ਤਾਜਾ ਖ਼ਬਰਾਂ


ਵਿਆਹ ਤੋਂ ਪਹਿਲਾਂ ਖ਼ੂਬਸੂਰਤ ਅੰਦਾਜ਼ 'ਚ ਨਜ਼ਰ ਆਈ ਗਿੰਨੀ ਚਤਰਥ
. . .  23 minutes ago
ਜਲੰਧਰ, 12 ਦਸੰਬਰ - ਕਾਮੇਡੀ ਕਿੰਗ ਕਪਿਲ ਸ਼ਰਮਾ ਅੱਜ ਜਲੰਧਰ ਦੀ ਰਹਿਣ ਵਾਲੀ ਗਿੰਨੀ ਚਤਰਥ ਨਾਲ ਵਿਆਹ ਦੇ ਬੰਧਨ 'ਚ ਬੱਝਣਗੇ। ਇਸ ਦੇ ਨਾਲ ਹੀ ਕਪਿਲ ਦੀ ਹੋਣ ਵਾਲੀ ਪਤਨੀ ਗਿੰਨੀ ਚਤਰਥ ਦੀ ਤਸਵੀਰ ਸਾਹਮਣੇ ਆਈ ਹੈ ਜਿਸ 'ਚ ਗਿੰਨੀ ਖ਼ੁਸ਼ ਅਤੇ .....
ਮੁੰਬਈ 'ਚ ਇੱਕ ਇਮਾਰਤ ਨੂੰ ਲੱਗੀ ਭਿਆਨਕ ਅੱਗ
. . .  35 minutes ago
ਮੁੰਬਈ, 12 ਦਸੰਬਰ- ਮੁੰਬਈ ਵਿਖੇ ਥਾਣਾ ਦੇ ਚਰਾਈ ਇਲਾਕੇ 'ਚ ਇੱਕ ਇਮਾਰਤ ਨੂੰ ਭਿਆਨਕ ਅੱਗ ਲੱਗਣ ਦੀ ਖ਼ਬਰ ਮਿਲੀ ਹੈ। ਮੌਕੇ 'ਤੇ ਪਹੁੰਚੇ ਅੱਗ ਬੁਝਾਊ ਦਸਤਿਆਂ ਵੱਲੋਂ ਅੱਗ 'ਤੇ ਕਾਬੂ ਪਾਉਣ ਦੀਆਂ ਕੋਸ਼ਿਸ਼ਾਂ ਜਾਰੀ ਹੈ। ਹਾਲਾਂਕਿ, ਅਜੇ ਤੱਕ ਕਿਸੇ ਜਾਨੀ ਮਾਲੀ .....
ਅੱਜ ਵਿਆਹ ਦੇ ਬੰਧਨ 'ਚ ਬੱਝਣਗੇ ਕਪਿਲ, ਅੰਮ੍ਰਿਤਸਰ ਤੋਂ ਜਲੰਧਰ ਗਿੰਨੀ ਨੂੰ ਆਉਣਗੇ ਵਿਆਹੁਣ
. . .  34 minutes ago
ਅਜਨਾਲਾ, 12 ਦਸੰਬਰ (ਗੁਰਪ੍ਰੀਤ ਸਿੰਘ ਢਿੱਲੋਂ)- ਕਾਮੇਡੀ ਕਿੰਗ ਕਪਿਲ ਸ਼ਰਮਾ ਅੱਜ ਆਪਣੇ ਜੀਵਨ ਦੀ ਨਵੀਂ ਸ਼ੁਰੂਆਤ ਕਰਨ ਜਾ ਰਹੇ ਹਨ। ਕਪਿਲ ਅੱਜ ਜਲੰਧਰ ਦੀ ਰਹਿਣ ਵਾਲੀ ਗਿੰਨੀ ਚਤਰਥ ਨਾਲ ਵਿਆਹ ਦੇ ਬੰਧਨ 'ਚ ਬੱਝਣਗੇ। ਕਪਿਲ ਦੀ ਬਰਾਤ ਸ਼ਾਮ ਨੂੰ...
ਸੁਪਰੀਮ ਕੋਰਟ ਨੇ ਵਧਾਇਆ ਪੰਜਾਬ ਦੇ ਡੀ. ਜੀ. ਪੀ. ਦਾ ਕਾਰਜਕਾਲ
. . .  about 1 hour ago
ਨਵੀਂ ਦਿੱਲੀ, 12 ਦਸੰਬਰ- ਸੁਪਰੀਮ ਕੋਰਟ ਨੇ ਪੰਜਾਬ ਅਤੇ ਹਰਿਆਣਾ 'ਚ ਪੁਲਿਸ ਦੇ ਡਾਇਰੈਕਟਰ ਜਨਰਲਾਂ (ਡੀ. ਜੀ. ਪੀ.) ਨੂੰ ਅਗਲੇ ਸਾਲ 31 ਜਨਵਰੀ ਤੱਕ ਆਪਣੇ ਅਹੁਦੇ 'ਤੇ ਬਣੇ ਰਹਿਣ ਦੀ ਆਗਿਆ ਪ੍ਰਦਾਨ ਕਰ ਦਿੱਤੀ ਹੈ। ਚੀਫ਼ ਜਸਟਿਸ ਰੰਜਨ ਗੋਗੋਈ ਦੀ...
ਕਰਜ਼ੇ ਦੀ ਪਰੇਸ਼ਾਨੀ ਦੇ ਚੱਲਦਿਆਂ ਇੱਕ ਹੋਰ ਕਿਸਾਨ ਨੇ ਕੀਤੀ ਖ਼ੁਦਕੁਸ਼ੀ
. . .  about 1 hour ago
ਨਾਭਾ, 12 ਦਸੰਬਰ (ਕਰਮਜੀਤ ਸਿੰਘ)- ਨਾਭਾ ਬਲਾਕ ਦੇ ਪਿੰਡ ਸੰਗਤਪੁਰਾ ਵਿਖੇ ਅੱਜ ਇੱਕ ਕਿਸਾਨ, ਜਿਹੜਾ ਕਿ ਪਿੰਡ ਦਾ ਸਰਪੰਚ ਵੀ ਸੀ, ਨੇ ਕਰਜ਼ੇ ਦੀ ਪਰੇਸ਼ਾਨੀ ਦੇ ਚੱਲਦਿਆਂ ਖ਼ੁਦਕੁਸ਼ੀ ਕਰ ਲਈ। ਮ੍ਰਿਤਕ ਦੀ ਪਹਿਚਾਣ ਬੂਟਾ ਸਿੰਘ ਦੇ ਰੂਪ 'ਚ ਹੋਈ ਹੈ। ਜਾਣਕਾਰੀ...
ਸ਼੍ਰੋਮਣੀ ਕਮੇਟੀ ਅਤੇ ਅਕਾਲੀ ਦਲ ਵਿਚਾਲੇ ਹੈ ਗਠਜੋੜ- ਪ੍ਰਕਾਸ਼ ਸਿੰਘ ਬਾਦਲ
. . .  about 2 hours ago
ਮਲੋਟ, 12 ਦਸੰਬਰ (ਗੁਰਮੀਤ ਸਿੰਘ ਮੱਕੜ)- ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਅਤੇ ਅਕਾਲੀ ਦਲ ਸਰਪ੍ਰਸਤ ਪ੍ਰਕਾਸ਼ ਸਿੰਘ ਬਾਦਲ ਨੇ ਅੱਜ ਪਿੰਡ ਕੋਲਿਆਂਵਾਲੀ ਵਿਖੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਪਹਿਲੀ ਵਾਰ ਇਹ ਕਬੂਲ ਕੀਤਾ ਕਿ ਸ਼੍ਰੋਮਣੀ ਕਮੇਟੀ ਅਤੇ...
ਅੰਮ੍ਰਿਤਸਰ ਦੇ ਇੱਕ ਹੋਰ ਪਿੰਡ 'ਚ ਸਰਬ ਸੰਮਤੀ ਨਾਲ ਹੋਈ ਸਰਪੰਚ ਦੀ ਚੋਣ
. . .  about 2 hours ago
ਓਠੀਆ, 12 ਦਸੰਬਰ (ਗੁਰਵਿੰਦਰ ਸਿੰਘ ਛੀਨਾ)- ਅੰਮ੍ਰਿਤਸਰ ਦੇ ਪਿੰਡ ਰੱਖ ਓਠੀਆ ਵਿਖੇ ਅੱਜ ਪਿੰਡ ਵਾਲਿਆਂ ਨੇ ਸਰਬ ਸੰਮਤੀ ਨਾਲ ਸਰਪੰਚ ਦੀ ਚੋਣ ਕੀਤੀ ਹੈ। ਪਿੰਡ ਵਾਸੀਆਂ ਨੇ ਸਹਿਮਤੀ ਨਾਲ ਕਾਂਗਰਸ ਪਾਰਟੀ ਨਾਲ ਸੰਬੰਧਿਤ ਬੀਬੀ ਰਾਜ ਕੌਰ ਪਤਨੀ ਜਸਵੰਤ ਸਿੰਘ...
ਰਿਜ਼ਰਵ ਬੈਂਕ ਦੇ ਗਵਰਨਰ ਦੀ ਨਿਯੁਕਤੀ 'ਤੇ ਸਵਾਮੀ ਨੇ ਚੁੱਕੇ ਸਵਾਲ, ਮੋਦੀ ਨੂੰ ਲਿਖੀ ਚਿੱਠੀ
. . .  about 2 hours ago
ਨਵੀਂ ਦਿੱਲੀ, 12 ਦਸੰਬਰ- ਭਾਜਪਾ ਦੇ ਸੀਨੀਅਰ ਨੇਤਾ ਸੁਬਰਾਮਣੀਅਮ ਸਵਾਮੀ ਨੇ ਸ਼ਕਤੀਕਾਂਤਾ ਦਾਸ ਨੂੰ ਰਿਜ਼ਰਵ ਬੈਂਕ ਦਾ ਨਵਾਂ ਗਵਰਨਰ ਨਿਯੁਕਤ ਕੀਤੇ ਜਾਣ 'ਤੇ ਸਵਾਲ ਚੁੱਕੇ ਹਨ। ਸਵਾਮੀ ਨੇ ਕਿਹਾ ਕਿ ਸ਼ਕਤੀਕਾਂਤਾ ਦਾਸ ਨੂੰ ਰਿਜ਼ਰਵ ਬੈਂਕ ਦਾ ਗਵਰਨਰ ਨਿਯੁਕਤ...
ਐਕਸਾਈਜ਼ ਵਿਭਾਗ ਵਲੋਂ ਗੁਰਦਾਸਪੁਰ 'ਚ ਵੱਡੀ ਮਾਤਰਾ 'ਚ ਨਾਜਾਇਜ਼ ਸ਼ਰਾਬ ਬਰਾਮਦ
. . .  about 2 hours ago
ਗੁਰਦਾਸਪੁਰ, 12 ਦਸੰਬਰ (ਆਲਮਬੀਰ ਸਿੰਘ)-ਨਜ਼ਦੀਕੀ ਪਿੰਡ ਗੋਹਤ ਪੋਖਰ ਵਿਖੇ ਐਕਸਾਈਜ਼ ਵਿਭਾਗ ਨੇ ਇੱਕ ਸ਼ੈਲਰ ਤੋਂ 762 ਪੇਟੀਆਂ ਨਜਾਇਜ਼ ਸ਼ਰਾਬ ਬਰਾਮਦ ਕਰਨ ਵਿਚ ਸਫਲਤਾ ਹਾਸਲ ਕੀਤੀ ਹੈ। ਜਾਣਕਾਰੀ ਅਨੁਸਾਰ ਇਹ ਸ਼ਰਾਬ ਚੰਡੀਗੜ੍ਹ ਤੋਂ ਲਿਆ ਕੇ...
ਮੱਧ ਪ੍ਰਦੇਸ਼ 'ਚ ਕਾਂਗਰਸ ਨੇ ਰਾਜਪਾਲ ਕੋਲ ਸਰਕਾਰ ਬਣਾਉਣ ਦਾ ਪੇਸ਼ ਕੀਤਾ ਦਾਅਵਾ
. . .  about 3 hours ago
ਭੋਪਾਲ, 12 ਦਸੰਬਰ- ਮੱਧ ਪ੍ਰਦੇਸ਼ 'ਚ ਅੱਜ ਕਾਂਗਰਸ ਦੇ ਇੱਕ ਵਫ਼ਦ ਵਲੋਂ ਸਰਕਾਰ ਦੇ ਗਠਨ ਨੂੰ ਲੈ ਕੇ ਸੂਬੇ ਦੇ ਰਾਜਪਾਲ ਨਾਲ ਮੁਲਾਕਾਤ ਕੀਤੀ ਗਈ। ਮੁਲਾਕਾਤ ਤੋਂ ਬਾਅਦ ਪੱਤਰਕਾਰਾਂ ਨੂੰ ਸੰਬੋਧਨ ਕਰਦਿਆਂ ਪਾਰਟੀ ਨੇਤਾ ਨਰਿੰਦਰ ਸਲੂਜਾ ਨੇ ਕਿਹਾ ਕਿ ਉਨ੍ਹਾਂ ਨੇ...
ਹੋਰ ਖ਼ਬਰਾਂ..

ਫ਼ਿਲਮ ਅੰਕ

ਪੂਜਾ ਹੈਗੜੇ

ਸ਼ੌਕ ਘੁੰਮਣ-ਫਿਰਨ ਦਾ

ਰਿਤਿਕ ਰੌਸ਼ਨ ਨਾਲ ਪੂਜਾ ਹੈਗੜੇ ਨੇ 'ਮੋਹੰਜੋਦੜੋ' ਫ਼ਿਲਮ ਨਾਲ ਪ੍ਰਵੇਸ਼ ਕੀਤਾ ਸੀ। ਪੂਜਾ ਇਸ ਤੋਂ ਪਹਿਲਾਂ ਦੱਖਣ ਦੀਆਂ ਫ਼ਿਲਮਾਂ ਕਰਦੀ ਸੀ। ਹੀਰੋਇਨ ਬਣਨ ਦੇ ਬਾਵਜੂਦ ਉਹ ਕੁਝ ਅਸਹਿਜ ਜਿਹਾ ਮਹਿਸੂਸ ਕਰ ਰਹੀ ਹੈ। ਪੱਤਰਕਾਰਾਂ ਨਾਲ ਵੀ ਉਸ ਦਾ ਵਤੀਰਾ ਖ਼ਾਸ ਨਹੀਂ ਰਹਿੰਦਾ। ਹਾਂ ਉਹ ਕੁਝ ਤੇਲਗੂ ਫ਼ਿਲਮਾਂ ਜ਼ਰੂਰ ਕਰ ਰਹੀ ਹੈ। ਪੂਜਾ ਦੱਖਣ ਦੀ ਇਕ ਫ਼ਿਲਮ 'ਚ ਵਿਸ਼ੇਸ਼ ਸੀਨ ਵੀ ਕਰ ਰਹੀ ਹੈ। ਪੂਜਾ ਦੀ ਉਂਜ ਆਕੜ ਬਹੁਤ ਹੈ ਤੇ ਉਸ ਨੇ ਸੂਰਜ ਪੇਰੋਲੀ ਨਾਲ ਫ਼ਿਲਮ ਕਰਨ ਤੋਂ ਨਾਂਹ ਕੀਤੀ ਹੈ। ਉਹ ਸਿਰਫ 'ਏ' ਕਤਾਰ ਦੇ ਕਲਾਕਾਰਾਂ ਨਾਲ ਹੀ ਕੰਮ ਕਰਨਾ ਚਾਹੁੰਦੀ ਹੈ। ਫ਼ਿਲਮ ਕਰਨੀ ਜਾਂ ਨਹੀਂ, ਉਸ ਦਾ ਨਿੱਜੀ ਫ਼ੈਸਲਾ ਹੈ ਪਰ ਹਰ ਵਾਰ ਸੁਪਰ ਸਟਾਰ ਨਾਲ ਫ਼ਿਲਮ ਕਰਨ ਦੀ ਖਾਹਿਸ਼ ਰੱਖਣੀ ਵੀ ਸਹੀ ਨਹੀਂ ਹੈ। ਟਾਲੀਵੁੱਡ 'ਚ ਪੂਜਾ ਦੇ ਸਿਤਾਰੇ ਠੀਕ ਹਨ। ਅਨੂ ਅਰਜਨ ਨਾਲ ਉਹ ਇਕ ਫ਼ਿਲਮ ਕਰ ਰਹੀ ਹੈ। ਉਂਜ ਦੱਖਣ 'ਚ ਹਿੱਟ ਫ਼ਿਲਮਾਂ ਦੇਣ ਦਾ ਰਿਕਾਰਡ ਉਸ ਕੋਲ ਹੈ। ਗਣੇਸ਼ ਅਚਾਰੀਆ ਨਾਲ ਪੂਜਾ ਡਾਂਸ ਦੀ ਰਿਹਰਸਲ ਕਰ ਰਹੀ ਹੈ। ਪੂਜਾ ਹੈਗੜੇ ਪਿਛਲੇ ਦਿਨੀਂ ਤੁਰਕੀ ਗਈ ਸੀ। ਉਹ ਹਰ ਸਾਲ ਕਿਤੇ ਨਾ ਕਿਤੇ ਘੁੰਮਣ-ਫਿਰਨ ਜਾਂਦੀ ਹੈ। ਉਸ ਲਈ ਇਹ ਜ਼ਰੂਰੀ ਨਹੀਂ ਕਿ ਘੁੰਮਣ-ਫਿਰਨ ਵਾਲੀ ਥਾਂ ਦੇਸ਼ 'ਚ ਹੋਏ ਜਾਂ ਦੇਸ਼ ਤੋਂ ਬਾਹਰ। ਪੂਜਾ ਨੇ ਇਸਤੰਬੁਲ ਦੀ ਸੈਰ ਵੀ ਕੀਤੀ। ਉਸ ਦਾ ਸੁਪਨਾ ਦੁਨੀਆ ਦੀ ਸੈਰ ਕਰਨੀ ਹੈ। ਐਮ.ਕਾਮ ਤੱਕ ਪੜ੍ਹੀ-ਲਿਖੀ ਪੂਜਾ ਹੈਗੜੇ ਨੂੰ 'ਰੇਸ-3' ਮਿਲਣ ਦੀ ਪੂਰੀ ਸੰਭਾਵਨਾ ਹੈ। ਬਾਲੀਵੁੱਡ ਲਈ ਚਾਹੇ ਮੌਕੇ ਘੱਟ ਹਨ ਪਰ ਪੂਜਾ ਹੈਗੜੇ ਨੂੰ ਕੋਈ ਫ਼ਰਕ ਨਹੀਂ ਪਿਆ। ਦੱਖਣ 'ਚ ਬਹੁਤ ਕੰਮ ਹੈ। ਤੁਰਕੀ ਘੁੰਮਣ ਤੋਂ ਬਾਅਦ ਸ਼ਾਇਦ ਉਹ ਯੂਰਪ ਜਾਂਦੀ ਪਰ ਰੁਝੇਵੇਂ ਆੜੇ ਆ ਗਏ। ਜਦ ਵੀ ਵਿਹਲ ਮਿਲੀ ਦੁਨੀਆ ਦੀ ਸੈਰ ਜਾਰੀ ਰੱਖੇਗੀ ਪੂਜਾ।


ਖ਼ਬਰ ਸ਼ੇਅਰ ਕਰੋ

ਸੋਨਮ ਕਪੂਰ

ਵਿਆਹ ਦੇ ਕਿਆਫ਼ੇ ਲੱਗਣੇ ਸ਼ੁਰੂ

ਫੈਸ਼ਨਾਂ ਦੀ ਮਾਹਿਰ ਬਾਲੀਵੁੱਡ ਦੀ ਬੜਬੋਲੀ ਹੀਰੋਇਨ ਸੋਨਮ ਕਪੂਰ ਇਸ ਸਮੇਂ ਅਕਸ਼ੈ ਕੁਮਾਰ ਨਾਲ 'ਪੈਡਮੈਨ' ਫ਼ਿਲਮ ਕਰ ਰਹੀ ਹੈ। ਰਹੀ ਗੱਲ ਉਸ ਦੀ ਫ਼ਿਲਮ 'ਵੀਰੇ ਦੀ ਵੈਡਿੰਗ' ਦੀ ਤਾਂ ਸੋਨਮ ਦੀ ਇਹ ਘਰੇਲੂ ਫ਼ਿਲਮ ਹੁਣ ਅਪ੍ਰੈਲ ਨੂੰ ਆਏਗੀ। ਏਕਤਾ ਦੇ ਭਤੀਜੇ ਲਕਸ਼ਯ ਦਾ ਜਨਮ ਦਿਨ ਅਪ੍ਰੈਲ 'ਚ ਹੈ। ਇਸ ਮੌਕੇ ਹੀ ਸੋਨਮ ਦੀ 'ਵੀਰੇ ਦੀ ਵੈਡਿੰਗ' ਰਿਲੀਜ਼ ਹੋ ਜਨਮ ਦਿਨ ਦਾ ਤੋਹਫ਼ਾ ਲਕਸ਼ਯ ਨੂੰ ਹੋਏਗੀ। ਉਂਜ ਇਸ ਲੋਹੜੀ 'ਤੇ ਸੋਨਮ ਕਿੱਥੇ ਸੀ? ਉਹ ਧੜਾਧੜ ਅਨੁਸ਼ਕਾ ਸ਼ਰਮਾ ਨੂੰ ਸੁਨੇਹੇ ਘੱਲ ਰਹੀ ਸੀ। ਵਿਆਹੁਤਾ ਜੀਵਨ ਸਬੰਧੀ ਪੁੱਛ ਰਹੀ ਸੀ। ਮਹਿਸੂਸ ਕਰੋ ਕਿ ਸੋਨਮ ਵੀ ਪਰਾਈ ਹੋਣ ਦੀ ਰਾਹ ਵੱਲ ਹੈ ਤੇ ਸੰਭਾਵਨਾ ਹੈ ਕਿ ਅਨੰਦ ਆਹੂਜਾ ਨਾਲ ਸੱਤ ਜਨਮਾਂ ਦਾ ਸਾਥ ਵਾਲੀ ਕਹਾਣੀ ਇਸ ਸਾਲ ਮੁਕਾਮ 'ਤੇ ਪਹੁੰਚ ਜਾਏ। ਕੋਲਕਾਤਾ ਦੀ ਇਕ ਗਹਿਣਿਆਂ ਦੀ ਦੁਕਾਨ 'ਤੇ ਲੋਹੜੀ ਵਾਲੇ ਦਿਨ ਸੋਨਮ ਅਨੰਦ ਆਹੂਜਾ ਦੀ ਅੰਮੀ ਨਾਲ ਖ਼ਰੀਦਦਾਰੀ ਕਰ ਰਹੀ ਸੀ। ਸੋਨਮ ਦੇ ਢਿੱਡ 'ਚ ਕੋਈ ਗੱਲ ਪੱਚ ਜਾਏ, ਨਹੀਂ-ਬਿਲਕੁਲ ਨਹੀਂ। ਸੋਨਮ ਨੇ ਕਾਫੀ ਚੰਗੀਆਂ ਫ਼ਿਲਮਾਂ ਵੀ ਕੀਤੀਆਂ ਹਨ। ਹੁਣ ਫੋਮ ਦੇ ਗੱਦਿਆਂ ਤੋਂ ਪ੍ਰੇਸ਼ਾਨ ਸੋਨਮ ਕਪੂਰ ਜੋਧਪੁਰ ਜਾ ਰਹੀ ਹੈ। ਇਥੇ ਹੀ ਅਪ੍ਰੈਲ 'ਚ ਦੋਵਾਂ ਦਾ ਵਿਆਹ ਹੋਏਗਾ। 'ਪੈਡਮੈਨ', 'ਵੀਰੇ ਦੀ ਵੈਡਿੰਗ' ਤਾਂ ਸੋਨਮ ਦੇ ਵਿਆਹ ਤੋਂ ਪਹਿਲਾਂ-ਪਹਿਲਾਂ ਸੰਪੂਰਨ ਹੋ ਜਾਣਗੀਆਂ ਪਰ ਸਸ਼ਾਂਕ ਘੋਸ਼ ਦੀ 'ਬੈਟਲ ਆਫ ਪਿਟੋਰਾ' ਦਾ ਕੀ ਬਣੂੰ? ਇਹ ਹੁਣ ਲੇਟ ਹੋ ਜਾਏਗੀ।

ਟਾਈਗਰ ਸ਼ਰਾਫ਼

'ਰੈਂਬੋ'... 'ਬਾਗੀ'

ਇਕ ਫਿਰ ਟਾਈਗਰ ਸ਼ਰਾਫ ਆਪਣੀ ਪਰਮ ਪਿਆਰੀ ਦਿਸ਼ਾ ਨਾਲ ਪਰਦੇ 'ਤੇ ਆ ਰਿਹਾ ਹੈ। ਖੜਕੇ-ਦੜਕੇ ਵਾਲੀ ਉਸ ਦੀ 'ਬਾਗੀ-2' ਦਿਨ ਪੱਘਰਦਿਆਂ ਹੀ ਮਾਰਚ ਮਹੀਨੇ ਥੀਏਟਰਾਂ 'ਚ ਲੋਕਾਂ ਦੀ ਪ੍ਰਤੀਕਿਰਿਆ ਵਸੂਲੇਗੀ। ਸ੍ਰੀਲੰਕਾ ਵਿਖੇ ਸਰਾਫ ਇਸ ਸਮੇਂ ਪਟਾਨੀ ਨਾਲ ਘੁੰਮ-ਫਿਰ ਰਿਹਾ ਹੈ। ਪਹਿਲਾਂ 'ਬਾਗੀ-2' ਅਪ੍ਰੈਲ ਨੂੰ ਆਉਣ ਦੀ ਖ਼ਬਰ ਸੀ ਪਰ ਸਾਜਿਦ ਨਾਡੀਆਡਵਾਲਾ ਨੇ ਹੁਣ ਮਹੀਨਾ ਪਹਿਲਾਂ ਹੀ ਇਸ ਦੇ ਜਾਰੀ ਹੋਣ ਦੀ ਤਰੀਕ ਨਿਸਚਿਤ ਕੀਤੀ ਹੈ। ਸਿਧਾਰਥ ਅਨੰਦ ਦੀ ਫ਼ਿਲਮ ਵੀ ਟਾਈਗਰ ਕਰ ਰਿਹਾ ਹੈ, ਜਿਸ 'ਚ ਉਸ ਦਾ ਮਨਪਸੰਦ ਸਿਤਾਰਾ ਹੀਰੋ ਰਿਤਿਕ ਰੌਸ਼ਨ ਹੈ। ਆਪਣੇ ਆਦਰਸ਼ ਨਾਲ ਕੰਮ ਕਰਨ ਲਈ ਬਹੁਤ ਉਤਸ਼ਾਹਿਤ ਹੈ। ਟਾਈਗਰ ਬਚਪਨ ਤੋਂ ਹੀ ਰਿਤਿਕ ਦਾ ਦੀਵਾਨਾ ਰਿਹਾ ਹੈ। ਰਿਤਿਕ ਦੇ ਸਾਹਮਣੇ 200-300 ਪ੍ਰਤੀਸ਼ਤ ਮਿਹਨਤ ਹੀ ਚੱਲੇਗੀ, ਉਹ ਜਾਣਦਾ ਹੈ। ਯਸ਼ਰਾਜ ਫ਼ਿਲਮਜ਼ ਨੇ ਦੋਵਾਂ ਨੂੰ ਇਕੱਠਿਆਂ ਕੀਤਾ ਹੈ। ਟਾਈਗਰ ਇਕ ਹੋਰ ਅੰਗਰੇਜ਼ੀ ਫ਼ਿਲਮ 'ਰੈਂਬੋ' ਦਾ ਰੀਮੇਕ ਵੀ ਕਰ ਰਿਹਾ ਹੈ। ਸਿਲਵੇਸਟਰ ਸਟੇਲਨ ਜੋ 'ਰੈਂਬੋ' ਬਣੇ ਸਨ, ਨੇ ਟਾਈਗਰ ਨੂੰ ਇਸ ਦੇ ਰੀਮੇਕ ਲਈ ਸ਼ੁੱਭ ਕਾਮਨਾਵਾਂ ਦਿੱਤੀਆਂ ਹਨ।

ਦੀਪਿਕਾ ਪਾਦੂਕੋਣ

ਹਮ ਕਿਸੀ ਸੇ ਕਮ ਨਹੀਂ

ਲਓ ਜੀ ਆਖਰ ਲੰਬੀ ਜੱਦੋ-ਜਹਿਦ, ਝਮੇਲੇ, ਪੁਆੜੇ ਸਭ ਮੁੱਕਣ ਦੇ ਤਕਰੀਬਨ ਨੇੜੇ ਹਨ ਤੇ ਗਣਤੰਤਰ ਦਿਵਸ ਤੋਂ ਇਕ ਦਿਨ ਪਹਿਲਾਂ ਦੀਪਿਕਾ ਪਾਦੂਕੋਣ ਦੀ ਫ਼ਿਲਮ 'ਪਦਮਾਵਤ' ਆ ਰਹੀ ਹੈ। 'ਪਦਮਾਵਤ' ਲੱਗੀ ਤਾਂ ਦੀਪੀ ਹੁਣ 'ਸਪਨਾ ਦੀਦੀ' ਬਣ ਕੈਮਰੇ ਦਾ ਸਾਹਮਣਾ ਕਰੇਗੀ। ਦੀਪਿਕਾ ਦੇ ਨਾਲ ਇਰਫਾਨ ਖਾਨ ਹੈ। ਟੈਨਿਸ ਪਰਿਵਾਰ 'ਚੋਂ ਹੋਏ ਤੇ ਇਸ ਖੇਡ ਵਾਲੇ ਖਿਡਾਰੀ ਨਾਲ ਗੱਲਬਾਤ ਆਮ ਗੱਲ ਹੈ। 'ਦ ਨਾਈਸ ਗਾਯ' ਲਾਸ ਏਂਜਲਸ ਦੇ ਰੈਸਟੋਰੈਂਟ 'ਚ ਪਿਛਲੇ ਮਹੀਨੇ ਦੀਪਿਕਾ ਨੇ ਟੈਨਿਸ ਖਿਡਾਰੀ ਨੋਵਾਕ ਨਾਲ ਡਿਨਰ ਕੀਤਾ ਸੀ। ਵਿਦੇਸ਼ੀ ਮੀਡੀਆ ਨੂੰ ਡਿਪੀ ਦੀ ਪਛਾਣ ਨਹੀਂ ਸੀ ਤੇ ਉਸ ਨੇ ਨੋਵਾਕ ਨਾਲ ਆਪਣੀਆਂ 'ਫੀਮੇਲ ਕੰਪੈਨੀਅਨ' ਨਾਲ ਸਿਰਲੇਖ ਦੇ ਕੇ ਫੋਟੋਆਂ ਪ੍ਰਕਾਸ਼ਿਤ ਕੀਤੀਆਂ ਸਨ। ਚਲੋ 'ਪਦਮਾਵਤ' ਦੀ ਗੱਲ ਤਾਂ 25 ਜਨਵਰੀ ਨੂੰ ਇਹ ਤੇਲਗੂ, ਤਾਮਿਲ ਤੇ ਹਿੰਦੀ 'ਚ ਆਵੇਗੀ। ਗਲੋਬਲ ਆਈਮੈਕਸ 3-ਡੀ ਦੇ ਫਾਰਮੈਟ ਨਾਲ 'ਪਦਮਾਵਤ' ਆ ਰਹੀ ਹੈ। ਰਣਵੀਰ ਸਿੰਘ ਦੀ ਥਾਂ ਨੋਵਾਕ ਨਾਲ ਸਬੰਧ ਤਾਂ ਦੀਪਿਕਾ ਦੇ ਦਿਮਾਗ ਦੀ ਉਹੀ ਜਾਣੇ। ਹਾਂ, ਰਣਵੀਰ ਨਾਲ ਹੁਣ ਡਿਪੀ ਦੀ ਉਹ ਗੱਲ ਨਹੀਂ ਹੈ। ਉਧਰ 11 ਸਾਲ ਬਾਅਦ ਡਿਪੀ-ਸੋਨਮ ਆਹਮੋ-ਸਾਹਮਣੇ ਹੋਣ ਜਾ ਰਹੀਆਂ ਹਨ। ਇਸ 25 ਨੂੰ 'ਪੈਡਮੈਨ' 'ਪਦਮਾਵਤ' ਇਕੱਠੀਆਂ ਆ ਰਹੀਆਂ ਹਨ। ਦੋਵਾਂ ਦੀ ਦੁਸ਼ਮਣੀ ਜੱਗ ਜਾਣਦਾ ਹੈ। ਅਕਸ਼ੈ ਨਾਲ 'ਪੈਡਮੈਨ' ਸੋਨਮ ਲਈ ਵੱਡਾ ਸੌਦਾ ਹੈ ਤੇ 'ਪਦਮਾਵਤ' ਆਪਣੇ-ਆਪ 'ਚ ਚਰਚਿਤ ਫਿਲਮ ਹੈ ਡਿਪੀ ਲਈ। ਦੀਪਿਕਾ ਬਨਾਮ ਸੋਨਮ ਇਹ 25 ਵਾਲਾ ਹਫ਼ਤਾ ਹੋਵੇਗਾ। 'ਓਮ ਸ਼ਾਂਤੀ ਓਮ' ਤੇ 'ਸਾਂਵਰੀਆ' ਵੀ ਇਕੋ ਸਮੇਂ 11 ਸਾਲ ਪਹਿਲਾਂ ਆਹਮੋ-ਸਾਹਮਣੇ ਹੋਈਆਂ ਸਨ। ਹੁਣ ਬਾਜ਼ੀ ਡਿਪੀ ਹੱਥ ਲੱਗੀ ਸੀ। 'ਸਾਂਵਰੀਆ' ਦੀਪਿਕਾ ਕਰਨ ਵਾਲੀ ਸੀ ਪਰ ਗੁਣਾ ਭੰਸਾਲੀ ਦੀ ਸਹਾਇਕਾ ਸੋਨਮ ਦਾ ਪਿਆ ਸੀ। ਰਣਵੀਰ ਸਿੰਘ ਵੀ ਦੋਸਤ ਸੋਨਮ ਦਾ ਸੀ। ਇਥੋਂ ਹੀ ਦੋਵਾਂ ਦੀ ਖਟਪਟ ਹੋ ਗਈ ਸੀ। ਦੀਪਿਕਾ ਤੇ ਸੋਨਮ ਦੀ ਇਸ ਨਵੀਂ ਆਹਮੋ-ਸਾਹਮਣੀ ਲੜਾਈ 'ਚ ਇਸ ਵਾਰ ਜੇਤੂ ਕੌਣ? ਫੈਸਲਾ ਅਗਲੇ ਹਫ਼ਤੇ ਤੱਕ ਹੋ ਜਾਣਾ ਹੈ।


-ਸੁਖਜੀਤ ਕੌਰ

ਰੁਖ਼ ਨਹੀਂ ਬਦਲਿਆ ਮਲਿਕਾ ਨੇ

ਚਰਚਿਤ ਮੁਟਿਆਰ ਮਲਿਕਾ ਸ਼ੇਰਾਵਤ ਕੁਝ ਦਿਨ ਪਹਿਲਾਂ ਭਾਰਤ ਵਿਚ ਆਈ ਸੀ। ਆਉਂਦਿਆਂ ਹੀ ਉਸ ਨੂੰ ਕੁਝ ਇੰਟਰਵਿਊ ਮਿਲ ਗਏ ਤੇ ਉਸ ਨੇ ਟੀ.ਵੀ. ਸ਼ੋਆਂ ਵਿਚ ਹਿੱਸਾ ਲਿਆ। ਲੰਮੇ ਅਰਸੇ ਤੋਂ ਉਹ ਵਿਦੇਸ਼ਾਂ ਵਿਚ ਰਹਿ ਰਹੀ ਹੈ। ਕਦੀ ਉਸ ਦੀ ਸਫ਼ਲਤਾ ਦਾ ਇਕ ਜਲਵਾ ਸੀ। ਉਹ ਹੁਣ ਮੱਧਮ ਹੋ ਕੇ ਵੀ ਟਿਮਟਿਮਾ ਰਿਹਾ ਹੈ। ਅੱਜ ਵੀ ਉਸ ਦਾ ਉਹੀ ਪੁਰਾਣਾ ਰੁਖ਼ ਹੈ। ਉਹ ਕਹਿੰਦੀ ਹੈ, 'ਮੈਂ ਅੱਜ ਵੀ ਆਲੋਚਕਾਂ ਦੀਆਂ ਗੱਲਾਂ ਨੂੰ ਜ਼ਿਆਦਾ ਤਵੱਜੋ ਨਹੀਂ ਦਿੰਦੀ ਹਾਂ। ਮੈਂ ਤਾਂ ਇਕ ਗੱਲ ਜਾਣਦੀ ਹਾਂ, ਕੁਝ ਤਾਂ ਇਸ ਤਰ੍ਹਾਂ ਦੀ ਗੱਲ ਮੇਰੇ ਅੰਦਰ ਹੈ, ਜਿਸ ਦੇ ਚਲਦਿਆਂ ਕਈ ਸਾਲਾਂ ਤੋਂ ਲੋਕਾਂ ਨੇ ਮੈਨੂੰ ਯਾਦ ਰੱਖਿਆ ਹੈ। ਅੱਜ ਵੀ ਮੇਰਾ ਆਪਣਾ ਇਕ ਵੱਖਰਾ ਆਕਰਸ਼ਣ ਹੈ। ਮੈਂ ਮੰਨਦੀ ਹਾਂ ਕਿ ਮੇਰੇ ਹਿੱਸੇ ਵਿਚ ਚੰਗੀਆਂ ਫ਼ਿਲਮਾਂ ਬਹੁਤ ਘੱਟ ਆਈਆਂ ਹਨ। ਪਰ ਇਸ ਲਈ ਮੈਂ ਜ਼ਰਾ ਵੀ ਦੋਸ਼ੀ ਨਹੀਂ ਹਾਂ। 'ਪਿਆਰ ਕਾ ਸਾਈਡ ਇਫੈਕਟਸ', 'ਵੈੱਲਕਮ' ਵਰਗੀਆਂ ਕੁਝ ਕੁ ਫ਼ਿਲਮਾਂ ਵਿਚ ਮੈਨੂੰ ਚੰਗਾ ਮੌਕਾ ਮਿਲਿਆ। ਮੈਂ ਉਸ ਨੂੰ ਆਪਣੇ ਢੰਗ ਨਾਲ ਚੰਗਾ ਕਰਨ ਦੀ ਕੋਸ਼ਿਸ਼ ਕੀਤੀ। ਮੈਨੂੰ ਹੁਣ ਵੀ ਕੁਝ ਫ਼ਿਲਮਾਂ ਵਿਚ ਕੰਮ ਕਰਨ ਦੀਆਂ ਪੇਸ਼ਕਸ਼ਾਂ ਆ ਰਹੀਆਂ ਹਨ ਪਰ ਹੁਣ ਨਵੇਂ ਸਿਰੇ ਤੋਂ ਸੋਚਣ ਦੀ ਕੁਝ ਇੱਛਾ ਨਹੀਂ ਹੁੰਦੀ ਹੈ।

ਚਲਾਕ ਹੋਈ

ਕੈਟਰੀਨਾ

ਇਹ ਗੱਲ ਬਹੁਤ ਮਜ਼ਬੂਤੀ ਨਾਲ ਕਹੀ ਜਾ ਰਹੀ ਹੈ ਕਿ ਸਲਮਾਨ ਅਤੇ ਕੈਟਰੀਨਾ ਕੈਫ਼ ਜਲਦੀ ਵਿਆਹ ਕਰ ਲੈਣਗੇ। ਸ਼ਾਇਦ ਇਹੀ ਵਜ੍ਹਾ ਹੈ ਕਿ ਕੈਟਰੀਨਾ ਇਨ੍ਹੀਂ ਦਿਨੀਂ ਸਲਮਾਨ ਨੂੰ ਬਿਨਾਂ ਦੱਸੇ ਕੁਝ ਕੰਮ ਨਹੀਂ ਕਰ ਰਹੀ ਹੈ। ਕੈਟ ਦੀ ਇਸ ਗੱਲ ਲਈ ਤਾਰੀਫ਼ ਕੀਤੀ ਜਾਣੀ ਚਾਹੀਦੀ ਹੈ ਕਿ ਤੋੜ-ਵਿਛੋੜੇ ਤੋਂ ਬਾਅਦ ਵੀ ਉਸ ਨੇ ਸਲਮਾਨ ਬਾਰੇ ਕੋਈ ਬਿਆਨਬਾਜ਼ੀ ਨਹੀਂ ਕੀਤੀ। ਉਹ ਖਾਨ ਪਰਿਵਾਰ ਦੇ ਹਰ ਸਮਾਰੋਹ ਵਿਚ ਹਿੱਸਾ ਲੈਂਦੀ ਰਹੀ ਹੈ। ਵਿਆਹ ਹੋਵੇ ਜਾਂ ਖਾਨਦਾਨ ਦਾ ਕੋਈ ਪਰਿਵਾਰਕ ਸਮਾਰੋਹ, ਕੈਟੀ ਨੇ ਕੁਝ ਵੀ ਛੱਡਿਆ ਨਹੀਂ ਹੈ। ਇਹੀ ਵਜ੍ਹਾ ਹੈ ਕਿ ਸਲਮਾਨ ਨਾਲ ਉਸ ਦੀ ਦੋਸਤੀ ਦੁਬਾਰਾ ਸ਼ੁਰੂ ਹੋ ਗਈ ਹੈ। ਹੁਣ ਉਸੇ ਚਲਾਕੀ ਦੇ ਨਾਲ ਉਸ ਨੇ ਸਲਮਾਨ ਦੇ ਨਾਲ ਆਪਣੇ ਅਫੇਅਰ ਨੂੰ ਕਾਫੀ ਮਜ਼ਬੂਤ ਕਰ ਲਿਆ ਹੈ। ਹੁਣ ਸਾਰੇ ਇਹੀ ਕਾਮਨਾ ਕਰ ਰਹੇ ਹਨ ਕਿ ਉਸ ਦਾ ਇਹ ਅਫੇਅਰ ਵਿਆਹ ਵਿਚ ਜ਼ਰੂਰ ਬਦਲ ਜਾਵੇ। ਹੁਣ ਇਕ ਵਿਦੇਸ਼ੀ ਸੂਤਰ ਦਾ ਕਹਿਣਾ ਹੈ ਕਿ ਸਲਮਾਨ ਦੀ ਫ਼ਿਲਮ 'ਰੇਸ-2' ਦੀ ਰਿਲੀਜ਼ ਤੋਂ ਪਹਿਲਾਂ ਇਨ੍ਹਾਂ ਦੋਵਾਂ ਦਾ ਵਿਆਹ ਹੋ ਜਾਵੇਗਾ।

ਕ੍ਰਿਤੀ ਸੈਨਨ

ਅੰਦਾਜ਼ ਨਵੇਂ-ਨਵੇਂ

ਕ੍ਰਿਤੀ ਵੱਡੇ ਪਰਦੇ ਦੀ ਇਕ ਖ਼ੂਬਸੂਰਤ ਅਦਾਕਾਰਾ ਹੈ ਜੋ ਗਲੈਮਰ ਨੂੰ ਪ੍ਰਦਰਸ਼ਿਤ ਕਰਦੀ ਹੈ। ਕ੍ਰਿਤੀ ਸੈਨਨ ਬਾਲੀਵੁੱਡ ਵਿਚ ਆਪਣੀ ਅਦਾਕਾਰੀ ਦੇ ਨਾਲ-ਨਾਲ ਆਪਣੇ ਫੈਸ਼ਨ ਨੂੰ ਲੈ ਕੇ ਵੀ ਇਕ ਜਾਣਿਆ-ਪਛਾਣਿਆ ਚਿਹਰਾ ਹੈ। ਉਸ ਦੇ ਗਲੈਮਰ ਦੀ ਤਰ੍ਹਾਂ ਉਸ ਦੀਆਂ ਫ਼ਿਲਮਾਂ ਵੀ ਕਾਫੀ ਧਮਾਕੇਦਾਰ ਹੁੰਦੀਆਂ ਹਨ। ਫ਼ਿਲਮ 'ਰਾਬਤਾ' ਵਿਚ ਸੁਸ਼ਾਂਤ ਸਿੰਘ ਦੇ ਨਾਲ ਵੱਡਾ ਪਰਦਾ ਸਾਂਝਾ ਕਰਨ ਵਾਲੀ ਕ੍ਰਿਤੀ ਸੈਨਨ ਦਾ ਸਟਾਈਲ ਹੀ ਵੱਖਰਾ ਹੈ। ਕ੍ਰਿਤੀ ਸੈਨਨ ਫ਼ਿਲਮ 'ਹੀਰੋਪੰਤੀ', 'ਦਿਲਵਾਲੇ' ਅਤੇ 'ਰਾਬਤਾ' ਵਿਚ ਅਹਿਮ ਕਿਰਦਾਰ ਨਿਭਾ ਚੁੱਕੀ ਹੈ। ਉਸ ਦੇ ਸਟਾਈਲ ਦੇ ਨਾਲ-ਨਾਲ ਉਸ ਦੀ ਸੁੰਦਰਤਾ ਵੀ ਜ਼ਰਾ ਵੱਖਰੀ ਹੈ। ਉਂਝ ਤਾਂ ਫ੍ਰਿਹਾਲ ਕ੍ਰਿਤੀ ਬਾਲੀਵੁੱਡ ਲਈ ਇਕ ਨਵਾਂ ਚਿਹਰਾ ਹੈ ਪਰ ਸਟਾਈਲ ਦੇ ਮਾਮਲੇ ਵਿਚ ਉਹ ਕਿਸੇ ਤੋਂ ਪਿੱਛੇ ਵੀ ਨਹੀਂ ਹੈ। ਚਾਹੇ 'ਰੈੱਡ ਕਾਰਪੈਟ' ਹੋਵੇ ਜਾਂ ਫਿਰ 'ਸਕਰੀਨ' ਹਰ ਥਾਂ ਕ੍ਰਿਤੀ ਦੀ ਵੱਖਰੀ ਹੀ ਦਿਖ ਹੁੰਦੀ ਹੈ। ਮੰਨੇ ਪ੍ਰਮੰਨੇ ਬ੍ਰੈਂਡ ਦੇ ਉਹ ਇਸ਼ਤਿਹਾਰਾਂ ਵਿਚ ਨਜ਼ਰ ਆਈ ਸੀ। ਉਹ ਵਿਲਸ ਲਾਈਫਸਟਾਈਲ ਫੈਸ਼ਨ ਵੀਕ, ਚੇਨੀ ਇੰਟਰਨੈਸ਼ਨਲ ਫੈਸ਼ਨ ਵੀਕ ਅਤੇ ਇੰਡੀਆ ਇੰਟਰਨੈਸ਼ਨਲ ਜਵੈਲਰੀ ਵੀਕ ਵਿਚ ਵੀ ਨਜ਼ਰ ਆਈ ਸੀ। ਉਹ ਰਿਤੂ ਬੇਰੀ, ਸੁਨੀਤ ਵਰਮਾ ਅਤੇ ਨਿੱਕੀ ਮਹਾਜਨ ਵਰਗੇ ਡਿਜ਼ਾਈਨਰਾਂ ਦੇ ਲਈ ਮਾਡਲਿੰਗ ਕਰ ਚੁੱਕੀ ਹੈ।

ਈਸ਼ਾ ਗੁਪਤਾ

ਤੇਰੀ ਮਰਜ਼ੀ

ਪ੍ਰਭਾਵਸ਼ਾਲੀ ਕਲਾਕਾਰਾਂ ਨਾਲ ਕੰਮ ਕਰਕੇ ਹੀ ਵਧੀਆ ਅਭਿਨੇਤਰੀ ਬਣਿਆ ਜਾ ਸਕਦਾ ਹੈ, ਇਹ ਈਸ਼ਾ ਕਹਿ ਰਹੀ ਹੈ। 'ਰੁਸਤਮ' ਸਮੇਂ ਉਸ ਨੇ ਅਕਸ਼ੈ ਕੁਮਾਰ ਤੋਂ ਕਾਫੀ ਕੁਝ ਸਿੱਖਿਆ। 'ਜੰਨਤ-2', 'ਰਾਜ-3' ਬਾਦਸ਼ਾਹ ਕਰ ਚੁੱਕੀ ਈਸ਼ਾ ਗੁਪਤਾ ਉਂਜ ਜ਼ਿਆਦਾ ਹੀ ਖੁੱਲ੍ਹਾਪਣ ਦਿਖਾ ਰਹੀ ਹੈ। ਬੇਹੱਦ ਘੱਟ ਕੱਪੜਿਆਂ 'ਚ ਤਸਵੀਰਾਂ ਤੇ ਤਸਵੀਰਾਂ ਖਿਚਵਾ ਰਹੀ ਹੈ। 'ਕਮਾਂਡੋ-2 ਬਲੈਕ ਮਨੀ' ਵਾਲੀ ਇਹ ਨਾਇਕਾ ਹੁਣ ਲੜਕੀਆਂ 'ਚ ਉਤਸ਼ਾਹ ਭਰਨ ਲਈ ਫੁੱਟਬਾਲ ਟੀਮ ਬਣਾ ਚੁੱਕੀ ਹੈ। ਇਹ ਤਾਂ ਵਧੀਆ ਕੰਮ ਹੈ ਪਰ ਫੈਸ਼ਨ ਮੈਗਜ਼ੀਨ 'ਤੇ ਬੇਹੱਦ ਮਾੜੀ ਤਸਵੀਰ ਛਪਵਾਉਣੀ ਉਸ ਦੇ ਖੇਡ ਪਿਆਰ ਨੂੰ ਨਰਾਜ਼ ਕਰ ਸਕਦੀ ਹੈ। ਹਾਂ, ਇਹ ਸਾਲ ਈਸ਼ਾ ਲਈ ਵਧੀਆ ਆਇਆ ਹੈ। 'ਆਂਖੇਂ-2' ਉਸ ਦੀ ਫ਼ਿਲਮ ਆ ਰਹੀ ਹੈ। 'ਹੇਰਾਫੇਰੀ-3' ਵੀ ਉਸ ਕੋਲ ਹੈ। ਅਰਜਨ ਰਾਮਪਾਲ, ਅਨਿਲ ਕਪੂਰ, ਅਰਸ਼ਦ ਵਾਰਸੀ, ਇਲੀਆਨਾ ਡਿਕਰੂਜ਼ ਤੇ ਅਮਿਤਾਭ ਬੱਚਨ ਨਾਲ 'ਆਂਖੇਂ-2' ਈਸ਼ਾ ਕਰ ਰਹੀ ਹੈ। ਅਨੀਸ ਬਜਮੀ ਇਸ ਫ਼ਿਲਮ ਦਾ ਨਿਰਦੇਸ਼ਕ ਹੈ। ਈਸ਼ਾ ਗੁਪਤਾ ਜੇਕਰ ਬੇਸ਼ਰਮੀ ਭਰੀਆਂ ਹਰਕਤਾਂ ਤੋਂ ਪਿਛਾਂਹ ਹਟ ਜਾਏ ਤਾਂ ਉਹ ਸਤਿਕਾਰਤ ਅਭਿਨੇਤਰੀਆਂ ਦੀ ਸ਼੍ਰੇਣੀ 'ਚ ਆ ਸਕਦੀ ਹੈ। ਇਹ ਤਾਂ ਈਸ਼ਾ 'ਤੇ ਨਿਰਭਰ ਹੈ ਕਿ ਉਹ ਬਦਲਦੀ ਹੈ ਜਾਂ ਨਹੀਂ।

ਸੰਦੀਪਾ ਧਰ ਹੁਣ ਨਾਂਹ-ਪੱਖੀ ਕਿਰਦਾਰ ਵਿਚ

ਖ਼ੂਬਸੂਰਤ ਚਿਹਰੇ ਵਾਲੀ ਸੰਦੀਪਾ ਧਰ ਨੂੰ ਕਸ਼ਮੀਰ ਦੀ ਕਲੀ ਕਹਿਣਾ ਬਿਲਕੁਲ ਗ਼ਲਤ ਨਹੀਂ ਹੋਵੇਗਾ ਕਿਉਂਕਿ ਉਹ ਸ਼੍ਰੀਨਗਰ ਦੀ ਰਹਿਣ ਵਾਲੀ ਹੈ। ਰਾਜਸ੍ਰੀ ਦੀ ਫ਼ਿਲਮ 'ਇਸ ਲਾਈਫ ਮੇਂ' ਰਾਹੀਂ ਬਾਲੀਵੁੱਡ ਵਿਚ ਆਪਣਾ ਆਗਮਨ ਕਰਨ ਵਾਲੀ ਸੰਦੀਪਾ ਨੇ 'ਦਬੰਗ-2', 'ਹੀਰੋਪੰਤੀ', 'ਗਲੋਬਲ ਬਾਬਾ' ਆਦਿ ਫ਼ਿਲਮਾਂ ਵੀ ਕੀਤੀਆਂ ਹਨ ਅਤੇ ਹੁਣ ਉਹ 'ਫਿਰਕੀ' ਵਿਚ ਨਾਂਹਪੱਖੀ ਭੂਮਿਕਾ ਵਿਚ ਦਿਸੇਗੀ।
ਇਸ ਵੱਖਰੇ ਤਰ੍ਹਾਂ ਦੀ ਭੂਮਿਕਾ ਬਾਰੇ ਉਹ ਕਹਿੰਦੀ ਹੈ, 'ਜਦੋਂ ਨਿਰਦੇਸ਼ਕ ਅੰਕੁਸ਼ ਭੱਟ ਨੇ ਮੈਨੂੰ ਇਹ ਫ਼ਿਲਮ ਪੇਸ਼ਕਸ਼ ਕੀਤੀ ਤੇ ਮੈਂ ਪਹਿਲਾ ਸਵਾਲ ਉਨ੍ਹਾਂ ਤੋਂ ਇਹ ਪੁੱਛਿਆ ਸੀ ਕਿ ਕੀ ਮੇਰੇ ਚਿਹਰੇ 'ਤੇ ਕਿਤੇ ਤੁਹਾਨੂੰ ਕੋਈ ਨਾਂਹਪੱਖੀ ਝਲਕ ਨਜ਼ਰ ਆਉਂਦੀ ਹੈ। ਉਨ੍ਹਾਂ ਦਾ ਜਵਾਬ ਨਾਂਹ ਵਿਚ ਸੀ ਪਰ ਉਨ੍ਹਾਂ ਨੇ ਕਿਹਾ ਕਿ ਇਹੀ ਤਾਂ ਇਕ ਕਲਾਕਾਰ ਲਈ ਵੱਡੀ ਚੁਣੌਤੀ ਹੁੰਦਾ ਹੈ ਕਿ ਉਹ ਕੈਮਰੇ ਦੇ ਸਾਹਮਣੇ ਉਸ ਭੂਮਿਕਾ ਨੂੰ ਸਟੀਕ ਤਰੀਕੇ ਨਾਲ ਨਿਭਾਏ, ਜਿਸ ਕਿਰਦਾਰ ਨਾਲ ਉਸ ਦਾ ਦੂਰ-ਦੂਰ ਤੱਕ ਕੋਈ ਸਬੰਧ ਨਹੀਂ ਹੁੰਦਾ। ਉਸ ਦੇ ਇਸ ਜਵਾਬ ਨੇ ਮੇਰਾ ਆਤਮ-ਵਿਸ਼ਵਾਸ ਵਧਾਇਆ ਅਤੇ ਉਦੋਂ ਮੇਰੇ ਦਿਮਾਗ਼ ਵਿਚ ਫ਼ਿਲਮ 'ਸੈਵਨ ਆਵਰਸ ਟੂ ਗੋ' ਵਿਚ ਮੇਰੇ ਵਲੋਂ ਨਿਭਾਈ ਗਈ ਮਹਿਲਾ ਪੁਲਿਸ ਅਫ਼ਸਰ ਦੀ ਭੂਮਿਕਾ ਦਾ ਖਿਆਲ ਆਇਆ। ਮੈਂ ਸਰੀਰਕ ਪੱਖ ਤੋਂ ਕਿਸੇ ਵੀ ਕੋਨੇ ਤੋਂ ਪੁਲਿਸ ਵਾਲੀ ਨਹੀਂ ਲਗਦੀ ਹਾਂ ਪਰ ਉਸ ਫ਼ਿਲਮ ਲਈ ਮੈਂ ਬਹੁਤ ਮਿਹਨਤ ਕੀਤੀ ਸੀ ਅਤੇ ਮੇਰੇ ਕੰਮ ਦੀ ਤਾਰੀਫ ਵੀ ਹੋਈ ਸੀ। ਉਸੇ ਤੋਂ ਪ੍ਰੇਰਿਤ ਹੋ ਕੇ ਹੁਣ ਮੈਂ ਇਥੇ ਨਹਾਂਪੱਖੀ ਭੂਮਿਕਾ ਨਿਭਾਅ ਰਹੀ ਹਾਂ।'

-ਪੰਨੂੰ

'ਜ਼ੀਰੋ' ਵਿਚ ਸ਼ਾਹਰੁਖ ਬੌਨਾ ਬਣਿਆ

ਪਹਿਲਾਂ ਕਮਲ ਹਸਨ ਨੇ 'ਅੱਪੂ ਰਾਜਾ' ਤੇ ਅਨੁਪਮ ਖੇਰ ਨੇ 'ਜਾਨੇਮਨ' ਵਿਚ ਬੌਨੇ ਦੀ ਭੂਮਿਕਾ ਨਿਭਾ ਕੇ ਦਰਸ਼ਕਾਂ ਨੂੰ ਹੈਰਾਨ ਕੀਤਾ ਸੀ। ਹੁਣ ਸ਼ਾਹਰੁਖ ਖਾਨ ਬੌਨੇ ਬਣ ਕੇ ਦਰਸ਼ਕਾਂ ਨੂੰ ਹੈਰਾਨ ਕਰਨ ਆ ਰਹੇ ਹਨ। 'ਤਨੂ ਵੈੱਡਸ ਮਨੂ' ਤੇ 'ਰਾਂਝਣਾ' ਵਾਲੇ ਨਿਰਦੇਸ਼ਕ ਆਨੰਦ ਐਲ. ਰਾਏ ਦੀ ਫ਼ਿਲਮ 'ਜ਼ੀਰੋ' ਵਿਚ ਸ਼ਾਹਰੁਖ ਖਾਨ ਬੌਨੇ ਦੀ ਭੂਮਿਕਾ ਨਿਭਾਅ ਰਹੇ ਹਨ। ਫ਼ਿਲਮ ਵਿਚ ਇਕ ਇਸ ਤਰ੍ਹਾਂ ਦੇ ਆਦਮੀ ਦੀ ਕਹਾਣੀ ਦਿਖਾਈ ਗਈ ਹੈ ਜੋ ਆਪਣੀਆਂ ਸਰੀਰਕ ਕਮੀਆਂ ਦੇ ਬਾਵਜੂਦ ਮੇਰਠ ਤੋਂ ਲੈ ਕੇ ਨਿਊਯਾਰਕ ਤੱਕ ਆਪਣੀ ਕਾਮਯਾਬੀ ਦੇ ਝੰਡੇ ਗੱਡਣ ਵਿਚ ਕਾਮਯਾਬ ਰਹਿੰਦਾ ਹੈ। ਆਨੰਦ ਰਾਏ ਅਨੁਸਾਰ ਉਹ ਇਕ ਜ਼ਮਾਨੇ ਤੋਂ ਸ਼ਾਹਰੁਖ ਨਾਲ ਫ਼ਿਲਮ ਬਣਾਉਣ ਬਾਰੇ ਸੋਚ ਰਿਹਾ ਸੀ ਪਰ ਉਸ ਨੂੰ ਰੋਮਾਂਟਿਕ ਭੂਮਿਕਾ ਵਿਚ ਚਮਕਾਉਣ ਦੀ ਉਨ੍ਹਾਂ ਦੀ ਬਿਲਕੁਲ ਇੱਛਾ ਨਹੀਂ ਸੀ। ਜਦੋਂ ਉਨ੍ਹਾਂ ਦੇ ਕੋਲ ਇਕ ਬੌਨੇ ਆਦਮੀ ਦੀ ਕਹਾਣੀ ਆਈ ਤਾਂ ਲੱਗਿਆ ਕਿ ਇਸ ਭੂਮਿਕਾ ਲਈ ਸ਼ਾਹਰੁਖ ਸਹੀ ਰਹਿਣਗੇ।
ਵੀ. ਐਫ. ਐਕਸ. ਤਕਨੀਕ ਦੀ ਵਰਤੋਂ ਕਰਕੇ ਇਸ ਵਿਚ ਸ਼ਾਹਰੁਖ ਨੂੰ ਬੌਨੇ ਦੇ ਤੌਰ 'ਤੇ ਪੇਸ਼ ਕੀਤਾ ਜਾਵੇਗਾ। ਇਹੀ ਵਜ੍ਹਾ ਹੈ ਕਿ ਫ਼ਿਲਮ ਦੀ ਸ਼ੂਟਿੰਗ ਤਾਂ ਜਲਦੀ ਮੁੱਕ ਜਾਵੇਗੀ ਪਰ ਕੰਪਿਊਟਰ 'ਤੇ ਫ਼ਿਲਮ ਪੂਰੀ ਕਰਨ ਵਿਚ ਕਈ ਮਹੀਨੇ ਲੱਗ ਜਾਣਗੇ। ਇਹ ਫ਼ਿਲਮ ਇਸ ਸਾਲ ਦੇ ਅਖੀਰ ਵਿਚ ਭਾਵ 21 ਦਸੰਬਰ ਨੂੰ ਪ੍ਰਦਰਸ਼ਿਤ ਹੋਵੇਗੀ।
ਜਦੋਂ ਇਸ ਫ਼ਿਲਮ ਦਾ ਐਲਾਨ ਕੀਤਾ ਗਿਆ ਸੀ ਉਦੋਂ ਇਸ ਦਾ ਨਾਂਅ ਕੀ ਰੱਖਿਆ ਜਾਵੇ, ਇਸ ਬਾਰੇ ਬਹੁਤ ਸੋਚ-ਵਿਚਾਰ ਕੀਤਾ ਗਿਆ ਸੀ। ਹੁਣ ਪਹਿਲੀ ਜਨਵਰੀ ਨੂੰ ਟਵਿਟਰ ਜ਼ਰੀਏ ਸ਼ਾਹਰੁਖ ਨੇ ਐਲਾਨ ਕੀਤਾ ਹੈ ਕਿ ਫ਼ਿਲਮ ਦਾ ਨਾਂਅ 'ਜ਼ੀਰੋ' ਰੱਖਿਆ ਗਿਆ ਹੈ।
ਇਸ ਟਾਈਟਲ ਬਾਰੇ ਆਨੰਦ ਰਾਏ ਕਹਿੰਦੇ ਹਨ, 'ਜ਼ੀਰੋ' ਭਾਵ ਸਿਫ਼ਰ। ਅਸੀਂ ਇਹ ਕਹਿੰਦੇ ਹਾਂ ਕਿ ਸਿਫ਼ਰ ਦੀ ਕੋਈ ਕੀਮਤ ਨਹੀਂ ਹੁੰਦੀ ਹੈ ਪਰ ਇਹ ਅਸੀਂ ਭੁੱਲ ਜਾਂਦੇ ਹਾਂ ਕਿ ਜ਼ੀਰੋ ਜਿਸ ਕਿਸੇ ਰਕਮ ਦੇ ਪਿੱਛੇ ਲਗਾ ਦਿੱਤਾ ਜਾਂਦਾ ਹੈ ਉਹ ਉਸ ਰਕਮ ਦੀ ਕੀਮਤ ਦਸ ਗੁਣਾ ਜ਼ਿਆਦਾ ਵਧਾ ਦਿੰਦਾ ਹੈ। ਇਹ ਜ਼ੀਰੋ ਦੀ ਸ਼ਕਤੀ ਹੈ। ਫ਼ਿਲਮ ਵਿਚ ਇਕ ਇਸ ਤਰ੍ਹਾਂ ਦੇ ਆਦਮੀ ਦੀ ਕਹਾਣੀ ਪੇਸ਼ ਕੀਤੀ ਗਈ ਹੈ ਜਿਸ ਦੀ ਉਪਯੋਗਤਾ ਸਮਾਜ ਵਿਚ ਜ਼ੀਰੋ ਮੰਨੀ ਜਾਂਦੀ ਹੈ। ਉਹੀ ਆਦਮੀ ਆਪਣੀ ਕਾਬਲੀਅਤ ਦੇ ਦਮ 'ਤੇ ਕੀ ਕੁਝ ਕਰ ਜਾਂਦਾ ਹੈ, ਇਹ ਇਸ ਵਿਚ ਦਿਖਾਇਆ ਗਿਆ ਹੈ।


-ਇੰਦਰਮੋਹਨ ਪੰਨੂੰ

'ਨਿਰਦੋਸ਼' 'ਚ ਨਕਾਰਾਤਮਕ ਭੂਮਿਕਾ ਚੁਣੌਤੀਪੂਰਨ ਹੈ-ਮੁਕੁਲ ਦੇਵ

19 ਜਨਵਰੀ, 2018 ਨੂੰ ਰਿਲੀਜ਼ ਹੋ ਰਹੀ ਫ਼ਿਲਮ 'ਨਿਰਦੋਸ਼' ਇਕ ਰਹੱਸਮਈ ਫ਼ਿਲਮ ਹੈ। ਇਸ ਫ਼ਿਲਮ 'ਚ ਇਕ ਵਿਅਕਤੀ ਦਾ ਕਤਲ ਹੋ ਜਾਂਦਾ ਹੈ। ਪੁਲਿਸ ਨੂੰ ਇਸ ਕਤਲ ਦਾ ਸ਼ੱਕ ਫ਼ਿਲਮ ਦੇ 5-6 ਕਿਰਦਾਰਾਂ 'ਤੇ ਹੈ। ਇਨ੍ਹਾਂ ਸ਼ੱਕੀ ਚਰਿੱਤਰਾਂ 'ਚੋਂ ਇਕ ਚਰਿੱਤਰ ਹੈ ਖਲਨਾਇਕ ਦਾ। ਇਸ ਖਲਨਾਇਕ ਦੀ ਭੂਮਿਕਾ 'ਚ ਅਭਿਨੇਤਾ ਮੁਕੁਲ ਦੇਵ ਹੈ। ਮੁਕੁਲ ਦੇਵ ਇਸ ਫ਼ਿਲਮ 'ਚ ਇਕ ਅਜਿਹਾ ਚਰਿੱਤਰ ਹੈ, ਜੋ ਕਿ ਹਰਿਆਣਾ ਤੋਂ ਆ ਕੇ ਮੁੰਬਈ 'ਚ ਵਸ ਚੁੱਕਾ ਹੈ। ਇਸ ਨਕਾਰਾਤਮਕ ਭੂਮਿਕਾ 'ਚ ਮੁਕੁਲ ਲੜਕੀਆਂ ਨੂੰ ਬਲੈਕਮੇਲ ਕਰਨ ਤੋਂ ਬਿਨਾਂ ਆਪਣੀ ਪਤਨੀ 'ਤੇ ਵੀ ਤਸ਼ੱਦਦ ਕਰਦਾ ਹੈ। ਮੁਕੁਲ ਦਾ ਮੰਨਣਾ ਹੈ ਕਿ ਅਜਿਹੇ ਚਰਿੱਤਰਾਂ ਨੂੰ ਨਿਭਾਉਣਾ ਇਕ ਅਦਾਕਾਰ ਦੇ ਲਈ ਚੰਗਾ ਹੁੰਦਾ ਹੈ, ਕਿਉਂਕਿ ਇਸ ਤਰ੍ਹਾਂ ਦੇ ਕਿਰਦਾਰਾਂ ਨੂੰ ਨਿਭਾਅ ਕੇ ਇਕ ਅਦਾਕਾਰ ਅਲੱਗ-ਅਲੱਗ ਭਾਵਨਾਵਾਂ ਨੂੰ ਉਜਾਗਰ ਕਰ ਸਕਦਾ ਹੈ ਤੇ ਇਹ ਭੂਮਿਕਾ ਉਸ ਲਈ ਚੁਣੌਤੀਪੂਰਨ ਸੀ। ਗੜ੍ਹਕਵੀਂ ਆਵਾਜ਼ ਦਾ ਮਾਲਕ ਮੁਕੁਲ ਜ਼ਿਲ੍ਹਾ ਜਲੰਧਰ ਦੇ ਕਸਬਾ ਆਦਮਪੁਰ ਦੇ ਨੇੜਲੇ ਪਿੰਡ ਪਧਿਆਣਾ ਦਾ ਵਸਨੀਕ ਹੈ। ਮਾਡਲਿੰਗ ਦੇ ਨਾਲ ਕੁਝ ਸੀਰੀਅਲਾਂ 'ਚ ਵੀ ਕੰਮ ਕੀਤਾ। ਮੁਕੁਲ ਦੇਵ ਜਿਸ ਸਮੇਂ ਮਹੇਸ਼ ਭੱਟ ਦੀ ਸਹਾਇਕਾ ਤਨੂਜਾ ਚੰਦਰਾ ਦੇ ਲੜੀਵਾਰ 'ਮੁਮਕਿਨ' 'ਚ ਕੰਮ ਕਰ ਰਿਹਾ ਸੀ ਤਾਂ ਭੱਟ ਨੂੰ ਮੁਕੁਲ ਦੀ ਅਦਾਕਾਰੀ ਚੰਗੀ ਲੱਗੀ ਤੇ ਇਸ ਤਰ੍ਹਾਂ ਉਸ ਨੂੰ ਪਹਿਲੀ ਹਿੰਦੀ ਫ਼ਿਲਮ 'ਦਸਤਕ' ਮਿਸ ਯੂਨੀਵਰਸ ਸੁਸ਼ਮਿਤਾ ਸੇਨ ਨਾਲ ਮਿਲੀ। ਇਸ ਤੋਂ ਉਸ ਦਾ ਫ਼ਿਲਮੀ ਕੈਰੀਅਰ ਸ਼ੁਰੂ ਹੋ ਗਿਆ। ਪਿਤਾ ਹਰੀ ਦੇਵ ਅਤੇ ਮਾਤਾ ਅਨੂਪ ਦੇਵ ਦੇ ਸਪੁੱਤਰ ਮੁਕੁਲ ਨੇ ਪੰਜਾਬੀ ਫ਼ਿਲਮਾਂ 'ਹਵਾਏਂ', 'ਸ਼ਰੀਕ', 'ਜ਼ੋਰਾਵਰ', 'ਸਾਕਾ', 'ਹੀਰ ਤੇ ਹੀਰੋ', 'ਪੈਸਾ ਯਾਰ ਪੰਗਾ' ਆਦਿ 'ਚ ਕੰਮ ਕਰ ਕੇ ਚੰਗੀ ਵਾਹ-ਵਾਹ ਖੱਟੀ।


-ਸਿਮਰਨ, ਜਗਰਾਉਂ।

ਸਾਫ਼-ਸੁਥਰੇ ਤੇ ਹਿੱਟ ਗੀਤਾਂ ਦਾ ਰਚੇਤਾ ਬਲਜੀਤ ਪਾਸਲਾ

ਅਮਰੀਕਾ ਦੇ ਸ਼ਹਿਰ ਨਿਊਜਰਸੀ ਵਿਚ ਵਸਦਾ ਬਲਜੀਤ ਪਾਸਲਾ ਪੰਜਾਬੀ ਗੀਤਕਾਰੀ ਦੇ ਖੇਤਰ ਦਾ ਉਹ ਮਾਣਮੱਤਾ ਹਸਤਾਖਰ ਹੈ ਜਿਸ ਨੇ ਸਾਫ ਸੁਥਰੇ ਤੇ ਸੱਭਿਆਚਾਰਕ ਗੀਤ ਰਚ ਕੇ ਵਿਲੱਖਣ ਪਹਿਚਾਣ ਬਣਾਈ ਹੈ। ਬਲਜੀਤ ਪਾਸਲਾ ਨੇ ਭਾਵੇਂ ਗਿਣਤੀ ਪੱਖੋਂ ਥੋੜ੍ਹੇ ਪ੍ਰੰਤੂ ਵਿਸ਼ੇ ਪੱਖੋਂ ਨਰੋਏ ਤੇ ਪਰਿਵਾਰਕ ਗੀਤ ਰਚ ਕੇ ਪ੍ਰਸਿੱਧੀ ਹਾਸਿਲ ਕੀਤੀ ਹੈ। ਗੈਰੀ ਸੰਧੁ ਅਤੇ ਜੈਸਮੀਨ ਸੈਡਲਸ ਦੇ ਗੀਤ, 'ਲੱਡੂ' ਨਾਲ ਪੰਜਾਬੀ ਦੇ ਸਿਰਮੌਰ ਗੀਤਕਾਰਾਂ ਦੀ ਸੂਚੀ ਵਿਚ ਸ਼ਾਮਿਲ ਹੋ ਚੁੱਕੇ ਪਾਸਲਾ ਦੇ ਗੀਤ ਹਿੱਕ ਦੇ ਜ਼ੋਰ ਨਾਲ ਗਾਉਣ ਵਾਲੇ ਗਾਇਕ ਬਲਜੀਤ ਮਾਲਵਾ, ਅਮਰਜੀਤ ਸੰਧੂ, ਜੀਤਾ ਗਿੱਲ, ਜੈਜ਼ ਮੱਲ੍ਹੀ, ਬਾਲੀਵੁੱਡ ਕਲਾਕਾਰ ਆਰ. ਡੀ. ਬੀ., ਰੇਸ਼ਮ ਸਿੰਘ ਰੇਸ਼ਮ ਆਦਿ ਅਨੇਕਾਂ ਗਾਇਕਾਂ ਨੇ ਅਪਾਣੀਆਂ ਆਵਾਜ਼ਾਂ ਵਿਚ ਰਿਕਾਰਡ ਕਰਵਾਏ ਹਨ। ਜਲੰਧਰ ਜ਼ਿਲ੍ਹੇ ਦੇ ਪਿੰਡ ਪਾਸਲਾ ਨਾਲ ਸਬੰਧਿਤ ਬਲਜੀਤ ਪਾਸਲਾ ਸਾਲ 2005 ਤੋਂ ਅਮਰੀਕਾ ਦੇ ਸ਼ਹਿਰ ਨਿਊਜਰਸੀ ਵਿਖੇ ਰਹਿ ਰਿਹਾ ਹੈ ਅਤੇ ਕਿੱਤੇ ਵਜੋਂ ਟਰਾਂਸਪੋਰਟ ਲਾਈਨ ਵਿਚ ਬਤੌਰ ਟਰਾਂਸਪੋਰਟਰ ਦੇ ਤੌਰ 'ਤੇ ਕੰੰਮ ਕਰਦਾ ਹੈ। ਇਟਲੀ ਦੇ ਸ਼ਹਿਰ ਸਨਬੋਨੀਫਾਚੋ ਵਿਖੇ ਗੀਤਕਾਰ ਜਗਤਾਰ ਸਿੰਘ ਗੋਰਾ ਦੇ ਗ੍ਰਹਿ ਵਿਖੇ ਵਿਸ਼ੇਸ਼ ਮੁਲਾਕਾਤ ਦੌਰਾਨ ਉਸ ਦੱਸਿਆ ਕਿ ਉਸ ਨੂੰ ਗੀਤਕਾਰੀ ਦਾ ਸ਼ੌਕ ਆਪਣੇ ਵੱਡੇ ਭਰਾ ਜਗਤਾਰ ਪਾਸਲਾ ਤੋਂ ਪ੍ਰਭਾਵਿਤ ਹੋ ਕੇ ਪਿਆ ਸੀ। ਗੈਰੀ ਸੰਧੂ ਅਤੇ ਜੈਸਮੀਨ ਸੈਡਲਸ ਦੇ ਗੀਤ, ਲੱਡੂ ਦੂਜੇ ਦੇ ਹੱਥਾਂ 'ਚ ਚੰਗਾ ਲੱਗਦਾ, ਜੇ ਆਪ ਖਾਈਏ ਤੰਗ ਕਰਦਾ, ਨਾਲ ਉਸ ਨੂੰ ਪੰਜਾਬੀ ਸਰੋਤਿਆਂ ਦੁਆਰਾ ਭਰਵਾਂ ਪਿਆਰ ਮਿਲਿਆ। ਇਸ ਤੋਂ ਬਾਅਦ ਚੱਲ ਸੋ ਚੱਲ ਹੋ ਗਈ ਅਤੇ ਉਸ ਦਾ ਇਹ ਸਿਲਸਿਲਾ ਅੱਜ ਵੀ ਜਾਰੀ ਹੈ। ਗਾਇਕ ਰੌਸ਼ਨ ਪ੍ਰਿੰਸ ਅਤੇ ਜੱਸੀ ਸੋਹਲ ਦੀ ਆਵਾਜ਼ ਵਿਚ ਜਲਦ ਹੀ ਉਸ ਦੇ ਨਵੇਂ ਗੀਤ ਪੰਜਾਬੀ ਸਰੋਤਿਆਂ ਨੂੰ ਸੁਣਨ ਨੂੰ ਮਿਲਣਗੇ। ਬਲਜੀਤ ਪਾਸਲਾ ਨੇ ਦੱਸਿਆ ਕਿ ਦੇਬੀ ਮਖਸੂਸਪੁਰੀ ਦੀ ਕਲਮ ਤੋਂ ਵੀ ਉਹ ਬਹੁਤ ਪ੍ਰਭਾਵਿਤ ਹੈ। ਗਾਇਕ ਬਲਜੀਤ ਮਾਲਵਾ ਤੋਂ ਮਿਲੇ ਪਿਆਰ ਅਤੇ ਸਹਿਯੋਗ ਲਈ ਉਹ ਉਨ੍ਹਾਂ ਦੇ ਹਮੇਸ਼ਾ ਰਿਣੀ ਰਹਿਣਗੇ। ਬਲਜੀਤ ਪਾਸਲਾ ਦਾ ਕਹਿਣਾ ਹੈ ਕਿ ਹਮੇਸ਼ਾਂ ਸਾਫ ਸੁਥਰੇ ਤੇ ਸਮਾਜਿਕ ਕਦਰਾਂ ਕੀਮਤਾਂ ਵਾਲੇ ਗੀਤਾਂ ਦੀ ਸਿਰਜਣਾ ਨੂੰ ਹੀ ਪਹਿਲ ਦਿੰਦੇ ਰਹਿਣਗੇ ਅਤੇ ਫੋਕੀ ਸ਼ੋਹਰਤ ਖਾਤਿਰ ਕਦੀ ਵੀ ਆਪਣੀ ਕਲਮ ਦੇ ਮਿਆਰ ਨੂੰ ਡਿੱਗਣ ਨਹੀਂ ਦੇਣਗੇ।


-ਹਰਦੀਪ ਸਿੰਘ ਕੰਗ
ਪੱਤਰਕਾਰ ਅਜੀਤ ਵੀਨਸ ਇਟਲੀ

ਤਪਦੀ ਹਿੱਕ 'ਤੇ ਸੀਤ ਬੂੰਦ ਵਰਗਾ ਕਲਾਕਾਰ ਸਰਦਾਰ ਸੋਹੀ

ਦੁਨੀਆ ਦੀ ਪ੍ਰਚੱਲਤ ਧਾਰਨਾ ਹੈ ਕਿ ਜਿੱਥੇ ਪੈਸਾ ਅਤੇ ਪ੍ਰਸਿੱਧੀ ਆ ਜਾਂਦੀ ਹੈ, ਨਿਮਰਤਾ ਅਤੇ ਨਰਮਾਈ ਓਥੋਂ ਪੋਲੇ ਪੈਰੀਂ ਬਾਹਰ ਖਿਸਕ ਜਾਂਦੀ ਹੈ, ਪਰ ਸਰਦਾਰ ਸੋਹੀ ਨੇ ਇਸ ਧਾਰਨਾ ਨੂੰ ਮਿੱਧ ਕੇ, ਇਹ ਸਬੂਤ ਦੇ ਦਿੱਤਾ ਹੈ ਕਿ ਜ਼ਰੂਰੀ ਨਹੀਂ ਕਿ ਹਰ ਪ੍ਰਸਿੱਧ ਵਿਅਕਤੀ ਆਕੜਕੰਨ੍ਹਾਂ ਹੋਵੇ। ਅੱਠੇ ਪਹਿਰ ਖਿੜਿਆ ਰਹਿਣ ਵਾਲਾ ਸਰਦਾਰ ਸੋਹੀ ਹਰ ਇਕ ਨੂੰ ਭੱਜ ਕੇ ਜੱਫ਼ੀ ਪਾਉਣ ਵਾਲਾ, ਮੋਹ ਦੀ ਮੂਰਤ ਹੈ। ਇਕ ਦਿਨ ਉਸ ਨੇ ਮੈਨੂੰ ਵੱਟਸਐਪ ਉਪਰ ਆਪਣੀ ਬੜੀ ਗੰਭੀਰ ਜਿਹੀ ਇਕ ਫ਼ੋਟੋ ਭੇਜੀ। ਦੇਖ ਕੇ ਮੈਂ ਪੁੱਛਿਆ, 'ਬਾਈ ਜੀ, ਬੜੇ ਤਣਾਓ ਜਿਹੇ ਵਿਚ ਲੱਗ ਰਹੇ ਹੋ...?' ਅੱਗਿਉਂ ਬਾਈ ਹੱਸ ਕੇ ਕਹਿੰਦਾ, 'ਫ਼ਿਲਮ ਦੀ ਵਾਰਤਾਲਾਪ ਚੇਤੇ ਨੀ ਹੋ ਰਹੀ, ਜੱਗੀ।' ਤਾਂ ਮੈਂ ਹੱਸਦਿਆਂ ਕਿਹਾ, 'ਪੈੱਗ ਸ਼ੈੱਗ ਲਾ ਕੇ ਦਿਮਾਗ਼ ਸਾਣ 'ਤੇ ਲਾ ਲੈਣਾ ਸੀ...।' ਹੱਸ ਕੇ ਕਹਿੰਦਾ, 'ਬੱਸ ਐਹਥੋਂ ਈ ਤਾਂ ਮੈਂ ਮਾਰ ਖਾਨੈਂ, ਜੱਗੀ ਸਿਆਂ!' ਮੇਰੇ ਕਹਿਣ ਦਾ ਮਤਲਬ ਸਰਦਾਰ ਸੋਹੀ ਜਿੰਨਾ ਮਰਜ਼ੀ ਕੰਮ ਦੇ ਦਬਾਓ ਹੇਠ ਹੋਵੇ, ਹੱਸਣਾ-ਖੇਡਣਾ ਉਹ ਕਦੇ ਵੀ ਨਹੀਂ ਤਿਆਗਦਾ। ਕਈ ਵਾਰ ਉਹ ਮੈਨੂੰ ਕਾਸ਼ਣੀ ਅੱਖ ਦੇ ਉਨੀਂਦਰੇ ਵਰਗਾ ਜਾਪਦਾ ਹੈ। ਉਸ ਦੇ ਚਿਹਰੇ ਦੀ ਮੁਸਕਰਾਹਟ ਮਿੱਤਰਾਂ ਦੀ ਜਾਕਿਟ 'ਤੇ ਘੁੰਡ ਕੱਢ ਕੇ ਬੂਟੀਆਂ ਪਾਉਂਦੀ ਹੈ। ਪਰਦੇ ਉੱਪਰ ਉਸ ਦੀ ਠੇਠ ਪੰਜਾਬੀ ਅਤੇ ਬੋਲਣ ਦੀ ਅਦਾ ਬੰਦੇ ਨੂੰ ਕਾਇਲ ਕਰਦੀ ਹੈ ਅਤੇ ਇਹੀ ਉਸ ਦੀ ਕਾਮਯਾਬੀ ਦਾ ਅਨੋਖਾ ਰਾਜ ਹੈ। ਉਹ ਆਪਣੇ ਕਿਰਦਾਰ ਨੂੰ ਅੰਨ੍ਹੇ ਵਾਲਾ ਜੱਫ਼ਾ ਨਹੀਂ ਮਾਰਦਾ, ਕਲਾ ਅਤੇ ਤਕਨੀਕ ਅਨੁਸਾਰ ਤੁਰਨ ਵਾਲਾ ਅਨੁਸਾਸ਼ਨੀ ਕਲਾਕਾਰ ਹੈ।
ਸ਼ੋਹਰਤ ਅਤੇ ਮਹਿਮਾਂ ਸਰਦਾਰ ਸੋਹੀ ਨੂੰ ਰਜਾਈ ਨੱਪੀ ਪਏ ਨੂੰ ਨਹੀਂ ਮਿਲੀ, ਇਸ ਪਿੱਛੇ ਉਸ ਦੀ ਲੰਮੀ ਘਾਲਣਾ ਅਤੇ ਸੰਘਰਸ਼ ਦਾ ਹੱਥ ਹੈ। ਇਕ ਅਨੰਦ ਸਟੇਜੀ ਕਲਾ ਦਾ ਵੀ ਹੁੰਦਾ ਹੈ ਅਤੇ ਸਟੇਜੀ ਕਲਾ ਦਾ ਧਨੰਤਰ ਰਿਹਾ ਹੈ ਬਾਈ ਸਰਦਾਰ ਸੋਹੀ। ਥੀਏਟਰ ਕਲਾ ਦਾ ਬਾਦਸ਼ਾਹ, ਮਰਹੂਮ ਹਰਪਾਲ ਟਿਵਾਣਾ ਹੁਰਾਂ ਦਾ ਜਗਾਇਆ ਇਹ ਦੀਪ, ਅੱਜ ਸੂਰਜ ਬਣ, ਦੁਨੀਆ ਭਰ ਦੇ ਪੰਜਾਬੀਆਂ ਲਈ ਮਨੋਰੰਜਨ ਦਾ ਨੂਰ ਬਿਖ਼ੇਰ ਰਿਹਾ ਹੈ। ਪਿੰਡ ਟਿੱਬਾ, ਜ਼ਿਲ੍ਹਾ ਸੰਗਰੂਰ ਵਿਚ ਜਨਮੇ ਬਾਈ ਸੋਹੀ ਨੇ 1975 ਵਿਚ ਨੀਨਾ ਟਿਵਾਣਾ ਅਤੇ ਮਰਹੂਮ ਹਰਪਾਲ ਟਿਵਾਣਾ ਜੀ ਨਾਲ ਥੀਏਟਰ ਤੋਂ ਆਪਣੀ ਕਲਾ ਦੀ ਸ਼ੁਰੂਆਤ ਕੀਤੀ ਅਤੇ ਫ਼ਿਲਮ 'ਲੌਂਗ ਦਾ ਲਿਸ਼ਕਾਰਾ' ਉਸ ਦੀ ਪਹਿਲੀ ਫ਼ਿਲਮ ਸੀ। ਗੁਲਾਬੋ ਮਾਸੀ (ਨਿਰਮਲ ਰਿਸ਼ੀ) ਨਾਲ 'ਨਾਹਰੇ ਅਮਲੀ' ਦਾ ਰੋਲ ਕਰ ਕੇ ਪੰਜਾਬੀ ਫ਼ਿਲਮੀ ਦੁਨੀਆ ਵਿਚ ਆਪਣੀ ਉੱਤਮ ਕਲਾ ਦਾ ਵਿਲੱਖਣ ਸਬੂਤ ਦਿੱਤਾ ਅਤੇ ਫ਼ਿਰ ਪਿੱਛੇ ਮੁੜ ਕੇ ਨਹੀਂ ਦੇਖਿਆ, ਆਤਿਸ਼ਬਾਜ਼ੀ ਵਾਂਗ ਅਸਮਾਨ ਦੀ ਹਿੱਕ ਵੱਲ ਨੂੰ ਹੀ ਗਿਆ। ਹੁਣ ਤੱਕ ਬਾਈ ਸੋਹੀ ਲਗਪਗ 50 ਪੰਜਾਬੀ ਫ਼ਿਲਮਾਂ ਵਿਚ ਆਪਣੀ ਕਲਾ ਦਾ ਲੋਹਾ ਮੰਨਵਾ ਚੁੱਕਿਆ ਹੈ ਅਤੇ ਉਸ ਦਾ ਇਹ ਸਫ਼ਰ ਨਿਰੰਤਰ ਜਾਰੀ ਹੈ। ਪਰਦੇ ਉਪਰ ਅੜਬ, ਕਠੋਰ, ਕਰੂਰ ਅਤੇ ਸਖ਼ਤ ਸੁਭਾਅ ਦਾ ਦਿਸਣ ਵਾਲਾ ਬਾਈ ਸੋਹੀ ਅਥਾਹ ਕੋਮਲ ਹਿਰਦੇ ਦਾ ਮਾਲਕ ਅਤੇ ਯਾਰਾਂ ਦਾ ਯਾਰ ਹੈ।
ਪਿਤਾ ਸ਼ਿਵਦੇਵ ਸਿੰਘ ਸੋਹੀ ਅਤੇ ਮਾਤਾ ਸਰੂਪ ਕੌਰ ਦੇ ਪੁੱਤਰ, ਇਕ ਭਰਾ ਅਤੇ ਚਾਰ ਭੈਣਾਂ ਦੇ ਭਰਾ ਸਰਦਾਰ ਸੋਹੀ ਦੇ ਮਨ ਵਿਚ ਪਤਾ ਨਹੀਂ ਕੀ ਆਇਆ, ਉਸ ਨੇ ਥੀਏਟਰ ਕਰਦਿਆਂ ਹੀ ਪ੍ਰਣ ਕਰ ਲਿਆ ਸੀ ਕਿ ਉਹ ਸ਼ਾਦੀ ਨਹੀਂ ਕਰਵਾਵੇਗਾ। ਉਮਰ ਦੇ ਛੇ ਦਹਾਕੇ ਪਾਰ ਕਰਨ ਤੋਂ ਬਾਅਦ ਵੀ ਸਰਦਾਰ ਸੋਹੀ ਆਪਣੇ ਓਸੇ ਪ੍ਰਣ ਉਪਰ ਧੁੱਸ ਦੇਈ ਤੁਰਿਆ ਆ ਰਿਹਾ ਹੈ। ਜਦ ਵਿਆਹ ਨਾ ਕਰਨ ਬਾਰੇ ਮੈਂ ਉਸ ਨੂੰ ਮਿੱਤਰਾਂ ਵਾਲਾ ਸੁਆਲ ਕੀਤਾ ਤਾਂ ਉਸ ਦਾ ਪ੍ਰਤੱਖ ਅਤੇ ਬੇਬਾਕ ਉਤਰ ਸੀ, 'ਮੈਂ 12 ਕੁ ਸਾਲ ਨਾਟਕ ਕੀਤੇ, ਥੀਏਟਰ ਵਿਚ ਪੈਸਾ ਨਹੀਂ ਸੀ, ਪਰ ਥੀਏਟਰ ਮੇਰੇ ਲਈ ਸਭ ਕੁਝ ਸੀ, ਇਸ ਲਈ ਨਿੱਜੀ ਜ਼ਿੰਦਗੀ ਨਾਲੋਂ ਕਲਾ ਨੂੰ ਪਹਿਲ ਦਿੱਤੀ ਅਤੇ ਇਕੱਲੇ ਰਹਿਣ ਦਾ ਮਨ ਬਣਾ ਲਿਆ, ਫ਼ਿਰ ਇਕੱਲੇ ਰਹਿਣ ਦੀ ਆਦਤ ਜਿਹੀ ਪੈ ਗਈ, ਹੁਣ ਤਾਂ ਅਦਾਕਾਰੀ ਹੀ ਮੇਰੀ ਜ਼ਿੰਦਗੀ ਦਾ ਲਕਬ ਹੈ, ਤੇ ਇਸੇ ਖੇਤਰ ਨੂੰ ਮਜ਼ੇ ਨਾਲ ਜਿਉ ਰਿਹਾ ਹਾਂ।'


-ਸ਼ਿਵਚਰਨ ਜੱਗੀ ਕੁੱਸਾ

ਦੁਸ਼ਮਣ ਘੱਟ, ਦੋਸਤ ਜ਼ਿਆਦਾ

ਅਥੀਆ ਸ਼ੈਟੀ

ਇਥੇ ਕੋਈ ਦੁਸ਼ਮਣ ਨਹੀਂ, ਦੇਖੋ ਅਥੀਆ ਸ਼ੈਟੀ ਨੇ ਸੂਰਜ ਪੰਚੋਲੀ ਨਾਲ 'ਕੱਟੀ' ਕਰ ਲਈ ਸੀ ਪਰ ਸਬੱਬ ਨਾਲ ਇਸ ਹੀ ਸੂਰਜ ਨੂੰ ਮੁੜ ਬੁਲਾਉਣਾ ਪਵੇਗਾ। ਸਾਜਿਦ ਨਾਡਿਆਡਵਾਲਾ ਨੇ ਆਪਣੀ ਨਵੀਂ ਫ਼ਿਲਮ 'ਚ ਸੂਰਜ ਦੇ ਨਾਲ ਅਥੀਆ ਸ਼ੈਟੀ ਨੂੰ ਲਿਆ ਹੈ। ਸਿਰਫ਼ 26 ਸਾਲ ਦੀ ਅਥੀਆ ਨੇ ਹੁਣੇ ਜਿਹੇ ਹੀ ਸ਼ਰਧਾ ਕਪੂਰ ਨਾਲ ਦੋਸਤੀ ਪਾਈ ਹੈ ਜਾਂ ਫਿਰ ਵਰੁਣ ਧਵਨ ਨੂੰ ਉਹ ਆਪਣਾ ਖਾਸ ਮਿੱਤਰ ਮੰਨਦੀ ਹੈ। ਨਿਖਿਲ ਅਡਵਾਨੀ ਨੇ ਅਥੀਆ ਨੂੰ ਆਪਣੀ ਨਵੀਂ ਫ਼ਿਲਮ 'ਚ ਮਿੱਤਰ ਵਰੁਣ ਦੇ ਕਹਿਣ 'ਤੇ ਹੀ ਲਿਆ ਹੈ। ਅਥੀਆ ਦੀ ਮਾਂ ਮਾਨਾ ਸ਼ੈਟੀ ਅਕਸਰ ਅਥੀਆ ਦੇ ਪਹਿਰਾਵੇ ਦੀ ਦੇਖ-ਰੇਖ ਕਰਦੀ ਹੈ। ਮਾਨਾ ਦੇ ਕਹਿਣ 'ਤੇ ਅਥੀਆ ਨੇ ਆਪਣੇ ਕੰਮਕਾਰ ਦਾ ਜ਼ਿੰਮਾ ਆਪਣੇ ਨਿੱਕੇ ਵੀਰ ਨੂੰ ਸੌਂਪਿਆ ਹੈ। ਨਿਊਯਾਰਕ ਫ਼ਿਲਮ ਸੰਸਥਾ ਦੇ ਸਾਲਾਨਾ ਸਮਾਰੋਹ 'ਚ ਅਥੀਆ ਨੇ ਦੱਸਿਆ ਕਿ ਜਿਥੇ ਸਿੱਖਿਆ ਲਈ ਜਾਵੇ, ਉਸ ਸੰਸਥਾ ਲਈ ਤਨ, ਮਨ, ਧਨ ਕੁਰਬਾਨ ਕਰਨਾ ਸਿੱਖੋ। 'ਹੀਰੋ' ਗਰਲ ਅਥੀਆ ਨੇ ਹਰ ਵਾਰ ਹੀ ਆਪਣਾ ਜਨਮ ਦਿਨ ਧੂਮਧਾਮ ਨਾਲ ਮਨਾਇਆ ਹੈ। ਅਥੀਆ ਸ਼ੈਟੀ ਨੇ ਸਾਫ਼ ਕਿਹਾ ਹੈ ਕਿ ਪਿਛਲੇ ਸਾਲ ਉਸ ਨੂੰ ਦੁੱਖ ਹੀ ਮਿਲੇ, ਉਹ ਘਰ ਵਿਹਲੀ ਰਹੀ ਹੈ। ਇਸ ਤੋਂ ਉਸ ਨੇ ਬਹੁਤ ਕੁਝ ਹਾਸਲ ਕੀਤਾ ਹੈ। ਇਕ ਤਾਂ ਇਹ ਕਿ ਦੁਸ਼ਮਣ ਘੱਟ ਤੇ ਦੋਸਤ ਜ਼ਿਆਦਾ ਬਣਾਓ। ਨਵੇਂ ਸਾਲ 'ਚ ਉਹ ਆਪਣੇ ਘਰ ਵਾਲਿਆਂ ਦੀ ਸਲਾਹ ਨਾਲ ਹੀ ਪੈਰ ਪੁੱਟੇਗੀ। ਅਥੀਆ ਨੇ ਆਪਣੀ ਸਾਰੀ ਜ਼ਿੰਮੇਵਾਰੀ ਆਪਣੀ ਅੰਮੀ ਮਾਨਾ ਸ਼ੈਟੀ ਦੇ ਸਿਰ ਪਾ ਦਿੱਤੀ ਹੈ। ਅਥੀਆ ਦੇ ਨਾਲ ਭਰਾ ਅਹਾਨ ਸ਼ੈਟੀ ਹੈ। ਹੁਣ ਅਥੀਆ ਸੂਰਜ ਪੰਚੋਲੀ ਹੋਵੇ ਜਾਂ ਵਰੁਣ ਧਵਨ ਸਭ ਦਾ ਸਾਥ ਲੈ ਕੇ ਨਵੇਂ ਸਾਲ 'ਚ ਨਵਾਂ ਕੁਝ ਕਰੇਗੀ, ਜਿੰਨਾ ਨੁਕਸਾਨ ਪਿਛਲੇ ਸਾਲ ਉਸ ਦੇ ਫ਼ਿਲਮੀ ਕੈਰੀਅਰ ਦਾ ਹੋਇਆ ਹੈ, ਹੁਣ ਉਹ ਪੂਰਾ ਕਰੇਗੀ।
ਅਥੀਆ ਦੀ ਮਾਂ ਮਾਨਾ ਸ਼ੈਟੀ ਅਕਸਰ ਅਥੀਆ ਦੇ ਪਹਿਰਾਵੇ ਦੀ ਦੇਖ-ਰੇਖ ਕਰਦੀ ਹੈ। ਮਾਨਾ ਦੇ ਕਹਿਣ 'ਤੇ ਅਥੀਆ ਨੇ ਆਪਣੇ ਕੰਮਕਾਰ ਦਾ ਜ਼ਿੰਮਾ ਆਪਣੇ ਨਿੱਕੇ ਵੀਰ ਨੂੰ ਸੌਂਪਿਆ ਹੈ। ਨਿਊਯਾਰਕ ਫ਼ਿਲਮ ਸੰਸਥਾ ਦੇ ਸਾਲਾਨਾ ਸਮਾਰੋਹ 'ਚ ਅਥੀਆ ਨੇ ਦੱਸਿਆ ਕਿ ਜਿਥੇ ਸਿੱਖਿਆ ਲਈ ਜਾਵੇ, ਉਸ ਸੰਸਥਾ ਲਈ ਤਨ, ਮਨ, ਧਨ ਕੁਰਬਾਨ ਕਰਨਾ ਸਿੱਖੋ। 'ਹੀਰੋ' ਗਰਲ ਅਥੀਆ ਨੇ ਹਰ ਵਾਰ ਹੀ ਆਪਣਾ ਜਨਮ ਦਿਨ ਧੂਮਧਾਮ ਨਾਲ ਮਨਾਇਆ ਹੈ।

ਸੋਨਾਕਸ਼ੀ ਸਿਨਹਾ

ਹੋ ਜਾਊਗੀ ਬੱਲੇ-ਬੱਲੇ

ਕੰਮ ਵੇਲੇ ਇਹ ਬਹਾਨਾ ਕਿ ਇਥੇ ਮੈਂ ਸੁਰੱਖਿਅਤ ਨਹੀਂ, ਚੰਗੀ ਗੱਲ ਨਹੀਂ ਤੇ ਇਹ ਗੱਲ ਹੁਣ ਸੋਨਾਕਸ਼ੀ ਸਿਨਹਾ ਕਹਿਣ ਲੱਗ ਪਈ ਹੈ। 'ਦਬੰਗ' ਦੀ ਕਾਮਯਾਬੀ ਤੋਂ ਬਾਅਦ 'ਰਾਊਡੀ ਰਾਠੌਰ', 'ਲੁਟੇਰਾ' ਹਿਟ ਪਰ 'ਅਕੀਰਾ', 'ਨੂਰ' ਨਾਲ ਕਾਮਯਾਬੀ ਦਾ ਨੂਰ ਘਟਣ ਤੋਂ ਬਾਅਦ ਸੋਨਾ ਕਾਫ਼ੀ ਬਦਲ ਗਈ ਹੈ। ਸੋਨਾ ਨੂੰ ਬਿਲਕੁਲ ਡਰ ਨਹੀਂ ਲਗਦਾ। ਸ਼ਤਰੂ ਪਰਿਵਾਰ ਦਾ ਹੀਰਾ ਹੈ ਸੋਨਾ। ਇਸ ਸਮੇਂ ਉਹ 'ਹੈਪੀ ਭਾਗ ਜਾਏਗੀ ਰਿਟਰਨ', 'ਗੋਲਮਾਲ ਇਨ ਨਿਊਯਾਰਕ' ਫ਼ਿਲਮਾਂ ਕਰ ਰਹੀ ਹੈ। ਇਸ ਸਾਲ ਉਸ ਦੀ 'ਦਬੰਗ-3' ਵੀ ਸ਼ੁਰੂ ਹੋ ਰਹੀ ਹੈ। ਕਾਸਟਿਊਮ ਡਿਜ਼ਾਈਨ ਤੋਂ ਅਭਿਨੇਤਰੀ ਬਣਨਾ ਸੋਨਾ ਲਈ ਵਧੀਆ ਸੁਪਨਾ ਹੀ ਕਿਹਾ ਜਾਏਗਾ। ਕਦੇ 90 ਕਿੱਲੋ ਭਾਰ ਸੀ ਉਸ ਦਾ ਤੇ ਹੁਣ ਪੱਚੀਆਂ ਫੁੱਲਾਂ ਜਿੰਨਾ ਭਾਰ ਹੈ ਪੂਨਮ ਦੀ ਇਸ ਹੋਣਹਾਰ ਬੇਟੀ ਦਾ। ਭਲਾ ਹੋਵੇ ਸਲਮਾਨ ਖ਼ਾਨ ਦਾ ਜਿਸ ਦਾ ਕਿਹਾ ਮੰਨ ਕੇ ਉਸ ਨੇ ਆਪਣਾ ਭਾਰ 40 ਕਿੱਲੋ ਘਟਾ ਲਿਆ। ਅੱਜਕਲ੍ਹ 'ਵੈਬ ਸੀਰੀਜ਼' ਦਾ ਦੌਰ ਹੈ ਤੇ ਸੋਨਾ ਵੀ ਚੰਗੀ ਜਿਹੀ 'ਵੈਬ ਸੀਰੀਜ਼' ਮਿਲਣ ਤੇ ਜ਼ਰੂਰ ਕਰੇਗੀ। ਹਾਂ ਸੈੱਟ 'ਤੇ ਡਾਇਰੈਕਟਰ ਸਭ ਤੋਂ ਔਖੀ ਘੜੀ ਕੱਢਦਾ ਹੈ ਤੇ ਸੋਨਾ 'ਚ ਐਨਾ ਮਾਦਾ ਨਹੀਂ ਕਿ ਉਹ ਅਜਿਹੀ ਘੜੀ ਕੱਢ ਲਵੇ। ਇਸ ਲਈ 'ਹੈਪੀ ਭਾਗ ਜਾਏਗੀ ਰਿਟਰਨ' ਵਾਲੀ ਸੋਨਾ ਕਦੇ ਵੀ ਡਾਇਰੈਕਟਰ ਨਹੀਂ ਬਣੇਗੀ। ਹਾਂ ਨਿਰਮਾਤਰੀ ਉਹ ਜ਼ਰੂਰ ਬਣ ਸਕਦੀ ਹੈ। ਸੋਨਾ ਦੀ ਇਹ ਖੂਬੀ ਹੈ ਕਿ ਉਹ ਦੂਸਰਿਆਂ ਨੂੰ ਆਪਣਾ ਮੁਰੀਦ ਬਣਾ ਲੈਂਦੀ ਹੈ। 'ਦੇਸੀ ਜੱਟ' ਫ਼ਿਲਮ ਦੀ ਘੁੰਡ ਚੁਕਾਈ 'ਚ ਉਸ ਨੇ ਸੁਸ਼ਾਂਤ ਸਿੰਘ ਰਾਜਪੂਤ, ਡੀ.ਐਸ. ਖੂੰਡੀ ਨੂੰ ਪ੍ਰਭਾਵਿਤ ਕੀਤਾ ਆਪਣੀ ਇਸ ਕਲਾ ਨਾਲ ਤੇ ਸੋਨਾ ਨੇ ਉਥੇ ਸਾਰਿਆਂ ਨੂੰ ਆਪਣੀ ਟੈਬ ਖੋਲ੍ਹ ਕੇ ਆਪਣੇ ਵਲੋਂ ਬਣਾਏ ਰੇਖਾ ਚਿੱਤਰ ਵੀ ਦਿਖਾਏ। ਸੋਨਾਕਸ਼ੀ ਸਿਨਹਾ ਦੀ 'ਗੋਲਮਾਲ ਇਨ ਨਿਊਯਾਰਕ', 'ਦਬੰਗ-3', 'ਹੈਪੀ ਭਾਗ ਜਾਏਗੀ ਰਿਟਰਨ' ਇਹ ਤਿੰਨੇ ਫ਼ਿਲਮਾਂ 2018 'ਚ ਉਸ ਨੂੰ ਸਟਾਰ ਹੀਰੋਇਨ ਬਣਾ ਸਕਦੀਆਂ ਹਨ। ਸੋਨਾਕਸ਼ੀ ਸਿਨਹਾ ਲਈ ਜਿੰਨਾ ਮਾੜਾ 2017 ਰਿਹਾ, ਓਨਾ ਹੀ ਚੰਗਾ 2018 ਰਹੇਗਾ ਇਹ ਸੰਭਾਵਨਾ ਹੈ।

ਵਿਦਿਆ ਬਾਲਨ

ਜ਼ਿੰਦਾਦਿਲ ਢੀਠ!

'ਤੁਮਹਾਰੀ ਸੁੱਲੂ' ਹਿੱਟ ਰਹੀ ਤੇ ਇਸ ਦੇ ਹਿੱਟ ਹੋਣ 'ਤੇ ਇਸ ਫ਼ਿਲਮ ਦੇ ਗਾਣੇ 'ਬਨ ਜਾ ਤੂੰ ਮੇਰੀ ਰਾਨੀ' ਦਾ ਅਹਿਮ ਯੋਗਦਾਨ ਸੀ। ਵਿਦਿਆ ਬਾਲਨ ਦੀ ਇਸ ਹਿੱਟ ਫ਼ਿਲਮ ਦਾ ਇਹ ਗੀਤ ਗੁਰੂ ਰੰਧਾਵਾ ਨੇ ਗਾਇਆ ਸੀ। ਵਿਦਿਆ ਨੇ ਗੁਰੂ ਰੰਧਾਵਾ ਨਾਲ ਅੱਜ ਵੀ ਸੰਪਰਕ ਰੱਖਿਆ ਹੋਇਆ ਹੈ ਤੇ ਇਸ ਦਾ ਅੰਦਾਜ਼ਾ ਤਦ ਲੱਗਿਆ ਜਦ ਵਿਦਿਆ ਬਾਲਨ ਨੇ ਖਾਸ ਤੌਰ 'ਤੇ ਗੁਰੂ ਰੰਧਾਵਾ ਦੇ ਨਵੇਂ ਗੀਤ 'ਲਾਹੌਰ' ਲਈ ਆਪਣੇ ਸ਼ੁੱਭ ਵਿਚਾਰ ਦਿੱਤੇ। 'ਤੁਮਹਾਰੀ ਸੁੱਲੂ' ਦੀ ਕਾਮਯਾਬੀ ਨੇ ਐਹ ਧਾਰਨਾ ਵੀ ਗ਼ਲਤ ਸਾਬਤ ਕੀਤੀ ਕਿ ਵਿਆਹੁਤਾ ਹੀਰੋਇਨ ਕਾਮਯਾਬ ਫ਼ਿਲਮ ਨਹੀਂ ਦੇ ਸਕਦੀ। ਸਨਮਾਨਾਂ ਦੀ ਉਹ ਹਮੇਸ਼ਾ ਕਦਰ ਕਰਦੀ ਹੈ ਤੇ ਕਰਦੀ ਰਹੇਗੀ। ਇਹ ਸਹੀ ਹੈ ਕਿ ਜਿੱਤਣ ਦਾ ਆਨੰਦ ਆਉਂਦਾ ਹੈ। ਵਿਦਿਆ ਨੂੰ ਅਭਿਨੈ ਦਾ ਬਿਜਲੀ ਘਰ ਕਿਹਾ ਜਾਂਦਾ ਹੈ। ਵਿਦਿਆ ਆਪਣੇ ਪਤੀ ਸਿਧਾਰਥ ਰਾਏ ਕਪੂਰ ਦੇ ਨਿਰਮਾਣ ਦੇ ਕੰਮ 'ਚ ਕਦੇ ਵੀ ਦਖਲਅੰਦਾਜ਼ੀ ਨਹੀਂ ਕਰਦੀ। 40ਵੇਂ ਸਾਲ ਨੂੰ ਅੱਪੜ ਚੁੱਕੀ ਵਿਦਿਆ ਬਾਲਨ ਹੁਣ ਸਾੜ੍ਹੀ ਦੀ ਥਾਂ ਕੁੜਤਾ-ਪਜਾਮਾ ਪਹਿਨਣ ਨੂੰ ਆਪਣਾ ਪਸੰਦੀਦਾ ਪਹਿਰਾਵਾ ਬਣਾ ਰਹੀ ਹੈ। ਵਿਦਿਆ ਖੁੱਲ੍ਹੇਪਨ ਦੀ ਹਮੇਸ਼ਾ ਹਮਾਇਤ ਕਰਦੀ ਰਹੀ ਹੈ। ਵਿਦਿਆ ਤਾਂ ਗੱਲਾਂ ਵੀ ਮੂੰਹ 'ਤੇ ਕਰ ਦਿੰਦੀ ਹੈ। ਜਿਵੇਂ ਉਸ ਨੇ ਕਿਹਾ ਕਿ ਉਸ ਜਿਹੀ ਢੀਠ ਔਰਤ ਕੌਣ ਹੋਊ? ਉਹ ਤਾਂ ਬੇਹੱਦ ਬੇਸ਼ਰਮ ਹੀਰੋਇਨ ਹੈ? ਬੇਝਿਜਕ, ਨਿਡਰ, ਬੇਬਾਕ, ਬਿੰਦਾਸ ਤੇ ਜ਼ਿੰਦਾਦਿਲ। ਇਸੇ ਨੂੰ ਉਹ 'ਬੇਸ਼ਰਮੀ' ਆਖਦੀ ਹੈ। ਕਹਿਣ ਦਾ ਅਰਥ ਇਹ ਲੈ ਲਵੋ ਕਿ ਪਲਕਕੜ ਅਈਅਰ ਪਰਿਵਾਰ 'ਚ ਜਨਮ ਲੈਣ ਵਾਲੀ ਵਿਦਿਆ ਬਾਲਨ 'ਦਾ ਡਰਟੀ ਪਿਕਚਰ' ਹੋਵੇ ਜਾਂ 'ਤੁਮਹਾਰੀ ਸੁੱਲੂ' ਦੋ-ਤਿੰਨ ਫੇਲ੍ਹ ਫ਼ਿਲਮਾਂ ਤੋਂ ਬਾਅਦ ਇਕ ਹਿੱਟ ਫ਼ਿਲਮ ਜ਼ਰੂਰ ਦੇ ਕੇ ਆਪਣੇ ਕੈਰੀਅਰ ਦਾ ਸੰਤੁਲਨ ਵਿਗੜਨ ਨਹੀਂ ਦਿੰਦੀ। ਬੇਝਿਜਕ ਉਹ ਗੁਰੂ ਰੰਧਾਵਾ ਨਾਲ ਗੱਲਾਂ ਕਰਦੀ ਹੈ। ਬੇਬਾਕੀ ਨਾਲ ਪਤੀ ਨੂੰ ਮਸ਼ਵਰੇ ਦਿੰਦੀ ਹੈ। ਸਿਧਾਰਥ ਰਾਏ ਕਪੂਰ ਦੀ ਇਹ ਹੋਣਹਾਰ ਪਤਨੀ ਵਿਦਿਆ ਬਾਲਨ ਇਸ ਲਈ ਹੀ ਬੀ-ਟਾਊਨ ਦੀ ਰਾਣੀ ਬਣੀ ਹੋਈ ਹੈ।

ਸ਼ਰਮਨ ਜੋਸ਼ੀ : ਪੈ ਗਿਆ ਸਿੱਧੇ ਰਾਹ

ਆਪਣੇ ਸਮੇਂ ਦੇ ਕਾਮਯਾਬ ਅਭਿਨੇਤਾ ਪ੍ਰੇਮ ਚੋਪੜਾ ਦੇ ਜਵਾਈ ਸ਼ਰਮਨ ਜੋਸ਼ੀ ਨਾਲ ਵਕਤ ਨੇ ਕਈ ਖੇਡਾਂ ਖੇਡੀਆਂ ਹਨ। ਤਕੜੇ ਘਰ ਦਾ ਜਵਾਈ ਹੋਣ ਦਾ ਮਾਣ ਤਾਂ ਮਿਲਿਆ ਪਰ ਵਕਤ ਦੀ ਚੱਕੀ ਨੇ ਅਲਾਮਤਾਂ ਦਾ ਆਟਾ ਸ਼ਰਮਨ ਲਈ ਪੀਹਣਾ ਸ਼ੁਰੂ ਕੀਤਾ। ਨੌਕਰਾਣੀ ਨਾਲ ਮਾੜੀ ਕਰਤੂਤ ਦੇ ਚੱਕਰ ਨੇ ਤਾਂ ਸ਼ਰਮਨ ਜੋਸ਼ੀ ਦੀ ਬੜੀ ਖੇਹ ਉਡਾਈ। ਚਲੋ ਦੁਨੀਆਦਾਰੀ ਹੈ, ਕੁਝ ਦਾਗ਼ ਧੋ ਹੋ ਗਏ, ਰੋਟੀ-ਰੋਜ਼ੀ ਲਈ ਸ਼ਰਮਨ ਆਪਣੇ ਖੇਤਰ 'ਚ ਸਰਗਰਮ ਹੋਇਆ। ਹੁਣ ਸ਼ਰਮਨ ਦੀ ਤਮੰਨਾ ਹੈ ਕਿ 1976 ਦੀ ਹਿੱਟ 'ਦੋ ਅਨਜਾਨੇ' ਫ਼ਿਲਮ ਦੇ ਰੀਮੇਕ 'ਚ ਉਹ ਕੰਮ ਕਰੇ। 'ਸੁਪਰ ਨਾਨੀ', 'ਹੇਟ ਸਟੋਰੀ-3', 'ਵਜ੍ਹਾ ਤੁਮ ਹੋ' ਜਿਹੀਆਂ ਫ਼ਿਲਮਾਂ ਕਰ ਚੁੱਕੇ ਸ਼ਰਮਨ ਜੋਸ਼ੀ ਨੂੰ ਕੋਈ ਦੁੱਖ ਨਹੀਂ ਕਿ '102 ਨਾਟ ਆਊਟ' ਉਸ ਨੇ ਕਿਉਂ ਠੁਕਰਾਈ? ਆਖਰ ਕਿਰਦਾਰ ਵੀ ਹੋਵੇ, ਐਂਵੇਂ ਖਾਨਾਪੂਰਤੀ, ਗਿਣਤੀ ਵਧਾਉਣੀ ਇਹ ਕੰਮ ਉਹ ਨਹੀਂ ਕਰ ਸਕਦਾ। 'ਕਾਸ਼ੀ ਇਨ ਸਰਚ ਆਫ਼ ਗੰਗਾ', ਇਸ ਨਵੀਂ ਫ਼ਿਲਮ ਲਈ ਵਾਰਾਣਸੀ ਪਹੁੰਚੇ ਸ਼ਰਮਨ ਨਾਲ ਗੋਵਿੰਦ ਨਾਮਦੇਵ ਵੀ ਇਸ ਫ਼ਿਲਮ 'ਚ ਹੈ। ਸ਼ਰਮਨ ਇਸ ਫ਼ਿਲਮ 'ਚ ਗਾਈਡ ਬਣਿਆ ਹੈ। ਸ਼ਰਮਨ ਇਸ ਤੋਂ ਪਹਿਲਾਂ ਪੂਰੇ ਪਰਿਵਾਰ ਨਾਲ ਬੈਂਕਾਕ ਘੁੰਮ ਕੇ ਆਇਆ ਹੈ। ਉਸ ਦੀ ਸੱਸ ਓਮਾ ਚੋਪੜਾ ਅਨੁਸਾਰ ਸ਼ਰਮਨ ਜਿਹਾ ਜਵਾਈ ਹਰੇਕ ਨੂੰ ਮਿਲੇ, ਲੋਕ ਤਾਂ ਐਵੇਂ ਸ਼ਰੀਫ਼ ਬੰਦੇ ਨੂੰ ਬਦਨਾਮ ਕਰਦੇ ਹਨ। ਓਮਾ ਜੀ ਦੇ ਨਾਲ-ਨਾਲ ਬੈਂਕਾਕ ਘੁੰਮੇ ਸਹੁਰਾ ਜੀ ਪ੍ਰੇਮ ਚੋਪੜਾ ਵੀ ਸ਼ਰਮਨ ਜੋਸ਼ੀ ਨੂੰ 2018 ਦਾ ਸਟਾਰ ਹੀਰੋ ਕਹਿੰਦੇ ਸੁਣੇ ਗਏ। 'ਕਾਸ਼ੀ ਇਨ ਸਰਚ ਆਫ਼ ਗੰਗਾ' 'ਤੇ ਸਾਰਾ ਧਿਆਨ ਇਸ ਸਮੇਂ ਦੇ ਰਹੇ ਸ਼ਰਮਨ ਜੋਸ਼ੀ ਨੇ ਅਪਨਾ ਪੰਜਾਬ ਇੰਟਰਟੇਨਮੈਂਟ ਦੀ ਲਾਚਿੰਗ ਤੇ ਤਮਾਮ ਯੂਨਿਟ ਨੂੰ ਸ਼ੁੱਭ-ਕਾਮਨਾਵਾਂ ਦਿੰਦੇ ਹੋਏ ਆਪਣੇ ਦਿਲ ਦੀ ਗੱਲ ਦੱਸੀ ਕਿ '102 ਨਾਟ ਆਊਟ' ਦੀ ਕਸਰ 'ਕਾਸ਼ੀ ਇਨ ਸਰਚ ਆਫ਼ ਗੰਗਾ' ਕੱਢ ਦੇਵੇਗੀ। 'ਦੋ ਅਨਜਾਨੇ' ਦਾ ਰੀਮੇਕ ਜਿਸ ਦਿਨ ਬਣ ਗਿਆ ਸਮਝੋ ਸ਼ਰਮਨ ਜੋਸ਼ੀ ਰਾਤੋ-ਰਾਤ ਸਟਾਰ ਨਾਇਕ ਬਣ ਜਾਵੇਗਾ।


-ਸੁਖਜੀਤ ਕੌਰ

ਬੇਟੀ ਆਲੀਆ ਦਾ ਇੰਤਜ਼ਾਰ ਕਰ ਰਹੇ ਹਨ ਮਹੇਸ਼ ਭੱਟ

ਸੰਤਾਨ ਜਦੋਂ ਆਪਣੇ ਪੈਰਾਂ 'ਤੇ ਖੜ੍ਹੀ ਹੋ ਜਾਵੇ ਤਾਂ ਮਾਂ-ਬਾਪ ਨੂੰ ਖ਼ੁਸ਼ੀ ਹੁੰਦੀ ਹੈ। ਇਸ ਤਰ੍ਹਾਂ ਦੀ ਖ਼ੁਸ਼ੀ ਪਿਤਾ ਮਹੇਸ਼ ਭੱਟ ਨੂੰ ਉਦੋਂ ਹੋਈ ਸੀ ਜਦੋਂ ਬੇਟੀ ਆਲੀਆ ਭੱਟ ਦੀ ਪਹਿਲੀ ਹੀ ਫ਼ਿਲਮ 'ਸਟੂਡੈਂਟ ਆਫ਼ ਦ ਯਿਅਰ' ਹਿੱਟ ਹੋ ਗਈ ਸੀ ਅਤੇ ਦੇਖਦੇ ਹੀ ਦੇਖਦੇ ਉਹ ਸਟਾਰ ਬਣ ਗਈ ਸੀ। ਬੇਟੀ ਦੀ ਇਹੀ ਸਫ਼ਲਤਾ ਹੁਣ ਪਿਤਾ ਲਈ ਚਿੰਤਾ ਦਾ ਕਾਰਨ ਬਣ ਗਈ ਹੈ।
ਹੋਇਆ ਇੰਝ ਕਿ ਮਹੇਸ਼ ਭੱਟ ਨੇ ਨਿਰਮਾਤਾ ਦੇ ਤੌਰ 'ਤੇ ਆਪਣੀ ਹੀ ਫ਼ਿਲਮ 'ਸੜਕ' ਦਾ ਵਿਸਥਾਰ ਬਣਾਉਣ ਦੀ ਯੋਜਨਾ ਬਣਾਈ ਅਤੇ ਇਸ ਲਈ ਆਲੀਆ ਭੱਟ ਦੇ ਨਾਲ ਸਿਧਾਰਥ ਮਲਹੋਤਰਾ ਨੂੰ ਫਾਈਨਲ ਕਰ ਲਿਆ। ਮਹੇਸ਼ ਭੱਟ ਨੂੰ ਲਗਦਾ ਸੀ ਕਿ ਹੀਰੋਇਨ ਤਾਂ ਘਰ ਦੀ ਹੀ ਹੈ। ਸੋ, ਉਹ ਜਲਦੀ ਹੀ ਇਹ ਫ਼ਿਲਮ ਸ਼ੁਰੂ ਕਰ ਦੇਣਗੇ। ਪਰ ਇਥੇ ਆਲੀਆ ਦੇ ਰੁਝੇਵੇਂ ਉਨ੍ਹਾਂ ਦੇ ਰਸਤੇ ਵਿਚ ਆ ਗਏ।
ਇਨ੍ਹੀਂ ਦਿਨੀਂ ਆਲੀਆ ਫ਼ਿਲਮ 'ਬ੍ਰਹਮਅਸਤਰ' ਦੀ ਸ਼ੂਟਿੰਗ ਵਿਚ ਰੁੱਝੀ ਹੋਈ ਹੈ ਅਤੇ ਇਸ ਦੀ ਸ਼ੂਟਿੰਗ ਇਜ਼ਰਾਈਲ ਵਿਚ ਕੀਤੀ ਜਾ ਰਹੀ ਹੈ। ਉਥੋਂ ਵਾਪਸ ਆ ਕੇ ਆਲੀਆ ਫ਼ਿਲਮ 'ਰਾਜ਼ੀ' ਦੇ ਪ੍ਰਮੋਸ਼ਨ ਵਿਚ ਰੁੱਝ ਜਾਵੇਗੀ ਅਤੇ ਫਿਰ ਨਿਰਦੇਸ਼ਿਕਾ ਜ਼ੋਇਆ ਅਖ਼ਤਰ ਉਸ ਨੂੰ ਲੈ ਕੇ 'ਗਲੀ ਬੁਆਏ' ਦੀ ਸ਼ੂਟਿੰਗ ਸ਼ੁਰੂ ਕਰ ਦੇਵੇਗੀ। ਇਸ ਤਰ੍ਹਾਂ 'ਸੜਕ-2' ਨੂੰ ਸ਼ੁਰੂ ਕਰਨ ਲਈ ਮਹੇਸ਼ ਭੱਟ ਨੂੰ ਚੰਗਾ ਇੰਤਜ਼ਾਰ ਕਰਨਾ ਪਵੇਗਾ।
ਜਿਥੋਂ ਤਕ 'ਸੜਕ-2' ਦੀ ਕਹਾਣੀ ਦਾ ਸਵਾਲ ਹੈ ਤਾਂ ਇਸ ਦੀ ਕਹਾਣੀ ਉਥੋਂ ਸ਼ੁਰੂ ਹੋਵੇਗੀ ਜਿਥੇ ਅਸਲੀ ਦੀ ਕਹਾਣੀ ਖ਼ਤਮ ਹੋਈ ਸੀ। ਇਥੇ ਇਹ ਦਿਖਾਇਆ ਜਾਵੇਗਾ ਕਿ 'ਸੜਕ' ਦੇ ਕਿਰਦਾਰ ਰਵੀ (ਸੰਜੈ ਦੱਤ) ਅਤੇ ਪੂਜਾ (ਪੂਜਾ ਭੱਟ) ਦੇ ਨਾਲ ਕੀ ਕੁਝ ਵਾਪਰ ਜਾਂਦਾ ਹੈ ਅਤੇ ਫਿਰ ਇਥੋਂ ਹੀ ਕਹਾਣੀ ਨੂੰ ਅੱਗੇ ਵਧਾਇਆ ਜਾਵੇਗਾ।
ਮਹੇਸ਼ ਭੱਟ 'ਸੜਕ-2' ਨੂੰ ਜਲਦੀ ਬਣਾਉਣਾ ਚਾਹੁੰਦੇ ਹਨ ਪਰ ਆਲੀਆ ਭੱਟ ਦੇ ਰੁਝੇਵੇਂ ਹੀ ਇਸ 'ਸੜਕ' ਦੇ ਅੱਗੇ ਸਪੀਡ ਬ੍ਰੇਕਰ ਸਾਬਤ ਹੋ ਰਹੇ ਹਨ।


-ਇੰਦਰਮੋਹਨ ਪੰਨੂੰ

ਰਿਚਾ ਚੱਢਾ

ਪਾਰੋ ਨੂੰ ਫਿਕਰ ਲੋਕਾਂ ਦੀ

ਪਿਆਰ ਦੀ ਮੂਰਤ ਹੈ ਰਿਚਾ ਚੱਢਾ। ਆਪਣੀ ਇਹ 'ਭੋਲੀ ਪੰਜਾਬਣ' ਤੇ ਪ੍ਰੇਮੀਆਂ ਦੇ ਖਾਸ ਦਿਨ 2018 ਦਾ 'ਵੈਲੇਨਟਾਈਨ ਡੇ' ਰਿਚਾ ਚੱਢਾ ਦੇ ਨਾਂਅ ਹੋਏਗਾ ਕਿਉਂਕਿ ਸੁਧੀਰ ਮਿਸ਼ਰਾ ਦੀ ਫ਼ਿਲਮ 'ਦਾਸਦੇਵ' ਇਸ ਹਫ਼ਤੇ ਹੀ ਰਿਲੀਜ਼ ਹੋਏਗੀ। ਇਸ ਲੋਹੜੀ 'ਤੇ ਰਿਚਾ ਸਭ ਨੂੰ ਦੱਸੇਗੀ ਕਿ 16 ਫਰਵਰੀ ਵਾਲੇ ਦਿਨ 'ਪਾਰੋ' ਬਣ ਕੇ ਉਹ 'ਦੇਵਦਾਸ' ਦੇ ਅਗਲੇ ਹਿੱਸੇ ਫ਼ਿਲਮ 'ਦਾਸਦੇਵ' 'ਚ ਆ ਰਹੀ ਹੈ। ਤਿਆਰ ਰਹੋ ਇਸ 'ਤੇ ਆਪਣੇ ਪ੍ਰਤੀਕਰਮ ਦੇਣ ਲਈ। ਰਾਹੁਲ ਭੱਟ, ਅਦਿਤੀ ਰਾਓ ਹੈਦਰੀ ਵੀ ਇਸ ਫ਼ਿਲਮ 'ਚ ਰਿਚਾ ਦੇ ਨਾਲ ਹਨ। ਸ਼ਰਤ ਚੰਦਰ ਦੇ ਨਾਵਲ 'ਤੇ ਬਣੀ 'ਦਾਸਦੇਵ' ਸਬੰਧੀ ਰਿਚਾ ਉਤਸ਼ਾਹਿਤ ਹੈ। ਰਿਚਾ ਭੋਲੀ ਪੰਜਾਬਣ ਹੈ ਤੇ ਉਹ ਹਰ ਗੱਲ ਖਰੀ ਕਰਦੀ ਹੈ, ਚਾਹੇ ਬਾਅਦ 'ਚ ਉਸ ਗੱਲ 'ਤੇ ਬਖੇੜੇ ਹੀ ਪੈਦਾ ਹੋ ਜਾਣ। ਰਿਚਾ ਚੱਢਾ 'ਆਧਾਰ ਕਾਰਡ' ਕਰਕੇ ਸਰਕਾਰ ਨਾਲ ਨਾਰਾਜ਼ ਹੈ। ਫੋਨ ਨਾਲ ਆਧਾਰ ਲਿੰਕ ਕਰਨ ਲਈ ਮਜਬੂਰ ਕਰਨਾ ਕਿਧਰ ਦਾ ਜਿਊਣ ਦਾ ਅਧਿਕਾਰ ਹੈ। ਰਿਚਾ ਸਿੱਧਾ ਕਹਿ ਰਹੀ ਹੈ ਕਿ ਵਿਚਾਰੇ ਕਾਰਗਿਲ ਦੇ ਸ਼ਹੀਦ ਦੀ ਘਰਵਾਲੀ 'ਆਧਾਰ ਕਾਰਡ' ਨਾ ਹੋਣ ਕਾਰਨ ਦੁਨੀਆ ਤੋਂ ਤੁਰ ਗਈ। ਢੱਠੇ ਖੂਹ 'ਚ ਜਾਣ ਇਹੋ ਜਿਹੇ 'ਆਧਾਰ ਕਾਰਡ', ਤੇ ਰਿਚਾ ਨੇ ਸਰਕਾਰ ਨੂੰ ਘੇਰਨ ਦੇ ਨਾਲ-ਨਾਲ ਕਈ ਵਾਰ ਵਿਦੇਸ਼ ਮੰਤਰੀ ਸੁਸ਼ਮਾ ਸਵਰਾਜ ਨਾਲ ਸੰਪਰਕ ਕਰਕੇ ਦਰਸਾਇਆ ਹੈ ਕਿ 'ਭੋਲੀ ਪੰਜਾਬਣ' ਸਮਾਜ ਲਈ ਵੀ ਸਰਗਰਮ ਹੈ। ਪਾਰੋ ਇਕੱਲੇ 'ਦੇਵਦਾਸ' ਜਾਂ 'ਦਾਸਦੇਵ' ਹੀ ਨਹੀਂ ਬਣਾਉਂਦੀ ਬਲਕਿ ਸਮਾਜ ਦੇ ਜ਼ਰੂਰੀ ਮੁੱਦਿਆਂ 'ਤੇ ਵੀ ਸਰਕਾਰ ਨੂੰ ਉਸ ਦੇ ਫ਼ਰਜ਼ਾਂ ਦਾ ਅਹਿਸਾਸ ਕਰਵਾਉਂਦੀ ਹੈ। ਰਿਚਾ ਨੇ ਔਰਤ ਸ਼ੋਸ਼ਣ ਦੇ ਮਾਮਲੇ 'ਤੇ ਕਿਹਾ ਹੈ ਕਿ ਜੇ ਉਹ ਬੋਲ ਪਈ ਤਾਂ ਇਸ ਇੰਡਸਟਰੀ ਦੇ ਸਟਾਰ ਹੀਰੋ ਸ਼ਰਾਫ਼ਤ ਦੇ ਚੋਲੇ 'ਚੋਂ ਬਾਹਰ ਆ ਜਾਣਗੇ। ਇਸ ਲਈ ਚੁੱਪ ਹੀ ਭਲੀ।

ਰਾਣੀ ਦੀ ਹਿਚਕੀ

ਸਾਲ 2014 ਵਿਚ ਆਦਿਤਿਆ ਚੋਪੜਾ ਨਾਲ ਵਿਆਹ ਕਰਵਾਉਣ ਤੋਂ ਬਾਅਦ ਰਾਣੀ ਮੁਖਰਜੀ ਨੇ ਵਿਆਹੁਤਾ ਜ਼ਿੰਦਗੀ ਦੇ ਰੁਝੇਵਿਆਂ ਦੇ ਚਲਦਿਆਂ ਅਭਿਨੈ ਤੋਂ ਦੂਰੀ ਬਣਾ ਲਈ ਸੀ। ਹੁਣ ਨਿਰਦੇਸ਼ਕ ਸਿਧਾਰਥ ਮਲਹੋਤਰਾ ਦੀ 'ਹਿਚਕੀ' ਰਾਹੀਂ ਉਹ ਅਭਿਨੈ ਵਿਚ ਆਪਣੀ ਵਾਪਸੀ ਕਰ ਰਹੀ ਹੈ। ਅੰਗਰੇਜ਼ੀ ਫ਼ਿਲਮ 'ਫਰੰਟ ਆਫ਼ ਦ ਕਲਾਸ' ਤੋਂ ਪ੍ਰੇਰਿਤ ਇਸ ਫ਼ਿਲਮ ਵਿਚ ਇਸ ਤਰ੍ਹਾਂ ਦੀ ਅਧਿਆਪਕਾ ਦੀ ਕਹਾਣੀ ਪੇਸ਼ ਕੀਤੀ ਗਈ ਹੈ ਜੋ ਹਿਚਕੀ ਤੋਂ ਪੀੜਤ ਹੈ।
ਨਇਨਾ ਮਾਥੁਰ (ਰਾਣੀ ਮੁਖਰਜੀ) ਦਾ ਸੁਪਨਾ ਹੈ ਕਿ ਉਹ ਸਕੂਲ ਅਧਿਆਪਕਾ ਬਣ ਕੇ ਭਵਿੱਖ ਸੰਵਾਰੇ। ਪਰ ਨਇਨਾ ਲਈ ਮੁਸ਼ਕਿਲ ਇਹ ਹੈ ਕਿ ਉਹ ਹਿਚਕੀ ਤੋਂ ਪੀੜਤ ਹੈ ਅਤੇ ਉਹ ਹਿਚਕੀ ਵੀ ਅਜੀਬ ਢੰਗ ਨਾਲ ਲੈਂਦੀ ਹੈ। ਇਸ ਵਜ੍ਹਾ ਕਰਕੇ ਉਹ ਕਈ ਵਾਰ ਮਜ਼ਾਕ ਦਾ ਨਿਸ਼ਾਨਾ ਵੀ ਬਣੀ ਹੈ। ਉਹ ਅਧਿਆਪਕਾ ਦੀ ਨੌਕਰੀ ਲਈ ਇਕ ਨਾਮੀ ਸਕੂਲ ਵਿਚ ਬੇਨਤੀ ਪੱਤਰ ਦਿੰਦੀ ਹੈ ਪਰ ਹਿਚਕੀ ਦੀ ਵਜ੍ਹਾ ਕਰਕੇ ਉਸ ਨੂੰ ਨੌਕਰੀ ਦੇ ਲਾਇਕ ਨਹੀਂ ਮੰਨਿਆ ਜਾਂਦਾ। ਰਾਈਟ ਟੂ ਐਜੂਕੇਸ਼ਨ ਸਕੀਮ ਤਹਿਤ ਉਸ ਸਕੂਲ ਵਿਚ 14 ਗ਼ਰੀਬ ਬੱਚਿਆਂ ਨੂੰ ਦਾਖਲਾ ਦਿੱਤਾ ਗਿਆ ਹੁੰਦਾ ਹੈ। ਨਇਨਾ ਨੂੰ ਉਨ੍ਹਾਂ ਬੱਚਿਆਂ ਨੂੰ ਪੜ੍ਹਾਉਣ ਦੀ ਜ਼ਿੰਮੇਵਾਰੀ ਸੌਂਪੀ ਜਾਂਦੀ ਹੈ। ਬੱਚਿਆਂ ਨਾਲ ਸਾਹਮਣਾ ਹੋਣ ਤੋਂ ਬਾਅਦ ਨਇਨਾ ਨੂੰ ਅਨੁਭਵ ਹੁੰਦਾ ਹੈ ਕਿ ਉਨ੍ਹਾਂ ਬੱਚਿਆਂ ਵਿਚ ਅਨੁਸ਼ਾਸਨ ਨਾਂਅ ਦੀ ਕੋਈ ਚੀਜ਼ ਨਹੀਂ ਹੈ ਅਤੇ ਉਹ ਬੱਚੇ ਵੀ ਨਇਨਾ ਤੇ ਉਸ ਦੀ ਹਿਚਕੀ ਦਾ ਮਜ਼ਾਕ ਉਡਾਉਂਦੇ ਹਨ। ਪਰ ਨਇਨਾ ਹਿੰਮਤ ਨਹੀਂ ਹਾਰਦੀ ਹੈ ਅਤੇ ਉਹ ਕਿਸ ਤਰ੍ਹਾਂ ਬੱਚਿਆਂ ਨੂੰ ਸਿੱਖਿਆ ਦੇ ਕੇ ਉਨ੍ਹਾਂ ਨੂੰ ਸਮਾਜ ਦੀ ਮੁੱਖਧਾਰਾ ਦੇ ਨਾਲ ਜੋੜਨ ਵਿਚ ਕਾਮਯਾਬ ਹੁੰਦੀ ਹੈ, ਇਹ ਇਸ ਦੀ ਕਹਾਣੀ ਹੈ।
ਇਹ ਪੂਰੀ ਫ਼ਿਲਮ ਰਾਣੀ ਮੁਖਰਜੀ ਦੇ ਮੋਢਿਆਂ 'ਤੇ ਹੈ ਅਤੇ ਇਹੀ ਵਜ੍ਹਾ ਹੈ ਕਿ ਇਥੇ ਰਾਣੀ ਦੇ ਨਾਲ ਕੋਈ ਵੱਡਾ ਸਟਾਰ ਨਹੀਂ ਹੈ। ਰਾਣੀ ਦੀ ਪਿਛਲੀ ਫ਼ਿਲਮ 'ਮਰਦਾਨੀ' ਵਿਚ ਵੀ ਫ਼ਿਲਮ ਦਾ ਦਾਰੋਮਦਾਰ ਉਸੇ 'ਤੇ ਸੀ। ਇਥੇ ਰਾਣੀ ਵਲੋਂ ਜੋ ਭੂਮਿਕਾ ਨਿਭਾਈ ਗਈ ਹੈ, ਉਸ ਤਰ੍ਹਾਂ ਦੀ ਪਹਿਲਾਂ ਕਿਸੇ ਕਮਰਸ਼ੀਅਲ ਫ਼ਿਲਮ ਵਿਚ ਕਿਸੇ ਹੀਰੋਇਨ ਵਲੋਂ ਨਹੀਂ ਨਿਭਾਈ ਗਈ। ਇਸ ਨੂੰ ਦੇਖ ਕੇ ਕਹਿਣਾ ਹੋਵੇਗਾ ਕਿ ਇਹ ਚੁਣੌਤੀਪੂਰਨ ਭੂਮਿਕਾ ਰਾਹੀਂ ਉਹ ਆਪਣੀ ਵਾਪਸੀ ਕਰ ਰਹੀ ਹੈ। ਰਾਣੀ ਦੇ ਨਾਲ ਇਸ ਵਿਚ ਹਰਸ਼ ਮਾਇਰ, ਸੁਪ੍ਰੀਆ ਪਿਲਗਾਓਂਕਰ, ਸ਼ਿਵ ਸੁਬ੍ਰਮਣੀਅਮ, ਨੀਰਜ ਕਬੀ, ਆਸਿਫ਼ ਬਸਰਾ ਅਤੇ ਇਵਾਨ ਰੋਡ੍ਰਿਗਸ ਨੇ ਅਭਿਨੈ ਕੀਤਾ ਹੈ।

'ਜੀਨੀਅਸ' ਇਸ਼ਿਤਾ ਚੌਹਾਨ

ਪਹਿਲਾਂ ਦਿਵਿਆ ਖੋਸਲਾ ਤੇ ਉਰਵਸ਼ੀ ਰੌਤੇਲਾ ਨੂੰ ਫ਼ਿਲਮਾਂ ਵਿਚ ਮੌਕਾ ਦੇਣ ਵਾਲੇ ਨਿਰਦੇਸ਼ਕ ਅਨਿਲ ਸ਼ਰਮਾ ਹੁਣ ਆਪਣੀ ਅਗਾਮੀ ਫ਼ਿਲਮ 'ਜੀਨੀਅਸ' ਵਿਚ ਇਕ ਹੋਰ ਹੀਰੋਇਨ ਨੂੰ ਮੌਕਾ ਦੇ ਰਹੇ ਹਨ ਅਤੇ ਇਹ ਹੈ ਇਸ਼ਿਤਾ ਚੌਹਾਨ। 'ਜੀਨੀਅਸ' ਰਾਹੀਂ ਅਨਿਲ ਸ਼ਰਮਾ ਆਪਣੇ ਬੇਟੇ ਉਤਕਰਸ਼ ਨੂੰ ਲਾਂਚ ਕਰ ਰਹੇ ਹਨ। ਉਹ ਬੇਟੇ ਦੇ ਸਾਹਮਣੇ ਨਵੀਂ ਹੀਰੋਇਨ ਚਾਹੁੰਦੇ ਸਨ। ਸੋ, ਕਈ ਸੌ ਨਵੇਂ ਚਿਹਰੇ ਦੇਖਣ ਤੋਂ ਬਾਅਦ ਉਨ੍ਹਾਂ ਨੇ ਇਸ਼ਿਤਾ ਨੂੰ ਫਾਈਨਲ ਕਰ ਲਿਆ। ਵਰਣਨਯੋਗ ਗੱਲ ਇਹ ਹੈ ਕਿ ਜਿਥੇ ਉਤਕਰਸ਼ ਨੇ ਬਾਲ ਕਲਾਕਾਰ ਦੇ ਤੌਰ 'ਤੇ 'ਗ਼ਦਰ' ਵਿਚ ਕੰਮ ਕੀਤਾ ਸੀ, ਉਥੇ ਇਸ਼ਿਤਾ ਨੇ ਬਾਲ ਕਲਾਕਾਰ ਦੇ ਰੂਪ ਵਿਚ 'ਆਪ ਕੇ ਸੁਰੂਰ' ਵਿਚ ਕੰਮ ਕੀਤਾ ਸੀ। ਭਾਵ 'ਜੀਨੀਅਸ' ਦੇ ਦੋ ਬਾਲ ਕਲਾਕਾਰਾਂ ਨੂੰ ਨਾਇਕ-ਨਾਇਕਾ ਦੇ ਤੌਰ 'ਤੇ ਚਮਕਾਇਆ ਜਾ ਰਿਹਾ ਹੈ। ਖ਼ੁਦ ਨੂੰ ਮਿਲੇ ਇਸ ਮੌਕੇ ਤੋਂ ਇਸ਼ਿਤਾ ਕਾਫੀ ਖੁਸ਼ ਹੈ ਅਤੇ ਉਸ ਦਾ ਕਹਿਣਾ ਹੈ ਕਿ ਉਹ ਜਿਸ ਮੌਕੇ ਦੀ ਭਾਲ ਵਿਚ ਸੀ, ਉਹ ਉਸ ਨੂੰ ਮਿਲ ਗਿਆ ਹੈ। ਉਮੀਦ ਹੈ ਕਿ 'ਗ਼ਦਰ' ਦੇ ਨਿਰਦੇਸ਼ਕ ਵਲੋਂ ਪੇਸ਼ ਕੀਤੀ ਜਾ ਰਹੀ ਇਹ ਜੋੜੀ ਟਿਕਟ ਖਿੜਕੀ 'ਤੇ ਗ਼ਦਰ ਮਚਾ ਦੇਣ ਵਿਚ ਕਾਮਯਾਬ ਹੋਵੇਗੀ।


-ਪੰਨੂੰ

ਨਵੀਂ ਫ਼ਿਲਮ 'ਜਾਨੇ ਕਿਉਂ ਦੇ ਯਾਰੋਂ'

ਆਪਣੇ ਗਾਡ ਫਾਦਰ ਦੇਵ ਆਨੰਦ ਦੇ ਪੈਰ ਚਿੰਨ੍ਹਾਂ 'ਤੇ ਚਲਦੇ ਹੋਏ ਅਦਾਕਾਰ ਤੋਂ ਨਿਰਦੇਸ਼ਕ ਬਣ ਗਏ ਹਨ ਅਤੇ ਉਨ੍ਹਾਂ ਵਲੋਂ ਨਿਰਦੇਸ਼ਿਤ ਕੀਤੀ ਗਈ ਫ਼ਿਲਮ ਦਾ ਨਾਂਅ ਹੈ 'ਜਾਨੇ ਕਿਉਂ ਦੇ ਯਾਰੋਂ'।
ਫ਼ਿਲਮ ਵਿਚ ਦੋ ਇਸ ਤਰ੍ਹਾਂ ਦੇ ਦੋਸਤਾਂ ਦੀ ਕਹਾਣੀ ਪੇਸ਼ ਕੀਤੀ ਗਈ ਹੈ, ਜੋ ਸੰਗੀਤ ਦੀ ਦੁਨੀਆ ਵਿਚ ਨਾਂਅ ਕਮਾਉਣ ਦੀ ਇੱਛਾ ਪਾਲੀ ਬੈਠੇ ਹੁੰਦੇ ਹਨ। ਸੰਘਰਸ਼ ਦੇ ਦੌਰ ਦੌਰਾਨ ਦੋਵੇਂ ਇਕ ਫ਼ਿਲਮੀ ਪਾਰਟੀ ਵਿਚ ਜਾਂਦੇ ਹਨ ਤਾਂ ਕਿ ਜਾਣ-ਪਛਾਣ ਵਧੇ ਅਤੇ ਕੁਝ ਕੰਮ ਮਿਲ ਜਾਵੇ। ਉਹ ਪਾਰਟੀ ਤੋਂ ਵਾਪਸ ਆ ਰਹੇ ਹੁੰਦੇ ਹਨ ਕਿ ਪੁਲਿਸ ਚੈਕਿੰਗ ਦੌਰਾਨ ਪੁਲਿਸ ਦੇ ਹੱਥੇ ਚੜ੍ਹ ਜਾਂਦੇ ਹਨ ਅਤੇ ਪੁਲਿਸ ਉਨ੍ਹਾਂ ਨੂੰ ਸ਼ਰਾਬ ਪੀ ਕੇ ਮੋਟਰ ਸਾਈਕਲ ਚਲਾਉਣ ਦੇ ਦੋਸ਼ ਵਿਚ ਗ੍ਰਿਫ਼ਤਾਰ ਕਰ ਲੈਂਦੀ ਹੈ। ਇਨ੍ਹਾਂ ਦੋਵਾਂ ਨੌਜਵਾਨਾਂ ਨੂੰ ਬਾਅਦ ਵਿਚ ਪਤਾ ਲੱਗਦਾ ਹੈ ਕਿ ਕਿਸ ਤਰ੍ਹਾਂ ਸ਼ਰਾਬ ਪੀ ਕੇ ਗੱਡੀ ਚਲਾਉਣ ਦੇ ਦੋਸ਼ ਵਿਚ ਕਾਨੂੰਨ ਦੀ ਵਰਤੋਂ ਕਰਕੇ ਨਿਰਦੋਸ਼ ਲੋਕਾਂ ਤੋਂ ਪੈਸੇ ਮੰਗਣ ਦਾ ਜਾਲ ਵਿਛਾਇਆ ਜਾ ਰਿਹਾ ਹੈ। ਉਹ ਇਸ ਭ੍ਰਿਸ਼ਟ ਤੰਤਰ ਖਿਲਾਫ਼ ਲੜਨ ਦਾ ਕਦਮ ਚੁੱਕਦੇ ਹਨ ਅਤੇ ਇਹ ਲੜਾਈ ਉਨ੍ਹਾਂ ਨੂੰ ਕਿੱਥੇ ਲੈ ਜਾਂਦੀ ਹੈ, ਇਹ ਇਸ ਦੀ ਕਹਾਣੀ ਹੈ।

ਸੁਸ਼ਾਂਤ ਸਿੰਘ ਹੁਣ ਡਾਕੂ ਦੀ ਭੂਮਿਕਾ ਵਿਚ

'ਉੜਤਾ ਪੰਜਾਬ' ਵਾਲੇ ਨਿਰਦੇਸ਼ਕ ਅਭਿਸ਼ੇਕ ਚੌਬੇ ਨੇ ਹੁਣ ਡਾਕੂ 'ਤੇ ਆਧਾਰਿਤ ਫ਼ਿਲਮ ਬਣਾਉਣ ਦਾ ਐਲਾਨ ਕੀਤਾ ਹੈ ਅਤੇ ਸੁਸ਼ਾਂਤ ਸਿੰਘ ਰਾਜਪੂਤ ਇਸ ਵਿਚ ਡਾਕੂ ਦੀ ਭੂਮਿਕਾ ਨਿਭਾਉਣਗੇ। ਫ਼ਿਲਮ ਦੀ ਜ਼ਿਆਦਾਤਰ ਸ਼ੂਟਿੰਗ ਚੰਬਲ ਦੀ ਘਾਟੀ ਵਿਚ ਕੀਤੀ ਜਾਵੇਗੀ ਅਤੇ ਇਸ ਦੇ ਸੰਵਾਦਾਂ ਵਿਚ ਬੁੰਦੇਲਖੰਡ ਵਾਲਾ ਟੱਚ ਰੱਖਿਆ ਜਾਵੇਗਾ।
ਇਸ ਭੂਮਿਕਾ ਲਈ ਸੁਸ਼ਾਂਤ ਵਲੋਂ ਪਹਿਲਾਂ ਹੀ ਤਿਆਰੀਆਂ ਸ਼ੁਰੂ ਕਰ ਦਿੱਤੀਆਂ ਗਈਆਂ ਹਨ। ਸਭ ਤੋਂ ਪਹਿਲਾ ਕੰਮ ਤਾਂ ਉਨ੍ਹਾਂ ਨੇ ਕਸਰਤ ਕਰਨੀ ਛੱਡ ਦਿੱਤੀ ਹੈ। ਫ਼ਿਲਮ ਦੀ ਕਹਾਣੀ 1970 ਦੇ ਸਮੇਂ ਦੀ ਹੈ ਅਤੇ ਉਦੋਂ ਸਿਕਸ ਪੈਕਸ ਐਬਸ ਦਾ ਰਿਵਾਜ਼ ਨਹੀਂ ਸੀ। ਇਸ ਵਜ੍ਹਾ ਕਰਕੇ ਸੁਸ਼ਾਂਤ ਨੇ ਆਪਣੇ ਮਸਲਾਂ ਤੋਂ ਨਿਜਾਤ ਪਾਉਣ ਦਾ ਨਿਰਣਾ ਲਿਆ ਹੈ।
ਫ਼ਿਲਮ ਵਿਚ ਭੂਮੀ ਪੇਡਣੇਕਰ ਵੀ ਹੈ ਅਤੇ ਉਹ ਵੀ ਡਾਕੂ ਦੀ ਭੂਮਿਕਾ ਵਿਚ ਹੈ। ਇਨ੍ਹਾਂ ਨਾਲ ਇਸ ਵਿਚ ਮਨੋਜ ਵਾਜਪਈ ਵੀ ਹੈ। ਅਗਾਮੀ 21 ਜਨਵਰੀ ਨੂੰ ਸੁਸ਼ਾਂਤ ਦਾ ਜਨਮ ਦਿਨ ਹੈ ਅਤੇ ਉਹ ਇਸ ਗੱਲ ਨੂੰ ਲੈ ਕੇ ਰੋਮਾਂਚਿਤ ਹੈ ਕਿ ਸ਼ਹਿਰੀ ਸ਼ੋਰ-ਸ਼ਰਾਬੇ ਤੋਂ ਦੂਰ ਚੰਬਲ ਦੀ ਘਾਟੀ ਵਿਚ ਉਹ ਆਪਣਾ ਜਨਮ ਦਿਨ ਮਨਾਉਣਗੇ।

ਚੌਵੀ ਸਾਲ ਬਾਅਦ ਦੀਪਿਕਾ ਦੀ ਵਾਪਸੀ

ਅੱਜ ਜਿਥੇ ਦੀਪਿਕਾ ਪਾਦੂਕੋਨ ਦੇ ਨਾਂਅ ਦੇ ਡੰਕੇ ਚਾਰੇ ਪਾਸੇ ਵੱਜ ਰਹੇ ਹਨ, ਉਥੇ ਤਕਰੀਬਨ ਤੀਹ ਸਾਲ ਪਹਿਲਾਂ ਇਕ ਹੋਰ ਦੀਪਿਕਾ ਦੇ ਨਾਂਅ ਦੇ ਡੰਕੇ ਵੱਜਿਆ ਕਰਦੇ ਸਨ। ਲੋਕਾਂ ਵਿਚ ਇਸ ਦੀਪਿਕਾ ਪ੍ਰਤੀ ਇਸ ਤਰ੍ਹਾਂ ਦੀ ਦੀਵਾਨਗੀ ਸੀ ਕਿ ਉਹ ਜਿਥੇ ਕਿਤੇ ਜਾਂਦੀ, ਲੋਕ ਉਸ ਦੇ ਪੈਰ ਛੂਹਣ ਲੱਗ ਜਾਂਦੇ ਸਨ। ਇਹ ਸੀ ਦੀਪਿਕਾ ਚੀਖਲੀਆ ਜੋ ਰਾਮਾਨੰਦ ਸਾਗਰ ਦੇ ਲੜੀਵਾਰ 'ਰਾਮਾਇਣ' ਵਿਚ ਸੀਤਾ ਬਣੀ ਸੀ। ਹਾਲਾਂਕਿ ਆਪਣੇ ਦੌਰ ਵਿਚ ਦੀਪਿਕਾ ਨੇ 'ਸੁਨ ਮੇਰੀ ਲੈਲਾ', 'ਪੱਥਰ', 'ਰਾਤ ਕੇ ਅੰਧੇਰੇ ਮੇਂ', 'ਚੀਖ', 'ਰੁਪਏ ਦਸ ਕਰੋੜ', 'ਦੂਰੀ' ਆਦਿ ਫ਼ਿਲਮਾਂ ਕੀਤੀਆਂ ਸਨ ਪਰ ਅੱਜ ਵੀ ਉਹ ਸੀਤਾ ਦੇ ਤੌਰ 'ਤੇ ਹੀ ਜਾਣੀ ਜਾਂਦੀ ਹੈ। ਉਦੋਂ ਦੀਪਿਕਾ ਆਪਣੀ ਲੋਕਪ੍ਰਿਅਤਾ ਦੇ ਦਮ 'ਤੇ ਭਾਰਤੀ ਜਨਤਾ ਪਾਰਟੀ ਦੀ ਟਿਕਟ 'ਤੇ ਚੋਣ ਲੜ ਕੇ ਲੋਕ ਸਭਾ ਵਿਚ ਵੀ ਪਹੁੰਚੀ ਸੀ।
ਵੱਡੇ ਪਰਦੇ 'ਤੇ ਆਖਰੀ ਵਾਰ ਫ਼ਿਲਮ 'ਖੁਦਾਈ' ਵਿਚ ਦਿਸੀ ਦੀਪਿਕਾ ਹੁਣ ਚੌਵੀ ਸਾਲ ਬਾਅਦ ਫ਼ਿਲਮਾਂ ਵਿਚ ਆਪਣੀ ਵਾਪਸੀ ਕਰ ਰਹੀ ਹੈ। ਨਿਰਦੇਸ਼ਕ ਮਨੋਜ ਗਿਰੀ ਦੀ ਫ਼ਿਲਮ 'ਗ਼ਾਲਿਬ' ਵਿਚ ਦੀਪਿਕਾ ਵਲੋਂ ਤਬੱਸੁਮ ਦੀ ਭੂਮਿਕਾ ਨਿਭਾਈ ਜਾ ਰਹੀ ਹੈ। ਇਹ ਫ਼ਿਲਮ ਅਫ਼ਜ਼ਲ ਗੁਰੂ ਦੇ ਬੇਟੇ ਗ਼ਾਲਿਬ ਦੀ ਜ਼ਿੰਦਗੀ 'ਤੇ ਅਧਾਰਿਤ ਹੈ ਅਤੇ ਉਹ ਗ਼ਾਲਿਬ ਦੀ ਮਾਂ ਦੀ ਭੂਮਿਕਾ ਵਿਚ ਹੈ।
ਆਪਣੀ ਵਾਪਸੀ ਵਾਲੀ ਇਸ ਫ਼ਿਲਮ ਵਿਚ ਭੂਮਿਕਾ ਬਾਰੇ ਦੀਪਿਕਾ ਕਹਿੰਦੀ ਹੈ, 'ਇਹ ਫ਼ਿਲਮ ਮਾਂ-ਬੇਟੇ ਦੇ ਰਿਸ਼ਤੇ 'ਤੇ ਆਧਾਰਿਤ ਹੈ। ਇਕ ਅੱਤਵਾਦੀ ਨੂੰ ਫ਼ਾਂਸੀ 'ਤੇ ਚੜ੍ਹਾ ਦੇਣ ਤੋਂ ਬਾਅਦ ਉਸ ਦੀ ਪਤਨੀ ਤੇ ਬੇਟੇ 'ਤੇ ਕੀ ਬੀਤਦੀ ਹੈ, ਇਹ ਇਸ ਦੀ ਕਹਾਣੀ ਹੈ। ਪਿਛਲੇ ਕੁਝ ਸਮੇਂ ਤੋਂ ਮੈਨੂੰ ਕਈ ਭੂਮਿਕਾਵਾਂ ਦੀਆਂ ਪੇਸ਼ਕਸ਼ਾਂ ਹੋ ਰਹੀਆਂ ਸਨ ਪਰ ਮੈਂ ਅਰਥਪੂਰਨ ਭੂਮਿਕਾ ਦੇ ਇੰਤਜ਼ਾਰ ਵਿਚ ਸੀ ਅਤੇ ਜਦੋਂ ਇਹ ਭੂਮਿਕਾ ਮੈਨੂੰ ਮਿਲੀ ਤਾਂ ਉਦੋਂ ਲੱਗਿਆ ਕਿ ਜਿਵੇਂ ਮੈਨੂੰ ਇਸ ਦਾ ਹੀ ਇੰਤਜ਼ਾਰ ਸੀ।'
ਦੀਪਿਕਾ ਨੇ ਆਪਣੀ ਪਹਿਲੀ ਪਾਰੀ ਵਿਚ ਛੋਟੇ ਪਰਦੇ 'ਤੇ ਤਾਂ ਬਹੁਤ ਸਫ਼ਲਤਾ ਬਟੋਰੀ ਸੀ ਹੁਣ ਦੇਖੋ, ਇਸ ਦੂਜੀ ਪਾਰੀ ਵਿਚ ਉਹ ਵੱਡੇ ਪਰਦੇ 'ਤੇ ਕੀ ਕ੍ਰਿਸ਼ਮਾ ਦਿਖਾ ਪਾਉਂਦੀ ਹੈ।


-ਮੁੰਬਈ ਪ੍ਰਤੀਨਿਧ

ਮੁਹੰਮਦ ਰਫ਼ੀ: ਫ਼ਿਲਮੀ ਗਾਇਕੀ ਦਾ ਫ਼ਰਿਸ਼ਤਾ

(ਲੜੀ ਜੋੜਨ ਲਈ ਪਿਛਲੇ ਸ਼ੁੱਕਰਵਾਰ ਦਾ ਅੰਕ ਦੇਖੋ)
ਰਫ਼ੀ ਨੂੰ ਇਹ ਰੱਬੀ ਬਖਸ਼ਿਸ਼ ਹਾਸਿਲ ਸੀ ਕਿ ਉਹ ਹਰ ਤਰ੍ਹਾਂ ਦੇ ਗੀਤ, ਗਜ਼ਲ, ਕੱਵਾਲੀ ਤੇ ਰਾਗ ਆਦਿ ਗਾ ਸਕਦਾ ਸੀ। ਰਫ਼ੀ ਦੀ ਆਵਾਜ਼ ਦਾ ਜਾਦੂ ਹਰ ਸਰੋਤੇ ਦੇ ਸਿਰ ਚੜ੍ਹ ਬੋਲਿਆ ਅਤੇ ਉਨ੍ਹਾਂ ਦਾ ਗਾਣਾ ਸੁਣ ਕੇ ਰੂਹ ਨਸ਼ਿਆ ਜਾਂਦੀ ਸੀ । ਇਹ ਕਿਹਾ ਜਾਂਦਾ ਹੈ ਕਿ ਉਨ੍ਹਾਂ ਨੇ ਆਪਣੇ ਫ਼ਿਲਮੀ ਕੈਰੀਅਰ ਦੌਰਾਨ ਹਿੰਦੀ, ਉਰਦੂ, ਪੰਜਾਬੀ ਤੋਂ ਇਲਾਵਾ ਭਾਰਤ ਅਤੇ ਵਿਸ਼ਵ ਦੀਆਂ ਕਈ ਹੋਰਨਾਂ ਭਾਸ਼ਾਵਾਂ (ਕੋਂਕਨੀ, ਭੋਜਪੁਰੀ, ਉੜੀਆ, ਬੰਗਾਲੀ, ਮਰਾਠੀ, ਸਿੰਧੀ, ਕੰਨੜ, ਗੁਜਰਾਤੀ, ਤੇਲਗੂ, ਮਾਘੀ, ਮੈਥਿਲੀ, ਅਸਾਮੀ, ਅੰਗਰੇਜ਼ੀ, ਫ਼ਾਰਸੀ, ਸਪੈਨਿਸ਼ ਅਤੇ ਡੱਚ ਆਦਿ) ਵਿਚ ਕਰੀਬਨ 26000 ਗੀਤ, ਕੱਵਾਲੀ, ਗ਼ਜ਼ਲ, ਭਜਨ ਆਦਿ ਗਾਏ ਹਨ। ਸਨ 2010 ਵਿਚ ਆਊਟ ਲੁੱਕ ਮੈਗਜ਼ੀਨ ਨੇ ਸੰਗੀਤ ਦਾ ਇਕ ਖੁੱਲ੍ਹਾ ਮੁਕਾਬਲਾ ਕਰਵਾਇਆ ਜਿਸ ਵਿਚ ਰਫ਼ੀ ਦੁਆਰਾ ਫ਼ਿਲਮ ਚਿੱਤਰਲੇਖਾ ਲਈ ਗਾਇਆ ਗੀਤ 'ਮਨ ਰੇ ਤੂੰ ਕਾਹੇ ਨਾ ਧੀਰ ਧਰੇ...' ਅੱਵਲ ਆਇਆ ਸੀ। 'ਸਟਾਰ ਡਸਟ' ਮੈਗਜ਼ੀਨ ਨੇ ਰਫ਼ੀ ਨੂੰ ਸਦੀ ਦਾ ਸਰਵੋਤਮ ਗਾਇਕ ਹੋਣ ਦਾ ਮਾਣ ਬਖਸ਼ਿਆ। ਭਾਰਤ ਸਰਕਾਰ ਨੇ ਰਫ਼ੀ ਨੂੰ ਉਨ੍ਹਾਂ ਦੀਆਂ ਸੇਵਾਵਾਂ ਲਈ ਨਾਗਰਿਕ ਐਵਾਰਡ ਪਦਮਸ਼੍ਰੀ ਨਾਲ ਵੀ ਸਨਮਾਨਿਤ ਕੀਤਾ ਸੀ। ਇਸ ਤੋਂ ਇਲਾਵਾ ਰਫ਼ੀ ਨੇ ਪੰਜ ਵਾਰੀ ਫ਼ਿਲਮ-ਫੇਅਰ ਟ੍ਰਾਫੀਆਂ/ ਐਵਾਰਡ ਵੀ ਜਿਤੇ ਸਨ।
ਉਹ ਕਦੇ ਸਨਮਾਨਾਂ ਦੀ ਦੌੜ ਵਿਚ ਨਹੀਂ ਪਏ ਸਗੋਂ ਉਨ੍ਹਾਂ ਸਾਦਗੀ ਨੂੰ ਆਪਣੇ ਜੀਵਨ ਵਿਚ ਅਪਣਾਈ ਰੱਖਿਆ। ਮੁਹੰਮਦ ਰਫ਼ੀ ਨੂੰ ਆਪਣੇ ਪਿੰਡ ਦੀ ਮਿੱਟੀ, ਮਾਂ-ਬੋਲੀ ਪੰਜਾਬੀ ਅਤੇ ਪੰਜਾਬ ਵਾਸੀਆਂ ਨਾਲ ਬੇਹੱਦ ਪਿਆਰ ਸੀ। ਮੁਹੰਮਦ ਰਫ਼ੀ ਨੇ ਇਨਸਾਨੀਅਤ ਅਤੇ ਰਹਿਮਦਿਲੀ ਨੂੰ ਕਦੇ ਨਹੀਂ ਛੱਡਿਆ। ਗ਼ਰੀਬਾਂ ਅਤੇ ਲੋੜਵੰਦਾਂ ਪ੍ਰਤੀ ਉਹ ਹਮੇਸ਼ਾ ਮਦਦਗਾਰ ਰਿਹਾ। ਇਥੋਂ ਤੱਕ ਕਿ ਕਈ ਨਵੇਂ ਤੇ ਛੋਟੇ ਸੰਗੀਤਕਾਰਾਂ ਵਾਸਤੇ ਮੁਫ਼ਤ ਵਿਚ ਗੀਤ ਗਾਏ। ਰਫ਼ੀ ਸਾਹਿਬ ਨਾ ਤਾਂ ਕਦੇ ਕਿਸੇ ਫ਼ਿਲਮੀ ਪਾਰਟੀ 'ਚ ਜਾਂਦੇ ਸਨ ਤੇ ਨਾ ਹੀ ਉਨ੍ਹਾਂ ਨੇ ਕਦੇ ਸ਼ਰਾਬ ਜਾਂ ਸਿਗਰਟ ਪੀਤੀ ਸੀ। ਉਹ ਤਾਂ ਘਰ ਤੋਂ ਰਿਕਾਰਡਿੰਗ ਰੂਮ ਤੇ ਵਾਪਸ ਘਰ ਦੇ ਰੂਟੀਨ ਦੀ ਪਾਲਣਾ ਕਰਦੇ ਸਨ। ਰੋਜ਼ਾਨਾ ਸਵੇਰੇ ਚਾਰ ਵਜੇ ਉਠ ਕੇ ਰਿਆਜ਼ ਕਰਨਾ ਕਦੇ ਨਹੀਂ ਭੁੱਲਦੇ ਸੀ। ਉਨ੍ਹਾਂ ਦੇ ਪੁੱਤਰ ਸ਼ਾਹਿਦ ਰਫ਼ੀ ਨੇ ਦੱਸਿਆ ਕਿ ਉਨ੍ਹਾਂ ਦੇ ਪਿਤਾ ਨੂੰ ਬੈਡਮਿੰਟਨ, ਕੈਰਮ ਖੇਡਣਾ ਅਤੇ ਪਤੰਗ ਉਡਾਉਣਾ ਬੇਹੱਦ ਪਸੰਦ ਸੀ। ਰਫ਼ੀ ਸਾਹਿਬ ਬਾਰੇ ਬਹੁਤ ਵਿਚਾਰ-ਚਰਚਾ ਕਰਨ ਨਾਲੋਂ ਸਿਰਫ ਏਨਾ ਹੀ ਕਹਿਣਾ ਬਹੁਤ ਹੈ ਕਿ ਉਹ ਗਾਇਕੀ ਦੇ ਇਕ ਚਮਕਦੇ ਸੂਰਜ ਸਨ।
ਰਫ਼ੀ ਨੇ 30 ਜੁਲਾਈ 1980 ਨੂੰ ਆਪਣਾ ਆਖ਼ਰੀ ਗੀਤ 'ਤੂ ਕਹੀਂ ਆਸ-ਪਾਸ ਹੈ ਦੋਸਤ, ਦਿਲ ਫਿਰ ਭੀ ਉਦਾਸ ਹੈ ਦੋਸਤ..' ਫ਼ਿਲਮ 'ਆਸ-ਪਾਸ' ਲਈ ਰਿਕਾਰਡ ਕੀਤਾ ਸੀ। ਦੂਜੇ ਹੀ ਦਿਹਾੜੇ 31 ਜੁਲਾਈ 1980 ਨੂੰ ਮੁਹੰਮਦ ਰਫ਼ੀ ਇਸ ਫਾਨੀ ਦੁਨੀਆ ਨੂੰ ਅਲਵਿਦਾ ਕਹਿ ਗਏ। ਵਰ੍ਹਦੇ ਪਾਣੀ ਦੇ ਮੌਸਮ ਵਿਚ ਰਫ਼ੀ ਸਾਹਿਬ ਦੀ ਅੰਤਿਮ ਯਾਤਰਾ 'ਚ ਅੰਤਾਂ ਦੀ ਭੀੜ ਇਕੱਠੀ ਹੋਈ ਸੀ। ਅੱਜ ਵੀ ਰਫ਼ੀ ਦੀ ਆਵਾਜ਼ ਕਰੋੜਾਂ ਸੰਗੀਤ ਪ੍ਰੇਮੀਆਂ ਦੇ ਦਿਲਾਂ ਦੀ ਧੜਕਨ ਬਣੀ ਹੋਈ ਹੈ। ਮੁਹੰਮਦ ਰਫ਼ੀ ਨੇ ਆਪਣੀ ਪ੍ਰਤਿਭਾ ਅਤੇ ਫ਼ਨ ਦੇ ਦਮ 'ਤੇ ਲੋਕਾਂ ਦੇ ਦਿਲਾਂ ਤੇ ਰਾਜ ਕੀਤਾ ਜਿਸ ਦੀ ਬਦੌਲਤ ਉਸ ਨੂੰ ਰਹਿੰਦੀ ਦੁਨੀਆ ਤੱਕ ਯਾਦ ਕੀਤਾ ਜਾਵੇਗਾ। (ਸਮਾਪਤ)


-ਭੀਮ ਰਾਜ ਗਰਗ
ਫਲੈਟ ਨੰ: 157, ਸੇਕਟਰ-45ਏ, ਚੰਡੀਗੜ੍ਹ-160047
ਈਮੇਲ: gbraj1950@gmail.com

ਪੰਜਾਬੀ ਗਾਇਕੀ ਵਿਚ ਉੱਭਰਦਾ ਨਾਂਅ-ਗਾਇਕ ਸਾਹਿਬ ਮੱਲ

ਅੱਜ ਦੇ ਜ਼ਮਾਨੇ ਵਿਚ ਬਹੁਤ ਸਾਰੇ ਨੌਜਵਾਨ ਮੁੰਡੇ-ਕੁੜੀਆਂ ਮਿਹਨਤ ਤੇ ਸੰਘਰਸ਼ ਦੇ ਬਲਬੂਤੇ ਗਾਇਕੀ ਦੇ ਖੇਤਰ ਵਿਚ ਆਪਣਾ ਨਾਂਅ ਬਣਾ ਰਹੇ ਹਨ। ਅਜਿਹਾ ਹੀ ਇਕ ਨਾਂਅ ਹੈ ਗਾਇਕ ਸਾਹਿਬ ਮੱਲ ਦਾ। ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਪਿੰਡ ਸਾਉਕੇ ਦੇ ਜਰਨੈਲ ਸਿੰਘ ਤੇ ਮਾਤਾ ਸਵਰਨ ਕੌਰ ਦਾ ਲਾਡਲਾ ਫਰਜ਼ੰਦ ਸਾਹਿਬ ਮੱਲ ਪੰਜਾਬੀ ਗਾਇਕੀ ਵਿਚ ਨਿਵੇਕਲਾ ਸਥਾਨ ਬਣਾਉਣਾ ਚਾਹੁੰਦਾ ਹੈ। ਉਸ ਨੇ ਉਸਤਾਦ ਪ੍ਰੋਫੈਸਰ ਗੁਰਰਾਜ ਸਿੰਘ ਗਿੱਲ ਦੇ ਥਾਪੜੇ ਸਦਕਾ ਯੂਨੀਵਰਸਿਟੀ ਯੂਥ ਫੈਸਟੀਵਲ ਵਿਚ ਸ਼ਬਦ ਗਾਇਨ, ਗੀਤ ਤੇ ਨਿਰੋਲ ਪੰਜਾਬੀ ਵਾਰ ਗਾਇਨ ਵਿਚ ਕਈ ਇਨਾਮ ਜਿੱਤੇ ਹਨ। ਆਰਮੀ ਸਕੂਲ ਫ਼ਿਰੋਜ਼ਪੁਰ ਵਿਖੇ ਗਣਿਤ ਅਧਿਆਪਕ ਵਜੋਂ ਸੇਵਾ ਦੌਰਾਨ ਉਸ ਦਾ ਮੇਲ ਸੰਗੀਤ ਅਧਿਆਪਕ ਤੇ ਗਾਇਕ ਤਰਸੇਮ ਅਰਮਾਨ ਤੇ ਸੁਖ ਸਾਰੰਗ ਨਾਲ ਹੋਇਆ। ਉਸ ਨੇ ਸਰੋਤਿਆਂ ਨੂੰ ਪਹਿਲੀ ਐਲਬਮ 'ਹਾਂ ਕਰਦੇ' ਦਿੱਤੀ ਜਿਸ ਨਾਲ ਉਹ ਦੇਸ਼ਾਂ-ਵਿਦੇਸ਼ਾਂ ਵਿਚ ਕਾਫੀ ਮਕਬੂਲ ਹੋਇਆ। ਉਸ ਦਾ ਗੀਤ 'ਬਾਬਾ ਬਖਤੌਰਾ' ਤੇ ਸੁਦੇਸ਼ ਕੁਮਾਰੀ ਨਾਲ ਦੋਗਾਣਾ 'ਫੈਬਲਸ ਜੱਟ' ਕਾਫ਼ੀ ਮਕਬੂਲ ਹੋਏ। ਆਪਣੇ ਛੋਟੇ ਜਿਹੇ ਸਫਰ ਦੌਰਾਨ ਉਸ ਨੂੰ ਬਾਲੀਵੁੱਡ ਗਾਇਕਾ ਸਵ: ਮਨਪ੍ਰੀਤ ਅਖ਼ਤਰ ਨਾਲ 'ਪ੍ਰਦੇਸ ਤੋਂ ਪੰਜਾਬ' ਗਾਉਣ ਦਾ ਸਬੱਬ ਮਿਲਿਆ। ਅੱਜਕਲ੍ਹ ਉਹ ਕੈਨੇਡਾ ਦੇ ਓਨਟਾਰੀਓ ਸੂਬੇ ਵਿਚ ਬਤੌਰ ਅਧਿਆਪਕ ਸੇਵਾਵਾਂ ਦੇ ਰਿਹਾ ਹੈ। ਉਹ ਜਲਦੀ ਹੀ ਗੀਤਕਾਰ ਨਿਰਮਲ ਦਿਉਲ, ਪ੍ਰੀਤ ਭਾਗੀਕੇ ਤੇ ਗਾਮਾ ਸਿੱਧੂ ਦੇ ਗੀਤਾਂ ਦੁਆਰਾ ਸਰੋਤਿਆਂ ਦੀ ਕਚਹਿਰੀ ਵਿਚ ਹਾਜ਼ਰੀ ਲਗਵਾ ਰਿਹਾ ਹੈ ਤੇ ਉਕਤ ਗੀਤਾਂ ਦੀ ਵੀਡੀਓਗ੍ਰਾਫੀ ਪੰਜਾਬ ਤੇ ਕੈਨੇਡਾ ਦੀਆਂ ਵੱਖ-ਵੱਖ ਥਾਵਾਂ 'ਤੇ ਕੀਤੀ ਗਈ ਹੈ।


-ਪ੍ਰਤੀਨਿਧੀ 'ਅਜੀਤ' ਹੀਰੋਂ ਖੁਰਦ (ਮਾਨਸਾ)
chahalheron@gmail.com





Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX