ਪੰਜਾਬ ਦਾ ਮਾਣ ਸਾਡੀ ਮਾਂ ਬੋਲੀ ਪੰਜਾਬੀ

ਅੱਜ ਪੰਜਾਬੀ ਮਾਂ-ਬੋਲੀ ਦਿਵਸ 'ਤੇ ਵਿਸ਼ੇਸ਼
ਮਾਂ-ਬੋਲੀ ਮਨੁੱਖ ਦੀ ਸਭ ਤੋਂ ਵੱਡੀ ਪਛਾਣ ਹੈ, ਜਿਸ ਰਾਹੀਂ ਉਸ ਦੀ ਸੋਚ ਗਤੀਸ਼ੀਲ ਹੁੰਦੀ ਹੈ। ਪੰਜਾਬੀ ਬੋਲੀ ਸਾਡੀ ਪੰਜਾਬੀਆਂ ਦੀ ਮਾਂ-ਬੋਲੀ ਹੈ, ਜਿਸ ਨੂੰ ਬਚਪਨ ਵਿਚ ਆਪਣੀ ਮਾਂ ਕੋਲੋਂ ਲੋਰੀਆਂ ਦੇ ਰੂਪ ਵਿਚ ਸੁਣਿਆ ਤੇ ਫਿਰ ਤੋਤਲੀ ਜ਼ੁਬਾਨ ਨਾਲ ਬੋਲਣ ਤੇ ਸਿੱਖਣ ਦੀ ਕੋਸ਼ਿਸ਼ ਕੀਤੀ। ਜਿਸ ਤਰ੍ਹਾਂ ਮਾਂ ਦੀ ਤੁਲਨਾ ਕਿਸੇ ਹੋਰ ਰਿਸ਼ਤੇ ਨਾਲ ਨਹੀਂ ਕੀਤੀ ਜਾ ਸਕਦੀ, ਉਸ ਤਰ੍ਹਾਂ ਹੀ ਮਾਂ-ਬੋਲੀ ਦਾ ਸਥਾਨ ਕਿਸੇ ਹੋਰ ਬੋਲੀ ਨੂੰ ਨਹੀਂ ਦਿੱਤਾ ਜਾ ਸਕਦਾ। ਇਹ ਬੋਲੀ ਹਰ ਵਿਅਕਤੀ ਦੀਆਂ ਭਾਵਨਾਵਾਂ ਨੂੰ ਪ੍ਰਗਟਾਉਣ ਦਾ ਸਭ ਤੋਂ ਉੱਤਮ ਵਸੀਲਾ ਹੈ, ਜਿਸ ਰਾਹੀਂ ਅਸੀਂ ਆਪਣੇ ਵਿਚਾਰਾਂ, ਲੋੜਾਂ ਤੇ ਭਾਵਨਾਵਾਂ ਨੂੰ ਦੂਸਰਿਆਂ ਤੱਕ ਪਹੁੰਚਾਉਂਦੇ ਹਾਂ। ਜਿਸ ਭਾਸ਼ਾ ਵਿਚ ਅਸੀਂ ਸੁਪਨੇ ਲੈਂਦੇ ਹਾਂ, ਉਹ ਹੀ ਮੂਲ ਰੂਪ ਵਿਚ ਸਾਡੀ ਮਾਂ-ਬੋਲੀ ਹੈ, ਜੋ ਜਨਮ ਤੋਂ ਲੈ ਕੇ ਮਰਨ ਤੱਕ ਸਾਡੇ ਨਾਲ ਵਿਚਰਦੀ ਹੈ।
ਅਸੀਂ ਬਹੁਤ ਭਾਗਾਂ ਵਾਲੇ ਹਾਂ ਕਿ ਸਾਡੇ ਹਿੱਸੇ ਪੰਜਾਬੀ ਮਾਂ-ਬੋਲੀ ਆਈ, ਜਿਹੜੀ ਪੰਜ ਦਰਿਆਵਾਂ ਦੀ ਰਾਣੀ ਅਤੇ ਗੁਰੂਆਂ ਪੀਰਾਂ ਦੀ ਬਾਣੀ ਹੈ। ਇਹ ਏਨੀ ਸਮਰੱਥ ਭਾਸ਼ਾ ਹੈ ਕਿ ਇਸ ਨੂੰ ਮਾਧਿਅਮ ਬਣਾ ਕੇ ਸੂਫ਼ੀ ਸੰਤ ਫ਼ਰੀਦ, ਸ਼ਾਹ ਹੁਸੈਨ, ਬੁੱਲ੍ਹੇ ਸ਼ਾਹ, ਵਾਰਿਸ ਨੇ ਆਪਣੀਆਂ ਰਚਨਾਵਾਂ ਰਚੀਆਂ। ਜਿਹੜੀਆਂ ਸਾਰੀ ਦੁਨੀਆ ਵਿਚ ਮਿਸਾਲ ਹਨ। ਵੇਦ ਪੁਰਾਣਾਂ ਵਿਚ ਵੀ ਇਹ ਭਾਸ਼ਾ ਸਮਾਈ ਹੋਈ ਹੈ। ਪੰਜਾਬੀ ਲੋਕ ਗੀਤ, ਸਾਹਿਤ, ਸੱਭਿਆਚਾਰ, ਪੰਜਾਬੀ ਫ਼ਿਲਮਾਂ, ਅਖੌਤਾਂ ਅਤੇ ਮੁਹਾਵਰੇ ਆਦਿ ਨੂੰ ਸਮਝਣ ਲਈ ਮਾਂ-ਬੋਲੀ ਆਉਣੀ ਲਾਜ਼ਮੀ ਹੈ।
ਇਸ ਭਾਸ਼ਾ ਨੇ ਆਪਣੇ ਵਿਚ ਪੰਜਾਬੀ ਸੱਭਿਆਚਾਰ ਦਾ ਮਹਾਨ ਵਿਰਸਾ ਸੰਭਾਲ ਕੇ ਰੱਖਿਆ ਹੈ। ਇਸ ਦੇ ਪ੍ਰਚਾਰ ਅਤੇ ਪ੍ਰਸਾਰ ਲਈ ਲਗਾਤਾਰ ਯਤਨਾਂ ਦੀ ਲੋੜ ਹੈ, ਤਾਂ ਕਿ ਪੰਜਾਬੀਆਂ ਦੀ ਪਹਿਚਾਣ ਬਚ ਸਕੇ। ਇਹ ਭਾਸ਼ਾ ਕਮਜ਼ੋਰ ਹੋ ਰਹੀ ਹੈ, ਕਿਉਂਕਿ ਪੰਜਾਬ ਦੇ ਲੋਕ ਹੀ ਇਸ ਨੂੰ ਬੋਲਣ ਵਿਚ ਸ਼ਰਮ ਮਹਿਸੂਸ ਕਰ ਰਹੇ ਹਨ ਅਤੇ ਇਸ ਦੀ ਉੱਨਤੀ ਵਿਚ ਕੋਈ ਰੁਚੀ ਨਹੀਂ ਰੱਖਦੇ। ਇਥੋਂ ਤੱਕ ਕਿ ਕਈ ਲੋਕ ਇਸ ਨੂੰ ਅਨਪੜ੍ਹਾਂ ਦੀ ਬੋਲੀ ਸਮਝਦੇ ਹਨ।
ਕੀ ਗੁਰੂਆਂ ਦੁਆਰਾ ਇਸ ਭਾਸ਼ਾ ਵਿਚ ਰਚੀ ਗਈ ਇਲਾਹੀ ਬਾਣੀ ਕਿਸੇ ਵਰਦਾਨ ਤੋਂ ਘੱਟ ਹੈ, ਬਲਕਿ ਇਸ ਦਾ ਇਤਿਹਾਸ ਤਾਂ ਦੁਨੀਆ ਦਾ ਰਾਹ ਦਸੇਰਾ ਹੈ, ਆਪਸੀ ਸਾਂਝ ਦਾ ਪ੍ਰਤੀਕ ਹੈ, ਜਿਹੜਾ ਰਿਸ਼ਤਿਆਂ ਨੂੰ ਨਿੱਘ ਦਿੰਦਾ ਹੈ। ਇਸ ਭਾਸ਼ਾ ਕਰਕੇ ਤਾਂ ਪੰਜਾਬੀਆਂ ਦੀ ਦੁਨੀਆ ਵਿਚ ਸ਼ਾਨ ਤੇ ਪਹਿਚਾਣ ਵੱਖਰੀ ਹੈ।
ਹਰ ਮਨੁੱਖ ਨੂੰ ਵੱਧ ਤੋਂ ਵੱਧ ਭਾਸ਼ਾਵਾਂ ਸਿੱਖਣੀਆਂ ਚਾਹੀਦੀਆਂ ਹਨ। ਪਰ ਮਾਂ ਬੋਲੀ ਨੂੰ ਉਸ ਦਾ ਬਣਦਾ ਹੱਕ ਜ਼ਰੂਰ ਦੇਣਾ ਚਾਹੀਦਾ ਹੈ। ਬੱਚੇ ਦਾ ਮੁਢਲਾ ਵਿਕਾਸ ਜੋ ਮਾਂ-ਬੋਲੀ ਦੁਆਰਾ ਹੋ ਸਕਦਾ ਹੈ, ਉਹ ਕਿਸੇ ਹੋਰ ਭਾਸ਼ਾ ਦੁਆਰਾ ਨਹੀਂ ਹੋ ਸਕਦਾ। ਇਸ ਲਈ ਸਕੂਲੀ ਵਿੱਦਿਆ ਮਾਤ-ਭਾਸ਼ਾ ਵਿਚ ਹੀ ਹੋਣੀ ਚਾਹੀਦੀ ਹੈ। ਇਸ ਭਾਸ਼ਾ ਰਾਹੀਂ ਹੀ ਉਹ ਆਪਣੀ ਹਰ ਸਮੱਸਿਆ ਦਾ ਹੱਲ ਕਰ ਸਕਦੇ ਹਨ।
ਦੁਨੀਆ ਦਾ ਹਰ ਦੇਸ਼ ਦਾ ਵਾਸੀ ਆਪਣੀ ਮਾਂ-ਬੋਲੀ ਵਿਚ ਗੱਲ ਕਰਨ ਵਿਚ ਮਾਣ ਮਹਿਸੂਸ ਕਰਦਾ ਹੈ। ਪਰ ਸਾਡੇ ਵਾਸਤੇ ਹੋਰ ਵੀ ਮਾਣ ਵਾਲੀ ਗੱਲ ਹੈ ਕਿ ਸਾਡੀ ਮਾਂ-ਬੋਲੀ ਨੂੰ ਕੈਨੇਡਾ ਵਰਗੇ ਮਹਾਨ ਦੇਸ਼ ਵਿਚ ਤੀਜੀ ਭਾਸ਼ਾ ਵਲੋਂ ਮਾਨਤਾ ਮਿਲ ਚੁੱਕੀ ਹੈ। ਹੋਰ ਵੀ ਖੁਸ਼ੀ ਦੀ ਗੱਲ ਹੈ ਕਿ ਪੰਜਾਬੀ ਦੁਨੀਆ ਦੀਆਂ ਹਰਮਨ ਪਿਆਰੀਆਂ ਅਤੇ ਵੱਧ ਬੋਲਣ ਵਾਲੀਆਂ ਭਾਸ਼ਾਵਾਂ ਵਿਚੋਂ ਗਿਆਰਵੇਂ ਸਥਾਨ 'ਤੇ ਪਹੁੰਚ ਚੁੱਕੀ ਹੈ। ਇਹ ਯੁਵਾ ਪੀੜ੍ਹੀ ਵਾਸਤੇ ਪ੍ਰੇਰਣਾ ਦਾ ਸਰੋਤ ਵੀ ਹੈ ਕਿ ਜਦੋਂ ਦੀ ਇਹ ਭਾਸ਼ਾ ਕਮਜ਼ੋਰ ਹੋਈ ਹੈ ਤਾਂ ਰਿਸ਼ਤੇ ਵੀ ਕਮਜ਼ੋਰ ਹੋ ਗਏ ਹਨ। ਉਨ੍ਹਾਂ ਵਿਚ ਪਿਆਰ ਤੇ ਆਪਣਾਪਣ ਖ਼ਤਮ ਹੋ ਰਿਹਾ ਹੈ ਅਤੇ ਕਈ ਬੁਰਾਈਆਂ ਜਨਮ ਲੈ ਰਹੀਆਂ ਹਨ। ਇਸ ਮਹਾਨ ਵਿਰਸੇ ਨੂੰ ਸੰਭਾਲਣ ਤੇ ਸਮਝਣ ਲਈ ਪੰਜਾਬੀ ਭਾਸ਼ਾ ਦਾ ਗਿਆਨ ਹੋਣਾ ਬਹੁਤ ਜ਼ਰੂਰੀ ਹੈ। ਵਿਦਿਅਕ ਅਦਾਰਿਆਂ ਵਿਚ ਵੀ ਇਸ ਦਾ ਪੂਰਾ ਮਾਣ-ਸਨਮਾਨ ਹੋਣਾ ਚਾਹੀਦਾ ਹੈ ਅਤੇ ਇਹ ਲਾਜ਼ਮੀ ਵਿਸ਼ੇ ਵਜੋਂ ਪੜ੍ਹਾਈ ਜਾਣੀ ਚਾਹੀਦੀ ਹੈ। ਸਭ ਨੂੰ ਮਿਲ ਕੇ ਯਤਨ ਕਰਨਾ ਚਾਹੀਦਾ ਹੈ ਕਿ ਉੱਤਮ ਜਨਮ ਉਪਯੋਗੀ ਪੰਜਾਬੀ ਸਾਹਿਤ ਵੱਧ ਤੋਂ ਵੱਧ ਛਾਪਿਆ ਜਾਵੇ ਅਤੇ ਆਮ ਲੋਕਾਂ ਤੱਕ ਪਹੁੰਚਾਇਆ ਜਾਵੇ।
ਕਹਿੰਦੇ ਹਨ ਕਿ ਜੇ ਕਿਸੇ ਨੂੰ ਵਿਰਸੇ ਤੇ ਜੜ੍ਹਾਂ ਤੋਂ ਵੱਖ ਕਰਨਾ ਹੋਵੇ ਤਾਂ ਉਸ ਕੋਲੋਂ ਉਸ ਦੀ ਮਾਂ-ਬੋਲੀ ਖੋਹ ਲਓ, ਹੌਲੀ-ਹੌਲੀ ਉਹ ਆਪਣੀ ਪਹਿਚਾਣ ਨੂੰ ਭੁੱਲ ਜਾਵੇ। ਸਾਡੀ ਤਾਂ ਪਹਿਚਾਣ ਹੀ ਸਾਡੀ ਮਾਂ-ਬੋਲੀ ਪੰਜਾਬੀ ਹੈ, ਇਸ ਲਈ ਤਾਂ ਕਹਿੰਦੇ ਹਨ ਕਿ ਮਾਂ-ਬੋਲੀ ਜਿਊਂਦੀ ਰਹੇਗੀ ਤਾਂ ਪੰਜਾਬੀ ਜਿਊਂਦੇ ਰਹਿਣਗੇ। ਮਾਂ-ਬੋਲੀ ਦਾ ਸਤਿਕਾਰ ਕਰਨਾ ਆਪਣੀ ਮਾਂ ਦੀ ਹੋਂਦ ਨੂੰ ਬਚਾਉਣਾ ਹੈ, ਇਸ ਲਈ ਹਰ ਮਾਂ ਦਾ ਫ਼ਰਜ਼ ਹੈ ਕਿ ਉਹ ਆਪਣੇ ਬੱਚਿਆਂ ਨੂੰ ਮਾਂ-ਬੋਲੀ ਨਾਲ ਜੋੜੇ। ਬਾਹਰ ਬੱਚੇ ਜੋ ਮਰਜ਼ੀ ਭਾਸ਼ਾ ਬੋਲਣ, ਘਰ ਵਿਚ ਪੰਜਾਬੀ ਵਿਚ ਗੱਲਬਾਤ ਕਰਨੀ ਚਾਹੀਦੀ ਹੈ। ਬੱਚਿਆਂ ਨੂੰ ਮਾਂ-ਬੋਲੀ ਵਿਚ ਛਪਦੇ ਅਖ਼ਬਾਰਾਂ, ਮੈਗਜ਼ੀਨ, ਰਸਾਲਿਆਂ ਆਦਿ ਨੂੰ ਪੜ੍ਹਨ ਲਈ ਪ੍ਰੇਰਿਤ ਕਰਨਾ ਚਾਹੀਦਾ ਹੈ। ਇਸ ਦੇ ਪ੍ਰਸਾਰ ਲਈ ਕਈ ਤਰ੍ਹਾਂ ਦੇ ਪ੍ਰੋਗਰਾਮ ਕੀਤੇ ਜਾ ਰਹੇ ਹਨ। ਇਹ ਦਿਵਸ ਸਕੂਲਾਂ, ਕਾਲਜਾਂ ਵਿਚ ਮਨਾਇਆ ਜਾਣਾ ਚਾਹੀਦਾ ਹੈ। ਆਓ ਅਸੀਂ ਸਾਰੇ ਅਮੀਰ ਵਿਰਸੇ ਦੇ ਵਾਸੀ ਹੋਣ ਦੇ ਨਾਤੇ ਸ਼ਹਿਦ ਵਰਗੀ ਮਿੱਠੀ ਮਾਂ-ਬੋਲੀ ਪੰਜਾਬੀ ਨੂੰ ਬੋਲਣ, ਪੜ੍ਹਣ ਤੇ ਲਿਖਣ ਵਿਚ ਮਾਣ ਮਹਿਸੂਸ ਕਰੀਏ ਅਤੇ ਆਉਣ ਵਾਲੀ ਪੀੜ੍ਹੀ ਦੀ ਅਮਾਨਤ ਨੂੰ ਸੰਭਾਲ ਕੇ ਰੱਖੀਏ, ਤਾਂ ਕਿ ਉਹ ਆਪਣੇ ਅਮੀਰ ਵਿਰਸੇ ਨੂੰ ਪੜ੍ਹ ਕੇ ਪੰਜਾਬੀ ਹੋਣ 'ਤੇ ਮਾਣ ਮਹਿਸੂਸ ਕਰਨ।
ਮੇਰੀ ਜਾਨ, ਮੇਰੀ ਪਹਿਚਾਣ ਹੈ
ਮਾਂ ਬੋਲੀ ਪੰਜਾਬੀ।
ਜੇ ਭੁੱਲ ਗਏ ਪੰਜਾਬੀ ਨੂੰ,
ਸਾਨੂੰ ਕੌਣ ਕਹੂ ਪੰਜਾਬੀ।

ਮੋਬਾਈਲ : 98782-49944.

ਖ਼ਬਰ ਸ਼ੇਅਰ ਕਰੋ

ਆਪਣੇ ਬੂਟਿਆਂ ਦੀ ਕਿੰਨੀ ਚੰਗੀ ਤਰ੍ਹਾਂ ਦੇਖਭਾਲ ਕਰਦੇ ਹੋ ਤੁਸੀਂ?

ਬੂਟਿਆਂ ਨੂੰ ਸਿਰਫ਼ ਘਰ ਦੀ ਬਾਲਕੋਨੀ ਜਾਂ ਬਗੀਚੇ ਵਿਚ ਖਰੀਦ ਕੇ ਲਗਾ ਲੈਣਾ ਹੀ ਤੁਹਾਨੂੰ ਸਹੀ ਨਹੀਂ ਬਣਾਉਂਦਾ। ਬੂਟਿਆਂ ਨੂੰ ਲਗਾਉਣ ਤੋਂ ਬਾਅਦ ਉਸ ਦੀ ਦੇਖਭਾਲ ਕਰਨਾ ਵੀ ਇਕ ਕਲਾ ਹੈ, ਜਿਸ ਵਿਚ ਪਰੰਪਰਾਗਤ ਹੋਣਾ ਜ਼ਰੂਰੀ ਹੈ। ਪੂਰਾ ਸਾਲ ਬੂਟੇ ਹਰੇ ਭਰੇ ਰਹਿ ਸਕਦੇ ਹਨ। ਉਨ੍ਹਾਂ ਨੂੰ ਸਹੀ ਸਮੇਂ 'ਤੇ ਖਾਦ, ਪਾਣੀ ਦੀ ਜ਼ਰੂਰਤ ਹੁੰਦੀ ਹੈ। ਉਨ੍ਹਾਂ ਦੀ ਸਹੀ ਦੇਖਭਾਲ, ਮੌਸਮ ਅਨੁਸਾਰ ਉਨ੍ਹਾਂ ਦਾ ਰੱਖ-ਰਖਾਅ ਜੇਕਰ ਕੀਤਾ ਜਾਵੇ ਤਾਂ ਤੁਸੀਂ ਵੀ ਆਪਣੇ ਬੂਟਿਆਂ ਦੀ ਚੰਗੀ ਦੇਖਭਾਲ ਕਰ ਸਕਦੇ ਹੋ। ਬੂਟਿਆਂ ਦੇ ਵਿਸ਼ੇ ਵਿਚ ਤੁਸੀਂ ਕਿੰਨੇ ਚੌਕੰਨੇ ਹੋ ਤੁਹਾਡੇ ਕੋਲੋਂ ਇਸ ਦੇ ਵਿਸ਼ੇ ਵਿਚ ਕੁਝ ਸਵਾਲ ਪੁੱਛ ਰਹੇ ਹਾਂ, ਇਨ੍ਹਾਂ ਦੇ ਜਵਾਬ ਦਿਓ ਅਤੇ ਆਪਣੇ-ਆਪ ਨੂੰ ਪਰਖੋ:-
1. ਬੂਟਿਆਂ ਵਿਚ ਕੀ ਚੀਜ਼ ਦੇਖ ਕੇ ਤੁਸੀਂ ਖਰੀਦ ਲੈਂਦੇ ਹੋ?
(ੳ) ਉਨ੍ਹਾਂ ਦੀ ਸੁੰਦਰਤਾ ਅਤੇ ਹਰਾ-ਭਰਾਪਨ ਦੇਖ ਕੇ।
(ਅ) ਮੌਸਮ ਅਨੁਸਾਰ
(ੲ) ਇਸ ਬਾਰੇ ਕਦੀ ਕੋਈ ਧਿਆਨ ਨਹੀਂ ਦਿੱਤਾ।
2. ਬੂਟਿਆਂ ਦੀ ਮਿੱਟੀ ਬਾਰੇ ਤੁਸੀਂ ਕੀ ਸੋਚਦੇ ਹੋ?
(ੳ) ਕਈ ਸਾਲ ਤੱਕ ਨਹੀਂ ਬਦਲਦੇ।
(ਅ) ਲਗਾਤਾਰ ਵਰਤੋਂ ਨਾਲ ਮਿੱਟੀ ਕਮਜ਼ੋਰ ਹੋ ਜਾਂਦੀ ਹੈ, ਇਸ ਦਾ ਤੁਹਾਨੂੰ ਕੋਈ ਗਿਆਨ ਹੀ ਨਹੀਂ ਹੈ।
(ੲ) ਇਕ ਸਾਲ ਦੇ ਬਾਅਦ ਬੂਟੇ ਦੀ ਮਿੱਟੀ ਨੂੰ ਬਦਲ ਕੇ ਉਸ ਵਿਚ ਦੂਜੀ ਮਿੱਟੀ ਮਿਲਾਉਂਦੇ ਹੋ।
3. ਤੁਸੀਂ ਬੂਟਿਆਂ ਨੂੰ ਕਦੋਂ ਖਰੀਦਦੇ ਹੋ?
(ੳ) ਹਮੇਸ਼ਾ ਬੂਟਿਆਂ ਨੂੰ ਸ਼ਾਮ ਨੂੰ ਹੀ ਖਰੀਦ ਕੇ ਲਿਆਂਦੀ ਹਾਂ।
(ਅ) ਜਦੋਂ ਮੌਕਾ ਲੱਗੇ ਤਦ ਹੀ ਲੈ ਆਉਂਦੀ ਹਾਂ।
(ੲ) ਦੁਪਹਿਰ ਨੂੰ ਬੂਟੇ ਲਿਆਉਣ ਵਿਚ ਕੋਈ ਹਰਜ਼ ਨਹੀਂ ਹੈ।
4. ਬੂਟਿਆਂ ਨੂੰ ਲਿਆਉਣ ਤੋਂ ਬਾਅਦ :
(ੳ) ਬੂਟਿਆਂ ਨੂੰ ਜਲਦੀ ਹੀ ਬਗੀਚੇ ਜਾਂ ਗਮਲੇ ਵਿਚ ਲਗਾ ਲੈਂਦੀ ਹਾਂ।
(ਅ) ਬੂਟਿਆਂ ਨੂੰ ਤਾਂ ਖਰੀਦ ਲਿਆਂਦੀ ਹਾਂ ਪਰ ਗਮਲਾ ਨਾ ਹੋਣ ਕਾਰਨ ਉਸ ਨੂੰ ਕਈ ਦਿਨਾਂ ਤੱਕ ਉਂਝ ਹੀ ਪਿਆ ਰਹਿਣ ਦਿੰਦੀ ਹਾਂ।
(ੲ) ਜਦੋਂ ਸਮਾਂ ਮਿਲ ਜਾਵੇ ਉਦੋਂ ਲਗਾ ਲੈਂਦੀ ਹਾਂ, ਇਸ ਬਾਰੇ ਜ਼ਿਆਦਾ ਨਹੀਂ ਸੋਚਦੀ।
5. ਬੂਟਿਆਂ ਦੀ ਚੰਗੀ ਦੇਖਭਾਲ ਲਈ:
(ੳ) ਮਾਲੀ ਦੀ ਸਹਾਇਤਾ ਲੈਂਦੀ ਹਾਂ।
(ਅ) ਕਿਤਾਬਾਂ ਤੋਂ ਪੜ੍ਹ ਕੇ ਜਾਂ ਖੇਤੀ ਨਾਲ ਜੁੜੇ ਲੋਕਾਂ ਤੋਂ ਜਾਣਕਾਰੀ ਹਾਸਲ ਕਰਦੀ ਹਾਂ।
(ੲ) ਜਿੰਨਾ ਗਿਆਨ ਹੋਵੇ, ਬਸ ਓਨੇ ਦੀ ਵਰਤੋਂ ਕਰਦੀ ਹਾਂ, ਉਸ ਵਿਚ ਵਾਧਾ ਕਰਨ ਲਈ ਨਹੀਂ ਸੋਚਦੀ।
ਉੱਤਰ : 1. (ਅ), 2. (ੲ), 3. (ੳ), 4. (ੳ), 5. (ਅ)।
ਨਤੀਜਾ : ਇਥੇ ਹਰ ਸਵਾਲ ਦੇ ਤਿੰਨ ਜਵਾਬ ਹਨ। ਤਿੰਨਾਂ ਵਿਚੋਂ ਸਿਰਫ਼ ਇਕ ਲਈ ਪੰਜ ਨੰਬਰ ਦਿੱਤੇ ਗਏ ਹਨ। ਬਾਕੀ ਲਈ ਜ਼ੀਰੋ ਅੰਕ ਹੈ। ਜੇਕਰ ਤੁਸੀਂ 20 ਤੋਂ 25 ਅੰਕ ਦੇ ਵਿਚਾਲੇ ਨੰਬਰ ਲੈਂਦੇ ਹੋ ਤਾਂ ਸਮਝ ਲਓ ਕਿ ਤੁਹਾਡੇ ਘਰ ਦੇ ਬੂਟੇ ਹਰ ਸਮੇਂ ਹਰੇ-ਭਰੇ ੱਤੇ ਸਿਹਤਮੰਦ ਰਹਿੰਦੇ ਹਨ। ਬਾਹਰ ਤੋਂ ਆਉਣ ਵਾਲੇ ਤੁਹਾਡੇ ਬੂਟਿਆਂ ਨੂੰ ਦੇਖ ਕੇ ਕਹਿ ਉੱਠਦੇ ਹਨ ਕਿੰਨੇ ਸੁੰਦਰ ਹਨ ਤੁਹਾਡੇ ਬੂਟੇ। ਜੇਕਰ 15 ਤੋਂ 20 ਅੰਕ ਹਾਸਲ ਕਰਦੇ ਹੋ ਤਾਂ ਸਮਝ ਲਓ ਕਿ ਤੁਹਾਨੂੰ ਆਪਣੇ ਬੂਟਿਆਂ ਦੀ ਦੇਖਭਾਲ ਵਿਚ ਹਾਲੇ ਹੋਰ ਜ਼ਿਆਦਾ ਸਮਾਂ ਅਤੇ ਧਿਆਨ ਦੇਣ ਦੀ ਜ਼ਰੂਰਤ ਹੈ। ਪਰ ਜੇਕਰ ਤੁਹਾਡੇ ਅੰਕ 10 ਤੋਂ ਘੱਟ ਹਨ ਤਾਂ ਤੁਸੀਂ ਸਮਝ ਲਓ ਕਿ ਤੁਸੀਂ ਬੂਟੇ ਲਗਾਉਣ ਦੇ ਤਾਂ ਸ਼ੌਕੀਨ ਹੋ ਪਰ ਉਨ੍ਹਾਂ ਦੀ ਸਹੀ ਢੰਗ ਨਾਲ ਦੇਖਭਾਲ ਨਹੀਂ ਕਰ ਪਾਉਂਦੇ, ਜਿਸ ਲਈ ਜ਼ਰੂਰਤ ਹੈ ਕਿ ਤੁਸੀਂ ਗਿਆਨ ਵਿਚ ਵਾਧਾ ਤਾਂ ਕਰੋ ਹੀ ਇਸ ਦੇ ਇਲਾਵਾ ਉਨ੍ਹਾਂ ਨਾਲ ਦਿਲ ਵੀ ਲਗਾਓ।

ਬੱਚਿਆਂ 'ਤੇ ਘਰੇਲੂ ਕਲੇਸ਼ ਦਾ ਬੁਰਾ ਪ੍ਰਭਾਵ

ਘਰ ਬੱਚੇ ਦਾ ਪ੍ਰਾਇਮਰੀ ਸਕੂਲ ਅਤੇ ਮਾਂ ਉਸ ਦੀ ਪਹਿਲੀ ਅਧਿਆਪਕਾ ਹੁੰਦੀ ਹੈ। ਘਰ ਦਾ ਮਾਹੌਲ ਸਿਰਜਣ ਵਿਚ ਵੀ ਉਸ ਦਾ ਉਸਾਰੂ ਯੋਗਦਾਨ ਹੁੰਦਾ ਹੈ। ਭਾਵ ਘਰ ਦੇ ਮਾਹੌਲ ਨੂੰ ਬੱਚੇ ਦੇ ਅਨੁਕੂਲ ਬਣਾਉਣ 'ਚ ਮਾਂ ਦੀ ਬੜੀ ਅਹਿਮ ਭੂਮਿਕਾ ਵੀ ਹੁੰਦੀ ਹੈ। ਪਰਿਵਾਰ ਅਤੇ ਆਂਢ-ਗੁਆਂਢ ਤੋਂ ਵੀ ਬੱਚਾ ਚੰਗੀ ਜੀਵਨ-ਜਾਚ, ਸਲੀਕਾ, ਮਿੱਠੀ ਬੋਲੀ, ਛੋਟੇ-ਵੱਡੇ ਨੂੰ ਬਣਦਾ ਪਿਆਰ, ਸਤਿਕਾਰ ਦੇਣਾ, ਸੇਵਾ ਭਾਵਨਾ ਅਤੇ ਨੈਤਿਕਤਾ ਆਦਿ ਗੁਣ ਸਿੱਖਦਾ ਹੈ। ਪਰਿਵਾਰਕ ਮਾਹੌਲ ਵਿਚੋਂ ਗੁਣ ਹਾਸਲ ਕਰਕੇ ਹੀ ਬੱਚਾ ਆਪਣੀ ਚੰਗੀ ਸ਼ਖ਼ਸੀਅਤ ਦਾ ਨਿਰਮਾਣ ਕਰਦਾ ਹੈ।
ਭਲੇ ਸਮੇਂ ਸਨ, ਸਾਂਝੇ ਪਰਿਵਾਰ ਸਨ। ਘਰ ਦੇ ਬਜ਼ੁਰਗ ਘਰ ਦੀ ਆਨ ਤੇ ਸ਼ਾਨ ਹੁੰਦੇ ਸਨ। ਘਰੇਲੂ ਕਲੇਸ਼ ਦੀ ਵੀ ਬਹੁਤ ਘੱਟ ਸੰਭਾਵਨਾ ਹੁੰਦੀ ਸੀ, ਕਿਉਂਕਿ ਬਾਪੂ ਦੇ ਖੂੰਡੇ ਦਾ ਡਰ ਘਰ ਦਾ ਹਰ ਜੀਅ ਮੰਨਦਾ ਸੀ। ਦਾਦਾ-ਦਾਦੀ ਬੱਚਿਆਂ ਨੂੰ ਬੜੀ ਸਹਿਜ ਤੇ ਸਰਲ ਭਾਸ਼ਾ ਵਿਚ ਧਾਰਮਿਕ, ਸੂਰਬੀਰ ਯੋਧਿਆਂ ਦੀਆਂ ਬਹਾਦਰੀ ਅਤੇ ਨੈਤਿਕਤਾ ਦੀਆਂ ਕਹਾਣੀਆਂ ਬਾਤਾਂ ਰਾਹੀਂ ਸੁਣਾ ਕੇ ਉਨ੍ਹਾਂ ਨੂੰ ਗ਼ੈਰ ਰਸਮੀ ਸਿੱਖਿਆ ਦਿੰਦੇ ਸਨ।
ਮਾਪੇ ਬੱਚੇ ਦੇ ਆਦਰਸ਼ ਮਾਡਲ ਹੁੰਦੇ ਹਨ। ਉਨ੍ਹਾਂ ਵਲੋਂ ਮਿਲੀ ਯੋਗ ਅਗਵਾਈ ਬੱਚੇ ਬਾਹਰੀ ਸਮਾਜ, ਦੋਸਤਾਂ ਅਤੇ ਹੋਰ ਲੋਕਾਂ ਦੇ ਸੰਪਰਕ ਵਿਚ ਆਉਣ ਕਰਕੇ ਮਿਲੀਆਂ ਮਾੜੀਆਂ ਆਦਤਾਂ ਤੋਂ ਬਚਾਉਂਦੀ ਹੈ। ਮਾਪਿਆਂ ਦੀ ਹਰ ਸੰਭਵ ਕੋਸ਼ਿਸ਼ ਹੋਣੀ ਚਾਹੀਦੀ ਹੈ ਕਿ ਉਨ੍ਹਾਂ ਦਾ ਬੱਚਾ ਨਿਰਾਰਥਕ ਗੱਲਾਂ ਨੂੰ ਨਾ ਅਪਣਾਵੇ। ਉਹ ਬੱਚੇ ਦੇ ਮਨ ਮਸਤਕ ਵਿਚ ਜ਼ਿੰਦਗੀ ਦੀਆਂ ਚੰਗੀਆਂ ਕਦਰਾਂ-ਕੀਮਤਾਂ ਦਾ ਸੰਚਾਰ ਕਰਨ।
ਪਰਿਵਾਰ ਦਾ ਕੋਈ ਜੀਅ ਜੇ ਸ਼ਰਾਬ ਜਾਂ ਕੋਈ ਹੋਰ ਨਸ਼ਾ ਕਰਦਾ ਹੈ ਤਾਂ ਇਸ ਦਾ ਮਾਰੂ ਪ੍ਰਭਾਵ ਪਰਿਵਾਰ ਤੋਂ ਜ਼ਿਆਦਾ ਬੱਚੇ ਦੀ ਮਾਨਸਿਕਤਾ 'ਤੇ ਪਵੇਗਾ, ਕਿਉਂਕਿ ਨਸ਼ੇ ਕਰਕੇ ਘਰ ਵਿਚ ਨਿੱਤ ਦਾ ਕਲੇਸ਼, ਗਾਲ੍ਹ ਮੰਦਾ ਤੇ ਕੁੱਟਮਾਰ ਹੁੰਦੀ ਹੈ, ਜਿਸ ਦਾ ਬੁਰਾ ਅਸਰ ਬੱਚੇ 'ਤੇ ਪੈਣਾ ਯਕੀਨੀ ਹੈ। ਇਸ ਦੇ ਫਲਸਰੂਪ ਉਹ ਕੋਈ ਅਣਸੁਖਾਵੀਂ ਗ਼ਲਤ ਦਿਸ਼ਾ ਅਖ਼ਤਿਆਰ ਕਰ ਸਕਦਾ ਹੈ। ਆਲੇ-ਦੁਆਲੇ ਦੇ ਅਜੋਕੇ ਗੰਧਲੇ ਹੋ ਚੁੱਕੇ ਮਾਹੌਲ ਦਾ ਮਾਰੂ ਪ੍ਰਭਾਵ ਸਕੂਲ ਜਾਂਦੇ ਬੱਚਿਆਂ 'ਤੇ ਵੀ ਪੈਣ ਦਾ ਡਰ ਅਕਸਰ ਮਾਪਿਆਂ ਨੂੰ ਸਤਾਉਂਦਾ ਹੈ ਕਿ ਉਹ ਕਿਧਰੇ ਥਿੜਕ ਨਾ ਜਾਣ। ਇਸ ਹਾਲਤ ਵਿਚ ਮਾਪੇ ਬੱਚੇ 'ਤੇ ਬਾਜ ਨਜ਼ਰ ਰੱਖਣ। ਜੇ ਕਰ ਕੋਈ ਅਜਿਹੀ ਸਮੱਸਿਆ ਧਿਆਨ ਵਿਚ ਆਉਂਦੀ ਹੈ ਅਤੇ ਬੱਚੇ ਦੀਆਂ ਆਦਤਾਂ ਤੇ ਸੁਭਾਅ ਵਿਚ ਕੋਈ ਤਬਦੀਲੀ ਵੇਖਣ ਨੂੰ ਮਿਲਦੀ ਹੈ ਤਾਂ ਬੱਚਿਆਂ ਨੂੰ ਵਿਸ਼ਵਾਸ ਵਿਚ ਲੈ ਕੇ ਸੁਖਾਵੇਂ ਮਾਹੌਲ ਵਿਚ ਇਨ੍ਹਾਂ ਮਸਲਿਆਂ ਬਾਰੇ ਵਿਚਾਰ-ਵਟਾਂਦਰਾ ਕਰਨਾ ਚਾਹੀਦਾ ਹੈ। ਇਸ ਤਰ੍ਹਾਂ ਪਰਿਵਾਰਕ ਮਾਹੌਲ ਵਿਚ ਅਪਣੱਤ ਪੈਦਾ ਹੋਵੇਗੀ, ਜਿਸ ਦਾ ਬੱਚੇ ਉੱਤੇ ਚੰਗਾ ਪ੍ਰਭਾਵ ਪਵੇਗਾ।
ਪਰਿਵਾਰਕ ਮਾਹੌਲ ਦੀ ਸਿਰਜਣਾ ਇਸ ਤਰ੍ਹਾਂ ਕੀਤੀ ਜਾਵੇ ਕਿ ਬੱਚੇ ਨਾਲ ਕਿਸੇ ਤਰ੍ਹਾਂ ਦਾ ਵਿਤਕਰਾ ਨਾ ਹੋਵੇ ਅਤੇ ਉਸ ਨੂੰ ਅਹਿਸਾਸ ਕਰਵਾਇਆ ਜਾਵੇ ਕਿ ਉਨ੍ਹਾਂ ਦੇ ਅਧਿਕਾਰ ਬਰਾਬਰ ਹਨ। ਇਸ ਤਰ੍ਹਾਂ ਘਰ ਦਾ ਸੁਖਾਵਾਂ ਮਾਹੌਲ ਬੱਚੇ ਦੀ ਸ਼ਖ਼ਸੀਅਤ ਨੂੰ ਨਿਖਾਰੇਗਾ ਅਤੇ ਬੱਚਿਆਂ 'ਤੇ ਘਰੇਲੂ ਕਲੇਸ਼ ਦਾ ਬੁਰਾ ਪ੍ਰਭਾਵ ਨਹੀਂ ਪਵੇਗਾ।

-ਪ੍ਰੀਤ ਨਗਰ-143109 (ਅੰਮ੍ਰਿਤਸਰ)।
ਮੋਬਾਈਲ : 98140-82217.

ਅੰਡੇ ਦਾ ਰੋਟੀ ਰੋਲ

ਸਮੱਗਰੀ : * ਇਕ ਅੰਡਾ ਚੰਗੀ ਤਰ੍ਹਾਂ ਫੈਂਟਿਆ ਹੋਇਆ। * ਤਿੰਨ ਚਮਚੇ ਬਾਰੀਕ ਕੱਟਿਆ ਪਿਆਜ਼,
* ਇਕ ਚੌਥਾਈ ਕੱਪ ਮੈਦਾ, * ਤੇਲ ਲੋੜ ਅਨੁਸਾਰ, * ਨਮਕ ਸਵਾਦ ਅਨੁਸਾਰ।
ਤਿਆਰ ਕਰਨ ਦੀ ਵਿਧੀ : * ਨਾਨਸਟਿਕ ਪੈਨ ਵਿਚ ਥੋੜ੍ਹਾ ਤੇਲ ਪਾ ਕੇ ਪਿਆਜ਼ ਭੁੰਨੋ।
* ਇਸ ਦੌਰਾਨ ਕੌਲੀ ਵਿਚ ਇਕ ਅੰਡੇ ਨੂੰ ਨਮਕ ਪਾ ਕੇ ਫੈਂਟੋ।
* ਹੁਣ ਸਟੋਵ ਦਾ ਸੇਕ ਘਟਾ ਕੇ ਇਸ ਵਿਚ ਅੰਡੇ ਦਾ ਮਿਸ਼ਰਨ ਪਾਓ।
* ਅੰਡੇ ਦੇ ਪੱਕਣ ਤੱਕ ਪਕਾਓ।
* ਹੁਣ ਅੰਡੇ ਨੂੰ ਇਕ ਪਾਸੇ ਰੱਖ ਲਓ, ਆਟੇ ਨੂੰ ਰੋਟੀ ਦੀ ਸ਼ਕਲ ਦਿਓ।
* ਤਵੇ ਨੂੰ ਗਰਮ ਕਰੋ, ਰੋਟੀ ਨੂੰ ਦੋਵੇਂ ਪਾਸਿਆਂ ਤੋਂ ਹਲਕਾ ਭੂਰਾ ਹੋਣ ਤੱਕ ਸੇਕ ਲਓ। ਰੋਟੀ ਬਣਾਉਂਦੇ ਸਮੇਂ ਲੋੜ ਅਨੁਸਾਰ ਤੇਲ ਦੀ ਵਰਤੋਂ ਕਰ ਸਕਦੇ ਹੋ।
* ਹਰੇਕ ਰੋਟੀ ਦੇ ਵਿਚਕਾਰ ਦੋ ਤਿਹਾਈ ਕੱਪ ਅੰਡੇ ਦਾ ਮਿਸ਼ਰਨ ਪਾ ਕੇ ਰੋਲ ਬਣਾ ਲਓ।
* ਇਸ ਨੂੰ ਦੋ ਹਿੱਸਿਆਂ ਵਿਚ ਕੱਟ ਲਓ ਅਤੇ ਹਰੀ ਚਟਣੀ ਨਾਲ ਪਰੋਸੋ।

ਸੁੰਦਰ ਅਤੇ ਸਿਹਤਮੰਦ ਚਮੜੀ ਲਈ ਜੂਸ ਦਾ ਕਰੋ ਸੇਵਨ

ਜੇਕਰ ਤੁਸੀਂ ਦਿਨ-ਰਾਤ ਜਿੰਮ, ਯੋਗਾ, ਕਸਰਤ, ਧਿਆਨ ਆਦਿ 'ਤੇ ਕੇਂਦਰਿਤ ਕਰ ਕੇ ਆਪਣੀ ਸੁੰਦਰਤਾ ਵਧਾਉਣਾ ਚਾਹੁੰਦੀ ਹੋ ਪਰ ਆਪਣੀ ਡਾਈਟ 'ਤੇ ਧਿਆਨ ਨਹੀਂ ਦੇ ਪਾ ਰਹੇ ਹੋ ਤਾਂ ਤੁਹਾਡੇ ਮਨ ਮੁਤਾਬਿਕ ਨਤੀਜਾ ਨਾ ਆਉਣ ਨਾਲ ਤੁਹਾਨੂੰ ਵਾਰ-ਵਾਰ ਨਿਰਾਸ਼ਾ ਦਾ ਸਾਹਮਣਾ ਕਰਨਾ ਪੈਂਦਾ ਹੈ।
ਫਲ ਅਤੇ ਸਬਜ਼ੀਆਂ ਦਾ ਜੂਸ ਸਰੀਰ 'ਚੋਂ ਜ਼ਹਿਰੀਲੇ ਤੱਤ ਬਾਹਰ ਕੱਢਣ ਦੀ ਅਹਿਮ ਭੂਮਿਕਾ ਨਿਭਾਉਂਦਾ ਹੈ। ਜੂਸ ਦੇ ਨਿਯਮਿਤ ਵਰਤੋਂ ਨਾਲ ਤੁਹਾਨੂੰ ਇਕ ਹੀ ਗਿਲਾਸ ਵਿਚ ਫਲ, ਸਬਜ਼ੀਆਂ ਦੇ ਤਾਕਤਵਰ ਐਂਟੀ ਆਕਸੀਡੈਂਟ ਸਿਰਫ਼ ਇਕ ਗਿਲਾਸ ਵਿਚ ਹੀ ਮਿਲ ਜਾਂਦੇ ਹਨ। ਸਵੇਰੇ ਨਿਯਮਿਤ ਇਕ ਗਿਲਾਸ ਜੂਸ ਦੇ ਸੇਵਨ ਨਾਲ ਸਰੀਰ ਵਿਚ ਪਾਣੀ ਦਾ ਸੰਤੁਲਨ ਬਣਿਆ ਰਹਿੰਦਾ ਹੈ ਅਤੇ ਇਸ ਨਾਲ ਖ਼ੂਨ ਸਾਫ਼ ਹੁੰਦਾ ਹੈ। ਹਾਜ਼ਮਾ ਤੰਤਰ ਮਜ਼ਬੂਤ ਹੁੰਦਾ ਹੈ, ਵਜ਼ਨ ਘੱਟ ਹੁੰਦਾ ਹੈ ਅਤੇ ਸਰੀਰ ਵਿਚ ਰੋਗਾਂ ਨਾਲ ਲੜਨ ਦੀ ਪ੍ਰਤੀਰੋਧੀ ਸ਼ਕਤੀ ਵਿਕਸਤ ਹੁੰਦੀ ਹੈ। ਜੂਸ ਵਿਚ ਇਕ ਮੌਜੂਦ ਫਾਈਬਰ ਅਤੇ ਜ਼ਰੂਰੀ ਪੋਸ਼ਕ ਤੱਤ ਸਰੀਰ 'ਚੋਂ ਜ਼ਹਿਰੀਲੇ ਪਦਾਰਥਾਂ ਨੂੰ ਬਾਹਰ ਕੱਢ ਕੇ ਚਮੜੀ ਅਤੇ ਵਾਲਾਂ ਨੂੰ ਤਾਜ਼ਗੀ ਪ੍ਰਦਾਨ ਕਰਦੇ ਹਨ।
ਇਕ ਖੀਰੇ ਨੂੰ ਕੱਟ ਕੇ ਇਸ ਵਿਚ ਅਜਵਾਇਨ ਦੀਆਂ ਪੱਤੀਆਂ ਨੂੰ ਕੱਟ ਕੇ ਦੋਵਾਂ ਨੂੰ ਜੂਸਰ/ਮਿਕਸਰ ਵਿਚ ਚੰਗੀ ਤਰ੍ਹਾਂ ਪੀਸ ਲਓ। ਇਸ ਜੂਸ ਵਿਚ ਤੁਸੀਂ ਆਪਣੇ ਸਵਾਦ ਅਨੁਸਾਰ ਨਮਕ ਜਾਂ ਕਾਲੀ ਮਿਰਚ ਮਿਲਾ ਕੇ ਹਰ ਰੋਜ਼ ਸਵੇਰੇ ਇਕ ਗਿਲਾਸ ਲੈ ਸਕਦੇ ਹੋ। ਇਹ ਜੂਸ ਵਿਟਾਮਿਨ ਨਾਲ ਭਰਪੂਰ ਮੰਨਿਆ ਜਾਂਦਾ ਹੈ ਅੇਤ ਅੰਤੜੀਆਂ ਵਿਚ ਮੌਜੂਦ ਜ਼ਹਿਰੀਲੇ ਤੱਤਾਂ ਨਾਲ ਹੋਣ ਵਾਲੇ ਸਾੜੇ ਤੋਂ ਰਾਹਤ ਦਿਵਾਉਂਦਾ ਹੈ।
ਦੋ ਟਮਾਟਰ ਅਤੇ ਥੋੜ੍ਹੀ ਜਿਹੀ ਸਟ੍ਰੋਬਰੀ ਨੂੰ ਇਕੱਠਾ ਕਰ ਕੇ ਜੂਸਰ/ਮਿਕਸਰ ਵਿਚ ਚੰਗੀ ਤਰ੍ਹਾਂ ਪੀਸ ਲਓ। ਤੁਸੀਂ ਇਸ ਜੂਸ ਵਿਚ ਆਪਣੇ ਸਵਾਦ ਅਨੁਸਾਰ ਸ਼ਹਿਦ ਜਾਂ ਪਾਣੀ ਮਿਲਾ ਸਕਦੇ ਹੋ। ਇਸ ਜੂਸ ਦੀ ਨਿਯਮਿਤ ਵਰਤੋਂ ਨਾਲ ਤੁਹਾਡੇ ਖੂਨ ਵਿਚ ਪਲੇਟਲੈਟਸ ਅਤੇ ਹੋਮੋਗਲੋਬਿਨ ਦਾ ਸੰਤੁਲਨ ਬਣਿਆ ਰਹਿੰਦਾ ਹੈ।
ਇਕ ਸੇਬ ਅਤੇ ਸੰਤਰੇ ਦੇ ਕੁਝ ਟੁੱਕੜਿਆਂ ਨੂੰ ਮਿਲਾ ਕੇ ਇਸ ਦਾ ਜੂਸ ਕੱਢ ਲਓ। ਇਸ ਜੂਸ ਵਿਚ ਤੁਸੀਂ ਸਵਾਦ ਅਨੁਸਾਰ ਸ਼ਹਿਦ ਜਾਂ ਪਾਣੀ ਮਿਲਾ ਕੇ ਪਤਲਾ ਕਰ ਸਕਦੇ ਹੋ। ਇਸ ਜੂਸ ਨੂੰ ਹਫ਼ਤੇ ਵਿਚ ਤਿੰਨ ਦਿਨ ਤਕ ਸੇਵਨ ਨਾਲ ਸਰੀਰ ਵਿਚ ਵਿਟਾਮਿਨ ਅਤੇ ਪੌਸ਼ਕ ਤੱਤਾਂ ਦੀ ਪੂਰਤੀ ਹੁੰਦੀ ਹੈ ਅਤੇ ਇਹ ਜੂਸ ਕੰਮਕਾਜ਼ੀ ਔਰਤਾਂ ਅਤੇ ਸਕੂਲੀ ਬੱਚਿਆਂ ਲਈ ਜ਼ਿਆਦਾ ਲਾਭਕਾਰੀ ਮੰਨਿਆ ਜਾਂਦਾ ਹੈ।
ਗਾਜਰ ਅਤੇ ਪਪੀਤੇ ਨੂੰ ਮਿਲਾ ਕੇ ਬਣਾਏ ਗਏ ਜੂਸ ਨਾਲ ਸਰੀਰ ਵਿਚ ਜਵਾਨੀ ਦਾ ਸੰਚਾਰ ਹੁੰਦਾ ਹੈ। ਚਮੜੀ ਵਿਚ ਰੰਗਤ ਤੇ ਨਿਖਾਰ ਆਉਂਦਾ ਹੈ। ਇਸ ਨਾਲ ਹਵਾ ਵਿਚ ਫੈਲੇ ਜ਼ਹਿਰੀਲੇ ਕਿਟਾਣੂਆਂ ਤੋਂ ਪ੍ਰਤੀਰੋਧੀ ਤਾਕਤ ਵਿਕਸਿਤ ਕਰਨ ਵਿਚ ਮਦਦ ਮਿਲਦੀ ਹੈ ਅਤੇ ਇਸ ਨਾਲ ਅੱਖਾਂ ਦੀ ਰੌਸ਼ਨੀ ਵਧਦੀ ਹੈ ਅਤੇ ਜੋੜਾਂ ਨੂੰ ਮਜ਼ੂਬਤ ਬਣਾਉਣ ਵਿਚ ਮਦਦ ਮਿਲਦੀ ਹੈ। ਕਣਕ ਦੇ ਜਵਾਰਾਂ ਦਾ ਜੂਸ ਸਰੀਰ ਵਿਚ ਐਂਟੀ ਆਕਸੀਡੈਂਟ ਦੇ ਵਿਕਸਿਤ ਕਰਨ ਵਿਚ ਮਦਦ ਕਰਦਾ ਹੈ। ਕਣਕ ਦੇ ਜਵਾਰਾਂ ਵਿਚ ਕੁਝ ਪਾਣੀ ਮਿਲਾ ਕੇ ਇਸ ਨੂੰ ਜੂਸਰ/ਮਿਕਸਰ ਵਿਚ ਪਾ ਕੇ ਜੂਸ ਬਣਾ ਲਓ। ਇਸ ਦੇ ਨਿਯਮਿਤ ਸੇਵਨ ਨਾਲ ਜਵਾਨੀ ਬਰਕਰਾਰ ਰਹਿੰਦੀ ਹੈ ਅਤੇ ਚਿਹਰੇ 'ਤੇ ਝੁਰੜੀਆਂ ਨਹੀਂ ਪੈਂਦੀਆਂ।
ਅਨਾਰ ਦਾ ਜੂਸ ਖੂਨ ਨੂੰ ਸਾਫ਼ ਕਰ ਕੇ ਸਰੀਰ ਵਿਚ ਪੌਸ਼ਟਿਕਤਾ ਵਧਾ ਕੇ ਚਮੜੀ ਵਿਚ ਨਿਖਾਰ ਲਿਆਉਂਦਾ ਹੈ। ਹਰ ਰੋਜ਼ ਇਕ ਗਿਲਾਸ ਅਨਾਰ ਦੇ ਜੂਸ ਦੇ ਨਿਯਮਤ ਸੇਵਨ ਨਾਲ ਕੋਸ਼ਿਕਾਵਾਂ ਦਾ ਦੁਬਾਰਾ ਨਿਰਮਾਣ ਹੁੰਦਾ ਹੈ ਜਿਸ ਨਾਲ ਸਰੀਰ ਵਿਚ ਜਵਾਨੀ ਅਤੇ ਸੁੰਦਰਤਾ ਦਾ ਆਗਾਜ਼ ਹੁੰਦਾ ਹੈ। ਅਦਰਕ ਅਤੇ ਨਿੰਬੂ ਜੂਸ ਸੁੰਦਰਤਾ ਲਈ ਕਾਫ਼ੀ ਲਾਭਕਾਰੀ ਮੰਨਿਆ ਜਾਂਦਾ ਹੈ। ਨਿੰਬੂ ਨੂੰ ਦੋ ਹਿੱਸਿਆਂ ਵਿਚ ਕੱਟ ਕੇ ਉਸ ਦਾ ਜੂਸ ਕੱਢ ਕੇ ਇਸ ਵਿਚ ਕੁਝ ਬੂੰਦਾਂ ਅਦਰਕ ਰਸ ਦੀਆਂ ਪਾ ਦਿਓ। ਇਸ ਵਿਚ ਤੁਸੀਂ ਸ਼ਹਿਦ ਵੀ ਮਿਲਾ ਸਕਦੇ ਹੋ। ਇਸ ਦੇ ਨਿਯਮਤ ਸੇਵਨ ਨਾਲ ਚਮੜੀ ਵਿਚ ਨਿਖਾਰ ਅਤੇ ਆਕਰਸ਼ਨ ਪੈਦਾ ਹੁੰਦਾ ਹੈ।

ਬਿੰਦੀਆ ਚਮਕੇਗੀ...

ਬਿੰਦੀ ਲਗਾਉਣ ਲਈ ਤਰਲ ਬਿੰਦੀ ਦੀ ਹੀ ਵਰਤੋਂ ਕਰੋ ਅਤੇ ਧਿਆਨ ਰੱਖੋ ਕਿ ਉਹ ਚੰਗੀ ਕੰਪਨੀ ਦੀ ਹੋਵੇ।
ਨਵਾਂ ਖਰੀਦਿਆ ਹੋਇਆ ਤਰਲ ਬਿੰਦੀ ਪਦਾਰਥ ਤੁਹਾਡੀ ਚਮੜੀ ਨੂੰ ਕੋਈ ਨੁਕਸਾਨ ਤਾਂ ਨਹੀਂ ਪਹੁੰਚਾ ਰਿਹਾ, ਇਹ ਜਾਣਨ ਲਈ ਤਰਲ ਬਿੰਦੀ ਪਦਾਰਥ ਨੂੰ ਥੋੜ੍ਹਾ ਜਿਹਾ ਹੱਥ ਵਿਚ ਉਂਗਲੀ ਤੇ ਅੰਗੂਠੇ ਦੇ ਮੱਧ ਵਾਲੀ ਥਾਂ 'ਤੇ ਲਗਾ ਕੇ ਦੇਖੋ। ਜੇਕਰ 10 ਮਿੰਟ ਤੱਕ ਸਾੜ ਨਾ ਪਏ ਜਾਂ ਹੋਰ ਕਿਸੇ ਕਿਸਮ ਦੀ ਐਲਰਜੀ ਮਹਿਸੂਸ ਨਾ ਹੋਵੇ ਤਾਂ ਬੇਝਿਜਕ ਉਸ ਦੀ ਵਰਤੋਂ ਕਰ ਸਕਦੇ ਹੋ।
ਬਾਜ਼ਾਰ ਵਿਚ ਬਣੀਆਂ ਬਣਾਈਆਂ ਬਿੰਦੀਆਂ ਹਮੇਸ਼ਾ ਪ੍ਰਸਿੱਧ ਕੰਪਨੀਆਂ ਦੀਆਂ ਹੀ ਖਰੀਦੋ। ਸਸਤੀਆਂ ਬਿੰਦੀਆਂ ਦੇ ਚੱਕਰ ਵਿਚ ਨਾ ਪਵੋ ਕਿਉਂਕਿ ਚਿਪਕਾਉਣ ਵਾਲੀ ਬਿੰਦੀ ਦਾ ਗੂੰਦ ਜੇਕਰ ਖਰਾਬ ਹੋਵੇ ਤਾਂ ਚਮੜੀ ਰੋਗ ਦੀ ਸੰਭਾਵਨਾ ਰਹਿੰਦੀ ਹੈ।
ਤਰ੍ਹਾਂ-ਤਰ੍ਹਾਂ ਦੇ ਡਿਜ਼ਾਈਨ ਬਣਾਉਣ ਲਈ ਬਾਜ਼ਾਰ ਵਿਚ ਉਪਲੱਬਧ ਕਈ ਰੰਗਾਂ ਵਾਲਾ ਤਰਲ ਬਿੰਦੀਆਂ ਦਾ ਡੱਬਾ ਲਓ।
ਤਰਲ ਬਿੰਦੀ ਨੂੰ ਹਮੇਸ਼ਾ ਹਿਲਾ ਕੇ ਵਰਤੋਂ ਕਰੋ। ਇਸ ਨਾਲ ਬਿੰਦੀ ਦਾ ਰੰਗ ਇਕੋ ਜਿਹਾ ਹੋ ਜਾਂਦਾ ਹੈ। ਵਰਤੋਂ ਤੋਂ ਬਾਅਦ ਢੱਕਣ ਕੱਸ ਕੇ ਬੰਦ ਕਰ ਦਿਉ। ਇਸ ਨਾਲ ਬਿੰਦੀ ਸੁੱਕਦੀ ਨਹੀਂ ਅਤੇ ਉਸ ਦਾ ਜੀਵਨ ਵਧ ਜਾਂਦਾ ਹੈ। ਬਾਰੀਕ ਬਿੰਦੀ ਲਗਾਉਣ ਲਈ ਬਾਜ਼ਾਰ ਵਿਚ ਉਪਲੱਬਧ ਬਿੰਦੀਪਿਨ ਲੈ ਲਓ ਅਤੇ ਮਨਚਾਹੇ ਬਾਰੀਕ ਡਿਜ਼ਾਈਨ ਸੁਵਿਧਾ ਅਨੁਸਾਰ ਬਣਾਓ। ਜੇਕਰ ਪਿਨ ਉਪਲੱਬਧ ਨਾ ਹੋਵੇ ਤਾਂ ਜ਼ੀਰੋ ਨੰਬਰ ਦਾ ਪੇਂਟਿੰਗ ਬੁਰਸ਼ ਵੀ ਕੰਮ ਵਿਚ ਲਿਆਂਦਾ ਜਾ ਸਕਦਾ ਹੈ।
ਬਿੰਦੀ ਦਾ ਤਰਲ ਹਮੇਸ਼ਾ ਜ਼ਰੂਰਤ ਅਨੁਸਾਰ ਲੈ ਕੇ ਬੋਤਲ ਪੂੰਝ ਦਿਓ ਤਾਂ ਕਿ ਡਿਗਣ ਅਤੇ ਫੈਲਣ ਦੀ ਸੰਭਾਵਨਾ ਨਾ ਰਹੇ। ਨਾਲ ਹੀ ਰੁਮਾਲ ਜਾਂ ਰੂੰਅ ਰੱਖੋ ਤਾਂ ਕਿ ਡਿੱਗਣ ਜਾਂ ਡਿਜ਼ਾਈਨ ਗ਼ਲਤ ਹੋਣ 'ਤੇ ਜਾਂ ਡਿਜ਼ਾਈਨ ਪਸੰਦ ਨਾ ਆਉਣ 'ਤੇ ਮਿਟਾ ਕੇ ਨਵਾਂ ਬਣਾ ਸਕੋ।
ਅੱਜਕਲ੍ਹ ਬਾਜ਼ਾਰ ਵਿਚੋਂ ਪਾਣੀ ਦੇ ਅਸਰ ਤੋਂ ਰਹਿਤ ਬਿੰਦੀਆਂ ਵੀ ਮਿਲਦੀਆਂ ਹਨ। ਇਨ੍ਹਾਂ ਦੀ ਵਰਤੋਂ ਨਾਲ ਪਸੀਨੇ ਵਿਚ ਬਿੰਦੀਆਂ ਦੇ ਫੈਲਣ ਦਾ ਡਰ ਨਹੀਂ ਰਹਿੰਦਾ ਅਤੇ ਇਹ ਜ਼ਿਆਦਾ ਦੇਰ ਤੱਕ ਟਿਕਦੀਆਂ ਵੀ ਹਨ।
ਜੇਕਰ ਉਪਰੋਕਤ ਗੱਲਾਂ ਦਾ ਧਿਆਨ ਰੱਖਿਆ ਜਾਵੇ ਤਾਂ ਦੁਲਹਨ ਤਾਂ ਦੁਲਹਨ ਲਾੜੇ ਰਾਜਾ ਵੀ ਖ਼ੁਸ਼ ਹੋ ਜਾਣਗੇ।