ਤਾਜਾ ਖ਼ਬਰਾਂ


ਫੀਫਾ ਵਿਸ਼ਵ ਕੱਪ 2018 : ਉਰੂਗੋਏ ਨੇ ਸਾਉਦੀ ਅਰਬ ਨੂੰ 1-0 ਨਾਲ ਹਰਾ ਕੇ ਵਿਸ਼ਵ ਕੱਪ ਤੋਂ ਕੀਤਾ ਬਾਹਰ
. . .  1 day ago
ਗਿਰੀਡੀਹ [ਝਾਰਖੰਡ] 'ਚ ਬਿਜਲੀ ਡਿੱਗਣ ਨਾਲ 6 ਦੀ ਮੌਤ , 4 ਜ਼ਖ਼ਮੀ
. . .  1 day ago
ਦਿੱਲੀ ਤੋਂ 15 ਆਈ.ਪੀ.ਐੱਸ ਅਫ਼ਸਰਾਂ ਦਾ ਤਬਾਦਲਾ
. . .  1 day ago
ਨਵੀਂ ਦਿੱਲੀ, 20 ਜੂਨ - ਦਿੱਲੀ ਦੇ ਉਪਰਾਜਪਾਲ ਵੱਲੋਂ ਦਿੱਲੀ ਤੋਂ 15 ਆਈ.ਪੀ.ਐੱਸ ਅਫ਼ਸਰਾਂ ਦਾ ਤੁਰੰਤ ਪ੍ਰਭਾਵ ਨਾਲ ਤਬਾਦਲਾ ਕਰ ਦਿੱਤਾ ਗਿਆ...
ਫੀਫਾ ਵਿਸ਼ਵ ਕੱਪ 2018 : ਪੁਰਤਗਾਲ ਨੇ ਮੋਰਾਕੋ ਨੂੰ 1-0 ਨਾਲ ਹਰਾਇਆ
. . .  1 day ago
ਮਾਸਕੋ, 20 ਜੂਨ - ਫੀਫਾ ਵਿਸ਼ਵ ਕੱਪ 2018 ਦੇ ਇੱਕ ਮੁਕਾਬਲੇ ਵਿਚ ਕਪਤਾਨ ਕ੍ਰਿਸਟਿਆਨੋ ਰੋਨਾਲਡੋ ਦੇ ਸ਼ਾਨਦਾਰ ਗੋਲ ਸਦਕਾ ਪੁਰਤਗਾਲ ਨੇ ਆਪਣਾ ਜੇਤੂ ਅਭਿਆਨ ਜਾਰੀ...
ਤਾਮਿਲਨਾਡੂ ਦੀ ਅਨੁਕ੍ਰਿਤੀ ਬਣੀ 'ਫੈਮਿਨਾ ਮਿਸ ਇੰਡੀਆ 2018'
. . .  1 day ago
ਮੁੰਬਈ, 20 ਜੂਨ - ਤਾਮਿਲਨਾਡੂ ਦੀ 19 ਸਾਲਾਂ ਕਾਲਜ ਦੀ ਵਿਦਿਆਰਥਣ ਅਨੁਕ੍ਰਿਤੀ ਵਾਸ ਨੇ 'ਫੈਮਿਨਾ ਮਿਸ ਇੰਡੀਆ 2018' ਦਾ ਖ਼ਿਤਾਬ ਆਪਣੇ ਨਾਂਅ ਕੀਤਾ ਹੈ। ਮੁੰਬਈ ਵਿਖੇ ਅੱਜ...
ਫੀਫਾ ਵਿਸ਼ਵ ਕੱਪ 2018 : ਅੱਧੇ ਸਮੇਂ ਤੱਕ ਪੁਰਤਗਾਲ ਮੋਰਾਕੋ ਤੋਂ 1-0 ਨਾਲ ਅੱਗੇ
. . .  1 day ago
ਇੱਟਾਂ ਦੇ ਭੱਠੇ 'ਤੇ ਇਕੱਠੇ ਹੋਏ ਪਾਣੀ 'ਚ ਡੁੱਬਣ ਕਾਰਨ ਦੋ ਬੱਚਿਆਂ ਦੀ ਮੌਤ
. . .  1 day ago
ਡੇਰਾਬੱਸੀ, 20 ਜੂਨ (ਸ਼ਾਮ ਸਿੰਘ ਸੰਧੂ, ਪੱਤਰ ਪ੍ਰੇਰਕ)- ਡੇਰਾਬੱਸੀ ਦੇ ਨੇੜਲੇ ਪਿੰਡ ਖੇੜੀ ਗੁੱਜਰਾਂ ਵਿਖੇ ਇੱਕ ਭੱਠੇ 'ਤੇ ਇੱਟਾਂ ਬਣਾਉਣ ਲਈ ਇਕੱਠੇ ਕੀਤੇ ਗਏ ਪਾਣੀ 'ਚ ਡੁੱਬਣ ਕਾਰਨ ਦੋ ਬੱਚਿਆਂ ਦੀ ਮੌਤ ਹੋ ਗਈ। ਮ੍ਰਿਤਕ ਬੱਚਿਆਂ ਦੀ ਪਹਿਚਾਣ 9 ਸਾਲਾ ਅਮਨ ਅਤੇ 7 ਸਾਲਾ...
ਪਟਿਆਲਾ ਦੇ ਵਾਦੀ ਹਸਪਤਾਲ 'ਚ ਸਿਹਤ ਵਿਭਾਗ ਵਲੋਂ ਛਾਪੇਮਾਰੀ
. . .  1 day ago
ਪਟਿਆਲਾ, 20 ਜੂਨ- ਪਟਿਆਲਾ ਦੇ ਬਹੁਦਰਗੜ੍ਹ ਵਿਖੇ ਵਾਦੀ ਹਸਪਤਾਲ 'ਚ ਸਿਹਤ ਵਿਭਾਗ ਅਤੇ ਕੈਥਲ ਸਿਹਤ ਵਿਭਾਗ ਦੀਆਂ ਟੀਮਾਂ ਵਲੋਂ ਛਾਪੇਮਾਰੀ ਕੀਤੀ ਗਈ ਹੈ। ਇਹ ਛਾਪੇਮਾਰੀ ਹਸਪਤਾਲ 'ਚ ਲਿੰਗ ਨਿਰਧਾਰਨ ਟੈਸਟ ਕਰਨ ਅਤੇ ਭਰੂਣ ਹੱਤਿਆ ਦੀ ਸ਼ਿਕਾਇਤ ਤੋਂ...
ਕੌਮਾਂਤਰੀ ਸਰਹੱਦ ਨੇੜਿਓਂ 22 ਕਰੋੜ ਤੋਂ ਵੱਧ ਮੁੱਲ ਦੀ ਹੈਰੋਇਨ ਬਰਾਮਦ
. . .  1 day ago
ਬੱਚੀਵਿੰਡ, 20 ਜੂਨ (ਬਲਦੇਵ ਸਿੰਘ ਕੰਬੋ)- ਸੀਮਾ ਸੁਰੱਖਿਆ ਬਲ ਦੇ ਜਵਾਨਾਂ ਨੇ ਅੰਮ੍ਰਿਤਸਰ ਸੈਕਟਰ ਤਹਿਤ ਪਿੰਡ ਕੱਕੜ ਵਿਖੇ ਕੌਮਾਂਤਰੀ ਸਰਹੱਦ ਨੇੜਿਓਂ ਹੈਰੋਇਨ ਦੀ ਵੱਡੀ ਖੇਪ ਬਰਾਮਦ ਕੀਤੀ ਹੈ। ਮਿਲੀ ਜਾਣਕਾਰੀ ਮੁਤਾਬਕ ਬੀ. ਐਸ. ਐਫ. ਦੀ 17 ਬਟਾਲੀਅਨ ਦੇ...
ਦੇਸ਼ ਸੇਵਾ ਲਈ ਹਮੇਸ਼ਾ ਵਚਨਬੱਧ ਰਹਾਂਗਾ- ਅਰਵਿੰਦ ਸੁਬਰਾਮਣੀਅਮ
. . .  1 day ago
ਨਵੀਂ ਦਿੱਲੀ, 20 ਜੂਨ- ਮੁੱਖ ਆਰਥਿਕ ਸਲਾਹਕਾਰ ਅਰਵਿੰਦ ਸੁਬਰਾਮਣੀਅਮ ਨੇ ਨਿੱਜੀ ਕਾਰਨਾਂ ਦੇ ਚੱਲਦਿਆਂ ਅਹੁਦੇ ਤੋਂ ਅਸਤੀਫ਼ਾ ਦੇ ਦਿੱਤਾ। ਅਸਤੀਫ਼ੇ ਤੋਂ ਬਾਅਦ ਪ੍ਰੈੱਸ ਕਾਨਫਰੰਸ ਕਰਕੇ ਉਨ੍ਹਾਂ ਕਿਹਾ ਕਿ ਇਹ ਉਨ੍ਹਾਂ ਦੀ ਸਭ ਤੋਂ ਚੰਗੀ ਨੌਕਰੀ ਰਹੀ ਹੈ। ਸੁਬਰਾਮਣੀਅਮ...
ਹੋਰ ਖ਼ਬਰਾਂ..
  •     Confirm Target Language  

ਨਾਰੀ ਸੰਸਾਰ

ਫੁੱਲਾਂ ਨਾਲ ਸੁੰਦਰਤਾ

ਫਰਵਰੀ ਦਾ ਮਹੀਨਾ ਸ਼ੁਰੂ ਹੁੰਦੇ ਹੀ ਚਾਰੇ ਪਾਸੇ ਬਾਗ-ਬਗੀਚਿਆਂ ਵਿਚ ਫੁੱਲਾਂ ਦੀ ਖੁਸ਼ਬੂ ਘਰ-ਬਾਹਰ ਸਭ ਨੂੰ ਮਹਿਕਾ ਦਿੰਦੀ ਹੈ। ਇਨ੍ਹਾਂ ਫੁੱਲਾਂ ਨੂੰ ਜੇ ਤੁਸੀਂ ਸੁੰਦਰਤਾ ਨਿਖਾਰਨ ਲਈ ਵੀ ਵਰਤੋਂ ਵਿਚ ਲਿਆਉਂਦੇ ਹੋ ਤਾਂ ਤੁਸੀਂ ਬਿਨਾਂ ਕਿਸੇ ਸੁੰਦਰਤਾ ਸਾਧਨ ਦੇ ਦਮਕਦੀ ਚਮੜੀ ਅਤੇ ਚਮਕੀਲੇ ਵਾਲ ਪ੍ਰਾਪਤ ਕਰ ਸਕਦੇ ਹੋ।
ਅੱਜ ਭਾਵੇਂ ਫੁੱਲਾਂ ਦੇ ਸੁੰਦਰਤਾ ਉਤਪਾਦ ਆਕਰਸ਼ਕ ਪੈਕ ਵਿਚ ਮਹਿੰਗੇ ਮੁੱਲਾਂ 'ਤੇ ਬਾਜ਼ਾਰ ਵਿਚ ਉਪਲਬਧ ਹਨ ਪਰ ਇਨ੍ਹਾਂ ਉਤਪਾਦਾਂ ਨੂੰ ਲੰਮੇ ਸਮੇਂ ਤੱਕ ਤਾਜ਼ਾ ਬਣਾਈ ਰੱਖਣ ਲਈ ਜਿਨ੍ਹਾਂ ਰਸਾਇਣਕ ਪਦਾਰਥਾਂ ਦੀ ਵਰਤੋਂ ਕੀਤੀ ਜਾਂਦੀ ਹੈ, ਉਹ ਫਾਇਦੇ ਦੀ ਬਜਾਏ ਨੁਕਸਾਨ ਜ਼ਿਆਦਾ ਕਰਦੇ ਹਨ। ਅਜਿਹੇ ਵਿਚ ਜੇ ਤੁਸੀਂ ਥੋੜ੍ਹਾ ਸਮਾਂ ਕੱਢ ਕੇ ਘਰ ਵਿਚ ਫੁੱਲਾਂ ਦੇ ਸਤ ਨਾਲ ਹਰਬਲ ਉਤਪਾਦ ਤਿਆਰ ਕਰ ਕੇ ਸੁੰਦਰਤਾ ਨਿਖਾਰਨ ਦੀ ਕੋਸ਼ਿਸ਼ ਕਰੋ ਤਾਂ ਇਸ ਨਾਲ ਜਿੱਥੇ ਪੈਸੇ ਦੀ ਬੱਚਤ ਹੋਵੇਗੀ, ਉੱਥੇ ਦੂਜੇ ਪਾਸੇ ਤੁਹਾਡੀ ਆਭਾ ਵਿਚ ਚਾਰ ਚੰਦ ਵੀ ਲੱਗਣਗੇ।
ਗੁਲਾਬ, ਲੇਵੇਂਡਰ, ਜੈਸਮਿਨ, ਗੁਡਹਰ ਆਦਿ ਫੁੱਲਾਂ ਦੀ ਵਰਤੋਂ ਕਰ ਕੇ ਤੁਸੀਂ ਕੁਦਰਤੀ ਸੁੰਦਰਤਾ ਪ੍ਰਾਪਤ ਕਰ ਸਕਦੇ ਹੋ। ਫੁੱਲਾਂ ਨਾਲ ਵਾਤਾਵਰਨ ਵਿਚ ਬਨਸਪਤਿਕ ਊਰਜਾ ਮਿਲਦੀ ਹੈ। ਫੁੱਲਾਂ ਦੀ ਸੁਗੰਧ ਅਤੇ ਰੰਗਾਂ ਨਾਲ ਨਾ ਕੇਵਲ ਸਾਡੀਆਂ ਇੰਦਰੀਆਂ ਆਨੰਦਿਤ ਮਹਿਸੂਸ ਹੁੰਦੀਆਂ ਹਨ, ਸਗੋਂ ਫੁੱਲਾਂ ਵਿਚ ਤਾਕਤਵਰ ਗੁਣਕਾਰੀ ਤੱਤ ਵੀ ਮੌਜੂਦ ਹੁੰਦੇ ਹਨ, ਜਿਨ੍ਹਾਂ ਤੋਂ ਅਨੁਕੂਲ, ਮਾਨਸਿਕ ਅਤੇ ਸਰੀਰਕ ਤਾਲਮੇਲ ਪ੍ਰਾਪਤ ਕੀਤਾ ਜਾ ਸਕਦਾ ਹੈ।
ਫੁੱਲਾਂ ਨਾਲ ਘਰੇਲੂ ਸੁੰਦਰਤਾ : ਗੁਲਾਬਜਲ ਨੂੰ ਚਮੜੀ ਦਾ ਬਿਹਤਰੀਨ ਟੋਨਰ ਮੰਨਿਆ ਜਾਂਦਾ ਹੈ। ਥੋੜ੍ਹੇ ਜਿਹੇ ਗੁਲਾਬਜਲ ਨੂੰ ਇਕ ਕਟੋਰੀ ਵਿਚ ਠੰਢਾ ਕਰੋ। ਕਾਟਨਵੂਲ ਦੀ ਮਦਦ ਨਾਲ ਠੰਢੇ ਗੁਲਾਬ ਜਲ ਨਾਲ ਚਮੜੀ ਨੂੰ ਸਾਫ਼ ਕਰੋ ਅਤੇ ਚਮੜੀ ਨੂੰ ਹਲਕੇ-ਹਲਕੇ ਥਪਥਪਾਓ। ਇਸ ਨਾਲ ਚਮੜੀ ਵਿਚ ਜੋਬਨਤਾ ਅਤੇ ਸਵਾਸਥਵਰਧਕ ਬਣਾਈ ਰੱਖਣ ਵਿਚ ਮਦਦ ਮਿਲਦੀ ਹੈ। ਇਹ ਗਰਮੀਆਂ ਅਤੇ ਬਰਸਾਤ ਰੁੱਤ ਵਿਚ ਕਾਫੀ ਲਾਭਦਾਇਕ ਸਾਬਤ ਹੁੰਦਾ ਹੈ।
ਤੇਲੀ ਚਮੜੀ ਲਈ : ਇਕ ਚਮਚ ਗੁਲਾਬਜਲ ਵਿਚ ਦੋ-ਤਿੰਨ ਚਮਚ ਨਿੰਬੂ ਦਾ ਰਸ ਮਿਲਾਓ ਅਤੇ ਇਸ ਮਿਸ਼ਰਣ ਵਿਚ ਰੂੰ ਡੁਬੋ ਕੇ ਇਸ ਨਾਲ ਚਿਹਰੇ ਨੂੰ ਸਾਫ਼ ਕਰੋ। ਇਸ ਨਾਲ ਚਿਹਰੇ 'ਤੇ ਜਮ੍ਹਾਂ ਮੈਲ, ਗੰਦਗੀ, ਪਸੀਨੇ ਦੀ ਬਦਬੂ ਨੂੰ ਹਟਾਉਣ ਵਿਚ ਮਦਦ ਮਿਲੇਗੀ।
ਠੰਢਾ ਸੱਤ ਤਿਆਰ ਕਰਨ ਲਈ ਜਪਾ ਪੁਸ਼ਪ ਦੇ ਫੁੱਲ ਅਤੇ ਪੱਤਿਆਂ ਨੂੰ ਇਕ ਅਤੇ ਛੇ ਦੇ ਅਨੁਪਾਤ ਵਿਚ ਰਾਤ ਭਰ ਠੰਢੇ ਪਾਣੀ ਵਿਚ ਰਹਿਣ ਦਿਓ। ਫੁੱਲਾਂ ਨੂੰ ਨਿਚੋੜ ਕੇ ਵਰਤੋਂ ਕਰਨ ਤੋਂ ਪਹਿਲਾਂ ਪਾਣੀ ਨੂੰ ਡੋਲ੍ਹ ਦਿਓ। ਇਸ ਸੱਤ ਨੂੰ ਵਾਲਾਂ ਅਤੇ ਖੋਪੜੀ ਨੂੰ ਧੋਣ ਲਈ ਵਰਤੋਂ ਵਿਚ ਲਿਆ ਸਕਦੇ ਹੋ। ਇਸ ਸੱਤ ਜਾਂ ਫੁੱਲਾਂ ਦੇ ਰਸ ਵਿਚ ਮਹਿੰਦੀ ਮਿਲਾ ਕੇ ਵਾਲਾਂ 'ਤੇ ਲਗਾਉਣ ਨਾਲ ਵਾਲਾਂ ਨੂੰ ਭਰਪੂਰ ਪੋਸ਼ਣ ਮਿਲਦਾ ਹੈ ਅਤੇ ਇਹ ਵਾਲਾਂ ਦੀ ਕੰਡੀਸ਼ਨਿੰਗ ਲਈ ਵਰਤਿਆ ਜਾਂਦਾ ਹੈ।
ਗੇਂਦੇ ਜਾਂ ਕੇਲੈਂਡਯੁਲਾ ਦੇ ਤਾਜ਼ਾ ਜਾਂ ਸੁੱਕੇ ਪੱਤਿਆਂ ਦੀ ਵੀ ਕੁਦਰਤੀ ਸੁੰਦਰਤਾ ਵਿਚ ਵਰਤੋਂ ਕੀਤੀ ਜਾ ਸਕਦੀ ਹੈ। ਚਾਰ ਚਮਚ ਫੁੱਲਾਂ ਨੂੰ ਉਬਲਦੇ ਪਾਣੀ ਵਿਚ ਪਾਓ ਪਰ ਇਸ ਨੂੰ ਉਬਾਲੋ ਨਾ। ਫੁੱਲਾਂ ਨੂੰ 20 ਜਾਂ 30 ਮਿੰਟ ਤੱਕ ਗਰਮ ਪਾਣੀ ਵਿਚ ਰਹਿਣ ਦਿਓ। ਇਸ ਮਿਸ਼ਰਣ ਨੂੰ ਠੰਢਾ ਹੋਣ ਤੋਂ ਬਾਅਦ ਪਾਣੀ ਨੂੰ ਕੱਢ ਦਿਓ ਅਤੇ ਮਿਸ਼ਰਣ ਨੂੰ ਵਾਲਾਂ ਦੇ ਸੰਪੂਰਨ ਰੋਗਾਂ ਦੇ ਇਲਾਜ ਲਈ ਵਰਤਿਆ ਜਾ ਸਕਦਾ ਹੈ। ਠੰਢੇ ਪਾਣੀ ਨਾਲ ਚਿਹਰੇ ਨੂੰ ਧੋਣ ਨਾਲ ਚਿਹਰੇ 'ਤੇ ਕੁਦਰਤੀ ਨਿਖਾਰ ਆ ਜਾਵੇਗਾ। ਇਸ ਮਿਸ਼ਰਣ ਨਾਲ ਤੇਲੀ ਅਤੇ ਕਿੱਲ-ਮੁਹਾਸਿਆਂ ਤੋਂ ਪ੍ਰਭਾਵਿਤ ਚਮੜੀ ਨੂੰ ਬਹੁਤ ਫਾਇਦਾ ਮਿਲਦਾ ਹੈ।
**


ਖ਼ਬਰ ਸ਼ੇਅਰ ਕਰੋ

ਇਮਤਿਹਾਨਾਂ ਦੇ ਦਿਨ: ਵਿਦਿਆਰਥੀਆਂ 'ਚ ਵਧਦਾ ਤਣਾਅ

ਕੋਈ ਵੀ ਕੰਮ ਕਰਨਾ ਹੋਵੇ, ਚਾਹੇ ਕਿਤੇ ਜਾਣਾ ਹੋਵੇ ਜਾਂ ਘਰ 'ਚ ਕੋਈ ਕਾਰਜ ਹੋਵੇ, ਥੋੜ੍ਹੀ ਜਿਹੀ ਬੇਚੈਨੀ ਤੇ ਮਨ 'ਤੇ ਛਾਇਆ ਤਣਾਅ ਸੁਭਾਵਿਕ ਹੈ। ਵਿਦਿਆਰਥੀਆਂ ਦੇ ਜੀਵਨ ਵਿਚ ਇਮਤਿਹਾਨ ਦੀ ਘੜੀ ਸਭ ਤੋਂ ਵੱਧ ਮਹੱਤਵ ਰੱਖਦੀ ਹੈ। ਇਨ੍ਹਾਂ ਦਿਨਾਂ ਵਿਚ ਪੇਪਰਾਂ ਦੀ ਚਿੰਤਾ ਉਨ੍ਹਾਂ ਦੇ ਮਨ 'ਤੇ ਤਣਾਅ ਦੀ ਸਥਿਤੀ ਪੈਦਾ ਕਰਦੀ ਹੈ। ਉਨ੍ਹਾਂ ਨੂੰ ਸਿਰਫ਼ ਪਾਸ ਹੋਣ ਦੀ ਚਿੰਤਾ ਨਹੀਂ ਸਤਾਉਂਦੀ, ਸਗੋਂ ਇਸ ਗੱਲ ਦਾ ਫਿਕਰ ਵੱਧ ਰਹਿੰਦਾ ਹੈ ਕਿ ਲੋਕ ਕੀ ਕਹਿਣਗੇ? ਕਿਤੇ ਮੇਰੇ ਸਾਥੀਆਂ ਦੇ ਮੇਰੇ ਤੋਂ ਵੱਧ ਨੰਬਰ ਨਾ ਆ ਜਾਣ ਜਾਂ ਜੇ ਮੈਂ ਆਪਣੇ ਮਾਪਿਆਂ ਦੀ ਉਮੀਦ 'ਤੇ ਪੂਰਾ ਨਾ ਉਤਰ ਸਕਿਆ ਤਾਂ ਕੀ ਹੋਵੇਗਾ? ਇਸ ਵੇਲੇ ਬੀਤੇ ਵਕਤ ਦਾ ਅਵੇਸਲਾਪਣ ਵੀ ਉਨ੍ਹਾਂ ਨੂੰ ਅਖਰਨ ਲਗਦਾ ਹੈ ਅਤੇ ਉਹ ਆਪਣੀ ਹੀ ਕਰਨੀ ਪ੍ਰਤੀ ਗਿਲਾਨੀ ਮਹਿਸੂਸ ਕਰਨ ਲਗਦੇ ਹਨ ਅਤੇ ਅਕਸਰ ਸੋਚਦੇ ਹਨ ਕਿ ਕਾਸ਼! ਮੈਂ ਸ਼ੁਰੂ ਤੋਂ ਮਿਹਨਤ ਕੀਤੀ ਹੁੰਦੀ। ਕੁਝ ਵਿਦਿਆਰਥੀ ਇਸ ਤਣਾਅ ਨੂੰ ਸਹਿਣ ਕਰਨ ਤੋਂ ਅਸਮਰੱਥ ਹੁੰਦੇ ਹਨ ਅਤੇ ਉਹ ਅਕਸਰ ਇਨ੍ਹਾਂ ਦਿਨਾਂ ਵਿਚ ਕਿਸੇ ਨਾ ਕਿਸੇ ਮਾਨਸਿਕ ਬਿਮਾਰੀ ਦੇ ਸ਼ਿਕਾਰ ਹੋ ਜਾਂਦੇ ਹਨ। ਜੀਅ ਮਿਚਲਾਉਣਾ, ਭੁੱਖ ਨਾ ਲੱਗਣੀ, ਸਿਰ ਦੁਖਣਾ, ਗੱਲ-ਗੱਲ 'ਤੇ ਗੁੱਸਾ ਆਉਣਾ, ਮਾਨਸਿਕ ਚਿੰਤਾ ਦੇ ਪਹਿਲੇ ਲੱਛਣ ਹਨ।
ਜਿਵੇਂ ਮੈਂ ਪਹਿਲਾਂ ਕਿਹਾ ਹੈ ਕਿ ਕੁਝ ਮਾਤਰਾ ਤੱਕ ਤਣਾਅ ਸਾਕਾਰਾਤਮਕ ਸਥਿਤੀ ਪੈਦਾ ਕਰਦਾ ਹੈ ਜਿਵੇਂ ਕਿ ਹਲਕੇ ਤਣਾਅ ਨਾਲ ਵਿਦਿਆਰਥੀ ਇਹ ਤੈਅ ਕਰਦਾ ਹੈ ਕਿ ਉਸ ਤੋਂ ਕੁਝ ਛੁੱਟ ਨਾ ਜਾਵੇ ਤੇ ਇਮਤਿਹਾਨ ਦੇ ਦਿਨਾਂ ਵਿਚ ਉਹ ਆਪਣੀ ਪੜ੍ਹਾਈ ਅਤੇ ਸਿਹਤ ਦੋਵਾਂ ਵਿਚ ਸੰਤੁਲਨ ਬਣਾ ਕੇ ਰੱਖਦਾ ਹੈ। ਵਕਤ ਦਾ ਪਾਬੰਦ ਅਤੇ ਨਿਯਮ ਨੂੰ ਨਿਭਾਉਂਦਾ ਹੋਇਆ ਉਹ ਆਪਣੇ ਉਦੇਸ਼ ਦੀ ਪੂਰਤੀ ਸਹਿਜ ਸੁਭਾਅ ਕਰ ਲੈਂਦਾ ਹੈ। ਇਸ ਦੇ ਉਲਟ ਬੀਤੇ ਵਕਤ ਦੀਆਂ ਗਲਤੀਆਂ ਵਿਚ ਉਲਝ ਕੇ ਆਤਮ ਗਿਲਾਨੀ ਨਾਲ ਲਬਰੇਜ਼ ਵਿਦਿਆਰਥੀ ਆਪਣੇ ਅੱਜ ਦੀ ਤਾਣੀ ਨੂੰ ਉਲਝਾ ਦਿੰਦਾ ਹੈ। ਉਸ ਦੀ ਸੋਚ ਨਾਕਾਰਾਤਮਕ ਹੋ ਨਿਬੜਦੀ ਹੈ ਅਤੇ ਕਈ ਵਾਰ ਉਹ ਆਪਣੇ ਉਦੇਸ਼ ਦੀ ਪੂਰਤੀ ਲਈ ਅਯੋਗ ਢੰਗਾਂ ਦੀ ਵਰਤੋਂ ਕਰਨ ਦੇ ਜੁਗਾੜ ਵੀ ਸੋਚਣ ਲੱਗ ਜਾਂਦਾ ਹੈ, ਜਿਸ ਦੇ ਸਿੱਟੇ ਅਕਸਰ ਭਿਆਨਕ ਹੀ ਨਿਕਲਦੇ ਹਨ। ਅਜਿਹੇ ਵਿਦਿਆਰਥੀ ਨੂੰ ਸਹਿਜ ਤੋਂ ਕੰਮ ਲੈ ਕੇ ਹਾਂ-ਪੱਖੀ ਸੋਚ ਅਪਣਾਉਣੀ ਚਾਹੀਦੀ ਹੈ ਅਤੇ ਭੂਤਕਾਲ ਨੂੰ ਵਰਤਮਾਨ 'ਤੇ ਹਾਵੀ ਨਹੀਂ ਹੋਣ ਦੇਣਾ ਚਾਹੀਦਾ। 'ਜਦੋਂ ਜਾਗੋ ਉਦੋਂ ਸਵੇਰਾ' ਦੀ ਸੋਚ ਨੂੰ ਅਪਣਾ ਕੇ ਆਪਣੇ ਜੀਵਨ ਨੂੰ ਸੰਵਾਰਨ ਦੀ ਵਿਉਂਤ ਘੜਨੀ ਚਾਹੀਦੀ ਹੈ। ਜਿਵੇਂ ਕਿ ਜਦੋਂ ਵਿਦਿਆਰਥੀ ਨੂੰ ਤਣਾਅ ਸਤਾਉਣ ਲੱਗੇ ਤਾਂ ਉਸ ਨੂੰ ਅਜਿਹਾ ਸੋਚਣਾ ਚਾਹੀਦਾ ਹੈ ਕਿ ਮੈਂ ਆਪਣੇ ਵਲੋਂ ਮਿਹਨਤ ਕਰਾਂਗਾ, ਸਿੱਟਾ ਜੋ ਵੀ ਹੋਵੇ, ਖਿੜੇ ਮੱਥੇ ਪ੍ਰਵਾਨ ਕਰਾਂਗਾ। ਕੀ ਹੋਇਆ, ਮੈਂ ਪਹਿਲਾਂ ਮਿਹਨਤ ਨਹੀਂ ਕੀਤੀ ਪਰ ਅੱਜ ਤੋਂ ਬਾਅਦ ਮੈਂ ਮਿਹਨਤ ਦਾ ਪੱਲਾ ਕਦੇ ਨਹੀਂ ਛੱਡਾਂਗਾ। ਮੈਂ ਆਪਣੇ ਮਾਪਿਆਂ ਨਾਲ ਵਾਅਦਾ ਕਰਾਂਗਾ ਕਿ ਮੈਂ ਕਦੇ ਕੋਈ ਅਜਿਹਾ ਕਦਮ ਨਹੀਂ ਚੁੱਕਾਂਗਾ, ਜੋ ਉਨ੍ਹਾਂ ਨੂੰ ਤਕਲੀਫ਼ ਦੇਵੇ। ਜ਼ਿੰਦਗੀ ਇਥੇ ਖ਼ਤਮ ਨਹੀਂ ਹੁੰਦੀ, ਇਸ ਵਿਚ ਹੋਰ ਵੀ ਬਹੁਤ ਕੁਝ ਹੈ, ਜੋ ਮੈਂ ਕਰ ਸਕਦਾ ਹਾਂ, ਮੈਂ ਕਦੇ ਹਾਰਾਂਗਾ ਨਹੀਂ। ਅਜਿਹੀ ਸੋਚ ਵਿਦਿਆਰਥੀ ਨੂੰ ਤਣਾਅ ਤੋਂ ਮੁਕਤੀ ਹੀ ਨਹੀਂ ਦੇਵੇਗੀ, ਸਗੋਂ ਉਸ ਅੰਦਰ ਨਵੀਂ ਊਰਜਾ ਵੀ ਭਰੇਗੀ, ਜਿਸ ਦਾ ਸਦਕਾ ਉਸ ਦਾ ਭਵਿੱਖ ਉੱਜਲਾ ਹੋਵੇਗਾ।
ਇਮਤਿਹਾਨਾਂ ਦੇ ਦਿਨਾਂ ਵਿਚ ਵਿਦਿਆਰਥੀ ਦੀ ਜ਼ਿੰਦਗੀ ਵਿਚ ਮਾਪੇ ਅਤੇ ਅਧਿਆਪਕਾਂ ਦਾ ਵੀ ਇਕ ਖਾਸ ਯੋਗਦਾਨ ਰਹਿੰਦਾ ਹੈ। ਮਾਪਿਆਂ ਨੂੰ ਚਾਹੀਦਾ ਹੈ ਕਿ ਆਪਣੇ ਬੱਚੇ ਨੂੰ ਇਨ੍ਹਾਂ ਦਿਨਾਂ ਵਿਚ ਭਰਪੂਰ ਪਿਆਰ ਦੇ ਨਾਲ ਉਸ ਦੀ ਪੌਸ਼ਟਿਕ ਖੁਰਾਕ ਦਾ ਵੀ ਧਿਆਨ ਰੱਖਣ ਅਤੇ ਹਰ ਸਥਿਤੀ ਵਿਚ ਉਨ੍ਹਾਂ ਦੇ ਨਾਲ ਹੋਣ ਦਾ ਭਰੋਸਾ ਵੀ ਦਿਵਾਉਣ। ਅਧਿਆਪਕ ਵੀ ਵਿਦਿਆਰਥੀਆਂ ਨੂੰ ਜਿਥੇ ਪੜ੍ਹਾਈ ਵਿਚ ਮਦਦ ਕਰ ਸਕਦੇ ਹਨ, ਉਥੇ ਉਨ੍ਹਾਂ ਵਿਚ ਹਰ ਸਥਿਤੀ ਨੂੰ ਖਿੜੇ ਮੱਥੇ ਸਹਿਣ ਕਰਨ ਦੀ ਸ਼ਕਤੀ ਵੀ ਪ੍ਰਦਾਨ ਕਰਨ। ਅਧਿਆਪਕ ਵਿਦਿਆਰਥੀ ਲਈ ਰੱਬ ਵਰਗਾ ਹੁੰਦਾ ਹੈ, ਇਸ ਲਈ ਅਧਿਆਪਕਾਂ ਨੂੰ ਚਾਹੀਦਾ ਹੈ ਕਿ ਉਹ ਵਿਦਿਆਰਥੀਆਂ ਦੇ ਮਨਾਂ ਅੰਦਰ ਤਣਾਅ ਦੀ ਸਥਿਤੀ ਨੂੰ ਪੈਦਾ ਹੀ ਨਾ ਹੋਣ ਦੇਣ। ਆਪਣੀ ਯੋਗ ਅਗਵਾਈ ਸਦਕਾ ਉਹ ਵਿਦਿਆਰਥੀਆਂ ਅੰਦਰ ਹਰ ਸਥਿਤੀ ਦਾ ਸਾਹਮਣਾ ਕਰਨ ਦੀ ਪ੍ਰਵਿਰਤੀ ਦੇ ਨਾਲ-ਨਾਲ ਉਨ੍ਹਾਂ ਨੂੰ ਸੁਚੱਜੀ ਜੀਵਨ ਜਾਚ ਸਿਖਾ ਸਕਦੇ ਹਨ।


-ਪ੍ਰਿੰਸੀਪਲ, ਬਲੋਜ਼ਮਜ਼ ਕਾਨਵੈਂਟ ਸਕੂਲ, ਸਿਧਵਾਂ ਬੇਟ ਰੋਡ, ਜਗਰਾਉਂ। ਮੋਬਾ: 98887-85887

ਬਾਥਰੂਮ ਲਈ ਉਪਯੋਗੀ ਨੁਸਖੇ

* ਟਾਇਲਟ ਕਲੀਨਰ : ਕੋਕਾ-ਕੋਲਾ ਦੀ ਇਕ ਵੱਡੀ ਬੋਤਲ ਲੈ ਕੇ ਸਾਰੀ ਕੋਕ ਟਾਇਲਟ ਸੀਟ ਦੇ ਅੰਦਰਲੇ ਹਿੱਸੇ ਵਿਚ ਪਾਓ ਤੇ ਫਿਰ ਦਸ ਕੁ ਮਿੰਟਾਂ ਬਾਅਦ ਪਾਣੀ ਛੱਡ ਦਿਓ।
* ਜੰਗ (ਰਸਟ) ਹਟਾਉਣਾ : ਬਾਥਰੂਮ ਵਿਚ ਲੱਗੀਆਂ ਟੂਟੀਆਂ ਦੇ ਪਿਛਲੇ ਹਿੱਸੇ ਤੋਂ ਜੰਗ ਦੀ ਸਫ਼ਾਈ ਲਈ 15 ਮਿੰਟ ਕੈਚਅਪ ਲਗਾਓ ਤੇ ਬਾਅਦ ਵਿਚ ਧੋ ਦਿਓ।
* ਹੈਂਡਵਾਸ਼ : ਸਾਬਣ ਦੇ ਟੁਕੜੇ ਕੱਦੂਕਸ਼ ਕਰ ਕੇ, ਗੈਸ 'ਤੇ ਪਤੀਲੀ ਰੱਖ ਕੇ, ਵਿਚ ਮਿਸ਼ਰਣ ਤੇ ਥੋੜ੍ਹਾ ਪਾਣੀ ਪਾ ਕੇ ਉਬਾਲ ਆਉਣ 'ਤੇ ਮਿਸ਼ਰਣ ਡੱਬੀ ਵਿਚ ਭਰ ਲਵੋ।
* ਸ਼ਾਵਰ ਦੀ ਸਫ਼ਾਈ : ਸ਼ਾਵਰ 'ਤੇ ਲਿਫਾਫਾ ਚੜ੍ਹਾ ਕੇ ਦੋ ਘੰਟੇ ਲਈ ਰੱਖੋ, ਲਿਫਾਫੇ ਵਿਚ ਪਾਣੀ ਤੇ ਵਿਨੇਗਰ ਮਿਲਾਉਣ ਤੋਂ ਬਾਅਦ ਲਿਫਾਫਾ ਚੜ੍ਹਾਉਣਾ ਹੈ।
* ਸ਼ੀਸ਼ੇ ਦਾ ਭਾਫ਼ ਤੋਂ ਬਚਾਅ : ਸ਼ੀਸ਼ੇ 'ਤੇ ਸ਼ੇਵਿੰਗ ਫੋਮ ਕੱਪੜੇ ਜਾਂ ਟਿਸ਼ੂ ਨਾਲ ਲਗਾ ਕੇ ਹਲਕਾ ਜਿਹਾ ਘਸਾ ਦਿਓ।
* ਟੂਟੀਆਂ ਦੀ ਚਮਕ : ਟੂਟੀਆਂ ਨੂੰ ਵਿਨੇਗਰ ਦੀ ਵਰਤੋਂ ਕਰ ਕੇ ਬੁਰਸ਼ ਨਾਲ ਰਗੜ ਕੇ ਚਮਕਾਓ।


-ਸਿਮਰਨਜੀਤ ਕੌਰ
simranjeet.dhiman16@gmail.com

ਕੀ ਤੁਸੀਂ ਖਾਣਾ ਖਾਣ ਦੇ ਸਹੀ ਨਿਯਮਾਂ ਦਾ ਪਾਲਣ ਕਰਦੇ ਹੋ?

ਖਾਣਾ ਖਾਣ ਦੇ ਸਹੀ ਨਿਯਮ ਸਾਨੂੰ ਤੰਦਰੁਸਤ ਤਾਂ ਬਣਾਉਂਦੇ ਹੀ ਹਨ, ਇਸ ਨਾਲ ਅਸੀਂ ਲੰਬੀ ਉਮਰ ਵੀ ਜਿਉਂਦੇ ਹਾਂ। ਖਾਣੇ ਦੀਆਂ ਗ਼ਲਤ ਆਦਤਾਂ ਅਤੇ ਤੌਰ-ਤਰੀਕੇ ਨਾਲ ਸਰੀਰ ਵਿਚ ਪੋਸ਼ਕ ਤੱਤਾਂ ਦੀ ਮਾਤਰਾ ਵਿਚ ਅਸੰਤੁਲਨ ਪੈਦਾ ਹੁੰਦਾ ਹੈ ਅਤੇ ਖਾਣ-ਪੀਣ ਦੀਆਂ ਸਹੀ ਆਦਤਾਂ ਦੀ ਕਮੀ ਕਾਰਨ ਸਾਡੀ ਸਿਹਤ 'ਤੇ ਵੀ ਇਸ ਦਾ ਬੁਰਾ ਅਸਰ ਹੁੰਦਾ ਹੈ। ਖਾਣ-ਪੀਣ ਦੇ ਮਾਮਲੇ ਵਿਚ ਸਫ਼ਾਈ ਰੱਖਣੀ, ਖਾਣ ਤੋਂ ਪਹਿਲਾਂ ਹੱਥ ਧੋਣੇ, ਸਾਫ਼ ਭਾਂਡਿਆਂ ਵਿਚ ਖਾਣਾ, ਜਿਨ੍ਹਾਂ ਭਾਂਡਿਆਂ ਵਿਚ ਖਾਣਾ ਸਟੋਰ ਕੀਤਾ ਜਾਵੇ, ਉਨ੍ਹਾਂ ਦੀ ਸਾਫ਼-ਸਫ਼ਾਈ, ਇਨ੍ਹਾਂ ਸਭ ਚੀਜ਼ਾਂ ਦਾ ਖਿਆਲ ਰੱਖਣਾ ਚਾਹੀਦਾ ਹੈ। ਕੀ ਤੁਸੀਂ ਖਾਣਾ ਖਾਣ ਦੇ ਨਿਯਮਾਂ ਤੋਂ ਜਾਣੂ ਹੋ? ਜ਼ਰਾ ਪਰਖੋ ਤਾਂ ਇਸ ਕੁਇਜ਼ ਦੇ ਜ਼ਰੀਏ ਆਪਣੇ-ਆਪ ਨੂੰ-
1. ਹਰ ਰੋਜ਼ ਖਾਣੇ ਦੇ ਸਮੇਂ ਦੀ ਰੁਟੀਨ ਕੀ ਹੈ?
(ਕ) ਸਵੇਰੇ, ਦੁਪਹਿਰ ਅਤੇ ਰਾਤ ਦਾ ਖਾਣਾ ਤੈਅ ਸਮੇਂ 'ਤੇ ਖਾਂਦੇ ਹੋ।
(ਖ) ਜਦੋਂ ਸਮਾਂ ਮਿਲੇ, ਉਦੋਂ ਖਾਂਦੇ ਹੋ।
(ਗ) ਜਦੋਂ ਭੁੱਖ ਲਗਦੀ ਹੈ, ਖਾ ਲੈਂਦੇ ਹੋ।
2. ਇਕ ਖਾਣੇ ਅਤੇ ਦੂਜੇ ਖਾਣੇ ਦੇ ਵਿਚਕਾਰ ਕਿੰਨੇ ਸਮੇਂ ਦਾ ਫਰਕ ਰੱਖਦੇ ਹੋ?
(ਕ) ਹਰ ਘੰਟੇ ਬਾਅਦ।
(ਖ) 3 ਤੋਂ 4 ਘੰਟੇ।
(ਗ) 1 ਤੋਂ 6 ਘੰਟੇ।
3. ਖਾਣੇ ਦੇ ਵਿਚ ਤੁਸੀਂ ਕਿਹੋ ਜਿਹੇ ਸਨੈਕਸ ਲੈਂਦੇ ਹੋ?
(ਕ) ਬਾਹਰ ਦੀਆਂ ਤਲੀਆਂ-ਭੁੰਨੀਆਂ ਚੀਜ਼ਾਂ ਹੀ ਚੰਗੀਆਂ ਲਗਦੀਆਂ ਹਨ।
(ਖ) ਘਰ ਦੇ ਬਣੇ ਸਨੈਕਸ ਹੀ ਪਸੰਦ ਹਨ।
(ਗ) ਸਨੈਕਸ ਤੋਂ ਜਿੰਨਾ ਸੰਭਵ ਹੋਵੇ, ਦੂਰ ਰਹਿੰਦੇ ਹੋ।
4. ਐਕਸਰਸਾਈਜ਼ ਤੋਂ ਬਾਅਦ ਤੁਸੀਂ ਕੀ ਖਾਂਦੇ ਹੋ?
(ਕ) ਅਕਸਰ ਸਨੈਕਸ ਦਾ ਮਜ਼ਾ ਲੈਂਦੇ ਹੋ।
(ਖ) ਸਨੈਕਸ ਦੀ ਬਜਾਏ ਹੈਲਥੀ ਡ੍ਰਿੰਕਸ ਲੈਂਦੇ ਹੋ।
(ਗ) ਸਨੈਕਸ ਅਤੇ ਡ੍ਰਿੰਕ ਦੋਵੇਂ ਥੋੜ੍ਹੀ-ਥੋੜ੍ਹੀ ਮਾਤਰਾ ਵਿਚ ਲੈਂਦੇ ਹੋ।
5. ਖਾਣਾ ਖਾਣ ਦਾ ਤੁਹਾਡਾ ਤਰੀਕਾ ਕੀ ਹੈ?
(ਕ) ਖਾਣਾ ਚਬਾ-ਚਬਾ ਕੇ ਆਰਾਮ ਨਾਲ ਖਾਂਦੇ ਹੋ।
(ਖ) ਘੱਟ ਸਮਾਂ ਹੋਣ ਕਾਰਨ ਛੇਤੀ-ਛੇਤੀ ਖਾਂਦੇ ਹੋ।
(ਗ) ਮੌਕੇ ਦੇ ਅਨੁਸਾਰ ਖਾਂਦੇ ਹੋ।
6. ਪਾਣੀ ਪੀਣ ਦੇ ਮਾਮਲੇ ਵਿਚ ਤੁਹਾਡੀ ਕੀ ਰੋਜ਼ਮਰਾ ਹੈ?
(ਕ) ਗਰਮੀ ਵਿਚ ਤਾਂ 10-12 ਗਿਲਾਸ ਪੀਂਦੇ ਹੋ ਪਰ ਸਰਦੀ ਵਿਚ ਸਿਰਫ ਇਕ ਜਾਂ ਦੋ ਗਿਲਾਸ ਹੀ ਪੀਂਦੇ ਹੋ।
(ਖ) ਸਰਦੀ ਹੋਵੇ ਜਾਂ ਗਰਮੀ, ਹਰ ਰੋਜ਼ 8 ਤੋਂ 10 ਗਿਲਾਸ ਪਾਣੀ ਪੀਂਦੇ ਹੋ।
(ਗ) ਕੋਈ ਤੈਅਸ਼ੁਦਾ ਨਿਯਮ ਨਹੀਂ ਹੈ, ਜਦੋਂ ਪਿਆਸ ਲੱਗੇ ਪੀ ਲੈਂਦੇ ਹੋ।
7. ਰਾਤ ਦਾ ਖਾਣਾ ਖਾਣ ਦਾ ਨਿਯਮ ਕੀ ਹੈ?
(ਕ) ਖਾਣਾ ਦੇਰ ਨਾਲ ਖਾ ਕੇ ਤੁਰੰਤ ਸੌਂ ਜਾਂਦੇ ਹੋ।
(ਖ) ਸੌਣ ਤੋਂ 3-4 ਘੰਟੇ ਪਹਿਲਾਂ ਖਾਣਾ ਖਾ ਲੈਂਦੇ ਹੋ।
(ਗ) ਸੌਣ ਤੋਂ 2-3 ਘੰਟੇ ਪਹਿਲਾਂ ਖਾਣਾ ਖਾ ਕੇ ਟਹਿਲਦੇ ਜ਼ਰੂਰ ਹੋ।
8. ਰਾਤ ਨੂੰ ਸੌਣ ਤੋਂ ਪਹਿਲਾਂ ਕੀ ਲੈਂਦੇ ਹੋ?
(ਕ) ਇਕ ਕੱਪ ਚਾਹ ਜਾਂ ਕੌਫੀ।
(ਖ) ਦੋ-ਤਿੰਨ ਗਿਲਾਸ ਪਾਣੀ।
(ਗ) ਇਕ ਗਿਲਾਸ ਗਰਮ ਦੁੱਧ।
9. ਬਾਹਰ ਖਾਣਾ ਖਾਣ ਸਬੰਧੀ ਤੁਹਾਡੀ ਕੀ ਰੁਟੀਨ ਹੈ?
(ਕ) ਕਦੇ-ਕਦੇ ਬਾਹਰ ਦਾ ਖਾ ਲੈਂਦੇ ਹੋ। (ਖ) ਰੋਜ਼ ਬਾਹਰ ਖਾਣਾ ਚੰਗਾ ਲਗਦਾ ਹੈ। (ਗ) ਬਾਹਰ ਖਾਂਦੇ ਹੋ ਪਰ ਭੁੱਖ ਤੋਂ ਘੱਟ ਖਾਂਦੇ ਹੋ।
10. ਤੁਹਾਡਾ ਖਾਣਾ ਖਾਣ ਦਾ ਤਰੀਕਾ ਕੀ ਹੈ?
(ਕ) ਪਰਿਵਾਰ ਦੇ ਨਾਲ ਮਿਲ ਕੇ ਖਾਂਦੇ ਹੋ। (ਖ) ਆਪਣੇ ਕਮਰੇ ਵਿਚ ਟੀ. ਵੀ. ਦੇਖਦੇ ਹੋਏ ਖਾਣਾ ਖਾਂਦੇ ਹੋ।
(ਗ) ਜਿਥੇ ਮਨ ਕਰੇ, ਉਥੇ ਬੈਠ ਕੇ ਖਾ ਲੈਂਦੇ ਹੋ।
ਨਤੀਜਾ : ਜੇ ਤੁਸੀਂ ਸਾਰੇ ਸਵਾਲਾਂ ਦੇ ਦਿੱਤੇ ਗਏ ਬਦਲਾਂ ਨੂੰ ਧਿਆਨ ਨਾਲ ਪੜ੍ਹ ਕੇ ਉਸੇ ਬਦਲ 'ਤੇ ਟਿਕ ਲਗਾਇਆ ਹੈ, ਜੋ ਅਸਲ ਵਿਚ ਤੁਹਾਡੇ 'ਤੇ ਲਾਗੂ ਹੁੰਦਾ ਹੈ ਤਾਂ ਹੁਣ ਅੰਕਾਂ ਦੇ ਆਧਾਰ 'ਤੇ ਖਾਣਾ ਖਾਣ ਦੇ ਸਬੰਧ ਵਿਚ ਸਹੀ ਨਿਯਮਾਂ ਦੇ ਪਾਲਣ 'ਤੇ ਆਪਣੇ ਆਂਕਲਣ ਨੂੰ ਲੈ ਕੇ ਤਿਆਰ ਹੋ ਜਾਓ। ਜੇ ਤੁਹਾਨੂੰ 40 ਤੋਂ 50 ਅੰਕ ਮਿਲੇ ਹਨ ਤਾਂ ਸਮਝੋ ਕਿ ਖਾਣਾ ਖਾਣ ਨਾਲ ਸਬੰਧਤ ਨਿਯਮਾਂ ਦੇ ਪਾਲਣ ਵਿਚ ਤੁਸੀਂ 'ਏ' ਸ਼੍ਰੇਣੀ ਵਿਚ ਰੱਖਣ ਯੋਗ ਹੋ। ਜੇ ਤੁਸੀਂ 30 ਤੋਂ 40 ਅੰਕ ਹਾਸਲ ਕੀਤੇ ਹਨ ਤਾਂ ਜ਼ਿਆਦਾ ਚਿੰਤਾ ਵਾਲੀ ਗੱਲ ਨਹੀਂ ਹੈ। ਖਾਣਾ ਖਾਣ ਦੇ ਸਹੀ ਨਿਯਮਾਂ ਦੀ ਸਮਝ ਤੁਹਾਡੇ ਵਿਚ ਹੈ ਪਰ ਅਨੁਸ਼ਾਸਨ ਦੀ ਥੋੜ੍ਹੀ ਕਮੀ ਦੇ ਕਾਰਨ ਤੁਹਾਡੇ ਅੰਕਾਂ ਦਾ ਗ੍ਰਾਫ ਹੋਰ ਬਿਹਤਰ ਹੋ ਸਕਦਾ ਹੈ। ਜੇ ਤੁਸੀਂ 20 ਤੋਂ ਘੱਟ ਅੰਕ ਹਾਸਲ ਕੀਤੇ ਹਨ ਤਾਂ ਸਮਝੋ ਕਿ ਖਾਣੇ ਸਬੰਧੀ ਤੁਹਾਡੇ ਵਿਚ ਗਿਆਨ ਦੀ ਕਮੀ ਹੈ। ਖਾਣਾ ਸਿਰਫ ਖਾਣਾ ਨਹੀਂ ਹੈ, ਇਸ ਨੂੰ ਜੇ ਅਸੀਂ ਸਹੀ ਸਮੇਂ ਅਤੇ ਸਹੀ ਤਰੀਕੇ ਨਾਲ ਖਾਈਏ ਤਾਂ ਤੰਦਰੁਸਤ ਰਹਿ ਸਕਦੇ ਹਾਂ। ਤੁਹਾਨੂੰ ਇਸ ਦੀ ਸਮਝ ਹੋਣੀ ਬਹੁਤ ਜ਼ਰੂਰੀ ਹੈ।


-ਇਮੇਜ ਰਿਫਲੈਕਸ਼ਨ ਸੈਂਟਰ

ਲਾਭਦਾਇਕ ਘਰੇਲੂ ਨੁਸਖੇ

* ਚਮੜੀ 'ਤੇ ਪਏ ਦਾਗ-ਧੱਬਿਆਂ ਨੂੰ ਦੂਰ ਕਰਨ ਲਈ ਨਿੰਬੂ ਦੀਆਂ ਛਿੱਲਾਂ ਦੀ ਵਰਤੋਂ ਕਰਨੀ ਚਾਹੀਦੀ ਹੈ।
* ਹਫ਼ਤੇ ਵਿਚ ਇਕ ਵਾਰ ਚੰਦਨ ਦਾ ਲੇਪ ਲਗਾਉਣ ਨਾਲ ਚਿਹਰੇ ਦੀ ਚਮੜੀ ਮੁਲਾਇਮ ਰਹਿੰਦੀ ਹੈ।
* ਗੂੜ੍ਹੀ ਨੀਂਦ ਨਾਲ ਚਮੜੀ ਦੀ ਚਮਕ ਬਰਕਰਾਰ ਰਹਿੰਦੀ ਹੈ। ਇਸ ਲਈ ਨੀਂਦ ਗੂੜ੍ਹੀ ਲਓ। * ਮੈਡੀਕੇਟਿਡ ਸੋਪ ਨਾਲ ਚਿਹਰਾ ਧੋਣ ਨਾਲ ਪ੍ਰਦੂਸ਼ਣ ਦਾ ਪ੍ਰਭਾਵ ਚਿਹਰੇ 'ਤੇ ਨਹੀਂ ਪੈਂਦਾ।
* ਦਾਲ, ਚੌਲ ਧੋਣ ਤੋਂ ਬਾਅਦ ਪਾਣੀ ਸੁੱਟੋ ਨਾ, ਉਸ ਨੂੰ ਇਕ ਡੱਬੇ ਵਿਚ ਰੱਖ ਦਿਓ। ਉਹ ਪਾਣੀ ਪੌਦਿਆਂ ਨੂੰ ਪਾਓ। ਪੌਦਿਆਂ ਨੂੰ ਖੁਰਾਕ ਮਿਲੇਗੀ।
* ਲੱਕੜੀ ਦਾ ਫਰਨੀਚਰ ਲੰਮਾ ਸਮਾਂ ਚੱਲੇ, ਇਸ ਵਾਸਤੇ ਦੀਮਕ ਅਤੇ ਪਾਣੀ ਤੋਂ ਫਰਨੀਚਰ ਨੂੰ ਬਚਾਅ ਕੇ ਰੱਖੋ।
* ਰੋਜ਼ ਕੀ ਬਣਾਈਏ, ਇਸ ਸਮੱਸਿਆ ਨੂੰ ਸੁਲਝਾਉਣ ਲਈ ਪੂਰੇ ਹਫ਼ਤੇ ਦਾ ਮੇਨੂ ਬਣਾ ਲਓ। ਮੇਨੂ ਬਣਾਉਂਦੇ ਸਮੇਂ ਪਰਿਵਾਰ ਦੇ ਮੈਂਬਰਾਂ ਦੀ ਸਲਾਹ ਵੀ ਲੈ ਲਓ।
* ਅਚਾਰ ਵਿਚ ਹਲਦੀ ਪਾਉਣ ਨਾਲ ਅਚਾਰ ਛੇਤੀ ਖਰਾਬ ਨਹੀਂ ਹੁੰਦਾ।
* ਸਬਜ਼ੀ ਜਾਂ ਦਾਲ ਵਿਚ ਲੂਣ ਜ਼ਿਆਦਾ ਹੋ ਗਿਆ ਹੋਵੇ ਤਾਂ ਉਸ ਵਿਚ ਆਟੇ ਦੀਆਂ ਛੋਟੀਆਂ-ਛੋਟੀਆਂ ਗੋਲੀਆਂ ਬਣਾ ਕੇ ਪਾ ਦੇਣ ਨਾਲ ਲੂਣ ਘੱਟ ਹੋ ਜਾਵੇਗਾ।
* ਰੋਟੀ ਨੂੰ ਨਰਮ ਰੱਖਣ ਲਈ ਆਟਾ ਗੁੰਨ੍ਹਦੇ ਸਮੇਂ ਥੋੜ੍ਹਾ ਜਿਹਾ ਬੇਕਿੰਗ ਸੋਢਾ ਮਿਲਾ ਦਿਓ। ਇਸ ਆਟੇ ਦੀ ਰੋਟੀ ਨਰਮ ਬਣੇਗੀ।
* ਫਰਨੀਚਰ 'ਤੇ ਅਖ਼ਬਾਰ, ਮੈਗਜ਼ੀਨ, ਪੈੱਨ ਖੁੱਲ੍ਹਾ ਨਾ ਛੱਡੋ। ਅਜਿਹਾ ਕਰਨ ਨਾਲ ਇਨ੍ਹਾਂ ਦੀ ਸਿਆਹੀ ਫਰਨੀਚਰ ਦੀ ਸ਼ੋਭਾ ਘਟਾ ਸਕਦੀ ਹੈ।
* ਦਹੀਂ ਖੱਟਾ ਹੋ ਜਾਣ 'ਤੇ ਉਸ ਦੀ ਕੜ੍ਹੀ ਬਣਾ ਸਕਦੇ ਹੋ ਜਾਂ ਦਹੀਂ ਨੂੰ ਮੁਲਾਇਮ ਕੱਪੜੇ ਵਿਚ ਬੰਨ੍ਹ ਕੇ ਕੁਝ ਦੇਰ ਲਈ ਲਟਕਾ ਦਿਓ, ਖੱਟਾ ਪਾਣੀ ਨਿਕਲ ਜਾਵੇਗਾ। ਚਾਹੋ ਤਾਂ ਉਸ ਵਿਚ ਥੋੜ੍ਹੀ ਖੰਡ, ਕੱਟੇ ਹੋਏ ਬਦਾਮ ਮਿਲਾ ਕੇ ਫ੍ਰੀਜ਼ਰ ਵਿਚ ਰੱਖ ਦਿਓ। ਥੋੜ੍ਹੇ ਸਮੇਂ ਬਾਅਦ ਉਸ ਨੂੰ ਖਾਓ। ਬਹੁਤ ਸਵਾਦੀ ਅਤੇ ਸਿਹਤਦਾਇਕ ਮਿਸ਼ਠਾਨ ਤਿਆਰ ਹੋ ਜਾਵੇਗਾ।
* ਫਰਨੀਚਰ 'ਤੇ ਮੋਮ ਡਿਗ ਜਾਵੇ ਤਾਂ ਕਿਸੇ ਨੋਕ ਵਾਲੀ ਚੀਜ਼ ਨਾਲ ਨਾ ਖੁਰਚੋ। ਇਸ ਨਾਲ ਫਰਨੀਚਰ ਖਰਾਬ ਹੋ ਜਾਂਦਾ ਹੈ। ਉਸ ਨੂੰ ਸੁੱਕਣ ਦਿਓ, ਫਿਰ ਉਤਾਰੋ, ਅਸਾਨੀ ਨਾਲ ਉਤਰ ਜਾਵੇਗਾ।
* ਵਾਲਾਂ ਦੀ ਮਜ਼ਬੂਤੀ ਲਈ ਵਿਟਾਮਿਨ 'ਸੀ' ਯੁਕਤ ਤੇਲ ਲਗਾਓ। ਤੇਲ ਵਾਲਾਂ ਦੀਆਂ ਜੜ੍ਹਾਂ ਵਿਚ ਲਗਾਓ।
* ਸਰਦੀ ਲੱਗਣ 'ਤੇ ਅਦਰਕ, ਤੁਲਸੀ, ਕਾਲੀ ਮਿਰਚ ਅਤੇ ਬਤਾਸ਼ੇ ਦਾ ਕਾੜ੍ਹਾ ਬਣਾ ਕੇ ਪੀਣ ਨਾਲ ਆਰਾਮ ਮਿਲਦਾ ਹੈ।
* ਦਾਲਾਂ, ਚੌਲਾਂ ਵਿਚ ਕੀੜਾ ਛੇਤੀ ਲਗਦਾ ਹੈ। ਇਸ ਤੋਂ ਛੁਟਕਾਰਾ ਪਾਉਣ ਲਈ ਦਾਲਾਂ, ਚੌਲਾਂ ਵਿਚ ਨਿੰਮ ਦੇ ਪੱਤੇ, ਹਲਦੀ ਅਤੇ ਲਸਣ ਦੀਆਂ ਤੁਰੀਆਂ ਰੱਖੋ।


-ਸੁਨੀਤਾ ਗਾਬਾ

ਰਸੋਈ ਗੈਸ ਦੀ ਵਰਤੋਂ ਸਮੇਂ ਰੱਖੋ ਧਿਆਨ

ਅਜੋਕੇ ਸਮੇਂ ਵਿਚ ਰਸੋਈ ਗੈਸ ਘਰ ਵਿਚ ਖਾਣਾ ਪਕਾਉਣ ਲਈ ਵਰਤਿਆ ਜਾਣ ਵਾਲਾ ਮੁੱਖ ਸਰੋਤ ਹੈ। ਰਸੋਈ ਗੈਸ ਦੀ ਵਰਤੋਂ ਕਰਦੇ ਸਮੇਂ ਸਾਡੇ ਵਲੋਂ ਅਨਜਾਣੇ ਵਿਚ ਹੋਈ ਲਾਪ੍ਰਵਾਹੀ ਕਈ ਵਾਰ ਕਿਸੇ ਵੱਡੇ ਹਾਦਸੇ ਦਾ ਕਾਰਨ ਬਣ ਸਕਦੀ ਹੈ। ਸੋ, ਅਸੀਂ ਹੇਠ ਲਿਖੀਆਂ ਸਾਵਧਾਨੀਆਂ ਦੀ ਵਰਤੋਂ ਕਰ ਕੇ ਭਵਿੱਖ ਵਿਚ ਵਾਪਰਨ ਵਾਲੇ ਕਿਸੇ ਵੱਡੇ ਹਾਦਸੇ ਤੋਂ ਬਚ ਸਕਦੇ ਹਾਂ :
* ਹਮੇਸ਼ਾ ਹੀ ਗੈਸ ਚੁੱਲ੍ਹੇ ਨੂੰ ਗੈਸ ਸਿਲੰਡਰ ਨਾਲੋਂ ਉੱਚਾ ਰੱਖਣਾ ਚਾਹੀਦਾ ਹੈ।
* ਜਦੋਂ ਵੀ ਸਿਲੰਡਰ ਬਦਲਿਆ ਜਾਂਦਾ ਹੈ ਤਾਂ ਇਹ ਧਿਆਨ ਰੱਖਿਆ ਜਾਵੇ ਕਿ ਰੈਗੂਲੇਟਰ ਠੀਕ ਤਰੀਕੇ ਨਾਲ ਲੱਗ ਗਿਆ ਹੈ। ਜੇਕਰ ਰੈਗੂਲੇਟਰ ਠੀਕ ਨਹੀਂ ਲੱਗਦਾ ਤਾਂ ਗੈਸ ਲੀਕ ਹੁੰਦੀ ਰਹਿੰਦੀ ਹੈ, ਜਿਸ ਨਾਲ ਜਿਥੇ ਗੈਸ ਬਰਬਾਦ ਹੁੰਦੀ ਹੈ, ਉੱਥੇ ਹੀ ਕੋਈ ਵੱਡਾ ਹਾਦਸਾ ਵੀ ਵਾਪਰ ਸਕਦਾ ਹੈ।
* ਜੇਕਰ ਗੈਸ ਲੀਕ ਹੋ ਰਹੀ ਹੈ ਤਾਂ ਸਾਨੂੰ ਬਿਜਲੀ ਦਾ ਸਵਿੱਚ ਚਾਲੂ ਜਾਂ ਬੰਦ ਨਹੀਂ ਕਰਨਾ ਚਾਹੀਦਾ।
* ਖਾਣਾ ਬਣਾਉਣ ਤੋਂ ਬਾਅਦ ਸਾਨੂੰ ਗੈਸ ਚੁੱਲ੍ਹੇ ਦੇ ਨਾਲ-ਨਾਲ ਗੈਸ ਪਾਈਪ ਨੂੰ ਵੀ ਚੰਗੀ ਤਰ੍ਹਾਂ ਸਾਫ਼ ਕਰਨਾ ਚਾਹੀਦਾ ਹੈ, ਤਾਂ ਜੋ ਚੂਹੇ ਉਸ ਨੂੰ ਟੁੱਕ ਨਾ ਸਕਣ।
* ਗੈਸ ਪਾਈਪ ਦਾ ਧਿਆਨ ਰੱਖੋ ਤੇ ਜਦੋਂ ਵੀ ਉਸ ਵਿਚ ਕੋਈ ਤਰੇੜ ਦਿਖਾਈ ਦੇਵੇ ਤਾਂ ਉਸ ਨੂੰ ਤੁਰੰਤ ਬਦਲ ਦਿਓ।
* ਮਾਚਸ ਦੀ ਜਗ੍ਹਾ ਚੁੱਲ੍ਹੇ ਬਾਲਣ ਲਈ ਲਾਈਟਰ ਦੀ ਵਰਤੋਂ ਕੀਤੀ ਜਾਣੀ ਚਾਹੀਦੀ ਹੈ।
* ਗੈਸ ਸਿਲੰਡਰ ਦੇ ਕੋਲ ਕੋਈ ਵੀ ਸਟੋਵ, ਅੰਗੀਠੀ ਜਾਂ ਹੋਰ ਕੋਈ ਜਲਣਸ਼ੀਲ ਚੀਜ਼ ਨਾ ਰੱਖੋ। * ਆਮ ਦੇਖਣ ਵਿਚ ਆਇਆ ਹੈ ਕਿ ਸਿਲੰਡਰ ਖ਼ਤਮ ਹੋਣ 'ਤੇ ਇਸ ਨੂੰ ਟੇਢਾ ਕਰ ਕੇ ਇਸ ਵਿਚਲੀ ਗੈਸ ਦੀ ਵਰਤੋਂ ਕੀਤੀ ਜਾਂਦੀ ਹੈ। ਅਜਿਹਾ ਕਰਨਾ ਕਿਸੇ ਹਾਦਸੇ ਨੂੰ ਖੁੱਲ੍ਹਾ ਸੱਦਾ ਦੇਣਾ ਹੈ।
* ਖਾਣਾ, ਚਾਹ ਬਣਾਉਂਦੇ ਸਮੇਂ ਜਾਂ ਦੁੱਧ ਗਰਮ ਕਰਦੇ ਸਮੇਂ ਗੈਸ ਚੁੱਲ੍ਹੇ ਦੇ ਕੋਲ ਹੀ ਰਹੋ, ਤਾਂ ਜੋ ਕੋਈ ਵੀ ਚੀਜ਼ ਉੱਬਲ ਕੇ ਚੁੱਲ੍ਹੇ ਵਿਚ ਨਾ ਪੈ ਜਾਵੇ, ਜਿਸ ਨਾਲ ਅਕਸਰ ਬਰਨਰ ਖ਼ਰਾਬ ਹੋ ਜਾਂਦੇ ਹਨ।
* ਰਸੋਈ ਵਿਚ ਕੰੰਮ ਕਰਦੇ ਸਮੇਂ ਸਾਨੂੰ ਸੂਤੀ ਕੱਪੜਿਆਂ ਦੀ ਵਰਤੋਂ ਕਰਨੀ ਚਾਹੀਦੀ ਹੈ। ਕੋਈ ਵੀ ਬਰਤਨ ਚੁੱਲ੍ਹੇ ਤੋਂ ਉਤਾਰਨ ਲੱਗਿਆਂ ਕਦੇ ਵੀ ਆਪਣੇ ਦੁਪੱਟੇ ਦੀ ਵਰਤੋਂ ਨਾ ਕਰੋ, ਇਸ ਨਾਲ ਕਈ ਵਾਰ ਅੱਗ ਵੀ ਲੱਗ ਸਕਦੀ ਹੈ।
* ਰਾਤ ਨੂੰ ਖਾਣਾ ਬਣਾਉਣ ਤੋਂ ਬਾਅਦ ਜਾਂ ਫਿਰ ਘਰ ਤੋਂ ਕਿਤੇ ਬਾਹਰ ਜਾਂਦੇ ਸਮੇਂ ਰੈਗੂਲੇਟਰ ਦਾ ਸਵਿੱਚ ਬੰਦ ਕਰ ਦੇਣਾ ਚਾਹੀਦਾ ਹੈ।
* ਹਮੇਸ਼ਾ ਘਰ ਵਿਚ ਇਕ ਭਰਿਆ ਹੋਇਆ ਵਾਧੂ ਸਿਲੰਡਰ ਰੱਖੋ, ਤਾਂ ਜੋ ਅਚਾਨਕ ਖਾਣਾ ਬਣਾਉਂਦੇ ਸਮੇੇਂ ਸਿੰਲਡਰ ਖ਼ਤਮ ਹੋ ਜਾਣ 'ਤੇ ਸਾਨੂੰ ਕਿਸੇ ਮੁਸ਼ਕਿਲ ਦਾ ਸਾਹਮਣਾ ਨਾ ਕਰਨਾ ਪਵੇ।


-ਤਰਨ ਤਾਰਨ।
ਮੋਬਾ: 94787-93231
Email : kanwaldhillon16@ gmail.com

ਜਦੋਂ ਬਣੋ ਪਹਿਲੀ ਵਾਰ ਮਾਪੇ...

ਜਦੋਂ ਵੀ ਕਿਸੇ ਵਿਆਹੁਤਾ ਜੋੜੇ ਦੇ ਘਰ ਪਹਿਲਾ ਬੱਚਾ ਜਨਮ ਲੈਂਦਾ ਹੈ ਤਾਂ ਉਸ ਬੱਚੇ ਦੇ ਜਨਮ ਦੀ ਵੀ ਉਨ੍ਹਾਂ ਨੂੰ ਆਪਣੇ ਵਿਆਹ ਜਿੰਨੀ ਹੀ ਖੁਸ਼ੀ ਹੁੰਦੀ ਹੈ। ਪਹਿਲਾ ਬੱਚਾ ਚਾਹੇ ਮੁੰਡਾ ਹੋਵੇ ਜਾਂ ਕੁੜੀ, ਹਰ ਮਾਪਿਆਂ ਨੂੰ ਉਹ ਬਹੁਤ ਹੀ ਪਿਆਰਾ ਹੁੰਦਾ ਹੈ। ਹਰ ਵਿਆਹੁਤਾ ਜੋੜੀ ਦੇ ਘਰ ਪਹਿਲਾ ਬੱਚਾ ਹੋਣ 'ਤੇ ਦੋਵਾਂ ਮੀਆਂ-ਬੀਵੀ ਦੇ ਪੈਰ ਧਰਤੀ ਉੱਪਰ ਨਹੀਂ ਲੱਗਦੇ। ਉਨ੍ਹਾਂ ਨੂੰ ਇਸ ਤਰ੍ਹਾਂ ਲੱਗਦਾ ਹੈ ਕਿ ਜਿਵੇਂ ਪੂਰਾ ਆਲਮ ਹੀ ਖੁਸ਼ੀਆਂ-ਖੇੜਿਆਂ ਨਾਲ ਭਰ ਗਿਆ ਹੋਵੇ।
ਪਰ ਇਹ ਵੀ ਇਕ ਕਠੋਰ ਸਚਾਈ ਹੈ ਕਿ ਪਹਿਲੀ ਵਾਰ ਬਣੇ ਮਾਪਿਆਂ ਦੇ ਅੱਗੇ ਖੁਸ਼ੀਆਂ ਦੇ ਨਾਲ-ਨਾਲ ਕਈ ਉਲਝਣਾਂ ਵੀ ਦਰਪੇਸ਼ ਹੁੰਦੀਆਂ ਹਨ। ਆਮ ਤੌਰ 'ਤੇ ਵਿਆਹੁਤਾ ਔਰਤਾਂ ਨੂੰ ਆਪਣਾ ਪਹਿਲਾ ਬੱਚਾ ਸੰਭਾਲਣ ਦੀ ਪੂਰੀ ਤਰ੍ਹਾਂ ਜਾਚ ਨਹੀਂ ਹੁੰਦੀ, ਕਿਉਂਕਿ ਉਨ੍ਹਾਂ ਨੂੰ ਇਸ ਕੰਮ ਦਾ ਕੋਈ ਤਜਰਬਾ ਨਹੀਂ ਹੁੰਦਾ। ਪਹਿਲੀ ਵਾਰ ਮਾਂ ਬਣੀ ਮੁਟਿਆਰ ਅਕਸਰ ਹੀ ਆਪਣੇ ਬੱਚੇ ਕਾਰਨ ਅਤੇ ਪਰਿਵਾਰਕ ਜ਼ਿੰਦਗੀ ਦੇ ਰੁਝੇਵਿਆਂ ਕਾਰਨ ਕਈ ਤਰ੍ਹਾਂ ਦੀਆਂ ਉਲਝਣਾਂ ਵਿਚ ਘਿਰ ਜਾਂਦੀ ਹੈ।
ਇਨ੍ਹਾਂ ਉਲਝਣਾਂ ਵਿਚੋਂ ਨਿਕਲਣ ਦਾ ਸਭ ਤੋਂ ਆਸਾਨ ਤਰੀਕਾ ਹੈ ਕਿ ਇਸ ਮੌਕੇ ਆਪਣੀ ਮਾਂ ਜਾਂ ਸੱਸ ਜਾਂ ਭੈਣ ਜਾਂ ਮਾਸੀ ਆਦਿ ਨੂੰ ਆਪਣੇ ਕੋਲ ਬੁਲਾ ਲਿਆ ਜਾਵੇ, ਜੋ ਕਿ ਇਸ ਤਰ੍ਹਾਂ ਦੇ ਮੌਕੇ 'ਤੇ ਆਪਣੇ ਜ਼ਿੰਦਗੀ ਭਰ ਦੇ ਤਜਰਬੇ ਨਾਲ ਨਵੀਂ ਬਣੀ ਮਾਂ ਦੀ ਅਤੇ ਉਸ ਦੇ ਬੱਚੇ ਦੀ ਚੰਗੀ ਤਰ੍ਹਾਂ ਸੰਭਾਲ ਕਰ ਸਕੇ। ਪਹਿਲੀ ਵਾਰ ਮਾਪੇ ਬਣੇ ਮੀਆਂ-ਬੀਵੀ ਕੋਲ ਉਨ੍ਹਾਂ ਦੇ ਰਿਸ਼ਤੇਦਾਰ, ਗੁਆਂਢੀ ਅਤੇ ਦੋਸਤ-ਮਿੱਤਰ ਕਈ ਤਰ੍ਹਾਂ ਦੀਆਂ ਮੁਫਤ ਸਲਾਹਾਂ ਦੇਣ ਲੱਗਦੇ ਹਨ ਅਤੇ ਕਈ ਤਰ੍ਹਾਂ ਦੇ ਘਰੇਲੂ ਉਪਚਾਰ ਵੀ ਦੱਸਦੇ ਰਹਿੰਦੇ ਹਨ, ਪਰ ਨਵੇਂ ਬਣੇ ਮਾਪਿਆਂ ਨੂੰ ਅਜਿਹਾ ਕੁਝ ਕਰਨ ਤੋਂ ਪਹਿਲਾਂ ਆਪਣੇ ਫੈਮਿਲੀ ਡਾਕਟਰ ਦੀ ਸਲਾਹ ਜ਼ਰੂਰ ਲੈਣੀ ਚਾਹੀਦੀ ਹੈ।
ਪਹਿਲੇ ਬੱਚੇ ਦੇ ਜਨਮ ਤੋਂ ਬਾਅਦ ਜ਼ਿੰਦਗੀ ਨੂੰ ਸਹੀ ਤਰੀਕੇ ਨਾਲ ਜਿਊਣ ਲਈ ਨਵੇਂ ਬਣੇ ਮਾਪਿਆਂ ਨੂੰ ਆਪਣਾ ਨਵਾਂ ਟਾਈਮ ਟੇਬਲ ਬਣਾਉਣਾ ਚਾਹੀਦਾ ਹੈ। ਇਸ ਮੌਕੇ ਪਤੀ ਅਤੇ ਪਤਨੀ ਨੂੰ ਆਪਣੇ ਕਰਨ ਵਾਲੇ ਕੰਮਾਂ ਦੀ ਵੀ ਵੰਡ ਕਰ ਲੈਣੀ ਚਾਹੀਦੀ ਹੈ। ਬੱਚੇ ਨੂੰ ਖਾਣਾ ਖਵਾਉਣਾ, ਨਹਾਉਣਾ, ਉਸ ਦੇ ਕੱਪੜੇ ਬਦਲਣ ਆਦਿ ਲਈ ਵੀ ਡਿਊਟੀ ਨਿਸਚਿਤ ਕਰ ਲੈਣੀ ਚਾਹੀਦੀ ਹੈ, ਤਾਂ ਕਿ ਇਕ ਹੀ ਵਿਅਕਤੀ ਉੱਪਰ ਬੋਝ ਨਾ ਪੈ ਸਕੇ। ਇਸ ਦੇ ਨਾਲ ਹੀ ਆਪਣੇ ਦਫ਼ਤਰ ਨੂੰ ਵੀ ਇਸ ਤਰੀਕੇ ਨਾਲ ਮੈਨੇਜ ਕੀਤਾ ਜਾਵੇ ਕਿ ਪਤੀ ਸਹੀ ਸਮੇਂ ਸਿਰ ਆਪਣੇ ਦਫ਼ਤਰ ਜਾ ਸਕੇ ਅਤੇ ਜਦੋਂ ਤੁਸੀਂ ਕਿਸੇ ਕੰਮ ਲਈ ਬਾਜ਼ਾਰ ਜਾਂ ਦਫ਼ਤਰ ਜਾਓ ਤਾਂ ਪਤੀ ਘਰ ਵਿਚ ਰਹੇ।
ਇਹ ਵੀ ਇਕ ਹਕੀਕਤ ਹੈ ਕਿ ਪਹਿਲੀ ਵਾਰ ਬਣੇ ਮਾਪੇ ਅਕਸਰ ਹੀ ਕਈ ਗ਼ਲਤੀਆਂ ਕਰ ਬੈਠਦੇ ਹਨ। ਨਵੇਂ ਬਣੇ ਮਾਪਿਆਂ ਨੂੰ ਚਾਹੀਦਾ ਹੈ ਕਿ ਉਹ ਆਪਣੇ ਪਹਿਲੇ ਬੱਚੇੇ ਦੇ ਜਨਮ ਤੋਂ ਪਹਿਲਾਂ ਹੀ ਉਸ ਦੇ ਲਈ ਵਿੱਤੀ ਬਜਟ ਵੀ ਬਣਾ ਲੈਣ, ਤਾਂ ਕਿ ਬੱਚੇ ਦੇ ਜਨਮ ਸਮੇਂ ਅਤੇ ਬਾਅਦ ਵਿਚ ਬੱਚੇ ਦੀ ਪਰਵਰਿਸ਼ ਉੱਪਰ ਹੋਣ ਵਾਲੇ ਖ਼ਰਚ ਨੂੰ ਸਹੀ ਤਰੀਕੇ ਨਾਲ ਮੈਨੇਜ ਕੀਤਾ ਜਾ ਸਕੇ। ਬੱਚੇ ਦੀ ਦਵਾਈ ਅਤੇ ਹੋਰ ਸਾਮਾਨ ਲਈ ਵੀ ਉਸ ਦੇ ਬਜਟ ਵਿਚ ਵਿਸ਼ੇਸ਼ ਧਿਆਨ ਰੱਖਿਆ ਜਾਵੇ। ਇਸ ਦੇ ਨਾਲ ਹੀ ਬੱਚੇ ਦੇ ਜਨਮ ਸਮੇਂ ਹੀ ਉਸ ਦੇ ਭਵਿੱਖ ਲਈ ਵੀ ਬਜਟ ਰੱਖਿਆ ਜਾਵੇ ਤਾਂ ਜੋ ਉਸ ਦੀ ਪਰਵਰਿਸ਼ ਆਉਣ ਵਾਲੇ ਸਾਲਾਂ ਵਿਚ ਵੀ ਚੰਗੇ ਤਰੀਕੇ ਨਾਲ ਹੋ ਸਕੇ। ਇਸ ਲਈ ਬੈਂਕ ਜਾਂ ਡਾਕਖਾਨੇ ਵਿਚ ਬੱਚੇ ਦੇ ਨਾਂਅ ਉੱਪਰ ਪਤੀ-ਪਤਨੀ ਦਾ ਸਾਂਝਾ ਖਾਤਾ ਖੁਲ੍ਹਵਾਇਆ ਜਾ ਸਕਦਾ ਹੈ, ਜਿਸ ਵਿਚ ਹਰ ਮਹੀਨੇ ਹੀ ਮਾਪੇ ਆਪਣੀ ਮਿਲਦੀ ਤਨਖਾਹ ਵਿਚੋਂ ਆਪਣੇ ਬੱਚੇ ਦੇ ਬਜਟ ਲਈ ਪੈਸੇ ਜਮ੍ਹਾਂ ਕਰਵਾ ਸਕਦੇ ਹਨ, ਤਾਂ ਜੋ ਉਨ੍ਹਾਂ ਦੇ ਲਾਲ ਦਾ ਭਵਿੱਖ ਸੁਨਹਿਰੀ ਬਣ ਸਕੇ। ਇਸ ਤਰ੍ਹਾਂ ਪਹਿਲੀ ਵਾਰ ਬਣੇ ਮਾਪਿਆਂ ਨੂੰ ਚਾਹੀਦਾ ਹੈ ਕਿ ਉਹ ਬੱਚੇ ਦੇ ਜਨਮ ਤੋਂ ਬਾਅਦ ਆਪਣੀ ਜ਼ਿੰਦਗੀ ਨੂੰ ਇਸ ਤਰੀਕੇ ਨਾਲ ਮੈਨੇਜ ਕਰਨ ਕਿ ਬੱਚੇ ਦੀ ਪਰਵਰਿਸ਼ ਵੀ ਸਹੀ ਤਰੀਕੇ ਨਾਲ ਹੋ ਸਕੇ ਅਤੇ ਮਾਪਿਆਂ ਨੂੰ ਪ੍ਰੇਸ਼ਾਨੀ ਵੀ ਨਾ ਹੋਵੇ।


-ਲੱਕੀ ਨਿਵਾਸ, 61-ਏ, ਵਿੱਦਿਆ ਨਗਰ, ਪਟਿਆਲਾ।
ਮੋਬਾ: 94638-19174

ਸੁੰਦਰਤਾ ਸਾਧਨਾਂ ਦੇ ਮਾੜੇ ਪ੍ਰਭਾਵਾਂ ਤੋਂ ਬਚੋ

ਖੂਬਸੂਰਤ ਦਿਸਣ ਲਈ ਅਸੀਂ ਕਈ ਤਰ੍ਹਾਂ ਦੇ ਸੁੰਦਰਤਾ ਸਾਧਨਾਂ ਦੀ ਵਰਤੋਂ ਕਰਦੇ ਹਾਂ, ਕਈ ਵਾਰ ਇਨ੍ਹਾਂ ਨੂੰ ਲੈਣ ਤੋਂ ਬਾਅਦ ਚਮੜੀ ਵਿਚ ਕਈ ਹੋਰ ਤਰ੍ਹਾਂ ਦੀ ਸਮੱਸਿਆ ਪੈਦਾ ਹੋ ਜਾਂਦੀਆਂ ਹਨ। ਕਿਸ ਤਰ੍ਹਾਂ ਦੇ ਸੁੰਦਰਤਾ ਸਾਧਨਾਂ ਦੇ ਕੀ ਮਾੜੇ ਪ੍ਰਭਾਵ ਪੈ ਸਕਦੇ ਹਨ, ਉਨ੍ਹਾਂ ਤੋਂ ਕਿਵੇਂ ਬਚਿਆ ਜਾ ਸਕਦਾ ਹੈ, ਆਓ ਜਾਣੀਏ-
ਵਾਲਾਂ ਨੂੰ ਸਿੱਧੇ ਕਰਨਾ : ਵਾਲਾਂ ਨੂੰ ਸਿੱਧਾ ਕਰਨ ਲਈ ਉਨ੍ਹਾਂ 'ਤੇ ਡ੍ਰਾਇਰ ਜਾਂ ਆਇਰਨ ਕਰਨਾ ਜਾਂ ਸੈਲੂਨ ਵਿਚ ਜਾ ਕੇ ਉੱਚ ਤਾਪਮਾਨ ਇਲਾਜ ਨਾਲ ਵਾਲਾਂ 'ਤੇ ਮਾੜਾ ਅਸਰ ਹੁੰਦਾ ਹੈ। ਵਾਲਾਂ 'ਤੇ ਰੋਜ਼ ਡ੍ਰਾਇਰ ਜਾਂ ਆਇਰਨ ਕਰਨਾ ਉਨ੍ਹਾਂ ਨੂੰ ਖਰਾਬ ਕਰ ਸਕਦਾ ਹੈ। ਇਸ ਲਈ ਇਨ੍ਹਾਂ ਨੂੰ ਸਿੱਧੇ ਕਰਨ ਲਈ ਚੰਗੇ ਸੈਲੂਨ ਵਿਚ ਕਿਸੇ ਅਨੁਭਵੀ ਦੀ ਮਦਦ ਲਓ। ਜੋ ਵਾਲਾਂ ਨੂੰ ਸਿੱਧਾ ਕਰਨ ਲਈ ਸਹੀ ਤਰੀਕਾ ਅਪਣਾਵੇ।
ਮੈਨੀਕਿਉਰ, ਪੈਡੀਕਿਉਰ : ਹੱਥਾਂ ਅਤੇ ਪੈਰਾਂ ਨੂੰ ਖੂਬਸੂਰਤ ਬਣਾਉਣ ਲਈ ਇਸ ਨੂੰ ਕਰਾਇਆ ਜਾਂਦਾ ਹੈ। ਇਸ ਵਿਚ ਨਹੁੰਆਂ ਨੂੰ ਇਕਸਾਰ ਦਿਖਾਉਣ ਲਈ ਇਨ੍ਹਾਂ ਦੀ ਉਪਰਲੀ ਪਰਤ ਨੂੰ ਰਗੜਿਆ ਜਾਂਦਾ ਹੈ, ਜਿਸ ਨਾਲ ਉਨ੍ਹਾਂ ਦੀ ਪਰਤ ਦੀ ਨਮੀ ਖ਼ਤਮ ਹੋ ਜਾਂਦੀ ਹੈ ਅਤੇ ਨਹੁੰ ਕਮਜ਼ੋਰ ਹੋ ਜਾਂਦੇ ਹਨ। ਜੇ ਮੈਨੀਕਿਉਰ ਅਤੇ ਪੈਡੀਕਿਉਰ ਕਰਨ ਵਾਲੇ ਟੱਬ ਦੀ ਸ਼ੁੱਧਤਾ ਸੁਨਿਸਚਿਤ ਨਾ ਹੋਵੇ ਤਾਂ ਬੈਕਟੀਰੀਅਲ ਇਨਫੈਕਸ਼ਨ ਹੋ ਸਕਦਾ ਹੈ। ਇਸ ਤੋਂ ਬਚਣ ਲਈ ਜ਼ਰੂਰੀ ਹੈ ਕਿ ਸੈਲੂਨ ਵਿਚ ਇਸਤੇਮਾਲ ਹੋਣ ਵਾਲੇ ਔਜ਼ਾਰ ਕੀਟਾਣੂ ਮੁਕਤ ਹੋਣੇ ਚਾਹੀਦੇ ਹਨ। ਟੱਬ ਚੰਗੀ ਤਰ੍ਹਾਂ ਸਾਫ਼ ਹੋਣਾ ਚਾਹੀਦਾ ਹੈ। ਬਿਹਤਰ ਹੋਵੇਗਾ ਜੇ ਸਵੇਰ ਦੇ ਸਮੇਂ ਇਸ ਨੂੰ ਕਰਾਇਆ ਜਾਵੇ, ਕਿਉਂਕਿ ਉਸ ਸਮੇਂ ਇਹ ਸਾਫ਼-ਸੁਥਰਾ ਅਤੇ ਧੋਤਾ ਹੁੰਦਾ ਹੈ।
ਨਹੁੰ-ਪਾਲਿਸ਼ ਉਤਾਰਨ ਵਾਲੇ ਤਰਲ ਨਾਲ ਨਹੁੰ ਖ਼ੁਸ਼ਕ ਹੋ ਜਾਂਦੇ ਹਨ ਅਤੇ ਇਕ ਵਾਰ ਨਹੁੰਆਂ ਉੱਤੋਂ ਨਹੁੰ-ਪਾਲਿਸ਼ ਲਾਹ ਦੇਣ ਤੋਂ ਬਾਅਦ ਕੁਝ ਦਿਨ ਉਨ੍ਹਾਂ ਨੂੰ ਇੰਜ ਹੀ ਛੱਡ ਦੇਣਾ ਚਾਹੀਦਾ ਹੈ।
ਹੇਅਰ ਬਲੀਚਿੰਗ : ਵਾਲਾਂ ਨੂੰ ਰੰਗ ਕਰਨ ਲਈ ਅਮੋਨੀਆ ਦੀ ਵਰਤੋਂ ਵਾਲਾਂ ਨੂੰ ਨੁਕਸਾਨ ਕਰ ਸਕਦੀ ਹੈ। ਰੰਗ ਕਰਨ ਵਾਲੇ ਉਤਪਾਦਾਂ ਵਿਚ ਮੌਜੂਦ ਰਸਾਇਣ ਵਾਲਾਂ ਦੇ ਕਿਊਟੀਕਲਸ ਨੂੰ ਖੋਲ੍ਹ ਕੇ ਇਸ ਦੇ ਅੰਦਰ ਰੰਗ ਨੂੰ ਪਹੁੰਚਾਉਂਦਾ ਹੈ, ਜਿਸ ਲਈ ਉਨ੍ਹਾਂ ਨੂੰ ਬਲੀਚ ਕੀਤਾ ਜਾਂਦਾ ਹੈ। ਵਾਲਾਂ ਦੇ ਕਿਊਟੀਕਲਸ ਖੁੱਲ੍ਹਣ ਤੋਂ ਬਾਅਦ ਵਾਲਾਂ ਦੀ ਨਮੀ ਖ਼ਤਮ ਹੋ ਜਾਂਦੀ ਹੈ। ਇਹ ਰੁੱਖੇ, ਬੇਜਾਨ ਅਤੇ ਦੋ-ਮੂੰਹੇਂ ਹੋ ਕੇ ਟੁੱਟਣ ਲਗਦੇ ਹਨ। ਜੇ ਸੈਲੂਨ ਵਿਚ ਜਾ ਕੇ ਵਾਲਾਂ ਨੂੰ ਬਲੀਚ ਕਰਾਉਣਾ ਹੋਵੇ ਤਾਂ ਅਮੋਨੀਆ ਮੁਕਤ ਵਿਧੀ ਅਪਣਾਓ ਅਤੇ ਆਪਣੇ ਵਾਲਾਂ ਵਿਚ ਵਾਰ-ਵਾਰ ਰੰਗ ਨਾ ਬਦਲੋ, ਕਿਉਂਕਿ ਵਾਰ-ਵਾਰ ਅਮੋਨੀਆ ਦੀ ਵਰਤੋਂ ਨਾਲ ਵਾਲ ਖਰਾਬ ਹੋ ਸਕਦੇ ਹਨ।
ਫੇਸ਼ੀਅਲ ਬਲੀਚਿੰਗ : ਚਮੜੀ ਮਾਹਿਰਾਂ ਦੀ ਮੰਨੀਏ ਤਾਂ ਮਹੀਨੇ ਵਿਚ ਇਕ ਹੀ ਵਾਰ ਫੇਸ਼ੀਅਲ ਕਰਾਉਣਾ ਚਾਹੀਦਾ ਹੈ। ਇਸ ਦੀ ਪ੍ਰਕਿਰਿਆ ਬੇਹੱਦ ਆਸਾਨ ਹੁੰਦੀ ਹੈ ਅਤੇ ਬਾਜ਼ਾਰ ਵਿਚ ਇਸ ਦੀ ਕਿੱਟ ਵੀ ਮਿਲਦੀ ਹੈ। ਪਰ ਜੇ ਇਸ ਨੂੰ ਘਰ ਵਿਚ ਹੀ ਕਰਨਾ ਹੋਵੇ ਤਾਂ ਇਸ ਨੂੰ ਘੋਲਣ ਲਈ ਕਿਸੇ ਧਾਤ ਦੇ ਭਾਂਡੇ ਦੀ ਵਰਤੋਂ ਨਾ ਕਰੋ ਅਤੇ ਚਿਹਰੇ 'ਤੇ ਇਸ ਦੀ ਵਰਤੋਂ ਕਰਨ ਤੋਂ ਪਹਿਲਾਂ ਸਰੀਰ ਦੇ ਛੋਟੇ ਜਿਹੇ ਹਿੱਸੇ ਵਿਚ ਲਗਾ ਕੇ ਦੇਖੋ ਕਿ ਇਸ ਨਾਲ ਚਮੜੀ ਵਿਚ ਖਾਰਸ਼ ਤਾਂ ਨਹੀਂ ਹੁੰਦੀ? 20 ਸਾਲ ਦੀ ਉਮਰ ਤੋਂ ਪਹਿਲਾਂ ਬਲੀਚਿੰਗ ਨਹੀਂ ਕਰਾਉਣੀ ਚਾਹੀਦੀ। ਇਸ ਦੀ ਵਜ੍ਹਾ ਨਾਲ ਚਿਹਰੇ 'ਤੇ ਖਾਰਸ਼ ਦਾ ਹੋਣਾ, ਚਮੜੀ ਦਾ ਲਾਲ ਹੋਣਾ, ਚਮੜੀ ਦਾ ਰੰਗ ਕਾਲਾ ਪੈਣਾ ਵਰਗੀਆਂ ਸਮੱਸਿਆਵਾਂ ਹੋ ਸਕਦੀਆਂ ਹਨ। ਜੇ ਇਕ ਨਿਸਚਿਤ ਸਮੇਂ ਦੇ ਅੰਦਰ ਇਸ ਨੂੰ ਚਿਹਰੇ ਤੋਂ ਨਾ ਹਟਾਇਆ ਜਾਵੇ ਤਾਂ ਚਮੜੀ ਨੁਕਸਾਨਗ੍ਰਸਤ ਹੋ ਸਕਦੀ ਹੈ। ਇਸ ਨਾਲ ਚਮੜੀ ਦੀ ਬਾਹਰੀ ਹੀ ਨਹੀਂ, ਅੰਦਰੂਨੀ ਪਰਤ ਨੂੰ ਵੀ ਨੁਕਸਾਨ ਹੋ ਸਕਦਾ ਹੈ।


-ਨੀਲੋਫਰ,
ਇਮੇਜ ਰਿਫਲੈਕਸ਼ਨ ਸੈਂਟਰ

5 ਮਿੰਟ ਦੀ ਕਲਾਕਾਰੀ

ਮੈਟ ਲਿਪਸਟਿਕ : ਪਹਿਲਾਂ ਆਪਣੇ ਮਨਪਸੰਦ ਦੀ ਕੋਈ ਵੀ ਲਿਪਸਟਿਕ ਲਗਾ ਲਵੋ। ਫਿਰ ਟਿਸ਼ੂ ਪੇਪਰ ਦੀ ਮਦਦ ਨਾਲ ਹਲਕੇ-ਹਲਕੇ ਹੱਥਾਂ ਨਾਲ ਵਾਧੂ ਲਿਪਸਟਿਕ ਨੂੰ ਹਟਾ ਦਿਓ। ਹੁਣ ਹਲਕਾ-ਹਲਕਾ ਪਾਊਡਰ ਬੁੱਲ੍ਹਾਂ 'ਤੇ ਲੱਗੀ ਹੋਈ ਲਿਪਸਟਿਕ 'ਤੇ ਲਗਾਓ। ਪਾਊਡਰ ਦੇ ਲਿਪਸਟਿਕ ਵਿਚ ਮਿਲਣ ਤੱਕ ਉਂਗਲਾਂ ਨਾਲ ਪ੍ਰੈੱਸ ਕਰਦੇ ਰਹੋ। ਬਿਨਾਂ ਚਮਕ ਦੀ ਮੈਟ ਲਿਪਸਟਿਕ ਤਿਆਰ ਹੈ।
ਲੌਂਗ ਲਾਸਟਿੰਗ ਬਲੱਸ਼ : ਇਸ ਲਈ ਤੁਹਾਨੂੰ ਚਾਹੀਦੀ ਹੈ ਆਪਣੀ ਮਨਪਸੰਦ ਦੀ ਲਾਲ ਜਾਂ ਹਲਕੀ ਗੁਲਾਬੀ ਲਿਪਸਟਿਕ ਤੇ ਐਸ. ਪੀ. ਐਫ. 30 ਜਾਂ 50 ਸਨਸਕ੍ਰੀਨ। ਹੁਣ ਆਪਣੀਆਂ ਗੱਲ੍ਹਾਂ 'ਤੇ ਹਲਕੀ ਜਿਹੀ ਲਿਪਸਟਿਕ ਲਗਾ ਕੇ ਸਨਸਕ੍ਰੀਨ ਲਗਾਵੋ। ਸਨਸਕ੍ਰੀਨ ਤੇ ਲਿਪਸਟਿਕ ਨੂੰ ਚੰਗੀ ਤਰ੍ਹਾਂ ਮਿਲਾਉਂਦੇ ਹੋਏ ਹੇਠਾਂ ਵੱਲ ਨੂੰ ਹੌਲੀ-ਹੌਲੀ ਬਲੈਂਡ ਕਰੋ।
ਕਾਲੇ ਘੇਰਿਆਂ ਤੋਂ ਛੁਟਕਾਰਾ : ਇਸ ਵਾਸਤੇ ਤੁਹਾਨੂੰ ਚਾਹੀਦੀ ਹੈ ਬਚੀ ਹੋਈ ਕੌਫ਼ੀ। ਬਚੀ ਹੋਈ ਕੌਫ਼ੀ ਨੂੰ ਆਈਸ ਟ੍ਰੇਅ ਵਿਚ ਪਾ ਕੇ ਕੁਝ ਘੰਟਿਆਂ ਲਈ ਫਰਿੱਜ ਦੇ ਉਪਰਲੇ ਖਾਨੇ ਵਿਚ ਰੱਖੋ। ਜਦ ਆਈਸ ਕਿਊਬ ਬਣ ਕੇ ਤਿਆਰ ਹੋ ਜਾਵੇ ਤਾਂ ਉਸ ਨੂੰ ਆਪਣੀਆਂ ਅੱਖਾਂ ਦੇ ਹੇਠਾਂ ਘਸਾਓ।
ਕਾਲੇ ਬੁੱਲ੍ਹਾਂ ਤੋਂ ਛੁਟਕਾਰਾ : ਇਸ ਲਈ ਤੁਹਾਨੂੰ ਚਾਹੀਦਾ ਹੈ ਇਕ ਚਮਚਾ ਬੇਬੀ ਆਇਲ, ਅੱਧਾ ਚਮਚਾ ਚੀਨੀ ਤੇ ਕੁਝ ਕੁ ਨਿੰਬੂ ਰਸ ਦੀਆਂ ਬੂੰਦਾਂ। ਸਾਰਿਆਂ ਨੂੰ ਇਕੱਠੇ ਮਿਲਾ ਕੇ ਬੁੱਲ੍ਹਾਂ 'ਤੇ ਕੁਝ ਮਿੰਟਾਂ ਲਈ ਰਗੜੋ। ਚੰਗੇ ਨਤੀਜਿਆਂ ਵਾਸਤੇ ਹਰ ਰਾਤ ਇਸ ਦਾ ਇਸਤੇਮਾਲ ਕਰੋ, ਜਦ ਤੱਕ ਕਾਲਾਪਨ ਦੂਰ ਨਾ ਹੋ ਜਾਵੇ। ਇਸ ਵਿਧੀ ਵਿਚ ਬੇਬੀ ਆਇਲ ਨੂੰ ਮਿਨਰਲ ਆਇਲ ਦੀ ਤਰ੍ਹਾਂ ਵਰਤਿਆ ਗਿਆ ਹੈ।
ਲਿਪ ਗਲਾਸ : ਬੇਬੀ ਆਇਲ ਦੀ ਵਰਤੋਂ ਵੀ ਲਿਪ ਗਲਾਸ ਲਈ ਕੀਤੀ ਜਾ ਸਕਦੀ ਹੈ।


-ਸਿਮਰਨਜੀਤ ਕੌਰ
simranjeet.dhiman16@gmail.com

ਕੌਣ ਕਹਿੰਦਾ ਹੈ ਨਹੀਂ ਹੁੰਦਾ ਸੁਰਾਖ ਆਸਮਾਨ ਵਿਚ

ਟੀਚਾ ਨਿਰਧਾਰਤ ਕਰੋ : ਹਰ ਵਿਅਕਤੀ ਸਫਲਤਾ ਦਾ ਇਛੁਕ ਹੁੰਦਾ ਹੈ। ਆਸਮਾਨ ਛੂਹਣ ਦੀ ਤਮੰਨਾ ਸਾਰਿਆਂ ਵਿਚ ਹੁੰਦੀ ਹੈ। ਇਸ ਲਈ ਵਿਸ਼ਵਾਸ ਕਰਕੇ ਟੀਚੇ 'ਤੇ ਧਿਆਨ ਕੇਂਦਰਿਤ ਕਰੋ। ਆਪਣੀ ਸਮਰੱਥਾ ਨੂੰ ਪਹਿਚਾਣੋ ਅਤੇ ਉਸੇ ਦੇ ਅਨੁਸਾਰ ਕੰਮ ਕਰੋ। ਹਰ ਦਮ ਚੌਕੰਨੇ ਰਹਿਣ ਨਾਲ ਤੁਹਾਨੂੰ ਪਤਾ ਲਗਦਾ ਰਹੇਗਾ ਕਿ ਤੁਸੀਂ ਕਿਥੇ ਗ਼ਲਤ ਸਾਬਤ ਹੋ ਰਹੇ ਹੋ। ਇਸ ਵਾਸਤੇ ਤੁਹਾਨੂੰ ਸਮਰਪਣ ਅਤੇ ਸੰਕਲਪ ਲੈਣਾ ਜ਼ਰੂਰੀ ਹੈ।
ਚੁਣੌਤੀਆਂ ਨੂੰ ਸਵੀਕਾਰ ਕਰੋ : ਹਰ ਗੱਲ ਵਿਚ 'ਮੈਥੋਂ ਨਹੀਂ ਹੋ ਸਕਦਾ', ਅਜਿਹਾ ਕਦੇ ਵੀ ਆਪਣੇ ਦਿਮਾਗ ਵਿਚ ਨਾ ਲਿਆਓ। ਮਨ ਵਿਚ ਪ੍ਰਣ ਕਰ ਲਓ ਕਿ ਮੈਂ ਇਹ ਕੰਮ ਕਰਕੇ ਹੀ ਸਾਹ ਲਵਾਂਗਾ/ਲਵਾਂਗੀ। ਜ਼ੋਖਮ ਦੇ ਕੰਮ ਸ਼ੁਰੂ ਵਿਚ ਤੁਹਾਡਾ ਹੌਸਲਾ ਪਸਤ ਕਰ ਸਕਦੇ ਹਨ ਪਰ ਚੁਣੌਤੀਆਂ ਨੂੰ ਮੰਜ਼ਿਲ ਮੰਨ ਕੇ ਕੰਮ ਕਰਨ ਨਾਲ ਆਤਮਵਿਸ਼ਵਾਸ ਪੈਦਾ ਹੋਵੇਗਾ। ਅਜਿਹਾ ਕਰਨ ਨਾਲ ਤੁਸੀਂ ਆਪਣੇ-ਆਪ ਵਿਚ ਬਦਲਾਅ ਮਹਿਸੂਸ ਕਰੋਗੇ।
ਅਨੁਸ਼ਾਸਤ ਰਹੋ : ਕੋਈ ਵੀ ਕੰਮ ਹੋਵੇ, ਚਾਹੇ ਘਰ ਦਾ ਹੋਵੇ, ਚਾਹੇ ਦਫਤਰ ਦਾ, ਨਵੇਂ ਕੰਮ ਨੂੰ ਸ਼ੁਰੂ ਕਰਨ ਤੋਂ ਪਹਿਲਾਂ ਉਸ ਦੀ ਪੂਰੀ ਜਾਣਕਾਰੀ ਲਓ। ਆਪਣੇ ਕੰਮ ਦੇ ਪ੍ਰਤੀ ਪੂਰੀ ਇਮਾਨਦਾਰੀ ਰੱਖੋ। ਦੂਜਿਆਂ 'ਤੇ ਆਪਣਾ ਕੰਮ ਨਾ ਪਾਓ। ਪ੍ਰਜੀਵੀ ਵਿਅਕਤੀ ਆਪਣੇ ਕੰਮ ਵਿਚ ਕਦੇ ਸਫਲ ਨਹੀਂ ਹੁੰਦਾ, ਕਿਉਂਕਿ ਉਸ ਦੇ ਕੋਲ ਕਿਸੇ ਵੀ ਕੰਮ ਦਾ ਤਜਰਬਾ ਨਹੀਂ ਹੁੰਦਾ। ਜੇ ਕਿਸੇ ਕੰਮ ਵਿਚ ਅਸਫਲਤਾ ਹੱਥ ਲਗਦੀ ਹੈ ਤਾਂ ਆਪਣੇ ਕਿਸੇ ਦੂਜੇ ਫਨ ਦਾ ਇਸਤੇਮਾਲ ਕਰਨਾ ਸਿੱਖੋ। ਕਹਿੰਦੇ ਵੀ ਹਨ ਇਕ ਰਾਹ ਬੰਦ ਹੁੰਦਾ ਹੈ ਤਾਂ ਦਸ ਦੂਜੇ ਖੁੱਲ੍ਹਦੇ ਹਨ। ਵੈਸੇ ਵੀ ਜਿੱਤਦਾ ਉਹੀ ਹੈ, ਜਿਸ ਨੂੰ ਜਿੱਤਣ ਦਾ ਵਿਸ਼ਵਾਸ ਹੁੰਦਾ ਹੈ।
ਖੁਦ ਨਾਲ ਪਿਆਰ ਕਰੋ : ਇਕ ਸਮਾਂ ਸੀ ਜਦੋਂ ਗੋਰਾ ਰੰਗ-ਰੂਪ ਹੀ ਸਭ ਕੁਝ ਹੋਇਆ ਕਰਦਾ ਸੀ। ਪਰ ਅੱਜ ਸੁੰਦਰਤਾ ਦੇ ਅਰਥ ਬਦਲ ਗਏ ਹਨ। ਹੁਣ ਸੁੰਦਰਤਾ ਨਾਲੋਂ ਜ਼ਿਆਦਾ ਤੰਦਰੁਸਤੀ ਅਤੇ ਚੁਸਤੀ ਦਾ ਜ਼ਮਾਨਾ ਹੈ। ਹੁਣ ਇਹ ਤੁਹਾਡੇ ਹੱਥ ਵਿਚ ਹੈ ਕਿ ਤੁਸੀਂ ਕਿਵੇਂ ਲੱਗਣਾ ਚਾਹੁੰਦੇ ਹੋ। ਇਸ ਲਈ ਆਪਣੇ ਰੱਖ-ਰਖਾਅ ਦਾ ਪੂਰਾ ਧਿਆਨ ਰੱਖੋ। ਫੈਸ਼ਨ ਦੇ ਹਿਸਾਬ ਨਾਲ ਰਹੋ ਪਰ ਇਸ ਦਾ ਮਤਲਬ ਇਹ ਵੀ ਨਹੀਂ ਹੈ ਕਿ ਜੋ ਤੁਹਾਡੇ 'ਤੇ ਫਬੇ, ਉਹ ਨਾ ਪਹਿਨੋ। ਪਹਿਰਾਵਾ ਉਹੀ ਹੋਵੇ ਜੋ ਇਕ ਨਵੀਂ ਪਹਿਚਾਣ ਦੇਵੇ।
ਤੰਦਰੁਸਤ ਰਹੋ : ਕਹਿੰਦੇ ਹਨ ਕਿ ਜਾਨ ਹੈ ਤਾਂ ਜਹਾਨ ਹੈ। ਇਸ ਸੰਸਾਰ ਵਿਚ ਜਾਨ ਤੋਂ ਵਧ ਕੇ ਵੀ ਕੀ ਕੋਈ ਚੀਜ਼ ਹੋ ਸਕਦੀ ਹੈ? ਜੇ ਤੁਹਾਡਾ ਸਰੀਰ ਤੰਦਰੁਸਤ ਅਤੇ ਅਰੋਗੀ ਹੈ ਤਾਂ ਤੁਸੀਂ ਸੰਸਾਰ ਦੇ ਸਭ ਤੋਂ ਸੁਖੀ ਪ੍ਰਾਣੀ ਹੋ। ਬਾਕੀ ਜੀਵਨ ਵਿਚ ਸੁੱਖ-ਦੁੱਖ ਆਉਂਦੇ-ਜਾਂਦੇ ਰਹਿੰਦੇ ਹਨ ਪਰ ਸਚਾਈ ਜਾਣਦੇ ਹੋਏ ਵੀ ਬਹੁਤ ਘੱਟ ਲੋਕ ਹੀ ਆਪਣੀ ਸਿਹਤ ਦਾ ਖਿਆਲ ਰੱਖਦੇ ਹਨ, ਸਵਾਦ ਨੂੰ ਸਿਹਤ ਨਾਲੋਂ ਜ਼ਿਆਦਾ ਮਹੱਤਵ ਦਿੰਦੇ ਹਨ। ਇਸ ਲਈ ਪਹਿਲੀ ਸ਼ਰਤ ਇਹੀ ਹੋਣੀ ਚਾਹੀਦੀ ਹੈ ਕਿ ਅਸੀਂ ਤੰਦਰੁਸਤ ਰਹੀਏ। ਤੰਦਰੁਸਤ ਰਹਿਣ ਨਾਲ ਅਸੀਂ ਆਤਮਵਿਸ਼ਵਾਸ ਨਾਲ ਲਬਰੇਜ਼ ਰਹਿੰਦੇ ਹਾਂ। ਆਪਣੇ ਰੁਝੇਵਿਆਂ ਵਿਚੋਂ ਕੁਝ ਸਮਾਂ ਕੱਢ ਕੇ ਕਸਰਤ, ਧਿਆਨ, ਯੋਗ, ਪੈਦਲ ਘੁੰਮਣਾ ਆਦਿ ਕਿਰਿਆਵਾਂ ਨੂੰ ਵੀ ਦੇਣਾ ਚਾਹੀਦਾ ਹੈ।
ਸਕਾਰਾਤਮਕ ਸੋਚੋ : ਕੋਈ ਵੀ ਵਿਅਕਤੀ ਸਰਬ ਗੁਣ ਸੰਪੰਨ ਨਹੀਂ ਹੁੰਦਾ। ਇਸ ਲਈ ਆਪਣੀਆਂ ਕਮੀਆਂ ਨੂੰ ਲੱਭੋ। ਉਲਟਾ-ਪੁਲਟਾ ਸੋਚਣ ਜਾਂ 'ਮੈਥੋਂ ਨਹੀਂ ਹੋਵੇਗਾ' ਵਰਗੀ ਧਾਰਨਾ ਮਨ ਵਿਚ ਨਾ ਆਉਣ ਦਿਓ। ਬਸ ਹੌਸਲਾ ਰੱਖ ਕੇ ਪੂਰੇ ਮਨ ਨਾਲ ਆਪਣਾ ਕੰਮ ਕਰੋ। ਨਤੀਜਾ ਬਿਹਤਰ ਹੀ ਆਵੇਗਾ।
ਮੰਜ਼ਿਲ 'ਤੇ ਪਹੁੰਚ ਕੇ ਟਿਕਣਾ ਵੀ ਸਿੱਖੋ : ਇਹ ਹੈ ਸਭ ਤੋਂ ਅਹਿਮ ਗੱਲ। ਮੰਜ਼ਿਲ ਸਾਹਮਣੇ ਪਾਉਂਦੇ ਹੀ ਖੁਸ਼ੀ ਦੇ ਮਾਰੇ ਇਹ ਨਾ ਭੁੱਲੋ ਕਿ ਹਾਲੇ ਵੀ ਓਨੀ ਹੀ ਮਿਹਨਤ ਅਤੇ ਲਗਨ ਦੀ ਲੋੜ ਹੈ। ਟੀਚਾ ਭ੍ਰਮਿਤ ਨਾ ਹੋਵੋ। ਹਰ ਦਮ ਜ਼ਿਆਦਾ ਤੋਂ ਜ਼ਿਆਦਾ ਸਿੱਖਣ ਦੀ ਉਮੀਦ ਰੱਖੋ। ਇਕ ਨਿਸਚਿਤ ਪਦ 'ਤੇ ਆਉਣ ਤੋਂ ਬਾਅਦ ਗੰਭੀਰਤਾ ਨਾਲ ਫੈਸਲਾ ਲੈਣਾ ਵੀ ਇਕ ਕਲਾ ਹੈ। ਤੁਹਾਡੇ ਨਾਲ, ਤੁਹਾਡੇ ਉੱਪਰ ਅਤੇ ਹੇਠਾਂ ਕਈ ਲੋਕ ਰਹਿੰਦੇ ਹਨ, ਸਾਰਿਆਂ ਨਾਲ ਆਪਣਾ ਤਾਲਮੇਲ ਬਣਾਉਣਾ ਵੀ ਤੁਹਾਡੇ ਲਈ ਜ਼ਰੂਰੀ ਹੈ। ਇਸ ਲਈ ਇਸ ਨੂੰ ਵੀ ਧਿਆਨ ਵਿਚ ਰੱਖਣਾ ਚਾਹੀਦਾ ਹੈ।


-ਮੋਬਾ: 78982-74643
jainrenu2011@gmail.com

ਗਹਿਣਿਆਂ ਦੀ ਗੁਆਚੀ ਹੋਈ ਚਮਕ ਵਾਪਸ ਲਿਆਓ

* ਇਕ ਬਾਊਲ ਵਿਚ ਗਰਮ ਪਾਣੀ ਲੈ ਕੇ ਉਸ ਵਿਚ ਇਕ ਚਮਚ ਬਲੀਚ ਫ੍ਰੀ ਡਿਟਰਜੈਂਟ ਪਾਊਡਰ ਪਾਓ। ਇਸ ਵਿਚ ਥੋੜ੍ਹੀ ਦੇਰ ਗਹਿਣਿਆਂ ਨੂੰ ਭਿਉਂ ਕੇ ਰੱਖੋ, ਬੁਰਸ਼ ਨਾਲ ਹੌਲੀ-ਹੌਲੀ ਸਾਫ਼ ਕਰੋ। ਗਹਿਣੇ ਚਮਕ ਉਠਣਗੇ। * ਰੀਠਿਆਂ ਨੂੰ ਰਾਤ ਭਰ ਭਿਉਂ ਕੇ ਰੱਖੋ ਅਤੇ ਉਸ ਪਾਣੀ ਨੂੰ ਚੰਗੀ ਤਰ੍ਹਾਂ ਉਬਾਲ ਲਓ, ਉਸ ਵਿਚ ਸੋਨੇ ਦੇ ਗਹਿਣੇ ਥੋੜ੍ਹੀ ਦੇਰ ਲਈ ਪਾ ਕੇ ਰੱਖੋ ਅਤੇ ਬੁਰਸ਼ ਨਾਲ ਸਾਫ਼ ਕਰੋ।
* ਹਲਕੇ ਗਰਮ ਪਾਣੀ ਵਿਚ ਨਿੰਬੂ ਨਿਚੋੜ ਕੇ ਗਹਿਣੇ ਉਸ ਵਿਚ ਪਾਓ, ਥੋੜ੍ਹੀ ਦੇਰ ਬਾਅਦ ਹਲਕੇ ਹੱਥਾਂ ਨਾਲ ਨਰਮ ਬੁਰਸ਼ ਨਾਲ ਰਗੜੋ, ਗਹਿਣੇ ਚਮਕ ਉਠਣਗੇ।
ਚਾਂਦੀ ਦੇ ਗਹਿਣੇ : * ਚਾਂਦੀ ਸਫੈਦ ਹੁੰਦੀ ਹੈ ਅਤੇ ਇਹ ਧੂੜ-ਮਿੱਟੀ ਦੇ ਕਾਰਨ ਛੇਤੀ ਕਾਲੀ ਹੋ ਜਾਂਦੀ ਹੈ। ਇਸ ਨੂੰ ਸਾਫ਼ ਕਰਨ ਲਈ ਚਾਂਦੀ ਦੇ ਗਹਿਣਿਆਂ ਅਤੇ ਭਾਂਡਿਆਂ ਨੂੰ ਥੋੜ੍ਹੇ ਸਮੇਂ ਲਈ ਖੱਟੇ ਦਹੀਂ ਵਿਚ ਭਿਉਂ ਦਿਓ। ਇਨ੍ਹਾਂ 'ਤੇ ਜੰਮੀ ਹੋਈ ਸਾਰੀ ਮੈਲ ਲੱਥ ਜਾਵੇਗੀ। ਇਸ ਤੋਂ ਬਾਅਦ ਇਨ੍ਹਾਂ ਨੂੰ ਕਿਸੇ ਸੁੱਕੇ ਕੱਪੜੇ ਨਾਲ ਰਗੜ ਲਓ।
* ਅੱਧਾ ਕੱਪ ਸਫੈਦ ਸਿਰਕੇ ਵਿਚ ਦੋ ਚਮਚੇ ਬੇਕਿੰਗ ਸੋਢਾ ਮਿਲਾ ਕੇ ਇਸ ਮਿਸ਼ਰਣ ਵਿਚ ਗਹਿਣਿਆਂ ਨੂੰ 2-3 ਘੰਟਿਆਂ ਤੱਕ ਡੁਬੋ ਕੇ ਰੱਖੋ। ਇਸ ਤੋਂ ਬਾਅਦ ਇਨ੍ਹਾਂ ਨੂੰ ਸਾਫ਼ ਪਾਣੀ ਨਾਲ ਧੋ ਦਿਓ ਅਤੇ ਸਿਰਫ ਸੁੱਕੇ ਕੱਪੜੇ ਨਾਲ ਰਗੜ ਕੇ ਸਾਫ਼ ਕਰੋ।
* ਕਾਲੇ ਪੈ ਚੁੱਕੇ ਚਾਂਦੀ ਦੇ ਗਹਿਣਿਆਂ ਨੂੰ ਸਾਫ਼ ਕਰਨ ਲਈ ਟਮੈਟੋ ਕੈਚਅਪ ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ। ਇਨ੍ਹਾਂ ਗਹਿਣਿਆਂ ਨੂੰ ਜ਼ਮੀਨ 'ਤੇ ਰੱਖ ਕੇ ਇਨ੍ਹਾਂ 'ਤੇ ਸਾਸ ਪਾ ਦਿਓ ਅਤੇ ਦੰਦ ਸਾਫ ਕਰਨ ਵਾਲੇ ਬੁਰਸ਼ ਨਾਲ ਇਨ੍ਹਾਂ ਦੇ ਕੋਨਿਆਂ ਨੂੰ ਰਗੜ ਕੇ ਸਾਫ਼ ਕਰੋ। ਪਰ ਇਸ ਨੂੰ ਕੈਚਅਪ ਦੇ ਵਿਚ ਜ਼ਿਆਦਾ ਦੇਰ ਤੱਕ ਨਾ ਰੱਖੋ। ਪਾਣੀ ਦੇ ਹੇਠਾਂ ਧੋ ਕੇ ਕਿਸੇ ਸੁੱਕੇ ਕੱਪੜੇ ਨਾਲ ਪੂੰਝ ਲਓ।
* ਦੰਦ ਸਾਫ ਕਰਨ ਵਾਲਾ ਸਫੈਦ ਪਾਊਡਰ ਲੈ ਕੇ ਉਸ ਦਾ ਪੇਸਟ ਬਣਾ ਲਓ। ਚਾਂਦੀ ਦੇ ਗਹਿਣਿਆਂ 'ਤੇ ਇਸ ਪੇਸਟ ਨੂੰ ਰਗੜ ਕੇ ਹੌਲੀ-ਹੌਲੀ ਬੁਰਸ਼ ਨਾਲ ਸਾਫ ਕਰੋ। ਚਾਂਦੀ ਦੀ ਗੁਆਚੀ ਹੋਈ ਚਮਕ ਵਾਪਸ ਆ ਜਾਂਦੀ ਹੈ।
* ਆਲੂ ਉਬਾਲਣ ਤੋਂ ਬਾਅਦ ਬਚੇ ਪਾਣੀ ਵਿਚ ਚਾਂਦੀ ਦੇ ਗਹਿਣਿਆਂ ਨੂੰ ਥੋੜ੍ਹੀ ਦੇਰ ਡੁਬੋ ਕੇ ਰੱਖੋ। ਬਾਅਦ ਵਿਚ ਇਨ੍ਹਾਂ ਨੂੰ ਕੱਢਣ ਤੋਂ ਬਾਅਦ ਹਲਕੇ ਬੁਰਸ਼ ਨਾਲ ਸਾਫ ਕਰ ਲਓ, ਗਹਿਣੇ ਇਕਦਮ ਚਮਕ ਜਾਂਦੇ ਹਨ।
ਹੀਰਿਆਂ ਅਤੇ ਮੋਤੀਆਂ ਦੇ ਗਹਿਣੇ : * ਮੋਤੀਆਂ ਦੇ ਗਹਿਣਿਆਂ ਦੀ ਸਹੀ ਸਾਂਭ-ਸੰਭਾਲ ਲਈ ਇਨ੍ਹਾਂ ਨੂੰ ਸਾਫ਼ ਰੂੰ ਵਿਚ ਰੱਖੋ। ਹੀਰੇ ਜੜੇ ਗਹਿਣਿਆਂ ਨੂੰ ਵੱਖ-ਵੱਖ ਸਾਫ਼ ਰੂੰ ਵਿਚ ਰੱਖੋ। * ਡਾਇਮੰਡ, ਰੂਬੀ ਅਤੇ ਮੋਤੀ ਜੜੇ ਗਹਿਣਿਆਂ ਨੂੰ ਸਾਫ਼ ਕਰਨ ਲਈ ਘਰ ਵਿਚ ਵਰਤੋਂ ਹੋਣ ਵਾਲੇ ਵਿੰਡੋ ਕਲੀਨਰ ਨੂੰ ਗਹਿਣਿਆਂ 'ਤੇ ਸਪਰੇਅ ਕਰੋ। ਉਸ ਤੋਂ ਬਾਅਦ ਉਸ ਹਿੱਸੇ ਨੂੰ ਦੰਦ ਸਾਫ ਕਰਨ ਵਾਲੇ ਬੁਰਸ਼ ਦੀ ਸਹਾਇਤਾ ਨਾਲ ਸਾਫ਼ ਕਰੋ। ਮੂੰਗੋ ਅਤੇ ਪਰਲ ਜੜੇ ਗਹਿਣਿਆਂ 'ਤੇ ਇਸ ਦੀ ਵਰਤੋਂ ਨਾ ਕਰੋ। ਅਮੋਨੀਆ ਅਤੇ ਡਿਟਰਜੈਂਟ ਇਨ੍ਹਾਂ ਰਤਨ ਜੜੇ ਗਹਿਣਿਆਂ ਦੇ ਰੰਗਾਂ ਨੂੰ ਖਰਾਬ ਕਰ ਸਕਦੇ ਹਨ।
* ਦੰਦ ਸਾਫ ਕਰਨ ਵਾਲੇ ਸਫੈਦ ਪਾਊਡਰ ਨਾਲ ਹੀਰੇ ਦੇ ਗਹਿਣਿਆਂ ਨੂੰ ਵੀ ਨਰਮ ਹੱਥਾਂ ਨਾਲ ਰਗੜ ਕੇ ਸਾਫ਼ ਕੀਤਾ ਜਾ ਸਕਦਾ ਹੈ। * ਡਾਇਮੰਡ ਦੇ ਗਹਿਣਿਆਂ ਨੂੰ ਨਵੀਂ ਚਮਕ ਦੇਣ ਲਈ ਉਨ੍ਹਾਂ ਨੂੰ ਕਲੱਬ ਸੋਢਾ ਨਾਲ ਸਾਫ਼ ਕੀਤਾ ਜਾ ਸਕਦਾ ਹੈ। ਇਕ ਗਲਾਸ ਵਿਚ ਕਲੱਬ ਸੋਢਾ ਲੈ ਕੇ ਉਸ ਵਿਚ ਗਹਿਣਿਆਂ ਨੂੰ ਪੂਰੀ ਰਾਤ ਡੁਬੋ ਕੇ ਰੱਖੋ, ਸਵੇਰੇ ਨਰਮ ਬੁਰਸ਼ ਨਾਲ ਚੰਗੀ ਤਰ੍ਹਾਂ ਸਾਫ਼ ਕਰ ਲਓ।


-ਫਿਊਚਰ ਮੀਡੀਆ ਨੈਟਵਰਕ

ਲਓ ਚਿੱਲਿਆਂ ਦਾ ਸਵਾਦ

ਕਣਕ ਦੇ ਆਟੇ ਦੇ ਮਿੱਠੇ ਚਿੱਲੇ
ਸਮੱਗਰੀ : 250 ਗ੍ਰਾਮ ਕਣਕ ਦਾ ਆਟਾ, 200 ਗ੍ਰਾਮ ਖੰਡ, ਥੋੜ੍ਹੀ ਜਿਹੀ ਸੌਂਫ, ਤੇਲ ਲੋੜ ਅਨੁਸਾਰ।
ਵਿਧੀ : ਚਿੱਲੇ ਬਣਾਉਣ ਤੋਂ 5-6 ਘੰਟੇ ਪਹਿਲਾਂ ਖੰਡ ਨੂੰ ਸਾਫ਼ ਪਾਣੀ ਵਿਚ ਭਿਉਂ ਦਿਓ। ਫਿਰ ਇਸ ਨੂੰ ਪਾਣੀ ਵਿਚ ਚੰਗੀ ਤਰ੍ਹਾਂ ਮਿਲਾ ਕੇ ਛਾਣ ਲਓ। ਆਟੇ ਨੂੰ ਛਾਣ ਕੇ ਉਸ ਵਿਚ ਖੰਡ ਦਾ ਪਾਣੀ ਥੋੜ੍ਹਾ-ਥੋੜ੍ਹਾ ਪਾਉਂਦੇ ਜਾਓ। ਇਸ ਤਰ੍ਹਾਂ ਇਸ ਦਾ ਪਤਲਾ ਘੋਲ ਤਿਆਰ ਕਰ ਲਓ। ਧਿਆਨ ਰੱਖੋ ਕਿ ਘੋਲ ਵਿਚ ਗੰਢਾਂ ਨਹੀਂ ਪੈਣੀਆਂ ਚਾਹੀਦੀਆਂ।
ਹੁਣ ਤਵੇ ਨੂੰ ਅੱਗ 'ਤੇ ਰੱਖੋ। ਗਰਮ ਹੋਣ ਤੋਂ ਬਾਅਦ ਇਕ ਚਮਚ ਘਿਓ ਪੂਰੇ ਤਵੇ 'ਤੇ ਲਗਾਓ। ਘੋਲ ਨੂੰ ਤਵੇ 'ਤੇ ਫੈਲਾਅ ਦਿਓ। ਹਲਕੀ ਅੱਗ ਕਰਕੇ ਇਕ ਚਮਚ ਘਿਓ ਇਸ ਦੇ ਕਿਨਾਰਿਆਂ 'ਤੇ ਲਗਾਓ ਅਤੇ ਪਲਟ ਦਿਓ। ਚੰਗੀ ਤਰ੍ਹਾਂ ਸੇਕ ਕੇ ਉਤਾਰ ਲਓ। ਗਰਮਾ-ਗਰਮ ਪਰੋਸੋ। ਇਸ ਤਰ੍ਹਾਂ ਦੇ ਚਿੱਲੇ ਕੜਾਹੀ ਵਿਚ ਵੀ ਬਣਾਏ ਜਾ ਸਕਦੇ ਹਨ। ਇਨ੍ਹਾਂ ਨੂੰ ਜੇ ਚੌਲਾਂ ਦੀ ਖੀਰ ਦੇ ਨਾਲ ਖਾਧਾ ਜਾਵੇ ਤਾਂ ਇਹ ਹੋਰ ਸਵਾਦ ਲਗਦੇ ਹਨ।
ਮੂੰਗੀ ਦੀ ਦਾਲ ਦੇ ਨਮਕੀਨ ਚਿੱਲੇ
ਸਮੱਗਰੀ : 250 ਗ੍ਰਾਮ ਮੂੰਗੀ ਦੀ (ਛਿਲਕੇ ਸਮੇਤ) ਦਾਲ, ਦੋ ਚਮਚ ਵੇਸਣ, 2 ਵੱਡੇ ਚਮਚ ਤੇਲ, ਥੋੜ੍ਹੀ ਜਿਹੀ ਹਿੰਗ ਅਤੇ ਅਜਵਾਇਣ, 3-4 ਹਰੀਆਂ ਮਿਰਚਾਂ (ਬਰੀਕ ਕੱਟੀਆਂ ਹੋਈਆਂ), ਨਮਕ ਸਵਾਦ ਅਨੁਸਾਰ।
ਵਿਧੀ : ਦਾਲ ਨੂੰ ਚਿੱਲੇ ਬਣਾਉਣ ਤੋਂ 4-5 ਘੰਟੇ ਪਹਿਲਾਂ ਭਿਉਂ ਦਿਓ। ਇਸ ਤੋਂ ਬਾਅਦ ਬਰੀਕ ਪੀਸ ਲਓ। ਫਿਰ ਵੇਸਣ, ਅਜਵਾਇਣ, ਹਿੰਗ, ਹਰੀ ਮਿਰਚ ਆਦਿ ਨੂੰ ਮਿਲਾ ਕੇ ਸੰਘਣਾ ਘੋਲ ਬਣਾ ਲਓ। ਇਸ ਨੂੰ ਵੀ ਚਿੱਲੇ ਦੀ ਤਰ੍ਹਾਂ ਬਣਾਓ। ਧਨੀਏ ਦੀ ਚਟਣੀ ਦੇ ਨਾਲ ਗਰਮਾ-ਗਰਮ ਪਰੋਸੋ। ਇਹ ਸਵਾਦੀ ਹੋਣ ਦੇ ਨਾਲ-ਨਾਲ ਪੌਸ਼ਟਿਕਤਾ ਨਾਲ ਭਰਪੂਰ ਹੁੰਦੇ ਹਨ।


-ਭਾਸ਼ਣਾ ਬਾਂਸਲ ਗੁਪਤਾ






Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX