ਤਾਜਾ ਖ਼ਬਰਾਂ


ਗੁਜਰਾਤ 'ਚ ਬੀ. ਐੱਸ. ਐੱਫ. ਨੇ ਪਾਕਿਸਤਾਨੀ ਨਾਗਰਿਕ ਨੂੰ ਕੀਤਾ ਗ੍ਰਿਫ਼ਤਾਰ
. . .  0 minutes ago
ਨਵੀਂ ਦਿੱਲੀ, 26 ਮਾਰਚ- ਗੁਜਰਾਤ 'ਚ ਭਾਰਤ-ਪਾਕਿਸਤਾਨ ਸਰਹੱਦ 'ਤੇ ਅੱਜ ਬੀ. ਐੱਸ. ਐੱਫ. ਨੇ ਇੱਕ ਪਾਕਿਸਤਾਨੀ ਨਾਗਰਿਕ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਫੜੇ ਗਏ ਪਾਕਿਸਤਾਨੀ ਨਾਗਰਿਕ ਦੀ ਪਹਿਚਾਣ 35 ਸਾਲਾ ਮੁਹੰਮਦ ਅਲੀ ਦੇ ਰੂਪ 'ਚ...
ਇਸਲਾਮਾਬਾਦ ਹਾਈਕੋਰਟ ਦਾ ਹੁਕਮ- ਅਗਵਾ ਹਿੰਦੂ ਲੜਕੀਆਂ ਦੀ ਸੁਰੱਖਿਆ ਯਕੀਨੀ ਬਣਾਵੇ ਸਰਕਾਰ
. . .  17 minutes ago
ਇਸਲਾਮਾਬਾਦ, 26 ਮਾਰਚ- ਇਸਲਾਮਾਬਾਦ ਹਾਈਕੋਰਟ ਨੇ ਪਾਕਿਸਤਾਨ ਦੇ ਸਿੰਧ ਸੂਬੇ ਦੀ ਸਰਕਾਰ ਨੂੰ ਇਹ ਹੁਕਮ ਦਿੱਤੇ ਹਨ ਕਿ ਉਹ ਅਗਵਾ ਹਿੰਦੂ ਲੜਕੀਆਂ ਦੀ ਸੁਰੱਖਿਆ ਨੂੰ ਯਕੀਨੀ ਬਣਾਵੇ। ਨਾਲ ਹੀ ਅਦਾਲਤ ਨੇ ਸਰਕਾਰ ਨੂੰ ਇਹ ਵੀ ਕਿਹਾ ਹੈ ਕਿ ਦੋਹਾਂ ਕੁੜੀਆਂ...
ਕਾਰ ਦੇ ਦਰਖ਼ਤ ਨਾਲ ਟਰਕਾਉਣ ਕਾਰਨ ਚਾਰ ਲੋਕਾਂ ਦੀ ਮੌਤ
. . .  36 minutes ago
ਹੈਦਰਾਬਾਦ, 26 ਮਾਰਚ- ਤੇਲੰਗਾਨਾ ਦੇ ਜਗਤੀਅਲ ਜ਼ਿਲ੍ਹੇ 'ਚ ਇੱਕ ਕਾਰ ਦੇ ਸੜਕ ਕਿਨਾਰੇ ਲੱਗੇ ਦਰਖ਼ਤ ਨਾਲ ਟਕਰਾਉਣ ਕਾਰਨ ਚਾਰ ਲੋਕਾਂ ਦੀ ਮੌਤ ਹੋ ਗਈ। ਪੁਲਿਸ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਬੀਤੀ ਰਾਤ ਇਹ ਹਾਦਸਾ ਜ਼ਿਲ੍ਹੇ ਦੇ ਧਰਮਾਰਾਮ ਪਿੰਡ ਦੇ ਨਜ਼ਦੀਕ...
ਭਾਜਪਾ ਨੇ ਮੁਰਲੀ ਮਨੋਹਰ ਜੋਸ਼ੀ ਨੂੰ ਟਿਕਟ ਦੇਣ ਤੋਂ ਕੀਤਾ ਇਨਕਾਰ
. . .  about 1 hour ago
ਲਖਨਊ, 26 ਮਾਰਚ- ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਦੇ ਸੀਨੀਅਰ ਨੇਤਾ ਮੁਰਲੀ ਮਨੋਹਰ ਜੋਸ਼ੀ 2019 ਦੀਆਂ ਲੋਕ ਸਭਾ ਚੋਣਾਂ ਕਿਤਿਓਂ ਵੀ ਨਹੀਂ ਲੜਨਗੇ। ਪਾਰਟੀ ਨੇ ਉਨ੍ਹਾਂ ਨੂੰ ਟਿਕਟ ਦੇਣ ਤੋਂ ਇਨਕਾਰ ਕਰ ਦਿੱਤਾ ਹੈ। ਉੱਤਰ ਪ੍ਰਦੇਸ਼ ਦੇ ਕਾਨਪੁਰ ਸ਼ਹਿਰ ਦੇ ਲੋਕਾਂ ਨੂੰ...
ਕਰੰਟ ਲੱਗਣ ਕਾਰਨ ਕਿਸਾਨ ਦੇ ਇਕਲੌਤੇ ਪੁੱਤਰ ਦੀ ਮੌਤ
. . .  about 1 hour ago
ਸ਼ਹਿਣਾ, 26 ਮਾਰਚ (ਸੁਰੇਸ਼ ਗੋਗੀ)- ਬਰਨਾਲਾ ਦੇ ਥਾਣਾ ਸ਼ਹਿਣਾ ਅਧੀਨ ਪੈਂਦੇ ਪਿੰਡ ਉਗੋਕੇ ਵਿਖੇ ਖੇਤਾਂ 'ਚ ਕਰੰਟ ਲੱਗਣ ਕਾਰਨ ਕਿਸਾਨ ਦੇ ਇਕਲੌਤੇ ਪੁੱਤਰ ਦੀ ਮੌਤ ਹੋ ਗਈ। ਮ੍ਰਿਤਕ ਦੀ ਪਹਿਚਾਣ 19 ਸਾਲਾ ਕੁਲਵਿੰਦਰ ਸਿੰਘ ਪੁੱਤਰ ਗੁਰਜੰਟ ਸਿੰਘ ਦੇ ਰੂਪ 'ਚ ਹੋਈ ਹੈ...
ਝੌਂਪੜੀ 'ਚ ਲੱਗੀ ਅੱਗ, ਜਿੰਦਾ ਝੁਲਸਣ ਕਾਰਨ ਦੋ ਬੱਚਿਆਂ ਦੀ ਮੌਤ
. . .  about 1 hour ago
ਲਖਨਊ, 26 ਮਾਰਚ- ਉੱਤਰ ਪ੍ਰਦੇਸ਼ ਦੇ ਕੌਸ਼ਾਂਬੀ ਜ਼ਿਲ੍ਹੇ ਦੇ ਮਝਨਪੁਰ ਇਲਾਕੇ 'ਚ ਅੱਜ ਸਵੇਰੇ ਇੱਟਾਂ ਦੇ ਇੱਕ ਭੱਠੇ 'ਤੇ ਬਣੀ ਝੌਂਪੜੀ 'ਚ ਅੱਗ ਲੱਗਣ ਕਾਰਨ ਦੋ ਬੱਚਿਆਂ ਦੀ ਮੌਤ ਹੋ ਗਈ, ਜਦਕਿ ਪੰਜ ਹੋਰ ਝੁਲਸ ਗਏ। ਇਸ ਸੰਬੰਧੀ ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ...
ਇਜ਼ਰਾਈਲ ਨੇ ਗਾਜਾ 'ਚ ਹਮਾਸ ਦੇ ਟਿਕਾਣਿਆਂ ਨੂੰ ਬਣਾਇਆ ਨਿਸ਼ਾਨਾ
. . .  about 1 hour ago
ਗਾਜਾ, 26 ਮਾਰਚ- ਇਜ਼ਰਾਈਲ ਨੇ ਮੱਧ ਇਜ਼ਰਾਈਲ 'ਚ ਰਾਕੇਟ ਨਾਲ ਇੱਕ ਘਰ ਨੂੰ ਨਸ਼ਟ ਕਰਨ ਦੇ ਜਵਾਬ 'ਚ ਗਾਜਾ ਪੱਟੀ 'ਚ ਹਮਾਸ (ਇੱਕ ਫ਼ਲਸਤੀਨੀ ਸੁੰਨੀ-ਇਸਲਾਮਵਾਦੀ ਕੱਟੜਪੰਥੀ ਸੰਗਠਨ) ਦੇ ਟਿਕਾਣਿਆਂ 'ਤੇ ਹਮਲਾ ਕੀਤਾ। ਇਜ਼ਰਾਈਲ ਰੱਖਿਆ ਬਲ...
ਛੱਤੀਸਗੜ੍ਹ 'ਚ ਮੁਠਭੇੜ ਦੌਰਾਨ ਚਾਰ ਨਕਸਲੀ ਢੇਰ, ਹਥਿਆਰ ਵੀ ਬਰਾਮਦ
. . .  about 2 hours ago
ਰਾਏਪੁਰ, 26 ਮਾਰਚ- ਛੱਤੀਸਗੜ੍ਹ ਦੇ ਸੁਕਮਾ ਜ਼ਿਲ੍ਹੇ 'ਚ ਅੱਜ ਸੁਰੱਖਿਆ ਬਲਾਂ ਨੇ ਮੁਠਭੇੜ ਦੌਰਾਨ ਚਾਰ ਨਕਸਲੀਆਂ ਨੂੰ ਢੇਰ ਕਰ ਦਿੱਤਾ। ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਸੁਕਮਾ ਜ਼ਿਲ੍ਹੇ ਦੇ ਚਿੰਤਲਾਨਾਰ ਥਾਣਾ ਖੇਤਰ ਅਧੀਨ ਪੈਂਦੇ ਕਰਕਨਗੁੜਾ ਪਿੰਡ ਦੇ ਨਜ਼ਦੀਕ ਅੱਜ...
ਅਗਸਤਾ ਵੈਸਟਲੈਂਡ ਮਾਮਲੇ 'ਚ ਈ.ਡੀ. ਨੇ ਇਕ ਗ੍ਰਿਫਤਾਰੀ ਕੀਤੀ
. . .  about 3 hours ago
ਨਵੀਂ ਦਿੱਲੀ, 26 ਮਾਰਚ - ਅਗਸਤਾ ਵੈਸਟਲੈਂਡ ਮਾਮਲੇ ਵਿਚ ਇਨਫੋਰਸਮੈਂਟ ਡਾਇਰੈਕਟੋਰੇਟ ਵੱਲੋਂ ਕਥਿਤ ਵਿਚੋਲੀਏ ਸੁਸ਼ੇਨ ਮੋਹਨ ਗੁਪਤਾ ਨੂੰ ਬੀਤੀ ਲੰਘੀ ਰਾਤ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਉਸ ਨੂੰ ਅੱਜ ਦਿੱਲੀ ਦੇ ਪਟਿਆਲਾ ਹਾਊਸ ਕੋਰਟ 'ਚ ਪੇਸ਼ ਕੀਤਾ...
ਉਤਰ ਪ੍ਰਦੇਸ਼ ਲਈ ਭਾਜਪਾ ਨੇ ਆਪਣੇ ਸਟਾਰ ਪ੍ਰਚਾਰਕਾਂ ਦੀ ਸੂਚੀ ਕੀਤੀ ਜਾਰੀ, ਅਡਵਾਨੀ ਦਾ ਨਾਂ ਸ਼ਾਮਲ ਨਹੀਂ
. . .  about 3 hours ago
ਨਵੀਂ ਦਿੱਲੀ, 26 ਮਾਰਚ - ਭਾਜਪਾ ਨੇ ਲੋਕ ਸਭਾ ਚੋਣਾਂ 2019 ਦੇ ਮੱਦੇਨਜ਼ਰ ਉਤਰ ਪ੍ਰਦੇਸ਼ ਲਈ ਆਪਣੇ ਸਟਾਰ ਪ੍ਰਚਾਰਕਾਂ ਦੀ ਸੂਚੀ ਜਾਰੀ ਕੀਤੀ ਹੈ। ਇਸ ਸੂਚੀ ਵਿਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ, ਅਮਿਤ ਸ਼ਾਹ, ਰਾਜਨਾਥ ਸਿੰਘ, ਅਰੁਣ ਜੇਤਲੀ, ਨਿਤਿਨ ਗਡਕਰੀ, ਸੁਸ਼ਮਾ ਸਵਰਾਜ ਤੇ ਊਮਾ ਭਾਰਤੀ ਜ਼ਿਕਰਯੋਗ...
ਹੋਰ ਖ਼ਬਰਾਂ..

ਨਾਰੀ ਸੰਸਾਰ

ਪਾਕਿ-ਪਵਿੱਤਰ ਰਿਸ਼ਤਾ : ਪਤੀ-ਪਤਨੀ

ਪਤੀ-ਪਤਨੀ ਦੋਵੇਂ ਇਕ-ਦੂਸਰੇ ਦੇ ਪੂਰਕ ਹੁੰਦੇ ਹਨ। ਕਿਸੇ ਇਕ ਤੋਂ ਬਿਨਾਂ ਦੂਸਰੇ ਦੀ ਹੋਂਦ ਮਨਫ਼ੀ ਹੋ ਕੇ ਰਹਿ ਜਾਂਦੀ ਹੈ। ਦੋਵਾਂ ਦਾ ਸਾਥ ਜ਼ਿੰਦਗੀ ਭਰ ਦਾ ਸਾਥ ਹੁੰਦਾ ਹੈ। ਵਿਆਹ ਸਮੇਂ ਲੜਕਾ-ਲੜਕੀ ਦੋਵੇਂ ਇਕ-ਦੂਸਰੇ ਨੂੰ ਤਾ-ਉਮਰ ਦੇ ਸਾਥੀ ਵਜੋਂ ਚੁਣਦੇ ਹਨ ਅਤੇ ਸਵੀਕਾਰ ਕਰਦੇ ਹਨ। ਤਿੰਨ-ਚਾਰ ਦਹਾਕੇ ਪਹਿਲਾਂ ਤੱਕ ਤਾਂ ਪਤੀ-ਪਤਨੀ ਤਾ-ਉਮਰ ਇਕ-ਦੂਜੇ ਦਾ ਸਾਥ ਸਵੀਕਾਰ ਕਰਦੇ ਸਨ ਤੇ ਨਿਭਾਉਂਦੇ ਵੀ ਸਨ, ਪਰ ਉਸ ਤੋਂ ਬਾਅਦ ਘਰੇਲੂ ਤੇ ਪਰਿਵਾਰਕ ਤਾਣੇ-ਬਾਣੇ ਵਿਚ ਬਦਲਾਅ ਆਇਆ ਤੇ ਕਈ ਕਾਰਨਾਂ ਕਰਕੇ ਗਿਰਾਵਟ ਵੀ ਆਈ। ਫਿਰ 'ਤਲਾਕ' ਨਾਂਅ ਦੇ ਦਾਨਵ (ਸਮਾਜਿਕ ਕੁਰੀਤੀ ਤੇ ਸਮੱਸਿਆ) ਨੇ ਆਪਣਾ ਦਾਇਰਾ ਵਧਾਉਣਾ ਸ਼ੁਰੂ ਕਰ ਦਿੱਤਾ ਅਤੇ ਇਸੇ ਤਲਾਕ ਨਾਂਅ ਦੇ ਦੈਂਤ ਨੇ ਘਰਾਂ ਦੇ ਘਰ ਤਬਾਹ ਕਰਨੇ ਸ਼ੁਰੂ ਕਰ ਦਿੱਤੇ। ਪਤੀ-ਪਤਨੀ ਦਾ ਰਿਸ਼ਤਾ ਇਕ ਅਨਮੋਲ, ਪਵਿੱਤਰ ਤੇ ਵਿਸ਼ਵਾਸ ਭਰਿਆ ਰਿਸ਼ਤਾ ਹੁੰਦਾ ਹੈ। ਕੁਝ ਗਿਲੇ-ਸ਼ਿਕਵੇ, ਮਨ-ਮੁਟਾਵ, ਛੋਟੀਆਂ-ਛੋਟੀਆਂ ਗੱਲਾਂ, ਬਾਹਰੀ ਦਖ਼ਲਅੰਦਾਜ਼ੀ, ਧਨ-ਦੌਲਤ ਦੀ ਖਿੱਚ ਜਾਂ ਹੋਰ ਕਿਸੇ ਕਾਰਨ ਸਦਕਾ ਜੀਵਨ ਭਰ ਦੇ ਸਾਥੀ ਨਾਲੋਂ ਸਾਥ ਤੋੜਨ ਦਾ ਜਲਦਬਾਜ਼ੀ ਨਾਲ ਫ਼ੈਸਲਾ ਕਰ ਲੈਣਾ ਦੋਵਾਂ ਵਿਚੋਂ ਕਿਸੇ ਦੇ ਵੀ ਹਿੱਤ ਵਿਚ ਨਹੀਂ ਹੋ ਸਕਦਾ।
ਸਾਡੇ ਜ਼ਰਾ ਜਿੰਨੇ ਅੜੀਅਲ ਵਤੀਰੇ ਸਦਕਾ ਸਾਡੇ ਪਰਿਵਾਰਾਂ, ਬੱਚਿਆਂ, ਰਿਸ਼ਤੇਦਾਰਾਂ, ਭਾਈਚਾਰਕ ਸਾਂਝ ਤੇ ਸਮਾਜਿਕ ਵਰਤਾਰੇ 'ਤੇ ਬਹੁਤ ਬੁਰਾ ਪ੍ਰਭਾਵ ਪੈਂਦਾ ਹੈ ਅਤੇ ਆਉਣ ਵਾਲੀਆਂ ਨਵੀਆਂ ਪੀੜ੍ਹੀਆਂ ਵੀ ਇਸ ਦੇ ਪ੍ਰਭਾਵ ਤੋਂ ਬਚੀਆਂ ਨਹੀਂ ਰਹਿ ਸਕਦੀਆਂ। ਪਤੀ-ਪਤਨੀ ਦੇ ਪਵਿੱਤਰ ਰਿਸ਼ਤੇ ਵਿਚ ਵਿਸ਼ਵਾਸ ਦੀ ਡੋਰ ਵੀ ਮਜ਼ਬੂਤ ਰੱਖਣੀ ਚਾਹੀਦੀ ਹੈ ਅਤੇ ਇਸ ਪਵਿੱਤਰ ਰਿਸ਼ਤੇ ਉੱਪਰ ਦਾਜ-ਦਹੇਜ, ਗਹਿਣੇ-ਗੱਟੇ, ਪੈਸੇ-ਧੇਲੇ, ਕੋਠੀਆਂ-ਕਾਰਾਂ ਅਤੇ ਹੋਰ ਭੌਤਿਕ ਸੁੱਖ-ਸਾਧਨਾਂ ਦੀ ਧੂੜ ਨਹੀਂ ਜੰਮਣ ਦੇਣੀ ਚਾਹੀਦੀ। ਪਤੀ-ਪਤਨੀ ਦੇ ਬੰਧਨ ਨੂੰ ਇਕ ਪਵਿੱਤਰ ਤੇ ਸਮਰਪਿਤ ਰਿਸ਼ਤੇ ਵਜੋਂ ਦੇਖਣਾ ਚਾਹੀਦਾ ਹੈ, ਨਾ ਕਿ ਸੌਦੇਬਾਜ਼ੀ ਵਜੋਂ। ਦੋਵਾਂ (ਪਤੀ-ਪਤਨੀ) ਨੂੰ ਆਪਣੀ ਪੜ੍ਹਾਈ, ਹੈਸੀਅਤ, ਅਹੁਦੇ, ਰੁਤਬੇ, ਪ੍ਰਸਿੱਧੀ ਆਦਿ ਨੂੰ ਵੀ ਇਸ ਪਵਿੱਤਰ ਰਿਸ਼ਤੇ 'ਤੇ ਹਾਵੀ ਨਹੀਂ ਹੋਣ ਦੇਣਾ ਚਾਹੀਦਾ। ਘਰੇਲੂ ਔਰਤ ਤੇ ਕੰਮਕਾਜੀ ਮਹਿਲਾ ਦੋਵਾਂ ਨੂੰ ਘਰ-ਸਮਾਜ ਵਿਚ ਸਤਿਕਾਰ, ਬਰਾਬਰਤਾ ਤੇ ਇੱਜ਼ਤ-ਮਾਣ ਮਿਲਣਾ ਚਾਹੀਦਾ ਹੈ। ਸਾਰੇ ਰਿਸ਼ਤਿਆਂ ਦਾ ਯਥਾ ਸੰਭਵ ਸਤਿਕਾਰ ਕਰਦੇ ਹੋਏ ਪਤੀ-ਪਤਨੀ ਦੇ ਰਿਸ਼ਤੇ ਨੂੰ ਵੀ ਸਮਾਂ ਤੇ ਧਿਆਨ ਦੇਣਾ ਚਾਹੀਦਾ ਹੈ। ਪਤਨੀ ਨੂੰ ਕਦੇ ਵੀ ਆਪਣੀ 'ਦਾਸੀ' ਸਮਝਣ ਦੀ ਭੁੱਲ ਨਹੀਂ ਕਰਨੀ ਚਾਹੀਦੀ। ਔਰਤ ਨੂੰ 'ਪੈਰ ਦੀ ਜੁੱਤੀ' ਸਮਝਣ ਵਾਲੇ ਘਰ-ਸਮਾਜ ਵਿਚ ਪਤੀ-ਪਤਨੀ ਦਾ ਪਵਿੱਤਰ ਰਿਸ਼ਤਾ ਕਦੇ ਵੀ ਸਥਾਈ ਤੇ ਟਿਕਾਊ ਨਹੀਂ ਰਹਿ ਸਕਦਾ ਤੇ ਨਾ ਹੀ ਉਹ ਘਰ, ਪਰਿਵਾਰ ਤੇ ਸਮਾਜ ਤਰੱਕੀ ਕਰ ਸਕਦਾ ਹੈ।
ਇਸ ਲਈ ਦੋਵਾਂ (ਪਤੀ-ਪਤਨੀ) ਨੂੰ ਇਕ-ਦੂਸਰੇ ਦੀਆਂ ਭਾਵਨਾਵਾਂ, ਜ਼ਰੂਰਤਾਂ, ਕਮੀਆਂ, ਹੋਂਦ, ਅਹੁਦੇ, ਰਿਸ਼ਤੇ ਅਤੇ ਵਜੂਦ ਨੂੰ ਸਮਝਦੇ ਹੋਏ ਤੇ ਕਦਰ ਕਰਦੇ ਹੋਏ ਇਕ-ਦੂਜੇ ਪ੍ਰਤੀ ਸਮਰਪਿਤ ਰਹਿਣਾ ਚਾਹੀਦਾ ਹੈ ਅਤੇ ਉਸਾਰੂ ਸੋਚ ਅਪਣਾਉਣ ਵਿਚ ਹੀ ਚੰਗੀ ਗੱਲ ਹੋ ਸਕਦੀ ਹੈ। ਛੋਟੇ-ਮੋਟੇ ਮਨ-ਮੁਟਾਵ ਅਕਸਰ ਵਿਆਹ ਤੋਂ ਬਾਅਦ ਇਕ-ਦੋ ਸਾਲ ਤੱਕ ਆਉਂਦੇ ਰਹਿੰਦੇ ਹਨ ਅਤੇ ਦੋਵਾਂ ਨੂੰ ਸਿਦਕ ਤੇ ਸਿਰੜ ਤੋਂ ਕੰਮ ਲੈ ਕੇ ਇਹ ਸ਼ੁਰੂਆਤੀ ਵਿਆਹੁਤਾ-ਸਮਾਂ ਠਰੰਮੇ ਅਤੇ ਸਬਰ-ਸੰਤੋਖ ਨਾਲ ਬਤੀਤ ਕਰਨ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ, ਕਿਉਂਕਿ ਦੋਵਾਂ (ਪਤੀ-ਪਤਨੀ) ਦੇ ਬੋਲ-ਵਿਹਾਰ, ਰਹਿਣ-ਸਹਿਣ, ਸੋਚ, ਖਾਣ-ਪੀਣ, ਮਿਲਵਰਤਨ ਅਤੇ ਖਾਸ ਤੌਰ 'ਤੇ ਵਿਚਾਰਾਂ ਵਿਚ ਅੰਤਰ ਹੋ ਸਕਦਾ ਹੈ ਅਤੇ ਇਹ ਖੱਪਾ ਭਰਨ ਲਈ ਤੇ ਦੋਵਾਂ ਨੂੰ ਥੋੜ੍ਹਾ-ਥੋੜ੍ਹਾ ਆਪਸੀ ਬਦਲਾਓ ਲਿਆਉਣ ਲਈ ਅਤੇ ਇਕ-ਦੂਸਰੇ ਨੂੰ ਸਮਝਣ ਲਈ ਕੁਝ ਵਕਤ ਤਾਂ ਲੱਗਦਾ ਹੀ ਹੈ ਤੇ ਵਕਤ ਚਾਹੀਦਾ ਵੀ ਹੈ। ਬਸ ਇਹੋ ਸ਼ੁਰੂਆਤੀ ਦੌਰ ਹੀ ਸ਼ਾਇਦ ਕਈ ਵਾਰ ਵਿਆਹੁਤਾ ਜੀਵਨ 'ਤੇ ਜ਼ਿਆਦਾ ਔਖਾ ਅਤੇ ਪਤੀ-ਪਤਨੀ ਦੇ ਰਿਸ਼ਤੇ 'ਤੇ ਭਾਰੂ ਹੋ ਸਕਦਾ ਹੈ। ਦੋਵਾਂ (ਪਤੀ-ਪਤਨੀ) ਦੇ ਪਰਿਵਾਰਾਂ ਤੇ ਪਰਿਵਾਰਕ ਮੈਂਬਰਾਂ ਨੂੰ ਵੀ ਇਸ ਰਿਸ਼ਤੇ ਦੀ ਮਰਿਆਦਾ ਨੂੰ ਸਮਝਦੇ ਹੋਏ ਇਸ ਪਵਿੱਤਰ ਰਿਸ਼ਤੇ ਨੂੰ ਹੋਰ ਮਜ਼ਬੂਤ ਬਣਾਉਣ ਅਤੇ ਮਿਲਵਰਤਨ ਰਾਹੀਂ ਗਿਲੇ-ਸ਼ਿਕਵੇ ਦੂਰ ਕਰ ਲੈਣ ਨੂੰ ਹੀ ਤਰਜੀਹ ਦੇਣੀ ਸਹੀ ਹੋ ਸਕਦੀ ਹੈ।
ਪਤੀ-ਪਤਨੀ ਨੂੰ ਆਪਣੀ ਸੂਝ-ਬੂਝ ਤੋਂ ਵੀ ਕੰਮ ਲੈਣਾ ਚਾਹੀਦਾ ਹੈ ਅਤੇ ਸਹੀ ਨੂੰ ਸਹੀ ਤੇ ਗ਼ਲਤ ਨੂੰ ਗ਼ਲਤ ਸਮਝਣ ਦਾ ਹੌਸਲਾ ਤੇ ਸਮਝ ਵੀ ਰੱਖਣੀ ਜ਼ਰੂਰ ਚਾਹੀਦੀ ਹੈ। ਜ਼ਰੂਰਤ ਅਨੁਸਾਰ ਪਤੀ-ਪਤਨੀ ਦੋਵਾਂ ਨੂੰ ਇਕ-ਦੂਸਰੇ ਦੇ ਕੰਮਾਂ-ਕਾਰਾਂ ਵਿਚ ਤੇ ਘਰੇਲੂ ਕੰਮਾਂ ਵਿਚ ਵੀ ਬੇਝਿਜਕ ਹੱਥ ਵਟਾ ਦੇਣਾ ਚਾਹੀਦਾ ਹੈ ਤੇ ਇਕ-ਦੂਜੇ ਦੀਆਂ ਮਜਬੂਰੀਆਂ ਤੇ ਦੁੱਖਾਂ-ਸੁੱਖਾਂ ਨੂੰ ਸਮਝ ਕੇ ਵੰਡਾਉਣਾ ਵੀ ਇਸ ਰਿਸ਼ਤੇ ਦੀ ਮਜ਼ਬੂਤੀ ਲਈ ਮੀਲ ਪੱਥਰ ਸਾਬਤ ਹੋ ਸਕਦਾ ਹੈ। 'ਮਰਦ ਪ੍ਰਧਾਨ ਸਮਾਜ' ਵਾਲੀ ਸੋਚ ਬਦਲ ਕੇ ਵੀ ਇਸ ਰਿਸ਼ਤੇ ਦੀ ਸਦੀਵੀ ਹੋਂਦ ਬਰਕਰਾਰ ਰੱਖੀ ਜਾ ਸਕਦੀ ਹੈ। ਪਤੀ-ਪਤਨੀ ਨੂੰ ਵੀ ਘਰ, ਸਮਾਜ ਤੇ ਹੋਰ ਰਿਸ਼ਤੇ ਦੀ ਇੱਜ਼ਤ ਅਤੇ ਮਰਿਆਦਾ ਰੱਖਣੀ ਚਾਹੀਦੀ ਹੈ। ਸ਼ੱਕ ਦੀ ਬਿਮਾਰੀ ਤੋਂ ਵੀ ਬਚ ਕੇ ਰਹਿਣਾ ਸਹੀ ਹੈ। ਪਤਨੀ ਨੂੰ ਇਕ 'ਵਸਤੂ' ਨਾ ਸਮਝਦੇ ਹੋਏ ਬਰਾਬਰ ਦਾ ਹੱਕ ਤੇ ਰੁਤਬਾ ਹਰ ਪਲ, ਹਰ ਥਾਂ ਦੇਣਾ ਵੀ ਜ਼ਿੰਦਗੀ ਭਰ ਦਾ ਸਾਥ ਬਣਾਈ ਰੱਖਣ ਲਈ ਸਹੀ ਕਦਮ ਹੋ ਸਕਦਾ ਹੈ। ਦੋਵਾਂ ਨੂੰ ਆਪਣੇ ਰਿਸ਼ਤੇ 'ਤੇ ਕਿਸੇ ਵੀ ਤੀਜੀ ਧਿਰ ਨੂੰ ਹਾਵੀ ਨਹੀਂ ਹੋਣ ਦੇਣਾ ਚਾਹੀਦਾ। ਪਤੀ-ਪਤਨੀ ਦਾ ਪਵਿੱਤਰ ਰਿਸ਼ਤਾ ਤਾ-ਉਮਰ ਦਾ ਸਾਥ ਹੈ। ਇਸ ਨੂੰ ਸਿਦਕ, ਸਿਰੜ, ਵਿਸ਼ਵਾਸ, ਸਮਰਪਣ-ਭਾਵਨਾ ਤੇ ਉਸਾਰੂ ਸੋਚ ਅਪਣਾ ਕੇ ਤਾ-ਉਮਰ ਨਿਭਾਉਣ ਦੀ ਪੂਰੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ ਅਤੇ ਇਸ ਰਿਸ਼ਤੇ ਨੂੰ ਟੁੱਟਣ ਤੋਂ ਬਚਾਉਣਾ ਹੀ ਸਹੀ ਮਾਨਵਤਾ ਹੋ ਸਕਦੀ ਹੈ।


-ਪਿੰਡ ਸੱਧੇਵਾਲ, ਡਾਕ: ਗੰਗੂਵਾਲ, ਸ੍ਰੀ ਅਨੰਦਪੁਰ ਸਾਹਿਬ।


ਖ਼ਬਰ ਸ਼ੇਅਰ ਕਰੋ

ਤਾਂ ਕਿ ਤੈਰਾਕੀ ਦੌਰਾਨ

ਪੂਲ ਵਿਚ ਬੱਚੇ ਰਹਿਣ ਸੁਰੱਖਿਅਤ

ਗਰਮੀ ਦੀਆਂ ਛੁੱਟੀਆਂ ਵਿਚ ਕਈ ਬੱਚੇ ਤੈਰਾਕੀ ਕਲਾਸਾਂ ਲਾਉਂਦੇ ਹਨ। ਇਨ੍ਹਾਂ ਦਿਨਾਂ ਵਿਚ ਅਕਸਰ ਪੂਲ ਵਿਚ ਬੱਚਿਆਂ ਦੇ ਨਾਲ ਦੁਰਘਟਨਾ ਹੋਣ ਦੀ ਸੰਭਾਵਨਾ ਰਹਿੰਦੀ ਹੈ। ਜੇ ਤਰਨ ਤਾਲ ਵਿਚ ਬੱਚਿਆਂ ਦੀ ਸੁਰੱਖਿਆ 'ਤੇ ਧਿਆਨ ਦਿੱਤਾ ਜਾਵੇ ਤਾਂ ਉਨ੍ਹਾਂ ਦੇ ਡੁੱਬਣ ਦੀਆਂ ਦੁਰਘਟਨਾਵਾਂ ਵੀ ਹੁੰਦੀਆਂ ਹਨ। ਗਰਮੀ ਦੇ ਦਿਨਾਂ ਵਿਚ ਤੈਰਾਕੀ ਕਲਾਸ ਹੀ ਨਹੀਂ, ਗਰਮੀ ਤੋਂ ਰਾਹਤ ਪਾਉਣ ਲਈ ਘਰ ਵਿਚ ਬਣੇ ਤਰਨ ਤਾਲ ਵਿਚ ਬੱਚੇ ਅਕਸਰ ਮੌਜਮਸਤੀ ਕਰਦੇ ਹਨ ਅਤੇ ਤੈਰਨ ਦਾ ਮਜ਼ਾ ਲੈਂਦੇ ਹਨ। ਪਰ ਮਾਹਿਰ ਤੋਂ ਬਿਨਾਂ ਬੱਚਿਆਂ ਦਾ ਇਸ ਤਰ੍ਹਾਂ ਤਰਨ ਤਾਲ ਵਿਚ ਉਤਰਨਾ ਜਾਂ ਤੈਰਨਾ ਖ਼ਤਰਨਾਕ ਵੀ ਸਾਬਤ ਹੋ ਸਕਦਾ ਹੈ, ਇਸ ਲਈ ਤਰਨ ਤਾਲ ਵਿਚ ਤੈਰਨ ਲਈ ਜਾਣ ਤੋਂ ਪਹਿਲਾਂ ਬੱਚਿਆਂ ਦੀ ਸੁਰੱਖਿਆ 'ਤੇ ਕਿਸ ਤਰ੍ਹਾਂ ਧਿਆਨ ਦੇਣਾ ਚਾਹੀਦਾ ਹੈ, ਆਓ ਇਸ ਸਬੰਧੀ ਜਾਣੋ-
ਫਲੋਟੇਸ਼ਨ ਡਿਵਾਈਸ ਦੀ ਵਰਤੋਂ ਕਰੋ
ਬੱਚਿਆਂ ਨੂੰ ਜੇ ਸਵਿਮਿੰਗ ਲਈ ਭੇਜ ਰਹੇ ਹੋ ਤਾਂ ਉਨ੍ਹਾਂ ਨੂੰ ਸਿਖਾਉਣ ਲਈ ਤੈਰਾਕੀ ਦੇ ਉਪਕਰਨਾਂ ਦੀ ਵਰਤੋਂ ਕਰਨੀ ਸਿਖਾਉਣੀ ਚਾਹੀਦੀ ਹੈ। ਵਾਟਰ ਵਿੰਗਸ, ਪੂਲ ਨੂਡਲਸ, ਫਲੋਟਰਸ, ਸੇਫਟੀ ਰੋਬਜ਼, ਸੇਫਟੀ ਲਾਈਨ, ਪੋਲਸ ਅਤੇ ਲਾਈਫ ਜੈਕਟ ਬਾਰੇ ਉਨ੍ਹਾਂ ਨੂੰ ਦੱਸੋ ਅਤੇ ਇਸ ਦੀ ਮਦਦ ਨਾਲ ਉਨ੍ਹਾਂ ਨੇ ਕਿਵੇਂ ਤੈਰਨਾ ਹੈ, ਇਹ ਸਿਖਾਓ। ਤੈਰਾਕੀ ਮਾਹਿਰ ਲਾਈਫ ਜੈਕਟ ਨੂੰ ਸਭ ਤੋਂ ਸੁਰੱਖਿਅਤ ਮੰਨਦੇ ਹਨ। ਸੈਰ-ਸਪਾਟੇ ਵਾਲੀਆਂ ਥਾਵਾਂ 'ਤੇ ਜੇ ਤੁਸੀਂ ਸਾਗਰ ਦੀਆਂ ਲਹਿਰਾਂ ਵਿਚ ਤੈਰਨ ਦਾ ਮਜ਼ਾ ਲੈ ਰਹੇ ਹੋ ਹੋ ਅਤੇ ਬੱਚੇ ਵੀ ਜੇ ਤੁਹਾਡੇ ਨਾਲ ਤੈਰ ਰਹੇ ਹਨ ਤਾਂ ਉਨ੍ਹਾਂ ਨੂੰ ਆਪਣੇ ਤੋਂ ਦੂਰ ਨਾ ਰੱਖੋ। ਉਨ੍ਹਾਂ 'ਤੇ ਪੂਰਾ ਸਮਾਂ ਨਜ਼ਰ ਰੱਖੋ।
ਤਰਨ ਤਾਲ ਹੋਵੇ ਸੁਰੱਖਿਅਤ
ਤਰਨ ਤਾਲ ਵਿਚ ਬੱਚੇ ਦੇ ਡੁੱਬਣ ਦੇ ਖਤਰੇ ਤੋਂ ਬਚਾਅ ਲਈ ਤਰਨ ਤਾਲ ਵਿਚ ਰੋਕ ਲੱਗੇ ਹੋਣੇ ਚਾਹੀਦੇ ਹਨ। ਤਰਨ ਤਾਲ ਜੇ ਘਰ ਵਿਚ ਹੈ ਤਾਂ ਉਸ ਦੇ ਆਸ-ਪਾਸ ਉੱਚੀ ਦੀਵਾਰ ਹੋਣੀ ਚਾਹੀਦੀ ਹੈ ਤਾਂ ਕਿ ਬੱਚਾ ਉਥੇ ਤੱਕ ਅਸਾਨੀ ਨਾਲ ਨਾ ਪਹੁੰਚ ਸਕੇ।
ਪਾਣੀ ਦੀ ਡੂੰਘਾਈ ਜਾਣੋ
ਤਰਨ ਤਾਲ ਵਿਚ ਅਕਸਰ ਇਹ ਜਾਨਣਾ ਜ਼ਰੂਰੀ ਹੈ ਕਿ ਕਿਥੋਂ ਪਾਣੀ ਦੀ ਡੂੰਘਾਈ ਵਧ ਰਹੀ ਹੈ। ਤਰਨ ਤਾਲ ਵਿਚ ਜਿਥੋਂ ਜ਼ਿਆਦਾ ਡੂੰਘਾਈ ਸ਼ੁਰੂ ਹੁੰਦੀ ਹੈ, ਉਥੇ ਜਾਲੀ ਜਾਂ ਰੁਕਾਵਟ ਲਗਾ ਦਿੱਤੀ ਜਾਂਦੀ ਹੈ। ਪਰ ਜੇ ਅਜਿਹਾ ਨਾ ਹੋਵੇ ਤਾਂ ਉਥੋਂ ਦੇ ਮਾਹਿਰ ਤੋਂ ਇਸ ਬਾਰੇ ਪਤਾ ਲਗਾਇਆ ਜਾ ਸਕਦਾ ਹੈ। ਇਸ ਲਈ ਤਰਨ ਤਾਲ ਵਿਚ ਕਿਥੇ ਕਿੰਨੀ ਡੂੰਘਾਈ ਹੈ, ਜੇ ਬੱਚੇ ਇਸ ਗੱਲ ਤੋਂ ਅਣਜਾਣ ਰਹਿੰਦੇ ਹਨ ਤਾਂ ਅਕਸਰ ਉਨ੍ਹਾਂ ਦੇ ਡੁੱਬਣ ਦੀ ਸੰਭਾਵਨਾ ਰਹਿੰਦੀ ਹੈ। ਬੱਚਿਆਂ ਲਈ ਰਿੰਗ ਜਾਂ ਰੋਪਸ ਦੀ ਵਰਤੋਂ ਕੀਤੀ ਜਾਂਦੀ ਹੈ ਅਤੇ ਉਨ੍ਹਾਂ ਨੂੰ ਇਹ ਦੱਸਿਆ ਜਾਂਦਾ ਹੈ ਕਿ ਉਨ੍ਹਾਂ ਨੇ ਰਿੰਗ ਦੇ ਅੰਦਰ ਹੀ ਰਹਿ ਕੇ ਤੈਰਾਕੀ ਸਿੱਖਣੀ ਹੋਵੇਗੀ, ਇਸ ਤੋਂ ਅੱਗੇ ਜਾਣ 'ਤੇ ਉਨ੍ਹਾਂ ਦੇ ਡੁੱਬਣ ਦਾ ਖ਼ਤਰਾ ਹੈ।
ਵੱਡੇ ਰੱਖਣ ਨਜ਼ਰ
ਜੇ ਬੱਚੇ ਨੂੰ ਤੈਰਾਕੀ ਲਈ ਲੈ ਕੇ ਜਾ ਰਹੇ ਹੋ ਤਾਂ ਉਸ ਨੂੰ ਇਕੱਲਾ ਨਾ ਛੱਡੋ, ਕਿਉਂਕਿ ਛੋਟੇ ਬੱਚੇ ਦੋ ਇੰਚ ਡੂੰਘੇ ਪਾਣੀ ਵਿਚ ਵੀ ਡੁੱਬ ਸਕਦੇ ਹਨ। ਇਸ ਲਈ ਉਸ ਨੂੰ ਇਕ ਪਲ ਲਈ ਵੀ ਇਕੱਲਾ ਨਾ ਛੱਡੋ। ਉਨ੍ਹਾਂ ਦੀ ਦੇਖ-ਰੇਖ ਕਰਨ ਵਾਲੇ ਮਾਪੇ ਪੂਰਾ ਸਮਾਂ ਸੁਚੇਤ ਰਹਿਣ ਅਤੇ ਇਕ ਮਿੰਟ ਲਈ ਵੀ ਉਨ੍ਹਾਂ ਦੀ ਲਾਪ੍ਰਵਾਹੀ ਜਾਂ ਅਣਦੇਖੀ ਕਿਸੇ ਵੱਡੀ ਦੁਰਘਟਨਾ ਦਾ ਕਾਰਨ ਹੋ ਸਕਦੀ ਹੈ।
ਤਰਨ ਤਾਲ ਦੇ ਨੇੜੇ-ਤੇੜੇ ਨਾ ਖੇਡੋ
ਜੇ ਤੁਸੀਂ ਆਪਣੇ ਪਰਿਵਾਰ ਦੇ ਨਾਲ ਕਿਤੇ ਘੁੰਮਣ ਲਈ ਗਏ ਹੋ ਤਾਂ ਤਰਨ ਤਾਲ ਦੇ ਆਸ-ਪਾਸ ਨਾ ਖੇਡੋ, ਕਿਉਂਕਿ ਉਸ ਵਿਚ ਡਿਗ ਕੇ ਬੱਚੇ ਦੀ ਮੌਤ ਹੋ ਸਕਦੀ ਹੈ। ਤਾਲ ਦੇ ਆਲੇ-ਦੁਆਲੇ ਦੌੜ ਨਾ ਲਗਾਓ।
ਬੱਚਾ ਜੇ ਛੋਟਾ ਹੈ ਤਾਂ
ਜੇ ਤੁਸੀਂ ਆਪ ਤੈਰਨ ਲਈ ਜਾਂਦੇ ਹੋ ਅਤੇ ਆਪਣੇ ਨਾਲ ਛੋਟੇ ਬੱਚੇ ਨੂੰ ਵੀ ਰੱਖਦੇ ਹੋ ਤਾਂ ਉਸ ਨੂੰ ਹਮੇਸ਼ਾ ਵਾਟਰਪਰੂਫ ਸਵਿਮਿੰਗ ਡਾਇਪਰ ਪਹਿਨਾ ਕੇ ਪਾਣੀ ਵਿਚ ਉਤਾਰੋ ਤਾਂ ਕਿ ਪਾਣੀ ਵਿਚ ਕਿਸੇ ਤਰ੍ਹਾਂ ਦੀ ਇਨਫੈਕਸ਼ਨ ਦਾ ਖਤਰਾ ਨਾ ਹੋਵੇ।
ਛਾਲ ਮਾਰਨ ਤੋਂ ਪਹਿਲਾਂ
ਬੱਚੇ ਨੂੰ ਤਰਨ ਤਾਲ ਵਿਚ ਉਤਰਨ ਦੌਰਾਨ ਘੱਟ ਪਾਣੀ ਵਿਚ ਛਾਲ ਨਹੀਂ ਮਾਰਨੀ ਚਾਹੀਦੀ, ਕਿਉਂਕਿ ਇਸ ਨਾਲ ਸਿਰ ਵਿਚ ਸੱਟ ਲੱਗਣ ਦਾ ਡਰ ਰਹਿੰਦਾ ਹੈ। ਪਾਣੀ ਦੀ ਡੂੰਘਾਈ ਦੇਖ ਕੇ ਹੀ ਡਾਇਵਿੰਗ ਬੋਰਡ ਨਾਲ ਹੀ ਛਾਲ ਮਾਰਨੀ ਚਾਹੀਦੀ ਹੈ। ਕਈ ਵਾਰ ਡੂੰਘਾਈ ਦਾ ਅੰਦਾਜ਼ਾ ਲਗਾਏ ਬਿਨਾਂ ਉਚਾਈ ਤੋਂ ਗੋਤਾ ਲਗਾਉਣ 'ਤੇ ਸਿਰ ਅਤੇ ਧੌਣ ਵਿਚ ਸੱਟ ਲੱਗ ਸਕਦੀ ਹੈ।


-ਕਿਰਣ ਭਾਸਕਰ,
ਫਿਊਚਰ ਮੀਡੀਆ ਨੈਟਵਰਕ

ਆਓ ਕਰੀਏ ਆਪਣੀ ਚਮੜੀ ਦੀ ਸੰਭਾਲ

ਚਮੜੀ ਸਾਡੇ ਸਰੀਰ ਦਾ ਬੜਾ ਹੀ ਮਹੱਤਵਪੂਰਨ ਜੈਵਿਕ ਮੰਨਿਆ ਜਾਂਦਾ ਹੈ, ਜੋ ਕਿ ਸਾਡੀ ਸਿਹਤ ਨੂੰ ਦਰਸਾਉਂਦਾ ਹੈ। ਹਰ ਕੋਈ ਸੋਹਣਾ ਦਿਸਣਾ ਚਾਹੁੰਦਾ ਹੈ ਤੇ ਸੋਹਣੇ ਦਿਸਣ ਲਈ ਸਾਨੂੰ ਆਪਣੀ ਚਮੜੀ ਦੀ ਖਾਸ ਦੇਖਭਾਲ ਕਰਨੀ ਚਾਹੀਦੀ ਹੈ, ਜੋ ਕਿ ਅੱਜਕਲ੍ਹ ਦੇ ਰੁਝੇਵੇਂ ਤੇ ਤਣਾਅ ਭਰੇ ਯੁੱਗ ਵਿਚ ਅਸੀਂ ਕਰ ਨਹੀਂ ਸਕਦੇ। ਜੇਕਰ ਅਸੀਂ ਖੂਬਸੂਰਤ ਤੇ ਸਿਹਤਮੰਦ ਚਮੜੀ ਚਾਹੁੰਦੇ ਹਾਂ ਤਾਂ ਸਾਨੂੰ ਆਪਣੇ ਲਈ ਥੋੜ੍ਹਾ ਜਿਹਾ ਸਮਾਂ ਜ਼ਰੂਰ ਕੱਢਣਾ ਪਵੇਗਾ। ਚਮੜੀ ਦੀ ਸੰਭਾਲ ਲਈ ਕੁਝ ਸੁਝਾਅ ਇਸ ਤਰ੍ਹਾਂ ਹਨ-
ਉਤਪਾਦਨ ਦੀ ਸਹੀ ਚੋਣ : ਉਤਪਾਦਨ ਦੀ ਚੋਣ ਹਮੇਸ਼ਾ ਆਪਣੀ ਚਮੜੀ ਦੀ ਕਿਸਮ ਨੂੰ ਅਤੇ ਮੌਸਮ ਨੂੰ ਧਿਆਨ ਵਿਚ ਰੱਖ ਕੇ ਕਰਨੀ ਚਾਹੀਦੀ ਹੈ। ਇਹੋ ਜਿਹੇ ਉਤਪਾਦਨ ਖਰੀਦਣੇ/ਵਰਤਣੇ ਚਾਹੀਦੇ ਹਨ ਜੋ ਕਿ ਚਮੜੀ ਜਾਂ ਵਾਲਾਂ ਨੂੰ ਰੁੱਖਾ ਨਾ ਬਣਾਉਣ, ਜਿਵੇਂ ਕਿ ਸਾਬਣ, ਫੇਸ ਵਾਸ਼, ਸ਼ੈਂਪੂ ਆਦਿ। ਉਤਪਾਦਨ ਖਰੀਦਦੇ ਸਮੇਂ ਉਨ੍ਹਾਂ ਵਿਚ ਪਈ ਸਮੱਗਰੀ ਨੂੰ ਧਿਆਨ ਨਾਲ ਪੜ੍ਹ ਕੇ ਹੀ ਖਰੀਦਣਾ ਚਾਹੀਦਾ ਹੈ।
ਇਸ ਦੇ ਨਾਲ ਹੀ ਉਤਪਾਦਨ ਹਮੇਸ਼ਾ ਪੀ.ਐਚ. ਬੈਲੇਂਸ ਨੂੰ ਦੇਖ ਕੇ ਖਰੀਦੋ, ਜੋ ਕਿ ਤੁਹਾਡੀ ਚਮੜੀ ਦੇ ਪੀ. ਐਚ. ਦੇ ਸੰਤੁਲਨ ਨੂੰ ਬਣਾ ਕੇ ਰੱਖੇ।
ਸਕ੍ਰਬਿੰਗ : ਸਕ੍ਰਬਿੰਗ ਹਫ਼ਤੇ ਵਿਚ ਇਕ ਜਾਂ ਦੋ ਵਾਰ ਕਰਨੀ ਚਾਹੀਦੀ ਹੈ, ਜੋ ਕਿ ਚਮੜੀ ਦੇ ਡੈੱਡ ਸੈੱਲਾਂ ਨੂੰ ਖ਼ਤਮ ਕਰਦੀ ਹੈ ਤੇ ਮਾਇਸਚਰਾਈਜ਼ਰ ਨੂੰ ਚਮੜੀ ਵਿਚ ਸੋਖਣ ਵਿਚ ਮਦਦ ਕਰਦੀ ਹੈ।
ਸਨਸਕ੍ਰੀਨ : ਸਨਸਕ੍ਰੀਨ ਰੋਜ਼ ਲਗਾਉਣਾ ਚਾਹੀਦਾ ਹੈ, ਜੋ ਕਿ ਸਾਡੀ ਚਮੜੀ ਨੂੰ ਧੁੱਪ ਦੀਆਂ ਹਾਨੀਕਾਰਕ ਪੈਰਾਬੈਂਗਣੀ ਕਿਰਨਾਂ ਤੋਂ ਬਚਾਉਂਦਾ ਹੈ।
ਸੀ. ਟੀ. ਐਮ. : ਸੀ. ਟੀ. ਐਮ. ਤੋਂ ਭਾਵ ਹੈ ਕਲੀਂਜਿੰਗ, ਟੋਨਿੰਗ ਤੇ ਮਾਇਸਚਰਾਈਜ਼ਿੰਗ। ਮੌਸਮ ਕੋਈ ਵੀ ਹੋਵੇ, ਚਮੜੀ ਦੀ ਸੰਭਾਲ ਕਰਨ ਲਈ ਰੋਜ਼ ਸੀ. ਟੀ. ਐਮ. ਕਰਨਾ ਚਾਹੀਦਾ ਹੈ, ਜੋ ਕਿ ਚਮੜੀ ਦੀ ਨਮੀ ਨੂੰ ਬਣਾਈ ਰੱਖਣ ਵਿਚ ਵੀ ਮਦਦ ਕਰਦਾ ਹੈ ਤੇ ਚਮੜੀ 'ਤੇ ਡੈੱਡ ਸੈੱਲ ਵੀ ਘੱਟ ਹੀ ਬਣਦੇ ਹਨ। ਬਸ ਫਰਕ ਸਿਰਫ ਏਨਾ ਹੈ ਕਿ ਮੌਸਮ ਦੇ ਅਨੁਸਾਰ ਉਤਪਾਦਨ ਬਦਲ ਜਾਂਦੇ ਹਨ।
ਮੇਕਅਪ ਉਤਾਰਨਾ : ਜਿਹੜੀਆਂ ਔਰਤਾਂ ਰੋਜ਼ ਮੇਕਅਪ ਕਰਦੀਆਂ ਹਨ, ਉਨ੍ਹਾਂ ਨੂੰ ਰਾਤ ਨੂੰ ਮੇਕਅਪ ਚੰਗੀ ਤਰ੍ਹਾਂ ਉਤਾਰ ਕੇ ਸੌਣਾ ਚਾਹੀਦਾ ਹੈ। ਮੇਕਅਪ ਨਾ ਉਤਾਰਨ ਨਾਲ ਮੇਕਅਪ ਵਿਚ ਜਿਹੜੇ ਰਸਾਇਣ ਹੁੰਦੇ ਹਨ, ਉਹ ਵੀ ਚਮੜੀ ਵਿਚੋਂ ਨਮੀ ਖਿੱਚ ਲੈਂਦੇ ਹਨ, ਜਿਸ ਨਾਲ ਚਮੜੀ ਬਹੁਤ ਜ਼ਿਆਦਾ ਰੁੱਖੀ ਹੋ ਜਾਂਦੀ ਹੈ।
ਖੁਰਾਕ : ਵਧੀਆ ਉਤਪਾਦਨ ਵਰਤਣ ਦੇ ਨਾਲ-ਨਾਲ ਸਾਨੂੰ ਚਮੜੀ ਦੀ ਖੂਬਸੂਰਤੀ ਲਈ ਖੁਰਾਕ ਵੀ ਵਧੀਆ ਤੇ ਸਿਹਤਮੰਦ ਲੈਣੀ ਚਾਹੀਦੀ ਹੈ। ਇਕੱਲੇ ਉਤਪਾਦਨ ਸਾਡੀ ਚਮੜੀ ਨੂੰ ਸਿਹਤਮੰਦ ਨਹੀਂ ਬਣਾ ਸਕਦੇ। ਇਸ ਲਈ ਚਮੜੀ ਨੂੰ ਹਾਈਡ੍ਰੇਟ ਰੱਖਣ ਲਈ 8 ਤੋਂ 10 ਗਲਾਸ ਪਾਣੀ ਰੋਜ਼ ਪੀਣਾ ਚਾਹੀਦਾ ਹੈ। ਗਰਮ ਪਾਣੀ ਵਿਚ ਨਿੰਬੂ ਨਿਚੋੜ ਕੇ ਪੀਣਾ ਚਾਹੀਦਾ ਹੈ, ਜੋ ਕਿ ਸਰੀਰ ਵਿਚੋਂ ਜ਼ਹਿਰੀਲੇ ਪਦਾਰਥ ਕੱਢਣ ਵਿਚ ਮਦਦ ਕਰਦਾ ਹੈ ਅਤੇ ਇਮਿਯੂਨ ਸਿਸਟਮ ਨੂੰ ਵੀ ਮਜ਼ਬੂਤ ਬਣਾਉਂਦਾ ਹੈ। ਇਸ ਤੋਂ ਇਲਾਵਾ ਗਰੀਨ ਟੀ, ਫਲ, ਸਬਜ਼ੀਆਂ ਆਦਿ ਖੁਰਾਕ ਵਿਚ ਸ਼ਾਮਿਲ ਕਰਨੇ ਚਾਹੀਦੇ ਹਨ। ਸੰਤੁਲਤ ਤੇ ਪੋਸ਼ਟਿਕ ਭੋਜਨ ਲੈਣਾ ਚਾਹੀਦਾ ਹੈ।
ਇਸ ਦੇ ਨਾਲ ਕਸਰਤ ਕਰਨੀ ਬਹੁਤ ਜ਼ਰੂਰੀ ਹੈ, ਜੋ ਕਿ ਖੂਨ ਦੇ ਸੰਚਾਰ ਨੂੰ ਠੀਕ ਰੱਖਦੀ ਹੈ, ਜਿਸ ਨਾਲ ਚਮੜੀ 'ਤੇ ਝੁਰੜੀਆਂ ਛੇਤੀ ਨਹੀਂ ਪੈਂਦੀਆਂ ਤੇ ਚਮੜੀ ਚਮਕਦਾਰ ਰਹਿੰਦੀ ਹੈ।
ਬਿਊਟੀ ਸਲੀਪ : ਚੰਗੇ ਉਤਪਾਦਨ ਤੇ ਚੰਗੀ ਖੁਰਾਕ ਦੇ ਨਾਲ-ਨਾਲ ਸਾਨੂੰ ਨੀਂਦ ਵੀ ਪੂਰੀ ਤੇ ਤਣਾਅ ਰਹਿਤ ਲੈਣੀ ਚਾਹੀਦੀ ਹੈ। ਨੀਂਦ ਦਾ ਸਾਡੀ ਸੁੰਦਰਤਾ ਨਾਲ ਬਹੁਤ ਗਹਿਰਾ ਸਬੰਧ ਹੈ। ਇਸੇ ਕਰਕੇ ਇਸ ਨੂੰ ਬਿਊਟੀ ਸਲੀਪ ਵੀ ਕਿਹਾ ਗਿਆ ਹੈ, ਜੋ ਕਿ ਬਿਊਟੀ ਨੂੰ ਵਧਾਉਂਦੀ ਹੈ।
ਇਸ ਤਰ੍ਹਾਂ ਇਨ੍ਹਾਂ ਸੁਝਾਵਾਂ ਨੂੰ ਧਿਆਨ ਵਿਚ ਰੱਖ ਕੇ ਅਤੇ ਥੋੜ੍ਹਾ ਜਿਹਾ ਸਮਾਂ ਕੱਢ ਕੇ ਅਸੀਂ ਆਪਣੀ ਚਮੜੀ ਨੂੰ ਸੋਹਣਾ ਤੇ ਸਿਹਤਮੰਦ ਬਣਾ ਸਕਦੇ ਹਾਂ।


-ਸਹਾਇਕ ਪ੍ਰੋਫੈਸਰ ਕਾਸਮੈਟਾਲੋਜੀ

ਹੱਸਣਾ ਵੀ ਇਕ ਕਲਾ ਹੈ

ਹੱਸਣਾ ਜ਼ਿੰਦਗੀ ਜਿਊਣ ਲਈ ਬਹੁਤ ਹੀ ਸੋਹਣੀ ਕਲਾ ਹੈ। ਜਿਹੜਾ ਵਿਅਕਤੀ ਹੱਸਣਾ ਸਿੱਖ ਲੈਂਦਾ ਹੈ, ਉਹ ਜ਼ਿੰਦਗੀ ਦੇ ਹਰ ਦੁੱਖ ਤੋਂ ਅਸਾਨੀ ਨਾਲ ਬਾਹਰ ਆ ਜਾਂਦਾ ਹੈ। ਹੱਸਣਾ ਸਾਡੀ ਜ਼ਿੰਦਗੀ ਵਿਚ ਬਹੁਤ ਹੀ ਜ਼ਰੂਰੀ ਹੈ। ਹੱਸਣ ਤੋਂ ਬਿਨਾਂ ਜ਼ਿੰਦਗੀ ਨਿਰਸ ਅਤੇ ਬੇਰੰਗ ਹੈ।
ਹੱਸਣ ਅਤੇ ਮੁਸਕਰਾਉਣ ਵਾਲੇ ਵਿਅਕਤੀ ਨੂੰ ਹਰ ਕੋਈ ਪਸੰਦ ਕਰਦਾ ਹੈ। ਕਿਸੇ ਨੂੰ ਹੱਸ ਕੇ ਬੁਲਾਉਣ ਨਾਲ ਦੂਜੇ ਦੇ ਚਿਹਰੇ 'ਤੇ ਵੀ ਮੁਸਕਰਾਹਟ ਆ ਜਾਂਦੀ ਹੈ। ਖੁੱਲ੍ਹ ਕੇ ਹੱਸਣਾ ਇਕ ਕਸਰਤ ਵੀ ਹੈ ਅਤੇ ਖੁੱਲ੍ਹ ਕੇ ਹੱਸਣ ਨਾਲ ਵਿਅਕਤੀ ਕਈ ਬਿਮਾਰੀਆਂ ਤੋਂ ਦੂਰ ਹੀ ਰਹਿੰਦਾ ਹੈ। ਬਹੁਤ ਸਾਰੇ ਡਾਕਟਰ ਵੀ ਹੱਸਣ ਅਤੇ ਖੁਸ਼ ਰਹਿਣ ਦੀ ਸਲਾਹ ਦਿੰਦੇ ਹਨ। ਹੱਸਦੇ ਰਹਿਣ ਵਾਲੇ ਵਿਅਕਤੀ ਦਾ ਸਾਥ ਹਰ ਕੋਈ ਪਸੰਦ ਕਰਦਾ ਹੈ। ਜਿਹੜਾ ਵਿਅਕਤੀ ਹੱਸਮੁੱਖ ਹੁੰਦਾ ਹੈ, ਉਹ ਆਪ ਤਾਂ ਖੁਸ਼ ਰਹਿੰਦਾ ਹੈ, ਨਾਲ ਹੀ ਆਪਣੇ ਨਾਲ ਵਾਲੇ ਵਿਅਕਤੀ ਨੂੰ ਵੀ ਖੁਸ਼ ਰੱਖਦਾ ਹੈ। ਜੋ ਵਿਅਕਤੀ ਹੱਸਣ ਦੀ ਕਲਾ ਜਾਣਦਾ ਹੋਵੇ, ਉਹ ਵਿਅਕਤੀ ਸਭ ਤੋਂ ਵਧੀਆ ਹੁੰਦਾ ਹੈ। ਅੱਜ ਦੀ ਜ਼ਿੰਦਗੀ ਵਿਚ ਖੁਸ਼ ਰਹਿਣਾ ਜਿਵੇਂ ਬਹੁਤ ਹੀ ਔਖਾ ਹੋ ਗਿਆ ਹੈ। ਇਕ ਮਹਿੰਗਾਈ ਬਹੁਤ ਜ਼ਿਆਦਾ ਹੈ, ਦੂਜਾ ਜ਼ਿੰਦਗੀ ਦੀਆਂ ਮੁਸ਼ਕਿਲਾਂ ਬਹੁਤ ਜ਼ਿਆਦਾ ਹਨ। ਹੱਸਣਾ ਅਤੇ ਖੁਸ਼ ਰਹਿਣਾ ਸਾਡੇ ਲਈ ਓਨਾ ਹੀ ਜ਼ਰੂਰੀ ਹੋ ਗਿਆ ਹੈ ਜਿੰਨਾ ਕਿ ਰੋਟੀ ਖਾਣਾ। ਹੱਸਣ ਨਾਲ ਬੰਦਾ ਜ਼ਿੰਦਗੀ ਦੀਆਂ ਮੁਸ਼ਕਿਲਾਂ ਨੂੰ ਥੋੜ੍ਹੀ ਦੇਰ ਲਈ ਹੀ ਸਹੀ ਪਰ ਭੁੱਲ ਤਾਂ ਜਾਂਦਾ ਹੈ ਅਤੇ ਜ਼ਿੰਦਗੀ ਦੀਆਂ ਖੁਸ਼ੀਆਂ ਨੂੰ ਮਾਣਦਾ ਹੈ। ਵੈਸੇ ਵੀ ਹਰ ਵੇਲੇ ਦੁਖੀ ਰਹਿਣ ਵਾਲੇ ਵਿਅਕਤੀ ਨੂੰ ਕੋਈ ਪਸੰਦ ਨਹੀਂ ਕਰਦਾ। ਇਸ ਲਈ ਸਾਨੂੰ ਹਮੇਸ਼ਾ ਖੁਸ਼ ਰਹਿਣ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ ਅਤੇ ਹੱਸਦੇ ਰਹਿਣ ਦੀ ਕਲਾ ਨੂੰ ਅਪਣਾਉਣਾ ਚਾਹੀਦਾ ਹੈ।


-ਸ਼ਹਾਬਦੀ ਨੰਗਲ, ਹੁਸ਼ਿਆਰਪੁਰ। ਮੋਬਾ: 97793-68243

ਕੀਮਤੀ ਜੁੱਤੀ-ਚੱਪਲ ਖ਼ਰੀਦਦੇ ਹੋ

...ਤਾਂ ਸਾਫ਼-ਸੁਥਰਾ 'ਸ਼ੂ ਰੈਕ' ਵੀ ਖ਼ਰੀਦੋ

ਜੁੱਤੀਆਂ-ਚੱਪਲਾਂ ਨੂੰ ਸੰਭਾਲ ਕੇ ਰੱਖਣ ਦਾ ਸਹੀ ਤਰੀਕਾ ਕੀ ਹੋਵੇ, ਆਓ ਇਹ ਮਹੱਤਵਪੂਰਨ ਗੱਲਾਂ ਕੁਝ ਟਿਪਸ ਰਾਹੀਂ ਜਾਣਦੇ ਹਾਂ-
* ਜੁੱਤੀਆਂ-ਚੱਪਲਾਂ ਨੂੰ ਘੱਟ ਜਗ੍ਹਾ ਵਿਚ ਰੱਖਣ ਲਈ ਇਨ੍ਹਾਂ ਨੂੰ ਪੁਰਾਣੇ 'ਸ਼ੂ ਬਾਕਸਾਂ' ਵਿਚ ਰੱਖੋ ਅਤੇ ਚਾਹੋ ਤਾਂ ਇਨ੍ਹਾਂ ਨੂੰ ਅਲਮਾਰੀ ਵਿਚ ਵੀ ਇਕ ਤੋਂ ਬਾਅਦ ਇਕ ਰੱਖ ਸਕਦੇ ਹੋ।
* ਕਿਸ ਬਾਕਸ ਵਿਚ ਕਿਹੜੀ ਜੁੱਤੀ ਜਾਂ ਚੱਪਲ ਹੈ, ਉਸ ਬਾਕਸ 'ਤੇ ਉਸ ਦੀ ਫੋਟੋ ਲਗਾ ਕੇ ਰੱਖੋ। ਇਹ ਸਹੂਲਤ ਨਾ ਹੋਵੇ ਤਾਂ ਘੱਟ ਤੋਂ ਘੱਟ ਕਿਸ ਆਕਾਰ ਅਤੇ ਰੰਗ ਦੇ, ਉਹ ਨੰਬਰ ਤਾਂ ਜ਼ਰੂਰ ਲਿਖੋ। ਜੁੱਤੀਆਂ ਨੂੰ ਧੂੜ, ਮਿੱਟੀ ਤੋਂ ਬਚਾਉਣ ਲਈ ਹਮੇਸ਼ਾ ''ਸ਼ੂ ਰੈਕ'' ਵਿਚ ਹੀ ਰੱਖੋ।
* 'ਸ਼ੂ ਰੈਕ' ਨੂੰ ਅਜਿਹੀ ਜਗ੍ਹਾ 'ਤੇ ਰੱਖਣਾ ਚਾਹੀਦਾ ਹੈ ਜਿਥੇ ਧੂੜ, ਮਿੱਟੀ ਘੱਟ ਆਉਂਦੀ ਹੋਵੇ, ਤਾਂ ਕਿ ਜੁੱਤੀਆਂ-ਚੱਪਲਾਂ ਨੂੰ ਧੂੜ-ਮਿੱਟੀ ਤੋਂ ਬਚਾਇਆ ਜਾ ਸਕੇ।
* ਘਰ ਵਿਚ ਜੇ ਜਗ੍ਹਾ ਘੱਟ ਹੋਵੇ ਤਾਂ ਹੈਂਗਿੰਗ 'ਸ਼ੂ ਰੈਕ' ਵੀ ਖਰੀਦਿਆ ਜਾ ਸਕਦਾ ਹੈ। ਇਸ ਨੂੰ ਸੌਣ ਵਾਲੇ ਕਮਰੇ ਜਾਂ ਅਲਮਾਰੀ ਦੇ ਦਰਵਾਜ਼ੇ ਦੇ ਪਿੱਛੇ ਟੰਗਿਆ ਜਾ ਸਕਦਾ ਹੈ।
* ਘਰ ਦੇ ਵੱਖ-ਵੱਖ ਮੈਂਬਰ ਚਾਹੁੰਣ ਤਾਂ ਆਪਣੇ-ਆਪਣੇ 'ਸ਼ੂ ਰੈਕ' ਨੂੰ ਆਪਣੇ ਕਮਰੇ ਵਿਚ ਰੱਖ ਸਕਦੇ ਹਨ, ਇਸ ਨਾਲ ਘਰ ਵਿਚ ਜੁੱਤੀਆਂ-ਚੱਪਲਾਂ ਖਿਲਰਨਗੀਆਂ ਨਹੀਂ ਅਤੇ ਬੇਲੋੜੇ ਰੂਪ ਨਾਲ ਦਿਸਣਗੀਆਂ ਵੀ ਨਹੀਂ। * ਘਰ ਵਿਚ ਜੇ ਜ਼ਿਆਦਾ ਮੈਂਬਰ ਹਨ ਤਾਂ ਵੱਡਾ 'ਸ਼ੂ ਰੈਕ' ਖ਼ਰੀਦੋ।
* 'ਸ਼ੂ ਰੈਕ' ਜੇ ਲੱਕੜੀ ਦਾ ਹੈ ਤਾਂ ਇਸ ਨੂੰ ਅੰਦਰੋਂ ਚੰਗੀ ਤਰ੍ਹਾਂ ਪਾਲਿਸ਼ ਕਰਾਓ, ਨਹੀਂ ਤਾਂ ਇਸ ਵਿਚ ਸਿਉਂਕ ਲੱਗਣ ਦਾ ਖਤਰਾ ਰਹਿੰਦਾ ਹੈ।
* ਪੁਰਾਣੀ ਪੌੜੀ ਜਾਂ ਬਾਜ਼ਾਰ ਦੇ ਬਣੇ ਹੈਂਗਿੰਗ 'ਸ਼ੂ ਰੈਕ' ਜਾਂ ਟ੍ਰੀ 'ਸ਼ੂ ਰੈਕ' ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ।
* 'ਸ਼ੂ ਰੈਕ' ਵਿਚ ਜੁੱਤੀਆਂ ਨੂੰ ਰੱਖਣ ਤੋਂ ਪਹਿਲਾਂ ਉਨ੍ਹਾਂ ਨੂੰ ਚੰਗੀ ਤਰ੍ਹਾਂ ਸਾਫ਼ ਕਰ ਲਓ। ਟੁੱਟੀਆਂ-ਫੁੱਟੀਆਂ ਜੁੱਤੀਆਂ, ਚੱਪਲਾਂ ਨੂੰ ਮੁਰੰਮਤ ਕਰਾ ਕੇ ਸਟੋਰ ਕਰੋ ਤਾਂ ਕਿ ਲੋੜ ਪੈਣ 'ਤੇ ਇਨ੍ਹਾਂ ਨੂੰ ਵਰਤੋਂ ਵਿਚ ਲਿਆਂਦਾ ਜਾ ਸਕੇ।
* ਕਈ ਜੁੱਤੀਆਂ ਦਾ ਮੈਟੀਰੀਅਲ ਇਸ ਤਰ੍ਹਾਂ ਦਾ ਹੁੰਦਾ ਹੈ ਕਿ ਉਨ੍ਹਾਂ ਦਾ ਆਕਾਰ ਛੇਤੀ ਖਰਾਬ ਹੋ ਜਾਂਦਾ ਹੈ। ਅਜਿਹੀਆਂ ਜੁੱਤੀਆਂ ਨੂੰ ਸਟੋਰ ਕਰਨ ਲਈ ਇਨ੍ਹਾਂ ਵਿਚ ਗੱਤੇ ਦਾ ਸਹਾਰਾ ਦੇ ਕੇ ਰੱਖੋ ਤਾਂ ਕਿ ਇਨ੍ਹਾਂ ਦਾ ਆਕਾਰ ਖਰਾਬ ਨਾ ਹੋਵੇ।
* ਜੁੱਤੀਆਂ ਨੂੰ ਕਦੇ ਵੀ ਪੁਰਾਣੀ ਅਖ਼ਬਾਰ ਜਾਂ ਮੈਗਜ਼ੀਨ ਦੇ ਸਫਿਆਂ 'ਚ ਲਪੇਟ ਕੇ ਨਾ ਰੱਖੋ, ਕਿਉਂਕਿ ਇਨ੍ਹਾਂ ਦੀ ਸਿਆਹੀ ਨਾਲ ਉਨ੍ਹਾਂ ਵਿਚ ਦਾਗ ਪੈ ਸਕਦੇ ਹਨ।
* ਉਨ੍ਹਾਂ ਨੂੰ ਸਟੋਰ ਕਰਨ ਤੋਂ ਪਹਿਲਾਂ ਹਵਾਬੰਦ ਡੱਬੇ ਜਾਂ ਬੈਗ ਵਿਚ ਰੱਖੋ ਤਾਂ ਕਿ ਨਮੀ ਦੇ ਕਾਰਨ ਉਹ ਖਰਾਬ ਨਾ ਹੋਣ।
* ਗਰਮੀਆਂ ਵਿਚ ਠੰਢੀ ਜਗ੍ਹਾ 'ਤੇ ਅਤੇ ਸਰਦੀਆਂ ਵਿਚ 'ਸ਼ੂ ਰੈਕ' ਨੂੰ ਗਰਮ ਜਗ੍ਹਾ 'ਤੇ ਰੱਖੋ, ਕਿਉਂਕਿ ਜ਼ਿਆਦਾ ਗਰਮੀ ਅਤੇ ਜ਼ਿਆਦਾ ਠੰਢ ਨਾਲ ਵੀ ਇਨ੍ਹਾਂ ਦਾ ਆਕਾਰ ਖਰਾਬ ਹੁੰਦਾ ਹੈ।
* ਬੂਟ ਅਤੇ ਸਰਦੀ ਵਿਚ ਪਹਿਨੀਆਂ ਜਾਣ ਵਾਲੀਆਂ ਭਾਰੀਆਂ ਜੁੱਤੀਆਂ ਨੂੰ ਪਹਿਨਣ ਤੋਂ ਪਹਿਲਾਂ ਉਨ੍ਹਾਂ ਨੂੰ ਧੁੱਪ ਵਿਚ ਚੰਗੀ ਸੁਕਾ ਕੇ ਪਹਿਨੋ ਤਾਂ ਕਿ ਉਨ੍ਹਾਂ ਵਿਚੋਂ ਬਦਬੂ ਨਾ ਆਵੇ।
* ਬਰਸਾਤ ਦੇ ਮੌਸਮ ਵਿਚ ਹਵਾ ਵਿਚ ਨਮੀ ਦੀ ਮਾਤਰਾ ਵਧ ਜਾਂਦੀ ਹੈ। ਆਪਣੇ 'ਸ਼ੂ ਰੈਕ' ਨੂੰ ਅਜਿਹੀ ਜਗ੍ਹਾ ਰੱਖੋ, ਜਿਥੇ ਬਰਸਾਤ ਦਾ ਪਾਣੀ ਨਾ ਆਵੇ। ਇਨ੍ਹਾਂ ਦਿਨਾਂ ਵਿਚ ਗਿੱਲੀਆਂ ਜੁੱਤੀਆਂ ਅਤੇ ਚੱਪਲਾਂ ਨੂੰ ਸਿੱਧੇ 'ਸ਼ੂ ਰੈਕ' ਵਿਚ ਨਾ ਰੱਖੋ। ਸਟੋਰ ਕਰਨ ਤੋਂ ਪਹਿਲਾਂ ਇਨ੍ਹਾਂ ਨੂੰ ਧੁੱਪ ਵਿਚ ਸੁਕਾ ਕੇ ਰੱਖੋ।


-ਫਿਊਚਰ ਮੀਡੀਆ ਨੈਟਵਰਕ

ਘਰੇਲੂ ਬਗੀਚੀ

ਮਹੱਤਵਪੂਰਨ ਟਿਪਸ

ਘਰ ਵਿਚ ਕੋਈ ਹੋਰ ਜਗ੍ਹਾ ਨਾ ਹੋਵੇ ਗਮਲੇ ਰੱਖਣ ਜਾਂ ਪੌਦੇ ਲਗਾਉਣ ਲਈ ਅਤੇ ਬਾਲਕੋਨੀ ਜੇ ਧੁੱਪ ਵਾਲੀ ਹੋਵੇ ਤਾਂ ਉਸ ਦਾ ਪੂਰਾ ਲਾਭ ਲਓ।
* ਜੇ ਤੁਸੀਂ ਹੇਠਾਂ ਜ਼ਮੀਨ 'ਤੇ ਹੋ ਅਤੇ ਕੱਚੀ ਜਗ੍ਹਾ ਹੈ ਤਾਂ ਉਸ 'ਤੇ ਕਿਆਰੀ ਬਣਾ ਕੇ ਘਰੇਲੂ ਬਗੀਚੀ ਬਣਾਓ।
* ਜੇ ਛੱਤ 'ਤੇ ਘਰੇਲੂ ਬਗੀਚੀ ਬਣਾਉਣੀ ਹੋਵੇ ਤਾਂ ਪੋਲੀਥੀਨ ਪਹਿਲਾਂ ਵਿਛਾ ਦਿਓ। ਉਸ ਵਿਚ ਥੋੜ੍ਹੀ ਦੂਰੀ 'ਤੇ ਕੁਝ ਸੁਰਾਖ ਕਰ ਲਓ ਤਾਂ ਕਿ ਜ਼ਿਆਦਾ ਪਾਣੀ ਨਿਕਲ ਜਾਵੇ ਅਤੇ ਛੱਤ ਵਿਚ ਸਿੱਲ੍ਹ ਵੀ ਨਾ ਆਵੇ।
* ਗਮਲੇ ਮਿੱਟੀ ਦੇ ਖ਼ਰੀਦੋ। ਪਲਾਸਟਿਕ ਦੇ ਗਮਲਿਆਂ ਵਿਚ ਪੌਦੇ ਦਾ ਪੂਰਾ ਵਿਕਾਸ ਨਹੀਂ ਹੁੰਦਾ।
* ਗਮਲਿਆਂ ਵਿਚ ਮਿੱਟੀ ਪਾਉਂਦੇ ਸਮੇਂ ਨਿੰਮ ਦੇ ਸੁੱਕੇ ਪੱਤੇ ਮਿਲਾਓ ਤਾਂ ਕਿ ਕੀੜਿਆਂ ਤੋਂ ਬਚਿਆ ਜਾ ਸਕੇ।
* ਗਮਲਿਆਂ ਜਾਂ ਕਿਆਰੀਆਂ ਵਿਚ ਹਵਾ ਅਤੇ ਪਾਣੀ ਚੰਗੀ ਤਰ੍ਹਾਂ ਮਿਲਦੇ ਰਹਿਣ, ਪੌਦਿਆਂ ਦੀ ਗੁਡਾਈ ਜ਼ਰੂਰ ਕਰੋ।
* ਆਂਡਿਆਂ ਅਤੇ ਫਲਾਂ ਦੀਆਂ ਛਿੱਲਾਂ ਦੀ ਵਰਤੋਂ ਮਿੱਟੀ ਵਿਚ ਮਿਲਾ ਕੇ ਕਰ ਸਕਦੇ ਹੋ ਤਾਂ ਕਿ ਪੌਦਿਆਂ ਨੂੰ ਪੋਸ਼ਣ ਮਿਲਦਾ ਰਹੇ।
* ਐਸਪ੍ਰਿਨ, ਡਿਸਪ੍ਰਿਨ ਜਾਂ ਇਕੋਸਪ੍ਰਿਨ ਦੀ ਗੋਲੀ ਇਕ ਮੱਗ ਪਾਣੀ ਵਿਚ ਮਿਲਾ ਕੇ ਸਪਰੇਅ ਕਰੋ ਤਾਂ ਕਿ ਪੌਦਿਆਂ ਨੂੰ ਉੱਲੀ ਤੋਂ ਬਚਾਇਆ ਜਾ ਸਕੇ ਅਤੇ ਪੌਦਿਆਂ ਦਾ ਵਿਕਾਸ ਵੀ ਸਹੀ ਤਰ੍ਹਾਂ ਹੋ ਸਕੇ।
* ਜੇ ਪੌਦਿਆਂ ਨੂੰ ਲੋੜੀਂਦੀ ਧੁੱਪ ਨਹੀਂ ਮਿਲੇਗੀ ਤਾਂ ਪੌਦੇ ਆਕਾਰ ਵਿਚ ਛੋਟੇ ਅਤੇ ਕਮਜ਼ੋਰ ਰਹਿ ਜਾਣਗੇ। ਦਿਨ ਵਿਚ 3 ਤੋਂ 4 ਘੰਟੇ ਦੀ ਧੁੱਪ ਕਾਫੀ ਹੈ। ਗਰਮੀਆਂ ਵਿਚ ਤੇਜ਼ ਧੁੱਪ ਤੋਂ ਪੌਦਿਆਂ ਨੂੰ ਬਚਾਓ।
* ਪੌਦਿਆਂ ਨੂੰ ਸਵੇਰੇ ਜਾਂ ਸ਼ਾਮ ਵੇਲੇ ਪਾਣੀ ਪਾਓ। ਤੇਜ਼ ਧੁੱਪ ਵਿਚ ਪਾਣੀ ਪਾਉਣ ਨਾਲ ਪੌਦੇ ਝੁਲਸ ਸਕਦੇ ਹਨ।
* ਜਦੋਂ ਗਮਲੇ ਸੁੱਕੇ ਲੱਗਣ, ਉਦੋਂ ਹੀ ਪਾਣੀ ਪਾਓ। ਸਰਦੀਆਂ ਵਿਚ 4-5 ਦਿਨ ਦੇ ਫਰਕ ਨਾਲ ਪਾਣੀ ਪਾਓ ਅਤੇ ਗਰਮੀਆਂ ਵਿਚ ਇਕ ਦਿਨ ਛੱਡ ਕੇ। ਜ਼ਿਆਦਾ ਪਾਣੀ ਨਾਲ ਮਿੱਟੀ ਦੇ ਕਣਾਂ ਵਿਚ ਮੌਜੂਦ ਆਕਸੀਜਨ ਪੌਦਿਆਂ ਦੀਆਂ ਜੜ੍ਹਾਂ ਤੱਕ ਨਹੀਂ ਪਹੁੰਚਦੀ।
* ਘਰੇਲੂ ਬਗੀਚੀ ਵਿਚ ਫਲ, ਹਰਬਲ ਪਲਾਂਟਸ, ਸਬਜ਼ੀਆਂ ਲਗਾਓ। ਗਰਮੀਆਂ ਵਿਚ ਕਰੇਲਾ, ਭਿੰਡੀ, ਧਨੀਆ, ਤੋਰੀ, ਘੀਆ, ਕਕੜੀ, ਬੈਂਗਣ ਲਗਾ ਸਕਦੇ ਹੋ। ਸਰਦੀਆਂ ਵਿਚ ਮੂਲੀ, ਗਾਜਰ, ਟਮਾਟਰ, ਪੱਤਾ ਗੋਭੀ, ਫੁੱਲ ਗੋਭੀ, ਪਾਲਕ, ਮੇਥੀ, ਬੈਂਗਣ, ਮਟਰ ਲਗਾ ਸਕਦੇ ਹੋ। ਹਰਬਲ ਪਲਾਂਟਸ ਵਿਚ ਕਰੀ ਪੱਤਾ, ਧਨੀਆ, ਪੁਦੀਨਾ, ਤੁਲਸੀ, ਨਿੰਮ ਲਗਾਓ।
* ਸਬਜ਼ੀਆਂ ਲਈ ਹਾਈਬ੍ਰਿਡ ਬੀਜ ਨਾ ਖ਼ਰੀਦੋ, ਕੁਦਰਤੀ ਬ੍ਰੀਡਿੰਗ ਵਾਲੇ ਬੀਜ ਖ਼ਰੀਦੋ। ਨਰਸਰੀ ਤੋਂ ਸਬਜ਼ੀਆਂ ਦੀ ਪਨੀਰੀ ਲੈ ਕੇ ਲਗਾਓ।

ਸੁੰਦਰਤਾ ਮਾਹਿਰ ਸ਼ਹਿਨਾਜ਼ ਹੁਸੈਨ ਨਾਲ ਮੁਲਾਕਾਤ

ਛੇਤੀ ਹੀ ਦੁਨੀਆ ਭਰ 'ਚ ਭਾਰਤੀ ਸੁੰਦਰਤਾ ਵਧਾਊ ਸਾਧਨਾਂ ਦਾ ਡੰਕਾ ਵੱਜੇਗਾ-ਸ਼ਹਿਨਾਜ਼


* ਕਿਰਪਾ ਕਰਕੇ ਆਪਣੇ ਜੀਵਨ ਦੇ ਸ਼ੁਰੂਆਤੀ ਸੰਘਰਸ਼ ਦੇ ਦੌਰ 'ਤੇ ਚਾਨਣਾ ਪਾਓ। ਤੁਹਾਨੂੰ ਸ਼ੁਰੂਆਤ ਸੰਘਰਸ਼ ਵਿਚ ਕਿਸ ਨੇ ਪ੍ਰੇਰਿਤ ਕੀਤਾ।
-ਲੰਡਨ ਵਿਚ ਮੇਰੀ ਸੁੰਦਰਤਾ ਪ੍ਰਸਾਧਨ 'ਤੇ ਪੜ੍ਹਾਈ ਦੌਰਾਨ ਮੈਨੂੰ ਰਸਾਇਣਕ ਸੁੰਦਰਤਾ ਉਤਪਾਦਾਂ ਨਾਲ ਚਮੜੀ, ਵਾਲਾਂ ਆਦਿ ਨੂੰ ਹੋਣ ਵਾਲੇ ਨੁਕਸਾਨ ਦੀ ਜਾਣਕਾਰੀ ਮਿਲੀ। ਮੈਂ ਇਹ ਜਾਣ ਕੇ ਹੈਰਾਨ ਰਹਿ ਗਈ ਅਤੇ ਇਸ ਘਟਨਾ ਨੇ ਮੇਰੇ ਜੀਵਨ ਅਤੇ ਭਵਿੱਖ ਦੋਵਾਂ ਨੂੰ ਬਦਲ ਦਿੱਤਾ। ਮੈਂ ਸੁੰਦਰਤਾ ਵਿਚ ਕੁਦਰਤੀ ਉਤਪਾਦਾਂ ਦੀ ਵਰਤੋਂ 'ਤੇ ਖੋਜ ਸ਼ੁਰੂ ਕੀਤੀ, ਜੋ ਕਿ ਬਿਲਕੁਲ ਸੁਰੱਖਿਅਤ ਅਤੇ ਬਿਨਾਂ ਕਿਸੇ ਜੋਖਮ ਦੇ ਕੁਦਰਤੀ ਸੁੰਦਰਤਾ ਦੇ ਸਕੇ। ਮੈਂ ਆਯੁਰਵੈਦਿਕ ਸੁੰਦਰਤਾ ਪ੍ਰਸਾਧਨਾਂ 'ਤੇ ਕੀਤੀ ਗਈ ਖੋਜ ਵਿਚ ਇਹ ਨਤੀਜਾ ਕੱਢਿਆ ਕਿ ਹਰਬਲ ਉਤਪਾਦ ਆਧੁਨਿਕ ਕਾਸਮੈਟਿਕ ਕੇਅਰ ਦਾ ਵਧੀਆ ਬਦਲ ਹੈ।
ਸਾਲ 1971 ਵਿਚ ਭਾਰਤ ਆਉਣ ਤੋਂ ਬਾਅਦ ਮੈਂ ਆਪਣੇ ਘਰ ਦੇ ਛੋਟੇ ਜਿਹੇ ਵਰਾਂਡੇ ਵਿਚ ਪਹਿਲਾ ਹਰਬਲ ਸੈਲੂਨ ਸ਼ੁਰੂ ਕੀਤਾ। ਉਸ ਸੈਲੂਨ ਵਿਚ ਕੁਦਰਤੀ ਉਤਪਾਦਾਂ ਰਾਹੀਂ ਸੁੰਦਰਤਾ ਸਮੱਸਿਆਵਾਂ ਦਾ ਹੱਲ ਪ੍ਰਦਾਨ ਕੀਤਾ ਗਿਆ, ਜੋ ਕਿ ਸੁੰਦਰਤਾ ਦੇ ਬਾਜ਼ਾਰ ਵਿਚ ਇਕ ਬਿਲਕੁਲ ਨਵਾਂ ਪ੍ਰਯੋਗ ਸੀ। ਮੈਂ ਆਯੁਰਵੈਦਿਕ ਸਿਧਾਂਤਾਂ ਦੇ ਅਨੁਰੂਪ ਕੁਦਰਤੀ ਪਦਾਰਥਾਂ ਅਤੇ ਪੌਦੇ ਦੇ ਸੰਘਟਕਾਂ 'ਤੇ ਆਧਾਰਿਤ ਸੁੰਦਰਤਾ ਪ੍ਰਸਾਧਨਾਂ ਦਾ ਉਤਪਾਦਨ ਸ਼ੁਰੂ ਕੀਤਾ ਅਤੇ ਅੱਜ ਇਹ ਸੈਲੂਨ ਕੁਦਰਤੀ ਸੁੰਦਰਤਾ ਇਲਾਜ ਵਿਚ ਵਿਸ਼ਵ ਭਰ ਵਿਚ ਹਰਮਨ ਪਿਆਰਾ ਹੋ ਚੁੱਕਾ ਹੈ। ਅੱਜ ਵਿਸ਼ਵ ਭਰ ਵਿਚ ਸਾਨੂੰ ਆਮ ਸੁੰਦਰਤਾ ਇਲਾਜ ਲਈ ਹੀ ਨਹੀਂ ਜਾਣਿਆ ਜਾਂਦਾ, ਸਗੋਂ ਕਿੱਲ-ਮੁਹਾਸੇ, ਚਿਹਰੇ ਦੇ ਦਾਗ, ਸਮੇਂ ਤੋਂ ਪਹਿਲਾਂ ਬੁਢਾਪਾ, ਵਾਲਾਂ ਦਾ ਝੜਨਾ, ਵਾਲਾਂ ਦੀ ਸਿੱਕਰੀ, ਪਿਗਮਨਟੇਸ਼ਨ ਆਦਿ ਸੁੰਦਰਤਾ ਨਾਲ ਜੁੜੀਆਂ ਸਮੱਸਿਆਵਾਂ ਦਾ ਇਲਾਜ ਕਰਨ ਵਾਲੇ ਉਤਪਾਦਾਂ ਲਈ ਵੀ ਜਾਣਿਆ ਜਾਂਦਾ ਹੈ। ਮੈਂ ਆਮ ਘਰਾਂ ਦੀਆਂ ਔਰਤਾਂ ਨੂੰ ਉਨ੍ਹਾਂ ਦੇ ਆਪਣੇ ਘਰ ਦੇ ਛੋਟੇ ਜਿਹੇ ਕੋਨੇ ਵਿਚ ਸੁੰਦਰਤਾ ਸੈਲੂਨ ਚਲਾਉਣ ਲਈ ਪ੍ਰੇਰਿਤ ਕੀਤਾ, ਤਾਂ ਕਿ ਉਹ ਆਰਥਿਕ ਤੌਰ 'ਤੇ ਆਤਮ-ਨਿਰਭਰ ਹੋ ਸਕਣ ਅਤੇ ਉਨ੍ਹਾਂ ਨਾਲ ਇਕ ਨਵੀਂ ਪ੍ਰਫੈਚਾਈਜ ਪ੍ਰਣਾਲੀ ਦਾ ਜਨਮ ਹੋਇਆ।
ਮੇਰੇ ਸਵਰਗੀ ਪਿਤਾ ਜੀ ਨੇ ਮੈਨੂੰ ਆਪਣੇ ਸੁਪਨਿਆਂ ਨੂੰ ਸਾਕਾਰ ਕਰਨ ਦੀ ਪ੍ਰੇਰਨਾ ਦਿੱਤੀ। ਜਦੋਂ ਮੈਂ ਵਪਾਰਕ ਖੇਤਰ ਵਿਚ ਪ੍ਰਵੇਸ਼ ਕੀਤਾ ਤਾਂ ਉਨ੍ਹਾਂ ਨੇ ਮੈਨੂੰ ਆਪਣੀ ਕਾਬਲੀਅਤ 'ਤੇ ਭਰੋਸਾ ਕਰਨ ਦਾ ਪਾਠ ਪੜ੍ਹਾਇਆ। ਉਨ੍ਹਾਂ ਨੇ ਕਿਹਾ ਕਿ ਕਿਸਮਤ ਨਾਂਅ ਦੀ ਕੋਈ ਚੀਜ਼ ਨਹੀਂ ਹੁੰਦੀ ਅਤੇ ਤੂੰ ਆਪਣੀ ਕਿਸਮਤ ਆਪ ਬਣਾ ਸਕਦੀ ਹੈਂ, ਤੂੰ ਆਪਣੀ ਕੋਸ਼ਿਸ਼ ਨਾਲ ਜੋ ਚਾਹੇਂ, ਬਣ ਸਕਦੀ ਹੈਂ। ਮੇਰੀ ਸਫਲਤਾ ਦੇ ਪਿੱਛੇ ਮੇਰੇ ਪਿਤਾ ਜੀ ਦੀ ਇਹ ਸੋਚ ਹੈ ਕਿ ਮੈਂ ਕਾਮਯਾਬ ਪੇਸ਼ੇਵਰ ਬਣਾਂਗੀ। ਉਨ੍ਹਾਂ ਦੀ ਲਗਾਤਾਰ ਮਦਦ ਮੇਰੇ ਲਈ ਸਫਲਤਾ ਦੀ ਕੁੰਜੀ ਸਾਬਤ ਹੋਈ।
* ਤੁਸੀਂ ਅੱਜ ਆਪਣੇ-ਆਪ ਨੂੰ ਕਿਥੇ ਸਮਝਦੇ ਹੋ ਅਤੇ ਅਗਲੇ ਪੰਜ-ਦਸ ਸਾਲਾਂ ਵਿਚ ਤੁਹਾਡਾ ਕੀ ਟੀਚਾ ਹੈ?
-ਅੱਜ ਮੈਂ ਵਿਸ਼ਵ ਦੇ ਆਪਣੇ ਵਰਗੇ ਸਭ ਤੋਂ ਵੱਡੇ ਸੰਗਠਨ ਦੀ ਮੁਖੀ ਹਾਂ, ਜਿਸ ਦਾ ਪ੍ਰਫੈਂਚਾਈਜ ਸੈਲੂਨ, ਸਪਾ, ਰਿਟੇਲ, ਆਊਟਲੇਟ, ਬਿਊਟੀ ਟ੍ਰੇਨਿੰਗ ਇੰਸਟੀਚਿਊਟ ਅਤੇ 380 ਸੁੰਦਰਤਾ ਉਤਪਾਦਾਂ ਦਾ ਵਿਸ਼ਵ ਭਰ ਵਿਚ ਨੈੱਟਵਰਕ ਹੈ। ਅੱਜ ਵਿਸ਼ਵ ਦੇ 100 ਦੇਸ਼ਾਂ ਵਿਚ ਪ੍ਰਫੈਂਚਾਈਜ ਅਤੇ ਉਤਪਾਦਾਂ ਨੂੰ ਵੇਚਣ ਦੇ ਡਿਸਟ੍ਰੀਬਿਊਟਰ ਹਨ। ਅਸੀਂ ਪੂਰੇ ਵਿਸ਼ਵ ਵਿਚ ਆਪਣੀ ਪਕੜ ਨੂੰ ਮਜ਼ਬੂਤ ਬਣਾ ਰਹੇ ਹਾਂ। ਮੇਰਾ ਇਹ ਮੰਨਣਾ ਹੈ ਕਿ ਅਗਲੇ ਦਹਾਕੇ ਵਿਚ ਸੁੰਦਰਤਾ ਪ੍ਰਸਾਧਨ ਉਤਪਾਦਾਂ ਵਿਚ ਆਯੁਰਵੈਦਿਕ ਦਾ ਡੰਕਾ ਵੱਜੇਗਾ ਅਤੇ ਅੰਤਰਰਾਸ਼ਟਰੀ ਬਾਜ਼ਾਰ ਵਿਚ ਸਾਡਾ ਦਬਦਬਾ ਵਧੇਗਾ।
* ਤੁਹਾਡੇ ਸਮੂਹ ਦੀਆਂ ਭਾਵੀ ਯੋਜਨਾਵਾਂ ਕੀ ਹਨ? ਕੀ ਤੁਸੀਂ ਆਪਣੀ ਪ੍ਰਗਤੀ ਤੋਂ ਸੰਤੁਸ਼ਟ ਹੋ ਜਾਂ ਹਾਲੇ ਹੋਰ ਉਚਾਈਆਂ ਛੂਹਣ ਦੀ ਇੱਛਾ ਹੈ?
-ਅਸੀਂ ਅਮਰੀਕਾ, ਇੰਗਲੈਂਡ, ਕੈਨੇਡਾ ਮਿਡਲਈਸਟ, ਆਸਟ੍ਰੇਲੀਆ, ਸਿੰਗਾਪੁਰ ਤੇ ਰੂਸ ਵਰਗੇ ਦੇਸ਼ਾਂ ਵਿਚ ਆਪਣੀ ਉਪਸਥਿਤੀ ਨੂੰ ਵਧਾਉਣਾ ਚਾਹੁੰਦੇ ਹਾਂ। ਭਵਿੱਖ ਵਿਚ ਅਸੀਂ ਅੰਤਰਰਾਸ਼ਟਰੀ ਬ੍ਰਾਂਡਿੰਗ ਨੂੰ ਮਜ਼ਬੂਤ ਕਰਕੇ ਵਿਸ਼ਵ ਭਰ ਵਿਚ ਆਪਣੇ ਪ੍ਰਫੈਂਚਾਈਜ ਦਾ ਵਿਸਥਾਰ ਕਰਕੇ ਉਨ੍ਹਾਂ ਖੇਤਰਾਂ ਵਿਚ ਆਪਣੀ ਉਪਸਥਿਤੀ ਦਰਜ ਕਰਾਂਗੇ, ਜਿਥੇ ਹਾਲੇ ਸਾਡੀ ਐਂਟਰੀ ਨਹੀਂ ਹੈ। ਮੈਂ ਵਾਹ-ਵਾਹ 'ਤੇ ਕਦੇ ਭਰੋਸਾ ਨਹੀਂ ਕਰਦੀ ਅਤੇ ਹਮੇਸ਼ਾ ਨਵੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਦੇ ਹੋਏ ਨਵੇਂ ਸਿਖਰਾਂ ਨੂੰ ਪਾਰ ਕਰਨ ਦਾ ਟੀਚਾ ਰੱਖਦੀ ਹਾਂ।
* ਕੀ ਤੁਹਾਡੀ ਰਾਜਨੀਤੀ ਵਿਚ ਆਉਣ ਦੀ ਕੋਈ ਇੱਛਾ ਹੈ?
-ਨਹੀਂ, ਮੇਰੀ ਰਾਜਨੀਤੀ ਵਿਚ ਆਉਣ ਦੀ ਕੋਈ ਇੱਛਾ ਨਹੀਂ ਹੈ।
* ਕੁਦਰਤੀ ਸੁੰਦਰਤਾ ਬਣਾਈ ਰੱਖਣ ਲਈ ਨੌਜਵਾਨਾਂ ਨੂੰ ਤੁਹਾਡਾ ਕੀ ਸੰਦੇਸ਼ ਹੈ?
-ਅੰਦਰੂਨੀ ਤੰਦਰੁਸਤੀ ਅਤੇ ਬਾਹਰੀ ਸੁੰਦਰਤਾ ਇਕੋ ਸਿੱਕੇ ਦੇ ਦੋ ਪਹਿਲੂ ਹਨ। ਅਸਲ ਵਿਚ ਸੁੰਦਰਤਾ ਸਰੀਰਕ ਤੰਦਰੁਸਤੀ ਅਤੇ ਚੰਗੀ ਸਿਹਤ ਨਾਲ ਹੀ ਪ੍ਰਾਪਤ ਕੀਤੀ ਜਾ ਸਕਦੀ ਹੈ। ਅਸਲ ਸੁੰਦਰਤਾ ਪ੍ਰਾਪਤ ਕਰਨ ਲਈ ਲੋੜੀਂਦੇ ਆਹਾਰ, ਸਰੀਰਕ ਕਸਰਤ ਅਤੇ ਤੰਦਰੁਸਤ ਜੀਵਨ ਸ਼ੈਲੀ ਆਧਾਰ ਮੰਨੀ ਜਾਂਦੀ ਹੈ। ਕੁਦਰਤੀ ਸੁੰਦਰਤਾ ਪ੍ਰਾਪਤ ਕਰਨ ਲਈ ਹਰਬਲ ਅਤੇ ਕੁਦਰਤੀ ਉਤਪਾਦਾਂ ਦੀ ਵਰਤੋਂ ਕਰੋ ਅਤੇ ਰਸਾਇਣਕ ਸੁੰਦਰਤਾ ਪ੍ਰਸਾਧਨਾਂ ਅਤੇ ਇਲਾਜ ਤੋਂ ਹਮੇਸ਼ਾ ਪ੍ਰਹੇਜ਼ ਕਰੋ।
* ਤੁਸੀਂ ਸੁੰਦਰਤਾ ਨੂੰ ਕਿਵੇਂ ਪਰਿਭਾਸ਼ਤ ਕਰਦੇ ਹੋ?
-ਸੁੰਦਰਤਾ ਅਸਲ ਵਿਚ ਸਰੀਰਕ, ਮਾਨਸਿਕ ਅਤੇ ਅਧਿਆਤਮਿਕ ਸ਼ਕਤੀਆਂ ਦਾ ਮਿਸ਼ਰਣ ਹੁੰਦੀ ਹੈ। ਇਨ੍ਹਾਂ ਸਭ ਨੂੰ ਮਿਲਾ ਕੇ ਇਸ ਪਦਾਰਥ ਬਣਾਉਣ ਨਾਲ ਹੀ ਅਸਲੀ ਸੁੰਦਰਤਾ ਪ੍ਰਾਪਤ ਕੀਤੀ ਜਾ ਸਕਦੀ ਹੈ।
* ਹਰ ਮੌਸਮ ਵਿਚ ਸੁੰਦਰਤਾ ਬਰਕਰਾਰ ਰੱਖਣ ਦੇ ਨੁਸਖੇ ਦੱਸੋ।
-ਸੁੰਦਰਤਾ ਵਿਅਕਤੀ ਦੀ ਵਸ਼ਿਸ਼ਟ ਚਮੜੀ ਅਤੇ ਮੌਸਮ ਦੇ ਅਨੁਰੂਪ ਹੋਣੀ ਚਾਹੀਦੀ ਹੈ। ਤੇਲੀ ਚਮੜੀ ਲਈ ਹਲਕਾ ਮਾਇਸਚਰਾਈਜ਼ਰ ਅਤੇ ਗ਼ੈਰ-ਤੇਲੀ ਉਤਪਾਦਾਂ ਦੀ ਵਰਤੋਂ ਕਰੋ। ਗਰਮੀਆਂ ਵਿਚ ਰਿਪ੍ਰਫੇਸ਼ਰ, ਇਸਟ੍ਰੀਜੈਂਟਸ ਅਤੇ ਟੋਨਰ ਦੀ ਜ਼ਿਆਦਾ ਵਰਤੋਂ ਕਰੋ।

ਅਜੋਕੇ ਸਮੇਂ ਸੰਸਕਾਰਾਂ ਦੀ ਅਣਹੋਂਦ ਦੀ ਭੇਟ ਚੜ੍ਹਦੇ ਜਾ ਰਹੇ ਸੰਯੁਕਤ ਪਰਿਵਾਰ

ਅਸੀਂ ਬਹੁਤ ਵਾਰ ਆਪਣੇ ਦੋਸਤਾਂ-ਮਿੱਤਰਾਂ ਜਾਂ ਕਰੀਬੀ ਰਿਸ਼ਤੇਦਾਰਾਂ ਵਿਚ ਬੈਠੇ ਬੜੇ ਚਾਅ ਅਤੇ ਮਾਣ ਨਾਲ ਆਪਣੇ ਪਰਿਵਾਰ ਦੇ ਬੀਤੇ ਸਮੇਂ ਦੀਆਂ ਹਾਸਿਆਂ ਅਤੇ ਖੇੜਿਆਂ ਦੀਆਂ ਗੱਲਾਂ ਕਰਦੇ ਹਾਂ। ਆਪਣੇ ਬਚਪਨ ਸਮੇਂ ਦੀਆਂ ਯਾਦਾਂ ਜਦੋਂ ਵੀ ਅਸੀਂ ਕਿਸੇ ਨਾਲ ਸਾਂਝੀਆਂ ਕਰਦੇ ਹਾਂ ਤਾਂ ਉਨ੍ਹਾਂ ਯਾਦਾਂ ਵਿਚ ਸਾਡੇ ਚਾਚੇ-ਚਾਚੀ, ਤਾਏ-ਤਾਈ, ਭੂਆ, ਦਾਦੇ ਅਤੇ ਦਾਦੀ ਦਾ ਜ਼ਿਕਰ ਜ਼ਰੂਰ ਆਉਂਦਾ ਹੈ। ਸਾਨੂੰ ਆਪਣੇ ਬਚਪਨ ਦੀਆਂ ਇਹ ਯਾਦਾਂ ਸਾਂਝਾ ਕਰਨਾ ਬੜਾ ਸਕੂਨ ਦਿੰਦਾ ਹੈ ਪਰ ਕੀ ਅੱਜ ਦੀ ਪੀੜ੍ਹੀ ਆਉਣ ਵਾਲੇ ਸਮੇਂ ਵਿਚ ਆਪਣੇ ਦੋਸਤਾਂ-ਮਿੱਤਰਾਂ ਜਾਂ ਰਿਸ਼ਤੇਦਾਰਾਂ ਨਾਲ ਆਪਣੇ ਸੰਯੁਕਤ ਪਰਿਵਾਰਾਂ ਦੇ ਖੇੜੇ ਸਾਂਝੇ ਕਰ ਪਾਵੇਗੀ? ਸ਼ਾਇਦ ਨਹੀਂ, ਕਿਉਂਕਿ ਅੱਜ ਸਾਡੇ ਸਮਾਜ ਵਿਚ ਸੰਯੁਕਤ ਪਰਿਵਾਰ ਵੱਡੇ ਪੱਧਰ 'ਤੇ ਅਲੋਪ ਹੁੰਦੇ ਜਾ ਰਹੇ ਹਨ ਅਤੇ ਉਨ੍ਹਾਂ ਦੀ ਥਾਂ ਵਿਆਪਕ ਰੂਪ ਵਿਚ ਇਕਹਿਰੇ ਪਰਿਵਾਰ ਲੈ ਰਹੇ ਹਨ। ਇਸ ਦੇ ਪ੍ਰਤੱਖ ਰੂਪ ਵਿਚ ਜਿਥੇ ਹੋਰ ਅਨੇਕਾਂ ਕਾਰਨ ਸੁਣਨ ਵਿਚ ਆਉਂਦੇ ਹਨ, ਉਥੇ ਹੀ ਅਪ੍ਰਤੱਖ ਰੂਪ ਵਿਚ ਇਸ ਦਾ ਕਾਰਨ ਅੱਜ ਦੀ ਪੀੜ੍ਹੀ ਵਿਚ ਪਾਈ ਜਾਣ ਵਾਲੀ ਮਨੁੱਖੀ ਸੰਸਕਾਰਾਂ ਦੀ ਅਣਹੋਂਦ ਹੈ। ਭਾਵੇਂ ਇਸ ਦਾ ਇਹ ਕਾਰਨ ਲੋਕਾਂ ਨੂੰ ਪ੍ਰਤੀਤ ਨਹੀਂ ਹੁੰਦਾ ਜਾਪਦਾ ਪਰ ਜੇਕਰ ਇਸ ਦਾ ਸਹੀ ਵਿਸ਼ਲੇਸ਼ਣ ਕੀਤਾ ਜਾਵੇ ਤਾਂ ਇਹ ਤੱਥ ਸਾਹਮਣੇ ਆਉਂਦਾ ਹੈ ਕਿ ਪਰਿਵਾਰ ਦੇ ਬਜ਼ੁਰਗਾਂ ਪ੍ਰਤੀ ਦਿਨ-ਬ-ਦਿਨ ਘਟਦਾ ਜਾ ਰਿਹਾ ਮਾਣ-ਸਤਿਕਾਰ, ਭਰਾਵਾਂ ਵਿਚ ਘਟਦਾ ਆਪਸੀ ਪਿਆਰ ਅਤੇ ਪਰਿਵਾਰਕ ਮੈਂਬਰਾਂ ਦੀ ਜ਼ਰੂਰਤ ਤੇ ਮਹੱਤਤਾ ਦਾ ਘਟਦਾ ਅਹਿਸਾਸ ਹੀ ਸੰਯੁਕਤ ਪਰਿਵਾਰਾਂ ਵਿਚ ਪੈਣ ਵਾਲੀ ਤਰੇੜ ਦੇ ਕਾਰਨ ਹਨ। ਆਓ ਸੰਯੁਕਤ ਪਰਿਵਾਰਾਂ ਦੇ ਘੱਟ ਹੁੰਦੇ ਜਾਣ ਦੇ ਕੁਝ ਹੋਰ ਕਾਰਨਾਂ ਬਾਰੇ ਜਾਣਕਾਰੀ ਲਈਏ।
ਵਰਤਮਾਨ ਸਿੱਖਿਆ : ਵਰਤਮਾਨ ਸਿੱਖਿਆ ਨੇ ਕਈ ਤਰੀਕਿਆਂ ਨਾਲ ਸੰਯੁਕਤ ਪਰਿਵਾਰਾਂ ਦੇ ਘੱਟ ਹੋਣ ਵਿਚ ਯੋਗਦਾਨ ਪਾਇਆ ਹੈ। ਸਿੱਖਿਆ ਨਾਲ ਅੱਜਕਲ੍ਹ ਦੀ ਪੜ੍ਹੀ-ਲਿਖੀ ਨੌਜਵਾਨ ਪੀੜ੍ਹੀ ਦੇ ਵਿਚਾਰ, ਆਦਤਾਂ ਤੇ ਵਿਸ਼ਵਾਸ ਪੂਰੀ ਤਰ੍ਹਾਂ ਪ੍ਰਭਾਵਿਤ ਹੋਏ ਹਨ। ਅੱਜ ਦੀ ਨੌਜਵਾਨ ਪੀੜ੍ਹੀ ਦੀ ਸੋਚ ਅਤੇ ਵਿਚਾਰ ਪੁਰਾਣੇ ਸਮੇਂ ਦੇ ਲੋਕਾਂ ਤੋਂ ਬਿਲਕੁਲ ਅਲੱਗ ਹਨ। ਅੱਜ ਦੀ ਨੌਜਵਾਨ ਪੀੜ੍ਹੀ ਦੇ ਵਿਚਾਰ ਆਪਣੇ ਬਜ਼ੁਰਗ ਦਾਦਾ-ਦਾਦੀ ਦੀ ਗੱਲ ਤਾਂ ਦੂਰ, ਆਪਣੇ ਮਾਤਾ-ਪਿਤਾ ਨਾਲ ਵੀ ਕੋਈ ਮੇਲ ਨਹੀਂ ਖਾਂਦੇ। ਜ਼ਿਆਦਾਤਰ ਨੌਜਵਾਨਾਂ ਨੂੰ ਲਗਦਾ ਹੈ ਕਿ ਉਨ੍ਹਾਂ ਦੇ ਮਾਤਾ-ਪਿਤਾ ਜਾਂ ਘਰ ਦੇ ਬਜ਼ੁਰਗ ਪੁਰਾਣੀ ਅਤੇ ਤੰਗ ਸੋਚ ਰੱਖਦੇ ਹਨ ਤੇ ਉਨ੍ਹਾਂ ਦੀ ਸੋਚ ਅਗਾਂਹਵਧੂ ਨਹੀਂ। ਇਸ ਤੋਂ ਇਲਾਵਾ ਅੱਜ ਦੀ ਨੌਜਵਾਨ ਪੀੜ੍ਹੀ ਨੂੰ ਸੰਯੁਕਤ ਪਰਿਵਾਰ ਵਿਚ ਰਹਿਣਾ ਉਨ੍ਹਾਂ ਦੀ ਆਜ਼ਾਦੀ ਲਈ ਖਤਰਾ ਵੀ ਮਹਿਸੂਸ ਹੁੰਦਾ ਹੈ, ਕਿਉਂਕਿ ਅੱਜ ਦੇ ਨੌਜਵਾਨ ਆਜ਼ਾਦੀ ਦੇ ਮਾਇਨੇ ਹੀ ਕੁਝ ਹੋਰ ਸਮਝਦੇ ਹਨ। ਇਸ ਤਰ੍ਹਾਂ ਸਿੱਖਿਆ ਦਾ ਇਕ ਪ੍ਰਕਾਰ ਨਾਲ ਸੰਯੁਕਤ ਪਰਿਵਾਰਾਂ ਦੀ ਹੋਂਦ 'ਤੇ ਬੁਰਾ ਪ੍ਰਭਾਵ ਪੈ ਰਿਹਾ ਹੈ।
ਵਰਤਮਾਨ ਸੁਖ-ਸਹੂਲਤਾਂ ਵਾਲੀ ਜ਼ਿੰਦਗੀ ਦਾ ਆਕਰਸ਼ਣ : ਆਮ ਤੌਰ 'ਤੇ ਇਹ ਦੇਖਣ ਨੂੰ ਮਿਲਦਾ ਹੈ ਕਿ ਵਰਤਮਾਨ ਸ਼ਹਿਰੀ ਜੀਵਨ ਦੀਆਂ ਸੁੱਖ-ਸਹੂਲਤਾਂ ਅਤੇ ਆਕਰਸ਼ਣ ਕਾਰਨ ਅੱਜ ਦੀ ਨੌਜਵਾਨ ਪੀੜ੍ਹੀ, ਜ਼ਿਆਦਾਤਰ ਔਰਤਾਂ ਸ਼ਹਿਰ 'ਚ ਜਾ ਕੇ ਸ਼ਹਿਰੀ ਜ਼ਿੰਦਗੀ ਜਿਉਣ ਲਈ ਸ਼ਹਿਰਾਂ ਵੱਲ ਆਕਰਸ਼ਤ ਹੁੰਦੀਆਂ ਹਨ। ਪਿੰਡਾਂ 'ਚ ਰਹਿ ਰਹੇ ਪਰਿਵਾਰਾਂ ਦੇ ਜ਼ਿਆਦਾਤਰ ਬਜ਼ੁਰਗ ਸ਼ਹਿਰੀ ਪ੍ਰਦੂਸ਼ਣ ਅਤੇ ਪਿੰਡਾਂ ਦੇ ਖਾਣ-ਪੀਣ ਦੇ ਵੱਧ ਸਾਫ਼-ਸੁਥਰੇ ਹੋਣ ਕਾਰਨ ਪਿੰਡ ਛੱਡ ਸ਼ਹਿਰ ਜਾ ਕੇ ਰਹਿਣ ਨੂੰ ਰਾਜ਼ੀ ਨਹੀਂ ਹੁੰਦੇ। ਇਸ ਤਰ੍ਹਾਂ ਪੁਰਾਣੀ ਅਤੇ ਨਵੀਂ ਪੀੜ੍ਹੀ ਦੀ ਸੋਚ ਦੇ ਅੰਤਰ ਕਾਰਨ ਵੱਧ ਤੋਂ ਵੱਧ ਪਿੰਡਾਂ 'ਚੋਂ ਸੰਯੁਕਤ ਪਰਿਵਾਰ ਘਟਦੇ ਜਾ ਰਹੇ ਹਨ ਅਤੇ ਜ਼ਿਆਦਾ ਇਕਹਿਰੇ ਪਰਿਵਾਰ ਹੋਂਦ ਵਿਚ ਆ ਰਹੇ ਹਨ।
ਪੱਛਮੀ ਸੱਭਿਅਤਾ ਦਾ ਪ੍ਰਭਾਵ : ਪੱਛਮੀ ਸੱਭਿਅਤਾ ਦਾ ਪ੍ਰਭਾਵ ਸਾਡੀ ਵਰਤਮਾਨ ਪੀੜ੍ਹੀ ਦੀ ਸੋਚ ਅਤੇ ਜੀਵਨ ਸ਼ੈਲੀ ਉੱਤੇ ਕਈ ਤਰ੍ਹਾਂ ਨਾਲ ਦੇਖਣ ਨੂੰ ਮਿਲਦਾ ਹੈ। ਪੱਛਮੀ ਸੱਭਿਅਤਾ ਦੇ ਪ੍ਰਭਾਵ ਕਾਰਨ ਹੀ ਸਾਡੀ ਵਰਤਮਾਨ ਪੀੜ੍ਹੀ ਨਿੱਜਤਾ, ਸਮਾਨਤਾ ਅਤੇ ਨਿੱਜੀ ਸੁਤੰਤਰਤਾ ਨੂੰ ਵੱਧ ਪਹਿਲ ਦੇਣ ਲੱਗ ਪਈ ਹੈ। ਇਸ ਤਰ੍ਹਾਂ ਪੱਛਮੀ ਸੱਭਿਅਤਾ ਦਾ ਪ੍ਰਭਾਵ ਵੀ ਸੰਯੁਕਤ ਪਰਿਵਾਰਾਂ ਦੀ ਸੰਖਿਆ ਘਟਦੇ ਜਾਣ ਦਾ ਇਕ ਵੱਡਾ ਕਾਰਨ ਹੈ।
ਲਗਾਤਾਰ ਵਧਦੀ ਜਨਸੰਖਿਆ : ਲਗਾਤਾਰ ਵਧਦੀ ਜਨਸੰਖਿਆ ਕਾਰਨ ਖੇਤੀ ਅਤੇ ਰਿਹਾਇਸ਼ ਯੋਗ ਜ਼ਮੀਨ ਲਗਾਤਾਰ ਘਟਦੀ ਜਾ ਰਹੀ ਹੈ। ਇਕੱਲੀ ਖੇਤੀਬਾੜੀ ਹੁਣ ਇਸ 'ਤੇ ਨਿਰਭਰ ਸਾਰੇ ਪਰਿਵਾਰਕ ਮੈਂਬਰਾਂ ਦਾ ਖਰਚਾ ਨਹੀਂ ਝੱਲ ਸਕਦੀ। ਇਸ ਕਾਰਨ ਰੁਜ਼ਗਾਰ ਦੀ ਭਾਲ ਵਿਚ ਪਰਿਵਾਰਕ ਮੈਂਬਰਾਂ ਨੂੰ ਆਪਣੇ ਘਰ ਤੋਂ ਬਾਹਰ ਜਾਣਾ ਪੈ ਰਿਹਾ ਹੈ ਅਤੇ ਸ਼ਹਿਰਾਂ ਵਿਚ ਜਿਥੇ ਕਿਤੇ ਰੁਜ਼ਗਾਰ ਮਿਲਦੇ ਹਨ, ਉਥੇ ਹੀ ਅਜਿਹੇ ਲੋਕਾਂ ਨੂੰ ਆਪਣੀ ਰਿਹਾਇਸ਼ ਕਰਨੀ ਪੈਂਦੀ ਹੈ। ਇਹ ਵੀ ਸੰਯੁਕਤ ਪਰਿਵਾਰਾਂ ਦੇ ਘਟਣ ਅਤੇ ਇਕਹਿਰੇ ਪਰਿਵਾਰਾਂ ਦੇ ਹੋਂਦ ਵਿਚ ਆਉਣ ਦਾ ਇਕ ਪ੍ਰਮੁੱਖ ਕਾਰਨ ਹੈ।
ਅੱਜ ਦੇ ਆਧੁਨਿਕ ਅਤੇ ਤਕਨੀਕੀ ਯੁੱਗ ਵਿਚ ਇਨਸਾਨੀ ਕਦਰਾਂ-ਕੀਮਤਾਂ ਅਤੇ ਮਨੁੱਖੀ ਜਜ਼ਬਾਤਾਂ ਦੀ ਅਹਿਮੀਅਤ ਭਾਵੇਂ ਲਗਾਤਾਰ ਘਟਦੀ ਜਾ ਰਹੀ ਹੈ ਪਰ ਅੱਜ ਸਾਨੂੰ ਜ਼ਰੂਰਤ ਹੈ ਅੱਜ ਦੀ ਪੀੜ੍ਹੀ ਨੂੰ ਮਾਪਿਆਂ ਅਤੇ ਬਜ਼ੁਰਗਾਂ ਦੀ ਕਦਰ ਕਰਨਾ ਸਿਖਾਉਣ ਵਾਲੇ ਸੰਸਕਾਰ ਦੇਣ ਦੀ। ਅੱਜ ਦੀ ਪੀੜ੍ਹੀ ਨੂੰ ਸਮਝਣ ਦੀ ਸਖਤ ਲੋੜ ਹੈ ਕਿ ਸੰਯੁਕਤ ਪਰਿਵਾਰ ਹੀ ਹੈ ਖੇੜਿਆਂ ਦਾ ਆਧਾਰ। ਜੇਕਰ ਅਸੀਂ ਆਪਣੇ ਮਾਤਾ-ਪਿਤਾ ਦਾ ਸਤਿਕਾਰ ਕਰਾਂਗੇ, ਤਦ ਹੀ ਬੱਚਿਆਂ ਨੂੰ ਵੀ ਆਪਣੇ ਬਜ਼ੁਰਗਾਂ ਦਾ ਸਨਮਾਨ ਕਰਨ ਦੀ ਜਾਚ ਅਤੇ ਪ੍ਰੇਰਨਾ ਮਿਲੇਗੀ।
ਅਸਲ ਵਿਚ ਸੰਸਕਾਰਾਂ ਅਤੇ ਮਨੁੱਖੀ ਕਦਰਾਂ-ਕੀਮਤਾਂ ਦੀ ਸਿਖਲਾਈ ਸਿੱਖਿਆ ਦਾ ਜ਼ਰੂਰੀ ਅੰਗ ਬਣਾਉਣ ਦੀ ਬੇਹੱਦ ਲੋੜ ਹੈ। ਇਹ ਵੀ ਦੇਖਣ ਵਿਚ ਆਇਆ ਹੈ ਕਿ ਜਿਹੜੇ ਮਾਂ-ਬਾਪ ਆਪਣੇ ਬੱਚਿਆਂ ਨੂੰ ਚੰਗੇ ਸੰਸਕਾਰ ਦਿੰਦੇ ਹਨ, ਉਨ੍ਹਾਂ ਦੇ ਬੱਚੇ ਵੀ ਮਾਪਿਆਂ ਅਤੇ ਬਜ਼ੁਰਗਾਂ ਦੀ ਕਦਰ ਕਰਨ ਵਾਲੇ ਅਤੇ ਸੰਯੁਕਤ ਪਰਿਵਾਰ ਨੂੰ ਚਾਹੁਣ ਵਾਲੇ ਹੁੰਦੇ ਹਨ। ਜੇਕਰ ਸਮਾਜ ਵਿਚ ਹਰ ਵਿਅਕਤੀ ਆਪਣੇ ਬੱਚਿਆਂ ਨੂੰ ਚੰਗੇ ਸੰਸਕਾਰ ਦੇਣ ਦੀ ਮਹੱਤਤਾ ਨੂੰ ਸਮਝਣ ਲੱਗ ਜਾਵੇ ਤਾਂ ਹੀ ਇਕ ਸੁਚੱਜੇ ਸਮਾਜ ਦੀ ਨੀਂਹ ਰੱਖੀ ਜਾ ਸਕਦੀ ਹੈ।


-ਬੀ-2/305, ਬੰਦ ਗਲੀ, ਸਦਰ ਬਾਜ਼ਾਰ,
ਬਰਨਾਲਾ-148101. ਮੋਬਾ: 78377-00375

ਆਓ ਬੱਚਿਆਂ ਨੂੰ ਇਨ੍ਹਾਂ ਛੁੱਟੀਆਂ ਵਿਚ ਸਿਖਾਈਏ

ਪੰਛੀਆਂ ਦੀ ਪਰਵਰਿਸ਼

ਇਨ੍ਹਾਂ ਵਿਚ ਪੰਛੀਆਂ ਨੂੰ ਦਾਣਾ ਪਾਉਣ ਦੀ ਪਰੰਪਰਾ ਸਦੀਆਂ ਪੁਰਾਣੀ ਹੈ। ਇਹ ਇਕ ਅਜਿਹੀ ਆਦਤ ਹੈ, ਜਿਸ ਦਾ ਸਾਡੇ ਦਿਲ ਅਤੇ ਦਿਮਾਗ ਦੀ ਸਿਹਤ ਨਾਲ ਸਿੱਧਾ ਰਿਸ਼ਤਾ ਹੈ। ਇਸ ਨਾਲ ਸਿਹਤ 'ਤੇ ਸਕਾਰਾਤਮਿਕ ਅਸਰ ਪੈਂਦਾ ਹੈ। ਨਾਲ ਹੀ ਅਸੀਂ ਆਪਣੇ ਆਸ-ਪਾਸ ਦੇ ਵਾਤਾਵਰਨ ਨੂੰ ਵੀ ਇਸ ਨਾਲ ਬਿਹਤਰ ਬਣਾ ਸਕਦੇ ਹਾਂ, ਕਿਉਂਕਿ ਪੰਛੀ ਰਹਿਣਗੇ ਤਾਂ ਇਕੋਲਾਜੀ ਸੰਤੁਲਨ ਬਣਿਆ ਰਹੇਗਾ। ਆਮ ਤੌਰ 'ਤੇ ਪੰਛੀਆਂ ਨੂੰ ਦਾਣਾ ਪਾਉਣ ਦਾ ਕੰਮ ਘਰ ਦੇ ਵੱਡੇ ਮੈਂਬਰ ਕਰਦੇ ਹਨ। ਉਨ੍ਹਾਂ ਨੂੰ ਇਹ ਆਦਤ ਬੱਚਿਆਂ ਨੂੰ ਵੀ ਪਾਉਣੀ ਚਾਹੀਦੀ ਹੈ। ਛੁੱਟੀਆਂ ਵਿਚ ਬੱਚਿਆਂ ਨੂੰ ਇਲੈਕਟ੍ਰੋਨਿਕ ਡਿਵਾਈਸਿਸ ਤੋਂ ਥੋੜ੍ਹੀ ਦੂਰੀ ਬਣਾ ਕੇ, ਉਨ੍ਹਾਂ ਨੂੰ ਪੰਛੀਆਂ ਦੀ ਦੇਖ-ਭਾਲ ਕਰਨੀ ਸਿਖਾਉਣੀ ਚਾਹੀਦੀ ਹੈ। ਪੰਛੀਆਂ ਨੂੰ ਦਾਣਾ-ਪਾਣੀ ਦੇਣ ਦੇ ਨਾਲ ਹੀ ਬੱਚੇ ਇਨ੍ਹਾਂ ਛੁੱਟੀਆਂ ਦੇ ਦਿਨਾਂ ਵਿਚ ਆਪਣੇ ਗਾਰਡਨ ਦੇ ਬੂਟਿਆਂ ਦੀ ਸਿੰਚਾਈ ਅਤੇ ਦੇਖ-ਰੇਖ ਕਰਨੀ ਵੀ ਸਿੱਖ ਜਾਣਗੇ।
ਬੱਚੇ ਪੰਛੀਆਂ ਨੂੰ ਕਿਵੇਂ ਪਹਿਚਾਨਣ
ਪੰਛੀਆਂ ਲਈ ਦਾਣਾ-ਪਾਣੀ ਪਾਉਣ ਤੋਂ ਤੁਰੰਤ ਬਾਅਦ ਪੰਛੀ ਨਹੀਂ ਆਉਂਦੇ। ਉਨ੍ਹਾਂ ਨੂੰ ਦਾਣਾ-ਪਾਣੀ ਪਾ ਕੇ ਕੁਝ ਦੂਰੀ 'ਤੇ ਜਾ ਕੇ ਛੁਪ ਜਾਣਾ ਚਾਹੀਦਾ ਹੈ, ਫਿਰ ਹੀ ਉਹ ਉਸ ਜਗ੍ਹਾ ਆਉਂਦੇ ਹਨ। ਘਰ ਦੇ ਕਿਸੇ ਵੱਡੇ ਮੈਂਬਰ ਨੂੰ ਇਸ ਸਭ ਕੁਝ ਵਿਚ ਬੱਚਿਆਂ ਦੀ ਮਦਦ ਕਰਨੀ ਚਾਹੀਦੀ ਹੈ। ਉਨ੍ਹਾਂ ਨੂੰ ਪੰਛੀਆਂ ਦੇ ਨਾਂਅ ਦੱਸਣੇ ਚਾਹੀਦੇ ਹਨ ਅਤੇ ਜੇ ਉਨ੍ਹਾਂ ਦੇ ਬਾਰੇ ਵਿਚ ਉਹ ਕੁਝ ਹੋਰ ਜਾਣਦੇ ਹੋਣ ਤਾਂ ਉਹ ਵੀ ਦੱਸਣਾ ਚਾਹੀਦਾ ਹੈ। ਇਕ ਵਾਰ ਬੱਚਿਆਂ ਨੂੰ ਪੰਛੀ ਦਿਖਾ ਕੇ ਫਿਰ ਵਿਸਥਾਰ ਨਾਲ ਉਨ੍ਹਾਂ ਬਾਰੇ ਜਾਨਣ ਲਈ ਇੰਟਰਨੈੱਟ ਦੇ ਜ਼ਰੀਏ ਜਾਣਕਾਰੀ ਹਾਸਲ ਕਰਨ ਲਈ ਉਨ੍ਹਾਂ ਨੂੰ ਉਤਸ਼ਾਹਿਤ ਕਰਨਾ ਚਾਹੀਦਾ ਹੈ। ਅਜਿਹਾ ਕਰਨਾ ਨਾ ਸਿਰਫ ਸਰੀਰਕ ਤੌਰ 'ਤੇ ਸਰਗਰਮ ਰਹਿਣਾ ਹੈ, ਸਗੋਂ ਇਸ ਨਾਲ ਦਿਮਾਗੀ ਕਸਰਤ ਵੀ ਹੁੰਦੀ ਹੈ ਅਤੇ ਨਾਲ ਹੀ ਰੁਚੀ ਵੀ ਸੁਧਰਦੀ ਹੈ।
ਕਿਵੇਂ ਤਿਆਰ ਕਰੀਏ ਪੰਛੀਆਂ ਦਾ ਦਾਣਾ-ਪਾਣੀ
ਆਮ ਤੌਰ 'ਤੇ ਲੋਕ ਕਣਕ, ਚੌਲ, ਕੱਚਾ ਜਾਂ ਪੱਕਾ ਮੱਕਾ ਜਾਂ ਫਲਾਂ ਦੇ ਛੋਟੇ ਟੁਕੜੇ ਜਾਂ ਖਾਣ ਵਾਲੀ ਕੋਈ ਹੋਰ ਚੀਜ਼ ਖੁੱਲ੍ਹੇ ਮੂੰਹ ਵਾਲੇ ਮਿੱਟੀ ਦੇ ਭਾਂਡੇ ਵਿਚ ਪਾ ਕੇ ਰੱਖਦੇ ਹਨ। ਜੇ ਜਗ੍ਹਾ ਹੋਵੇ ਤਾਂ ਪੱਕੇ ਤੌਰ 'ਤੇ ਕੰਮ ਆਉਣ ਵਾਲੇ 'ਬਰਡ ਫੀਡਰ' ਵੀ ਬਣਾਏ ਜਾ ਸਕਦੇ ਹਨ, ਕਿਉਂਕਿ ਕਈ ਪੰਛੀ ਜ਼ਮੀਨ 'ਤੇ ਰੱਖਿਆ ਦਾਣਾ ਚੁਗਦੇ ਹਨ ਤੇ ਕਈ ਫਲ ਖਾਣਾ ਪਸੰਦ ਕਰਦੇ ਹਨ। ਕੁਝ ਪੰਛੀ ਉਚਾਈ 'ਤੇ ਰੁੱਖ ਉੱਤੇ ਲਟਕੇ ਫਲਾਂ ਤੋਂ ਹੀ ਭੋਜਨ ਗ੍ਰਹਿਣ ਕਰਦੇ ਹਨ। ਇਸ ਲਈ ਆਪਣੇ ਬਾਲਕੋਨੀ ਜਾਂ ਵਿਹੜੇ ਵਿਚ ਆਉਣ ਵਾਲੇ ਪੰਛੀਆਂ ਦੀਆਂ ਖਾਣ ਦੀਆਂ ਆਦਤਾਂ ਨੂੰ ਜਾਨਣ ਤੋਂ ਬਾਅਦ ਹੀ ਉਨ੍ਹਾਂ ਲਈ ਬਰਡ ਫੀਡਰ ਤਿਆਰ ਕਰਨਾ ਚਾਹੀਦਾ ਹੈ।
ਕਿਥੇ ਰੱਖੀਏ ਇਹ ਦਾਣਾ-ਪਾਣੀ
ਬਰਡ ਫੀਡਰ ਨੂੰ ਜੇ ਉੱਪਰ ਰੱਖਣਾ ਹੋਵੇ ਤਾਂ ਖਿੜਕੀ ਤੋਂ ਘੱਟ ਤੋਂ ਘੱਟ ਇਕ ਮੀਟਰ ਦੀ ਦੂਰੀ 'ਤੇ ਇਸ ਨੂੰ ਰੱਖਣਾ ਚਾਹੀਦਾ ਹੈ, ਤਾਂ ਕਿ ਪੰਛੀ ਬਿਨਾਂ ਡਰੇ ਦਾਣਾ-ਪਾਣੀ ਲੈ ਸਕਣ। ਘਰ ਵਿਚ ਜੇ ਕੋਈ ਦੂਜੇ ਪਾਲਤੂ ਜਾਨਵਰ ਹਨ ਤਾਂ ਬਰਡ ਫੀਡਰ ਨੂੰ ਉਨ੍ਹਾਂ ਦੀ ਪਹੂੰਚ ਤੋਂ ਦੂਰ ਰੱਖੋ। ਇਸ ਗੱਲ ਦਾ ਧਿਆਨ ਰੱਖੋ ਕਿ ਕਿਸ ਪੰਛੀ ਨੂੰ ਕਿਹੜਾ ਭੋਜਨ ਪਸੰਦ ਹੈ, ਇਸ ਦੇ ਅਨੁਸਾਰ ਹੀ ਉਸ ਲਈ ਦਾਣਾ ਬਣਾਓ। ਬਿਹਤਰ ਹੋਵੇਗਾ ਜੇ ਬਾਜਰਾ, ਛੋਲੇ, ਦਾਲ, ਚੌਲ ਜਾਂ ਬਲੈਕ ਆਇਲ ਸਨਫਲਾਵਰ ਸੀਡ ਨੂੰ ਮਿਲਾ ਕੇ ਇਨ੍ਹਾਂ ਨੂੰ ਇਕੱਠੇ ਰੱਖਿਆ ਜਾਵੇ।
ਬਰਡ ਫੀਡਰ ਨੂੰ ਸਾਫ਼ ਰੱਖੋ
ਜਿਸ ਤਰ੍ਹਾਂ ਖਾਣਾ ਖਾਣ ਤੋਂ ਬਾਅਦ ਅਸੀਂ ਆਪਣੇ ਭਾਂਡੇ ਸਾਫ਼ ਕਰਦੇ ਹਾਂ, ਉਸੇ ਤਰ੍ਹਾਂ ਪੰਛੀਆਂ ਲਈ ਦਾਣਾ-ਪਾਣੀ ਰੱਖਣ ਦੇ ਪਾਤਰ ਨੂੰ ਵੀ ਨਿਯਮਤ ਸਫਾਈ ਦੀ ਲੋੜ ਹੁੰਦੀ ਹੈ। ਉਸ ਨੂੰ ਚੰਗੀ ਤਰ੍ਹਾਂ ਰਗੜ ਕੇ ਸਾਫ਼ ਕਰੋ ਅਤੇ ਥੋੜ੍ਹੀ ਦੇਰ ਧੁੱਪ ਵਿਚ ਸੁਕਾਓ। ਉਸ ਤੋਂ ਬਾਅਦ ਉਸ ਨੂੰ ਦਾਣਾ ਪਾਓ, ਇਹ ਕੰਮ ਬੱਚੇ ਤੋਂ ਕਰਾਓ। ਇਨ੍ਹਾਂ ਛੁੱਟੀਆਂ ਵਿਚ ਬੱਚਿਆਂ ਨੂੰ ਕੁਦਰਤੀ ਪਾਰਕ ਜਾਂ ਆਪਣੇ ਨੇੜੇ-ਤੇੜੇ ਸਥਿਤ ਚਿੜੀਆਘਰ ਵਿਚ ਲੈ ਕੇ ਜਾਓ ਅਤੇ ਉਥੇ ਉਨ੍ਹਾਂ ਨੂੰ ਪੰਛੀਆਂ ਬਾਰੇ ਜਾਣਕਾਰੀ ਦੇਣ ਦੇ ਨਾਲ-ਨਾਲ ਪੰਛੀਆਂ ਦੀਆਂ ਖਾਣੇ ਦੀਆਂ ਆਦਤਾਂ ਬਾਰੇ ਵੀ ਜਾਣੂ ਕਰਾਓ।


-ਇਮੇਜ ਰਿਫਲੈਕਸ਼ਨ ਸੈਂਟਰ

ਵਾਲਾਂ ਦੀ ਸਾਂਭ-ਸੰਭਾਲ ਕਿਵੇਂ ਹੋਵੇ?

ਪਹਿਲਾਂ ਵਾਲਾਂ ਦੀ ਸਫੈਦੀ ਛੁਪਾਉਣ ਲਈ ਲੋਕ ਕਲਰ ਕਰਦੇ ਸੀ ਪਰ ਫੈਸ਼ਨ ਦੇ ਇਸ ਯੁੱਗ ਵਿਚ ਵਾਲਾਂ ਨੂੰ ਕਲਰ ਕਰਨਾ ਆਮ ਗੱਲ ਹੋ ਗਈ ਹੈ।
* ਕਲਰ ਹਮੇਸ਼ਾ ਉਹੀ ਲਓ, ਜੋ ਕੁਦਰਤੀ ਰੰਗ ਨਾਲ ਮੇਲ ਖਾਂਦਾ ਹੋਵੇ। ਜੇ ਤੁਹਾਡੀ ਚਮੜੀ ਗੋਰੀ ਹੈ ਤਾਂ ਏਸ਼ ਬਲਾਂਡ ਕਲਰ ਵਰਤੋ। ਸਾਂਵਲੀ ਚਮੜੀ ਅਤੇ ਵਾਲ ਭੂਰੇ ਹਨ ਤਾਂ ਬ੍ਰਿਗੇਂਡੀ ਕਲਰ ਅਤੇ ਵਾਲ ਕਾਲੇ ਹਨ ਤਾਂ ਕਾਪਰ ਕਲਰ ਦੀ ਵਰਤੋਂ ਕਰੋ।
* ਵਾਲਾਂ ਨੂੰ ਕਲਰ ਕਰਨ ਲਈ ਤਿੰਨ ਪਧਤੀਆਂ ਹੁੰਦੀਆਂ ਹਨ-ਪਹਿਲੀ ਅਸਥਾਈ ਪੱਧਤੀ, ਜੋ ਇਕ-ਦੋ ਦਿਨ ਤੱਕ ਚਲਦੀ ਹੈ। ਦੂਜੀ ਸੈਮੀ ਪਰਮਾਨੈਂਟ, ਜੋ 4-5 ਹਫ਼ਤੇ ਤੱਕ ਚਲਦੀ ਹੈ ਅਤੇ ਤੀਜੀ ਸਥਾਈ ਜੋ ਕਾਫੀ ਲੰਬੇ ਸਮੇਂ ਤੱਕ ਚਲਦੀ ਹੈ। ਅਸਥਾਈ ਪੱਧਤੀ ਨੂੰ ਅਪਣਾਓ ਤਾਂ ਕਿ ਪਸੰਦ ਆਉਣ 'ਤੇ ਉਸ ਨੂੰ ਸਥਾਈ ਰੂਪ ਦਿੱਤਾ ਜਾ ਸਕੇ। * ਕਲਰ ਹਮੇਸ਼ਾ ਚੰਗੀ ਕੰਪਨੀ ਦੇ ਹੀ ਖਰੀਦੋ। ਉਸ ਦੀ ਮਿਆਦ ਖ਼ਤਮ ਹੋਣ ਦੀ ਮਿਤੀ ਜ਼ਰੂਰ ਪੜ੍ਹ ਲਓ, ਨਹੀਂ ਤਾਂ ਅਲਰਜੀ ਹੋਣ ਦਾ ਖ਼ਤਰਾ ਹੋ ਸਕਦਾ ਹੈ।
* ਕਲਰ ਖਰੀਦਣ ਤੋਂ ਬਾਅਦ ਉਸ ਵਿਚ ਦਿੱਤੇ ਗਏ ਨਿਰਦੇਸ਼ਾਂ ਦਾ ਪਾਲਣ ਕਰਦੇ ਹੋਏ ਹੀ ਕਲਰ ਕਰੋ।
* ਵਾਲਾਂ ਨੂੰ ਕਲਰ ਕਰਨ ਤੋਂ ਪਹਿਲਾਂ ਉਸ ਦੀ ਅਲਰਜੀ ਟੈਸਟਿੰਗ ਜ਼ਰੂਰ ਕਰ ਲੈਣੀ ਚਾਹੀਦੀ ਹੈ। ਜੇ ਪਹਿਲੀ ਵਾਰ ਕਲਰ ਕਰ ਰਹੇ ਹੋ ਤਾਂ ਥੋੜ੍ਹਾ ਜਿਹਾ ਕਲਰ ਡਵੈਲਪਰ ਮਿਲਾ ਕੇ ਆਪਣੇ ਕੰਨ ਦੇ ਪਿੱਛੇ ਜਾਂ ਧੌਣ 'ਤੇ ਲਗਾਓ। ਜੇ ਜਲਣ ਜਾਂ ਕਿਸੇ ਵੀ ਤਰ੍ਹਾਂ ਦੀ ਅਲਰਜੀ ਮਹਿਸੂਸ ਹੋਵੇ ਤਾਂ ਤੁਰੰਤ ਠੰਢੇ ਪਾਣੀ ਨਾਲ ਧੋ ਲਓ ਅਤੇ ਕਲਰ ਦੀ ਵਰਤੋਂ ਨਾ ਕਰੋ।
* ਜੇ ਤੁਹਾਡੇ ਵਾਲ ਝੜਦੇ ਹਨ, ਉਨ੍ਹਾਂ ਵਿਚ ਸਿੱਕਰੀ ਹੈ ਜਾਂ ਕੋਈ ਜ਼ਖ਼ਮ ਹੈ ਤਾਂ ਪਹਿਲਾਂ ਕਾਸਮੈਟੋਲਾਜਿਸਟ ਨਾਲ ਸਲਾਹ ਕਰੋ ਅਤੇ ਫਿਰ ਕਲਰਿੰਗ ਕਰੋ।
* ਜੇ ਇਕ ਕਲਰ ਕਰਨ ਤੋਂ ਬਾਅਦ ਦੂਜਾ ਕਲਰ ਕਰਨਾ ਚਾਹੁੰਦੇ ਹੋ ਤਾਂ ਇਕ ਮਹੀਨੇ ਤੱਕ ਇੰਤਜ਼ਾਰ ਕਰੋ। ਛੇਤੀ-ਛੇਤੀ ਕਲਰ ਨਾ ਬਦਲੋ। ਇਸ ਨਾਲ ਵਾਲ ਰੁੱਖੇ ਅਤੇ ਬੇਜਾਨ ਹੋ ਜਾਣਗੇ।
* ਤੁਹਾਡੇ ਵਾਲ ਦੋਮੂੰਹੇਂ ਹਨ, ਬਲੀਚ ਕੀਤੇ ਹੋਏ ਹਨ ਜਾਂ ਵਾਲਾਂ ਵਿਚ ਹਿਨਾ ਕੀਤਾ ਹੋਇਆ ਹੋਵੇ ਤਾਂ ਉਨ੍ਹਾਂ ਵਾਲਾਂ ਨੂੰ ਵਧਾ ਕੇ ਨਿਕਲ ਜਾਣ ਦਿਓ। ਉਨ੍ਹਾਂ 'ਤੇ ਕਲਰ ਨਾ ਕਰੋ। ਜੇ ਕਰਨਾ ਵੀ ਚਾਹ ਰਹੇ ਹੋ ਤਾਂ ਕਿਸੇ ਚੰਗੇ ਹੇਅਰਸਟਾਈਲਿਸਟ ਦੀ ਰਾਇ ਲੈ ਕੇ ਹੀ ਕਰੋ।
* ਕਲਰਡ ਵਾਲਾਂ ਵਿਚ ਹਮੇਸ਼ਾ ਮਾਈਲਡ ਕੰਡੀਸ਼ਨਰ ਯੁਕਤ ਸ਼ੈਂਪੂ ਦੀ ਵਰਤੋਂ ਕਰੋ ਜਾਂ ਸ਼ੈਂਪੂ ਤੋਂ ਬਾਅਦ ਚੰਗੀ ਕੰਪਨੀ ਦਾ ਕੰਡੀਸ਼ਨਰ ਵਰਤੋਂ ਕਰੋ। ਸ਼ੈਂਪੂ ਵੀ ਉਹੀ ਲਗਾਓ ਜੋ ਖਾਸ ਤੌਰ 'ਤੇ ਕਲਰਡ ਵਾਲਾਂ ਲਈ ਬਣਾਇਆ ਗਿਆ ਹੋਵੇ। ਇਸ ਨਾਲ ਵਾਲਾਂ ਦੀ ਕੋਮਲਤਾ ਅਤੇ ਚਮਕ ਬਰਕਰਾਰ ਰਹਿੰਦੀ ਹੈ।
* ਜੇ ਤੁਸੀਂ ਕੋਈ ਦਵਾਈ ਖਾ ਰਹੇ ਹੋ ਤਾਂ ਵੀ ਕਲਰਿੰਗ ਕਰਨ ਤੋਂ ਪਹਿਲਾਂ ਡਾਕਟਰ ਦੀ ਸਲਾਹ ਜ਼ਰੂਰ ਲੈ ਲਓ।
* ਸ਼ੈਂਪੂ ਕਰਨ ਤੋਂ ਬਾਅਦ ਕਲਰਡ ਵਾਲਾਂ ਨੂੰ ਸਿੱਧੇ ਧੁੱਪ ਵਿਚ ਨਾ ਸੁਕਾਓ। ਡ੍ਰਾਇਰ ਆਦਿ ਦੀ ਵਰਤੋਂ ਵੀ ਨਾ ਕਰੋ, ਕਿਉਂਕਿ ਇਸ ਨਾਲ ਵਾਲਾਂ ਦਾ ਰੰਗ ਬਦਰੰਗ ਹੋ ਜਾਵੇਗਾ।
* ਸੂਰਜ ਦੀਆਂ ਪੈਰਾਬੈਂਗਣੀ ਕਿਰਨਾਂ ਕਲਰਡ ਵਾਲਾਂ ਨੂੰ ਨੁਕਸਾਨ ਪਹੁੰਚਾਉਂਦੀਆਂ ਹਨ। ਇਸ ਲਈ ਘਰੋਂ ਬਾਹਰ ਨਿਕਲਦੇ ਸਮੇਂ ਸਨਸ਼ੀਲਡ ਦੀ ਵਰਤੋਂ ਕਰੋ।


-ਸ਼ੈਲੀ ਮਾਥੁਰ

ਬੈਂਕਾਂ ਦੇ ਕਰਜ਼ੇ ਦੀਆਂ ਸਹੂਲਤਾਂ ਬਾਰੇ ਕਿੰਨਾ ਜਾਣਦੇ ਹੋ?

ਅੱਜ ਦੀ ਜੀਵਨ ਸ਼ੈਲੀ ਨੂੰ ਈ.ਐਮ.ਆਈ. ਦੇ ਇਰਦ-ਗਿਰਦ ਘੁੰਮਣ ਵਾਲੀ ਜੀਵਨ ਸ਼ੈਲੀ ਕਹਿੰਦੇ ਹਨ। ਅਜਿਹਾ ਕਿਹਾ ਵੀ ਕਿਉਂ ਨਾ ਜਾਵੇ, ਜਦੋਂ ਅੱਜ ਦੀਆਂ ਤਮਾਮ ਸੁੱਖ ਸਹੂਲਤਾਂ ਕਰਜ਼ਾ ਆਧਾਰਿਤ ਹੋਣ? ਸ਼ਹਿਰਾਂ ਵਿਚ 95 ਫੀਸਦੀ ਲੋਕ ਹੋਮ ਲੋਨ ਦੀ ਬਦੌਲਤ ਹੀ ਆਪਣਾ ਘਰ ਬਣਾ ਸਕਦੇ ਹਨ ਅਤੇ ਮੱਧ ਵਰਗ ਤੋਂ ਲੈ ਕੇ ਉਪਰਲੇ ਵਰਗ ਤੱਕ 100 ਫੀਸਦੀ ਲੋਕ ਕਰਜ਼ੇ 'ਤੇ ਹੀ ਕਾਰ ਲੈਂਦੇ ਹਨ। ਨਤੀਜਾ ਇਹ ਕਿ ਅੱਜ ਜੇ ਅਸੀਂ ਘੱਟ ਤੋਂ ਘੱਟ ਸੁੱਖ-ਸਹੂਲਤਾਂ ਵਾਲੀ ਮੱਧ ਵਰਗੀ ਜ਼ਿੰਦਗੀ ਜਿਊਣਾ ਚਾਹੁੰਦੇ ਹਾਂ ਤਾਂ ਸਾਨੂੰ ਕਿਸੇ ਨਾ ਕਿਸੇ ਰੂਪ ਵਿਚ ਕਰਜ਼ਾ ਲੈਣਾ ਹੀ ਪਵੇਗਾ। ਕਿਉਂਕਿ ਸਰਕਾਰ ਦੀਆਂ ਨੀਤੀਆਂ ਦੇ ਕਾਰਨ ਬੈਂਕਾਂ ਵਲੋਂ ਔਰਤਾਂ ਨੂੰ ਦਿੱਤੇ ਜਾਣ ਵਾਲੇ ਕਰਜ਼ੇ ਵਿਚ ਵਿਆਜ ਦਰਾਂ ਘੱਟ ਹੁੰਦੀਆਂ ਹਨ ਅਤੇ ਹੋਰ ਵੀ ਕਈ ਤਰ੍ਹਾਂ ਦੀਆਂ ਸਹੂਲਤਾਂ ਮਿਲਦੀਆਂ ਹਨ। ਪਰ ਇਨ੍ਹਾਂ ਅਨੇਕਾਂ ਸਹੂਲਤਾਂ ਦਾ ਫਾਇਦਾ ਲੈਣ ਲਈ ਜ਼ਰੂਰੀ ਹੈ ਕਿ ਸਾਨੂੰ ਬੈਂਕਾਂ ਤੋਂ ਕਰਜ਼ਾ ਲੈਣ ਸਬੰਧੀ ਸਾਰੀਆਂ ਪ੍ਰਕਿਰਿਆਵਾਂ ਦੀ ਜਾਣਕਾਰੀ ਹੋਵੇ। ਕੀ ਤੁਹਾਨੂੰ ਇਹ ਜਾਣਕਾਰੀਆਂ ਹਨ, ਆਓ ਪਰਖਦੇ ਹਾਂ-
1. ਕਰਜ਼ਾ ਲੈਣ ਲਈ ਜ਼ਿਆਦਾ ਜ਼ਰੂਰੀ ਹੈ ਕਿ-
(ਕ) ਤੁਹਾਡੇ ਕੋਲ ਇਕ ਵਿਵਸਥਿਤ ਨੌਕਰੀ ਹੋਵੇ। (ਖ) ਤੁਹਾਡਾ ਸਮਾਜ ਵਿਚ ਰਸੂਖ ਹੋਵੇ। (ਗ) ਤੁਸੀਂ ਪੜ੍ਹੇ-ਲਿਖੇ ਹੋਵੋ।
2. ਆਮ ਤੌਰ 'ਤੇ ਨੌਕਰੀਪੇਸ਼ਾ ਲੋਕਾਂ ਨੂੰ ਬੈਂਕ ਕਿੰਨੇ ਸਾਲਾਂ ਦਾ ਹੋਮ ਲੋਨ ਦਿੰਦੇ ਹਨ-(ਕ) 20 ਸਾਲ ਲਈ। (ਖ) 30 ਸਾਲ ਲਈ। (ਗ) 50 ਸਾਲ ਲਈ।
3. ਕਰਜ਼ਾ ਲੈਂਦੇ ਸਮੇਂ ਧਿਆਨ ਰੱਖਣ ਵਾਲੀ ਸਭ ਤੋਂ ਮਹੱਤਵਪੂਰਨ ਗੱਲ ਹੈ-(ਕ) ਆਪਣੀ ਆਰਥਿਕ ਸਥਿਤੀ ਅਤੇ ਭੁਗਤਾਨ ਸਮਾਂ।
(ਖ) ਬੈਂਕ ਅਤੇ ਕਰਜ਼ੇ ਦੀ ਕਿਸਮ। (ਗ) ਬੈਂਕ ਮੈਨੇਜਰ ਨਾਲ ਵਿਅਕਤੀਗਤ ਰਿਸ਼ਤੇ।
4. ਕੀ ਬੈਂਕ 100 ਫੀਸਦੀ ਹੋਮ ਲੋਨ ਦਿੰਦੇ ਹਨ?
(ਕ) ਪਤਾ ਨਹੀਂ। (ਖ) ਹਾਂ। (ਗ) ਨਹੀਂ।
5. ਜੇ ਤੁਸੀਂ ਆਪਣਾ ਬਿਜ਼ਨੈਸ ਕਰਨਾ ਚਾਹੁੰਦੇ ਹੋ ਤਾਂ ਹੋਮ ਲੋਨ ਲੈਣ ਲਈ ਆਮਦਨ ਕਰ ਰਿਟਰਨ ਭਰਨੀ ਜ਼ਰੂਰੀ ਹੁੰਦੀ ਹੈ-(ਕ) ਕੋਈ ਜ਼ਰੂਰੀ ਨਹੀਂ। (ਖ) ਜ਼ਰੂਰੀ ਹੁੰਦੀ ਹੈ। (ਗ) ਨਹੀਂ ਪਤਾ।
ਨਤੀਜਾ : ਜੇ ਤੁਸੀਂ ਇਸ ਕੁਇਜ਼ ਨੂੰ ਪੜ੍ਹ ਕੇ ਇਸ ਦੇ ਉਨ੍ਹਾਂ ਸੰਭਾਵਿਤ ਜਵਾਬਾਂ 'ਤੇ ਟਿਕ ਲਗਾਇਆ ਹੈ, ਜਿਨ੍ਹਾਂ ਨੂੰ ਤੁਸੀਂ ਆਪਣੇ ਜਵਾਬਾਂ ਦੇ ਨੇੜੇ ਮੰਨਦੇ ਹੋ, ਤਾਂ ਬੈਂਕਾਂ ਤੋਂ ਕਰਜ਼ਾ ਲੈਣ ਸਬੰਧੀ ਤੁਹਾਡੀ ਜਾਣਕਾਰੀ ਇਸ ਤਰ੍ਹਾਂ ਹੈ-
(ਕ) ਜੇ ਤੁਹਾਡੇ ਕੁੱਲ ਹਾਸਲ ਅੰਕ 20 ਜਾਂ ਇਸ ਤੋਂ ਜ਼ਿਆਦਾ ਹਨ ਤਾਂ ਤੁਹਾਨੂੰ ਕਰਜ਼ਾ ਲੈਣ ਨਾਲ ਸਬੰਧਤ ਹਰ ਕਿਸਮ ਦੀ ਜਾਣਕਾਰੀ ਹੈ। ਤੁਹਾਨੂੰ ਬਹੁਤ ਅਸਾਨੀ ਨਾਲ ਕਰਜ਼ਾ ਮਿਲ ਜਾਵੇਗਾ।
(ਖ) ਜੇ ਤੁਹਾਡੇ ਕੁੱਲ ਹਾਸਲ ਅੰਕ 10 ਜਾਂ ਇਸ ਤੋਂ ਜ਼ਿਆਦਾ ਪਰ 15 ਤੋਂ ਘੱਟ ਹਨ ਤਾਂ ਇਸ ਦਾ ਸਾਫ਼ ਮਤਲਬ ਹੈ ਕਿ ਕੋਈ ਵੀ ਬੈਂਕ ਕਰਜ਼ਾ ਹਾਸਲ ਕਰਨ ਸਬੰਧੀ ਨਾ ਸਿਰਫ ਤੁਹਾਨੂੰ ਜਾਣਕਾਰੀ ਹੈ, ਸਗੋਂ ਤੁਸੀਂ ਉਨ੍ਹਾਂ ਦੀ ਗੰਭੀਰਤਾ ਨੂੰ ਵੀ ਸਮਝਦੇ ਹੋ ਪਰ ਆਲਸ ਅਤੇ ਝਿਜਕ ਕਾਰਨ ਵੱਡਾ ਕਦਮ ਚੁੱਕਣ ਵਿਚ ਭਾਵ ਕਰਜ਼ਾ ਲੈਣ ਵਿਚ ਘਬਰਾਹਟ ਮਹਿਸੂਸ ਕਰਦੇ ਹੋ।
(ਗ) ਜੇ ਤੁਹਾਡੇ ਹਾਸਲ ਅੰਕ 10 ਤੋਂ ਵੀ ਘੱਟ ਹਨ ਤਾਂ ਮੁਆਫ਼ ਕਰੋ, ਤੁਹਾਨੂੰ ਕਿਸੇ ਵੀ ਤਰੀਕੇ ਨਾਲ ਕਰਜ਼ਾ ਲੈਣ ਸਬੰਧੀ ਜਾਣਕਾਰੀ ਨਹੀਂ ਹੈ। ਫਿਰ ਵੀ ਤੁਹਾਨੂੰ ਕਰਜ਼ਾ ਅਸਾਨੀ ਨਾਲ ਮਿਲ ਜਾਂਦਾ ਹੈ ਤਾਂ ਇਹ ਸਮਝੋ ਕਿ ਇਹ ਸਭ ਤੁਹਾਡੀ ਬਦੌਲਤ ਨਹੀਂ, ਤੁਹਾਡੇ ਅਨੇਕਾਂ ਦਸਤਾਵੇਜ਼ਾਂ ਦੇ ਕਾਰਨ ਹੈ।


-ਇਮੇਜ ਰਿਫਲੈਕਸ਼ਨ ਸੈਂਟਰ






Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX