ਤਾਜਾ ਖ਼ਬਰਾਂ


ਮਾਰਚ ਦੇ ਪਹਿਲੇ ਹਫ਼ਤੇ ਹੋ ਸਕਦੀ ਹੈ ਲੋਕ ਸਭਾ ਚੋਣਾਂ ਦੀ ਘੋਸ਼ਣਾ - ਸੂਤਰ
. . .  8 minutes ago
ਨਵੀਂ ਦਿੱਲੀ, 17 ਜਨਵਰੀ - ਸੂਤਰਾਂ ਦਾ ਕਹਿਣਾ ਹੈ ਕਿ ਚੋਣ ਕਮਿਸ਼ਨ ਲੋਕ ਸਭਾ ਚੋਣਾਂ ਦੀ ਘੋਸ਼ਣਾ ਮਾਰਚ ਦੇ ਪਹਿਲੇ ਹਫ਼ਤੇ ਕਰ ਸਕਦਾ ਹੈ। ਲੋਕ ਸਭਾ ਚੋਣਾਂ 6-7 ਪੜਾਵਾਂ...
ਲੜਕਿਆ ਨੂੰ ਬਲੈਕਮੇਲ ਕਰਨ ਵਾਲੇ ਗਿਰੋਹ ਦੇ 5 ਮੈਂਬਰ ਗ੍ਰਿਫ਼ਤਾਰ
. . .  22 minutes ago
ਫ਼ਾਜ਼ਿਲਕਾ, 18 ਜਨਵਰੀ (ਪ੍ਰਦੀਪ ਕੁਮਾਰ)- ਫ਼ਾਜ਼ਿਲਕਾ ਜ਼ਿਲ੍ਹਾ ਪੁਲਿਸ ਨੇ ਨੌਜਵਾਨ ਲੜਕਿਆ ਨੂੰ ਆਪਣੇ ਜਾਲ 'ਚ ਫ਼ਸਾਕੇ ਜਬਰਜਨਾਹ ਦਾ ਮਾਮਲਾ ਦਰਜ ਕਰਵਾਉਣ ਦਾ ਡਰ ਪਾ ਕੇ ਬਲੈਕਮੇਲ...
ਸਿਲੰਡਰ ਦੇ ਫਟਣ ਕਾਰਨ ਦੋ ਲੋਕਾਂ ਦੀ ਮੌਤ, 6 ਜ਼ਖਮੀ
. . .  26 minutes ago
ਹੈਦਰਾਬਾਦ, 18 ਜਨਵਰੀ- ਤੇਲੰਗਾਨਾ ਦੇ ਮਡਚਲ ਜ਼ਿਲ੍ਹੇ 'ਚ ਇੱਕ ਘਰ 'ਚ ਸਿਲੰਡਰ ਫਟਣ ਕਾਰਨ 2 ਲੋਕਾਂ ਦੀ ਮੌਤ ਹੋਣ ਦੀ ਖ਼ਬਰ ਹੈ ਜਦਕਿ 6 ਹੋਰ ਗੰਭੀਰ ਜ਼ਖਮੀ ਹੋਏ ਹਨ। ਜ਼ਖਮੀ ਹੋਏ ਲੋਕਾਂ ਨੂੰ ਨੇੜੇ ਦੇ ਨਿੱਜੀ ਹਸਪਤਾਲ 'ਚ ਇਲਾਜ ਲਈ ਦਾਖਲ ਕਰਵਾਇਆ......
ਟੀ.ਐਮ.ਸੀ ਦੀ ਰੈਲੀ ਲਈ ਅਖਿਲੇਸ਼ ਪਹੁੰਚੇ ਕੋਲਕਾਤਾ
. . .  38 minutes ago
ਕੋਲਕਾਤਾ, 18 ਜਨਵਰੀ - ਕੋਲਕਾਤਾ 'ਚ ਟੀ.ਐਮ.ਸੀ ਦੀ 19 ਜਨਵਰੀ ਨੂੰ ਹੋਣ ਵਾਲੀ ਰੈਲੀ 'ਚ ਸ਼ਾਮਲ ਹੋਣ ਲਈ ਉੱਤਰ ਪ੍ਰਦੇਸ਼ ਦੇ ਸਾਬਕਾ ਮੁੱਖ ਮੰਤਰੀ ਅਖਿਲੇਸ਼ ਯਾਦਵ...
ਅਮਿਤ ਸ਼ਾਹ ਨੂੰ ਨਹੀ ਹੈ ਸਵਾਈਨ ਫਲੂ - ਕਾਂਗਰਸੀ ਆਗੂ ਬੀ.ਕੇ ਹਰੀ ਪ੍ਰਸਾਦ
. . .  49 minutes ago
ਨਵੀਂ ਦਿੱਲੀ, 18 ਜਨਵਰੀ - ਕਾਂਗਰਸੀ ਆਗੂ ਬੀ.ਕੇ ਹਰੀ ਪ੍ਰਸਾਦ ਦਾ ਕਹਿਣਾ ਹੈ ਕਿ ਉਨ੍ਹਾਂ ਕੋਲ ਰਿਪੋਰਟ ਹੈ ਕਿ ਭਾਜਪਾ ਦੇ ਕੌਮੀ ਪ੍ਰਧਾਨ ਅਮਿਤ ਸ਼ਾਹ ਨੂੰ ਸਵਾਈਨ ਫਲੂ ਨਹੀ ਹੋਇਆ...
ਸੁਖਜਿੰਦਰ ਰੰਧਾਵਾ ਕੁਲਬੀਰ ਜ਼ੀਰਾ ਨੂੰ ਲੈ ਕੇ ਪਹੁੰਚੇ ਪੰਜਾਬ ਭਵਨ
. . .  about 1 hour ago
ਚੰਡੀਗੜ੍ਹ, 18 ਜਨਵਰੀ (ਵਿਕਰਮਜੀਤ ਸਿੰਘ ਮਾਨ) - ਕੈਬਨਿਟ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ ਕਾਂਗਰਸ ਤੋਂ ਮੁਅੱਤਲ ਕੀਤੇ ਗਏ ਵਿਧਾਇਕ ਕੁਲਬੀਰ ਸਿੰਘ ਜ਼ੀਰਾ ਨੂੰ ਲੈ ਕੇ ਪੰਜਾਬ...
ਅਦਾਲਤ ਨੇ ਮੁਹੰਮਦ ਅਬਸਾਰ ਦੀ ਰਿਮਾਂਡ ਨੂੰ ਸੱਤ ਦਿਨਾਂ ਲਈ ਵਧਾਇਆ
. . .  about 1 hour ago
ਨਵੀਂ ਦਿੱਲੀ, 18 ਜਨਵਰੀ - ਦਿੱਲੀ ਦੀ ਪਟਿਆਲਾ ਹਾਊਸ ਕੋਰਟ ਨੇ ਮੁਹੰਮਦ ਅਬਸਾਰ ਦੀ ਰਿਮਾਂਡ ਨੂੰ ਸੱਤ ਦਿਨਾਂ ਦੇ ਲਈ ਵਧਾ ਦਿੱਤਾ ਹੈ। ਜਾਣਕਾਰੀ ਲਈ ਦੱਸ ਦੇਈਏ ਕਿ 6 ਦਿਨ ਦੀ ਹਿਰਾਸਤ ਖ਼ਤਮ ਹੋਣ ਤੋਂ ਬਾਅਦ ਉਸ ਨੂੰ ਅੱਜ ਕੋਰਟ 'ਚ ਪੇਸ਼ ਕੀਤਾ ਗਿਆ ਸੀ.....
ਹਰਦੀਪ ਸਿੰਘ ਬਣੇ ਚੰਡੀਗੜ੍ਹ ਦੇ ਸੀਨੀਅਰ ਡਿਪਟੀ ਮੇਅਰ
. . .  about 1 hour ago
ਚੰਡੀਗੜ੍ਹ, 18 ਜਨਵਰੀ (ਲਿਬਰੇਟ) - ਸ਼੍ਰੋਮਣੀ ਅਕਾਲੀ ਦਲ ਦੇ ਹਰਦੀਪ ਸਿੰਘ ਚੰਡੀਗੜ੍ਹ ਨਗਰ ਨਿਗਮ ਦੇ ਸੀਨੀਅਰ ਡਿਪਟੀ ਮੇਅਰ ਚੁਣੇ ਗਏ ਹਨ, ਜਦਕਿ ਭਾਜਪਾ ਦੇ ਕੰਵਰਜੀਤ ਰਾਣਾ ਡਿਪਟੀ ਮੇਅਰ...
ਟੈਸਟ ਲੜੀ ਤੋਂ ਬਾਅਦ ਭਾਰਤ ਨੇ ਆਸਟ੍ਰੇਲੀਆ 'ਚ ਪਹਿਲੀ ਵਾਰ ਜਿੱਤੀ ਇੱਕ ਦਿਨਾਂ ਲੜੀ
. . .  about 1 hour ago
ਮੈਲਬੌਰਨ, 18 ਜਨਵਰੀ - ਭਾਰਤ ਨੇ ਟੈਸਟ ਲੜੀ 'ਚ ਜਿੱਤ ਹਾਸਲ ਕਰਨ ਤੋਂ ਬਾਅਦ ਆਸਟ੍ਰੇਲੀਆ 'ਚ ਪਹਿਲੀ ਵਾਰ ਇੱਕ ਦਿਨਾਂ ਲੜੀ ਵੀ ਜਿੱਤ ਲਈ ਹੈ। ਤੀਸਰੇ ਇੱਕ ਦਿਨਾਂ ਮੈਚ ਵਿਚ ਭਾਰਤ...
ਦਿੱਲੀ ਕਮੇਟੀ ਦੇ ਅਹੁਦੇਦਾਰਾਂ ਦੀ ਚੋਣ 'ਤੇ ਕੋਰਟ ਨੇ ਲਗਾਈ ਰੋਕ
. . .  about 1 hour ago
ਨਵੀਂ ਦਿੱਲੀ, 18 ਜਨਵਰੀ (ਜਗਤਾਰ ਸਿੰਘ) -ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ 19 ਜਨਵਰੀ ਨੂੰ ਹੋਣ ਵਾਲੀਆਂ ਕਾਰਜਕਾਰੀ ਚੋਣਾਂ 'ਤੇ ਕੋਰਟ ਵੱਲੋਂ ਰੋਕ ਲਗਾ ਦਿੱਤੀ ਗਈ ਹੈ। ਜਾਣਕਾਰੀ ਲਈ ਦੱਸ ਦੇਈਏ ਕਿ ਇਸ ਮਾਮਲੇ 'ਚ ਦਿੱਲੀ ਕਮੇਟੀ ਦੇ ਹੀ ਇੱਕ ....
ਹੋਰ ਖ਼ਬਰਾਂ..

ਲੋਕ ਮੰਚ

ਜੀਵਨ ਦੀ ਹੋਂਦ ਲਈ ਰੁੱਖ ਜ਼ਰੂਰੀ

ਰੁੱਖ ਤੇ ਮਨੁੱਖ ਦਾ ਬਹੁਤ ਹੀ ਡੂੰਘਾ ਰਿਸ਼ਤਾ ਹੈ। ਸ਼ੁਰੂ ਤੋਂ ਅੰਤ ਤੱਕ ਰੁੱਖ ਮਨੁੱਖ ਦਾ ਸਾਥ ਨਿਭਾਉਂਦੇ ਹਨ। ਰੁੱਖ ਉਸ ਪਰਮਾਤਮਾ ਦੁਆਰਾ ਦਿੱਤੇ ਗਏ ਅਨਮੋਲ ਤੋਹਫੇ ਹਨ। ਇਹ ਇਕ ਅਨਮੋਲ ਖਜ਼ਾਨਾ ਵੀ ਹੈ। ਰੁੱਖ ਕੇਵਲ ਸਾਡੇ ਲਈ ਹੀ ਨਹੀਂ, ਸਗੋਂ ਧਰਤੀ 'ਤੇ ਰਹਿੰਦੇ ਹਰੇਕ ਸਜੀਵ ਪ੍ਰਾਣੀ ਲਈ ਬਹੁਤ ਜ਼ਰੂਰੀ ਹਨ। ਇਥੋਂ ਤੱਕ ਕਿ ਧਰਤੀ ਦਾ ਜੀਵਨ ਰੁੱਖਾਂ ਦੀ ਹੋਂਦ ਨਾਲ ਹੀ ਚਲਦਾ ਰਹਿ ਸਕਦਾ ਹੈ। ਇਕ ਸਾਧਾਰਨ ਘਰ ਵਿਚ ਵਿਧੀਪੂਰਵਕ ਲਗਾਇਆ ਗਿਆ ਇਕ ਪੌਦਾ ਏ. ਸੀ. ਦਾ ਕੰਮ ਕਰ ਸਕਦਾ ਹੈ।
ਅੱਜ ਦੇ ਸਮੇਂ ਵਿਚ ਪ੍ਰਦੂਸ਼ਣ ਲਗਾਤਾਰ ਵਧਦਾ ਜਾ ਰਿਹਾ ਹੈ, ਜਿਸ ਕਾਰਨ ਅਤਿ ਭਿਆਨਕ ਬਿਮਾਰੀਆਂ ਦਾ ਪਸਾਰ ਹੋ ਰਿਹਾ ਹੈ। ਘਰ ਦੇ ਬਾਹਰ ਹੀ ਨਹੀਂ, ਸਗੋਂ ਘਰ ਦੇ ਅੰਦਰ ਵੀ ਬਹੁਤ ਪ੍ਰਦੂਸ਼ਣ ਪੈਦਾ ਹੁੰਦਾ ਹੈ, ਜਿਸ ਦਾ ਇਕ ਕਾਰਨ ਘਰਾਂ ਦੀ ਬਣਤਰ ਵੀ ਹੈ। ਅੱਜਕਲ੍ਹ ਕਈ ਘਰਾਂ ਦੀ ਬਣਤਰ ਇਹੋ ਜਿਹੀ ਹੈ ਕਿ ਉਨ੍ਹਾਂ ਵਿਚੋਂ ਤਾਜ਼ੀ ਹਵਾ ਦਾ ਪੂਰਨ ਤੌਰ 'ਤੇ ਅਦਾਨ-ਪ੍ਰਦਾਨ ਨਹੀਂ ਹੁੰਦਾ। ਗਰਬੈਰਾ ਡੇਜ਼ੀ Gerbera Daisy) ਇਕ ਬਹੁਤ ਹੀ ਮਹੱਤਵਪੂਰਨ ਪੌਦਾ ਹੈ, ਜੋ ਕਿ ਕਈ ਜ਼ਹਿਰੀਲੀਆਂ ਗੈਸਾਂ ਨੂੰ ਬੜੀ ਹੀ ਅਸਾਨੀ ਨਾਲ ਸੋਖ ਕੇ ਖਤਮ ਕਰ ਦਿੰਦਾ ਹੈ। ਕਵਾਰ ਦਾ ਪੌਦਾ ਜਿੱਥੇ ਦੇਖਣ ਨੂੰ ਬਹੁਤ ਸੋਹਣਾ ਲਗਦਾ ਹੈ, ਉੱਥੇ ਹੀ ਇਸ ਦੇ ਪੱਤੇੇ ਬਹੁਤ ਹੀ ਗੁਣਕਾਰੀ ਹੁੰਦੇ ਹਨ। ਇਹ ਕੀਟਾਣੂਨਾਸ਼ਕ ਵਜੋਂ ਕੰਮ ਕਰਦੇ ਹਨ। ਇਸ ਦੇ ਪੱਤੇ ਚਮੜੀ ਲਈ ਬਹੁਤ ਹੀ ਵਧੀਆ ਹੁੰਦੇ ਹਨ। ਇਸ ਤੋਂ ਇਲਾਵਾ ਵੀ ਬਹੁਤ ਸਾਰੇ ਛੋਟੇ ਪੌਦੇ ਹਨ, ਜਿਵੇ ਮਨੀ ਪਲਾਂਟ, ਅਰੇਕਾ ਪਾਮ, ਚਾਈਨੀਸ ਸਦਾਬਹਾਰ ਆਦਿ।
ਮਨੁੱਖ ਦੇ ਲਾਲਚ ਸਦਕਾ ਜੰਗਲ ਹੇਠ ਰਕਬਾ ਘਟਦਾ ਜਾ ਰਿਹਾ ਹੈ। ਜੇਕਰ ਵਰਖਾ ਵਣ ਦੀ ਗੱਲ ਕਰੀਏ ਤਾਂ 78 ਮਿਲੀਅਨ ਏਕੜ ਵਰਖਾ ਵਣ ਹਰ ਸਾਲ ਖਤਮ ਹੋ ਰਹੇ ਹਨ। ਜਾਣਕਾਰ ਮੰਨਦੇ ਹਨ ਕਿ 2020 ਤੱਕ 80 ਤੋਂ 90 ਫੀਸਦੀ ਵਰਖਾ ਵਣ ਖਤਮ ਹੋ ਜਾਣਗੇ। ਇਹ ਇਕ ਬਹੁਤ ਵੱਡਾ ਚਿੰਤਾ ਦਾ ਵਿਸ਼ਾ ਹੈ।
ਸਾਡਾ ਭਾਰਤ ਦੇਸ਼ ਖੇਤੀ ਪ੍ਰਧਾਨ ਦੇਸ਼ ਹੈ। ਵੱਖ-ਵੱਖ ਪ੍ਰਕਾਰ ਦੀਆਂ ਫਸਲਾਂ ਇੱਥੇ ਪੈਦਾ ਕੀਤੀਆਂ ਜਾਂਦੀਆਂ ਹਨ। ਪਰ ਪਿਛਲੇ ਕੁਝ ਦਹਾਕਿਆਂ ਤੋਂ ਭੂਮੀ ਦੀ ਉਪਜਾਊ ਸ਼ਕਤੀ ਵਿਚ ਕਮੀ ਦਰਜ ਕੀਤੀ ਗਈ ਹੈ। ਰਸਾਇਣਕ ਖਾਦਾਂ ਤੋਂ ਇਲਾਵਾ ਇਸ ਦਾ ਇਕ ਹੋਰ ਪ੍ਰਮੁੱਖ ਕਾਰਨ ਹੈ ਰੁੱਖਾਂ ਦੀ ਕਟਾਈ। ਰੁੱਖਾਂ ਦੀਆਂ ਜੜ੍ਹਾਂ ਉਪਜਾਊ ਮਿੱਟੀ ਦੀ ਪਰਤ ਨੂੰ ਜਕੜ ਕੇ ਰੱਖਦੀਆਂ ਹਨ।
ਲੋਕ ਬੜੇ ਉਤਸ਼ਾਹ ਨਾਲ ਰੁੱਖ ਤਾਂ ਲਗਾ ਦਿੰਦੇ ਹਨ ਪਰ ਬਾਅਦ ਵਿਚ ਉਨ੍ਹਾਂ ਦੀ ਕੋਈ ਸਾਰ ਨਹੀਂ ਲੈਂਦੇ। ਰੁੱਖ ਲਗਾਉਣ ਦੇ ਨਾਲ-ਨਾਲ ਉਨ੍ਹਾਂ ਦੀ ਦੇਖ-ਰੇਖ ਵੀ ਅਤਿ ਜ਼ਰੂਰੀ ਹੈ। ਸਭ ਤੋਂ ਵੱਧ ਪ੍ਰਦੂਸ਼ਿਤ ਸ਼ਹਿਰਾਂ ਵਿਚ ਸ਼ਾਮਿਲ ਸਾਡੀ ਰਾਜਧਾਨੀ ਦਿੱਲੀ, ਜਿੱਥੇ ਸਾਹ ਲੈਣਾ ਵੀ ਬਹੁਤ ਔਖਾ ਹੈ। ਜਿੱਥੇ ਨਵੇਂ ਰੁੱਖ ਲਗਾਉਣੇ ਅਤੇ ਉਨ੍ਹਾਂ ਦੀ ਦੇਖ-ਰੇਖ ਬਹੁਤ ਜ਼ਰੂਰੀ ਹੈ, ਉੱਥੇ ਹੀ ਬਚੇ ਹੋਏ ਜੰਗਲਾਂ ਦੀ ਸਾਂਭ-ਸੰਭਾਲ ਵੀ ਅਤਿ ਜ਼ਰੂਰੀ ਹੈ।
ਸੋ, ਅੱਜ ਲੋੜ ਹੈ ਇਕ-ਇਕ ਰੁੱਖ ਬਚਾਉਣ ਦੀ ਤੇ ਨਵੇਂ ਰੁੱਖ ਲਗਾ ਕੇ ਉਨ੍ਹਾਂ ਦੀ ਸੰਭਾਲ ਕਰਨ ਦੀ। ਅੱਜ ਜ਼ਰੂਰੀ ਹੈ ਕਿ ਹਰ ਵਿਅਕਤੀ ਰੁੱਖਾਂ ਦੀ ਮਹੱਤਤਾ ਨੂੰ ਸਮਝੇ ਤੇ ਕੁਦਰਤ ਨੂੰ ਪਿਆਰ ਕਰੇ।
ਰੁੱਖਾਂ ਨੇ ਬਚਾਈ ਜਾਤ ਮਨੁੱਖ
ਮਨੁੱਖ ਹੁਣ ਬਚਾਵੇ ਹਰ ਇਕ ਰੁੱਖ।

-ਜ਼ਿਲ੍ਹਾ ਰੋਪੜ। ਮੋਬਾ: 99149-65937


ਖ਼ਬਰ ਸ਼ੇਅਰ ਕਰੋ

ਸਫਲਤਾ ਲਈ ਸਾਕਾਰਾਤਮਿਕ ਸੋਚ ਹੋਣੀ ਜ਼ਰੂਰੀ

ਜ਼ਿੰਦਗੀ ਨਾ ਰੁਕਣ ਵਾਲਾ, ਨਿਰੰਤਰ ਚੱਲਣ ਵਾਲਾ ਇਹੋ ਜਿਹਾ ਚੱਕਰ ਹੈ, ਜਿਥੇ ਧੁੱਪ-ਛਾਂ, ਸਰਦੀ-ਗਰਮੀ, ਦਿਨ-ਰਾਤ, ਖ਼ੁਸ਼ੀ-ਗ਼ਮੀ, ਹਾੜ੍ਹ-ਸਿਆਲ, ਸਾਵਣ-ਭਾਦੋਂ ਆਦਿ ਬਦਲਦੀਆਂ ਰੁੱਤਾਂ ਨੂੰ ਹਰ ਹੀਲੇ ਹੰਢਾਉਣਾ ਪੈਂਦਾ ਹੈ। ਸ਼ਾਇਦ ਚਲਦੇ ਰਹਿਣ ਦਾ ਨਾਂਅ ਹੀ ਜ਼ਿੰਦਗੀ ਅਤੇ ਰੁਕਣ ਦਾ ਸਮਝੋ ਅੰਤ। ਜੀਵਨ ਦੇ ਦੋ ਪਹੀਆਂ ਰੂਪੀ ਵਾਹਨ ਨੂੰ ਤੋਰੀ ਰੱਖਣ ਲਈ ਉਸਾਰੂ ਅਤੇ ਸਕਾਰਾਤਮਕ ਸੋਚ ਅਪਣਾਉਣਾ ਲਾਜ਼ਮੀ ਹੋ ਜਾਂਦਾ ਹੈ, ਜਿਸ ਤੋਂ ਬਿਨਾਂ ਸਮਾਂ ਬਤੀਤ ਕਰਨਾ ਔਖਾ ਜਿਹਾ ਜਾਪਦਾ ਹੈ।
ਸਹੀ ਸਮੇਂ ਸਹੀ ਸਲਾਹ ਕਾਰਨ, ਸਕਾਰਾਤਮਿਕ ਸੋਚ ਦਾ ਹੋਣਾ ਵੀ ਸਫਲਤਾ ਦੀ ਪੌੜੀ ਚੜ੍ਹਨ ਵਿਚ ਕਾਰਗਰ ਸਾਬਤ ਹੁੰਦੇ ਹਨ। ਮਾਤਾ-ਪਿਤਾ ਨੂੰ ਵੀ ਸਮੇਂ-ਸਮੇਂ 'ਤੇ ਬੱਚਿਆਂ ਨੂੰ ਅਗਾਂਹਵਧੂ ਅਤੇ ਉਸਾਰੂ ਸੋਚ ਅਪਣਾਉਣ ਵਿਚ ਉਨ੍ਹਾਂ ਦੀ ਮਦਦ ਕਰਨੀ ਚਾਹੀਦੀ ਹੈ। ਕਿਉਂਕਿ ਜੇ ਮੁੱਢਾ ਪੱਕਾ ਹੋਵੇਗਾ ਤਾਂ ਹਰ ਹਨੇਰੀ, ਝੱਖੜ, ਤੂਫ਼ਾਨ, ਜ਼ਲਜ਼ਲੇ ਦਾ ਟਾਕਰਾ ਕਰਦਾ ਹੋਇਆ ਉਹ ਰੁੱਖ ਫੁੱਲ ਤੇ ਫਲ ਦੇ ਸਕੇਗਾ। ਸ਼ੁਰੂ ਤੋਂ ਹੀ ਪਰਿਵਾਰ ਨੂੰ ਨੈਤਿਕ ਕਦਰਾਂ-ਕੀਮਤਾਂ, ਉਤਸ਼ਾਹਪੂਰਵਕ, ਪਰਿਪੱਕ ਸੋਚ ਨੂੰ ਅਗਾਂਹ ਤੋਰਨ ਲਈ ਬੱਚਿਆਂ ਨੂੰ ਵਿਚਾਰ-ਵਟਾਂਦਰਾ ਦੇ ਜ਼ਰੀਏ ਜਾਂ ਆਪਣੀਆਂ ਉਦਾਹਰਨਾਂ ਦੀ ਬਦੌਲਤ ਸਹੀ ਸਮੇਂ, ਸਹੀ ਰਾਹ ਦੱਸਣ ਦੇ ਯੋਗ ਜਾਂ ਹਾਣੀ ਬਣਾਉਣ ਦੀ ਭਰਪੂਰ ਕੋਸ਼ਿਸ਼ ਕਰਦੇ ਰਹਿਣਾ ਚਾਹੀਦਾ ਹੈ। ਜ਼ਰੂਰੀ ਨਹੀਂ ਕਿ ਹਰ ਸਮੇਂ, ਹਰ ਚੀਜ਼ ਤੁਹਾਡੇ ਪੱਖ ਵਿਚ ਹੋਵੇ, ਉਲਟ ਜਾਂ ਅਸਹਿਯੋਗੀ ਹਾਲਤਾਂ ਵਿਚ ਹੀ ਜੀਵਨ ਜਾਚ ਦਾ ਅਨਿੱਖੜਵਾਂ ਪਹਿਲੂ ਸਾਹਮਣੇ ਆਉਂਦਾ ਹੈ।
ਮਾਪਿਆਂ ਨੂੰ ਵੀ ਚਾਹੀਦਾ ਹੈ ਕਿ ਵਿਦਿਆਰਥੀ ਜੀਵਨ ਵਿਚ ਆਪਣੇ ਬੱਚਿਆਂ ਦੀ ਤੁਲਨਾ ਦੂਜਿਆਂ ਨਾਲ ਖਾਸ ਕਰਕੇ ਪੜ੍ਹਾਈ ਨੂੰ ਲੈ ਕੇ ਨਾ ਕਰਨ, ਕਿਉਂਕਿ ਹਰ ਬੱਚਾ ਦੂਜੇ ਨਾਲੋਂ ਆਪਣੇ ਵਿਚਾਰਾਂ, ਹਾਵਾਂ-ਭਾਵਾਂ, ਰੁਚੀ, ਰਹਿਣ-ਸਹਿਣ, ਖਾਣ-ਪੀਣ ਆਦਿ ਵਿਚ ਵੱਖਰਾ ਹੁੰਦਾ ਹੈ। ਕੁਦਰਤ ਨੇ ਕਿਸੇ ਨੂੰ ਕੁਝ ਹੋਰ ਤੇ ਦੂਜੇ ਨੂੰ ਕੁਝ ਹੋਰ ਗੁਣਾਂ ਦੇ ਧਾਰਨੀ ਬਣਾਇਆ ਹੈ। ਗੁਣਹੀਣ ਕੋਈ ਨਹੀਂ, ਹਰ ਕੋਈ ਆਪਣੇ-ਆਪ ਵਿਚ ਪੂਰਨ ਹੈ, ਬਸ ਲੋੜ ਹੈ ਸਹੀ ਨਜ਼ਰੀਏ ਦੀ। ਜੇ ਕੋਈ ਵਿਦਿਆਰਥੀ ਆਪਣੇ ਸ਼ੌਕ ਨੂੰ ਹੀ ਕੀ ਤੁਸੀਂ ਜਾਣਦੇ ਹੋ ਕਿ ਪੂਰੇ ਵਿਸ਼ਵ ਨੂੰ ਰੌਸ਼ਨੀ ਦੇਣ ਵਾਲੇ ਨੂੰ ਸਕੂਲ ਸੰਸਥਾ ਨੇ ਡਫਰ ਕਹਿ ਕੇ ਸਕੂਲ 'ਚੋਂ ਕੱਢ ਦਿੱਤਾ ਸੀ। ਜਿਸ ਨੇ ਬਲਬ ਦੀ ਖੋਜ ਕੀਤੀ, ਇਥੇ ਗੱਲ ਮਸ਼ਹੂਰ ਵਿਗਿਆਨੀ ਐਡੀਸਨ ਦੀ ਹੋ ਰਹੀ ਹੈ, ਜਿਸ ਨੇ ਆਪਣੇ ਬਲਬੂਤੇ ਮੁੱਢਲੀ ਸਿੱਖਿਆ ਆਪਣੇ ਮਾਤਾ ਪਾਸੋਂ ਹੀ ਗ੍ਰਹਿਣ ਕਰਕੇ, ਖੋਜਾਂ ਦੇ ਆਧਾਰ 'ਤੇ 1093 ਖੋਜਾਂ ਨੂੰ ਆਪਣੇ ਨਾਂਅ 'ਤੇ ਪੇਟੈਂਟ ਕਰਵਾਇਆ ਸੀ। ਉਨ੍ਹਾਂ ਅਨੁਸਾਰ ਸਾਡੀ ਵੱਡੀ ਕਮਜ਼ੋਰੀ ਹੈ ਹੌਸਲਾ ਛੱਡ ਦੇਣਾ, ਯਕੀਨਨ ਕਾਮਯਾਬੀ ਹਾਸਲ ਕਰਨ ਲਈ ਸਾਨੂੰ ਹਮੇਸ਼ਾ ਇਕ ਕੋਸ਼ਿਸ਼ ਹੋਰ ਕਰਨੀ ਚਾਹੀਦੀ ਹੈ।

-ਅਧਿਆਪਕ ਸ: ਸੀ: ਸੈ: ਸਕੂਲ, ਡਿਹਰੀਵਾਲਾ (ਅੰਮ੍ਰਿਤਸਰ)।

ਅਧਿਆਪਕ-ਵਿਦਿਆਰਥੀ ਦੇ ਸਬੰਧ ਕਿਹੋ ਜਿਹੇ ਹੋਣ

ਕੁੰਭੇ ਬਧਾ ਜਲੁ ਰਹੈ ਜਲ ਬਿਨੁ ਕੁੰਭੁ ਨ ਹੋਇ॥
ਗਿਆਨ ਕਾ ਬਧਾ ਮਨੁ ਰਹੈ ਗੁਰ ਬਿਨੁ ਗਿਆਨੁ ਨ ਹੋਇ॥
ਗੁਰੂ-ਸ਼ਿਸ਼ ਦੀ ਪਰੰਪਰਾ ਸਦੀਆਂ ਤੋਂ ਚੱਲੀ ਆ ਰਹੀ ਹੈ। ਜੇ ਇਹ ਕਹਿ ਲਿਆ ਜਾਵੇ ਕਿ ਗੁਰੂ ਤੋਂ ਬਿਨਾਂ ਸ਼ਿਸ਼ ਕਦੇ ਵੀ ਮਹਾਨ ਇਨਸਾਨ ਨਹੀਂ ਬਣ ਸਕਦਾ ਤਾਂ ਇਸ ਵਿਚ ਕੋਈ ਅਤਿਕਥਨੀ ਨਹੀਂ ਹੋਵੇਗੀ। ਮਾਂ-ਬਾਪ ਤੋਂ ਬਾਅਦ ਜੇ ਕੋਈ ਬੱਚੇ ਦੇ ਦਿਲ ਨੂੰ ਸਮਝਦਾ ਹੈ ਤਾਂ ਉਹ ਹੈ ਉਸ ਦਾ ਅਧਿਆਪਕ, ਜਿਸ ਦੇ ਕੋਲ ਉਹ ਘਰਦਿਆਂ ਨਾਲੋਂ ਜ਼ਿਆਦਾ ਸਮਾਂ ਬਤੀਤ ਕਰਦਾ ਹੈ।
ਇਸ ਰਿਸ਼ਤੇ ਦੀ ਕੋਈ ਤੁਲਨਾ ਨਹੀਂ। ਅਧਿਆਪਕ ਆਪਣੇ ਵਿਦਿਆਰਥੀ ਵਿਚ ਆਉਣ ਵਾਲਾ ਕੱਲ੍ਹ ਦੇਖਦਾ ਹੈ। ਸੰਪੂਰਨ ਗੁਰੂ ਉਹੀ ਹੈ ਜੋ ਆਪਣੀ ਲਗਨ ਤੇ ਤਜਰਬੇ ਨਾਲ ਵਿਦਿਆਰਥੀ ਨੂੰ ਵਿੱਦਿਅਕ ਗਿਆਨ ਦੇਣ ਦੇ ਨਾਲ ਉਸ ਦੀ ਸ਼ਖ਼ਸੀਅਤ ਦਾ ਪੂਰਨ ਵਿਕਾਸ ਕਰੇ।
ਅਧਿਆਪਕ ਆਪਣੇ ਗਿਆਨ ਦੇ ਭੰਡਾਰ ਨਾਲ ਵਿਦਿਆਰਥੀ ਲਈ ਚੁੰਬਕ ਬਣ ਜਾਂਦਾ ਹੈ ਤੇ ਭਰਪੂਰ ਜਾਣਕਾਰੀ ਨਾਲ ਉਸ ਦੇ ਸਭ ਸ਼ੰਕੇ ਦੂਰ ਕਰਦਾ ਹੈ। ਅਧਿਆਪਕ ਨੂੰ ਸਭ ਤੋਂ ਵੱਧ ਖੁਸ਼ੀ ਉਦੋਂ ਹੁੰਦੀ ਹੈ ਜਦੋਂ ਉਸ ਦਾ ਵਿਦਿਆਰਥੀ ਉਸ ਤੋਂ ਅੱਗੇ ਨਿਕਲ ਕੇ ਇਕ ਚਾਨਣਮੁਨਾਰਾ ਬਣ ਜਾਂਦਾ ਹੈ। ਇਹ ਅਧਿਆਪਕ ਲਈ ਸਭ ਤੋਂ ਵੱਧ ਮਾਣ ਵਾਲੀ ਗੱਲ ਹੁੰਦੀ ਹੈ।
ਅੱਜ ਅਕਸਰ ਇਹ ਸੁਣਦੇ ਹਾਂ ਕਿ ਨਾ ਤਾਂ ਪਹਿਲਾਂ ਜਿਹੇ ਅਧਿਆਪਕ ਰਹੇ ਤੇ ਨਾ ਹੀ ਪਹਿਲਾਂ ਜਿਹੇ ਵਿਦਿਆਰਥੀ ਜਾਂ ਇੰਜ ਕਹਿ ਲਓ ਕਿ ਅਧਿਆਪਕ ਤੇ ਵਿਦਿਆਰਥੀ ਦੇ ਸਬੰਧ ਵਿਚ ਦੂਰੀ ਆ ਗਈ ਹੈ। ਸਮੇਂ ਦੇ ਨਾਲ ਬਦਲਾਵ ਆਉਂਦੇ ਹਨ ਪਰ ਕੁਝ ਰਿਸ਼ਤੇ ਅਜਿਹੇ ਹੁੰਦੇ ਹਨ ਜਿਨ੍ਹਾਂ ਦਾ ਬਦਲਣਾ ਸਮਾਜ ਲਈ ਘਾਤਕ ਹੁੰਦਾ ਹੈ। ਇਕ ਸੂਝਵਾਨ, ਗਿਆਨਵਾਨ ਤੇ ਸਮਝਦਾਰ ਗੁਰੂ ਉਹੀ ਹੈ ਜੋ ਆਪਣੇ ਫਰਜ਼ਾਂ ਨੂੰ ਨਾ ਭੁੱਲੇ, ਸਮਾਜਿਕ ਕੁਰੀਤੀਆਂ ਦਾ ਅਸਰ ਵਿੱਦਿਅਕ ਸੰਸਥਾਵਾਂ 'ਤੇ ਨਹੀਂ ਪੈਣਾ ਚਾਹੀਦਾ। ਅਧਿਆਪਕ ਵਿਦਿਆਰਥੀਆਂ ਲਈ ਇਕ 'ਰੋਲ ਮਾਡਲ' ਹੁੰਦਾ ਹੈ ਭਾਵ ਵਿਦਿਆਰਥੀ ਦੇ ਸਾਹਮਣੇ ਇਕ ਉਦਾਹਰਨ ਬਣਨ ਦੀ ਜ਼ਰੂਰਤ ਹੈ।
ਵਿਦਿਆਰਥੀ ਨੂੰ ਪੜ੍ਹਾਈ ਦੇ ਨਾਲ ਨੈਤਿਕ ਕਦਰਾਂ-ਕੀਮਤਾਂ ਤੋਂ ਜਾਣੂ ਕਰਵਾਉਣਾ, ਮਹਾਨ ਸਿੱਖਿਆ ਸ਼ਾਸਤਰੀ ਤੇ ਬੁੱਧੀਜੀਵੀ ਵਰਗ ਦੇ ਪਾਏ ਪੂਰਨਿਆਂ 'ਤੇ ਚੱਲਣ ਦੇ ਸਮਰੱਥ ਬਣਾਉਣਾ ਵੀ ਅਧਿਆਪਕ ਵਰਗ ਦੀ ਜ਼ਿੰਮੇਵਾਰੀ ਹੈ।
ਵਿਦਿਆਰਥੀਆਂ ਨੂੰ ਵੀ ਚਾਹੀਦਾ ਹੈ ਕਿ ਵਿੱਦਿਆ ਗ੍ਰਹਿਣ ਕਰਨ ਲਈ ਦਿਲੋਂ ਅਧਿਆਪਕ ਨੂੰ ਸਨਮਾਨ ਦੇ ਕੇ ਜ਼ਿੰਦਗੀ ਵਿਚ ਕਾਮਯਾਬ ਹੋਣ ਤੇ ਸਹੀ ਰਸਤਿਆਂ ਦੀ ਚੋਣ ਕਰਨ ਦੇ ਕਾਬਲ ਬਣਨ।
ਅਧਿਆਪਕ ਦਿਵਸ 'ਤੇ ਇਹੀ ਦੁਆ ਹੈ ਕਿ ਗੁਰੂ ਤੇ ਸ਼ਿਸ਼ ਦਾ ਰਿਸ਼ਤਾ ਹਮੇਸ਼ਾ ਹੀ ਮਾਣ-ਸਤਿਕਾਰ ਤੇ ਮਿਠਾਸ ਵਾਲਾ ਬਣਿਆ ਰਹੇ। ਗੁਰਬਾਣੀ ਕਦਮ-ਕਦਮ 'ਤੇ ਹਾਮੀ ਭਰਦੀ ਹੈ ਕਿ-
ਗੁਰ ਬਿਨੁ ਘੋਰੁ ਅੰਧਾਰੁ ਗੁਰੂ ਬਿਨੁ ਸਮਝ ਨਾ ਆਵੈ॥

-ਜਲੰਧਰ। ਮੋਬਾ: 94649-36950

ਮੁਕਾਮ ਨੂੰ ਪੂਰਾ ਕਰਨ ਲਈ ਲੋੜ ਹੈ ਜਜ਼ਬੇ ਤੇ ਮਿਹਨਤ ਦੀ

ਚਿੱਕੜ ਵਿਚੋਂ ਨਿਕਲ ਕੇ ਹੀ ਕਮਲ ਦਾ ਫੁੱਲ ਖਿੜਦਾ ਹੈ। ਇਸੇ ਤਰ੍ਹਾਂ ਗਰੀਬੀ ਅਤੇ ਮਾੜੇ ਹਾਲਾਤ ਦੀ ਦਲਦਲ ਵਿਚੋਂ ਨਿਕਲ ਕੇ ਹੀ ਬੰਦਾ ਇਕ ਵਧੀਆ ਇਨਸਾਨ ਬਣਦਾ ਹੈ, ਕਿਉਂਕਿ ਚਿੱਕੜ ਨੂੰ ਉਤਾਰਨ ਵਾਸਤੇ ਉਸ ਨੂੰ ਹੱਥ-ਪੱਲਾ ਮਾਰ ਕੇ ਆਪਣੇ-ਆਪ ਸਾਫ ਕਰਨਾ ਪੈਂਦਾ ਹੈ ਤੇ ਜੋ ਇਨਸਾਨ ਪਹਿਲਾਂ ਹੀ ਸਾਫ ਹੋਵੇ, ਉਸ ਨੂੰ ਹੋਰ ਸਾਫ ਹੋਣ ਦੀ ਜ਼ਿਆਦਾ ਫਿਕਰ ਨਹੀਂ ਹੁੰਦੀ। ਇਸ ਤਰ੍ਹਾਂ ਜਿਸ ਇਨਸਾਨ ਨੂੰ ਦੁਨੀਆ ਤੋਂ ਬਹੁਤ ਤਾਅਨੇ-ਮਿਹਣੇ ਮਿਲੇ ਹੋਣ ਤੇ ਲੋਕਾਂ ਦੁਆਰਾ ਬਹੁਤ ਬੇਇੱਜ਼ਤੀ ਹੋਈ ਹੋਵੇ, ਉਸ ਅੰਦਰ ਇਕ ਜਜ਼ਬਾ ਉੱਠ ਖੜ੍ਹਾ ਹੁੰਦਾ ਹੈ। ਆਪਣੀ ਗਵਾਚੀ ਹੋਈ ਇੱਜ਼ਤ ਨੂੰ ਮੁੜ ਵਾਪਸ ਲਿਆਉਣ ਲਈ। ਇਸ ਚੀਜ਼ ਦੀ ਪਰਖ ਹਮੇਸ਼ਾ ਬੁਰੇ ਵਕਤ ਵਿਚ ਹੁੰਦੀ ਹੈ। ਸਿਆਣੇ ਕਹਿੰਦੇ ਹਨ ਕਿ ਆਪਣੇ-ਆਪ ਨੂੰ ਕਦੇ ਮਾੜਾ ਨਾ ਸਮਝੋ, ਬੰਦਾ ਕਦੇ ਮਾੜਾ ਨਹੀਂ ਹੁੰਦਾ ਪਰ ਉਸ ਦੇ ਹਾਲਾਤ ਜ਼ਰੂਰ ਮਾੜੇ ਹੋ ਜਾਂਦੇ ਹਨ। ਜੇਕਰ ਬੰਦ ਘੜੀ ਦਿਨ ਵਿਚ ਦੋ ਵਾਰ ਸਹੀ ਸਮਾਂ ਦੱਸ ਸਕਦੀ ਹੈ ਤਾਂ ਬੁਰੇ ਵਕਤ ਵਿਚ ਤੁਹਾਡੀ ਚੰਗੀ ਸੋਚ ਵੀ ਕੁਝ ਚੰਗਾ ਕਰ ਸਕਦੀ ਹੈ।
ਜਦੋਂ ਸਮਾਂ ਆ ਜਾਵੇ, ਮਨ ਬਹੁਤ ਡੋਲ ਰਿਹਾ ਹੋਵੇ ਤੇ ਫਿਰ ਯਾਦ ਕਰੋ ਆਪਣੇ ਤਾਅਨੇ-ਮਿਹਣਿਆਂ ਵਾਲਾ ਦਿਨ। ਫਿਰ ਯਾਦ ਕਰਿਓ ਆਪਣੇ ਕਹੇ ਲਫ਼ਜ਼ਾਂ ਨੂੰ। ਦੇਖਿਓ, ਫਿਰ ਆਪਣੇ-ਆਪ ਹੀ ਪੈ ਜਾਉਂਗੇ ਸਿੱਧੇ ਰਾਹ 'ਤੇ। ਕਹਿਣ ਨੂੰ ਤਾਂ ਬਹੁਤ ਸੁਖਾਲਾ ਹੈ ਕਿ ਨਾਲ ਦਾ ਬੰਦਾ ਤਾਂ ਬਈ ਬੜੇ ਵੱਡੇ ਮੁਕਾਮ 'ਤੇ ਪਹੁੰਚ ਗਿਆ ਪਰ ਆਹ ਤਾਂ ਦੇਖਿਆ ਹੀ ਨਹੀਂ ਕਿ ਉਸ ਮੁਕਾਮ 'ਤੇ ਪਹੁੰਚਣ ਲਈ ਉਸ ਨੇ ਮਿਹਨਤ ਕਿੰਨੀ ਕੀਤੀ। ਜੇਕਰ ਬਿਨਾਂ ਮਿਹਨਤਾਂ ਤੋਂ ਮੁਕਾਮ ਮਿਲਦੇ ਹੁੰਦੇ ਤਾਂ ਅੱਜ ਸਾਰੀ ਦੁਨੀਆ ਹੀ ਮਿਥਿਆ ਮੁਕਾਮ ਪਾ ਲੈਂਦੀ। ਨਾਲੇ ਸਾਰੇ ਦਿਨ ਇਕੋ ਵਰਗੇ ਨਹੀਂ ਹੁੰਦੇ। ਕਿਸੇ-ਕਿਸੇ ਦਿਨ ਤਾਂ ਕੰਮ ਲਈ ਜੋਸ਼ ਸਿਖਰਾਂ 'ਤੇ ਹੁੰਦਾ ਤੇ ਕਈ ਵਾਰ ਬਿਲਕੁਲ ਹੀ ਉਲਟ ਹੋ ਜਾਂਦਾ। ਜੇਕਰ ਜੋਸ਼ ਨੂੰ ਵੱਸ ਵਿਚ ਕਰਨਾ ਚਾਹੋ ਤਾਂ ਆਪਣਾ ਸਬਰ ਵਾਲਾ ਬੰਨ੍ਹ ਨਾ ਟੁੱਟਣ ਦਿਓ। ਜਿਹੜੀ ਚੀਜ਼ ਹਾਸਲ ਕਰਨਾ ਚਾਹੁੰਦੇ ਹੋ, ਉਸ ਨਾਲ ਦਿਲੋਂ ਪਿਆਰ ਕਰਨਾ ਸ਼ੁਰੂ ਕਰ ਦਿਓ, ਨਾ ਕਿ ਉਸ ਖਾਤਰ ਕਦੀ-ਕਦੀ ਹੀ ਮਿਹਨਤ ਕਰੋ।
ਬੂਟੇ ਲਾਉਣੇ ਤਾਂ ਬਹੁਤ ਸੌਖੇ ਹਨ ਪਰ ਦੇਖਭਾਲ ਕਰਕੇ ਪਾਲਣੇ ਬੜੇ ਔਖੇ ਹਨ। ਇਸੇ ਤਰ੍ਹਾਂ ਜ਼ਿੰਦਗੀ ਵਿਚ ਆਪਣਾ ਭਵਿੱਖ ਬਣਾਉਣ ਵਾਸਤੇ ਪੂਰੀ ਮਿਹਨਤ ਤੇ ਮੁਸ਼ੱਕਤ ਕਰਨੀ ਪੈਂਦੀ ਹੈ। ਵਧੀਆ ਦੇਖਭਾਲ ਨਾਲ ਤੇ ਸਹੀ ਪਾਣੀ-ਖੁਰਾਕ ਮਿਲਣ ਨਾਲ ਬੂਟੇ 'ਤੇ ਫੁੱਲ ਖਿੜਦੇ ਹਨ। ਉਸੇ ਤਰ੍ਹਾਂ ਹੀ ਜਦੋਂ ਜ਼ਿੰਦਗੀ ਵਿਚ ਅਸਲ ਮਿਹਨਤ ਦਾ ਮੁੱਲ ਮਿਲਦਾ ਹੈ ਤਾਂ ਫਿਰ ਫੁੱਲ ਦੀ ਖ਼ੁਸ਼ਬੂ ਸਾਰਿਆਂ ਤੱਕ ਮਹਿਕਦੀ ਹੈ ਤੇ ਰੂਹ ਨੂੰ ਬੜਾ ਸਕੂਨ ਮਿਲਦਾ ਹੈ। ਮੈਂ ਵੀ ਕੋਈ ਬਾਹਲਾ ਸਿਆਣਾ ਤਾਂ ਹੈ ਨਹੀਂ, ਮੈਂ ਵੀ ਰੋਜ਼ ਟੁੱਟਦਾ, ਡਿੱਗਦਾ ਤੇ ਫਿਰ ਉੱਠ ਖੜੋਂਦਾ ਹਾਂ ਤੇ ਮਿਹਨਤ ਦੇ ਰਸਤੇ 'ਤੇ ਜਾਣ ਦੀ ਕੋਸ਼ਿਸ਼ ਕਰ ਰਿਹਾਂ। ਅੰਤ 'ਤੇ ਮੈਂ ਇਹੀ ਕਹਿਣਾ ਚਾਹਾਂਗਾ ਕਿ ਉਦੋਂ ਤੱਕ ਮਿਹਨਤ ਕਰਨ ਵਿਚ ਜੁਟੇ ਰਹੋ ਜਦੋਂ ਤੱਕ ਜਿਸ ਇਨਸਾਨ ਦੇ ਮੂੰਹੋਂ ਤੁਸੀਂ ਬੇਇੱਜ਼ਤੀ ਸੁਣੀ ਸੀ, ਉਸ ਦੇ ਮੂੰਹੋਂ ਇੱਜ਼ਤ ਤੇ ਤਾਰੀਫ ਨਾ ਸੁਣ ਲਵੋ। ਔਕੜਾਂ ਦੇਖ ਕੇ ਕਦੇ ਨਾ ਭੱਜਿਓ, ਹਮੇਸ਼ਾ ਡਟੇ ਰਹਿਓ, ਕਿਉਂਕਿ ਵਧੀਆ ਚੀਜ਼ਾਂ ਦਾ ਨਤੀਜਾ ਛੇਤੀ ਨਹੀਂ ਮਿਲਦਾ ਤੇ ਜਿਸ ਚੀਜ਼ ਦਾ ਨਤੀਜਾ ਛੇਤੀ ਮਿਲਦਾ, ਉਹ ਜ਼ਿਆਦਾ ਦੇਰ ਤੱਕ ਨਹੀਂ ਟਿਕਦੀ।

-(ਕੈਨੇਡਾ)। ਮੋਬਾ: +14379818227

ਆਰਥਿਕ ਅਤੇ ਮਨੁੱਖੀ ਹੁਨਰ ਦੇ ਗੰਭੀਰ ਸੰਕਟ ਦੀ ਚਿਤਾਵਨੀ

ਪੰਜਾਬੀਆਂ ਵਲੋਂ ਪ੍ਰਵਾਸ ਕੀਤੇ ਜਾਣ ਦਾ ਸਿਲਸਿਲਾ ਬੇਸ਼ੱਕ ਕਾਫੀ ਪੁਰਾਣਾ ਹੈ, ਪਰ ਇਨ੍ਹੀਂ ਦਿਨੀਂ ਚੱਲ ਰਹੇ ਪ੍ਰਵਾਸ ਦੇ ਰੁਝਾਨ ਵਿਚ ਪੁਰਾਤਨ ਸਮਿਆਂ ਦੇ ਪ੍ਰਵਾਸ ਨਾਲੋਂ ਜ਼ਮੀਨ-ਅਸਮਾਨ ਦਾ ਅੰਤਰ ਹੈ। ਪੁਰਾਤਨ ਸਮਿਆਂ 'ਚ ਪਰਿਵਾਰ ਦੇ ਇਕ-ਦੋ ਜੀਅ ਮੈਂਬਰ ਵਿਦੇਸ਼ਾਂ ਵਿਚ ਕਮਾਈ ਕਰਨ ਦੇ ਮਨੋਰਥ ਨਾਲ ਜਾਂਦੇ ਸਨ। ਵਿਦੇਸ਼ੀ ਧਰਤੀ 'ਤੇ ਪੱਕੇ ਤੌਰ 'ਤੇ ਵਸਣ ਦਾ ਤਾਂ ਕਦੇ ਉਨ੍ਹਾਂ ਸੁਪਨਾ ਵੀ ਨਹੀਂ ਵੇਖਿਆ ਹੁੰਦਾ ਸੀ।
ਪਰ ਹੁਣ ਪ੍ਰਵਾਸ ਦੇ ਮਾਮਲੇ ਵਿਚ ਉਲਟੀ ਗੰਗਾ ਵਗੀ ਹੋਈ ਹੈ। ਅੱਜ ਦੇ ਜ਼ਮਾਨੇ ਵਿਚ ਸਾਡੇ ਪੜ੍ਹੇ-ਲਿਖੇ ਨੌਜਵਾਨ ਮੁੰਡੇ-ਕੁੜੀਆਂ ਨੂੰ ਤਾਂ ਜਿਵੇਂ ਆਪਣੇ ਮੁਲਕ ਅਤੇ ਸੂਬੇ ਤੋਂ ਨਫ਼ਰਤ ਹੀ ਹੋ ਗਈ ਹੈ। ਕਈ ਵਰ੍ਹੇ ਪਹਿਲਾਂ ਮਾਪੇ ਆਪਣੇ ਬੱਚਿਆਂ ਨੂੰ ਵਿਦੇਸ਼ ਜਾਣ ਦੀ ਬਜਾਏ ਇਧਰ ਹੀ ਕੋਈ ਰੁਜ਼ਗਾਰ ਤਲਾਸ਼ਣ ਲਈ ਮਜਬੂਰ ਕਰਦੇ ਸਨ, ਪਰ ਅੱਜ ਦੀ ਤਰੀਕ ਵਿਚ ਮਾਪੇ ਵੀ ਬੱਚਿਆਂ ਦੀ ਵਿਦੇਸ਼ ਜਾਣ ਦੀ ਇੱਛਾ ਨਾਲ ਇਕਸੁਰ ਹੋਣਾ ਸ਼ੁਰੂ ਹੋ ਗਏ ਹਨ। ਵਰਨਣਯੋਗ ਹੈ ਕਿ ਪ੍ਰਵਾਸ ਕਰਨ ਵਾਲੇ ਹੁਸ਼ਿਆਰ ਅਤੇ ਲਾਇਕ ਨੌਜਵਾਨ ਸਿਰਫ ਕਮਾਈ ਕਰਨ ਦੇ ਮਨੋਰਥ ਨਾਲ ਵਿਦੇਸ਼ ਨਹੀਂ ਜਾ ਰਹੇ, ਬਲਕਿ ਉਹ ਤਾਂ ਪੱਕੇ ਤੌਰ 'ਤੇ ਆਪਣੇ ਵਤਨ ਨੂੰ ਅਲਵਿਦਾ ਕਹਿ ਰਹੇ ਹਨ।
ਪਿਛਲੇ ਦਿਨੀਂ ਪ੍ਰਕਾਸ਼ਿਤ ਅਖ਼ਬਾਰੀ ਰਿਪੋਰਟਾਂ ਅਨੁਸਾਰ ਸਾਡੇ ਕਾਲਜਾਂ ਵਿਚ ਵੱਡੀ ਗਿਣਤੀ ਵਿਚ ਸੀਟਾਂ ਖਾਲੀ ਰਹਿਣ ਲੱਗੀਆਂ ਹਨ। ਸਾਡੀਆਂ ਯੂਨੀਵਰਸਿਟੀਆਂ ਅਤੇ ਕਾਲਜ ਲਗਾਤਾਰ ਵੀਰਾਨ ਹੋ ਰਹੇ ਹਨ। ਮਾਪੇ ਬੈਕਾਂ ਤੋਂ ਸਿੱਖਿਆ ਕਰਜ਼ੇ ਲੈ ਕੇ ਜਾਂ ਜਾਇਦਾਦਾਂ ਵੇਚ ਕੇ ਬੱਚਿਆਂ ਦੀਆਂ ਮਹਿੰਗੀਆਂ ਵਿਦੇਸ਼ੀ ਫੀਸਾਂ ਤਾਰ ਰਹੇ ਹਨ। ਵਿਦੇਸ਼ੀ ਕਾਲਜ ਸਾਡੇ ਬੱਚਿਆਂ ਤੋਂ ਮੂੰਹ ਮੰਗਵੀਆਂ ਫੀਸਾਂ ਲੈ ਰਹੇ ਹਨ। ਪ੍ਰਵਾਸ ਕਰਨ ਵਾਲੇ ਇਨ੍ਹਾਂ ਬੱਚਿਆਂ ਨੇ ਕਦੇ ਵੀ ਵਾਪਸ ਨਹੀਂ ਪਰਤਣਾ ਅਤੇ ਇਨ੍ਹਾਂ ਨੇ ਵਿਦੇਸ਼ ਦੀ ਤਰੱਕੀ ਲਈ ਹੀ ਕਾਰਜ ਕਰਨਾ ਹੈ।
ਹਰ ਵਰ੍ਹੇ ਹੋਣ ਵਾਲੇ ਪ੍ਰਵਾਸ ਦੀ ਗਿਣਤੀ ਲੱਖਾਂ ਵਿਚ ਪੁੱਜ ਗਈ ਹੈ। ਪ੍ਰਵਾਸ ਦੇ ਇਸ ਵਰਤਾਰੇ ਨੇ ਸਾਡੇ ਮੁਲਕ ਅਤੇ ਸੂਬੇ ਦੀ ਆਰਥਿਕਤਾ ਨੂੰ ਲਗਾਤਾਰ ਖੋਰਾ ਲਗਾਉਣਾ ਸ਼ੁਰੂ ਕੀਤਾ ਹੋਇਆ ਹੈ। ਪ੍ਰਵਾਸ ਨੂੰ ਲਗਾਮ ਦੇਣ ਲਈ ਸਰਕਾਰਾਂ ਨੂੰ ਇਸ ਮੁੱਦੇ ਪ੍ਰਤੀ ਗੰਭੀਰਤਾ ਵਿਖਾਉਂਦਿਆਂ ਵਿਆਪਕ ਯੋਜਨਾ ਉਲੀਕਣੀ ਪਵੇਗੀ। ਨੌਜਵਾਨਾਂ ਲਈ ਰੋਜ਼ਗਾਰ ਦੇ ਮੌਕੇ ਉਪਲਬਧ ਕਰਵਾਉਣੇ ਪੈਣਗੇ। ਨੌਕਰੀ ਦੌਰਾਨ ਵਧੀਆ ਮਾਹੌਲ ਅਤੇ ਵੇਤਨ ਦੇ ਕੇ ਨੌਜਵਾਨਾਂ ਨੂੰ ਆਕਰਸ਼ਿਤ ਕਰਨਾ ਹੋਵੇਗਾ। ਨੌਕਰੀ ਦੌਰਾਨ ਕੀਤਾ ਜਾ ਰਿਹਾ ਆਰਥਿਕ ਸ਼ੋਸਣ ਰੋਕਣਾ ਹੋਵੇਗਾ। ਜੇਕਰ ਸਰਕਾਰਾਂ ਨੇ ਸਮਾਂ ਰਹਿੰਦੇ ਨੌਜਵਾਨਾਂ ਦੇ ਪ੍ਰਵਾਸ ਪ੍ਰਤੀ ਗੰਭੀਰਤਾ ਨਾ ਵਿਖਾਈ ਤਾਂ ਆਉਣ ਵਾਲੇ ਕੁਝ ਹੀ ਵਰ੍ਹਿਆਂ ਵਿਚ ਪੰਜਾਬ ਆਰਥਿਕ ਅਤੇ ਮਨੁੱਖੀ ਹੁਨਰ ਦੇ ਗੰਭੀਰ ਸੰਕਟ ਦੀ ਦਹਿਲੀਜ਼ 'ਤੇ ਹੋਵੇਗਾ।

-ਗਲੀ ਨੰਬਰ 1, ਸ਼ਕਤੀ ਨਗਰ, ਬਰਨਾਲਾ। ਮੋਬਾ: 98786-05965

ਸ਼ਾਬਾਸ਼ ਦੇ ਹੱਕਦਾਰ ਬਣੋ-ਸਰਬਸੰਮਤੀ ਨਾਲ ਪੰਚਾਇਤ ਚੁਣੋ

ਚੋਣਾਂ ਦੌਰਾਨ ਨੇਤਾਵਾਂ ਦੀ ਤਾਂ ਖੂਬ ਬੱਲੇ-ਬੱਲੇ ਹੁੰਦੀ ਹੈ ਅਤੇ ਉਹ ਚੋਣਾਂ ਦੇ ਦਿਨਾਂ ਵਿਚ ਖੂਬ ਸ਼ਿਕਾਰ ਖੇਡਣ ਜਾਣ ਦੀ ਮੁਹਿੰਮ ਵਾਂਗ, ਚੋਣਾਵੀ ਦੌਰਿਆਂ 'ਤੇ ਨਿਕਲਦੇ ਹਨ। ਉਹ ਵੋਟਾਂ ਲਈ ਲੋਕਤੰਤਰ ਦੀ ਜੈ-ਜੈ ਕਾਰ ਕਰਦੇ ਹਨ। ਪਰ ਕਈ ਵਾਰ ਤਾਂ ਪਾੜੋ ਅਤੇ ਰਾਜ ਕਰੋ ਦੀ ਰਾਜਨੀਤਕ ਚਾਲ ਵੀ ਖੇਡਦੇ ਹਨ। ਇਨ੍ਹਾਂ ਵੋਟਾਂ ਲਈ ਦੇਸ਼ ਦਾ ਇਹ ਹਾਲ ਹੈ ਕਿ ਦੇਸ਼ ਦੇ ਪ੍ਰਧਾਨ ਮੰਤਰੀ ਨੂੰ ਵੀ ਕੰਮ ਕਰਨ ਦਾ ਸਮਾਂ ਘੱਟ ਅਤੇ ਵੋਟਾਂ ਮੰਗਣ ਦਾ ਸਮਾਂ ਵੱਧ ਲਗਾਉਣਾ ਪੈਂਦਾ ਹੈ। ਇਨ੍ਹਾਂ ਵੋਟਾਂ ਸਮੇਂ ਗਰੀਬਾਂ ਦੀ ਹਾਲਤ ਬੜੀ ਤਰਸਯੋਗ ਬਣ ਜਾਂਦੀ ਹੈ। ਹਰ ਕੋਈ ਢੱਠੇ ਸਾਨ੍ਹ ਵਾਂਗ ਉਨ੍ਹਾਂ 'ਤੇ ਰੋਹਬ ਮਾਰਦਾ ਹੈ। ਜੇ ਕੁਝ ਨਹੀਂ ਹੁੰਦਾ ਤਾਂ ਪੈਸਿਆਂ ਅਤੇ ਸ਼ਰਾਬ ਦਾ ਲਾਲਚ ਦੇ ਕੇ ਉਨ੍ਹਾਂ ਦਾ ਸ਼ੋਸ਼ਣ ਕਰਦਾ ਹੈ। ਇਸ ਤਰ੍ਹਾਂ ਚੋਣਾਂ ਸਮੇਂ ਪਿੰਡਾਂ ਦੀ ਹਾਲਤ ਤਾਂ ਬਹੁਤ ਤਰਸਯੋਗ ਬਣ ਜਾਂਦੀ ਹੈ।
ਇੱਥੇ ਇਹ ਗੱਲ ਦੱਸਣੀ ਬਹੁਤ ਜ਼ਰੂਰੀ ਹੈ ਕਿ ਹੁਣ ਪੰਜਾਬ ਵਿਚ ਪਿੰਡਾਂ ਦੀਆਂ ਪੰਚਾਇਤਾਂ ਬਣਾਉਣ ਲਈ ਚੋਣਾਂ ਹੋਣ ਦੀ ਤਿਆਰੀ ਹੈ ਅਤੇ ਹੁਣ ਤੋਂ ਵੱਖ-ਵੱਖ ਪਾਰਟੀਆਂ ਵਲੋਂ ਧੜੇਬੰਦੀਆਂ ਸ਼ੁਰੂ ਹੋ ਗਈਆਂ ਹਨ। ਇਨ੍ਹਾਂ ਧੜੇਬੰਦੀਆਂ ਦੇ ਚਲਦੇ ਪਿੰਡਾਂ ਵਿਚ ਝਗੜੇ ਵਧ ਜਾਂਦੇ ਹਨ ਅਤੇ ਕਈ ਵਾਰ ਤਾਂ ਇਹ ਝਗੜੇ ਵੋਟਾਂ ਤੋਂ ਬਾਅਦ ਵੀ ਵਧਦੇ ਹੀ ਜਾਂਦੇ ਹਨ ਅਤੇ ਇਥੋਂ ਤੱਕ ਕਿ ਬਹੁਤ ਵਾਰ ਤਾਂ ਭਿਆਨਕ ਰੂਪ ਧਾਰ ਲੈਂਦੇ ਹਨ। ਹੁਣ ਇਨ੍ਹਾਂ ਝਗੜਿਆਂ ਤੋਂ ਬਚਣ ਦਾ ਸੁਨਹਿਰੀ ਮੌਕਾ ਹੈ ਕਿ ਪਿੰਡਾਂ ਵਿਚ ਚੋਣਾਂ ਸਮੇਂ ਪਿੰਡ ਦੇ ਹੀ ਕੁਝ ਸਿਆਣੇ ਵਿਅਕਤੀਆਂ ਨੂੰ ਸਰਬਸੰਮਤੀ ਨਾਲ ਪੰਚ ਅਤੇ ਸਰਪੰਚ ਚੁਣ ਕੇ ਬਿਨਾਂ ਵੋਟਾਂ ਦੇ ਹੀ ਪੰਚਾਇਤ ਬਣਾਈ ਜਾਵੇ ਤਾਂ ਕਿ ਪਿੰਡ ਦੇ ਸਭ ਲੋਕ ਧੜੇਬੰਦੀ ਤੋਂ ਨਿਰਪੱਖ ਹੋ ਕੇ ਪਿੰਡ ਦੇ ਵਿਕਾਸ ਵਿਚ ਹਿੱਸਾ ਪਾ ਸਕਣ। ਵਿਕਾਸ ਦੀ ਗੱਲ ਵੀ ਤਾਂ ਹੀ ਚੰਗੀ ਲਗਦੀ ਹੈ, ਜੇ ਪਿੰਡ ਵਿਚ ਸੁੱਖ-ਸ਼ਾਂਤੀ ਅਤੇ ਭਾਈਚਾਰੇ ਵਾਲਾ ਮਾਹੌਲ ਹੋਵੇਗਾ।
ਸਰਕਾਰ ਵਲੋਂ ਵੀ ਸਰਬਸੰਮਤੀ ਨਾਲ ਚੁਣੀਆਂ ਗਈਆਂ ਪੰਚਾਇਤਾਂ ਲਈ ਇਨਾਮ ਰੱਖੇ ਗਏ ਹਨ ਤਾਂ ਕਿ ਉਨ੍ਹਾਂ ਪਿੰਡਾਂ ਵਾਲੇ ਇਸ ਗੱਲ ਦਾ ਲਾਭ ਉਠਾਉਣ ਅਤੇ ਸਰਕਾਰ ਵਲੋਂ ਮਿਲੀ ਇਨਾਮੀ ਰਕਮ ਨੂੰ ਪਿੰਡਾਂ ਦੇ ਵਿਕਾਸ ਕਾਰਜਾਂ ਵਿਚ ਲਗਾ ਕੇ ਸਭ ਪਿੰਡ ਵਾਸੀਆਂ ਦਾ ਜੀਵਨ ਪੱਧਰ ਉੱਚਾ ਚੁੱਕਣ ਵਿਚ ਮਦਦਗਾਰ ਹੋਣ।
ਪਿੰਡਾਂ ਵਿਚ ਅਜੇ ਵੀ ਬਹੁਤ ਕੁਝ ਕਰਨਾ ਬਾਕੀ ਹੈ, ਚੰਗੇ ਸਕੂਲ, ਸਿਹਤ ਕੇਂਦਰ, ਬੈਂਕ, ਡਾਕਘਰ, ਸਫਾਈ ਦਾ ਪ੍ਰਬੰਧ, ਪਸ਼ੂ ਹਸਪਤਾਲ, ਡੇਅਰੀ ਵਿਕਾਸ ਅਤੇ ਸਭ ਤੋਂ ਵੱਧ ਪਿੰਡ ਨੂੰ ਹਰਿਆ-ਭਰਿਆ ਬਣਾਉਣਾ ਹਰ ਪਿੰਡ ਵਾਸੀ ਲੋਚਦਾ ਹੈ। ਇਸ ਸਬੰਧ ਵਿਚ ਪਿੰਡ ਦੇ ਨੌਜਵਾਨਾਂ, ਪੜ੍ਹੇ-ਲਿਖੇ ਲੋਕਾਂ, ਸਮਾਜ ਸੇਵੀਆਂ ਅਤੇ ਅਧਿਆਪਕਾਂ ਦਾ ਅਹਿਮ ਰੋਲ ਹੋ ਸਕਦਾ ਹੈ ਅਤੇ ਇਹ ਗੱਲ ਰਾਜਨੀਤਕ ਲੋਕਾਂ ਦੇ ਹੱਕ ਵਿਚ ਵੀ ਜਾਂਦੀ ਹੈ, ਕਿਉਂਕਿ ਹਰ ਪਾਰਟੀ ਦੇ ਨੁਮਾਇੰਦੇ ਪੰਚਾਇਤ ਪ੍ਰਣਾਲੀ ਦਾ ਅੰਗ ਬਣ ਸਕਦੇ ਹਨ।

-ਮ: ਨੰ: 3098, ਸੈਕਟਰ 37-ਡੀ, ਚੰਡੀਗੜ੍ਹ। ਮੋਬਾ: 98764-52223

ਸੱਭਿਆਚਾਰ ਦੀ ਇਹ ਕਿਹੜੀ ਤਸਵੀਰ ਪੇਸ਼ ਕੀਤੀ ਜਾ ਰਹੀ ਹੈ?

ਕਿਸੇ ਵੀ ਦੇਸ਼ ਜਾਂ ਸਮਾਜ ਦੀ ਪਹਿਚਾਣ ਉਸ ਦੇ ਸੱਭਿਆਚਾਰ ਤੋਂ ਸਹਿਜੇ ਹੀ ਕੀਤੀ ਜਾ ਸਕਦੀ ਹੈ, ਸੱਭਿਆਚਾਰ ਉੱਥੋਂ ਦੇ ਲੋਕਾਂ ਦੇ ਬੋਲਣ-ਚੱਲਣ, ਪਹਿਰਾਵਾ, ਰਹਿਣ-ਸਹਿਣ, ਰੀਤੀ-ਰਿਵਾਜ ਅਤੇ ਕਦਰਾਂ-ਕੀਮਤਾਂ ਦਾ ਪ੍ਰਗਟਾਵਾ ਕਰਦਾ ਹੈ। ਪਰ ਅੱਜਕਲ੍ਹ ਜੋ ਸਾਨੂੰ ਪੰਜਾਬੀ ਗੀਤਾਂ ਵਿਚ ਪੰਜਾਬੀ ਸੱਭਿਆਚਾਰ ਦੇ ਨਾਂਅ ਹੇਠ ਦਿਖਾਇਆ ਜਾ ਰਿਹਾ ਹੈ ਜਾਂ ਇਹ ਮੰਨ ਲਿਆ ਜਾਵੇ ਕਿ ਸਾਡੇ 'ਤੇ ਜ਼ੋਰ-ਸ਼ੋਰ ਨਾਲ ਥੋਪਿਆ ਜਾ ਰਿਹਾ ਹੈ, ਉਹ ਪੰਜਾਬੀ ਸੱਭਿਆਚਾਰ ਤੋਂ ਕੋਹਾਂ ਦੂਰ ਹੈ। ਪੰਜਾਬੀ ਗਾਣੇ ਨਿਰ੍ਹਾ ਲੱਚਰਤਾ, ਨਸ਼ੇ ਅਤੇ ਹਥਿਆਰਾਂ ਦੀ ਨਜਾਇਜ਼ ਵਰਤੋਂ ਉੱਤੇ ਹੀ ਕੇਂਦਰਿਤ ਹੋ ਕੇ ਰਹਿ ਗਏ ਹਨ। ਔਰਤ ਜਿਸ ਦਾ ਕਿਸੇ ਵੀ ਸਮਾਜ ਜਾਂ ਦੇਸ਼ ਦੀ ਖ਼ੁਸ਼ਹਾਲੀ ਲਈ ਮਹੱਤਵਪੂਰਨ ਯੋਗਦਾਨ ਹੁੰਦਾ ਹੈ, ਉਸ ਨੂੰ ਕੇਵਲ ਇਕ ਨੁਮਾਇਸ਼ ਦੇ ਰੂਪ ਵਿਚ ਪੇਸ਼ ਕਰਨਾ ਇਕ ਸਮਾਜ ਦੀ ਨਿੱਘਰ ਰਹੀ ਸਥਿਤੀ ਨੂੰ ਉਜਾਗਰ ਕਰਦਾ ਹੈ। ਜੇ ਅੱਜਕਲ੍ਹ ਦੇ ਗਾਣਿਆਂ ਦੇ ਵਿਸ਼ੇ ਅਨੁਸਾਰ ਸੋਚੀਏ, ਫਿਰ ਤਾਂ ਇਸ ਤਰ੍ਹਾਂ ਮਹਿਸੂਸ ਹੁੰਦਾ ਕਿ ਜੱਟ ਤਾਂ ਹਮੇਸ਼ਾ ਬੰਦੂਕ ਆਪਣੇ ਮੋਢੇ 'ਤੇ ਰੱਖ ਕੇ ਹਮੇਸ਼ਾ ਲੜਨ ਲਈ ਤਿਆਰ ਹੀ ਰਹਿੰਦਾ ਹੈ, ਇਸ ਨਾਲ ਇਸ ਅਣਖੀ ਅਤੇ ਮਿਹਨਤੀ ਕੌਮ ਦੇ ਕਿਰਦਾਰ ਨੂੰ ਠੇਸ ਪਹੁੰਚਾਈ ਜਾ ਰਹੀ ਹੈ।
ਕਈ ਗਾਇਕ ਵੀਰ ਤਰਕ ਦੇ ਰਹੇ ਹਨ ਕਿ ਜਿਸ ਨੇ ਜੋ ਸੁਣਨਾ ਹੈ ਉਹ ਸੁਣ ਰਿਹਾ ਹੈ ਤੇ ਅਸੀਂ ਤਾਂ ਉਹੀ ਗਾ ਰਹੇ ਹਾਂ ਜੋ ਲੋਕ ਸੁਣਨਾ ਚਾਹੁੰਦੇ ਹਨ, ਮੈਨੂੰ ਲੱਗਦਾ ਸ਼ਾਇਦ ਉਹ 'ਰੰਗਲਾ ਪੰਜਾਬ' ਜਿਹੇ ਸੱਭਿਆਚਰਕ ਗੀਤ ਦੀ ਕਾਮਯਾਬੀ ਨੂੰ ਭੁੱਲ ਗਏ ਹਨ। ਇਸ ਵਿਚਾਰ ਦੇ ਸੰਦਰਭ ਵਿਚ ਇਹ ਵੀ ਕਹਿਣਾ ਬਣਦਾ ਹੈ ਕਿ ਅਸੀਂ ਸਮਾਜ ਪ੍ਰਤੀ ਆਪਣੀ ਜ਼ਿੰਮੇਵਾਰੀ ਤੋਂ ਭੱਜ ਨਹੀਂ ਸਕਦੇ, ਸਾਨੂੰ ਸਿਰਫ਼ ਅਤੇ ਸਿਰਫ਼ ਆਪਣੀ ਵਪਾਰਕ ਕਮਾਈ ਨਾਲ ਹੀ ਸੰਤੁਸ਼ਟ ਨਹੀਂ ਹੋਣਾ ਚਾਹੀਦਾ, ਜੇ ਸਾਡੇ ਬੋਲਾਂ ਅਤੇ ਭਾਵਾਂ ਦੇ ਪ੍ਰਭਾਵ ਕਾਰਨ ਨੌਜਵਾਨੀ ਕੁਰਾਹੇ ਪੈ ਰਹੀ ਹੈ ਤਾਂ ਸਾਨੂੰ ਇਸ ਦੇ ਲਈ ਸਵੈ-ਚਿੰਤਨ ਕਰ ਲੈਣਾ ਚਾਹੀਦਾ ਹੈ। ਆਏ ਦਿਨ ਨਸ਼ੇ ਨਾਲ ਪੰਜਾਬੀ ਗੱਭਰੂਆਂ ਦੀ ਮੌਤ ਦੀਆਂ ਖ਼ਬਰਾਂ ਸਾਨੂੰ ਸੁਣਨ ਨੂੰ ਮਿਲ ਰਹੀਆਂ ਹਨ, ਫਿਰ ਕਿਉਂ ਨਸ਼ਿਆਂ ਵੱਲ ਪ੍ਰੇਰਿਤ ਕਰਨ ਵਾਲੇ ਗੀਤ ਲਿਖੇ ਅਤੇ ਗਾਏ ਜਾ ਰਹੇ ਹਨ? ਸਾਡਾ ਤਾਂ ਵਿਰਸਾ ਹੀ ਚਿੰਤਨ ਤੋਂ ਚਾਨਣ ਤੱਕ ਜਾਣ ਦਾ ਸਫ਼ਰ ਹੈ।
ਅੱਜ ਸਾਡੇ ਕਾਲਜਾਂ-ਯੂਨੀਵਰਸਿਟੀਆਂ ਵਿਚ ਸੱਭਿਆਚਾਰ ਦੇ ਨਾਂਅ 'ਤੇ ਲੱਚਰਤਾ ਨੂੰ ਦਿਖਾਉਣ ਵਾਲੇ ਗਾਇਕਾਂ ਨੂੰ ਸੱਦ ਕੇ ਪ੍ਰੋਗਰਾਮ ਕਰਵਾਏ ਜਾਂਦੇ ਹਨ, ਘੱਟੋ-ਘੱਟ ਵਿੱਦਿਆ ਦੇ ਮੰਦਰ ਇਨ੍ਹਾਂ ਵਿੱਦਿਅਕ ਅਦਾਰਿਆਂ ਦੀਆਂ ਪ੍ਰਬੰਧਕੀ ਕਮੇਟੀਆਂ ਨੂੰ ਅਜਿਹੇ ਪ੍ਰੋਗਰਾਮਾਂ ਤੋਂ ਗੁਰੇਜ਼ ਕਰਨਾ ਚਾਹੀਦਾ ਹੈ।
ਜੇ ਅਸੀਂ ਸਮਾਜ ਨੂੰ ਸਹੀ ਸੇਧ ਦੇਣੀ ਚਾਹੁੰਦੇ ਹਾਂ ਤਾਂ ਸਾਨੂੰ ਅੱਜ ਲੋੜ ਹੈ ਚੰਗੇ ਵਿਸ਼ੇ ਵਾਲੇ ਗੀਤ-ਸੰਗੀਤ ਦੀ, ਜੋ ਨਵੀਂ ਪੀੜ੍ਹੀ ਦੀ ਯੋਗ ਅਗਵਾਈ ਕਰਨ ਅਤੇ ਉਨ੍ਹਾਂ ਦੀ ਸਰਬਪੱਖੀ ਸ਼ਖ਼ਸੀਅਤ ਉਸਾਰਨ ਤਾਂ ਜੋ ਉਹ ਅੱਜ ਵਿਸ਼ਵੀਕਰਨ ਦੇ ਯੁੱਗ ਵਿਚ ਕਾਮਯਾਬੀ ਹਾਸਲ ਕਰ ਸਕਣ। ਅਜਿਹੇ ਵਿਚ ਇੱਥੇ ਇਹ ਵੀ ਦੱਸਣਯੋਗ ਹੈ ਕਿ ਕੁਝ ਅਜਿਹੇ ਗਾਇਕ ਵੀ ਹਨ, ਜਿਨ੍ਹਾਂ ਨੇ ਹਮੇਸ਼ਾ ਸਮਾਜ ਨੂੰ ਉਸਾਰੂ ਸੋਚ ਵਾਲੇ ਹੀ ਗੀਤ ਦਿੱਤੇ ਹਨ। ਉਨ੍ਹਾਂ ਗਾਇਕ ਵੀਰਾਂ ਦਾ ਤਹਿ-ਦਿਲੋਂ ਸਤਿਕਾਰ ਕਰਨਾ ਵੀ ਬਣਦਾ ਹੈ। ਪੰਜਾਬ ਜਿਸ ਦੇ ਕਣ-ਕਣ ਵਿਚ ਸ਼ਹੀਦਾਂ ਦਾ ਖ਼ੂਨ ਡੁੱਲ੍ਹਿਆ ਹੈ, ਉਥੋਂ ਦੀ ਨਵੀਂ ਪੀੜ੍ਹੀ ਨੂੰ ਆਪਣੇ ਮਹਾਨ ਵਿਰਸੇ ਨਾਲ ਜਾਣੂ ਕਰਵਾਉਣਾ ਸਾਡਾ ਸਾਰਿਆਂ ਦਾ ਹੀ ਫ਼ਰਜ਼ ਹੈ। ਇਸ ਸਾਂਝੇ ਯਤਨ ਨਾਲ ਹੀ ਅਸੀਂ ਇਕ ਮਿਹਨਤੀ, ਅਣਖੀ, ਖ਼ੁਸ਼ਹਾਲ ਅਤੇ ਆਦਰਸ਼ ਸੋਚ ਵਾਲਾ ਪੰਜਾਬੀ ਸੱਭਿਆਚਾਰ ਪੂਰੀ ਦੁਨੀਆ ਦੇ ਸਾਹਮਣੇ ਪੇਸ਼ ਕਰ ਸਕਣ ਵਿਚ ਕਾਮਯਾਬ ਜ਼ਰੂਰ ਹੋਵਾਂਗੇ।

-ਕੰਪਿਊਟਰ ਅਧਿਆਪਕ, ਸ: ਹਾ: ਸਕੂਲ, ਲਕਸੀਹਾਂ,
ਜ਼ਿਲ੍ਹਾ ਹੁਸ਼ਿਆਰਪੁਰ। ਮੋਬਾ: 94655-76022

ਧਰਮ ਦੇ ਅਸਲ ਅਰਥਾਂ ਨੂੰ ਪਛਾਣਨ ਦੀ ਲੋੜ

ਆਪਾਂ ਅਕਸਰ ਆਪਣੇ ਦੇਸ਼ ਵਿਚ ਇਕ ਸ਼ਬਦ ਸੁਣਦੇ ਹਾਂ-ਮਾਫੀਆ। ਉਸ ਨੂੰ ਆਪਾਂ ਟਰਾਂਸਪੋਰਟ ਮਾਫੀਆ, ਭੂ-ਮਾਫੀਆ, ਸੈਂਡ ਮਾਫੀਆ ਕਹਿੰਦੇ ਹਾਂ ਪਰ ਇਕ ਹੋਰ ਮਾਫੀਆ ਪਿਛਲੇ ਲੰਮੇ ਸਮੇਂ ਤੋਂ ਸਾਡੇ ਸਮਾਜ ਵਿਚ ਆਪਣੀਆਂ ਜੜ੍ਹਾਂ ਲਾਈ ਬੈਠਾ ਹੈ। ਉਸ ਨੂੰ ਅਸੀਂ ਧਾਰਮਿਕ ਮਾਫੀਆ ਕਹਿ ਸਕਦੇ ਹਾਂ, ਕਿਉਂਕਿ ਹੁਣ ਇਸ ਨੇ ਆਪਣਾ ਅਸਲੀ ਰੰਗ ਵਿਖਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਆਏ ਦਿਨ ਅਖ਼ਬਾਰਾਂ, ਟੈਲੀਵਿਜ਼ਨ ਅਤੇ ਸੋਸ਼ਲ ਮੀਡੀਆ 'ਤੇ ਆਪਾਂ ਇਹੋ ਜਿਹੀਆਂ ਖ਼ਬਰਾਂ ਦੇਖਦੇ ਹਾਂ ਕਿ ਕਿਸ ਤਰ੍ਹਾਂ ਧਰਮ ਦੇ ਨਾਂਅ 'ਤੇ ਲੋਕਾਂ ਦਾ ਸਰੀਰਕ, ਆਰਥਿਕ ਤੇ ਮਾਨਸਿਕ ਤੌਰ 'ਤੇ ਸ਼ੋਸ਼ਣ ਕੀਤਾ ਜਾਂਦਾ ਹੈ।
ਇਥੇ ਗੱਲ ਕਿਸੇ ਇਕ ਧਰਮ ਦੀ ਨਹੀਂ, ਸਗੋਂ ਸਾਰੇ ਧਰਮਾਂ ਦੇ ਅੰਦਰ ਇਹੋ ਜਿਹੇ ਲੋਕ ਬੈਠੇ ਹਨ। ਧਰਮ ਦੇ ਨਾਂਅ 'ਤੇ ਲੋਕਾਂ ਦੇ ਮਨ ਅੰਦਰ ਡਰ ਪੈਦਾ ਕੀਤਾ ਜਾਂਦਾ ਹੈ। ਫਿਰ ਉਸੇ ਡਰ ਦੇ ਸਹਾਰੇ ਲੋਕਾਂ ਦੀ ਲੁੱਟ ਕੀਤੀ ਜਾਂਦੀ ਹੈ। ਸਾਡੇ ਲੋਕਾਂ ਦੀ ਇਕ ਮਾਨਸਿਕਤਾ ਬਣੀ ਹੋਈ ਹੈ ਕਿ ਆਪਾਂ ਕਿਸੇ ਚਮਤਕਾਰ ਦੀ ਬਹੁਤ ਉਮੀਦ ਕਰਦੇ ਹਾਂ। ਆਪਣੇ ਸੁਪਨੇ ਪੂਰੇ ਕਰਨ ਲਈ ਆਪਾਂ ਮਿਹਨਤ ਕਰਨ ਦੀ ਬਜਾਏ ਕਿਸਮਤ 'ਤੇ ਜ਼ਿਆਦਾ ਯਕੀਨ ਕਰਦੇ ਹਾਂ। ਧਾਰਮਿਕ ਅਸਥਾਨਾਂ 'ਤੇ ਸੁੱਖਾਂ ਮੰਗਣ ਲਈ ਜਾਣ ਲਗਦੇ ਹਾਂ। ਸਾਡੇ ਸੁਪਨੇ ਪੂਰਾ ਕਰਨ ਦਾ ਲਾਲਚ ਦੇ ਕੇ ਉਹ ਸਾਨੂੰ ਜਾਦੂ-ਟੂਣਿਆਂ, ਪੁੱਛਾਂ ਦੇਣ ਅਤੇ ਕੁਝ ਕਰਨ-ਕਰਾਉਣ ਦੇ ਚੱਕਰਾਂ ਵਿਚ ਉਲਝਾ ਦਿੰਦੇ ਹਨ।
ਇਹ ਸਾਰੇ ਬਾਬੇ ਆਪਣੇ ਮੁਲਕ ਵਿਚ ਹੀ ਕਿਉਂ ਜ਼ਿਆਦਾ ਹਨ? ਅਮਰੀਕਾ, ਕੈਨੇਡਾ, ਇੰਗਲੈਂਡ, ਜਾਪਾਨ ਵਰਗੇ ਵਿਕਸਤ ਮੁਲਕਾਂ ਵਿਚ ਇਹ ਕਿਉਂ ਨਹੀਂ ਹੁੰਦੇ? ਇਹ ਗੱਲ ਸੋਚਣੀ ਬਣਦੀ ਹੈ। ਉਹ ਸਾਰੇ ਮੁਲਕ ਕੁਦਰਤ ਨਾਲ ਬਹੁਤ ਪਿਆਰ ਕਰਦੇ ਹਨ। ਵਾਤਾਵਰਨ ਅਤੇ ਪਾਣੀ ਸਾਫ਼ ਰੱਖਣ ਵਿਚ ਉਹ ਸਾਥੋਂ ਬਹੁਤ ਅੱਗੇ ਹਨ। ਉਨ੍ਹਾਂ ਮੁਲਕਾਂ ਦੇ ਲੋਕ ਵਿਗਿਆਨਕ ਸੋਚ ਰੱਖਦੇ ਹਨ, ਕਦੇ ਕਿਸੇ ਨੇ ਸੁਣਿਆ ਕਿ ਅਮਰੀਕਾ ਵਿਚ ਸ਼ਲੇਡਾ ਆ ਗਿਆ, ਫਿਲਮ ਦੇਖਣ ਨਾਲ ਗੁਰਦੇ ਠੀਕ ਹੋ ਗਏ, ਨਲਕੇ ਵਿਚ ਅੰਮ੍ਰਿਤ ਜਲ ਆ ਗਿਆ, ਜਿਸ ਨਾਲ ਬਿਮਾਰੀਆਂ ਦੂਰ ਹੋ ਗਈਆਂ। ਇਹ ਸਭ ਕੁਝ ਆਪਣੇ ਹੀ ਦੇਸ਼ ਵਿਚ ਹੁੰਦਾ ਹੈ।
ਆਪਣੇ ਸਮਾਜ ਵਿਚ ਹੀ ਸੇਬ ਖਾ ਕੇ ਬੱਚੇ ਜੰਮ ਸਕਦੇ ਹਨ। ਕਿਸੇ ਨੂੰ ਸੁਪਨੇ ਵਿਚ ਧਰਤੀ ਥੱਲੇ ਸੋਨਾ ਦਿਸ ਜਾਂਦਾ ਤੇ ਇਹੋ ਜਿਹੀ ਸਾਡੀ ਸਰਕਾਰ ਜੋ ਉਥੇ ਖੁਦਾਈ ਸ਼ੁਰੂ ਕਰ ਦਿੰਦੀ ਹੈ। ਕਦੇ ਵੀ ਔਡੀ, ਬੀ.ਐਮ.ਡਬਲਿਊ. ਵਰਗੀਆਂ ਹੋਰ ਮਹਿੰਗੀਆਂ ਗੱਡੀਆਂ ਉੱਤੇ ਨਹੀਂ ਲਿਖਿਆ ਹੋਵੇਗਾ ਕਿ ਬੁਰੀ ਨਜ਼ਰ ਵਾਲੇ ਤੇਰਾ ਮੂੰਹ ਕਾਲਾ। ਇਹ ਸਿਰਫ ਟਰੱਕਾਂ ਤੇ ਘੜੁੱਕਿਆਂ ਪਿੱਛੇ ਹੀ ਲਿਖਿਆ ਹੁੰਦਾ ਹੈ। ਇਸ ਦਾ ਮਤਲਬ ਨਜ਼ਰ ਵੀ ਸਸਤੀ ਗੱਡੀ ਨੂੰ ਹੀ ਲਗਦੀ ਹੈ।
ਅਸੀਂ ਆਪਣੇ ਬੱਚਿਆਂ ਨੂੰ ਇਹ ਸਿਖਾਉਂਦੇ ਹਾਂ ਕਿ ਰੱਬ ਤੇ ਧਰਮ ਉੱਪਰ ਕਦੇ ਸਵਾਲ ਨਹੀਂ ਕਰਦੇ ਹੁੰਦੇ। ਮੈਂ ਵੀ ਮੰਨਦਾ ਹਾਂ ਕਿ ਰੱਬ ਤੇ ਧਰਮ ਉੱਪਰ ਸਵਾਲ ਨਾ ਕਰੋ ਪਰ ਜੋ ਸਵਾਲ ਅੱਜ ਸਾਡੇ ਅੱਗੇ ਖੜ੍ਹੇ ਹਨ, ਉਨ੍ਹਾਂ ਦੇ ਜਵਾਬ ਕੌਣ ਦੇਵੇਗਾ? ਕਿਸੇ ਵੀ ਇਨਸਾਨ ਦੀ ਸ਼ਰਧਾ ਖ਼ਤਮ ਕਰਨੀ ਬਹੁਤ ਔਖੀ ਹੈ, ਚਾਹੇ ਸਚਾਈ ਉਸ ਦੀਆਂ ਅੱਖਾਂ ਸਾਹਮਣੇ ਹੀ ਕਿਉਂ ਨਾ ਹੋਵੇ ਕਿ ਜਿਸ ਨੂੰ ਉਹ ਰੱਬ ਮੰਨਦਾ ਹੈ, ਉਸ ਦੀਆਂ ਅਸਲ ਵਿਚ ਹਰਕਤਾਂ ਕਿਹੋ ਜਿਹੀਆਂ ਹਨ।
ਆਪਾਂ ਅਕਸਰ ਜਦ ਵੀ ਕੋਈ ਗ਼ਲਤ ਕੰਮ ਕਰਨ ਲਗਦੇ ਹਾਂ ਤਾਂ ਆਪਣੇ ਅੰਦਰੋਂ ਇਕ ਵਾਰ ਆਵਾਜ਼ ਜ਼ਰੂਰ ਆਉਂਦੀ ਹੈ, ਜਿਸ ਨੂੰ ਮੰਨਣਾ ਜਾਂ ਨਾ ਮੰਨਣਾ ਆਪਣੀ ਮਰਜ਼ੀ ਹੈ। ਬਸ ਉਹ ਰੱਬ ਦੀ ਹੀ ਆਵਾਜ਼ ਹੈ। ਧਰਮ ਕੇਵਲ ਦਿਖਾਉਣ ਦਾ ਹੀ ਨਹੀਂ ਹੁੰਦਾ, ਬਲਕਿ ਆਪਣੀ ਜ਼ਿੰਦਗੀ 'ਤੇ ਲਾਗੂ ਵੀ ਕਰਨਾ ਚਾਹੀਦਾ ਹੈ, ਜਿਵੇਂ ਕਿਸੇ ਦਾ ਵੀ ਹੱਕ ਨਹੀਂ ਖਾਣਾ, ਪੌਣ-ਪਾਣੀ ਸਾਫ਼ ਰੱਖਣਾ, ਇਮਾਨਦਾਰੀ ਨਾਲ ਮਿਹਨਤ ਕਰਨਾ ਅਤੇ ਜ਼ਿੰਦਗੀ ਵਿਚ ਗਰੀਬਾਂ ਦੀ ਮਦਦ ਕਰਨਾ।
ਮੇਰਾ ਮਕਸਦ ਕਿਸੇ ਦੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣਾ ਨਹੀਂ, ਬਲਕਿ ਧਰਮ ਦੇ ਨਾਂਅ 'ਤੇ ਹੋ ਰਹੀ ਅੰਨ੍ਹੀ ਲੁੱਟ ਬਾਰੇ ਚਾਨਣਾ ਪਾਉਣਾ ਹੈ।

-ਪਿੰਡ ਭੀਖੀ ਖੱਟੜਾ, ਜ਼ਿਲ੍ਹਾ ਲੁਧਿਆਣਾ। ਮੋਬਾਈਲ : 98550-81990






Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX