ਤਾਜਾ ਖ਼ਬਰਾਂ


ਆਈ.ਪੀ.ਐੱਲ 2018 : ਟਾਸ ਜਿੱਤ ਕੇ ਮੁੰਬਈ ਇੰਡੀਅਨਜ਼ ਵੱਲੋਂ ਪਹਿਲਾ ਬੱਲੇਬਾਜ਼ੀ ਦਾ ਫੈਸਲਾ
. . .  16 minutes ago
ਆਈ.ਪੀ.ਐੱਲ 2018 : ਚੇਨਈ ਸੁਪਰ ਕਿੰਗਜ਼ ਨੇ ਸਨਰਾਈਜ਼ਰਸ ਹੈਦਰਾਬਾਦ ਨੂੰ 4 ਦੌੜਾਂ ਨਾਲ ਹਰਾਇਆ
. . .  21 minutes ago
ਆਈ.ਪੀ.ਐੱਲ 2018 : ਸਨਰਾਈਜ਼ਰਸ ਹੈਦਰਾਬਾਦ ਨੂੰ 6ਵਾਂ ਝਟਕਾ, ਯੂਸਫ ਪਠਾਨ 45 ਦੌੜਾਂ ਬਣਾ ਕੇ ਆਊਟ
. . .  28 minutes ago
ਆਈ.ਪੀ.ਐੱਲ 2018 : ਸਨਰਾਈਜ਼ਰਸ ਹੈਦਰਾਬਾਦ ਨੂੰ 5ਵਾਂ ਝਟਕਾ, ਕਪਤਾਨ ਵਿਲੀਅਮਸਨ ਆਊਟ
. . .  30 minutes ago
ਭੌਂ ਰੱਖਿਆ ਵਿਭਾਗ ਦੇ 347 ਸਰਵੇਅਰਾਂ ਦੀ ਨਿਯੁਕਤੀ ਹਾਈਕੋਰਟ ਵਲੋਂ ਰੱਦ
. . .  52 minutes ago
ਮਾਹਿਲਪੁਰ 22 ਅਪ੍ਰੈਲ (ਦੀਪਕ ਅਗਨੀਹੋਤਰੀ)- ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਨੇ ਪੰਜਾਬ ਭੌਂ ਰੱਖਿਆ ਵਿਭਾਗ ਦੇ 347 ਸਰਵੇਅਰਾਂ ਦੀਆਂ ਨਿਯੁਕਤੀਆਂ ਰੱਦ ਕਰਦਿਆਂ ਵਿਭਾਗ...
ਆਈ.ਪੀ.ਐੱਲ 2018 : 15 ਓਵਰਾਂ ਤੋਂ ਬਾਅਦ ਸਨਰਾਈਜ਼ਰਸ ਹੈਦਰਾਬਾਦ 117/4
. . .  53 minutes ago
ਆਈ.ਪੀ.ਐੱਲ 2018 : ਸਨਰਾਈਜ਼ਰਸ ਹੈਦਰਾਬਾਦ ਦੇ ਕਪਤਾਨ ਵਿਲੀਅਮਸਨ ਦੀਆਂ 50 ਦੌੜਾਂ ਪੂਰੀਆਂ
. . .  about 1 hour ago
ਆਈ.ਪੀ.ਐੱਲ 2018 : 10 ਓਵਰਾਂ ਤੋਂ ਬਾਅਦ ਸਨਰਾਈਜ਼ਰਸ ਹੈਦਰਾਬਾਦ 71/3
. . .  about 1 hour ago
ਆਈ.ਪੀ.ਐੱਲ 2018 : 5 ਓਵਰਾਂ ਤੋਂ ਬਾਅਦ ਸਨਰਾਈਜ਼ਰਸ ਹੈਦਰਾਬਾਦ 28/3
. . .  about 1 hour ago
ਆਈ.ਪੀ.ਐੱਲ 2018 : ਸਨਰਾਈਜ਼ਰਸ ਹੈਦਰਾਬਾਦ ਨੂੰ ਤੀਸਰਾ ਝਟਕਾ, ਦੀਪਕ ਹੁੱਡਾ ਇੱਕ ਦੌੜ ਬਣਾ ਕੇ ਆਊਟ
. . .  about 1 hour ago
ਹੋਰ ਖ਼ਬਰਾਂ..
  •     Confirm Target Language  

ਨਾਰੀ ਸੰਸਾਰ

ਕਿੰਨੇ ਕੁ ਦੋਸਤ ਹਨ ਤੁਹਾਡੇ ਜਵਾਨ ਹੁੰਦੇ ਬੱਚੇ ਦੇ...

ਜੇਕਰ ਤੁਹਾਡਾ ਬੱਚਾ ਸਕੂਲ, ਟਿਊਸ਼ਨ ਜਾਂ ਕਿਸੇ ਖੇਡ ਮੈਦਾਨ/ਕਲੱਬ ਆਦਿ 'ਚ ਜਾ ਰਿਹਾ ਹੈ ਤਾਂ ਉਸ 'ਤੇ ਨਜ਼ਰ ਰੱਖੋ। ਇਸ ਦੇ ਲਈ ਜਿਥੇ ਹੋਰ ਪੱਖਾਂ ਤੋਂ ਨਜ਼ਰ ਰੱਖਣ ਦੀ ਜ਼ਰੂਰਤ ਹੈ, ਉਥੇ ਇਸ ਗੱਲ ਵੱਲ ਖਾਸ ਧਿਆਨ ਦੀ ਵੀ ਲੋੜ ਹੈ ਕਿ ਤੁਹਾਡਾ ਜਵਾਨ ਹੁੰਦਾ ਬੱਚਾ ਕਿੰਨੇ ਕੁ ਦੋਸਤ ਬਣਾ ਰਿਹਾ ਹੈ। ਚੰਗਾ, ਸੱਚਾ ਤੇ ਇਮਾਨਦਾਰ ਦੋਸਤ ਇਕ ਵੀ ਬਹੁਤ ਹੁੰਦਾ ਹੈ। ਪਰ ਦੋਸਤ ਇਕ ਦੀ ਬਜਾਏ ਦੋ ਵੀ ਹੋ ਸਕਦੇ ਹਨ। ਆਮ ਵੇਖਣ 'ਚ ਆਉਂਦਾ ਹੈ ਕਿ ਜਵਾਨ ਹੁੰਦੇ ਬੱਚੇ ਖਾਸ ਕਰਕੇ ਲੜਕੇ ਬਹੁਤ ਜ਼ਿਆਦਾ ਦੋਸਤ ਬਣਾ ਲੈਂਦੇ ਹਨ, ਜੋ ਕਿ ਠੀਕ ਨਹੀਂ ਹੈ। ਜੇਕਰ ਦੋਸਤਾਂ ਦੀ ਗਿਣਤੀ ਜ਼ਿਆਦਾ ਵਧ ਜਾਵੇਗੀ ਤਾਂ ਤੁਹਾਡੇ ਬੱਚੇ ਦਾ ਧਿਆਨ ਵੀ ਜ਼ਿਆਦਾ ਭਾਗਾਂ 'ਚ ਵੰਡ ਜਾਵੇਗਾ। ਅਜਿਹਾ ਹੋਣ ਨਾਲ ਉਸ ਦਾ ਰੁਝੇਵਾਂ ਵਧੇਗਾ ਅਤੇ ਉਹ ਸਮੇਂ ਦੀ ਬਰਬਾਦੀ ਵੀ ਕਰੇਗਾ। ਇਸ ਲਈ ਬਹੁਤ ਜ਼ਰੂਰੀ ਹੈ ਕਿ ਸਭ ਤੋਂ ਪਹਿਲਾਂ ਇਸ ਪੱਖ ਨੂੰ ਦੇਖਿਆ ਜਾਵੇ ਕਿ ਤੁਹਾਡਾ ਬੱਚਾ ਜਿਸ ਬੱਚੇ ਨਾਲ ਦੋਸਤੀ ਬਣਾ ਰਿਹਾ ਹੈ, ਉਹ ਕਿਹੋ ਜਿਹਾ ਹੈ। ਇਸ ਦੇ ਲਈ ਤੁਸੀਂ ਅਮੀਰੀ-ਗਰੀਬੀ ਦਾ ਮੁਲਾਂਕਣ ਨਹੀਂ ਕਰਨਾ, ਸਗੋਂ ਇਹ ਦੇਖਣਾ ਹੈ ਕਿ ਤੁਹਾਡੇ ਬੱਚੇ ਦੇ ਦੋਸਤ ਦਾ ਸੁਭਾਅ ਤੇ ਆਦਤਾਂ ਕਿਹੋ ਜਿਹੀਆਂ ਹਨ। ਉਹ ਪੜ੍ਹਾਈ 'ਚ ਕਿਹੋ ਜਿਹਾ ਹੈ।
ਇਹ ਵੀ ਖਾਸ ਧਿਆਨ ਰੱਖਿਆ ਜਾਵੇ ਕਿ ਤੁਹਾਡੇ ਬੱਚੇ ਦਾ ਦੋਸਤ ਉਸ ਤੋਂ ਜ਼ਿਆਦਾ ਵੱਡੀ ਉਮਰ ਦਾ ਤਾਂ ਨਹੀਂ, ਕਿਉਂਕਿ ਅਜਿਹਾ ਹੋਣ ਨਾਲ ਤੁਹਾਡੇ ਬੱਚੇ ਦੀਆਂ ਆਦਤਾਂ ਅਤੇ ਸੁਭਾਅ 'ਚ ਸਮੇਂ ਤੋਂ ਪਹਿਲਾਂ ਹੀ ਜ਼ਿਆਦਾ ਤੇਜ਼ੀ ਆ ਸਕਦੀ ਹੈ। ਇਸ ਨਾਲ ਉਸ ਦੀ ਪੜ੍ਹਾਈ ਅਤੇ ਵਿਵਹਾਰ 'ਤੇ ਅਸਰ ਪੈ ਸਕਦਾ ਹੈ। ਬੱਚਿਆਂ ਦਾ ਮਨ ਬਹੁਤ ਕੋਮਲ ਹੁੰਦਾ ਹੈ, ਇਸ ਲਈ ਤੁਹਾਡੇ ਲਈ ਜ਼ਰੂਰੀ ਹੈ ਕਿ ਤੁਸੀਂ ਆਪਣੇ ਬੱਚੇ ਨਾਲ ਖੁਦ ਦੋਸਤਾਨਾ ਸਬੰਧ ਰੱਖਦੇ ਹੋਏ ਉਸ ਦੇ ਦੋਸਤਾਂ ਦੀ ਗਿਣਤੀ ਸੀਮਤ ਰੱਖਣ ਲਈ ਉਸ ਨੂੰ ਤਿਆਰ ਕਰੋ। ਇਸ ਲਈ ਬੱਚੇ ਉਪਰ ਕੋਈ ਦਬਾਅ ਪਾਉਣ ਜਾਂ ਸਖ਼ਤੀ ਵਰਤਣ ਦੀ ਜ਼ਰੂਰਤ ਨਹੀਂ, ਸਗੋਂ ਪਿਆਰ ਨਾਲ ਅਤੇ ਉਸ ਨੂੰ ਬਿਨਾਂ ਅਹਿਸਾਸ ਦਿਵਾਏ ਤੁਸੀਂ ਖੁਦ ਵੀ ਚੰਗਾ ਦੋਸਤ ਚੁਣਨ ਲਈ ਆਪਣੇ ਬੱਚੇ ਦੀ ਅਸਿੱਧੇ ਢੰਗ ਨਾਲ ਮਦਦ ਕਰ ਸਕਦੇ ਹੋ। ਇਥੋਂ ਤੱਕ ਕਿ ਬੱਚੇ ਦੇ ਬਣ ਰਹੇ ਦੋਸਤ ਦੇ ਮਾਪਿਆਂ ਨਾਲ ਮਿਲ ਕੇ ਤੁਸੀਂ ਉਨ੍ਹਾਂ ਨਾਲ ਵੀ ਚੰਗੇ ਸਬੰਧ ਬਣਾ ਸਕਦੇ ਹੋ। ਜੇਕਰ ਤੁਹਾਡੇ ਬੱਚੇ ਦੇ ਦੋਸਤ ਦੇ ਪਰਿਵਾਰ ਅਤੇ ਤੁਹਾਡੇ ਵਿਚਾਰਾਂ ਵਿਚ ਸਮਾਨਤਾ ਹੈ ਤਾਂ ਇਹ ਹੋਰ ਵੀ ਵਧੀਆ ਹੋ ਸਕਦਾ ਹੈ।


-ਵਰਸੋਲਾ (ਗੁਰਦਾਸਪੁਰ)। ਮੋਬਾ: 84379-25062


ਖ਼ਬਰ ਸ਼ੇਅਰ ਕਰੋ

ਪੁਰਸ਼ ਪ੍ਰਧਾਨ ਸਮਾਜ 'ਚ ਔਰਤ ਨੂੰ ਖੁਦ ਹੀ ਬੰਨ੍ਹਣੇ ਪੈਣੇ ਆਪਣੀ ਸੁਰੱਖਿਆ ਦੇ ਘੇਰੇ

ਸਾਡੇ ਦੇਸ਼ 'ਚ ਵੈਸੇ ਤਾਂ ਅਨੇਕਾਂ ਹੀ ਗੰਭੀਰ ਮਸਲੇ ਹਨ, ਜੋ ਸਮੇਂ ਦੀਆਂ ਸਰਕਾਰਾਂ ਲਈ ਚੁਣੌਤੀ ਬਣਦੇ ਹਨ। ਇਨ੍ਹਾਂ ਵਿਚੋਂ ਇਕ ਗੰਭੀਰ ਮੁੱਦਾ ਔਰਤਾਂ ਦੀ ਸੁਰੱਖਿਆ ਦਾ ਵੀ ਹੈ। ਔਰਤ ਦੇਵੀ ਦਾ ਰੂਪ ਮੰਨੀ ਜਾਂਦੀ ਹੈ, ਜਗਤ ਜਨਨੀ ਹੈ, ਫਿਰ ਕਿਉਂ ਇਸ ਨੂੰ ਸੁਰੱਖਿਆ ਦੀ ਲੋੜ ਹੈ? ਮੁੱਢਕਦੀਮ ਤੋਂ ਹੀ ਘਰ ਦੀ ਚਾਰਦੀਵਾਰੀ 'ਚ ਕੈਦ ਰਹੀ ਔਰਤ ਸਾਰੇ ਘਰ-ਪਰਿਵਾਰ ਨੂੰ ਸੰਭਾਲਦੀ ਰਹੀ। ਪਹਿਲਾਂ ਲੜਕੀ ਪੈਦਾ ਹੋਣ 'ਤੇ ਔਰਤ ਨੂੰ ਤਾਹਨੇ-ਮਿਹਣੇ ਦਿੱਤੇ ਜਾਂਦੇ ਸਨ। ਜ਼ਮਾਨੇ ਦੇ ਬਦਲਾਅ ਨਾਲ ਅੱਜ ਆਧੁਨਿਕਤਾ ਦੇ ਦੌਰ 'ਚ ਮੁੱਦਾ ਔਰਤ ਦੀ ਸੁਰੱਖਿਆ ਦਾ ਹੋਰ ਵੀ ਗੰਭੀਰ ਹੋ ਗਿਆ ਹੈ। ਔਰਤਾਂ ਨਾਲ ਹੁੰਦੇ ਅਪਰਾਧਾਂ ਦੀ ਸੰਖਿਆ ਅਤੇ ਤਰੀਕਿਆਂ ਵਿਚ ਕਮੀ ਦੀ ਜਗ੍ਹਾ ਵਾਧਾ ਹੋਇਆ ਹੈ। ਅੱਜ ਦੇ ਯੁੱਗ ਵਿਚ ਔਰਤ ਨਾ ਘਰ ਵਿਚ ਸੁਰੱਖਿਅਤ ਹੈ ਤੇ ਨਾ ਹੀ ਬਾਹਰ। ਘਰ ਦੀ ਚਾਰਦੀਵਾਰੀ ਵਿਚ ਵੀ ਉਸ ਨਾਲ ਘਿਨੌਣੇ ਅਪਰਾਧ ਹੋ ਰਹੇ ਹਨ। ਔਰਤ ਅੱਜ ਹਰ ਮੁਕਾਮ ਹਾਸਲ ਕਰਨ 'ਚ ਅੱਵਲ ਹੈ। ਫਿਰ ਕਿਉਂ ਉਸ ਨੂੰ ਆਪਣੀ ਸੁਰੱਖਿਆ ਲਈ ਕਿਸੇ ਮਰਦ ਜਾਂ ਸਰਕਾਰਾਂ ਦੀ ਲੋੜ ਹੈ। ਔਰਤ ਹੋਵੇ ਜਾਂ ਲੜਕੀ, ਉਸ ਨੂੰ ਥੋੜ੍ਹੀ ਜਿਹੀ ਜਾਗਰੂਕਤਾ ਖੁਦ ਹੀ ਆਪਣੇ ਅੰਦਰ ਰੱਖਣੀ ਪੈਂਦੀ ਹੈ, ਤਾਂ ਜੋ ਕੋਈ ਉਸ ਦਾ ਸ਼ੋਸ਼ਣ ਨਾ ਕਰ ਸਕੇ। ਲੜਕੀਆਂ (ਔਰਤਾਂ) ਸੁਚੇਤ ਹੋ ਕੇ ਰਹਿਣ, ਬਿਨਾਂ ਵਜ੍ਹਾ ਜ਼ਿਆਦਾ ਕਿਸੇ ਨਾਲ ਦੋਸਤੀ ਰੱਖਣ ਤੋਂ ਪ੍ਰਹੇਜ਼ ਹੀ ਰੱਖਣ। ਕੰਮ-ਕਾਜ 'ਤੇ ਜਾਂਦੇ ਸਮੇਂ ਰਸਤੇ 'ਚ ਵੀ ਅਣਜਾਣ ਲੋਕਾਂ ਤੋਂ ਸਾਵਧਾਨ ਰਹਿਣ ਦੀ ਲੋੜ ਹੈ। ਕੰਮਕਾਰ ਵਾਲੀ ਜਗ੍ਹਾ 'ਤੇ ਵੀ ਪੁਰਸ਼ਾਂ ਨਾਲ ਕੰਮਕਾਰ ਤੱਕ ਹੀ ਸੀਮਤ ਗੱਲਬਾਤ ਕਰਨ। ਜ਼ਿਆਦਾ ਲੋੜ ਇਸ ਵਕਤ ਘਰ 'ਚ ਹਰੇਕ ਔਰਤ ਨੂੰ ਆਪਣੀ ਜਵਾਨ ਹੁੰਦੀ ਧੀ ਨੂੰ ਸੁਰੱਖਿਆ ਵਾਸਤੇ ਸਮਝਾਉਣ ਦੀ ਹੈ। ਸਕੂਲ ਜਾਂ ਕਾਲਜ ਜਾਂਦੇ ਸਮੇਂ ਜ਼ਿਆਦਾ ਦੋਸਤਾਂ ਜਾਂ ਸਹੇਲੀਆਂ ਨਾਲ ਸਮਾਂ ਨਾ ਗੁਜ਼ਾਰਨ। ਜਦ ਵੀ ਕੋਈ ਗ਼ਲਤ ਹਰਕਤ ਕਰਨ ਦੀ ਕੋਸ਼ਿਸ਼ ਕਰੇ, ਉਸ ਨੂੰ ਖੁਦ ਹਿੰਮਤ ਕਰਕੇ ਕਰਾਰਾ ਜਵਾਬ ਦੇਣ। ਘਰ ਵਿਚ ਵੀ ਸਾਰਿਆਂ ਵਲੋਂ ਕੁੜੀਆਂ ਨੂੰ ਦੋਸਤਾਨਾ ਮਾਹੌਲ ਮਿਲੇ, ਤਾਂ ਜੋ ਉਹ ਹਰ ਗੱਲ ਬਿਨਾਂ ਝਿਜਕ ਸਭ ਨਾਲ ਕਰ ਸਕਣ। ਸਮੇਂ-ਸਮੇਂ ਸਿਰ ਸਰਕਾਰਾਂ ਨੇ ਕਈ ਕਾਨੂੰਨ ਤੇ ਕਈ ਹੈਲਪਲਾਈਨ ਨੰਬਰ ਵੀ ਔਰਤਾਂ ਵਾਸਤੇ ਜਾਰੀ ਕੀਤੇ ਹਨ ਜੋ ਕਿ ਬਹੁਤ ਚੰਗੀ ਗੱਲ ਹੈ। ਫਿਰ ਵੀ ਔਰਤਾਂ ਨੂੰ ਆਪਣੇ ਆਲੇ-ਦੁਆਲੇ ਇਕ ਸੁਰੱਖਿਆ ਲਾਈਨ ਖਿੱਚ ਕੇ ਰੱਖਣੀ ਚਾਹੀਦੀ ਹੈ। ਉਸ ਦਾਇਰੇ ਵਿਚ ਰਹਿ ਕੇ ਵੀ ਔਰਤ ਆਪਣੀ ਸਫਲਤਾ ਦੀ ਉੱਚੀ ਉਡਾਨ ਭਰ ਸਕਦੀ ਹੈ। ਮਰਦ ਪ੍ਰਧਾਨ ਸਮਾਜ ਵਿਚ ਹੁਣ ਔਰਤ ਆਪਣੀ ਇਕ ਵੱਖਰੀ ਪਹਿਚਾਣ ਦਾਖਲ ਕਰ ਚੁੱਕੀ ਹੈ। ਆਪਣੇ ਅੰਦਰ ਦੀ ਸ਼ਕਤੀ ਨੂੰ ਪਹਿਚਾਣੇ ਔਰਤ ਅਤੇ ਖੁਦ ਵੀ ਆਪਣੀ ਸੁਰੱਖਿਆ ਲਈ ਅੱਗੇ ਆਵੇ ਔਰਤ, ਫਿਰ ਇਹ ਨਾ ਕਹਿਣਾ ਪਵੇ-
ਔਰਤ ਦੀ ਸੁਰੱਖਿਆ ਦਾ ਮੁੱਦਾ ਅੱਜ ਗੰਭੀਰ ਹੈ 'ਜੱਸ' ਸਮਾਜ ਅੰਦਰ,
ਜੋ ਕਦੀ ਚੰਡੀ, ਦੁਰਗਾ ਤੇ ਲਕਸ਼ਮੀ ਬਾਈ ਬਣ ਦੁਸ਼ਟ ਸੰਹਾਰਦੀ ਸੀ।


-ਸੈਕਟਰ 3, ਤਲਵਾੜਾ ਟਾਊਨਸ਼ਿਪ (ਹੁਸ਼ਿਆਰਪੁਰ)। ਮੋਬਾ: 99146-10729

ਅੱਖਾਂ ਦੀ ਖੂਬਸੂਰਤੀ ਲਈ ਪਲਕਾਂ ਨਿਭਾਉਂਦੀਆਂ ਨੇ ਅਹਿਮ ਰੋਲ

* ਪਲਕਾਂ ਸਿਰਫ ਸਾਡੀ ਅੱਖਾਂ ਦੀ ਸੁੰਦਰਤਾ ਹੀ ਨਹੀਂ ਵਧਾਉਂਦੀਆ, ਬਲਕਿ ਮਿੱਟੀ-ਘੱਟੇ ਤੋਂ ਵੀ ਅੱਖਾਂ ਦੀ ਰੱਖਿਆ ਕਰਦੀਆਂ ਹਨ। ਇਸ ਲਈ ਇਨ੍ਹਾਂ ਦੀ ਦੇਖਭਾਲ ਲਈ ਰਾਤ ਨੂੰ ਸੌਣ ਤੋਂ ਪਹਿਲਾਂ ਬਦਾਮ ਦੇ ਤੇਲ ਨਾਲ, ਹਲਕੇ ਹੱਥਾਂ ਨਾਲ ਆਈ ਲੈਸ਼ ਦੀ ਮਾਲਿਸ਼ ਕਰੋ। * ਸਿਰ ਦੇ ਵਾਲਾਂ ਦੀ ਸਿਕਰੀ ਵੀ ਪਲਕਾਂ ਨੂੰ ਨੁਕਸਾਨ ਪਹੁੰਚਾਉਂਦੀ ਹੈ, ਇਸ ਨਾਲ ਪਲਕਾਂ ਦੇ ਵਾਲ ਝੜਨ ਲਗਦੇ ਹਨ। ਇਸ ਲਈ ਪਲਕਾਂ ਨੂੰ ਤੰਦਰੁਸਤ ਰੱਖਣ ਲਈ ਸਭ ਤੋਂ ਪਹਿਲਾਂ ਵਾਲਾਂ ਨੂੰ ਸਿਕਰੀ ਤੋਂ ਮੁਕਤ ਕਰੋ।
* ਆਈ-ਲੈਬਜ਼ ਨੂੰ ਸੰਘਣਾ ਅਤੇ ਘੁੰਗਰਾਲੀ ਦਿੱਖ ਦੇਣ ਲਈ ਪਲਕਾਂ 'ਤੇ ਮਸਕਾਰਾ ਜੜ੍ਹਾਂ ਤੋਂ ਸਿਰਿਆਂ ਵੱਲ ਨੂੰ ਲਗਾਓ। ਧਿਆਨ ਰੱਖੋ ਕਿ ਪਹਿਲਾ ਕੋਟ ਸੁੱਕਣ 'ਤੇ ਹੀ ਦੂਜਾ ਕੋਟ ਲਗਾਓ।
* ਪਲਕਾਂ ਨੂੰ ਕਰਲ ਕਰਨ ਲਈ ਰੰਗ ਦਾ ਇਸਤੇਮਾਲ ਕਰੋ। ਇਸ ਦੇ ਲਈ ਪਹਿਲਾਂ ਮਸਕਾਰੇ ਨੂੰ ਮੇਕਅੱਪ ਰਿਮੂਵਰ ਨਾਲ ਸਾਫ ਕਰੋ, ਫਿਰ ਰੰਗ ਲਗਾਓ, ਨਹੀਂ ਤਾਂ ਪਲਕਾਂ ਟੁੱਟਣ ਦਾ ਡਰ ਰਹਿੰਦਾ ਹੈ।
* ਜੇਕਰ ਤੁਹਾਡੀਆ ਅੱਖਾਂ ਛੋਟੀਆਂ ਹਨ ਤਾਂ ਆਈ-ਲੇਸ਼ਜ਼ ਦੇ ਨਾਲ ਪਲਕਾਂ 'ਤੇ ਆਈ ਲਾਈਨਰ ਮੋਟਾ ਲਗਾਓ ਅਤੇ ਜੇਕਰ ਪਲਕਾਂ ਛੋਟੀਆਂ ਅਤੇ ਸੰਘਣੀਆਂ ਹਨ ਤਾਂ ਲੰਬਾ ਮਸਕਾਰਾ ਲਗਾਓ। ਅੱਖਾਂ ਵੱਡੀਆਂ ਲੱਗਣਗੀਆਂ। * ਨਕਲੀ ਆਈ ਲੈਸ਼ਜ਼ ਲਗਾ ਕੇ ਵੀ ਤੁਸੀਂ ਆਪਣੀਆਂ ਅੱਖਾਂ ਨੂੰ ਵੱਡੀ ਦਿੱਖ ਦੇ ਸਕਦੇ ਹੋ ਪਰ ਧਿਆਨ ਰਹੇ ਕਿ ਰਾਤ ਨੂੰ ਸੌਣ ਤੋਂ ਪਹਿਲਾਂ ਇਨ੍ਹਾਂ ਨੂੰ ਹਟਾਉਣਾ ਨਾ ਭੁੱਲੋ।


-ਗੁਰਭਿੰਦਰ ਗੁਰੀ
ਮੋਬਾ: 99157-27311

ਕੱਪੜੇ ਧੋਂਦੇ ਸਮੇਂ ਕਿਨ੍ਹਾਂ-ਕਿਨ੍ਹਾਂ ਗੱਲਾਂ ਦਾ ਧਿਆਨ ਰੱਖੀਏ?

ਮੈਲੇ ਕੱਪੜਿਆਂ ਨੂੰ ਧੋਣ ਲਈ ਡਿਟਰਜੈਂਟ ਵਿਚ ਭਿਉਣ ਤੋਂ ਪਹਿਲਾਂ ਜੇਬਾਂ ਦੀ ਜਾਂਚ ਨਾ ਕਰਨੀ, ਸਫ਼ੈਦ ਕੱਪੜਿਆਂ 'ਤੇ ਰੰਗੀਨ ਕੱਪੜਿਆਂ ਦਾ ਰੰਗ ਚੜ੍ਹਨਾ, ਨਵੇਂ ਕੱਪੜਿਆਂ ਦਾ ਸੁੰਗੜ ਕੇ ਛੋਟੇ ਹੋ ਜਾਣਾ, ਇਸ ਤਰ੍ਹਾਂ ਦੀਆਂ ਕਈ ਗ਼ਲਤੀਆਂ ਅਸੀਂ ਕੱਪੜੇ ਧੋਣ ਦੌਰਾਨ ਕਰਦੇ ਹਾਂ। ਭਾਵੇਂ ਅਸੀਂ ਇਸ ਗੱਲ ਦਾ ਦਾਅਵਾ ਕਰਦੇ ਹਾਂ ਕਿ ਮੈਂ ਕਿੰਨੇ ਸਾਲਾਂ ਤੋਂ ਕੱਪੜੇ ਧੋ ਰਹੀ ਹਾਂ। ਇਸ ਦੇ ਬਾਵਜੂਦ ਗ੍ਰਹਿਣੀਆਂ ਕਈ ਅਜਿਹੀਆਂ ਗ਼ਲਤੀਆਂ ਕਰਦੀਆਂ ਹਨ, ਜਿਨ੍ਹਾਂ ਨਾਲ ਮਹਿੰਗੇ ਕੱਪੜੇ ਖ਼ਰਾਬ ਹੋ ਜਾਂਦੇ ਹਨ। ਅਜਿਹੀਆਂ ਕਿਹੜੀਆਂ ਗ਼ਲਤੀਆਂ ਆਮ ਤੌਰ 'ਤੇ ਉਹ ਕਰਦੀਆਂ ਹਨ ਅਤੇ ਇਨ੍ਹਾਂ ਨੂੰ ਸੁਧਾਰਨ ਲਈ ਕੀ ਕੀਤਾ ਜਾਵੇ, ਆਓ ਜਾਣੀਏ-
ਡ੍ਰਾਈਕਲੀਨਿੰਗ ਵਾਲੇ ਕੱਪੜਿਆਂ ਨੂੰ ਘਰ ਧੋਣਾ : ਜੜਾਊ ਕੱਪੜੇ, ਲੈਦਰ ਜਾਂ ਜਿਨ੍ਹਾਂ ਕੱਪੜਿਆਂ ਨੂੰ ਸਿਰਫ ਡ੍ਰਾਈਕਲੀਨ ਹੀ ਕਰਵਾਉਣਾ ਹੋਵੇ, ਉਨ੍ਹਾਂ ਨੂੰ ਜੇ ਘਰ ਧੋ ਲਿਆ ਜਾਂਦਾ ਹੈ। ਇਸ ਲਈ ਕੱਪੜੇ ਨੂੰ ਖਰੀਦ ਕੇ ਲਿਆਉਣ ਤੋਂ ਬਾਅਦ ਉਸ 'ਤੇ ਲੱਗੇ ਟੈਗ ਉੱਤੋਂ ਦੇਖ ਲਓ ਕਿ ਕੀ ਇਹ ਡ੍ਰਾਈਕਲੀਨਿੰਗ ਕਰਵਾਉਣ ਵਾਲਾ ਹੀ ਹੈ ਜਾਂ ਇਸ ਨੂੰ ਘਰ ਵੀ ਧੋਇਆ ਜਾ ਸਕਦਾ ਹੈ।
ਧੋਣ ਤੋਂ ਪਹਿਲਾਂ ਕੱਪੜਿਆਂ ਦੀ ਛਟਾਈ ਕਰੋ : ਜ਼ਿਆਦਾ ਗੰਦੇ ਅਤੇ ਘੱਟ ਗੰਦੇ ਕੱਪੜਿਆਂ ਨੂੰ ਇਕੱਠੇ ਧੋਣ ਨਾਲ ਘੱਟ ਗੰਦੇ ਕੱਪੜਿਆਂ ਵਿਚ ਮੈਲੇ ਕੱਪੜਿਆਂ ਦੀ ਗੰਦਗੀ ਚਲੀ ਜਾਂਦੀ ਹੈ ਜਾਂ ਮੋਟੇ ਕੱਪੜਿਆਂ ਨੂੰ ਨਾਜ਼ੁਕ ਅਤੇ ਨਰਮ ਕੱਪੜਿਆਂ ਦੇ ਨਾਲ ਧੋਣ ਨਾਲ ਵੀ ਉਹ ਖ਼ਰਾਬ ਹੋ ਜਾਂਦੇ ਹਨ। ਚਾਦਰ, ਤੌਲੀਏ ਵਰਗੇ ਵੱਡੇ ਅਤੇ ਮੋਟੇ ਕੱਪੜੇ ਵੱਖਰੇ ਧੋਣੇ ਚਾਹੀਦੇ ਹਨ। ਅੰਡਰਵਿਅਰ, ਜੁਰਾਬਾਂ ਅਤੇ ਰੁਮਾਲ, ਇਨ੍ਹਾਂ ਸਭ ਨੂੰ ਵੱਖ-ਵੱਖ ਧੋਣਾ ਚਾਹੀਦਾ ਹੈ।
ਜਿਪ ਅਤੇ ਬਟਨਾਂ ਦਾ ਰੱਖੋ ਖਿਆਲ : ਖੁੱਲ੍ਹੀ ਜਿਪ ਜਾਂ ਕਮਜ਼ੋਰ ਧਾਗੇ 'ਤੇ ਲਟਕੇ ਬਟਨ ਧੋਂਦੇ ਸਮੇਂ ਵਾਸ਼ਿੰਗ ਮਸ਼ੀਨ ਵਿਚ ਫਸ ਜਾਂਦੇ ਹਨ। ਖੁੱਲ੍ਹੀ ਜਿਪ ਫਰੰਟ ਲੋਡਿੰਗ ਮਸ਼ੀਨ ਦੇ ਦਰਵਾਜ਼ੇ 'ਤੇ ਝਰੀਟ ਲਗਾ ਸਕਦੀ ਹੈ। ਧੋਣ ਤੋਂ ਪਹਿਲਾਂ ਢਿੱਲੇ ਬਟਨਾਂ ਨੂੰ ਸੂਈ ਨਾਲ ਮਜ਼ਬੂਤ ਕਰ ਲੈਣਾ ਚਾਹੀਦਾ ਹੈ। ਧੋਂਦੇ ਸਮੇਂ ਕੱਪੜਿਆਂ ਦੀ ਜਿਪ ਬੰਦ ਕਰ ਦੇਣੀ ਚਾਹੀਦੀ ਹੈ।
ਕੱਪੜਿਆਂ ਦਾ ਰੰਗ ਇਕ-ਦੂਜੇ 'ਤੇ ਚੜ੍ਹਨਾ : ਅਕਸਰ ਕੱਪੜੇ ਧੋਂਦੇ ਸਮੇਂ ਇਹ ਧਿਆਨ ਨਹੀਂ ਰਹਿੰਦਾ ਜਾਂ ਜਿਸ ਕੱਪੜੇ ਦਾ ਰੰਗ ਲੱਥਦਾ ਹੋਵੇ ਉਸ ਦੀ ਪਹਿਲਾਂ ਜਾਂਚ-ਪਰਖ ਕਰਨ ਦੀ ਲੋੜ ਹੀ ਨਹੀਂ ਸਮਝੀ ਜਾਂਦੀ ਅਤੇ ਉਸ ਨੂੰ ਦੂਜੇ ਹੋਰ ਕੱਪੜਿਆਂ ਦੇ ਨਾਲ ਵਾਸ਼ਿੰਗ ਮਸ਼ੀਨ ਵਿਚ ਪਾ ਦਿੱਤਾ ਜਾਂਦਾ ਹੈ, ਜਿਸ ਕਾਰਨ ਉਸ ਦਾ ਰੰਗ ਚਿੱਟੇ ਜਾਂ ਦੂਜੇ ਕੱਪੜਿਆਂ ਨੂੰ ਚੜ੍ਹ ਜਾਂਦਾ ਹੈ। ਇਸ ਲਈ ਜਿਸ ਕੱਪੜੇ ਦਾ ਰੰਗ ਲੱਥਣ ਦੀ ਸੰਭਾਵਨਾ ਹੋਵੇ, ਉਸ ਨੂੰ ਵੱਖਰਾ ਧੋਣਾ ਚਾਹੀਦਾ ਹੈ।
ਜ਼ਿਆਦਾ ਡਿਟਰਜੈਂਟ ਦੀ ਵਰਤੋਂ ਕਰਨਾ : ਕਈ ਲੋਕ ਕੱਪੜਿਆਂ ਦੀ ਮੈਲ ਛੇਤੀ ਸਾਫ਼ ਕਰਨ ਲਈ ਉਨ੍ਹਾਂ ਵਿਚ ਜ਼ਿਆਦਾ ਡਿਟਰਜੈਂਟ ਦੀ ਵਰਤੋਂ ਕਰਦੇ ਹਨ। ਇਸ ਨਾਲ ਪਾਣੀ ਦੀ ਖਪਤ ਤਾਂ ਜ਼ਿਆਦਾ ਹੁੰਦੀ ਹੀ ਹੈ, ਇਸ ਦੇ ਨਾਲ ਰੰਗੀਨ ਕੱਪੜੇ ਫਿੱਕੇ ਹੋ ਜਾਂਦੇ ਹਨ ਅਤੇ ਜ਼ਿਆਦਾ ਡਿਟਰਜੈਂਟ ਨਾਲ ਮਸ਼ੀਨ ਵਿਚ ਬੈਕਟੀਰੀਆ ਪੈਦਾ ਹੋ ਜਾਂਦੇ ਹਨ। ਉਨ੍ਹਾਂ ਥਾਵਾਂ ਵਿਚ ਜਿਥੇ ਸਾਬਣ ਦਾ ਪਾਣੀ ਜੰਮ ਜਾਂਦਾ ਹੈ ਅਤੇ ਜਿਥੇ ਸਫ਼ਾਈ ਨਹੀਂ ਹੁੰਦੀ। ਕੱਪੜੇ ਦੇ ਪਲੇਟਸ ਅਤੇ ਕਾਲਰ ਵਿਚ ਜਮ੍ਹਾਂ ਡਿਟਰਜੈਂਟ ਵਾਰ-ਵਾਰ ਧੋਣ ਦੇ ਬਾਵਜੂਦ ਨਿਕਲਦੇ ਨਹੀਂ, ਜਿਸ ਨਾਲ ਕੱਪੜੇ ਵਿਚੋਂ ਡਿਟਰਜੈਂਟ ਦੀ ਖੁਸ਼ਬੂ ਆਉਂਦੀ ਹੈ ਅਤੇ ਉਸ ਦੇ ਨਾਜ਼ੁਕ ਤੰਤੁ ਵੀ ਖ਼ਰਾਬ ਹੋ ਜਾਂਦੇ ਹਨ।
ਵਾਰ-ਵਾਰ ਬਲੀਚ ਦੀ ਵਰਤੋਂ ਕਰਨਾ : ਸਫ਼ੈਦ ਕੱਪੜੇ ਦੀ ਸਫ਼ੈਦੀ ਨੂੰ ਬਣਾਈ ਰੱਖਣ ਲਈ ਕਦੇ-ਕਦੇ ਬਲੀਚ ਕਰਨਾ ਠੀਕ ਹੈ ਪਰ ਇਨ੍ਹਾਂ ਨੂੰ ਵਾਰ-ਵਾਰ ਬਲੀਚ ਕਰਨ ਨਾਲ ਇਹ ਪੀਲੇ ਹੋ ਜਾਂਦੇ ਹਨ। ਇਨ੍ਹਾਂ ਕੱਪੜਿਆਂ ਤੋਂ ਖੂਨ ਅਤੇ ਪਸੀਨੇ ਦੇ ਦਾਗ਼ ਹਟਾਉਣ ਲਈ ਦਾਗ਼ ਵਾਲੀ ਜਗ੍ਹਾ 'ਤੇ ਨਿੰਬੂ ਰਗੜੋ ਅਤੇ ਉਸ ਨੂੰ ਥੋੜ੍ਹੀ ਦੇਰ ਤੱਕ ਉਬਲਦੇ ਪਾਣੀ ਵਿਚ ਡੁਬੋ ਕੇ ਰੱਖੋ।
ਕੱਪੜਿਆਂ ਨੂੰ ਜ਼ਿਆਦਾ ਰਗੜਨਾ : ਜ਼ਿਆਦਾ ਰਗੜਨ ਨਾਲ ਕੱਪੜੇ ਜ਼ਿਆਦਾ ਸਾਫ਼ ਹੁੰਦੇ ਹਨ, ਕਈ ਲੋਕ ਇਹ ਸੋਚ ਕੇ ਉਨ੍ਹਾਂ ਨੂੰ ਵਾਰ-ਵਾਰ ਜ਼ਿਆਦਾ ਰਗੜਦੇ ਹਨ, ਜਿਸ ਕਾਰਨ ਦਾਗ਼-ਧੱਬੇ ਨੂੰ ਜਿਥੋਂ ਰਗੜਿਆ ਜਾਂਦਾ ਹੈ, ਉਸ ਜਗ੍ਹਾ ਦੇ ਤੰਤੁ ਜ਼ਿਆਦਾ ਕਮਜ਼ੋਰ ਹੋ ਜਾਂਦੇ ਹਨ ਅਤੇ ਕੱਪੜਾ ਉਥੋਂ ਘਸਣ ਦੇ ਨਾਲ-ਨਾਲ ਉਸ ਥਾਂ ਤੋਂ ਰੰਗ ਵੀ ਫਿੱਕਾ ਪੈ ਜਾਂਦਾ ਹੈ। ਇਸ ਲਈ ਕੱਪੜਿਆਂ ਨੂੰ ਨਰਮ ਹੱਥਾਂ ਨਾਲ ਰਗੜਨਾ ਚਾਹੀਦਾ ਹੈ। ਜ਼ਿਆਦਾ ਮੈਲੇ ਹੋਣ 'ਤੇ ਉਨ੍ਹਾਂ ਨੂੰ ਥੋੜ੍ਹੀ ਦੇਰ ਗਰਮ ਪਾਣੀ ਵਿਚ ਭਿਉਂ ਕੇ ਰੱਖੋ ਤਾਂ ਉਹ ਜ਼ਿਆਦਾ ਸਾਫ਼ ਹੁੰਦੇ ਹਨ।
ਮਸ਼ੀਨ ਵਿਚ ਕੱਪੜੇ ਜ਼ਿਆਦਾ ਭਰਨਾ : ਮਸ਼ੀਨ ਦੀ ਸਮਰੱਥਾ ਨਾਲੋਂ ਜੇ ਜ਼ਿਆਦਾ ਕੱਪੜੇ ਉਸ ਵਿਚ ਪਾ ਦਿੱਤੇ ਜਾਂਦੇ ਹਨ ਤਾਂ ਇਸ ਨਾਲ ਮਸ਼ੀਨ ਨੂੰ ਤਾਂ ਨੁਕਸਾਨ ਹੁੰਦਾ ਹੀ ਹੈ, ਇਸ ਦੇ ਨਾਲ ਹੀ ਕੱਪੜੇ ਚੰਗੀ ਤਰ੍ਹਾਂ ਸਾਫ਼ ਵੀ ਨਹੀਂ ਹੁੰਦੇ। ਕੱਪੜਿਆਂ ਨੂੰ ਸਾਫ਼ ਕਰਨ ਲਈ ਉਨ੍ਹਾਂ ਦਾ ਮਸ਼ੀਨ ਵਿਚ ਡਰੱਮ ਦੇ ਇਧਰ-ਉਧਰ ਘੁੰਮਣਾ ਜ਼ਰੂਰੀ ਹੈ ਤਾਂ ਕਿ ਕੱਪੜਿਆਂ ਵਿਚ ਪਾਣੀ ਅਤੇ ਡਿਟਰਜੈਂਟ ਚੰਗੀ ਤਰ੍ਹਾਂ ਧੋ ਕੇ ਉਨ੍ਹਾਂ ਵਿਚ ਜੰਮੀ ਧੂੜ-ਮਿੱਟੀ ਨੂੰ ਸਾਫ਼ ਕਰ ਸਕੇ। ਮਸ਼ੀਨ ਨੂੰ ਜਦੋਂ ਓਵਰਲੋਡ ਕਰਦੇ ਹਾਂ ਤਾਂ ਕੱਪੜਿਆਂ 'ਤੇ ਲੱਗੇ ਦਾਗ਼-ਧੱਬੇ ਵੀ ਸਾਫ਼ ਨਹੀਂ ਹੁੰਦੇ ਅਤੇ ਛੇਤੀ ਦੀ ਬਜਾਏ ਕੰਮ ਦੇਰ ਨਾਲ ਹੁੰਦਾ ਹੈ।
ਕੱਪੜਿਆਂ 'ਤੇ ਸਿੱਧੇ ਡਿਟਰਜੈਂਟ ਪਾਉਣਾ : ਅਕਸਰ ਲੋਕ ਮਸ਼ੀਨ ਵਿਚ ਕੱਪੜੇ ਪਾ ਕੇ ਸਿੱਧਾ ਡਿਟਰਜੈਂਟ ਪਾਉਣ ਤੋਂ ਬਾਅਦ ਉਸ ਵਿਚ ਪਾਣੀ ਪਾਉਂਦੇ ਹਨ। ਇਸ ਦੀ ਬਜਾਏ ਕੱਪੜਿਆਂ ਨੂੰ ਪਹਿਲਾਂ ਪਾਉਣ ਤੋਂ ਬਾਅਦ ਉਸ ਵਿਚ ਪਾਣੀ ਪਾਓ ਅਤੇ ਸਭ ਤੋਂ ਬਾਅਦ ਡਿਟਰਜੈਂਟ ਪਾਓ। ਜੇ ਤੁਸੀਂ ਉਨ੍ਹਾਂ ਵਿਚ ਬਲੀਚ ਦੀ ਵਰਤੋਂ ਕਰ ਰਹੇ ਹੋ ਤਾਂ ਵੀ ਪਾਣੀ ਪਹਿਲਾਂ ਪਾਓ, ਬਾਅਦ ਵਿਚ ਕੱਪੜਾ ਅਤੇ ਫਿਰ ਡਿਟਰਜੈਂਟ ਪਾਓ।
ਡ੍ਰਾਇਰ ਨੂੰ ਓਵਰਲੋਡ ਕਰਨਾ : ਧੁਲਾਈ ਦਾ ਕੰਮ ਛੇਤੀ ਨਿਪਟਾਉਣ ਲਈ ਅਕਸਰ ਡ੍ਰਾਇਰ ਵਿਚ ਜ਼ਿਆਦਾ ਕੱਪੜੇ ਪਾ ਦਿੱਤੇ ਜਾਂਦੇ ਹਨ ਜਾਂ ਉਸ ਨੂੰ ਜ਼ਿਆਦਾ ਸੁਕਾਇਆ ਜਾਂਦਾ ਹੈ। ਇਸ ਕਾਰਨ ਨਾਜ਼ਕ ਕੱਪੜਿਆਂ ਦਾ ਆਕਾਰ ਖ਼ਰਾਬ ਹੋ ਜਾਂਦਾ ਹੈ। ਜੇ ਉਨ੍ਹਾਂ ਨੂੰ ਵਧੇਰੇ ਸੁਕਾ ਲਿਆ ਜਾਂਦਾ ਹੈ ਤਾਂ ਉਨ੍ਹਾਂ ਦੀ ਤਹਿ ਖ਼ਰਾਬ ਹੋ ਜਾਂਦੀ ਹੈ, ਕਿਉਂਕਿ ਡ੍ਰਾਇਰ ਵਿਚ ਉਹ ਗੋਲ ਹੋ ਜਾਂਦੇ ਹਨ ਅਤੇ ਉਨ੍ਹਾਂ ਵਿਚ ਵਲ਼ ਵਧ ਜਾਂਦੇ ਹਨ। ਇਸ ਲਈ ਘੱਟ ਕੱਪੜਿਆਂ ਨੂੰ ਨਿਸਚਿਤ ਸਮੇਂ ਤੱਕ ਡ੍ਰਾਇਰ ਕਰੋ।


-ਇਮੇਜ ਰਿਫਲੈਕਸ਼ਨ ਸੈਂਟਰ

ਇੰਜ ਮਿਟਾਓ ਕੱਪੜਿਆਂ ਤੋਂ ਦਾਗ਼-ਧੱਬੇ

ਕੱਪੜਿਆਂ 'ਤੇ ਦਾਗ਼-ਧੱਬੇ ਲੱਗ ਜਾਣਾ ਇਕ ਆਮ ਗੱਲ ਹੈ। ਇਸ ਨਾਲ ਕੱਪੜਿਆਂ ਦੀ ਖੂਬਸੂਰਤੀ ਖਤਮ ਹੋ ਜਾਂਦੀ ਹੈ ਅਤੇ ਇਹ ਪਾਉਣ ਯੋਗ ਨਹੀਂ ਰਹਿੰਦੇ। ਇਥੇ ਤੁਹਾਨੂੰ ਕਈ ਅਜਿਹੇ ਤਰੀਕੇ ਦੱਸ ਰਹੇ ਹਾਂ, ਜਿਨ੍ਹਾਂ ਨੂੰ ਵਰਤੋਂ ਵਿਚ ਲਿਆ ਕੇ ਤੁਸੀਂ ਆਪਣੇ ਕੱਪੜਿਆਂ 'ਤੇ ਲੱਗੇ ਕਿਸੇ ਵੀ ਚੀਜ਼ ਦੇ ਦਾਗ਼-ਧੱਬਿਆਂ ਨੂੰ ਅਸਾਨੀ ਨਾਲ ਸਾਫ਼ ਕਰ ਸਕਦੇ ਹੋ-
* ਗਰੀਸ ਦੇ ਦਾਗ਼ ਜੇਕਰ ਸੂਤੀ ਕੱਪੜੇ 'ਤੇ ਲੱਗ ਜਾਣ ਤਾਂ ਅਖ਼ਬਾਰ ਦਾ ਟੁਕੜਾ ਜਾਂ ਬਲਟਿੰਗ ਪੇਪਰ ਧੱਬੇ ਦੇ ਹੇਠਾਂ ਰੱਖੋ, ਫਿਰ ਬੇਂਜੀਨ ਕਾਰਬਨ ਟਰਾਕਲੋਰਾਈਡ ਜਾਂ ਕਲੋਰੋਫਾਰਮ ਕੱਪੜੇ ਦੇ ਉਲਟੇ ਪਾਸੇ ਲਗਾਓ। ਦਾਗ਼ ਸਾਫ਼ ਹੋ ਜਾਵੇਗਾ।
* ਜੇਕਰ ਆਂਡੇ ਦੀ ਸਫੇਦੀ ਦਾ ਦਾਗ਼ ਕਿਸੇ ਸੂਤੀ ਕੱਪੜੇ 'ਤੇ ਲੱਗ ਜਾਵੇ ਤਾਂ ਉਸ ਨੂੰ ਸਾਰੀ ਰਾਤ ਇਕ ਫੀਸਦੀ ਸੋਡੀਅਮ ਸਿਲੀਕੇਟ ਦੇ ਘੋਲ ਵਿਚ ਭਿਉਂ ਕੇ ਰੱਖਣ ਨਾਲ ਦਾਗ਼ ਸਾਫ਼ ਹੋ ਜਾਵੇਗਾ। * ਚਾਹ ਦੇ ਦਾਗ਼ ਸਾਫ਼ ਕਰਨ ਲਈ ਗਰਮ ਪਾਣੀ ਵਿਚ ਕੱਪੜੇ ਨੂੰ ਦੋ ਤੋਂ ਚਾਰ ਘੰਟੇ ਤੱਕ ਡੁਬੋ ਕੇ ਰੱਖੋ, ਦਾਗ਼ ਮਿਟ ਜਾਣਗੇ। * ਜੇਕਰ ਊਨੀ ਕੱਪੜਿਆਂ 'ਤੇ ਕੌਫੀ ਆਦਿ ਦਾ ਦਾਗ਼ ਲੱਗ ਜਾਵੇ ਤਾਂ ਇਕ ਭਾਗ ਗਲਿਸਰੀਨ ਅਤੇ ਨੌਂ ਭਾਗ ਪਾਣੀ ਦੇ ਘੋਲ ਨਾਲ ਸਾਫ਼ ਕਰੋ। ਦਾਗ਼ ਜਾਂਦਾ ਰਹੇਗਾ। * ਸਿਆਹੀ ਦੇ ਨਿਸ਼ਾਨ ਮਿਟਾਉਣ ਲਈ ਕੱਪੜੇ ਨੂੰ ਨਿੰਬੂ ਅਤੇ ਲੂਣ ਦੇ ਘੋਲ ਵਿਚ ਭਿਉਂ ਦਿਓ। ਬਾਅਦ ਵਿਚ ਨਿਸ਼ਾਨ ਵਾਲੀ ਜਗ੍ਹਾ 'ਤੇ ਐਸਟਿਕ ਐਸਿਡ ਲਗਾਓ, ਨਿਸ਼ਾਨ ਸਾਫ਼ ਹੋ ਜਾਵੇਗਾ। * ਜੇਕਰ ਕੱਪੜੇ 'ਤੇ ਪਾਨ ਦੇ ਦਾਗ਼ ਲੱਗ ਜਾਣ ਤਾਂ ਕੱਚੇ ਆਲੂ ਨੂੰ ਕੱਟ ਕੇ ਦਾਗ਼ ਵਾਲੀ ਜਗ੍ਹਾ 'ਤੇ ਰਗੜੋ। ਦਾਗ਼ ਹਲਕਾ ਹੋ ਜਾਣ 'ਤੇ ਸਾਬਣ ਨਾਲ ਧੋ ਦਿਓ। ਦਾਗ਼ ਦੂਰ ਹੋ ਜਾਵੇਗਾ।
* ਪੇਂਟ ਦਾ ਦਾਗ਼ ਜੇਕਰ ਰੇਸ਼ਮੀ ਕੱਪੜੇ 'ਤੇ ਪੈ ਜਾਵੇ ਤਾਂ ਦਾਗ਼ ਨੂੰ ਟਰਪੇਟਾਈਨ ਜਾਂ ਤਾਰਪੀਨ ਦੇ ਤੇਲ ਨਾਲ ਸਾਫ਼ ਕਰੋ। ਦਾਗ਼ ਨਹੀਂ ਰਹੇਗਾ। * ਬਬਲਗਮ ਦਾ ਦਾਗ਼ ਕੱਪੜਿਆਂ ਤੋਂ ਉਤਾਰਨ ਲਈ ਸਭ ਤੋਂ ਪਹਿਲਾਂ ਦਾਗ਼ ਵਾਲੀ ਜਗ੍ਹਾ 'ਤੇ ਬਰਫ ਰਗੜੋ, ਫਿਰ ਜੰਮੀ ਹੋਈ ਬਬਲਗਮ ਨੂੰ ਹਟਾਉਣ ਲਈ ਕਾਰਬਨ ਟੈਟ੍ਰਾਕਲੋਰਾਈਡ ਨੂੰ ਵਰਤੋਂ ਵਿਚ ਲਿਆਓ। * ਪਸੀਨੇ ਦਾ ਦਾਗ਼ ਹਟਾਉਣ ਲਈ ਕੱਪੜੇ ਨੂੰ ਸਾਫ਼ ਕਰਨ ਸਮੇਂ ਪਾਣੀ ਵਿਚ ਥੋੜ੍ਹਾ ਜਿਹਾ ਹਾਈਡਡ੍ਰੋਕਲੋਰਿਕ ਐਸਿਡ ਮਿਲਾ ਕੇ ਕੱਪੜੇ ਧੋਵੋ, ਦਾਗ਼ ਮਿਟ ਜਾਵੇਗਾ। * ਜੇਕਰ ਕੱਪੜੇ 'ਤੇ ਖੂਨ ਆਦਿ ਦਾ ਦਾਗ਼ ਲੱਗ ਜਾਂਦਾ ਹੈ ਤਾਂ ਅਮੋਨੀਆ ਦੀਆਂ ਕੁਝ ਬੂੰਦਾਂ ਹਾਈਡ੍ਰੋਜਨ ਪੈਰਾਕਸਾਈਡ ਵਿਚ ਮਿਲਾ ਕੇ ਦਾਗ਼ ਵਾਲੀ ਜਗ੍ਹਾ 'ਤੇ ਮਲੋ, ਦਾਗ਼ ਦੂਰ ਹੋ ਜਾਵੇਗਾ। * ਜੇਕਰ ਕੱਪੜੇ 'ਤੇ ਚਾਕਲੇਟ ਆਦਿ ਦਾ ਦਾਗ਼ ਲੱਗ ਜਾਵੇ ਤਾਂ ਕੱਪੜੇ ਨੂੰ ਸਿਰਫ ਗਰਮ ਪਾਣੀ ਅਤੇ ਸਾਬਣ ਨਾਲ ਧੋ ਦਿਓ, ਦਾਗ਼ ਨਹੀਂ ਰਹੇਗਾ।


-ਪਿੰਡ ਤੇ ਡਾਕ: ਖੋਸਾ ਪਾਂਡੋ (ਮੋਗਾ)-142048

ਪੰਜ ਮਿੰਟ ਦੀ ਕਲਾਕਾਰੀ

* ਵਿਨੇਗਰ, ਕਲੱਬ ਸੋਡਾ, ਡਿਸ਼ ਸੋਪ (ਭਾਂਡੇ ਧੋਣ ਲਈ ਵਰਤਿਆ ਜਾਣ ਵਾਲਾ) ਤੇ ਲੈਮਨ ਜੂਸ ਮਿਲਾ ਕੇ ਇਕ ਮਿਸ਼ਰਣ ਤਿਆਰ ਕਰ ਲਓ। ਇਸ ਨੂੰ ਮੇਜ਼ ਵਗੈਰਾ 'ਤੇ ਲੱਗੇ ਦਾਗ਼-ਧੱਬੇ ਹਟਾਉਣ ਲਈ ਵਰਤੋ।
* ਕੌਫੀ ਨੂੰ ਪੋਟਲੀ ਵਿਚ ਬੰਨ੍ਹ ਕੇ ਫਰਿੱਜ ਵਿਚ ਰੱਖਣ ਨਾਲ ਕੁਦਰਤੀ ਖੁਸ਼ਬੋ ਦਾ ਪਸਾਰ ਹੁੰਦਾ ਹੈ।
* ਪਾਣੀ ਤੇ ਫੈਬਰਿਕ ਕੰਡੀਸ਼ਨਰ ਦਾ ਘੋਲ ਬਣਾ ਕੇ 15 ਮਿੰਟ ਲਈ ਧੋਤੇ ਕੱਪੜਿਆਂ ਨੂੰ ਇਸ ਵਿਚ ਭਿਉਂ ਕੇ ਰੱਖਣ ਨਾਲ ਕੱਪੜੇ ਸੁੰਗੜਦੇ ਨਹੀਂ।
* ਮੇਜ਼ ਦੇ ਥੱਲੇ ਪਏ ਗਲੀਚੇ 'ਤੇ ਮੇਜ਼ ਦਾ ਭਾਰ ਪੈਣ ਕਾਰਨ ਗਲੀਚਾ ਹੇਠਾਂ ਨੂੰ ਦੱਬਿਆ ਜਾਂਦਾ ਹੈ। ਉਸ ਥਾਂ 'ਤੇ ਤੁਸੀਂ ਗਿੱਲਾ ਕੱਪੜਾ ਰੱਖ ਕੇ ਉੱਤੋਂ ਦੀ ਪ੍ਰੈੱਸ ਫੇਰ ਦਿਓ ਤਾਂ ਉਹ ਠੀਕ ਹੋ ਜਾਂਦਾ ਹੈ।
* ਆਪਣੀ ਹੱਥ ਦੀ ਬਣੀ ਤਸਵੀਰ ਨੂੰ ਲੈਮੀਨੇਟ ਕਰਨ ਲਈ ਉਸ 'ਤੇ ਲੈਮੀਨੇਸ਼ਨ ਪੇਪਰ ਰੱਖ ਕੇ ਉੱਪਰ ਰੁਮਾਲ ਰੱਖ ਲਓ। ਹੁਣ ਰੁਮਾਲ ਉੱਪਰੋਂ ਪ੍ਰੈੱਸ ਫੇਰੋ। ਇਸ ਨਾਲ ਤੁਹਾਡਾ ਲੈਮੀਨੇਸ਼ਨ ਕਵਰ ਤੁਹਾਡੀ ਬਣਾਈ ਤਸਵੀਰ ਨਾਲ ਚਿਪਕ ਜਾਵੇਗਾ ਤੇ ਤੁਹਾਡੀ ਲੈਮੀਨੇਟਿਡ ਤਸਵੀਰ ਤਿਆਰ ਹੋ ਜਾਵੇਗੀ।
* ਦੋ ਬ੍ਰੈੱਡਾਂ ਵਿਚਕਾਰ ਚੀਜ਼ (ਸੈਂਡਵਿਚ ਪਨੀਰ) ਰੱਖ ਕੇ ਇਸ ਸੈਂਡਵਿਚ ਨੂੰ ਸਿਲਵਰ ਫੋਇਲ (ਰੋਟੀ ਲਪੇਟਣ ਵਾਲਾ ਕਾਗਜ਼) ਵਿਚ ਲਪੇਟ ਕੇ ਥੋੜ੍ਹੀ ਦੇਰ ਲਈ ਇਸ 'ਤੇ ਪ੍ਰੈੱਸ ਧਰ ਦਿਓ। ਤੁਹਾਡਾ ਸੈਂਡਵਿਚ ਤੁਹਾਨੂੰ ਤਿਆਰ ਮਿਲੇਗਾ, ਜਿਸ ਵਿਚ ਬ੍ਰੈੱਡਾਂ ਵਿਚਲੀ ਚੀਜ਼ (ਪਨੀਰ) ਵੀ ਪਿਘਲ ਜਾਵੇਗੀ ਤੇ ਬ੍ਰੈੱਡ ਵੀ ਸਿਕ ਜਾਣਗੇ।


simranjeet.dhiman16@gmail.com

ਘਰ ਵਿਚ ਹੀ ਬਣਾਓ ਨਰਸਰੀ


* ਜੇ ਤੁਸੀਂ ਰੁੱਖ ਲਗਾਉਣੇ ਹੀ ਚਾਹੁੰਦੇ ਹੋ ਤਾਂ ਇਨ੍ਹਾਂ ਦੀ ਬੋਨਸਾਈ (ਬੌਨੀ ਨਸਲ) ਨੂੰ ਵੱਡੇ ਗਮਲੇ ਵਿਚ ਲਗਾਓ। ਇਹ ਬੂਟੇ ਵੱਡੇ ਗਮਲੇ ਵਿਚ ਵੀ ਫਲਦੇ-ਫੁਲਦੇ ਹਨ।
* ਘਰ ਦੇ ਮੁੱਖ ਦਰਵਾਜ਼ੇ ਦੇ ਸਾਹਮਣੇ ਵੀ ਕੋਈ ਅਜਿਹਾ ਰੁੱਖ ਨਾ ਲਗਾਓ, ਜਿਸ ਦੀ ਛਾਂ ਦਰਵਾਜ਼ੇ 'ਤੇ ਜਾਂ ਪੌੜੀਆਂ 'ਤੇ ਪੈਂਦੀ ਹੋਵੇ। ਛਾਂ ਪੌੜੀਆਂ ਤੋਂ 3 ਫੁੱਟ ਦੂਰ ਰਹਿਣੀ ਚਾਹੀਦੀ ਹੈ।
* ਕਿਆਰੀਆਂ ਵਿਚ ਫੁੱਲ ਅਤੇ ਹਰਿਆਲੀ ਦੇਣ ਵਾਲੇ ਛੋਟੇ ਪੌਦੇ, ਵੇਲਾਂ ਅਤੇ ਕੈਕਟਸ ਲਗਾਏ ਜਾ ਸਕਦੇ ਹਨ।
* ਘਰ ਦੇ ਅੰਦਰੂਨੀ ਪੌਦਿਆਂ ਨੂੰ ਵੀ ਧੁੱਪ ਦੀ ਲੋੜ ਹੁੰਦੀ ਹੈ, ਇਸ ਲਈ ਇਨ੍ਹਾਂ ਨੂੰ ਅਜਿਹੀਆਂ ਥਾਵਾਂ 'ਤੇ ਲਗਾਓ ਜਿਥੇ ਥੋੜ੍ਹੀ ਦੇਰ ਲਈ ਧੁੱਪ ਜ਼ਰੂਰ ਆਉਂਦੀ ਹੋਵੇ। ਜੇ ਅਜਿਹਾ ਸੰਭਵ ਨਾ ਹੋਵੇ ਤਾਂ ਮਹੀਨੇ ਵਿਚ ਇਕ-ਦੋ ਵਾਰ ਇਨ੍ਹਾਂ ਪੌਦਿਆਂ ਨੂੰ ਬਾਹਰ ਹਲਕੀ ਧੁੱਪ ਵਿਚ ਰੱਖਣਾ ਚਾਹੀਦਾ ਹੈ।
* ਪੌਦੇ ਲਗਾਉਂਦੇ ਸਮੇਂ ਪੌਦਿਆਂ ਦੀ ਕੇਵਲ ਜੜ੍ਹ ਨੂੰ ਹੀ ਜ਼ਮੀਨ ਵਿਚ ਲਗਾਓ। ਤਣਾ ਇਕ ਇੰਚ ਤੋਂ ਵੱਧ ਮਿੱਟੀ ਵਿਚ ਨਹੀਂ ਹੋਣਾ ਚਾਹੀਦਾ। ਜੇ ਪੌਦਾ ਵੱਡਾ ਹੋਵੇ ਅਤੇ ਖੜ੍ਹਾ ਨਾ ਰਹਿ ਰਿਹਾ ਹੋਵੇ ਤਾਂ ਵੱਖਰੀ ਲੱਕੜੀ ਜਾਂ ਰਾਡ ਗੱਡ ਕੇ ਉਸ ਨਾਲ ਪੌਦੇ ਨੂੰ ਬੰਨ੍ਹ ਦਿਓ।
* ਇਨ੍ਹਾਂ ਕਿਆਰੀਆਂ ਵਿਚ ਸਬਜ਼ੀਆਂ ਵੀ ਲਗਾਈਆਂ ਜਾ ਸਕਦੀਆਂ ਹਨ।
* ਸੂਰਜਮੁਖੀ, ਮਿਰਚ ਦੇ ਪੌਦੇ ਸਦਾ ਹਰੇ-ਭਰੇ ਰਹਿੰਦੇ ਹਨ ਅਤੇ ਉਨ੍ਹਾਂ 'ਤੇ ਹਮੇਸ਼ਾ ਸਫੈਦ ਛੋਟੇ ਫੁੱਲ ਖਿੜੇ ਰਹਿੰਦੇ ਹਨ। ਫਲ ਵੀ ਗੁੱਛਿਆਂ ਵਿਚ ਅਤੇ ਉੱਪਰ ਵੱਲ ਲਗਦੇ ਹਨ, ਜੋ ਦੇਖਣ ਵਿਚ ਬੜੇ ਸੁੰਦਰ ਲਗਦੇ ਹਨ।
* ਪੌਦੇ ਵਿਸ਼ਵਾਸਯੋਗ ਨਰਸਰੀ ਤੋਂ ਹੀ ਖਰੀਦੋ।
* ਪੌਦਿਆਂ ਲਈ ਕੰਪੋਸਟ ਖਾਦ, ਜੈਵਿਕ ਖਾਦ, ਘਰ ਦੀ ਬਚੀ ਹੋਈ ਬੇਕਾਰ ਖਾਧ ਸਮੱਗਰੀ ਤੋਂ ਇਲਾਵਾ ਚੌਲ ਅਤੇ ਦਾਲ ਦੇ ਧੋਣ, ਸਬਜ਼ੀ ਦੀਆਂ ਛਿੱਲਾਂ, ਚਾਹ-ਪੱਤੀ, ਆਟੇ ਦੇ ਚੋਕਰ ਆਦਿ ਤੋਂ ਬਣਿਆ ਖਾਦ ਬਹੁਤ ਲਾਭਦਾਇਕ ਹੁੰਦਾ ਹੈ। ਧੋਣ ਅਤੇ ਪੱਤੀ ਨੂੰ ਸਿੱਧਾ ਪਾਓ ਅਤੇ ਹੋਰਾਂ ਨੂੰ ਟੋਆ ਪੁੱਟ ਕੇ ਗੱਡ ਦਿਓ ਅਤੇ ਰੋਜ਼ ਸਵੇਰੇ ਉਸ 'ਤੇ ਪਾਣੀ ਪਾਓ। ਇਹ ਸੜ ਕੇ ਵਧੀਆ ਖਾਦ ਬਣ ਜਾਵੇਗੀ।
* ਰਸਾਇਣਕ ਖਾਦਾਂ ਜਾਂ ਕੀਟਨਾਸ਼ਕਾਂ ਦੀ ਵਰਤੋਂ ਤੋਂ ਬਚੋ। ਇਨ੍ਹਾਂ ਦੀ ਵਰਤੋਂ ਨਾਲ ਸਿਹਤ ਅਤੇ ਵਾਤਾਵਰਨ ਦੋਵਾਂ 'ਤੇ ਬੁਰਾ ਅਸਰ ਪੈਂਦਾ ਹੈ।
* ਕੀਟਨਾਸ਼ਕਾਂ ਦੀ ਜਗ੍ਹਾ ਨਿੰਮ ਦੀ ਖਲੀ, ਉਸ ਦੇ ਪੱਤੇ, ਤੇਲ ਆਦਿ ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ। ਗੁਰੀਚ ਦੇ ਪੱਤੇ, ਬਬੂਲ ਦੇ ਪੱਤੇ ਅਤੇ ਕਰੇਲੇ ਦੇ ਪੱਤਿਆਂ ਦੀ ਕੀਟਨਾਸ਼ਕ ਦੇ ਰੂਪ ਵਿਚ ਵਰਤੋਂ ਕੀਤੀ ਜਾ ਸਕਦੀ ਹੈ।
* ਸਖ਼ਤ ਤਣੇ ਵਾਲੇ ਰੁੱਖ-ਬੂਟੇ ਵਿਚ ਕੀੜੇ ਲੱਗ ਜਾਣ ਤਾਂ ਉਨ੍ਹਾਂ ਨੂੰ ਚਾਕੂ ਨਾਲ ਖੁਰਚ ਕੇ ਕੀੜੇ ਲੱਗੇ ਹਿੱਸੇ ਨੂੰ ਕੱਢ ਦੇਣਾ ਚਾਹੀਦਾ ਹੈ ਅਤੇ ਉਸ 'ਤੇ ਮਿੱਟੀ ਦਾ ਤੇਲ ਜਾਂ ਚੂਨਾ ਪਾਣੀ ਵਿਚ ਘੋਲ ਕੇ ਲੇਪ ਕਰ ਦੇਣਾ ਚਾਹੀਦਾ ਹੈ।
* ਰੁੱਖ-ਬੂਟਿਆਂ ਦੇ ਪੱਤਿਆਂ 'ਤੇ ਲੱਗੇ ਕੀੜਿਆਂ ਨੂੰ ਦੂਰ ਕਰਨ ਲਈ ਹਫ਼ਤੇ ਵਿਚ ਇਕ ਵਾਰ ਨਿੰਮ ਦੇ ਤੇਲ ਦਾ ਛਿੜਕਾਅ ਕਰਨਾ ਚਾਹੀਦਾ ਹੈ।
ਗਮਲਿਆਂ ਵਿਚ ਪੌਦੇ ਲਗਾਉਣ ਤੋਂ ਪਹਿਲਾਂ ਗਮਲੇ ਦੇ ਸੁਰਾਖ 'ਤੇ ਪਲਾਸਟਿਕ ਦੀ ਬਰੀਕ ਜਾਲੀ ਰੱਖ ਕੇ ਉਸ 'ਤੇ 1 ਇੰਚ ਮੋਟੀ ਰੇਤ ਦੀ ਪਰਤ ਵਿਛਾ ਦਿਓ। ਇਸ ਤੋਂ ਬਾਅਦ ਖਾਦ ਮਿਲੀ ਹੋਈ ਮਿੱਟੀ ਬਰੀਕ ਕਰਕੇ ਗਮਲੇ ਵਿਚ ਭਰ ਦਿਓ। ਹੁਣ ਪੌਦੇ ਨੂੰ ਲਗਾ ਕੇ ਪਾਣੀ ਦੇ ਛਿੱਟੇ ਦੇ ਕੇ ਮਿੱਟੀ ਨੂੰ ਤਰ ਕਰ ਦਿਓ।
ਗਮਲੇ ਨੂੰ ਹਮੇਸ਼ਾ ਧੁੱਪ ਵਿਚ ਰੱਖੋ ਪਰ ਤੇਜ਼ ਧੁੱਪ ਹੋਵੇ ਤਾਂ ਉਨ੍ਹਾਂ ਨੂੰ ਚੁੱਕ ਕੇ ਛਾਂ ਵਿਚ ਰੱਖ ਦਿਓ। ਗਮਲੇ ਨੂੰ ਛੱਤ ਦੀ ਰੇਲਿੰਗ ਦੇ ਕਿਨਾਰੇ, ਬਾਲਕੋਨੀ ਦੀ ਰੇਲਿੰਗ ਦੇ ਕਿਨਾਰੇ, ਪੌੜੀਆਂ ਦੀ ਰੇਲਿੰਗ ਦੇ ਹੇਠਾਂ ਲਗਾਓ। ਇਸ ਨਾਲ ਸੁੰਦਰਤਾ ਵਧਦੀ ਹੈ ਅਤੇ ਮਨ ਨੂੰ ਸ਼ਾਂਤੀ ਮਿਲਦੀ ਹੈ।
ਗਮਲੇ ਵਿਚ ਪਾਣੀ ਤੇਜ਼ ਧਾਰ ਨਾਲ ਨਹੀਂ ਸਗੋਂ ਸਪ੍ਰੇਅ ਨਾਲ ਪੌਦੇ ਨੂੰ ਕਵਰ ਕਰਦੇ ਹੋਏ ਪਾਓ। ਸਮੇਂ-ਸਮੇਂ 'ਤੇ ਲੋੜ ਅਨੁਸਾਰ ਖਾਦ ਵੀ ਪਾਓ ਪਰ ਪਾਣੀ ਹਰ ਰੋਜ਼ ਸਵੇਰੇ ਹੀ ਪਾਓ, ਸ਼ਾਮ ਨੂੰ ਨਹੀਂ। ਗਰਮੀ ਦੇ ਦਿਨਾਂ ਵਿਚ ਰਾਤ 9 ਵਜੇ ਤੋਂ ਬਾਅਦ ਪਾਣੀ ਪਾਓ। ਗਰਮ ਪੌਦਾ ਇਕਦਮ ਠੰਢਾ ਪਾਣੀ ਪੈਣ ਨਾਲ ਗਲ ਜਾਵੇਗਾ। ਜੇ ਮਿੱਟੀ ਵਿਚ ਨਮੀ ਹੋਵੇ ਤਾਂ ਨਾ ਗਮਲੇ ਵਿਚ ਪਾਣੀ ਪਾਓ ਅਤੇ ਨਾ ਕਿਆਰੀਆਂ ਵਿਚ। ਪਾਣੀ ਦੇਣ ਤੋਂ ਬਾਅਦ ਜਦੋਂ ਮਿੱਟੀ ਭੁਰਭੁਰੀ ਹੋ ਜਾਵੇ ਤਾਂ ਉਸ ਨੂੰ ਭੁਰਭੁਰਾ ਕਰ ਦਿਓ। ਇਸ ਨਾਲ ਜ਼ਿਆਦਾ ਸਮੇਂ ਤੱਕ ਨਮੀ ਬਣੀ ਰਹਿੰਦੀ ਹੈ।
ਗਮਲਿਆਂ ਵਿਚ ਨਾਰੀਅਲ ਦਾ ਜੂਟ ਜਾਂ ਫੋਮ ਦੇ ਟੁਕੜੇ ਪਾ ਦੇਣ ਨਾਲ ਨਮੀ ਜ਼ਿਆਦਾ ਦਿਨਾਂ ਤੱਕ ਬਣੀ ਰਹਿੰਦੀ ਹੈ। ਗਮਲੇ ਵਿਚ ਮਿਰਚ, ਟਮਾਟਰ, ਕਰੇਲੇ, ਬੈਂਗਣ, ਗੋਭੀ ਅਤੇ ਜਿਮੀਕੰਦ ਵੀ ਉਗਾਏ ਜਾ ਸਕਦੇ ਹਨ।
ਮਿੱਟੀ ਅਤੇ ਰੇਤ ਬਰਾਬਰ ਮਾਤਰਾ ਵਿਚ ਲੈ ਕੇ ਇਸ ਵਿਚ ਗੋਬਰ ਦੀ ਖਾਦ ਮਿਲਾ ਕੇ ਕਿਆਰੀਆਂ ਵਿਚ ਇਕ ਇੰਚ ਮੋਟਾ ਖਿਲਾਰ ਦਿਓ ਅਤੇ ਇਸ ਵਿਚ ਮੂੰਗਫਲੀ ਬੀਜ ਦਿਓ। ਇਸ ਦੇ ਪੌਦੇ ਛੋਟੇ, ਸੰਘਣੇ ਅਤੇ ਹਰੇ ਹੁੰਦੇ ਹਨ, ਜੋ ਦੇਖਣ ਵਿਚ ਖੂਬਸੂਰਤ ਲੱਗਣਗੇ ਅਤੇ ਮੂੰਗਫਲੀ ਵੀ ਪ੍ਰਾਪਤ ਹੋਵੇਗੀ।
ਗਮਲਾ ਖਰੀਦਦੇ ਸਮੇਂ ਚੈੱਕ ਕਰ ਲਓ ਕਿ ਇਸ ਵਿਚ ਦਰਾੜ ਜਾਂ ਵਾਧੂ ਸੁਰਾਖ ਤਾਂ ਨਹੀਂ ਹੈ।

ਤੁਹਾਡੀ ਖੁਸ਼ਹਾਲੀ ਦਾ ਰਾਜ਼ ਤੁਹਾਡੇ ਚੰਗੇ ਸੰਸਕਾਰ

ਤੁਹਾਡੀ ਜ਼ਿੰਦਗੀ ਦੀ ਸਭ ਤੋਂ ਵੱਡੀ ਵਸੀਅਤ ਤੁਹਾਡੇ ਚੰਗੇ ਸੰਸਕਾਰ ਹਨ। ਤੁਹਾਡੇ ਚੰਗੇ ਸੰਸਕਾਰ ਹੀ ਤੁਹਾਨੂੰ ਚੰਗੇ ਅਤੇ ਸਫ਼ਲ ਸੰਸਾਰੀ ਹੋਣ ਦਾ ਮਾਣ ਦੇ ਸਕਦੇ ਹਨ। ਆਪਣੇ ਗ਼ਲਤ ਹੋਣ ਦਾ ਅਹਿਸਾਸ ਨਾ ਹੋਣਾ ਹੀ ਸਭ ਤੋਂ ਵੱਡੀ ਰੁਕਾਵਟ ਹੈ। ਦੁਨੀਆ ਦੇ ਕਿਸੇ ਵੀ ਬਾਜ਼ਾਰ ਵਿਚੋਂ ਗੁਣ ਜਾਂ ਸੰਸਕਾਰ ਖਰੀਦੇ ਨਹੀਂ ਜਾ ਸਕਦੇ, ਬਲਕਿ ਇਹ ਤਾਂ ਖੁਦ ਕਮਾਏ ਜਾਂਦੇ ਹਨ। ਸਿਆਣਪ ਕਦੇ ਵੀ ਸਹੀ ਹੋਣ ਦੀ ਜ਼ਿੱਦ ਨਹੀਂ ਕਰਦੀ। ਤੁਹਾਡੀ ਖੁਸ਼ਹਾਲੀ ਦੇ ਜਿੰਦਰੇ ਦੀ ਚਾਬੀ ਤੁਹਾਡੇ ਚੰਗੇ ਸੰਸਕਾਰ ਹਨ। ਤੁਸੀਂ ਆਪਣੇ ਬੱਚਿਆਂ ਨੂੰ ਚੰਗੇ ਸੰਸਕਾਰ ਦਿਓ, ਦੁਨੀਆ ਦੀਆਂ ਬਾਕੀ ਦੌਲਤਾਂ ਉਹ ਆਪੇ ਕਮਾ ਲੈਣਗੇ। ਤੁਹਾਡੇ ਚੰਗੇ ਗੁਣ ਤੁਹਾਨੂੰ ਕਦੇ ਵੀ ਉਦਾਸ ਜਾਂ ਨਿਰਾਸ਼ ਨਹੀਂ ਹੋਣ ਦਿੰਦੇ। ਮੈਂ ਇਕ ਚੰਗਾ ਇਨਸਾਨ ਹਾਂ, ਇਹ ਕਹਿਣਾ ਤੁਹਾਡਾ ਆਤਮਵਿਸ਼ਵਾਸ ਹੈ ਪਰ ਸਿਰਫ ਮੈਂ ਹੀ ਚੰਗਾ ਇਨਸਾਨ ਹਾਂ, ਇਹ ਕਹਿਣਾ ਤੁਹਾਡਾ ਹੰਕਾਰ ਹੈ। ਧੀਆਂ ਦਾ ਸਭ ਤੋਂ ਵੱਧ ਕੀਮਤੀ ਦਾਜ ਮਾਵਾਂ ਦੁਆਰਾ ਦਿੱਤੇ ਚੰਗੇ ਸੰਸਕਾਰ ਹਨ। ਪੁੱਤਰਾਂ ਦੇ ਕਿਰਦਾਰ ਚੰਗੇ ਸੰਸਕਾਰਾਂ ਨਾਲ ਉੱਚੇ ਹੁੰਦੇ ਹਨ। ਅਕਸਰ ਪ੍ਰਛਾਵਾਂ ਤੁਹਾਡੇ ਕੱਦ ਨਾਲੋਂ ਵੱਡਾ ਨਜ਼ਰ ਆਉਂਦਾ ਹੈ ਪਰ ਕਦਰ ਕਿਰਦਾਰ ਕਰਕੇ ਹੀ ਮਿਲਦੀ ਹੈ।
ਦੁਨੀਆ ਵਿਚ ਤੁਹਾਡੀ ਪਛਾਣ ਤੁਹਾਡੇ ਕਿਰਦਾਰ ਅਤੇ ਗੁਣਾਂ ਕਰਕੇ ਹੈ। ਧੀਆਂ-ਪੁੱਤਰਾਂ ਨੂੰ ਵੱਧ ਤੋਂ ਵੱਧ ਵਿੱਦਿਆ ਪ੍ਰਾਪਤ ਕਰਨ ਦੇ ਵਸੀਲੇ ਪੈਦਾ ਕਰੋ ਪਰ ਉਨ੍ਹਾਂ ਵਿਚ ਇਨਸਾਨੀਅਤ ਵਾਲੇ ਗੁਣ ਵੀ ਪੈਦਾ ਕਰੋ। ਦੌਲਤ ਕਮਾਉਣਾ ਤੁਹਾਡੀ ਯੋਗਤਾ ਅਤੇ ਮਿਹਨਤ 'ਤੇ ਨਿਰਭਰ ਹੈ ਪਰ ਸਮਾਜ ਵਿਚ ਆਪਣੀ ਪਛਾਣ ਬਣਾਉਣਾ ਤੁਹਾਡੇ ਗੁਣਾਂ ਅਤੇ ਸੰਸਕਾਰਾਂ 'ਤੇ ਨਿਰਭਰ ਹੈ। ਸਿਰਫ ਕਲਾ ਹੀ ਤੁਹਾਨੂੰ ਕਲਾਕਾਰ ਨਹੀਂ ਬਣਾਉਂਦੀ। ਸਿਰਫ ਕਲਾ ਦਾ ਗੁਣ ਹੋਣਾ ਹੀ ਕਾਫੀ ਨਹੀਂ, ਬਲਕਿ ਇਕ ਖੁਸ਼ਹਾਲ ਅਤੇ ਖੂਬਸੂਰਤ ਜ਼ਿੰਦਗੀ ਜਿਉਣ ਦਾ ਢੰਗ ਹੋਣਾ ਵੀ ਲਾਜ਼ਮੀ ਹੈ। ਗਿਆਨੀ ਅਤੇ ਅਗਿਆਨੀ ਨੂੰ ਸਮਝਾਇਆ ਜਾ ਸਕਦਾ ਹੈ ਪਰ ਇਕ ਅਭਿਮਾਨੀ ਹੁੰਦਾ ਹੈ, ਜਿਸ ਨੂੰ ਕੁਝ ਵੀ ਸਿਖਾਇਆ ਜਾਂ ਸਮਝਾਇਆ ਨਹੀਂ ਜਾ ਸਕਦਾ। ਕਹਿੰਦੇ ਹਨ ਕਿ ਚੰਗੇ ਲੋਕਾਂ ਦੀ ਤਲਾਸ਼ ਕਰਨ ਨਾਲੋਂ ਤੁਸੀਂ ਖੁਦ ਚੰਗੇ ਬਣ ਜਾਵੋ। ਇਸ ਨਾਲ ਹੋ ਸਕਦਾ ਹੈ ਕਿ ਕਿਸੇ ਹੋਰ ਦੀ ਤਲਾਸ਼ ਪੂਰੀ ਹੋ ਜਾਵੇ। ਕਈ ਵਾਰ ਦੂਜਿਆਂ ਨੂੰ ਆਪਣੇ ਨਾਲ ਸਹਿਮਤ ਕਰਨ ਲਈ ਉਨ੍ਹਾਂ ਨਾਲ ਖੁਦ ਸਹਿਮਤ ਹੋਣਾ ਪੈਂਦਾ ਹੈ। ਨਿੰਮ ਦੇ ਪੱਤੇ ਬੇਸ਼ੱਕ ਬਹੁਤ ਕੌੜੇ ਹੁੰਦੇ ਹਨ ਪਰ ਉਸ ਦੀ ਛਾਂ ਹਮੇਸ਼ਾ ਠੰਢੀ ਤੇ ਲਾਭਦਾਇਕ ਹੁੰਦੀ ਹੈ। ਇਕ ਚੰਗੀ ਔਰਤ ਘਰ ਲਈ ਵਰਦਾਨ ਹੈ। ਸਿਰਫ ਸਮਝਾਉਣਾ ਹੀ ਕਾਫੀ ਨਹੀਂ, ਸਗੋਂ ਦੂਜਿਆਂ ਨੂੰ ਸਮਝਣਾ ਵੀ ਜ਼ਰੂਰੀ ਹੈ। ਚੰਗੇ ਸੰਸਕਾਰ ਜ਼ਿੰਦਗੀ ਦੀਆਂ ਕਈ ਸਮੱਸਿਆਵਾਂ ਦਾ ਹੱਲ ਹਨ। ਕਈ ਸੰਸਕਾਰ ਸਾਡੇ ਲਈ ਕੁਦਰਤ ਦੀ ਦੇਣ ਹੁੰਦੇ ਹਨ ਅਤੇ ਕਈ ਸੰਸਕਾਰ ਸਾਨੂੰ ਮਾਪਿਆਂ ਕੋਲੋਂ ਮਿਲਦੇ ਹਨ। ਕਈ ਸੰਸਕਾਰ ਅਸੀਂ ਆਪਣੇ ਅਧਿਆਪਕਾਂ ਅਤੇ ਵੱਡਿਆਂ ਕੋਲੋਂ ਸਿੱਖਦੇ ਹਾਂ ਅਤੇ ਕਈ ਸੰਸਕਾਰ ਸਾਡੇ ਆਲੇ-ਦੁਆਲੇ ਦੇ ਸਮਾਜ ਦੀ ਉਪਜ ਹੁੰਦੇ ਹਨ। ਕਈ ਸੰਸਕਾਰ ਸਾਨੂੰ ਸਾਡਾ ਧਰਮ ਸਿਖਾਉਂਦਾ ਹੈ ਅਤੇ ਕਈ ਸੰਸਕਾਰ ਵਿਰਾਸਤੀ ਹੁੰਦੇ ਹਨ।
ਆਪਣੀਆਂ ਗ਼ਲਤੀਆਂ ਤੋਂ ਸਿੱਖਣਾ ਸਿਆਣਪ ਹੈ ਅਤੇ ਆਪਣੀਆਂ ਗ਼ਲਤੀਆਂ ਦੇ ਨਾਲ-ਨਾਲ ਦੂਜਿਆਂ ਦੀਆਂ ਗ਼ਲਤੀਆਂ ਤੋਂ ਸਿੱਖਣਾ ਮਹਾਨਤਾ ਹੈ। ਕੋਈ ਵੀ ਸਮੱਸਿਆ ਐਨੀ ਵੱਡੀ ਨਹੀਂ ਹੁੰਦੀ, ਜਿੰਨੀ ਕਿ ਅਸੀਂ ਉਸ ਨੂੰ ਮੰਨ ਲੈਂਦੇ ਹਾਂ। ਘੱਟ ਬੋਲੋ ਪਰ ਵੱਧ ਸੁਣੋ, ਕਿਉਂਕਿ ਮੂੰਹ ਇਕ ਅਤੇ ਕੰਨ ਦੋ ਹਨ। ਸਿਰਫ ਦੂਜਿਆਂ ਨੂੰ ਸੁਣਨਾ ਹੀ ਕਾਫੀ ਨਹੀਂ, ਕਦੇ ਇਕਾਂਤ ਵਿਚ ਬੈਠ ਕੇ ਆਪਣੀ ਵੀ ਸੁਣੋ। ਜ਼ਿੰਦਗੀ ਵਿਚ ਸਿਰਫ ਜਿੱਤਣਾ ਹੀ ਨਹੀਂ, ਬਲਕਿ ਜ਼ਿੰਦਗੀ ਜਿਊਣਾ ਵੀ ਸਿੱਖੋ। ਕਿਸੇ ਦਾ ਸਹਾਰਾ ਬਣੋ ਤਾਂ ਕਿ ਤੁਹਾਡੇ ਮੋਢੇ 'ਤੇ ਸਿਰ ਰੱਖ ਕੇ ਕਿਸੇ ਦਾ ਜਿਉਣਾ ਆਸਾਨ ਹੋ ਜਾਵੇ। ਤੁਹਾਡੇ ਗੁਣ ਦੂਜਿਆਂ ਦੇ ਦਿਲਾਂ ਵਿਚ ਜਗ੍ਹਾ ਬਣਾਉਣ ਦੀ ਕੀਮਤ ਅਦਾ ਕਰਦੇ ਹਨ। ਸੰਸਾਰ ਵਿਚ ਤੁਹਾਡੀ ਕੀਮਤ ਤੁਹਾਡੇ ਸੰਸਕਾਰ ਤੈਅ ਕਰਦੇ ਹਨ। ਅਸਲੀ ਸੁੰਦਰਤਾ ਆਪਣੇ ਜਿਸਮ ਦਾ ਵਿਖਾਵਾ ਕਰਨ ਵਿਚ ਨਹੀਂ ਹੈ। ਯਤਨ ਕਰੋ ਕਿ ਤੁਹਾਡੇ ਕਰਕੇ ਕਿਸੇ ਦੀ ਅੱਖ ਵਿਚ ਅੱਥਰੂ ਨਾ ਆਵੇ। ਜ਼ਿੰਦਗੀ ਵਿਚ ਕਈ ਵਾਰ ਬਹੁਤ ਦੂਰ ਤੱਕ ਜਾਣਾ ਪੈਂਦਾ ਹੈ, ਇਹ ਜਾਣਨ ਲਈ ਕਿ ਸਾਡੇ ਨਜ਼ਦੀਕ ਕੌਣ ਹੈ। ਇਕ ਸਾਲ ਵਿਚ 50 ਦੋਸਤ ਬਣਾਉਣੇ ਆਸਾਨ ਹਨ ਪਰ 50 ਸਾਲ ਲਈ ਕਿਸੇ ਇਕ ਨਾਲ ਦੋਸਤੀ ਨਿਭਾਉਣਾ ਬਹੁਤ ਖਾਸ ਹੈ। ਸਾਡੇ ਸਬੰਧ ਕਿਨ੍ਹਾਂ ਲੋਕਾਂ ਨਾਲ ਹਨ, ਇਸ ਨਾਲੋਂ ਇਹ ਜ਼ਿਆਦਾ ਮਹੱਤਵਪੂਰਨ ਹੈ ਕਿ ਸਾਡੇ ਸਬੰਧ ਦੂਜਿਆਂ ਨਾਲ ਕਿਸ ਤਰ੍ਹਾਂ ਦੇ ਹਨ।

-ਪਿੰਡ ਗੋਲੇਵਾਲਾ (ਫ਼ਰੀਦਕੋਟ)। ਮੋਬਾ: 94179-49079

ਕਿਰਦਾਰ ਨਿਭਾਓ ਤਾਂ ਕੁਝ ਇਸ ਤਰ੍ਹਾਂ

ਅਸੀਂ ਸਭ ਜੀਵ ਧਰਤੀ ਉੱਪਰ ਰੱਬ ਦੀ ਮਿਹਰ ਸਦਕਾ ਆਪਣਾ-ਆਪਣਾ ਕਿਰਦਾਰ ਨਿਭਾਅ ਰਹੇ ਹਾਂ। ਰੱਬ ਨੇ ਸਭ ਜੀਵਾਂ ਨੂੰ ਜ਼ਿੰਦਗੀ ਵਿਚ ਉਨ੍ਹਾਂ ਦੇ ਕਿਰਦਾਰ ਨੂੰ ਮਿੱਥ ਦਿੱਤਾ ਹੈ। ਇਸ ਦੁਨੀਆ ਅੰਦਰ ਕੋਈ ਅਮੀਰ ਹੈ, ਕੋਈ ਗ਼ਰੀਬ ਹੈ, ਕੋਈ ਅਨਪੜ੍ਹ ਹੈ, ਕੋਈ ਮਹਾਨ ਵਿਅਕਤੀ, ਕੋਈ ਅਪਾਹਜ ਹੈ, ਕੋਈ ਸ਼ਹਿਰੀ, ਕੋਈ ਪੇਂਡੂ, ਕੋਈ ਵਿਦਿਆਰਥੀ, ਕੋਈ ਅਧਿਆਪਕ, ਕੋਈ ਨੇਤਾ ਤੇ ਕੋਈ ਭਗਤ, ਸੇਵਕ ਆਦਿ। ਇਹ ਸਭ ਜੀਵ ਰੱਬ ਦੁਆਰਾ ਮਿਥੇ ਗਏ ਕਿਰਦਾਰ ਅਨੁਸਾਰ ਇਸ ਧਰਤੀ ਉੱਪਰ ਨਾਟਕ ਦੇ ਐਕਟਰਾਂ ਵਾਂਗ ਆਪਣੇ-ਆਪਣੇ ਕਿਰਦਾਰ ਨੂੰ ਨਿਭਾਅ ਰਹੇ ਹਨ।
ਜੇ ਅਸੀਂ ਆਪਣੀ ਮਨਮਰਜ਼ੀ ਦਾ ਕਿਰਦਾਰ ਨਿਭਾਉਣਾ ਚਾਹੀਏ ਤਾਂ ਇਹ ਸਾਡੇ ਹੱਥ-ਵੱਸ ਨਹੀਂ ਹੈ, ਕਿਉਂਕਿ ਇਹ ਸਭ ਪਰਮਾਤਮਾ ਹੀ ਮਿੱਥ ਸਕਦਾ ਹੈ ਪਰ ਅਸੀਂ ਪਰਮਾਤਮਾ ਦੁਆਰਾ ਦਿੱਤੇ ਹੋਏ ਕਿਰਦਾਰ ਨੂੰ ਚਾਹ ਕੇ ਵਧੀਆ ਤੋਂ ਵਧੀਆ ਨਿਭਾਅ ਸਕਦੇ ਹਾਂ। ਪਰਮਾਤਮਾ ਦੁਆਰਾ ਬਖਸ਼ੀ ਹੋਈ ਜ਼ਿੰਦਗੀ ਮਾੜੇ ਲਈ ਇਕ ਫੁੱਲਾਂ ਦੀ ਸੇਜ ਸਮਾਨ ਹੈ, ਜਿਥੇ ਹਰ ਇਕ ਇਨਸਾਨ ਦਾ ਫਰਜ਼ ਬਣਦਾ ਹੈ ਕਿ ਉਹ ਕੰਡਿਆਂ ਦੀ ਮਾਰ ਨੂੰ ਸਹਾਰਦਾ ਹੋਇਆ ਸਲੀਕੇ ਤੇ ਸੁਚੱਜੇ ਢੰਗ ਨਾਲ ਵਿਚਰਦਾ ਹੋਇਆ ਆਪਣੇ ਕਿਰਦਾਰ ਨੂੰ ਇਸ ਤਰ੍ਹਾਂ ਨਿਭਾਵੇ ਕਿ ਉਹ ਇਕ ਯਾਦਗਾਰ ਬਣ ਜਾਵੇ। ਜੇਕਰ ਕੋਈ ਇਨਸਾਨ ਪਰਮਾਤਮਾ ਦੁਆਰਾ ਬਖਸ਼ੇ ਹੋਏ ਕਿਰਦਾਰ ਤੋਂ ਖੁਸ਼ ਨਹੀਂ ਹੈ ਤਾਂ ਉਸ ਨੂੰ ਇਸ ਪ੍ਰਤੀ ਕੋਈ ਸ਼ਿਕਾਇਤ ਜ਼ਾਹਰ ਨਹੀਂ ਕਰਨੀ ਚਾਹੀਦੀ, ਬਲਕਿ ਇਹ ਸੋਚ ਕੇ ਕਿ ਜੋ ਕੁਝ ਵੀ ਹੋ ਰਿਹਾ ਹੈ, ਉਹ ਸਾਡੇ ਭਲੇ ਲਈ ਹੀ ਤਾਂ ਹੋ ਰਿਹਾ ਹੈ, ਨਾਲ ਆਪਣੇ ਕਿਰਦਾਰ ਨੂੰ ਹਾਲਾਤ ਅਨੁਸਾਰ ਢਾਲ ਕੇ ਆਪਣੇ-ਆਪ ਨੂੰ ਖੁਸ਼ ਰੱਖਣਾ ਚਾਹੀਦਾ ਹੈ।
ਵਿਦਿਆਰਥੀ ਜੀਵਨ ਦਾ ਕਿਰਦਾਰ ਨਿਭਾਉਂਦੇ ਸਮੇਂ ਹਰ ਵਿਦਿਆਰਥੀ ਨੂੰ ਆਪਣੇ ਚੰਗੇ ਅਧਿਆਪਕਾਂ ਦੇ ਆਚਰਨ, ਬੋਲਚਾਲ ਅਤੇ ਵਿਵਹਾਰ ਨੂੰ ਅਪਣਾਉਣ ਦਾ ਯਤਨ ਕਰਨਾ ਚਾਹੀਦਾ ਹੈ, ਤਾਂ ਜੋ ਹਰ ਵਿਦਿਆਰਥੀ ਕਿਸੇ ਚੰਗੇ ਤੇ ਪਵਿੱਤਰ ਆਤਮਾ ਵਾਲੇ ਅਧਿਆਪਕ ਦੇ ਵਧੀਆ ਗੁਣਾਂ ਨੂੰ ਅਪਣਾ ਕੇ ਆਪਣੇ ਕਿਰਦਾਰ ਨੂੰ ਵਧੀਆ ਤਰੀਕੇ ਨਾਲ ਨਿਭਾਉਣ ਦੇ ਸਮਰੱਥ ਹੋ ਸਕੇ।
ਮੈਂ ਇਹੀ ਸੰਦੇਸ਼ ਦੇਵਾਂਗੀ ਕਿ ਜੇਕਰ ਤੁਹਾਨੂੰ ਕਿਸੇ ਗਰੀਬ ਜਾਂ ਅਮੀਰ, ਵਿਦਿਆਰਥੀ ਜਾਂ ਅਧਿਆਪਕ, ਨੇਤਾ ਜਾਂ ਆਮ ਜਨਤਾ ਆਦਿ ਕਿਸੇ ਦਾ ਵੀ ਕਿਰਦਾਰ ਨਿਭਾਉਣਾ ਪਵੇ ਤਾਂ ਉਸ ਕਿਰਦਾਰ ਨੂੰ ਸਵੈ-ਦ੍ਰਿੜ੍ਹਤਾ ਤੇ ਸਵੈ-ਵਿਸ਼ਵਾਸ ਨਾਲ ਏਨੀ ਮਜ਼ਬੂਤੀ ਨਾਲ ਨਿਭਾਓ ਕਿ ਤੁਸੀਂ ਇਕ ਯਾਦਗਾਰ ਬਣ ਜਾਵੋ।

-ਸਿਵਲ ਲਾਈਨ, ਮੋਗਾ।
ਮੋਬਾ: 83603-19449

ਫਰਨੀਚਰ ਦਿੰਦਾ ਹੈ ਘਰ ਨੂੰ ਨਵਾਂ ਰੂਪ

ਫਰਨੀਚਰ ਹਮੇਸ਼ਾ ਘਰ ਦੀ ਬਨਾਵਟ ਅਤੇ ਉਸ ਵਿਚ ਬਚੀ ਜਗ੍ਹਾ ਨੂੰ ਧਿਆਨ ਵਿਚ ਰੱਖ ਕੇ ਖਰੀਦਣਾ ਚਾਹੀਦਾ ਹੈ। ਘਰ ਛੋਟਾ ਹੈ ਜਾਂ ਦੋ ਕਮਰਿਆਂ ਵਾਲਾ ਸੈੱਟ ਹੈ ਤਾਂ ਫਰਨੀਚਰ ਵੀ ਹਲਕੇ-ਫੁਲਕੇ ਹੋਣੇ ਚਾਹੀਦੇ ਹਨ, ਜਿਸ ਨਾਲ ਘੱਟ ਜਗ੍ਹਾ ਵਿਚ ਜ਼ਿਆਦਾ ਮਹਿਸੂਸ ਹੋਵੇ। ਜੇ ਘਰ ਵੱਡਾ ਹੈ ਤਾਂ ਫਰਨੀਚਰ ਭਾਰੀ ਸ਼ੋਭਾ ਦਿੰਦਾ ਹੈ ਪਰ ਛੋਟੇ ਕਮਰੇ ਵਿਚ ਭਾਰੀ ਫਰਨੀਚਰ ਬੋਝਲ ਲਗਦਾ ਹੈ, ਜਿਥੇ ਨਾ ਤੁਹਾਡਾ ਰਹਿਣ ਨੂੰ ਮਨ ਕਰੇਗਾ, ਨਾ ਕਿਸੇ ਹੋਰ ਦਾ। ਕਿਉਂਕਿ ਅੱਜਕਲ੍ਹ ਮਹਿੰਗਾਈ ਦਾ ਜ਼ਮਾਨਾ ਹੈ, ਆਮ ਹੀ ਲੋਕ ਛੋਟੇ ਘਰਾਂ ਵਿਚ ਰਹਿਣ ਲੱਗੇ ਹਨ। ਇਸ ਲਈ ਇਨ੍ਹਾਂ ਘਰਾਂ ਦੇ ਅਨੁਸਾਰ ਫਰਨੀਚਰ ਦੇ ਹਲਕੇ-ਹਲਕੇ ਕਾਫੀ ਮਾਡਲ ਅੱਜਕਲ੍ਹ ਬਾਜ਼ਾਰ ਵਿਚ ਉਪਲਬਧ ਹਨ। ਇਸ ਲਈ ਆਪਣੇ ਘੱਟ ਜਗ੍ਹਾ ਵਾਲੇ ਘਰ ਲਈ ਸਿੱਧੇ ਕੱਟ ਵਾਲੇ ਡਿਜ਼ਾਈਨਦਾਰ ਫਰਨੀਚਰ ਹੀ ਲਓ। ਟੇਢੇ-ਮੇਢੇ ਕੱਟ ਜਾਂ ਗੋਲ ਕੱਟ ਵਾਲੇ ਫਰਨੀਚਰ ਤੋਂ ਦੂਰ ਰਹੋ। ਅਜਿਹੇ ਫਰਨੀਚਰ ਦਾ ਫੈਸ਼ਨ ਛੇਤੀ ਹੀ ਆਊਟ ਹੋ ਜਾਂਦਾ ਹੈ ਅਤੇ ਇਹ ਮਹਿੰਗਾ ਵੀ ਪੈਂਦਾ ਹੈ, ਇਸ ਲਈ ਸਾਧਾਰਨ ਕੱਟ ਵਾਲਾ ਫਰਨੀਚਰ ਖਰੀਦਣਾ ਹੀ ਫਾਇਦੇਮੰਦ ਰਹਿੰਦਾ ਹੈ।
ਫਰਨੀਚਰ ਰਾਟ ਆਇਰਨ ਅਤੇ ਲੱਕੜੀ ਦੇ ਮਿਸ਼ਰਣ ਨੂੰ ਮਿਲਾ ਕੇ ਬਣਾਇਆ ਗਿਆ ਹੋਵੇ ਤਾਂ ਬਹੁਤ ਵਧੀਆ। ਇਹ ਹਮੇਸ਼ਾ ਰਿਵਾਜ ਵਿਚ ਰਹਿੰਦਾ ਹੈ। ਹੁਣ ਵਾਰੀ ਆਉਂਦੀ ਹੈ ਫਰਨੀਚਰ ਦੇ ਰੰਗ ਦੀ ਚੋਣ ਦੀ। ਫਰਨੀਚਰ ਦਾ ਰੰਗ ਕੁਦਰਤੀ ਹੋਵੇ ਤਾਂ ਬਿਹਤਰ ਲੱਗੇਗਾ। ਟੀਕ ਵੁੱਡ ਦਾ ਕੁਦਰਤੀ ਰੰਗ ਬੇਹੱਦ ਖੂਬਸੂਰਤ ਲਗਦਾ ਹੈ। ਉਸ ਵਿਚ ਗੂੜ੍ਹੇ ਰੰਗ ਦਾ ਹਲਕਾ ਜਿਹਾ ਟਚ ਵੀ ਦਿਓਗੇ ਤਾਂ ਚਾਰ ਚੰਦ ਲੱਗ ਜਾਣਗੇ ਤੁਹਾਡੇ ਫਰਨੀਚਰ ਵਿਚ। ਹਲਕੇ ਰੰਗ ਦਾ ਫਰਨੀਚਰ ਜ਼ਿਆਦਾ ਜਗ੍ਹਾ ਦਾ ਅਹਿਸਾਸ ਕਰਾਉਂਦਾ ਹੈ।
ਫਰਨੀਚਰ 'ਤੇ ਲੱਗਾ ਹੋਇਆ ਕੱਪੜਾ ਵੀ ਅਜਿਹਾ ਹੋਣਾ ਚਾਹੀਦਾ ਹੈ ਜੋ ਆਸਾਨੀ ਨਾਲ ਘਰ ਵਿਚ ਧੋਇਆ ਜਾ ਸਕੇ। ਕੱਪੜਿਆਂ ਦੀ ਵੰਨ-ਸੁਵੰਨਤਾ ਤੋਂ ਬਚੋ। ਧਿਆਨ ਰੱਖੋ ਕਿ ਸੂਤੀ ਕੱਪੜਾ ਧੋਣ ਤੋਂ ਬਾਅਦ ਸੁੰਗੜਦਾ ਹੈ ਅਤੇ ਉਸ ਵਿਚ ਆਪਣੀ ਪੁਰਾਣੀ ਚਮਕ ਵੀ ਧੋਣ ਤੋਂ ਬਾਅਦ ਫਿੱਕੀ ਪੈ ਜਾਂਦੀ ਹੈ। ਵੈਲਵੇਟ ਦਾ ਕੱਪੜਾ ਦੇਖਣ ਵਿਚ ਸੁੰਦਰ ਲਗਦਾ ਹੈ ਅਤੇ ਉਸ ਦੇ ਗੰਦਾ ਹੋਣ ਦਾ ਘੱਟ ਹੀ ਪਤਾ ਲਗਦਾ ਹੈ ਪਰ ਉਹ ਧੂੜ-ਮਿੱਟੀ ਨੂੰ ਆਪਣੇ ਅੰਦਰ ਜਮ੍ਹਾਂ ਕਰਦਾ ਰਹਿੰਦਾ ਹੈ। ਦੂਜੇ ਪਾਸੇ ਇਹ ਗਰਮੀ ਵਿਚ ਸਹਿਣਯੋਗ ਨਹੀਂ ਹੁੰਦਾ ਹੈ। ਇਸ ਤੋਂ ਇਲਾਵਾ ਇਹ ਆਸਾਨੀ ਨਾਲ ਸਾਫ਼ ਵੀ ਨਹੀਂ ਹੁੰਦਾ।
ਪਾਲਿਸਟਰ ਗਰਮੀ ਵਿਚ ਗਰਮ ਅਤੇ ਸਰਦੀਆਂ ਵਿਚ ਠੰਢਾ ਲਗਦਾ ਹੈ, ਇਸ ਲਈ ਇਸ ਨੂੰ ਨਾ ਹੀ ਲਗਵਾਓ। ਸਹੀ ਹੋਵੇਗਾ ਜੇ ਇਸ ਦਾ ਅਤੇ ਸੂਤੀ ਦਾ ਮਿਸ਼ਰਤ ਕੱਪੜਾ ਲਗਵਾਓ। ਇਸ ਨੂੰ ਧੋਣ ਵਿਚ ਅਸਾਨੀ ਵੀ ਰਹੇਗੀ। ਫਰਨੀਚਰ ਲਈ ਵੱਖਰੇ ਕਵਰ ਵੀ ਬਣਵਾ ਲਓ, ਜਿਸ ਨਾਲ ਉਸ ਦਾ ਗੰਦਾ ਹੋਣ ਤੋਂ ਕੁਝ ਬਚਾਅ ਵੀ ਹੋ ਸਕੇ। ਇਹ ਕਵਰ ਅਸਾਨੀ ਨਾਲ ਧੋਤੇ ਵੀ ਜਾ ਸਕਦੇ ਹਨ। ਫਰਨੀਚਰ 'ਤੇ ਅਜਿਹੀ ਫਿਨਿਸ਼ਿੰਗ ਕਰਾਓ, ਜਿਸ ਵਿਚ ਧਨ ਦੀ ਬੱਚਤ ਹੋਵੇ ਪਰ ਉਹ ਫੂਹੜ ਨਾ ਲੱਗੇ।
ਫਰਨੀਚਰ 'ਤੇ ਸਸਤੀ ਪਾਲਿਸ਼ ਕਰਾਓ। ਪਾਲਿਸ਼ ਵੈਸੇ ਤਾਂ ਕਈ ਤਰ੍ਹਾਂ ਦੀ ਹੁੰਦੀ ਹੈ ਜਿਵੇਂ ਸਪਿਰਟ, ਲੈਕਰ ਪਾਲਿਸ਼ ਅਤੇ ਪਾਲੀਯੂਰਿਥਿਨ ਪਾਲਿਸ਼। ਸਪਿਰਟ ਪਾਲਿਸ਼ ਇਨ੍ਹਾਂ ਸਾਰੀਆਂ ਵਿਚੋਂ ਸਸਤੀ ਹੁੰਦੀ ਹੈ ਅਤੇ ਜੇ ਚੰਗੀ ਤਰ੍ਹਾਂ ਕੀਤੀ ਗਈ ਹੋਵੇ ਤਾਂ ਟਿਕਾਊ ਵੀ, ਜਦੋਂ ਕਿ ਲੈਕਰ ਪਾਲਿਸ਼ 'ਤੇ ਪਾਣੀ ਦੇ ਧੱਬਿਆਂ ਦਾ ਕੋਈ ਅਸਰ ਨਹੀਂ ਪੈਂਦਾ, ਕਿਉਂਕਿ ਇਹ ਵਾਟਰਪਰੂਫ ਹੁੰਦੀ ਹੈ। ਹਾਲਾਂਕਿ ਇਹ ਥੋੜ੍ਹੀ ਮਹਿੰਗੀ ਹੁੰਦੀ ਹੈ, ਫਿਰ ਵੀ ਇਹ ਵਧੀਆ ਹੈ। ਪਾਲੀਯੂਰਿਥਿਨ ਪਾਲਿਸ਼ ਸਭ ਤੋਂ ਮਹਿੰਗੀ ਪੈਂਦੀ ਹੈ। ਇਸ ਵਿਚ ਸਪ੍ਰੇਗਨ ਨਾਲ ਪਾਲਿਸ਼ ਕਰਕੇ ਫਿਨਿਸ਼ਿੰਗ ਕੀਤੀ ਜਾਂਦੀ ਹੈ। ਇਹ ਜ਼ਿਆਦਾ ਸਮੇਂ ਤੱਕ ਚਲਦੀ ਹੈ।

-ਸ਼ਿਖਾ ਚੌਧਰੀ

ਮੋਤੀਆਂ ਦੇ ਗਹਿਣਿਆਂ ਨੂੰ ਚਮਕਾ ਕੇ ਇੰਜ ਰੱਖੋ

ਮੋਤੀਆਂ ਦੇ ਗਹਿਣੇ ਦੇਖਣ ਵਿਚ ਰਾਇਲ ਦਿੱਖ ਦਿੰਦੇ ਹਨ। ਸੁੰਦਰ ਏਨੇ ਲਗਦੇ ਹਨ ਕਿ ਮਨ ਚਾਹੁੰਦਾ ਹੈ ਇਨ੍ਹਾਂ ਨੂੰ ਸੰਭਾਲ ਕੇ ਵੱਧ ਤੋਂ ਵੱਧ ਸਮੇਂ ਤੱਕ ਇਨ੍ਹਾਂ ਦੀ ਵਰਤੋਂ ਕੀਤੀ ਜਾਵੇ। ਪਰਲ ਆਰਗੈਨਿਕ ਸਮੱਗਰੀ ਤੋਂ ਤਿਆਰ ਕੀਤੇ ਜਾਂਦੇ ਹਨ। ਮੋਤੀਆਂ ਦੀ ਵਰਤੋਂ ਸੋਨੇ ਅਤੇ ਚਾਂਦੀ ਦੇ ਗਹਿਣਿਆਂ ਦੇ ਨਾਲ ਅੱਜਕਲ੍ਹ ਬਹੁਤ ਕੀਤੀ ਜਾ ਰਹੀ ਹੈ। ਪਰਲ ਦੀ ਚਮਕ ਬਰਕਰਾਰ ਰੱਖਣ ਲਈ ਸਾਨੂੰ ਇਨ੍ਹਾਂ ਦਾ ਵਿਸ਼ੇਸ਼ ਧਿਆਨ ਰੱਖਣਾ ਚਾਹੀਦਾ ਹੈ ਤਾਂ ਕਿ ਇਨ੍ਹਾਂ 'ਤੇ ਧੂੜ ਨਾ ਜੰਮੇ ਅਤੇ ਝਰੀਟਾਂ ਨਾ ਪੈਣ।
* ਪਰਲਸ ਦੀ ਧੂੜ ਸਾਫ਼ ਕਰਨ ਲਈ ਨਰਮ ਕੱਪੜੇ ਦੀ ਵਰਤੋਂ ਕਰੋ। ਨਰਮ ਕੱਪੜੇ ਨਾਲ, ਨਰਮ ਹੱਥਾਂ ਦੁਆਰਾ ਉਨ੍ਹਾਂ ਦੀ ਧੂੜ ਸਾਫ਼ ਕਰੋ। ਸਮੇਂ-ਸਮੇਂ 'ਤੇ ਘੱਟਾ ਪੂੰਝਦੇ ਰਹੋ ਤਾਂ ਕਿ ਪਰਲਸ ਮੈਲੇ ਅਤੇ ਬਦਰੰਗ ਨਾ ਲੱਗਣ।
* ਪਰਫਿਊਮ ਅਤੇ ਹੇਅਰ ਸਪਰੇਅ ਨੂੰ ਲਗਾਉਂਦੇ ਸਮੇਂ ਧਿਆਨ ਰੱਖੋ ਕਿ ਪਰਲ ਜਿਊਲਰੀ ਲਾਹ ਕੇ ਸਪਰੇਅ ਕਰੋ ਅਤੇ ਫਿਰ ਦੁਬਾਰਾ ਉਸ ਨੂੰ ਪਹਿਨ ਲਓ, ਨਹੀਂ ਤਾਂ ਪਰਲਜ਼ ਆਪਣੀ ਅਸਲੀ ਰੰਗਤ ਗੁਆ ਦੇਣਗੇ।
* ਨਹਾਉਂਦੇ ਹੋਏ ਵੀ ਇਸ ਜਿਊਲਰੀ ਨੂੰ ਲਾਹ ਦਿਓ, ਕਿਉਂਕਿ ਸਾਬਣ ਅਤੇ ਬਾਡੀ ਵਾਸ਼ ਦੇ ਰਸਾਇਣ ਇਨ੍ਹਾਂ ਨੂੰ ਨੁਕਸਾਨ ਪਹੁੰਚਾ ਸਕਦੇ ਹਨ। * ਪਾਣੀ ਵਿਚ ਵੀ ਕਲੋਰੀਨ ਹੋਣ ਦੇ ਕਾਰਨ ਪਰਲ ਜਿਊਲਰੀ ਖਰਾਬ ਹੋ ਸਕਦੀ ਹੈ।
* ਪਰਲਸ ਨੂੰ ਦੰਦ ਸਾਫ਼ ਕਰਨ ਵਾਲੇ ਬਰੱਸ਼ ਨਾਲ ਸਾਫ਼ ਨਾ ਕਰੋ। * ਮੇਕਅਪ ਪੂਰਾ ਹੋਣ ਤੋਂ ਬਾਅਦ ਹੀ ਪਰਲ ਜਿਊਲਰੀ ਪਹਿਨੋ। ਕਦੇ-ਕਦੇ ਮੇਕਅਪ ਕਰਦੇ ਹੋਏ ਕੁਝ ਜਿਊਲਰੀ 'ਤੇ ਡਿਗ ਸਕਦਾ ਹੈ। ਇਸ ਨਾਲ ਉਸ ਦਾ ਰੰਗ ਖਰਾਬ ਹੋ ਜਾਵੇਗਾ।
* ਮੈਟੇਲਿਕ ਜਿਊਲਰੀ ਦੇ ਨਾਲ ਕਦੇ ਵੀ ਪਰਲ ਜਿਊਲਰੀ ਨੂੰ ਨਾ ਰੱਖੋ, ਕਿਉਂਕਿ ਰਗੜ ਲੱਗ ਕੇ ਪਰਲ ਖਰਾਬ ਹੋ ਸਕਦੇ ਹਨ।
* ਪਰਲ ਨੂੰ ਮਲਮਲ ਦੇ ਕੱਪੜੇ ਵਿਚ ਲਪੇਟ ਕੇ ਰੱਖੋ।
* ਪਰਲ ਜਿਊਲਰੀ ਨੂੰ ਅਜਿਹੀ ਜਗ੍ਹਾ ਰੱਖੋ, ਜਿਥੇ ਤਾਪਮਾਨ ਆਮ ਹੋਵੇ।
**

ਫਲ-ਸਬਜ਼ੀਆਂ ਨਾਲ ਚਮੜੀ 'ਤੇ ਲਿਆਓ ਕੁਦਰਤੀ ਨਿਖਾਰ

ਕੇਲਾ : ਕੇਲੇ ਦੇ ਗੁੱਦੇ ਨੂੰ ਦਹੀਂ ਵਿਚ ਮਿਲਾ ਕੇ ਜਾਂ ਉਂਜ ਹੀ ਚਿਹਰੇ 'ਤੇ ਮਾਸਕ ਦੀ ਤਰ੍ਹਾਂ ਲਗਾਉਣ 'ਤੇ ਵਧੀਆ ਅਸਰ ਹੁੰਦਾ ਹੈ ਅਤੇ ਇਸ ਨਾਲ ਚਮੜੀ ਦੇ ਧੱਬੇ ਮਿਲ ਜਾਂਦੇ ਹਨ। ਪੱਕੇ ਕੇਲੇ ਦੇ ਗੁੱਦੇ ਵਿਚ ਨਾਰੀਅਲ, ਜੈਤੂਨ ਆਦਿ ਦੇ ਤੇਲ ਦੀਆਂ ਕੁਝ ਬੂੰਦਾਂ ਅਤੇ ਥੋੜ੍ਹੀ ਜਿਹੀ ਮਾਤਰਾ ਵਿਚ ਸ਼ਹਿਦ ਮਿਲਾ ਕੇ ਚਿਹਰੇ ਲਈ ਵਧੀਆ ਪੈਕ ਤਿਆਰ ਕਰ ਸਕਦੇ ਹੋ।
ਸੇਬ : ਸੇਬ ਦੇ ਰਸ ਨੂੰ ਸਿਰਕੇ ਵਿਚ ਮਿਲਾ ਕੇ ਵਾਲ ਧੋਣ ਨਾਲ ਸਫੈਦ ਵਾਲਾਂ ਵਿਚ ਸੁਨਹਿਰੀ ਰੰਗਤ ਆ ਜਾਂਦੀ ਹੈ। ਸੇਬ ਦਾ ਲੇਪ ਬਣਾ ਕੇ ਇਸ ਨੂੰ ਪੈਕ ਦੀ ਤਰ੍ਹਾਂ ਚਿਹਰੇ 'ਤੇ ਲਗਾਓ। ਫਿਰ 10 ਤੋਂ 15 ਮਿੰਟਾਂ ਬਾਅਦ ਧੋ ਦਿਓ। ਇਸ ਤਰ੍ਹਾਂ ਚਿਹਰੇ 'ਤੇ ਵੱਖਰਾ ਨਿਖਾਰ ਆਵੇਗਾ। ਜੇਕਰ ਸੇਬ ਦੇ ਛਿਲਕੇ ਨੂੰ ਹੱਥਾਂ-ਪੈਰਾਂ ਆਦਿ 'ਤੇ ਮਲ ਲਿਆ ਜਾਵੇ ਤਾਂ ਇਸ ਨਾਲ ਇਹ ਨਰਮ ਹੋ ਜਾਂਦੇ ਹਨ ਅਤੇ ਇਨ੍ਹਾਂ 'ਤੇ ਚਮਕ ਆ ਜਾਂਦੀ ਹੈ।
ਪਾਲਕ : ਪਾਲਕ ਅਤੇ ਬਾਥੂ ਨੂੰ ਇਕੋ ਸਮੇਂ ਪਾਣੀ ਵਿਚ ਉਬਾਲ ਲਓ ਅਤੇ ਇਸ ਪਾਣੀ ਨੂੰ ਪੁਣ ਕੇ ਸਿਰ ਧੋਵੋ। ਇਸ ਨਾਲ ਸਿਕਰੀ ਦੀ ਸਮੱਸਿਆ ਖ਼ਤਮ ਹੋ ਜਾਵੇਗੀ। ਚਿਹਰੇ ਨੂੰ ਨਿਖਾਰਨ ਲਈ ਵੀ ਪਾਲਕ ਕਾਫੀ ਮਹੱਤਵਪੂਰਨ ਮੰਨੀ ਜਾਂਦੀ ਹੈ।
ਆਲੂ : ਇਹ ਚਮੜੀ ਤੋਂ ਦਾਗ-ਧੱਬੇ ਸਾਫ਼ ਕਰਨ ਵਿਚ ਕਾਫੀ ਸਹਾਇਕ ਹੈ। ਆਲੂ ਨੂੰ ਕੱਦੂਕਸ਼ ਕਰਕੇ ਇਸ ਦਾ ਰਸ ਕੱਢ ਲਓ ਅਤੇ ਚਮੜੀ 'ਤੇ ਲਗਾਓ। ਆਲੂ ਦੇ ਰਸ ਵਿਚ ਚਮੜੀ ਵਿਚ ਖਿਚਾਅ ਲਿਆਉਣ ਦਾ ਗੁਣ ਹੁੰਦਾ ਹੈ ਅਤੇ ਇਹ ਅੱਖਾਂ ਦੇ ਆਲੇ-ਦੁਆਲੇ ਕਾਲੇ ਘੇਰਿਆਂ ਨੂੰ ਦੂਰ ਕਰਨ ਵਿਚ ਵੀ ਸਹਾਈ ਹੁੰਦਾ ਹੈ ਅਤੇ ਇਸ ਨਾਲ ਅੱਖਾਂ ਦੇ ਹੇਠਾਂ ਦਾ ਭਾਰੀਪਣ ਦੂਰ ਹੋ ਜਾਂਦਾ ਹੈ।
ਟਮਾਟਰ : ਟਮਾਟਰ ਦੇ ਰਸ ਨੂੰ ਪੋਸ਼ਣ ਕਰਨ ਵਾਲੇ ਲੋਸ਼ਨ ਦੇ ਤੌਰ 'ਤੇ ਇਸਤੇਮਾਲ ਕਰੋ ਜਾਂ ਉਸ ਨੂੰ ਦਹੀਂ ਵਿਚ ਮਿਲਾ ਕੇ ਚਿਹਰੇ 'ਤੇ ਪੈਕ ਦੀ ਤਰ੍ਹਾਂ ਲਗਾਓ। ਇਹ ਤੇਲੀ ਚਮੜੀ ਲਈ ਬਹੁਤ ਉਪਯੋਗੀ ਹੈ। ਮੁਲਤਾਨੀ ਮਿੱਟੀ ਦੇ ਚੂਰੇ ਵਿਚ ਟਮਾਟਰ ਦਾ ਗੁੱਦਾ ਮਿਲਾ ਕੇ ਵਧੀਆ ਲੇਪ ਬਣਾਇਆ ਜਾ ਸਕਦਾ ਹੈ। ਇਹ ਲੇਪ ਨਹਾਉਣ ਤੋਂ ਅੱਧਾ ਘੰਟਾ ਪਹਿਲਾਂ ਸਰੀਰ 'ਤੇ ਲਗਾਓ। ਇਸ ਨਾਲ ਸਰੀਰ ਦੀ ਚਮੜੀ ਮੁਲਾਇਮ ਅਤੇ ਚਮਕਦਾਰ ਹੋ ਜਾਂਦੀ ਹੈ।

-ਸੁਖਮੰਦਰ ਸਿੰਘ ਤੂਰ, ਪਿੰਡ ਤੇ ਡਾਕ: ਖੋਸਾ ਪਾਂਡੋ (ਮੋਗਾ)-142048






Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX