ਤਾਜਾ ਖ਼ਬਰਾਂ


ਪ੍ਰਿਥਵੀ ਸ਼ਾਹ ਦੀ ਜਗ੍ਹਾ ਮਯੰਕ ਅਗਰਵਾਲ ਭਾਰਤੀ ਟੈਸਟ ਟੀਮ 'ਚ ਸ਼ਾਮਲ
. . .  12 minutes ago
ਮੁੰਬਈ, 17 ਦਸੰਬਰ - ਆਸਟ੍ਰੇਲੀਆ ਖ਼ਿਲਾਫ਼ ਚੱਲ ਰਹੀ ਚਾਰ ਮੈਚਾਂ ਦੀ ਟੈਸਟ ਲੜੀ ਲਈ ਸੱਟ ਦੇ ਚੱਲਦਿਆਂ ਪ੍ਰਿਥਵੀ ਸ਼ਾਹ ਨੂੰ ਬਾਹਰ ਕਰ ਮਯੰਕ ਅਗਰਵਾਲ ਨੂੰ ਭਾਰਤੀ ਕ੍ਰਿਕਟ ਟੀਮ 'ਚ ਸ਼ਾਮਲ ਕੀਤਾ ਗਿਆ ਹੈ।
ਉਡੀਸ਼ਾ ਅਤੇ ਤ੍ਰਿਪੁਰਾ ਲਈ ਵਾਧੂ ਰਾਹਤ ਪੈਕੇਜ ਨੂੰ ਮਨਜ਼ੂਰੀ
. . .  about 1 hour ago
ਨਵੀਂ ਦਿੱਲੀ, 17 ਦਸੰਬਰ - ਕੇਂਦਰੀ ਗ੍ਰਹਿ ਮੰਤਰੀ ਰਾਜਨਾਥ ਸਿੰਘ ਦੀ ਅਗਵਾਈ 'ਚ ਹੋਈ ਉੱਚ ਪੱਧਰੀ ਮੀਟਿੰਗ ਦੌਰਾਨ ਉਡੀਸ਼ਾ ਲਈ 1023.59 ਕਰੋੜ ਅਤੇ ਤ੍ਰਿਪੁਰਾ ਲਈ 268.63 ਕਰੋੜ ਦੇ...
ਪੁਲਿਸ ਨਾਕੇ ਤੇ ਖੜੇ ਮੁਲਾਜ਼ਮਾਂ ਉੱਪਰ ਚੜੀ ਕਾਰ , ਇਕ ਦੀ ਮੌਤ
. . .  about 1 hour ago
ਮੰਡੀ ਅਰਨੀਵਾਲਾ, 17 ਦਸੰਬਰ (ਨਿਸ਼ਾਨ ਸਿੰਘ ਸੰਧੂ) - ਅਰਨੀਵਾਲਾ ਨਗਰ ਪੰਚਾਇਤ ਦੀ ਹੱਦ ਤੇ ਪੁਲਿਸ ਥਾਣਾ ਅਰਨੀਵਾਲਾ ਵੱਲੋਂ ਲਗਾਏ ਨਾਕੇ ਤੇ ਖੜੇ ਪੁਲਿਸ ਮੁਲਾਜ਼ਮਾਂ ਉੱਪਰ...
ਮੁੰਬਈ : ਹਸਪਤਾਲ ਨੂੰ ਲੱਗੀ ਅੱਗ 'ਚ ਮ੍ਰਿਤਕਾਂ ਦੀ ਗਿਣਤੀ ਵੱਧ ਕੇ ਹੋਈ 5
. . .  about 1 hour ago
ਮੁੰਬਈ, 17 ਦਸੰਬਰ - ਮੁੰਬਈ ਦੇ ਅੰਧੇਰੀ ਵਿਖੇ ਹਸਪਤਾਲ ਨੂੰ ਲੱਗੀ ਅੱਗ 'ਚ ਮ੍ਰਿਤਕਾਂ ਦੀ ਗਿਣਤੀ ਵੱਧ ਕੇ 5 ਹੋ ਗਈ...
ਕੱਪੜਾ ਫ਼ੈਕਟਰੀ ਨੂੰ ਲੱਗੀ ਭਿਆਨਕ ਅੱਗ
. . .  about 2 hours ago
ਲੁਧਿਆਣਾ, 17 ਦਸੰਬਰ (ਰੁਪੇਸ਼ ਕੁਮਾਰ) - ਲੁਧਿਆਣਾ ਦੇ ਹੰਬੜਾਂ ਰੋਡ 'ਤੇ ਅੱਜ ਸ਼ਾਮ 4.30 ਵਜੇ ਦੇ ਕਰੀਬ ਇੱਕ ਕੱਪੜਾ ਫ਼ੈਕਟਰੀ ਨੂੰ ਅਚਾਨਕ ਅੱਗ ਲੱਗ ਗਈ, ਜਿਸ ਨੇ ਦੇਖਦੇ ਹੀ ਦੇਖਦੇ ਭਿਆਨਕ...
ਭੁਪੇਸ਼ ਬਘੇਲ ਨੇ ਛੱਤੀਸਗੜ੍ਹ ਦੇ ਮੁੱਖ ਮੰਤਰੀ ਵਜੋ ਚੁੱਕੀ ਸਹੁੰ
. . .  about 2 hours ago
ਰਾਏਪੁਰ, 17 ਦਸੰਬਰ - ਭੁਪੇਸ਼ ਬਘੇਲ ਨੇ ਛੱਤੀਸਗੜ੍ਹ ਦੇ ਮੁੱਖ ਮੰਤਰੀ ਵਜੋ ਸਹੁੰ ਚੁੱਕ ਲਈ ਹੈ। ਇਸ ਤੋਂ ਇਲਾਵਾ ਟੀ.ਐੱਸ. ਸਿੰਘ ਅਤੇ ਤਮਰਾਧਵਜ ਸਾਹੂ ਸਮੇਤ ਹੋਰਨਾਂ ਮੰਤਰੀਆਂ...
ਮੰਦਿਰ ਦਾ ਮੁੱਦਾ ਜਦ ਤੱਕ ਅਦਾਲਤ 'ਚ ਹੈ, ਸੰਸਦ ਨੂੰ ਕਾਨੂੰਨ ਬਣਾਉਣ ਦਾ ਕੋਈ ਹੱਕ ਨਹੀ - ਯੂ.ਪੀ ਮੰਤਰੀ
. . .  about 2 hours ago
ਲਖਨਊ, 17 ਦਸੰਬਰ - ਉੱਤਰ ਪ੍ਰਦੇਸ਼ ਦੇ ਮੰਤਰੀ ਸਵਾਮੀ ਪ੍ਰਸਾਦ ਮੌਰੀਆ ਦਾ ਕਹਿਣਾ ਹੈ ਕਿ ਰਾਮ ਮੰਦਰ ਦਾ ਮੁੱਦਾ ਸੁਪਰੀਮ ਕੋਰਟ 'ਚ ਹੈ, ਇਸ ਲਈ ਇਸ ਉੱਪਰ ਚਰਚਾ ਨਹੀ...
ਹਸਪਤਾਲ ਨੂੰ ਲੱਗੀ ਅੱਗ 'ਚ ਇੱਕ ਦੀ ਮੌਤ
. . .  about 3 hours ago
ਮੁੰਬਈ, 17 ਦਸੰਬਰ - ਮੁੰਬਈ ਦੇ ਅੰਧੇਰੀ ਵਿਖੇ ਹਸਪਤਾਲ ਨੂੰ ਲੱਗੀ ਅੱਗ ਵਿਚ ਇੱਕ ਵਿਅਕਤੀ ਦੀ ਮੌਤ ਹੋ ਗਈਹੈ, ਜਦਕਿ 47 ਲੋਕ ਬਚਾਏ ਜਾ ਚੁੱਕੇ ਹਨ। ਅੱਗ ਉੱਪਰ ਕਾਬੂ...
84 ਦੰਗਿਆਂ ਨਾਲ ਜੁੜਿਆ ਕੋਈ ਕੇਸ ਜਾਂ ਐੱਫ.ਆਈ.ਆਰ ਮੇਰੇ ਖ਼ਿਲਾਫ਼ ਨਹੀ - ਕਮਲਨਾਥ
. . .  about 3 hours ago
ਭੋਪਾਲ, 17 ਦਸੰਬਰ - ਮੱਧ ਪ੍ਰਦੇਸ਼ ਦੇ ਨਵਨਿਯੁਕਤ ਮੁੱਖ ਮੰਤਰੀ ਕਮਲਨਾਥ ਦਾ ਕਹਿਣਾ ਹੈ 1984 ਸਿੱਖ ਦੰਗਿਆਂ ਨਾਲ ਸਬੰਧਿਤ ਕੋਈ ਵੀ ਕੇਸ, ਐੱਫ.ਆਈ ਆਰ ਜਾਂ ਦੋਸ਼ ਪੱਤਰ ਉਨ੍ਹਾਂ ਖ਼ਿਲਾਫ਼...
ਕਰਜ਼ੇ ਤੋਂ ਪਰੇਸ਼ਾਨ ਕਿਸਾਨ ਵੱਲੋਂ ਖ਼ੁਦਕੁਸ਼ੀ
. . .  about 3 hours ago
ਤਲਵੰਡੀ ਸਾਬੋ/ ਸੀਂਗੋ ਮੰਡੀ 17 ਦਸੰਬਰ (ਲਕਵਿੰਦਰ ਸ਼ਰਮਾ) - ਉਪ ਮੰਡਲ ਦੇ ਪਿੰਡ ਲੇਲੇਵਾਲਾ 'ਚ ਕਰਜ਼ੇ ਤੋਂ ਪਰੇਸ਼ਾਨ ਇਕ ਕਿਸਾਨ ਵੱਲੋਂ ਆਪਣੇ ਖੇਤ ਵਿਚ ਖ਼ੁਦਕੁਸ਼ੀ ਕਰ ਲਈ ਹੈ। ਮ੍ਰਿਤਕ ਕਿਸਾਨ ਪਰਿਵਾਰਕ ਮੈਂਬਰਾਂ ਨੇ ਦੱਸਿਆ ਕਿ ਕਿਸਾਨ ਗੁਰਮੇਲ ਸਿੰਘ (41) ਦੇ .....
ਹੋਰ ਖ਼ਬਰਾਂ..

ਨਾਰੀ ਸੰਸਾਰ

18ਵੀਆਂ ਏਸ਼ੀਅਨ ਖੇਡਾਂ 'ਚ ਭਾਰਤੀ ਮਹਿਲਾਵਾਂ ਨੇ ਨਵੇਂ ਇਤਿਹਾਸ ਸਿਰਜੇ

(ਲੜੀ ਜੋੜਨ ਲਈ ਪਿਛਲੇ ਸ਼ੁੱਕਰਵਾਰ ਦਾ ਅੰਕ ਦੇਖੋ)
ਸੁਧਾ ਸਿੰਘ ਨੇ ਵੀ ਕੀਤੀ ਕਮਾਲ
ਭਾਰਤੀ ਮਹਿਲਾ ਅਥਲੀਟ ਸੁਧਾ ਸਿੰਘ ਨੇ ਇਸ ਵਾਰੀ ਚਾਂਦੀ ਦਾ ਤਗਮਾ ਜਿੱਤ ਕੇ ਭਾਰਤ ਦੀ ਲਾਜ ਰੱਖੀ ਤੇ ਇਸ ਨੇ ਮਹਿਲਾਵਾਂ ਦੇ 3000 ਮੀਟਰ ਸਟੀਪਲ ਚੇਜ ਮੁਕਾਬਲੇ ਵਿਚੋਂ 9 ਮਿੰਟ 40.03 ਸੈਕਿੰਡ ਨਾਲ ਸ਼ਾਨਦਾਰ ਪ੍ਰਦਰਸ਼ਨ ਕਰਕੇ ਇਹ ਮਾਣਮੱਤੀ ਪ੍ਰਾਪਤੀ ਕੀਤੀ।
ਨੀਨਾ ਵਰਕਿਲ ਨੇ ਲਈ ਲੰਬੀ ਛਾਲ
18ਵੀਆਂ ਏਸ਼ੀਅਨ ਖੇਡਾਂ ਵਿਚੋਂ ਭਾਰਤੀ ਮਹਿਲਾ ਅਥਲੀਟ ਨੀਨਾ ਵਰਕਿਲ ਨੇ 6.51 ਮੀਟਰ ਦੀ ਲੰਬੀ ਛਾਲ ਲਗਾ ਕੇ ਭਾਰਤ ਦੀ ਝੋਲੀ ਵਿਚ ਚਾਂਦੀ ਦਾ ਤਗਮਾ ਪਾਇਆ ਤੇ ਏਸ਼ੀਅਨ ਖੇਡਾਂ ਵਿਚ ਟਰੈਕ ਐਂਡ ਫੀਲਡ ਵਿਚ ਚੰਗੇ ਪ੍ਰਦਰਸ਼ਨ ਨੂੰ ਦੁਹਰਾਇਆ।
ਸਿੰਧੂ ਨੇ ਵੀ ਕੀਤੀ ਕਮਾਲ
ਬੇਸ਼ੱਕ 18ਵੀਆਂ ਏਸ਼ੀਅਨ ਖੇਡਾਂ ਦੇ ਬੈਡਮਿੰਟਨ ਦੇ ਮਹਿਲਾ ਸਿੰਗਲ ਵਰਗ ਦੇ ਮੁਕਾਬਲੇ ਵਿਚੋਂ ਭਾਰਤ ਦੀ ਸਟਾਰ ਖਿਡਾਰਨ ਪੀ.ਵੀ. ਸਿੰਧੂ ਸੋਨ ਤਗਮਾ ਨਹੀਂ ਜਿੱਤ ਸਕੀ ਪਰ ਇਸ ਨੇ ਚਾਂਦੀ ਦਾ ਤਗਮਾ ਜਿੱਤ ਕੇ ਵੀ ਨਵਾਂ ਇਤਿਹਾਸ ਸਿਰਜਿਆ ਤੇ ਇਸ ਨੇ ਦੁਨੀਆ ਦੀ ਨੰਬਰ 1 ਖਿਡਾਰਨ ਚੀਈਨੀ ਤੇਪਾਈ ਦੀ ਤਾਈ ਜਿੰਗ ਨਾਲ ਮੁਕਾਬਲੇ 'ਚ ਚਾਂਦੀ ਦੇ ਤਗਮੇ 'ਤੇ ਕਬਜ਼ਾ ਕੀਤਾ ਤੇ ਬੈਡਮਿੰਟਨ ਦੇ ਸਿੰਗਲ ਵਰਗ ਦੇ ਮੁਕਾਬਲੇ ਵਿਚੋਂ ਚਾਂਦੀ ਦਾ ਤਗਮਾ ਜਿੱਤਣ ਵਾਲੀ ਪਹਿਲੀ ਭਾਰਤੀ ਮਹਿਲਾ ਬਣਨ ਦਾ ਮਾਣ ਵੀ ਹਾਸਲ ਕੀਤਾ।
ਪਿੰਕੀ ਬਲਹਾਰਾ ਨੇ ਵੀ ਚਾਂਦੀ ਜਿੱਤੀ
ਏਸ਼ੀਅਨ ਖੇਡਾਂ ਦੇ ਮਹਿਲਾਵਾਂ ਦੇ ਕੁਰਾਸ਼ ਦੇ 52 ਕਿੱਲੋ ਭਾਰ ਵਰਗ ਵਿਚੋਂ ਭਾਰਤ ਦੀ ਮਹਿਲਾ ਖਿਡਾਰਨ ਪਿੰਕੀ ਬਲਹਾਰਾ ਨੇ ਚਾਂਦੀ ਦਾ ਤਗਮਾ ਜਿੱਤ ਕੇ ਭਾਰਤ ਦੀ ਇੱਜ਼ਤ ਰੱਖੀ। ਕੁਰਾਸ਼ ਜੋ ਮੱਧ ਏਸ਼ੀਆ ਦਾ ਰਵਾਇਤੀ ਖੇਡ ਹੈ ਤੇ ਇਸ ਵਿਚ ਖਿਡਾਰੀ ਆਪਣੇ ਵਿਰੋਧੀ ਨੂੰ ਤੌਲੀਏ ਨਾਲ ਹੇਠਾਂ ਸੁੱਟਣ ਦੀ ਕੋਸ਼ਿਸ਼ ਕਰਦਾ ਹੈ ਤੇ ਇਸ ਖੇਡ ਨੂੰ ਜਕਾਰਤਾ ਏਸ਼ੀਅਨ ਖੇਡਾਂ ਵਿਚ ਪਹਿਲੀ ਵਾਰੀ ਸ਼ਾਮਿਲ ਕੀਤਾ ਗਿਆ ਸੀ।
ਕੁਰਾਸ਼ 'ਚੋਂ ਮਾਲਾਪ੍ਰਭਾ ਯਾਦਵ ਨੇ ਵੀ ਜਿੱਤੀ ਕਾਂਸੀ
ਭਾਰਤ ਦੀ ਇਕ ਹੋਰ ਮਹਿਲਾ ਕੁਰਾਸ਼ ਖਿਡਾਰਨ ਮਾਲਾਪ੍ਰਭਾ ਯਾਦਵ ਨੇ 52 ਕਿੱਲੋ ਭਾਰ ਵਰਗ ਵਿਚੋਂ ਵੀ ਕਾਂਸੀ ਦਾ ਤਗਮਾ ਜਿੱਤ ਕੇ ਭਾਰਤ ਦਾ ਮਾਣ ਵਧਾਇਆ। ਕਿਸੇ ਵੇਲੇ ਮਾਲਾਪ੍ਰਭਾ ਯਾਦਵ ਤੇ ਪਿੰਕੀ ਬਲਹਾਰਾ ਦੇ ਕੋਲ ਆਪਣੀ ਖੇਡ ਕਿੱਟ ਖਰੀਦਣ ਲਈ ਪੈਸੇ ਨਹੀਂ ਸਨ ਤੇ ਭਾਰਤੀ ਖੇਡ ਮੰਤਰਾਲੇ ਦੀ ਦਖਲਅੰਦਾਜ਼ੀ ਤੋਂ ਬਾਅਦ ਇਨ੍ਹਾਂ ਨੂੰ ਏਸ਼ੀਅਨ ਖੇਡਾਂ ਵਿਚ ਐਂਟਰੀ ਮਿਲੀ ਸੀ ਤੇ ਨਾਲ ਹੀ ਖੇਡ ਕਿੱਟ ਨਸੀਬ ਹੋਈ ਸੀ।
ਪੁਰਾਣੇ ਬੂਟਾਂ ਨਾਲ ਰਿਕਸ਼ਾ ਚਾਲਕ ਦੀ ਬੇਟੀ ਸਵੱਪਨਾ ਨੇ ਸੋਨ ਤਗਮੇ 'ਤੇ ਕੀਤਾ ਕਬਜ਼ਾ
18ਵੀਆਂ ਏਸ਼ੀਅਨ ਖੇਡਾਂ ਦੇ ਕਈ ਐਸੇ ਖਿਡਾਰੀ ਰਹੇ ਹਨ, ਜਿਨ੍ਹਾਂ ਨੇ ਗਰੀਬੀ ਨੂੰ ਬਹੁਤ ਹੀ ਨੇੜੇ ਤੋਂ ਵੇਖਿਆ ਹੈ। ਇਸ ਵਿਚ ਸਵੱਪਨਾ ਬਰਮਨ ਇਕ ਹੈ ਤੇ ਇਸ ਦੇ ਪਿਤਾ ਰਿਕਸ਼ਾ ਚਾਲਕ ਹਨ ਤੇ ਇਸ ਨੇ ਮਹਿਲਾਵਾਂ ਦੇ ਹੈਪਟੈਥਲਾਨ ਦੇ ਮੁਕਾਬਲੇ ਵਿਚੋਂ 6026 ਅੰਕ ਹਾਸਲ ਕਰਕੇ ਸੋਨ ਤਗਮਾ ਹਾਸਲ ਕੀਤਾ ਤੇ ਉਹ ਵੀ ਆਪਣੇ ਪੁਰਾਣੇ ਬੂਟਾਂ ਨਾਲ, ਕਿਉਂਕਿ ਇਸ ਦੇ ਦੋਵਾਂ ਪੈਰਾਂ ਦੀਆਂ 6-6 ਉਂਗਲਾਂ ਹਨ ਤੇ ਇਸ ਦੇ ਕੋਈ ਵੀ ਜੁੱਤੀ ਫਿੱਟ ਨਹੀਂ ਬੈਠਦੀ ਤੇ ਸਵੱਪਨਾ ਨੇ ਪੁਰਾਣਾ ਬੂਟ ਪਾ ਕੇ ਦੇਸ਼ ਲਈ ਇਹ ਮਾਣਮੱਤੀ ਪ੍ਰਾਪਤੀ ਕਰਕੇ ਭਾਰਤ ਦਾ ਝੰਡਾ ਬੁਲੰਦ ਕੀਤਾ।
ਸੀਮਾ ਪੂਨੀਆਂ ਨੇ ਵੀ ਕੀਤੀ ਕਮਾਲ
ਭਾਰਤ ਦੀ 35 ਸਾਲਾ ਮਹਿਲਾ ਡਿਸਕਸ ਥਰੋਅਰ ਸੀਮਾ ਪੂਨੀਆ ਨੇ 62.26 ਮੀਟਰ ਨਾਲ ਏਸ਼ੀਅਨ ਖੇਡਾਂ ਵਿਚੋਂ ਕਾਂਸੀ ਦਾ ਤਗਮਾ ਹਾਸਲ ਕੀਤਾ ਤੇ ਸੀਮਾ ਦਾ ਇਹ ਸਭ ਤੋਂ ਚੰਗਾ ਪ੍ਰਦਰਸ਼ਨ ਸੀ। ਸੀਮਾ ਨੇ ਏਸ਼ੀਅਨ ਖੇਡਾਂ ਵਿਚੋਂ ਮਿਲੀ ਆਪਣੀ 700 ਡਾਲਰ ਦੀ ਰਾਸ਼ੀ ਤੇ ਇਕ ਲੱਖ
ਰੁਪਏ ਕੇਰਲ ਦੇ ਹੜ੍ਹ ਪੀੜਤਾਂ ਨੂੰ ਦਾਨ ਵਿਚ ਵੀ ਦਿੱਤੇ ਤੇ ਹੋਰ ਖਿਡਾਰੀਆਂ ਨੂੰ ਵੀ ਇਸ ਨੇਕ ਕੰਮ ਵਿਚ ਹਿੱਸਾ ਲੈਣ ਲਈ ਪ੍ਰੇਰਿਤ ਕੀਤਾ।
ਚਿਤਰਾ ਊਨੀਕ੍ਰਿਸ਼ਨਨ
ਵੀ ਚਮਕੀ
ਏਸ਼ੀਅਨ ਖੇਡਾਂ ਦੀ ਮਹਿਲਾਵਾਂ ਦੀ 1500 ਮੀਟਰ ਦੌੜ ਵਿਚੋਂ ਵੀ ਭਾਰਤ ਦੀ ਚਿਤਰਾ ਊਨੀਕ੍ਰਿਸ਼ਨਨ ਨੇ 12.56 ਸੈਕਿੰਡ ਨਾਲ ਕਾਂਸੀ ਦੇ ਤਗਮੇ 'ਤੇ ਕਬਜ਼ਾ ਕੀਤਾ ਤੇ ਭਾਰਤ ਦੀ ਤਗਮਾ ਸੂਚੀ ਵਿਚ ਵਾਧਾ ਕੀਤਾ।
ਰੋਸ਼ਬਿਨਾ ਦੇਵੀ ਨੇ ਵੀ ਕਾਂਸੀ ਦੇ ਤਗਮੇ 'ਤੇ ਕੀਤਾ ਕਬਜ਼ਾ
ਭਾਰਤ ਦੀ ਮਹਿਲਾ ਖਿਡਾਰਨ ਨਾਓਰਾਮ ਰੋਸ਼ਬਿਨਾ ਦੇਵੀ ਨੇ ਸਾਂਡਾ ਦੇ 60 ਕਿੱਲੋ ਭਾਰ ਵਰਗ ਵਿਚੋਂ ਕਾਂਸੀ ਦਾ ਤਗਮਾ ਹਾਸਲ ਕੀਤਾ।
ਅਪੂਰਵੀ ਚੰਦੇਲਾ ਨੇ ਨਿਸ਼ਾਨੇਬਾਜ਼ੀ 'ਚੋ ਕਾਂਸੀ ਜਿੱਤੀ
ਏਸ਼ੀਅਨ ਖੇਡਾਂ ਦੀ ਨਿਸ਼ਾਨੇਬਾਜ਼ੀ ਦੇ ਮਿਕਸ ਟੀਮ ਨੇ 10 ਮੀਟਰ ਏਅਰ ਰਾਈਫਲ ਦੇ ਮੁਕਾਬਲੇ ਵਿਚੋਂ ਅਪੂਰਵੀ ਚੰਦੇਲਾ ਨੇ ਕਾਂਸੀ ਦਾ ਤਗਮਾ ਹਾਸਲ ਕੀਤਾ।
ਸੇਲਿੰਗ 'ਚੋਂ ਵਰਸ਼ਾ ਗੌਤਮ ਤੇ ਸ਼ਵੇਤਾ ਨੇ ਚਾਂਦੀ 'ਤੇ ਕੀਤਾ ਕਬਜ਼ਾ
18ਵੀਆਂ ਏਸ਼ੀਅਨ ਖੇਡਾਂ ਦੇ ਸੇਲਿੰਗ ਮਹਿਲਾ ਟੀਮ ਨੇ 49 ਈ.ਆਰ.ਐਫ.ਐਕਸ. ਦੇ ਮੁਕਾਬਲੇ ਵਿਚੋਂ ਭਾਰਤ ਦੀ ਜੋੜੀ ਸ਼ਵੇਤਾ ਸ਼ੇਰਵੇਗਰ ਤੇ ਵਰਸ਼ਾ ਗੌਤਮ ਨੇ 15 ਰੇਸ ਤੋਂ ਬਾਅਦ 44 ਅੰਕ ਤੇ 40 ਨੈਟ ਹਾਸਲ ਕਰਕੇ ਚਾਂਦੀ ਦੇ ਤਗਮੇ 'ਤੇ ਕਬਜ਼ਾ ਕੀਤਾ ਤੇ ਸੇਲਿੰਗ ਵਿਚੋਂ ਭਾਰਤ ਨੂੰ ਤੀਜਾ ਤਗਮਾ ਜਿੱਤ ਕੇ ਦਿੱਤਾ।
ਭਾਰਤੀ ਮਹਿਲਾ ਹਾਕੀ ਟੀਮ ਨੇ ਵੀ ਚਾਂਦੀ ਦਾ ਤਗਮਾ ਹਾਸਲ ਕੀਤਾ
ਏਸ਼ੀਅਨ ਖੇਡਾਂ ਵਿਚੋਂ ਸੋਨ ਤਗਮੇ ਦੀ ਦਾਅਵੇਦਾਰ ਭਾਰਤੀ ਮਹਿਲਾ ਹਾਕੀ ਟੀਮ ਨੂੰ ਫ਼ਾਈਨਲ ਮੁਕਾਬਲੇ ਵਿਚੋਂ ਜਾਪਾਨ ਨੇ 2-1 ਨਾਲ ਮਾਤ ਦਿੱਤੀ ਤੇ ਇਸ ਤਰ੍ਹਾਂ ਭਾਰਤੀ ਮਹਿਲਾ ਹਾਕੀ ਟੀਮ ਨੇ 20 ਸਾਲ ਦੇ ਅਰਸੇ ਬਾਅਦ ਏਸ਼ੀਅਨ ਖੇਡਾਂ ਦਾ ਚਾਂਦੀ ਦਾ ਤਗਮਾ ਆਪਣੇ ਨਾਂਅ 'ਤੇ ਕੀਤਾ।
ਭਾਰਤੀ ਮਹਿਲਾਵਾਂ ਦੀ ਰੀਲੇਅ ਟੀਮ ਨੇ ਕੀਤਾ ਸੋਨ ਤਗਮੇ 'ਤੇ ਕਬਜ਼ਾ
ਏਸ਼ੀਅਨ ਖੇਡਾਂ ਦੀ 4×400 ਮੀਟਰ ਰੀਲੇਅ ਦੌੜ ਵਿਚੋਂ ਭਾਰਤ ਦੀ ਹਿਮਾ ਦਾਸ, ਐਮ.ਆਰ. ਪੂਰਵੱਮਾ, ਸਰਿਤਾਬੇਨ ਤੇ ਵਿਸਮਿਆ ਦੀ ਟੀਮ ਨੇ 3 ਮਿੰਟ 28.72 ਸੈਕਿੰਡ ਨਾਲ ਸੋਨ ਤਗਮਾ ਜਿੱਤ ਕੇ ਭਾਰਤ ਦੀ ਝੋਲੀ ਵਿਚ ਪਾਇਆ।
ਮਹਿਲਾ ਤੀਰਅੰਦਾਜ਼ੀ ਟੀਮ ਨੇ ਵੀ ਚਾਂਦੀ ਜਿੱਤੀ
ਏਸ਼ੀਅਨ ਖੇਡਾਂ ਦੇ ਮਹਿਲਾਵਾਂ ਦੇ ਕੰਪਾਊਂਡ ਤੀਰਅੰਦਾਜ਼ੀ ਦੇ ਮੁਕਾਬਲੇ ਵਿਚੋਂ ਭਾਰਤੀ ਮਹਿਲਾਵਾਂ ਦੀ ਟੀਮ ਨੇ 228 ਅੰਕ ਹਾਸਲ ਕਰਕੇ ਚਾਂਦੀ ਦਾ ਤਗਮਾ ਹਾਸਲ ਕੀਤਾ।
ਸੋਨ ਤਗਮੇ ਤੋਂ ਖੁੰਝੀ ਭਾਰਤੀ ਮਹਿਲਾ ਕਬੱਡੀ ਟੀਮ
ਭਾਰਤੀ ਮਹਿਲਾ ਕਬੱਡੀ ਟੀਮ ਵੀ ਸੋਨ ਤਗਮੇ ਦੀ ਤਕੜੀ ਦਾਅਵੇਦਾਰ ਸੀ ਤੇ ਹੁਣ ਤੱਕ ਦੇ ਇਤਿਹਾਸ ਵਿਚ ਸੋਨ ਤਗਮਾ ਹੀ ਜਿੱਤਦੀ ਆਈ ਸੀ ਤੇ ਇਸ ਵਾਰੀ ਈਰਾਨ ਨੇ ਭਾਰਤ ਦੀ ਕਬੱਡੀ ਵਿਚ ਸਰਦਾਰੀ ਤੋੜੀ ਤੇ ਲਗਾਤਾਰ ਦੀ ਦੋ ਵਾਰੀ ਦੀ ਚੈਂਪੀਅਨ ਭਾਰਤੀ ਮਹਿਲਾ ਕਬੱਡੀ ਟੀਮ ਨੂੰ ਚਾਂਦੀ ਦੇ ਤਗਮੇ 'ਤੇ ਸਬਰ ਕਰਨਾ ਪਿਆ। (ਸਮਾਪਤ)


-ਮੋਬਾ: 98729-78781


ਖ਼ਬਰ ਸ਼ੇਅਰ ਕਰੋ

ਕੀ ਹੋਣ ਸਾਡੀ ਅਜੋਕੀ ਨਾਰੀ ਦੀਆਂ ਤਰਜੀਹਾਂ

ਨਾਰੀ ਸਮਾਜ ਦੀ ਚੂਲ ਹੈ, ਉਸ ਤੋਂ ਬਿਨਾਂ ਸਮਾਜਿਕ ਤਾਣਾ-ਬਾਣਾ ਸਿਰਜਿਆ ਹੀ ਨਹੀਂ ਜਾ ਸਕਦਾ। ਇਸ ਲਈ ਜ਼ਰੂਰੀ ਹੈ ਕਿ ਨਾਰੀ ਨੂੰ ਆਪਣੀਆਂ ਤਰਜੀਹਾਂ ਦਾ ਚੰਗਾ ਗਿਆਨ ਹੋਵੇ। ਆਓ, ਜ਼ਰਾ ਇਨ੍ਹਾਂ 'ਤੇ ਗੌਰ ਕਰੀਏ-
ਅੱਜ ਦੀ ਸਭ ਤੋਂ ਵੱਡੀ ਲੋੜ ਨਾਰੀ ਦਾ ਆਪਣੀ ਹੋਂਦ ਪ੍ਰਤੀ ਸੁਚੇਤ ਹੋਣਾ ਹੈ। ਜਿੰਨੀ ਦੇਰ ਉਹ ਇਸ ਪਾਸੇ ਤੋਂ ਅਵੇਸਲੀ ਰਹੇਗੀ, ਓਨੀ ਦੇਰ ਉਸ ਲਈ ਨਿੱਤ ਨਵੀਆਂ ਮੁਸੀਬਤਾਂ ਦੇ ਅੰਬਾਰ ਵਧਦੇ ਰਹਿਣਗੇ। ਕਾਰਨ ਕਿ ਮਰਦ-ਨਾਰੀ ਅਨੁਪਾਤ ਦਾ ਸਾਵਾਂ ਹੋਣਾ ਅਤਿ ਜ਼ਰੂਰੀ ਹੈ। ਕੁੜੀਆਂ ਦੀ ਜਨਮ ਦਰ ਵਿਚ ਘਾਟਾ ਨਾਰੀ ਦੀ ਆਪਣੀ ਹੋਂਦ ਲਈ ਖਤਰੇ ਦੀ ਘੰਟੀ ਹੈ।
ਦੂਜੀ ਵੱਡੀ ਤਰਜੀਹ ਨਾਰੀ ਦਾ ਵਹਿਮਾਂ-ਭਰਮਾਂ ਤੋਂ ਬਾਹਰ ਨਿਕਲਣਾ ਅਤੀ ਜ਼ਰੂਰੀ ਹੈ। ਵਹਿਮਾਂ-ਭਰਮਾਂ ਦੇ ਚੱਕਰਵਿਊ ਵਿਚ ਫਸੀ ਹੋਈ ਨਾਰੀ ਕਦੇ ਵੀ ਖੁੱਲ੍ਹੀ ਸੁਤੰਤਰ ਸੋਚ ਲੈ ਕੇ ਨਹੀਂ ਚੱਲ ਸਕਦੀ, ਕਿਉਂਕਿ ਉਹਦਾ ਮਨ ਮਜ਼ਬੂਤ ਨਾ ਹੋਣ ਕਰਕੇ ਬੜੀ ਛੇਤੀ ਤਿਲਕਦਾ ਹੈ। ਉਹਨੂੰ ਦੁਬਿਧਾ ਜਕੜੀ ਰੱਖਦੀ ਹੈ ਕਿ ਜੇ ਕਿਤੇ ਇਸ ਤਰ੍ਹਾਂ ਹੋਣ ਦੀ ਜਗ੍ਹਾ ਇਸ ਤਰ੍ਹਾਂ ਹੋ ਗਿਆ ਤਾਂ ਕੀ ਹੋਵੇਗਾ? ਤੇ ਇਸ ਤੋਂ ਬਚਾਅ ਲਈ ਉਹ ਵਹਿਮਾਂ-ਭਰਮਾਂ ਦਾ ਆਸਰਾ ਲੈਂਦੀ ਹੈ। ਜੋਤਸ਼ੀਆਂ, ਤਾਂਤਰਿਕਾਂ ਦੇ ਚੱਕਰ ਵਿਚ ਫਸਦੀ ਹੈ ਤੇ ਆਪਣਾ ਆਰਥਿਕ ਸ਼ੋਸ਼ਣ ਕਰਵਾਉਂਦੀ ਹੈ। ਸਿੱਟੇ ਵਜੋਂ ਇਨ੍ਹਾਂ ਕਾਰੋਬਾਰੀਆਂ ਦਾ ਤੋਰੀ-ਫੁਲਕਾ ਵਧੀਆ ਤੁਰੀ ਜਾਂਦਾ ਹੈ ਤੇ ਨਾਰੀ ਦੀ ਇਸੇ ਸੋਚ ਦੇ ਸਹਾਰੇ ਅੱਜ ਦੇ ਪੂੰਜੀਪਤੀ ਘਰਾਣੇ ਅਜਿਹੇ ਬਾਬਿਆਂ, ਜੋਤਸ਼ੀਆਂ, ਤਾਂਤਰਿਕਾਂ ਨੂੰ ਆਪਣੇ ਨਿੱਜੀ ਟੀ. ਵੀ. ਚੈਨਲਾਂ 'ਤੇ ਬਿਠਾ ਕੇ ਕਰੋੜਾਂ ਦਾ ਕਾਰੋਬਾਰ ਕਰੀ ਜਾ ਰਹੇ ਹਨ। ਇਸ ਕਿਸਮ ਦੀ ਸੋਚ ਤੋਂ ਬਾਹਰ ਨਿਕਲਣ ਲਈ ਨਾਰੀ ਨੂੰ ਆਪਣੇ ਮਾਨਸਿਕ ਪੱਧਰ ਨੂੰ ਮਜ਼ਬੂਤ ਕਰਨ ਦੀ ਵੱਡੀ ਲੋੜ ਹੈ। ਉਸ ਨੂੰ ਦ੍ਰਿੜ੍ਹਤਾ ਨਾਲ ਇਹ ਸੋਚ ਅਪਣਾਉਣੀ ਪਵੇਗੀ ਕਿ ਆਪਣੇ ਵਲੋਂ ਸਹੀ ਕਰਮ ਕੀਤੇ ਜਾਣ ਦਾ ਫਲ ਹਮੇਸ਼ਾ ਸਹੀ ਹੀ ਹੋਵੇਗਾ ਤੇ ਕੋਈ ਵੀ ਆਪਣਾ/ਬੇਗਾਨਾ ਕਿਸੇ ਜੋਤਿਸ਼, ਕਿਸੇ ਤੰਤਰ-ਮੰਤਰ ਵਿੱਦਿਆ ਦੇ ਸਹਾਰੇ ਉਸ ਦਾ ਕੁਝ ਨਹੀਂ ਵਿਗਾੜ ਸਕਦਾ। ਕਾਰਨ ਕਿ ਅਜਿਹੀ ਕੋਈ ਵਿੱਦਿਆ ਹੈ ਹੀ ਨਹੀਂ, ਜੋ ਕਿਸੇ ਦਾ ਕੁਝ ਵਿਗਾੜ ਸਕਦੀ ਹੋਵੇ। ਲੋੜ ਕੇਵਲ ਤੇ ਕੇਵਲ ਆਪਣੀ ਸੋਚ ਨੂੰ ਸਾਰਥਿਕਤਾ ਵਾਲੇ ਪਾਸੇ ਲਾਉਣ ਦੀ ਹੈ। ਇਸ ਦੇ ਨਾਲ ਮਿਲਦੀ-ਜੁਲਦੀ ਇਕ ਹੋਰ ਸਮੱਸਿਆ ਅਜੋਕੀ ਨਾਰੀ ਨੂੰ ਦਰਪੇਸ਼ ਹੈ ਤੇ ਉਹ ਹੈ ਉਸ ਦਾ ਭੂਤਾਂ-ਪ੍ਰੇਤਾਂ ਵਿਚ ਅੰਨ੍ਹਾ ਵਿਸ਼ਵਾਸ। ਬੇਸ਼ੱਕ ਅਜੋਕੀ ਪੜ੍ਹੀ-ਲਿਖੀ ਨਾਰੀ ਕਾਫ਼ੀ ਗਿਣਤੀ ਵਿਚ ਇਸ ਸਮੱਸਿਆ ਤੋਂ ਬਾਹਰ ਨਿਕਲ ਚੁੱਕੀ ਹੈ ਪਰ ਸਾਡੀ ਵਧੇਰੇ ਪਿੰਡਾਂ ਦੀ ਨਿਵਾਸੀ, ਕੁਝ ਕੋਰੀ ਅਨਪੜ੍ਹ, ਕੁਝ ਅਰਧ-ਪੜ੍ਹੀ ਤੇ ਕੁਝ ਵੱਧ ਪੜ੍ਹੀ-ਲਿਖੀ ਨਾਰੀ ਇਸ ਵਹਿਮ ਦਾ ਅਜੇ ਵੀ ਸ਼ਿਕਾਰ ਹੈ। ਇਥੇ ਲੋੜ ਹੈ ਕਿ ਅੱਜ ਦੀ ਨਾਰੀ ਇਸ ਫੋਕੇ ਵਹਿਮ ਤੋਂ ਬਾਹਰ ਆ ਕੇ ਵਿਗਿਆਨਕ ਸੋਚ ਦੀ ਧਾਰਨੀ ਬਣੇ। ਤਰਕ ਤੇ ਦਲੀਲ ਨਾਲ ਹਰੇਕ ਗੱਲ ਦਾ ਨਿਤਾਰਾ ਕਰਨ ਦੀ ਆਦਤ ਬਣਾਵੇ ਤਾਂ ਹੀ ਉਹ ਅਜੋਕੇ ਦੌਰ ਦੀ ਹਾਣੀ ਹੋ ਸਕੇਗੀ, ਨਹੀਂ ਤਾਂ ਸਦੀਆਂ ਪੁਰਾਣੀ ਗੁਲਾਮੀ ਦਾ ਜੂਲਾ ਉਸ ਦੁਆਲੇ ਹੋਰ ਪੀਡੀ ਪਕੜ ਬਣਾ ਲਵੇਗਾ। ਇਸ ਤੋਂ ਅੱਗੇ ਵਧੀਏ ਤਾਂ ਨਾਰੀ ਨੂੰ ਲੋੜ ਹੈ ਆਪਣੇ ਗਿਆਨ ਦਾ ਦਾਇਰਾ ਵਿਸ਼ਾਲ ਕਰਨ ਦੀ। ਸਿੱਖਿਆ ਦੇ ਖੇਤਰ ਵਿਚ ਵੱਧ ਤੋਂ ਵੱਧ ਮੱਲਾਂ ਮਾਰਦੀ ਹੋਈ ਬੇਸ਼ੱਕ ਅੱਜ ਦੀ ਲੜਕੀ ਮੈਰਿਟ ਵਿਚ ਪਹਿਲੀਆਂ ਪੁਜ਼ੀਸ਼ਨਾਂ ਹਾਸਲ ਕਰਕੇ ਆਪਣਾ ਨਾਂਅ ਚਮਕਾ ਰਹੀ ਹੈ। ਉਂਜ ਤਾਂ ਲਗਪਗ ਹਰ ਉਸ ਖੇਤਰ ਵਿਚ ਨਾਰੀ ਨੇ ਪੈਰ ਧਰ ਹੀ ਲਿਆ ਹੈ ਜੋ ਕੇਵਲ ਮਰਦਾਂ ਲਈ ਰਾਖਵੇਂ ਗਿਣੇ ਜਾਂਦੇ ਰਹੇ ਹਨ ਪਰ ਉਹਨੂੰ ਹਰ ਉਸ ਖੇਤਰ ਵਿਚ ਆਪਣੀ ਹੋਂਦ ਹੀ ਨਹੀਂ ਦਰਸਾਉਣੀ, ਸਗੋਂ ਉਥੇ ਆਪਣੀ ਪ੍ਰਤਿਭਾ ਦਾ ਲੋਹਾ ਵੀ ਮੰਨਵਾਉਣਾ ਹੈ ਤੇ ਆਪਣੀ ਭਰਵੀਂ ਸ਼ਮੂਲੀਅਤ ਦਰਸਾ ਕੇ ਸਿੱਧ ਕਰਨ ਦੀ ਲੋੜ ਹੈ ਕਿ ਉਹ ਕਿਸੇ ਵੀ ਤਰ੍ਹਾਂ ਮਰਦ ਤੋਂ ਹੀਣੀ ਨਹੀਂ। ਅਗਲੀ ਗੱਲ ਹੈ ਨਾਰੀ ਦੇ ਪਹਿਰਾਵੇ ਅਤੇ ਗਹਿਣਿਆਂ ਸਬੰਧੀ। ਨਾਰੀ ਕਿਉਂਕਿ ਸੁਭਾਅ ਤੋਂ ਹੀ ਆਪਣੀ ਸੁੰਦਰਤਾ ਪ੍ਰਤੀ ਸੰਵੇਦਨਸ਼ੀਲ ਹੈ, ਇਸ ਲਈ ਉਸ ਦੀ ਇਸ ਪ੍ਰਵਿਰਤੀ ਦਾ ਰੱਜਵਾਂ ਲਾਭ ਲਿਆ ਜਾਂਦਾ ਹੈ। ਸਾਦਾ ਪਹਿਰਾਵਾ ਅਪਣਾਉਣ ਤੇ ਸੋਚ ਨੂੰ ਉੱਚੀ ਰੱਖਣ, ਬੇਤਹਾਸ਼ਾ ਫੈਸ਼ਨ ਮਨ ਵਿਚ ਵੀ ਵਿਕਾਰ ਪੈਦਾ ਕਰਦਾ ਹੈ, ਜਦਕਿ ਸਾਨੂੰ ਇਸ ਵਿਕਾਰ ਵਿਚ ਖ਼ਚਿਤ ਹੋਣ ਦੀ ਜਗ੍ਹਾ ਗਿਆਨ ਸਾਗਰ ਵਿਚ ਗੋਤੇ ਲਾਉਣ ਦੀ ਲਗਨ ਹੋਣੀ ਅਤਿ ਲੋੜੀਂਦੀ ਹੈ। ਇਸੇ ਗਿਆਨ ਦੇ ਸਹਾਰੇ ਅਸੀਂ ਜਗਤ ਵਿਚ ਆਪਣੀ ਕਾਬਲੀਅਤ ਦਾ ਲੋਹਾ ਮੰਨਵਾਉਣ ਯੋਗ ਹੋ ਸਕਾਂਗੀਆਂ।
ਇਨ੍ਹਾਂ ਕੁਝ ਕੁ ਮਸਲਿਆਂ 'ਤੇ ਜੇਕਰ ਅੱਜ ਸਾਡੀ ਨਾਰੀ ਗਹਿਰ-ਗੰਭੀਰ ਹੋ ਕੇ ਅਮਲ ਕਰ ਲਵੇ ਤਾਂ ਕੋਈ ਕਾਰਨ ਨਹੀਂ ਕਿ ਉਹਦੀ ਸਮਾਜਿਕ ਮਾਣ-ਮਰਿਆਦਾ ਨੂੰ ਚਾਰ ਚੰਨ ਨਾ ਲੱਗਣ।


-ਮੋਬਾ: 98726-65229

ਫਸਟ-ਏਡ ਦਾ ਮਹੱਤਵ ਕਿੰਨਾ ਸਮਝਦੇ ਹੋ?

1. ਫਸਟ-ਏਡ ਦੀ ਕਦੋਂ ਅਤੇ ਕਿਉਂ ਲੋੜ ਪੈਂਦੀ ਹੈ? (ਕ) ਜਦੋਂ ਅਚਾਨਕ ਕੋਈ ਦੁਰਘਟਨਾ ਦਾ ਸ਼ਿਕਾਰ ਹੋ ਜਾਵੇ ਅਤੇ ਤੁਰੰਤ ਡਾਕਟਰੀ ਸਹੂਲਤ ਉਪਲਬਧ ਨਾ ਹੋਵੇ। (ਖ) ਜਦੋਂ ਸਫਰ ਵਿਚ ਹੋਵੋ ਅਤੇ ਆਸ-ਪਾਸ ਕੋਈ ਡਾਕਟਰ ਨਾ ਹੋਵੇ। (ਗ) ਜਦੋਂ ਡਾਕਟਰ ਕੋਲ ਜਾਣ ਦਾ ਮਨ ਨਾ ਹੋਵੇ।
2. ਕੀ ਫਸਟ-ਏਡ ਡਾਕਟਰੀ ਇਲਾਜ ਦੀ ਲੋੜ ਖਤਮ ਕਰ ਦਿੰਦੀ ਹੈ? (ਕ) ਹਾਂ। (ਖ) ਨਹੀਂ। (ਗ) ਕਦੇ-ਕਦੇ ਹਾਂ, ਕਦੇ-ਕਦੇ ਨਹੀਂ।
3. ਜੇ ਕਿਸੇ ਵਿਅਕਤੀ ਦਾ ਐਕਸੀਡੈਂਟ ਹੋ ਜਾਂਦਾ ਹੈ ਤਾਂ ਫਸਟ-ਏਡ ਦੇ ਤਹਿਤ ਸਭ ਤੋਂ ਪਹਿਲਾਂ ਕੀ ਕਰਨ ਦੀ ਲੋੜ ਹੁੰਦੀ ਹੈ? (ਕ) ਸਭ ਤੋਂ ਪਹਿਲਾਂ ਖੂਨ ਵਗਣਾ ਰੋਕਣ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ। (ਖ) ਸਭ ਤੋਂ ਪਹਿਲਾਂ ਪੀੜਤ ਵਿਅਕਤੀ ਨੂੰ ਸੁਰੱਖਿਅਤ ਜਗ੍ਹਾ ਪਹੁੰਚਾਉਣਾ ਚਾਹੀਦਾ ਹੈ। (ਗ) ਸਭ ਤੋਂ ਪਹਿਲਾਂ ਪੁਲਿਸ, ਫਿਰ ਐਂਬੂਲੈਂਸ ਨੂੰ ਫੋਨ ਕਰਨਾ ਚਾਹੀਦਾ ਹੈ।
4. ਫਸਟ-ਏਡ ਦੇ ਚਲਦੇ ਕਦੋਂ ਕਿਸੇ ਪੀੜਤ ਨੂੰ ਸਭ ਤੋਂ ਪਹਿਲਾਂ ਉਲਟੀ ਕਰਾਉਣ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ? (ਕ) ਜਦੋਂ ਉਸ ਦਾ ਜੀਅ ਮਿਚਲਾਅ ਰਿਹਾ ਹੋਵੇ। (ਖ) ਜਦੋਂ ਉਸ ਨੇ ਤੇਜ਼ਾਬ ਜਾਂ ਜ਼ਹਿਰ ਪੀ ਲਿਆ ਹੋਵੇ। (ਗ) ਜਦੋਂ ਉਸ ਦੇ ਪੇਟ ਵਿਚ ਰਹਿ-ਰਹਿ ਕੇ ਤੇਜ਼ ਦਰਦ ਹੋ ਰਿਹਾ ਹੋਵੇ।
5. ਫਸਟ-ਏਡ ਵਿਚ ਫਸਟ-ਏਡ ਬਾਕਸ ਦਾ ਕਿੰਨਾ ਮਹੱਤਵ ਹੈ?
(ਕ) ਇਸ ਤੋਂ ਬਿਨਾਂ ਫਸਟ-ਏਡ ਦੀ ਕਲਪਨਾ ਹੀ ਨਹੀਂ ਕੀਤੀ ਜਾ ਸਕਦੀ। (ਖ) ਫਸਟ-ਏਡ ਬਾਕਸ ਫਸਟ-ਏਡ ਵਿਚ ਜ਼ਰੂਰੀ ਚੀਜ਼ਾਂ ਦਾ ਬਾਕਸ ਹੈ। (ਗ) ਫਸਟ-ਏਡ ਬਾਕਸ ਦੀ ਮੌਜੂਦਗੀ ਵਿਚ ਸੁਰੱਖਿਅਤ ਹੋਣ ਦਾ ਅਹਿਸਾਸ ਮਹਿਸੂਸ ਹੁੰਦਾ ਹੈ।
ਨਤੀਜਾ : ਜੇ ਤੁਸੀਂ ਸਾਰੇ ਸਵਾਲਾਂ ਨੂੰ ਧਿਆਨ ਨਾਲ ਪੜ੍ਹਿਆ ਹੈ ਅਤੇ ਉਨ੍ਹਾਂ ਹੀ ਜਵਾਬਾਂ 'ਤੇ ਟਿਕ ਕੀਤਾ ਹੈ ਜੋ ਜਵਾਬ ਸੱਚਮੁੱਚ ਤੁਹਾਡੀ ਸੋਚ ਦੇ ਬਿਲਕੁਲ ਕਰੀਬ ਹਨ ਤਾਂ ਇਹ ਜਾਣਨ ਲਈ ਤਿਆਰ ਹੋ ਜਾਓ ਕਿ ਤੁਹਾਡੀਆਂ ਨਜ਼ਰਾਂ ਵਿਚ ਫਸਟ-ਏਡ ਦਾ ਮਹੱਤਵ ਕਿੰਨਾ ਹੈ?
ਕ-ਜੇ ਤੁਸੀਂ 5 ਸਵਾਲਾਂ ਦੇ ਦਿੱਤੇ ਗਏ ਆਪਣੇ ਜਵਾਬਾਂ ਦੇ ਚਲਦੇ 8 ਤੋਂ 10 ਅੰਕ ਹਾਸਲ ਕੀਤੇ ਹਨ ਤਾਂ ਇਸ ਦਾ ਮਤਲਬ ਇਹ ਹੈ ਕਿ ਤੁਸੀਂ ਫਸਟ-ਏਡ ਦੇ ਮਹੱਤਵ ਨੂੰ ਬਹੁਤ ਜ਼ਿਆਦਾ ਨਹੀਂ ਸਮਝਦੇ। ਹਾਲਾਂਕਿ ਤੁਸੀਂ ਇਸ ਨੂੰ ਨਕਾਰਦੇ ਨਹੀਂ ਹੋ ਪਰ ਇਸ ਨੂੰ ਲੈ ਕੇ ਬਹੁਤ ਸੁਚੇਤ ਨਹੀਂ ਰਹਿੰਦੇ। ਇਸ ਲਈ ਜ਼ਰੂਰੀ ਹੈ ਕਿ ਆਪਣੀ ਉਦਾਸੀਨਤਾ ਨੂੰ ਤਿਆਗੋ ਅਤੇ ਇਸ ਦੇ ਮਹੱਤਵ ਨੂੰ ਸਮਝੋ।
ਖ-ਜੇ ਤੁਹਾਡੇ ਪ੍ਰਾਪਤ ਅੰਕ 12 ਤੋਂ ਵੱਧ ਹਨ ਪਰ 14 ਤੋਂ ਘੱਟ ਹਨ ਤਾਂ ਇਸ ਦਾ ਮਤਲਬ ਇਹ ਹੈ ਕਿ ਤੁਹਾਨੂੰ ਫਸਟ-ਏਡ ਦੇ ਮਹੱਤਵ ਦੀ ਪੂਰੀ ਜਾਣਕਾਰੀ ਹੈ। ਪਰ ਏਨੇ ਸੁਚੇਤ ਨਹੀਂ ਹੋ ਕਿ ਜਿਥੇ ਵੀ ਰਹੋ, ਆਪਣੇ ਨਾਲ ਫਸਟ-ਏਡ ਬਾਕਸ ਨੂੰ ਰੱਖਣਾ ਨਾ ਭੁੱਲੋ।
ਗ-ਜੇ ਤੁਹਾਡੇ ਹਾਸਲ ਅੰਕ 15 ਜਾਂ ਇਸ ਤੋਂ ਜ਼ਿਆਦਾ ਹਨ ਤਾਂ ਬਿਨਾਂ ਸ਼ੱਕ ਕਿਹਾ ਜਾ ਸਕਦਾ ਹੈ ਕਿ ਤੁਹਾਨੂੰ ਫਸਟ-ਏਡ ਦਾ ਮਹੱਤਵ ਪੂਰੀ ਤਰ੍ਹਾਂ ਪਤਾ ਹੈ। ਤੁਸੀਂ ਇਸ ਲਈ ਸੁਚੇਤ ਵੀ ਰਹਿੰਦੇ ਹੋ ਅਤੇ ਦੂਜਿਆਂ ਨੂੰ ਵੀ ਇਸ ਦੇ ਫਾਇਦੇ ਤੋਂ ਜਾਣੂ ਕਰਾਉਂਦੇ ਹੋ।


-ਪਿੰਕੀ ਅਰੋੜਾ
ਇਮੇਜ ਰਿਫਲੈਕਸ਼ਨ ਸੈਂਟਰ

ਸਾਂਵਲੇ ਰੰਗ 'ਤੇ ਜ਼ਰੂਰੀ ਹੈ ਸਹੀ ਮੇਕਅਪ

ਹਰ ਔਰਤ ਚਾਹੁੰਦੀ ਹੈ ਕਿ ਉਹ ਸੁੰਦਰ ਦਿਸੇ। ਉਸ ਦਾ ਰੰਗ-ਰੂਪ ਭਾਵੇਂ ਜਿਹੋ ਜਿਹਾ ਮਰਜ਼ੀ ਹੋਵੇ ਪਰ ਸਜੇ-ਸੰਵਰੇ। ਗੋਰੇ ਰੰਗ 'ਤੇ ਤਾਂ ਸਭ ਕੁਝ ਸਜਦਾ ਹੈ ਪਰ ਮੁਸ਼ਕਿਲ ਉਦੋਂ ਆਉਂਦੀ ਹੈ ਜਦੋਂ ਰੰਗ ਸਾਂਵਲਾ ਹੋਵੇ। ਤੁਹਾਡੀ ਚਮੜੀ ਦਾ ਰੰਗ ਕੁਦਰਤ ਦੀ ਦੇਣ ਹੈ ਅਤੇ ਕੁਦਰਤ ਨੇ ਹਰ ਕਿਸੇ ਨੂੰ ਕੁਝ ਨਾ ਕੁਝ ਸੁੰਦਰ ਜ਼ਰੂਰ ਦਿੱਤਾ ਹੈ। ਇਸ ਲਈ ਆਪਣੇ ਅੰਦਰ ਕਿਸੇ ਹੀਣ-ਭਾਵਨਾ ਨੂੰ ਨਾ ਪਾਲੋ। ਤੁਹਾਨੂੰ ਬਸ ਇਹ ਆਉਣਾ ਚਾਹੀਦਾ ਕਿ ਤੁਸੀਂ ਕਿਸ ਤਰ੍ਹਾਂ ਦਾ ਮੇਕਅਪ ਵਰਤੋਂ ਕਰੋ, ਜਿਸ ਨਾਲ ਤੁਸੀਂ ਆਪਣੇ ਚਿਹਰੇ ਦੀਆਂ ਕਮੀਆਂ ਨੂੰ ਛੁਪਾ ਸਕੋ ਅਤੇ ਖੂਬਸੂਰਤੀ ਨੂੰ ਉਭਾਰੋ। ਜੇ ਤੁਹਾਡਾ ਰੰਗ ਸਾਂਵਲਾ ਹੈ ਤਾਂ ਕੁਝ ਗੱਲਾਂ ਨੂੰ ਧਿਆਨ ਵਿਚ ਰੱਖੋ।
* ਜੇ ਤੁਸੀਂ ਫਾਊਂਡੇਸ਼ਨ ਦੀ ਵਰਤੋਂ ਕਰਦੇ ਹੋ ਤਾਂ ਆਪਣੀ ਚਮੜੀ ਦੀ ਰੰਗਤ ਦੇ ਅਨੁਸਾਰ ਇਕ ਸ਼ੇਡ ਹਲਕਾ ਫਾਊਂਡੇਸ਼ਨ ਵਰਤੋਂ ਵਿਚ ਲਿਆਓ।
* ਸਾਂਵਲੇ ਰੰਗ 'ਤੇ ਗੁਲਾਬੀ ਰੰਗ ਦੇ ਬਲਸ਼ ਆਨ ਦੀ ਵਰਤੋਂ ਨਾ ਕਰੋ। ਕੁਦਰਤੀ ਸ਼ੇਡਜ਼ ਹੀ ਤੁਹਾਡੇ ਚਿਹਰੇ 'ਤੇ ਫਬਣਗੇ।
* ਆਈ ਸ਼ੈਡੋ ਵੀ ਗੁਲਾਬੀ, ਹਲਕਾ ਨੀਲਾ ਜਾਂ ਜਾਮਣੀ ਸ਼ੇਡ ਤੋਂ ਬਿਲਕੁਲ ਨਾ ਲਗਾਓ। ਬਰਾਊਨ ਸ਼ੇਡ, ਪੀਚ ਆਦਿ ਸ਼ੇਡ ਦੀ ਵਰਤੋਂ ਕਰੋ।
* ਲਿਪਸਟਿਕ ਦੇ ਸ਼ੇਡ ਵੀ ਬ੍ਰਾਊਨ, ਮੈਰੂਨ, ਮੈਟਸ ਸ਼ੇਡ ਲਗਾਓ। ਸਾਂਵਲੇ ਰੰਗ 'ਤੇ ਲਾਲ, ਮਜੈਂਟਾ ਆਦਿ ਸ਼ੇਡ ਬਹੁਤ ਚਮਕੀਲੇ ਲਗਦੇ ਹਨ। ਸੁਭਾਵਿਕ ਸ਼ੇਡ ਦੀ ਹੀ ਚੋਣ ਕਰੋ।
* ਲਿਪ ਲਾਈਨਰ ਵੀ ਲਿਪਸਟਿਕ ਨਾਲੋਂ ਇਕ ਸ਼ੇਡ ਗੂੜ੍ਹਾ ਲਓ।
* ਆਪਣੇ ਪਹਿਰਾਵੇ ਦੇ ਰੰਗ ਦੀ ਚੋਣ ਵੀ ਸਮਝਦਾਰੀ ਨਾਲ ਕਰੋ। ਬ੍ਰਾਊਨ, ਰਸਟ, ਹਲਕਾ ਫਿਰੋਜ਼ੀ ਆਦਿ ਸ਼ੇਡ ਸਾਂਵਲੇ ਰੰਗ 'ਤੇ ਫਬਦੇ ਹਨ। ਫਿਰ ਵੀ ਪੁਸ਼ਾਕ ਨੂੰ ਆਪਣੇ ਅੱਗੇ ਰੱਖ ਕੇ ਦੇਖੋ ਕਿ ਉਹ ਰੰਗ ਤੁਹਾਡੇ ਚਿਹਰੇ 'ਤੇ ਫਬਦਾ ਹੈ ਜਾਂ ਨਹੀਂ।
* ਆਈ ਲਾਈਨਰ ਵੀ ਕਾਲਾ, ਬ੍ਰਾਊਨ ਆਦਿ ਹੀ ਤੁਹਾਡੇ 'ਤੇ ਚੰਗੇ ਲੱਗਣਗੇ।

18ਵੀਆਂ ਏਸ਼ੀਅਨ ਖੇਡਾਂ 'ਚ ਭਾਰਤੀ ਮਹਿਲਾਵਾਂ ਨੇ ਨਵੇਂ ਇਤਿਹਾਸ ਸਿਰਜੇ

ਜਕਾਰਤਾ ਵਿਖੇ ਕਰਵਾਈਆਂ ਗਈਆਂ 18ਵੀਆਂ ਏਸ਼ੀਅਨ ਖੇਡਾਂ ਵਿਚ ਭਾਰਤ ਦਾ ਹੁਣ ਤੱਕ ਦਾ ਸ਼ਾਨਦਾਰ ਪ੍ਰਦਰਸ਼ਨ ਰਿਹਾ ਹੈ ਤੇ ਭਾਰਤ ਨੇ 1951 ਦੀਆਂ ਏਸ਼ੀਅਨ ਖੇਡਾਂ ਦਾ ਇਤਿਹਾਸ ਮੁੜ ਦੁਹਰਾਇਆ ਹੈ ਤੇ ਸਭ ਤੋਂ ਵੱਧ 69 ਤਗਮੇ ਵੀ ਇਨ੍ਹਾਂ ਖੇਡਾਂ ਵਿਚੋਂ ਜਿੱਤੇ ਹਨ ਤੇ ਇਸ ਲਈ ਜਕਾਰਤਾ ਖੇਡਾਂ 'ਚ ਭਾਰਤੀ ਖਿਡਾਰੀਆਂ ਨੇ ਨਵੇਂ ਇਤਿਾਹਸ ਵੀ ਸਿਰਜੇ ਹਨ ਤੇ ਇਸ ਵਿਚ ਮਹਿਲਾਵਾਂ ਦਾ ਵੀ ਖਾਸ ਯੋਗਦਾਨ ਰਿਹਾ ਹੈ। ਜਕਰਾਤਾ ਏਸ਼ੀਅਨ ਖੇਡਾਂ ਵਿਚ ਭਾਰਤ ਨੇ 15 ਸੋਨ, 24 ਚਾਂਦੀ, 30 ਕਾਂਸੀ ਤੇ ਕੁੱਲ 69 ਤਗਮੇ ਜਿੱਤੇ ਹਨ, ਜੋ ਹੁਣ ਤੱਕ ਦੀਆਂ ਏਸ਼ੀਅਨ ਖੇਡਾਂ ਵਿਚ ਭਾਰਤ ਦਾ ਸਭ ਤੋਂ ਚੰਗਾ ਪ੍ਰਦਰਸ਼ਨ ਕਿਹਾ ਜਾ ਸਕਦਾ ਹੈ। ਚੀਨ ਨੇ ਇਸ ਵਾਰੀ ਵੀ ਆਪਣੀ ਸਰਦਾਰੀ ਕਾਇਮ ਰੱਖੀ ਹੈ ਤੇ ਇਸ ਨੇ 132 ਸੋਨ, 92 ਚਾਂਦੀ, 65 ਕਾਂਸੀ ਤੇ ਕੁੱਲ 289 ਤਗਮੇ ਜਿੱਤ ਕੇ ਆਪਣਾ ਦਬਦਬਾ ਫਿਰ ਤੋਂ ਏਸ਼ੀਅਨ ਖੇਡਾਂ ਵਿਚ ਕਾਇਮ ਕੀਤਾ ਹੈ। 18ਵੀਆਂ ਏਸ਼ੀਅਨ ਖੇਡਾਂ ਵਿਚ ਜਿੱਥੇ ਭਾਰਤੀ ਮਰਦਾਂ ਨੇ ਚੰਗਾ ਪ੍ਰਦਰਸ਼ਨ ਕੀਤਾ, ਉਥੇ ਮਹਿਲਾਵਾਂ ਨੇ ਵੀ ਕਈ ਨਵੇਂ ਰਿਕਾਰਡ ਕਾਇਮ ਕੀਤੇ ਤੇ ਭਾਰਤੀ ਮਹਿਲਾ ਹਾਕੀ ਟੀਮ ਦੀ ਕਪਤਾਨ ਰਾਣੀ ਰਾਮਪਾਲ ਨੇ ਭਾਰਤੀ ਖੇਡ ਦਲ ਦੀ ਸਮਾਪਤੀ ਮੌਕੇ ਝੰਡਾ ਬਰਦਾਰ ਬਣਨ ਦਾ ਮਾਣ ਹਾਸਲ ਕੀਤਾ ਤੇ ਅਥਲੈਟਿਕਸ, ਕੁਸ਼ਤੀ, ਬੈਡਮਿੰਟਨ ਤੇ ਨਿਸ਼ਾਨੇਬਾਜ਼ੀ ਵਿਚ ਵੀ ਭਾਰਤੀ ਮਹਿਲਾਵਾਂ ਨੇ ਆਪਣੇ ਜੌਹਰ ਵੀ ਵਿਖਾਏ।
ਗੋਲਡਨ ਗਰਲ ਬਣੀ
ਵਿਨੇਸ਼ ਫੋਗਟ

ਏਸ਼ੀਅਨ ਖੇਡਾਂ ਦੇ ਮਹਿਲਾਵਾਂ ਵਿਚ 50 ਕਿੱਲੋ ਭਾਰ ਵਰਗ ਦੇ ਮੁਕਾਬਲੇ ਵਿਚੋਂ ਹਰਿਆਣਾ ਦੀ ਵਿਨੇਸ਼ ਫੋਗਟ ਨੇ ਗੋਲਡਨ ਗਰਲ ਬਣਨ ਦਾ ਮਾਣ ਹਾਸਲ ਕੀਤਾ ਤੇ ਇਸ ਨੇ ਫਾਈਨਲ ਮੁਕਾਬਲੇ ਵਿਚੋਂ ਜਾਪਾਨ ਦੀ ਇਰੀ ਜੁਕੀ ਨੂੰ 6-2 ਨਾਲ ਮਾਤ ਦੇ ਕੇ ਪਹਿਲੀ ਮਹਿਲਾ ਪਹਿਲਵਾਨ ਬਣਨ ਦਾ ਖਿਤਾਬ ਵੀ ਹਾਸਲ ਕੀਤਾ ਤੇ ਬੇਸ਼ੱਕ ਇਸ ਨੂੰ ਪਿਛਲੇ ਸਮੇਂ ਸੱਟ ਲੱਗਣ ਕਰਕੇ ਕਾਫੀ ਦਿੱਕਤ ਝੱਲਣੀ ਪਈ ਪਰ ਵਿਨੇਸ਼ ਨੇ ਸਭ ਨੂੰ ਪਿੱਛੇ ਛੱਡ ਕੇ ਕੁਸ਼ਤੀ ਦੇ ਖੇਤਰ ਵਿਚ ਨਵਾਂ ਇਤਿਹਾਸ ਸਿਰਜਿਆ।
ਗੁਰਬਤ 'ਚੋਂ ਨਿਕਲੀ
ਦਿਵਿਆ ਕਾਕਰਨ

ਕੁਸ਼ਤੀ ਦੇ ਖੇਤਰ ਵਿਚ ਏਸ਼ੀਅਨ ਖੇਡਾਂ 'ਚੋਂ ਭਾਰਤੀ ਮਹਿਲਾ ਪਹਿਲਵਾਨਾਂ ਨੇ ਕਮਾਲ ਕੀਤੀ ਤੇ ਭਾਰਤ ਦੀ ਮਹਿਲਾ ਪਹਿਲਵਾਨ ਦਿਵਿਆ ਕਾਕਰਨ ਨੇ 68 ਕਿੱਲੋ ਭਾਰ ਵਰਗ ਵਿਚੋਂ ਦੇਸ਼ ਲਈ ਕਾਂਸੀ ਦਾ ਤਗਮਾ ਹਾਸਲ ਕੀਤਾ ਤੇ ਇਸ ਤੋਂ ਪਹਿਲਾਂ ਇਸ ਨੇ 2018 ਦੀਆਂ ਰਾਸ਼ਟਰ ਮੰਡਲ ਖੇਡਾਂ ਵਿਚੋਂ ਵੀ ਕਾਂਸੀ ਦਾ ਤਗਮਾ ਹਾਸਲ ਕੀਤਾ ਸੀ ਤੇ ਦਿਵਿਆ ਦਾ ਪਰਿਵਾਰ ਅੱਜ ਵੀ ਪਿਛਲੇ 20 ਸਾਲਾਂ ਤੋਂ ਦਿੱਲੀ ਵਿਖੇ ਕਿਰਾਏ ਦੇ ਮਕਾਨ ਵਿਚ ਰਹਿ ਰਿਹਾ ਹੈ ਤੇ ਇਸ ਦੇ ਪਿਤਾ ਅੱਜ ਵੀ ਪੰਜਾਬ, ਹਰਿਆਣਾ , ਦਿੱਲੀ ਤੇ ਯੂ.ਪੀ. ਵਿਖੇ ਪਹਿਲਵਾਨਾਂ ਨੂੰ ਅਖਾੜਿਆਂ ਵਿਚ ਜਾ ਕੇ ਲੰਗੋਟ ਵੇਚਦੇ ਹਨ ਤੇ ਪਰਿਵਾਰ ਦਾ ਪਾਲਣ-ਪੋਸ਼ਣ ਕਰਦੇ ਹਨ।
ਪਿਸਟਲ ਰਾਣੀ ਬਣੀ ਰਾਹੀ ਸਰਨੋਬਤ
ਜਕਾਰਤਾ ਏਸ਼ੀਅਨ ਖੇਡਾਂ ਵਿਚ ਭਾਰਤੀ ਨਿਸ਼ਾਨੇਬਾਜ਼ਾਂ ਨੇ ਵੀ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਤੇ ਭਾਰਤ ਦੀ ਨਿਸ਼ਾਨੇਬਾਜ਼ ਰਾਹੀ ਸਰਨੋਬਤ ਨੇ 25 ਮੀਟਰ ਏਅਰ ਪਿਸਟਲ ਦੇ ਮੁਕਾਬਲੇ ਵਿਚੋਂ ਥਾਈਲੈਂਡ ਦੀ ਯੰਗਪਾਈਨਯੂਨ ਨਫਸਵਣ ਨੂੰ ਹਰਾ ਕੇ ਸੋਨ ਤਗਮਾ ਜਿੱਤ ਕੇ ਪਿਸਟਲ ਰਾਣੀ ਬਣਨ ਦਾ ਮਾਣ ਹਾਸਲ ਕੀਤਾ ਹੈ।
ਅੰਕਿਤਾ ਰੈਣਾ ਨੇ ਵੀ ਕਾਂਸੀ ਜਿੱਤੀ
ਭਾਰਤ ਦੀ ਸਟਾਰ ਖਿਡਾਰਨ ਅੰਕਿਤਾ ਰੈਣਾ ਨੇ ਵੀ ਟੈਨਿਸ ਦੇ ਮਹਿਲਾ ਸਿੰਗਲ ਵਰਗ ਦੇ ਮੁਕਾਬਲੇ ਵਿਚੋਂ ਕਾਂਸੀ ਦਾ ਤਗਮਾ ਹਾਸਲ ਕੀਤਾ ਤੇ ਇਸ ਦਾ ਨਿਸ਼ਾਨਾ ਫਾਈਨਲ ਵਿਚ ਪੁੱਜਣ ਦਾ ਸੀ ਪਰ ਸੈਮੀਫਾਈਨਲ ਮੁਕਾਬਲੇ ਵਿਚੋਂ ਇਸ ਦੀਆਂ ਆਸਾਂ 'ਤੇ ਚੀਨ ਦੀ ਸ਼ੁਆਈ ਜੈਂਗ ਨੇ ਪਾਣੀ ਫੇਰ ਦਿੱਤਾ ਤੇ ਇਸ ਨੂੰ ਕਾਂਸੀ ਦੇ ਤਗਮੇ 'ਤੇ ਸਬਰ ਕਰਨਾ ਪਿਆ।
ਹਿਨਾ ਸਿੱਧੂ ਦੇ ਹਿੱਸੇ ਵੀ ਕਾਂਸੀ ਆਈ
ਪੰਜਾਬ ਦੇ ਸ਼ਾਹੀ ਸ਼ਹਿਰ ਪਟਿਆਲਾ ਦੀ ਰਹਿਣ ਵਾਲੀ ਨਿਸ਼ਾਨੇਬਾਜ਼ ਹਿਨਾ ਸਿੱਧੂ ਨੇ ਜਕਾਰਤਾ ਏਸ਼ੀਅਨ ਖੇਡਾਂ ਦੇ 10 ਮੀਟਰ ਏਅਰ ਪਿਸਟਲ ਦੇ ਮੁਕਾਬਲੇ ਵਿਚੋਂ 219.2 ਅੰਕ ਹਾਸਲ ਕਰਕੇ ਕਾਂਸੀ ਦੇ ਤਗਮੇ 'ਤੇ ਨਿਸ਼ਾਨਾ ਲਗਾ ਕੇ ਭਾਰਤ ਦੀ ਤਗਮਾ ਸੂਚੀ ਵਿਚ ਵਾਧਾ ਕੀਤਾ।
ਦੀਪਕਾ ਪੱਲੀਕਲ ਨੂੰ ਵੀ ਕਾਂਸੀ ਮਿਲੀ
18ਵੀਆਂ ਏਸ਼ੀਅਨ ਖੇਡਾਂ ਵਿਚ ਕਈ ਨਵੀਆਂ ਖੇਡਾਂ ਨੂੰ ਵੀ ਥਾਂ ਦਿੱਤੀ ਗਈ ਤੇ ਸਕਵੈਸ਼ ਵਿਚ ਵੀ ਭਾਰਤੀ ਖਿਡਾਰੀਆਂ ਨੇ ਚੰਗਾ ਪ੍ਰਦਰਸ਼ਨ ਕੀਤਾ ਤੇ ਭਾਰਤ ਦੀ ਦੀਪਕਾ ਪੱਲੀਕਲ ਨੇ ਮਹਿਲਾ ਸਕਵੈਸ਼ ਦੇ ਸੈਮੀਫਾਈਨਲ ਮੁਕਾਬਲੇ ਵਿਚੋਂ ਕਾਂਸੀ ਦੇ ਤਗਮੇ 'ਤੇ ਕਬਜ਼ਾ ਕੀਤਾ।
ਜੋਸ਼ਨਾ ਨਚੱਪਾ ਦੇ ਹਿੱਸੇ ਵੀ ਕਾਂਸੀ ਆਈ
ਇਸ ਦੇ ਨਾਲ ਹੀ ਭਾਰਤ ਦੀ ਇਕ ਹੋਰ ਸਟਾਰ ਖਿਡਾਰਨ ਜੋਸ਼ਨਾ ਨਚੱਪਾ ਨੇ ਵੀ ਮਹਿਲਾਵਾਂ ਦੇ ਸਿੰਗਲ ਵਰਗ ਦੇ ਸਕਵੈਸ਼ ਮੁਕਾਬਲੇ ਵਿਚੋਂ ਕਾਂਸੀ ਦਾ ਤਗਮਾ ਜਿੱਤਣ 'ਚ ਸਫਲਤਾ ਹਾਸਲ ਕੀਤੀ।
ਦੁੱਤੀ ਚੰਦ ਨੇ ਕੀਤੀ ਕਮਾਲ, ਜਿੱਤੀ ਦੋਹਰੀ ਚਾਂਦੀ
ਭਾਰਤ ਦੀ ਮਹਿਲਾ ਅਥਲੀਟ ਦੁੱਤੀ ਚੰਦ 'ਤੇ ਕਿਸੇ ਵੇਲੇ ਮਰਦ ਬਣਨ ਦੇ ਇਲਜ਼ਾਮ ਲੱਗੇ ਸਨ ਤੇ ਇਸ ਨੂੰ ਇਸ ਕਰਕੇ ਖੇਡਣ ਤੋਂ ਰੋਕ ਦਿੱਤਾ ਗਿਆ ਸੀ ਤੇ ਫਿਰ ਦੁੱਤੀ ਚੰਦ ਨੇ ਖੇਡ ਪੰਚਾਟ ਦੇ ਕੋਲ ਇਸ ਮਾਮਲੇ ਦੀ ਸ਼ਿਕਾਇਤ ਕੀਤੀ ਸੀ ਤੇ ਉਥੋਂ ਰਾਹਤ ਮਿਲਣ ਕਰਕੇ ਦੁੱਤੀ ਚੰਦ ਇਨ੍ਹਾਂ ਖੇਡਾਂ ਵਿਚ ਹਿੱਸਾ ਲੈ ਸਕੀ ਤੇ ਇਸ ਨੇ 100 ਮੀਟਰ ਦੌੜ ਤੇ 200 ਮੀਟਰ ਦੌੜ ਵਿਚ ਭਾਰਤ ਲਈ ਦੋਹਰਾ ਚਾਂਦੀ ਦਾ ਤਗਮਾ ਜਿੱਤ ਕੇ ਨਵਾਂ ਇਤਿਹਾਸ ਵੀ ਸਿਰਜਿਆ।
ਹਿਮਾਦਾਸ ਨੇ ਵੀ ਕੀਤੀ ਕਮਾਲ
ਭਾਰਤ ਦੀ ਮਹਿਲਾ ਅਥਲੀਟ ਹਿਮਾਦਾਸ ਨੇ ਵੀ ਜਕਾਰਤਾ ਖੇੇਡਾਂ ਵਿਚ ਨਵੀਂ ਇਬਾਰਤ ਲਿਖੀ ਤੇ ਇਸ ਨੇ ਜੂਨੀਅਰ ਵਿਸ਼ਵ ਚੈਂਪੀਅਨਸ਼ਿਪ ਵਿਚੋਂ ਸੋਨ ਤਗਮਾ ਜਿੱਤਣ ਤੋਂ ਬਾਅਦ ਇਨ੍ਹਾਂ ਖੇਡਾਂ ਵਿਚੋਂ ਹੀ ਮਹਿਲਾਵਾਂ ਦੀ 400 ਮੀਟਰ ਦੌੜ ਵਿਚੋਂ 50.79 ਸੈਕਿੰਡ ਨਾਲ ਚਾਂਦੀ ਦਾ ਤਗਮਾ ਜਿੱਤ ਕੇ ਭਾਰਤ ਦੀ ਝੋਲੀ ਵਿਚ ਪਾਇਆ।
ਸਾਈਨਾ ਨੇਹਵਾਲ ਨੇ ਵੀ ਨਵਾਂ ਰਿਕਾਰਡ ਕਾਇਮ ਕੀਤਾ
ਭਾਰਤ ਦੀ ਬੈਡਮਿੰਟਨ ਸਟਾਰ ਸਾਈਨਾ ਨੇਹਵਾਲ ਨੇ ਬੈਡਮਿੰਟਨ ਦੇ ਮਹਿਲਾ ਸਿੰਗਲ ਵਰਗ ਦੇ ਮੁਕਾਬਲੇ ਵਿਚੋਂ ਬੇਸ਼ੱਕ ਕਾਂਸੀ ਦਾ ਤਗਮਾ ਹਾਸਲ ਕੀਤਾ ਪਰ ਇਸ ਨੇ ਏਸ਼ੀਅਨ ਖੇਡਾਂ ਦੇ ਇਤਿਹਾਸ ਵਿਚੋਂ ਬੈਡਮਿੰਟਨ ਦੇ ਸਿੰਗਲ ਵਰਗ ਦੇ ਮੁਕਾਬਲੇ ਵਿਚੋਂ ਤਗਮਾ ਜਿੱਤ ਕੇ ਪਹਿਲੀ ਮਹਿਲਾ ਖਿਡਾਰਨ ਵੀ ਬਣਨ ਦਾ ਮਾਣ ਹਾਸਲ ਕੀਤਾ।

(ਬਾਕੀ ਅਗਲੇ ਸ਼ੁੱਕਰਵਾਰ ਦੇ ਅੰਕ 'ਚ)
-ਮੋਬਾ: 98729-78781

ਖ਼ੂਬਸੂਰਤੀ ਦੀ ਖਾਣ ਸੇਬ

ਸੇਬ ਨੂੰ ਦੁਨੀਆ ਭਰ ਵਿਚ ਸਿਹਤਵਰਧਕ ਅਤੇ ਤਾਜ਼ੇ ਫਲਾਂ ਲਈ ਜਾਣਿਆ ਜਾਂਦਾ ਹੈ। ਤਾਜ਼ੇ ਸੇਬ ਫਾਈਬਰ, ਵਿਟਾਮਿਨ 'ਸੀ', ਕਾਪਰ ਅਤੇ ਵਿਟਾਮਿਨ 'ਏ' ਵਰਗੇ ਪੋਸ਼ਕ ਤੱਤਾਂ ਨਾਲ ਭਰਪੂਰ ਹੁੰਦੇ ਹਨ ਅਤੇ ਸੇਬ ਵਿਚ ਮੌਜੂਦ ਰੈਟੀਨਾਇਸਿਸ ਸਰੀਰ ਵਿਚ ਨਿਰੋਗੀ ਚਮੜੀ ਦੇ ਵਿਕਾਸ ਅਤੇ ਚਮੜੀ ਦੇ ਕੈਂਸਰ ਦੇ ਖ਼ਤਰੇ ਨੂੰ ਘੱਟ ਕਰਦੀ ਹੈ। ਸੇਬ ਸਿਰਫ ਇਕ ਸਵਾਦੀ ਫਲ ਹੀ ਨਹੀਂ ਹੈ, ਸਗੋਂ ਸੁੰਦਰਤਾ ਦੇ ਗੁਣਾਂ ਦੀ ਖਾਣ ਵੀ ਹੈ। ਸੇਬ ਵਿਚ ਮੌਜੂਦ ਮਲਟੀ ਵਿਟਾਮਿਨ ਪੋਸ਼ਕ ਅਤੇ ਕੁਦਰਤੀ ਫਰੂਟ ਐਸਿਡ ਨਾਲ ਚਮੜੀ ਦੀ ਰੰਗਤ ਵਿਚ ਨਿਖਾਰ ਆਉਂਦਾ ਹੈ ਅਤੇ ਟੈਨਿੰਗ ਤੋਂ ਪ੍ਰਤੀਰੱਖਿਆ ਮਿਲਦੀ ਹੈ। ਸੇਬ ਦੀ ਲਗਾਤਾਰ ਵਰਤੋਂ ਨਾਲ ਸਰੀਰ ਵਿਚ ਚਿਕਨਾਈ ਅਤੇ ਰੋਗਾਣੂਆਂ ਤੋਂ ਛੁਟਕਾਰਾ ਮਿਲਦਾ ਹੈ, ਜਿਸ ਨਾਲ ਸਰੀਰ ਵਿਚ ਤਾਜ਼ਗੀ ਅਤੇ ਚਮੜੀ ਵਿਚ ਲਾਲੀ ਆਉਂਦੀ ਹੈ।
ਸੇਬ ਨੂੰ ਬਿਹਤਰੀਨ ਸਕਿਨ ਟੋਨਰ ਫੇਸ਼ੀਅਲ ਟੋਨਰ ਮੰਨਿਆ ਜਾਂਦਾ ਹੈ ਅਤੇ ਸੇਬ ਚਮੜੀ ਨੂੰ ਸ਼ਾਂਤ ਕਰਦਾ ਹੈ। ਸਿਰ ਦੀ ਚਮੜੀ ਸਾਫ਼ ਕਰਦਾ ਹੈ ਅਤੇ ਚਿਹਰੇ ਦੀਆਂ ਝੁਰੜੀਆਂ ਨੂੰ ਮਿਟਾਉਂਦਾ ਹੈ, ਜਿਸ ਨਾਲ ਧਮਣੀਆਂ ਵਿਚ ਖੂਨ ਸੰਚਾਰ ਵਧਦਾ ਹੈ ਅਤੇ ਚਮੜੀ ਵਿਚ ਖਿਚਾਅ ਆਉਂਦਾ ਹੈ। ਸੇਬ ਵਿਚ ਐਂਟੀ-ਆਕਸੀਡੈਂਟ ਗੁਣ ਮੌਜੂਦ ਹੁੰਦੇ ਹਨ, ਜਿਸ ਨਾਲ ਚਮੜੀ ਵਿਚ ਜਵਾਨੀ ਬਰਕਰਾਰ ਰਹਿੰਦੀ ਹੈ ਅਤੇ ਬੁਢਾਪੇ ਨੂੰ ਰੋਕਦੇ ਹਨ। ਨਵੀਆਂ ਖੋਜਾਂ ਵਿਚ ਇਹ ਪਾਇਆ ਗਿਆ ਹੈ ਕਿ ਹਰੇ ਸੇਬਾਂ ਵਿਚ ਪਾਲੀ ਫੀਨਾਇਲਨ ਤੱਤ ਮੌਜੂਦ ਹੁੰਦੇ ਹਨ, ਜਿਸ ਨਾਲ ਵਾਲਾਂ ਨੂੰ ਝੜਨ ਤੋਂ ਰੋਕਣ ਵਿਚ ਅਹਿਮ ਮਦਦ ਮਿਲਦੀ ਹੈ। ਸੇਬ ਵਿਚ ਫਰੂਟ ਐਸਿਡ ਮੌਜੂਦ ਹੁੰਦਾ ਹੈ, ਜੋ ਕਿ ਚਮੜੀ ਨੂੰ ਸਾਫ਼ ਕਰਨ ਵਿਚ ਅਹਿਮ ਭੂਮਿਕਾ ਅਦਾ ਕਰਦਾ ਹੈ ਅਤੇ ਚਮੜੀ ਦੀਆਂ ਮ੍ਰਿਤ ਕੋਸ਼ਿਕਾਵਾਂ ਨੂੰ ਹਟਾਉਂਦਾ ਹੈ, ਜਿਸ ਨਾਲ ਚਮੜੀ ਵਿਚ ਚਮਕ ਆਉਂਦੀ ਹੈ ਅਤੇ ਕਾਲੇ ਧੱਬਿਆਂ ਤੋਂ ਮੁਕਤੀ ਮਿਲਦੀ ਹੈ, ਸੇਬ ਦੇ ਰਸ ਨੂੰ ਚਿਹਰੇ 'ਤੇ 20 ਮਿੰਟ ਤੱਕ ਲਗਾ ਕੇ ਸਾਦੇ ਪਾਣੀ ਨਾਲ ਧੋਣ ਨਾਲ ਚਮੜੀ ਵਿਚ ਚਮਕ ਅਤੇ ਨਿਖਾਰ ਆਉਂਦਾ ਹੈ। ਫਰੂਟ ਐਸਿਡ ਨਾਲ ਚਮੜੀ ਵਿਚ ਤੇਲੀਪਨ ਘੱਟ ਹੁੰਦਾ ਹੈ, ਜਿਸ ਨਾਲ ਕਿੱਲ-ਮੁਹਾਸਿਆਂ ਨੂੰ ਰੋਕਣ ਵਿਚ ਮਦਦ ਮਿਲਦੀ ਹੈ। ਸੇਬ ਦੇ ਰਸ ਵਿਚ ਬਦਾਮ ਤੇਲ ਅਤੇ ਦੁੱਧ ਜਾਂ ਦਹੀਂ ਮਿਲਾ ਕੇ ਪੇਸਟ ਬਣਾ ਕੇ ਚਿਹਰੇ 'ਤੇ ਲਗਾ ਕੇ 20 ਮਿੰਟ ਬਾਅਦ ਚਿਹਰੇ ਨੂੰ ਧੋ ਦਿਓ। ਸੇਬ ਦੇ ਅਸਬ ਦੇ ਸਿਰਕੇ ਨੂੰ ਅਨੇਕ ਸੁੰਦਰਤਾ ਸਮੱਸਿਆਵਾਂ ਦਾ ਹੱਲ ਮੰਨਿਆ ਜਾਂਦਾ ਹੈ। ਇਸ ਨਾਲ ਚਮੜੀ ਅਤੇ ਖੋਪੜੀ ਦੇ ਐਸਿਡ ਐਲਕਾਈਨ ਸੰਤੁਲਨ ਬਣਿਆ ਰਹਿੰਦਾ ਹੈ ਅਤੇ ਇਹ ਕਿੱਲ-ਮੁਹਾਸਿਆਂ ਵਿਚ ਕਾਫੀ ਮਦਦਗਾਰ ਸਾਬਤ ਹੁੰਦੀ ਹੈ। ਸੇਬ ਦੇ ਅਸਬ ਦੇ ਸਿਰਕੇ ਨੂੰ ਬਾਹਰੀ ਰੂਪ ਵਿਚ ਚਮੜੀ ਅਤੇ ਵਾਲਾਂ ਦੀਆਂ ਸੁੰਦਰਤਾ ਸਮੱਸਿਆਵਾਂ ਲਈ ਵਰਤਿਆ ਜਾਂਦਾ ਰਿਹਾ ਹੈ, ਇਸ ਨਾਲ ਵਾਲ ਧੋਣ ਨਾਲ ਅਨੇਕ ਫਾਇਦੇ ਹੁੰਦੇ ਹਨ। ਸ਼ੈਂਪੂ ਤੋਂ ਬਾਅਦ ਦੋ ਚਮਚ ਸੇਬ ਦੇ ਸਤ ਦੇ ਸਿਰਕੇ ਨੂੰ ਪਾਣੀ ਦੇ ਮੱਗ ਵਿਚ ਪਾ ਕੇ ਸਿਰ ਨੂੰ ਧੋਣ ਨਾਲ ਵਾਲਾਂ ਦੀਆਂ ਸੁੰਦਰਤਾ ਸਮੱਸਿਆਵਾਂ ਖ਼ਤਮ ਹੁੰਦੀਆਂ ਹਨ ਅਤੇ ਵਾਲਾਂ ਵਿਚ ਚਮਕ ਆਉਂਦੀ ਹੈ। ਜੇ ਤੁਸੀਂ ਵਾਲਾਂ ਦੀ ਸਿੱਕਰੀ ਦੀ ਸਮੱਸਿਆ ਨਾਲ ਜੂਝ ਰਹੇ ਹੋ ਤਾਂ ਵਾਲਾਂ ਨੂੰ ਸ਼ੈਂਪੂ ਕਰਨ ਤੋਂ ਅੱਧਾ ਘੰਟਾ ਪਹਿਲਾਂ ਦੋ ਚਮਚ ਸੇਬ ਦੇ ਸਤ ਦੇ ਸਿਰਕੇ ਨੂੰ ਖੋਪੜੀ 'ਤੇ ਹੌਲੀ-ਹੌਲੀ ਮਲੋ। ਇਸ ਤੋਂ ਬਾਅਦ ਵਾਲਾਂ ਨੂੰ ਸ਼ੈਂਪੂ ਨਾਲ ਧੋਣ ਨਾਲ ਵਾਲਾਂ ਦੀ ਸਿੱਕਰੀ ਖ਼ਤਮ ਹੋ ਜਾਂਦੀ ਹੈ। ਜੇ ਤੁਸੀਂ ਗੰਭੀਰ ਸਿੱਕਰੀ ਦਾ ਸਾਹਮਣਾ ਕਰ ਰਹੇ ਹੋ ਤਾਂ ਸੇਬ ਦੇ ਸਤ ਦੇ ਸਿਰਕੇ ਨੂੰ ਰੂੰ ਵਿਚ ਡੁਬੋ ਕੇ ਪੂਰੀ ਖੋਪੜੀ 'ਤੇ ਹੌਲੀ-ਹੌਲੀ ਲਗਾਓ ਅਤੇ ਇਸ ਨੂੰ ਵਾਲਾਂ ਵਿਚ ਸੁੱਕਣ ਦਿਓ। ਇਸ ਤੋਂ ਅੱਧਾ ਘੰਟਾ ਬਾਅਦ ਵਾਲਾਂ ਨੂੰ ਸ਼ੈਂਪੂ ਨਾਲ ਧੋ ਦਿਓ ਅਤੇ ਸਿੱਕਰੀ ਦੀ ਸਮੱਸਿਆ ਖ਼ਤਮ ਹੋ ਜਾਵੇਗੀ।
ਸੇਬ ਦੇ ਸਤ ਦੇ ਸਿਰਕੇ ਨੂੰ ਪਾਣੀ ਵਿਚ ਮਿਲਾ ਕੇ ਰੂੰ ਦੀ ਮਦਦ ਨਾਲ ਚਿਹਰੇ 'ਤੇ ਲਗਾਉਣ ਨਾਲ ਚਿਹਰੇ ਦਾ ਐਸਿਡ-ਐਲਕਾਲੀਨ ਸੰਤੁਲਨ ਬਣਿਆ ਰਹਿੰਦਾ ਹੈ ਅਤੇ ਚਮੜੀ ਦੀਆਂ ਸੁੰਦਰਤਾ ਸਮੱਸਿਆਵਾਂ ਤੋਂ ਛੁਟਕਾਰਾ ਮਿਲਦਾ ਹੈ। ਸੇਬ ਦੇ ਸਤ ਦੇ ਸਿਰਕੇ ਨਾਲ ਚਮੜੀ ਦੀ ਖਾਰਸ਼/ਖੁਜਲੀ ਵਿਚ ਵੀ ਮਦਦ ਮਿਲਦੀ ਹੈ। ਆਪਣੇ ਨਹਾਉਣ ਵਾਲੇ ਪਾਣੀ ਵਿਚ ਸੇਬ ਦੇ ਸਤ ਦੇ ਸਿਰਕੇ ਨੂੰ ਪਾ ਕੇ ਪਾਣੀ ਨਾਲ ਨਹਾ ਕੇ ਚਮੜੀ ਦੀ ਖਾਜ-ਖੁਜਲੀ ਤੋਂ ਰਾਹਤ ਮਿਲਦੀ ਹੈ। ਸੇਬ ਦੇ ਸਤ ਦੇ ਸਿਰਕੇ ਨਾਲ ਸਰੀਰ ਗੰਢ ਅਤੇ ਮੱਸਿਆਂ ਤੋਂ ਵੀ ਮੁਕਤੀ ਮਿਲਦੀ ਹੈ। ਸਰੀਰ ਦੇ ਮੱਸਿਆਂ 'ਤੇ ਸੇਬ ਦੇ ਸਤ ਦੇ ਸਿਰਕੇ ਨੂੰ ਰੋਜ਼ਾਨਾ ਲਗਾਉਣ ਨਾਲ ਮੱਸੇ ਖ਼ਤਮ ਹੋ ਜਾਂਦੇ ਹਨ। ਸੇਬ ਦੇ ਲਗਾਤਾਰ ਸੇਵਨ ਨਾਲ ਤੁਸੀਂ ਲੰਬੇ, ਚਮਕੀਲੇ ਵਾਲ ਪਾ ਸਕਦੇ ਹੋ। ਸੇਬ ਵਿਚ ਪਰੋਸਾਯਨਾ ਈਡਨ ਬੀ-2 ਮੌਜੂਦ ਹੁੰਦੇ ਹਨ, ਜੋ ਕਿ ਵਾਲਾਂ ਦੀ ਸਿਹਤ ਲਈ ਬਹੁਤ ਮਹੱਤਵਪੂਰਨ ਮੰਨੇ ਜਾਂਦੇ ਹਨ।

ਪਹਿਰਾਵੇ ਦੇ ਨਾਲ ਮੇਲ ਖਾਂਦੀਆਂ ਜੁੱਤੀਆਂ

ਫੈਸ਼ਨ ਦੇ ਅਨੁਸਾਰ ਚੱਪਲਾਂ ਖਰੀਦੋ। ਖਰੀਦਦੇ ਸਮੇਂ ਇਸ ਗੱਲ ਦਾ ਧਿਆਨ ਰੱਖੋ ਕਿ ਚੱਪਲ ਤੁਹਾਡੇ ਪੈਰਾਂ ਨੂੰ ਆਰਾਮ ਪਹੁੰਚਾਵੇ।
* ਸਾੜ੍ਹੀ ਅਤੇ ਪੱਛਮੀ ਪੋਸ਼ਾਕ ਦੇ ਨਾਲ ਅੱਡੀ ਵਾਲੀ ਜੁੱਤੀ ਪਹਿਨਣਾ ਠੀਕ ਲਗਦਾ ਹੈ। ਆਰਾਮਦੇਹ ਅੱਡੀ ਵਾਲੀ ਜੁੱਤੀ ਪਹਿਨੋ, ਜੋ ਤੁਹਾਡੀ ਪੋਸ਼ਾਕ ਦੀ ਸ਼ੋਭਾ ਨੂੰ ਚਾਰ ਚੰਦ ਲਗਾ ਦੇਵੇ।
* ਵਿਆਹ ਪਾਰਟੀ ਆਦਿ ਵਿਚ ਤੁਸੀਂ ਜਾ ਰਹੇ ਹੋ ਤਾਂ ਸੁਨਹਿਰੀ, ਚਮਕੀਲੇ ਕੰਮ ਦੀ ਅੱਡੀ ਵਾਲੇ ਸੈਂਡਲ ਪਹਿਨੋ। ਸਾੜ੍ਹੀ ਅਤੇ ਲਹਿੰਗੇ ਦੇ ਨਾਲ ਬਹੁਤ ਚੰਗੀ ਲੱਗੇਗੀ।
* ਸੂਟ ਆਦਿ ਦੇ ਨਾਲ ਛੋਟੀ ਅੱਡੀ ਦੀ ਚੱਪਲ ਚੰਗੀ ਲਗਦੀ ਹੈ। ਸੂਟ ਦੇ ਨਾਲ ਪਤਲੀ ਸਟ੍ਰੈਪ ਵਾਲੀ ਚੱਪਲ ਪਹਿਨੋ। ਪੈਰ ਨੂੰ ਜ਼ਿਆਦਾ ਢਕਣ ਵਾਲੀ ਚੱਪਲ ਨਾ ਪਹਿਨੋ।
* ਸਰਦੀ ਵਿਚ ਪੈਂਟ, ਜੀਨਜ਼ ਜੈਕਟ ਦੇ ਨਾਲ ਚਮੜੇ ਦੀ ਬੈਲੀ ਫਬਦੀ ਹੈ ਜਾਂ ਸਪੋਰਟਸ ਸ਼ੂਜ਼ ਪਹਿਨੋ।
* ਅੱਜਕਲ੍ਹ ਬਾਜ਼ਾਰ ਵਿਚ ਫਰ ਵਾਲੀਆਂ ਚੱਪਲਾਂ ਦਾ ਫੈਸ਼ਨ ਹੈ, ਜੋ ਪੱਛਮੀ ਪੋਸ਼ਾਕ ਅਤੇ ਸੂਟ ਦੇ ਨਾਲ ਚੰਗੀ ਲਗਦੀ ਹੈ।

-ਨੀਤੂ ਗੁਪਤਾ

ਤੁਸੀਂ ਵੀ ਰੱਖੋ ਜ਼ਰਾ ਆਪਣਾ ਖ਼ਿਆਲ

ਵਰਤਮਾਨ ਸਮੇਂ ਕਿਸੇ ਲੜਕੀ ਜਾਂ ਔਰਤ ਦਾ ਆਪਣੇ-ਆਪ ਪ੍ਰਤੀ ਜਾਗਰੂਕ ਹੋਣਾ ਬਹੁਤ ਜ਼ਰੂਰੀ ਹੈ। ਆਪਣੇ-ਆਪ ਪ੍ਰਤੀ ਜਾਗਰੂਕਤਾ ਤੋਂ ਭਾਵ ਆਪਣੇ-ਆਪ ਪ੍ਰਤੀ ਅਤੇ ਆਪਣੇ ਆਲੇ-ਦੁਆਲੇ ਪ੍ਰਤੀ ਜਾਣਕਾਰੀ ਦਾ ਹੋਣਾ ਹੈ। ਧੋਖਾ ਹੋਣਾ ਸ਼ਾਇਦ ਤੁਹਾਡੀ ਗ਼ਲਤੀ ਨਹੀਂ ਪਰ ਧੋਖੇ ਹੋਣਾ ਇਸ ਗੱਲ ਦਾ ਪ੍ਰਤੀਕ ਹੈ ਕਿ ਕਮੀ ਤੁਹਾਡੇ ਵਿਚ ਹੈ। ਬਹੁਤ ਅਸਾਨੀ ਨਾਲ ਕਿਸੇ ਨੂੰ ਮੁਆਫ਼ ਕੀਤਾ ਜਾ ਸਕਦਾ ਹੈ ਪਰ ਕਿਸੇ 'ਤੇ ਵਿਸ਼ਵਾਸ ਵਾਰ-ਵਾਰ ਨਹੀਂ ਕੀਤਾ ਜਾ ਸਕਦਾ। ਜ਼ਮਾਨੇ ਦੇ ਰੰਗ ਬਹੁਤ ਤਰ੍ਹਾਂ ਦੇ ਹਨ, ਜਿਸ ਤਰ੍ਹਾਂ ਕਿ ਗਿਰਗਿਟ ਦੇ ਅਸਲੀ ਰੰਗ ਦਾ ਕਿਸੇ ਨੂੰ ਵੀ ਨਹੀਂ ਪਤਾ। ਕਈ ਲੋਕ ਤੁਹਾਡੇ ਸਾਹਮਣੇ ਆਪਣੀ ਚੰਗਿਆਈ ਦਾ ਦਿਖਾਵਾ ਕਰਦੇ ਹਨ ਜਦਕਿ ਹਕੀਕਤ ਇਹ ਹੈ ਕਿ ਚੰਗਿਆਈ ਨੂੰ ਕਦੇ ਵੀ ਦਿਖਾਵੇ ਜਾਂ ਅਡੰਬਰ ਦੀ ਲੋੜ ਨਹੀਂ ਹੁੰਦੀ। ਕਈ ਲੋਕ ਤੁਹਾਡੇ ਸਾਹਮਣੇ ਸਿਰਫ ਤੁਹਾਡੇ ਹੋਣ ਦਾ ਦਿਖਾਵਾ ਕਰਦੇ ਹਨ, ਉਹ ਤੁਹਾਡੀ ਭਲਾਈ ਦਾ ਨਾਟਕ ਕਰਦੇ ਹਨ ਜਦਕਿ ਅਸਲੀਅਤ ਇਹ ਹੈ ਕਿ ਉਨ੍ਹਾਂ ਲੋਕਾਂ ਦੇ ਕਿਰਦਾਰ ਵੀ ਇਕਸਾਰ ਨਹੀਂ ਹੁੰਦੇ। ਮੌਕਾਪ੍ਰਸਤ ਲੋਕਾਂ ਦੀਆਂ ਲੁਭਾਉਣੀਆਂ ਚਾਲਾਂ ਤੋਂ ਬਚੋ।
ਆਪਣੀਆਂ ਗ਼ਲਤੀਆਂ ਤੋਂ ਕੁਝ ਵੀ ਨਾ ਸਿੱਖਣਾ ਸਭ ਤੋਂ ਵੱਡੀ ਗ਼ਲਤੀ ਹੁੰਦੀ ਹੈ। ਕਿਸੇ ਵੀ ਵਿਅਕਤੀ ਦੀ ਚੰਗੀ ਗੱਲਬਾਤ ਸਿਰਫ ਇਸ ਗੱਲ ਦਾ ਪ੍ਰਮਾਣ ਨਹੀਂ ਹੁੰਦੀ ਕਿ ਉਸ ਵਿਅਕਤੀ ਦਾ ਵਿਹਾਰ ਵੀ ਚੰਗਾ ਹੋਵੇਗਾ। ਇਸ ਪੱਖ ਤੋਂ ਔਰਤਾਂ ਨੂੰ ਹੋਰ ਵੀ ਜ਼ਿਆਦਾ ਸੁਚੇਤ ਹੋਣ ਦੀ ਜ਼ਰੂਰਤ ਹੈ ਕਿ ਲੋੜ ਤੋਂ ਵਧੇਰੇ ਅਤੇ ਤੁਹਾਡੀ ਖਾਸ ਜਾਣ-ਪਛਾਣ ਤੋਂ ਜੋ ਲੋਕ ਸਿਰਫ ਤੁਹਾਡੀ ਤਾਰੀਫ ਕਰਦੇ ਹਨ, ਸਮਝ ਲਵੋ ਉਹ ਵਿਅਕਤੀ ਬੜੇ ਮਤਲਬੀ ਕਿਸਮ ਦੇ ਹੁੰਦੇ ਹਨ। ਐਨੇ ਕੁ ਚੁਸਤ ਜ਼ਰੂਰ ਬਣੋ ਕਿ ਤੁਸੀਂ ਦੂਜਿਆਂ ਦੀਆਂ ਚਾਲਾਂ ਨੂੰ ਭਾਂਪ ਸਕੋ। ਸਾਡੀ ਨਾ ਸਮਝੀ ਅਤੇ ਮੂਰਖਤਾ ਹੀ ਸਾਡੇ ਲਈ ਸਭ ਤੋਂ ਵੱਡੀ ਸਿਰਦਰਦੀ ਬਣਦੀ ਹੈ। ਜਦੋਂ ਕੋਈ ਤੁਹਾਡਾ ਆਪਣਾ ਤੁਹਾਡੇ ਨਾਲ ਬੋਲਣਾ ਬੰਦ ਕਰ ਦੇਵੇ ਤਾਂ ਫਿਰ ਉਹੀ ਤੁਹਾਡੀ ਪਿੱਠ ਪਿੱਛੇ ਤੁਹਾਡੇ ਬਾਰੇ ਸਭ ਤੋਂ ਵੱਧ ਬੋਲਦਾ ਹੈ। ਜੇਕਰ ਤੁਸੀਂ ਉੱਨੀ ਕਰਦੇ ਹੋ ਤਾਂ ਇੱਕੀ ਕਦੇ ਨਾ ਬੋਲੋ ਅਤੇ ਸਿਰਫ ਆਪਣੀ ਹੈਸੀਅਤ ਅਨੁਸਾਰ ਹੀ ਗੱਲ ਕਰੋ। ਫੜ੍ਹਾਂ ਮਾਰਨ ਵਾਲੇ 'ਤੇ ਕਦੇ ਯਕੀਨ ਨਾ ਕਰੋ। ਕਈ ਲੋਕਾਂ ਦਾ ਕਿਰਦਾਰ ਤਨ 'ਤੇ ਪਹਿਨੇ ਕੱਪੜਿਆਂ ਵਰਗਾ ਹੁੰਦਾ ਹੈ ਜੋ ਬਹੁਤ ਛੇਤੀ ਬਦਲ ਜਾਂਦਾ ਹੈ।
ਔਖਾ ਵਕਤ ਤੁਹਾਡੀ ਪ੍ਰੀਖਿਆ ਲਈ ਆਉਂਦਾ ਹੈ। ਜੇਕਰ ਤੁਹਾਡੇ ਕੋਲ ਸੰਘਰਸ਼ ਕਰਨ ਦਾ ਨਿਸਚਾ ਹੈ, ਜੇਕਰ ਤੁਹਾਡੇ ਕੋਲ ਆਪਣੇ ਹਾਲਾਤ ਨੂੰ ਬਦਲਣ ਦਾ ਸੰਕਲਪ ਹੈ ਤਾਂ ਗਰੀਬੀ ਵੀ ਤੁਹਾਡੇ ਲਈ ਇਕ ਵਰਦਾਨ ਹੈ। ਔਖਾ ਵਕਤ ਹਮੇਸ਼ਾ ਸਾਡੀ ਪ੍ਰੀਖਿਆ ਲੈਣ ਆਉਂਦਾ ਹੈ। ਦੂਜਿਆਂ ਦੀਆਂ ਅੱਖਾਂ ਅਤੇ ਚਿਹਰਾ ਪੜ੍ਹਨ ਵਾਲੇ ਲੋਕ ਅਕਸਰ ਕਈ ਤਰ੍ਹਾਂ ਦੀਆਂ ਪ੍ਰੇਸ਼ਾਨੀਆਂ ਅਤੇ ਧੋਖਿਆਂ ਤੋਂ ਬਚ ਜਾਂਦੇ ਹਨ। ਗੱਲਾਂ ਵਿਚੋਂ ਦੂਜਿਆਂ ਦਾ ਇਰਾਦਾ ਸਮਝਣਾ ਸਿੱਖੋ, ਦੂਜਿਆਂ ਦੇ ਵਿਹਾਰ ਵਿਚੋਂ ਉਨ੍ਹਾਂ ਦਾ ਕਿਰਦਾਰ ਪੜ੍ਹਨਾ ਸਿੱਖੋ। ਇਸ ਤਰ੍ਹਾਂ ਤੁਸੀਂ ਅਨੇਕ ਅਜਿਹੀਆਂ ਉਲਝਣਾਂ ਤੋਂ ਬਚ ਸਕਦੇ ਹੋ ਜੋ ਤੁਹਾਡੀਆਂ ਮੁਸ਼ਕਿਲਾਂ ਵਿਚ ਵਾਧਾ ਕਰਦੀਆਂ ਹਨ। ਤੁਹਾਡਾ ਇਮਾਨਦਾਰ ਹੋਣਾ ਹੀ ਤੁਹਾਡਾ ਸਭ ਤੋਂ ਵੱਡਾ ਇਨਾਮ ਹੈ। ਦਿਲ ਦਾ ਸਾਫ਼ ਹੋਣਾ ਹੀ ਸਭ ਤੋਂ ਵੱਡੀ ਤਸੱਲੀ ਹੈ। ਤੁਸੀਂ ਆਪਣਾ ਖਿਆਲ ਆਪ ਰੱਖੋ, ਕਿਉਂਕਿ ਹਰ ਗੱਲ ਵਿਚ ਦੂਜਿਆਂ ਦੇ ਭਰੋਸੇ 'ਤੇ ਰਹਿਣਾ ਤੁਹਾਨੂੰ ਕਮਜ਼ੋਰ ਕਰਦਾ ਹੈ। ਕਿਸੇ ਮਰਦ ਦੀ ਰਾਖੀ ਨਾਲ ਔਰਤ ਦੀ ਇੱਜ਼ਤ ਨੂੰ ਸੁਰੱਖਿਆ ਨਹੀਂ ਮਿਲ ਸਕਦੀ, ਜਿੰਨਾ ਸਮਾਂ ਕਿ ਉਹ ਖੁਦ ਆਪਣੀ ਇੱਜ਼ਤ ਦੀ ਰਾਖੀ ਨਹੀਂ ਕਰ ਸਕਦੀ। ਆਪਣੀ ਸੁਰੱਖਿਆ ਲਈ ਔਰਤ ਨੂੰ ਖ਼ੁਦ ਹੀ ਮਜ਼ਬੂਤ ਹੋਣਾ ਪਵੇਗਾ। ਹੱਕ ਕਦੇ ਵੀ ਮਿਲਦੇ ਨਹੀਂ, ਇਹ ਖੁਦ ਪ੍ਰਾਪਤ ਕਰਨੇ ਪੈਂਦੇ ਹਨ, ਜ਼ਿੰਦਗੀ ਦੇ ਮੈਦਾਨ ਵਿਚ ਝਾਂਸੀ ਬਣ ਕੇ।

-ਪਿੰਡ ਗੋਲੇਵਾਲਾ (ਫ਼ਰੀਦਕੋਟ)। ਮੋਬਾ: 94179-49079

ਘਰੇਲੂ ਅਵਿਵਸਥਾਵਾਂ ਕਿਤੇ ਦੁਰਘਟਨਾ ਦਾ ਕਾਰਨ ਨਾ ਬਣ ਜਾਣ

ਕਈ ਗ੍ਰਹਿਣੀਆਂ ਦੀ ਸੋਚ ਹੁੰਦੀ ਹੈ ਕਿ ਉਹ ਘਰੇਲੂ ਉਪਕਰਨਾਂ ਨੂੰ ਠੀਕ ਕਰਾਉਣ ਦੀ ਬਜਾਏ ਨਵੇਂ ਮਾਡਲ ਦਾ ਸਾਮਾਨ ਖਰੀਦਣਾ ਜ਼ਿਆਦਾ ਬਿਹਤਰ ਸਮਝਦੀਆਂ ਹਨ, ਜਿਸ ਦੇ ਨਤੀਜੇ ਵਜੋਂ ਪੁਰਾਣੇ ਪ੍ਰੈਸ਼ਰ ਕੁੱਕਰ, ਮਿਕਸੀ, ਓਵਨ, ਵਾਸ਼ਿੰਗ ਮਸ਼ੀਨ, ਹੀਟਰ, ਪੱਖੇ, ਕੂਲਰ, ਵਾਲ ਕਲਾਕ, ਗੈਸ ਸਟੋਪ, ਗੀਜ਼ਰ ਵਗੈਰਾ ਘਰ ਦੇ ਇਕ ਕੋਨੇ ਵਿਚ ਪਏ ਰਹਿੰਦੇ ਹਨ। ਸੰਕਟ ਵੇਲੇ ਜਦੋਂ ਇਨ੍ਹਾਂ ਉਪਕਰਨਾਂ ਦੀ ਵਰਤੋਂ ਕੀਤੀ ਜਾਂਦੀ ਹੈ ਤਾਂ ਅਕਸਰ ਛੋਟੀ-ਮੋਟੀ ਦੁਰਘਟਨਾ ਵਾਪਰ ਜਾਂਦੀ ਹੈ।
ਇਸੇ ਤਰ੍ਹਾਂ ਤਿਲਕਣ ਭਰੇ ਬਾਥਰੂਮ, ਬਿਨਾਂ ਰੇਲਿੰਗ ਦੀ ਛੱਤ ਅਤੇ ਪੌੜੀ, ਟੁੱਟੀ-ਫੁੱਟੀ ਚੌਖਟ, ਜੰਗ ਲੱਗਾ ਜਾਂ ਬੇਕਾਰ ਹੋ ਚੁੱਕਾ ਬਿਜਲੀ ਦਾ ਸਾਮਾਨ, ਬੇਢਬ ਦਰਵਾਜ਼ੇ, ਗੈਸ ਲੀਕ ਕਰਨ ਵਾਲੇ ਗੈਸ ਸਟੋਪ, ਹਰ ਦਮ ਵਗਦੀਆਂ ਰਹਿਣ ਵਾਲੀਆਂ ਟੂਟੀਆਂ ਆਦਿ ਪ੍ਰਤੀ ਲਾਪ੍ਰਵਾਹੀ ਵਰਤਣ ਨਾਲ ਅਕਸਰ ਦੁਰਘਟਨਾਵਾਂ ਹੋਣ ਦੀ ਸੰਭਾਵਨਾ ਬਣੀ ਰਹਿੰਦੀ ਹੈ।
ਨਤੀਜੇ ਵਜੋਂ ਅਜਿਹੇ ਮਾਹੌਲ ਵਿਚ ਪਲੇ-ਵਧੇ ਬੱਚੇ ਵੀ ਅਜਿਹੀਆਂ ਛੋਟੀਆਂ-ਮੋਟੀਆਂ ਘਰੇਲੂ ਦਿੱਕਤਾਂ ਨੂੰ ਦੂਰ ਕਰਨ ਦੀ ਬਜਾਏ ਉਨ੍ਹਾਂ ਨੂੰ ਸਹਿਣ ਕਰਨ ਦੇ ਆਦੀ ਹੋ ਜਾਂਦੇ ਹਨ ਪਰ ਘਰ ਵਿਚ ਕੋਈ ਵੱਡਾ ਨੁਕਸਾਨ ਹੋ ਜਾਵੇ, ਉਸ ਤੋਂ ਪਹਿਲਾਂ ਹੀ ਗ੍ਰਹਿਣੀਆਂ ਨੂੰ ਘਰ ਵਿਚ ਪਏ ਖਰਾਬ ਉਪਕਰਨਾਂ ਅਤੇ ਹੋਰ ਦੁਰਘਟਨਾਵਾਂ ਘਟਣ ਵਾਲੀਆਂ ਚੀਜ਼ਾਂ ਨੂੰ ਸੁਧਾਰ ਲੈਣ ਦੀ ਪਹਿਲ ਕਰਨੀ ਚਾਹੀਦੀ ਹੈ। ਫੁਰਸਤ ਦੇ ਪਲਾਂ ਨੂੰ ਵਿਅਰਥ ਨਾ ਗਵਾ ਕੇ ਘਰ ਵਿਚ ਪਈਆਂ ਚੀਜ਼ਾਂ ਦੀ ਵਰਤੋਂ ਅਤੇ ਉਨ੍ਹਾਂ ਦੀ ਸਥਿਤੀ ਦਾ ਨਿਰੀਖਣ ਕਰ ਲੈਣਾ ਚਾਹੀਦਾ ਹੈ। ਖਰਾਬ ਹੋ ਚੁੱਕੇ ਉਪਕਰਨ ਜੇ ਠੀਕ ਕਰਵਾਏ ਜਾ ਸਕਦੇ ਹੋਣ ਤਾਂ ਇਕ-ਇਕ ਕਰਕੇ ਉਨ੍ਹਾਂ ਨੂੰ ਠੀਕ ਕਰਵਾ ਲਓ, ਤਾਂ ਕਿ ਉਹ ਅੱਗੇ ਜਾ ਕੇ ਜ਼ਿਆਦਾ ਖਰਾਬ ਅਤੇ ਜੋਖਮ ਪੂਰਨ ਨਾ ਹੋ ਜਾਣ। ਇਸ ਤੋਂ ਇਲਾਵਾ ਹਰੇਕ ਵਸਤੂ ਨੂੰ ਆਪਣੇ ਨਿਰਧਾਰਤ ਸਥਾਨ 'ਤੇ ਰੱਖਣ ਦੀ ਆਦਤ ਘਰ ਦੇ ਸਾਰੇ ਮੈਂਬਰਾਂ ਵਿਚ ਹੋਣੀ ਚਾਹੀਦੀ ਹੈ, ਤਾਂ ਕਿ ਲੋੜ ਪੈਣ 'ਤੇ ਉਨ੍ਹਾਂ ਦੀ ਤਲਾਸ਼ ਵਿਚ ਵਿਅਰਥ ਭਟਕਣਾ ਨਾ ਪਵੇ। ਅਕਸਰ ਘਰਾਂ ਵਿਚ ਸਿਲਾਈ-ਕਿੱਟ ਵਿਚ ਸੂਈ, ਧਾਗਾ ਰੱਖਣ ਦੀ ਬਜਾਏ ਔਰਤਾਂ ਉਨ੍ਹਾਂ ਨੂੰ ਇਧਰ-ਉਧਰ ਰੱਖ ਦਿੰਦੀਆਂ ਹਨ, ਜਿਸ ਨਾਲ ਲੋੜ ਪੈਣ ਸਮੇਂ ਉਨ੍ਹਾਂ ਨੂੰ ਕੈਂਚੀ, ਸੂਈ, ਧਾਗਾ, ਬਟਨ ਵਗੈਰਾ ਮਿਲਣ ਵਿਚ ਪ੍ਰੇਸ਼ਾਨੀ ਹੁੰਦੀ ਹੈ। ਇਸੇ ਤਰ੍ਹਾਂ ਮੈਡੀਕਲ-ਕਿੱਟ ਬਣਾ ਕੇ ਜੇ ਉਸ ਵਿਚ ਜ਼ਰੂਰੀ ਦਵਾਈਆਂ, ਰੂੰ, ਡਿਟੋਲ, ਐਂਟੀਸੈਪਟਿਕ ਕ੍ਰੀਮ, ਬੈਂਡ ਏਡ ਵਗੈਰਾ ਰੱਖੇ ਜਾ ਸਕਦੇ ਹਨ।
ਟੂਲਬਾਕਸ ਵਿਚ ਜੇ ਹਥੌੜੀ, ਕਿੱਲ, ਪੇਚਕੱਸ, ਸਕਰਿਊਡ੍ਰਾਈਵਰ ਆਦਿ ਸਲੀਕੇ ਨਾਲ ਰੱਖੇ ਜਾਣ ਤਾਂ ਲੋੜ ਦੇ ਸਮੇਂ ਦੂਜਿਆਂ ਤੋਂ ਮੰਗਣ ਦੀ ਨੌਬਤ ਨਹੀਂ ਆਉਂਦੀ। ਜ਼ਰੂਰੀ ਪੁਸਤਕਾਂ, ਅਖ਼ਬਾਰ ਦੀਆਂ ਕਟਿੰਗਾਂ ਦੀ ਫਾਈਲ, ਪਾਣੀ-ਬਿਜਲੀ ਦੇ ਬਿੱਲ ਦੀ ਫਾਈਲ, ਬੱਚਿਆਂ ਦੀਆਂ ਵਿੱਦਿਅਕ ਯੋਗਤਾਵਾਂ ਦੇ ਪ੍ਰਮਾਣ-ਪੱਤਰ, ਪ੍ਰਗਤੀ ਪੱਤਰ, ਰਾਸ਼ਨ ਕਾਰਡ, ਪਛਾਣ-ਪੱਤਰ, ਟੈਲੀਫੋਨ ਡਾਇਰੀ ਅਤੇ ਮੈਸੇਜ, ਕਾਪੀ-ਪੈੱਨ ਆਦਿ ਨਿਰਧਾਰਤ ਜਗ੍ਹਾ 'ਤੇ ਰੱਖੋ। ਕੁਝ ਸਮੇਂ ਬਾਅਦ ਤੁਸੀਂ ਖੁਦ ਮਹਿਸੂਸ ਕਰੋਗੇ ਕਿ ਸਾਰੀਆਂ ਚੀਜ਼ਾਂ ਸੁਚਾਰੂ ਢੰਗ ਨਾਲ ਕੰਮ ਆਉਣ ਦੇ ਨਤੀਜੇ ਵਜੋਂ ਤੁਹਾਡੇ ਘਰ ਵਿਚ ਵਿਅਰਥ ਦਾ ਤਣਾਅ, ਖਿਝ, ਲੜਾਈ ਅਤੇ ਮਨਮੁਟਾਵ ਹੋਣਾ ਬੰਦ ਹੋ ਗਿਆ ਹੈ।
ਸਮੇਂ ਸਿਰ ਜ਼ਰੂਰੀ ਚੀਜ਼ਾਂ ਵੀ ਨਿਰਧਾਰਤ ਸਥਾਨ 'ਤੇ ਮਿਲਣ ਨਾਲ ਸਾਰੇ ਪਰਿਵਾਰਕ ਮੈਂਬਰ ਖੁਸ਼ ਅਤੇ ਨਿਸ਼ਚਿੰਤ ਰਹਿਣਗੇ।





Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX