁਫ਼ਤ ਨਹੀਂ ਹੋਣੀ ਚਾਹੀਦੀ। ਇਹ ਸਾਰਾ ਸਿਸਟਮ ਹੀ ਮੁਫ਼ਤ ਨੇ ਵਿਗਾੜਿਆ ਹੈ। ਘਰਾਂ ਵਿਚ ਜੋ ਯੂਨਿਟ ਮੁਆਫ਼ ਹੁੰਦੇ ਹਨ, ਉਹ ਵੀ ਨਹੀਂ ਹੋਣੇ ਚਾਹੀਦੇ। ਇਹ ਸਾਰਾ ਤਾਣਾ-ਬਾਣਾ ਵੋਟਾਂ ਕਰਕੇ ਵਿਗਾੜਿਆ ਹੈ।


-ਹਰਜਿੰਦਰਪਾਲ ਸਿੰਘ ਬਾਜਵਾ
536, ਗਲੀ ਨੰ: 5ਬੀ, ਵਿਜੇ ਨਗਰ, ਹੁਸ਼ਿਆਰਪੁਰ।

11/04/2017

 ਅਵਾਰਾ ਕੁੱਤਿਆਂ ਦੀ ਦਹਿਸ਼ਤ
ਕੁਝ ਦਿਨ ਪਹਿਲਾਂ ਗੁਰਦਾਸਪੁਰ ਜ਼ਿਲ੍ਹੇ ਦੇ ਪਿੰਡ ਸਲੋਪੁਰ ਵਿਖੇ ਖੂੰਖਾਰ ਕੁੱਤਿਆਂ ਨੇ ਦਿਲ ਨੂੰ ਪੂਰੀ ਤਰ੍ਹਾਂ ਹਿਲਾਅ ਦੇਣ ਵਾਲੀ ਘਟਨਾ ਨੂੰ ਅੰਜਾਮ ਦਿੱਤਾ ਕਿ ਇਕ 80-90 ਸਾਲਾਂ ਦੇ ਬਜ਼ੁਰਗ ਜੋ ਖੇਤਾਂ ਵਿਚ ਆਪਣੇ ਧਿਆਨ ਨਾਲ ਬੈਠਾ ਕੰਮ ਕਰ ਰਿਹਾ ਸੀ, ਪਿਛੋਂ ਕੁੱਤਿਆਂ ਦੇ ਝੁੰਡ ਨੇ ਉਸ 'ਤੇ ਹਮਲਾ ਬੋਲ ਦਿੱਤਾ। ਸਿੱਟੇ ਵਜੋਂ ਉਸ ਬਜ਼ੁਰਗ ਨੂੰ ਉਨ੍ਹਾਂ ਨੋਚ-ਨੋਚ ਕੇ ਬਹੁਤ ਹੀ ਬੁਰੀ ਤਰ੍ਹਾਂ ਬੋਟੀ-ਬੋਟੀ ਕਰਕੇ ਖਾ ਲਿਆ, ਕੇਵਲ ਪਿੰਜਰ ਹੀ ਬਾਕੀ ਛੱਡਿਆ।
ਰੋਜ਼ ਅਨੇਕਾਂ ਹੀ ਅਜਿਹੀਆਂ ਘਟਨਾਵਾਂ ਕਿਤੇ ਛੋਟੇ-ਛੋਟੇ ਬੱਚਿਆਂ ਤੇ ਕਦੇ ਗਾਵਾਂ ਦੇ ਵੱਛੇ-ਵੱਛੀਆਂ, ਕਦੇ ਰਾਹ ਜਾਂਦੇ ਆਮ ਵਿਅਕਤੀ 'ਤੇ ਹਮਲਾ ਬੋਲ ਕੇ ਖ਼ਤਰਨਾਕ ਘਟਨਾਵਾਂ ਨੂੰ ਅੰਜਾਮ ਦੇ ਰਹੇ। ਅਵਾਰਾ ਕੁੱਤਿਆਂ ਦੀ ਦਹਿਸ਼ਤ ਦਿਨ-ਬ-ਦਿਨ ਵਧਦੀ ਜਾ ਰਹੀ ਹੈ। ਸਰਕਾਰ ਹੱਥ 'ਤੇ ਹੱਥ ਧਰ ਕੇ ਚੁੱਪੀ ਸਾਧ ਕੇ ਵੇਖੀ ਜਾ ਰਹੀ ਹੈ। ਅਗਰ ਜਾਨਵਰਾਂ ਨੂੰ ਬਚਾਅ ਕੇ ਰੱਖਣ ਬਾਰੇ ਕਾਨੂੰਨ ਬਣੇ ਹਨ ਤਾਂ ਘੱਟੋ-ਘੱਟ ਕੁੱਤਿਆਂ ਬਾਰੇ ਤਾਂ ਸੋਚਿਆ ਜਾ ਸਕਦਾ ਹੈ, ਜੋ ਬਿਲਕੁਲ ਅਵਾਰਾ ਤੇ ਮਨੁੱਖਾਂ ਦਾ ਚਿੱਟੇ ਦਿਨ ਘਾਣ ਕਰਨ 'ਤੇ ਉਤਰੇ ਹੋਏ ਹਨ। ਜੇ ਇਸ ਬਾਰੇ ਸੰਜੀਦਾ ਹੋ ਕੇ ਨਾ ਵਿਚਾਰਿਆ ਗਿਆ ਤਾਂ ਆਉਣ ਵਾਲੇ ਸਮਿਆਂ ਅੰਦਰ ਹੋਰ ਵੀ ਅਨੇਕਾਂ ਅਜਿਹੀਆਂ ਹੌਲਨਾਕ ਘਟਨਾਵਾਂ ਵਾਪਰ ਸਕਦੀਆਂ ਹਨ।

-ਮਾਸਟਰ ਦੇਵ ਰਾਜ ਖੁੰਡਾ
ਗੁਰਦਾਸਪੁਰ।

ਅੰਮ੍ਰਿਤਸਰ ਕਾਰਪੋਰੇਸ਼ਨ ਦੀ ਲੁੱਟ
ਅੰਮ੍ਰਿਤਸਰ ਕਾਰਪੋਰੇਸ਼ਨ ਦੇ ਅਧਿਕਾਰੀ ਸਾਲ 2016-17 ਦੇ ਵਿੱਤੀ ਸਾਲ ਦੌਰਾਨ ਹੀ ਪ੍ਰਾਪਰਟੀ ਟੈਕਸ ਉੱਤੇ 20 ਫ਼ੀਸਦੀ ਜੁਰਮਾਨਾ ਲਗਾ ਕੇ ਟੈਕਸ ਵਸੂਲ ਰਹੇ ਹਨ। ਹਰੇਕ ਵਿੱਤੀ ਸਾਲ ਹਰੇਕ ਸਰਕਾਰ ਦਾ ਕੰਮ ਨਿਪਟਾਉਣ ਦਾ ਸਾਲ ਹੁੰਦਾ ਹੈ। ਵਿੱਤੀ ਸਾਲ ਦੌਰਾਨ ਕੋਈ ਜੁਰਮਾਨਾ ਵਸੂਲਣਾ ਇਕ ਧੱਕੇਸ਼ਾਹੀ ਜਾਂ ਲੁੱਟ ਹੀ ਕਹੀ ਜਾ ਸਕਦੀ ਹੈ। ਅਫ਼ਸੋਸ ਨਾਲ ਲਿਖਣਾ ਪੈਂਦਾ ਹੈ ਕਿ ਮੇਰੇ ਕੋਲੋਂ ਰਸੀਦ ਨੰ: 28, 29/4579 ਮਿਤੀ 31.3.2017 ਰਾਹੀਂ ਤਿੰਨ ਸੌ ਰੁਪਏ ਜੁਰਮਾਨੇ ਦੇ ਵਾਧੂ ਵਸੂਲੇ ਗਏ ਹਨ। ਲੋਕਲ ਬਾਡੀਜ਼ ਮਨਿਸਟਰ ਨੂੰ ਅਜਿਹੇ ਨਾਜਾਇਜ਼ ਵਸੂਲੇ ਪੈਸੇ ਲੋਕਾਂ ਨੂੰ ਵਾਪਸ ਕਰਵਾਉਣੇ ਬਣਦੇ ਹਨ।
ਪਿਛਲੀ ਅਕਾਲੀ-ਭਾਜਪਾ ਸਰਕਾਰ ਨੂੰ ਆਪਣੇ ਨਾਦਰਸ਼ਾਹੀ ਫ਼ੈਸਲਿਆਂ ਕਾਰਨ ਹੀ ਹੁਣੇ-ਹੁਣੇ ਹੋਈਆਂ ਵਿਧਾਨ ਸਭਾ ਚੋਣਾਂ ਵਿਚ ਨਮੋਸ਼ੀਜਨਕ ਹਾਰ ਦਾ ਮੂੰਹ ਦੇਖਣਾ ਪਿਆ ਹੈ। ਸ਼ਹਿਰਾਂ ਵਿਚ ਵਪਾਰੀਆਂ ਉਤੇ ਚੁੰਗੀ ਟੈਕਸ ਖ਼ਤਮ ਕਰਨਾ ਤੇ ਆਪਣੇ ਹੀ ਜੱਦੀ ਘਰਾਂ ਉੱਤੇ 'ਮੁਗਲਾਂ ਦੇ ਜਜ਼ੀਆ' ਟੈਕਸ ਨੂੰ ਲਗਾਉਣਾ ਸ਼ਹਿਰੀਆਂ ਨੇ ਇਕ ਤਰਕਹੀਣ ਅਤੇ ਮਿਊਂਸਪਲ ਵਿੱਤੀ ਪ੍ਰਬੰਧ ਦਾ ਦੀਵਾਲਾ ਕੱਢਣ ਵਾਲਾ ਫ਼ੈਸਲਾ ਕਰਾਰ ਦਿੱਤਾ ਸੀ। ਸ਼ਹਿਰੀਆਂ ਨੇ ਆਪਣੇ ਜੱਦੀ ਘਰਾਂ ਉੱਤੇ ਲੱਗੇ ਪ੍ਰਾਪਰਟੀ ਟੈਕਸ ਨੂੰ ਆਪਣੀ ਹੱਤਕ ਸਮਝਿਆ ਸੀ। ਸੋ, ਨਵੀਂ ਬਣੀ ਸਰਕਾਰ ਨੂੰ ਉਕਤ ਦੋਵੇਂ ਫ਼ੈਸਲੇ ਛੇਤੀ ਹੀ ਬਦਲ ਕੇ ਇਕ ਲੋਕ-ਪੱਖੀ ਸਰਕਾਰ ਹੋਣ ਦਾ ਦਾਅਵਾ ਪੇਸ਼ ਕਰਨਾ ਚਾਹੀਦਾ ਹੈ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
4724, ਗੁਰੂ ਨਾਨਕ ਵਾੜਾ, ਖ਼ਾਲਸਾ ਕਾਲਜ, ਅੰਮ੍ਰਿਤਸਰ।

10/04/2017

 ਨਿੱਜੀ ਸਕੂਲਾਂ ਦਾ ਮਾਮਲਾ
ਨਿੱਜੀ ਸਕੂਲਾਂ ਵੱਲੋਂ ਹਰ ਸਾਲ ਦਾਖਲਾ ਫੀਸਾਂ ਲੈ ਕੇ ਬੱਚਿਆਂ ਦੇ ਮਾਪਿਆਂ ਦੀ ਲੁੱਟ ਕੀਤੀ ਜਾ ਰਹੀ ਹੈ। ਇਕ ਬੱਚੇ ਨੂੰ ਜਦੋਂ ਕਿਸੇ ਨਿੱਜੀ ਸਕੂਲ ਵਿਚ ਦਾਖਲ ਕੀਤਾ ਜਾਂਦਾ ਹੈ, ਉਸੇ ਸਮੇਂ ਹਜ਼ਾਰਾਂ ਰੁਪਏ ਦਾਖਲਾ ਫੀਸ ਲਈ ਜਾਂਦੀ ਹੈ। ਉਸ ਤੋਂ ਬਾਅਦ ਜਦੋਂ ਬੱਚਾ ਅਗਲੇਰੀ ਕਲਾਸ ਵਿਚ ਜਾਂਦਾ ਹੈ, ਉਸ ਵੇਲੇ ਵੀ ਦਾਖਲਾ ਫੀਸ ਦੇ ਨਾਂਅ 'ਤੇ ਹਜ਼ਾਰਾਂ ਰੁਪਏ ਵਸੂਲ ਕੀਤੇ ਜਾਂਦੇ ਹਨ, ਜੋ ਕਿ ਪੰਜਾਬ ਸਰਕਾਰ ਅਤੇ ਹਾਈ ਕੋਰਟ ਦੇ ਫੈਸਲੇ ਨੂੰ ਛਿੱਕੇ ਟੰਗ ਕੇ ਇਹ ਨਿੱਜੀ ਸਕੂਲ ਲੋਕਾਂ ਨੂੰ ਲੁੱਟ ਰਹੇ ਹਨ। ਅਸੀਂ ਸਰਕਾਰ ਤੋਂ ਮੰਗ ਕਰਦੇ ਹਾਂ ਕਿ ਦਾਖਲਾ ਫੀਸ ਇਕ ਵਾਰ ਲਈ ਜਾਵੇ, ਵਾਰ-ਵਾਰ ਨਹੀਂ।


-ਗੁਰਦੀਪ ਸਿੰਘ ਜੰਡਿਆਲਾ
ਮੋਬਾ: 98152-01287


ਵਿਦੇਸ਼ਾਂ ਵੱਲ ਸਿੱਧੀਆਂ ਉਡਾਨਾਂ

ਅੰਮ੍ਰਿਤਸਰ ਤੋਂ ਮੈਂਬਰ ਪਾਰਲੀਮੈਂਟ ਸ: ਗੁਰਜੀਤ ਸਿੰਘ ਔਜਲਾ ਨੇ ਪਾਰਲੀਮੈਂਟ ਵਿਚ ਬੜੇ ਜ਼ੋਰਦਾਰ ਢੰਗ ਨਾਲ ਅੰਮ੍ਰਿਤਸਰ ਦੇ ਇੰਟਰਨੈਸ਼ਨਲ ਹਵਾਈ ਅੱਡੇ ਤੋਂ ਵਿਦੇਸ਼ਾਂ ਵੱਲ ਸਿੱਧੀਆਂ ਉਡਾਣਾਂ ਸ਼ੁਰੂ ਕਰਨ ਦਾ ਸਵਾਲ ਉਠਾਇਆ ਹੈ। ਉਨ੍ਹਾਂ ਨੇ ਦਲੀਲਾਂ ਦੇ ਕੇ ਸਾਬਤ ਕੀਤਾ ਹੈ ਕਿ ਅੰਮ੍ਰਿਤਸਰ ਤੋਂ ਸਿੱਧੀਆਂ ਵਿਦੇਸ਼ੀ ਉਡਾਣਾਂ ਹਵਾਈ ਕੰਪਨੀਆਂ ਅਤੇ ਪ੍ਰਵਾਸੀਆਂ ਵਾਸਤੇ ਲਾਭਦਾਇਕ ਸਨ। ਪਰ ਬੜੇ ਦੁੱਖ ਦੀ ਗੱਲ ਹੈ ਕਿ ਪੂਰੇ ਸੰਸਾਰ ਵਿਚ ਫੈਲੇ ਪੰਜਾਬੀ ਪ੍ਰਵਾਸੀਆਂ ਦੀਆਂ ਆਸਾਂ ਉੱਤੇ ਪਾਣੀ ਫੇਰ ਕੇ ਸਾਰੀਆਂ ਵਿਦੇਸ਼ੀ ਉਡਾਣਾਂ ਦਿੱਲੀ ਹਵਾਈ ਅੱਡੇ ਉੱਤੇ ਤਬਦੀਲ ਕਰ ਦਿੱਤੀਆਂ ਗਈਆਂ ਸਨ। ਜੇਕਰ ਅੰਤਰਰਾਸ਼ਟਰੀ ਹਵਾਈ ਉਡਾਣਾਂ ਇਸੇ ਵਿੱਤੀ ਵਰ੍ਹੇ 'ਚ ਅਪ੍ਰੈਲ, 2017 ਤੋਂ ਸ਼ੁਰੂ ਕਰਵਾ ਦਿੱਤੀਆਂ ਜਾਣ ਤਾਂ ਗਰਮੀਆਂ ਦੇ ਮੌਸਮ ਦੌਰਾਨ ਪ੍ਰਵਾਸੀਆਂ ਨੂੰ ਵੱਡੀ ਰਾਹਤ ਮਿਲੇਗੀ।


-ਇੰਜੀ: ਕੁਲਦੀਪ ਸਿੰਘ ਲੁੱਧਰ,
4724, ਗੁਰੂ ਨਾਨਕ ਵਾੜਾ, ਅੰਮ੍ਰਿਤਸਰ।


ਅਵਾਰਾ ਪਸ਼ੂਆਂ ਦੀ ਸਮੱਸਿਆ

ਪਿੰਡ ਖਟੜਾ, ਖੰਨਾ ਖੁਰਦ, ਖੰਨਾ ਕਲਾਂ ਅਤੇ ਇਸ ਦੇ ਨੇੜੇ-ਤੇੜੇ ਅਵਾਰਾ ਪਸ਼ੂ ਅਕਸਰ ਘੁੰਮਦੇ ਰਹਿੰਦੇ ਹਨ, ਜੋ ਰੋਜ਼ਾਨਾ ਹੀ ਲੋਕਾਂ ਦਾ ਜਾਨੀ-ਮਾਲੀ ਨੁਕਸਾਨ ਕਰਦੇ ਹਨ। ਜਿਥੇ ਪਸ਼ੂ ਕਿਸਾਨਾਂ ਦੀਆਂ ਸਖ਼ਤ ਮਿਹਨਤ ਨਾਲ ਪਾਲੀਆਂ ਫਸਲਾਂ ਤਬਾਹ ਕਰ ਰਹੇ ਹਨ, ਉਥੇ ਅਵਾਰਾ ਕੁੱਤੇ ਮਾਸੂਮ ਬੱਚਿਆਂ, ਨਿਰਦੋਸ਼ ਲੋਕਾਂ, ਬੇਸਹਾਰਾ ਗਊਆਂ ਦੇ ਵੱਛੇ-ਵੱਛੀਆਂ ਨੂੰ ਖਾ ਰਹੇ ਹਨ। ਪ੍ਰਸ਼ਾਸਨ ਵੱਲੋਂ ਇਸ ਸਮੱਸਿਆ ਵੱਲ ਧਿਆਨ ਨਹੀਂ ਦਿੱਤਾ ਜਾ ਰਿਹਾ। ਇਹ ਸਮੱਸਿਆ ਦਿਨ-ਪ੍ਰਤੀ-ਦਿਨ ਵਧਦੀ ਜਾ ਰਹੀ ਹੈ। ਇਕ ਪਾਸੇ ਤਾਂ ਸਰਕਾਰ ਲੋਕਾਂ ਤੋਂ ਗਊ ਸੈੱਸ ਵਸੂਲ ਕਰ ਰਹੀ ਹੈ ਪਰ ਦੂਜੇ ਪਾਸੇ ਗਊਆਂ, ਸਾਨ੍ਹ ਆਦਿ ਮੋਟਰਾਂ-ਗੱਡੀਆਂ ਅਤੇ ਹੋਰ ਵਾਹਨਾਂ ਵਿਚ ਵੱਜ ਕੇ ਆਪਣੀ ਅਤੇ ਲੋਕਾਂ ਦੀ ਜਾਨ ਦਾ ਖੌਅ ਬਣ ਰਹੇ ਹਨ। ਲਗਦੈ ਸਰਕਾਰ ਕਿਸੇ ਵੱਡੇ ਨੁਕਸਾਨ ਦੀ ਉਡੀਕ ਕਰ ਰਹੀ ਹੈ। ਰੋਜ਼ਾਨਾ ਹੀ ਅਖ਼ਬਾਰਾਂ ਵਿਚ ਇਸ ਸਬੰਧੀ ਖ਼ਬਰਾਂ ਛਪਦੀਆਂ ਹਨ ਪਰ ਕਿਸੇ ਵੀ ਅਧਿਕਾਰੀ ਦਾ ਧਿਆਨ ਨਹੀਂ ਜਾਂਦਾ। ਅਵਾਰਾ ਪਸ਼ੂਆਂ ਲਈ ਯੋਗ ਪ੍ਰਬੰਧ ਕਰਨਾ ਸਰਕਾਰ ਦਾ ਫਰਜ਼ ਹੈ। ਅਸੀਂ ਸਬੰਧਤ ਅਧਿਕਾਰੀਆਂ, ਅਫਸਰਾਂ, ਅਦਾਲਤਾਂ ਨੂੰ ਬੇਨਤੀ ਕਰਦੇ ਹਾਂ ਕਿ ਛੇਤੀ ਅਤੇ ਜ਼ਰੂਰੀ ਤੌਰ 'ਤੇ ਅਵਾਰਾ ਪਸ਼ੂਆਂ ਦੀ ਸਮੱਸਿਆ ਹੱਲ ਕੀਤੀ ਜਾਵੇ, ਤਾਂ ਜੋ ਲੋਕਾਂ ਦੀ ਜਾਨ-ਮਾਲ ਦੀ ਰਾਖੀ ਹੋ ਸਕੇ।


-ਰਾਜਪਾਲ,
ਪੀ.ਜੀ.ਡੀ. (ਮਨੁੱਖੀ ਅਧਿਕਾਰ), ਗਲੀ ਨੰ: 4, ਸਮਾਧੀ ਰੋਡ, ਖੰਨਾ (ਲੁਧਿਆਣਾ)।
ਮੋਬਾ: 98150-41652

07/04/2017

 ਐਚ.ਆਈ.ਵੀ./ਏਡਜ਼
ਐਚ.ਆਈ.ਵੀ. ਭਾਵ ਮਨੁੱਖ ਦੀ ਸਰੀਰ ਦੀ ਪ੍ਰਤੀਰੋਧਕ ਸਮਰਥਾ ਘੱਟ ਕਰਨ ਵਾਲੇ ਵਾਇਰਸ। ਏਡਜ਼ ਭਾਵ ਸਰੀਰ ਦੀ ਪ੍ਰਤੀ ਰੱਖਿਅਕ ਪ੍ਰਣਾਲੀ ਦਾ ਕਮਜ਼ੋਰ ਹੋਣਾ। ਦੋਵੇਂ ਬਿਮਾਰੀਆਂ ਆਪਸ ਵਿਚ ਸਬੰਧਤ ਹਨ। ਸਰੀਰ ਵਿਚ ਐਚ.ਆਈ.ਵੀ. ਵਿਸ਼ਾਣੂ ਫੈਲਣ 'ਤੇ ਪ੍ਰਤੀਰੋਧੀ ਸਮਰੱਥਾ ਘੱਟ ਹੁੰਦੀ ਹੈ। ਇਸ ਦਾ ਅਗਲਾ ਰੂਪ ਏਡਜ਼ ਹੁੰਦਾ ਹੈ, ਜਿਹੜੀ ਕਿ ਇਕ ਖ਼ਤਰਨਾਕ ਬਿਮਾਰੀ ਹੈ। ਮਨੁੱਖ ਵਿਚ ਇਹ ਰੋਗ ਤੇਜ਼ੀ ਨਾਲ ਫੈਲਦਾ ਹੈ। ਸੰਨ 1959 ਵਿਚ ਅਮਰੀਕਾ ਵਿਚ ਖੂਨ ਦੇ ਨਮੂਨੇ ਵਿਚ ਏਡਜ਼ ਦਾ ਪਤਾ ਲੱਗਾ।
ਕਿਹਾ ਜਾਂਦਾ ਹੈ ਕਿ ਐਚ.ਆਈ.ਵੀ. ਵਿਸ਼ਾਣੂ ਸਭ ਤੋਂ ਪਹਿਲਾਂ ਅਫਰੀਕਾ ਦੇ ਬਾਂਦਰਾਂ ਵਿਚ ਪਾਇਆ ਗਿਆ। ਇਸ ਤੋਂ ਬਾਅਦ ਮਨੁੱਖੀ ਸਰੀਰ ਵਿਚ ਪ੍ਰਵੇਸ਼ ਕੀਤਾ ਅਤੇ ਹੌਲੀ-ਹੌਲੀ ਇਕ ਦੂਜੇ ਮਨੁੱਖ ਤੱਕ ਪਹੁੰਚਦਾ ਗਿਆ। ਇਹ ਲਾਗ ਦਾ ਰੋਗ ਸਰੀਰਕ ਸਬੰਧਾਂ ਰਾਹੀਂ ਫੈਲਦਾ ਹੈ। ਸਿਹਤਮੰਦ ਵਿਅਕਤੀ ਨੂੰ ਏਡਜ਼ ਸੰਕ੍ਰਮਿਤ ਵਿਅਕਤੀ ਦਾ ਖੂਨ ਚੜ੍ਹਾਉਣ ਜਾਂ ਉਸ ਦੀ ਸਰਿੰਜ ਦੀ ਵਰਤੋਂ ਨਾਲ ਵੀ ਇਹ ਰੋਗ ਫੈਲ ਸਕਦਾ ਹੈ। ਇਸ ਰੋਗ ਨਾਲ ਪੀੜਤ ਮਾਤਾ-ਪਿਤਾ ਤੋਂ ਪੈਦਾ ਹੋਈ ਸੰਤਾਨ ਨੂੰ ਵੀ ਇਹ ਰੋਗ ਹੋ ਸਕਦਾ ਹੈ। ਰੋਗ ਲੱਗਣ ਉਪਰੰਤ ਇਸ ਦਾ ਕੋਈ ਇਲਾਜ ਨਹੀਂ, ਜੇ ਹੈ ਤਾਂ ਉਹ ਹੈ ਪ੍ਰਹੇਜ਼।

-ਜਸਪ੍ਰੀਤ ਕੌਰ 'ਸੰਘਾ'
ਪਿੰਡ ਤਨੂੰਲੀ, ਜ਼ਿਲ੍ਹਾ ਹੁਸ਼ਿਆਰਪੁਰ।

ਨਜ਼ਰੀਆ ਬਦਲਣ ਦੀ ਲੋੜ
ਦੁਨੀਆ ਵਿਚ ਅੱਜ ਵੀ ਔਰਤ ਨੂੰ ਆਪਣੇ ਸਵੈਮਾਣ ਮਾਣ-ਸਨਮਾਨ ਤੇ ਸਮਾਜਿਕ ਹੋਂਦ ਲਈ ਜੂਝਣਾ ਪੈ ਰਿਹਾ ਹੈ, ਭਾਵੇਂ ਕਿ ਔਰਤ ਆਪਣੇ ਦਮ 'ਤੇ ਸਿੱਖਿਆ ਪ੍ਰਾਪਤ ਕਰਕੇ ਸਮਾਜ 'ਚ ਆਪਣੀ ਨਿਵੇਕਲੀ ਪਛਾਣ ਸਥਾਪਤ ਕਰ ਚੁੱਕੀ ਹੈ। ਔਰਤ ਮਰਦ ਨਾਲੋਂ ਕਿਸੇ ਵੀ ਖੇਤਰ ਵਿਚ ਪਿੱਛੇ ਨਹੀਂ ਹੈ ਭਾਵੇਂ ਖੇਡਾਂ, ਸਿਆਸਤ, ਵਿਗਿਆਨ ਜਾਂ ਪੁਲਿਸ ਪ੍ਰਬੰਧ ਦਾ ਖੇਤਰ ਹੋਵੇ। ਔਰਤ ਮਕਾਨ ਨੂੰ 'ਘਰ' 'ਚ ਬਦਲਣ ਦੀ ਸਮਰੱਥਾ ਰੱਖਦੀ ਹੈ। ਅਫ਼ਸੋਸ ਹੈ ਕਿ ਏਨੇ ਕੁਝ ਦੇ ਬਾਵਜੂਦ ਔਰਤ ਨੂੰ ਸਮਾਜ ਨੇ ਹਾਸ਼ੀਏ 'ਤੇ ਰੱਖਿਆ ਹੋਇਆ ਹੈ। ਭਰੂਣ ਹੱਤਿਆਵਾਂ, ਸਰੀਰਕ ਸ਼ੋਸ਼ਣ, ਦਾਜ ਦਹੇਜ ਆਦਿ ਜਿਹੀਆਂ ਨਾਮੁਰਾਦ ਸਮੱਸਿਆਵਾਂ ਨਾਲ ਔਰਤ ਨੂੰ ਨਿਪਟਣਾ ਪੈ ਰਿਹਾ ਹੈ। ਅੱਜ ਪੜ੍ਹੀ-ਲਿਖੀ ਔਰਤ ਹੋਣ ਦੇ ਬਾਵਜੂਦ ਗਲੀ-ਮੁਹੱਲੇ, ਬੱਸ, ਰੇਲ ਸਫ਼ਰ 'ਚ ਕਿਤੇ ਵੀ ਉਹ ਅਸੁਰੱਖਿਅਤ ਮਹਿਸੂਸ ਕਰ ਰਹੀ ਹੈ। ਇਸ ਸਭ ਕਾਸੇ ਪਿੱਛੇ ਸਾਡੀ ਲੋਕ ਮਾਨਸਿਕਤਾ ਹੈ। ਔਰਤ ਕੋਮਲ ਹੈ, ਕਮਜ਼ੋਰ ਨਹੀਂ। ਉਸ ਨੂੰ ਅੱਗੇ ਵਧਣ ਦੇ ਮੌਕੇ ਪ੍ਰਦਾਨ ਕਰਨ ਦੀ ਜ਼ਰੂਰਤ ਹੈ। ਉਸ ਦੇ ਉਤਸ਼ਾਹ ਨੂੰ ਬੜਾਵਾ ਦੇਣਾ ਹੋਵੇਗਾ। ਉਸ ਪ੍ਰਤੀ ਆਪਣਾ ਵਿਵਹਾਰ ਅਤੇ ਨਜ਼ਰੀਆ ਬਦਲਣਾ ਬਹੁਤ ਜ਼ਰੂਰੀ ਹੈ। ਸੋ, ਉਸ ਨੂੰ ਸਮਾਜ 'ਚ ਬਣਦਾ ਸਨਮਾਨ ਮਿਲਣਾ ਤੇ ਦੇਣਾ ਸਮੇਂ ਦੀ ਵੱਡੀ ਲੋੜ ਹੈ ਤਾਂ ਹੀ ਸਾਡਾ ਘਰ ਤੇ ਰਾਸ਼ਟਰ ਉੱਨਤੀ ਕਰੇਗਾ।

-ਮਾਸਟਰ ਦੇਵ ਰਾਜ ਖੁੰਡਾ
ਗੁਰਦਾਸਪੁਰ।

06/04/2017

 ਪ੍ਰਦੂਸ਼ਣ ਲਈ ਦੋਸ਼ੀ ਕੌਣ?
ਜੇ ਧਿਆਨ ਨਾਲ ਵਿਚਾਰਿਆ ਜਾਵੇ ਤਾਂ ਪ੍ਰਦੂਸ਼ਣ ਲਈ ਸਰਕਾਰ ਅਤੇ ਲੋਕ ਬਰਾਬਰ ਦੇ ਭਾਈਵਾਲ ਹਨ। ਸੜਕਾਂ ਉਤੋਂ ਸਰਕਾਰ ਨੇ ਰੁੱਖ ਮੁਕਾਏ, ਕਾਲੋਨੀਆਂ ਬਣਾਉਣ ਵਾਲਿਆਂ ਸ਼ਹਿਰਾਂ ਦੁਆਲਿਓਂ, ਕਿਸਾਨਾਂ ਨੇ ਖੇਤਾਂ ਵਿਚੋਂ ਅਤੇ ਆਮ ਲੋਕਾਂ ਨੇ ਘਰਾਂ ਦੇ ਵਿਹੜਿਆਂ ਵਿਚੋਂ। ਬਿਜਲੀ ਨਾਲ ਚੱਲਣ ਵਾਲੇ ਪੱਖਿਆਂ ਤੇ ਏ.ਸੀ. ਦੇ ਯੰਤਰਾਂ ਨੇ ਲੋਕਾਂ ਨੂੰ ਬਨਾਉਟੀ ਵਾਤਾਵਰਨ ਦੇ ਕੇ ਰੁੱਖਾਂ ਦੀ ਕੀਮਤੀ ਤੇ ਸਿਹਤਮੰਦ ਆਕਸੀਜਨ ਖੋਹ ਲਈ ਹੈ। ਰੁੱਖ, ਫਲ, ਫੁੱਲ, ਠੰਢੀ ਛਾਂ ਤੇ ਸ਼ੁੱਧ ਹਵਾ ਦੇ ਨਾਲ ਮੀਂਹ ਵਰ੍ਹਾਉਂਦੇ ਅਤੇ ਅਨੇਕਾਂ ਸੁੱਖ ਪਹੁੰਚਾਉਂਦੇ ਹਨ। ਜੇਕਰ ਧਰਤੀ 'ਤੇ ਵਸਦੇ ਇਨਸਾਨ ਨੇ ਕੁਦਰਤ ਦੀ ਸਭ ਤੋਂ ਕੀਮਤੀ ਨਿਆਮਤ ਦੀ ਸਾਰ ਨਹੀਂ ਜਾਣੀ ਤਾਂ ਉਸ ਤੋਂ ਵੱਡਾ ਮੂਰਖ ਹੋਰ ਕੌਣ ਹੋ ਸਕਦਾ ਹੈ। ਹਵਾ ਨੂੰ ਸ਼ੁੱਧ ਬਣਾਉਣ ਲਈ ਸੜਕਾਂ ਤੋਂ ਪੁਰਾਣੀਆਂ ਮੋਟਰ ਗੱਡੀਆਂ ਹਟਾਉਣ ਦੀ ਲੋੜ ਹੈ। ਕਾਰਖਾਨਿਆਂ ਦੇ ਧੂੰਏਂ ਨੂੰ ਟਰੀਟਮੈਂਟ ਪਲਾਂਟਾਂ ਰਾਹੀਂ ਸਾਫ਼ ਕਰਕੇ ਛੱਡਣ ਦੇ ਨਾਲ ਖੇਤਾਂ ਦੀ ਪਰਾਲੀ ਨੂੰ ਸਾੜਨ ਦਾ ਰਿਵਾਜ ਬੰਦ ਕਰਨ ਦੀ ਲੋੜ ਹੈ। ਦੇਸ਼ ਵਿਚ ਲੋਕਰਾਜ ਹੈ। ਲੀਡਰਾਂ ਨੂੰ ਸੜਕਾਂ ਉੱਤੇ ਰੁੱਖ ਲਗਾਉਣ ਨੂੰ ਆਖੀਏ ਅਤੇ ਖ਼ੁਦ ਵੀ ਆਪਣੇ ਸ਼ਹਿਰਾਂ ਤੇ ਪਿੰਡਾਂ ਨੂੰ ਰੁੱਖਾਂ ਦੀ ਹਰਿਆਵਲ ਨਾਲ ਮਾਲੋ-ਮਾਲ ਕਰ ਦੇਈਏ। ਇਸ ਵਿਚ ਸਰਬੱਤ ਦਾ ਭਲਾ ਹੈ।-

ਇੰਜ: ਕੁਲਦੀਪ ਸਿੰਘ ਲੁੱਧਰ
ਗੁਰੂ ਨਾਨਕ ਵਾੜਾ, ਅੰਮ੍ਰਿਤਸਰ।

ਵਧੀਆ ਪ੍ਰਸ਼ਾਸਨ ਮਿਲੇ
ਅਖੀਰ ਪੰਜਾਬ ਵਿਚ 15ਵੀਂ ਵਿਧਾਨ ਸਭਾ ਦਾ ਗਠਨ ਹੋ ਗਿਆ। ਜਿਸ ਵਿਚ ਕਾਂਗਰਸ ਪਾਰਟੀ ਸਭ ਤੋਂ ਵੱਡੀ ਪਾਰਟੀ ਦੇ ਰੂਪ ਵਿਚ ਸਭ ਦੇ ਸਾਹਮਣੇ ਆਈ ਅਤੇ ਸੱਤਾ 'ਤੇ ਕਾਬਜ਼ ਹੋ ਗਈ। ਦੇਖਣਾ ਇਹ ਹੈ ਕਿ ਪੰਜਾਬ ਅੰਦਰ ਇਸ ਵਾਰ ਚੁਣੀ ਨਵੀਂ ਸਰਕਾਰ ਕੀ ਫ਼ੈਸਲੇ ਲੈਂਦੀ ਹੈ। ਜਿਸ ਨੇ ਆਪਣੇ ਚੋਣ ਮਨੋਰਥ ਪੱਤਰ ਵਿਚ ਅਨੇਕਾਂ ਹੀ ਅਜਿਹੇ ਵਾਅਦੇ ਕੀਤੇ ਹੋਏ ਹਨ, ਜਿਨ੍ਹਾਂ ਨੂੰ ਪੂਰੇ ਕਰਨਾ ਤਾਂ ਕੀ ਸਮਝਣਾ ਵੀ ਔਖਾ ਹੈ। ਅੱਜ ਆਮ ਲੋਕ ਆਰਥਿਕ ਪੱਖੋਂ ਏਨੇ ਜ਼ਿਆਦਾ ਕਮਜ਼ੋਰ ਹੋ ਚੁੱਕੇ ਹਨ ਕਿ ਉਨ੍ਹਾਂ ਨੂੰ ਇਨ੍ਹਾਂ ਚੋਣਾਂ ਦੇ ਨਤੀਜਿਆਂ ਵਿਚੋਂ ਇਕ ਨਵੀਂ ਆਸ ਦੀ ਕਿਰਨ ਦਿਖਾਈ ਦੇ ਰਹੀ ਹੈ, ਜਿਸ ਦੀ ਉਹ ਬੇਸਬਰੀ ਨਾਲ ਉਡੀਕ ਕਰ ਰਹੇ ਹਨ। ਉਨ੍ਹਾਂ ਦੀ ਰਾਇ ਵੀ ਇਹੀ ਹੈ ਕਿ ਨਵੀਂ ਸਰਕਾਰ ਉਨ੍ਹਾਂ ਨੂੰ ਖੈਰਾਤ ਨਾ ਦੇਵੇ, ਬਲਕਿ ਇਕ ਵਧੀਆ ਪ੍ਰਸ਼ਾਸਨ ਦੇਵੇ। ਮਨੁੱਖ ਦੀਆਂ ਮੁਢਲੀਆਂ ਲੋੜਾਂ ਦੀ ਪੂਰਤੀ ਹੋਵੇ। ਗਰੀਬ ਢਿੱਡ ਭਰ ਕੇ ਰੋਟੀ ਖਾ ਸਕੇ। ਪੜ੍ਹਿਆ-ਲਿਖਿਆ ਨੌਜਵਾਨ ਆਪਣੀ ਯੋਗਤਾ ਅਨੁਸਾਰ ਰੁਜ਼ਗਾਰ ਪਾ ਸਕੇ। ਬੁਢੇਪਾ ਨਾ ਰੁਲੇ, ਧੀਆਂ ਸੁਰੱਖਿਅਤ ਹੋਣ, ਸਭ ਲਈ ਸਿਹਤ ਸੇਵਾਵਾਂ ਹੋਣ। ਲੋਕਾਂ ਦੇ ਚੁਣੇ ਨੁਮਾਇੰਦੇ ਉਨ੍ਹਾਂ ਪ੍ਰਤੀ ਜਵਾਬਦੇਹ ਹੋਣ। ਇਹੀ ਨਵੀਂ ਸਰਕਾਰ ਤੋਂ ਉਮੀਦਾਂ ਹਨ ਕਿ ਉਹ ਪੰਜਾਬ ਨਾਲ ਵਫ਼ਾਦਾਰੀ ਨਿਭਾਅ ਕੇ ਲੋਕਾਂ ਨੂੰ ਵਧੀਆ ਪ੍ਰਸ਼ਾਸਨ ਦੇ ਨਾਲ-ਨਾਲ ਸਾਫ਼-ਸੁਥਰਾ ਚੌਗਿਰਦਾ ਮੁਹੱਈਆ ਕਰਵਾਏ। ਪੰਜਾਬ ਵਿਚ ਆਈ ਨਵੀਂ ਸਰਕਾਰ ਲਈ 'ਮੁਬਾਰਕਬਾਦ'।

-ਇੰਦਰਜੀਤ ਸਿੰਘ ਕੰਗ
ਕੋਟਲਾ ਸਮਸ਼ਪੁਰ (ਸਮਰਾਲਾ) ਜ਼ਿਲ੍ਹਾ ਲੁਧਿਆਣਾ।

05/04/2017

 ਰਿਸ਼ਤਿਆਂ ਦੇ ਬਦਲਦੇ ਮਾਇਨੇ
ਹੁਣ ਰੋਜ਼ਾਨਾ ਅਖ਼ਬਾਰਾਂ ਵਿਚ ਕਤਲ ਹੋਣ ਦੀਆਂ ਖ਼ਬਰਾਂ ਛਪਦੀਆਂ ਹਨ। ਜ਼ਿਆਦਾਤਰ ਕਤਲ ਕਰਨ ਵਾਲੇ ਪਰਿਵਾਰਕ ਮੈਂਬਰ ਹੀ ਨਿਕਲਦੇ ਹਨ। ਪਤਨੀ ਵੱਲੋਂ ਪਤੀ ਦਾ ਕਤਲ, ਪਤੀ ਦੁਆਰਾ ਪਤਨੀ ਦਾ ਕਤਲ ਕੀਤਾ ਜਾ ਰਿਹਾ ਹੈ। ਪਿਤਾ ਬੱਚਿਆਂ ਦਾ ਕਤਲ ਕਰ ਰਿਹਾ ਹੈ। ਭੈਣ-ਭਰਾਵਾਂ ਵਰਗੇ ਪਵਿੱਤਰ ਰਿਸ਼ਤੇ ਵੀ ਜਾਇਦਾਦ ਦੇ ਲਾਲਚ ਦੀ ਭੇਟ ਚੜ੍ਹ ਰਹੇ ਹਨ। ਅੱਜ ਦੇ ਸਮੇਂ ਵਿਚ ਸਭ ਨੇ ਪੈਸੇ ਨੂੰ ਅਹਿਮੀਅਤ ਦੇ ਰੱਖੀ ਹੈ, ਜਿਸ ਦੇ ਅੱਗੇ ਸਭ ਰਿਸ਼ਤੇ-ਨਾਤੇ ਫਿੱਕੇ ਪੈ ਰਹੇ ਹਨ। ਘਟ ਰਹੀ ਸਹਿਣਸ਼ੀਲਤਾ, ਨਾਜਾਇਜ਼ ਸਬੰਧ, ਆਪਸੀ ਅਵਿਸ਼ਵਾਸ, ਟੁੱਟ ਰਹੇ ਪਰਿਵਾਰ ਇਸ ਦੇ ਮੁੱਖ ਕਾਰਨ ਹਨ। ਅੱਜ ਦੀ ਨੌਜਵਾਨ ਪੀੜ੍ਹੀ ਵਿਚ ਹੱਥੀਂ ਕੰਮ ਕਰਕੇ ਕਮਾਉਣ ਦਾ ਰੁਝਾਨ ਘਟ ਰਿਹਾ ਹੈ। ਹਰ ਕੋਈ ਬਣਿਆ ਬਣਾਇਆ ਭਾਲਦਾ ਹੈ, ਜਿਸ ਕਾਰਨ ਮਾਪਿਆਂ ਅਤੇ ਬੱਚਿਆਂ ਵਿਚ ਵੀ ਫ਼ਾਸਲੇ ਵਧ ਰਹੇ ਹਨ।


-ਰਾਜਵੀਰ ਕੌਰ
ਧਨੌਲਾ।


ਰੁੱਖ ਨੀਤੀ 2017
ਅਸੀਂ ਸਭ ਜਾਣਦੇ ਹਾਂ ਕਿ ਅੱਜ ਪੰਜਾਬ ਵਿਚ ਜੰਗਲਾਂ ਹੇਠ ਰਕਬਾ ਲਗਾਤਾਰ ਘਟਦਾ ਜਾ ਰਿਹਾ ਹੈ। ਇਹ ਸਿਰਫ 3 ਫ਼ੀਸਦੀ ਹੀ ਰਹਿ ਗਿਆ ਹੈ। ਅਖੌਤੀ ਵਿਕਾਸ ਦੇ ਨਾਂਅ 'ਤੇ ਰੁੱਖਾਂ ਨੂੰ ਬੜੀ ਬੇਰਹਿਮੀ ਨਾਲ ਕੱਟਿਆ-ਵੱਢਿਆ ਜਾ ਰਿਹਾ ਹੈ। ਪਿਛਲੇ ਦਿਨੀਂ ਪੇਂਡੂ ਵਿਕਾਸ ਤੇ ਪੰਚਾਇਤ ਵਿਭਾਗ ਦੀ 'ਰੁੱਖ ਨੀਤੀ 2017' ਤਹਿਤ ਪੰਜਾਬ ਦੀਆਂ ਤਕਰੀਬਨ 13000 ਦੇ ਕਰੀਬ ਪੰਚਾਇਤਾਂ ਨੂੰ ਪੰਚਾਇਤੀ ਜ਼ਮੀਨਾਂ ਵਿਚ ਵੱਧ ਤੋਂ ਵੱਧ ਰੁੱਖ ਲਗਾਉਣ ਦੀ ਹਦਾਇਤ ਕੀਤੀ ਗਈ ਹੈ। ਰੁੱਖ ਲਗਾਓ ਨੀਤੀ ਚੰਗੀ ਗੱਲ ਹੈ। ਅਸੀਂ ਵਿਭਾਗ ਨੂੰ ਕਹਿਣਾ ਚਾਹੁੰਦੇ ਹਾਂ ਕਿ ਜਿਹੜੀ ਪੰਚਾਇਤ ਰੁੱਖ ਲਗਾਉਣ ਦੀ ਨੀਤੀ 'ਤੇ ਫੁੱਲ ਚੜ੍ਹਾਉਂਦੀ ਹੈ, ਉਸ ਪੰਚਾਇਤ ਨੂੰ ਜ਼ਿਲ੍ਹਾ ਜਾਂ ਸੂਬਾ ਪੱਧਰ 'ਤੇ ਸਨਮਾਨਿਤ ਕੀਤਾ ਜਾਵੇ। ਜਿਹੜੀ ਪੰਚਾਇਤ ਇਹ ਨੀਤੀ ਨਹੀਂ ਅਪਣਾਉਂਦੀ, ਉਸ ਨੂੰ ਨੋਟਿਸ ਭੇਜ ਕੇ ਜੁਰਮਾਨਾ ਵਗੈਰਾ ਦਾ ਭਾਗੀ ਬਣਾਇਆ ਜਾਵੇ। ਦੁੱਖ ਹੈ ਕਿ ਰੁੱਖਾਂ ਪ੍ਰਤੀ ਵੀ ਮਨੁੱਖ ਸਵਾਰਥੀ ਹੁੰਦਾ ਜਾ ਰਿਹਾ ਹੈ। ਅੱਜ ਜ਼ਰੂਰੀ ਹੈ ਕਿ ਗੁਰੂਆਂ ਦੀ ਸੋਚ ਦੇ ਧਾਰਨੀ ਬਣ ਕੇ ਵੱਧ ਤੋਂ ਵੱਧ ਰੁੱਖ ਲਗਾਈਏ।


-ਬੰਤ ਸਿੰਘ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।


ਜ਼ਿੰਮੇਵਾਰੀ ਸਮਝਣ ਦੀ ਲੋੜ
ਪਿਛਲੇ ਦਿਨੀਂ 'ਅਜੀਤ' ਵਿਚ ਮੋਹਨ ਸ਼ਰਮਾ ਦੀ ਲਿਖਤ 'ਹਵਾ ਦੇ ਰੁਖ਼ ਅਨੁਸਾਰ ਚੋਲਾ ਬਦਲਣ ਵਾਲੇ ਲੋਕ' ਪੜ੍ਹੀ। ਉਨ੍ਹਾਂ ਨੇ ਆਪਣੇ ਤਜਰਬੇ ਨੂੰ ਬਹੁਤ ਵਧੀਆ ਤਰੀਕੇ ਨਾਲ ਦੱਸਿਆ ਤੇ ਸਮਾਜ ਦੇ ਕੁਝ ਲੋਕਾਂ ਦੀ ਅਸਲੀਅਤ ਬਿਆਨ ਕੀਤੀ। ਪੈਸੇ ਦਾ ਲੈਣ-ਦੇਣ, ਰਿਸ਼ਵਤ, ਸਿਆਸੀ ਪਾਰਟੀਆਂ ਦਾ ਜੋੜ-ਤੋੜ ਪਹਿਲਾਂ ਵੀ ਹੁੰਦਾ ਸੀ। ਉਦੋਂ ਏਨਾ ਜ਼ਿਆਦਾ ਖੁੱਲ੍ਹੇਆਮ ਨਹੀਂ ਸੀ। ਇਹ ਸਾਡਾ ਸਮਾਜ ਹੈ, ਸਾਡਾ ਦੇਸ਼ ਹੈ, ਇਸ ਦਾ ਸਿਸਟਮ ਵਧੀਆ ਤੇ ਸੁਚਾਰੂ ਤਰੀਕੇ ਨਾਲ ਚੱਲੇਗਾ ਤਾਂ ਸਾਨੂੰ ਸਭ ਨੂੰ ਫਾਇਦਾ ਹੈ, ਸਾਡੇ ਬੱਚਿਆਂ ਨੂੰ ਵਧੀਆ ਸਹੂਲਤਾਂ ਮਿਲਣਗੀਆਂ। ਜੇ ਸਿਸਟਮ ਵਿਚ ਕਿਧਰੇ ਕੋਤਾਹੀ ਹੈ ਤਾਂ ਗ਼ਲਤੀ ਕਿਤੇ ਨਾ ਕਿਤੇ ਅਸੀਂ ਵੀ ਕੀਤੀ ਹੁੰਦੀ ਹੈ। ਸ਼ਰਮਾ ਸਾਹਿਬ ਦੀ ਇਹ ਲਿਖਤ ਬਹੁਤ ਕੁਝ ਦੱਸ ਗਈ, ਕਹਿ ਗਈ, ਸਮਝਾ ਗਈ। ਸਮਾਜ ਅਤੇ ਦੇਸ਼ ਪ੍ਰਤੀ ਆਪਣੀ ਜ਼ਿੰਮੇਵਾਰੀ ਨੂੰ ਸਮਝਣਾ ਹੀ ਆਪਣੀਆਂ ਸਹੂਲਤਾਂ ਨੂੰ ਜ਼ਿੰਦਾ ਰੱਖਣ ਦਾ ਰਸਤਾ ਹੈ।


-ਪ੍ਰਭਜੋਤ ਕੌਰ ਢਿੱਲੋਂ
ਮੋ: 98150-30221.

04/04/2017

 ਸੜਕਾਂ ਤਰਸਣ ਰੁੱਖਾਂ ਨੂੰ
ਅਟਾਰੀ-ਵਾਹਗਾ ਸਰਹੱਦ ਤੋਂ ਸ਼ਹਿਰ ਅੰਮ੍ਰਿਤਸਰ ਵਿਚ ਦਾਖਲ ਹੁੰਦੀ ਜੀ.ਟੀ. ਰੋਡ ਅਤੇ ਬੀ.ਆਰ.ਟੀ.ਐਸ. ਦੇ ਬੱਸ ਪ੍ਰਾਜੈਕਟ ਅਧੀਨ ਆਉਂਦੀਆਂ ਸ਼ਹਿਰ ਦੀਆਂ ਹੋਰ ਸੜਕਾਂ ਦੇ ਕਿਨਾਰਿਆਂ ਤੋਂ ਰੁੱਖਾਂ ਦੀ ਹਰਿਆਵਲ ਨੂੰ ਤਹਿਸ-ਨਹਿਸ ਕਰਕੇ ਪਿਛਲੀ ਸਰਕਾਰ ਨੇ ਰੁੱਖਾਂ, ਮਨੁੱਖਾਂ ਅਤੇ ਭੋਲੇ ਪੰਛੀਆਂ 'ਤੇ ਜ਼ੁਲਮ ਢਾਹਿਆ ਸੀ। ਸ਼ਹਿਰ ਵਾਸੀਆਂ ਦੀ ਫੈਲੇ ਹੋਏ ਪ੍ਰਦੂਸ਼ਣ ਦੀ ਚੀਖ-ਪੁਕਾਰ ਸਮੇਂ ਦੀ ਸਰਕਾਰ ਨੇ ਵੀ ਨਾ ਸੁਣੀ। ਹੁਣ ਉਹ ਸਮਾਂ ਆ ਚੁੱਕਾ ਹੈ, ਜਦੋਂ ਸ: ਨਵਜੋਤ ਸਿੰਘ ਸਿੱਧੂ ਐਮ.ਐਲ.ਏ., ਇਸ ਗੁਰੂ ਦੀ ਨਗਰੀ ਨੂੰ 'ਕਲੀਨ ਤੇ ਗਰੀਨ' ਕਰਨ ਦਾ ਆਪਣਾ ਪੁਰਾਣਾ ਵਾਅਦਾ ਪੂਰਾ ਕਰ ਸਕਦੇ ਹਨ। ਹੁਣ ਉਹ ਸ਼ਹਿਰ ਵਿਚ ਕੂੜੇ-ਕਰਕਟ ਤੋਂ ਖਾਦ ਬਣਾਉਣ ਦੇ ਪਲਾਂਟ ਅਤੇ ਸੀਵਰੇਜ-ਸਿਸਟਮ ਦੇ ਸੁਧਾਰ ਲਈ ਟਰੀਟਮੈਂਟ ਪਲਾਂਟ ਵੀ ਲਗਾਉਣ ਦੇ ਸਮਰੱਥ ਬਣ ਚੁੱਕੇ ਹਨ। ਗੁਰੂ ਰਾਮਦਾਸ ਜੀ ਦੀ ਕਿਰਪਾ ਨਾਲ ਉਹ ਅੰਮ੍ਰਿਤਸਰ ਤੋਂ ਹੀ ਚੋਣ ਜਿੱਤੇ ਹਨ ਅਤੇ ਉਨ੍ਹਾਂ ਨੂੰ ਗੁਰੂ ਮਹਾਰਾਜ ਨੇ ਗੁਰੂ ਦੀ ਨਗਰੀ ਦੇ ਸੁਧਾਰ ਦਾ ਇਕ ਸੁਨਹਿਰੀ ਅਵਸਰ ਬਖਸ਼ਿਆ ਹੈ। ਕੀਤੀ ਸੇਵਾ ਕਦੇ ਬੇਅਰਥ ਨਹੀਂ ਜਾਂਦੀ।


-ਇੰਜ: ਕੁਲਦੀਪ ਸਿੰਘ ਲੁੱਧਰ
ਅੰਮ੍ਰਿਤਸਰ।


ਵਧਦੀ ਮਹਿੰਗਾਈ
ਅੱਜ ਦੇ ਜ਼ਮਾਨੇ ਵਿਚ ਮਹਿੰਗਾਈ ਰੂਪੀ ਦੈਂਤ ਨੇ ਆਮ ਲੋਕਾਂ ਦਾ ਜਿਊਣਾ ਏਨਾ ਦੁੱਭਰ ਕਰ ਦਿੱਤਾ ਹੈ ਕਿ ਉਹ ਤੰਗ ਆਏ ਹੋਏ ਹਨ। ਮਹਿੰਗਾਈ ਵਧਣ ਨਾਲ ਉਨ੍ਹਾਂ ਦੇ ਜੀਵਨ ਦੀਆਂ ਮੁਢਲੀਆਂ ਲੋੜਾਂ ਦੀ ਪੂਰਤੀ ਨਹੀਂ ਹੋ ਰਹੀ। ਇਥੋਂ ਤੱਕ ਕਿ ਉਨ੍ਹਾਂ ਨੂੰ ਖਾਣ-ਪੀਣ ਵਾਲੀਆਂ ਵਸਤਾਂ ਦੀ ਪ੍ਰਾਪਤੀ ਲਈ ਵੱਡੀ ਜੱਦੋ-ਜਹਿਦ ਕਰਨੀ ਪੈ ਰਹੀ ਹੈ। ਪਰ ਇਨ੍ਹਾਂ ਵਸਤਾਂ ਦੇ ਭਾਅ ਫਿਰ ਵੀ ਥੰਮ੍ਹਣ ਦਾ ਨਾਂਅ ਨਹੀਂ ਲੈ ਰਹੇ, ਸਗੋਂ ਆਏ ਦਿਨ ਵਧਦੇ ਜਾ ਰਹੇ ਹਨ। ਜੇਕਰ ਮਹਿੰਗਾਈ ਦਾ ਹਾਲ ਇਹੀ ਰਿਹਾ ਤਾਂ ਆਮ ਲੋਕਾਂ ਲਈ ਜਿਊਣਾ ਬਹੁਤ ਹੀ ਕਠਿਨ ਹੋ ਜਾਵੇਗਾ।


-ਰਾਜਵੰਤ ਸਿੰਘ ਰਾਜੂ
ਗੁਰੂ ਨਾਨਕ ਆਟੋ ਸਪੇਅਰਜ਼, ਰਾਏਕੋਟ।


ਅਵਾਰਾ ਕੁੱਤਿਆਂ ਦੀ ਸਮੱਸਿਆ
ਪੰਜਾਬ ਵਿਚ ਅਵਾਰਾ ਕੁੱਤਿਆਂ ਦੀ ਸਮੱਸਿਆ ਦਿਨੋ-ਦਿਨ ਵਿਰਾਟ ਰੂਪ ਧਾਰਨ ਕਰਦੀ ਜਾ ਰਹੀ ਹੈ। ਇਨ੍ਹਾਂ ਕੁੱਤਿਆਂ ਦੇ ਝੁੰਡ ਮਨੁੱਖਾਂ ਤੇ ਬੱਚਿਆਂ ਨੂੰ ਨੋਚ-ਨੋਚ ਕੇ ਖਾਈ ਜਾ ਰਹੇ ਹਨ। ਇਹ ਕੁੱਤੇ ਹੱਡਾ-ਰੋੜੀਆਂ ਦੇ ਇਰਦ-ਗਿਰਦ ਪਸ਼ੂਆਂ ਦਾ ਮਾਸ ਖਾਣ ਲਈ ਇਕੱਠੇ ਹੁੰਦੇ ਹਨ ਅਤੇ ਖੂੰਖਾਰ ਹੋ ਜਾਂਦੇ ਹਨ। ਇਕ ਸਮਾਂ ਸੀ ਜਦੋਂ ਮਨੁੱਖ ਅਤੇ ਜਾਨਵਰਾਂ ਵਿਚ ਆਪਸੀ ਸਾਂਝ ਹੁੰਦੀ ਸੀ। ਇਹ ਸਾਂਝ ਹੁਣ ਖਤਮ ਹੁੰਦੀ ਜਾ ਰਹੀ ਹੈ। ਘਰਾਂ ਅੱਗੇ ਜਦੋਂ ਗੇਟ ਨਹੀਂ ਲੱਗੇ ਹੁੰਦੇ ਸਨ, ਉਦੋਂ ਇਹ ਅਵਾਰਾ ਕੁੱਤੇ ਘਰਾਂ ਦੇ ਵਿਹੜਿਆਂ ਵਿਚ ਖੂਬ ਚੱਕਰ ਲਗਾਉਂਦੇ ਰਹਿੰਦੇ ਸਨ ਅਤੇ ਘਰ ਦੀਆਂ ਸੁਆਣੀਆਂ ਇਨ੍ਹਾਂ ਜਾਨਵਰਾਂ ਲਈ ਰੋਟੀ ਵਗੈਰਾ ਰੱਖਦੀਆਂ ਸਨ ਤੇ ਇਨ੍ਹਾਂ ਜਾਨਵਰਾਂ ਦੇ ਪੇਟ ਦੀ ਥੋੜ੍ਹੀ ਬਹੁਤੀ ਭੁੱਖ ਮਿਟ ਜਾਂਦੀ ਸੀ। ਪਰ ਹੁਣ ਜਾਨਵਰਾਂ ਨੂੰ ਇਨ੍ਹਾਂ ਘਰਾਂ ਵਿਚੋਂ ਖਾਣ ਨੂੰ ਕੁਝ ਵੀ ਨਸੀਬ ਨਹੀਂ ਹੁੰਦਾ ਅਤੇ ਹੁਣ ਇਹ ਆਪਣੇ ਪੇਟ ਦੀ ਅੱਗ ਬੁਝਾਉਣ ਲਈ ਮਨੁੱਖਾਂ 'ਤੇ ਹਮਲੇ ਕਰਦੇ ਹਨ ਅਤੇ ਇਨਸਾਨਾਂ ਨੂੰ ਆਪਣਾ ਸ਼ਿਕਾਰ ਬਣਾ ਰਹੇ ਹਨ। ਬਹੁਤ ਸਾਰੇ ਲੋਕ ਆਪਣੀਆਂ ਜਾਨਾਂ ਗੁਆ ਚੁੱਕੇ ਹਨ। ਕਈ ਜਗ੍ਹਾ ਇਨ੍ਹਾਂ ਦੀ ਗਿਣਤੀ ਨੂੰ ਘਟਾਉਣ ਲਈ ਨਸਬੰਦੀ ਕੀਤੀ ਜਾ ਰਹੀ ਹੈ ਪਰ ਇਹ ਕੰਮ ਏਨਾ ਸੌਖਾ ਨਹੀਂ ਹੈ। ਕਾਨੂੰਨੀ ਤੌਰ 'ਤੇ ਕੁੱਤਿਆਂ ਨੂੰ ਮਾਰਨ 'ਤੇ ਪਾਬੰਦੀ ਹੈ। ਇਕ ਹੱਲ ਹੋਰ ਹੈ ਕਿ ਇਨ੍ਹਾਂ ਕੁੱਤਿਆਂ ਨੂੰ ਵਪਾਰਕ ਤੌਰ 'ਤੇ ਵਰਤਿਆ ਜਾਵੇ ਤੇ ਜਿਨ੍ਹਾਂ ਪ੍ਰਦੇਸ਼ਾਂ ਤੇ ਬਾਹਰਲੇ ਦੇਸ਼ਾਂ ਨੂੰ ਇਨ੍ਹਾਂ ਜਾਨਵਰਾਂ ਦੀ ਲੋੜ ਹੈ, ਉਥੇ ਸਰਕਾਰੀ ਸਮਝੌਤਿਆਂ ਅਧੀਨ ਸਪਲਾਈ ਕੀਤਾ ਜਾਵੇ।


-ਸਮਿੱਤਰ ਸਿੰਘ 'ਦੋਸਤ'
ਮੋਬਾਈਲ : 92562-92764.

03/04/2017

 ਚਿਹਰਿਆਂ 'ਤੇ ਰੌਣਕ
ਪੰਜਾਬ ਵਿਚ ਕੈਪਟਨ ਸਰਕਾਰ ਦੇ ਬਣਦਿਆਂ ਹੀ ਪੰਜਾਬ ਵਿਚ ਪਨਪੀਆਂ ਅਨੇਕਾਂ ਬੁਰਾਈਆਂ 'ਤੇ ਤੁਰੰਤ ਕਾਬੂ ਪਾਉਣ ਦੇ ਕੀਤੇ ਜਾ ਰਹੇ ਯਤਨਾਂ ਦੀ ਹਰ ਪਾਸੇ ਸ਼ਲਾਘਾ ਹੋਣੀ ਸ਼ੁਰੂ ਹੋ ਗਈ ਹੈ। ਪਿਛਲੇ ਲੰਮੇ ਸਮੇਂ ਤੋਂ ਪੰਜਾਬ ਵਿਚ ਡਰ ਦਾ ਮਾਹੌਲ ਬਣਿਆ ਹੋਇਆ ਹੈ। ਲੁੱਟ-ਖੋਹ, ਕਤਲੋਗਾਰਤ ਆਮ ਹੋ ਗਿਆ ਹੈ। ਜਬਰ-ਜਨਾਹ ਤੇ ਛੇੜ-ਛਾੜ ਦੀਆਂ ਘਟਨਾਵਾਂ ਵਧਦੀਆਂ ਜਾ ਰਹੀਆਂ ਹਨ। ਰੇਤ-ਬਜਰੀ ਮਾਫੀਆ ਤੇ ਨਸ਼ੇ ਦਾ ਕਾਰੋਬਾਰ ਕਰਨ ਵਾਲੇ ਆਪਣੇ ਗ਼ੈਰ-ਕਾਨੂੰਨੀ ਕੰਮਾਂ ਨੂੰ ਇਸ ਤਰ੍ਹਾਂ ਕਰ ਰਹੇ ਹਨ, ਜਿਵੇਂ ਉਨ੍ਹਾਂ ਨੂੰ ਕਾਨੂੰਨ ਆਦਿ ਦਾ ਕੋਈ ਡਰ ਹੀ ਨਾ ਹੋਵੇ। ਇਸ ਤੋਂ ਇਲਾਵਾ ਪੰਜਾਬ 'ਚ ਥਾਂ-ਥਾਂ ਘੁੰਮ ਰਹੇ ਹਨ ਗੈਂਗਸਟਰ, ਜਿਨ੍ਹਾਂ ਨੇ ਸੂਬੇ ਦੇ ਸ਼ਾਂਤ ਮਾਹੌਲ ਨੂੰ ਮਾਰਧਾੜ ਵਿਚ ਬਦਲ ਕੇ ਰੱਖ ਦਿੱਤਾ ਹੈ। ਹਰ ਤਰ੍ਹਾਂ ਦੇ ਨਾਜਾਇਜ਼ ਕਾਰੋਬਾਰ ਕਰਨ ਵਾਲਿਆਂ ਨੂੰ ਨੱਥ ਪਾਉਣ ਦੇ ਨਾਲ-ਨਾਲ ਹਰ ਮਹਿਕਮੇ ਵਿਚ ਫੈਲ ਚੁੱਕੇ ਭ੍ਰਿਸ਼ਟਾਚਾਰ ਨੂੰ ਖਤਮ ਕਰਨ ਤੋਂ ਇਲਾਵਾ ਉਪਰੋਕਤ ਬੁਰਾਈਆਂ 'ਤੇ ਕਾਬੂ ਪਾਉਣ ਲਈ ਜੋ ਦ੍ਰਿੜ੍ਹਤਾ ਦਿਖਾਈ ਜਾ ਰਹੀ ਹੈ, ਤੋਂ ਇਨਸਾਫ਼ ਪਸੰਦ ਲੋਕਾਂ ਦੇ ਚਿਹਰਿਆਂ 'ਤੇ ਰੌਣਕ ਆਉਣੀ ਸ਼ੁਰੂ ਹੋ ਗਈ ਹੈ।


-ਬੰਤ ਸਿੰਘ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਜ਼ਿਲ੍ਹਾ ਲੁਧਿਆਣਾ।


ਚੁੰਗੀ ਤੇ ਪ੍ਰਾਪਰਟੀ ਟੈਕਸ
ਪੰਜਾਬ ਦੇ ਸ਼ਹਿਰਾਂ ਦਾ ਚਿਹਰਾ ਮੁਹਰਾ ਸੁਧਾਰਨ ਲਈ ਸ: ਨਵਜੋਤ ਸਿੰਘ ਸਿੱਧੂ ਦੀ ਬਤੌਰ ਲੋਕਲ ਬਾਡੀਜ਼ ਮੰਤਰੀ ਚੋਣ, ਇਕ ਸਹੀ ਤੇ ਵਧੀਆ ਚੋਣ ਹੈ। ਉਹ ਅੰਮ੍ਰਿਤਸਰ ਦੀ ਪਵਿੱਤਰ ਨਗਰੀ ਸਮੇਤ ਪੰਜਾਬ ਦੇ ਸ਼ਹਿਰੀ ਵਿਕਾਸ ਦੇ ਹਾਮੀ ਰਹੇ ਹਨ। ਪ੍ਰੰਤੂ ਸਭ ਤੋਂ ਪਹਿਲਾਂ ਉਨ੍ਹਾਂ ਨੂੰ ਲੋਕਲ ਬਾਡੀਜ਼ ਦੇ ਵਿਤੀ ਪ੍ਰਬੰਧ ਨੂੰ ਸੁਧਾਰਨਾ ਪਵੇਗਾ। ਇਸ ਕੰਮ ਲਈ ਉਨ੍ਹਾਂ ਨੂੰ ਪਿਛਲੀ ਅਕਾਲੀ-ਭਾਜਪਾ ਸਰਕਾਰ ਵੱਲੋਂ ਬੰਦ ਕੀਤਾ ਚੁੰਗੀ ਟੈਕਸ ਮੁੜ ਬਹਾਲ ਕਰਨਾ ਪਵੇਗਾ। ਸ਼ਹਿਰੀਆਂ ਦਾ ਸਨਮਾਨ ਬਹਾਲ ਕਰਨ ਲਈ ਉਨ੍ਹਾਂ ਨੂੰ ਰਿਹਾਇਸ਼ੀ ਘਰਾਂ ਉਤੇ ਲਗਾਇਆ ਪ੍ਰਾਪਰਟੀ ਟੈਕਸ ਖਤਮ ਕਰਨਾ ਪਵੇਗਾ। ਲੋਕਲ ਬਾਡੀਜ਼ ਨੇ ਸ਼ਹਿਰਾਂ ਵਿਚ ਪਾਣੀ ਦੀ ਸਪਲਾਈ, ਸੀਵਰੇਜ ਸਿਸਟਮ, ਸਟਰੀਟ ਲਾਈਟ ਅਤੇ ਸੜਕੀ ਪ੍ਰਬੰਧ ਨੂੰ ਸੁਰੱਖਿਅਤ ਢੰਗ ਨਾਲ ਚਲਾਉਣਾ ਹੁੰਦਾ ਹੈ। ਕਰਮਚਾਰੀਆਂ ਦੀਆਂ ਤਨਖਾਹਾਂ ਸਮੇਤ ਕੁਝ ਨਵੇਂ ਕਾਰਜ ਵੀ ਸਿਰੇ ਚਾੜ੍ਹਨੇ ਹੁੰਦੇ ਹਨ। ਸੋ, ਜੇਕਰ ਚੁੰਗੀ ਟੈਕਸ ਨਾਲ ਸ਼ਹਿਰੀ ਸੁਧਾਰ ਹੁੰਦਾ ਹੈ ਤਾਂ ਇਸ ਟੈਕਸ ਨੂੰ ਖਿੜੇ ਮੱਥੇ ਪ੍ਰਵਾਨ ਕਰ ਲੈਣਾ ਹੀ ਵੱਡੀ ਸਿਆਣਪ ਹੈ।


-ਇੰਜ: ਕੁਲਦੀਪ ਸਿੰਘ ਲੁੱਧਰ
ਅੰਮ੍ਰਿਤਸਰ।


ਸੜਕ ਹਾਦਸੇ
ਪੰਜਾਬ ਵਿਚ ਦਿਨੋ-ਦਿਨ ਵਧ ਰਹੇ ਸੜਕ ਹਾਦਸੇ ਚਿੰਤਾ ਦਾ ਵਿਸ਼ਾ ਹਨ। ਥੋੜ੍ਹੀ ਜਿਹੀ ਲਾਪ੍ਰਵਾਹੀ ਕਾਰਨ ਸੈਂਕੜੇ ਕੀਮਤੀ ਜਾਨਾਂ ਹਰ ਰੋਜ਼ ਚਲੀਆਂ ਜਾਂਦੀਆਂ ਹਨ। ਜੇਕਰ ਧਿਆਨ ਪੂਰਵਰਕ ਵਾਚਿਆ ਜਾਵੇ ਤਾਂ ਇਹ ਸੜਕ ਹਾਦਸੇ ਮਨੁੱਖੀ ਗ਼ਲਤੀ ਦਾ ਹੀ ਮੁੱਖ ਕਾਰਨ ਹੁੰਦੇ ਹਨ, ਜਿਨ੍ਹਾਂ ਵਿਚ ਟ੍ਰੈਫਿਕ ਨਿਯਮਾਂ ਦੀ ਲਾਪ੍ਰਵਾਹੀ ਮੁੱਖ ਤੌਰ 'ਤੇ ਸ਼ਾਮਿਲ ਹੈ। ਸੋ, ਸਾਨੂੰ ਚਾਹੀਦਾ ਹੈ ਕਿ ਟ੍ਰੈਫਿਕ ਨਿਯਮਾਂ ਦੀ ਪਾਲਣਾ ਕਰੀਏ, ਸੜਕਾਂ ਅਤੇ ਬਾਜ਼ਾਰਾਂ ਵਿਚ ਨਾਜਾਇਜ਼ ਉਸਾਰੀਆਂ ਤੋਂ ਪ੍ਰਹੇਜ਼ ਕਰੀਏ, ਛੋਟੀ ਉਮਰ ਦੇ ਬੱਚਿਆਂ ਨੂੰ ਵਾਹਨ ਚਲਾਉਣ ਤੋਂ ਵਰਜ਼ੀਏ, ਨਸ਼ੇ ਦੀ ਵਰਤੋਂ ਨਾ ਕਰੀਏ ਅਤੇ ਵਾਹਨ ਦੀ ਰਫ਼ਤਾਰ ਨੂੰ ਕਾਬੂ ਵਿਚ ਰੱਖੀਏ ਕਿਉਂਕਿ ਕਦੇ ਵੀ ਨਾ ਪਹੁੰਚਣ ਨਾਲੋਂ ਦੇਰ ਨਾਲ ਪਹੁੰਚਣਾ ਚੰਗਾ ਹੁੰਦਾ ਹੈ।


-ਰਾਜਵੰਤ ਸਿੰਘ ਰਾਜੂ
ਗੁਰੂ ਨਾਨਕ ਆਟੋ ਸਪੇਅਰਜ਼, ਰਾਏਕੋਟ।

31/03/2017

 ਸਕੂਲਾਂ ਵੱਲੋਂ ਮਾਪਿਆਂ ਦੀ ਲੁੱਟ
ਨਿੱਜੀ ਸਕੂਲਾਂ ਵੱਲੋਂ ਸਾਲਾਨਾ ਤੇ ਮਹੀਨਾਵਾਰ ਫੀਸਾਂ ਸਹਿਤ ਕਈ ਤਰ੍ਹਾਂ ਦੇ ਫੰਡਾਂ ਦੇ ਨਾਂਅ 'ਤੇ ਫੀਸਾਂ ਵਿਚ ਭਾਰੀ ਵਾਧਾ ਕਰਕੇ ਬੱਚਿਆਂ ਦੇ ਮਾਪਿਆਂ ਦੀ ਆਰਥਿਕ ਲੁੱਟ ਕੀਤੀ ਜਾ ਰਹੀ ਹੈ। ਪੰਜਾਬ ਸਰਕਾਰ ਤੇ ਹਾਈਕੋਰਟ ਦੇ ਹੁਕਮਾਂ ਨੂੰ ਛਿੱਕੇ ਟੰਗ ਕੇ ਇਹ ਨਿੱਜੀ ਸਕੂਲ ਮਾਪਿਆਂ ਦੀ ਅੰਨ੍ਹੀ ਲੁੱਟ ਕਰਕੇ ਤੇ ਟੀਚਰਾਂ ਨੂੰ ਘੱਟ ਮਿਹਨਤਾਨਾ ਦੇ ਕੇ ਸਕੂਲਾਂ ਦੀਆਂ ਵੱਡੀਆਂ-ਵੱਡੀਆਂ ਆਲੀਸ਼ਾਨ ਇਮਾਰਤਾਂ ਉਸਾਰ ਰਹੇ ਹਨ। ਸਰਕਾਰ ਨੂੰ ਚਾਹੀਦਾ ਹੈ ਕਿ ਸਕੂਲਾਂ ਅੰਦਰ ਬਾਜ਼ਾਰ ਨਾਲੋਂ ਮਹਿੰਗੇ ਭਾਅ ਵੇਚੀਆਂ ਜਾਂ ਰਹੀਆਂ ਵਰਦੀਆਂ, ਸਟੇਸ਼ਨਰੀ ਤੇ ਕਿਤਾਬਾਂ ਦੇ ਕਾਊਂਟਰ ਬੰਦ ਕਰਕੇ, ਹਰੇਕ ਸਕੂਲ ਦਾ ਸਿਲੇਬਸ ਇਕ ਸਮਾਨ ਕੀਤਾ ਜਾਵੇ ਕਿਉਂਕਿ ਨਿੱਜੀ ਸਕੂਲ ਵਾਰ-ਵਾਰ ਕਿਤਾਬਾਂ ਤੇ ਵਰਦੀਆਂ ਬਦਲ ਕੇ ਦੁਕਾਨਦਾਰਾਂ ਨਾਲ ਮਿਲ ਕੇ ਮੋਟਾ ਕਮਿਸ਼ਨ ਵਸੂਲ ਰਹੇ ਹਨ। ਸਰਕਾਰ ਨੂੰ ਸਖ਼ਤ ਫ਼ੈਸਲਾ ਲੈਂਦਿਆਂ ਹੋਇਆਂ ਲੁੱਟ-ਖਸੁੱਟ ਕਰ ਰਹੇ ਇਨ੍ਹਾਂ ਪ੍ਰਾਈਵੇਟ ਸਕੂਲਾਂ ਦੇ ਖਿਲਾਫ਼ ਸਖ਼ਤ ਕਾਰਵਾਈ ਕਰਕੇ ਮਾਪਿਆਂ ਨੂੰ ਇਨਸਾਫ਼ ਦਿਵਾਉਣਾ ਚਾਹੀਦਾ ਹੈ ਤਾਂ ਕਿ ਅੱਗੇ ਤੋਂ ਮਾਪਿਆਂ ਨੂੰ ਆਪਣੇ ਬੱਚਿਆਂ ਨੂੰ ਚੰਗੀ ਸਿੱਖਿਆ ਦਿਵਾਉਣ ਲਈ ਭਾਰੀ ਫੀਸਾਂ ਕਰਕੇ ਕੋਈ ਪ੍ਰੇਸ਼ਾਨੀ ਨਾ ਆਵੇ।-

ਮਸ਼ੇਰ ਸਿੰਘ ਸੋਹੀਪਿੰਡ ਸੋਹੀਆਂ, ਡਾਕ: ਚੀਮਾ ਖੁੱਡੀ, ਤਹਿ: ਬਟਾਲਾ, ਜ਼ਿਲ੍ਹਾ ਗੁਰਦਾਸਪੁਰ।

ਨਸ਼ਿਆਂ 'ਤੇ ਨਕੇਲ
ਪੰਜਾਬ ਵਿਚ ਪਿਛਲੇ ਕੁਝ ਸਾਲਾਂ ਤੋਂ ਫੈਲੇ ਨਸ਼ਿਆਂ ਨੂੰ ਨਕੇਲ ਪਾਉਣ ਲਈ ਨਵੀਂ-ਨਵੀਂ ਸੱਤਾ ਵਿਚ ਆਈ ਕੈਪਟਨ ਅਮਰਿੰਦਰ ਸਿੰਘ ਦੀ ਅਗਵਾਈ ਵਾਲੀ ਕਾਂਗਰਸ ਸਰਕਾਰ ਪੂਰੀ ਤਰ੍ਹਾਂ ਸਰਗਰਮ ਨਜ਼ਰ ਆ ਰਹੀ ਹੈ। ਮਾਣਯੋਗ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਕੁਰਸੀ ਸੰਭਾਲਦਿਆਂ ਹੀ ਨਸ਼ਿਆਂ ਦੇ ਕਾਰੋਬਾਰ ਨਾਲ ਜੁੜੇ ਲੋਕਾਂ ਨੂੰ ਜਿਥੇ ਇਸ ਧੰਦੇ ਤੋਂ ਬਾਜ ਆਉਣ ਲਈ ਸਖ਼ਤ ਤਾੜਨਾ ਕੀਤੀ ਗਈ ਹੈ, ਉਥੇ ਰਾਜ ਦੇ ਡਿਪਟੀ ਕਮਿਸ਼ਨਰਾਂ, ਜ਼ਿਲ੍ਹਾ ਪੁਲਿਸ ਮੁਖੀਆਂ ਅਤੇ ਹੋਰ ਸੀਨੀਅਰ ਅਧਿਕਾਰੀਆਂ ਨੂੰ ਇਸ ਮੁਹਿੰਮ ਨੂੰ ਕਾਮਯਾਬ ਕਰਨ ਲਈ ਨਸ਼ਾ ਵੇਚਣ ਵਾਲਿਆਂ ਖਿਲਾਫ਼ ਸਖ਼ਤ ਕਾਰਵਾਈ ਯਕੀਨੀ ਬਣਾਉਣ ਦੀਆਂ ਹਦਾਇਤਾਂ ਵੀ ਜਾਰੀ ਕੀਤੀਆਂ ਗਈਆਂ ਹਨ। ਸੋ, ਸਾਨੂੰ ਸਭ ਨੂੰ ਵੀ ਇਸ ਮੁਹਿੰਮ ਦਾ ਹਿੱਸਾ ਬਣ ਕੇ ਆਪਣੇ-ਆਪਣੇ ਇਲਾਕੇ ਅੰਦਰ ਚੋਰੀ-ਛੁਪੇ ਨਸ਼ੇ ਦਾ ਕਾਰੋਬਾਰ ਕਰਨ ਵਾਲੇ ਲੋਕਾਂ ਦੀ ਜਾਣਕਾਰੀ ਪੁਲਿਸ ਨੂੰ ਪਹਿਲ ਦੇ ਆਧਾਰ 'ਤੇ ਦੇਣੀ ਚਾਹੀਦੀ ਹੈ ਤਾਂ ਜੋ ਨਸ਼ਿਆਂ ਦੀ ਦਲਦਲ ਵਿਚ ਧੱਸਦੀ ਜਾ ਰਹੀ ਜਵਾਨੀ ਬਰਬਾਦ ਹੋਣੋਂ ਬਚ ਸਕੇ ਅਤੇ ਪੰਜਾਬ ਮੁੜ ਤਰੱਕੀ ਦੀਆਂ ਬੁਲੰਦੀਆਂ ਨੂੰ ਛੂਹਣ ਲੱਗੇ।

-ਰਾਜਾ ਗਿੱਲ (ਚੜਿੱਕ)
ਮੋ: 94654-11585

ਸਿਆਣੇ ਕਹਿੰਦੇ ਹੱਸਣਾ ਚਾਹੀਦੈ
ਸਿਆਣਿਆਂ ਦਾ ਕਹਿਣਾ ਹੈ ਕਿ ਹੱਸਣਾ ਰੂਹ ਦੀ ਖੁਰਾਕ ਹੈ। ਜੀਵਨ ਦੇ ਹਰ ਪਲ ਨੂੰ ਖੁਸ਼ਹਾਲ ਬਣਾਉਣ ਲਈ ਜ਼ਰੂਰੀ ਹੈ ਕਿ ਅਸੀਂ ਸਦਾ ਖੁਸ਼ ਰਹੀਏ ਕਿਉਂਕਿ ਸਦਾ ਖੁਸ਼ ਰਹਿਣ ਵਾਲਾ ਵਿਅਕਤੀ ਜਿਥੇ ਹਮੇਸ਼ਾ ਤੰਦਰੁਸਤ ਰਹਿੰਦਾ ਹੈ, ਉਥੇ ਉਹ ਹਰ ਵੇਲੇ ਫੁੱਲਾਂ ਵਾਂਗ ਖਿੜ੍ਹਿਆ-ਖਿੜ੍ਹਿਆ ਵੀ ਰਹਿੰਦਾ ਹੈ। ਇਹ ਵੀ ਸੱਚ ਹੈ ਕਿ ਹੱਸਦਿਆਂ ਦੇ ਹੀ ਘਰ ਵੱਸਦੇ ਹਨ। ਮੱਥੇ ਤਿਉੜੀ ਰੱਖਣ ਵਾਲਾ ਵਿਅਕਤੀ ਜਿਥੇ ਲੋਕਾਂ ਵਿਚ ਘ੍ਰਿਣਾ ਦਾ ਪਾਤਰ ਬਣਿਆ ਰਹਿੰਦਾ ਹੈ, ਉਥੇ ਉਹ ਜ਼ਿੰਦਗੀ ਵਿਚ ਬਾਕੀ ਲੋਕਾਂ ਨਾਲੋਂ ਕਾਫੀ ਪਛੜ ਕੇ ਵੀ ਰਹਿ ਜਾਂਦਾ ਹੈ। ਇਹ ਵੀ ਸੱਚ ਹੈ ਕਿ ਲਗਪਗ ਹਰ ਮਨੁੱਖ ਤਣਾਅ, ਭੈਅ ਅਤੇ ਚਿੰਤਾ ਵਿਚ ਗ੍ਰਸਤ ਹੈ। ਅੱਜ ਮਨੁੱਖ ਨੇ ਸਮੱਸਿਆਵਾਂ ਨੂੰ ਏਨਾ ਵਧਾ ਲਿਆ ਹੈ ਕਿ ਉਹ ਮਾਨਸਿਕ ਰੋਗੀ ਬਣਦਾ ਜਾ ਰਿਹਾ ਹੈ। ਜਿਥੇ ਉਹ ਸਮੇਂ ਸਿਰ ਖਾਣਾ-ਪੀਣਾ ਭੁੱਲ ਗਿਆ ਹੈ, ਉਥੇ ਉਹ ਹੱਸਣਾ ਵੀ ਭੁੱਲਦਾ ਜਾ ਰਿਹਾ ਹੈ। ਸਿਆਣਿਆਂ ਦੀ ਉਪਰੋਕਤ ਸਲਾਹ 'ਤੇ ਅਮਲ ਕਰਨ ਨਾਲ ਅਜੋਕਾ ਮਨੁੱਖ ਕਾਫੀ ਹੱਦ ਤੱਕ ਰਾਹਤ ਪਾ ਸਕਦਾ ਹੈ।

-ਬੰਤ ਸਿੰਘ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

30/03/2017

ਸ਼ਲਾਘਾਯੋਗ ਉਪਰਾਲਾ

ਤਕਨੀਕੀ ਸਿੱਖਿਆ ਅਤੇ ਉਦਯੋਗਿਕ ਸਿਖਲਾਈ ਮੰਤਰੀ ਸ੍ਰੀ ਚਰਨਜੀਤ ਸਿੰਘ ਚੰਨੀ ਦਾ ਨਵਾਂ ਸਿਲੇਬਸ ਲਾਗੂ ਕਰਨ ਦਾ ਉਪਰਾਲਾ ਬਹੁਤ ਹੀ ਸ਼ਲਾਘਾਯੋਗ ਹੈ। ਚੰਨੀ ਸਾਹਿਬ ਵਧਾਈ ਦੇ ਪਾਤਰ ਹਨ, ਜਿਨ੍ਹਾਂ ਨੇ ਸਮਾਜ ਦੇ ਨੌਜਵਾਨਾਂ ਦੀ ਮੁੱਖ ਸਮੱਸਿਆ ਬੇਰੁਜ਼ਗਾਰੀ ਨੂੰ ਸੁਲਝਾਉਣ ਵੱਲ ਧਿਆਨ ਦਿੱਤਾ ਹੈ। ਨਵੇਂ ਸਿਲੇਬਸ ਅਨੁਸਾਰ ਇਨ੍ਹਾਂ ਬਣ ਰਹੇ ਇੰਜੀਨੀਅਰ ਨੌਜਵਾਨਾਂ ਨੂੰ ਉਦਯੋਗਿਕ ਇਕਾਈਆਂ ਨਾਲ ਜੋੜ ਕੇ ਇਕਾਈਆਂ ਦੀ ਲੋੜ ਅਨੁਸਾਰ ਸਿਖਲਾਈ ਦੁਆ ਕੇ ਨੌਜਵਾਨਾਂ ਨੂੰ ਕਿੱਤੇ ਦੇ ਮਾਹਿਰ ਅਤੇ ਰੁਜ਼ਗਾਰ ਦੇ ਯੋਗ ਬਣਾ ਕੇ ਬੇਰੁਜ਼ਗਾਰੀ ਨੂੰ ਨੱਥ ਪਾਈ ਜਾ ਸਕੇਗੀ ਅਤੇ ਨੌਜਵਾਨ ਸਵੈ-ਰੁਜ਼ਗਾਰ ਲਈ ਵੀ ਉਤਸ਼ਾਹਿਤ ਹੋਣਗੇ।

-ਡਾ: ਚਮਨ ਲਾਲ ਸਚਦੇਵਾ
ਮੋਗਾ।

ਜਲੰਧਰ ਟੀ.ਵੀ. 'ਤੇ ਵੀ

ਅੱਜ ਪੰਜਾਬੀ ਗੀਤ-ਸੰਗੀਤ ਫੈਲ ਤਾਂ ਬਹੁਤ ਵੱਡੇ ਪੱਧਰ 'ਤੇ ਰਿਹਾ ਹੈ ਪਰ ਇਸ ਦਾ ਮਿਆਰ ਦਿਨ-ਬਦਿਨ ਡਿਗਦਾ ਜਾ ਰਿਹਾ ਹੈ। ਅੱਜ ਬਹੁਗਿਣਤੀ ਸੰਗੀਤਕ ਪੰਜਾਬੀ ਚੈਨਲ ਪੰਜਾਬੀ ਗਾਇਕੀ ਵਿਖਾ ਰਹੇ ਹਨ ਤੇ ਦਿਖਾਏ ਜਾਣ ਵਾਲੇ ਗੀਤ ਕਈ ਪਾਸਿਆਂ ਤੋਂ ਗ਼ਲਤ ਹੁੰਦੇ ਹਨ। ਇਸੇ ਦੇਖਾ-ਦੇਖੀ ਅਧੀਨ ਹੁਣ ਸਰਕਾਰੀ ਚੈਨਲ, ਜਲੰਧਰ ਟੀ.ਵੀ. ਵੀ ਆਪਣੇ ਸੰਗੀਤਕ ਪ੍ਰੋਗਰਾਮਾਂ ਵਿਚ ਅਸ਼ਲੀਲ ਗੀਤ ਪੇਸ਼ ਕਰਨ ਲੱਗ ਪਿਆ ਹੈ। ਬੀਤੇ ਦਿਨੀਂ ਇਸ ਚੈਨਲ 'ਤੇ ਗੀਤ ਚੱਲ ਰਿਹਾ ਸੀ 'ਨੀ ਤੂੰ ਦੇਸੀ ਦੇ ਡਰੰਮ ਵਰਗੀ, ਜੱਟ ਪੀ ਜਾਊ ਗਟ-ਗਟ ਕਰਕੇ'। ਹੁਣ ਦੱਸੋ ਇਹੋ ਜਿਹੇ ਗੀਤ ਧੱਕੇ ਨਾਲ ਵਿਖਾਉਣ ਦੀ ਕੀ ਤੁਕ ਬਣਦੀ ਹੈ। ਇਸ ਗੀਤ ਵਿਚ ਨਸ਼ਿਆਂ ਦਾ ਪ੍ਰਚਾਰ, ਔਰਤ ਦਾ ਗ਼ਲਤ ਰੂਪ, ਨੰਗੇਜ਼ ਆਦਿ ਸਭ ਕੁਝ ਰੱਜ ਕੇ ਦਿਖਾਇਆ ਗਿਆ ਹੈ। ਸਮਝ ਨਹੀਂ ਆ ਰਹੀ ਕਿ ਸਭ ਆਪਣੀ ਜ਼ਿੰਮੇਵਾਰੀ ਛੱਡ ਕੇ ਕੀ ਸੋਚ ਰਹੇ ਹਨ, ਜੋ ਉੱਚ ਅਹੁਦਿਆਂ 'ਤੇ ਬੈਠੇ ਹਨ। ਇਨ੍ਹਾਂ ਗ਼ਲਤ ਗੱਲਾਂ ਦਾ ਵੱਧ ਤੋਂ ਵੱਧ ਵਿਰੋਧ ਹੋਵੇ ਤਾਂ ਜੋ ਲੋਕ ਵੀ ਜਾਗਣ ਅਤੇ ਟੀ.ਵੀ. ਅਧਿਕਾਰੀ ਵੀ ਸੋਚਣ ਲਈ ਮਜਬੂਰ ਹੋਣ।

-ਬਲਬੀਰ ਸਿੰਘ ਬੱਬੀ
ਪਿੰਡ ਤੱਖਰਾਂ (ਲੁਧਿਆਣਾ)।

ਅਕਸ਼ੈ ਕੁਮਾਰ ਵੱਲੋਂ ਆਰਥਿਕ ਮਦਦ

ਪਿਛਲੇ ਦਿਨੀਂ ਸਾਡੇ ਦੇਸ਼ ਦੇ ਛੱਤੀਸਗੜ੍ਹ ਸੂਬੇ ਦੇ ਸੁਕਮਾ ਜ਼ਿਲ੍ਹੇ 'ਚ ਨਕਸਲੀਆਂ ਨਾਲ 2 ਘੰਟੇ ਤੱਕ ਚੱਲੇ ਮੁਕਾਬਲੇ 'ਚ ਸੀ.ਆਰ.ਪੀ.ਐਫ. ਦੇ 12 ਜਵਾਨ ਸ਼ਹੀਦ ਹੋ ਗਏ ਸਨ। ਇਹ ਬੜੀ ਹੀ ਦੁੱਖਦਾਇਕ ਘਟਨਾ ਸੀ। ਇਸ ਦੁੱਖ ਦੀ ਘੜੀ 'ਚ ਸ਼ਹੀਦ ਪਰਿਵਾਰਾਂ ਦੇ ਆਰਥਿਕ ਸਹਾਰੇ ਲਈ ਬਾਲੀਵੁੱਡ ਅਭਿਨੇਤਾ ਅਕਸ਼ੈ ਕੁਮਾਰ ਨੇ ਆਪਣੀ ਕਿਰਤ ਕਮਾਈ 'ਚੋਂ 9 ਲੱਖ ਪ੍ਰਤੀ ਪਰਿਵਾਰ ਦੇ ਹਿਸਾਬ ਨਾਲ 1 ਕਰੋੜ 8 ਲੱਖ ਰੁਪਏ ਮਦਦ ਦੇ ਰੂਪ 'ਚ ਦਿੱਤੇ ਹਨ। ਇਹ ਅਕਸ਼ੈ ਕੁਮਾਰ ਵੱਲੋਂ ਕੀਤਾ ਗਿਆ ਬੜਾ ਹੀ ਸ਼ਲਾਘਾਯੋਗ ਉਪਰਾਲਾ ਹੈ। ਪਰਮਾਤਮਾ ਅਕਸ਼ੈ ਕੁਮਾਰ ਤੇ ਉਸ ਦੇ ਪਰਿਵਾਰ ਨੂੰ ਸੁੱਖ-ਸਲਾਮਤੀ ਤੇ ਦਿਨ ਦੁੱਗਣੀ ਤੇ ਰਾਤ ਚੋਗੁਣੀ ਤਰੱਕੀ ਬਖਸ਼ੇ।

-ਰਾਜੇਸ਼ ਛਾਬੜਾ
ਪਿੰਡ ਤੇ ਡਾਕ: ਧਿਆਨਪੁਰ (ਬਟਾਲਾ)।

29/03/2017

 ਨਵੀਂ ਸਰਕਾਰ ਨਵੀਆਂ ਚੁਣੌਤੀਆਂ
ਲੰਮੇਰੀ ਤੇ ਅਕੇਵੇਂ ਭਰੀ ਚੋਣ ਪ੍ਰਕਿਰਿਆ ਤੋਂ ਬਾਅਦ ਆਖ਼ਰ ਕੈਪਟਨ ਸਰਕਾਰ ਨੇ ਸੂਬੇ ਦੀ ਵਾਗਡੋਰ ਸੰਭਾਲ ਕੇ ਨਵੇਂ ਸਿਰੇ ਤੋਂ ਵਿਧਾਨ ਪਾਲਿਕਾ ਦੇ ਫਰਜ਼ ਨਿਭਾਉਣੇ ਸ਼ੁਰੂ ਕਰ ਦਿੱਤੇ ਹਨ। ਸ਼ੁਰੂਆਤੀ ਦੌਰ ਵਿਚ ਕੁਝ ਚੰਗੇ ਫ਼ੈਸਲੇ ਲੈ ਕੇ ਹਾਕਮ ਧਿਰ ਨੇ ਲੋਕਾਂ ਵਿਚ ਆਪਣੀ ਭੱਲ ਬਣਾਉਣ ਦੀ ਕੋਸ਼ਿਸ਼ ਵੀ ਕੀਤੀ ਹੈ ਤਾਂ ਜੋ ਲੋਕਾਈ ਨੂੰ ਬਦਲਾਅ ਦਾ ਅਹਿਸਾਸ ਕਰਾਇਆ ਜਾ ਸਕੇ। ਲੋਕ ਹਿੱਤ ਵਿਚ ਲਏ ਫ਼ੈਸਲਿਆਂ ਦੀ ਸ਼ਲਾਘਾ ਕਰਨੀ ਵੀ ਬਣਦੀ ਹੈ। ਪਰ ਤਾਜ ਪਹਿਨਦਿਆਂ ਹੀ ਹਜ਼ਾਰਾਂ ਹੋਰ ਚੁਣੌਤੀਆਂ ਵੀ ਸਰਕਾਰ ਦੇ ਸਵਾਗਤ ਲਈ ਤਿਆਰ-ਬਰ-ਤਿਆਰ ਖੜ੍ਹੀਆਂ ਹਨ। ਚਾਹੇ ਉਹ ਐਸ.ਵਾਈ.ਐਲ. ਦਾ ਮੁੱਦਾ ਹੋਵੇ ਜਾਂ ਨਸ਼ੇ ਦੇ ਸਮਗਲਰਾਂ ਅਤੇ ਮਾਫ਼ੀਆ ਰਾਜ ਦੀ ਗੁੰਡਾਗਰਦੀ ਦਾ ਮੁੱਦਾ। ਡੂੰਘੀ ਦਲਦਲ ਵਿਚ ਧਸੀ ਹੋਈ ਅਮਨ-ਕਾਨੂੰਨ ਦੀ ਗੱਡੀ ਨੂੰ ਵੀ ਰਾਹ 'ਤੇ ਤੋਰਨਾ ਹੈ ਤੇ ਮੁਲਾਜ਼ਮ ਵਰਗ ਦੀਆਂ ਆਸਾਂ ਨੂੰ ਵੀ ਬੂਰ ਪਾਉਣਾ ਕਾਂਗਰਸ ਦੇ ਚੋਣ ਮੈਨੀਫੈਸਟੋ ਦਾ ਹਿੱਸਾ ਹੈ। ਕੁੱਲ ਮਿਲਾ ਕੇ ਲੋਕਾਂ ਨੂੰ ਭਵਿੱਖ ਦੀ ਪੌੜੀ ਦੇ ਉਸ ਸਿਰੇ ਤੱਕ ਅਪੜਾਉਣ ਦਾ ਵਾਅਦਾ ਕੀਤਾ ਗਿਆ ਹੈ ਜਿਥੋਂ ਇਕ ਖੁਸ਼ਹਾਲ ਤੇ ਚੰਗੇਰੇ ਭਵਿੱਖ ਦੀ ਫੁਟਦੀ ਲੋਅ ਦਾ ਚਾਨਣ ਦਿਸਦਾ ਹੋਵੇ ਤੇ ਇਸੇ ਪੌੜੀ ਦੇ ਡੰਡੇ ਚੜ੍ਹ ਕੇ ਹੀ ਕਾਂਗਰਸ ਨੇ ਵੀ ਪੂਰੇ 10 ਸਾਲ ਬਾਅਦ ਸਫਲਤਾ ਦਾ ਅਨੰਦ ਮਾਣਿਆ। ਲੋਕਾਂ ਨੇ ਵੀ ਆਪਣੇ ਵੱਲੋਂ ਸਾਰੀ ਘਾਟ ਦੂਰ ਕਰਦਿਆਂ ਆਸ ਤੋਂ ਵੱਧ ਸਫਲਤਾ ਨਾਲ ਸਾਥ ਦਿੱਤਾ। ਹੁਣ ਦੇਖਣ ਵਾਲੀ ਗੱਲ ਹੋਵੇਗੀ ਕਿ ਕਾਗਜ਼ਾਂ ਦੀ ਹਿੱਕ 'ਤੇ ਲਕੀਰਾਂ ਖਿੱਚ ਕੇ ਦਿਖਾਏ ਸੁਪਨੇ ਜ਼ਮੀਨੀ ਸਤਹ 'ਤੇ ਕਿੰਨੀ ਡੂੰਘਾਈ ਨਾਲ ਪੁੰਗਰਦੇ ਹਨ ਜਾਂ ਫਿਰ ਹਮੇਸ਼ਾ ਵਾਂਗ ਪਾਰਟੀਆਂ ਵੱਲੋਂ ਵਾਅਦੇ ਵਫ਼ਾ ਨਾ ਕਰਨ ਦੀ ਰੀਤ ਹੀ ਭਾਰੂ ਰਹੇਗੀ।


-ਬਲਜਿੰਦਰ ਸਿੰਘ ਸਮਾਘ
ਸ੍ਰੀ ਮੁਕਤਸਰ ਸਾਹਿਬ।


ਕਿਵੇਂ ਰੁਕਣ ਖ਼ੁਦਕੁਸ਼ੀਆਂ

ਅੱਜਕਲ੍ਹ ਪੰਜਾਬ ਵਿਚ ਜਿਥੇ ਕਿਸਾਨ ਖ਼ੁਦਕੁਸ਼ੀਆਂ ਦਾ ਰੁਝਾਨ ਦਿਨੋ-ਦਿਨ ਵਧ ਰਿਹਾ ਹੈ, ਉਥੇ ਹੀ ਪੰਜਾਬੀ ਪਰਿਵਾਰਾਂ ਵਿਚ ਆਪਣੇ ਪਰਿਵਾਰਕ ਝਗੜਿਆਂ ਵਿਚ ਅਣਭੋਲ ਤੇ ਬੇਕਸੂਰ ਬੱਚੇ ਵੀ ਬਲੀ ਦਾ ਬੱਕਰਾ ਬਣ ਰਹੇ ਹਨ। ਕਈ ਪਰਿਵਾਰ ਆਪਣੇ ਨੰਨ੍ਹੇ ਬੱਚੇ-ਬੱਚੀਆਂ ਸਮੇਤ ਨਹਿਰਾਂ ਦੀ ਭੇਟ ਚੜ੍ਹ ਰਹੇ ਹਨ, ਜੋ ਕਿ ਬਹੁਤ ਹੀ ਚਿੰਤਾ ਦਾ ਵਿਸ਼ਾ ਹੈ। ਹਰ ਦੰਪਤੀ ਨੂੰ ਦ੍ਰਿੜ੍ਹ ਇਰਾਦੇ ਨਾਲ ਔਖੇ ਤੋਂ ਔਖੇ ਸਮਾਜਿਕ ਤੇ ਆਰਥਿਕ ਹਾਲਾਤ ਨਾਲ ਨਜਿੱਠਣਾ ਆਉਣਾ ਚਾਹੀਦਾ ਹੈ। ਹਰ ਮਸਲੇ ਦਾ ਕੋਈ ਨਾ ਕੋਈ ਹੱਲ ਜ਼ਰੂਰ ਨਿਕਲ ਆਉਂਦਾ ਹੈ। ਖ਼ੁਦਕੁਸ਼ੀ ਕਿਸੇ ਮਸਲੇ ਦਾ ਹੱਲ ਨਹੀਂ। ਜ਼ਿੰਦਗੀ ਅਨਮੋਲ ਹੈ। ਹਰ ਪਰਿਵਾਰ ਨੂੰ ਚਾਹੀਦਾ ਹੈ ਕਿ ਉਹ ਆਪਣੇ ਖਰਚਿਆਂ ਨੂੰ ਆਪਣੀ ਆਮਦਨ ਦੇ ਅੰਦਰ ਹੀ ਰੱਖੇ। ਆਮਦਨ ਨਾਲੋਂ ਵਧਿਆ ਖਰਚ ਕਈ ਪ੍ਰੇਸ਼ਾਨੀਆਂ ਪੈਦਾ ਕਰ ਜਾਂਦਾ ਹੈ।


-ਮਾਸਟਰ ਜਸਵੰਤ ਸਿੰਘ
ਬਾਬਾ ਨਾਮਦੇਵ ਪਬਲਿਕ ਸਕੂਲ, ਭੱਟੀਵਾਲ, ਘੁਮਾਣ, ਗੁਰਦਾਸਪੁਰ।


ਖੂੰਖਾਰ ਕੁੱਤੇ ਤੇ ਭੈਭੀਤ ਸਮਾਜ

ਪੰਜਾਬ ਦੇ ਪਿੰਡਾਂ ਵਿਚ ਦਗੜ-ਦਗੜ ਕਰਦੇ ਕੁੱਤਿਆਂ ਦੇ ਝੁੰਡਾਂ ਤੋਂ ਸਮਾਜ ਕਿਸ ਤਰ੍ਹਾਂ ਭੈਅ-ਭੀਤ ਹੋ ਕੇ ਜ਼ਿੰਦਗੀ ਬਸਰ ਕਰ ਰਿਹਾ ਹੈ, ਇਹ ਲਿਖਣ ਤੇ ਦੱਸਣ ਤੋਂ ਬਾਹਰੀ ਗੱਲ ਹੈ। ਜਦੋਂ ਅਖ਼ਬਾਰਾਂ ਵਿਚ ਕੁੱਤਿਆਂ ਵੱਲੋਂ ਮਚਾਈ ਬਰਬਾਦੀ ਦੀ ਕਹਾਣੀ ਪੜ੍ਹਨ ਨੂੰ ਮਿਲਦੀ ਹੈ ਤਾਂ ਦਿਲ ਦਹਿਲ ਜਾਂਦਾ ਹੈ ਕਿਉਂਕਿ ਹੱਡਾ ਰੋੜੀਆਂ ਪਿੰਡਾਂ ਦੇ ਲਾਗੇ ਤੇ ਸੜਕਾਂ ਦੇ ਉੱਪਰ ਬਣੀਆਂ ਹੋਈਆਂ ਹਨ। ਉਹ ਕੁੱਤੇ ਪਸ਼ੂਆਂ ਦਾ ਮਾਸ ਖਾ ਕੇ ਮਾਸਖੋਰ ਕੁੱਤੇ ਬਣ ਜਾਂਦੇ ਹਨ। ਫਿਰ ਉਹ ਪਿੰਡਾਂ ਵਿਚ 'ਕੱਲੇ ਇਕਹਿਰੇ ਬੰਦੇ 'ਤੇ ਜਾਂ ਫਿਰ ਬੱਚਿਆਂ 'ਤੇ ਹਮਲਾ ਕਰਕੇ ਕੋਹਰਾਮ ਮਚਾਉਂਦੇ ਹਨ। ਸਰਕਾਰ ਨੂੰ ਇਨ੍ਹਾਂ 'ਤੇ ਗੰਭੀਰਤਾ ਨਾਲ ਵਿਚਾਰਨਾ ਚਾਹੀਦਾ ਹੈ। ਇਹੋ ਜਿਹਾ ਕਾਨੂੰਨ ਬਣਾਉਣਾ ਚਾਹੀਦਾ ਹੈ ਜਿਸ ਨਾਲ ਸਮਾਜ ਵਿਚ ਭੈਅ-ਭੀਤ ਦਾ ਮਾਹੌਲ ਹਟਾਇਆ ਜਾ ਸਕੇ। ਕਈ ਵਾਰ ਸੜਕਾਂ 'ਤੇ ਹੁੰਦੇ ਐਕਸੀਡੈਂਟ ਵੀ ਕੁੱਤਿਆਂ ਦੇ ਤਾਂਡਵ ਨਾਚ ਦਾ ਹੀ ਹਿੱਸਾ ਬਣਦੇ ਹਨ। ਸਰਕਾਰ ਨੂੰ ਇਸ ਪਾਸੇ ਵੱਲ ਧਿਆਨ ਦੇ ਕੇ ਕਾਨੂੰਨ ਬਣਾਉਣ ਦੀ ਲੋੜ ਹੈ।


-ਮਨਜੀਤ ਸਿੰਘ ਭਾਮ।

28/03/2017

 ਜੱਟ ਦੀ ਜੂਨ ਬੁਰੀ

ਪਿਛਲੇ ਦਿਨੀਂ ਡਾ: ਸ. ਸ. ਛੀਨਾ ਦਾ ਲੇਖ 'ਇਕ ਗੰਭੀਰ ਕੌਮੀ ਮੁੱਦਾ ਹਨ ਕਿਸਾਨ ਖ਼ੁਦਕੁਸ਼ੀਆਂ' ਸੁੱਤੀਆਂ ਸਰਕਾਰਾਂ ਨੂੰ ਜਗਾਉਣ ਵਾਲਾ ਸੀ। ਅੰਗਰੇਜ਼ ਸਰਕਾਰ ਵੇਲੇ ਜੇ ਕੋਈ ਕਿਸਾਨ ਖ਼ੁਦਕੁਸ਼ੀ ਕਰਦਾ ਸੀ ਤਾਂ ਸਰਕਾਰ ਉਸ ਦੇ ਪਰਿਵਾਰ ਖਿਲਾਫ਼ ਕੇਸ ਦਰਜ ਕਰਦੀ ਸੀ, ਜਿਸ ਦਾ ਨਤੀਜਾ ਇਹ ਹੋਇਆ ਕਿ ਕੋਈ ਹਿੰਮਤ ਨਹੀਂ ਕਰਦਾ ਸੀ ਖ਼ੁਦਕੁਸ਼ੀ ਕਰਨ ਦੀ। ਇਸ ਦੇ ਉਲਟ ਪਿਛਲੀ ਅਕਾਲੀ-ਭਾਜਪਾ ਸਰਕਾਰ, ਜੋ ਕਿਸਾਨਾਂ ਦੀ ਸਰਕਾਰ ਅਖਵਾਉਂਦੀ ਰਹੀ ਹੈ, ਵਿਚ ਸਭ ਤੋਂ ਵੱਧ ਕਿਸਾਨੀ ਖ਼ੁਦਕੁਸ਼ੀਆਂ ਹੋਈਆਂ ਹਨ। ਬਿਜਲੀ, ਪਾਣੀ ਬਿੱਲ ਮੁਆਫ਼ ਹੋਣ ਦੇ ਬਾਵਜੂਦ ਕਿਸਾਨਾਂ ਨੇ ਖ਼ੁਦਕੁਸ਼ੀ ਦਾ ਰਾਹ ਚੁਣਿਆ। ਖ਼ੁਦਕੁਸ਼ੀਆਂ ਦਾ ਮੁੱਖ ਕਾਰਨ ਕਰਜ਼ਾ ਹੈ, ਜੋ ਵਧਦਾ ਤਾਂ ਗਿਆ ਪਰ ਵਾਪਸ ਨਹੀਂ ਹੋਇਆ। ਦੂਜਾ ਕਾਰਨ ਆੜ੍ਹਤੀਆਂ ਦਾ ਬੈਂਕਾਂ ਨਾਲੋਂ ਵਧੇਰੇ ਵਿਆਜ ਹੈ। ਪਿੰਡਾਂ ਵਿਚ ਬੇਰੁਜ਼ਗਾਰੀ, ਫ਼ਸਲਾਂ ਦਾ ਸਹੀ ਮੁੱਲ ਨਾ ਮਿਲਣਾ, ਡੇਅਰੀ ਧੰਦਾ ਵੀ ਦਮ ਤੋੜਦਾ ਨਜ਼ਰ ਆ ਰਿਹਾ ਹੈ। ਹੁਣ ਤਾਂ ਕਾਂਗਰਸ ਰਾਜ ਆ ਗਿਆ ਹੈ। ਸਵਾਮੀਨਾਥਨ ਰਿਪੋਰਟ ਲਾਗੂ ਕਰਵਾਉਣ ਲਈ ਪਹਿਲ ਕਰਨੀ ਚਾਹੀਦੀ ਹੈ। 'ਜੱਟ ਦੀ ਜੂਨ ਬੁਰੀ ਤੜਫ-ਤੜਫ਼ ਮਰ ਜਾਣਾ' ਸਹੀ ਤੱਥ ਹਨ।

-ਹਰਜਿੰਦਰ ਪਾਲ ਸਿੰਘ
ਜਵੱਦੀ ਕਲਾਂ, ਲੁਧਿਆਣਾ।

ਫੀਸਾਂ ਵਿਚ ਬੇਲੋੜਾ ਵਾਧਾ

ਪਿਛਲੇ ਦਿਨੀਂ ਅਖ਼ਬਾਰਾਂ ਰਾਹੀਂ ਹੀ ਪਤਾ ਲੱਗਾ ਕਿ ਸੈਂਟਰਲ ਮੋਟਰ ਵਹੀਕਲ ਐਕਟ ਤਹਿਤ ਅਲੱਗ-ਅਲੱਗ ਕੰਮਾਂ ਲਈ ਵਿਭਾਗ ਵੱਲੋਂ ਜੋ ਸਰਕਾਰੀ ਫੀਸਾਂ ਲਈਆਂ ਜਾ ਰਹੀਆਂ ਸਨ, ਉਨ੍ਹਾਂ ਵਿਚ ਚੁੱਪ-ਚੁਪੀਤੇ ਹੀ ਢੇਰ ਸਾਰਾ ਵਾਧਾ ਕਰ ਦਿੱਤਾ ਗਿਆ ਹੈ। ਕਈ ਫੀਸਾਂ ਵਿਚ ਤਾਂ ਨਾਜਾਇਜ਼ ਹੀ ਪੰਜ ਗੁਣਾਂ ਤੱਕ ਵਾਧਾ ਕਰ ਦਿੱਤਾ ਹੈ, ਜੋ ਕਿ ਕਿਸੇ ਪਾਸਿਉਂ ਵੀ ਸਹੀ ਨਹੀਂ ਹੈ ਤੇ ਆਮ ਜਨਤਾ ਵਿਚ ਇਨ੍ਹਾਂ ਵਧਾਈਆਂ ਫੀਸਾਂ ਦਾ ਰੋਸ ਵੀ ਹੈ। ਅੱਜ ਆਵਾਜਾਈ ਦੇ ਕੰਮ ਲਈ ਵੱਡੇ ਤੇ ਛੋਟੇ ਵਾਹਨਾਂ ਦੀ ਭਾਰੀ ਲੋੜ ਹੈ, ਇਨ੍ਹਾਂ ਬਿਨਾਂ ਕੰਮ ਨਹੀਂ ਚਲਦਾ, ਇਸ ਤਰ੍ਹਾਂ ਵਧਾਈਆਂ ਫੀਸਾਂ ਕਾਰਨ ਹਰ ਪਾਸੇ ਮਹਿੰਗਾਈ ਦਾ ਅਸਰ ਵੀ ਪੈਣਾ ਲਾਜ਼ਮੀ ਹੈ। ਹਾਲੇ ਤੱਕ ਨੋਟਬੰਦੀ ਵਾਲਾ ਮਸਲਾ ਪੂਰੀ ਤਰ੍ਹਾਂ ਸਹੀ ਨਹੀਂ ਹੋ ਸਕਿਆ ਤੇ ਲੋਕਾਂ ਦੇ ਕੰਮਕਾਰ ਵੀ ਠੱਪ ਜਿਹੇ ਹੀ ਹਨ, ਉੱਪਰੋਂ ਟਰਾਂਸਪੋਰਟ ਵਿਭਾਗ ਨੇ ਸਰਕਾਰੀ ਫੀਸਾਂ ਵਿਚ ਵੱਡਾ ਵਾਧਾ ਕਰਕੇ ਲੋਕਾਂ ਦੀ ਜੇਬ ਨੂੰ ਤੰਗ ਕਰ ਦਿੱਤਾ ਹੈ। ਹਾਂ ਜੇ ਕੋਈ ਫੀਸ ਆਦਿ ਵਧਾਉਣੀ ਪਵੇ ਤਾਂ ਲੋਕ ਰਾਇ ਨਾਲ ਵਧਾਉਣੀ ਚਾਹੀਦੀ ਹੈ, ਉਹ ਵੀ ਕਿਸੇ ਹਿਸਾਬ-ਕਿਤਾਬ ਨਾਲ ਨਾ ਕਿ ਕਈ ਗੁਣਾਂ ਵਧਾਈ ਜਾਵੇ। ਸਰਕਾਰ ਨੂੰ ਲੋਕ ਸਹੂਲਤਾਂ ਦਾ ਵੀ ਧਿਆਨ ਰੱਖਣਾ ਪਵੇਗਾ।

-ਬਲਬੀਰ ਸਿੰਘ ਬੱਬੀ
ਪਿੰਡ ਤੱਖਰਾਂ, ਲੁਧਿਆਣਾ।

ਜੀਵਨੀਆਂ ਪੜ੍ਹਨਾ

ਮਹਾਨ ਪੁਰਸ਼ਾਂ ਦੀਆਂ ਜੀਵਨੀਆਂ ਪੜ੍ਹਨਾ, ਉਨ੍ਹਾਂ ਨਾਲ ਗੱਲਾਂ ਕਰਨ ਦੇ ਬਰਾਬਰ ਹੁੰਦਾ ਹੈ। ਪ੍ਰਸਿੱਧ ਵਿਗਿਆਨੀ, ਉਘੇ ਖਿਡਾਰੀ, ਮਹਾਨ ਚਿੱਤਰਕਾਰ ਤੇ ਸਾਹਿਤਕਾਰ ਬੜੀ ਮਿਹਨਤ ਤੇ ਲਗਨ ਸਦਕਾ ਹੀ ਮਹਾਨ ਬਣੇ ਸਨ। ਜ਼ਿੰਦਗੀ ਵਿਚ ਆਈਆਂ ਅਨੇਕਾਂ ਅਸਫ਼ਲਤਾਵਾਂ ਦਾ ਸਾਹਮਣਾ ਕਰਦੇ ਹੋਏ ਇਨ੍ਹਾਂ ਮਹਾਨ ਪੁਰਸ਼ਾਂ ਨੇ ਕਦੇ ਹਿੰਮਤ ਨਹੀਂ ਹਾਰੀ ਤੇ ਦੁਨੀਆ 'ਤੇ ਆਪਣਾ ਨਾਂਅ ਚਮਕਾਇਆ। ਪ੍ਰਸਿੱਧ ਵਿਅਕਤੀਆਂ ਦੀਆਂ ਜੀਵਨੀਆਂ ਤੇ ਕਿਤਾਬਾਂ ਪੜ੍ਹਨਾ ਸ਼ਹੀਦ ਭਗਤ ਸਿੰਘ ਦਾ ਸ਼ੌਕ ਸੀ। ਭਗਤ ਸਿੰਘ ਫਾਂਸੀ 'ਤੇ ਚੜ੍ਹਨ ਤੋਂ ਕੁਝ ਸਮਾਂ ਪਹਿਲਾਂ ਵੀ ਲੈਨਿਨ ਦੀ ਜੀਵਨੀ ਪੜ੍ਹ ਰਿਹਾ ਸੀ। ਆਓ! ਆਪਣੇ ਬੱਚਿਆਂ ਵਿਚ ਪੁਸਤਕਾਂ ਪੜ੍ਹਨ ਦਾ ਸ਼ੌਕ ਪੈਦਾ ਕਰੀਏ ਤੇ ਉਨ੍ਹਾਂ ਦੇ ਜਨਮ ਦਿਨ 'ਤੇ ਪੁਸਤਕਾਂ ਤੋਹਫ਼ੇ ਵਜੋਂ ਭੇਟ ਕਰੀਏ। ਮਹਾਨ ਲੋਕਾਂ ਦੀਆਂ ਜੀਵਨੀਆਂ ਸਾਨੂੰ ਜੀਵਨ-ਜਾਚ ਸਿਖਾਉਂਦੀਆਂ ਹਨ। ਆਓ! ਇਨ੍ਹਾਂ ਵਿਚੋਂ ਗਿਆਨ ਸੰਗ੍ਰਹਿਤ ਕਰਕੇ ਅਸੀਂ ਵੀ ਆਪਣੇ ਦੇਸ਼ ਦੀ ਤਰੱਕੀ ਵਿਚ ਯੋਗਤਾਨ ਪਾਈਏ.

-ਸ਼ਮਸ਼ੇਰ ਸਿੰਘ ਸੋਹੀ
ਮੋ : 98764-74671.

27/03/2017

 ਭੁੱਖੇ ਕੁੱਤੇ ਖਾਂਦੇ ਬੰਦੇ
ਪਿਛਲੇ ਦਿਨੀਂ ਇਕ ਅਤਿ ਦੁਖਦਾਈ ਖ਼ਬਰ ਸੀ ਕਿ ਪਿੰਡ ਕੈਰੋਂਵਾਲ ਦੇ ਨੇੜੇ ਭੁੱਖੇ ਕੁੱਤਿਆਂ ਦੇ ਇਕ ਹਜੂਮ ਨੇ ਇਕ ਸਾਢੇ ਚਾਰ ਸਾਲਾ ਮਾਸੂਮ ਬੱਚੇ ਨੂੰ ਨੋਚ-ਨੋਚ ਕੇ ਖਾਧਾ ਹੈ। ਦੇਸ਼ ਵਿਚ ਲੋੜੋਂ ਵੱਧ, ਵਧੀ ਆਬਾਦੀ ਵਾਂਗ ਪੂਰੇ ਪੰਜਾਬ ਵਿਚ ਕੁੱਤਿਆਂ ਦੀ ਗਿਣਤੀ ਵਿਚ ਭਿਆਨਕ ਵਾਧਾ ਹੋਇਆ ਹੈ। ਕੁੱਤਿਆਂ ਦੀ ਗਿਣਤੀ ਘਟਾਉਣ ਲਈ ਇਨ੍ਹਾਂ ਨੂੰ ਲੋੜੀਂਦੇ ਟੀਕੇ ਵੱਡੀ ਪੱਧਰ ਉਤੇ ਲਗਾਉਣ ਲਈ ਸਰਕਾਰ ਨੂੰ ਫੌਰਨ ਹੀ ਮੈਦਾਨ ਵਿਚ ਨਿਤਰ ਪੈਣਾ ਜ਼ਰੂਰੀ ਹੈ। ਮੈਂ ਸਮਝਦਾ ਹਾਂ ਕਿ ਪਿੰਡ ਦੇ ਬੱਚੇ ਦੀ ਮੌਤ ਦਾ ਦੁੱਖ, ਸਰਕਾਰ ਨੂੰ ਆਪਣਾ ਦੁੱਖ ਸਮਝਣਾ ਚਾਹੀਦਾ ਹੈ ਅਤੇ ਮਾਪਿਆਂ ਦੀ ਉਚਿਤ ਸਹਾਇਤਾ ਕਰਨੀ ਚਾਹੀਦੀ ਹੈ। ਦੂਸਰੇ ਪਿੰਡਾਂ ਅਤੇ ਸ਼ਹਿਰਾਂ ਦੇ ਲੋਕਾਂ ਨੂੰ ਰੋਜ਼ਾਨਾ ਹੀ ਭੁੱਖੇ ਕੁੱਤਿਆਂ ਨੂੰ ਰੋਟੀ ਪਾਉਣੀ ਚਾਹੀਦੀ ਹੈ ਤਾਂ ਕਿ ਉਹ ਭੁੱਖੇ ਪੇਟ ਕਿਸੇ ਇਨਸਾਨ ਉਤੇ ਹਮਲਾ ਨਾ ਕਰਨ। ਸਰਕਾਰ ਅਤੇ ਪੰਚਾਇਤਾਂ ਨੂੰ ਇਸ ਪਾਸੇ ਵੱਲ ਉਚਿਤ ਧਿਆਨ ਦੀ ਲੋੜ ਹੈ ਤਾਂ ਜੋ ਕਿਸੇ ਮਾਸੂਮ ਦੀ ਜਾਨ ਨਾ ਜਾ ਸਕੇ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਅੰਮ੍ਰਿਤਸਰ।

ਲਾਵਾਰਿਸ ਬੱਚੀ ਕਿਸ ਦੀ ਹੈ?
ਅਸੀਂ ਹਰ ਰੋਜ਼ ਅਖ਼ਬਾਰਾਂ 'ਚ ਖ਼ਬਰਾਂ ਪੜ੍ਹਦੇ ਹਾਂ, ਟੀ. ਵੀ. 'ਤੇ ਖ਼ਬਰਾਂ ਸੁਣਦੇ ਹਾਂ ਕਿ ਇਹ ਲਵਾਰਿਸ ਬੱਚੀ ਕਿਸ ਦੀ ਹੈ? ਜਦੋਂ ਇਹ ਸੁਣਦੇ ਹਾਂ ਦਿਲ ਵਿਚੋਂ ਇਕ ਚੀਸ ਜਿਹੀ ਨਿਕਲਦੀ ਹੈ। ਹਿਰਦਾ ਕੰਬ ਜਾਂਦਾ ਹੈ, ਇਹ ਖ਼ਬਰ ਸੁਣ ਕੇ ਪਰ ਉਹ ਮਾਪੇ ਕਿੰਨੇ ਨਿਰਦਈ ਹਨ ਜਿਹੜੇ ਆਪਣੇ ਜਿਗਰ ਦੇ ਟੁਕੜੇ ਨੂੰ ਨਾਲੋਂ ਲਾਹ ਕੇ ਸੁੱਟ ਦਿੰਦੇ ਨੇ ਰੂੜੀਆਂ 'ਤੇ ਰੁਲਣ ਲਈ। ਕੜਾਕੇ ਦੀ ਠੰਢ 'ਚ ਠਰਨ ਲਈ, ਮਰਨ ਲਈ। ਇਕ ਨੰਨ੍ਹੀ ਜਾਨ ਨੂੰ ਕੀ ਪਤਾ ਕਿ ਉਸ ਦਾ ਏਨਾ ਹੀ ਕਸੂਰ ਹੈ ਕਿ ਉਹ ਇਕ ਲੜਕੀ ਹੈ। ਕਈ ਥਾਈਂ ਇਹ ਬੱਚੀਆਂ ਝਾੜੀਆਂ ਵਿਚ ਕੁੱਤਿਆਂ ਆਦਿ ਦਾ ਖਾਜਾ ਬਣੀਆਂ ਹਨ। ਕੀ ਅਸੀਂ ਅਨਪੜ੍ਹ ਹਾਂ, ਗੁਆਰ ਹਾਂ। ਜੰਮਣ ਤੋਂ ਪਹਿਲਾਂ ਧੀ ਨੂੰ ਮਾਰਨਾ ਬਹੁਤ ਵੱਡਾ ਪਾਪ ਹੈ। ਅਸੀਂ ਬਹੁਤ ਨਾਅਰੇ ਲਗਾ ਰਹੇ ਹਾਂ 'ਬੇਟੀ ਬਚਾਓ, ਬੇਟੀ ਪੜ੍ਹਾਓ।' ਕਿੰਨਾ ਕੁ ਅਸਰ ਹੋਇਆ ਇਨ੍ਹਾਂ ਦਾ। ਮੁੰਡਾ ਹੋਵੇ ਜਾਂ ਕੁੜੀ, ਇਹ ਕੁਦਰਤ ਦਾ ਨਿਯਮ ਹੈ ਅਤੇ ਇਸ ਨਿਯਮ ਨੂੰ ਬਣਾਈ ਰੱਖਣਾ ਹੀ ਸਾਡੇ ਸਾਰਿਆਂ ਲਈ ਸਹੀ ਹੈ। ਜੇਕਰ ਧੀਆਂ ਮਾਰ ਮੁਕਾਵਾਂਗੇ ਤਾਂ ਨੂੰਹਾਂ ਕਿਥੋਂ ਲਿਆਵਾਂਗੇ।

-ਤਿਲਕ ਰਾਜ ਰਾਜੂ
ਮੋਬਾਈਲ : 93560-42793
.

ਸੱਚ ਕੀ ਹੈ?
ਹੁਣ ਵਿਧਾਨ ਸਭਾ ਚੋਣਾਂ 'ਚ ਕਈ ਹਾਰਨ ਵਾਲੀਆਂ ਰਾਜਨੀਤਕ ਪਾਰਟੀਆਂ ਦੇ ਲੀਡਰਾਂ ਦੁਆਰਾ ਈ.ਵੀ.ਐੱਮ ਮਸ਼ੀਨਾਂ ਤੇ ਵੋਟਾਂ 'ਚ ਗੜਬੜੀ ਕਰਨ ਦੇ ਇਲਜ਼ਾਮ ਲਗਾਏ ਜਾ ਰਹੇ ਹਨ। ਭਾਵੇਂ ਕਿ ਇਹ ਗੱਲ ਸ਼ੋਭਦੀ ਨਹੀਂ ਕਿਉਂਕਿ ਈ.ਵੀ.ਐੱਮ ਮਸ਼ੀਨਾਂ ਰਾਹੀਂ ਅਜਿਹਾ ਨਹੀਂ ਹੋ ਸਕਦਾ। ਚੋਣ ਕਮਿਸ਼ਨ ਵੱਲੋਂ ਪੂਰੀ ਸਖ਼ਤੀ ਕੀਤੀ ਹੁੰਦੀ ਹੈ ਪਰ ਆਮ ਆਦਮੀ ਪਾਰਟੀ ਵੱਲੋਂ ਕਈ ਥਾਂਵਾਂ 'ਤੇ ਪੂਰੇ ਸਬੂਤਾਂ ਦੇ ਆਧਾਰ 'ਤੇ ਆਪਣੇ ਵਲੰਟੀਅਰਾਂ ਦੀਆਂ ਵੋਟਾਂ ਘੱਟ ਭੁਗਤਣ ਦੀਆਂ ਗੱਲਾਂ ਆਖੀਆਂ ਜਾ ਰਹੀਆਂ ਹਨ। ਕਿਉਂਕਿ ਉਨ੍ਹਾਂ ਦੇ ਵਲੰਟੀਅਰਾਂ ਦੀ ਗਿਣਤੀ ਜ਼ਿਆਦਾ ਹੈ ਪਰ ਵੋਟਾਂ ਬੂਥ ਤੋਂ ਗਿਣਤੀ ਮੌਕੇ ਘੱਟ ਨਿਕਲਦੀਆਂ ਹਨ। ਇਸ ਤੋਂ ਇਲਾਵਾ ਉੱਤਰ ਪ੍ਰਦੇਸ਼ ਵਿਚ ਵੀ ਅਜਿਹੇ ਦੋਸ਼ ਲਗਾਏ ਜਾ ਰਹੇ ਹਨ। ਸ੍ਰੀ ਅਰਵਿੰਦ ਕੇਜਰੀਵਾਲ ਨੇ ਮਹਾਰਾਸ਼ਟਰ ਤੋਂ ਇਕ ਉਮੀਦਵਾਰ ਦੀ ਉਦਾਹਰਨ ਦਿੱਤੀ ਹੈ ਜਿੱਥੇ ਉਸ ਉਮੀਦਵਾਰ ਨੇ ਖੁਦ ਨੂੰ ਵੋਟ ਪਾਈ ਉਥੇ ਉਸ ਉਮੀਦਵਾਰ ਦੇ ਹੱਕ ਵਿਚ ਕੋਈ ਵੋਟ ਨਹੀਂ ਨਿਕਲਿਆ। ਅਜਿਹੇ ਮਾਮਲੇ ਜੇਕਰ ਸੱਚ ਹੁੰਦੇ ਹਨ ਤਾਂ ਫਿਰ ਲੋਕਾਂ ਦਾ ਲੋਕਤੰਤਰ ਬਿਨਾਂ ਕਿਸੇ ਸ਼ੱਕ ਦੇ ਸੱਚਮੁੱਚ ਹੀ ਖ਼ਤਰੇ ਵਿਚ ਹੈ। ਅਜਿਹੇ ਹਾਲਾਤ ਮੌਕੇ ਚੋਣ ਕਮਿਸ਼ਨ ਨੂੰ ਸਾਰਾ ਸੱਚ ਜਨਤਾ ਦੇ ਸਾਹਮਣੇ ਲਿਆਉਣਾ ਚਾਹੀਦਾ ਹੈ ਤਾਂ ਕਿ ਲੋਕਾਂ ਦਾ ਈ.ਵੀ.ਐੱਮ ਮਸ਼ੀਨਾਂ ਤੋਂ ਵਿਸ਼ਵਾਸ ਭੰਗ ਨਾ ਹੋਵੇ।

-ਸੁਖਰਾਜ ਚਹਿਲ ਧਨੌਲਾ
-ਮੋਬਾਈਲ : 97810-48055.

23/03/2017

 ਵਧਦੀ ਅਸਹਿਣਸ਼ੀਲਤਾ
ਪਿਛਲੇ ਦਿਨੀਂ ਦੇ ਐਤਵਾਰ ਦੇ ਅੰਕ ਵਿਚ ਸੰਪਾਦਕੀ ਸਫ਼ੇ 'ਤੇ ਕਿਛੁ ਸੁਣੀਐ ਕਿਛੁ ਕਹੀਐ ਕਾਲਮ ਅਧੀਨ ਉੱਘੇ ਚਿੰਤਕ ਸਤਨਾਮ ਸਿੰਘ ਮਾਣਕ ਦਾ ਲੇਖ 'ਦੇਸ਼ ਲਈ ਵੱਡੀ ਚੁਣੌਤੀ ਬਣ ਸਕਦੀ ਹੈ ਵਧਦੀ ਹੋਈ ਅਸਹਿਣਸ਼ੀਲਤਾ' ਪੜ੍ਹਿਆ। ਲੇਖਕ ਨੇ ਬਾਖੂਬੀ ਕੇਂਦਰ ਵਿਚ ਸੱਤਾਧਾਰੀ ਸਿਆਸੀ ਪਾਰਟੀ ਦਾ ਇਕਪਾਸੜ ਸੋਚ ਦਾ ਕੱਚਾ ਚਿੱਠਾ ਬਿਆਨ ਕੀਤਾ। ਲੇਖ ਨੂੰ ਪੜ੍ਹ ਕੇ ਮਹਿਸੂਸ ਹੋਇਆ ਕਿ ਭਾਜਪਾ ਦੇਸ਼ ਦੇ ਧਰਮ-ਨਿਰਪੱਖ ਖਾਸੇ ਨੂੰ ਅਤੇ ਸੱਭਿਆਚਾਰਕ ਵਿਭਿੰਨਤਾ ਨੂੰ ਮੰਨਣ ਲਈ ਤਿਆਰ ਨਹੀਂ ਹੈ। ਸੱਚਮੁੱਚ ਭਾਜਪਾ ਮੁੜ ਉਹੀ ਖੇਡ ਖੇਡਣ ਜਾ ਰਹੀ ਹੈ, ਜੋ ਕਾਂਗਰਸ ਨੇ ਘੱਟ-ਗਿਣਤੀ ਸਿੱਖਾਂ ਨੂੰ ਨਿਸ਼ਾਨਾ ਬਣਾ ਕੇ ਖੇਡੀ ਸੀ। ਕਿਸੇ ਨਿਰਪੱਖ ਵਿਅਕਤੀ ਦੇ ਬੌਧਿਕ ਪੱਧਰ 'ਚੋਂ ਨਿਕਲੀ ਵਿਚਾਰਧਾਰਾ ਪ੍ਰਤੀ ਜੋ ਅਸਹਿਣਸ਼ੀਲਤਾ ਦੇਖਣ ਨੂੰ ਮਿਲਦੀ ਹੈ, ਸਾਰੇ ਭਾਰਤ ਵਾਸੀਆਂ ਲਈ ਸ਼ਰਮ ਦੀ ਗੱਲ ਹੈ ਕਿ ਅਸੀਂ ਧਰਮ-ਨਿਰਪੱਖ ਰਾਸ਼ਟਰ ਦੇ ਨਾਗਰਿਕ ਹੁੰਦੇ ਹੋਏ ਅਜਿਹਾ ਕੁਝ ਸ਼ਰੇਆਮ ਹੁੰਦਾ ਦੇਖਦੇ ਹਾਂ।

-ਗੁਰਪਾਲ ਬਿਲਾਵਲ 'ਧਨੌਲਾ'
ਸਰਾਏ ਅਮਾਨਤ ਖਾਂ (ਤਰਨ ਤਾਰਨ)।

ਕਿਸਾਨਾਂ ਦੀ ਲੁੱਟ
ਪਿਛਲੇ ਦਿਨੀਂ 'ਅਜੀਤ' ਵਿਚ ਡਾ: ਸੁਰਿੰਦਰ ਸਿੰਘ ਮੰਡ ਦਾ ਲੇਖ 'ਕਿਸਾਨਾਂ ਦੇ ਸਬਰ ਦਾ ਇਮਤਿਹਾਨ ਨਾ ਲਵੇ ਮੋਦੀ ਸਰਕਾਰ' ਪੜ੍ਹਨ ਨੂੰ ਮਿਲਿਆ, ਜੋ ਕਾਬਲੇ-ਤਾਰੀਫ਼ ਹੈ। ਡਾ: ਸਾਹਿਬ ਨੇ ਬੜੇ ਵਿਸਥਾਰਪੂਰਵਕ ਦੱਸਿਆ ਕਿ ਕਿਵੇਂ, ਵਪਾਰੀ ਲੋਕ ਸਰਕਾਰ ਦੀ ਮਿਲੀਭੁਗਤ ਨਾਲ ਕਿਸਾਨੀ ਨੂੰ ਲੁੱਟਦੇ ਆ ਰਹੇ ਹਨ ਅਤੇ ਆਪਣੀ ਫ਼ਸਲ ਨੂੰ ਲਾਗਤ ਤੋਂ ਵੀ ਕਿਤੇ ਘੱਟ ਕੀਮਤ 'ਤੇ ਵੇਚਣ ਲਈ ਮਜਬੂਰ ਹਨ। ਸਰਕਾਰ ਦੀਆਂ ਗ਼ਲਤ ਨੀਤੀਆਂ ਕਰਕੇ ਹੀ ਖੇਤੀ ਅੱਜ ਘਾਟੇ ਵਾਲਾ ਸੌਦਾ ਬਣ ਕੇ ਰਹਿ ਗਈ ਹੈ। ਇਸ ਲੇਖ ਵਿਚ ਡਾ: ਸਾਹਿਬ ਨੇ ਫ਼ਸਲੀ ਬੀਮੇ ਬਾਰੇ, ਖ਼ੁਦਕੁਸ਼ੀਆਂ ਬਾਰੇ ਅਤੇ ਕੁਦਰਤੀ ਸੋਮਿਆਂ ਬਾਰੇ ਵੀ ਚਾਨਣਾ ਪਾਇਆ ਹੈ। ਸਾਡੀ ਸਰਕਾਰ ਨੂੰ ਅਜਿਹੇ ਸੂਝਵਾਨ, ਪੜ੍ਹੇ-ਲਿਖੇ ਵਿਅਕਤੀਆਂ ਕੋਲੋਂ ਸਲਾਹ ਲੈ ਕੇ ਕਿਸਾਨਾਂ ਨੂੰ ਖੇਤੀ ਸੰਕਟ 'ਚੋਂ ਕੱਢਣਾ ਚਾਹੀਦਾ ਹੈ।

-ਗੁਰਚਰਨ ਸਿੰਘ ਉੱਪਲ
ਪਿੰਡ ਤੇ ਡਾਕ: ਉੱਪਲ, ਲੁਧਿਆਣਾ।

ਗੈਂਗਸਟਰ : ਸਮਾਜ ਲਈ ਖ਼ਤਰਾ

ਪਿਛਲੇ ਦਿਨੀਂ ਸੁਰਿੰਦਰ ਚਹਿਲ ਖੇੜੀ ਦਾ ਲਿਖਿਆ ਲੇਖ 'ਗੈਂਗਸਟਰ... ਇਕ ਖ਼ਤਰਨਾਕ ਮੋੜ' ਸਿਰਲੇਖ ਹੇਠ ਪੜ੍ਹਿਆ। ਅੱਜ ਇਹ ਸਮਾਜ ਲਈ ਬਹੁਤ ਖ਼ਤਰਨਾਕ ਸਾਬਤ ਹੋ ਰਿਹਾ ਹੈ। ਇਸ ਸਾਰੇ ਦੇ ਪਿੱਛੇ ਸਿਆਸੀ ਹੱਲਾਸ਼ੇਰੀ ਤੋਂ ਵੀ ਮੁਨਕਰ ਨਹੀਂ ਹੋਇਆ ਜਾ ਸਕਦਾ। ਜਦੋਂ ਪਿੰਡਾਂ, ਸ਼ਹਿਰਾਂ ਵਿਚ ਪਹਿਲਾਂ ਛੋਟੀਆਂ-ਛੋਟੀਆਂ ਲੜਾਈਆਂ 'ਚ ਸ਼ਾਮਿਲ ਲੋਕਾਂ ਨੂੰ ਸਿਆਸੀ ਦਿਮਾਗ ਆਪਣੇ ਮੁਫ਼ਾਦ ਲਈ ਥਾਣਿਆਂ ਵਿਚੋਂ ਛੁਡਵਾ ਲੈਂਦੇ ਸਨ। ਫਿਰ ਇਹ ਵੱਡੀਆਂ ਵਾਰਦਾਤਾਂ ਨੂੰ ਅੰਜਾਮ ਦਿੰਦੇ ਹਨ ਤੇ ਫਿਰ ਬਦਮਾਸ਼ੀ ਵਿਚ ਉਨ੍ਹਾਂ ਦੀ ਤੂਤੀ ਬੋਲਦੀ ਹੈ। ਪਰ ਇਹ ਮਾੜੀ ਸੰਗਤ ਦੀ ਰੰਗਤ ਉਨ੍ਹਾਂ ਨੂੰ ਉਸ ਰਾਹ 'ਤੇ ਲੈ ਜਾਂਦੀ ਹੈ, ਜਿਥੋਂ ਜਿਊਂਦੇ ਵਾਪਸ ਨਹੀਂ ਆਇਆ ਜਾ ਸਕਦਾ। ਇਸ ਸਾਰੇ ਪਿੱਛੇ ਵੀ ਗਰੀਬੀ, ਬੇਰੁਜ਼ਗਾਰੀ ਹੀ ਮੁੱਖ ਤੌਰ 'ਤੇ ਜ਼ਿੰਮੇਵਾਰ ਹੈ। ਲੋੜ ਹੈ ਸਮਾਜ ਨੂੰ ਸਹੀ ਤੇ ਨਰੋਈ ਸੇਧ ਦੇਣ ਦੀ ਤਾਂ ਹੀ ਸਮਾਜ ਵਿਚ ਪ੍ਰੇਮ ਭਾਵਨਾ ਪੈਦਾ ਹੋ ਸਕਦੀ ਹੈ।

-ਮਨਜੀਤ ਸਿੰਘ ਭਾਮ
ਹੁਸ਼ਿਆਰਪੁਰ, ਸੂਬਾ ਪ੍ਰਧਾਨ, ਮਨੁੱਖੀ ਅਧਿਕਾਰ ਸੰਗਠਨ, ਪੰਜਾਬ।

22/03/2017

 ਅਣਸੱਦੇ ਮਹਿਮਾਨ
ਪੰਜਾਬ ਵਿਚ ਹਰ ਸਾਲ ਤਕਰੀਬਨ ਨਵੰਬਰ ਮਹੀਨੇ ਤੋਂ ਸ਼ੁਰੂ ਹੋ ਕੇ ਮਾਰਚ ਮਹੀਨੇ ਤੱਕ ਵਿਆਹ-ਸ਼ਾਦੀਆਂ ਦਾ ਬੇਹੱਦ ਜ਼ੋਰ ਪਾਇਆ ਜਾਂਦਾ ਹੈ। ਇਨ੍ਹਾਂ ਵਿਆਹ ਸਮਾਗਮਾਂ ਵਿਚ ਸ਼ਾਮਿਲ ਹੋਣ ਲਈ ਸਾਨੂੰ ਅਨੇਕਾਂ ਯਾਰਾਂ, ਮਿੱਤਰਾਂ ਅਤੇ ਰਿਸ਼ਤੇਦਾਰੀਆਂ ਵਿਚੋਂ ਰੋਜ਼ਾਨਾ ਕੋਈ ਨਾ ਕੋਈ ਸੱਦਾ ਪੱਤਰ ਆਇਆ ਹੀ ਰਹਿੰਦਾ ਹੈ। ਇਨ੍ਹਾਂ ਵਿਆਹ ਸਮਾਗਮਾਂ ਵਿਚ ਜਾਣ ਸਮੇਂ ਅਨੇਕਾਂ ਲੋਕਾਂ ਵੱਲੋਂ ਅਕਸਰ ਹੀ ਆਪਣੇ ਕਈ-ਕਈ ਯਾਰਾਂ ਬੇਲੀਆਂ ਨੂੰ ਨਾਲ ਜਾਣ ਲਈ ਤਿਆਰ ਕਰ ਲਿਆ ਜਾਂਦਾ ਹੈ। ਲੋਕਾਂ ਦੇ ਇਸ ਰਵੱਈਏ ਕਾਰਨ ਇਸ ਤਰ੍ਹਾਂ ਇਕ ਸਮਾਗਮ ਵਿਚ ਕਈ-ਕਈ ਅਣਸੱਦੇ ਮਹਿਮਾਨ ਸ਼ਾਮਿਲ ਹੋ ਜਾਂਦੇ ਹਨ, ਜਿਨ੍ਹਾਂ ਦਾ ਲੜਕੇ ਜਾਂ ਲੜਕੀ ਪਰਿਵਾਰ ਨਾਲ ਕੋਈ ਵਾਹ-ਵਾਸਤਾ ਵੀ ਨਹੀਂ ਹੁੰਦਾ ਹੈ। ਇਸ ਤੋਂ ਇਲਾਵਾ ਇਹ ਵੀ ਵੇਖਣ ਵਿਚ ਆਉਂਦਾ ਹੈ ਕਿ ਕਈ ਵਾਰ ਇਹ ਅਣਸੱਦੇ ਮਹਿਮਾਨ ਘਰ ਵਾਲਿਆਂ ਦਾ 1000-1200 ਰੁਪਏ ਦਾ ਸਮਾਨ ਡਕਾਰ ਕੇ ਲੜਕੇ ਜਾਂ ਲੜਕੀ ਨੂੰ ਬਿਨਾਂ ਸ਼ਗਨ ਦਿੱਤੇ ਹੀ ਆਪਣੇ ਘਰਾਂ ਨੂੰ ਪਰਤ ਜਾਂਦੇ ਹਨ। ਸੋ, ਜਿੰਨਾ ਹੋ ਸਕੇ, ਸਾਨੂੰ ਸਭ ਨੂੰ ਅਜਿਹੇ ਘਟੀਆ ਵਰਤਾਰੇ ਤੋਂ ਗੁਰੇਜ਼ ਕਰਨਾ ਚਾਹੀਦਾ ਹੈ, ਕਿਉਂਕਿ ਆਪਣੀਆਂ ਲਿਹਾਜ਼ਾਂ ਪੂਰਦੇ ਹੋਏ ਕਿਸੇ 'ਤੇ ਬੋਝ ਬਣਨਾ ਕੋਈ ਚੰਗੀ ਗੱਲ ਨਹੀਂ ਹੈ।


-ਰਾਜਾ ਗਿੱਲ (ਚੜਿੱਕ)
ਮੋ: 94654-11585.


ਪੰਜਾਬੀਆਂ ਨੂੰ ਬੇਨਤੀ
ਮੈਂ ਪਿਛਲੇ ਚਾਰ ਮਹੀਨਿਆਂ ਤੋਂ ਦੁਬਈ ਵਿਚ ਹਾਂ ਤੇ ਪੰਜਾਬ ਰਹਿੰਦੇ ਵੀਰਾਂ ਨੂੰ ਬੇਨਤੀ ਕਰਦਾ ਹਾਂ ਕਿ ਏਜੰਟਾਂ ਵੱਲੋਂ ਦੁਬਈ ਟੈਕਸੀ ਵਿਚ ਭੇਜਣ ਦੇ ਝਾਂਸੇ ਵਿਚ ਨਾ ਆਉਣ। ਦੁਬਈ ਟੈਕਸੀ ਵਿਚ ਤੁਸੀਂ ਆ ਤਾਂ ਜਾਓਗੇ ਪਰ ਇਸ ਦਾ ਖਰਚ 3-4 ਲੱਖ ਤੱਕ ਆ ਜਾਂਦਾ ਹੈ ਤੇ ਬਾਅਦ 'ਚ ਇਥੇ ਆ ਕੇ ਪੈਸੇ ਪੂਰੇ ਬੜੀ ਮੁਸ਼ਕਿਲ ਨਾਲ ਹੁੰਦੇ ਹਨ। ਇਥੇ ਅਸੀਂ ਦੋ ਸੌ ਤੋਂ ਵਧੇਰੇ ਮੁੰਡੇ ਆਏ ਹਾਂ। ਸਾਡਾ ਤਾਂ ਇਹੀ ਕਹਿਣਾ ਹੈ ਕਿ ਆਪਣੇ ਪੈਸੇ ਖਰਾਬ ਨਾ ਕਰਿਓ।


-ਜਰਮਨਜੀਤ ਸਿੰਘ
singhjarmanjit87@yahoo.com


ਪਾਣੀ ਦੀ ਬਰਬਾਦੀ ਇੰਜ ਵੀ

ਅਸੀਂ ਸਾਰੇ ਇਸ ਗੱਲ ਤੋਂ ਭਲੀਭਾਂਤ ਜਾਣੂ ਹਾਂ ਕਿ ਜੇ ਪਾਣੀ ਹੈ ਤਾਂ ਜੀਵਨ ਸੰਭਵ ਹੈ। ਜੇ ਪਾਣੀ ਨਹੀਂ ਤਾਂ ਕੁਝ ਵੀ ਨਹੀਂ। ਅਕਸਰ ਹੀ ਪਾਣੀ ਦੀ ਬਰਬਾਦੀ ਦਾ ਬਹੁਤਾ ਇਲਜ਼ਾਮ ਕਿਸਾਨਾਂ 'ਤੇ ਲਾਇਆ ਜਾਂਦਾ ਹੈ, ਜਦੋਂ ਕਿ ਸਚਾਈ ਇਹ ਹੈ ਕਿ ਕਿਸਾਨ ਤਾਂ ਪਾਣੀ ਦੀ ਵਰਤੋਂ ਫ਼ਸਲ ਦੀ ਉਪਜ ਲਈ ਹੀ ਕਰਦਾ ਹੈ। ਅਸਲ ਵਿਚ ਪਾਣੀ ਦੀ ਦੁਰਵਰਤੋਂ ਉਹ ਲੋਕ ਕਰਦੇ ਹਨ, ਜੋ ਪਾਣੀ ਦੀ ਅਹਿਮੀਅਤ ਤੋਂ ਕੋਰੇ ਹਨ। ਪਾਣੀ ਦੀ ਬਰਬਾਦੀ ਦਾ ਇਕ ਵੱਡਾ ਕਾਰਨ ਲੋਕਾਂ ਦੀ ਵੱਡੀ ਗਿਣਤੀ ਦਾ ਵਹਿਮਾਂ-ਭਰਮਾਂ ਵਿਚ ਫਸਿਆ ਹੋਣਾ ਵੀ ਹੈ। ਪੜ੍ਹੀਆਂ-ਲਿਖੀਆਂ ਤੇ ਖਾਂਦੇ-ਪੀਂਦੇ ਘਰਾਂ ਦੀਆਂ ਔਰਤਾਂ ਅਕਸਰ ਹੀ ਰਿਹਾਇਸ਼ੀ ਮਕਾਨਾਂ ਦੇ ਮੁੱਖ ਗੇਟਾਂ ਅੱਗੇ ਪਾਣੀ ਡੋਲ੍ਹਦੀਆਂ ਆਮ ਦੇਖੀਆਂ ਜਾਂਦੀਆਂ ਹਨ। ਸਾਡੇ ਇਕ ਮਿੱਤਰ ਨੇ ਦੱਸਿਆ ਕਿ ਉਸ ਦੇ ਗੁਆਂਢੀ ਇਸ ਕਦਰ ਮਾਨਸਿਕ ਰੋਗੀ ਬਣ ਚੁੱਕੇ ਹਨ ਕਿ ਜੇ ਇਸ ਪਰਿਵਾਰ 'ਚੋਂ ਕਿਸੇ ਇਕ ਮੈਂਬਰ ਦੀ ਅੱਖ ਰਾਤੀਂ 12 ਵਜੇ ਖੁੱਲ੍ਹ ਗਈ ਤਾਂ ਉਹ ਝੱਟ ਉੱਠ ਕੇ ਪਾਣੀ ਦੀ ਇਕ ਬਾਲਟੀ ਭਰ ਕੇ ਮਕਾਨ ਦੇ ਮੁੱਖ ਗੇਟ 'ਚ ਡੋਲ੍ਹ ਆਉਂਦਾ ਹੈ। ਅੱਜ ਦੇ ਇਸ ਵਿਗਿਆਨਕ ਯੁੱਗ ਤੇ 21ਵੀਂ ਸਦੀ 'ਚ ਵਿਚਰਦਿਆਂ ਮਾਨਸਿਕ ਰੋਗੀਆਂ ਦੀ ਗਿਣਤੀ ਦਾ ਵਧਣਾ ਬੇਹੱਦ ਚਿੰਤਾਜਨਕ ਵਿਸ਼ਾ ਹੈ। ਇਸ ਤੋਂ ਇਲਾਵਾ ਗੱਡੀਆਂ ਧੋਣ ਦੇ ਨਾਂਅ 'ਤੇ ਪਾਣੀ ਦੀ ਵੱਡੀ ਬਰਬਾਦੀ ਕੀਤੀ ਜਾਂਦੀ ਹੈ। ਸੋ, ਪਾਣੀ ਵਰਗੇ ਸਰੋਤ ਨੂੰ ਬਚਾਉਣ ਲਈ ਅੱਜ ਸੁਚੇਤ ਹੋਣ ਦੀ ਵੱਡੀ ਲੋੜ ਹੈ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ : ਘੁਡਾਣੀ ਕਲਾਂ, ਲੁਧਿਆਣਾ।

21/03/2017

ਕਿਸਾਨਾਂ ਦੀ ਬਾਂਹ ਫੜਨ ਦਾ ਵੇਲਾ
ਪਿਛਲੇ ਦਿਨਾਂ ਦੇ ਅਖ਼ਬਾਰ ਪੰਜਾਬ ਦੇ ਆਲੂ ਕਾਸ਼ਤਕਾਰਾਂ ਵੱਲੋਂ ਆਪਣੀ ਜਿਣਸ ਸੜਕਾਂ 'ਤੇ ਸੁੱਟ ਕੇ ਮੁਜ਼ਾਹਰੇ ਕਰਨ ਦੀਆਂ ਤਸਵੀਰਾਂ ਨਾਲ ਭਰੇ ਪਏ ਹਨ। ਕਿਸਾਨਾਂ ਨੂੰ ਆਪਣੀ ਮਿਹਨਤ ਦਾ ਪੂਰਾ ਮੁੱਲ ਨਾ ਮਿਲਣ ਦਾ ਰੋਸ ਹੈ। ਉਨ੍ਹਾਂ ਦਾ ਇਹ ਰੋਸ ਜਾਇਜ਼ ਵੀ ਹੈ। ਟਨਾਂ ਦੇ ਹਿਸਾਬ ਨਾਲ ਸੜਕਾਂ 'ਤੇ ਰੁਲਦੇ ਇਹ ਓਹੀ ਆਲੂ ਹਨ, ਜਿਨ੍ਹਾਂ ਤੋਂ ਤਿਆਰ ਚਿਪਸ ਗ੍ਰਾਮਾਂ ਦੀ ਮਾਤਰਾ ਵਿਚ ਵਿਕਦੇ ਹਨ। ਕਿਸਾਨ ਦੇ ਖੇਤ ਵਿਚੋਂ ਦੋ-ਢਾਈ ਰੁਪਏ ਕਿਲੋ ਦੇ ਰੇਟ 'ਚ ਵਿਕੇ ਆਲੂ,ઠਖਪਤਕਾਰ ਨੂੰ 10 ਰੁਪਏ ਕਿੱਲੋ ਦੇ ਭਾਅ ਮਿਲਦੇ ਹਨ।
ਕਿਸਾਨ ਖੇਤ ਦੀ ਤਿਆਰੀ ਤੋਂ ਲੈ ਕੇ ਫ਼ਸਲ ਸਮੇਟਣ ਤੱਕ, ਸੌ ਮਾਰਾਂ ਸਹਿ ਕੇ ਸਖ਼ਤ ਮਿਹਨਤ ਕਰਦਾ ਹੈ। ਜਦੋਂ ਆਪਣੀ ਫ਼ਸਲ ਮੰਡੀ 'ਚ ਲੈ ਕੇ ਜਾਂਦਾ ਹੈ ਤਾਂ ਉਸ ਦਾ ਮੁੱਲ ਕੌਡੀ ਪੈਂਦਾ ਹੈ ਤੇ ਉਸ ਨੂੰ ਪੂਰਾ ਮੁੱਲ ਲੈਣ ਲਈ ਵੀ ਸੰਘਰਸ਼ ਕਰਨਾ ਪੈਂਦਾ ਹੈ। ਮਹਾਰਾਸ਼ਟਰ ਵਿਚ ਦਾਲਾਂ ਦੇ ਕਾਸ਼ਤਕਾਰਾਂ ਦਾ ਹਾਲ ਵੀ ਆਲੂ ਕਾਸ਼ਤਕਾਰਾਂ ਤੋਂ ਬਹੁਤਾ ਵੱਖਰਾ ਨਹੀਂ। ਆਪਣੀ ਬੰਪਰ ਪੈਦਾਵਾਰ ਨੂੰ ਉਹ ਵੀ ਭੰਗ ਦੇ ਭਾਅ ਵੇਚਣ ਲਈ ਮਜਬੂਰ ਹਨ। ਦਾਲਾਂ ਦੀ ਪੈਦਾਵਾਰ ਪੱਖੋਂ ਸਾਡਾ ਦੇਸ਼ ਆਤਮ-ਨਿਰਭਰ ਨਹੀਂ ਹੈ। ਸਰਕਾਰ ਹਰ ਸਾਲ ਲੱਖਾਂ ਟਨ ਦਾਲਾਂ ਦਰਾਮਦ ਕਰਦੀ ਹੈ। ਆਪਣੇ ਘਰੇਲੂ ਪੈਦਾਵਾਰ ਨੂੰ ਸੜਕਾਂ 'ਤੇ ਰੋਲ ਕੇ ਵਿਦੇਸ਼ਾਂ ਤੋਂ ਵਸਤਾਂ ਦਰਾਮਦ ਕਰਨ ਦੀ ਨੀਤੀ ਸਧਾਰਨ ਬੰਦੇ ਦੀ ਸਮਝ ਤੋਂ ਪਰ੍ਹੇ ਹੈ।
ਫ਼ਸਲ ਲੈ ਕੇ ਮੰਡੀ ਪਹੁੰਚੇ ਕਿਸਾਨ ਦੀ ਸਰਕਾਰ ਬਾਂਹ ਨਹੀਂ ਫੜਦੀ। ਉਸ ਨੂੰ ਖੁੱਲ੍ਹੇ ਬਾਜ਼ਾਰ ਦੇ ਦੈਂਤ ਅੱਗੇ ਛੱਡ ਦਿੱਤਾ ਜਾਂਦਾ ਹੈ। ਆਖਰ ਉਹ ਕਿਹੜੀਆਂ ਨੀਤੀਆਂ ਹਨ ਜੋ ਕਿਸਾਨਾਂ ਨੂੰ ਮੁਨਾਫ਼ਾ ਤਾਂ ਦੂਰ, ਆਪਣੀ ਮਿਹਨਤ ਦਾ ਪੂਰਾ ਮੁੱਲ ਵੱਟਣ ਤੋਂ ਵੀ ਪਾਸੇ ਖੜ੍ਹਾ ਰੱਖਦੀਆਂ ਹਨ?ઠਕੀ ਅਜਿਹੀਆਂ ਨੀਤੀਆਂ ਬਣਾਉਣ ਵਾਲੇ ਕਦੇ ਕਿਸਾਨਾਂ ਬਾਰੇ ਵੀ ਕੁਝ ਸੋਚਣਗੇ? ਗਲ਼ ਤੱਕ ਕਰਜ਼ੇ 'ਚ ਡੁੱਬ ਚੁੱਕੇ ਕਿਸਾਨ ਨੂੰ ਉਸੇ ਦੇ ਹਾਲ 'ਤੇ ਨਹੀਂ ਛੱਡ ਦੇਣਾ ਚਾਹੀਦਾ।


-ਅਮਰਜੀਤ ਸਿੰਘ ਮਾਨ
ਮੌੜ ਕਲਾਂ, ਬਠਿੰਡਾ।


ਪਾਵਰਕਾਮ ਦਾ ਪਲਾਸ
ਆਮ ਲੋਕਾਂ ਦਾ ਬਿਜਲੀ ਦਾ ਬਿੱਲ ਜੇ ਨਿਸਚਿਤ ਮਿਤੀ ਤੋਂ ਇਕ ਦਿਨ ਵੀ ਲੇਟ ਹੋ ਜਾਵੇ ਤਾਂ ਬਿੱਲ 'ਤੇ ਲਿਖਿਆ ਹੋਇਆ ਜੁਰਮਾਨਾ ਭਰਨਾ ਪੈਂਦਾ ਹੈ। ਜੇ ਬਿੱਲ ਨਾ ਦਿੱਤਾ ਜਾਵੇ ਤਾਂ ਬਗੈਰ ਪੁੱਛ-ਗਿੱਛ ਦੇ ਪਲਾਸ ਚੱਲ ਜਾਂਦਾ ਹੈ ਅਤੇ ਦੁਬਾਰਾ ਕੁਨੈਕਸ਼ਨ ਜੋੜਨ ਲਈ ਖੱਜਲ-ਖੁਆਰ ਹੋਣਾ ਪੈਂਦਾ ਹੈ ਤੇ ਕੁਨੈਕਸ਼ਨ ਜੋੜਨ ਦੇ ਵਾਧੂ ਪੈਸੇ ਦੇਣੇ ਪੈਂਦੇ ਹਨ। ਹੈਰਾਨੀ ਦੀ ਗੱਲ ਹੈ ਕਿ ਸਰਕਾਰੀ ਮਹਿਕਮਿਆਂ, ਅਦਾਰਿਆਂ, ਨਿਗਮਾਂ ਤੇ ਕਮੇਟੀਆਂ ਵੱਲ ਕਰੋੜਾਂ ਦਾ ਬਕਾਇਆ ਖੜ੍ਹਾ ਹੈ ਪ੍ਰੰਤੂ ਅਧਿਕਾਰੀਆਂ ਨੂੰ ਕੋਈ ਚਿੰਤਾ ਹੀ ਨਹੀਂ ਹੈ ਕਿ ਬਿਜਲੀ ਵਿਭਾਗ ਕੰਮ ਕਿਵੇਂ ਚਲਾਵੇ।
ਇਸ ਤੋਂ ਵੀ ਅਨੋਖੀ ਗੱਲ ਇਹ ਹੈ ਕਿ ਸਾਡੇ ਸ਼ਾਸਕਾਂ, ਸਿਆਸੀ ਆਗੂਆਂ ਤੇ ਕਈ ਵੱਡੇ ਘਰਾਣਿਆਂ ਜਿਨ੍ਹਾਂ ਵੱਲ ਲੱਖਾਂ ਦੇ ਬਕਾਏ ਖੜ੍ਹੇ ਹਨ, ਨੂੰ ਤਾਂ ਬਿੱਲ ਭਰਨ ਦੀ ਪ੍ਰਵਾਹ ਹੀ ਨਹੀਂ ਹੈ। ਉਲਟਾ ਕਰਮਚਾਰੀਆਂ ਨੂੰ ਡਰਾਵੇ ਦਿੰਦੇ ਹਨ। ਇਹ ਲੋਕ ਕੀ ਮਿਸਾਲ ਕਾਇਮ ਕਰਨਾ ਚਾਹੁੰਦੇ ਹਨ? ਕੀ ਸਾਡਾ ਇਖ਼ਲਾਕ ਇਸ ਕਦਰ ਉੱਚਾ-ਸੁੱਚਾ ਹੈ? ਪਾਵਰਕਾਮ ਦੇ ਪਲਾਸ ਨੂੰ ਆਪਣੀ ਕਾਰਵਾਈ ਜਾਰੀ ਰੱਖਣੀ ਚਾਹੀਦੀ ਹੈ ਤਾਂ ਕਿ ਕਾਨੂੰਨ ਦੀ ਇਕਸਾਰਤਾ ਬਣੀ ਰਹੇ।


-ਮਾ: ਮਹਿੰਦਰ ਸਿੰਘ ਸਿੱਧੂ
ਸਿੱਧਵਾਂ ਕਲਾਂ, ਜ਼ਿਲ੍ਹਾ ਲੁਧਿਆਣਾ।

20/03/2017

 ਇਕ ਐਨ ਆਰ ਆਈ ਦਾ ਪੰਜਾਬ ਵੱਲ ਸੁਨੇਹਾ
ਵਿਦੇਸ਼ਾਂ ਵਿਚ ਵਸਦਿਆਂ ਤਾਂ ਮੇਰੀਆਂ ਪੰਜਾਬ ਫੇਰੀਆਂ ਲਗਦੀਆਂ ਰਹੀਆਂ ਪਰ ਆਪਣੇ ਪਿੰਡ ਤੋਂ ਆਇਆਂ ਨੂੰ ਵਰ੍ਹੇ ਹੀ ਬੀਤ ਗਏ। ਪਰ ਇਹ ਪਿੰਡ ਵਡਾਲਾ ਖੁਰਦ ਨੇੜੇ ਤਪ ਅਸਥਾਨ ਗੁਰੂ ਤੇਗ ਬਹਾਦਰ ਜੀ ਦਾ ਬਾਬਾ ਬਕਾਲਾ ਸਾਹਿਬ ਕਦੇ ਆਪਣੇ ਦਿਮਾਗ/ਸੋਚ ਵਿਚੋਂ ਨਾ ਕੱਢ ਸਕਿਆ। ਵਿਧਾਨ ਸਭਾ ਚੋਣਾਂ ਮੌਕੇ ਫਿਰ ਪੰਜਾਬ ਆਇਆ ਤਾਂ ਮੁੜ ਪੰਜਾਬ ਨੂੰ ਨੇੜੇ ਤੋਂ ਵੇਖਿਆ। ਜੋ ਪੰਜਾਬ ਦੇ ਹਾਲਾਤ ਵੇਖੇ, ਉਹ ਬਹੁਤ ਚਿੰਤਾਜਨਕ ਸਨ। ਪੰਜਾਬ ਦੀ ਨੌਜਵਾਨ ਪੀੜ੍ਹੀ ਨਸ਼ਿਆਂ ਦੇ ਰਾਹ ਤੁਰ ਪਈ ਹੈ ਅਤੇ ਇਸ ਪਾਸੇ ਨਵੀਂ ਬਣਨ ਵਾਲੀ ਪੰਜਾਬ ਸਰਕਾਰ ਨੂੰ ਬਹੁਤ ਜਲਦੀ ਧਿਆਨ ਦੇਣ ਦੀ ਲੋੜ ਹੈ। ਸਮੱਸਿਆ ਬਹੁਤ ਗੰਭੀਰ ਹੁੰਦੀ ਜਾਂਦੀ ਹੈ, ਬੇਰੁਜ਼ਗਾਰੀ ਸਮੱਸਿਆ ਦੀ ਜੜ੍ਹ ਹੈ। ਪੰਜਾਬ ਵਿਚ ਜ਼ਮੀਨਾਂ ਘਟ ਰਹੀਆਂ ਹਨ ਅਤੇ ਜ਼ਿਮੀਂਦਾਰਾ ਖ਼ਤਮ ਹੋ ਰਿਹਾ ਹੈ, ਜਾਇਜ਼-ਨਾਜਾਇਜ਼ ਤਰੀਕੇ ਵਰਤ ਕੇ ਨੌਂਜਵਾਨ ਪੀੜ੍ਹੀ ਵਿਦੇਸ਼ਾਂ ਨੂੰ ਆਉਣ ਨੂੰ ਕਾਹਲ ਕਰ ਰਹੀ ਹੈ ਪਰ ਉਨ੍ਹਾਂ ਨੂੰ ਸੇਧ ਕੋਈ ਨਹੀਂ ਦੇ ਰਿਹਾ, ਉਨ੍ਹਾਂ ਦੇ ਹੱਥਾਂ ਵਿਚ ਕੋਈ ਹੁਨਰ ਨਹੀਂ ਹੈ। ਅੱਜ ਪੰਜਾਬ ਵਿਚ ਕਾਫੀ ਆਈ.ਟੀ.ਆਈ. ਤੇ ਹੋਰ ਡਿਗਰੀ ਕਾਲਜ, ਮੈਡੀਕਲ ਤੇ ਨਰਸਿੰਗ ਕਾਲਜ ਤਾਂ ਹਨ ਪਰ ਕਾਫੀ ਫਿਰ ਵੀ ਨਹੀਂ ਹਨ। ਦੂਸਰਾ ਇਹ ਬਹੁਤ ਮਹਿੰਗੇ ਹਨ। ਆਮ ਗਰੀਬ ਜੱਟ ਦਾ ਮੁੰਡਾ ਕਿਵੇਂ ਇਹ ਸਾਰਾ ਕੁਝ ਕਰ ਲਉ। ਮੇਰੀ ਜ਼ਿੰਦਗੀ ਦਾ ਤਜਰਬਾ ਹੈ ਕਿ ਅੱਜ ਪੰਜਾਬ ਦੀ ਨੌਜਵਾਨੀ ਨੂੰ ਟੈਕਨੀਕਲ ਕੰਮ ਵੱਲ ਲਾਉਣ ਦੀ ਸਖ਼ਤ ਲੋੜ ਹੈ। ਭਾਵੇਂ ਪੰਜਾਬ ਸਰਕਾਰ ਕਈ ਖੇਤਰਾਂ 'ਚ ਆਪਣੇ ਵੱਲੋਂ ਬਹੁਤ ਚੰਗਾ ਕੰਮ ਕਰ ਰਹੀ ਹੈ, ਭਾਵੇਂ ਕੁਝ ਮੁਸ਼ਕਿਲਾਂ ਹਨ ਪਰ ਪੰਜਾਬ ਫਿਰ ਵੀ ਤਰੱਕੀ ਦੀ ਰਾਹ 'ਤੇ ਤੁਰਿਆ ਜਾਂਦਾ ਹੈ। ਸਮੇਂ ਦੇ ਹਾਣੀ ਹੋਣ ਵਾਸਤੇ ਹੋਰ ਬਹੁਤ ਚੰਗੇ ਕਦਮ ਪੁੱਟਣ ਦੀ ਲੋੜ ਹੈ। ਇਨ੍ਹਾਂ ਵਿਚੋਂ ਇਕ ਹੈ ਦੋ ਸਾਲਾਂ ਦਾ ਟੈਕਨੀਕਲ ਕੋਰਸ, ਆਪ੍ਰੇਸ਼ਨ ਐਂਡ ਮੇਂਟੀਨੈਂਸ ਆਫ ਹੈਵੇਅਰਜ਼ ਮੈਵਿੰਗ ਮਸ਼ੀਨਰੀ। ਅੱਜ ਤੋਂ 30-35 ਸਾਲ ਪਹਿਲਾਂ ਇਹ ਕੋਰਸ ਨੰਗਲ ਭਾਖੜਾ ਡੈਮ ਲਾਗੇ ਅਮਰੀਕੀ ਸਹਾਇਤਾ ਨਾਲ ਚਲਦਾ ਸੀ। ਫਿਰ ਅਮਰੀਕਾ ਦੀ ਸਰਕਾਰ ਨੇ ਅਚਨਚੇਤ ਬੰਦ ਕਰ ਦਿੱਤਾ। ਪੰਜਾਬ ਸਰਕਾਰ ਕੋਲ ਟੈਕਨੀਕਲ ਮਾਹਿਰ ਵੀ ਹਨ, ਮੈਨੂੰ ਲੰਮਾ ਸਮਾਂ ਵਿਦੇਸ਼ਾਂ ਵਿਚ ਟੈਕਨੀਕਲ ਕੰਮਾਂ ਦਾ ਤਜਰਬਾ ਹੈ। ਪੰਜਾਬ ਸਰਕਾਰ ਨੂੰ ਪਹਿਲ ਦੇ ਆਧਾਰ 'ਤੇ ਪੰਜਾਬ ਵਿਚ ਇਹ ਕੋਰਸ ਸ਼ੁਰੂ ਕਰਨਾ ਚਾਹੀਦਾ ਹੈ ਤਾਂ ਜੋ ਸਾਡੇ ਨੌਜਵਾਨ ਬੱਚੇ ਇਹ ਕੋਰਸ ਕਰਕੇ ਆਪਣਾ ਭਵਿੱਖ ਸੰਵਾਰ ਸਕਣ ਅਤੇ ਦੇਸ਼ ਅਤੇ ਵਿਦੇਸ਼ ਵਿਚ ਚੰਗਾ ਰੁਜ਼ਗਾਰ ਹਾਸਲ ਕਰ ਸਕਣ। ਇਹ ਪੰਜਾਬ ਸਰਕਾਰ ਦਾ ਆਪਣੇ ਸ਼ਹਿਰੀਆਂ ਪ੍ਰਤੀ ਫਰਜ਼ ਵੀ ਹੈ। ਇਸ ਤਰ੍ਹਾਂ ਕਰਨ ਨਾਲ ਕੁਝ ਤਾਂ ਲੋਕਾਂ ਨੂੰ ਰੁਜ਼ਗਾਰ ਮਿਲੇਗਾ। ਇਸ ਕੋਰਸ ਨੂੰ ਚਲਾਉਣ ਵਾਸਤੇ ਸਰਕਾਰ ਚਾਹੇ ਤਾਂ ਇਸ ਵਾਸਤੇ ਟੈਕਨੀਕਲ ਸਹਾਇਤਾ ਬਗੈਰ ਕਿਸੇ ਸੇਵਾ ਤੋਂ ਦਿੱਤੀ ਜਾ ਸਕਦੀ ਹੈ।


-ਰਤਨ ਸਿੰਘ ਸੇਖੋਂ
(ਮੋਬ:) 98-7688-1829, ਫੋਨ ਆਸਟਰੀਆ 0043-676-610-7242
ਰਾਹੀਂ-ਸ਼ਰਨਬੀਰ ਸਿੰਘ ਕੰਗ,
ਪ.ਪ.ਰਈਆ।

17-03-2017

 ਕਾਂਗਰਸ ਦੀ ਵੱਡੀ ਜਿੱਤ
ਪੰਜਾਬ ਵਿਚ ਹੋਈਆਂ ਚੋਣਾਂ ਦਾ ਫ਼ੈਸਲਾ ਕਾਂਗਰਸ ਪਾਰਟੀ ਲਈ ਵੱਡੀ ਪ੍ਰਾਪਤੀ ਸਾਬਤ ਹੋਇਆ ਹੈ। ਪੰਜਾਬ ਵਿਧਾਨ ਸਭਾ ਚੋਣਾਂ ਦੇ ਨਤੀਜਿਆਂ ਦਾ ਐਲਾਨ ਹੁੰਦਿਆਂ ਹੀ ਜਨਤਾ ਵਿਚ ਹਲਚਲ ਦਾ ਮਾਹੌਲ ਬਣ ਗਿਆ। ਕੈਪਟਨ ਅਮਰਿੰਦਰ ਸਿੰਘ ਨੂੰ ਪੰਜਾਬ ਵਾਸੀਆਂ ਨੇ ਉਨ੍ਹਾਂ ਦੇ ਜਨਮ ਦਿਨ ਦਾ ਤੋਹਫਾ ਪੰਜਾਬ ਦੇ ਮੁੱਖ ਮੰਤਰੀ ਦੇ ਰੂਪ ਵਿਚ ਦੇ ਦਿੱਤਾ ਹੈ। 10 ਸਾਲ ਰਾਜ ਕਰਨ ਵਾਲੀ ਅਕਾਲੀ-ਭਾਜਪਾ ਸਰਕਾਰ ਨੂੰ ਪੰਜਾਬੀਆਂ ਨੇ ਹੁਣ ਸੱਤਾ ਤੋਂ ਬਾਹਰ ਦਾ ਰਾਹ ਦਿਖਾ ਦਿੱਤਾ ਹੈ। ਕੈਪਟਨ ਅਮਰਿੰਦਰ ਸਿੰਘ ਨੇ ਜਨਤਾ ਨਾਲ ਬਹੁਤ ਲੁਭਾਉਣੇ ਵਾਅਦੇ ਕੀਤੇ ਸਨ, ਜਿਨ੍ਹਾਂ ਵਿਚ ਪੈਨਸ਼ਨ ਵਧਾਉਣਾ, ਨੌਜਵਾਨਾਂ ਨੂੰ ਸਮਾਰਟ ਫੋਨ ਦੇਣਾ ਅਤੇ ਹਰ ਘਰ ਵਿਚ ਇਕ ਨੌਕਰੀ ਦੇਣ ਦਾ ਵਾਅਦਾ ਵੀ ਸ਼ਾਮਿਲ ਹੈ। ਹੁਣ ਸਮਾਂ ਆ ਗਿਆ ਹੈ ਕਿ ਕੈਪਟਨ ਅਮਰਿੰਦਰ ਸਿੰਘ ਜਨਤਾ ਨਾਲ ਕੀਤੇ ਆਪਣੇ ਵਾਅਦਿਆਂ ਨੂੰ ਪੂਰਾ ਕਰਨ ਅਤੇ ਆਪਣੀ ਪਾਰਟੀ ਨੂੰ ਮੁੜ ਸਿਆਸਤ ਵਿਚ ਪਹਿਲਾਂ ਵਾਂਗ ਹੀ ਸਾਬਤ ਕਰਨ।-

ਵਰਸ਼ਾ ਵਰਮਾ
ਮੋ: 9023456748


ਕਿਸਾਨ ਖ਼ੁਦਕੁਸ਼ੀਆਂ ਦਾ ਮੁੱਦਾ
ਇਕ ਗ਼ੈਰ-ਸਰਕਾਰੀ ਸੰਗਠਨ ਵੱਲੋਂ ਕਿਸਾਨ ਖ਼ੁਦਕੁਸ਼ੀਆਂ ਬਾਰੇ ਦਾਇਰ ਪਟੀਸ਼ਨ 'ਤੇ ਸੁਣਵਾਈ ਕਰਦਿਆਂ ਸੁਪਰੀਮ ਕੋਰਟ ਨੇ ਸਰਕਾਰ ਨੂੰ ਨਸੀਹਤ ਦਿੰਦਿਆਂ ਕਿਹਾ ਹੈ ਕਿ 21 ਦਿਨਾਂ ਦੇ ਸਮੇਂ ਵਿਚ ਕਿਸਾਨਾਂ ਦੀਆਂ ਖ਼ੁਦਕੁਸ਼ੀਆਂ ਰੋਕਣ ਲਈ ਕੋਈ ਠੋਸ ਨੀਤੀ ਤਿਆਰ ਕੀਤੀ ਜਾਵੇ, ਸਿਰਫ ਕੁਝ ਮੁਆਵਜ਼ਾ ਦੇਣਾ ਹੀ ਇਸ ਦਾ ਹੱਲ ਨਹੀਂ ਹੈ। ਹੁਣ ਸਰਕਾਰ ਨੂੰ ਚਾਹੀਦਾ ਹੈ ਕਿ ਸਵਾਮੀਨਾਥਨ ਰਿਪੋਰਟ ਨੂੰ ਆਧਾਰ ਬਣਾ ਕੇ ਫ਼ਸਲਾਂ ਦੀ ਕੀਮਤ ਤੈਅ ਕੀਤੀ ਜਾਵੇ। ਕਿਸਾਨਾਂ ਦੇ ਵੱਡੇ ਕਰਜ਼ੇ ਮੁਆਫ਼ ਕਰਕੇ ਘੱਟ ਵਿਆਜ ਦਰ 'ਤੇ ਕਰਜ਼ੇ ਦਿੱਤੇ ਜਾਣ ਅਤੇ ਖੇਤੀ ਸੰਦਾਂ 'ਤੇ 50 ਫ਼ੀਸਦੀ ਸਬਸਿਡੀ ਦਿੱਤੀ ਜਾਵੇ। ਫ਼ਸਲੀ ਬੀਮੇ ਦਾ ਪੰਜਾਬ ਦੇ ਕਿਸਾਨਾਂ ਨੂੰ ਕੋਈ ਲਾਭ ਨਹੀਂ ਕਿਉਂਕਿ ਪੰਜਾਬ ਦਾ ਕਿਸਾਨ ਕਿਸੇ ਕੁਦਰਤੀ ਕਰੋਪੀ ਨਾਲ ਨਹੀਂ, ਬਲਕਿ ਸਰਕਾਰੀ ਕਰੋਪੀ ਨਾਲ ਮਰ ਰਿਹਾ ਹੈ।-

ਲੱਖੀ ਗਿੱਲ ਧਨਾਨਸੂ
ਜ਼ਿਲ੍ਹਾ ਲੁਧਿਆਣਾ।


ਸਿਹਤ ਵਿਭਾਗ ਦੇ ਧਿਆਨ ਹਿਤ

ਸਿਹਤ ਵਿਭਾਗ ਪੰਜਾਬ ਮੌਜੂਦਾ ਸਰਕਾਰੀ ਡਿਸਪੈਂਸਰੀਆਂ ਤੇ ਪ੍ਰਾਇਮਰੀ ਹੈਲਥ ਸੈਂਟਰਾਂ ਵਿਚ ਜਿਥੇ ਡਾਕਟਰਾਂ ਦੀ ਘਾਟ ਨੂੰ ਪੂਰਨ ਲਈ ਬਣਦੀ ਭਰਤੀ ਕਰੇ, ਉਥੇ ਇਨ੍ਹਾਂ ਡਿਸਪੈਂਸਰੀਆਂ ਵਿਚ ਦਵਾਈਆਂ ਦੀ ਸਪਲਾਈ ਵੀ ਤੁਰੰਤ ਯਕੀਨੀ ਬਣਾਵੇ। ਆਮ ਲੋਕਾਂ ਦੀ ਸਿਹਤ ਨੂੰ ਮੁੱਖ ਰੱਖਦਿਆਂ ਇਨ੍ਹਾਂ ਡਿਸਪੈਂਸਰੀਆਂ ਤੇ ਹੈਲਥ ਸੈਂਟਰਾਂ ਵਿਚ ਡਾਕਟਰਾਂ ਦੀ ਹਾਜ਼ਰੀ ਪੂਰੇ ਦਿਨ ਦੇ ਨਾਲ-ਨਾਲ ਰਾਤ ਨੂੰ ਵੀ ਯਕੀਨੀ ਬਣਾਈ ਜਾਵੇ। ਅਜਿਹਾ ਕਰਨਾ ਇਸ ਲਈ ਜ਼ਰੂਰੀ ਹੈ ਕਿਉਂਕਿ ਅੱਜ ਪਿੰਡਾਂ ਵਿਚ ਬੈਠੇ ਅਣਸਿੱਖਿਅਤ ਡਾਕਟਰ ਜਿਥੇ ਆਮ ਲੋਕਾਂ ਦੀ ਸਿਹਤ ਨਾਲ ਖਿਲਵਾੜ ਕਰ ਰਹੇ ਹਨ, ਉਥੇ ਉਹ ਵੱਡੀ ਪੱਧਰ 'ਤੇ ਆਰਥਿਕ ਲੁੱਟ ਵੀ ਕਰ ਰਹੇ ਹਨ। ਅਜਿਹਾ ਹੀ ਧਿਆਨ ਪਿੰਡਾਂ ਵਿਚ ਖੋਲ੍ਹੀਆਂ ਗਈਆਂ ਆਯੁਰਵੈਦਿਕ ਤੇ ਹੋਮਿਓਪੈਥਿਕ ਡਿਸਪੈਂਸਰੀਆਂ ਮੰਗ ਰਹੀਆਂ ਹਨ। ਸਬੰਧਤ ਵਿਭਾਗ ਨੂੰ ਇਸ ਪਾਸੇ ਵਿਸ਼ੇਸ਼ ਧਿਆਨ ਦੇਣ ਦੀ ਅੱਜ ਬੇਹੱਦ ਜ਼ਰੂਰਤ ਹੈ।

-ਬੰਤ ਸਿੰਘ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

16/03/2017

 ਔਕੜਾਂ 'ਚ ਘਿਰੀ ਔਰਤ
'ਔਰਤ ਦਿਵਸ' 'ਤੇ ਉੱਚੇ ਅਹੁਦੇ 'ਤੇ ਬੈਠੀਆਂ ਔਰਤਾਂ ਦੇ ਵਿਚਾਰ ਪੜ੍ਹਨ ਨੂੰ ਮਿਲੇ। ਇਕ ਪਲ ਲਈ ਸੋਚਣ ਤੇ ਫਿਰ ਲਿਖਣ ਲਈ ਮਜਬੂਰ ਕਰ ਦਿੱਤਾ ਹੈ। ਪ੍ਰਿੰਸੀਪਲ ਨਵਜੋਤ ਕੌਰ, ਡਾ: ਰਘਬੀਰ ਕੌਰ ਤੇ ਡਾ: ਨਵਜੋਤ ਦੇ ਵਿਚਾਰਾਂ ਨੂੰ ਜਲੰਧਰ ਦੇ ਪੱਤਰਕਾਰ ਜਸਪਾਲ ਨੇ ਪੇਸ਼ ਕੀਤਾ ਜੋ ਹੋਰ ਔਰਤਾਂ ਦੇ ਲਈ ਸੇਧ ਹਨ। ਔਰਤ ਨੌਕਰੀ 'ਤੇ ਲੱਗੀ ਵੀ ਅਜ਼ਾਦ ਨਹੀਂ ਹੈ। ਉਹ ਆਪਣੀ ਮਰਜ਼ੀ ਨਾਲ ਖਰਚ ਨਹੀਂ ਕਰ ਸਕਦੀ, ਜਦ ਤੱਕ ਉਸ ਦਾ ਪਤੀ ਆਗਿਆ ਨਾ ਦੇਵੇ। ਜੇ ਕੁੜੀ ਨੇ ਬਾਜ਼ਾਰ ਨੂੰ ਜਾਣਾ ਹੋਵੇ ਤਾਂ ਛੋਟੇ ਬੱਚੇ ਨੂੰ ਉਂਗਲੀ ਨਾਲ ਲਗਾ ਕੇ ਜਾਊਗੀ। ਮਰਦ ਪ੍ਰਧਾਨ ਸਮਾਜ ਵਿਚ ਔਰਤ ਮਹਿਸੂਸ ਕਰਦੀ ਹੈ ਕਿ ਉਸ ਦੀ ਆਪਣੀ ਇੱਜ਼ਤ ਹਮੇਸ਼ਾ ਖ਼ਤਰੇ ਵਿਚ ਰਹਿੰਦੀ ਹੈ।
ਕਾਨੂੰਨੀ ਤੌਰ 'ਤੇ ਕਈ ਤਰ੍ਹਾਂ ਦੇ ਹੱਕ ਮਿਲੇ ਹੋਏ ਹਨ। ਪਿੰਡਾਂ ਵਿਚ ਅੱਜ ਵੀ ਔਰਤ ਸਰਪੰਚ ਜਾਂ ਪੰਚ ਹੈ ਤੇ ਉਸ ਨੂੰ ਕਦੇ ਵੀ ਥਾਣੇ ਜਾਂ ਪਿੰਡ ਦੀ ਪੰਚਾਇਤ ਵਿਚ ਨਹੀਂ ਸੱਦਿਆ ਜਾਂਦਾ ਤੇ ਉਸ ਦੇ ਹਸਤਾਖਰ ਉਸ ਦਾ ਪਤੀ ਜਾਂ ਬੇਟਾ ਕਰ ਜਾਂਦਾ ਹੈ। ਦਲਿਤ ਔਰਤਾਂ ਜੋ ਪਿੰਡਾਂ ਦੀਆਂ ਸਰਪੰਚ ਹਨ, ਨੂੰ ਦਬਾ ਕੇ ਰੱਖਿਆ ਹੋਇਆ ਹੈ। ਕਹਿਣ ਦਾ ਭਾਵ ਹੈ ਕਿ ਔਰਤ ਕਿਸੇ ਵੀ ਧਰਮ ਜਾਂ ਜਾਤ ਦੀ ਹੋਵੇ, ਮਰਦ ਪ੍ਰਧਾਨ ਸਮਾਜ ਦੇ ਬਰਾਬਰ ਨਹੀਂ ਹੈ। ਔਰਤ ਨੂੰ ਸਮਾਜ ਦੇ ਮਾੜੇ ਤਾਣੇ-ਬਾਣੇ ਤੋਂ ਮੁਕਤ ਹੋਣ ਲਈ ਆਪਣੀ ਆਵਾਜ਼ ਨੂੰ ਬੁਲੰਦ ਕਰਨਾ ਪਵੇਗਾ। ਸਮਾਜ ਵਿਚ ਗ਼ਲਤ ਅਨਸਰਾਂ ਨੂੰ ਠੱਲ੍ਹ ਪਾਉਣ ਲਈ ਮਰਦ ਨੂੰ ਔਰਤਾਂ ਦਾ ਸਾਥ ਦੇਣਾ ਚਾਹੀਦਾ ਹੈ, ਜਿਸ ਤਰ੍ਹਾਂ ਗੁਰਮੇਹਰ ਦਾ ਲੋਕਾਂ ਨੇ ਸਾਥ ਦਿੱਤਾ ਹੈ।

-ਮਾ: ਜਗੀਰ ਸਿੰਘ ਸਠਿਆਲਾ
ਸ.ਕੰ.ਹ.ਸਕੂਲ ਸਠਿਆਲਾ (ਅੰਮ੍ਰਿਤਸਰ)।

ਅਸ਼ਲੀਲਤਾ ਵਿਰੁੱਧ ਸਖ਼ਤੀ ਹੋਵੇ
ਅੱਜ ਟੈਲੀਵਿਜ਼ਨ ਦੇ ਜ਼ਿਆਦਾਤਰ ਚੈਨਲਾਂ 'ਤੇ ਬਹੁਤੇ ਪ੍ਰੋਗਰਾਮਾਂ ਵਿਚ ਅਸ਼ਲੀਲਤਾ ਦਾ ਮਿਆਰ ਦਿਨ-ਪ੍ਰਤੀ-ਦਿਨ ਵਧਦਾ ਜਾ ਰਿਹਾ ਹੈ। ਵਿਅਕਤੀ ਨੂੰ ਆਪਣੇ ਪੂਰੇ ਪਰਿਵਾਰ ਵਿਚ ਬੈਠ ਕੇ ਪਤਨੀ, ਭੈਣ, ਬੱਚਿਆਂ, ਬਜ਼ੁਰਗਾਂ, ਰਿਸ਼ਤੇਦਾਰਾਂ ਆਦਿ ਨਾਲ ਰਲ-ਮਿਲ ਕੇ ਟੈਲੀਵਿਜ਼ਨ ਦੇ ਪ੍ਰੋਗਰਾਮ ਦੇਖਣੇ ਦੁੱਭਰ ਹੋ ਰਹੇ ਹਨ। ਕੀ ਪ੍ਰਸਿੱਧੀ ਪ੍ਰਾਪਤ ਕਰਨ ਲਈ ਹੱਦੋਂ ਵੱਧ ਅਸ਼ਲੀਲਤਾ ਦਰਸਾਉਣਾ ਹੀ ਟੈਲੀਵਿਜ਼ਨ ਦਾ ਉਦੇਸ਼ ਅਤੇ ਸਾਧਨ ਮਾਤਰ ਰਹਿ ਗਿਆ ਹੈ? ਇਸ ਲਈ ਸੈਂਸਰ ਬੋਰਡ ਇਸ ਵਿਰੁੱਧ ਬਣਦੀ ਕਾਰਵਾਈ ਤੁਰੰਤ ਪ੍ਰਭਾਵ ਨਾਲ ਕਰੇ ਤਾਂ ਜੋ ਪੰਜਾਬੀ ਵਿਰਸੇ ਅਤੇ ਭਾਰਤੀ ਸਮਾਜ ਨੂੰ ਅਸ਼ਲੀਲਤਾ ਦੀ ਦਲਦਲ ਵਿਚ ਧੱਸ ਜਾਣ ਤੋਂ ਬਚਾਇਆ ਜਾ ਸਕੇ, ਸਮਾਜਿਕ ਕੁਰੀਤੀਆਂ ਨੂੰ ਵਧਣ ਤੋਂ ਰੋਕਿਆ ਜਾ ਸਕੇ ਅਤੇ ਸਾਦਗੀ ਨੂੰ ਅਹਿਮੀਅਤ ਦਿੱਤੀ ਜਾ ਸਕੇ। ਇਸ ਨਾਲ ਆਉਣ ਵਾਲੀਆਂ ਪੀੜ੍ਹੀਆਂ ਨੂੰ ਸਦ-ਆਚਰਨ ਵਿਚ ਰਹਿਣ ਦਾ ਸੁਖਾਵਾਂ ਮਾਹੌਲ ਮਿਲੇਗਾ ਅਤੇ ਸਾਡੀਆਂ ਨੈਤਿਕ ਕਦਰਾਂ-ਕੀਮਤਾਂ ਨੂੰ ਵੀ ਖੋਰਾ ਨਹੀਂ ਲੱਗੇਗਾ।

-ਸੰਜੀਵ ਧਰਮਾਣੀ
ਮੱਧੇਵਾਲੀਆ, ਸ੍ਰੀ ਅਨੰਦਪੁਰ ਸਾਹਿਬ।

13/03/2017

 ਕਿਸਾਨ ਖੁਦਕੁਸ਼ੀਆਂ ਕਿਵੇਂ ਰੁਕਣ
ਕਿਸਾਨੀ ਕਰਜ਼ਿਆਂ ਦੀ ਮੁਆਫ਼ੀ ਕਿਸਾਨ ਖੁਦਕੁਸ਼ੀਆਂ ਰੋਕਣ ਦਾ ਕੋਈ ਪੱਕਾ ਹੱਲ ਨਹੀਂ ਹੈ। ਕਿਸਾਨੀ ਨੂੰ ਬਚਾਉਣ ਲਈ ਪੰਜ ਏਕੜ ਤੱਕ ਦੀ ਮਾਲਕੀ ਵਾਲੇ ਕਿਸਾਨਾਂ ਦੀ ਘੱਟੋ-ਘੱਟ ਆਮਦਨ ਤੈਅ ਕਰਨ ਦੀ ਲੋੜ ਹੈ। ਘੱਟੋ-ਘੱਟ ਸਾਲਾਨਾ ਆਮਦਨ ਤੋਂ ਜਿੰਨੀ ਆਮਦਨ ਘੱਟ ਹੋਵੇ, ਉਸ ਨੂੰ ਕੇਂਦਰ ਸਰਕਾਰ ਆਪਣੇ ਖਜ਼ਾਨੇ ਵਿਚੋਂ ਪੂਰਾ ਕਰੇ। ਦੂਜੇ ਪਾਸੇ ਕਿਸਾਨਾਂ ਨੂੰ ਆਪਣੀ ਚਾਦਰ ਵੇਖ ਕੇ ਪੈਰ ਪਸਾਰਨੇ ਚਾਹੀਦੇ ਹਨ। ਸਾਦਾ ਜੀਵਨ ਬਿਤਾਉਣ ਅਤੇ ਵਿਆਹ-ਸ਼ਾਦੀਆਂ ਤੇ ਹੋਰ ਸਮਾਗਮਾਂ ਵਿਚ ਅਮੀਰ ਲੋਕਾਂ ਦੀ ਰੀਸ ਨਾਲ ਵਿਤੋਂ ਵੱਧ ਖਰਚ ਤੋਂ ਪ੍ਰਹੇਜ਼ ਕਰਨ ਨਾਲ ਹੀ ਜੀਵਨ ਸੁਖੀ ਬਣ ਸਕਦਾ ਹੈ। ਇਨਸਾਨ ਨੂੰ ਜਿਊਂਦੇ ਰਹਿਣ ਲਈ ਅਨਾਜ ਦੀ ਲੋੜ ਹੁੰਦੀ ਹੈ। ਕਿਸਾਨ, ਅਨਾਜ ਪੈਦਾ ਕਰਦਾ ਹੈ। ਇਸ ਲਈ ਉਸ ਨੂੰ ਵੀ ਜਿਊਂਦੇ ਰੱਖਣ ਦੀ ਲੋੜ ਹੈ। 'ਪੇਟ ਨਾ ਪਈਆਂ ਰੋਟੀਆਂ ਤਾਂ ਸਭੇ ਗੱਲਾਂ ਖੋਟੀਆਂ' ਦੇ ਅਖਾਣ ਅਨੁਸਾਰ ਅਨਾਜ ਖੁਣੋਂ ਭੁੱਖਾ ਢਿੱਡ, ਸੰਸਾਰ ਵਿਚਲੀਆਂ ਜ਼ਿੰਮੇਵਾਰੀਆਂ ਨਹੀਂ ਨਿਭਾਅ ਸਕਦਾ। ਹੁਣ ਛੋਟੀ ਕਿਸਾਨੀ ਨੂੰ ਬਚਾਉਣ ਵਿਚ ਹੀ ਅਕਲਮੰਦੀ ਹੈ। ਕੇਂਦਰ ਸਰਕਾਰ ਨੂੰ ਛੋਟੇ ਕਿਸਾਨਾਂ ਦੀ ਘੱਟੋ-ਘੱਟ ਸਾਲਾਨਾ ਆਮਦਨ ਮਿਥਣ ਦਾ ਬਿੱਲ ਲੋਕ ਸਭਾ ਵਿਚ ਪਾਸ ਕਰ ਦੇਣਾ ਚਾਹੀਦਾ ਹੈ। ਕਿਸਾਨ ਖੁਦਕੁਸ਼ੀਆਂ ਰੋਕਣ ਦਾ ਇਹ ਹੀ ਸਥਾਈ ਹੱਲ ਹੈ।


-ਇੰਜ: ਕੁਲਦੀਪ ਸਿੰਘ ਲੁੱਧਰ
ਅੰਮ੍ਰਿਤਸਰ।


ਵਿਆਹ 'ਤੇ ਖਰਚ
8 ਮਾਰਚ, 2017 ਦੀ 'ਅਜੀਤ' ਵਿਚ ਛਪਿਆ ਲੇਖ 'ਕੀ ਹੁਣ ਵਿਆਹ ਸੌਖੇ ਤੇ ਸਸਤੇ ਹੋਣਗੇ?' ਸਮਾਜ ਲਈ ਰਾਮਬਾਣ ਸਿੱਧ ਹੋਏਗਾ। ਲੋਕ ਸਭਾ ਵਿਚ ਪੇਸ਼ ਬਿੱਲ ਜਨਤਾ ਨੂੰ ਇਕ ਨਵਾਂ ਰਾਹ ਦਿਖਾਏਗਾ। ਲੋਕਾਂ ਵੱਲੋਂ ਇਸ ਦਾ ਸਵਾਗਤ ਕੀਤਾ ਜਾ ਰਿਹਾ ਹੈ। ਇਸ ਬਿੱਲ ਦਾ ਫਾਇਦਾ ਗ਼ਰੀਬ ਲੋਕਾਂ ਨੂੰ ਵੱਧ ਮਿਲੇਗਾ। ਕਿਉਂਕਿ ਉਹ ਦੋ-ਤਿੰਨ ਘੰਟੇ ਦੇ ਪ੍ਰੋਗਰਾਮ 'ਤੇ ਆਪਣੀ ਜ਼ਿੰਦਗੀ ਦੀ ਖੂਨ-ਪਸੀਨੇ ਦੀ ਸਾਰੀ ਕਮਾਈ ਖਰਚ ਕਰ ਦਿੰਦੇ ਹਨ ਅਤੇ ਉਹ ਵਿਆਹ ਸੰਪੂਰਨ ਕਰਨ ਲਈ ਲੱਖਾਂ ਰੁਪਏ ਦੇ ਕਰਜ਼ੇ ਵੀ ਲੈਂਦੇ ਹਨ, ਜਿਸ ਦਾ ਨਤੀਜਾ ਇਹ ਹੁੰਦਾ ਹੈ ਕਿ ਉਹ ਕਰਜ਼ੇ ਦਾ ਵਿਆਜ ਦੇਣ ਦੇ ਕਾਬਲ ਨਹੀਂ ਰਹਿੰਦੇ, ਕਰਜ਼ਾ ਵਾਪਸ ਕਰਨਾ ਤਾਂ ਦੂਰ ਦੀ ਗੱਲ ਹੈ। ਅਮੀਰ ਲੋਕ ਤਾਂ ਵਿਖਾਵਾ ਕਰਨ ਲਈ ਬੇਹਿਸਾਬ ਪੂੰਜੀ ਖਰਚ ਕਰਦੇ ਹਨ। ਗ਼ਰੀਬ ਲੋਕਾਂ ਨੂੰ ਵੀ ਮਜਬੂਰੀ ਵੱਸ ਇਹ ਖਰਚ ਕਰਨਾ ਪੈਂਦਾ ਹੈ। ਸਰਕਾਰ ਵੱਲੋਂ ਜੇ ਇਹ ਕਾਨੂੰਨ ਪਾਸ ਕਰਕੇ ਸਖਤੀ ਨਾਲ ਲਾਗੂ ਕੀਤਾ ਜਾਵੇ ਤਾਂ ਸਾਡਾ ਸਮਾਜ ਇਸ ਭੈੜੀ ਲਾਹਨਤ ਤੋਂ ਮੁਕਤ ਹੋ ਸਕਦਾ ਹੈ।


-ਸਮਿੱਤਰ ਸਿੰਘ ਦੋਸਤ
ਮੋਬਾਈਲ : 92562-92764.


ਅਪਗਰੇਡ ਸਕੂਲਾਂ ਦੇ ਅਧਿਆਪਕਾਂ ਦੇ ਦੁੱਖ
ਪਿਛਲੇ ਸਾਲ ਪੰਜਾਬ ਸਰਕਾਰ ਨੇ ਸਿੱਖਿਆ ਵਿਭਾਗ ਦੇ ਮਿਡਲ ਸਕੂਲ ਅਪਗਰੇਡ ਕਰਕੇ ਹਾਈ ਸਕੂਲ ਕਰ ਦਿੱਤੇ। ਮਿਡਲ ਤੋਂ ਹਾਈ ਉਹ ਸਕੂਲ ਕੀਤੇ ਜਿਨ੍ਹਾਂ ਸਕੂਲਾਂ ਵਿੱਚ ਬੱਚਿਆਂ ਦੀ ਗਿਣਤੀ 100 ਤੋਂ ਜ਼ਿਆਦਾ ਸੀ। ਅਧਿਆਪਕਾਂ ਨੇ ਬੜੀ ਮਿਹਨਤ ਨਾਲ ਸਕੂਲ ਵਿੱਚ ਬੱਚਿਆਂ ਦੀ ਗਿਣਤੀ ਵਧਾਈ ਸੀ, ਪਰ ਇਸ ਦਾ ਨਤੀਜਾ ਇਹ ਹੋਇਆ ਕਿ ਸਕੂਲਾਂ ਵਿਚ ਮੁੱਖ ਅਧਿਆਪਕ ਅਤੇ ਕਲਰਕਾਂ ਦੀਆਂ ਪੋਸਟਾਂ ਖਾਲੀ ਹੋਣ ਕਾਰਨ ਵਿਚਾਰੇ ਅਧਿਆਪਕ ਪਿਛਲੇ ਚਾਰ-ਪੰਜ ਮਹੀਨਿਆਂ ਤੋਂ ਤਨਖਾਹਾਂ ਤੋਂ ਵਾਂਝੇ ਹਨ। ਇਹ ਅਧਿਆਪਕ ਤਨਖਾਹਾਂ ਲਈ ਏ.ਜੀ. ਪੰਜਾਬ ਦੇ ਦਫਤਰ ਅਤੇ ਜ਼ਿਲ੍ਹਾ ਸਿੱਖਿਆ ਅਫਸਰਾਂ ਦੇ ਦਫਤਰਾਂ ਦੇ ਚੱਕਰ ਲਗਾਉਣ ਜਾਂ ਸਕੂਲਾਂ ਵਿਚ ਬੱਚਿਆਂ ਨੂੰ ਪੜ੍ਹਾਉਣ। ਹੁਣ ਤਾਂ ਅਧਿਆਪਕ ਇਹ ਸੋਚਣ ਨੂੰ ਮਜਬੂਰ ਹੋ ਗਏ ਹਨ ਕਿ ਕਾਸ਼! ਉਨ੍ਹਾਂ ਨੇ ਸਕੂਲਾਂ ਵਿਚ ਬੱਚਿਆਂ ਦੀ ਗਿਣਤੀ ਨਾ ਵਧਾਈ ਹੁੰਦੀ ਤਾਂ ਅੱਜ ਉਹ ਵੀ ਬਾਕੀ ਅਧਿਆਪਕਾਂ ਵਾਂਗ ਖੱਜਲ-ਖੁਆਰੀ ਤੋਂ ਬਚ ਜਾਂਦੇ। ਪੰਜਾਬ ਸਰਕਾਰ ਨੂੰ ਅਧਿਆਪਕਾਂ ਦੀ ਹੋ ਰਹੀ ਖੱਜਲ-ਖੁਆਰੀ ਅਤੇ ਮਾਨਸਿਕ ਪਰੇਸ਼ਾਨੀ ਨੂੰ ਛੇਤੀ ਤੋਂ ਛੇਤੀ ਦੂਰ ਕਰਨ ਲਈ ਠੋਸ ਉਪਰਾਲੇ ਕਰਨੇ ਚਾਹੀਦੇ ਹਨ।


-ਇਕ ਪਾਠਕ

10-3-2017

  ਸਾਡੀ ਰੀਸ ਕੌਣ ਕਰ ਲਊ...

ਇਕ ਦਿਨ ਮੈਂ ਆਪਣੇ ਆੜ੍ਹਤੀਏ ਦੇਵ ਰਾਜ ਦੀ ਕੀੜੇਮਾਰ ਦਵਾਈਆਂ ਦੀ ਦੁਕਾਨ ਤੋਂ ਆਪਣੇ ਖੇਤ ਵਾਸਤੇ ਨਦੀਨਨਾਸ਼ਕ ਦਵਾਈ ਲੈਣ ਗਿਆ। ਮੈਂ ਕੀ ਦੇਖਿਆ ਕਿ ਮੇਰੇ ਤੋਂ ਪਹਿਲਾਂ ਮੇਰੇ ਹੀ ਪਿੰਡ ਦਾ ਕਿਸਾਨ ਕਿੱਕਰ ਸਿੰਘ ਦੇਵ ਰਾਜ ਤੋਂ 5000 ਰੁਪਏ ਵਿਆਜ 'ਤੇ ਲੈਣ ਲਈ ਮਿੰਨਤਾਂ ਤਰਲੇ ਕਰ ਰਿਹਾ ਸੀ ਪਰ ਦੇਵ ਰਾਜ ਉਸ ਨੂੰ ਪਿਛਲੇ ਖੜ੍ਹੇ ਪੈਸੇ ਵਾਪਸ ਨਾ ਕਰਨ ਕਰਕੇ ਹੋਰ ਪੈਸੇ ਦੇਣ ਤੋਂ ਅਸਮਰੱਥਾ ਪ੍ਰਗਟ ਕਰ ਰਿਹਾ ਸੀ। ਕਿੱਕਰ ਸਿੰਘ ਦੇ ਜ਼ਿਆਦਾ ਵਾਸਤੇ ਪਾਉਣ ਕਰਕੇ ਅਖੀਰ ਨਾ-ਚਾਹੁੰਦੇ ਹੋਏ ਵੀ ਦੇਵ ਰਾਜ ਨੇ ਉਸ ਦਾ ਸੱਜਾ ਅੰਗੂਠਾ ਆਪਣੀ ਲਾਲ ਵਹੀ 'ਤੇ ਲਗਾ ਕੇ ਉਸ ਨੂੰ 5000 ਰੁਪਏ ਦੇ ਦਿੱਤੇ ਸਨ। ਉਸ ਤੋਂ ਅਗਲੇ ਦਿਨ ਮੈਂ ਕੀ ਦੇਖਿਆ ਕਿ ਉਹੀ ਕਿੱਕਰ ਸਿੰਘ ਪਿੰਡੋਂ ਗਈ ਜੈਲਦਾਰਾਂ ਦੀ ਬਰਾਤ ਵਿਚ ਨੱਚਦੀਆਂ ਆਰਕੈਸਟਰਾਂ 'ਤੇ ਨੋਟ ਸੁੱਟ ਰਿਹਾ ਸੀ ਅਤੇ ਡੀ.ਜੇ. ਵਾਲੇ ਨੂੰ ਵਾਰ-ਵਾਰ ਇਕੋ ਗਾਣਾ ਲਾਉਣ ਦੀ ਫਰਮਾਇਸ਼ ਵੀ ਕਰ ਰਿਹਾ ਸੀ, ਜਿਸ ਦੇ ਬੋਲ ਸਨ:
ਮਾਲਕ ਜ਼ਮੀਨਾਂ ਦੇ ਤੇ ਪੁੱਤ ਸਰਦਾਰਾਂ ਦੇ,
ਸਾਡੇ ਸਿਰੋਂ ਚਲਦੇ ਨੇ ਘਰ ਸ਼ਾਹੂਕਾਰਾਂ ਦੇ,
ਖੁੱਲ੍ਹੇ ਰੱਖੀਏ ਦਿਲਾਂ ਦੇ ਦਰਵਾਜ਼ੇ
ਸਾਡੀ ਰੀਸ ਕੌਣ ਕਰ ਲਓ,
ਸਾਨੂੰ ਰੱਬ ਨੇ ਬਣਾਇਆ ਮਹਾਰਾਜੇ।

-ਰਾਜਾ ਗਿੱਲ
ਪਿੰਡ ਤੇ ਡਾਕ: ਚੜਿੱਕ (ਮੋਗਾ)। ਮੋਬਾ : 94654-11585.


ਸੈਲਫੀਆਂ ਤੇ ਲਾਈਵ ਵੀਡੀਓ

ਜ਼ਿੰਦਗੀ ਵਿਚ ਬੀਤ ਰਹੇ ਹਰੇਕ ਯਾਦਗਾਰ ਪਲ ਨੂੰ ਕੈਮਰੇ ਵਿਚ ਕੈਦ ਕਰਕੇ ਸੈਲਫੀਆਂ ਤੇ ਲਾਈਵ ਵੀਡੀਓ ਦੇ ਰੂਪ ਵਿਚ ਆਪਣੇ ਦੋਸਤਾਂ-ਮਿੱਤਰਾਂ ਨੂੰ ਫੇਸਬੁੱਕ, ਟਵਿਟਰ, ਵਟਸਐਪ, ਯੂ-ਟਿਊਬ ਤੇ ਇੰਸਟਾਗ੍ਰਾਮ ਰਾਹੀਂ ਦਿਖਾਉਣ ਦਾ ਰੁਝਾਨ ਅੱਜਕਲ੍ਹ ਆਮ ਹੋ ਗਿਆ ਹੈ। ਅਜਿਹੀਆਂ ਹਰਕਤਾਂ ਕਰਦੇ ਸਮੇਂ ਸਾਡੀ ਨੌਜਵਾਨ ਪੀੜ੍ਹੀ ਇਹ ਭੁੱਲ ਜਾਂਦੀ ਹੈ ਕਿ ਕੁਝ ਹੀ ਪਲਾਂ ਤੱਕ ਮੌਤ ਉਨ੍ਹਾਂ ਤੱਕ ਪਹੁੰਚ ਰਹੀ ਹੈ। ਧਾਰਮਿਕ ਸਥਾਨਾਂ ਤੇ ਮੇਲਿਆਂ ਨੂੰ ਮੋਟਰਸਾਈਕਲਾਂ 'ਤੇ ਜਾਂਦੇ ਸਮੇਂ ਗਰੁੱਪ ਵਿੱਚ ਨੌਜੁਆਨਾਂ ਵੱਲੋਂ ਆਪਣੇ-ਆਪ ਨੂੰ ਲਾਈਵ ਦਿਖਾਉਣ ਕਰਕੇ ਅੱਜਕਲ੍ਹ ਧਾਰਮਿਕ ਸਥਾਨਾਂ ਦੀ ਯਾਤਰਾ ਸੈਲਫੀਆਂ ਦੀ ਯਾਤਰਾ ਬਣਦੀ ਜਾ ਰਹੀ ਹੈ। ਪਿਛਲੇ ਸਮੇਂ ਵਿਚ ਸੈਲਫੀਆਂ ਖਿੱਚਦੇ ਸਮੇਂ ਕਈ ਕੀਮਤੀ ਜਾਨਾਂ ਜਾ ਚੁੱਕੀਆਂ ਹਨ, ਪਰ ਕੋਈ ਵੀ ਅਜਿਹੀਆਂ ਹਰਕਤਾਂ ਕਰਨ ਤੋਂ ਬਾਜ਼ ਨਹੀਂ ਆ ਰਿਹਾ। ਨੌਜਵਾਨ ਪੀੜ੍ਹੀ ਨੂੰ ਚਾਹੀਦਾ ਹੈ ਕਿ ਇਸ ਤਕਨੀਕ ਦਾ ਇਸਤੇਮਾਲ ਮੂਰਖਤਾ ਦੀ ਹੱਦ ਤੱਕ ਕਰਨਾ ਛੱਡ ਕੇ ਸਹੀ ਤਰੀਕੇ ਨਾਲ ਕੀਤਾ ਜਾਵੇ ਅਤੇ ਸਮਾਂ ਤੇ ਸਥਾਨ ਜ਼ਰੂਰ ਦੇਖ ਲਿਆ ਜਾਵੇ।

-ਸ਼ਮਸ਼ੇਰ ਸਿੰਘ ਸੋਹੀ
ਪਿੰਡ ਸੋਹੀਆਂ, ਡਾਕਖਾਨਾ ਚੀਮਾਂ ਖੁੱਡੀ, ਤਹਿਸੀਲ ਬਟਾਲਾ, ਜ਼ਿਲ੍ਹਾ ਗੁਰਦਾਸਪੁਰ। ਮੋਬਾਈਲ : 98764-74671.

ਨੋਟਾਂ ਦੀ ਬੇਕਦਰੀ

ਪੈਸੇ ਨੂੰ ਦੁਨੀਆ ਵਿਚ ਰੱਬ ਰੂਪ ਵਜੋਂ ਸਮਝਿਆ ਜਾਂਦਾ ਹੈ। ਹੈ ਵੀ ਠੀਕ, ਕਿਉਂਕਿ ਧਨ ਮਨੁੱਖ ਦੇ ਹਰ ਦੁੱਖ-ਸੁੱਖ ਵਿਚ ਕੰਮ ਆਉਂਦਾ ਹੈ। ਕੋਈ ਵੀ ਲੈਣ-ਦੇਣ ਬਿਨਾਂ ਨੋਟਾਂ ਤੋਂ ਨਹੀਂ ਹੁੰਦਾ। ਪੈਸਾ ਰੱਬ ਤਾਂ ਨਹੀਂ, ਪਰ ਹੈ ਵੀ ਬਹੁਤ ਕੁਝ। ਇਨ੍ਹਾਂ ਪੈਸਿਆਂ ਨੂੰ ਕਮਾਉਣ ਲਈ ਬਹੁਤ ਮਿਹਨਤ-ਮੁਸ਼ੱਕਤ ਕਰਨੀ ਪੈਂਦੀ ਹੈ, ਦਿਨ-ਰਾਤ ਮਿਹਨਤ ਕਰਨੀ ਪੈਂਦੀ ਹੈ, ਵਿਦੇਸ਼ਾਂ ਵਿਚ ਜਾ ਕੇ ਧੱਕੇ ਵੀ ਖਾਣੇ ਪੈਂਦੇ ਹਨ ਅਤੇ ਆਪਣੇ ਅਰਮਾਨਾਂ ਦਾ ਘਾਣ ਵੀ ਕਰਨਾ ਪੈਂਦਾ ਹੈ। ਪਰ ਦੁੱਖ ਉਦੋਂ ਹੁੰਦਾ ਹੈ ਜਦੋਂ ਕਿਸੇ ਵਿਆਹ, ਸੇਵਾਮੁਕਤੀ ਜਾਂ ਹੋਰ ਖੁਸ਼ੀ ਦੇ ਮੌਕਿਆਂ 'ਤੇ ਨੱਚਦੇ-ਟੱਪਦੇ ਹੋਏ ਲੋਕ ਹੋਰ ਦੂਜੇ 'ਤੇ ਨਾਲ ਦੇ ਨੱਚਣ ਵਾਲੇ ਲੋਕਾਂ 'ਤੇ ਨੋਟ ਵਾਰਦੇ (ਸੁੱਟਦੇ) ਨਜ਼ਰ ਆਉਂਦੇ ਹਨ ਤੇ ਫਿਰ ਕੁਝ ਸਕਿੰਟਾਂ ਵਿਚ ਉਹੀ ਰੱਬ ਵਾਂਗ ਪੂਜੇ ਤੇ ਮਿਹਨਤ-ਮੁਸ਼ੱਕਤ ਨਾਲ ਕਮਾਏ ਨੋਟ ਭੰਗੜੇ ਪਾਉਂਦੇ ਲੋਕਾਂ ਦੇ ਪੈਰਾਂ ਹੇਠਾਂ, ਜੁੱਤੀਆਂ ਥੱਲੇ ਰੁਲਦੇ ਨਜ਼ਰੀਂ ਆਉਂਦੇ ਹਨ। ਸੋ, ਇਨ੍ਹਾਂ ਨੋਟਾਂ ਦੀ ਕਦਰ ਕਰਦੇ ਹੋਏ ਸਾਨੂੰ ਅਜਿਹੀ ਗ਼ਲਤੀ ਨਹੀਂ ਕਰਨੀ ਚਾਹੀਦੀ। ਸਖ਼ਤ ਮਿਹਨਤ ਤੇ ਘਾਲਣਾ ਘਾਲ ਕੇ ਪ੍ਰਾਪਤ ਹੋਣ ਵਾਲੀ ਵਸਤੂ ਨੂੰ ਇੱਜ਼ਤ-ਮਾਣ ਨਾਲ ਸੰਭਾਲ ਕੇ ਰੱਖਣਾ ਹੀ ਸਹੀ ਹੋ ਸਕਦਾ ਹੈ, ਉਸ ਦੀ ਬੇਕਦਰੀ ਕਰਨ ਨਾਲ ਘਰ-ਬਾਰ ਤੇ ਵਿਅਕਤੀਤਵ ਦੀ ਤਰੱਕੀ ਹੋਣੀ ਔਖੀ ਹੈ।

-ਮਾ: ਸੰਜੀਵ ਧਰਮਾਣੀ
ਸ੍ਰੀ ਅਨੰਦਪੁਰ ਸਾਹਿਬ। ਮੋਬਾਈਲ : 94785-61356.

 

 

9/3/2017

 ਔਰਤਾਂ ਦਾ ਸਨਮਾਨ
ਮਾਂ ਅਰਥਾਤ ਮਾਤਾ ਦੇ ਰੂਪ ਵਿਚ ਨਾਰੀ ਨੂੰ ਧਰਤੀ 'ਤੇ ਆਉਣ ਲਈ ਸਭ ਤੋਂ ਵੱਧ ਪਵਿੱਤਰ ਮੰਨਿਆ ਗਿਆ ਹੈ। ਕਿਉਂਕਿ ਮਾਂ ਈਸ਼ਵਰ ਦੀ ਵੀ ਜਨਮਦਾਤੀ ਹੈ ਪਰ ਹੁਣ ਔਰਤ ਦਾ ਸਨਮਾਨ ਘਟਦਾ ਜਾ ਰਿਹਾ ਹੈ। ਇਹ ਇਕ ਚਿੰਤਾਜਨਕ ਪਹਿਲੂ ਹੈ। ਸਭ ਆਪਣੇ ਕੰਮਾਂ-ਕਾਰਾਂ ਵਿਚ ਨੈਤਿਕ ਕਦਰਾਂ-ਕੀਮਤਾਂ ਗੁਆ ਰਹੇ ਹਨ। ਨਵੀਂ ਪੀੜ੍ਹੀ ਦੇ ਵਰਗ ਨੂੰ ਸੋਚਣਾ ਚਾਹੀਦਾ ਹੈ ਕਿ ਔਰਤਾਂ ਦਾ ਸਨਮਾਨ ਕਿਉਂ ਘਟਦਾ ਜਾ ਰਿਹਾ ਹੈ। ਔਰਤਾਂ ਹਰ ਖੇਤਰ ਵਿਚ ਮੁੰਡਿਆਂ ਨਾਲੋਂ ਅੱਗੇ ਹਨ। ਇਹ ਹਰ ਖੇਤਰ ਵਿਚ ਆਪਣੀ ਮਿਹਨਤ ਸਦਕਾ ਬਾਜ਼ੀ ਮਾਰ ਰਹੀਆਂ ਹਨ। ਜੇਕਰ ਅਸੀਂ ਇਤਿਹਾਸ ਵੱਲ ਧਿਆਨ ਦੇਈਏ ਤਾਂ ਮਦਰ ਟੈਰੇਸਾ, ਕਲਪਨਾ ਚਾਵਲਾ, ਕਸਤੂਰਬਾ ਗਾਂਧੀ, ਮਾਈ ਭਾਗੋ ਅਤੇ ਹੋਰ ਵੀ ਬਹੁਤ ਪ੍ਰਸਿੱਧ ਮਹਿਲਾਵਾਂ ਹਨ, ਜਿਨ੍ਹਾਂ ਨੇ ਸਾਡੇ ਦੇਸ਼ ਦੀ ਤਰੱਕੀ ਨੂੰ ਵਧਾਉਣ ਲਈ ਭੂਮਿਕਾ ਨਿਭਾਈ ਹੈ। ਸੋ, ਸਾਨੂੰ ਔਰਤਾਂ ਦਾ ਸਨਮਾਨ ਕਰਨਾ ਚਾਹੀਦਾ ਹੈ।


-ਬੇਅੰਤ ਕੌਰ ਬਰਾੜ
ਪਿੰਡ ਖੁੜੰਜ, ਜ਼ਿਲ੍ਹਾ ਫਾਜ਼ਿਲਕਾ।


ਜਾਣਕਾਰੀ ਭਰਪੂਰ ਲੇਖ

ਪਿਛਲੇ ਦਿਨੀਂ 'ਅਜੀਤ' ਵਿਚ ਇਕ ਲੇਖ ਬਾਬਾ ਦਾਨ ਸਿੰਘ ਬਰਾੜ ਬਾਰੇ ਪੜ੍ਹਿਆ, ਬਹੁਤ ਜਾਣਕਾਰੀ ਭਰਪੂਰ ਸੀ। ਲੇਖਕ ਨੇ ਵਧੀਆ ਸ਼ਬਦਾਂ ਦੀ ਵਰਤੋਂ ਕਰਦੇ ਹੋਏ ਥੋੜ੍ਹੇ ਸ਼ਬਦਾਂ ਵਿਚ ਹੀ ਭਰਪੂਰ ਜਾਣਕਾਰੀ ਦੇਣ ਦੀ ਖੇਚਲ ਕੀਤੀ ਹੈ ਪਰ ਇਸ ਮਹਾਂਪੁਰਸ਼ ਨੂੰ ਜਿੰਨਾ ਵੱਡਾ ਸਥਾਨ ਸਿੱਖ ਇਤਿਹਾਸ ਵਿਚ ਮਿਲਣਾ ਚਾਹੀਦਾ ਸੀ, ਉਹ ਨਹੀਂ ਮਿਲ ਸਕਿਆ। ਬਹੁਤ ਥੋੜ੍ਹੇ ਪਾਠਕਾਂ ਨੂੰ ਇਨ੍ਹਾਂ ਬਾਰੇ ਜਾਣਕਾਰੀ ਸੀ ਪਰ ਇਹ ਲੇਖ ਪੜ੍ਹ ਕੇ ਜਾਣਕਾਰੀ ਵਿਚ ਵਾਧਾ ਹੋਇਆ ਹੈ। ਤੁਸੀਂ ਵਧਾਈ ਦੇ ਪਾਤਰ ਹੋ ਕਿ ਮਾਲਵੇ ਦੇ ਲੋਕਾਂ ਨੂੰ ਇਸ ਮਹਾਨ ਜਰਨੈਲ ਬਾਰੇ ਭਰਪੂਰ ਜਾਣਕਾਰੀ ਦਿੱਤੀ।

-ਬਲਦੇਵ ਸਿੰਘ ਮਰਾਹੜ
ਪਿੰਡ ਤੇ ਡਾਕ: ਕੋਠਾ ਗੁਰੂ ਕਾ, ਬਠਿੰਡਾ

ਆਲੂਆਂ ਦੀ ਮੰਦੀ

ਲੋਕਾਂ ਨੇ ਹਾਲੇ ਨੋਟਬੰਦੀ ਤੋਂ ਪੂਰੀ ਤਰ੍ਹਾਂ ਰਾਹਤ ਵੀ ਮਹਿਸੂਸ ਨਹੀਂ ਕੀਤੀ ਕਿ ਆਲੂਆਂ ਦੀ ਫ਼ਸਲ ਦੀ ਮੰਦੀ ਹਾਲਤ ਨੇ ਕਿਸਾਨੀ ਦਾ ਲੱਕ ਤੋੜ ਦਿੱਤਾ। ਮਹਿੰਗੇ ਭਾਅ ਦੀ ਖਾਦ ਨਾਲ ਤਿਆਰ ਕੀਤੀ ਆਲੂਆਂ ਦੀ ਫ਼ਸਲ ਦੀ ਆਮਦ ਭਾਵੇਂ ਇਕ ਵਾਰ ਚੰਗੀ ਹੋਈ ਪਰ ਰੁਪਏ ਕਿਲੋ ਵਿਕਦੇ ਆਲੂਆਂ ਨੇ ਕਿਸਾਨਾਂ ਦੇ ਮੁਢਲੇ ਖਰਚੇ ਵੀ ਪੂਰੀ ਨਹੀਂ ਕਰਨੇ। ਪਿਛਲੇ ਦਿਨੀਂ ਕਰਤਾਰਪੁਰ ਵਿਚ ਜਲੰਧਰ ਅੰਮ੍ਰਿਤਸਰ ਕੌਮੀ ਮਾਰਗ 'ਤੇ ਕਿਸਾਨਾਂ ਨੇ ਆਲੂ ਸੁੱਟ ਕੇ ਰੋਸ ਪ੍ਰਦਰਸ਼ਨ ਕੀਤਾ ਤੇ ਪ੍ਰਸ਼ਾਸਨ ਨੂੰ ਆਲੂਆਂ ਦਾ ਚਿੱਕੜ ਜੇ.ਸੀ.ਬੀ. ਮਸ਼ੀਨਾਂ ਨਾਲ ਹਟਾਉਣਾ ਪਿਆ। ਆਲੂਆਂ ਦੀ ਫ਼ਸਲ ਦੇ ਨਿਕਲੇ ਇਸ ਜਨਾਜ਼ੇ ਕਾਰਨ ਕਿਸਾਨਾਂ ਦੇ ਚਿਹਰੇ ਮੁਰਝਾ ਗਏ ਹਨ। ਮੰਡੀ ਵਿਚ ਆਲੂ ਭਾਵੇਂ ਮੰਦੇ ਵਿਕ ਰਹੇ ਨੇ ਪਰ ਆਲੂਆਂ ਤੋਂ ਬਣੇ ਪਦਾਰਥ ਮਾਰਕੀਟ ਵਿਚ ਮਹਿੰਗੇ ਭਾਅ ਵਿਕ ਰਹੇ ਹਨ। ਆਲੂਆਂ ਦੇ ਮੰਦੇ ਭਾਅ ਨੇ ਕਿਸਾਨਾਂ ਨੂੰ ਆ ਰਹੇ ਹਾੜ੍ਹੀ ਦੇ ਸੀਜ਼ਨ ਬਾਰੇ ਸੋਚਣ ਲਈ ਮਜਬੂਰ ਕਰ ਦਿੱਤਾ ਹੈ। ਸੈਂਕੜੇ ਏਕੜ ਵਿਚ ਲੱਗੇ ਆਲੂਆਂ ਦੀ ਫ਼ਸਲ ਦਾ ਸਹੀ ਮੁੱਲ ਪਾਉਣ ਲਈ ਸਰਕਾਰ ਜਲਦ ਹੀ ਕੋਈ ਪੁਖਤਾ ਤੇ ਫੌਰੀ ਇੰਤਜ਼ਾਮ ਕਰਕੇ 'ਕਿਸਾਨ ਹਿਤੈਸ਼ੀ' ਬਣਨ ਦਾ ਯਤਨ ਕਰੇ ਤਾਂ ਕਿ ਕਿਸਾਨਾਂ ਦਾ ਰੋਹ ਠੰਢਾ ਹੋ ਸਕੇ।

-ਜਸਬੀਰ ਦੱਧਾਹੂਰ
ਪਿੰਡ ਤੇ ਡਾਕ: ਦੱਧਾਹੂਰ, ਤਹਿ: ਰਾਏਕੋਟ, ਜ਼ਿਲ੍ਹਾ ਲੁਧਿਆਣਾ।

 

08/03/2017

 ਸਹਿਣਸ਼ੀਲਤਾ ਦਾ ਮਹੱਤਵ
ਅਜੋਕੇ ਸਮਿਆਂ ਵਿਚ ਭਾਵੇਂ ਅਸੀਂ ਬਹੁਤ ਅਗਾਂਹਵਧੂ ਵਿਚਾਰਾਂ ਦੇ ਧਾਰਨੀ ਹੋਣ ਦਾ ਵਿਖਾਵਾ ਕਰਦੇ ਹਾਂ ਪ੍ਰੰਤੂ ਅਸੀਂ ਦਿਨ-ਬ-ਦਿਨ ਸਹਿਣਸ਼ੀਲ ਆਚਾਰ-ਵਿਹਾਰ ਤੋਂ ਦੂਰ ਹੁੰਦੇ ਜਾ ਰਹੇ ਹਾਂ। ਘਰ ਵਿਚ ਬੱਚਿਆਂ ਦਾ ਰੁੱਸਣਾ, ਨੌਜਵਾਨ ਪੀੜ੍ਹੀ ਦੀਆਂ ਖ਼ੁਦਕੁਸ਼ੀਆਂ, ਮਾਨਸਿਕ ਤਣਾਅ ਸਭ ਉਨ੍ਹਾਂ ਵਿਚ ਇਸ ਗੁਣ ਦੀ ਘਾਟ ਦਾ ਨਤੀਜਾ ਹੈ। ਅਸੀਂ ਬੋਲਣ ਨੂੰ ਵਧੇਰੇ ਅਤੇ ਸੁਣਨ ਨੂੰ ਘੱਟ ਅਹਿਮੀਅਤ ਦਿੰਦੇ ਹਾਂ। ਸਹਿਣਸ਼ੀਲ ਹੋਣ ਦਾ ਮਤਲਬ ਇਹ ਨਹੀਂ ਕਿ ਅਸੀਂ ਹਰ ਗੱਲ ਨੂੰ ਸਹਾਰ ਲਈਏ ਬਲਕਿ ਇਹ ਹੈ ਕਿ ਅਸੀਂ ਟਾਲਣਯੋਗ ਹਾਲਤਾਂ ਨੂੰ ਆਉਣ ਤੋਂ ਰੋਕ ਸਕੀਏ। 21ਵੀਂ ਸਦੀ ਦੇ ਧੀਆਂ-ਪੁੱਤ, ਮਾਂ-ਬਾਪ ਨਾਲ ਸਮਾਯੋਜਨ ਇਸ ਕਰਕੇ ਨਹੀਂ ਕਰ ਰਹੇ ਕਿਉਂਕਿ ਉਨ੍ਹਾਂ ਵਿਚ ਪੀੜ੍ਹੀ-ਪਾੜਾ ਹੈ। ਪਰਿਵਰਤਨ ਕੁਦਰਤ ਦਾ ਨਿਯਮ ਹੈ। ਅਜੋਕੇ ਮਾਂ-ਬਾਪ ਬੱਚਿਆਂ ਦੇ ਮਿੱਤਰ ਬਣਨ, ਗਾਈਡ ਬਣਨ ਨਾ ਕਿ ਆਪਣੀਆਂ ਗੱਲਾਂ ਉਨ੍ਹਾਂ 'ਤੇ ਥੋਪਣ। ਦੋ ਪਲ ਦਾ ਗੁੱਸਾ, ਸਦੀਆਂ ਦਾ ਨਰਕ ਬਣ ਜਾਂਦਾ ਹੈ। ਸੋ, ਇਹ ਜ਼ਰੂਰੀ ਹੈ ਕਿ ਹਰ ਸਥਿਤੀ ਨੂੰ ਹਉਮੈਂ ਨੂੰ ਤਿਆਗ ਕੇ ਵਿਚਾਰਿਆ ਜਾਵੇ ਤੇ ਸਹਿਣਸ਼ੀਲ ਵਿਵਹਾਰ ਦਾ ਧਾਰਨੀ ਬਣਿਆ ਜਾਵੇ।


 
-ਮਾ: ਮਨਦੀਪ ਸਿਵੀਆ
ਸ.ਸ.ਸ. ਸਕੂਲ, ਚੱਕ ਜਾਨੀਸਰ, ਜ਼ਿਲ੍ਹਾ ਫਾਜ਼ਿਲਕਾ


ਪਾਣੀ ਦੀ ਕਦਰ ਜਾਣੋ
'ਜਲ ਹੀ ਜੀਵਨ ਹੈ' ਇਹ ਇਕ ਤੁੱਕ ਹੀ ਨਹੀਂ ਹੈ ਸਗੋਂ ਸਾਰੀ ਸ੍ਰਿਸ਼ਟੀ ਦਾ ਮੂਲ ਸਾਰ ਹੈ, ਕਿਉਂਕਿ ਪਾਣੀ ਤੋਂ ਬਗੈਰ ਜੀਵਨ, ਕੰਮ-ਕਾਜ ਤੇ ਸਾਡੀ ਸਭ ਦੀ ਹੋਂਦ ਅਸੰਭਵ ਹੈ। ਗੁਰਬਾਣੀ ਵਿਚ ਵੀ ਪਾਣੀ ਨੂੰ 'ਪਿਤਾ' ਭਾਵ ਜਨਮਦਾਤਾ ਦਾ ਦਰਜਾ ਸਤਿਕਾਰ ਵਜੋਂ ਦਿੱਤਾ ਗਿਆ ਹੈ, ਤਾਂ ਕਿ ਅਸੀਂ ਪਾਣੀ ਨੂੰ ਸਾਧਾਰਨ ਵਸਤੂ ਨਾ ਸਮਝਦੇ ਹੋਏ ਜੀਵਨ-ਦਾਤੇ ਦੇ ਨਜ਼ਰੀਏ ਨਾਲ ਦੇਖੀਏ ਪਰ ਅੱਜ ਜਦੋਂ ਕਦੇ ਜਨਤਕ ਥਾਵਾਂ 'ਤੇ ਜਾਂ ਘਰਾਂ ਦੀਆਂ ਟੂਟੀਆਂ ਜਾਂ ਟੈਂਕੀਆਂ ਵਿਚੋਂ ਚਾਂਦੀ ਰੰਗਾ ਸ਼ੁੱਧ ਪਾਣੀ ਓਵਰ ਫਲੋਅ ਹੋ ਕੇ ਜਾਂ ਟੂਟੀਆਂ ਖੁੱਲ੍ਹੀਆਂ ਰੱਖਣ ਕਰਕੇ ਵਿਅਰਥ ਗਲੀਆਂ, ਨਾਲੀਆਂ ਸੜਕਾਂ ਆਦਿ 'ਚ ਡਿੱਗ ਕੇ ਵਿਅਰਥ ਜਾਂਦਾ ਨਜ਼ਰੀਂ ਪੈਂਦਾ ਹੈ ਤਾਂ ਮਨ ਨੂੰ ਬਹੁਤ ਦੁੱਖ ਹੁੰਦਾ ਹੈ। ਅਜਿਹਾ ਕਈ ਵਾਰ ਖੁਸ਼ੀ-ਗਮੀ ਦੇ ਪ੍ਰੋਗਰਾਮਾਂ ਸਮੇਂ ਵੀ ਹੁੰਦਾ ਨਜ਼ਰੀਂ ਆਉਂਦਾ ਹੈ ਜੋ ਕਿ ਅਤਿ ਨਿੰਦਣਯੋਗ ਤੇ ਦੁਖਦਾਈ ਗੱਲ ਹੈ। ਅੱਜ ਵਿਗਿਆਨੀ ਤੇ ਮਾਹਿਰ ਪਾਣੀ ਦੇ ਡਿੱਗ ਰਹੇ ਪੱਧਰ ਅਤੇ ਪਾਣੀ ਦੇ ਗੰਧਲੇ ਹੋਣ 'ਤੇ ਬਹੁਤ ਚਿੰਤਤ ਹੋਏ ਪਏ ਹਨ। ਕਈ ਵਾਰ ਤਾਂ ਇੰਜ ਜਾਪਦਾ ਹੈ ਕਿ ਭਵਿੱਖ ਵਿਚ ਸ਼ਾਇਦ ਕਿਤੇ ਪਾਣੀ ਕਰਕੇ ਹੀ ਜੰਗਾਂ-ਯੁੱਧ ਨਾ ਹੋ ਜਾਣ। ਸੋ, ਮੁਕਦੀ ਗੱਲ ਸੰਖੇਪ ਵਿਚ ਇਹੋ ਹੈ ਕਿ ਸਾਨੂੰ ਆਪਣੇ ਲਈ, ਸਮੁੱਚੇ ਜੀਵ-ਜਗਤ ਲਈ ਅਤੇ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਅੱਜ ਤੋਂ ਹੀ ਪਾਣੀ ਦੀ ਸੰਭਾਲ ਪ੍ਰਤੀ ਖ਼ੁਦ ਜਾਗਰੂਕ ਹੋਣਾ ਪਵੇਗਾ।


-ਸੰਜੀਵ ਧਰਮਾਣੀ
ਸ੍ਰੀ ਅਨੰਦਪੁਰ ਸਾਹਿਬ।


ਚੋਣਾਂ ਦੇ ਨਤੀਜੇ
ਪੰਜਾਬ ਵਿਚ ਵਿਧਾਨ ਸਭਾ ਚੋਣਾਂ ਦੇ 117 ਹਲਕਿਆਂ ਦੇ ਨਤੀਜਿਆਂ ਦੀ ਲੋਕ ਬੜੀ ਬੇਸਬਰੀ ਨਾਲ ਉਡੀਕ ਕਰ ਰਹੇ ਹਨ। ਇੰਤਜ਼ਾਰ ਕਰਨ ਵੀ ਕਿਉਂ ਨਾ, ਕਿਉਂਕਿ ਲੋਕਾਂ ਨੂੰ ਹਰ ਵਾਰ ਨਵੀਂ ਚੁਣੀ ਸਰਕਾਰ ਤੋਂ ਢੇਰ ਸਾਰੀਆਂ ਉਮੀਦਾਂ ਹੁੰਦੀਆਂ ਹਨ। ਆਉਣ ਵਾਲੀ ਸਰਕਾਰ ਲੋਕਾਂ ਦੀਆਂ ਉਮੀਦਾਂ 'ਤੇ ਖਰੀ ਉਤਰਦੀ ਹੈ ਜਾਂ ਨਹੀਂ, ਖੈਰ ਇਹ ਤਾਂ ਆਉਣ ਵਾਲਾ ਵਕਤ ਹੀ ਤੈਅ ਕਰੇਗਾ। ਪਰ ਸਮੇਂ ਦੀ ਮੰਗ ਹੈ ਕਿ ਪੰਜਾਬ ਵਿਚ ਕਿਸਾਨਾਂ ਦੀਆਂ ਵੱਧ ਰਹੀਆਂ ਖ਼ੁਦਕੁਸ਼ੀਆਂ ਨੂੰ ਠੱਲ੍ਹ ਪਾਈ ਜਾਵੇ, ਕਿਸਾਨਾਂ ਦੀਆਂ ਮੁਸ਼ਕਿਲਾਂ ਦਾ ਹੱਲ ਕੱਢਿਆ ਜਾਵੇ, ਬੇਰੁਜ਼ਗਾਰੀ ਖ਼ਤਮ ਕਰਨ ਲਈ ਰੁਜ਼ਗਾਰ ਦੇ ਮੌਕੇ ਪੈਦਾ ਕੀਤੇ ਜਾਣ। ਸਰਕਾਰੀ ਸਕੂਲਾਂ ਦਾ ਸਟੇਟਸ ਪ੍ਰਾਈਵੇਟ ਸਕੂਲਾਂ ਦੇ ਬਰਾਬਰ ਕੀਤਾ ਜਾਵੇ ਤਾਂ ਜੋ ਗ਼ਰੀਬ ਤੇ ਅਮੀਰ ਸਭ ਲੋਕਾਂ ਦੇ ਬੱਚੇ ਉਚੇਰੀ ਸਿੱਖਿਆ ਸੌਖਿਆਂ ਪ੍ਰਾਪਤ ਕਰ ਸਕਣ। ਸਰਕਾਰ ਭਾਵੇਂ ਆਮ ਆਦਮੀ ਪਾਰਟੀ, ਕਾਂਗਰਸ ਜਾਂ ਅਕਾਲੀ-ਭਾਜਪਾ ਦੀ ਬਣੇ, ਲੋਕਾਂ ਨੂੰ ਕੋਈ ਫ਼ਰਕ ਨਹੀਂ ਪੈਂਦਾ। ਲੋੜ ਤਾਂ ਇਸ ਗੱਲ ਦੀ ਹੈ ਕਿ ਜੋ ਵੀ ਸਰਕਾਰ ਬਣੇ, ਲੋਕਾਂ ਦੀਆਂ ਉਮੀਦਾਂ 'ਤੇ ਖਰੀ ਉਤਰੇ।


-ਸਮਿੱਤਰ ਸਿੰਘ
ਦਸ਼ਮੇਸ਼ ਨਗਰ, ਝੁੰਗੀਆਂ ਰੋਡ, ਖਰੜ।

07/03/2017

 ਰੁੱਖ ਲਗਾਉਣ ਤੋਂ ਬੇਖ਼ਬਰ ਪੰਚਾਇਤਾਂ
ਸਮਰਾਲਾ ਤੋਂ ਕੁਲਦੀਪ ਸਿੰਘ ਬਰਮਾਲੀਪੁਰ ਦੀ ਖ਼ਬਰ ਹੈ ਕਿ ਦਰੱਖਤਾਂ ਦੀ ਘਟ ਰਹੀ ਗਿਣਤੀ ਤੋਂ ਬੇਖ਼ਬਰ ਨੇ ਪੰਚਇਤਾਂ, ਬਿਲਕੁਲ ਸਹੀ ਹੈ। ਪਿੰਡਾਂ ਵਿਚ ਗ੍ਰਾਮ ਪੰਚਇਤਾਂ ਨੇ ਕਦੇ ਵੀ ਸਾਂਝੀਆ ਥਾਂਵਾਂ 'ਤੇ ਬੂਟੇ ਲਗਾਉਣ ਬਾਰੇ ਨਹੀਂ ਸੋਚਿਆ ਹੈ। ਪਿੰਡਾਂ ਵਿਚ ਨੌਜਵਾਨਾਂ ਨੇ ਕੁਝ ਕਲੱਬ ਬਣਾਏ ਹਨ ਤੇ ਉਨ੍ਹਾਂ ਵੱਲੋਂ ਕੁਝ ਪਿੰਡਾਂ ਵਿਚ ਬੂਟੇ ਲਗਾਏ ਗਏ ਹਨ। ਪੰਜਾਬ ਦੇ ਪਿੰਡਾਂ ਦੀਆਂ ਸਾਂਝੀਆਂ ਥਾਂਵਾਂ 'ਤੇ ਅਜੀਤ ਹਰਿਆਵਲ ਲਹਿਰ ਨੇ ਵਾਤਾਵਰਨ ਨੂੰ ਸ਼ੁੱਧ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ। ਅੱਜ ਕਈ ਪਿੰਡ ਵਿਚ ਅਜੀਤ ਹਰਿਆਵਲ ਦੇ ਬੂਟੇ ਰਾਹਗੀਰਾਂ ਨੂੰ ਛਾਂ ਦੇ ਰਹੇ ਹਨ। ਪੰਚਾਇਤਾਂ ਨੇ ਬੂਟੇ ਕੀ ਲਗਾਉਣੇ ਹਨ? ਕਈ ਪੰਚਾਇਤਾਂ ਵੱਲੋਂ ਕੁਝ ਪਿੰਡਾਂ ਵਿਚ ਛੱਪੜਾਂ 'ਤੇ ਮਿਲੀਭੁਗਤ ਨਾਲ ਕਬਜ਼ੇ ਕਰਵਾ ਦਿੱਤੇ ਗਏ। ਪਿੰਡਾਂ ਦੀਆਂ ਸੰਪਰਕ ਸੜਕਾਂ 'ਤੇ ਰੁੱਖ ਲਗਾਉਣ ਦੀ ਬਜਾਏ ਕੂੜਾ ਕਰਕਟ ਨਜ਼ਰ ਆਉਂਦਾ ਹੈ। ਖਡੂਰ ਸਾਹਿਬ ਦੀਆਂ ਸੰਪਰਕ ਸੜਕਾਂ 'ਤੇ ਬਾਬਾ ਸੇਵਾ ਸਿੰਘ ਖਡੂਰ ਸਾਹਿਬ ਵਾਲਿਆਂ ਵੱਲੋਂ ਵੱਡੀ ਪੱਧਰ 'ਤੇ ਰੁੱਖ ਲਗਾਏ ਹਨ। ਲੋਕ ਸ਼ੁੱਧ ਵਾਤਾਵਰਨ ਦਾ ਅਨੰਦ ਮਾਣ ਰਹੇ ਹਨ। ਪੰਜਾਬ ਦੇ ਸਾਰੇ ਡਿਪਟੀ ਕਮਿਸ਼ਨਰਾਂ ਵੱਲੋਂ ਪੰਚਾਇਤਾਂ ਨੂੰ ਹਦਾਇਤ ਕੀਤੀ ਜਾਣੀ ਚਾਹੀਦੀ ਹੈ ਕਿ ਛੱਪੜਾਂ ਦੀ ਸਫ਼ਾਈ ਕਰਵਾ ਕੇ ਪਿੱਪਲ, ਜਾਮਣ, ਅੰਬ ਤੇ ਹੋਰ ਕਿਸਮਾਂ ਦੇ ਬੂਟੇ ਲਗਾਏ ਜਾਣ ਤਾਂ ਕਿ ਵਾਤਾਵਰਨ ਦੇ ਪ੍ਰੇਮੀ ਸਵੇਰ ਦੀ ਸੈਰ ਸਮੇਂ ਸ਼ੁੱਧ ਵਾਤਾਵਰਨ 'ਚ ਸਾਹ ਲੈ ਸਕਣ।


-ਮਾਸਟਰ ਜਗੀਰ ਸਿੰਘ ਸਫਰੀ
ਸਠਿਆਲਾ (ਅੰਮ੍ਰਿਤਸਰ)।


ਚੋਣ ਨਤੀਜੇ
ਪੰਜਾਬ ਵਿਚ ਪਿਛਲੀ ਲੰਘੀ 4 ਫਰਵਰੀ ਨੂੰ ਹੋਈਆਂ ਵਿਧਾਨ ਸਭਾ ਦੀਆਂ ਚੋਣਾਂ ਦੇ ਨਤੀਜੇ ਆਉਣ ਵਿਚ ਸਿਰਫ ਕੁਝ ਦਿਨ ਹੀ ਬਾਕੀ ਬਚੇ ਹਨ। ਸਾਨੂੰ ਸਭ ਨੂੰ ਪਤਾ ਹੈ ਕਿ ਆਉਣ ਵਾਲੀ 11 ਮਾਰਚ ਨੂੰ ਸਵੇਰੇ 8 ਵਜੇ ਤੋਂ ਹਰੇਕ ਵਿਧਾਨ ਸਭਾ ਹਲਕੇ ਦੀ ਗਿਣਤੀ ਆਰੰਭ ਹੋ ਜਾਵੇਗੀ ਅਤੇ ਤਕਰੀਬਨ 10-11 ਵਜੇ ਤੱਕ ਹੀ ਨਤੀਜਿਆਂ ਦੇ ਰੁਝਾਨ ਆਉਣੇ ਵੀ ਸ਼ੁਰੂ ਹੋ ਜਾਣਗੇ। ਇਨ੍ਹਾਂ ਚੋਣਾਂ ਵਿਚ ਹਾਰਨ ਵਾਲੇ ਉਮੀਦਵਾਰਾਂ ਅਤੇ ਉਨ੍ਹਾਂ ਦੇ ਸਮਰੱਥਕਾਂ ਵਿਚ ਜਿਥੇ ਨਿਰਾਸ਼ਾ ਦਾ ਆਲਮ ਹੋਵੇਗਾ, ਉਥੇ ਜਿੱਤੇ ਹੋਏ ਉਮੀਦਵਾਰਾਂ ਅਤੇ ਉਨ੍ਹਾਂ ਦੇ ਸਮਰੱਥਕਾਂ ਵੱਲੋਂ ਆਪਣੇ-ਆਪਣੇ ਤਰੀਕੇ ਨਾਲ ਜਿੱਤ ਦੇ ਜਸ਼ਨ ਵੀ ਮਨਾਏ ਜਾਣਗੇ। ਪਿਛਲੇ ਕਈ ਦਹਾਕਿਆਂ ਤੋਂ ਅਸੀਂ ਅਕਸਰ ਹੀ ਦੇਖਦੇ ਆ ਰਹੇ ਹਾਂ ਕਿ ਇਨ੍ਹਾਂ ਚੋਣ ਨਤੀਜਿਆਂ ਵਾਲੇ ਦਿਨ ਜਿੱਤੇ ਹੋਏ ਉਮੀਦਵਾਰਾਂ ਦੇ ਸਮਰਥਕਾਂ ਵੱਲੋਂ ਜਿੱਤ ਦੇ ਗ਼ਰੂਰ ਵਿਚ ਜਿਥੇ ਖੂਬ ਰੌਲਾ-ਰੱਪਾ ਅਤੇ ਪਟਾਕੇ ਆਦਿ ਚਲਾਏ ਜਾਂਦੇ ਹਨ, ਉਥੇ ਕਈ ਵਾਰ ਇਨ੍ਹਾਂ ਦੁਆਰਾ ਜਾਣਬੁੱਝ ਕੇ ਹਾਰੇ ਹੋਏ ਉਮੀਦਵਾਰਾਂ ਦੇ ਸਮਰਥਕਾਂ ਦੇ ਘਰਾਂ ਅੱਗੇ ਜਾ ਕੇ ਉੱਚੀ ਆਵਾਜ਼ ਵਿਚ ਲਲਕਾਰੇ ਅਤੇ ਭੱਦੀ ਸ਼ਬਦਾਵਲੀ ਵੀ ਵਰਤੀ ਜਾਂਦੀ ਹੈ ਜੋ ਕਿ ਬਹੁਤ ਮਾੜਾ ਰੁਝਾਨ ਹੈ। ਸੋ, ਸਾਨੂੰ ਸਭ ਨੂੰ ਅਜਿਹੇ ਮੌਕੇ 'ਤੇ ਕਿਸੇ ਦੇ ਮਨ ਨੂੰ ਠੇਸ ਪਹੁੰਚਾਉਣ ਵਾਲੇ ਘਟੀਆ ਵਰਤਾਰੇ ਤੋਂ ਬਚਣਾ ਚਾਹੀਦਾ ਹੈ ਅਤੇ ਆਪਸੀ ਭਾਈਚਾਰਕ ਸਾਂਝ ਕਾਇਮ ਰੱਖਣੀ ਚਾਹੀਦੀ ਹੈ।


-ਰਾਜਾ ਚੜਿੱਕ
ਮੋ: 94654-11585.


ਸ਼ਲਾਘਾਯੋਗ ਕਦਮ
ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ (ਪਾਵਰਕਾਮ) ਵੱਲੋਂ ਬਿਜਲੀ ਦਾ ਬਿੱਲ ਨਾ ਭਰਨ ਵਾਲੇ ਖਪਤਕਾਰਾਂ ਦੇ ਕੁਨੈਕਸ਼ਨ ਕੱਟਣ ਦੀ ਚਲਾਈ ਮੁਹਿੰਮ ਸ਼ਲਾਘਾਯੋਗ ਕਦਮ ਹੈ। ਇਸ ਤਰ੍ਹਾਂ ਕਰਨ ਨਾਲ ਪੰਜਾਬ ਦੇ ਖਾਲੀ ਪਏ ਖਜ਼ਾਨੇ ਨੂੰ ਥੋੜ੍ਹੀ ਬਹੁਤੀ ਰਾਹਤ ਜ਼ਰੂਰ ਮਿਲੇਗੀ। ਇਸ ਚਲਾਈ ਮੁਹਿੰਮ ਨਾਲ ਬਿਜਲੀ ਦਾ ਬਿੱਲ ਨਾ ਭਰਨ ਵਾਲੇ ਖਪਤਕਾਰਾਂ ਨੂੰ ਕੰਨ ਹੋ ਗਏ ਹਨ ਅਤੇ ਹੁਣ ਹਰ ਕੋਈ ਬਿਜਲੀ ਦਾ ਬਿੱਲ ਨਾ ਭਰਨ ਦੀ ਅਣਗਹਿਲੀ ਨਹੀਂ ਕਰੇਗਾ, ਕਿਉਂਕਿ ਉਸ ਨੂੰ ਡਰ ਰਹੇਗਾ ਕਿ ਸਾਡਾ ਵੀ ਕੁਨੈਕਸ਼ਨ ਕੱਟਵਾਉਣ ਵਾਲਿਆਂ ਵਿਚ ਨਾਂਅ ਆ ਸਕਦਾ ਹੈ। ਇਸ ਤਰ੍ਹਾਂ ਹੀ ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ ਨੇ ਪਿੰਡਾਂ ਵਿਚ ਲੱਗੀਆਂ ਪਾਣੀ ਵਾਲੀਆਂ ਟੈਂਕੀਆਂ ਦੇ ਵੀ ਕੁਨੈਕਸ਼ਨ ਕੱਟਣੇ ਸ਼ੁਰੂ ਕਰ ਦਿੱਤੇ ਹਨ, ਜਿਨ੍ਹਾਂ ਖਿਲਾਫ਼ ਪਾਵਰਕਾਮ ਦਾ ਲੱਖਾਂ ਰੁਪਏ ਬਕਾਇਆ ਖੜ੍ਹਾ ਹੈ। ਪਰ ਇਨ੍ਹਾਂ ਟੈਂਕੀਆਂ ਦਾ ਬਕਾਇਆ ਸਰਕਾਰ ਦੀ ਅਣਗਹਿਲੀ ਕਾਰਨ ਖੜ੍ਹਾ ਹੈ, ਕਿਉਂਕਿ ਸਰਕਾਰ ਨੇ ਲੋਕਾਂ ਨੂੰ ਮੁਫ਼ਤ ਪਾਣੀ ਦੇਣ ਦੀ ਜੋ ਚੇਟਕ ਲਾਈ ਹੈ, ਉਸ ਕਾਰਨ ਲੋਕ ਆਪਣਾ ਪਾਣੀ ਦਾ ਬਿੱਲ ਨਹੀਂ ਭਰਦੇ ਅਤੇ ਜਲ ਸਪਲਾਈ ਵਿਭਾਗ ਦਾ ਲੱਖਾਂ ਰੁਪਈਆ ਪਾਣੀ ਵਰਤਣ ਵਾਲੇ ਖਪਤਕਾਰਾਂ ਵੱਲ ਖੜ੍ਹਾ ਹੈ, ਜਿਸ ਕਾਰਨ ਇਨ੍ਹਾਂ ਨੂੰ ਕੋਈ ਬੱਚਤ ਨਹੀਂ ਹੁੰਦੀ ਅਤੇ ਇਹ ਜਲ ਸਪਲਾਈ ਵਿਭਾਗ ਵਾਲੇ ਬਿਜਲੀ ਦਾ ਬਿੱਲ ਅਦਾ ਨਹੀਂ ਕਰ ਪਾਉਂਦੇ। ਹੁਣ ਜਦੋਂ ਪਾਵਰਕਾਮ ਨੇ ਬਿਜਲੀ ਕੁਨੈਕਸ਼ਨ ਕੱਟਣੇ ਸ਼ੁਰੂ ਕੀਤੇ ਹਨ ਤਾਂ ਹੁਣ ਲੋਕਾਂ ਨੂੰ ਪਾਣੀ ਲਈ ਤਰਾਹ-ਤਰਾਹ ਕਰਨਾ ਪੈ ਰਿਹਾ। ਉਪਰੋਂ ਗਰਮੀ ਦਾ ਮੌਸਮ ਸ਼ੁਰੂ ਹੋਣ ਕਾਰਨ ਪਾਣੀ ਦੀ ਮੰਗ ਵੀ ਵਧ ਗਈ ਹੈ। ਇਸ ਲਈ ਲੋਕਾਂ ਨੂੰ ਚਾਹੀਦਾ ਹੈ ਕਿ ਉਹ ਆਪਣਾ ਪਾਣੀ ਦਾ ਬਿੱਲ ਅਦਾ ਕਰਨ ਤਾਂ ਜੋ ਲੋਕਾਂ ਨੂੰ ਨਿਰਵਿਘਨ ਪਾਣੀ ਮਿਲ ਸਕੇ ਅਤੇ ਉਹ ਆਪਣਾ ਗੁਜ਼ਾਰਾ ਕਰ ਸਕਣ।


-ਨਰਿੰਦਰ ਸਿੰਘ ਚੌਹਾਨ
ਪਿੰਡ ਬਠੋਈ ਕਲਾਂ, ਡਾਕ: ਡਕਾਲਾ, ਜ਼ਿਲ੍ਹਾ ਪਟਿਆਲਾ।

06/03/2017

 ਅੰਤਰਰਾਸ਼ਟਰੀ ਮਹਿਲਾ ਦਿਵਸ
ਹਰ ਸਾਲ 8 ਮਾਰਚ ਦਾ ਦਿਨ ਅੰਤਰਰਾਸ਼ਟਰੀ ਮਹਿਲਾ ਦਿਵਸ ਵਜੋਂ ਸਾਰੇ ਸੰਸਾਰ ਵਿਚ ਮਨਾਇਆ ਜਾਂਦਾ ਹੈ। ਜਗਿਆਸੂ ਲੋਕ ਮਿਲ ਬੈਠ ਕੇ ਇਸਤਰੀ ਦੀ ਦਸ਼ਾ ਬਾਰੇ ਵਿਚਾਰ ਵਟਾਂਦਰੇ ਕਰਦੇ ਹਨ। ਕਾਨਫਰੰਸਾਂ ਹੁੰਦੀਆਂ ਹਨ, ਕਈ ਥਾਈਂ ਰੈਲੀਆਂ ਵੀ। ਇਸ ਵਿਚ ਕੋਈ ਸ਼ੱਕ ਨਹੀਂ ਕਿ ਅੱਜ ਇਸਤਰੀ ਦੀ ਦਸ਼ਾ ਪਹਿਲੇ ਸਮਿਆਂ ਨਾਲੋਂ ਕਾਫ਼ੀ ਬਿਹਤਰ ਹੋਈ ਹੈ। ਅੱਜ ਇਸਤਰੀ ਹਰ ਖੇਤਰ ਵਿਚ ਮੱਲਾਂ ਮਾਰ ਰਹੀ ਹੈ। ਪੁਲਾੜ ਵਿਚ ਵੀ ਗੇੜੇ ਮਾਰ ਰਹੀ ਹੈ। ਯੁੱਧ ਦੇ ਮੈਦਾਨਾਂ ਵਿਚ ਵੀ ਆਧੁਨਿਕ ਹਥਿਆਰਾਂ ਨਾਲ ਲੈਸ ਹੋ ਕੇ ਪੁਰਸ਼ ਦੇ ਮੋਢੇ ਨਾਲ ਮੋਢਾ ਜੋੜ ਕੇ ਅਮਨ-ਸ਼ਾਂਤੀ ਲਈ ਲੜਾਈ ਲੜ ਰਹੀ ਹੈ। ਪਰ ਸਾਡੇ ਦੇਸ਼ ਵਿਚ ਇਸਤਰੀ ਦੀ ਦਸ਼ਾ ਬਾਰੇ ਬਹੁਤ ਕੰਮ ਕਰਨ ਦੀ ਲੋੜ ਹੈ। ਸ਼ਹਿਰਾਂ ਤੋਂ ਦੂਰ ਪਿੰਡਾਂ ਵਿਚ ਰਹਿਣ ਵਾਲੀਆਂ ਔਰਤਾਂ ਅਤੇ ਲੜਕੀਆਂ ਲਈ ਵਿਦਿਆ, ਸਿਹਤ ਸਹੂਲਤਾਂ, ਮਰਦਾਂ ਦੇ ਬਰਾਬਰ ਉਜਰਤਾਂ ਆਦਿ ਸਮੱਸਿਆਵਾਂ ਨੂੰ ਹੱਲ ਕਰਨ ਦੀ ਜ਼ਰੂਰਤ ਹੈ। ਆਉਣ ਵਾਲੇ ਸਮੇਂ ਵਿਚ ਪਿਛਲੀਆਂ ਤਰੁਟੀਆਂ ਬਾਰੇ ਵਿਚਾਰ ਕਰੀਏ। ਇਸ ਕੰਮ ਲਈ ਜਾਗਰੂਕ ਔਰਤ ਵਰਗ ਅਤੇ ਬੁੱਧੀਜੀਵੀ ਮਿਲ ਕੇ ਔਰਤ ਵਰਗ ਨਾਲ ਹੋ ਰਹੀਆਂ ਜ਼ਿਆਦਤੀਆਂ ਬਾਰੇ ਇਕ ਦਿਨ ਨਹੀਂ ਸਗੋਂ ਸਾਰਾ ਸਾਲ ਕੰਮ ਕਰਨ। ਬਹੁਤ ਕੁਝ ਕਰਨ ਦੀ ਅਜੇ ਲੋੜ ਹੈ। ਨਾਰੀ ਸ਼ਕਤੀ ਦੇਸ਼ ਦੀ ਰੀੜ੍ਹ ਦੀ ਹੱਡੀ ਹੁੰਦੀ ਹੈ।


-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ। ਮੋਬਾਈਲ : 94647-80299.


ਲੱਚਰ ਗਾਇਕੀ ਦੀ ਹਨੇਰੀ...
ਅੱਜ ਪੰਜਾਬੀ ਗਾਇਕੀ ਉੱਪਰ ਲੱਚਰਤਾ ਤੇ ਗ਼ਲਤ ਗਾਇਕੀ ਦਾ ਠੱਪਾ ਲੱਗ ਚੁੱਕਾ ਹੈ। ਪਰ ਫਿਰ ਵੀ ਚੱਲ ਰਹੀ ਲੱਚਰ ਗਾਇਕੀ ਦੀ ਹਨੇਰੀ ਵਿਚ ਕਈ ਨਵੇਂ ਤੇ ਪੁਰਾਣੇ ਗਾਇਕ ਵੀ ਰੂਹ ਨੂੰ ਸਕੂਨ ਤੇ ਰੌਲੇ-ਰੱਪੇ ਤੋਂ ਰਹਿਤ ਗਾਇਕੀ ਪੇਸ਼ ਕਰ, ਸਹੀ ਚੀਜ਼ਾਂ ਪੇਸ਼ ਕਰ ਰਹੇ ਹਨ। ਬੀਤੇ ਦਿਨ 'ਅਜੀਤ' ਵਿਚ ਵਧੀਆ ਗਾਇਕ ਹਰਪ੍ਰੀਤ ਮਾਂਗਟ ਬਾਰੇ ਪੜ੍ਹਿਆ। ਇਹ ਗਾਇਕ ਅੱਜਕਲ੍ਹ ਵਧੀਆ ਗੀਤ ਪੇਸ਼ ਕਰ ਰਿਹਾ ਹੈ ਤੇ ਲੱਚਰਤਾ ਜਿਹੀਆਂ ਗੱਲਾਂ ਤੋਂ ਵੀ ਦੂਰ ਹੈ। ਲੋਕਾਂ ਨੂੰ ਚਾਹੀਦਾ ਹੈ ਕਿ ਚੰਗੀਆਂ ਚੀਜ਼ਾਂ ਹੀ ਪਸੰਦ ਕਰਨ। ਲੋਕਾਂ ਦੇ ਵਿਰੋਧ ਕਾਰਨ ਹੀ ਗ਼ਲਤ ਚੀਜ਼ਾਂ ਬੰਦ ਹੋ ਸਕਦੀਆਂ ਹਨ।


-ਬਲਬੀਰ ਸਿੰਘ ਬੱਬੀ
ਪਿੰਡ ਤੱਖਰਾਂ, ਜ਼ਿਲ੍ਹਾ ਲੁਧਿਆਣਾ। ਮੋਬਾ : 92175-92531.

 


ਪ੍ਰਗਟਾਵੇ ਦੀ ਆਜ਼ਾਦੀ
ਗੁਰਮੇਹਰ ਕੌਰ ਦਾ ਨਾਂਅ ਅੱਜਕਲ੍ਹ ਹਰ ਅਖ਼ਬਾਰ ਤੇ ਚੈਨਲ 'ਤੇ ਆ ਰਿਹਾ ਹੈ। ਗੁਰਮੇਹਰ ਕੌਰ ਕੈਪਟਨ ਮਨਦੀਪ ਸਿੰਘ ਦੀ ਬੇਟੀ ਹੈ, ਜੋ ਜੰਮੂ-ਕਸ਼ਮੀਰ ਦੀ ਕਾਰਗਿਲ ਦੀ ਲੜਾਈ ਦੌਰਾਨ ਸ਼ਹੀਦ ਹੋ ਗਏ ਸਨ। ਗੁਰਮੇਹਰ ਕੌਰ ਦੇ ਕੇਵਲ ਆਪਣੀ ਹੀ ਮਾਂ ਦੇ ਕਹੇ ਸ਼ਬਦ ਸੋਸ਼ਲ ਮੀਡੀਆ 'ਤੇ ਪਾਉਣ ਨਾਲ ਹਾਹਾਕਾਰ ਮਚ ਗਈ । ਮਾਂ ਦੇ ਕੀ ਸ਼ਬਦ ਸਨ? ਇਹ ਸੀ ਕਿ ਮਾਂ ਨੇ ਗੁਰਮੇਹਰ ਕੌਰ ਨੂੰ ਦੱਸਿਆ ਕਿ ਭਾਰਤ ਤੇ ਪਾਕਿਸਤਾਨ ਦੇ ਚੰਗੇ ਸਬੰਧ ਨਾ ਹੋਣ ਕਾਰਨ ਤੇਰੇ ਪਿਤਾ ਨੂੰ ਤਾਂ ਜੰਗ ਨੇ ਮਾਰਿਆ ਹੈ। ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਹੀ ਗੁਰਮੇਹਰ ਨੇ ਕੀਤਾ ਤਾਂ ਉਸ ਨੂੰ ਧਮਕੀਆ ਦਾ ਸ਼ਿਕਾਰ ਹੋਣਾ ਪੈ ਰਿਹਾ ਹੈ। ਇਸ ਨੌਜਵਾਨ ਕੁੜੀ ਨੂੰ ਬਲਾਤਕਾਰ ਤੇ ਜਾਨੋ ਮਾਰਨ ਦੀਆਂ ਧਮਕੀਆਂ ਦਿੱਤੀਆਂ ਗਈਆਂ, ਜਿਸ ਦੀ ਨਿਖੇਧੀ ਵੱਖ-ਵੱਖ ਪਾਰਟੀਆਂ ਵੱਲੋਂ ਕੀਤੀ ਗਈ। ਸਿੱਖਾਂ ਦਾ ਇਤਿਹਾਸ ਹੈ ਕਿ ਔਰਤ ਤੇ ਧੀ ਦੀ ਰੱਖਿਆ ਕਰਨੀ ਭਾਵੇਂ ਕਿਸੇ ਧਰਮ ਜਾਂ ਜਾਤ ਦੀ ਹੋਏ। ਪੂਰੇ ਦੇਸ਼ ਵਾਸੀਆਂ ਨੂੰ ਉਸ ਦੀ ਮਦਦ ਲਈ ਅੱਗੇ ਆਉਣਾ ਚਾਹੀਦਾ ਹੈ। ਦੇਸ਼ ਦੇ ਪ੍ਰਧਾਨ ਮੰਤਰੀ ਸ੍ਰੀ ਨਰਿੰਦਰ ਮੋਦੀ ਤੇ ਉਨ੍ਹਾਂ ਦੀ ਪਾਰਟੀ ਦੇ ਵਰਕਰਾਂ ਨੂੰ ਅਜਿਹੇ ਅਨਸਰਾਂ ਦੇ ਖਿਲਾਫ਼ 'ਬੇਟੀ ਬਚਾਉ ਤੇ ਬੇਟੀ ਪੜ੍ਹਾਉ' ਦੇ ਨਾਅਰਿਆਂ 'ਤੇ ਪਹਿਰਾ ਦੇ ਕੇ ਆਪਣੀਆਂ ਸਫਾਂ ਵਿਚੋਂ ਕੱਢ ਦੇਣਾ ਚਾਹੀਦਾ ਹੈ। ਤਾਂ ਕਿ ਦੇਸ਼ ਵਿਚ ਏਕਤਾ ਦਾ ਮਾਹੌਲ ਕਾਇਮ ਬਣਿਆ ਰਹਿ ਸਕੇ।


-ਮਾ: ਜਗੀਰ ਸਿੰਘ ਸਫਰੀ
ਸਠਿਆਲਾ (ਅੰਮ੍ਰਿਤਸਰ)।
jagirsafri@gmail.com

3/3/2017

 ਆਓ, ਫ਼ੌਜੀ ਵੀਰ ਜਵਾਨਾਂ ਨੂੰ ਸਲਾਮ ਕਰੀਏ

ਕਿਸੇ ਦੇਸ਼, ਸਮਾਜ ਅਤੇ ਉਥੋਂ ਦੇ ਵਸਨੀਕਾਂ ਦੀ ਤਰੱਕੀ, ਅਮਨ ਤੇ ਖੁਸ਼ਹਾਲੀ ਉਸ ਦੇਸ਼ ਦੀਆਂ ਮਜ਼ਬੂਤ ਸਰਹੱਦਾਂ 'ਤੇ ਨਿਰਭਰ ਹੁੰਦੀ ਹੈ। ਇਨ੍ਹਾਂ ਸਰਹੱਦਾਂ 'ਤੇ ਦਿਨ-ਰਾਤ ਮੌਤ ਦੇ ਮੂੰਹ 'ਤੇ ਖੜ੍ਹਨ ਵਾਲੇ ਫ਼ੌਜੀ ਵੀਰ ਜਵਾਨਾਂ ਨੂੰ ਸਾਡਾ ਸਲਾਮ ਕਰਨਾ ਬਣਦਾ ਹੈ, ਜੋ ਆਪਣਾ ਘਰ-ਬਾਰ, ਪਿੰਡ-ਸਮਾਜ, ਮਾਤਾ-ਪਿਤਾ, ਭੈਣ-ਭਰਾ, ਪਤਨੀ, ਬੱਚਿਆਂ ਅਤੇ ਆਪਣੀਆਂ ਸਾਰੀਆਂ ਸੱਧਰਾਂ ਨੂੰ ਪਿੱਛੇ ਛੱਡ ਕੇ ਦਿਨ-ਰਾਤ ਦੇਸ਼-ਧਰਮ ਨਿਭਾਉਂਦੇ ਹੋਏ, ਸਾਡੇ ਸਭਨਾਂ ਦੇ ਲਈ ਆਪਣੀ ਜਾਨ ਦੀ ਪ੍ਰਵਾਹ ਕੀਤੇ ਬਿਨਾਂ ਸਾਰੇ ਦੁੱਖ-ਦਰਦ ਭੁਲਾ ਕੇ ਆਪਣਾ ਫ਼ਰਜ਼ ਨਿਭਾਅ ਰਹੇ ਹਨ। ਬਿਨਾਂ ਗਰਮੀ-ਸਰਦੀ, ਧੁੱਪ-ਛਾਂ ਦੀ ਪ੍ਰਵਾਹ ਕੀਤਿਆਂ ਪਹਾੜਾਂ, ਬਰਫ਼ੀਲੇ ਖੇਤਰਾਂ, ਗਰਮ ਮਾਰੂਥਲਾਂ, ਜੰਗਲਾਂ, ਨਦੀਆਂ-ਸਮੁੰਦਰਾਂ ਆਦਿ ਭਾਂਤ-ਭਾਂਤ ਦੀਆਂ ਕਠਿਨ ਪ੍ਰਸਥਿਤੀਆਂ ਵਿਚ ਸਾਡੇ ਲਈ ਅਤੇ ਦੇਸ਼ ਲਈ ਦਿਨ-ਰਾਤ ਇਕ ਕਰਨ ਵਾਲੇ ਵੀਰ-ਜਵਾਨਾਂ ਨੂੰ ਹਰ ਖੁਸ਼ੀ, ਦਿਨ-ਤਿਉਹਾਰਾਂ, ਮੇਲਿਆਂ 'ਤੇ ਜ਼ਰੂਰ ਯਾਦ ਕਰਕੇ ਉਨ੍ਹਾਂ ਨੂੰ ਸਲਾਮ ਕਰਨਾ ਚਾਹੀਦਾ ਹੈ ਤਾਂ ਜੋ ਇਨ੍ਹਾਂ ਬਾਂਕੇ ਬਹਾਦਰਾਂ, ਵੀਰ-ਜਵਾਨਾਂ ਨੂੰ ਬਣਦਾ ਪਿਆਰ, ਸਤਿਕਾਰ, ਇੱਜ਼ਤ, ਮਾਣ, ਸਨੇਹ ਅਤੇ ਹੌਸਲਾ ਮਿਲਦਾ ਰਹੇ। ਕਿਉਂ ਜੋ ਇਹ ਵੀ ਸਾਡੇ ਤੁਹਾਡੇ ਵਿਚੋਂ ਹੀ ਕਿਸੇ ਦੇ ਪਿਤਾ, ਕਿਸੇ ਦੇ ਪੁੱਤਰ, ਕਿਸੇ ਦੇ ਪਤੀ ਤੇ ਕਿਸੇ ਦੇ ਭਰਾ ਹਨ।

-ਮਾਸਟਰ ਸੰਜੀਵ ਧਰਮਾਣੀ
ਸ੍ਰੀ ਅਨੰਦਪੁਰ ਸਾਹਿਬ।

ਪੰਜਾਬੀਅਤ ਦੀ ਭਾਵਨਾ

ਪੰਜਾਬੀਅਤ ਦੀ ਭਾਵਨਾ ਨੂੰ ਮਜ਼ਬੂਤ ਬਣਾਉਣ ਲਈ ਅਤੇ ਪੰਜਾਬੀਅਤ ਦੇ ਸੰਕਲਪ ਨੂੰ ਗੌਰਵਮਈ ਬਣਾਉਣ ਲਈ ਪਿਛਲੇ ਸਾਲਾਂ ਦੀ ਤਰ੍ਹਾਂ ਇਸ ਸਾਲ ਵੀ ਜਲੰਧਰ ਵਿਚ 'ਪੰਜਾਬ ਜਾਗ੍ਰਿਤੀ ਮੰਚ' ਤੇ 'ਸਰਬੱਤ ਦਾ ਭਲਾ ਟਰੱਸਟ' ਵੱਲੋਂ ਸਾਂਝੇ ਤੌਰ 'ਤੇ ਇਕ ਬੇਹੱਦ ਪ੍ਰਭਾਵਸ਼ਾਲੀ ਮਾਰਚ ਕੱਢਿਆ ਗਿਆ, ਜਿਸ ਦੀ ਜਿੰਨੀ ਸਰਾਹਨਾ ਕੀਤੀ ਜਾਵੇ, ਥੋੜ੍ਹੀ ਹੈ। ਇਸ ਮਾਰਚ ਵਿਚ ਵੱਖ-ਵੱਖ ਸਕੂਲਾਂ ਦੇ ਵਿਦਿਆਰਥੀਆਂ ਨੇ ਵੱਡੀ ਗਿਣਤੀ ਵਿਚ ਸ਼ਮੂਲੀਅਤ ਕੀਤੀ। ਇਸ ਤੋਂ ਇਲਾਵਾ ਪੰਜਾਬੀ ਭਾਸ਼ਾ ਤੇ ਪੰਜਾਬੀ ਸੱਭਿਆਚਾਰ ਨੂੰ ਆਪਣੀ ਗਾਇਕੀ ਰਾਹੀਂ ਜਿਊਂਦਾ-ਜਾਗਦਾ ਰੱਖਣ ਲਈ ਹੋਕਾ ਦਿੰਦੇ ਗਾਇਕਾਂ ਦੀ ਸ਼ਮੂਲੀਅਤ ਵੀ ਸ਼ਲਾਘਾਯੋਗ ਸੀ। ਇਸ ਮਾਰਚ ਦੌਰਾਨ ਪੰਜਾਬੀ ਭਾਸ਼ਾ ਨੂੰ ਬਣਦਾ ਮਾਣ-ਸਨਮਾਨ ਦਿਵਾਉਣ ਲਈ ਅਤੇ ਪੰਜਾਬ ਦੀਆਂ ਹੱਕੀ ਮੰਗਾਂ ਦੀ ਪੂਰਤੀ ਦੀ ਹਾਮੀ ਭਰਦੇ ਜੋ ਮਤੇ ਪੇਸ਼ ਕੀਤੇ ਗਏ, ਉਹ ਸਮੇਂ ਦੀ ਮੰਗ ਅਨੁਸਾਰ ਬਿਲਕੁਲ ਜਾਇਜ਼ ਹਨ। ਦੁੱਖ ਇਸ ਗੱਲ ਦਾ ਹੈ ਕਿ ਸਮੇਂ-ਸਮੇਂ ਦੀਆਂ ਕੇਂਦਰੀ ਸਰਕਾਰਾਂ ਨੇ ਪੰਜਾਬ ਨਾਲ ਹਰ ਪੱਖ ਤੋਂ ਧੱਕਾ ਕੀਤਾ ਹੈ। ਪੰਜਾਬੀਆਂ ਦੀ ਆਪਣੀ ਰਾਜਧਾਨੀ ਨਹੀਂ ਹੈ। ਪੰਜਾਬ ਦਾ ਪਾਣੀ ਖੋਹਣ ਦੀ ਵਿਉਂਤ ਗੁੰਦੀ ਜਾ ਰਹੀ ਹੈ। ਇਸ ਤੋਂ ਇਲਾਵਾ ਕੁਝ ਤਾਕਤਾਂ ਪੰਜਾਬੀ ਭਾਸ਼ਾ ਨੂੰ ਖ਼ਤਮ ਕਰਨ ਲਈ ਤੁਲੀਆਂ ਨਜ਼ਰ ਆ ਰਹੀਆਂ ਹਨ। ਇਸ ਲਈ ਸਮੂਹ ਪੰਜਾਬੀਆਂ ਨੂੰ ਸੂਬੇ ਨਾਲ ਹੁੰਦੀ ਬੇਇਨਸਾਫ਼ੀ ਖਿਲਾਫ਼ ਡਟ ਜਾਣਾ ਚਾਹੀਦਾ ਹੈ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

ਲੰਮੀ ਗ਼ੈਰ-ਹਾਜ਼ਰੀ ਵਾਲੇ ਬੱਚੇ

ਇਸ ਵਿਚ ਕੋਈ ਦੋ ਰਾਇ ਨਹੀਂ ਕਿ ਪੰਜਾਬ ਦੇ ਅਧਿਆਪਕ ਸਕੂਲਾਂ ਵਿਚ ਪੜ੍ਹ ਰਹੇ ਬੱਚਿਆਂ ਨੂੰ ਬੇਹੱਦ ਵਧੀਆ ਪੜ੍ਹਾ ਰਹੇ ਹਨ। ਉਸ ਤੋਂ ਬਾਅਦ ਪੰਜਾਬ ਦੇ ਕਈ ਸ਼ਹਿਰੀ ਖੇਤਰਾਂ ਵਿਚ ਆਉਣ ਵਾਲੇ ਸਕੂਲਾਂ ਜਾਂ ਜਿਨ੍ਹਾਂ ਪਿੰਡਾਂ ਦੇ ਆਲੇ-ਦੁਆਲੇ ਸਨਅਤੀ ਇਕਾਈਆਂ, ਮੈਰਿਜ ਪੈਲੇਸ ਜਾਂ ਭੱਠਿਆਂ 'ਤੇ ਕੰਮ ਕਰਨ ਵਾਲੀ ਲੇਬਰ ਆਉਂਦੀ ਹੈ, ਉਨ੍ਹਾਂ ਬੱਚਿਆਂ ਨੂੰ ਸਕੂਲਾਂ ਵਿਚ ਦਾਖਲ ਕਰਨਾ ਲਾਜ਼ਮੀ ਹੈ ਕਿਉਂ ਜੋ ਆਰ.ਟੀ.ਆਈ. ਕਾਨੂੰਨ ਤਹਿਤ ਕਿਸੇ ਵੀ ਬੱਚੇ ਨੂੰ ਸਕੂਲ ਦਾਖਲ ਕਰਨ ਤੋਂ ਮਨ੍ਹਾਂ ਨਹੀਂ ਕਰਨਾ ਤੇ ਉਸ ਦੀ ਉਮਰ ਵੇਖ ਯੋਗ ਜਮਾਤ ਵਿਚ ਦਾਖਲ ਕਰਨਾ ਆਦਿ ਕਿਹਾ ਗਿਆ ਹੈ ਤੇ ਬੱਚੇ ਦੀ ਮੁਢਲੀ ਸਿੱਖਿਆ ਪੂਰੀ ਹੋਣ ਤੱਕ ਉਸ ਦਾ ਨਾਂਅ ਸਕੂਲ ਰਿਕਾਰਡ ਵਿਚੋਂ ਨਹੀਂ ਕੱਟਿਆ ਜਾ ਸਕਦਾ। ਪ੍ਰੀਖਿਆਵਾਂ ਵਿਚ ਬੱਚਿਆਂ ਦੀ ਗਿਣਤੀ ਘਟਦੀ ਜਾ ਰਹੀ ਹੈ। ਜਿਹੜੇ ਬੱਚੇ ਮਾਪਿਆਂ ਨਾਲ ਆਉਂਦੇ ਤੇ ਲੇਬਰ ਦਾ ਕੰਮ ਖ਼ਤਮ ਹੋਣ ਉਪਰੰਤ, ਸਕੂਲਾਂ ਵਿਚ ਬਿਨਾਂ ਕੋਈ ਇਤਲਾਹ ਕਰੇ ਚਲੇ ਜਾਂਦੇ ਹਨ, ਉਹ ਬੱਚੇ ਹੀ ਪ੍ਰੀਖਿਆ ਵਿਚ ਬੈਠਣ ਤੋਂ ਰਹਿ ਜਾਂਦੇ ਹਨ। ਇਸ ਦਾ ਕਸੂਰਵਾਰ ਅਧਿਆਪਕ ਨਹੀਂ, ਬਲਕਿ ਬੱਚੇ ਦੇ ਮਾਪੇ ਨੂੰ ਠਹਿਰਾਉਣਾ ਚਾਹੀਦਾ ਹੈ।

-ਜਸਦੀਪ ਸਿੰਘ ਖ਼ਾਲਸਾ
ਖੰਨਾ।

2/3/2017

 ਕਾਰਪੋਰੇਸ਼ਨ ਦੀ ਲਾਪਰਵਾਹੀ
ਅੰਮ੍ਰਿਤਸਰ ਸ਼ਹਿਰ ਦੀਆਂ ਸੜਕਾਂ ਦੇ ਬੀ.ਆਰ.ਟੀ.ਐਸ. ਪ੍ਰਾਜੈਕਟ ਦੇ ਨਿਰਮਾਣ ਦੌਰਾਨ, ਜੀ.ਟੀ. ਰੋਡ ਦੇ ਆਸ-ਪਾਸ ਵੱਸਦੀਆਂ ਘੁੱਗ ਆਬਾਦੀਆਂ ਦੇ ਸੀਵਰੇਜ ਸਿਸਟਮ, ਪਾਣੀ ਅਤੇ ਟੈਲੀਫੋਨ ਸੇਵਾਵਾਂ ਵਿਚ ਗੰਭੀਰ ਕਿਸਮ ਦੇ ਨੁਕਸ ਪੈਦਾ ਹੋਏ ਹਨ। ਅਜਿਹਾ ਪ੍ਰਾਜੈਕਟ ਦੇ ਕਰਮਚਾਰੀਆਂ ਦੀ ਲਾਪਰਵਾਹੀ ਅਤੇ ਕਾਰਪੋਰੇਸ਼ਨ ਦੇ ਅਧਿਕਾਰੀਆਂ ਦੀ ਚੌਕਸੀ ਦੀ ਕਮੀ ਕਾਰਨ ਹੋਇਆ ਹੈ। ਆਬਾਦੀ ਰਣਜੀਤਪੁਰਾ ਸਮੇਤ ਕੁਝ ਆਬਾਦੀਆਂ ਦਾ ਸੀਵਰੇਜ ਸਿਸਟਮ ਚੋਕ (ਬੰਦ) ਹੋ ਗਿਆ ਹੈ, ਪੀਣ ਵਾਲਾ ਪਾਣੀ ਬਦਬੂਦਾਰ ਬਣ ਗਿਆ ਹੈ ਅਤੇ ਟੈਲੀਫੋਨ ਬੰਦ ਪਏ ਹਨ। ਸੀਵਰੇਜ ਦੇ ਬੰਦ ਹੋਣ ਨਾਲ ਗੰਦਾ ਪਾਣੀ ਆਬਾਦੀ ਦੀਆਂ ਸੜਕਾਂ ਉੱਤੇ ਸੜਾਂਦ ਛੱਡਦਾ ਘੁੰਮ ਰਿਹਾ ਹੈ। ਇਸ ਤਰ੍ਹਾਂ ਦੇ ਨੁਕਸ ਬਾਰੇ ਇਲਾਕੇ ਦੇ ਕੌਂਸਲਰ, ਮਿਊਂਸਪਲ ਕਮਿਸ਼ਨਰ, ਐਕਸੀਅਨਜ਼ ਅਤੇ ਐਸ.ਡੀ.ਓ. ਸਾਹਿਬਾਨ ਨੂੰ ਪੂਰੀ ਜਾਣਕਾਰੀ ਦਿੱਤੀ ਜਾ ਚੁੱਕੀ ਹੈ। ਕਾਰਪੋਰੇਸ਼ਨ ਦੇ ਅਧਿਕਾਰੀ ਲੋਕਾਂ ਦੀ ਸਿਹਤ ਦੀ ਕੀਮਤ 'ਤੇ ਕਿਉਂ ਚੁੱਪੀ ਧਾਰੀ ਬੈਠੇ ਹਨ, ਸਮਝ ਤੋਂ ਬਾਹਰ ਹੈ।


-ਇੰਜ: ਕੁਲਦੀਪ ਸਿੰਘ ਲੁੱਧਰ
ਅੰਮ੍ਰਿਤਸਰ।


ਦੇਰ ਆਏ ਦਰੁਸਤ ਆਏ

ਵਿਆਹ ਸ਼ਾਦੀਆਂ 'ਤੇ ਪੰਜ ਲੱਖ ਰੁਪਏ ਤੋਂ ਵੱਧ ਦਾ ਖਰਚ ਨਾ ਕਰਨ ਬਾਰੇ ਬਿੱਲ ਦਾ ਲੋਕ ਸਭਾ ਵਿਚ ਪੇਸ਼ ਹੋਣਾ ਸਾਡੇ ਸਮਾਜ ਲਈ ਇਕ ਬਹੁਤ ਹੀ ਸ਼ਲਾਘਾਯੋਗ ਕਦਮ ਹੈ। ਅੱਜ ਦੀ ਹਾਲਤ ਇਹ ਹੈ ਕਿ ਵਿਆਹ ਸ਼ਾਦੀਆਂ 'ਤੇ ਵਿੱਤੋਂ ਵੱਧ ਖਰਚ ਕੀਤਾ ਜਾ ਰਿਹਾ ਹੈ। ਇਹ ਖਰਚ ਪੰਜ ਲੱਖ ਤੋਂ ਸ਼ੁਰੂ ਹੋ ਕੇ ਕਿਸੇ ਵੀ ਹੱਦ ਤੱਕ ਜਾ ਰਿਹਾ ਹੈ। ਫੋਕੀ ਸ਼ੁਹਰਤ ਅਤੇ ਵਿਖਾਵਾ ਕਰਨ ਲਈ ਵਿਆਹਾਂ 'ਤੇ ਅੱਡੀ ਚੋਟੀ ਦਾ ਜ਼ੋਰ ਲਗਾਇਆ ਜਾ ਰਿਹਾ ਹੈ। ਇਸ ਮੰਤਵ ਲਈ ਪੈਸਾ ਵਿਆਜ 'ਤੇ ਜਾਂ ਜ਼ਮੀਨ ਜਾਇਦਾਦ ਵੇਚ ਕੇ ਹਾਸਲ ਕੀਤਾ ਜਾਂਦਾ ਹੈ। ਸਿਰਫ ਪੰਜ-ਸੱਤ ਪ੍ਰਤੀਸ਼ਤ ਲੋਕ ਹੀ ਇਹ ਖਰਚਾ ਆਪਣੀ ਜੇਬ ਵਿਚੋਂ ਹੀ ਕਰਦੇ ਹਨ। ਬਾਕੀ ਰੀਸੋਰੀਸੀ ਜਾਂ ਇਹ ਸਮਝ ਕੇ ਕਿ ਅਸੀਂ ਕਿਸੇ ਤੋਂ ਘੱਟ ਹਾਂ ਸਾਬਤ ਕਰਨ ਲਈ ਅੱਡੀ ਚੁੱਕ ਕੇ ਫਾਹਾ ਲਿਆ ਜਾਂਦਾ ਹੈ। ਦੋ ਚਾਰ ਘੰਟਿਆਂ ਲਈ ਵਾਹ-ਵਾਹ ਖੱਟਣ ਲਈ ਸਾਰੀ ਉਮਰ ਲਈ ਪ੍ਰੇਸ਼ਾਨੀਆਂ ਸਹੇੜ ਲਈਆਂ ਜਾਂਦੀਆਂ ਹਨ, ਵਿਆਜੀ ਚੁੱਕੀ ਰਕਮ ਦਾ ਵਿਆਜ ਸਮੇਤ ਮੂਲ ਵਾਪਸ ਕਰਨਾ ਬਹੁਤ ਔਖਾ ਹੋ ਜਾਂਦਾ ਹੈ। ਇਨ੍ਹਾਂ ਸਮਾਗਮਾਂ 'ਤੇ ਪਾਣੀ ਵਾਂਗ ਰੋੜ੍ਹੀ ਰਕਮ ਬੱਚਿਆਂ ਦੀ ਪੜ੍ਹਾਈ, ਘਰ ਉਸਾਰੀ ਆਦਿ ਅਤੇ ਬਿਮਾਰੀ ਦੀ ਹਾਲਤ ਵਿਚ ਕੰਮ ਆ ਸਕਦੀ ਹੈ। ਇਹ ਕਾਨੂੰਨ ਪਾਸ ਕਰਨ ਉਪਰੰਤ ਸਖ਼ਤੀ ਨਾਲ ਲਾਗੂ ਹੋਣਾ ਚਾਹੀਦਾ ਹੈ ਤਾਂ ਜੋ ਸਮਾਜ ਨੂੰ ਪ੍ਰੇਸ਼ਾਨੀਆਂ ਤੋਂ ਬਚਾਇਆ ਜਾ ਸਕੇ। ਆਓ! ਸਾਦੇ ਵਿਆਹਾਂ ਦੀ ਪਿਰਤ ਪਾਈਏ।


-ਮਹਿੰਦਰ ਸਿੰਘ ਬਾਜਵਾ
ਪਿੰਡ ਮਸੀਤਾਂ, ਕਪੂਰਥਲਾ।


ਸਾਰਥਿਕ ਯਤਨ
ਪਿਛਲੇ ਸਮੇਂ ਤੋਂ ਪੰਜਾਬ ਦੇ ਵਾਤਾਵਰਨ ਨੂੰ ਸਾਫ਼-ਸੁਥਰਾ ਤੇ ਸ਼ੁੱਧ ਬਣਾਉਣ ਲਈ ਬਹੁਤ ਸਾਰੀਆਂ ਸਮਾਜ ਸੇਵੀ ਤੇ ਧਾਰਮਿਕ ਜਥੇਬੰਦੀਆਂ ਨੇ ਸਾਰਥਿਕ ਯਤਨ ਆਰੰਭੇ ਹੋਏ ਹਨ। ਇਨ੍ਹਾਂ ਜਥੇਬੰਦੀਆਂ ਵਿਚ ਜੇ ਕਿਸੇ ਜਥੇਬੰਦੀ ਜਾਂ ਸ਼ਖ਼ਸੀਅਤ ਦਾ ਨਾਂਅ ਲਿਆ ਜਾ ਸਕਦਾ ਹੈ, ਤਾਂ ਉਹ ਹੈ ਵਾਤਾਵਰਨ ਪ੍ਰੇਮੀ ਸੰਤ ਬਲਬੀਰ ਸਿੰਘ ਸੀਚੇਵਾਲ ਜਿਨ੍ਹਾਂ ਨੇ ਪਿਛਲੇ ਦਿਨੀਂ 'ਗਰੀਨ ਪੰਜਾਬ ਕਲੀਨ ਪੰਜਾਬ' ਦਾ ਨਾਅਰਾ ਦਿੰਦਿਆਂ ਪੰਜਾਬ ਵਾਸੀਆਂ ਨੂੰ ਮੁੜ ਹਰਿਆਵਲਾ ਪੰਜਾਬ ਲਿਆਉਣ ਤੇ ਇਸ ਦੀ ਸਾਂਭ-ਸੰਭਾਲ ਨੂੰ ਯਕੀਨੀ ਬਣਾਉਣ ਲਈ ਪ੍ਰੇਰਿਆ। ਅਜਿਹੀ ਸਾਰਥਿਕ ਪ੍ਰੇਰਨਾ 'ਤੇ ਅਮਲ ਕਰਕੇ ਹੀ ਪੰਜਾਬ ਨੂੰ ਤੰਦਰੁਸਤ ਤੇ ਮਜ਼ਬੂਤ ਬਣਾਇਆ ਜਾ ਸਕਦਾ ਹੈ, ਕਿਉਂਕਿ ਅੱਜ ਪੰਜਾਬ ਦੇ ਹਵਾ ਤੇ ਪਾਣੀ ਵੱਡੀ ਪੱਧਰ 'ਤੇ ਗੰਧਲੇ ਹੋ ਚੁੱਕੇ ਹਨ, ਜਿਸ ਨਾਲ ਪੰਜਾਬ ਵਿਚ ਮੌਤ ਦਰ ਵਧਦੀ ਜਾ ਰਹੀ ਹੈ। ਵੱਖਰੇ-ਵੱਖਰੇ ਰੋਗਾਂ ਨਾਲ ਗ੍ਰਸਤ ਪੰਜਾਬੀਆਂ ਦੀਆਂ ਲਾਈਨਾਂ ਲੰਮੀਆਂ ਹੁੰਦੀਆਂ ਜਾ ਰਹੀਆਂ ਹਨ। ਪੰਜਾਬ ਨੂੰ ਤੰਦਰੁਸਤ ਦੇਖਣ ਲਈ ਜ਼ਰੂਰੀ ਹੈ ਕਿ ਇਸ ਵਿਚ ਵੱਡੀ ਪੱਧਰ 'ਤੇ ਰੁੱਖ ਲਾਏ ਜਾਣ। ਜ਼ਰੂਰੀ ਹੈ ਕਿ ਧਾਰਮਿਕ ਤੇ ਸਮਾਜਿਕ ਜਥੇਬੰਦੀਆਂ ਦੇ ਨਾਲ-ਨਾਲ ਸਮੂਹ ਰਾਜਨੀਤਕ ਪਾਰਟੀਆਂ ਵੀ ਵਾਤਾਵਰਨ ਪ੍ਰਤੀ ਗੰਭੀਰ ਹੋਣ। ਅਜਿਹੇ ਯਤਨਾਂ ਨਾਲ ਹੀ ਹਰ ਸਮੱਸਿਆ 'ਤੇ ਕਾਬੂ ਪਾਇਆ ਜਾ ਸਕਦਾ ਹੈ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਜ਼ਿਲ੍ਹਾ ਲੁਧਿਆਣਾ।

1/03/2017

 ਉਡੀਕ ਮੁੱਕੀ ਨਹੀਂ
ਨੋਟਬੰਦੀ ਦੀ ਰਾਤ ਭਾਰਤ ਦੇ ਮਾਣਯੋਗ ਪ੍ਰਧਾਨ ਮੰਤਰੀ ਹੋਰਾਂ ਜੋ ਭਾਸ਼ਣ ਭਾਰਤੀ ਜਨਤਾ ਦੇ ਨਾਂਅ ਦਿੱਤਾ, ਉਹ ਹਰੇਕ ਨੂੰ ਯਾਦ ਹੋਵੇਗਾ। ਭੁੱਲ ਵੀ ਨਹੀਂ ਸਕਦਾ। ਵਾਅਦੇ ਸਨ ਕਾਲਾ ਧਨ ਖ਼ਤਮ ਹੋਏਗਾ, ਭ੍ਰਿਸ਼ਟਾਚਾਰ ਨਹੀਂ ਰਹੇਗਾ, ਹਰੇਕ ਚੀਜ਼ ਸਸਤੀ ਮਿਲੇਗੀ। ਮਹਿੰਗਾਈ ਘਟ ਜਾਵੇਗੀ ਆਦਿ-ਆਦਿ। ਭਾਸ਼ਣ ਸੁਣ ਕੇ ਲੋਕ ਸੋਚਣ ਲੱਗ ਪਏ ਸਨ ਕਿ ਆਖਰ ਕਿਹੜੀ ਜਾਦੂ ਦੀ ਛੜੀ 'ਨੋਟਬੰਦੀ ਕਰਕੇ) ਨਾਲ ਸਭ ਕੁਝ ਆਮ ਵਾਂਗ ਹੋ ਜਾਵੇਗਾ। ਹੁਣ ਭਾਰਤੀ ਲੋਕਾਂ ਦੀ ਗ਼ਰੀਬੀ ਕੱਟੀ ਗਈ ਸਮਝੋ ਹੁਣ 'ਅੱਛੇ ਦਿਨ' ਆਏ ਸਮਝੋ। ਪਰ ਉਸ ਰਾਤ ਤੋਂ ਬਾਅਦ ਜੋ ਹੁਣ ਤੱਕ ਆਮ ਲੋਕਾਂ ਨਾਲ ਹੋਈ ਬੀਤੀ, ਉਹ ਨਾ ਭੁੱਲਣਯੋਗ ਹੋ ਗਈ ਹੈ। ਲੋਕਾਂ ਨੇ ਵੀ ਸਹਿਣਸ਼ੀਲਤਾ ਦਿਖਾਈ। ਸਾਊ ਬਣ ਕੇ ਲੋਕਾਂ ਨੇ ਆਪਣੀਆਂ ਕਮਜ਼ੋਰ ਲੱਤਾਂ 'ਤੇ ਤਿੰਨ-ਤਿੰਨ, ਚਾਰ-ਚਾਰ ਘੰਟੇ ਆਪਣੇ ਸਰੀਰ ਦਾ ਭਾਰ ਭੁੱਖੇ ਪਿਆਸਿਆਂ ਨੇ ਝੱਲਿਆ। ਕਈ ਵਾਰੀ ਖਾਲੀ ਹੱਥ ਵੀ ਮੁੜਦੇ ਰਹੇ। ਕੀ ਮਹਿੰਗਾਈ ਘਟ ਗਈ ਹੈ। ਹੁਣ ਤਾਂ ਨਿਗੂਣੀ ਛੋਲਿਆਂ ਦੀ ਦਾਲ ਵੀ ਆਮ ਆਦਮੀ ਦੀ ਪਹੁੰਚ ਤੋਂ ਦੂਰ ਹੋ ਗਈ ਹੈ। ਤਿੰਨ ਵਾਰ ਪੈਟਰੋਲ, ਡੀਜ਼ਲ ਦਾ ਰੇਟ ਵਧਿਆ। 100 ਰੁਪਏ ਗੈਸ ਸਿਲੰਡਰ ਵਧ ਗਿਆ ਪਰ ਕਿਸਾਨ ਰੁਲ ਗਿਆ ਹੈ, ਸਬਜ਼ੀ ਨੇ ਰੋਲ 'ਤਾ। ਹੁਣ ਸਾਲ ਦੋ ਸਾਲ ਤੱਕ ਉੱਠ ਨਹੀਂ ਸਕੇਗਾ। ਵੇਖੋ ਕੀ ਰੰਗ ਲਿਆਉਂਦੇ ਹਨ ਆਉਣ ਵਾਲੇ 'ਅੱਛੇ ਦਿਨ'।

-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।
ਮੋਬਾਈਲ : 94647-80299.

ਭਰੂਣ ਹੱਤਿਆ
ਭਰੂਣ-ਹੱਤਿਆ ਭਾਰਤੀ ਸਮਾਜ ਉੱਪਰ ਲੱਗਾ ਇਕ ਵੱਡਾ ਕਲੰਕ ਹੈ। ਖੁਦ ਨੂੰ ਮਾਡਰਨ ਤੇ ਪੜ੍ਹਿਆ-ਲਿਖਿਆ ਅਖਵਾਉਣ ਵਾਲਾ ਸਾਡਾ ਸਮਾਜ ਕੰਨਿਆ ਭਰੂਣ ਹੱਤਿਆ ਵਿਚ ਮੋਹਰੀ ਬਣਦਾ ਜਾ ਰਿਹਾ ਹੈ। ਅੰਕੜਿਆਂ ਦੀ ਮੰਨੀਏ ਤਾਂ ਜਿਸ ਤਰ੍ਹਾਂ ਸਾਡੇ ਸਮਾਜ ਵਿਚ ਧੀਆਂ ਦਾ ਕੁੱਖਾਂ ਵਿਚ ਕਤਲ ਹੋ ਰਿਹਾ ਹੈ, ਆਉਣ ਵਾਲੇ ਸਮੇਂ ਵਿਚ ਅਸੀਂ ਨੂੰਹਾਂ ਦੇ ਮੂੰਹ ਵੇਖਣ ਨੂੰ ਵੀ ਤਰਸ ਜਾਵਾਂਗੇ। ਪੁਰਾਣੇ ਸਮੇਂ ਵਿਚ ਬੱਚੀਆਂ ਨੂੰ ਜਨਮ ਲੈਣ ਤੋਂ ਬਾਅਦ ਮਾਰਿਆ ਜਾਂਦਾ ਸੀ ਪਰ ਵਰਤਮਾਨ ਵਿਚ ਵਿਗਿਆਨ ਨੇ ਏਨੀ ਤਰੱਕੀ ਕਰ ਲਈ ਹੈ ਕਿ ਹੁਣ ਤਾਂ ਬੱਚੀ ਨੂੰ ਜਨਮ ਵੀ ਨਹੀਂ ਲੈਣ ਦਿੱਤਾ ਜਾਂਦਾ। ਅਲਟਰਾਸਾਊਂਡ ਰਾਹੀਂ ਕੁੜੀ ਦਾ ਪਤਾ ਲਗਦੇ ਸਾਰ ਹੀ ਕਤਲ ਕਰਨ ਦਾ ਜਿੰਮਾ ਡਾਕਟਰ ਨੂੰ ਦੇ ਕੇ ਮਾਪੇ ਆਪ ਸੁਰਖਰੂ ਹੋ ਜਾਂਦੇ ਹਨ। ਡਾਕਟਰ ਪੈਸੇ ਲੈ ਕੇ ਔਰਤ ਦੇ ਪੇਟ ਅੰਦਰ ਹੀ ਇਸ ਕਤਲ ਨੂੰ ਅੰਜਾਮ ਦੇ ਦਿੰਦੇ ਹਨ। ਭਾਵੇਂ ਭਰੂਣ ਹੱਤਿਆ ਕਾਨੂੰਨੀ ਅਪਰਾਧ ਹੈ ਪਰ ਫਿਰ ਵੀ ਇਸ ਅਪਰਾਧ ਨੂੰ ਸਰਕਾਰ ਪੂਰੀ ਤਰ੍ਹਾਂ ਖਤਮ ਕਰਨ ਵਿਚ ਨਾਕਾਮ ਰਹੀ ਹੈ। ਗੁਰੂਆਂ-ਪੀਰਾਂ ਦੀ ਧਰਤੀ 'ਤੇ ਹੁੰਦੇ ਅਣਜੰਮੀਆਂ ਬੱਚੀਆਂ ਦੇ ਕਤਲ ਸਾਡਾ ਸਭ ਦਾ ਸਿਰ ਸ਼ਰਮ ਨਾਲ ਝੁਕਾਉਂਦੇ ਹਨ। ਆਖਰ ਕਿਉਂ ਧੀ ਨੂੰ ਜਨਮ ਲੈਣ ਦਾ ਅਧਿਕਾਰ ਨਹੀਂ ਦਿੱਤਾ ਜਾਂਦਾ। ਕਿਉਂ ਧੀ ਨੂੰ ਕੁੱਖ ਵਿਚ ਕਤਲ ਕਰਵਾਉਣ ਸਮੇਂ ਮਾਂ ਦਾ ਆਪਾ ਨਹੀਂ ਵਲੂੰਧਰਿਆ ਜਾਂਦਾ। ਕਿਉਂ ਉਸ ਨੂੰ ਘਰ ਵਿਚ ਉਹ ਸਤਿਕਾਰ ਨਹੀਂ ਮਿਲਦਾ ਜਿਸ ਦੀ ਉਹ ਹੱਕਦਾਰ ਹੈ। ਅਸੀਂ ਇਹ ਕਿਉਂ ਨਹੀਂ ਸਮਝ ਰਹੇ ਕਿ ਧੀਆਂ ਨੂੰ ਕੁੱਖਾਂ ਵਿਚ ਮਾਰ ਕੇ ਅਸੀਂ ਆਪਣੀ ਹੋਂਦ ਮਿਟਾ ਰਹੇ ਹਾਂ ਕਿਉਂਕਿ ਧਰਤੀ 'ਤੇ ਜੀਵਨ ਔਰਤ ਨਾਲ ਹੀ ਹੈ।

-ਜਸਪ੍ਰੀਤ ਕੌਰ ਸੰਘਾ
ਪਿੰਡ ਤਨੂੰਲੀ, ਜ਼ਿਲ੍ਹਾ ਹੁਸ਼ਿਆਰਪੁਰ।
ਮੋਬਾਈਲ : 99150-33176.

28/02/2017

 ਪ੍ਰੀਖਿਆਵਾਂ ਦੀ ਤਿਆਰੀ

ਪੂਰਾ ਸਾਲ ਅਧਿਆਪਕਾਂ, ਬੱਚਿਆਂ ਤੇ ਮਾਪਿਆਂ ਦੀ ਸਖ਼ਤ ਘਾਲਣਾ ਤੋਂ ਬਾਅਦ ਅੰਤ ਵਿਚ ਪ੍ਰੀਖਿਆ ਦੀ ਘੜੀ ਆਉਂਦੀ ਹੈ ਜਿਸ ਨਾਲ ਸਭ ਦੇ ਚਾਅ, ਭਾਵਨਾ ਤੇ ਭਵਿੱਖਮੁਖੀ ਫੈਸਲੇ ਜੁੜੇ ਹੁੰਦੇ ਹਨ। ਇਸ ਦੀ ਤਿਆਰੀ ਲਈ ਸਾਨੂੰ ਡੇਟ ਸ਼ੀਟ ਤੋਂ ਬਾਅਦ ਦੇ ਸਮੇਂ ਦੀ ਵੰਡ ਦਾ ਪ੍ਰਬੰਧ ਚੰਗੇ ਤਰੀਕੇ ਨਾਲ ਕਰਨਾ ਜ਼ਰੂਰੀ ਹੁੰਦਾ ਹੈ। ਉਸ ਦੇ ਅਨੁਸਾਰ ਪੜ੍ਹਾਈ ਸ਼ੁਰੂ ਕਰ ਸਕਦੇ ਹਾਂ। ਕਈ ਵਾਰ ਅਜਿਹੀ ਸਾਰਣੀ ਵਿਚ ਅਸੀਂ ਇਕ ਹੀ ਵਿਸ਼ੇ ਨੂੰ ਪੂਰਾ ਦਿਨ ਵਿਚ ਪੜ੍ਹਨਾ ਤੈਅ ਕੀਤਾ ਹੁੰਦਾ ਹੈ, ਜਿਸ ਨਾਲ ਇਹ ਵਿਸ਼ਾ ਅਕਾਊ ਬਣ ਜਾਂਦਾ ਹੈ। ਅਜਿਹੇ ਵਿਸ਼ੇ ਦੇ ਨਾਲ ਆਪਣੀ ਦਿਲਚਸਪੀ ਵਾਲੇ ਵਿਸ਼ੇਸ਼ ਵੀ ਜ਼ਰੂਰ ਪੜ੍ਹੋ। ਇਸ ਨਾਲ ਦਿਮਾਗੀ ਥਕਾਵਟ ਤਾਂ ਹੁੰਦੀ ਹੀ ਹੈ, ਨਾਲੋ-ਨਾਲ ਸਾਨੂੰ ਮਾਨਸਿਕ ਸੰਤੁਸ਼ਟੀ ਵੀ ਮਿਲਦੀ ਹੈ। ਉਂਜ ਭਾਵੇਂ ਪੇਪਰਾਂ ਦੇ ਦੌਰਾਨ ਕੋਈ ਪਲ ਵੀ ਬੇਅਰਥ ਨਹੀਂ ਗਵਾਉਣਾ ਚਾਹੀਦਾ ਪਰ ਸਰੀਰਕ ਸੰਤੁਲਨ ਦੀ ਬਰਕਰਾਰੀ ਲਈ ਸਮਾਂ ਸਾਰਣੀ ਵਿਚ ਇਕ ਘੰਟਾ ਇਸ ਤਰ੍ਹਾਂ ਰੱਖੋ ਜਦੋਂ ਤੁਸੀਂ ਖੁੱਲ੍ਹੀ ਹਵਾ ਵਿਚ ਸੈਰ ਕਰ ਸਕੋ ਜਾਂ ਘੁੰਮ ਫਿਰ ਸਕੋ।
ਡੇਟ ਸ਼ੀਟ ਆਉਣ ਤੋਂ ਬਾਅਦ ਸਮਾਂ ਸਾਰਣੀ ਵਿਚ ਬਦਲਾਓ ਵੀ ਜ਼ਰੂਰੀ ਹੈ ਕਿਉਂਕਿ ਇਸ ਵਿਚ ਛੁੱਟੀਆਂ ਦੇ ਨਾਲ ਪੇਪਰਾਂ 'ਤੇ ਵੀ ਧਿਆਨ ਕੇਂਦਰਿਤ ਕਰਨਾ ਜ਼ਰੂਰੀ ਹੁੰਦਾ ਹੈ। ਕਈ ਵਾਰ ਸੌਖੇ ਪੇਪਰ ਅੱਗੇ ਜ਼ਿਆਦਾ ਛੁੱਟੀਆਂ ਹੁੰਦੀਆਂ ਹਨ, ਇਸ ਸਥਿਤੀ ਵਿਚ ਕਿਸੇ ਹੋਰ ਵਿਸ਼ੇ ਨੂੰ ਸਮਾਂ ਦੇਣ ਦੀ ਜ਼ਰੂਰਤ ਹੋਵੇ ਤਾਂ ਉਨ੍ਹਾਂ ਵਿਚੋਂ ਲੋੜ ਮੁਤਾਬਿਕ ਛੁੱਟੀ ਵਰਤ ਲੈਣ ਵਿਚ ਕੋਈ ਹਰਜ਼ ਨਹੀਂ ਹੁੰਦਾ। ਪੇਪਰ ਤਿਆਰੀ ਦੀਆਂ ਛੁੱਟੀਆਂ ਵਿਚ ਤੁੱਛ ਸ਼ੰਕਾ ਵਾਲੇ ਪਾਠ ਪਹਿਲਾਂ ਦੁਹਰਾਉਣੇ ਲਾਜ਼ਮੀ ਹਨ। ਸਮੇਂ ਦੀ ਕਦਰ ਕਰਨ ਨਾਲ ਸਫ਼ਲਤਾ ਦੇ ਰਾਹ ਆਪਣੇ-ਆਪ ਖੁੱਲ੍ਹ ਜਾਂਦੇ ਹਨ।

-ਐਡਵੋਕੇਟ ਰਵਿੰਦਰ ਸਿੰਘ ਧਾਲੀਵਾਲ
ਪਿੰਡ ਨੱਥੂ ਮਾਜਰਾ, ਜ਼ਿਲ੍ਹਾ ਸੰਗਰੂਰ।

ਮੋ: 99880-03419.

ਆਪਣਾ ਪੰਜਾਬ...

ਮੇਰਾ ਵਸਦਾ ਰਹੇ ਪੰਜਾਬ, ਰੰਗਲਾ ਪੰਜਾਬ, ਮੇਰਾ ਦੇਸ਼ ਹੋਵੇ ਪੰਜਾਬ, ਲੱਭਣੀ ਨੀ ਮੌਜ ਪੰਜਾਬ ਵਰਗੀ ਜਿਹੇ ਗੀਤ ਇਕ ਸਮੇਂ ਦੇ ਗੀਤਕਾਰਾਂ ਨੇ ਪੰਜਾਬ ਦੇ ਖੁਸ਼ਨੁਮਾ ਮਾਹੌਲ ਨੂੰ ਦੇਖਦਿਆਂ ਸਿਰਜੇ ਹੋਣਗੇ। ਇੰਝ ਹੀ ਗਾਇਕੀ ਦੇ ਬਾਬਾ ਬੋਹੜ ਮੰਨੇ ਜਾਂਦੇ ਪੰਜਾਬ ਦੇ ਮਾਣਮੱਤੇ ਕਲਾਕਾਰ ਗੁਰਦਾਸ ਮਾਨ ਦਾ ਗੀਤ 'ਆਪਣਾ ਪੰਜਾਬ ਹੋਵੇ' 1996 ਵਿਚ ਸੁਣਨ ਨੂੰ ਮਿਲਿਆ। ਉਸ ਵਿਚ ਹੱਸਦੇ-ਵਸਦੇ ਪੰਜਾਬ ਅਤੇ ਇਸ ਦੇ ਖੁਸ਼ਗਵਾਰ ਮਾਹੌਲ ਨੂੰ ਮਾਨ ਸਾਹਿਬ ਨੇ ਬੜੇ ਖੂਬਸੂਰਤ ਢੰਗ ਨਾਲ ਦਰਸਾਇਆ। ਸਮਾਂ ਬਦਲਿਆ ਅਤੇ ਕਰੀਬ ਦੋ ਦਹਾਕਿਆਂ ਬਾਅਦ ਗੁਰਦਾਸ ਮਾਨ ਦਾ ਹੁਣ ਦੇ ਪੰਜਾਬ ਦੇ ਮਾਹੌਲ ਨੂੰ ਬਿਆਨ ਕਰਦਾ ਨਵਾਂ ਗੀਤ ਸੁਣਨ ਨੂੰ ਮਿਲ ਰਿਹਾ ਹੈ। ਪੰਜਾਬ ਦੀ ਹਵਾ ਦਾ ਬਦਲਿਆ ਰੁੱਖ ਇਨ੍ਹਾਂ ਦੋਵਾਂ ਗੀਤਾਂ ਨੂੰ ਵੇਖਣ, ਸੁਣਨ ਤੋਂ ਬਾਅਦ ਸਮਝਿਆ ਜਾ ਸਕਦਾ ਹੈ। ਇਕ ਵਾਰ ਤਾਂ ਯਕੀਨ ਹੀ ਨਹੀਂ ਆਉਂਦਾ ਕਿ ਵੀਹ ਕੁ ਸਾਲਾਂ ਦੇ ਸਮੇਂ ਵਿਚ ਲਹਿ ਲਹਾਉਂਦੀਆਂ ਫਸਲਾਂ, ਹੱਸਦੇ-ਨੱਚਦੇ ਭੰਗੜੇ ਪਾਉਂਦੇ ਅਤੇ ਖੇਤਾਂ ਵਿਚ ਕੰਮ ਕਰਦੇ ਪੰਜਾਬੀ ਨਜ਼ਰ ਆਉਂਦੇ ਹਨ। ਸਰ੍ਹੋਂ ਦਾ ਸਾਗ, ਮੱਕੀ ਦੀ ਰੋਟੀ, ਘਿਓ, ਗੰਨੇ ਆਦਿ ਉਨ੍ਹਾਂ ਦੀ ਮਨਪਸੰਦ ਖੁਰਾਕ ਹੈ। ਪਰ ਹੁਣ ਵਾਲੇ ਪੰਜਾਬ ਦਾ ਦ੍ਰਿਸ਼ ਬਿਲਕੁਲ ਅਲੱਗ ਹੈ। ਇਸ ਵਿਚ ਹੱਥਾਂ ਵਿਚ ਹਥਿਆਰ ਫੜ ਕੇ ਨੱਚਣ ਵਾਲੇ, ਮੋਬਾਈਲਾਂ 'ਤੇ ਉਲਝੇ, ਫੈਸ਼ਨਪ੍ਰਸਤੀ ਅਤੇ ਲੱਚਰਤਾ ਵਿਚ ਡੁੱਬੇ ਪੰਜਾਬੀ ਨਜ਼ਰ ਪੈਂਦੇ ਹਨ। ਇਨ੍ਹਾਂ ਦੀ ਖੁਰਾਕ ਪੀਜ਼ੇ, ਬਰਗਰ ਹਨ ਜਾਂ ਫਿਰ ਸਪਰੇਆਂ ਨਾਲ ਉਗਾਏ ਅਨਾਜ ਤੋਂ ਤਿਆਰ ਭੋਜਨ ਹਨ। ਇਹ ਸਭ ਦੇਖ ਕੇ ਸ਼ੱਕ ਜਿਹਾ ਪੈਂਦਾ ਹੈ ਕਿ ਆਪਣਾ ਪੰਜਾਬ ਕਿਧਰੇ ਪਰਾਇਆ ਤਾਂ ਨੀ ਹੋ ਗਿਆ?

-ਰਮਨਦੀਪ ਸਿੰਘ
ਪਿੰਡ ਸ਼ੇਖੂ, ਜ਼ਿਲ੍ਹਾ ਬਠਿੰਡਾ। ਮੋ: 94171-12740.

27/02/2017

 ਗ਼ਰੀਬ ਅਤੇ ਅਮੀਰ
ਆਮ ਲੋਕਾਂ ਦੀ ਇਹ ਤ੍ਰਾਸਦੀ ਹੀ ਕਹੀ ਜਾ ਸਕਦੀ ਹੈ ਕਿ ਜਦੋਂ ਉਹ ਕਿਸੇ ਵੇਲੇ ਢਿੱਲੇ-ਮੱਠੇ ਹੋ ਜਾਂਦੇ ਹਨ ਤਾਂ ਉਹ ਆਪਣੇ ਵਿੱਤ ਅਨੁਸਾਰ ਪਿੰਡਾਂ ਵਿਚ ਬੈਠੇ ਡਾਕਟਰਾਂ (ਝੋਲਾ ਛਾਪ) ਕੋਲ ਪਹੁੰਚ ਕੇ ਦਵਾਈ-ਬੂਟੀ ਲੈ ਲੈਂਦੇ ਹਨ ਜਾਂ ਕਈ ਵਾਰ ਇਹ ਗੰਭੀਰ ਬਿਮਾਰੀ ਦਾ ਸ਼ਿਕਾਰ ਹੋਣ 'ਤੇ ਵੱਧ ਤੋਂ ਵੱਧ ਸਰਕਾਰੀ ਹਸਪਤਾਲਾਂ ਵਿਚ ਅੱਪੜ ਜਾਂਦੇ ਹਨ। ਵਧੀਆ ਜਾਂ ਪ੍ਰਾਈਵੇਟ ਹਸਪਤਾਲਾਂ 'ਚ ਇਲਾਜ ਕਰਵਾਉਣਾ ਅੱਜ ਆਮ ਬੰਦੇ ਦੇ ਵੱਸ ਦੀ ਗੱਲ ਨਹੀਂ ਰਹੀ। ਇਸ ਦੇ ਉਲਟ ਜਦੋਂ ਕੋਈ ਦੇਸ਼ ਦਾ ਰਾਜਨੀਤਕ ਆਗੂ ਜਾਂ ਫਿਰ ਕਿਸੇ ਧਾਰਮਿਕ ਡੇਰੇ ਦਾ ਕੋਈ ਮੁਖੀ ਬਿਮਾਰ ਹੋ ਜਾਂਦਾ ਹੈ ਤਾਂ ਉਹ ਝੱਟ ਹਵਾਈ ਟਿਕਟ ਖ਼ਰੀਦ ਕੇ ਬਾਹਰਲੇ ਦੇਸ਼ 'ਚ ਆਪਣਾ ਇਲਾਜ ਕਰਵਾਉਣ ਲਈ ਤੁਰ ਪੈਂਦਾ ਹੈ। ਇਥੋਂ ਤੱਕ ਇਹ ਲੋਕ ਹਵਾਈ ਸਫ਼ਰ ਦੌਰਾਨ ਨਾਮੀ ਡਾਕਟਰਾਂ ਦੀ ਟੀਮ ਵੀ ਨਾਲ ਲੈ ਕੇ ਜਾਂਦੇ ਹਨ। ਨਾਲ ਜਾਣ ਵਾਲੀ ਟੀਮ ਦਾ ਟਿਕਟ ਖਰਚਾ ਤੇ ਇਸ ਤੋਂ ਵੱਖਰਾ ਖਰਚਾ ਵੀ ਖੁਦ ਚੁੱਕਦੇ ਹਨ। ਸ਼ਾਇਦ ਇਨ੍ਹਾਂ ਦੀ ਬਿਮਾਰੀ 'ਤੇ ਓਨਾ ਖਰਚ ਨਾ ਆਉਂਦਾ ਹੋਵੇ, ਜਿੰਨਾ ਖਰਚਾ ਇਹ ਹਵਾਈ ਟਿਕਟਾਂ 'ਤੇ ਕਰ ਦਿੰਦੇ ਹਨ। ਇਥੇ ਸਵਾਲ ਉਠਦਾ ਹੈ ਕਿ ਕੀ ਇਨ੍ਹਾਂ ਰਾਜਨੀਤਕ ਆਗੂਆਂ ਤੇ ਡੇਰਿਆਂ ਦੇ ਮੁਖੀਆਂ ਨੂੰ ਦੇਸ਼ ਦੇ ਹਸਪਤਾਲਾਂ ਜਾਂ ਡਾਕਟਰਾਂ 'ਤੇ ਯਕੀਨ ਨਹੀਂ ਹੈ। ਸਵਾਲ ਇਹ ਵੀ ਹੈ ਕਿ ਇਨ੍ਹਾਂ ਲੋਕਾਂ ਕੋਲ ਏਨਾ ਪੈਸਾ ਕਿੱਥੋਂ ਆ ਰਿਹਾ ਹੈ। ਅੱਜ ਇਹ ਆਮ ਸੁਣਿਆ ਜਾਂਦਾ ਹੈ ਕਿ ਅੱਜ ਜੇ ਕਿਸੇ ਕੋਲ ਪੈਸਾ ਹੈ ਤਾਂ ਉਹ ਰਾਜਨੀਤਕ ਲੋਕਾਂ ਕੋਲ ਹੈ ਜਾਂ ਫਿਰ ਧਾਰਮਿਕ ਡੇਰੇ ਵਾਲਿਆਂ ਕੋਲ। ਅੱਜ ਪੰਜਾਬ ਦੀ ਤ੍ਰਾਸਦੀ ਇਹ ਹੈ ਕਿ ਇਸ ਢਾਈ ਕਰੋੜ ਦੀ ਆਬਾਦੀ ਵਾਲੇ ਸੂਬੇ ਵਿਚ ਧਾਰਮਿਕ ਡੇਰਿਆਂ ਦੀ ਗਿਣਤੀ 9 ਹਜ਼ਾਰ ਤੋਂ ਟੱਪ ਚੁੱਕੀ ਹੈ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

ਮੋਬਾਈਲ : 98551-81104.


ਰੁੱਖ, ਮਨੁੱਖ ਤੇ ਪ੍ਰਦੂਸ਼ਣ ਦੀ ਮਾਰ

ਇਹ ਇਕ ਕੌੜਾ ਸੱਚ ਹੈ ਕਿ ਸਾਡੇ ਆਪਣੇ ਲੋਕ ਅਤੇ ਲੋਕ-ਸਰਕਾਰਾਂ, ਰੁੱਖ ਅਤੇ ਮਨੁੱਖ ਦੇ ਕੁਦਰਤੀ ਰਿਸ਼ਤੇ ਨੂੰ ਭੁਲਾ ਕੇ ਬੇਸ਼ੁਮਾਰ ਤੇ ਲਾਇਲਾਜ ਮਾਰੂ ਬਿਮਾਰੀਆਂ ਨਾਲ ਪੀੜਤ ਹੋ ਕੇ ਕੁਰਲਾ ਰਹੇ ਹਨ। ਕੁਦਰਤ ਨੇ ਧਰਤੀ ਦੇ ਨਾਲ ਹੀ ਜੰਗਲ ਪੈਦਾ ਕੀਤੇ ਸਨ। ਧਰਤੀ ਅੰਨ ਪੈਦਾ ਕਰਦੀ ਹੈ ਅਤੇ ਰੁੱਖ ਸਾਹ ਲੈਣ ਵਾਸਤੇ ਆਕਸੀਜਨ ਪੈਦਾ ਕਰਦੇ ਹਨ। ਸ਼ੁੱਧ ਧਰਤੀ ਅਤੇ ਸ਼ੁੱਧ ਹਵਾ ਦੇ ਨਾਲ ਪਾਣੀ ਵੀ ਸ਼ੁੱਧ ਰਹਿੰਦਾ ਹੈ।
ਅੰਮ੍ਰਿਤਸਰ ਦੀ ਪਵਿੱਤਰ ਨਗਰੀ ਕਦੇ ਫੁੱਲਦਾਰ ਬਾਗਾਂ, ਸੜਕੀ ਰੁੱਖਾਂ ਅਤੇ ਬਨਸਪਤੀ ਦੀ ਹਰਿਆਵਲ ਨਾਲ ਮਾਲੋਮਾਲ ਸੀ। ਪ੍ਰਦੂਸ਼ਣ ਦਾ ਨਾਮੋ-ਨਿਸ਼ਾਨ ਨਹੀਂ ਸੀ। ਲੋਕ ਤੰਦਰੁਸਤ ਅਤੇ ਖੁਸ਼ ਮਿਜਾਜ਼ ਸਨ।
ਵਪਾਰੀ ਕਿਸਮ ਦੇ ਲੋਕ-ਰਾਜੀ ਲੀਡਰਾਂ ਦਾ ਰਾਜ ਆਇਆ ਹੈ। ਵਿਕਾਸ ਦਾ ਨਾਂਅ ਵਰਤ ਕੇ ਇਨ੍ਹਾਂ ਨੂੰ ਪਹਿਲਾਂ ਸ਼ਹਿਰ ਦੁਆਲੇ ਕਾਲੋਨੀਆਂ ਬਣਵਾ ਕੇ ਬਾਗ਼ ਉਜਾੜੇ, ਕਿਸਾਨਾਂ ਨੂੰ ਪਿੰਡਾਂ ਵਿਚ ਰੁੱਖਾਂ ਨੂੰ ਕੱਟਣ ਤੋਂ ਨਾ ਰੋਕਿਆ ਤੇ ਅਖੀਰ ਸ਼ਹਿਰ ਵਿਚ ਬੀ.ਆਰ.ਟੀ.ਐਸ. ਦੇ ਸੜਕੀ ਬੱਸ ਪ੍ਰਾਜੈਕਟ ਤਹਿਤ ਸੜਕਾਂ ਉਤੇ ਲੱਗੇ ਸੈਂਕੜੇ ਸਾਲ ਪੁਰਾਣੇ ਬੋਹੜ, ਪਿੱਪਲ, ਟਾਹਲੀਆਂ ਸਮੇਤ ਅੰਬਾਂ ਤੇ ਜਾਮਣ ਦੇ ਹਜ਼ਾਰਾਂ ਰੁੱਖ ਕਟਵਾ ਕੇ ਸ਼ਹਿਰ ਨੂੰ ਰੁੱਖ ਵਿਹੂਣਾ ਬਣਾ ਦਿੱਤਾ ਅਤੇ ਲੋਕਾਂ ਨੂੰ ਮਰਨ ਲਈ ਮਾਰੂ ਪ੍ਰਦੂਸ਼ਣ ਦੇ ਹਵਾਲੇ ਕਰ ਦਿੱਤਾ।
ਸਰਬੱਤ ਦੇ ਭਲੇ ਵਿਚ ਹੀ ਸਭ ਦੀ ਭਲਾਈ ਹੈ। ਪ੍ਰੰਤੂ ਦੀਵੇ ਹੇਠਾਂ ਹਮੇਸ਼ਾ ਹਨੇਰਾ ਹੁੰਦਾ ਹੈ। ਅਜੋਕੇ ਨੇਤਾਵਾਂ ਦੇ ਦਿਲ ਇਸੇ ਲਈ ਹਨੇਰੇ ਵਿਚ ਭਟਕ ਰਹੇ ਹਨ ਅਤੇ ਉਹ ਲੋਕ ਭਲਾਈ ਦੇ ਕੰਮਾਂ ਤੋਂ ਕੰਨੀ ਕਤਰਾ ਰਹੇ ਹਨ। ਮਤ ਦਾਗੀ ਕਰੋ, ਇਸ ਗੁਰੂਆਂ ਦੀ ਧਰਤੀ ਨੂੰ।


-ਇੰਜ: ਕੁਲਦੀਪ ਸਿੰਘ ਲੁੱਧਰ
ਅੰਮ੍ਰਿਤਸਰ।

24/02/2017

 ਮੈਰਿਜ ਪੈਲੇਸਾਂ ਵਿਚ ਭੋਜਨ ਦੀ ਬਰਬਾਦੀ
ਮੈਰਿਜ ਪੈਲੇਸਾਂ ਅੰਦਰ ਹੋ ਰਹੀਆਂ ਮੰਦਭਾਗੀਆਂ ਘਟਨਾਵਾਂ ਬਾਰੇ ਅਕਸਰ ਹੀ ਅਸੀਂ ਸੁਣਦੇ ਰਹਿੰਦੇ ਹਾਂ। ਅਗਰ ਭੋਜਨ ਦੀ ਗੱਲ ਕਰੀਏ ਤਾਂ ਜ਼ਿਆਦਾਤਰ ਭੋਜਨ ਉਥੇ ਕੂੜੇਦਾਨਾਂ ਵਿਚ ਸੁੱਟ ਕੇ ਭੋਜਨ ਦੀ ਬਰਬਾਦੀ ਕੀਤੀ ਜਾਂਦੀ ਹੈ। ਵਿਆਹਾਂ ਵਿਚ ਪਏ ਬੇਕਾਰ ਭੋਜਨ ਨੂੰ ਜਦੋਂ ਅਸੀਂ ਦੇਖਦੇ ਹਾਂ ਤਾਂ ਮਨ ਨੂੰ ਬੜਾ ਦੁੱਖ ਹੁੰਦਾ ਹੈ ਕਿ ਕੇਵਲ ਸਾਦੇ ਭੋਜਨ ਲਈ ਇਨਸਾਨ ਦਿਨ-ਰਾਤ ਇਕ ਕਰ ਦਿੰਦਾ ਹੈ ਪ੍ਰੰਤੂ ਪੈਲੇਸਾਂ ਵਿਚ ਇਨ੍ਹਾਂ ਦੀ ਕੋਈ ਕਦਰ ਨਹੀਂ ਕੀਤੀ ਜਾਂਦੀ। ਕੁਝ ਲੋਕ ਦਿਖਾਵੇ ਦੇ ਤੌਰ 'ਤੇ ਭੋਜਨ ਪਲੇਟ ਵਿਚ ਛੱਡਣਾ ਆਪਣੀ ਸ਼ੇਖੀ ਸਮਝਦੇ ਹਨ। ਜ਼ਿਆਦਾਤਰ ਗਿਲਾਸਾਂ ਵਿਚ ਅੱਧੇ ਤੋਂ ਵੱਧ ਜੂਸ ਜਾਂ ਕੋਲਡਰਿੰਕ ਉਂਜ ਹੀ ਛੱਡ ਦਿੱਤਾ ਜਾਂਦਾ ਹੈ। ਆਓ! ਜ਼ਰਾ ਸੋਚੀਏ ਕਿ ਕਿੰਨੇ ਲੋਕ ਬਿਨਾਂ ਰੋਟੀ ਤੋਂ ਭੁੱਖੇ ਸੌਂਦੇ ਹਨ। ਜੇਕਰ ਅਸੀਂ ਭੋਜਨ ਨੂੰ ਸਹੀ ਤਰੀਕੇ ਨਾਲ ਗ੍ਰਹਿਣ ਕਰਾਂਗੇ ਤਾਂ ਕਿੰਨਾ ਭੋਜਨ ਬਚ ਜਾਵੇਗਾ ਜੋ ਕਿ ਕਿਸੇ ਦੇ ਪੇਟ ਦੀ ਭੁੱਖ ਮਿਟਾ ਸਕਦਾ ਹੈ। ਸਾਡੇ ਗੁਰੂਆਂ ਨੇ ਸਾਨੂੰ ਇਸ ਭੋਜਨ ਨੂੰ ਇਕ ਪੰਗਤ ਵਿਚ ਬੈਠ ਕੇ ਛਕਣ ਦੀ ਪ੍ਰੇਰਨਾ ਦਿੱਤੀ। ਅਸੀਂ ਆਪਣੇ ਘਰਾਂ ਵੱਲ ਝਾਤ ਮਾਰੀਏ ਕਿ ਅਸੀਂ ਕਿੰਨਾ ਕੁ ਭੋਜਨ ਬਰਬਾਦ ਕਰਦੇ ਹਾਂ ਜਾਂ ਫਿਰ ਕਿੰਨਾ ਕੁ ਕੋਲਡਰਿੰਕ ਜਾਂ ਜੂਸ ਫਾਲਤੂ ਸੁੱਟ ਦਿੰਦੇ ਹਾਂ। ਅਸੀਂ ਸਾਰੇ ਹੀ ਇਸ ਗੱਲ ਵੱਲ ਧਿਆਨ ਦੇਈਏ ਕਿ ਮੈਰਿਜ ਪੈਲੇਸਾਂ ਵਿਚ ਜਿਥੇ ਸਾਨੂੰ ਏਨੇ ਵੱਡੇ ਨੁਕਸਾਨ ਝੱਲਣੇ ਪੈ ਰਹੇ ਹਨ, ਉਥੇ ਹੀ ਅਸੀਂ ਆਪਣੇ ਸੱਭਿਅਕ ਰੀਤੀ-ਰਿਵਾਜਾਂ ਤੋਂ ਟੁੱਟ ਰਹੇ ਹਾਂ। ਵਿਆਹ ਕਰਨ ਸਮੇਂ ਜਾਂ ਵਿਆਹ 'ਤੇ ਜਾਣ ਸਮੇਂ ਅਸੀਂ ਦੋਵਾਂ ਸਥਿਤੀਆਂ ਨੂੰ ਧਿਆਨ ਵਿਚ ਰੱਖੀਏ ਤੇ ਓਨਾ ਹੀ ਭੋਜਨ ਪਰੋਸੀਏ/ਗ੍ਰਹਿਣ ਕਰੀਏ, ਜਿਸ ਨਾਲ ਸਾਡਾ ਨੁਕਸਾਨ ਨਾ ਹੋਵੇ ਅਤੇ ਕੋਈ ਦੂਸਰਾ ਭੁੱਖੇ ਪੇਟ ਨਾ ਰਹੇ।


-ਰਵਿੰਦਰ ਸਿੰਘ ਰੇਸ਼ਮ
ਪਿੰਡ-ਉਮਰਪੁਰਾ, ਨੱਥੂਮਾਜਰਾ।


ਖਸਤਾ ਗੱਡੀਆਂ
ਪੰਜਾਬ ਦੀਆਂ ਸੜਕਾਂ 'ਤੇ ਹਰ ਰੋਜ਼ ਹੀ ਭਿਆਨਕ ਹਾਦਸੇ ਵਾਪਰਦੇ ਰਹਿੰਦੇ ਹਨ, ਜਿਨ੍ਹਾਂ ਨਾਲ ਕਈ ਕੀਮਤੀ ਜਾਨਾਂ ਇਨ੍ਹਾਂ ਹਾਦਸਿਆਂ ਦੀ ਭੇਟ ਚੜ੍ਹ ਜਾਂਦੀਆਂ ਹਨ। ਇਸ ਦੇ ਕਈ ਕਾਰਨ ਹਨ, ਜ਼ਿਆਦਾ ਸਪੀਡ, ਨਸ਼ੇ ਦੀ ਵਰਤੋਂ ਤੇ ਖਸਤਾ ਹਾਲਤ ਗੱਡੀਆਂ। ਅਜਿਹੀਆਂ ਕਈ ਗੱਡੀਆਂ ਸੜਕ 'ਤੇ ਚਲਦੀਆਂ ਹਨ ਜੋ ਆਪਣੀ ਉਮਰ ਵਿਹਾਅ ਚੁੱਕੀਆਂ ਹੁੰਦੀਆਂ ਹਨ। ਇਹ ਬਿਨਾਂ ਡਰ ਖੌਫ਼ ਦੇ ਇਨ੍ਹਾਂ ਖੂਨੀ ਸੜਕਾਂ 'ਤੇ ਘੁੰਮਦੀਆਂ ਮਨੁੱਖੀ ਜਾਨਾਂ ਲਈ ਖ਼ਤਰਾ ਬਣੀਆਂ ਹੋਈਆਂ ਹਨ, ਖ਼ਾਸ ਕਰਕੇ ਹਾੜ੍ਹੀ ਸਾਉਣੀ ਦੇ ਸੀਜ਼ਨ ਸਮੇਂ ਇਹ ਪੁਰਾਣੀਆਂ ਗੱਡੀਆਂ ਜਿਨ੍ਹਾਂ ਨੂੰ ਪਟਿਆਲੇ ਦੇ ਕਬਾੜ 'ਚ ਹੋਣਾ ਚਾਹੀਦਾ ਹੈ, ਉਹ ਨਵੀਆਂ ਗੱਡੀਆਂ ਦੇ ਬਰਾਬਰ ਪੈਸੇ ਕਮਾਉਂਦੀਆਂ ਹਨ। ਬਹੁਤ ਸਾਰੀਆਂ ਦੁਰਘਟਨਾਵਾਂ ਇਨ੍ਹਾਂ ਪੁਰਾਣੀਆਂ ਗੱਡੀਆਂ ਦੇ ਬੇਕਾਬੂ ਹੋਣ ਨਾਲ ਵਾਪਰਦੀਆਂ ਹਨ, ਕਿਉਂਕਿ ਪੁਰਾਣੀਆਂ ਗੱਡੀਆਂ ਦਾ ਸਪੇਅਰ ਪਾਰਟਸ ਬੜਾ ਔਖਾ ਮਿਲਦਾ ਹੈ। ਇਨ੍ਹਾਂ ਗੱਡੀਆਂ ਦੀ ਉੱਚ ਪੱਧਰੀ ਜਾਂਚ ਹੋਵੇ ਤਾਂ ਕਿ ਸੜਕੀ ਦੁਰਘਟਨਾਵਾਂ ਤੋਂ ਕੁਝ ਹੱਦ ਤੱਕ ਬਚਿਆ ਜਾ ਸਕੇ, ਕਿਉਂਕਿ ਰੁਜ਼ਗਾਰ ਵਾਂਗ ਹੀ ਜਾਨ ਵੀ ਜ਼ਰੂਰੀ ਹੈ।


-ਜਸਬੀਰ ਦੱਧਾਹੂਰ
ਪਿੰਡ ਤੇ ਡਾਕ: ਦੱਧਾਹੂਰ, ਤਹਿ: ਰਾਏਕੋਟ, ਜ਼ਿਲ੍ਹਾ ਲੁਧਿਆਣਾ।

23/02/2017

 ਨੇਕੀ ਦਾ ਕੰਮ ਕਰੋ
ਬੀਤੇ ਦਿਨੀਂ ਪੰਜਾਬੀ ਦੇ ਅਲੰਬਰਦਾਰ ਗਾਇਕ ਗੁਰਦਾਸ ਮਾਨ ਦੀ ਰਿਲੀਜ਼ ਹੋਈ ਐਲਬਮ 'ਪੰਜਾਬ' ਵਿਚਲੇ ਸਿਰਲੇਖ ਵਾਲੇ ਗੀਤ ਰਾਹੀਂ ਬਹੁਤ ਸਾਰੇ ਪੰਜਾਬੀਆਂ ਨੇ ਅਜੋਕੇ ਪੰਜਾਬ ਦੀ ਤਸਵੀਰ ਵੇਖ ਲਈ ਹੈ। ਗੁਰਦਾਸ ਮਾਨ ਇਕ ਅਜਿਹਾ ਗਾਇਕ ਤੇ ਗੀਤਕਾਰ ਹੈ, ਜੋ ਪੰਜਾਬੀਆਂ ਦੀ ਨਬਜ਼ ਨੂੰ ਪਛਾਣਨ ਦੀ ਸਮਰੱਥਾ ਰੱਖਦਾ ਹੈ। ਗਾਇਕੀ ਉਹੋ ਹੁੰਦੀ ਹੈ ਜੋ ਸਰੋਤਿਆਂ ਦੇ ਸਿਰ ਚੜ੍ਹ ਬੇਲੋ। ਇਸ ਗੀਤ ਰਾਹੀਂ ਮਾਨ ਸਾਹਿਬ ਪੰਜਾਬ ਦੀ ਵੇਦਨਾ ਨੂੰ ਪੇਸ਼ ਕਰਨ 'ਚ ਸੌ ਫ਼ੀਸਦੀ ਸਫਲ ਰਹੇ ਹਨ। ਬਾਕੀ ਦੇ ਸਮਕਾਲੀ ਗੀਤਕਾਰਾਂ ਤੇ ਗਾਇਕਾਂ ਨੂੰ ਗੁਰਦਾਸ ਮਾਨ ਵੱਲੋਂ ਪਾਈਆਂ ਸੰਦਲੀ ਪੈੜਾਂ ਨੂੰ, ਨਕਸ਼ੇ-ਕਦਮ ਮਿੱਥ ਲੈਣਾ ਚਾਹੀਦਾ ਹੈ। ਘਟੀਆ ਗਾਇਕਾਂ ਤੇ ਗੀਤਕਾਰਾਂ ਨੂੰ ਸਾਡੀ ਨਿਮਰਤਾ ਸਹਿਤ ਬੇਨਤੀ ਹੈ ਕਿ ਸੂਝਬੂਝ ਦਾ ਪੱਲਾ ਫੜ ਕੇ ਪੰਜਾਬ ਦੇ ਭਲੇ ਲਈ ਨੇਕੀ ਦਾ ਕੰਮ ਕਰੋ।


-ਪ੍ਰਿੰ: ਗੁਰਬਚਨ ਸਿੰਘ ਲਾਲੀ
ਲੇਖਕ ਮੰਚ ਪੱਟੀ।


ਪੱਗ ਬਨਾਮ ਚੁੰਨੀ
ਪਿਛਲੇ ਸਮੇਂ ਤੋਂ ਪੰਜਾਬ ਦੇ ਨਾਲ-ਨਾਲ ਪੂਰੀ ਦੁਨੀਆ ਵਿਚ ਦਸਤਾਰ ਭਾਵ ਪੱਗ ਸਬੰਧੀ ਸਿਖਲਾਈ ਸੈਂਟਰ ਖੋਲ੍ਹਣ ਦੇ ਨਾਲ-ਨਾਲ ਸੁੰਦਰ ਦਸਤਾਰ ਸਜਾਉਣ ਦੇ ਮੁਕਾਬਲੇ ਕਰਵਾਉਣ ਦੀ ਜੋ ਪਿਰਤ ਚੱਲੀ ਹੈ, ਉਹ ਬੇਹੱਦ ਸ਼ਲਾਘਾਯੋਗ ਹੈ। ਇਹ ਸੱਚ ਹੈ ਕਿ ਪੰਜਾਬੀਆਂ ਦੀ ਸਰਦਾਰੀ ਹੀ ਪੱਗ ਨਾਲ ਹੈ। ਖੁਸ਼ੀ ਦੀ ਗੱਲ ਹੈ ਕਿ ਨਵੀਂ ਪੀੜ੍ਹੀ 'ਚ ਪੱਗ ਬੰਨ੍ਹਣ ਦਾ ਰੁਝਾਨ ਵਧਿਆ ਹੈ। ਕੁੱਲ ਮਿਲਾ ਕੇ ਪੱਗ ਅੱਜ ਪੂਰੀ ਦੁਨੀਆ ਵਿਚ ਖਿੱਚ ਦਾ ਕੇਂਦਰ ਬਣਨ ਦੇ ਨਾਲ-ਨਾਲ ਸਨਮਾਨ ਦਾ ਪ੍ਰਤੀਕ ਵੀ ਬਣੀ ਹੋਈ ਹੈ। ਇਸ ਦੇ ਉਲਟ ਔਰਤ ਦੇ ਸਿਰ ਦੀ ਚੁੰਨੀ ਅੱਜ ਆਪਣਾ ਸਨਮਾਨ ਗੁਆਉਂਦੀ ਜਾ ਰਹੀ ਹੈ। ਖ਼ਾਸ ਕਰਕੇ ਨਵੀਂ ਉਮਰ ਦੀਆਂ ਕੁੜੀਆਂ ਚੁੰਨੀ ਦੀ ਮਹੱਤਤਾ ਨੂੰ ਭੁਲਦੀਆਂ ਜਾ ਰਹੀਆਂ ਹਨ। ਇਸ ਰੁਝਾਨ ਨੂੰ ਠੱਲ੍ਹ ਪੈਣੀ ਚਾਹੀਦੀ ਹੈ। ਕਿਉਂਕਿ ਦਸਤਾਰ ਦੀ ਤਰ੍ਹਾਂ ਚੁੰਨੀ ਵੀ ਸਨਮਾਨ ਦਾ ਪ੍ਰਤੀਕ ਹੈ। ਇਹ ਚੁੰਨੀ ਹੀ ਹੈ ਜੋ ਔਰਤ ਦੇ ਉੱਚੇ-ਸੁੱਚੇ ਤੇ ਉਸਾਰੂ ਕਿਰਦਾਰ ਦੀ ਹਾਮੀ ਭਰਦੀ ਹੈ। ਸੋ, ਅਖੀਰ ਅਸੀਂ ਪੱਗ ਨੂੰ ਉੱਚ ਮੁਕਾਮ ਦਿਵਾਉਣ ਵਾਲੀਆਂ ਸੰਸਥਾਵਾਂ ਨੂੰ ਬੇਨਤੀ ਕਰਦੇ ਹਾਂ ਕਿ ਉਹ ਚੁੰਨੀ ਨੂੰ ਵੀ ਬਣਦਾ ਸਨਮਾਨ ਦਿਵਾਉਣ ਲਈ ਹੰਭਲਾ ਮਾਰਨ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।


ਪ੍ਰੀਖਿਆ ਡਿਊਟੀਆਂ
ਸਾਲਾਨਾ ਪ੍ਰੀਖਿਆ ਸ਼ੁਰੂ ਹੋਣ ਜਾ ਰਹੀਆਂ ਹਨ। ਕਈ ਸਾਲਾਂ ਬਾਅਦ ਹੁਣ ਪੰਜਵੀਂ ਤੇ ਅੱਠਵੀਂ ਦੀਆਂ ਬੋਰਡ ਦੀਆਂ ਪ੍ਰੀਖਿਆਵਾਂ ਸ਼ੁਰੂ ਕੀਤੀਆਂ ਗਈਆਂ ਹਨ, ਜਿਨ੍ਹਾਂ ਨੂੰ ਮੁਲਾਂਕਣ ਦਾ ਨਾਂਅ ਦਿੱਤਾ ਗਿਆ ਹੈ। ਉਸ ਤੋਂ ਬਾਅਦ ਦਸਵੀਂ ਤੇ ਬਾਰ੍ਹਵੀਂ ਦੀਆਂ ਪ੍ਰੀਖਿਆਵਾਂ ਵੀ ਆਰੰਭ ਹੋ ਜਾਣਗੀਆਂ। ਇਨ੍ਹਾਂ ਪੇਪਰਾਂ ਵਿਚ ਪ੍ਰਾਇਮਰੀ ਸਟਾਫ ਦੀ ਡਿਊਟੀ ਨਹੀਂ ਲੱਗਣੀ ਚਾਹੀਦੀ। ਕਿਉਂ ਜੋ ਸਕੂਲਾਂ ਦੇ ਨਵੇਂ ਦਾਖਲਿਆਂ ਦਾ ਸਮਾਂ ਵੀ ਇਨ੍ਹਾਂ ਦਿਨਾਂ ਵਿਚ ਹੀ ਹੁੰਦਾ ਹੈ। ਦੂਜਾ ਪ੍ਰਵੇਸ਼ ਪ੍ਰੋਜੈਕਟ ਵੀ ਸਕੂਲਾਂ ਅੰਦਰ ਚੱਲ ਰਿਹਾ ਹੈ, ਜਿਸ ਦੀ ਸਾਲਾਨਾ ਟੈਸਟਿੰਗ ਵੀ ਸ਼ੁਰੂ ਹੋਣ ਜਾ ਰਹੀ ਹੈ। ਤੀਜਾ ਕੰਮ ਕਿ ਪੰਜਵੀਂ ਦੇ ਪੇਪਰਾਂ ਦੀ ਚੈਕਿੰਗ ਵੀ ਨਾਲੋ-ਨਾਲ ਹੋਣੀ ਹੈ। ਅਜਿਹੇ ਵਿਚ ਜੇ ਜਮਾਤ ਤੇ ਸਕੂਲ ਅਧਿਆਪਕ, ਸਕੂਲ ਵਿਚ ਨਹੀਂ ਹੋਵੇਗਾ ਤਾਂ ਛੋਟੇ ਬੱਚਿਆਂ ਨਾਲ ਬੇਇਨਸਾਫ਼ੀ ਹੋਵੇਗੀ। ਚੌਥਾ ਕਾਰਨ ਕਿ ਪ੍ਰਾਇਮਰੀ ਸਕੂਲਾਂ ਵਿਚ ਨਵੇਂ ਦਾਖਲੇ ਘੱਟ ਹੋਣਗੇ। ਜੋ ਮਾਪੇ ਆਪਣੇ ਬੱਚਿਆਂ ਨੂੰ ਸਕੂਲ ਦਾਖਲ ਕਰਾਉਣ ਆਉਣਗੇ ਤਾਂ ਉਹ ਸਕੂਲ ਦੀ ਸਥਿਤੀ ਨੂੰ ਵੇਖ ਜ਼ਰੂਰ ਦੁਚਿੱਤੀ ਵਿਚ ਪੈਣਗੇ, ਕਿਉਂ ਜੋ ਉਨ੍ਹਾਂ ਨੇ ਆਪਣਾ ਬੱਚਾ ਜੋ ਦਾਖਲ ਕਰਵਾਉਣਾ ਹੈ। ਸੋ, ਪੰਜਾਬ ਸਕੂਲ ਸਿੱਖਿਆ ਬੋਰਡ ਤੇ ਉੱਚ ਅਫਸਰਸ਼ਾਹੀ ਵੀ ਅਜਿਹੇ ਹਲਾਤ ਨੂੰ ਮੁੱਖ ਰੱਖਦੇ ਹੋਏ ਪ੍ਰਾਇਮਰੀ ਸਕੂਲ ਅਧਿਆਪਕਾਂ ਨੂੰ ਪ੍ਰੀਖਿਆਵਾਂ ਡਿਊਟੀਆਂ ਤੋਂ ਪੂਰੀ ਤਰ੍ਹਾਂ ਇਕ ਪਾਸੇ ਰੱਖੇ।


-ਜਸਦੀਪ ਸਿੰਘ ਖ਼ਾਲਸਾ,
ਖੰਨਾ, ਮੋ: 94630-57786

17/02/2017

 ਨਾਪਾਕ ਗਠਜੋੜ
'ਰਾਜਨੇਤਾ ਅਤੇ ਪੁਰੋਹਿਤ ਹਮੇਸ਼ਾ ਮਨੁੱਖ ਜਾਤੀ ਦੇ ਖਿਲਾਫ਼ ਸਾਜ਼ਿਸ਼ਾਂ ਰਚਦੇ ਹਨ ਅਤੇ ਇਕ-ਦੂਜੇ ਦੇ ਸਹਾਇਕ ਹਨ।' ਅਚਾਰੀਆ ਰਜਨੀਸ਼ ਦਾ ਉਕਤ ਕਥਨ ਹਾਲ ਹੀ ਵਿਚ ਪੰਜਾਬ ਵਿਧਾਨ ਸਭਾ ਦੀਆਂ ਚੋਣਾਂ ਦੌਰਾਨ ਪੂਰੀ ਤਰ੍ਹਾਂ ਸਾਰਥਿਕ ਸਿੱਧ ਹੋਇਆ। ਪੰਜਾਬ ਦੇ ਵੋਟਰਾਂ ਨੇ ਇਸ ਨਾਪਾਕ ਗਠਜੋੜ ਨੂੰ ਪਸੰਦ ਨਹੀਂ ਕੀਤਾ। ਹੋ ਸਕਦਾ ਹੈ ਬਹੁਤ ਸਾਰੇ ਸੋਝੀ ਤੋਂ ਸੱਖਣੇ, ਅਲਪ-ਬੁੱਧੀ ਧਾਰਕ ਆਸਥਾ ਦਾ ਸ਼ਿਕਾਰ ਹੋ ਕੇ ਗੁੰਮਰਾਹ ਹੋ ਗਏ ਹੋਣ। ਸਾਡੀ ਜਾਚੇ ਮਨੁੱਖ ਨੂੰ ਆਸਤਕ, ਨਾਸਤਿਕ ਹੋਣ ਦੀ ਬਜਾਏ 'ਵਾਸਤਵਿਕ' ਹੋਣਾ ਚਾਹੀਦਾ ਹੈ, ਕਿਉਂਕਿ ਅੰਨ੍ਹੀ ਸ਼ਰਧਾ ਹਨੇਰੇ ਦੀ ਪ੍ਰਤੀਕ ਹੈ, ਇਸ ਲਈ ਗਿਆਨਵਾਨ ਬਣ ਕੇ ਮਨੁੱਖ ਵਾਸਤਵਿਕਤਾ ਦੇ ਮਾਰਗ 'ਤੇ ਚਲਦਿਆਂ ਰੌਸ਼ਨੀ ਦਾ ਸੰਗੀ ਬਣ ਸਕਦਾ ਹੈ। ਭਾਵ ਚਾਣਨ ਨਾਲ ਮਿੱਤਰਤਾ ਪਾਈ ਜਾ ਸਕਦੀ ਹੈ। ਕਿਸੇ ਵਿਦਵਾਨ ਦਾ ਕਥਨ ਸਚਮੁੱਚ ਹੀ ਮਨੁੱਖ ਨੂੰ ਹਨੇਰੇ 'ਚੋਂ ਬਾਹਰ ਆਉਣ ਦਾ ਸੱਦਾ ਦਿੰਦਾ ਹੈ, 'ਆਸਤਕ ਹੋਣ ਲਈ ਕਿਸੇ ਪੜ੍ਹਾਈ ਦੀ ਜ਼ਰੂਰਤ ਨਹੀਂ ਪਰ ਨਾਸਤਿਕ ਹੋਣ ਲਈ ਤੁਹਾਡਾ ਪੜ੍ਹਿਆ-ਲਿਖਿਆ ਹੋਣਾ ਅਤੀ ਜ਼ਰੂਰੀ ਹੈ। ਸਾਡੀ ਪੁਰਜ਼ੋਰ ਅਪੀਲ ਹੈ ਸੂਝਵਾਨ ਤੇ ਬੁੱਧੀਮਾਨ ਪਾਠਕ ਵਰਗ ਨੂੰ ਕਿ ਸਾਰੇ ਮਿਲ ਕੇ ਸਮੁੱਚੇ ਪੰਜਾਬ ਨੂੰ ਜਾਗ੍ਰਿਤ ਕਰਨ ਤਾਂ ਕਿ ਭਵਿੱਖ 'ਚ ਸਾਧਾਂ ਤੇ ਸਿਆਸਤ ਦਾ ਨਾਪਾਕ ਗਠਜੋੜ ਸਦੀਵੀ ਤੌਰ 'ਤੇ ਤਹਿਸ-ਨਹਿਸ ਹੋ ਜਾਵੇ।


-ਪ੍ਰਿੰ: ਗੁਰਬਚਨ ਸਿੰਘ ਲਾਲੀ
ਲੇਖਕ ਮੰਚ, ਪੱਟੀ।


ਆਪਣੀ ਬੋਲੀ
ਸਭ ਤੋਂ ਪਹਿਲਾਂ ਮਾਂ ਹੀ ਹੈ ਜੋ ਆਪਣੇ ਬੱਚੇ ਦੀ ਸਾਂਭ-ਸੰਭਾਲ ਦੇ ਨਾਲ-ਨਾਲ ਉਸ ਦੀ ਆਲੇ-ਦੁਆਲੇ ਦੀਆਂ ਵਸਤਾਂ ਨਾਲ, ਰਿਸ਼ਤਿਆਂ ਨਾਲ ਜਾਣ-ਪਛਾਣ ਕਰਵਾਉਂਦੀ ਹੈ, ਸਾਂਝ ਪੁਆਉਂਦੀ ਹੈ। ਬੱਚਾ ਬੋਲੀ ਵੀ ਮਾਂ ਵਾਲੀ ਹੀ ਬੋਲਦਾ ਹੈ। ਇਸ ਕਰਕੇ ਮਾਂ-ਬੋਲੀ ਨੂੰ ਅਸੀਂ ਵਡਿਆਉਂਦੇ ਹਾਂ। ਵਰਤਮਾਨ ਸਮੇਂ ਦੀ ਗੱਲ ਕਰੀਏ ਤਾਂ ਅੱਜਕਲ੍ਹ ਦੀਆਂ ਮਾਵਾਂ ਬੱਚੇ ਨੂੰ ਖਿਚੜੀ ਜਿਹੀ ਭਾਸ਼ਾ ਸਿਖਾ ਦਿੰਦੀਆਂ ਹਨ, ਜਿਵੇਂ ਅੰਗਰੇਜ਼ੀ, ਹਿੰਦੀ, ਪੰਜਾਬੀ ਆਦਿ। ਇਸ ਤਰ੍ਹਾਂ ਹੀ ਆਲੇ-ਦੁਆਲੇ ਵਸਦੇ ਵਿਚਰਦੇ ਰਿਸ਼ਤਿਆਂ ਪ੍ਰਤੀ ਕਈ ਵਾਰ ਬਚਪਨ ਤੋਂ ਹੀ ਬੱਚੇ ਦੇ ਮਨ ਵਿਚ ਅਜਿਹੀ ਕੁੜੱਤਣ ਭਰ ਦਿੱਤੀ ਜਾਂਦੀ ਹੈ ਕਿ ਉਹ ਵੱਡਾ ਹੋ ਕੇ ਆਪਣੇ ਸਕਿਆਂ ਦਾ ਹੀ ਦੁਸ਼ਮਣ ਬਣਦਾ ਹੈ। ਵੱਡੇ-ਛੋਟੇ ਦਾ ਖਿਆਲ ਭੁੱਲ ਕੇ ਆਪਹੁਦਰਾ ਹੋ ਜਾਂਦਾ ਹੈ। ਅਜਿਹੀ ਅਵਸਥਾ ਰਿਸ਼ਤਿਆਂ ਨੂੰ ਖੋਰਾ ਲਾਉਂਦੀ ਹੈ। ਬੱਚੇ ਦਾ ਸਹੀ ਮਾਨਸਿਕ ਵਿਕਾਸ ਨਹੀਂ ਹੋ ਪਾਉਂਦਾ। ਸੋ, ਆਪਣੀ ਬੋਲੀ ਤੇ ਆਪਣਿਆਂ ਨਾਲ ਬੱਚਿਆਂ ਨੂੰ ਜੋੜੋ। ਇਹੀ ਸਮੇਂ ਦੀ ਲੋੜ ਹੈ।


-ਸਨੇਹਇੰਦਰ ਮੀਲੂ ਫਰੌਰ
ਮੋ: 93163-17356

15/02/2017

 ਵੱਡੇ ਘੱਲੂਘਾਰੇ ਦੀ ਯਾਦਗਾਰ
ਵੱਡਾ ਘੱਲੂਘਾਰਾ ਗੌਰਵਮਈ ਸਿੱਖ ਇਤਿਹਾਸ ਦਾ ਇਕ ਸੁਨਹਿਰੀ ਪੰਨਾ ਹੈ। ਇਸ ਦੀ ਯਾਦ ਹਰ ਸਿੱਖ ਦੇ ਦਿਲ ਵਿਚ ਰਹਿਣੀ ਚਾਹੀਦੀ ਹੈ। ਇਸੇ ਗੱਲ ਨੂੰ ਮੁੱਖ ਰੱਖ ਕੇ ਪੰਜਾਬ ਸਰਕਾਰ ਨੇ ਕੁੱਪ-ਰੋਹੀੜਾ ਦੇ ਸਥਾਨ 'ਤੇ 10 ਏਕੜ ਜ਼ਮੀਨ ਵਿਚ ਇਕ ਵਧੀਆ ਯਾਦਗਾਰ ਬਣਾਈ ਹੈ, ਜਿਸ ਵਿਚ ਸ਼ਹੀਦੀ ਟਾਵਰ, ਟੂਰਿਸਟ ਸੂਚਨਾ ਕੇਂਦਰ, ਆਡੀਟੋਰੀਅਮ, ਵਿਸ਼ਾਲ ਅਜਾਇਬ ਘਰ ਅਤੇ ਓਪਨ ਏਅਰ ਥੀਏਟਰ ਦਾ ਨਿਰਮਾਣ ਕੀਤਾ ਗਿਆ ਹੈ। ਇਹ ਇਕ ਸ਼ਲਾਘਾਯੋਗ ਉੱਦਮ ਹੈ। ਇਹ ਸੁਣ ਕੇ ਮੈਂ ਵੀ ਅਗਸਤ 2016 ਵਿਚ ਇਸ ਸਮਾਰਕ ਨੂੰ ਦੇਖਣ ਪਰਿਵਾਰ ਸਮੇਤ ਗਿਆ। ਉਥੇ ਪਹੁੰਚਣ 'ਤੇ ਗੇਟ 'ਤੇ ਬੈਠੇ ਦੋ ਚੌਕੀਦਾਰਾਂ ਨੇ ਸਾਨੂੰ ਜੀ ਆਇਆਂ ਕਹਿਣ ਦੀ ਬਜਾਏ, ਸਾਡੇ ਵੱਲ ਇਸ ਤਰ੍ਹਾਂ ਵੇਖਿਆ, ਜਿਸ ਤਰ੍ਹਾਂ ਕੋਈ ਘੁਸਪੈਠੀਆ ਆ ਗਿਆ ਹੋਵੇ। ਮੈਂ ਸਮਾਰਕ ਬਾਰੇ ਪੁੱਛਿਆ। ਉਨ੍ਹਾਂ ਸਾਨੂੰ ਇਹ ਦੱਸਿਆ ਕਿ ਇਹ ਹਾਲੇ ਚਾਲੂ ਨਹੀਂ ਹੋਇਆ। ਉਹ ਇਹ ਵੀ ਨਾ ਦੱਸ ਸਕੇ ਕਿ ਇਹ ਕਦੋਂ ਚਾਲੂ ਹੋਵੇਗਾ। ਕੰਧ ਵਿਚ ਲੱਗੇ ਪੱਥਰ ਤੋਂ ਪਤਾ ਲੱਗਾ ਕਿ ਇਸ ਸਮਾਰਕ ਦਾ ਉਦਘਾਟਨ 2013 ਵਿਚ ਹੋ ਚੁੱਕਿਆ ਹੈ। ਇਥੇ ਬਣੀਆਂ ਸਾਰੀਆਂ ਇਮਾਰਤਾਂ ਨੂੰ ਜਿੰਦੇ ਲੱਗੇ ਹੋਏ ਸਨ। ਅਸੀਂ ਇਨ੍ਹਾਂ ਇਮਾਰਤਾਂ ਨੂੰ ਬਾਹਰੋਂ ਦੇਖਿਆ ਅਤੇ ਕੁਝ ਦੇਰ ਓਪਨ ਏਅਰ ਥੀਏਟਰ ਵਿਚ ਬੈਠ ਕੇ ਵਾਪਸ ਪਰਤ ਆਏ। ਬੜਾ ਮਹਿਸੂਸ ਹੋਇਆ। ਇਸ ਤਰ੍ਹਾਂ ਇਹ ਪ੍ਰਾਜੈਕਟ ਹਾਲੇ ਅਧੂਰਾ ਹੀ ਪਿਆ ਹੈ। ਲੋੜ ਹੈ ਇਸ ਯਾਦਗਾਰ ਨੂੰ ਠੀਕ ਤਰੀਕੇ ਨਾਲ ਚਲਾਉਣ ਦੀ, ਨਹੀਂ ਤਾਂ ਕਰ ਦਾਤਿਆਂ ਦਾ ਲੱਗਿਆ ਇਹ ਪੈਸਾ ਬੇਕਾਰ ਚਲਾ ਜਾਵੇਗਾ।


 
-ਬਿੱਕਰ ਸਿੰਘ ਸਿੱਧੂ
ਸਾਬਕਾ ਪ੍ਰੋਫ਼ੈਸਰ ਪੀ. ਏ. ਯੂ. ਲੁਧਿਆਣਾ।


ਦਿੱਲੀ ਸਿੱਖ ਗੁਰਦੁਆਰਾ ਚੋਣਾਂ
ਰਾਜਧਾਨੀ ਦਿੱਲੀ ਦੇ ਗੁਰਦੁਆਰਿਆਂ ਦੀ ਸਾਂਭ-ਸੰਭਾਲ ਕਰਨ ਵਾਲੀ ਸੰਸਥਾ ਦਿੱਲੀ ਸਿੱਖ ਗੁਰਦੁਆਰਾ ਮੈਨੇਜਮੈਂਟ ਦੀਆਂ ਚੋਣਾਂ ਆ ਰਹੀਆਂ ਹਨ। 4 ਸਾਲਾਂ ਬਾਅਦ ਹੋਣ ਵਾਲੀਆਂ ਇਹ ਚੋਣਾਂ 26 ਫਰਵਰੀ ਨੂੰ ਹੋਣਗੀਆਂ। ਇਕ ਪਾਸੇ ਜਿਥੇ ਕਮੇਟੀ ਦੇ ਮੌਜੂਦਾ ਪ੍ਰਧਾਨ ਤੇ ਸ਼੍ਰੋਮਣੀ ਅਕਾਲੀ ਦਲ (ਬਾਦਲ) ਦਿੱਲੀ ਇਕਾਈ ਦੇ ਮਨਜੀਤ ਸਿੰਘ ਜੀ. ਕੇ. ਚੋਣ ਮੈਦਾਨ ਵਿਚ ਹਨ, ਉਥੇ ਦੂਜੇ ਪਾਸੇ ਸਰਨਾ ਧੜਾ ਸਣੇ ਪੰਥਕ ਸੇਵਾ ਦਲ ਵੀ ਮੈਦਾਨ 'ਚ ਹੈ। 1971 'ਚ ਦੇਸ਼ ਦੀ ਕੇਂਦਰ ਸਰਕਾਰ ਦੇ ਦਖ਼ਲ ਤੋਂ ਬਾਅਦ ਇਕ ਆਰਡੀਨੈਂਸ ਜ਼ਰੀਏ 5 ਮੈਂਬਰੀ ਗੁਰਦੁਆਰਾ ਬੋਰਡ ਦਾ ਗਠਨ ਕੀਤਾ ਗਿਆ ਸੀ ਤੇ 1974 'ਚ ਪਹਿਲੀ ਵਾਰ ਦਿੱਲੀ ਚੋਣਾਂ ਹੋਈਆਂ, ਜਿਸ ਤੋਂ ਬਾਅਦ ਸਿੱਖ ਵੋਟਾਂ ਨਾਲ ਦਿੱਲੀ ਸਿੱਖ ਮੈਨੇਜਮੈਂਟ ਕਮੇਟੀ ਹੋਂਦ 'ਚ ਆਈ। ਡੀ.ਐਸ.ਜੀ.ਐਮ. ਸੀ. ਅਧੀਨ 14 ਗੁਰਦੁਆਰਿਆਂ ਦਾ ਪ੍ਰਬੰਧ ਹੈ। ਇਸ ਦੇ ਗੁਰਦੁਆਰਾ ਸਾਹਿਬਾਨ ਦੀ ਸੇਵਾ ਸੰਭਾਲ, ਸਿੱਖ ਰਵਾਇਤਾਂ, ਸਿੱਖ ਸੱਭਿਆਚਾਰ ਲਈ ਉਪਰਾਲੇ, ਸਿੱਖ ਧਰਮ ਦਾ ਪ੍ਰਸਾਰ ਤੇ ਪ੍ਰਚਾਰ ਸਣੇ ਕਈ ਅਹਿਮ ਕਾਰਜ ਹਨ। ਦਿੱਲੀ ਕਮੇਟੀ 'ਚ ਕੁੱਲ 55 ਮੈਂਬਰ ਹੁੰਦੇ ਹਨ, ਜਿਨ੍ਹਾਂ 'ਚੋਂ 46 ਮੈਂਬਰਾਂ ਦੀ ਚੋਣ ਸਿੱਖ ਵੋਟਰਾਂ ਵੱਲੋਂ ਕੀਤੀ ਜਾਂਦੀ ਹੈ ਤੇ ਬਾਕੀ 9 ਮੈਂਬਰ ਉੱਚ ਪੱਧਰੀ ਕਮੇਟੀ, ਸਿੱਖ ਸਭਾਵਾਂ ਤੇ ਤਖ਼ਤ ਸਾਹਿਬਾਨ ਵੱਲੋਂ ਨਾਮਜ਼ਦ ਹੁੰਦੇ ਹਨ। ਮੁਫ਼ਤ ਲੰਗਰ ਦੀ ਸੇਵਾ, ਫ੍ਰੀ ਡਿਸਪੈਂਸਰੀਆਂ ਤੇ ਸਮਾਜਿਕ ਤੇ ਧਾਰਮਿਕ ਸੇਵਾ ਲਈ ਉਪਰਾਲੇ ਕਰਨ ਵਾਲੀ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਚੋਣਾਂ 'ਚ ਇਸ ਵਾਰ ਸਿੱਖ ਸੰਗਤ ਕਿਸ ਦੇ ਹੱਕ 'ਚ ਫ਼ਤਵਾ ਦਿੰਦੀ ਹੈ, ਇਹ ਆਉਣ ਵਾਲਾ ਸਮਾਂ ਹੀ ਦੱਸੇਗਾ ਪਰ ਦਿੱਲੀ ਕਮੇਟੀ ਵੱਲੋਂ ਸਮੇਂ-ਸਮੇਂ 'ਤੇ ਕੀਤੇ ਜਾਣ ਵਾਲੇ ਉਪਰਾਲੇ ਕਾਫ਼ੀ ਸ਼ਲਾਘਾਯੋਗ ਹਨ।


-ਰਾਹੁਲ ਸ਼ਰਮਾ
ਖੰਨਾ। ਮੋ: 82853-80006.

14/2/2017

 ਵੋਟਾਂ ਤੋਂ ਬਾਅਦ
ਪੰਜਾਬ ਵਿਚ ਵਿਧਾਨ ਸਭਾ ਦੀਆਂ ਵੋਟਾਂ ਅਮਨ-ਅਮਾਨ ਨਾਲ ਨੇਪਰੇ ਚੜ੍ਹ ਗਈਆਂ। ਇਹ ਪੰਜਾਬ ਲਈ ਅਤੇ ਲੋਕਤੰਤਰ ਲਈ ਸ਼ੁੱਭ ਸ਼ਗਨ ਵਾਂਗ ਹੀ ਹੈ। ਇਸ ਵਾਰ ਇਹ ਮੁਕਾਬਲਾ ਦੋ ਧਿਰੀ ਦੀ ਬਜਾਏ ਤਿਕੋਣਾ ਸੀ, ਇਸ ਲਈ ਇਹ ਬਹੁਤ ਹੀ ਤਕੜਾ ਤੇ ਰੌਚਕ ਦੰਗਲ ਸੀ। ਪਰ ਚੋਣਾਂ ਤੋਂ ਬਾਅਦ ਕੁਝ ਥਾਵਾਂ 'ਤੇ ਹਿੰਸਾ ਹੋਈ ਜੋ ਕਿ ਬਹੁਤ ਹੀ ਨਿੰਦਾਯੋਗ ਤੇ ਚਿੰਤਾਯੋਗ ਹੈ। ਜੋ ਚੋਣਾਂ ਬਿਲਕੁਲ ਸ਼ਾਂਤੀਪੂਰਵਕ ਹੋ ਗਈਆਂ ਸਨ, ਉਸ ਚੰਗੇ ਕਾਰਜ ਨੂੰ ਕੁਝ ਲੋਕ ਆਪਣੀ ਝੂਠੀ ਸਿਆਸੀ ਇੱਛਾ ਦੇ ਬਲ 'ਤੇ ਕਲੰਕਿਤ ਕਰਨਾ ਚਾਹੁੰਦੇ ਹਨ, ਜਦ ਕਿ ਲੋਕਾਂ ਨੇ ਜੋ ਵੀ ਆਪਣਾ ਮਨ ਬਣਾ ਕੇ ਫ਼ੈਸਲਾ ਕੀਤਾ ਹੈ, ਉਹ ਸਾਹਮਣੇ ਆ ਹੀ ਜਾਵੇਗਾ। ਇਸ ਲਈ ਕਿਸੇ ਨਾਲ ਵੀ ਜਾਤੀ ਰੰਜਿਸ਼ ਕੱਢਣੀ ਜਾਂ ਆਪਣੀ ਹੈਂਕੜ ਜ਼ਾਹਰ ਕਰਨੀ ਕਿਸੇ ਵੀ ਤਰ੍ਹਾਂ ਲੋਕਤੰਤਰੀ ਤਰੀਕਾ ਨਹੀਂ। ਬੱਸ ਭਵਿੱਖ ਵਿਚ ਆਉਣ ਵਾਲੇ ਨਤੀਜੇ ਦੀ ਉਡੀਕ ਕਰਨੀ ਚਾਹੀਦੀ ਹੈ ਅਤੇ ਆਏ ਨਤੀਜੇ ਨੂੰ ਕਬੂਲ ਕਰਨਾ ਹੀ ਆਪਣੇ ਅਤੇ ਪੰਜਾਬ ਦੇ ਹਿਤ ਵਿਚ ਹੋਵੇਗਾ।

-ਵਿਵੇਕ
ਮਾਨਵਤਾ ਭਵਨ, ਕੋਟ ਈਸੇ ਖਾਂ (ਮੋਗਾ)।

ਬੇਟੀ ਬਚਾਓ ਬੇਟੀ ਪੜ੍ਹਾਓ
ਕਿਸੇ ਵੀ ਸਮਾਜ ਜਾਂ ਦੇਸ਼ ਦੀ ਤਰੱਕੀ ਵਿਚ ਔਰਤਾਂ ਦਾ ਮਰਦਾਂ ਦੇ ਬਰਾਬਰ ਦਾ ਯੋਗਦਾਨ ਹੁੰਦਾ ਹੈ। ਔਰਤਾਂ ਨੇ ਹਰ ਖੇਤਰ ਵਿਚ ਅਹਿਮ ਯੋਗਦਾਨ ਪਾਇਆ ਹੈ। ਪਰ ਅੱਜ ਵੀ ਸਾਡੇ ਸਮਾਜ ਵਿਚ ਕੁੜੀਆਂ ਦੇ ਜਨਮ ਨੂੰ ਬੋਝ ਸਮਝਿਆ ਜਾਂਦਾ ਹੈ ਤੇ ਉਨ੍ਹਾਂ ਨੂੰ ਜ਼ਿਆਦਾ ਪੜ੍ਹਾਉਣਾ ਲਿਖਾਉਣਾ ਚੰਗਾ ਨਹੀਂ ਸਮਝਿਆ ਜਾਂਦਾ। ਮਾਸੂਮ ਬੱਚੀਆਂ ਨਾਲ ਹੋ ਰਹੇ ਬਲਾਤਕਾਰ ਤੇ ਜਨਮ ਤੋਂ ਪਹਿਲਾਂ ਮਾਰ ਦੇਣ ਦੀਆਂ ਘਟਨਾਵਾਂ ਨੇ ਸਾਡੇ ਦੇਸ਼ ਨੂੰ ਸ਼ਰਮਸਾਰ ਕੀਤਾ ਹੈ। ਸਰਕਾਰ ਨੂੰ ਇਸ ਅੱਤਿਆਚਾਰ ਨੂੰ ਰੋਕਣ ਲਈ ਸਖ਼ਤ ਕਦਮ ਚੁੱਕਣੇ ਚਾਹੀਦੇ ਹਨ। ਮਾਪਿਆਂ ਨੂੰ ਵੀ ਚਾਹੀਦਾ ਹੈ ਕਿ ਆਪਣੀਆਂ ਲੜਕੀਆਂ ਨੂੰ ਲੜਕਿਆਂ ਵਾਂਗ ਬਰਾਬਰ ਦਾ ਹੱਕ ਦੇਣ ਤੇ ਉਚੇਰੀ ਸਿੱਖਿਆ ਹਾਸਲ ਕਰਨ ਦੇ ਮੌਕੇ ਪ੍ਰਦਾਨ ਕਰਨ। ਬੇਟੀਆਂ ਨੂੰ ਵੀ ਚਾਹੀਦਾ ਹੈ ਕਿ ਉਹ ਆਪਣੇ ਮਾਤਾ ਪਿਤਾ ਦਾ ਨਾਂਅ ਰੌਸ਼ਨ ਕਰਨ। ਇਸ ਸਮੇਂ ਲੜਕਿਆਂ ਦੇ ਮੁਕਾਬਲੇ ਲੜਕੀਆਂ ਦੀ ਘਟ ਰਹੀ ਗਿਣਤੀ ਚਿੰਤਾ ਦਾ ਵਿਸ਼ਾ ਬਣੀ ਹੋਈ ਹੈ, ਜਿਸ ਕਾਰਨ ਆਉਣ ਵਾਲੇ ਸਮੇਂ ਸਾਨੂੰ ਭੂਆ, ਮਾਸੀਆਂ ਤੇ ਭੈਣਾਂ ਵੀ ਨਹੀਂ ਲੱਭਣੀਆਂ। ਆਓ! ਕੁੜੀਆਂ ਨੂੰ ਸੰਸਾਰ ਵਿਚ ਜਨਮ ਲੈਣ ਦਾ ਮੌਕਾ ਦਈਏ ਤੇ ਕੁੜੀਆਂ ਦੇ ਜਨਮ 'ਤੇ ਵੀ ਮੁੰਡਿਆਂ ਵਾਂਗ ਲੱਡੂ ਵੰਡੀਏ ਤੇ ਲੋਹੜੀ ਮਨਾਈਏ ਤਾਂ ਕਿ ਆਉਣ ਵਾਲੇ ਸਮੇਂ ਇਕ ਹੋਰ ਲੜਕੀ ਕਲਪਨਾ ਚਾਵਲਾ ਵਾਂਗ ਉੱਚੀਆਂ ਬੁਲੰਦੀਆਂ ਨੂੰ ਹਾਸਲ ਕਰ ਸਕੇ।

-ਸ਼ਮਸ਼ੇਰ ਸਿੰਘ ਸੋਹੀ
ਪਿੰਡ ਸੋਹੀਆਂ, ਡਾਕ: ਚੀਮਾ ਖੁੱਡੀ, ਤਹਿ: ਬਟਾਲਾ, ਜ਼ਿਲ੍ਹਾ ਗੁਰਦਾਸਪੁਰ।

ਮਾਤ ਭਾਸ਼ਾ ਦੀ ਅਹਿਮੀਅਤ
ਹਰੇਕ ਵਿਅਕਤੀ ਆਪਣੀ ਮਾਤ ਭਾਸ਼ਾ ਦੇ ਸਹਾਰੇ ਹੀ ਆਪਣੇ ਮਨੋਭਾਵਾਂ ਦੀ ਅਭਿਵਿਅਕਤੀ ਕਰਦਾ ਹੈ ਪ੍ਰੰਤੂ ਉਮਰ ਤੇ ਸਰੀਰਕ ਬੁੱਧੀ ਦੇ ਵਿਕਾਸ ਨਾਲ ਕਈ ਵਾਰ ਮਾਤ ਭਾਸ਼ਾ ਉਸ ਦੀ ਜ਼ਿੰਦਗੀ ਵਿਚੋਂ ਮਨਫ਼ੀ ਹੋਣ ਦੇ ਪੱਧਰ 'ਤੇ ਪਹੁੰਚ ਜਾਂਦੀ ਹੈ ਜੋ ਕਿ ਬਹੁਤ ਹੀ ਮਾੜੀ ਗੱਲ ਹੈ। ਅਜੋਕੇ ਸਮੇਂ ਮਾਂ-ਬਾਪ ਬੱਚਿਆਂ ਨੂੰ ਅੰਗਰੇਜ਼ੀ ਮਾਧਿਅਮ ਸਕੂਲਾਂ ਵਿਚ ਪੜ੍ਹਾਉਣਾ ਪਸੰਦ ਕਰਦੇ ਹਨ। ਪ੍ਰੰਤੂ ਸਿੱਖਿਆ ਸ਼ਾਸਤਰੀ ਵੀ ਇਸ ਗੱਲ ਨੂੰ ਮੰਨਦੇ ਹਨ ਕਿ ਮਾਤ ਭਾਸ਼ਾ ਰਾਹੀਂ ਹੀ ਵਿਦੇਸ਼ੀ ਭਾਸ਼ਾ ਸਿੱਖੀ ਜਾ ਸਕਦੀ ਹੈ। ਮਾਤ ਭਾਸ਼ਾ ਦੀ ਕੀ ਅਹਿਮੀਅਤ ਹੈ, ਤੁਸੀਂ ਦੱਖਣ ਭਾਰਤ ਦੇ ਲੋਕਾਂ ਤੋਂ ਪੁੱਛੋ। ਪੰਜਾਬੀ ਬੋਲਦੇ ਪਰਿਵਾਰਾਂ ਦੇ ਬੱਚਿਆਂ ਦਾ ਹੋਰਨਾਂ ਭਾਸ਼ਾਵਾਂ ਦਾ ਘਰ ਵਿਚ ਪ੍ਰਯੋਗ ਮਾਂ-ਬੋਲੀ ਪੰਜਾਬੀ ਨੂੰ ਆਉਣ ਵਾਲੇ ਸਮੇਂ ਦੇ ਖ਼ਤਰਿਆਂ ਬਾਰੇ ਸੰਕੇਤ ਕਰਦਾ ਹੈ। ਕੋਈ ਵੀ ਭਾਸ਼ਾ ਮਾੜੀ ਨਹੀਂ, ਪ੍ਰੰਤੂ ਅਸੀਂ ਖ਼ੁਦ ਦੀ ਮਾਂ ਬੋਲੀ ਤੋਂ ਉਪਰਾਮ ਨਹੀਂ ਹੋ ਸਕਦੇ। ਪੰਜਾਬੀ ਭਾਸ਼ਾ ਨੂੰ ਚੋਣਵਾਂ ਵਿਸ਼ਾ ਰੱਖ ਕੇ ਬਹੁਤ ਸਾਰੇ ਲੋਕ ਆਈ.ਏ.ਐਸ., ਪੀ.ਸੀ.ਐਸ. ਅਫ਼ਸਰ ਬਣੇ ਹਨ। ਸੋ, ਲੋੜ ਹੈ ਕਿ ਪੰਜਾਬੀ ਭਾਸ਼ਾ ਨੂੰ ਭਵਿੱਖੀ ਖ਼ਤਰਿਆਂ ਤੋਂ ਬਚਾਇਆ ਜਾਵੇ।

-ਮਾ: ਮਨਦੀਪ ਸਿਵੀਆ
ਪਿੰਡ ਤੇ ਡਾਕ: ਜੌੜਕੀ ਅੰਧੇਵਾਲੀ, ਜ਼ਿਲ੍ਹਾ ਫਾਜ਼ਿਲਕਾ।

13/2/2017

 ਕੰਧ ਬੋਲਦੀ ਹੈ
ਨਵੰਬਰ, 1984 ਵਿਚ ਬੇਗੁਨਾਹ ਸਿੱਖਾਂ ਦਾ ਗਿਣੀ-ਮਿੱਥੀ ਯੋਜਨਾ ਦੁਆਰਾ ਸਮੇਂ ਦੀ ਹਕੂਮਤ ਨੇ ਕਤਲ-ਏ-ਆਮ ਕਰਵਾਇਆ ਸੀ। ਉਨ੍ਹਾਂ ਸ਼ਹੀਦਾਂ ਦੀ ਯਾਦਗਾਰ 'ਸੱਚ ਦੀ ਕੰਧ' ਦਿੱਲੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਤੇ ਸੰਗਤਾਂ ਵੱਲੋਂ ਉਸਾਰੀ ਗਈ ਹੈ। ਦਿੱਲੀ ਅਤੇ ਹੋਰ ਥਾਈਂ ਵੱਡੀ ਪੱਧਰ 'ਤੇ ਕਤਲੋ-ਗਾਰਤ ਹੋਈ, ਉਸ ਦਾ ਸੰਸਦ ਵਿਚ ਕਿਸੇ ਨੇ ਆਹ ਦਾ ਨਾਅਰਾ ਵੀ ਨਹੀਂ ਮਾਰਿਆ। ਕੋਈ ਅਤਿ ਭ੍ਰਿਸ਼ਟ ਲੀਡਰ ਮਰ ਜਾਵੇ, ਸੰਸਦ ਵਿਚ ਮੋਨ ਰੱਖਿਆ ਜਾਂਦਾ ਹੈ, ਸੈਸ਼ਨ ਉਠਾ ਦਿੱਤਾ ਜਾਂਦਾ ਹੈ, ਝੰਡੇ ਨੀਵੇਂ ਹੋ ਜਾਂਦੇ ਹਨ ਤੇ ਕਈ ਦਿਨ ਸੋਗ ਮਨਾਇਆ ਜਾਂਦਾ ਹੈ। ਯਾਦਗਾਰ ਬਣਾ ਕੇ ਪੂਜਾ ਕੀਤੀ ਜਾਂਦੀ ਹੈ। ਜਿੰਨੇ ਵੱਡੇ ਘਪਲੇ ਕੀਤੇ ਹੋਣ ਉਸੇ ਹਿਸਾਬ ਨਾਲ ਵੱਡਾ ਖ਼ਿਤਾਬ ਦਿੱਤਾ ਜਾਂਦਾ ਹੈ।
ਸਿੱਖ ਸ਼ਹੀਦਾਂ ਦਾ ਸਮਾਰਕ ਬਣਾਉਣ ਵਿਚ ਹੁਣ ਤੱਕ ਅੜਚਨਾਂ ਹੀ ਪੈਂਦੀਆਂ ਰਹੀਆਂ ਹਨ। ਅਫਸੋਸ! ਕਈ ਸਿੱਖ ਅਖੌਤੀ ਆਗੂ ਵੀ ਵਿਰੋਧ ਕਰਦੇ ਰਹੇ ਸਨ। ਸਿੱਖ ਨਸਲਕੁਸ਼ੀ ਦੀ ਘਿਨਾਉਣੀ ਕਾਰਵਾਈ ਦੀ ਗਾਥਾ ਇਹ ਕੰਧ ਪੁਕਾਰ-ਪੁਕਾਰ ਕੇ ਬਿਆਨ ਕਰ ਰਹੀ ਹੈ। ਜਾਗਦੀ ਜ਼ਮੀਰ ਵਾਲੇ ਹਿੰਦੂ, ਮੁਸਲਮਾਨ, ਈਸਾਈ ਤੇ ਹੋਰ ਲੋਕ ਜਿਨ੍ਹਾਂ ਨੇ ਮਜ਼ਲੂਮਾਂ ਦੀ ਰੱਖਿਆ ਕੀਤੀ, ਨੂੰ ਇਹ ਕੰਧ ਅਮਰ ਬਣਾ ਰਹੀ ਹੈ। ਸਿੱਖ ਭਾਈਚਾਰਾ ਜ਼ਰੂਰ ਵਿਚਾਰ ਕਰੇ।
ਸਿੱਖ ਕੌਮ ਨੂੰ ਜਿਨ੍ਹਾਂ ਨੇ ਰੋਲਿਆ ਸੀ,
ਕਿਉਂਕਰ ਉਨ੍ਹਾਂ ਦੇ ਪੈਰਾਂ ਵਿਚ ਰੁਲ ਗਏ ਹਾਂ।
ਕੀ ਅਸੀਂ ਚਰਾਸੀ ਦੇ ਕਾਰਨਾਮੇ,
ਬਸ ਬੱਤੀਆਂ ਸਾਲਾਂ ਵਿਚ ਭੁੱਲ ਗਏ ਹਾਂ।


-ਮਾ: ਮਹਿੰਦਰ ਸਿੰਘ ਸਿੱਧੂ
ਸਿੱਧਵਾਂ ਕਲਾਂ, ਜ਼ਿਲ੍ਹਾ ਲੁਧਿਆਣਾ। ਮੋਬਾਈਲ : 98720-86101.

08/02/2017

 ਖ਼ਰੀਆਂ-ਖ਼ਰੀਆਂ
'ਪੰਜਾਬੀ ਗਾਇਕੀ ਦੇ ਨਾਂਅ 'ਤੇ ਕੂੜ ਕਬਾੜ ਪੇਸ਼ ਕਰਦੇ ਰਹੇ 2016 'ਚ ਬਹੁਤੇ ਗਾਇਕ' ਸਿਰਲੇਖ ਹੇਠ 'ਖ਼ਰੀਆਂ-ਖ਼ਰੀਆਂ' ਸਤੰਭ ਵਿਚ ਸ: ਸਵਰਨ ਸਿੰਘ ਟਹਿਣਾ ਦਾ ਲੇਖ ਹਰ ਵਾਰ ਦੀ ਤਰ੍ਹਾਂ 'ਮਾੜੀ ਗਾਇਕੀ ਤੇ ਗੀਤਕਾਰੀ' ਜੋ ਪੰਜਾਬ ਵਿਚ ਘਾਤਕ ਹੱਦ ਤੱਕ ਸਮੱਸਿਆ ਬਣ ਚੁੱਕੀ ਹੈ, ਪ੍ਰਤੀ ਜਾਗ੍ਰਿਤ ਕਰਨ ਲਈ ਸ਼ਾਨਦਾਰ ਉੱਦਮ ਹੈ। ਅਜਿਹੇ ਲੇਖ ਅਤੇ ਲੇਖਕ ਦੀ ਤਾਰੀਫ ਕਰਨਾ ਬਣਦਾ ਹੈ। ਗੀਤਕਾਰੀ ਦੇ ਨਾਂਅ 'ਤੇ ਸੱਭਿਆਚਾਰਕ ਪ੍ਰਦੂਸ਼ਣ ਫੈਲਾਉਣ ਵਾਲੇ ਗਾਇਕ ਅਤੇ ਗੀਤਕਾਰ ਸਮਾਜ ਦੇ ਦੁਸ਼ਮਣ ਹਨ। ਅੱਜ ਬਹੁਤ ਸਾਰੇ ਟੀ. ਵੀ. ਚੈਨਲਾਂ 'ਤੇ ਜੋ ਗੀਤ ਚੱਲ ਰਹੇ ਹਨ, ਉਹ ਪਰਿਵਾਰਕ ਸਰੋਤਿਆਂ ਨੂੰ ਨਾ ਸਿਰਫ਼ ਸ਼ਰਮਸਾਰ ਤੇ ਬੇਚੈਨ ਕਰਦੇ ਹਨ ਬਲਕਿ ਅਕਲ ਦਾ ਜਨਾਜ਼ਾ ਕੱਢ ਚੁੱਕੇ ਕਲਾਕਾਰਾਂ 'ਤੇ ਤਰਸ ਵੀ ਪੈਦਾ ਕਰਦੇ ਹਨ। ਸਮਝ ਨਹੀਂ ਆਉਂਦੀ ਅਜਿਹੇ ਗਾਇਕ ਜਦੋਂ ਘਰ ਵਿਚ ਬੈਠ ਕੇ ਆਪਣੇ ਤਾਹਨੇ ਮਿਹਣੇ, ਗਾਲ੍ਹਾਂ ਤੇ ਨੰਗੇਜ਼ ਭਰਪੂਰ ਗੀਤ ਸੁਣਦੇ ਹੋਣਗੇ ਤਾਂ ਉਨ੍ਹਾਂ ਨੂੰ ਕਿੰਨੀ ਕੁ ਮਾਨਸਿਕ ਸ਼ਾਂਤੀ ਤੇ ਸਕੂਨ ਮਿਲਦਾ ਹੋਵੇਗਾ। ਇਸ ਸ਼ੋਰ-ਸ਼ਰਾਬੇ ਵਾਲੇ ਸੰਗੀਤ ਨੇ ਸਮਾਜ ਵਿਚ ਸਹਿਣਸ਼ੀਲਤਾ, ਨੈਤਿਕਤਾ ਤੇ ਇਕਾਗਰਤਾ ਨੂੰ ਸਰੋਤਿਆਂ ਦੇ ਮਨਾਂ 'ਚੋਂ ਕੱਢ ਕੇ ਹੈਂਕੜ, ਇਸ਼ਕ-ਮਿਜ਼ਾਜੀ ਅਤੇ ਅਸ਼ਾਂਤੀ ਨਾਲ ਭਰ ਦਿੱਤਾ ਹੈ। ਪੰਜਾਬੀਆਂ ਦੀ ਉੱਚੀ ਹੇਕ, ਸਾਧਨਾ, ਮਿਠਾਸ ਭਰੀ ਗਾਇਕੀ ਵਿਸ਼ਵ ਪ੍ਰਸਿੱਧ ਹੈ। ਅਨੇਕਾਂ ਉੱਚ ਦਰਜੇ ਦੇ ਗਾਇਕਾਂ ਤੇ ਗੀਤਕਾਰਾਂ ਦਾ ਆਪਣਾ ਇਤਿਹਾਸ ਹੈ, ਜਿਨ੍ਹਾਂ 'ਤੇ ਪੰਜਾਬੀਆਂ ਨੂੰ ਸਦਾ ਮਾਣ ਰਹੇਗਾ। ਅੱਜ ਦੀ ਕੁਰਾਹੇ ਪਈ ਗਾਇਕੀ ਨੂੰ ਆਪਣੇ ਇਤਿਹਾਸ ਤੋਂ ਸੇਧ ਲੈਣੀ ਚਾਹੀਦੀ ਹੈ।


-ਬਿਸ਼ੰਬਰ ਸਾਮਾ,
ਪਿੰਡ ਤੇ ਡਾਕ: ਖੂਈਆਂ ਸਰਵਰ, ਤਹਿਸੀਲ ਅਬੋਹਰ, ਜ਼ਿਲ੍ਹਾ ਫਾਜ਼ਿਲਕਾ।


ਮਹਿੰਗਾਈ ਦੀ ਮਾਰ

ਮਹਿੰਗਾਈ ਇਕ ਅਜਿਹੀ ਚੀਜ਼ ਹੈ, ਜੋ ਅਮਰਵੇਦ ਵਾਂਗੂੰ ਵਧਦੀ ਹੀ ਜਾ ਰਹੀ ਹੈ। ਮੈਂ ਇਸ ਵਿਚ ਜ਼ਿਆਦਾਤਰ ਗੈਸ ਦੇ ਸਿਲੰਡਰ ਦੀ ਗੱਲ ਕਰ ਰਿਹਾ ਹਾਂ। ਦੇਖ ੋਜਦੋਂ ਵੀ ਪੈਟਰੋਲ, ਡੀਜ਼ਲ ਦੀ ਕੀਮਤ ਵਧਦੀ ਹੈ, ਕਦੇ ਪੈਟਰੋਲ 2 ਰੁਪਏ ਮਹਿੰਗਾ, ਡੀਜ਼ਲ 1.50 ਰੁਪਏ ਮਹਿੰਗਾ। 10/15 ਦਿਨਾਂ ਜਾਂ ਇਕ ਮਹੀਨੇ ਬਾਅਦ ਫਿਰ ਇਨ੍ਹਾਂ ਦੋਹਾਂ ਦਾ ਰੇਟ ਘੱਟ ਜਾਂਦਾ ਹੈ। ਯਾਨੀ 70 ਰੁਪਏ ਦੇ ਲਾਗੇ-ਚਾਗੇ, ਪੈਟਰੋਲ ਅਤੇ ਡੀਜ਼ਲ 55-56 ਰੁਪਏ ਰਹਿੰਦਾ ਹੈ।
ਪਰ ਗੈਸ ਦੀ ਕੀਮਤ ਜੋ ਵਧਦੀ ਹੈ, ਇਹ ਵੀ 5/10 ਰੁਪਏ ਤੱਕ ਹੀ ਵਧਣੀ/ਘਟਣੀ ਚਾਹੀਦੀ ਹੈ ਕਿਉਂਕਿ, ਇਹ ਇਕ ਅਜਿਹੀ ਸਾਂਝੀ ਚੀਜ਼ ਹੈ, ਜਿਸ ਨੂੰ ਹਰ ਗ਼ਰੀਬ/ਅਮੀਰ ਆਪਣੇ ਘਰ ਵਿਚ ਵਰਤ ਰਿਹਾ ਹੈ।
ਗੈਸ ਦੀ ਏਨੀ ਕੀਮਤ ਯਕਦਮ ਨਹੀਂ ਵਧਣੀ ਚਾਹੀਦੀ। ਇਹ ਗੈਸ ਸਿਲੰਡਰ ਅੱਜ ਤੋਂ 7/8 ਦਿਨ ਪਹਿਲਾਂ 583 ਰੁਪਏ ਤੱਕ ਵਿਕ ਰਿਹਾ ਸੀ, ਜਦ ਕਿ ਹੁਣ ਇਸ ਦੀ ਕੀਮਤ 640 ਰੁਪਏ ਕਰ ਦਿੱਤੀ ਗਈ ਹੈ। ਇਕੱਠਾ ਹੀ 57 ਰੁਪਏ ਸਿਲੰਡਰ ਪਿੱਛੇ ਰੇਟ ਵਧ ਜਾਣਾ ਮਾੜੀ ਗੱਲ ਹੈ। ਜੇਕਰ ਰੇਟ ਵਧਾਉਣਾ ਹੀ ਹੈ ਤਾਂ 5/10 ਰੁਪਏ ਵਧਣਾ ਚਾਹੀਦਾ ਹੈ। ਸੋ ਸਰਕਾਰ ਨੂੰ ਯਾਨੀ ਕੇਂਦਰ ਸਰਕਾਰ ਨੂੰ ਇਸ ਬਾਰੇ ਕੋਈ ਨਾ ਕੋਈ ਠੋਸ ਕਦਮ ਚੁੱਕਣਾ ਪੈਣਾ ਹੈ ਕਿਉਂਕਿ ਇਸ ਤਰ੍ਹਾਂ ਮਹਿੰਗਾਈ ਨਾਲ ਗ਼ਰੀਬ ਜ਼ਿਆਦਾ ਪਿਸਦਾ ਹੈ।


-ਹਰਜਿੰਦਰਪਾਲ ਸਿੰਘ ਬਾਜਵਾ
536, ਗਲੀ 5-ਬੀ, ਵਿਜੇ ਨਗਰ, ਹੁਸ਼ਿਆਰਪੁਰ।

7/2/2017

 ਸੋਨੇ ਦੀ ਚਿੜੀ

ਦੇਸ਼ ਦੇ ਦੁਸ਼ਮਣਾਂ ਨੇ ਦੇਸ਼ ਦੀ ਜਨਤਾ ਦੀ ਲੁੱਟ ਦੀ ਅੱਤ ਮਚਾ ਰੱਖੀ ਹੈ। ਜਨਤਾ ਨੂੰ ਲੁੱਟ ਕੇ ਦੇਸ਼ ਦੀ ਬਰਬਾਦੀ ਕਰਨ ਵਾਲੇ ਲੋਕ ਕਈ ਰੂਪਾਂ ਵਿਚ ਆਪਣਾ ਕੰਮ ਚਲਾ ਰਹੇ ਹਨ। ਸੰਤਰੀ ਤੋਂ ਮੰਤਰੀ ਤੱਕ ਭ੍ਰਿਸ਼ਟਾਚਾਰ ਫੈਲਿਆ ਹੋਇਆ ਹੈ। ਕਿਸੇ ਵੀ ਦਫ਼ਤਰ ਦਾ ਮੁਲਾਜ਼ਮ ਚਾਹ-ਪਾਣੀ ਲਏ ਬਿਨਾਂ ਕੰਮ ਨਹੀਂ ਕਰਦਾ। ਲਾਲਚੀ ਅਫ਼ਸਰਸ਼ਾਹੀ ਦੀ ਕਲਮ ਤਾਂ ਚਲਦੀ ਹੀ ਰਿਸ਼ਵਤ ਨਾਲ ਹੈ। ਭ੍ਰਿਸ਼ਟਾਚਾਰ ਦੇ ਖ਼ਾਤਮੇ ਲਈ ਮੈਦਾਨ ਵਿਚ ਜੂਝ ਰਹੀ ਵਧੀਆ ਵਿਅਕਤੀਆਂ ਦੀ ਟੋਲੀ ਦੀ ਪੁਕਾਰ ਕੋਈ ਸੁਣ ਕੇ ਰਾਜ਼ੀ ਨਹੀਂ ਹੈ। ਲੋਕਪਾਲ ਬਿੱਲ ਆਉਣ ਨਾਲ ਦੇਸ਼ ਦੀ ਬਰਬਾਦੀ ਹੋਣੋਂ ਰੁਕ ਸਕਦੀ ਹੈ ਪਰ ਦੇਸ਼ ਨੂੰ ਖੁਸ਼ਹਾਲ ਨਾ ਦੇਖਣ ਵਾਲਿਆਂ ਨੂੰ ਲੋਕਪਾਲ ਬਿੱਲ ਮਨਜ਼ੂਰ ਨਹੀਂ ਜਾਪਦਾ। ਵੱਡਿਆਂ-ਵੱਡਿਆਂ ਅਹੁਦਿਆਂ 'ਤੇ ਪਹੁੰਚ ਕੇ ਵੀ ਉਨ੍ਹਾਂ ਦੀ ਸੋਚ ਦੇਸ਼ ਪ੍ਰਤੀ ਅਨਪੜ੍ਹਾਂ ਜਿਹੀ ਹੈ। ਭ੍ਰਿਸ਼ਟਾਚਾਰ ਦੇ ਖ਼ਾਤਮੇ ਲਈ ਜੇਕਰ ਹਰ ਦੇਸ਼ ਵਾਸੀ ਅੰਨਾ ਜਿਹੀ ਸੋਚ ਲੈ ਕੇ ਤੁਰੇਗਾ ਤਾਂ ਉਹ ਦਿਨ ਦੂਰ ਨਹੀਂ ਜਦੋਂ ਭਾਰਤ ਖੁਸ਼ਹਾਲੀ ਦੇ ਰਸਤੇ ਪੈ ਜਾਵੇਗਾ। ਗੱਲਾਂ-ਗੱਲਾਂ ਵਿਚ ਦੇਸ਼ ਦੀ ਸੇਵਾ ਕਰਨ ਵਾਲਿਆਂ ਨੇ ਸੋਨੇ ਦੀ ਚਿੜੀ ਕਹਾਉਣ ਵਾਲੇ ਭਾਰਤ ਨੂੰ ਆਟੇ ਦੀ ਚਿੜੀ ਤੁਲ ਕਰਕੇ ਰੱਖ ਦਿੱਤਾ ਹੈ। ਗੁਰੂਆਂ, ਪੀਰਾਂ, ਭਗਤਾਂ ਅਤੇ ਸੂਰਮਿਆਂ ਦੀ ਇਸ ਧਰਤੀ ਦੀ ਕਦਰ ਪਾਉਣੀ ਹਰ ਭਾਰਤ ਵਾਸੀ ਦਾ ਪਹਿਲਾ ਫ਼ਰਜ਼ ਹੈ।

-ਸੁਖਵਿੰਦਰ ਕਲੇਰ ਬੱਸੀਆਂ
ਪਿੰਡ ਤੇ ਡਾਕ: ਬੱਸੀਆਂ, ਜ਼ਿਲ੍ਹਾ ਲੁਧਿਆਣਾ।

ਅਵਾਰਾ ਕੁੱਤਿਆਂ ਨੂੰ ਨਕੇਲ ਪਵੇ

ਅਕਸਰ ਹੀ ਮੀਡੀਆਂ ਦੀਆਂ ਸੁਰਖੀਆਂ ਬਣਿਆ ਰਹਿੰਦਾ ਹੈ ਅਵਾਰਾ ਕੁੱਤਿਆਂ ਵੱਲੋਂ ਮਨੁੱਖਤਾ 'ਤੇ ਵਰਤਾਇਆ ਜਾਂਦਾ ਕਹਿਰ। ਅਵਾਰਾ ਕੁੱਤਿਆਂ ਕਾਰਨ ਪੰਜਾਬ ਵਾਸੀ ਅੱਜ ਸਹਿਮ ਦੇ ਮਾਹੌਲ ਵਿਚ ਜੀਅ ਰਹੇ ਹਨ। ਪਿਛਲੇ ਥੋੜ੍ਹੇ ਸਮੇਂ ਵਿਚ ਹੀ ਇਨ੍ਹਾਂ ਅਵਾਰਾ ਕੁੱਤਿਆਂ ਨੇ ਕਈ ਨੌਜਵਾਨਾਂ, ਬਜ਼ੁਰਗਾਂ ਤੇ ਛੋਟੇ-ਛੋਟੇ ਮਾਸੂਮਾਂ ਨੂੰ ਨੋਚ-ਨੋਚ ਕੇ ਮਾਰ-ਮੁਕਾਇਆ ਹੈ। ਇਥੋਂ ਤੱਕ ਕਿ ਕਈ ਪਸ਼ੂ ਵੀ ਇਨ੍ਹਾਂ ਕੁੱਤਿਆਂ ਦਾ ਸ਼ਿਕਾਰ ਹੋ ਚੁੱਕੇ ਹਨ। ਇਕ ਸਮਾਂ ਹੁੰਦਾ ਸੀ ਜਦੋਂ ਇਨ੍ਹਾਂ ਕੁੱਤਿਆਂ ਨੂੰ ਸਿਰਫ ਹੱਡਾ ਰੋੜੀ ਵਿਚ ਹੀ ਦੇਖਿਆ ਜਾਂਦਾ ਸੀ ਪਰ ਅੱਜ ਇਹ ਹਰ ਪਿੰਡ ਦੀ ਹਰ ਗਲੀ ਵਿਚ 10-10 ਦੀ ਗਿਣਤੀ ਵਿਚ ਡੇਰੇ ਜਮਾਈ ਬੈਠੇ ਆਮ ਦੇਖੇ ਜਾ ਸਕਦੇ ਹਨ। ਜੋ ਕਿਸੇ ਵੀ ਸਮੇਂ ਕਹਿਰ ਢਾਅ ਸਕਦੇ ਹਨ। ਸਰਕਾਰ ਇਨ੍ਹਾਂ ਅਵਾਰਾ ਕੁੱਤਿਆਂ ਦੀ ਗਿਣਤੀ ਨੂੰ ਕੁਝ ਹੱਦ ਤੱਕ ਸੀਮਤ ਕਰਨ ਲਈ ਨਸਬੰਦੀ ਨੂੰ ਤੁਰੰਤ ਪਹਿਲ ਦੇਵੇ, ਤਾਂ ਕਿ ਲੋਕਾਂ ਵਿਚ ਬਣੇ ਸਹਿਮ ਦੇ ਮਾਹੌਲ ਨੂੰ ਘਟਾਇਆ ਜਾ ਸਕੇ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

ਖੁਸ਼ੀ ਬਨਾਮ ਮੁਸਕਰਾਹਟ

ਜਦੋਂ ਵੀ ਕੋਈ ਮੁਸਕਰਾਉਂਦਾ ਹੈ ਤਾਂ ਉਹ ਆਪਣੇ ਜੀਵਨ ਵਿਚ ਖੁਸ਼ੀਆਂ ਦਾ ਇਜ਼ਾਫ਼ਾ ਕਰਦਾ ਹੈ। ਖੁਸ਼ੀ ਦਾ ਦੂਸਰਾ ਨਾਂਅ ਹੀ ਜ਼ਿੰਦਗੀ ਹੈ। ਫੁੱਲਾਂ ਵਾਂਗੂੰ ਹਮੇਸ਼ਾ ਖਿੜੇ ਚਿਹਰੇ ਕਿਸ ਨੂੰ ਚੰਗੇ ਨਹੀਂ ਲਗਦੇ। ਸਗੋਂ ਅਜਿਹੇ ਚਿਹਰਿਆਂ ਨੂੰ ਤਾਂ ਹਰ ਕੋਈ ਪਸੰਦ ਕਰਦਾ ਹੈ। ਹਰ ਪਲ ਅਸੀਂ ਹੱਸਦੇ ਰਹੀਏ, ਇਹ ਵੀ ਸੰਭਵ ਨਹੀਂ ਪਰ ਹਰ ਪਲ ਅਸੀਂ ਦੁਖੀ ਅਤੇ ਮਸੋਸੇ ਰਹੀਏ, ਇਹ ਵੀ ਨਾਮੁਮਕਿਨ ਹੈ। ਜੇਕਰ ਅਸੀਂ ਆਪਣੀ ਜ਼ਿੰਦਗੀ ਵਿਚ ਖੁਸ਼ੀ ਨਾਂਅ ਦੀ ਚੀਜ਼ ਦਾ ਲੁਤਫ਼ ਲੈਣਾ ਹੈ ਤਾਂ ਸਾਨੂੰ ਦੁੱਖ ਵਿਚ ਜ਼ਿਆਦਾ ਦੁਖੀ ਨਹੀਂ ਹੋਣਾ ਚਾਹੀਦਾ। ਆਪਣੀ ਜ਼ਿੰਦਗੀ ਦਾ ਮਜ਼ਾ ਲਓ ਕਿ ਜੋ ਤੁਹਾਡੇ ਕੋਲ ਹੈ, ਉਹ ਹੀ ਤੁਹਾਡੀ ਸੰਤੁਸ਼ਟੀ ਲਈ ਕਾਫੀ ਹੈ। ਮੁਸਕਰਾਉਂਦੇ ਹੋਏ ਲੋਕ ਫੁੱਲਾਂ ਦੀ ਤਰ੍ਹਾਂ ਖੁਸ਼ਬੂ ਛੱਡਦੇ ਹਨ, ਆਪਣੇ ਅਤੇ ਦੂਸਰਿਆਂ ਦੇ ਗ਼ਮ, ਨਿਰਾਸ਼ਾ ਨੂੰ ਖ਼ਤਮ ਕਰਦੇ ਹਨ। ਗ਼ਮ, ਦੁੱਖ, ਮੁਸੀਬਤ ਦਾ ਬੋਝ ਤਿਆਗ ਕੇ ਖੁਸ਼ੀਆਂ ਨੂੰ ਖਿੜੇ ਮੱਥੇ ਸਵੀਕਾਰ ਕਰਨਾ ਚਾਹੀਦਾ ਹੈ।

-ਰਾਜਵੰਤ ਸਿੰਘ ਰਾਜੂ
ਗੁਰੂ ਨਾਨਕ ਆਟੋ ਸਪੇਅਰਜ਼, ਰਾਏਕੋਟ।

6/2/2017

 ਪੰਜਾਬੀ ਮਾਂ-ਬੋਲੀ ਦਾ ਘਟ ਰਿਹਾ ਮਹੱਤਵ
ਮਾਂ-ਬੋਲੀ ਤੋਂ ਭਾਵ ਉਹ ਬੋਲੀ ਜੋ ਕਿ ਇਕ ਬੱਚੇ ਨੂੰ ਆਪਣੀ ਮਾਂ ਦੇ ਦੁੱਧ ਨਾਲ ਹੀ ਵਿਰਸੇ ਵਿਚ ਮਿਲਦੀ ਹੈ। ਮਾਂ-ਬੋਲੀ ਵਿਚ ਹੀ ਮਾਂ ਆਪਣੇ ਬੱਚੇ ਨੂੰ ਲੋਰੀਆਂ ਸੁਣਾਉਂਦੀ ਹੈ। ਮਾਂ-ਬੋਲੀ ਨੂੰ ਸਿੱਖਣ ਲਈ ਕੋਈ ਵਿਸ਼ੇਸ਼ ਕੋਸ਼ਿਸ਼ ਨਹੀਂ ਕਰਨੀ ਪੈਂਦੀ ਕਿਉਂਕਿ ਇਹ ਤਾਂ ਸਾਡੇ ਅੰਦਰ ਧੜਕਦੇ ਦਿਲ ਦੀ ਭਾਸ਼ਾ ਹੈ, ਪਰ ਅੱਜ ਸਾਡੀ ਮਾਂ-ਬੋਲੀ ਦੀ ਹਾਲਤ ਏਨੀ ਤਰਸਯੋਗ ਹੈ ਕਿ ਇਹ ਆਪਣੇ ਘਰੋਂ ਹੀ ਬੇਗਾਨੀ ਹੋ ਚੁੱਕੀ ਹੈ। ਅੱਜ ਪੰਜਾਬੀਆਂ ਨੂੰ ਪੰਜਾਬੀ ਪੜ੍ਹਨ, ਪੰਜਾਬੀ ਬੋਲਣ ਵਿਚ ਸ਼ਰਮ ਮਹਿਸੂਸ ਹੁੰਦੀ ਹੈ। ਸਕੂਲ, ਕਾਲਜ, ਦਫਤਰ ਕਿਸੇ ਵੀ ਜਗ੍ਹਾ ਚਲੇ ਜਾਓ, ਹਰ ਥਾਂ ਅੰਗਰੇਜ਼ੀ ਤੇ ਹਿੰਦੀ ਦਾ ਹੀ ਬੋਲਬਾਲਾ ਹੈ। ਪੰਜਾਬੀ ਮਾਂ-ਬੋਲੀ ਨੂੰ ਅਨਪੜ੍ਹਤਾ ਦੀ ਨਿਸ਼ਾਨੀ ਸਮਝਿਆ ਜਾਂਦਾ ਹੈ। ਪੰਜਾਬੀ ਭਾਸ਼ਾ ਦੇ ਇਸ ਤ੍ਰਿਸਕਾਰ ਲਈ ਅਸੀਂ ਖੁਦ ਜ਼ਿੰਮੇਵਾਰ ਹਾਂ। ਪੰਜਾਬ ਦੇ ਕਿੰਨੇ ਘਰ ਹਨ, ਜਿਥੇ ਮਾਂ-ਬੋਲੀ ਨਾਲ ਜੋੜਨ ਲਈ ਦਾਦੀ ਕਹਾਣੀਆਂ ਸੁਣਾਉਂਦੀ ਹੋਵੇ, ਬੁਝਾਰਤਾਂ ਪਾਉਂਦੀ ਹੋਵੇ। ਥਾਂ-ਥਾਂ ਪੰਜਾਬੀ ਪੜ੍ਹੋ, ਪੰਜਾਬੀ ਬੋਲੋ, ਪੰਜਾਬੀ ਲਿਖੋ ਦੇ ਬੋਰਡ ਲਾਉਣ ਦੀ ਲੋੜ ਸਾਨੂੰ ਇਸੇ ਕਰਕੇ ਪਈ ਕਿਉਂਕਿ ਸਾਡੀ ਮਾਂ-ਬੋਲੀ ਸਾਡੇ ਆਪਣੇ ਘਰਾਂ ਤੋਂ ਬੇਘਰ ਹੋ ਚੁੱਕੀ ਹੈ। ਅੱਜ ਲੋੜ ਹੈ ਮਾਂ-ਬੋਲੀਪ੍ਰਤੀ ਆਪਣੇ ਬਣਦੇ ਫਰਜ਼ ਨੂੰ ਸਮਝਣ ਅਤੇ ਨਿਭਾਉਣ ਦੀ। ਪੰਜਾਬੀ ਮਾਂ-ਬੋਲੀ ਨੂੰ ਪਿਆਰ ਕਰਨ ਵਾਲਿਆਂ ਨੂੰ ਇਕ-ਜੁੱਟ ਹੋ ਕੇ ਪੰਜਾਬੀ ਭਾਸ਼ਾ ਦੇ ਬਚਾਓ ਤੇ ਇਸ ਦੇ ਵਿਕਾਸ ਲਈ ਯਤਨ ਕਰਨੇ ਪੈਣਗੇ ਅਤੇ ਇਹ ਕੰਮ ਸਾਨੂੰ ਆਪਣੇ ਘਰਾਂ ਤੋਂ ਹੀ ਸ਼ੁਰੂ ਕਰਨਾ ਪਵੇਗਾ।

-ਜਸਪ੍ਰੀਤ ਕੌਰ 'ਸੰਘਾ'
ਪਿੰਡ ਤਨੂੰਲੀ, ਜ਼ਿਲ੍ਹਾ ਹੁਸ਼ਿਆਰਪੁਰ।

ਆਵਾਜ਼ ਪ੍ਰਦੂਸ਼ਣ
ਸਰਦੀ ਦੀ ਰੁੱਤ ਸ਼ੁਰੂ ਹੁੰਦਿਆਂ ਹੀ ਵਿਆਹ-ਸ਼ਾਦੀਆਂ ਵੀ ਜ਼ੋਰ-ਸ਼ੋਰ ਨਾਲ ਸ਼ੁਰੂ ਹੋ ਜਾਂਦੀਆਂ ਹਨ। ਗਿੱਧਾ, ਭੰਗੜਾ, ਜਾਗੋ ਅਤੇ ਡੀ.ਜੇ. ਦਾ ਸ਼ੋਰ ਵੀ ਵਧ ਜਾਂਦਾ ਹੈ। ਇਸ ਦੇ ਨਾਲ ਹੀ ਉੱਚੀਆਂ ਆਵਾਜ਼ਾਂ ਵਾਲੇ ਲਾਊਡ ਸਪੀਕਰ ਵਿਦਿਆਰਥੀਆਂ ਅਤੇ ਬਿਰਧ ਬੀਮਾਰਾਂ ਲਈ ਪ੍ਰੇਸ਼ਾਨੀ ਪੈਦਾ ਕਰ ਰਹੇ ਹਨ। ਸ਼ਾਮ-ਸਵੇਰੇ ਵਿਦਿਆਰਥੀਆਂ ਦੇ ਪੜ੍ਹਨ ਦਾ ਸਮਾਂ ਹੁੰਦਾ ਹੈ। ਸਾਲਾਨਾ ਪ੍ਰੀਖਿਆਵਾਂ ਜਿਵੇਂ-ਜਿਵੇਂ ਨਜ਼ਦੀਕ ਆਉਂਦੀਆਂ ਹਨ ਤਾਂ ਵਿਦਿਆਰਥੀਆਂ ਨੂੰ ਦਿਨ-ਰਾਤ ਪੜ੍ਹਾਈ ਕਰਨੀ ਪੈਂਦੀ ਹੈ। ਆਵਾਜ਼ ਪ੍ਰਦੂਸ਼ਣ ਉਨ੍ਹਾਂ ਦੀ ਪੜ੍ਹਾਈ ਵਿਚ ਬਹੁਤ ਵਿਘਨ ਪਾਉਂਦਾ ਹੈ। ਇਸ ਲਈ ਸਾਨੂੰ ਚਾਹੀਦਾ ਹੈ ਕਿ ਇਸ ਆਵਾਜ਼ ਨਾਲ ਲੋਕਾਂ ਖਾਸ ਕਰਕੇ ਵਿਦਿਆਰਥੀਆਂ ਨੂੰ ਪ੍ਰੇਸ਼ਾਨੀ ਦਾ ਸਾਹਮਣਾ ਨਾ ਕਰਨਾ ਪਵੇ।

-ਮਾ: ਮਹਿੰਦਰ ਸਿੰਘ ਬਾਜਵਾ
ਪਿੰਡ ਮਸੀਤਾਂ, ਜ਼ਿਲ੍ਹਾ ਕਪੂਰਥਲਾ।

ਗ਼ਰੀਬੀ ਦੀ ਲਾਹਨਤ
ਅੱਜ ਦੁਨੀਆ ਦਾ ਹਰ ਦੇਸ਼ ਗ਼ਰੀਬੀ ਵਰਗੀ ਨਾਮੁਰਾਦ ਬਿਮਾਰੀ ਦਾ ਸ਼ਿਕਾਰ ਹੈ ਅਤੇ ਇਸ ਗ਼ਰੀਬੀ ਤੋਂ ਪੀੜਤ ਹੈ ਪਰ ਭਾਰਤ ਜੋ ਇਕ ਅਜਿਹਾ ਦੇਸ਼ ਹੈ, ਜਿਸ ਵਿਚ ਹੱਦੋਂ ਵੱਧ ਗ਼ਰੀਬੀ ਪਾਈ ਜਾਂਦੀ ਹੈ। ਹਰ ਰੋਜ਼ ਅਖ਼ਬਾਰਾਂ ਵਿਚ ਇਹ ਪੜ੍ਹਨ ਨੂੰ ਮਿਲਦਾ ਹੈ ਕਿ ਫਲਾਣੇ ਵਿਅਕਤੀ ਨੇ ਗ਼ਰੀਬੀ ਤੋਂ ਤੰਗ ਆ ਕੇ ਆਤਮ-ਹੱਤਿਆ ਕਰ ਲਈ। ਗ਼ਰੀਬੀ, ਬੇਰੁਜ਼ਗਾਰੀ ਅਤੇ ਆਬਾਦੀ ਦਾ ਵਾਧਾ, ਇਹ ਤਿੰਨੋਂ ਸਮੱਸਿਆਵਾਂ ਆਪਸ ਵਿਚ ਪੂਰੀ ਤਰ੍ਹਾਂ ਜੁੜੀਆਂ ਹੋਈਆਂ ਹਨ। ਸਾਡੇ ਦੇਸ਼ ਦੀ ਗ਼ਰੀਬੀ ਦਾ ਮੁੱਖ ਕਾਰਨ ਆਬਾਦੀ ਦਾ ਬੇਤਹਾਸ਼ਾ ਵਾਧਾ ਹੈ। ਆਬਾਦੀ ਦੇ ਵਾਧੇ ਕਾਰਨ ਹੀ ਸਾਰੇ ਲੋਕਾਂ ਨੂੰ ਰੁਜ਼ਗਾਰ ਨਹੀਂ ਮਿਲਦਾ, ਜਿਸ ਨਾਲ ਗ਼ਰੀਬੀ ਪੈਦਾ ਹੁੰਦੀ ਹੈ। ਜਿੰਨਾ ਚਿਰ ਆਬਾਦੀ ਦੇ ਵਾਧੇ ਨੂੰ ਠੱਲ੍ਹ ਨਹੀਂ ਪਾਈ ਜਾਂਦੀ, ਨਾ ਤਾਂ ਸਭ ਨੂੰ ਰੁਜ਼ਗਾਰ ਪ੍ਰਾਪਤ ਹੋ ਸਕਦਾ ਹੈ ਤੇ ਨਾ ਹੀ ਗ਼ਰੀਬੀ ਨੂੰ ਖ਼ਤਮ ਕੀਤਾ ਜਾ ਸਕਦਾ ਹੈ।

-ਮਨਿੰਦਰ ਸਿੰਘ ਰਾਜੂ
ਗਰਚਾ ਨਰਸਰੀ, ਧਨੌਲਾ ਰੋਡ, ਬਰਨਾਲਾ।

'ਜ਼ਿੰਦਗੀ' ਦੇ ਖੂਬਸੂਰਤ ਪਹਿਲੂ
ਜ਼ਿੰਦਗੀ ਦੇ ਮੌਸਮ ਦਾ ਪਤਝੜ ਵੀ ਹਿੱਸਾ ਹੈ। ਫ਼ਰਕ ਸਿਰਫ ਏਨਾ ਹੈ ਕਿ ਕੁਦਰਤ ਵਿਚ ਪੱਤੇ ਸੁੱਕਦੇ ਹਨ ਅਤੇ ਹਕੀਕਤ ਵਿਚ ਰਿਸ਼ਤੇ। ਨਰਿੰਦਰ ਸਿੰਘ ਨੰਗਲ ਜੀ ਪਿਛਲੇ ਲੰਮੇ ਸਮੇਂ ਤੋਂ 'ਜ਼ਿੰਦਗੀ' ਸਿਰਲੇਖ ਅਧੀਨ ਉਪਰੋਕਤ ਕਿਸਮ ਦੇ ਬਾਕਮਾਲ ਵਿਚਾਰਾਂ ਨਾਲ ਜ਼ਿੰਦਗੀ ਦੇ ਯਥਾਰਥ ਦੀ ਤਸਵੀਰ ਉਲੀਕ ਰਹੇ ਹਨ। ਹਰ ਐਤਵਾਰ 'ਸਾਹਿਤ ਫੁਲਵਾੜੀ' ਸਫ਼ੇ 'ਤੇ ਪੜ੍ਹਨ ਨੂੰ ਮਿਲਦੇ ਨੰਗਲ ਜੀ ਦੇ ਵਿਚਾਰ ਪਾਠਕਾਂ ਦੇ ਜ਼ਿੰਦਗੀ ਪ੍ਰਤੀ ਦ੍ਰਿਸ਼ਟੀਕੋਣ ਵਿਚ ਨਿਰੰਤਰ ਵਾਧਾ ਕਰ ਰਹੇ ਹਨ। ਲੇਖਕ ਨੇ ਇਸ ਤੋਂ ਪਹਿਲਾਂ ਜ਼ਿੰਦਗੀ ਦੇ ਹੋਰ ਪਹਿਲੂਆਂ ਜਿਵੇਂ ਮਾਂ, ਮੌਤ, ਪੈਸਾ ਅਤੇ ਘਰੁ ਸੁਖ ਵਸਿਆ, ਬਾਹਰ ਸੁਖ ਪਾਇਆ ਬਾਰੇ ਵੀ ਆਪਣੇ ਵਡਮੁੱਲੇ ਵਿਚਾਰਾਂ ਨਾਲ ਪਾਠਕ ਵਰਗ ਦੇ ਗਿਆਨ 'ਚ ਭਾਰੀ ਵਾਧਾ ਕੀਤਾ ਹੈ। ਲੇਖਕ ਦੀ ਇਹ ਸੇਵਾ ਭਾਈ ਘਨੱਈਆ ਜੀ ਦੀ ਸੇਵਾ ਦੇ ਸਮਾਨ ਹੈ।

-ਪ੍ਰਿੰ: ਗੁਰਬਚਨ ਸਿੰਘ ਲਾਲੀ
ਲੇਖਕ ਮੰਚ, ਪੱਟੀ।

3/2/2017

 ਸਿਆਸੀ ਪਾਰਟੀਆਂ ਦੀ ਭਰਮਾਰ
ਜਿਵੇਂ ਹੀ ਪੰਜਾਬ ਵਿਧਾਨ ਸਭਾ ਚੋਣਾਂ ਨੇੜੇ ਆਈਆਂ, ਉਵੇਂ ਹੀ ਖੁੰਬਾਂ ਵਾਂਗ ਨਿੱਤ ਨਵੀਆਂ ਸਿਆਸੀ ਪਾਰਟੀਆਂ ਦਾ ਜਨਮ ਹੋ ਗਿਆ। ਅੱਜ ਇਹ ਕਹਿਣ 'ਚ ਵੀ ਕੋਈ ਅਤਿਕਥਨੀ ਨਹੀਂ ਕਿ ਇਨ੍ਹਾਂ ਸਿਆਸੀ ਪਾਰਟੀਆਂ ਦੀ ਗਿਣਤੀ ਕਰਨਾ ਵੀ ਆਮ ਬੰਦੇ ਦੇ ਵੱਸ ਦੀ ਗੱਲ ਨਹੀਂ ਰਹੀ। ਪੰਜਾਬ ਦੇ ਸਿਆਸੀ ਨਕਸ਼ੇ 'ਤੇ ਨਿੱਤ ਨਵੀਂ ਪਾਰਟੀ ਦੇ ਜਨਮ ਨੇ ਜਿਥੇ ਪੰਜਾਬ ਦੀ ਸਿਆਸਤ ਨੂੰ ਹਾਸੋਹੀਣਾ ਬਣਾ ਕੇ ਰੱਖ ਦਿੱਤਾ ਹੈ, ਉਥੇ ਇਸ ਵਰਤਾਰੇ ਨੇ ਇਹ ਵੀ ਸਪੱਸ਼ਟ ਕਰ ਦਿੱਤਾ ਹੈ ਕਿ ਚੌਧਰ ਦੀ ਲਾਲਸਾ ਕਿਸ ਕਦਰ ਵਧ ਗਈ ਹੈ। ਜਿਹੜੀਆਂ ਪਾਰਟੀਆਂ ਨੇ ਆਪੋ-ਆਪਣੇ ਮੈਨੀਫੈਸਟੋ ਪੇਸ਼ ਕੀਤੇ ਹਨ, ਉਹ ਤਕਰੀਬਨ-ਤਕਰੀਬਨ ਇਕੋ ਜਿਹੀ ਹੀ ਝਲਕ ਪੇਸ਼ ਕਰ ਰਹੇ ਹਨ। ਅੱਜ ਪੰਜਾਬ ਦੀ ਇਸ ਗੁੰਝਲਦਾਰ ਰਾਜਨੀਤਕ ਸਥਿਤੀ ਨੇ ਲੋਕਾਂ ਨੂੰ ਘੁੰਮਣਘੇਰੀ 'ਚ ਪਾ ਕੇ ਰੱਖ ਦਿੱਤਾ ਹੈ ਕਿ ਉਹ ਕਿਸ ਪਾਰਟੀ ਨੂੰ ਆਪਣਾ ਕੀਮਤੀ ਵੋਟ ਦੇਣ ਤੇ ਕਿਸ ਨੂੰ ਨਾ ਦੇਣ। ਪਰ ਮੰਜ਼ਲ ਤਾਂ ਉਨ੍ਹਾਂ ਪਾਰਟੀਆਂ ਨੂੰ ਹੀ ਨਸੀਬ ਹੋਣੀ ਹੈ ਜੋ ਨੇਕ ਨੀਤੀਆਂ ਰਾਹੀਂ ਆਪਣਾ ਸਫ਼ਰ ਜਾਰੀ ਰੱਖਣਗੀਆਂ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।


ਚੋਣਾਂ ਤੇ ਸੈਮੀਨਾਰ ਸਕੂਲ ਖਾਲੀ
ਇਹ ਆਮ ਵਰਤਾਰਾ ਹੈ ਕਿ ਜਦੋਂ ਵੀ ਕਿਸੇ ਪ੍ਰਾਂਤ ਵਿਚ ਚੋਣਾਂ ਕਰਵਾਈਆਂ ਜਾਂਦੀਆਂ ਹਨ ਤਾਂ ਚੋਣ ਡਿਊਟੀਆਂ ਦੌਰਾਨ ਅਕਸਰ ਹੀ ਸਕੂਲ ਅਧਿਆਪਕਾਂ ਨੂੰ ਲਗਾ ਦਿੱਤਾ ਜਾਂਦਾ ਹੈ। ਇਸ ਵਾਰ ਵੀ ਹਜ਼ਾਰਾਂ ਅਧਿਆਪਕ ਚੋਣ ਡਿਊਟੀ ਉੱਪਰ ਲਗਾ ਦਿੱਤੇ ਗਏ ਹਨ। ਦੂਜੇ ਪਾਸੇ ਰਹਿੰਦੀ ਕਸਰ ਸਿੱਖਿਆ ਵਿਭਾਗ ਦੁਆਰਾ ਲਗਾਏ ਸੈਮੀਨਾਰਾਂ ਨੇ ਕੱਢ ਦਿੱਤੀ ਹੈ। ਹਰ ਸਕੂਲ ਦੇ ਦੋ ਤਿੰਨ ਅਧਿਆਪਕ 10 ਰੋਜ਼ਾ ਸੈਮੀਨਾਰ ਪੂਰਾ ਕਰਨ ਲਈ ਜਾ ਰਹੇ ਹਨ। ਇਮਤਿਹਾਨਾਂ ਦਾ ਸਮਾਂ ਹੈ। ਫਰਵਰੀ ਮਹੀਨੇ ਦੌਰਾਨ ਪੰਜਵੀਂ, ਅੱਠਵੀਂ, ਬਾਰ੍ਹਵੀਂ ਦੀਆਂ ਸਾਲਾਨਾ ਪ੍ਰੀਖਿਆਵਾਂ ਸ਼ੁਰੂ ਹੋ ਰਹੀਆਂ ਹਨ। ਵਿਦਿਆਰਥੀਆਂ ਨੂੰ ਰਵੀਜ਼ਨ ਕਰਵਾਈ ਜਾਣੀ ਹੈ ਪ੍ਰੰਤੂ ਅਧਿਆਪਕਾਂ ਬਿਨਾਂ ਰਵੀਜ਼ਨ ਕੌਣ ਕਰਵਾਏ। ਸਿੱਖਿਆ ਬੱਚੇ ਦਾ ਮੌਲਿਕ ਹੱਕ ਹੈ। 'ਸਿੱਖਿਆ ਦਾ ਅਧਿਕਾਰ ਕਾਨੂੰਨ' ਮਖੌਲ ਬਣਦਾ ਜਾ ਰਿਹਾ ਹੈ।


-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀ ਖ਼ਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।


ਪੰਜਾਬੀ ਬੋਲੀ ਦਾ ਮੁੱਦਾ
ਕਾਨਵੈਂਟ ਸਕੂਲਾਂ ਦੇ ਫੈਸ਼ਨ ਨੇ ਸਾਡੀ ਮਾਂ-ਬੋਲੀ ਤੋਂ ਸਾਡੇ ਜਵਾਕਾਂ ਦੇ ਮੂੰਹ ਮੋੜ ਦਿੱਤੇ ਹਨ। ਪੰਜਾਬ ਦੇ ਬਾਲ ਇਨ੍ਹਾਂ ਸਕੂਲਾਂ 'ਚ ਪੰਜਾਬੀ ਬੋਲ ਨਹੀਂ ਸਕਦੇ। ਇਸ ਸਭ 'ਚ ਕਸੂਰ ਕਿਸ ਦਾ, ਸਮੇਂ ਦੇ ਹਾਕਮਾਂ ਦਾ ਜਿਨ੍ਹਾਂ ਪ੍ਰਵਾਹ ਨਹੀੇਂ ਕੀਤੀ। ਸਾਡੀ ਮਾਂ-ਬੋਲੀ ਨਾਲ ਜੋ ਵਿਤਕਰਾ ਹੋ ਰਿਹਾ ਹੈ ਉਸ ਨੂੰ ਵੀ ਰੋਕਿਆ ਜਾਣਾ ਚਾਹੀਦਾ ਹੈ। ਕਾਨੂੰਨ ਬਣੇ ਕਿ ਸਾਡੀ ਭਾਸ਼ਾ ਨਾਲ ਕੋਈ ਵਿਤਕਰਾ ਕਰਨ ਦਾ ਹੀਆ ਨਾ ਕਰ ਸਕੇ। ਪੰਜਾਬ 'ਚ ਪੰਜਾਬੀ 'ਤੇ ਪਾਬੰਦੀ ਠੀਕ ਨਹੀਂ। ਹੁਣ ਮੌਕਾ ਆਪਣੀ ਬੋਲੀ ਦਾ ਮੁੱਦਾ ਵੀ ਉਠਾਉਣ ਦਾ।


-ਮਨਿੰਦਰ ਕੌਰ ਧੌਲ
ਮੈਲਬੌਰਨ (ਆਸਟਰੇਲੀਆ)।

1/02/2017

 ਝੂਠੇ ਚੋਣ ਵਾਅਦਿਆਂ ਤੋਂ ਬਚੋ
ਭਖਦੇ ਚੋਣ ਪ੍ਰਚਾਰ ਦੌਰਾਨ ਵੱਖ-ਵੱਖ ਰਾਜਸੀ ਪਾਰਟੀਆਂ ਵੱਲੋਂ ਕਈ ਚੋਣ ਵਾਅਦੇ ਕੀਤੇ ਜਾ ਰਹੇ ਹਨ, ਜਿਵੇਂ ਮੁਫ਼ਤ ਆਟਾ-ਦਾਲ ਸਕੀਮ, ਖੰਡ ਘਿਉ, ਸ਼ਗਨ ਸਕੀਮ, ਬਿਜਲੀ ਯੂਨਿਟਾਂ ਦੀ ਮੁਆਫੀ, ਫਰੀ ਆਈ ਫੋਨ ਆਦਿ। ਪਹਿਲੀ ਗੱਲ ਇਨ੍ਹਾਂ ਵਾਅਦਿਆਂ ਵੱਲ ਪਿੱਛੇ ਨੂੰ ਝਾਤੀ ਮਾਰ ਕੇ ਦੇਖੋ ਕਿੰਨੇ ਕੁ ਪ੍ਰਤੀਸ਼ਤ ਪੂਰੇ ਹੋਏ ਹਨ। ਦੂਸਰਾ ਇਨ੍ਹਾਂ ਵਾਅਦਿਆਂ ਨੇ ਜੇਕਰ ਇਕ ਵਰਗ ਨੂੰ ਲਾਭ ਪਹੁੰਚਾਉਣ ਦੀ ਕੋਸ਼ਿਸ ਕੀਤੀ ਤਾਂ ਇਸ ਨਾਲ ਦੂਸਰੇ ਵਰਗ 'ਤੇ ਬੋਝ ਪਿਆ ਹੈ। ਅਜਿਹੇ ਚੋਣ ਵਾਅਦੇ ਜਿਨ੍ਹਾਂ ਕਰਕੇ ਘਰ ਬੈਠੇ ਲੋਕਾਂ ਨੂੰ ਆਟਾ ਦਾਲ, ਘਿਉ ਖੰਡ ਮਿਲਣ ਲੱਗ ਪਵੇ, ਉਸ ਨੂੰ ਕੰਮ ਕਰਨ ਦੀ ਕੀ ਲੋੜ ਹੈ। ਉਹ ਨਿਕੰਮੇ ਕਰਕੇ ਸੁੱਟ ਦਿੱਤੇ ਹਨ। ਆਮ ਜਨਤਾ ਦੇ ਉੱਪਰ ਵੀ ਬੋਝ ਵੀ ਪੈਂਦਾ ਹੈ। ਬਹੁਤੀ ਵਾਰ ਵੋਟਾਂ ਲੈਣ ਦੀ ਖ਼ਾਤਰ ਕਈ ਵਾਅਦੇ ਕੀਤੇ ਜਾਂਦੇ ਹਨ ਜੋ ਬਾਅਦ ਵਿਚ ਪੂਰੇ ਨਹੀਂ ਕੀਤੇ ਜਾਂਦੇ। ਅੱਜ ਦੀ ਤਰੀਕ ਵਿਚ ਪੰਜਾਬ ਕਈ ਰਾਜਾਂ ਤੋਂ ਪਿੱਛੇ ਚਲਾ ਗਿਆ ਹੈ। ਮੁੱਕਦੀ ਗੱਲ ਪੰਜਾਬ ਖੋਖਲਾ ਹੋ ਗਿਆ ਹੈ। ਆਉ, ਇਨ੍ਹਾਂ ਚੋਣ ਵਾਅਦਿਆਂ ਨੂੰ ਨਕਾਰਦੇ ਹੋਏ ਉਸ ਪਾਰਟੀ ਨੂੰ ਸੱਦਾ ਦੇਈਏ ਜੋ ਸਾਡਾ ਸਰਬਪੱਖੀ ਵਿਕਾਸ ਕਰ ਸਕੇ।


-ਸਰਬਜੀਤ ਸਿੰਘ
126, ਮੋਹਨ ਵਿਹਾਰ, ਜਲੰਧਰ।


ਲਾਊਡ ਸਪੀਕਰਾਂ ਦਾ ਸ਼ੋਰ

ਅੱਜਕਲ੍ਹ ਵਿਦਿਆਰਥੀਆਂ ਦੇ ਇਮਤਿਹਾਨਾਂ ਦਾ ਜ਼ੋਰ ਹੈ। ਛੋਟੀਆਂ ਕਲਾਸਾਂ ਦੇ ਬੱਚਿਆਂ ਤੋਂ ਲੈ ਕੇ ਉੱਚ ਸਿੱਖਿਆ ਦੇ ਵਿਦਿਆਰਥੀ ਆਪਣਾ ਪੂਰਾ ਧਿਆਨ ਸਾਲ ਭਰ ਕੀਤੀ ਤਿਆਰੀ ਨੂੰ ਹੋਰ ਵਧੇਰੇ ਮਿਹਨਤ ਕਰ ਵਧੀਆ ਤੋਂ ਵਧੀਆ ਨਤੀਜਾ ਪ੍ਰਾਪਤ ਕਰਨ ਦੇ ਯਤਨ ਵਿਚ ਹਨ। ਕਿਸੇ ਵੀ ਵਿਦਿਆਰਥੀ ਵਾਸਤੇ ਪੜ੍ਹਾਈ ਲਈ ਸਭ ਤੋਂ ਅਨੁਕੂਲ ਸਮਾਂ ਸਵੇਰ ਦਾ ਅਤੇ ਸ਼ਾਮ ਦਾ ਸਮਾਂ ਹੁੰਦਾ ਹੈ ਪਰ ਸਵੇਰੇ ਅਤੇ ਸ਼ਾਮ ਦੇ ਸਮੇਂ ਧਾਰਮਿਕ ਅਸਥਾਨਾਂ ਤੋਂ ਉੱਚੀ ਆਵਾਜ਼ ਵਿਚ ਵੱਜਦੇ ਲਾਊਡ ਸਪੀਕਰ ਵਿਦਿਆਰਥੀਆਂ ਲਈ ਬਹੁਤ ਵੱਡੀ ਸਮੱਸਿਆ ਬਣ ਜਾਂਦੇ ਹਨ। ਧਰਮ ਮਨੁੱਖ ਦੀ ਮਾਨਸਿਕ ਸ਼ਾਂਤੀ ਅਤੇ ਬਿਹਤਰੀ ਲਈ ਹੈ ਪਰ ਧਰਮ ਸਥਾਨਾਂ 'ਤੇ ਬੈਠੇ ਧਰਮ ਦੇ ਠੇਕੇਦਾਰਾਂ ਨੂੰ ਇਹ ਗੱਲ ਸਮਝਣ ਵਿਚ ਅਜੇ ਬਹੁਤ ਦੇਰ ਲੱਗੇਗੀ। ਆਵਾਜ਼ ਪ੍ਰਦੂਸ਼ਣ ਦੀ ਇਸ ਗੰਭੀਰ ਸਮੱਸਿਆ ਲਈ ਕੋਈ ਵੀ ਸੰਜੀਦਾ ਨਹੀਂ ਹੈ।


-ਸਵਰਨਦੀਪ ਸਿੰਘ ਨੂਰ
ਬਠਿੰਡਾ।


ਰਾਜਨੀਤਕ ਲੋਕਾਂ ਦੀ ਜਾਇਦਾਦ
ਜਦੋਂ ਵੀ ਚੋਣਾਂ ਦੀ ਰੁੱਤ ਆਉਂਦੀ ਹੈ ਤਾਂ ਉਸ ਸਮੇਂ ਹੋਰ ਜਾਣਕਾਰੀਆਂ ਤੋਂ ਇਲਾਵਾ ਇਕ ਵਿਸ਼ੇਸ਼ ਜਾਣਕਾਰੀ ਵੀ ਪ੍ਰਾਪਤ ਹੁੰਦੀ ਹੈ ਕਿ ਸਾਡੇ ਰਾਜਨੀਤਕ ਲੋਕਾਂ ਕੋਲ ਕੀ ਕੁਝ ਹੈ। ਮਾਇਆ ਦੇ ਖਜ਼ਾਨੇ, ਜ਼ਮੀਨ-ਜਾਇਦਾਦ ਸਭ ਕੁਝ ਸਿਰਫ ਅਖ਼ਬਾਰਾਂ ਰਾਹੀਂ ਹੀ ਪਤਾ ਲਗਦਾ ਹੈ। ਇਸ ਵੇਲੇ ਪੰਜਾਬ ਦੇ ਦਿੱਗਜ ਨੇਤਾਵਾਂ ਦੀ ਆਮਦਨ ਦਿਨੋ-ਦਿਨ ਵਧਦੀ ਜਾ ਰਹੀ ਹੈ ਤੇ ਇਹ ਸਾਲ ਵਿਚ ਦੁੱਗਣੀ-ਤਿੱਗਣੀ ਹੋਈ ਜਾ ਰਹੀ ਹੈ। ਬਹੁਤੇ ਨੇਤਾਵਾਂ ਨੇ ਤਾਂ ਰਾਜਨੀਤੀ ਵਿਚ ਆ ਕੇ ਆਪਣੇ ਚੰਗੇ ਤੇ ਮਾੜੇ ਧੰਦਿਆਂ ਨੂੰ ਬਹੁਤ ਵਧਾਇਆ ਹੈ। ਇਹ ਗੱਲਾਂ ਜਾਣ ਕੇ ਹੀ ਪਤਾ ਲਗਦਾ ਹੈ ਕਿ ਪੰਜਾਬ ਦਾ ਵਿਕਾਸ ਤੇ ਆਮ ਜਨਤਾ ਦਾ ਵਿਕਾਸ ਬੇਸ਼ੱਕ ਹੋਇਆ ਜਾਂ ਨਹੀਂ ਪਰ ਕੁਝ ਕੁ ਰਾਜਨੀਤਕ ਲੋਕਾਂ ਦਾ ਵਿਕਾਸ ਰੱਜ ਕੇ ਹੋਇਆ ਹੈ। ਇਸ ਸਮੇਂ ਦਰਸਾਈ ਗਈ ਕੁੱਲ ਜਾਇਦਾਦ ਤਾਂ ਸੀਮਤ ਹੀ ਹੁੰਦੀ ਹੈ। ਪਰਦੇ ਦੇ ਪਿੱਛੇ ਹਾਲੇ ਬਹੁਤ ਕੁਝ ਹੋਰ ਹੋਵੇਗਾ। ਵੱਡੇ ਰੂਪ ਵਿਚ ਬਹੁਗਿਣਤੀ ਕੰਮਾਂਕਾਰਾਂ ਉੱਤੇ ਰਾਜਨੀਤਕ ਲੋਕਾਂ ਦਾ ਦਬਾਅ ਹੋਣ ਕਾਰਨ ਇਨ੍ਹਾਂ ਦਾ ਕਬਜ਼ਾ ਹੈ, ਜੋ ਕਿ ਵਧੀਆ ਲੋਕਤੰਤਰ ਵਿਚ ਇਨ੍ਹਾਂ ਗੱਲਾਂ ਦਾ ਸਥਾਨ ਨਹੀਂ ਹੈ। ਸਾਡੇ ਨੇਤਾਵਾਂ ਦੀ ਅੱਖ ਤਾਂ ਸਦਾ ਕੁਰਸੀ 'ਤੇ ਹੈ ਤਾਂ ਕਿ ਉਹ ਹੋਰ ਵੱਧ ਫੈਲ ਸਕਣ।


-ਬਲਬੀਰ ਸਿੰਘ ਬੱਬੀ
ਪਿੰਡ ਤੱਖਰਾਂ, ਲੁਧਿਆਣਾ।

31/1/2017

 ਭੱਦੀ ਦੂਸ਼ਣਬਾਜ਼ੀ
ਕੋਈ ਸਮਾਂ ਸੀ ਜਦੋਂ ਸਾਡੇ ਨੇਤਾ ਆਦਰਸ਼ ਹੁੰਦੇ ਸਨ, ਜਿਨ੍ਹਾਂ ਦੀ ਤਸਵੀਰ ਅੱਜ ਵੀ ਅੱਖਾਂ ਸਾਹਮਣੇ ਆ ਜਾਏ ਤਾਂ ਸ਼ਰਧਾਪੂਰਵਕ ਸਿਰ ਝੁਕ ਜਾਂਦਾ ਹੈ। ਚੋਣਾਂ ਦਾ ਦੰਗਲ ਭਖ ਚੁੱਕਾ ਹੈ। ਅੱਜ ਜੋ ਨੇਤਾ ਇਕ-ਦੂਜੇ ਦੇ ਖਿਲਾਫ਼ ਜਿਹੜੀ ਭੱਦੀ ਸ਼ਬਦਾਵਲੀ ਵਰਤ ਰਹੇ ਹਨ, ਉਸ ਨਾਲ ਹਰੇਕ ਚੰਗੇ ਨਾਗਰਿਕ ਦਾ ਹਿਰਦਾ ਵਲੂੰਧਰਿਆ ਜਾਂਦਾ ਹੈ ਅਤੇ ਸਿਰ ਸ਼ਰਮ ਨਾਲ ਝੁਕ ਜਾਂਦੇ ਹਨ। ਕੀ ਸੰਵਾਰਨਗੇ ਸਮਾਜ ਦਾ ਇਹ ਲੋਕ? ਬੋਲੀ ਵਿਚ ਕੋਈ ਸੰਜਮ ਰਹਿ ਹੀ ਨਹੀਂ ਗਿਆ।
ਇਕ-ਦੂਜੇ 'ਤੇ ਸ਼ਬਦੀ ਚਿੱਕੜ ਸੁੱਟ ਕੇ ਇਕ-ਦੂਜੇ ਦਾ ਅਕਸ ਤਾਂ ਖਰਾਬ ਕਰ ਹੀ ਰਹੇ ਹਨ, ਨਾਲ ਹੀ ਸਮਾਜ ਨੂੰ ਗੰਧਲਾ ਵੀ ਕਰ ਰਹੇ ਹਨ। ਜਿੱਤਣ ਤੋਂ ਬਾਅਦ ਵੀ ਇਹ ਲੋਕ ਲੋਕਾਂ ਦੇ ਮਸਲੇ ਭੁੱਲ ਕੇ ਆਪਣੀਆਂ ਤਨਖਾਹਾਂ, ਭੱਤਿਆਂ ਆਦਿ 'ਤੇ ਇਕੱਠੇ ਤਾਂ ਹੋ ਜਾਣਗੇ ਪਰ ਲੋਕਾਂ ਦੇ ਮਸਲਿਆਂ 'ਤੇ ਬਹਿਸਾਂ ਦੌਰਾਨ ਇਕ-ਦੂਜੇ ਨੂੰ ਭੱਦੀਆਂ ਸ਼ਬਦਾਵਲੀਆਂ ਦੀ ਵਰਤੋਂ ਨਾਲ ਲੋਕਾਂ ਦੀਆਂ ਨਜ਼ਰਾਂ ਵਿਚ ਗਿਰਦੇ ਨਜ਼ਰ ਆਉਣਗੇ। ਸਾਰੇ ਇਕੋ ਜਿਹੇ ਨਹੀਂ, ਚੰਗੇ ਨੇਤਾਵਾਂ ਦੀ ਵੀ ਘਾਟ ਨਹੀਂ। ਆਪਣੀ ਮੱਤ ਨੂੰ ਦਾਨ ਕਰਨ ਲੱਗਿਆਂ ਆਪਣੀ ਆਤਮਾ ਵਿਕਾਊ ਨਾ ਕਰ ਬਹਿਣਾ। ਨੇਤਾਵਾਂ ਨੂੰ ਵੀ ਚਾਹੀਦਾ ਹੈ ਕਿ ਉਹ ਆਪਣੀਆਂ ਅਤੇ ਜਨਤਾ ਦੀਆਂ ਭਾਵਨਾਵਾਂ ਨੂੰ ਭੱਦੀ ਸ਼ਬਦਾਵਲੀ ਰਾਹੀਂ ਸ਼ਰਮਸ਼ਾਰ ਹੋਣ ਤੋਂ ਰੋਕਣ। ਉਨ੍ਹਾਂ ਦੇਸ਼ ਭਗਤਾਂ ਨੂੰ ਯਾਦ ਕਰੋ ਜਿਨ੍ਹਾਂ ਸਾਨੂੰ ਆਜ਼ਾਦੀ ਦਾ ਨਿੱਘ ਦੇਣ ਲਈ ਆਪਣੀਆਂ ਕੁਰਬਾਨੀਆਂ ਦਿੱਤੀਆਂ। ਇਕ-ਦੂਜੇ ਦੀ ਪਤ ਨਾ ਰੋਲੋ।


-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।


ਸਿਆਸੀ ਅਖਾੜਾ
ਪੰਜਾਬ ਵਿਚ ਵਿਧਾਨ ਸਭਾ ਚੋਣਾਂ ਦਾ ਅਖਾੜਾ ਪੂਰੀ ਤਰ੍ਹਾਂ ਭਖਿਆ ਹੋਇਆ ਹੈ। ਹਰ ਪਾਰਟੀ ਵੱਲੋਂ ਇਹ ਚੋਣਾਂ ਜਿੱਤਣ ਦੇ ਮਕਸਦ ਨਾਲ ਲੋਕਾਂ ਨਾਲ ਕਈ ਸੱਚੇ-ਝੂਠੇ ਲੋਕ ਲੁਭਾਊ ਵਾਅਦੇ ਕੀਤੇ ਜਾ ਰਹੇ ਹਨ। ਬਹੁਤ ਸਾਰੇ ਲੀਡਰ ਆਪਣੇ ਨਿੱਜੀ ਫਾਇਦਿਆਂ ਖਾਤਰ ਦਲ ਬਦਲ ਕੇ ਇਕ-ਦੂਜੀ ਪਾਰਟੀ ਵਿਚ ਜਾਣ ਲਈ ਡੱਡੂ ਟਪੂਸੀਆਂ ਮਾਰਦੇ ਨਜ਼ਰ ਆ ਰਹੇ ਹਨ।
ਇਨ੍ਹਾਂ ਲੀਡਰਾਂ ਵੱਲੋਂ ਲੋਕਾਂ ਵਿਚ ਆਪਣੀ ਹਰਮਨ-ਪਿਆਰਤਾ ਬਣਾਉਣ ਲਈ ਮੀਟਿੰਗਾਂ, ਰੈਲੀਆਂ ਵਿਚ ਇਕ-ਦੂਜੇ ਨੂੰ ਨਿੰਦਣ ਖਾਤਰ ਘਟੀਆ ਸ਼ਬਦਾਵਲੀ ਵੀ ਵਰਤੀ ਜਾ ਰਹੀ ਹੈ। ਪੰਜਾਬ ਅੰਦਰ ਅਨੇਕਾਂ ਹਲਕਿਆਂ ਵਿਚ ਲੋਕਾਂ ਵੱਲੋਂ ਲੀਡਰਾਂ ਦੁਆਰਾ ਪਿਛਲੀਆਂ ਚੋਣਾਂ ਦੌਰਾਨ ਕੀਤੇ ਝੂਠੇ ਵਾਅਦੇ ਯਾਦ ਕਰਾਉਣ ਲਈ ਘੇਰਿਆ ਵੀ ਜਾ ਰਿਹਾ ਹੈ। ਵੱਖ-ਵੱਖ ਥਾਵਾਂ 'ਤੇ ਲੋਕਾਂ ਵੱਲੋਂ ਕਈ ਲੀਡਰਾਂ ਪ੍ਰਤੀ ਰੋਸ ਪ੍ਰਗਟਾਉਂਦੇ ਹੋਏ ਗੱਡੀਆਂ ਆਦਿ ਦੀ ਭੰਨ-ਤੋੜ ਅਤੇ ਪਥਰਾਓ ਕਰਨ ਦੀਆਂ ਖ਼ਬਰਾਂ ਵੀ ਆਈਆਂ ਹਨ। ਸੋ ਸਾਨੂੰ ਸਭ ਨੂੰ ਗੁੱਸੇ ਵਿਚ ਹੋਸ਼ ਗੁਆ ਕੇ ਕਾਨੂੰਨ ਨੂੰ ਹੱਥ ਵਿਚ ਲੈਣ ਦੀ ਬਜਾਇ ਆਪਣੀ ਵੋਟ ਦੀ ਤਾਕਤ ਜ਼ਰੀਏ ਇਨ੍ਹਾਂ ਝੂਠੇ ਲੀਡਰਾਂ ਨੂੰ ਸਬਕ ਸਿਖਾਉਣਾ ਚਾਹੀਦਾ ਹੈ ਕਿਉਂਕਿ ਇਹੀ ਸਾਡੇ ਭਵਿੱਖ ਅਤੇ ਆਪਸੀ ਭਾਈਚਾਰਕ ਸਾਂਝ ਲਈ ਫਾਇਦੇਮੰਦ ਸਾਬਤ ਹੋਵੇਗਾ।


-ਰਾਜਾ ਗਿੱਲ (ਚੜਿੱਕ)
ਮੋ: 94654-11585

26/1/2017

 ਵੋਟਾਂ ਦਾ ਮਾਹੌਲ

ਠੰਢ ਦੇ ਦਿਨਾਂ ਵਿਚ ਹੁਣ ਵੋਟਾਂ ਦਾ ਮਾਹੌਲ ਗਰਮੋ-ਗਰਮੀ ਹੋਇਆ ਪਿਆ ਹੈ। ਹਰ ਪਿੰਡ ਤੇ ਸ਼ਹਿਰ ਦੀਆਂ ਗਲੀਆਂ ਵਿਚ ਚੋਣਾਂ ਦੀ ਚਰਚਾ ਹੁੰਦੀ ਹੈ। ਇਸ ਵਾਰ ਨੌਜਵਾਨ ਵੀ ਇਨ੍ਹਾਂ ਚੋਣਾਂ ਨੂੰ ਬੜੇ ਰੋਚਕ ਢੰਗ ਨਾਲ ਦੇਖ ਰਹੇ ਹਨ ਕਿਉਂਕਿ ਪਹਿਲਾਂ ਪੰਜਾਬ ਵਿਚ ਦੋ ਹੀ ਪਾਰਟੀਆਂ ਜਿੱਤ ਦਰਜ ਕਰਦੀਆਂ ਆਈਆਂ ਹਨ, ਪਰ ਹੁਣ ਤੀਜੀ ਧਿਰ ਦੇ ਆਉਣ ਨਾਲ ਮੁਕਾਬਲਾ ਤਿਕੋਣਾ ਹੁੰਦਾ ਨਜ਼ਰ ਆਉਂਦਾ ਹੈ। ਕੀ ਨਵੀਂ ਪਾਰਟੀ ਇਨ੍ਹਾਂ ਰਵਾਇਤੀ ਪਾਰਟੀਆਂ ਨੂੰ ਹਿਲਾਉਣ ਵਿਚ ਸਫਲ ਹੋ ਪਾਏਗੀ? ਇਹ ਦੇਖਣ ਲਈ ਮੁਕਾਬਲਾ ਬੜਾ ਦਿਲਚਸਪ ਹੋਣ ਵਾਲਾ ਹੈ।

-ਤੇਜਿੰਦਰ ਸਿੰਘ
ਪਿੰਡ-ਭੇਡਵਾਲ ਝੂੰਗਿਆਂ, ਜ਼ਿਲ੍ਹਾ, ਪਟਿਆਲਾ।

ਵੋਟ ਦਾ ਅਧਿਕਾਰ

ਭਾਰਤੀ ਨਾਗਰਿਕਾਂ ਨੂੰ ਸੰਵਿਧਾਨ ਦੁਆਰਾ ਬਿਨਾਂ ਕਿਸੇ ਵਿਤਕਰੇ ਭੇਦ-ਭਾਵ ਦੇ ਵੋਟ ਦਾ ਅਧਿਕਾਰ ਦਿੱਤਾ ਗਿਆ ਹੈ। ਇਸ ਲਈ ਵੋਟਰਾਂ ਦਾ ਵੀ ਫ਼ਰਜ਼ ਬਣਦਾ ਹੈ ਕਿ ਉਹ ਆਪਣੀ ਵੋਟ ਜ਼ਰੂਰ ਪਾਉਣ। ਵੋਟ ਪਾਉਣ ਦੇ ਨਾਲ-ਨਾਲ ਵੋਟ ਦੀ ਸੁਚੱਜੀ ਵਰਤੋਂ ਹੋਵੇ। ਸੂਝਵਾਨ ਵੋਟਰਾਂ ਦੀ ਪਛਾਣ ਹੀ ਇਸ ਗੱਲ ਤੋਂ ਹੁੰਦੀ ਹੈ ਕਿ ਉਹ ਬਿਨਾਂ ਕਿਸੇ ਲੋਭ-ਲਾਲਚ, ਦਬਾਅ ਅਤੇ ਜਾਤੀ ਭੇਦ-ਭਾਵ ਦੇ ਆਪਣੇ ਹੱਕ ਦੀ ਵਰਤੋਂ ਕਰਦੇ ਹਨ। ਅਜਿਹੇ ਕਾਰਜ ਨੂੰ ਨੇਪਰੇ ਚਾੜ੍ਹਨ ਹਿਤ ਮੀਡੀਆ ਦਾ ਅਹਿਮ ਯੋਗਦਾਨ ਹੁੰਦਾ ਹੈ। ਲੋਕਤੰਤਰ ਦੇ ਚੌਥੇ ਥੰਮ੍ਹ ਮੀਡੀਆ ਦਾ ਫਰਜ਼ ਬਣਦਾ ਹੈ ਕਿ ਉਹ ਨਿਰਪੱਖ ਹੋ ਕੇ ਆਪਣੀ ਭੂਮਿਕਾ ਨਿਭਾਵੇ। 'ਅਜੀਤ ਪ੍ਰਕਾਸ਼ਨ ਸਮੂਹ' ਦੁਆਰਾ ਪੇਡ ਨਿਊਜ਼ ਦੇ ਵਿਰੁੱਧ ਪ੍ਰਗਟਾਈ ਵਚਨਬੱਧਤਾ ਸਲਾਹੁਣਯੋਗ ਹੈ। ਚੋਣ ਕਮਿਸ਼ਨ ਦੇ ਅਧਿਕਾਰੀਆਂ ਦੁਆਰਾ ਸਥਾਨਕ ਪ੍ਰਸ਼ਾਸਨ ਦੇ ਸਹਿਯੋਗ ਨਾਲ ਉਠਾਏ ਜਾ ਰਹੇ ਕਦਮ ਪ੍ਰਸੰਸਾਯੋਗ ਹਨ। ਆਉਣ ਵਾਲੀ 4 ਫਰਵਰੀ ਨੂੰ ਆਉਣ ਵਾਲੀਆਂ ਵੋਟਾਂ ਦੇ ਕਾਰਜ ਨੂੰ ਨਿਰਪੱਖ ਤੇ ਸੁਚਾਰੂ ਬਣਾਉਣ ਲਈ ਪ੍ਰਸ਼ਾਸਨ ਨੂੰ ਸਹਿਯੋਗ ਦੇਈਏ।

-ਮਾ: ਮਨਦੀਪ ਸਿਵੀਆ
ਪਿੰਡ ਤੇ ਡਾਕ : ਜੌੜਕੀ ਅੰਧੇਵਾਲੀ, ਜ਼ਿਲ੍ਹਾ ਫਾਜ਼ਿਲਕਾ।

ਬਜ਼ੁਰਗਾਂ ਦਾ ਸਤਿਕਾਰ

ਜਿਵੇਂ-ਜਿਵੇਂ ਅਸੀਂ ਆਧੁਨਿਕ ਹੁੰਦੇ ਜਾ ਰਹੇ ਹਾਂ, ਅਸੀਂ ਬਹੁਤ ਸਾਰੀਆਂ ਨਵੀਆਂ ਸਮਾਜਿਕ ਸਮੱਸਿਆਵਾਂ ਵਿਚ ਘਿਰ ਰਹੇ ਹਾਂ। ਸਮਾਜਿਕ ਖਿੰਡਾਅ ਕਾਰਨ ਪਰਿਵਾਰ ਵੀ ਟੁੱਟ ਰਹੇ ਹਨ। ਪਰਿਵਾਰਾਂ ਦੇ ਟੁੱਟਣ ਦਾ ਕਾਰਨ ਬਜ਼ੁਰਗਾਂ ਦੀ ਰਾਇ ਨੂੰ ਅੱਖੋਂ ਓਹਲੇ ਕਰਨਾ ਹੈ। ਪੁਰਾਣੇ ਸਮੇਂ ਵਿਚ ਘਰ ਦੇ ਮੁਖੀ ਭਾਵ ਬਜ਼ੁਰਗ ਨੂੰ ਬਹੁਤ ਜ਼ਿਆਦਾ ਸਨਮਾਨ ਤੇ ਇੱਜ਼ਤ ਦਿੱਤੀ ਜਾਂਦੀ ਸੀ ਤੇ ਉਸ ਦੀ ਗੱਲ ਟਾਲਣ ਦੀ ਕਿਸੇ ਦੀ ਹਿੰਮਤ ਵੀ ਨਹੀਂ ਸੀ ਹੁੰਦੀ। ਬਜ਼ੁਰਗ ਸਾਨੂੰ ਸਹੀ ਤੇ ਜਾਇਜ਼ ਰਸਤਾ ਦਿਖਾਉਂਦੇ ਹਨ ਕਿਉਂਕਿ ਉਨ੍ਹਾਂ ਕੋਲ ਜ਼ਿੰਦਗੀ ਦਾ ਅਨੁਭਵ ਹੁੰਦਾ ਹੈ। ਉਨ੍ਹਾਂ ਨੇ ਚੰਗੇ ਤੇ ਬੁਰੇ ਵਕਤ ਨੂੰ ਆਪਣੇ 'ਤੇ ਹੰਢਾਇਆ ਹੁੰਦਾ ਹੈ। ਪ੍ਰੰਤੂ ਅੱਜਕਲ੍ਹ ਹਰ ਘਰ ਵਿਚ ਬਜ਼ੁਰਗਾਂ ਦੀ ਗੱਲ ਨੂੰ ਬਿਲਕੁਲ ਹੀ ਨਕਾਰਿਆ ਜਾਂਦਾ ਹੈ। ਲੋਕਾਂ ਦੇ ਆਪ-ਮੁਹਾਰੇਪਣ ਨੇ ਬਜ਼ੁਰਗਾਂ ਦਾ ਸਤਿਕਾਰ ਘਟਾ ਦਿੱਤਾ ਹੈ।

-ਹਰਬੰਸ ਸਿੰਘ ਬੰਸਾ
ਰਾਏਕੋਟ।

25/1/2017

 ਪੰਜਾਬ ਚੋਣਾਂ

ਪੰਜਾਬ ਅਸੰਬਲੀ ਦੀ ਚੋਣ ਲਈ 4 ਫਰਵਰੀ ਨੂੰ ਵੋਟਾਂ ਪੈਣੀਆਂ ਹਨ। ਜਨਤਾ ਨੂੰ ਚਾਹੀਦਾ ਹੈ ਕਿ ਉਹ ਉਨ੍ਹਾਂ ਦੂਰ-ਅੰਦੇਸ਼, ਇਮਾਨਦਾਰ ਤੇ ਪੱਕੇ ਇਰਾਦੇ ਵਾਲੇ ਉਮੀਦਵਾਰਾਂ ਨੂੰ ਹੀ ਵੋਟਾਂ ਪਾ ਕੇ ਚੁਣੇ, ਜਿਹੜੇ ਪੰਜਾਬ ਵਿਚੋਂ ਬੇਰੁਜ਼ਗਾਰੀ ਤੇ ਨਸ਼ਿਆਂ ਦਾ ਅੰਤ ਕਰਕੇ ਸਮਾਜ ਦੇ ਮੱਧ ਵਰਗ, ਕਿਸਾਨਾਂ ਅਤੇ ਮਜ਼ਦੂਰਾਂ ਦੇ ਮਸਲੇ ਹੱਲ ਕਰਕੇ ਇਕ ਇਮਾਨਦਾਰ ਪ੍ਰਸ਼ਾਸਨ, ਪ੍ਰਦੂਸ਼ਣ ਰਹਿਤ ਵਾਤਾਵਰਨ ਅਤੇ ਮਿਲਾਵਟ ਰਹਿਤ ਖਾਧ-ਪਦਾਰਥਾਂ ਦਾ ਪ੍ਰਬੰਧ ਕਰਕੇ ਜਨਤਾ ਦੀ ਨਰੋਈ ਸਿਹਤ ਨੂੰ ਯਕੀਨੀ ਬਣਾ ਸਕਣ। ਝੂਠੇ ਵਾਅਦੇ ਕਰਨ ਵਾਲੇ ਭ੍ਰਿਸ਼ਟ ਲੀਡਰਾਂ ਦੇ ਦਿਨ ਪੁੱਗ ਚੁੱਕੇ ਹਨ। ਅਜਿਹੇ ਲੀਡਰਾਂ ਨੂੰ ਖੁਦ ਹੀ ਬਨਵਾਸ ਹਾਸਲ ਕਰ ਲੈਣਾ ਚਾਹੀਦਾ ਹੈ। ਪੰਜਾਬ ਵਿਚ ਨਾ ਹੁਣ ਪੁੱਤਰ ਮੋਹ ਦੀ ਦਾਲ ਗਲੇਗੀ, ਨਾ ਰਿਸ਼ਤੇਦਾਰੀਆਂ ਪੁੱਗਣਗੀਆਂ ਅਤੇ ਉਹ ਸਮਾਂ ਆ ਚੁੱਕਾ ਹੈ, ਜਦੋਂ ਲੋਕ ਮਾੜੇ ਪ੍ਰਬੰਧ ਤੋਂ ਅੱਕ ਚੁੱਕੇ ਹਨ ਅਤੇ ਰਿਸ਼ਵਤਖੋਰਾਂ ਨਾਲ ਦੋ-ਦੋ ਹੱਥ ਕਰਨ ਨੂੰ ਤਿਆਰ ਬੈਠੇ ਹਨ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਅੰਮ੍ਰਿਤਸਰ।

ਸੜਕ ਹਾਦਸਿਆਂ ਦਾ ਕਹਿਰ

ਅੱਜਕਲ੍ਹ ਜ਼ਿਆਦਾ ਮੌਤਾਂ ਸੜਕ ਹਾਦਸਿਆਂ ਕਾਰਨ ਹੀ ਹੁੰਦੀਆਂ ਹਨ। ਪਤਾ ਨਹੀਂ ਕਿੰਨੇ ਘਰਾਂ ਵਿਚ ਹਰ ਰੋਜ਼ ਸੋਗ ਮਨਾਇਆ ਜਾਂਦਾ ਹੈ। ਨਿਯਮਾਂ ਦੀ ਇਥੋਂ ਤੱਕ ਉਲੰਘਣਾ ਕੀਤੀ ਜਾਂਦੀ ਹੈ ਕਿ ਕਈ ਵਾਹਨ ਚਾਲਕਾਂ ਕੋਲ ਲਾਇਸੈਂਸ ਵੀ ਨਹੀਂ ਹੁੰਦਾ। ਜਿਨ੍ਹਾਂ ਕੋਲ ਲਾਇਲੈਂਸ ਹੁੰਦਾ ਹੈ, ਉਨ੍ਹਾਂ ਵਿਚੋਂ ਬਹੁਤੇ ਉਂਜ ਹੀ ਅਣਜਾਣ ਹੁੰਦੇ ਹਨ। ਹਾਦਸਿਆਂ ਦਾ ਕਾਰਨ ਡਰਾਈਵਰਾਂ ਵੱਲੋਂ ਵਰਤੇ ਜਾਂਦੇ ਮੋਬਾਈਲ ਫੋਨ ਵੀ ਹਨ। ਵਾਹਨ ਚਲਾਉਂਦੇ ਸਮੇਂ ਫੋਨ ਦੀ ਵਰਤੋਂ ਸਖਤੀ ਨਾਲ ਬੰਦ ਕੀਤੀ ਜਾਣੀ ਚਾਹੀਦੀ ਹੈ। ਸੜਕਾਂ 'ਤੇ ਅਵਾਰਾ ਪਸ਼ੂਆਂ ਅਤੇ ਹੋਰ ਵਾਹਨਾਂ ਦਾ ਖੜ੍ਹਾ ਕਰਨਾ ਆਦਿ ਵੀ ਹਾਦਸਿਆਂ ਦਾ ਕਾਰਨ ਬਣਦਾ ਹੈ। ਲੋਕਾਂ ਵਿਚ ਜ਼ਿੰਮੇਵਾਰੀ ਦੇ ਅਹਿਸਾਸ ਅਤੇ ਸਰਕਾਰ ਦੇ ਸਹਿਯੋਗ ਨਾਲ ਹੀ ਹਾਦਸੇ ਘਟ ਸਕਦੇ ਹਨ ਅਤੇ ਕਈ ਅਨਮੋਲ ਜਾਨਾਂ ਬਚ ਸਕਦੀਆਂ ਹਨ।

-ਮਨਿੰਦਰ ਸਿੰਘ ਰਾਜੂ
ਧਨੌਲਾ ਰੋਡ, ਬਰਨਾਲਾ।

ਕੁਦਰਤੀ ਵਸੀਲੇ

ਸੰਸਾਰ ਅੰਦਰ ਕੁਦਰਤੀ ਵਸੀਲੇ ਅਮੁੱਕ ਹਨ ਪਰ ਜਿਵੇਂ-ਜਿਵੇਂ ਮਨੁੱਖ ਨੇ ਇਨ੍ਹਾਂ ਵਸੀਲਿਆਂ ਦੀ ਬੇਸਮਝੀ ਨਾਲ ਵਰਤੋਂ ਕੀਤੀ ਹੈ, ਉਵੇਂ-ਉਵੇਂ ਹੀ ਇਹ ਵਸੀਲੇ ਖ਼ਤਮ ਹੋਣ ਦੀ ਨੇੜੇ ਪਹੁੰਚ ਚੁੱਕੇ ਹਨ। ਕੁਦਰਤੀ ਵਸੀਲਿਆਂ ਵਿਚ ਅਸੀਂ ਮੁੱਖ ਤੌਰ 'ਤੇ ਤਿੰਨ ਚੀਜ਼ਾਂ ਗਿਣਦੇ ਹਾਂ ਜਿਵੇਂ ਪੌਣ, ਪਾਣੀ ਅਤੇ ਧਰਤੀ। ਇਨ੍ਹਾਂ ਤਿੰਨਾਂ ਦੀ ਦੁਰਵਰਤੋਂ ਬੰਦ ਕਰਕੇ ਇਨ੍ਹਾਂ ਦੀ ਸਾਂਭ-ਸੰਭਾਲ ਕਰਨਾ ਸਾਡਾ ਫ਼ਰਜ਼ ਹੈ। ਪਰ ਅਫ਼ਸੋਸ ਦੀ ਗੱਲ ਹੈ ਕਿ ਧਨ-ਦੌਲਤ ਦੀ ਅੰਨ੍ਹੀ ਦੌੜ ਲੱਗੀ ਹੋਣ ਕਾਰਨ ਲੋਕਾਂ ਦੀ ਵੱਡੀ ਗਿਣਤੀ ਆਪਣੇ ਫ਼ਰਜ਼ਾਂ ਨੂੰ ਭੁੱਲੀ ਬੈਠੀ ਹੈ। ਮਨੁੱਖ ਨੇ ਹਵਾ ਅਤੇ ਪਾਣੀ ਨੂੰ ਪ੍ਰਦੂਸ਼ਤ ਕਰ ਦਿੱਤਾ ਹੈ। ਉਹ ਸਮਾਂ ਦੂਰ ਨਹੀਂ ਜਦੋਂ ਆਉਣ ਵਾਲੀਆਂ ਪੀੜ੍ਹੀਆਂ ਸਾਨੂੰ ਕੋਸਣਗੀਆਂ। ਆਓ! ਪ੍ਰਣ ਕਰੀਏ ਕਿ ਵਾਤਾਵਰਨ ਨੂੰ ਸਾਫ਼-ਸੁਥਰਾ ਰੱਖਾਂਗੇ।

-ਬਲਜੀਤ ਸਿੰਘ ਵੜੈਚ
ਪਿੰਡ ਤੇ ਡਾਕ: ਪੰਜਗਰਾਈਆਂ, (ਬਟਾਲਾ) ਗੁਰਦਾਸਪੁਰ।

24/1/2017

 ਵੋਟ ਦਾ ਸਹੀ ਇਸਤੇਮਾਲ

ਵੋਟਾਂ ਦਾ ਸਮਾਂ ਹੋਣ ਕਾਰਨ ਪੰਜਾਬ 'ਚ ਵੱਖ-ਵੱਖ ਪਾਰਟੀਆਂ ਦੇ ਨੁਮਾਇੰਦੇ ਲੋਕਾਂ ਨੂੰ ਝੂਠੇ ਲਾਰੇ ਲਗਾ ਕੇ ਗੁੰਮਰਾਹ ਕਰ ਰਹੇ ਹਨ। ਵੋਟਰਾਂ ਨੂੰ ਵੀ ਸੋਚਣਾ ਚਾਹੀਦਾ ਹੈ ਕਿ ਉਹ ਆਪਣੀ ਸਮਝਦਾਰੀ ਵਰਤਦੇ ਹੋਏ ਉਸ ਨੂੰ ਹੀ ਪੰਜਾਬ ਦੀ ਵਾਗਡੋਰ ਦੇਣ ਜੋ ਵਾਕਿਆ ਹੀ ਸੂਬੇ ਦੇ ਦਰਦ ਨੂੰ ਪਛਾਣਦਾ ਹੋਵੇ। ਪੰਜਾਬੀਆਂ ਨੂੰ ਸੋਚ ਕੇ, ਸਮਝ ਕੇ ਆਪਣੇ ਹੱਕ ਦਾ ਇਸਤੇਮਾਲ ਕਰਨਾ ਚਾਹੀਦਾ ਹੈ। ਆਪਣਾ ਕੀਮਤੀ ਵੋਟ ਝੂਠੇ ਭਾਸ਼ਣਾਂ ਅਤੇ ਲੋਟੂ ਲੀਡਰਾਂ ਦੇ ਮਗਰ ਲੱਗ ਕੇ ਖਰਾਬ ਨਾ ਕਰਨਾ ਚਾਹੀਦਾ।

-ਮਨਿੰਦਰ ਕੌਰ ਧੌਲ
ਮੈਲਬੌਰਨ (ਆਸਟ੍ਰੇਲੀਆ)

ਨਿਤਿਸ਼ ਤੋਂ ਕੁਝ ਸਿੱਖਣ ਸਿੱਖ ਆਗੂ

ਸਾਹਿਬ-ਏ-ਕਮਾਲ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਦਾ 350 ਸਾਲਾ ਪ੍ਰਕਾਸ਼ ਪੁਰਬ ਸ੍ਰੀ ਪਟਨਾ ਸਾਹਿਬ (ਬਿਹਾਰ) ਦੀ ਧਰਤੀ 'ਤੇ ਮੁੱਖ ਮੰਤਰੀ ਸ੍ਰੀ ਨਿਤਿਸ਼ ਕੁਮਾਰ ਹੁਰਾਂ ਦੀ ਸੁਚੱਜੀ ਅਗਵਾਈ 'ਚ ਸ਼ਰਧਾ ਸਹਿਤ ਮਨਾਇਆ ਗਿਆ। ਇਸ ਵਿਚ ਦੇਸ਼-ਵਿਦੇਸ਼ ਦੀਆਂ ਲੱਖਾਂ ਦੀ ਗਿਣਤੀ ਵਿਚ ਸਿੱਖ ਸੰਗਤਾਂ ਨੇ ਸ਼ਰਧਾ ਸਹਿਤ ਹਾਜ਼ਰੀ ਭਰੀ। ਇਸ ਸਮਾਗਮ ਦੌਰਾਨ ਪੁੱਜੀਆਂ ਸੰਗਤਾਂ ਨੂੰ ਰਿਹਾਇਸ਼, ਖਾਣ-ਪੀਣ, ਮੈਡੀਕਲ ਆਦਿ ਕਿਸੇ ਕਿਸਮ ਦੀ ਕੋਈ ਮੁਸ਼ਕਿਲ ਪੇਸ਼ ਨਹੀਂ ਆਈ। ਇਨ੍ਹਾਂ ਸਾਰੇ ਪ੍ਰਬੰਧਾਂ ਸਬੰਧੀ ਮਾਣਯੋਗ ਮੁੱਖ ਮੰਤਰੀ ਸ੍ਰੀ ਨਿਤਿਸ਼ ਕੁਮਾਰ ਹੁਰਾਂ ਨਿੱਜੀ ਦਿਲਚਸਪੀ ਲੈ ਕੇ ਬਾਖੂਬੀ ਜ਼ਿੰਮੇਵਾਰੀ ਨਿਭਾਈ ਹੈ। ਇਕ ਹੋਰ ਵੱਡੀ ਗੱਲ ਕਿ ਮੁੱਖ ਮੰਤਰੀ ਵੱਲੋਂ ਸਮਾਗਮਾਂ ਦੌਰਾਨ ਕਿਸੇ ਵੀ ਆਗੂ ਨੂੰ ਗੁਰੂ ਸਾਹਿਬ ਦੀ ਵਡਿਆਈ ਤੋਂ ਬਿਨਾਂ ਹੋਰ ਕੋਈ ਰਾਜਨੀਤਕ ਗੱਲ ਨਹੀਂ ਕਰਨ ਦਿੱਤੀ ਅਤੇ ਨਾ ਹੀ ਆਪ ਕੋਈ ਰਾਜਨੀਤਕ ਲਾਹਾ ਲੈਣ ਦੀ ਕੋਸ਼ਿਸ਼ ਕੀਤੀ, ਜਿਸ ਨਾਲ ਸ੍ਰੀ ਨਿਤਸ਼ਿ ਕੁਮਾਰ ਦੇ ਵਡੱਪਣ ਦੀ ਪੂਰੀ ਦੁਨੀਆ ਵਿਚ ਪ੍ਰਸੰਸਾ ਹੋ ਰਹੀ ਹੈ। ਸਾਡੇ ਸਿੱਖ ਆਗੂਆਂ ਨੂੰ ਵੀ ਮੁੱਖ ਮੰਤਰੀ ਸ੍ਰੀ ਨਿਤਿਸ਼ ਕੁਮਾਰ ਪਾਸੋਂ ਕੁਝ ਐਸੀਆਂ ਚੰਗੀਆਂ ਗੱਲਾਂ ਸਿੱਖਣ ਦੀ ਲੋੜ ਹੈ।

-ਅਜਮੇਰ ਸਿੰਘ ਬੱਲ
ਪਿੰਡ ਤੇ ਡਾਕ: ਬੁਤਾਲਾ, ਜ਼ਿਲ੍ਹਾ ਅੰਮ੍ਰਿਤਸਰ।
ਮੋਬਾਈਲ : 98152-24630.

ਬਾਲ ਅਧਿਕਾਰਾਂ ਦਾ ਮੁੱਦਾ...

ਤੰਦਰੁਸਤ, ਰਿਸ਼ਟ-ਪੁਸ਼ਟ ਅਤੇ ਅਰੋਗ ਬੱਚੇ ਕਿਸੇ ਦੇਸ਼, ਕੌਮ ਜਾਂ ਸਮਾਜ ਦਾ ਵਡਮੁੱਲਾ ਸਰਮਾਇਆ ਹੀ ਨਹੀਂ, ਉਥੋਂ ਦੇ ਭਵਿੱਖ ਦੇ ਅਸਲ ਵਾਰਿਸ ਹੁੰਦੇ ਹਨ। ਜੇਕਰ ਕਿਸੇ ਦੇਸ਼, ਕੌਮ ਜਾਂ ਸਮਾਜ ਦੀ ਸਮੁੱਚੀ ਉੱਨਤੀ ਦਾ ਅੰਦਾਜ਼ਾ ਲਾਉਣਾ ਹੋਵੇ ਤਾਂ ਉਥੋਂ ਦੇ ਲੋਕਾਂ ਦੀ ਸਿਹਤ ਤੋਂ, ਉਥੇ ਦੇ ਲੋਕਾਂ ਦੀ ਸਿਹਤ ਦਾ ਅੰਦਾਜ਼ਾ ਉਥੋਂ ਦੀ ਸਰਕਾਰ ਵੱਲੋਂ ਦਿੱਤੀਆਂ ਜਾਣ ਵਾਲੀਆਂ ਸਿਹਤ ਸਹੂਲਤਾਂ ਤੋਂ ਅਤੇ ਉਥੋਂ ਦੀਆਂ ਸਿਹਤ ਸਹੂਲਤਾਂ ਦੇ ਪੱਧਰ ਦਾ ਅੰਦਾਜ਼ਾ ਉਥੋਂ ਦੇ ਬੱਚਿਆਂ ਦੀ ਮੌਤ ਦਰ ਤੋਂ ਸਹਿਜੇ ਹੀ ਲਾਇਆ ਜਾ ਸਕਦਾ ਹੈ। ਸਿਰਫ਼ ਇਹੀ ਨਹੀਂ ਸਾਡੇ ਦੇਸ਼ ਵਿਚ ਸਿੱਖਿਆ, ਸਾਇੰਸ ਅਤੇ ਤਕਨਾਲੋਜੀ ਦੇ ਪ੍ਰਚਾਰ, ਪ੍ਰਸਾਰ ਦੇ ਯੁੱਗ ਵਿਚ ਅਜੇ ਵੀ ਬੱਚਿਆਂ ਦੀ ਮੌਤ ਦਰ ਬਹੁਤ ਜ਼ਿਆਦਾ ਹੈ। ਅਫਸੋਸ ਛੋਟੇ ਬੱਚਿਆਂ 'ਚ ਕੁਪੋਸ਼ਣ, ਭੁੱਖਮਰੀ, ਖੂਨ ਦੀ ਘਾਟ ਸਮੇਤ ਅਨੇਕਾਂ ਹੋਰ ਕਾਰਨਾਂ ਕਰਕੇ ਲੱਖਾਂ ਬੱਚੇ ਹਰ ਸਾਲ ਮੌਤ ਦਾ ਸ਼ਿਕਾਰ ਹੋ ਜਾਂਦੇ ਹਨ। ਸਾਡੇ ਦੇਸ਼ ਦੇ ਸਰਬ-ਪੱਖੀ ਵਿਕਾਸ ਦੇ ਰਸਤੇ ਵਿਚ ਬਹੁਤ ਵੱਡਾ ਸਵਾਲੀਆ ਚਿੰਨ੍ਹ ਹੀ ਨਹੀਂ ਸਗੋਂ ਅੜਿੱਕਾ ਹੈ। ਸੋ, ਹੋਰਨਾਂ ਚੋਣ ਮੁੱਦਿਆਂ ਦੀ ਤਰ੍ਹਾਂ ਬੱਚਿਆਂ ਦੇ ਅਧਿਕਾਰਾਂ ਦਾ ਮੁੱਦਾ ਜਾਂ ਫਿਰ ਬੱਚਿਆਂ ਦੇ ਸਰਬਪੱਖੀ ਵਿਕਾਸ ਦਾ ਮੁੱਦਾ ਚੋਣ ਮੁੱਦਾ ਕਿਉਂ ਨਹੀਂ? ਸੋ, ਇਸ ਮੁੱਦੇ ਨੂੰ ਪਹਿਲ ਦੇ ਆਧਾਰ 'ਤੇ ਵਿਚਾਰਨਾ ਚਾਹੀਦਾ ਹੈ।

-ਲਾਲ ਚੰਦ ਸਿੰਘ
ਪਿੰਡ ਚੁੱਘੇ ਖੁਰਦ, ਡਾਕਖਾਨਾ ਬਹਿਮਣ ਦੀਵਾਨਾ, ਜ਼ਿਲ੍ਹਾ ਬਠਿੰਡਾ।

20/1/2017

 ਅੰਧ-ਵਿਸ਼ਵਾਸ ਤੇ ਸਮੱਸਿਆਵਾਂ

ਅਜੋਕੇ ਮਨੁੱਖ ਨੂੰ ਮਹਾਂਮਨੁੱਖ ਬਣਨਾ ਚਾਹੀਦਾ ਸੀ ਪਰ ਅਜੋਕਾ ਮਨੁੱਖ ਆਪਣੇ ਰਸਤਿਆਂ ਤੋਂ ਭਟਕ ਰਿਹਾ ਹੈ ਤੇ ਸਮੱਸਿਆਵਾਂ ਵਿਚੋਂ ਨਿਕਲਣ ਦੀ ਥਾਂ ਸਗੋਂ ਹੋਰ ਫਸ ਰਿਹਾ ਹੈ। ਜੋ ਵਿਕਾਸ ਸਾਨੂੰ ਸਾਹਮਣੇ ਦਿਸ ਰਿਹਾ ਹੈ, ਸਿਰਫ ਨਾਂਅ ਦਾ ਹੀ ਹੈ। ਅਸੀਂ ਦਿਨੋ-ਦਿਨ ਅੰਧ-ਵਿਸ਼ਵਾਸੀ ਹੋ ਰਹੇ ਹਾਂ। ਵਿਗਿਆਨ ਪੜ੍ਹ ਕੇ ਵੀ ਗਿਆਨ ਵਿਹੂਣੇ ਹੋ ਰਹੇ ਹਾਂ। ਇਮਤਿਹਾਨਾਂ ਦੀ 'ਰੁੱਤ' ਹੈ। ਸਕੂਲਾਂ, ਕਾਲਜਾਂ ਵਿਚ ਵਿਦਿਆਰਥੀਆਂ ਨੂੰ ਸਖ਼ਤ ਮਿਹਨਤ ਕਰਨ ਦੀ ਜਗ੍ਹਾ ਹਵਨ ਤੇ ਪੂਜਾ-ਪਾਠਾਂ ਵਿਚ ਉਲਝਾ ਰਹੇ ਹਾਂ। ਵਿਦਿਆਰਥੀਆਂ ਨੂੰ ਮਿਹਨਤ ਦੀ ਥਾਂ ਕਿਸਮਤਵਾਦੀ ਬਣਾ ਰਹੇ ਹਾਂ। ਨਵੇਂ ਸਵੇਰੇ ਕਿੱਥੋਂ ਲੱਭਣੇ ਨੇ? ਸਾਡੀ ਅੱਜ ਦੀ ਸਿਆਸਤ ਵੀ ਚਾਹੁੰਦੀ ਹੈ ਕਿ ਲੋਕ ਜਾਗਰੂਕ ਨਾ ਹੋਣ। ਜੇ ਲੋਕ ਸਿਆਣੇ ਹੋ ਗਏ, ਇਨ੍ਹਾਂ ਦਾ ਮਨ ਮਸਤਕ ਕੰਮ ਕਰਨ ਲੱਗ ਪਿਆ ਤਾਂ ਇਹ ਭਲੇ-ਬੁਰੇ ਨੂੰ ਪਛਾਣ ਲੈਣਗੇ। ਪਰ ਜਿਸ ਹਿਸਾਬ ਨਾਲ ਅਸੀਂ ਤੁਰ ਰਹੇ ਹਾਂ, ਸਵੇਰਾ ਦੂਰ ਦੀ ਗੱਲ ਹੈ। ਸੂਝਵਾਨ ਲੋਕ ਸਿਰ ਜੋੜ ਕੇ ਸੋਚਣ। ਇਸੇ ਵਿਚ ਭਲਾਈ ਹੈ।

-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।

ਚੋਣ ਰੁੱਤ ਤੇ ਲੋਕ-ਹੇਜ ਲੀਡਰਾਂ ਦਾ

4 ਫਰਵਰੀ, 2017 ਨੂੰ ਪੰਜਾਬ ਵਿਧਾਨ ਸਭਾ ਦੀਆਂ ਚੋਣਾਂ ਲਈ ਵੋਟਾਂ ਪੈਣ ਜਾ ਰਹੀਆਂ ਹਨ। ਮੌਜੂਦਾ ਵਿਧਾਇਕਾਂ ਦੇ ਗੱਦੀਓਂ ਲੱਥਣ ਕਾਰਨ ਚਿਹਰੇ ਮੁਰਝਾਏ ਹਨ। ਰਾਜ ਗੱਦੀ ਦੇ ਆਸਵੰਦ ਉਮੀਦਵਾਰਾਂ ਦੇ ਚਿਹਰੇ ਖਿੜ ਗਏ ਹਨ। ਸਿਆਸਤ ਕਿੰਨਾ ਵਧੀਆ ਵਪਾਰ ਹੈ। ਵੋਟਰਾਂ ਨੂੰ ਭਰਮਾਉਣ ਲਈ ਕਰੋੜ ਦੋ ਕਰੋੜ ਖਰਚੋ ਤੇ ਦਸ ਕਰੋੜ ਕਮਾਓ। ਉਹ ਵੋਟਰਾਂ ਨੂੰ ਮੁਫ਼ਤਖੋਰੀਆਂ ਨਾਲ ਨਿਹਾਲ ਕਰਕੇ ਉਨ੍ਹਾਂ ਦੀ ਮੱਤ ਮਾਰ ਦਿੰਦੇ ਹਨ। ਵੋਟਰ ਹਰ ਵਾਰ ਮੁਫ਼ਤਖੋਰੀਆਂ, ਪੈਸੇ, ਨਸ਼ਿਆਂ ਤੇ ਜਾਤ-ਪਾਤ ਦੇ ਪ੍ਰਭਾਵ ਹੇਠ ਆ ਕੇ ਗ਼ਲਤ ਲੀਡਰ ਚੁਣ ਬੈਠਦੇ ਹਨ। ਫਿਰ ਪੰਜ ਸਾਲ ਝੂਰਦੇ ਰਹਿੰਦੇ ਹਨ। ਲੋਕਾਂ ਨੂੰ ਆਰਜ਼ੀ ਮੁਫ਼ਤਖੋਰੀਆਂ ਦੀ ਲੋੜ ਨਹੀਂ। ਉਨ੍ਹਾਂ ਨੂੰ ਲੋੜ ਹੈ ਪੱਕੇ ਰੁਜ਼ਗਾਰ ਦੀ, ਰਿਸ਼ਵਤ-ਮੁਕਤ ਪ੍ਰਸ਼ਾਸਨ ਦੀ ਅਤੇ ਪ੍ਰਦੂਸ਼ਣ ਮੁਕਤ ਜਲਵਾਯੂ ਦੀ। ਚੋਣਾਂ ਜਿੱਤਣ ਲਈ ਲੀਡਰਾਂ ਦੇ ਜਾਗੇ ਨਵੇਂ, ਝੂਠੇ ਤੇ ਛਲਾਵੇਦਾਰ ਹੇਜ ਨੂੰ ਨਕਾਰ ਦੇਵੋ। ਇਕੋ ਨਿਸ਼ਾਨਾ ਰੱਖੋ ਕਿ ਇਮਾਨਦਾਰ ਤੇ ਦੂਰਅੰਦੇਸ਼ ਲੀਡਰ ਚੁਣ ਕੇ ਇਕ ਗੁਲਾਬ ਤੇ ਫੁੱਲ ਵਰਖਾ ਖੁਸ਼ਹਾਲ ਪੰਜਾਬ ਬਣਾਉਣਾ ਹੈ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਅੰਮ੍ਰਿਤਸਰ।

ਏਡਜ਼ ਤੋਂ ਡਰੋ

ਏਡਜ਼ ਇਕ ਜਾਨਲੇਵਾ ਬਿਮਾਰੀ ਹੈ ਅਤੇ ਹੁਣ ਇਹ ਇਕ ਖ਼ਤਰਨਾਕ ਰੂਪ ਧਾਰਨ ਕਰਦੀ ਜਾ ਰਹੀ ਹੈ। ਇਹ ਇਕ ਚਿੰਤਾ ਦੀ ਗੱਲ ਹੈ ਕਿ ਭਾਰਤ ਵਿਚ ਇਸ ਦੇ ਮਰੀਜ਼ਾਂ ਦੀ ਗਿਣਤੀ ਲਗਾਤਾਰ ਵਧ ਰਹੀ ਹੈ। ਲੋੜ ਇਸ ਬਿਮਾਰੀ ਤੋਂ ਡਰਨ ਦੀ ਨਹੀਂ, ਸਗੋਂ ਇਸ ਵਿਰੁੱਧ ਜਾਗਰੂਕ ਹੋਣ ਦੀ ਹੈ। ਸਹੀ ਜਾਣਕਾਰੀ ਵਿਚ ਹੀ ਇਸ ਦੀ ਰੋਕਥਾਮ ਸੰਭਵ ਹੈ।

-ਸੇਵਾ ਰਾਮ ਸਿੰਗਲਾ
ਮੇਨ ਅਜੀਤ ਰੋਡ, ਬਠਿੰਡਾ।

19/1/2017

 ਅਜੀਤ ਦੀ ਸੰਪਾਦਕੀ

ਪਿਛਲੇ ਦਿਨੀਂ 'ਅਜੀਤ' ਵਿਚ ਤੁਸੀਂ ਆਪਣੇ ਸੰਪਾਦਕੀ ਵਿਚ ਪੰਜਾਬ ਚੋਣਾਂ ਸਬੰਧੀ ਬਿਲਕੁਲ ਸਹੀ ਜਾਣਕਾਰੀ ਦਿੱਤੀ ਹੈ। ਇਹ ਇਕ ਕਠੋਰ ਸਚਾਈ ਹੈ ਕਿ ਇਨ੍ਹਾਂ ਚੋਣਾਂ ਨੇ ਭੈਣ-ਭਰਾਵਾਂ ਤੇ ਹੋਰ ਰਿਸ਼ਤੇਦਾਰੀਆਂ ਵਿਚ ਫ਼ਰਕ ਪਾ ਦਿੱਤਾ ਹੈ। ਇਸ ਸੰਪਾਦਕੀ ਦੇ ਅੰਤ ਵਿਚ ਆਪ ਜੀ ਨੇ ਬਿਲਕੁਲ ਸਹੀ ਕਿਹਾ ਹੈ ਕਿ ਪੰਜਾਬ ਵਿਚ ਜੋ ਹਾਲਾਤ ਬਣ ਰਹੇ ਹਨ, ਉਸ ਤੋਂ ਲਮਕਵੀਂ ਸਰਕਾਰ ਬਣ ਸਕਦੀ ਹੈ। ਤੁਸੀਂ ਬਿਲਕੁਲ ਸਹੀ ਕਿਹਾ ਹੈ ਕਿ ਪੰਜਾਬ ਨੂੰ ਇਕ ਮਜ਼ਬੂਤ ਅਤੇ ਪ੍ਰਭਾਵਸ਼ਾਲੀ ਸਰਕਾਰ ਦੀ ਲੋੜ ਹੈ। ਇਸ ਤੋਂ ਪਹਿਲਾਂ ਹਰ ਦਿਨ ਹੀ ਤੁਹਾਡੀਆਂ ਸੰਪਾਦਕੀਆਂ ਵਿਚੋਂ ਬਹੁਤ ਜਾਣਕਾਰੀ ਮਿਲਦੀ ਹੈ। ਸਿਰਫ 'ਅਜੀਤ' ਅਖ਼ਬਾਰ ਹੀ ਹੈ, ਜੋ ਕਿ ਹਮੇਸ਼ਾ ਸੱਚ ਉੱਪਰ ਪਹਿਰਾ ਦਿੰਦਾ ਹੈ ਅਤੇ ਪਾਠਕਾਂ ਤੱਕ ਸੱਚੀ ਅਤੇ ਸਹੀ ਢੰਗ ਨਾਲ ਜਾਣਕਾਰੀ ਪਹੁੰਚਾਉਂਦਾ ਹੈ।

-ਜਗਮੋਹਨ ਸਿੰਘ ਲੱਕੀ
ਲੱਕੀ ਨਿਵਾਸ, 61 ਏ, ਵਿਦਿਆ ਨਗਰ, ਪਟਿਆਲਾ।

ਰਾਜਨੀਤੀ ਅਤੇ ਕਲਾਕਾਰ

ਰੋਜ਼ਾਨਾ ਰਾਜਨੀਤੀ ਵਿਚ ਕਲਾਕਾਰਾਂ ਦਾ ਧੜਾਧੜ ਪੈਰ ਧਰਨਾ ਬੇਤੁਕਾ ਜਿਹਾ ਜਾਪਦਾ ਹੈ ਕਿਉਂਕਿ ਰਾਜਨੀਤੀ ਅਤੇ ਕਲਾਕਾਰ ਵਿਚਕਾਰਲੀਆਂ ਵਿਸ਼ੇਸ਼ਤਾਵਾਂ ਦਾ ਦੂਰ-ਦੂਰ ਤੱਕ ਕੋਈ ਆਪਸੀ ਸਬੰਧ ਨਹੀਂ ਹੈ। ਅਲੱਗ-ਅਲੱਗ ਰਾਜਨੀਤਕ ਪਾਰਟੀਆਂ ਦਾ ਆਪਣਾ ਸੀਮਤ ਦਾਇਰਾ ਹੁੰਦਾ ਹੈ ਅਤੇ ਹਰੇਕ ਰਾਜਨੀਤਕ ਪਾਰਟੀ ਦੀ ਵਿਚਾਰਧਾਰਾ ਨਾਲ ਸਬੰਧ ਰੱਖਣ ਅਤੇ ਨੀਤੀਆਂ ਨੂੰ ਸਿਰ ਮੱਥੇ ਕਬੂਲਣ ਵਾਲੇ ਲੋਕਾਂ ਦੇ ਕੁਝ ਖ਼ਾਸ ਸਮੂਹ ਹੁੰਦੇ ਹਨ। ਪਰ ਕਲਾਕਾਰ ਸਾਰਿਆਂ ਦੇ ਸਾਂਝੇ ਹੁੰਦੇ ਹਨ। ਉਨ੍ਹਾਂ ਦਾ ਸਬੰਧ ਕਿਸੇ ਪਾਰਟੀ ਵਿਸ਼ੇਸ਼ ਜਾਂ ਕੁਝ ਕੁ ਲੋਕਾਂ ਦੇ ਸਮੂਹ ਨਾਲ ਨਹੀਂ ਹੁੰਦਾ ਹੈ ਸਗੋਂ ਸਮੁੱਚੇ ਤੌਰ 'ਤੇ ਸਾਰੀ ਜਨਤਾ ਨਾਲ ਹੁੰਦਾ ਹੈ। ਕਲਾਕਾਰਾਂ ਨੇ ਤਾਂ ਨਿਰਪੱਖ ਹੋ ਕੇ ਸਮਾਜ ਅਤੇ ਰਾਜਨੀਤੀ ਵਿਚਲੀਆਂ ਖਾਮੀਆਂ ਨੂੰ ਆਪਣੀ ਕਲਾ ਦੇ ਦਮ ਨਾਲ ਬਾਹਰ ਲਿਆ ਕੇ ਆਮ ਲੋਕਾਂ ਨੂੰ ਜਾਣੂ ਕਰਵਾਉਣਾ ਹੁੰਦਾ ਹੈ। ਪਰ ਅੱਜਕਲ੍ਹ ਦੇ ਰਾਜਨੀਤਕ ਝੁਕਾਵਾਂ ਵਿਚ ਕਲਾਕਾਰਾਂ ਦਾ ਬੋਲਬਾਲਾ ਦੇਖਣ ਨੂੰ ਮਿਲ ਰਿਹਾ ਹੈ, ਇਸ ਦਾ ਨੁਕਸਾਨ ਇਹ ਹੈ ਕਿ ਜਦੋਂ ਕੋਈ ਕਲਾਕਾਰ ਕਿਸੇ ਪਾਰਟੀ ਨਾਲ ਜੁੜਦਾ ਹੈ, ਤਾਂ ਉਹ ਆਪਣੇ-ਆਪ ਨੂੰ ਆਪਣੇ ਹੱਥੀਂ ਸੀਮਤ ਕਰ ਲੈਂਦਾ ਹੈ। ਭਾਵੇਂ ਉਹ ਕਿਸੇ ਪਾਰਟੀ ਨਾਲ ਜੁੜ ਕੇ ਜਿੰਨਾ ਮਰਜ਼ੀ ਨੀਤੀਵਾਨ, ਕਲਿਆਣਕਾਰੀ ਜਾਂ ਭਲਾਈ ਕਰਨ ਵਾਲਾ ਬਣ ਕੇ ਦੱਸੇ, ਲੋਕਾਂ ਨੂੰ ਉਸ ਦਾ ਹਰ ਕਾਰਜ ਦਿਖਾਵਟੀ ਅਤੇ ਬਨਾਵਟੀ ਜਿਹਾ ਜਾਪਦਾ ਹੈ। ਸਮਾਂ ਪਾ ਕੇ ਲੋਕਾਂ ਨੂੰ ਆਪਣੇ ਨਾਲ ਜੋੜਨਾ ਤਾਂ ਕੀ ਸਗੋਂ ਉਹ ਕਲਾਕਾਰ ਦੇ ਤੌਰ 'ਤੇ ਆਪਣੀ ਲੋਕਪ੍ਰਿਅਤਾ ਵੀ ਗਵਾ ਬੈਠਦਾ ਹੈ। ਰਾਜਨੀਤੀ ਵਿਚ ਆ ਕੇ ਕਲਾਕਾਰਾਂ ਨੂੰ ਵੀ ਰਾਜਨੀਤੀ ਵਾਲੇ ਹਥਿਆਰ ਚੁੱਕਣੇ ਪੈਂਦੇ ਹਨ, ਜੋ ਇਕ ਕਲਾਕਾਰ ਦੇ ਵਿਅਕਤਿਤਵ ਨਾਲ ਮੇਲ ਨਹੀਂ ਖਾਂਦੇ ਅਤੇ ਇਹੋ ਅਢੁੱਕਵਾਂਪਣ ਹੌਲੀ-ਹੌਲੀ ਕਲਾਕਾਰ ਨੂੰ ਇਕ ਅਜਿਹੇ ਮੋੜ 'ਤੇ ਲਿਆ ਕੇ ਖੜ੍ਹਾ ਕਰ ਦਿੰਦਾ ਹੈ ਕਿ ਲੋਕ ਰਾਜਨੀਤਕ ਨੇਤਾ ਤਾਂ ਕੀ, ਉਸ ਨੂੰ ਕਲਾਕਾਰ ਵਜੋਂ ਵੀ ਪਸੰਦ ਨਹੀਂ ਕਰਦੇ। ਰਾਜਨੀਤੀ ਸ਼ੈਅ ਹੀ ਐਸੀ ਹੈ ਜਿਸ ਵੱਲ ਹਰ ਕਿਸੇ ਦਾ ਖਿੱਚਿਆ ਜਾਣਾ ਅਤੇ ਕਿਸਮਤ ਅਜ਼ਮਾਉਣਾ ਸੁਭਾਵਿਕ ਹੈ ਪਰ ਕਲਾਕਾਰਾਂ ਨੂੰ ਲੋਕਾਂ ਦੀਆਂ ਭਾਵਨਾਵਾਂ ਸਮਝਦੇ ਹੋਏ ਰਾਜਨੀਤੀ ਵਿਚ ਪ੍ਰਵੇਸ਼ ਕਰਨ ਤੋਂ ਗੁਰੇਜ਼ ਕਰਨਾ ਚਾਹੀਦਾ ਹੈ।

-ਅੰਮ੍ਰਿਤਪਾਲ ਸਿੰਘ ਸੰਧੂ ਬਾੜੀਆਂ
ਮੋ: 94649-29718

18/1/2017

 ਹੁਣ ਆਈ ਜਾਣ ਦੀ ਵਾਰੀ

ਲੋਕ ਰਾਜ ਵਿਚ ਸਰਕਾਰੀ ਟੀਚਿਆਂ ਵਿਚ ਨਾਕਾਮ ਰਹਿਣ ਵਾਲੇ ਲੀਡਰਾਂ ਨੂੰ ਘਰ ਬੈਠਣਾ ਜ਼ਰੂਰੀ ਹੈ। ਆਜ਼ਾਦੀ ਮਿਲਣ ਤੋਂ ਪਿੱਛੋਂ ਭਾਰਤ ਦੇ ਦੇਸ਼ ਭਗਤ ਨੇਤਾਵਾਂ ਨੇ ਅਮਰੀਕਾ ਅਤੇ ਕੈਨੇਡਾ ਆਦਿ ਲੋਕਰਾਜੀ ਦੇਸ਼ਾਂ ਦੀ ਰੀਸ ਨਾਲ ਭਾਰਤ ਵਿਚ ਵੀ ਲੋਕਰਾਜ ਸਥਾਪਤ ਕਰ ਦਿੱਤਾ। ਪ੍ਰੰਤੂ ਉਨ੍ਹਾਂ ਨੇਤਾਵਾਂ ਨੂੰ ਇਹ ਗਿਆਨ ਨਹੀਂ ਸੀ ਕਿ ਇਥੋਂ ਦੇ ਲੀਡਰ ਇਕ ਵਾਰੀ ਮਿਲੀ ਗੱਦੀ ਨੂੰ ਕਦੇ ਛੱਡਣ ਨੂੰ ਤਿਆਰ ਨਹੀਂ ਹੋਣਗੇ ਅਤੇ ਸਰਕਾਰੀ ਖਜ਼ਾਨੇ ਦੇ ਬਲਬੂਤੇ ਆਪਣੇ ਕਾਰੋਬਾਰ ਚਲਾਉਣਗੇ। ਪਿਛਲੇ 70 ਸਾਲਾਂ ਦੌਰਾਨ ਪੰਜਾਬ ਪ੍ਰਾਂਤ ਦੀ ਜੋ ਦੁਰਗਤ ਹੋਈ ਹੈ, ਉਸ ਲਈ ਪ੍ਰਾਂਤ ਦੀਆਂ ਦੋਵੇਂ ਵੱਡੀਆਂ ਪਾਰਟੀਆਂ, ਕਾਂਗਰਸ ਅਤੇ ਅਕਾਲੀ ਦਲ ਜ਼ਿੰਮੇਵਾਰ ਹਨ। ਖੇਤੀ ਅਤੇ ਸਨਅਤ ਦੋਵੇਂ ਨਿਘਾਰ ਵੱਲ ਜਾਣ ਦੇ ਬਾਵਜੂਦ ਇਨ੍ਹਾਂ ਦੋਵਾਂ ਪਾਰਟੀਆਂ 'ਉਤਰ ਕਾਟੋ ਮੈਂ ਚੜ੍ਹਾਂ' ਦੀ ਖੇਡ ਜਾਰੀ ਰੱਖੀ ਹੋਈ ਹੈ। ਪ੍ਰਾਂਤ ਨੂੰ ਖੁਸ਼ਹਾਲੀ ਦੀਆਂ ਲੀਹਾਂ ਉੱਤੇ ਤੋਰਨ ਲਈ ਹਰੇਕ ਜਿੱਤੀ ਹੋਈ ਪਾਰਟੀ ਨੂੰ ਆਪਣੇ ਚੋਣ ਮੈਨੀਫੈਸਟੋ ਅਨੁਸਾਰ, ਮਿਥੇ ਹੋਏ ਟੀਚੇ ਪੂਰੇ ਕਰਨੇ ਜ਼ਰੂਰੀ ਬਣਾਉਣੇ ਚਾਹੀਦੇ ਹਨ। ਜਿਹੜੀ ਪਾਰਟੀ ਅਜਿਹਾ ਨਾ ਕਰ ਸਕੇ, ਉਸ ਦੀ ਸਰਕਾਰ ਨੂੰ ਡਿਸਮਿਸ ਕਰਕੇ ਉਸ ਪਾਰਟੀ ਦੀ ਮਾਨਤਾ ਖ਼ਤਮ ਕਰ ਦੇਣੀ ਚਾਹੀਦੀ ਹੈ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਅੰਮ੍ਰਿਤਸਰ।

ਪੋਸਟਰ ਤੇ ਬੈਨਰ

ਅੱਜ ਦੇ ਦੌਰ ਵਿਚ ਹਰ ਸ਼ਹਿਰ ਕਸਬੇ ਦੀਆਂ ਦੀਵਾਰਾਂ (ਕੰਧਾਂ) ਉੱਪਰ ਕੰਪਨੀਆਂ, ਸੰਸਥਾਵਾਂ ਨੇ ਆਪਣੀ ਮਸ਼ਹੂਰੀ ਲਈ ਥਾਂ-ਥਾਂ 'ਤੇ ਪੋਸਟਰ ਤੇ ਪਰਚੇ ਲਗਾ ਕੇ ਸ਼ਹਿਰਾਂ ਦੀ ਦਿੱਖ ਹੀ ਵਿਗਾੜ ਕੇ ਰੱਖ ਦਿੱਤੀ ਹੈ। ਕਈ ਥਾਵਾਂ 'ਤੇ ਤਾਂ ਦਿਸ਼ਾ ਸੂਚਕ ਬੋਰਡਾਂ ਉੱਪਰ ਵੀ ਪੋਸਟਰ ਹੀ ਚੇਪੇ ਪਏ ਹੁੰਦੇ ਹਨ, ਜਿਸ ਕਾਰਨ ਅਨਜਾਣ ਵਿਅਕਤੀ ਨੂੰ ਮੰਜ਼ਿਲ 'ਤੇ ਪਹੁੰਚਣ ਲਈ ਬੜੀ ਮੁਸ਼ਕਿਲ ਹੋ ਜਾਂਦੀ ਹੈ। ਕਈ ਘਰਾਂ ਤੇ ਦੁਕਾਨਾਂ 'ਤੇ ਹੋਰ ਬਿਲਡਿੰਗਾਂ ਦੇ ਮਾਲਕਾਂ ਨੇ ਨਵਾਂ ਰੰਗ ਰੋਗਨ ਕੀਤਾ ਹੁੰਦਾ ਹੈ। ਇਨ੍ਹਾਂ ਪੋਸਟਰਾਂ ਤੇ ਪਰਚਿਆਂ ਕਾਰਨ ਉਹ ਖਰਾਬ ਹੋ ਜਾਂਦਾ ਹੈ। ਇਹ ਕਈ ਵਾਰ ਲੜਾਈ ਝਗੜੇ ਦੀ ਵੀ ਵਜ੍ਹਾ ਬਣਦਾ ਹੈ। ਅੱਜ ਦੇ ਸਮੇਂ ਵਿਚ ਪੋਸਟਰਾਂ ਦੀ ਵਰਤੋਂ ਕਰਨ ਵਾਲਿਆਂ ਨੂੰ ਸੋਸ਼ਲ ਮੀਡੀਆ, ਅਖ਼ਬਾਰ, ਟੀ.ਵੀ. ਕੇਬਲ ਤੇ ਹੋਰ ਸਾਧਨਾਂ ਦੀ ਵਰਤੋਂ ਕਰਕੇ ਆਪਣੇ ਮਸ਼ਹੂਰੀ ਦੇ ਨਵੇਂ ਢੰਗ ਅਪਣਾਉਣੇ ਚਾਹੀਦੇ ਹਨ ਤਾਂ ਕਿ ਆਪਣੇ ਸ਼ਹਿਰਾਂ, ਕਸਬਿਆਂ ਦੀ ਸੁੰਦਰਤਾ ਨੂੰ ਕਾਇਮ ਰੱਖ ਸਕੀਏ।

-ਸੇਵਾ ਰਾਮ ਸਿੰਗਲਾ
ਮੇਨ ਅਜੀਤ ਰੋਡ, ਬਠਿੰਡਾ।

ਆਤਮ-ਵਿਸ਼ਵਾਸ

ਆਤਮ-ਵਿਸ਼ਵਾਸ ਸਾਰੇ ਗੁਣਾਂ ਦੀ ਆਧਾਰਸ਼ਿਲਾ ਹੈ। ਇਹ ਜੀਵਨ ਦੀ ਪ੍ਰੇਰਨਾ ਸ਼ਕਤੀ ਹੈ, ਜੀਵਨ ਦਾ ਸਾਰ ਹੈ। ਮਹਾਨ ਕੰਮ ਇਸੇ ਸਦਕਾ ਹੋ ਸਕਦੇ ਹਨ। ਸੰਸਾਰ ਦਾ ਇਤਿਹਾਸ ਵੀ ਉਨ੍ਹਾਂ ਚੰਦ ਮਹਾਨ ਲੋਕਾਂ ਦਾ ਇਤਿਹਾਸ ਹੈ, ਜਿਨ੍ਹਾਂ ਦਾ ਆਪਣੇ-ਆਪ ਵਿਚ ਵਿਸ਼ਵਾਸ ਸੀ। ਜਿਸ ਵਿਚ ਆਤਮ-ਵਿਸ਼ਵਾਸ ਹੀ ਨਹੀਂ, ਉਸ ਵਿਚ ਹੋਰ ਚੀਜ਼ਾਂ ਲਈ ਵਿਸ਼ਵਾਸ ਕਿੰਝ ਹੋ ਸਕਦਾ ਹੈ। ਹੋਰ ਨੂੰ ਦੋਸ਼ ਦੇਣ ਤੋਂ ਪਹਿਲਾਂ ਆਪਣੇ ਅੰਦਰ ਝਾਤੀ ਮਾਰੋ, ਕਿਉਂਕਿ ਲੋੜ ਜੋਗੀ ਸ਼ਕਤੀ ਤੇ ਸਹਾਇਤਾ ਸਾਡੇ ਅੰਦਰ ਹੀ ਹੈ। ਇਸ ਨਾਲ ਆਪਾਂ ਦੁਸਰਿਆਂ ਵਿਚ ਵੀ ਆਤਮ-ਵਿਸ਼ਵਾਸ ਦੀ ਭਾਵਨਾ ਪੈਦਾ ਕਰ ਸਕਦੇ ਹਾਂ। ਚੀਨੀ ਕਹਾਵਤ ਹੈ ਕਿ ਭੁੱਖੇ ਨੂੰ ਮੱਛੀ ਨਾ ਦਿਓ, ਸਗੋਂ ਉਸ ਨੂੰ ਮੱਛੀ ਫੜਨ ਦੀ ਜਾਂਚ ਸਿਖਾਓ। ਨਾਲੇ ਪਰਮਾਤਮਾ ਵੀ ਉਨ੍ਹਾਂ ਦੀ ਸਹਾਇਤਾ ਕਰਦਾ ਹੈ ਜੋ ਆਪਣੀ ਸਹਾਇਤਾ ਆਪ ਕਰਦੇ ਹਨ।

-ਮਨਿੰਦਰ ਸਿੰਘ ਰਾਜੂ
ਗਰਚਾ ਨਰਸਰੀ, ਧਨੌਲਾ ਰੋਡ, ਬਰਨਾਲਾ।

17/1/2017

 ਫ਼ਸਲੀ ਵਿਭਿੰਨਤਾ
ਪੰਜਾਬ ਦੇ ਕਿਸਾਨ ਨੇ ਦੇਸ਼ ਦੇ ਅਨਾਜ ਭੰਡਾਰ ਤਾਂ ਭਰ ਦਿੱਤੇ ਪਰ ਉਸ ਦੀ ਆਪਣੀ ਹਾਲਤ ਹਾਸੋ-ਹੀਣੀ ਹੁੰਦੀ ਗਈ, ਜਿਸ ਦਾ ਮੁੱਖ ਕਾਰਨ ਕਿਸਾਨਾਂ ਨੂੰ ਜਿਣਸਾਂ ਦਾ ਲਾਹੇਵੰਦ ਭਾਅ ਦਾ ਨਾ ਮਿਲਣਾ ਸੀ। ਸਰਕਾਰ ਨੇ ਕਿਸਾਨ ਨੂੰ ਕਣਕ-ਝੋਨੇ ਦੇ ਫ਼ਸਲੀ ਚੱਕਰ 'ਚੋਂ ਕੱਢਣ ਲਈ ਫ਼ਸਲੀ ਵਿਭਿੰਨਤਾ ਅਪਣਾਉਣ ਲਈ ਬੜਾ ਪ੍ਰਚਾਰ ਕੀਤਾ ਅਤੇ ਕਿਸਾਨ ਨੇ ਵੀ ਸਰਕਾਰ ਦੀ ਗੱਲ ਮੰਨ ਕੇ ਕਣਕ-ਝੋਨੇ ਦੇ ਫ਼ਸਲੀ ਚੱਕਰ 'ਚੋਂ ਨਿਕਲਣ ਲਈ ਹੱਥ-ਪੈਰ ਮਾਰੇ। ਪਹਿਲਾਂ ਕਿਸਾਨਾਂ ਨੇ ਗੰਨੇ ਦੀ ਫ਼ਸਲ ਨੂੰ ਤਰਜੀਹ ਦਿੱਤੀ ਅਤੇ ਗੰਨਾ ਪੰਜਾਬ ਦੀਆਂ ਮਿੱਲਾਂ ਲਈ ਵਾਧੂ ਕਰ ਦਿੱਤਾ ਪਰ ਸਾਡੀਆਂ ਸਮੇਂ ਦੀਆਂ ਸਰਕਾਰਾਂ ਨੇ ਕਿਸਾਨਾਂ ਨੂੰ ਗੰਨੇ ਦੀ ਫ਼ਸਲ ਦੇ ਸਮੇਂ ਸਿਰ ਪੈਸੇ ਨਾ ਦਿੱਤੇ। ਫ਼ਸਲ ਦੇ ਪੈਸੇ ਮਿੱਲਾਂ ਵੱਲ ਕਈ ਸਾਲਾਂ ਤੱਕ ਫਸੇ ਰਹੇ। ਇਸ ਖੇਤੀ ਵਿਚ ਕਿਸਾਨ ਦੀ ਆਰਥਿਕ ਹਾਲਤ ਹੋਰ ਮਾੜੀ ਹੁੰਦੀ ਗਈ। ਕਿਸਾਨ ਮਾਯੂਸ ਹੋ ਕੇ ਫਿਰ ਉਹੀ ਕਣਕ-ਝੋਨੇ ਦੇ ਫ਼ਸਲੀ ਚੱਕਰ ਵਿਚ ਜਾ ਫਸਿਆ। ਜੇਕਰ ਕਿਸਾਨਾਂ ਨੇ ਬਾਸਮਤੀ ਵੱਲ ਰੁਖ਼ ਕੀਤਾ। ਕਿਸਾਨਾਂ ਨੂੰ ਬਾਸਮਤੀ ਦੀ ਫ਼ਸਲ ਤੋਂ ਪੈਸੇ ਵੀ ਚੰਗੇ ਮਿਲ ਜਾਂਦੇ ਸਨ ਪਰ ਕਿਸਾਨਾਂ ਦੀ ਪੰਜਾਬ ਦੀਆਂ ਮੰਡੀਆਂ 'ਚ ਆਰਥਿਕ ਲੁੱਟ ਕਾਰਨ ਉਨ੍ਹਾਂ ਨੂੰ ਬਹੁਤ ਵੱਡਾ ਘਾਟਾ ਪੈ ਗਿਆ, ਜਿਸ ਨਾਲ ਕਿਸਾਨੀ ਕਰਜ਼ੇ ਦੀ ਦਲਦਲ ਵਿਚ ਫਸ ਕੇ ਰਹਿ ਗਈ ਤੇ ਕਈ ਕਿਸਾਨ ਆਤਮ-ਹੱਤਿਆਵਾਂ ਕਰਨ ਲਈ ਮਜਬੂਰ ਹੋ ਗਏ।


-ਬਿਕਰਮਜੀਤ ਸਿੰਘ ਸੰਧੂ
ਮੱਖੀ ਕਲਾਂ।


ਯੂਥ ਦੀ ਜ਼ਿੰਮੇਵਾਰੀ
ਆਉਣ ਵਾਲੀ 4 ਫਰਵਰੀ ਨੂੰ ਪੰਜਾਬ ਵਿਧਾਨ ਸਭਾ ਦੀਆਂ ਚੋਣਾਂ ਹੋਣ ਜਾ ਰਹੀਆਂ ਹਨ ਅਤੇ ਹਰੇਕ ਰਾਜਨੀਤਕ ਪਾਰਟੀ ਵੱਲੋਂ ਲੋਕਾਂ ਨਾਲ ਤਰ੍ਹਾਂ-ਤਰ੍ਹਾਂ ਦੇ ਵਾਅਦੇ ਕੀਤੇ ਜਾ ਰਹੇ ਹਨ। ਅੱਜ ਬੇਰੁਜ਼ਗਾਰੀ ਨੇ ਆਮ ਪੜ੍ਹੇ-ਲਿਖੇ ਨੌਜਵਾਨ ਦਾ ਬੁਰਾ ਹਾਲ ਕੀਤਾ ਹੋਇਆ ਹੈ ਅਤੇ ਇਕ ਡਿਪਲੋਮੇ ਡਿਗਰੀ ਵਾਲਾ ਨੌਜਵਾਨ ਕਲਾਸ ਫੋਰ ਦੀ ਨੌਕਰੀ ਕਰਨ ਵਾਸਤੇ ਵੀ ਹਾੜੇ ਕੱਢ ਰਿਹਾ ਹੈ। ਹਰੇਕ ਪਾਰਟੀ ਵਿਚ ਯੂਥ ਦੀ ਬਹੁਤ ਮਹੱਤਤਾ ਹੁੰਦੀ ਹੈ ਅਤੇ ਸਾਡੇ ਅੱਜ ਦੇ ਯੂਥ ਦੀ ਇਹ ਜ਼ਿੰਮੇਵਾਰੀ ਬਣਦੀ ਹੈ ਕਿ ਚੋਣਾਂ ਵਿਚ ਸ਼ਰਾਬ ਦਾ ਇਸਤੇਮਾਲ ਬਿਲਕੁਲ ਰੋਕਿਆ ਜਾਵੇ ਅਤੇ ਜਿਹੜੀ ਵੀ ਰਾਜਨੀਤਕ ਪਾਰਟੀ ਰੁਜ਼ਗਾਰ ਨੂੰ ਵੱਧ ਤੋਂ ਵੱਧ ਤਰਜੀਹ ਦਿੰਦੀ ਹੈ ਅਤੇ ਨਸ਼ਿਆਂ ਵਿਰੁੱਧ ਡਟ ਕੇ ਖੜ੍ਹਦੀ ਹੈ, ਉਸੇ ਹੀ ਰਾਜਨੀਤਕ ਪਾਰਟੀ ਨੂੰ ਅੱਗੇ ਲਿਆਉਣਾ ਚਾਹੀਦਾ ਹੈ। ਇਹ ਕੰਮ ਸਿਰਫ ਅੱਜ ਦਾ ਯੂਥ ਹੀ ਕਰ ਸਕਦਾ ਹੈ ਅਤੇ ਯੂਥ ਨੂੰ ਆਪਣੀ ਜ਼ਿੰਮੇਵਾਰੀ ਸਮਝਣੀ ਚਾਹੀਦੀ ਹੈ।


-ਕੇਵਲ ਸਿੰਘ ਬਾਠਾਂ
ਮੋ: 98557-44211


ਗ਼ਲਤ ਪੰਜਾਬੀ ਗੀਤ
ਲੰਮੇ ਸਮੇਂ ਤੋਂ ਪੰਜਾਬੀ ਗੀਤ-ਸੰਗੀਤ ਵਿਚ ਗ਼ਲਤ ਤਰੀਕੇ ਨਾਲ ਲੱਚਰਪੁਣਾ ਦਿਖਾਇਆ ਜਾ ਰਿਹਾ ਹੈ, ਜੋ ਰੁਕਣ ਦੀ ਥਾਂ ਦਿਨੋ-ਦਿਨ ਵਧ ਰਿਹਾ ਹੈ। ਉਸ ਵੇਲੇ ਬਹੁਤ ਹੀ ਦਿਲ ਦੁਖੀ ਹੁੰਦਾ ਹੈ ਜਦੋਂ ਸਫ਼ਰ ਦੌਰਾਨ ਮਜਬੂਰੀਵੱਸ ਪ੍ਰਾਈਵੇਟ ਬੱਸਾਂ ਵਿਚ ਗ਼ਲਤ ਗੀਤ ਸਾਨੂੰ ਸੁਣਨੇ ਪੈਂਦੇ ਹਨ। ਘਰ ਤਾਂ ਅਸੀਂ ਟੀ.ਵੀ. ਚੈਨਲ ਬਦਲ ਕੇ ਗੁੱਸਾ ਕੱਢ ਲੈਂਦੇ ਹਾਂ ਪਰ ਬੱਸ ਵਿਚ ਵਾਹ ਨਹੀਂ ਜਾਂਦੀ। ਕਈ ਵਾਰ ਡਰਾਈਵਰ-ਕੰਡਕਟਰਾਂ ਨੂੰ ਸਮਝਾ ਕੇ ਵੀ ਦੇਖ ਲਿਆ ਪਰ ਉਹ ਨਹੀਂ ਮੰਨਦੇ, ਲੜ ਕੇ ਵੀ ਕਈ ਵਾਰ ਦੇਖ ਲਿਆ। ਨੌਜਵਾਨ ਬੱਚਿਆਂ ਜਾਂ ਭੈਣਾਂ ਸੰਗ ਬੈਠ ਕੇ ਸੂਝਵਾਨ ਬੰਦਾ ਕਦੇ ਵੀ ਇਹ ਕੁਝ ਨਹੀਂ ਸੁਣਿਆ-ਦੇਖਿਆ ਜਾ ਸਕਦਾ। ਪੰਜਾਬ ਸਰਕਾਰ ਦਾ ਟਰਾਂਸਪੋਰਟ ਮਹਿਕਮਾ ਬਹੁਤ ਹੀ ਗੂੜ੍ਹੀ ਨੀਂਦ ਸੁੱਤਾ ਪਿਆ ਹੈ। ਸਿਰਫ ਐਲਾਨ ਨਾਲ ਹੀ ਬੱਸਾਂ ਵਿਚੋਂ ਗੀਤ ਨਹੀਂ ਰੁਕਣੇ ਸਗੋਂ ਸਖ਼ਤੀ ਕਰਨ ਦੀ ਲੋੜ ਹੈ। ਮੇਰੀ ਬੱਸਾਂ ਵਾਲਿਆਂ ਨੂੰ ਵੀ ਬੇਨਤੀ ਹੈ ਕਿ ਤੁਸੀਂ ਵੀ ਸਮਾਜ ਪ੍ਰਤੀ ਆਪਣੀ ਜ਼ਿੰਮੇਵਾਰੀ ਸਮਝੋ ਤੇ ਗ਼ਲਤ ਗੀਤ ਨਾ ਵਜਾਓ, ਲੋਕਾਂ ਨੂੰ ਚੰਗਾ ਸੁਣਾਓ।


-ਸੁਖਦੇਵ ਸ਼ਮਸਪੁਰੀ
ਪਿੰਡ ਸ਼ਮਸਪੁਰ (ਸਮਰਾਲਾ)।

16/1/2017

ਦਲਬਦਲੀ ਦਾ ਮੌਸਮ
ਜਿਉਂ-ਜਿਉਂ ਵਿਧਾਨ ਸਭਾ ਚੋਣਾਂ ਨੇੜੇ ਆ ਰਹੀਆਂ ਹਨ, ਦਲਬਦਲੂ ਨੇਤਾਵਾਂ ਨੇ ਆਪਣੇ ਫਾਇਦੇ ਮੁਤਾਬਿਕ ਦਲ ਬਦਲਣੇ ਸ਼ੁਰੂ ਕਰ ਦਿੱਤੇ ਹਨ। ਰੋਜ਼ਾਨਾ ਹੀ ਪੇਪਰਾਂ ਵਿਚ ਕਿਸੇ ਨਾ ਕਿਸੇ ਨੇਤਾ ਦੀ ਪਾਰਟੀ ਬਦਲਣ ਦੀ ਵੱਡੀ ਸੁਰਖੀ ਲੱਗੀ ਹੁੰਦੀ ਹੈ। ਪਾਰਟੀ ਬਦਲ ਕੇ ਨੇਤਾ ਜੀ ਉਸੇ ਪਾਰਟੀ ਦੀ ਸਿਫ਼ਤ ਕਰਨੋਂ ਰਤਾ ਵੀ ਨਹੀਂ ਸ਼ਰਮਾਉਂਦੇ, ਜਿਸ ਉਤੇ ਚਿੱਕੜ ਸੁੱਟ ਕੇ ਉਨ੍ਹਾਂ ਨੇ ਆਪਣੀ ਪਛਾਣ ਬਣਾਈ ਹੁੰਦੀ ਹੈ। 'ਦੁਸ਼ਮਣ ਦਾ ਦੁਸ਼ਮਣ ਆਪਣਾ ਦੋਸਤ' ਦੀ ਕਹਾਵਤ 'ਤੇ ਅਮਲ ਕਰਦਿਆਂ ਸਿਆਸੀ ਪਾਰਟੀਆਂ ਪਾਰਟੀ ਛੱਡ ਕੇ ਆਏ ਨੇਤਾਵਾਂ ਨੂੰ ਦੋਵੀਂ ਹੱਥੀਂ ਛਾਵਾਂ ਕਰ ਰਹੀਆਂ ਹਨ। ਦਲਬਦਲੂ ਨੇਤਾਵਾਂ ਨੂੰ ਸਨਮਾਨਿਤ ਕਰਨ ਵਿਚ ਕੋਈ ਵੀ ਪਿੱਛੇ ਨਹੀਂ ਰਹਿਣਾ ਚਾਹੁੰਦਾ। ਦਲਬਦਲੀ ਨੂੰ ਮੌਕਾਪ੍ਰਸਤਾਂ ਦੀ ਮਤਲਬਖੋਰੀ ਸਮਝਣ ਦੀ ਬਜਾਏ ਸਿਆਸੀ ਪਾਰਟੀਆਂ ਇਸ ਹਥਿਆਰ ਨੂੰ ਵਿਰੋਧੀਆਂ ਨੂੰ ਮਾਤ ਦੇਣ ਲਈ ਵਰਤ ਰਹੀਆਂ ਹਨ। ਟਿਕਟਾਂ ਦੀ ਵੰਡ ਸਮੇਂ ਦਲ ਬਦਲੂਆਂ ਦੀ ਗਿਣਤੀ ਵਿਚ ਭਾਰੀ ਵਾਧਾ ਹੋਣ ਦੇ ਪੂਰੇ ਆਸਾਰ ਹਨ।


-ਮਨਿੰਦਰ ਸਿੰਘ ਰਾਜੂ
ਗੁਰਸੇਵਕ ਨਗਰ, ਬਰਨਾਲਾ।


ਚੋਣਾਂ
ਪੰਜਾਬ ਵਿਧਾਨ ਸਭਾ ਦੀਆਂ ਨਜ਼ਦੀਕ ਆ ਰਹੀਆਂ ਚੋਣਾਂ ਵਿਚ ਹਰ ਉਮੀਦਵਾਰ ਆਪਣੀ ਕਿਸਮਤ ਅਜ਼ਮਾਉਣ ਲਈ ਪੂਰਾ ਜ਼ੋਰ ਲਗਾ ਰਿਹਾ ਹੈ। ਉਹ ਨੇਤਾ ਜਿਨ੍ਹਾਂ ਦੇ ਦਰਸ਼ਨਾਂ ਨੂੰ ਆਮ ਜਨਤਾ ਤਰਸਦੀ ਸੀ, ਉਹ ਹੁਣ ਘਰ-ਘਰ ਫਿਰਦੇ ਦਿਖਾਈ ਦੇਣਗੇ। ਜਨਤਾ ਨਾਲ ਵੱਡੇ-ਵੱਡੇ ਵਾਅਦੇ ਕੀਤੇ ਜਾ ਰਹੇ ਹਨ। ਇਕ-ਦੂਸਰੇ ਖਿਲਾਫ਼ ਬਿਆਨਬਾਜ਼ੀ ਦਾ ਦੌਰ ਤਾਂ ਹਮੇਸ਼ਾ ਹੀ ਚਲਦਾ ਰਹਿੰਦਾ ਹੈ। ਭੋਲੀ-ਭਾਲੀ ਜਨਤਾ ਨੂੰ ਭਰਮਾਉਣ ਲਈ ਦਿਲ ਲੁਭਾਊ ਭਾਸ਼ਣ ਦਿੱਤੇ ਜਾ ਰਹੇ ਹਨ, ਜੋ ਸੁਣਨ ਨੂੰ ਤਾਂ ਬਹੁਤ ਸੋਹਣੇ ਲਗਦੇ ਹਨ ਪਰ ਅਸਲੀਅਤ ਨਾਲ ਇਨ੍ਹਾਂ ਦਾ ਕੋਈ ਵਾਹ-ਵਾਸਤਾ ਨਹੀਂ ਹੁੰਦਾ। ਸੱਚ ਤਾਂ ਇਹੀ ਹੈ ਕਿ ਹਰ ਲੀਡਰ ਆਪਣੇ ਵਿਕਾਸ ਬਾਰੇ ਸੋਚਦਾ ਹੈ ਨਾ ਕਿ ਪੰਜਾਬ ਦੇ ਵਿਕਾਸ ਬਾਰੇ। ਜੇਕਰ ਕਿਸੇ ਲੀਡਰ ਨੇ ਪੰਜਾਬ ਦੇ ਵਿਕਾਸ ਬਾਰੇ ਸੋਚਿਆ ਹੁੰਦਾ ਤਾਂ ਪੰਜਾਬ ਦਾ ਅੰਨਦਾਤਾ ਅੱਜ ਖੁਦਕੁਸ਼ੀਆਂ ਕਰਨ ਲਈ ਮਜਬੂਰ ਨਾ ਹੁੰਦਾ। ਰੋਜ਼ ਧੀਆਂ-ਭੈਣਾਂ ਦੀ ਇੱਜ਼ਤ ਨਾਲ ਖਿਲਵਾੜ ਨਾ ਹੁੰਦਾ, ਧਰਮ ਦੇ ਨਾਂਅ 'ਤੇ ਰੋਜ਼ ਸਿਆਸਤ ਨਾ ਹੁੰਦੀ। ਸੱਚ ਇਹੀ ਹੈ ਕਿ ਸਾਡੇ ਨੇਤਾ ਸ਼ੁਰੂ ਤੋਂ ਸਾਨੂੰ ਮੂਰਖ ਬਣਾ ਰਹੇ ਹਨ ਤੇ ਅਸੀਂ ਮੂਰਖ ਬਣ ਰਹੇ ਹਾਂ। ਸੰਵਿਧਾਨ ਦੁਆਰਾ ਦਿੱਤਾ ਵੋਟ ਦਾ ਅਧਿਕਾਰ ਬਹੁਤ ਮਹੱਤਵਪੂਰਨ ਅਧਿਕਾਰ ਹੈ, ਇਸ ਲਈ ਆਮ ਜਨਤਾ ਨੂੰ ਚਾਹੀਦਾ ਹੈ ਕਿ ਬਿਨਾਂ ਕਿਸੇ ਲਾਲਚ ਦੇ ਉਹ ਆਪਣੇ ਵੋਟ ਦੇ ਅਧਿਕਾਰ ਦੀ ਸਹੀ ਵਰਤੋਂ ਕਰਕੇ ਯੋਗ ਉਮੀਦਵਾਰ ਦੀ ਚੋਣ ਕਰਨ ਤਾਂ ਕਿ ਪੰਜਾਬ ਨੂੰ ਫਿਰ ਤੋਂ ਖੁਸ਼ਹਾਲ ਸੂਬਾ ਬਣਾਇਆ ਜਾ ਸਕੇ।


-ਜਸਪ੍ਰੀਤ ਕੌਰ ਸੰਘਾ
ਪਿੰਡ ਤਨੂੰਲੀ, ਜ਼ਿਲ੍ਹਾ ਹੁਸ਼ਿਆਰਪੁਰ।


ਮੇਰਾ ਪੰਜਾਬ
ਉਂਜ ਤਾਂ ਪੰਜਾਬ ਨੂੰ ਅਨੇਕਾਂ ਸਮੱਸਿਆਵਾਂ ਨੇ ਘੇਰ ਰੱਖਿਆ ਹੈ ਪਰ ਅੱਜ ਪੰਜਾਬ ਜਿਸ ਸਭ ਤੋਂ ਵੱਡੀ ਸਮੱਸਿਆ ਵਿਚ ਘਿਰਿਆ ਹੋਇਆ ਹੈ, ਉਹ ਹੈ ਨਸ਼ਿਆਂ ਦੀ ਗ੍ਰਿਫ਼ਤ 'ਚ ਆਈ ਨੌਜਵਾਨ ਪੀੜ੍ਹੀ। ਤੰਬਾਕੂ ਅੱਜ ਬਹੁਗਿਣਤੀ ਵਿਅਕਤੀਆਂ ਵੱਲੋਂ ਨਸ਼ੇ ਦੇ ਤੌਰ 'ਤੇ ਵਰਤਿਆ ਜਾਂਦਾ ਹੈ ਜੋ ਕੈਂਸਰ ਵਰਗੀ ਭਿਆਨਕ ਬਿਮਾਰੀ ਦੀ ਜੜ੍ਹ ਹੈ। ਜੇਕਰ ਵੇਖਿਆ ਜਾਵੇ, ਪਸ਼ੂ ਤੰਬਾਕੂ ਵੱਲ ਨਜ਼ਰ ਵੀ ਨਹੀਂ ਕਰਦਾ ਖਾਣ ਦੀ ਗੱਲ ਤਾਂ ਇਕ ਪਾਸੇ ਰਹੀ। ਪਰ ਦਿਮਾਗ ਦਾ ਮਾਲਕ ਅਖਵਾਉਂਦਾ ਇਨਸਾਨ ਤੰਬਾਕੂ ਆਪਣੇ ਮੂੰਹ 'ਚ ਪਾ ਰਿਹਾ ਹੈ।


-ਸੁਖਵਿੰਦਰ ਕਲੇਰ ਬੱਸੀਆਂ
ਪਿੰਡ ਤੇ ਡਾਕ: ਬੱਸੀਆਂ, ਜ਼ਿਲ੍ਹਾ ਲੁਧਿਆਣਾ।

14/01/2017

  ਆਸ਼ਾ ਵਿਚ ਨਿਰਾਸ਼ਾ
ਪ੍ਰਧਾਨ ਮੰਤਰੀ ਸ੍ਰੀ ਨਰਿੰਦਰ ਮੋਦੀ ਵੱਲੋਂ 31 ਦਸੰਬਰ ਨੂੰ ਦਿੱਤੇ ਭਾਸ਼ਣ ਤੋਂ ਲੋਕਾਂ ਨੇ ਅਨੇਕਾਂ ਹੀ ਬੇਮਿਸਾਲ ਆਸਾਂ ਤੇ ਉਮੀਦਾਂ ਰੱਖੀਆਂ ਹੋਈਆਂ ਸਨ ਕਿ ਉਹ ਖ਼ਾਸ ਕਰਕੇ ਕਾਲੇ ਧਨ ਵਾਲਿਆਂ ਖਿਲਾਫ਼ ਕਾਨੂੰਨੀ ਕਾਰਵਾਈ ਤੇ ਗ਼ਰੀਬਾਂ ਲਈ ਕੋਈ ਰਿਆਇਤਾਂ ਦਾ ਐਲਾਨ ਕਰਨਗੇ ਪਰ ਹੋਇਆ ਇਸ ਦੇ ਉਲਟ | ਕਿਉਂ ਪ੍ਰਧਾਨ ਮੰਤਰੀ ਮੋਦੀ ਨੇ ਪਹਿਲਾਂ ਵਾਲੀਆਂ ਚਲਦੀਆਂ ਸਕੀਮਾਂ ਹੀ ਹੋਰ ਢੰਗ ਨਾਲ ਪੇਸ਼ ਕਰਕੇ ਲੋਕਾਂ ਨੂੰ ਪਰੋਸ ਕੇ ਦੇ ਦਿੱਤੀਆਂ? ਜਿਹੜੀਆਂ ਨੋਟਬੰਦੀ ਕਾਰਨ ਲੋਕਾਂ ਨੂੰ ਔਕੜਾਂ, ਮੁਸੀਬਤਾਂ ਤੇ ਸਮੱਸਿਆਵਾਂ ਆਈਆਂ, ਉਹ ਮੁੁੱਦੇ ਗ਼ਾਇਬ ਰਹੇ | ਜਿਵੇਂ ਲੋਕਾਂ ਦੀਆਂ ਮੌਤਾਂ, ਕਾਲੇ ਧਨ ਦੀ ਜਾਣਕਾਰੀ, ਜਨ ਧਨ ਯੋਜਨਾ ਵਾਲੇ ਤੇ ਹੋਰ ਗ਼ਰੀਬਾਂ ਦੇ ਖਾਤਿਆਂ 'ਚ ਰਾਸ਼ੀ ਪਾਉਣੀ, ਬੈਂਕਾਂ 'ਚ ਹੋ ਰਹੀ ਖੱਜਲ-ਖੁਆਰੀ, ਕੈਸ਼ ਸਮੱਸਿਆਵਾਂ, ਬੈਂਕਾਂ 'ਚ ਔਰਤਾਂ ਲਈ ਪੈਸੇ ਲੈਣ ਲਈ ਕੋਈ ਪੁਖਤਾ ਪ੍ਰਬੰਧਾਂ ਦੀ ਘਾਟ, ਵਿਆਹ, ਸ਼ਾਦੀਆਂ, ਸਿਹਤ ਸੇਵਾਵਾਂ, ਵਿਦਿਅਕ ਅਦਾਰੇ, ਕਾਰੋਬਾਰੀਆਂ ਲਈ ਤੇ ਹੋਰ ਆਮ ਤੇ ਖ਼ਾਸ ਗ਼ਰੀਬਾਂ, ਕਿਸਾਨਾਂ ਤੇ ਦੁਕਾਨਦਾਰਾਂ 'ਤੇ ਛਾਏ ਨੋਟਬੰਦੀ ਕਾਰਨ ਕਾਲੇ ਬੱਦਲ ਆਦਿ ਇਹ ਮੁੱਦੇ ਭਾਸ਼ਣ 'ਚੋਂ ਗ਼ਾਇਬ ਰਹੇ ਹਨ | ਕਿਉਂ ਨੋਟਬੰਦੀ ਕਾਰਨ ਲੋਕਾਂ ਦੇ ਕਾਰੋਬਾਰ ਤੇ ਕੰਮਕਾਜ ਠੱਪ ਹੋ ਕੇ ਰਹਿ ਗਏ ਹਨ? ਜਿਸ ਦਾ ਅਸਰ ਸਮੁੱਚੇ ਦੇਸ਼ਵਾਸੀਆਂ ਨੂੰ ਵੇਖਣ ਨੂੰ ਮਿਲ ਰਿਹਾ ਹੈ | ਭਾਸ਼ਣ ਨਾਲ ਲੋਕਾਂ ਨੂੰ ਨਿਰਾਸ਼ਾ ਹੋਈ ਹੈ |

-ਰਾਜੂ ਪੱਤੋ
ਜ਼ਿਲ੍ਹਾ ਮੋਗਾ |

ਟ੍ਰੈਫਿਕ ਨਿਯਮਾਂ ਦੀ ਉਲੰਘਣਾ
ਦੇਸ਼ ਭਰ 'ਚ ਹਰ ਰੋਜ਼ ਛੋਟੇ ਤੇ ਵੱਡੇ ਅਨੇਕਾਂ ਸੜਕ ਹਾਦਸੇ ਵਾਪਰ ਰਹੇ ਹਨ, ਜਿਨ੍ਹਾਂ ਵਿਚ ਕਿੰਨੀਆਂ ਹੀ ਕੀਮਤੀ ਜਾਨਾਂ ਜਾ ਰਹੀਆਂ ਹਨ ਅਤੇ ਲੋਕ ਫੱਟੜ ਹੋ ਰਹੇ ਹਨ, ਜੋ ਬੇਹੱਦ ਚਿੰਤਾ ਦਾ ਵਿਸ਼ਾ ਹੈ | ਭਾਵੇਂ ਇਨ੍ਹਾਂ ਸੜਕ ਹਾਦਸਿਆਂ ਪਿੱਛੇ ਅਨੇਕਾਂ ਕਾਰਨ ਹਨ, ਜਿਵੇਂ ਹੱਦੋਂ ਵੱਧ ਟ੍ਰੈਫਿਕ, ਕਮਜ਼ੋਰ ਸੜਕ ਵਿਵਸਥਾ, ਮੌਸਮ ਆਦਿ ਪਰ ਟ੍ਰੈਫਿਕ ਨਿਯਮਾਂ ਦੀ ਪਾਲਣਾ ਨਾ ਕਰਨਾ ਹਾਦਸਿਆਂ ਦਾ ਸਭ ਤੋਂ ਵੱਡਾ ਕਾਰਨ ਹੈ | ਚਾਲਕ ਜਾਂ ਤਾਂ ਟ੍ਰੈਫਿਕ ਨਿਯਮਾਂ ਤੋਂ ਜਾਣੂ ਨਹੀਂ ਹਨ ਜਾਂ ਜਾਣਬੁੱਝ ਕੇ ਨਿਯਮਾਂ ਦੀ ਉਲੰਘਣਾ ਕਰਦੇ ਹਨ | ਇਸ ਲਈ ਅਜਿਹੇ ਸਖ਼ਤ ਨਿਯਮਾਂ ਦੀ ਲੋੜ ਹੈ, ਜੋ ਦੋਸ਼ੀ ਨੂੰ ਤੁਰੰਤ ਜੁਰਮਾਨਾ ਲਾਵੇ ਜਿਵੇਂ ਟ੍ਰੈਫਿਕ ਨੂੰ ਲਗਾਤਾਰ ਕੈਮਰਿਆਂ ਰਾਹੀਂ ਚੈੱਕ ਕੀਤਾ ਜਾਵੇ |
ਜਦੋਂ ਕੋਈ ਚਾਲਕ ਟ੍ਰੈਫਿਕ ਨਿਯਮਾਂ ਦੀ ਉਲੰਘਣਾ ਕਰੇ ਤਾਂ ਤੁਰੰਤ ਉਸ ਦੇ ਫੋਨ 'ਤੇ ਸੰਦੇਸ਼ ਆ ਜਾਵੇ ਕਿ ਤੇਰੇ ਬੈਂਕ ਖਾਤੇ 'ਚੋਂ ਜੁਰਮਾਨੇ ਵਜੋਂ ਏਨੇ ਰੁਪਏ ਕੱਟ ਲਏ ਗਏ ਹਨ, ਕਿਉਂਕਿ ਤੁਸੀਂ ਕਿਸੇ ਖ਼ਾਸ ਜਗ੍ਹਾ 'ਤੇ ਟ੍ਰੈਫਿਕ ਨਿਯਮ ਦੀ ਉਲੰਘਣਾ ਕੀਤੀ ਹੈ | ਇਸ ਕੰਮ ਲਈ ਗੱਡੀ ਦੀ ਰਜਿਸਟ੍ਰੇਸ਼ਨ ਸਮੇਂ ਆਧਾਰ ਕਾਰਡ ਨਾਲ ਉਸ ਦੇ ਬੈਂਕ ਖਾਤੇ ਨੂੰ ਵੀ ਜੋੜਿਆ ਜਾਵੇ | ਜਾਨ ਦੀ ਪਰਵਾਹ ਨਾ ਕਰਨ ਵਾਲੇ ਵਹੀਕਲ ਚਾਲਕ ਆਰਥਿਕ ਨੁਕਸਾਨ ਦੇ ਡਰੋਂ ਸ਼ਾਇਦ ਸੁਧਰ ਜਾਣ |

-ਬਿਸ਼ੰਬਰ ਸਾਮਾ
ਪਿੰਡ ਤੇ ਡਾਕ: ਖੂਈਆਂ ਸਰਵਰ, ਤਹਿ: ਅਬੋਹਰ, ਜ਼ਿਲ੍ਹਾ ਫ਼ਾਜ਼ਿਲਕਾ |

13/01/2017

 ਸਰਕਾਰੀ ਸਕੂਲਾਂ ਦੀ ਪੜ੍ਹਾਈ

ਸਮਿਆਂ ਦੇ ਬਦਲਦੇ ਦੌਰ ਨਾਲ ਅਜੋਕੇ ਸਮੇਂ ਵਿਚ ਸਰਕਾਰੀ ਸਕੂਲਾਂ ਵਿਚ ਕੇਵਲ ਲੋੜਵੰਦ ਜਾਂ ਗ਼ਰੀਬ ਘਰਾਂ ਦੇ ਬੱਚੇ ਹੀ ਵਿੱਦਿਆ ਹਾਸਲ ਕਰਨ ਆਉਂਦੇ ਹਨ। ਸਵਾਲ ਉੱਠਦਾ ਹੈ ਕਿ ਅਜਿਹਾ ਕਿਉਂ? ਇਸ ਦਾ ਜਵਾਬ ਹੈ ਕਿ ਬਦਲਦੀ ਜੀਵਨ-ਸ਼ੈਲੀ ਦੇ ਤਰੀਕਿਆਂ ਅਤੇ ਸਿੱਖਿਆ ਦੇ ਵਪਾਰੀਕਰਨ ਦੇ ਸਿੱਟੇ ਵਜੋਂ ਅਮੀਰ ਲੋਕ ਤਾਂ ਇਕ ਪਾਸੇ ਸਗੋਂ ਮੱਧ ਵਰਗ ਵੀ ਇਸ ਅੰਨ੍ਹੇਵਾਹ ਦੌੜ ਵਿਚ ਸ਼ਾਮਿਲ ਹੋ ਚੁੱਕਾ ਹੈ। ਸਰਕਾਰ ਦੁਆਰਾ ਪਿਛਲੇ ਸਾਲਾਂ ਵਿਚ ਟੀ.ਈ.ਟੀ., ਯੂ.ਜੀ.ਸੀ. ਨੈੱਟ ਪਾਸ ਹਜ਼ਾਰਾਂ ਅਧਿਆਪਕਾਂ ਦੀ ਵੱਡੀ ਗਿਣਤੀ ਵਿਚ ਚੋਣ ਕਰਕੇ ਸਰਕਾਰੀ ਸਕੂਲਾਂ ਨੂੰ ਦਿੱਤੀ ਗਈ। ਕਈ ਸਕੂਲਾਂ ਨੂੰ ਅਪਗ੍ਰੇਡ ਕੀਤਾ ਗਿਆ ਹੈ। ਅੱਜ ਵੀ ਸਰਕਾਰੀ ਸਕੂਲਾਂ ਦੇ ਵਿਦਿਆਰਥੀ ਬੋਰਡ ਪ੍ਰੀਖਿਆਵਾਂ ਵਿਚ ਟਾਪਰ ਹਨ। ਐਸ.ਐਮ.ਸੀ. ਮੀਟਿੰਗਾਂ ਵਿਚ ਅਕਸਰ ਸਵਾਲ ਉੱਠਦਾ ਹੈ ਕਿ ਮਾਸਟਰਾਂ ਦੇ ਖ਼ੁਦ ਦੇ ਬੱਚੇ ਸਰਕਾਰੀ ਸਕੂਲਾਂ ਵਿਚ ਕਿਉਂ ਨਹੀਂ ਪੜ੍ਹਦੇ? ਅਧਿਆਪਕ ਖ਼ੁਦ ਵੀ ਇਸ ਪਾਸੇ ਸੋਚਣ। ਜੇਕਰ ਅਜਿਹਾ ਹੋ ਗਿਆ ਤਾਂ ਉਹ ਦਿਨ ਦੂਰ ਨਹੀਂ ਹੋਵੇਗਾ ਜਦ ਸਰਕਾਰੀ ਸਕੂਲ ਵੀ ਪ੍ਰਾਈਵੇਟਾਂ ਤੋਂ ਵੱਧ ਲੋਕਪ੍ਰਿਯ ਹੋਣਗੇ।

-ਮਾ: ਮਨਦੀਪ ਸਿਵੀਆ
ਪਿੰਡ ਤੇ ਡਾਕ: ਜੌੜਕੀ ਅੰਧੇ ਵਾਲੀ, ਤਹਿ: ਤੇ ਜ਼ਿਲ੍ਹਾ ਫਾਜ਼ਿਲਕਾ।

ਅਨਪੜ੍ਹਤਾ ਬਨਾਮ 'ਕੈਸ਼ਲੈੱਸ ਇੰਡੀਆ'

ਨੋਟਬੰਦੀ ਮਗਰੋਂ ਕੇਂਦਰ ਸਰਕਾਰ ਕੈਸ਼ਲੈੱਸ ਇੰਡੀਆ ਨੂੰ ਲੈ ਕੇ ਬੇਹੱਦ ਗੰਭੀਰ ਹੈ। ਪਰ ਸਵਾਲ ਇਹ ਉੱਠ ਰਿਹਾ ਹੈ ਕਿ ਜਿਥੇ 35 ਕਰੋੜ ਦੀ ਆਬਾਦੀ ਅਨਪੜ੍ਹ ਹੈ, ਉਥੇ ਹੀ ਸਿੱਖਿਆ ਵਿਵਸਥਾ ਵੀ ਚੌਪਟ ਹੈ, ਅਜਿਹੇ 'ਚ ਇਹ ਲੋਕ ਮੋਦੀ ਦੇ 'ਇੰਡੀਆ' ਨੂੰ ਹਾਈਟੈੱਕ ਹੋਣ ਦੇ ਸੁਪਨੇ ਨੂੰ ਕਿਵੇਂ ਸਾਕਾਰ ਕਰਨਗੇ? ਇਸ 'ਚ ਦੋ ਰਾਏ ਨਹੀਂ ਹੋ ਸਕਦੀਆਂ ਕਿ ਡਿਜੀਟਲ ਇਕਾਨਮੀ, ਕੈਸ਼ਲੈੱਸ ਇਕਾਨਾਮੀ ਜਾਂ ਈ-ਗਵਰਨੈਂਸ ਬਿਹਤਰ ਵਿਵਸਥਾਵਾਂ ਮੰਨੀਆਂ ਜਾ ਰਹੀਆਂ ਹਨ ਪਰ ਵਿਕਾਸ ਦੀਆਂ ਨਿਰਧਾਰਤ ਪ੍ਰਕਿਰਿਆਵਾਂ ਹਨ, ਜੇਕਰ ਅਜਿਹਾ ਨਹੀਂ ਹੁੰਦਾ ਤਾਂ ਲੋਕ ਆਪਣੇ ਬੱਚਿਆਂ ਨੂੰ ਸਾਰੀਆਂ ਹੇਠਲੀਆਂ ਜਮਾਤਾਂ 'ਚ ਪੜ੍ਹਾਉਣ ਦੀ ਬਜਾਏ ਸਿੱਧੇ ਐਮ.ਫਿਲ., ਪੀ.ਐਚ.ਡੀ. ਕਰਵਾਉਂਦੇ। ਸੰਯੁਕਤ ਰਾਸ਼ਟਰ ਦੀ ਐਜੂਕੇਸ਼ਨ ਫਾਰ ਆਲ ਗਲੋਬਲ ਮੋਨੀਟਰਿੰਗ ਰਿਪੋਰਟ (2014) ਅਨੁਸਾਰ ਭਾਰਤ ਵਿਚ 28.7 ਕਰੋੜ ਨੌਜਵਾਨ ਪੜ੍ਹਨਾ-ਲਿਖਣਾ ਨਹੀਂ ਜਾਣਦੇ ਹਨ। ਇਹ ਦੁਨੀਆ ਦੀ ਅਨਪੜ੍ਹ ਆਬਾਦੀ ਦਾ 37 ਫ਼ੀਸਦੀ ਹਨ। ਇਥੇ ਇਹ ਸਵਾਲ ਉੱਠਦਾ ਰਿਹਾ ਹੈ ਕਿ ਇਨ੍ਹਾਂ ਨੂੰ ਸਿੱਖਿਅਤ ਕਰਨ ਲਈ ਕੇਂਦਰ ਸਰਕਾਰ ਕੀ ਕਦਮ ਚੁੱਕ ਰਹੀ ਹੈ?

-ਪ੍ਰਿੰ: ਗੁਰਬਚਨ ਸਿੰਘ ਲਾਲੀ
ਲੇਖਕ ਮੰਚ, ਪੱਟੀ।

ਬੁਢਾਪਾ ਪੈਨਸ਼ਨ

ਪੰਜਾਬ ਸਰਕਾਰ ਨੇ ਬਜ਼ੁਰਗ, ਵਿਧਵਾ, ਅਪੰਗ ਤੇ ਆਸ਼ਰਿਤ ਬੱਚਿਆਂ ਨੂੰ ਦਿੱਤੀ ਜਾਣ ਵਾਲੀ 500 ਰੁਪਏ ਮਹੀਨਾ ਪੈਨਸ਼ਨ, ਜੋ ਕੁਝ ਸਮਾਂ ਪਹਿਲਾਂ ਪੰਚਾਇਤਾਂ ਰਾਹੀਂ ਦਿੱਤੀ ਜਾਂਦੀ ਸੀ, ਨੂੰ ਫਿਰ ਬੈਂਕਾਂ ਰਾਹੀਂ ਦੇਣ ਦਾ ਫ਼ੈਸਲਾ ਲਿਆ ਹੈ। ਵੋਟਾਂ ਨਜ਼ਦੀਕ ਆਉਣ ਕਰਕੇ ਸਰਕਾਰ ਵੱਲੋਂ ਬਜ਼ੁਰਗਾਂ ਨੂੰ ਕੁਝ ਮਹੀਨੇ ਇਕੱਠੀ ਹੋਈ ਪੈਨਸ਼ਨ ਦੇਣਾ ਜ਼ਰੂਰੀ ਸੀ। ਨੋਟਬੰਦੀ ਕਾਰਨ ਸਰਪੰਚ ਵੱਲੋਂ ਬੈਂਕ ਵਿਚੋਂ ਕੈਸ਼ ਦੀ ਕਮੀ ਤੇ ਪੈਸੇ ਕਢਵਾਉਣ 'ਤੇ ਲੱਗੀ ਪਾਬੰਦੀ ਕਾਰਨ ਪੈਨਸ਼ਨ ਕਢਵਾਉਣੀ ਔਖੀ ਹੋ ਗਈ ਸੀ। ਕੋਈ ਕਾਰਗਰ ਹੱਲ ਲੱਭਣ ਦੀ ਥਾਂ ਸਰਕਾਰ ਨੇ ਬਜ਼ੁਰਗਾਂ ਨੂੰ ਪੰਚਾਇਤਾਂ ਵੱਲੋਂ ਕੱਟੇ ਚੈੱਕਾਂ ਰਾਹੀਂ ਪੈਨਸ਼ਨ ਲੈਣ ਲਈ ਬੈਂਕਾਂ ਵਿਚ ਫਿਰ ਧੱਕੇ ਖਾਣ ਲਈ ਮਜਬੂਰ ਕਰ ਦਿੱਤਾ ਹੈ। ਵਿਉਂਤਬੰਦੀ ਤੋਂ ਬਿਨਾਂ ਕੀਤੀ ਨੋਟਬੰਦੀ ਕਾਰਨ ਲੋਕ ਪਹਿਲਾਂ ਹੀ ਕੇਂਦਰ ਸਰਕਾਰ ਨਾਲ ਨਾਰਾਜ਼ ਹਨ, ਹੁਣ ਪੰਜਾਬ ਸਰਕਾਰ ਨੇ ਪੈਨਸ਼ਨ ਫਿਰ ਬੈਂਕਾਂ ਰਾਹੀਂ ਕਰਕੇ ਆਪਣੀ ਕਮੀ ਜ਼ਾਹਰ ਕਰ ਦਿੱਤੀ ਹੈ। ਸਰਕਾਰ ਨੂੰ ਚਾਹੀਦਾ ਹੈ ਕਿ ਜਲਦੀ ਤੋਂ ਜਲਦੀ ਉਹ ਬਜ਼ੁਰਗਾਂ ਨੂੰ ਕਿਸੇ ਹੋਰ ਸੰਸਥਾ ਰਾਹੀਂ ਘਰ ਬੈਠੇ ਪੈਨਸ਼ਨ ਦੇਣ ਬਾਰੇ ਵਿਚਾਰ ਕਰੇ।

-ਸ਼ਮਸ਼ੇਰ ਸਿੰਘ ਸੋਹੀ
ਪਿੰਡ ਸੋਹੀਆਂ, ਡਾਕ: ਚੀਮਾਂ ਖੁੱਡੀ, ਤਹਿ: ਬਟਾਲਾ, ਜ਼ਿਲ੍ਹਾ ਗੁਰਦਾਸਪੁਰ।

 

12/01/2017

 ਵੋਟ ਸੋਚ ਸਮਝ ਕੇ ਪਾਇਓ
ਪੰਜਾਬ 'ਚ ਫਰਵਰੀ 'ਚ ਵੋਟਾਂ ਪੈ ਰਹੀਆਂ ਹਨ। ਸਾਰੀਆਂ ਪਾਰਟੀਆਂ ਅੱਡੀ-ਚੋਟੀ ਦਾ ਜ਼ੋਰ ਲਗਾ ਰਹੀਆਂ ਹਨ ਕਿ ਉਨ੍ਹਾਂ ਦੀ ਸਰਕਾਰ ਬਣ ਜਾਵੇ। ਪੰਜਾਬੀਓ ਇਸ ਵਾਰ ਆਪਣੀ ਵੋਟ ਦਾ ਇਸਤੇਮਾਲ ਸੋਚ ਕੇ ਕਰਿਓ, ਕਿਧਰੇ ਆਪਣੀ ਕੀਮਤੀ ਵੋਟ ਕਿਸੇ ਨੂੰ ਸ਼ਰਾਬ ਦੀ ਬੋਤਲ ਜਾਂ ਕਿਸੇ ਹੋਰ ਲਾਲਚ 'ਚ ਆ ਕੇ ਖਰਾਬ ਨਾ ਕਰ ਦਿਓ। ਵਾਸਤਾ ਤੁਹਾਨੂੰ ਸਾਡਾ ਪ੍ਰਦੇਸੀਂ ਬੈਠੇ ਤੁਹਾਡੇ ਸ਼ੁੱਭਚਿੰਤਕਾਂ ਦਾ, ਤੁਹਾਡਾ ਦੁੱਖ ਜ਼ਰਿਆ ਨਹੀਂ ਜਾਂਦਾ। ਰੋਜ਼ ਖ਼ਬਰਾਂ ਦੀਆਂ ਸੁਰਖੀਆਂ ਆਤਮ-ਹੱਤਿਆਵਾਂ ਅਤੇ ਕਈ ਹੋਰ ਬੇਰੁਜ਼ਗਾਰੀ ਅਤੇ ਗ਼ਰੀਬੀ ਤੋਂ ਤੰਗ ਆ ਕੇ ਮਰਦੇ ਲੋਕ। ਇਸ ਵਾਰ ਸਮਝਦਾਰੀ ਵਰਤਿਓ। ਸੋਚ ਸਮਝ ਕੇ ਉਸ ਨੂੰ ਹੀ ਵੋਟ ਦਿਓ, ਜਿਸ ਨੂੰ ਤੁਸੀਂ ਸਮਝਦੇ ਹੋ ਕਿ ਵੋਟ ਦੇਣ ਨਾਲ ਪੰਜਾਬ ਦਾ ਭਲਾ ਹੋ ਸਕੇਗਾ। ਇਸ ਸੂਬੇ ਦੀ ਹਾਲਤ ਅਜਿਹੀ ਬਣ ਚੁੱਕੀ ਹੈ ਕਿ ਇਸ ਵਾਰ ਤੁਸੀਂ ਆਪਣੇ ਅਧਿਕਾਰ ਦੀ ਸਹੀ ਵਰਤੋਂ ਕਰਕੇ ਇਸ ਦਾ ਭਲਾ ਕਰੋ। ਸਾਡਾ ਕਿਸੇ ਨਾਲ ਵਿਰੋਧ ਨਹੀਂ ਪਰ ਉਹੀ ਪੰਜਾਬ 'ਚ ਸਰਕਾਰ ਆਵੇ ਜੋ ਦਿਲੋਂ ਪੰਜਾਬੀਆਂ ਦਾ ਭਲਾ ਕਰ ਸਕੇ। ਤੁਸੀਂ ਸੋਚਣਾ ਹੈ ਅਤੇ ਸੋਚ ਸਮਝ ਕੇ ਵੋਟ ਪਾਉਣੀ ਹੈ।


-ਮਨਿੰਦਰ ਕੌਰ ਧੌਲ
ਮੈਲਬੌਰਨ (ਆਸਟਰੇਲੀਆ)।


ਸੜਕ ਹਾਦਸੇ
ਅੱਜ ਦੀ ਇਸ ਭੱਜ-ਨੱਸ ਦੀ ਦੌੜ ਵਿਚ ਬਹੁਤ ਹੀ ਕੀਮਤੀ ਜਾਨਾਂ ਸੜਕਾਂ 'ਤੇ ਅਜਾਈਂ ਜਾ ਰਹੀਆਂ ਹਨ। ਬਹੁਤ ਘਰਾਂ ਦੇ ਚੜ੍ਹਦੀ ਉਮਰ ਦੇ ਨੌਜਵਾਨ ਪੁੱਤਰ ਇਨ੍ਹਾਂ ਖੂਨੀ ਸੜਕਾਂ ਨੇ ਆਪਣੀ ਲਪੇਟ ਵਿਚ ਲੈ ਲਏ ਹਨ। ਘਰਾਂ ਦੇ ਇਕਲੌਤੇ ਚਿਰਾਗ ਬੁੱਝ ਗਏ ਹਨ ਪਰ ਸਰਕਾਰਾਂ ਦੇ ਲੱਖਾਂ ਯਤਨਾਂ ਦੇ ਬਾਵਜੂਦ ਅਸੀਂ ਮੌਤ ਦੇ ਖੂਹ ਵੱਲ ਆਪ ਵਧ ਰਹੇ ਹਾਂ। ਘਰੇ ਬੈਠੇ ਏਜੰਟਾਂ ਤੋਂ ਲਾਇਸੰਸ ਬਣਵਾ ਲਏ ਜਾਂਦੇ ਹਨ। ਛੋਟੀ ਉਮਰ ਦਾ ਬੱਚਾ ਬਾਈਕ ਜਾਂ ਗੱਡੀ ਚਲਾਉਂਦਾ ਹੋਵੇ ਤਾਂ ਮਾਂ-ਪਿਉ ਹੁਬ-ਹੁਬ ਦੱਸਣਗੇ ਕਿ ਇਹ ਤਾਂ ਬਹੁਤ ਤੇਜ਼ ਗੱਡੀ ਚਲਾਉਂਦਾ ਹੈ ਤੇ ਸਿੱਖ ਵੀ ਛੇਤੀ ਗਿਆ ਹੈ। ਉਹ ਇਸ ਗੱਲ ਤੋਂ ਅਨਜਾਣ ਹਨ ਕਿ ਉਨ੍ਹਾਂ ਦਾ ਹੁੱਬਣਾ ਹੀ ਇਕ ਦਿਨ ਘਰ 'ਚ ਵਿਛੇ ਸੱਥਰ ਦਾ ਕਾਰਨ ਬਣਨਾ ਹੈ। ਸੜਕਾਂ ਦੀ ਹਾਲਤ ਓਨੀ ਵਧੀਆ ਨਹੀਂ ਹੈ ਜਿੰਨੀ ਗੱਡੀਆਂ ਜਾਂ ਮੋਟਰਸਾਈਕਲਾਂ ਦੀ ਸਪੀਡ ਵਧਾ ਦਿੱਤੀ ਹੈ। ਇਸ ਪਾਸੇ ਵੱਲ ਸਾਰਿਆਂ ਖ਼ਾਸ ਕਰ ਮਾਂ-ਪਿਉ ਨੂੰ ਵਿਸ਼ੇਸ਼ ਤਵੱਜੋ ਦੇਣੀ ਚਾਹੀਦੀ ਹੈ। ਮਾਂ ਦੀ ਮਮਤਾ ਹੀ ਪੁੱਤ ਦੀ ਮੌਤ ਦਾ ਕਾਰਨ ਸਮਾਜ ਵਿਚ ਬਹੁਤ ਵਾਰੀ ਬਣਦੀ ਦੇਖੀ ਹੈ। ਲੋੜ ਹੈ ਜਾਗਣ ਦੀ ਤੇ ਸੰਭਲਣ ਦੀ।


-ਮਨਜੀਤ ਸਿੰਘ ਭਾਮ
ਸੂਬਾ ਪ੍ਰਧਾਨ, ਮਨੁੱਖੀ ਅਧਿਕਾਰ ਸੰਗਠਨ, ਹੁਸ਼ਿਆਰਪੁਰ।


ਡਾਂਸ ਮਜਬੂਰੀ ਜਾਂ ਸ਼ੌਕ?
ਲੋਕਾਂ ਵੱਲੋਂ ਖੁਸ਼ੀਆਂ ਦੇ ਮੌਕੇ 'ਤੇ ਬੁਲਾਏ ਜਾਂਦੇ ਆਰਕੈਸਟਰਾ ਗਰੁੱਪ ਦੇ ਨੌਜਵਾਨ ਮੁੰਡੇ-ਕੁੜੀਆਂ ਵੱਲੋਂ ਡੀ.ਜੇ. ਲਾ ਕੇ ਡਾਂਸ ਕਰਨਾ ਮਜਬੂਰੀ ਹੈ ਜਾਂ ਸ਼ੌਕ, ਇਸ ਬਾਰੇ ਵਿਸਥਾਰ 'ਚ ਕੋਈ ਪਤਾ ਨਹੀਂ ਲੱਗ ਸਕਿਆ। ਪਰ ਪਿਛਲੇ ਦਿਨੀਂ ਇਕ ਵਿਆਹ ਸਮੇਂ ਆਈ ਆਰਕੈਸਟਰਾ ਗਰੁੱਪ ਦੀ ਡਾਂਸਰ ਨੂੰ ਪੁੱਛਣ 'ਤੇ ਪਤਾ ਲੱਗਾ ਕਿ ਇਹ ਉਸ ਦੀ ਮਜਬੂਰੀ ਹੈ ਕੋਈ ਸ਼ੌਕ ਨਹੀਂ ਹੈ। ਉਸ ਨੇ ਦੱਸਿਆ ਕਿ ਉਹ ਦੋ ਭਰਾਵਾਂ ਦੀ ਭੈਣ ਹੈ। ਦੋਵੇਂ ਭਰਾ ਨਸ਼ਿਆਂ ਦੇ ਆਦੀ ਹਨ। ਪਿਤਾ ਸੱਤ ਸਾਲ ਪਹਿਲਾਂ ਘਰੋਂ ਚਲਾ ਗਿਆ, ਮੁੜ ਘਰ ਨਹੀਂ ਪਰਤਿਆ। ਜਦੋਂ ਕਿਹਾ ਕਿ ਇਹ ਸੱਭਿਆਚਾਰ ਦੇ ਨਾਂਅ 'ਤੇ ਪ੍ਰਦੂਸ਼ਣ ਫੈਲਾਇਆ ਜਾ ਰਿਹਾ ਹੈ ਤਾਂ ਉਸ ਕੁੜੀ ਦੇ ਅੱਖਾਂ ਵਿਚੋਂ ਪਾਣੀ ਵਹਿ ਤੁਰਿਆ, ਕਹਿਣ ਲੱਗੀ ਘਰ ਦਾ ਖਰਚ ਚਲਾਉਣ ਲਈ ਅਜਿਹਾ ਕਰਨਾ ਪੈ ਰਿਹਾ ਹੈ। ਮੇਰੇ ਭਰਾ ਨਸ਼ੇ ਖਾਣ ਤੋਂ ਸਿਵਾਏ ਕੋਈ ਕੰਮ ਨਹੀਂ ਕਰਦੇ। ਨੱਚਣ ਸਮੇਂ ਹੱਸਣਾ ਇਕ ਝੂਠਾ ਜਿਹਾ ਹੱਸਣਾ ਹੁੰਦਾ ਹੈ। ਜੇਕਰ ਖੁਸ਼ੀਆਂ ਦੇ ਮੌਕੇ ਮਸੋਸਿਆ ਜਿਹਾ ਮੂੰਹ ਬਣਾ ਕੇ ਨੱਚੀਏ ਤਾਂ ਸਾਡਾ ਮਾਲਿਕ ਅਗਲੇ ਪ੍ਰੋਗਰਾਮ 'ਚੋਂ ਨਾਂਅ ਕੱਟ ਦਿੰਦਾ ਹੈ ਤੇ ਸਾਨੂੰ ਫਿਰ ਆਰਥਿਕ ਤੰਗੀ ਨਾਲ ਜੂਝਣਾ ਪੈ ਜਾਂਦਾ ਹੈ। ਇਸ ਲਈ ਡਾਂਸ ਕਰਨ ਦੇ ਨਾਲ ਹੱਸਣਾ ਜ਼ਰੂਰੀ ਹੈ।


-ਸੁਖਵਿੰਦਰ ਕਲੇਰ ਬੱਸੀਆਂ
ਪਿੰਡ ਤੇ ਡਾਕ: ਬੱਸੀਆਂ, ਜ਼ਿਲ੍ਹਾ ਲੁਧਿਆਣਾ।

9/1/2017

 ਰਿਹਾਇਸ਼ੀ ਖੇਤਰਾਂ 'ਚ ਵਧਦਾ ਆਵਾਜ਼ ਪ੍ਰਦੂਸ਼ਣ
ਪਾਣੀ ਤੇ ਹਵਾ ਪ੍ਰਦੂਸ਼ਣ 'ਤੇ ਨਕੇਲ ਕੱਸਣ ਲਈ ਸਮੇਂ-ਸਮੇਂ 'ਤੇ ਮੌਜੂਦਾ ਸਰਕਾਰ, ਕਈ ਮਹਾਂਪੁਰਖਾਂ ਅਤੇ ਕਈ ਸੰਸਥਾਵਾਂ ਦੁਆਰਾ ਕੀਤੇ ਗਏ ਕਾਰਜ ਅਤਿ ਸ਼ਲਾਘਾਯੋਗ ਅਤੇ ਪ੍ਰੇਰਨਾਸਰੋਤ ਹਨ। ਸਖਤ ਕਾਨੂੰਨ ਹੋਣ ਦੇ ਬਾਵਜੂਦ ਲੋਕ ਲਗਾਤਾਰ ਲਾਊਡ ਸਪੀਕਰਾਂ ਅਤੇ ਮਲਟੀ ਮੀਡੀਆ ਸਪੀਕਰਾਂ ਦੀ ਵਰਤੋਂ ਕਰ ਰਹੇ ਹਨ ਜੋ ਕਿ ਪੜ੍ਹਨ ਵਾਲੇ ਬੱਚਿਆਂ, ਮੁਕਾਬਲੇ ਦੀ ਪ੍ਰੀਖਿਆ ਦੀ ਤਿਆਰੀ ਕਰ ਰਹੇ ਨੌਜਵਾਨਾਂ, ਬਜ਼ੁਰਗਾਂ ਅਤੇ ਛੋਟੇ ਬੱਚਿਆਂ ਅਤੇ ਬਿਮਾਰ ਲੋਕਾਂ ਲਈ ਲਗਾਤਾਰ ਪ੍ਰੇਸ਼ਾਨੀ ਦਾ ਕਾਰਨ ਬਣ ਰਹੇ ਹਨ। ਲੋੜ ਹੈ ਸਾਨੂੰ ਆਪਣੇ-ਆਪ ਨੂੰ ਧੁਨੀ ਪ੍ਰਦੂਸ਼ਣ ਨੂੰ ਘੱਟ ਕਰਨ ਪ੍ਰਤੀ ਜਾਗਰੂਕ ਹੋਣ ਦੀ ਅਤੇ ਦੂਸਰਿਆਂ ਦੀ ਪ੍ਰੇਸ਼ਾਨੀ ਪ੍ਰਤੀ ਸੰਵੇਦਨਸ਼ੀਲ ਹੋਣ ਦੀ।


-ਪ੍ਰੋ: ਉਪਦੇਸ਼ ਖਿੰਡਾ
ਸੁਲਤਾਨਪੁਰ ਲੋਧੀ, ਜ਼ਿਲ੍ਹਾ ਕਪੂਰਥਲਾ।


ਧਰਨੇ ਅਤੇ ਟ੍ਰੈਫਿਕ

ਅਸੀਂ ਅਕਸਰ ਹੀ ਦੇਖਦੇ ਹਾਂ ਕਿ ਲੋਕ ਆਪਣੀਆਂ ਮੰਗਾਂ ਮੰਨਵਾਉਣ ਕਰਨ ਲਈ ਧਰਨੇ ਲਾਉਂਦੇ ਹਨ ਅਤੇ ਕਈ ਵਾਰੀ ਆਵਾਜਾਈ ਰੋਕਦੇ ਹਨ। ਹਰ ਕਿਸੇ ਨੂੰ ਆਪਣੀਆਂ ਜਾਇਜ਼ ਮੰਗਾਂ ਨੂੰ ਮੰਨਾਉਣ ਦਾ ਹੱਕ ਹੈ ਪਰ ਇਸ ਹੱਕ ਦੀ ਕਿਸੇ ਨੂੰ ਵੀ ਦੁਰਵਰਤੋਂ ਕਰਨ ਦਾ ਕੋਈ ਅਧਿਕਾਰ ਨਹੀਂ ਹੈ। ਆਪਣੀਆਂ ਮੰਗਾਂ ਨੂੰ ਉੱਚ-ਅਧਿਕਾਰੀਆਂ ਤੱਕ ਪਹੁੰਚਾਉਣ ਲਈ ਕਈ ਕਿਸਮ ਦੇ ਰਸਤੇ ਅਪਣਾਏ ਜਾਂਦੇ ਹਨ। ਧਰਨੇ ਲਾਏ ਜਾਂਦੇ ਹਨ। ਆਮ ਲੋਕ ਇਸ ਜਾਮ ਵਿਚ ਫਸ ਜਾਂਦੇ ਹਨ। ਉਨ੍ਹਾਂ ਨੇ ਆਪਣੀ ਮੰਜ਼ਿਲ 'ਤੇ ਪਹੁੰਚਣਾ ਹੁੰਦਾ ਹੈ ਪਰ ਉਨ੍ਹਾਂ ਨੂੰ ਰਸਤੇ ਵਿਚ ਹੀ ਰੋਕ ਦਿੱਤਾ ਜਾਂਦਾ ਹੈ। ਉਹ ਆਮ ਲੋਕ ਹੁੰਦੇ ਹਨ। ਉਨ੍ਹਾਂ ਦਾ ਕੋਈ ਕਸੂਰ ਨਹੀਂ ਹੁੰਦਾ। ਕਈਆਂ ਮਰੀਜ਼ਾਂ ਨੂੰ ਹਸਪਤਾਲ ਜਲਦੀ ਪਹੁੰਚਣਾ ਹੁੰਦਾ ਹੈ। ਸੋਚਣ ਵੱਲੀ ਗੱਲ ਹੈ ਕਿ ਇਨ੍ਹਾਂ ਵਿਚਾਰਿਆਂ ਨੂੰ ਕਿਸ ਕਿਸਮ ਦੀ ਸਜ਼ਾ ਦਿੱਤੀ ਜਾਂਦੀ ਹੈ।


-ਸੁਖਪਾਲ ਸਿੰਘ ਫਾਰਮਾਸਿਸਟ
ਗੋਨਿਆਣਾ ਮੰਡੀ, ਬਠਿੰਡਾ।


ਸਮਾਂ
ਸਮਾਂ ਇਨਸਾਨ ਲਈ ਬਹੁਤ ਕੀਮਤੀ ਹੈ। ਸਾਡਾ ਸਾਰਿਆਂ ਦਾ ਫ਼ਰਜ਼ ਬਣਦਾ ਹੈ ਅਸੀਂ ਸਮੇਂ ਦੀ ਕਦਰ ਕਰੀਏ। ਜਿਹੜਾ ਇਨਸਾਨ ਸਮੇਂ ਦੀ ਕਦਰ ਕਰਦਾ ਹੈ, ਉਹ ਜ਼ਿੰਦਗੀ ਵਿਚ ਹਮੇਸ਼ਾ ਸਫ਼ਲ ਹੁੰਦਾ ਹੈ। ਅੱਜ ਦਾ ਕੰਮ ਕੱਲ੍ਹ 'ਤੇ ਨਹੀਂ ਛੱਡਣਾ ਚਾਹੀਦਾ। ਸਾਰੇ ਕੰਮ ਸਮੇਂ ਸਿਰ ਕਰਨੇ ਚਾਹੀਦੇ ਹਨ। ਬੀਤਿਆ ਸਮਾਂ ਕਦੀ ਵੀ ਮੁੜ ਕੇ ਹੱਥ ਨਹੀਂ ਆਉਂਦਾ। ਬਾਅਦ ਵਿਚ ਪਛਤਾਵਾ ਹੀ ਰਹਿ ਜਾਂਦਾ ਹੈ। ਸਾਨੂੰ ਕਦੇ ਵੀ ਸਮਾਂ ਫਜ਼ੂਲ ਗੱਲਾਂ ਕਰਕੇ ਨਹੀਂ ਗਵਾਉਣਾ ਚਾਹੀਦਾ। ਵਿਹਲੇ ਸਮੇਂ ਦੀ ਵੀ ਠੀਕ ਢੰਗ ਨਾਲ ਵਰਤੋਂ ਕਰਨੀ ਚਾਹੀਦੀ ਹੈ। ਹਰੇਕ ਇਨਸਾਨ ਨੂੰ ਚਾਹੀਦਾ ਹੈ ਕਿ ਆਪਣੀ ਜ਼ਿੰਦਗੀ ਨੂੰ ਵਧੀਆ ਬਣਾਉਣ ਲਈ ਮਿਹਨਤ ਅਤੇ ਸਮੇਂ ਦੀ ਕਦਰ ਕਰੇ।


-ਰਾਜਵੀਰ ਕੌਰ
ਪਿੰਡ ਰਾਜਪੁਰ ਭਾਈਆਂ, ਜ਼ਿਲ੍ਹਾ ਹੁਸ਼ਿਆਰਪੁਰ।


ਨਵੇਂ ਸਾਲ ਦੀ ਵਧਾਈ
ਪੰਜਾਬੀ ਮਾਂ-ਬੋਲੀ ਦੀ ਸੇਵਾ ਵਿਚ ਵਿਸ਼ੇਸ਼ ਨਾਮਣਾ ਖੱਟ ਰਿਹਾ 'ਅਜੀਤ' ਜਿਸ ਨੇ ਸਾਡੀ ਮਾਂ-ਬੋਲੀ ਪੰਜਾਬੀ ਜ਼ਬਾਨ ਨੂੰ ਸਿਖਰਾਂ 'ਤੇ ਪਹੁੰਚਾਇਆ ਹੈ ਤੇ ਮਾਣ ਕਰਨਯੋਗ ਕਾਰਜ ਕੀਤੇ ਹਨ। ਇਸ ਦੇ ਮੁੱਖ ਸੰਪਾਦਕ, ਪ੍ਰਬੰਧਕਾਂ ਅਤੇ ਸਮੁੱਚੇ ਸਟਾਫ਼ ਗੱਲ ਕੀ 'ਅਜੀਤ' ਨਾਲ ਜੁੜੀ ਹਰ ਰੂਹ ਨੂੰ ਸਾਡੇ ਵੱਲੋਂ ਨਵੇਂ ਸਾਲ 2017 ਦੀਆਂ ਦਿਲੋਂ ਮੁਬਾਰਕਾਂ। ਇਸੇ ਤਰ੍ਹਾਂ ਹੋਰ ਵਡਮੁੱਲੀ ਸੇਵਾ ਕਰਕੇ ਪੰਜਾਬੀ ਮਾਂ-ਬੋਲੀ ਦੀ ਸੰਦਲੀ ਝੋਲੀ ਹੋਰ ਨਵੇਂ ਪਰਾਗਿਆਂ ਨਾਲ ਭਰ ਕੇ ਪਾਠਕਾਂ ਦੇ ਸਨਮੁੱਖ ਕੀਤਾ ਜਾਵੇ। ਨਵੇਂ ਸਾਲ ਮੌਕੇ 'ਅਜੀਤ ਮੈਗਜ਼ੀਨ' ਵਿਚ ਨਵੇਂ ਸਾਲ ਸਬੰਧੀ ਦਿੱਤੀ ਜਾਣਕਾਰੀ ਅਤੇ ਕਾਵਿ ਮਹਿਫ਼ਲ ਸਲਾਹੁਣਯੋਗ ਸੀ।


-ਬਲਬੀਰ ਸਿੰਘ ਬੱਬੀ
ਪਿੰਡ ਤੱਖਰਾਂ (ਲੁਧਿਆਣਾ)। ਮੋਬਾਈਲ : 92175-92531.

7/1/2017

 ਕਾਲਾ ਧਨ ਖਿਲਾਫ਼ ਮੁਹਿੰਮ

ਦੇਸ਼ ਨੂੰ ਅੰਗਰੇਜ਼ਾਂ ਕੋਲੋਂ ਆਜ਼ਾਦੀ ਮਿਲਣ ਉਪਰੰਤ ਕਾਂਗਰਸ ਪਾਰਟੀ ਨੇ ਦੇਸ਼ ਉੱਤੇ ਲਗਾਤਾਰ 60 ਸਾਲ ਰਾਜ ਕੀਤਾ ਹੈ। ਜਨਤਾ ਦੀ ਆਸ ਦੇ ਉਲਟ ਦੇਸ਼ ਨੂੰ ਖੁਸ਼ਹਾਲ ਬਣਾਉਣ ਦੀ ਬਜਾਏ ਇਸ ਪਾਰਟੀ ਨੇ ਦੇਸ਼ ਵਿਚ ਭ੍ਰਿਸ਼ਟਾਚਾਰ ਤੇ ਰਿਸ਼ਵਤਖੋਰੀ ਫੈਲਾਅ ਕੇ ਦੇਸ਼ ਨੂੰ ਬਰਬਾਦ ਕੀਤਾ ਹੈ। ਦੇਸ਼ ਵਿਚ ਕਾਲੇ ਧਨ ਦਾ ਪਾਸਾਰ ਏਨਾ ਹੋ ਗਿਆ ਸੀ ਕਿ ਉਹ ਦੇਸ਼ ਦੀ ਸੁਰੱਖਿਆ ਲਈ ਖ਼ਤਰਾ ਬਣ ਗਿਆ ਸੀ। ਦੇਸ਼ ਦੇ ਲੋਕਾਂ ਨੇ ਕਾਂਗਰਸ ਪਾਰਟੀ ਨੂੰ ਨਕਾਰ ਕੇ ਸੰਨ 2014 ਦੀਆਂ ਲੋਕ ਸਭਾ ਚੋਣਾਂ ਵਿਚ ਪੂਰਨ ਬਹੁਮਤ ਦੇ ਕੇ ਸ੍ਰੀ ਮੋਦੀ ਦੀ ਅਗਵਾਈ ਵਾਲੀ ਭਾਰਤੀ ਜਨਤਾ ਪਾਰਟੀ ਨੂੰ ਦੇਸ਼ ਦੀ ਵਾਗਡੋਰ ਥਮਾ ਦਿੱਤੀ ਸੀ। ਹੁਣ ਜਦੋਂ ਸ੍ਰੀ ਮੋਦੀ ਦੀ ਸਰਕਾਰ ਨੇ ਕਾਲੇ ਧਨ ਦੇ ਖਿਲਾਫ਼ ਹੱਲਾ ਬੋਲ ਦਿੱਤਾ ਹੈ ਤਾਂ ਕਾਂਗਰਸ ਪਾਰਟੀ ਤੇ ਨਹਿਰੂ ਪਰਿਵਾਰ ਦੇ ਵਾਰਸ ਸ੍ਰੀ ਰਾਹੁਲ ਗਾਂਧੀ ਨੇ ਕਾਲੇ ਧਨ ਕੁਬੇਰਾਂ ਦੇ ਹੱਕ ਵਿਚ ਲੁਕਵੇਂ ਤੌਰ 'ਤੇ ਮੁਹਿੰਮ ਚਲਾ ਰੱਖੀ ਹੈ। ਸ੍ਰੀ ਮੋਦੀ ਇਕ ਮਜ਼ਬੂਤ ਇਰਾਦੇ ਵਾਲੇ ਪ੍ਰਧਾਨ ਮੰਤਰੀ ਹਨ ਤੇ ਦੇਸ਼ ਦੀ ਜਨਤਾ ਉਨ੍ਹਾਂ ਪਿੱਛੇ ਚਟਾਨ ਵਾਂਗ ਖੜ੍ਹੀ ਹੈ। ਦੇਸ਼ ਦੇ ਲੋਕਾਂ ਨੂੰ ਆਸ ਹੈ ਕਿ ਹੁਣ ਦੇਸ਼ ਖੁਸ਼ਹਾਲੀ ਦੇ ਰਸਤੇ ਪੈਰ ਧਰ ਸਕੇਗਾ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਅੰਮ੍ਰਿਤਸਰ।

ਨੋਟ ਤਸਕਰ

ਭਾਰਤ ਵਿਚ ਨੋਟਬੰਦੀ ਦੇ ਦਿਨ ਤੋਂ ਹੀ ਨੋਟ ਤਸਕਰੀ ਦਾ ਧੰਦਾ ਸ਼ੁਰੂ ਹੋ ਗਿਆ ਸੀ। ਇਕ ਪਾਸੇ ਤਾਂ ਦੋ ਹਜ਼ਾਰ ਦਾ ਇਕ ਨੋਟ ਪ੍ਰਾਪਤ ਕਰਨ ਲਈ ਆਮ ਲੋਕ ਕਈ-ਕਈ ਦਿਨ ਬੈਂਕਾਂ ਦੇ ਬਾਹਰ ਲਾਈਨਾਂ ਲਗਾਈ ਖੜ੍ਹੇ ਰਹਿੰਦੇ ਹਨ, ਫਿਰ ਵੀ ਕਈ ਵਾਰੀ ਤਾਂ ਖਾਲੀ ਹੱਥ ਹੀ ਵਾਪਸ ਮੁੜਨਾ ਪੈਂਦਾ ਹੈ। ਦੂਸਰੇ ਪਾਸੇ ਕਰੋੜਾਂ ਰੁਪਏ ਦੇ ਨਵੇਂ ਨੋਟ ਤਸਕਰਾਂ ਕੋਲੋਂ ਫੜੇ ਜਾ ਰਹੇ ਹਨ। ਹੈਰਾਨੀ ਦੀ ਗੱਲ ਹੈ ਕਿ ਇਹ ਨਵੇਂ ਕਰੰਸੀ ਤਸਕਰਾਂ ਦੇ ਘਰ ਕਿਵੇਂ ਪੁੱਜ ਗਈ। ਇਨ੍ਹਾਂ ਧਨ ਕੁਬੇਰਾਂ ਦੇ ਨਾਲ ਬੈਂਕ ਕਰਮਚਾਰੀਆਂ ਦੀ ਮਿਲੀਭੁਗਤ ਵੀ ਨਜ਼ਰ ਆ ਰਹੀ ਹੈ। ਬੈਂਕਾਂ ਅੱਗੇ ਲੰਮੀਆਂ ਲਾਈਨਾਂ ਅਜੇ ਵੀ ਜਾਰੀ ਹਨ ਅਤੇ ਹਰ ਰੋਜ਼ ਨਵੇਂ ਨੋਟ ਭਾਰੀ ਗਿਣਤੀ ਵਿਚ ਫੜੇ ਜਾ ਰਹੇ ਹਨ। ਅਗਰ ਇਹੀ ਨੋਟ ਬੈਂਕਾਂ ਵਿਚ ਜਮ੍ਹਾਂ ਹੁੰਦੇ ਤਾਂ ਆਮ ਜਨਤਾ ਨੂੰ ਏਨੀਆਂ ਤਕਲੀਫ਼ਾਂ ਨਾ ਝੱਲਣੀਆਂ ਪੈਂਦੀਆਂ। ਸਰਕਾਰ ਨੂੰ ਚਾਹੀਦਾ ਹੈ ਕਿ ਇਨ੍ਹਾਂ ਫੜੇ ਗਏ ਧਨ ਕੁਬੇਰਾਂ ਨੂੰ ਅਤੇ ਮਿਲੀਭੁਗਤ ਕਰਨ ਵਾਲੇ ਬੈਂਕ ਕਰਮਚਾਰੀਆਂ ਨੂੰ ਦੇਸ਼ਧ੍ਰੋਹ ਦਾ ਮੁਕੱਦਮਾ ਚਲਾ ਕੇ ਜਲਦੀ ਤੋਂ ਜਲਦੀ ਸਜ਼ਾ ਦੇਵੇ। ਇਹੀ ਵਕਤ ਅਤੇ ਇਨਸਾਫ਼ ਦਾ ਤਕਾਜ਼ਾ ਹੈ।

-ਮਾ: ਮਹਿੰਦਰ ਸਿੰਘ ਬਾਜਵਾ
ਪਿੰਡ ਮਸੀਤਾਂ, ਜ਼ਿਲ੍ਹਾ ਕਪੂਰਥਲਾ।

36 ਸੌ ਕਰੋੜ ਦੀ ਯਾਦਗਾਰ

ਅਸੀਂ ਵਿਕਾਸਸ਼ੀਲ ਦੇਸ਼ ਦੇ ਨਿਵਾਸੀ ਹਾਂ। ਯਥਾਰਥ ਨੂੰ ਭੁੱਲ ਕੇ ਵਿਕਸਤ ਹੋਣ ਦੀ ਕਲਪਨਾ ਪਾਲੀ ਬੈਠੇ ਹਾਂ। ਦੇਸ਼ ਦੀ 70 ਕਰੋੜ ਆਬਾਦੀ ਅੱਜ ਵੀ ਰੋਜ਼ਾਨਾ 20 ਰੁਪਏ ਨਾਲ ਗੁਜ਼ਾਰਾ ਕਰ ਰਹੀ ਹੈ। ਦੇਸ਼ ਕੋਲ ਅਜੇ ਤੱਕ ਔਸਤਨ 45 ਫ਼ੀਸਦੀ ਹੀ ਬਿਜਲੀ ਉਪਲਬਧ ਹੈ। ਦੇਸ਼ ਦਾ ਅੰਨਦਾਤਾ ਆਰਥਿਕ ਮੰਦਹਾਲੀ ਦਾ ਸ਼ਿਕਾਰ ਹੋ ਕੇ ਖ਼ੁਦਕੁਸ਼ੀਆਂ ਕਰਨ ਲਈ ਮਜਬੂਰ ਹੈ। ਦੇਸ਼ ਦਾ ਬਾਲ ਮਜ਼ਦੂਰੀ ਕਾਨੂੰਨ ਦੇਸ਼ ਦੇ ਲੱਖਾਂ ਬੱਚਿਆਂ ਨੂੰ ਅਜੇ ਤੱਕ ਸਕੂਲ ਨਹੀਂ ਭੇਜ ਸਕਿਆ। ਆਪਣੇ ਕੋਮਲ ਹੱਥਾਂ ਵਿਚ ਕਿਤਾਬਾਂ ਫੜਨ ਵਾਲੇ ਹਜ਼ਾਰਾਂ ਬੱਚੇ ਅਜੇ ਵੀ ਢਾਬਿਆਂ ਉੱਪਰ ਜੂਠੇ ਬਰਤਨ ਸਾਫ਼ ਕਰ ਰਹੇ ਹਨ। ਦੂਜੇ ਪਾਸੇ ਪੱਥਰ ਤਰਾਸ਼ ਕੇ ਇੱਟਾਂ, ਸੀਮੈਂਟ ਨਾਲ ਕਰੋੜਾਂ ਦੀਆਂ ਯਾਦਗਾਰਾਂ ਅਤੇ ਬੁੱਤ ਉਸਾਰੇ ਜਾ ਰਹੇ ਹਨ। ਹਾਲ ਹੀ ਵਿਚ ਮਹਾਰਾਸ਼ਟਰ ਦੇ ਮੁੰਬਈ ਤਟ 'ਤੇ ਅਰਬ ਸਾਗਰ ਦੇ ਇਕ ਟਾਪੂ 'ਤੇ ਛਤਰਪਤੀ ਸ਼ਿਵਾਜੀ ਦੀ 36 ਸੌ ਕਰੋੜ ਵਿਚ ਬਣ ਰਹੀ ਯਾਦਗਾਰ ਦਾ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੱਲੋਂ ਉਦਘਾਟਨ ਕੀਤਾ ਗਿਆ ਹੈ। ਇਸ ਯਾਦਗਾਰ 'ਤੇ ਖਰਚਿਆ ਜਾਣਾ ਵਾਲਾ 36 ਸੌ ਕਰੋੜ ਰੁਪਿਆ ਦੇਸ਼ ਦੀਆਂ ਹਜ਼ਾਰਾਂ ਗਰੀਬ ਜ਼ਿੰਦਗੀਆਂ ਨੂੰ ਰੁਸ਼ਨਾ ਸਕਦਾ ਹੈ, ਬਾਲ ਮਜ਼ਦੂਰੀ ਕਰ ਰਹੇ ਲੱਖਾਂ ਬੱਚਿਆਂ ਦੇ ਹੱਥਾਂ ਵਿਚ ਕਿਤਾਬਾਂ ਫੜਾ ਸਕਦਾ ਹੈ। ਆਰਥਿਕ ਮੰਦਹਾਲੀ ਦਾ ਸ਼ਿਕਾਰ ਹੋ ਰਹੇ ਲੱਖਾਂ ਕਿਸਾਨਾਂ ਦੀਆਂ ਖ਼ੁਦਕੁਸ਼ੀਆਂ ਰੋਕ ਸਕਦਾ ਹੈ। ਦੇਸ਼ ਵਿਚ ਅਰਬਾਂ ਰੁਪਏ ਦੀ ਹੋ ਰਹੀ ਬਰਬਾਦੀ ਅਤੇ ਬੁੱਤਾਂ ਅਤੇ ਯਾਦਗਾਰਾਂ ਦੀ ਰਾਜਨੀਤੀ ਕਦੋਂ ਬੰਦ ਹੋਵੇਗੀ।

-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀਖਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

6/1/2017

 ਲੋਕਾਂ ਦੀ ਪ੍ਰੇਸ਼ਾਨੀ

ਪੰਜਾਬ ਵਿਧਾਨ ਸਭਾ ਚੋਣ ਨੇ ਦਸਤਕ ਦੇ ਦਿੱਤੀ ਹੈ। ਹਰੇਕ ਪਾਰਟੀ ਦੇ ਨੁਮਾਇੰਦੇ ਆਪੋ-ਆਪਣੇ ਢੰਗ ਨਾਲ ਜ਼ੋਰ ਅਜਮਾਈ ਕਰਕੇ ਆਪਣੇ ਚੋਣ ਜੁਮਲਿਆਂ ਰਾਹੀਂ ਵੋਟਰਾਂ ਨੂੰ ਆਪਣੇ ਵੱਲ ਖਿੱਚਣ ਦਾ ਯਤਨ ਕਰ ਰਹੇ ਹਨ। ਪੰਜਾਬ ਦੇ ਮੁੱਖ ਮੰਤਰੀ ਸੰਗਤ ਦਰਸ਼ਨ ਪ੍ਰੋਗਰਾਮਾਂ ਲਈ ਅਜਿਹੇ ਵਿਧਾਨ ਸਭਾ ਹਲਕਿਆਂ ਨੂੰ ਤਰਜੀਹ ਦੇ ਰਹੇ ਹਨ, ਜਿਨ੍ਹਾਂ ਵਿਚ ਸ਼੍ਰੋਮਣੀ ਅਕਾਲੀ ਦਲ ਵੱਲੋਂ ਉਮੀਦਵਾਰਾਂ ਦੀ ਅਦਲਾ ਬਦਲੀ ਕੀਤੀ ਗਈ ਹੈ, ਨਾਲ ਹੀ ਇਨ੍ਹਾਂ ਹਲਕਿਆਂ ਅੰਦਰ ਉਮੀਦਵਾਰਾਂ ਦੀਆਂ ਚਣੌਤੀਆਂ ਨੂੰ ਗ੍ਰਾਂਟਾਂ ਦੇ ਜ਼ੋਰ ਨਾਲ ਦੂਰ ਕਰਨ ਦੇ ਯਤਨ ਕੀਤੇ ਜਾ ਰਹੇ ਹਨ।
ਪ੍ਰੰਤੂ ਪੰਜਾਬ ਅੰਦਰ ਸਮਰਾਲਾ ਇਕ ਅਜਿਹਾ ਵਿਧਾਨ ਸਭਾ ਹਲਕਾ ਵੀ ਹੈ, ਜਿੱਥੇ ਆਉਂਦੀਆਂ ਵਿਧਾਨ ਸਭਾ ਚੋਣਾਂ ਲਈ ਸ਼੍ਰੋਮਣੀ ਅਕਾਲੀ ਦਲ ਦਾ ਉਮੀਦਵਾਰ ਬਦਲ ਕੇ ਵੀ ਅਕਾਲੀ ਦਲ ਦੀ ਇਲਾਕੇ ਵਿਚ ਹਾਲਤ ਸੁਧਾਰਨ ਦੀ ਸੰਭਾਵਨਾ ਘਟ ਲਗਦੀ ਹੈ। ਸਮਰਾਲਾ ਸ਼ਹਿਰ ਸਮੇਤ ਇਲਾਕੇ ਦੀਆਂ ਸੜਕਾਂ ਦੇ ਬੇਹੱਦ ਮੰਦੇ ਹਾਲ ਹਨ ਅਤੇ ਸਰਕਾਰ ਵੱਲੋਂ ਪੰਜਾਬ ਦੇ ਕੀਤੇ ਵਿਕਾਸ ਦੇ ਵਾਅਦੇ ਸਮਰਾਲੇ ਦੀ ਹੱਦ ਅੰਦਰ ਦਾਖ਼ਲ ਹੁੰਦੇ ਹੀ ਖੋਖਲੇ ਨਜ਼ਰ ਆਉਣ ਲੱਗਦੇ ਹਨ। ਇਕ ਗੱਲ ਜ਼ਰੂਰ ਹੈ ਸਮਰਾਲਾ ਇਲਾਕੇ ਨੂੰ ਕੈਬਨਿਟ ਦਰਜੇ ਦੇ ਨੇਤਾ 'ਲਾਲੀਪਾਪ' ਦੀ ਤਰ੍ਹਾਂ ਜ਼ਰੂਰ ਦਿੱਤੇ ਹੋਏ ਹਨ ਜਿਨ੍ਹਾਂ ਵਿਚ ਪੰਜਾਬ ਮੰਡੀ ਬੋਰਡ ਦਾ ਚੇਅਰਮੈਨ, ਮੈਂਬਰ ਪੀ. ਏ. ਸੀ., ਚੇਅਰਮੈਨ ਮਾਰਕਫੈੱਡ, ਡਾਇਰੈਕਟਰ ਪੰਜਾਬ ਸਟੇਟ ਇੰਡਸਟਰੀਅਲ ਡਿਵੈੱਲਪਮੈਂਟ ਕਾਰਪੋਰੇਸ਼ਨ ਆਦਿ ਤੋਂ ਇਲਾਵਾ ਪੰਜਾਬ ਦੀਆਂ ਸਿਰਕੱਢ ਕਿਸਾਨ ਜਥੇਬੰਦੀਆਂ ਦੇ ਆਗੂ ਵੀ ਇਸੇ ਇਲਾਕੇ ਦਾ ਮਾਣ ਹਨ। 'ਕੱਟੇ ਨੂੰ ਮਣ ਦੁੱਧ ਦਾ ਕੀ ਭਾਅ' ਦੀ ਕਹਾਵਤ ਵਾਂਗ ਸਮਰਾਲਾ ਵਿਧਾਨ ਸਭਾ ਹਲਕੇ ਦੇ ਲੋਕ ਇੰਨੀਆਂ ਉੱਚ ਸ਼ਖ਼ਸੀਅਤਾਂ ਦਾ ਮਾਣ ਹਾਸਲ ਕਰਕੇ ਵੀ ਇਕ ਲਵਾਰਿਸ ਬੱਚੇ ਵਾਂਗ ਬੁਰੀ ਤਰ੍ਹਾਂ ਵਿਲਕ ਰਹੇ ਹਨ। ਸਰਕਾਰ ਦੀ ਇਸ ਬੇਰੁਖ਼ੀ ਦਾ ਸਥਾਨਕ ਪ੍ਰਸ਼ਾਸਨ ਅਤੇ ਹੋਰ ਸਰਕਾਰੀ ਮਹਿਕਮੇ ਕੰਮ ਪ੍ਰਤੀ ਧਿਆਨ ਨਾ ਦੇ ਕੇ ਪੂਰੀ ਖੁੱਲ੍ਹਦਿਲੀ ਨਾਲ ਫਾਇਦਾ ਲੈ ਰਹੇ ਹਨ। ਪਰ ਆਮ ਲੋਕਾਂ ਨੂੰ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

-ਇੰਦਰਜੀਤ ਸਿੰਘ ਕੰਗ
ਕੋਟਲਾ ਸਮਸ਼ਪੁਰ (ਸਮਰਾਲਾ), ਜ਼ਿਲ੍ਹਾ ਲੁਧਿਆਣਾ।

ਸੁਪਨਈ ਵਾਅਦੇ

ਪੰਜਾਬ ਵਿਧਾਨ ਸਭਾ ਚੋਣਾਂ ਦਾ ਸਿਆਸੀ ਬਾਜ਼ਾਰ ਪੂਰਾ ਗਰਮ ਹੋ ਚੁੱਕਾ ਹੈ। ਸੱਤਾ ਪ੍ਰਾਪਤ ਕਰਨ ਲਈ ਹਰ ਸਿਆਸੀ ਪਾਰਟੀ ਦੇ ਨੇਤਾ ਆਪਣੇ ਚੋਣ ਮਨੋਰਥ ਵਿਚ ਹਰ ਵਰਗ ਦੇ ਵੋਟਰਾਂ ਨੂੰ ਭਰਮਾਉਣ ਲਈ ਵੱਡੇ-ਵੱਡੇ ਦਾਅਵੇ ਤੇ ਵਾਅਦੇ ਕਰ ਰਹੇ ਹਨ, ਜੋ ਪੰਜਾਬ ਦੇ ਲੋਕਾਂ ਨੂੰ ਪਿਛਲੇ 67 ਵਰ੍ਹਿਆਂ ਤੋਂ ਚੋਣਾਂ ਸਮੇਂ ਹਰ ਵਾਰ ਸੁਣਨ ਨੂੰ ਮਿਲਦੇ ਹਨ। ਬੇਰੁਜ਼ਗਾਰੀ, ਨਸ਼ੇ, ਪਲੀਤ ਵਾਤਾਵਰਨ, ਮਹਿੰਗਾਈ, ਮਿਆਰੀ ਸਿਹਤ ਸਹੂਲਤਾਂ, ਸਿੱਖਿਆ ਦਾ ਡਿੱਗਦਾ ਪੱਧਰ, ਬਰਬਾਦ ਹੋ ਚੁੱਕੀ ਕਿਸਾਨੀ, ਤਰਸਯੋਗ ਮਜ਼ਦੂਰਾਂ ਦੀ ਹਾਲਤ, ਤਬਾਹ ਹੋ ਚੁੱਕੀਆਂ ਉਦਯੋਗਿਕ ਇਕਾਈਆਂ ਆਦਿ ਸਮੱਸਿਆਵਾਂ ਵਿਚੋਂ ਗੁਜ਼ਰ ਰਹੇ ਪੰਜਾਬ ਦੇ ਲੋਕਾਂ ਨੂੰ ਆਪਣੀ ਵੋਟ ਦਾ ਇਸਤੇਮਾਲ ਕਰਨ ਤੋਂ ਪਹਿਲਾਂ ਪੰਜਾਬ ਪ੍ਰਤੀ ਰਾਜਨੀਤਕ ਪਾਰਟੀਆਂ ਦੇ ਮੁੱਦਿਆਂ ਉੱਪਰ ਜ਼ਰੂਰ ਨਜ਼ਰ ਮਾਰਨ ਦੀ ਲੋੜ ਹੈ। ਇਸ ਤੋਂ ਇਲਾਵਾ ਸਾਨੂੰ ਸਿਆਸੀ ਪਾਰਟੀਆਂ ਤੋਂ ਸੁਪਨਮਈ ਵਾਅਦਿਆਂ ਦੀ ਥਾਂ ਯਥਾਰਥਮਈ ਪ੍ਰੋਗਰਾਮ ਮੰਗਣੇ ਚਾਹੀਦੇ ਹਨ ਤਾਂ ਕਿ ਪੰਜਾਬ ਮੁੜ ਖੁਸ਼ਹਾਲੀ ਦੀ ਰਾਹ ਉਪਰ ਪੈ ਸਕੇ।

-ਇਕਬਾਲ ਪਾਲੀ
ਪਿੰਡ ਫਲੌਂਡ ਕਲਾਂ (ਸੰਗਰੂਰ)।

5/1/2017

 ਵੋਟ ਦਾ ਅਧਿਕਾਰ
ਭਾਰਤ ਇਕ ਲੋਕਤੰਤਰੀ ਦੇਸ਼ ਹੈ, ਜਿਸ ਵਿਚ 18 ਸਾਲ ਦੀ ਉਮਰ ਪੂਰੀ ਕਰਨ 'ਤੇ ਹਰੇਕ ਨਾਗਰਿਕ ਨੂੰ ਵੋਟ ਦਾ ਅਧਿਕਾਰ ਪ੍ਰਾਪਤ ਹੁੰਦਾ ਹੈ। ਸਾਡਾ ਸਾਰਿਆਂ ਦਾ ਫ਼ਰਜ਼ ਬਣਦਾ ਹੈ ਕਿ ਅਸੀਂ ਵੋਟ ਦੇ ਅਧਿਕਾਰ ਦੀ ਠੀਕ ਢੰਗ ਨਾਲ ਵਰਤੋਂ ਕਰੀਏ। ਸਾਨੂੰ ਕਿਸੇ ਵੀ ਲਾਲਚ ਜਾਂ ਦਬਾਅ ਹੇਠਾਂ ਆ ਕੇ ਵੋਟ ਦੇ ਅਧਿਕਾਰ ਦੀ ਵਰਤੋਂ ਨਹੀਂ ਕਰਨੀ ਚਾਹੀਦੀ। ਹਰੇਕ ਪਾਰਟੀ ਜਿੱਤਣ ਲਈ ਵੱਧ ਤੋਂ ਵੱਧ ਚੋਣ ਪ੍ਰਚਾਰ ਕਰਨ, ਲੋਕਾਂ ਨੂੰ ਸਹੂਲਤਾਂ ਦੇਣ ਦੇ ਵਾਅਦੇ ਕਰ ਰਹੀ ਹੈ। ਦੇਸ਼ ਦੇ ਹਰੇਕ ਨਾਗਰਿਕ ਨੂੰ ਚਾਹੀਦਾ ਹੈ ਕਿ ਆਪਣੀ ਕੀਮਤੀ ਵੋਟ ਉਸ ਪਾਰਟੀ ਨੂੰ ਪਾਵੇ ਜਿਹੜੀ ਵਰਤਮਾਨ ਸਮੇਂ ਵਿਚ ਦੇਸ਼ ਵਿਚ ਚਲ ਰਹੀਆਂ ਸਮੱਸਿਆਵਾਂ ਗ਼ਰੀਬੀ, ਬੇਰੁਜ਼ਗਾਰੀ, ਨਸ਼ਾ, ਮਹਿੰਗਾਈ, ਭ੍ਰਿਸ਼ਟਾਚਾਰ ਨੂੰ ਦੂਰ ਕਰ ਸਕੇ। ਨਾਗਰਿਕਾਂ ਨੂੰ ਵੱਧ ਤੋਂ ਵੱਧ ਰੁਜ਼ਗਾਰ ਦੇ ਮੌਕੇ ਪ੍ਰਦਾਨ ਕਰ ਸਕੇ। ਆਮ ਲੋਕਾਂ ਦੇ ਜੀਵਨ ਪੱਧਰ ਨੂੰ ਉੱਚਾ ਉਠਾ ਸਕੇ।


-ਰਾਜਵੀਰ ਕੌਰ
ਪਿੰਡ ਰਾਜਪੁਰ ਭਾਈਆਂ, ਜ਼ਿਲ੍ਹਾ ਹੁਸ਼ਿਆਰਪੁਰ।


ਸਿਆਸੀ ਪਾਰਟੀਆਂ ਦਾ ਮੁੱਖ ਮਕਸਦ
ਪੰਜਾਬ ਵਿਧਾਨ ਸਭਾ ਚੋਣਾਂ 2017 ਦਾ ਬਿਗਲ ਵੱਜ ਚੁੱਕਾ ਹੈ ਅਤੇ ਸਾਰੀਆਂ ਸਿਆਸੀ ਪਾਰਟੀਆਂ ਨੇ ਆਪਣੀਆਂ ਤਿਆਰੀਆਂ ਖਿੱਚ ਲਈਆਂ ਹਨ। ਸਿਆਸੀ ਲੀਡਰਾਂ ਦੇ ਨਿੱਤ ਆਉਂਦੇ ਬਿਆਨ ਇਕ-ਦੂਸਰੇ ਲਈ ਤੋਹਮਤਬਾਜ਼ੀ ਅਤੇ ਦੂਸ਼ਣਬਾਜ਼ੀ ਨਾਲ ਭਰਪੂਰ ਹੁੰਦੇ ਹਨ। ਸਭ ਪਾਰਟੀਆਂ ਇਕ-ਦੂਸਰੇ ਉੱਪਰ ਅਜਿਹੇ ਇਲਜ਼ਾਮ ਜਾਂ ਤੋਹਮਤਾਂ ਲਾ ਰਹੀਆਂ ਹਨ ਕਿ ਜਿਨ੍ਹਾਂ ਨੂੰ ਸੁਣ ਕੇ ਕਈ ਵਾਰ ਸੋਚਣ ਲਈ ਮਜਬੂਰ ਹੋਣਾ ਪੈਂਦਾ ਹੈ ਕਿ ਪੰਜਾਬ ਦੀ ਸਿਆਸਤ ਕਿੱਧਰ ਨੂੰ ਜਾ ਰਹੀ ਹੈ ਅਤੇ ਕੀ ਕਿਸੇ ਨੂੰ ਸੱਚਮੁਚ ਪੰਜਾਬ ਦਾ ਫਿਕਰ ਹੈ? ਅਗਾਮੀ ਚੋਣਾਂ ਵਿਚ ਸੱਤਾ ਵਿਚ ਭਾਵੇਂ ਕੋਈ ਵੀ ਪਾਰਟੀ ਆਵੇ, ਪਰ ਸਭ ਪਾਰਟੀਆਂ ਦਾ ਕੇਵਲ ਇਕੋ-ਇਕ ਉਦੇਸ਼ ਹੋਵੇ ਅਤੇ ਇਹ ਉਦੇਸ਼ ਹੋਵੇ ਪੰਜਾਬ ਦੀ ਭਲਾਈ। ਪੜ੍ਹਾਈ ਅਤੇ ਖੇਡਾਂ ਦੇ ਨਾਲ-ਨਾਲ ਹੋਰ ਵੀ ਬਹੁਤ ਸਾਰੇ ਖੇਤਰਾਂ ਵਿਚ ਪਛੜ ਰਹੇ ਪੰਜਾਬ ਨੂੰ ਅਜਿਹੀ ਸਰਕਾਰ ਦੀ ਜ਼ਰੂਰਤ ਹੈ ਜੋ ਕਿ ਪੰਜਾਬ ਨੂੰ ਪੜ੍ਹਾਈ ਅਤੇ ਖੇਡਾਂ ਦੇ ਨਾਲ-ਨਾਲ ਸਭ ਖੇਤਰਾਂ ਵਿਚ ਮੋਹਰੀ ਬਣਾਉਣ ਦਾ ਯਤਨ ਕਰੇ। ਇਸ ਲਈ ਸਭ ਸਿਆਸੀ ਪਾਰਟੀਆਂ ਨੂੰ ਚਾਹੀਦਾ ਹੈ ਕਿ ਉਹ ਇਕ-ਦੂਸਰੇ ਉੱਪਰ ਹੋ ਰਹੀ ਬੇਤੁਕੀ ਤੋਹਮਤਬਾਜ਼ੀ ਨੂੰ ਤਿਆਗ ਕੇ ਪੰਜਾਬ ਦੇ ਭਲੇ ਲਈ ਸੋਚਣ ਅਤੇ ਪੰਜਾਬ ਦੇ ਭਲੇ ਲਈ ਕੰਮ ਕਰਨ ਤਾਂ ਜੋ ਸਾਡਾ ਪੰਜਾਬ ਸਭ ਖੇਤਰਾਂ ਵਿਚ ਮੋਹਰੀ ਬਣ ਕੇ ਭਾਰਤ ਮਾਤਾ ਦੇ ਗਲ ਦਾ ਰਾਣੀ ਹਾਰ ਬਣ ਸਕੇ।


-ਗੁਰਪ੍ਰੀਤ ਸਿੰਘ ਮੱਲ੍ਹੀ
ਪਿੰਡ ਤੇ ਡਾਕ: ਜਲਾਲਦੀਵਾਲ, ਤਹਿ: ਰਾਏਕੋਟ, ਜ਼ਿਲ੍ਹਾ ਲੁਧਿਆਣਾ।

3/1/2017

 ਕਿਸਾਨ ਹਿਤੈਸ਼ੀ ਕਾਂਗਰਸੀ ਪ੍ਰਤੀਨਿਧ ਮੰਡਲ
ਪੰਜਾਬ ਸਮੇਤ ਦੇਸ਼ ਦੇ ਵੱਖ-ਵੱਖ ਰਾਜਾਂ ਦੇ ਕਿਸਾਨਾਂ ਸਿਰ ਚੜ੍ਹੇ ਕਰਜ਼ੇ ਨੂੰ ਖ਼ਤਮ ਕਰਨ ਹਿਤ ਪ੍ਰਧਾਨ ਮੰਤਰੀ ਸ੍ਰੀ ਨਰਿੰਦਰ ਮੋਦੀ ਨੂੰ ਸੌਂਪੇ ਮੰਗ ਪੱਤਰ ਰਾਹੀਂ ਸੁਖਦ ਸੁਨੇਹਾ ਜ਼ਰੂਰ ਮਿਲਿਆ ਹੈ। ਕਿਸਾਨ ਹਿਤਾਂ ਦੀ ਰਾਖੀ ਲਈ ਆਮ ਤੌਰ 'ਤੇ ਰਾਜਸੀ ਪਾਰਟੀਆਂ ਕਈ ਤਰ੍ਹਾਂ ਦੇ ਸੰਘਰਸ਼ਾਂ ਰਾਹੀਂ ਸਮੇਂ-ਸਮੇਂ ਆਵਾਜ਼ ਬੁਲੰਦ ਕਰਦੀਆਂ ਰਹੀਆਂ ਹਨ ਪਰ ਕਿਸਾਨਾਂ ਲਈ ਅਮਲੀ ਰੂਪ ਵਿਚ ਅਜੇ ਤੱਕ ਕੁਝ ਖ਼ਾਸ ਨਹੀਂ ਕੀਤਾ ਗਿਆ। ਕਿਸਾਨ ਦੀ ਸਥਿਤੀ ਤੋਂ ਜਾਣੂ ਹੋਣ ਦੇ ਬਾਵਜੂਦ ਰਾਜਨੀਤਕ ਆਗੂ ਅੱਖਾਂ ਬੰਦ ਕਰੀ ਰੱਖਦੇ। ਦੇਸ਼ ਦੀ ਮੌਜੂਦਾ ਅਰਥ-ਵਿਵਸਥਾ ਵਿਚ ਵੱਧ ਪੀੜਤ ਕਿਸਾਨ ਵਰਗ ਹੈ। ਕਿਸਾਨ ਦੇਸ਼ ਵਿਚ ਆਤਮ-ਹੱਤਿਆਵਾਂ ਕਰ ਰਹੇ ਹਨ, ਜੋ ਕਿ ਦੇਸ਼ ਦਾ ਅੰਨਦਾਤਾ ਹੈ। ਰਾਜਨੀਤਕ ਪਾਰਟੀਆਂ ਨੂੰ ਕਿਸਾਨ ਦੀਆਂ ਸਮੱਸਿਆਵਾਂ ਨੂੰ ਗੰਭੀਰਤਾ ਨਾਲ ਲੈਣਾ ਚਾਹੀਦਾ ਹੈ। ਕਿਸਾਨਾਂ ਦੇ ਕਰਜ਼ੇ ਦੇ ਮੁੱਦੇ ਨੂੰ ਖ਼ਤਮ ਕਰਨ ਲਈ ਸਾਰਿਆਂ ਨੂੰ ਸਾਂਝਾ ਹੰਭਲਾ ਮਾਰਨ ਦੀ ਲੋੜ ਹੈ।


-ਪ੍ਰਗਟ ਸਿੰਘ ਵਜੀਦਪੁਰ
ਪਿੰਡ ਤੇ ਡਾਕ: ਵਜੀਦਪੁਰ, ਜ਼ਿਲ੍ਹਾ ਤੇ ਤਹਿਸੀਲ ਪਟਿਆਲਾ।


ਗੱਲ ਫ਼ਸਲੀ ਵਿਭਿੰਨਤਾ ਦੀ

ਕਿਸਾਨਾਂ ਦੀ ਆਰਥਿਕ ਹਾਲਤ ਨੂੰ ਸੁਧਾਰਨ ਲਈ ਸਰਕਾਰਾਂ ਫ਼ਸਲੀ ਵਿਭਿੰਨਤਾ ਦੀਆਂ ਸਲਾਹਾਂ ਤਾਂ ਦੇ ਰਹੀਆਂ ਹਨ ਪਰ ਅਸਲ ਤਸਵੀਰ ਕੁਝ ਹੋਰ ਹੈ। ਸੁਝਾਅ ਤਾਂ ਦਿੱਤੇ ਜਾਂਦੇ ਹਨ ਪਰ ਜਦੋਂ ਜਿਣਸਾਂ ਦੇ ਮੁੱਲ ਤੈਅ ਕਰਨ ਦੀ ਗੱਲ ਆਉਂਦੀ ਹੈ ਤਾਂ ਇਸ ਫ਼ਸਲੀ ਚੱਕਰ ਦੀ ਗੱਲ ਕਿਸਾਨਾਂ ਨੂੰ ਰਾਸ ਨਹੀਂ ਆਉਂਦੀ, ਜਿਸ ਕਰਕੇ ਕਿਸਾਨ ਵੱਧ ਆਮਦਨ ਦੀ ਬਜਾਏ ਘਾਟੇ ਵਿਚ ਰਹਿ ਜਾਂਦੇ ਹਨ। ਮਹਿੰਗੇ ਬੀਜ, ਦਵਾਈਆਂ, ਖਾਦਾਂ, ਖੇਤੀ ਮਸ਼ੀਨਰੀ ਆਦਿ ਵਰਤ ਕੇ ਤਿਆਰ ਕੀਤੀ ਸਬਜ਼ੀ ਜਦੋਂ ਮੰਡੀ 'ਚ ਪਹੁੰਚਦੀ ਹੈ ਤਾਂ ਸਬਜ਼ੀ ਵੇਚਣ ਵਾਲਿਆਂ ਦੀ ਕਮਿਸ਼ਨ ਸਮੇਤ ਕਿਸਾਨ ਖੁੱਲ੍ਹੀ ਮੰਡੀ ਵਿਚ ਲੁੱਟੇ ਜਾਂਦੇ ਹਨ। ਉਗਾਉਣ ਵਾਲੇ ਤੇ ਖਾਣ ਵਾਲੇ ਠੱਗੇ ਜਾਂਦੇ ਹਨ, ਜਦੋਂ ਕਿ ਵਿਚੋਲੇ ਦੋਵਾਂ ਧਿਰਾਂ ਨੂੰ ਚੂਨਾ ਲਗਾ ਲੈਂਦੇ ਹਨ। ਸਮਝ ਨਹੀਂ ਆਉਂਦੀ ਸਰਕਾਰ ਝੋਨੇ, ਕਣਕ, ਗੰਨੇ ਵਾਂਗ ਸਬਜ਼ੀਆਂ, ਫਲਾਂ ਆਦਿ ਦੇ ਮੁੱਲ ਨਿਸਚਿਤ ਕਿਉਂ ਨਹੀਂ ਕਰਦੀ? ਸਬਜ਼ੀ ਮੰਡੀ ਵਿਚ ਰੁਲ ਰਹੀ ਹੈ, ਕਿਸਾਨ ਮੰਡੀ ਵਿਚੋਂ ਮਾਯੂਸ ਹੋ ਕੇ ਖਾਲੀ ਹੱਥੀਂ ਮੁੜਦਾ ਹੈ। ਦੇਸ਼ ਦੀ ਰੀੜ੍ਹ ਦੀ ਹੱਡੀ ਕਹਾਉਂਦੀ ਕਿਰਸਾਨੀ ਦਾ ਲੱਕ ਟੁੱਟ ਰਿਹਾ ਹੈ। ਉਤੋਂ ਨੋਟਬੰਦੀ ਨੇ ਹੋਰ ਰੋਲ ਦਿੱਤਾ ਹੈ। ਕੀੜੇ ਮਾਰ ਦਵਾਈਆਂ, ਖਾਦਾਂ, ਖੇਤੀ ਮਸ਼ੀਨਰੀ ਬਣਾਉਣ ਵਾਲੀਆਂ ਕੰਪਨੀਆਂ ਬੇਲਗਾਮ ਹੋ ਕੇ ਬੇਹਿਸਾਬ ਰੇਟ ਵਧਾ ਕੇ ਕਿਸਾਨਾਂ ਦੀ ਲੁੱਟ ਕਰ ਰਹੀਆਂ ਹਨ। ਉਨ੍ਹਾਂ ਨੂੰ ਕੋਈ ਨਹੀਂ ਪੁੱਛਣ ਵਾਲਾ। ਫ਼ਸਲੀ ਵਿਭਿੰਨਤਾ ਦਾ ਨਾਅਰਾ ਦੇ ਕੇ ਕਿਸਾਨਾਂ ਨੂੰ ਸੰਤੁਸ਼ਟ ਨਹੀਂ ਕੀਤਾ ਜਾ ਸਕਦਾ। ਸਰਕਾਰ ਹਰ ਫ਼ਸਲ ਚਾਹੇ ਸਬਜ਼ੀ ਹੋਵੇ, ਫਲ ਹੋਣ, ਦੀ ਕੀਮਤ ਨਿਸਚਿਤ ਕਰੇ। ਖੇਤੀ ਲਾਗਤ ਘਟੇ ਪੂਰਾ ਮੁੱਲ ਮਿਲੇ ਕਿਸਾਨ ਨੂੰ ਉਸ ਦੇ ਖੂਨ ਪਸੀਨੇ ਦੀ ਕਮਾਈ ਦਾ। ਫ਼ਸਲੀ ਵਿਭਿੰਨਤਾ ਨਾਲ ਪਾਣੀ ਦੀ ਬੱਚਤ ਵੀ ਹੋਵੇਗੀ। ਖ਼ੁਦਕੁਸ਼ੀਆਂ ਦੇ ਰਾਹ ਪਈ ਕਿਸਾਨੀ ਨੂੰ ਸਰਕਾਰ ਬਚਾਵੇ।


-ਜਗਤਾਰ ਗਿੱਲ
ਅੰਮ੍ਰਿਤਸਰ।

1-1-2017

 ਰੁੱਖ ਤੇ ਮਨੁੱਖ
ਰੁੱਖ ਤੇ ਮਨੁੱਖ ਦਾ ਨਾਤਾ ਆਦਿ-ਜੁਗਾਦੀ ਹੈ | ਕੇਵਲ ਮਨੁੱਖ ਹੀ ਨਹੀਂ, ਪਸ਼ੂ ਅਤੇ ਪੰਛੀ ਵੀ ਰੁੱਖਾਂ ਉਤੇ ਨਿਰਭਰ ਹਨ | ਵੰਨ-ਸੁਵੰਨੇ ਪੰਛੀ ਰੁੱਖਾਂ ਦੇ ਟਾਹਣਿਆਂ 'ਤੇ ਆਲ੍ਹਣੇ ਬਣਾ ਕੇ ਰੌਣਕਾਂ ਲਾਉਂਦੇ ਹਨ | ਸਾਨੂੰ ਆਕਸੀਜਨ ਦਰੱਖਤਾਂ ਤੋਂ ਮਿਲਦੀ ਹੈ, ਜੋ ਸਾਹ ਪ੍ਰਣਾਲੀ ਦੀ ਧੜਕਣ ਹੈ ਤੇ ਧੜਕਦੇ ਜੀਵਾਂ ਨਾਲ ਹੀ ਸੰਸਾਰ ਹੈ | ਸੋ, ਜਿਊਾਦੇ ਰਹਿਣ ਲਈ ਦਰੱਖਤਾਂ ਦੀ ਬਹੁਤ ਲੋੜ ਹੈ | ਦਰੱਖਤਾਂ ਦੀ ਅੰਨ੍ਹੇਵਾਹ ਕਟਾਈ ਨੂੰ ਰੋਕਣ ਲਈ ਕਾਨੂੰਨੀ ਤੇ ਸਮਾਜਿਕ ਉੱਦਮਾਂ ਦੀ ਲੋੜ ਹੈ | ਨਵੇਂ ਦਰੱਖਤਾਂ ਨੂੰ ਲਗਾਉਣ ਲਈ ਵੱਡੇ ਯਤਨ ਬਹੁਤ ਜ਼ਰੂਰੀ ਹਨ | ਇਸ ਕੰਮ ਲਈ ਜਾਗਿ੍ਤੀ ਮੁਹਿੰਮ ਆਮ ਲੋਕਾਂ ਵਿਚ ਫੈਲਾਉਣ ਦੀ ਲੋੜ ਹੈ | ਇਕ ਰੁੱਖ-ਸੌ ਸੁੱਖ |

-ਮਨਿੰਦਰ ਸਿੰਘ ਰਾਜੂ
ਧਨੌਲਾ ਰੋਡ, ਬਰਨਾਲਾ |

ਪੰਜਾਬੀ ਮਾਂ-ਬੋਲੀ
ਗੁਰੂਆਂ-ਪੀਰਾਂ, ਰਿਸ਼ੀਆਂ-ਮੁਨੀਆਂ ਤੇ ਮਹਾਨ ਯੋਧਿਆਂ ਦੀ ਧਰਤੀ | ਪੰਜ+ਆਬ ਯਾਨਿ ਪੰਜਾਬ ਜਿਥੋਂ ਦੇ ਪਿੰਡਾਂ ਤੇ ਸ਼ਹਿਰਾਂ ਵਿਚ ਪੰਜਾਬੀ ਮਾਂ-ਬੋਲੀ ਪੜ੍ਹੀ, ਲਿਖੀ ਤੇ ਬੋਲੀ ਜਾਂਦੀ ਹੈ | ਜਿਥੇ ਗੁੜ੍ਹਤੀ ਹੀ ਪੰਜਾਬੀ ਮਾਂ-ਬੋਲੀ ਵਿਚ ਦਿੱਤੀ ਜਾਂਦੀ ਹੈ | ਪਰ ਅਫ਼ਸੋਸ ਪੰਜਾਬ ਅਤੇ ਕਈ ਯੂਨੀਵਰਸਿਟੀਆਂ ਅੰਦਰ ਪੰਜਾਬੀ ਮਾਂ-ਬੋਲੀ ਨਾਲ ਵਿਤਕਰਾ ਕੀਤਾ ਜਾਂਦਾ ਹੈ | ਜਦੋਂ ਕਿ ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਵੱਲੋਂ ਪੰਜਾਬੀ ਗਰੈਜੂਏਟ ਪੱਧਰ ਤੱਕ ਲਾਜ਼ਮੀ ਵਿਸ਼ੇ ਤੇ ਚੋਣਵੇਂ ਵਿਸ਼ੇ ਵਜੋਂ ਪੜ੍ਹਾਈ ਜਾ ਰਹੀ ਸੀ ਪਰ ਹੁਣ ਇਕ ਗਿਣੀ-ਮਿਥੀ ਸਾਜ਼ਿਸ਼ ਤਹਿਤ ਉਸ ਨੂੰ ਨਵੇਂ ਕੋਰਸ ਸਿਸਟਮ ਅਨੁਸਾਰ ਇੱਛਤ ਵਿਸ਼ਾ ਬਣਾਇਆ ਜਾ ਰਿਹਾ ਹੈ | ਪਰ ਸਾਰੇ ਸਮੈਸਟਰਾਂ 'ਚ ਪਹਿਲਾ ਅਤੇ ਚੋਣਵਾਂ ਵਿਸ਼ਾ ਪੰਜਾਬੀ ਲਾਜ਼ਮੀ ਸੀ | ਅਸਲ ਵਿਚ ਭਾਰਤੀ ਸੰਵਿਧਾਨ ਦੀਆਂ ਧਾਰਾਵਾਂ ਅਨੁਸਾਰ ਹਰ ਮਾਤ ਭਾਸ਼ਾ ਵਿਚ ਸਿੱਖਿਆ ਦੇਣੀ ਲਾਜ਼ਮੀ ਹੈ | ਪੰ੍ਰਤੂ ਸਰਕਾਰ ਦੀ ਮਾੜੀ ਨੀਤੀ ਕਾਰਨ ਪੰਜਾਬ ਵਿਚ ਸਬੰਧਤ ਯੂਨੀਵਰਸਿਟੀਆਂ ਵੀ ਪੰਜਾਬੀ ਮਾਂ-ਬੋਲੀ ਨਾਲ ਖਿਲਵਾੜ ਕਰਨ ਲੱਗ ਪਈਆਂ ਹਨ |
ਮਾਤ ਭਾਸ਼ਾ ਤੋਂ ਬਿਨਾਂ ਹੋਰ ਭਾਸ਼ਾਵਾਂ ਦਾ ਗਿਆਨ ਪ੍ਰਾਪਤ ਕਰਨਾ ਕੋਈ ਮਾੜੀ ਗੱਲ ਨਹੀਂ | ਆਪਣੀ ਮਾਤ ਭਾਸ਼ਾ ਤੋਂ ਦੂਰ ਹੋਣਾ ਸਭ ਤੋਂ ਵੱਡਾ ਦੁੱਖ ਹੈ | ਪੰਜਾਬੀ ਸਾਹਿਤ ਨਾਲ ਜੁੜੀਆਂ ਸਾਹਿਤਕ ਸੰਸਥਾਵਾਂ ਅਤੇ ਸਾਰੇ ਮਾਤ ਭਾਸ਼ਾ ਨਾਲ ਜੁੜੇ ਬੁੱਧੀਜੀਵੀਆਂ ਨੂੰ ਅਤੇ ਸ਼੍ਰੋਮਣੀ ਪ੍ਰਬੰਧਕ ਕਮੇਟੀ ਨੂੰ ਇਸ ਘਿਨੌਣੀ ਨੀਤੀ ਦਾ ਵਿਰੋਧ ਕਰਨਾ ਚਾਹੀਦਾ ਹੈ | ਅਜਿਹੇ ਸਮੇਂ ਪੰਜਾਬੀ ਦੇ ਮਾਣ-ਮੱਤੇ ਤੇ ਸਿਰਮੌਰ ਗਾਇਕ ਦੀਆਂ ਸਤਰਾਂ ਸਹੀ ਅਗਵਾਈ ਭਰਦੀਆਂ ਨਜ਼ਰ ਆਉਂਦੀਆਂ ਹਨ:
ਪੰਜਾਬੀਏ ਜ਼ੁਬਾਨੇ ਨੀ ਰੁਕਾਨੇ ਮੇਰੇ ਦੇਸ ਦੀਏ
ਫਿੱਕੀ ਪੈ ਗਈ ਚਿਹਰੇ ਦੀ ਨੁਹਾਰ
ਮੀਢੀਆਂ ਖਿਲਾਰੀ ਫਿਰੇਂ ਨੀ ਬੁੱਲੇ ਦੀਏ ਕਾਫੀਏ
ਕੀਹਨੇ ਤੇਰਾ ਲਾਹ ਲਿਆ ਸ਼ਿੰਗਾਰ... |

-ਰਣਜੀਤ ਸਿੰਘ ਬੱਸੀਆਂ
ਪਿੰਡ ਤੇ ਡਾਕ: ਬੱਸੀਆਂ, ਜ਼ਿਲ੍ਹਾ ਲੁਧਿਆਣਾ |
ਮੋਬਾਈਲ : 99884-67725.

ਨੋਟਬੰਦੀ
ਮੋਦੀ ਸਵਰਗ ਲਈ ਰਚੇ ਅਸ਼ਵਮੇਧ ਯੱਗ ਵਿਚ ਲਗਪਗ 100 ਦੇ ਕਰੀਬ ਲੋਕਾਂ ਨੇ ਆਪਣੀ ਜਾਨ ਦੀ ਆਹੂਤੀ ਦੇ ਦਿੱਤੀ ਹੈ ਤੇ ਅਜੇ ਪਤਾ ਨਹੀਂ ਹੋਰ ਕਿੰਨੀਆਂ ਜਾਣਗੀਆਂ? ਇਵੇਂ ਲੱਗਾ ਹੈ ਕਿ ਮੋਦੀ ਦੇ ਸਲਾਹਕਾਰਾਂ ਨੂੰ ਦੇਸ਼ ਦੇ ਪਿੰਡਾਂ ਦੀ ਆਰਥਿਕ ਅਤੇ ਸਮਾਜ ਸ਼ਾਸਤਰ ਦੀ ਜਾਣਕਾਰੀ ਨਹੀਂ ਹੈ ਕਿ ਪਿੰਡਾਂ ਵਿਚ ਲੋਕਾਂ ਦਾ ਰੋਜ਼ਮਰ੍ਹਾ ਦਾ ਜੀਵਨ ਪ੍ਰਵਾਹ ਕਿਵੇਂ ਚਲਦਾ ਹੈ | ਇਨ੍ਹਾਂ ਲੋਕਾਂ ਨੇ ਸ਼ਹਿਰੀ ਜੀਵਨ ਦੀ ਤਸਵੀਰ ਨੂੰ ਜ਼ਿਆਦਾ ਸਾਹਮਣੇ ਰੱਖਿਆ ਹੈ |
ਸਹਿਕਾਰੀ ਬੈਂਕਾਂ ਵਿਚੋਂ ਨੋਟਬੰਦੀ ਦਾ ਕੰਮ ਬੰਦ ਕਰਨ ਦਾ ਸਰਕਾਰ ਦਾ ਮੰਦਭਾਗਾ ਫ਼ੈਸਲਾ ਸੀ | ਇਸ ਨਾਲ ਪੰਜਾਬ ਦੇ ਪਿੰਡਾਂ ਦੇ ਅਰਥਚਾਰੇ ਨੂੰ ਵੱਡੇ ਪੱਧਰ 'ਤੇ ਸੱਟ ਵੱਜੀ ਹੈ | 80 ਫ਼ੀਸਦੀ ਮੁਦਰਾ ਦਾ ਲੈਣ-ਦੇਣ ਇਨ੍ਹਾਂ ਸਹਿਕਾਰੀ ਬੈਂਕਾਂ ਰਾਹੀਂ ਹੀ ਹੁੰਦਾ ਹੈ | ਇਹ ਸਹਿਕਾਰੀ ਬੈਂਕਾਂ ਪਿੰਡਾਂ ਲਈ ਰੀੜ੍ਹ ਦੀ ਹੱਡੀ ਹਨ | ਇਨ੍ਹਾਂ ਨੇ ਪਿੰਡਾਂ ਦੀ ਆਰਥਿਕਤਾ ਦੇ ਸੁਧਾਰ ਲਈ ਬਹੁਤ ਸ਼ਲਾਘਾਯੋਗ ਰੋਲ ਵੀ ਅਦਾ ਕੀਤਾ ਹੈ | ਕੁਝ ਕਾਲੀਆਂ ਭੇਡਾਂ ਦੀ ਕਾਲੀ ਕਰਤੂਤ ਕਾਰਨ ਸਾਰੇ ਪਿੰਡਾਂ ਨੂੰ ਸਜ਼ਾ ਕਿਸੇ ਵੀ ਸੂਰਤ ਵਿਚ ਜਾਇਜ਼ ਨਹੀਂ |

-ਹਰਜੀਤ ਸਿੰਘ ਰਾਜਾਸਾਂਸੀ
ਪਿੰਡ ਤੇ ਡਾਕ: ਰਾਜਾਸਾਂਸੀ, ਗਲੀ ਘਾਹ ਮੰਡੀ, ਜ਼ਿਲ੍ਹਾ ਅੰਮਿ੍ਤਸਰ |
<br/>

31-12-2016

 ਸੁਪਰੀਮ ਕੋਰਟ ਦੀ ਖ਼ਰੀ-ਖ਼ਰੀ

ਸੁਪਰੀਮ ਕੋਰਟ ਨੇ ਪੰਜਾਬ ਸਰਕਾਰ ਦੀ ਇਸ ਅਣਗਹਿਲੀ ਕਾਰਨ ਖਿਚਾਈ ਕੀਤੀ ਹੈ ਕਿ ਉਸ ਨੇ ਪੰਜਾਬ ਦੀਆਂ ਵੱਡੀਆਂ ਸੜਕਾਂ ਦੇ ਕਿਨਾਰਿਆਂ ਤੋਂ ਸ਼ਰਾਬ ਦੇ ਠੇਕੇ ਬੰਦ ਕਰਨ ਦੇ ਕਾਰਜ ਵਿਚ ਢਿੱਲਮਠ ਦਿਖਾਈ ਹੈ, ਜਦ ਕਿ ਕੋਰਟ ਨੇ ਸ਼ਰਾਬਬੰਦੀ ਲਈ ਬਿਹਾਰ ਸਰਕਾਰ ਦੀ ਪ੍ਰਸੰਸਾ ਕੀਤੀ ਹੈ। ਕੋਰਟ ਨੇ ਕਿਹਾ ਹੈ ਕਿ ਪੰਜਾਬ ਸਰਕਾਰ ਨੂੰ ਸ਼ਰਾਬੀਆਂ ਦੁਆਰਾ ਕਰਨ ਵਾਲੇ ਸੜਕੀ ਹਾਦਸਿਆਂ ਵਿਚ ਹੋਣ ਵਾਲੀਆਂ ਮੌਤਾਂ ਨਾਲ ਕੋਈ ਸਰੋਕਾਰ ਨਹੀਂ। ਭਾਰਤ ਦੀ ਸਭ ਤੋਂ ਵੱਡੀ ਅਦਾਲਤ ਦੀ ਟਿੱਪਣੀ ਪੰਜਾਬ ਸਰਕਾਰ ਦੇ ਨਸ਼ਿਆਂ ਪ੍ਰਤੀ ਮੋਹ ਨੂੰ ਉਜਾਗਰ ਕਰਦੀ ਹੈ। ਪ੍ਰੰਤੂ ਜਦੋਂ ਅਕਾਲੀ-ਭਾਜਪਾ ਗਠਜੋੜ ਸਰਕਾਰ ਦੇ ਲੀਡਰ ਇਹ ਕਹਿੰਦੇ ਹਨ ਕਿ ਪੰਜਾਬੀਆਂ ਨੂੰ ਨਸ਼ੇੜੀ ਕਹਿ ਕੇ ਬਦਨਾਮ ਕੀਤਾ ਜਾ ਰਿਹਾ ਹੈ ਤਾਂ ਲੀਡਰਾਂ ਦੇ ਸਫੈਦ ਝੂਠ ਤੇ ਪਰਦਾਪੋਸ਼ੀ ਉਤੇ ਹੈਰਾਨੀ ਹੁੰਦੀ ਹੈ। ਅੱਜ ਪੰਜਾਬ ਦਾ ਬੱਚਾ-ਬੱਚਾ ਪੰਜਾਬ ਵਿਚਲੇ ਨਸ਼ਿਆਂ ਦੇ ਛੇਵੇਂ ਦਰਿਆ ਦੀ ਗੱਲ ਕਰਦਾ ਹੈ। ਦੁੱਧ, ਘਿਓ, ਮੱਖਣ ਤੇ ਲੱਸੀ ਦੇ ਸ਼ੌਕੀਨ ਪੰਜਾਬੀਆਂ ਨੂੰ ਨਸ਼ਿਆਂ ਵੱਲ ਧੱਕਣ ਲਈ ਪੰਜਾਬ ਦੀਆਂ ਸਾਰੀਆਂ ਸਿਆਸੀ ਪਾਰਟੀਆਂ ਦੇ ਲੀਡਰ ਬਰਾਬਰ ਦੇ ਜ਼ਿੰਮੇਵਾਰ ਹਨ। ਇਨ੍ਹਾਂ ਲੀਡਰਾਂ ਨੇ ਐਕਸਾਈਜ਼ ਡਿਊਟੀ ਤੋਂ ਹੋਣ ਵਾਲੀ ਆਮਦਨ ਅਤੇ ਚੋਣਾਂ ਸਮੇਂ ਵੱਧ ਤੋਂ ਵੱਧ ਵੋਟਾਂ ਬਟੋਰਨ ਲਈ ਨਸ਼ਿਆਂ ਨੂੰ ਉਤਸ਼ਾਹਿਤ ਕੀਤਾ ਹੈ। ਪ੍ਰੰਤੂ ਯਾਦ ਰੱਖੋ, ਜਿਹੜਾ ਸ਼ਰੀਕਾਂ ਦੇ ਘਰ ਨੂੰ ਅੱਗ ਲਾਉਂਦਾ ਹੈ, ਉਸ ਦਾ ਸੇਕ ਉਸ ਦੇ ਆਪਣੇ ਘਰ ਤੱਕ ਵੀ ਪਹੁੰਚ ਜਾਂਦਾ ਹੈ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਅੰਮ੍ਰਿਤਸਰ।

'ਸੁਫ਼ਨਾ ਇਕ-ਖਰਚਾ ਕਰੋੜਾਂ ਦਾ'

ਬੀਤੇ ਦਿਨੀਂ ਹਰੀਕੇ ਝੀਲ ਵਿਚ ਬਸ ਚਲਵਾ ਕੇ ਪੰਜਾਬ ਦੇ ਉਪ ਮੁੱਖ ਮੰਤਰੀ ਸ: ਸੁਖਬੀਰ ਸਿੰਘ ਬਾਦਲ ਨੇ ਆਪਣਾ ਇਕ ਹੋਰ ਸੁਫ਼ਨਾ ਪੂਰਾ ਹੋਣ ਦੀ ਗੱਲ ਕਹੀ। ਉਨ੍ਹਾਂ ਦੇ ਇਸ ਬਿਆਨ ਨੇ ਆਮ ਲੋਕਾਂ ਦੇ ਮਨਾਂ ਅੰਦਰ ਕਈ ਤਰ੍ਹਾਂ ਦੇ ਸਵਾਲ ਖੜ੍ਹੇ ਕਰ ਦਿੱਤੇ। ਜੇਕਰ ਇਕ ਰਾਜ ਨੇਤਾ ਦਾ ਸੁਫ਼ਨਾ ਪੂਰਾ ਕਰਨ ਲਈ ਕਰੋੜਾਂ ਰੁਪਏ ਖਰਚੇ ਜਾ ਸਕਦੇ ਹਨ ਤਾਂ ਆਮ ਲੋਕਾਂ ਦੇ ਸੁਫ਼ਨਿਆਂ ਦਾ ਕੀ ਬਣੇਗਾ? ਮੇਰਾ ਮਨ ਵੀ ਇਹ ਘੋਖਣ ਲੱਗ ਪਿਆ ਕਿ ਕੀ ਭਾਰਤ ਹੁਣ ਸੱਚਮੁਚ ਹੀ ਲੋਕਤੰਤਰੀ ਦੇਸ਼ ਹੈ ਜਾਂ ਕੇਵਲ ਨਾਂਅ ਦਾ ਹੀ ਹੈ? ਲੋਕਤੰਤਰੀ ਦੇਸ਼ ਤਾਂ ਉਹ ਹੁੰਦਾ ਹੈ ਜਿੱਥੇ ਲੋਕਾਂ ਦੇ ਸੁਫ਼ਨੇ ਪੂਰੇ ਕਰਨ ਲਈ ਨੇਤਾ ਚੁਣੇ ਜਾਂਦੇ ਹਨ ਅਤੇ ਆਮ ਲੋਕਾਂ ਲਈ ਸੁਖ ਸਹੂਲਤਾਂ ਅਤੇ ਰੁਜ਼ਗਾਰ ਦੇ ਮੌਕੇ ਪੈਦਾ ਕੀਤੇ ਜਾਂਦੇ ਹਨ। ਪ੍ਰੰਤੂ ਸਾਡੇ ਪੰਜਾਬ ਸੂਬੇ ਦੇ ਅਸੂਲ ਹੀ ਵੱਖਰੇ ਹਨ, ਇੱਥੇ ਨੇਤਾਵਾਂ ਦੇ ਸੁਫ਼ਨੇ ਪੂਰੇ ਕਰਨ ਲਈ ਕਰੋੜਾਂ ਰੁਪਏ ਪਾਣੀ ਵਿਚ ਵਹਾਅ ਦਿੱਤੇ ਜਾਂਦੇ ਹਨ, ਆਮ ਲੋਕਾਂ ਨੂੰ ਕੋਈ ਲਾਭ ਜਾਂ ਰੁਜ਼ਗਾਰ ਮਿਲੇ ਜਾਂ ਨਾ ਮਿਲੇ। ਬੀਤੇ ਦਿਨੀਂ ਪੰਜਾਬ ਦੇ ਉੱਪ ਮੁੱਖ ਮੰਤਰੀ ਨੇ ਆਪਣਾ ਸੁਫ਼ਨਾ ਪੂਰਾ ਕਰਨ ਲਈ 10 ਕਰੋੜ ਰੁਪਏ ਖਰਚ ਕੇ ਜਲ ਬਸ ਨੂੰ ਹਰੀਕੇ ਝੀਲ ਵਿਚ ਉਤਾਰ ਦਿੱਤਾ। ਇਸ ਉਪਰੰਤ ਇਸ ਦੇ ਰੱਖ-ਰਖਾਓ, ਡਰਾਈਵਰ ਦੀ ਤਨਖਾਹ ਵਗੈਰਾ ਅਤੇ ਹੋਰ ਖਰਚੇ ਵੱਖਰੇ ਹਨ। ਜਲ ਬੱਸ ਦੇ 45 ਮਿੰਟ ਨਜ਼ਾਰੇ ਲੈਣ ਲਈ ਟਿਕਟ ਰੱਖ ਦਿੱਤੀ 800 ਰੁਪਏ, ਜਿਹੜੀ ਕਿ ਆਮ ਲੋਕਾਂ ਦੀ ਪਹੁੰਚ ਤੋਂ ਬਾਹਰ ਹੈ। ਜੇਕਰ ਅਜਿਹੇ ਕਾਰਜਾਂ ਦੀ ਥਾਂ 'ਤੇ ਆਮ ਲੋਕਾਂ ਦੇ ਸੁਫਨੇ ਪੂਰੇ ਕਰਨ ਲਈ ਰੁਜ਼ਗਾਰ ਦੇ ਮੌਕੇ ਪੈਦਾ ਕੀਤੇ ਜਾਂਦੇ ਤਾਂ ਸੱਚਮੁੱਚ ਹੀ ਇਕ ਵਿਅਕਤੀ ਦਾ ਸੁਫ਼ਨਾ ਪੂਰਾ ਕਰਨ ਦੀ ਥਾਂ ਹਜ਼ਾਰਾਂ ਘਰਾਂ ਦੇ ਚੁੱਲ੍ਹੇ ਮਘ ਕੇ ਲੱਖਾਂ ਲੋਕਾਂ ਦੇ ਸੁਫ਼ਨੇ ਪੂਰੇ ਹੁੰਦੇ। ਪੰਜਾਬ ਦੇ ਸਰਕਾਰੀ ਖਜ਼ਾਨੇ ਨੂੰ ਕਰੋੜਾਂ ਰੁਪਏ ਦਾ ਚੂਨਾ ਲੱਗ ਗਿਆ ਹੈ।

-ਇੰਦਰਜੀਤ ਸਿੰਘ ਕੰਗ
ਕੋਟਲਾ ਸਮਸ਼ਪੁਰ (ਸਮਰਾਲਾ), ਜ਼ਿਲ੍ਹਾ ਲੁਧਿਆਣਾ।

30/12/2016

 ਮਿਸਾਲੀ ਫ਼ੈਸਲਾ

ਪਿਛਲੇ ਦਿਨੀਂ 'ਅਜੀਤ' ਵਿਚ ਸੰਪਾਦਕੀ 'ਲੁਧਿਆਣਾ ਤੇਜਾਬ ਕਾਂਡ ਦਾ ਫ਼ੈਸਲਾ' ਬਹੁਤ ਹੀ ਪ੍ਰਭਾਵਸ਼ਾਲੀ ਸੀ। ਅਦਾਲਤ ਨੇ ਇਸ ਹਿਰਦੇਵੇਦਕ ਘਟਨਾ ਨੂੰ ਪੂਰੀ ਗੰਭੀਰਤਾ ਨਾਲ ਲੈਂਦੇ ਹੋਏ ਮਿਸਾਲੀ ਫ਼ੈਸਲਾ ਸੁਣਾਇਆ ਹੈ। ਅਜਿਹੇ ਫ਼ੈਸਲੇ ਨਾਲ ਸਮਾਜ ਵਿਰੋਧੀ ਅਨਸਰਾਂ ਨੂੰ ਇਕ ਸਖ਼ਤ ਸੰਦੇਸ਼ ਜਾਵੇਗਾ ਜੋ ਕਿ ਅਤਿ-ਜ਼ਰੂਰੀ ਵੀ ਹੈ। ਸਖ਼ਤ ਕਾਨੂੰਨੀ ਸਜ਼ਾਵਾਂ ਤੋਂ ਬਿਨਾਂ ਸਮਾਜ ਵਿਚ ਸਿਰ ਚੁੱਕ ਰਹੇ ਗੁੰਡਾ ਅਨਸਰਾਂ 'ਤੇ ਨਕੇਲ ਨਹੀਂ ਪਾਈ ਜਾ ਸਕਦੀ। ਇਸ ਤਰ੍ਹਾਂ ਦੇ ਕੇਸਾਂ ਦੇ ਫ਼ੈਸਲੇ ਇਕ ਤੈਅ-ਸ਼ੁਦਾ ਸਮਾਂ ਸੀਮਾ ਵਿਚ ਹਰ ਹਾਲਤ ਵਿਚ ਹੱਲ ਹੋਣੇ ਚਾਹੀਦੇ ਹਨ ਤਾਂ ਜੋ ਆਮ ਆਦਮੀ ਦਾ ਨਿਆਂਪਾਲਿਕਾ 'ਤੇ ਭਰੋਸਾ ਹੋਰ ਵੀ ਪ੍ਰਪੱਕ ਹੋ ਸਕੇ।

-ਬਿਕਰਮਜੀਤ ਸਿੰਘ
ਭਾਦਸੋਂ, ਜ਼ਿਲ੍ਹਾ ਪਟਿਆਲਾ।

ਕਦਰਾਂ-ਕੀਮਤਾਂ ਤੋਂ ਦੂਰੀ

ਅੱਜ ਅਸੀਂ ਰੀਤੀ-ਰਿਵਾਜ ਅਤੇ ਕਦਰਾਂ-ਕੀਮਤਾਂ ਤੋਂ ਬਹੁਤ ਦੂਰ ਹੋ ਚੁੱਕੇ ਹਾਂ। ਅੱਜ ਪੰਜਾਬੀ ਸਮਾਜ ਵੀ ਆਧੁਨਿਕਤਾ ਦੀ ਦੌੜ ਵਿਚ ਆਪਣੇ ਸੱਭਿਆਚਾਰ ਅਤੇ ਲੋਕ ਵਿਰਸੇ ਤੋਂ ਦੂਰ ਹੋ ਰਿਹਾ ਹੈ। ਅਜਿਹੇ ਵਿਰਸੇ ਤੋਂ ਜੋ ਲੋਕਾਂ ਨੂੰ ਮਿਲ ਬੈਠਣਾ ਅਤੇ ਆਪਸੀ ਭਾਈਚਾਰਾ ਸਿਖਾਉਂਦਾ ਹੈ। ਅੱਜ ਅਸੀਂ ਅਜਿਹੇ ਰਿਵਾਜ ਤੋਂ ਵਾਕਈ ਦੂਰ ਹੋ ਚੁੱਕੇ ਹਾਂ ਜੋ ਖੁਸ਼ੀ ਦਿਲੋਂ ਪ੍ਰਗਟ ਕਰਦੇ ਸਨ ਅਤੇ ਆਪਣੇ ਸਾਰੇ ਝਮੇਲਿਆਂ ਨੂੰ ਛੱਡ ਉਸ ਵਿਚ ਸ਼ਾਮਿਲ ਹੋਣ ਲਈ ਮਜਬੂਰ ਕਰ ਦਿੰਦੇ ਸਨ। ਅੱਜ ਜ਼ਰੂਰਤ ਹੈ ਕਿ ਅਸੀਂ ਆਪਣੇ ਇਨ੍ਹਾਂ ਰਿਵਾਜ ਨੂੰ ਅਲੋਪ ਹੋਣ ਤੋਂ ਬਚਾਈਏ, ਸੱਭਿਆਚਾਰ ਨੂੰ ਸਾਂਭੀਏ ਤਾਂ ਜੋ ਅਗਲੀਆਂ ਪੀੜ੍ਹੀਆਂ ਵੀ ਇਨ੍ਹਾਂ ਨੂੰ ਵੇਖ ਸਕਣ, ਮਾਣ ਸਕਣ। ਅੱਜ ਜ਼ਰੂਰਤ ਹੈ ਅਜਿਹੀਆਂ ਸੰਸਥਾਵਾਂ ਦੀ ਜੋ ਪੰਜਾਬੀ ਵਿਰਸੇ ਨੂੰ ਜ਼ਿੰਦਾ ਰੱਖਣ ਲਈ ਹੰਭਲਾ ਮਾਰਨ।

-ਮਨਿੰਦਰ ਸਿੰਘ ਰਾਜੂ
ਗਰਚਾ ਨਰਸਰੀ, ਧਨੌਲਾ ਰੋਡ, ਬਰਨਾਲਾ।

ਦਲ ਬਦਲੂਆਂ ਦੀ ਭਰਮਾਰ

ਜਿਵੇਂ-ਜਿਵੇਂ ਪੰਜਾਬ ਵਿਧਾਨ ਸਭਾ ਚੋਣਾਂ ਨੇੜੇ ਆ ਰਹੀਆਂ ਹਨ, ਉਵੇਂ-ਉਵੇਂ ਹੀ ਚੌਧਰ ਦੀ ਲਾਲਸਾ ਦੇ ਭੁੱਖੇ ਦਲ ਬਦਲੂਆਂ ਦੀ ਕਤਾਰ ਵੀ ਲੰਮੀ ਹੁੰਦੀ ਜਾ ਰਹੀ ਹੈ। ਕਿਸੇ ਵੀ ਦਲ ਬਦਲੂ ਨੇਤਾ ਨੂੰ ਜੇ ਦਲ ਬਦਲੀ ਬਾਰੇ ਪੁੱਛਿਆ ਜਾਂਦਾ ਹੈ ਤਾਂ ਉਹ ਬੜੇ ਫ਼ਕਰ ਨਾਲ ਕਹਿੰਦਾ ਹੈ ਕਿ ਉਸ ਨੇ ਲੋਕ ਹਿਤ ਵਿਚ ਪਾਰਟੀ ਜਾਂ ਦਲ ਬਦਲਿਆ ਹੈ, ਜਦੋਂ ਕਿ ਸੱਚ ਇਹ ਹੈ ਕਿ ਇਹ ਦਲ ਬਦਲੂ ਨਿੱਜੀ ਹਿਤਾਂ ਕਰਕੇ ਦਲ ਬਦਲ ਰਹੇ ਹਨ। ਜਿਹੜੀਆਂ ਪਾਰਟੀਆਂ ਰਾਹੀਂ ਇਨ੍ਹਾਂ ਦਲ ਬਦਲੂਆਂ ਨੇ ਲੰਮਾ ਸਮਾਂ ਸੱਤਾ ਸੁੱਖ ਭੋਗਿਆ ਹੈ, ਜਦੋਂ ਉਸ ਪਾਰਟੀ ਨੇ ਕਿਸੇ ਕਾਰਨ ਇਨ੍ਹਾਂ ਨੂੰ ਦੁਬਾਰਾ ਟਿਕਟ ਨਾ ਦਿੱਤੀ ਤਾਂ ਇਨ੍ਹਾਂ ਝੱਟ ਪਾਰਟੀ ਛੱਡ ਕੇ ਉਹ ਪਾਰਟੀ ਅਪਣਾ ਲਈ ਜਿਸ ਪਾਰਟੀ ਵੱਲੋਂ ਇਨ੍ਹਾਂ ਨੂੰ ਟਿਕਟ ਦੇਣ ਦਾ ਪੂਰਾ ਭਰੋਸਾ ਦਿੱਤਾ ਗਿਆ। ਅਸੀਂ ਚੋਣ ਕਮਿਸ਼ਨ ਨੂੰ ਪੁਰਜ਼ੋਰ ਬੇਨਤੀ ਕਰਦੇ ਹਾਂ ਕਿ ਉਹ ਇਨ੍ਹਾਂ ਦਲ ਬਦਲੂਆਂ ਦੀ ਆਮਦਨ ਅਤੇ ਇਨ੍ਹਾਂ ਦੀ ਆਮਦਨ ਦੇ ਸਰੋਤਾਂ ਦਾ ਪਤਾ ਲਗਾਏ। ਜੇ ਕੋਈ ਇਨ੍ਹਾਂ 'ਚੋਂ ਕਿਸੇ ਵੀ ਪੱਖ ਤੋਂ ਦੋਸ਼ੀ ਪਾਇਆ ਜਾਂਦਾ ਹੈ ਤਾਂ ਕਮਿਸ਼ਨ ਇਨ੍ਹਾਂ ਨੂੰ ਚੋਣ ਲੜਨ ਤੋਂ ਅਯੋਗ ਕਰਾਰ ਦੇ ਕੇ ਸਜ਼ਾ ਦਾ ਭਾਗੀ ਬਣਾਵੇ ਤਾਂ ਕਿ ਇਹ ਅਖੌਤੀ ਲੋਕ-ਹਿਤੂ ਲੋਕਾਂ ਦੇ ਜਜ਼ਬਾਤ ਨਾਲ ਖੇਡਣਾ ਬੰਦ ਕਰ ਸਕਣ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ : ਘੁਡਾਣੀ ਕਲਾਂ, ਲੁਧਿਆਣਾ।

29/12/2016

 ਇਹ ਰੁੱਤਾਂ ਕਹਿਰ ਦੀਆਂ

ਪੰਜਾਬ ਦੇ ਕਿਸੇ ਵੀ ਕੋਨੇ ਤੋਂ ਇਨ੍ਹੀਂ ਦਿਨੀਂ ਕੋਈ ਸੁਖਾਵੀਂ ਖ਼ਬਰ ਨਹੀਂ ਆ ਰਹੀ। ਅਖ਼ਬਾਰਾਂ ਦੇ ਪੰਨੇ ਦਿਲ ਨੂੰ ਲੂਹ ਲੈਣ ਵਾਲੀਆਂ ਖ਼ਬਰਾਂ ਨਾਲ ਭਰੇ ਆਉਂਦੇ ਹਨ। ਜਿਵੇਂ ਸਾਡੇ ਇਸ ਹੱਸਦੇ ਵਸਦੇ ਖਿੱਤੇ ਦੇ ਵਿਹੜੇ ਵਿਚੋਂ ਖੁਸ਼ੀਆਂ ਨੇ ਮੂੰਹ ਮੋੜ ਲਿਆ ਹੋਵੇ। ਪਹਿਲਾਂ ਬਠਿੰਡੇ ਰੋਜ਼ੀ-ਰੋਟੀ ਲਈ ਨੱਚਦੀ ਮੁਟਿਆਰ ਦਾ ਕਤਲ ਹੋਵੇ ਜਾਂ ਸੜਕਾਂ 'ਤੇ, ਟੈਂਕੀਆਂ 'ਤੇ ਆਪਣੇ-ਆਪ ਨੂੰ ਅੱਗਾਂ ਲਾਉਂਦੀ ਜਵਾਨੀ ਜਾਂ ਰੋਜ਼ ਖ਼ੁਦਕੁਸ਼ੀਆਂ ਕਰਦਾ ਅੰਨਦਾਤਾ ਹੋਵੇ। ਸੜਕਾਂ 'ਤੇ ਰੋਜ਼ ਤੇਜ਼ ਰਫ਼ਤਾਰੀ ਦੀ ਭੇਟ ਚੜ੍ਹਦੇ ਰਾਹਗੀਰ ਹੋਣ ਜਾਂ ਨੋਟਬੰਦੀ ਮਗਰੋਂ ਬੈਂਕਾਂ ਅੱਗੇ ਰੁਲਦੇ ਕੰਮਕਾਜੀ ਲੋਕ ਹੋਣ। ਸਾਡੇ ਸਮਾਜ ਦਾ ਸਮੁੱਚਾ ਤਾਣਾ-ਬਾਣਾ ਬੜੀ ਬੁਰੀ ਤਰ੍ਹਾਂ ਉਲਝਿਆ ਪਿਆ ਹੈ। ਕੀ ਇਹ ਹਾਲਾਤ ਸਿਰਫ ਚੰਦ ਵੋਟਾਂ ਦਾ ਵਪਾਰ ਕਰਨ ਵਾਲੇ ਲੋਕਾਂ ਨੇ ਸਿਰਜੇ ਹਨ ਜਾਂ ਕਿਤੇ ਅਸੀਂ ਖ਼ੁਦ ਸਮਾਜ ਦੀ ਇਸ ਤਰਸਯੋਗ ਤਸਵੀਰ ਦੇ ਰਚਨਹਾਰ ਤਾਂ ਨਹੀਂ।
ਬਿਨਾਂ ਸ਼ੱਕ ਸਿਆਸੀ ਸੌਦਿਆਂ ਦੀ ਮਾਰ ਨੇ ਅੱਜ ਪੰਜਾਬੀ ਸਮਾਜ ਦੀ ਸ਼ਕਲੋ ਸੂਰਤ ਵਿਗਾੜ ਕੇ ਰੱਖ ਦਿੱਤੀ ਹੈ। ਪਰ ਇਸ ਸਮੁੱਚੇ ਵਰਤਾਰੇ ਵਿਚ ਅਸੀਂ ਕਿਥੇ ਖੜ੍ਹੇ ਹਾਂ, ਇਹ ਵੀ ਵਿਚਾਰਨਯੋਗ ਮੁੱਦਾ ਹੈ। ਲੋਕਾਂ ਨੂੰ ਸਹੀ ਸੇਧ ਦੇਣ ਦੇ ਕਾਬਲ ਸਾਡਾ ਬੁੱਧੀਜੀਵੀ ਵਰਗ ਅਜੇ ਤੱਕ ਆਪਣੀ ਵਿਦਵਤਾ ਦੀ ਹਉਮੈ ਵਿਚੋਂ ਹੀ ਨਹੀਂ ਨਿਕਲ ਸਕਿਆ ਤਾਂ ਫਿਰ ਅਸੀਂ ਉਪਜੇ ਹਾਲਾਤ ਦਾ ਦੋਸ਼ ਕਿਸ ਦੇ ਸਿਰ ਮੜ੍ਹੀਏ। ਇਸ ਦਾ ਦੋਸ਼ ਹਰ ਜਾਗਰੂਕ ਸ਼ਖ਼ਸ ਨੂੰ ਆਪਣੇ ਸਿਰ ਲੈਣ ਦੀ ਲੋੜ ਹੈ ਤੇ ਸਮਾਜ ਦੇ ਇਸ ਨਿਘਾਰ ਵਾਲੀ ਬਿਮਾਰੀ ਦਾ ਇਲਾਜ ਵੀ ਸਾਨੂੰ ਖ਼ੁਦ ਹੀ ਕਰਨਾ ਪਵੇਗਾ। ਆਓ, ਸੜਕਾਂ 'ਤੇ ਬੰਦਿਆਂ ਵਾਂਗ ਵਿਵਹਾਰ ਕਰੀਏ, ਆਪਣੇ ਬੱਚਿਆਂ ਅੰਦਰ ਸਹੀ ਕਦਰਾਂ-ਕੀਮਤਾਂ ਉਪਜਾਈਏ। ਇਨ੍ਹਾਂ ਸਿਆਸੀ ਠੱਗਾਂ ਤੋਂ ਦੂਰ ਰਹੀਏ ਤਾਂ ਹੀ ਅਸੀਂ ਇਸ ਰੰਗਲੇ ਪੰਜਾਬ ਦੀ ਰੰਗਲੀ ਤਸਵੀਰ ਦੇ ਰੰਗ ਨਿਖੇਰ ਸਕਾਂਗੇ।

-ਬਲਜਿੰਦਰ ਸਿੰਘ ਸਮਾਘ
ਸ੍ਰੀ ਮੁਕਤਸਰ ਸਾਹਿਬ।

ਮਕਸਦ ਭਰਪੂਰ ਜ਼ਿੰਦਗੀ

ਮਨੁੱਖੀ ਜਨਮ ਨੂੰ ਪਰਮਾਤਮਾ ਦੀ ਸਰਬਉੱਤਮ ਰਚਨਾ ਮੰਨਿਆ ਗਿਆ ਹੈ। ਇਸ ਜ਼ਿੰਦਗੀ ਨੂੰ ਸੁਚੱਜੇ ਢੰਗ ਨਾਲ ਜਿਊਣ ਲਈ ਕੋਈ ਮਕਸਦ ਹੋਣਾ ਬਹੁਤ ਜ਼ਰੂਰੀ ਹੈ। ਮਕਸਦ ਭਰਪੂਰ ਵਿਅਕਤੀ ਨੂੰ ਕੁਦਰਤ ਦੀ ਹਰ ਸ਼ੈਅ ਕਿਸੇ ਨਾ ਕਿਸੇ ਆਹਰੇ ਲੱਗੀ ਨਜ਼ਰ ਆਉਂਦੀ ਹੈ। ਮਕਸਦ ਦੀ ਅਸਪੱਸ਼ਟਤਾ ਜੀਵਨ ਨੂੰ ਘੋਰ ਹਨੇਰੇ ਵੱਲ ਲੈ ਜਾਂਦੀ ਹੈ। ਮਕਸਦ ਵਿਅਕਤੀ ਤੋਂ ਵਿਅਕਤੀ ਵੱਖਰੇ-ਵੱਖਰੇ ਹੋ ਸਕਦੇ ਹਨ।
ਵਿਦਿਆਰਥੀ ਜੀਵਨ ਵਿਚ ਇਕ ਖਾਸ ਟੀਚਾ ਮੁਕਰੱਰ ਕਰਨ ਦੀ ਬਹੁਤ ਅਹਿਮੀਅਤ ਹੈ। ਵਿਦਿਆਰਥੀਆਂ ਨੂੰ ਚਾਹੀਦਾ ਹੈ ਕਿ ਉਹ ਆਪਣੀ ਆਰਥਿਕ ਸਥਿਤੀ, ਆਪਣੀ ਕਾਰਜ ਕੁਸ਼ਲਤਾ ਨੂੰ ਮੁੱਖ ਰੱਖ ਕੇ ਭਵਿੱਖੀ ਜ਼ਿੰਦਗੀ ਬਾਰੇ ਨਿਰਣਾ ਲੈਣ। ਡਾਵਾਂਡੋਲ ਦੀ ਮਿੱਟੀ ਹਮੇਸ਼ਾ ਗੋਲ ਹੀ ਰਹਿੰਦੀ ਹੈ। ਮਾਪਿਆਂ ਨੂੰ ਵੀ ਚਾਹੀਦਾ ਹੈ ਕਿ ਉਹ ਆਪਣੀਆਂ ਨਿੱਜੀ ਖਾਹਿਸ਼ਾਂ ਦੀ ਬੱਚਿਆਂ ਤੋਂ ਪੂਰਤੀ ਕਰਵਾਉਣ ਨਾਲੋਂ ਉਨ੍ਹਾਂ ਦੀਆਂ ਮਨੋਬਿਰਤੀਆਂ, ਸੰਭਾਵਨਾਵਾਂ, ਰੁਚੀਆਂ ਨੂੰ ਅਹਿਮੀਅਤ ਦੇਣ। ਮਕਸਦ ਵਿਹੂਣੀਆਂ ਜਾਂ ਮਕਸਦ ਤੋਂ ਭਟਕੀਆਂ ਜ਼ਿੰਦਗੀਆਂ ਨਸ਼ਿਆਂ, ਲੁੱਟ-ਮਾਰ ਤੇ ਘਰੇਲੂ ਝਗੜਿਆਂ ਦੇ ਰਾਹ 'ਤੇ ਤੁਰ ਪੈਂਦੀਆਂ ਹਨ, ਸੋ ਮਕਸਦ ਭਰਪੂਰ ਜ਼ਿੰਦਗੀ ਜ਼ਰੂਰੀ ਹੈ।

-ਮਾ: ਮਨਦੀਪ ਸਿਵੀਆ
ਪਿੰਡ ਤੇ ਡਾਕ: ਜੌੜਕੀ ਅੰਧੇਵਾਲੀ, ਫਾਜ਼ਿਲਕਾ।

27/12/2016

 ਜ਼ਿਮੀਂਦਾਰਾਂ ਦਾ ਘਾਣ
ਭਾਵੇਂ ਹਰ ਆਮ ਬੰਦਾ ਨੋਟਬੰਦੀ ਦਾ ਸ਼ਿਕਾਰ ਹੋਇਆ ਹੈ ਪਰ ਜ਼ਿਮੀਂਦਾਰ 'ਤੇ ਇਸ ਦਾ ਸਭ ਤੋਂ ਵੱਧ ਮਾੜਾ ਅਸਰ ਪਿਆ ਹੈ। ਨਵੰਬਰ 8 ਤੋਂ ਹੋਰ ਕਿਸੇ ਚੀਜ਼ ਦੇ ਭਾਅ ਨਹੀਂ ਡਿੱਗੇ ਜਿੰਨੇ ਸਬਜ਼ੀ ਦੇ ਭਾਅ ਡਿਗੇ ਹਨ। ਆਲੂ, ਮਟਰ, ਗੋਭੀ, ਗਾਜਰਾਂ, ਮੰਡੀਆਂ 'ਚ ਸਭ ਰੁਲ ਰਹੇ ਹਨ ਪਰ ਰਿਟੇਲ ਮਾਰਕਿਟ 'ਚ ਏਨੇ ਭਾਅ ਨਹੀਂ ਡਿਗੇ। ਜ਼ਿਮੀਂਦਾਰ ਦੀ ਲਾਗਤ ਵੀ ਪੂਰੀ ਨਹੀਂ ਹੋ ਰਹੀ ਤੇ ਉਹ ਵੇਚਣ ਲਈ ਮਜਬੂਰ ਹੋ ਰਿਹਾ ਹੈ। ਇਕ ਪਾਸੇ ਸਰਕਾਰ ਕਣਕ ਝੋਨੇ ਦਾ ਰਕਬਾ ਘਟਾ ਕੇ ਸਬਜ਼ੀਆਂ ਦੀ ਕਾਸ਼ਤ ਕਰਨ ਨੂੰ ਸਲਾਹ ਦਿੰਦੀ ਹੈ, ਦੂਸਰੇ ਪਾਸੇ ਮੰਡੀਆਂ 'ਚ ਕਿਸਾਨ ਦੀ ਹੋ ਰਹੀ ਦੁਰਦਸ਼ਾ ਵੱਲ ਧਿਆਨ ਦੇਣ ਤੋਂ ਵੀ ਪਾਸਾ ਵੱਟ ਰਹੀ ਹੈ। ਲੱਕੋਂ ਟੁੱਟਿਆ ਕਿਸਾਨ ਕਦੋਂ ਆਪਣੇ ਪੈਰਾਂ 'ਤੇ ਖੜ੍ਹਾ ਹੋਏਗਾ? ਕੀ ਸਰਕਾਰ ਨੂੰ ਨੋਟਬੰਦੀ ਦੇ ਇਸ ਮਾੜੇ ਪ੍ਰਭਾਵ ਦਾ ਪਤਾ ਨਹੀਂ ਸੀ? ਕਦੋਂ ਖੇਤੀ ਜਿਣਸਾਂ ਦੇ ਭਾਅ ਨੀਯਤ ਹੋਣਗੇ? ਕੀ ਅੰਨਦਾਤਾ ਇਵੇਂ ਹੀ ਭੁੱਖਾ ਮਰੇਗਾ?


-ਸਰਬਜੀਤ ਸਿੰਘ
126, ਮੋਹਨ ਵਿਹਾਰ, ਲੱਧੇਵਾਲੀ, ਜਲੰਧਰ।


ਦਿਖਾਵੇ ਦਾ ਰਿਵਾਜ
ਅੱਜਕਲ੍ਹ ਦੇ ਸਮੇਂ ਵਿਚ ਦਿਖਾਵੇ ਦਾ ਰਿਵਾਜ ਬਹੁਤ ਹੀ ਜ਼ਿਆਦਾ ਵਧ ਗਿਆ ਹੈ। ਇਨਸਾਨ ਨਾ ਚਾਹੁੰਦੇ ਹੋਏ ਵੀ ਇਕ ਦੂਸਰੇ ਨੂੰ ਦੇਖ ਕੇ ਇਸ ਜਾਲ ਵਿਚ ਫਸਦਾ ਜਾ ਰਿਹਾ ਹੈ। ਉਹ ਆਪਣੇ-ਆਪ ਨੂੰ ਦੂਸਰਿਆਂ ਤੋਂ ਘੱਟ ਨਹੀਂ ਸਮਝਦਾ। ਵਿਆਹ ਦੇ ਪ੍ਰੋਗਰਾਮ ਮਹਿੰਗੇ ਮੈਰਿਜ ਪੈਲੇਸਾਂ ਵਿਚ ਰੱਖੇ ਜਾਂਦੇ ਹਨ। ਗੀਤ-ਸੰਗੀਤ ਦੇ ਪ੍ਰੋਗਰਾਮ ਦੇ ਨਾਂਅ 'ਤੇ ਰੌਲੇ-ਰੱਪੇ ਦਾ ਕੰਨ ਪਾੜਵਾਂ ਰੌਲਾ ਪੈਂਦਾ ਹੈ, ਜਿਥੇ ਕਿ ਬੈਠਣਾ ਵੀ ਬਹੁਤ ਮੁਸ਼ਕਿਲ ਹੁੰਦਾ ਹੈ। ਇਕ-ਦੂਸਰੇ ਨਾਲ ਗੱਲਬਾਤ ਕਰਨੀ ਤਾਂ ਬਹੁਤ ਦੂਰ ਦੀ ਗੱਲ ਹੈ, ਪੈਸੇ ਖਰਚ ਕੇ ਸਿਰਦਰਦ ਲੈਣ ਵਾਲੀ ਗੱਲ ਹੋ ਨਿਬੜਦੀ ਹੈ। ਨਾਚ-ਗਾਣੇ ਦੇ ਪ੍ਰੋਗਰਾਮ ਵਿਚ ਘਟੀਆ ਕਿਸਮ ਦਾ ਪ੍ਰੋਗਰਾਮ ਹੁੰਦਾ ਹੈ, ਜਿਸ ਨੂੰ ਕਿ ਸਾਰੇ ਬਿਨਾਂ ਕਿਸੇ ਸੰਗ ਸ਼ਰਮ ਦੇ ਦੇਖਿਆ, ਸੁਣਿਆ ਜਾਂਦਾ ਹੈ। ਹਥਿਆਰਾਂ ਅਤੇ ਲੜਾਈਆਂ-ਝਗੜਿਆਂ ਦੀਆਂ ਗੱਲਾਂ ਕੀਤੀਆਂ ਜਾਂਦੀਆਂ ਹਨ। ਇਨ੍ਹਾਂ ਤੋਂ ਬਚਣ ਦੀ ਲੋੜ ਹੈ।


-ਸੁਖਪਾਲ ਸਿੰਘ ਫਾਰਮਾਸਿਸਟ
ਗੋਨਿਆਣਾ ਮੰਡੀ (ਬਠਿੰਡਾ)।


ਰਿਆਇਤਾਂ ਦੀ ਲੋੜ ਨਹੀਂ
ਸ਼ੁਰੂ ਫਰਵਰੀ ਵਿਚ ਵਿਧਾਨ ਸਭਾ ਦੀਆਂ ਚੋਣਾਂ ਹੋਣ ਜਾ ਰਹੀਆਂ ਹਨ। ਹਰੇਕ ਪਾਰਟੀ ਵੱਲੋਂ ਲੋਕਾਂ ਨੂੰ ਭਰਮਾਉਣ ਆਪਣੇ ਮੈਨੀਫੈਸਟੋ ਵਿਚ ਕਈ ਤਰ੍ਹਾਂ ਦੀਆਂ ਮੁਫ਼ਤ ਸਹੂਲਤਾਂ ਪ੍ਰਦਾਨ ਕਰਨ ਦਾ ਵਾਅਦਾ ਕੀਤਾ ਜਾਂਦਾ ਹੈ। ਭਾਵੇਂ ਮੈਨੀਫੈਸਟੋ ਵਿਚ ਬੇਰੁਜ਼ਗਾਰੀ ਦਾ ਮੁੱਦਾ ਸਭ ਤੋਂ ਉੱਪਰ ਲਿਖਿਆ ਜਾਂਦਾ ਹੈ ਪ੍ਰੰਤੂ ਇਸ ਦਾ ਕੋਈ ਸਾਰਥਿਕ ਹੱਲ ਅੱਜ ਤੱਕ ਨਹੀਂ ਨਿਕਲ ਸਕਿਆ। ਲੱਖਾਂ ਦੀ ਗਿਣਤੀ ਵਿਚ ਨੌਜਵਾਨ ਡਿਪਲੋਮੇ-ਡਿਗਰੀਆਂ ਚੁੱਕੀ ਫਿਰਦੇ ਹਨ। ਆਉਣ ਵਾਲੀ ਸਰਕਾਰ ਵੱਲੋਂ ਲੋਕਾਂ ਨੂੰ ਦਿੱਤੀਆਂ ਜਾਂਦੀਆਂ ਮੁਫ਼ਤ ਸਹੂਲਤਾਂ ਬਿਲਕੁਲ ਬੰਦ ਕਰ ਦੇਣੀਆਂ ਚਾਹੀਦੀਆਂ ਹਨ ਅਤੇ ਹਰੇਕ ਪਰਿਵਾਰ ਦੇ ਘੱਟੋ-ਘੱਟ ਇਕ ਮੈਂਬਰ ਨੂੰ ਯੋਗਤਾ ਮੁਤਾਬਿਕ ਸਰਕਾਰੀ ਨੌਕਰੀ ਦੇਣ ਦਾ ਉਪਰਾਲਾ ਕਰਨਾ ਚਾਹੀਦਾ ਹੈ। ਜੇ ਸਾਡੇ ਦੇਸ਼ ਵਿਚ ਬੇਰੁਜ਼ਗਾਰੀ ਨਹੀਂ ਹੋਵੇਗੀ ਤਾਂ ਸਾਨੂੰ ਮੁਫ਼ਤ ਸਹੂਲਤਾਂ ਦੀ ਹੀ ਲੋੜ ਨਹੀਂ ਪਵੇਗੀ। ਸੋ, ਆਉਣ ਵਾਲੀ ਸਰਕਾਰ ਨੂੰ ਬੇਨਤੀ ਹੈ ਕਿ ਹਰੇਕ ਪਰਿਵਾਰ ਦੇ ਇਕ ਮੈਂਬਰ ਨੂੰ ਸਰਕਾਰੀ ਨੌਕਰੀ ਦੇਣ ਦਾ ਬੰਦੋਬਸਤ ਕੀਤਾ ਜਾਵੇ।


-ਕੇਵਲ ਸਿੰਘ ਬਾਠਾਂ
ਮੋ: 98557-44211.

25/12/2016

  ਕਾਲਾ ਧਨ
ਸਵਿਸ ਬੈਂਕਿੰਗ ਐਸੋਸੀਏਸ਼ਨ ਦੀ 2006 ਦੀ ਰਿਪੋਰਟ ਅਨੁਸਾਰ ਸਵਿਸ ਬੈਂਕਾਂ ਵਿਚ ਸਭ ਤੋਂ ਵੱਧ ਧਨ ਭਾਰਤੀਆਂ ਦਾ ਹੈ | ਇਹ 1456 ਅਰਬ ਡਾਲਰ ਤੱਕ ਦੇ ਕਰੀਬ ਦੱਸਿਆ ਜਾ ਰਿਹਾ ਹੈ | ਰੌਾਗਟੇ ਖੜ੍ਹੇ ਕਰਨ ਵਾਲੀ ਗੱਲ ਇਹ ਹੈ ਕਿ ਵਿਸ਼ਵ ਦੇ ਬਾਕੀ ਸਾਰੇ ਦੇਸ਼ਾਂ ਦੀ ਜਿੰਨੀ ਰਕਮ ਉਥੇ ਜਮ੍ਹਾਂ ਹੈ, ਉਸ ਤੋਂ 3 ਗੁਣਾ ਜ਼ਿਆਦਾ ਪੈਸਾ ਭਾਰਤੀਆਂ ਦਾ ਹੈ | ਇਹ ਪੈਸਾ ਸਾਡੇ ਦੇਸ਼ 'ਤੇ ਚੜਿ੍ਹਆ ਵਿਦੇਸ਼ੀ ਕਰਜ਼ਾ ਲਾਹ ਕੇ ਵੀ ਇਸ ਵਿਚੋਂ ਵੱਡੀ ਰਕਮ ਬਚ ਸਕਦੀ ਹੈ | ਉਪਰੋਕਤ ਸਾਰੀ ਤਸਵੀਰ ਇਹ ਸਪੱਸ਼ਟ ਕਰਦੀ ਹੈ ਕਿ ਸਮੇਂ-ਸਮੇਂ 'ਤੇ ਬਣੇ ਦੇਸ਼ ਦੇ ਹੁਕਮਰਾਨਾਂ ਨੇ ਦੇਸ਼ ਨੂੰ ਦੱਬ ਕੇ ਲੁੱਟਿਆ ਹੈ | ਅੱਜ ਦੇਸ਼ ਵਿਚ 64 ਕਿਸਮ ਦੇ ਟੈਕਸਾਂ ਤੋਂ 20 ਲੱਖ ਕਰੋੜ ਰੁਪਿਆ ਦੇਸ਼ ਨੂੰ ਸਾਲਾਨਾ ਆਮਦਨ ਹੈ | ਇਹ ਰਕਮ ਜੇ ਸ਼ੁਰੂ ਤੋਂ ਸਹੀ ਅਰਥਾਂ 'ਚ ਦੇਸ਼ ਦੇ ਵਿਕਾਸ 'ਤੇ ਲਗਦੀ ਆਉਂਦੀ ਹੁੰਦੀ ਤਾਂ ਅੱਜ ਤਸਵੀਰ ਕੁਝ ਹੋਰ ਹੁੰਦੀ ਹੈ | ਦੇਸ਼ ਦੇ ਹੁਕਮਰਾਨਾਂ ਨੂੰ ਇਹ ਕਹਿਣ ਲਈ ਮਜਬੂਰ ਨਾ ਹੋਣਾ ਪੈਂਦਾ ਕਿ ਵਿਕਾਸ ਲਈ ਪੈਸਾ ਨਹੀਂ ਹੈ | ਜੇ ਕਾਲਾ ਧਨ ਅੱਜ ਦੇਸ਼ ਵਿਚ ਆਉਂਦਾ ਹੈ ਤਾਂ 50 ਸਾਲ ਤੱਕ ਦੇਸ਼ ਵਾਸੀਆਂ ਨੂੰ ਟੈਕਸਾਂ ਤੋਂ ਰਾਹਤ ਮਿਲ ਸਕਦੀ ਹੈ | ਅੱਜ ਦੇਸ਼ ਵਾਸੀ ਸਰਕਾਰ ਤੋਂ ਉਮੀਦ ਰੱਖਦੇ ਹਨ ਕਿ ਉਹ ਵਿਦੇਸ਼ਾਂ 'ਚ ਜਮ੍ਹਾਂ ਧਨ ਨੂੰ ਵਾਪਸ ਲਿਆ ਕੇ ਦੇਸ਼ ਦੇ ਵਡੇਰੇ ਹਿਤਾਂ ਲਈ ਵਰਤੇਗੀ |

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਜ਼ਿਲ੍ਹਾ ਲੁਧਿਆਣਾ |

ਰੁੱਖਾਂ ਦੀ ਸੰਭਾਲ
ਰੁੱਖ ਤੇ ਮਨੁੱਖ ਦਾ ਆਦਿ ਤੋਂ ਅੰਤ ਦਾ ਰਿਸ਼ਤਾ ਹੈ | ਰੁੱਖ ਦਾ ਕੋਈ ਨਾ ਕੋਈ ਰੂਪ ਹਮੇਸ਼ਾ ਮਨੁੱਖ ਦੇ ਅੰਗ-ਸੰਗ ਰਹਿੰਦਾ ਹੈ | ਰੁੱਖ ਸਾਡੀ ਭਾਵਨਾ ਸਮਝਣ ਵਾਲੇ ਅਤੇ ਦਰਦ ਵੰਡਾਉਣ ਵਾਲੇ ਹਨ | ਇਹ ਹਮੇਸ਼ਾ ਸਾਨੂੰ ਦਿੰਦੇ ਹੀ ਹਨ ਜਿਵੇਂ ਆਕਸੀਜਨ, ਮੀਂਹ, ਸ਼ੁੱਧ ਵਾਤਾਵਰਨ ਅਤੇ ਮਿੱਟੀ ਦੀ ਸੰਭਾਲ, ਦਵਾ-ਦਾਰੂ ਤੇ ਲੱਕੜ ਆਦਿ | ਆਲੇ-ਦੁਆਲੇ 'ਚੋਂ ਰੁੱਖ ਗ਼ਾਇਬ ਹਨ, ਰੁੱਖਾਂ, ਜੀਰਾਂਦਾਂ, ਬੀੜਾਂ ਬੀਤੇ ਦੀ ਗੱਲ ਬਣ ਚੁੱਕੀਆਂ ਹਨ ਨਹਿਰਾਂ ਦੇ ਕੰਢਿਆਂ ਤੋਂ ਚੋਰੀ-ਛਿਪੇ ਰਲ-ਮਿਲ ਕੇ ਅੰਨ੍ਹੇਵਾਹ ਰੁੱਖਾਂ ਦੀ ਕਟਾਈ ਹੋ ਰਹੀ ਹੈ | ਬਾਲਣ ਲਈ, ਮੋਟੀਆਂ ਕੀਮਤੀ ਲੱਕੜਾਂ, ਕਿੱਕਰਾਂ, ਟਾਹਲੀਆਂ ਦੇ ਮੁੱਢ ਤੱਕ ਗ਼ਾਇਬ ਹਨ | ਧਰਤੀ, ਪਾਣੀ, ਵਾਤਾਵਰਨ ਬਚਾਉਣ ਦੀ ਬੇਹੱਦ ਜ਼ਰਰੂਤ ਹੈ | ਬਨਸਪਤੀ ਨੂੰ ਪਿਆਰਨ ਤੇ ਹੋਰ ਰੁੱਖਾਂ ਨੂੰ ਲਾਉਣ ਦੀ ਬੜੀ ਲੋੜ ਹੈ |

-ਮਨਿੰਦਰ ਸਿੰਘ ਰਾਜੂ
ਧਨੌਲਾ ਰੋਡ, ਬਰਨਾਲਾ |

ਨੋਟਬੰਦੀ
ਅਚਨਚੇਤ ਨੋਟਬੰਦੀ ਕਾਲਾ ਧਨ ਕਢਾਉਣ, ਭਿ੍ਸ਼ਟਾਚਾਰ ਹਟਾਉਣ ਅਤੇ ਹੋਰ ਕਈ ਪੱਖਾਂ ਤੋਂ ਦੇਸ਼ ਨੂੰ ਬਚਾਉਣ ਲਈ ਇਕ ਸਾਰਥਿਕ ਨੀਤੀ ਹੈ | ਕੋਈ ਪਹਿਲਕਦਮੀ ਤਾਂ ਅਕਸਰ ਕਰਨੀ ਹੀ ਪੈਣੀ ਸੀ | ਨਵੀਂ ਕਰੰਸੀ ਬੈਂਕਾਂ ਤੱਕ ਪਹੁੰਚਾਉਣ ਵਿਚ ਕੋਤਾਹੀ ਜ਼ਰੂਰ ਹੋਈ ਹੈ | ਨਵੇਂ ਨੋਟਾਂ ਦੀ ਪ੍ਰਾਪਤੀ ਲਈ ਜੋ ਅਸੀਂ ਲੋਕ ਸੰਕਟ ਝੱਲ ਰਹੇ ਹਾਂ, ਇਹ ਸਮਝੋ ਮੋਦੀ ਜੀ ਵੱਲੋਂ ਉਠਾਏ ਇਕ ਚੰਗੇ ਕਦਮ ਦੀ ਸਫ਼ਲਤਾ ਲਈ ਜੰਗ ਲੜ ਰਹੇ ਹਾਂ | ਹਰ ਚੰਗੇ ਕੰਮ ਲਈ ਕਸ਼ਟ ਉਠਾਉਣਾ ਹੀ ਪੈਂਦਾ ਹੈ | ਇਨ੍ਹਾਂ ਦਿਨਾਂ ਵਿਚ ਫਜ਼ੂਲਖਰਚੀ ਦੀ ਥਾਂ ਘਰਾਂ ਵਿਚ ਸੰਜਮ ਆ ਗਿਆ ਹੈ | ਮੰਗਤੇ ਘੱਟ ਹੀ ਨਜ਼ਰ ਆਉਂਦੇ ਹਨ | ਸ਼ਰਾਬ ਦੀਆਂ ਦੁਕਾਨਾਂ 'ਤੇ ਵੀ ਕੋਈ ਟਾਵਾਂ-ਟਾਵਾਂ ਹੀ ਆਉਂਦਾ ਹੈ | ਇਹ ਵੀ ਤਾਂ ਛੋਟੀ ਬੱਚਤ ਹੈ | ਵਿਰੋਧੀ ਧਿਰ, ਕਾਲੇ ਧਨ ਵਾਲੇ ਅਤੇ ਭਿ੍ਸ਼ਟਾਚਾਰੀਆਂ ਨੇ ਤਾਂ ਵਿਰੋਧ ਕਰਨਾ ਹੀ ਹੁੰਦਾ ਹੈ | 1975 ਈ: ਵਿਚ ਐਮਰਜੈਂਸੀ ਲਾਈ ਗਈ ਭਾਵ ਸਾਰੇ ਦੇਸ਼ ਵਿਚ ਕਰਫਿਊ ਲੱਗ ਗਿਆ ਸੀ | ਹਜ਼ਾਰਾਂ ਦੀ ਗਿਣਤੀ ਵਿਚ ਲੀਡਰ ਤੇ ਵਰਕਰ ਜੇਲ੍ਹਾਂ ਵਿਚ ਡਕ ਦਿੱਤੇ ਗਏ ਸੀ | ਕੋਈ ਚੰੂ ਵੀ ਕਰਦਾ ਸੀ ਤਾਂ ਚਲ ਅੰਦਰ | ਮੀਡੀਆ 'ਤੇ ਸੈਂਸਰ ਬਿਠਾ ਦਿੱਤਾ ਗਿਆ | ਭਾਰੀ ਸਹਿਮ ਵਿਚ ਲੋਕ ਦਿਨ ਕਟੀ ਕਰ ਰਹੇ ਸਨ | ਉਹ ਸਮਾਂ ਵੀ ਅਸੀਂ ਜਰਿਆ ਹੈ | ਇਸ ਕ੍ਰਾਂਤੀ ਲਈ ਵੀ ਸਾਨੂੰ ਹੌਸਲੇ ਨਾਲ ਜੂਝਣਾ ਚਾਹੀਦਾ ਹੈ | ਜਿੱਤ ਲੋਕਾਂ ਦੇ ਹੱਥ ਵਿਚ ਹੈ |

-ਮਾ: ਮਹਿੰਦਰ ਸਿੰਘ ਸਿੱਧੂ
ਸਿੱਧਵਾਂ ਕਲਾਂ, ਜ਼ਿਲ੍ਹਾ ਲੁਧਿਆਣਾ | ਮੋਬਾਈਲ : 98720-86101.

ਗੰਦਗੀ ਦੀ ਭਰਮਾਰ
ਅੱਜਕਲ੍ਹ ਘਰ ਦੇ ਆਲੇ-ਦੁਆਲੇ ਤੇ ਹਰ ਪਾਸੇ ਗੰਦਗੀ ਬਹੁਤ ਫੈਲੀ ਹੋਈ ਹੈ | ਲੋਕ ਆਪਣੇ ਘਰਾਂ ਦਾ ਕੂੜਾ ਕਰਕਟ ਠੀਕ ਜਗ੍ਹਾ 'ਤੇ ਨਹੀਂ ਸੁੱਟਦੇ | ਸਾਡੇ ਮੁਹੱਲੇ ਦੀਆਂ ਨਾਲੀਆਂ ਵੀ ਸਾਫ਼ ਨਹੀਂ ਹਨ ਅਤੇ ਸਾਡੇ ਮੁਹੱਲੇ ਵਿਚ ਅਵਾਰਾ ਪਸ਼ੂ ਵੀ ਬਹੁਤ ਹਨ | ਉਹ ਮੁਹੱਲੇ ਵਿਚ ਜਿਸ ਥਾਂ 'ਤੇ ਕੂੜਾ ਕਰਕਟ ਹੁੰਦਾ ਹੈ, ਉਸ ਨੂੰ ਖਿਲਾਰ ਦਿੰਦੇ ਹਨ, ਜਿਸ ਦੇ ਕਾਰਨ ਸਾਰੇ ਮੁਹੱਲੇ ਵਿਚ ਕੂੜਾ ਕਰਕਟ ਖਿਲਰ ਜਾਂਦਾ ਹੈ | ਨਾਲੀਆਂ ਦਾ ਪਾਣੀ ਗਲੀਆਂ ਵਿਚ ਆ ਜਾਂਦਾ ਹੈ ਜਿਸ ਨਾਲ ਗਲੀਆਂ ਵਿਚ ਚਿੱਕੜ ਹੋ ਜਾਂਦਾ ਅਤੇ ਉਥੋਂ ਲੰਘਣ ਵਾਲੇ ਲੋਕਾਂ ਨੂੰ ਬਹੁਤ ਮੁਸ਼ਕਿਲ ਆਉਂਦੀ ਹੈ |

-ਅਮਰਜੀਤ ਕੌਰ
ਪਿੰਡ ਬਰਗਾੜੀ, ਫਰੀਦਕੋਟ |
<br/>

24/12/2016

 ਕਿਰਤੀ ਕਿੱਧਰ ਜਾਣ?

ਪੰਜਾਬ ਦੀ ਕਿਸਾਨੀ ਕਰਜ਼ੇ ਦੇ ਭਾਰ ਹੇਠ ਖ਼ੁਦਕੁਸ਼ੀਆਂ ਕਰ ਰਹੀ ਹੈ, ਜਿਸ ਵਿਚ ਪੰਜਾਬ ਪਹਿਲੇ ਸਥਾਨ 'ਤੇ ਪਹੁੰਚ ਗਿਆ ਹੈ। ਖ਼ੁਦਕੁਸ਼ੀਆਂ ਕਰਦੀ ਕਿਸਾਨੀ ਦੇ ਪੁੱਤਰ-ਧੀਆਂ ਕੀ ਕਰਨ? ਨਿੱਕੇ ਦੁਕਾਨਦਾਰਾਂ ਦੀ ਰੋਜ਼ੀ-ਰੋਟੀ ਵੱਡੇ ਸਟੋਰਾਂ ਨੇ ਖੋਹ ਲਈ ਹੈ। ਛੋਟੀਆਂ-ਛੋਟੀਆਂ ਦੁਕਾਨਾਂ ਚਲਾ ਕੇ ਰੋਜ਼ੀ-ਰੋਟੀ ਕਮਾਉਂਦੇ ਦੁਕਾਨਦਾਰ ਕਿੱਧਰ ਜਾਣ? ਅੱਜ ਕਈ ਸਵਾਲ ਖੜ੍ਹੇ ਹਨ, ਜਿਹੜੇ ਜਵਾਬ ਦੀ ਮੰਗ ਕਰਦੇ ਹਨ। ਜੇ ਇਨ੍ਹਾਂ ਵਾਰ-ਵਾਰ ਉੱਠਦੇ ਸਵਾਲਾਂ ਦਾ ਕੋਈ ਨਾ ਕੋਈ ਹੱਲ ਤਲਾਸ਼ਣਾ ਹੈ ਤਾਂ ਸਾਨੂੰ ਜ਼ਰੂਰੀ ਹੈ ਕਿ ਉਨ੍ਹਾਂ ਲੋਕਾਂ ਦੇ ਮੋਢੇ ਨਾਲ ਮੋਢਾ ਜੋੜੀਏ ਜਿਹੜੇ ਅੱਜ ਸਿਰ ਜੋੜ ਕੇ ਬੈਠੇ ਹਨ ਕਿ ਕਿਸਾਨ ਖ਼ੁਦਕੁਸ਼ੀਆਂ ਨਾ ਕਰੇ, ਮਜ਼ਦੂਰ ਭੁੱਖਾ ਨਾ ਸੌਵੇਂ, ਨੌਜਵਾਨ ਬੇਰੁਜ਼ਗਾਰ ਨਾ ਫਿਰੇ, ਧੀਆਂ ਦਾਜ ਦੀ ਬਲੀ ਨਾ ਚੜ੍ਹਨ, ਤਾਂ ਆਓ ਸੰਸਥਾਵਾਂ ਬਣਾਈਏ ਅਤੇ ਮੁਸ਼ਕਿਲਾਂ ਦਾ ਹੱਲ ਇਕੱਠੇ ਹੋ ਕੇ ਤਲਾਸ਼ੀਏ।

-ਰਾਜਵੰਤ ਸਿੰਘ ਰਾਜੂ
ਗੁਰੂ ਨਾਨਕ ਆਟੋ ਸਪੇਅਰਜ਼, ਰਾਏਕੋਟ।

ਪਿਆਰ ਤੇ ਮੁਹੱਬਤ ਦੇ ਜਜ਼ਬੇ

ਸਿਆਣਪ ਦੀ ਗੱਲ ਇਹ ਹੁੰਦੀ ਹੈ ਕਿ ਵਰਤਮਾਨ ਵਿਚ ਵਿਚਰਦਿਆਂ ਸਮੇਂ-ਸਮੇਂ ਸਾਨੂੰ ਸਹਿਣਸ਼ੀਲ ਹੋਣਾ ਚਾਹੀਦਾ ਹੈ। ਸਭ ਦਾ ਮਾਣ-ਸਤਿਕਾਰ ਕਰਨਾ ਚਾਹੀਦਾ ਹੈ। ਧੀਰਜ ਅਤੇ ਠਰੰਮੇ ਨਾਲ ਜੀਵਨ ਦੀ ਯਾਤਰਾ ਕਰੋ। ਭੱਜੋ ਨੱਸੀ ਅਤੇ ਭੀੜ ਤੋਂ ਹਮੇਸ਼ਾ ਹੀ ਬਚਾਓ ਕਰੋ। ਆਪਣੀ ਮਾਨਸਿਕਤਾ ਦਾ ਵਿਕਾਸ ਕਰਕੇ ਇਕ-ਦੂਜੇ ਨਾਲ ਏਕਤਾ, ਨੇੜਤਾ ਪੈਦਾ ਕਰੋ। 21ਵੀਂ ਸਦੀ ਵਿਚ ਵੀ ਅੰਧ-ਵਿਸ਼ਵਾਸ ਵਿਚ ਉਲਝ ਰਹੇ ਹੋ। ਸਭ ਕੁਝ ਹੁੰਦੇ-ਸੁੰਦੇ ਵੀ ਅਸੀਂ ਨੀਤ ਦੀ ਭੁੱਖ ਨਹੀਂ ਮਿਟਾ ਸਕਦੇ। ਬੌਧਿਕ ਵਿਕਾਸ ਕਰਨ ਦੀ ਬਜਾਏ ਅਸੀਂ ਕੱਚੇ ਵਿਸ਼ਵਾਸ ਵਿਚ ਹੀ ਫਸ ਰਹੇ ਹਾਂ। ਆਪਣੀ ਸੋਚ ਨੂੰ ਵਿਗਿਆਨਕ ਬਣਾਉਣ ਦੀ ਲੋੜ ਹੈ।
ਮਾੜੀ-ਮੋਟੀ ਸਰੀਰਕ ਢਿੱਲਮੱਠ ਹੋਣ 'ਤੇ ਅਸੀਂ ਕਿਸੇ ਡਾਕਟਰੀ ਇਲਾਜ ਕਰਾਉਣ ਦੀ ਥਾਂ ਕਿਸੇ ਸਿਆਣੇ ਕੋਲ ਪੁੱਛਾਂ ਪੁਆਉਣ ਚੱਲ ਪੈਂਦੇ ਹਾਂ। ਸੋ, ਲੋੜ ਹੈ ਆਪੇ ਦੀ ਪੜਚੋਲ ਕਰਨ ਦੀ। ਚੰਗੀਆਂ ਕਿਤਾਬਾਂ, ਰਸਾਲੇ, ਅਖ਼ਬਾਰ ਪੜ੍ਹਨ ਨਾਲ ਆਪਣੇ ਆਮ ਗਿਆਨ ਵਿਚ ਵਾਧਾ ਕਰਕੇ ਆਪਣੇ ਅੰਦਰਲੇ ਡਰ ਨੂੰ ਦੂਰ ਕਰੋ। ਸਮਾਜ ਵਿਚ ਭਾਈਚਾਰਕ ਸਾਂਝ ਬਣਾ ਕੇ ਜਿਊਣ ਦਾ ਅਨੰਦ ਹੀ ਵੱਖਰਾ ਹੈ। ਪਿਆਰ, ਮੁਹੱਬਤ ਦੇ ਜਜ਼ਬਿਆਂ ਨੂੰ ਪੈਦਾ ਕਰਕੇ ਸਹਿਣਸ਼ੀਲਤਾ ਵਾਲਾ ਜੀਵਨ ਜੀਓ।

-ਸਨੇਹਇੰਦਰ ਮੀਲੂ ਫਰੌਰ
ਖੰਨਾ।

ਪਾਣੀ ਦੀ ਦੁਰਵਰਤੋਂ

ਪੰਜ ਪਾਣੀਆਂ ਦੀ ਧਰਤੀ ਵਜੋਂ ਜਾਣਿਆ ਜਾਂਦਾ ਪੰਜਾਬ ਅੱਜ ਖ਼ੁਦ ਪਿਆਸਾ ਹੁੰਦਾ ਨਜ਼ਰ ਆ ਰਿਹਾ ਹੈ। ਆਏ ਸਾਲ ਧਰਤੀ ਹੇਠਲਾ ਪਾਣੀ ਲਗਾਤਾਰ ਹੇਠਾਂ ਹੁੰਦਾ ਜਾ ਰਿਹਾ ਹੈ। ਅਸੀਂ ਸਭ ਭਲੀਭਾਂਤ ਜਾਣਦੇ ਹਾਂ ਕਿ ਪਾਣੀ ਬਿਨਾਂ ਜੀਵਨ ਦੀ ਕਲਪਨਾ ਵੀ ਨਹੀਂ ਕੀਤੀ ਜਾ ਸਕਦੀ ਪਰ ਇਹ ਸਭ ਜਾਣਦੇ ਹੋਏ ਵੀ ਅਸੀਂ ਸਭ ਇਸ ਅਣਮੁੱਲੀ ਵਸਤੂ ਦੀ ਦੁਰਵਰਤੋਂ ਕਰਨ 'ਤੇ ਤੁਲੇ ਹੋਏ ਹਾਂ। ਸਮਾਂ ਰਹਿੰਦੇ ਜੇਕਰ ਅਸੀਂ ਇਸ ਗੰਭੀਰ ਮਸਲੇ ਪ੍ਰਤੀ ਸੁਚੇਤ ਨਾ ਹੋਏ ਤਾਂ ਉਹ ਦਿਨ ਦੂਰ ਨਹੀਂ ਜਦੋਂ ਇਸ ਦੀ ਘਾਟ ਕਾਰਨ ਅਸੀਂ ਅਨੇਕਾਂ ਮੁਸ਼ਕਿਲਾਂ ਵਿਚ ਘਿਰ ਜਾਵਾਂਗੇ। ਸੋ, ਸਰਕਾਰਾਂ ਦੇ ਨਾਲ-ਨਾਲ ਸਾਨੂੰ ਸਭ ਨੂੰ ਇਸ ਪ੍ਰਤੀ ਸੋਚਣ ਦੀ ਅਹਿਮ ਲੋੜ ਹੈ।

-ਰਾਜਾ ਗਿੱਲ ਚੜਿੱਕ
ਪਿੰਡ ਤੇ ਡਾਕ: ਚੜਿੱਕ (ਮੋਗਾ)।

23/12/2016

 ਬੇਰੁਜ਼ਗਾਰਾਂ ਦੀਆਂ ਉਮੀਦਾਂ

ਬੇਰੁਜ਼ਗਾਰੀ ਦਾ ਸੰਤਾਪ ਹੰਢਾਅ ਰਹੇ ਨੌਜਵਾਨਾਂ ਨੂੰ ਭਾਵੇਂ ਹੁਣ ਪੰਜਾਬ ਸਰਕਾਰ ਵੱਲੋਂ ਵੱਖ-ਵੱਖ ਵਿਭਾਗਾਂ ਵਿਚ ਕੀਤੀਆਂ ਜਾ ਰਹੀਆਂ ਭਰਤੀਆਂ ਕਾਰਨ ਰੁਜ਼ਗਾਰ ਪ੍ਰਾਪਤੀ ਦੀ ਆਸ ਦੀ ਕਿਰਨ ਨਜ਼ਰ ਆਈ ਸੀ ਪਰ ਇਨ੍ਹਾਂ ਭਰਤੀਆਂ ਦੀਆਂ ਚੱਲ ਰਹੀਆਂ ਪ੍ਰਕਿਰਿਆਵਾਂ 'ਚ ਹੋ ਰਹੀ ਬੇਲੋੜੀ ਦੇਰੀ ਨੇ ਬੇਰੁਜ਼ਗਾਰਾਂ ਦੇ ਸਾਹ ਸੂਤੇ ਹੋਏ ਹਨ। ਚੋਣ ਜ਼ਾਬਤਾ ਜਲਦ ਲਾਗੂ ਹੋਣ ਦੀਆਂ ਖ਼ਬਰਾਂ ਨਾਲ ਇਨ੍ਹਾਂ ਰੁਜ਼ਗਾਰ ਪ੍ਰਾਪਤੀ ਲਈ ਤਰਸ ਰਹੇ ਨੌਜਵਾਨਾਂ ਦੀਆਂ ਉਮੀਦਾਂ 'ਤੇ ਕਾਲੇ ਬੱਦਲ ਮੰਡਰਾ ਰਹੇ ਹਨ। ਅੱਧ ਵਿਚਕਾਰ ਲਟਕ ਰਹੀਆਂ ਈਟੀਟੀ ਅਧਿਆਪਕਾਂ ਦੀ 4500 ਤੇ 2005 ਦੀ ਭਰਤੀ, ਜੇਲ੍ਹ ਵਾਰਡਨਾਂ ਦੀ ਭਰਤੀ, ਪੰਚਾਇਤ ਸਕੱਤਰਾਂ ਦੀ ਭਰਤੀ ਅਤੇ 28000 ਕੱਚੇ ਮੁਲਾਜ਼ਮ ਜੋ ਸਰਕਾਰ ਦੇ ਲਾਰੇ ਉਪਰੰਤ ਵੀ ਪੱਕੇ ਹੋਣ ਤੋਂ ਵਾਂਝੇ ਹਨ, ਨੂੰ ਭਵਿੱਖ ਦੀ ਚਿੰਤਾ ਘੁਣ ਵਾਂਗ ਖਾ ਰਹੀ ਹੈ। ਇਨ੍ਹਾਂ ਭਰਤੀ ਪ੍ਰਕਿਰਿਆਵਾਂ 'ਚ ਵਿਭਾਗਾਂ ਦੀਆਂ ਨਾਕਾਮੀਆਂ ਨੇ ਬੇਰੁਜ਼ਗਾਰਾਂ ਦੀਆਂ ਰਾਤਾਂ ਦੀਆਂ ਨੀਂਦਾਂ ਉੱਡਾਈਆਂ ਹੋਈਆਂ ਹਨ। ਜੇਕਰ ਭਰਤੀਆਂ ਨੇਪਰੇ ਨਾ ਚੜ੍ਹੀਆਂ ਤਾਂ ਸੱਤਾਧਾਰੀ ਪਾਰਟੀ ਨੂੰ ਵੀ ਅਗਾਮੀ ਵਿਧਾਨ ਸਭਾ ਚੋਣਾਂ 'ਚ ਖਮਿਆਜ਼ਾ ਭੁਗਤਾਣ ਪੈ ਸਕਦਾ ਹੈ।

-ਰਵਿੰਦਰ ਕਸਾਣਾ ਸੂਰਾਪੁਰੀ
ਕਾਠਗੜ੍ਹ, ਮੋ: 9417100073

ਸਮਾਜਿਕ ਈਰਖਾ

ਅਜੋਕੇ ਸਮੇਂ ਵਿਚ ਮਨੁੱਖ ਕੁਝ ਜ਼ਿਆਦਾ ਹੀ ਸਵਾਰਥੀ ਹੋ ਚੁੱਕਾ ਹੈ। ਉਹ ਲੋਭ ਲਾਲਚ ਵੱਸ ਦੂਸਰੇ ਮਨੁੱਖਾਂ ਪ੍ਰਤੀ ਈਰਖਾ ਜਾਂ ਗੁੱਸੇ ਦੀ ਭਾਵਨਾ ਰੱਖਦਾ ਹੈ। ਸਾਡਾ ਆਦਰਸ਼ ਬੁਰੇ ਦਾ ਭਲਾ ਕਰਨ ਅਤੇ ਸਰਬੱਤ ਦਾ ਭਲਾ ਮੰਗਣ ਦਾ ਹੋਣਾ ਚਾਹੀਦਾ ਹੈ। ਕਿਉਂ ਅਸੀਂ ਕਿਸੇ ਦੀ ਤਰੱਕੀ ਜਾਂ ਕਾਮਯਾਬੀ ਨੂੰ ਹਜ਼ਮ ਨਹੀਂ ਕਰ ਸਕਦੇ? ਅੱਜ ਤੱਕ ਮਨੁੱਖ ਦੂਸਰੇ ਮਨੁੱਖ ਦੀ ਗੁਣ ਚੰਗਿਆਈ ਨੂੰ ਦਬਾ ਕੇ ਖ਼ੁਦ ਸਮਾਜ ਵਿਚ ਉੱਚਾ ਅਹੁਦਾ ਪ੍ਰਾਪਤ ਕਰਨਾ ਚਾਹੁੰਦਾ ਹੈ ਪਰ ਇਹ ਸੰਭਵ ਨਹੀਂ ਕਿਉਂਕਿ ਸੂਰਜ ਨੂੰ ਚਮਕਣ ਤੋਂ ਕੋਈ ਰੋਕ ਨਹੀਂ ਸਕਦਾ ਅਤੇ ਨਾ ਹੀ ਸੂਰਜ ਨੂੰ ਪਰਦੇ ਵਿਚ ਰੱਖ ਸਕਦਾ ਹੈ। ਆਓ! ਅਸੀਂ ਦੂਸਰਿਆਂ ਪ੍ਰਤੀ ਆਪਣੀ ਸੋਚ ਦਾ ਨਜ਼ਰੀਆ ਬਦਲੀਏ ਅਤੇ ਨਿੱਗਰ ਸੋਚ ਨੂੰ ਅਪਣਾਈਏ।

-ਲੱਖੀ ਗਿੱਲ ਧਨਾਨਸੂ
ਲੁਧਿਆਣਾ।

ਧੁੰਦ ਦਾ ਕਹਿਰ

ਪੰਜਾਬ ਵਿਚ ਹਰ ਸਾਲ ਦੀ ਤਰ੍ਹਾਂ ਦਸੰਬਰ ਮਹੀਨੇ ਦੇ ਸ਼ੁਰੂ ਤੋਂ ਹੀ ਠੰਢ ਦੇ ਨਾਲ-ਨਾਲ ਸਵੇਰੇ ਸੰਘਣੀ ਧੁੰਦ ਦੀ ਚਾਦਰ ਵੀ ਵਿਛਣੀ ਸ਼ੁਰੂ ਹੋ ਗਈ ਹੈ। ਇਸ ਧੁੰਦ ਨਾਲ ਜਿਥੇ ਆਮ ਲੋਕਾਂ ਦਾ ਜੀਵਨ ਬੇਹੱਦ ਪ੍ਰਭਾਵਿਤ ਹੁੰਦਾ ਹੈ, ਉਥੇ ਇਨ੍ਹਾਂ ਦਿਨਾਂ ਵਿਚ ਸੜਕੀ ਹਾਦਸਿਆਂ ਦੀ ਗਿਣਤੀ ਵਿਚ ਵੀ ਵਾਧਾ ਹੋ ਜਾਂਦਾ ਹੈ। 9 ਦਸੰਬਰ ਦੀ ਸਵੇਰ ਨੂੰ ਧੁੰਦ ਕਾਰਨ ਇਕ ਭਿਆਨਕ ਸੜਕ ਹਾਦਸਾ ਹੋਣ ਨਾਲ ਆਪਣੀ ਡਿਊਟੀ 'ਤੇ ਸਕੂਲ ਜਾ ਰਹੇ 12 ਅਧਿਆਪਕ ਅਤੇ ਇਕ ਡਰਾਈਵਰ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਇਹ ਜੋ ਵੀ ਹੋਇਆ ਸੁਣ ਕੇ ਹਰ ਕਿਸੇ ਨੂੰ ਬੇਹੱਦ ਦੁੱਖ ਮਹਿਸੂਸ ਹੋਇਆ। ਜੇਕਰ ਧੁੰਦ ਦੇ ਦਿਨਾਂ ਵਿਚ ਡਰਾਈਵਿੰਗ ਕਰਦੇ ਸਮੇਂ ਕੁਝ ਖ਼ਾਸ ਗੱਲਾਂ ਦਾ ਖਿਆਲ ਰੱਖਿਆ ਜਾਵੇ ਤਾਂ ਕੁਝ ਹੱਦ ਤੱਕ ਇਨ੍ਹਾਂ ਘਟਨਾਵਾਂ ਨੂੰ ਘੱਟ ਕੀਤਾ ਜਾ ਸਕਦਾ ਹੈ। ਸੋ, ਧੁੰਦ ਦੇ ਦਿਨਾਂ ਵਿਚ ਜਿਥੇ ਆਪਣੇ ਵਹੀਕਲ ਹੌਲੀ ਸਪੀਡ 'ਤੇ ਚਲਾਉਣੇ ਚਾਹੀਦੇ ਹਨ, ਉਥੇ ਆਪਣੇ ਵਹੀਕਲਾਂ ਦੀਆਂ ਦਿਸਣਯੋਗ ਲਾਈਟਾਂ ਦਾ ਵੀ ਪ੍ਰਬੰਧ ਕਰਨਾ ਚਾਹੀਦਾ ਹੈ। ਇਸ ਲਈ ਖ਼ੁਦ ਵੀ ਬਚੋ ਅਤੇ ਹੋਰਨਾਂ ਨੂੰ ਵੀ ਬਚਾਓ।

-ਰਾਜਾ ਗਿੱਲ ਚੜਿੱਕ
ਮੋ: 94654-11585.

20/12/2016

 ਨੋਟਬੰਦੀ
ਨੋਟਬੰਦੀ ਨੂੰ ਭਾਵੇਂ ਜਨਤਾ ਦੇ ਭਲੇ ਲਈ ਦੱਸਿਆ ਜਾ ਰਿਹਾ ਹੈ ਪਰ ਲੋਕਾਂ ਨੂੰ ਭਾਰੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਕਾਲੇ ਧਨ ਨੂੰ ਰੋਕਣ ਲਈ ਲੱਗੀ ਇਸ ਆਰਥਿਕ ਐਮਰਜੈਂਸੀ ਨਾਲ ਅਸਲ ਚੋਰਾਂ ਨੂੰ ਮੁਸ਼ਕਿਲਾਂ ਤਾਂ ਆਉਣੀਆਂ ਹੀ ਸਨ ਪਰ ਦੇਸ਼ ਦੀ ਆਮ ਜਨਤਾ ਵੀ ਆਪਣੇ ਆਪਣੇ ਘਰਾਂ ਦੇ ਚੁੱਲ੍ਹੇ ਮਘਦੇ ਰੱਖਣ ਵਾਸਤੇ ਕੰਮ ਕਾਰ ਛੱਡ ਇਕ ਮਹੀਨਾ ਬੀਤਣ ਬਾਅਦ ਵੀ 2 ਜਾਂ 4 ਹਜ਼ਾਰ ਦੀ ਨਵੀਂ ਕਰੰਸੀ ਲਈ ਦਿਨ ਰਾਤ ਲਾਈਨਾਂ 'ਚ ਖੜ੍ਹੀ ਵਾਰੀ ਦੀ ਇੰਤਜ਼ਾਰ ਕਰ ਰਹੀ ਹੈ। ਕੀ ਨੋਟਬੰਦੀ ਦੇ ਐਲਾਨ ਤੋਂ ਬਾਅਦ ਖਰੀਦੀ ਗਈ ਕਰੋੜਾਂ ਰੁਪਏ ਦੀ ਜ਼ਮੀਨ, ਸੋਨਾ, ਚਾਂਦੀ ਉਸ ਕਾਲੇ ਧਨ ਦਾ ਹਿੱਸਾ ਨਹੀਂ? ਅਰਬਾਂ ਖਰਬਾਂ ਦੇ ਧਨ ਵਿਚੋਂ 5-6 ਫ਼ੀਸਦੀ ਹਿੱਸਾ ਫੜ ਕੇ ਇਸ ਦੇ ਖ਼ਾਤਮੇ ਦੇ ਨੇੜੇ ਹੋਣ ਦੇ ਦਾਅਵੇ ਕਰਨਾ ਇਕ ਕੋਝਾ ਮਜ਼ਾਕ ਲਗਦਾ ਹੈ।
ਇਕ ਪਾਸੇ ਚਹੇਤਿਆਂ ਲਈ ਵੱਡੇ-ਵੱਡੇ ਕਰਜ਼ਿਆਂ ਲਈ ਪ੍ਰਬੰਧ ਕਰਨਾ ਤੇ ਸੱਤਾ ਦੀ ਦੁਰਵਰਤੋਂ ਕਰਦਿਆਂ ਮਾਫ਼ ਕਰ ਦੇਣਾ, ਉਨ੍ਹਾਂ ਕਿਸਾਨਾਂ ਨਾਲ ਕਿੰਨੀ ਵੱਡੀ ਬੇਇਨਸਾਫ਼ੀ ਹੈ ਜਿਹੜੇ ਕੁਝ ਹਜ਼ਾਰਾਂ ਦੇ ਕਰਜ਼ੇ ਕਾਰਨ ਬੈਂਕ ਵੱਲੋਂ ਮਿਲ ਰਹੀ ਜ਼ਮੀਨ ਕੁਰਕੀ ਕਰਨ ਦੀ ਧਮਕੀ ਦੀ ਵਜ੍ਹਾ ਕਰਕੇ ਆਪਣੀ ਜੀਵਨ ਲੀਲ੍ਹਾ ਖ਼ਤਮ ਕਰ ਬੈਠਦੇ ਹਨ। ਅੱਜ ਰਾਜਨੀਤਕ ਹਸਤੀਆਂ ਆਪਣੇ ਬੇਟੇ ਬੇਟੀਆਂ ਦੇ ਵਿਆਹਾਂ 'ਤੇ 50 ਤੋਂ 500 ਕਰੋੜ ਤੱਕ ਖਰਚ ਕਰਦੇ ਹਨ ਪਰ ਆਮ ਜਨਤਾ ਦੇ ਵਿਆਹ ਸਮਾਗਮਾਂ ਲਈ 2.50 ਲੱਖ ਦੀ ਐਲਾਨੀ ਰਕਮ ਵੀ ਬੈਂਕ ਵਿਚ ਮੌਜੂਦ ਨਹੀਂ। ਅਜਿਹੇ ਅੱਛੇ ਦਿਨਾਂ ਦੀ ਆਸ ਤਾਂ ਜਨਤਾ ਦੀ ਕਲਪਨਾ ਵਿਚ ਵੀ ਨਹੀਂ ਸੀ। ਇਸ ਫ਼ੈਸਲੇ ਨਾਲ ਆਉਣ ਵਾਲੇ ਸਮੇਂ ਵਿਚ ਕਾਲਾ ਬਾਜ਼ਾਰੀ ਦੀ ਰੋਕ 'ਤੇ ਤੋਲਾ ਮਾਸਾ ਫ਼ਰਕ ਪਵੇ ਜਾਂ ਨਾ ਪਵੇ ਪਰ ਉਹ ਲੋਕ ਇਸ ਸਰਕਾਰ ਨੂੰ ਉਮਰ ਭਰ ਕੋਸਦੇ ਰਹਿਣਗੇ ਜਿਨ੍ਹਾਂ ਦੇ ਘਰ ਵਿਆਹ ਹੋਣ ਦੇ ਬਾਵਜੂਦ ਸੱਥਰ ਵਿਛਣ ਲੱਗ ਪਏ ਹਨ।


-ਐਡਵੋਕੇਟ ਰਵਿੰਦਰ ਸਿੰਘ ਧਾਲੀਵਾਲ
ਪਿੰਡ ਨੱਥੂ ਮਾਜਰਾ, ਜ਼ਿਲ੍ਹਾ ਸੰਗਰੂਰ।


ਅਵਾਰਾ ਪਸ਼ੂਆਂ ਦੀ ਭਰਮਾਰ
ਮੈਂ ਇਲਾਕੇ ਵਿਚ ਅਵਾਰਾ ਪਸ਼ੂਆਂ ਦੀ ਭਰਮਾਰ ਵੱਲ ਸਰਕਾਰ ਦਾ ਧਿਆਨ ਦਿਵਾਉਣਾ ਚਾਹੁੰਦਾ ਹਾਂ। ਕਹਿਣ ਨੂੰ ਵੱਖ-ਵੱਖ ਸਮਾਜ ਸੇਵੀ ਜਥੇਬੰਦੀਆਂ ਵੱਲੋਂ ਤੇ ਸਰਕਾਰ ਵੱਲੋਂ ਮਾਨਤਾ ਪ੍ਰਾਪਤ ਗਊਸ਼ਾਲਾਵਾਂ ਖੋਲ੍ਹੀਆਂ ਗਈਆਂ ਹਨ, ਤਾਂ ਕਿ ਅਵਾਰਾ ਪਸ਼ੂਆਂ ਦੀ ਨਾਜਾਇਜ਼ ਕੁੱਟਮਾਰ ਨਾ ਹੋਵੇ ਤੇ ਉਨ੍ਹਾਂ ਦੀ ਸਾਂਭ-ਸੰਭਾਲ ਗਊਸ਼ਾਲਾ ਵਿਚ ਕੀਤੀ ਜਾ ਸਕੇ। ਪਰ ਹੋ ਇਸ ਦੇ ਬਿਲਕੁਲ ਉਲਟ ਰਿਹਾ ਹੈ।
ਜਿਥੇ ਸਰਕਾਰ ਵੱਲੋਂ ਵੱਖ-ਵੱਖ ਮਾਲ ਮਹਿਕਮੇ ਤੇ ਬਿਜਲੀ ਵਿਭਾਗ ਵੱਲੋਂ ਤੇ ਹੋਰ ਬਹੁਤ ਪਾਸਿਆਂ ਤੋਂ ਟੈਕਸ ਗਊਸ਼ਾਲਾ ਦੇ ਨਾਂਅ 'ਤੇ ਇਕੱਠਾ ਕੀਤਾ ਜਾਂਦਾ ਹੈ, ਉਸ ਦੇ ਉਲਟ ਉਨ੍ਹਾਂ ਦੀ ਦੇਖ-ਭਾਲ ਲਈ ਕੋਈ ਵੀ ਉਸਾਰੂ ਕਦਮ ਨਹੀਂ ਚੁੱਕੇ ਜਾ ਰਹੇ। ਕਈ ਗਊਸ਼ਾਲਾ ਵਾਲੇ ਪ੍ਰਤੀ ਪਸ਼ੂ ਦੇ ਹਿਸਾਬ ਪੈਸੇ ਮੰਗ ਰਹੇ ਹਨ। ਸਰਕਾਰ ਨੂੰ ਅਵਾਰਾ ਪਸ਼ੂਆਂ ਦੀ ਭਰਮਾਰ ਨੂੰ ਮੁੱਖ ਰੱਖ ਕੇ ਕੋਈ ਠੋਸ ਪ੍ਰਬੰਧ ਕਰਨਾ ਚਾਹੀਦਾ ਹੈ।


-ਮਨਜੀਤ ਸਿੰਘ ਭਾਮ
ਸੂਬਾ ਪ੍ਰਧਾਨ ਮਨੁੱਖੀ ਅਧਿਕਾਰ ਸੰਗਠਨ, ਪੰਜਾਬ, ਹੁਸ਼ਿਆਰਪੁਰ।

19/12/2016

  ਬਰਾਬਰ ਕੰਮ ਬਰਾਬਰ ਤਨਖਾਹ
ਮਾਣਯੋਗ ਸੁਪਰੀਮ ਕੋਰਟ ਆਫ਼ ਇੰਡੀਆ ਨੇ ਦੇਸ਼ ਦੇ ਸਰਕਾਰੀ ਮਹਿਕਮਿਆਂ ਵਿਚ ਬਰਾਬਰ ਕੰਮ ਲਈ ਬਰਾਬਰ ਤਨਖਾਹ ਦੇਣ ਦਾ ਇਤਿਹਾਸਕ ਫ਼ੈਸਲਾ ਸੁਣਾਇਆ ਹੈ। ਇਹ ਫ਼ੈਸਲਾ ਲੋਕ ਹਿਤ ਅਤੇ ਦੇਸ਼ ਹਿਤ ਵਿਚ ਹੈ। ਇਹ ਫ਼ੈਸਲਾ ਅਦਾਲਤੀ ਅਤੇ ਪ੍ਰਸ਼ਾਸਨਿਕ ਇਤਿਹਾਸ ਵਿਚ ਇਕ ਮੀਲ ਪੱਥਰ ਸਾਬਤ ਹੋਵੇਗਾ। ਕੀ ਹੁਣ ਸਰਕਾਰ ਉਨ੍ਹਾਂ ਲੱਖਾਂ ਉੱਚ ਯੋਗਤਾ ਪ੍ਰਾਪਤ ਟੀਚਰਾਂ ਦੀ ਸਾਰ ਵੀ ਲਵੇਗੀ, ਜਿਹੜੇ ਪ੍ਰਾਈਵੇਟ ਸਕੂਲਾਂ ਵਿਚ ਸਰਕਾਰੀ ਤਨਖਾਹ ਨਾਲੋਂ ਅੱਧੀ ਤਨਖਾਹ ਤੋਂ ਵੀ ਘੱਟ ਤਨਖਾਹ ਉਤੇ ਪਿਛਲੇ ਕਈ ਸਾਲਾਂ ਤੋਂ ਸੇਵਾ ਨਿਭਾਅ ਰਹੇ ਹਨ? ਦੇਸ਼ ਦੇ ਉਸਰੱਈਏ ਟੀਚਰਾਂ ਨੂੰ ਆਪਣਾ ਵਾਜਬ ਹੱਕ ਦਿਵਾਉਣਾ, ਦੇਸ਼ ਦੀ ਉੱਚ ਦਰਜੇ ਦੀ ਸੇਵਾ ਮੰਨੀ ਜਾਏਗੀ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਗੁਰੂ ਨਾਨਕ ਵਾੜਾ, ਅੰਮ੍ਰਿਤਸਰ।

ਪ੍ਰੇਰਨਾ ਦਾ ਸਰੋਤ ਪੰਛੀ
ਹਰ ਸਾਲ ਦੀ ਤਰ੍ਹਾਂ ਇਸ ਸਾਲ ਵੀ ਪ੍ਰਵਾਸੀ ਪੰਛੀਆਂ ਨੇ ਭਾਰਤ ਦੀਆਂ ਵੱਖ-ਵੱਖ ਝੀਲਾਂ ਤੇ ਪੱਤਣਾਂ ਵੱਲ ਨੂੰ ਉਡਾਰੀਆਂ ਭਰ ਲਈਆਂ ਹਨ। ਇਹ ਪ੍ਰਵਾਸੀ ਪੰਛੀ ਹਰ ਸਾਲ ਅਕਸਰ ਸਤੰਬਰ-ਅਕਤੂਬਰ ਦੇ ਮਹੀਨਿਆਂ 'ਚ ਹੀ ਆਉਣਾ ਸ਼ੁਰੂ ਕਰ ਦਿੰਦੇ ਹਨ। ਅੱਜ ਸਾਡੇ ਦੇਸ਼ ਵਿਚ ਜਿਥੇ ਇਹ ਲੱਖਾਂ ਦੀ ਗਿਣਤੀ 'ਚ ਪਹੁੰਚ ਚੁੱਕੇ ਹਨ, ਉਥੇ ਆਉਂਦੇ ਦਿਨਾਂ 'ਚ ਇਨ੍ਹਾਂ ਦੀ ਗਿਣਤੀ ਹੋਰ ਵਧਣ ਦੀ ਉਮੀਦ ਕੀਤੀ ਜਾ ਰਹੀ ਹੈ। ਪੰਜਾਬ ਦੀ ਹਰੀਕੇ ਝੀਲ ਵਿਖੇ ਪ੍ਰਵਾਸੀ ਪੰਛੀ ਤੇ ਸਥਾਨਕ ਪੰਛੀਆਂ ਦੀ ਗਿਣਤੀ ਇਨ੍ਹਾਂ ਦਿਨਾਂ ਵਿਚ ਪੌਣੇ ਦੋ ਲੱਖ ਦੇ ਕਰੀਬ ਹੋ ਜਾਂਦੀ ਹੈ। ਇਸ ਤੋਂ ਇਲਾਵਾ ਭਾਰਤ ਦੇ ਹੋਰ ਸਮੁੰਦਰਾਂ, ਦਰਿਆਵਾਂ, ਝੀਲਾਂ, ਪੱਤਣਾਂ 'ਚ ਵੀ ਪ੍ਰਵਾਸੀ ਪੰਛੀਆਂ ਦੀ ਵੱਡੀ ਆਮਦ ਹੁੰਦੀ ਹੈ। ਕੁਦਰਤ ਵੱਲੋਂ ਬਖ਼ਸ਼ੀ ਸੋਝੀ ਅਨੁਸਾਰ ਇਹ ਪ੍ਰਵਾਸੀ ਪੰਛੀ ਲੰਮਾ ਸਫ਼ਰ ਤੈਅ ਕਰਕੇ ਆਪਣੇ ਮਿਥੇ ਸਥਾਨਾਂ 'ਤੇ ਆ ਰੁਕਦੇ ਹਨ। ਇਨ੍ਹਾਂ ਦੇ ਆਉਣ ਦਾ ਕਾਰਨ ਸਰਦੀ ਦੀ ਰੁੱਤ ਬਤੀਤ ਕਰਨਾ ਹੈ ਤੇ ਅਖੀਰ ਇਹ ਫਰਵਰੀ ਮਹੀਨੇ ਦੇ ਆਖਰੀ ਦਿਨਾਂ 'ਚ ਮੁੜ ਆਪਣੇ ਵਤਨਾਂ ਵੱਲ ਨੂੰ ਵਹੀਰਾਂ ਘੱਤ ਦਿੰਦੇ ਹਨ। ਇਹ ਪ੍ਰਵਾਸੀ ਪੰਛੀ ਆਲਸੀ ਲੋਕਾਂ ਲਈ ਪ੍ਰੇਰਨਾ ਦਾ ਸਰੋਤ ਬਣ ਗਏ ਹਨ, ਜੋ ਹਿੰਮਤ ਨਾ ਹਾਰਦੇ ਹੋਏ ਆਪਣੀ ਮੰਜ਼ਿਲ ਪਾਉਣ ਲਈ ਹਰ ਪਲ ਉਡਾਰੀ ਭਰੀ ਰੱਖਦੇ ਹਨ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਜ਼ਿਲ੍ਹਾ ਲੁਧਿਆਣਾ।
ਮੋਬਾਈਲ : 98551-81104.

ਫੁਕਰਪੁਣੇ ਦੀ ਹੱਦ
ਪਿਛਲੇ ਦਿਨੀਂ ਐਸ. ਅਸ਼ੋਕ ਭੋਰਾ ਦਾ 'ਮੌੜ ਮੰਡੀ' ਵਿਚ ਵਾਪਰੇ ਉਸ ਦੁਖਾਂਤ 'ਤੇ ਲਿਖਿਆ ਲੇਖ ਪੜ੍ਹਿਆ, ਜਿਸ ਨਾਲ ਹਰੇਕ ਇਨਸਾਨੀ ਦਿਲ ਪਸੀਜਿਆ ਗਿਆ। ਸਟੇਜਾਂ 'ਤੇ ਕੋਈ ਖੁਸ਼ੀਨਾਮੇ ਨਹੀਂ ਨੱਚਦਾ ਢਿੱਡ ਨੂੰ ਝੁਲਕਾ ਦੇਣ ਲਈ ਜਾਂ ਲੋਕਾਂ ਦਾ ਮਨ ਬਹਿਲਾਉਣ ਲਈ ਸਟੇਜੀ ਪ੍ਰੋਗਰਾਮ ਕਰ ਰਹੇ ਕੁੜੀਆਂ-ਮੁੰਡਿਆਂ ਨਾਲ ਧੱਕਾ ਜਾਂ ਹੁੱਲ੍ਹੜਬਾਜ਼ੀ ਕਰਨ ਵਾਲੇ ਲੋਕਾਂ ਨਾਲ ਕਾਨੂੰਨ ਨੂੰ ਸਖ਼ਤੀ ਵਿਖਾਉਣੀ ਚਾਹੀਦੀ ਹੈ ਤਾਂ ਕਿ ਕਦੇ ਵੀ ਕਿਸੇ ਦਾ ਹੀਆ ਨਾ ਪਵੇ ਧੱਕਾ ਕਰਨ ਦਾ। ਲਾਈਸੈਂਸ ਅਵਾਗੌਣ ਦੇਣ ਨਾਲ ਵੀ ਪਿਛਲੇ ਸਮੇਂ ਵਿਚ ਘਾਤਕ ਨਤੀਜੇ ਸਾਹਮਣੇ ਆਏ ਹਨ। ਸਰਕਾਰ ਨੂੰ ਸਖ਼ਤੀ ਨਾਲ ਪੇਸ਼ ਆਉਣਾ ਚਾਹੀਦਾ ਹੈ ਹੁੱਲ੍ਹੜਬਾਜ਼ ਤੇ ਫੁਕਰਪੁਣੇ ਦੀ ਹੱਦ ਤੋਂ ਬਾਹਰ ਜਾਣ ਵਾਲਿਆਂ ਨਾਲ। ਇਨ੍ਹਾਂ ਨੂੰ ਇਹ ਨਹੀਂ ਪਤਾ ਹੁੰਦਾ ਕਿ ਉਹ ਕੁੜੀਆਂ ਵੀ ਕਿਸੇ ਘਰ ਵਿਚ ਮਾਂ-ਭੈਣ ਜਾਂ ਪਤਨੀ ਹੁੰਦੀਆਂ ਹਨ। ਕਿਸ ਦਾ ਦਿਲ ਕਰਦਾ ਹੈ ਲੋਕਾਂ ਸਾਹਮਣੇ ਜਾਂ ਸ਼ਰਾਬੀਆਂ ਸਾਹਮਣੇ ਨੱਚਣ ਨੂੰ, ਸਭ ਮਜਬੂਰੀ ਦੀ ਖੇਡ ਹੈ। ਪੰਜਾਬੀ ਫ਼ਿਲਮਾਂ ਤੇ ਪੰਜਾਬੀ ਗੀਤ ਹੀ ਇਨ੍ਹਾਂ ਨੂੰ ਬੜਾਵਾ ਦੇ ਰਹੇ ਹਨ। ਲੋੜ ਹੈ ਸੱਭਿਆਚਾਰ ਨੂੰ ਸਾਂਭਣ ਦੀ। ਲੋੜ ਹੈ ਬੇਗਾਨੀਆਂ ਧੀਆਂ-ਭੈਣਾਂ ਦੀਆਂ ਮਜਬੂਰੀਆਂ ਨੂੰ ਸਮਝਣ ਦੀ।

-ਮਨਜੀਤ ਸਿੰਘ ਭਾਮ
ਸੂਬਾ ਪ੍ਰਧਾਨ ਮਨੁੱਖੀ ਅਕਾਰ ਸੰਗਠਨ, ਪੰਜਾਬ ਹੁਸ਼ਿਆਰਪੁਰ।

ਲੰਮੀਆਂ ਕਤਾਰਾਂ ਦਾ ਹੱਲ
ਜੋ ਫ਼ੈਸਲਾ ਨੋਟਬੰਦੀ ਦਾ ਮੋਦੀ ਸਰਕਾਰ ਨੇ ਲਿਆ ਹੈ, ਬਹੁਤ ਹੀ ਵਧੀਆ ਅਤੇ ਦੇਸ਼ ਨੂੰ ਤਰੱਕੀ ਵੱਲ ਲਿਜਾਣ ਵਾਲਾ ਫ਼ੈਸਲਾ ਹੈ, ਕਿਉਂਕਿ ਬਲੈਕਮਨੀ ਜਮ੍ਹਾਂ ਹੋਣ ਕਰਕੇ ਗ਼ਰੀਬ ਅੱਤ ਦਾ ਗਰੀਬ ਅਤੇ ਅਮੀਰ ਅੱਤ ਦਾ ਅਮੀਰ ਹੁੰਦਾ ਜਾ ਰਿਹਾ ਹੈ। ਪੰਜ ਸੌ ਅਤੇ ਇਕ ਹਜ਼ਾਰ ਦਾ ਨੋਟ ਬੰਦ ਹੋਣ ਨਾਲ ਆਮ ਜਨਤਾ ਨੂੰ ਬਹੁਤ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਕਈ ਥਾਵਾਂ 'ਤੇ ਲਾਈਨਾਂ ਵਿਚ ਲੱਗੇ ਲੋਕਾਂ ਦੀ ਮੌਤ ਵੀ ਹੋ ਚੁੱਕੀ ਹੈ, ਜੋ ਕਿ ਬਹੁਤ ਹੀ ਮੰਦਭਾਗੀ ਗੱਲ ਹੈ।

-ਕੇਵਲ ਸਿੰਘ ਬਾਠਾਂ
ਮੋਬਾਈਲ : 98557-44211.

17/12/2016

 ਝੂਠ ਦੇ ਪੈਰ ਨਹੀਂ ਹੁੰਦੇ

ਬੜਾ ਅਨੋਖਾ ਅਖਾਣ ਹੈ ਕਿ 'ਝੂਠ ਦੇ ਪੈਰ ਨਹੀਂ ਹੁੰਦੇ'। ਜੇ ਝੂਠ ਦੇ ਪੈਰ ਨਾ ਹੁੰਦੇ ਤਾਂ ਉਹ ਦੇਸ਼ ਦੇ ਇਕ ਕੋਨੇ ਤੋਂ ਅਖੀਰਲੇ ਕੋਨੇ ਤੀਕ ਨਾ ਫੈਲਦਾ। ਲੋਕਾਂ ਲਈ ਕੁਝ ਠੋਸ ਕਰਨ ਤੋਂ ਬਿਨਾਂ ਲੀਡਰ ਝੂਠੇ ਨਾਅਰਿਆਂ ਤੇ ਝੂਠੇ ਵਾਅਦਿਆਂ ਨਾਲ ਵਾਰ-ਵਾਰ ਗੱਦੀਨਸ਼ੀਨ ਨਾ ਹੁੰਦੇ। ਉਹ ਭ੍ਰਿਸ਼ਟਾਚਾਰੀ ਤੇ ਰਿਸ਼ਵਤਖੋਰ ਹੋਣ ਦੇ ਬਾਵਜੂਦ ਨਾਤ੍ਹੇ-ਧੋਤੇ ਨਾ ਬਣੇ ਰਹਿੰਦੇ। ਆਜ਼ਾਦੀ ਦੇ ਸੱਤਰ ਸਾਲ ਬੀਤਣ 'ਤੇ ਵੀ ਸਾਡਾ ਦੇਸ਼, ਸੰਸਾਰ ਦੇ ਖ਼ੁਸ਼ਹਾਲ ਦੇਸ਼ਾਂ ਤੋਂ ਪਛੜਿਆ ਹੋਇਆ ਹੈ। ਸੋ, ਦੇਸ਼ ਦੇ ਨੇਤਾਵਾਂ ਨੇ ਡਾਕਟਰ ਦੀ ਨਰਮ ਤੇ ਤੇਜ਼ ਦਵਾਈ ਵਾਂਗ ਝੂਠ ਦੀ ਖੁਰਾਕ ਜਾਂ ਤੀਬਰਤਾ ਵਧਾ ਦਿੱਤੀ ਹੈ। ਲੀਡਰਾਂ ਦੀ ਰਿਸ਼ਵਤਖੋਰੀ ਅਤੇ ਪੁਲਿਸ ਦੀਆਂ ਡਾਂਗਾਂ ਦੇ ਸਤਾਏ ਪੰਜਾਹ ਲੱਖ ਨੌਜਵਾਨ ਪਰਵਾਸ ਕਰ ਚੁੱਕੇ ਹਨ। ਉਨ੍ਹਾਂ ਦੇ ਬਿਰਧ ਮਾਪੇ ਇਕੱਲੇ ਰੋਂਦੇ ਕਲਪਦੇ ਹਨ। ਪ੍ਰੰਤੂ ਲੀਡਰ ਲੋਕ ਜਾਅਲੀ ਸਬੂਤਾਂ ਦੇ ਆਸਰੇ ਸੁਥਰੇ ਬਣਦੇ ਰਹਿੰਦੇ ਹਨ। ਦੇਸ਼ ਨੂੰ ਲਗਾਤਾਰ ਲੁੱਟਿਆ ਜਾ ਰਿਹਾ ਹੈ ਤੇ ਨੌਕਰੀਆਂ ਮੰਗਣ ਵਾਲਿਆਂ ਨੂੰ ਕੁੱਟਿਆ ਜਾ ਰਿਹਾ ਹੈ। ਲੀਡਰਾਂ ਦੁਆਰਾ ਵਿਦੇਸ਼ੀ ਲੁਟੇਰਿਆਂ ਵਾਂਗ ਦੇਸ਼ ਦਾ ਲੁੱਟਿਆ ਧਨ ਵਿਦੇਸ਼ੀ ਬੈਂਕਾਂ ਵਿਚ ਭਰਿਆ ਜਾ ਰਿਹਾ ਹੈ। ਦੇਸ਼ ਦੇ ਨੇਤਾ, ਲੋਕਰਾਜੀ ਸਿਸਟਮ ਤੋਂ ਮੂੰਹ ਮੋੜ ਕੇ ਪਰਿਵਾਰਵਾਦ ਦੇ ਰਜਵਾੜਾ ਸ਼ਾਹੀ ਵੱਲ ਵਧਣ ਲੱਗ ਪਏ ਹਨ। ਹੇ ਦੇਸ਼ ਦੇ ਨਾਖ਼ੁਦਾਓ, ਰੁੱਕ ਜਾਓ ਝੂਠ ਬੋਲਣ ਤੋਂ। ਸੱਚ ਦਾ ਦਾਮਨ ਫੜ ਕੇ ਦੇਸ਼ ਦੀ ਕਾਇਆ ਕਲਪ ਕਰੋ। ਬਹੁਤ ਹੋ ਗਿਆ, ਹੁਣ ਤਾਂ ਜਨਤਾ ਦੀਆਂ ਘਸ ਚੁੱਕੀਆਂ ਜੁੱਤੀਆਂ ਵਾਂਗ ਬਿਨਾਂ ਪੈਰਾਂ ਵਾਲਾ ਝੂਠ ਆਪਣਾ ਢਿੱਡ ਵੀ ਘਸਾ ਬੈਠਾ ਹੈ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਗੁਰੂ ਨਾਨਕ ਵਾੜਾ, ਅੰਮ੍ਰਿਤਸਰ।

\ਭਟਕਣ ਵਿਚ ਪਾ ਰਹੀ ਹੈ ਮੀਲ-ਪੱਥਰਾਂ ਨਾਲ ਛੇੜਖਾਨੀ

ਅਕਸਰ ਦੇਖਿਆ ਜਾਂਦਾ ਹੈ ਕਿ ਸੜਕਾਂ ਦੇ ਕਿਨਾਰੇ ਲੱਗੇ ਮੀਲ-ਪੱਥਰ ਰਾਹਗੀਰਾਂ ਲਈ ਮਾਰਗ ਦਰਸ਼ਕ ਦਾ ਕੰਮ ਕਰਦੇੇ ਹਨ। ਅਸੀਂ ਜਦੋਂ ਵੀ ਕਿਸੇ ਅਨਜਾਣ ਜਗ੍ਹਾ ਜਾਣਾ ਹੋਵੇ ਤਾਂ ਮੀਲ-ਪੱਥਰਾਂ ਤੋਂ ਪਿੰਡ ਜਾਂ ਸ਼ਹਿਰ ਦਾ ਨਾਂਅ ਤੇ ਦੂਰੀ ਦੇਖ ਕੇ ਉਸ ਸਥਾਨ 'ਤੇ ਆਸਾਨੀ ਨਾਲ ਪਹੁੰਚ ਜਾਂਦੇ ਹਾਂ। ਪ੍ਰੰਤੂ ਬੜੇ ਦੁੱਖ ਦੀ ਗੱਲ ਹੈ ਕਿ ਅੱਜ ਮੀਲ-ਪੱਥਰਾਂ ਨਾਲ ਛੇੜਖਾਨੀ ਕਰਕੇ ਪਿੰਡਾਂ ਅਤੇ ਸ਼ਹਿਰਾਂ ਦੇ ਨਾਂਅ ਬਿਲਕੁਲ ਉਲਟ ਉਕਰ ਦਿੱਤੇ ਜਾਂਦੇ ਹਨ, ਜਿਸ ਤਰ੍ਹਾਂ (ਰ) ਸ਼ਬਦ ਦਾ (ਹ) ਸ਼ਬਦ ਕਰ ਦੇੇਣਾ ਤੇ (ਹ) ਸ਼ਬਦ ਦਾ (ਰ) ਕਰ ਦੇਣਾ ਅਤੇ (ਚ) ਦਾ (ਦ) ਕਰ ਦੇਣਾ ਅਤੇ (ਦ) ਦਾ (ਚ) ਕਰ ਦੇਣਾ ਰਾਹਗੀਰਾਂ ਲਈ ਪ੍ਰੇਸ਼ਾਨੀ ਪੈਦਾ ਕਰ ਦਿੰਦਾ ਹੈ। ਨਾਲ ਹੀ ਦੂਰੀ ਨੂੰ ਕੱਟ ਕੇ ਘਟਾ ਵਧਾ ਦਿੱਤਾ ਜਾਂਦਾ ਹੈ। ਜਿਵੇ ਕਿ 4 ਕਿਲੋਮੀਟਰ ਦਾ 1 ਕਿਲੋਮੀਟਰ ਕਰ ਦੇਣਾ ਅਤੇ 10 ਦਾ 1 ਕੱਟ ਕੇ 0 ਕਰ ਦੇਣਾ, ਇਹ ਬਹੁਤ ਹੀ ਮੰਦਭਾਗੀਆਂ ਘਟਨਾਵਾਂ ਹਨ। ਇਥੇ ਹੀ ਬਸ ਨਹੀਂ ਪਿੰਡਾਂ ਅਤੇ ਸ਼ਹਿਰਾਂ ਲਈ ਲੱਗੇ ਪਹੁੰਚ ਮਾਰਗ ਨਿਸ਼ਾਨ ਵੀ ਕੱਟ ਦਿੱਤੇ ਜਾਂਦੇ ਹਨ, ਜਿਸ ਨਾਲ ਯਾਤਰੀ ਕਈ ਵਾਰ ਉਲਟ ਦਿਸ਼ਾ ਵੱਲ ਚਲੇ ਜਾਂਦੇ ਹਨ। ਕਈ ਵਾਰ ਮੀਲ-ਪੱਥਰਾਂ ਨੂੰ ਚੌਂਕਾਂ ਜਾਂ ਰਸਤਿਆਂ ਉਪਰ ਤੋੜਿਆ ਹੋਇਆ ਵੀ ਵੇਖਣ ਨੂੰ ਮਿਲਦਾ ਹੈ। ਸਾਨੂੰ ਸਾਰਿਆਂ ਨੂੰ ਚਾਹੀਦਾ ਹੈ ਕਿ ਸੁੰਨੇ ਰਾਹਾਂ ਵਿਚ ਇਨ੍ਹਾਂ ਮੂੰਹ ਬੋਲਦੇ ਮੀਲ-ਪੱਥਰਾਂ ਨਾਲ ਛੇੜਖਾਨੀ ਨਾ ਕੀਤੀ ਜਾਵੇ। ਸਰਕਾਰ ਅਤੇ ਪ੍ਰਸ਼ਾਸਨ ਨੂੰ ਵੀ ਇਸ ਪ੍ਰਤੀ ਠੋਸ ਕਦਮ ਚੁੱਕਣੇ ਚਾਹੀਦੇ ਹਨ।

-ਰਵਿੰਦਰ ਸਿੰਘ ਰੇਸ਼ਮ
ਪਿੰਡ ਨੱਥੂਮਾਜਰਾ (ਸੰਗਰੂਰ)।

ਜ਼ਿੰਦਗੀ

ਜ਼ਿੰਦਗੀ ਇਕ ਖੇਡ ਦੇ ਮੈਦਾਨ ਦੀ ਤਰ੍ਹਾਂ ਹੈ। ਇਸ ਵਿਚ ਜਿੱਤ, ਹਾਰ, ਖੁਸ਼ੀ, ਗ਼ਮੀ, ਦੁੱਖ, ਸੁੱਖ ਦਾ ਸਿਲਸਿਲਾ ਜਾਰੀ ਰਹਿੰਦਾ ਹੈ। ਇਨਸਾਨ ਨੂੰ ਕਦੀ ਜਿੱਤ, ਕਦੀ ਹਾਰ ਪ੍ਰਾਪਤ ਹੁੰਦੀ ਹੈ। ਜ਼ਿੰਦਗੀ ਵਿਚ ਰਸਤੇ ਕਦੀ ਵੀ ਬੰਦ ਨਹੀਂ ਹੁੰਦੇ। ਕਈ ਵਾਰ ਇਨਸਾਨ ਹੀ ਹਿੰਮਤ ਹਾਰ ਜਾਂਦਾ ਹੈ। ਸਾਨੂੰ ਹਾਰਾਂ ਤੋਂ ਕਦੇ ਵੀ ਘਬਰਾਉਣਾ ਨਹੀਂ ਚਾਹੀਦਾ। ਸਗੋਂ ਹਾਰਾਂ ਤੋਂ ਸਬਕ ਲੈ ਕੇ ਲਗਾਤਾਰ ਮਿਹਨਤ ਕਰਕੇ ਮੰਜ਼ਿਲ ਦੀ ਪ੍ਰਾਪਤੀ ਕਰਨੀ ਚਾਹੀਦੀ ਹੈ। ਜ਼ਿੰਦਗੀ ਵਿਚ ਆਪਣੇ-ਆਪ ਨੂੰ ਕਦੇ ਵੀ ਕਮਜ਼ੋਰ ਨਹੀਂ ਸਮਝਣਾ ਚਾਹੀਦਾ। ਹਰੇਕ ਇਨਸਾਨ ਨੂੰ ਚਾਹੀਦਾ ਹੈ ਕਿ ਆਪਣੀ ਜ਼ਿੰਦਗੀ ਨੂੰ ਵਧੀਆ ਬਣਾਉਣ ਲਈ ਮਿਹਨਤ ਤੇ ਸਮੇਂ ਦੀ ਕਦਰ ਕਰੇ।

-ਰਾਜਵੀਰ ਕੌਰ
ਪਿੰਡ ਰਾਜਪੁਰ ਭਾਈਆਂ, ਜ਼ਿਲ੍ਹਾ ਹੁਸ਼ਿਆਰਪੁਰ।

16/12/2016

 ਬਿਮਾਰ ਮਾਨਸਿਕਤਾ

ਦੇਸ਼ ਵਿਚ ਅੱਜ ਸਰਕਾਰਾਂ ਦੀਆਂ ਗ਼ਲਤ ਨੀਤੀਆਂ ਕਾਰਨ ਦਿਨ-ਬਦਿਨ ਮਹਿੰਗਾਈ ਵਧਦੀ ਹੀ ਜਾ ਰਹੀ ਹੈ। ਮਹਿੰਗਾਈ ਦੇ ਇਸ ਦੌਰ ਵਿਚ ਦੇਸ਼ ਦਾ ਹਰ ਵਰਗ ਬੇਹੱਦ ਨਿਰਾਸ਼ਾ ਦੇ ਆਲਮ ਵਿਚੋਂ ਗੁਜ਼ਰ ਰਿਹਾ ਹੈ। ਅੱਜ ਆਮ ਆਦਮੀ ਨੂੰ ਆਪਣੀਆਂ ਜ਼ਰੂਰਤਾਂ ਪੂਰੀਆਂ ਕਰਨ ਲਈ ਬੇਹੱਦ ਮੁਸ਼ਕਿਲਾਂ ਆ ਰਹੀਆਂ ਹਨ। ਇਨ੍ਹਾਂ ਮੁਸ਼ਕਿਲਾਂ ਦੇ ਝੰਬੇ ਮਾਨਸਿਕ ਤੌਰ 'ਤੇ ਕਮਜ਼ੋਰ ਹੋਏ ਲੋਕ ਅੱਜ ਪਖੰਡੀ ਬਾਬਿਆਂ ਦੇ ਡੇਰਿਆਂ ਵਿਚ ਮੱਥੇ ਰਗੜਦੇ ਨਜ਼ਰ ਆ ਰਹੇ ਹਨ। ਇਨ੍ਹਾਂ ਡੇਰਿਆਂ ਵਿਚ ਬੈਠੇ ਵੱਡੀਆਂ-ਵੱਡੀਆਂ ਗੋਗੜਾਂ ਵਾਲੇ ਪਖੰਡੀ ਬਾਬਿਆਂ ਵੱਲੋਂ ਲੋਕਾਂ ਦੀ ਬਿਮਾਰ ਹੋ ਚੁੱਕੀ ਮਾਨਸਿਕਤਾ ਦਾ ਫਾਇਦਾ ਉਠਾ ਕੇ ਉਨ੍ਹਾਂ ਦੀ ਕਿਰਤ ਕਮਾਈ ਨੂੰ ਬੜੀ ਆਸਾਨੀ ਹੜੱਪਿਆ ਜਾ ਰਿਹਾ ਹੈ। ਸੋ, ਅੱਜ ਲੋੜ ਹੈ ਜਿਥੇ ਸਮੇਂ ਦੀਆਂ ਸਰਕਾਰਾਂ ਨੂੰ ਆਪਣੇ ਨਾਗਰਿਕਾਂ ਨੂੰ ਵੱਧ ਤੋਂ ਵੱਧ ਰੁਜ਼ਗਾਰ ਦੇ ਮੌਕੇ ਮੁਹੱਈਆ ਕਰਵਾਉਣੇ ਚਾਹੀਦੇ ਹਨ, ਉਥੇ ਸਾਨੂੰ ਵੀ ਇਨ੍ਹਾਂ ਪਖੰਡੀਆਂ ਦਾ ਖਹਿੜਾ ਛੱਡ ਕੇ ਆਪਣੀ ਮਿਹਨਤ ਦੇ ਬਲਬੂਤੇ ਆਪਣੀਆਂ ਸਮੱਸਿਆਵਾਂ ਦਾ ਹੱਲ ਲੱਭਣਾ ਚਾਹੀਦਾ ਹੈ ਤਾਂ ਜੋ ਇਨ੍ਹਾਂ ਪਿੱਛੇ ਬਰਬਾਦ ਹੁੰਦਾ ਸਾਡਾ ਬੇਸ਼ਕੀਮਤੀ ਸਮਾਂ ਅਤੇ ਪੈਸਾ ਬਚ ਸਕੇ।

-ਰਾਜਾ ਗਿੱਲ (ਚੜਿੱਕ)
ਮੋ: 94654-11585.

ਮੌਕਾਪ੍ਰਸਤ ਸਿਆਸਤ

ਆਗਾਮੀ ਚੋਣਾਂ ਨਾਲ ਸਬੰਧਤ ਸੀਟਾਂ ਦੀ ਵੰਡ ਤੋਂ ਨਾਰਾਜ਼ ਉਮੀਦਵਾਰ ਇੱਧਰ-ਉੱਧਰ ਦੀ ਪਾਰੀ ਖੇਡਦੇ ਦਿਖਾਈ ਦੇ ਰਹੇ ਹਨ। ਮਾਮਲਾ ਸਿਰਫ ਤਾਂ ਸਿਰਫ ਸੀਟ ਦਾ ਹੈ, ਨਾ ਕਿ ਪਾਰਟੀ ਪ੍ਰਤੀ ਵਫ਼ਾਦਾਰੀ ਦਾ। ਦਲਬਦਲੂ ਉਮੀਦਵਾਰ ਤਿਆਗੀ ਹੋਈ ਪਾਰਟੀ ਦੀ ਤਿੱਖੀ ਆਲੋਚਨਾ ਕਰਦੇ ਸਾਹ ਨਹੀਂ ਲੈ ਰਹੇ। ਜਿਨ੍ਹਾਂ ਉਮੀਦਵਾਰਾਂ ਨੂੰ ਤਾਂ ਸਹਿਜੇ ਹੀ ਸੀਟਾਂ ਕਾਰਜਸ਼ੀਲ ਪਾਰਟੀ 'ਚ ਹੀ ਮਿਲ ਗਈਆਂ, ਉਹ ਤਾਂ ਖੁਸ਼ ਹਨ, ਪਰ ਜਿਨ੍ਹਾਂ ਨੂੰ ਨਾਂਹ-ਨੁੱਕਰ ਹੋ ਰਹੀ ਹੈ, ਉਹ ਵਿਦਰੋਹੀ ਭਾਵਨਾ ਨਾਲ ਅਸਤੀਫ਼ੇ ਲਿਖੀ ਜਾ ਰਹੇ ਹਨ। ਸੀਟਾਂ ਤੋਂ ਵਾਂਝੇ ਰਹਿ ਚੁੱਕੇ ਉਮੀਦਵਾਰ ਮੌਕਾਪ੍ਰਸਤ ਸਿਆਸਤ ਸਦਕਾ ਜੀ ਆਇਆਂ ਕਹਿਣ ਵਾਲੀਆਂ ਪਾਰਟੀਆਂ ਵੱਲ ਕੂਚ ਕਰ ਰਹੇ ਹਨ। ਮਸਲਾ ਕੇਵਲ ਉਮੀਦਵਾਰ ਲਈ ਸੀਟ ਦਾ ਹੈ। ਗ਼ੌਰ-ਏ-ਤਲਬ ਇਹ ਵੀ ਹੈ ਕਿ ਉਮੀਦਵਾਰ ਜਿਸ ਪਾਰਟੀ ਵੱਲ ਜਾਵੇ ਤਾਂ ਉਸ ਦੇ ਵੋਟਰਾਂ/ਹਮਾਇਤੀਆਂ ਦਾ ਕਾਫਲਾ ਵੀ ਨਾਲ ਜਾਵੇਗਾ, ਕਿਉਂਕਿ ਕੁਝ ਵੋਟਰ ਪੁਰਾਣੀ ਪਾਰਟੀ ਦੇ ਸਮਰਥਨ 'ਚ ਹੀ ਮੌਜੂਦ ਰਹਿੰਦੇ ਹਨ। ਉਮੀਦਵਾਰ ਜਿਹੜਾ ਮਰਜ਼ੀ ਹੋਵੇ, ਪਰ ਕੁਝ ਲੋਕਾਂ ਦਾ ਮਤ ਹੈ ਕਿ ਗੰਗਾ ਗਏ ਤਾਂ ਗੰਗਾ ਰਾਮ, ਜਮਨਾ ਗਏ ਤਾਂ ਜਮਨਾ ਦਾਸ। ਦੋਸਤੋ ਉਮੀਦਵਾਰ ਤਾਂ ਮੌਕਾਪ੍ਰਸਤ ਸਿਆਸਤ ਖੇਡ ਰਹੇ ਹਨ, ਲੋੜ ਤਾਂ ਸਾਨੂੰ ਸਹੀ ਉਮੀਦਵਾਰ ਨੂੰ ਚੁਣਨ ਦੀ ਹੈ, ਕਿਉਂਕਿ ਇਕ-ਇਕ ਵੋਟ ਬੇਹੱਦ ਕੀਮਤੀ ਹੈ।

-ਕਮਲਜੀਤ ਸਿੰਘ
ਪਿੰਡ ਮੱਲ੍ਹੀਆਂ (ਕਰਤਾਰਪੁਰ)।

ਮਨਾਂ ਨੂੰ ਜਗਾਈਏ

ਦੀਵਾਲੀ ਦੇ ਨੇੜੇ ਆਉਂਦਿਆਂ ਅਸੀਂ ਸਾਰੇ ਆਪਣੇ ਘਰਾਂ ਦੀ ਸਫ਼ਾਈ ਕਰਨੀ ਸ਼ੁਰੂ ਕਰ ਦਿੰਦੇ ਹਾਂ ਇਕ ਸਾਲ ਦਾ ਜਿੰਨਾ ਵੀ ਕੂੜਾ ਕਰਕਟ ਖੱਲਾਂ-ਖੂੰਜਿਆਂ ਵਿਚ ਪਿਆ ਹੁੰਦਾ ਹੈ, ਉਹ ਸਾਰਾ ਹੀ ਬਾਹਰ ਕੱਢ ਕੇ ਧੋ ਦਿੱਤਾ ਜਾਂਦਾ ਹੈ। ਇਸ ਸਫ਼ਾਈ ਤੋਂ ਬਾਅਦ ਕਾਫੀ ਰਾਹਤ ਮਹਿਸੂਸ ਕਰਦੇ ਹਾਂ ਕਿ ਬਹੁਤ ਵੱਡਾ ਕੰਮ ਹੋ ਗਿਆ ਹੈ ਤੇ ਫਿਰ ਅਸੀਂ ਵਿਚ ਰੱਖਣ ਵਾਸਤੇ ਫੁੱਲ-ਬੂਟੇ ਜਾਂ ਹੋਰ ਕਈ ਪ੍ਰਕਾਰ ਦੀਆਂ ਵਸਤਾਂ ਲਿਆ ਕੇ ਖੁਸ਼ੀ ਮਹਿਸੂਸ ਕਰਦੇ ਹਾਂ। ਪ੍ਰੰਤੂ ਅੱਜ ਲੋੜ ਹੈ ਸਾਨੂੰ ਇਸ ਪ੍ਰਤੀ ਜਾਗਰੂਕ ਹੋਣ ਦੀ ਕਿ ਜਿੱਥੇ ਘਰਾਂ ਨੂੰ ਸਾਫ਼ ਕਰਕੇ ਸੋਹਣਾ ਬਣਾਇਆ ਜਾਂਦਾ ਹੈ ਕਿ ਜੋ ਵੀ ਘਰ ਵਿਚ ਆਵੇ ਉਹ ਖੁਸ਼ੀ ਮਹਿਸੂਸ ਕਰੇ, ਉਥੇ ਹੀ ਮਨ ਦੀ ਸਫ਼ਾਈ ਵੀ ਬਹੁਤ ਜ਼ਰੂਰੀ ਹੈ। ਮਨਾਂ ਵਿਚਲੀ ਨਫ਼ਰਤ, ਵੈਰ-ਈਰਖਾ ਦੁਰਵਿਹਾਰ ਦਾ ਭਾਵ ਸਭ ਸਾਫ਼ ਕਰੀਏ ਤਾਂ ਸਾਡੇ ਮਨਾਂ ਨੂੰ ਸਾਫ਼ ਦੇਖ ਕੇ ਕੋਈ ਸਾਡੇ ਮਨ ਵਿਚ ਬੈਠ ਜਾਵੇ। ਆਉ! ਸਾਰੇ ਰਲ ਮਿਲ ਕੇ ਮਨਾਂ ਵਿਚ ਪਿਆਰ ਦੇ ਦੀਵੇ ਬਾਲੀਏ ਤੇ ਮਨਾਂ ਨੂੰ ਜਗਾਈਏ।

-ਰਵਿੰਦਰ ਸਿੰਘ ਰੇਸ਼ਮ
ਪਿੰਡ ਨੱਥੂਮਾਜਰਾ (ਸੰਗਰੂਰ)।

15/12/2016

 ਮੋਦੀ ਸਰਕਾਰ ਨੂੰ ਸੱਚ ਦਾ ਸ਼ੀਸ਼ਾ ਦਿਖਾਇਆ
9 ਦਸੰਬਰ ਦੇ 'ਅਜੀਤ' ਵਿਚ ਡਾ: ਬਰਜਿੰਦਰ ਸਿੰਘ ਹਮਦਰਦ ਜੀ ਦੀ ਲਿਖੀ ਸੰਪਾਦਕੀ 'ਭਰਦਾ ਜਾ ਰਿਹੈ ਸਬਰ ਦਾ ਪਿਆਲਾ' ਪੜ੍ਹ ਕੇ ਅਨੰਦ ਆ ਗਿਆ। ਇਸ ਸੰਪਾਦਕੀ ਵਿਚ ਡਾ: ਬਰਜਿੰਦਰ ਸਿੰਘ ਹਮਦਰਦ ਜੀ ਨੇ ਮੋਦੀ ਸਰਕਾਰ ਨੂੰ ਸੱਚ ਦਾ ਸ਼ੀਸ਼ਾ ਦਿਖਾਇਆ ਹੈ। ਅੱਜ ਵੱਡੀ ਗਿਣਤੀ ਵਿਚ ਭਾਰਤੀ ਖ਼ਬਰਾਂ ਵਾਲੇ ਚੈਨਲ ਜਿਥੇ ਮੋਦੀ ਸਰਕਾਰ ਦਾ ਗੁਣਗਾਣ ਕਰ ਰਹੇ ਹਨ ਅਤੇ ਮੀਡੀਆ ਦਾ ਇਕ ਹਿੱਸਾ ਵੀ ਮੋਦੀ ਸਰਕਾਰ ਦੇ ਨੋਟਬੰਦੀ ਦੇ ਤੁਗਲਕੀ ਫੈਸਲੇ ਨੂੰ ਸਹੀ ਠਹਿਰਾਅ ਰਿਹਾ ਹੈ, ਉਥੇ ਡਾ: ਬਰਜਿੰਦਰ ਸਿੰਘ ਹਮਦਰਦ ਜੀ ਨੇ ਆਪਣੀ ਸੰਪਾਦਕੀ ਵਿਚ ਬਿਲਕੁਲ ਸੱਚ ਲਿਖ ਕੇ ਆਮ ਲੋਕਾਂ ਦੀ ਗੱਲ ਕੀਤੀ ਹੈ ਅਤੇ ਆਮ ਲੋਕਾਂ ਦੇ ਜ਼ਖ਼ਮਾਂ ਉੱਪਰ ਮੱਲ੍ਹਮ ਲਗਾਉਣ ਦਾ ਕੰਮ ਕੀਤਾ ਹੈ, ਜਿਸ ਲਈ ਡਾ: ਹਮਦਰਦ ਵਧਾਈ ਦੇ ਪਾਤਰ ਹਨ। ਇਨ੍ਹਾਂ ਗੱਲਾਂ ਕਾਰਨ ਹੀ 'ਅਜੀਤ' ਪੰਜਾਬੀ ਦਾ ਇਕ ਨੰਬਰ ਅਖ਼ਬਾਰ ਬਣਿਆ ਹੋਇਆ ਹੈ।


-ਜਗਮੋਹਨ ਸਿੰਘ ਲੱਕੀ
ਲੱਕੀ ਨਿਵਾਸ, 61-ਏ ਵਿੱਦਿਆ ਨਗਰ, ਪਟਿਆਲਾ।


ਅਵਾਰਾ ਪਸ਼ੂ
ਵਰਤਮਾਨ ਸਮੇਂ ਵਿਚ ਅਵਾਰਾ ਪਸ਼ੂਆਂ ਦੀ ਗਿਣਤੀ ਵਿਚ ਲਗਾਤਾਰ ਵਾਧਾ ਹੁੰਦਾ ਜਾ ਰਿਹਾ ਹੈ ਜੋ ਕਿ ਬਹੁਤ ਹੀ ਵੱਡੀ ਚਿੰਤਾ ਦਾ ਵਿਸ਼ਾ ਹੈ। ਸੜਕੀ ਦੁਰਘਟਨਾਵਾਂ ਤੋਂ ਲੈ ਕੇ ਫ਼ਸਲਾਂ ਦੀ ਬਰਬਾਦੀ ਤੱਕ ਅਵਾਰਾ ਪਸ਼ੂਆਂ ਵੱਲੋਂ ਕੀਤੇ ਜਾ ਰਹੇ ਨੁਕਸਾਨ ਤੋਂ ਅਸੀਂ ਸਾਰੇ ਭਲੀਭਾਂਤ ਜਾਣੂ ਹਾਂ। ਟੀ.ਵੀ. ਚੈਨਲਾਂ ਅਤੇ ਅਖ਼ਬਾਰਾਂ ਵਿਚ ਅਸੀਂ ਲਗਾਤਾਰ ਹਰ ਰੋਜ਼ ਇਸ ਬਾਰੇ ਸੁਣਦੇ ਹਾਂ। ਜ਼ਿਆਦਾਤਰ ਸੜਕੀ ਦੁਰਘਟਨਾਵਾਂ ਦੇ ਕਾਰਨ ਇਹ ਪਸ਼ੂ ਬਣ ਰਹੇ ਹਨ। ਸੜਕਾਂ 'ਤੇ ਜਾ ਰਹੇ ਵਾਹਨ ਚਾਲਕਾਂ ਨੂੰ ਇਹ ਵੀ ਨਹੀਂ ਪਤਾ ਚਲਦਾ ਕਿ ਕਦੋਂ ਇਹ ਅੱਗੇ ਆ ਜਾਣ ਤੇ ਜ਼ਿੰਦਗੀ ਤੋਂ ਹੱਥ ਧੋਣੇ ਪੈ ਜਾਣ। ਇਥੇ ਹੀ ਬਸ ਨਹੀਂ ਫ਼ਸਲਾਂ ਦੀ ਦਿਨ-ਬ-ਦਿਨ ਹੋ ਰਹੀ ਬਰਬਾਦੀ ਦਾ ਕਾਰਨ ਵੀ ਇਹ ਅਵਾਰਾ ਪਸ਼ੂ ਬਣ ਰਹੇ ਹਨ। ਕਿਸਾਨ ਦੀ ਫ਼ਸਲ ਨੂੰ ਇਹ ਪਸ਼ੂ ਖਾ ਕੇ ਤੇ ਲਿਤਾੜ ਕੇ ਬਹੁਤ ਵੱਡਾ ਨੁਕਸਾਨ ਕਰ ਰਹੇ ਹਨ। ਇਕ ਕਿਸਾਨ ਜੋ ਦਿਨ ਦਾ ਕੰਮ ਕਾਰ ਕਰਨ ਤੋਂ ਬਾਅਦ ਵੀ ਆਰਾਮ ਨਹੀਂ ਕਰ ਸਕਦਾ ਕਿਉਂਕਿ ਇਹ ਪਸ਼ੂ ਰਾਤ ਦੇ ਸਮੇਂ ਜ਼ਿਆਦਾ ਨੁਕਸਾਨ ਕਰਦੇ ਹਨ, ਜਿਸ ਤੋਂ ਕਿਸਾਨੀ ਜੀਵਨ ਵੀ ਬਹੁਤ ਪ੍ਰੇਸ਼ਾਨ ਹੈ। ਕਈ ਜਗ੍ਹਾ ਉੱਪਰ ਚਲਦਿਆਂ ਹੋਇਆਂ ਰਾਹੀਆਂ ਨੂੰ ਵੀ ਸਿੰਗਾਂ ਦੀ ਮਾਰ ਨਾਲ ਮਾਰ ਦਿੱਤਾ ਜਾਂਦਾ ਹੈ। ਹੁਣ ਸਵਾਲ ਇਹ ਖੜ੍ਹਾ ਹੁੰਦਾ ਹੈ ਕਿ ਇਸ ਹੋਣ ਵਾਲੇ ਨੁਕਸਾਨ ਦਾ ਜ਼ਿੰਮੇਵਾਰ ਕੌਣ ਹੈ? ਵੱਡੀਆਂ-ਵੱਡੀਆਂ ਦੁਰਘਟਨਾਵਾਂ ਤੋਂ ਬਾਅਦ ਵੀ ਸਥਿਤੀ ਜਿਉਂ ਦੀ ਤਿਉਂ ਬਣੀ ਹੋਈ ਹੈ ਕਿਉਂਕਿ ਸਰਕਾਰ ਤੇ ਪ੍ਰਸ਼ਾਸਨ ਇਸ ਵੱਲ ਕੋਈ ਠੋਸ ਕਦਮ ਨਹੀਂ ਚੁੱਕ ਰਿਹਾ, ਜਿਸ ਨਾਲ ਇਸ ਦਾ ਸਾਰਥਕ ਹੱਲ ਅਤੇ ਪੈਦਾ ਹੋ ਰਹੀਆਂ ਸਮੱਸਿਆਵਾਂ ਨਾਲ ਨਜਿੱਠਿਆ ਜਾਵੇ। ਪਿੰਡਾਂ ਅਤੇ ਸ਼ਹਿਰਾਂ ਵਿਚ ਗਾਵਾਂ, ਮੱਝਾਂ ਜਾਂ ਵੱਛਿਆਂ ਨੂੰ ਛੱਡਣ ਵਾਲਿਆਂ ਖਿਲਾਫ਼ ਸਖ਼ਤ ਕਾਰਵਾਈ ਹੋਣੀ ਚਾਹੀਦੀ ਹੈ ਤੇ ਪਤਾ ਲੱਗਣ 'ਤੇ ਜੁਰਮਾਨਾ ਹੋਣਾ ਜ਼ਰੂਰੀ ਹੈ। ਸਮੇਂ ਦੀਆਂ ਸਰਕਾਰਾਂ ਨੂੰ ਚਾਹੀਦਾ ਹੈ ਕਿ ਇਸ ਵਿਸ਼ੇ ਪ੍ਰਤੀ ਗੰਭੀਰ ਹੁੰਦਿਆਂ ਸਖ਼ਤ ਕਾਨੂੰਨ ਬਣਾਏ ਜਾਣ, ਜਿਸ ਨਾਲ ਅਜਿਹੀਆਂ ਸਮੱਸਿਆਵਾਂ ਦੁਬਾਰਾ ਪੈਦਾ ਨਾ ਹੋਣ।


-ਰਵਿੰਦਰ ਸਿੰਘ ਰੇਸ਼ਮ
ਪਿੰਡ ਉਮਰਪੁਰਾ, ਨੱਥੂਮਾਜਰਾ, ਸੰਗਰੂਰ।

14/12/2016

 ਮਾਤ ਭਾਸ਼ਾ ਦਾ ਸਤਿਕਾਰ ਵਧਾਓ

ਮਾਤਾ ਭਾਸ਼ਾ ਸੰਚਾਰ ਦਾ ਅਜਿਹਾ ਸਾਧਨ ਹੈ, ਜਿਸ ਰਾਹੀਂ ਅਸੀਂ ਆਪਣੇ ਵਿਚਾਰ ਲਿਖ ਕੇ ਜਾਂ ਬੋਲ ਕੇ ਪ੍ਰਗਟ ਕਰ ਸਕਦੇ ਹਾਂ। ਵਰਤਮਾਨ ਸਮੇਂ ਵਿਚ ਇਸ ਭਾਸ਼ਾ ਦਾ ਮਹੱਤਵ ਘਟ ਰਿਹਾ ਹੈ। ਅੰਗਰੇਜ਼ੀ ਤੇ ਹਿੰਦੀ ਭਾਸ਼ਾਵਾਂ ਦਾ ਪ੍ਰਭਾਵ ਵਧ ਰਿਹਾ ਹੈ। ਸਕੂਲਾਂ, ਕਾਲਜਾਂ, ਦਫ਼ਤਰਾਂ, ਘਰਾਂ ਵਿਚ ਵੀ ਅੰਗਰੇਜ਼ੀ ਭਾਸ਼ਾ ਨੂੰ ਪਹਿਲ ਦਿੱਤੀ ਜਾਣ ਲੱਗ ਪਈ ਹੈ। ਰਾਸ਼ਟਰੀ ਪੱਧਰ ਦੇ ਇਮਤਿਹਾਨ ਵੀ ਅੰਗਰੇਜ਼ੀ ਤੇ ਹਿੰਦੀ ਭਾਸ਼ਾ ਵਿਚ ਲਏ ਜਾਂਦੇ ਹਨ। ਸਾਡਾ ਸਾਰਿਆਂ ਦਾ ਫਰਜ਼ ਬਣਦਾ ਹੈ ਕਿ ਅਸੀਂ ਹੋਰ ਭਾਸ਼ਾਵਾਂ ਦੇ ਨਾਲ-ਨਾਲ ਮਾਤ-ਭਾਸ਼ਾ ਨੂੰ ਪਹਿਲ ਦੇਈਏ। ਵਿਦੇਸ਼ਾਂ ਵਿਚ ਜਾ ਕੇ ਵੀ ਇਸ ਭਾਸ਼ਾ ਦਾ ਪ੍ਰਚਾਰ ਕਰਨਾ ਚਾਹੀਦਾ ਹੈ। ਸਾਨੂੰ ਪੰਜਾਬੀ ਹੋਣ 'ਤੇ ਪੂਰਾ ਮਾਣ ਹੋਣਾ ਚਾਹੀਦਾ ਹੈ। ਮਾਤ ਭਾਸ਼ਾ ਨੂੰ ਕਦੇ ਵੀ ਭੁੱਲਣਾ ਨਹੀਂ ਚਾਹੀਦਾ। ਮਾਤ ਭਾਸ਼ਾ ਦਾ ਪ੍ਰਚਾਰ ਕਰਨ ਦੇ ਲਈ ਸਕੂਲਾਂ ਵਿਚ ਵੱਧ ਤੋਂ ਵੱਧ ਲੇਖ ਮੁਕਾਬਲੇ, ਭਾਸ਼ਣ ਮੁਕਾਬਲੇ ਕਰਵਾਉਣੇ ਚਾਹੀਦੇ ਹਨ। ਮਾਤਾ-ਪਿਤਾ ਤੇ ਅਧਿਆਪਕਾਂ ਦਾ ਫ਼ਰਜ਼ ਬਣਦਾ ਹੈ ਕਿ ਉਹ ਬੱਚਿਆਂ ਨੂੰ ਵੱਧ ਤੋਂ ਵੱਧ ਮਾਤ ਭਾਸ਼ਾ ਲਿਖਣ, ਬੋਲਣ ਲਈ ਪ੍ਰੇਰਿਤ ਕਰਨ। ਮਾਤ ਭਾਸ਼ਾ ਸਾਡੇ ਸਮਾਜਿਕ, ਮਾਨਸਿਕ, ਚਰਿੱਤਰ ਦੇ ਵਿਕਾਸ ਵਿਚ ਸਹਾਈ ਹੁੰਦੀ ਹੈ।

-ਰਾਜਵੀਰ ਕੌਰ
ਪਿੰਡ ਰਾਜਪੁਰ ਭਾਈਆਂ, ਜ਼ਿਲ੍ਹਾ ਹੁਸ਼ਿਆਰਪੁਰ।

ਤਕਨਾਲੋਜੀ ਤੇ ਨਸ਼ੇ ਦੀ ਗ਼ੁਲਾਮੀ

ਅੱਜ ਦੇ ਵਿਗਿਆਨਕ ਯੁੱਗ ਅੰਦਰ ਮਨੁੱਖ ਦੀ ਜ਼ਿੰਦਗੀ ਬਹੁਤ ਸੁਖਾਲੀ ਹੋ ਗਈ ਹੈ। ਉਸ ਨੇ ਵਿਗਿਆਨਕ ਦ੍ਰਿਸ਼ਟੀਕੋਣ ਨਾਲ ਬਹੁਤ ਸਾਰੀਆਂ ਸਮੱਸਿਆਵਾਂ 'ਤੇ ਕਾਬੂ ਪਾ ਲਿਆ ਹੈ। ਅੱਜ ਦੇ ਮਨੁੱਖ ਨੂੰ ਆਪਣੀਆਂ ਲੋੜਾਂ ਦੀ ਪੂਰਤੀ ਲਈ ਹੁਣ ਵਿਸ਼ੇਸ਼ ਯਤਨ ਨਹੀਂ ਕਰਨੇ ਪੈਂਦੇ। ਤਕਨਾਲੋਜੀ ਦੇ ਖੇਤਰ ਵਿਚ ਮਨੁੱਖ ਨੇ ਬੇਮਿਸਾਲ ਤਰੱਕੀ ਕੀਤੀ ਹੈ। ਪਰੰਤੂ ਕਿਤੇ ਨਾ ਕਿਤੇ ਵਿਗਿਆਨ ਅਤੇ ਤਕਨਾਲੋਜੀ ਦੀ ਮਾਰ ਪੜ੍ਹੀ-ਲਿਖੀ ਨੌਜਵਾਨ ਪੀੜ੍ਹੀ ਨੂੰ ਬਰਬਾਦ ਕਰ ਰਹੀ ਹੈ। ਉਹ ਨਵੀਂ ਤਕਨਾਲੋਜੀ ਦਾ ਗ਼ੁਲਾਮ ਬਣ ਕੇ ਰਹਿ ਗਿਆ ਹੈ। ਜੇਕਰ ਘਰ ਵਿਚ ਇਕ ਦਿਨ ਇੰਟਰਨੈੱਟ ਨਾ ਚੱਲੇ ਤਾਂ ਉਹ ਖਫ਼ਾ ਹੋ ਜਾਂਦਾ ਹੈ। ਮੋਬਾਈਲ 'ਤੇ ਨੈੱਟ 24 ਘੰਟੇ ਉਸ ਦਾ ਪਿੱਛਾ ਕਰਦਾ ਹੈ। ਇੰਟਰਨੈੱਟ ਤੇ ਮੋਬਾਈਲ ਤੋਂ ਬਿਨਾਂ ਅੱਜ ਉਹ ਆਪਣੇ-ਆਪ ਨੂੰ ਅਧੂਰਾ ਸਮਝਦਾ ਹੈ। ਇਹ ਨਜ਼ਾਰਾ ਅੱਜ ਹਰ ਪਿੰਡ ਅਤੇ ਸ਼ਹਿਰ ਵਿਚ ਦੇਖਿਆ ਜਾ ਸਕਦਾ ਹੈ। ਅੱਜ ਦੇ ਨੌਜਵਾਨ ਦੀ ਮਾਨਸਿਕ ਤੇ ਸਰੀਰਕ ਸਿਹਤ ਡਾਵਾਂਡੋਲ ਹੋ ਰਹੀ ਹੈ। ਅੱਖਾਂ ਖਰਾਬ ਹੋ ਰਹੀਆਂ ਹਨ ਅਤੇ ਹਾਜ਼ਮਾ ਦਰੁਸਤ ਨਹੀਂ ਰਿਹਾ। ਸਿੱਖਿਆ ਦਾ ਮਾਟੋ ਕੇਵਲ ਕਿਤਾਬੀ ਗਿਆਨ ਨਹੀਂ, ਵਿਵਹਾਰਕ ਤੇ ਨੈਤਿਕ ਸਿੱਖਿਆ ਵੀ ਇਸ ਦਾ ਹਿੱਸਾ ਹੈ। ਸਿੱਖਿਆ ਦਾ ਭਾਵ ਹੈ ਮਨੁੱਖ ਦਾ ਸਰਵਪੱਖੀ ਗਿਆਨ ਪ੍ਰੰਤੂ ਅੱਜ ਦਾ ਨੌਜਵਾਨ ਗ੍ਰੈਜੂਏਟ ਅਤੇ ਪੋਸਟ-ਗ੍ਰੈਜੂਏਟ ਹੋ ਕੇ ਵੀ ਸਿਰਫ ਕਿਤਾਬੀ ਤੇ ਪਾਠਕ੍ਰਮ ਦੇ ਗਿਆਨ ਤੱਕ ਹੀ ਸੀਮਤ ਰਹਿ ਗਿਆ ਹੈ। ਸਿਹਤ ਉਸ ਲਈ ਸੈਕੰਡਰੀ ਵਿਸ਼ਾ ਬਣ ਕੇ ਰਹਿ ਗਈ ਹੈ। ਨਸ਼ਿਆਂ ਦੀ ਦਲਦਲ ਵਿਚ ਫਸਿਆ ਉਹ ਆਧੁਨਿਕ ਸਹੂਲਤਾਂ ਲਈ ਤਰਸ ਰਿਹਾ ਹੈ। ਮਾਂ-ਪਿਓ ਦੀ ਦਸਾਂ ਨਹੁੰਆਂ ਦੀ ਕਮਾਈ ਉਸ ਨੇ ਪਾਣੀ ਵਾਂਗ ਰੋੜ੍ਹ ਦਿੱਤੀ ਹੈ। ਅੱਜ ਸਮੇਂ ਦੀ ਜ਼ਰੂਰਤ ਹੈ ਕਿ ਹਰ ਪੰਜਾਬੀ ਨੌਜਵਾਨ ਆਪਣੀ ਵਿਰਾਸਤ, ਆਪਣੇ ਸੱਭਿਆਚਾਰਕ ਪਿਛੋਕੜ ਨੂੰ ਦੇਖਦੇ ਹੋਏ ਆਧੁਨਿਕ ਤਕਨਾਲੋਜੀ ਅਤੇ ਨਸ਼ਿਆਂ ਦੇ ਮਕੜਜਾਲ ਵਿਚੋਂ ਨਿਕਲ ਕੇ ਅਸਲ ਪੰਜਾਬੀ ਹੋਣ ਦਾ ਆਪਣਾ ਫਰਜ਼ ਪਛਾਣੇ।

-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀ ਖ਼ਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

10/12/2016

 ਜ਼ਿੰਦਗੀ ਦਾ ਵਿਗੜਿਆ ਗਣਿਤ
ਨੋਟਬੰਦੀ ਨੇ ਭਾਰਤੀ ਜ਼ਿੰਦਗੀ ਦੀ ਰਫ਼ਤਾਰ ਨੂੰ ਬਰੇਕਾਂ ਲਗਾ ਦਿੱਤੀਆਂ ਹਨ। ਕਾਲੇ ਧਨ ਤੇ ਭ੍ਰਿਸ਼ਟਾਚਾਰ ਪ੍ਰਤੀ ਅਹਿਮ ਫ਼ੈਸਲੇ ਵਜੋਂ ਪ੍ਰਚਾਰੇ ਜਾ ਰਹੇ ਇਸ ਕਦਮ ਨਾਲ ਧਨਾਢ ਲੋਕਾਂ ਨੂੰ ਕੋਈ ਫ਼ਰਕ ਪਿਆ ਹੈ ਜਾਂ ਨਹੀਂ ਪਰ ਇਸ ਫ਼ੈਸਲੇ ਨੇ ਆਮ ਜ਼ਿੰਦਗੀ ਨੂੰ ਬਹੁਤ ਬੁਰੀ ਤਰ੍ਹਾਂ ਪ੍ਰਭਾਵਿਤ ਕੀਤਾ ਹੈ। ਅਜਿਹੇ ਫ਼ੈਸਲਿਆਂ ਦੀ ਜ਼ਰੂਰਤ ਹੈ ਜਿਸ ਨਾਲ ਕਾਲਾ ਬਾਜ਼ਾਰੀ ਤੇ ਭ੍ਰਿਸ਼ਟ ਤਰੀਕਿਆਂ ਨਾਲ ਧਨ ਇਕੱਠਾ ਕਰ ਰਹੇ ਲੋਕਾਂ ਦੇ ਨੈੱਟਵਰਕ ਨੂੰ ਤਬਾਹ ਕੀਤਾ ਜਾ ਸਕੇ। ਪਰ ਭਾਰਤੀ ਜਨਸੰਖਿਆ ਅਤੇ ਕਰੰਸੀ ਦੇ ਫੈਲਾਅ ਦੇ ਹਿਸਾਬ ਨਾਲ ਅਜਿਹੇ ਫ਼ੈਸਲੇ ਨੂੰ ਲਾਗੂ ਕਰਨ ਲਈ ਜ਼ਮੀਨੀ ਹਕੀਕਤਾਂ ਨੂੰ ਚੰਗੀ ਤਰ੍ਹਾਂ ਸਮਝਣ ਤੇ ਸੁਚੱਜੇ ਪ੍ਰਬੰਧ ਕਰਨ ਵਿਚ ਪ੍ਰਸ਼ਾਸਨਿਕ ਤਾਣਾ-ਬਾਣਾ ਪੂਰੀ ਤਰ੍ਹਾਂ ਫੇਲ੍ਹ ਸਿੱਧ ਹੋਇਆ। ਇਸ ਦਾ ਖਮਿਆਜ਼ਾ ਆਮ ਵਰਗ ਨੂੰ ਹੀ ਭੁਗਤਣਾ ਪੈ ਰਿਹਾ ਹੈ। ਲੋਕਾਂ ਦੀ ਜ਼ਿੰਦਗੀ ਬੈਂਕਾਂ ਦੇ ਗੇੜਿਆਂ ਵਿਚ ਉਲਝ ਕੇ ਰਹਿ ਗਈ ਹੈ। ਹਾਲਤ ਇਹ ਹੈ ਕਿ ਕਈ ਥਾਵਾਂ 'ਤੇ ਆਪਣਾ ਪੈਸਾ ਪ੍ਰਾਪਤ ਕਰਨ ਲਈ ਲੋਕ ਰਾਤਾਂ ਵੀ ਬੈਂਕਾਂ ਮੂਹਰੇ ਕੱਟ ਰਹੇ ਹਨ ਤੇ ਸਰਕਾਰ ਮੁਤਾਬਿਕ ਹਾਲਾਤ ਸੁਧਰਨ ਨੂੰ ਅਜੇ ਤਿੰਨ-ਚਾਰ ਮਹੀਨੇ ਹੋਰ ਲੱਗ ਸਕਦੇ ਹਨ। ਸੋ, ਲੋੜ ਹੈ ਕਿ ਲੋਕਾਂ ਨਾਲ ਜੁੜੇ ਹਰ ਫ਼ੈਸਲੇ ਨੂੰ ਪੂਰੀ ਤਿਆਰੀ ਤੇ ਚੰਗੀ ਤਰ੍ਹਾਂ ਸੋਚ, ਵਿਚਾਰ ਤੇ ਸਮਝ ਕੇ ਹੀ ਅਮਲ ਵਿਚ ਲਿਆਂਦਾ ਜਾਵੇ।


-ਬਲਜਿੰਦਰ ਸਿੰਘ ਸਮਾਘ
ਸ੍ਰੀ ਮੁਕਤਸਰ ਸਾਹਿਬ।

 

9/12/2016

 ਕਿਰਤ ਦਾ ਸਤਿਕਾਰ

ਮਨੁੱਖੀ ਜੀਵਨ ਵਿਚ ਕਿਰਤ ਦਾ ਅਹਿਮ ਸਥਾਨ ਹੈ। ਸ੍ਰੀ ਗੁਰੂ ਨਾਨਕ ਦੇਵ ਜੀ ਨੇ ਵੀ ਕਿਰਤ ਕਰਨ ਦੀ ਸਿੱਖਿਆ ਦਿੱਤੀ ਸੀ। ਪ੍ਰੰਤੂ ਅਜੋਕੇ ਸਮੇਂ ਵਿਚ ਆਧੁਨਿਕਤਾ ਦੀ ਦੌੜ ਵਿਚ ਨੌਜਵਾਨ ਪੀੜ੍ਹੀ ਹੱਥੀਂ ਕੰਮ ਕਰਨ ਤੋਂ ਮੁਨਕਰ ਹੋ ਰਹੀ ਹੈ। ਪੜ੍ਹਿਆ-ਲਿਖਿਆ ਨੌਜਵਾਨ ਵਰਗ ਆਪਣੇ ਦੇਸ਼ ਵਿਚ ਕੰਮ ਨੂੰ ਊਚ-ਨੀਚ ਦੀ ਕਸੌਟੀ 'ਤੇ ਪਰਖਦਾ ਹੈ, ਜਦ ਕਿ ਉਹੀ ਲੋਕ ਵਿਦੇਸ਼ਾਂ ਵਿਚ ਜਾ ਕੇ ਕੋਈ ਵੀ ਕੰਮ ਕਰਨ ਲਈ ਤਿਆਰ ਹੋ ਜਾਂਦੇ ਹਨ।
ਕੋਈ ਵੀ ਕੰਮ ਵੱਡਾ-ਛੋਟਾ ਨਹੀਂ ਹੁੰਦਾ, ਬਲਕਿ ਨਜ਼ਰੀਆ ਹੀ ਉਸ ਕੰਮ ਪ੍ਰਤੀ ਸਾਡੀ ਧਾਰਨਾ ਨੂੰ ਪੈਦਾ ਕਰਦਾ ਹੈ। ਨਿੱਤ ਵਧ ਰਹੀਆਂ ਲੁੱਟ-ਖੋਹ ਦੀਆਂ ਵਾਰਦਾਤਾਂ ਤੇ ਨਸ਼ਿਆਂ ਦਾ ਰੁਝਾਨ ਸਹੀ ਅਰਥਾਂ ਵਿਚ ਕੰਮ ਤੋਂ ਸੱਖਣੇ ਨੌਜਵਾਨ ਵਰਗ ਨੂੰ ਕਿੰਤੂ-ਪ੍ਰੰਤੂ ਦੇ ਘੇਰੇ ਵਿਚ ਲਿਆ ਖੜ੍ਹਾ ਕਰਦੇ ਹਨ। ਸਾਨੂੰ ਇਸ ਗੱਲ ਨੂੰ ਸਮਝਣਾ ਪਵੇਗਾ ਕਿ ਸਾਰੇ ਪੜ੍ਹੇ-ਲਿਖੇ ਵਰਗ ਨੂੰ ਸਰਕਾਰ ਨੌਕਰੀ 'ਤੇ ਨਹੀਂ ਲਗਾ ਸਕਦੀ ਤਾਂ ਸਾਨੂੰ ਚਾਹੀਦਾ ਹੈ ਕਿ ਸਰਕਾਰ ਵੱਲੋਂ ਚਲਾਈਆਂ ਲੋਕ ਸੇਵਾ ਯੋਜਨਾਵਾਂ ਜਿਵੇਂ ਬਾਗਬਾਨੀ, ਪਸ਼ੂ ਪਾਲਣ, ਮੱਛੀ ਪਾਲਣ ਤੇ ਹੋਰ ਵੀ ਖੇਤੀ ਸਹਾਇਕ, ਤਕਨੀਕੀ ਧੰਦਿਆਂ ਨੂੰ ਅਪਣਾ ਕੇ ਆਪਣੀ ਤੇ ਆਪਣੇ ਘਰ ਪਰਿਵਾਰ ਦੀ ਦਿਸ਼ਾ ਤੇ ਦਸ਼ਾ ਸੁਧਾਰੀਏ।

-ਮਾ: ਮਨਦੀਪ ਸਿਵੀਆ
ਪਿੰਡ ਤੇ ਡਾਕ: ਜੌੜਕੀ ਅੰਧੇ ਵਾਲੀ, ਫਾਜ਼ਿਲਕਾ।

ਨੋਟਬੰਦੀ

ਨੋਟਬੰਦੀ ਦੇ ਐਲਾਨ ਤੋਂ ਬਾਅਦ ਅਜੇ ਤੱਕ ਵੀ ਜਨਜੀਵਨ ਥਾਂ ਸਿਰ ਆਇਆ ਪ੍ਰਤੀਤ ਨਹੀਂ ਹੁੰਦਾ ਕਿਉਂਕਿ ਨੋਟਾਂ ਦੇ ਅਚਾਨਕ ਕਰਵਟ ਬਦਲਣ ਦਾ ਸਿੱਧਾ ਪ੍ਰਭਾਵ ਸਾਧਾਰਨ ਵਿਅਕਤੀਆਂ 'ਤੇ ਪਿਆ। ਕੇਂਦਰ ਸਰਕਾਰ ਵੱਲੋਂ ਸੁਚੱਜੀ ਵਿਉਂਤਬੰਦੀ ਨੂੰ ਮਨਫ਼ੀ ਕਰਕੇ ਪੁੱਟਿਆ ਇਹ ਕਦਮ ਸਾਧਾਰਨ ਲੋਕਾਂ ਲਈ ਟੇਢੀ ਖੀਰ ਬਣਿਆ ਹੋਇਆ ਹੈ।
ਸਰਕਾਰ ਨੂੰ ਚਾਹੀਦਾ ਹੈ ਕਿ ਆਮ ਵਿਅਕਤੀ ਵਾਸਤੇ ਕੁਝ ਰਾਹਤ ਮੁਹੱਈਆ ਕਰਵਾਏ ਤਾਂ ਜੋ ਸੁਚੱਜੀ ਵਿਉਂਤਬੰਦੀ ਅਨੁਸਾਰ ਪੈਸਿਆਂ ਦਾ ਲੈਣ-ਦੇਣ ਕੀਤਾ ਜਾ ਸਕੇ ਸਾਧਾਰਨ ਵਿਅਕਤੀ ਦਾ ਕਾਲੇ ਧਨ ਨਾਲ ਤਾਂ ਕੋਈ ਵਾਹ-ਵਾ