ਤਾਜਾ ਖ਼ਬਰਾਂ


ਸੜਕ ਹਾਦਸੇ ਚ 2 ਨੌਜਵਾਨਾ ਦੀ ਮੌਤ
. . .  about 1 hour ago
ਉਸਮਾਨਪੁਰ ,21 ਜਨਵਰੀ {ਸੰਦੀਪ }-ਪਿੰਡ ਉਸਮਾਨਪੁਰ - ਚੱਕਲ਼ੀ ਸੰਪਰਕ ਸੜਕ 'ਤੇ ਟਰੈਕਟਰ ਟਰਾਲੀ ਅਤੇ ਮੋਟਰ ਸਾਈਕਲ ਦੀ ਟੱਕਰ 'ਚ 2 ਨੌਜਵਾਨਾ ਦੀ ਮੌਤ ਹੋ ਗਈ ।
ਲੰਡਨ 'ਚ ਈ.ਵੀ.ਐਮ ਸਬੰਧੀ ਕਰਵਾਏ ਜਾ ਰਹੇ ਪ੍ਰੋਗਰਾਮ 'ਤੇ ਨਜ਼ਰ - ਚੋਣ ਕਮਿਸ਼ਨ
. . .  about 2 hours ago
ਨਵੀਂ ਦਿੱਲੀ, 21 ਜਨਵਰੀ - ਇੰਗਲੈਂਡ ਦੇ ਲੰਡਨ 'ਚ ਈ.ਵੀ.ਐਮ ਸਬੰਧੀ ਕਰਵਾਏ ਜਾ ਰਹੇ ਪ੍ਰੋਗਰਾਮ ਜਿਸ ਵਿਚ ਦਾਅਵਾ ਕੀਤਾ ਗਿਆ ਹੈ ਕਿ ਭਾਰਤੀ ਚੋਣ ਕਮਿਸ਼ਨ ਦੀ ਈ.ਵੀ.ਐਮ...
ਅਮਰੀਕੀ ਸੈਨੇਟਰ ਕਮਲਾ ਹੈਰਿਸ ਵੱਲੋਂ 2020 ਰਾਸ਼ਟਰਪਤੀ ਚੋਣ ਲੜਨ ਦਾ ਐਲਾਨ
. . .  about 2 hours ago
ਨਿਊਯਾਰਕ, 21 ਜਨਵਰੀ - ਅਮਰੀਕੀ ਸੈਨੇਟਰ ਕਮਲਾ ਹੈਰਿਸ ਨੇ ਐਲਾਨ ਕੀਤਾ ਹੈ ਕਿ ਉਨ੍ਹਾਂ ਵੱਲੋਂ 2020 ਦੀ ਰਾਸ਼ਟਰਪਤੀ ਚੋਣ ਲੜੀ...
ਟਾਟਾ ਸੂਮੋ ਅਤੇ ਟਰੱਕ ਦੀ ਟੱਕਰ 'ਚ 3 ਮੌਤਾਂ, ਇੱਕ ਜ਼ਖਮੀ
. . .  about 3 hours ago
ਮੂਨਕ, 21 ਜਨਵਰੀ (ਰਾਜਪਾਲ ਸਿੰਗਲਾ) - ਇੱਥੋਂ ਨੇੜਲੇ ਪਿੰਡ ਕੋਲ ਹੋਏ ਦਰਦਨਾਕ ਸੜਕ ਹਾਦਸੇ ਵਿਚ 3 ਲੋਕਾਂ ਦੀ ਮੌਤ ਹੋ ਗਈ, ਜਦਕਿ ਇੱਕ ਜ਼ਖਮੀ ਹੋ ਗਿਆ। ਇਹ ਹਾਦਸਾ...
ਖ਼ਰਾਬ ਮੌਸਮ ਦੇ ਮੱਦੇਨਜ਼ਰ ਦੇਹਰਾਦੂਨ ਦੇ ਸਕੂਲਾਂ 'ਚ ਕੱਲ੍ਹ ਛੁੱਟੀ
. . .  about 3 hours ago
ਦੇਹਰਾਦੂਨ, 21 ਜਨਵਰੀ - ਭਾਰੀ ਬਰਸਾਤ ਤੇ ਬਰਫ਼ਬਾਰੀ ਦੀ ਸੰਭਾਵਨਾ ਨੂੰ ਦੇਖਦੇ ਹੋਏ ਉੱਤਰਾਖੰਡ ਦੇ ਦੇਹਰਾਦੂਨ ਪ੍ਰਸ਼ਾਸਨ ਨੇ 22 ਜਨਵਰੀ ਨੂੰ ਜ਼ਿਲ੍ਹੇ ਦੇ ਸਾਰੇ ਸਕੂਲਾਂ ਅਤੇ ਆਂਗਣਵਾੜੀ...
ਕਰਨਾਟਕ : ਵਿਧਾਇਕ ਜੇ.ਐਨ ਗਣੇਸ਼ ਕਾਂਗਰਸ ਤੋਂ ਮੁਅੱਤਲ
. . .  about 3 hours ago
ਬੈਂਗਲੁਰੂ, 21 ਜਨਵਰੀ - ਕਾਂਗਰਸ ਦੇ ਵਿਧਾਇਕ ਜੇ.ਐਨ ਗਣੇਸ਼ ਵੱਲੋਂ ਕਾਂਗਰਸ ਦੇ ਹੀ ਵਿਧਾਇਕ ਅਨੰਦ ਸਿੰਘ ਨਾਲ ਮਾਰਕੁੱਟ ਤੋਂ ਬਾਅਦ ਕਰਨਾਟਕ ਕਾਂਗਰਸ ਦੇ ਜਨਰਲ ਸਕੱਤਰ...
ਕਰਨਾਟਕ ਕਿਸ਼ਤੀ ਹਾਦਸਾ : ਹੁਣ ਤੱਕ 16 ਲਾਸ਼ਾਂ ਬਰਾਮਦ
. . .  about 3 hours ago
ਬੈਂਗਲੁਰੂ, 21 ਜਨਵਰੀ - ਕਰਨਾਟਕ ਦੇ ਕਰਵਾੜ 'ਚ 24 ਲੋਕਾਂ ਨੂੰ ਲੈ ਕੇ ਜਾ ਰਹੀ ਕਿਸ਼ਤੀ ਪਲਟਣ ਤੋਂ ਬਾਅਦ ਸਮੁੰਦਰੀ ਫ਼ੌਜ ਤੇ ਕੋਸਟ ਗਾਰਡ ਨੇ ਹੁਣ ਤੱਕ 16 ਲੋਕਾਂ ਦੀਆਂ ਲਾਸ਼ਾਂ...
680 ਪੇਟੀਆਂ ਨਾਜਾਇਜ਼ ਸ਼ਰਾਬ ਸਮੇਤ ਇੱਕ ਗ੍ਰਿਫ਼ਤਾਰ
. . .  about 4 hours ago
ਜਲੰਧਰ, 21 ਜਨਵਰੀ - ਸੀ.ਆਈ.ਏ ਸਟਾਫ਼ ਨੇ 680 ਪੇਟੀਆਂ ਨਾਜਾਇਜ਼ ਸ਼ਰਾਬ ਸਮੇਤ ਇੱਕ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਇਸ ਸਬੰਧੀ ਡੀ.ਸੀ.ਪੀ ਜਾਂਚ ਗੁਰਮੀਤ ਸਿੰਘ ਨੇ ਦੱਸਿਆ ਕਿ...
ਗੋਦਾਮ ਦੀ ਕੰਧ ਡਿੱਗਣ ਕਾਰਨ 2 ਲੋਕਾਂ ਦੀ ਮੌਤ
. . .  about 4 hours ago
ਨਵੀਂ ਦਿੱਲੀ, 21 ਜਨਵਰੀ- ਦਿੱਲੀ ਦੇ ਨਜਫਗੜ੍ਹ ਦੇ ਨਾਂਗਲੀ 'ਚ ਇੱਕ ਗੋਦਾਮ ਦੀ ਕੰਧ ਡਿੱਗਣ ਕਾਰਨ ਦੋ ਲੋਕਾਂ ਦੀ ਮੌਤ ਹੋ ਗਈ......
ਸੁਨੰਦਾ ਪੁਸ਼ਕਰ ਮਾਮਲੇ ਦੀ ਸੁਣਵਾਈ 29 ਜਨਵਰੀ ਤੱਕ ਮੁਲਤਵੀ
. . .  about 4 hours ago
ਨਵੀਂ ਦਿੱਲੀ, 21 ਜਨਵਰੀ- ਸੁਨੰਦਾ ਪੁਸ਼ਕਰ ਦੀ ਮੌਤ ਦੇ ਮਾਮਲੇ 'ਚ ਸੁਣਵਾਈ ਨੂੰ ਦਿੱਲੀ ਦੀ ਪਟਿਆਲਾ ਹਾਊਸ ਕੋਰਟ ਨੇ 29 ਜਨਵਰੀ ਤੱਕ ਮੁਲਤਵੀ ਕਰ ਦਿੱਤਾ.....
ਹੋਰ ਖ਼ਬਰਾਂ..

ਨਾਰੀ ਸੰਸਾਰ

ਫਜ਼ੂਲ ਖ਼ਰਚੀ ਤੋਂ ਬਚੋ, ਤਿਉਹਾਰਾਂ ਦੇ ਸੀਜ਼ਨ ਵਿਚ

ਆਉਣ ਵਾਲੇ ਦਿਨਾਂ ਵਿਚ ਬਹੁਤ ਸਾਰੇ ਤਿਉਹਾਰ ਆ ਰਹੇ ਹਨ। ਤਿਉਹਾਰਾਂ 'ਤੇ ਲੋਕ ਬਹੁਤ ਜ਼ਿਆਦਾ ਖਰੀਦਦਾਰੀ ਕਰਦੇ ਹਨ ਪਰ ਖਰੀਦਦਾਰੀ ਕਰਨ ਵਿਚ ਸਭ ਤੋਂ ਅੱਗੇ ਹਨ ਔਰਤਾਂ। ਔਰਤਾਂ ਹੀ ਸਭ ਤੋਂ ਵੱਧ ਖਰੀਦਦਾਰੀ ਕਰਦੀਆਂ ਹਨ। ਹਾਂ, ਇਹ ਠੀਕ ਹੈ ਕਿ ਔਰਤਾਂ ਨੂੰ ਸਾਰੇ ਘਰ ਦੀ ਜ਼ਿੰਮੇਵਾਰੀ ਹੁੰਦੀ ਹੈ। ਸੋ, ਉਨ੍ਹਾਂ ਨੇ ਘਰ ਦੀ ਲੋੜ ਦਾ ਸਮਾਨ ਤਾਂ ਖਰੀਦਣਾ ਹੀ ਹੁੰਦਾ ਹੈ। ਅਸੀਂ ਇਹ ਨਹੀਂ ਕਹਿ ਰਹੇ ਕਿ ਘਰੇਲੂ ਜ਼ਰੂਰਤ ਦਾ ਲੋੜੀਂਦਾ ਸਮਾਨ ਤਾਂ ਖਰੀਦਣਾ ਹੀ ਹੁੰਦਾ ਹੈ ਪਰ ਦੇਖਣ ਵਿਚ ਆਉਂਦਾ ਹੈ ਕਿ ਤਿਉਹਾਰਾਂ ਦੇ ਸਮੇਂ ਔਰਤਾਂ ਬਹੁਤ ਸਾਰਾ ਅਜਿਹਾ ਸਮਾਨ ਵੀ ਖ਼ਰੀਦ ਲੈਂਦੀਆਂ ਹਨ, ਜਿਨ੍ਹਾਂ ਦੀ ਨੇੜ ਭਵਿੱਖ ਵਿਚ ਕੋਈ ਵੀ ਜ਼ਰੂਰਤ ਨਹੀਂ ਹੁੰਦੀ। ਕਈ ਵਾਰ ਤਾਂ ਕੰਪਨੀਆਂ ਆਪਣੇ ਗਾਹਕਾਂ ਨੂੰ ਲਾਲਚ ਦੇ ਦਿੰਦੀਆਂ ਹਨ ਕਿ ਇਕ ਨਾਲ ਇਕ ਮੁਫਤ ਜਾਂ ਵੱਧ ਫੀਸਦੀ ਜਿਵੇਂ 40 ਫੀਸਦੀ ਛੂਟ ਆਦਿ ਪਰ ਕੰਪਨੀਆਂ ਨੇ ਇਸ ਸਾਮਾਨ ਦੇ ਪੈਸੇ ਪਹਿਲਾਂ ਹੀ ਲਗਾ ਰੱਖੇ ਹੁੰਦੇ ਹਨ। ਕਈ ਔਰਤਾਂ ਬਿਨਾਂ ਸੋਚੇ-ਸਮਝੇ ਬਹੁਤ ਸਾਰਾ ਸਾਮਾਨ ਖਰੀਦ ਕੇ ਰੱਖ ਲੈਂਦੀਆਂ ਹਨ, ਜਿਸ ਨਾਲ ਪੈਸੇ ਦੀ ਬਰਬਾਦੀ ਹੁੰਦੀ ਹੈ।
ਇਸ ਕਰਕੇ ਸੋਚ-ਸਮਝ ਕੇ, ਲੋੜ ਅਤੇ ਜ਼ਰੂਰਤ ਅਨੁਸਾਰ ਹੀ ਖਰੀਦਦਾਰੀ ਕਰੋ।


-ਦਿਉਣ ਖੇੜਾ (ਸ੍ਰੀ ਮੁਕਤਸਰ ਸਾਹਿਬ)। ਮੋਬਾ: 94174-47941


ਖ਼ਬਰ ਸ਼ੇਅਰ ਕਰੋ

ਮਾਪਿਆਂ ਦਾ ਬੱਚਿਆਂ ਪ੍ਰਤੀ ਵਿਹਾਰ

ਬੱਚਿਆਂ ਉੱਪਰ ਪਰਿਵਾਰਕ ਮਾਹੌਲ ਅਤੇ ਆਲੇ-ਦੁਆਲੇ ਦਾ ਬਹੁਤ ਹੀ ਅਸਰ ਹੁੰਦਾ ਹੈ। ਬੱਚੇ ਦਾ ਮਨ ਇਕ ਕੋਰੀ ਸਲੇਟ ਵਾਂਗ ਹੈ, ਜਿਸ ਉੱਪਰ ਜਿਹੜੇ ਅੱਖਰ ਲਿਖੇ ਜਾਣਗੇ, ਉਹ ਪੱਕੇ ਹੁੰਦੇ ਜਾਣਗੇ। ਬੱਚੇ ਦੀ ਸ਼ਖ਼ਸੀਅਤ ਉਸ ਦੇ ਮੁਢਲੇ ਸਾਲਾਂ ਤੋਂ ਹੀ ਉਸਰਨੀ ਸ਼ੁਰੂ ਹੋ ਜਾਂਦੀ ਹੈ। ਬੱਚਿਆਂ ਦੀ ਸ਼ੈਤਾਨੀ ਅਤੇ ਸੁਭਾਅ ਵੱਡੇ-ਵੱਡੇ ਨੁਕਸਾਨ ਕਰਵਾ ਦਿੰਦਾ ਹੈ। ਇਥੋਂ ਤੱਕ ਕਿ ਕਈ ਵਾਰ ਬੱਚੇ ਦੀ ਜਾਨ ਵੀ ਜਾ ਸਕਦੀ ਹੈ। ਬੱਚਿਆਂ ਅੰਦਰ ਬਗਾਵਤ ਤੇ ਹਿੰਸਕ ਰੁਚੀਆਂ ਪੈਦਾ ਹੋਣ ਦੇ ਕਾਰਨ ਇਹ ਹੋ ਸਕਦੇ ਹਨ-
* ਮਾਂ-ਪਿਓ ਦੁਆਰਾ ਕੰਮਕਾਰ ਵਿਚ ਮਗਨ ਰਹਿ ਕੇ ਬੱਚਿਆਂ ਨੂੰ ਨਜ਼ਰਅੰਦਾਜ਼ ਕਰਨਾ। ਇਹ ਠੀਕ ਹੈ ਕਿ ਅੱਜ ਦੀ ਰੁਝੇਵਿਆਂ ਭਰੀ ਜ਼ਿੰਦਗੀ ਵਿਚ ਮਾਪਿਆਂ ਕੋਲ ਬੱਚਿਆਂ ਲਈ ਸਮੇਂ ਦੀ ਕਮੀ ਹੈ ਪਰ ਬੱਚੇ ਖਾਸ ਕਰਕੇ ਜਵਾਨ ਹੋ ਰਹੇ ਬੱਚੇ ਦੇ ਨਾਲ ਗੱਲਬਾਤ ਕਰਨਾ ਰਿਸ਼ਤਿਆਂ ਨੂੰ ਸੁਖਾਵਾਂ ਬਣਾਉਂਦਾ ਹੈ। ਬੱਚੇ ਨੂੰ ਇਹ ਪੁੱਛਣਾ ਲਾਜ਼ਮੀ ਹੈ ਕਿ ਉਸ ਦਾ ਅੱਜ ਦਾ ਦਿਨ ਸਕੂਲ-ਕਾਲਜ ਵਿਚ ਕਿਵੇਂ ਬੀਤਿਆ?
* ਮਾਂ-ਪਿਓ ਦੇ ਆਪਸੀ ਝਗੜੇ ਵੀ ਬੱਚਿਆਂ ਅੰਦਰ ਹਿੰਸਕ ਰੁਚੀਆਂ ਪੈਦਾ ਕਰਦੇ ਹਨ, ਜਦ ਮਾਪੇ ਆਪੋ ਵਿਚ ਲੜਦੇ ਹਨ ਤਾਂ ਬੱਚੇ ਲਈ ਘਰ ਦਾ ਮਾਹੌਲ ਬਹੁਤ ਤਣਾਅ ਭਰਪੂਰ ਹੋ ਜਾਂਦਾ ਹੈ ਤੇ ਉਹ ਕਸੂਰ ਕਿਸ ਦਾ ਹੈ? ਇਹੀ ਸੋਚ-ਸੋਚ ਕੇ ਮਾਂ-ਬਾਪ 'ਤੇ ਗੁੱਸਾ ਕਰਦੇ ਹੌਲੀ-ਹੌਲੀ ਬਾਗੀ ਹੋ ਜਾਂਦੇ ਹਨ। ਮਾਪੇ ਆਪਣੇ ਝਗੜੇ ਵਿਚ ਫਸ ਕੇ ਬੱਚੇ ਦੇ ਵਜੂਦ ਨੂੰ ਬਿਲਕੁਲ ਨਜ਼ਰਅੰਦਾਜ਼ ਕਰ ਦਿੰਦੇ ਹਨ।
* ਕਈ ਮਾਪੇ ਬਸ ਬੱਚਿਆਂ ਉੱਪਰ ਰੋਹਬ ਰੱਖਣਾ ਹੀ ਮਾਪੇ ਹੋਣ ਦਾ ਪਹਿਲਾ ਕਰਤੱਵ ਸਮਝਦੇ ਹਨ ਜੋ ਕਿ ਜਵਾਨ ਹੋ ਰਹੇ ਬੱਚਿਆਂ ਅੰਦਰ ਹੀਣ ਭਾਵਨਾ ਅਤੇ ਮਾਪਿਆਂ ਪ੍ਰਤੀ ਕੁੜੱਤਣ ਭਰ ਦਿੰਦਾ ਹੈ। ਹਰ ਵੇਲੇ ਬੱਚੇ ਨੂੰ ਤਾੜਨਾ ਦੇਣਾ, ਰੋਹਬ ਪਾਉਣਾ, ਉਸ ਨੂੰ ਦਬਕਾਉਣਾ ਆਪਸੀ ਪ੍ਰੇਮ ਘਟਾ ਦਿੰਦਾ ਹੈ, ਜਿਸ ਨਾਲ ਬੱਚਿਆਂ ਅੰਦਰ ਮਾਪਿਆਂ ਤੋਂ ਕੁਝ ਵੀ ਚੰਗਾ ਹੋਣ ਦੀ ਉਮੀਦ ਖ਼ਤਮ ਹੋ ਜਾਂਦੀ ਹੈ।
* ਬਹੁਤ ਸਾਰੇ ਮਾਪੇ ਆਪਣੀਆਂ ਇੱਛਾਵਾਂ/ਖਾਹਿਸ਼ਾਂ ਦਾ ਭਾਰ ਆਪਣੇ ਬੱਚਿਆਂ ਉੱਪਰ ਲੱਦ ਕੇ ਉਨ੍ਹਾਂ ਦੀ ਦਿਲਚਸਪੀ ਜਾਣੇ ਬਿਨਾਂ ਉਨ੍ਹਾਂ ਨੂੰ ਆਪਣੇ ਮੁਤਾਬਿਕ ਕੈਰੀਅਰ ਚੁਣਨ ਤੋਂ ਰੋਕਦੇ ਹੋਏ ਆਪਣੇ ਵਲੋਂ ਜ਼ਬਰਦਸਤੀ ਖੇਤਰ ਚੁਣਨ ਲਈ ਮਜਬੂਰ ਕਰਦੇ ਹਨ। ਬੱਚਿਆਂ ਦਾ ਮਾਰਗ ਦਰਸ਼ਨ ਕਰਨਾ ਜ਼ਰੂਰੀ ਹੈ ਪਰ ਉਨ੍ਹਾਂ ਦੀਆਂ ਰੁਚੀਆਂ ਅਨੁਸਾਰ ਉਨ੍ਹਾਂ ਨੂੰ ਕੈਰੀਅਰ ਚੁਣਨ ਦੀ ਖੁੱਲ੍ਹ ਦੇਣਾ ਵੀ ਜ਼ਰੂਰੀ ਹੈ, ਨਹੀਂ ਤਾਂ ਤਣਾਅ ਵਿਚ ਰਹਿ ਰਿਹਾ ਬੱਚਾ ਹੌਲੀ-ਹੌਲੀ ਅਪਰਾਧੀ ਹੋ ਸਕਦਾ ਹੈ।
* ਬੱਚਿਆਂ ਨੂੰ ਸੁਖਾਵੀਂ ਜ਼ਿੰਦਗੀ, ਸੁਖ-ਸਹੂਲਤਾਂ, ਟੈਕਨਾਲੋਜੀ ਆਦਿ ਦੇ ਸਾਧਨ ਦੇ ਕੇ ਸੁਖੀ ਜੀਵਨ ਦੇਣਾ ਹੀ ਮਾਪਿਆਂ ਦਾ ਕਰਤੱਵ ਨਹੀਂ, ਸਗੋਂ ਉਨ੍ਹਾਂ ਦੀਆਂ ਭਾਵਨਾਵਾਂ ਦਾ ਸਤਿਕਾਰ ਕਰਨਾ, ਉਨ੍ਹਾਂ ਦੀਆਂ ਰੁਚੀਆਂ ਨੂੰ ਸਮਝਣਾ ਵੀ ਮਾਪਿਆਂ ਦਾ ਫਰਜ਼ ਹੈ।
* ਗ਼ਲਤੀ ਕਰਨ 'ਤੇ ਡਾਂਟਣ, ਮਾਰਨ, ਝਿੜਕਣ ਦੀ ਬਜਾਏ ਗ਼ਲਤੀ ਦੇ ਕਾਰਨਾਂ ਦੀ ਤਹਿ ਤੱਕ ਜਾਣਾ ਜ਼ਰੂਰੀ ਹੈ ਤੇ ਪਿਆਰ ਨਾਲ ਉਨ੍ਹਾਂ ਸਾਰੀਆਂ ਪ੍ਰਸਥਿਤੀਆਂ 'ਤੇ ਝਾਤ ਪਾਉਣੀ ਜ਼ਰੂਰੀ ਹੈ, ਜਿਨ੍ਹਾਂ ਕਾਰਨ ਬੱਚੇ ਨੇ ਗ਼ਲਤੀ ਕੀਤੀ। ਉਸ ਨਾਲ ਹਮਦਰਦੀ ਕਰਕੇ ਅੱਗੇ ਤੋਂ ਗ਼ਲਤੀ ਕਰਨ ਤੋਂ ਵਰਜਿਆ ਜਾ ਸਕਦਾ ਹੈ।
* ਬੱਚਿਆਂ ਉੱਪਰ ਮਾਪਿਆਂ ਦਾ ਹਰ ਸਮੇਂ ਧਿਆਨ ਦੇਣਾ ਜ਼ਰੂਰੀ ਹੈ ਪਰ ਹਿਟਲਰਸ਼ਾਹੀ ਨਹੀਂ, ਸਗੋਂ ਪਿਆਰ ਤੇ ਦੋਸਤੀ ਨਾਲ ਹੀ ਬੱਚਿਆਂ ਦੀਆਂ ਗ਼ਲਤੀਆਂ ਸੁਧਾਰੀਆਂ ਜਾ ਸਕਦੀਆਂ ਹਨ। ਦੋਸਤੀ ਵਿਚ ਬੜੀ ਤਾਕਤ ਹੈ। ਦੋਸਤ ਮੰਮੀ-ਡੈਡੀ ਨਾਲ ਬੱਚੇ ਆਪਣੀਆਂ ਕਮਜ਼ੋਰੀਆਂ, ਅਸਫਲਤਾਵਾਂ, ਬੁਰੀਆਂ ਆਦਤਾਂ ਜਾਂ ਆਪਣੇ ਨਿੱਜੀ ਮਾਮਲੇ ਨਹੀਂ ਲੁਕਾਉਂਦੇ, ਸਗੋਂ ਇਹ ਦੱਸ ਕੇ ਹਲਕੇ ਹੋ ਜਾਂਦੇ ਹਨ।
* ਇਸ ਲਈ ਖੁੱਲ੍ਹ ਕੇ ਗੱਲ ਕਰਨਾ ਰਿਸ਼ਤਿਆਂ ਦੇ ਸੁਖਾਵੇਂ ਅਹਿਸਾਸ ਨੂੰ ਜਨਮ ਦਿੰਦਾ ਹੈ ਪਰ ਸ਼ੱਕ ਸੰਦੇਹ, ਵਹਿਮ, ਗ਼ਲਤ-ਫਹਿਮੀਆਂ ਮਾਪੇ ਤੇ ਬੱਚਿਆਂ ਦੇ ਕੋਮਲ ਰਿਸ਼ਤੇ ਨੂੰ ਕਮਜ਼ੋਰ ਕਰ ਦਿੰਦੇ ਹਨ। ਇਸ ਲਈ ਆਪਣੇ ਜਵਾਨ ਹੋ ਰਹੇ ਬੱਚਿਆਂ ਦੇ ਮਨਾਂ ਅੰਦਰ ਵਿਸ਼ਵਾਸ ਦੀ ਰੌਸ਼ਨੀ ਭਰੀਏ, ਉਨ੍ਹਾਂ ਦੇ ਸਹੀ ਮਾਰਗ ਦਰਸ਼ਕ ਬਣੀਏ ਤੇ ਉਨ੍ਹਾਂ ਦੀਆਂ ਅਸਫਲਤਾਵਾਂ 'ਤੇ ਉਨ੍ਹਾਂ ਨੂੰ ਬੁਰਾ ਕਹਿਣ ਦੀ ਬਜਾਏ ਉਨ੍ਹਾਂ ਦਾ ਅੱਗੇ ਵਾਸਤੇ ਹੌਸਲਾ ਵਧਾਈਏ। ਬੱਚਿਆਂ ਦੇ ਗ਼ਲਤ ਮਾਰਗ ਤੇ ਭਟਕਣ ਵਿਚ ਸਿਰਫ ਬੱਚੇ ਹੀ ਨਹੀਂ, ਸਗੋਂ ਮਾਪੇ ਵੀ ਜ਼ਿੰਮੇਵਾਰ ਹੁੰਦੇ ਹਨ। ਇਸ ਲਈ ਮਾਪਿਆਂ ਨੂੰ ਆਪਣਾ ਫਰਜ਼, ਜ਼ਿੰਮੇਵਾਰੀ ਪੂਰੀ ਤਨਦੇਹੀ ਨਾਲ ਸਮਝਣ ਦੀ ਲੋੜ ਹੈ, ਤਾਂ ਜੋ ਚੰਗੇ ਸਮਾਜ ਦੀ ਸਿਰਜਣਾ ਕੀਤੀ ਜਾ ਸਕੇ।


-ਐਚ. ਐਮ. ਵੀ., ਜਲੰਧਰ।

ਹਰਮਨ ਪਿਆਰੇ ਰਾਜਸਥਾਨੀ ਪਕਵਾਨ

ਕਾਂਜੀ ਵੜਾ
ਸਮੱਗਰੀ : ਹਰੀ ਮੂੰਗੀ ਦੀ ਦਾਲ, ਪੀਸੀ ਹੋਈ ਰਾਈ, ਨਮਕ, ਤੇਲ।
ਵਿਧੀ : ਕਾਂਜੀ ਬਣਾਉਣ ਲਈ ਪਾਣੀ ਨੂੰ ਚੰਗੀ ਤਰ੍ਹਾਂ ਗਰਮ ਕਰ ਲਓ। ਫਿਰ ਸਟੀਲ ਦੀ ਭਿਗੋਨੀ ਜਾਂ ਮਿੱਟੀ ਦੇ ਘੜੇ ਵਿਚ ਕਰੀਬ ਦੋ ਜਾਂ ਢਾਈ ਲਿਟਰ ਗਰਮ ਪਾਣੀ ਲੈ ਕੇ ਇਕ ਵੱਡਾ ਚਮਚ ਪੀਸੀ ਹੋਈ ਰਾਈ ਪਾਓ ਅਤੇ ਸਵਾਦ ਅਨੁਸਾਰ ਨਮਕ ਪਾ ਕੇ ਉਸ ਨੂੰ ਦੋ ਜਾਂ ਤਿੰਨ ਦਿਨ ਤੱਕ ਰੱਖ ਦਿਓ, ਜਿਸ ਨਾਲ ਪਾਣੀ ਵਿਚ ਖਟਿਆਈ ਆਉਣ ਲਗਦੀ ਹੈ ਅਤੇ ਕਾਂਜੀ ਬਣਨ ਲਗਦੀ ਹੈ। ਫਿਰ ਮੂੰਗੀ ਦੀ ਦਾਲ ਨੂੰ 4-5 ਘੰਟੇ ਭਿਉਂ ਕੇ ਉਸ ਨੂੰ ਧੋ ਕੇ ਪੀਸ ਲਓ।
ਪੀਸਣ ਤੋਂ ਬਾਅਦ ਦਾਲ ਵਿਚ ਮਸਾਲਾ ਅਤੇ ਨਮਕ ਪਾਏ ਬਿਨਾਂ ਹੀ ਤੇਲ ਨੂੰ ਗਰਮ ਕਰਕੇ ਵੜੇ ਬਣਾ ਲਓ। ਵੜੇ ਬਣਾਉਣ ਤੋਂ ਬਾਅਦ ਭਿਗੋਨੀ ਵਿਚ ਪਾਣੀ ਪਾ ਕੇ ਉਸ ਵਿਚ ਨਮਕ ਪਾ ਦਿਓ। ਫਿਰ ਵੜੇ ਉਸ ਪਾਣੀ ਵਿਚ ਭਿੱਜਣ ਲਈ ਪਾ ਦਿਓ। ਜਦੋਂ ਵੜੇ ਭਿੱਜ ਜਾਣਗੇ ਤਾਂ ਨਮਕ ਦਾ ਸਵਾਦ ਉਨ੍ਹਾਂ ਵੜਿਆਂ ਵਿਚ ਆ ਜਾਵੇਗਾ। ਹੁਣ ਵੜਿਆਂ ਨੂੰ ਪਾਣੀ ਵਿਚੋਂ ਬਾਹਰ ਦਬਾਅ ਕੇ ਕੱਢ ਲਓ ਅਤੇ ਅਸੀਂ ਜੋ ਤਿੰਨ ਦਿਨ ਪਹਿਲਾਂ ਕਾਂਜੀ ਬਣਾਉਣ ਲਈ ਰੱਖੀ ਸੀ, ਹੁਣ ਉਹ ਤਿਆਰ ਹੋ ਗਈ ਹੋਵੇਗੀ। ਹੁਣ ਇਸ ਕਾਂਜੀ ਵਿਚ ਵੜੇ ਪਾ ਕੇ ਫਰਿੱਜ ਵਿਚ ਕੁਝ ਦੇਰ ਲਈ ਰੱਖ ਦਿਓ। ਜਦੋਂ ਕਾਂਜੀ ਵੜੇ ਠੰਢੇ ਹੋ ਜਾਣ ਤਾਂ ਖਵਾਓ।
ਬਾਫਲਾ
ਸਮੱਗਰੀ : ਕਣਕ ਦਾ ਮੋਟਾ ਆਟਾ, ਨਮਕ, ਮਿੱਠਾ ਸੋਢਾ, ਲਾਲ ਪੀਸੀ ਹੋਈ ਮਿਰਚ, ਜ਼ੀਰਾ, ਹਲਦੀ, ਤੇਲ, ਘਿਓ।
ਵਿਧੀ : ਕਣਕ ਦੇ ਆਟੇ ਵਿਚ ਥੋੜ੍ਹਾ ਨਮਕ, ਪੀਸੀ ਹੋਈ ਲਾਲ ਮਿਰਚ, ਜ਼ੀਰਾ, ਹਲਦੀ ਅਤੇ ਥੋੜ੍ਹਾ ਮਿੱਠਾ ਸੋਢਾ ਪਾ ਕੇ ਮਿਲਾਉਣ ਤੋਂ ਬਾਅਦ ਆਟੇ ਵਿਚ ਮੋਯਨ ਲਈ ਤੇਲ ਪਾਓ ਅਤੇ ਚੰਗੀ ਤਰ੍ਹਾਂ ਮਿਲਾਓ। ਹੁਣ ਗਰਮ ਪਾਣੀ ਕਰਕੇ ਆਟੇ ਨੂੰ ਗੁੰਨ੍ਹ ਲਓ। ਗੁੰਨ੍ਹਣ ਤੋਂ ਬਾਅਦ ਸਾਰੇ ਆਟੇ ਦੇ ਗੋਲੇ ਬਣਾ ਲਓ ਅਤੇ ਗੋਲਿਆਂ ਨੂੰ ਥੋੜ੍ਹਾ-ਥੋੜ੍ਹਾ ਦਬਾਅ ਲਓ। ਇਕ ਭਗੋਨੇ ਵਿਚ ਗਰਮ ਪਾਣੀ ਕਰਕੇ ਸਾਰੇ ਗੋਲਿਆਂ ਨੂੰ ਪਾਣੀ ਵਿਚ ਉਬਾਲੋ। ਜਦੋਂ ਸਾਰੇ ਗੋਲੇ ਚੰਗੀ ਤਰ੍ਹਾਂ ਉਬਲ ਜਾਣ, ਉਦੋਂ ਉਨ੍ਹਾਂ ਨੂੰ ਪਾਣੀ ਵਿਚੋਂ ਬਾਹਰ ਕੱਢ ਲਓ। ਕੱਢਣ ਤੋਂ ਬਾਅਦ ਸਾਰੇ ਗੋਲਿਆਂ ਨੂੰ ਵਿਚਕਾਰੋਂ ਕੱਟ ਕੇ ਦੋ ਹਿੱਸੇ ਕਰ ਲਓ। ਹੁਣ ਇਕ ਕੜਾਹੀ ਵਿਚ ਘਿਓ ਗਰਮ ਕਰੋ। ਜਦੋਂ ਘਿਓ ਚੰਗੀ ਤਰ੍ਹਾਂ ਗਰਮ ਹੋ ਜਾਵੇ ਤਾਂ ਦੋ ਹਿੱਸਿਆਂ ਵਿਚ ਲਏ ਗਏ ਗੋਲਿਆਂ ਨੂੰ ਪਾ ਕੇ ਸੁਨਹਿਰੇ ਭੂਰੇ ਹੋਣ ਤੱਕ ਤਲੋ। ਉਨ੍ਹਾਂ ਨੂੰ ਘਿਓ ਵਿਚੋਂ ਬਾਹਰ ਕੱਢੋ। ਇਸ ਤਰ੍ਹਾਂ ਬਾਫਲੇ ਤਿਆਰ ਹਨ। ਬਾਫਲਿਆਂ ਨੂੰ ਖਵਾਉਣ ਲਈ ਨਾਲ ਦਾਲ ਜਾਂ ਗੱਟੇ ਦੀ ਸਬਜ਼ੀ ਜਾਂ ਧਨੀਏ ਦੀ ਚਟਣੀ ਦੇ ਨਾਲ ਖਵਾਓ। ਜੇ ਤੁਹਾਨੂੰ ਘਿਓ ਬਹੁਤ ਹੀ ਪਸੰਦ ਹੈ ਤਾਂ ਤੁਸੀਂ ਬਾਫਲਿਆਂ ਨੂੰ ਥੋੜ੍ਹਾ ਚੂਰ ਕੇ ਉਸ ਵਿਚ ਆਪਣੀ ਇੱਛਾ ਅਨੁਸਾਰ ਘਿਓ ਪਾ ਕੇ ਖਾ ਸਕਦੇ ਹੋ।
ਦਮ ਆਲੂ
ਸਮੱਗਰੀ : ਛੋਟੇ-ਛੋਟੇ ਆਲੂ, ਪਿਆਜ਼, ਟਮਾਟਰ, ਹਰੀ ਮਿਰਚ, ਅਦਰਕ, ਹਰਾ ਧਨੀਆ, ਲਸਣ, ਦਹੀਂ, ਪੀਸੀ ਹੋਈ ਲਾਲ ਮਿਰਚ, ਹਲਦੀ, ਧਨੀਆ ਪਾਊਡਰ, ਜ਼ੀਰਾ, ਨਮਕ, ਘਿਓ, ਖੜ੍ਹਾ ਗਰਮ ਮਸਾਲਾ।
ਵਿਧੀ : ਆਲੂ ਨੂੰ ਉਬਾਲ ਕੇ ਛਿੱਲ ਲਓ। ਪਿਆਜ਼ ਅਤੇ ਟਮਾਟਰ ਨੂੰ ਚਾਹੋ ਤਾਂ ਬਰੀਕ-ਬਰੀਕ ਕੱਟ ਲਓ ਜਾਂ ਪੇਸਟ ਬਣਾ ਲਓ। ਲਸਣ, ਅਦਰਕ, ਮਿਰਚ ਦਾ ਵੀ ਪੇਸਟ ਬਣਾ ਲਓ।
ਕੜਾਹੀ ਵਿਚ ਘਿਓ ਪਾ ਕੇ ਗਰਮ ਕਰੋ। ਫਿਰ ਖੜ੍ਹਾ ਗਰਮ ਮਸਾਲਾ ਅਤੇ ਜ਼ੀਰਾ ਪਾ ਕੇ ਅਦਰਕ, ਲਸਣ ਦਾ ਪੇਸਟ ਪਾਓ। ਫਿਰ ਪਿਆਜ਼ ਦਾ ਪੇਸਟ ਪਾ ਕੇ ਉਸ ਨੂੰ ਉਦੋਂ ਤੱਕ ਹਿਲਾਓ ਜਦੋਂ ਤੱਕ ਘਿਓ ਨਾ ਛੱਡ ਦੇਵੇ। ਬਾਅਦ ਵਿਚ ਟਮਾਟਰ ਦਾ ਪੇਸਟ ਪਾ ਕੇ ਇਸੇ ਤਰ੍ਹਾਂ ਹਿਲਾਓ। ਹੁਣ ਇਸ ਵਿਚ ਦਹੀਂ ਪਾਓ, ਨਾਲ ਹੀ ਲਾਲ ਮਿਰਚ, ਹਲਦੀ, ਧਨੀਆ ਪਾਊਡਰ ਅਤੇ ਸਵਾਦ ਅਨੁਸਾਰ ਨਮਕ ਪਾਓ ਅਤੇ ਇਸ ਨੂੰ ਉਦੋਂ ਤੱਕ ਹਿਲਾਓ, ਜਦੋਂ ਤੱਕ ਘਿਓ ਨਾ ਛੱਡੇ। ਘਿਓ ਛੱਡਣ ਤੋਂ ਬਾਅਦ ਥੋੜ੍ਹਾ ਪਾਣੀ ਪਾ ਦਿਓ।
ਹੁਣ ਉਬਲੇ ਹੋਏ ਆਲੂ ਨੂੰ ਕਾਂਟੇ ਨਾਲ ਕੁਝ ਸੁਰਾਖ ਕਰਕੇ ਤਿਆਰ ਕੀਤੀ ਗ੍ਰੇਵੀ ਵਿਚ ਪਾ ਕੇ ਹੌਲੀ ਅੱਗ 'ਤੇ ਥੋੜ੍ਹੀ ਦੇਰ ਤੱਕ ਰਹਿਣ ਦਿਓ। ਬਾਅਦ ਵਿਚ ਕੱਟਿਆ ਹੋਇਆ ਹਰਾ ਧਨੀਆ ਪਾਓ। ਇਸ ਤਰ੍ਹਾਂ ਦਮ ਆਲੂ ਤਿਆਰ ਹੈ। ਗਰਮ-ਗਰਮ ਦਮ ਆਲੂ ਪਰਾਉਂਠੇ ਜਾਂ ਫੁਲਕਿਆਂ ਦੇ ਨਾਲ ਖਵਾਓ ਅਤੇ ਖਾਓ।


-ਸ਼ਵੇਤਾ ਮੰਗਲ

ਤੁਸੀਂ ਵੀ ਬਣ ਸਕਦੇ ਹੋ ਦੂਜਿਆਂ ਲਈ ਰਾਹ ਦਸੇਰੇ

ਅਕਸਰ ਅਸੀਂ ਬਾਹਰ ਦੀਆਂ ਚੁਣੌਤੀਆਂ ਤੋਂ ਨਹੀਂ, ਸਗੋਂ ਆਪਣੀਆਂ ਅੰਦਰਲੀਆਂ ਕਮਜ਼ੋਰੀਆਂ ਤੋਂ ਹਾਰਦੇ ਹਾਂ। ਇਸ ਗੱਲ ਦੀ ਵਿਆਖਿਆ ਕਰਨੀ ਬਹੁਤ ਆਸਾਨ ਹੈ ਕਿ ਅਸੀਂ ਕੀ ਹਾਂ ਪਰ ਇਸ ਗੱਲ ਨੂੰ ਜਾਣਨਾ ਬਹੁਤ ਮੁਸ਼ਕਿਲ ਹੈ ਕਿ ਅਸੀਂ ਕੀ ਬਣ ਸਕਦੇ ਹਾਂ। ਤੁਹਾਡੇ ਕੰਮ ਹੀ ਦੱਸਦੇ ਹਨ ਕਿ ਤੁਹਾਡੀ ਜ਼ਿੰਦਗੀ ਦਾ ਮਨੋਰਥ ਕੀ ਹੈ। ਭਵਿੱਖ ਵਿਚ ਤੈਅ ਕੀਤਾ ਮਨੋਰਥ ਤੁਹਾਡੇ ਅੱਜ ਦੇ ਯਤਨਾਂ ਨੂੰ ਤਾਕਤ ਦਿੰਦਾ ਹੈ। ਵਿਖਾਵੇ ਤੇ ਪਿਆਰ ਵਿਚ ਉਹ ਤਾਕਤ ਨਹੀਂ ਹੁੰਦੀ ਕਿ ਜਿਸ ਨਾਲ ਕਿਸੇ ਦਾ ਦਿਲ ਜਿੱਤਿਆ ਜਾ ਸਕੇ। ਉਸਾਰੂ ਸੋਚ, ਸਖ਼ਤ ਮਿਹਨਤ ਅਤੇ ਇਮਾਨਦਾਰ ਯਤਨਾਂ ਦੀ ਦੌਲਤ ਨਾਲ ਸਫਲਤਾ ਨੂੰ ਖਰੀਦਿਆ ਜਾ ਸਕਦਾ ਹੈ। ਕਿਸੇ ਦੇ ਕੰਮ ਆਉਣ ਦੀ ਖੁਸ਼ੀ ਹੀ ਤੁਹਾਡੇ ਲਈ ਖੁਸ਼ਹਾਲੀ ਬਣਦੀ ਹੈ। ਜਿਸ ਕੰਮ ਨੂੰ ਅਸੀਂ ਆਪਣੇ ਲਈ ਬੋਝ ਸਮਝਦੇ ਹਾਂ, ਉਹੀ ਕੰਮ ਔਖੇ ਹੁੰਦੇ ਹਨ, ਵਰਨਾ ਕੋਈ ਵੀ ਕੰਮ ਐਨਾ ਮੁਸ਼ਕਿਲ ਨਹੀਂ ਹੁੰਦਾ।
ਤੁਸੀਂ ਦੂਜਿਆਂ ਦੀ ਜ਼ਿੰਦਗੀ ਲਈ ਰਾਹ ਦਸੇਰੇ ਬਣੋ, ਤੁਹਾਡੀ ਇਹ ਕੋਸ਼ਿਸ਼ ਤੁਹਾਨੂੰ ਦੁਨੀਆ ਦੀ ਭੀੜ ਵਿਚ ਗੁਆਚਣ ਨਹੀਂ ਦੇਵੇਗੀ। ਇਹ ਜ਼ਰੂਰੀ ਨਹੀਂ ਕਿ ਜਿਸ ਰਸਤੇ 'ਤੇ ਲੋਕਾਂ ਦੀ ਬਹੁਗਿਣਤੀ ਜਾ ਰਹੀ ਹੋਵੇ, ਉਹ ਰਸਤਾ ਸਹੀ ਹੁੰਦਾ ਹੈ, ਬਲਕਿ ਤੁਸੀਂ ਸਹੀ ਰਸਤੇ ਦੀ ਚੋਣ ਕਰੋ। ਮੰਜ਼ਿਲ ਤੱਕ ਜਾਣ ਲਈ ਰਸਤੇ ਬਹੁਤ ਹੁੰਦੇ ਹਨ ਪਰ ਇਰਾਦਾ ਇਕ ਹੋਣਾ ਚਾਹੀਦਾ ਹੈ। ਜ਼ਿੰਦਗੀ ਦੀ ਕਿਸੇ ਉਚਾਈ ਨੂੰ ਸਬਰ ਨਾਲ ਸਰ ਕਰਨ ਵਾਲੇ ਲੋਕ ਕਦੇ ਵੀ ਇਕੱਲੇ ਨਹੀਂ ਹੁੰਦੇ, ਕਿਉਂਕਿ ਉਨ੍ਹਾਂ ਵਿਚ ਦੂਜਿਆਂ ਦਾ ਹੱਥ ਫੜ ਕੇ ਚੱਲਣ ਦਾ ਚਾਅ ਹੁੰਦਾ ਹੈ। ਉਨ੍ਹਾਂ ਕੋਲ ਜ਼ਿੰਦਗੀ ਜਿਉਣ ਦਾ ਹੁਨਰ ਅਤੇ ਸਲੀਕਾ ਹੁੰਦਾ ਹੈ। ਦਰਿਆ ਦਿਲ ਬੰਦੇ ਦੀ ਜ਼ਿੰਦਗੀ ਸਮੁੰਦਰ ਵਾਂਗ ਵਿਸ਼ਾਲ ਹੁੰਦੀ ਹੈ। ਆਪਣੀ ਜ਼ਿੰਦਗੀ ਨੂੰ ਐਨਾ ਸ਼ਾਨਦਾਰ ਬਣਾਓ ਕਿ ਤੁਹਾਨੂੰ ਯਾਦ ਕਰਦਿਆਂ ਹੀ ਕਿਸੇ ਦੀਆਂ ਅੱਖਾਂ ਵਿਚ ਚਮਕ ਆ ਜਾਵੇ। ਸੰਸਕਾਰਾਂ ਨਾਲ ਹੀ ਸੰਸਾਰ ਜਿੱਤਿਆ ਜਾ ਸਕਦਾ ਹੈ, ਵਰਨਾ ਹੰਕਾਰ ਨਾਲ ਤਾਂ ਬੰਦਾ ਆਪਣੇ-ਆਪ ਤੋਂ ਵੀ ਹਾਰ ਜਾਂਦਾ ਹੈ। ਹੁਸ਼ਿਆਰ ਹੋਣਾ ਚੰਗੀ ਗੱਲ ਹੈ ਪਰ ਹੁਸ਼ਿਆਰੀਆਂ ਕਰਨਾ ਬੁਰਾ। ਚੁਸਤ ਬਣੋ ਪਰ ਸੁਸਤ ਨਹੀਂ। ਚੰਗੇ ਸੁਭਾਅ ਦਾ ਕੱਦ ਖੂਬਸੂਰਤੀ ਦੇ ਕੱਦ ਨਾਲੋਂ ਉੱਚਾ ਹੁੰਦਾ ਹੈ। ਆਪਣੀ ਹਾਜ਼ਰੀ ਦਾ ਦਿਖਾਵਾ ਕਰਨ ਲਈ ਕਈ ਤਸਵੀਰਾਂ ਵਿਚ ਤੁਹਾਡੇ ਨਾਲ ਖੜ੍ਹਦੇ ਹਨ ਅਤੇ ਕਈ ਆਪਣੀ ਗ਼ੈਰ-ਹਾਜ਼ਰੀ ਵਿਚ ਤੁਹਾਡੀਆਂ ਤਕਲੀਫਾਂ ਵਿਚ ਤੁਹਾਡਾ ਸਾਥ ਦਿੰਦੇ ਹਨ। ਕੋਸ਼ਿਸ਼ ਹਮੇਸ਼ਾ ਕਰਦੇ ਰਹੋ, ਕਿਉਂਕਿ ਕੋਸ਼ਿਸ਼ ਕਰਨ ਨਾਲ ਜਿੱਤ ਭਾਵੇਂ ਨਾ ਹੋਵੇ ਪਰ ਸਿੱਖਣ ਨੂੰ ਬਹੁਤ ਕੁਝ ਮਿਲਦਾ ਹੈ। ਜਿੱਤ ਨਾਲ ਜਿੱਤਣਾ ਤੇ ਹਾਰ ਨਾਲ ਸਿੱਖਣਾ ਇਕ ਖੁਸ਼ੀ ਦਿੰਦਾ ਹੈ ਅਤੇ ਦੂਜਾ ਤਜਰਬਾ। ਅਮੀਰ ਤਜਰਬਾ ਦਿਲਾਂ 'ਤੇ ਵੱਜੀਆਂ ਸੱਟਾਂ ਦਾ ਸੰਗ੍ਰਹਿ ਹੁੰਦਾ ਹੈ। ਇਹ ਸੱਚ ਹੈ ਕਿ ਜਿਥੇ ਤੁਹਾਡੀ ਗ਼ੈਰ-ਹਾਜ਼ਰੀ ਮਹਿਸੂਸ ਨਹੀਂ ਹੁੰਦੀ, ਉਥੇ ਤੁਹਾਡੀ ਹਾਜ਼ਰੀ ਦੀ ਵੀ ਕੀਮਤ ਨਹੀਂ ਹੁੰਦੀ। ਜੇਕਰ ਤੁਹਾਡੇ ਪੈਰ ਸਫਲਤਾ ਵੱਲ ਨਹੀਂ ਤੁਰਦੇ ਤਾਂ ਅਸਫਲਤਾ ਆਪਣੇ-ਆਪ ਚੱਲ ਕੇ ਤੁਹਾਡੇ ਕੋਲ ਆ ਜਾਂਦੀ ਹੈ। ਸਮੁੰਦਰ ਦੀਆਂ ਲਹਿਰਾਂ ਨੂੰ ਰੋਕਿਆ ਨਹੀਂ ਜਾ ਸਕਦਾ ਪਰ ਜੇਕਰ ਤੈਰਨ ਦਾ ਹੁਨਰ ਹੋਵੇ ਤਾਂ ਲਹਿਰਾਂ ਚਿੰਤਾ ਅਤੇ ਪ੍ਰੇਸ਼ਾਨੀ ਦਾ ਕਾਰਨ ਨਹੀਂ ਬਣਦੀਆਂ। ਚੰਗੇ ਬਣੋਗੇ ਤਾਂ ਚੰਗੇ ਨਜ਼ਰ ਆਉਣ ਦਾ ਵਿਖਾਵਾ ਨਹੀਂ ਕਰਨਾ ਪਵੇਗਾ।
ਤੁਹਾਡੇ ਕੋਲ ਕੀ ਹੈ, ਇਸ ਨਾਲੋਂ ਇਹ ਜ਼ਿਆਦਾ ਮਹੱਤਵਪੂਰਨ ਹੈ ਕਿ ਤੁਸੀਂ ਖੁਦ ਕੀ ਹੋ। ਲੋਕ ਤੁਹਾਨੂੰ ਪਿਆਰ ਕਰਦੇ ਹਨ, ਇਸ ਤੋਂ ਵੱਡੀ ਤਸੱਲੀ ਕੋਈ ਨਹੀਂ। ਲੋਕ ਤੁਹਾਡੇ 'ਤੇ ਯਕੀਨ ਕਰਦੇ ਹਨ, ਇਸ ਤੋਂ ਵੱਡੀ ਕੋਈ ਦੌਲਤ ਨਹੀਂ। ਲੋਕ ਤੁਹਾਡਾ ਸਾਥ ਦਿੰਦੇ ਹਨ, ਇਸ ਤੋਂ ਵੱਡੀ ਕੋਈ ਤਾਕਤ ਨਹੀਂ। ਲੋਕ ਤੁਹਾਨੂੰ ਯਾਦ ਕਰਦੇ ਹਨ, ਇਸ ਤੋਂ ਵੱਡਾ ਕੋਈ ਅਹਿਸਾਸ ਨਹੀਂ। ਲੋਕ ਤੁਹਾਡੇ ਤੋਂ ਪ੍ਰੇਰਿਤ ਹੁੰਦੇ ਹਨ, ਇਸ ਤੋਂ ਵੱਡੀ ਪ੍ਰਾਪਤੀ ਕੋਈ ਨਹੀਂ। ਲੋਕ ਤੁਹਾਡੇ ਬਾਰੇ ਚੰਗਾ ਸੋਚਦੇ ਹਨ, ਇਸ ਤੋਂ ਵੱਡੀ ਕੋਈ ਖੁਸ਼ੀ ਨਹੀਂ। ਇਹ ਦੌਲਤਾਂ, ਇੱਜ਼ਤਾਂ, ਪਿਆਰ, ਸਤਿਕਾਰ, ਦੁਆਵਾਂ, ਖੁਸ਼ੀਆਂ ਤੇ ਯਕੀਨ ਹੀ ਤੁਹਾਡੀ ਸਭ ਤੋਂ ਵੱਡੀ ਕਮਾਈ ਹੈ। ਇਕ ਚੰਗਾ ਮਨੋਰਥ ਤੁਹਾਨੂੰ ਕਦੇ ਆਲਸੀ ਨਹੀਂ ਹੋਣ ਦਿੰਦਾ। ਚੰਗੇ ਸੁਪਨੇ ਤੁਹਾਨੂੰ ਸਵੇਰੇ ਬਿਸਤਰੇ ਵਿਚੋਂ ਜਲਦੀ ਉੱਠਣ ਲਈ ਪ੍ਰੇਰਿਤ ਕਰਦੇ ਹਨ। ਹਰ ਚੀਜ਼ ਕਿਸਮਤ 'ਤੇ ਛੱਡੀ ਜਾਵੇ ਤਾਂ ਕਿਸਮਤ ਇਕ ਦਿਨ ਤੁਹਾਡੇ ਲਈ ਕੁਝ ਵੀ ਨਹੀਂ ਛੱਡਦੀ।
ਬੱਚਿਆਂ ਲਈ ਮਾਪੇ ਉਨ੍ਹਾਂ ਦੀ ਜ਼ਿੰਦਗੀ ਦੇ ਪਹਿਲੇ ਰਾਹ ਦਸੇਰੇ ਹਨ। ਸਾਡੇ ਮਾਰਗ ਦਰਸ਼ਕ ਜਿੰਨੇ ਸੁੱਚੇ ਹੁੰਦੇ ਹਨ, ਅਸੀਂ ਓਨੇ ਹੀ ਉੱਚੇ ਹੁੰਦੇ ਹਾਂ। ਵਿਦਿਆਰਥੀਆਂ ਦੀ ਜ਼ਿੰਦਗੀ ਦੇ ਰਾਹ ਦਸੇਰੇ ਉਨ੍ਹਾਂ ਦੇ ਅਧਿਆਪਕ ਜਦੋਂ ਆਪਣੇ ਵਿਦਿਆਰਥੀਆਂ ਨੂੰ ਆਪਣੇ ਬੱਚੇ ਸਮਝ ਕੇ ਪੜ੍ਹਾਉਣਗੇ ਤਾਂ ਵਿਦਿਆਰਥੀਆਂ ਦੀ ਕਾਮਯਾਬੀ ਨੂੰ ਕੋਈ ਰੋਕ ਨਹੀਂ ਸਕਦਾ। ਨਿਰਸੰਦੇਹ, ਵਕਤ ਤੁਹਾਡੇ ਦਰਵਾਜ਼ੇ 'ਤੇ ਦਸਤਕ ਜ਼ਰੂਰ ਦੇਵੇਗਾ, ਮਿਹਨਤ ਦੇ ਹੱਥਾਂ ਨਾਲ ਜਦੋਂ ਦਰਵਾਜ਼ਾ ਖੋਲ੍ਹੋਗੇ ਤਾਂ ਵਕਤ ਦੇ ਨਾਲ ਕਿਸਮਤ ਵੀ ਅੰਦਰ ਲੰਘ ਆਵੇਗੀ। ਆਪਣੇ ਲਈ ਆਪਣੇ ਰਸਤੇ ਖੁਦ ਚੁਣੋ, ਕਿਉਂਕਿ ਆਪਣੀ ਜ਼ਿੰਦਗੀ ਦਾ ਸਫ਼ਰ ਤੁਸੀਂ ਆਪਣੇ ਪੈਰਾਂ ਨਾਲ ਤੈਅ ਕਰਨਾ ਹੈ। ਦੂਜਿਆਂ ਲਈ ਪ੍ਰੇਰਨਾ ਉਹੀ ਬਣਦੇ ਹਨ ਜੋ ਖੁਦ ਕਿਸੇ ਤੋਂ ਪ੍ਰੇਰਿਤ ਹੁੰਦੇ ਹਨ। ਚੰਗੀਆਂ ਪੁਸਤਕਾਂ, ਚੰਗੇ ਵਿਚਾਰ ਦਿੰਦੀਆਂ ਹਨ ਅਤੇ ਚੰਗੇ ਵਿਚਾਰ ਚੰਗੀ ਸੋਚ ਬਣਾਉਂਦੇ ਹਨ। ਤੁਸੀਂ ਜੋ ਸੋਚੋਗੇ, ਉਹੀ ਤੁਸੀਂ ਬਣੋਗੇ। ਇਕ ਚਰਿੱਤਰ ਹੈ ਜੋ ਤੁਹਾਨੂੰ ਆਪਣੇ-ਆਪ ਵਿਚ ਵੀ ਗੁੰਮ ਕਰ ਦਿੰਦਾ ਹੈ ਅਤੇ ਇਕ ਉਹ ਚਰਿੱਤਰ ਹੈ ਜੋ ਤੁਹਾਨੂੰ ਦੁਨੀਆ ਦੀ ਭੀੜ ਵਿਚ ਵੀ ਕਦੇ ਗੁਆਚਣ ਨਹੀਂ ਦਿੰਦਾ। ਚੰਗੇ ਅਤੇ ਖੁਸ਼ਹਾਲ ਸਮਾਜ ਚੰਗੀਆਂ ਮਾਵਾਂ ਦੀਆਂ ਚੰਗੀਆਂ ਸੋਚਾਂ ਦੇ ਚੰਗੇ ਸੰਕਲਪ ਹਨ, ਜਿਨ੍ਹਾਂ ਦੀਆਂ ਨੀਂਹਾਂ ਬਹੁਤ ਮਜ਼ਬੂਤ ਹਨ।


-ਪਿੰਡ ਗੋਲੇਵਾਲਾ (ਫਰੀਦਕੋਟ)। ਮੋਬਾ: 94179-49079

ਝੁਰੜੀਆਂ ਅਤੇ ਛਾਈਆਂ ਤੋਂ ਛੁਟਕਾਰਾ-ਕੁਝ ਘਰੇਲੂ ਉਪਾਅ

ਰੇਸ਼ਮ ਜਿਹੀ ਮੁਲਾਇਮ ਅਤੇ ਗੁਲਾਬ ਵਰਗੀ ਦਮਕਦੀ ਚਮੜੀ ਦੀ ਇੱਛਾ ਹਰ ਔਰਤ ਨੂੰ ਹੁੰਦੀ ਹੈ ਪਰ ਖਾਨਦਾਨੀ ਗੁਣ, ਠੀਕ ਦੇਖ-ਭਾਲ ਦੀ ਕਮੀ, ਦੁਰਬਲਤਾ, ਪ੍ਰਦੂਸ਼ਤ ਵਾਤਾਵਰਨ, ਹਾਰਮੋਨਸ ਦੀ ਗੜਬੜੀ, ਮਾਨਸਿਕ ਤਣਾਅ ਵਗੈਰਾ ਨਾਲ ਰੰਗ ਬਦਰੰਗ ਅਤੇ ਕਾਂਤੀਹੀਣ ਹੋਣ ਲਗਦਾ ਹੈ।
* ਤੁਲਸੀ ਦੇ ਪੱਤਿਆਂ ਦਾ ਰਸ ਅਤੇ ਨਿੰਬੂ ਦਾ ਰਸ ਬਰਾਬਰ ਮਾਤਰਾ ਵਿਚ ਮਿਲਾ ਕੇ ਚਿਹਰੇ 'ਤੇ ਲਗਾਓ। ਇਸ ਨਾਲ ਛਾਈਆਂ ਅਤੇ ਮੁਹਾਸੇ ਦੂਰ ਹੋ ਜਾਂਦੇ ਹਨ।
* ਰੋਜ਼ ਪੁਦੀਨੇ ਦੇ ਪੱਤੇ ਪੀਸ ਕੇ ਉਸ ਦਾ ਰਸ ਚਿਹਰੇ 'ਤੇ ਲਗਾਓ। ਥੋੜ੍ਹੀ ਦੇਰ ਬਾਅਦ ਧੋ ਲਓ। ਇਸ ਨਾਲ ਚਿਹਰੇ ਦੀਆਂ ਛਾਈਆਂ ਹੌਲੀ-ਹੌਲੀ ਮਿਟਣ ਲੱਗਣਗੀਆਂ।
* ਕੱਚੇ ਨਾਰੀਅਲ ਦਾ ਪਾਣੀ ਅਤੇ ਥੋੜ੍ਹੀ ਜਿਹੀ ਮਲਾਈ ਨੂੰ ਮਿਲਾ ਕੇ ਫੈਂਟ ਲਓ। ਇਸ ਨੂੰ ਰੋਜ਼ ਦੋ ਵਾਰ ਚਿਹਰੇ 'ਤੇ ਲਗਾਉਣ ਨਾਲ ਦਾਗ-ਧੱਬੇ ਦੂਰ ਹੋ ਕੇ ਚਮੜੀ ਦਮਕਣ ਲਗਦੀ ਹੈ।
* ਇਕ ਛੋਟਾ ਚਮਚ ਕਕੜੀ ਦਾ ਰਸ ਰੋਜ਼ ਚਿਹਰੇ 'ਤੇ ਲਗਾਓ। ਇਸ ਨਾਲ ਚਿਹਰੇ ਦੀ ਚਮੜੀ ਨਿਖਰਦੀ ਹੈ।
* ਰੋਜ਼ਾਨਾ ਇਕ ਛੋਟਾ ਲਾਲ ਟਮਾਟਰ ਕੱਟ ਲਓ। ਇਸ ਵਿਚ ਨਿੰਬੂ ਦੀਆਂ ਕੁਝ ਬੂੰਦਾਂ ਮਿਲਾ ਕੇ ਚਿਹਰੇ 'ਤੇ ਮਲੋ। 10 ਮਿੰਟ ਬਾਅਦ ਚਿਹਰਾ ਧੋ ਲਓ। ਕੁਝ ਹੀ ਦਿਨ ਵਿਚ ਚਮੜੀ ਦਾਗ ਰਹਿਤ ਹੋ ਜਾਵੇਗੀ।
* ਰੁੱਖੀ ਚਮੜੀ ਵਿਚ ਝੁਰੜੀਆਂ ਛੇਤੀ ਪੈ ਜਾਂਦੀਆਂ ਹਨ, ਜਿਸ ਨਾਲ ਚਿਹਰਾ ਨਿਸਤੇਜ ਅਤੇ ਸਾਂਵਲਾ ਲੱਗਣ ਲਗਦਾ ਹੈ। ਇਸ ਤੋਂ ਬਚਣ ਲਈ ਰਾਤ ਨੂੰ ਮਲਾਈ ਅਤੇ ਨਿੰਬੂ ਦਾ ਰਸ ਲਗਾ ਕੇ ਸੌਂ ਜਾਓ। ਸਵੇਰੇ ਕੋਸੇ ਪਾਣੀ ਨਾਲ ਚਿਹਰਾ ਧੋ ਲਓ। * ਸਮਾਨ ਮਾਤਰਾ ਵਿਚ ਪੁਦੀਨੇ ਦਾ ਰਸ ਅਤੇ ਗੁਲਾਬਜਲ ਦਾ ਲੇਪ ਕਰਨ ਨਾਲ ਕੁਝ ਹੀ ਦਿਨ ਵਿਚ ਚਿਹਰੇ ਦਾ ਰੰਗ ਸਾਫ਼ ਹੋਣ ਲਗਦਾ ਹੈ।
* ਜਾਇਫਲ ਨੂੰ ਦੁੱਧ ਵਿਚ ਪੀਸ ਕੇ 15 ਮਿੰਟ ਤੱਕ ਚਿਹਰੇ 'ਤੇ ਲਗਾਓ। ਇਸ ਨਾਲ ਚਿਹਰੇ ਦੇ ਦਾਗ-ਧੱਬੇ ਦੂਰ ਹੋ ਜਾਣਗੇ।
* ਰੋਜ਼ਾਨਾ ਪੁਦੀਨੇ ਦਾ ਰਸ ਅਤੇ ਆਲੂ ਦਾ ਰਸ ਮਿਲਾ ਕੇ ਲਗਾਉਣ ਨਾਲ ਵੀ ਛਾਈਆਂ ਦੂਰ ਹੋ ਜਾਂਦੀਆਂ ਹਨ।
* ਸੰਤਰੇ ਦੀਆਂ ਛਿੱਲਾਂ ਨੂੰ ਮਲਾਈ ਵਿਚ ਮਿਲਾ ਕੇ ਚਿਹਰੇ 'ਤੇ ਲਗਾਓ। ਇਸ ਨਾਲ ਰੁੱਖੀ ਚਮੜੀ ਵਾਲਾ ਚਿਹਰਾ ਚਮਕਦਾਰ ਹੋ ਜਾਂਦਾ ਹੈ।
* ਝੁਰੜੀਆਂ ਤੋਂ ਛੁਟਕਾਰਾ ਪਾਉਣ ਲਈ ਕੱਚੇ ਆਲੂ ਨੂੰ ਪੀਸ ਕੇ ਉਸ ਵਿਚ ਗਲਿਸਰੀਨ, ਸਿਰਕਾ ਅਤੇ ਗੁਲਾਬਜਲ ਮਿਲਾ ਕੇ ਪੇਸਟ ਬਣਾਓ। ਇਸ ਨੂੰ ਚਿਹਰੇ 'ਤੇ ਲਗਾਓ ਅਤੇ ਸੁੱਕ ਜਾਣ 'ਤੇ ਤਾਜ਼ੇ ਪਾਣੀ ਨਾਲ ਧੋ ਲਓ।
* ਸ਼ਹਿਦ ਵਿਚ ਨਿੰਬੂ ਦਾ ਰਸ ਮਿਲਾ ਕੇ ਲਗਾਉਣ ਨਾਲ ਵੀ ਝੁਰੜੀਆਂ ਤੋਂ ਛੁਟਕਾਰਾ ਪਾਇਆ ਜਾ ਸਕਦਾ ਹੈ।
* ਇਕ ਚਮਚ ਮਲਾਈ ਵਿਚ 3-4 ਰਸਭਰੀ ਮਸਲ ਕੇ ਮਿਲਾ ਲਓ। ਫਿਰ ਇਸ ਨੂੰ ਚਿਹਰੇ 'ਤੇ ਮਲੋ ਅਤੇ ਲਗਪਗ 15 ਤੋਂ 20 ਮਿੰਟ ਬਾਅਦ ਧੋ ਲਓ।

ਕਿਹੋ ਜਿਹਾ ਹੋਵੇ ਤੁਹਾਡਾ ਇਸ਼ਨਾਨਘਰ

ਇਸ਼ਨਾਨਘਰ
* ਇਸ਼ਨਾਨਘਰ ਖੁੱਲ੍ਹਾ ਅਤੇ ਹਵਾਦਾਰ ਹੋਣਾ ਚਾਹੀਦਾ, ਜਿਸ ਵਿਚ ਤਾਜ਼ੀ ਹਵਾ ਅਤੇ ਲੋੜੀਂਦੀ ਰੌਸ਼ਨੀ ਆਉਂਦੀ ਰਹੇ। * ਨਹਾਉਣ ਵਾਲੇ ਸਾਬਣ ਨੂੰ ਮੋਟੇ ਸੁਰਾਖਾਂ ਵਾਲੀ ਸਾਬਣਦਾਨੀ ਵਿਚ ਰੱਖੋ, ਤਾਂ ਕਿ ਸਾਬਣ ਦੇ ਪਾਣੀ ਵਿਚ ਮੱਛਰ ਨਾ ਪਨਪ ਸਕਣ। * ਗਿੱਲੇ ਤੌਲੀਏ ਨੂੰ ਧੁੱਪ ਲਗਾ ਕੇ ਵਾਪਸ ਇਸ਼ਨਾਨਘਰ ਵਿਚ ਟੰਗ ਦਿਓ। ਬਾਡੀ ਬੁਰਸ਼ ਨੂੰ ਚੰਗੀ ਤਰ੍ਹਾਂ ਧੋ ਕੇ, ਸੁਕਾ ਕੇ ਵਰਤੋਂ ਵਿਚ ਲਿਆਓ। ਜਿਥੋਂ ਤੱਕ ਸੰਭਵ ਹੋਵੇ, ਸਾਰੇ ਮੈਂਬਰਾਂ ਦੇ ਤੌਲੀਏ ਅਤੇ ਸਕ੍ਰਬਰ ਆਦਿ ਅਲੱਗ-ਅਲੱਗ ਹੋਣੇ ਚਾਹੀਦੇ ਹਨ। * ਸਾਬਣਦਾਨੀ ਨੂੰ ਵੀ ਸਾਫ਼ ਕਰਕੇ ਰੱਖੋ।
ਵਾਸ਼ਬੇਸਿਨ
* ਵਾਸ਼ਬੇਸਿਨ ਵਿਚ ਵਾਲ, ਸਾਬਣ ਦੇ ਟੁਕੜੇ ਅਤੇ ਹੋਰ ਕੋਈ ਕਚਰਾ ਨਾ ਪਾਓ, ਨਹੀਂ ਤਾਂ ਨਾਲੀ ਰੁਕ ਜਾਣ 'ਤੇ ਪ੍ਰੇਸ਼ਾਨੀ ਉਠਾਉਣੀ ਪੈ ਸਕਦੀ ਹੈ। * ਵਾਸ਼ਬੇਸਿਨ ਦੇ ਸ਼ੀਸ਼ੇ 'ਤੇ ਬਿੰਦੀ ਨਾ ਚਿਪਕਾਓ।
* ਵਾਸ਼ਬੇਸਿਨ ਦੇ ਕੋਲ ਤੌਲੀਆ-ਰਾਡ ਸਿੱਧੀ ਲਗਵਾਓ, ਜਿਸ ਨਾਲ ਤੌਲੀਆ ਇਕੱਠਾ ਨਾ ਹੋ ਸਕੇ ਅਤੇ ਸੁੱਕਦਾ ਰਹੇ।
* ਵਾਸ਼ਬੇਸਿਨ ਰੁਕਣ 'ਤੇ ਉਸ ਦੀ ਜਾਲੀ 'ਤੇ ਇਕ ਕੱਪ ਸੋਡਾ ਪਾ ਕੇ ਦੋ ਜਾਂ ਢਾਈ ਲਿਟਰ ਗਰਮ ਪਾਣੀ ਪਾਓ। ਪਾਈਪ ਖੁੱਲ੍ਹ ਜਾਵੇਗਾ।
* ਦੰਦ ਸਾਫ਼ ਕਰਨ ਤੋਂ ਬਾਅਦ ਵਾਸ਼ਬੇਸਿਨ ਨੂੰ ਵਿਮ ਪਾਊਡਰ ਨਾਲ ਹਰ ਰੋਜ਼ ਸਾਫ਼ ਕਰੋ।
ਪਖਾਨਾ
* ਚਾਹੇ ਪਖਾਨਾ ਇੰਡੀਅਨ ਹੋਵੇ ਜਾਂ ਵੈਸਟਰਨ, ਵਰਤੋਂ ਕਰਨ ਤੋਂ ਬਾਅਦ ਫਲੱਸ਼ ਜ਼ਰੂਰ ਚਲਾਓ।
* ਪਖਾਨੇ ਦੀ ਟੂਟੀ ਨੂੰ ਵਰਤਣ ਤੋਂ ਬਾਅਦ ਉਸ 'ਤੇ ਸਾਫ਼ ਪਾਣੀ ਪਾਓ।
* ਪਖਾਨੇ ਵਿਚ 'ਫ੍ਰੈਸ਼ਨਰ' ਆਦਿ ਲਗਾ ਕੇ ਰੱਖੋ, ਜਿਸ ਨਾਲ ਬਦਬੂ ਇਕੱਠੀ ਨਾ ਹੋਵੇ।
* ਸਾਰਿਆਂ ਦੇ ਪਖਾਨਾ ਜਾਣ ਤੋਂ ਬਾਅਦ ਕੁਝ ਸਮੇਂ ਲਈ 'ਐਗਜਾਸਟ ਫੈਨ' ਚਲਾਓ।
* ਹਰ ਰੋਜ਼ ਪਖਾਨੇ ਨੂੰ ਵਿਮ ਪਾਊਡਰ ਨਾਲ ਸਾਫ਼ ਕਰੋ। * ਹਫ਼ਤੇ ਵਿਚ ਦੋ ਵਾਰ 'ਐਂਟੀਸੈਪਟਿਕ ਲਿਕੁਇਡ ਕਲੀਨਰ' ਪਾ ਕੇ ਪਖਾਨੇ ਦੀ ਸੀਟ ਨੂੰ ਸਾਫ਼ ਕਰੋ। ਘੱਟ ਤੋਂ ਘੱਟ ਇਕ ਵਾਰ ਤਾਂ ਅਜਿਹਾ ਜ਼ਰੂਰ ਕਰੋ।


-ਨੀਤੂ ਗੁਪਤਾ

ਰਿਸ਼ਤੇ ਵੀ ਆਜ਼ਾਦੀ ਚਾਹੁੰਦੇ ਹਨ

ਆਜ਼ਾਦੀ ਬਹੁਤ ਵੱਡੀ ਮਿਹਨਤ ਹੈ, ਜਿਸ ਨੂੰ ਮਨੁੱਖ ਹੀ ਨਹੀਂ, ਹਰ ਪਸ਼ੂ-ਪੰਛੀ ਵੀ ਪਸੰਦ ਕਰਦਾ ਹੈ। ਅੱਜ ਦਾ ਮਨੁੱਖ ਏਨਾ ਸੁਆਰਥੀ ਹੋ ਗਿਆ ਹੈ ਕਿ ਉਹ ਆਪ ਤਾਂ ਆਜ਼ਾਦ ਰਹਿਣਾ ਚਾਹੁੰਦਾ ਹੈ ਪਰ ਦੂਜਿਆਂ ਨੂੰ ਆਜ਼ਾਦ ਦੇਖਣਾ ਨਹੀਂ ਚਾਹੁੰਦਾ। ਹਰ ਰਿਸ਼ਤਾ ਘੁਟਣ ਮਹਿਸੂਸ ਕਰ ਰਿਹਾ ਹੈ। ਇਨ੍ਹਾਂ ਵਿਚ ਮਿਠਾਸ ਅਤੇ ਨਿੱਘ ਦੀ ਕਮੀ ਆ ਰਹੀ ਹੈ, ਜਿਸ ਕਾਰਨ ਆਪਣੇ ਵੀ ਬੇਗਾਨੇ ਨਜ਼ਰ ਆ ਰਹੇ ਹਨ ਅਤੇ ਹਰ ਰਿਸ਼ਤੇ ਦੀ ਅਹਿਮੀਅਤ ਘਟ ਰਹੀ ਹੈ। ਜੇ ਤੁਸੀਂ ਚਾਹੁੰਦੇ ਹੋ ਕਿ ਰਿਸ਼ਤੇ ਹਮੇਸ਼ਾ ਬਣੇ ਰਹਿਣ ਤਾਂ ਉਨ੍ਹਾਂ ਨੂੰ ਖੁੱਲ੍ਹ ਕੇ ਜਿਉਣ ਦਿਓ। ਛੋਟੀ-ਛੋਟੀ ਗੱਲ 'ਤੇ ਟੋਕਾ-ਟਾਕੀ, ਇਕ-ਦੂਜੇ ਨੂੰ ਸ਼ੱਕ ਦੀ ਨਜ਼ਰ ਨਾਲ ਦੇਖਣਾ ਅਤੇ ਹਰ ਸਮੇਂ ਦੂਜੇ ਨੂੰ ਛੋਟਾ ਦਿਖਾਉਣ ਦੀ ਕੋਸ਼ਿਸ਼ ਵਿਚ ਲੱਗੇ ਰਹਿਣ ਕਰਕੇ ਰਿਸ਼ਤੇ ਕਮਜ਼ੋਰ ਹੋ ਜਾਂਦੇ ਹਨ। ਇਸ ਤਰ੍ਹਾਂ ਦੇ ਮਾਹੌਲ ਵਿਚ ਰਿਸ਼ਤਿਆਂ ਵਿਚ ਦੂਰੀ ਹੀ ਨਹੀਂ ਵਧਦੀ, ਬਲਕਿ ਜੜ੍ਹੋਂ ਵੀ ਹਿੱਲ ਜਾਂਦੇ ਹਨ। ਸੋਸ਼ਲ ਮੀਡੀਆ ਦੇ ਯੁੱਗ ਵਿਚ ਤਾਂ ਲੋਕ ਉਂਜ ਵੀ ਰਿਸ਼ਤਿਆਂ ਨੂੰ ਤੇਜ਼ੀ ਨਾਲ ਭੁੱਲ ਰਹੇ ਹਨ। ਜੇ ਅਸੀਂ ਵੀ ਇਕ-ਦੂਜੇ ਦੀਆਂ ਭਾਵਨਾਵਾਂ ਜਾਂ ਮਜਬੂਰੀਆਂ ਨੂੰ ਨਾ ਸਮਝਿਆ ਤਾਂ ਰਿਸ਼ਤੇ ਬੋਝ ਬਣ ਜਾਣਗੇ। ਸਾਨੂੰ ਬਿਨਾਂ ਕਿਸੇ ਸੁਆਰਥ ਦੇ ਇਨ੍ਹਾਂ ਨੂੰ ਆਪਣੇ ਢੰਗ ਨਾਲ ਜਿਉਣ ਦਾ ਮੌਕਾ ਦੇਣਾ ਚਾਹੀਦਾ ਹੈ।
ਗੱਲ ਜਦੋਂ ਆਜ਼ਾਦੀ ਦੀ ਹੋਵੇ ਤਾਂ ਰਿਸ਼ਤਿਆਂ ਵਿਚ ਵਿਅਕਤਿਤਵ ਛੂਟ ਜ਼ਰੂਰ ਹੋਣੀ ਚਾਹੀਦੀ ਹੈ। ਪਤੀ-ਪਤਨੀ ਵਲੋਂ ਆਪਸ ਵਿਚ ਇਕ-ਦੂਜੇ ਦਾ ਪੂਰਾ ਧਿਆਨ ਰੱਖਣਾ ਬਹੁਤ ਚੰਗੀ ਗੱਲ ਹੈ। ਜ਼ਰੂਰਤ ਤੋਂ ਜ਼ਿਆਦਾ ਖਿਆਲ ਰੱਖਣ ਦਾ ਮਤਲਬ ਹੈ ਰਿਸ਼ਤਿਆਂ ਵਿਚ ਸਹਿਜਤਾ ਦਾ ਖ਼ਤਮ ਹੋਣਾ। ਦੋਵੇਂ ਕੁਝ ਸਮਾਂ ਆਪਣੇ-ਆਪ ਨੂੰ ਜ਼ਰੂਰ ਦੇਣ। ਜਿਵੇਂ ਪਤੀ ਦਾ ਆਪਣੇ ਮਿੱਤਰਾਂ ਨਾਲ ਜਾਂ ਮਾਂ-ਬਾਪ ਆਦਿ ਨਾਲ ਕੁਝ ਸਮਾਂ ਬਿਤਾਉਣਾ। ਇਸ ਤਰ੍ਹਾਂ ਪਤਨੀ ਆਪਣੀਆਂ ਸਹੇਲੀਆਂ ਨਾਲ ਕਿੱਟੀ ਪਾਰਟੀ ਦਾ ਆਨੰਦ ਲੈ ਸਕਦੀ ਹੈ ਜਾਂ ਰੁਚੀ ਅਨੁਸਾਰ ਕੰਮ ਕਰ ਸਕਦੀ ਹੈ। ਇਸ ਤਰ੍ਹਾਂ ਰਿਸ਼ਤੇ ਮਜ਼ਬੂਤ ਵੀ ਹੋਣਗੇ ਅਤੇ ਜੀਵਨ ਦਾ ਆਨੰਦ ਵੀ ਆਵੇਗਾ।
ਭੈਣ-ਭਰਾ ਦੇ ਰਿਸ਼ਤੇ ਵਿਚ ਵੀ ਸਮੇਂ ਨਾਲ ਤਬਦੀਲੀ ਆਉਣੀ ਜ਼ਰੂਰੀ ਹੈ। ਪਹਿਲਾਂ ਉਹ ਇਕ ਵਾਤਾਵਰਨ ਵਿਚ ਵੱਡੇ ਹੁੰਦੇ ਹਨ, ਵਿਆਹ ਤੋਂ ਬਾਅਦ ਸਭ ਕੁਝ ਬਦਲ ਜਾਂਦਾ ਹੈ। ਭਰਾ ਨੂੰ ਵਿਆਹੀ ਭੈਣ ਦੀ ਜ਼ਿੰਦਗੀ ਵਿਚ ਦਖਲਅੰਦਾਜ਼ੀ ਨਹੀਂ ਕਰਨੀ ਚਾਹੀਦੀ ਅਤੇ ਨਾ ਹੀ ਭੈਣ ਨੂੰ ਆਪਣੇ ਭਰਾ-ਭਰਜਾਈ 'ਤੇ ਬੋਝ ਬਣਨਾ ਚਾਹੀਦਾ ਹੈ। ਹਰੇਕ ਦੀ ਆਪਣੀ ਜ਼ਿੰਦਗੀ ਹੈ ਤੇ ਉਸ ਨੂੰ ਉਸ ਦੇ ਢੰਗ ਨਾਲ ਜਿਉਣ ਦਾ ਹੱਕ ਦੇਵਾਂਗੇ ਤਾਂ ਰਿਸ਼ਤੇ ਦੂਰ ਤੱਕ ਸਾਥ ਦੇਣਗੇ। ਇਸ ਕਰਕੇ ਕਦੇ ਵੀ ਬਿਨਾਂ ਮੰਗੇ ਸਲਾਹ ਨਾ ਦਿਓ।
ਸੱਸ-ਨੂੰਹ ਦੀ ਗੱਲ ਕਰੀਏ ਤਾਂ ਇੰਜ ਲਗਦਾ ਹੈ ਜਿਵੇਂ ਆਜ਼ਾਦੀ ਖ਼ਤਮ ਹੀ ਹੋ ਜਾਂਦੀ ਹੈ। ਇਸ ਕਾਰਨ ਇਹ ਰਿਸ਼ਤਾ ਬਹੁਤ ਸੰਵੇਦਨਸ਼ੀਲ ਹੈ ਪਰ ਇਸ ਦੀ ਵੀ ਡੋਰ ਸਾਡੇ ਹੱਥ ਹੈ। ਜੇ ਥੋੜ੍ਹੀ ਸਮਝਦਾਰੀ ਤੋਂ ਕੰਮ ਲਈਏ ਤਾਂ ਰਿਸ਼ਤਿਆਂ ਨੂੰ ਖੰਭ ਲਗਦਿਆਂ ਦੇਰ ਨਹੀਂ ਲਗਦੀ। ਜੇ ਸੱਸ ਇਕ ਕਦਮ ਅੱਗੇ ਵਧੇ ਤਾਂ ਨੂੰਹ ਨੂੰ ਵੀ ਦੋ ਕਦਮ ਅੱਗੇ ਵਧਣਾ ਚਾਹੀਦਾ ਹੈ। ਸਮੇਂ ਦੇ ਨਾਲ-ਨਾਲ ਸਭ ਨੂੰ ਆਜ਼ਾਦੀ ਦੇਣਾ ਜ਼ਰੂਰੀ ਹੈ, ਤਾਂ ਹੀ ਹਰ ਕੋਈ ਖੁੱਲ੍ਹ ਕੇ ਜੀਅ ਸਕਦਾ ਹੈ। ਲੋੜ ਪੈਣ 'ਤੇ ਨੂੰਹ ਨੂੰ ਸਮਝਾਇਆ ਜਾ ਸਕਦਾ ਹੈ ਪਰ ਰੋਕ-ਟੋਕ ਕਰਨਾ ਠੀਕ ਨਹੀਂ। ਸੱਸ ਨੂੰ ਵੀ ਮਾਂ ਵਰਗਾ ਸਤਿਕਾਰ ਦਿੱਤਾ ਜਾ ਸਕਦਾ ਹੈ।
ਮਿੱਤਰ ਵੀ ਬਹੁਤ ਪਿਆਰੇ ਹੁੰਦੇ ਹਨ ਪਰ ਮਿੱਤਰਤਾ ਨੂੰ ਸੀਮਤ ਕਰਨਾ ਅਕਲਮੰਦੀ ਨਹੀਂ। ਕਦੇ ਵੀ ਬਿਨਾਂ ਸੋਚੇ-ਸਮਝੇ ਉਸ ਦੇ ਨਿੱਜੀ ਜੀਵਨ ਵਿਚ ਦਖਲਅੰਦਾਜ਼ੀ ਨਹੀਂ ਕਰਨੀ ਚਾਹੀਦੀ। ਉਹ ਤੁਹਾਡਾ ਮਿੱਤਰ ਜ਼ਰੂਰ ਹੈ ਪਰ ਉਸ ਦਾ ਵੀ ਘਰ-ਪਰਿਵਾਰ ਹੈ। ਉਸ ਦੀਆਂ ਚੀਜ਼ਾਂ ਨੂੰ ਬਿਨਾਂ ਪੁੱਛੇ ਕਦੇ ਵੀ ਇਸਤੇਮਾਲ ਨਹੀਂ ਕਰਨਾ ਚਾਹੀਦਾ। ਇਸ ਅਟੁੱਟ ਰਿਸ਼ਤੇ ਨੂੰ ਬਣਾਈ ਰੱਖਣ ਵਿਚ ਆਜ਼ਾਦੀ ਦਾ ਅਹਿਮ ਰੋਲ ਹੈ, ਇਸ ਲਈ ਇਸ ਨੂੰ ਕਦੇ ਵੀ ਨਜ਼ਰਅੰਦਾਜ਼ ਨਹੀਂ ਕਰਨਾ ਚਾਹੀਦਾ। ਜੇ ਮਿੱਤਰ ਮੁਸ਼ਕਿਲ ਵਿਚ ਹੋਵੇ ਤਾਂ ਕਦੇ ਵੀ ਉਸ ਦਾ ਇਮਤਿਹਾਨ ਨਹੀਂ ਲੈਣਾ ਚਾਹੀਦਾ।
ਅੱਜ ਬਹੁਤ ਸਾਰੇ ਰਿਸ਼ਤੇ ਟੁੱਟਣ ਦੀ ਕਗਾਰ ਦੇ ਨਾਲ-ਨਾਲ ਖ਼ਤਮ ਹੋ ਰਹੇ ਹਨ। ਭੱਜ-ਦੌੜ ਦੀ ਜ਼ਿੰਦਗੀ ਵਿਚ ਕਿਸੇ ਕੋਲ ਇਕ-ਦੂਜੇ ਵਾਸਤੇ ਸਮਾਂ ਨਹੀਂ ਹੈ। ਬੱਚਿਆਂ ਨੂੰ ਰਿਸ਼ਤਿਆਂ ਬਾਰੇ ਜਾਣਕਾਰੀ ਲਗਪਗ ਖਤਮ ਹੋ ਰਹੀ ਹੈ। ਲੋਕ ਜ਼ਿਆਦਾ ਤੋਂ ਜ਼ਿਆਦਾ ਸਮਾਂ ਸੋਸ਼ਲ ਸਾਈਟਸ ਨਾਲ ਬਿਤਾ ਰਹੇ ਹਨ। ਰਿਸ਼ਤੇਦਾਰ ਭਾਰ ਨਜ਼ਰ ਆ ਰਹੇ ਹਨ, ਇਸ ਲਈ ਜੇ ਅਸੀਂ ਚਾਹੁੰਦੇ ਹਾਂ ਕਿ ਕੁਝ ਰਿਸ਼ਤੇ ਬਣੇ ਰਹਿਣ ਤਾਂ ਉਨ੍ਹਾਂ ਦੀ ਆਜ਼ਾਦੀ ਵਿਚ ਰੁਕਾਵਟ ਨਾ ਬਣੀਏ। ਜੇ ਅਸੀਂ ਰਿਸ਼ਤਿਆਂ ਦਾ ਆਨੰਦ ਮਾਨਣਾ ਚਾਹੁੰਦੇ ਹਾਂ ਤਾਂ ਹਰ ਰਿਸ਼ਤੇ ਨੂੰ ਆਜ਼ਾਦੀ ਨਾਲ ਜਿਉਣ ਦਾ ਹੱਕ ਦਈਏ। ਆਜ਼ਾਦ ਰਿਸ਼ਤੇ ਹੀ ਜੀਵਨ ਵਿਚ ਗਰਮਾਹਟ ਅਤੇ ਨਿੱਘ ਲਿਆ ਸਕਦੇ ਹਨ। ਖੁੱਲ੍ਹ ਕੇ ਜੀਓ ਤੇ ਜਿਉਣ ਦਿਓ।


-ਮੋਬਾ: 98782-49944

ਬੱਚਿਆਂ ਦੀ ਸਾਂਭ-ਸੰਭਾਲ ਦੇ ਮਾਮਲੇ ਵਿਚ ਕਿੰਨਾ ਜਾਣਦੇ ਹੋ ਤੁਸੀਂ?

1. ਤੁਹਾਡੇ ਬੱਚੇ ਦਾ ਜਨਮ ਭਰ ਗਰਮੀਆਂ ਵਿਚ ਹੋਇਆ ਹੈ ਅਤੇ ਤੁਹਾਡੇ ਕਈ ਬਜ਼ੁਰਗ ਰਿਸ਼ਤੇਦਾਰਾਂ ਦੀ ਸਲਾਹ ਹੈ ਕਿ ਗਰਮੀ ਦੀ ਬਹੁਤਾਤ ਕਾਰਨ ਬੱਚੇ ਨੂੰ ਮਾਂ ਦੇ ਦੁੱਧ ਦੇ ਨਾਲ-ਨਾਲ ਥੋੜ੍ਹਾ ਪਾਣੀ ਵੀ ਪਿਲਾਉਂਦੇ ਰਹਿਣਾ ਚਾਹੀਦਾ ਹੈ। ਇਸ ਸਲਾਹ 'ਤੇ ਤੁਸੀਂ ਕੀ ਕਰੋਗੇ?
(ਕ) ਸਲਾਹ ਦੀ ਪਾਲਣਾ ਕਰੋਗੇ।
(ਖ) ਸਲਾਹ ਨੂੰ ਸਿਰੇ ਤੋਂ ਖਾਰਜ ਕਰ ਦਿਓਗੇ, ਕਿਉਂਕਿ ਤੁਹਾਨੂੰ ਪਤਾ ਹੈ ਕਿ ਬੱਚੇ ਨੂੰ ਮਾਂ ਦੇ ਦੁੱਧ ਤੋਂ ਇਲਾਵਾ ਕੁਝ ਨਹੀਂ ਚਾਹੀਦਾ।
(ਗ) ਕਈ ਦੂਜੇ ਲੋਕਾਂ ਦੀ ਸਲਾਹ ਲਓਗੇ ਤਾਂ ਕਿ ਸਹੀ ਫੈਸਲਾ ਕਰ ਸਕੋ।
2. ਆਪਣੇ ਨਵਜਨਮੇ ਬੱਚੇ ਨੂੰ ਤੁਸੀਂ ਬਹੁਤਾ ਸਮਾਂ ਗੋਦ ਵਿਚ ਚੁੱਕੀ ਰੱਖਦੇ ਹੋ, ਜਦੋਂ ਕਿ ਤੁਹਾਡੀ ਸੱਸ ਦਾ ਕਹਿਣਾ ਹੈ ਕਿ ਬੱਚੇ ਨੂੰ ਜ਼ਿਆਦਾ ਗੋਦ ਵਿਚ ਚੁੱਕਣਾ ਉਸ ਦੀ ਸਿਹਤ ਲਈ ਨੁਕਸਾਨਦਾਇਕ ਹੈ। ਇਸ 'ਤੇ ਤੁਸੀਂ-
(ਕ) ਬੱਚੇ ਨੂੰ ਬਹੁਤਾ ਸਮਾਂ ਬਿਸਤਰ 'ਤੇ ਪਿਆ ਰਹਿਣ ਦਿਓਗੇ।
(ਖ) ਤੁਹਾਨੂੰ ਪਤਾ ਹੈ ਕਿ ਸੱਸ ਮਾਂ ਜੋ ਕੁਝ ਕਹਿ ਰਹੀ ਹੈ, ਉਹ ਵਿਗਿਆਨਕ ਆਧਾਰ 'ਤੇ ਸਹੀ ਨਹੀਂ ਹੈ। ਸਗੋਂ ਜ਼ਿਆਦਾ ਸਮਾਂ ਗੋਦ ਵਿਚ ਰੱਖਣ 'ਤੇ ਬੱਚੇ ਦੇ ਨਾਲ ਖਿੱਚ ਚੰਗੀ ਬਣਦੀ ਹੈ। ਇਸ ਲਈ ਉਸ ਦੀ ਸਲਾਹ ਨੂੰ ਖਾਰਜ ਕਰ ਦਿਓਗੇ।
(ਗ) ਆਪਣੀ ਮਾਂ ਤੋਂ ਪੁੱਛੋਗੇ ਅਤੇ ਜਿਵੇਂ ਉਹ ਕਹੇਗੀ, ਉਵੇਂ ਹੀ ਕਰੋਗੇ।
3. ਪ੍ਰਸਵ ਤੋਂ ਤੁਰੰਤ ਬਾਅਦ ਸਤਨਾਂ ਵਿਚ ਉਤਰਨ ਵਾਲੇ ਦੁੱਧ ਨੂੰ ਬੱਚੇ ਨੂੰ ਨਹੀਂ ਪਿਲਾਉਣਾ ਚਾਹੀਦਾ। ਤੁਹਾਡੇ ਕਈ ਰਿਸ਼ਤੇਦਾਰਾਂ ਨੇ ਤੁਹਾਨੂੰ ਇਹ ਸਲਾਹ ਦਿੱਤੀ ਹੈ। ਕੀ ਤੁਸੀਂ ਇਸ ਸਲਾਹ ਨੂੰ ਮੰਨੋਗੇ?
(ਕ) ਬਿਲਕੁਲ ਨਹੀਂ, ਕਿਉਂਕਿ ਇਹ ਸਹੀ ਨਹੀਂ ਹੈ।
(ਖ) ਬਿਨਾਂ ਸ਼ੱਕ, ਕਿਉਂਕਿ ਇਹ ਤਜਰਬੇਕਾਰ ਔਰਤਾਂ ਦੀ ਸਲਾਹ ਹੈ।
(ਗ) ਅਜੇ ਕੁਝ ਸਮਝ ਵਿਚ ਨਹੀਂ ਆ ਰਿਹਾ ਕਿ ਕੀ ਕਰਾਂਗੀ। ਮੌਕੇ 'ਤੇ ਹੀ ਫੈਸਲਾ ਕਰਾਂਗੀ, ਜੋ ਠੀਕ ਲੱਗੇਗਾ।
4. ਬੱਚੇ ਦੀ ਜੀਭ 'ਤੇ ਖੰਡ ਰੱਖਣ ਨਾਲ ਹਿਚਕੀ ਖ਼ਤਮ ਹੋ ਜਾਂਦੀ ਹੈ। ਤੁਹਾਡੇ ਮੁਤਾਬਿਕ ਕੀ ਇਹ ਸਹੀ ਹੈ?
(ਕ) ਬਿਲਕੁਲ ਨਹੀਂ।
(ਖ) ਕਦੇ ਅਜ਼ਮਾ ਕੇ ਨਹੀਂ ਦੇਖਿਆ।
(ਗ) ਕਈ ਲੋਕਾਂ ਤੋਂ ਪੁੱਛ ਕੇ ਕੋਈ ਅੰਤਿਮ ਰਾਏ ਬਣਾਵਾਂਗੀ।
5. ਜੇ ਬੱਚਾ ਛਿੱਕਦਾ ਹੈ ਤਾਂ ਇਸ ਦਾ ਮਤਲਬ ਹੈ ਉਸ ਨੂੰ ਸਰਦੀ ਲੱਗ ਗਈ ਹੈ। ਕੀ ਇਹ ਗੱਲ ਹਮੇਸ਼ਾ ਸਹੀ ਹੁੰਦੀ ਹੈ?
(ਕ) ਬਿਲਕੁਲ ਨਹੀਂ। ਸਗੋਂ ਇਹ ਛਿੱਕ ਇਸ ਗੱਲ ਦੀ ਪੁਸ਼ਟੀ ਕਰਦੀ ਹੈ ਕਿ ਬੱਚੇ ਦੀ ਸਿਹਤ ਚੰਗੀ ਹੈ।
(ਖ) ਹਾਂ, ਬਜ਼ੁਰਗਾਂ ਨੇ ਤਾਂ ਇਹੀ ਦੱਸਿਆ ਹੈ, ਫਿਰ ਇਹ ਸਹੀ ਹੀ ਹੋਵੇਗਾ।
(ਗ) ਪਤਾ ਨਹੀਂ।
ਨਤੀਜਾ : ਜੇ ਤੁਸੀਂ ਸਾਰੇ ਸਵਾਲਾਂ ਦੇ ਜਵਾਬ ਇਮਾਨਦਾਰੀ ਨਾਲ ਦਿੱਤੇ ਹਨ ਤਾਂ ਹੁਣ ਇਨ੍ਹਾਂ ਜਵਾਬਾਂ ਨਾਲ ਹਾਸਲ ਅੰਕਾਂ ਦੇ ਆਧਾਰ 'ਤੇ ਆਓ ਦੇਖਦੇ ਹਾਂ ਕਿ ਤੁਸੀਂ ਬੱਚੇ ਦੀ ਸਾਂਭ-ਸੰਭਾਲ ਦੇ ਸਬੰਧ ਵਿਚ ਕਿੰਨੇ ਜਾਗਰੂਕ ਹੋ।
ਕ-ਜੇ ਤੁਹਾਨੂੰ 10 ਜਾਂ ਇਸ ਤੋਂ ਘੱਟ ਅੰਕ ਮਿਲੇ ਹਨ ਤਾਂ ਤੁਹਾਡਾ ਬੱਚੇ ਦੀ ਸੰਭਾਲ ਸਬੰਧੀ ਗਿਆਨ ਲੋਕਾਂ ਦੀਆਂ ਸਲਾਹਾਂ 'ਤੇ ਆਧਾਰਿਤ ਹੈ। ਇਸ ਨੂੰ ਪੂਰੀ ਤਰ੍ਹਾਂ ਸਹੀ ਨਹੀਂ ਕਿਹਾ ਜਾ ਸਕਦਾ।
ਖ-ਜੇ ਤੁਹਾਡੇ ਕੁੱਲ ਹਾਸਲ ਅੰਕ 11 ਜਾਂ 15 ਹਨ ਤਾਂ ਤੁਹਾਨੂੰ ਬੱਚੇ ਦੀ ਸਾਂਭ-ਸੰਭਾਲ ਦੇ ਸਬੰਧ ਵਿਚ ਸਾਰੀਆਂ ਮੁਢਲੀਆਂ ਗੱਲਾਂ ਪਤਾ ਹਨ। ਪਰ ਤੁਸੀਂ ਕਈ ਵਾਰ ਦੂਜਿਆਂ ਦੀ ਦੇਖਾ-ਦੇਖੀ ਜਾਂ ਉਨ੍ਹਾਂ ਦੀਆਂ ਸਲਾਹਾਂ 'ਤੇ ਚੱਲ ਕੇ ਗੜਬੜ ਕਰ ਦਿੰਦੇ ਹੋ।
ਗ-ਜੇ ਤੁਸੀਂ 16 ਜਾਂ ਇਸ ਤੋਂ ਜ਼ਿਆਦਾ ਅੰਕ ਹਾਸਲ ਕੀਤੇ ਹਨ ਤਾਂ ਤੁਸੀਂ ਨਾ ਸਿਰਫ ਬੱਚੇ ਦੀ ਸੰਭਾਲ ਬਾਰੇ ਕਾਫੀ ਕੁਝ ਜਾਣਦੇ ਹੋ ਸਗੋਂ ਆਪਣੀ ਜਾਣਕਾਰੀ ਨੂੰ ਵਿਗਿਆਨਕ ਕਸੌਟੀ 'ਤੇ ਵੀ ਪਰਖਦੇ ਹੋ। ਨਤੀਜਾ ਇਹ ਹੈ ਕਿ ਤੁਹਾਨੂੰ ਬੱਚੇ ਦੀ ਸੰਭਾਲ ਬਾਰੇ ਚੰਗੀ ਤਰ੍ਹਾਂ ਪਤਾ ਹੈ।


-ਇਮੇਜ ਰਿਫਲੈਕਸ਼ਨ ਸੈਂਟਰ

ਬਦਲਦੇ ਮੌਸਮ ਵਿਚ ਹੱਥਾਂ-ਪੈਰਾਂ ਦੀ ਸਾਂਭ-ਸੰਭਾਲ

ਮੌਸਮ ਵਿਚ ਤਬਦੀਲੀ ਤੁਹਾਡੀ ਚਮੜੀ ਨੂੰ ਲੈ ਕੇ ਤਣਾਅਪੂਰਨ ਹੋ ਸਕਦੀ ਹੈ, ਵਿਸ਼ੇਸ਼ ਤੌਰ 'ਤੇ ਜਦੋਂ ਗਰਮੀ ਅਤੇ ਹੁੰਮਸ ਭਰੇ ਮਹੀਨੇ ਠੰਢੇ ਮੌਸਮ ਵਿਚ ਤਬਦੀਲ ਹੋਣ ਲਗਦੇ ਹਨ। ਇਕ ਵਾਰ ਜਦੋਂ ਤਾਪਮਾਨ ਬਦਲਣਾ ਸ਼ੁਰੂ ਹੋ ਜਾਵੇ ਤਾਂ ਤੁਹਾਨੂੰ ਆਪਣੀ ਚਮੜੀ ਦੀ ਦੇਖਭਾਲ ਸਬੰਧੀ ਰੁਟੀਨ ਨੂੰ ਵੀ ਬਦਲਣਾ ਸ਼ੁਰੂ ਕਰ ਦੇਣਾ ਚਾਹੀਦਾ ਹੈ। ਆਮ ਤੌਰ 'ਤੇ ਇਸ ਤਬਦੀਲੀ ਕਾਰਨ ਤੁਹਾਡੀ ਚਮੜੀ ਭੱਦੀ ਲੱਗਣ ਲੱਗੇਗੀ। ਇਹ ਕੁਝ ਸਮੇਂ ਲਈ ਚਮੜੀ ਲਈ ਮੁਸ਼ਕਿਲ ਪੈਦਾ ਕਰ ਸਕਦੀ ਹੈ। ਠੰਢੇ ਮੌਸਮ ਵਿਚ ਆਪਣੀ ਚਮੜੀ ਦੀ ਦੇਖਭਾਲ ਸਬੰਧੀ ਸਮੇਂ ਸਿਰ ਹੇਠ ਲਿਖੇ ਅਨੁਸਾਰ ਧਿਆਨ ਦਿੱਤਾ ਜਾ ਸਕਦਾ ਹੈ-
1. ਰਾਤ ਸਮੇਂ ਚਿਹਰੇ ਲਈ ਹਾਈਡ੍ਰੇਟਿੰਗ ਮਾਇਸਚਰਾਈਜਰ ਦੀ ਵਰਤੋਂ ਕਰੋ : ਚਮੜੀ ਦੀ ਖ਼ਤਮ ਹੋ ਚੁੱਕੀ ਨਮੀ ਨੂੰ ਮੁੜ ਠੀਕ ਕਰਨ ਲਈ, ਸੌਣ ਤੋਂ ਪਹਿਲਾਂ ਹਾਈਡ੍ਰੇਟਿੰਗ ਮਾਇਸਚਰਾਈਜਰ ਦੀ ਚਿਹਰੇ 'ਤੇ ਵਰਤੋਂ ਕਰੋ। ਇਸ ਤਰ੍ਹਾਂ ਰਾਤ ਵੇਲੇ ਤੁਹਾਡੀ ਚਮੜੀ ਦੀ ਮੁਰੰਮਤ ਆਪਣੇ-ਆਪ ਹੋ ਜਾਵੇਗੀ ਅਤੇ ਉਮਰ ਤੋਂ ਪਹਿਲਾਂ ਝੁਰੜੀਆਂ ਪੈਣ ਤੋਂ ਵੀ ਬਚਾਅ ਰਹੇਗਾ। ਮਾਇਸਚਰਾਈਜ਼ਰ ਨੂੰ ਵਿਟਾਮਿਨ 'ਈ' ਅਤੇ ਅਲਫ਼ਾ ਹਾਈਡ੍ਰੋਕਸੀ ਐਸਿਡ ਨਾਲ ਵਰਤੋ, ਜੋ ਚਮੜੀ ਵਿਚ ਖੁਸ਼ਕੀ ਨੂੰ ਦੂਰ ਕਰੇਗੀ।
2. ਨਰਮ ਮਾਇਸਚਰਾਈਜਿੰਗ ਬਾਡੀ ਸੋਪ ਦੀ ਵਰਤੋਂ ਸ਼ੁਰੂ ਕਰੋ : ਐਂਟੀਬੈਕਟੀਰੀਅਲ ਬਾਡੀ ਸੋਪ ਹੋ ਸਕਦਾ ਚਮੜੀ ਦੀ ਕੁਦਰਤੀ ਨਮੀ ਲਈ ਠੀਕ ਨਾ ਬੈਠਣ। ਸਰਦੀਆਂ ਵਿਚ ਜੇਕਰ ਤੁਸੀਂ ਐਂਟੀਬੈਕਟੀਰੀਅਲ ਬਾਡੀ ਸੋਪ ਦੀ ਵਰਤੋਂ ਕਰਦੇ ਹੋ ਤਾਂ ਤੁਹਾਡੀ ਚਮੜੀ ਕਾਫੀ ਖੁਸ਼ਕ ਹੋ ਸਕਦੀ ਹੈ। ਇਸ ਲਈ ਨਰਮ, ਖੁਸ਼ਬੂ ਰਹਿਤ ਮਾਇਸਚਰਾਈਜਿੰਗ ਸਾਬਣ ਦੀ ਚੋਣ ਹੀ ਕਰੋ।
3. ਜ਼ਿਆਦਾ ਦੇਰ ਗਰਮ ਇਸ਼ਨਾਨ ਤੋਂ ਬਚੋ : ਹਮੇਸ਼ਾ ਇਸ਼ਨਾਨ ਕਰਨ ਤੋਂ ਬਾਅਦ ਆਪਣੇ ਸਰੀਰ 'ਤੇ ਲੋਸ਼ਨ ਲਗਾਉਣਾ ਨਾ ਭੁੱਲੋ, ਖਾਸ ਤੌਰ 'ਤੇ ਖੁਸ਼ਕ ਭਾਗਾਂ ਉੱਪਰ। ਇਸ ਤਰ੍ਹਾਂ ਕਰਕੇ ਪੂਰਾ ਦਿਨ ਤੁਹਾਡੀ ਚਮੜੀ ਦੀ ਨਮੀ ਠੀਕ ਰਹੇਗੀ।
4. ਨਰਮ ਸੂਤੀ ਕੱਪੜੇ ਪਹਿਨੋ : ਚਮੜੀ ਨਾਲ ਸਿੱਧੇ ਸੰਪਰਕ ਵਿਚ ਆਉਣ ਵਾਲੇ ਪੋਲੀਐਸਟਰ ਕੱਪੜੇ ਪਹਿਨਣ ਤੋਂ ਬਚੋ, ਖਾਸ ਤੌਰ 'ਤੇ ਆਪਣੇ ਗਲੇ ਦੁਆਲੇ। ਬਦਲਦਾ ਹੋਇਆ ਮੌਸਮ ਤੁਹਾਡੀ ਚਮੜੀ ਨੂੰ ਖੁਸ਼ਕ ਤੇ ਖਰਾਬ ਕਰ ਸਕਦਾ ਹੈ। ਇਸ ਤਰ੍ਹਾਂ ਦੇ ਕੱਪੜੇ ਰਗੜ ਪੈਦਾ ਕਰਕੇ ਚਮੜੀ ਦੀਆਂ ਮੁਸ਼ਕਿਲਾਂ ਵਿਚ ਵਾਧਾ ਕਰਦੇ ਹਨ। ਇਸ ਲਈ ਕਮੀਜ਼ਾਂ, ਬਲਾਊਜ਼ ਤੇ ਸਵੈਟਰ ਨਰਮ ਸੂਤੀ ਹੀ ਪਹਿਨੋ।
5. ਹੱਥਾਂ-ਪੈਰਾਂ ਨੂੰ ਮਾਇਸਚਰਾਈਜ਼ ਕਰਨਾ ਨਾ ਭੁੱਲੋ : ਹੱਥਾਂ ਅਤੇ ਪੈਰਾਂ ਦੀ ਚਮੜੀ 'ਤੇ ਮੌਸਮ ਦਾ ਤੁਰੰਤ ਅਸਰ ਹੁੰਦਾ ਹੈ। ਇਸ ਲਈ ਮਾਇਸਚਰਾਈਜਿੰਗ ਲੋਸ਼ਨ ਲਗਾਉਣਾ ਨਾ ਭੁੱਲੋ। ਹੱਥਾਂ ਅਤੇ ਪੈਰਾਂ ਦੀ ਖੁਸ਼ਕ ਚਮੜੀ 'ਤੇ ਖਰਾਸ਼ ਹੋ ਸਕਦੀ ਹੈ ਅਤੇ ਇਹ ਫਟ ਸਕਦੇ ਹਨ ਜਾਂ ਦਰਦ ਵੀ ਕਰ ਸਕਦੇ ਹਨ। ਇਸ ਲਈ ਨਹਾਉਣ ਪਿੱਛੋਂ ਮਾਇਸਚਰਾਈਜ਼ਰ ਕਰੀਮ ਜ਼ਰੂਰ ਲਗਾਓ। ਚਮੜੀ ਪੋਸ਼ਕ ਤੱਤਾਂ ਨੂੰ ਆਪਣੇ ਵਿਚ ਛੇਤੀ ਜਜ਼ਬ ਕਰ ਲੈਂਦੀ ਹੈ ਜਦੋਂ ਕਿ ਇਹ ਆਪ ਨਮੀ ਵਾਲੀ ਅਤੇ ਨਰਮ ਰਹਿੰਦੀ ਹੈ।

ਕੱਦੂ ਦਾ ਸੂਪ

ਪ੍ਰੈਸ਼ਰ ਕੁੱਕਰ ਵਿਚ ਪਕਾਉਣ ਲਈ :
* 2.75 ਕੱਪ ਕੱਦੂ ਜਾਂ 250 ਗ੍ਰਾਮ ਕੱਦੂ
* 1/3 ਕੱਪ ਕੱਟਿਆ ਪਿਆਜ਼ ਜਾਂ ਇਕ ਵਿਚਕਾਰਲੇ ਆਕਾਰ ਦਾ ਪਿਆਜ਼ (ਕੱਟਿਆ ਹੋਇਆ) * 1 ਤੋਂ 2 ਤੁਰੀਆਂ ਲਸਣ ਦੀਆਂ (ਕੱਟੀਆਂ ਹੋਈਆਂ)
* 3/4 ਤੋਂ 1 ਕੱਪ ਪਾਣੀ
ਕੱਦੂ ਦੇ ਸੂਪ ਲਈ ਹੋਰ ਸਮੱਗਰੀ :
* 2 ਤੋਂ 3 ਚਮਚੇ ਜੈਤੂਨ ਦਾ ਤੇਲ * 1/4 ਚਮਚੇ ਖੁਸ਼ਕ ਜਵਾਇਣ ਦੀਆਂ ਪੱਤੀਆਂ * 1/2 ਚਮਚੇ ਖੁਸ਼ਕ ਜਵਾਇਣ * 1/2 ਚਮਚੇ ਚੀਨੀ * ਕਾਲੀ ਮਿਰਚ ਪਾਊਡਰ ਲੋੜ ਅਨੁਸਾਰ
* ਨਮਕ ਸਵਾਦ ਅਨੁਸਾਰ
ਤਿਆਰ ਕਰਨ ਦੀ ਵਿਧੀ :
* 250 ਗ੍ਰਾਮ ਕੱਦੂ ਛਿੱਲ ਕੇ ਧੋ ਲਓ ਅਤੇ ਛੋਟੇ ਟੁਕੜੇ ਕਰ ਲਓ। ਇਕ ਮੀਡੀਅਮ ਆਕਾਰ ਦਾ ਪਿਆਜ਼ ਅਤੇ 1 ਤੋਂ 2 ਤੁਰੀਆਂ ਲਸਣ ਵੀ ਕੱਟ ਲਓ। * 2 ਲਿਟਰ ਪ੍ਰੈਸ਼ਰ ਕੁੱਕਰ ਵਿਚ ਕੱਦੂ ਦੇ ਟੁਕੜੇ ਅਤੇ ਲਸਣ, ਪਿਆਜ਼ ਪਾਓ। * ਹੁਣ 3/4 ਤੋਂ 1 ਕੱਪ ਪਾਣੀ ਪਾਓ, ਗਾੜ੍ਹਾ ਸੂਪ ਬਣ ਜਾਵੇਗਾ।
* ਕੁੱਕਰ ਦਾ ਢੱਕਣ ਬੰਦ ਕਰ ਦਿਓ ਅਤੇ 8 ਤੋਂ 9 ਮਿੰਟ ਤੱਕ ਪਕਾਓ। ਇਸ ਨੂੰ ਪੈਨ ਵਿਚ ਵੀ ਪਕਾ ਸਕਦੇ ਹੋ।
* ਹੁਣ ਢੱਕਣ ਖੋਲ੍ਹ ਕੇ ਕੱਦੂ ਨੂੰ ਥੋੜ੍ਹਾ ਠੰਢਾ ਹੋਣ ਦਿਓ।
* ਹੁਣ ਇਸ ਮਿਕਸਚਰ ਨੂੰ ਮਿਕਸੀ ਜਾਂ ਬਲੈਂਡਰ ਨਾਲ ਪੀਸ ਸਕਦੇ ਹੋ। ਇਸ ਨੂੰ ਇਕੋ ਜਿਹਾ ਹੋਣ ਤੱਕ ਮਿਕਸ ਕਰੋ।
ਕੱਦੂ ਦਾ ਸੂਪ ਬਣਾਉਣਾ :
* ਹੁਣ ਫਿਰ ਕੁੱਕਰ ਨੂੰ ਹਲਕੀ ਅੱਗ 'ਤੇ ਰੱਖੋ। ਇਸ ਵਿਚ 2-3 ਚਮਚੇ ਜੈਤੂਨ ਦਾ ਤੇਲ ਪਾਓ। ਤੁਸੀਂ ਤੇਲ ਨਹੀਂ ਵੀ ਪਾ ਸਕਦੇ ਹੋ। ਤੁਸੀਂ ਮੱਖਣ ਵੀ ਪਾ ਸਕਦੇ ਹੋ ਤੇ ਜੈਤੂਨ ਦੇ ਤੇਲ ਦੀ ਥਾਂ 'ਤੇ ਸੂਰਜਮੁਖੀ ਤੇਲ ਵੀ ਵਰਤ ਸਕਦੇ ਹੋ।
* ਚੰਗੀ ਤਰ੍ਹਾਂ ਮਿਲਾਓ।
* ਹੁਣ 1/4 ਚਮਚਾ ਜਵਾਇਣ ਦੀਆਂ ਪੱਤੀਆਂ ਅਤੇ ਅੱਧਾ ਚਮਚਾ ਜਵਾਇਣ ਅਤੇ ਕੁੱਟੀ ਹੋਈ ਮਿਰਚ ਲੋੜ ਅਨੁਸਾਰ ਪਾ ਸਕਦੇ ਹੋ। ਇਸ ਵਿਚ ਆਪਣੀ ਪਸੰਦ ਦਾ ਮਸਾਲਾ ਵੀ ਮਿਲਾਇਆ ਜਾ ਸਕਦਾ ਹੈ।
* 1/2 ਚਮਚ ਚੀਨੀ ਅਤੇ ਨਮਕ ਸਵਾਦ ਅਨੁਸਾਰ ਪਾਓ।
* ਚੰਗੀ ਤਰ੍ਹਾਂ ਮਿਲਾਓ। ਜੇਕਰ ਕੱਦੂ ਮਿੱਠਾ ਹੈ ਤਾਂ ਚੀਨੀ ਮਿਲਾਉਣ ਦੀ ਲੋੜ ਨਹੀਂ ਹੈ।
* ਹੁਣ ਸੂਪ ਨੂੰ ਠੀਕ ਤਰ੍ਹਾਂ ਬਣਨ ਦਿਓ ਅਤੇ ਅੱਗ ਤੋਂ ਉਤਾਰ ਲਓ।
* ਗਰਮ ਕੱਦੂ ਦਾ ਸੂਪ ਪਰੋਸੋ। ਇਸ ਨੂੰ ਕੱਦੂਕਸ਼ ਕੀਤਾ ਪਨੀਰ, ਡਬਲਰੋਟੀ ਦੇ ਟੁਕੜੇ ਜਾਂ ਕਰੀਮ ਨਾਲ ਸਜਾ ਸਕਦੇ ਹੋ।

ਮੇਕਅਪ ਲਗਾਓ, ਉਸ ਨੂੰ ਹਟਾਓ ਵੀ ਜ਼ਰੂਰ

ਮੇਕਅਪ ਕਰਨਾ ਔਰਤਾਂ ਦਾ ਪਿਆਰਾ ਸ਼ੌਕ ਹੈ। ਕਿਤੇ ਪਾਰਟੀ ਵਿਚ ਜਾਣਾ ਹੋਵੇ ਤਾਂ ਖੂਬ ਸਜ-ਸੰਵਰ ਕੇ ਜਾਣਾ ਉਨ੍ਹਾਂ ਨੂੰ ਚੰਗਾ ਲਗਦਾ ਹੈ ਪਰ ਪਾਰਟੀ ਤੋਂ ਬਾਅਦ ਬਹੁਤੀਆਂ ਔਰਤਾਂ ਮੇਕਅਪ ਸਾਫ਼ ਕੀਤੇ ਬਗੈਰ ਹੀ ਸੌਂ ਜਾਂਦੀਆਂ ਹਨ।
ਅਜਿਹਾ ਕਰਨਾ ਗ਼ਲਤ ਆਦਤ ਹੈ। ਬਾਹਰ ਤਾਂ ਚਮਕ ਕੇ ਜਾਓ ਪਰ ਘਰ ਆ ਕੇ ਆਪਣੀ ਚਮੜੀ ਨਾਲੋਂ ਉਸ ਨੂੰ ਸਾਫ਼ ਜ਼ਰੂਰ ਕਰੋ, ਨਹੀਂ ਤਾਂ ਚਮੜੀ ਨੂੰ ਨੁਕਸਾਨ ਹੋਵੇਗਾ। ਚੰਗੀ ਤਰ੍ਹਾਂ ਮੇਕਅਪ ਹਟਾਉਣ ਨਾਲ ਚਮੜੀ ਤੰਦਰੁਸਤ ਰਹਿੰਦੀ ਹੈ, ਰਾਤ ਨੂੰ ਸਾਹ ਲੈ ਸਕਦੀ ਹੈ। ਜੇ ਚੰਗੀ ਤਰ੍ਹਾਂ ਮੇਕਅਪ ਨਾ ਉਤਾਰਿਆ ਜਾਵੇ ਤਾਂ ਚਮੜੀ ਸਾਹ ਨਹੀਂ ਲੈ ਸਕਦੀ। ਆਓ ਜਾਣੀਏ ਮੇਕਅਪ ਨੂੰ ਠੀਕ ਤਰੀਕੇ ਨਾਲ ਕਿਵੇਂ ਹਟਾਇਆ ਜਾਵੇ।
* ਦੁੱਧ ਵਿਚ ਨਿੰਬੂ ਦੇ ਰਸ ਨੂੰ ਮਿਲਾ ਕੇ ਚਿਹਰੇ 'ਤੇ ਰੂੰ ਦੇ ਫਹੇ ਨਾਲ ਚੰਗੀ ਤਰ੍ਹਾਂ ਮਲੋ ਤਾਂ ਕਿ ਰੋਮਾਂ ਤੱਕ ਪਹੁੰਚਿਆ ਮੇਕਅਪ ਸਾਫ਼ ਹੋ ਸਕੇ। ਇਸ ਨਾਲ ਚਮੜੀ ਚੰਗੀ ਤਰ੍ਹਾਂ ਮੇਕਅਪ ਤੋਂ ਮੁਕਤ ਹੋ ਜਾਂਦੀ ਹੈ ਪਰ ਧਿਆਨ ਦਿਓ, ਤੇਲੀ ਚਮੜੀ ਵਾਲੇ ਇਸ ਦੀ ਵਰਤੋਂ ਨਾ ਕਰਨ।
* ਕਿਸੇ ਵੀ ਤਰ੍ਹਾਂ ਦੇ ਫਾਊਂਡੇਸ਼ਨ ਜਾਂ ਕ੍ਰੀਮ ਨੂੰ ਆਸਾਨੀ ਨਾਲ ਸਾਫ਼ ਕਰਨ ਲਈ ਟਮਾਟਰ ਪਿਊਰੀ ਦੀ ਵਰਤੋਂ ਕਰੋ। ਟਮਾਟਰ ਪਿਊਰੀ ਤੁਹਾਡੇ ਮੇਕਅਪ ਨੂੰ ਉਤਾਰਨ ਵਿਚ ਮਦਦ ਕਰਦੀ ਹੈ।
* ਜੇ ਸਮਾਂ ਅਤੇ ਹਿੰਮਤ ਹੋਵੇ ਤਾਂ ਚਮੜੀ ਨੂੰ ਭਾਫ਼ ਦੇ ਕੇ ਵੀ ਮੇਕਅਪ ਉਤਾਰਿਆ ਜਾ ਸਕਦਾ ਹੈ ਜੋ ਚੰਗਾ ਤਰੀਕਾ ਹੈ। ਭਾਫ਼ ਨਾਲ ਚਮੜੀ ਨੂੰ ਗਰਮੀ ਮਿਲਦੀ ਹੈ, ਜਿਸ ਨਾਲ ਰੋਮ ਖੁੱਲ੍ਹ ਜਾਂਦੇ ਹਨ।
* ਮੇਕਅਪ ਉਤਾਰਨ ਦਾ ਸੌਖਾ ਤਰੀਕਾ ਹੈ ਜੋਜੋਬਾ ਤੇਲ ਦੀਆਂ ਕੁਝ ਬੂੰਦਾਂ ਨੂੰ ਰੂੰ ਦੇ ਫਹੇ 'ਤੇ ਪਾ ਕੇ ਮੇਕਅਪ ਵਾਲੀ ਚਮੜੀ 'ਤੇ ਚੰਗੀ ਤਰ੍ਹਾਂ ਲਗਾਓ। ਫਿਰ ਹਲਕਾ ਮਲ ਕੇ ਸਾਫ਼ ਕਰੋ ਤਾਂ ਕਿ ਰੋਮਾਂ ਵਿਚ ਸਮਾਇਆ ਮੇਕਅਪ ਆਸਾਨੀ ਨਾਲ ਨਿਕਲ ਜਾਵੇ।
* ਮੇਕਅਪ ਵਾਲੇ ਚਿਹਰੇ 'ਤੇ ਬੇਬੀ ਲੋਸ਼ਨ ਲਗਾਓ। ਥੋੜ੍ਹੀ ਦੇਰ ਬਾਅਦ ਰੂੰ ਦੇ ਫਹੇ ਨਾਲ ਸਾਫ਼ ਕਰ ਲਓ। ਚਮੜੀ ਨਰਮ ਬਣੀ ਰਹੇਗੀ।


-ਸੁਨੀਤਾ ਗਾਬਾ

ਜਵਾਨ ਹੋ ਰਹੇ ਬੱਚਿਆਂ ਪ੍ਰਤੀ ਤੁਹਾਡੇ ਫਰਜ਼

ਮਾਪਿਆਂ ਨੂੰ ਆਪਣੇ ਬੱਚੇ ਪ੍ਰਤੀ ਉਸ ਦੇ ਬਚਪਨ ਤੋਂ ਹੀ ਇਹ ਫਿਕਰ ਲੱਗਾ ਰਹਿੰਦਾ ਹੈ ਕਿ ਉਸ ਦੀ ਚੰਗੀ ਸਿਹਤ ਪ੍ਰਤੀ ਉਸ ਦੇ ਖਾਣ-ਪਾਨ ਦਾ ਪੂਰਾ ਖਿਆਲ ਰੱਖਿਆ ਜਾਵੇ। ਉਸ ਦੀ ਸਿੱਖਿਆ ਪ੍ਰਤੀ ਮਾਪੇ ਹਮੇਸ਼ਾ ਹੀ ਸੁਚੇਤ ਰਹਿੰਦੇ ਹਨ। ਮਾਪਿਆਂ ਦੀ ਕੋਸ਼ਿਸ਼ ਹੁੰਦੀ ਹੈ ਕਿ ਉਨ੍ਹਾਂ ਦਾ ਬੱਚਾ ਪੜ੍ਹ-ਲਿਖ ਕੇ ਉੱਚੇ ਅਹੁਦੇ 'ਤੇ ਪਹੁੰਚੇ। ਇਸ ਮਕਸਦ ਲਈ ਉਹ ਮਹਿੰਗੇ ਤੋਂ ਮਹਿੰਗੇ ਸਕੂਲ 'ਚ ਉਸ ਨੂੰ ਪੜ੍ਹਾਉਂਦੇ ਹਨ ਤਾਂ ਕਿ ਉਹ ਚੰਗੀ ਤਾਲੀਮ ਹਾਸਲ ਕਰਕੇ ਆਸਾਨੀ ਨਾਲ ਉਨ੍ਹਾਂ ਵਲੋਂ ਮਿੱਥੇ ਟੀਚੇ 'ਤੇ ਪਹੁੰਚ ਜਾਵੇ ਤੇ ਉਨ੍ਹਾਂ ਦਾ ਨਾਂਅ ਰੌਸ਼ਨ ਕਰੇ। ਬਚਪਨ ਤੋਂ ਜਵਾਨੀ ਦੀਆਂ ਦਹਿਲੀਜ਼ਾਂ 'ਤੇ ਪੈਰ ਧਰਨ ਤੱਕ ਤਾਂ ਬੱਚੇ ਦੀ ਹਰ ਹਰਕਤ, ਉਸ ਦੀ ਬੋਲਚਾਲ, ਰਹਿਣ-ਸਹਿਣ, ਉਸ ਦੀਆਂ ਆਦਤਾਂ ਤੇ ਉਸ ਦੇ ਆਪਣੇ ਅਰਮਾਨਾਂ ਬਾਰੇ ਬਹੁਤ ਜ਼ਿਆਦਾ ਧਿਆਨ ਦੇਣ ਦੀ ਲੋੜ ਹੈ। ਜੇ ਥੋੜ੍ਹਾ ਜਿੰਨਾ ਵੀ ਤੁਸੀਂ ਬੱਚੇ ਦੇ ਫਰਜ਼ਾਂ ਪ੍ਰਤੀ ਅਵੇਸਲੇ ਹੋ ਗਏ ਤਾਂ ਇਸ ਦਾ ਖਮਿਆਜ਼ਾ ਬਹੁਤ ਮਾੜਾ ਤੇ ਬਹੁਤ ਦੇਰ ਤੱਕ ਭੁਗਤਣਾ ਪੈਂਦਾ ਹੈ। ਜਦੋਂ ਫਿਰ ਪਤਾ ਲਗਦਾ ਹੈ, ਉਦੋਂ ਬਹੁਤ ਦੇਰ ਹੋ ਚੁੱਕੀ ਹੁੰਦੀ ਹੈ। ਫਿਰ ਲੱਖ ਕੋਸ਼ਿਸ਼ਾਂ ਕਰਨ 'ਤੇ ਵੀ ਤੁਸੀਂ ਸਫਲ ਨਹੀਂ ਹੋ ਸਕਦੇ। ਬੱਚਿਆਂ ਪ੍ਰਤੀ ਜੋ ਤੁਹਾਡੇ ਫਰਜ਼ ਬਣਦੇ ਹਨ, ਉਹ ਕੁਝ ਇਸ ਤਰ੍ਹਾਂ ਹਨ-
* ਜਵਾਨ ਹੋ ਰਹੇ ਬੱਚੇ ਦੇ ਮਨ 'ਚ ਕੋਈ ਚਾਹਤ ਹੈ ਤਾਂ ਉਸ ਨੂੰ ਪਿਆਰ ਨਾਲ ਪੁੱਛ ਕੇ ਉਸ ਨੂੰ ਬੜੀ ਸੂਝਬੂਝ ਨਾਲ ਪੂਰਾ ਕੀਤਾ ਜਾਵੇ।
* ਜੇ ਤੁਹਾਨੂੰ ਬੱਚੇ 'ਤੇ ਥੋੜ੍ਹਾ ਸ਼ੱਕ ਪੈਦਾ ਹੋਣ ਲੱਗੇ ਕਿ ਉਸ ਨੂੰ ਕੁਝ ਮਾੜੀਆਂ ਆਦਤਾਂ ਪੈ ਰਹੀਆਂ ਹਨ ਤਾਂ ਬਜਾਏ ਉਸ ਨੂੰ ਡਾਂਟਣ ਦੇ ਉਨ੍ਹਾਂ ਆਦਤਾਂ ਦੇ ਮਾੜੇ ਪ੍ਰਭਾਵਾਂ ਤੋਂ ਜਾਣੂ ਕਰਾਇਆ ਜਾਵੇ ਤਾਂ ਬੱਚਾ ਬੜੀ ਜਲਦੀ ਸਮਝ ਕੇ ਕੁਰਾਹੇ ਜੈਣ ਤੋਂ ਸਿੱਧੇ ਰਾਹ ਆ ਸਕਦਾ ਹੈ।
* ਕੋਸ਼ਿਸ਼ ਕਰੋ, ਪੂਰੇ ਪਰਿਵਾਰ 'ਚ ਕੋਈ ਸਾਂਝੀ ਗੱਲ ਕਰਨ ਲੱਗਿਆਂ ਬੱਚੇ ਨੂੰ ਵਿਚ ਬਿਠਾ ਕੇ ਉਸ ਦੇ ਵਿਚਾਰ ਵੀ ਸੁਣੋ। ਇਸ ਨਾਲ ਬੱਚਾ ਆਪਣੇ-ਆਪ ਨੂੰ ਸਿਆਣਿਆਂ 'ਚ ਬੈਠਣ 'ਤੇ ਮਾਣ ਮਹਿਸੂਸ ਕਰੇਗਾ ਤੇ ਆਪਣੇ-ਆਪ ਨੂੰ ਸਿਆਣਾ ਸਮਝਣ ਲੱਗੇਗਾ। ਇਸ ਨਾਲ ਉਸ ਦਾ ਬੌਧਿਕਤਾ ਬਲ ਵਧੇਗਾ।
* ਇਹ ਬੱਚੇ ਲਈ ਬੜਾ ਅਹਿਮ ਪੱਖ ਮੰਨਿਆ ਜਾਂਦਾ ਹੈ ਕਿ ਤੁਸੀਂ ਬੱਚੇ ਬਾਰੇ ਜੋ ਸੋਚਿਆ ਹੁੰਦਾ ਹੈ, ਤੁਸੀਂ ਉਹ ਬਣਨ ਦੀ ਚਾਹਤ ਰੱਖਦੇ ਹੋ, ਭਾਵੇਂ ਬੱਚੇ ਦੀ ਉਸ ਵਿਚ ਰੁਚੀ ਵੀ ਨਾ ਹੋਵੇ। ਇਸ ਤਰ੍ਹਾਂ ਦੀ ਸਥਿਤੀ 'ਚ ਬੱਚੇ ਦੇ ਦਿਮਾਗ ਦੀ ਪਰਖ ਕਰਨੀ ਚਾਹੀਦੀ ਹੈ ਕਿ ਬੱਚੇ ਦੀ ਕਿਸ ਖੇਤਰ ਵੱਲ ਰੁਚੀ ਹੈ।
* ਕੋਸ਼ਿਸ਼ ਕਰੋ, ਸ਼ੁਰੂ ਤੋਂ ਹੀ ਬੱਚੇ ਨੂੰ ਕੰਪਿਊਟਰ ਤੇ ਇੰਟਰਨੈੱਟ ਦੀ ਜਾਣਕਾਰੀ ਦੇ ਕੇ ਉਸ ਨੂੰ ਵੱਧ ਤੋਂ ਵੱਧ ਇਸ ਦੇ ਫਾਇਦਿਆਂ ਬਾਰੇ ਜਾਗਰੂਕ ਕੀਤਾ ਜਾਵੇ। ਇਸ ਨਾਲ ਬੱਚਾ ਆਪਣੇ-ਆਪ ਬੌਧਿਕ ਵਿਕਾਸ ਦਾ ਪੱਲਾ ਫੜ ਲਵੇਗਾ ਤੇ ਯਾਦ ਰੱਖੋ, ਉਹ ਜੋ ਵੀ ਕਰੇਗਾ, ਉਸ ਵਿਚ ਹੀ ਸਫਲ ਹੋਵੇਗਾ।


-ਡੀ. ਆਰ. ਬੰਦਨਾ,
511, ਖਹਿਰਾ ਇਨਕਲੇਵ, ਜਲੰਧਰ-144007






Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX