ਤਾਜਾ ਖ਼ਬਰਾਂ


ਚੋਰਾਂ ਸੰਨ੍ਹ ਲਗਾ ਕੇ ਕੋਆਪਰੇਟਿਵ ਬੈਂਕ ਚੋਂ 4 ਲੱਖ 24 ਹਜ਼ਾਰ ਦੀ ਰਕਮ ਉਡਾਈ
. . .  1 day ago
ਭਿੰਡੀ ਸੈਦਾਂ, 12 ਨਵੰਬਰ ( ਪਿ੍ਤਪਾਲ ਸਿੰਘ ਸੂਫ਼ੀ)- ਪੁਲਿਸ ਥਾਣਾ ਭਿੰਡੀ ਸੈਦਾਂ ਅਧੀਨ ਪੈਂਦੇ ਪਿੰਡ ਜਸਰਾਊਰ ਵਿਖੇ ਚੋਰਾਂ ਨੇ ਕੋਆਪੇ੍ਟਿਵ ਬੈਂਕ ਦੀ ਇਮਾਰਤ ਦੀ ਖਿੜਕੀ ਵਾਲੀ ਗਰਿੱਲ ਤੋੜ ਕੇ ਬੈਂਕ ਅੰਦਰੋਂ ਆਰੀ ਦੇ ਬਲੇਡ ਨਾਲ ਲੌਕਰ ...
ਸਾਂਝਾ ਅਧਿਆਪਕ ਮੋਰਚਾ ਵੱਲੋਂ ਆਰ-ਪਾਰ ਦੀ ਲੜਾਈ ਦਾ ਐਲਾਨ
. . .  1 day ago
ਸੰਗਰੂਰ, 12 ਨਵੰਬਰ (ਧੀਰਜ ਪਸ਼ੋਰੀਆ)- ਅਧਿਆਪਕਾਂ ਦੀਆਂ ਤਨਖ਼ਾਹਾਂ 'ਚ ਕਟੌਤੀ ਕਰਨ ਦੇ ਖ਼ਿਲਾਫ਼ ਸੰਘਰਸ਼ ਕਰ ਰਹੇ ਅਧਿਆਪਕਾਂ ਦੀ ਅਗਵਾਈ ਕਰ ਰਹੇ ਸਾਂਝਾ ਅਧਿਆਪਕ ਮੋਰਚਾ ਦੇ ਆਗੂ ਸੁਖਵਿੰਦਰ ਸਿੰਘ ਚਾਹਲ ਨੇ ...
ਸੁਰੱਖਿਆ ਬਲਾਂ ਨਾਲ ਮੁੱਠਭੇੜ 'ਚ ਦੋ ਨਕਸਲੀ ਢੇਰ
. . .  1 day ago
ਰਾਏਪੁਰ, 12 ਨਵੰਬਰ- ਛੱਤੀਸਗੜ੍ਹ ਦੇ ਸੁਕਮਾ 'ਚ ਸੁਰੱਖਿਆ ਬਲਾਂ ਨਾਲ ਹੋਈ ਮੁੱਠਭੇੜ 'ਚ ਦੋ ਨਕਸਲੀਆਂ ਢੇਰ ਹੋਏ ਹਨ। ਸੁਰੱਖਿਆ ਬਲਾਂ ਨੇ ਇਨ੍ਹਾਂ ਨਕਸਲੀਆਂ ਕੋਲੋਂ ਦੋ ਰਾਈਫ਼ਲ ਬਰਾਮਦ ਕੀਤੀਆਂ....
ਮਾਨਸਿਕ ਪਰੇਸ਼ਾਨੀ ਤੇ ਚੱਲਦਿਆਂ ਮਜ਼ਦੂਰ ਵੱਲੋਂ ਕੀਤੀ ਖ਼ੁਦਕੁਸ਼ੀ
. . .  1 day ago
ਸੀਗੋਂ ਮੰਡੀ, 11 ਨਵੰਬਰ (ਲਕਵਿੰਦਰ ਸ਼ਰਮਾ) - ਪਿੰਡ ਨਥੇਹਾ ਦੇ ਇੱਕ ਨੌਜਵਾਨ ਨੇ ਕਰਜ਼ੇ ਦੇ ਬੋਝ ਨੂੰ ਲੈ ਕੇ ਮਾਨਸਿਕ ਪਰੇਸ਼ਾਨੀ ਦੇ ਚੱਲਦਿਆਂ ਫਾਹਾ ਲੈ ਕੇ ਖ਼ੁਦਕੁਸ਼ੀ ਕਰ ਲਈ ਹੈ । ਮ੍ਰਿਤਕ ਦੇ ਵਾਰਸਾਂ ਨੇ ਦੱਸਿਆ ਕਿ ਬੱਬੂ ਸਿੰਘ ਜੋ ਕਿ ਮਜ਼ਦੂਰੀ ਦਾ ਕੰਮ ਕਰਦਾ ਸੀ, ਨੇ ਘਰ...
ਸਖ਼ਤ ਮਨਾਹੀ ਦੇ ਬਾਵਜੂਦ ਜੀਰੀ ਦੀ ਪਰਾਲ਼ੀ ਨੂੰ ਅੱਗ ਲਗਾਉਣ ਦਾ ਰੁਝਾਨ ਹੋਇਆ ਸ਼ੁਰੂ
. . .  1 day ago
ਦੋਰਾਹਾ, 12 ਨਵੰਬਰ (ਜਸਵੀਰ ਝੱਜ)- ਪਿਛਲੇ ਸਾਲ ਤੋਂ ਪੰਜਾਬ ਸਰਕਾਰ ਫ਼ਸਲਾਂ ਦੀ ਰਹਿੰਦ ਖੂੰਹਦ ਨੂੰ ਖੇਤਾਂ 'ਚ ਨਾ ਫੂਕਣ ਅਤੇ ਇਸ ਆਦੇਸ਼ ਦੀ ਪਾਲਨਾ ਨਾ ਕਰਨ ਵਾਲ਼ਿਆਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਦੇ ਆਦੇਸ਼ ਦੇ ਰਹੀ ਹੈ। ਭਾਵੇਂ ਇਸ ਹੁਕਮ ਕਾਰਨ ਫ਼ਸਲਾਂ ਦੀ...
ਬ੍ਰਹਮਪੁਰਾ ਅਤੇ ਹੋਰ ਸੀਨੀਅਰ ਆਗੂਆਂ ਦਾ ਅਕਾਲੀ ਦਲ ਤੋਂ ਬਾਹਰ ਹੋਣਾ ਮੰਦਭਾਗਾ - ਚੰਦੂਮਾਜਰਾ
. . .  1 day ago
ਸ੍ਰੀ ਅਨੰਦਪੁਰ ਸਾਹਿਬ, 12 ਨਵੰਬਰ (ਕਰਨੈਲ ਸਿੰਘ, ਜੇ ਐਸ ਨਿੱਕੂਵਾਲ)- ਸ. ਰਣਜੀਤ ਸਿੰਘ ਬ੍ਰਹਮਪੁਰਾ ਅਤੇ ਹੋਰ ਸੀਨੀਅਰ ਆਗੂਆਂ ਦਾ ਅਕਾਲੀ ਦਲ ਤੋਂ ਬਾਹਰ ਹੋਣਾ ਬਹੁਤ ਹੀ ਮੰਦਭਾਗਾ ਹੈ। ਬ੍ਰਹਮਪੁਰਾ ਦੀਆਂ ਸ਼੍ਰੋਮਣੀ ਅਕਾਲੀ ਦਲ 'ਚ ਵੱਡੀ ਸੇਵਾਵਾਂ ਅਤੇ ਵੱਡਾ...
ਸੁਖਬੀਰ ਬਾਦਲ ਨੂੰ ਸੌਂਪੇ ਗਏ ਸ਼੍ਰੋਮਣੀ ਕਮੇਟੀ ਦੇ ਕੱਲ੍ਹ ਹੋਣ ਵਾਲੇ ਇਜਲਾਸ ਦੇ ਸਾਰੇ ਅਧਿਕਾਰ- ਚੀਮਾ
. . .  1 day ago
ਅੰਮ੍ਰਿਤਸਰ, 12 ਨਵੰਬਰ (ਹਰਮਿੰਦਰ ਸਿੰਘ)- ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਕੱਲ੍ਹ ਹੋਣ ਵਾਲੇ ਇਜਲਾਸ 'ਚ ਪ੍ਰਧਾਨ ਦੀ ਕੀਤੀ ਜਾਣ ਵਾਲੀ ਚੋਣ ਦੇ ਸਾਰੇ ਅਧਿਕਾਰ ਸ਼੍ਰੋਮਣੀ ਅਕਾਲੀ ਦਲ ਨਾਲ ਸੰਬੰਧਿਤ ਮੈਂਬਰਾਂ ਵੱਲੋਂ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ...
ਅਫ਼ਗ਼ਾਨਿਸਤਾਨ : ਆਤਮਘਾਤੀ ਹਮਲੇ 'ਚ 6 ਲੋਕਾਂ ਦੀ ਮੌਤ, 20 ਜ਼ਖਮੀ
. . .  1 day ago
ਕਾਬੁਲ, 12 ਨਵੰਬਰ - ਅਫ਼ਗ਼ਾਨਿਸਤਾਨ ਦੀ ਰਾਜਧਾਨੀ ਕਾਬੁਲ ਵਿਖੇ ਸਿਟੀ ਸੈਂਟਰ 'ਚ ਹੋਏ ਆਤਮਘਾਤੀ ਹਮਲੇ 'ਚ 6 ਲੋਕਾਂ ਦੀ ਮੌਤ ਹੋ ਗਈ ਜਦਕਿ 20 ਲੋਕ ਜ਼ਖਮੀ ਹੋਏ ਹਨ। ਜ਼ਖਮੀ ਹੋਏ ਲੋਕਾਂ ਨੂੰ ਨੇੜੇ ਦੇ ਹਸਪਤਾਲ 'ਚ ਇਲਾਜ ਲਈ ਦਾਖਲ ਕਰਵਾਇਆ ਗਿਆ...
ਛੇਹਰਟਾ ਪੁਲਿਸ ਨੇ ਲੁੱਟਾਂ ਖੋਹਾਂ ਕਰਨ ਵਾਲੇ ਤਿੰਨ ਨੌਜਵਾਨਾ ਨੂੰ ਕੀਤਾ ਕਾਬੂ
. . .  1 day ago
ਛੇਹਰਟਾ, 12 ਨਵੰਬਰ (ਵਡਾਲੀ) -ਪੁਲਿਸ ਕਮਿਸ਼ਨਰ ਵਾਸਤਵਾ ਵੱਲੋਂ ਮਾੜੇ ਅਨਸਰਾਂ ਵਿਰੁੱਧ ਵਿੱਢੀ ਗਈ ਮਹਿਮ ਨੂੰ ਉਸ ਵੇਲੇ ਵੱਡੀ ਸਫਲਤਾ ਮਿਲੀ ਜੱਦੋ ਡੀ.ਸੀ.ਪੀ ਅਮਰੀਕ ਸਿੰਘ ਪਵਾਰ ਦੀ ਰਹਿਨੁਮਾਈ ਹੇਠ, ਡੀ.ਸੀ.ਪੀ ਲਖਬੀਰ ਸਿੰਘ ਦੀਆਂ ਹਦਾਇਤਾਂ ਅਨੁਸਾਰ ....
ਤੇਜ਼ਧਾਰ ਹਥਿਆਰ ਦੀ ਨੋਕ 'ਤੇ ਸਕੂਟਰੀ ਸਮੇਤ ਪੰਜ ਲੱਖ ਦੀ ਲੁੱਟ
. . .  1 day ago
ਬਾਘਾਪੁਰਾਣਾ, 12 ਨਵੰਬਰ (ਬਲਰਾਜ ਸਿੰਗਲਾ)- ਅੱਜ ਸ਼ਾਮ 4 ਵਜੇ ਦੇ ਕਰੀਬ ਇੱਕ ਅਣਪਛਾਤੇ ਨਕਾਬਪੋਸ਼ ਲੁਟੇਰੇ ਵੱਲੋਂ ਤੇਜ਼ਧਾਰ ਹਥਿਆਰ ਦੀ ਨੋਕ 'ਤੇ ਲੁੱਟ ਨੂੰ ਅੰਜਾਮ ਦੇਣ ਦੀ ਖ਼ਬਰ ਹੈ। ਇਸ ਲੁਟੇਰਾ ਹਥਿਆਰ ਦੀ ਨੋਕ 'ਤੇ ਐਕਟਿਵਾ ਸਵਾਰ ਸੇਤੀਆ ਮਨੀਚੇਂਜਰ....
ਹੋਰ ਖ਼ਬਰਾਂ..

ਸਾਹਿਤ ਫੁਲਵਾੜੀ

ਟੈਟ ਤੋਂ ਟੈਂਟ

ਪ੍ਰੀਤ ਜਦੋਂ ਵੀ ਸਵੇਰੇ ਤਿਆਰ ਹੋ ਕੇ ਸਕੂਲ ਜਾਣ ਲੱਗਦੀ ਤਾਂ ਵੇਖ ਕੇ ਮਾਂ ਦੀਆਂ ਅੱਖਾਂ ਵਿਚੋਂ ਹੰਝੂ ਤੁਰ ਪੈਂਦੇ ਕਿ ਕਿਤੇ ਮੇਰੀ ਧੀ ਨੂੰ ਨਜ਼ਰ ਨਾ ਲੱਗ ਜਾਵੇ, ਆਪੇ ਨਹਾ-ਧੋ ਕੇ ਵਰਦੀ ਪਾ ਕੇ ਰਸੋਈ ਵਿਚ ਆ ਕੇ ਪੁੱਛਦੀ ਮੰਮੀ ਕੀ ਬਣਾਇਆ ਹੈ ਅੱਜ | ਜੋ ਵੀ ਬਣਿਆ ਹੁੰਦਾ ਖਾ ਕੇ ਤੇ ਕੁਝ ਡੱਬੀ 'ਚ ਦੁਪਹਿਰ ਦੇ ਖਾਣ ਲਈ ਪਾ ਲੈਂਦੀ ਤੇ ਮੰਮੀ-ਪਾਪਾ ਨੂੰ ਬਾਏ-ਬਾਏ ਕਹਿ ਸਕੂਲ ਚਲੀ ਜਾਂਦੀ |
ਇਉਂ ਕੁਝ ਕਰਦਿਆਂ-ਸੋਚਦਿਆਂ ਮਾਂ-ਬਾਪ ਦੀਆਂ ਸੱਧਰਾਂ ਨੂੰ ਬੂਰ ਪੈ ਗਿਆ, ਧੀ ਕਾਲਜ ਜਾਣ ਲੱਗ ਪਈ ਪੜ੍ਹਾਈ ਜ਼ੋਰਾਂ-ਸ਼ੋਰਾਂ 'ਤੇ ਸ਼ੁਰੂ ਹੋ ਗਈ, ਪ੍ਰੀਤ ਰਾਤਾਂ ਨੂੰ ਜਾਗ-ਜਾਗ ਕੇ ਪੜ੍ਹਦੀ ਤੇ ਚੰਗੇ ਨੰਬਰ ਲੈ ਕੇ ਪਾਸ ਹੋਈ | ਉਹ ਆਪਣੀ ਮਾਂ ਨਾਲ ਵੀ ਘਰ ਦਾ ਕੰਮ ਕਰਵਾਉਂਦੀ | ਵੇਖਦਿਆਂ-ਵੇਖਦਿਆਂ ਪਤਾ ਹੀ ਨ੍ਹੀ ਚੱਲਿਆ ਕਦੋਂ ਕਣਕਾਂ ਲੰਮੀਆਂ ਹੋ ਗਈਆਂ, ਤੇ ਕਾਲਜੇ ਉਦੋਂ ਚੀਸ ਪੈਂਦੀ ਜਦੋਂ ਕਿਤੇ ਗਾਣੇ ਦੇ ਬੋਲ ਕੰਨੀਂ ਪੈਂਦੇ ਕਣਕਾਂ ਲੰਮੀਆਂ ਧੀਆਂ ਕਿਉਂ ਜੰਮੀਆਂ ਨੀ ਮਾਏ, ਹਾਏ ਮੇਰੀ ਧੀ |
ਮਾਂ ਦੀ ਖੁਸ਼ੀ ਦਾ ਟਿਕਾਣਾ ਨਾ ਰਿਹਾ ਜਦੋਂ ਇਕ ਦਿਨ ਧੀ ਰਾਣੀ ਨੇ ਆ ਕੇ ਕਿਹਾ ਮੰਮੀ ਮੇਰਾ ਟੈਟ ਪਾਸ ਹੋ ਗਿਆ, ਹੁਣ ਮੈਨੂੰ ਅਧਿਆਪਿਕਾ ਦੀ ਨੌਕਰੀ ਮਿਲ ਜਾਵੇਗੀ | ਜ਼ਰੂਰ ਮਿਲੂਗੀ ਪੁੱਤਰ ਤੂੰ ਐਨੀ ਮਿਹਨਤ ਜੋ ਕੀਤੀ ਹੈ, ਮਾਂ ਦੇ ਪੈਰ ਧਰਤੀ ਤੇ ਨ੍ਹੀ ਸੀ ਲੱਗਦੇ | ਕੁਝ ਸਮੇਂ ਬਾਅਦ ਪ੍ਰੀਤ ਨੂੰ ਨੌਕਰੀ ਵੀ ਮਿਲ ਗਈ ਤੇ ਚੰਗਾ ਜਿਹਾ ਲੜਕਾ ਵੇਖ ਕੇ ਉਸ ਦਾ ਰਿਸ਼ਤਾ ਵੀ ਕਰ ਦਿੱਤਾ | ਲੜਕਾ ਪੱਕੀ ਨੌਕਰੀ 'ਤੇ ਲੱਗਿਆ ਸੀ, ਦਿਨ ਚੰਗੇ ਆ ਗਏ ਸੋਚ ਕੇ ਮਾਂ ਪ੍ਰਮਾਤਮਾ ਦਾ ਸ਼ੁਕਰੀਆ ਕਰਦੀ ਕਿ ਪ੍ਰੀਤ ਨੂੰ ਮਿਹਨਤ ਦਾ ਫਲ ਮਿਲ ਗਿਆ ਹੈ, ਇਸ ਦੇ ਪਾਪਾ ਦੀ ਮਿਹਨਤ ਦੀ ਕਮਾਈ ਦਾ ਮੁੱਲ ਪੈ ਗਿਆ ਹੈ |
ਇਕ ਦਿਨ ਸਵੇਰੇ-ਸਵੇਰੇ ਪ੍ਰੀਤ ਉਦਾਸ ਜਿਹਾ ਚਿਹਰਾ ਲੈ ਕੇ ਰਸੋਈ ਵਿਚ ਆਈ ਤੇ ਮਾਂ ਝਾਕਦੀ ਰਹਿ ਗਈ ਕਿ ਨਾ ਇਹ ਤਿਆਰ ਹੋਈ ਤੇ ਨਾ ਇਹ ਪੁੱਛਿਆ ਕਿ ਕੀ ਬਣਾਇਆ ਹੈ | ਮਾਂ ਦੇ ਕੁਝ ਪੁੱਛਣ ਤੋਂ ਪਹਿਲਾਂ ਹੀ ਉਹ ਬੋਲੀ ਅੱਜ ਕੁਝ ਨੀ ਖਾਣਾ, ਕੁਝ ਨਾ ਬਣਾਓ, ਮੈਨੂੰ ਭੁੱਖ ਨ੍ਹੀ, ਮੇਰਾ ਮਨ ਠੀਕ ਨ੍ਹੀ | ਮਾਂ ਦੇ ਪੁੱਛਣ ਤੇ ਪ੍ਰੀਤ ਨੇ ਦੱਸਿਆ ਕਿ ਰਾਜ ਦਾ ਫੋਨ ਆਇਆ ਸੀ ਕਹਿੰਦਾ ਤੁਹਾਡੀ ਤਨਖਾਹ ਘਟਾ ਦਿੱਤੀ, ਤੁਸੀਂ ਤਾਂ ਕੱਚੇ ਹੋ ਹਾਲੇ ਪਤਾ ਨ੍ਹੀ ਤੁਹਾਡਾ ਕੀ ਬਣੇਗਾ, ਮੈਨੂੰ ਇਹ ਰਿਸ਼ਤਾ ਮਨਜ਼ੂਰ ਨ੍ਹੀ ਕਿਉਂਕਿ ਤੁਸੀਂ ਪਹਿਲਾਂ ਨ੍ਹੀ ਦੱਸਿਆ ਸਾਨੂੰ |
ਘਰ ਵਿਚ ਮਾਤਮ ਜਿਹਾ ਛਾ ਗਿਆ ਪ੍ਰੀਤ ਦਾ ਰਿਸ਼ਤਾ ਟੁੱਟ ਗਿਆ | ਰਿਸ਼ਤੇਦਾਰਾਂ ਨੂੰ ਪਤਾ ਲੱਗ ਗਿਆ | ਭੂਆ ਅਫਸੋਸ ਕਰਨ ਆਈ ਤੇ ਪ੍ਰੀਤ ਬਾਰੇ ਪੁੱਛਿਆ ਕਿੱਥੇ ਹੈ ਤਾਂ ਮਾਂ ਨੇ ਕਿਹਾ ਉਹ ਤਾਂ ਟੈਂਟ 'ਚ ਮਰਨ ਵਰਤ 'ਤੇ ਬੈਠੀ ਹੈ ਸੁਣਦਿਆਂ ਹੀ ਭੂਆ ਦੀ ਭੁੱਬ ਨਿਕਲ ਗਈ ਕਹਿੰਦੀ ਕਿੱਥੇ ਤਾਂ ਵਿਆਹ ਦੀ ਤਿਆਰੀ ਕਰਨੀ ਸੀ ਤੇ ਕਿੱਥੇ ਆਹ ਦਿਨ ਵੇਖਣੇ ਪੈ ਗਏ |

-ਮੋਬਾਈਲ : 9417738737.


ਖ਼ਬਰ ਸ਼ੇਅਰ ਕਰੋ

ਵਿਅੰਗ: ਐਤਕੀਂ ਆਪਾਂ ਸਰਪੰਚੀ ਨਹੀਂ ਛੱਡਣੀ

ਲਓ ਬਈ ਭਰਾਓ, ਆਪਾਂ ਤਾਂ ਇਹ ਪੱਕਾ ਫੈਸਲਾ ਕਰ ਲਿਆ ਹੈ ਕਿ ਐਤਕੀਂ ਆਪਾਂ ਸਰਪੰਚੀ ਨਹੀਂ ਛੱਡਣੀ | ਚਾਹੇ ਕੁਝ ਵੀ ਹੋ ਜਾਵੇ, ਆਪਾਂ ਪਿੰਡ ਦਾ ਸਰਪੰਚ ਬਣਨੈ ਹੀ ਬਣਨੈ | ਤਾਹੀਂ ਤਾਂ ਪੰਜਾਹ ਲੱਖ ਰੁਪਏ ਆਪਾਂ ਸਰਪੰਚੀ ਲਈ ਇਕ ਪਾਸੇ ਕਰ ਕੇ ਰੱਖ ਦਿੱਤੇ ਹਨ | ਮੰਤਰੀ ਜੀ ਦਾ ਪੀ. ਏ. ਤਾਂ ਕਹਿੰਦਾ ਸੀ ਅਖੇ ਇਹ ਪੰਜਾਹ ਲੱਖ ਰੁਪਏ ਤੂੰ ਸਾਡੇ ਸਪੁਰਦ ਕਰ, ਸਰਪੰਚੀ ਤੈਨੂੰ ਘਰ ਬੈਠੇ ਨੂੰ ਹੀ ਦੇ ਦਿਆਂਗੇ - ਐਨ ਥਾਲੀ ਵਿਚ ਪਰੋਸ ਕੇ | ਪਰ ਆਪਾਂ ਤਾਂ ਲੋਕਤੰਤਰੀ ਕਦਰਾਂ- ਕੀਮਤਾਂ ਵਿਚ ਵਿਸ਼ਵਾਸ ਰੱਖਣ ਵਾਲੇ ਬੰਦੇ ਹਾਂ | ਇਸ ਕਰਕੇ ਆਪਾਂ ਪੀ. ਏ. ਸਾਅਬ ਨੂੰ ਕੋਰਾ ਜੁਆਬ ਦੇ ਦਿੱਤੈ | ਨਾਲੇ ਜਦੋਂ ਆਪਾਂ ਜਿੱਤਣ ਦੀ ਪੂਰੀ ਸਮਰੱਥਾ ਰੱਖਦੇ ਹਾਂ ਤਾਂ ਆਪਾਂ ਨਾਜਾਇਜ਼ ਕੰਮ ਕਿਉਂ ਕਰੀਏ |
ਆਪਣੀ ਜਿੱਤ ਨੂੰ ਯਕੀਨੀ ਬਣਾਉਣ ਲਈ ਅਸੀਂ ਹੁਣ ਤੋਂ ਹੀ ਪਿੰਡ ਦੇ ਸਮੂਹ ਲੋਕਾਂ ਨਾਲ ਰਾਬਤਾ ਬਣਾ ਕੇ ਰੱਖ ਰਹੇ ਹਾਂ | ਹਰੇਕ ਦੇ ਦੁੱਖ-ਸੁੱਖ ਵਿਚ ਸ਼ਰੀਕ ਹੁੰਦੇ ਹਾਂ ਅਤੇ ਲੋੜ ਸਮੇਂ ਉਨ੍ਹਾਂ ਦੀ ਮਦਦ ਵੀ ਕਰਦੇ ਹਾਂ | ਪਿਛਲੇ ਮਹੀਨੇ ਇਕ ਗਰੀਬ ਘਰ ਦੀ ਬੇਟੀ ਦਾ ਵਿਆਹ ਸੀ | ਉਸ ਬੇਟੀ ਨੂੰ ਪੰਜ ਸੂਟ, ਇਕ ਬੈੱਡ, ਦੋ ਕੁਰਸੀਆਂ, ਇਕ ਮੇਜ਼, ਘਰੇਲੂ ਵਰਤੋਂ ਦੇ ਭਾਂਡੇ ਅਤੇ ਕੁੜੀਆਂ-ਕੱਤਰੀਆਂ ਵਾਲਾ ਸਾਰਾ ਜ਼ਰੂਰੀ ਸਮਾਨ ਆਪਾਂ ਲੈ ਕੇ ਦਿੱਤਾ ਹੈ | ਕੁੜੀ ਵਾਲੇ ਐਨ ਬਾਗੋ-ਬਾਗ ਹੋ ਗਏ | ਪਿਛਲੇ ਹਫ਼ਤੇ ਦੋ ਵਿਦਿਆਰਥੀਆਂ ਨੂੰ ਆਪਾਂ ਨਵੀਆਂ-ਨਕੋਰ ਸਕੂਲੀ ਵਰਦੀਆਂ ਬਣਾ ਕੇ ਦਿੱਤੀਆਂ ਹਨ | ਪਰਸੋਂ ਪਿੰਡ ਦੇ ਇਕ ਗਰੀਬ ਆਦਮੀ ਦਾ ਚੰਗੇ ਡਾਕਟਰ ਤੋਂ ਇਲਾਜ ਕਰਵਾਇਆ ਹੈ- ਵਿਚਾਰਾ ਹਫ਼ਤੇ ਭਰ ਤੋਂ ਬੁਖਾਰ ਨਾਲ ਮੰਜੇ 'ਤੇ ਪਿਆ ਚੂਕੀ ਜਾਂਦਾ ਸੀ | ਅੱਜ ਪਿੰਡ ਦੇ ਦੋ ਸਕੇ ਭਰਾਵਾਂ ਦਾ ਰਾਜ਼ੀਨਾਵਾਂ ਕਰਵਾਇਆ ਹੈ | ਪਿਛਲੇ ਦਿਨੀਂ ਪਾਣੀ ਦੀ ਵਾਰੀ ਤੇ ਦੋਵੇਂ ਭਰਾ ਡਾਂਗੋ-ਡਾਂਗੀ ਹੋ ਗਏ ਸਨ | ਗੱਲ ਮੁਕਾਓ ਜੀ, ਜਿਹੜਾ ਵੀ ਲੋੜਵੰਦ ਸਾਡੇ ਦਰ 'ਤੇ ਉਮੀਦ ਲੈ ਕੇ ਆਉਂਦਾ ਹੈ, ਅਸੀਂ ਉਸ ਨੂੰ ਖਾਲੀ ਨਹੀਂ ਮੋੜਦੇ | ਇਸ ਪਿੱਛੇ ਮੂਲ ਕਾਰਨ ਦਾ ਤਾਂ ਤੁਹਾਨੂੰ ਪਤਾ ਹੀ ਐ ਕਿ ਐਤਕੀ ਆਪਾਂ ਸਰਪੰਚੀ ਨਹੀਂ ਛੱਡਣੀ |
ਆਪਣੇ ਵਿਰੋਧੀਆਂ ਨੂੰ ਮਾਤ ਦੇਣ ਲਈ ਅਸੀਂ ਕੋਈ ਵੀ ਕਸਰ ਬਾਕੀ ਨਹੀਂ ਛੱਡਣੀ ਚਾਹੁੰਦੇ | ਤਾਂ ਹੀ ਤਾਂ ਆਪਾਂ ਪਿੰਡ ਵਿਚ ਸੈਂਕੜੇ ਜਾਲ੍ਹੀ ਵੋਟਾਂ ਬਣਾ ਲਈਆਂ ਹਨ | ਇਹ ਵੋਟਾਂ ਚੋਣ ਅਮਲੇ ਦੀ ਯੋਗ ਮਦਦ ਦੇ ਨਾਲ ਆਪਾਂ ਜ਼ਰੂਰ ਭੁਗਤਾ ਲਵਾਂਗੇ | ਥਾਣਾ ਮੁਖੀ ਨਾਲ ਆਪਾਂ ਪੂਰੇ ਸੁਖਾਵੇਂ ਸਬੰਧ ਬਣਾ ਰੱਖੇ ਹਨ | ਗਾਹੇ-ਬ-ਗਾਹੇ ਆਪਾਂ ਉਨ੍ਹਾਂ ਨੂੰ ਪ੍ਰੀਤੀ-ਭੋਜ ਛਕਾਉਂਦੇ ਰਹਿੰਦੇ ਹਾਂ ਅਤੇ ਉਨ੍ਹਾਂ ਦੀਆਂ ਨਿੱਕੀਆਂ-ਮੋਟੀਆਂ ਵਗਾਰਾਂ ਪੂਰੀਆਂ ਕਰਦੇ ਰਹਿੰਦੇ ਹਾਂ | ਵੈਸੇ ਆਪਾਂ ਮੰਤਰੀ ਜੀ ਨੂੰ ਵੀ ਚੋਣਾਂ ਸਮੇਂ 'ਪਾਰਟੀ ਫ਼ੰਡ' ਦਾ ਮੋਟਾ ਗੱਫ਼ਾ ਦੇ ਚੁੱਕੇ ਹਾਂ | ਇਸ ਕਰਕੇ ਉਹ ਵੀ ਆਪਣੇ 'ਤੇ ਮਿਹਰ ਭਰਿਆ ਹੱਥ ਰੱਖਣਗੇ | ਪਿੰਡ ਦੀਆਂ ਸਾਰੀਆਂ ਵਿਕਾਊ ਵੋਟਾਂ ਦੀ ਆਪਾਂ ਲਿਸਟ ਤਿਆਰ ਕਰ ਲਈ ਹੈ ਅਤੇ ਉਨ੍ਹਾਂ ਦੇ ਰੇਟ ਫਿਕਸ ਕਰਨ ਲਈ ਗੁਪਤ ਮੀਟਿੰਗਾਂ ਦਾ ਦੌਰ ਵੀ ਸ਼ੁਰੂ ਕਰ ਦਿੱਤਾ ਹੈ | ਇਹ ਗੱਲ ਆਪਾਂ ਮਨ ਵਿਚ ਧਾਰ ਲਈ ਹੈ ਕਿ ਵੋਟਰ ਜੋ ਵੀ ਕੀਮਤ ਮੂੰਹੋਂ ਮੰਗਣਗੇ, ਆਪਾਂ ਖਿੜੇ ਮੱਥੇ ਅਦਾ ਕਰ ਦਿਆਂਗੇ | ਨਾਲੇ ਆਪਾਂ ਤਾਂ ਦਿ੍ੜ ਫ਼ੈਸਲਾ ਕਰ ਲਿਆ ਹੈ ਕਿ ਐਤਕੀ ਆਪਾਂ ਸਰਪੰਚੀ ਨਹੀਂ ਛੱਡਣੀ |
ਜਿਸ ਦਿਨ ਤੋਂ ਪੰਚਾਇਤੀ ਚੋਣਾਂ ਦਾ ਐਲਾਨ ਹੋਇਆ ਹੈ, ਆਪਾਂ ਉਸ ਦਿਨ ਤੋਂ ਹੀ ਨਿਆਈਾ ਵਾਲੇ ਖੇਤ ਰੂੜੀ ਮਾਰਕਾ ਸ਼ਰਾਬ ਕੱਢਣ ਦੇ ਨੇਕ ਕਾਰਜ ਵਿਚ ਜੁਟ ਗਏ ਹਾਂ | ਮੁਰਗੀਖਾਨੇ ਵਾਲਾ ਰਮਨ ਵਰਮਾ ਆਪਣੇ ਘਰ ਦਾ ਮੁੰਡਾ ਹੈ | ਉਸਨੂੰ ਜਿੰਨੇ ਮੁਰਗਿਆਂ ਦਾ ਆਰਡਰ ਕਰਦੇ ਹਾਂ, ਉਹ ਤੁਰੰਤ ਘਰ ਭੇਜ ਦਿੰਦਾ ਹੈ | ਹਰ ਰੋਜ਼ ਸ਼ਾਮ ਨੂੰ ਆਪਣੇ ਘਰ ਵਿਆਹ ਵਰਗਾ ਮਾਹੌਲ ਹੁੰਦਾ ਹੈ | ਅੱਧਾ ਪਿੰਡ ਆਪਣੇ ਘਰੋਂ ਰੂੜੀ ਮਾਰਕਾ ਸ਼ਰਾਬ ਨਾਲ ਡੱਕ ਕੇ ਜਾਂਦਾ ਹੈ | ਪਿੰਡ ਦੇ ਅਮਲੀਆਂ ਦੀ ਯੋਗ ਸੇਵਾ ਲਈ ਅਸੀਂ ਚੰਗੀ ਅਫ਼ੀਮ ਦਾ ਕੋਟਾ ਗੁਪਤ ਰੂਪ ਵਿਚ ਮੰਗਵਾ ਲਿਆ ਹੈ | ਰਾਤ-ਬਰਾਤੇ ਜਦੋਂ ਵੀ ਉਨ੍ਹਾਂ ਨੂੰ ਨਸ਼ੇ ਦੀ ਤੋੜ ਲਗਦੀ ਹੈ ਤਾਂ ਉਨ੍ਹਾਂ ਨੂੰ ਪੂਰੀ ਖੁੱਲ੍ਹ ਹੈ ਕਿ ਉਹ ਕਿਸੇ ਸਮੇਂ ਵੀ ਆ ਕੇ ਸਾਡੀਆਂ 'ਅਮਲੀ ਭਲਾਈ ਸੇਵਾਵਾਂ' ਦਾ ਭਰਭੂਰ ਲਾਭ ਉਠਾ ਸਕਦੇ ਹਨ | ਏ-ਕਲਾਸ ਡੋਡਿਆਂ ਦਾ ਭਰਿਆ ਇਕ ਕੈਂਟਰ ਵੋਟਰਾਂ ਦੀ ਲੋੜ ਨੂੰ ਮੁੱਖ ਰੱਖਦਿਆਂ ਅਸੀਂ ਵਿਸ਼ੇਸ਼ ਤੌਰ 'ਤੇ ਮੰਗਵਾਇਆ ਹੈ, ਜੋ ਕਿ ਲੋੜਵੰਦਾਂ ਨੂੰ ਨਿਰਵਿਘਨ ਸਪਲਾਈ ਕੀਤਾ ਜਾ ਰਿਹਾ ਹੈ | ਨਾਲੇ ਮਿੱਤਰ ਪਿਆਰਿਓ, ਐਤਕੀਂ ਆਪਾਂ ਸਰਪੰਚੀ ਨਹੀਂ ਛੱਡਣੀ, ਚਾਹੇ ਵੋਟਰਾਂ ਦੀ ਖਾਤਰ ਆਪਾਂ ਨੂੰ ਕੁਝ ਵੀ ਕਰਨਾ ਪਵੇ |
ਹੁਣ ਤੁਹਾਡੇ ਮਨ ਵਿਚ ਇਹ ਗੱਲ ਆ ਸਕਦੀ ਹੈ ਕਿ ਇਹ ਭਲਾਮਾਣਸ ਸਰਪੰਚੀ ਤੇ ਪੰਜਾਹ ਲੱਖ ਰੁਪਏ ਕਿਉਂ ਖਰਚ ਰਿਹਾ ਹੈ? ਆਖਰ ਇਸ ਨੂੰ ਸਰਪੰਚੀ ਵਿਚੋਂ ਕੀ ਦਿਸਦਾ ਹੈ? ਭਰਾ ਮੇਰਿਓ, ਸਾਨੂੰ ਸਰਪੰਚੀ ਵਿਚੋਂ ਬਹੁਤ ਕੁਝ ਦਿਸਦੈ | ਭਾਵ ਸਾਨੂੰ ਪੰਚਾਇਤ ਦੀ ਸੱਠ ਕਿੱਲੇ ਝੋਟੇ ਦੇ ਸਿਰ ਵਰਗੀ ਜ਼ਮੀਨ ਦਿਸਦੀ ਹੈ | ਸਰਪੰਚ ਬਣਨ ਉਪਰੰਤ ਆਪਾਂ ਇਹ ਜ਼ਮੀਨ ਠੇਕੇ 'ਤੇ ਦਿਆ ਕਰਾਂਗੇ ਤੇ ਬੇ-ਝਿਜਕ ਹੋ ਕੇ ਇਹ ਠੇਕਾ ਛਕਿਆ ਕਰਾਂਗੇ | ਜੇ ਮੰਤਰੀ ਜੀ ਨਾਲ ਮਿਲ-ਮਿਲਾ ਕੇ ਪੰਦਰਾਂ ਵੀਹ ਕਿੱਲਿਆਂ 'ਤੇ ਪੱਕਾ ਕਬਜ਼ਾ ਹੀ ਹੋ ਜਾਵੇ ਫੇਰ ਤਾਂ ਆਪਣੀਆਂ ਪੰਜੇ ਹੀ ਘਿਓ ਵਿਚ ਹੋ ਜਾਣਗੀਆਂ | ਸਾਨੂੰ ਸਰਕਾਰ ਵਲੋਂ ਆਉਣ ਵਾਲੀਆਂ ਗਰਾਂਟਾਂ ਦਿਸਦੀਆਂ ਹਨ, ਜੀਹਦੇ ਵਿਚੋਂ ਬੁਰਕੀ ਕੁ ਪੰਚਾਇਤ ਸੈਕਟਰੀ ਨੂੰ , ਬੁਰਕੀ ਕੁ ਪੰਚਾਇਤ ਅਫ਼ਸਰ ਨੂੰ , ਡੇਢ ਕੁ ਬੁਰਕੀ ਐਮ. ਐਲ. ਏ. ਸਾਅਬ ਨੂੰ ਦੇ ਬਾਕੀ ਸਾਰੀ ਗਰਾਂਟ ਆਪਾਂ ਡਕਾਰ ਜਾਇਆ ਕਰਾਂਗੇ | ਸਾਨੂੰ ਪਿੰਡ ਦਾ ਪੰਦਰਾਂ ਕਿੱਲਿਆਂ ਵਾਲਾ ਵਿਸ਼ਾਲ ਛੱਪੜ ਦਿਸਦਾ ਹੈ | ਇਸ ਵਿਚ ਆਪਾਂ ਚੰਗੀ ਨਸਲ ਦੀਆਂ ਮੱਛੀਆਂ ਪਾਲਿਆ ਕਰਾਂਗੇ ਤੇ ਵਾਧੂ ਨੋਟ ਛਾਪਿਆ ਕਰਾਂਗੇ | ਸਾਡਾ ਪਿੰਡ ਸੁੱਖ ਨਾਲ ਬਹੁਤ ਵੱਡਾ ਹੈ | ਉਸ ਹਿਸਾਬ ਨਾਲ ਇੱਥੇ ਬੁਢਾਪਾ ਪੈਨਸ਼ਨਾਂ ਵੀ ਬਹੁਤ ਆਉਂਦੀਆਂ ਹੋਣਗੀਆਂ | ਬਜ਼ੁਰਗਾਂ ਦੇ ਕਾਗਜ਼ਾਂ 'ਤੇ ਅੰਗੂਠੇ ਲੁਆ ਉਨ੍ਹਾਂ ਦੀ ਅੱਧ-ਪਚੱਧੀ ਪੈਨਸ਼ਨ ਆਪਾਂ ਹਜ਼ਮ ਕਰ ਜਾਇਆ ਕਰਾਂਗੇ | ਸਰਕਾਰੀ ਸਕੂਲਾਂ ਵਿਚ ਵੀ ਚੰਗੀਆਂ ਗਰਾਂਟਾਂ ਆ ਜਾਂਦੀਆਂ ਹਨ | ਸਕੂਲ ਕਮੇਟੀ ਦਾ ਧੱਕੇ ਨਾਲ ਚੇਅਰਮੈਨ ਬਣ ਨਾਲੇ ਤਾਂ 'ਚੇਅਰਮੈਨ' ਵਾਲੀ ਲਾਲ ਪਲੇਟ ਆਪਣੀ ਗੱਡੀ ਦੇ ਅੱਗੇ ਲਗਾਇਆ ਕਰਾਂਗੇ ਤੇ ਨਾਲੇ ਅਧਿਆਪਕਾਂ ਨੂੰ ਦਬਕੇ ਮਾਰ ਸਕੂਲ ਦੀ ਗਰਾਂਟ ਛਕਿਆ ਕਰਾਂਗੇ | ਨਰੇਗਾ ਵਿਚੋਂ ਵੀ ਕਦੇ-ਕਦਾਈਾ ਆਪਾਂ ਦਾਅ ਮਾਰ ਲਿਆ ਕਰਾਂਗੇ | ਨਾਲੇ ਇੱਥੇ ਕੌਣ ਪੁੱਛਦੈ- ਅੰਨ੍ਹੀਂ ਪੀਂਹਦੀ ਐ ਤੇ ਕੁੱਤੇ ਚੱਟੀ ਜਾਂਦੇ ਐ | ਤਾਹੀਂ ਤਾਂ ਆਪਾਂ ਮੁੱਠੀਆਂ ਵਿਚ ûੱਕੀ ਫਿਰਦੇ ਹਾਂ ਕਿ ਐਤਕੀਂ ਆਪਾਂ ਸਰਪੰਚੀ ਨਹੀਂ ਛੱਡਣੀ – ਸਰੀਰ ਭਾਵੇਂ ਛੱਡ ਦੇਈਏ |

-ਸੁਤੰਤਰਤਾ ਸੰਗਰਾਮੀ ਨਿਵਾਸ, ਅਬੋੋਹਰ ਰੋਡ, ਗਲੀ ਨੰਬਰ 12, ਸ੍ਰੀ ਮੁਕਤਸਰ ਸਾਹਿਬ | -ਮੋਬਾਈਲ : 94176 71364

ਸਿੱਧੂ ਤੋਂ ਸਾਊਥ ਇੰਡੀਆ

ਹੁਣੇ-ਹੁਣੇ ਇਕ ਵਾਰ ਫਿਰ ਪੰਜਾਬ ਦੇ ਕਾਂਗਰਸੀ ਨੇਤਾ, ਪੰਜਾਬ ਸਰਕਾਰ ਦੇ ਮੰਤਰੀ ਸ੍ਰੀ ਸਿੱਧੂ ਸਾਹਬ ਨੇ ਦੇਸ਼ ਦੇ ਇਕ ਦੱਖਣੀ ਖਿੱਤੇ ਤਾਮਿਲਨਾਡੂ ਨਾਲ, ਮੁਕਾਬਲਾ ਕਰਦਿਆਂ ਇਉਂ ਕਹਿ ਦਿੱਤਾ ਹੈ ਕਿ ਦੱਖਣ ਭਾਰਤ 'ਚ ਉਨ੍ਹਾਂ ਨੂੰ ਨਾ ਤਾਂ ਉਨ੍ਹਾਂ ਦੇ ਵਾਸੀਆਂ ਦੀ ਬੋਲੀ ਸਮਝ ਆਉਂਦੀ ਹੈ, ਨਾ ਹੀ ਉਨ੍ਹਾਂ ਦਾ ਖਾਣਾ ਪਸੰਦ ਆਉਂਦਾ ਹੈ, ਭਲਾ ਕੌਣ ਇਡਲੀਆਂ ਖਾਏ...? ਪਰ ਪਾਕਿਸਤਾਨ ਦੀ ਸਿਫ਼ਤ ਕਰਦਿਆਂ ਉਨ੍ਹਾਂ ਕਿਹਾ ਕਿ ਉਥੇ ਲੋਕਾਂ ਦੀ ਬੋਲੀ ਪੰਜਾਬੀ ਹੈ, ਖਾਣਾ ਪੰਜਾਬੀ ਹੈ, ਬਿਲਕੁਲ ਆਪਣੇ ਪੰਜਾਬ ਵਰਗਾ, ਇਸ ਲਈ ਉਥੇ ਜਾਣਾ ਬਹੁਤ ਚੰਗਾ ਲਗਦਾ ਹੈ |
ਇਥੇ ਦੱਸ ਦਈਏ ਕਿ ਤਾਮਿਲਨਾਡੂ 'ਚ ਵੀ ਗੁਰੂ ਨਾਨਕ ਪਾਤਸ਼ਾਹ ਜੀ ਨੇ ਚਰਨ ਪਾਏ ਸਨ ਤੇ ਇਥੇ ਵੀ ਇਕ ਲਾਂਘਾ ਹੈ, ਜਿਥੋਂ ਉਹ ਸ੍ਰੀਲੰਕਾ 'ਚ ਗਏ ਸਨ |
ਰਾਮੇਸ਼ਵਰਮ... ਇਹ ਸ਼ਹਿਰ ਹੈ ਜਿਥੋਂ ਅੱਜ ਵੀ, ਜਿਸ ਕਿਸੇ ਨੇ ਸ੍ਰੀਲੰਕਾ ਜਾਣਾ ਹੋਵੇ, ਜੈਟੀ ਤੇ ਬੇੜੀਆਂ 'ਤੇ ਸਵਾਰ ਹੋ ਕੇ ਸ੍ਰੀਲੰਕਾ ਜਾਂਦੇ ਹਨ |
ਸਵਰਗੀ ਸ: ਸੁਰਜੀਤ ਸਿੰਘ ਬਰਨਾਲਾ ਤਾਮਿਲਨਾਡੂ ਦੇ ਗਵਰਨਰ ਸਨ, ਉਨ੍ਹਾਂ ਨੂੰ ਪਤਾ ਲੱਗਾ ਕਿ ਰਾਮੇਸ਼ਵਰਮ 'ਚ ਉਸ ਥਾਂ ਦਾ ਜਿਥੇ ਸ੍ਰੀਲੰਕਾ ਜਾਣ ਤੋਂ ਪਹਿਲਾਂ ਗੁਰੂ ਨਾਨਕ ਦੇਵ ਜੀ ਰੁਕੇ ਸਨ | ਉਥੇ ਇਕ ਛੋਟੇ ਜਿਹੇ ਕਮਰੇ ਵਿਚ ਕਈ ਸਾਲਾਂ ਤੋਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬੀੜ ਸਾਹਿਬ ਦੀ ਸੇਵਾ ਸੰਭਾਲ ਇਕ ਤਾਮਿਲ ਹੀ ਕਰਦਾ ਸੀ | ਉਹਦਾ ਪਹਿਰਾਵਾ ਲੋਕਲ ਤਾਮਿਲਾਂ ਵਰਗਾ ਹੀ ਸੀ ਪਰ ਸੇਵਾ ਕਰਦਿਆਂ ਉਹ ਸਿਰ ਜ਼ਰੂਰ ਢਕਦਾ ਸੀ | ਸ੍ਰੀ ਗੁਰੂ ਨਾਨਕ ਦੇਵ ਜੀ ਦਾ ਨਾਂਅ ਵੀ ਉਹਨੂੰ ਯਾਦ ਸੀ | ਇਹ ਸਮਾਚਾਰ ਗਵਰਨਰ ਸ: ਬਰਨਾਲਾ ਪਾਸ ਵੀ ਪਹੁੰਚਿਆ, ਉਹ ਆਪ ਉਸ ਸਥਾਨ 'ਤੇ ਗਏ, ਉਸ ਵੇਲੇ ਤਾਮਿਲਨਾਡੂ ਦੇ ਮੁੱਖ ਮੰਤਰੀ ਸਵਰਗੀ ਕਰੁਣਾਨਿਧੀ ਜੀ ਸਨ | ਬਰਨਾਲਾ ਜੀ ਨੇ ਕਰੁਣਾਨਿਧੀ ਨਾਲ ਗੱਲ ਕੀਤੀ ਤੇ ਉਨ੍ਹਾਂ ਉਸੇ ਵੇਲੇ ਹੀ ਗੁਰੂ ਬਾਬਾ ਨਾਨਕ ਦੇਵ ਜੀ ਦੇ ਉਸ ਸਥਾਨ 'ਤੇ ਉਨ੍ਹਾਂ ਦੀ ਯਾਦ 'ਚ ਸਮਰਪਿਤ ਗੁਰਦੁਆਰਾ ਸਾਹਿਬ ਉਸਾਰਨ ਲਈ ਰਾਮੇਸ਼ਵਰਮ ਵਿਖੇ ਚਾਰ ਏਕੜ ਜ਼ਮੀਨ ਅਲਾਟ ਕਰ ਦਿੱਤੀ | ਮਦਰਾਸ ਦੀ ਕੋਇੰਬਟੂਰ ਤੇ ਬੰਗਲੌਰ ਦੀ ਸਿੱਖ ਸੰਗਤ ਨੇ ਮਿਲ ਕੇ ਉਥੇ ਇਕ ਸੰੁਦਰ ਗੁਰਦੁਆਰਾ ਸਾਹਿਬ ਦੀ ਇਮਾਰਤ ਖੜ੍ਹੀ ਕਰ ਦਿੱਤੀ | ਇਹ ਗੁਰਦੁਆਰਾ ਸਾਹਿਬ ਇਨ੍ਹੀਂ ਦਿਨੀਂ ਤੀਰਥ ਸਥਾਨ ਹੈ | ਤਾਮਿਲ ਯੂਨੀਵਰਸਿਟੀ 'ਚ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ ਨਾਂਅ 'ਤੇ ਇਕ ਚੇਅਰ ਵੀ ਸਥਾਪਤ ਹੈ | ਤਾਮਿਲਨਾਡੂ ਦਾ ਕਿਹੜਾ ਸ਼ਹਿਰ ਹੈ, ਜਿਥੇ ਪੰਜਾਬੀ, ਹਿੰਦੂ ਸਿੱਖਾਂ ਦੀ ਵਸੋਂ ਨਹੀਂ ਹੈ? ਇਹ ਇਉਂ ਤਾਮਿਲ ਲੋਕਾਂ ਨਾਲ ਰਚਮਿਚ ਗਏ ਹਨ ਜਿਵੇਂ ਦੁੱਧ ਵਿਚ ਖੰਡ ਘੁਲੀ ਹੋਵੇ | ਇਥੇ ਵਸੇ ਸਾਰੇ ਪੰਜਾਬੀ, ਹਿੰਦੂ ਅਤੇ ਸਿੱਖ ਰੱਜੇ-ਪੁੱਜੇ ਹਨ, ਇਨ੍ਹਾਂ ਦੇ ਵਪਾਰ ਚੰਗੇ ਚੱਲ ਰਹੇ ਹਨ, ਰਹਿਣ-ਬਹਿਣ, ਸੁਖਾਵਾਂ ਹੈ, ਇਨ੍ਹਾਂ ਦੇ ਬੱਚੇ ਸਭੇ ਇਡਲੀਆਂ, ਡੋਸੇ ਖਾ ਕੇ ਖੁਸ਼ ਹਨ, ਉਹ ਰੋਟੀਆਂ ਦੀ ਥਾਂ ਚੌਲ ਖਾਣ ਦੇ ਆਦੀ ਹੋ ਗਏ ਹਨ | ਫ਼ੌਜ ਵਿਚ ਵੀ, ਮਦਰਾਸ ਰਜਮੈਂਟ ਤੇ ਸਿੱਖ ਰਜਮੈਂਟ ਵਿਚ ਤਾਮਿਲ-ਮਦਰਾਸੀ ਫ਼ੌਜੀ ਤੇ ਸਿੱਖ ਫ਼ੌਜੀ ਆਪਸ 'ਚ ਐਨੇ ਪਿਆਰ-ਸਤਿਕਾਰ ਨਾਲ ਰਹਿੰਦੇ ਹਨ ਕਿ ਇਹ ਪ੍ਰੇਮ ਪਿਆਰ ਦੀ ਮਿਸਾਲ ਹਨ | ਪੰਜਾਬੀਆਂ ਦੇ ਬੱਚੇ ਇਉਂ ਤਾਮਿਲ ਬੋਲਦੇ ਹਨ ਕਿ ਤਾਮਿਲ ਲੋਕ ਵੀ ਹੈਰਾਨ ਰਹਿ ਜਾਂਦੇ ਹਨ | ਸੱਭਿਆਚਾਰ ਦਾ ਵੀ ਆਦਾਨ-ਪ੍ਰਦਾਨ ਹੈ | ਜੇਕਰ ਤਾਮਿਲ ਘਰਾਂ 'ਚੋਂ ਇਡਲੀਆਂ ਡੋਸੇ ਆਉਂਦੇ ਹਨ ਤਾਂ ਪੰਜਾਬੀਆਂ ਦੇ ਘਰੋਂ ਉਨ੍ਹਾਂ ਲਈ ਆਲੂ ਤੇ ਗੋਭੀ ਦੇ ਭਰਵੇਂ ਪਰੌਾਠੇ ਤੇ ਦਹੀਂ ਭੇਜੇ ਜਾਂਦੇ ਹਨ | ਮਦਰਾਸ, ਅੱਜ ਜਿਹਨੂੰ ਚੇਨਈ ਕਹਿੰਦੇ ਹਨ, ਕੋਇੰਬਟੋਰ, ਤਿ੍ਚਨਾਪਲੀ, ਤਿ੍ਪੁਰਾ, ਆਦਿ ਸਭੇ ਸ਼ਹਿਰਾਂ ਵਿਚ ਗੁਰਦੁਆਰੇ ਸਥਾਪਤ ਹਨ | ਇਨ੍ਹਾਂ 'ਚ ਮੱਥਾ ਟੇਕਣ ਤਾਮਿਲੀਅਨ ਵੀ ਆਉਂਦੇ ਹਨ | ਸੋਚੋ, ਸਿੱਧੂ ਸਾਹਬ ਦੇ ਇਕ ਬੋਲ ਨੇ ਕਿੰਨੀ ਠੇਸ ਪਹੁੰਚਾਈ ਹੋਵੇਗੀ, ਐਨੇ ਮਿਲਣਸਾਰ ਲੋਕਾਂ ਨੂੰ ?
ਪੰਜਾਬ ਦੇ ਉਹ ਸੱਭਿਆਚਾਰਕ ਮਾਮਲਿਆਂ ਦੇ ਮੰਤਰੀ ਹਨ, ਸ੍ਰੀ ਗੁਰੂ ਨਾਨਕ ਦੇਵ ਜੀ ਨੂੰ , ਉਨ੍ਹਾਂ ਸ੍ਰੀਲੰਕਾ ਯਾਤਰਾ ਨੂੰ ਸਮਰਪਿਤ ਜਿਹੜਾ ਗੁਰਦੁਆਰਾ ਸਾਹਿਬ ਰਾਮੇਸ਼ਵਰਮ ਵਿਖੇ, ਤਾਮਿਲਨਾਡੂ ਦੇ ਵਾਸੀਆਂ ਵਲੋਂ ਐਨੀ ਸ਼ਰਧਾ ਨਾਲ ਸਿੱਖਾਂ ਨੂੰ ਭੇਟ ਕੀਤਾ ਗਿਆ ਹੈ, ਉਹਦਾ ਕੋਈ ਦੇਣਾ ਦੇ ਸਕਦਾ ਹੈ? ਮੰਤਰੀ ਸਾਹਬ ਨੂੰ ਚਾਹੀਦਾ ਤਾਂ ਇਹ ਹੈ ਕਿ ਪੰਜਾਬ, ਦਿੱਲੀ ਤੇ ਹੋਰ ਥਾੲੀਂ ਵਸੇ ਪੰਜਾਬੀਆਂ ਤੇ ਸਿੱਖਾਂ ਨੂੰ , ਰਾਮੇਸ਼ਵਰਮ ਦੇ ਇਸ ਇਤਿਹਾਸਕ ਗੁਰਦੁਆਰਾ ਸਾਹਿਬ ਦੇ ਦਰਸ਼ਨ ਕਰਨ ਦੀ ਪ੍ਰੇਰਨਾ ਦੇਣ, ਕਿਉਂਕਿ ਇਥੇ ਕੋਈ 'ਲਾਂਘਾ' ਨਹੀਂ ਹੈ, ਜਿਹੜਾ ਕਿਸੇ ਸਰਕਾਰ ਨੇ ਬੰਦ ਕੀਤਾ ਹੋਵੇ ਜਾਂ ਜਿਸ ਦੇ ਖੋਲ੍ਹਣ ਦੀ ਆਗਿਆ ਲੈਣੀ ਪਏ |
ਨਾਨਕ ਫਿਕਾ ਬੋਲੀਏ,
ਤਨ ਮਨ ਫਿਕਾ ਹੋਏ |
ਇਡਲੀ ਫਿਕੀ ਹੁੰਦੀ ਹੈ ਤਾਂ ਆਪਣੇ ਦੇਸ਼ ਵਾਸੀਆਂ ਦੀ ਸ਼ਹਿਦ ਨਾਲੋਂ ਮਿੱਠੀ | ਕਿਸੇ ਹੋਰ ਦੀ ਮਤ ਨਾ ਮੰਨੋ, ਬਾਬਾ ਨਾਨਕ ਜੀ ਦੀ ਸਲਾਹ ਹੀ ਮੰਨ ਲਓ, ਐਨਾ ਫਿੱਕਾ ਬੋਲਣ ਦੀ ਕੀ ਲੋੜ ਸੀ?
'ਮੀ ਟੂ'
ਇਥੇ ਮੰੁਬਈ 'ਚ ਮਸ਼ਹੂਰ ਹੈ, ਬਾਲੀਵੁੱਡ | ਬਾਲੀਵੁੱਡ, ਹਾਲੀਵੁੱਡ ਦੀ ਨਕਲ ਹੈ, ਹਾਲੀਵੁੱਡ, ਲਾਸਏਾਜਲਸ, ਅਮਰੀਕਾ ਵਿਖੇ ਸਥਿਤ ਹੈ, ਉਥੇ ਵਧੇਰੇ ਕਰਕੇ ਅੰਗਰੇਜ਼ੀ ਵਿਚ ਫ਼ਿਲਮਾਂ ਬਣਦੀਆਂ ਹਨ ਤੇ ਮੰੁਬਈ ਦੇ ਬਾਲੀਵੁੱਡ ਵਿਖੇ ਮੁੱਖ ਤੌਰ 'ਤੇ ਹਿੰਦੀ ਫਿਲਮਾਂ ਬਣਦੀਆਂ ਹਨ ਅਤੇ ਕਈ ਹੋਰ ਪ੍ਰਾਂਤਕ ਭਾਸ਼ਾਵਾਂ ਦੀਆਂ ਵੀ |
ਹਾਲੀਵੁੱਡ 'ਚ ਵੀ ਦੂਰ-ਦੁਰੇਡੇ ਸ਼ਹਿਰਾਂ, ਪਿੰਡਾਂ ਤੋਂ, ਮੰੁਡੇ-ਕੁੜੀਆਂ ਹੀਰੋ-ਹੀਰੋਇਨਾਂ ਬਣਨ ਦੀ ਲੋਚ ਵਿਚ ਆਉਂਦੇ ਹਨ ਤੇ ਇਥੇ ਮੰੁਬਈ ਦੇ ਬਾਲੀਵੁੱਡ ਵਿਚ ਤਾਂ ਸਮਝੋ ਹੁਸਨ ਦਾ ਦਰਿਆ ਵਹਿੰਦਾ ਹੈ, ਬੇਸ਼ੱਕ ਇਥੇ ਸਮੰੁਦਰ ਹੈ ਪਰ ਇਹ ਦਰਿਆ ਨਾ ਸਮੰੁਦਰ 'ਚ ਜਾ ਰਲਦਾ ਹੈ ਨਾ ਕਦੇ ਸੁਕਦਾ ਹੈ, ਇਹ ਤਾਂ ਨਿਰੰਤਰ ਵਹਿੰਦਾ ਹੀ ਰਹਿੰਦਾ ਹੈ | ਸੋ...
ਪਰਦੇ ਮੇਂ ਰਹਿਨੇ ਦੋ
ਪਰਦਾ ਜੋ ਉਠ ਗਇਆ ਤੋ
ਭੇਦ ਖੁਲ੍ਹ ਜਾਏਗਾ
ਅਲਾਹ ਮੇਰੀ ਤੌਬਾ
ਮੌਲਾ ਮੇਰੀ ਤੌਬਾ |
ਕਾਸਟਿੰਗ ਕਾਊਚ, ਹਾਲੀਵੁੱਡ ਵਿਚ ਵੀ ਹੈ ਤੇ ਬਾਲੀਵੁੱਡ ਵਿਚ ਤਾਂ ਬੜਾ ਪ੍ਰਸਿੱਧ ਹੈ | ਕਾਸਟਿੰਗ ਕਾਊਚ ਅਗਨੀ ਪ੍ਰੀਖਸ਼ਾ ਹੈ | ਇਕ ਦੋ ਸਾਲ ਹੋਏ, ਬਾਲੀਵੁੱਡ 'ਚ ਅਚਾਨਕ ਇਕ ਉਬਾਲ ਉੱਠਿਆ, ਕਈ ਕਹਿੰਦੀਆਂ ਕਹਾਉਂਦੀਆਂ ਹੀਰੋਇਨਾਂ ਨੇ ਕਈ ਕਹਿੰਦੇ ਕਹਾਉਂਦੇ ਐਕਟਰਾਂ, ਡਾਇਰੈਕਟਰਾਂ ਆਦਿ ਦੇ ਪਰਦੇ ਚੱਕੇ, ਖੁੱਲ੍ਹ ਕੇ ਦੱਸਿਆ ਕਿ ਉਨ੍ਹਾਂ ਦਾ ਸਰੀਰਕ ਸ਼ੋਸ਼ਣ ਉਨ੍ਹਾਂ ਕਿਹੜੇ ਸੰਨ 'ਚ, ਕਿਹੜੇ ਵੇਲੇ, ਕਿਹੜੀ ਥਾਂ 'ਤੇ ਕਿੱਦਾਂ ਕੀਤਾ ਸੀ | ਬਸ ਹਨੇਰੀ ਵਗ ਪਈ, 'ਮੀ ਟੂ' (ਮੇਰੇ ਨਾਲ ਵੀ ਇਦਾਂ ਹੀ ਹੋਇਆ, ਗੁਨਾਹਗਾਰ ਫਲਾਣਾ ਹੈ) ਸ਼ੁਰੂ ਹੋ ਗਿਆ | ਹਿੰਮਤ ਆ ਗਈ, ਸੱਚ ਕਹਿਣ ਦੀ ਔਰਤਾਂ ਨੂੰ |
ਇਹ ਹਵਾ ਹਾਲੀਵੁੱਡ ਤੋਂ ਵਗਦੀ ਆ ਪਹੁੰਚੀ ਬਾਲੀਵੁੱਡ 'ਚ ਵੀ | ਇਥੇ ਵੀ ਆਪਣੇ-ਆਪ 'ਤੇ ਪਾਏ ਪਰਦੇ, ਪਰ੍ਹਾਂਹ ਸੁੱਟ ਕੇ ਬੀਬੀਆਂ 'ਚੋਂ ਸਭ ਤੋਂ ਪਹਿਲਾਂ ਦਸ ਸਾਲ ਮਗਰੋਂ ਤਨੂਸ੍ਰੀ ਹੀਰੋਇਨ ਨੇ ਐਕਟਰ ਨਾਨਾ ਪਾਟੇਕਰ ਦਾ ਚਿੱਠਾ ਖੋਲਿ੍ਹਆ, ਫਿਰ ਤਾਂ ਮੀ ਟੂ (ਮੈਂ ਵੀ, ਮੈਂ ਵੀ) ਸ਼ੁਰੂ ਹੋ ਗਿਆ | ਸੁਭਾਸ਼ ਘਈ ਤੋਂ ਲੈ ਕੇ, ਚੇਤੰਨ ਭਗਤ, ਅਲੋਕ ਨਾਥ, ਸਾਜਿਦ ਖ਼ਾਨ... ਕਈ ਤੜਫੇ, ਪਰ ਮੀ ਟੂ (ਮੈਂ ਵੀ ਮੈਂ ਵੀ) ਹਰ ਦਿਨ ਨਵਾਂ ਤੋਂ ਨਵਾਂ ਨਾਂਅ ਸਾਹਮਣੇ ਆ ਰਿਹਾ ਹੈ | ਖੂਬ ਮਨੋਰੰਜਨ ਦੇ ਰਿਹਾ ਹੈ | ਅੱਜਕਲ੍ਹ ਇਕ ਹੋਰ ਮਜ਼ੇਦਾਰ ਚੱਕਰ ਚੱਲ ਰਿਹਾ ਹੈ, ਫ਼ਿਲਮਾਂ ਦੇ ਹਰ ਖੇਤਰ 'ਚ ਕੰਮ ਕਰ ਰਹੇ, ਦੋਸਤ, ਇਕ-ਦੂਜੇ ਨੂੰ ਫੋਨ ਕਰਕੇ ਪੁੱਛ ਰਹੇ ਹਨ, 'ਅਰੇ ਤੂੰ ਭੀ 'ਮੀ ਟੂ' | ਸੁਹੇਲ ਸੇਠ ਵੀ ਫਸਿਆ ਹੈ, ਜਿਹੜੇ ਮਰ ਗਏ ਹਨ, ਉਹ ਬਚ ਗਏ ਹਨ | ਹੁਣ ਸੰਗੀਤਕਾਰ ਅਨੂ ਮਲਿਕ ਵੀ ਮੀ-ਟੂ ਹੋ ਗਿਆ ਹੈ | ਕੁਝ ਦਿਨ ਪਹਿਲਾਂ ਤਦ ਤਾਂ 'ਆਪੇ ਬਣੇ ਰੱਬ ਦੇ ਖਾਸ ਬੰਦੇ' ਬਾਬੇ ਤੇ ਸਵਾਮੀ ਇਸ ਮਾਮਲੇ 'ਚ ਪਰਦਾ ਖੁੱਲ੍ਹਣ 'ਤੇ, ਬਾਪੂ ਆਸਾ ਰਾਮ, ਰਾਮ ਪਾਲ, ਬਾਬਾ ਰਾਮ ਰਹੀਮ, ਫਲਹਾਰ ਬਾਬਾ ਆਦਿ ਕਿੰਨੇ ਹੀ ਬਾਬੇ ਮੀ ਟੂ (M5 TOO) 'ਚ ਫਸੇ ਸਨ, ਹੁਣ ਬਾਲੀਵੁੱਡ ਦੇ ਬਾਬਿਆਂ ਦੀ ਵਾਰੀ ਆਈ ਹੈ |
ਹਾਲੀਵੁੱਡ, ਹਾਲੀਵੁੱਡ, ਇੰਡੀਆ ਦੇ ਬਾਬੇ ਤੇ ਬਾਲੀਵੁੱਡ+ME TOO ME TOO YOU TOO, YOU TOO.
••

ਰਿਸ਼ਤੇ

(ਲੜੀ ਜੋੜਨ ਪਿਛਲੇ ਐਤਵਾਰ ਦਾ ਅੰਕ ਦੇਖੋ)
• ਕਹਿੰਦੇ ਹਨ ਕਿ ਰਿਸ਼ਤੇ ਨਸ਼ਾ ਬਣ ਜਾਂਦੇ ਹਨ, ਕੋਈ ਕਹਿੰਦਾ ਹੈ ਕਿ ਰਿਸ਼ਤੇ ਸਜ਼ਾ ਬਣ ਜਾਂਦੇ ਹਨ, ਪਰ ਰਿਸ਼ਤੇ ਨਿਭਾਓ ਸੱਚੇ ਦਿਲ ਨਾਲ ਤਾਂ ਰਿਸ਼ਤੇ ਹੀ ਜਿਊਣ ਦੀ ਵਜ੍ਹਾ ਬਣ ਜਾਂਦੇ ਹਨ |
• ਰਿਸ਼ਤੇ ਦੂਰ ਰਹਿਣ ਨਾਲ ਟੁੱਟਦੇ ਨਹੀਂ ਤੇ ਕੋਲ ਰਹਿਣ 'ਤੇ ਜੁੜਦੇ ਨਹੀਂ | ਪਰ ਅਹਿਸਾਸ ਇਕ ਅਜਿਹੀ ਚੀਜ਼ ਹੈ, ਜੋ ਆਪਣਿਆਂ ਨੂੰ ਆਪਣੇ ਨਾਲ ਜੋੜੀ ਰੱਖਦਾ ਹੈ |
• ਨਿਯਮਾਂ 'ਚ ਬੰਨ੍ਹਣ ਨਾਲ ਰਿਸ਼ਤੇ ਨਹੀਂ ਚਲਦੇ |
• ਕਈ ਵਾਰੀ ਤੁਹਾਨੂੰ ਰਿਸ਼ਤਿਆਂ ਨੂੰ ਜਾਂ ਦੂਸਰਿਆਂ ਨੂੰ ਬਚਾਉਣ ਲਈ ਆਪਣਾ ਇਕ ਕਦਮ ਪਿੱਛੇ ਹਟਾਉਣਾ ਪੈਂਦਾ ਹੈ |
• ਜੇ ਹਾਲਾਤ 'ਤੇ ਪਕੜ ਮਜ਼ਬੂਤ ਹੋਵੇ ਤਾਂ ਜ਼ਹਿਰ ਉਗਲਣ ਵਾਲੇ ਵੀ ਸਾਡਾ ਕੁਝ ਨਹੀਂ ਵਿਗਾੜ ਸਕਦੇ |
• ਸਬੰਧਾਂ ਨੂੰ ਏਨਾ ਨਾ ਵਿਗਾੜੋ ਕਿ ਸੁਲ੍ਹਾ ਦੀ ਗੰੁਜਾਇਸ਼ ਹੀ ਨਾ ਬਚੇ |
• ਦੁਨੀਆ ਵਿਚ ਹਜ਼ਾਰਾਂ ਰਿਸ਼ਤੇ ਬਣਾਓ ਪਰ ਉਨ੍ਹਾਂ ਰਿਸ਼ਤਿਆਂ ਵਿਚੋਂ ਇਕ ਰਿਸ਼ਤਾ ਇਸ ਤਰ੍ਹਾਂ ਦਾ ਬਣਾਓ ਕਿ ਜਦੋਂ ਹਜ਼ਾਰਾਂ ਤੁਹਾਡੇ ਖਿਲਾਫ਼ ਹੋਣ, ਉਸ ਵੇਲੇ ਉਹ ਤੁਹਾਡੇ ਨਾਲ ਹੋਵੇ |
• ਵਿਸ਼ਵਾਸ ਹੀ ਰਿਸ਼ਤਿਆਂ ਦੀ ਸੰਜੀਵਨੀ ਹੈ |
• ਇੰਟਰਨੈੱਟ ਨਵੇਂ ਯੁੱਗ ਦੀਆਂ ਰਿਸ਼ਤੇਦਾਰੀਆਂ ਦਾ ਵਿਚੋਲਾ ਬਣ ਗਿਆ ਹੈ |
• ਅਨਮੋਲ ਰਿਸ਼ਤੇ ਨੂੰ ਬਚਾਅ ਕੇ ਰੱਖਣ ਲਈ ਕੋਈ ਵੀ ਕੀਮਤ ਅਦਾ ਕਰਨੀ ਪਵੇ ਤਾਂ ਉਹ ਥੋੜ੍ਹੀ ਹੀ ਹੋਵੇਗੀ |
• ਸਿਆਣੇ ਕਹਿੰਦੇ ਹਨ ਕਿ ਲਾਠੀਆਂ ਨਾਲ ਹੱਡੀਆਂ ਟੁੱਟ ਜਾਂਦੀਆਂ ਹਨ ਪਰ ਕੌੜੇ ਅਤੇ ਕੁਰੱਖਤ ਬੋਲਾਂ ਨਾਲ ਰਿਸ਼ਤੇ ਟੁੱਟ ਜਾਂਦੇ ਹਨ | ਇਹ ਵੀ ਕਹਿੰਦੇ ਹਨਕਿ ਤਲਵਾਰ ਦਾ ਫਟ ਤਾਂ ਕੁਝ ਸਮੇਂ ਬਾਅਦ ਭਰ ਜਾਂਦਾ ਹੈ ਪਰ ਕਿਸੇ ਦੇ ਕਹੇ ਬੋਲਾਂ ਦੇ ਜ਼ਖ਼ਮ ਉਮਰ ਭਰ ਟੀਸ ਦਿੰਦੇ ਰਹਿੰਦੇ ਹਨ |
• ਚੰਗਾ ਰਿਸ਼ਤਾ 'ਮੈਂ' ਮੁਕਾ ਕੇ 'ਅਸੀਂ' ਨੂੰ ਜਗਾਉਣ ਦਾ ਨਾਂਅ ਹੈ |
• ਰਿਸ਼ਤਾ ਕੋਈ ਵੀ ਹੋਵੇ, ਇਹ ਉਦੋਂ ਤੱਕ ਹੀ ਨਿਭਦਾ ਹੈ, ਜਦੋਂ ਤੱਕ ਤਮੀਜ਼ ਦੇ ਘੇਰੇ ਵਿਚ ਰਹਿ ਕੇ ਵਿਹਾਰ ਕੀਤਾ ਜਾਂਦਾ ਹੈ |
• ਜੇ ਕੋਈ ਆਪਣਾ ਰੁੱਸ ਜਾਵੇ ਤਾਂ ਉਸ ਨੂੰ ਉਦੋਂ ਹੀ ਮਨਾ ਲਵੋ, ਦੇਖਿਓ ਕਿਤੇ ਜਿੱਦ ਦੀ ਜੰਗ ਵਿਚ ਦੂਰੀਆਂ ਹੀ ਨਾ ਜਿੱਤ ਜਾਣ |
• ਰਿਸ਼ਤਾ ਡੰੂਘਾ ਹੋਵੇ ਜਾਂ ਨਾ ਹੋਵੇ ਪਰ ਭਰੋਸਾ ਡੰੂਘਾ ਹੋਣਾ ਬਹੁਤ ਜ਼ਰੂਰੀ ਹੈ |
• ਰਿਸ਼ਤੇ ਕਦੇ ਆਪਣੇ-ਆਪ ਨਹੀਂ ਟੁੱਟਦੇ | ਹੰਕਾਰ, ਅਗਿਆਨ ਤੇ ਰਵੱਈਆ ਉਨ੍ਹਾਂ ਨੂੰ ਤੋੜ ਦਿੰਦੇ ਹਨ |
• ਸਾਨੂੰ ਉਨ੍ਹਾਂ ਅੱਗੇ ਝੁਕਣਾ ਚਾਹੀਦਾ ਹੈ ਜੋ ਰਿਸ਼ਤੇ ਬਚਾ ਕੇ ਖੁਸ਼ ਨੇ | ਉਨ੍ਹਾਂ ਅੱਗੇ ਨਹੀਂ ਜੋ ਸਾਨੂੰ ਝੁਕਾ ਕੇ ਖੁਸ਼ ਨੇ |
• ਯਕੀਨ ਤੋਂ ਵੱਡਾ ਕੋਈ ਰਿਸ਼ਤਾ ਨਹੀਂ ਹੈ ਅਤੇ ਸ਼ੱਕ ਤੋਂ ਵੱਡੀ ਕੋਈ ਪ੍ਰੇਸ਼ਾਨੀ ਨਹੀਂ ਹੈ | ਸਮਝਦਾਰੀ ਤੋਂ ਵੱਡਾ ਕੋਈ ਗੁਣ ਨਹੀਂ ਅਤੇ ਇੱਜ਼ਤ ਤੋਂ ਵੱਡੀ ਕੋਈ ਸ਼ੁਹਰਤ ਨਹੀਂ ਹੈ |
• ਬੇਸ਼ੱਕ ਵੱਡੇ-ਵੱਡੇ ਲੋਕਾਂ ਨਾਲ ਸਬੰਧ ਬਣਾਓ ਪਰ ਆਪਣੇ ਕਰੀਬੀਆਂ ਨੂੰ ਕਦੇ ਨਾ ਠੁਕਰਾਓ |
• ਰਿਸ਼ਤੇ ਦੀ ਕਦਰ ਵੀ ਪੈਸੇ ਦੀ ਤਰ੍ਹਾਂ ਕਰਨਾ ਸਿੱਖੋ ਕਿਉਂਕਿ ਦੋਵੇਂ ਕਮਾਉਣੇ ਔਖੇ ਆ ਪਰ ਗੁਆਉਣੇ ਬਹੁਤ ਸੌਖੇ ਆ |
• ਝੁਕਦਾ ਉਹੀ ਹੈ, ਜਿਸ ਨੂੰ ਰਿਸ਼ਤਿਆਂ ਦੀ ਕਦਰ ਹੋਵੇ |
• ਜਿਸ ਘਰ ਵਿਚ ਆਮਦਨ ਘੱਟ ਹੋਵੇ ਪਰ ਖਰਚੇ ਆਮਦਨ ਤੋਂ ਵੱਧ ਕੀਤੇ ਜਾਣ, ਜ਼ਿੰਮੇਵਾਰ ਮੈਂਬਰਾਂ ਨੂੰ ਨਸ਼ਾ, ਜੂਆ ਆਦਿ ਵਰਗੀਆਂ ਬੁਰੀਆਂ ਆਦਤਾਂ ਹੋਣ, ਮੁਕੱਦਮੇਬਾਜ਼ੀ ਚਲ ਰਹੀ ਹੋਵੇ | ਅਨੁਸ਼ਾਸਨ ਘਰ ਵਿਚੋਂ ਖੰਭ ਲਾ ਕੇ ਉੱਡ ਗਿਆ ਹੋਵੇ, ਕੋਈ ਵੀ ਮੈਂਬਰ ਸਮੇਂ ਦਾ ਪਾਬੰਦ ਨਾ ਹੋਵੇ ਤੇ ਮਿਹਨਤ ਕਰਨ ਦੀ ਕਿਸੇ ਨੂੰ ਆਦਤ ਹੀ ਨਾ ਹੋਵੇ ਤਾਂ ਅਜਿਹੇ ਘਰ ਵਿਚ ਰਿਸ਼ਤਿਆਂ ਨੂੰ ਨਿਭਾਉਣ ਵਿਚ ਭਾਰੀ ਦਿੱਕਤਾਂ, ਮੁਸ਼ਕਿਲਾਂ ਤੇ ਮੁਸੀਬਤਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ |

(ਬਾਕੀ ਅਗਲੇ ਐਤਵਾਰ ਦੇ ਅੰਕ 'ਚ)
-ਮੋਬਾਈਲ : 99155-63406.

ਮਿੰਨੀ ਕਹਾਣੀਆਂ

ਰਿਸ਼ਤਾ
ਸਾਡਾ ਮੈਥ ਪੜ੍ਹਾਉਣ ਵਾਲਾ ਸਰ ਬੜਾ ਸ਼ੈਤਾਨ ਹੈ | ਹਰ ਰੋਜ਼ ਪੰਜ-ਸੱਤ ਮਿੰਟ ਘੱਟ ਪੜ੍ਹਾਉਂਦੈ', ਲਵਲੀ ਨੇ ਆਪਣੀ ਮੰਮੀ ਕੋਲ ਆਪਣੇ ਟਿਊਸ਼ਨ ਵਾਲੇ ਅਧਿਆਪਕ ਦੀ ਗੱਲ ਕੀਤੀ |
'ਬੇਟੇ ਅਧਿਆਪਕ ਬਾਰੇ ਇਸ ਤਰ੍ਹਾਂ ਸਿੰਗੂਲਰ ਸ਼ਬਦਾਂ ਦਾ ਪ੍ਰਯੋਗ ਨਹੀਂ ਕਰੀਦਾ | ਅਧਿਆਪਕ ਗੁਰੂ ਹੁੰਦੇ ਹਨ ਅਤੇ ਵਿਦਿਆਰਥੀ ਚੇਲੇ ਹੁੰਦੇ ਹਨ | ਚੇਲੇ ਹਮੇਸ਼ਾ ਆਪਣੇ ਗੁਰੂਆਂ ਪ੍ਰਤੀ ਸਤਿਕਾਰਤ ਭਾਸ਼ਾ ਦਾ ਪ੍ਰਯੋਗ ਕਰਿਆ ਕਰਦੇ ਹਨ | ਗੁਰੂ ਅਤੇ ਚੇਲੇ ਦਾ ਰਿਸ਼ਤਾ ਬੜਾ ਪਵਿੱਤਰ ਹੁੰਦੇ |' ਮੰਮੀ ਨੇ ਆਪਣੇ ਪੁੱਤਰ ਨੂੰ ਸਮਝਾਉਣ ਲਈ ਕਿਹਾ |
'ਪਰ ਮੈਂ ਤਾਂ ਸੁਣਿਐ, ਗੁਰੂ ਸਿੱਖਿਆ ਵੇਚਦੇ ਨਹੀਂ ਹੁੰਦੇ ਸੀ | ਉਹ ਤਾਂ ਗਿਆਨ ਵੰਡਿਆ ਕਰਦੇ ਸਨ |' ਲਵਲੀ ਨੇ ਮੰਮੀ ਅੱਗੇ ਸਵਾਲ ਖੜ੍ਹਾ ਕਰ ਦਿੱਤਾ |
'ਤੁਹਾਡੇ ਅਧਿਆਪਕ ਵੀ ਤਾਂ ਗਿਆਨ ਵੰਡਦੇ ਹੀ ਆ |'
'ਨਹੀਂ ਮੰਮੀ | ਉਹ ਗਿਆਨ ਵੰਡਦੇ ਨਹੀਂ, ਵੇਚਦੇ ਆ | ਉਹ ਤਾਂ ਟਿਊਸ਼ਨ ਦੇ ਪੈਸੇ ਪਹਿਲਾਂ ਲੈ ਲੈਂਦੇ ਆ, ਫਿਰ ਪੜ੍ਹਾਉਣਾ ਸ਼ੁਰੂ ਕਰਦੇ ਆ | ਜਿਵੇਂ ਦੁਕਾਨਦਾਰ ਚੀਜ਼ ਵੇਚਣ ਤੋਂ ਪਹਿਲਾਂ ਚੀਜ਼ ਦਾ ਮੁੱਲ ਲੈ ਲੈਂਦਾ ਹੋਵੇ | ਫਿਰ...?'
'ਪਰ,...' ਤੇ ਮੰਮੀ ਅੱਗੇ ਅਵਾਕ ਹੋ ਗਏ |

-ਗੁਰਦੀਪ ਸਿੰਘ ਢੁੱਡੀ
1439, 6-ਆਰ, ਡੋਗਰ ਬਸਤੀ ਫ਼ਰੀਦਕੋਟ | ਮੋਬਾਈਲ : 95010-20731.

ਅਸ਼ੀਰਵਾਦ
ਪਿਕਨਿਕ 'ਤੇ ਆਏ ਬੱਚੇ ਜਦੋਂ ਮਠਿਆਈ ਖਾਣ ਲੱਗੇ ਤਾਂ ਦੂਰ ਫੁੱਟਪਾਥ 'ਤੇ ਬੈਠੇ ਬੂਟ ਪਾਲਿਸ਼ ਕਰਨ ਵਾਲੇ ਬੱਚੇ ਦੀ ਨਿਗ੍ਹਾ ਵਾਰ-ਵਾਰ ਮਠਿਆਈ ਵਾਲੇ ਡੱਬੇ 'ਤੇ ਜਾ ਰਹੀ ਸੀ | ਬੱਚਿਆਂ ਦੀ ਮਾਂ ਨੇ ਜਦ ਉਸ ਨੂੰ ਵੇਖਿਆ ਤਾਂ ਮਠਿਆਈ ਵਾਲਾ ਡੱਬਾ ਚੁੱਕ ਕੇ ਉਸ ਕੋਲ ਜਾ ਕੇ ਉਸ ਨੂੰ ਦੇਣ ਲੱਗੀ ਤਾਂ ਬੱਚੇ ਨੇ ਦੋਵੇਂ ਹੱਥ ਜੋੜ ਕੇ ਕਿਹਾ, 'ਨੋ ਥੈਂਕ ਯੂ', ਫੇਰ ਅੱਗੇ ਕਿਹਾ ਕਿ, 'ਮੇਰੀ ਮੰਮੀ ਨੇ ਸਿਖਾਇਆ ਹੈ ਕਿ ਹਮੇਸ਼ਾ ਆਪਣੇ ਦਸਾਂ ਨਹੰੁਆਂ ਨਾਲ ਕੀਤੀ ਹੋਈ ਹਲਾਲ ਦੀ ਕਮਾਈ ਹੀ ਖਾਣੀ ਚਾਹੀਦੀ ਹੈ |
ਉਸ ਔਰਤ ਨੇ ਪੁੱੱਛਿਆ, 'ਬੇਟਾ ਤੰੂ ਪੜ੍ਹਦਾ ਏਾ?'
ਤਾਂ ਉਸ ਨੇ 'ਹਾਂਜੀ' ਕਹਿ ਦਿੱਤਾ |
ਉਸ ਨੇ ਫਿਰ ਪੁੱਛਿਆ, 'ਬੇਟਾ ਤੂੰ ਪੜ੍ਹ ਕੇ ਕੀ ਬਣੇਂਗਾ?'
ਤਾਂ ਉਸ ਨੇ ਛੋਟਾ ਜਿਹਾ ਜਵਾਬ ਦਿੱਤਾ, 'ਪੀ.ਐਮ.'
ਉਸ ਨੇ ਫਿਰ ਪੁੱਛਿਆ, 'ਬੇਟੇ ਪੀ.ਐਮ. ਬਣ ਕੇ ਕੀ ਕਰੇਂਗਾ?'
ਤਾਂ ਉਸ ਨੇ ਸੋਚ ਕੇ ਜਵਾਬ ਦਿੱਤਾ, 'ਕੁਝ ਐਹੋ ਜਿਹਾ ਜਿਸ ਨਾਲ ਮੇਰੇ ਸਟੂਡੈਂਟਾਂ ਨੂੰ ਪੜ੍ਹਾਈ ਦੇ ਖਰਚੇ ਲਈ ਫੁੱਟਪਾਥ 'ਤੇ ਬੈਠ ਕੇ ਬੂਟ ਪਾਲਿਸ਼ ਨਾ ਕਰਨੇ ਪੈਣ |'
ਉਸ ਔਰਤ ਨੇ ਉਸ ਨੂੰ ਆਪਣੀਆਂ ਬਾਹਾਂ ਵਿਚ ਘੁੱਟ ਕੇ ਉਸ ਦਾ ਮੱਥਾ ਚੰੁਮ ਲਿਆ |

-ਕਿਰਪਾਲ ਸਿੰਘ 'ਨਾਜ਼'
ਢਿੱਲੋਂ ਕਾਟੇਜ, ਸ਼ਾਮ ਨਗਰ, 155 ਸੈਕਟਰ, 2-ਏ, ਮੰਡੀ ਗੋਬਿੰਦਗੜ੍ਹ, ਜ਼ਿਲ੍ਹਾ ਫਤਹਿਗੜ੍ਹ ਸਾਹਿਬ-147301.
ਮੋਬਾਈਲ : 98554-80191.

ਜ਼ਿੰਦਗੀ ਚੁਣੌਤੀ ਵੀ ਹੈ ਤੇ ਸਮੱਸਿਆ ਵੀ

(ਲੜੀ ਜੋੜਨ ਲਈ ਪਿਛਲੇ ਐਤਵਾਰ ਦਾ ਅੰਕ ਦੇਖੋ)
ਉਸ ਦੇ ਨਾਲ ਬਾਕੀ ਸਾਰੇ ਬਲਾੲੀਂਡ ਬੱਚੇ ਤੇ ਹੋਰ ਵੀ ਲੀਡਰ ਟਾਈਪ ਦੇ ਲੜਕੇ ਧਫੜ-ਧਫੜ ਕਰਦੇ ਮੇਰੇ ਦਫ਼ਤਰ ਵਿਚ ਆ ਗਏ | ਜਗਬੀਰ ਬਿਲਕੁਲ ਮੇਰੇ ਕੋਲ ਆ ਕੇ ਟੇਬਲ 'ਤੇ ਹੱਥ ਰੱਖ ਕੇ ਖੜ੍ਹਾ ਹੋ ਗਿਆ | ਮੇਰੇ ਕੁਝ ਪੁੱਛਣ ਤੋਂ ਪਹਿਲਾਂ ਉਹ ਇਕਦਮ ਟੇਬਲ 'ਤੇ ਜ਼ੋਰ ਦੀ ਮੁੱਕਾ ਮਾਰ ਕੇ ਬੋਲਿਆ, 'ਮੈਡਮ ਜੀ ਕੀ ਤੁਸੀਂ ਬੱਚਿਆਂ ਦੀ ਪੜ੍ਹਾਈ ਤੋਂ ਇਲਾਵਾ ਕਦੇ ਉਨ੍ਹਾਂ ਦੀ ਬਾਬਤ ਹੋਰ ਕੁਝ ਸੋਚਿਆ ਹੈ |'
'ਪੜ੍ਹਾਈ ਦੇ ਵਿਚ ਕੀ ਸਾਰਾ ਕੁਝ ਨਹੀਂ ਆ ਜਾਂਦਾ', ਮੈਂ ਆਰਾਮ ਨਾਲ ਪੁੱਛਿਆ |
'ਸਾਰੇ ਕੁਝ ਤੋਂ ਤੁਹਾਡਾ ਕੀ ਮਤਲਬ ਹੈ', ਉਸ ਨੇ ਗੁੱਸੇ ਵਾਲੀ ਟੋਨ ਵਿਚ ਪੁੱਛਿਆ |
'ਅਸੀਂ ਉਨ੍ਹਾਂ ਨੂੰ ਪੜ੍ਹਨਾ ਲਿਖਣਾ ਸਿਖਾਉਂਦੇ ਹਾਂ, ਖੇਲਾਂ ਦੇ ਪੀਰੀਅਡ ਲਗਦੇ ਹਨ, ਸਮਾਜਿਕ ਸਿੱਖਿਆ, ਧਾਰਮਿਕ ਸਿੱਖਿਆ...' ਉਹ ਵਿਚੋਂ ਹੀ ਬੋਲਿਆ, 'ਇਹ ਸਭ ਤਾਂ ਠੀਕ ਹੈ ਪਰ ਮੈਨੂੰ ਇਕ ਗੱਲ ਦਾ ਜਵਾਬ ਦਿਓ ਸਾਰੇ ਸਕੂਲਾਂ ਵਿਚ ਕੁੜੀਆਂ-ਮੰੁਡੇ ਇਕੱਠੇ ਪੜ੍ਹਦੇ ਹਨ ਇਸ ਸਕੂਲ ਵਿਚ ਕੁੜੀਆਂ ਕਿਉਂ ਨਹੀਂ?' ਉਸ ਨੇ ਮੇਰੇ ਕੋਲੋਂ ਪੁੱਛਿਆ | 'ਕਿਉਂਕਿ ਇਹ ਮੰੁਡਿਆਂ ਦਾ ਸਕੂਲ ਹੈ |' ਮੈਂ ਕਿਹਾ |
'ਮੈਨੂੰ ਇਹ ਦੱਸੋ ਕਿ ਕਿਥੇ ਲਿਖਿਆ ਹੋਇਆ ਹੈ ਕਿ ਇਹ ਸਕੂਲ ਸਿਰਫ਼ ਮੰੁਡਿਆਂ ਲਈ ਹੈ (ਓਨਲੀ ਫਾਰ ਬੁਆਏਜ਼) ਮੈਂ ਉਸ ਦੀ ਸਮਝ 'ਤੇ ਹੈਰਾਨ ਹੋ ਗਈ | ਗੱਲ ਉਸ ਦੀ ਸਹੀ ਸੀ | ਮੈਨੂੰ ਜਵਾਬ ਨਾ ਆਇਆ | ਮੈਂ ਹੌਲੀ ਜਿਹੀ ਕਿਹਾ, 'ਪਰ ਇਹ ਸਕੂਲ ਸ਼ੁਰੂ ਤੋਂ ਹੀ ਇਵੇਂ ਚੱਲ ਰਿਹਾ ਹੈ | ਇਥੇ ਸਿਰਫ਼ ਮੰੁਡੇ ਹੀ ਪੜ੍ਹਦੇ ਰਹੇ ਸਨ |' ਉਹ ਇਸ ਕਰਕੇ ਕਿ ਪਹਿਲਾਂ ਇਹ ਪ੍ਰਾਈਵੇਟ ਸਕੂਲ ਸੀ | ਉਨ੍ਹਾਂ ਦੇ ਆਪਣੇ ਕਾਇਦੇ-ਕਾਨੂੰਨ ਹੁੰਦੇ ਹਨ, ਚਾਹੇ 'ਕੱਲੇ ਮੰੁਡੇ ਰੱਖਣ ਜਾਂ ਕੁੜੀਆਂ, ਸਟਾਫ਼ ਵੀ ਉਹ ਆਪਣੀ ਮਰਜ਼ੀ ਦਾ ਰੱਖਦੇ ਹਨ ਪਰ ਹੁਣ ਇਹ ਸਰਕਾਰੀ ਸਕੂਲ ਬਣ ਗਿਆ ਹੈ, ਸਰਕਾਰ ਦੇ ਅਧੀਨ ਹੈ | ਹੁਣ ਇਸ ਸਕੂਲ ਦਾ ਏਨਾ ਨਾਂਅ ਹੋ ਗਿਆ ਹੈ ਕਿ ਬਹੁਤ ਸਾਰੇ ਮਾਪੇ ਆਪਣੀਆਂ ਕੁੜੀਆਂ ਨੂੰ ਇਥੇ ਦਾਖ਼ਲ ਕਰਾਉਣਾ ਚਾਹੁੰਦੇ ਹਨ ਫਿਰ ਇਹ ਸਕੂਲ ਸ਼ਹਿਰ ਦੇ ਵਿਚ ਹੈ ਤੇ ਕੁੜੀਆਂ ਇਥੇ ਪੂਰੀ ਤਰ੍ਹਾਂ ਸੁਰੱਖਿਅਤ ਹਨ | ਪਰ ਕਿਸੇ ਨੇ ਇਸ ਗੱਲ ਵੱਲ ਧਿਆਨ ਨਹੀਂ ਦਿੱਤਾ | 'ਪਰ ਮਾਪੇ ਖੁਦ ਵੀ ਤਾਂ ਮੇਰੇ ਨਾਲ ਆ ਕੇ ਗੱਲ ਕਰ ਸਕਦੇ ਹਨ | ਉਨ੍ਹਾਂ ਨੇ ਤੁਹਾਨੂੰ ਅੱਗੇ ਕਿਉਂ ਕੀਤਾ |' ਮੈਂ ਗੁੱਸੇ ਨਾਲ ਕਿਹਾ |
'ਕਿਉਂਕਿ ਉਨ੍ਹਾਂ ਨੂੰ ਭਰੋਸਾ ਨਹੀਂ ਸੀ ਕਿ ਤੁਸੀਂ ਉਨ੍ਹਾਂ ਦੀ ਗੱਲ ਸੁਣੋਂਗੇ | ਸੁਣ ਵੀ ਲਈ ਤਾਂ ਸਰਕਾਰੀ ਕਰਮਚਾਰੀ ਹੋਣ ਦੇ ਨਾਤੇ ਅੱਗੇ ਆਵਾਜ਼ ਉਠਾਓਗੇ |'
'ਚਲੋ ਉਹ ਤਾਂ ਇਹ ਸੋਚ ਕੇ ਚੁੱਪ ਰਹੇ ਪਰ ਤੁਸੀਂ ਇਹ ਜਿਹੜਾ ਤਰੀਕਾ ਅਪਨਾਇਆ ਉਹ ਕਿੰਨਾ ਕੁ ਸਹੀ ਹੈ, ਮੈਨੂੰ ਇਹ ਦੱਸੋ |'
'ਮੈਡਮ ਸਰਦਾਰ ਭਗਤ ਸਿੰਘ ਨੇ ਅਸੰਬਲੀ ਵਿਚ ਬੰਬ ਕਿਉਂ ਸੁੱਟਿਆ ਸੀ ਕਿ ਉਹ ਕਿਸੇ ਨੂੰ ਮਾਰਨਾ ਚਾਹੁੰਦੇ ਸੀ, ਨਹੀਂ ਉਹ ਸਿਰਫ਼ ਸੁੱਤੇ ਹੋਏ ਲੋਕਾਂ ਨੂੰ ਜਗਾਉਣਾ ਚਾਹੁੰਦੇ ਸੀ, ਅਸੀਂ ਵੀ ਸਾਰਿਆਂ ਨੇ ਮਿਲ ਕੇ ਇਹ ਤਰੀਕਾ ਸਿਰਫ਼ ਤੁਹਾਨੂੰ ਇਸ ਗੱਲ ਦਾ ਅਹਿਸਾਸ ਕਰਵਾਉਣ ਲਈ ਹੀ ਅਪਨਾਇਆ ਹੈ, ਭਾਵੇਂ ਸਾਰੇ ਲੜਕੇ ਇਹੀ ਚਾਹੁੰਦੇ ਸੀ ਪਰ ਅੱਗੇ ਆਉਣ ਦੀ ਹਿੰਮਤ ਕੋਈ ਨਹੀਂ ਸੀ ਕਰਦਾ | ਸੋ, ਇਸ ਕੰਮ ਦਾ ਬੀੜਾ ਮੈਂ ਹੀ ਚੁੱਕਿਆ ਬਈ ਰੱਬ ਨੇ ਏਨੀ ਵੱਡੀ ਸਜ਼ਾ ਮੈਨੂੰ ਪਹਿਲਾਂ ਹੀ ਦੇ ਦਿੱਤੀ ਹੈ ਤਾਂ ਟੀਚਰ ਮੈਨੂੰ ਹੋਰ ਕੀ ਸਜ਼ਾ ਦੇਣਗੇ, ਜ਼ਿਆਦਾ ਤੋਂ ਜ਼ਿਆਦਾ ਮੈਨੂੰ ਸਕੂਲੋਂ ਕੱਢ ਦੇਣਗੇ | ਪਰ ਹੋ ਸਕਦਾ ਹੈ ਕਿ ਸਕੂਲ ਵਿਚ ਕੋਈ ਤਬਦੀਲੀ ਆ ਜਾਏ | ਮੈਂ ਜਾਣਦਾ ਸੀ ਕਿ ਮੈਡਮ ਤੁਸੀਂ ਬਹੁਤ ਸਮਝਦਾਰ ਹੋ, ਤੁਸੀਂ ਜ਼ਰੂਰ ਮੇਰੀ ਗੱਲ ਨੂੰ ਸਮਝੋਗੇ |'
ਮੈਂ ਉਨ੍ਹਾਂ ਦੀ ਦਲੀਲ ਤੋਂ ਕਾਇਲ ਹੋ ਗਈ ਤੇ ਉਨ੍ਹਾਂ ਨੂੰ ਭਰੋਸਾ ਦੁਆਇਆ ਕਿ ਮੈਂ ਉਨ੍ਹਾਂ ਦੀ ਮੰਗ ਨੂੰ ਪੂਰਾ ਕਰਨ ਲਈ ਕੋਸ਼ਿਸ਼ ਕਰਾਂਗੀ | ਉਹ ਚੁੱਪਚਾਪ ਆਪਣੀਆਂ ਕਲਾਸਾਂ ਵਿਚ ਚਲੇ ਗਏ ਤੇ ਉਸ ਤੋਂ ਬਾਅਦ ਬਾਕਾਇਦਾ ਆਪਣੀਆਂ ਕਲਾਸਾਂ ਅਟੈਂਡ ਕਰਦੇ ਰਹੇ |
ਅਗਲੇ ਸੈਸ਼ਨ ਵਿਚ ਮੈਂ ਬਿਨਾਂ ਕਿਸੇ ਨੂੰ ਪੁੱਛਿਆਂ, ਦੱਸਿਆਂ ਕੁੜੀਆਂ ਸਕੂਲ ਵਿਚ ਦਾਖ਼ਲ ਕਰ ਲਈਆਂ | ਵਿਰੋਧੀਆਂ ਨੇ ਕਾਫ਼ੀ ਰੌਲਾ ਪਾਇਆ | ਡੀ.ਈ.ਓ. ਸਾਹਿਬ ਨੂੰ ਸ਼ਿਕਾਇਤ ਵੀ ਕੀਤੀ ਪਰ ਡੀ.ਪੀ.ਆਈ. ਤੱਕ ਵੀ ਗੱਲ ਪਹੁੰਚੀ ਫਿਰ ਇਨਕੁਆਇਰੀ ਹੋਈ ਤੇ ਜਦ ਮੈਂ ਕਿਹਾ ਕਿ ਦੱਸੋ ਕਿਥੇ ਇਹ ਲਿਖਿਆ ਹੋਇਆ ਕਿ ਇਹ ਸਕੂਲ ਸਿਰਫ਼ ਮੰੁਡਿਆਂ ਲਈ ਹੀ ਹੈ | ਉਨ੍ਹਾਂ ਪਾਸ ਇਸ ਗੱਲ ਦਾ ਕੋਈ ਜਵਾਬ ਨਹੀਂ ਸੀ | ਸੋ ਇਨਕੁਆਇਰੀ ਬੰਦ ਹੋ ਗਈ ਤੇ ਸ਼ਹਿਰ ਦੀਆਂ ਬਹੁਤ ਸਾਰੀਆਂ ਕੁੜੀਆਂ ਸਕੂਲ ਵਿਚ ਦਾਖ਼ਲ ਹੋ ਗਈਆਂ | ਇਸ ਤੋਂ ਬਾਅਦ ਮੈਂ ਮੰੁਡਿਆਂ ਦੀ ਇਕ ਕਮੇਟੀ ਬਣਾ ਦਿੱਤੀ ਤੇ ਜਗਬੀਰ ਨੂੰ ਉਸ ਦਾ ਪ੍ਰੈਜ਼ੀਡੈਂਟ ਚੁਣ ਲਿਆ ਗਿਆ | ਉਹ ਕਾਫੀ ਸਮਝਦਾਰ ਮੰੁਡਾ ਸੀ | ਮੈਂ ਬਾਅਦ ਵਿਚ ਕਈ ਮਸਲਿਆਂ ਵਿਚ ਉਸ ਦੀ ਸਲਾਹ ਲਈ | ਉਹ ਗਾਉਂਦਾ ਵੀ ਬਹੁਤ ਅੱਛਾ ਸੀ | ਮੈਂ ਸਕੂਲ ਵਿਚ ਮਿਊਜ਼ਿਕ ਦਾ ਵਿਸ਼ਾ ਇੰਟ੍ਰੋਡਿਊਸ ਕੀਤਾ, ਜਿਸ ਲਈ ਮਿਊਜ਼ਿਕ ਦੇ ਟੀਚਰ ਦੀ ਨਿਯੁਕਤੀ ਵੀ ਹੋ ਗਈ, ਇਕ ਬਲਾੲੀਂਡ ਟੀਚਰ ਵੀ ਮੰਗ ਲਿਆ, ਜਿਹੜਾ ਕਿ ਬਲਾੲੀਂਡ ਬੱਚਿਆਂ ਨੂੰ ਬ੍ਰੇਲ ਦੀ ਸਿੱਖਿਆ ਦੇ ਸਕੇ | ਬਲਾੲੀਂਡ ਬੱਚਿਆਂ ਦੀ ਇਕ ਕ੍ਰਿਕਟ ਦੀ ਟੀਮ ਵੀ ਬਣਾ ਦਿੱਤੀ | ਇਨ੍ਹਾਂ ਤਬਦੀਲੀਆਂ ਕਰਕੇ ਸਕੂਲ ਦਾ ਅਨੁਸ਼ਾਸਨ ਬਹੁਤ ਬਿਹਤਰ ਹੋ ਗਿਆ ਸੀ ਤੇ ਮੰੁਡੇ-ਕੁੜੀਆਂ ਦੀ ਗਿਣਤੀ ਵੀ ਲਗਪਗ ਦੁੱਗਣੀ ਹੋ ਗਈ ਸੀ | ਸਭ ਜਗ੍ਹਾ ਹੁਣ ਮੇਰੇ ਸਕੂਲ ਦੀ ਉਦਾਹਰਨ ਦਿੱਤੀ ਜਾਂਦੀ ਸੀ |
ਤੇ ਉਹ ਟੀਚਰ ਜਿਹੜੇ ਇਨ੍ਹਾਂ ਬਲਾੲੀਂਡ ਬੱਚਿਆਂ ਨੂੰ ਦਾਖ਼ਲ ਕਰਨ ਦੇ ਖਿਲਾਫ਼ ਸਨ, ਉਨ੍ਹਾਂ ਸਭ ਨੇ ਕਿਹਾ, 'ਮੈਡਮ ਤੁਸੀਂ ਇਨ੍ਹਾਂ ਬੱੱਚਿਆਂ ਨੂੰ ਦਾਖ਼ਲ ਕਰਕੇ ਸਾਡੇ ਮਨਾਂ ਵਿਚ ਜੋ ਇਨ੍ਹਾਂ ਲਈ ਗ਼ਲਤ ਧਾਰਨਾ ਬੈਠੀ ਹੋਈ ਸੀ, ਉਹ ਦੂਰ ਕਰ ਦਿੱਤੀ, ਬਲਕਿ ਇਨ੍ਹਾਂ ਦੀ ਆਮਦ ਕਰਕੇ ਕਿੰਨਾ ਕੁਝ ਨਵਾਂ ਤੇ ਚੰਗਾ ਹੋ ਗਿਆ |' ਸਿਆਣਿਆਂ ਨੇ ਸੱਚ ਹੀ ਕਿਹਾ ਹੈ ਕਿ ਕਿਸੇ ਵੀ ਸਮੱਸਿਆ ਨੂੰ ਜਾਚੇ-ਪਰਖੇ ਬਿਨਾਂ ਹੀ ਉਸ ਲਈ ਕਿਸੇ ਧਾਰਨਾ ਨੂੰ ਆਪਣੇ ਮਨਾਂ ਵਿਚ ਬੈਠਾ ਲੈਣਾ, ਉਸ ਸਮੱਸਿਆ ਨੂੰ ਹੋਰ ਵੀ ਵਧਾ ਦਿੰਦਾ ਹੈ | ਸੋ, ਸਮੱਸਿਆ ਨੂੰ ਔਖਾ ਸਮਝ ਕੇ ਉਸ 'ਤੇ ਪੋਚਾ ਫੇਰ ਦੇਣਾ ਬਹੁਤ ਵੱਡੀ ਗ਼ਲਤੀ ਹੈ, ਸਗੋਂ ਉਸ ਸਮੱਸਿਆ ਦਾ ਹੱਲ ਲੱਭਣਾ ਚਾਹੀਦਾ ਹੈ, ਕਿਉਂਕਿ ਦੁਨੀਆ ਵਿਚ ਕੋਈ ਵੀ ਸਮੱਸਿਆ ਅਜਿਹੀ ਨਹੀਂ ਹੈ, ਜਿਸ ਦਾ ਕੋਈ ਹੱਲ ਨਾ ਹੋਵੇ, ਹਾਂ ਉਸ ਨੂੰ ਲੱਭਣਾ ਜ਼ਰੂਰ ਥੋੜ੍ਹਾ ਔਖਾ ਹੁੰਦਾ ਹੈ, ਇਸ ਤੋਂ ਬਾਅਦ ਮੈਂ ਜਿੰਨਾ ਚਿਰ ਉਸ ਸਕੂਲ ਵਿਚ ਰਹੀ, ਕਦੇ ਕੋਈ ਅਜਿਹੀ ਘਟਨਾ ਨਹੀਂ ਘਟੀ, ਮੈਂ ਅੱਜ ਵੀ ਇਹ ਸੋਚਦੀ ਹਾਂ ਕਿ ਇਨਸਾਨ ਦੀ ਲਿਆਕਤ ਦੀ ਕਦਰ ਕਰਨੀ ਚਾਹੀਦੀ ਹੈ, ਬਜਾਏ ਕਿ ਉਸ ਦੇ ਸਰੀਰ ਦੇ ਅੰਗਾਂ ਦੀ ਗਿਣਤੀ ਕਰ ਕੇ ਉਸ ਦੀਆਂ ਕਮੀਆਂ ਲੱਭੀਆਂ ਜਾਣ | (ਸਮਾਪਤ)

-ਮੋਬਾਈਲ : 99881-52523.

ਮਿੰਨੀ ਕਹਾਣੀ

ਨਸ਼ਾ

ਆਖਰ ਦਰਸ਼ਨ ਨੂੰ ਹਸਪਤਾਲ ਦਾਖ਼ਲ ਕਰਵਾਉਣਾ ਪੈ ਗਿਆ, ਉਸ ਦੀ ਸਰੀਰਕ ਤੇ ਮਾਨਸਿਕ ਹਾਲਤ ਹੀ ਏਨੀ ਵਿਗੜ ਚੁੱਕੀ ਸੀ।
ਉਹ ਤਿੰਨ ਭੈਣ-ਭਰਾ ਸਨ, ਤਿੰਨੇ ਹੀ ਵਿਆਹੇ ਵਰ੍ਹੇ।
ਪਹਿਲਾਂ ਜ਼ਮੀਨ ਚੰਗੀ ਸੀ, ਪਰ ਹੁਣ ਗੁਜ਼ਾਰੇ ਜੋਗੀ ਵੀ ਨਹੀਂ ਸੀ ਰਹੀ।
ਨਿੱਤ ਦੇ ਘਰੇਲੂ ਕਲਾ-ਕਲੇਸ਼ ਤੋਂ ਤੰਗ ਆ ਕੇ ਵੱਡਾ ਭਰਾ ਆਪਣਾ ਹਿੱਸਾ ਵੇਚ-ਵੱਟ ਕੇ ਬਾਹਰ ਚਲਾ ਗਿਆ। ਦਰਸ਼ਨ ਹੋਰ 'ਆਜ਼ਾਦ' ਹੋ ਗਿਆ।
'ਕੰਮ' ਹੋਰ ਵੀ ਵਧ ਗਿਆ। ਇਕ ਧੀ ਦਾ ਬਾਪ ਬਣ ਗਿਆ, ਫਿਰ ਵੀ ਨਾ ਸੁਧਰਿਆ। ਪਤਨੀ, ਬੱਚੀ ਨੂੰ ਨਾਲ ਲੈ ਕੇ ਪੇਕੀਂ ਜਾ ਬੈਠੀ। ਬੁਢਾਪੇ ਵੱਲ ਤੇਜ਼ੀ ਨਾਲ ਵਧ ਰਹੇ ਮਾਂ-ਬਾਪ ਪ੍ਰੇਸ਼ਾਨ ਅਸਮਰੱਥ।
ਦਰਸ਼ਨ ਨੇ ਬਾਰਾਂ ਜਮਾਤਾਂ ਪਾਸ ਕਰ ਲੈਣ ਉਪਰੰਤ ਪਹਿਲਾਂ ਇਕ ਕਿੱਤਾ-ਮੁਖੀ ਡਿਪਲੋਮਾ ਕਰ ਲਿਆ ਅਤੇ ਫਿਰ ਕਾਲਜ ਵੀ ਪੜ੍ਹਦਾ ਰਿਹਾ, ਪਰ ਕੋਈ ਰੁਜ਼ਗਾਰ ਦਾ ਵਸੀਲਾ ਨਾ ਬਣ ਸਕਿਆ।
ਨੇੜਲੇ ਵੱਡੇ ਪਿੰਡ ਦੇ ਇਕ ਨਸ਼ਾ ਤਸਕਰ ਰਾਜਨੀਤਕ ਕਰਿੰਦੇ ਦੇ ਉਹ ਅਜਿਹਾ ਟੇਟੇ ਚੜ੍ਹਿਆ ਕਿ ਉਸ ਨੂੰ ਫਾਇਦਾ ਘੱਟ ਅਤੇ ਨੁਕਸਾਨ ਵੱਧ ਹੋ ਗਿਆ।
ਪਰ ਹੁਣ ਡਾਕਟਰੀ ਉਪਚਾਰ ਸਦਕਾ ਏਨਾ ਕੁ ਸਾਕਾਰਾਤਮਕ ਫਰਕ ਪੈ ਗਿਆ ਕਿ ਉਸ ਦੀ ਸਿਹਤ ਤੇ ਸੋਚ ਦੋਵਾਂ ਵਿਚ ਮੋੜਾ ਪੈਣਾ ਸ਼ੁਰੂ ਹੋ ਗਿਆ ਪਰ ਉਸ ਨੂੰ ਆਪਣੇ ਅੰਦਰ ਕੋਈ ਘਾਟ ਹਮੇਸ਼ਾ ਮਹਿਸੂਸ ਹੁੰਦੀ ਰਹਿੰਦੀ, ਅੰਤਰ-ਦਵੰਦ ਖਤਮ ਨਹੀਂ ਸੀ ਹੋ ਰਿਹਾ।
ਇਕ ਦਿਨ, ਸਕੂਲ ਸਮੇਂ ਦਾ ਇਕ ਜਮਾਤੀ ਉਸ ਦਾ ਹਾਲਚਾਲ ਪਤਾ ਕਰਨ ਆਇਆ। ਦੋਵੇਂ ਕਾਫ਼ੀ ਦੇਰ ਗੱਲਾਂ ਕਰਦੇ ਰਹੇ। ਦਰਸ਼ਨ ਦਾ ਮਨ ਕੁਝ ਹੌਲਾ ਹੋ ਗਿਆ।
ਜਾਣ ਲੱਗੇ ਜਮਾਤੀ ਦੇ ਹੱਥ ਵਿਚ ਲਟਕ ਰਹੇ ਲਿਫ਼ਾਫ਼ੇ ਵੱਲ ਦੇਖ ਕੇ ਦਰਸ਼ਨ ਨੇ ਪੁੱਛ ਲਿਆ, 'ਆਹ ਕੀ ਚੁੱਕੀ ਫਿਰਦੈਂ?'
'ਕਿਤਾਬਾਂ ਨੇ', ਮਿੱਤਰ ਨੇ ਦੱਸਿਆ, 'ਅੱਜ ਇਥੇ ਪੁਸਤਕ ਮੇਲਾ ਲੱਗਿਆ ਹੋਇਆ ਸੀ, ਉਥੋਂ ਹੀ ਖਰੀਦੀਐਂ।'
ਮਿੱਤਰ ਨੇ ਪੁੱਛ ਲਿਆ, 'ਤੂੰ ਪੜ੍ਹੇਂਗਾ?'
ਦੁਚਿੱਤੀ ਵਿਚ ਹੋਣ ਦੇ ਬਾਵਜੂਦ ਵੀ ਦਰਸ਼ਨ ਨੇ 'ਹਾਂ' ਵਿਚ ਸਿਰ ਹਿਲਾ ਦਿੱਤਾ।
ਇਹ ਇਕ ਸਾਫ਼-ਸੁਥਰਾ ਪਰਿਵਾਰਕ ਨਾਵਲ ਸੀ, ਜਿਸ ਦੇ ਪਹਿਲੇ ਇਕ-ਦੋ ਕਾਂਡ ਪੜ੍ਹਨ ਦੌਰਾਨ ਬੇਸ਼ੱਕ ਦਰਸ਼ਨ ਦੀ ਦਿਲਚਸਪੀ ਨਾ ਬਣੀ, ਪਰ ਫਿਰ ਜਿਵੇਂ-ਜਿਵੇਂ ਉਹ ਅੱਗੇ ਵਧਦਾ ਗਿਆ, ਸ਼ਾਮ ਤੱਕ ਨਾਵਲ ਮੁਕਾ ਕੇ ਹੀ ਉਸ ਨੇ ਸਾਹ ਲਿਆ।
ਉਸ ਰਾਤ ਉਸ ਨੂੰ ਬਹੁਤ ਗੂੜ੍ਹੀ ਨੀਂਦ ਆਈ।
ਅਗਲੇ ਦਿਨ, ਉਸ ਨੇ ਇਕ ਹੋਰ ਕਿਤਾਬ ਮੰਗਵਾ ਲਈ... ਫਿਰ ਹੋਰ, ਫਿਰ ਹੋਰ। ਇਸ ਨਵੇਂ ਸਹੇੜੇ ਨਸ਼ੇ ਦਾ ਅਨੰਦ ਪਹਿਲੇ ਨਾਲੋਂ ਕਿਤੇ ਜ਼ਿਆਦਾ ਸੀ।
ਇਸ ਕਦਰ ਸੁਧਰੀ ਹਾਲਤ ਦੇਖ ਕੇ ਡਾਕਟਰਾਂ ਨੇ ਦਰਸ਼ਨ ਨੂੰ ਸਮੇਂ ਤੋਂ ਪਹਿਲਾਂ ਹੀ ਹਸਪਤਾਲ ਤੋਂ ਫਾਰਗ ਕਰ ਦਿੱਤਾ। ਪਰਿਵਾਰ ਨੂੰ ਉਸ ਦੀ ਲਗਾਤਾਰ ਨਿਗਰਾਨੀ ਰੱਖਣ ਦੀ ਹਦਾਇਤ ਵੀ ਕਰ ਦਿੱਤੀ।
ਘਰ ਵਿਚ ਮਾਂ ਪਰਛਾਵੇਂ ਵਾਂਗ ਉਸ ਦੇ ਨਾਲ ਰਹਿੰਦੀ। ਇਕ ਦਿਨ ਦਰਸ਼ਨ ਨੇ ਕਹਿ ਹੀ ਦਿੱਤਾ, 'ਮੰਮੀ ਹੁਣ ਮੇਰਾ ਕੁਝ ਨਹੀਂ ਵਿਗੜਨ ਲੱਗਿਆ, ਤੁਸੀਂ ਨਿਸਚਿੰਤ ਹੋ ਕੇ ਆਰਾਮ ਕਰਿਆ ਕਰੋ।'
ਉਸ ਨੇ ਅੱਗੇ ਇਹ ਵੀ ਕਿਹਾ, 'ਇਕ ਹੋਰ ਗੱਲ ਮੈ ਕੱਲ੍ਹ ਸਵੇਰੇ ਤੜਕੇ ਤੁਹਾਡੀ ਨੂੰਹ ਤੇ ਪਿਆਰੀ ਪੋਤੀ ਨੂੰ ਲੈਣ ਸਹੁਰੀਂ ਚੱਲਿਐਂ।'
ਸਵੇਰੇ ਕਾਫ਼ੀ ਭਾਰਾ ਨਾਸ਼ਤਾ ਕਰਨ ਉਪਰੰਤ ਉਹ 'ਬਣ-ਠਣ' ਕੇ ਘਰੋਂ ਨਿਕਲਣ ਲੱਗਾ ਤਾਂ ਉਸ ਦੇ ਮੰਮੀ-ਡੈਡੀ ਵੀ ਬੱਸ ਅੱਡੇ ਤੱਕ ਨਾਲ ਹੀ ਤੁਰ ਗਏ।
ਅੱਜ ਦਰਸ਼ਨ ਨੇ ਬੈਗ ਵਿਚ ਕੱਪੜਾ-ਲੀੜਾ ਅਤੇ ਹੋਰ ਸਾਮਾਨ ਪਾਉਂਦਿਆਂ ਯਾਦ ਨਾਲ ਇਕ-ਦੋ ਕਿਤਾਬਾਂ ਵੀ ਪਾ ਲਈਆਂ ਸਨ।


-ਗੁਰੂ ਨਾਨਕ ਨਗਰ, ਗਿੱਦੜਬਾਹਾ-152101.
ਮੋਬਾਈਲ : 94640-76257.

ਡੂਢੀਆਂ ਸਵਾਈਆਂ ਦਾ ਚੇਤਾ...

ਖਾੜਕੂਵਾਦ ਦੇ ਦੌਰ ਮੌਕੇ ਪਿੰਡ ਛੱਡ ਕੇ ਪਰਿਵਾਰ ਸਮੇਤ ਸ਼ਹਿਰ ਜਾ ਵਸੇ ਸੋਮੀ ਸੇਠ ਦਾ ਅਚਾਨਕ ਸਵੇਰੇ ਸਾਝਰੇ ਹੀ ਘਰ ਆਉਣਾ ਮੇਰੇ ਲਈ ਹੈਰਾਨੀਜਨਕ ਸੀ। ਪਿੰਡ ਰਹਿੰਦਿਆਂ ਸਰਕਾਰੀ ਨੌਕਰੀ ਦੇ ਨਾਲ-ਨਾਲ ਉਸ ਦੀ ਸੱਥ ਵਿਚਲੀ ਹੱਟੀ ਪਿੰਡ ਵਾਸੀਆਂ ਦੀਆਂ ਸਾਰੀਆਂ ਘਰੇਲੂ ਲੋੜਾਂ ਦੀ ਪੂਰਤੀ ਦਾ ਇਕੋ-ਇਕੋ ਸਰੋਤ ਹੁੰਦਾ ਸੀ। ਸੂਈ ਤੋਂ ਲੈ ਕੇ ਟਰੈਕਟਰ ਦੇ ਇੰਜਣਾਂ ਦੇ ਸਮਾਨ ਤੱਕ ਸਭ ਕੁਛ ਸੋਮੀ ਸੇਠ ਦੀ ਹੱਟੀ ਤੋਂ ਮਿਲ ਜਾਂਦਾ। ਅਸੀਂ ਵਿਹੜੇ ਦੇ ਸਾਰੇ ਜੁਆਕ ਉਸ ਨੂੰ ਸੋਮੀ ਤਾਇਆ ਕਹਿ ਕੇ ਬੁਲਾਉਂਦੇ। ਕਈ ਦਹਾਕਿਆਂ ਬਾਅਦ ਘਰ ਆਇਆ ਤਾਇਆ ਸੋਮੀ ਇਸ ਵੇਲੇ ਸ਼ਹਿਰ ਦਾ ਮੰਨਿਆ-ਪ੍ਰਮੰਨਿਆ ਧਨਾਢ ਸੇਠ ਤਰਸੇਮ ਲਾਲ ਬਣ ਗਿਆ ਸੀ। 'ਦੇਖ ਲਾ ਪੁੱਤਰਾ, ਤੇਰੇ ਬਾਪੂ ਨੇ ਨੀ ਸੀ ਦੇਖਣਾ ਆਹ ਸਭ ਕੁਛ, ਬਹੁਤ ਕਮਾਈਆਂ ਕੀਤੀਆਂ ਸੀ ਉਸ ਨੇ, ਬੱਸ ਪੁੱਤਾਂ ਦੀ ਕਮਾਈ ਨੀ ਸੀ ਦੇਖਣੀ ਵਿਚਾਰੇ ਨੇ', ਤਾਇਆ ਸੋਮੀ ਕੁਰਸੀ 'ਤੇ ਬੈਠਾ ਚਾਹ ਦੀਆਂ ਚੁਸਕੀਆਂ ਭਰਦਾ ਮੇਰੇ ਸਵਰਗੀ ਬਾਪੂ ਨਾਲ ਅਪਣੀ ਪੁਰਾਣੀ ਨੇੜਤਾ ਨੂੰ ਯਾਦ ਕਰਨ ਲੱਗਿਆ। ਅਸਲ ਵਿਚ ਉਹ ਸਸਪੈਂਡ ਹੋ ਗਏ ਆਪਣੇ ਇਕ ਕਰੀਬੀ ਰਿਸ਼ਤੇਦਾਰ ਅਫ਼ਸਰ ਦੇ ਮਾਮਲੇ ਵਿਚ ਮੇਰੇ ਕੋਲੋਂ ਮਦਦ ਲੈਣ ਲਈ ਆਇਆ ਸੀ। ਕਈ ਸਿਆਸੀ ਆਗੂਆਂ ਤੇ ਅਫ਼ਸਰਾਂ ਦੇ ਅਕਸਰ ਮੇਰੇ ਘਰ ਆਉਣ-ਜਾਣ ਬਾਰੇ ਉਸ ਨੂੰ ਕਿਸੇ ਨੇ ਦੱਸਿਆ ਸੀ। ਸਾਡੀ ਗੱਲਾਂ ਕਰਦਿਆਂ ਦੀ ਆਵਾਜ਼ ਸੁਣ ਕੇ ਮੇਰੀ ਬੁੱਢੀ ਮਾਂ ਖੂੰਡੀ ਖੜਕਾਉਂਦੀ ਬਿੜਕਾਂ ਲੈਂਦੀ ਕਈ ਚੱਕਰ ਲਗਾ ਗਈ। ਤਾਏ ਸੋਮੀ ਦੇ ਚਲੇ ਜਾਣ ਪਿੱਛੋਂ ਹਾਲੇ ਮੈਂ ਦਰਵਾਜ਼ਾ ਬੰਦ ਕੀਤਾ ਹੀ ਸੀ ਕਿ ਮਾਂ ਨੇ ਮੋਟੇ ਸ਼ੀਸ਼ਿਆਂ ਵਾਲੀ ਐਨਕ ਉੱਪਰ ਸੱਜੇ ਹੱਥ ਦੀ ਛਾਂ ਜਿਹੀ ਕਰਦਿਆਂ ਪੁੱਛਿਆ, 'ਵੇ ਆਹ ਸੋਮੀ ਬਾਣੀਆਂ ਕੀ ਕਰਨ ਆਇਆ? ਤੈਂ ਇਹਦਾ ਕੀ ਦੇਣੈ?' ਬੁੱਢੀ ਮਾਂ ਦੇ ਸਵਾਲ ਮੈਨੂੰ ਬੇਚੈਨ ਕਰ ਗਏ। ਅੱਖਾਂ ਤੋਂ ਬਹੁਤ ਘੱਟ ਦਿਖਦਾ ਹੋਣ ਦੇ ਬਾਵਜੂਦ ਮਾਂ ਨੇ ਤੀਹ ਪੈਂਤੀ ਵਰ੍ਹੇ ਪਹਿਲਾਂ ਸੁਣੀ ਆਵਾਜ਼ ਤੋਂ ਸੋਮੀ ਸੇਠ ਨੂੰ ਪਛਾਣ ਲਿਆ ਸੀ। ਸੇਠ ਦੇ ਆਉਣ ਦਾ ਮਕਸਦ ਸੁਣ ਕੇ ਮਾਂ ਤਾਂ ਤਸੱਲੀ ਨਾਲ ਮੰਜੀ ਉੱਪਰ ਬਹਿ ਗਈ ਪ੍ਰੰਤੂ ਮੇਰੀਆਂ ਅੱਖਾਂ ਸਾਹਮਣੇ ਦਹਾਕਿਆਂ ਪਹਿਲਾਂ ਸਾਰੇ ਟੱਬਰ ਵਲੋਂ ਦਿਨ-ਰਾਤ ਖ਼ੂਨ ਪਸੀਨਾ ਇਕ ਕਰ ਕੇ ਲਿਆਂਦੀ ਕਣਕ ਦੀ ਹੁੰਦੀ ਰਹੀ ਲੁੱਟ ਦਾ ਮੰਜ਼ਰ ਘੁੰਮਣ ਲੱਗਿਆ। ਉਦੋਂ ਹਰ ਸਾਲ ਹੀ ਜਨਵਰੀ-ਫਰਵਰੀ ਦੇ ਮਹੀਨੇ ਗ਼ਰੀਬ ਘਰਾਂ ਦੇ ਦਾਣੇ ਮੁੱਕ ਜਾਇਆ ਕਰਦੇ ਸਨ। ਟੱਬਰ ਦਾ ਢਿੱਡ ਭਰਨ ਲਈ ਛੋਟੇ ਕਿਸਾਨਾਂ ਤੇ ਮਜ਼ਦੂਰ ਪਰਿਵਾਰਾਂ ਨੂੰ ਡੂਢੀਆਂ ਸਵਾਈਆਂ 'ਤੇ ਧਨਾਢ ਸੇਠਾਂ ਤੋਂ ਕਣਕ ਉਧਾਰ ਲੈਣੀ ਪੈਂਦੀ ਸੀ। ਜਨਵਰੀ ਮਹੀਨੇ ਲਈ ਇਕ ਕੁਇੰਟਲ ਕਣਕ ਤਿੰਨ ਮਹੀਨਿਆਂ ਬਾਅਦ ਮਈ ਦੇ ਮਹੀਨੇ ਡੇਢ ਕੁਇੰਟਲ ਕਰ ਕੇ ਮੋੜਨੀ ਪੈਂਦੀ ਸੀ। ਵਾਢੀ ਤੋਂ ਮਹਿਜ ਮਹੀਨਾ ਪਹਿਲਾਂ ਲਈ ਕਣਕ ਸਵਾਈ ਕਰ ਕੇ ਮੋੜੀ ਜਾਂਦੀ ਸੀ। ਸੋਮੀ ਸੇਠ ਹਰ ਵਰ੍ਹੇ ਸੈਂਕੜੇ ਕੁਇੰਟਲ ਕਣਕ ਲੋਕਾਂ ਨੂੰ ਡੂਢੀ ਸਵਾਈ 'ਤੇ ਦੇ ਕੇ ਕੁਝ ਮਹੀਨਿਆਂ ਬਾਅਦ ਹੀ ਮੋਟਾ ਮੁਨਾਫ਼ਾ ਕਮਾ ਲੈਂਦਾ। ਵਾਢੀ ਦੇ ਦਿਨਾਂ ਵਿਚ ਸਾਡਾ ਸਾਰਾ ਟੱਬਰ ਠੇਕੇ 'ਤੇ ਵਾਢੀ ਕਰਦਾ। ਸਵੇਰੇ ਚਾਰ ਵਜੇ ਹੀ ਘਰ ਦੇ ਸਾਰੇ ਜੀਅ ਔਰਤਾਂ ਬੱਚਿਆਂ ਸਮੇਤ ਕਣਕ ਦੀ ਵਾਢੀ ਨੂੰ ਜੁਟ ਜਾਂਦੇ। ਵੀਹਾਂ ਪੱਚੀਆਂ ਦਿਨਾਂ ਦੀ ਭਾਰੀ ਮੁਸ਼ੱਕਤ ਬਾਅਦ ਘਰ ਲਿਆਂਦੀ ਸਾਲ ਭਰ ਦੇ ਗੁਜ਼ਾਰੇ ਜੋਗੀ ਕਣਕ ਦੀ ਢੇਰੀ ਨੂੰ ਸਾਂਭਣ ਲਈ ਸਾਰਾ ਟੱਬਰ ਪੁਰਾਣੀਆਂ ਬੋਰੀਆਂ ਸੰਵਾਰਨ ਜੁੱਟ ਜਾਂਦਾ। ਹਾਲੇ ਘਰ ਦੀਆਂ ਔਰਤਾਂ ਬੋਰੀਆਂ ਨੂੰ ਟਾਂਕੇ ਟਾਕੀਆਂ ਲਾ ਕੇ ਸੰਵਾਰ ਹੀ ਰਹੀਆਂ ਹੁੰਦੀਆਂ ਕਿ ਸੋਮੀ ਸੇਠ ਬੋਰੀਆਂ, ਤੱਕੜੀ ਤੇ ਵੱਟੇ ਚੁੱਕੀ ਢੇਰੀ ਦੁਆਲੇ ਆ ਬਹਿੰਦਾ। ਮੇਰੀਆਂ ਭੈਣਾਂ ਕਣਕ ਤੋਲਦੇ ਸੇਠ ਨੂੰ ਵੇਖ-ਵੇਖ ਬਹਾਨੇ ਨਾਲ ਖੱਲਾਂ ਖੂੰਜਿਆਂ ਵਿਚ ਖੜ੍ਹ ਕੇ ਹੁੱਬਕੀਂ ਰੋਂਦੀਆਂ ਰਹਿੰਦੀਆਂ। ਕਈ ਵਾਰ ਮਹੀਨੇ ਭਰ ਤਿੱਖੜ ਦੁਪਹਿਰਿਆਂ 'ਚ ਖੂਨ ਪਸੀਨਾ ਇਕ ਕਰਕੇ ਕਮਾਈ ਸਾਰੀ ਕਣਕ ਉਹ ਡੂਢੀ ਦੇ ਹਿਸਾਬ ਚੁੱਕ ਕੇ ਲੈ ਜਾਂਦਾ।
'ਤਾਇਆ ਇਕ ਪੀਹਣੇ ਦੇ ਦਾਣੇ ਤਾਂ ਛੱਡ ਜਾਂਦਾ', ਮੇਰੀਆਂ ਭੈਣਾਂ ਆਖਰੀ ਬੋਰੀ ਭਰਦੇ ਤਾਏ ਸੋਮੀ ਅੱਗੇ ਤਰਲਾ ਜਿਹਾ ਕਰਦੀਆਂ। ਉਹ ਮੁੱਸਕੜੀਏਂ ਹੱਸਦਾ ਕੁੜੀਆਂ ਦੀ ਗੱਲ ਅਣਸੁਣੀ ਕਰ ਕੇ ਬੋਰੀਆਂ ਦੇ ਮੂੰਹ ਬੰਨ੍ਹਣ ਲੱਗ ਜਾਂਦਾ। ਵਾਢੀ ਕਰ ਕੇ ਲਿਆਂਦੀ ਸਾਰੀ ਕਣਕ ਤਾਇਆ ਸੋਮੀ ਚੁੱਕ ਕੇ ਲੈ ਜਾਂਦਾ ਅਤੇ ਟੱਬਰ ਲਈ ਸਾਲ ਭਰ ਦੇ ਗੁਜ਼ਾਰੇ ਲਈ ਖੇਤਾਂ 'ਚੋਂ ਚੁਗੀਆਂ ਕਣਕ ਦੀਆਂ ਬੱਲੀਆਂ ਹੀ ਬਚਦੀਆਂ। ਡੂਢੀਆਂ ਸਵਾਈਆਂ ਦਾ ਭਾਰ ਹਰ ਸਾਲ ਵਧਦਾ ਹੀ ਜਾਂਦਾ। ਸਕੂਲ ਜਾਂਦਿਆ ਨੂੰ ਮਾਂ ਹਰ ਰੋਜ਼ ਇਹੀ ਕਹਿੰਦੀ, 'ਸਾਡੀ ਤਾਂ ਜਿਵੇਂ ਕਿਵੇਂ ਲੰਘ 'ਗੀ, ਵੇ ਤੁਸੀਂ ਤਾਂ ਪੜ੍ਹ ਲਓ, ਨਹੀਂ ਤਾਂ ਸਾਰੀ ਉਮਰ ਡੂਢੀਆਂ ਸਵਾਈਆਂ ਦੇ ਹਿਸਾਬ ਹੀ ਪੂਰੇ ਨ੍ਹੀ ਹੋਣੇ'।
'ਚੱਲ ਪੁੱਤ ਜੇ ਕਰਵਾ ਸਕਦੈਂ ਤਾਂ ਕਰਵਾ ਦੇ ਇਹਦਾ ਕੰਮ, ਭੁੱਖੇ ਟੱਬਰ ਦਾ ਢਿੱਡ ਭਰਨ ਨੂੰ ਕਣਕ ਤਾਂ ਦਿੰਦਾ ਈ ਰਿਹੈ ਵਿਚਾਰਾ, ਚਾਹੇ ਡੂਢੀ ਸਵਾਈ 'ਤੇ ਹੀ ਸਹੀ', ਮੈਨੂੰ ਲੱਗਿਆ ਕਿ ਹਰ ਵਰ੍ਹੇ ਕਣਕ ਦੀ ਢੇੇਰੀ ਚੁੱਕ ਕੇ ਲੈ ਜਾਣ ਵਾਲੇ ਤਾਏ ਸੋਮੀ ਦਾ ਇਕ ਸਵਾਲੀ ਬਣ ਕੇ ਮੇਰੇ ਘਰ ਆਉਣਾ ਬੁੱਢੀ ਮਾਂ ਨੂੰ ਤਸੱਲੀ ਦੇ ਗਿਆ।


-ਪਿੰਡ ਕੁਠਾਲਾ , ਤਹਿਸੀਲ ਮਲੇਰਕੋਟਲਾ , ਜ਼ਿਲ੍ਹਾ ਸੰਗਰੂਰ ( ਪੰਜਾਬ ) ਮੋਬਾਈਲ : 98153-47904.

ਪੈਸਾ, ਸੰਭਾਲੋ ਸੱਜਣੋ

ਪਹਿਲਾਂ ਪੈਸੇ ਵਾਲੇ, ਸਿਰਫ਼ ਅਮੀਰ ਹੁੰਦੇ ਸਨ, ਦੂਜੇ ਗਰੀਬ ਹੁੰਦੇ ਸਨ, ਅਰਥ-ਸ਼ਾਸਤਰੀ ਸ਼ਾਇਦ ਹੀ ਹੁੰਦੇ ਸਨ, ਜਿਹੜੇ ਅੱਜਕਲ੍ਹ ਹਨ। ਪੜ੍ਹਦੇ-ਗੁੜ੍ਹਦੇ ਹੀ, ਵੱਡੀਆਂ-ਵੱਡੀਆਂ ਯੂਨੀਵਰਸਿਟੀਆਂ 'ਚ ਇਹੀ ਹਨ ਕਿ ਪੈਸਾ ਕਿਵੇਂ ਕਮਾਉਣਾ ਹੈ। ਪੈਸੇ ਦੀ ਕੀਮਤ ਕੀ ਹੈ? ਵਿਹਾਰ ਪੈਸਾ, ਵਪਾਰ ਪੈਸਾ, ਕਾਰੋਬਾਰ ਪੈਸਾ, ਪੜ੍ਹ-ਪੜ੍ਹ ਕੇ ਹੋਏ ਸ਼ਾਸਤਰੀ, ਲਿਖ-ਲਿਖ ਕੇ ਲਾਲ ਜੀ... ਪੈਸੇ ਲਈ ਜਗ ਲੜ ਮਰੇ, ਪੈਸੇ ਦਾ ਜਲਾਲ ਜੀ। ਪੈਸਾ ਕਮਾਓ, ਹੋਰ ਕਮਾਓ, ਕਿਵੇਂ ਕਮਾਓ, ਜਿਵੇਂ ਕਮਾਓ, ਨਾ ਸੋਚੋ, ਨਾ ਸਮਝੋ, ਅਰਥ-ਸ਼ਾਸਤਰੀਆਂ ਦੀ ਇਕੋ ਮਤ ਯਾਦ ਰੱਖੋ: ਪੈਸਾ ਦਰੱਖਤਾਂ 'ਤੇ ਨਹੀਂ ਲਗਦਾ, ਪੈਸਾ ਪੈਸੇ ਨੂੰ ਕਮਾਉਂਦਾ ਹੈ।
'ਕੌਨ ਬਨੇਗਾ ਕਰੋੜਪਤੀ?'
ਅੱਜਕਲ੍ਹ ਇਕ ਟੀ.ਵੀ. ਚੈਨਲ 'ਤੇ ਇਕ ਪ੍ਰੋਗਰਾਮ ਚਲ ਰਿਹਾ ਹੈ, 'ਕੌਨ ਬਨੇਗਾ ਕਰੋੜਪਤੀ?' ਇਸ ਪ੍ਰੋਗਰਾਮ ਦਾ ਐਂਕਰ ਹੈ ਸਦੀ ਦਾ ਮਹਾਂਨਾਇਕ ਅਮਿਤਾਭ ਬੱਚਨ। ਬੱਚਨ ਸਾਹਿਬ ਬਚਨ ਕਰਦੇ ਹਨ, ਸਾਹਮਣੇ ਬਿਠਾਏ ਕਾਂਟੈਸਟੈਂਟ ਨੂੰ ਇਕ-ਇਕ ਕਰਕੇ ਸਵਾਲ ਪੁੱਛੀ ਜਾਂਦੇ ਹਨ। ਜੇਕਰ ਸਾਹਮਣੇ ਬੈਠਾ/ਬੈਠੀ ਸਹੀ ਜਵਾਬ ਦਈ ਜਾਂਦਾ ਹੈ ਤਾਂ ਐਨੇ 'ਚ ਹੀ ਉਹ ਮਿੱਥੀ ਹੋਈ ਰਕਮ ਜਿੱਤੀ ਜਾਂਦੀ ਹੈ। ਜਿਹੜੀ ਹਰ ਸਹੀ ਜਵਾਬ ਨਾਲ ਵਧਦੀ ਜਾਂਦੀ ਹੈ। ਇਸ ਪ੍ਰੋਗਰਾਮ ਵਿਚ ਵੀ ਸਾਹਮਣੇ ਬੈਠੇ ਸਹੀ ਜਵਾਬ ਦੇਣ ਵਾਲੇ ਨੂੰ ਹਰ ਅਗਲੇ ਸਵਾਲ ਨਾਲ ਲਾਲਚ ਦਿੱਤਾ ਜਾਂਦਾ ਹੈ ਕਿ ਜੇਕਰ ਉਸ ਨੇ ਸਹੀ ਜਵਾਬ ਦਿੱਤਾ ਤਾਂ ਐਨੇ ਲੱਖ ਹੋਰ ਰੁਪਿਆਂ ਦਾ ਉਹ ਹੱਕਦਾਰ ਹੋ ਜਾਏਗਾ, ਤੇ ਜੇਕਰ ਗ਼ਲਤ ਜਵਾਬ ਦਿੱਤਾ ਤਾਂ ਪਿਛਲਾ ਸਾਰਾ ਜਿੱਤਿਆ ਮਾਲ ਵੀ ਗਵਾ ਬਹੇਗਾ/ਬਹੇਗੀ। ਜ਼ਾਹਿਰ ਹੈ, ਸਬਰ, ਸੰਤੋਖ, ਜਿੰਨਾ ਜਿੱਤ ਲਿਆ ਬਹੁਤ ਤੇ ਲਾਲਚ ਹਾਵੀ ਹੀ ਰਹਿੰਦਾ ਹੈ, ਕਈ ਲਾਲਚਵਸ ਜਿਹੜਾ ਜਿੱਤਿਆ ਮਾਲ ਹੈ, ਉਹ ਵੀ ਗਵਾ ਬਹਿੰਦੇ ਹਨ ਤੇ ਦਿਮਾਗ ਨੂੰ ਭੈੜੀ ਕਿਸਮਤ ਹਵਾਲੇ ਕਰ ਖਾਲੀ ਹੱਥ ਆਏ ਸਨ, ਖਾਲੀ ਹੱਥ ਘਰ ਚਲੇ ਜਾਂਦੇ ਹਨ।
ਇਥੇ ਮੈਂ ਸਿਕੰਦਰ ਮਹਾਨ ਦਾ ਜ਼ਿਕਰ ਕਰਾਂਗਾ, ਜਿਹਨੇ ਠਾਣ ਰੱਖਿਆ ਸੀ ਕਿ ਉਹ ਸੰਸਾਰ ਫਤਹਿ ਕਰਕੇ ਕਾਰੂੰ ਦਾ ਖਜ਼ਾਨਾ ਲੁੱਟ ਕੇ ਦੋਵੀਂ-ਦੋਵੀਂ ਹੱਥੀਂ ਪੈਸੇ ਮੁੱਠਾਂ ਵਿਚ ਭਰਦਾ, ਸੰਸਾਰ ਦਾ ਸਭ ਤੋਂ ਮਹਾਨ ਪੈਸੇ ਵਾਲਾ ਅਖਵਾਏਗਾ ਪਰ...
ਜਬ ਗਇਆ ਸਿਕੰਦਰ ਇਸ ਜਹਾਂ ਸੇ,
ਤੋ ਦੋਨੋ ਹਾਥ ਖਾਲੀ ਥੇ।
ਕੋਈ ਅਜਿਹੀ ਹਸਤੀ ਨਹੀਂ ਇਸ ਜਹਾਨ ਵਿਚ ਕਿ ਇਥੇ ਪੈਸੇ ਇਕੱਤਰ ਕਰ-ਕਰ ਕੇ ਇਕ ਪੈਸਾ ਵੀ ਆਪਣੇ ਨਾਲ ਦੂਜੇ ਜਹਾਨ ਵਿਚ ਲੈ ਗਿਆ ਹੋਵੇ। ਇਸੇ ਲਈ ਇਹ ਸੱਚ ਹਰੇਕ ਅਮੀਰ-ਗ਼ਰੀਬ ਨੂੰ ਪਤਾ ਹੈ, 'ਜਿੰਨਾ ਮਰਜ਼ੀ ਹੈ ਪੈਸਾ ਕਮਾ ਲਓ, ਸਭ ਇਥੇ ਹੀ ਰਹਿ ਜਾਣਾ ਹੈ। ਪਰ ਇਹ ਵੀ ਤਾਂ ਸੱਚ ਹੈ ਨਾ ਕਿ ਜਦ ਤਾਈਂ ਇਸ ਧਰਤੀ 'ਤੇ ਰਹਿਣਾ ਹੈ, ਜਿਊਂਦਿਆਂ ਰਹਿਣਾ ਹੈ ਪੈਸੇ ਦੀ ਬਹੁਤ ਲੋੜ ਹੈ। ਪੈਸੇ ਦੀ ਹੀ ਮਹਾਨਤਾ ਹੈ, ਪੈਸੇ ਵਿਚ ਕੁਝ ਵੀ ਖਰੀਦਣ ਦੀ ਸ਼ਕਤੀ ਹੈ, ਹਰੇ ਧਨੀਏ ਤੋਂ ਲੈ ਕੇ ਹਦਵਾਣੇ ਤੱਕ। ਪੈਸੇ ਬਿਨਾਂ ਇਕ ਕਦਮ ਨਹੀਂ ਚਲ ਸਕਦਾ ਇਨਸਾਨ।
ਆਹੋ, ਅੱਜਕਲ੍ਹ ਫੇਸਬੁੱਕ ਤੇ ਜਾਂ ਤੁਹਾਡੇ ਸਮਾਰਟ ਸੈੱਲ ਫੋਨਾਂ 'ਤੇ ਸੁਨੇਹੇ ਆ ਰਹੇ ਹਨ, 'ਕੌਨ ਬਨੇਗਾ ਕਰੋੜਪਤੀ' ਵਾਲਿਆਂ ਵਲੋਂ ਕਿ ਇਸ ਪ੍ਰੋਗਰਾਮ ਦੀ ਖਾਸ ਮਦ ਸਦਕਾ ਤੁਹਾਨੂੰ ਵੀ ਐਨੇ ਲੱਖ ਰੁਪਏ ਦਾ ਇਨਾਮ ਮਿਲਿਆ ਹੈ, ਝਟ ਦਿੱਤੇ ਨੰਬਰ 'ਤੇ ਸੰਪਰਕ ਕਰੋ। ਲਾਲਚ ਤੇ ਸੰਪਰਕ ਕਰਾ ਦਿੱਤਾ। ਅੱਗੋਂ ਇਹ ਛੋਟੀ ਜਿਹੀ ਸ਼ਰਤ ਰੱਖੀ ਗਈ ਕਿ ਐਨੇ ਰੁਪਏ ਝਟਪਟ ਜਮ੍ਹਾ ਕਰਵਾ ਦਿਓ, ਫਲਾਣੇ ਅਕਾਊਂਟ ਵਿਚ ਤਾਂ ਜੋ ਬਾਕੀ ਰਕਮ ਤੁਹਾਨੂੰ ਦਿੱਤੀ ਜਾ ਸਕੇ। ਜੇ ਤੁਸਾਂ ਓਨੇ ਪੈਸੇ ਕਰਵਾ ਦਿੱਤੇ ਉਸ ਅਕਾਊਂਟ ਵਿਚ ਜਮ੍ਹਾਂ ਤਾਂ ਉਹ ਪਲ-ਛਿਨ 'ਚ ਗਵਾ ਬੈਠੇ ਸਮਝੋ। ਬਈ, ਜਿਨ੍ਹਾਂ ਨੇ ਇਹ ਲਾਲਚ ਦਿੱਤਾ ਹੈ, ਉਨ੍ਹਾਂ ਨੇ ਵੀ ਤਾਂ ਕਰੋੜਪਤੀ ਬਣਨਾ ਹੈ। ਬਣ ਗਏ ਮਿੰਟਾਂ 'ਚ, ਤੁਸੀਂ ਲਾਲਚ 'ਚ ਠੱਗੇ ਗਏ।
ਕਿੰਨੀਆਂ ਘਟਨਾਵਾਂ ਵਾਪਰੀਆਂ ਹਨ, ਬੈਂਕਾਂ ਵਿਚ। ਹਜ਼ਾਰਾਂ ਲੱਖਾਂ ਰੁਪਏ ਲੋਕੀਂ ਹਰ ਰੋਜ਼ ਸਵੇਰੇ-ਸਵੇਰੇ ਬੈਂਕਾਂ 'ਚ ਜਮ੍ਹਾਂ ਕਰਵਾਉਣ ਜਾਂਦੇ ਹਨ। ਉਥੇ ਫਾਰਮ ਭਰਨਾ ਪੈਂਦਾ ਹੈ ਕਿ ਕਿੰਨੇ ਨੋਟ, ਕਿੰਨੇ ਮੁੱਲ ਵਾਲੇ ਹਨ। ਉਥੇ ਕੋਲ ਖੜ੍ਹੇ, ਕਈ ਖਾਸ ਬੰਦੇ, ਬੰਦੇ ਤਾੜਨ 'ਚ ਮਾਹਿਰ, ਇਸੇ ਲਈ ਖੜ੍ਹੇ ਹੁੰਦੇ ਹਨ। ਉਹ ਬੜੇ ਮਿੱਠੇ ਬਚਨ ਬੋਲ ਕੇ ਉਸ ਪੈਸਾ ਜਮ੍ਹਾਂ ਕਰਾਉਣ ਵਾਲੇ ਭਲੇ ਆਦਮੀ ਨੂੰ ਕਹਿੰਦੇ ਹਨ ਓ ਜੀ, ਮੈਂ ਤੁਹਾਡੀ ਮਦਦ ਕਰ ਦਿੰਦਾ ਹਾਂ, ਫਾਰਮ ਭਰਨ 'ਚ ਤੇ ਨੋਟ ਗਿਣਨ 'ਚ। ਬਸ ਇਹ ਉਹ ਨੋਟ ਗਿਣਦਾ-ਗਿਣਦਾ ਪਤਾ ਹੀ ਨਹੀਂ ਲੱਗਣ ਦਿੰਦਾ ਕਿ ਕਿੰਨੇ ਨੋਟ ਉਸ ਨੇ ਵਿਚੋਂ ਗ਼ਾਇਬ ਕਰ ਦਿੱਤੇ ਹਨ। ਉਹ ਧੰਨਵਾਦ ਕਬੂਲ ਕਰਦਾ, ਉਥੋਂ ਚਲਦਾ ਬਣਦਾ ਹੈ, ਤੇ ਫਿਰ ਪਤਾ ਲਗਦਾ ਹੈ ਕਿ ਜਦ ਕੈਸ਼ੀਅਰ ਨੋਟਾਂ ਨੂੰ ਗਿਣਦਾ ਹੈ, ਕਿ ਕਿੰਨੀ ਥੁੱਕ ਲਾ ਗਏ ਭਲੇ ਸੱਜਣ ਜੀ, ਲੋਕ ਭਲਾਈ ਕਰਦਿਆਂ ਕਰਦਿਆਂ।
ਥੋੜ੍ਹੇ ਦਿਨ ਪਹਿਲਾਂ ਮੈਨੂੰ ਵੀ, ਮੇਰੇ ਮੋਬਾਈਲ ਫੋਨ 'ਤੇ ਇਕ ਐਸ.ਐਮ.ਐਸ. ਆਇਆ ਸੀ ਕਿ ਤੁਹਾਡੇ ਨਾਂਅ ਨਾਲ ਮਿਲਦੇ ਨਾਂਅ ਵਾਲੇ ਇਕ ਕਰੋੜਾਂਪਤੀ ਦਾ ਸਵਰਗਵਾਸ ਹੋ ਗਿਆ ਹੈ, ਉਹ ਐਨੇ ਲੱਖ ਰੁਪਿਆ ਤੁਹਾਡੇ ਨਾਂਅ ਛੱਡ ਗਿਆ ਹੈ, ਤੁਸੀਂ ਐਸ ਨੰਬਰ 'ਤੇ ਫੌਰਨ ਕਾਂਟੈਕਟ ਕਰੋ। ਮੈਂ ਤਾਂ ਕਾਂਟੈਕਟ ਨਹੀਂ ਕੀਤਾ ਪਰ ਪਤਾ ਲੱਗਾ ਹੈ ਕਿ ਇਸ ਤਰ੍ਹਾਂ ਦੇ ਮੈਸਿਜ਼ ਹਜ਼ਾਰਾਂ ਲੱਖਾਂ ਲੋਕਾਂ ਨੂੰ ਉਨ੍ਹਾਂ ਦੇ ਮੋਬਾਈਲ ਫੋਨਾਂ 'ਤੇ ਜਾਂ ਫੇਸਬੁੱਕ ਆਦਿ 'ਤੇ ਆਉਂਦੇ ਹਨ। ਫਿਰ ਲਾਲਚ ਬੁਰੀ ਬਲਾ ਹੈ। ਬਲਾ ਉਨ੍ਹਾਂ ਨੂੰ ਫਸਾ ਦਿੰਦੀ ਹੈ, ਇਸ ਠਗ-ਜਾਲ ਵਿਚ, ਉਹ ਮੰਗ ਕੀਤੇ ਰੁਪਏ, ਦੱਸੇ ਗਏ ਅਕਾਊਂਟ 'ਚ ਜਮ੍ਹਾਂ ਕਰਾ ਦਿੰਦੇ ਹਨ। ਪੈਸੇ ਜਮ੍ਹਾਂ ਕਰਵਾਏ ਨਹੀਂ ਕਿ ਬੱਤੀ ਗੁੱਲ, ਦੀਵਾ ਗੁੱਲ, ਪੈਸੇ ਗਏ ਉਨ੍ਹਾਂ ਕੋਲ, ਜਿਨ੍ਹਾਂ ਦੇ ਨਸੀਬ 'ਚ ਸਨ। ਏ.ਟੀ.ਐਮ. (ਐਨੀ ਟਾਈਮ ਮਨੀ) ਮਸ਼ੀਨਾਂ ਤਾਂ ਹਰੇਕ ਬੈਂਕਾਂ ਵਲੋਂ ਥਾਂ-ਥਾਂ ਫਿਟ ਹਨ। ਕ੍ਰੈਡਿਟ ਤੇ ਡੈਬਿਟ ਕਾਰਡ, ਅਮੀਰ ਤੇ ਰੀਸ ਕਰਨ ਵਾਲੇ ਆਮ ਲੋਕਾਂ ਪਾਸ ਹਨ। ਏ.ਟੀ.ਐਮ. 'ਚ ਕਈਆਂ ਨੂੰ ਭਸੂੜੀ ਪੈ ਜਾਂਦੀ ਹੈ, ਉਨ੍ਹਾਂ ਨੂੰ ਠੀਕ ਤਰ੍ਹਾਂ ਆਪਣਾ ਕਾਰਡ ਮਸ਼ੀਨ 'ਚ ਫਿਟ ਕਰਨਾ ਨਹੀਂ ਆਉਂਦਾ, ਕੋਈ ਨਾ ਕੋਈ ਫਰਿਸ਼ਤਾ ਉਥੇ ਆ ਹੀ ਬਹੁੜਦਾ ਹੈ, ਇਸ ਸਮੇਂ ਮਦਦਗਾਰ ਬਣ ਕੇ। ਉਹ ਉਸ ਵੇਲੇ ਕ੍ਰੈਡਿਟ ਜਾਂ ਡੈਬਿਟ ਕਾਰਡ ਫਿਟ ਕਰਕੇ ਉਹਨੂੰ ਪੈਸੇ ਕਢਾਉਣ 'ਚ ਮਦਦ ਤਾਂ ਕਰ ਦਿੰਦਾ ਹੈ ਪਰ ਅਕਾਊਂਟ ਹੋਲਡਰ ਨੂੰ ਇਹ ਪਤਾ ਨਹੀਂ ਹੁੰਦਾ ਕਿ ਉਸ ਨੇ ਬੜੇ ਸ਼ਾਤਰਾਨਾ ਤਰੀਕੇ ਨਾਲ ਉਸ ਦਾ ਨੰਬਰ ਨੋਟ ਕਰ ਲਿਆ ਹੁੰਦਾ ਹੈ। ਕਾਰਡ ਹੋਲਡਰ ਉਥੋਂ ਗਿਆ ਨਹੀਂ ਕਿ ਸਮਝੋ ਉਹਦੇ ਬੈਂਕ ਅਕਾਊਂਟ 'ਚੋਂ ਉਹਦਾ ਲੱਖਾਂ ਜੋੜਿਆ ਪੈਸਾ ਗਿਆ ਸਮਝੋ। ਬੈਂਕ ਤਾਂ ਝੱਟ ਸੁਨੇਹਾ ਦੇ ਦਿੰਦਾ ਹੈ ਕਿ ਤੁਹਾਡੇ ਅਕਾਊਂਟ 'ਚੋਂ ਐਨੇ ਰੁਪਏ ਡੈਬਿਟ ਹੋ ਗਏ ਹਨ।
ਲੱਗੇ ਰਹੋ, ਪੁਲਿਸ ਕੋਲ ਧੋਖਾਧੜੀ ਦੀਆਂ ਸ਼ਿਕਾਇਤਾਂ ਦਰਜ ਕਰਾਉਣ।
ਆਪਣਾ ਕ੍ਰਿਕਟ ਪਲੇਅਰ ਹੈ ਨਾ ਯੁਵਰਾਜ ਸਿੰਘ, ਜਿਹੜਾ ਇਕੋ ਓਵਰ ਵਿਚ 6 ਬਾਲਾਂ 'ਤੇ 6 ਛੱਕੇ ਮਾਰਨ ਲਈ ਮਸ਼ਹੂਰ ਹੈ, ਉਹਦੀ ਮੰਮੀ, ਸ਼ਬਨਮ ਸਿੰਘ ਨੇ ਇਕ ਪੌਂਜੀ (P®©*9) ਸਕੀਮ 'ਚ 84 ਫ਼ੀਸਦੀ ਪੈਸਾ ਮੁਨਾਫਾ ਕਮਾਉਣ ਦੇ ਲਾਲਚ ਵਿਚ ਇਕ ਕਰੋੜ ਰੁਪਏ ਲਾ ਦਿੱਤੇ ਤੇ ਅੰਤ 50 ਲੱਖ ਰੁਪਏ ਗੁਆ ਦਿੱਤੇ। ਇਸ ਠੱਗ ਕੰਪਨੀ ਨੇ 7000 ਕਰੋੜ ਰੁਪਿਆਂ ਦਾ ਘਾਲਾਮਾਲਾ ਕੀਤਾ ਹੈ। ਸ਼ੁਰੂ 'ਚ ਚੈੱਕ ਦਿੱਤੇ, ਉਹ ਪਾਸ ਹੋ ਗਏ, ਫਿਰ ਉਹੀਓ ਚੱਕਰ ਹੋਇਆ, ਪੈਸਾ ਲੈ ਕੇ ਮੁੱਕਰ ਗਏ। ਖ਼ਬਰ ਅਨੁਸਾਰ ਸ਼ਬਨਮ ਸਿੰਘ ਨੇ ਇਕ ਕਰੋੜ ਦੀ ਰਕਮ ਚੈੱਕ ਰਾਹੀਂ ਦਿੱਤੀ ਸੀ, ਇਸ ਫਰਾਡ ਕੰਪਨੀ ਨੇ ਵਾਅਦਾ ਕੀਤਾ ਸੀ ਕਿ ਉਹ ਉਸ ਨੂੰ ਹਰ ਮਹੀਨੇ 7 ਲੱਖ ਰੁਪਏ ਦਏਗੀ, ਭਾਵ ਕਿ ਇਕ ਕਰੋੜ ਦੀ ਇਨਵੈਸਟਮੈਂਟ 'ਤੇ 84 ਫੀਸਦੀ ਮੁਨਾਫਾ। ਬਾਕੀ 50 ਲੱਖ ਤਾਂ ਲੁੱਟਿਆ ਹੀ ਗਿਆ, ਉਲਟਾ ਈ.ਡੀ. ਦੇ ਚੱਕਰ ਪੈ ਗਏ ਹਨ।
ਇਸ ਤਰ੍ਹਾਂ ਦੀਆਂ ਲੁਭਾਵਣੀਆਂ ਪੌਂਜੀ ਸਕੀਮਾਂ ਅਕਸਰ ਕਿਸੇ ਨਾ ਕਿਸੇ ਕੰਪਨੀ ਵਲੋਂ, ਕਿਸੇ ਨਾ ਕਿਸੇ ਸ਼ਹਿਰ ਤੋਂ ਚਲਦੀਆਂ ਹੀ ਰਹਿੰਦੀਆਂ ਹਨ। ਕੁਝ ਸਾਲ ਪਹਿਲਾਂ ਪੂਨਾ ਤੋਂ ਇਕ ਕੰਪਨੀ ਨੇ ਇਹੋ ਚੱਕਰ ਚਲਾਇਆ ਸੀ ਕਿ ਉਹ ਮਰਸਡੀਜ਼ ਤੇ ਹੋਰ ਲਗਜ਼ਰੀ ਕਾਰਾਂ ਵੱਡੇ-ਵੱਡੇ ਫਾਈਵ ਸਟਾਰ ਹੋਟਲਾਂ ਨੂੰ ਸਪਲਾਈ ਕਰੇਗੀ, ਇਸ ਲਈ ਹਰ ਇਕ ਮੈਂਬਰ ਨੂੰ ਐਨੀ ਰਕਮ ਦੇਣੀ ਪਏਗੀ, ਮਗਰੋਂ ਇਹ ਕਾਰਾਂ ਵੀ ਉਨ੍ਹਾਂ ਦੇ ਨਾਂਅ ਹੋ ਜਾਣਗੀਆਂ। ਉਨ੍ਹਾਂ ਇਨਵੈਸਟਰਾਂ ਨੂੰ ਬਦਲੇ ਵਿਚ ਚੈੱਕ ਵੀ ਦਿੱਤੇ ਜਿਹੜੇ ਕੁਝ ਤਾਂ ਪਾਸ ਹੋ ਗਏ, ਬਾਕੀ ਬੈਂਕਾਂ 'ਚੋਂ ਵਾਪਸ ਹੋ ਗਏ। ਕੰਪਨੀ ਦੇ ਦਫਤਰ ਬੰਦ ਹੋ ਗਏ ਸਨ।
'ਮਿਊਚਅਲ ਫੰਡ' ਸਹੀ ਹੈ, ਅੱਜਕਲ੍ਹ ਚੈਨਲਾਂ 'ਤੇ, ਅਖ਼ਬਾਰਾਂ 'ਚ, ਇਹਦੀ ਖੂਬ ਇਸ਼ਤਿਹਾਰਬਾਜ਼ੀ ਹੈ ਕਿ ਐਕਸਟਰਾ ਮਾਲ ਕਮਾਉਣ ਲਈ ਮਿਊਚਅਲ ਫੰਡ 'ਚ ਪੈਸੇ ਲਾ ਦਿਓ, ਨਾਲੇ ਅੰਤ 'ਚ ਇਹ ਵਾਰਨਿੰਗ ਵੀ ਦਿੱਤੀ ਜਾਂਦੀ ਹੈ ਕਿ ਇਹ ਮਿਊਂਚਅਲ ਫੰਡ ਮਾਰਕੀਟ ਦੇ ਉੱਪਰ ਥੱਲੇ ਹੋਣ 'ਤੇ ਨਿਰਭਰ ਕਰਦੇ ਹਨ, ਪੈਸਾ ਲਾਉਣ ਤੋਂ ਪਹਿਲਾਂ ਇਹਦਾ ਪ੍ਰਾਸਪੈਕਟ ਚੰਗੀ ਤਰ੍ਹਾਂ ਗਹੁ ਨਾਲ ਪੜ੍ਹ ਲਓ।
ਸਟਾਕ ਮਾਰਕੀਟ, ਬਹੁਤ ਵੱਡਾ ਛਲਾਵਾ ਹੈ, ਇਹਨੂੰ ਆਮ ਸਰਲ ਭਾਸ਼ਾ 'ਚ 'ਅੰਕੜੇ' ਦਾ ਧੰਦਾ ਵੀ ਕਹਿੰਦੇ ਹਨ। ਸਾਫ਼ ਹੈ...
ਆਂਕੜੇ ਕਾ ਧੰਦਾ
ਏਕ ਦਿਨ ਗਰਮ,
ਸੌ ਦਿਨ ਮੰਦਾ।
ਸਟਾਕ ਮਾਰਕੀਟ, ਸੈਸੈਂਕਸ ਜਦੋਂ ਡਿਗਦਾ ਹੈ ਤਾਂ ਸਮਝੋ ਸੁਨਾਮੀ ਆਈ, ਸਭ ਕੁਝ ਰੋੜ੍ਹ ਕੇ ਲੈ ਜਾਂਦੀ ਹੈ। ਅਸਲ 'ਚ ਸਟਾਕ ਮਾਰਕੀਟ 'ਚ ਨੌਜਵਾਨਾਂ ਨੂੰ ਬੜਾ ਸੋਚ-ਸਮਝ ਕੇ ਪੈਰ ਰੱਖਣਾ ਚਾਹੀਦਾ ਹੈ ਤੇ ਉਹ ਵਿਅਕਤੀ ਜਿਹੜੇ ਬਜ਼ੁਰਗ ਅਖਵਾਉਣ ਦੀ ਸਟੇਜ 'ਚ ਪੁੱਜ ਗਏ ਹਨ, ਉਨ੍ਹਾਂ ਲਈ ਸਭ ਤੋਂ ਅੱਛਾ ਹੈ, ਸਰਕਾਰੀ ਬੈਂਕਾਂ 'ਚ ਫਿਕਸਡ ਡਿਪਾਜ਼ਿਟ ਕਰਾਉਣਾ। ਵਰਨਾ ਲਾਲਚ ਬੁਰੀ ਬਲਾ ਹੈ, ਸਮਝੋ ਪੈਸਾ ਹਵਾ ਹੈ।

ਰਿਸ਼ਤੇ

(ਲੜੀ ਜੋੜਨ ਲਈ ਪਿਛਲੇ
ਐਤਵਾਰ ਦਾ ਅੰਕ ਦੇਖੋ)
* ਰਿਸ਼ਤੇ ਕੱਚੇ ਕੋਠਿਆਂ ਵਰਗੇ ਹੁੰਦੇ ਹਨ ਜਿਨ੍ਹਾਂ ਨੂੰ ਵਾਰ-ਵਾਰ ਲਿਪਣਾ-ਪੋਚਣਾ ਪੈਂਦਾ ਹੈ।
* ਦਿਮਾਗ ਨਾਲ ਬਣੇ ਰਿਸ਼ਤੇ ਬਾਜ਼ਾਰ ਤੱਕ ਚਲਦੇ ਹਨ ਪਰ ਪਿਆਰ ਨਾਲ ਬਣੇ ਰਿਸ਼ਤੇ ਸ਼ਮਸ਼ਾਨ ਤੱਕ ਚਲਦੇ ਹਨ।
* ਕੁਝ ਝੁਕਣ ਨਾਲ ਜੇਕਰ ਰਿਸ਼ਤਾ ਡੂੰਘਾ ਹੁੰਦਾ ਹੈ ਤਾਂ ਝੁਕ ਜਾਓ ਪਰ ਹਰ ਵਾਰ ਤੁਹਾਨੂੰ ਹੀ ਝੁਕਣਾ ਪਵੇ ਤਾਂ ਰੁਕ ਜਾਓ।
* ਰਿਸ਼ਤਿਆਂ ਦੀ ਉੱਚਤਾ ਨੂੰ ਸਮਝ ਕੇ ਸਾਨੂੰ ਆਪਣੇ ਹਰੇਕ ਰਿਸ਼ਤੇਦਾਰ ਨਾਲ ਵਰਤਣਾ ਚਾਹੀਦਾ ਹੈ। ਕਿਸੇ ਵੀ ਰਿਸ਼ਤੇਦਾਰ ਦੇ ਘਰੇਲੂ ਮਾਮਲੇ ਵਿਚ ਆਪਣੀ ਟੰਗ ਨਾ ਫਸਾਓ ਨਹੀਂ ਤਾਂ ਤੁਹਾਡੇ ਰਿਸ਼ਤੇ ਖਰਾਬ ਹੋ ਸਕਦੇ ਹਨ।
* ਰਿਸ਼ਤੇਦਾਰ ਦੇ ਕਿਸੇ ਵੀ ਗਮਗੀਨ ਮਾਹੌਲ ਵਿਚ ਜ਼ਰੂਰ ਸ਼ਾਮਿਲ ਹੋਵੋ ਤੇ ਉਸ ਦਾ ਦੁੱਖ-ਦਰਦ ਵੰਡਾਵੋ ਜਿਥੇ ਤੁਹਾਡੀ ਘਾਟ ਉਨ੍ਹਾਂ ਨੂੰ ਬਹੁਤ ਰੜਕਦੀ ਹੈ।
* ਰਿਸ਼ਤਿਆਂ ਦਾ ਸਭ ਤੋਂ ਵੱਡਾ ਇਮਤਿਹਾਨ ਉਹ ਹੁੰਦਾ ਹੈ ਕਿ ਅਸਹਿਮਤ ਵੀ ਹੋਵੋ ਅਤੇ ਹੱਥ ਵੀ ਨਾ ਛੱਡੋ।
* ਹਰ ਮਜ਼ਬੂਤ ਰਿਸ਼ਤੇ ਦੀ ਸਫ਼ਲਤਾ ਦਾ ਇਕ ਹੀ ਮੂਲਮੰਤਰ ਹੈ। ਤੁਹਾਨੂੰ ਪਤਾ ਹੋਣਾ ਚਾਹੀਦਾ ਹੈ ਕਿ ਕਦੋਂ ਸਹਾਰਾ ਦੇਣਾ ਹੈ ਅਤੇ ਕਦੋਂ ਦਖਲ ਨਹੀਂ ਦੇਣਾ ਹੈ।
* ਜਿਸ ਤਰ੍ਹਾਂ ਮਾਲਾ ਦੀ ਡੋਰੀ ਟੁੱਟਣ ਕਾਰਨ ਮਣਕੇ ਵੱਖ-ਵੱਖ ਹੋ ਜਾਂਦੇ ਹਨ, ਉਸ ਤਰ੍ਹਾਂ ਹੀ ਰਿਸ਼ਤਿਆਂ ਵਿਚਲਾ ਵਿਸ਼ਵਾਸ ਖਤਮ ਹੋਣ ਕਾਰਨ ਸਾਰੇ ਰਿਸ਼ਤਿਆਂ ਵਿਚ ਕੁੜੱਤਣ ਭਰ ਜਾਂਦੀ ਹੈ। ਰਿਸ਼ਤਿਆਂ ਵਿਚ ਸ਼ਿਕਾਇਤਾਂ, ਇਲਜ਼ਾਮ ਜਿੰਨੇ ਘੱਟ ਤੋਂ ਘੱਟ ਹੋਣ ਰਿਸ਼ਤੇ ਓਨੇ ਚੰਗੇ ਨਿਭਦੇ ਹਨ।
* ਨਾ ਜਾਣੇ ਕਿੰਨੇ ਰਿਸ਼ਤੇ ਖਤਮ ਕਰ ਦਿੱਤੇ ਇਸ ਭੁਲੇਖੇ (ਭਰਮ) ਨੇ ਕਿ ਮੈਂ ਹੀ ਸਹੀ ਹਾਂ ਅਤੇ ਸਿਰਫ਼ ਮੈਂ ਹੀ ਸਹੀ ਹਾਂ।
* ਸਿਲਾਈ ਮਸ਼ੀਨ ਵਿਚ ਧਾਗਾ ਨਾ ਪਾਉਣ 'ਤੇ ਉਹ ਚਲਦੀ ਤਾਂ ਹੈ ਪਰ ਸਿਲਾਈ ਕੁਝ ਵੀ ਨਹੀਂ ਕਰਦੀ। ਉਸੇ ਤਰ੍ਹਾਂ ਜੇਕਰ ਰਿਸ਼ਤਿਆਂ ਵਿਚ ਪਿਆਰ ਨਹੀਂ ਪਾਓਗੇ ਤਾਂ ਜ਼ਿੰਦਗੀ ਚੱਲੇਗੀ ਤਾਂ ਜ਼ਰੂਰ, ਪਰ ਰਿਸ਼ਤਿਆਂ ਨੂੰ ਜੋੜ ਨਹੀਂ ਸਕੇਗੀ।
* ਸ਼ੀਸ਼ਾ ਅਤੇ ਰਿਸ਼ਤਾ ਦੋਵੇਂ ਨਾਜ਼ੁਕ ਹੁੰਦੇ ਹਨ ਪਰ ਦੋਵਾਂ ਵਿਚ ਫਰਕ ਸਿਰਫ਼ ਇਹ ਹੈ ਕਿ ਸ਼ੀਸ਼ਾ ਗ਼ਲਤੀ ਨਾ ਟੁੱਟ ਜਾਂਦਾ ਹੈ ਅਤੇ ਰਿਸ਼ਤਾ ਗ਼ਲਤ ਫਹਿਮੀ ਨਾਲ।
* ਜੇ ਉਹ ਯਾਦ ਨਹੀਂ ਕਰਦੇ ਤਾਂ ਤੁਸੀਂ ਕਰ ਲਓ। ਰਿਸ਼ਤੇ ਨਿਭਾਉਣ ਵੇਲੇ ਮੁਕਾਬਲਾ ਨਹੀਂ ਕੀਤਾ ਜਾਂਦਾ।
* ਰਿਸ਼ਤਿਆਂ ਦੀ ਸਿਲਾਈ ਜੇ ਭਾਵਨਾਵਾਂ ਨਾਲ ਹੋਈ ਹੈ ਤਾਂ ਟੁੱਟਣੇ ਮੁਸ਼ਕਿਲ ਹਨ। ਜੇ ਸਵਾਰਥ ਨਾਲ ਹੋਈ ਹੈ ਤਾਂ ਟਿਕਣੇ ਮੁਸ਼ਕਿਲ ਹਨ।
* ਸਵਾਦ ਤੇ ਵਿਵਾਦ ਦੋਵਾਂ ਨੂੰ ਛੱਡ ਦੇਣਾ ਚਾਹੀਦਾ ਹੈ ਕਿਉਂਕਿ ਸਵਾਦ ਛੱਡੋ ਤਾਂ ਸਰੀਰ ਨੂੰ ਫਾਇਦਾ ਤੇ ਜੇ ਵਿਵਾਦ ਛੱਡੋ ਤਾਂ ਰਿਸ਼ਤਿਆਂ ਨੂੰ ਫਾਇਦਾ ਹੈ।
* ਮਨ ਅਜਿਹਾ ਰੱਖੋ ਕਿ ਕਿਸੇ ਨੂੰ ਮਾੜਾ ਨਾ ਲੱਗੇ। ਦਿਲ ਅਜਿਹਾ ਰੱਖੋ ਕਿ ਕਿਸੇ ਨੂੰ ਦੁਖੀ ਨਾ ਕਰੇ। ਸਪਰਸ਼ (ਛੋਹ) ਅਜਿਹਾ ਕਰੋ ਕਿ ਕਿਸੇ ਨੂੰ ਦਰਦ ਨਾ ਹੋਵੇ। ਰਿਸ਼ਤਾ ਅਜਿਹਾ ਰੱਖੋ ਕਿ ਉਸ ਦਾ ਅੰਤ ਨਾ ਹੋਵੇ।
* ਕਿਸੇ ਵੀ ਰਿਸ਼ਤੇ ਨੂੰ ਨਿਭਾਉਣ ਲਈ ਸਮਾਂ ਜ਼ਰੂਰ ਕੱਢਣਾ ਚਾਹੀਦਾ ਹੈ।
* ਦੂਜਿਆਂ ਦੀਆਂ ਭਾਵਨਾਵਾਂ ਅਤੇ ਜਜ਼ਬੇ ਨੂੰ ਸਮਝਣਾ ਵੀ ਇਕ ਸਲੀਕਾ ਹੈ ਅਤੇ ਜਿਹੜੇ ਲੋਕ ਇਸ ਸਲੀਕੇ ਤੋਂ ਅਨਜਾਣ ਹੁੰਦੇ ਹਨ, ਉਹ ਕਿਸੇ ਨਾਲ ਵੀ ਹੰਢਣਸਾਰ ਰਿਸ਼ਤਾ ਨਹੀਂ ਉਸਾਰ ਸਕਦੇ।
* ਜਿਸ ਰਿਸ਼ਤੇ ਦੇ ਆਧਾਰ ਵਿਚ ਯਕੀਨ ਨਹੀਂ, ਉਸ ਰਿਸ਼ਤੇ ਦਾ ਸੁੱਖ ਅਸੀਂ ਕਦੇ ਵੀ ਮਾਣ ਨਹੀਂ ਸਕਦੇ।
* ਅਵਿਸ਼ਵਾਸ ਪੀਡੇ (ਡੂੰਘੇ, ਨਜ਼ਦੀਕੀ ਤੇ ਖੂਨੀ) ਰਿਸ਼ਤਿਆਂ ਦੀ ਬੁਨਿਆਦ ਵੀ ਹਿਲਾ ਦਿੰਦਾ ਹੈ।
* ਜੋ ਦਿਲ ਵਿਚ ਸ਼ਿਕਵੇ ਤੇ ਜ਼ਬਾਨ 'ਤੇ ਸ਼ਿਕਾਇਤ ਘੱਟ ਰੱਖਦੇ ਹਨ, ਉਹ ਲੋਕ ਹਰ ਰਿਸ਼ਤਾ ਨਿਭਾਉਣ ਦਾ ਦਮ ਰੱਖਦੇ ਹਨ।
(ਬਾਕੀ ਅਗਲੇ ਐਤਵਾਰ ਦੇ ਅੰਕ 'ਚ)


-ਮੋਬਾਈਲ : 99155-63406.

ਨਹਿਲੇ 'ਤੇ ਦਹਿਲਾ

ਗਿਣਤੀ ਸਾਨੂੰ ਵੀ ਆਉਂਦੀ ਏ

ਇਕ ਵਾਰ ਮੌਲਾਨਾ ਜ਼ਫ਼ਰ ਅਲੀ ਦੇ ਦਿਮਾਗ ਵਿਚ ਇਹ ਖਿਆਲ ਆਇਆ ਕਿ ਜੇਕਰ ਹਿੰਦੁਸਤਾਨ ਦੇ ਸਾਰੇ ਮੁਸਲਮਾਨ ਇਕ-ਇਕ ਰੁਪਿਆ ਚੰਦਾ ਦੇਣ ਤਾਂ ਕਰੋੜਾਂ ਰੁਪਏ ਜਮ੍ਹਾਂ ਹੋ ਸਕਦੇ ਹਨ, ਜਿਸ ਨਾਲ ਇਕ ਬਹੁਤ ਸੁੰਦਰ ਅਤੇ ਦਿਲਕਸ਼ ਮਸਜਿਦ ਬਣਾਈ ਜਾ ਸਕਦੀ ਹੈ। ਉਨ੍ਹਾਂ ਆਪਣੇ ਇਸ ਖਿਆਲ ਦੀ ਸਾਂਝ ਕਈ ਪੜ੍ਹੇ-ਲਿਖੇ ਮੁਸਲਿਮ ਭਰਾਵਾਂ ਨਾਲ ਪਾਈ ਤਾਂ ਪੂਰਾ ਇਕ ਗਰੁੱਪ ਇਸ ਕਾਰਜ ਲਈ ਤਿਆਰ ਹੋ ਗਿਆ। ਉਨ੍ਹਾਂ ਘਰ-ਘਰ ਜਾ ਕੇ ਮਸਜਿਦ ਲਈ ਚੰਦਾ ਇਕੱਠਾ ਕਰਨਾ ਸ਼ੁਰੂ ਕਰ ਦਿੱਤਾ।
ਇਸ ਸਿਲਸਿਲੇ ਵਿਚ ਉਹ ਇਕ ਭੰਡ ਦੇ ਘਰ ਵੀ ਗਏ ਅਤੇ ਭੰਡ ਅਤੇ ਉਸ ਦੀ ਪਤਨੀ ਨੂੰ ਚੰਦਾ ਦੇਣ ਬਾਰੇ ਕਿਹਾ। ਇਹ ਸੁਣ ਕੇ ਚੰਦਾ ਮਸਜਿਦ ਬਣਾਉਣ ਲਈ ਮੰਗਦੇ ਨੇ, ਭੰਡ ਬੜਾ ਖੁਸ਼ ਹੋਇਆ ਅਤੇ ਕਹਿਣ ਲੱਗਾ, 'ਲਿਖ ਲੌ ਪੰਜ ਰੁਪਏ।' ਮੌਲਾਨਾ ਰਸੀਦ ਬੁੱਕ 'ਤੇ ਲਿਖਣ ਹੀ ਵਾਲੇ ਸਨ ਕਿ ਭੰਡ ਦੀ ਪਤਨੀ ਬੋਲੀ, 'ਵਾਹ ਮੀਯਾਂ, ਖ਼ੁਦਾ ਦੇ ਘਰ ਦੀ ਉਸਾਰੀ ਹੋਣੀ ਏ ਤੇ ਤੁਸੀਂ ਦੇ ਰਹੋ ਹੋ ਪੰਜ ਰੁਪਏ। ਇਹ ਠੀਕ ਨਹੀਂ, ਚੋਖੀ ਰਕਮ ਲਿਖਵਾਓ।'
ਭੰਡ ਨੇ ਮੂੰਹ ਫੈਲਾ ਕੇ ਕਿਹਾ, 'ਦਸ ਰੁਪਏ ਲਿਖ ਲੌ ਮੌਲਾਨਾ।' ਇਹ ਸੁਣ ਕੇ ਪਤਨੀ ਨੇ ਉੱਚੀ ਆਵਾਜ਼ ਵਿਚ ਕਿਹਾ,'ਨਾ ਮੀਆਂ ਦਸ ਰੁਪਏ ਕੋਈ ਚੰਦਾ ਹੁੰਦਾ ਏ।' ਭੰਡ ਨੇ ਝੱਟ ਕਿਹਾ, 'ਪੰਦਰਾਂ ਰੁਪਏ ਲਿਖ ਲੌ।' ਇਹ ਸੁਣ ਕੇ ਭੰਡ ਦੀ ਪਤਨੀ ਬੋਲੀ, 'ਮੀਆਂ ਕਿਉਂ ਸ਼ਰਮਿੰਦਾ ਕਰਦੇ ਪਏ ਹੋ, ਪੰਦਰਾਂ ਰੁਪਏ ਭਲਾ ਕੀ ਹੁੰਦੇ ਨੇ।'
ਭੰਡ ਵੀਹ, ਤੀਹ, ਚਾਲੀ ਅਤੇ ਫਿਰ ਪੰਜਾਹ 'ਤੇ ਪਹੁੰਚ ਗਿਆ। ਮੌਲਾਨਾ ਕਾਫ਼ੀ ਬੋਰ ਹੋ ਚੁੱਕਿਆ ਸੀ, ਉਸ ਨੇ ਕਿਹਾ, 'ਬਈ ਜਿੰਨੀ ਰਕਮ ਦੇਣੀ ਜੇ ਓਨੀ ਲਿਖਵਾ ਦਿਓ।' ਇਹ ਸੁਣ ਕੇ ਉਨ੍ਹਾਂ ਬੜੀ ਸਾਦਗੀ ਨਾਲ ਜਵਾਬ ਦਿੱਤਾ, 'ਮੌਲਾਨਾ, ਅਸੀਂ ਗ਼ਰੀਬ ਹਾਂ ਸਾਡੇ ਕੋਲ ਤਾਂ ਖਾਣ ਲਈ ਰੋਟੀ ਵੀ ਨਹੀਂ, ਅਸੀਂ ਚੰਦਾ ਕੀ ਦੇਣਾ ਹੈ? ਹਾਂ ਅਸਾਂ ਏਨਾ ਤਾਂ ਸਾਬਤ ਕਰ ਦਿੱਤਾ ਹੈ ਕਿ ਗਿਣਤੀ ਸਾਨੂੰ ਵੀ ਆਉਂਦੀ ਹੈ।'


-ਜੇਠੀ ਨਗਰ, ਮਲੇਰਕੋਟਲਾ ਰੋਡ, ਖੰਨਾ-141401. ਮੋਬਾਈਲ : 94170-91668.

ਜ਼ਿੰਦਗੀ ਚੁਣੌਤੀ ਵੀ ਹੈ ਤੇ ਸਮੱਸਿਆ ਵੀ

ਜਦੋਂ ਮੈਂ ਹਾਈ ਸਕੂਲ ਦੀ ਹੈੱਡਮਿਸਟ੍ਰੇਸ ਤੋਂ ਪ੍ਰਮੋਟ ਹੋ ਕੇ ਸੀਨੀਅਰ ਸੈਕੰਡਰੀ ਸਕੂਲ ਦੀ ਪ੍ਰਿੰਸੀਪਲ ਬਣ ਕੇ ਉਸੇ ਸ਼ਹਿਰ ਵਿਚ ਗਈ ਤਾਂ ਮੇਰੀ ਖ਼ੁਸ਼ੀ ਦਾ ਠਿਕਾਣਾ ਨਹੀਂ ਸੀ। ਇਹ ਇਕ ਬਹੁਤ ਵੱਡੀ ਪ੍ਰਾਪਤੀ ਸੀ। ਨਾਲੇ ਪ੍ਰਮੋਸ਼ਨ ਤੇ ਨਾਲੇ ਉਸੇ ਸ਼ਹਿਰ ਵਿਚ ਹੀ ਐਡਜਸਟ ਹੋ ਜਾਣਾ। ਪੁਰਾਣੇ ਸਕੂਲ ਦੇ ਕਾਫ਼ੀ ਸਾਰੇ ਟੀਚਰ ਤੇ ਕਲਰਕ ਮੈਨੂੰ ਨਵੇਂ ਸਕੂਲ ਦੀ ਕੁਰਸੀ 'ਤੇ ਬਿਠਾਉਣ ਲਈ ਆਏ, ਸਕੂਲ ਘਰ ਦੇ ਨੇੜੇ ਹੀ ਸੀ। ਪਰ ਥੋੜ੍ਹੇ ਦਿਨਾਂ ਬਾਅਦ ਹੀ ਨਵੇਂ ਸਕੂਲ ਦਾ ਸਾਰਾ ਨਸ਼ਾ ਉੱਤਰ ਗਿਆ। ਸਕੂਲ ਦਾ ਤਾਂ ਰੰਗ-ਢੰਗ ਹੀ ਨਿਰਾਲਾ ਸੀ, ਬਿਲਡਿੰਗ ਹੀ ਬਹੁਤ ਵੱਡੀ ਸੀ। ਕਈ ਏਕੜ ਵਿਚ ਫੈਲੀ ਹੋਈ ਸੀ। ਅਸਲ ਵਿਚ ਪਹਿਲਾਂ ਇਹ ਪ੍ਰਾਈਵੇਟ ਸਕੂਲ ਹੁੰਦਾ ਸੀ, ਫਿਰ ਸਰਕਾਰ ਨੇ ਇਸ ਨੂੰ ਟੇਕਓਵਰ ਕਰ ਲਿਆ। ਇਸ ਦਾ ਉਰਲਾ ਵਿੰਗ ਹੀ ਕੰਮ ਵਿਚ ਆਉਂਦਾ ਸੀ, ਪਰਲੇ ਪਾਸੇ ਦੇ ਸਾਰੇ ਕਮਰੇ ਵਿਹਲੇ ਪਏ ਸਨ ਤੇ ਦੇਖਭਾਲ ਨਾ ਕਰਨ ਕਰਕੇ ਡਿਗਣ-ਡਿਗਣ ਨੂੰ ਹੋ ਰਹੇ ਸਨ। ਬੱਚੇ ਉਨ੍ਹਾਂ ਵਿਚ ਜਾ ਕੇ ਛਿਪ ਜਾਂਦੇ ਤੇ ਕਲਾਸਾਂ ਮਿਸ ਕਰਦੇ। ਗੇਟ 'ਤੇ ਕੋਈ ਰੋਕਣ-ਟੋਕਣ ਵਾਲਾ ਨਹੀਂ ਸੀ, ਜਿਸ ਦਾ ਜੀਅ ਕਰਦਾ ਬਾਹਰ ਚਲਾ ਜਾਂਦਾ। ਟੀਚਰਾਂ ਵਿਚ ਬੜਾ ਭਾਈਚਾਰਾ ਸੀ। ਸਭ ਨੇ ਆਪਣੀ ਮਰਜ਼ੀ ਦਾ ਆਪਣਾ ਟਾਈਮ ਟੇਬਲ ਬਣਾਇਆ ਹੋਇਆ ਸੀ। ਹਰ ਇਕ ਨੇ ਆਪਣੇ ਤਿੰਨ-ਤਿੰਨ ਪੀਰੀਅਡ ਖਾਲੀ ਰੱਖੇ ਹੋਏ ਸਨ ਤੇ ਉਨ੍ਹਾਂ ਵਿਚ ਆਪਣੇ ਘਰ ਜਾ ਕੇ ਟਿਊਸ਼ਨਾਂ ਪੜ੍ਹਾ ਆਉਂਦੇ। ਸਕੂਲ ਬਾਜ਼ਾਰ ਵਿਚ ਹੋਣ ਕਰਕੇ ਲੇਡੀਜ਼ ਸ਼ਾਪਿੰਗ ਕਰਨ ਚਲੇ ਜਾਂਦੀਆਂ। ਹੋਰ ਤਾਂ ਹੋਰ ਸਕੂਲ ਦਾ ਮਾਲੀ ਹੀ ਪ੍ਰਧਾਨ ਬਣਿਆ ਹੋਇਆ ਸੀ। ਸਭ ਤੋਂ ਪੁਰਾਣਾ ਕਰਮਚਾਰੀ ਹੋਣ ਕਰਕੇ ਉਹ ਸਭ ਦੀਆਂ ਕਮਜ਼ੋਰੀਆਂ ਜਾਣਦਾ ਸੀ, ਇਸ ਕਰਕੇ ਹਰ ਕੋਈ ਉਸ ਤੋਂ ਡਰਦਾ ਸੀ, ਉਹ ਸਕੂਲ ਦਾ ਕੋਈ ਕੰਮ ਨਹੀਂ ਸੀ ਕਰਦਾ, ਸਿਵਾਏ ਚੌਧਰ ਦੇ। ਬੱਚਿਆਂ ਨੂੰ ਬਾਹਰ ਜਾਣ ਤੋਂ ਕੋਈ ਰੋਕਦਾ ਹੀ ਨਹੀਂ ਸੀ। ਮੈਂ ਜਿਸ ਸਕੂਲ ਤੋਂ ਆਈ ਸਾਂ ਉਹ ਬਹੁਤ ਹੀ ਡਿਸਿਪਲਿੰਡ ਸਕੂਲ ਸੀ, ਉਥੋਂ ਦੇ ਰਿਜ਼ਲਟ ਵੀ ਹਰ ਸਾਲ ਪਲੱਸ ਵਿਚ ਆਉਂਦੇ ਸਨ ਤੇ ਇਥੇ ਹਰ ਸਾਲ ਰਿਜ਼ਲਟ ਨੈਗੇਟਿਵ। ਜਦ ਮੈਂ ਪਹਿਲੀ ਵਾਰ ਡੀ.ਈ.ਓ. ਸਾਹਿਬ ਦੀ ਮਾਸਿਕ ਬੈਠਕ ਅਟੈਂਡ ਕੀਤੀ ਤਾਂ ਉਨ੍ਹਾਂ ਨੇ ਬੜੀ ਹਿਕਾਰਤ ਨਾਲ ਮੇਰੇ ਵੱਲ ਦੇਖਿਆ ਤੇ ਬੋਲੇ, 'ਆਪ ਤੋ ਮੈਡਮ ਬੈਠ ਹੀ ਜਾਓ, ਆਪ ਕਾ ਸਕੂਲ ਤੋ ਪਹਿਲੇ ਹੀ ਮਾਈਨਸ ਪਰ ਟਿਕਾ ਹੂਆ ਹੈ।' ਸੁਣ ਕੇ ਬੜਾ ਦੁੱਖ ਹੋਇਆ, ਸਮਝ ਨਾ ਆਏ ਕੀ ਕਰਾਂ। ਸਕੂਲ ਜਾਣ ਨੂੰ ਵੀ ਜੀ ਨਾ ਕਰੇ।
ਮੈਂ ਆਪਣੇ ਪਿਤਾ ਜੀ ਨਾਲ ਗੱਲ ਕੀਤੀ। ਉਹ ਪੁਰਾਣੇ ਅਨੁਭਵੀ ਅਧਿਆਪਕ ਸਨ। ਉਨ੍ਹਾਂ ਨੇ ਮੈਨੂੰ ਚੰਗੀ ਤਰ੍ਹਾਂ ਸਮਝਾ ਦਿੱਤਾ। ਸਭ ਤੋਂ ਪਹਿਲਾਂ ਸਕੂਲ ਦਾ ਟਾਈਮ ਟੇਬਲ ਬਦਲਿਆ। ਮਾਲੀ ਨੂੰ ਪੱਕੀ ਤੌਰ 'ਤੇ ਹੀ ਰਜਿਸਟਰ ਦੇ ਕੇ ਗੇਟ 'ਤੇ ਬਿਠਾ ਦਿੱਤਾ ਤੇ ਉਹ ਹਰ ਆਉਣ-ਜਾਣ ਵਾਲੇ ਦੇ ਟਾਈਮ ਦੀ ਐਂਟਰੀ ਕਰਦਾ। ਬਿਨਾਂ ਮੇਰੀ ਆਗਿਆ ਦੇ ਕਿਸੇ ਨੂੰ ਬਾਹਰ ਜਾਣ ਨਾ ਦਿੰਦਾ। ਇਕ ਚਪੜਾਸੀ ਨੂੰ ਪੂਰੇ ਦਿਨ ਲਈ ਖਾਲੀ ਕਮਰਿਆਂ ਵੱਲ ਬਿਠਾ ਦਿੱਤਾ, ਮੇਰਾ ਇਕ ਪੁਰਾਣਾ ਸਟੂਡੈਂਟ ਪੁਲਿਸ ਵਿਚ ਸੀ। ਉਹ ਵੀ ਗਾਹੇ-ਬਗਾਹੇ ਸਕੂਲ ਦੇ ਚੱਕਰ ਲਾਉਣ ਲੱਗ ਪਿਆ। ਗੱਲ ਕੀ ਆਉਣ ਵਾਲੇ ਅਗਲੇ ਚਾਰ ਪੰਜ ਮਹੀਨਿਆਂ ਵਿਚ ਸਭ ਕੁਝ ਠੀਕ ਹੋ ਗਿਆ। ਰਿਜ਼ਲਟ ਵੀ ਅਗਲੇ ਸਾਲ ਪਲੱਸ ਵਿਚ ਆ ਗਏ ਤੇ ਸਾਡੇ ਸਕੂਲ ਦਾ ਨਾਂਅ ਚੰਗੇ-ਚੰਗੇ ਸਕੂਲਾਂ ਵਿਚ ਗਿਣਿਆ ਜਾਣ ਲੱਗ ਪਿਆ।
ਸਕੂਲ ਦਾ ਨਾਂਅ ਚਮਕਣ ਕਰਕੇ ਬਹੁਤ ਸਾਰੇ ਬੱਚੇ ਦੂਜੇ ਸਕੂਲਾਂ ਤੋਂ ਆਪਣੇ ਸਰਟੀਫਿਕੇਟ ਲੈ ਕੇ ਸਾਡੇ ਸਕੂਲ ਵਿਚ ਦਾਖ਼ਲ ਹੋ 'ਗੇ। ਇਕ ਦਿਨ ਤਿੰਨ ਚਾਰ ਬਲਾਈਂਡ ਮੁੰਡੇ ਇਕ-ਦੂਜੇ ਦਾ ਹੱਥ ਫੜੀ ਦਾਖ਼ਲ ਹੋਣ ਲਈ ਆ ਗਏ। ਸਟਾਫ਼ ਮੈਂਬਰਾਂ ਨੇ ਦੇਖਿਆ ਤਾਂ ਸਭ ਨੇ ਇਕਮੁੱਠ ਹੋ ਕੇ ਉਨ੍ਹਾਂ ਨੂੰ ਦਾਖ਼ਲ ਕਰਨ ਤੋਂ ਨਾਂਹ ਕਰ ਦਿੱਤੀ। ਜਦ ਮੈਂ ਕਾਰਨ ਪੁੱਛਿਆ ਤਾਂ ਉਨ੍ਹਾਂ ਕਿਹਾ, 'ਮੈਡਮ ਇਹ ਬਲਾਈਂਡ ਬੱਚੇ ਬਹੁਤ ਤੰਗ ਕਰਦੇ ਨੇ, ਬੜੇ ਜ਼ਿੱਦੀ ਹੁੰਦੇ ਨੇ, ਕਿਸੇ ਦਾ ਕਹਿਣਾ ਨਹੀਂ ਮੰਨਦੇ। ਸਕੂਲ ਦਾ ਕੋਈ ਕਾਇਦਾ-ਕਾਨੂੰਨ ਨਹੀਂ ਨਿਭਾਉਂਦੇ। ਇਨ੍ਹਾਂ ਨੂੰ ਦੇਖ ਕੇ ਸਕੂਲ ਦੇ ਬਾਕੀ ਬੱਚੇ ਵੀ ਵਿਗੜਦੇ ਹਨ। ਅਸੀਂ ਪਹਿਲਾਂ ਹੀ ਇਨ੍ਹਾਂ ਦਾ ਇਹ ਤਜਰਬਾ ਕਰਕੇ ਦੇਖ ਚੁੱਕੇ ਹਾਂ।' ਮੈਂ ਬੜੀ ਹੈਰਾਨ ਹੋਈ। ਮੈਨੂੰ ਤਾਂ ਉਹ ਇਕਦਮ ਚੰਗੇ-ਭਲੇ ਲੱਗੇ। ਇਕ ਅੱਖਾਂ ਦੀ ਕਮੀ ਸੀ। ਬਾਕੀ ਉਹ ਬਿਲਕੁਲ ਨਾਰਮਲ ਸਨ, ਪਰ ਮੈਂ ਉਨ੍ਹਾਂ ਨੂੰ ਦਾਖ਼ਲ ਕਰਕੇ ਆਪਣੇ ਸਟਾਫ਼ ਨੂੰ ਵੀ ਨਾਰਾਜ਼ ਨਹੀਂ ਸੀ ਕਰਨਾ ਚਾਹੁੰਦੀ। ਸੋ, ਮੈਂ ਉਨ੍ਹਾਂ ਬੱਚਿਆਂ ਨੂੰ ਅਗਲੇ ਹਫ਼ਤੇ ਆਉਣ ਲਈ ਕਹਿ ਦਿੱਤਾ।
ਅਗਲੇ 4-5 ਦਿਨਾਂ ਵਿਚ ਮੈਂ ਪੁੱਛ-ਪੜਤਾਲ ਕੀਤੀ ਤੇ ਉਨ੍ਹਾਂ ਅਪੰਗ ਬੱਚਿਆਂ ਦੀ ਬਾਬਤ ਪੂਰੀ ਜਾਣਕਾਰੀ ਹਾਸਲ ਕੀਤੀ। ਪਤਾ ਲੱਗਿਆ ਕਿ ਵੈਸੇ ਤਾਂ ਇਹ ਬੱਚੇ ਠੀਕ-ਠਾਕ ਹੀ ਰਹਿੰਦੇ ਹਨ, ਸ਼ਰਾਰਤਾਂ ਵੀ ਨਹੀਂ ਕਰਦੇ ਪਰ ਵਿਚੋਂ ਕਈ ਵਾਰ ਕੋਈ ਬੱਚਾ ਅਜਿਹਾ ਨਿਕਲ ਆਉਂਦਾ ਹੈ, ਜੋ ਉਹ ਬਾਕੀ ਬੱਚਿਆਂ ਨੂੰ ਵੀ ਆਪਣੇ ਮਗਰ ਲਾ ਲੈਂਦਾ ਹੈ ਤੇ ਆਪਣੇ ਅਪੰਗ ਹੋਣ ਦੀ ਕਮੀ ਦਾ ਵਾਸਤਾ ਦੇ ਕੇ ਉਨ੍ਹਾਂ ਦੀ ਹਮਦਰਦੀ ਜਿੱਤ ਲੈਂਦਾ ਹੈ ਤੇ ਫੇਰ ਸਾਰੇ ਮਿਲ ਕੇ ਟੀਚਰਾਂ ਲਈ ਸਮੱਸਿਆ ਖੜ੍ਹੀ ਕਰ ਦਿੰਦੇ ਹਨ। ਸੋ, ਉਨ੍ਹਾਂ ਨੂੰ ਪੜ੍ਹਾਉਣ ਲਈ ਬੜੀਆਂ ਗੱਲਾਂ ਦਾ ਧਿਆਨ ਰੱਖਣਾ ਪੈਂਦਾ ਹੈ। ਮੈਨੂੰ ਹਾਸਾ ਆ ਗਿਆ ਬਈ ਲੀਡਰਸ਼ਿਪ ਦੇ ਜਜ਼ਬੇ ਦਾ ਪੈਦਾ ਹੋਣਾ ਤਾਂ ਇਨਸਾਨੀ ਫਿਤਰਤ ਹੈ, ਫੇਰ ਚਾਹੇ ਉਹ ਇਨਸਾਨ ਬਲਾਈਂਡ ਹੈ ਜਾਂ ਚੰਗਾ ਭਲਾ, ਬਗ਼ਾਵਤ ਤਾਂ ਕੋਈ ਵੀ ਕਰ ਸਕਦਾ ਹੈ।
ਮੈਂ ਅਗਲੇ ਦਿਨ ਟੀਚਰਾਂ ਦੀ ਮੀਟਿੰਗ ਕੀਤੀ ਤੇ ਇਹ ਸਾਰੀਆਂ ਗੱਲਾਂ ਉਨ੍ਹਾਂ ਨੂੰ ਸਮਝਾਈਆਂ ਤੇ ਉਨ੍ਹਾਂ ਸਭ ਦੀ ਸਹਿਮਤੀ ਨਾਲ ਉਨ੍ਹਾਂ ਬਲਾਈਂਡ ਬੱਚਿਆਂ ਨੂੰ ਦਾਖ਼ਲ ਕਰ ਲਿਆ ਤੇ ਉਨ੍ਹਾਂ ਦੀ ਦੇਖਾ-ਦੇਖੀ ਹੋਰ ਵੀ ਕਈ ਬੱਚੇ ਉਨ੍ਹਾਂ ਵਰਗੇ ਸਕੂਲ ਵਿਚ ਦਾਖਲ ਹੋ ਗਏ। ਇਸ ਤੋਂ ਬਾਅਦ ਦੋ ਕੁ ਮਹੀਨੇ ਬੜੇ ਸੋਹਣੇ ਲੰਘ ਗਏ ਤੇ ਸਕੂਲ ਦਾ ਕੰਮਕਾਰ ਵੀ ਵਧੀਆ ਚੱਲ ਰਿਹਾ ਸੀ। ਅਚਾਨਕ ਇਕ ਦਿਨ ਪਤਾ ਲੱਗਿਆ ਕਿ 11ਵੀਂ, 12ਵੀਂ ਦੇ ਬੱਚਿਆਂ ਨੇ ਕਲਾਸਾਂ ਦਾ ਬਾਈਕਾਟ ਕਰ ਦਿੱਤਾ ਹੈ। ਸਾਰੇ ਬਾਹਰ ਗਾਰਡਨ ਵਿਚ ਬੈਠੇ ਹਨ ਤੇ ਟੀਚਰਾਂ ਦੇ ਬੁਲਾਉਣ 'ਤੇ ਵੀ ਆਪਣੀਆਂ ਕਲਾਸਾਂ ਵਿਚ ਨਹੀਂ ਜਾ ਰਹੇ। ਮੈਂ ਹੈਰਾਨ ਹੋ ਗਈ ਤੇ ਟੀਚਰਾਂ ਦੀ ਭਵਿੱਖਬਾਣੀ ਸੱਚੀ ਹੁੰਦੀ ਜਾਪੀ। ਪਰ ਮੈਨੂੰ ਇਕਦਮ ਸਿੱਧਿਆਂ ਜਾ ਕੇ ਉਨ੍ਹਾਂ ਨੂੰ ਡਰਾਉਣ-ਧਮਕਾਉਣ ਜਾਂ ਸਮਝਾਉਣ ਵਿਚ ਆਪਣੀ ਹੇਠੀ ਮਹਿਸੂਸ ਹੋਈ। ਸੋ, ਪਹਿਲਾਂ ਸੈਕਿੰਡ ਮਾ: ਤੇ ਫਿਰ ਡੀ.ਪੀ.ਈ. ਸਾਹਿਬ ਨੂੰ ਉਨ੍ਹਾਂ ਨੂੰ ਮਨਾਉਣ ਲਈ ਭੇਜਿਆ ਪਰ ਉਨ੍ਹਾਂ ਦੀ ਪੂਰੀ ਕੋਸ਼ਿਸ਼ ਦੇ ਬਾਵਜੂਦ ਵੀ ਬੱਚੇ ਆਪਣੀ ਜ਼ਿੱਦ 'ਤੇ ਅੜੇ ਰਹੇ ਤੇ ਸਕੂਲ ਦੀ ਛੁੱਟੀ ਹੋਣ 'ਤੇ ਚੁੱਪ-ਚਾਪ ਆਪਣੇ ਘਰਾਂ ਨੂੰ ਚਲੇ ਗਏ। ਅਗਲਾ ਦਿਨ ਵੀ ਐਵੇਂ ਹੀ ਲੰਘ ਗਿਆ। ਅਖੀਰ ਮੈਂ ਸੋਚ-ਸੋਚ ਕੇ ਬਲਾਈਂਡ ਲੜਕੇ ਜਗਬੀਰ ਨੂੰ ਬੁਲਾਇਆ। (ਬਾਕੀ ਅਗਲੇ ਐਤਵਾਰ ਦੇ ਅੰਕ 'ਚ)


-ਮੋਬਾਈਲ : 99881-52523.





Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX