ਤਾਜਾ ਖ਼ਬਰਾਂ


ਬੀ.ਸੀ.ਸੀ.ਆਈ.ਨੇ ਤੁਫ਼ਾਨ ਘੋਸ਼ ਨੂੰ ਨੈਸ਼ਨਲ ਕ੍ਰਿਕਟ ਅਕੈਡਮੀ ਦਾ ਚੀਫ਼ ਅਫ਼ਸਰ ਕੀਤਾ ਨਿਯੁਕਤ
. . .  1 day ago
ਪ੍ਰੇਮੀ ਨਾਲ ਮਿਲ ਕੇ ਪਿਤਾ ਦਾ ਕਤਲ ਕਰਵਾਉਣ ਵਾਲੀ ਧੀ ਸਮੇਤ 3 ਨੂੰ ਉਮਰ ਕੈਦ
. . .  1 day ago
ਗੁਰਦਾਸਪੁਰ, 12 ਦਸੰਬਰ (ਆਰਿਫ਼)-ਬੀਤੇ ਸਾਲ ਥਾਣਾ ਧਾਰੀਵਾਲ ਵਿਖੇ ਦਰਜ ਇਕ ਮਾਮਲੇ ਵਿਚ ਅੱਜ ਮਾਨਯੋਗ ਅਦਾਲਤ ਗੁਰਦਾਸਪੁਰ ਨੇ ਫ਼ੈਸਲਾ ਸੁਣਾਉਂਦੇ ਹੋਏ ਆਪਣੇ ਪਿਤਾ ਦਾ ਕਤਲ ਕਰਵਾਉਣ ਵਾਲੀ ਧੀ, ਉਸ ਦੇ ਪ੍ਰੇਮੀ ਸਮੇਤ 3 ਨੂੰ ਉਮਰ ਕੈਦ...
ਅਸੀਂ ਕਿਸੇ ਨਾਲ ਗਠਬੰਧਨ ਨਹੀਂ ਕਰਾਂਗੇ- ਫ਼ਾਰੂਕ ਅਬਦੁੱਲਾ
. . .  1 day ago
ਸ੍ਰੀਨਗਰ, 12 ਦਸੰਬਰ- ਜੰਮੂ-ਕਸ਼ਮੀਰ ਦੇ ਸਾਬਕਾ ਮੁੱਖ ਮੰਤਰੀ ਤੇ ਮੌਜੂਦਾ ਸੰਸਦ ਮੈਂਬਰ ਫ਼ਾਰੂਕ ਅਬਦੁੱਲਾ ਨੇ ਕਿਹਾ ਕਿ ਉਹ ਕਿਸੇ ਪਾਰਟੀ ਨਾਲ ਗਠਬੰਧਨ ਨਹੀਂ ਕਰਨਗੇ...
ਰਾਵੀ ਦਰਿਆ 'ਚ ਪਾਣੀ ਦਾ ਪੱਧਰ ਵਧਿਆ-ਮਕੌੜਾ ਪੱਤਣ 'ਤੇ ਪਲਟੂਨ ਪੁਲ ਰੁੜ੍ਹਿਆ
. . .  1 day ago
ਬਹਿਰਾਮਪੁਰ, 12 ਦਸੰਬਰ (ਬਲਬੀਰ ਸਿੰਘ ਕੋਲਾ)-ਬੀਤੀ ਰਾਤ ਪਹਾੜਾਂ ਵਿਚ ਹੋਈ ਬਰਸਾਤ ਕਰਕੇ ਰਾਵੀ ਦਰਿਆ ਵਿਚ ਪਾਣੀ ਦਾ ਪੱਧਰ ਵਧਣ ਕਰਕੇ ਪੱਤਣ ਮਕੌੜਾ 'ਤੇ ਬਣਿਆ ਪਲਟੂਨ ਪੁਲ ਰੁੜ੍ਹ ਜਾਣ ਦੀ ਖ਼ਬਰ ਹੈ। ਇਕੱਤਰ ਜਾਣਕਾਰੀ...
ਪ੍ਰਵਾਸੀ ਮਜ਼ਦੂਰ ਨੇ ਦੂਸਰੇ ਪ੍ਰਵਾਸੀ ਮਜ਼ਦੂਰ ਦੀ ਕੀਤੀ ਹੱਤਿਆ
. . .  1 day ago
ਪਠਾਨਕੋਟ,12 ਦਸੰਬਰ (ਆਰ. ਸਿੰਘ/ਸੰਧੂ)-ਪਿੰਡ ਕੰਡਰਾਂ ਵਿਖੇ ਆਪਸੀ ਰੰਜਸ਼ 'ਚ ਇੱਕ ਪ੍ਰਵਾਸੀ ਮਜ਼ਦੂਰ ਨੇ ਦੂਸਰੇ ਪ੍ਰਵਾਸੀ ਮਜ਼ਦੂਰ ਦਾ ਕਤਲ ਕਰ ਦਿੱਤਾ । ਜਾਣਕਾਰੀ ਅਨੁਸਾਰ ਮ੍ਰਿਤਕ ਪੋਲਟਰੀ ਫਾਰਮ 'ਤੇ ਕੰਮ ਕਰਦਾ ਸੀ ਅਤੇ ਆਪਣੀ...
ਮੋਟਰ ਸਾਈਕਲਾਂ ਦੀ ਭਿਆਨਕ ਟੱਕਰ 'ਚ 2 ਹਲਾਕ-2 ਜ਼ਖ਼ਮੀ
. . .  1 day ago
ਸ੍ਰੀ ਮੁਕਤਸਰ ਸਾਹਿਬ, 12 ਨਵੰਬਰ (ਰਣਜੀਤ ਸਿੰਘ ਢਿੱਲੋਂ)-ਦੇਰ ਸ਼ਾਮ ਸਥਾਨਕ ਬਠਿੰਡਾ ਰੋਡ ਸਥਿਤ ਪਿੰਡ ਭਲਾਈਆਣਾ ਵਿਖੇ 2 ਮੋਟਰ ਸਾਈਕਲਾਂ ਦੀ ਆਹਮੋ-ਸਾਹਮਣੀ ਟੱਕਰ ਵਿਚ 2 ਵਿਅਕਤੀਆਂ ਦੀ ਮੌਤ ਹੋ ਜਾਣ ਤੇ 2...
ਜੈਤੋ ਰੇਲਵੇ ਸਟੇਸ਼ਨ 'ਤੇ ਖੜੀ ਮਾਲ ਗੱਡੀ 'ਚੋਂ ਕਣਕ ਦੇ ਗੱਟੇ ਚੋਰੀ
. . .  1 day ago
ਜੈਤੋ, 12 ਦਸੰਬਰ (ਗੁਰਚਰਨ ਸਿੰਘ ਗਾਬੜੀਆ, ਨਿੱਜੀ ਪੱਤਰ ਪ੍ਰੇਰਕ)- ਸਥਾਨਕ ਰੇਲਵੇ ਸਟੇਸ਼ਨ 'ਤੇ ਲੋਡਿੰਗ ਲਈ ਖੜੀ ਮਾਲ ਗੱਡੀ ਦੀ ਬੋਗੀ ਵਿਚੋਂ ਅਣਗਿਣਤ ਕਣਕ ਦੇ ਗੱਟੇ ਚੋਰੀ ਕਰਕੇ ਲੈ ਜਾਣ ਦਾ ਪਤਾ ਲੱਗਿਆ ਹੈ। ਲੋਕਾਂ ਦੇ ਮੁਤਾਬਿਕ ਚੋਰ ਬੋਗੀ...
ਚੰਡੀਗੜ੍ਹ 'ਚ ਲਾਂਚ ਹੋਵੇਗਾ ਪਹਿਲਾ 'ਸਮਾਰਟ ਸਿਟੀ ਕਾਰਡ'
. . .  1 day ago
ਚੰਡੀਗੜ੍ਹ, 12 ਦਸੰਬਰ- ਚੰਡੀਗੜ੍ਹ ਵਿਖੇ ਦੇਸ਼ ਦਾ ਪਹਿਲਾ 'ਸਮਾਰਟ ਸਿਟੀ ਕਾਰਡ' ਲਾਂਚ ਹੋਣ ਜਾ ਰਿਹਾ ਹੈ। ਇਸ ਨਾਲ ਡਿਜੀਟਲ ਪੇਮੈਂਟ ਕੀਤੀ ਜਾ ਸਕੇਗੀ ਤੇ ਸ਼ਹਿਰਵਾਸੀ ਇਸ ਦਾ ਇਸਤੇਮਾਲ ਵੀ ਆਸਾਨੀ ਨਾਲ ਕਰ ਸਕਣਗੇ। ਚੰਡੀਗੜ੍ਹ ਦੇਸ਼ ਦਾ...
ਪ੍ਰਿਅੰਕਾ ਚੋਪੜਾ ਨੂੰ ਮਦਰ ਟਰੇਸਾ ਮੈਮੋਰੀਅਲ ਐਵਾਰਡ
. . .  1 day ago
ਸ੍ਰੀ ਗੁਰੂ ਗੋਬਿੰਦ ਸਿੰਘ ਦਾ ਪ੍ਰਕਾਸ਼ ਦਿਹਾੜਾ ਅਕਾਲ ਤਖਤ ਸਾਹਿਬ ਦੇ ਹੁਕਮਾਂ ਅਨੁਸਾਰ ਮਨਾਇਆ ਜਾਵੇਗਾ ਲੌਂਗੋਵਾਲ
. . .  1 day ago
ਹੋਰ ਖ਼ਬਰਾਂ..
  •     Confirm Target Language  

ਫ਼ਿਲਮ ਅੰਕ

ਪੂਜਾ ਹੈਗੜ

ਉੱਚੀਆਂ ਉਡਾਰੀਆਂ

ਐਮ. ਕਾਮ ਦੀ ਪੜ੍ਹਾਈ ਕਰਨ ਵਾਲੀ ਮੰਜੂ ਨਾਥ ਹੈਗੜੇ ਦੀ ਬੇਟੀ ਪੂਜਾ ਹੈਗੜੇ ਨੇ ਧਾਰ ਲਿਆ ਸੀ ਕਿ ਉਹ ਜਾਂ ਤਾਂ ਵੱਡੀ ਵਪਾਰਨ ਬਣੇਗੀ ਜਾਂ ਫਿਰ ਮਾਡਲ-ਅਭਿਨੇਤਰੀ ਬਣੇਗੀ। ਤਾਮਿਲ ਫ਼ਿਲਮਾਂ ਤੋਂ ਆਪਣਾ ਕੈਰੀਅਰ ਸ਼ੁਰੂ ਕਰਨ ਵਾਲੀ ਪੂਜਾ ਦੀ ਚਰਚਾ ਇਸ ਹਿੰਦੀ ਫ਼ਿਲਮ ਸੰਸਾਰ 'ਚ 'ਮੋਂਹਜੋਦੜੋ' ਫ਼ਿਲਮ ਨੇ ਕੀਤੀ ਜੋ ਰਿਤਿਕ ਰੌਸ਼ਨ ਦਾ ਇਕ ਸੁਪਨਾ ਸੀ। ਚਾਹੇ ਤੇਲਗੂ ਫ਼ਿਲਮਾਂ ਹੀ ਉਸ ਨੇ ਜ਼ਿਆਦਾ ਕੀਤੀਆਂ ਹਨ ਪਰ ਹੁਣ ਨਵੇਂ ਸਾਲ 'ਚ ਸਲਮਾਨ ਖ਼ਾਨ, ਜੈਕਲਿਨ ਫਰਨਾਂਡਿਜ਼ ਨਾਲ ਉਸ ਦੀ ਵੱਡੀ ਫ਼ਿਲਮ 'ਰੇਸ-3' ਆਉਣੀ ਹੈ। ਜਿਥੇ ਸਟਾਰ ਸਟੂਡੀਓਜ਼ ਨੇ ਇਸ ਫ਼ਿਲਮ ਨੂੰ ਰਿਲੀਜ਼ ਕਰਨਾ ਹੈ, ਉਥੇ ਰੋਮੀਓ ਡਿਸੂਜ਼ਾ ਦੀ ਇਹ ਫ਼ਿਲਮ ਪੂਜਾ ਹੈਗੜੇ ਲਈ ਬਾਲੀਵੁੱਡ 'ਚ ਨਵੇਂ ਰਸਤੇ ਖੋਲ੍ਹੇਗੀ। 'ਇੰਡੀਆ ਕਿਡਜ਼ ਫੈਸ਼ਨ ਵੀਕ' ਦੀ ਸ਼ੋਅ ਸਟਾਪਰ ਪੂਜਾ ਨੇ ਰਿਤਿਕ ਨੂੰ 'ਰਬੜਮੈਨ' ਕਿਹਾ ਹੈ ਤੇ ਉਸ ਨਾਲ ਜ਼ਿਆਦਾ ਫ਼ਿਲਮਾਂ ਕਰਨ ਦੀ ਤਮੰਨਾ ਜ਼ਾਹਿਰ ਕੀਤੀ ਹੈ। ਇਹ ਵੀ ਖਾਸ ਗੱਲ ਹੈ ਕਿ 'ਬਾਹੂਬਲੀ-2' ਵਾਲੇ ਪ੍ਰਕਾਸ਼ ਨੇ ਵੀ ਕੈਟਰੀਨਾ ਕੈਫ਼ ਦੀ ਥਾਂ ਪੂਜਾ ਹੈਗੜੇ ਨੂੰ ਅਹਿਮੀਅਤ ਦੇਣ ਦਾ ਫੈਸਲਾ ਕੀਤਾ ਹੈ। 'ਸਾਹੋ' ਨਾਂਅ ਦੀ ਪ੍ਰਕਾਸ਼ ਦੀ ਫ਼ਿਲਮ ਵਿਚ ਕੈਟੀ ਦੀ ਥਾਂ ਪੂਜਾ ਆ ਗਈ ਹੈ। ਇਹ ਵੀ ਖਾਸ ਖ਼ਬਰ ਘੁੰਮ ਰਹੀ ਹੈ ਕਿ ਰਿਤਿਕ ਦੀ ਨਵੀਂ ਫ਼ਿਲਮ 'ਚ ਉਹ ਆ ਸਕਦੀ ਹੈ। ਹਾਂ ਪੂਜਾ ਹੈਗੜੇ ਸਿਰਫ਼ ਸੂਰਜ ਪੰਚੋਲੀ ਦੇ ਨਾਂਅ ਤੋਂ ਨਫ਼ਰਤ ਕਰਦੀ ਹੈ। ਪੂਜਾ ਨੇ ਤਾਂ ਸੂਰਜ ਨਾਲ ਇਕ ਫ਼ਿਲਮ ਕਰਨ ਤੋਂ ਨਾਂਹ ਕਰ ਦਿੱਤੀ ਹੈ। ਪੂਜਾ ਸਿਰਫ਼ 'ਏ ਗਰੇਡ' ਕਲਾਕਾਰਾਂ ਨਾਲ ਹੀ ਕੰਮ ਕਰੇਗੀ ਤੇ ਸੂਰਜ 'ਏ ਗਰੇਡ' 'ਚ ਨਹੀਂ ਹੈ। ਜੋ ਹੀਰੋਇਨ ਰਿਤਿਕ, ਸਲਮਾਨ ਤੇ 'ਬਾਹੂਬਲੀ-2' ਨਾਲ ਫ਼ਿਲਮਾਂ ਕਰ ਰਹੀ ਹੋਏ, ਉਹ ਸੂਰਜ ਨੂੰ ਕਿਉਂ ਮਹੱਤਤਾ ਦੇਵੇਗੀ। ਦੀਪਿਕਾ ਪਾਦੂਕੋਨ ਤੇ ਕੈਟਰੀਨਾ ਕੈਫ਼ ਨੂੰ ਪਛਾੜ ਕੇ ਪੂਜਾ ਹੈਗੜੇ ਨੇ ਪ੍ਰਕਾਸ਼ ਦੀ 'ਸਾਹੋਂ' ਬਣ 'ਰੇਸ-3' ਕਰ ਰਹੀ ਹੈ ਤੇ ਇਹ ਅਗਾਂਹ ਵਧਣ ਦੀ 'ਰੇਸ' 'ਚ ਉਹ ਫਿਲਹਾਲ ਅੱਗੇ ਹੈ।


ਖ਼ਬਰ ਸ਼ੇਅਰ ਕਰੋ

ਪਰਣੀਤੀ ਚੋਪੜਾ ਮਿਲ ਗਈ ਕੇਸਰੀ

ਜਦ ਵੀ ਪਰਣੀਤੀ ਚੋਪੜਾ ਵਿਹਲੀ ਹੁੰਦੀ ਹੈ ਤਦ ਹੀ ਉਹ ਖ਼ਬਰਾਂ ਵਿਚ ਰਹਿਣ ਲਈ ਕੋਈ ਨਾ ਕੋਈ ਕੰਮ ਫੜ ਹੀ ਲੈਂਦੀ ਹੈ। 'ਐਫ.ਓ.ਏ.' ਭਾਵ ਫਰੈਂਡ ਆਫ਼ ਆਸਟ੍ਰੇਲੀਆ ਪੈਨਲ ਨੇ ਭਾਰਤੀ ਔਰਤ ਅੰਬੈਸਡਰ ਦੇ ਤੌਰ 'ਤੇ ਪਰੀ ਨੂੰ ਲਿਆ ਹੈ। ਪਰੀ ਨੇ ਖ਼ਬਰਾਂ 'ਚ ਰਹਿਣ ਲਈ ਆਸਟ੍ਰੇਲੀਆ ਜਾ ਕੇ ਜਾਨਵਰ-ਪਸ਼ੂ-ਪੰਛੀ ਪ੍ਰੇਮ ਦਿਖਾਇਆ। ਆਸਟ੍ਰੇਲੀਆ ਦੇ ਲੋਕਾਂ ਨੇ ਪਰੀ ਨੂੰ 'ਸੱਚੀ ਇਨਸਾਨ' ਕਿਹਾ। ਚਲੋ ਯਸ਼ਰਾਜ ਫ਼ਿਲਮਜ਼ ਨੇ ਪਰਣੀਤੀ ਦੀ ਨਵੀਂ ਫ਼ਿਲਮ 'ਸੰਦੀਪ ਔਰ ਪਿੰਕੀ ਫਰਾਰ' ਦਾ ਪ੍ਰਚਾਰ ਆਰੰਭ ਦਿੱਤਾ ਹੈ। ਇਸ ਫ਼ਿਲਮ 'ਚ ਉਹ ਕਾਰਪੋਰੇਟ ਔਰਤ ਬਣੀ ਹੈ। ਅਰਜਨ ਕਪੂਰ ਨਾਲ ਪਰੀ ਦੀ ਇਹ ਖਾਸ ਫ਼ਿਲਮ ਹੈ ਜੋ ਨਵੇਂ ਸਾਲ 'ਚ ਉਸ ਦੇ ਕੈਰੀਅਰ ਦਾ ਫੈਸਲਾ ਕਰੇਗੀ ਕਿ ਇਹ ਉਚਾਈਆਂ ਵੱਲ ਜਾਂਦਾ ਏ ਜਾਂ ਨਿਵਾਣ ਵੱਲ। 'ਗੋਲਮਾਲ ਅਗੇਨ' ਤੋਂ ਬਾਅਦ ਮਹੇਸ਼ ਬਾਬੂ ਨਾਲ ਨਵੀਂ ਤੇਲਗੂ ਫ਼ਿਲਮ ਪਰੀ ਨੇ ਤਿੰਨ ਕਰੋੜ 'ਚ ਸਾਈਨ ਕੀਤੀ ਹੈ। ਪਰੀ ਦੇ ਲਈ ਜਾ ਰਿਹਾ ਸਾਲ ਜ਼ਿਆਦਾ ਮਾੜਾ ਵੀ ਨਹੀਂ ਰਿਹਾ। 6 ਕੁ ਸਾਲ ਤੋਂ ਪਰੀ ਨੇ ਕਈ ਕਾਮਯਾਬੀਆਂ ਦੇ ਤੇ ਕਈ ਮਾੜੇ ਮਹੀਨੇ ਵੀ ਦੇਖੇ ਹਨ। ਅਕਸ਼ੈ ਕੁਮਾਰ ਨੇ ਸਭ ਤੋਂ ਜ਼ਿਆਦਾ ਪ੍ਰਸੰਸਾ ਪਰਣੀਤੀ ਚੋਪੜਾ ਦੀ ਕੀਤੀ ਹੈ। ਕੈਟਰੀਨਾ ਕੈਫ਼ ਨੂੰ ਪਰ੍ਹਾਂ ਕੱਢ ਕੇ ਜਾਂ ਪਰ੍ਹਾਂ ਕਰਵਾ ਕੇ ਅਕਸ਼ੈ ਨੇ 'ਸਾਰਾਗੜ੍ਹੀ' ਦੀ ਜੰਗ 'ਤੇ ਬਣ ਰਹੀ 'ਕੇਸਰੀ' ਫ਼ਿਲਮ 'ਚ ਪਰਣੀਤੀ ਚੋਪੜਾ ਦਾ ਪ੍ਰਵੇਸ਼ ਕਰਵਾ ਦਿੱਤਾ ਹੈ।

ਟਿਸਕਾ ਚੋਪੜਾ

ਖਾਹਮਖਾਹ ਦੀ ਮੁਸੀਬਤ

'ਤਾਰੇ ਜ਼ਮੀਂ ਪਰ', 'ਦਿਲ ਤੋ ਬੱਚਾ ਹੈ ਜੀ', 'ਰਹਸਯ' ਤੇ ਹੁਣ ਲਘੂ ਫ਼ਿਲਮ 'ਚਟਨੀ' ਬਣਾ ਕੇ ਅਭਿਨੈ ਦਾ ਸਵਾਦ ਫ਼ਿਲਮ ਦਰਸ਼ਕਾਂ ਨੂੰ ਚਖਾਉਣ ਵਾਲੀ ਟਿਸਕਾ ਚੋਪੜਾ ਪਾਲੀਵੁੱਡ 'ਚ ਵੀ ਪ੍ਰਵੇਸ਼ ਕਰ ਚੁੱਕੀ ਹੈ ਤੇ 'ਖ਼ੁਸ਼ੀਆਂ' ਫ਼ਿਲਮ ਨਾਲ ਉਸ ਨੇ ਚਾਹੇ ਕਾਮਯਾਬ ਪਾਲੀਵੁੱਡ ਹੀਰੋਇਨ ਬਣਨ ਦੀਆਂ ਖੁਸ਼ੀਆਂ ਨਾ ਪ੍ਰਾਪਤ ਕੀਤੀਆਂ ਹੋਣ ਪਰ ਆਪਣੀ ਮਾਤ ਭਾਸ਼ਾ ਦੀ ਫ਼ਿਲਮ 'ਚ ਕੰਮ ਕਰਕੇ ਉਸ ਨੇ ਮਾਨਸਿਕ ਸੰਤੁਸ਼ਟੀ ਹਾਸਲ ਕੀਤੀ ਹੈ। 'ਰੇਪਟਾਈਲ ਡਾਈਫੰਕਸ਼ਨ' ਵੀਡੀਓ ਵਾਇਰਲ ਜਦ ਹੋਇਆ ਸੀ ਤਦ ਟਿਸਕਾ ਦੀ ਚਰਚਾ ਮੁੰਬਈ ਦੀ ਫ਼ਿਲਮ ਨਗਰੀ 'ਚ ਬਹੁਤ ਹੋਈ ਸੀ। ਯੂ-ਟਿਊਬ ਚੈਨਲ 'ਤੇ ਇਕ ਕੰਪਨੀ ਨੂੰ ਪ੍ਰਤੀਕਿਰਿਆ ਦਿੰਦਿਆਂ ਟਿਸਕਾ ਦੇ ਕਹੇ ਲਫ਼ਜ਼ ਯਾਦ ਕਰੋ ਕਿ ਇਥੇ ਫ਼ਿਲਮ ਆ ਜਾਏ, ਫਲਾਪ ਰਹੇ ਤਾਂ ਐਕਟਰ ਜਾਂ ਐਕਟਰੈੱਸ ਦੀ ਡਾਇਰੀ 'ਬੰਜਰ ਰੇਗਿਸਤਾਨ' ਜਿਹੀ ਹੁੰਦੀ ਹੈ ਤੇ ਫਿਰ ਸ਼ਾਇਦ ਟਿਸਕਾ ਨੂੰ 'ਕਾਸਟਿੰਗ ਕਾਊਚ' ਨਾਂਅ ਦੀ 'ਅਸ਼ਲੀਲ ਪ੍ਰਥਾ' 'ਚੋਂ ਲੰਘਣ ਦੇ ਸੱਦੇ ਆਏ ਪਰ ਉਸ ਨੇ ਠੋਕਰ ਮਾਰ ਦਿੱਤੀ ਇਸ ਗੰਦੀ ਸੱਭਿਅਤਾ ਨੂੰ ਅਤੇ ਅੱਜ ਉਸਦਾ ਸੁਖੀ ਪਰਿਵਾਰ ਹੈ। ਟਿਸਕਾ ਚੋਪੜਾ 'ਚਟਨੀ' ਤੇ 'ਮੁਕਤੀ ਭਵਨ' ਫ਼ਿਲਮਾਂ ਨਾਲ ਅੰਤਰਰਾਸ਼ਟਰੀ ਫ਼ਿਲਮ ਸਮਾਰੋਹਾਂ 'ਚ ਆਪਣੇ ਅਭਿਨੈ ਲਈ ਹੁਣੇ ਜਿਹੇ ਹੀ ਪ੍ਰਸੰਸਾ ਪੱਤਰ ਲੈ ਕੇ ਪਰਤੀ ਹੈ। 'ਕਿੱਸਾ' ਫ਼ਿਲਮ ਨੇ ਵੀ ਟਿਸਕਾ ਨੂੰ ਮਾਣ-ਸਨਮਾਨ ਦਿਵਾਏ। ਹੁਣ ਟਿਸਕਾ ਚੋਪੜਾ ਚਾਹੁੰਦੀ ਹੈ ਕਿ ਅੰਮ੍ਰਿਤਾ ਪ੍ਰੀਤਮ 'ਤੇ ਫ਼ਿਲਮ ਬਣੇ ਤੇ ਉਹ ਮੁੱਖ ਭੂਮਿਕਾ ਨਿਭਾਏ। ਸੋਸ਼ਲ ਮੀਡੀਆ ਤੇ ਖਾਹਮਖ਼ਾਹ ਕਿਸੇ ਵਿਸ਼ੇ 'ਤੇ ਹਾਂ ਕਰਕੇ ਉਹ ਕਸੂਤੀ ਫਸ ਗਈ ਤੇ ਉਸ ਨੂੰ ਸ਼ਰਮਿੰਦਗੀ ਝੱਲਣੀ ਪਈ ਹੈ।


-ਸੁਖਜੀਤ ਕੌਰ

ਆਯੂਸ਼ਮਨ ਖੁਰਾਨਾ

ਵਧਾਈ ਹੋ

ਅਭਿਨੇਤਾ ਆਯੂਸ਼ਮਨ ਖੁਰਾਨਾ ਨੂੰ ਅੱਜਕਲ੍ਹ ਸਾਨੀਆ ਮਲਹੋਤਰਾ ਬਹੁਤ ਪ੍ਰਭਾਵਿਤ ਕਰ ਰਹੀ ਹੈ। ਆਯੂਸ਼ਮਨ ਖੁਦ ਰਿਤੇਸ਼ ਬਤਰਾ ਦੀ ਫ਼ਿਲਮ 'ਫੋਟੋਗ੍ਰਾਫ਼ਰ' ਦੇ ਸੈੱਟ 'ਤੇ ਸਾਨੀਆ ਨੂੰ ਮਿਲਣ ਪਹੁੰਚਿਆ। ਮਾਜ਼ਰਾ ਤਾਂ ਇਹ ਹੈ ਕਿ ਮਿਸਟਰ ਖੁਰਾਨਾ ਨੂੰ ਅਮਿਤ ਸ਼ਰਮਾ ਦੀ ਫ਼ਿਲਮ 'ਵਧਾਈ ਹੋ' ਮਿਲੀ ਹੈ ਤੇ ਇਸ 'ਚ ਖੁਰਾਨਾ ਜੀ ਨਾਲ ਸਾਨੀਆ ਨੂੰ ਹੀਰੋਇਨ ਲਿਆ ਗਿਆ ਹੈ। ਆਯੂਸ਼ ਤਾਂ ਦਿਨੇਸ਼ ਸ਼ਰਮਾ ਦਾ ਬਾਇਓਡਾਟਾ ਵੀ ਸਾਨੀਆ ਨੂੰ ਦੱਸ ਰਿਹਾ ਹੈ ਕਿ 1000 ਹਿੱਟ ਵਿਗਿਆਪਨ ਇਸ ਨਿਰਦੇਸ਼ਕ ਨੇ ਬਣਾਏ ਹਨ। ਸੋਨਾਕਸ਼ੀ-ਅਰਜਨ ਦੀ 'ਤੇਵਰ' ਫ਼ਿਲਮ ਵੀ ਦਿਨੇਸ਼ ਨੇ ਹੀ ਬਣਾਈ ਸੀ। ਚਲੋ ਜੀ 'ਵਧਾਈ ਹੋ' ਆਯੂਸ਼ਮਨ ਨੂੰ ਕਿ 'ਦੰਗਲ' ਵਾਲੀ ਸਾਨੀਆ ਨਾਲ ਇਹ ਨਵੀਂ ਫ਼ਿਲਮ ਉਸ ਦੇ ਕੈਰੀਅਰ ਲਈ ਨਵਾਂਪਨ ਲਿਆਏਗੀ। ਆਯੂਸ਼ ਦੀ ਪਹੁੰਚ ਹੁਣ ਬਿੱਗ ਬੀ ਤੱਕ ਵੀ ਹੈ। ਆਯੂਸ਼ ਵਧੀਆ ਸ਼ਾਇਰ ਵੀ ਹੈ। ਅਸੀਂ ਨਹੀਂ ਖੁਦ ਅਮਿਤਾਬ ਬੱਚਨ ਕਹਿੰਦੇ ਹਨ ਕਿਉਂਕਿ ਆਯੂਸ਼ ਦੀ ਸ਼ਾਇਰੀ 'ਮੁਖੌਟਾ' ਸੁਣ ਕੇ ਉਹ ਹੈਰਾਨ ਤੇ ਸੰਤੁਸ਼ਟ ਜੋ ਹੋਏ ਹਨ। ਆਯੂਸ਼ ਦੀ ਮਾਂ 'ਤੇ ਲਿਖੀ ਕਵਿਤਾ ਪੂਰੇ ਬਾਲੀਵੁੱਡ ਨੂੰ ਭਾਵੁਕ ਕਰ ਰਹੀ ਹੈ। 'ਹਾਰਿਆ ਮੈਂ ਦਿਲ ਹਾਰਿਆ' ਅਕਸਰ 'ਮੇਰੀ ਪਿਆਰੀ ਬਿੰਦੂ' ਦਾ ਇਹ ਗਾਣਾ ਆਯੂਸ਼ ਸਭ ਨੂੰ ਸੁਣਾਉਂਦਾ ਹੈ। 'ਵਧਾਈ ਹੋ' ਤੇ ਆਯੂਸ਼ ਦਾ ਪੂਰਾ ਧਿਆਨ ਹੈ ਤਾਂ ਜੋ ਉਹ ਸਿੱਧਾ 'ਏ' ਦਰਜੇ ਦੇ ਕਲਾਕਾਰਾਂ 'ਚ ਸ਼ਾਮਿਲ ਹੋ ਜਾਏ। ਫ਼ਿਲਮਾਂ ਲਈ ਉਹ ਗੀਤ ਵੀ ਗਾਉਂਦਾ ਹੈ। ਥੀਏਟਰ ਤੋਂ ਟੀ.ਵੀ. ਤੇ ਫਿਰ ਫ਼ਿਲਮਾਂ ਤੱਕ ਅੱਪੜੇ ਇਸ ਗਾਇਕ-ਨਾਇਕ ਦੀ ਖਾਸੀਅਤ ਇਹ ਹੈ ਕਿ ਉਹ ਦੁੱਖ ਤੇ ਸੁੱਖ ਇਸ ਦੇ ਵਿਚਕਾਰ ਵਾਲਾ ਸ਼ਖ਼ਸ ਹੈ।

ਭੋਲੀ ਪੰਜਾਬਣ ਨੇ ਨਵੀਂ ਪਛਾਣ ਦਿੱਤੀ

ਰਿਚਾ ਚੱਢਾ

ਸਾਲ 2008 ਵਿਚ ਪ੍ਰਦਰਸ਼ਿਤ ਹੋਈ 'ਓਏ ਲੱਕੀ ਲੱਕੀ ਓਏ' ਤੋਂ ਵੱਡੇ ਪਰਦੇ 'ਤੇ ਚਮਕੀ ਰਿਚਾ ਚੱਢਾ ਨੇ ਹਿੰਦੀ ਫ਼ਿਲਮ ਇੰਡਸਟਰੀ ਵਿਚ ਆਪਣੀ ਵੱਖਰੀ ਪਛਾਣ ਬਣਾਉਣ ਵਿਚ ਸਫ਼ਲਤਾ ਹਾਸਲ ਕੀਤੀ ਹੈ। 'ਗੈਂਗਸ ਆਫ ਵਾਸੇਪੁਰ', 'ਮਸਾਨ', 'ਰਾਮ ਲੀਲ੍ਹਾ', 'ਸਰਬਜੀਤ' ਆਦਿ ਫ਼ਿਲਮਾਂ ਵਿਚ ਰਿਚਾ ਨੇ ਆਪਣੇ ਅਭਿਨੈ ਦੀ ਕਾਬਲੀਅਤ ਚੰਗੀ ਤਰ੍ਹਾਂ ਕਰਾਈ ਹੈ। ਹੁਣ 'ਫੁਕਰੇ ਰਿਟਨਰਜ਼' ਵਿਚ ਆਪਣੇ ਅਭਿਨੈ ਦੇ ਜਲਵੇ ਪੇਸ਼ ਕਰਨ ਵਾਲੀ ਰਿਚਾ ਇਸ ਫ਼ਿਲਮ ਨੂੰ ਆਪਣੇ ਕੈਰੀਅਰ ਲਈ ਖ਼ਾਸ ਮੰਨਦੀ ਹੈ।
ਫ਼ਿਲਮ ਬਾਰੇ ਉਹ ਕਹਿੰਦੀ ਹੈ, 'ਬਾਲੀਵੁੱਡ ਵਿਚ ਅੱਜ ਜੋ ਵੀ ਮੇਰੀ ਪਛਾਣ ਹੈ, ਉਹ 'ਫੁਕਰੇ' ਦੀ ਬਦੌਲਤ ਹੈ। ਮੇਰੀ ਪਹਿਲੀ ਫ਼ਿਲਮ 'ਓਏ ਲੱਕੀ ਲੱਕੀ ਹੋਏ' ਹਿੱਟ ਰਹੀ ਸੀ ਪਰ ਇਹ ਫ਼ਿਲਮ ਦਰਸ਼ਕਾਂ ਨਾਲ ਮੇਰਾ ਸਬੰਧ ਨਹੀਂ ਬਣਾ ਸਕੀ ਸੀ। ਫਿਰ ਆਈ 'ਬੇਨੀ ਐਂਡ ਬਬਲੂ' ਟਿਕਟ ਖਿੜਕੀ 'ਤੇ ਆਈ ਗਈ ਸਾਬਤ ਹੋਈ ਅਤੇ 'ਗੈਂਗਸ ਆਫ਼ ਵਾਸੇਪੁਰ' ਨੂੰ ਸੀਮਿਤ ਵਰਗ ਦੇ ਦਰਸ਼ਕਾਂ ਨੇ ਹੀ ਦੇਖਿਆ ਤੇ ਪਸੰਦ ਕੀਤਾ। ਉਸ ਫ਼ਿਲਮ ਵਿਚ ਗਾਲੀ-ਗਲੋਚ ਤੇ ਖੂਨ-ਖਰਾਬਾ ਬਹੁਤ ਸੀ। ਇਸ ਲਈ ਪਰਿਵਾਰਿਕ ਦਰਸ਼ਕ ਇਸ ਤੋਂ ਦੂਰ ਰਹੇ। 'ਫੁਕਰੇ' ਮੇਰੀ ਪਹਿਲੀ ਕਮਰਸ਼ੀਅਲ ਹਿੱਟ ਫ਼ਿਲਮ ਸੀ ਅਤੇ ਹਰ ਵਰਗ ਦੇ ਦਰਸ਼ਕਾਂ ਨੇ ਇਸ ਨੂੰ ਪਸੰਦ ਕੀਤਾ ਸੀ। ਫ਼ਿਲਮ ਵਿਚ ਮੇਰੇ ਵੱਲੋਂ ਨਿਭਾਇਆ ਗਿਆ ਭੋਲੀ ਪੰਜਾਬਣ ਦਾ ਕਿਰਦਾਰ ਵੀ ਦਰਸ਼ਕਾਂ ਨੂੰ ਪਸੰਦ ਆਇਆ ਸੀ ਅਤੇ ਇਸ ਵਜ੍ਹਾ ਕਰਕੇ ਭੋਲੀ ਪੰਜਾਬਣ ਨੇ ਮੈਨੂੰ ਨਵੀਂ ਪਛਾਣ ਦਿੱਤੀ। ਇਹ ਕਿਰਦਾਰ ਮੇਰੇ ਲਈ ਸਪੈਸ਼ਲ ਹੈ ਅਤੇ ਇਸੇ ਵਜ੍ਹਾ ਕਰਕੇ ਜਦੋਂ ਇਸ ਫ਼ਿਲਮ ਦਾ ਵਿਸਥਾਰ ਬਣਨ ਦਾ ਐਲਾਨ ਹੋਇਆ ਤਾਂ ਮੈਨੂੰ ਬੇਹੱਦ ਖੁਸ਼ੀ ਹੋਈ ਸੀ।'
ਭੋਲੀ ਪੰਜਾਬਣ ਦਾ ਕਿਰਦਾਰ ਨਿਭਾਉਣਾ ਰਿਚਾ ਲਈ ਕਿੰਨਾ ਫਾਇਦੇਮੰਦ ਰਿਹਾ, ਇਸ ਬਾਰੇ ਦੱਸਦਿਆਂ ਉਹ ਕਹਿੰਦੀ ਹੈ, 'ਹਰ ਕਲਾਕਾਰ ਦੀ ਇਹ ਇੱਛਾ ਹੁੰਦੀ ਹੈ ਕਿ ਉਹ ਲੋਕਾਂ ਵਿਚ ਲੋਕਪ੍ਰਿਅਤਾ ਹਾਸਲ ਕਰੇ ਅਤੇ ਭੋਲੀ ਪੰਜਾਬਣ ਦੇ ਕਿਰਦਾਰ ਨੇ ਮੇਰੀ ਇਹ ਇੱਛਾ ਪੂਰੀ ਕਰ ਦਿੱਤੀ। ਪਿਛਲੇ ਦਿਨੀਂ ਮੈਂ ਇਕ ਵਿਆਹ ਦੇ ਸਿਲਸਿਲੇ ਵਿਚ ਪੁਸ਼ਕਰ (ਰਾਜਸਥਾਨ) ਗਈ ਸੀ। ਉਥੇ ਜਿਸ ਕਿਸੇ ਦੁਕਾਨ ਵਿਚ ਗਈ ਤਾਂ ਹਰ ਦੁਕਾਨਦਾਰ ਨੇ ਇਹੀ ਕਿਹਾ ਕਿ ਤੁਹਾਡੀ ਸ਼ਕਲ ਭੋਲੀ ਪੰਜਾਬਣ ਨਾਲ ਮਿਲਦੀ ਹੈ ਅਤੇ ਉਦੋਂ ਮੈਂ ਭੋਲੇਪਣ ਦਾ ਅਭਿਨੈ ਕਰਦੇ ਹੋਏ ਪੁੱਛਦੀ ਕਿ ਉਹ ਕੌਣ ਹੈ। ਇਸ ਅਨੁਭਵ ਤੋਂ ਪਤਾ ਲੱਗਿਆ ਕਿ ਇਹ ਕਿਰਦਾਰ ਕਿੰਨਾ ਲੋਕਪ੍ਰਿਆ ਹੈ। 'ਫੁਕਰੇ' ਟੀ.ਵੀ. 'ਤੇ ਅਕਸਰ ਪ੍ਰਸਾਰਿਤ ਹੁੰਦੀ ਰਹਿੰਦੀ ਹੈ। ਇਸ ਵਜ੍ਹਾ ਨਾਲ ਵੀ ਮੇਰੇ ਇਸ ਕਿਰਦਾਰ ਨੂੰ ਬਹੁਤ ਹੁੰਗਾਰਾ ਮਿਲਿਆ ਹੈ।' 'ਫੁਕਰੇ' ਦੇ ਮੁਕਾਬਲੇ 'ਫੁਕਰੇ ਰਿਟਰਨਜ਼' ਵਿਚ ਭੋਲੀ ਪੰਜਾਬਣ ਦੇ ਕਿਰਦਾਰ ਵਿਚ ਕੀ ਫਰਕ ਹੈ, ਇਹ ਪੁੱਛਣ 'ਤੇ ਰਿਚਾ ਕਹਿੰਦੀ ਹੈ, 'ਪਹਿਲੀ ਫ਼ਿਲਮ ਵਿਚ ਭੋਲੀ ਨੂੰ ਇਕ ਦਬੰਗ ਔਰਤ ਦੇ ਤੌਰ 'ਤੇ ਪੇਸ਼ ਕੀਤਾ ਗਿਆ ਸੀ। ਹੁਣ ਇਸ ਦੂਜੀ ਫ਼ਿਲਮ ਵਿਚ ਭੋਲੀ ਦੇ ਪਿਤਾ ਨੂੰ ਵੀ ਲਿਆਂਦਾ ਗਿਆ ਹੈ। ਇਥੇ ਇਹ ਦਿਖਾਇਆ ਗਿਆ ਹੈ ਕਿ ਪੂਰੇ ਸ਼ਹਿਰ ਵਿਚ ਰੋਹਬ ਝਾੜਦੀ ਫਿਰਦੀ ਭੋਲੀ ਆਪਣੇ ਪਿਤਾ ਤੋਂ ਡਰਦੀ ਹੈ। ਭਾਵ ਇਥੇ ਭੋਲੀ ਦਾ ਇਕ ਨਵਾਂ ਰੂਪ ਪੇਸ਼ ਕੀਤਾ ਗਿਆ ਹੈ।'


-ਇੰਦਰਮੋਹਨ ਪੰਨੂੰ

ਕ੍ਰਿਤੀ ਸੇਨਨ

ਦਾ 'ਅਰਜਨ ਪਟਿਆਲਾ'

ਆਪਣੇ ਟਵਿੱਟਰ ਖਾਤੇ 'ਤੇ ਕ੍ਰਿਤੀ ਸੇਨਨ ਨੇ ਬਹੁਤ ਹੀ ਖੁਸ਼ੀ ਦਾ ਇਜ਼ਹਾਰ ਕੀਤਾ ਹੈ ਤੇ ਇਕ ਖਾਸ ਤੇ ਧਮਾਕੇਦਾਰ ਖ਼ਬਰ ਬੀ-ਟਾਊਨ ਦੇ ਨਾਲ-ਨਾਲ ਆਪਣੇ ਪ੍ਰਸੰਸਕਾਂ ਨੂੰ ਦਿੱਤੀ ਹੈ। ਕ੍ਰਿਤੀ ਅੱਜਕਲ੍ਹ ਪੰਜਾਬੀ ਸੁਪਰਸਟਾਰ ਹੀਰੋ ਤੇ ਗਾਇਕ ਦਿਲਜੀਤ ਦੁਸਾਂਝ ਦੀ ਸਿਫ਼ਤ 'ਚ ਅਕਸਰ ਟਵੀਟ ਕਰਦੀ ਰਹਿੰਦੀ ਹੈ। ਕ੍ਰਿਤੀ ਨੇ ਦਿਲਜੀਤ ਨਾਲ ਨਵੀਂ ਫ਼ਿਲਮ ਦੀ ਗੱਲ ਆਖੀ ਹੈ ਤੇ ਦਿਲਜੀਤ ਨੇ ਵੀ ਆਪਣੀ ਫੇਸਬੁੱਕ 'ਤੇ ਇਸ ਸਬੰਧੀ ਤਸਵੀਰਾਂ ਪਾਈਆਂ ਹਨ। ਜੀ ਹਾਂ, ਕ੍ਰਿਤੀ ਸੇਨਨ ਗੱਲ ਆਪਣੀ ਨਵੀਂ ਫ਼ਿਲਮ 'ਅਰਜਨ ਪਟਿਆਲਾ' ਦੀ ਕਰ ਰਹੀ ਹੈ। ਕ੍ਰਿਤੀ ਦੀ ਦਿਲਜੀਤ ਨਾਲ ਸੈਲਫੀ 'ਅਰਜਨ ਪਟਿਆਲਾ' ਸਬੰਧੀ ਸਬੂਤ ਹੈ ਕਿ ਮੈਡਾਕ ਫ਼ਿਲਮਜ਼ ਦੀ ਇਹ ਫ਼ਿਲਮ ਉਹ ਦਿਲਜੀਤ ਨਾਲ ਕਰ ਰਹੀ ਹੈ। ਦਿਨੇਸ਼ ਵਿਜਨ 'ਅਰਜਨ ਪਟਿਆਲਾ' ਬਣਾ ਰਿਹਾ ਹੈ। ਕ੍ਰਿਤੀ ਨੇ 'ਪਦਮਾਵਤੀ' ਵਿਵਾਦ 'ਚ ਵੀ ਦੀਪਿਕਾ ਦੀ ਹਮਾਇਤ ਕੀਤੀ ਹੈ। 'ਬਰੇਲੀ ਕੀ ਬਰਫ਼ੀ' ਤੋਂ ਬਾਅਦ 'ਅਰਜਨ ਪਟਿਆਲਾ' ਰਾਹੀਂ ਕ੍ਰਿਤੀ ਦਾ 2018 ਚੜ੍ਹਦਿਆਂ ਹੀ ਬੀ-ਟਾਊਨ 'ਚ ਚੋਟੀ ਦੀ ਨਾਇਕਾ ਬਣਨ ਦਾ ਸੁਨਹਿਰੀ ਖਵਾਬ ਹੈ। ਟਵਿਸਟ ਕਮਰੀਆ ਵਾਲੀ ਕ੍ਰਿਤੀ ਜਾਣਦੀ ਹੈ ਦਿਲਜੀਤ ਨਾਲ ਫ਼ਿਲਮ ਦਾ ਮਹੱਤਵ ਕਿਉਂਕਿ ਕਰੀਨਾ-ਆਲੀਆ ਤੇ ਅਨੁਸ਼ਕਾ ਤੋਂ ਬਾਅਦ ਕ੍ਰਿਤੀ ਸੇਨਨ ਨਾਲ ਉਸ ਦਾ ਆਉਣਾ ਕ੍ਰਿਤੀ ਦੇ ਚੰਗੇ ਦਿਨਾਂ ਦੀ ਗੱਲ ਹੈ। ਯਾਦ ਕਰੋ ਆਪਣੇ ਪਹਿਲੇ 'ਰੈਂਪ ਵਾਕ' ਸਮੇਂ ਕ੍ਰਿਤੀ ਬਹੁਤ ਘਬਰਾ ਗਈ ਸੀ। ਮਾਡਲ ਤੋਂ ਹੀਰੋਇਨ ਬਣ ਹੁਣ 'ਅਰਜਨ ਪਟਿਆਲਾ' ਤੱਕ ਪਹੁੰਚਣਾ ਕ੍ਰਿਤੀ ਲਈ ਸਮਾਂ ਸਭ 'ਤੇ ਆਉਂਦਾ ਹੈ, ਵਾਲੀ ਗੱਲ ਹੈ। ਕ੍ਰਿਤੀ ਜਾਣਦੀ ਹੈ ਕਿ ਅਜੈ, ਅਕਸ਼ੈ, ਸਲਮਾਨ ਤੇ ਸ਼ਾਹਰੁਖ ਦਾ ਟਾਕਰਾ ਹੁਣ ਦਿਲਜੀਤ ਹੀ ਕਰ ਸਕਦਾ ਹੈ। ਕ੍ਰਿਤੀ ਇਸ ਸਮੇਂ ਅਰਜਨ ਕਪੂਰ ਨਾਲ 'ਫਰਜ਼ੀ' ਫ਼ਿਲਮ ਵੀ ਕਰ ਰਹੀ ਹੈ। ਚਲੋ ਜੀ 'ਅਰਜਨ ਪਟਿਆਲਾ' ਕ੍ਰਿਤੀ ਨੂੰ ਸਟਾਰ ਹੀਰੋਇਨ ਵਜੋਂ 2018 'ਚ ਪੇਸ਼ ਕਰ ਦੇਵੇ, ਚੰਗੀ ਖ਼ਬਰ ਹੈ। 'ਹੀਰੋਪੰਥੀ', 'ਰਾਬਤਾ', 'ਦਿਲਵਾਲੇ' ਤੋਂ 'ਬਰੇਲੀ ਕੀ ਬਰਫ਼ੀ' ਤੇ ਸੁਸ਼ਾਂਤ ਰਾਜਪੂਤ ਨਾਲ ਪਿਆਰ ਕਿੱਸੇ ਪਰ ਨਵੇਂ ਸਾਲ 'ਚ ਕ੍ਰਿਤੀ ਸੇਨਨ ਕਈਆਂ ਦੀ ਛੁੱਟੀ ਕਰਨ ਵਾਲੀ ਹੈ।

ਜਦੋਂ ਡੇਜ਼ੀ ਸ਼ਾਹ ਭਾਵੁਕ ਹੋਈ

ਫ਼ਿਲਮ 'ਜੈ ਹੋ' ਵਿਚ ਸਲਮਾਨ ਖਾਨ ਦੀ ਨਾਇਕਾ ਦੇ ਤੌਰ 'ਤੇ ਪੇਸ਼ ਹੋਈ ਡੇਜ਼ੀ ਸ਼ਾਹ ਅਭਿਨੈ ਖੇਤਰ ਵਿਚ ਆਉਣ ਤੋਂ ਪਹਿਲਾਂ ਗਰੁੱਪ ਡਾਂਸਰ ਦੇ ਤੌਰ 'ਤੇ ਬਾਲੀਵੁੱਡ ਵਿਚ ਸਰਗਰਮ ਸੀ। ਉਹ ਨ੍ਰਿਤ ਨਿਰਦੇਸ਼ਕ ਗਣੇਸ਼ ਅਚਾਰਿਆ ਦੇ ਗਰੁੱਪ ਵਿਚ ਸ਼ਾਮਿਲ ਸੀ ਅਤੇ ਇਸੇ ਡੇਜ਼ੀ ਨੂੰ ਫ਼ਿਲਮ 'ਤੇਰੇ ਨਾਮ' ਦੇ ਗੀਤ 'ਲਗਨ ਲਗੀ...' ਵਿਚ ਡਾਂਸਰ ਦੇ ਤੌਰ 'ਤੇ ਸਲਮਾਨ ਦੇ ਨਾਲ ਥਿਰਕਦੇ ਦੇਖਿਆ ਜਾ ਸਕਦਾ ਹੈ।
ਹੁਣ ਡੇਜ਼ੀ ਨੂੰ ਨਿਰਦੇਸ਼ਕ ਜੋੜੀ ਅੱਬਾਸ-ਮਸਤਾਨ ਨੇ 'ਰੇਸ-3' ਵਿਚ ਨਾਇਕਾ ਦੇ ਤੌਰ 'ਤੇ ਕਾਸਟ ਕੀਤਾ ਹੈ। ਪਿਛਲੇ ਦਿਨੀਂ ਜਦੋਂ ਡੇਜ਼ੀ ਨੇ ਇਸ ਦੀ ਸ਼ੂਟਿੰਗ ਵਿਚ ਹਿੱਸਾ ਲਿਆ ਉਦੋਂ ਉਹ ਸੈੱਟ 'ਤੇ ਭਾਵੁਕ ਹੋ ਗਈ ਸੀ। ਅਸਲ ਵਿਚ 2008 ਵਿਚ ਜਦੋਂ 'ਰੇਸ' ਦੀ ਸ਼ੂਟਿੰਗ ਦੱਖਣੀ ਅਫਰੀਕਾ ਵਿਚ ਕੀਤੀ ਜਾ ਰਹੀ ਸੀ, ਉਦੋਂ ਇਸ ਦੇ ਇਕ ਗੀਤ ਦੀ ਸ਼ੂਟਿੰਗ ਵਿਚ ਡੇਜ਼ੀ ਨੇ ਡਾਂਸਰ ਦੇ ਤੌਰ 'ਤੇ ਹਿੱਸਾ ਲਿਆ ਸੀ। ਉਦੋਂ ਡੇਜ਼ੀ ਨੇ ਇਹ ਸੁਪਨੇ ਵਿਚ ਵੀ ਨਹੀਂ ਸੋਚਿਆ ਸੀ ਕਿ ਜਦੋਂ ਇਸੇ ਫ਼ਿਲਮ ਦੀ ਤੀਜੀ ਲੜੀ ਬਣੇਗੀ ਤਾਂ ਉਦੋਂ ਉਹ ਇਸ ਵਿਚ ਹੀਰੋਇਨ ਹੋਵੇਗੀ ਅਤੇ ਅੱਬਾਸ-ਮਸਤਾਨ ਉਸ ਨੂੰ ਨਿਰਦੇਸ਼ਿਤ ਕਰਨਗੇ। ਕਿਸਮਤ ਦੀ ਦੇਵੀ ਦੀ ਏਨੀ ਵੱਡੀ ਮਿਹਰਬਾਨੀ ਖ਼ੁਦ 'ਤੇ ਹੋਈ ਦੇਖ ਕੇ ਉਹ ਭਾਵੁਕ ਹੋ ਉੱਠੀ ਸੀ।
ਹਾਂ, ਜਦੋਂ ਕਿਸਮਤ ਦੀ ਦੇਵੀ ਕਿਸੇ 'ਤੇ ਮਿਹਰਬਾਨ ਹੁੰਦੀ ਹੈ ਤਾਂ ਉਸ ਦੀ 'ਜੈ ਹੋ' ਹੋਣੀ ਸੁਭਾਵਿਕ ਹੀ ਹੈ।


-ਮੁੰਬਈ ਪ੍ਰਤੀਨਿਧ

ਪੰਜਾਬ ਦੀ ਮਿੱਟੀ ਨਾਲ ਜੁੜਿਆ ਫ਼ਿਲਮਕਾਰ ਸੀ ਵਰਿੰਦਰ

ਪੰਜਾਬੀ ਸਿਨੇਮੇ ਲਈ ਅੱਸੀ-ਨੱਬੇ ਦਾ ਦੌਰ ਪੂਰੀ ਤਰ੍ਹਾਂ ਵਰਿੰਦਰ ਨੂੰ ਹੀ ਸਮਰਪਿਤ ਸੀ। ਜੇ ਗੱਲ ਕਰੀਏ 'ਸਰਪੰਚ', 'ਬਲਬੀਰੋ ਭਾਬੀ', 'ਨਿੰਮੋ', 'ਜਿਗਰੀ ਯਾਰ', 'ਸਰਦਾਰਾ ਕਰਤਾਰਾ', 'ਯਾਰੀ ਜੱਟ ਦੀ' ਇਨ੍ਹਾਂ ਫ਼ਿਲਮਾਂ ਵਿਚਲਾ ਜੀਤਾ, ਕਰਮਾ, ਸੁੱਚਾ... ਅੱਜ ਵੀ ਦਰਸ਼ਕਾਂ ਦੇ ਮਨਾਂ 'ਚ ਵਸਿਆ ਪਿਆ ਹੈ। ਵਰਿੰਦਰ ਇਕ ਅਜਿਹਾ ਫ਼ਿਲਮਸ਼ਾਜ਼ ਸੀ ਜਿਸ ਨੇ ਪੰਜਾਬ, ਪੰਜਾਬੀ ਤੇ ਪੰਜਾਬੀਅਤ ਨੂੰ ਬਹੁਤ ਨੇੜਿਓਂ ਫ਼ਿਲਮੀ ਪਰਦੇ 'ਤੇ ਉਤਾਰਿਆ। ਜਿਸ ਨੂੰ ਅੱਜ ਵੀ ਲੋਕ ਯਾਦ ਕਰਦੇ ਹਨ। ਉਸ ਦੀਆਂ ਫ਼ਿਲਮਾਂ 'ਚ ਪੰਜਾਬ ਦੇ ਲੋਕਾਂ ਦੀ ਆਵਾਜ਼ ਹੁੰਦੀ ਸੀ। ਉਨ੍ਹਾਂ ਦੀਆਂ ਸਮੱਸਿਆਵਾਂ, ਸਮਾਜਿਕ ਕੁਰੀਤੀਆਂ ਨੂੰ ਵਰਿੰਦਰ ਨੇ ਆਪਣੀਆਂ ਫ਼ਿਲਮਾਂ ਦਾ ਹਿੱਸਾ ਬਣਾਇਆ। ਫ਼ਿਲਮ 'ਸਰਪੰਚ' ਰਾਹੀਂ ਉਸ ਨੇ ਨਸ਼ਿਆਂ ਨਾਲ ਉਜੜਦੇ ਘਰਾਂ ਦੀ ਦਾਸਤਾਨ ਬਿਆਨ ਕਰਦਿਆਂ ਇਹ ਵਿਖਾਇਆ ਸੀ ਕਿ ਕਿਵੇਂ ਨਸ਼ੇ ਦੇ ਸੌਦਾਗਰ ਆਪਣੀਆਂ ਜੇਬਾਂ ਭਰਨ ਲਈ ਪੰਜਾਬ ਦੀ ਜਵਾਨੀ ਨੂੰ ਖ਼ਤਮ ਕਰਨ ਦੇ ਰਾਹ ਪੈਂਦੇ ਹਨ। ਇਸੇ ਤਰ੍ਹਾਂ ਫ਼ਿਲਮ 'ਨਿੰਮੋ' ਰਾਹੀਂ ਇਕ ਗਾਉਣ ਵਾਲੀ ਦੇ ਵਿਅਕਤੀਤਵ ਤੇ ਲੋਕਾਂ ਵਿਚਲੀ ਸ਼ੋਹਰਤ ਨੂੰ ਦੋ-ਦੋ ਵੱਖ-ਵੱਖ ਐਂਗਲਾਂ ਤੋਂ ਪੇਸ਼ ਕੀਤਾ। 'ਬਲਬੀਰੋ ਭਾਬੀ' ਫ਼ਿਲਮ ਰਾਹੀਂ ਉਸ ਨੇ ਪੰਜਾਬੀ ਕਿੱਸਿਆਂ ਦੇ ਲੋਕ ਨਾਇਕ 'ਸੁੱਚਾ ਸੂਰਮੇ' ਨੂੰ ਫ਼ਿਲਮੀ ਪਰਦੇ 'ਤੇ ਉਤਾਰਿਆ। ਫ਼ਿਲਮ 'ਯਾਰੀ ਜੱਟ ਦੀ' 'ਚ ਇਕ ਐਸੀ ਖ਼ੂਬਸੂਰਤ ਮੁਟਿਆਰ ਦੀ ਕਹਾਣੀ ਨੂੰ ਮੂਲ ਬਣਾਇਆ ਜਿਸ ਦੀ ਮਤਰੇਈ ਮਾਂ ਡਾਲਰਾਂ ਦੇ ਲਾਲਚ ਵਿਚ ਆ ਕੇ ਉਸਦਾ ਵਿਆਹ ਕੈਨੇਡਾ ਦੇ ਇਕ ਬੁੱਢੇ ਨਾਲ ਕਰ ਕੇ ਉਸ ਦੇ ਪਿਆਰ ਤੋਂ ਦੂਰ ਭੇਜ ਦਿੰਦੀ ਹੈ। ਸੱਚੇ ਪਿਆਰ ਦੀ ਆਖਿਰ ਜਿੱਤ ਹੁੰਦੀ ਹੈ।
ਵਰਿੰਦਰ ਦੀ ਪਹਿਲੀ ਫ਼ਿਲਮ 'ਤੇਰੀ ਮੇਰੀ ਇਕ ਜਿੰਦੜੀ' ਸੀ ਜਿਸ ਵਿੱਚ ਉਸ ਨੇ ਪਹਿਲੀ ਵਾਰ ਬਤੌਰ ਨਾਇਕ ਕੈਮਰੇ ਦਾ ਸਾਹਮਣਾ ਕੀਤਾ। ਪ੍ਰਸਿੱਧ ਗੀਤਕਾਰ ਇੰਦਰਜੀਤ ਹਸਨਪੁਰੀ ਵਲੋਂ 'ਲੁਧਿਆਣਾ ਫ਼ਿਲਮਜ਼' ਦੇ ਬੈਨਰ ਹੇਠ ਬਣਾਈ ਇਸ ਫ਼ਿਲਮ 'ਚ ਧਰਮਿੰਦਰ ਨੇ ਵੀ ਕੰਮ ਕੀਤਾ ਸੀ। ਵਰਿੰਦਰ ਬਹੁਤ ਸੰਗਾਊ ਸੁਭਾਅ ਵਾਲਾ ਸੀ। ਇਸ ਫ਼ਿਲਮ ਦੀ ਸੂਟਿੰਗ ਸਮੇਂ ਉਸ ਨੇ ਅਦਾਕਾਰਾ ਮੀਨਾ ਰਾਏ ਨਾਲ ਜੋ ਰੁਮਾਂਟਿਕਤਾ ਵਾਲੇ ਦ੍ਰਿਸ਼ ਦਿੱਤੇ ਉਹ ਬਹੁਤ ਹੀ ਸੰਗ-ਸੰਗ ਦਿੱਤੇ। ਅਦਾਕਾਰੀ ਦੇ ਨਾਲ-ਨਾਲ ਉਸ ਨੇ ਫ਼ਿਲਮ ਨਿਰਦੇਸ਼ਨ 'ਚ ਵੀ ਚੰਗਾ ਗਿਆਨ ਹਾਸਿਲ ਕੀਤਾ। ਵਰਿੰਦਰ ਆਪਣੀ ਫ਼ਿਲਮ ਦੀ ਕਹਾਣੀ, ਡਾਇਲਾਗ, ਲੁਕੇਸ਼ਨ ਅਤੇ ਗੀਤਾਂ ਦਾ ਖ਼ਾਸ ਧਿਆਨ ਰੱਖਦਾ ਸੀ। ਉਹ ਫ਼ਿਲਮ ਦੇ ਨਾਇਕ ਦੀ ਆਵਾਜ਼ ਨਾਲ ਮਿਲਦੀ-ਆਵਾਜ਼ ਤੋਂ ਹੀ ਪਲੇਅ-ਬੈਕ ਗਵਾਉਂਦਾ ਸੀ। ਮਹਿੰਦਰ ਕਪੂਰ ਉਸ ਦਾ ਮਨਪਸੰਦ ਗਾਇਕ ਸੀ। ਇਹੋ ਕਾਰਨ ਸੀ ਕਿ ਉਸ ਦੀ ਫ਼ਿਲਮ ਦਾ ਸਾਊਂਡਟਰੈਕ ਕੋਈ ਨਾਮੀ ਮਿਊਜ਼ਕ ਕੰਪਨੀ ਸੱਜਧਜ ਕੇ ਰਿਲੀਜ਼ ਕਰਦੀ ਹੁੰਦੀ ਸੀ।
ਵਰਿੰਦਰ ਨੇ ਆਪਣੇ 12 ਸਾਲ ਦੇ ਫ਼ਿਲਮੀ ਕੈਰੀਅਰ ਦੌਰਾਨ ਬਤੌਰ ਲੇਖਕ, ਨਿਰਮਾਤਾ-ਨਿਰਦੇਸ਼ਕ ਅਤੇ ਨਾਇਕ ਲਗਪਗ 25 ਫ਼ਿਲਮਾਂ ਪੰਜਾਬੀ ਦਰਸ਼ਕਾਂ ਨੁੰ ਦਿੱਤੀਆਂ। 'ਲੰਬੜਦਾਰਨੀ', 'ਲਾਜੋ', 'ਵੈਰੀ ਜੱਟ', 'ਸੈਦਾਂ ਜੋਗਣ', 'ਬਟਵਾਰਾ', 'ਬਲਬੀਰੋ ਭਾਬੀ', 'ਰਾਣੋ, ਸਰਪੰਚ', 'ਸੰਤੋ-ਬੰਤੋ', 'ਤੇਰੀ ਮੇਰੀ ਇਕ ਜਿੰਦੜੀ', 'ਸਰਦਾਰਾ ਕਰਤਾਰਾ', 'ਜਿਗਰੀ ਯਾਰ', 'ਜੱਟ ਸੂਰਮੇ', 'ਗਿੱਧਾ', 'ਟਾਕਰਾ', 'ਧਰਮਜੀਤ', 'ਯਾਰੀ ਜੱਟ ਦੀ', 'ਜੱਟ ਤੇ ਜ਼ਮੀਨ', 'ਨਿੰਮੋ' ਅਦਿ ਉਸ ਦੀਆਂ ਚਰਚਿਤ ਫ਼ਿਲਮਾਂ ਹਨ। ਉਸ ਨੇ ਦੋ ਹਿੰਦੀ ਫ਼ਿਲਮਾਂ 'ਖੇਲ ਮੁਕੱਦਰ ਕਾ' ਅਤੇ 'ਦੋ ਚਿਹਰੇ' 'ਚ ਵੀ ਕੰਮ ਕੀਤਾ।


-ਸੁਰਜੀਤ ਜੱਸਲ

'ਬਿੱਗ ਬੌਸ' ਨਾਲ ਕੋਈ ਫ਼ਾਇਦਾ ਨਹੀਂ ਹੋਇਆ : ਜ਼ੁਬੇਰ ਖਾਨ

ਰਿਆਲਿਟੀ ਸ਼ੋਅ 'ਬਿੱਗ ਬੌਸ' ਦੇ ਹਾਲੀਆ ਸੀਜ਼ਨ ਵਿਚ ਜ਼ੁਬੇਰ ਖਾਨ ਸਿਰਫ਼ ਇਕ ਹਫ਼ਤੇ ਲਈ ਬਿੱਗ ਬੌਸ ਦੇ ਘਰ ਵਿਚ ਰਹੇ ਅਤੇ ਬਾਹਰ ਆ ਗਏ। ਇਸ ਸ਼ੋਅ ਦੇ ਪ੍ਰਤੀਯੋਗੀ ਬਣਨ ਤੋਂ ਪਹਿਲਾਂ ਜ਼ੁਬੇਰ ਖਾਨ ਦੀ ਪਛਾਣ ਇਹ ਸੀ ਕਿ ਉਨ੍ਹਾਂ ਨੇ ਬਤੌਰ ਨਿਰਦੇਸ਼ਕ 'ਲਕੀਰ ਕਾ ਫ਼ਕੀਰ' ਫ਼ਿਲਮ ਬਣਾਈ ਸੀ ਅਤੇ ਇਸ ਵਿਚ ਏਜਾਜ਼ ਖਾਨ (ਇਹ ਜਨਾਬ ਵੀ 'ਬਿੱਗ ਬੌਸ' ਦੇ ਪ੍ਰਤੀਯੋਗੀ ਰਹਿ ਚੁੱਕੇ ਹਨ) ਨਾਇਕ ਸਨ। ਸਮਾਚਾਰ ਚੈਨਲਾਂ 'ਤੇ ਜਦੋਂ ਕਦੇ 'ਲਕੀਰ ਕਾ ਫ਼ਕੀਰ' ਦਾ ਜ਼ਿਕਰ ਹੁੰਦਾ ਤਾਂ ਉਦੋਂ ਜ਼ੁਬੇਰ ਦੀ ਪਛਾਣ ਦਾਊਦ ਇਬ੍ਰਾਹੀਮ ਦੀ ਭੈਣ ਹਸੀਨਾ ਪਾਰਕਰ ਦੇ ਜਵਾਈ ਦੇ ਤੌਰ 'ਤੇ ਵੀ ਦਿੱਤੀ ਜਾਂਦੀ ਸੀ। ਉਨ੍ਹਾਂ ਨਾਲ ਗੱਲਬਾਤ ਹੋਣ 'ਤੇ ਜ਼ਿਕਰ ਜਦੋਂ 'ਬਿੱਗ ਬੌਸ' ਦਾ ਹੋਇਆ ਤਾਂ ਚਿਹਰੇ 'ਤੇ ਉਦਾਸੀ ਦੇ ਭਾਵ ਲਿਆ ਕੇ ਉਹ ਕਹਿਣ ਲੱਗੇ, 'ਇਸ ਸ਼ੋਅ ਵਿਚ ਅਕਸਰ ਲੋਕ ਇਹ ਸੋਚ ਕੇ ਹਿੱਸਾ ਲੈਂਦੇ ਹਨ ਕਿ ਸ਼ੋਅ ਦੇ ਬਹਾਨੇ ਉਨ੍ਹਾਂ ਨੂੰ ਪ੍ਰਚਾਰ ਮਿਲ ਜਾਵੇਗਾ ਪਰ ਮੈਂ ਪ੍ਰਚਾਰ ਹਾਸਲ ਕਰਨ ਦੇ ਇਰਾਦੇ ਨਾਲ ਇਸ ਸ਼ੋਅ ਵਿਚ ਨਹੀਂ ਗਿਆ ਸੀ। ਪਰਿਵਾਰਿਕ ਕਾਰਨਾਂ ਕਰਕੇ ਮੈਂ ਇਸ ਵਿਚ ਹਿੱਸਾ ਲਿਆ ਸੀ। ਮੇਰਾ ਮੇਰੀ ਪਤਨੀ ਸਨਾ ਖਾਨ ਨਾਲ ਵਖਰੇਵਾਂ ਹੋ ਚੁੱਕਾ ਹੈ। ਮੇਰੇ ਤਿੰਨ ਬੱਚੇ ਉਸ ਦੇ ਨਾਲ ਰਹਿੰਦੇ ਹਨ। ਇਨ੍ਹਾਂ ਵਿਚੋਂ ਵੱਡਾ ਮੁੰਡਾ ਅਸੀਂ ਗੋਦ ਲਿਆ ਸੀ। ਮੈਂ ਤਿੰਨੇ ਬੱਚਿਆਂ ਦੀ ਬਹੁਤ ਘਾਟ ਮਹਿਸੂਸ ਕਰਦਾ ਹਾਂ। ਮੈਨੂੰ ਲੱਗਿਆ ਕਿ ਸਨਾ ਨੇ ਮੇਰੇ ਵਿਰੁੱਧ ਬੱਚਿਆਂ ਦੇ ਕੰਨ ਭਰੇ ਹੋਣਗੇ। ਸੋ, ਮੈਂ ਬਿੱਗ ਬੌਸ ਦੇ ਕੈਮਰੇ ਸਾਹਮਣੇ ਆਪਣੇ ਦਿਲ ਦੀ ਗੱਲ ਕਹਿ ਕੇ ਬੱਚਿਆਂ ਤੱਕ ਆਪਣੀ ਗੱਲ ਪਹੁੰਚਾਉਣਾ ਚਾਹੁੰਦਾ ਸੀ। ਸਨਾ ਨੇ ਬੱਚਿਆਂ ਦੇ ਨਾਲ ਮੇਰੇ ਸੰਪਰਕ ਦੇ ਸਾਰੇ ਰਸਤੇ ਬੰਦ ਕਰ ਦਿੱਤੇ ਹਨ। ਇਸ ਲਈ 'ਬਿੱਗ ਬੌਸ' ਦਾ ਸਹਾਰਾ ਲੈਣਾ ਸਹੀ ਲੱਗਿਆ। ਜਦੋਂ ਮੈਂ 'ਲਕੀਰ ਕਾ ਫ਼ਕੀਰ' ਬਣਾ ਰਿਹਾ ਸੀ, ਉਦੋਂ ਸਮਾਚਾਰ ਚੈਨਲਾਂ ਦੇ ਮਾਧਿਅਮ ਨਾਲ ਹਸੀਨਾ ਪਾਰਕਰ ਨਾਲ ਮੇਰੇ ਰਿਸ਼ਤੇ ਦਾ ਦੁਨੀਆ ਨੂੰ ਪਤਾ ਲੱਗਿਆ। 'ਬਿੱਗ ਬੌਸ' ਵਾਲਿਆਂ ਨੇ ਮੇਰੇ ਬਾਰੇ ਵਿਚ ਗੂਗਲ 'ਤੇ ਖੋਜ ਕੀਤੀ ਅਤੇ ਮੈਨੂੰ ਇਸ ਸ਼ੋਅ ਦੀ ਪੇਸ਼ਕਸ਼ ਕੀਤੀ। ਮੈਨੂੰ ਪਿਛਲੇ ਸੀਜ਼ਨ ਵਿਚ ਵੀ ਇਸ ਸ਼ੋਅ ਦੀ ਪੇਸ਼ਕਸ਼ ਹੋਈ ਸੀ ਪਰ ਉਦੋਂ ਮੈਂ ਨਾਂਹ ਕਹੀ ਸੀ ਪਰ ਹੁਣ ਆਪਣੇ ਬੱਚਿਆਂ ਤੱਕ ਆਪਣੀ ਗੱਲ ਪਹੁੰਚਾਉਣ ਦੇ ਇਰਾਦੇ ਨਾਲ ਮੈਂ ਬਿੱਗ ਬੌਸ ਦੇ ਘਰ ਵਿਚ ਦਾਖ਼ਲ ਹੋ ਗਿਆ। ਪਰ ਮੈਂ ਜੋ ਸੋਚਿਆ ਸੀ, ਉਹ ਹੋਇਆ ਨਹੀਂ। 'ਬਿੱਗ ਬੌਸ' ਨਾਲ ਕੋਈ ਫਾਇਦਾ ਨਹੀਂ ਹੋਇਆ। ਉਤੋਂ ਸਲਮਾਨ ਨੇ ਜੋ ਬੇਇੱਜ਼ਤੀ ਕੀਤੀ, ਉਹ ਵੱਖਰੀ।
ਉਮੀਦ ਹੈ ਕਿ ਇਸ ਕੋਸ਼ਿਸ਼ ਵਿਚ ਉਨ੍ਹਾਂ ਨੂੰ ਸਫ਼ਲਤਾ ਮਿਲੇਗੀ।


-ਪੰਨੂੰ

ਨਵਾਜ਼ੂਦੀਨ ਨੇ ਨਿਭਾਈ 'ਮੌਨਸੂਨ ਸ਼ੂਟਆਊਟ' 'ਚ ਕ੍ਰਾਈਮ ਥ੍ਰਿਲਰ ਦੀ ਭੂਮਿਕਾ

ਇਹ ਤਾਂ ਸੱਚ ਹੈ ਕਿ ਅਦਾਕਾਰ ਨਵਾਜ਼ੂਦੀਨ ਸਿਦੀਕੀ ਦੀ ਸਫਲਤਾ ਵਿਚ ਕ੍ਰਾਈਮ ਥ੍ਰਿਲਰ ਫ਼ਿਲਮਾਂ ਦਾ ਵੱਡਾ ਯੋਗਦਾਨ ਰਿਹਾ ਹੈ। 'ਗੈਂਗਸ ਆਫ ਵਾਸੇਪੁਰ', 'ਰਾਮਨ ਰਾਘਵ-2', 'ਬਦਲਾਪੁਰ', 'ਕਹਾਨੀ' ਆਦਿ ਫ਼ਿਲਮਾਂ ਦੀ ਬਦੌਲਤ ਉਹ ਆਪਣੇ ਕੈਰੀਅਰ ਨੂੰ ਉਭਾਰਨ ਵਿਚ ਕਾਮਯਾਬ ਰਹੇ। ਕ੍ਰਾਈਮ ਥ੍ਰਿਲਰ ਫ਼ਿਲਮਾਂ ਨਾਲ ਉਨ੍ਹਾਂ ਦਾ ਚੰਗਾ ਸਬੰਧ ਦੇਖ ਕੇ ਹੁਣ ਉਨ੍ਹਾਂ ਨੂੰ ਚਮਕਾਉਂਦੀ ਇਕ ਹੋਰ ਇਸੇ ਤਰ੍ਹਾਂ ਦੀ ਫ਼ਿਲਮ 'ਮੌਨਸੂਨ ਸ਼ੂਟਆਊਟ' ਆ ਰਹੀ ਹੈ।
ਮੁੰਬਈ ਸ਼ਹਿਰ ਦੀ ਕ੍ਰਾਈਮ ਦੀ ਦੁਨੀਆ 'ਤੇ ਆਧਾਰਿਤ ਇਸ ਫ਼ਿਲਮ ਵਿਚ ਇਸ ਸ਼ਹਿਰ ਦੀ ਬਰਸਾਤ ਦੀ ਖਾਸੀਅਤ ਨੂੰ ਵੀ ਪੇਸ਼ ਕੀਤਾ ਗਿਆ ਹੈ। ਬਾਰਿਸ਼ ਦੇ ਮੌਸਮ ਵਿਚ ਇਥੇ ਲਗਾਤਾਰ ਤਿੰਨ-ਚਾਰ ਦਿਨ ਤਕ ਮੀਂਹ ਪੈਣਾ ਆਮ ਗੱਲ ਹੈ। ਇਸੇ ਤਰ੍ਹਾਂ ਦੀ ਇਕ ਬਰਸਾਤੀ ਰਾਤ ਵਿਚ ਪੁਲਿਸ ਇੰਸਪੈਕਟਰ ਅਦੀ (ਵਿਜੇ ਵਰਮਾ) ਇਕ ਬਦਮਾਸ਼ ਸ਼ਿਵਾ (ਨਵਾਜ਼ੂਦੀਨ ਸਿਦੀਕੀ) ਦਾ ਪਿੱਛਾ ਕਰਦੇ ਹੋਏ ਗੀਚ ਝੋਂਪੜਪੱਟੀ ਵਾਲੇ ਇਲਾਕੇ ਵਿਚ ਪਹੁੰਚ ਜਾਂਦਾ ਹੈ। ਅਦੀ ਨੂੰ ਸ਼ਿਵਾ ਦਾ ਐਨਕਾਊਂਟਰ ਕਰਨ ਦਾ ਹੁਕਮ ਦਿੱਤਾ ਗਿਆ ਹੁੰਦਾ ਹੈ। ਇਹ ਉਸ ਦਾ ਪਹਿਲਾ ਐਨਕਾਊਂਟਰ ਕੇਸ ਹੈ। ਆਪਣੀ ਡਿਊਟੀ ਨਿਭਾਉਣ ਲਈ ਕਿਸੇ ਦੀ ਜਾਨ ਲੈਣ ਲਈ ਨਿਕਲੇ ਅਦੀ ਦੇ ਦਿਲ ਵਿਚ ਕੀ ਕੁਝ ਬੀਤ ਰਹੀ ਹੁੰਦੀ ਹੈ, ਇਹ ਇਸ ਵਿਚ ਭਾਵਨਾਤਮਕ ਢੰਗ ਨਾਲ ਪੇਸ਼ ਕੀਤਾ ਗਿਆ ਹੈ। ਇਹ ਫ਼ਿਲਮ ਅਮਿਤ ਕੁਮਾਰ ਵਲੋਂ ਨਿਰਦੇਸ਼ਿਤ ਕੀਤੀ ਗਈ ਹੈ। 'ਮੌਨਸੂਨ ਸ਼ੂਟਆਊਟ' ਦਾ ਨਿਰਮਾਣ ਅਨੁਰਾਗ ਕਸ਼ਿਅਪ ਤੇ ਗੁਨੀਤ ਮੌਂਗਾ ਵਲੋਂ ਕੀਤਾ ਗਿਆ ਹੈ। ਉਂਝ ਤਾਂ ਇਹ ਫ਼ਿਲਮ 2013 ਵਿਚ ਹੀ ਬਣ ਕੇ ਤਿਆਰ ਹੋ ਗਈ ਸੀ ਅਤੇ ਇਸ ਨੂੰ ਕਾਂਸ ਫ਼ਿਲਮ ਸਮਾਰੋਹ ਵਿਚ ਵੀ ਦਿਖਾਇਆ ਗਿਆ ਸੀ। ਬਾਅਦ ਵਿਚ ਇਹ ਹੋਰ ਅੰਤਰਰਾਸ਼ਟਰੀ ਫ਼ਿਲਮ ਸਮਾਰੋਹਾਂ ਵਿਚ ਵੀ ਦਿਖਾਈ ਗਈ ਅਤੇ ਅੱਜ ਜਦੋਂ ਨਵਾਜ਼ੂਦੀਨ ਦੇ ਨਾਂਅ ਦਾ ਸਿੱਕਾ ਬਹੁਤ ਚਲ ਰਿਹਾ ਹੈ ਤਾਂ ਉਨ੍ਹਾਂ ਦੀ ਲੋਕਪ੍ਰਿਅਤਾ ਦਾ ਲਾਹਾ ਲਈ ਇਹ ਫ਼ਿਲਮ ਹੁਣ ਸਿਨੇਮਾਘਰਾਂ ਵਿਚ ਲਿਆਂਦੀ ਜਾ ਰਹੀ ਹੈ।


-ਮੁੰਬਈ ਪ੍ਰਤੀਨਿਧ

ਅਦਾਕਾਰੀ, ਗਾਇਕੀ ਅਤੇ ਗੀਤਕਾਰੀ ਦਾ ਅਨਿੱਖੜਵਾਂ ਸੁਮੇਲ ਹੈ-ਗੁਰਵਿੰਦਰ ਬਰਾੜ

ਗਾਇਕੀ, ਅਦਾਕਾਰੀ ਅਤੇ ਗੀਤਕਾਰੀ ਦਾ ਸੁਮੇਲ ਗੁਰਵਿੰਦਰ ਬਰਾੜ ਅੱਜ ਕਿਸੇ ਵੀ ਜਾਣ-ਪਹਿਚਾਣ ਦਾ ਮੁਥਾਜ ਨਹੀਂ। ਚੜ੍ਹਦੀ ਜਵਾਨੀ ਵਿਚ ਹੀ ਗੀਤ ਲਿਖਣ ਅਤੇ ਗਾਇਕੀ ਦੀ ਲੱਗੀ ਚੇਟਕ ਅਤੇ ਫਿਰ ਉੱਘੇ ਨਾਟਕਕਾਰ ਅਜਮੇਰ ਔਲਖ ਦੀ ਟੀਮ ਵਿਚ ਸ਼ਾਮਲ ਹੋ ਕੇ ਰੰਗਮੰਚ ਵੱਲ ਰੁਚਿਤ ਹੋਣ ਕਾਰਨ ਉਸ ਦਾ ਸਾਰਾ ਚੁਗਿਰਦਾ ਹੀ ਕਲਾ ਦੇ ਰੰਗ ਵਿਚ ਰੰਗਿਆ ਗਿਆ। ਉੱਤੋਂ ਸੋਨੇ 'ਤੇ ਸੁਹਾਗੇ ਵਾਲੀ ਗੱਲ ਇਹ ਕਿ ਉਸ ਦੀ ਪਤਨੀ ਸੁਹਜ ਔਲਖ ਬਰਾੜ ਇਕ ਬਹੁਤ ਹੀ ਸੁਲਝੀ ਹੋਈ ਅਦਾਕਾਰਾ ਹੋਣ ਕਾਰਨ ਗੁਰਵਿੰਦਰ ਦੀ ਕਲਾ ਵਿਚ ਨਿਖਾਰ ਆਉਣਾ ਸੁਭਾਵਿਕ ਹੀ ਸੀ। ਰੋਜ਼-ਰੋਜ਼ ਨਾਟਕ ਅਤੇ ਗਾਇਕੀ ਦੇ ਸਟੇਜ਼ ਸ਼ੋਆਂ ਕਾਰਨ ਉਹ ਤਰਾਸ਼ਿਆ ਹੋਇਆ ਹੀਰਾ ਬਣ ਗਿਆ ਜੋ ਹੁਣ ਗਾਇਕੀ ਰੂਪੀ ਮੁੰਦਰੀ ਵਿਚ ਜੜਿਆ ਹੋਇਆ ਹਰ ਇਕ ਦੀ ਖਿੱਚ ਦਾ ਕੇਂਦਰ ਬਣ ਰਿਹਾ ਹੈ ਤੇ ਉੱਤੋਂ ਨਿਮਰਤਾ ਅਤੇ ਸਾਊਪੁਣਾ ਉਸ ਦੀ ਸ਼ਖ਼ਸੀਅਤ ਵਿਚ ਹੋਰ ਵੀ ਨਿਖਾਰ ਲਿਆ ਰਿਹਾ ਹੈ। ਪੰਜਾਬ ਦੇ ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਪਿੰਡ ਮਹਾਂਬੱਧਰ ਵਿਚ ਪਿਤਾ ਸਵਰਗਵਾਸੀ ਸ: ਬਲਦੇਵ ਸਿੰਘ ਅਤੇ ਮਾਤਾ ਸ੍ਰੀਮਤੀ ਸੁਰਜੀਤ ਕੌਰ ਦੇ ਸਪੁੱਤਰ ਅਤੇ ਦੋ ਭਰਾਵਾਂ ਦੇ ਲਾਡਲੇ ਭਰਾ ਗੁਰਵਿੰਦਰ ਦਾ ਲਿਖਿਆ ਗੀਤ ਰਾਣੀ ਰਣਦੀਪ ਦੀ ਆਵਾਜ਼ ਵਿਚ 'ਕਿਹੜਾ ਘੋਲ ਕੇ ਤਵੀਤ ਪਿਲਾਇਆ, ਕਾਫੀ ਹਿੱਟ ਹੋਇਆ। ਸੁਰਿੰਦਰ ਛਿੰਦਾ ਦੁਆਰਾ ਗਾਇਆ ਉਸ ਦਾ ਗੀਤ 'ਲੋਕਾਂ ਨੋਟ ਨੇ ਕਮਾਏ' ਗੀਤ ਗਾਇਆ ਤੇ ਰਾਜ ਬਰਾੜ, ਮੁਹੰਮਦ ਸਦੀਕ, ਧਰਮਪ੍ਰੀਤ, ਬਲਕਾਰ ਸਿੱਧੂ, ਗਿੱਲ ਹਰਦੀਪ, ਨਿਰਮਲ ਸਿੱਧੂ ਆਦਿ ਨੇ ਵੀ ਗੀਤ ਗਾਏ। ਉਸ ਦੀ ਆਪਣੀ ਆਵਾਜ਼ ਵਿਚ ਰਿਕਾਰਡ ਹੋਏ ਗੀਤ 'ਓਸ ਕਮਲੀ ਦੀਆਂ ਯਾਦਾਂ', ਮੁੰਡਾ ਘੋੜੀਆਂ ਰੱਖਣ ਦਾ ਸ਼ੌਕੀਂ, ਉੱਠੋ ਜੀ ਥੋਡੀ ਜਾਨ ਗੁੱਡ ਮੌਰਨਿੰਗ ਕਹਿੰਦੀ ਐ ਆਦਿ ਵੱਖ-ਵੱਖ ਕੈਸੇਟਾਂ ਰਾਹੀ ਲੋਕਾਂ ਵਲੋਂ ਕਾਫੀ ਸਲਾਹੇ ਗਏ।


-ਹਰਜੀਤ ਸਿੰਘ ਬਾਜਵਾ, ਪੱਤਰਕਾਰ ਟੋਰਾਂਟੋਂ (ਕੈਨੇਡਾ)

ਅਸਗਰ ਖਾਨ ਵਲੋਂ ਸੋਲਾਂ ਘੰਟੇ ਵਿਚ ਫ਼ਿਲਮ ਬਣਾਉਣ ਦਾ ਦਾਅਵਾ

ਸਵਰਗੀ ਹਾਸ ਕਲਾਕਾਰ ਮਹਿਮੂਦ ਅਕਸਰ ਇਹ ਕਿਹਾ ਕਰਦੇ ਸਨ ਕਿ ਫ਼ਿਲਮਾਂ ਵਾਲਿਆਂ ਨੂੰ ਇਕ ਹੀ ਸਿਟੀ ਪਸੰਦ ਆਉਂਦੀ ਹੈ ਅਤੇ ਉਹ ਹੈ ਪਬਲੀਸਿਟੀ। ਪ੍ਰਚਾਰ ਲੈਣ ਲਈ ਫ਼ਿਲਮੀ ਲੋਕ ਕੀ ਕੀ ਸਕੀਮਾਂ ਘੜਦੇ ਹਨ, ਇਸ ਦੇ ਨਜ਼ਾਰੇ ਆਏ ਦਿਨ ਦੇਖਣ ਨੂੰ ਮਿਲ ਜਾਂਦੇ ਹਨ। ਪ੍ਰਚਾਰ ਲੈਣ ਲਈ ਕੁਝ ਇਸ ਤਰ੍ਹਾਂ ਦਾ ਹੀ ਸ਼ਗੂਫਾ ਨਿਰਮਾਤਾ ਅਸਗਰ ਖਾਨ ਵਲੋਂ ਛੱਡਿਆ ਗਿਆ ਹੈ। ਇਨ੍ਹਾਂ ਨੇ ਫ਼ਿਲਮ 'ਬਰਮੁਡਾ ਟ੍ਰਾਈਏਂਗਲ' ਦਾ ਐਲਾਨ ਕੀਤਾ ਹੈ ਅਤੇ ਨਾਲ ਹੀ ਇਹ ਦਾਅਵਾ ਵੀ ਕੀਤਾ ਹੈ ਕਿ ਉਹ ਇਸ ਦੀ ਸ਼ੂਟਿੰਗ ਸਿਰਫ ਸੋਲਾਂ ਘੰਟੇ ਵਿਚ ਨਿਪਟਾ ਕੇ ਇਸ ਨੂੰ ਰਿਲੀਜ਼ ਕਰ ਦੇਣਗੇ। ਆਪਣੀ ਇਸ ਝੱਟਪਟ ਫ਼ਿਲਮ ਬਾਰੇ ਉਹ ਕਹਿੰਦੇ ਹਨ, 'ਤਾਮਿਲ ਫ਼ਿਲਮ 'ਸਵੰਬਰਮ' ਚੌਵੀ ਘੰਟੇ 'ਚ ਬਣਾ ਕੇ ਦਰਸ਼ਕਾਂ ਲਈ ਤਿਆਰ ਕਰ ਦਿੱਤੀ ਗਈ ਸੀ। ਇਹ ਦੇਖ ਕੇ ਮੈਨੂੰ ਲੱਗਿਆ ਕਿ ਮੈਨੂੰ ਇਸ ਤੋਂ ਘੱਟ ਸਮੇਂ ਵਿਚ ਫ਼ਿਲਮ ਬਣਾ ਕੇ ਰਿਕਾਰਡ ਸਥਾਪਿਤ ਕਰਨਾ ਚਾਹੀਦਾ। ਮੈਂ ਜਾਣਦਾ ਹਾਂ ਕਿ ਸਿਰਫ ਸੋਲਾਂ ਘੰਟੇ ਵਿਚ ਫ਼ਿਲਮ ਬਣਾਉਣਾ ਬੇਹੱਦ ਚੁਣੌਤੀਪੂਰਨ ਹੈ ਪਰ ਮੈਂ ਪੂਰੀਆਂ ਤਿਆਰੀਆਂ ਤੋਂ ਬਾਅਦ ਹੀ ਆਪਣੀ ਫ਼ਿਲਮ ਦੀ ਸ਼ੂਟਿੰਗ ਸ਼ੁਰੂ ਕਰਾਂਗਾ। ਇਸ ਦੀ ਸ਼ੂਟਿੰਗ ਐਨ. ਡੀ. ਸਟੂਡੀਓ ਵਿਚ ਕੀਤੀ ਜਾਵੇਗੀ ਅਤੇ ਵੱਖ-ਵੱਖ ਸੈੱਟ ਖੜ੍ਹੇ ਕਰਕੇ ਦਸ ਨਿਰਦੇਸ਼ਕ ਇਸ ਨੂੰ ਸ਼ੂਟ ਕਰਨਗੇ ਅਤੇ ਆਨ ਲਾਈਨ ਐਡੀਟਿੰਗ ਕਰਕੇ ਇਸ ਨੂੰ ਸੈਂਸਰ ਲਈ ਭੇਜ ਦਿੱਤਾ ਜਾਵੇਗਾ। ਫ਼ਿਲਮ ਦੀ ਕਹਾਣੀ ਮੈਂ ਇਸ ਤਰ੍ਹਾਂ ਦੀ ਚੁਣੀ ਹੈ ਤਾਂ ਕਿ ਸ਼ੂਟਿੰਗ ਲਈ ਸਟੂਡੀਓ ਤੋਂ ਬਾਹਰ ਜਾਣਾ ਨਾ ਪਵੇ।


-ਮੁੰਬਈ ਪ੍ਰਤੀਨਿਧ






Website & Contents Copyright © Sadhu Singh Hamdard Trust, 2002-2017.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX