ਤਾਜਾ ਖ਼ਬਰਾਂ


ਸੜਕ ਹਾਦਸੇ ਚ 2 ਨੌਜਵਾਨਾ ਦੀ ਮੌਤ
. . .  1 day ago
ਉਸਮਾਨਪੁਰ ,21 ਜਨਵਰੀ {ਸੰਦੀਪ }-ਪਿੰਡ ਉਸਮਾਨਪੁਰ - ਚੱਕਲ਼ੀ ਸੰਪਰਕ ਸੜਕ 'ਤੇ ਟਰੈਕਟਰ ਟਰਾਲੀ ਅਤੇ ਮੋਟਰ ਸਾਈਕਲ ਦੀ ਟੱਕਰ 'ਚ 2 ਨੌਜਵਾਨਾ ਦੀ ਮੌਤ ਹੋ ਗਈ ।
ਲੰਡਨ 'ਚ ਈ.ਵੀ.ਐਮ ਸਬੰਧੀ ਕਰਵਾਏ ਜਾ ਰਹੇ ਪ੍ਰੋਗਰਾਮ 'ਤੇ ਨਜ਼ਰ - ਚੋਣ ਕਮਿਸ਼ਨ
. . .  1 day ago
ਨਵੀਂ ਦਿੱਲੀ, 21 ਜਨਵਰੀ - ਇੰਗਲੈਂਡ ਦੇ ਲੰਡਨ 'ਚ ਈ.ਵੀ.ਐਮ ਸਬੰਧੀ ਕਰਵਾਏ ਜਾ ਰਹੇ ਪ੍ਰੋਗਰਾਮ ਜਿਸ ਵਿਚ ਦਾਅਵਾ ਕੀਤਾ ਗਿਆ ਹੈ ਕਿ ਭਾਰਤੀ ਚੋਣ ਕਮਿਸ਼ਨ ਦੀ ਈ.ਵੀ.ਐਮ...
ਅਮਰੀਕੀ ਸੈਨੇਟਰ ਕਮਲਾ ਹੈਰਿਸ ਵੱਲੋਂ 2020 ਰਾਸ਼ਟਰਪਤੀ ਚੋਣ ਲੜਨ ਦਾ ਐਲਾਨ
. . .  1 day ago
ਨਿਊਯਾਰਕ, 21 ਜਨਵਰੀ - ਅਮਰੀਕੀ ਸੈਨੇਟਰ ਕਮਲਾ ਹੈਰਿਸ ਨੇ ਐਲਾਨ ਕੀਤਾ ਹੈ ਕਿ ਉਨ੍ਹਾਂ ਵੱਲੋਂ 2020 ਦੀ ਰਾਸ਼ਟਰਪਤੀ ਚੋਣ ਲੜੀ...
ਟਾਟਾ ਸੂਮੋ ਅਤੇ ਟਰੱਕ ਦੀ ਟੱਕਰ 'ਚ 3 ਮੌਤਾਂ, ਇੱਕ ਜ਼ਖਮੀ
. . .  1 day ago
ਮੂਨਕ, 21 ਜਨਵਰੀ (ਰਾਜਪਾਲ ਸਿੰਗਲਾ) - ਇੱਥੋਂ ਨੇੜਲੇ ਪਿੰਡ ਕੋਲ ਹੋਏ ਦਰਦਨਾਕ ਸੜਕ ਹਾਦਸੇ ਵਿਚ 3 ਲੋਕਾਂ ਦੀ ਮੌਤ ਹੋ ਗਈ, ਜਦਕਿ ਇੱਕ ਜ਼ਖਮੀ ਹੋ ਗਿਆ। ਇਹ ਹਾਦਸਾ...
ਖ਼ਰਾਬ ਮੌਸਮ ਦੇ ਮੱਦੇਨਜ਼ਰ ਦੇਹਰਾਦੂਨ ਦੇ ਸਕੂਲਾਂ 'ਚ ਕੱਲ੍ਹ ਛੁੱਟੀ
. . .  1 day ago
ਦੇਹਰਾਦੂਨ, 21 ਜਨਵਰੀ - ਭਾਰੀ ਬਰਸਾਤ ਤੇ ਬਰਫ਼ਬਾਰੀ ਦੀ ਸੰਭਾਵਨਾ ਨੂੰ ਦੇਖਦੇ ਹੋਏ ਉੱਤਰਾਖੰਡ ਦੇ ਦੇਹਰਾਦੂਨ ਪ੍ਰਸ਼ਾਸਨ ਨੇ 22 ਜਨਵਰੀ ਨੂੰ ਜ਼ਿਲ੍ਹੇ ਦੇ ਸਾਰੇ ਸਕੂਲਾਂ ਅਤੇ ਆਂਗਣਵਾੜੀ...
ਕਰਨਾਟਕ : ਵਿਧਾਇਕ ਜੇ.ਐਨ ਗਣੇਸ਼ ਕਾਂਗਰਸ ਤੋਂ ਮੁਅੱਤਲ
. . .  1 day ago
ਬੈਂਗਲੁਰੂ, 21 ਜਨਵਰੀ - ਕਾਂਗਰਸ ਦੇ ਵਿਧਾਇਕ ਜੇ.ਐਨ ਗਣੇਸ਼ ਵੱਲੋਂ ਕਾਂਗਰਸ ਦੇ ਹੀ ਵਿਧਾਇਕ ਅਨੰਦ ਸਿੰਘ ਨਾਲ ਮਾਰਕੁੱਟ ਤੋਂ ਬਾਅਦ ਕਰਨਾਟਕ ਕਾਂਗਰਸ ਦੇ ਜਨਰਲ ਸਕੱਤਰ...
ਕਰਨਾਟਕ ਕਿਸ਼ਤੀ ਹਾਦਸਾ : ਹੁਣ ਤੱਕ 16 ਲਾਸ਼ਾਂ ਬਰਾਮਦ
. . .  1 day ago
ਬੈਂਗਲੁਰੂ, 21 ਜਨਵਰੀ - ਕਰਨਾਟਕ ਦੇ ਕਰਵਾੜ 'ਚ 24 ਲੋਕਾਂ ਨੂੰ ਲੈ ਕੇ ਜਾ ਰਹੀ ਕਿਸ਼ਤੀ ਪਲਟਣ ਤੋਂ ਬਾਅਦ ਸਮੁੰਦਰੀ ਫ਼ੌਜ ਤੇ ਕੋਸਟ ਗਾਰਡ ਨੇ ਹੁਣ ਤੱਕ 16 ਲੋਕਾਂ ਦੀਆਂ ਲਾਸ਼ਾਂ...
680 ਪੇਟੀਆਂ ਨਾਜਾਇਜ਼ ਸ਼ਰਾਬ ਸਮੇਤ ਇੱਕ ਗ੍ਰਿਫ਼ਤਾਰ
. . .  1 day ago
ਜਲੰਧਰ, 21 ਜਨਵਰੀ - ਸੀ.ਆਈ.ਏ ਸਟਾਫ਼ ਨੇ 680 ਪੇਟੀਆਂ ਨਾਜਾਇਜ਼ ਸ਼ਰਾਬ ਸਮੇਤ ਇੱਕ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਇਸ ਸਬੰਧੀ ਡੀ.ਸੀ.ਪੀ ਜਾਂਚ ਗੁਰਮੀਤ ਸਿੰਘ ਨੇ ਦੱਸਿਆ ਕਿ...
ਗੋਦਾਮ ਦੀ ਕੰਧ ਡਿੱਗਣ ਕਾਰਨ 2 ਲੋਕਾਂ ਦੀ ਮੌਤ
. . .  1 day ago
ਨਵੀਂ ਦਿੱਲੀ, 21 ਜਨਵਰੀ- ਦਿੱਲੀ ਦੇ ਨਜਫਗੜ੍ਹ ਦੇ ਨਾਂਗਲੀ 'ਚ ਇੱਕ ਗੋਦਾਮ ਦੀ ਕੰਧ ਡਿੱਗਣ ਕਾਰਨ ਦੋ ਲੋਕਾਂ ਦੀ ਮੌਤ ਹੋ ਗਈ......
ਸੁਨੰਦਾ ਪੁਸ਼ਕਰ ਮਾਮਲੇ ਦੀ ਸੁਣਵਾਈ 29 ਜਨਵਰੀ ਤੱਕ ਮੁਲਤਵੀ
. . .  1 day ago
ਨਵੀਂ ਦਿੱਲੀ, 21 ਜਨਵਰੀ- ਸੁਨੰਦਾ ਪੁਸ਼ਕਰ ਦੀ ਮੌਤ ਦੇ ਮਾਮਲੇ 'ਚ ਸੁਣਵਾਈ ਨੂੰ ਦਿੱਲੀ ਦੀ ਪਟਿਆਲਾ ਹਾਊਸ ਕੋਰਟ ਨੇ 29 ਜਨਵਰੀ ਤੱਕ ਮੁਲਤਵੀ ਕਰ ਦਿੱਤਾ.....
ਹੋਰ ਖ਼ਬਰਾਂ..

ਖੇਡ ਜਗਤ

ਗਰਮੀ ਰੁੱਤ ਯੂਥ ਉਲੰਪਿਕ ਖੇਡਾਂ ਵਿਚ ਭਾਰਤੀ ਖਿਡਾਰੀ

ਦੁਨੀਆ ਦੇ ਖੇਡਾਂ ਨਾਲ ਪਿਆਰ ਕਰਨ ਵਾਲੇ ਯੂਥ ਉਲੰਪਿਕ ਖੇਡਾਂ ਦਾ ਬੇਸਬਰੀ ਨਾਲ ਇੰਤਜ਼ਾਰ ਕਰ ਰਹੇ ਹਨ। ਇਨ੍ਹਾਂ ਖੇਡਾਂ ਵਿਚ ਹਰ ਦੇਸ਼ ਦੀ ਰੀੜ੍ਹ ਦੀ ਹੱਡੀ ਕਹੇ ਜਾਣ ਵਾਲੇ ਨੌਜਵਾਨ ਹਿੱਸਾ ਲੈਂਦੇ ਹਨ। ਅਸੀਂ ਗੱਲ ਕਰ ਰਹੇ ਹਾਂ ਗਰਮੀ ਰੁੱਤ ਯੂਥ ਉਲੰਪਿਕ ਖੇਡਾਂ ਦੀ। 6 ਤੋਂ 18 ਅਕਤੂਬਰ ਤੱਕ ਚੱਲਣ ਵਾਲੀਆਂ ਯੂਥ ਉਲੰਪਿਕ ਖੇਡਾਂ ਅਰਜਨਟੀਨਾ ਦੇ ਸ਼ਹਿਰ ਬੇਸਨ ਵਿਚ ਕਰਵਾਈਆਂ ਜਾ ਰਹੀਆਂ ਹਨ। ਜੇਕਰ ਯੂਥ ਉਲੰਪਿਕ ਖੇਡਾਂ ਦੇ ਇਤਿਹਾਸ ਵੱਲ ਝਾਤੀ ਮਾਰੀਏ ਤਾਂ ਇਨ੍ਹਾਂ ਖੇਡਾਂ ਦੀ ਸ਼ੁਰੂਆਤ 1998 ਵਿਚ ਹੋਈ। ਯੂਥ ਉਲੰਪਿਕ ਖੇਡਾਂ ਦੀ ਨੀਂਹ ਆਸਟਰੀਆ ਦੇ ਉਦਯੋਗਿਕ ਜੌਹਾਨ ਰੋਜੇਜ਼ੋਫ ਨੇ ਰੱਖੀ ਸੀ। ਉਸ ਦੀ ਸੋਚ ਸੀ ਕਿ ਨੌਜਵਾਨ ਬਚਪਨ ਤੋਂ ਹੀ ਮੋਟਾਪੇ ਦੇ ਸ਼ਿਕਾਰ ਹੋ ਜਾਂਦੇ ਹਨ ਅਤੇ ਖੇਡ ਦੀਆਂ ਸਰਗਰਮੀਆਂ ਵਿਚ ਨੌਜਵਾਨ ਘੱਟ ਹੀ ਹਿੱਸਾ ਲੈਂਦੇ ਹਨ। ਆਈ.ਓ.ਸੀ. ਇਨ੍ਹਾਂ ਖੇਡਾਂ ਦਾ ਪ੍ਰਬੰਧ ਕਰਦੀ ਹੈ। ਇਹ ਖੇਡਾਂ ਵੀ 4 ਸਾਲ ਬਾਅਦ ਕਰਵਾਈਆ ਜਾਂਦੀਆਂ ਹਨ। ਪਹਿਲੀ ਵਾਰ ਇਨ੍ਹਾਂ ਖੇਡਾਂ ਨੂੰ 14 ਤੋਂ 26 ਅਗਸਤ, 2010 ਸਿੰਗਾਪੁਰ ਵਿਖੇ ਕਰਵਾਈਆ ਗਈਆਂ। ਇਨ੍ਹਾਂ ਯੂਥ ਉਲੰਪਿਕ ਖੇਡਾਂ ਦੀ ਵਿਸ਼ੇਸ਼ਤਾ ਇਹ ਹੈ ਕਿ ਇਨ੍ਹਾਂ ਖੇਡਾਂ ਵਿਚ ਐਥਲੀਟ ਦੀ ਉਮਰ ਹੱਦ 14 ਤੋਂ 18 ਹੈ। ਭਾਰਤ ਨੇ 2010 ਵਿਚ ਇਨ੍ਹਾਂ ਖੇਡਾਂ 'ਚ ਸ਼ਮੂਲੀਅਤ ਕੀਤੀ ਸੀ। 2010 ਦੀਆਂ ਗਰਮੀ ਰੁੱਤ ਯੂਥ ਉਲੰਪਿਕ ਖੇਡਾਂ ਵਿਚ ਭਾਰਤ ਨੇ 13 ਖੇਡਾਂ ਲਈ 32 ਐਥਲੀਟ ਭੇਜੇ ਸਨ, ਇਨ੍ਹਾਂ ਖੇਡਾਂ ਵਿਚ 6 ਚਾਂਦੀ ਤੇ 2 ਕਾਂਸੇ ਕੁੱਲ 8 ਤਗਮੇ ਭਾਰਤੀ ਖਿਡਾਰੀਆਂ ਨੇ ਜਿੱਤੇ ਸਨ।
ਭਾਰਤ ਨੇ ਮੁੱਕੇਬਾਜ਼ੀ, ਬੈਡਮਿੰਟਨ, ਤੈਰਾਕੀ, ਤੀਰਅੰਦਾਜ਼ੀ, ਐਥਲੈਟਿਕਸ, ਬਾਸਕਟਬਾਲ, ਜੂਡੋ, ਰੋਇੰਗ, ਸ਼ੂਟਿੰਗ, ਟੇਬਲ ਟੈਨਿਸ, ਟੈਨਿਸ, ਵੇਟ ਲਿਫਟਿੰਗ ਅਤੇ ਕੁਸ਼ਤੀ ਖੇਡਾਂ ਦੇ ਖਿਡਾਰੀਆਂ ਨੇ ਹਿੱਸਾ ਲਿਆ। 2014 ਦੀਆਂ ਗਰਮ ਰੁੱਤ ਯੂਥ ਉਲੰਪਿਕ ਖੇਡਾਂ ਦੀ ਗੱਲ ਕਰੀਏ ਤਾਂ ਇਸ ਵਿਚ ਭਾਰਤ ਨੇ ਕੁੱਲ 2 ਤਗਮੇ ਜਿੱਤੇ ਸਨ, ਜਿਸ ਵਿਚ 1 ਚਾਂਦੀ ਅਤੇ 1 ਕਾਂਸੀ ਦਾ ਤਗਮਾ ਸ਼ਾਮਿਲ ਸੀ। ਵੈਂਕਟ ਰਾਹੁਲ ਰੈਗਾਲਾ ਨੇ ਚਾਂਦੀ ਤੇ ਅਤੁਲ ਵਰਮਾ ਤੀਰਅੰਦਾਜ਼ੀ ਨੇ ਕਾਂਸੇ ਦਾ ਤਗਮਾ ਜਿੱਤਿਆ। ਸਾਲ 2018 ਦੀਆਂ ਗਰਮ ਰੁੱਤ ਯੂਥ ਉਲੰਪਿਕ ਖੇਡਾਂ ਵਿਚ ਭਾਰਤ ਦੇ 25 ਪੁਰਸ਼ ਤੇ 21 ਮਹਿਲਾ ਐਥਲੀਟ ਕੁੱਲ 46 ਐਥਲੀਟ ਹਿੱਸਾ ਲੈ ਰਹੇ ਹਨ। ਜੇਕਰ ਗੱਲ ਵੱਖ-ਵੱਖ ਖੇਡਾਂ ਦੀ ਕਰੀਏ ਤਾਂ ਇਨ੍ਹਾਂ ਖੇਡਾਂ ਵਿਚ ਤੀਰਅੰਦਾਜ਼ੀ ਵਿਚ 3 ਖਿਡਾਰੀ, ਅਥਲੈਟਿਕਸ ਵਿਚ 7 ਖਿਡਾਰੀ, ਬੈਡਮਿੰਟਨ ਵਿਚ 2 ਖਿਡਾਰੀ, ਬਾਕਸਿੰਗ ਇਕ ਖਿਡਾਰੀ, ਹਾਕੀ ਪੁਰਸ਼ ਅਤੇ ਔਰਤਾਂ 18 ਖਿਡਾਰੀ, ਜੂਡੋ ਵਿਚ ਇਕ ਖਿਡਾਰੀ, ਕਿਸ਼ਤੀ ਚਾਲਣ ਵਿਚ 2 ਖਿਡਾਰੀ, ਸ਼ੂਟਿੰਗ ਵਿਚ 4 ਖਿਡਾਰੀ, ਤੈਰਾਕੀ ਵਿਚ 2 ਖਿਡਾਰੀ, ਟੇਬਲ ਟੈਨਿਸ ਵਿਚ 2 ਖਿਡਾਰੀ, ਵੇਟ ਲਿਫਟਿੰਗ ਵਿਚੋਂ 2 ਖਿਡਾਰੀ ਅਤੇ ਕੁਸ਼ਤੀ ਵਿਚ ਦੋ ਖਿਡਾਰੀ ਭਾਰਤੀ ਟੀਮ ਦੀ ਪ੍ਰਤੀਨਿਧਤਾ ਕਰਨਗੇ। ਇਨ੍ਹਾਂ ਖੇਡਾਂ ਵਿਚ ਰਾਸ਼ਟਰ ਮੰਡਲ ਖੇਡਾਂ ਦੇ ਤਗਮਾ ਜੇਤੂ ਮੇਹਲੀ ਘੋਸ਼, ਵਿਸ਼ਵ ਯੁਵਾ ਮੁੱਕੇਬਾਜ਼ੀ ਚੈਂਪੀਅਨ ਜਯੋਤੀ ਗੁਲਾ, ਆਈ.ਐਸ.ਐਸ.ਐਫ. ਦੇ ਸੀਨੀਅਰ ਅਤੇ ਜੂਨੀਅਰ ਵਿਸ਼ਵ ਕੱਪ ਜੇਤੂ ਮਨੂ ਬੇਕਰ ਤੋਂ ਭਾਰਤ ਨੂੰ ਉਮੀਦਾਂ ਹਨ। ਆਸ ਕਰਦੇ ਹਾਂ ਕਿ ਗਰਮੀ ਰੁੱਤ ਯੂਥ ਉਲੰਪਿਕ ਖੇਡਾਂ ਵਿਚ ਤਗਮਿਆਂ ਦੀ ਗਿਣਤੀ ਵਿਚ ਵਾਧਾ ਕਰਨਗੇ।


-ਮੋਬਾ: 82888-47042


ਖ਼ਬਰ ਸ਼ੇਅਰ ਕਰੋ

ਕੌਮਾਂਤਰੀ ਫੁੱਟਬਾਲ ਦਾ ਨਵਾਂ ਮੁਕਾਮ : ਨੇਸ਼ਨਜ਼ ਲੀਗ

ਇਸ ਸਾਲ ਦੁਨੀਆ ਦੇ ਸਭ ਤੋਂ ਵੱਡੇ ਫੁੱਟਬਾਲ ਟੂਰਨਾਮੈਂਟ, ਫ਼ੀਫ਼ਾ ਵਿਸ਼ਵ ਕੱਪ ਦੇ ਮੁਕਾਬਲੇ ਰੂਸ ਵਿਚ ਹੋਏ ਸਨ ਅਤੇ ਇਨ੍ਹਾਂ ਮੁਕਾਬਲਿਆਂ ਨੇ ਪੂਰੇ ਵਿਸ਼ਵ ਵਿਚ ਫੁੱਟਬਾਲ ਦਾ ਜਲਵਾ ਵਿਖਾ ਦਿੱਤਾ ਸੀ। ਵਿਸ਼ਵ ਕੱਪ ਮਗਰੋਂ ਫੁੱਟਬਾਲ ਕਲੱਬਾਂ ਦੇ ਮੁਕਾਬਲੇ ਤਾਂ ਚੱਲਦੇ ਰਹਿੰਦੇ ਹਨ ਪਰ ਕੌਮਾਂਤਰੀ ਫੁੱਟਬਾਲ ਵੇਖਣ ਲਈ 4 ਸਾਲ ਇੰਤਜ਼ਾਰ ਕਰਨਾ ਪੈਂਦਾ ਸੀ। ਹੁਣ ਇਸੇ ਉਡੀਕ ਨੂੰ ਛੋਟਾ ਕੀਤਾ ਹੈ ਬਿਲਕੁਲ ਵਿਸ਼ਵ ਕੱਪ ਵਰਗੇ ਇਕ ਨਵੇਂ ਨਕੋਰ ਕੌਮਾਂਤਰੀ ਆਯੋਜਨ ਨੇ। 'ਯੂਏਫਾ ਨੇਸ਼ਨਜ਼ ਲੀਗ' ਨਾਂਅ ਦੇ ਇਕ ਆਲਮੀ ਫੁੱਟਬਾਲ ਟੂਰਨਾਮੈਂਟ ਦੀ ਸ਼ੁਰੂਆਤ ਹੋਈ ਹੈ, ਜਿਸ ਦੇ ਅਗਲੇਰੇ ਗੇੜ ਦੇ ਪ੍ਰਮੁੱਖ ਮੁਕਾਬਲੇ 11 ਅਕਤੂਬਰ ਤੋਂ ਸ਼ੁਰੂ ਹੋ ਰਹੇ ਹਨ ਅਤੇ ਇਨ੍ਹਾਂ ਦੀ ਖਾਸੀਅਤ ਇਹ ਹੈ ਕਿ ਇਨ੍ਹਾਂ ਮੁਕਾਬਲਿਆਂ ਵਿਚ ਯੂਰਪ ਦੇ ਸਾਰੇ ਦੇਸ਼ ਇਕ ਲੀਗ ਵਾਂਗ ਖੇਡ ਰਹੇ ਹਨ, ਯਾਨੀ ਉੱਚਕੋਟੀ ਦੀਆਂ ਟੀਮਾਂ ਸਮੇਤ ਸਾਰੇ ਉੱਚਕੋਟੀ ਦੇ ਖਿਡਾਰੀ ਵੀ ਇਸੇ ਕੌਮਾਂਤਰੀ ਲੀਗ ਵਿਚ ਖੇਡ ਰਹੇ ਹਨ। ਯੂਰਪੀ ਫੁੱਟਬਾਲ ਜਥੇਬੰਦੀ 'ਯੂਏਫਾ' ਵਲੋਂ ਕਰਵਾਈ ਜਾ ਰਹੀ ਯੂਏਫਾ ਨੇਸ਼ਨਜ਼ ਲੀਗ ਵਿਚ ਯੂਰਪ ਦੇ ਕੁੱਲ 55 ਦੇਸ਼ ਖੇਡ ਰਹੇ ਹਨ। ਏਨੀ ਵੱਡੀ ਸੰਖਿਆ ਵਾਲੀਆਂ ਟੀਮਾਂ ਦੀ ਇਹ ਲੀਗ 9 ਜੂਨ, 2019 ਤੱਕ ਚੱਲੇਗੀ। ਇਸ ਲੀਗ ਵਿਚ ਕੌਮਾਂਤਰੀ ਦਰਜਾਬੰਦੀ ਦੇ ਹਿਸਾਬ ਨਾਲ ਯੂਰਪੀ ਦੇਸ਼ਾਂ ਦੀਆਂ ਟੀਮਾਂ ਨੂੰ ਚਾਰ ਪੂਲਾਂ ਵਿਚ ਵੰਡਿਆ ਗਿਆ ਹੈ ਅਤੇ ਅਗਾਂਹ ਹਰ ਪੂਲ ਵਿਚ ਚਾਰ ਗਰੁੱਪ ਬਣੇ ਹਨ ਅਤੇ ਇਸ ਤਰ੍ਹਾਂ ਟੀਮਾਂ ਨੂੰ ਦਰਜਾਬੰਦੀ ਦੇ ਹਿਸਾਬ ਨਾਲ ਅੱਗੇ-ਅੱਗੇ ਵੰਡਿਆ ਗਿਆ ਹੈ। ਯੂਏਫਾ ਨੇਸ਼ਨਜ਼ ਲੀਗ ਦੀ ਇਕ ਹੋਰ ਖਾਸੀਅਤ ਇਹ ਹੈ ਕਿ ਇਨ੍ਹਾਂ ਮੁਕਾਬਲਿਆਂ ਦੀਆਂ ਜੇਤੂ ਟੀਮਾਂ ਨੂੰ ਅਗਲੇ ਯੂਰੋ ਕੱਪ ਮੁਕਾਬਲਿਆਂ ਲਈ ਸਿੱਧਾ ਦਾਖਲਾ ਮਿਲੇਗਾ ਅਤੇ ਅੰਤਰਰਾਸ਼ਟਰੀ ਮੈਚਾਂ ਦੀ ਸੰਖਿਆ ਵੀ ਵਧੇਗੀ।
ਇਸ ਲੀਗ ਰਾਹੀਂ ਜਿਥੇ ਪ੍ਰਸੰਸਕ ਵਿਸ਼ਵ ਕੱਪ ਜੇਤੂ ਫਰਾਂਸ, ਉੱਪ-ਜੇਤੂ ਕ੍ਰੋਏਸ਼ੀਆ, ਬੈਲਜ਼ੀਅਮ, ਇੰਗਲੈਂਡ, ਸਪੇਨ, ਪੁਰਤਗਾਲ, ਸਾਬਕਾ ਵਿਸ਼ਵ ਕੱਪ ਜੇਤੂ ਜਰਮਨੀ, ਡੈਨਮਾਰਕ ਵਰਗੀਆਂ ਟੀਮਾਂ ਦੀ ਵਿਸ਼ਵ ਕੱਪ ਤੋਂ ਬਾਅਦ ਦੀ ਖੇਡ ਵੇਖ ਸਕਣਗੇ, ਉਥੇ ਹੀ ਵਿਸ਼ਵ ਕੱਪ ਖੇਡਣ ਤੋਂ ਵਾਂਝਿਆਂ ਰਹਿ ਗਏ ਦੇਸ਼ ਇਟਲੀ ਅਤੇ ਹਾਲੈਂਡ ਦੀ ਵਾਪਸੀ ਵੀ ਵੇਖ ਸਕਣਗੇ। ਇਸ ਦੇ ਨਾਲ ਹੀ ਕੌਮਾਂਤਰੀ ਵਿਸ਼ਵ ਫੁੱਟਬਾਲ ਦੇ ਮੰਚ ਉੱਪਰ ਜਲਵਾ ਵਿਖਾ ਰਹੀਆਂ ਟੀਮਾਂ ਜਿਵੇਂ ਸਵੀਡਨ, ਆਇਰਲੈਂਡ, ਯੂਕ੍ਰੇਨ, ਸਵਿਟਜ਼ਰਲੈਂਡ, ਚੈੱਕ ਰਿਪਬਲਿਕ, ਸਰਬੀਆ, ਪੋਲੈਂਡ ਆਦਿ ਦੇਸ਼ਾਂ ਦੀ ਖੇਡ ਦਾ ਵੀ ਲੁਤਫ ਲਿਆ ਜਾ ਸਕੇਗਾ। ਇਸ ਦਾ ਭਾਵ ਇਹ ਵੀ ਹੈ ਕਿ ਇਸ ਕੌਮਾਂਤਰੀ ਫੁੱਟਬਾਲ ਮੁਕਾਬਲੇ ਰਾਹੀਂ ਫਰਾਂਸ ਦੇ ਕਿਲੀਅਨ ਐਮਬਾਪੇ, ਬੈਲਜ਼ੀਅਮ ਦੇ ਏਡਨ ਹੈਜ਼ਾਰਡ, ਇੰਗਲੈਂਡ ਦੇ ਹੈਰੀ ਕੇਨ ਅਤੇ ਪੁਰਤਗਾਲ ਦੇ ਕ੍ਰਿਸਟਿਆਨੋ ਰੋਨਾਲਡੋ ਵਰਗੇ ਸਟਾਰ ਖਿਡਾਰੀ ਆਪੋ-ਆਪਣੇ ਦੇਸ਼ ਲਈ ਖੇਡਦੇ ਨਜ਼ਰ ਆਉਣਗੇ। ਇੰਜ 55 ਤੋਂ ਸ਼ੁਰੂ ਹੋ ਕੇ 8 ਮਹੀਨੇ ਦੇ ਸਫਰ ਦੇ ਬਾਅਦ ਜੂਨ, 2019 ਵਿਚ ਇਹ ਲੰਮੇਰਾ ਟੂਰਨਾਮੈਂਟ ਮੁਕੰਮਲ ਹੋਵੇਗਾ, ਜਿਸ ਉੱਤੇ ਸਾਰੇ ਵਿਸ਼ਵ ਦੀਆਂ ਨਜ਼ਰਾਂ ਟਿਕੀਆਂ ਹੋਣਗੀਆਂ, ਇਹ ਵੇਖਣ ਲਈ ਕਿ ਆਪਣੀ ਤਰ੍ਹਾਂ ਦੀ ਇਸ ਸਭ ਤੋਂ ਪਹਿਲੀ ਕੌਮਾਂਤਰੀ ਫੁੱਟਬਾਲ ਲੀਗ ਦਾ ਪਲੇਠਾ ਜੇਤੂ ਕੌਣ ਬਣਦਾ ਹੈ। ਖੇਡ ਚੈਨਲ 'ਸੋਨੀ-ਟੈਨ ਨੈੱਟਵਰਕ' ਉੱਤੇ ਇਨ੍ਹਾਂ ਸਾਰੇ ਮੈਚਾਂ ਦਾ ਸਿੱਧਾ ਪ੍ਰਸਾਰਨ ਕੀਤਾ ਜਾਂਦਾ ਹੈ ਅਤੇ ਕਾਫੀ ਹੱਦ ਤੱਕ ਵਿਸ਼ਵ ਕੱਪ ਫੁੱਟਬਾਲ ਦੀ ਕਮੀ ਘਟਾਈ ਜਾ ਰਹੀ ਹੈ।


-ਪਿੰਡ ਢਿੱਲਵਾਂ, ਡਾਕ: ਦਕੋਹਾ, ਜ਼ਿਲ੍ਹਾ ਜਲੰਧਰ-144023
E-mail : sudeepsdhillon@ymail.com

ਯੂਨੀਵਰਸਿਟੀ ਖੇਡਾਂ 'ਚੋਂ ਮੋਹਰੀ ਪੰਜਾਬ ਕੌਮੀ ਪੱਧਰ 'ਤੇ ਕਿਉਂ ਪਛੜਿਆ?

ਪਿਛਲੇ ਤਿੰਨ ਦਹਾਕਿਆਂ ਤੋਂ ਖੇਡਾਂ ਦੇ ਖੇਤਰ 'ਚ ਦੇਸ਼ ਦੀ ਸਰਬੋਤਮ ਯੂਨੀਵਰਸਿਟੀ ਨੂੰ ਦਿੱਤੀ ਜਾਣ ਵਾਲੀ ਮੌਲਾਨਾ ਅਬੁਲ ਕਲਾਮ ਆਜ਼ਾਦ (ਮਾਕਾ) ਟਰਾਫੀ ਪੰਜਾਬ ਦੀਆਂ ਯੂਨੀਵਰਸਿਟੀਆਂ ਜਿੱਤਣ ਦਾ ਮਾਣ ਪ੍ਰਾਪਤ ਕਰ ਰਹੀਆਂ ਹਨ, ਜਿਸ ਨੂੰ ਦੇਖ ਕੇ ਅਚਰਜ ਹੁੰਦਾ ਹੈ ਕਿ ਕੌਮੀ ਪੱਧਰ ਦੇ ਓਪਨ ਮੁਕਾਬਲਿਆਂ 'ਚ ਵੀ ਪੰਜਾਬ ਅੱਵਲ ਕਿਉਂ ਨਹੀਂ ਹੈ? ਪੰਜਾਬ ਦੀਆਂ ਯੂਨੀਵਰਸਿਟੀਆਂ ਵੀ ਨੌਜਵਾਨ ਖਿਡਾਰੀਆਂ ਦੀ ਬਦੌਲਤ ਹੀ ਦੇਸ਼ 'ਚੋਂ ਪਹਿਲੇ ਸਥਾਨ 'ਤੇ ਆਉਂਦੀਆਂ ਹਨ ਪਰ ਇਹੀ ਨੌਜਵਾਨ ਖਿਡਾਰੀ ਪੰਜਾਬ ਨੂੰ ਕੌਮੀ ਪੱਧਰ 'ਤੇ ਮੋਹਰੀ ਕਿਉਂ ਨਹੀਂ ਬਣਾ ਰਹੇ? ਇਹ ਸਵਾਲ ਹਰੇਕ ਖੇਡ ਪ੍ਰੇਮੀ ਦੇ ਮਨ ਵਿਚ ਉੱਭਰਦਾ ਹੈ।
ਪੰਜਾਬ ਦੀਆਂ ਕੁਝ ਯੂਨੀਵਰਸਿਟੀਆਂ ਦੇ ਦੇਸ਼ ਭਰ 'ਚੋਂ ਮੋਹਰੀ ਹੋਣ ਦੇ ਰਹੱਸ ਸਬੰਧੀ ਪੰਜਾਬ ਦੇ ਖੇਡ ਮਾਹਿਰ ਮੁੱਖ ਤੌਰ 'ਤੇ ਦੋ ਸਵਾਲ ਉਠਾਉਂਦੇ ਆ ਰਹੇ ਹਨ। ਪਹਿਲਾ ਸਵਾਲ ਇਹ ਹੈ ਕਿ ਮਾਕਾ ਟਰਾਫੀ ਜਿੱਤਣ ਲਈ ਰਾਜ ਦੀਆਂ ਕੁਝ ਯੂਨੀਵਰਸਿਟੀਆਂ ਬਾਹਰਲੇ ਰਾਜਾਂ ਦੇ ਤਕੜੇ ਖਿਡਾਰੀਆਂ ਨੂੰ ਆਪਣੀਆਂ ਟੀਮਾਂ 'ਚ ਖਿਡਾਉਂਦੀਆਂ ਹਨ। ਦੂਸਰਾ ਮਾਮਲਾ, ਰਾਜ ਦੀਆਂ ਯੂਨੀਵਰਸਿਟੀਆਂ ਬਹੁਤ ਸਾਰੀਆਂ ਨਵੀਆਂ ਤੇ ਘੱਟ ਪ੍ਰਚੱਲਤ ਖੇਡਾਂ ਦੀਆਂ ਕੌਮੀ ਚੈਂਪੀਅਨਸ਼ਿਪਾਂ ਕਰਵਾ ਕੇ ਖੁਦ ਹੀ ਪਹਿਲੇ-ਦੂਜੇ ਸਥਾਨ ਹਾਸਲ ਕਰਕੇ ਮਾਕਾ ਟਰਾਫੀ ਲਈ ਵੱਧ ਤੋਂ ਵੱਧ ਅੰਕ ਬਟੋਰਨ ਲਈ ਯਤਨਸ਼ੀਲ ਰਹਿੰਦੀਆਂ ਹਨ। ਪੰਜਾਬ ਦੀਆਂ ਯੂਨੀਵਰਸਿਟੀਆਂ ਉਪਰੋਕਤ ਦੋ ਸਵਾਲਾਂ ਦੇ ਘੇਰੇ 'ਚ ਲਗਾਤਾਰ ਆ ਰਹੀਆਂ ਹਨ। ਖੇਡ ਮਾਹਿਰ ਤਰਕ ਦਿੰਦੇ ਹਨ ਕਿ ਰਾਜ ਦੀਆਂ ਕੁਝ ਯੂਨੀਵਰਸਿਟੀਆਂ ਸਿਰਫ ਮਾਕਾ ਟਰਾਫੀ ਜਿੱਤਣ ਲਈ ਤਰ੍ਹਾਂ-ਤਰ੍ਹਾਂ ਦੇ ਹੱਥਕੰਡੇ ਅਪਣਾ ਰਹੀਆਂ ਹਨ, ਜਿਨ੍ਹਾਂ ਤਹਿਤ ਇਹ ਬਾਹਰਲੇ ਰਾਜਾਂ ਦੇ ਖਿਡਾਰੀਆਂ ਵੱਲ ਵਧੇਰੇ ਧਿਆਨ ਦਿੰਦੀਆਂ ਹਨ ਅਤੇ ਇਨ੍ਹਾਂ ਦਾ ਰਾਜ ਦੀ ਖੇਡ ਪ੍ਰਤਿਭਾ ਨੂੰ ਨਿਖਾਰਨ ਵੱਲ ਬਹੁਤਾ ਧਿਆਨ ਨਹੀਂ ਹੈ। ਇਨ੍ਹਾਂ ਦੋ ਸਵਾਲਾਂ ਦੇ ਜੁਆਬ ਸਬੰਧੀ ਯੂਨੀਵਰਸਿਟੀਆਂ ਦੇ ਖੇਡ ਸੰਚਾਲਕਾਂ ਦਾ ਕਹਿਣਾ ਹੈ ਕਿ ਦੁਨੀਆ ਭਰ 'ਚ ਖਿਡਾਰੀਆਂ ਨੂੰ ਜਿੱਥੇ ਵਧੇਰੇ ਸਹੂਲਤਾਂ ਤੇ ਇਨਾਮ ਮਿਲਦੇ ਹਨ, ਉਹ ਉਨ੍ਹਾਂ ਸੰਸਥਾਵਾਂ ਲਈ ਖੇਡਣ ਨੂੰ ਪਹਿਲ ਦਿੰਦੇ ਹਨ। ਸਾਡੇ ਦੇਸ਼ 'ਚ ਪੰਜਾਬ ਦੀਆਂ ਯੂਨੀਵਰਸਿਟੀਆਂ ਖਿਡਾਰੀਆਂ ਨੂੰ ਬਿਹਤਰ ਸਹੂਲਤਾਂ ਤੇ ਇਨਾਮ ਦੇਣ 'ਚ ਮੋਹਰੀ ਹਨ। ਇਸ ਕਰਕੇ ਬਾਹਰਲੇ ਰਾਜਾਂ ਦੇ ਖਿਡਾਰੀ ਪੰਜਾਬ ਦੀਆਂ ਯੂਨੀਵਰਸਿਟੀਆਂ ਵਲੋਂ ਖੇਡਣ ਨੂੰ ਤਰਜੀਹ ਦਿੰਦੇ ਹਨ। ਪਰ ਬਾਹਰਲੇ ਰਾਜਾਂ ਦੇ ਖਿਡਾਰੀ ਕੌਮੀ ਪੱਧਰ ਦੇ ਹੋਰਨਾਂ ਮੁਕਾਬਲਿਆਂ 'ਚ ਆਪਣੇ ਰਾਜਾਂ ਵਲੋਂ ਹੀ ਖੇਡਦੇ ਹਨ।
ਇਸ ਮਾਮਲੇ 'ਚ ਇਹ ਗੱਲ ਉੱਭਰ ਕੇ ਸਾਹਮਣੇ ਆਉਂਦੀ ਹੈ ਕਿ ਪੰਜਾਬ ਦੀਆਂ ਯੂਨੀਵਰਸਿਟੀਆਂ ਬਾਹਰਲੇ ਰਾਜਾਂ ਨੂੰ ਖਿਡਾਰੀ ਤਿਆਰ ਕਰਕੇ ਦੇ ਰਹੀਆਂ ਹਨ। ਨਵੀਆਂ ਤੇ ਘੱਟ ਪ੍ਰਚੱਲਤ ਖੇਡਾਂ ਦੀਆਂ ਲੁਕ-ਛਿਪ ਕੇ ਕੌਮੀ ਚੈਂਪੀਅਨਸ਼ਿਪਾਂ ਕਰਵਾਉਣ ਬਾਰੇ ਪੰਜਾਬ ਦੀਆਂ ਯੂਨੀਵਰਸਿਟੀਆਂ ਕੋਲ ਕੋਈ ਜੁਆਬ ਨਹੀਂ ਹੈ। ਇਸ ਸਬੰਧੀ ਐਸੋਸੀਏਸ਼ਨ ਆਫ ਇੰਡੀਅਨ ਯੂਨੀਵਰਸਿਟੀਜ਼ (ਏ.ਆਈ.ਯੂ.) ਦੇ ਨਵੇਂ ਨਿਯਮ ਹੀ ਪੰਜਾਬ ਦੀਆਂ ਕੁਝ ਯੂਨੀਵਰਸਿਟੀਆਂ ਵਲੋਂ ਕੌਮੀ ਚੈਂਪੀਅਨਸ਼ਿਪਾਂ 'ਚੋਂ ਅੰਕ ਬਟੋਰਨ ਦੀਆਂ ਚੋਰ-ਮੋਰੀਆਂ ਨੂੰ ਬੰਦ ਕਰਨ ਜਾ ਰਹੇ ਹਨ।
ਉਪਰੋਕਤ ਮਾਮਲੇ ਸਬੰਧੀ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦੇ ਸਾਬਕਾ ਖੇਡ ਨਿਰਦੇਸ਼ਕ ਡਾ: ਰਾਜ ਕੁਮਾਰ ਸ਼ਰਮਾ ਦਾ ਕਹਿਣਾ ਹੈ ਕਿ ਪੰਜਾਬ ਵਿਚ ਖਿਡਾਰੀਆਂ ਨੂੰ ਮਿਲਣ ਵਾਲੀਆਂ ਨਿਗੂਣੀਆਂ ਤੇ ਬੇਵਕਤੀ ਇਨਾਮੀ ਰਾਸ਼ੀਆਂ ਕਾਰਨ ਸਾਡੇ ਚੰਗੇ ਖਿਡਾਰੀ ਜਿਉਂ ਹੀ ਕੌਮੀ ਪੱਧਰ 'ਤੇ ਮੋਹਰੀ ਸਫਾਂ 'ਚ ਜਾਂਦੇ ਹਨ ਤਾਂ ਉਹ ਵੱਖ-ਵੱਖ ਸਰਕਾਰੀ ਤੇ ਗੈਰ-ਸਰਕਾਰੀ ਅਦਾਰਿਆਂ ਵਲੋਂ ਖੇਡਣ ਨੂੰ ਤਰਜੀਹ ਦਿੰਦੇ ਹਨ। ਜੇਕਰ ਸਾਡੇ ਖਿਡਾਰੀਆਂ ਨੂੰ ਆਪਣੇ ਰਾਜ 'ਚ ਬਿਹਤਰ ਸਹੂਲਤਾਂ ਮਿਲਣ ਤਾਂ ਉਹ ਵੀ ਆਪਣੀਆਂ ਯੂਨੀਵਰਸਿਟੀਆਂ ਵਲੋਂ ਖੇਡਣ ਨੂੰ ਤਰਜੀਹ ਦੇਣਗੇ। ਡਾ: ਸ਼ਰਮਾ ਦਾ ਤਰਕ ਹੈ ਕਿ ਰਾਜ ਦੀਆਂ ਵਿੱਦਿਅਕ ਸੰਸਥਾਵਾਂ ਦੇ ਖੇਡ ਢਾਂਚੇ 'ਚ ਤਾਲਮੇਲ ਦੀ ਘਾਟ ਹੈ। ਜੇਕਰ ਸਾਡੀਆਂ ਯੂਨੀਵਰਸਿਟੀਆਂ ਆਪੋ-ਆਪਣੇ ਖਿੱਤੇ ਦੇ ਸਕੂਲਾਂ ਨਾਲ ਤਾਲਮੇਲ ਬਣਾ ਕੇ ਰੱਖਣ ਤਾਂ ਵੀ ਹੋਰ ਬਿਹਤਰ ਨਤੀਜੇ ਆ ਸਕਦੇ ਹਨ। ਉਨ੍ਹਾਂ ਮੁੱਖ ਜ਼ੋਰ ਰਾਜ ਸਰਕਾਰ ਵਲੋਂ ਖਿਡਾਰੀਆਂ ਨੂੰ ਹਰਿਆਣਾ ਸਰਕਾਰ ਦੀ ਤਰਜ਼ 'ਤੇ ਸਕੂਲ ਪੱਧਰ ਤੋਂ ਹੀ ਇਨਾਮੀ ਰਾਸ਼ੀਆਂ ਦਿੱਤੀਆਂ ਜਾਣ ਤਾਂ ਪੰਜਾਬ ਖੇਡਾਂ ਦੇ ਖੇਤਰ 'ਚ ਮੁੜ ਮੋਹਰੀ ਸਥਾਨਾਂ 'ਤੇ ਆ ਸਕਦਾ ਹੈ। ਸਮੁੱਚੀ ਚਰਚਾ 'ਚੋਂ ਇਹ ਗੱਲ ਉੱਭਰ ਕੇ ਸਾਹਮਣੇ ਆਉਂਦੀ ਹੈ ਕਿ ਰਾਜ ਸਰਕਾਰ ਵਲੋਂ ਆਪਣੇ ਖਿਡਾਰੀਆਂ ਨੂੰ ਬਿਹਤਰ ਸਹੂਲਤਾਂ ਤੇ ਇਨਾਮ ਦਿੱਤੇ ਜਾਣ ਅਤੇ ਯੂਨੀਵਰਸਿਟੀਆਂ ਆਪਣੇ ਹਿੱਤਾਂ ਦੀ ਥਾਂ ਸੂਬੇ ਦੇ ਹਿੱਤਾਂ ਨੂੰ ਤਰਜੀਹ ਦੇਣ।


-ਪਟਿਆਲਾ। ਮੋਬਾ: 97795-90575

ਛੋਟੀ ਉਮਰੇ ਹੀ ਸ਼ਤਰੰਜ ਦੀਆਂ ਚਾਲਾਂ ਦਾ ਮਾਹਿਰ ਨੇਤਰਹੀਣ ਖਿਡਾਰੀ ਦਿਨੇਸ਼ ਚੰਦ

'ਮੰਜ਼ਲੇਂ ਬੜੀ, ਹੌਸਲੇ ਬੀ ਬੇ-ਹਿਸਾਬ, ਇਸੀ ਲੀਏ ਰੁਕੇ ਨਹੀਂ ਬਣੇ ਹਾਂ ਵਕਤ ਕੀ ਪਰਵਾਜ਼।' ਪੈਰਾ ਖਿਡਾਰੀ, ਚਾਹੇ ਉਹ ਕਿਸੇ ਵੀ ਖੇਡ ਵਿਚ ਹੋਵੇ, ਉਹ ਕਿਸੇ ਗੱਲੋਂ ਦੂਸਰੇ ਖਿਡਾਰੀਆਂ ਤੋਂ ਘੱਟ ਨਹੀਂ ਅਤੇ ਉਹ ਵੀ ਆਪਣੇ ਖੇਡ ਖੇਤਰ ਵਿਚ ਲਗਾਤਾਰ ਮੱਲਾਂ ਮਾਰਦੇ ਭਾਰਤ ਮਾਤਾ ਦੀ ਸ਼ਾਨ ਵਿਚ ਲਗਾਤਾਰ ਵਾਧਾ ਕਰਦੇ ਹਨ। ਗੱਲ ਕਰਦੇ ਹਾਂ ਬਹੁਤ ਹੀ ਛੋਟੀ ਉਮਰੇ ਚਿੱਸ ਜਾਣੀ ਸ਼ਤਰੰਜ ਦੀਆਂ ਚਾਲਾਂ ਦੇ ਮਾਹਿਰ ਨੇਤਰਹੀਣ ਖਿਡਾਰੀ ਦਿਨੇਸ਼ ਚੰਦ ਨੇ ਇਸ ਖੇਡ ਵਿਚ ਆਪਣਾ ਲੋਹਾ ਮੰਨਵਾਉਂਦੇ ਇਹ ਸਾਬਤ ਕਰ ਦਿੱਤਾ ਹੈ ਕਿ ਜੇਕਰ ਅੱਖਾਂ ਦੀ ਰੌਸ਼ਨੀ ਪਰਮਾਤਮਾ ਨੇ ਨਹੀਂ ਦਿੱਤੀ ਤਾਂ ਮਨ ਦੀਆਂ ਅੱਖਾਂ ਨਾਲ ਵੀ ਇਸ ਰੰਗਲੇ ਸੰਸਾਰ 'ਤੇ ਜਿੱਤ ਪ੍ਰਾਪਤ ਕੀਤੀ ਜਾ ਸਕਦੀ ਹੈ। ਦਿਨੇਸ਼ ਚੰਦ ਦਾ ਜਨਮ 30 ਜੁਲਾਈ, 1998 ਨੂੰ ਰਾਜਸਥਾਨ ਪ੍ਰਾਂਤ ਦੇ ਸੇਊਵਾ ਪਿੰਡ ਵਿਚ ਇਕ ਸਾਧਾਰਨ ਪਰਿਵਾਰ ਵਿਚ ਪਿਤਾ ਦੀਪ ਚੰਦ ਦੇ ਘਰ ਮਾਤਾ ਸਰੋਜ ਦੇਵੀ ਦੀ ਕੁੱਖੋਂ ਹੋਇਆ। ਦਿਨੇਸ਼ ਚੰਦ ਨੇ ਜਨਮ ਲਿਆ ਤਾਂ ਮਾਂ-ਬਾਪ ਨੂੰ ਪਤਾ ਲੱਗਾ ਕਿ ਉਨ੍ਹਾਂ ਦੇ ਬੱਚੇ ਨੂੰ ਦਿਸਦਾ ਨਹੀਂ ਅਤੇ ਉਹ ਮਾਸੂਮ ਹੱਥਾਂ ਦੇ ਇਸ਼ਾਰਿਆਂ 'ਤੇ ਹੀ ਗੱਲ ਕਰਨ ਦੀ ਕੋਸ਼ਿਸ਼ ਕਰਦਾ ਹੈ ਅਤੇ ਜਦ ਦਿਨੇਸ਼ ਚੰਦ ਨੂੰ ਅੱਖਾਂ ਦੇ ਮਾਹਿਰ ਡਾਕਟਰਾਂ ਦੇ ਕੋਲ ਲਿਜਾਇਆ ਗਿਆ ਤਾਂ ਉਸ ਦੇ ਨਾਮਾਤਰ ਹੀ ਵੇਖ ਲੈਣ ਦੀ ਪੁਸ਼ਟੀ ਡਾਕਟਰਾਂ ਨੇ ਕਰ ਦਿੱਤੀ। ਮਾਂ ਦੀਆਂ ਅੱਖਾਂ ਤ੍ਰਿਪ-ਤ੍ਰਿਪ ਵਹਿਣ ਲੱਗੀਆਂ ਅਤੇ ਬਾਪ ਸਿਰਫ ਉਪਰ ਵੱਲ ਹੀ ਤੱਕਦਾ ਰਿਹਾ। ਸ਼ਾਇਦ ਉਸ ਨੂੰ ਗਿਲਾ ਸੀ ਉਸ ਡਾਹਢੇ ਸਾਹਿਬ ਅੱਗੇ ਕਿ ਪੁੱਤਰ ਦੀ ਦਾਤ ਤਾਂ ਦਿੱਤੀ ਪਰ ਉਸ ਨੂੰ ਸਾਰੀ ਜ਼ਿੰਦਗੀ ਦਾ ਸਰਾਫ਼ ਵੀ ਨਾਲੋ-ਨਾਲ ਦੇ ਦਿੱਤਾ ਕਿ ਉਹ ਸਾਰੀ ਜ਼ਿੰਦਗੀ ਸੰਸਾਰ ਨੂੰ ਵੇਖ ਸਕਣ ਦੀ ਆਪਣੀ ਰੀਝ ਪੂਰੀ ਨਹੀਂ ਕਰ ਸਕੇਗਾ। ਆਖਰ ਕੁਝ ਹੋ ਵੀ ਨਹੀਂ ਸਕਦਾ ਸੀ ਅਤੇ ਬਚਪਨ ਦੇ ਦਿਨੇਸ਼ ਦਾ ਪਾਲਣ-ਪੋਸ਼ਣ ਕਰਨ ਲੱਗੇ।
ਵਕਤ ਬੀਤਦਾ ਗਿਆ, ਵੱਡਾ ਹੋਇਆ ਤਾਂ ਉਸ ਨੂੰ ਮੁਢਲੀ ਵਿੱਦਿਆ ਲਈ ਸੀ੍ਰ ਗੰਗਾਨਗਰ ਦੇ ਨੇਤਰਹੀਣ ਸਕੂਲ ਵਿਚ ਦਾਖ਼ਲ ਕਰਵਾ ਦਿੱਤਾ ਗਿਆ, ਜਿੱਥੇ ਦਿਨੇਸ਼ ਚੰਦ ਨੇ ਆਪਣਾ ਜ਼ਿੰਦਗੀ ਦਾ ਸਫ਼ਰ ਸ਼ੁਰੂ ਕੀਤਾ। ਦਿਨੇਸ਼ ਚੰਦ ਜਿੱਥੇ ਪੜ੍ਹਾਈ ਵਿਚ ਹੁਸ਼ਿਆਰ ਸੀ, ਉਥੇ ਉਹ ਦਿਮਾਗੀ ਤੌਰ 'ਤੇ ਐਨਾ ਤੇਜ਼-ਤਰਾਰ ਸੀ ਕਿ ਉਹ ਹੱਥਾਂ ਦੇ ਕਮਾਲ ਨਾਲ ਹੀ ਸਭ ਨੂੰ ਹੈਰਾਨ ਕਰ ਦਿੰਦਾ। ਉਸੇ ਦੌਰਾਨ ਉਸ ਦੀ ਕਮਾਲ ਦੀ ਅੰਤਰ-ਦ੍ਰਿਸ਼ਟੀ ਬਾਰੇ ਜਦ ਉਸ ਦੇ ਅਧਿਆਪਕ ਰਜਿੰਦਰ ਸੇਵਟਾ ਅਤੇ ਨਰਾਇਣ ਬਿਸਟ ਨੇ ਗੰਭੀਰਤਾ ਨਾਲ ਜਾਣਿਆ ਤਾਂ ਉਨ੍ਹਾਂ ਉਸ ਨੂੰ ਸ਼ਤਰੰਜ ਖੇਡਣ ਦੀ ਪ੍ਰੇਰਨਾ ਦਿੱਤੀ ਅਤੇ ਦਿਨੇਸ਼ ਚੰਦ ਨੂੰ ਸ਼ਤਰੰਜ ਦੀ ਖੇਡ ਵਿਚ ਤਰਾਸ਼ਣਾ ਸ਼ੁਰੂ ਕਰ ਦਿੱਤਾ ਅਤੇ ਨਤੀਜਾ ਇਹ ਹੋਇਆ ਕਿ ਉਸ ਨੇ ਰਾਜਸਥਾਨ ਦੀ ਚਿੱਸ ਜਾਣੀ ਸ਼ਤਰੰਜ ਦੀ ਚੈਂਪੀਅਨਸ਼ਿਪ ਆਪਣੇ ਨਾਂਅ ਕਰਕੇ ਆਪਣੇ ਇਸ ਹੁਨਰ ਦਾ ਲੋਹਾ ਮੰਨਵਾ ਦਿੱਤਾ ਅਤੇ ਅੱਜ ਉਹ ਆਲ ਇੰਡੀਆ ਚਿੱਸ ਫੈਡਰੇਸ਼ਨ ਦਾ ਮੰਨਿਆ ਹੋਇਆ ਖਿਡਾਰੀ ਹੈ ਅਤੇ ਉਹ ਆਪਣੇ ਕੋਚ ਸ੍ਰੀ ਨਰੇਸ਼ ਸਿੰਘ ਨਿਯਾਲ ਦੀ ਅਗਵਾਈ ਵਿਚ ਲਗਾਤਾਰ ਪ੍ਰਾਪਤੀਆਂ ਕਰ ਰਿਹਾ ਹੈ ਅਤੇ ਸ਼ਾਇਦ ਇਹ ਸਤਰਾਂ ਦਿਨੇਸ਼ ਚੰਦ 'ਤੇ ਬਿਲਕੁਲ ਸਾਫ ਢੁਕਦੀਆਂ ਹਨ ਕਿ, 'ਮੈਨੇ ਹਿੰਮਤ ਸੇ ਲਿਖੀ ਹੈ ਤਕਦੀਰ ਅਪਨੀ, ਨਾ ਰੁਕੇਂਗੇ ਨਾ ਥਮੇਂਗੇ, ਬੱਸ ਬਨਕੇ ਤੁਫਾਂ ਆਗੇ ਹੀ ਬੜੇਂਗੇ।'


-ਮੋਗਾ। ਮੋਬਾ: 98551-14484

ਖਿਡਾਰੀ ਹਮੇਸ਼ਾ ਆਸ਼ਾਵਾਦੀ ਦ੍ਰਿਸ਼ਟੀਕੋਣ ਅਪਣਾਉਣ

ਸਕੂਲ-ਕਾਲਜ ਦੇ ਖੇਡ ਕੈਰੀਅਰ ਤੋਂ ਲੈ ਕੇ ਰਾਸ਼ਟਰੀ, ਅੰਤਰਰਾਸ਼ਟਰੀ ਮੁਕਾਬਲਿਆਂ ਤੱਕ ਕਦੇ ਉਹ ਟੀਮ 'ਚ ਚੋਣ ਲਈ ਚੋਣ-ਕਰਤਾਵਾਂ ਕੋਲੋਂ ਨਿਰਾਸ਼ ਹੁੰਦਾ ਹੈ, ਕਦੇ ਘਰ ਦੀ ਗੁਰਬਤ ਉਸ ਨੂੰ ਤੰਗ ਕਰਦੀ, ਭੈਣ-ਭਰਾਵਾਂ ਦੀਆਂ ਜ਼ਿੰਮੇਵਾਰੀਆਂ ਦਾ ਬੋਝ, ਬੁੱਢੇ ਮਾਂ-ਬਾਪ ਦੀ ਦੇਖਭਾਲ ਦੀ ਸਮੱਸਿਆ, ਅਚਾਨਕ ਸਰੀਰ ਦੇ ਕਿਸੇ ਹਿੱਸੇ 'ਤੇ ਕਿਸੇ ਗੰਭੀਰ ਚੋਟ ਕਾਰਨ ਖੇਡ ਕੈਰੀਅਰ ਦਾਅ 'ਤੇ ਲੱਗਣ ਦਾ ਖ਼ਤਰਾ, ਖੇਡਾਂ ਦੇ ਨਾਲ ਪੜ੍ਹਾਈ ਕਰਨ ਦਾ ਬੋਝ ਅਤੇ ਲਗਾਤਾਰ ਅਸਫਲਤਾ, ਨੌਕਰੀ ਨਾ ਮਿਲਣ ਦੀ ਮਾਯੂਸੀ, ਖੇਡ ਕੈਰੀਅਰ ਦੀਆਂ ਸਮੁੱਚੀਆਂ ਪ੍ਰਾਪਤੀਆਂ ਦੇ ਆਧਾਰ 'ਤੇ ਇਨਾਮ-ਸਨਮਾਨ ਨਾ ਮਿਲਣ ਦਾ ਅਫਸੋਸ, ਰਿਸ਼ਵਤ ਅਤੇ ਸਿਫਾਰਸ਼ ਕਾਰਨ ਬਣਦਾ ਹੱਕ ਖੁੱਸਣ ਦਾ ਡਰ, ਕਿਸੇ ਮੈਚ 'ਚ ਪ੍ਰਭਾਵਸ਼ਾਲੀ ਪ੍ਰਦਰਸ਼ਨ ਨਾ ਕਰਨ ਕਰਕੇ ਟੀਮ 'ਚੋਂ ਬਾਹਰ ਕੱਢੇ ਜਾਣ ਦਾ ਡਰ ਜਾਂ ਅਚਾਨਕ ਕਿਸੇ ਬਿਮਾਰੀ ਦੀ ਲਪੇਟ 'ਚ ਆ ਜਾਣ ਦੀ ਚਿੰਤਾ ਆਦਿ ਅਜਿਹੀਆਂ ਉਹ ਸਮੱਸਿਆਵਾਂ, ਰੁਕਾਵਟਾਂ ਹਨ, ਖਿਡਾਰੀ ਵਰਗ ਜਿਨ੍ਹਾਂ ਦਾ ਆਪਣੇ ਸਮੁੱਚੇ ਖੇਡ ਕੈਰੀਅਰ ਦੌਰਾਨ ਸਾਹਮਣਾ ਕਰਦਾ ਹੈ। ਕੋਚਾਂ, ਖੇਡ ਸੰਸਥਾ ਦੇ ਅਹੁਦੇਦਾਰਾਂ ਦੀ ਬੇਰੁਖ਼ੀ, ਮੀਡੀਏ, ਸਪਾਂਸਰਸ਼ਿਪ ਦੀ ਬੇਧਿਆਨੀ ਵੀ ਉਸ ਨੂੰ ਤੰਗ ਕਰਦੀ ਹੈ। ਅਸੀਂ ਸਮਝਦੇ ਹਾਂ ਕਿ ਖਿਡਾਰੀਆਂ ਦੀ ਨਿੱਜੀ ਜ਼ਿੰਦਗੀ ਬਹੁਤ ਹੀ ਕਠਿਨ ਤਪੱਸਿਆ ਦਾ, ਤਿਆਗ ਦਾ, ਮਿਹਨਤ ਦਾ ਪ੍ਰਤੀਕ ਹੁੰਦੀ ਹੈ। ਇਸ ਸਾਰੀ ਜੱਦੋ-ਜਹਿਦ ਲਈ ਉਨ੍ਹਾਂ ਨੂੰ ਆਸ਼ਾਵਾਦੀ ਦ੍ਰਿਸ਼ਟੀਕੋਣ ਅਪਣਾਉਣ ਦੀ ਲੋੜ ਹੁੰਦੀ ਹੈ।
ਇਹ ਆਸ ਹੀ ਉਨ੍ਹਾਂ ਨੂੰ ਖੇਡ ਜਗਤ ਦੇ ਮੁਕਾਬਲਿਆਂ ਦੀ ਦੌੜ ਵਿਚ ਬਣਾ ਕੇ ਰੱਖ ਸਕਦੀ ਹੈ। ਉਸ ਨਾਲ ਜੋ ਕੁਝ ਵੀ ਵਾਪਰਦਾ ਹੈ, ਇਹ ਜ਼ਿੰਦਗੀ ਅਤੇ ਖੇਡ ਦੋਵਾਂ ਦਾ ਹਿੱਸਾ ਹੈ ਪਰ ਇਸ ਵਿਚ ਇਕ ਸੰਤੁਲਨ ਬਣਾ ਕੇ ਰੱਖਣਾ ਹੋਵੇਗਾ। ਔਖੀਆਂ ਤੋਂ ਔਖੀਆਂ ਘੜੀਆਂ 'ਚ ਵੀ ਉਹ ਕੁਦਰਤ ਜਾਂ ਖੇਡ ਪ੍ਰਬੰਧਕ ਵਲੋਂ ਆਪਣੇ ਨਾਲ ਹੋਈਆਂ ਵਧੀਕੀਆਂ ਨੂੰ, ਨਾਇਨਸਾਫੀਆਂ ਨੂੰ ਜਾਂ ਪਰਿਵਾਰਕ ਅਤੇ ਸਰੀਰਕ ਮੁਸ਼ਕਿਲਾਂ ਨੂੰ ਆਪਣੇ ਦਿਲੋ-ਦਿਮਾਗ 'ਤੇ ਹਾਵੀ ਨਾ ਹੋਣ ਦੇਣ, ਕਿਉਂਕਿ ਖੇਡਾਂ ਅਤੇ ਮਨੋਵਿਗਿਆਨ ਦਾ ਗੂੜ੍ਹਾ ਸਬੰਧ ਹੈ। ਕਿਸੇ ਖਿਡਾਰੀ ਦੇ ਅੰਦਰੋਂ ਜਦੋਂ ਆਸ ਦੀ ਚਿਣਗ ਬੁਝਦੀ ਹੈ, ਜਦੋਂ ਖੂਬਸੂਰਤ ਸੁਪਨੇ ਟੁੱਟਦੇ ਹਨ ਤਾਂ ਉਸ ਦਾ ਉਤਸ਼ਾਹ, ਉਸ ਦੀ ਮਿਹਨਤ, ਉਸ ਦੀ ਹਿੰਮਤ, ਉਸ ਦੀ ਵਚਨਬੱਧਤਾ ਵੀ ਪ੍ਰਭਾਵਿਤ ਹੁੰਦੀ ਹੈ ਜੋ ਸਭ ਤੋਂ ਖਤਰਨਾਕ ਹੈ, ਆਤਮਘਾਤੀ ਹੈ। ਜੇ ਕਿਸੇ ਖਿਡਾਰੀ ਦਾ ਅੱਜ ਬੁਰਾ ਹੈ ਤਾਂ ਬੁਰੇ ਦਿਨਾਂ ਤੋਂ ਮਾਯੂਸ ਹੋਣ ਦੀ ਲੋੜ ਨਹੀਂ, ਇਹ ਤਾਂ ਉਸ ਦੀ ਅਜ਼ਮਾਇਸ਼ ਦਾ ਵੇਲਾ ਹੈ, ਪ੍ਰੀਖਿਆ ਦੀ ਘੜੀ ਹੈ। ਖਿਡਾਰੀਆਂ ਨੂੰ ਭਲੀਭਾਂਤ ਪਤਾ ਹੋਣਾ ਚਾਹੀਦਾ ਹੈ ਕਿ ਉਨ੍ਹਾਂ ਦੇ ਖੇਡ ਕੈਰੀਅਰ ਦਾ ਵੀ ਇਕ ਵਕਤ ਹੁੰਦਾ ਹੈ, ਇਕ ਸੀਮਾ ਹੁੰਦੀ ਹੈ।
ਅਸੀਂ ਜਦੋਂ ਕੁਝ ਵੈਟਰਨ ਖਿਡਾਰੀਆਂ ਅਤੇ ਖੇਡ ਜਗਤ ਤੋਂ ਸੰਨਿਆਸ ਲੈ ਚੁੱਕੇ ਖਿਡਾਰੀਆਂ ਨਾਲ ਗੱਲਬਾਤ ਕੀਤੀ ਤਾਂ ਬਹੁਤ ਸਾਰਿਆਂ ਨੂੰ ਉਨ੍ਹਾਂ ਪਲਾਂ ਦਾ ਪਛਤਾਵਾ ਅਜੇ ਵੀ ਹੈ, ਜਦੋਂ ਉਹ ਨਿਰਾਸ਼ਾ ਦੇ ਆਲਮ 'ਚ ਘਿਰ ਗਏ, ਆਪਣੇ-ਆਪ ਨੂੰ ਸੰਭਾਲ ਨਹੀਂ ਸਕੇ, ਮਾਨਸਿਕ ਬੋਝ ਥੱਲੇ ਆ ਕੇ ਖੇਡ ਖੇਤਰ 'ਚ ਦਮਦਾਰ ਪ੍ਰਦਰਸ਼ਨ ਨਾ ਕਰ ਸਕੇ, ਜਿਸ ਦੀ ਉਦੋਂ ਜ਼ਰੂਰਤ ਸੀ। ਅੱਜ ਉਨ੍ਹਾਂ ਨੂੰ ਸਮਝ ਤਾਂ ਆ ਗਈ ਪਰ ਉਨ੍ਹਾਂ ਦਾ ਖੇਡ ਕੈਰੀਅਰ ਸੰਘਰਸ਼ ਹੁਣ ਖਤਮ ਹੋ ਚੁੱਕਾ ਹੈ। ਭਾਵੁਕਤਾ 'ਚ ਆ ਕੇ ਨਿਰਾਸ਼ਾਵਾਦੀ ਅਤੇ ਨਿਰਉਤਸ਼ਾਹਿਤ ਹੋਣ ਦਾ ਉਨ੍ਹਾਂ ਨੂੰ ਪਛਤਾਵਾ ਹੈ।


-ਡੀ. ਏ. ਵੀ. ਕਾਲਜ, ਅੰਮ੍ਰਿਤਸਰ। ਮੋਬਾ: 98155-35410

ਫੁੱਟਬਾਲ ਦਾ ਨਵਾਂ ਕ੍ਰਿਸ਼ਮਾ ਲੁਕਾ ਮਾਡਰਿਕ

ਫੁੱਟਬਾਲ ਦੀ ਦੁਨੀਆ ਵਿਚ ਕਦੇ ਪੇਲੇ, ਮਾਰਾਡੋਨਾ, ਫਰਾਜ ਬੈਕਨਬਾਉਰ, ਮਿਸ਼ੇਲ ਪਲਾਤੀਨੀ ਅਤੇ ਯੂਸੇਵੀਉ ਵਰਗੇ ਦਿੱਗਜ਼ ਖਿਡਾਰੀ ਲੋਕ-ਦਿਲਾਂ ਦੇ ਚਹੇਤੇ ਰਹੇ ਅਤੇ ਪਿਛਲੇ ਇਕ ਦਹਾਕੇ ਤੋਂ ਕ੍ਰਿਸਟਿਆਨੋ ਰੋਨਾਲਡੋ, ਲਿਊਨਲ ਮੈਸੀ, ਨੇਮਾਰ, ਲੂਈਸ ਸੁਆਰੇਜ, ਗਾਰੇਥ ਬਾਲੇ ਆਦਿ ਖਿਡਾਰੀਆਂ ਦੇ ਨਾਂਅ ਰੱਜ ਕੇ ਸੁਰਖੀਆਂ ਲਿਖੀਆਂ ਗਈਆਂ ਪਰ ਵਿਸ਼ਵ ਕੱਪ ਫੁੱਟਬਾਲ 2018, ਜਿਸ ਖਿਡਾਰੀ ਨੇ ਆਪਣੇ ਦਮ 'ਤੇ ਕ੍ਰੋਏਸ਼ੀਆ ਨੂੰ ਫਾਈਨਲ ਤੱਕ ਪਹੁੰਚਾ ਕੇ ਨਵਾਂ ਇਤਿਹਾਸ ਸਿਰਜਦਿਆਂ ਖੇਡ ਪ੍ਰੇਮੀਆਂ ਦੇ ਦਿਲਾਂ 'ਤੇ ਰਾਜ ਕੀਤਾ ਹੈ। ਜੀ ਹਾਂ, ਫੁੱਟਬਾਲ ਦੀ ਦੁਨੀਆ ਦੇ ਇਸ ਨਵੇਂ ਕ੍ਰਿਸ਼ਮੇ ਦਾ ਨਾਂਅ ਹੈ ਲੁਕਾ ਮਾਡਰਿਕ, ਜਿਸ ਨੇ ਫੀਫਾ ਦਾ ਵਰ੍ਹੇ ਦਾ ਸਰਬੋਤਮ ਖਿਡਾਰੀ ਦਾ ਪੁਰਸਕਾਰ ਹਾਸਲ ਕਰਕੇ ਕ੍ਰਿਟਿਆਨੋ ਰੋਨਾਲਡੋ ਅਤੇ ਲਿਊਨਲ ਮੈਸੀ ਦੀ ਫੁੱਟਬਾਲ 'ਚ ਵਿਅਕਤੀਗਤ ਖਿਤਾਬਾਂ ਨੂੰ ਹਾਸਲ ਕਰਨ 'ਚ ਪਿਛਲੇ ਇਕ ਦਹਾਕੇ ਤੋਂ ਚੱਲੀ ਆ ਰਹੀ ਬਾਦਸ਼ਾਹਤ ਨੂੰ ਸਮਾਪਤ ਕਰ ਦਿਖਾਇਆ। ਇਹ ਵੱਡੀ ਤਬਦੀਲੀ ਫੁੱਟਬਾਲ ਦੇ ਇਤਿਹਾਸ ਵਿਚ ਇਕ ਨਵੇਂ ਯੁੱਗ ਦੀ ਸ਼ੁਰੂਆਤ ਕਹੀ ਜਾ ਰਹੀ ਹੈ।
ਸਪੈਨਿਸ਼ ਕਲੱਬ ਰੀਅਲ ਮੈਡਰਿਡ ਅਤੇ ਕ੍ਰੋਏਸ਼ੀਆ ਦੇ ਮਿਡਫੀਲਡਰ ਨੇ ਆਪਣੇ ਕਲੱਬ ਅਤੇ ਦੇਸ਼ ਲਈ ਸਫ਼ਲਤਾ ਦੀ ਸ਼ਾਨਦਾਰ ਇਬਾਰਤ ਉਕਰਦਿਆਂ ਸ਼ੋਹਰਤ ਦੇ ਸਿਖਰ ਦਾ ਸਫਰ ਤੈਅ ਕੀਤਾ ਹੈ। ਉਸ ਦੀ ਮੌਜੂਦਗੀ 'ਚ ਰੀਅਲ ਮੈਡਰਿਡ ਨੇ ਲਗਾਤਾਰ ਤੀਸਰੀ ਵਾਰ ਯੂਏਫਾ ਚੈਂਪੀਅਨਜ਼ ਦਾ ਖ਼ਿਤਾਬ ਜਿੱਤਿਆ, ਜਦ ਕਿ ਕ੍ਰੋਏਸ਼ੀਆ ਪਹਿਲੀ ਵਾਰ ਵਿਸ਼ਵ ਕੱਪ ਦੇ ਫਾਈਨਲ 'ਚ ਪਹੁੰਚਣ 'ਚ ਸਫ਼ਲ ਰਿਹਾ।
ਪਿਛਲੇ 10 ਸਾਲ 'ਚ ਇਹ ਪਹਿਲਾ ਮੌਕਾ ਹੈ, ਜਦ ਇਹ ਪੁਰਸਕਾਰ ਅਰਜਨਟੀਨਾ ਦੇ ਮੈਸੀ ਅਤੇ ਪੁਰਤਗਾਲ ਦੇ ਰੋਨਾਲਡੋ ਨੂੰ ਨਹੀਂ ਮਿਲਿਆ। ਸੰਨ 2007 'ਚ ਬ੍ਰਾਜ਼ੀਲ ਦੇ ਕਾਕਾ ਫੀਫਾ ਪਲੇਅਰ ਆਫ ਦੀ ਯੀਅਰ ਚੁਣੇ ਗਏ ਸਨ। ਮੈਸੀ (2009, 2010, 2011, 2012 ਅਤੇ 2015), ਰੋਨਾਲਡੋ (2008, 2013, 2014, 2016 ਅਤੇ 2017) 'ਚ ਪੰਜ-ਪੰਜ ਵਾਰ ਇਹ ਐਵਾਰਡ ਜਿੱਤ ਚੁੱਕੇ ਹਨ। ਇਸ ਵਕਾਰੀ ਮੁਕਾਬਲੇ ਵਿਚ ਮਾਡਰਿਕ ਨੇ ਮਿਸਰ ਦੇ ਸਟਰਾਈਕਰ ਮੁਹੰਮਦ ਸਾਲਾਹ ਅਤੇ ਜੁਵੈੱਟਸ ਦੇ ਰੋਨਾਲਡੋ ਨੂੰ ਪਛਾੜਦਿਆਂ ਸਿਹਰਾ ਆਪਣੇ ਸਿਰ ਸਜਾਇਆ।
33 ਵਰ੍ਹਿਆਂ ਦੇ ਮਾਡਰਿਕ ਨੂੰ ਆਪਣੇ ਕੈਰੀਅਰ ਦੇ ਇਸ ਮੁਕਾਮ 'ਤੇ ਪਹੁੰਚਣ ਲਈ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪਿਆ। 9 ਸਤੰਬਰ, 1985 ਨੂੰ ਜਦੋਂ 10 ਵਰ੍ਹਿਆਂ ਦੇ ਸਨ ਤਾਂ ਕੁਝ ਕੋਚਾਂ ਨੇ ਉਸ ਨੂੰ ਫੁੱਟਬਾਲ 'ਚ ਬੇਹੱਦ ਕਮਜ਼ੋਰ ਤੱਕ ਕਹਿ ਦਿੱਤਾ। ਲਿਹਾਜ਼ਾ ਉਹ ਫੁੱਟਬਾਲ ਨਹੀਂ ਖੇਡ ਸਕਦਾ। ਹਾਲਾਂਕਿ ਇਕ ਉਸ ਨਾਲ ਜੁੜੇ ਪਹਿਲੇ ਕੋਚ ਨੇ ਉਸ ਨੂੰ ਡਾਇਨਮੋ ਜੇਗਰੇਬ ਕਲੱਬ 'ਚ ਟ੍ਰਾਇਲ ਦੇਣ ਲਈ ਉਤਸ਼ਾਹਿਤ ਕੀਤਾ। 16 ਵਰ੍ਹਿਆਂ ਦੀ ਉਮਰ 'ਚ ਮਾਡਰਿਕ ਦਾ ਡਾਇਨਮੋ ਕਲੱਬ ਨਾਲ ਕਰਾਰ ਹੋਇਆ, ਜਿਥੇ ਉਸ ਦੀ ਪ੍ਰਤਿਭਾ 'ਚ ਨਿਖਾਰ ਆਇਆ, ਜਿਸ ਤੋਂ ਬਾਅਦ ਉਸ ਨੇ ਪਿਛਾਂਹ ਮੁੜ ਕੇ ਨਾ ਦੇਖਿਆ।
ਸੰਨ 2006 'ਚ ਮਾਡਰਿਕ ਨੇ ਅਰਜਨਟੀਨਾ ਦੇ ਖ਼ਿਲਾਫ਼ ਆਪਣੇ ਅੰਤਰਰਾਸ਼ਟਰੀ ਕੈਰੀਅਰ ਦੀ ਸ਼ੁਰੂਆਤ ਕੀਤੀ। ਕ੍ਰੋਏਸ਼ੀਆ ਨੇ ਇਹ ਮੈਚ 3-2 ਨਾਲ ਜਿੱਤਿਆ। ਮਾਡਰਿਕ ਨੇ ਆਪਣੇ ਅੰਤਰਰਾਸ਼ਟਰੀ ਕੈਰੀਅਰ ਦਾ ਪਹਿਲਾ ਗੋਲ ਇਟਲੀ ਨਾਲ ਖੇਡੇ ਦੋਸਤਾਨਾ ਮੈਚ 'ਚ ਕੀਤਾ। ਵਿਸ਼ਵ ਕੱਪ ਦੇ ਸੈਮੀਫਾਈਨਲ ਤੱਕ ਮਾਡਰਿਕ ਆਪਣੇ ਦੇਸ਼ ਲਈ 115 ਮੈਚ ਖੇਡ ਚੁੱਕੇ ਸਨ। ਉਹ ਇੰਗਲੈਂਡ ਦੇ ਕਲੱਬ ਟਾਟਨਹੈਮ (2008-12) ਲਈ ਵੀ ਖੇਡ ਚੁੱਕੇ ਹਨ। ਉਹ 2012 ਤੋਂ ਵਰਤਮਾਨ ਸਮੇਂ ਤੱਕ ਸਪੈਨਿਸ਼ ਕਲੱਬ ਰੀਅਡ ਮੈਡਰਿਡ ਦੇ ਸਟਾਰ ਖਿਡਾਰੀ ਵਜੋਂ ਜਾਣਿਆ ਜਾਂਦਾ ਹੈ। ਮਾਡਰਿਕ ਫੁੱਟਬਾਲ ਦੀ ਦੁਨੀਆ ਵਿਚ ਕੀਮਤੀ ਖਿਡਾਰੀਆਂ ਵਿਚੋਂ ਇਕ ਹੈ। ਉਹ 6 ਵਾਰ ਕ੍ਰੋਏਸ਼ੀਆਈ ਫੁੱਟਬਾਲਰ ਆਫ ਦੀ ਯੀਅਰ ਚੁਣੇ ਜਾ ਚੁੱਕੇ ਹਨ। ਉਹ ਕ੍ਰੋਏਸ਼ੀਆ ਦਾ ਇਕੋ-ਇਕ ਖਿਡਾਰੀ ਹੈ, ਜਿਸ ਨੂੰ ਵਿਸ਼ਵ ਇਲੈਵਨ ਟੀਮਾਂ 'ਚ ਸ਼ਾਮਿਲ ਕੀਤਾ ਗਿਆ ਹੈ। ਲੁਕਾ ਮਾਡਰਿਕ ਕ੍ਰੋਏਸ਼ੀਆ ਦੇ ਅੰਡਰ-15, ਅੰਡਰ-18 ਅਤੇ 2003-04 'ਚ ਅੰਡਰ-19 ਅਤੇ ਅੰਡਰ-21 ਟੀਮਾਂ 'ਚ ਖੇਡ ਚੁੱਕੇ ਹਨ। ਮਾਡਰਿਕ ਨੂੰ ਵਿਸ਼ਵ ਕੱਪ 2018 'ਚ ਅਰਜਨਟੀਨਾ, ਆਈਸਲੈਂਡ, ਨਾਈਜੀਰੀਆ ਅਤੇ ਫਿਰ ਡੈਨਮਾਰਕ, ਰੂਸ ਅਤੇ ਫਾਈਨਲ 'ਚ ਫਰਾਂਸ ਵਿਰੁੱਧ ਬੇਜੋੜ ਖੇਡ ਦੀ ਬਦੌਲਤ 'ਗੋਲਡਨ ਬਾਲ, ਬਤੌਰ ਬੈਸਟ ਪਲੇਅਰ ਆਫ ਦਾ ਟੂਰਨਾਮੈਂਟ' ਨਾਲ ਨਿਵਾਜਿਆ ਅਤੇ ਲੰਡਨ 'ਚ ਹੋਏ ਸਮਾਰੋਹ 'ਚ ਬ੍ਰਾਜ਼ੀਲ ਦੀ ਮਾਰਟਾ ਨੂੰ ਛੇਵੀਂ ਵਾਰ ਸਰਬੋਤਮ ਮਹਿਲਾ ਫੁੱਟਬਾਲਰ ਦੇ ਸਨਮਾਨ ਨਾਲ ਨਿਵਾਜਿਆ ਗਿਆ।


-ਅੰਤਰਰਾਸ਼ਟਰੀ ਫੁੱਟਬਾਲਰ, ਪਿੰਡ ਤੇ ਡਾਕ: ਪਲਾਹੀ, ਫਗਵਾੜਾ। ਮੋਬਾ: 94636-12204






Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX