ਤਾਜਾ ਖ਼ਬਰਾਂ


ਕੈਪਟਨ ਅਮਰਿੰਦਰ ਸਿੰਘ ਨੇ ਪ੍ਰਧਾਨ ਮੰਤਰੀ ਮੋਦੀ ਨਾਲ ਕੀਤੀ ਮੁਲਾਕਾਤ
. . .  10 minutes ago
ਨਵੀਂ ਦਿੱਲੀ, 18 ਜੂਨ- ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਅੱਜ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨਾਲ ਕੀਤੀ ਵਿਸ਼ੇਸ਼ ਮੁਲਾਕਾਤ ਦੌਰਾਨ ਪੰਜਾਬ ਨਾਲ ਸੰਬੰਧਤ ਵੱਖ-ਵੱਖ ਮੁੱਦਿਆਂ 'ਤੇ ਚਰਚਾ ਕੀਤੀ। ਇਸ ਦੌਰਾਨ ਉਨ੍ਹਾਂ ਨੇ ਪ੍ਰਧਾਨ ਮੰਤਰੀ ਕੋਲੋਂ ਸਰਹੱਦੀ ਖੇਤਰਾਂ...
ਗੁਰਦੁਆਰਾ ਦੁੱਖ ਨਿਵਾਰਨ ਸਾਹਿਬ ਵਿਖੇ ਸ਼ਰਧਾ ਨਾਲ ਮਨਾਈ ਜਾ ਰਹੀ ਹੈ ਪੰਚਮੀ
. . .  46 minutes ago
ਪਟਿਆਲਾ, 18 ਜੂਨ- ਗੁਰਦੁਆਰਾ ਸ੍ਰੀ ਦੁਖ ਨਿਵਾਰਨ ਸਾਹਿਬ ਵਿਖੇ ਪੰਚਮੀ ਬੜੀ ਸ਼ਰਧਾ ਭਾਵਨਾ ਨਾਲ ਮਨਾਈ ਜਾ ਰਿਹਾ ਹੈ। ਗੁਰੂ ਘਰ ਕਵੀ ਦਰਬਾਰ, ਕੀਰਤਨ ਸਮਾਗਮ ਅਤੇ ਢਾਡੀ ਜਥੇ ਗੁਰਦੁਆਰਾ ਸਾਹਿਬ 'ਚ ਪਹੁੰਚੀਆਂ ਹੋਈਆਂ ਸੰਗਤਾਂ ਨੂੰ ਇਲਾਹੀ ਬਾਣੀ ਨਾਲ...
ਸ਼ਿਵਸੈਨਾ ਨੇ ਵੀ ਦਿੱਤਾ ਕੇਜਰੀਵਾਲ ਨੂੰ ਸਮਰਥਨ
. . .  about 1 hour ago
ਨਵੀਂ ਦਿੱਲੀ, 18 ਜੂਨ- ਆਪਣੀਆਂ ਮੰਗਾਂ ਨੂੰ ਲੈ ਕੇ ਉਪ ਰਾਜਪਾਲ ਅਨਿਲ ਬੈਜਲ ਦੇ ਘਰ ਧਰਨੇ 'ਤੇ ਬੈਠੇ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੂੰ ਹੁਣ ਮਹਾਰਾਸ਼ਟਰ 'ਚ ਭਾਜਪਾ ਦੀ ਸਹਿਯੋਗੀ ਸ਼ਿਵਸੈਨਾ ਨੇ ਵੀ ਸਮਰਥਨ ਦਿੱਤਾ ਹੈ...
ਮੰਗੋਲੀਆ ਜਾਣਗੇ ਗ੍ਰਹਿ ਮੰਤਰੀ ਰਾਜਨਾਥ ਸਿੰਘ
. . .  about 1 hour ago
ਨਵੀਂ ਦਿੱਲੀ, 18 ਜੂਨ- ਗ੍ਰਹਿ ਮੰਤਰੀ ਰਾਜਨਾਥ ਸਿੰਘ ਆਉਣ ਵਾਲੀ 21 ਜੂਨ ਨੂੰ ਮੰਗੋਲੀਆ ਜਾਣਗੇ। ਉਨ੍ਹਾਂ ਦਾ ਇਹ ਦੌਰਾ 24 ਜੂਨ ਤੱਕ ਹੋਵੇਗਾ...
ਚੀਨ ਨੇ ਕਿਹਾ- ਅਸੀਂ ਡੋਕਲਾਮ ਵਰਗੀ ਹੋਰ ਘਟਨਾ ਨਹੀਂ ਬਰਦਾਸ਼ਤ ਕਰ ਸਕਦੇ
. . .  about 1 hour ago
ਨਵੀਂ ਦਿੱਲੀ, 18 ਜੂਨ- ਭਾਰਤ ਨਾਲ ਰਿਸ਼ਤਿਆਂ ਨੂੰ ਸੁਧਾਰਨ ਦੀ ਦਿਸ਼ਾ 'ਚ ਇੱਕ ਕਦਮ ਵਧਾਉਂਦਿਆਂ ਚੀਨ ਦੇ ਰਾਜਦੂਤ ਲੁਓ ਝਾਓਹੁਈ ਦਾ ਕਹਿਣਾ ਹੈ ਕਿ ਫਿਰ ਤੋਂ ਡੋਕਲਾਮ ਵਰਗੀ ਘਟਨਾ ਨਹੀਂ ਹੋਵੇਗੀ। ਨਵੀਂ ਦਿੱਲੀ 'ਚ ਆਯੋਜਿਤ ਇੱਕ ਪ੍ਰੋਗਰਾਮ ਦੌਰਾਨ ਬੋਲਦਿਆਂ ਚੀਨੀ...
ਇਵਾਨ ਡੁਕ ਬਣੇ ਕੋਲੰਬੀਆ ਦੇ ਨਵੇਂ ਰਾਸ਼ਟਰਪਤੀ
. . .  about 1 hour ago
ਬੋਗੋਟਾ, 18 ਜੂਨ- ਕੋਲੰਬੀਆ 'ਚ ਡੈਮੋਕ੍ਰੇਟਿਕ ਸੈਂਟਰ ਪਾਰਟੀ ਦੇ ਨੇਤਾ ਇਵਾਨ ਡੁਕ ਸੋਮਵਾਰ ਨੂੰ ਦੇਸ਼ ਦੇ ਨਵੇਂ ਰਾਸ਼ਟਰਪਤੀ ਚੁਣੇ ਗਏ। ਇੱਕ ਮੀਡੀਆ ਰਿਪੋਰਟ ਮੁਤਾਬਕ ਡੁਕ ਨੂੰ ਐਤਵਾਰ ਨੂੰ 1.03 ਕਰੋੜ ਭਾਵ ਕਿ 53.98 ਫੀਸਦੀ ਵੋਟਾਂ ਮਿਲੀਆਂ, ਜਦੋਂਕਿ ਉਨ੍ਹਾਂ ਨੇ ਵਿਰੋਧੀ...
ਸੀਰੀਆ 'ਚ ਫੌਜੀ ਟਿਕਾਣਿਆਂ 'ਤੇ ਹਵਾਈ ਹਮਲੇ
. . .  1 minute ago
ਦਮਿਸ਼ਕ, 18 ਜੂਨ- ਅਮਰੀਕਾ ਦੀ ਅਗਵਾਈ 'ਚ ਐਤਵਾਰ ਨੂੰ ਸੀਰੀਆ ਦੇ ਪੂਰਬੀ ਡੇਰ ਅਲ-ਜੌਰ ਸੂਬੇ 'ਚ ਫੌਜੀ ਟਿਕਾਣਿਆਂ 'ਤੇ ਹਵਾਈ ਹਮਲੇ ਕੀਤੇ ਗਏ। ਸਥਾਨਕ ਮੀਡੀਆ ਮੁਤਾਬਕ ਅਮਰੀਕਾ ਦੀ ਅਗਵਾਈ 'ਚ ਗਠਜੋੜ ਹਮਲਿਆਂ 'ਚ ਡੇਰ-ਅਲ-ਜੌਰ ਸੂਬੇ ਦੇ ਹਿਰੀ 'ਚ...
ਅੱਠ ਮਾਓਵਾਦੀਆਂ ਨੇ ਕੀਤਾ ਆਤਮ ਸਮਰਪਣ
. . .  about 2 hours ago
ਰਾਏਪੁਰ, 18 ਜੂਨ - ਛੱਤੀਸਗੜ੍ਹ ਦੇ ਜਗਦਲਪੁਰ 'ਚ ਅੱਠ ਮਾਓਵਾਦੀਆਂ ਨੇ ਕੇਂਦਰੀ ਰਿਜ਼ਰਵ ਪੁਲਿਸ ਫੋਰਸ (ਸੀ.ਆਰ.ਪੀ.ਐਫ.) ਦੇ 80 ਵੀਂ ਬਟਾਲੀਅਨ ਅੱਗੇ ਆਤਮ ਸਮਰਪਣ ਕੀਤਾ...
ਅਮਰਨਾਥ ਯਾਤਰਾ ਲਈ ਤਿਆਰੀਆਂ ਪੂਰੀਆਂ ਕਰ ਲਈਆਂ ਗਈਆਂ ਹਨ- ਐਸ. ਪੀ. ਵੈਦ
. . .  about 2 hours ago
ਸ੍ਰੀਨਗਰ, 18 ਜੂਨ- ਅਮਰਨਾਥ ਯਾਤਰਾ 'ਤੇ ਜੰਮੂ-ਕਸ਼ਮੀਰ ਦੇ ਡੀ. ਜੀ. ਪੀ. ਐਸ. ਪੀ. ਵੈਦ ਦਾ ਕਹਿਣਾ ਹੈ ਕਿ ਅਮਰਨਾਥ ਯਾਤਰਾ ਲਈ ਸਾਰੀਆਂ ਤਿਆਰੀਆਂ ਪੂਰੀਆਂ ਕਰ ਲਈਆਂ ਗਈਆਂ ਹਨ। ਉਨ੍ਹਾਂ ਕਿਹਾ ਉਹ ਸਾਰੇ ਭਗਤਾਂ ਨੂੰ ਬਿਨਾਂ ਕਿਸੇ ਡਰ ਦੇ ਅਮਰਨਾਥ ਯਾਤਰਾ 'ਤੇ...
ਫ਼ੌਜ ਮੁਖੀ ਨੇ ਕੀਤੀ ਸ਼ਹੀਦ ਔਰੰਗਜ਼ੇਬ ਦੇ ਪਰਿਵਾਰ ਨਾਲ ਮੁਲਾਕਾਤ
. . .  about 2 hours ago
ਸ੍ਰੀਨਗਰ, 18 ਜੂਨ - ਫ਼ੌਜ ਦੇ ਮੁਖੀ ਜਨਰਲ ਬਿਪਨ ਰਾਵਤ ਨੇ ਪੂੰਛ 'ਚ ਸ਼ਹੀਦ ਹੋਏ ਜਵਾਨ ਔਰੰਗਜ਼ੇਬ ਦੇ ਪਰਿਵਾਰ ਨਾਲ ਮੁਲਾਕਾਤ ਕੀਤੀ। ਦੱਸ ਦੇਈਏ ਕਿ ਅੱਤਵਾਦੀਆਂ ਨੇ ਔਰੰਗਜ਼ੇਬ ਨੂੰ ਪੁਲਵਾਮਾ ਤੋਂ ਅਗਵਾ ਕਰ ਲਿਆ...
ਹੋਰ ਖ਼ਬਰਾਂ..
  •     Confirm Target Language  

ਫ਼ਿਲਮ ਅੰਕ

ਅਥੀਆ ਸ਼ੈਟੀ

ਕਰੇ ਸਿਆਣੀਆਂ ਗੱਲਾਂ

ਨਵੀਂ ਪੀੜ੍ਹੀ ਦੀਆਂ ਹੀਰੋਇਨਾਂ 'ਚੋਂ ਅਥੀਆ ਸ਼ੈਟੀ ਅਜਿਹੀ ਕੁੜੀ ਹੈ ਜਿਸ ਨੇ ਸ਼ੁਰੂਆਤ ਸਮੇਂ ਹੀ ਦਿਖਾ ਦਿੱਤਾ ਸੀ ਕਿ ਉਸ ਦਾ ਭਵਿੱਖ ਬਹੁਤ ਹੀ ਸ਼ਾਨਦਾਰ ਹੈ। 'ਹੀਰੋ', 'ਮੁਬਾਰਕਾਂ' ਫ਼ਿਲਮਾਂ ਤਾਂ ਉਸ ਨੇ ਦੋ ਹੀ ਕੀਤੀਆਂ ਹਨ ਪਰ 26ਵੇਂ ਸਾਲ 'ਚ ਪ੍ਰਵੇਸ਼ ਕਰ ਚੁੱਕੀ ਅਥੀਆ ਕਾਫ਼ੀ ਚਮਕ-ਦਮਕ ਨਾਲ ਭਰੀ ਤੇ ਅੰਦਾਜ਼ਾਂ ਦੀ ਰਾਣੀ ਹੈ। ਫੈਸ਼ਨ ਮਾਹਿਰ ਮੰਨਦੇ ਹਨ ਕਿ ਉਹ ਫੈਸ਼ਨ ਦੇ ਮਾਮਲੇ 'ਚ ਸੋਨਮ ਕਪੂਰ ਨੂੰ ਪਿਛਾਂਹ ਛੱਡ ਸਕਦੀ ਹੈ। ਅਥੀਆ ਵੀ ਮਿਹਨਤ ਵਿਚ ਵਿਸ਼ਵਾਸ ਰੱਖਦੀ ਹੈ। ਉਹ ਵਾਰ-ਵਾਰ ਸਲਮਾਨ ਖਾਨ ਦਾ ਜ਼ਿਕਰ ਕਰਦੀ ਹੈ ਕਿ ਉਨ੍ਹਾਂ ਦੁਆਰਾ ਮੌਕੇ ਦਿੱਤੇ ਜਾਣ ਕਾਰਨ ਉਸ ਦੇ ਸਿਰ 'ਤੇ ਜ਼ਿੰਮੇਵਾਰੀਆਂ ਦੀ ਪੰਡ ਭਾਰੀ ਹੈ। ਸਲਮਾਨ ਨੂੰ ਤਾਂ ਅਥੀਆ ਆਪਣਾ ਗੁਰੂ-ਉਸਤਾਦ ਮੰਨਦੀ ਹੈ। ਅਥੀਆ 'ਤੇ ਉਸ ਦੇ ਪਿਤਾ ਸੁਨੀਲ ਸ਼ੈਟੀ ਨੂੰ ਵੀ ਫ਼ਖਰ ਹੈ ਤੇ ਉਹ ਚਾਹੁੰਦੇ ਹਨ ਕਿ ਕਿਸੇ ਫ਼ਿਲਮ 'ਚ ਉਹ ਆਪ ਉਸ ਦੇ ਬਾਪ ਦਾ ਕਿਰਦਾਰ ਨਿਭਾਉਣ। ਅਥੀਆ ਕੁਝ ਦੇਰ ਅਰਾਮ ਕਰ ਰਹੀ ਹੈ। ਉਹ ਚੋਣਵਾਂ ਕੰਮ ਹੀ ਕਰੇਗੀ। ਚੰਗੀ ਕਹਾਣੀ ਦਾ ਇੰਤਜ਼ਾਰ ਹੈ। ਚਾਹੇ ਦੋ ਸਾਲ 'ਚ ਦੋ ਫ਼ਿਲਮਾਂ ਘੱਟ ਹਨ ਪਰ ਅਥੀਆ ਨੂੰ ਇਸ ਦਾ ਕੋਈ ਮਲਾਲ ਨਹੀਂ ਹੈ। ਮਾਂ ਮਾਨਾ ਸ਼ੈਟੀ ਨਾਲ ਮਿਲ ਕੇ ਕਈ ਚੰਗੇ ਕਾਰਜਾਂ ਲਈ ਵੀ ਉਹ ਸਰਗਰਮ ਰਹਿੰਦੀ ਹੈ। ਨਿਊਯਾਰਕ ਦੀ ਸਿੱਖਿਆ ਤੇ ਇਥੋਂ ਦੀ ਸਿੱਖਿਆ ਜ਼ਮੀਨ-ਅਕਾਸ਼ ਦਾ ਅੰਤਰ ਉਸ ਅਨੁਸਾਰ ਹੈ। ਅਥੀਆ ਚਾਹੁੰਦੀ ਹੈ ਕਿ ਇਥੇ ਸਿੱਖਿਆ ਵਪਾਰਕ ਕੰਮਾਂ ਲਈ ਅਗਾਂਹ ਕੰਮ ਆਏ, ਸਿੱਖਿਆ ਅਜਿਹੀ ਹੋਣੀ ਚਾਹੀਦੀ ਹੈ ਤਾਂ ਜੋ ਬਹੁਤ ਸਾਰੇ ਸਿੱਖਿਅਤ ਲੋਕ ਰੁਜ਼ਗਾਰ ਪ੍ਰਾਪਤ ਕਰ ਸਕਣ।


ਖ਼ਬਰ ਸ਼ੇਅਰ ਕਰੋ

ਅਕਸ਼ੈ ਕੁਮਾਰ

ਬਣਿਆ ਲੋਕ ਨਾਇਕ

'ਪੈਡਮੈਨ' ਇਸ ਫ਼ਿਲਮ ਨਾਲ ਫਿਰ ਅਕਸ਼ੈ ਕੁਮਾਰ ਖ਼ਬਰਾਂ ਦਾ ਮੁੱਖ ਮੁੱਦਾ ਹੈ ਫ਼ਿਲਮੀ ਗਲਿਆਰਿਆਂ ਵਿਚ। ਅਕਸ਼ੈ ਦਾ ਚਿਹਰਾ ਲੋਕਾਂ 'ਚ ਸਮਾਜਿਕ ਮੁੱਦਿਆਂ ਨਾਲ ਜੁੜਿਆ ਚਿਹਰਾ ਬਣ ਉੱਭਰ ਰਿਹਾ ਹੈ। ਜਨ-ਕਲਿਆਣ ਲਈ ਸਰਕਾਰ ਨਾਲ ਮਿਲ ਕੇ ਔਰਤਾਂ ਦੀ ਇਸ ਸਮੱਸਿਆ 'ਤੇ ਉਹ ਦਸਤਾਵੇਜ਼ੀ ਫ਼ਿਲਮ ਵੀ ਬਣਾ ਸਕਦਾ ਹੈ। ਭੂਮੀ ਪੇਡਨੇਕਰ ਉਸ ਨਾਲ ਹੋਏਗੀ। ਅੱਕੀ ਨੇ ਸਮਾਜਿਕ ਮੁੱਦਿਆਂ 'ਤੇ ਹੁਣ ਧਿਆਨ ਕੇਂਦਰਿਤ ਕਰ ਲਿਆ ਹੈ ਤੇ ਉਸ ਦੀ ਅਗਲੀ ਫ਼ਿਲਮ 'ਦਾਜ' ਵੀ ਭੈੜੀ ਲਾਹਨਤ 'ਤੇ ਹੋਏਗੀ। ਅੱਕੀ ਦੀ ਪਤਨੀ ਟਵਿੰਕਲ ਦਾ ਸਾਥ ਅਜਿਹੀਆਂ ਫ਼ਿਲਮਾਂ ਲਈ ਉਸ ਨੂੰ ਮਿਲ ਰਿਹਾ ਹੈ। ਅਕਸ਼ੈ ਤਾਂ 'ਪੈਡਮੈਨ' ਤੋਂ ਬਾਅਦ ਬਦਲ ਹੀ ਗਿਆ ਹੈ। ਅਕਸ਼ੈ ਤਾਂ ਮਹਾਂਰਾਸ਼ਟਰ ਸਰਕਾਰ ਨਾਲ ਮਿਲ ਕੇ 'ਅਸਮਿਤਾ ਯੋਜਨਾ' 'ਚ ਵੀ ਸਹਿਯੋਗ ਦੇ ਰਿਹਾ ਹੈ। ਅਕਸ਼ੈ ਨੂੰ ਖੁਸ਼ੀ ਹੈ ਕਿ ਜਿਥੇ 'ਪੈਡਮੈਨ' ਲੋਕਾਂ ਪਸੰਦ ਕੀਤੀ ਹੈ, ਉਥੇ ਉਸ ਦੇ ਪੁੱਤਰ ਆਰਵ ਨੇ ਵੀ ਉਸ ਦੀ ਪਿੱਠ ਥਾਪੜੀ ਹੈ। ਅਕਸ਼ੈ ਨੇ 'ਗੋਲਡ' ਦੀ ਸ਼ੂਟਿੰਗ ਵੀ ਪੂਰੀ ਕਰਵਾ ਦਿੱਤੀ ਹੈ। ਪ੍ਰੇਰਨਾ ਅਰੋੜਾ ਉਸ ਦੀ ਨਵੀਂ ਫ਼ਿਲਮ 'ਚ ਭਾਈਵਾਲ ਬਣੀ ਹੈ। ਪ੍ਰੇਰਨਾ ਦੀ ਅੱਕੀ ਨਾਲ ਹੁਣ ਚੌਥੀ ਨਵੀਂ ਫ਼ਿਲਮ ਹੋਵੇਗੀ। ਸਮਾਜ ਦਾ ਚਿਹਰਾ ਬਣ ਅਕਸ਼ੈ ਲੋਕਾਂ ਦੀ ਹਮਦਰਦੀ ਤੇ ਪਿਆਰ ਹਾਸਿਲ ਕਰ ਰਿਹਾ ਹੈ। 'ਗੋਲਡ' ਤੋਂ ਬਾਅਦ 'ਦਾਜ' ਤੇ ਉਸ ਦੀ ਫ਼ਿਲਮ ਸਮਾਜ 'ਚ ਸੱਚਮੁੱਚ ਅੱਜ ਦੇ ਸਿਨੇਮਾ ਦਾ ਯੋਗਦਾਨ ਪ੍ਰਮੁੱਖ ਹੈ, ਨੂੰ ਦਰਸਾਉਂਦਾ ਹੈ। ਅਕਸ਼ੈ ਨੂੰ ਕੇਂਦਰ ਸਰਕਾਰ ਤੋਂ ਵੀ ਸਮਾਜਿਕ ਫ਼ਿਲਮਾਂ ਬਣਾਉਣ ਲਈ ਪ੍ਰਸੰਸਾ ਮਿਲ ਰਹੀ ਹੈ। ਲੋਕਮੰਚ ਨਾਲ ਜੁੜ ਕੇ ਅਕਸ਼ੈ ਕੁਮਾਰ ਲੋਕ ਅਭਿਨੇਤਾ/ਲੋਕ ਨਾਇਕ ਬਣ ਗਿਆ ਹੈ।

ਅਨੁਸ਼ਕਾ ਸ਼ਰਮਾ ਕੋਹਲੀ ਪਰੀ ਤੋਂ ਆਸ

ਅਨੁਸ਼ਕਾ ਕੋਹਲੀ ਨੂੰ ਖੁਸ਼ੀ ਹੈ ਕਿ ਵਿਰਾਟ ਕ੍ਰਿਕਟ 'ਚ ਨਵੇਂ ਰਿਕਾਰਡ ਬਣਾ ਰਿਹਾ ਹੈ ਤੇ ਉਹ ਕਰਮਾਂਵਾਲੀ ਪਤਨੀ ਬਣ ਗਈ ਹੈ। ਅਨੁਸ਼ਕਾ ਦੱਖਣੀ ਅਫ਼ਰੀਕਾ 'ਚ ਵਿਰਾਟ ਸਦਕਾ ਮਿਲੀ ਇਤਿਹਾਸਕ ਜਿੱਤ 'ਤੇ ਕਹਿ ਰਹੀ ਹੈ ਕਿ ਉਹ ਲੋਕ ਜੋ ਵਿਰਾਟ ਦੇ ਮਾੜੇ ਪ੍ਰਦਰਸ਼ਨ ਲਈ ਉਸ ਨੂੰ ਪਾਣੀ ਪੀ ਪੀ ਕੇ ਕੋਸਦੇ ਸਨ, ਉਹ ਹੁਣ ਜਵਾਬ ਦੇਣ। ਚਾਹੇ ਵਿਰਾਟ ਨੂੰ ਦੁੱਖੀ ਕਰਨ ਲਈ ਫ਼ਿਲਮੀ ਦ੍ਰਿਸ਼ਾਂ ਦੀ ਕਾਂਟ-ਸ਼ਾਂਟ ਕਰ ਕੇ ਅਨੁਸ਼ਕਾ ਦੇ ਵੀਡੀਓ ਵਾਇਰਲ ਕੀਤੇ ਜਾ ਰਹੇ ਹਨ ਪਰ ਅਨੂੰ ਘਬਰਾਈ ਨਹੀਂ ਹੈ। ਅਨੂੰ ਨੂੰ ਆਪਣੇ ਕੰਮ ਤੇ ਵਿਰਾਟ ਨਾਲ ਮਤਲਬ ਹੈ। ਮਾਰਚ ਦੇ ਪਹਿਲੇ ਹਫ਼ਤੇ ਵਿਆਹ ਤੋਂ ਬਾਅਦ ਤੇ ਇਸ ਨਵੇਂ ਸਾਲ 'ਚ ਆ ਰਹੀ ਨਵੀਂ ਫ਼ਿਲਮ 'ਪਰੀ' ਤੋਂ ਅਨੂੰ ਨੂੰ ਕਾਫ਼ੀ ਉਮੀਦ ਹੈ। 'ਪਰੀ' ਇਕ ਰੌਂਗਟੇ ਖੜ੍ਹੇ ਕਰ ਦੇਣ ਵਾਲੀ ਫ਼ਿਲਮ ਹੈ ਤੇ ਅਨੂੰ ਅਨੁਸਾਰ ਕਮਜ਼ੋਰ ਦਿਲ ਇਸ ਫ਼ਿਲਮ ਨੂੰ ਦੇਖਣ ਲਈ ਸਾਵਧਾਨ ਰਹਿਣ। ਅਨੂੰ ਨੇ 'ਪਰੀ' ਦਾ ਟ੍ਰੇਲਰ ਆਪਣੇ ਪਤੀ ਵਿਰਾਟ ਤੋਂ ਜਾਰੀ ਕਰਵਾ ਲਿਆ ਹੈ। ਇਸ ਫ਼ਿਲਮ 'ਚ ਅਨੂੰ ਦਾ ਅੰਦਾਜ਼ ਕਾਫ਼ੀ ਭਿਆਨਕ ਤੇ ਖ਼ੌਫ਼ਨਾਕ ਹੈ। ਯਾਦ ਰਹੇ 'ਪਰੀ' ਦਾ ਨਿਰਮਾਣ ਅਨੂੰ ਨੇ ਆਪ ਕੀਤਾ ਹੈ ਤੇ 'ਐਨ. ਐਚ.-101' ਤੇ 'ਫਿਲੌਰੀ' ਤੋਂ ਬਾਅਦ ਅਨੂੰ ਦੀ ਆਪਣੀ ਘਰ ਦੀ ਇਹ ਤੀਸਰੀ ਫ਼ਿਲਮ ਹੈ। 'ਪਰੀ' ਤੋਂ ਇਲਾਵਾ ਉਹ ਸ਼ਾਹਰੁਖ ਨਾਲ 'ਜ਼ੀਰੋ' ਕਰ ਰਹੀ ਹੈ ਤੇ ਵਰੁਣ ਧਵਨ ਨਾਲ ਉਸ ਦੀ 'ਸੂਈ ਧਾਗਾ' ਵੀ ਤੇਜ਼ੀ ਨਾਲ ਬਣ ਰਹੀ ਹੈ। 'ਪਰੀ', 'ਸੂਈ ਧਾਗਾ' ਲੈ ਕੇ ਦਰਸ਼ਕ ਨਵੇਂ ਸਾਲ 'ਚ ਵੀ ਆਪਣੇ ਪਿਆਰ 'ਚ ਪਰੋਅ ਲੈਣ 'ਚ ਕਾਮਯਾਬ ਰਹੇ ਜਿਵੇਂ 'ਪਰੀ' ਦਾ ਰਾਜ ਕੁਮਾਰ ਵਿਰਾਟ ਕੋਹਲੀ ਕ੍ਰਿਕਟ 'ਚ ਕਾਮਯਾਬ ਹੈ।

ਕੰਗਨਾ ਰਣੌਤ

ਬੋਲੇ ਬੇਬਾਕ ਬੋਲ

ਨਿੱਤ ਨਵੀਂ ਲੜਾਈ, ਨਵਾਂ ਪੰਗਾ, ਨਵਾਂ ਝਮੇਲਾ ਇਹ ਸਭ ਇੰਡਸਟਰੀ ਵਿਚ ਕੰਗਨਾ ਰਣੌਤ ਹੀ ਕਰ ਸਕਦੀ ਹੈ। ਇਧਰ ਕਰਨ ਜੌਹਰ ਨੇ 'ਵਿਕਟਿਮ ਕਾਰਡ', 'ਮਹਿਲਾ ਕਾਰਡ' ਜਿਹੇ ਲਫ਼ਜ਼ ਕੰਗਨਾ ਲਈ ਹੀ ਵਰਤੇ ਤਾਂ ਉਹ ਤਾਂ ਭੜਕ ਪਈ। ਕੰਗਨਾ ਨੇ ਤੁਰੰਤ ਸੰਵਾਦਦਾਤਾ ਸੰਮੇਲਨ ਬੁਲਾਇਆ ਤੇ ਕਿਹਾ ਕਿ ਕਈਆਂ ਨੂੰ ਤਾਂ 'ਭਾਈ ਭਤੀਜਾਵਾਦ' ਦੀ ਪਰਿਭਾਸ਼ਾ ਦਾ ਹੀ ਨਹੀਂ ਪਤਾ। ਉਸ ਦਾ ਇਸ਼ਾਰਾ ਕਰਨ ਜੌਹਰ ਵੱਲ ਸੀ। ਕਰਨ ਨੇ ਕਿਹਾ ਸੀ ਕਿ ਜੇ ਕਿਸੇ ਨੂੰ ਇਥੇ ਤਕਲੀਫ਼ ਹੈ ਤਾਂ ਉਹ ਇੰਡਸਟਰੀ ਤੋਂ ਵਿਦਾਈ ਲੈ ਲਏ ਤਾਂ ਕੰਗਨਾ ਖਿੱਝ ਗਈ। ਉਸ ਨੇ ਕਿਹਾ ਕਿ ਬਾਲੀਵੁੱਡ ਇੰਡਸਟਰੀ ਕਿਸੇ ਦੇ ਪਿਉ ਦਾ ਸਟੂਡੀਓ ਨਹੀਂ ਹੈ ਤੇ ਇਹ ਕਿਸੇ ਦੀ ਨਿੱਜੀ ਜਗੀਰ ਨਹੀਂ ਹੈ। ਇਸ 'ਤੇ ਸਭ ਦਾ ਹੱਕ ਹੈ। ਉਹ ਮਰਦਵਾਚੀ ਸ਼ੋਰ ਦੇ ਖ਼ਿਲਾਫ਼ ਲੜਦੀ ਰਹੇਗੀ। ਕੰਗਨਾ ਤਾਂ ਇਥੋਂ ਤੱਕ ਗੁੱਸੇ 'ਚ ਕਹਿ ਗਈ ਕਿ ਹੁਣ ਖ਼ੁਦ ਕਰਨ ਇਕ ਧੀ ਦੇ ਪਿਤਾ ਹਨ। ਉਹ ਇਨ੍ਹਾਂ ਕਾਰਡਜ਼ ਦਾ ਇਸਤੇਮਾਲ ਆਪਣੀ ਧੀ ਲਈ ਕਰਨ। ਵੈਸੇ ਕੰਗਨਾ ਵਿਚਾਰੀ ਸਹੀ ਹੈ। ਉਸ ਨੂੰ ਕਈ ਪਲੇਟਫਾਰਮ 'ਤੇ ਲੜਨਾ ਪੈ ਰਿਹਾ ਹੈ। ਖਾਸ ਗੱਲ ਇਹ ਹੈ ਕਿ ਇਹ ਸਾਰੇ ਹੀ ਮਰਦ ਹਨ। ਸ਼ੇਖਰ ਸੁਮਨ ਨੇ ਕੰਗਨਾ ਨੂੰ 'ਕੋਕੀਨ ਗਰਲ' ਕਿਹਾ, ਹਾਲਾਂਕਿ ਇਹ ਅਪ੍ਰਤੱਖ ਰੂਪ ਵਿਚ ਕਿਹਾ ਗਿਆ ਸੀ। ਕੰਗਨਾ ਲਈ ਚੰਗੀ ਗੱਲ ਇਹ ਰਹੀ ਕਿ ਲੋਕਾਂ ਨੇ ਸ਼ੇਖਰ ਸੁਮਨ ਦੀ ਇਸ ਟਵੀਟ ਲਈ ਕਾਫ਼ੀ ਆਲੋਚਨਾ ਕੀਤੀ। ਕੰਗਨਾ ਦੀ ਇਸ ਸਮੇਂ 'ਮਣੀਕਰਨ' ਫ਼ਿਲਮ ਆ ਰਹੀ ਹੈ। ਰਿਤਿਕ ਤੋਂ ਲੈ ਕੇ ਸ਼ੇਖਰ ਸੁਮਨ ਤੇ ਕਰਨ ਜੌਹਰ, ਪੂਰੀ ਇੰਡਸਟਰੀ ਦੇ ਵੱਡੇ ਲੋਕਾਂ ਨਾਲ ਲੜ ਰਹੀ ਕੰਗਨਾ ਲਈ ਖ਼ਾਸ ਗੱਲ ਇਹ ਹੈ ਕਿ ਉਸ ਕੋਲ ਪ੍ਰਸੰਸਕਾਂ ਦਾ ਪਿਆਰ ਹੈ। ਈਸ਼ਵਰ ਉਸ ਦੀ ਸਹਾਇਤਾ ਕਰਦਾ ਹੈ ਤੇ ਕੰਗਨਾ ਹਰ ਵਿਵਾਦ 'ਚੋਂ ਜੇਤੂ ਹੋ ਕੇ ਹੀ ਨਿਕਲਦੀ ਹੈ।


-ਸੁਖਜੀਤ ਕੌਰ

'ਮੈਨੂੰ ਪੰਜਾਬੀ ਵਿਆਹ ਪਸੰਦ ਹੈ'

ਕ੍ਰਿਤੀ ਖਰਬੰਦਾ

'ਰਾਜ਼ ਰੀਬੂਟ' ਤੋਂ ਬਾਲੀਵੁੱਡ ਵਿਚ ਪੇਸ਼ ਹੋਈ ਕ੍ਰਿਤੀ ਖਰਬੰਦਾ ਨਾਲ ਮੁੰਬਈ ਦੇ ਇਕ ਹੋਟਲ ਵਿਚ ਕ੍ਰਿਤੀ ਨਾਲ ਮੁਲਾਕਾਤ ਹੋਣ 'ਤੇ ਪਹਿਲਾ ਸਵਾਲ ਇਹੀ ਪੁੱਛਿਆ ਗਿਆ ਕਿ 'ਤੁਹਾਡੀਆਂ ਹਾਲੀਆ ਦੋ ਫ਼ਿਲਮਾਂ ਦੇ ਨਾਂਅ ਦੇਖ ਕੇ ਲਗਦਾ ਹੈ ਕਿ ਤੁਹਾਨੂੰ ਬਰਾਤ ਵਿਚ ਸ਼ਾਮਿਲ ਹੋਣਾ ਕੁਝ ਜ਼ਿਆਦਾ ਪਸੰਦ ਹੈ?'
-ਬਾਰਾਤ ਦੀ ਗੱਲ ਛੱਡੋ, ਮੈਨੂੰ ਤਾਂ ਸਿੱਧੇ ਦੁਲਹਨ ਹੀ ਬਣਾ ਦਿੱਤਾ ਜਾਂਦਾ ਹੈ। 'ਉਹ ਹੱਸਦੇ ਹੋਏ ਕਹਿੰਦੀ ਹੈ।' ਪਿਛਲੇ ਅੱਠ ਮਹੀਨਿਆਂ ਵਿਚ ਮੈਂ ਅੱਠ ਵਾਰ ਦੁਲਹਨ ਬਣੀ ਹਾਂ। 'ਸ਼ਾਦੀ ਮੇਂ ਜ਼ਰੂਰ ਆਨਾ' ਵਿਚ ਮੈਂ ਤਿੰਨ ਵਾਰ ਦੁਲਹਨ ਬਣੀ ਤੇ 'ਗੈਸਟ ਇਨ ਲੰਦਨ' ਵਿਚ ਇਕ ਵਾਰ। ਇਹ ਫ਼ਿਲਮ 'ਵੀਰੇ ਕੀ ਵੈਡਿੰਗ' ਵਿਚ ਫਿਰ ਦੁਲਹਨ ਬਣੀ ਤੇ 'ਸ਼ਾਦੀ ਮੇਂ ਜ਼ਰੂਰ ਆਨਾ' ਦੇ ਪ੍ਰਚਾਰ ਤੇ ਪੋਸਟਰ ਸ਼ੂਟ ਲਈ ਤਿੰਨ ਵਾਰ ਦੁਲਹਨ ਬਣੀ। ਹੁਣ ਤਾਂ ਦੁਲਹਨ ਬਣਨ ਦਾ ਅਭਿਆਸ ਜਿਹਾ ਹੋ ਗਿਆ ਹੈ, ਕਹਿ ਕੇ ਉਹ ਫਿਰ ਇਕ ਵਾਰ ਹੱਸ ਪੈਂਦੀ ਹੈ।
* ਜਦੋਂ ਤੁਸੀਂ ਦੁਲਹਨ ਬਣਦੇ ਹੋ, ਉਦੋਂ ਤੁਹਾਡੇ ਦਿਮਾਗ਼ ਵਿਚ ਕੀ ਕੁਝ ਚੱਲ ਰਿਹਾ ਹੁੰਦਾ ਹੈ?
-ਪਹਿਲੀ ਵਾਰ ਜਦੋਂ ਦੁਲਹਨ ਬਣੀ ਸੀ, ਉਹ ਦੱਖਣ ਦੀ ਫ਼ਿਲਮ ਲਈ ਬਣੀ ਸੀ। ਜਦੋਂ ਖ਼ੁਦ ਨੂੰ ਦੁਲਹਨ ਦੇ ਕੱਪੜਿਆਂ ਵਿਚ ਸਜ਼ੀ ਦੇਖਿਆ ਤਾਂ ਮਨ ਹੀ ਮਨ ਇਹ ਕਿਹਾ ਸੀ 'ਹਾਏ, ਕਿੰਨੀ ਸੋਹਣੀ ਲਗ ਰਹੀ ਹਾਂ।' ਫਿਰ ਮੈਨੂੰ ਆਪਣੇ ਬਚਪਨ ਦੇ ਦਿਨ ਯਾਦ ਆ ਗਏ। ਉਦੋਂ ਮੈਂ ਸੋਚਿਆ ਕਰਦੀ ਸੀ ਕਿ ਚਿੱਟੇ ਘੋੜੇ 'ਤੇ ਬੈਠ ਕੇ ਰਾਜ ਕੁਮਾਰ ਮੈਨੂੰ ਲੈਣ ਆਵੇਗਾ। ਹੁਣ ਜਦੋਂ ਦੁਲਹਨ ਬਣ ਗਈ ਤਾਂ ਸੋਚਿਆ ਕਿ ਰਾਜ ਕੁਮਾਰ ਭਾਵੇਂ ਸਫੈਦ ਘੋੜੇ 'ਤੇ ਸਵਾਰ ਹੋ ਕੇ ਆਵੇ ਪਰ ਜਦੋਂ ਮੈਨੂੰ ਲੈ ਕੇ ਜਾਵੇ ਤਾਂ ਬੀ. ਐਮ. ਡਬਿਲਊ ਵਿਚ ਬਿਠਾ ਕੇ ਲੈ ਜਾਵੇ।
* ਨਿੱਜੀ ਜੀਵਨ ਵਿਚ ਤੁਸੀਂ ਕਈ ਵਿਆਹ ਦੇਖੇ ਹੋਣਗੇ, ਕੋਈ ਯਾਦਗਾਰ ਵਿਆਹ?
-ਮੇਰੇ ਲਈ ਤਾਂ ਹਰ ਵਿਆਹ ਯਾਦਗਾਰ ਰਿਹਾ ਹੈ। ਮੈਂ ਦਿੱਲੀ ਤੋਂ ਹਾਂ ਅਤੇ ਉਥੇ ਮੈਂ ਆਪਣੇ ਰਿਸ਼ਤੇਦਾਰਾਂ ਦੇ ਵਿਆਹਾਂ 'ਚ ਸ਼ਾਮਿਲ ਹੁੰਦੀ ਰਹੀ ਹਾਂ। ਮੈਂ ਆਪਣੀਆਂ ਮਾਸੀਆਂ ਦੇ ਵਿਆਹ ਵੀ ਦੇਖੇ ਹਨ। ਵਿਆਹ ਦੀ ਸਭ ਤੋਂ ਚੰਗੀ ਗੱਲ ਮੈਨੂੰ ਇਹ ਲਗਦੀ ਹੈ ਕਿ ਦੋ ਕਮਰੇ ਦੇ ਫਲੈਟ ਵਿਚ 25 ਲੋਕ ਖ਼ੁਦ ਨੂੰ 'ਅਡਜਸਟ' ਕਰ ਲੈਂਦੇ ਹਨ। ਮੈਨੂੰ ਵਿਆਹ ਦੀਆਂ ਰਸਮਾਂ ਵੀ ਪਸੰਦ ਹਨ। ਖ਼ਾਸ ਕਰ ਕੇ ਪੰਜਾਬੀ ਵਿਆਹ ਪਸੰਦ ਹਨ। ਵਿਆਹ ਦੇ ਮੌਕੇ 'ਤੇ ਰਿਸ਼ਤੇਦਾਰਾਂ ਨਾਲ ਮੇਲ-ਮਿਲਾਪ ਵਿਆਹ ਦੀ ਅਹਿਮੀਅਤ ਵਧਾ ਦਿੰਦਾ ਹੈ।
* 'ਵੀਰੇ ਕੀ ਵੈਡਿੰਗ' ਦੀ ਸ਼ੂਟਿੰਗ ਦਿੱਲੀ ਵਿਚ ਕੀਤੀ ਗਈ ਹੈ। ਭੂਮਿਕਾ ਲਈ ਦਿੱਲੀ ਵਾਲੀ ਕੁੜੀ ਬਣਨਾ ਤੁਹਾਡੇ ਲਈ ਸੌਖਾ ਰਿਹਾ?
-ਸੌਖਾ ਨਹੀਂ ਸਗੋਂ ਮੁਸ਼ਕਿਲ ਰਿਹਾ ਸੀ। ਫ਼ਿਲਮ ਵਿਚ ਮੇਰੇ ਕਿਰਦਾਰ ਦਾ ਨਾਂਅ ਗੀਤ ਹੈ। ਉਹ ਦਿੱਲੀ ਦੀ ਰਹਿਣ ਵਾਲੀ ਹੈ ਅਤੇ ਮਾਂ-ਬਾਪ ਦੀ ਲਾਡਲੀ ਹੈ। ਮੈਂ ਦਿੱਲੀ ਤੋਂ ਹਾਂ ਪਰ ਜਦੋਂ ਮੈਂ ਡੇਢ ਸਾਲ ਦੀ ਸੀ, ਉਦੋਂ ਅਸੀਂ ਬੰਗਲੌਰ ਚਲੇ ਗਏ ਸੀ। ਮੈਂ ਉਥੇ ਪਲੀ ਹਾਂ। ਸੋ, ਮੇਰੇ ਵਿਚ ਦਿੱਲੀ ਦੀ ਕੁੜੀ ਵਾਲੀ ਕੋਈ ਗੱਲ ਨਹੀਂ ਹੈ। ਜਦੋਂ ਮੈਂ ਫ਼ਿਲਮ ਦੀ ਡਬਿੰਗ ਕਰ ਰਹੀ ਸੀ, ਉਦੋਂ ਮੈਂ ਮਹਿਸੂਸ ਕੀਤਾ ਕਿ ਕੁਝ ਕਮੀ ਰੜਕ ਰਹੀ ਹੈ। ਮੈਂ ਡਬਿੰਗ ਰੋਕ ਦਿੱਤੀ ਅਤੇ ਦਿੱਲੀ ਦੇ ਕਿਰਦਾਰਾਂ 'ਤੇ ਆਧਾਰਿਤ ਕਈ ਫ਼ਿਲਮਾਂ ਦੇਖੀਆਂ। ਉਥੋਂ ਦਿੱਲੀ ਵਾਲਾ ਰਹਿਣ-ਸਹਿਣ ਸਿੱਖਿਆ। ਫਿਰ ਜਾ ਕੇ ਫ਼ਿਲਮ ਦੀ ਡਬਿੰਗ ਕੀਤੀ।
* ਤੁਹਾਡੀ ਅਗਲੀ ਫ਼ਿਲਮ?
-ਮੈਂ ਦੋ ਹਿੰਦੀ ਫ਼ਿਲਮਾਂ 'ਯਮਲਾ ਪਗਲਾ ਦੀਵਾਨਾ 3' ਤੇ 'ਕਾਰਵਾਂ' ਕਰ ਰਹੀ ਹਾਂ। 'ਕਾਰਵਾਂ' ਵਿਚ ਮੇਰੀ ਪੂਰੀ ਵੱਡੀ ਭੂਮਿਕਾ ਨਹੀਂ ਹੈ। ਨਾਲ ਹੀ ਕੰਨੜ ਫ਼ਿਲਮ 'ਦਲਪਤੀ' ਕਰ ਰਹੀ ਹਾਂ ਅਤੇ ਹਾਂ, ਇਹ ਕਮਲ ਹਸਨ ਦੀ ਹਿੱਟ ਫ਼ਿਲਮ 'ਦਲਪਤੀ' ਦੀ ਰੀਮੇਕ ਨਹੀਂ ਹੈ।


-ਇੰਦਰਮੋਹਨ ਪੰਨੂੰ

ਅਦਿੱਤੀ ਰਾਉ ਹੈਦਰੀ

ਸਾਦਾਪਨ ਪਸੰਦ

'ਪਦਮਾਵਤ' ਨੇ ਅਦਿਤੀ ਰਾਉ ਹੈਦਰੀ ਨੂੰ ਫਿਰ ਚਰਚਾ ਵਿਚ ਲਿਆਂਦਾ ਹੈ। ਸਮਰ ਰਿਸਾਰਟ 2018 ਦੇ ਚੌਥੇ ਦਿਨ ਅਦਿਤੀ ਡਿਜ਼ਾਈਨਰ ਪਾਇਲ ਸਿੰਘਲ ਲਈ ਰੈਂਪ 'ਤੇ ਆਈ। 'ਪਦਮਾਵਤ' 'ਚ ਮੇਹਰੁਨਿਸਾ ਦੀ ਭੂਮਿਕਾ ਨਿੱਕੀ ਸੀ ਪਰ ਭੰਸਾਲੀ ਨਾਲ ਕੰਮ ਕਰਨ ਦਾ ਉਸ ਦਾ ਸੁਪਨਾ ਪੂਰਾ ਹੋਇਆ। 'ਦਾਸ ਦੇਵ' ਨੂੰ ਲੈ ਕੇ ਅਦਿਤੀ ਬਹੁਤ ਉਤਸ਼ਾਹਿਤ ਹੈ। ਸੁਧੀਰ ਮਿਸ਼ਰਾ ਦੀ ਇਹ ਫ਼ਿਲਮ ਕਿਤੇ 'ਹੇਟ ਸਟੋਰੀ-4' ਨਾਲ ਟਕਰਾ ਨਾ ਜਾਏ, ਡਰ ਇਸ ਗੱਲ ਦਾ ਹੈ। ਰਾਹੁਲ ਭੱਟ ਦੇ ਨਾਲ ਅਦਿਤੀ ਨੇ 'ਚਾਂਦਨੀ' ਦੀ ਭੂਮਿਕਾ ਅਦਾ ਕੀਤੀ ਹੈ। ਭੰਸਾਲੀ ਤੇ ਮਣੀਰਤਨਮ ਨਾਲ ਕੰਮ ਕਰਨ ਤੋਂ ਬਾਅਦ ਹੁਣ ਅਦਿਤੀ ਨਜ਼ਰ ਆਏਗੀ ਉਮੰਗ ਕੁਮਾਰ ਨਾਲ ਫ਼ਿਲਮ ਕਰ ਕੇ। ਇਹ ਫ਼ਿਲਮ ਸੰਜੇ ਦੱਤ ਨਾਲ ਅਦਿਤੀ ਦੀ ਫ਼ਿਲਮ ਹੋਏਗੀ। ਇਸ ਤੋਂ ਇਲਾਵਾ ਅਦਿਤੀ ਇਕ ਤਾਮਿਲ ਫ਼ਿਲਮ ਵੀ ਕਰ ਰਹੀ ਹੈ। ਅਦਿਤੀ ਦਾ ਕਰੀਅਰ ਹੌਲੀ-ਹੌਲੀ ਸੰਵਰ ਰਿਹਾ ਹੈ ਤੇ ਗੁਜ਼ਾਰੇ ਜੋਗੀਆਂ ਉਹ ਫ਼ਿਲਮਾਂ ਕਰੀ ਜਾ ਰਹੀ ਹੈ। ਕਰਨ ਜੌਹਰ ਵਲੋਂ ਦਿੱਤੀ ਪਾਰਟੀ 'ਚ ਅਦਿਤੀ ਦਾ ਆਉਣਾ ਕਈ ਸਵਾਲਾਂ ਨੂੰ ਜਨਮ ਦੇ ਰਿਹਾ ਹੈ। ਅਦਿਤੀ ਦਾ ਅੱਜਕਲ੍ਹ ਰਿਚਾ ਚੱਢਾ ਨਾਲ ਵੀ ਕਾਫੀ ਚੰਗਾ ਤਾਲ-ਮੇਲ ਹੈ। ਚੰਗਾ ਦਿਸਣਾ ਜ਼ਰੂਰੀ ਹੈ ਤੇ ਨਾਲ ਹੀ ਚੰਗਾ ਕਰਨਾ, ਇਹ ਅਦਿਤੀ ਦੀ ਸੋਚ ਹੈ। ਅਦਿਤੀ ਨੂੰ ਬਹੁਤ ਸਾਰੀਆਂ ਚੀਜ਼ਾਂ ਪਸੰਦ ਹਨ। ਚਾਹੇ ਉਹ ਰੈੱਡ ਕਾਰਪੇਟ 'ਤੇ ਚਲਦੀ ਹੈ, ਰੈਂਪ ਕਰਦੀ ਹੈ ਪਰ ਵੈਸੇ ਅਦਿਤੀ ਨੂੰ ਸਰਲਤਾ ਪਸੰਦ ਹੈ। ਸਰਲ ਤੇ ਸਾਧਾਰਨ ਰਹਿਣਾ ਤੇ ਦਿਸਣਾ ਉਸ ਨੂੰ ਚੰਗਾ ਲੱਗਦਾ ਹੈ। ਸ਼ਾਹੀ ਪਰਿਵਾਰ 'ਚੋਂ ਆ ਕੇ ਵੀ ਲੋੜ ਪੈਣ 'ਤੇ ਅਦਿਤੀ ਨੇ ਆਪਣੇ ਸਰਲ ਸੁਭਾਅ ਸਦਕਾ ਨਿਰਮਾਤਾਵਾਂ ਨਾਲ ਸੰਪਰਕ ਵੀ ਕੀਤਾ ਹੈ ਤੇ ਚੰਗਾ ਕੰਮ ਮੰਗਣ ਤੋਂ ਉਸ ਨੇ ਗੁਰੇਜ਼ ਵੀ ਨਹੀਂ ਕੀਤਾ।

ਚਿਤਰਾਂਗਦਾ ਸਿੰਘ ਜੱਜ ਬਣੀ

ਪਿਛਲੇ ਚਾਰ ਸਾਲਾਂ ਵਿਚ 'ਗੱਬਰ ਇਜ਼ ਬੈਕ' ਤੇ 'ਮੁੰਨਾ ਮਾਈਕਲ' ਵਿਚ ਛੋਟੀ ਭੂਮਿਕਾ ਵਿਚ ਨਜ਼ਰ ਆਈ ਚਿਤਰਾਂਗਦਾ ਸਿੰਘ ਉਦੋਂ ਖ਼ਬਰਾਂ ਵਿਚ ਆਈ ਜਦੋਂ ਉਸ ਨੇ ਨਵਾਜ਼ੂਦੀਨ ਸਿਦੀਕੀ ਨੂੰ ਮੁੱਖ ਭੂਮਿਕਾ ਵਿਚ ਚਮਕਾਉਂਦੀ 'ਬਾਬੂਮੋਸ਼ਾਏ ਬੰਦੂਕਬਾਜ਼' ਛੱਡ ਦਿੱਤੀ ਸੀ। ਇਸ ਤੋਂ ਇਲਾਵਾ ਚਿਤਰਾਂਗਦਾ ਦੀਆਂ ਸਰਗਰਮੀਆਂ ਬਾਰੇ ਜ਼ਿਆਦਾ ਕੁਝ ਸੁਣਨ ਵਿਚ ਨਹੀਂ ਆਇਆ। ਹੁਣ ਉਸ ਨੂੰ ਲੈ ਕੇ ਇਹ ਖ਼ਬਰ ਆਈ ਹੈ ਕਿ ਉਹ ਡਾਂਸ ਸ਼ੋਅ ਵਿਚ ਜੱਜ ਦੀ ਕੁਰਸੀ 'ਤੇ ਬੈਠੀ ਨਜ਼ਰ ਆਏਗੀ।
'ਡਾਂਸ ਇੰਡੀਆ ਡਾਂਸ ਲਿਟਲ ਮਾਸਟਰਜ਼' ਸ਼ੋਅ ਲਈ ਚਿਤਰਾਂਗਦਾ ਨੂੰ ਜੱਜ ਦੇ ਤੌਰ 'ਤੇ ਸਾਈਨ ਕਰ ਲਿਆ ਗਿਆ ਹੈ ਅਤੇ ਇਸ ਸ਼ੋਅ ਦੀ ਸ਼ੂਟਿੰਗ ਵੀ ਸ਼ੁਰੂ ਹੋ ਗਈ ਹੈ।
ਉਂਝ ਚਿਤਰਾਂਗਦਾ ਲਈ ਜੱਜ ਦੇ ਕੰਮ ਨੂੰ ਅੰਜਾਮ ਦੇਣਾ ਸੌਖਾ ਰਹੇਗਾ ਕਿਉਂਕਿ 'ਮੁੰਨਾ ਮਾਈਕਲ' ਵਿਚ ਵੀ ਉਹ ਡਾਂਸਿੰਗ ਸ਼ੋਅ ਦੀ ਜੱਜ ਬਣ ਕੇ ਆਪਣੀ ਰਾਏ ਦਿੰਦੀ ਨਜ਼ਰ ਆਈ ਸੀ।
ਭਾਵ, ਜੋ ਉਸ ਨੇ ਵੱਡੇ ਪਰਦੇ 'ਤੇ ਕੀਤਾ, ਉਹੀ ਕੰਮ ਹੁਣ ਛੋਟੇ ਪਰਦੇ 'ਤੇ ਕਰ ਰਹੀ ਹੈ।


-ਪੰਨੂੰ

ਫ਼ਿਲਮ 'ਸੱਸੀ-ਪੁਨੂੰ' (1965)

ਇਸ ਪੰਜਾਬੀ ਫ਼ਿਲਮ ਦੀ ਕਹਾਣੀ ਐੱਸ.ਪੀ. ਬਖ਼ਸ਼ੀ ਨੇ ਲਿਖੀ। ਇਸ ਦਾ ਸੰਗੀਤ ਬੀ.ਐੱਨ. ਬਾਲੀ ਨੇ ਦਿੱਤਾ ਸੀ। ਇਹ ਪਹਿਲੀ ਪੰਜਾਬੀ ਫ਼ਿਲਮ ਸੀ ਜੋ ਈਸਟਮੈਨ ਕਲਰ ਫ਼ਿਲਮ ਸੀ। ਇਸ ਫ਼ਿਲਮ ਦੇ ਮੁੱਖ ਅਦਾਕਾਰ ਰਵਿੰਦਰ ਕਪੂਰ, ਇੰਦਰਾ ਬਿੱਲੀ ਤੇ ਮਜਨੂੰ ਆਦਿ ਸਨ।
ਹਿੱਟ ਗੀਤਾਂ ਦੇ ਬੋਲ : 1. ਉੱਤੇ ਲੱਦਿਆ ਰੂਪ ਕੁੰਵਾਰਾ ਡਾਚੀਆਂ ਨੂੰ ਚਾਅ ਚੜ੍ਹਿਆ, 2. ਹੱਥ ਜੋੜਦੀ ਮੈਂ ਤੈਨੂੰ ਤਸਵੀਰੇ ਨੀ ਇੱਕ ਨਵੀਂ ਗੱਲ ਕਰਦੇ, 3. ਚੰਨ ਚੜ੍ਹਿਆ ਕੁਲ ਆਲਮ ਦੇਖੇ ਸਾਨੂੰ ਸੱਜਣਾ ਬਾਝ ਹਨੇਰਾ, 4. ਅੱਖਾਂ ਦੇ ਵਿੱਚ ਅੱਖਾਂ ਨਾ ਪਾ, ਮੇਰੇ ਦਿਲ ਨੂੰ ਕੁਝ ਕੁਝ ਹੋਵੇ, 5. ਗੱਜਦੇ ਦੇਖ ਲਾਲ ਬੱਦਲ ਜੰਗ ਦੇ, ਉੱਠ ਜਵਾਨਾਂ ਤੇਰਾ ਮੂੰਹ ਰੰਗਦੇ, 6. ਡਾਚੀ ਵਾਲਿਆ ਮੋੜ ਮੁਹਾਰ ਵੇ, 7. ਜੱਗ ਸਾਰਾ ਤਾਹਨੇ ਮਾਰਦਾ. ਵੇ ਰੱਬ ਰਾਖਾ ਸਾਡੇ ਪਿਆਰ ਦਾ। ਇਸ ਫ਼ਿਲਮ ਵਿਚ ਕੁੱਲ ਦਸ ਗੀਤ ਸਨ। ਇਹ ਫ਼ਿਲਮ ਅਤੇ ਇਸ ਦੇ ਗੀਤ ਬਹੁਤ ਹਿੱਟ ਰਹੇ ਸਨ।


-ਸੰਗ੍ਰਹਿ ਕਰਤਾ : ਗੁਰਮੁਖ ਸਿੰਘ ਲਾਲੀ
ਸਟੇਟ ਐਵਾਰਡੀ (ਸੰਗੀਤ), ਪਿੰਡ ਸ਼ੇਰ ਸਿੰਘ ਪੁਰਾ (ਬਰਨਾਲਾ)।

ਮਾਂ ਦਾ ਸੁਪਨਾ ਪੂਰਾ ਕਰ ਰਹੀ ਹਾਂ :

ਰੇਣੂ ਸ਼ਰਮਾ

ਇੰਦੌਰ ਵਿਚ ਜਨਮੀ ਤੇ ਪਲੀ ਰੇਣੂ ਸ਼ਰਮਾ ਹੁਣ ਬਤੌਰ ਗਾਇਕਾ ਬਾਲੀਵੁੱਡ ਵਿਚ ਕਾਫੀ ਨਾਂਅ ਕਮਾ ਰਹੀ ਹੈ। ਇਨ੍ਹੀਂ ਦਿਨੀਂ ਉਸ ਦੀ ਆਵਾਜ਼ ਨਾਲ ਸਜਿਆ ਗੀਤ 'ਦੇਸੀ ਲਵ' ਬਹੁਤ ਚਰਚਾ ਵਿਚ ਹੈ ਅਤੇ ਇਸ ਗੀਤ ਦੇ ਵੀਡੀਓ ਵਿਚ ਉਹ ਖ਼ੁਦ ਨੱਚਦੀ ਦਿਖਾਈ ਦੇ ਰਹੀ ਹੈ। ਇਸ ਤੋਂ ਪਹਿਲਾਂ ਹੈਦਰਾਬਾਦੀ ਹਿੰਦੀ ਵਿਚ ਬਣੀ 'ਦੁਲਹਨ ਹੈਦਰਾਬਾਦ ਕੀ' ਵਿਚ ਉਸ ਵਲੋਂ ਗਾਏ ਗੀਤ ਬਹੁਤ ਪਸੰਦ ਕੀਤੇ ਗਏ ਸਨ।
ਗਾਇਕਾ ਦੇ ਤੌਰ 'ਤੇ ਨਵੇਂ ਮੁਕਾਮ ਹਾਸਲ ਕਰ ਰਹੀ ਰੇਣੂ ਆਪਣੇ ਬਾਰੇ ਕਹਿੰਦੀ ਹੈ, 'ਜਦੋਂ ਮੈਂ ਪੜ੍ਹਾਈ ਕਰ ਰਹੀ ਸੀ ਉਦੋਂ ਆਈ. ਏ. ਐਸ. ਵਿਚ ਜਾਣਾ ਚਾਹੁੰਦੀ ਸੀ। ਨਾਲ ਹੀ ਮੇਰੀ ਸੰਗੀਤ ਵਿਚ ਵੀ ਰੁਚੀ ਸੀ। ਮੈਂ ਸ਼ੌਕੀਆ ਤੌਰ 'ਤੇ ਗਾਇਆ ਕਰਦੀ ਸੀ ਅਤੇ ਮੇਰੀ ਮਾਂ ਨੂੰ ਮੇਰੀ ਆਵਾਜ਼ ਬਹੁਤ ਪਸੰਦ ਸੀ। ਜਦੋਂ ਕਦੀ ਮੈਂ ਗਾਉਂਦੀ ਤਾਂ ਅੱਖਾਂ ਬੰਦ ਕਰ ਕੇ ਗੀਤ ਦਾ ਆਨੰਦ ਲੈਂਦੀ ਅਤੇ ਵੱਖਰੀ ਦੁਨੀਆ ਵਿਚ ਗੁਆਚ ਜਾਂਦੀ। ਮੇਰੇ ਪਿਤਾ ਦਾ ਸਵਰਗਵਾਸ ਹੋ ਗਿਆ ਸੀ ਅਤੇ ਮੇਰੇ ਲਈ ਮੇਰੀ ਮਾਂ ਹੀ ਸਭ ਕੁਝ ਸੀ। ਉਹ ਹੀ ਮੇਰੀ ਦੁਨੀਆ ਸੀ। ਜਦੋਂ ਮੈਂ 15 ਸਾਲ ਦੀ ਹੋਈ ਤਾਂ ਮਾਂ ਵੀ ਇਸ ਦੁਨੀਆ ਨੂੰ ਅਲਵਿਦਾ ਕਹਿ ਗਈ। ਉਨ੍ਹਾਂ ਦੇ ਜਾਣ ਤੋਂ ਬਾਅਦ ਮੈਨੂੰ ਲੱਗਿਆ ਕਿ ਮੈਨੂੰ ਆਪਣੀ ਮਾਂ ਦਾ ਸੁਪਨਾ ਪੂਰਾ ਕਰਨਾ ਚਾਹੀਦਾ ਹੈ ਅਤੇ ਹੁਣ ਗਾਇਕਾ ਬਣ ਕੇ ਮਾਂ ਦਾ ਸੁਪਨਾ ਪੂਰਾ ਕਰ ਰਹੀ ਹਾਂ।
ਆਈ. ਏ. ਐਸ. ਬਣਨ ਦਾ ਇਰਾਦਾ ਛੱਡ ਕੇ ਰੇਣੂ ਨੇ ਗਾਇਕੀ ਵੱਲ ਆਪਣਾ ਪੂਰਾ ਧਿਆਨ ਕਰ ਲਿਆ ਅਤੇ ਸ਼ਾਸਤਰੀ ਸੰਗੀਤ ਵਿਚ ਡਿਪਲੋਮਾ ਹਾਸਲ ਕਰ ਲਿਆ। ਆਪਣੀ ਆਵਾਜ਼ ਨੂੰ ਦੁਨੀਆ ਤੱਕ ਪਹੁੰਚਾਉਣ ਲਈ ਰੇਣੂ ਨੇ ਬਾਲੀਵੁੱਡ ਵੱਲ ਰੁਖ ਕੀਤਾ ਅਤੇ ਉਹ ਇੰਦੌਰ ਤੋਂ ਮੁੰਬਈ ਪਹੁੰਚ ਗਈ।
ਫ਼ਿਲਮੀ ਦੁਨੀਆ ਵਿਚ ਆਪਣੇ ਸੰਘਰਸ਼ ਬਾਰੇ ਉਹ ਕਹਿੰਦੀ ਹੈ, 'ਇਥੇ ਆ ਕੇ ਮੈਨੂੰ ਵੀ ਸਖ਼ਤ ਸੰਘਰਸ਼ ਕਰਨਾ ਪਿਆ। ਤਿੰਨ ਸਾਲਾਂ ਵਿਚ ਬਾਲੀਵੁੱਡ ਬਾਰੇ ਜਾਣੂ ਹੋ ਗਈ। ਇਸ ਦੌਰਾਨ ਮੇਰੇ ਤੋਂ ਤਕਰੀਬਨ ਪੰਜਾਹ ਗੀਤ ਗਵਾਏ ਗਏ ਪਰ ਇਕ ਵੀ ਗੀਤ ਜਾਰੀ ਨਹੀਂ ਕੀਤਾ ਗਿਆ। ਇਹ ਮੇਰੀ ਮੁਸ਼ਕਿਲ ਦੀ ਘੜੀ ਦਾ ਦੌਰ ਸੀ, ਪਰ ਮੈਂ ਹਿੰਮਤ ਨਹੀਂ ਹਾਰੀ। ਜਦੋਂ ਕਦੀ ਨਾਉਮੀਦ ਹੁੰਦੀ ਤਾਂ ਮਾਂ ਨੂੰ ਯਾਦ ਕਰ ਲੈਂਦੀ ਅਤੇ ਅੱਖਾਂ ਸਾਹਮਣੇ ਉਨ੍ਹਾਂ ਦਾ ਚਿਹਰਾ ਆਉਂਦਿਆਂ ਹੀ ਮੇਰੇ ਵਿਚ ਨਵੀਂ ਤਾਕਤ ਆ ਜਾਂਦੀ। ਪਿਛਲੇ ਦਿਨੀਂ ਮੈਨੂੰ ਦੋ ਮਰਾਠੀ ਫ਼ਿਲਮਾਂ ਵਿਚ ਮੌਕਾ ਮਿਲਿਆ ਇਹ ਫ਼ਿਲਮਾਂ ਸਨ, 'ਮੈਮਰੀ ਕਾਰਡ' ਤੇ 'ਲਵ ਝੱਕਾਸ'। ਹਾਲਾਂਕਿ ਮੈਨੂੰ ਮਰਾਠੀ ਭਾਸ਼ਾ ਨਹੀਂ ਆਉਂਦੀ ਪਰ ਮੈਨੂੰ ਜੋ ਗੀਤ ਮਿਲੇ ਉਹ ਪਾਰਟੀ ਗੀਤ ਸਨ। ਸੋ, ਇਨ੍ਹਾਂ ਵਿਚ ਅੰਗਰੇਜ਼ੀ ਸ਼ਬਦ ਜ਼ਿਆਦਾ ਸਨ। ਇਸ ਵਜ੍ਹਾ ਕਰਕੇ ਇਨ੍ਹਾਂ ਨੂੰ ਗਾਉਣ ਵਿਚ ਸੌਖ ਰਹੀ। ਹੁਣ ਜਦੋਂ ਮੈਂ ਆਪਣਾ ਸੋਲੋ ਗੀਤ 'ਦੇਸੀ ਲਵ' ਲੈ ਕੇ ਆਈ ਤਾਂ ਸ਼ੁਰੂ ਵਿਚ ਇਸ ਗੀਤ ਨੂੰ ਠੰਢਾ ਹੁੰਗਾਰਾ ਮਿਲਿਆ। ਉਸ ਦੌਰਾਨ ਯੂ-ਟਿਊਬ 'ਤੇ ਹੋਰ ਗੀਤਾਂ ਨੂੰ ਭਾਰੀ ਹੁੰਗਾਰਾ ਮਿਲਿਆ ਪਰ ਮੇਰੇ ਗੀਤ ਨੂੰ ਜ਼ਿਆਦਾ ਪਸੰਦ ਨਹੀਂ ਕੀਤਾ ਗਿਆ। ਮੇਰੀਆਂ ਦੋਵੇਂ ਵੱਡੀਆਂ ਭੈਣਾਂ ਨੂੰ ਵੀ ਮੇਰਾ ਗੀਤ ਬਹੁਤ ਪਸੰਦ ਆਇਆ ਅਤੇ ਉਨ੍ਹਾਂ ਨੇ ਇਹ ਕਹਿ ਕੇ ਹੌਸਲਾ ਦਿੱਤਾ ਕਿ ਤੂੰ ਇਮਾਨਦਾਰੀ ਨਾਲ ਮਿਹਨਤ ਕੀਤੀ ਹੈ, ਫਲ ਵੀ ਮਿੱਠਾ ਹੀ ਮਿਲੇਗਾ। ਕੁਝ ਦਿਨਾਂ ਬਾਅਦ ਮੇਰੇ ਗੀਤ ਨੂੰ ਹੁੰਗਾਰਾ ਮਿਲਣ ਲੱਗਾ ਅਤੇ ਦੇਖਦੇ ਹੀ ਦੇਖਦੇ ਗਿਣਤੀ ਵਧਣ ਲੱਗੀ। ਸੰਗੀਤ ਦੀ ਦੁਨੀਆ ਵਿਚ ਵੀ ਮੇਰੇ ਗੀਤ ਦੀ ਚਰਚਾ ਹੋਣ ਲੱਗੀ ਅਤੇ ਮੈਂ ਇਹ ਕਹਿ ਸਕਦੀ ਹਾਂ ਕਿ ਇਸ ਗੀਤ ਨੇ ਮੇਰੀ ਕਿਸਮਤ ਬਦਲ ਦਿੱਤੀ।' ਰੇਣੂ ਅਨੁਸਾਰ ਇਸ ਗੀਤ ਦੀ ਸਫਲਤਾ ਨੇ ਉਸ ਨੂੰ ਗਾਇਕੀ ਵੱਲ ਹੋਰ ਗੰਭੀਰ ਬਣਾ ਦਿੱਤਾ ਹੈ ਅਤੇ ਉਹ ਅੱਗੇ ਹੋਰ ਸੁਰੀਲੇ ਗੀਤ ਪੇਸ਼ ਕਰਨਾ ਚਾਹੁੰਦੀ ਹੈ ।

-ਪੰਨੂੰ

ਧੁਰ ਅੰਦਰ ਤੱਕ ਸਕੂਨ ਦੇਣ ਵਾਲੀ ਗਾਇਕੀ ਤੇ ਸ਼ਾਇਰੀ ਦਾ ਮਾਲਕ ਬਾਬਾ ਬੇਲੀ

ਅਜੋਕੇ ਸਮੇਂ ਅੰਦਰ ਸੰਗੀਤਕ ਦੁਨੀਆਂ ਵਿਚ ਭਾਵੇਂ ਮਾਰਧਾੜ, ਹਥਿਆਰ ਅਤੇ ਨਸ਼ਿਆਂ ਦਾ ਬੋਲਬਾਲਾ ਹੈ ਪਰ ਕਈ ਗੀਤਕਾਰ ਤੇ ਗਾਇਕ ਅੱਜ ਵੀ ਅਜਿਹੇ ਹਨ ਜੋ ਸਾਫ-ਸੁਥਰੀ ਤੇ ਪਰਿਵਾਰਕ ਗਾਇਕੀ 'ਚ ਆਪਣਾ ਯੋਗਦਾਨ ਪਾ ਰਹੇ ਹਨ। ਉਨ੍ਹਾਂ ਵਿਚੋਂ ਇਕ ਨਾਂਅ ਬਾਬਾ ਬੇਲੀ ਦਾ ਆਉਂਦਾ ਹੈ ਜੋ ਸਮਾਜਿਕ ਤੇ ਅਰਥ ਭਰਪੂਰ ਲੇਖਣੀ ਵਾਲਾ ਗੀਤਕਾਰ ਤੇ ਗਾਇਕ ਹੈ। 'ਖੁਆਬਾਂ ਦੇ ਦੇਸ਼' ਵਰਗੇ ਦਿਲਖਿੱਚ ਗੀਤ ਦੇ ਗਾਇਕ ਬਾਬਾ ਬੇਲੀ ਦੇ ਰਚੇ ਗੀਤ ਜਿਥੇ ਕਈ ਗਾਇਕਾਂ ਨੇ ਗਾਏ ਹਨ, ਉਥੇ ਹੀ ਉਸ ਵਲੋਂ ਲਿਖਿਆ ਤੇ ਪ੍ਰਸਿੱਧ ਗਾਇਕ ਕੰਵਰ ਗਰੇਵਾਲ ਵਲੋਂ ਗਾਇਆ 'ਜਿਨ੍ਹਾਂ ਨੂੰ ਤੂੰ ਦਿਸਦੈਂ ਓਹ ਹੋਰ ਈ ਅੱਖਾਂ ਨੇ' ਗੀਤ ਬਹੁਤ ਮਕਬੂਲ ਹੋਇਆ ਹੈ। ਹੁਣ ਇਕ ਵਾਰ ਫਿਰ ਨਿਰਦੇਸ਼ਕ ਸਟਾਲਨਵੀਰ ਅਤੇ ਕੇ. ਵੀ. ਸਿੰਘ ਦੇ ਸੰਗੀਤ ਹੇਠ ਵਸਲ ਪ੍ਰੋਡਕਸ਼ਨ ਰਾਹੀਂ ਬਾਬਾ ਬੇਲੀ 'ਲਾਵਾਂ' ਗੀਤ ਲੈ ਕੇ ਹਾਜ਼ਰ ਹੋਇਆ ਹੈ ਜਿਸ ਨੂੰ ਖੂਬ ਪਸੰਦ ਕੀਤਾ ਜਾ ਰਿਹਾ ਹੈ। ਅੰਮ੍ਰਿਤਸਰ ਜ਼ਿਲ੍ਹੇ ਦੇ ਪਿੰਡ ਦੋਬਲੀਆਂ ਵਿਖੇ ਮਾਤਾ ਹਰਜਿੰਦਰ ਕੌਰ ਦੀ ਕੁੱਖੋਂ ਪਿਤਾ ਸਵਿੰਦਰ ਸਿੰਘ ਦੇ ਘਰ 1986 'ਚ ਜਨਮੇ ਬਾਬਾ ਬੇਲੀ ਦਾ ਅਸਲ ਨਾਂਅ ਹਰਪ੍ਰੀਤ ਸਿੰਘ ਹੈ ਜਿਸ ਨੂੰ ਬਚਪਨ ਵਿਚ ਲਿਖਣ ਦਾ ਸ਼ੌਕ ਪੈ ਗਿਆ ਤੇ ਆਪਣੀ ਮੁੱਢਲੀ ਪੜ੍ਹਾਈ ਪੂਰੀ ਕਰਨ ਉਪਰੰਤ ਪੰਜਾਬੀ ਯੂਨੀਵਰਸਿਟੀ ਤੋਂ ਆਪਣੀ ਉਚੇਰੀ ਸਿੱਖਿਆ ਹਾਸਲ ਕਰਕੇ ਹੁਣ ਸੰਗਰੂਰ ਜ਼ਿਲ੍ਹੇ ਦੇ ਧੂਰੀ ਹਲਕੇ 'ਚ ਪਿੰਡ ਬੇਨੜੇ ਦੇ ਕਾਲਜ ਵਿਚ ਬਤੌਰ ਅਧਿਆਪਕ ਵਲੋਂ ਵਿਚਰ ਰਹੇ ਬਾਬਾ ਬੇਲੀ ਨੇ ਆਪਣੇ ਇਸ ਸ਼ੌਕ ਨੂੰ ਲਗਾਤਾਰ ਜਾਰੀ ਰੱਖਿਆ ਹੈ। ਬਾਬਾ ਬੇਲੀ ਦੀ ਕਲਮ ਤੋਂ ਨਿਕਲੇ 'ਬੇ-ਫਿਕਰੀ ਨੂੰ ਹੱਲਾ ਸ਼ੇਰੀ ਦਿੰਦਾ ਏ, ਸਾਨੂੰ ਤੇਰਾ ਇਸ਼ਕ ਦਲੇਰੀ ਦਿੰਦਾ ਏ' ਵਰਗੇ ਬੋਲ ਦਿਲ ਨੂੰ ਛੂਹ ਜਾਂਦੇ ਹਨ। ਉਨ੍ਹਾਂ ਦੀ ਪੂਰੀ ਟੀਮ ਦੀ ਦਿਲੀ ਇੱਛਾ ਪੰਜਾਬ ਤੇ ਪੰਜਾਬੀ ਲਈ ਸਾਫ-ਸੁਥਰਾ ਤੇ ਪਰਿਵਾਰਕ ਕੰਮ ਕਰਨ ਦੀ ਹੈ।


-ਵਿਕਰਮਜੀਤ ਸਿੰਘ ਬਾਜਵਾ
ਕਕਰਾਲਾ (ਪਟਿਆਲਾ) 'ਅਜੀਤ' ਪੱਤਰਕਾਰ ਘੱਗਾ।

ਕੈਟਰੀਨਾ ਦੀ ਭੈਣ ਵੀ ਕੈਫ ਹੈ

ਸਾਲ 2002-03 ਵਿਚ ਜੈਕੀ ਸ਼ਰਾਫ ਦੀ ਪਤਨੀ ਆਇਸ਼ਾ ਜਦੋਂ ਬਤੌਰ ਨਿਰਮਾਤਰੀ 'ਬੂਮ' ਦਾ ਨਿਰਮਾਣ ਕਰ ਰਹੀ ਸੀ, ਉਦੋਂ ਦੋ ਨਵੀਆਂ ਹੀਰੋਇਨਾਂ ਪਦਮਾ ਲਕਸ਼ਮੀ ਤੇ ਕੈਟਰੀਨਾ ਨੂੰ ਇਸ ਵਿਚ ਚਮਕਾਇਆ ਗਿਆ ਸੀ। ਇਹ ਕੈਟਰੀਨਾ ਦੀ ਪਹਿਲੀ ਹਿੰਦੀ ਫ਼ਿਲਮ ਸੀ। ਜਦੋਂ ਆਪਣੀ ਇਸ ਨਵੀਂ ਹੀਰੋਇਨ ਦਾ ਨਾਂਅ ਰੱਖਣ ਦੀ ਵਾਰੀ ਆਈ ਤਾਂ ਆਇਸ਼ਾ ਦੇ ਨਾਲ-ਨਾਲ ਫ਼ਿਲਮ ਦੇ ਨਿਰਦੇਸ਼ਕ ਕੈਜ਼ਾਦ ਗੁਸਤਾਦ ਨੂੰ ਵੀ ਆਪਣੀ ਹੀਰੋਇਨ ਦਾ ਨਾਂਅ ਬਾਲੀਵੁੱਡ ਲਈ ਅਨੋਖਾ ਲੱਗਿਆ ਸੀ ਕਿਉਂਕਿ ਕੈਟਰੀਨਾ ਦਾ ਅਸਲੀ ਨਾਂਅ ਹੈ ਕੈਟਰੀਨਾ ਟੂਰਕੋਟ। ਉਨ੍ਹਾਂ ਨੂੰ ਲੱਗਿਆ ਕਿ ਹਿੰਦੀ ਫ਼ਿਲਮ ਦੀ ਹੀਰੋਇਨ ਲਈ ਇਹ ਨਾਂਅ ਸਹੀ ਨਹੀਂ ਰਹੇਗਾ। ਸੋ, ਉਸ ਦਾ ਨਾਂਅ ਰੱਖਿਆ ਗਿਆ ਕੈਟਰੀਨਾ ਕਾਜ਼ੀ ਅਤੇ ਫ਼ਿਲਮ ਦੇ ਸਿਲਸਿਲੇ ਵਿਚ ਜੋ ਪਹਿਲਾਂ ਪ੍ਰੈੱਸ ਸਮਾਗਮ ਮੀਡੀਆ ਵਿਚ ਦਿੱਤਾ ਗਿਆ, ਉਸ ਵਿਚ ਇਹ ਨਾਂਅ ਐਲਾਨਿਆ ਗਿਆ ਸੀ। ਫਿਰ ਲੱਗਿਆ ਕਿ ਹੀਰੋਇਨ ਵਿਚ ਗਲੈਮਰ ਹੈ ਅਤੇ ਇਸ ਗਲੈਮਰ ਦੇ ਨਾਲ ਕਾਜ਼ੀ ਨਾਂਅ ਜੱਚਦਾ ਨਹੀਂ ਹੈ ਤੇ ਫਿਰ ਇਕ ਵਾਰ ਨਵੇਂ ਨਾਂਅ 'ਤੇ ਸੋਚ-ਵਿਚਾਰ ਕੀਤਾ ਜਾਣ ਲੱਗਿਆ। ਕਿਉਂਕਿ ਉਨ੍ਹੀਂ ਦਿਨੀਂ ਕ੍ਰਿਕਟ ਵਿਚ ਮੁਹੰਮਦ ਕੈਫ ਦਾ ਬੋਲਬਾਲਾ ਬਹੁਤ ਸੀ। ਸੋ, ਉਸ ਦੇ ਨਾਂਅ ਤੋਂ ਪ੍ਰੇਰਿਤ ਹੋ ਕੇ ਕੈਟਰੀਨਾ ਦੇ ਨਾਂਅ ਦੇ ਪਿੱਛੇ ਲੱਗੇ ਕਾਜ਼ੀ ਸ਼ਬਦ ਨੂੰ ਹਟਾ ਕੇ ਕੈਫ਼ ਜੋੜ ਦਿੱਤਾ ਗਿਆ ਅਤੇ ਇਸ ਨਾਂਅ ਨਾਲ ਉਸ ਨੂੰ ਪੇਸ਼ ਕੀਤਾ ਗਿਆ। ਕੈਟਰੀਨਾ ਨੂੰ ਇਹ ਨਾਂਅ ਫਲਿਆ ਵੀ ਬਹੁਤ ਅਤੇ ਉਹ ਸਟਾਰ ਵੀ ਬਣ ਗਈ।
ਹੁਣ ਕੈਟਰੀਨਾ ਦੀ ਭੈਣ ਇਸਾਬੈਲ ਫ਼ਿਲਮਾਂ ਵਿਚ ਆ ਰਹੀ ਹੈ। ਇਕ 'ਕਾਸਮੈਟਿਕ ਬ੍ਰਾਂਡ' ਲਈ ਇਸਾਬੈਲ ਨੂੰ ਕਰਾਰਬੱਧ ਕਰ ਲਿਆ ਗਿਆ ਹੈ ਅਤੇ ਇਥੇ ਪ੍ਰਚਾਰ ਵਿਚ ਉਸ ਦਾ ਨਾਂਅ ਇਸਾਬੈਲ ਕੈਫ ਰੱਖਿਆ ਗਿਆ ਹੈ। ਭਾਵ ਭੈਣ ਨੇ ਵੀ ਆਪਣੀ ਵੱਡੀ ਭੈਣ ਦਾ ਨਾਂਅ ਅਖ਼ਤਿਆਰ ਕਰ ਲਿਆ। ਕੈਫ਼ ਨਾਂਅ ਕੈਟਰੀਨਾ ਨੂੰ ਤਾਂ ਬਹੁਤ ਫਲਿਆ। ਹੁਣ ਦੇਖਣਾ ਇਹ ਹੈ ਕਿ ਇਹ ਨਾਂਅ ਇਸਾਬੈਲ ਨੂੰ ਕਿੰਨਾ ਕੁ ਫਲਦਾ ਹੈ।


-ਮੁੰਬਈ ਪ੍ਰਤੀਨਿਧ

ਹਸੂੰ-ਹਸੂੰ ਕਰਦਾ ਖ਼ੂਬਸੂਰਤ ਚਿਹਰਾ 'ਨੇਹਾ ਪਵਾਰ'

ਬਾਲੀਵੁੱਡ ਫ਼ਿਲਮਾਂ ਦਾ ਖੂਬਸੂਰਤ ਪੰਜਾਬੀ ਚਿਹਰਾ ਤੇ ਕਮਾਲ ਦੀ ਅਦਾਕਾਰਾ ਨੇਹਾ ਪਵਾਰ ਨਿਰਦੇਸ਼ਕ ਰਾਣਾ ਰਣਬੀਰ ਨਾਲ ਪੰਜਾਬੀ ਫ਼ਿਲਮ 'ਆਸੀਸ' ਜ਼ਰੀਏ ਮੁੜ ਪੰਜਾਬੀ ਸਿਨਮੇ ਨਾਲ ਜੁੜੀ ਹੈ। ਨਵਰੋਜ਼ ਗੁਰਬਾਜ਼ ਇੰਟਰਟੇਨਮੈਂਟ ਲਿਮਟਿਡ, ਬਸੰਤ ਇੰਟਰਟੇਨਮੈਂਟ ਅਤੇ ਜ਼ਿੰਦਗੀ ਜ਼ਿੰਦਾਬਾਦ ਲਿਮਟਿਡ ਦੇ ਬੈਨਰ ਹੇਠ ਨਿਰਮਾਤਾ ਲਵਪ੍ਰੀਤ ਸਿੰਘ ਲੱਕੀ ਸੰਧੂ, ਰਾਣਾ ਰਣਬੀਰ ਤੇ ਬਲਦੇਵ ਸਿੰਘ ਬਾਠ ਦੀ ਇਸ ਫ਼ਿਲਮ 'ਚ ਨੇਹਾ ਪਵਾਰ ਨੇ ਮੁੱਖ ਭੂਮਿਕਾ ਨਿਭਾਈ ਹੈ। ਉਸ ਦਾ ਕਿਰਦਾਰ ਪਿੰਡ ਦੀ ਨੇਕ ਦਿਲ, ਸਾਊ ਜਿਹੀ ਕੁੜੀ ਦਾ ਹੈ, ਜੋ ਉਸ ਦੇ ਦਿਲ ਦੇ ਬਹੁਤ ਨੇੜੇ ਹੈ। ਹਿੰਦੀ ਅਤੇ ਤਾਮਿਲ ਫ਼ਿਲਮਾਂ ਕਰ ਚੁੱਕੀ ਹਸਮੁੱਖ ਸੁਭਾਅ ਵਾਲੀ ਨੇਹਾ ਪਵਾਰ ਨੇ ਦੱਸਿਆ ਕਿ ਮਾਂ-ਬੋਲੀ ਪੰਜਾਬੀ ਲਈ ਇਕ ਵਧੀਆ ਫ਼ਿਲਮ ਕਰਨਾ ਉਸ ਦੀ ਪੁਰਾਣੀ ਤਮੰਨਾ ਸੀ। ਰੰਗਮੰਚ ਤੇ ਫਿਲਮਾਂ ਦੇ ਵੱਡੇ ਕਲਾਕਾਰ ਰਾਣਾ ਰਣਬੀਰ ਦੇ ਨਿਰਦੇਸ਼ਨ 'ਚ ਉਨ੍ਹਾਂ ਨਾਲ ਮੁੱਖ ਭੂਮਿਕਾ 'ਚ ਕੰਮ ਕਰਨਾ ਉਸ ਦੀ ਜ਼ਿੰਦਗੀ ਦੀ ਇਕ ਵੱਡੀ ਪ੍ਰਾਪਤੀ ਹੈ। ਇਸ ਫ਼ਿਲਮ ਲਈ ਸਰਦਾਰ ਸੋਹੀ, ਰੁਪਿੰਦਰ ਰੂਪੀ , ਸੀਮਾ ਕੌਸ਼ਲ ਜਿਹੇ ਕਲਾਕਾਰਾਂ ਤੇ ਨਿਰਮਾਤਾ ਲਵਪ੍ਰੀਤ ਸਿੰਘ ਲੱਕੀ ਸੰਧੁੂ, ਐਗਜ਼ੀਕਿਉਟਿਵ ਪ੍ਰੋਡਿਊਸਰ ਪਰਦੀਪ ਸੰਧੂ ਦਾ ਬਹੁਤ ਸਹਿਯੋਗ ਮਿਲਿਆ। ਇਸ ਫ਼ਿਲਮ 'ਚ ਰਾਣਾ ਰਣਬੀਰ, ਨੇਹਾ ਪਵਾਰ, ਸਰਦਾਰ ਸੋਹੀ, ਸੀਮਾ ਕੌਸ਼ਲ, ਰੁਪਿੰਦਰ ਰੂਪੀ, ਗੁਰਪ੍ਰੀਤ ਕੌਰ ਭੰਗੂ, ਅਨੀਤਾ ਮੀਤ, ਵਿਜੈ ਟੰਡਨ, ਮਲਕੀਤ ਰੌਣੀ, ਕੁਲਜਿੰਦਰ ਸਿੱਧੂ, ਸ਼ੇਵਿਨ ਰੇਖੀ, ਅਰਵਿੰਦਰ ਕੌਰ, ਰਾਜਵੀਰ ਬੋਪਾਰਾਏ, ਰੁਪਿੰਦਰਜੀਤ ਸ਼ਰਮਾ, ਸ਼ਮਿੰਦਰ ਵਿੱਕੀ, ਜੋਤ ਅਰੋੜਾ, ਆਦਿ ਕਲਾਕਾਰਾਂ ਨੇ ਅਹਿਮ ਕਿਰਦਾਰ ਨਿਭਾਏ ਹਨ।
ਜਲੰਧਰ ਸ਼ਹਿਰ ਨਾਲ ਸਬੰਧਤ ਨੇਹਾ ਪਵਾਰ ਭਾਵੇਂ ਕਿ ਦਿੱਲੀ ਦੀ ਜੰਮਪਲ ਹੈ ਪਰ ਉਸਨੇ ਆਪਣੇ ਕੈਰੀਅਰ ਦੀ ਸ਼ੁਰੂਆਤ ਮੁੰਬਈ ਤੋਂ ਕੀਤੀ, ਜਿੱਥੇ ਉਸ ਨੇ ਛੋਟੇ ਤੇ ਵੱਡੇ ਪਰਦੇ ਲਈ ਅਨੇਕਾਂ ਵਪਾਰਕ ਫ਼ਿਲਮਾਂ ਤੇ ਲੜੀਵਾਰ ਕੀਤੇ। ਫ਼ਿਰ ਇਕ ਹਿੰਦੀ ਫ਼ਿਲਮ 'ਪਰਾਂਠੇ ਵਾਲੀ ਗਲੀ' ਵਿਚ ਉਸ ਨੇ ਮੁੱਖ ਭੂਮਿਕਾ 'ਚ ਕੰਮ ਕੀਤਾ ਤਾਂ ਉਸ ਦਾ ਕਲਾ ਸਿਤਾਰਾ ਹੋਰ ਵੀ ਚਮਕਿਆ। ਇਸ ਤੋਂ ਬਾਅਦ ਫ਼ਿਲਮ 'ਥੋੜ੍ਹਾ ਲੁਤਫ਼-ਥੋੜ੍ਹਾ ਇਸ਼ਕ' ਨਾਲ ਉਸ ਦੇ ਕੰਮ ਦੀ ਖੂਬ ਚਰਚਾ ਹੋਈ। 'ਕਿਰਦਾਰ-ਏ ਸਰਦਾਰ' ਵਿਚ ਵੀ ਉਸ ਦਾ ਕੰਮ ਬਹੁਤ ਕਾਬਲੇ ਤਾਰੀਫ਼ ਸੀ ਪਰ ਇਸ ਨਵੀਂ ਫ਼ਿਲਮ 'ਆਸੀਸ' ਵਿਚ ਉਸ ਦਾ ਕਿਰਦਾਰ ਪਹਿਲੀਆਂ ਫ਼ਿਲਮਾਂ ਤੋਂ ਬਹੁਤ ਹਟ ਕੇ ਹੈ। ਤੇਜਵੰਤ ਕਿੱਟੂ ਦਾ ਗੀਤ-ਸੰਗੀਤ ਮਨ ਦੀਆਂ ਤਰੰਗਾਂ ਛੁੂੰਹਣ ਦੇ ਸਮਰੱਥ ਹੈ। ਸਮਾਜਿਕ ਸਰੋਕਾਰਾਂ ਨਾਲ ਜੁੜੀ ਇਹ ਫ਼ਿਲਮ ਸਾਡੇ ਸਮਾਜਿਕ ਤਾਣੇ-ਬਾਣੇ ਦੀਆਂ ਉਲਝੀਆਂ ਤੰਦਾਂ ਨੂੰ ਸੁਲਝਾਉਣ ਦਾ ਇਕ ਉਸਾਰੂ ਯਤਨ ਹੈ।


-ਸੁਰਜੀਤ ਜੱਸਲ

ਤਾਪਸੀ ਪੰਨੂ

ਦਾ ਦਿਲ ਜੰਗਲੀ

'ਦਿਲ ਜੰਗਲੀ' ਹੈ ਤਾਪਸੀ ਪੰਨੂ ਦਾ। ਜੀ ਨਹੀਂ, ਇਹ ਤਾਂ ਇਸ ਪੰਜਾਬਣ ਕੁੜੀ ਤਾਪਸੀ ਪੰਨੂ ਦੀ ਨਵੀਂ ਫ਼ਿਲਮ ਦਾ ਨਾਂਅ ਹੈ, ਜਿਸ ਦੇ ਇਕ ਗੀਤ ਨੇ ਯੂ-ਟਿਊਬ 'ਤੇ ਧਮਾਲ ਪਾ ਦਿੱਤੀ ਹੈ। 'ਨੱਚ ਲੈ ਨਾ' ਇਹ ਬੋਲ ਨੇ ਗਾਣੇ ਦੇ ਤੇ ਗੁਰੂ ਰੰਧਾਵਾ ਦੇ ਗਾਏ ਇਸ ਗੀਤ ਵਿਚ ਤਾਪਸੀ ਪੰਨੂ ਇਉਂ ਲਗਦਾ ਹੈ ਜਿਵੇਂ ਸਿਰੇ ਦੀ ਸ਼ਰਾਬਣ ਹੋਵੇ ਭਾਵ ਨਸ਼ੇ 'ਚ ਟੱਲੀ ਦਿਖਾਈ ਦੇ ਰਹੀ ਹੈ। ਤਾਪਸੀ ਦੇ ਨਾਲ 'ਦਿਲ ਜੰਗਲੀ' 'ਚ ਸਾਕਿਬ ਸਲੀਮ ਹੀਰੋ ਹੈ। ਬਸ ਇੰਤਜ਼ਾਰ ਖ਼ਤਮ ਹੋਣ ਵਾਲਾ ਹੈ, ਤਾਪਸੀ ਦੀ 'ਦਿਲ ਜੰਗਲੀ' ਅਗਲੇ ਮਹੀਨੇ ਆ ਰਹੀ ਹੈ। ਤਾਪਸੀ ਨੂੰ ਇਸ ਸਾਲ ਫਿਰ ਧਮਾਕੇਦਾਰ ਸ਼ੁਰੂਆਤ ਹਿੰਦੀ ਸਿਨੇਮਾ 'ਚ ਮਿਲਣ ਜਾ ਰਹੀ ਹੈ। ਇਕ ਹੋਰ ਪ੍ਰਾਪਤੀ ਤਾਪਸੀ ਦੀ ਇਹ ਹੈ ਕਿ ਅਨੁਰਾਗ ਕਸ਼ਯਪ ਜੋ ਲੀਕ ਤੋਂ ਪਰ੍ਹਾਂ ਵਾਲੀਆਂ ਫ਼ਿਲਮਾਂ ਬਣਾਉਂਦੇ ਹਨ, ਨੇ ਆਪਣੀ ਨਵੀਂ ਫ਼ਿਲਮ 'ਵੂਮੈਨੀਆ' ਲਈ ਤਾਪਸੀ ਦੇ ਨਾਂਅ 'ਤੇ ਠੱਪਾ ਲਾ ਦਿੱਤਾ ਹੈ। 'ਮਨਮਰਜ਼ੀਆਂ' ਤੋਂ ਬਾਅਦ ਤਾਪਸੀ ਦੀ ਇਹ ਅਨੁਰਾਗ ਨਾਲ ਦੂਜੀ ਫ਼ਿਲਮ ਹੈ। 'ਪਿੰਕ ਗਰਲ', 'ਮਿਲਕੀ ਬਿਊਟੀ' ਦੇ ਨਾਂਅ ਨਾਲ ਵੀ ਜਾਣੀ ਜਾਂਦੀ ਤਾਪਸੀ ਅਕਸਰ 'ਸੋਸ਼ਲ' ਮੀਡੀਆ 'ਤੇ ਆਪਣੀਆਂ ਟਿੱਪਣੀਆਂ ਨਾਲ ਝਮੇਲੇ ਆਪ ਸਹੇੜ ਲੈਂਦੀ ਹੈ। ਪਹਿਲਾਂ 'ਨੀਲੀ ਬਿਕਨੀ' ਨਾਲ ਉਸ ਦੀ ਨਿੰਦਿਆ ਸੋਸ਼ਲ ਮੰਚ 'ਤੇ ਹੋਈ ਸੀ ਤੇ ਹੁਣ 'ਦਿਲ ਜੰਗਲੀ' ਵਾਲੀ ਤਾਪਸੀ ਪੰਨੂ ਨੇ ਜਦ ਆਪਣੀ ਫੋਟੋ ਨਾਲ ਆਤਿਸ਼ਬਾਜ਼ੀ ਦਿਖਾਈ ਤਾਂ ਲੋਕਾਂ ਨੇ ਕਿਹਾ ਕਿ ਪਟਾਕਿਆਂ 'ਤੇ ਪਾਬੰਦੀ ਹੈ, ਜੇ ਚਲਾਉਣ ਦਾ ਸ਼ੌਕ ਹੈ ਤਾਂ ਉਹ ਈਦ 'ਤੇ ਚਲਾਵੇ। ਇਸ ਟਿੱਪਣੀ ਤੋਂ ਖਫ਼ਾ ਹੋਈ ਤਾਪਸੀ ਨੇ ਤਾਂ ਇਥੋਂ ਤੱਕ ਕਹਿ ਦਿੱਤਾ ਕਿ ਸਾਡੇ ਦੇਸ਼ 'ਚ ਤਾਂ ਬਹੁਗਿਣਤੀ ਫਿਰਕਾ ਸੁਰੱਖਿਅਤ ਨਹੀਂ, ਇਥੇ ਲੋਕਾਂ ਨੂੰ ਤਾਂ ਘੱਟ-ਗਿਣਤੀਆਂ ਦੀ ਫਿਕਰ ਹੈ, ਤਾਂ ਰੱਜ ਕੇ ਤਾਪਸੀ ਦੀ ਆਲੋਚਨਾ ਹੋਈ। ਸ਼ਾਇਦ ਅਭਿਨੈ 'ਚ ਮਾਹਿਰ ਤਾਪਸੀ ਦੀ ਇਥੇ 'ਦਿਲ ਜੰਗਲੀ' ਵਾਲੀ ਗੱਲ ਹੋ ਗਈ ਹੈ। ਅਭਿਨੇਤਰੀਆਂ ਰਾਜਨੀਤੀ ਤੋਂ ਪਰ੍ਹਾਂ ਹੀ ਰਹਿਣ ਤਾਂ ਚੰਗਾ ਹੈ, ਅੱਗੇ ਤਾਪਸੀ ਦੀਆਂ 'ਮਨਮਰਜ਼ੀਆਂ', ਕੌਣ ਕਹੇ 'ਪਿੰਕ ਗਰਲ' ਨੂੰ ਕਿ ਇੰਜ ਨਹੀਂ, ਇੰਜ ਕਰ...।

ਸੋਨਾਕਸ਼ੀ ਸਿਨਹਾ

ਪ੍ਰੇਮ ਦੀਵਾਨੀ

ਡਿਜ਼ਾਈਨਰ ਮਨੀਸ਼ ਮਲਹੋਤਰਾ ਨਾਲ ਸੋਨਾਕਸ਼ੀ ਸਿਨਹਾ ਦੇ ਸਬੰਧ ਬਹੁਤ ਮਿੱਠੇ ਹਨ ਤੇ ਦਿਨ-ਪ੍ਰਤੀ-ਦਿਨ ਹੋਰ ਨਿੱਘੇ, ਮਿੱਠੇ ਤੇ ਮਧੁਰ ਹੋ ਰਹੇ ਹਨ। ਸੋਨਾ ਇਸ ਸਮੇਂ 'ਵੈਲਕਮ ਟੂ ਨਿਊਯਾਰਕ' ਫ਼ਿਲਮ ਕਰ ਰਹੀ ਹੈ। ਸੋਨਾ ਨੇ ਸ਼ਰ੍ਹੇਆਮ ਆਲੀਆ-ਸਿਧਾਰਥ ਮਲਹੋਤਰਾ ਦੀ ਨੇੜਤਾ ਸਬੰਧੀ ਖੁਲਾਸੇ ਕਰਕੇ ਦੋਵਾਂ ਨੂੰ ਸ਼ਸ਼ੋਪੰਜ 'ਚ ਪਾਇਆ ਹੈ। 'ਵੋਗ ਬੀ ਐਫ ਐਫ' ਸ਼ੋਅ 'ਚ ਨੇਹਾ ਧੂਪੀਆ ਹੈਰਾਨ ਹੋ ਗਈ ਸੀ ਕਿ ਕਿਵੇਂ ਸੋਨਾ ਨੇ ਸੋਨਮ ਕਪੂਰ ਕੋਲੋਂ ਮੁਆਫ਼ੀ ਮੰਗਵਾ ਕੇ ਆਪਣੇ-ਆਪ ਨੂੰ ਹੈਂਕੜਬਾਜ਼ ਦਿਖਾਇਆ ਸੀ। ਸੋਨਾਕਸ਼ੀ ਸਿਨਹਾ 'ਵੈਲਕਮ ਟੂ ਨਿਊਯਾਰਕ' ਦੇ ਸਬੰਧ 'ਚ ਕਹਿ ਰਹੀ ਹੈ ਕਿ ਇਹ ਭਾਰਤ ਦੀ ਪਹਿਲੀ ਕਾਮੇਡੀ 3-ਡੀ ਫ਼ਿਲਮ ਹੋਵੇਗੀ। ਸੋਨਾ ਨਾਲ ਫ਼ਿਲਮ 'ਚ ਦਿਲਜੀਤ ਦੁਸਾਂਝ, ਬੋਮਨ ਇਰਾਨੀ, ਰਾਣਾ ਡਗਬਤੀ, ਲਾਰਾ ਦੱਤਾ ਤੇ ਕਰਨ ਜੌਹਰ ਹਨ। ਫ਼ਿਲਮ ਦਾ ਪੋਸਟਰ ਮੀਡੀਆ 'ਚ ਆ ਚੁੱਕਾ ਹੈ ਤੇ ਪਸੰਦ ਕੀਤਾ ਜਾ ਰਿਹਾ ਹੈ। 'ਇੰਡੋ-ਵੈਸਟਰਨ ਲੁੱਕ' 'ਚ ਸੋਨਾ ਨੇ ਨਵੀਆਂ ਤਸਵੀਰਾਂ ਖਿਚਵਾਈਆਂ ਹਨ। ਭਾਰਤ ਦੀ ਹਰ ਔਰਤ ਦੀ ਉਹ ਆਵਾਜ਼ ਬਣਨਾ ਚਾਹੁੰਦੀ ਹੈ। 'ਹੈਪੀ ਭਾਗ ਜਾਏਗੀ' ਦਾ ਅਗਲਾ ਹਿੱਸਾ ਵੀ ਉਹ ਕਰ ਰਹੀ ਹੈ। ਫ਼ਿਲਮਾਂ ਨੇ ਉਸ ਦੀ ਆਵਾਜ਼ ਮਿੱਠੀ ਬਣਾਈ, ਉਹ ਸਿਨੇਮਾ ਦਾ ਸ਼ੁਕਰੀਆ ਅਦਾ ਕਰ ਰਹੀ ਹੈ। ਹੁਣ ਗੱਲ ਫਿਰ ਮਨੀਸ਼ ਮਲਹੋਤਰਾ ਦੀ ਤਾਂ ਹਰ ਪਾਰਟੀ, ਸਮਾਰੋਹ 'ਚ ਉਹ ਪ੍ਰਛਾਵਾਂ ਬਣ ਸੋਨਾਕਸ਼ੀ ਸਿਨਹਾ ਨਾਲ ਘੁੰਮਦਾ ਨਜ਼ਰ ਆ ਰਿਹਾ ਹੈ। ਸੋਨਮ ਕਪੂਰ ਤੋਂ ਮੁਆਫ਼ੀ ਮੰਗਵਾਉਣ ਤੇ ਆਲੀਆ ਨੂੰ ਸਤਾਉਣ 'ਚ ਵੀ ਮਨੀਸ਼ ਦਾ ਹੀ ਹੱਥ ਹੈ। ਸੋਨਾ ਵੀ ਮਨੀਸ਼ ਦੀ ਹਰ ਗੱਲ ਨਾਲ ਸਹਿਮਤ ਨਜ਼ਰ ਆ ਰਹੀ ਹੈ। ਇਥੋਂ ਤੱਕ ਕਿ ਮਨੀਸ਼ ਦੀ ਸਲਾਹ 'ਤੇ ਫੋਟੋਆਂ ਖਿਚਵਾਉਣੀਆਂ, ਪਹਿਰਾਵੇ ਦੀ ਚੋਣ ਤੇ ਹੁਣ ਫ਼ਿਲਮਾਂ ਦੀ ਵੀ ਚੋਣ, ਤੇ ਹਾਂ, 'ਵੈਲਕਮ ਟੂ ਨਿਊਯਾਰਕ' ਵੀ ਉਸ ਨੇ ਮਨੀਸ਼ ਦੀ ਸਲਾਹ ਨਾਲ ਹੀ ਕੀਤੀ ਹੈ। ਇਸ ਨੂੰ ਕਹਿੰਦੇ ਹਨ ਕਿ ਸੋਨਾਕਸ਼ੀ ਤਾਂ ਪਿਆਰ 'ਚ ਪਾਗਲ ਹੋ ਗਈ ਹੈ।

ਜ਼ਰੀਨ ਖਾਨ : ਵੱਡੀਆਂ ਫ਼ਿਲਮਾਂ ਮਿਲਣੀਆਂ ਖੇਡ ਤਕਦੀਰਾਂ ਦੀ

ਸੁਣੋ ਹੈਰਾਨ ਕਰਨ ਵਾਲੀ ਗੱਲ ਜ਼ਰੀਨ ਖਾਨ ਸਬੰਧੀ, ਜਿਸ ਨੇ ਜ਼ਹਿਰ ਦੀ ਸ਼ੀਸ਼ੀ ਵੀ ਲੈ ਲਈ ਸੀ ਤੇ ਤਲਾਬ ਕਿਨਾਰੇ ਪਹੁੰਚ ਕੇ ਇਸ ਨੂੰ ਪੀ ਕੇ ਜੀਵਨ ਲੀਲ੍ਹਾ ਖ਼ਤਮ ਕਰਨ ਦਾ ਫੈਸਲਾ ਵੀ ਲੈ ਲਿਆ ਸੀ। ਡਰਾਉਣੀ ਫ਼ਿਲਮ '1921' ਦੇ ਟਰੇਲਰ ਤੇ ਕਾਟੇ ਦੇ ਮਹੂਰਤ 'ਤੇ ਜ਼ਰੀਨ ਨੇ ਇਹ ਰਾਜ਼ ਵਾਲੀ ਗੱਲ ਦੱਸੀ ਤਾਂ ਸਾਰੇ ਹੀ ਹੈਰਾਨ ਹੋ ਗਏ। 'ਓਹ... ਹੋ... ਜ਼ਰੀਨ ਮਜ਼ਾਕ ਚੰਗਾ ਕਰ ਲੈਂਦੀ ਹੈ ਤੇ ਉਹ ਵੀ ਫਰਵਰੀ ਮਹੀਨੇ 'ਚ, ਜਦਕਿ 'ਅਪ੍ਰੈਲ ਫੂਲ' ਦੂਰ ਹੈ।' ਜੀ ਹਾਂ, ਜ਼ਰੀਨ ਨੇ ਆਪਣੀ ਡਰਾਉਣੀ ਫ਼ਿਲਮ '1921' ਦੇ ਦ੍ਰਿਸ਼ ਦੀ ਗੱਲ ਦੱਸੀ ਪਰ ਹੁਣ ਇਹ ਦੱਸਣ ਦੀ ਕੀ ਤੁਕ? ਸਿਰਫ ਸਸਤਾ ਪ੍ਰਚਾਰ ਹਾਸਲ ਕਰਨ ਲਈ। 'ਅਕਸਰ-21' ਫੇਲ੍ਹ ਹੋਈ, '1921' ਦੀ ਚਰਚਾ ਨਹੀਂ ਤੇ 'ਪਿਆਰ ਮਾਂਗਾ ਹੈ ਤੁਮਹੀ ਸੇ' ਹਾਲੇ ਬਣ ਰਹੀ ਹੈ ਤੇ ਫਿਰ ਨਿਰੀ-ਪੁਰੀ ਕੈਟਰੀਨਾ ਕੈਫ਼ ਲਗਦੀ ਜ਼ਰੀਨ ਸਸਤੇ ਪ੍ਰਚਾਰ, ਤੀਜੇ ਦਰਜੇ ਦੀਆਂ ਫ਼ਿਲਮਾਂ ਨਾ ਕਰੇ ਤਾਂ ਕੀ ਵਿਹਲ ਕੱਟ ਲਵੇ? ਹਾਰ ਕੇ ਜ਼ਰੀਨ ਨੇ ਨਿੱਕੇ ਪਰਦੇ ਵੱਲ ਰੁਖ਼ ਕਰਨ ਬਾਰੇ ਸੋਚ ਲਿਆ ਹੈ। ਟੀ. ਵੀ. ਤੇ ਫ਼ਿਲਮਾਂ 'ਚ ਹੁਣ ਉਸ ਨੂੰ ਵੱਡਾ ਫਰਕ ਨਹੀਂ ਲਗਦਾ। ਜ਼ਰੀਨ ਖਾਨ ਹੁਣ ਟੈਲੀਵਿਜ਼ਨ 'ਤੇ ਖੇਤਰੀ ਫ਼ਿਲਮਾਂ ਵੱਲ ਹੀ ਧਿਆਨ ਦੇਵੇ ਤਾਂ ਚੰਗਾ ਹੈ, ਕਿਉਂਕਿ ਵੱਡੀਆਂ ਫ਼ਿਲਮਾਂ ਸ਼ਾਇਦ ਖੇਡ ਤਕਦੀਰਾਂ ਦੀ ਹੈ।

ਸੰਜੇ ਦੱਤ

ਮੁੰਨਾ ਭਾਈ, ਮੰਨ ਗਏ

ਕੁਝ ਤਾਂ ਤਕਦੀਰ ਮਾੜੀ ਤੇ ਕੁਝ ਆਪ ਸਹੇੜ ਲਏ ਦੁੱਖ। ਪੂਰੇ ਦੋ ਸਾਲ ਸੰਜੇ ਦੱਤ ਦੀ ਫ਼ਿਲਮੀ ਦੁਨੀਆ ਤੋਂ ਦੂਰੀ ਹੀ ਰਹੀ। 'ਭੂਮੀ' ਨਾਲ ਫਿਰ ਸੰਜੂ ਬਾਬਾ ਨੇ ਕੈਮਰੇ ਦੇ ਦਰਸ਼ਨ ਕੀਤੇ, ਚਾਹੇ ਇਹ ਫ਼ਿਲਮ ਨਹੀਂ ਕਾਮਯਾਬ ਹੋਈ ਪਰ ਸੰਜੂ ਨੇ ਇਰਾਦਾ ਧਾਰ ਲਿਆ ਕਿ ਹਾਲੇ ਉਸ ਦੇ ਤਰਕਸ਼ 'ਚ ਬਹੁਤ ਸਾਰੇ ਤੀਰ ਹਨ। 'ਸਾਹਿਬ ਬੀਵੀ ਔਰ ਗੈਂਗਸਟਰ-3' 'ਚ ਫਿਰ ਉਹ ਆ ਰਿਹਾ ਹੈ। ਆਪਣੀ ਬਾਇਓਪਿਕ ਵੱਲ ਵੀ ਉਸ ਦਾ ਧਿਆਨ ਹੈ। ਖ਼ਬਰਾਂ ਹਨ ਕਿ ਸੰਜੂ ਬਾਬਾ ਆਪਣੀ ਬਾਇਓਪਿਕ ਤੋਂ ਖੁਸ਼ ਜਿਹੇ ਨਹੀਂ ਹਨ। ਬਹੁਤ ਸਾਰੇ ਕਲਾਕਾਰ ਸੰਜੂ ਦੀ ਇਸ ਬਾਇਓਪਿਕ 'ਚ ਉਸ ਸਬੰਧੀ ਅਣਜਾਣੇ ਤੱਥ ਦੱਸ ਰਹੇ ਹਨ। ਸੰਜੇ ਦੱਤ ਦੇ ਪ੍ਰਸੰਸਕਾਂ ਨੂੰ ਇਸ ਫ਼ਿਲਮ ਦੀ ਬੇਸਬਰੀ ਨਾਲ ਉਡੀਕ ਹੈ। ਡਾਇਰੈਕਟਰ ਬਿੱਲੂ ਨੇ ਸੰਜੇ ਦੱਤ ਨੂੰ ਹੁਣ ਪੂਰੀ ਕਾਮੇਡੀ ਫ਼ਿਲਮ ਲਈ ਲਿਆ ਹੈ। 'ਮੁੰਨਾ ਭਾਈ ਮਾਨ ਗਏ' ਨਾਂਅ ਦੀ ਇਹ ਫ਼ਿਲਮ ਸੰਜੂ ਬਾਬਾ ਨੂੰ ਲੈ ਕੇ ਅਪ੍ਰੈਲ 'ਚ ਮਾਰੀਸ਼ਸ਼ ਵਿਖੇ ਸ਼ੁਰੂ ਹੋਵੇਗੀ। 'ਤੋਰਬਾਜ਼', 'ਸਾਹਿਬ ਬੀਵੀ ਔਰ ਗੈਂਗਸਟਰ-3' ਤੇ 'ਮੁੰਨਾ ਭਾਈ ਮਾਨ ਗਏ', ਮਤਲਬ ਕਿ ਸੰਜੂ ਬਾਬਾ 2018 'ਚ ਜ਼ੋਰਦਾਰ ਵਾਪਸੀ ਕਰ ਰਹੇ ਹਨ। ਦਿਲਜੀਤ ਦੁਸਾਂਝ ਉਸ ਦਾ ਜ਼ਬਰਦਸਤ ਦੀਵਾਨਾ ਹੈ ਤੇ ਇਸ ਤਰ੍ਹਾਂ ਸੰਜੇ ਦੱਤ ਲਈ ਪਹਿਲਾਂ ਵਾਲੀ ਟੌਹਰ ਫ਼ਿਲਮ ਨਗਰੀ 'ਚ ਮੁੜ ਜਮਾਉਣ ਦਾ ਸ਼ਾਨਦਾਰ ਮੌਕਾ ਹੈ ਤੇ ਆਸ ਹੈ ਕਿ 'ਮੁੰਨਾ ਭਾਈ' ਇਸ ਨੂੰ ਕਰ ਵਿਖਾਏਗਾ।


-ਸੁਖਜੀਤ ਕੌਰ

ਖਰੂਦੀ ਜੀਜਿਆਂ ਦੀ ਕਹਾਣੀ ਪੇਸ਼ ਕਰੇਗੀ ਫ਼ਿਲਮ 'ਲਾਵਾਂ ਫੇਰੇ'

ਲੰਘੇ ਸਾਲ ਦੇ ਅੱਧ ਮਗਰੋਂ ਪੰਜਾਬੀ ਫ਼ਿਲਮਾਂ 'ਤੇ ਸੋਕਾ ਜਿਹਾ ਪਿਆ ਹੋਇਆ, ਜਿਹੜਾ ਹਾਲੇ ਤੱਕ ਜਾਰੀ ਹੈ। ਇਹ ਗੱਲ ਬੱਚੇ-ਬੱਚੇ ਦੀ ਸਮਝ ਦਾ ਹਿੱਸਾ ਬਣ ਚੁੱਕੀ ਹੈ ਕਿ ਫ਼ਿਲਮ ਉਹੀ ਕਾਮਯਾਬ ਹੁੰਦੀ ਹੈ, ਜਿਹੜੀ ਕਹਾਣੀ ਤੋਂ ਲੈ ਕੇ ਪ੍ਰਚਾਰ ਤੱਕ ਸਭ ਪੱਖੋਂ ਉੱਤਮ ਹੋਵੇ। ਜੇ ਕਲਾਕਾਰਾਂ ਦੀ ਚੋਣ, ਨਿਰਦੇਸ਼ਨ ਜਾਂ ਐਡੀਟਿੰਗ ਕਿਸੇ ਇਕ ਪੱਖ ਤੋਂ ਊਣ-ਪੌਣ ਰਹਿ ਗਈ ਤਾਂ ਨਤੀਜੇ ਆਸ ਤੋਂ ਉਲਟ ਨਿਕਲਦੇ ਹਨ। ਟਰੇਲਰ ਤੋਂ ਤੈਅ ਹੋ ਜਾਂਦਾ ਕਿ ਫ਼ਿਲਮ ਦੇਖਣਯੋਗ ਹੋਵੇਗੀ ਜਾਂ ਨਹੀਂ। ਪਿਛਲੇ ਕਈ ਦਿਨਾਂ ਤੋਂ 'ਲਾਵਾਂ ਫੇਰੇ' ਫ਼ਿਲਮ ਦਾ ਟਰੇਲਰ ਦਰਸ਼ਕਾਂ ਵਿਚ ਚੰਗਾ ਪ੍ਰਭਾਵ ਛੱਡਣ ਵਿਚ ਕਾਮਯਾਬ ਹੋ ਰਿਹਾ ਤੇ ਜ਼ਾਹਰ ਹੈ ਕਿ ਇਸ ਦਾ ਅਸਰ ਫ਼ਿਲਮ 'ਤੇ ਪੈਣਾ ਕੁਦਰਤੀ ਹੈ। ਇਹ ਫ਼ਿਲਮ 16 ਫਰਵਰੀ ਨੂੰ ਰਿਲੀਜ਼ ਹੋਣੀ ਹੈ।
'ਲਾਵਾਂ ਫੇਰੇ' ਨਾਂਅ ਤੋਂ ਹੀ ਸਾਫ਼ ਹੋ ਜਾਂਦਾ ਹੈ ਕਿ ਫ਼ਿਲਮ ਵਿਆਹਾਂ ਨਾਲ ਸਬੰਧਤ ਹੋਵੇਗੀ। ਵਿਆਹ ਵੀ ਉਹ, ਜਿਹੜੇ ਪਹਿਲੇ ਵੇਲਿਆਂ ਵਿਚ ਹੁੰਦੇ ਸਨ। ਅੱਜ ਵਾਲੇ ਵਿਆਹ ਤਾਂ ਪੈਲੇਸਾਂ ਵਿਚ ਕੁਝ ਘੰਟਿਆਂ ਦੇ ਪ੍ਰਾਹੁਣੇ ਬਣ ਕੇ ਰਹਿ ਗਏ ਹਨ। ਪਹਿਲੇ ਵਿਆਹ ਕਈ-ਕਈ ਦਿਨ ਚਲਦੇ ਸਨ। ਮੇਲ-ਗੇਲ 'ਕੱਠਾ ਹੁੰਦਾ। ਇਸ ਮੇਲ-ਗੇਲ ਵਿਚ ਹੀ ਰੋਲ-ਘਚੋਲਾ ਛਿੜਦਾ ਤੇ ਵਿਆਹ ਯਾਦਗਾਰੀ ਹੋ ਜਾਂਦਾ। 'ਲਾਵਾਂ ਫੇਰੇ' ਵਿਆਹਾਂ ਵਿਚ ਜੀਜਿਆਂ ਵਲੋਂ ਮਚਾਏ ਜਾਂਦੇ ਹੁੜਦੰਗ ਨਾਲ ਸਬੰਧਤ ਹੈ। ਜੀਜੇ ਵੀ ਅਜਿਹੇ, ਜਿਹੜੇ ਹਰ ਗੱਲ ਨੂੰ ਨੱਕ ਦਾ ਮਸਲਾ ਬਣਾ ਬਹਿੰਦੇ ਹਨ। ਫੂੰ-ਫਾਂ ਵਿਚ ਅਜਿਹੇ ਫਸੇ ਹੋਏ ਕਿ ਪੁੱਛੋ ਕੁੱਝ ਨਾ।
ਗੁਰਪ੍ਰੀਤ ਘੁੱਗੀ, ਕਰਮਜੀਤ ਅਨਮੋਲ ਅਤੇ ਹਾਰਬੀ ਸੰਘਾ ਨੇ ਜੀਜਿਆਂ ਦੀ ਭੂਮਿਕਾ ਅਦਾ ਕੀਤੀ ਹੈ। ਰੌਸ਼ਨ ਪ੍ਰਿੰਸ ਦੇ ਵਿਆਹ ਵਿਚ ਤਿੰਨੇ ਅਜਿਹਾ ਰੂਪ ਦਿਖਾਉਂਦੇ ਹਨ ਕਿ ਦੇਖਣ ਵਾਲੇ ਇਹੋ ਜਿਹੇ ਜੀਜਿਆਂ ਤੋਂ ਤੌਬਾ ਕਰਦੇ ਹਨ। ਫ਼ਿਲਮ ਵਿਚ ਰੌਸ਼ਨ ਪ੍ਰਿੰਸ ਦਾ ਕਿਰਦਾਰ ਮੁੱਖ ਹੈ। ਹੀਰੋਇਨ ਰੁਬੀਨਾ ਬਾਜਵਾ ਹੈ, ਜਿਸ ਨੇ ਇਸ ਤੋਂ ਪਹਿਲਾਂ ਵੀ ਕੁਝ ਪੰਜਾਬੀ ਫ਼ਿਲਮਾਂ ਵਿਚ ਕੰਮ ਕੀਤਾ ਹੈ। ਬੀ.ਐਨ. ਸ਼ਰਮਾ ਤੇ ਬਾਕੀ ਕਲਾਕਾਰਾਂ ਦਾ ਫ਼ਿਲਮ ਵਿਚ ਕਮਾਲ ਦਾ ਕੰਮ ਹੈ। 'ਲਾਵਾਂ ਫੇਰੇ' ਪਹਿਲੀ ਫ਼ਿਲਮ ਹੈ, ਜਿਸ 'ਤੇ ਕਰਮਜੀਤ ਅਨਮੋਲ ਨੇ ਪੈਸਾ ਨਿਵੇਸ਼ ਕੀਤਾ ਹੈ। ਭਾਵ ਬਤੌਰ ਨਿਰਮਾਤਾ ਉਹ ਸਾਹਮਣੇ ਆ ਰਹੇ ਹਨ। ਫ਼ਿਲਮ ਦਾ ਨਿਰਦੇਸ਼ਨ ਸਮੀਪ ਕੰਗ ਦਾ ਹੈ। ਸਮੀਪ ਉਹ ਨਿਰਦੇਸ਼ਕ ਹੈ, ਜਿਸ ਨੂੰ ਹਾਸਰਸ ਫ਼ਿਲਮਾਂ ਕਰਨ ਦਾ ਚੋਖਾ ਤਜਰਬਾ ਹੈ। ਭਾਵੇਂ ਗੱਲ ਜਸਪਾਲ ਭੱਟੀ ਦੀਆਂ ਫ਼ਿਲਮਾਂ ਦੀ ਕਰ ਲਵੋ ਜਾਂ ਗਿੱਪੀ ਗਰੇਵਾਲ ਦੀ 'ਕੈਰੀ ਆਨ ਜੱਟਾ', ਉਸ ਨੂੰ ਦਰਸ਼ਕਾਂ ਦੀ ਨਬਜ਼ ਫੜਨੀ ਆਉਂਦੀ ਹੈ।
ਰੌਸ਼ਨ ਪ੍ਰਿੰਸ ਫ਼ਿਲਮ ਦੇ ਪ੍ਰਚਾਰ ਤੋਂ ਬੇਹੱਦ ਆਸਵੰਦ ਹੈ। ਉਸ ਮੁਤਾਬਕ, ਜੇ 'ਕੱਲੇ-'ਕੱਲੇ ਸੰਵਾਦ 'ਤੇ ਦਰਸ਼ਕ ਹੱਸ-ਹੱਸ ਦੂਹਰਾ ਨਾ ਹੋਇਆ ਤਾਂ ਆਖਿਓ। ਫ਼ਿਲਮ ਪੂਰੀ ਤਰ੍ਹਾਂ ਪਰਿਵਾਰਕ ਹੈ ਤੇ ਦੇਖਣ ਵਾਲਾ ਸਿਨੇਮੇ ਵਿਚੋਂ ਬਾਹਰ ਨਿਕਲਣ ਵੇਲ਼ੇ ਬਾਕੀ ਸਾਥੀਆਂ ਨੂੰ ਵੀ ਕਹੇਗਾ ਕਿ ਤੁਸੀਂ ਵੀ ਫ਼ਿਲਮ ਦੇਖ ਕੇ ਜ਼ਰੂਰ ਆਇਓ। ਫ਼ਿਲਮ ਦਾ ਹਰ ਕਿਰਦਾਰ ਸੰਪੂਰਨ ਹੈ। ਜਦੋਂ ਸਕਰੀਨ 'ਤੇ ਆਉਂਦਾ ਤਾਂ ਬੱਸ ਹਾਸੇ ਦੀ ਛਹਿਬਰ ਲਾਉਂਦਾ।'
ਕਰਮਜੀਤ ਅਨਮੋਲ ਮੁਤਾਬਕ, 'ਅੱਜ ਤੱਕ ਮੈਂ ਬਤੌਰ ਅਦਾਕਾਰ ਹੀ ਕੰਮ ਕੀਤਾ। ਪੈਸੇ ਲਵੋ ਤੇ ਕੰਮ ਕਰੋ। ਪਰ ਪਹਿਲੀ ਵਾਰ ਪੈਸਾ ਨਿਵੇਸ਼ ਕੀਤਾ ਤਾਂ ਪਤਾ ਲੱਗਾ ਕਿ ਇਹ ਜ਼ਿੰਮੇਵਾਰੀ ਅਦਾਕਾਰੀ ਨਾਲੋਂ ਵੀ ਵੱਡੀ ਹੈ। ਹਰ ਨਿਰਮਾਤਾ ਪੈਸਾ ਨਿਵੇਸ਼ ਕਰਨ ਵੇਲ਼ੇ ਚੰਗੇ ਨਤੀਜੇ ਦੀ ਆਸ ਰੱਖਦਾ ਹੈ। ਮੈਨੂੰ ਵੀ ਆਸ ਹੈ ਕਿ ਫ਼ਿਲਮ ਚੰਗਾ ਨਤੀਜਾ ਪੇਸ਼ ਕਰੇਗੀ।'
**

ਕੀ ਸਾਰਾ ਅਲੀ ਖਾਨ ਆਕੜਖੋਰ ਹੈ?

ਅੰਮ੍ਰਿਤਾ ਸਿੰਘ ਨੇ ਬੇਟੀ ਸਾਰਾ ਅਲੀ ਖ਼ਾਨ ਦੇ ਕਰੀਅਰ ਖ਼ਾਤਰ ਅਨੀਸ ਬਜ਼ਮੀ ਦੀਆਂ 'ਮੁਬਾਰਕਾਂ' ਨਹੀਂ ਕੀਤੀ। ਅੰਮ੍ਰਿਤਾ ਦਾ ਕਹਿਣਾ ਸੀ ਕਿ ਉਹ ਆਪਣੀ ਬੇਟੀ ਦੇ ਕਰੀਅਰ 'ਤੇ ਧਿਆਨ ਦੇਣ ਲਈ ਸਮਾਂ ਨਹੀਂ ਕੱਢ ਸਕੀ ਸੀ, ਇਸ ਲਈ ਉਸ ਨੇ ਉਸ ਪੇਸ਼ਕਸ਼ ਨੂੰ ਨਕਾਰ ਦਿੱਤਾ। ਅੰਮ੍ਰਿਤਾ ਸਿੰਘ ਦਾ ਇਸ ਸਮੇਂ ਸਿਰਫ਼ ਇਕ ਹੀ ਮਕਸਦ ਹੈ ਕਿ ਕਿਸੇ ਵੀ ਤਰ੍ਹਾਂ ਬੇਟੀ ਸਾਰਾ ਅਲੀ ਖ਼ਾਨ ਫ਼ਿਲਮਾਂ ਵਿਚ ਇਕ ਕਾਮਯਾਬ ਅਦਾਕਾਰਾ ਦੇ ਤੌਰ 'ਤੇ ਸਥਾਪਿਤ ਹੋ ਜਾਵੇ। ਸੈਫ਼ ਅਲੀ ਖ਼ਾਨ ਅਤੇ ਅੰਮ੍ਰਿਤਾ ਸਿੰਘ ਦੀ ਬੇਟੀ ਸਾਰਾ ਅਲੀ ਖ਼ਾਨ ਦੀ ਕਰਨ ਜੌਹਰ ਨੂੰ 'ਸਟੂਡੈਂਟ ਆਫ਼ ਦ ਈਅਰ-2' ਦੀ ਪੇਸ਼ਕਸ਼ ਹੋਈ ਸੀ, ਇਸ ਵਿਚ ਉਸ ਨੂੰ ਟਾਈਗਰ ਸ਼ਰਾਫ਼ ਦੇ ਉਲਟ ਕੰਮ ਦਿੱਤਾ ਜਾਣ ਵਾਲਾ ਸੀ ਪਰ ਸਾਰਾ ਨੇ ਉਹ ਪੇਸ਼ਕਸ਼ ਨਕਾਰ ਦਿੱਤੀ। ਪੇਸ਼ਕਸ਼ ਨਕਾਰਨ ਦੀ ਵਜ੍ਹਾ ਦਾ ਹੁਣ ਤੱਕ ਖੁਲਾਸਾ ਨਹੀਂ ਹੋ ਸਕਿਆ ਹੈ।
ਸੰਨੀ ਦਿਓਲ ਨੇ ਬੇਟੇ ਕਰਨ ਦੀ ਫ਼ਿਲਮ 'ਪਲ ਪਲ ਦਿਲ ਕੇ ਪਾਸ' ਲਈ ਸਾਰਾ ਨੂੰ ਪੇਸ਼ਕਸ਼ ਕੀਤੀ ਸੀ ਪਰ ਸਾਰਾ ਨੇ ਸਵੀਕਾਰ ਨਹੀਂ ਕੀਤੀ। ਇਕ ਤਰ੍ਹਾਂ ਨਾਲ ਦੇਖਿਆ ਜਾਵੇ ਤਾਂ ਬਿਨਾਂ ਕੋਈ ਫ਼ਿਲਮ ਸਾਈਨ ਕੀਤੇ ਸਾਰਾ ਨੇ ਤਿੰਨ ਤਿੰਨ ਫ਼ਿਲਮਾਂ ਨਕਾਰ ਦਿੱਤੀਆਂ। ਇਸ ਤਰ੍ਹਾਂ ਉਸ ਨੇ ਇਕ ਨਵਾਂ ਕੀਰਤੀਮਾਨ ਆਪਣੇ ਨਾਂਅ ਕਰ ਲਿਆ ਹੈ। ਉਨ੍ਹਾਂ ਦੇ ਇਸ ਰਵੱਈਏ ਤੋਂ ਬਾਅਦ ਕੁਝ ਲੋਕ ਤਾਂ ਉਸ ਨੂੰ ਆਕੜਖੋਰ ਵੀ ਕਹਿਣ ਲੱਗੇ ਸਨ।
ਸਾਰਾ ਦੇ ਨਖ਼ਰੇ ਕਿਸੇ ਏ ਲਿਸਟ ਦੀ ਹੀਰੋਇਨ ਵਰਗੇ ਹਨ। ਸੈੱਟ 'ਤੇ ਸਮੇਂ ਸਿਰ ਨਹੀਂ ਪਹੁੰਚਦੀ। ਆਪਣੇ ਕੰਮ ਤੋਂ ਜ਼ਿਆਦਾ ਆਪਣੇ ਕੱਪੜਿਆਂ 'ਤੇ ਧਿਆਨ ਦਿੰਦੀ ਹੈ। ਫ਼ਿਲਮ ਦਾ ਅਮਲਾ ਸਾਰਾ ਨੂੰ ਲੈ ਕੇ ਪਰੇਸ਼ਾਨ ਹੈ।

ਕਰੀਨਾ ਕਪੂਰ

ਗਾਇਤਰੀ ਦੇਵੀ?

'ਕਾਮਯਾਬ ਬਾਇਓਪਿਕ ਫਾਰਮੂਲਾ' ਤੇ ਫਿਰ 'ਬੇਬੋ' ਵੀ ਇਸ ਫਾਰਮੂਲੇ ਵਿਚ ਆਪਣੀ ਹਾਜ਼ਰੀ ਲੁਆਉਣ ਸਬੰਧੀ ਕਿਉਂ ਨਾ ਸੋਚੇ? ਕੰਗਨਾ ਰਣੌਤ ਤੋਂ ਬਾਅਦ ਕਰੀਨਾ ਨੇ ਵੀ ਆਪਣੀ ਇੱਛਾ ਦੱਸ ਦਿੱਤੀ ਹੈ ਕਿ ਹਾਂ, ਉਹ ਵੀ ਇਸ ਫਾਰਮੂਲੇ 'ਚ ਆਉਣਾ ਪਸੰਦ ਕਰੇਗੀ। ਕਰੀਨਾ ਚਾਹੇਗੀ ਕਿ ਉਹ 'ਮਹਾਰਾਣੀ ਗਾਇਤਰੀ ਦੇਵੀ' ਦੀ ਭੂਮਿਕਾ ਨਿਭਾਏ। ਲੰਡਨ 'ਚ ਜਨਮੀ ਤੇ ਜੈਪੁਰ ਤੱਕ ਆਈ ਗਾਇਤਰੀ ਦੇਵੀ ਦਾ ਜੀਵਨ ਕਾਫੀ ਰੁਮਾਂਟਿਕ ਰਿਹਾ ਹੈ। 'ਗਾਰਜੀਅਨ ਫੈਸ਼ਨ ਵੀਕ' ਦੌਰਾਨ 'ਬੇਬੋ' ਨੇ ਇਹ ਤਮੰਨਾ ਸਭ ਸਾਹਮਣੇ ਜ਼ਾਹਰ ਕੀਤੀ। ਇਸ ਸਮੇਂ 'ਵੀਰੇ ਦੀ ਵੈਡਿੰਗ' 'ਚ ਉਹ ਰੁੱਝੀ ਹੋਈ ਹੈ। 800 ਕਰੋੜ ਦੇ ਮਹਿਲ ਦੀ ਮਾਲਕਣ 'ਬੇਬੋ' ਨੇ 'ਭਾਈ ਭਤੀਜਾਵਾਦ' ਬਾਰੇ ਕਿਹਾ ਕਿ ਜੇ ਇਥੇ ਆਲੀਆ ਭੱਟ ਹੈ ਤਾਂ ਕੰਗਨਾ ਰਣੌਤ ਵੀ ਹੈ। ਜੀਵਨ ਦੇ 40 ਬਸੰਤ ਦੇਖ ਚੁੱਕੀ ਸ੍ਰੀਮਤੀ ਸੈਫੀਨਾ ਨੇ 2018 'ਚ ਫੈਸ਼ਨ ਬਾਜ਼ਾਰ 'ਚ ਸਰਗਰਮੀਆਂ ਵਧਾਈਆਂ ਹਨ। 'ਰੈਂਪ' 'ਤੇ ਉਸ ਦਾ ਹੁਲੀਆ ਹੀ ਕਮਾਲ ਹੁੰਦਾ ਹੈ। ਬੀ. ਟਾਊਨ ਦੀ ਡਿਜ਼ਾਈਨਰ ਅਨਾਮਿਕਾ ਖੰਨਾ ਤਾਂ ਕਰੀਨਾ ਨੂੰ ਅੱਜ ਵੀ 'ਸਵੀਟ ਸਿਕਸਟੀਨ' ਮੰਨਦੀ ਹੈ। 18 ਸਾਲ ਤੋਂ ਸਰਗਰਮ ਕਰੀਨਾ ਦੀ ਚਾਹਤ ਅਗਲੇ ਦਹਾਕੇ ਤੱਕ ਕੰਮ ਕਰਨ ਦੀ ਹੈ। 'ਰਿਫਿਊਜੀ ਗਰਲ' ਨੇ 'ਜਬ ਵੀ ਮੈਟ', 'ਉੜਤਾ ਪੰਜਾਬ' ਜਿਹੀਆਂ ਕਈ ਹਿੱਟ ਫ਼ਿਲਮਾਂ ਦਿੱਤੀਆਂ ਹਨ। ਆਪਣੇ ਬੇਟੇ ਤੈਮੂਰ ਨਾਲ ਉਹ ਹਰ ਸਮੇਂ ਜੁੜੀ ਰਹਿੰਦੀ ਹੈ। ਸਿਆਣੀ ਮਾਂ ਤੇ ਆਗਿਆਕਾਰੀ ਬੇਗ਼ਮ ਕਰੀਨਾ ਨੇ ਮਾਂ ਬਣਨ ਤੋਂ ਬਾਅਦ ਸ਼ਾਨਦਾਰ ਵਾਪਸੀ ਕੀਤੀ ਹੈ। 'ਵੀਰੇ ਦੀ ਵੈਡਿੰਗ' ਲਈ ਉਸ ਨੇ ਪੂਰਾ ਜ਼ੋਰ ਲਾਇਆ ਹੈ। ਹੁਣ ਬਾਇਓਪਿਕ ਫ਼ਿਲਮਾਂ ਵੱਲ ਧਿਆਨ ਦੇ ਰਹੀ ਕਰੀਨਾ ਜੇ 'ਗਾਇਤਰੀ ਦੇਵੀ' ਬਣੀ ਤਾਂ ਇਹ ਉਸ ਦੀ ਜੀਵਨ ਭਰ ਦੀ ਇਕ ਯਾਦਗਾਰੀ ਫ਼ਿਲਮ ਬਣ ਜਾਵੇਗੀ। ਰੁਮਾਂਟਿਕ ਕਿਰਦਾਰ 'ਚ ਜੋ 'ਬੇਬੋ' ਕਰ ਸਕਦੀ ਹੈ, ਉਹ ਹੋਰ ਕਿਸੇ ਦੇ ਵੱਸ ਦੀ ਗੱਲ ਨਹੀਂ ਹੈ। ਦੇਖੋ, ਕਿਸ ਨਿਰਮਾਤਾ ਵਲੋਂ ਗਾਇਤਰੀ ਦੇਵੀ ਦੇ ਜੀਵਨ 'ਤੇ ਬਣਨ ਵਾਲੀ ਫ਼ਿਲਮ ਦਾ ਐਲਾਨ ਹੁੰਦਾ ਹੈ।

ਨਵੀਂ ਵਿਆਂਹਦੜ ਮੁਟਿਆਰ ਦੇ ਜਜ਼ਬਾਤ ਦਿਖਾਉਂਦਾ ਲੜੀਵਾਰ

ਪਿਛਲੇ ਦਿਨੀਂ ਫਰਵਰੀ ਵਿਚ ਇਕ ਨਵੇਂ ਲੜੀਵਾਰ 'ਕਲੀਰੇ' ਦਾ ਪ੍ਰਸਾਰਨ ਸ਼ੁਰੂ ਹੋਇਆ ਹੈ। ਨਾਂਅ ਤੋਂ ਹੀ ਇਹ ਤਾਂ ਸਾਫ ਹੋ ਜਾਂਦਾ ਹੈ ਕਿ ਇਸ ਵਿਚ ਨਵੀਂ ਵਿਆਹੁਤਾ ਮੁਟਿਆਰ ਦੀ ਕਹਾਣੀ ਪੇਸ਼ ਕੀਤੀ ਗਈ ਹੈ, ਨਾਲ ਹੀ ਇਸ ਦੀ ਪਿੱਠਭੂਮੀ ਪੰਜਾਬ ਦੀ ਹੈ।
ਇਸ ਵਿਚ ਮੀਰਾ ਨਾਂਅ ਦੀ ਇਕ ਇਸ ਤਰ੍ਹਾਂ ਦੀ ਮੁਟਿਆਰ ਦੀ ਕਹਾਣੀ ਪੇਸ਼ ਕੀਤੀ ਗਈ ਹੈ ਜੋ ਪੰਜਾਬ ਦੇ ਛੋਟੇ ਜਿਹੇ ਸ਼ਹਿਰ ਵਿਚ ਰਹਿ ਰਹੀ ਹੁੰਦੀ ਹੈ। ਮੀਰਾ ਨੇ ਆਪਣੀ ਵਿਆਹੁਤਾ ਜ਼ਿੰਦਗੀ ਨੂੰ ਲੈ ਕੇ ਕਈ ਤਰ੍ਹਾਂ ਦੇ ਸੁਪਨੇ ਸੰਜੋ ਰੱਖੇ ਹੁੰਦੇ ਹਨ। ਨਾਲ ਹੀ ਉਸ ਦੀ ਇੱਛਾ ਹੈ ਕਿ ਵਿਆਹ ਤੋਂ ਬਾਅਦ ਉਸ ਦਾ ਆਪਣਾ ਵਜੂਦ ਕਾਇਮ ਰਹੇ। ਉਸ ਨੂੰ ਆਪਣੀ ਪਸੰਦ ਦੀ ਜ਼ਿੰਦਗੀ ਜਿਊਣ ਨੂੰ ਮਿਲੇ ਨਾ ਕਿ ਸਹੁਰੇ ਵਾਲਿਆਂ ਦੀ ਇੱਛਾ ਦੇ ਅਨੁਸਾਰ ਖ਼ੁਦ ਨੂੰ ਉਨ੍ਹਾਂ ਦੀ ਪਸੰਦ ਅਨੁਸਾਰ ਢਾਲਣਾ ਪਵੇ। ਮੀਰਾ ਦਾ ਵਿਆਹ ਵਿਵਾਨ ਨਾਲ ਤੈਅ ਕਰ ਦਿੱਤਾ ਜਾਂਦਾ ਹੈ। ਉਹ ਐਨ. ਆਰ. ਆਈ. ਹੈ, ਨਾਲ ਹੀ ਉਸ ਦੇ ਖਿਆਲ ਪੁਰਾਣੇ ਜ਼ਮਾਨੇ ਦੇ ਹਨ। ਇਸ ਤਰ੍ਹਾਂ ਦੇ ਜੀਵਨ ਸਾਥੀ ਨੂੰ ਪਾ ਕੇ ਮੀਰਾ ਦੀ ਵਿਆਹੁਤਾ ਜ਼ਿੰਦਗੀ ਵਿਚ ਕੀ-ਕੀ ਵਾਪਰ ਜਾਂਦਾ ਹੈ, ਇਹ ਇਸ ਦੀ ਮੁੱਖ ਕਹਾਣੀ ਹੈ।
ਇਸ ਵਿਚ ਮੀਰਾ ਦੀ ਭੂਮਿਕਾ ਅਦਿਤੀ ਸ਼ਰਮਾ ਵਲੋਂ ਨਿਭਾਈ ਗਈ ਹੈ। ਲੜੀਵਾਰ ਵਿਚ ਏਨਾ ਵੱਡਾ ਮੌਕਾ ਪਾ ਕੇ ਉਹ ਖ਼ੁਸ਼ ਤਾਂ ਹੈ, ਨਾਲ ਹੀ ਸੁਚੇਤ ਵੀ ਹੈ। ਆਪਣੀ ਭੂਮਿਕਾ ਬਾਰੇ ਉਹ ਕਹਿੰਦੀ ਹੈ, 'ਇਥੇ ਮੈਂ ਜੋ ਮੀਰਾ ਬਣੀ ਹਾਂ, ਉਸ ਤਰ੍ਹਾਂ ਦੀ ਕੁੜੀ ਆਮ ਤੌਰ 'ਤੇ ਹਰ ਦੂਜੇ ਘਰ ਵਿਚ ਮਿਲ ਜਾਵੇਗੀ। ਅੱਜ ਦੀਆਂ ਕੁੜੀਆਂ ਆਪਣੀ ਜ਼ਿੰਦਗੀ ਆਪਣੇ ਢੰਗ ਨਾਲ ਜਿਊਣਾ ਚਾਹੁੰਦੀਆਂ ਹਨ। ਇਕ ਜ਼ਮਾਨਾ ਉਹ ਸੀ ਜਦੋਂ ਮਾਂ-ਬਾਪ ਆਪਣੀ ਬੇਟੀ ਨੂੰ ਕਿਹਾ ਕਰਦੇ ਸਨ ਕਿ ਜੋ ਵੀ ਸ਼ੌਕ ਹੋਵੇ, ਹੁਣ ਪੂਰੇ ਕਰ ਲਵੇ। ਪਤਾ ਨਹੀਂ, ਸਹੁਰੇ ਜਾ ਕੇ ਸ਼ੌਕ ਪੂਰਾ ਕਰਨ ਦੀ ਆਗਿਆ ਮਿਲੇ ਜਾਂ ਨਹੀਂ। ਵਾਲ ਸੈੱਟ ਕਰਵਾਉਣੇ ਹੋਣ ਜਾਂ ਜੀਨਸ ਪਾਉਣੀਆਂ ਹੋਣ, ਇਸ ਤਰ੍ਹਾਂ ਦੇ ਸ਼ੌਕ ਵਿਆਹ ਤੋਂ ਪਹਿਲਾਂ ਹੀ ਪੂਰੇ ਕਰ ਲਏ ਜਾਂਦੇ ਸਨ। ਡੋਲੀ ਉੱਠਦੇ ਹੀ ਸਾਰੇ ਸ਼ੌਕ ਘਰ ਦੀ ਡਿਊੜੀ ਪਿੱਛੇ ਛੱਡ ਦੇਣੇ ਪੈਂਦੇ ਸਨ। ਪਰ ਅੱਜ ਉਸ ਤਰ੍ਹਾਂ ਦੇ ਹਲਾਤ ਨਹੀਂ ਹਨ। ਹੁਣ ਕੁੜੀਆਂ ਨੂੰ ਸਹੀ ਅਰਥਾਂ ਵਿਚ ਜੀਵਨ ਸਾਥੀ ਸਮਝਣ ਲੱਗੇ ਹਨ ਅਤੇ ਉਸ ਦੀ ਪਸੰਦ ਤੇ ਜਜ਼ਬਾਤ ਦਾ ਵੀ ਖਿਆਲ ਰੱਖਿਆ ਜਾਂਦਾ ਹੈ। ਮੈਨੂੰ ਲਗਦਾ ਹੈ ਕਿ ਹੁਣ ਵੀ ਲੋਕਾਂ ਦੀ ਸੋਚ ਵਿਚ ਬਦਲਾਅ ਲਿਆਉਣ ਦੀ ਜ਼ਰੂਰਤ ਹੈ ਅਤੇ ਉਮੀਦ ਹੈ ਕਿ ਮੀਰਾ ਦੇ ਕਿਰਦਾਰ ਦੀ ਬਦੌਲਤ ਮੈਂ ਕੁਝ ਹੱਦ ਤੱਕ ਬਦਲਾਅ ਲਿਆਉਣ ਵਿਚ ਕਾਮਯਾਬ ਹੋ ਪਾਵਾਂਗੀ। ਮੀਰਾ ਦੇ ਕਿਰਦਾਰ ਰਾਹੀਂ ਅੱਜ ਦੀਆਂ ਕੁੜੀਆਂ ਦੀ ਸੋਚ ਪੇਸ਼ ਕੀਤੀ ਗਈ ਹੈ ਅਤੇ ਮੈਨੂੰ ਉਮੀਦ ਹੈ ਕਿ ਮੈਂ ਉਨ੍ਹਾਂ ਦੀ ਅਗਵਾਈ ਸਹੀ ਢੰਗ ਨਾਲ ਕਰ ਸਕਾਂਗੀ।' ਇਥੇ ਵਿਵਾਨ ਦੀ ਭੂਮਿਕਾ ਅਰਜਿਤ ਤਨੇਜਾ ਵਲੋਂ ਨਿਭਾਈ ਗਈ ਹੈ ਅਤੇ ਉਹ ਖ਼ੁਦ ਕਬੂਲ ਕਰਦੇ ਹਨ ਕਿ ਅਰਜਿਤ ਦੇ ਕਿਰਦਾਰ ਰਾਹੀਂ ਇਹ ਦਿਖਾਇਆ ਗਿਆ ਹੈ ਕਿ ਦੂਜਿਆਂ ਦੀਆਂ ਭਾਵਨਾਵਾਂ ਦੀ ਕਦਰ ਨਾ ਕਰਨ ਨਾਲ ਕੀ ਨਤੀਜੇ ਨਿਕਲਦੇ ਹਨ 'ਮੈਨੂੰ ਉਮੀਦ ਹੈ ਕਿ ਇਥੇ ਮੇਰੇ ਕਿਰਦਾਰ ਤੋਂ ਅੱਜ ਦੇ ਮੁੰਡੇ ਸਿੱਖਿਆ ਲੈਣਗੇ।


-ਮੁੰਬਈ ਪ੍ਰਤੀਨਿਧ

ਚਰਚਾ 'ਰੇਡ' ਦੀ

ਰਾਜ ਕੁਮਾਰ ਗੁਪਤਾ ਵਲੋਂ ਨਿਰਦੇਸ਼ਿਤ 'ਰੇਡ' ਵਿਚ ਅਸਲੀ ਸਰਕਾਰੀ ਕਰਮਚਾਰੀਆਂ ਦੇ ਕੰਮਕਾਰ ਨੂੰ ਦਿਖਾਇਆ ਜਾਵੇਗਾ। ਇਹ ਫ਼ਿਲਮ 80 ਦੇ ਦਹਾਕੇ 'ਤੇ ਆਧਾਰਿਤ ਹੈ ਅਤੇ ਇਸ ਦੀ ਕਹਾਣੀ ਭਾਰਤੀ ਮਾਲ ਸੇਵਾਵਾਂ ਭਾਵ ਇੰਡੀਅਨ ਰੈਵਨਿਊ ਸਰਵਿਸ ਦੇ ਇਕ ਇਮਾਨਦਾਰ ਅਧਿਕਾਰੀ ਦੀ ਜ਼ਿੰਦਗੀ ਦੇ ਪ੍ਰਸੰਗਾਂ 'ਤੇ ਬੁਣੀ ਗਈ ਹੈ। ਆਪਣੀ ਇਮਾਨਦਾਰੀ ਦੀ ਵਜ੍ਹਾ ਕਰਕੇ ਇਸ ਅਫਸਰ ਦੀ ਅਕਸਰ ਬਦਲੀ ਹੋ ਜਾਇਆ ਕਰਦੀ ਸੀ ਅਤੇ ਜਦੋਂ ਉਨ੍ਹਾਂ ਦੀ ਬਦਲੀ ਲਖਨਊ ਹੋਈ ਤਾਂ ਉਥੇ ਇਨ੍ਹਾਂ ਦਾ ਵਾਸਤਾ ਉੱਤਰ ਪ੍ਰਦੇਸ਼ ਦੇ ਭ੍ਰਿਸ਼ਟ ਨੇਤਾਵਾਂ ਤੇ ਉਦੋਗਪਤੀਆਂ ਨਾਲ ਪੈਂਦਾ ਸੀ। ਉਦੋਂ ਆਪਣੇ ਫਰਜ਼ ਦੀ ਪਾਲਣਾ ਕਰਦੇ ਹੋਏ ਇਸ ਅਧਿਕਾਰੀ ਨੇ ਕਈਆਂ ਦੇ ਘਰਾਂ 'ਤੇ ਰੇਡ ਮਾਰ ਕੇ ਕਰੋੜਾਂ ਦੀ ਬੇਨਾਮੀ ਜਾਇਦਾਦ ਸਰਕਾਰੀ ਖਜ਼ਾਨੇ ਵਿਚ ਜਮ੍ਹਾਂ ਕਰਵਾਈ ਸੀ।
ਫ਼ਿਲਮ ਵਿਚ ਅਜੈ ਦੇਵਗਨ ਵਲੋਂ ਇਮਾਨਦਾਰ ਆਈ. ਆਰ. ਐਸ. ਅਧਿਕਾਰੀ ਦੀ ਭੂਮਿਕਾ ਨਿਭਾਈ ਗਈ ਹੈ ਜਦੋਂ ਮੈਨੂੰ ਇਕ ਇਮਾਨਦਾਰ ਸਰਕਾਰੀ ਅਧਿਕਾਰੀ ਬਾਰੇ ਪਤਾ ਲੱਗਿਆ ਤਾਂ ਮੈਨੂੰ ਲੱਗਿਆ ਕਿ ਇਨ੍ਹਾਂ 'ਤੇ ਫ਼ਿਲਮ ਬਣਨੀ ਚਾਹੀਦੀ ਹੈ। ਅਜੈ ਦੇਵਗਨ ਦੇ ਨਾਲ ਇਸ ਵਿਚ ਉਨ੍ਹਾਂ ਦੀ ਪਤਨੀ ਦੀ ਭੂਮਿਕਾ ਵਿਚ ਇਲਿਆਨਾ ਡਿਕਰੂਜ਼ ਹੈ ਅਤੇ ਨਾਲ ਹੈ ਸੌਰਭ ਸ਼ੁਕਲਾ ਜੋ ਉੱਤਰ ਪ੍ਰਦੇਸ਼ ਦੇ ਦਬੰਗ ਨੇਤਾ ਦੀ ਭੂਮਿਕਾ ਵਿਚ ਹੈ।

ਸੈਫ ਦੇ ਨਾਲ ਕੰਮ ਕਰਨਾ ਵੱਡੀ ਪ੍ਰਾਪਤੀ : ਨੇਰੀ ਸਿੰਘ

ਹਰ ਕਲਾਕਾਰ ਦਾ ਸੁਪਨਾ ਹੁੰਦਾ ਹੈ ਕਿ ਉਸ ਨੂੰ ਵੱਡੀ ਫ਼ਿਲਮ ਵਿਚ ਮੌਕਾ ਮਿਲੇ। ਨਵੀਂ ਹੀਰੋਇਨ ਨੇਰੀ ਸਿੰਘ ਦਾ ਵੀ ਇਹੀ ਸੁਪਨਾ ਸੀ ਪਰ ਉਦੋਂ ਉਸ ਨੂੰ ਆਪਣੇ ਕੰਨਾਂ 'ਤੇ ਯਕੀਨ ਨਹੀਂ ਹੋਇਆ ਜਦੋਂ ਨਿਰਦੇਸ਼ਕ ਅਕਸ਼ੁਤ ਵਰਮਾ ਨੇ ਉਸ ਨੂੰ ਇਹ ਦੱਸਿਆ ਕਿ ਉਸ ਨੂੰ 'ਕਾਲਾਕਾਂਡੀ' ਵਿਚ ਲਿਆ ਗਿਆ ਹੈ। ਨੇਰੀ ਦੀ ਖੁਸ਼ੀ ਉਦੋਂ ਦੁੱਗਣੀ ਹੋ ਗਈ ਜਦੋਂ ਉਸ ਨੂੰ ਪਤਾ ਲੱਗਿਆ ਕਿ ਫ਼ਿਲਮ ਵਿਚ ਉਸ ਦੇ ਜ਼ਿਆਦਾਤਰ ਦ੍ਰਿਸ਼ ਸੈਫ ਅਲੀ ਖਾਨ ਦੇ ਨਾਲ ਹੋਣਗੇ। ਨੇਰੀ ਲਈ ਇਹ ਸੁਪਨਾ ਸੱਚ ਹੋਣ ਵਰਗੀ ਗੱਲ ਸੀ।
'ਕਾਲਾਕਾਂਡੀ' ਵਿਚ ਨੇਰੀ ਵਲੋਂ ਬਦਨਾਮ ਔਰਤ ਸ਼ੀਲਾ ਦੀ ਭੂਮਿਕਾ ਨਿਭਾਈ ਗਈ ਹੈ। ਇਸ ਭੂਮਿਕਾ ਬਾਰੇ ਉਹ ਕਹਿੰਦੀ ਹੈ, 'ਪਹਿਲਾਂ ਤਾਂ ਮੈਂ ਇਸ ਸ਼ਸ਼ੋਪੰਜ ਵਿਚ ਸੀ ਕਿ ਕਿਸ ਤਰ੍ਹਾਂ ਇਸ ਭੂਮਿਕਾ ਨਾਲ ਨਿਆਂ ਕਰ ਸਕਾਂਗੀ। ਫਿਰ ਜ਼ਿਆਦਾ ਸੋਚੇ ਬਗੈਰ ਮੈਂ ਇਹ ਕਿਰਦਾਰ ਆਪਣੇ ਨਿਰਦੇਸ਼ਕ ਦੇ ਭਰੋਸੇ 'ਤੇ ਛੱਡ ਦਿੱਤਾ। ਉਹ ਜਿਵੇਂ ਕਹਿੰਦੇ ਗਏ, ਮੈਂ ਕਰਦੀ ਚਲੀ ਗਈ। ਨਤੀਜੇ ਵਜੋਂ ਸ਼ੀਲਾ ਦੇ ਕਿਰਦਾਰ ਰਾਹੀਂ ਆਪਣੀ ਛਾਪ ਛੱਡਣ ਵਿਚ ਕਾਮਯਾਬ ਰਹੀ।
ਸੈਫ ਦੇ ਨਾਲ ਕੰਮ ਕਰਨ ਬਾਰੇ ਇਹ ਨਵੀਂ ਹੀਰੋਇਨ ਕਹਿੰਦੀ ਹੈ, 'ਸੈਫ ਵਰਗੇ ਸੀਨੀਅਰ ਕਲਾਕਾਰ ਦੇ ਨਾਲ ਕੰਮ ਕਰਦੇ ਸਮੇਂ ਸ਼ੁਰੂ ਵਿਚ ਮੈਂ ਘਬਰਾਈ ਸੀ। ਉਹ ਅਨੁਭਵੀ ਕਲਾਕਾਰ ਹਨ। ਮੇਰੇ ਚਿਹਰੇ 'ਤੇ ਹਵਾਈਆਂ ਉੱਡੀਆਂ ਦੇਖ ਕੇ ਉਹ ਸਮਝ ਗਏ ਕਿ ਇਹ ਨਵੀਂ ਕੁੜੀ ਘਬਰਾਈ ਹੋਈ ਹੈ। ਸ਼ੂਟਿੰਗ ਰੋਕ ਕੇ ਉਨ੍ਹਾਂ ਨੇ ਮੇਰੇ ਨਾਲ ਗੱਲਬਾਤ ਸ਼ੁਰੂ ਕੀਤੀ ਅਤੇ ਕੁਝ ਸਮੇਂ ਬਾਅਦ ਉਹ 'ਹਾਏ ਨੇਰੀ... ਹਾਏ ਨੇਰੀ...' ਕਹਿ ਕੇ ਇਸ ਅੰਦਾਜ਼ ਨਾਲ ਗੱਲ ਕਰਨ ਲੱਗੇ ਜਿਵੇਂ ਪੁਰਾਣੇ ਜਾਣੂ ਹੋਣ। ਉਨ੍ਹਾਂ ਦੇ ਇਸ ਤਰ੍ਹਾਂ ਦੇ ਰਵੱਈਏ ਨਾਲ ਮੇਰਾ ਡਰ ਦੂਰ ਹੋ ਗਿਆ ਅਤੇ ਮੇਰੇ ਚਿਹਰੇ 'ਤੇ ਆਤਮ ਵਿਸ਼ਵਾਸ ਵਾਪਸ ਆ ਗਿਆ। ਅਗਲੇ ਦਿਨ ਸੈਫ ਵੀ ਇਹ ਦੇਖ ਕੇ ਖੁਸ਼ ਸਨ ਤੇ ਇਕੱਠਿਆਂ ਕੰਮ ਕਰਕੇ ਇਹ ਲੱਗ ਰਿਹਾ ਸੀ ਜਿਵੇਂ ਅਸੀਂ ਇਕੱਠੇ ਪੰਜਵੀਂ ਫ਼ਿਲਮ ਵਿਚ ਕੰਮ ਕਰ ਰਹੇ ਹੋਈਏ। ਸੈਫ ਦੇ ਨਾਲ ਕੰਮ ਕਰਨਾ ਵਾਕਈ ਵੱਡੀ ਪ੍ਰਾਪਤੀ ਰਹੀ।

ਹਿੱਕ ਦੇ ਜ਼ੋਰ ਨਾਲ ਗਾਉਣ ਵਾਲਾ ਸੁਰੀਲਾ ਗਾਇਕ ਲਾਭ ਹੀਰਾ

ਪੰਜਾਬੀ ਸੰਗੀਤ ਜਗਤ 'ਚ ਹਿੱਕ ਦੇ ਜ਼ੋਰ ਅਤੇ ਦਮਦਾਰ ਆਵਾਜ਼ ਵਾਲੇ ਗਾਇਕਾਂ ਵਿਚੋਂ ਇਕ ਹੈ ਗਾਇਕ ਲਾਭ ਹੀਰਾ। ਨਾਂਅ ਪਿੱਛੇ 'ਹੀਰਾ' ਸ਼ਬਦ ਲਾਭ ਸਿੰਘ ਨੂੰ ਗਾਇਕੀ ਦੇ ਇਸ ਵਿਸ਼ਾਲ ਖੇਤਰ 'ਚ ਸਚਮੁੱਚ ਇਕ ਅਣਮੋਲ ਹੀਰਾ ਸਾਬਤ ਕਰਦਾ ਹੈ। ਆਵਾਜ਼ ਦੇ ਨਾਲ-ਨਾਲ ਸਟੇਜ 'ਤੇ ਲਾਜਵਾਬ ਪੇਸ਼ਕਾਰੀ ਲਾਭ ਹੀਰੇ ਦੀ ਗਾਇਕੀ ਨੂੰ ਹੋਰ ਵੀ ਚਾਰ ਚੰਨ ਲਗਾਉਂਦੀ ਹੈ। ਬੁਢਲਾਡਾ ਦੇ ਨਜ਼ਦੀਕ ਪਿੰਡ ਚਾਣਕ ਦਾ ਰਹਿਣ ਵਾਲਾ ਲਾਭ ਹੀਰਾ ਹਮੇਸ਼ਾ ਹੀ ਆਪਣੇ ਗੀਤਾਂ 'ਚ ਜ਼ਿਆਦਾਤਰ ਲੋਕ ਤੱਥਾਂ ਨੂੰ ਤਰਜੀਹ ਦਿੰਦਾ ਹੋਇਆ ਠੇਠ ਮਲਵਈ ਭਾਸ਼ਾ ਦੀ ਵਰਤੋਂ ਕਰਦਾ ਹੈ। ਦਰਜਨਾਂ ਦੇ ਕਰੀਬ ਕੈਸੇਟਾਂ ਨਾਲ ਸਰੋਤਿਆਂ ਦੀ ਕਚਹਿਰੀ 'ਚ ਹਾਜ਼ਰੀ ਲਗਵਾਉਣ ਵਾਲਾ ਗਾਇਕ ਲਾਭ ਹੀਰਾ ਪਿਛਲੇ ਸਮੇਂ 'ਚ ਫ਼ਿਲਮ 'ਜ਼ੋਰਾ 10 ਨੰਬਰੀਆ' 'ਚ ਗੀਤਕਾਰ ਮੱਟ ਸ਼ੇਰੋਵਾਲਾ ਦੀ ਕਲਮ 'ਚੋਂ ਨਿਕਲਿਆ ਗੀਤ 'ਵੈਲੀ' ਨਾਲ ਖੂਬ ਚਰਚਾ 'ਚ ਰਿਹਾ। ਇਸ ਫ਼ਿਲਮ 'ਚ ਗੀਤ ਗਾ ਕੇ ਲਾਭ ਹੀਰੇ ਨੇ ਬੇਹੱਦ ਸੰਤੁਸ਼ਟੀ ਪ੍ਰਗਟਾਈ ਕਿਉਂਕਿ ਇਸ ਫ਼ਿਲਮ 'ਚ ਉਨ੍ਹਾਂ ਦੇ ਅਤੇ ਸਮੁੱਚੇ ਪੰਜਾਬੀਆਂ ਦੇ ਹਰਮਨ-ਪਿਆਰੇ ਅਦਾਕਾਰ ਧਰਮਿੰਦਰ ਵੀ ਅਹਿਮ ਭੂਮਿਕਾ ਨਿਭਾਅ ਰਹੇ ਸਨ। ਇਸੇ ਤਰ੍ਹਾਂ ਲਾਭ ਹੀਰੇ ਦੀ ਗਾਇਕੀ ਦੀ ਇਕ ਵਿਸ਼ੇਸ਼ਤਾ ਇਹ ਹੈ ਕਿ ਉਹ ਆਪਣੇ ਗੀਤਾਂ ਨੂੰ ਗਾਉਣ ਸਮੇਂ ਆਪਣੇ ਗੀਤਾਂ 'ਚ ਸ਼ਬਦਾਂ ਦੇ ਉਚਾਰਨ 'ਤੇ ਵੀ ਵਿਸ਼ੇਸ਼ ਤਵਜੋਂ ਦਿੰਦਾ ਹੈ। ਜਲਦ ਹੀ ਗਾਇਕ ਲਾਭ ਹੀਰਾ ਨਿਵੇਕਲੇ ਵਿਸ਼ੇ ਨੂੰ ਛੋਂਹਦੇ ਗੀਤਾਂ ਦੀ ਕੈਸੇਟ ਲੈ ਕੇ ਹਾਜ਼ਰੀ ਲਗਵਾਉਣ ਜਾ ਰਿਹਾ ਹੈ। ਉਮੀਦ ਹੈ ਪਹਿਲਾਂ ਦੀ ਤਰ੍ਹਾਂ ਗਾਇਕ ਲਾਭ ਹੀਰਾ ਸਰੋਤਿਆਂ ਦੇ ਦਿਲਾਂ 'ਤੇ ਇਕ ਅਮਿੱਟ ਛਾਪ ਛੱਡੇਗਾ।


-ਅਜੀਤ ਸਿੰਘ ਅਖਾੜਾ, ਜਗਰਾਉਂ

ਸਲਮਾਨ ਦੇ ਪਿੱਛੇ ਕਈ ਨਾਇਕਾਵਾਂ

ਤਾਜ਼ਾ ਖ਼ਬਰ ਇਹ ਹੈ ਕਿ ਸਲਮਾਨ ਖਾਨ ਦੇ ਜੀਵਨ 'ਚੋਂ ਯੂਲੀਆ ਵੇਂਟੂਰ ਨਾਮੀ ਸੁੰਦਰੀ ਪੂਰੀ ਤਰ੍ਹਾਂ ਨਾਲ ਆਦ੍ਰਿਸ਼ ਹੋ ਚੁੱਕੀ ਹੈ। ਉਸ ਦੀ ਥਾਂ ਲੈ ਲਈ ਹੈ ਉਸ ਦੀ ਗਵਾਂਢਣ ਵਲੂਚਾ ਡੀ. ਸੂਜ਼ਾ ਨਾਮੀ ਸੁੰਦਰ ਅਭਿਨੇਤਰੀ ਨੇ। ਵਲੂਚਾ ਫ਼ਿਲਮ 'ਫੈਨ' ਵਿਚ ਇਕ ਛੋਟੀ ਜਿਹੀ ਭੂਮਿਕਾ ਕਰ ਚੁੱਕੀ ਹੈ। ਉਹ ਵੀ ਬਾਲੀਵੁੱਡ ਦੀਆਂ ਸਥਾਪਤ ਨਾਇਕਾਵਾਂ ਦੀ ਸੂਚੀ ਵਿਚ ਆਪਣਾ ਨਾਂਅ ਦਰਜ ਕਰਵਾਉਣਾ ਚਾਹੁੰਦੀ ਹੈ। ਪਰ ਉਸ ਨੂੰ ਉਸ ਤਰ੍ਹਾਂ ਦਾ ਕੰਮ ਨਹੀਂ ਮਿਲ ਰਿਹਾ। ਇਸ ਲਈ ਉਸ ਨੇ ਵੀ ਸਲਮਾਨ ਦਾ ਪੱਲਾ ਫੜਿਆ ਹੋਇਆ ਹੈ। ਸਲਮਾਨ ਨੇ ਵੀ ਮਨ ਖੋਲ੍ਹ ਕੇ ਉਸ ਦਾ ਸਾਥ ਦਿੱਤਾ ਹੈ। ਡੇਜ਼ੀ ਸ਼ਾਹ, ਐਲੀ ਅਬ੍ਰਾਹਮ, ਸਨਾ ਖਾਨ ਵਿਚਾਲੇ ਉਹ ਵੀ ਇਕ ਹੈ ਜਿਸ ਨੂੰ ਸਲਮਾਨ ਦੇ ਘਰ ਹੋਣ ਵਾਲੀ ਹਰ ਪਾਰਟੀ ਹੋਣ 'ਤੇ ਬੁਲਾਇਆ ਜਾ ਰਿਹਾ ਹੈ। ਸੂਤਰ ਦੱਸਦੇ ਹਨ ਕਿ ਇਨ੍ਹੀਂ ਦਿਨੀਂ ਇਸ ਸੁੰਦਰੀ 'ਤੇ ਸਲਮਾਨ ਫ਼ਿਦਾ ਹੈ। ਇਸ ਤੋਂ ਪਹਿਲਾਂ ਚਿਤਰਾਂਗਧਾ ਸਿੰਘ ਨੇ ਵੀ ਕੁਝ ਕੋਸ਼ਿਸ਼ ਕੀਤੀ ਸੀ, ਪਰ ਇਸ ਤਰ੍ਹਾਂ ਦਾ ਮੌਕਾ ਉਸ ਨੂੰ ਨਹੀਂ ਮਿਲਿਆ। ਦੂਜੇ ਪਾਸੇ ਮੌਨੀ ਰਾਏ ਨੇ ਵੀ ਕੋਸ਼ਿਸ਼ ਜਾਰੀ ਰੱਖੀ ਹੋਈ ਹੈ। ਪਰ ਵਾਲੂਚਾ ਇਸ ਸਮੇਂ ਇਸ ਦੌੜ ਵਿਚ ਸਭ ਤੋਂ ਅੱਗੇ ਹੈ। ਇਸ ਤਰ੍ਹਾਂ ਇਕ ਸਵਾਲ ਉੱਭਰਦਾ ਹੈ ਕਿ ਇਸ ਤਰ੍ਹਾਂ ਦੀ ਹਾਲਤ ਵਿਚ ਕੈਟਰੀਨਾ ਦਾ ਹਾਸਲ ਕੀ ਹੈ?

ਮੋਨਾਲੀ ਦੀ ਸ਼ਿਕਾਇਤ

ਰੀ-ਮੇਕ ਗਾਣਿਆਂ ਨੂੰ ਲੈ ਕੇ ਗਾਇਕਾ ਮੋਨਾਲੀ ਠਾਕੁਰ ਨੂੰ ਕੋਈ ਸਮੱਸਿਆ ਨਹੀਂ ਹੈ। ਉਸ ਦੇ ਮਨ ਵਿਚ ਸਿਰਫ ਇਕ ਸਵਾਲ ਹੈ। ਇਧਰ ਪੁਰਾਣੇ ਗਾਣਿਆਂ ਨੂੰ ਨਵਿਆ ਕੇ ਵਰਤਣ ਦਾ ਇਕ ਨਵਾਂ ਰੁਝਾਨ ਹਿੰਦੀ ਫ਼ਿਲਮਾਂ ਵਿਚ ਸ਼ੁਰੂ ਹੋਇਆ ਹੈ। ਉਹ ਸੰਗੀਤਕਾਰਾਂ ਤੋਂ ਇਹ ਜਾਣਨਾ ਚਾਹੁੰਦੀ ਹੈ ਕਿ ਇਸ ਨਵੇਂ ਰੁਝਾਨ ਨੂੰ ਲੈ ਕੇ ਉਹ ਕੀ ਸੋਚਦੇ ਹਨ। ਇਸ ਲਈ ਮੋਨਾਲੀ ਦਾ ਮੰਨਣਾ ਹੈ ਕਿ ਰੀ-ਮੇਕ ਗਾਣਿਆਂ ਪ੍ਰਤੀ ਉਨ੍ਹਾਂ ਦੀ ਵੀ ਡੂੰਘੀ ਰੁਚੀ ਹੈ ਪਰ ਉਨ੍ਹਾਂ ਦੀ ਸ਼ਰਤ ਸਿਰਫ਼ ਏਨੀ ਹੈ ਕਿ ਉਸ ਗਾਣੇ ਨੂੰ ਮੂਲ ਗਾਣੇ ਤੋਂ ਵਧੀਆ ਹੋਣਾ ਚਾਹੀਦਾ ਹੈ। ਮੋਨਾਲੀ ਕਹਿੰਦੀ ਹੈ, 'ਸਰੋਤਿਆਂ ਦੇ ਮਨ ਵਿਚ ਪੁਰਾਣੇ ਗਾਣਿਆਂ ਨੇ ਡੂੰਘੀ ਛਾਪ ਛੱਡੀ ਹੈ, ਇਸ ਲਈ ਉਨ੍ਹਾਂ ਨੂੰ ਪੁਰਾਣੇ ਗਾਣਿਆਂ ਨਾਲੋਂ ਚੰਗਾ ਨਾ ਬਣਨ 'ਤੇ ਨਵੇਂ ਸਿਰੇ ਤੋਂ ਉਸ ਦੀ ਰਚਨਾ ਦਾ ਕੀ ਮਤਲਬ।' ਇਹ ਠੀਕ ਵੀ ਹੈ। ਫਿਲਹਾਲ ਤਾਂ ਇਹ ਤਜਰਬਾ ਮੂਧੇ ਮੂੰਹ ਜਾ ਡਿਗਿਆ ਹੈ।






Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX