ਤਾਜਾ ਖ਼ਬਰਾਂ


ਮੱਧ ਪ੍ਰਦੇਸ਼ ਵਿਧਾਨ ਸਭਾ ਚੋਣਾਂ ਲਈ ਮਾਇਆਵਤੀ ਨੇ ਜਾਰੀ ਕੀਤੀ ਉਮੀਦਵਾਰਾਂ ਦੀ ਪਹਿਲੀ ਸੂਚੀ
. . .  1 day ago
ਏਸ਼ੀਆ ਕੱਪ 2018 : ਅਫ਼ਗ਼ਾਨਿਸਤਾਨ ਨੇ ਬੰਗਲਾਦੇਸ਼ ਨੂੰ ਜਿੱਤਣ ਲਈ ਦਿੱਤਾ 256 ਦੌੜਾਂ ਦਾ ਟੀਚਾ
. . .  1 day ago
ਹਾਮਿਦ ਕਰਜ਼ਈ ਸ੍ਰੀ ਦਰਬਾਰ ਸਾਹਿਬ ਹੋਏ ਨਤਮਸਤਕ
. . .  1 day ago
ਅੰਮ੍ਰਿਤਸਰ, 20 ਸਤੰਬਰ (ਰਾਜੇਸ਼ ਕੁਮਾਰ) - ਅਫਗਾਨਿਸਤਾਨ ਦੇ ਸਾਬਕਾ ਰਾਸ਼ਟਰਪਤੀ ਹਾਮਿਦ ਕਰਜ਼ਈ ਅੱਜ ਸ੍ਰੀ ਦਰਬਾਰ ਸਾਹਿਬ ਨਤਮਸਤਕ...
ਬਾਂਦੀਪੋਰਾ ਮੁੱਠਭੇੜ 'ਚ ਇੱਕ ਅੱਤਵਾਦੀ ਢੇਰ
. . .  1 day ago
ਸ੍ਰੀਨਗਰ, 20 ਸਤੰਬਰ - ਜੰਮੂ ਕਸ਼ਮੀਰ ਦੇ ਬਾਂਦੀਪੋਰਾ 'ਚ ਸੁਰੱਖਿਆ ਬਲਾਂ ਨੇ ਮੁੱਠਭੇੜ ਦੌਰਾਨ ਇੱਕ ਅੱਤਵਾਦੀ ਨੂੰ ਢੇਰ ਕਰ...
ਭਾਰਤੀ ਕੋਸਟ ਗਾਰਡ ਨੇ ਕਿਸ਼ਤੀ ਸਮੇਤ ਚਾਲਕ ਦਲ ਨੂੰ ਬਚਾਇਆ
. . .  1 day ago
ਨਵੀਂ ਦਿੱਲੀ, 20 ਸਤੰਬਰ - ਭਾਰਤੀ ਕੋਸਟ ਗਾਰਡ ਨੇ ਕਰਨਾਟਕ-ਗੋਆ ਸਰਹੱਦ 'ਤੇ ਸਮੁੰਦਰ 'ਚੋਂ ਕਿਸ਼ਤੀ ਸਮੇਤ 25 ਮੈਂਬਰੀ ਚਾਲਕ ਦਲ ਨੂੰ ਬਚਾਇਆ ਹੈ।
ਛੱਤੀਸਗੜ੍ਹ 'ਚ ਅਜੀਤ ਯੋਗੀ ਦੀ ਪਾਰਟੀ ਨਾਲ ਮਿਲਕੇ ਚੋਣਾਂ ਲੜੇਗੀ ਬਸਪਾ - ਮਾਇਆਵਤੀ
. . .  1 day ago
ਲਖਨਊ, 20 ਸਤੰਬਰ - ਛੱਤੀਸਗੜ੍ਹ ਚੋਣਾਂ 'ਤੇ ਬੋਲਦਿਆ ਬਸਪਾ ਸੁਪਰੀਮੋ ਮਾਇਆਵਤੀ ਨੇ ਕਿਹਾ ਕਿ ਬਸਪਾ ਛੱਤੀਸਗੜ੍ਹ 'ਚ ਅਜੀਤ ਯੋਗੀ ਦੀ ਪਾਰਟੀ ਜਨਤਾ ਕਾਂਗਰਸ ਛੱਤੀਸਗੜ੍ਹ ਨਾਲ...
ਭੇਦ ਭਰੇ ਹਾਲਾਤਾਂ 'ਚ ਡਿਸਪੈਂਸਰੀ ਅੰਦਰ ਏ. ਐਨ.ਐੱਮ ਵੱਲੋਂ ਆਤਮ ਹਤਿਆ
. . .  1 day ago
ਗੁਰਦਾਸਪੁਰ, 30 ਸਤੰਬਰ(ਆਰਿਫ਼) - ਅੱਜ ਗੁਰਦਾਸਪੁਰ ਨਜ਼ਦੀਕੀ ਪਿੰਡ ਡੂਗਰੀ ਦੀ ਡਿਸਪੈਂਸਰੀ ਅੰਦਰ ਏ. ਐਨ.ਐੱਮ. ਵੱਲੋਂ ਆਤਮ ਹਤਿਆ ਕੀਤੇ ਜਾਣ ਦੀ ਖ਼ਬਰ ਹੈ। ਦੱਸਿਆ ਜਾ ਰਿਹਾ ਹੈ ਕੇ ਕਿਸੇ ਇੰਸ਼ੋਰੈਂਸ ਕੰਪਨੀ ਤੋਂ ਆਪਣੇ ਪਤੀ ਦੇ ਪੈਸੇ ਨਾ ਮਿਲਣ ਕਾਰਨ ਇਸ .....
ਜ਼ਿਲ੍ਹਾ ਸੰਗਰੂਰ 'ਚ ਡੇਂਗੂ ਦਾ ਕਹਿਰ ਜਾਰੀ, ਪੀੜਤ ਮਰੀਜ਼ਾਂ ਦੀ ਗਿਣਤੀ ਹੋਈ 193
. . .  1 day ago
ਸੰਗਰੂਰ, 20 ਸਤੰਬਰ (ਧੀਰਜ ਪਸ਼ੋਰੀਆ) - ਜ਼ਿਲ੍ਹਾ ਸੰਗਰੂਰ 'ਚ ਡੇਂਗੂ ਦਾ ਕਹਿਰ ਜਾਰੀ ਹੈ। ਜ਼ਿਲ੍ਹਾ ਨੋਡਲ ਅਫ਼ਸਰ ਡਾ.ਉਪਾਸਨਾ ਬਿੰਦਰਾ ਨੇ ਦੱਸਿਆ ਕਿ ਜ਼ਿਲ੍ਹੇ ਦੀਆਂ ਸਰਕਾਰੀ ਲੈਬੋਟਰੀਆ 'ਚ ਹੁਣ ਤੱਕ ਡੇਂਗੂ ਦੇ 580 ਸ਼ੱਕੀ ਮਰੀਜ਼ ਟੋਸਟ ਲਈ ਪਹੁੰਚੇ ਹਨ ਜਿਨ੍ਹਾਂ 'ਚੋਂ .....
ਏਸ਼ੀਆ ਕੱਪ 2018 : ਅਫ਼ਗ਼ਾਨਿਸਤਾਨ ਨੂੰ ਲੱਗਿਆ ਦੂਜਾ ਝਟਕਾ, ਰਹਿਮਤ ਸ਼ਾਹ 10 ਦੌੜਾਂ ਬਣਾ ਕੇ ਆਊਟ
. . .  1 day ago
ਕੇਰਲ ਨਨ ਜਬਰ ਜਨਾਹ ਮਾਮਲਾ : ਵੇਟਿਕਨ ਨੇ ਬਿਸ਼ਪ ਫਰੈਂਕੋ ਮੁਲੱਕਲ ਨੂੰ ਅਹੁਦੇ ਤੋਂ ਕੀਤਾ ਮੁਕਤ
. . .  1 day ago
ਤਿਰੂਵਨੰਤਪੁਰਮ, 20 ਸਤੰਬਰ - ਵੇਟਿਕਨ ਨੇ ਜਬਰ ਜਨਾਹ ਮਾਮਲੇ ਦੇ ਦੋਸ਼ਾਂ ਦਾ ਸਾਹਮਣਾ ਕਰ ਰਹੇ ਜਲੰਧਰ ਡਾਇਸਿਸ ਦੇ ਬਿਸ਼ਪ ਫਰੈਂਕੋ ਮੁਲੱਕਲ ਨੂੰ ਉਨ੍ਹਾਂ ਦੇ ਅਹੁਦੇ ਤੋਂ ਮੁਕਤ ਕਰ ਦਿੱਤਾ ....
ਹੋਰ ਖ਼ਬਰਾਂ..

ਫ਼ਿਲਮ ਅੰਕ

ਤਾਪਸੀ

ਜਲਵਾ ਹੀ ਜਲਵਾ

ਇਕ ਧੀ, ਇਕ ਖਿਡਾਰਨ ਤੇ ਇਕ ਬਹਾਦਰ ਕੁੜੀ ਤਾਪਸੀ ਪੰਨੂ ਨਵੇਂ ਪੋਸਟਰ ਜੋ 'ਸੂਰਮਾ' ਫ਼ਿਲਮ ਦਾ ਹੈ, 'ਚ ਨਜ਼ਰ ਆਈ ਹੈ। ਦਿਲਜੀਤ ਦੋਸਾਂਝ ਫ਼ਿਲਮ 'ਚ ਉਸ ਦਾ ਨਾਇਕ ਹੈ ਤੇ ਇਹ ਹਾਕੀ ਖਿਡਾਰੀ ਸੰਦੀਪ ਸਿੰਘ ਦੇ ਜੀਵਨ ਉੱਪਰ ਆਧਾਰਤ ਹੈ। ਅਗਲੇ ਮਹੀਨੇ ਇਹ ਫ਼ਿਲਮ ਆ ਰਹੀ ਹੈ। 'ਮਨਮਰਜ਼ੀਆਂ' ਉਸ ਦੀ ਅਭਿਸ਼ੇਕ ਬੱਚਨ ਨਾਲ ਆਉਣ ਵਾਲੀ ਇਕ ਹੋਰ ਫ਼ਿਲਮ ਹੈ। ਇਧਰ ਤਾਪਸੀ ਦੀ ਦੀਦੀ ਸ਼ਗਨ ਨੂੰ ਲੈ ਕੇ ਉੱਡ ਰਹੀਆਂ ਖ਼ਬਰਾਂ 'ਤੇ ਤਾਪਸੀ ਦਾ ਬਿਆਨ ਆਇਆ ਹੈ ਕਿ ਸ਼ਗਨ ਦਾ ਇੰਡਸਟਰੀ 'ਚ ਪਰਦੇ 'ਤੇ ਆਉਣ ਦਾ ਕੋਈ ਵਿਚਾਰ ਨਹੀਂ ਹੈ। ਆਨਲਾਈਨ ਫੈਸ਼ਨ ਨਾਲ ਜੁੜੀ ਤਾਪਸੀ ਦੀ ਦੀਦੀ ਸ਼ਗਨ ਉਸ ਨਾਲ ਰੋਮ ਗਈ ਸੀ। ਤਾਪਸੀ ਦੀ ਚਾਹਤ ਮੁੜ ਅਮਿਤਾਬ ਬੱਚਨ ਨਾਲ ਫ਼ਿਲਮ ਕਰਨ ਦੀ ਵੀ ਹੈ। ਉਹ 'ਪਿੰਕ' ਵਾਲਾ ਇਤਿਹਾਸ ਦੁਹਰਾਉਣਾ ਚਾਹੁੰਦੀ ਹੈ। ਸੁਜਾਏ ਘੋਸ਼ ਇਹ ਖਾਹਿਸ਼ ਪੂਰੀ ਕਰਨ ਜਾ ਰਹੇ ਹਨ ਤੇ ਸਪੇਨ ਦੀ ਇਕ ਫ਼ਿਲਮ 'ਤੇ ਆਧਾਰਤ ਨਵੀਂ ਫ਼ਿਲਮ 'ਚ ਬਿੱਗ ਬੀ ਤੇ ਤਾਪਸੀ ਨੂੰ ਫ਼ਿਲਮਾਇਆ ਗਿਆ ਹੈ। ਤਾਪਸੀ ਇਸ ਸਮੇਂ ਤੇਜ਼ੀ ਨਾਲ ਹਿੰਦੀ ਸਿਨੇਮਾ 'ਚ ਵੀ ਜ਼ਬਰਦਸਤ ਸਫ਼ਲਤਾ ਹਾਸਲ ਕਰਦੀ ਦਿਖਾਈ ਦੇ ਰਹੀ ਹੈ। 'ਸੂਰਮਾ' ਦੇ ਟਰੇਲਰ ਤੇ ਪੋਸਟਰ ਦੀ ਚਰਚਾ, ਅਮਿਤਾਬ ਨਾਲ ਨਵੀਂ ਫ਼ਿਲਮ ਤੇ ਦੋ ਵੱਡੀਆਂ ਫ਼ਿਲਮਾਂ ਆਖਰ ਤਾਪਸੀ ਦਾ ਜਾਦੂ ਚਲ ਰਿਹਾ ਹੈ। ਤਾਪਸੀ ਨੇ ਤਾਂ ਹੀ ਨਵਾਜ਼ੂਦੀਨ ਸਿੱਦੀਕੀ ਨਾਲ ਇਕ ਫ਼ਿਲਮ ਠੁਕਰਾਈ ਹੈ। ਆਖਰ ਅਮਿਤਾਬ ਅਭਿਸ਼ੇਕ ਸਾਹਮਣੇ ਨਵਾਜ਼ੂਦੀਨ? ਤਾਪਸੀ ਗੱਲ 'ਤੇ ਕਾਇਮ ਰਹਿੰਦੀ ਹੈ। ਮੁੱਕਰ ਜਾਣਾ ਉਸ ਦੀ ਆਦਤ ਨਹੀਂ ਹੈ। 'ਸੂਰਮਾ' ਦੇ ਚੱਲਣ ਦੀ ਪੂਰੀ ਉਮੀਦ ਹੈ ਤੇ ਅੰਗਦ ਬੇਦੀ ਨੇ ਵੀ ਤਾਪਸੀ ਲਈ ਕਿਹਾ ਹੈ ਕਿ ਹੁਣ ਇਥੇ ਇਕੱਲੀ ਤਾਪਸੀ ਨੇ ਇਕ ਲਘੂ ਫ਼ਿਲਮ ਵੀ ਕੀਤੀ। ਚੰਗੇ ਵਿਸ਼ੇ 'ਤੇ ਕਹਾਣੀ ਦਾ 'ਉਹ ਹਮੇਸ਼ਾ' ਸਵਾਗਤ ਕਰਦੀ ਹੈ। ਔਰਤਾਂ ਨਾਲ ਸਰੀਰਕ ਸ਼ੋਸ਼ਣ 'ਤੇ ਅਕਸਰ ਆਵਾਜ਼ ਉਠਾਉਣ ਵਾਲੀ ਤਾਪਸੀ ਪੰਨੂ ਨੇ ਕਿਹਾ ਕਿ ਪੰਜਾਬਣ ਰੰਗ (ਸੂਰਮਾ) ਉਸ ਵਾਸਤੇ ਮਦਦਗਾਰ ਰਿਹਾ ਹੈ। ਇਸ ਸਾਲ 'ਚ ਤਾਪਸੀ ਦਾ ਜਲਵਾ ਸਿਰ ਚੜ੍ਹ ਕੇ ਬੋਲਦਾ ਨਜ਼ਰ ਆਏਗਾ। 'ਜੁੜਵਾ-2' ਵਾਲੀ ਕਹਾਣੀ 'ਸੂਰਮਾ' ਦੁਹਰਾ ਦੇਵੇ ਤੇ ਚਲ ਜਾਏ। 'ਮਨਮਰਜ਼ੀਆਂ' ਤੋਂ ਬਾਅਦ ਤਾਂ ਸਮਝੋ ਤਾਪਸੀ ਪੰਨੂ ਨੰਬਰ ਇਕ ਦੀ ਕੁਰਸੀ 'ਤੇ ਮਾਣ ਨਾਲ ਬੈਠ ਹੁਕਮ ਚਲਾਏਗੀ।


ਖ਼ਬਰ ਸ਼ੇਅਰ ਕਰੋ

ਐਵਲਿਨ ਸ਼ਰਮਾ

ਹਾਜ਼ਰ ਹੋ

'ਬਬਲੀ ਗਰਲ', ਨਟਖਟ ਗੁੱਡੀਆ ਤੇ ਹੁਣ ਇਸ ਤੋਂ ਹਟ ਕੇ ਐਵਲਿਨ ਸ਼ਰਮਾ ਕੁਝ ਕਰੇ ਤਾਂ ਹੀ ਪਤਾ ਲੱਗੇ ਕਿ ਉਸ ਦੇ ਅਭਿਨੈ 'ਚ ਦਮ-ਖਮ ਹੈ। ਹਿੰਦੀ ਫ਼ਿਲਮਾਂ ਵਾਲਿਆਂ ਨੇ ਤਾਂ ਐਵਲਿਨ ਤੋਂ ਅੱਖਾਂ ਹੀ ਮੀਟੀਆਂ ਹੋਈਆਂ ਨੇ ਪਰ ਦੱਖਣ ਵਾਲੇ ਜ਼ਰੂਰ ਈਵ ਦੀਆਂ ਅੱਖੀਆਂ 'ਚ ਚਮਕ ਦੇਖ ਰਹੇ ਹਨ। ਐਵਲਿਨ ਜਲਦੀ ਹੀ ਇਕ ਤੇਲਗੂ ਫ਼ਿਲਮ ਕਰਨ ਜਾ ਰਹੀ ਹੈ। ਇਕ ਤਰ੍ਹਾਂ ਨਾਲ ਗੁੰਮਨਾਮੀ ਦੇ ਦੌਰ ਤੇ ਚਰਚਾ ਦੇ ਬਾਜ਼ਾਰ 'ਚ ਉਹ ਆ ਰਹੀ ਹੈ। ਗਰਮੀ ਤੇ ਵਿਚ-ਵਿਚ ਵਰਖਾ ਦੀਆਂ ਕਣੀਆਂ, ਫਿਰ ਨਿਊਜ਼ ਡਾਟ ਕਾਮ ਵਾਲੀ ਹੱਬਨੈਨ ਨਾਲ ਇਸ ਮੌਸਮ 'ਦੇ ਨਜ਼ਾਰੇ ਤੇ ਥਾਂ ਹੈ ਮਾਸੂਰੀ, ਜੀ ਹਾਂ ਉਥੇ ਪਹੁੰਚੀ ਹੈ ਐਵਲਿਨ ਤੇ ਅੱਧਾ ਹਫ਼ਤਾ ਉਹ ਮਾਸੂਰੀ ਠਹਿਰੀ। ਇਥੇ ਹੀ ਬਿਕਨੀ ਪਹਿਨ ਕੇ 'ਇੰਸਟਾਗ੍ਰਾਮ' ਭਰ ਦਿੱਤੀ ਉਸ ਆਪਣੀਆਂ ਖੁੱਲ੍ਹਮ-ਖੁੱਲ੍ਹਾ ਤਸਵੀਰਾਂ ਨਾਲ। ਹਾਂ ਮੁੜ੍ਹਕਾ ਗਰਮੀ ਤੇ ਵਰਖਾ ਇਸ ਦਾ ਨਜ਼ਾਰਾ ਲੈ ਕੇ ਮਾਸੂਰੀ ਦੇ ਪੰਜ ਤਾਰਾ ਹੋਟਲ 'ਚ ਐਵਲਿਨ ਇਕ ਪੱਤਰ-ਪ੍ਰੇਰਿਕਾ ਤੋਂ ਇਲਾਵਾ ਹੋਰ ਕਿਸੇ ਨੂੰ ਨਹੀਂ ਮਿਲੀ। ਐਵਲਿਨ ਲਕਸ਼ਮੀ ਸ਼ਰਮਾ ਨੇ ਜਰਮਨ ਫ਼ਿਲਮਾਂ ਵੀ ਕੀਤੀਆਂ ਹਨ। 'ਯਾਰੀਆਂ', 'ਯੇ ਜਵਾਨੀ ਹੈ ਦੀਵਾਨੀ', 'ਨੌਟੰਕੀ ਸਾਲਾ' ਫ਼ਿਲਮਾਂ ਵਾਲੀ ਐਵਲਿਨ ਮਾਸੂਰੀ ਤੋਂ ਪਹਿਲਾਂ ਡੁਬਈ ਵੀ ਗਈ ਸੀ ਪਰ ਇਹ ਯਾਤਰਾ ਵੀ ਗੁਪਤ ਰੱਖੀ ਸੀ। ਇਕ ਕਰੋੜ ਛੇ ਲੱਖ ਇੰਸਟਾਗ੍ਰਾਮ ਪ੍ਰਸੰਸਕ 'ਤੇ 32 ਸਾਲ ਦੀ ਐਵਲਿਨ ਨੇ ਆਪਣੀਆਂ 1897 ਤਸਵੀਰਾਂ ਇੰਸਟਾਗ੍ਰਾਮ 'ਤੇ ਹੁਣ ਤੱਕ ਪਾਈਆਂ ਹਨ। ਖੁੱਲ੍ਹੀਆਂ-ਡੁੱਲ੍ਹੀਆਂ ਤਸਵੀਰਾਂ ਤੇ ਅਜਿਹੀਆਂ ਹੀ ਗੱਲਾਂ-ਬਾਤਾਂ ਐਵਲਿਨ ਦਾ ਸੁਭਾਅ ਹੈ, ਆਦਤ ਹੈ ਤੇ ਕੰਮ ਹੈ। ਡੱਬੂ ਰਤਨਾਨੀ ਦੇ ਇਸ ਸਾਲ ਦੇ ਕੈਲੰਡਰ 'ਚ ਐਵਲਿਨ ਆਈ ਹੈ। ਰੇਖਾ ਵੀ ਉਸ ਨਾਲ ਹੈ। 'ਮੈਂ ਤੇਰਾ ਹੀਰੋ' ਤੋਂ ਬਾਅਦ 'ਇਸ਼ਕੇਦਾਰੀਆਂ' ਵਾਲੀ ਈਵ ਸੰਕੇਤ ਦੇ ਰਹੀ ਹੈ ਕਿ ਬੁਹਤ ਦੇਰ ਚੁੱਪ ਰਹੀ ਹਾਂ, ਹੁਣ ਦੱਖਣ, ਮਾਡਲਿੰਗ ਤੇ ਨਾਲ-ਨਾਲ ਮਸਤੀ, ਜੀਵਨ ਦੇ ਆਨੰਦ, ਗਰਮੀ ਤੋਂ ਨਿਜਾਤ ਹਰ ਪਾਸੇ ਸਰਗਰਮੀ ਫੜਨੀ ਹੀ ਠੀਕ ਹੈ। ਐਵਲਿਨ ਦੀ ਦੋਸਤੀ ਜਵਾਨ ਇਸ਼ਾਨ ਖੱਟਰ ਨਾਲ ਹੋਣ 'ਤੇ ਕਈ ਹੈਰਾਨ ਹੋਏ ਹਨ। ਐਵਲਿਨ ਨੂੰ ਚਰਚਾ ਦੀ ਲੋੜ ਹੈ। ਇਸ ਲਈ ਇਸ਼ਾਨ ਖੱਟਰ ਨਾਲ ਦੋਸਤੀ ਇਕ ਖ਼ਬਰਾਂ ਪੈਦਾ ਕਰਨ ਦਾ ਜ਼ਰੀਆ ਬਣਿਆ ਹੈ। ਜਰਮਨ ਵੇਖਿਆ ਪਰ ਭਾਰਤ ਵੀ ਪੂਰਾ ਰਾਸ ਨਾ ਆਇਆ ਐਵਲਿਨ ਸ਼ਰਮਾ ਨੂੰ। ਫਿਰ ਵੀ ਕਈਆਂ ਨਾਲੋਂ ਉਹ ਚੰਗੀ ਰਹੀ ਹੈ ਤੇ ਜੇ ਦੱਖਣ 'ਚ ਸਿੱਕਾ ਚਲ ਗਿਆ ਤੇ ਇਸ ਨਾਲ ਸਮਝੋ ਉਧਰ ਐਵਲਿਨ ਸ਼ਰਮਾ ਦਾ ਫ਼ਿਲਮੀ ਆਸ਼ਿਆਨਾ ਸਜ-ਸੰਵਰ ਜਾਏਗਾ।

ਟਾਈਗਰ ਸ਼ਰਾਫ਼

ਤਕਦੀਰ ਮਿਹਰਬਾਨ

'ਐਕਸ਼ਨ ਸਟਾਰ' ਦਾ ਤਗਮਾ ਟਾਈਗਰ ਸ਼ਰਾਫ਼ ਦੇ ਗਲੇ ਦਾ ਸ਼ਿੰਗਾਰ ਬਣ ਚੁੱਕਾ ਹੈ ਤੇ ਅਗਾਂਹ ਉਸ ਦੀਆਂ ਆ ਰਹੀਆਂ ਫ਼ਿਲਮਾਂ ਦੀ ਝਲਕ ਦਰਸਾ ਰਹੀ ਹੈ ਕਿ ਕਾਮਯਾਬੀ ਤੇ ਕਾਮਯਾਬੀ ਇਸ ਜਵਾਨ ਐਕਸ਼ਨ ਹੀਰੋ ਦੀਆਂ ਕਿਸਮਤ ਰੇਖਾਵਾਂ 'ਚ ਚਮਕ ਰਹੀ ਹੈ। 'ਸਟੂਡੈਂਟ ਆਫ਼ ਦਾ ਯੀਅਰ-2' ਦੇ ਦ੍ਰਿਸ਼ ਲਈ ਉਸ ਨੇ ਦੌੜਨ 'ਤੇ ਖਾਸੀ ਮਿਹਨਤ ਕੀਤੀ। ਉਸ ਦੀ ਇਸ ਮਿਹਨਤ ਤੇ ਫ਼ਿਦਾ ਹੈ ਦਿਸ਼ਾ ਪਟਾਨੀ ਤੇ ਦਿਸ਼ਾ ਤੇ ਟਾਈਗਰ 'ਬਾਗੀ-2' ਹਿੱਟ ਫ਼ਿਲਮ ਦੇ ਸਿਤਾਰੇ ਹਨ। ਅਕਸ਼ੈ-ਅਜੈ ਦੇਵਗਨ 'ਤੇ ਭਾਰੂ ਪੈ ਰਿਹਾ ਹੈ ਕੱਲ੍ਹ ਦਾ ਇਹ ਨਵਾਂ ਜਿਹਾ ਗੱਭਰੂ ਮੁੰਡਾ। ਟਾਈਗਰ ਨੇ 'ਸਟੂਡੈਂਟ ਆਫ਼ ਦਾ ਯੀਅਰ-2' ਲਈ ਕਬੱਡੀ ਮਨੋਜ ਪਾਹਵਾ ਤੋਂ ਸਿੱਖਣੀ ਸ਼ੁਰੂ ਕੀਤੀ ਹੈ। ਮਾਸੂਰੀ ਵਿਖੇ ਕਬੱਡੀ ਦੇ ਦ੍ਰਿਸ਼ ਪਾਹਵਾ 'ਤੇ ਟਾਈਗਰ ਉੱਪਰ 'ਸਟੂਡੈਂਟ ਆਫ਼ ਦਾ ਯੀਅਰ-2' ਲਈ ਫ਼ਿਲਮਾਏ ਗਏ। ਟਾਈਗਰ ਆਪਣੀ ਦੀਦੀ ਕ੍ਰਿਸ਼ਨਾ ਤੇ ਦਿਸ਼ਾ ਪਟਾਨੀ ਨਾਲ ਘੁੰਮਣ ਨਿਕਲਿਆ ਪਰ ਮੀਡੀਆ ਨੂੰ ਦੇਖ ਕੇ ਉਹ ਪਰ੍ਹਾਂ ਖਿਸਕ ਕੇ ਇਕ ਤਰ੍ਹਾਂ ਲੁਕ ਗਿਆ। ਖ਼ੈਰ ਇਹ ਤਾਂ ਉਸ ਦਾ ਘਰੇਲੂ ਮਾਮਲਾ ਹੈ ਤੇ ਇਸ ਵਿਚ ਆਕੜ ਜਾਂ ਗੁੱਸੇ ਵਾਲੀ ਕੋਈ ਗੱਲ ਨਹੀਂ। ਗੋਆ ਦੀ ਸੈਰ ਤੋਂ ਲੈ ਕੇ ਮਸੂਰੀ ਤੇ ਹੁਣ ਕੁਝ ਦਿਨ ਮਾਲਦੀਵ ਵਿਖੇ ਉਸ ਨੇ ਦਿਸ਼ਾ ਨਾਲ ਗੁਜ਼ਾਰੇ ਹਨ। ਟਾਈਗਰ ਦੀ ਮਾਂ ਨੇ ਵੀ ਦਿਸ਼ਾ ਦੀ ਸਿਫ਼ਤ ਕੀਤੀ ਹੈ। ਟਾਈਗਰ ਦੀ ਦੀਦੀ ਕ੍ਰਿਸ਼ਨਾ ਵੀ ਦਿਸ਼ਾ ਨੂੰ ਪਸੰਦ ਕਰਦੀ ਹੈ। 'ਬਾਗੀ-2' ਦੀ ਕਾਮਯਾਬੀ ਤੋਂ ਬਾਅਦ ਹੀ ਉਤਸ਼ਾਹਿਤ ਜੈਕੀ ਦਾ ਇਹ ਕਾਮਯਾਬ ਹੀਰੋ ਪੁੱਤਰ ਹੁਣ 'ਰੈਂਬੋ' ਫ਼ਿਲਮ 'ਤੇ ਟੇਕ ਰੱਖ ਰਿਹਾ ਹੈ। ਸਿਧਾਰਥ ਆਨੰਦ ਦੀ 'ਰੈਂਬੋ' ਅੰਗਰੇਜ਼ੀ ਨਾਵਲ 'ਫਸਟ ਬਲੱਡ' 'ਤੇ ਆਧਾਰਤ ਹੈ। ਸਿਲਵਸਟਰ ਸਟਾਲਿਨ ਦੇ ਇਸ ਨਾਵਲ ਦੇ ਨਾਇਕ 'ਜੌਹਨ ਰੈਂਬੋ' ਦਾ ਕਿਰਦਾਰ ਟਾਈਗਰ ਸ਼ਰਾਫ਼ ਨਿਭਾਅ ਰਿਹਾ ਹੈ। 'ਐਕਸ਼ਨ ਹੀਰੋ, ਸੁਪਰ ਸਿਤਾਰਾ, ਜਵਾਨ ਪ੍ਰਸੰਸਕਾਂ ਦਾ ਚਹੇਤਾ ਤੇ ਦਿਸ਼ਾ ਪਟਾਨੀ ਦਾ ਖਾਸਮਖਾਸ ਟਾਈਗਰ ਜਿਥੇ ਫ਼ਿਲਮੀ ਕੈਰੀਅਰ ਸ਼ਾਨਦਾਰ ਬਣਾ ਰਿਹਾ ਹੈ, ਉਥੇ ਮਾਂ ਆਇਸ਼ਾ ਤੇ ਦੀਦੀ ਕ੍ਰਿਸ਼ਨਾ ਦੇ ਪਿਆਰ ਸਦਕਾ ਦਿਸ਼ਾ ਪਟਾਨੀ ਨਾਲ ਪਰਿਵਾਰਕ ਸਾਂਝ ਵੀ ਵਧੀਆ ਪੁਆ ਰਿਹਾ ਹੈ। ਬਚਪਨ ਦਾ ਇਹ ਸ਼ੈਤਾਨ, ਸ਼ਰਾਰਤੀ ਟਾਈਗਰ ਸ਼ਰਾਫ਼ ਜ਼ਿਆਦਾ ਰੁਝੇਵੇਂ ਕਾਰਨ ਆਰਥਿਕ ਤਣਾਅ ਵੀ ਝੱਲਣ ਦੀ ਗੱਲ ਨਾਲ ਸਹਿਮਤ ਹੈ। ਜਿਥੇ ਹੈ ਸਫਾਈ ਉਥੇ ਹੀ ਖੁਦਾਈ ਵਾਲੀ ਗੱਲ ਨਾਲ ਉਹ ਸੌ ਫੀਸਦੀ ਸਹਿਮਤ ਹੈ। 'ਪਦਮਾਵਤ', 'ਰੇਡ', 'ਪੈਡਮੈਨ' ਤੋਂ ਜ਼ਿਆਦਾ ਉਸ ਦੀ ਫ਼ਿਲਮ 'ਬਾਗੀ-2' ਚੱਲੀ ਹੈ। ਫਿਰ ਉਹ ਦਿਸ਼ਾ ਪਟਾਨੀ ਦੀ ਜੇ ਜਾਸੂਸੀ ਕਰ ਵੀ ਲਵੇ ਤਾਂ ਕੀ ਇਤਰਾਜ਼? ਆਖਰ ਦਿਸ਼ਾ ਉਸ ਦੀ ਤਾਂ ਹੈ ਖਾਸ।

ਏਲੀ ਅਵਰਾਮ

ਟੁੱਟੇ ਦਿਲ ਦੀ ਦਾਸਤਾਨ

ਕ੍ਰਿਕਟਰ ਹਾਰਦਿਕ ਪੰਡਯਾ ਤੇ ਏਲੀ ਅਵਰਾਮ, ਬਿਲਕੁਲ ਦੋਵਾਂ 'ਚ 'ਕੁਝ-ਕੁਝ ਹੁੰਦਾ ਹੈ', ਵਾਲੀ ਗੱਲ ਜ਼ਰੂਰ ਹੈ। ਹਾਰਦਿਕ ਦੇ ਭਰਾ ਕੁਨਾਲ ਪੰਡਯਾ ਦੇ ਵਿਆਹ 'ਤੇ ਆਖਰ ਏਲੀ ਦਾ ਕੀ ਕੰਮ ਸੀ? ਬਿੱਗ ਬੌਸ ਵਾਲੀ ਏਲੀ ਨੇ ਪ੍ਰਿਅੰਕਾ ਚੋਪੜਾ ਦੀ ਕਾਟ ਕੱਟਣ ਲਈ ਇਸ ਵਿਆਹ 'ਤੇ ਹਾਜ਼ਰੀ ਲੁਆਈ ਸੀ ਕਿਉਂਕਿ ਪ੍ਰਿਅੰਕਾ ਦੀ ਦਿਲਚਸਪੀ ਹਾਰਦਿਕ 'ਚ ਸੀ। ਸਲਮਾਨ ਖ਼ਾਨ ਦੀ ਸਲਾਹ ਨਾਲ ਹਰ ਕਦਮ ਇੰਡਸਟਰੀ 'ਚ ਪੁੱਟਣ ਦੀ ਗੱਲ ਕਹਿਣ ਵਾਲੀ ਏਲੀ ਅਵਰਾਮ ਧੜਾਧੜ ਨਵੀਆਂ ਫੋਟੋਆਂ ਖਿੱਚਵਾ ਰਹੀ ਹੈ। ਬਰਾਈਡਲ ਲੁੱਕ ਦੇ ਫੋਟੋ ਸੈਸ਼ਨ 'ਚ ਦਿਲਚਸਪੀ, ਸਾਰੇ ਆਈ.ਪੀ.ਐਲ. ਦੌਰਾਨ ਹਾਰਦਿਕ ਪੰਡਯਾ ਨੂੰ ਸ਼ੁੱਭ ਕਾਮਨਾਵਾਂ ਦੇ ਕੇ ਏਲੀ ਨੇ ਆਪਣੀ 'ਪੱਕੀ ਦੋਸਤੀ' ਦੀ ਰਸੀਦ ਕਟਵਾ ਲਈ ਹੈ। ਕਪਿਲ ਸ਼ਰਮਾ ਨਾਲ ਉਸ ਦੀਆਂ ਮੁਲਾਕਾਤਾਂ ਕੈਰੀਅਰ 'ਚ ਕੁਝ ਨਵਾਂ ਵਾਪਰਨ ਵੱਲ ਇਸ਼ਾਰਾ ਹੈ। ਏਲੀ ਖੂਬ ਸਰਗਰਮ ਹੈ ਤੇ ਸੱਲੂ ਦੀ ਉਹ ਮਨਪਸੰਦ ਅਭਿਨੇਤਰੀ ਹੈ। 'ਮਿੱਕੀ ਵਾਇਰਸ' ਵਾਲੀ ਏਲੀ ਸਵੀਡਨ ਦੀ ਹੈ ਤੇ ਉਥੇ ਆਈਸ ਸਕੇਟਿੰਗ ਕਰਨ ਦਾ ਵੀਡੀਓ ਉਸ ਨੇ ਪਾਇਆ ਹੈ। ਵਰੁਣ ਧਵਨ ਦੀ ਫ਼ਿਲਮ 'ਅਕਤੂਬਰ' ਦੇ ਗਾਣੇ 'ਤੇ ਥਿਰਕਦੀ ਉਹ ਸਕੇਟਿੰਗ ਕਰ ਰਹੀ ਸੀ। ਦੱਖਣ ਦੀਆਂ ਫ਼ਿਲਮਾਂ ਦੀ ਉਹ ਆਈਟਮ ਗਰਲ ਬਣ ਚੁੱਕੀ ਹੈ ਤੇ ਕਪਿਲ ਸ਼ਰਮਾ ਨਾਲ ਨਵੀਂ ਫ਼ਿਲਮ ਕਰਨ ਦੀ ਉਸ ਨੂੰ ਪੂਰੀ ਆਸ ਹੈ। ਜੂਨ ਮਹੀਨਾ ਬੀਤਣ ਵਾਲਾ ਹੈ ਤੇ ਇਹ ਜੂਨ ਏਲੀ ਲਈ ਅਸ਼ੁੱਭ ਰਿਹਾ ਹੈ। ਬਿਲਕੁਲ ਹਾਰਦਿਕ ਪੰਡਯਾ ਨਾਲ ਦੋ ਦਿਨ ਪਹਿਲਾਂ ਹੀ ਉਸ ਦੀ ਦੋਸਤੀ ਟੁੱਟਣ ਦੀ ਖ਼ਬਰ ਆਈ ਹੈ। ਟੁੱਟੇ ਦਿਲ ਨਾਲ ਏਲੀ ਅਵਰਾਮ ਸਿੱਧੀ ਇੰਡੀਆ ਤੋਂ ਸ੍ਰੀਲੰਕਾ ਪਹੁੰਚ ਗਈ ਹੈ। ਬਹਾਨਾ ਗਰਮੀਆਂ ਦਾ ਹੈ ਪਰ ਉਹ ਕਿਹੜਾ ਕਸੌਲੀ, ਮਾਸੂਰੀ, ਡਲਹੌਜ਼ੀ ਜਾਂ ਸ਼ਿਮਲਾ ਹੈ। ਹਵਾਈ ਅੱਡੇ 'ਤੇ ਏਲੀ ਦੀਆਂ ਅੱਖੀਆਂ 'ਚ ਗ਼ਮੀ ਦੇ ਅੱਥਰੂ ਸਾਫ਼ ਦਿਖਾਈ ਦਿੱਤੇ ਸਨ, ਜਦੋਂ ਉਹ ਸ੍ਰੀਲੰਕਾ ਦੀ ਫਲਾਈਟ ਫੜ ਰਹੀ ਸੀ। ਸ਼ੁਕਰ ਹੈ ਕਿ ਇਕ ਵਿਗਿਆਪਨ ਉਸ ਨੂੰ ਸ੍ਰੀਲੰਕਾ 'ਚ ਮਿਲ ਗਿਆ ਹੈ। 'ਹਾਊਸਫੁਲ-3', 'ਕਿਸ ਕਿਸ ਕੋ ਪਿਆਰ ਕਰੂੰ', 'ਨਾਮ ਸ਼ਬਾਨਾ' ਵਾਲੀ ਖੂਬਸੂਰਤ ਸਵੀਡਨ ਕੁੜੀ ਏਲੀ ਅਵਰਾਮ ਦਿਲ ਨੂੰ ਦਿਲਾਸਾ ਦੇ ਕੇ ਫਿਰ ਮਜ਼ਬੂਤ ਹੋ ਕੇ ਸ੍ਰੀਲੰਕਾ ਤੋਂ ਵਾਪਸ ਪਰਤੇਗੀ ਤੇ ਦੱਖਣ ਵੱਲ ਰੁਖ਼ ਕਰੇਗੀ। ਹਾਰਦਿਕ ਪੰਡਯਾ ਨਾਲ ਟੁੱਟੀ ਦੋਸਤੀ ਦਾ ਵਾਸਤਾ ਪਾਉਣ ਤੋਂ ਬਚਣ ਲਈ ਸ੍ਰੀਲੰਕਾ ਜਾਣ ਦਾ ਫੈਸਲਾ ਏਲੀ ਅਵਰਾਮ ਲਈ ਠੀਕ ਹੈ ਕਿਉਂਕਿ ਸਾਹਮਣੇ ਰਹਿ ਕੇ ਦਿਲ ਜ਼ਿਆਦਾ ਦੁੱਖਦਾ ਹੈ।

ਰਿਸ਼ਤਿਆਂ ਦੀ ਕਹਾਣੀ ਹੈ ਆਸੀਸ

ਬਹੁਤ ਘੱਟ ਫ਼ਿਲਮਾਂ ਅਜਿਹੀਆਂ ਹੁੰਦੀਆਂ ਹਨ ਜੋ ਸਮਾਜਿਕ ਮੁੱਦਿਆਂ ਦੀ ਪੇਸ਼ਕਾਰੀ ਕਰਦੀਆਂ ਸਾਰਥਕ ਸੁਨੇਹਾ ਦਿੰਦੀਆਂ ਹਨ। 'ਅਰਦਾਸ, 'ਰੱਬ ਦਾ ਰੇਡੀਓ', 'ਦਾਣਾ ਪਾਣੀ' ਵਰਗੀਆਂ ਅਰਥ ਭਰਪੂਰ ਫ਼ਿਲਮਾਂ ਨੇ ਪੰਜਾਬੀ ਸਿਨਮੇ ਦਾ ਮੁਹਾਂਦਰਾ ਬਦਲਿਆ ਹੈ। ਅਜਿਹੀਆਂ ਫ਼ਿਲਮਾਂ ਵਿਚ ਇਕ ਹੋਰ ਫ਼ਿਲਮ 'ਆਸੀਸ' ਸ਼ਾਮਿਲ ਹੋਣ ਜਾ ਰਹੀ ਹੈ। ਬਤੌਰ ਨਿਰਦੇਸ਼ਕ ਰਾਣਾ ਰਣਬੀਰ ਦੀ ਇਹ ਪਹਿਲੀ ਫ਼ਿਲਮ 'ਆਸੀਸ' ਵੀ ਮਨੁੱਖੀ ਭਾਵਨਾਵਾਂ ਨਾਲ ਜੁੜੀ ਮਨੋਰੰਜਨ ਦੇ ਨਾਲ-ਨਾਲ ਪਰਿਵਾਰਕ ਰਿਸ਼ਤਿਆਂ ਦੀ ਅਹਿਮੀਅਤ ਦਰਸਾਉਂਦੀ ਫ਼ਿਲਮ ਹੈ। ਨਵਰੋਜ਼ ਗੁਰਬਾਜ਼ ਇੰਟਰਟੇਨਮੈਂਟ, ਬਸੰਤ ਇੰਟਰਟੇਨਮੈਂਟ ਅਤੇ ਜ਼ਿੰਦਗੀ ਜ਼ਿੰਦਾਬਾਦ ਲਿਮਟਿਡ ਦੇ ਬੈਨਰ ਹੇਠ ਬਣੀ ਇਹ ਫ਼ਿਲਮ 22 ਜੂਨ ਨੂੰ ਰਿਲੀਜ਼ ਹੋ ਰਹੀ ਹੈ। 'ਆਸੀਸ' ਬਾਰੇ ਰਾਣਾ ਰਣਬੀਰ ਨੇ ਦੱਸਿਆ ਕਿ ਇਹ ਫ਼ਿਲਮ ਮਾਂ-ਪੁੱਤ ਦੀ ਕਹਾਣੀ 'ਤੇ ਅਧਾਰਤ ਹੈ ਜੋ ਕਿ ਇਕ ਸਮਾਜਿਕ ਤੇ ਪਰਿਵਾਰਕ ਡਰਾਮਾ ਹੈ। ਫ਼ਿਲਮ ਵੇਖਦਿਆਂ ਹਰੇਕ ਦਰਸ਼ਕ ਆਪਣੇ ਨਾਲ, ਆਪਣੇ ਆਲੇ-ਦੁਆਲੇ ਨਾਲ ਜੁੜਿਆ ਮਹਿਸੂਸ ਕਰੇਗਾ। ਸਮਾਜਿਕ ਮੁੱਦਿਆਂ 'ਤੇ ਅਧਾਰਤ ਬਣਨ ਵਾਲੀ ਇਹ ਫ਼ਿਲਮ ਰਿਸ਼ਤੇ-ਨਾਤਿਆਂ ਦੀ ਅਹਿਮੀਅਤ ਨੂੰ ਸਮਝਾਉਂਦੀ ਹੋਈ ਤਿੜਕੇ ਰਿਸ਼ਤਿਆਂ ਨੂੰ ਬਚਾਉਣ ਦਾ ਯਤਨ ਕਰੇਗੀ। ਇਸ ਵਿਚ ਮਨੁੱਖੀ ਜ਼ਿੰਦਗੀ ਦੇ ਕਈ ਰੰਗ ਵੇਖਣ ਨੂੰ ਮਿਲਣਗੇ। ਉਸਦਾ ਆਪਣਾ ਕਿਰਦਾਰ ਇਕ ਅਜਿਹੇ ਸਿੱਧੇ ਸਾਦੇ, ਰੱਬ ਦੇ ਬੰਦੇ ਦਾ ਹੈ ਜਿਸ ਲਈ ਮਾਂ ਹੀ ਸਭ ਕੁਝ ਹੈ।
ਇਸ ਫ਼ਿਲਮ ਦੇ ਨਿਰਮਾਤਾ ਲਵਪ੍ਰੀਤ ਸਿੰਘ ਲੱਕੀ ਸੰਧੂ , ਬਲਦੇਵ ਸਿੰਘ ਬਾਠ ਤੇ ਰਾਣਾ ਰਣਬੀਰ ਹਨ। ਨਿਰਮਾਤਾ ਲਵਪ੍ਰੀਤ ਸਿੰਘ ਸੰਧੂ ਨੇ ਦੱਸਿਆ ਕਿ ਨਿਰਮਾਤਾ ਬਣ ਕੇ ਫ਼ਿਲਮ ਉਦਯੋਗ ਵਿਚ ਸਾਡੀ ਸੋਚ ਜੇਬਾਂ ਭਰਨ ਤੱਕ ਸੀਮਤ ਨਹੀਂ ਬਲਕਿ ਦਰਸ਼ਕਾਂ ਨੂੰ ਚੰਗੀ ਸੇਧ, ਨੇਕ ਤੇ ਉਸਾਰੂ ਸੋਚ ਵਾਲੀ ਮਨੋਰੰਜਕ ਫ਼ਿਲਮ ਬਣਾਉਣਾ ਹੀ ਸਾਡਾ ਮੰਤਵ ਹੈ। ਇਹ ਪਰਿਵਾਰਾਂ ਸਮੇਤ ਵੇਖਣ ਵਾਲੀ ਫ਼ਿਲਮ ਹੈ। ਫ਼ਿਲਮ ਦੀ ਕਹਾਣੀ ਤੇ ਸੰਵਾਦ ਰਾਣਾ ਰਣਬੀਰ ਨੇ ਲਿਖੇ ਹਨ। ਰਾਣਾ ਰਣਬੀਰ, ਨੇਹਾ ਪਵਾਰ, ਰੁਪਿੰਦਰ ਰੂਪੀ, ਸਰਦਾਰ ਸੋਹੀ, ਗੁਰਪ੍ਰੀਤ ਕੌਰ ਭੰਗੂ, ਮਲਕੀਤ ਰੌਣੀ, ਕੁਲਜਿੰਦਰ ਸਿੱਧੂ, ਸੀਮਾ ਕੌਸ਼ਲ, ਸ਼ਮਿੰਦਰ ਵਿੱਕੀ,ਵਿਜੈ ਟੰਡਨ, ਸੈਵਿਨ ਰੇਖੀ, ਪਰਦੀਪ ਸਰਾਂ, ਆਦਿ ਨੇ ਅਹਿਮ ਕਿਰਦਾਰ ਨਿਭਾਏ ਹਨ। ਫ਼ਿਲਮ ਲਈ ਸੰਗੀਤ ਤੇਜਵੰਤ ਕਿੱਟੂ ਤੇ ਰੂਪਨ ਕਾਹਲੋਂ ਨੇ ਦਿੱਤਾ ਹੈ। ਗਿੱਲ ਰੌਂਤਾ, ਅਮਰ ਕਵੀ, ਤੇ ਰਾਣਾ ਰਣਬੀਰ ਦੇ ਲਿਖੇ ਗੀਤਾਂ ਨੂੰ ਕੰਵਰ ਗਰੇਵਾਲ, ਲਖਵਿੰਦਰ ਵਡਾਲੀ, ਫ਼ਿਰੋਜ਼ ਖ਼ਾਨ, ਪਰਦੀਪ ਸਰਾਂ ਗੁਰਲੇਜ਼ ਅਖਤਰ ਤੇ ਕੁਲਵਿੰਦਰ ਕੈਲੀ ਦੀ ਜੋੜੀ ਨੇ ਗਾਇਆ ਹੈ।
**

ਧੜਕਣਾਂ ਵਧਾਉਂਦੀ ਧੜਕ

ਸਾਲ 2016 ਵਿਚ ਆਈ ਮਰਾਠੀ ਫ਼ਿਲਮ 'ਸੈਰਾਟ' ਨੇ ਟਿਕਟ ਖਿੜਕੀ 'ਤੇ ਕਮਾਈ ਦੇ ਨਵੇਂ ਰਿਕਾਰਡ ਸਥਾਪਿਤ ਕੀਤੇ ਸਨ। ਮਰਾਠੀ ਭਾਸ਼ਾ ਵਿਚ ਸੈਰਾਟ ਦਾ ਅਰਥ ਪਿਆਰ ਵਿਚ ਬੇਹੱਦ ਪਾਗਲ ਹੁੰਦਾ ਹੈ ਅਤੇ ਫ਼ਿਲਮ ਵਿਚ ਪਿਆਰ ਵਿਚ ਪਾਗਲ ਕੁੜੀ ਦੀ ਭੂਮਿਕਾ ਰਿੰਕੂ ਰਾਜਗੁਰੂ ਵਲੋਂ ਨਿਭਾਈ ਗਈ ਸੀ ਅਤੇ ਇਥੇ ਉਸ ਦੇ ਪ੍ਰੇਮੀ ਦੀ ਭੂਮਿਕਾ ਵਿਚ ਆਕਾਸ਼ ਠੋਸਰ ਸੀ। ਹੁਣ ਕਰਨ ਜੌਹਰ ਨੇ ਇਕ ਚੈਨਲ ਨਾਲ ਮਿਲ ਕੇ 'ਸੈਰਾਟ' ਦਾ ਹਿੰਦੀ ਭਾਗ ਬਣਾਇਆ ਹੈ ਅਤੇ ਇਸ ਦਾ ਟਾਈਟਲ ਹੈ 'ਧੜਕ'। ਆਪਣੇ ਐਲਾਨ ਦੇ ਨਾਲ ਹੀ ਇਹ ਫ਼ਿਲਮ ਚਰਚਾ ਵਿਚ ਆ ਗਈ ਸੀ ਅਤੇ ਇਸ ਦੀ ਅਹਿਮ ਵਜ੍ਹਾ ਇਹ ਸੀ ਕਿ ਸ੍ਰੀਦੇਵੀ ਦੀ ਬੇਟੀ ਜਾਹਨਵੀ ਨੂੰ ਇਸ ਰਾਹੀਂ ਬਾਲੀਵੁੱਡ ਵਿਚ ਪੇਸ਼ ਕੀਤਾ ਜਾ ਰਿਹਾ ਹੈ। ਇਥੇ ਜਾਹਨਵੀ ਦੇ ਨਾਇਕ ਹਨ ਇਸ਼ਾਨ ਖੱਟਰ। ਅਭਿਨੇਤਾ ਪਿਤਾ ਰਾਜੇਸ਼ ਖੱਟੜ ਤੇ ਅਭਿਨੇਤਰੀ ਮਾਤਾ ਨੀਲਿਮਾ ਅਜ਼ੀਮ ਦੇ ਬੇਟੇ ਇਸ਼ਾਨ ਹਾਲ ਵਿਚ ਪ੍ਰਦਰਸ਼ਿਤ ਹੋਈ ਮਾਜਿਦ ਮਜੀਦੀ ਦੀ ਫ਼ਿਲਮ 'ਬਿਓਂਡ ਦ ਕਲਾਊਡਸ' ਵਿਚ ਵੀ ਸਨ। 'ਸੈਰਾਟ' ਦੀ ਤਰ੍ਹਾਂ 'ਧੜਕ' ਵਿਚ ਵੀ ਇਕ ਅਮੀਰ ਤੇ ਰਸੂਖਦਾਰ ਪਿਤਾ ਦੀ ਬੇਟੀ ਤੇ ਇਕ ਗ਼ਰੀਬ ਮੁੰਡੇ ਵਿਚਾਲੇ ਪਿਆਰ ਦੀ ਕਹਾਣੀ ਪੇਸ਼ ਕੀਤੀ ਗਈ ਹੈ। ਹਾਂ, ਹਿੰਦੀ ਦਰਸ਼ਕਾਂ ਦੀ ਪਸੰਦ ਨੂੰ ਧਿਆਨ ਵਿਚ ਰੱਖ ਕੇ ਇਥੇ ਕਹਾਣੀ ਦੀ ਪਿੱਠਭੂਮੀ ਰਾਜਸਥਾਨ ਦੀ ਰੱਖੀ ਗਈ ਹੈ ਅਤੇ ਜ਼ਿਆਦਾਤਰ ਸ਼ੂਟਿੰਗ ਉਦੈਪੁਰ ਵਿਚ ਕੀਤੀ ਗਈ ਹੈ। ਇਹ ਫ਼ਿਲਮ ਸ਼ਸ਼ਾਂਕ ਖੇਤਾਨ ਵਲੋਂ ਨਿਰਦੇਸ਼ਿਤ ਕੀਤੀ ਗਈ ਹੈ। ਉਹ ਖ਼ੁਦ ਰਾਜਸਥਾਨ ਤੋਂ ਹੈ ਅਤੇ ਰਾਜਸਥਾਨੀ ਸੱਭਿਆਚਾਰ ਤੋਂ ਜਾਣੂ ਹੈ। ਇਸ ਵਜ੍ਹਾ ਨਾਲ ਕਹਾਣੀ ਵਿਚ ਰਾਜਸਥਾਨੀ ਰੰਗ ਭਰਿਆ ਗਿਆ ਹੈ। ਆਪਣੀ ਇਸ ਫ਼ਿਲਮ ਬਾਰੇ ਉਹ ਸਪੱਸ਼ਟ ਕਰ ਦੇਣਾ ਚਾਹੁੰਦੇ ਹਨ ਕਿ ਇਹ 'ਸੈਰਾਟ' ਦੀ ਪੂਰਨ ਰੂਪ ਨਾਲ ਨਕਲ ਨਹੀਂ ਹੈ। ਉਹ ਕਹਿੰਦੇ ਹਨ, 'ਮੈਂ ਪਹਿਲਾਂ 'ਹੰਪਟੀ ਸ਼ਰਮਾ ਕੀ ਦੁਲਹਨੀਆ' ਨਿਰਦੇਸ਼ਿਤ ਕੀਤੀ ਸੀ। ਉਹ 'ਦਿਲਵਾਲੇ ਦੁਲਹਨੀਆ ਲੇ ਜਾਏਂਗੇ' ਤੋਂ ਪ੍ਰੇਰਿਤ ਸੀ ਪਰ ਉਸ ਦੀ ਨਕਲ ਨਹੀਂ ਸੀ। ਉਸੇ ਤਰਜ਼ 'ਤੇ ਇਥੇ ਵੀ 'ਸੈਰਾਟ' ਤੋਂ ਪ੍ਰੇਰਣਾ ਲਈ ਗਈ ਹੈ। ਇਹ ਉਸ ਦੀ ਨਕਲ ਨਹੀਂ ਹੈ।
ਇਸ ਫ਼ਿਲਮ ਵਿਚ ਜਾਹਨਵੀ ਵਲੋਂ ਪਾਰਥਵੀ ਕਿਰਦਾਰ ਨਿਭਾਇਆ ਗਿਆ ਹੈ ਜਦੋਂ ਕਿ ਇਸ਼ਾਨ ਦੇ ਕਿਰਦਾਰ ਦਾ ਨਾਂਅ ਮਧੁਕਰ ਹੈ। ਫ਼ਿਲਮ ਦੀ ਸ਼ੂਟਿੰਗ ਸ਼ੁਰੂ ਹੋਣ ਤੋਂ ਪਹਿਲਾਂ ਦੋਵਾਂ ਨੂੰ 'ਸੈਰਾਟ' ਦੇਖਣ ਨੂੰ ਕਿਹਾ ਗਿਆ ਸੀ ਤਾਂ ਕਿ ਕਿਰਦਾਰ ਬਾਰੇ ਵਿਸਤਾਰ ਨਾਲ ਪਤਾ ਲਗ ਸਕੇ। ਜਾਹਨਵੀ ਅਨੁਸਾਰ ਜਦੋਂ 'ਸੈਰਾਟ' ਰਿਲੀਜ਼ ਹੋਈ ਸੀ ਉਦੋਂ ਉਸ ਨੇ ਆਪਣੀ ਮਾਂ ਨਾਲ ਇਹ ਫ਼ਿਲਮ ਦੇਖੀ ਸੀ ਅਤੇ ਇੱਛਾ ਪ੍ਰਗਟ ਕੀਤੀ ਸੀ ਕਿ ਇਸੇ ਤਰ੍ਹਾਂ ਦੀ ਕਿਸੇ ਫ਼ਿਲਮ ਵਿਚ ਉਸ ਨੂੰ ਮੌਕਾ ਮਿਲ ਜਾਵੇ ਤਾਂ ਮਜ਼ਾ ਆ ਜਾਵੇ। ਉੱਪਰ ਵਾਲੇ ਨੇ ਉਸ ਦੀ ਸੁਣ ਲਈ ਅਤੇ ਉਸ ਨੂੰ ਇਸੇ ਫ਼ਿਲਮ ਦੇ ਹਿੰਦੀ ਵਰਸ਼ਨ ਲਈ ਕਾਸਟ ਕਰ ਲਿਆ ਗਿਆ।
ਤਾਰੀਫ਼ਾਂ ਸੁਣ ਕੇ ਕਰਨ ਜੌਹਰ ਜਾਹਨਵੀ ਨੂੰ ਮਿਲਣ ਲਈ ਉਤਸੁਕ ਹੋਏ ਅਤੇ ਜਦੋਂ ਉਨ੍ਹਾਂ ਜਾਹਨਵੀ ਦੀਆਂ ਅੱਖਾਂ ਵਿਚ ਅਭਿਨੈ ਪ੍ਰਤੀ ਬੇਕਰਾਰੀ ਦੇਖੀ ਤਾਂ ਉਹ ਉਸ ਨੂੰ ਫ਼ਿਲਮ ਵਿਚ ਲੈਣ ਲਈ ਤਿਆਰ ਹੋ ਗਏ। ਜਿਥੋਂ ਤੱਕ ਇਸ਼ਾਨ ਦਾ ਸਵਾਲ ਹੈ ਤਾਂ ਉਨ੍ਹਾਂ ਨੇ ਉਸ ਦੀਆਂ ਕੁਝ ਤਸਵੀਰਾਂ ਇੰਸਟਾਗ੍ਰਾਮ ਵਿਚ ਦੇਖੀਆਂ ਸਨ। ਇਸ਼ਾਨ-ਜਾਹਨਵੀ ਦੀ ਇਸ ਫ਼ਿਲਮ ਵਿਚ ਆਸ਼ੂਤੋਸ਼ ਰਾਣਾ ਵੀ ਹੈ ਅਤੇ ਇਥੇ ਉਹ ਜਾਹਨਵੀ ਦੇ ਪਿਤਾ ਦੀ ਭੂਮਿਕਾ ਵਿਚ ਹੈ।

ਸੋਨਮ ਕਪੂਰ

ਆਪਣੇ ਮੂੰਹ, ਮੀਆਂ ਮਿੱਠੂ

ਬਾਲੀਵੁੱਡ ਦੀ ਸਟਾਈਲਿਸ਼ ਲੜਕੀ, ਸਭ ਤੋਂ ਵੱਧ ਪ੍ਰਤਿਭਾ ਭਰਪੂਰ ਅਭਿਨੇਤਰੀ, ਰਾਸ਼ਟਰੀ ਸਨਮਾਨ ਪ੍ਰਾਪਤ ਚੋਟੀ ਦੀ ਹੀਰੋਇਨ ਤੇ ਗੱਲ ਕੀ ਹੋਰ ਵੀ ਕਈ ਵਿਸ਼ੇਸ਼ਣ ਉਸ ਨਾਲ ਲੱਗ ਜਾਣ ਤਾਂ ਗ਼ਲਤ ਗੱਲ ਨਹੀਂ ਹੋਏਗੀ। ਸੁਪਰ ਸਟਾਰ ਸੋਨਮ ਕਪੂਰ ਆਹੂਜਾ ਸਬੰਧੀ ਹੀ ਇਹ ਗੱਲਾਂ ਹੋ ਰਹੀਆਂ ਹਨ। 33 ਸਾਲ ਉਮਰ ਉਸ ਦੀ ਹੋ ਗਈ ਹੈ। ਪ੍ਰਤਿਭਾ ਸਹਾਰੇ ਉਸ ਦੀ ਇੱਜ਼ਤ 'ਚ ਵਾਧਾ ਇਸ ਇੰਡਸਟਰੀ 'ਚ ਹੋਇਆ ਹੈ। ਹਾਂ, ਉਸ ਦੇ ਸਿੱਧੇ ਬਿਆਨ ਜ਼ਰੂਰ ਕਈਆਂ ਦੇ ਦਿਲ 'ਚ ਤੀਰ ਦੀ ਤਰ੍ਹਾਂ ਲਗਦੇ ਹਨ। ਕਈ ਵਾਰ ਸੋਨਮ ਦੀ ਤੋਏ-ਤੋਏ ਉਸ ਦੇ ਅਜਿਹੇ ਸਿੱਧੇ ਬਿਆਨਾਂ ਕਾਰਨ ਹੁੰਦੀ ਹੈ ਪਰ ਨਵਵਿਆਹੀ ਸੋਨਮ ਦੀ ਸਿਹਤ 'ਤੇ ਕੋਈ ਅਸਰ ਨਹੀਂ ਹੈ। ਜਿੱਤਣਾ ਹੋਵੇ ਫ਼ਿਲਮੀ ਸਨਮਾਨ ਜਾਂ ਹੋਇਆ ਹੋਵੇ ਵਿਆਹ, ਸੁਪਰ ਕਾਮਯਾਬ ਰਹੀ ਹੈ ਸੋਨਮ। ਸਹੁਰੇ ਘਰ ਚਲੀ ਗਈ ਹੈ ਪਰ ਕੈਰੀਅਰ 'ਤੇ ਕੋਈ ਚਿੰਤਾ ਦੀ ਲਕੀਰ ਨਹੀਂ ਆਈ। 9 ਸਾਲ ਇਥੇ ਰਹਿ ਕੇ ਅਹਿਮ ਪ੍ਰਾਪਤੀਆਂ ਕੀਤੀਆਂ, ਹਾਂ ਜੀਭ ਦੇ ਬੋਲ ਕਈਆਂ ਨੂੰ ਜ਼ਰੂਰ ਉਸ ਦੇ ਕੌੜੇ ਲੱਗੇ ਹਨ। ਸੋਨਮ ਨੇ ਆਪਣੀ ਜ਼ੁਬਾਨ ਸਦਕਾ ਕਈਆਂ ਨੂੰ ਨਾਰਾਜ਼ ਕੀਤਾ ਹੈ। ਚਾਹੇ ਮੀਡੀਆ ਨੂੰ ਪਿੱਠ ਦਿਖਾਉਣ ਵਾਲੀ ਘਟਨਾ ਹੋਵੇ ਤੇ ਚਾਹੇ ਸੈਂਸਰਸ਼ਿਪ 'ਚ ਵਿਸ਼ਵਾਸ ਨਹੀਂ। ਸੋਨਮ ਦੀਆਂ ਗੱਲਾਂ ਵੱਧ-ਚੜ੍ਹ ਕੇ ਹੋਈਆਂ ਹਨ। ਰਹੀ ਗੱਲ ਸਰੀਰ ਦਿਖਾਉਣ ਦੀ ਤਾਂ ਜ਼ਰਾ ਸ੍ਰੀਮਤੀ ਆਹੂਜਾ ਦਾ ਜਵਾਬ ਸੁਣੋ ਕਿ ਇਹ ਯੁਵਾ ਸ਼ਕਤੀ ਦਾ ਅਜੋਕੇ ਸਮੇਂ 'ਚ ਹੱਕ ਹੈ। ਆਉਣ ਵਾਲੀ ਪੀੜ੍ਹੀ ਦੀ ਅੰਟੀ ਉਸ ਨੇ ਐਸ਼ਵਰਿਆ ਰਾਏ ਬੱਚਨ ਨੂੰ ਕਿਹਾ ਤਾਂ ਰੌਲਾ ਪੈ ਗਿਆ। ਅਭੈ ਦਿਉਲ ਨਾਲ ਉਸ ਨੇ ਬੋਲਚਾਲ ਬੰਦ ਕਰ ਦਿੱਤੀ। ਜਰਨਲਿਸਟ ਸ਼ੋਭਾ ਡੇ ਨੂੰ ਤਾਂ ਸੋਨਮ ਨੇ 'ਪੋਰਨ ਰਾਈਟਰ' ਤੱਕ ਕਹਿ ਦਿੱਤਾ। ਕੈਟਰੀਨਾ ਨੂੰ 'ਬੇਸ਼ਰਮ' ਕਹਿਣ ਵਾਲੀ ਸੋਨਮ ਕਪੂਰ ਆਪਣੇ-ਆਪ ਨੂੰ ਸੋਹਣੀ ਕੁੜੀ ਮੰਨਦੀ ਹੈ ਤੇ ਬਾਕੀਆਂ ਨੂੰ ਉਹ ਬਦਸੂਰਤ ਕਹਿੰਦੀ ਹੈ। ਆਪਣੇ ਮੂੰਹੋਂ ਆਪਣੀ ਤਾਰੀਫ਼। ਰਣਬੀਰ ਕਪੂਰ ਨੂੰ ਉਹ ਮਾੜਕੂ ਕਹਿ ਚੁੱਕੀ ਹੈ। ਅਖੇ ਮੈਂ ਰੱਜੀ-ਪੁੱਜੀ, ਆਪੇ ਮੇਰੇ ਬੱਚੇ ਜਿਊਣ। ਇਕ ਮੈਂ ਹਾਂ, ਮੈਂ ਉਸ 'ਚ ਖੁਸ਼ ਹਾਂ ਤੇ ਹਾਂ 'ਵੀਰੇ ਦੀ ਵੈਡਿੰਗ' ਖੂਬ ਚਲ ਰਹੀ ਹੈ। ਇਸ ਲਈ ਖੂਬ ਬੇਬਾਕ, ਸਿੱਧੀ ਮੂੰਹ 'ਤੇ ਕਹਿਣ ਵਾਲੀ ਸੋਨਮ ਕਪੂਰ ਜੋ ਵੀ ਕਹੇ, ਇੰਡਸਟਰੀ ਸਵੀਕਾਰ ਕਰ ਰਹੀ ਹੈ।

ਮੁੜ ਸਰਗਰਮ ਹੋਏ

ਕੇ. ਸੀ. ਬੋਕਾਡੀਆ

ਇਕ ਜ਼ਮਾਨਾ ਸੀ ਜਦੋਂ ਫ਼ਿਲਮ ਨਿਰਮਾਣ ਦੇ ਖੇਤਰ ਵਿਚ ਕਸਤੂਰ ਚੰਦ ਬੋਕਾਡੀਆ ਉਰਫ਼ ਕੇ. ਸੀ. ਬੋਕਾਡੀਆ ਦੇ ਨਾਂਅ ਦੀ ਧੂਮ ਹੁੰਦੀ ਸੀ। ਉਨ੍ਹਾਂ ਨੇ ਆਪਣੇ ਬੈਨਰ ਬੀ. ਐਮ. ਬੀ. ਪ੍ਰੋਡਕਸ਼ਨਸ ਦਾ ਨਾਂਅ ਆਪਣੇ ਪਿਤਾ ਭੂਰਮਲ ਬੋਕਾਡੀਆ ਦੇ ਨਾਂਅ 'ਤੇ ਰੱਖਿਆ ਸੀ ਅਤੇ ਇਸ ਬੈਨਰ ਰਾਹੀਂ ਧੜੱਲੇ ਨਾਲ ਫ਼ਿਲਮ ਨਿਰਮਾਣ ਕੀਤਾ ਸੀ। 'ਪਿਆਰ ਝੁਕਤਾ ਨਹੀਂ', 'ਤੇਰੀ ਮੇਹਰਬਾਨੀਆਂ', 'ਨਸੀਬ ਅਪਨਾ ਅਪਨਾ', 'ਲਾਲ ਬਾਦਸ਼ਾਹ', 'ਆਜ ਕਾ ਅਰਜੁਨ', 'ਤਿਆਗੀ', 'ਪੁਲਿਸ ਔਰ ਮੁਜਰਿਮ', 'ਫੂਲ ਬਨੇ ਅੰਗਾਰੇ' ਸਮੇਤ ਕਈ ਹੋਰ ਫ਼ਿਲਮਾਂ ਇਨ੍ਹਾਂ ਨੇ ਬਣਾਈਆਂ ਸਨ ਅਤੇ ਉਦੋਂ ਇਨ੍ਹਾਂ ਨੂੰ ਫ਼ਿਲਮ ਫੈਕਟਰੀ ਦਾ ਨਾਂਅ ਦਿੱਤਾ ਗਿਆ ਸੀ। ਸੰਜੀਵ ਕੁਮਾਰ ਦੀ ਫ਼ਿਲਮ ਸਾਲਾਂ ਤੋਂ ਡੱਬਾ ਬੰਦ ਪਈ 'ਲਵ ਐਂਡ ਗਾਡ' ਨੂੰ ਇਨ੍ਹਾਂ ਦੀਆਂ ਕੋਸ਼ਿਸ਼ਾਂ ਸਦਕਾ ਵੱਡਾ ਪਰਦਾ ਨਸੀਬ ਹੋਇਆ ਸੀ।
ਉਦੋਂ ਜਨਾਬ ਬੋਕਾਡੀਆ ਨੇ ਫ਼ਿਲਮ ਫੈਕਟਰੀ ਨਾਂਅ ਨੂੰ ਕੁਝ ਜ਼ਿਆਦਾ ਹੀ ਗੰਭੀਰਤਾ ਨਾਲ ਲੈਣਾ ਸ਼ੁਰੂ ਕਰ ਦਿੱਤਾ ਸੀ ਅਤੇ ਉਹ ਇਕੱਠੀਆਂ ਤਿੰਨ-ਚਾਰ ਫ਼ਿਲਮਾਂ ਬਣਾਉਣ ਲੱਗੇ ਸਨ। ਕਵਾਂਟਿਟੀ ਦਾ ਕਵਾਲਿਟੀ 'ਤੇ ਅਸਰ ਪੈਣਾ ਸੁਭਾਵਿਕ ਹੀ ਸੀ। ਨਤੀਜਾ ਇਨ੍ਹਾਂ ਦੀਆਂ ਫ਼ਿਲਮਾਂ ਟਿਕਟ ਖਿੜਕੀ 'ਤੇ ਮੁੱਧੇ ਮੂੰਹ ਡਿੱਗਣ ਲੱਗੀਆਂ। ਉਨ੍ਹਾਂ ਨੇ ਕਾਫੀ ਸਮੇਂ ਤੱਕ ਫ਼ਿਲਮ ਨਿਰਮਾਣ ਤੋਂ ਦੂਰੀ ਬਣਾਈ ਰੱਖੀ ਪਰ ਹੁਣ ਉਹ ਫ਼ਿਲਮ ਨਿਰਮਾਣ ਵਿਚ ਦੁਬਾਰਾ ਸਰਗਰਮ ਹੋ ਗਏ ਹਨ।
ਹੁਣ ਇਨ੍ਹਾਂ ਨੇ ਸਚਿਨ ਤੇ ਸ਼ਿਲਪਾ ਤੁਲਸਕਰ ਨੂੰ ਲੈ ਕੇ ਮਰਾਠੀ ਫ਼ਿਲਮ 'ਸੋਹਲਾ' ਬਣਾਈ ਹੈ। ਕਿਉਂਕਿ ਇਨ੍ਹਾਂ ਦੀ ਮਰਾਠੀ ਭਾਸ਼ਾ 'ਤੇ ਚੰਗੀ ਪਕੜ ਨਹੀਂ ਹੈ, ਇਸ ਲਈ ਇਸ ਨੂੰ ਮਰਾਠੀ ਫ਼ਿਲਮ ਇੰਡਸਟਰੀ ਦੇ ਨਾਮੀ ਨਿਰਦੇਸ਼ਕ ਗਜੇਂਦਰ ਆਹਿਰੇ ਨੇ ਨਿਰਦੇਸ਼ਿਤ ਕੀਤਾ ਹੈ। ਫ਼ਿਲਮ ਵਿਚ ਇਹ ਦਿਖਾਇਆ ਗਿਆ ਹੈ ਕਿ ਜਦੋਂ ਕਿਸੇ ਦਾ ਦਿਲ ਦੁਖਾਉਣ 'ਤੇ ਉਸ ਤੋਂ ਮਾਫੀ ਮੰਗਣ ਵਿਚ ਦੇਰੀ ਕਰ ਦਿੱਤੀ ਜਾਂਦੀ ਹੈ ਤਾਂ ਕਿੰਨਾ ਕੁਝ ਸਹਿਣਾ ਪੈ ਜਾਂਦਾ ਹੈ। 'ਸੋਹਲਾ' ਨੂੰ ਉਹ ਬਾਅਦ ਵਿਚ ਤਾਮਿਲ ਵਿਚ ਵੀ ਬਣਾਉਣਗੇ।
ਉਹ ਤੇਲਗੂ ਭਾਸ਼ਾ ਵਿਚ 'ਰੌਕੀ' ਤੇ ਹਿੰਦੀ ਵਿਚ 'ਤੇਰੀ ਮਹਿਰਬਾਨੀਆਂ-2' ਵੀ ਬਣਾ ਰਹੇ ਹਨ। ਨਾਲ ਹੀ ਇਕ ਹੋਰ ਫ਼ਿਲਮ ਵੀ ਉਹ ਤੇਲਗੂ ਵਿਚ ਬਣਾ ਰਹੇ ਹਨ। ਬੋਕਾਡੀਆ ਜੀ ਖ਼ੁਦ ਰਾਜਸਥਾਨ ਦੇ ਮੇੜਤਾ ਤੋਂ ਹੈ ਪਰ ਉਹ ਕਈ ਸਾਲਾਂ ਤੋਂ ਚੇਨਈ ਵਿਚ ਵਸੇ ਹੋਏ ਹਨ। ਉਹ ਚੰਗੀ ਤਾਮਿਲ ਬੋਲ ਲੈਂਦੇ ਹਨ। ਇਸ ਲਈ ਤਾਮਿਲ ਵਿਚ ਫ਼ਿਲਮਾਂ ਬਣਾ ਰਹੇ ਹਨ।


-ਪੰਨੂੰ

ਬੁਢਾਪੇ ਦਾ ਦਰਦ ਦਸ ਨਹੀਂ ਚਾਲੀਸ

ਬੁਢਾਪੇ ਦੇ ਵਿਸ਼ੇ 'ਤੇ ਬਾਲੀਵੁੱਡ ਵਿਚ ਸਮੇਂ-ਸਮੇਂ 'ਤੇ ਫ਼ਿਲਮਾਂ ਬਣਦੀਆਂ ਆਈਆਂ ਹਨ। ਕਦੀ 'ਅਵਤਾਰ' ਤੇ ਕਦੀ 'ਸ਼ਰਾਰਤ' ਜਾਂ 'ਕਲੱਬ 60' ਦੇ ਰਾਹੀਂ ਜ਼ਿੰਦਗੀ ਦੇ ਆਖਰੀ ਸਾਲਾਂ ਨੂੰ ਕਹਾਣੀ ਵਿਚ ਪਿਰੋ ਕੇ ਪੇਸ਼ ਕੀਤਾ ਗਿਆ ਹੈ। ਹੁਣ ਨਿਰਮਾਤਾ-ਨਿਰੇਦਸ਼ਕ ਡਾ. ਜੇ. ਐਸ. ਰੰਧਾਵਾ ਨੇ 'ਦਸ ਨਹੀਂ ਚਾਲੀਸ' ਰਾਹੀਂ ਬੁਢਾਪੇ ਦੀ ਵੇਦਨਾ ਨੂੰ ਪੇਸ਼ ਕੀਤਾ ਹੈ। ਫਿਮਲਾਂ ਨੂੰ ਮਨੋਰੰਜਨ ਦਾ ਮਾਧਿਅਮ ਕਿਹਾ ਜਾਂਦਾ ਹੈ। ਸੋ ਇਥੇ ਕਹਾਣੀ ਵਿਚ ਕਾਮੇਡੀ ਦਾ ਤੜਕਾ ਵੀ ਲਗਾਇਆ ਗਿਆ ਹੈ ਤਾਂ ਕਿ ਫ਼ਿਲਮ ਬੋਝਲ ਨਾ ਬਣ ਸਕੇ।
ਪਹਿਲਾਂ ਸੰਜੇ ਮਿਸ਼ਰਾ, ਸ਼ਿਆਮ ਮਸ਼ਾਲਕਰ, ਸੋਨਮ ਮੁਦਗਿਲ ਆਦਿ ਨੂੰ ਲੈ ਕੇ 'ਮੁਸਕਰਾਹਟੇਂ' ਬਣਾਉਣ ਵਾਲੇ ਜਨਾਬ ਰੰਧਾਵਾ ਨੇ ਹੀ ਆਪਣੀ ਇਸ ਨਵੀਂ ਪੇਸ਼ਕਾਰੀ ਦੀ ਕਹਾਣੀ ਲਿਖੀ ਹੈ। ਇਥੇ ਦਿੱਲੀ ਵਿਚ ਰਹਿ ਰਹੇ ਕੁਝ ਬਜ਼ੁਰਗਾਂ ਦੀ ਗੱਲ ਕੀਤੀ ਗਈ ਹੈ। ਦਿੱਲੀ ਦੀ ਇਕ ਕਾਲੋਨੀ ਵਿਚ ਕੁਝ ਬਜ਼ੁਰਗ ਆਪਣੇ ਪਰਿਵਾਰ ਨਾਲ ਰਹਿ ਰਹੇ ਹੁੰਦੇ ਹਨ। ਉਨ੍ਹਾਂ ਦੀ ਔਲਾਦ ਆਪਣੀ ਜ਼ਿੰਦਗੀ ਵਿਚ ਰੁਝੀ ਹੁੰਦੀ ਹੈ। ਇਸ ਲਈ ਇਨ੍ਹਾਂ ਵਲ ਜ਼ਿਆਦਾ ਧਿਆਨ ਨਹੀਂ ਦਿੱਤਾ ਜਾਂਦਾ। ਇਸ ਤਰ੍ਹਾਂ ਉਹ ਸੁਸਾਇਟੀ ਦੀ ਸਾਫ-ਸਫਾਈ, ਪਾਰਕਿੰਗ, ਲੀਕੇਜ ਆਦਿ ਦੀ ਸਮੱਸਿਆ ਨੂੰ ਲੈ ਕੇ ਇਸ ਸੁਸਾਇਟੀ ਦੇ ਇਕ ਵਾਸੀ ਸੁਮੀਤ (ਡਾ. ਜੇ. ਐਸ. ਰੰਧਾਵਾ) ਕੋਲ ਸ਼ਿਕਾਇਤਾਂ ਕਰਦੇ ਰਹਿੰਦੇ ਹਨ। ਸੁਮੀਤ ਵੀ ਇਨ੍ਹਾਂ ਦੀਆਂ ਸ਼ਿਕਾਇਤਾਂ ਤੋਂ ਤੰਗ ਆਇਆ ਹੁੰਦਾ ਹੈ। ਇਕ ਦਿਨ ਸੁਸਾਇਟੀ ਦੇ ਮੈਂਬਰਾਂ ਵਲੋਂ ਅਲਤਾਫ ਰਾਜਾ ਦੀ ਕੱਵਾਲੀ ਦਾ ਪ੍ਰੋਗਰਾਮ ਆਯੋਜਿਤ ਕੀਤਾ ਜਾਂਦਾ ਹੈ ਅਤੇ ਸੁਮੀਤ ਨੂੰ ਇਹ ਜ਼ਿੰਮੇਵਾਰੀ ਸੌਂਪੀ ਜਾਂਦੀ ਹੈ ਕਿ ਉਹ ਸੁਸਾਇਟੀ ਦੇ ਬਜ਼ੁਰਗਾਂ ਨੂੰ ਸੱਦਾ ਦੇਣ। ਕੱਵਾਲੀ ਦੇ ਇਸ ਪ੍ਰੋਗਰਾਮ ਵਿਚ ਕੁਝ ਬੁੱਢੇ ਨੱਚ ਕੇ ਆਪਣੀ ਖੁਸ਼ੀ ਜ਼ਾਹਿਰ ਕਰਦੇ ਹਨ ਅਤੇ ਉਨ੍ਹਾਂ ਦਾ ਇਹ ਨਵਾਂ ਰੂਪ ਦੇਖ ਕੇ ਸੁਮੀਤ ਹੈਰਾਨ ਰਹਿ ਜਾਂਦਾ ਹੈ। ਉਹ ਉਨ੍ਹਾਂ ਨਾਲ ਮੇਲ-ਜੋਲ ਵਧਾਉਂਦਾ ਹੈ ਅਤੇ ਇਨ੍ਹਾਂ ਦੇ ਡੂੰਘੀ ਪਛਾਣ ਵਿਚ ਆ ਕੇ ਸੁਮੀਤ ਨੂੰ ਪਤਾ ਲਗਦਾ ਹੈ ਕਿ ਇਨ੍ਹਾਂ ਦੀ ਜ਼ਿੰਦਗੀ ਵਿਚ ਕਿੰਨਾ ਇਕੱਲਾਪਨ ਹੈ। ਉਹ ਕਿਵੇਂ ਇਨ੍ਹਾਂ ਦੀ ਢਲਦੀ ਉਮਰ ਵਾਲੀ ਜ਼ਿੰਦਗੀ ਵਿਚ ਖੁਸ਼ੀਆਂ ਦੇ ਨਵੇਂ ਰੰਗ ਭਰਦਾ ਹੈ, ਇਹ ਅੱਗੇ ਦੀ ਕਹਾਣੀ ਹੈ। ਕਹਾਣੀ ਦੇ ਹਿਸਾਬ ਨਾਲ ਫ਼ਿਲਮ ਵਿਚ ਜੋ ਕਲਾਕਾਰ ਲਏ ਗਏ ਹਨ, ਉਹ ਸਾਰੇ ਉਮਰਦਰਾਜ ਹਨ ਅਤੇ ਇਹ ਹਨ ਬੀਰਬਲ, ਮਨਮੌਜੀ, ਰਮੇਸ਼ ਗੋਇਲ, ਮਹੇਸ਼ ਗਹਿਲੋਤ, ਰਾਧਾ ਰਾਨੀ, ਮਨੋਜ ਬਖਸ਼ੀ ਆਦਿ।


-ਮੁੰਬਈ ਪ੍ਰਤੀਨਿਧ

'ਮਾਇਆਵੀ ਮਲਿੰਗ' ਨਾਲ ਚਮਕੀ ਗ੍ਰੇਸੀ ਗੋਸਵਾਮੀ

ਇਨ੍ਹੀਂ ਦਿਨੀਂ 'ਸਟਾਰ ਭਾਰਤ' 'ਤੇ ਇਕ ਅਲੱਗ ਹੀ ਤਰ੍ਹਾਂ ਦੇ ਚਲ ਰਹੇ ਸ਼ੋਅ 'ਮਾਇਆਵੀ ਮਲਿੰਗ' ਰਾਹੀਂ ਦਰਸ਼ਕਾਂ ਦੇ ਦਿਲਾਂ 'ਤੇ ਰਾਜ਼ ਕਰਨ ਵਾਲੀ ਬਾਲ ਅਦਾਕਾਰਾ 'ਗ੍ਰੇਸੀ ਗੋਸਵਾਮੀ' ਦਾ ਜਨਮ 22 ਮਈ 2003 ਨੂੰ ਪਿਤਾ ਬਿਟਿਨ ਗੋਸਵਾਮੀ ਮਾਤਾ ਵੈਸ਼ਾਲੀ ਗੋਸਵਾਮੀ ਦੇ ਘਰ ਬੜੋਦਰਾ (ਗੁਜਰਾਤ) ਵਿਖੇ ਹੋਇਆ। ਗ੍ਰੇਸੀ ਗੋਸਵਾਮੀ ਨੂੰ ਬਚਪਨ ਤੋਂ ਹੀ ਅਦਾਕਾਰੀ ਦਾ ਸ਼ੌਂਕ ਹੈ। ਉਸ ਨੇ ਲਗਪਗ 10-15 ਵਿਗਿਆਪਨਾਂ 'ਚ ਵੀ ਕੰਮ ਕੀਤਾ ਪਰ ਅਦਾਕਾਰੀ ਦੀ ਦੁਨੀਆ 'ਚ ਉਸ ਨੇ ਆਪਣਾ ਕੈਰੀਅਰ 'ਕਲਰ ਟੀ.ਵੀ.' 'ਤੇ ਪੇਸ਼ ਹੁੰਦੇ ਲੜੀਵਾਰ 'ਬਾਲਿਕਾ ਬਧੂ' ਤੋਂ ਸ਼ੁਰੂ ਕੀਤਾ। ਇਸ ਤੋਂ ਬਾਅਦ ਉਸ ਨੇ 'ਝਲਕ ਦਿਖਲਾ ਜਾ', 'ਕ੍ਰਾਈਮ ਪੈਟ੍ਰੋਲ' ਤੇ 'ਬਾਲ ਕ੍ਰਿਸ਼ਨਾ' ਵਰਗੇ ਲੜੀਵਾਰਾਂ 'ਚ ਕੰਮ ਕਰਕੇ ਆਪਣੀ ਪ੍ਰਤਿਭਾ ਦਾ ਲੋਹਾ ਮੰਨਵਾਇਆ। ਇਸ ਤੋਂ ਬਿਨਾਂ ਉਹ ਅਭਿਨੇਤਰੀ 'ਵਿੱਦਿਆ ਬਾਲਨ' ਦੀ ਫ਼ਿਲਮ 'ਬੇਗ਼ਮ ਜਾਨ' 'ਚ ਵੀ ਇਕ ਚਰਿੱਤਰ ਭੂਮਿਕਾ 'ਚ ਨਜ਼ਰ ਆਈ। ਜਿਵੇਂ ਹੀ ਉਸ ਦੀ ਚੋਣ ਲੜੀਵਾਰ 'ਮਾਇਆਵੀ ਮਲਿੰਗ' 'ਚ ਹੋਈ ਤਾਂ ਉਸ ਨੂੰ ਇਸ ਲੜੀਵਾਰ ਲਈ ਦਿਨ-ਰਾਤ ਇਕ ਕਰਨਾ ਪਿਆ ਕਿਉਂ ਕਿ ਇਸ ਲੜੀਵਾਰ 'ਚ ਉਸ 'ਤੇ ਕਈ ਸਟੰਟ ਦ੍ਰਿਸ਼ ਫਿਲਮਾਏ ਗਏ ਹਨ, ਜਿਸ ਕਾਰਨ ਉਸ ਨੇ ਮਾਰਸ਼ਲ ਆਰਟ, ਕਰਾਟੇ, ਤੈਰਾਕੀ, ਘੋੜ ਸਵਾਰੀ ਤੇ ਤਲਵਾਰਬਾਜ਼ੀ ਦੀ ਸਿੱਖਿਆ ਲਈ। ਇਸ ਲੜੀਵਾਰ 'ਚ ਸੰਸਕ੍ਰਿਤ ਭਾਸ਼ਾ 'ਚ ਸੰਵਾਦ ਬੋਲਣ ਲਈ ਉਸ ਨੇ ਸੰਸਕ੍ਰਿਤ ਭਾਸ਼ਾ ਦੀ ਵੀ ਸਿੱਖਿਆ ਲਈ ਕਿਉਂਕਿ 'ਮਾਇਆਵੀ ਮਲਿੰਗ' ਲੜੀਵਾਰ 'ਚ ਜੋ ਸੰਵਾਦ ਰੱਖੇ ਗਏ ਹਨ ਉਹ ਸ਼ੁੱਧ 'ਸੰਸਕ੍ਰਿਤ ਤੇ ਹਿੰਦੀ ਭਾਸ਼ਾ ਦਾ ਸੁਮੇਲ' ਹਨ।


-ਸਿਮਰਨ ਜਗਰਾਓਂ

ਹਾਕੀ ਦੇ ਪਹਿਲੇ ਗੋਲਡ ਤਗਮੇ 'ਤੇ ਬਣੀ 'ਗੋਲਡ'

ਸਾਲ 1947 ਵਿਚ ਆਜ਼ਾਦੀ ਹਾਸਲ ਕਰਨ ਤੋਂ ਬਾਅਦ ਆਜ਼ਾਦ 1948 ਵਿਚ ਹੋਈਆਂ ਉਲੰਪਿਕ ਖੇਡਾਂ ਵਿਚ ਭਾਰਤ ਨੇ ਹਾਕੀ ਵਿਚ ਸੋਨ ਤਗਮਾ ਜਿੱਤਿਆ ਸੀ। ਇਹ ਆਜ਼ਾਦ ਭਾਰਤ ਦਾ ਪਹਿਲਾ ਉਲੰਪਿਕ ਸੋਨ ਤਗਮਾ ਸੀ ਅਤੇ ਇਸ ਤਗਮੇ ਦੀ ਜਿੱਤ ਨੇ ਪੂਰੇ ਦੇਸ਼ ਨੂੰ ਇਕ ਸੂਤਰ ਵਿਚ ਬੰਨ੍ਹ ਦਿੱਤਾ ਸੀ। ਉਦੋਂ ਗ਼ੁਲਾਮੀ ਦੀਆਂ ਜ਼ੰਜੀਰਾਂ ਤੋਂ ਮੁਕਤ ਹੋਏ ਦੇਸ਼ਵਾਸੀਆਂ ਲਈ ਇਸ ਤਗਮੇ ਦੀ ਮਹਤੱਤਾ ਕਿੰਨੀ ਰਹੀ ਹੋਵੇਗੀ, ਇਸ ਦੀ ਕਲਪਨਾ ਕੀਤੀ ਜਾ ਸਕਦੀ ਹੈ।
ਇਸ ਇਤਿਹਾਸਕ ਜਿੱਤ 'ਤੇ ਹੁਣ ਨਿਰਦੇਸ਼ਿਕਾ ਰੀਮਾ ਕਾਗਤੀ ਨੇ 'ਗੋਲਡ' ਨਾਂਅ ਦੀ ਫ਼ਿਲਮ ਬਣਾਈ ਹੈ। ਪਹਿਲਾਂ 'ਹਨੀਮੂਨ ਟ੍ਰੈਵਲਸ ਪ੍ਰਾ. ਲਿਮ.' ਤੇ 'ਤਲਾਸ਼' ਨਿਰੇਦਸ਼ਿਤ ਕਰਨ ਵਾਲੀ ਰੀਮਾ ਨੇ 'ਗੋਲਡ' ਰਾਹੀਂ ਇਕ ਵੱਖਰੇ ਹੀ ਵਿਸ਼ੇ 'ਤੇ ਹੱਥ ਅਜ਼ਮਾਇਆ ਹੈ। ਇਸ ਦਾ ਨਿਰਮਾਣ ਅਕਸ਼ੈ ਕੁਮਾਰ, ਫਰਹਾਨ ਅਖ਼ਤਰ ਤੇ ਰਿਤੇਸ਼ ਸਿਘਵਾਨੀ ਵਲੋਂ ਕੀਤਾ ਗਿਆ ਹੈ ਅਤੇ ਅਕਸ਼ੈ ਇਸ ਵਿਚ ਉਸ ਸ਼ਖ਼ਸ ਦੀ ਭੂਮਿਕਾ ਨਿਭਾਅ ਰਹੇ ਹਨ ਜਿਸ ਨੇ ਤਿਰੰਗਾ ਲਹਿਰਾ ਕੇ ਖਿਡਾਰੀਆਂ ਵਿਚ ਨਵਾਂ ਜੋਸ਼ ਭਰ ਦਿੱਤਾ ਸੀ।
ਕਿਉਂਕਿ ਉਦੋਂ ਹਾਕੀ ਸਟਿਕ ਤੋਂ ਲੈ ਕੇ ਖੇਡ ਦੇ ਨਿਯਮ ਵੀ ਵੱਖਰੇ ਤਰ੍ਹਾਂ ਦੇ ਸਨ। ਸੋ, ਉਸ ਜ਼ਮਾਨੇ ਦੀ ਜਾਣਕਾਰੀ ਲਈ ਰੀਮਾ ਵਲੋਂ ਪਹਿਲਾਂ ਹਾਕੀ ਖਿਡਾਰੀ ਮਾਈਕੇਲ ਨੋਬਸ ਦੀ ਸੇਵਾ ਲਈ ਗਈ ਸੀ ਜਿਨ੍ਹਾਂ ਨੇ ਸਾਲ 2011-13 ਦੌਰਾਨ ਭਾਰਤੀ ਹਾਕੀ ਟੀਮ ਨੂੰ ਸਿਖਲਾਈ ਦਿੱਤੀ ਸੀ।
ਅਕਸ਼ੈ ਕੁਮਾਰ ਦੇ ਨਾਲ ਇਸ ਵਿਚ ਮੌਨੀ ਰਾਏ, ਕੁਨਾਲ ਕਪੂਰ, ਸੰਨੀ ਕੌਸ਼ਲ, ਵਿਨੀਤ ਕੁਮਾਰ ਸਿੰਘ ਤੇ ਅਮਿਤ ਅਭਿਨੈ ਕਰ ਰਹੇ ਹਨ। ਫ਼ਿਲਮ ਵਿਚ ਪੇਸ਼ ਕੀਤੇ ਗਏ ਦੇਸ਼ ਭਗਤੀ ਦੇ ਜਜ਼ਬੇ ਨੂੰ ਧਿਆਨ ਵਿਚ ਰੱਖਦੇ ਹੋਏ ਇਹ 15 ਅਗਸਤ ਨੂੰ ਪ੍ਰਦਰਸ਼ਿਤ ਕੀਤੀ ਜਾ ਰਹੀ ਹੈ।


-ਮੁੰਬਈ ਪ੍ਰਤੀਨਿਧ

ਮਲਿਆਲਮ ਫ਼ਿਲਮ 'ਚ ਸਿੱਖ ਕਿਰਦਾਰ ਨਿਭਾਏਗਾ ਸਿਮਰਜੀਤ ਸਿੰਘ ਨਾਗਰਾ

ਸਿਮਰਜੀਤ ਸਿੰਘ ਨਾਗਰਾ ਮੁਹਾਲੀ ਦਾ ਜੰਮਿਆ-ਪਲਿਆ ਅਜਿਹਾ ਦਸਤਾਰਧਾਰੀ ਸਿੱਖ ਅਦਾਕਾਰ ਹੈ ਜੋ ਮਲਿਆਲਮ ਭਾਸ਼ਾ ਦੀ ਐਕਸ਼ਨ ਡਰਾਮਾ ਫ਼ਿਲਮ 'ਕਾਮਾਰਾ ਸੰਭਾਵਮ' ਵਿਚ ਮਲਿਆਲੀ ਭਾਸ਼ਾ ਦੇ ਪ੍ਰਸਿੱਧ ਕਲਾਕਾਰ ਦਿਲੀਪ ਅਤੇ ਤਾਮਿਲ ਕਲਾਕਾਰ ਅਤੇ 'ਰੰਗ ਦੇ ਬਸੰਤੀ' ਫ਼ਿਲਮ 'ਚ ਆਪਣੀ ਕਲਾਕਾਰੀ ਦੇ ਜਲਵੇ ਕਾਰਨ ਪ੍ਰਸਿੱਧੀ ਹਾਸਲ ਕਰਨ ਵਾਲੇ ਸਿਧਾਰਥ ਨਾਲ ਬਰਾਬਰ ਦੀ ਅਹਿਮੀਅਤ ਵਾਲਾ ਕਿਰਦਾਰ ਨਿਭਾਅ ਰਿਹਾ ਹੈ। ਫ਼ਿਲਮ ਮੁਰਲੀ ਗੋਪੀ ਵਲੋਂ ਲਿਖੀ ਗਈ ਹੈ ਅਤੇ ਰਤੀਸ਼ ਅੰਬਤ ਵਲੋਂ ਨਿਰਦੇਸ਼ਤ ਕੀਤੀ ਗਈ ਹੈ। ਸਿਮਰਜੀਤ ਨੇ ਇਸ ਫ਼ਿਲਮ ਵਿਚ ਕੰਮ ਕਰਨ ਬਾਰੇ ਗੱਲ ਕਰਦਿਆਂ ਦੱਸਿਆ ਕਿ ਇਹ ਫ਼ਿਲਮ ਕਰਕੇ ਬਿਲਕੁਲ ਅਨੋਖੀ ਤਰ੍ਹਾਂ ਦਾ ਤਜਰਬਾ ਹੋ ਰਿਹਾ ਹੈ। ਮਲਿਆਲੀ ਸਿਨੇਮਾ ਬੇਹੱਦ ਸੋਚ-ਵਿਚਾਰ ਕੇ ਫ਼ਿਲਮਾਂ ਬਣਾਉਂਦਾ ਹੈ। ਇਸ ਫ਼ਿਲਮ ਵਿਚ ਉਨ੍ਹਾਂ ਨੂੰ ਇਕ ਸਿੱਖ ਕਿਰਦਾਰ ਨਿਭਾਉਣ ਵਾਲੇ ਕਲਾਕਾਰ ਦੀ ਲੋੜ ਸੀ ਤੇ ਨਿਰਦੇਸ਼ਕ ਇਹ ਰੋਲ ਕਿਸੇ ਅਸਲ ਸਿੱਖ ਕੋਲੋਂ ਹੀ ਕਰਾਉਣਾ ਚਾਹੁੰਦੇ ਸੀ। ਕਿਉਂਕਿ ਲੇਖਕ ਮੁਰਲੀ ਗੋਪੀ ਸਿੱਖਾਂ ਪ੍ਰਤੀ ਬੜਾ ਆਦਰ ਭਾਵ ਰੱਖਦੇ ਹਨ। ਮੈਨੂੰ ਉਨ੍ਹਾਂ ਵਲੋਂ ਬੜਾ ਮਾਣ ਅਤੇ ਸਤਿਕਾਰ ਦਿੱਤਾ ਗਿਆ ਹੈ। ਮੈਂ ਸਮਝਦਾ ਹਾਂ ਕਿ ਮੇਰੀ ਦਸਤਾਰ ਦੇ ਸਤਿਕਾਰ ਕਰਕੇ ਹੀ ਮੈਨੂੰ ਇਹ ਰੋਲ ਦਿੱਤਾ ਗਿਆ ਹੈ। ਦੱਖਣ ਭਾਰਤ ਦੇ ਵੱਡੇ ਕਲਾਕਾਰਾਂ ਨਾਲ ਕੰਮ ਕਰਨਾ ਕਿਵੇਂ ਲੱਗਾ ਦੇ ਜਵਾਬ 'ਚ ਉਹ ਕਹਿੰਦੇ ਹਨ ਦਿਲੀਪ ਚੋਟੀ ਦੇ ਮਲਿਆਲਮ ਸਟਾਰ ਹਨ ਤੇ ਪਿਛਲੇ 25 ਸਾਲ ਤੋਂ ਵਧ ਸਮੇਂ ਤੋਂ ਉਹ ਫ਼ਿਲਮਾਂ ਨਾਲ ਜੁੜੇ ਹੋਏ ਹਨ। ਇਸੇ ਤਰ੍ਹਾਂ ਸਿਧਾਰਥ ਤਾਮਿਲ ਫ਼ਿਲਮਾਂ ਦੇ ਸਟਾਰ ਹਨ ਤੇ 15 ਸਾਲ ਤੋਂ ਫ਼ਿਲਮਾਂ ਨਾਲ ਜੁੜੇ ਹੋਏ ਹਨ। ਉਨ੍ਹਾਂ ਨੇ ਬਾਲੀਵੁੱਡ ਦੀਆਂ ਵੀ ਕਈ ਚੰਗੀਆਂ ਫ਼ਿਲਮਾਂ ਕੀਤੀਆਂ ਹਨ। ਅਸੀਂ ਕੇਰਲ ਅਤੇ ਤਾਮਿਲਨਾਡੂ ਦੀਆਂ 13 ਥਾਵਾਂ 'ਤੇ ਲਗਪਗ 50 ਦਿਨ ਤੋਂ ਸਮਾਂ ਚੱਲੀ ਸ਼ੂਟਿੰਗ ਦੌਰਾਨ ਇਕੱਠੇ ਰਹੇ। ਸੱਚਮੁੱਚ ਉਹ ਬੜੇ ਨਿਮਰ ਸੁਭਾਅ ਵਾਲੇ, ਮਿਲਣਸਾਰ ਤੇ ਤਜਰਬੇਕਾਰ ਹਨ। ਸੋ, ਮੈਨੂੰ ਉਨ੍ਹਾਂ ਕੋਲੋਂ ਸਿੱਖਣ ਲਈ ਬਹੁਤ ਕੁਝ ਮਿਲਿਆ। ਫ਼ਿਲਮ 'ਚ ਕੰਮ ਕਰਨ ਤੋਂ ਪਹਿਲਾਂ ਕੀ-ਕੀ ਤਿਆਰੀ ਕਰਨੀ ਪਈ ਦੇ ਜਵਾਬ ਵਿਚ ਉਨ੍ਹਾਂ ਦੱਸਿਆ ਕਿ ਫ਼ਿਲਮ 'ਚ ਮੇਰੇ ਕਿਰਦਾਰ ਦਾ ਨਾਂਅ ਸਤਨਾਮ ਸਿੰਘ ਹੈ। ਨਿਰਦੇਸ਼ਕ ਨੂੰ ਕਿਸੇ ਤਰ੍ਹਾਂ ਪਤਾ ਲੱਗਾ ਸੀ ਕੀ ਫ਼ਿਲਮ ਦਾ ਕਿਰਦਾਰ ਸਤਨਾਮ ਸਿੰਘ ਨਾਲ ਰਲਦਾ-ਮਿਲਦਾ ਕਿਰਦਾਰ ਮੇਰੇ ਅਸਲ ਕਿਰਦਾਰ ਦੇ ਬਹੁਤ ਨੇੜੇ ਹੈ। ਸੋ, ਮੈਨੂੰ ਕੋਈ ਖਾਸ ਤਿਆਰੀ ਨਹੀਂ ਕਰਨੀ ਪਈ। ਉਂਜ ਇਹ ਐਕਸ਼ਨ ਫ਼ਿਲਮ ਹੋਣ ਕਰਕੇ ਮੈਂ ਘੋੜ ਸਵਾਰੀ ਸਿੱਖੀ ਤੇ ਐਕਸ਼ਨ ਦ੍ਰਿਸ਼ਾਂ ਲਈ ਅਭਿਆਸ ਜ਼ਰੂਰ ਕੀਤਾ।
ਫ਼ਿਲਮ ਵਿਚਲੇ ਆਪਣੇ ਚਰਿਤਰ ਬਾਰੇ ਉਨ੍ਹਾਂ ਦੱਸਿਆ ਕਿ ਇਹ ਦੂਜੀ ਸੰਸਾਰ ਜੰਗ ਵੇਲੇ ਦੀ ਕਹਾਣੀ 'ਤੇ ਆਧਾਰਿਤ ਹੈ ਤੇ ਜ਼ਿੰਦਗੀ ਦੇ ਤਿੰਨ ਵੱਖ-ਵੱਖ ਪੜਾਵਾਂ 'ਚ ਕਿਸ-ਕਿਸ ਤਰ੍ਹਾਂ ਦੇ ਉਤਾਰ-ਚੜ੍ਹਾਅ ਆਉਂਦੇ ਹਨ 'ਤੇ ਆਧਾਰਿਤ ਕਹਾਣੀ ਹੈ। ਪਹਿਲੇ ਅੱਧ ਤੱਕ ਮੇਰਾ 1940 ਦੇ ਦਹਾਕੇ ਦੇ ਪੀਰੀਅਡ ਡਰਾਮਾ ਵਾਲਾ ਕਿਰਦਾਰ ਹੈ ਤੇ ਦੂਜੇ ਅੱਧ 'ਚ ਆਧੁਨਿਕ ਦਿਖ ਵਾਲਾ ਰੋਲ ਹੈ। ਮੇਰਾ ਕਿਰਦਾਰ ਕਾਫ਼ੀ ਪ੍ਰਭਾਵਸ਼ਾਲੀ ਹੈ।

-ਅ.ਬ.

ਬਾਲੀਵੁੱਡ 'ਚ ਹੁਣ ਗੂੰਜੇਗੀ ਆਵਾਜ਼: ਸੁਰਜੀਤ ਭੁੱਲਰ

ਸੁਰ ਦੇ ਸਹਾਰੇ ਕੀਤੀ ਮਿਹਨਤ, ਰੱਬ ਤੇ ਤਕਦੀਰ ਦਾ ਸਾਥ, ਸੱਚੇ ਦਿਲੋਂ ਲਗਨ ਨਾਲ ਗਾਇਕੀ ਦੇ ਕਿੱਤੇ ਨੂੰ ਨਿਭਾਉਣ ਵਾਲੇ ਗਾਇਕ ਸੁਰਜੀਤ ਭੁੱਲਰ ਨੂੰ ਉਸ ਦੀ ਮਿੱਠੀ ਆਵਾਜ਼ ਨੇ ਸਰੋਤਿਆਂ ਦਾ ਦੇਸ਼-ਵਿਦੇਸ਼ 'ਚ ਭਰਵਾਂ ਪਿਆਰ ਦੁਆਇਆ ਹੈ ਤਾਂ ਭਲਾ ਪਾਲੀਵੁੱਡ ਕਿਉਂ ਨਾ ਉਸ ਦੀ ਸੁਰ ਨੂੰ ਵਰਤਦੀ ਤੇ ਭੂਸ਼ਨ ਮਦਾਨ ਦੀ ਫ਼ਿਲਮ 'ਮਜਾਜਣ' ਦੇ ਦੋ ਗੀਤ ਸੁਦੇਸ਼ ਕੁਮਾਰੀ ਨਾਲ ਗਾਏ ਤੇ ਇਹ ਗੀਤ ਮੋਬਾਈਲਾਂ 'ਤੇ ਐਨੇ ਵੱਜੇ ਕਿ ਅੱਜ ਤੱਕ ਰਿਕਾਰਡ ਕਾਇਮ ਹੈ। ਫ਼ਿਲਮ 'ਵਿਦਰੋਹ' ਦੇ ਪੋਸਟਰਾਂ 'ਤੇ ਬਾਕਾਇਦਾ ਗੁੱਗੂ ਗਿੱਲ ਨਾਲ ਉਸ ਦੀ ਤਸਵੀਰ ਲੱਗੀ ਸੀ ਤੇ ਹੁਣ ਪੰਜਾਬੀ ਫ਼ਿਲਮ 'ਢੋਲ ਰੱਤੀ' ਦੇ ਗੀਤ ਗਾਉਣ ਦੇ ਮੌਕੇ ਨੇ ਪਾਲੀਵੁੱਡ 'ਚ ਸੁਰਜੀਤ ਭੁੱਲਰ ਦੀ ਆਵਾਜ਼ ਨੂੰ ਹੋਰ ਸੁਰਜੀਤ ਕਰ ਦਿੱਤਾ ਹੈ। ਸੰਨ 1970 ਦੇ ਦਹਾਕੇ ਦੀ ਕਹਾਣੀ 'ਤੇ ਆਧਾਰਤ 'ਢੋਲ ਰੱਤੀ' ਦਾ ਸੰਗੀਤ ਰਵੀ ਪਵਾਰ ਤੇ ਤਨੁਜ ਜੇਤਲੀ ਦਾ ਹੈ। ਮੀਨਾ ਸਿੰਘ, ਨਛੱਤਰ ਗਿੱਲ, ਸੁਦੇਸ਼ ਕੁਮਾਰੀ, ਰਾਣੀ ਰਣਦੀਪ ਨਾਲ ਉਸ ਦਾ ਗਾਉਣਾ ਉਸ ਦਾ ਪਾਲੀਵੁੱਡ 'ਚ ਚਮਕ ਰਿਹਾ ਪਿੱਠਵਰਤੀ ਗਾਇਕੀ ਦਾ ਕੈਰੀਅਰ ਹੈ। ਸ਼ਿਵਮ ਸ਼ਰਮਾ ਨਿਰਦੇਸ਼ਤ ਮਾਣਿਕ ਵਰਮਾ ਦੀ ਇਸ ਫ਼ਿਲਮ 'ਚ ਅਰਸ਼ ਚਾਵਲਾ, ਲੱਖਾ ਲਖਵਿੰਦਰ, ਹਰਬੀ ਸੰਘਾ, ਮਲਕੀਤ ਰੌਣੀ, ਗੁਰਪ੍ਰੀਤ ਭੰਗੂ, ਰੁਪਿੰਦਰ ਰੂਪੀ ਦੇ ਨਾਲ ਸੁਰਜੀਤ ਭੁੱਲਰ ਦਾ ਵੀ ਪਰਦੇ 'ਤੇ ਕੰਮ ਹੈ। 'ਢੋਲ ਰੱਤੀ' ਦੇ ਗੀਤਾਂ ਤੋਂ ਪ੍ਰਭਾਵਿਤ ਹੋ ਕੇ ਬਾਲੀਵੁੱਡ ਦੇ ਦਿੱਗਜ਼ ਲਾਇਨ ਨਿਰਮਾਤਾ ਦਰਸ਼ਨ ਔਲਖ ਨੇ ਉਸ ਦੀ ਆਵਾਜ਼ ਬਾਲੀਵੁੱਡ ਪਹੁੰਚਾਉਣ ਦਾ ਵਾਅਦਾ ਕੀਤਾ ਹੈ ਤੇ ਜਲਦੀ ਹੀ ਵੱਡੇ ਬੈਨਰਜ਼ 'ਚ ਉਸਦੀ ਫ਼ਿਲਮੀ ਗਾਇਕੀ ਸੁਣਾਈ ਦੇਵੇਗੀ, ਜਦ ਕਿ ਸੀ.ਡੀ. ਗਾਇਕੀ, ਦੋਗਾਣਾ ਤੇ ਸਿੰਗਲ ਟਰੈਕ 'ਚ ਨਿੱਤ ਮਿਲਦੀਆਂ ਸਫ਼ਲਤਾਵਾਂ ਕਿਸੇ ਤੋਂ ਲੁਕੀਆਂ ਨਹੀਂ ਹਨ।


-ਅੰਮ੍ਰਿਤ ਪਵਾਰ

ਪੂਜਾ ਹੈਗੜ

ਕਦਮ ਸਫ਼ਲਤਾ ਵੱਲ

ਰਾਧਾ ਕ੍ਰਿਸ਼ਨ ਕੁਮਾਰ ਦੀ ਨਵੀਂ ਫ਼ਿਲਮ ਦਾ ਐਲਾਨ ਹੋ ਗਿਆ ਹੈ। ਇਹ ਹਿੰਦੀ ਤੇ ਤੇਲਗੂ 'ਚ ਬਣੇਗੀ ਤੇ ਇਸ 'ਚ 'ਬਾਹੂਬਲੀ' ਪ੍ਰਭਾਸ ਨੂੰ 'ਸਾਹੋ' ਤੋਂ ਬਾਅਦ ਲਿਆ ਗਿਆ ਹੈ। ਪ੍ਰਭਾਸ ਦੇ ਨਾਲ ਹੀਰੋਇਨ ਪੂਜਾ ਹੈਗੜੇ ਨੂੰ ਲਿਆ ਗਿਆ ਹੈ। ਪ੍ਰਭਾਸ ਤੇ ਪੂਜਾ ਦੀ ਇਹ ਇਕੱਠਿਆਂ ਪਹਿਲੀ ਫ਼ਿਲਮ ਹੋਵੇਗੀ। ਰਿਤਿਕ ਰੌਸ਼ਨ ਦੀ ਹੀਰੋਇਨ ਰਹਿ ਚੁੱਕੀ ਪੂਜਾ ਹੈਗੜੇ ਲਈ ਹੁਣ ਮੌਕਾ ਕੁਝ ਕਰ ਦਿਖਾਉਣ ਦਾ ਹੈ। ਪੂਜਾ ਚਾਹੁੰਦੀ ਹੈ ਕਿ ਰਿਤਿਕ ਤੋਂ ਬਾਅਦ ਉਹ 'ਏ ਗਰੇਡ' ਦੇ ਹੀਰੋਆਂ ਨਾਲ ਹੀ ਕੰਮ ਕਰੇ। ਪੂਜਾ ਦਾ ਸੁਪਨਾ ਪੂਰੀ ਦੁਨੀਆ ਦੇਖਣਾ ਹੈ। ਤੁਰਕੀ ਵਿਚ ਪੂਜਾ ਨੇ ਆਪਣਾ ਫੋਟੋ ਸੈਸ਼ਨ ਵੀ ਕਰਵਾਇਆ। ਜਦ ਉਹ ਰਿਤਿਕ ਨਾਲ ਫ਼ਿਲਮ ਕਰ ਰਹੀ ਸੀ ਤਦ ਦੋ ਸਾਲ ਤੱਕ ਉਹ ਵਿਦੇਸ਼ ਨਹੀਂ ਘੁੰਮ ਸਕੀ ਸੀ। ਇਸ ਲਈ ਤੁਰਕੀ ਵਿਖੇ ਉਸ ਨੇ ਖੂਬ ਮਸਤੀ ਕੀਤੀ ਤੇ ਅਨੰਦ ਮਾਣਿਆ। ਪੂਜਾ ਇਸ ਸਮੇਂ ਇਕ ਤੇਲਗੂ ਫ਼ਿਲਮ ਵੀ ਕਰ ਰਹੀ ਹੈ। 'ਸਾਹੋ' ਦੀ ਰਿਲੀਜ਼ ਤੋਂ ਬਾਅਦ ਪ੍ਰਭਾਸ ਨੇ ਪੂਜਾ ਹੈਗੜੇ ਨੂੰ ਮਿਲਣਾ ਹੈ ਤੇ ਦੋਵੇਂ ਆਪਣੀ ਰੁਮਾਂਟਿਕ ਜੋੜੀ ਹਿੱਟ ਬਣਾਉਣ ਦੀ ਚਰਚਾ ਕਰਨਗੇ। 'ਹਾਊਸਫੁਲ-4' ਪੂਜਾ ਹੈਗੜੇ ਤਕਰੀਬਨ ਆ ਹੀ ਗਈ ਹੈ। ਅਕਸ਼ੈ ਕੁਮਾਰ, ਰਿਤੇਸ਼, ਬੌਬੀ ਦਿਉਲ ਦੇ ਨਾਲ ਕੀਰਤੀ ਖਰਬੰਦਾ ਤੇ ਪੂਜਾ ਹੈਗੜੇ ਨੂੰ ਲਿਆ ਗਿਆ ਹੈ। ਵੈਸੇ ਅਧਿਕਾਰਤ ਤੌਰ 'ਤੇ 'ਹਾਊਸਫੁਲ-4' ਪੂਜਾ ਦੀ ਦੂਸਰੀ ਹਿੰਦੀ ਫ਼ਿਲਮ ਹੋਵੇਗੀ। ਉਹ ਦੱਖਣ ਭਾਰਤੀ ਫ਼ਿਲਮ ਇੰਡਸਟਰੀ ਦਾ ਚਰਚਿਤ ਚਿਹਰਾ ਹੈ ਤੇ ਰਣਬੀਰ ਕਪੂਰ ਨਾਲ ਐਕਟਿੰਗ ਦਾ ਵਿਗਿਆਪਨ ਵੀ ਉਹ ਕਰ ਚੁੱਕੀ ਹੈ। ਪੂਜਾ ਦੇ ਆਉਣ ਨਾਲ ਕੈਟਰੀਨਾ ਤੇ ਕ੍ਰਿਤੀ ਸੇਨਨ ਨੂੰ ਜ਼ਰੂਰ ਘਾਟਾ ਪਿਆ ਹੈ।

ਦੀਪਿਕਾ ਪਾਦੂਕੋਨ

'ਘਰ' ਜਾਣ ਦੀ ਤਿਆਰੀ!

ਹਾਲੀਵੁੱਡ ਫ਼ਿਲਮ '3 ਐਕਸ ਐਕਸ ਐਕਸ : ਰਿਟਰਨ ਆਫ਼ ਜੇਂਡਰ ਕੇਸ' ਦੇ ਡਾਇਰੈਕਟਰ ਡੀ.ਜੇ. ਕਾਰੂਸੋ ਦੀਪਿਕਾ ਪਾਦੂਕੋਨ ਨਾਲ ਇਕ ਬੀ-ਟਾਊਨ ਅੰਦਾਜ਼ ਨਾਲ ਡਾਂਸ ਨੰਬਰ ਕਰਨ ਜਾ ਰਹੇ ਹਨ। 'ਟ੍ਰਿਪਲ ਐਕਸ-4 ਜੇਂਡਰ ਕੇਸ' ਨਵੀਂ ਫ਼ਿਲਮ ਦਾ ਅੰਤ ਉਹ ਬੀ-ਟਾਊਨ ਡਾਂਸ ਨੰਬਰ ਕਰਨ ਜਾ ਰਹੇ ਹਨ। 'ਲੂੰਗੀ ਡਾਂਸ' ਅਰਥਾਤ ਹਾਲੀਵੁੱਡ ਫ਼ਿਲਮ ਵਿਚ ਇਹ ਕੁਝ ਹੁਣ ਦੀਪੀ ਕਰੇਗੀ। ਇਹ ਦੀਪੀ ਦੀ ਦੂਸਰੀ ਹਾਲੀਵੁੱਡ ਫ਼ਿਲਮ ਹੋਵੇਗੀ। ਦੁਨੀਆ ਦੀਆਂ ਚਰਚਿਤ 100 ਹਸਤੀਆਂ 'ਚ ਉਹ ਸ਼ਾਮਿਲ ਹੈ। ਚਾਹੇ ਹਾਲੀਵੁੱਡ 'ਚ ਦੀਪੀ ਨੂੰ ਮਨਚਾਹੀ ਕਾਮਯਾਬੀ ਨਹੀਂ ਨਸੀਬ ਹੋਈ ਪਰ ਦੂਸਰੀ ਫ਼ਿਲਮ ਕਰਨੀ ਦਰਸਾਉਂਦਾ ਹੈ ਕਿ ਉਹ ਹਾਲੀਵੁੱਡ 'ਚ ਪੈਰ ਟਿਕਾਏਗੀ। 'ਯੇ ਜਵਾਨੀ ਹੈ ਦੀਵਾਨੀ' ਨਾਲ ਦੀਪੀ ਦੀ ਰਣਬੀਰ ਕਪੂਰ ਨਾਲ 'ਚੰਨ ਤਾਰਾ' ਵਾਲੀ ਸ਼ਾਨਦਾਰ ਜੋੜੀ ਬਣੀ ਸੀ। ਹੁਣ ਦੋਵਾਂ 'ਚ ਹਾਏ-ਹੈਲੋ ਵੀ ਬੰਦ ਹੈ। ਦੀਪਿਕਾ ਹੁਣ 'ਸੁਪਰ ਵੋਮੈਨ' ਬਣ ਗਈ ਹੈ। ਹਾਲੀਵੁੱਡ ਫ਼ਿਲਮ 'ਵੰਡਰ ਵੋਮੈਨ' 'ਤੇ ਆਧਾਰਿਤ ਬਣ ਰਹੀ ਫ਼ਿਲਮ 'ਸੁਪਰ ਵੋਮੈਨ' ਲਈ ਉਸ ਨੇ ਮਾਰਸ਼ਲ ਆਰਟ ਦੀ ਸਿੱਖਿਆ ਲਈ ਹੈ। ਇਸ ਤੋਂ ਇਲਾਵਾ ਉਹ ਵਿਸ਼ਾਲ ਨਾਲ ਫ਼ਿਲਮ 'ਸਪਨਾ ਦੀਦੀ' ਵੀ ਕਰ ਰਹੀ ਹੈ। ਉੱਧਰ ਰਣਬੀਰ ਕਪੂਰ ਦੀ ਥਾਂ ਉਸੇ ਹੀ ਰਾਸ਼ੀ ਵਾਲੇ ਪਰ 'ਕਪੂਰ' ਨਹੀਂ 'ਸਿੰਘ ਭਾਵ ਰਣਵੀਰ ਸਿੰਘ' ਨਾਲ ਦੀਪੀ ਦੇ ਵਿਆਹ ਦੀਆਂ ਗੱਲਾਂ ਇਸ ਸਮੇਂ ਕਾਫੀ ਹੋ ਰਹੀਆਂ ਹਨ। ਰਣਵੀਰ ਨੇ ਤਾਂ ਦੀਪੀ ਲਈ ਨਵਾਂ ਘਰ ਵੀ ਲੈ ਲਿਆ ਹੈ। ਹੁਣ ਚਰਚਾ ਤੇਜ਼ ਹੈ ਕਿ ਦੀਪਿਕਾ ਨੇ ਨੇਹਾ ਧੂਪੀਆ, ਹਿਮੇਸ਼ ਰੇਸ਼ਮੀਆਂ ਤੇ ਸੋਨਮ ਕਪੂਰ ਦੀ ਤਰ੍ਹਾਂ ਵਿਆਹੁਤਾ ਜੀਵਨ ਲਈ ਸੋਚਣਾ ਸ਼ੁਰੂ ਕੀਤਾ ਹੈ। ਨਵੰਬਰ ਮਹੀਨੇ 'ਚ ਦੀਪਿਕਾ ਹੋ ਸਕਦਾ ਹੈ ਰਣਵੀਰ ਸਿੰਘ ਦੀ ਦੁਲਹਨ ਬਣ ਜਾਏ। ਦੁਲਹਨ ਅਜਿਹੀ ਜਿਹੜੀ ਪੀਆ ਅਰਥਾਤ ਰਣਵੀਰ ਸਿੰਘ ਦੇ ਮਨ ਨੂੰ ਜਿੱਤ ਲਏ। ਮਾਂ ਨਾਲ ਗਹਿਣੇ ਬਣਾਉਣੇ, ਕੱਪੜੇ ਖਰੀਦਣੇ ਵਿਆਹ ਦੀਆਂ ਹੀ ਤਿਆਰੀਆਂ ਹਨ। ਮਾਂ ਉਜਵਲਾ ਬਾਂਦਰਾ ਦੇ ਕੰਪਲੈਕਸ 'ਚ ਰੋਜ਼ ਦੀਪੀ ਲਈ ਖਰੀਦੋ-ਫਰੋਖ਼ਤ ਕਰ ਰਹੀ ਹੈ। ਉਹ 300 ਕਰੋੜ ਦੇ ਆਲੀਸ਼ਾਨ ਬਜਟ ਵਾਲੀ 'ਸੁਪਰ ਵੋਮੈਨ' ਕਰ ਰਹੀ ਤੇ 'ਸਪਨਾ ਦੀਦੀ' ਬਣੀ ਦੀਪਿਕਾ ਪਾਦੂਕੋਨ ਫ਼ਿਲਮਾਂ ਦੀ ਤਰ੍ਹਾਂ ਕਾਮਯਾਬ ਵਿਆਹੁਤਾ ਜੀਵਨ 'ਚ ਪ੍ਰਵੇਸ਼ ਕਰੇ, ਹੁਣ ਜ਼ਿਆਦਾ ਸਮਾਂ ਤੇ ਧਿਆਨ ਉਸ ਦਾ ਇਸ ਵੱਲ ਹੀ ਹੈ।

ਦੀਕਸ਼ਾ ਸੇਠ

ਮਟਨ ਤੋਂ ਤੌਬਾ

ਆਈ.ਟੀ.ਸੀ. ਕੰਪਨੀ 'ਚ ਪਿਤਾ ਜੀ ਦੇ ਹੋਣ ਕਾਰਨ ਤੇ ਉਨ੍ਹਾਂ ਦੀ ਇਕ ਥਾਂ ਤੋਂ ਦੂਸਰੀ ਥਾਂ 'ਤੇ ਬਦਲੀ ਕਾਰਨ ਦੀਕਸ਼ਾ ਸੇਠ ਨੇ ਬਚਪਨ ਤੋਂ ਜਵਾਨੀ ਤੱਕ ਪੂਰਾ ਭਾਰਤ ਘੁੰਮਿਆ ਤੇ ਹਰ ਤਰ੍ਹਾਂ ਦਾ ਸੱਭਿਆਚਾਰ, ਵੱਖ-ਵੱਖ ਪਹਿਰਾਵੇ, ਬੋਲੀਆਂ ਤੇ ਸ਼ਹਿਰਾਂ ਦੀ ਸੈਰ ਕੀਤੀ। ਦੀਕਸ਼ਾ ਨੇ ਕਦੇ ਵੀ ਅਭਿਨੇਤਰੀ ਬਣਨ ਸਬੰਧੀ ਨਹੀਂ ਸੀ ਸੋਚਿਆ। ਦੀਕਸ਼ਾ ਅੱਜ ਤੱਕ ਸ਼ੁਕਰ ਗੁਜ਼ਾਰ ਹੈ ਫੈਮਿਨਾ ਦੀ ਜਿਸ ਸਦਕਾ ਉਹ 'ਮਿਸ ਫੈਮਿਨਾ' ਬਣੀ ਸੀ ਤੇ ਇਕੱਲੀ ਹੀ ਦੀਕਸ਼ਾ ਦੀ ਮਨੋਰੰਜਨ ਸੰਸਾਰ 'ਚ ਯਾਤਰਾ ਸ਼ੁਰੂ ਹੋਈ ਸੀ। ਦੀਕਸ਼ਾ ਨੇ ਕੰਨੜ ਫ਼ਿਲਮਾਂ ਵੀ ਕੀਤੀਆਂ ਹਨ। 'ਜੱਗੂ ਦਾਦਾ' ਨਾਲ ਦੀਕਸ਼ਾ ਨੇ ਕਈ ਕੰਨੜ ਫ਼ਿਲਮਾਂ ਵੀ ਕੀਤੀਆਂ। ਦੀਕਸ਼ਾ ਨੇ 'ਲੇਕਰ ਹਮ ਦੀਵਾਨਾ ਦਿਲ' ਹਿੰਦੀ ਫ਼ਿਲਮ ਵੀ ਕੀਤੀ ਪਰ ਬਾਲੀਵੁੱਡ 'ਚ ਉਸ ਦਾ ਸਿੱਕਾ ਨਹੀਂ ਚੱਲਿਆ। ਅਰਮਾਨ ਦੇ ਨਾਲ ਹੁਣ ਤਾਂ ਉਸ ਦੀ ਬੋਲਚਾਲ ਵੀ ਬੰਦ ਹੈ। ਦੀਕਸ਼ਾ ਕਦੇ ਵੀ ਦਬਾਅ 'ਚ ਨਹੀਂ ਰਹੀ। ਫ਼ਿਲਮ ਖੇਤਰ 'ਚ ਸਫ਼ਲਤਾ ਨਾ ਮਿਲਣ 'ਤੇ ਦੀਕਸ਼ਾ ਸੇਠ ਨੇ ਫੂਡ ਸ਼ੋਅ 'ਜੰਗਲੀ ਮਟਨ' ਵੀ ਕੀਤਾ। ਦੀਕਸ਼ਾ ਹਾਲਾਂਕਿ ਸ਼ੁੱਧ ਸ਼ਾਕਾਹਾਰੀ ਹੈ ਤੇ ਉਸ ਦਾ ਪਰਿਵਾਰ ਪੰਡਿਤ ਸੰਸਕ੍ਰਿਤੀ ਨੂੰ ਮੰਨਦਾ ਹੈ ਪਰ ਕਿੱਤੇ ਕਾਰਨ ਉਸ ਨੂੰ 'ਜੰਗਲੀ ਮਟਨ' ਸ਼ੋਅ ਕਰਨਾ ਪਿਆ। ਇਸ ਸ਼ੋਅ ਨੂੰ ਲੈ ਕੇ ਦੀਕਸ਼ਾ ਦੇ ਰਿਸ਼ਤੇਦਾਰਾਂ ਨੇ ਉਸ ਦੇ ਪਰਿਵਾਰ ਨਾਲ ਨਰਾਜ਼ਗੀ ਵੀ ਜ਼ਾਹਿਰ ਕੀਤੀ ਹੈ। ਉਹ ਦੱਸਦੀ ਹੈ ਕਿ ਇਹ ਸ਼ੋਅ ਉਸ ਲਈ ਸਭ ਤੋਂ ਵੱਧ ਕਠਿਨ ਰਿਹਾ। ਦੀਕਸ਼ਾ ਨੇ ਤਿੰਨ ਤਾਮਿਲ ਫ਼ਿਲਮਾਂ ਪ੍ਰਭਾਸ, ਰਵੀ ਤੇਜਾ ਨਾਲ ਕੀਤੀਆਂ। 'ਵੇਦਮ' ਫ਼ਿਲਮ 'ਚ ਪੂਜਾ ਦਾ ਕਿਰਦਾਰ 'ਵਾਂਟੇਡ' ਦੀ 'ਨੰਦਿਨੀ' ਨੇ 'ਸਾਤ ਕਦਮ' ਜਿਹੀਆਂ ਫ਼ਿਲਮਾਂ ਵੀ ਕੀਤੀਆਂ ਹਨ ਪਰ ਵੱਡੀ ਪ੍ਰਾਪਤੀ ਉਸ ਦੇ ਖਾਤੇ 'ਚ ਨਹੀਂ ਹੈ। ਅਮਿਤ ਸਾਧ ਨਾਲ ਦੀਕਸ਼ਾ ਦਾ ਨਾਂਅ ਵੀ ਜੁੜਿਆ ਪਰ ਇਸ ਨਾਂਹ-ਪੱਖੀ ਪ੍ਰਚਾਰ ਨੇ ਦੀਕਸ਼ਾ ਨੂੰ ਕੋਈ ਲਾਭ ਨਹੀਂ ਦਿੱਤਾ। ਅਭਿਨੇਤਰੀ ਤਮੰਨਾ ਭਾਟੀਆ ਨਾਲ ਹੀ ਸਿਰਫ਼ ਦੋਸਤੀ ਹੈ ਤੇ ਤਮੰਨਾ ਨਾਲ ਉਸ ਨੇ ਇਕ ਹੀ ਫ਼ਿਲਮ ਕੀਤੀ ਹੈ। ਕਾਫ਼ੀ ਸੰਘਰਸ਼ ਤੇ ਮਿਹਨਤ ਵੀ ਦੀਕਸ਼ਾ ਨੂੰ ਬਾਲੀਵੁੱਡ 'ਚ ਸੁਰੱਖਿਅਤ ਥਾਂ ਨਹੀਂ ਦਿਵਾ ਸਕੀ। ਤਾਮਿਲ, ਕੰਨੜ ਤੇ ਤੇਲਗੂ ਫ਼ਿਲਮਾਂ ਦੇ ਕਾਰਨ ਹੀ ਉਹ ਟਿਕੀ ਹੋਈ ਹੈ ਤੇ ਫ਼ਿਲਮਾਂ ਦੇ ਕਾਰਨ ਦੀਕਸ਼ਾ ਨੇ ਟੀ.ਵੀ. ਤੇ ਮਾਡਲਿੰਗ ਤੋਂ ਵੀ ਦੂਰੀ ਹੀ ਬਣਾ ਕੇ ਰੱਖੀ ਹੈ। ਦੀਕਸ਼ਾ ਨੂੰ ਫਿਰ ਵੀ ਉਮੀਦ ਹੈ ਕਿ ਅਜੇ ਉਸ ਨੂੰ ਮੌਕਾ ਮਿਲ ਸਕਦਾ ਹੈ ਤੇ ਇਕ ਹੀ ਮੌਕਾ ਉਸ ਦੀ ਜ਼ਿੰਦਗੀ ਪਲਟ ਦੇਵੇਗਾ।


-ਸੁਖਜੀਤ ਕੌਰ

ਵਿੱਕੀ ਕੌਸ਼ਲ

ਚੰਗੇ ਸਮੇਂ ਦੀ ਆਮਦ

'ਸੰਜੂ' ਦਾ ਨਵਾਂ ਟ੍ਰੇਲਰ ਆ ਗਿਆ ਹੈ। ਰਣਬੀਰ ਕਪੂਰ ਦੇ ਨਾਲ ਵਿੱਕੀ ਕੌਸ਼ਲ ਵੀ ਹੈ। ਰਾਜ ਕੁਮਾਰ ਹਿਰਾਨੀ ਦੀ ਇਹ ਫ਼ਿਲਮ ਵਿੱਕੀ ਲਈ ਨਵੇਂ ਰਾਹ ਖੋਲ੍ਹੇਗੀ। ਵਿੱਕੀ ਪੰਜਾਬੀ ਪੁੱਤਰ ਹੈ ਤੇ ਪ੍ਰਤਿਭਾ ਵਾਲਾ ਵੀ ਹੈ। 'ਮਸਾਨ' ਦੇ ਨਾਲ ਵਿੱਕੀ ਪਰਦੇ 'ਤੇ ਆਇਆ ਸੀ। ਹੁਣ ਮੇਘਨਾ ਦੀ ਫ਼ਿਲਮ 'ਰਾਜ਼ੀ' ਨੇ ਫਿਰ ਵਿੱਕੀ ਦਾ ਸਿਤਾਰਾ ਚਮਕਾਇਆ ਹੈ। 'ਰਮਨ ਰਾਘਵ 2.0' ਉਸਨੇ ਨਵਾਜ਼ੂਦੀਨ ਸਿੱਦੀਕੀ ਨਾਲ ਕੀਤੀ ਸੀ। ਵਿੱਕੀ ਦੇ ਅਭਿਨੈ ਨੂੰ ਘੱਟ ਕਰ ਕੇ ਜਾਨਣਾ ਵੱਡੀ ਭੁਲ ਹੋਵੇਗੀ। ਜਿਥੋਂ ਤੱਕ ਸ਼ੋਹਰਤ ਦਾ ਸਵਾਲ ਹੈ ਤੇ ਉਹ ਉਸ ਨੂੰ 'ਰਾਜ਼ੀ' ਨੇ ਹੀ ਦਿੱਤੀ ਹੈ। ਸੰਜੇ ਦੱਤ ਦੀ ਬਾਇਓਪਿਕ 'ਸੰਜੂ' ਉਸ ਨੂੰ ਏ-ਗਰੇਡ ਸਿਤਾਰਿਆਂ ਦੀ ਸੂਚੀ 'ਚ ਲਿਆ ਰਹੀ ਹੈ। ਇੱਧਰ ਰਾਜਕੁਮਾਰ ਹਿਰਾਨੀ ਆਪਣੀ ਨਵੀਂ ਫ਼ਿਲਮ ਵੀ ਵਿੱਕੀ ਨਾਲ ਕਰ ਰਿਹਾ ਹੈ। ਉਸ ਨੂੰ ਪਤਾ ਹੈ ਕਿ 'ਰਾਜ਼ੀ' ਤੇ 'ਸੰਜੂ' ਵਾਲਾ ਵਿੱਕੀ ਹੁਣ ਰੁਝਿਆ ਹੋਇਆ ਸਿਤਾਰਾ ਬਣ ਜਾਣ ਵਾਲਾ ਹੈ। 'ਬੜੀਆ' ਗਾਣੇ 'ਚ ਵਿੱਕੀ ਦਾ ਅਭਿਨੈ ਸਭ ਨੇ ਸਰਾਹਿਆ ਹੈ। ਵਿੱਕੀ ਇਸ ਸਮੇਂ ਤਾਪਸੀ ਪੰਨੂ ਤੇ ਅਭਿਸ਼ੇਕ ਬੱਚਨ ਦੇ ਨਾਲ 'ਮਨਮਰਜ਼ੀਆਂ' ਵੀ ਕਰ ਰਿਹਾ ਹੈ। ਵਿੱਕੀ ਇਕ ਨਵੀਂ ਫ਼ਿਲਮ 'ਉੜੀ' ਵੀ ਕਰ ਰਿਹਾ ਹੈ। ਇਸ 'ਚ ਉਹ ਫ਼ੌਜੀ ਅਧਿਕਾਰੀ ਦਾ ਕਿਰਦਾਰ ਨਿਭਾਏਗਾ। ਇਹ ਫ਼ਿਲਮ 'ਉੜੀ' ਹਮਲੇ 'ਤੇ ਆਧਾਰਿਤ ਹੈ। ਕਰਨ ਜੌਹਰ ਦੀ ਲੜੀ 'ਲਸਟ ਸਟੋਰੀਜ਼' ਵੀ ਵਿੱਕੀ ਕੋਲ ਹੈ। ਕਿਆਰਾ ਅਡਵਾਨੀ ਉਸ ਨਾਲ ਹੈ ਤੇ ਇਹ ਲੜੀ ਨੈੱਟ 'ਤੇ ਆਏਗੀ। 'ਲਵ ਸ਼ਵ ਚਿਕਨ ਖੁਰਾਨਾ' 'ਚ ਨਿੱਕੀ ਜਿਹੀ ਭੂਮਿਕਾ ਨਿਭਾਉਣ ਵਾਲੇ ਵਿੱਕੀ ਕੌਸ਼ਲ ਦੀਆਂ ਇਹ ਚਾਰ ਫ਼ਿਲਮਾਂ ਉਸ ਦੀ ਤਕਦੀਰ ਹੀ ਪਲਟ ਦੇਣਗੀਆਂ। 'ਸੰਜੂ', 'ਮਨਮਰਜ਼ੀਆਂ', 'ਉੜੀ', 'ਲਸਟ ਸਟੋਰੀਜ਼' ਅਰਥਾਤ ਵਿੱਕੀ ਦਾ ਕੈਰੀਅਰ ਹੁਣ ਟੌਹਰੀ ਬਣਨ ਜਾ ਰਿਹਾ ਹੈ। ਸਭ ਪਾਸੇ ਹੁਣ ਉਸ ਦੀ ਚਰਚਾ ਹੋਣ ਵਾਲੀ ਹੈ।

ਸ੍ਰੀਦੇਵੀ ਦੀ ਧੀ ਜਾਹਨਵੀ ਦੀ ਚਰਚਾ ਸ਼ੁਰੂ

ਸਵਰਗਵਾਸੀ ਅਭਿਨੇਤਰੀ ਸ੍ਰੀਦੇਵੀ ਦੀ ਧੀ ਜਾਹਨਵੀ ਕਪੂਰ ਬਾਲੀਵੁੱਡ ਦੀ ਫ਼ਿਲਮ 'ਧੜਕ' ਰਾਹੀਂ ਅਗਲੇ ਮਹੀਨੇ 20 ਜੁਲਾਈ ਨੂੰ ਪਰਦੇ 'ਤੇ ਨਜ਼ਰ ਆਏਗੀ ਤੇ ਆਸ ਹੈ ਉਹ ਸ੍ਰੀਦੇਵੀ ਵਾਂਗ ਲੋਕ ਦਿਲਾਂ ਦੀ ਧੜਕਣ ਬਣੇਗੀ। ਇਕ ਮੁਲਾਕਾਤ ਵਿਚ ਉਸ ਨੇ ਆਪਣੀ ਮਾਂ ਸ੍ਰੀਦੇਵੀ ਨਾਲ ਗੁਜ਼ਾਰੇ ਆਖਰੀ ਦਿਨਾਂ ਦਾ ਜ਼ਿਕਰ ਕੀਤਾ ਹੈ ਤੇ ਦੱਸਿਆ ਹੈ ਕਿ ਉਸ ਦੀ ਮਾਂ ਨੇ ਫ਼ਿਲਮ ਦੀ ਸਿਰਫ਼ 25 ਮਿੰਟ ਦੀ ਫੁਟੇਜ ਹੀ ਦੇਖੀ ਸੀ। ਉਹ ਦੱਸਦੀ ਹੈ ਕਿ ਮਾਂ ਨੇ ਮੈਨੂੰ ਫ਼ਿਲਮ ਬਾਰੇ ਟਿਪਸ ਵੀ ਦਿੱਤੇ ਸਨ ਤੇ ਮੇਰੇ ਮੇਕਅੱਪ ਬਾਰੇ ਵੀ ਉਹ ਅਕਸਰ ਸਲਾਹ ਦਿਆ ਕਰਦੀ ਸੀ। ਜਾਹਨਵੀ ਨੇ ਇਹ ਵੀ ਕਿਹਾ ਕਿ ਉਹ ਆਪਣੇ ਕੰਮ ਰਾਹੀਂ ਆਪਣੇ ਮਾਤਾ-ਪਿਤਾ ਨੂੰ ਗੌਰਵ ਮਹਿਸੂਸ ਕਰਾਉਣ ਦੀ ਇਛੁਕ ਸੀ ਪਰ ਕਾਸ਼ ਮੰਮੀ ਕੁਝ ਸਮਾਂ ਹੋਰ ਜਿਊਂਦੇ ਰਹਿੰਦੇ। ਸ੍ਰੀਦੇਵੀ ਦੇ ਚਾਹੁਣ ਵਾਲੇ ਹੁਣ ਸ੍ਰੀਦੇਵੀ ਦੀ ਥਾਂ ਉਸ ਦੀ ਧੀ ਦੀ ਕਲਾ ਦੇਖ ਕੇ ਹੀ ਸਬਰ ਕਰ ਸਕਣਗੇ।

ਸੀਤਾ ਅਤੇ ਸੱਤਾ ਦੋਵਾਂ ਦਾ ਅਨੁਭਵ ਹੋਇਆ : ਦੀਪਿਕਾ ਚਿਖਲੀਆ

ਅੱਜ ਜਿਥੇ ਚਾਰੇ ਪਾਸੇ ਦੀਪਿਕਾ ਪਾਦੂਕੋਨ ਦੇ ਨਾਂਅ ਦੀ ਧੁਮ ਮਚੀ ਹੋਈ ਹੈ, ਉਥੇ ਅੱਸੀ ਦੇ ਦਹਾਕੇ ਵਿਚ ਇਕ ਹੋਰ ਦੀਪਿਕਾ ਨੇ ਆਪਣੇ ਨਾਂਅ ਦੇ ਝੰਡੇ ਗੱਡੇ ਸਨ। ਇਹ ਸੀ ਦੀਪਿਕਾ ਚਿਖਲੀਆ ਜੋ ਲੜੀਵਾਰ 'ਰਾਮਾਇਣ' ਵਿਚ ਸੀਤਾ ਬਣੀ ਸੀ। ਇਸ ਲੜੀਵਾਰ ਨੇ ਲੋਕਾਂ ਨੂੰ ਏਨਾ ਪ੍ਰਭਾਵਿਤ ਕੀਤਾ ਸੀ ਕਿ ਦੀਪਿਕਾ ਜਿਥੇ ਜਾਂਦੀ ਲੋਕ ਉਸ ਦੇ ਪੈਰ ਛੂਹੰਦੇ ਸਨ। 'ਰਾਮਾਇਣ' ਦੀ ਲੋਕਪ੍ਰਿਅਤਾ ਦੇ ਦਮ 'ਤੇ ਹੀ ਦੀਪਿਕਾ ਵਡੋਦਰਾ ਤੋਂ ਚੋਣਾਂ ਜਿੱਤ ਕੇ ਲੋਕ ਸਭਾ ਵਿਚ ਵੀ ਪਹੁੰਚਣ ਵਿਚ ਕਾਮਯਾਬ ਰਹੀ ਸੀ।
ਹੁਣ ਤਕਰੀਬਨ ਚੌਵੀ ਸਾਲ ਦੇ ਸਮੇਂ ਬਾਅਦ ਦੀਪਿਕਾ ਨੇ ਅਭਿਨੈ ਦੀ ਦੁਨੀਆ ਵਿਚ ਆਪਣੀ ਵਾਪਸੀ ਕੀਤੀ ਹੈ। ਉਹ ਹਿੰਦੀ ਫ਼ਿਲਮ 'ਗ਼ਾਲਿਬ' ਤੇ ਗੁਜਰਾਤੀ ਫ਼ਿਲਮ 'ਨਟਸਮਰਾਟ' ਵਿਚ ਅਭਿਨੈ ਕਰ ਰਹੀ ਹੈ। ਇਥੇ ਉਹ ਆਪਣੀ ਵਾਪਸੀ ਬਾਰੇ ਗੱਲ ਕਰ ਰਹੀ ਹੈ।
* 'ਰਾਮਾਇਣ' ਦੇ ਲਿਹਾਜ਼ ਨਾਲ ਕਹੀਏ ਤਾਂ ਤੁਸੀਂ ਅਭਿਨੈ ਤੋਂ ਚੌਵੀ ਸਾਲ ਦਾ ਬਨਵਾਸ ਲਿਆ। ਹੁਣ ਇਸ ਬਨਵਾਸ ਦੀ ਸਮਾਪਤੀ ਕਿਵੇਂ ਹੋਈ?
-ਜਦੋਂ ਮੈਂ ਚੋਣਾਂ ਜਿੱਤ ਕੇ ਲੋਕ ਸਭਾ ਵਿਚ ਪਹੁੰਚੀ ਸੀ ਉਦੋਂ ਹੀ ਮੇਰੇ ਦਿਮਾਗ਼ ਵਿਚ ਸੀ ਕਿ ਮੈਂ ਦੋ ਕਿਸ਼ਤੀਆਂ 'ਤੇ ਸਵਾਰ ਨਹੀਂ ਹੋ ਸਕਦੀ। ਉਦੋਂ ਮੈਂ ਸੋਚਿਆ ਸੀ ਕਿ ਮੈਂ ਕੋਈ ਨਵੀਂ ਫ਼ਿਲਮ ਹੱਥ ਵਿਚ ਨਹੀਂ ਲਵਾਂਗੀ ਅਤੇ ਅਧੂਰੀ ਫ਼ਿਲਮ ਪੂਰੀ ਕਰ ਕੇ ਆਪਣੇ ਚੋਣ ਖੇਤਰ 'ਤੇ ਧਿਆਨ ਦੇਵਾਂਗੀ। ਮੈਂ ਆਖ਼ਰੀ ਵਾਰ ਕੈਮਰੇ ਦਾ ਸਾਹਮਣਾ ਤਾਮਿਲ ਫ਼ਿਲਮ ਲਈ ਕੀਤਾ ਸੀ ਜਿਸ ਵਿਚ ਸ਼ਿਵਾਜੀ ਗਣੇਸ਼ਨ ਅਤੇ ਪ੍ਰਭੂ ਸਨ। ਉਸ ਫ਼ਿਲਮ ਵਿਚ ਦੋ ਦਿਨ ਦਾ ਕੰਮ ਬਾਕੀ ਸੀ ਜਿਸ ਨੂੰ ਪੂਰਾ ਕਰ ਕੇ ਮੈਂ ਅਭਿਨੈ ਤੋਂ ਦੂਰ ਹੋ ਗਈ। ਫਿਰ ਵਿਆਹ ਕੀਤਾ ਅਤੇ ਦੋ ਬੇਟੀਆਂ ਦੀ ਮਾਂ ਬਣੀ। ਪਰਿਵਾਰਕ ਜ਼ਿੰਮੇਦਾਰੀਆਂ ਦੇ ਚਲਦਿਆਂ ਫ਼ਿਲਮਾਂ ਤੇ ਲੜੀਵਾਰਾਂ ਵਿਚ ਕੰਮ ਕਰ ਸਕਣਾ ਮੁਸ਼ਕਿਲ ਸੀ। ਸੋ, ਅਭਿਨੈ ਤੋਂ ਦੂਰ ਹੀ ਰਹੀ।
* ਇਸ ਵਿਚ ਤੁਹਾਡੀ ਭੂਮਿਕਾ ਕੀ ਹੈ?
-ਇਥੇ ਮੈਂ ਗ਼ਾਲਿਬ ਦੀ ਮਾਂ ਬਣੀ ਹਾਂ। ਇਹ ਅੱਜ ਦੇ ਦੌਰ ਦੀ ਫ਼ਿਲਮ ਹੈ ਅਤੇ ਕਸ਼ਮੀਰ 'ਤੇ ਆਧਾਰਿਤ ਹੈ। ਕਹਾਣੀ ਇਹ ਹੈ ਕਿ ਜਦੋਂ ਕੋਈ ਅੱਤਵਾਦੀ ਮਾਰ ਦਿੱਤਾ ਜਾਂਦਾ ਹੈ ਤਾਂ ਉਸ ਦੇ ਪਰਿਵਾਰ 'ਤੇ ਕੀ ਬੀਤਦੀ ਹੈ। ਇਥੇ ਮੇਰੇ ਪਤੀ ਦੀ ਭੂਮਿਕਾ ਵਿਚ ਕਸ਼ਮੀਰੀ ਕਲਾਕਾਰ ਮੀਰ ਸਰਵਰ ਹਨ, ਜਿਨ੍ਹਾਂ ਨੂੰ ਅੱਤਵਾਦੀ ਦੇ ਰੂਪ ਵਿਚ ਦਿਖਾਇਆ ਗਿਆ ਹੈ। ਅਫ਼ਜ਼ਲ ਗੁਰੂ ਸਮੇਤ ਕੁਝ ਹੋਰ ਅੱਤਵਾਦੀਆਂ ਦੇ ਨਾਲ ਵਾਪਰੀਆਂ ਘਟਨਾਵਾਂ ਤੋਂ ਫ਼ਿਲਮ ਦੀ ਕਹਾਣੀ ਤਿਆਰ ਕੀਤੀ ਗਈ ਹੈ। ਇਸ ਤੋਂ ਇਲਾਵਾ ਮੈਂ ਗੁਜਰਾਤੀ ਫ਼ਿਲਮ 'ਨਟਸਮਰਾਟ' ਵੀ ਕਰ ਰਹੀ ਹਾਂ। ਇਹ ਮਰਾਠੀ 'ਨਟਸਮਰਾਟ' ਦੀ ਰੀਮੇਕ ਹੈ। ਮਰਾਠੀ ਵਰਸ਼ਨ ਵਿਚ ਜੋ ਭੂਮਿਕਾ ਨਾਨਾ ਪਾਟੇਕਰ ਨੇ ਨਿਭਾਈ ਸੀ ਉਹ ਇਥੇ ਸਿਧਾਰਥ ਰਾਂਦੇਰੀਆ ਵਲੋਂ ਨਿਭਾਈ ਜਾ ਰਹੀ ਹੈ ਅਤੇ ਮੈਂ ਉਨ੍ਹਾਂ ਦੀ ਪਤਨੀ ਦੇ ਕਿਰਦਾਰ ਵਿਚ ਹਾਂ।
* ਆਪਣੀ ਵਾਪਸੀ ਨੂੰ ਲੈ ਕੇ ਤੁਹਾਨੂੰ ਕਿਸ ਤਰ੍ਹਾਂ ਦੀਆਂ ਤਿਆਰੀਆਂ ਕਰਨੀਆਂ ਪਈਆਂ ਸੀ?
-ਜ਼ਿਆਦਾ ਤਿਆਰੀਆਂ ਨਹੀਂ ਕਰਨੀਆਂ ਪਈਆਂ ਕਿਉਂਕਿ ਇਕ ਕਲਾਕਾਰ ਅਭਿਨੈ ਕਰਨਾ ਕਦੀ ਭੁੱਲ ਨਹੀਂ ਸਕਦਾ। ਹਾਂ, 'ਨਟਸਮਰਾਟ' ਲਈ ਹੋਮਵਰਕ ਕਰਨਾ ਪਿਆ। ਕੁਝ ਗੁਜਰਾਤੀ ਨਾਟਕ ਤੇ ਫ਼ਿਲਮਾਂ ਦੇਖੀਆਂ ਤਾਂ ਕਿ ਇਹ ਪਤਾ ਲੱਗੇ ਕਿ ਕਿਸ ਤਰ੍ਹਾਂ ਦੀ ਗੁਜਰਾਤੀ ਬੋਲੀ ਜਾਂਦੀ ਹੈ। ਮੈਂ ਖ਼ੁਦ ਗੁਜਰਾਤੀ ਹਾਂ ਪਰ ਘਰ ਵਿਚ ਸਿਰਫ਼ ਸੱਸ ਦੇ ਨਾਲ ਹੀ ਗੁਜਰਾਤੀ ਵਿਚ ਗੱਲ ਕਰਦੀ ਹਾਂ। ਮੇਰੇ ਪਤੀ ਜਦੋਂ ਗੁਜਰਾਤੀ ਬੋਲਦੇ ਹਨ ਤੇ ਉਹ ਬੰਬਈਆ ਟਚ ਵਾਲੀ ਗੁਜਰਾਤੀ ਹੁੰਦੀ ਹੈ। 'ਨਟਸਮਰਾਟ' ਵਿਚ ਖੇਤਰੀ ਭਾਸ਼ਾ ਦਾ ਪ੍ਰਯੋਗ ਕੀਤਾ ਗਿਆ ਹੈ। ਸੋ, ਗੁਜਰਾਤੀ ਭਾਸ਼ਾ ਦੀ ਜ਼ਿਆਦਾ ਜਾਣਕਾਰੀ ਹੋਣਾ ਜ਼ਰੂਰੀ ਸੀ।
* ਕੀ ਵਜ੍ਹਾ ਰਹੀ ਕਿ ਤੁਸੀਂ ਹੁਣ ਤੱਕ ਸੀਤਾ ਦੀ ਇਮੇਜ ਤੋਂ ਉੱਭਰ ਨਹੀਂ ਸਕੇ?
-ਮੈਂ ਖ਼ੁਦ ਸੀਤਾ ਦੀ ਇਮੇਜ ਤੋੜਨਾ ਨਹੀਂ ਚਾਹੁੰਦੀ ਸੀ। ਮੈਂ ਸੀਤਾ ਬਣ ਕੇ ਲੋਕਾਂ ਦੇ ਦਿਲ ਵਿਚ ਵਸੀ ਹੋਈ ਹਾਂ। ਇਸ ਤਰ੍ਹਾਂ ਸੀਤਾ ਦੀ ਇਮੇਜ ਤੋੜ ਕੇ ਉਨ੍ਹਾਂ ਦੀਆਂ ਭਾਵਨਾਵਾਂ ਨਾਲ ਖਿਲਵਾੜ ਨਹੀਂ ਕਰਨਾ ਚਾਹੁੰਦੀ ਸੀ। ਇਸ ਇਮੇਜ ਦੀ ਵਜ੍ਹਾ ਨਾਲ ਹੀ ਅੱਜ ਵੀ ਜਦੋਂ ਮੈਂ ਜਨਤਕ ਪ੍ਰੋਗਰਾਮਾਂ ਵਿਚ ਜਾਂਦੀ ਹਾਂ ਤਾਂ ਸਾੜ੍ਹੀ ਪਾ ਕੇ ਜਾਂਦੀ ਹਾਂ। ਇਸ ਭੂਮਿਕਾ ਦੀ ਵਜ੍ਹਾ ਨਾਲ ਮੈਨੂੰ ਸੀਤਾ ਅਤੇ ਸੱਤਾ ਦੋਵਾਂ ਦਾ ਅਨੁਭਵ ਮਿਲਿਆ ਤੇ ਫਿਰ ਭਲਾ ਮੈਂ ਕਿਉਂ ਇਕ ਚੰਗੀ ਇਮੇਜ ਨੂੰ ਤੋੜਾਂ।

ਮਜਬੂਰੀਆਂ 'ਚ ਘਿਰੀ

ਜ਼ਰੀਨ ਖ਼ਾਨ

ਸਲਮਾਨ ਖ਼ਾਨ ਦੀ ਹੀਰੋਇਨ ਬਣਨ ਦਾ ਮੌਕਾ ਪ੍ਰਾਪਤ ਕਰਕੇ ਵੀ ਧੱਕੇ ਖਾ ਰਹੀ ਜ਼ਰੀਨ ਖ਼ਾਨ ਨੂੰ ਜੇ ਦੱਖਣ ਦਾ ਸਹਾਰਾ ਨਾ ਹੋਵੇ ਤਾਂ ਉਹ ਹੁਣ ਤੱਕ ਲੋਕਾਂ ਦੇ ਚੇਤਿਆਂ ਤੋਂ ਗੁੰਮ ਹੀ ਹੋ ਜਾਂਦੀ। ਜ਼ਰੀਨ ਕੋਲ ਕੰਮ ਚਾਹੇ ਘੱਟ ਹੈ ਪਰ ਸੋਸ਼ਲ ਮੀਡੀਆ 'ਤੇ ਉਹ ਕਾਫ਼ੀ ਸਰਗਰਮ ਹੈ ਤੇ ਇਸ ਸੋਸ਼ਲ ਮੀਡੀਆ ਨੇ ਲਾਭ ਘੱਟ, ਬਦਨਾਮੀ ਜ਼ਿਆਦਾ ਉਸ ਨੂੰ ਦਿੱਤੀ ਹੈ। ਇਥੇ ਅਕਸਰ ਉਸ 'ਤੇ ਲੋਕ ਤਰ੍ਹਾਂ-ਤਰ੍ਹਾਂ ਦੀ ਬਿਆਨਬਾਜ਼ੀ ਕਰਦੇ ਹਨ। ਇਸ ਸਬੰਧੀ ਜ਼ਰੀਨ ਸਪੱਸ਼ਟ ਕਰਦੀ ਹੈ ਕਿ ਸ਼ੁਕਰ ਹੈ ਕਿ ਉਸ ਦੀ ਮੰਮੀ ਸੋਸ਼ਲ ਮੀਡੀਆ 'ਤੇ ਨਹੀਂ ਹੈ, ਵਰਨਾ ਉਹ ਪ੍ਰੇਸ਼ਾਨ ਹੋ ਜਾਂਦੀ। ਜ਼ਰੀਨ ਖ਼ਾਨ ਐਮ. ਟੀ.ਵੀ. ਦਾ ਸ਼ੋਅ 'ਐਮ. ਟੀ.ਵੀ. ਟਰੋਲ ਪੁਲਿਸ' ਕਰ ਰਹੀ ਹੈ। ਜ਼ਰੀਨ ਦੇ ਨਾਲ ਇਹ ਸ਼ੋਅ ਰਣਵਿਜੈ ਕਰ ਰਿਹਾ ਹੈ। ਜ਼ਰੀਨ ਨੇ ਪਿਛਲੇ ਦਿਨੀਂ ਕਿਹਾ ਸੀ ਕਿ ਚਾਹੇ 'ਵੀਰ' ਹਿੱਟ ਨਹੀਂ ਸੀ ਪਰ ਲੋਕ ਉਸ ਨੂੰ ਫ਼ਿਲਮ ਕਾਰਨ ਹੀ ਜਾਣਦੇ ਹਨ। 'ਰੈਡੀ', 'ਹਾਊਸਫੁਲ' ਕੇਵਲ ਉਸ ਨੇ ਸਮਾਂ ਪਾਸ ਤੇ ਚਰਚਾ ਲਈ ਹੀ ਕੀਤੀਆਂ ਤਾਂ 'ਹੇਟ ਸਟੋਰੀ-3' ਨੇ ਉਸ ਦੀ ਪਛਾਣ ਜ਼ਰੂਰ ਬਣਾਈ। ਜ਼ਰੀਨ ਨੂੰ ਅਕਸਰ ਲੋਕ ਪੁੱਛਦੇ ਹਨ ਕਿ ਜਦ ਉਹ ਖੁੱਲ੍ਹੇ-ਡੁੱਲ੍ਹੇ ਦ੍ਰਿਸ਼ ਦਿੰਦੀ ਹੈ ਤਾਂ ਉਸ ਦੀ ਪਹਿਲੀ ਫ਼ਿਲਮ ਦੇ ਹੀਰੋ ਸਲਮਾਨ ਖ਼ਾਨ ਦੇ ਦਿਲ 'ਤੇ ਕੀ ਬੀਤੇਗੀ? ਜ਼ਰੀਨ ਇਸ ਦਾ ਸਪੱਸ਼ਟ ਜਵਾਬ ਨਹੀਂ ਦੇ ਸਕਦੀ। 'ਹੇਟ ਸਟੋਰੀ-3' ਉਹ ਨਹੀਂ ਸੀ ਕਰਨੀ ਚਾਹੁੰਦੀ ਪਰ ਮਾਂ ਦੇ ਕਹਿਣ 'ਤੇ ਉਸ ਨੇ ਇਹ ਫ਼ਿਲਮ ਕੀਤੀ ਸੀ, ਕਾਰਨ ਪੈਸਾ ਜਾਂ ਫਿਰ ਪਾਪੀ ਪੇਟ ਦਾ ਸਵਾਲ ਸੀ।

ਹਾਕੀ ਦੇ ਸਟਾਰ ਖਿਡਾਰੀ ਸੰਦੀਪ ਸਿੰਘ ਦੀ ਜ਼ਿੰਦਗੀ 'ਤੇ ਬਣੀ 'ਸੂਰਮਾ'

ਬਾਲੀਵੁੱਡ ਵਿਚ ਚੱਲ ਰਹੀ ਬਾਇਓਪਿਕ ਦੀ ਬਹਾਰ ਦੀ ਬਦੌਲਤ ਕਈ ਨਾਮੀ ਖਿਡਾਰੀਆਂ ਦੀ ਜ਼ਿੰਦਗੀ 'ਤੇ ਬਣੀਆਂ ਯਾਦਗਾਰ ਫ਼ਿਲਮਾਂ ਦੇਖਣ ਨੂੰ ਮਿਲੀਆਂ। ਇਨ੍ਹਾਂ ਫ਼ਿਲਮਾਂ ਦੀ ਵਜ੍ਹਾ ਨਾਲ ਆਮ ਆਦਮੀ ਨੂੰ ਮਹਿੰਦਰ ਸਿੰਘ ਧੋਨੀ, ਮੈਰੀ ਕਾਮ, ਸਚਿਨ ਤੇਂਦੁਲਕਰ, ਮਿਲਖਾ ਸਿੰਘ, ਅਜ਼ਹਰ ਵਰਗੇ ਖਿਡਾਰੀਆਂ ਦੀ ਜ਼ਿੰਦਗੀ ਵਿਚ ਝਾਕਣ ਦਾ ਮੌਕਾ ਮਿਲਿਆ। ਹੁਣ ਹਾਕੀ ਦੇ ਸਟਾਰ ਖਿਡਾਰੀ ਸੰਦੀਪ ਸਿੰਘ ਦੀ ਵਾਰੀ ਹੈ। ਇਨ੍ਹਾਂ ਦੀ ਜ਼ਿੰਦਗੀ 'ਤੇ ਨਿਰਦੇਸ਼ਕ ਸ਼ਾਦ ਅਲੀ ਨੇ 'ਸੂਰਮਾ' ਬਣਾਈ ਹੈ। ਪਹਿਲਾਂ 'ਬੰਟੀ ਔਰ ਬਬਲੀ', 'ਸਾਥੀਆ', 'ਝੂਮ ਬਰਾਬਰ ਝੂਮ', 'ਕਿਲ ਦਿਲ' ਤੇ 'ਓ ਕੇ ਜਾਨੂੰ' ਨਿਰਦੇਸ਼ਿਤ ਕਰਨ ਵਾਲੇ ਸ਼ਾਦ ਅਲੀ ਲਈ ਬਾਇਓਪਿਕ ਨਿਰਦੇਸ਼ਿਤ ਕਰਨ ਦਾ ਇਹ ਪਹਿਲਾ ਮੌਕਾ ਹੈ। ਇਥੇ ਦਿਲਜੀਤ ਦੋਸਾਂਝ ਵਲੋਂ ਸੰਦੀਪ ਸਿੰਘ ਦੇ ਕਿਰਦਾਰ ਨੂੰ ਪਰਦੇ 'ਤੇ ਨਿਭਾਇਆ ਗਿਆ ਹੈ ਅਤੇ ਕਿਸੇ ਜਿਊਂਦੇ ਵਿਅਕਤੀ ਦੇ ਕਿਰਦਾਰ ਨੂੰ ਹਿੰਦੀ ਫ਼ਿਲਮ ਦੇ ਪਰਦੇ 'ਤੇ ਪੇਸ਼ ਕਰਨਾ ਉਨ੍ਹਾਂ ਲਈ ਇਹ ਪਹਿਲਾ ਮੌਕਾ ਹੈ। ਸੰਦੀਪ ਸਿੰਘ ਦੀ ਜ਼ਿੰਦਗੀ ਦੀ ਖ਼ਾਸ ਗੱਲ ਇਹ ਰਹੀ ਹੈ ਕਿ ਜਦੋਂ ਉਹ ਵਿਸ਼ਵ ਕੱਪ ਹਾਕੀ ਪ੍ਰਤੀਯੋਗਤਾ ਵਿਚ ਹਿੱਸਾ ਲੈਣ ਲਈ ਆਪਣੇ ਘਰ ਤੋਂ ਦਿੱਲੀ ਜਾ ਰਹੇ ਸਨ ਉਦੋਂ ਗੱਡੀ ਵਿਚ ਉਨ੍ਹਾਂ ਨੂੰ ਗੋਲੀ ਲੱਗ ਗਈ ਸੀ। ਮੌਤ ਨੂੰ ਮਾਤ ਦੇ ਕੇ ਸੰਦੀਪ ਸਿੰਘ ਦੁਬਾਰਾ ਕਿਵੇਂ ਹਾਕੀ ਦੇ ਮੈਦਾਨ ਵਿਚ ਵਾਪਸ ਆਏ ਅਤੇ ਦੇਸ਼ ਦਾ ਨਾਂਅ ਰੌਸ਼ਨ ਕੀਤਾ, ਇਹ ਪ੍ਰੇਰਨਾਦਾਈ ਕਹਾਣੀ ਫ਼ਿਲਮ ਵਿਚ ਪੇਸ਼ ਕੀਤੀ ਗਈ ਹੈ।
ਆਪਣੀ ਜ਼ਿੰਦਗੀ ਦੀ ਇਸ ਪਹਿਲੀ ਬਾਇਓਪਿਕ ਬਾਰੇ ਦਿਲਜੀਤ ਕਹਿੰਦੇ ਹਨ, 'ਜਦੋਂ ਮੈਨੂੰ ਇਸ ਫ਼ਿਲਮ ਦੀ ਪੇਸ਼ਕਸ਼ ਕੀਤੀ ਗਈ ਸੀ, ਉਦੋਂ ਮੈਂ ਨਕਾਰ ਦਿੱਤੀ ਸੀ। ਮੈਂ ਸੋਚਿਆ ਸੀ ਕਿ ਇਸ ਵਿਚ ਹਾਕੀ ਬਾਰੇ ਗੱਲ ਹੋਵੇਗੀ ਅਤੇ ਮੇਰਾ ਹਾਕੀ ਨਾਲ ਕੋਈ ਸਬੰਧ ਵੀ ਨਹੀਂ ਸੀ। ਮੇਰੇ ਪਿਤਾ ਜੀ ਹਾਕੀ ਖੇਡਿਆ ਕਰਦੇ ਸਨ ਪਰ ਮੇਰੀ ਇਸ ਖੇਡ ਵਿਚ ਕੋਈ ਦਿਲਚਸਪੀ ਨਹੀਂ ਸੀ। ਬਚਪਨ ਵਿਚ ਪਿਤਾ ਜੀ ਨੇ ਹਾਕੀ ਲਿਆ ਕੇ ਦਿੱਤੀ ਸੀ ਪਰ ਮੈਂ ਉਸ ਨੂੰ ਇਕ ਵਾਰ ਵੀ ਹੱਥ ਨਹੀਂ ਲਗਾਇਆ ਸੀ ਕਿਉਂਕਿ ਮੇਰੀ ਰੁਚੀ ਹਾਕੀ ਵਿਚ ਨਹੀਂ, ਸੰਗੀਤ ਵਿਚ ਸੀ। ਇਸ ਫ਼ਿਲਮ ਲਈ ਨਾਂਹ ਕਹਿਣ ਲਈ ਮੈਂ ਖ਼ੁਦ ਚੱਲ ਕੇ ਨਿਰਮਾਤਾ ਦੇ ਦਫ਼ਤਰ ਗਿਆ ਸੀ ਪਰ ਜਦੋਂ ਕਿਹਾ ਗਿਆ ਕਿ ਮੈਂ ਇਕ ਵਾਰ ਸਕਰਿਪਟ ਪੜ੍ਹਾਂ ਤਾਂ ਉਨ੍ਹਾਂ ਦਾ ਕਿਹਾ ਮੰਨ ਕੇ ਮੈਂ ਸਕਰਿਪਟ ਪੜ੍ਹੀ। ਜਦੋਂ ਮੈਂ ਪੜ੍ਹੀ ਤਾਂ ਖ਼ੁਦ ਬੜਾ ਸ਼ਰਮਿੰਦਾ ਹੋਇਆ ਕਿ ਇਸ ਮਹਾਨ ਖਿਡਾਰੀ ਦੀ ਜ਼ਿੰਦਗੀ ਵਿਚ ਜੋ ਕੁਝ ਹੋਇਆ, ਉਸ ਤੋਂ ਮੈਂ ਅਣਜਾਣ ਹਾਂ। ਪ੍ਰਾਣਘਾਤਕ ਘਟਨਾ ਤੋਂ ਬਾਅਦ ਮੈਦਾਨ ਵਿਚ ਵਾਪਸ ਆਉਣ ਦਾ ਕਾਰਨਾਮਾ ਕੋਈ ਵਿਰਲਾ ਹੀ ਕਰ ਸਕਦਾ ਹੈ। ਸੰਦੀਪ ਦੀ ਜ਼ਿੰਦਗੀ ਬਾਰੇ ਜਾਣ ਕੇ ਮੈਂ ਉਸ ਦੀ ਵਿੱਲ ਪਾਵਰ ਤੋਂ ਬਹੁਤ ਪ੍ਰਭਾਵਿਤ ਹੋਇਆ ਅਤੇ ਮੈਨੂੰ ਲੱਗਿਆ ਕਿ ਇਸ ਮਹਾਨ ਖਿਡਾਰੀ ਦੀ ਕਹਾਣੀ ਨੂੰ ਲੋਕਾਂ ਤੱਕ ਪਹੁੰਚਾਉਣਾ ਚਾਹੀਦਾ ਹੈ ਅਤੇ ਮੈਂ ਇਹ ਫ਼ਿਲਮ ਕਰਨ ਲਈ ਤਿਆਰ ਹੋ ਗਿਆ।


-ਮੁੰਬਈ ਪ੍ਰਤੀਨਿਧ

'ਉਰੀ' ਫ਼ਿਲਮ ਲਈ ਯਾਮੀ ਦਾ ਨਵਾਂ ਵਾਲਾਂ ਦਾ ਸਟਾਈਲ

ਜਦੋਂ ਰਿਤਿਕ ਰੌਸ਼ਨ 'ਲਕਸ਼ੈ' ਵਿਚ ਫ਼ੌਜੀ ਦੀ ਭੂਮਿਕਾ ਨਿਭਾਅ ਰਹੇ ਸਨ, ਉਦੋਂ ਉਨ੍ਹਾਂ ਨੇ ਆਪਣੇ ਵਾਲ ਛੋਟੇ ਕਰਵਾ ਲਏ ਸਨ। ਉਦੋਂ ਰਿਤਿਕ 'ਤੇ ਇਹ ਪਾਬੰਦੀ ਵੀ ਲਗਾਈ ਗਈ ਸੀ ਕਿ ਫ਼ਿਲਮ ਦੀ ਰਿਲੀਜ਼ ਤੱਕ ਉਹ ਆਪਣਾ ਨਵੇਂ ਵਾਲਾਂ ਦਾ ਸਟਾਈਲ ਜ਼ਾਹਿਰ ਨਹੀਂ ਹੋਣ ਦੇਣਗੇ। ਉਦੋਂ ਉਹ ਟੋਪੀ ਪਾ ਕੇ ਘਰ ਤੋਂ ਬਾਹਰ ਨਿਕਲਿਆ ਕਰਦੇ ਸਨ।
ਹੁਣ ਫ਼ਿਲਮ 'ਉਰੀ' ਲਈ ਯਾਮੀ ਗੌਤਮ ਨੇ ਆਪਣੇ ਵਾਲਾਂ ਦਾ ਸਟਾਈਲ ਬਦਲਿਆ ਹੈ। ਕਿਉਂਕਿ ਯਾਮੀ ਦੀ ਇਸ ਨਵੀਂ ਦਿਖ ਨੂੰ ਲੈ ਕੇ ਕਿਸੇ ਤਰ੍ਹਾਂ ਦੀ ਕੋਈ ਪਾਬੰਦੀ ਨਹੀਂ ਹੈ। ਇਸ ਕਰਕੇ ਉਹ ਆਪਣੀ ਇਸ ਨਵੀਂ ਦਿੱਖ ਨਾਲ ਧੜੱਲੇ ਨਾਲ ਪ੍ਰਚਾਰ ਕਰ ਰਹੀ ਹੈ। ਯਾਮੀ ਇਸ ਫ਼ਿਲਮ ਵਿਚ ਇੰਟੈਲੀਜੈਂਸ ਅਫ਼ਸਰ ਦੀ ਭੂਮਿਕਾ ਨਿਭਾਅ ਰਹੀ ਹੈ ਅਤੇ ਇਸ ਭੂਮਿਕਾ ਨੂੰ ਧਿਆਨ ਵਿਚ ਰੱਖ ਕੇ ਉਸ ਨੇ ਨਵੀਂ ਦਿੱਖ ਅਪਣਾਈ ਹੈ।
ਇਸ ਭੂਮਿਕਾ ਬਾਰੇ ਯਾਮੀ ਕਹਿੰਦੀ ਹੈ, 'ਮੈਨੂੰ ਹਰ ਫ਼ਿਲਮ ਦੇ ਨਾਲ ਨਵਾਂ ਤਜਰਬਾ ਕਰਨਾ ਪਸੰਦ ਹੈ। 'ਵਿੱਕੀ ਡੋਨਰ', 'ਕਾਬਿਲ' ਤੇ ਹੋਰ ਫ਼ਿਲਮਾਂ ਵਿਚ ਮੈਂ ਕੁਝ ਨਾ ਕੁਝ ਨਵਾਂ ਕੀਤਾ ਸੀ। ਇਥੇ ਮੈਂ ਆਪਣੇ ਵਾਲਾਂ ਦੇ ਨਾਲ ਨਵਾਂ ਤਜਰਬਾ ਕੀਤਾ ਹੈ। ਉਂਝ ਫ਼ਿਲਮ ਦੇ ਨਿਰਦੇਸ਼ਕ ਆਦਿਤਿਆ ਧਰ ਦਾ ਵੀ ਸੁਝਾਅ ਸੀ ਕਿ ਇਥੇ ਮੈਂ ਆਪਣੇ ਕਿਰਦਾਰ ਲਈ ਕੁਝ ਨਵਾਂਪਣ ਪੇਸ਼ ਕਰਾਂ। ਨਵੇਂ ਵਾਲਾਂ ਦੇ ਸਟਾਈਲ ਦਾ ਵਿਚਾਰ ਉਸ ਨੂੰ ਵੀ ਪਸੰਦ ਆਇਆ ਅਤੇ ਮੈਨੂੰ ਇਸ ਗੱਲ ਦੀ ਵੀ ਖੁਸ਼ੀ ਹੈ ਕਿ ਮੇਰੀ ਇਹ ਨਵੀਂ ਦਿੱਖ ਪਸੰਦ ਆਈ ਹੈ।' ਇਸ ਫ਼ਿਲਮ ਦੀ ਕਹਾਣੀ ਸਾਲ 2016 ਵਿਚ ਹੋਏ ਉਰੀ ਹਮਲੇ 'ਤੇ ਆਧਾਰਿਤ ਹੈ। ਕਸ਼ਮੀਰ ਦੇ ਸਰਹੱਦੀ ਇਲਾਕਿਆਂ ਵਿਚ ਸ਼ੂਟਿੰਗ ਕਰਨਾ ਸੰਭਵ ਨਹੀਂ, ਇਸ ਲਈ ਇਸ ਫ਼ਿਲਮ ਦੇ ਮੁੱਖ ਦ੍ਰਿਸ਼ਾਂ ਦੀ ਸ਼ੂਟਿੰਗ ਸਰਬੀਆ ਵਿਚ ਕੀਤੀ ਜਾਵੇਗੀ।

ਪਾਇਲਟ ਤੋਂ ਬੜੇ ਪਾਪਾ ਤੱਕ ਜਿੱਤਪ੍ਰੀਤ ਸਿੰਘ ਗਿੱਲ

ਜਲੰਧਰ ਸ਼ਹਿਰ ਦੇ ਨਾਲ ਲਗਦੇ ਕਸਬਾ ਰਾਮਾਮੰਡੀ ਦੇ ਰਹਿਣ ਵਾਲੇ ਜਿੱਤਪ੍ਰੀਤ ਸਿੰਘ ਗਿੱਲ ਇਕ ਖੁਸ਼ਹਾਲ ਜਿਮੀਂਦਾਰ ਪਰਿਵਾਰ ਨਾਲ ਸਬੰਧਤ ਹਨ ਜਿਨ੍ਹਾਂ ਨੇ ਆਪਣੀ ਮੁਢਲੀ ਸਿੱਖਿਆ ਜੂਨੀਅਰ ਮਾਡਲ ਸਕੂਲ ਲਾਡੋਵਾਲੀ ਰੋਡ ਜਲੰਧਰ ਤੋਂ ਪ੍ਰਾਪਤ ਕੀਤੀ ਹੈ ਅਤੇ ਗ੍ਰੈਜੂਏਸ਼ਨ ਜਲੰਧਰ ਦੇ ਲਾਇਲਪੁਰ ਖ਼ਾਲਸਾ ਕਾਲਜ ਤੋਂ ਪੂਰੀ ਕੀਤੀ। ਇਸ ਤੋਂ ਬਾਅਦ ਲੜਾਕੂ ਜਹਾਜ਼ਾਂ ਦੇ ਪਾਇਲਟ ਵਜੋਂ ਭਾਰਤੀ ਏਅਰ ਫੋਰਸ 'ਚ ਨੌਕਰੀ ਕੀਤੀ। ਰਿਟਾਇਰਮੈਂਟ ਤੋਂ ਬਾਅਦ ਉਨ੍ਹਾਂ ਖੇਤੀਬਾੜੀ ਦੇ ਨਾਲ-ਨਾਲ ਰੈਡੀਮੇਡ ਕੱਪੜਿਆਂ ਦਾ ਕਾਰੋਬਾਰ ਸ਼ੁਰੂ ਕੀਤਾ। ਜਿਸ ਨੂੰ ਉਨ੍ਹਾਂ ਨੇ ਸਫ਼ਲਤਾ ਨਾਲ ਚਲਾਇਆ। ਪਰ ਇਸ ਸਾਰੇ ਸਮੇਂ ਦੌਰਾਨ ਉਨ੍ਹਾਂ ਦੇ ਅੰਦਰਲਾ ਕਲਾਕਾਰ ਖਾਮੋਸ਼ ਆਪਣੀਆਂ ਸਰਗਰਮੀਆਂ ਵਿਚ ਲੱਗਾ ਰਿਹਾ ਅਤੇ ਉਨ੍ਹਾਂ ਦੇ ਅੰਦਰ ਛਿਪੀ ਪ੍ਰਤਿਭਾ ਨੂੰ ਬਾਹਰ ਆਉਣ ਦਾ ਮੌਕਾ ਨਹੀਂ ਮਿਲਿਆ। ਫਿਰ ਇਕ ਦਿਨ ਅਚਾਨਕ ਨਿਰਦੇਸ਼ਕ ਸ਼ਸ਼ਾਂਕ ਘੋਸ਼ ਨਾਲ ਮੁਲਾਕਾਤ ਹੋਈ। ਉਨ੍ਹਾਂ ਨੇ ਉਨ੍ਹਾਂ ਦੇ ਅੰਦਰਲੇ ਕਲਾਕਾਰ ਨੂੰ ਪਹਿਚਾਣਿਆ ਅਤੇ ਫ਼ਿਲਮ 'ਵੀਰੇ ਦੀ ਵੈਡਿੰਗ' ਵਿਚ ਬੜੇ ਪਾਪਾ ਦੇ ਰੋਲ ਦੀ ਪੇਸ਼ਕਸ਼ ਕੀਤੀ, ਜੋ ਉਨ੍ਹਾਂ ਖ਼ੁਸ਼ੀ ਨਾਲ ਸਵੀਕਾਰ ਕਰ ਲਈ। ਇਸ ਤਰ੍ਹਾਂ ਐਕਟਿੰਗ ਦੇ ਖੇਤਰ ਵਿਚ ਉਨ੍ਹਾਂ ਦਾ ਦਾਖਲਾ ਹੋ ਗਿਆ। ਉਨ੍ਹਾਂ ਕਿਹਾ ਕਿ ਅੱਜ ਉਹ ਕਈ ਟੀ.ਵੀ. ਸੀਰੀਅਲਾਂ ਤੋਂ ਇਲਾਵਾ ਕਈ ਫ਼ਿਲਮਾਂ 'ਚ ਵੀ ਕੰਮ ਕਰ ਰਿਹਾ ਹੈ। ਉਨ੍ਹਾਂ ਹੋਰ ਦੱਸਿਆ ਕਿ ਉਨ੍ਹਾਂ ਦਾ ਝੁਕਾਅ ਅਦਾਕਾਰੀ ਦੇ ਨਾਲ-ਨਾਲ ਸੰਗੀਤ ਵੱਲ ਵੀ ਬਹੁਤ ਜ਼ਿਆਦਾ ਹੈ। ਉਨ੍ਹਾਂ ਕਿਹਾ ਕਿ ਉਹ ਅੱਜ ਵੀ ਦਰੱਖਤਾਂ ਦੇ ਪੱਤਿਆਂ ਤੋਂ ਕਈ ਤਰ੍ਹਾਂ ਦੀਆਂ ਧੁਨਾਂ ਕੱਢ ਲੈਂਦੇ ਹਨ। ਉਨ੍ਹਾਂ ਕਿਹਾ ਕਿ ਜੇਕਰ ਉਹ ਪਾਇਲਟ ਨਾ ਬਣਦੇ ਤਾਂ ਜ਼ਰੂਰ ਨਿਰਦੇਸ਼ਕ ਹੁੰਦੇ।

ਅੱਜ ਬਰਸੀ 'ਤੇ ਵਿਸੇਸ਼

ਸੱਚਮੁੱਚ ਪੰਜਾਬ ਦੀ ਕੋਇਲ ਸੀ ਸੁਰਿੰਦਰ ਕੌਰ

ਅਗਸਤ 1943 ਵਿਚ ਸੁਰਿੰਦਰ ਕੌਰ ਨੇ 12 ਸਾਲ ਦੀ ਉਮਰ ਵਿਚ ਪਹਿਲੀ ਵਾਰ ਲਾਹੌਰ ਰੇਡੀਓ 'ਤੇ ਗਾਇਆ। ਇਸ ਉਪਰੰਤ ਉਸੇ ਸਾਲ ਹੀ 31 ਅਗਸਤ ਨੂੰ ਐਚ ਐਮ ਵੀ ਕੰਪਨੀ ਨੇ ਦੋਵਾਂ ਭੈਣਾਂ ਦੀ ਆਵਾਜ਼ ਵਿਚ ਪਹਿਲਾ ਗੀਤ ਮਾਵਾਂ ਤੇ ਧੀਆਂ ਰਲ ਬੈਠੀਆਂ, ਰਿਕਾਰਡ ਕੀਤਾ ਜਿਸ ਨੂੰ ਪੰਜਾਬੀਆਂ ਨੇ ਖ਼ੂਬ ਪਸੰਦ ਕੀਤਾ। ਉਨ੍ਹਾਂ ਨੇ ਪੰਜਾਬੀ ਗਾਇਕੀ ਦੇ ਨਾਲ਼-ਨਾਲ਼ ਹਿੰਦੀ ਫ਼ਿਲਮ ਇੰਡਸਟਰੀ ਵਿਚ ਵੀ ਪਿੱਠਵਰਤੀ ਗਾਇਕਾ ਦੇ ਤੌਰ 'ਤੇ ਕੁਝ ਚਿਰ ਕੰਮ ਕੀਤਾ ਅਤੇ 1949 ਵਿਚ ਹਿੰਦੀ ਦੀ ਮਸ਼ਹੂਰ ਫ਼ਿਲਮ 'ਸ਼ਹੀਦ' ਲਈ ਉਨ੍ਹਾਂ ਦਾ ਬਹੁਤ ਹੀ ਯਾਦਗਾਰੀ ਗੀਤ 'ਬਦਨਾਮ ਨਾ ਹੋ ਜਾਏ ਮੁਹੱਬਤ ਕਾ ਫਸਾਨਾ' ਰਿਕਾਰਡ ਹੋਇਆ।
ਜਦੋਂ ਸੁਰਿੰਦਰ ਕੌਰ ਦੀ ਪੂਰੀ ਚੜ੍ਹਾਈ ਸੀ ਤਾਂ ਪਰਿਵਾਰ ਨੇ ਉਸ ਨੂੰ ਸੰਨ 1952 'ਚ ਵਾਪਸ ਦਿੱਲੀ ਬੁਲਾ ਲਿਆ। ਵਾਪਸ ਪਰਤਣ 'ਤੇ ਸੁਰਿੰਦਰ ਕੌਰ ਦਾ ਵਿਆਹ ਦਿੱਲੀ ਯੂਨੀਵਰਸਿਟੀ ਵਿਚ ਪੰਜਾਬੀ ਸਾਹਿਤ ਦੇ ਲੈਕਚਰਾਰ ਜੋਗਿੰਦਰ ਸਿੰਘ ਸੋਢੀ ਨਾਲ ਕਰ ਦਿੱਤਾ ਗਿਆ। ਸੁਰਿੰਦਰ ਕੌਰ ਦਾ ਪਤੀ ਸੋਢੀ ਵੀ ਕਲਾ ਖੇਤਰ ਦਾ ਮੁਰੀਦ ਸੀ। ਦੋਵਾਂ ਦੀ ਆਪੋ-ਆਪਣੇ ਕਲਾ ਦੇ ਖੇਤਰ 'ਚ ਪਕੜ ਸੀ, ਦੋਵਾਂ ਨੇ ਇਕ ਦੂਜੇ ਦਾ ਪੂਰਾ ਸਾਥ ਦਿੱਤਾ । ਉਨ੍ਹਾਂ ਦੇ ਘਰ ਤਿੰਨ ਲੜਕੀਆਂ ਨੇ ਜਨਮ ਲਿਆ, ਜਿਨ੍ਹਾਂ ਵਿਚੋਂ ਵੱਡੀ ਡੌਲੀ ਗੁਲੇਰੀਆ ਪੰਜਾਬੀ ਦੀ ਨਾਮਵਰ ਗਾਇਕਾ ਹੈ। ਜੇਕਰ ਸੁਰਿੰਦਰ ਕੌਰ ਵਲੋਂ ਗਾਏ ਗੀਤਾਂ ਦੀ ਗੱਲ ਕੀਤੀ ਜਾਵੇ ਤਾਂ ਸਾਰੇ ਗੀਤਾਂ ਦਾ ਜ਼ਿਕਰ ਕਰਨਾ ਕਾਫੀ ਕਠਿਨ ਕੰਮ ਹੈ । ਉਸ ਦੇ ਕੁਝ ਕਿ ਗੀਤਾਂ ਦਾ ਜ਼ਿਕਰ ਜ਼ਰੂਰ ਕਰਾਂਗੇ ਜਿਸ ਨਾਲ ਉਸ ਦੀ ਪਛਾਣ ਬਣੀ।
* ਚੰਨ ਕਿਥਾਂ ਗੁਜ਼ਾਰੀ ਅਈ ਰਾਤ ਵੇ, * ਲੱਠੇ ਦੀ ਚਾਦਰ, * ਸ਼ੌਂਕਣ ਮੇਲੇ ਦੀ, * ਗੋਰੀ ਦੀਆਂ ਝਾਂਜਰਾਂ, * ਸੜਕੇ-ਸੜਕੇ ਜਾਂਦੀਏ ਮੁਟਿਆਰੇ ਨੀ, * ਮਾਵਾਂ ਤੇ ਧੀਆਂ, * ਜੁੱਤੀ ਕਸੂਰੀ ਪੈਰੀਂ ਨਾ ਪੂਰੀ, * ਮਧਾਣੀਆਂ, * ਇਨ੍ਹਾਂ ਅੱਖੀਆਂ 'ਚ ਪਾਵਾਂ ਕਿਵੇਂ ਕਜਲਾ, * ਗ਼ਮਾਂ ਦੀ ਰਾਤ ਲੰਮੀ ਏ, * ਸੂਹੇ ਵੇ ਚੀਰੇ ਵਾਲਿਆ, * ਚੰਨ ਵੇ ਕਿ ਸ਼ੌਂਕਣ ਮੇਲੇ ਦੀ, * ਤੇਰਾ ਮੁੰਡਾ ਨਿਰਾ ਸਨਿਚਰ ਈ (ਆਸਾ ਸਿੰਘ ਮਸਤਾਨਾ)
ਸਦਾ ਬਹਾਰ ਗੀਤਾਂ ਦੀ ਗਾਇਕਾ ਨੇ ਬਾਬਾ ਬੁਲ੍ਹੇ ਸ਼ਾਹ ਦੀਆਂ ਕਾਫ਼ੀਆਂ ਤੋਂ ਇਲਾਵਾ ਨੰਦ ਲਾਲ ਨੂਰਪੁਰੀ, ਅਮ੍ਰਿਤਾ ਪ੍ਰੀਤਮ, ਮੋਹਨ ਸਿੰਘ ਅਤੇ ਸ਼ਿਵ ਕੁਮਾਰ ਬਟਾਲਵੀ ਦੇ ਗੀਤਾਂ ਨੂੰ ਵੀ ਰੂਹ ਨਾਲ ਗਾਇਆ। ਸ਼ਿਵ ਕੁਮਾਰ ਬਟਾਲਵੀ ਦਾ ਲਿਖਿਆ ਗੀਤ 'ਇਕ ਮੇਰੀ ਅੱਖ ਕਾਸ਼ਨੀ ਦੂਜਾ ਰਾਤ ਤੇ ਉਨੀਂਦਰੇ ਨੇ ਮਾਰਿਆ' ਅੱਜ ਵੀ ਚਾਅ ਨਾਲ ਸੁਣਿਆ ਜਾਂਦਾ ਹੈ।
ਆਸਾ ਸਿੰਘ ਮਸਤਾਨਾ, ਕਰਨੈਲ ਗਿੱਲ, ਹਰਚਰਨ ਗਰੇਵਾਲ, ਰੰਗੀਲਾ ਜੱਟ ਅਤੇ ਦੀਦਾਰ ਸੰਧੂ ਨਾਲ ਦੋ-ਗਾਣਿਆਂ ਸਮੇਤ 2000 ਤੋਂ ਵਧੇਰੇ ਗੀਤ ਰਿਕਾਰਡ ਕਰਵਾਉਣ ਵਾਲੀ ਅਤੇ ਕਈ ਮੁਲਕਾਂ ਦੇ ਸਫਲ ਟੂਰ ਲਾਉਣ ਵਾਲੀ ਸੁਰਿੰਦਰ ਕੌਰ ਦੇ ਗੀਤਾਂ ਦੀ ਉਦੋਂ ਲੈਅ ਹੀ ਬਦਲ ਗਈ, ਜਦ 1975 ਵਿਚ ਉਸ ਦੇ ਪਤੀ ਜੋਗਿੰਦਰ ਸਿੰਘ ਸੋਢੀ ਵਿਛੋੜਾ ਦੇ ਗਏ। ਪਤੀ ਦੀ ਮੌਤ ਤੋਂ ਬਾਅਦ ਉਹ ਕਾਫੀ ਟੁੱਟ ਚੁੱਕੀ ਸੀ ਪਰ ਉਹ ਕਸੀਸ ਵੱਟ ਇਨ੍ਹਾਂ ਹਾਲਾਤ ਵਿਚ ਵੀ ਆਪਣੀ ਬੇਟੀ ਰੁਪਿੰਦਰ ਕੌਰ (ਡੌਲੀ ਗੁਲੇਰੀਆ) ਅਤੇ ਦੋਹਤੀ ਸੁਨੈਨਾ ਨਾਲ ਮਿਲ ਕੇ ਗਾਉਂਦੇ ਰਹੇ। ਸੁਰਿੰਦਰ ਕੌਰ ਨੇ ਆਪਣੀ ਧੀ ਅਤੇ ਦੋਹਤੀ ਨਾਲ ਮਿਲ ਕੇ 'ਥ੍ਰੀ ਜਨਰੇਸ਼ਨਜ਼' ਨਾਂਅ ਦੀ ਐਲਬਮ ਕੱਢੀ ਜੋ 1995 ਵਿਚ ਰਿਲੀਜ਼ ਹੋਈ।
ਪੰਜਾਬ ਦੀ ਕੋਇਲ ਸੁਰਿੰਦਰ ਕੌਰ ਨੂੰ ਆਪਣੀ ਗਾਇਕੀ ਦੇ ਖੇਤਰ 'ਚ ਪਾਏ ਯੋਗਦਾਨ ਕਰਕੇ ਭਾਰਤ ਸਰਕਾਰ ਵਲੋਂ ਸੰਗੀਤ ਨਾਟਕ ਅਕੈਡਮੀ ਐਵਾਰਡ (1984), ਮਿਲੇਨੀਅਮ ਪੰਜਾਬੀ ਸਿੰਗਰ ਐਵਾਰਡ, ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਵਲੋਂ ਡਾਕਟਰੇਟ ਦੀ ਡਿਗਰੀ (2002), ਇੰਡੀਅਨ ਨੈਸ਼ਨਲ ਅਕੈਡਮੀ ਸੰਗੀਤ ਡਾਂਸ ਵਰਗੇ ਐਵਾਰਡਾਂ ਨਾਲ ਸਨਮਾਨਿਤ ਕੀਤਾ ਗਿਆ। ਸੁਰਿੰਦਰ ਕੌਰ ਨੇ ਇੱਕ ਵਾਰ ਕਿਹਾ ਸੀ, ਜੋ ਪਿਆਰ ਮੇਰੇ ਗੀਤਾਂ ਨੂੰ ਪੰਜਾਬੀਆਂ ਨੇ ਦਿੱਤਾ ਏ ਇਹ ਮੇਰੇ ਮਰਨ ਮਗਰੋਂ ਵੀ ਮੈਨੂੰ ਜਿਊਂਦਾ ਰੱਖੇਗਾ।
2006 ਵਿਚ ਉਨ੍ਹਾਂ ਨੂੰ ਇਲਾਜ ਲਈ ਅਮਰੀਕਾ ਵਿਖੇ ਰਹਿੰਦੀਆਂ ਆਪਣੀਆਂ ਧੀਆਂ ਕੋਲ ਜਾਣਾ ਪਿਆ, ਜਿੱਥੇ ਹਸਪਤਾਲ ਵਿਚ ਹੀ ਪੰਜਾਬ ਦੀ ਇਸ ਮਹਾਨ ਗਾਇਕਾ ਨੇ 15 ਜੂਨ 2006 ਨੂੰ ਆਖ਼ਰੀ ਸਾਹ ਲਿਆ। ਭਾਵੇਂ ਅੱਜ ਸੁਰਿੰਦਰ ਕੌਰ ਸਾਡੇ ਵਿਚ ਜਿਸਮਾਨੀ ਤੌਰ 'ਤੇ ਨਹੀਂ ਰਹੇ ਪਰ ਸਾਡੇ ਦਿਲਾਂ ਵਿਚੋਂ ਦੂਰ ਨਹੀਂ ਗਏ। ਸੁਰਿੰਦਰ ਕੌਰ ਦੇ ਗਾਏ ਗੀਤ ਸਾਡੇ ਪੰਜਾਬੀ ਸੰਗੀਤ ਜਗਤ ਵਿਚ ਸਦਾ ਗੂੰਜਦੇ ਰਹਿਣਗੇ।


- ਅਵਤਾਰ ਸਿੰਘ ਆਨੰਦ
ਪਿੰਡ ਹੁਸ਼ਿਆਰ ਨਗਰ , ਜ਼ਿਲ੍ਹਾ ਅੰਮ੍ਰਿਤਸਰ।

ਪਹਿਲਾਂ ਕਦੀ ਮੱਖੀ ਵੀ ਨਹੀਂ ਮਾਰੀ ਸੀ : ਸਾਕਿਬ ਸਲੀਮ

'ਮੁਝਸੇ ਫ੍ਰੈਂਡਸ਼ਿਪ ਕਰੋਗੇ', 'ਮੇਰੇ ਡੈਡ ਕੀ ਮਾਰੂਤੀ', 'ਦੋਬਾਰਾ', 'ਦਿਲ ਜੰਗਲੀ' ਆਦਿ ਫ਼ਿਲਮਾਂ ਕਰਨ ਵਾਲੇ ਦਿੱਲੀ ਦੇ ਮੁੰਡੇ ਸਾਕਿਬ ਸਲੀਮ ਦੀ ਜ਼ਿੰਦਗੀ ਵਿਚ 'ਰੇਸ-3' ਦੀ ਬਦੌਲਤ ਨਵਾਂ ਮੋੜ ਆਇਆ ਹੈ। ਸਲਮਾਨ ਖ਼ਾਨ, ਬੌਬੀ ਦਿਓਲ, ਅਨਿਲ ਕਪੂਰ ਵਰਗੇ ਸਿਤਾਰਿਆਂ ਨਾਲ ਸਾਕਿਬ ਨੂੰ ਇਸ ਫ਼ਿਲਮ ਵਿਚ ਚਮਕਾਇਆ ਗਿਆ ਹੈ ਅਤੇ ਉਨ੍ਹਾਂ ਨੂੰ ਵਿਸ਼ਵਾਸ ਹੈ ਕਿ ਇਹ ਫ਼ਿਲਮ ਉਨ੍ਹਾਂ ਨੂੰ ਨਵੀਂ ਪਹਿਚਾਣ ਦਿਵਾਉਣ ਵਿਚ ਕਾਰਗਰ ਸਿੱਧ ਹੋਵੇਗੀ।
ਇਹ ਫ਼ਿਲਮ ਕਿਵੇਂ ਮਿਲੀ ਇਸ ਬਾਰੇ ਸਾਕਿਬ ਕਹਿੰਦੇ ਹਨ, 'ਮੈਂ ਸਟਾਰ ਕ੍ਰਿਕਟ ਟੂਰਨਾਮੈਂਟ ਦੇ ਸਿਲਸਿਲੇ ਵਿਚ ਗੋਆ ਗਿਆ ਸੀ। ਉਥੇ ਬੌਬੀ ਦਿਓਲ ਵੀ ਸਨ। ਜਦੋਂ ਅਸੀਂ ਵਾਪਸ ਆ ਰਹੇ ਸੀ ਉਦੋਂ ਏਅਰਪੋਰਟ 'ਤੇ ਗੱਲਾਂ-ਗੱਲਾਂ ਵਿਚ ਬੌਬੀ ਨੇ ਦੱਸਿਆ ਕਿ ਉਹ 'ਰੇਸ-3' ਵਿਚ ਕੰਮ ਕਰਨ ਜਾ ਰਹੇ ਹਨ। ਮੈਂ ਖੁਸ਼ੀ ਜ਼ਾਹਿਰ ਕੀਤੀ, ਨਾਲ ਹੀ ਸ਼ੁੱਭਕਾਮਨਾਵਾਂ ਵੀ ਦਿੱਤੀਆਂ। ਉਸੇ ਸ਼ਾਮ ਪੰਜ ਵਜੇ ਮੈਨੂੰ ਨਿਰਮਾਤਾ ਰਮੇਸ਼ ਤੌਰਾਨੀ ਦਾ ਫ਼ੋਨ ਆਇਆ। ਦੋ ਸਾਲ ਪਹਿਲਾਂ ਉਹ ਮੈਨੂੰ ਲੈ ਕੇ ਇਕ ਸਪੈਨਿਸ਼ ਫ਼ਿਲਮ ਦੀ ਰੀਮੇਕ ਬਣਾਉਣਾ ਚਾਹੁੰਦੇ ਸਨ ਪਰ ਗੱਲ ਅੱਗੇ ਨਹੀਂ ਵਧ ਸਕੀ ਸੀ। ਮੈਂ ਸੋਚਿਆ ਕਿ ਸ਼ਾਇਦ ਉਸੇ ਫ਼ਿਲਮ ਦੇ ਸਿਲਸਿਲੇ ਵਿਚ ਫੋਨ ਹੋਵੇਗਾ। ਉਨ੍ਹਾਂ ਨੇ ਦਫ਼ਤਰ ਆ ਕੇ ਮਿਲਣ ਨੂੰ ਕਿਹਾ ਅਤੇ ਮੈਂ ਕਹਿ ਦਿੱਤਾ ਕਿ ਕਲ੍ਹ ਆ ਕੇ ਮਿਲਦਾ ਹਾਂ। ਬਾਅਦ ਵਿਚ ਸਲਮਾਨ ਖ਼ਾਨ ਦਾ ਫੋਨ ਆਇਆ ਅਤੇ ਦੱਸਿਆ ਕਿ ਤੈਨੂੰ 'ਰੇਸ-3' ਦੀ ਪੇਸ਼ਕਸ਼ ਹੋ ਰਹੀ ਹੈ। ਅਗਲੇ ਦਿਨ ਜਦੋਂ ਮੈਂ ਰਮੇਸ਼ ਜੀ ਨੂੰ ਮਿਲਿਆ ਤਾਂ ਉਨ੍ਹਾਂ ਨੇ ਇਸ ਫ਼ਿਲਮ ਦੀ ਪੇਸ਼ਕਸ਼ ਕੀਤੀ ਅਤੇ ਇਸ ਤਰ੍ਹਾਂ ਮੈਂ ਇਸ ਫ਼ਿਲਮ ਦਾ ਹਿੱਸਾ ਬਣ ਗਿਆ। ਜਦੋਂ ਮੈਂ ਦਿੱਲੀ ਵਿਚ ਸੀ ਉਦੋਂ ਮੈਂ ਥੀਏਟਰ ਵਿਚ ਜਾ ਕੇ 'ਰੇਸ' ਦੇਖੀ ਸੀ ਪਰ ਉਦੋਂ ਸੁਪਨੇ ਵਿਚ ਵੀ ਨਹੀਂ ਸੋਚਿਆ ਸੀ ਕਿ ਇਸ ਦੇ ਤੀਜੇ ਹਿੱਸੇ ਵਿਚ ਮੈਂ ਹੋਵਾਂਗਾ। ਇਹ ਨਸੀਬ ਦੀ ਖੇਡ ਹੈ।
ਇਸ ਵੱਡੇ ਬਜਟ ਵਾਲੀ ਫ਼ਿਲਮ ਵਿਚ ਆਪਣੀ ਭੂਮਿਕਾ ਬਾਰੇ ਸਾਕਿਬ ਕਹਿੰਦੇ ਹਨ, 'ਇਥੇ ਮੇਰਾ ਕਿਰਦਾਰ ਗ੍ਰੇਅ ਸ਼ੇਡਸ ਵਾਲਾ ਹੈ। ਇਸ ਤਰ੍ਹਾਂ ਦੀ ਭੂਮਿਕਾ ਪਹਿਲਾਂ ਕਦੀ ਨਹੀਂ ਕੀਤੀ। ਪਹਿਲੀਆਂ ਕੁਝ ਫ਼ਿਲਮਾਂ ਵਿਚ ਸੰਸਕਾਰੀ ਮੁੰਡੇ ਦੀ ਭੂਮਿਕਾ ਨਿਭਾਈ। ਉਦੋਂ ਪਰਦੇ 'ਤੇ ਪਹਿਲਾਂ ਕਦੀ ਮੱਖੀ ਵੀ ਨਹੀਂ ਮਾਰੀ ਸੀ ਜਦੋਂ ਕਿ ਇਥੇ ਦੋਵਾਂ ਹੱਥਾਂ ਵਿਚ ਬੰਦੂਕ ਫੜ ਕੇ ਤਬਾਹੀ ਮਚਾਉਂਦਾ ਫਿਰਦਾ ਹਾਂ। ਦੋਵੇਂ 'ਰੇਸ' ਦੀ ਤਰ੍ਹਾਂ ਇਥੇ ਵੀ ਕਿਰਦਾਰਾਂ ਦਾ ਰੰਗ ਬਦਲਦਾ ਰਹਿੰਦਾ ਹੈ। ਇਸ ਤਰ੍ਹਾਂ ਦੀ ਭੂਮਿਕਾ ਕਰਨਾ ਚੁਣੌਤੀਪੂਰਨ ਰਿਹਾ।


-ਮੁੰਬਈ ਪ੍ਰਤੀਨਿਧ

ਬੀਤੇ ਦੀ ਪੈੜ

'ਕਿਆਮਤ...' ਹਮੇਸ਼ਾ ਮੇਰੇ ਦਿਲ ਦੇ ਨੇੜੇ ਰਹੇਗੀ : ਆਮਿਰ ਖਾਨ

(ਲੜੀ ਜੋੜਨ ਲਈ ਪਿਛਲੇ ਸ਼ੁੱਕਰਵਾਰ ਦਾ ਅੰਕ ਦੇਖੋ)
ਆਖਿਰ ਮੁੰਬਈ ਟੈਰੇਟਰੀ ਵਿਚ ਅਸੀਂ ਖ਼ੁਦ ਇਸ ਨੂੰ ਰਿਲੀਜ਼ ਕਰਨ ਦਾ ਨਿਰਣਾ ਲਿਆ ਅਤੇ ਨਾਮੀ ਵਿਤਰਕ ਸ਼ਿੰਗਾਰ ਫ਼ਿਲਮਜ਼ ਨੂੰ ਕਮਿਸ਼ਨ ਦੇ ਆਧਾਰ 'ਤੇ ਰਿਲੀਜ਼ ਕਰਨ ਨੂੰ ਦੇ ਦਿੱਤੀ। ਅਸੀਂ ਜਾਣਦੇ ਸੀ ਕਿ ਜੇਕਰ ਸਾਡੀ ਫ਼ਿਲਮ ਕਿਸੇ ਵੱਡੀ ਫ਼ਿਲਮ ਦੇ ਸਾਹਮਣੇ ਰਿਲੀਜ਼ ਹੋਵੇਗੀ ਤਾਂ ਇਹ ਫੁੱਟਬਾਲ ਦੀ ਤਰ੍ਹਾਂ ਉੱਡ ਜਾਵੇਗੀ। ਇਸ ਵਜ੍ਹਾ ਕਰਕੇ ਅਸੀਂ ਉਹ ਸਮਾਂ ਚੁਣਿਆ ਜਦੋਂ ਵੱਡੀ ਫ਼ਿਲਮ ਰਿਲੀਜ਼ ਨਹੀਂ ਹੁੰਦੀ ਹੈ। ਰਮਜ਼ਾਨ ਦੇ ਮਹੀਨੇ ਨੂੰ ਬਾਲੀਵੁੱਡ ਵਿਚ 'ਡਲ ਪੀਰੀਅਡ' ਮੰਨਿਆ ਜਾਂਦਾ ਹੈ। ਉਦੋਂ ਵੱਡੀਆਂ ਫ਼ਿਲਮਾਂ ਨਹੀਂ ਆਉਂਦੀਆਂ। ਸੋ, ਅਸੀਂ ਰਮਜ਼ਾਨ ਤੋਂ ਪਹਿਲੇ ਸ਼ੁੱਕਰਵਾਰ ਨੂੰ ਇਹ ਰਿਲੀਜ਼ ਕੀਤੀ। ਸਾਡੇ ਕੋਲ ਇਕ ਮਹੀਨੇ ਦਾ 'ਕਲੀਅਰ ਪੀਰੀਅਡ' ਸੀ। ਫ਼ਿਲਮ ਦੂਜੇ ਤੇ ਤੀਜੇ ਹਫ਼ਤੀੇ ਵਿਚ ਠੰਢੀ ਰਹੀ। ਉਦੋਂ ਲੱਗਿਆ ਕਿ ਫ਼ਿਲਮ ਦੀ ਜ਼ਿੰਦਗੀ ਪੂਰੀ ਹੋ ਗਈ ਹੈ ਪਰ ਚੌਥੇ ਹਫ਼ਤੇ ਵਿਚ ਜਦੋਂ ਭੀੜ ਆਉਣ ਲੱਗੀ ਤਾਂ ਫਿਰ ਤਾਂ ਥਾਂ-ਥਾਂ ਹਾਊਸ-ਫੁੱਲ ਦੇ ਬੋਰਡ ਝੂਲਣ ਲੱਗੇ। ਇਸ ਫ਼ਿਲਮ ਨੇ ਮੈਨੂੰ ਸਟਾਰ ਬਣਾ ਦਿੱਤਾ। ਇਸ ਵਜ੍ਹਾ ਕਰਕੇ ਇਹ ਹਮੇਸ਼ਾ ਮੇਰੇ ਦਿਲ ਦੇ ਨੇੜੇ ਰਹੇਗੀ।'
ਇਸ ਫ਼ਿਲਮ ਦੀ ਸਫਲਤਾ ਤੋਂ ਬਾਅਦ ਵੀ ਆਮਿਰ ਲਈ ਸਫ਼ਲਤਾ ਦਾ ਰਸਤਾ ਕੰਡਿਆਂ ਭਰਿਆ ਰਿਹਾ ਸੀ।
(ਬਾਕੀ ਅਗਲੇ ਸ਼ੁੱਕਰਵਾਰ ਦੇ ਅੰਕ 'ਚ)


-ਪੰਨੂੰ






Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX