ਤਾਜਾ ਖ਼ਬਰਾਂ


ਇੰਗਲੈਂਡ ਦੇ 14 ਨੌਜਵਾਨਾਂ ਨੇ ਕੈਪਟਨ ਅਮਰਿੰਦਰ ਸਿੰਘ ਨਾਲ ਕੀਤੀ ਮੁਲਾਕਾਤ
. . .  4 minutes ago
ਚੰਡੀਗੜ੍ਹ, 15 ਅਗਸਤ - ਇੰਗਲੈਂਡ ਤੋਂ ਆਏ 15 ਨੌਜਵਾਨਾਂ ਨੇ ਅੱਜ ਚੰਡੀਗੜ੍ਹ ਵਿਖੇ ਮੁੱਖ ਮੰਤਰੀ ਪੰਜਾਬ ਕੈਪਟਨ ਅਮਰਿੰਦਰ ਸਿੰਘ ਨਾਲ ਮੁਲਾਕਾਤ ਕੀਤੀ। ਇਸ ਮੌਕੇ ਕੈਪਟਨ ਅਮਰਿੰਦਰ ਸਿੰਘ...
ਬਿਹਾਰ : ਬੰਬ ਧਮਾਕੇ 'ਚ 4 ਬੱਚੇ ਜ਼ਖਮੀ
. . .  31 minutes ago
ਪਟਨਾ, 15 ਅਗਸਤ - ਬਿਹਾਰ ਦੇ ਨਾਲੰਦਾ ਜ਼ਿਲ੍ਹੇ 'ਚ ਇੱਕ ਘਰ ਵਿਚ ਹੋਏ ਬੰਬ ਧਮਾਕੇ ਦੌਰਾਨ 4 ਬੱਚੇ ਜ਼ਖਮੀ ਹੋ ਗਏ। ਇਹ ਘਟਨਾ ਜ਼ਿਲ੍ਹੇ ਦੇ ਰਹੂਈ ਪਿੰਡ ਦੀ ਹੈ। ਘਰ ਵਿਚੋਂ ਤਿੰਨ ਜਿੰਦਾ...
ਛੱਤੀਸਗੜ੍ਹ : ਆਈ.ਈ.ਡੀ ਧਮਾਕੇ 'ਚ 2 ਜਵਾਨ ਜ਼ਖਮੀ
. . .  50 minutes ago
ਰਾਏਪੁਰ, 15 ਅਗਸਤ - ਛੱਤੀਸਗੜ੍ਹ ਦੇ ਰਾਜਨਾਂਦ ਪਿੰਡ ਨੇੜੇ ਨਕਸਲੀਆਂ ਵੱਲੋਂ ਕੀਤੇ ਗਏ ਆਈ.ਈ.ਡੀ ਧਮਾਕੇ 'ਚ ਆਈ.ਟੀ.ਬੀ.ਪੀ ਦੇ 2 ਜਵਾਨ ਜ਼ਖਮੀ ਹੋ...
ਜਲੰਧਰ ਜ਼ਿਲ੍ਹੇ ਦੇ ਸਾਰੇ ਵਿੱਦਿਅਕ ਅਦਾਰਿਆਂ 'ਚ ਕੱਲ੍ਹ ਛੁੱਟੀ ਦਾ ਐਲਾਨ
. . .  about 1 hour ago
ਜਲੰਧਰ, 15 ਅਗਸਤ - ਜਲੰਧਰ ਜ਼ਿਲ੍ਹੇ ਦੇ ਸਾਰੇ ਸਰਕਾਰੀ ਅਤੇ ਨਿੱਜੀ ਵਿੱਦਿਅਕ ਅਦਾਰਿਆਂ 'ਚ 16 ਅਗਸਤ ਛੁੱਟੀ ਰਹੇਗੀ। ਇਹ ਐਲਾਨ ਖੇਡ ਮੰਤਰੀ ਪੰਜਾਬ ਰਾਣਾ ਗੁਰਮੀਤ ਸਿੰਘ...
ਇਟਲੀ ਹਾਈਵੇ ਪੁਲ ਹਾਦਸਾ : ਮੌਤਾਂ ਦੀ ਗਿਣਤੀ 38 ਹੋਈ
. . .  about 2 hours ago
ਜਿਨੋਆ, 15 ਅਗਸਤ - ਇਟਲੀ ਦੇ ਜਿਨੋਆ 'ਚ ਹਾਈਵੇ ਦਾ ਪੁਲ ਡਿਗਣ ਕਾਰਨ ਵਾਪਰੇ ਹਾਦਸੇ ਵਿਚ ਮ੍ਰਿਤਕਾਂ ਦੀ ਗਿਣਤੀ 38 ਹੋ ਗਈ ਹੈ। ਸਥਾਨਕ ਸਰਕਾਰ ਵਲੋਂ ਇਸ ਹਾਦਸੇ ਲਈ ਦੇਸ਼ ਲਈ ਮੋਟਰਵੇਅ ਬਣਾਉਣ ਵਾਲੀ ਕੰਪਨੀ ਨੂੰ ਜਿੰਮੇਵਾਰ ਠਹਿਰਾਇਆ ਜਾ ਰਿਹਾ ਹੈ...
ਕੋਚੀ ਹਵਾਈ ਅੱਡਾ 18 ਅਗਸਤ ਤੱਕ ਬੰਦ
. . .  about 2 hours ago
ਤਿਰੁਵਨੰਤਪੁਰਮ, 15 ਅਗਸਤ - ਕੇਰਲ 'ਚ ਹੜ੍ਹ ਨਾਲ ਵਿਗੜੇ ਹਾਲਾਤਾਂ ਦੇ ਵਿਚਕਾਰ ਕੋਚਿਨ ਇੰਟਰਨੈਸ਼ਨਲ ਹਵਾਈ ਅੱਡੇ ਨੂੰ 18 ਅਗਸਤ ਦੁਪਹਿਰ 2 ਵਜੇ ਤੱਕ ਲਈ ਬੰਦ ਕਰ ਦਿੱਤਾ ਗਿਆ ਹੈ। ਪੇਰਿਅਰ ਨਦੀ ਦਾ ਜਲ ਪੱਧਰ ਵਧਣ ਕਾਰਨ ਪਾਣੀ ਦੇ ਏਅਰਪੋਰਟ ਅੰਦਰ ਦਾਖਲ...
ਆਜ਼ਾਦੀ ਸਮਾਗਮ ਮੌਕੇ ਨਾਭਾ ਪ੍ਰਸ਼ਾਸਨ ਦੀ ਅਣਦੇਖੀ ਦਾ ਸ਼ਿਕਾਰ ਹੋਏ ਆਜ਼ਾਦੀ ਘੁਲਾਟੀਏ
. . .  about 2 hours ago
ਨਾਭਾ,15 ਅਗਸਤ (ਕਰਮਜੀਤ ਸਿੰਘ) - ਅੱਜ ਨਾਭਾ ਵਿਖੇ 72ਵੇਂ ਆਜ਼ਾਦੀ ਦਿਵਸ ਸਮਾਗਮ ਦੌਰਾਨ ਪਹੁੰਚੇ ਆਜ਼ਾਦੀ ਘੁਲਾਟੀਏ ਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਨੂੰ ਨਮੋਸ਼ੀ ਦਾ ਸਾਹਮਣਾ ਕਰਨਾ ਪਿਆ। ਸਮਾਗਮ ਦੌਰਾਨ ਨਾਭਾ ਪ੍ਰਸ਼ਾਸਨ ਦੀ ਨਾਲਾਇਕੀ ਤੇ ਅਣਦੇਖੀ ਸਾਫ਼ ਦੇਖਣ...
ਕੇਜਰੀਵਾਲ ਨੇ ਆਸ਼ੂਤੋਸ਼ ਦਾ ਅਸਤੀਫ਼ਾ ਕੀਤਾ ਨਾ ਮਨਜ਼ੂਰ
. . .  about 3 hours ago
ਨਵੀਂ ਦਿੱਲੀ, 15 ਅਗਸਤ - ਆਮ ਆਦਮੀ ਪਾਰਟੀ ਪ੍ਰਮੁੱਖ ਅਰਵਿੰਦ ਕੇਜਰੀਵਾਲ ਨੇ ਆਸ਼ੂਤੋਸ਼ ਦਾ ਅਸਤੀਫ਼ਾ ਨਾ ਮਨਜ਼ੂਰ ਕਰ ਦਿੱਤਾ ਹੈ। ਉਨ੍ਹਾਂ ਨੇ ਟਵੀਟ ਕਰਕੇ ਕਿਹਾ ਕਿ ਇਸ ਜਨਮ 'ਚ ਉਹ ਅਸਤੀਫ਼ਾ ਮਨਜ਼ੂਰ ਨਹੀਂ ਕਰ ਸਕਦੇ। ਆਮ ਆਦਮੀ ਪਾਰਟੀ ਦੇ ਸੀਨੀਅਰ ਨੇਤਾ ਆਸ਼ੂਤੋਸ਼...
ਮੌਸਮ ਵਿਭਾਗ ਵੱਲੋਂ ਕੇਰਲ 'ਚ ਭਾਰੀ ਤੋਂ ਭਾਰੀ ਮੀਂਹ ਦਾ ਅਲਰਟ ਜਾਰੀ
. . .  about 4 hours ago
ਤਿਰੂਵਨੰਤਪੁਰਮ, 15 ਅਗਸਤ - ਮੌਸਮ ਵਿਭਾਗ ਨੇ ਕੇਰਲ ਦੇ ਕਈ ਹਿੱਸਿਆ 'ਚ ਭਾਰੀ ਤੋਂ ਭਾਰੀ ਮੀਂਹ ਦਾ ਅਲਰਟ ਜਾਰੀ ਕੀਤਾ...
ਅਫ਼ਗ਼ਾਨਿਸਤਾਨ : ਬੰਬ ਧਮਾਕੇ 'ਚ 4 ਮੌਤਾਂ, 2 ਜ਼ਖਮੀ
. . .  about 4 hours ago
ਕਾਬੁਲ, 15 ਅਗਸਤ - ਅਫ਼ਗ਼ਾਨਿਸਤਾਨ ਦੇ ਜਾਬੁਲ ਜ਼ਿਲ੍ਹੇ ਵਿਚ ਹੋਏ ਬੰਬ ਧਮਾਕੇ ਦੌਰਾਨ 4 ਲੋਕਾਂ ਦੀ ਮੌਤ ਹੋ ਗਈ, ਜਦਕਿ 2 ਜ਼ਖਮੀ ਹੋ...
ਹੋਰ ਖ਼ਬਰਾਂ..
  •     Confirm Target Language  

ਸਾਡੀ ਸਿਹਤ

ਕਿਉਂ ਭੁੱਲ ਜਾਂਦੇ ਹੋ ਤੁਸੀਂ?

ਭੁੱਲਣਾ ਆਪਣੇ-ਆਪ ਵਿਚ ਇਕ ਬਿਮਾਰੀ ਹੁੰਦੀ ਹੈ, ਜਿਸ ਨੂੰ 'ਯਾਦ ਨਾ ਰਹਿਣਾ' ਵੀ ਕਿਹਾ ਜਾਂਦਾ ਹੈ। ਕਦੇ-ਕਦੇ ਅਜਿਹਾ ਦੇਖਿਆ ਗਿਆ ਹੈ ਕਿ ਘਰ ਵਿਚ ਕੁਝ ਦੇਰ ਪਹਿਲਾਂ ਜਿਸ ਸਾਮਾਨ ਨੂੰ ਰੱਖ ਦਿੱਤਾ ਗਿਆ ਸੀ, ਉਸ ਨੂੰ ਲੋੜ ਪੈਣ 'ਤੇ ਲੱਭਣ ਵਿਚ ਘੰਟੇ ਲੱਗ ਜਾਂਦੇ ਹਨ।
ਯਾਦ ਸ਼ਕਤੀ ਕਮਜ਼ੋਰ ਹੋਣ ਦੇ ਕੁਝ ਵਿਸ਼ੇਸ਼ ਕਾਰਨ ਹੁੰਦੇ ਹਨ। ਜੇ ਇਹ ਇਕ ਵਾਰ ਜਾਣ ਲਿਆ ਜਾਵੇ ਕਿ ਯਾਦ ਸ਼ਕਤੀ ਕਮਜ਼ੋਰ ਕਿਉਂ ਹੁੰਦੀ ਹੈ ਤਾਂ ਨਿਸਚਿਤ ਰੂਪ ਨਾਲ ਆਪਣੀ ਯਾਦ ਸ਼ਕਤੀ ਨੂੰ ਵਧਾਉਣ ਦਾ ਉਪਾਅ ਕੀਤਾ ਜਾਵੇਗਾ।
ਕੁਝ ਗੱਲਾਂ ਨੂੰ ਭੁੱਲਣ ਦਾ ਅਰਥ ਇਹ ਨਹੀਂ ਹੁੰਦਾ ਕਿ ਯਾਦ ਸ਼ਕਤੀ ਕਮਜ਼ੋਰ ਹੁੰਦੀ ਜਾ ਰਹੀ ਹੈ, ਸਗੋਂ ਇਸ ਲਈ ਭੁੱਲ ਜਾਂਦੇ ਹਾਂ ਕਿ ਅਸੀਂ ਇਕ ਵਾਰ ਵਿਚ ਬਹੁਤ ਸਾਰੀਆਂ ਗੱਲਾਂ ਨੂੰ ਯਾਦ ਕਰਨਾ ਚਾਹੁੰਦੇ ਹਾਂ ਜਾਂ ਕਿਸੇ ਦੂਜੀ ਗੱਲ ਬਾਰੇ ਸੋਚਣ ਸਮੇਂ ਕੁਝ ਖਾਸ ਗੱਲਾਂ ਨੂੰ ਯਾਦ ਵੀ ਰੱਖਣਾ ਚਾਹੁੰਦੇ ਹਾਂ।
ਇਕ ਵਿਅਕਤੀ ਜੋ ਤਣਾਅ ਵਿਚ ਘਿਰਿਆ ਰਹਿੰਦਾ ਹੈ, ਉਸ ਦੇ ਦਿਮਾਗ ਵਿਚ ਅਨੇਕਾਂ ਤਰ੍ਹਾਂ ਦੇ ਵਿਚਾਰ ਚੱਕਰ ਕੱਟਦੇ ਰਹਿੰਦੇ ਹਨ ਅਤੇ ਉਹ ਵਿਅਕਤੀ ਵਾਰ-ਵਾਰ ਉਨ੍ਹਾਂ ਗੱਲਾਂ ਬਾਰੇ ਸੋਚਦਾ ਰਹਿੰਦਾ ਹੈ। ਅਜਿਹੀ ਦਿਸ਼ਾ ਵਿਚ ਉਸ ਵਿਅਕਤੀ ਦੀ ਯਾਦ ਸ਼ਕਤੀ ਕਮਜ਼ੋਰ ਹੋ ਜਾਂਦੀ ਹੈ। ਤਣਾਅ ਤੋਂ ਪੀੜਤ ਔਰਤਾਂ ਅਤੇ ਪੁਰਸ਼ ਸਰੀਰਕ ਅਤੇ ਮਾਨਸਿਕ ਦੋਵੇਂ ਪੱਖੋਂ ਸੁਸਤ ਹੋ ਜਾਂਦੇ ਹਨ।
ਨਸ਼ੀਲੇ ਪਦਾਰਥਾਂ ਦਾ ਸੇਵਨ ਕਰਨ ਨਾਲ ਵੀ ਯਾਦ ਸ਼ਕਤੀ ਕਮਜ਼ੋਰ ਹੋ ਜਾਂਦੀ ਹੈ। ਜੇ ਨਸ਼ੀਲੇ ਪਦਾਰਥਾਂ ਦਾ ਸੇਵਨ ਬਹੁਤ ਘੱਟ ਮਾਤਰਾ ਵਿਚ ਕੀਤਾ ਜਾਵੇ ਤਾਂ ਯਾਦ ਸ਼ਕਤੀ ਪ੍ਰਭਾਵਿਤ ਨਹੀਂ ਹੁੰਦੀ ਪਰ ਜ਼ਿਆਦਾ ਮਾਤਰਾ ਵਿਚ ਨਸ਼ੀਲੇ ਪਦਾਰਥਾਂ ਦਾ ਸੇਵਨ ਕਰਨ ਨਾਲ ਯਾਦ ਸ਼ਕਤੀ ਹੌਲੀ-ਹੌਲੀ ਕਮਜ਼ੋਰ ਹੋਣ ਲਗਦੀ ਹੈ।
ਯਾਦ ਸ਼ਕਤੀ 'ਤੇ ਉਮਰ ਦਾ ਪ੍ਰਭਾਵ ਵੀ ਪੈਂਦਾ ਹੈ, ਕਿਉਂਕਿ ਦਿਮਾਗ ਹੀ ਯਾਦ ਸ਼ਕਤੀ ਨੂੰ ਕਾਬੂ ਕਰਦਾ ਹੈ। ਉਮਰ ਵਧਣ ਦੇ ਨਾਲ-ਨਾਲ ਦਿਮਾਗ ਦੀ ਕਾਰਜ ਸਮਰੱਥਾ ਵੀ ਘੱਟ ਹੋਣ ਲਗਦੀ ਹੈ, ਜਿਸ ਦਾ ਪ੍ਰਭਾਵ ਵਿਅਕਤੀ ਦੀ ਯਾਦ ਸ਼ਕਤੀ 'ਤੇ ਪੈਂਦਾ ਹੈ।
ਸਰੀਰਕ ਅਤੇ ਮਾਨਸਿਕ ਬਿਮਾਰੀ ਦਾ ਪ੍ਰਭਾਵ ਵੀ ਯਾਦ ਸ਼ਕਤੀ 'ਤੇ ਪੈਂਦਾ ਹੈ। ਅਕਸਰ ਦੇਖਿਆ ਗਿਆ ਹੈ ਕਿ ਸਿਰ ਵਿਚ ਸੱਟ ਲੱਗਣ ਨਾਲ ਜਾਂ ਮਿਰਗੀ ਦਾ ਦੌਰਾ ਪੈਣ ਨਾਲ ਵੀ ਯਾਦ ਸ਼ਕਤੀ ਪ੍ਰਭਾਵਿਤ ਹੋ ਜਾਂਦੀ ਹੈ।
ਜੇ ਕਿਸੇ ਨੂੰ ਇਹ ਗਿਆਨ ਹੋ ਜਾਵੇ ਕਿ ਉਸ ਦੀ ਯਾਦ ਸ਼ਕਤੀ ਕਮਜ਼ੋਰ ਹੋਣ ਦਾ ਕਾਰਨ ਉਸ ਦੀ ਸਰੀਰਕ ਅਤੇ ਮਾਨਸਿਕ ਬਿਮਾਰੀ ਹੈ ਤਾਂ ਉਸ ਦੇ ਹੱਲ ਲਈ ਤੁਰੰਤ ਡਾਕਟਰ ਦੀ ਸਲਾਹ ਲੈਣੀ ਚਾਹੀਦੀ ਹੈ। ਕੁਝ ਅਜਿਹੇ ਵੀ ਵਿਅਕਤੀ ਹਨ ਜੋ ਨਾ ਤਾਂ ਕਿਸੇ ਤਰ੍ਹਾਂ ਦੇ ਤਣਾਅ ਦੇ ਹੀ ਸ਼ਿਕਾਰ ਹੁੰਦੇ ਹਨ ਅਤੇ ਨਾ ਹੀ ਕਿਸੇ ਬਿਮਾਰੀ ਤੋਂ ਪੀੜਤ ਹੁੰਦੇ ਹਨ, ਫਿਰ ਵੀ ਉਨ੍ਹਾਂ ਦੀ ਯਾਦ ਸ਼ਕਤੀ ਠੀਕ ਤਰ੍ਹਾਂ ਕੰਮ ਨਹੀਂ ਕਰਦੀ। ਇਸ ਦਾ ਕਾਰਨ ਲਾਪ੍ਰਵਾਹੀ ਹੁੰਦਾ ਹੈ। ਅਜਿਹੇ ਲੋਕ ਚਾਹੁਣ ਤਾਂ ਹਰੇਕ ਛੋਟੀ-ਛੋਟੀ ਗੱਲ ਦਾ ਵੀ ਵਿਸ਼ੇਸ਼ ਧਿਆਨ ਰੱਖ ਕੇ ਯਾਦ ਸ਼ਕਤੀ ਨੂੰ ਵਧਾ ਸਕਦੇ ਹਨ।
ਉਦਾਸੀ ਯਾਦ ਸ਼ਕਤੀ ਲਈ ਬਹੁਤ ਘਾਤਕ ਹੁੰਦੀ ਹੈ। ਪ੍ਰਸਿੱਧ ਮਨੋਵਿਗਿਆਨਕ ਅਤੇ ਦਾਰਸ਼ਨਿਕ 'ਇਮਰਸਨ' ਨੇ ਕਿਹਾ ਹੈ ਕਿ 'ਆਪਣੇ ਮਨ ਦੇ ਦੁਆਰ ਸਦਾ ਉਤਸ਼ਾਹ, ਉਮੰਗ ਅਤੇ ਆਨੰਦ ਲਈ ਖੁੱਲ੍ਹੇ ਰੱਖੋ ਅਤੇ ਉਦਾਸੀਨਤਾ ਨੂੰ ਨੇੜੇ ਨਾ ਫਟਕਣ ਦਿਓ। ਪੂਰੇ ਮਨੋਯੋਗ ਨਾਲ ਕੰਮ ਕਰਦੇ ਹੋਏ ਮਨ ਦੇ ਸਾਰੇ ਵਿਕਾਰਾਂ 'ਤੇ ਕਾਬੂ ਰੱਖੋ। ਅਜਿਹਾ ਕਰਦੇ ਰਹਿਣ ਨਾਲ ਯਾਦ ਸ਼ਕਤੀ ਹਮੇਸ਼ਾ ਬਣੀ ਰਹਿ ਕੇ ਤੁਹਾਡੀ ਚਾਕਰੀ ਕਰੇਗੀ।'


ਖ਼ਬਰ ਸ਼ੇਅਰ ਕਰੋ

ਗਰਮੀ ਵਿਚ ਤਾਜ਼ਗੀ ਲਿਆਉਂਦੇ ਹਨ ਤਰਲ ਪਦਾਰਥ

ਮੌਸਮ ਅਨੁਸਾਰ ਅਸੀਂ ਆਪਣੀ ਚਮੜੀ ਦੀ ਕਿਵੇਂ ਦੇਖਭਾਲ ਕਰਨੀ ਹੈ, ਉਨ੍ਹਾਂ ਉਪਾਵਾਂ ਨੂੰ ਤਾਂ ਅਸੀਂ ਧਿਆਨ ਵਿਚ ਰੱਖ ਲੈਂਦੇ ਹਾਂ ਪਰ ਮੌਸਮ ਅਨੁਸਾਰ ਆਪਣੇ ਸਰੀਰ ਨੂੰ ਤੰਦਰੁਸਤ ਕਿਵੇਂ ਰੱਖਣਾ ਹੈ, ਇਸ 'ਤੇ ਧਿਆਨ ਨਹੀਂ ਦਿੰਦੇ ਜਦੋਂ ਕਿ ਇਹ ਬਹੁਤ ਜ਼ਰੂਰੀ ਹੈ। ਇਸੇ ਤਰ੍ਹਾਂ ਗਰਮੀ ਆਉਣ 'ਤੇ ਅਸੀਂ ਤੇਜ਼ ਧੁੱਪ ਤੋਂ ਆਪਣੇ-ਆਪ ਨੂੰ ਕਿਵੇਂ ਬਚਾਅ ਕੇ ਰੱਖੀਏ, ਇਸ ਦਾ ਧਿਆਨ ਰੱਖਦੇ ਹੋਏ ਸਰੀਰ ਵਿਚ ਆਉਣ ਵਾਲੀ ਕਮਜ਼ੋਰੀ ਨੂੰ ਦੂਰ ਕਿਵੇਂ ਕਰੀਏ, ਇਸ 'ਤੇ ਵੀ ਪੂਰਾ ਧਿਆਨ ਦੇਣਾ ਚਾਹੀਦਾ ਹੈ। ਸਰੀਰ ਨੂੰ ਅੰਦਰ ਤੱਕ ਠੰਢਾ ਰੱਖਣ ਲਈ ਸਾਨੂੰ ਦਿਨ ਭਰ ਵਿਚ ਪਾਣੀ ਦਾ ਸੇਵਨ ਭਰਪੂਰ ਮਾਤਰਾ ਵਿਚ ਕਰਨਾ ਚਾਹੀਦਾ ਹੈ। ਜੇ ਜ਼ਿਆਦਾ ਪਾਣੀ ਨਹੀਂ ਪੀ ਸਕਦੇ ਤਾਂ ਰੂਹਅਫਜਾ ਪਾਣੀ ਵਿਚ ਪਾ ਕੇ ਪੀਓ। ਨਿੰਬੂ-ਪਾਣੀ ਵੀ ਲੈ ਸਕਦੇ ਹੋ। ਸਾਫਟ ਡ੍ਰਿੰਕਸ, ਰੈਡੀਮੇਡ ਜੂਸ ਸਰੀਰ ਨੂੰ ਊਰਜਾ ਤਾਂ ਦਿੰਦੇ ਹਨ ਅਤੇ ਠੰਢਕ ਵੀ ਪਰ ਸਿਹਤ ਦੇ ਲਿਹਾਜ਼ ਨਾਲ ਇਨ੍ਹਾਂ ਦਾ ਜ਼ਿਆਦਾ ਸੇਵਨ ਨੁਕਸਾਨਦੇਹ ਹੁੰਦਾ ਹੈ।
ਪਾਣੀ ਦਾ ਕਰੋ ਸੇਵਨ
ਦਿਨ ਭਰ ਵਿਚ 8 ਤੋਂ 10 ਗਿਲਾਸ ਪਾਣੀ ਤਾਂ ਜ਼ਰੂਰ ਪੀਣਾ ਚਾਹੀਦਾ ਹੈ। ਪਾਣੀ ਨਾਲ ਸਰੀਰ ਨੂੰ ਕਈ ਲਾਭ ਹੁੰਦੇ ਹਨ। ਸਰੀਰ ਵਿਚ ਨਮੀ ਬਣੀ ਰਹਿੰਦੀ ਹੈ। ਸਰੀਰ ਵਿਚੋਂ ਜ਼ਹਿਰੀਲੇ ਪਦਾਰਥ ਪਸੀਨੇ ਅਤੇ ਮਲਮੂਤਰ ਦੁਆਰਾ ਨਿਕਲਦੇ ਹਨ। ਵੈਸੇ ਕਮਰੇ ਦੇ ਤਾਪਮਾਨ ਵਾਲਾ ਪਾਣੀ ਪੀਣ ਲਈ ਵਧੀਆ ਹੁੰਦਾ ਹੈ ਜੋ ਸਿਹਤ ਲਈ ਚੰਗਾ ਮੰਨਿਆ ਜਾਂਦਾ ਹੈ। ਦਿਨ ਵਿਚ ਚਾਹੋ ਤਾਂ ਇਕ-ਦੋ ਵਾਰ ਕੋਸਾ ਪਾਣੀ ਵੀ ਪੀ ਸਕਦੇ ਹੋ। ਇਸ ਸਭ ਨਾਲ ਪਾਚਣ ਸ਼ਕਤੀ ਠੀਕ ਰਹਿੰਦੀ ਹੈ। ਕਮਜ਼ੋਰ ਪਾਚਣ ਸ਼ਕਤੀ ਵਾਲਿਆਂ ਨੂੰ ਠੰਢਾ ਪਾਣੀ ਨੁਕਸਾਨ ਪਹੁੰਚਾਉਂਦਾ ਹੈ। ਪਾਣੀ ਤੋਂ ਇਲਾਵਾ ਨਿੰਬੂ ਪਾਣੀ, ਨਾਰੀਅਲ ਪਾਣੀ ਦਾ ਸੇਵਨ ਵੀ ਕਰ ਸਕਦੇ ਹੋ। ਝਟਪਟ ਅਨਰਜੀ ਲਈ ਜੂਸ, ਪਾਣੀ ਵਿਚ ਸ਼ਹਿਦ, ਮਿੱਠੀ ਲੱਸੀ ਵੀ ਲੈ ਸਕਦੇ ਹੋ ਪਰ ਇਨ੍ਹਾਂ ਦਾ ਨਿਯਮਤ ਸੇਵਨ ਠੀਕ ਨਹੀਂ।
ਫਲਾਂ ਅਤੇ ਸਬਜ਼ੀਆਂ ਦਾ ਰਸ
ਤਾਜ਼ਾ ਫਲਾਂ ਦਾ ਰਸ ਸਰੀਰ ਨੂੰ ਇੰਸਟੈਂਟ ਅਨਰਜੀ ਦਿੰਦਾ ਹੈ, ਕਿਉਂਕਿ ਫਲਾਂ ਵਿਚ ਕੁਦਰਤੀ ਸ਼ੂਗਰ ਦੀ ਮਾਤਰਾ ਜ਼ਿਆਦਾ ਹੁੰਦੀ ਹੈ, ਜੋ ਰਸ ਦੇ ਰੂਪ ਵਿਚ ਖੂਨ ਵਿਚ ਛੇਤੀ ਘੁਲ ਜਾਂਦੀ ਹੈ ਅਤੇ ਸਰੀਰ ਨੂੰ ਊਰਜਾ ਪ੍ਰਾਪਤ ਹੁੰਦੀ ਹੈ। ਜ਼ਿਆਦਾ ਰਸ ਵੀ ਸਰੀਰ ਨੂੰ ਨੁਕਸਾਨ ਪਹੁੰਚਾਉਂਦਾ ਹੈ। ਰਸ ਬੱਚਿਆਂ, ਰੋਗੀਆਂ ਅਤੇ ਬਜ਼ੁਰਗ ਲੋਕਾਂ ਲਈ ਜ਼ਿਆਦਾ ਲਾਭਦਾਇਕ ਹੁੰਦਾ ਹੈ। ਨਿਰੋਗੀ ਲੋਕਾਂ ਨੂੰ ਫਲਾਂ ਦਾ ਸੇਵਨ ਜ਼ਿਆਦਾ ਕਰਨਾ ਚਾਹੀਦਾ ਹੈ ਤਾਂ ਕਿ ਸਰੀਰ ਨੂੰ ਲੋੜੀਂਦੀ ਮਾਤਰਾ ਵਿਚ ਰੇਸ਼ਾ ਪ੍ਰਾਪਤ ਹੋ ਸਕੇ। ਸਬਜ਼ੀਆਂ ਦੇ ਰਸ ਨਾਲ ਸਰੀਰ ਨੂੰ ਸਬਜ਼ੀਆਂ ਦੀ ਮਾਤਰਾ ਤਰਲ ਰੂਪ ਵਿਚ ਮਿਲ ਜਾਂਦੀ ਹੈ, ਜਿਸ ਨਾਲ ਸਰੀਰ ਨੂੰ ਲਾਭ ਮਿਲਦਾ ਹੈ।
ਹਰਬਲ ਟੀ : ਹਰਬਲ ਟੀ ਵਿਚ ਕੈਫੀਨ ਦੀ ਮਾਤਰਾ ਨਾ ਹੋਣ ਕਾਰਨ ਸਰੀਰ ਲਈ ਇਹ ਸਰਬੋਤਮ ਹੈ। ਨਿਯਮਤ ਸੇਵਨ ਕਰਨ ਨਾਲ ਪਾਚਣ ਸਬੰਧੀ ਸਮੱਸਿਆਵਾਂ ਵਿਚ ਲਾਭ ਮਿਲਦਾ ਹੈ। ਹਰਬਲ ਟੀ ਵਿਚ ਕਈ ਸਵਾਦ ਉਪਲਬਧ ਹਨ, ਆਪਣੀ ਪਸੰਦ ਅਨੁਸਾਰ ਹਰਬਲ ਟੀ ਪੀਣ ਦੀ ਆਦਤ ਸਿਹਤ ਲਈ ਲਾਭਦਾਇਕ ਹੁੰਦੀ ਹੈ।
ਲੱਸੀ ਦਾ ਸੇਵਨ ਕਰੋ : ਡਬਲ ਟੋਂਡ ਦੁੱਧ ਦੇ ਦਹੀਂ ਤੋਂ ਬਣੀ ਲੱਸੀ ਸਰੀਰ ਨੂੰ ਅੰਦਰ ਤੱਕ ਠੰਢਾ ਕਰਦੀ ਹੈ। ਗਰਮੀਆਂ ਵਿਚ ਇਸ ਦਾ ਨਿਯਮਤ ਸੇਵਨ ਲਾਭਦਾਇਕ ਹੈ। ਲੱਸੀ ਤੁਸੀਂ ਫਿੱਕੀ ਜਾਂ ਹਲਕੇ ਨਮਕ, ਜ਼ੀਰੇ ਵਾਲੀ ਲੈ ਸਕਦੇ ਹੋ।
ਡੀ ਕੈਫਿਨੇਟੇਡ ਕੌਫੀ : ਡੀ ਕੈਫਿਨੇਟੇਡ ਕੌਫੀ ਵਿਚ ਕੈਫੀਨ ਦੀ ਮਾਤਰਾ ਬਹੁਤ ਘੱਟ ਹੁੰਦੀ ਹੈ। ਕੌਫੀ ਦੇ ਸ਼ੌਕੀਨ ਲੋਕਾਂ ਨੂੰ ਇਸ ਦਾ ਸੇਵਨ ਗਰਮੀਆਂ ਵਿਚ ਕਰਨਾ ਚਾਹੀਦਾ ਹੈ ਪਰ ਧਿਆਨ ਰੱਖੋ ਕਿ ਇਸ ਵਿਚ ਕ੍ਰੀਮ ਅਤੇ ਦੁੱਧ ਦੀ ਮਾਤਰਾ ਘੱਟ ਰੱਖੋ। ਖੰਡ ਵੀ ਘੱਟ ਅਤੇ ਪਾਣੀ ਸਾਫ਼ ਹੋਣਾ ਚਾਹੀਦਾ ਹੈ।


-ਨੀਤੂ ਗੁਪਤਾ

ਘਰੇਲੂ ਦਵਾਈ ਹੈ ਨਿੰਮ

ਕਿਹਾ ਜਾਂਦਾ ਹੈ ਕਿ ਅੰਗਰੇਜ਼ੀ ਦਵਾਈ ਡਿਟੋਲ ਜਿੰਨੀ ਸਾਡੇ ਲਈ ਫਾਇਦੇਮੰਦ ਹੁੰਦੀ ਹੈ, ਉਸ ਨਾਲੋਂ ਕਿਤੇ ਜ਼ਿਆਦਾ ਮਿੱਤਰ ਰੁੱਖ ਨਿੰਮ ਦੇ ਪੱਤਿਆਂ ਦਾ ਉਬਲਿਆ ਹੋਇਆ ਪਾਣੀ ਫਾਇਦੇਮੰਦ ਹੁੰਦਾ ਹੈ। ਇਸ ਪਾਣੀ ਨੂੰ ਜੇ ਸਬਜ਼ੀਆਂ, ਫਸਲਾਂ 'ਤੇ ਕੀਟਨਾਸ਼ਕ ਦੀ ਜਗ੍ਹਾ ਛਿੜਕਾਇਆ ਜਾਵੇ ਤਾਂ ਕੀਟਾਂ ਦਾ ਤਾਂ ਨਾਸ਼ ਹੋਵੇਗਾ ਹੀ, ਨਾਲ ਹੀ ਸਬਜ਼ੀਆਂ ਅਤੇ ਅਨਾਜਾਂ ਦੇ ਖਾਣੇ 'ਤੇ ਕੀਟਨਾਸ਼ਕਾਂ ਦਾ ਜੋ ਅਸਰ ਵਿਅਕਤੀਆਂ ਵਿਚ ਦੇਖਣ ਨੂੰ ਮਿਲਦਾ ਹੈ, ਉਸ ਤੋਂ ਵੀ ਛੁਟਕਾਰਾ ਪਾਇਆ ਜਾ ਸਕਦਾ ਹੈ। ਇਹੀ ਵਜ੍ਹਾ ਹੈ ਕਿ ਭਾਰਤੀ ਮੂਲ ਦੇ ਪ੍ਰਾਚੀਨ ਰਿਸ਼ੀਆਂ-ਮੁਨੀਆਂ ਨੇ ਇਸ ਨੂੰ ਸਰਬਸ੍ਰੇਸ਼ਠ ਰੁੱਖਾਂ ਵਿਚੋਂ ਇਕ ਕਿਹਾ ਹੈ।
ਦਵਾਈ ਦੇ ਰੂਪ ਵਿਚ ਵਿਖਿਆਤ ਨਿੰਮ ਦੇ ਲਾਭ ਹੇਠ ਲਿਖੇ ਅਨੁਸਾਰ ਹਨ-
ਫੋੜੇ-ਫਿੰਨਸੀ ਦੀ ਸਮਾਪਤੀ : ਆਯੁਰਵੇਦ ਅਨੁਸਾਰ ਨਿੰਮ ਦੀ ਸੁੱਕੀ ਛਿੱਲ ਨੂੰ ਪਾਣੀ ਦੇ ਨਾਲ ਘਿਸ ਕੇ ਫੋੜੇ-ਫਿੰਨਸੀ 'ਤੇ ਲੇਪ ਕਰਨ ਨਾਲ ਬਹੁਤ ਲਾਭ ਮਿਲਦਾ ਹੈ ਅਤੇ ਹੌਲੀ-ਹੌਲੀ ਇਹ ਠੀਕ ਹੋ ਜਾਂਦੇ ਹਨ।
ਪੇਟ ਅਤੇ ਚਮੜੀ ਰੋਗਾਂ ਵਿਚ ਲਾਭਦਾਇਕ : ਦੇਖਣ ਵਿਚ ਆਇਆ ਹੈ ਕਿ ਨਿੰਮ ਦੀਆਂ ਨਵੀਆਂ ਕਰੂੰਬਲਾਂ ਨੂੰ ਅੱਜ ਵੀ ਪੇਂਡੂ ਲੋਕ ਚੇਤ ਮਹੀਨੇ ਵਿਚ ਖਾਣਾ ਬੇਹੱਦ ਪਸੰਦ ਕਰਦੇ ਹਨ, ਕਿਉਂਕਿ ਇਕ ਮਹੀਨੇ ਤੱਕ ਲਗਾਤਾਰ ਅਜਿਹਾ ਕਰਨ 'ਤੇ ਇਸ ਨਾਲ ਪੇਟ ਦੀਆਂ ਬਿਮਾਰੀਆਂ ਤੋਂ ਇਲਾਵਾ ਵਰਖਾ ਰੁੱਤ ਵਿਚ ਪੈਦਾ ਹੋਣ ਵਾਲੀਆਂ ਚਮੜੀ ਸਬੰਧੀ ਪ੍ਰੇਸ਼ਾਨੀਆਂ ਤੋਂ ਵੀ ਛੁਟਕਾਰਾ ਪਾਇਆ ਜਾ ਸਕਦਾ ਹੈ।
ਦੰਦਾਂ ਦੀ ਸੁਰੱਖਿਆ : ਹਰੇਕ ਜਗ੍ਹਾ ਮਿਲਣ ਵਾਲੀ ਨਿੰਮ ਦੀ ਪਤਲੀ ਟਹਿਣੀ ਦੇ ਰੂਪ ਵਿਚ ਮੌਜੂਦ ਦਾਤਣ ਵੀ ਵਿਅਕਤੀ ਲਈ ਬਹੁਤ ਫਾਇਦੇਮੰਦ ਸਿੱਧ ਹੁੰਦੀ ਹੈ। ਇਸ ਦੀ ਲਗਾਤਾਰ ਵਰਤੋਂ ਨਾਲ ਦੰਦਾਂ ਦੀ ਸਫ਼ਾਈ ਦੇ ਨਾਲ-ਨਾਲ ਦੰਦਾਂ ਵਿਚ ਲੱਗਣ ਵਾਲੇ ਕੀੜਿਆਂ ਤੋਂ ਰੱਖਿਆ ਕੀਤੀ ਜਾ ਸਕਦੀ ਹੈ। ਦੰਦਾਂ ਨੂੰ ਮਜ਼ਬੂਤੀ ਮਿਲਦੀ ਹੈ।
ਕੁਸ਼ਟ ਰੋਗ ਵਿਚ ਆਰਾਮ : ਡਾਕਟਰਾਂ ਦੇ ਸ਼ਬਦਾਂ ਵਿਚ ਨਿੰਮ ਦੇ ਕੋਮਲ ਅਤੇ ਨਵੀਨ ਪੱਤੇ ਕੁਸ਼ਟ ਰੋਗ ਵਿਚ ਕਾਫੀ ਲਾਭਦਾਇਕ ਹਨ। ਇਸ ਨਾਲ ਵਿਅਕਤੀ ਦੇ ਕੁਸ਼ਟ ਰੋਗ ਨੂੰ ਸ਼ਾਂਤ ਕੀਤਾ ਜਾ ਸਕਦਾ ਹੈ।
ਖੂਨ ਸਬੰਧੀ ਵਿਕਾਰਾਂ ਤੋਂ ਮੁਕਤੀ : ਵੈਸੇ ਤਾਂ ਨਿੰਮ ਦੇ ਬੀਜਾਂ ਦਾ ਤੇਲ ਕਿੰਚਿਤ ਕੌੜਾ ਹੀ ਹੁੰਦਾ ਹੈ ਜੋ ਮਨੁੱਖ ਦੇ ਖੂਨ ਸਬੰਧੀ ਵਿਕਾਰਾਂ ਨੂੰ ਨਾਸ਼ ਕਰਦਾ ਹੈ। ਇਸ ਤੋਂ ਇਲਾਵਾ ਇਹ ਜਵਰ, ਕਫ ਅਤੇ ਪਿੱਤ ਵਰਗੇ ਰੋਗਾਂ ਦਾ ਵੀ ਚੰਗੀ ਤਰ੍ਹਾਂ ਨਾਸ ਕਰਦਾ ਹੈ।
ਇਸ ਤਰ੍ਹਾਂ ਅਸੀਂ ਯਕੀਨ ਨਾਲ ਕਹਿ ਸਕਦੇ ਹਾਂ ਕਿ ਭਾਰਤ ਵਿਚ ਵੱਡੀ ਮਾਤਰਾ ਵਿਚ ਪਾਇਆ ਜਾਣ ਵਾਲਾ ਸੁਪ੍ਰਸਿੱਧ ਰੁੱਖ ਨਿੰਮ ਬਹੁਤ ਗੁਣਾਂ ਅਤੇ ਦਵਾਈਆਂ ਨਾਲ ਭਰਪੂਰ ਹੋਣ ਕਾਰਨ ਅੱਜ ਦੀ ਤਾਰੀਖ ਵਿਚ ਵੀ ਪੇਂਡੂ ਖੇਤਰਾਂ ਵਿਚ ਕਾਫੀ ਫਾਇਦੇਮੰਦ ਸਿੱਧ ਹੋ ਰਿਹਾ ਹੈ, ਜਿਸ ਨਾਲ ਉਥੋਂ ਦੇ ਲੋਕ ਇਸ ਨੂੰ ਇਕ ਡਿਸਪੈਂਸਰੀ ਦੇ ਰੂਪ ਵਿਚ ਦੇਖਦੇ ਹਨ ਅਤੇ ਆਯੁਰਵੇਦ ਦੇ ਮੁਤਾਬਿਕ ਇਸ ਦੇ ਬੀਜ, ਪੱਤਿਆਂ ਅਤੇ ਛਿੱਲਾਂ ਦੀ ਸਹੀ ਵਰਤੋਂ ਕਰਕੇ ਸਰੀਰ ਵਿਚ ਮੌਜੂਦ ਅਨੇਕਾਂ ਤਰ੍ਹਾਂ ਦੀਆਂ ਬਿਮਾਰੀਆਂ ਨੂੰ ਦੂਰ ਕਰਕੇ ਲਾਭ ਉਠਾਉਂਦੇ ਹਨ।

ਸੇਬ ਪੌਸ਼ਟਿਕ ਵੀ, ਦਵਾਈ ਵੀ

ਵੈਸੇ ਤਾਂ ਫਲਾਂ ਦਾ ਸਾਡੇ ਜੀਵਨ ਵਿਚ ਬਹੁਤ ਮਹੱਤਵਪੂਰਨ ਸਥਾਨ ਹੈ ਪਰ ਜਦੋਂ ਗੱਲ ਸਿਹਤ ਅਤੇ ਸੁੰਦਰਤਾ ਦੀ ਆਉਂਦੀ ਹੈ ਤਾਂ ਸੇਬ ਸਾਡੀਆਂ ਗਲ੍ਹਾਂ ਨੂੰ ਗੁਲਾਬੀ ਬਣਾਉਣ ਵਿਚ ਅੱਵਲ ਨਜ਼ਰ ਆਉਂਦਾ ਹੈ। ਸ਼ਾਇਦ ਇਹੀ ਖਾਸ ਵਜ੍ਹਾ ਰਹੀ ਹੋਵੇਗੀ, ਜੋ ਫਲਾਂ ਵਿਚ ਸੇਬ ਨੂੰ ਸਭ ਤੋਂ ਜ਼ਿਆਦਾ ਪਸੰਦ ਕੀਤਾ ਜਾਂਦਾ ਹੈ ਅਤੇ ਆਪਣੇ ਇਨ੍ਹਾਂ ਗੁਣਾਂ ਦੇ ਕਾਰਨ ਇਕ ਦਵਾਈ ਦੇ ਰੂਪ ਵਿਚ ਦੇਖਿਆ ਜਾਂਦਾ ਹੈ। ਸੇਬ ਖਾਣ ਨਾਲ ਹੋਣ ਵਾਲੇ ਲਾਭ- ਸਰੀਰ ਤਾਕਤਵਰ ਬਣਾਏ : ਸੇਬ ਵਿਚ ਫਾਸਫੋਰਸ ਅਤੇ ਲੋਹ ਤੱਤ ਭਰਪੂਰ ਮਾਤਰਾ ਵਿਚ ਪਾਇਆ ਜਾਂਦਾ ਹੈ, ਜੋ ਵਿਅਕਤੀ ਦੇ ਸਰੀਰ ਨੂੰ ਰਿਸ਼ਟ-ਪੁਸ਼ਟ, ਫੁਰਤੀਲਾ ਅਤੇ ਤਾਕਤਵਰ ਬਣਾਉਂਦਾ ਹੈ। ਇਹੀ ਨਹੀਂ, ਇਹ ਦਿਲ ਨੂੰ ਸ਼ਕਤੀਸ਼ਾਲੀ ਅਤੇ ਬੁੱਧੀ ਨੂੰ ਤੇਜ਼ ਕਰਦਾ ਹੈ। ਇਸ ਤੋਂ ਇਲਾਵਾ ਇਹ ਦੁਰਬਲ ਸਰੀਰ ਨੂੰ ਮੋਟਾ ਅਤੇ ਤੇਜਸਵੀ ਬਣਾਈ ਰੱਖਣ ਲਈ ਵੀ ਸਰਬੋਤਮ ਪੋਸ਼ਕ ਫਲ ਹੈ। ਭੁੱਖ ਵਧਾਏ : ਜਿਨ੍ਹਾਂ ਵਿਅਕਤੀਆਂ ਨੂੰ ਭੁੱਖ ਘੱਟ ਲਗਦੀ ਹੈ, ਉਨ੍ਹਾਂ ਲਈ ਸੇਬ ਬਹੁਤ ਫਾਇਦੇਮੰਦ ਹੈ। ਅਜਿਹੇ ਵਿਅਕਤੀਆਂ ਨੂੰ ਹਰ ਰੋਜ਼ ਇਕ ਵੱਡਾ ਸੇਬ ਖਾਣਾ ਚਾਹੀਦਾ ਹੈ। ਇਸ ਨਾਲ ਉਨ੍ਹਾਂ ਨੂੰ ਭੁੱਖ ਖੁੱਲ੍ਹ ਕੇ ਚੰਗੀ ਤਰ੍ਹਾਂ ਲੱਗਣ ਲੱਗੇਗੀ। ਦੰਦਾਂ ਨੂੰ ਮਜ਼ਬੂਤੀ ਦੇਵੇ : ਬੱਚੇ ਦੇ ਜਨਮ ਤੋਂ ਬਾਅਦ ਜਦੋਂ ਉਸ ਦੇ ਪੂਰੇ ਦੰਦ ਨਿਕਲ ਆਉਣ ਅਤੇ ਉਹ ਸਾਰੀਆਂ ਚੀਜ਼ਾਂ ਨੂੰ ਕੁਤਰ-ਕੁਤਰ ਕੇ ਖਾਣਾ ਸ਼ੁਰੂ ਕਰ ਦੇਵੇ, ਉਸ ਨੂੰ ਰੋਜ਼ਾਨਾ ਇਕ ਸੇਬ ਦਾ ਰਸ ਪਿਲਾਉਣਾ ਕਦੇ ਨਾ ਭੁੱਲੋ, ਕਿਉਂਕਿ ਉਹ ਬੱਚਿਆਂ ਦੇ ਦੰਦਾਂ ਨੂੰ ਮਜ਼ਬੂਤੀ ਪ੍ਰਦਾਨ ਕਰਦਾ ਹੈ।

-ਅਨੂਪ ਮਿਸ਼ਰਾ

ਦਿਲ ਦਾ ਦੋਸਤ ਅਦਰਕ

ਅਦਰਕ ਇਕ ਦਵਾਈ ਹੈ। ਇਹ ਪੰਜੇ ਦੇ ਆਕਾਰ ਦਾ ਹੁੰਦਾ ਹੈ। ਇਸ ਦੇ ਕੱਚੇ ਰੂਪ ਨੂੰ ਅਦਰਕ ਅਤੇ ਸੁੱਕੇ ਰੂਪ ਨੂੰ ਸੁੰਢ ਕਿਹਾ ਜਾਂਦਾ ਹੈ। ਦੋਵਾਂ ਦੇ ਇਕੋ ਜਿਹੇ ਗੁਣ ਹਨ। ਇਹ ਅਨੇਕ ਰੋਗਾਂ ਵਿਚ ਦਵਾਈ ਦੇ ਰੂਪ ਵਿਚ ਵਰਤਿਆ ਜਾਂਦਾ ਹੈ। ਇਹ ਸਾਹ, ਦਮਾ, ਖੰਘ ਅਤੇ ਫੇਫੜਿਆਂ ਦੇ ਰੋਗ ਵਿਚ ਵਿਸ਼ੇਸ਼ ਪ੍ਰਭਾਵੀ ਹੈ। ਹਾਲ ਹੀ ਵਿਚ ਹੋਈ ਇਕ ਭਾਰਤੀ ਖੋਜ ਦੌਰਾਨ ਇਸ ਵਿਚ ਛੁਪੇ ਅਨੇਕ ਗੁਣਾਂ ਦਾ ਪਤਾ ਲੱਗਾ ਹੈ ਅਤੇ ਪੁਸ਼ਟੀ ਹੋਈ ਹੈ। ਇਹ ਸਰਦੀ ਵਿਚ ਜ਼ੁਕਾਮ, ਬੁਖਾਰ, ਗਲੇ ਵਿਚ ਸੋਜ, ਜੋੜਾਂ ਵਿਚ ਦਰਦ ਨੂੰ ਦੂਰ ਕਰਦਾ ਹੈ। ਅਦਰਕ ਦੀ ਚਾਹ ਪੇਟ ਨਾਲ ਸਬੰਧਤ ਰੋਗਾਂ ਨੂੰ ਦੂਰ ਕਰਕੇ ਭੁੱਖ ਵਧਾਉਂਦੀ ਹੈ। ਇਸ ਨੂੰ ਖਾਣ ਨਾਲ ਮੂੰਹ ਦੇ ਹਾਨੀਕਾਰਕ ਬੈਕਟੀਰੀਆ ਮਰ ਜਾਂਦੇ ਹਨ। ਇਹ ਕੋਲੈਸਟ੍ਰੋਲ ਨੂੰ ਕਾਬੂ ਕਰਦਾ ਹੈ। ਇਸ ਨਾਲ ਖੂਨ ਦਾ ਪ੍ਰਵਾਹ ਠੀਕ ਰਹਿੰਦਾ ਹੈ। ਇਹ ਖੂਨ ਵਿਚ ਥੱਕੇ ਜੰਮਣ ਤੋਂ ਬਚਾਉਂਦਾ ਹੈ। ਇਸ ਦਾ ਰਸ ਬਰਾਬਰ ਮਾਤਰਾ ਪਾਣੀ ਦੇ ਨਾਲ ਪੀਣ ਨਾਲ ਦਿਲ ਦੀਆਂ ਬਿਮਾਰੀਆਂ ਵਿਚ ਆਰਾਮ ਮਿਲਦਾ ਹੈ।

ਧੌਣ ਦੀ ਕਸਰਤ ਕਈ ਰੋਗਾਂ ਨੂੰ ਦੂਰ ਕਰਦੀ ਹੈ

ਰੀੜ੍ਹ ਦੀ ਹੱਡੀ ਨੂੰ ਮੇਰੂਦੰਡ ਕਿਹਾ ਜਾਂਦਾ ਹੈ। ਇਸ ਨਾਲ ਸਮੁੱਚੇ ਕੰਕਾਲ ਨੂੰ ਸਹਾਰਾ ਮਿਲਦਾ ਹੈ। ਰੀੜ੍ਹ ਦੀ ਹੱਡੀ ਜਾਂ ਮੇਰੂਦੰਡ ਵਿਚ 33 ਕਸ਼ੇਰੂਕਾਵਾਂ ਹੁੰਦੀਆਂ ਹਨ, ਜਿਨ੍ਹਾਂ ਵਿਚੋਂ 7 ਕਸ਼ੇਰੂਕਾਵਾਂ ਧੌਣ ਵਿਚ ਹੁੰਦੀਆਂ ਹਨ। ਇਨ੍ਹਾਂ ਨੂੰ ਸਰਵਾਈਕਲ ਵਰਟਿਬਰਾ ਕਿਹਾ ਜਾਂਦਾ ਹੈ। ਇਨ੍ਹਾਂ ਕਸ਼ੇਰੂਕਾਵਾਂ ਦੇ ਵਿਚ ਫਾਈਬਰੋ ਕਾਲਟੀਲੇਜ ਡਿਸਕ ਹੁੰਦੀ ਹੈ, ਜਿਸ ਦੇ ਚਲਦੇ ਕਸ਼ੇਰੂਕਾਵਾਂ ਇਕ-ਦੂਜੇ ਨਾਲ ਨਹੀਂ ਜੁੜਦੀਆਂ ਅਤੇ ਸਿਰ ਨੂੰ ਮੋੜਨ ਜਾਂ ਘੁੰਮਾਉਣ ਵਿਚ ਇਸ ਨਾਲ ਮਦਦ ਮਿਲਦੀ ਹੈ।
ਜੇ ਧੌਣ ਵਿਚ ਦਰਦ ਹੋਣ ਲੱਗੇ ਅਤੇ ਇਹ ਦਰਦ ਹੱਥਾਂ ਤੱਕ ਪਹੁੰਚ ਜਾਵੇ ਅਤੇ ਉਂਗਲੀਆਂ ਵਿਚ ਝਨਝਨਾਹਟ ਮਹਿਸੂਸ ਹੋਵੇ ਤਾਂ ਇਹ ਸਰਵਾਈਕਲ ਸਪਾਂਡੇਲਾਈਟਿਸ ਤੋਂ ਪੀੜਤ ਹੋਣ ਦੀ ਨਿਸ਼ਾਨੀ ਹੈ ਜਾਂ ਅੱਗੇ ਚੱਲ ਕੇ ਤੁਸੀਂ ਇਸ ਰੋਗ ਦੇ ਸ਼ਿਕਾਰ ਹੋ ਸਕਦੇ ਹੋ। ਧੌਣ ਵਿਚ ਹੋਣ ਵਾਲਾ ਸਪਾਂਡੇਲਾਈਟਿਸ ਨਸਾਂ 'ਤੇ ਦਬਾਅ ਪਾਉਂਦਾ ਹੈ, ਜਿਸ ਕਾਰਨ ਦਰਦਾਂ ਵਿਚ ਵਾਧਾ ਹੁੰਦਾ ਹੈ।
ਵਾਤਰੋਗ ਦੇ ਕਾਰਨ ਧੌਣ ਵਿਚ ਹੇਠ ਲਿਖੀਆਂ ਸਮੱਸਿਆਵਾਂ ਪੈਦਾ ਹੋ ਸਕਦੀਆਂ ਹਨ-
* ਹੱਥਾਂ ਵਿਚ ਦਰਦ, * ਮੋਢਿਆਂ ਵਿਚ ਦਰਦ, * ਚੱਕਰ ਆਉਣੇ, * ਅੱਖਾਂ ਵਿਚ ਤਕਲੀਫ, * ਉਨੀਂਦਰਾ, * ਛੋਟੀਆਂ-ਛੋਟੀਆਂ ਗੱਲਾਂ 'ਤੇ ਗੁੱਸਾ ਆਉਣਾ।
ਵਾਤ ਰੋਗ ਤੋਂ ਬਚਣ ਲਈ ਹੇਠ ਲਿਖੇ ਉਪਾਅ ਅਮਲ ਵਿਚ ਲਿਆਓ-
* ਸਖ਼ਤ ਬਿਸਤਰ ਦੀ ਵਰਤੋਂ ਕਰੋ। * ਆਪਣੀ ਸਮਰੱਥਾ ਅਨੁਸਾਰ ਕਸਰਤ ਅਤੇ ਯੋਗ ਆਸਣ ਕਰੋ। * ਆਪਣਾ ਭਾਰ ਕਾਬੂ ਵਿਚ ਰੱਖੋ। * ਹਮੇਸ਼ਾ ਸਮਤਲ ਬਿਸਤਰ ਦੀ ਹੀ ਵਰਤੋਂ ਕਰੋ। * ਠੰਢੇ ਕਮਰੇ ਵਿਚ ਨਿਵਾਸ ਨਾ ਕਰੋ। * ਮੱਖਣ, ਘਿਓ, ਸ਼ਰਾਬ, ਮਿੱਠੀ ਡਬਲ ਰੋਟੀ, ਆਂਡੇ, ਮਾਸ, ਸੇਮ ਅਤੇ ਕੰਦਮੂਲ ਵਰਗੇ ਖਾਧ ਪਦਾਰਥਾਂ ਦਾ ਸੇਵਨ ਨਾ ਕਰੋ।
ਇਹ ਰੋਗ ਹੇਠ ਲਿਖੇ ਕਾਰਨਾਂ ਕਰਕੇ ਹੁੰਦੇ ਹਨ-
* ਉੱਚੇ ਸਿਰਹਾਣੇ ਦੀ ਵਰਤੋਂ ਕਰਨ ਨਾਲ। * ਧੌਣ ਝੁਕਾ ਕੇ ਕੰਮ ਕਰਨ ਨਾਲ (ਦਫ਼ਤਰ, ਕੰਪਿਊਟਰ, ਸਿਲਾਈ-ਕਢਾਈ ਦੇ ਕੰਮ ਆਦਿ)। * ਗ਼ਲਤ ਤਰੀਕੇ ਨਾਲ ਸੌਣ ਜਾਂ ਲੇਟਣ ਨਾਲ। * ਬਹੁਤ ਜ਼ਿਆਦਾ ਮਾਨਸਿਕ ਤਣਾਅ ਕਾਰਨ।
ਇਲਾਜ : ਇਲਾਜ ਸ਼ੁਰੂ ਕਰਨ ਤੋਂ ਪਹਿਲਾਂ ਐਕਸਰੇ ਕਰਵਾ ਕੇ ਹੇਠ ਲਿਖੀਆਂ ਗੱਲਾਂ ਦਾ ਪਤਾ ਲਗਾਉਣਾ ਚਾਹੀਦਾ ਹੈ-
* ਰੀੜ੍ਹ ਦੇ ਧੌਣ ਵਾਲੇ ਹਿੱਸੇ ਦਾ ਟੇਢਾ ਹੋ ਜਾਣਾ। * ਵੱਖ-ਵੱਖ ਕਸ਼ੇਰੂਕਾਵਾਂ ਵਿਚ ਦਰਦ ਦਾ ਸਹੀ ਕਾਰਨ। * ਰੀੜ੍ਹ ਦੀਆਂ ਕਸ਼ੇਰੂਕਾਵਾਂ ਦੇ ਵਿਚ ਫਰਕ ਵਿਚ ਆਈ ਕਮੀ ਦੀ ਸੰਭਾਵਨਾ।
ਜੇ ਕਿਸੇ ਮਾਸਪੇਸ਼ੀ ਵਿਚ ਦਰਦ ਹੋ ਰਹੀ ਹੋਵੇ ਤਾਂ ਪਤਲੇ ਸਿਰਹਾਣੇ ਦੀ ਵਰਤੋਂ ਕਰਨੀ ਚਾਹੀਦੀ ਹੈ ਅਤੇ ਸਖ਼ਤ ਬਿਸਤਰ 'ਤੇ ਸੌਣਾ ਚਾਹੀਦਾ ਹੈ। ਜੇ ਤੁਸੀਂ ਧੌਣ ਝੁਕਾ ਕੇ ਕੰਮ ਕਰਦੇ ਹੋ ਤਾਂ ਧੌਣ ਝੁਕਾ ਕੇ ਕੰਮ ਕਰਨਾ ਬੰਦ ਕਰ ਦਿਓ। ਇਸ ਨਾਲ ਧੌਣ ਨੂੰ ਰਾਹਤ ਮਿਲੇਗੀ। ਸਿਰ ਝੁਕਾ ਕੇ ਕੋਈ ਕਸਰਤ ਜਾਂ ਯੋਗ ਆਸਣ ਜਿਵੇਂ ਸ਼ੀਸ਼ ਆਸਣ, ਸਰਵਾਂਗ ਆਸਣ, ਹਲ ਆਸਣ ਆਦਿ ਕਦੇ ਨਾ ਕਰੋ।
ਧੌਣ ਦੀਆਂ ਹੇਠ ਲਿਖੀਆਂ ਕਸਰਤਾਂ ਕਰੋ-
ਕਸਰਤ 1 : ਸਿੱਧੇ ਖੜ੍ਹੇ ਹੋ ਜਾਓ ਜਾਂ ਬੈਠ ਜਾਓ। ਸੁਭਾਵਿਕ ਰੂਪ ਨਾਲ ਸਾਹ ਲੈਂਦੇ ਹੋਏ ਅਤੇ ਸਾਹ ਛੱਡਦੇ ਹੋਏ ਸਿਰ ਨੂੰ ਇਕ ਵਾਰ ਸੱਜੇ ਵੱਲ ਜਿੰਨਾ ਘੁਮਾ ਸਕੋ, ਘੁਮਾਓ। ਫਿਰ ਖੱਬੇ ਵੱਲ ਜਿੰਨਾ ਸੰਭਵ ਹੋਵੇ, ਸਿਰ ਘੁਮਾਓ। ਇਸ ਪ੍ਰਕਿਰਿਆ ਨੂੰ ਇਕ ਵਾਰ ਮੰਨ ਕੇ ਇਸ ਕਸਰਤ ਨੂੰ 10 ਵਾਰ ਕਰੋ।
ਕਸਰਤ 2 : ਇਸ ਕਸਰਤ ਨੂੰ ਕਰਨ ਲਈ ਵੀ ਪਿਛਲੀ ਕਸਰਤ ਦੀ ਤਰ੍ਹਾਂ ਖੜ੍ਹੇ ਹੋ ਜਾਓ ਜਾਂ ਬੈਠ ਜਾਓ। ਫਿਰ ਸੁਭਾਵਿਕ ਰੂਪ ਨਾਲ ਸਾਹ ਲੈਂਦੇ ਹੋਏ ਅਤੇ ਛੱਡਦੇ ਹੋਏ ਸਿਰ ਨੂੰ ਇਕ ਵਾਰ ਪਿੱਛੇ ਵੱਲ ਝੁਕਾਓ, ਫਿਰ ਸਿੱਧਾ ਕਰੋ। ਇਸ ਪੂਰੀ ਪ੍ਰਕਿਰਿਆ ਨੂੰ ਇਕ ਵਾਰ ਮੰਨ ਕੇ ਇਸ ਕਸਰਤ ਨੂੰ ਵੀ 10 ਵਾਰ ਕਰੋ।
ਕਸਰਤ 3 : ਹੁਣ ਪਿੱਛੇ ਵੱਲ ਮੋੜ ਕੇ-ਸਿੱਧਾ ਰਹਿ ਕੇ।
ਕਸਰਤ 4 : ਸਿਰ ਨੂੰ ਵ੍ਰਿਤਾਕਾਰ ਸੱਜੇ ਤੋਂ ਖੱਬੇ ਵੱਲ ਘੁਮਾਓ ਅਤੇ ਖੱਬੇ ਤੋਂ ਸੱਜੇ ਵੱਲ ਘੁਮਾਓ। ਇਸ ਪ੍ਰਕਿਰਿਆ ਨੂੰ ਇਕ ਵਾਰ ਮੰਨ ਕੇ ਇਸੇ ਤਰ੍ਹਾਂ 10 ਵਾਰ ਕਰੋ। ਸਿਰ ਨੂੰ ਵ੍ਰਿਤਾਕਾਰ ਘੁਮਾਉਣ ਨਾਲ ਜਿਨ੍ਹਾਂ ਨੂੰ ਚੱਕਰ ਆਉਂਦੇ ਹੋਣ, ਉਹ ਇਹ ਕਸਰਤ ਨਾ ਕਰਨ।
ਰੁਕਾਵਟ ਪਾਉਣ ਵਾਲੀ ਕਸਰਤ (ਸਟੇਟਿਕ ਐਕਸਰਸਾਈਜ਼) : ਸੱਜੇ-ਖੱਬੇ ਧੌਣ ਘੁਮਾਉਂਦੇ ਸਮੇਂ ਹੱਥ ਨਾਲ ਉਲਟ ਦਿਸ਼ਾ ਵਿਚ ਦਬਾਅ ਪਾਇਆ ਜਾਂਦਾ ਹੈ। ਉਸ ਸਮੇਂ ਦਬਾਅ ਅਤੇ ਧੌਣ ਦਾ ਦਬਾਅ ਬਰਾਬਰ ਰਹਿਣ 'ਤੇ ਸਿਰ ਸਥਿਰ ਰਹੇਗਾ, ਹਿੱਲੇਗਾ ਨਹੀਂ।
ਸ਼ੋਲਡਰ ਰੋਲਿੰਗ : ਪਹਿਲਾਂ ਸਿੱਧੇ ਖੜ੍ਹੇ ਹੋ ਜਾਓ। ਉਸ ਤੋਂ ਬਾਅਦ ਦੋਵੇਂ ਮੋਢਿਆਂ ਨੂੰ ਸਾਹਮਣੇ ਤੋਂ ਪਿੱਛੇ ਵੱਲ ਵਾਰੀ-ਵਾਰੀ ਨਾਲ ਵ੍ਰਿਤਾਕਾਰ ਘੁਮਾਓ। ਫਿਰ ਉਲਟ ਦਿਸ਼ਾ ਵਿਚ ਪਿੱਛੇ ਤੋਂ ਸਾਹਮਣੇ ਵੱਲ 10 ਵਾਰ ਘੁਮਾਓ। ਕਸਰਤ ਕਰਦੇ ਸਮੇਂ ਸਾਹ ਸੁਭਾਵਿਕ ਰੂਪ ਨਾਲ ਲਓ ਅਤੇ ਛੱਡੋ।
**

ਸਿਹਤ ਖ਼ਬਰਨਾਮਾ

ਦਮੇ ਦੀ ਦਵਾਈ ਹਨ ਸੂਰਜ ਦੀਆਂ ਕਿਰਨਾਂ

ਸੂਰਜ ਦੀਆਂ ਕਿਰਨਾਂ ਅਰਥਾਤ ਧੁੱਪ ਸਾਨੂੰ ਮੁਫ਼ਤ ਵਿਚ ਮਿਲਦੀ ਹੈ। ਇਸ ਵਿਚ ਅਨੇਕ ਗੁਣ ਮੌਜੂਦ ਹਨ, ਜਿਨ੍ਹਾਂ ਤੋਂ ਸਾਰੇ ਜਾਣੂ ਨਹੀਂ ਹਨ। ਧੁੱਪ ਵਿਚ ਮੌਜੂਦ ਹੈ ਵਿਟਾਮਿਨ 'ਡੀ'। ਇਹੀ ਵਿਟਾਮਿਨ 'ਡੀ' ਸਾਡੇ ਖਾਣ-ਪੀਣ ਦੇ ਕੈਲਸ਼ੀਅਮ ਨੂੰ ਗ੍ਰਹਿਣ ਕਰਨ ਵਿਚ ਸਾਡੀ ਮਦਦ ਕਰਦਾ ਹੈ। ਇਹ ਅਜਿਹਾ ਕਰਕੇ ਹੱਡੀਆਂ ਅਤੇ ਮਾਸਪੇਸ਼ੀਆਂ ਨੂੰ ਮਜ਼ਬੂਤੀ ਦਿੰਦਾ ਹੈ। ਧੁੱਪ ਨਾਲ ਦਿਮਾਗੀ ਸਮਰੱਥਾ ਵਧਦੀ ਹੈ। ਧੁੱਪ ਸ਼ੁਕਰਾਣੂ ਵਧਾਉਂਦੀ ਹੈ ਅਤੇ ਯੌਨ ਸ਼ਕਤੀ ਦਿੰਦੀ ਹੈ। ਇਹ ਲਾਭ ਸੂਰਜ ਦੀਆਂ ਕੋਮਲ ਕਿਰਨਾਂ ਤੋਂ ਮਿਲਦਾ ਹੈ। ਧੁੱਪ ਵਿਚ ਮੌਜੂਦ ਪੈਰਾਵੈਂਗਣੀ ਕਿਰਨਾਂ ਨਾਲ ਚਮੜੀ ਨੂੰ ਨੁਕਸਾਨ ਪਹੁੰਚਦਾ ਹੈ, ਇਸ ਲਈ ਸੂਰਜ ਦੀ ਤਿੱਖੀ ਧੁੱਪ ਤੋਂ ਬਚਣ ਲਈ ਕਿਹਾ ਜਾਂਦਾ ਹੈ। ਹਾਲ ਹੀ ਵਿਚ ਇਕ ਖੋਜ ਵਿਚ ਸੂਰਜ ਦੀ ਕੋਮਲ ਧੁੱਪ ਨਾਲ ਮਿਲਣ ਵਾਲੇ ਵਿਟਾਮਿਨ 'ਡੀ' ਵਿਚ ਦਮਾ ਨਾਸ਼ਕ ਗੁਣ ਪਾਇਆ ਗਿਆ ਹੈ। ਇਹ ਬੱਚਿਆਂ ਨੂੰ ਸਾਹ ਨਾਲ ਬਾਧਿਕ ਤਕਲੀਫ ਤੋਂ ਬਚਾਉਂਦਾ ਹੈ। ਇਹ ਸਾਹ ਦੀ ਬਿਮਾਰੀ ਵਿਚ ਬੱਚਿਆਂ ਲਈ ਕਵਚ ਦਾ ਕੰਮ ਕਰਦਾ ਹੈ।

ਸਿਹਤ ਖ਼ਬਰਨਾਮਾ

ਕੀਟਨਾਸ਼ਕਾਂ ਨਾਲ ਘਟ ਰਹੀ ਹੈ ਦਿਮਾਗੀ ਸਮਰੱਥਾ

ਖਾਧ ਪਦਾਰਥਾਂ ਦੇ ਉਤਪਾਦਨ, ਭੰਡਾਰ ਅਤੇ ਪ੍ਰੋਸੈੱਸ ਕਰਨ ਵਿਚ ਕੀਟਨਾਸ਼ਕਾਂ ਦੀ ਵਰਤੋਂ ਵਧ ਗਈ ਹੈ। ਕੋਲਡ ਡ੍ਰਿੰਕਸ ਅਤੇ ਪੈਕਡ ਪਾਣੀ ਵਿਚ ਵੀ ਇਸ ਦੀ ਵਰਤੋਂ ਵਧੀ ਹੈ। ਇਹੀ ਸਭ ਮਨੁੱਖੀ ਸਰੀਰ ਵਿਚ ਜਾ ਕੇ ਵਿਕਾਰ ਪੈਦਾ ਕਰ ਰਹੇ ਹਨ। ਇਹ ਦਿਮਾਗੀ ਸਮਰੱਥਾ ਨੂੰ ਪ੍ਰਭਾਵਿਤ ਕਰ ਰਹੇ ਹਨ। ਇਹ ਮਨੁੱਖੀ ਭਰੂਣ, ਗਰਭ ਵਿਚ ਪਲ ਰਹੇ ਬੱਚੇ, ਨਵਜਨਮੇ ਅਤੇ ਵੱਡੇ, ਸਾਰਿਆਂ ਦੀ ਦਿਮਾਗੀ ਸਮਰੱਥਾ ਨੂੰ ਕਮਜ਼ੋਰ ਕਰ ਰਹੇ ਹਨ। ਅਜਿਹਾ ਨਿਊਯਾਰਕ ਵਿਚ ਹੋਈ ਇਕ ਖੋਜ ਵਿਚ ਪਾਇਆ ਗਿਆ ਹੈ।






Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX