ਤਾਜਾ ਖ਼ਬਰਾਂ


ਮਨਪ੍ਰੀਤ ਬਾਦਲ ਵੱਲੋਂ ਅੰਮ੍ਰਿਤਸਰ 'ਚ ਲਹਿਰਾਇਆ ਗਿਆ ਤਿਰੰਗਾ
. . .  7 minutes ago
ਅੰਮ੍ਰਿਤਸਰ, 15 ਅਗਸਤ (ਜਸਵੰਤ ਸਿੰਘ ਜੱਸ) - ਅੱਜ ਆਜ਼ਾਦੀ ਦਿਵਸ 'ਤੇ ਗੁਰੂ ਨਾਨਕ ਸਟੇਡੀਅਮ ਅੰਮ੍ਰਿਤਸਰ ਵਿਖੇ ਪੰਜਾਬ ਦੇ ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਵੱਲੋਂ ਕੌਮੀ ਤਿਰੰਗਾ ਲਹਿਰਾਇਆ...
ਆਪ ਵਲੰਟੀਅਰਾਂ 'ਤੇ ਹੋਏ ਪਰਚੇ 'ਚ ਮੇਰਾ ਕੋਈ ਰੋਲ ਨਹੀਂ-ਭਗਵੰਤ ਮਾਨ
. . .  12 minutes ago
ਮਹਿਲ ਕਲਾਂ, 15 ਅਗਸਤ (ਅਵਤਾਰ ਸਿੰਘ ਅਣਖੀ)-ਬੀਤੇ ਦਿਨੀਂ ਪਿੰਡ ਪੰਡੋਰੀ 'ਚ ਭਗਵੰਤ ਮਾਨ ਨੂੰ ਘੇਰਨ ਵਾਲੇ ਪੰਜ ਆਪ ਵਲੰਟੀਅਰਾਂ 'ਤੇ ਪੁਲਿਸ ਥਾਣਾ ਮਹਿਲ ਕਲਾਂ 'ਚ ਦਰਜ ਹੋਏ ਪਰਚੇ ਸਬੰਧੀ ਪ੍ਰਤੀਕਰਮ ਦਿੰਦਿਆਂ ਸੰਸਦ ਮੈਂਬਰ ਭਗਵੰਤ ਮਾਨ ਨੇ ਕਿਹਾ ਕਿ ਇਸ ਵਿਚ ਉਨ੍ਹਾਂ...
ਲਾਲਾ ਜੀ, ਸੁਖਦੇਵ, ਸਰਾਭਾ ਤੇ ਨਾਮਧਾਰੀਆਂ ਦੀ ਯਾਦਗਾਰ ਲਈ 1-1 ਕਰੋੜ ਦੇਣ ਦਾ ਐਲਾਨ
. . .  12 minutes ago
ਮੁੱਖ ਮੰਤਰੀ ਵੱਲੋਂ ਨਸ਼ਿਆਂ ਖਿਲਾਫ਼ 'ਬੱਡੀ, ਤੂੰ ਮੇਰਾ ਦੋਸਤ' ਮੁਹਿੰਮ ਦੀ ਸ਼ੁਰੂਆਤ
. . .  21 minutes ago
ਲੁਧਿਆਣਾ, 15 ਅਗਸਤ (ਪੁਨੀਤ ਬਾਵਾ)-ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਨਸ਼ਿਆਂ ਖਿਲਾਫ਼ 'ਬੱਡੀ, ਤੂੰ ਮੇਰਾ ਦੋਸਤ' ਮੁਹਿੰਮ ਦੀ ਸ਼ੁਰੂਆਤ ਕੀਤਾ ਤੇ ਬੱਡੀ ਕਿਤਾਬਚਾ ਜਾਰੀ ਕੀਤਾ ਅਤੇ ਕਿਸਾਨਾਂ ਨੂੰ ਪਰਾਲੀ ਨੂੰ ਅੱਗ ਲਗਾਉਣ ਤੋਂ ਰੋਕਣ ਲਈ ਸਬਸਿਡੀ ਤੇ ਖੇਤੀਬਾੜੀ ਮਸ਼ੀਨਰੀ...
ਵਰ੍ਹਦੇ ਮੀਂਹ 'ਚ ਕੈਬਨਿਟ ਮੰਤਰੀ ਵਿਜੇ ਇੰਦਰ ਸਿੰਗਲਾ ਨੇ ਲਹਿਰਾਇਆ ਕੌਮੀ ਝੰਡਾ
. . .  45 minutes ago
ਫ਼ਿਰੋਜ਼ਪੁਰ, 15 ਅਗਸਤ (ਜਸਵਿੰਦਰ ਸਿੰਘ ਸੰਧੂ ) ਆਜ਼ਾਦੀ ਦਿਹਾੜੇ ਮੌਕੇ ਅੱਜ ਵਰ੍ਹਦੇ ਮੀਂਹ 'ਚ ਫ਼ਿਰੋਜ਼ਪੁਰ ਅੰਦਰ ਸ਼ਹੀਦ ਭਗਤ ਸਿੰਘ ਸਟੇਡੀਅਮ ਵਿਖੇ ਕੈਬਨਿਟ ਮੰਤਰੀ ਵਿਜੇਇੰਦਰ ਸਿੰਗਲਾ ਵੱਲੋਂ ਕੌਮੀ ਝੰਡਾ ਲਹਿਰਾਇਆ ਗਿਆ । ਕੌਮੀ ਝੰਡਾ ਲਹਿਰਾਉਣ ਉਪਰੰਤ ਉਨ੍ਹਾਂ ਨੇ ਸਲਾਮੀ...
ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਨੇ ਪਟਿਆਲਾ 'ਚ ਲਹਿਰਾਇਆ ਤਿਰੰਗਾ
. . .  59 minutes ago
ਪਟਿਆਲਾ, 15 ਅਗਸਤ - ਦੇਸ਼ ਦੇ 72ਵੇਂ ਆਜ਼ਾਦੀ ਦਿਹਾੜੇ ਮੌਕੇ ਯਾਦਵਿੰਦਰਾ ਸਟੇਡੀਅਮ ਪਟਿਆਲਾ ਵਿਖੇ ਕਰਵਾਏ ਜਾ ਰਹੇ ਜ਼ਿਲ੍ਹਾ ਪੱਧਰੀ ਸਮਾਗਮ 'ਚ ਪੰਜਾਬ ਦੇ ਪੇਂਡੂ ਵਿਕਾਸ ਤੇ ਪੰਚਾਇਤੀ ਅਤੇ ਮਕਾਨ ਉਸਾਰੀ, ਸ਼ਹਿਰੀ ਵਿਕਾਸ ਦੇ ਮੰਤਰੀ ਤ੍ਰਿਪਤ ਰਾਜਿੰਦਰ ਸਿੰਘ ਬਾਜਵਾ...
ਲੁਧਿਆਣਾ 'ਚ ਮੁੱਖ ਮੰਤਰੀ ਨੇ ਕੌਮੀ ਝੰਡਾ ਲਹਿਰਾਇਆ
. . .  about 1 hour ago
ਲੁਧਿਆਣਾ, 15 ਅਗਸਤ (ਪੁਨੀਤ ਬਾਵਾ)- ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਅੱਜ ਲੁਧਿਆਣਾ ਦੇ ਗੁਰੂ ਨਾਨਕ ਸਟੇਡੀਅਮ ਵਿਖੇ ਰਾਜ ਪੱਧਰੀ ਸਮਾਗਮ ਦੌਰਾਨ ਕੌਮੀ ਝੰਡਾ ਲਹਿਰਾਇਆ ਅਤੇ ਪੰਜਾਬ ਵਾਸੀਆਂ ਨੂੰ ਸੰਬੋਧਨ ਕਰਦਿਆਂ ਉਨ੍ਹਾਂ ਨੂੰ ਅਗਲੇ ਸਾਲ...
ਤਪਾ 'ਚ ਭਾਰੀ ਮੀਂਹ, ਜਨਜੀਵਨ ਪ੍ਰਭਾਵਿਤ
. . .  about 1 hour ago
ਤਪਾ ਮੰਡੀ, 15 ਅਗਸਤ (ਪ੍ਰਵੀਨ ਗਰਗ) - ਸਬ ਡਵੀਜ਼ਨ ਤਪਾ ਵਿਖੇ ਅੱਜ ਸਵੇਰ ਤੋਂ ਹੋ ਰਹੀ ਬਾਰਸ਼ ਨੇ ਜਿੱਥੇ ਜਨ ਜੀਵਨ ਪ੍ਰਭਾਵਿਤ ਕਰ ਦਿੱਤਾ ਹੈ, ਉੱਥੇ ਹੀ ਸ਼ਹਿਰ ਦੇ ਕਈ ਇਲਾਕੇ ਪਾਣੀ ਨਾਲ ਭਰ ਗਏ ਹਨ। ਇਸ ਤੋਂ ਇਲਾਵਾ ਆਜ਼ਾਦੀ ਦਿਹਾੜੇ ਲਈ ਕਰਾਏ ਜਾ ਰਹੇ ਪ੍ਰੋਗਰਾਮ...
ਮੈਂ ਆਪਣੇ ਦੇਸ਼ ਨੂੰ ਅੱਗੇ ਲੈ ਜਾਣ ਲਈ ਬੇਸਬਰ ਹਾਂ - ਪ੍ਰਧਾਨ ਮੰਤਰੀ ਮੋਦੀ
. . .  about 1 hour ago
ਅਸੀਂ ਗੋਲੀ ਜਾਂ ਗਾਲੀ ਦੇ ਰਸਤੇ ਨਹੀਂ, ਬਲਕਿ ਗਲੇ ਲਗਾ ਕੇ ਕਸ਼ਮੀਰੀ ਭਰਾਵਾਂ-ਭੈਣਾਂ ਦੇ ਨਾਲ ਅੱਗੇ ਵਧਣਾ ਚਾਹੁੰਦੇ ਹਾਂ - ਮੋਦੀ
. . .  about 1 hour ago
ਹੋਰ ਖ਼ਬਰਾਂ..
  •     Confirm Target Language  

ਲੋਕ ਮੰਚ

ਨਿਮਰਤਾ ਅਤੇ ਬਰਾਬਰਤਾ ਦੇ ਸਿਧਾਂਤ ਨੂੰ ਅਪਣਾਈੲ

ਅੱਜ ਹਨੇਰੇ ਅਤੇ ਮੁਸ਼ਕਿਲਾਂ ਵਿਚ ਫਸਿਆਂ ਨੂੰ ਆਸਰੇ ਦੀ ਲੋੜ ਹੈ ਕੀ? ਇਹ ਜ਼ਿਆਦਾ ਜ਼ਰੂਰੀ ਹੈ ਕਿ ਅਸੀਂ ਦੂਜਿਆਂ ਦੇ ਦੁੱਖਾਂ ਨੂੰ ਦੇਖ ਆਪ ਚ੍ਹਾਂਗਾਂ ਮਾਰਦੇ ਫਿਰੀਏ ਅਤੇ ਦੂਜੇ ਸਾਡੇ ਸਾਹਮਣੇ ਰੋਂਦੇ-ਵਿਲਕਦੇ ਆਪਣੇ ਪ੍ਰਾਣ ਤਿਆਗ ਦੇਣ। ਕਿਥੋਂ ਦੀ ਇਨਸਾਨੀਅਤ ਹੈ ਇਹ? ਅਜੋਕੇ ਸਮਾਜ ਵਿਚਲੇ ਲੋਕ ਸਿਰਫ ਤਮਾਸ਼ਾ ਦੇਖਦੇ ਹਨ ਪਰ ਕਰਦੇ ਕੁਝ ਵੀ ਨਹੀਂ। ਅਸੀਂ ਕਿਉਂ ਦੂਜਿਆਂ ਪ੍ਰਤੀ ਆਪਣੀ ਸੰਵੇਦਨਾ ਨੂੰ ਖ਼ਤਮ ਕੀਤਾ ਹੋਇਆ ਹੈ? ਜਦੋਂ ਹਨੇਰੀ, ਝੱਖੜ ਆਉਂਦੇ ਹਨ, ਉਦੋਂ ਤਾਂ ਰੁੱਖ ਵੀ ਇਕ-ਦੂਜੇ ਦੇ ਨਾਲ ਹੇਠਾਂ ਵੱਲ ਝੁਕ ਜਾਂਦੇ ਹਨ, ਜਿਸ ਵਿਚੋਂ ਨਿਮਰਤਾ ਅਤੇ ਸਮਝ ਦੀ ਝਲਕ ਨਜ਼ਰੀਂ ਪੈਂਦੀ ਹੈ। ਪਰ ਅਸੀਂ ਇਨਸਾਨ ਨਿਮਰਤਾ ਅਤੇ ਬਰਾਬਰਤਾ ਦੇ ਸਿਧਾਂਤ ਤੋਂ ਕਿਉਂ ਮੂੰਹ ਮੋੜਦੇ ਹਾਂ? ਜ਼ਿੰਦਗੀ ਦਾ ਮਕਸਦ ਇਹ ਨਹੀਂ ਕਿ ਅਸੀਂ ਦੂਜਿਆਂ ਨੂੰ ਜ਼ਲੀਲ ਕਰਦੇ ਫਿਰੀਏ। ਮਕਸਦ ਹੈ ਚੰਗੇ ਅਤੇ ਨੇਕ ਕੰਮ ਕਰਨਾ, ਮਦਦ ਕਰਨ ਵਾਲੇ ਬਣੋ। ਸੋਚਣ ਵਾਲੀ ਗੱਲ ਹੈ ਜੇ ਹਰੇਕ ਇਨਸਾਨ ਇਨ੍ਹਾਂ ਮੁਸ਼ਕਿਲਾਂ ਤੋਂ ਵਾਂਝਾ ਹੁੰਦਾ ਤਾਂ ਫਿਰ ਸ਼ਾਇਦ ਜੀਵਨ ਦਾ ਕੋਈ ਮਨੋਰਥ ਹੀ ਨਾ ਹੁੰਦਾ। ਫਿਰ ਸ਼ਾਇਦ ਅਮੀਰੀ-ਗਰੀਬੀ, ਬਿਮਾਰੀ-ਤੰਦਰੁਸਤੀ ਵਰਗੇ ਸ਼ਬਦਾਂ ਦਾ ਜਨਮ ਹੀ ਨਾ ਹੁੰਦਾ। ਕਦੇ ਵੀ ਆਪਣੇ ਮਤਲਬ ਲਈ ਕਿਸੇ ਨੂੰ ਵਰਤੋ ਨਾ, ਜੋ ਅਜੋਕੇ ਸਮੇਂ ਵਿਚ ਬਹੁਤ ਚੱਲ ਰਿਹਾ ਹੈ। ਦੂਜਿਆਂ ਨੂੰ ਸਮਝਣ ਦੀ ਜਾਚ ਸਿੱਖੋ। ਆਪਣੇ ਵਿਚੋਂ ਹਮਦਰਦੀ ਕਦੇ ਖ਼ਤਮ ਨਾ ਹੋਣ ਦਿਓ। ਦੂਜਿਆਂ ਲਈ ਜਿਉਣਾ ਹੀ ਅਸਲ ਜਿਉਣਾ ਹੈ। ਹੋਰਾਂ ਖਾਤਰ ਜਾਂ ਹੋਰਾਂ ਲਈ ਕਰਮ ਕਰਨ ਵਾਲੇ ਇਨਸਾਨ ਉੱਪਰ ਰੱਬ ਦੀ ਰੱਖ ਹਮੇਸ਼ਾ ਰਹਿੰਦੀ ਹੈ। ਕਰ ਭਲਾ, ਹੋ ਭਲਾ, ਅੰਤ ਭਲੇ ਦਾ ਭਲਾ। ਅਜਿਹੇ ਅਨਮੋਲ ਵਚਨ ਵਾਕਿਆ ਹੀ ਫਿਰ ਸਾਡੀ ਜ਼ਿੰਦਗੀ ਨੂੰ ਅਮੁੱਲ ਬਣਾ ਦੇਣਗੇ।

-ਪਿੰਡ ਡੱਲੇਵਾਲਾ (ਫਰੀਦਕੋਟ)। ਮੋਬਾ: 84377-93329


ਖ਼ਬਰ ਸ਼ੇਅਰ ਕਰੋ

ਜ਼ਿੰਦਗੀ 'ਚ ਚੰਗੇ ਸੰਸਕਾਰਾਂ ਦਾ ਹੋਣਾ ਬਹੁਤ ਜ਼ਰੂਰੀ

ਸਮਾਜ 'ਚ ਹਰ ਤਰ੍ਹਾਂ ਦੇ ਲੋਕ ਰਹਿੰਦੇ ਹਨ ਤੇ ਹਰ ਇਕ ਵਿਅਕਤੀ ਦੀ ਆਪੋ-ਆਪਣੀ ਸੋਚ, ਸਮਝ ਤੇ ਵਿਵਹਾਰ ਹੁੰਦਾ ਹੈ। ਹਰ ਵਿਅਕਤੀ ਆਪਣੇ ਵਿਚਾਰਾਂ ਰਾਹੀਂ ਆਪਣੀ ਸੋਚ ਦਾ ਪ੍ਰਗਟਾਵਾ ਕਰਦਾ ਰਹਿੰਦਾ ਹੈ। ਪਿਛਲੇ ਦਿਨੀਂ ਮੈਂ ਕੱਪੜੇ ਲੈਣ ਲਈ ਦੁਕਾਨ 'ਤੇ ਗਿਆ। ਮੇਰੇ ਤੋਂ ਪਹਿਲਾਂ ਇਕ ਨੌਜਵਾਨ ਵੀਰ ਵਿਆਹ 'ਤੇ ਜਾਣ ਲਈ ਰੈਡੀਮੇਡ ਪੈਂਟ-ਕਮੀਜ਼ ਦੇਖ ਰਿਹਾ ਸੀ। ਦੁਕਾਨਦਾਰ ਉਸ ਨੂੰ ਮਹਿੰਗੇ ਕੱਪੜੇ ਖਰੀਦਣ ਲਈ ਉਕਸਾ ਰਿਹਾ ਸੀ। ਮੈਂ ਵੀ ਉਨ੍ਹਾਂ ਦੀ ਗੱਲਬਾਤ ਨੂੰ ਗੰਭੀਰਤਾ ਨਾਲ ਸੁਣਨ ਲੱਗਾ। ਲੜਕੇ ਨੇ ਉਸ ਦਾ ਜਵਾਬ ਦਿੰਦਿਆਂ ਕਿਹਾ ਕਿ ਮੈਨੂੰ ਚੱਲ ਰਹੇ ਰਿਵਾਜ ਦਾ ਕੋਈ ਚੱਕਰ ਨਹੀਂ, ਮੇਰਾ ਮਕਸਦ ਸਿਰਫ਼ ਤਨ ਢਕਣਾ ਹੈ, ਬਾਹਰੀ ਦਿਖਾਵਾ ਨਹੀਂ। ਇਹ ਅਰਥਪੂਰਨ ਜਵਾਬ ਸੁਣ ਕੇ ਦੁਕਾਨਦਾਰ ਵੀ ਸ਼ਾਂਤ ਹੋ ਗਿਆ ਤੇ ਹਾਮੀ ਭਰਨ ਲੱਗਾ। ਮੇਰਾ ਦਿਲ ਵੀ ਇਸ ਕਰਕੇ ਖੁਸ਼ ਹੋ ਗਿਆ, ਕਿਉਂਕਿ ਉਹ ਨੌਜਵਾਨ ਮੈਨੂੰ ਛੋਟੀ ਉਮਰੇ ਵੱਡੀ ਸੋਚ ਦਾ ਮਾਲਕ ਲੱਗ ਰਿਹਾ ਸੀ। ਇਸ ਤੋਂ ਸਪੱਸ਼ਟ ਹੈ ਕਿ ਚੰਗੀ ਸੋਚ ਅਤੇ ਅਕਲ ਦਾ ਉਮਰ ਨਾਲ ਕੋਈ ਸੰਬੰਧ ਨਹੀਂ ਹੁੰਦਾ। ਅਜੋਕਾ ਸਮਾਂ ਤਾਂ ਅਜਿਹਾ ਚੱਲ ਰਿਹਾ ਹੈ ਕਿ ਅਸੀਂ ਲੋਕਾਂ ਨੂੰ ਦੇਖੋ-ਦੇਖ ਆਪਣੇ ਘਰ ਉਜਾੜ ਲਏ ਹਨ। ਵਧਦੀ ਮਹਿੰਗਾਈ, ਫੈਸ਼ਨਪ੍ਰਸਤੀ ਤੇ ਬਾਹਰੀ ਦਿਖਾਵੇ ਨੇ ਲੋਕਾਂ ਦਾ ਜਿਊਣਾ ਹਰਾਮ ਕਰ ਦਿੱਤਾ ਹੈ। ਸਾਨੂੰ ਸਮਝਣਾ ਚਾਹੀਦਾ ਹੈ ਕਿ ਵਿਅਕਤੀ ਵੱਡੀਆਂ ਕੋਠੀਆਂ, ਕਾਰਾਂ, ਜ਼ਮੀਨ-ਜਾਇਦਾਦਾਂ ਤੇ ਬਰਾਂਡਿਡ ਕੱਪੜਿਆਂ ਨਾਲ ਨਹੀਂ, ਸਗੋਂ ਚੰਗੀ ਸੋਚ ਤੇ ਉੱਚ ਵਿਚਾਰਾਂ ਨਾਲ ਵੱਡਾ ਹੁੰਦਾ ਹੈ। ਪੈਸੇ ਨਾਲ ਵਿਅਕਤੀ ਸਭ ਕੁਝ ਖਰੀਦ ਸਕਦਾ ਹੈ ਪਰ ਉਸਾਰੂ ਸੋਚ ਤੇ ਸਮਾਜਿਕ ਵਿਚਾਰ ਨਹੀਂ। ਅੱਜ ਲੋਕ ਪੈਸੇ 'ਚ ਅਮੀਰ ਤੇ ਰੂਹ ਦੇ ਗਰੀਬ ਹੋ ਗਏ ਹਨ, ਇਸੇ ਕਾਰਨ ਧੜਾਧੜ ਰਿਸ਼ਤੇ-ਨਾਤੇ ਟੁੱਟ ਰਹੇ ਹਨ। ਸਭ ਜਾਣਦੇ ਹਨ ਕਿ ਪੈਸਾ ਨਾਲ ਨਹੀਂ ਜਾਣਾ ਪਰ ਕੋਈ ਮੰਨਣ ਨੂੰ ਤਿਆਰ ਨਹੀਂ। ਮੰਨਿਆ ਪੈਸਾ ਜ਼ਿੰਦਗੀ 'ਚ ਬਹੁਤ ਕੁਝ ਹੈ ਪਰ ਸਭ ਕੁਝ ਵੀ ਨਹੀਂ। ਪੈਸਾ ਹੱਥਾਂ ਦੀ ਮੈਲ ਤੇ ਚੰਗੀ ਸੋਚ ਸਥਾਈ ਹੁੰਦੀ ਹੈ, ਜੋ ਇਨਸਾਨ ਦੇ ਮਰਨ ਪਿੱਛੋਂ ਵੀ ਵਡਿਆਈ ਖੱਟਦੀ ਰਹਿੰਦੀ ਹੈ। ਸਮਾਜ 'ਚ ਕਈ ਧਨਾਢ ਲੋਕ ਆਪਣਾ ਸਤਿਕਾਰ ਨਾ ਹੋਣ ਦੇ ਪਛਤਾਵੇ 'ਚ ਹੀ ਮਰ ਜਾਂਦੇ ਹਨ, ਕਿਉਂਕਿ ਉਹ ਖਾਸ ਗੁਣਾਂ ਤੋਂ ਸੱਖਣੇ ਹੁੰਦੇ ਹਨ ਤੇ ਹੰਕਾਰ ਰੂਪੀ ਘੋੜੇ 'ਤੇ ਹੀ ਸਵਾਰ ਰਹਿੰਦੇ ਹਨ। ਲੋਕਾਂ ਦੇ ਦਿਲਾਂ 'ਚ ਵਸਣ ਲਈ ਪੈਸਾ ਨਹੀਂ, ਸਗੋਂ ਚੰਗੇ ਸੰਸਕਾਰਾਂ ਤੇ ਅਸੂਲਾਂ ਦਾ ਹੋਣਾ ਜ਼ਰੂਰੀ ਹੁੰਦਾ ਹੈ। ਵਿਅਕਤੀ ਨੂੰ ਸਮਾਜ 'ਚ ਗੁਣਵਾਨ ਹੋ ਕੇ ਵਿਚਰਨਾ ਚਾਹੀਦਾ ਹੈ, ਰੂਪਵਾਨ ਹੋ ਕੇ ਨਹੀਂ। ਸਮਝਦਾਰ ਵਿਅਕਤੀ ਇਨਸਾਨ ਦੀ ਚੰਗੀ ਬੋਲਬਾਣੀ, ਸਮਾਜਿਕ ਮਿਲਵਰਤਣ, ਨਿਮਰਤਾ, ਹਲੀਮੀ ਅਤੇ ਸਿਆਣਪ ਵਰਗੇ ਅਨਮੋਲ ਗਹਿਣਿਆਂ ਦੀ ਕਦਰ ਕਰਦਾ ਹੈ, ਮੁੱਲ ਦੀਆਂ ਚੀਜ਼ਾਂ ਦੀ ਨਹੀਂ। ਅੱਜ ਜਿੱਥੇ ਨੌਜਵਾਨ ਪੀੜ੍ਹੀ ਮਹਿੰਗੇ ਸ਼ੌਂਕਾਂ ਦੀ ਗੁਲਾਮ ਹੈ, ਉੱਥੇ ਅਜਿਹੀ ਨਿੱਗਰ ਸੋਚ ਵਾਲੇ ਨੌਜਵਾਨ ਸਾਡੇ ਸਮਾਜ ਲਈ ਚਾਨਣ ਮੁਨਾਰਾ ਹਨ। ਸੋ, ਆਪਣੀ ਜ਼ਿੰਦਗੀ ਨੂੰ ਸੁਖਮਈ ਬਤੀਤ ਕਰਨ ਲਈ ਅਜਿਹੇ ਚੰਗੇ ਗੁਣਾਂ ਦੇ ਧਾਰਨੀ ਬਣੀਏ ਅਤੇ ਖਾਹਿਸ਼ਾਂ ਦੇ ਘੋੜੇ ਨੂੰ ਵੀ ਲਗਾਮ ਪਾ ਕੇ ਰੱਖੀਏ।

-ਪਿੰਡ ਜਲਵੇੜਾ, ਜ਼ਿਲ੍ਹਾ ਫ਼ਤਹਿਗੜ੍ਹ ਸਾਹਿਬ।
ਮੋਬਾ: 75081-32699

ਮਾਣ-ਮੱਤੇ ਅਧਿਆਪਕ-5

ਸਿੱਖਿਆ ਜਗਤ ਦਾ ਮਾਣ ਸ਼ਫੀ ਮੁਹੰਮਦ ਮੂੰਗੋ

ਕੁਝ ਸਿਦਕਵਾਨ ਇਨਸਾਨ ਅਜਿਹੇ ਵੀ ਹੁੰਦੇ ਹਨ ਜਿਹੜੇ ਕਮੀਆਂ ਦੇ ਬਾਵਜੂਦ ਪੜ੍ਹਾਈ ਦੇ ਮਾਹੌਲ ਨੂੰ ਅਸੰਭਵ ਤੋਂ ਸੰਭਵ ਬਣਾ ਲੈਂਦੇ ਹਨ। ਸਰਕਾਰੀ ਐਲੀਮੈਂਟਰੀ ਸਕੂਲ ਲੱਧਾਹੇੜੀ, ਜ਼ਿਲ੍ਹਾ ਪਟਿਆਲਾ ਦੇ ਸਮਾਜਿਕ ਸਿੱਖਿਆ ਮਾਸਟਰ ਸ਼ਫੀ ਮੁਹੰਮਦ ਮੂੰਗੋ ਨੇ ਅਜਿਹਾ ਹੀ ਕੁਝ ਕਰ ਵਿਖਾਇਆ ਹੈ। ਪਟਿਆਲਾ ਜ਼ਿਲ੍ਹੇ ਦੀ ਨਾਭਾ ਤਹਿਸੀਲ ਦੇ ਪਿੰਡ ਮੂੰਗੋ ਵਿਖੇ ਪਿਤਾ ਰਹਿਮਦੀਨ ਦੇ ਗ੍ਰਹਿ ਵਿਖੇ ਮਾਤਾ ਸ੍ਰੀਮਤੀ ਰਾਈਸਾਂ ਦੀ ਕੁੱਖੋਂ ਮਾਰਚ 1957 ਨੂੰ ਜਨਮੇ ਸ਼ਫੀ ਮੁਹੰਮਦ ਮੂੰਗੋ ਮੁਢਲੀ ਪੜ੍ਹਾਈ ਪਿੰਡ ਦੇ ਸਕੂਲ ਤੋਂ ਕਰਕੇ ਗਿਆਨੀ, ਆਰਟ ਐਂਡ ਕਰਾਫਟ, ਪਿੰਗਲ, ਟਰਿਪਲ ਐਮ.ਏ., ਬੀ.ਐੱਡ., ਐਮ. ਐੱਡ. ਦੀਆਂ ਡਿਗਰੀਆਂ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਤੋਂ ਹਾਸਲ ਕਰਨ ਉਪਰੰਤ 1978 ਤੋਂ ਸਿੱਖਿਆ ਵਿਭਾਗ ਵਿਚ ਬਤੌਰ ਅਧਿਆਪਕ ਸੇਵਾ ਨਿਭਾਅ ਰਹੇ ਹਨ। ਸ਼ਫੀ ਨੇ ਕਦੇ ਪਿੱਛੇ ਮੁੜ ਕੇ ਨਹੀਂ ਦੇਖਿਆ ਅਤੇ ਹਰ ਦਿਨ ਨਵੀਆਂ ਪ੍ਰਾਪਤੀਆਂ ਕਰਨ ਦਾ ਇਤਿਹਾਸ ਰਚਿਆ ਹੈ। ਅਪ੍ਰੈਲ 1992 ਵਿਚ ਬਤੌਰ ਐੱਸ. ਐੱਸ. ਮਾਸਟਰ ਪਦਉੱਨਤ ਹੋ ਕੇ ਵਧੇਰੇ ਜ਼ਿੰਮੇਵਾਰੀ ਨਾਲ ਆਪਣੇ ਕਿੱਤੇ ਨੂੰ ਚੁਣੌਤੀ ਵਜੋਂ ਲਿਆ। ਅਕਤੂਬਰ 2003 ਵਿਚ ਲੱਧਾਹੇੜੀ ਸਕੂਲ ਵਿਚ ਤਾਇਨਾਤ ਹੋਣ ਮਗਰੋਂ ਸਭ ਤੋਂ ਪਹਿਲਾਂ ਇਸ ਸਿਰੜੀ ਅਧਿਆਪਕ ਨੇ ਪੀਣ ਵਾਲੇ ਪਾਣੀ ਤੋਂ ਸੱਖਣੇ ਇਸ ਸਕੂਲ ਲਈ ਬੱਚਿਆਂ ਲਈ ਪੀਣ ਵਾਲੇ ਪਾਣੀ ਦਾ ਪ੍ਰਬੰਧ ਕੀਤਾ। ਪਿੰਡ ਦੀ ਪੰਚਾਇਤ ਨੂੰ ਪ੍ਰੇਰਿਤ ਕਰਕੇ ਸਕੂਲ ਦੇ ਨਾਲ ਲੱਗਦੀ ਪੰਚਾਇਤ ਦੀ ਜ਼ਮੀਨ ਸਕੂਲ ਲਈ ਪ੍ਰਾਪਤ ਕੀਤੀ ਅਤੇ ਨਾਲ ਲੱਗਦੇ ਟੋਭੇ ਵਿਚ ਵੀ ਭਰਤ ਪੁਆ ਕੇ ਸਕੂਲ ਵਿਚ ਸ਼ਾਮਿਲ ਕੀਤਾ। ਯੂਰਪ ਦੇ ਪੰਜ ਦੇਸ਼ਾਂ ਇੰਗਲੈਂਡ, ਫਰਾਂਸ, ਜਰਮਨੀ, ਇਟਲੀ ਤੇ ਕੈਨੇਡਾ ਦੇੇ ਆਧਾਰਿਤ ਬਣੀ ਟੀਮ ਭਾਰਤੀ ਸਿੱਖਿਆ ਦਰਸ਼ਨ ਦੀ ਸਮੀਖਿਆ ਕਰਨ ਲਈ ਪਹਿਲੀ ਵਾਰ ਮਾਰਚ 2004 ਵਿਚ ਸ਼ਫੀ ਦੇ ਉੱਦਮ ਸਦਕਾ ਲੱਧਾਹੇੜੀ ਸਕੂਲ ਵਿਖੇ ਆਈ। ਇਸ ਸਕੂਲ ਦੇ ਕਿਸੇ ਬੱਚੇ ਨੇ ਅਜੇ ਤੱਕ ਕਦੇ ਵੀ ਵਰਦੀ, ਕਾਪੀਆਂ, ਪੈਨ, ਬੂਟ, ਜਰਸੀਆਂ ਆਦਿ ਆਪ ਨਹੀਂ ਖਰੀਦੀਆਂ, ਸਗੋਂ ਸ੍ਰੀ ਸ਼ਫੀ ਵਲੋਂ ਦਾਨੀ ਸੱਜਣਾਂ ਨੂੰ ਪ੍ਰੇਰ ਕੇ ਹਰ ਸਾਲ ਬੱਚਿਆਂ ਲਈ ਇਹ ਵਸਤਾ ਮੁਫ਼ਤ ਮੁਹੱਈਆ ਕਰਵਾਈਆਂ ਜਾਂਦੀਆਂ ਹਨ।
ਦਾਨੀ ਸੱਜਣਾਂ ਦੀ ਸਹਾਇਤਾ ਨਾਲ ਸਕੂਲ ਵਿਚ ਬੈਂਚ, ਪੀਣ ਵਾਲੇ ਪਾਣੀ ਅਤੇ ਬਿਜਲੀ ਦਾ ਸੁਚੱਜਾ ਪ੍ਰਬੰਧ ਕੀਤਾ ਗਿਆ। ਦਾਨੀ ਸੱਜਣਾਂ ਦੀ ਸਹਾਇਤਾ ਨਾਲ ਸਕੂਲ ਇਮਾਰਤ ਨੂੰ ਹਰ ਸਾਲ ਸਫੈਦੀ ਕਰਵਾਈ ਜਾਂਦੀ ਹੈ। ਸੁੰਦਰ ਬਗ਼ੀਚੇ ਤੇ ਵੱਖ-ਵੱਖ ਕਿਸਮਾਂ ਦੇ ਛਾਂ-ਦਰ ਦਰੱਖਤ ਸਕੂਲ ਦੇ ਵਾਤਾਵਰਨ ਨੂੰ ਸੁਖਾਵਾਂ ਬਣਾਉਂਦੇ ਹਨ। ਸਾਲ 2003 ਤੋਂ 2007 ਤੱਕ ਸ਼ਫੀ ਸਕੂਲ ਵਿਖੇ ਇਕੱਲੇ ਹੀ ਦੂਜੀਆਂ ਜਮਾਤਾਂ ਦੇ ਨਾਲ-ਨਾਲ ਬੋਰਡ ਦੀ ਅੱਠਵੀਂ ਕਲਾਸ ਨੂੰ ਸਾਰੇ ਵਿਸ਼ੇ ਪੜ੍ਹਾਉਂਦੇ ਰਹੇ ਅਤੇ ਨਤੀਜਾ ਸੌ ਫ਼ੀਸਦੀ ਆਉਂਦਾ ਰਿਹਾ। ਵਿਦਿਆਰਥੀ ਜੀਵਨ ਵਿਚ ਖ਼ੁਦ ਚੰਗੇ ਖਿਡਾਰੀ ਰਹੇ ਹੋਣ ਕਰਕੇ ਸ੍ਰੀ ਮੂੰਗੋ ਨੇ ਸਕੂਲ ਵਿਚ ਖੇਡਾਂ ਨੂੰ ਬਕਾਇਦਾ ਸ਼ੁਰੂ ਕਰਾਇਆ। ਇਸ ਸਕੂਲ ਦੀਆਂ ਵਿਦਿਆਰਥਣਾਂ ਅਤੇ ਵਿਦਿਆਰਥੀ ਸਿੱਖਿਆ ਵਿਭਾਗ ਵਲੋਂ ਕਰਵਾਈ ਜਾਂਦੀ ਮੁਕਾਬਲੇ ਦੀ ਪ੍ਰੀਖਿਆ ਵਿਚ ਅਨੇਕਾਂ ਵਾਰ ਇਨਾਮ ਜਿੱਤ ਚੁੱਕੇ ਹਨ। ਇਸ ਤੋਂ ਇਲਾਵਾ ਸਕੂਲ ਵਿਖੇ ਹਰ ਸਾਲ ਵਣ ਮਹਾਂਉਤਸਵ ਮਨਾ ਕੇ ਵੱਡੀ ਗਿਣਤੀ ਵਿਚ ਨਵੇਂ ਬੂਟੇ ਲਗਾਏ ਜਾਂਦੇ ਹਨ। ਸਕੂਲ ਨੂੰ ਇੰਡੀਅਨ ਰੈੱਡ ਕਰਾਸ ਸੁਸਾਇਟੀ ਪੰਜਾਬ ਸਟੇਟ ਬ੍ਰਾਂਚ ਚੰਡੀਗੜ੍ਹ ਵੱਲੋਂ ਮਾਡਲ ਰੈੱਡ ਕਰਾਸ ਸਕੂਲ ਦਾ ਦਰਜਾ ਵੀ ਮਿਲ ਚੁੱਕਿਆ ਹੈ। ਸ਼ਫੀ ਖੁਦ ਇਕ ਵਧੀਆ ਗੀਤਕਾਰ ਹੈ। ਕੁਲਦੀਪ ਮਾਣਕ ਵਰਗੇ ਅਨੇਕਾਂ ਲੋਕ ਗਾਇਕਾਂ ਨੇ ਸ਼ਫੀ ਦੇ ਲਿਖੇ ਗੀਤਾਂ ਨੂੰ ਆਪਣੀ ਆਵਾਜ਼ ਵਿਚ ਰਿਕਾਰਡ ਕਰਾਇਆ। ਸ੍ਰੀ ਸ਼ਫੀ ਸਿੱਖਿਆ ਜਗਤ ਦਾ ਚਮਕਦਾ ਸਿਤਾਰਾ ਅਤੇ ਪ੍ਰਸਿੱਧ ਸਾਹਿਤਕਾਰ ਹੋਣ ਦੇ ਨਾਲ-ਨਾਲ ਕਈ ਸੰਸਥਾਵਾਂ ਦੇ ਅਹੁਦੇਦਾਰ, ਮੈਂਬਰ ਅਤੇ ਲੋਕ ਵਿਰਸਾ ਅਤੇ ਸੱਭਿਆਚਾਰ ਮੰਚ ਪੰਜਾਬ ਦੇ ਪ੍ਰਧਾਨ ਹਨ। ਸ੍ਰੀ ਮੂੰਗੋ ਨੂੰ ਪਹਿਲਾ ਪੰਜਾਬ ਸਰਕਾਰ ਵਲੋਂ ਰਾਜ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਗਿਆ ਸੀ। ਪੰਜ ਸਤੰਬਰ 2011 ਨੂੰ ਸ੍ਰੀ ਸ਼ਫੀ ਵਲੋਂ ਸਿੱਖਿਆ ਦੇ ਖੇਤਰ ਵਿਚ ਕੀਤੀਆਂ ਪ੍ਰਾਪਤੀਆਂ ਅਤੇ ਸਮਾਜ ਨੂੰ ਵਧੀਆ ਸੇਧ ਦੇਣ ਲਈ ਦੇਸ਼ ਦੀ ਰਾਸ਼ਟਰਪਤੀ ਸ੍ਰੀਮਤੀ ਪ੍ਰਤਿਭਾ ਦੇਵੀ ਸਿੰਘ ਪਾਟਿਲ ਵਲੋਂ ਅਧਿਆਪਕ ਦਿਵਸ ਮੌਕੇ ਨੈਸ਼ਨਲ ਐਵਾਰਡ ਨਾਲ ਸਨਮਾਨਿਤ ਕੀਤਾ ਗਿਆ। ਸ੍ਰੀ ਮੂੰਗੋ ਦਾ ਕਹਿਣਾ ਹੈ ਸਾਨੂੰ ਕੰਮ ਨੂੰ ਪੂਜਾ ਸਮਝਣਾ ਚਾਹੀਦਾ ਹੈ। ਇਹ ਕਿਰਤ ਉਨ੍ਹਾਂ ਦੀ ਰੋਜ਼ੀ-ਰੋਟੀ ਦਾ ਸਾਧਨ ਹੀ ਨਹੀਂ, ਸਗੋਂ ਮਾਨਸਿਕ ਅਤੇ ਆਤਮਿਕ ਲੋੜ ਵੀ ਹੈ।

-ਮੋਬਾਈਲ : 93565 52000.

ਮਿਲਾਵਟਖੋਰੀ ਨੂੰ ਨੱਥ ਪਾਈ ਜਾਵੇ

ਖਾਧ ਪਦਾਰਥਾਂ 'ਚ ਮਿਲਾਵਟ ਕਰਨਾ ਇਕ ਅਪਰਾਧ ਹੈ। ਸ਼ੁੱਧ ਖੁਰਾਕੀ ਪਦਾਰਥ ਜਿਥੇ ਜ਼ਿੰਦਗੀ ਨੂੰ ਸੁਚਾਰੂ ਢੰਗ ਨਾਲ ਗਤੀਸ਼ੀਲ ਰੱਖਣ 'ਚ ਮਦਦ ਕਰਦੇ ਹਨ, ਪਰ ਕੁਝ ਸਮਾਜ ਵਿਰੋਧੀ ਅਨਸਰ ਰਾਤੋ-ਰਾਤ ਅਮੀਰ ਬਣਨ ਦੀ ਦੌੜ ਵਿਚ ਪੈ ਕੇ ਖੁਰਾਕੀ ਪਦਾਰਥਾਂ ਵਿਚ ਜ਼ਹਿਰੀਲੇ ਰਸਾਇਣਾਂ ਅਤੇ ਹੋਰ ਭੈੜੇ ਪਦਾਰਥਾਂ ਦੀ ਮਿਲਾਵਟ ਕਰਕੇ ਲੋਕਾਂ ਦੀ ਸਿਹਤ ਨਾਲ ਖਿਲਵਾੜ ਕਰ ਰਹੇ ਹਨ, ਜਿਸ ਕਰਕੇ ਮਨੁੱਖ ਗੰਭੀਰ ਬਿਮਾਰੀਆਂ ਦਾ ਸ਼ਿਕਾਰ ਹੋ ਰਹੇ ਹਨ।
ਦੇਖਿਆ ਜਾਵੇ ਤਾਂ ਮੰਡੀ ਵਿਚ ਅੱਜ ਦੇ ਸਮੇਂ ਵਿਚ ਕੋਈ ਵੀ ਖੁਰਾਕੀ ਪਦਾਰਥ ਸ਼ੁੱਧ ਨਹੀਂ ਮਿਲ ਰਿਹਾ। ਫਲ, ਸਬਜ਼ੀਆਂ ਨੂੰ ਪਕਾਉਣ ਅਤੇ ਇਨ੍ਹਾਂ ਦੀ ਦਿੱਖ ਸੰਵਾਰਨ ਅਤੇ ਲੰਮੇ ਸਮੇਂ ਤੱਕ ਹਰਿਆ-ਭਰਿਆ ਰੱਖਣ ਲਈ ਮਨੁੱਖੀ ਸਿਹਤ ਲਈ ਪਾਬੰਦੀਸ਼ੁਦਾ ਜ਼ਹਿਰੀਲੇ ਰਸਾਇਣਕ ਪਦਾਰਥ ਸ਼ਰੇਆਮ ਇਸਤੇਮਾਲ ਕੀਤੇ ਜਾ ਰਹੇ ਹਨ। ਸਬਜ਼ੀਆਂ ਨੂੰ ਛੇਤੀ ਵਧਾਉਣ ਲਈ ਰਸਾਇਣਾਂ ਦੇ ਟੀਕੇ ਲਗਾਏ ਜਾਂਦੇ ਹਨ। ਇਨ੍ਹਾਂ ਦੀ ਦਿੱਖ ਸੰਵਾਰਨ ਲਈ ਰਸਾਇਣਾਂ ਨਾਲ ਧੋਤੇ ਜਾਂਦੇ ਹਨ। ਫਲਾਂ ਦੇ ਵਪਾਰੀ ਕਲੋਰੋਫਾਇਰੀਫਾਸ ਰਸਾਇਣ ਦੀ ਵਰਤੋਂ ਨਾਲ ਕੇਲੇ ਦਾ ਰੰਗ ਸੋਹਣਾ ਤੇ ਦਿਲਖਿੱਚਵਾਂ ਬਣਾਉਣ ਲਈ ਵਰਤਦੇ ਹਨ। ਇਸ ਨਾਲ ਇਕ ਸੌ ਰੁਪਏ ਦੀ ਰਸਾਇਣ ਨਾਲ ਇਕ ਟਰੱਕ ਕੇਲਾ ਰਾਤੋ-ਰਾਤ ਪੱਕ ਕੇ ਤਿਆਰ ਹੋ ਜਾਂਦਾ ਹੈ। ਭਾਰਤ ਵਿਚ 99 ਫੀਸਦੀ ਅੰਬ ਦਾ ਫਲ ਕੈਲਸ਼ੀਅਮ ਕਾਰਬਾਈਡ ਜਿਸ ਨੂੰ ਆਮ ਸ਼ਬਦਾਂ ਵਿਚ ਮਸਾਲਾ ਕਿਹਾ ਜਾਂਦਾ ਹੈ, ਨਾਲ ਪਕਾਇਆ ਜਾਂਦਾ ਹੈ। ਭਾਰਤ ਸਰਕਾਰ ਵਲੋਂ ਇਸ ਜ਼ਹਿਰੀਲੇ ਰਸਾਇਣ ਨਾਲ ਫਲ ਪਕਾਉਣ 'ਤੇ ਪਾਬੰਦੀ ਲਗਾਈ ਗਈ ਹੈ ਪਰ ਫਿਰ ਵੀ ਸ਼ਰੇਆਮ ਵਰਤਿਆ ਜਾਂਦਾ ਹੈ।
ਹਲਦੀ ਵਿਚ ਲੈਡਕਰੋਮੇਂਟ, ਸ਼ਹਿਦ ਵਿਚ ਖੰਡ, ਕਾਲੀ ਮਿਰਚ ਵਿਚ ਪਪੀਤੇ ਦੇ ਬੀਜ, ਚਾਹ ਪੱਤੀ 'ਚ ਲੋਹੇ ਦੀਆਂ ਕਾਤਰਾਂ, ਮਿਰਚ ਵਿਚ ਇੱਟਾਂ ਦਾ ਗੇਰੂ, ਸਰ੍ਹੋਂ ਦੇ ਤੇਲ ਵਿਚ ਆਰਜੀਮੈਨ ਆਦਿ ਦੀ ਮਿਲਾਵਟ ਕੀਤੀ ਜਾ ਰਹੀ ਹੈ। ਦਹੀਂ ਵਿਚ ਆਰਾਰੋਟ ਤੇ ਪਲੋਟਿੰਗ ਪੇਪਰ, ਦੁੱਧ ਵਿਚ ਯੂਰੀਆ, ਡਿਟਰਜੈਂਟ, ਸਟਾਰਚ, ਕਾਸਟਿਕ ਸੋਢਾ, ਬੋਰਿਕ ਐਸਿਡ ਹਾਈਡ੍ਰੋਜਨ ਤੇ ਅਕਸਾਈਡ ਤੇ ਪਾਣੀ ਦੀ ਮਿਲਾਵਟ ਕਰਕੇ ਨਕਲੀ ਦੁੱਧ ਤਿਆਰ ਕੀਤਾ ਜਾਂਦਾ ਹੈ। ਭਾਵੇਂ ਸਰਕਾਰ ਅਤੇ ਸਿਹਤ ਵਿਭਾਗ ਸਮੇਂ-ਸਮੇਂ ਸਿਰ ਮਿਲਾਵਟਖੋਰੀ ਨੂੰ ਰੋਕਣ ਲਈ ਯਤਨਸ਼ੀਲ ਰਹਿੰਦੀ ਹੈ ਪਰ ਇਸ ਦੀਆਂ ਰਿਪੋਰਟਾਂ ਜਨਤਕ ਨਹੀਂ ਹੋ ਰਹੀਆਂ, ਜਿਸ ਕਰਕੇ ਛਾਪੇਮਾਰੀ ਸਿਰਫ ਖਾਨਾਪੂਰਤੀ ਤੱਕ ਸੀਮਤ ਹੋ ਕੇ ਰਹਿ ਜਾਂਦੀ ਹੈ। ਰਿਪੋਰਟਾਂ ਮੁਤਾਬਿਕ ਖਪਤਕਾਰਾਂ ਵਲੋਂ ਖਰੀਦੇ ਪਦਾਰਥਾਂ ਦੀ ਸ਼ੁੱਧਤਾ ਦੀ ਪਰਖ ਕਰਨ ਲਈ ਸ਼ਹਿਰਾਂ ਵਿਚ ਮੋਬਾਈਲ ਵੈਨਾਂ ਚਲਾਈਆਂ ਗਈਆਂ ਹਨ ਜੋ ਮੌਕੇ 'ਤੇ ਹੀ ਖਰੀਦੇ ਪਦਾਰਥਾਂ ਦੀ ਸ਼ੁੱਧਤਾ ਦੀ ਪਰਖ ਕਰਦੀਆਂ ਹਨ ਜੋ ਕਿ ਸਰਕਾਰ ਦਾ ਸਾਰਥਿਕ ਉੱਦਮ ਹੈ। ਇਸ ਸਬੰਧੀ ਲੋਕਾਂ ਵਿਚ ਜਾਗਰੂਕਤਾ ਪੈਦਾ ਕੀਤੀ ਜਾਵੇ। ਮਿਲਾਵਟਖੋਰੀ ਨੂੰ ਰੋਕਣ ਲਈ ਸਖ਼ਤ ਕਦਮ ਚੁੱਕਣ ਦੀ ਲੋੜ ਹੈ।

-ਪਿੰਡ ਤੇ ਡਾਕ: ਟੱਲੇਵਾਲ (ਰੰਧਾਵਾ ਪੱਤੀ), ਤਹਿ: ਤਪਾ, ਜ਼ਿਲ੍ਹਾ ਬਰਨਾਲਾ-148100. ਮੋਬਾ: 98765-28579

ਲਿੰਕ ਸੜਕਾਂ 'ਤੇ ਬਰਮਾਂ ਹੁੰਦੀਆਂ ਜਾ ਰਹੀਆਂ ਨੇ ਅਲੋਪ

ਭਾਵੇਂ ਕਿ ਪੰਜਾਬ ਸਰਕਾਰ ਵਲੋਂ ਜਿੱਥੇ ਪਿੰਡਾਂ ਦੇ ਲੋਕਾਂ ਨੂੰ ਸ਼ਹਿਰਾਂ ਵਰਗੀਆਂ ਸਹੁੂਲਤਾਂ ਦਿੱਤੀਆ ਜਾਣ ਦੇ ਦਾਅਵੇ ਕੀਤੇ ਜਾ ਰਹੇ ਹਨ, ਉਥੇ ਹੀ ਕੁਝ ਪਿੰਡਾਂ ਦੇ ਲੋਕਾਂ ਵਲੋਂ ਪਿੰਡਾਂ ਨੂੰ ਜਾਣ ਵਾਲੀਆਂ ਬਹੁਤੀਆਂ ਲਿੰਕ ਸੜਕਾਂ ਦੇ ਦੋਵੇਂ ਪਾਸਿਆਂ ਤੋਂ ਬਰਮਾਂ (ਨਿਸ਼ਾਨਦੇਹੀ) ਨੂੰ ਵਾਹ ਕੇ ਆਪਣੀਆਂ ਜ਼ਮੀਨਾਂ ਵਿਚ ਮਿਲਾਉਣ ਕਾਰਨ ਉਕਤ ਕਥਨਾਂ 'ਤੇ ਪ੍ਰਸ਼ਨ ਚਿੰਨ੍ਹ ਲੱਗ ਰਿਹਾ ਹੈ। ਭਾਵੇਂ ਕਿ ਕੁਝ ਸਮਾਂ ਪਹਿਲਾਂ ਮਾਣਯੋਗ ਹਾਈਕੋਰਟ ਨੇ ਹੁਕਮ ਜਾਰੀ ਕੀਤਾ ਸੀ ਕਿਸੇ ਵੀ ਇਲਾਕੇ ਅੰਦਰ ਨਾਜਾਇਜ਼ ਕਬਜ਼ਿਆਂ ਨੂੰ ਹਰ ਹਾਲਤ ਵਿਚ ਖ਼ਤਮ ਕੀਤਾ ਜਾਵੇ, ਤਾਂ ਕਿ ਸੜਕ ਹਾਦਸਿਆਂ ਵਿਚ ਵਾਧਾ ਨਾ ਹੋਵੇ ਪਰ ਇਹ ਹੁਕਮ ਸਿਰਫ ਕੁਝ ਸਮੇਂ ਲਈ ਲਾਗੂ ਹੋਇਆ ਸੀ, ਫਿਰ ਪਹਿਲਾਂ ਵਾਲੀ ਸਥਿਤੀ ਬਣਦੀ ਜਾ ਰਹੀ ਹੈ ਪਰ ਜੇਕਰ ਅੱਜ ਵੀ ਵਧੇਰੇ ਪਿੰਡਾਂ ਵੱਲ ਝਾਤ ਮਾਰੀ ਜਾਵੇ ਤਾਂ ਕੁਝ ਪਿੰਡਾਂ ਦੀਆਂ ਲਿੰਕ ਸੜਕਾਂ ਨੂੰ ਛੱਡ ਕੇ ਬਾਕੀ ਸੜਕਾਂ 'ਤੇ ਇਕੋ ਸਮੇਂ ਦੋ ਵਾਹਨਾਂ ਨੂੰ ਆਪਸ ਵਿਚ ਕਰਾਸ ਕਰਨਾ ਬਹੁਤ ਮੁਸ਼ਕਿਲ ਹੁੰਦਾ ਹੈ, ਜਿਸ ਕਾਰਨ ਕਈ ਵਾਰੀ ਸਕੂਲੀ ਬੱਸਾਂ ਅਤੇ ਹੋਰ ਰਾਹਗੀਰਾਂ ਨੂੰ ਛੋਟੇ-ਮੋਟੇ ਹਾਦਸਿਆਂ ਦਾ ਸ਼ਿਕਾਰ ਹੋਣਾ ਪਿਆ ਹੈ। ਜਾਣਕਾਰੀ ਅਨੁਸਾਰ ਸੜਕ ਮਹਿਕਮੇ ਅਨੁਸਾਰ ਲਿੰਕ ਸੜਕਾਂ ਦੇ ਦੋਵਾਂ ਪਾਸਿਆਂ 'ਤੇ ਕਰੀਬ 3-3 ਫੁੱਟ ਜਗ੍ਹਾ ਛੱਡਣੀ ਜ਼ਰੂਰੀ ਹੁੰਦੀ ਹੈ ਪਰ ਪੇਂਡੂ ਖੇਤਰ ਨਾਲ ਸਬੰਧਤ ਵਧੇਰੇ ਸੜਕਾਂ ਵੱਲ ਝਾਤ ਮਾਰੀ ਜਾਵੇ ਤਾਂ ਬਹੁਤ ਘੱਟ ਇਸ ਤਰ੍ਹਾਂ ਦੀਆਂ ਲਿੰਕ ਸੜਕਾਂ ਦਿਖਾਈ ਦਿੰਦੀਆਂ ਹਨ। ਕਈ ਪਿੰਡਾਂ ਦੀਆਂ ਪੰਚਾਇਤਾਂ ਨੂੰ ਸਰਕਾਰ ਵਲੋਂ ਨਰੇਗਾ ਸਕੀਮ ਤਹਿਤ ਲੱਖਾਂ ਰੁਪਏ ਬਰਮਾਂ 'ਤੇ ਮਿੱਟੀ ਪਾਉਣ ਲਈ ਦਿੱਤੇ ਗਏ ਸਨ ਪਰ ਸਿਰਫ ਜ਼ਿਆਦਾਤਰ ਕਾਗਜ਼ਾਂ ਵਿਚ ਖਾਨਾਪੂਰਤੀ ਤੱਕ ਹੀ ਮਿੱਟੀ ਪਾਉਣ ਦਾ ਕੰਮ ਸੀਮਿਤ ਰਹਿੰਦਾ ਹੈ, ਦੂਜੇ ਪਾਸੇ ਜੇਕਰ ਸਬੰਧਤ ਵਿਭਾਗ ਦੇ ਅਧਿਕਾਰੀ ਕਈ ਪਿੰਡਾਂ ਵਿਚ ਲਿੰਕ ਸੜਕਾਂ 'ਤੇ ਕਬਜ਼ਾ ਛੁਡਾਉਣ ਲਈ ਆਉਂਦੇ ਹਨ ਤਾਂ ਉਹ ਵੀ ਗੋਗਲੂਆਂ ਤੋਂ ਮਿੱਟੀ ਝਾੜਨ ਵਾਂਗ ਇਨ੍ਹਾਂ ਸੜਕਾਂ ਤੋਂ ਨਾਜਾਇਜ਼ ਕਬਜ਼ੇ ਹਟਾਉਣ ਦੇ ਕੰਮ ਕਰਕੇ ਕਾਗਜ਼ੀ ਖਾਨਾਪੂਰਤੀ ਕਰਦੇ ਹਨ। ਜੇਕਰ ਇਹ ਸਿਲਸਿਲਾ ਇਸੇ ਤਰ੍ਹਾਂ ਜਾਰੀ ਰਿਹਾ ਤਾਂ ਉਹ ਦਿਨ ਦੂਰ ਨਹੀਂ ਜਦ ਕਿਸਾਨਾਂ ਨੇ ਸੜਕਾਂ ਵੀ ਜ਼ਮੀਨ ਵਿਚ ਮਿਲਾ ਲੈਣੀਆਂ ਹਨ। ਇਨ੍ਹਾਂ ਨਾਜਾਇਜ਼ ਕਬਜ਼ਿਆਂ ਕਰਕੇ ਸੜਕਾਂ ਦੀ ਚੌੜਾਈ ਘਟ ਜਾਣ ਕਰਕੇ ਕਈ ਥਾਈਂ ਸੜਕੀ ਹਾਦਸੇ ਵਾਪਰਨ ਦਾ ਡਰ ਬਣਿਆ ਹੋਇਆ ਹੈ, ਇਸ ਲਈ ਪੰਜਾਬ ਸਰਕਾਰ ਅਤੇ ਜ਼ਿਲ੍ਹਾ ਪ੍ਰਸ਼ਾਸਨ ਨੂੰ ਇਸ ਮਸਲੇ ਵੱਲ ਵਿਸ਼ੇਸ਼ ਰੂਪ ਵਿਚ ਧਿਆਨ ਦੇਣ ਦੀ ਲੋੜ ਹੈ ਤਾਂ ਜੋ ਨਾਜਾਇਜ਼ ਕਬਜ਼ੇ ਕਰਨ ਵਾਲਿਆਂ ਵਿਰੁੱਧ ਸ਼ਿਕੰਜਾ ਕੱਸਿਆ ਜਾਵੇ ਤੇ ਲਿੰਕ ਸੜਕਾਂ 'ਤੇ ਹੋਣ ਵਾਲੇ ਹਾਦਸੇ ਘਟ ਸਕਣ।

-ਪਿੰਡ ਸ਼ੇਖਾ, ਡਾਕ: ਮਗਰਮੂਦੀਆ, ਜ਼ਿਲ੍ਹਾ ਗੁਰਦਾਸਪੁਰ

ਯੋਜਨਾਵਾਂ ਤੇ ਸਹੂਲਤਾਂ ਦੇ ਲਾਭ ਲੈਣ ਲਈ ਸਰਪੰਚ ਦਾ ਪੜ੍ਹਿਆ-ਲਿਖਿਆ ਹੋਣਾ ਜ਼ਰੂਰੀ

ਪੰਜਾਬ ਵਿਚ ਪੰਚਾਇਤੀ ਚੋਣਾਂ ਦੇ ਨਜ਼ਦੀਕ ਆਉਂਦਿਆਂ ਹੀ ਆਮ ਲੋਕਾਂ ਖਾਸ ਕਰਕੇ ਨੌਜਵਾਨ ਵਰਗ 'ਚ ਪੰਚਾਇਤੀ, ਬਲਾਕ ਸੰਮਤੀ, ਜ਼ਿਲ੍ਹਾ ਪ੍ਰੀਸ਼ਦ ਚੋਣਾਂ ਦੇ ਉਮੀਦਵਾਰ ਲਈ ਵਿੱਦਿਅਕ ਯੋਗਤਾ ਲਾਗੂ ਕਰਨ ਦੀ ਮੰਗ ਲਈ ਨੌਜਵਾਨਾਂ ਵਲੋਂ ਭਾਰੀ ਮੰਗ ਕੀਤੀ ਜਾਣੀ ਸ਼ੁਰੂ ਹੋ ਗਈ ਹੈ। ਪੰਚਾਇਤੀ ਰਾਜ ਦੇ ਅਨੁਸਾਰ ਗ੍ਰਾਮ ਪੰਚਾਇਤ, ਸੰਮਤੀ, ਜ਼ਿਲ੍ਹਾ ਪ੍ਰੀਸ਼ਦ ਭਾਰਤੀ ਲੋਕਤੰਤਰ ਦਾ ਮੁਢਲਾ ਅੰਗ ਹਨ। ਪੰਜਾਬ ਦੀਆਂ ਲਗਪਗ 13028 ਪੰਚਾਇਤਾਂ ਦੇ ਲਗਪਗ 85,000 ਪੰਚ ਤੇ 13028 ਸਰਪੰਚ ਅਤੇ 147 ਬਲਾਕ ਸੰਮਤੀ ਦੇ ਲਗਪਗ 1800 ਜ਼ਿਲ੍ਹਾ ਪ੍ਰੀਸ਼ਦ, ਸੰਮਤੀ ਮੈਂਬਰਾਂ, ਜਿਨ੍ਹਾਂ ਦੀ ਪਿੰਡਾਂ ਦੇ ਵਿਕਾਸ ਦੇ ਨਾਲ-ਨਾਲ ਆਮ ਲੋਕਾਂ ਦੇ ਰਹਿਣ-ਸਹਿਣ ਦੇ ਪੱਧਰ ਨੂੰ ਉੱਚਾ ਚੁੱਕਣ ਦੀ ਜ਼ਿੰਮੇਵਾਰੀ ਹੁੰਦੀ ਹੈ। ਅੱਜ ਦੇ ਕੰਪਿਊਟਰ ਯੁੱਗ 'ਚ ਸਾਰੀਆਂ ਯੋਜਨਾਵਾਂ ਦੀ ਜਾਣਕਾਰੀ ਅਤੇ ਸਹੂਲਤਾਂ ਦਾ ਲਾਭ ਲੈਣ ਲਈ ਫਾਰਮ ਵਗੈਰਾ ਭਰਨ ਲਈ ਪੜ੍ਹਿਆ-ਲਿਖਿਆ ਹੋਣ ਦੇ ਨਾਲ-ਨਾਲ ਕੰਪਿਊਟਰ ਦਾ ਗਿਆਨ ਹੋਣਾ ਵੀ ਬਹੁਤ ਜ਼ਰੂਰੀ ਹੈ। ਲਗਪਗ 80 ਫੀਸਦੀ ਸਰਪੰਚ ਪੰਚਾਇਤ ਸਕੱਤਰ ਦੇ ਪੰਜ ਸਾਲ ਝੋਲੀ ਚੁੱਕ ਕੇ ਆਪਣਾ ਸਮਾਂ ਪੂਰਾ ਕਰ ਦਿੰਦੇ ਹਨ, ਬਹੁਤੇ ਸਰਪੰਚਾਂ ਨੂੰ ਤਾਂ ਅਨਪੜ੍ਹਤਾ ਹੋਣ ਕਰਕੇ ਕਾਗਜ਼ੀ ਕਾਰਵਾਈ ਤੇ ਵਿਚਾਰੇ ਅਨਪੜ੍ਹ ਸਰਪੰਚ ਕੋਲ ਅੱਖਾਂ ਮੀਚ ਕੇ ਅੰਗੂਠਾ ਲਾਉਣ ਤੋਂ ਬਿਨਾਂ ਕੋਈ ਚਾਰਾ ਨਹੀਂ ਹੁੰਦਾ। ਘੱਟ ਪੜ੍ਹੇ-ਲਿਖੇ ਤੇ ਅਨਪੜ੍ਹ ਸਰਪੰਚ ਹੋਣ ਕਰਕੇ ਗ੍ਰਾਮ ਪੰਚਾਇਤ ਦਾ ਪੂਰਾ ਕੰਮਕਾਰ ਪੰਚਾਇਤ ਸਕੱਤਰਾਂ ਦੇ ਹੱਥ 'ਚ ਹੁੰਦਾ ਹੈ ਪਰ ਇਕ-ਇਕ ਪੰਚਾਇਤ ਸਕੱਤਰ ਕੋਲ 8-8, 10-10 ਪਿੰਡ ਹੋਣ ਕੰਮ ਦਾ ਜ਼ਿਆਦਾ ਭਾਰ ਹੋਣ ਕਾਰਨ ਸਹੀ ਤਰੀਕੇ ਨਾਲ ਕਿਸੇ ਵੀ ਪਿੰਡ 'ਤੇ ਧਿਆਨ ਲਾ ਕੇ ਕੰਮ ਨਹੀਂ ਕਰ ਸਕਦੇ, ਜਿਸ ਕਾਰਨ ਪਿੰਡ ਦਾ ਵਿਕਾਸ ਪਛੜਣ ਦਾ ਡਰ ਲੱਗਾ ਹੁੰਦਾ ਹੈ। ਜਿੱਥੇ ਪੜ੍ਹੀ-ਲਿਖੀ ਪੰਚਾਇਤ ਹੋਵੇਗੀ, ਉਹ ਪੰਚਾਇਤ ਸਕੱਤਰ 'ਤੇ ਨਿਰਭਰ ਨਹੀਂ ਰਹੇਗੀ, ਉਹ ਸਰਕਾਰ ਦੀਆਂ ਚਲਾਈਆਂ ਯੋਜਨਾਵਾਂ ਨੂੰ ਹਾਸਲ ਕਰਕੇ ਆਪਣੇ ਤੌਰ 'ਤੇ ਪਿੰਡ 'ਚ ਲਾਗੂ ਕਰਨ 'ਚ ਸਹਾਈ ਹੋ ਸਕਦੀ ਹੈ, ਉਥੇ ਹੀ ਪਿੰਡ 'ਚ ਸਰਕਾਰ ਵਲੋਂ ਚਲਾਈਆਂ ਭਲਾਈ ਸਕੀਮਾਂ ਨੂੰ ਘਰ-ਘਰ 'ਚ ਜਾਗਰੂਕ ਕਰ ਸਕਦੇ ਹਨ। ਇਸ ਲਈ ਜ਼ਰੂਰੀ ਹੈ ਕਿ ਨਾਲ ਦੇ ਰਾਜ ਹਰਿਆਣੇ ਨੂੰ ਦੇਖਦੇ ਹੋਏ ਪੰਜਾਬ ਸਰਕਾਰ ਵਲੋਂ ਵਿੱਦਿਅਕ ਯੋਗਤਾ ਸਰਪੰਚ ਲਈ ਘੱਟੋ-ਘੱਟ 12ਵੀਂ ਤੇ ਪੰਚ ਲਈ ਦਸਵੀਂ, ਜ਼ਿਲ੍ਹਾ ਪ੍ਰੀਸ਼ਦ ਤੇ ਬਲਾਕ ਸੰਮਤੀ ਲਈ ਗ੍ਰੈਜੂਏਸ਼ਨ ਲਾਗੂ ਕਰਨੀ ਚਾਹੀਦੀ ਹੈ, ਤਾਂ ਜੋ ਪਿੰਡਾਂ ਦਾ ਵਿਕਾਸ ਸੁਚਾਰੂ ਰੂਪ ਵਿਚ ਕਰਵਾਇਆ ਜਾ ਸਕੇ।

 

-ਸਾਬਕਾ ਚੇਅਰਮੈਨ, ਸਰਪੰਚ ਐਸੋਸੀਏਸ਼ਨ ਦੋਰਾਹਾ।
ਮੋਬਾ: 98144-09793


ਸੂਚਨਾ ਦਾ ਅਧਿਕਾਰ ਕਾਨੂੰਨ ਨੂੰ ਹੋਰ ਮਜ਼ਬੂਤ ਬਣਾਉਣ ਦੀ ਲੋੜ

ਸਾਲ 2005 ਵਿਚ ਸ: ਮਨਮੋਹਨ ਸਿੰਘ ਦੀ ਅਗਵਾਈ ਵਾਲੀ ਸਰਕਾਰ ਨੇ ਕਈ ਸਮਾਜ ਸੇਵੀ ਸੰਸਥਾਵਾਂ, ਕਾਰਕੁਨਾਂ ਦੀ ਚਿਰੋਕਣੀ ਮੰਗ ਨੂੰ ਪੂਰਾ ਕਰਦੇ ਹੋਏ 'ਸੂਚਨਾ ਦਾ ਅਧਿਕਾਰ ਕਾਨੂੰਨ-2005' ਖਾਸ ਕਰਕੇ ਇਤਿਹਾਸਕ ਫੈਸਲਾ ਤੇ ਕਾਰਜ ਕੀਤਾ ਸੀ। ਸੰਸਾਰ ਦੇ ਸਭ ਤੋਂ ਵੱਡੇ ਲੋਕਤੰਤਰ ਨੂੰ ਇਸ 'ਮਹਾਨ' ਕਾਨੂੰਨ ਦੇ ਬਣਨ ਨਾਲ ਮਜ਼ਬੂਤੀ ਮਿਲੀ ਸੀ। ਇਸ ਲਈ ਇਕ ਨਿਸਚਿਤ ਵਿਧੀ ਅਤੇ ਸਮਾਂ ਵੀ ਨਿਸਚਿਤ ਕੀਤਾ ਗਿਆ ਹੈ। ਇਸ ਕਾਨੂੰਨ ਦੇ ਬਣਨ ਤੋਂ ਬਾਅਦ ਕਈ ਜਾਗਰੂਕ ਆਰ.ਟੀ.ਆਈ. ਕਾਰਕੁਨਾਂ ਨੇ ਕਾਫੀ ਘਪਲਿਆਂ ਦਾ ਪਰਦਾਫਾਸ਼ ਇਸ ਕਾਨੂੰਨ ਰਾਹੀਂ ਕੀਤਾ ਹੈ ਅਤੇ ਇਹ ਕਾਨੂੰਨ ਆਮ ਆਦਮੀ ਦਾ ਇਕ ਹਥਿਆਰ ਸਾਬਤ ਹੋਇਆ ਹੈ। ਪਿੰਡ ਪੱਧਰ ਤੋਂ ਲੈ ਕੇ ਕੇਂਦਰ ਸਰਕਾਰ ਦੇ ਵਿਭਾਗਾਂ ਤੱਕ ਇਸ ਕਾਨੂੰਨ ਨਾਲ ਕਾਫੀ ਕੁਝ ਆਮ ਜਨਤਾ ਦੀ ਪਹੁੰਚ ਵਿਚ ਆਇਆ ਹੈ, ਜੋ ਪਹਿਲਾਂ ਸਰਕਾਰੀ ਫਾਈਲਾਂ ਵਿਚ ਅਤਿ ਗੁਪਤ ਰੱਖਿਆ ਜਾਂਦਾ ਸੀ। ਪਰ ਇਸ ਸਾਰੇ ਵਰਤਾਰੇ ਦਾ ਦੁੱਖਦਾਇਕ ਅਤੇ ਅਫਸੋਸਜਨਕ ਪਹਿਲੂ ਇਹ ਹੈ ਕਿ ਇਸ ਸਾਰੇ ਸਮੇਂ ਵਿਚ ਕਈ ਆਰ.ਟੀ.ਆਈ. ਕਾਰਕੁਨਾਂ ਨੂੰ ਆਪਣੀ ਜਾਨ ਗਵਾਉਣੀ ਪਈ ਅਤੇ ਕਈਆਂ 'ਤੇ ਹਮਲੇ ਹੋਏ ਅਤੇ ਕਈਆਂ ਨੂੰ ਕਈ ਤਰ੍ਹਾਂ ਦੇ ਦਬਾਅ ਦਾ ਸਾਹਮਣਾ ਕਰਨਾ ਪਿਆ।
ਅੱਜ ਦੇ ਹਾਲਾਤ ਇਹ ਹਨ ਕਿ ਸਰਕਾਰੀ ਅਧਿਕਾਰੀਆਂ ਵਿਚ ਇਸ ਕਾਨੂੰਨ ਨੂੰ ਖ਼ਤਮ ਕਰਨ ਤੇ ਕਮਜ਼ੋਰ ਕਰਨ ਲਈ ਸਿਰਤੋੜ ਯਤਨ ਕੀਤੇ ਜਾਂਦੇ ਹਨ। ਇਹ ਭਾਰਤੀ ਲੋਕਤੰਤਰ ਲਈ ਖ਼ਤਰਨਾਕ ਵਰਤਾਰਾ ਹੈ। ਇਸ ਲਈ ਸਮੇਂ ਦੀ ਵੱਡੀ ਲੋੜ ਹੈ ਕਿ 'ਸੂਚਨਾ ਦਾ ਅਧਿਕਾਰ ਕਾਨੂੰਨ 2005' ਨੂੰ ਹੋਰ ਮਜ਼ਬੂਤ ਬਣਾਇਆ ਜਾਵੇ। ਇਸ ਦੀ ਉਲੰਘਣਾ ਕਰਨ ਵਾਲੇ ਅਧਿਕਾਰੀਆਂ 'ਤੇ ਸਖ਼ਤ ਕਾਰਵਾਈ ਹੋਵੇ ਅਤੇ ਸਮਾਂਬੱਧ ਸੂਚਨਾ ਪ੍ਰਦਾਨ ਕਰਨੀ ਯਕੀਨੀ ਬਣਾਈ ਜਾਵੇ। ਹਰੇਕ ਭਾਰਤੀ ਨਾਗਰਿਕ ਨੂੰ ਇਸ ਕਾਨੂੰਨ ਦੀ ਜਾਣਕਾਰੀ ਪ੍ਰਦਾਨ ਕੀਤੀ ਜਾਵੇ ਅਤੇ ਮੀਡੀਏ ਰਾਹੀਂ ਲੋਕ ਲਹਿਰ ਪੈਦਾ ਕੀਤੀ ਜਾਵੇ। ਇਸ ਕਾਨੂੰਨ ਦੀ ਮਜ਼ਬੂਤੀ ਭਾਰਤੀ ਲੋਕਤੰਤਰ, ਭਾਰਤੀ ਜਨਤਾ ਦੇ ਵਡਮੁੱਲੇ ਹਿਤਾਂ ਵਿਚ ਹੋਵੇਗੀ।

-ਪਿੰਡ ਪੀਰ ਦੀ ਸੈਨ, ਡਾਕ: ਬੱਬਰੀ ਨੰਗਲ, ਤਹਿ: ਤੇ ਜ਼ਿਲ੍ਹਾ ਗੁਰਦਾਸਪੁਰ-143529. ਮੋਬਾ: 98768-56311

ਮੋਬਾਈਲ ਫੋਨਾਂ ਦੇ ਨੁਕਸਾਨ

ਅੱਜ ਮੋਬਾਈਲ ਫੋਨ ਆਮ ਆਦਮੀ ਦੀ ਲੋੜ ਬਣ ਗਿਆ ਤੇ ਨਵੀਂ ਪੀੜ੍ਹੀ ਬਾਰੇ ਤਾਂ ਕਿਹਾ ਜਾ ਰਿਹਾ ਹੈ ਕਿ ਉਸ ਦਾ ਲਗਾਓ ਤਾਂ ਇਸ ਨਾਲ ਜਨੂੰਨ ਦੀ ਹੱਦ ਤੱਕ ਹੈ। ਹੁਣ ਸਕੂਲ ਪੜ੍ਹਦੇ ਬੱਚਿਆਂ ਨੂੰ ਮੋਬਾਈਲ ਫੋਨ ਲੈ ਕੇ ਦੇਣਾ ਮਾਪਿਆਂ ਦੀ ਮਜਬੂਰੀ ਬਣ ਗਿਆ ਹੈ। ਨਵੀਂ ਪੀੜ੍ਹੀ ਦਾ ਇਸ ਤੋਂ ਪਹਿਲੀ ਪੀੜ੍ਹੀ ਨਾਲੋਂ ਫਰਕ ਇਹ ਹੈ ਕਿ ਉਹ ਇਸ ਨੂੰ ਗੱਲਾਂ ਕਰਨ ਲਈ ਘੱਟ ਵਰਤਦੇ ਹਨ ਜਦੋਂ ਕਿ ਡੇਢ ਦਹਾਕਾ ਪਹਿਲਾਂ ਮੋਬਾਈਲ ਫੋਨ ਰੱਖਣ ਵਾਲੇ ਇਸ ਦੀ ਵਰਤੋਂ ਵਧੇਰੇ ਗੱਲਾਂ ਲਈ ਕਰਦੇ ਸਨ। ਪਰ ਅਜੋਕੀ ਪੀੜ੍ਹੀ ਟੈਕਸਟ ਮੈਸੇਜ, ਟਵਿਟਰ, ਫੇਸਬੁੱਕ, ਈ-ਮੇਲ ਅਤੇ ਇੰਟਰਨੈੱਟ ਲਈ ਮੁੱਖ ਰੂਪ ਵਿਚ ਸੈੱਲ ਫੋਨਾਂ ਦੀ ਵਰਤੋਂ ਕਰ ਰਹੀ ਹੈ। ਬੇਸ਼ੱਕ ਪਿਛਲੇ ਇਕ ਦਹਾਕੇ ਤੋਂ ਕੀਤੇ ਗਏ ਵੱਖ-ਵੱਖ ਅਧਿਐਨਾਂ ਵਿਚ ਸੈੱਲ ਫੋਨ ਦੀ ਵਰਤੋਂ ਦੇ ਕਈ ਖ਼ਤਰਨਾਕ ਨਤੀਜੇ ਵੀ ਸਾਹਮਣੇ ਆਏ ਹਨ ਪਰ ਇਸ ਦੇ ਬਾਵਜੂਦ ਇਸ ਦੀ ਵਧ ਰਹੀ ਲੋਕਪ੍ਰਿਅਤਾ 'ਚ ਕੋਈ ਕਮੀ ਨਹੀਂ ਆਈ।
ਇਹ ਮਿਸਾਲ ਸ਼ਾਇਦ ਅਜੀਬ ਲੱਗੇ ਪਰ ਇਸ ਤੋਂ ਪਤਾ ਲਗਦਾ ਹੈ ਕਿ ਅੱਜਕਲ੍ਹ ਕੀ ਹੋ ਰਿਹਾ ਹੈ। ਕਈ ਲੋਕ ਤਾਂ ਆਪਣੇ ਫੋਨ ਤੋਂ ਇਕ ਘੰਟੇ ਲਈ ਵੀ ਦੂਰ ਨਹੀਂ ਹੋ ਸਕਦੇ। 20 ਕੁ ਸਾਲਾਂ ਦੀ ਇਕ ਮੁਟਿਆਰ ਨੇ ਕਿਹਾ ਕਿ ਜੇ ਅਸੀਂ ਈ-ਮੇਲ ਨਾ ਦੇਖੀਏ, ਇੰਟਰਨੈੱਟ ਨਾ ਵਰਤੀਏ ਤੇ ਦੋਸਤਾਂ-ਮਿੱਤਰਾਂ ਨੂੰ ਇੰਸਟੰਟ ਮੈਸੇਜ ਨਾ ਭੇਜੀਏ ਤਾਂ ਸਾਡੀ ਜਾਨ ਨਿਕਲ ਜਾਂਦੀ ਹੈ।
ਇਕ ਡਾਕਟਰ ਦੇ ਅਨੁਸਾਰ ਜਿਹੜੇ ਲੋਕ ਘੰਟਿਆਂਬੱਧੀ ਨਵੀਂ ਤੋਂ ਨਵੀਂ ਤਕਨੀਕ ਨਾਲ ਲੱਗੇ ਰਹਿੰਦੇ ਹਨ ਤੇ ਕੋਈ ਕਸਰਤ ਨਹੀਂ ਕਰਦੇ, ਉਨ੍ਹਾਂ ਨੂੰ ਦਿਲ ਦੀ ਬਿਮਾਰੀ, ਸ਼ੱਕਰ ਰੋਗ ਜਾਂ ਹੋਰ ਬਿਮਾਰੀਆਂ ਲੱਗਣ ਦਾ ਖ਼ਤਰਾ ਹੋ ਸਕਦਾ ਹੈ। ਇਹ ਹੋਰ ਸਰਵੇਖਣ ਨੇ ਦਿਖਾਇਆ ਕਿ ਜਿਹੜੇ ਲੋਕ ਗੱਡੀ ਚਲਾਉਣ ਵੇਲੇ ਫੋਨ 'ਤੇ ਜਾਂ ਹੈਂਡਸ ਫ੍ਰੀ ਕਿੱਟ ਰਾਹੀਂ ਗੱਲ ਕਰਦੇ ਹਨ, ਉਨ੍ਹਾਂ ਦੀ ਹਾਲਤ ਸ਼ਰਾਬੀ ਡਰਾਈਵਰਾਂ ਦੇ ਬਰਾਬਰ ਹੁੰਦੀ ਹੈ। ਇਕ ਆਦਮੀ ਗੱਡੀ ਚਲਾਉਂਦਾ ਇਕ ਵੱਡੇ ਖੰਭੇ ਵਿਚ ਜਾ ਵੱਜਦਾ ਹੈ ਤੇ ਉਸ ਨਾਲ ਬੈਠੀ ਔਰਤ ਨੂੰ ਕਾਫੀ ਸੱਟ ਲਗਦੀ ਹੈ। ਉਹ ਪੁਲਿਸ ਤੇ ਐਂਬੂਲੈਂਸ ਬੁਲਾਉਂਦਾ ਹੈ। ਪਰ ਇਹ ਦੁਰਘਟਨਾ ਹੋਈ ਕਿਵੇਂ? ਮੋਬਾਈਲ ਵੱਜਣ ਕਾਰਨ ਉਸ ਦਾ ਧਿਆਨ ਸੜਕ ਤੋਂ ਖਿੱਚਿਆ ਗਿਆ।
ਇਸ ਮਿਸਾਲ ਤੋਂ ਪਤਾ ਲਗਦਾ ਹੈ ਕਿ ਤਕਨੀਕ ਜਾਂ ਤਾਂ ਸਾਡੇ ਫਾਇਦੇ ਲਈ ਹੋ ਸਕਦੀ ਹੈ ਜਾਂ ਸਾਡਾ ਨੁਕਸਾਨ ਕਰ ਸਕਦੀ ਹੈ। ਫੈਸਲਾ ਸਾਡਾ ਹੈ ਪਰ ਬਹੁਤ ਘੱਟ ਲੋਕ ਹਨ ਜੋ ਬੀਤੇ ਜ਼ਮਾਨੇ ਦੀਆਂ ਪੁਰਾਣੀਆਂ ਚੀਜ਼ਾਂ ਵਰਤਣੀਆਂ ਚਾਹੁਣਗੇ।

-ਮੋਬਾ: 98140-70716

ਵੱਡੀ ਸ਼ਕਤੀ ਹੈ ਡਰ

ਡਰ ਦੇ ਮਾਰੇ ਭਾਵੇਂ ਆਦਮੀ ਕਮਜ਼ੋਰ ਹੋ ਜਾਂਦਾ ਹੈ ਪਰ 'ਡਰ' ਆਪਣੇ-ਆਪ ਵਿਚ ਵੱਡੀ ਸ਼ਕਤੀ ਹੈ। ਗੁਰਬਾਣੀ ਵਿਚ ਵੀ ਦਰਜ ਹੈ ਕਿ ਲੱਖਾਂ ਸੂਰਜ, ਤਾਰੇ, ਧਰਤੀਆਂ ਕੇਵਲ ਇਕ ਡਰ ਦੇ ਮਾਰੇ ਆਪਣੇ ਕੰਮ ਵਿਚ ਦਿਨ-ਰਾਤ ਅਨੁਸ਼ਾਸਨ ਨਾਲ ਲੱਗੇ ਹੋਏ ਹਨ। ਧਰਤੀ ਦਾ ਹਰੇਕ ਜੀਵ ਕਿਸੇ ਨਾ ਕਿਸੇ ਡਰ ਅਧੀਨ ਕਾਬੂ ਵਿਚ ਰਹਿੰਦਾ ਹੈ। ਜਿਥੇ ਡਰ ਖ਼ਤਮ ਹੈ, ਉਥੇ ਵਿਨਾਸ਼ ਹੈ। ਸਮਾਜ ਨੂੰ ਚੰਗੇ ਢੰਗ ਨਾਲ ਚਲਾਉਣ ਲਈ ਸੰਵਿਧਾਨ ਘੜੇ ਜਾਂਦੇ ਹਨ ਤੇ ਫਿਰ ਉਸ ਸੰਵਿਧਾਨ (ਕਾਨੂੰਨ) ਦੇ ਡਰ ਨਾਲ ਲੋਕਾਂ ਨੂੰ ਨਿਯਮਬੱਧ ਰੱਖਿਆ ਜਾਂਦਾ ਹੈ। ਰਾਜਸੀ ਨੇਤਾ ਵੋਟਾਂ ਕਰਕੇ ਲੋਕਾਂ ਤੋਂ ਡਰਦੇ ਚੰਗਾ ਕੰਮ ਕਰਦੇ ਹਨ। ਇਕ ਅਫ਼ਸਰ ਆਪਣੇ ਵੱਡੇ ਅਫ਼ਸਰ ਤੋਂ, ਸਮਾਜ ਤੋਂ, ਕਾਨੂੰਨ ਤੋਂ ਡਰਦਾ ਅਨੁਸ਼ਾਸਨ ਵਿਚ ਬੱਝਾ ਰਹਿੰਦਾ ਹੈ। ਰੱਬ ਦਾ ਡਰ ਤਾਂ ਸਭ ਨੂੰ ਹੁੰਦਾ ਹੈ ਤੇ ਇਹ ਸਰਬ ਵਿਆਪਕ ਵੀ ਹੈ। ਸਾਰੇ ਲੋਕ ਰੱਬ ਦੀ ਕਰੋਪੀ ਤੋਂ ਡਰਦੇ ਆਪੋ-ਆਪਣੇ ਧਰਮ ਅਸਥਾਨਾਂ 'ਤੇ ਮੱਥਾ ਟੇਕਦੇ, ਪਾਠ-ਪੂਜਾ ਕਰਦੇ ਹਨ। ਕਈ ਨਰਕ ਵਿਚ ਮਿਲਣ ਵਾਲੇ ਤਸੀਹਿਆਂ ਤੋਂ ਡਰਦੇ ਧਰਤੀ 'ਤੇ ਹੀ ਰੱਬ-ਰੱਬ ਕਰਦੇ। ਰੱਬ ਵੀ ਕਈ ਵਾਰ ਸੁਨਾਮੀ, ਝੱਖੜ, ਮੀਂਹ, ਬਰਫ਼, ਅੱਗ ਆਦਿ ਦੇ ਰੂਪ ਵਿਚ ਲੋਕਾਂ ਮੂਹਰੇ ਡਰ ਬਣਾਈ ਰੱਖਦਾ ਹੈ। ਲੋਕ ਆਪੇ ਡਰਦੇ, ਹਰਿ-ਹਰਿ ਕਰਦੇ ਹਨ।
ਡਰ ਦੀਆਂ ਵੀ ਕਈ ਪ੍ਰਸਥਿਤੀਆਂ ਹਨ। ਕਈ ਤਾਂ ਐਵੇਂ ਨਿੱਕੀ-ਨਿੱਕੀ ਗੱਲ (ਚੂਹੇ) ਤੋਂ ਵੀ ਡਰਦੇ ਰਹਿੰਦੇ ਹਨ, ਜੋ ਕਮਜ਼ੋਰੀ ਦੀ ਨਿਸ਼ਾਨੀ ਹੈ। ਕਈਆਂ ਨੂੰ ਡਰਾਇਆ ਜਾਂਦਾ ਹੈ ਤਾਂ ਜੋ ਉਹ ਡਰਾਉਣ ਵਾਲੇ ਦੀ ਮਰਜ਼ੀ ਅਨੁਸਾਰ ਕੰਮ ਕਰਨ। ਸਿਆਣੇ, ਬਲਵਾਨ, ਦੂਰ-ਦ੍ਰਿਸ਼ਟੀ ਵਾਲੇ ਲੋਕ ਇਉਂ ਨਹੀਂ ਡਰਦੇ। ਕਈ ਵਾਰ ਅਚਾਨਕ ਆਈ ਬਿਪਤਾ ਤੋਂ ਬੰਦਾ ਡਰ ਜਾਂਦਾ ਹੈ ਪਰ ਹੌਸਲੇ, ਹਿੰਮਤ ਤੇ ਵਕਤ ਬੀਤਣ ਨਾਲ ਡਰ ਖ਼ਤਮ ਹੋ ਜਾਂਦਾ ਹੈ। ਕਈ ਵਾਰ ਸਿਆਣੇ ਵਿਅਕਤੀ ਆਉਣ ਵਾਲੇ ਡਰ ਤੋਂ ਪਹਿਲਾਂ ਹੀ ਸੁਚੇਤ ਹੁੰਦੇ ਹਨ ਅਤੇ ਬੰਨ੍ਹ ਸ਼ੁੱਭ ਕਰ ਲੈਂਦੇ ਹਨ ਜਿਵੇਂ ਕਿ ਬਹੁਤਾ ਮੀਂਹ ਪੈਣ ਨਾਲ ਹੜ੍ਹ ਦਾ ਡਰ ਵਧ ਜਾਂਦਾ ਹੈ। ਧਾਰਮਿਕ ਬੰਦਿਆਂ ਨੂੰ ਦੁਨੀਆ ਦੇ ਤੌਰ-ਤਰੀਕਿਆਂ ਤੋਂ ਆਉਣ ਵਾਲੀ ਸਮਾਜਿਕ ਬਿਪਤਾ ਦਾ ਪਹਿਲਾਂ ਪਤਾ ਲੱਗ ਜਾਂਦਾ ਹੈ। ਕੁਝ ਵੀ ਹੋਵੇ, ਅੰਦਰਲਾ ਡਰ ਹਮੇਸ਼ਾ ਸੁਧਾਰ ਵਾਲੇ ਪਾਸੇ ਧੱਕਦਾ ਹੈ। ਹਰ ਆਦਮੀ ਦੇ ਅੰਦਰ ਕਿਤੇ ਨਾ ਕਿਤੇ, ਕੋਈ ਨਾ ਕੋਈ ਡਰ ਹਰ ਵੇਲੇ ਜ਼ਰੂਰ ਬੈਠਾ ਹੁੰਦਾ ਹੈ, ਜੋ ਉਸ ਨੂੰ ਸੱਚੇ-ਸੁੱਚੇ ਲੋਕ ਭਲਾਈ ਦੇ ਕੰਮ ਕਰਨ ਲਈ ਪ੍ਰੇਰਦਾ ਹੈ।

-ਪਿੰਡ ਤੇ ਡਾਕ: ਘੜੂੰਆਂ, ਤਹਿ: ਖਰੜ (ਮੁਹਾਲੀ)। ਮੋਬਾ: 88721-04763






Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX