ਤਾਜਾ ਖ਼ਬਰਾਂ


ਡੇਹਲੋਂ 'ਚ ਗੈਂਗਸਟਰਾਂ ਨੇ ਪੁਲਿਸ 'ਤੇ ਚਲਾਈ ਗੋਲੀ
. . .  26 minutes ago
ਡੇਹਲੋਂ, 26 ਮਾਰਚ (ਅੰਮ੍ਰਿਤਪਾਲ ਸਿੰਘ ਕੈਲੇ) - ਡੇਹਲੋਂ ਕਸਬੇ ਦੇ ਮੁੱਖ ਚੌਂਕ ਵਿਖੇ ਜ਼ਿਲ੍ਹਾ ਪੁਲਿਸ ਵੱਲੋਂ ਗੈਂਗਸਟਰਾਂ ਦੇ ਗਰੁੱਪ ਦਾ ਪਿੱਛਾ ਕਰਦੇ ਸਮੇਂ ਗੈਂਗਸਟਰਾਂ ਨੇ ਪੁਲਿਸ ਉੱਪਰ ਗੋਲੀ ਚਲਾ ਦਿੱਤੀ, ਇਸ ਦੌਰਾਨ...
ਆਈ.ਪੀ.ਐੱਲ 2019 : ਚੇਨਈ ਸੁਪਰ ਕਿੰਗਜ਼ ਖ਼ਿਲਾਫ਼ ਟਾਸ ਜਿੱਤ ਕੇ ਦਿੱਲੀ ਕੈਪੀਟਲਸ ਵੱਲੋਂ ਪਹਿਲੇ ਬੱਲੇਬਾਜ਼ੀ ਦਾ ਫ਼ੈਸਲਾ
. . .  about 1 hour ago
'ਸ਼ਬਦ ਗੁਰੂ ਯਾਤਰਾ' ਦਾ ਗੁਰੂ ਨਾਨਕ ਮਿਸ਼ਨ ਹਸਪਤਾਲ ਢਾਹਾਂ ਕਲੇਰਾਂ ਪੁੱਜਣ 'ਤੇ ਸੰਗਤਾਂ ਵਲੋਂ ਨਿੱਘਾ ਸਵਾਗਤ
. . .  about 2 hours ago
ਬੰਗਾ, 26 ਮਾਰਚ (ਗੁਰਜਿੰਦਰ ਸਿੰਘ ਗੁਰੂ)- ਸਿੱਖ ਧਰਮ ਦੇ ਮੋਢੀ ਪਹਿਲੇ ਪਾਤਸ਼ਾਹ ਧੰਨ ਧੰਨ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ 550 ਸਾਲਾ ਪ੍ਰਕਾਸ਼ ਪੁਰਬ ਨੂੰ ਸਮਰਪਿਤ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਗੁਰਦੁਆਰਾ ਸ੍ਰੀ ਬੇਰ ਸਾਹਿਬ ਸੁਲਤਾਨਪੁਰ ਲੋਧੀ ਤੋਂ ਆਰੰਭ .....
ਸਮਾਜਵਾਦੀ ਪਾਰਟੀ ਵੱਲੋਂ 3 ਹੋਰ ਉਮੀਦਵਾਰਾਂ ਦੀ ਸੂਚੀ ਜਾਰੀ
. . .  about 2 hours ago
ਨਵੀਂ ਦਿੱਲੀ, 26 ਮਾਰਚ- ਲੋਕ ਸਭਾ ਚੋਣਾਂ ਨੂੰ ਲੈ ਕੇ ਅਖਿਲੇਸ਼ ਯਾਦਵ ਦੀ ਸਮਾਜਵਾਦੀ ਪਾਰਟੀ ਨੇ ਉਮੀਦਵਾਰਾਂ ਦੀ ਇਕ ਹੋਰ ਸੂਚੀ ਜਾਰੀ ਕਰ ਦਿੱਤੀ ਹੈ। ਇਸ ਸੂਚੀ 'ਚ 3 ਉਮੀਦਵਾਰਾਂ ਦੇ ਨਾਂਅ ਸ਼ਾਮਲ....
ਪਟਿਆਲਾ ਪੁਲਿਸ ਵੱਲੋਂ 1 ਕੁਇੰਟਲ 65 ਕਿਲੋ ਚਾਂਦੀ ਬਰਾਮਦ
. . .  about 2 hours ago
ਪਟਿਆਲਾ, 26 ਮਾਰਚ (ਅਮਨਦੀਪ ਸਿੰਘ)- ਐੱਸ.ਐੱਸ.ਪੀ. ਪਟਿਆਲਾ ਮਨਦੀਪ ਸਿੰਘ ਸਿੱਧੂ ਨੇ ਪ੍ਰੈੱਸ ਵਾਰਤਾ ਦੌਰਾਨ ਦਸਿਆ ਕਿ ਚੋਣ ਕਮਿਸ਼ਨ ਦੀਆ ਹਦਾਇਤਾਂ ਮੁਤਾਬਕ ਪਟਿਆਲਾ ਅੰਦਰ ਸਖ਼ਤ ਨਾਕਾਬੰਦੀ ਚਲਦੀ ਆ ਰਹੀ ਹੈ ਜਿਸ ਦੌਰਾਨ ਸਦਰ ਰਾਜਪੁਰਾ ਪੁਲਿਸ .....
ਭਾਜਪਾ ਨੇ ਉੱਤਰ ਪ੍ਰਦੇਸ਼ ਤੇ ਪੱਛਮੀ ਬੰਗਾਲ ਦੇ ਉਮੀਦਵਾਰਾਂ ਦੀ ਜਾਰੀ ਕੀਤੀ ਸੂਚੀ
. . .  about 2 hours ago
ਲਖਨਊ, 26 ਮਾਰਚ- ਲੋਕ ਸਭਾ ਚੋਣਾਂ 2019 ਦੇ ਲਈ ਭਾਰਤੀ ਜਨਤਾ ਪਾਰਟੀ ਨੇ ਉੱਤਰ ਪ੍ਰਦੇਸ਼ ਦੇ ਲਈ29 ਉਮੀਦਵਾਰਾਂ ਅਤੇ ਪੱਛਮੀ ਬੰਗਾਲ ਦੇ ਲਈ 10 ਉਮੀਦਵਾਰਾਂ ਦੇ ਨਾਂਅ ਦੀ ਸੂਚੀ ਜਾਰੀ
ਦੇਸ਼ ਦਾ ਪ੍ਰਧਾਨ ਮੰਤਰੀ ਅਜਿਹਾ ਹੋਣਾ ਚਾਹੀਦੈ, ਜਿਸ ਦੇ ਸਹੁੰ ਚੁੱਕਦਿਆਂ ਹੀ ਦੁਸ਼ਮਣਾਂ ਦੇ ਦਿਲਾਂ 'ਚ ਡਰ ਬੈਠ ਜਾਏ- ਅਮਿਤ
. . .  about 2 hours ago
ਲਖਨਊ, 26 ਮਾਰਚ- ਭਾਜਪਾ ਪ੍ਰਧਾਨ ਅਮਿਤ ਸ਼ਾਹ ਨੇ ਉੱਤਰ ਪ੍ਰਦੇਸ਼ ਦੇ ਮੁਰਾਦਾਬਾਦ 'ਚ ਇੱਕ ਰੈਲੀ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਦੇਸ਼ ਨੂੰ ਇੱਕ ਅਜਿਹਾ ਪ੍ਰਧਾਨ ਮੰਤਰੀ ਚਾਹੀਦਾ ਹੈ, ਜਿਸ ਦੇ ਸਹੁੰ ਚੁੱਕਦਿਆਂ ਹੀ ਦੁਸ਼ਮਣਾਂ ਦੇ ਦਿਲ 'ਚ ਡਰ ਬੈਠ ਜਾਏ। ਏਅਰ ਸਟ੍ਰਾਈਕ ...
ਦਿਨ ਦਿਹਾੜੇ ਅਣਪਛਾਤੇ ਵਿਅਕਤੀਆਂ ਨੇ ਗੋਲੀਆਂ ਮਾਰ ਕੇ ਨੌਜਵਾਨ ਦਾ ਕੀਤਾ ਕਤਲ
. . .  about 3 hours ago
ਖਡੂਰ ਸਾਹਿਬ 26 ਮਾਰਚ (ਮਾਨ ਸਿੰਘ, ਰਸ਼ਪਾਲ ਸਿੰਘ ਕੁਲਾਰ)- ਥਾਣਾ ਵੈਰੋਵਾਲ ਅਧੀਨ ਆਉਂਦੇ ਪਿੰਡ ਏਕਲਗੱਡਾ ਵਿਖੇ ਅਣਪਛਾਤੇ ਵਿਅਕਤੀਆਂ ਵੱਲੋਂ ਗੋਲੀਆਂ ਮਾਰ ਕੇ ਇੱਕ ਨੌਜਵਾਨ ਦਾ ਕਤਲ ਕਰ ਦੇਣ ਸੰਬੰਧੀ ਖ਼ਬਰ ਮਿਲੀ ਹੈ ਮੌਕੇ ਤੇ ਜਾਣਕਾਰੀ ਦਿੰਦੇ .....
ਸੈਪਟਿਕ ਟੈਂਕ ਦੀ ਸਫ਼ਾਈ ਦੌਰਾਨ ਦਮ ਘੁਟਣ ਕਾਰਨ ਛੇ ਮਜ਼ਦੂਰਾਂ ਦੀ ਮੌਤ
. . .  about 3 hours ago
ਚੇਨਈ, 26 ਮਾਰਚ- ਤਾਮਿਲਨਾਡੂ ਦੇ ਕਾਂਚੀਪੁਰਮ ਜ਼ਿਲ੍ਹੇ 'ਚ ਅੱਜ ਇੱਕ ਸੈਪਟਿਕ ਟੈਂਕ ਦੀ ਸਫ਼ਾਈ ਕਰਨ ਗਏ 6 ਮਜ਼ਦੂਰਾਂ ਦੀ ਦਮ ਘੁਟਣ ਕਾਰਨ ਮੌਤ ਹੋ ਗਈ। ਮਿਲੀ ਜਾਣਕਾਰੀ ਮੁਤਾਬਕ ਇਹ ਸਾਰੇ ਮਜ਼ਦੂਰ ਜ਼ਿਲ੍ਹੇ ਦੇ ਸ਼੍ਰੀਪੇਰੰਬਦੂਰ ਇਲਾਕੇ 'ਚ ਇੱਕ ਸੈਪਟਿਕ ਟੈਂਕ ਦੀ...
ਨਵਾਜ਼ ਸ਼ਰੀਫ਼ ਦੀ ਜ਼ਮਾਨਤ ਮਨਜ਼ੂਰੀ ਦਾ ਇਮਰਾਨ ਖ਼ਾਨ ਨੇ ਕੀਤਾ ਸਵਾਗਤ
. . .  about 3 hours ago
ਇਸਲਾਮਾਬਾਦ, 26 ਮਾਰਚ- ਅਲ ਅਜ਼ੀਜ਼ੀਆ ਭ੍ਰਿਸ਼ਟਾਚਾਰ ਮਾਮਲੇ 'ਚ ਸੱਤ ਸਾਲ ਦੀ ਜੇਲ੍ਹ ਦੀ ਸਜ਼ਾ ਕੱਟ ਰਹੇ ਪਾਕਿਸਤਾਨ ਦੇ ਸਾਬਕਾ ਪ੍ਰਧਾਨ ਮੰਤਰੀ ਨਵਾਜ਼ ਸ਼ਰੀਫ਼ ਨੂੰ ਮੈਡੀਕਲ ਆਧਾਰ 'ਤੇ ਸੁਪਰੀਮ ਕੋਰਟ ਨੇ ਅੱਜ ਛੇ ਹਫ਼ਤਿਆਂ ਦੀ ਜ਼ਮਾਨਤ ਦਿੰਦਿਆਂ ਉਨ੍ਹਾਂ ਦੀ ....
ਹੋਰ ਖ਼ਬਰਾਂ..

ਨਾਰੀ ਸੰਸਾਰ

ਸੁੰਦਰਤਾ ਨੂੰ ਗ੍ਰਹਿਣ ਲਗਾਉਂਦਾ ਹੈ ਪ੍ਰਦੂਸ਼ਣ

ਹਵਾ ਵਿਚ ਵਧਦੇ ਪ੍ਰਦੂਸ਼ਣ ਨਾਲ ਨਾ ਸਿਰਫ ਤੁਹਾਡੀ ਸਰੀਰਕ ਤੰਦਰੁਸਤੀ 'ਤੇ ਮਾੜਾ ਪ੍ਰਭਾਵ ਪੈਂਦਾ ਹੈ, ਸਗੋਂ ਉਸ ਨਾਲ ਤੁਹਾਡੀ ਖੂਬਸੂਰਤੀ ਨੂੰ ਵੀ ਗ੍ਰਹਿਣ ਲਗਦਾ ਹੈ। ਸ਼ਹਿਰਾਂ ਵਿਚ ਵਧਦੇ ਹਵਾ ਪ੍ਰਦੂਸ਼ਣ ਨਾਲ ਤੁਹਾਨੂੰ ਫੇਫੜਿਆਂ ਦੇ ਰੋਗਾਂ ਤੋਂ ਇਲਾਵਾ ਸਮੇਂ ਤੋਂ ਪਹਿਲਾਂ ਬੁਢਾਪਾ, ਪਿਗਮੈਂਟੇਸ਼ਨ, ਚਮੜੀ ਦੇ ਮੁਸਾਮ ਬੰਦ ਹੋਣੇ ਆਦਿ ਅਨੇਕ ਸੁੰਦਰਤਾ ਸਮੱਸਿਆਵਾਂ ਆ ਜਾਂਦੀਆਂ ਹਨ। ਜ਼ਿਆਦਾਤਰ ਭਾਰਤੀ ਸ਼ਹਿਰਾਂ ਵਿਚ ਵਾਹਨਾਂ, ਏਅਰਕੰਡੀਸ਼ਨਾਂ, ਧੂੜ, ਧੂੰਏਂ ਆਦਿ ਨਾਲ ਆਸਮਾਨ ਵਿਚ ਬਣਨ ਵਾਲੀ ਜ਼ਹਿਰੀਲੀ ਧੁੰਦ ਦੀ ਚਾਦਰ ਨਾਲ ਮਾਈਕ੍ਰੋਸਕੋਪਿਕ ਰਸਾਇਣਾਂ ਦੀ ਇਕ ਪਰਤ ਬਣ ਜਾਂਦੀ ਹੈ, ਜਿਸ ਦੇ ਕਣ ਸਾਡੇ ਮੁਸਾਮਾਂ ਦੇ ਮੁਕਾਬਲੇ 20 ਗੁਣਾ ਜ਼ਿਆਦਾ ਪਤਲੇ ਹੁੰਦੇ ਹਨ, ਜਿਸ ਦੀ ਵਜ੍ਹਾ ਨਾਲ ਉਹ ਸਾਡੀ ਬਾਹਰੀ ਚਮੜੀ ਰਾਹੀਂ ਸਾਡੇ ਮੁਸਾਮਾਂ ਵਿਚ ਦਾਖ਼ਲ ਹੋ ਕੇ ਚਮੜੀ ਦੀ ਨਮੀ ਨੂੰ ਖ਼ਤਮ ਕਰ ਦਿੰਦੇ ਹਨ, ਜਿਸ ਨਾਲ ਚਮੜੀ ਵਿਚ ਲਾਲੀ, ਸੋਜ, ਕਾਲੇ ਦਾਗ਼, ਚਮੜੀ ਵਿਚ ਲਚੀਲੇਪਨ ਦੀ ਕਮੀ ਆ ਜਾਂਦੀ ਹੈ, ਜਿਸ ਨਾਲ ਚਮੜੀ ਨਿਰਜੀਵ, ਖੁਸ਼ਕ, ਕਮਜ਼ੋਰ ਅਤੇ ਬੁਝੀ-ਬੁਝੀ ਜਿਹੀ ਹੋ ਜਾਂਦੀ ਹੈ। ਹਵਾ ਵਿਚ ਮੌਜੂਦ ਰਸਾਇਣਕ ਪ੍ਰਦੂਸ਼ਣ ਚਮੜੀ ਅਤੇ ਖੋਪੜੀ ਦੇ ਆਮ ਸੰਤੁਲਨ ਨੂੰ ਵਿਗਾੜ ਦਿੰਦੇ ਹਨ, ਜਿਸ ਨਾਲ ਚਮੜੀ ਵਿਚ ਰੁੱਖਾਪਣ, ਸੰਵੇਦਨਹੀਣਤਾ, ਲਾਲ ਚਕੱਤੇ, ਮੁਹਾਸੇ ਅਤੇ ਖੁਜਲੀ ਅਤੇ ਕਈ ਤਰ੍ਹਾਂ ਦੀ ਅਲਰਜੀ ਅਤੇ ਵਾਲਾਂ ਵਿਚ ਸਿੱਕਰੀ ਆਦਿ ਦੀਆਂ ਸਮੱਸਿਆਵਾਂ ਆ ਸਕਦੀਆਂ ਹਨ। ਪਰ ਜੇ ਤੁਸੀਂ ਸ਼ਹਿਰਾਂ ਵਿਚ ਰਹਿੰਦੇ ਹੋ ਤਾਂ ਤੁਸੀਂ ਪ੍ਰਦੂਸ਼ਣ ਤੋਂ ਕਦੇ ਵੀ ਛੁਟਕਾਰਾ ਨਹੀਂ ਪਾ ਸਕਦੇ ਪਰ ਚੰਗੀ ਖ਼ਬਰ ਇਹ ਹੈ ਕਿ ਤੁਸੀਂ ਪ੍ਰਦੂਸ਼ਣ ਤੋਂ ਸੁੰਦਰਤਾ ਨੂੰ ਹੋਣ ਵਾਲੇ ਨੁਕਸਾਨ ਤੋਂ ਘੱਟ ਕਰ ਸਕਦੇ ਹੋ।
ਆਯੁਰਵੈਦਿਕ ਘਰੇਲੂ ਇਲਾਜ ਅਤੇ ਪ੍ਰਾਚੀਨ ਦਵਾਈ ਵਾਲੇ ਪੌਦਿਆਂ ਦੀ ਮਦਦ ਨਾਲ ਪ੍ਰਦੂਸ਼ਣ ਦੇ ਸੁੰਦਰਤਾ 'ਤੇ ਪੈਣ ਵਾਲੇ ਪ੍ਰਭਾਵ ਨੂੰ ਪੂਰੀ ਤਰ੍ਹਾਂ ਰੋਕਿਆ ਜਾ ਸਕਦਾ ਹੈ ਅਤੇ ਤੁਹਾਡੀ ਸੁੰਦਰਤਾ ਆਮ ਵਾਂਗ ਨਿਖਰੀ ਰਹਿ ਸਕਦੀ ਹੈ।
ਜੇ ਤੁਹਾਡੀ ਚਮੜੀ ਖੁਸ਼ਕ ਹੈ ਤਾਂ ਤੁਹਾਨੂੰ ਕਲੀਜ਼ਿੰਗ ਕ੍ਰੀਮ ਅਤੇ ਜੈੱਲ ਦੀ ਵਰਤੋਂ ਕਰਨੀ ਚਾਹੀਦੀ ਹੈ, ਜਦੋਂ ਕਿ ਤੇਲੀ ਚਮੜੀ ਵਿਚ ਕਲੀਨਿੰਗ ਦੁੱਧ ਜਾਂ ਫੇਸਵਾਸ਼ ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ। ਸੁੰਦਰਤਾ 'ਤੇ ਪ੍ਰਦੂਸ਼ਣ ਦੇ ਪ੍ਰਭਾਵਾਂ ਨੂੰ ਘੱਟ ਕਰਨ ਲਈ ਚੰਦਨ, ਸਫੈਦੇ ਦਾ ਤੇਲ, ਪੁਦੀਨਾ, ਨਿੰਮ, ਤੁਲਸੀ, ਧ੍ਰਤਕੁਮਾਰੀ ਵਰਗੇ ਪਦਾਰਥਾਂ ਦੀ ਵਰਤੋਂ ਕਰੋ।
ਇਕ ਚਮਚ ਸਿਰਕਾ ਅਤੇ ਧ੍ਰਤਕੁਮਾਰੀ ਵਿਚ ਇਕ ਆਂਡੇ ਨੂੰ ਮਿਲਾ ਕੇ ਮਿਸ਼ਰਣ ਬਣਾ ਲਓ ਅਤੇ ਮਿਸ਼ਰਣ ਨੂੰ ਹਲਕੇ-ਹਲਕੇ ਖੋਪੜੀ 'ਤੇ ਲਗਾ ਲਓ। ਇਸ ਮਿਸ਼ਰਣ ਨੂੰ ਖੋਪੜੀ 'ਤੇ ਅੱਧੇ ਘੰਟੇ ਤੱਕ ਲੱਗਾ ਰਹਿਣ ਤੋਂ ਬਾਅਦ ਖੋਪੜੀ ਨੂੰ ਤਾਜ਼ੇ ਅਤੇ ਸਾਫ਼ ਪਾਣੀ ਨਾਲ ਧੋ ਦਿਓ। ਤੁਸੀਂ ਬਦਲਵੇਂ ਤੌਰ 'ਤੇ ਗਰਮ ਤੇਲ ਦੀ ਥੈਰੇਪੀ ਵੀ ਦੇ ਸਕਦੇ ਹੋ। ਨਾਰੀਅਲ ਤੇਲ ਨੂੰ ਗਰਮ ਕਰਕੇ ਇਸ ਨੂੰ ਸਿਰ 'ਤੇ ਲਗਾ ਲਓ। ਹੁਣ ਗਰਮ ਪਾਣੀ ਵਿਚ ਇਕ ਤੌਲੀਆ ਡੁਬੋਵੋ ਅਤੇ ਤੌਲੀਏ ਦਾ ਗਰਮ ਪਾਣੀ ਨਿਚੋੜਨ ਤੋਂ ਬਾਅਦ ਤੌਲੀਏ ਨੂੰ ਸਿਰ ਦੇ ਚਾਰੇ ਪਾਸੇ ਪਗੜੀ ਵਾਂਗ ਬੰਨ੍ਹ ਕੇ ਇਸ ਨੂੰ ਪੰਜ ਮਿੰਟ ਤੱਕ ਰਹਿਣ ਦਿਓ ਅਤੇ ਇਸ ਪ੍ਰਕਿਰਿਆ ਨੂੰ 3-4 ਵਾਰ ਦੁਹਰਾਓ। ਇਸ ਪ੍ਰਕਿਰਿਆ ਨਾਲ ਵਾਲਾਂ ਅਤੇ ਖੋਪੜੀ 'ਤੇ ਤੇਲ ਨੂੰ ਸੋਖਣ ਵਿਚ ਮਦਦ ਮਿਲਦੀ ਹੈ। ਇਸ ਤੇਲ ਨੂੰ ਪੂਰੀ ਰਾਤ ਸਿਰ 'ਤੇ ਲੱਗਾ ਰਹਿਣ ਦਿਓ ਅਤੇ ਸਵੇਰੇ ਤਾਜ਼ੇ-ਠੰਢੇ ਪਾਣੀ ਨਾਲ ਧੋ ਦਿਓ।
ਪ੍ਰਦੂਸ਼ਣ ਨਾਲ ਜੰਗ ਵਿਚ ਪਾਣੀ ਮਹੱਤਵਪੂਰਨ ਭੂਮਿਕਾ ਅਦਾ ਕਰਦਾ ਹੈ। ਇਸ ਦੌਰਾਨ ਤੁਸੀਂ ਤਾਜ਼ੇ, ਸ਼ੁੱਧ ਪਾਣੀ ਦੀ ਵੱਧ ਤੋਂ ਵੱਧ ਵਰਤੋਂ ਕਰੋ, ਕਿਉਂਕਿ ਪਾਣੀ ਸਰੀਰ ਦੇ ਜ਼ਹਿਰੀਲੇ ਪਦਾਰਥਾਂ ਨੂੰ ਬਾਹਰ ਕੱਢਣ ਅਤੇ ਕੋਸ਼ਿਕਾਵਾਂ ਨੂੰ ਪੋਸ਼ਟਿਕ ਪਦਾਰਥਾਂ ਨੂੰ ਬਣਾਈ ਰੱਖਣ ਵਿਚ ਮਦਦ ਕਰਦਾ ਹੈ। ਪ੍ਰਦੂਸ਼ਣ ਦੀ ਵਜ੍ਹਾ ਨਾਲ ਚਮੜੀ ਨੂੰ ਹੋਏ ਨੁਕਸਾਨ ਦੀ ਭਰਪਾਈ ਪਾਣੀ ਨਾਲ ਅਸਾਨੀ ਨਾਲ ਕੀਤੀ ਜਾ ਸਕਦੀ ਹੈ।
ਓਮੇਗਾ-3 ਅਤੇ ਓਮੇਗਾ-6 ਫੈਟੀ ਐਸਿਡਜ਼ ਚਮੜੀ ਨੂੰ ਪ੍ਰਦੂਸ਼ਣ ਦੇ ਮਾੜੇ ਪ੍ਰਭਾਵ ਤੋਂ ਬਚਾਉਣ ਵਿਚ ਅਹਿਮ ਭੂਮਿਕਾ ਅਦਾ ਕਰਦੇ ਹਨ। ਫੈਟੀ ਐਸਿਡਜ਼ ਚਮੜੀ ਵਿਚ ਆਇਲ ਸ਼ੀਲਡ ਬਣਾ ਦਿੰਦੇ ਹਨ, ਜਿਸ ਨਾਲ ਚਮੜੀ ਨੂੰ ਪੈਰਾਬੈਂਗਣੀ ਕਿਰਨਾਂ ਨਾਲ ਹੋਣ ਵਾਲੇ ਨੁਕਸਾਨ ਤੋਂ ਸੁਰੱਖਿਆ ਮਿਲਦੀ ਹੈ।
ਓਮੇਗਾ-3 ਫੈਟੀ ਐਸਿਡ ਬਰਫ਼ੀਲੇ ਪਹਾੜਾਂ ਦੀਆਂ ਨਦੀਆਂ ਵਿਚ ਪਾਏ ਜਾਣ ਵਾਲੀ ਮੱਛੀ, ਅਖਰੋਟ, ਰਾਜਮਾਂਹ ਅਤੇ ਪਾਲਕ ਵਿਚ ਭਰਪੂਰ ਮਾਤਰਾ ਵਿਚ ਮਿਲਦਾ ਹੈ, ਜਦੋਂ ਕਿ ਓਮੇਗਾ-6 ਚਿਕਨ, ਮੀਟ, ਖਾਧ ਤੇਲਾਂ, ਅਨਾਜ ਅਤੇ ਖਾਧ ਬੀਜਾਂ ਵਿਚ ਪਾਇਆ ਜਾਂਦਾ ਹੈ।
ਇਸ ਤੋਂ ਇਲਾਵਾ ਅੰਜੀਰ, ਬਰਗਦ, ਪਿੱਪਲ ਦਾ ਰੁੱਖ ਸਪਾਈਡਰ ਪਲਾਂਟ ਵੀ ਹਵਾ ਨੂੰ ਸਾਫ਼ ਕਰਨ ਵਿਚ ਕਾਫੀ ਸਹਾਇਕ ਮੰਨਿਆ ਜਾਂਦਾ ਹੈ, ਕਿਉਂਕਿ ਇਹ ਹਵਾ ਵਿਚ ਮੌਜੂਦ ਜ਼ਹਿਰੀਲੇ ਤੱਤਾਂ ਨੂੰ ਸੋਖ ਲੈਂਦੇ ਹਨ। ਇਸ ਤੋਂ ਇਲਾਵਾ ਸਾਂਸੇਵੀਰਿਆ, ਜਿਸ ਨੂੰ ਆਮ ਭਾਸ਼ਾ ਵਿਚ ਸਨੇਕ ਪਲਾਂਟ ਕਿਹਾ ਜਾਂਦਾ ਹੈ, ਵੀ ਹਵਾ ਪ੍ਰਦੂਸ਼ਣ ਨੂੰ ਰੋਕਣ ਅਤੇ ਤਾਜ਼ਾ ਸ਼ੁੱਧ ਹਵਾ ਦੇਣ ਵਿਚ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦਾ ਹੈ। ਸਨੇਕ ਪਲਾਂਟ ਨੂੰ ਆਮ ਤੌਰ 'ਤੇ ਬੈੱਡਰੂਮ ਵਿਚ ਰੱਖਿਆ ਜਾਂਦਾ ਹੈ ਅਤੇ ਇਸ ਦੀ ਦੇਖਭਾਲ ਵੀ ਕਾਫੀ ਆਸਾਨ ਅਤੇ ਆਮ ਹੈ। ਇਸ ਤੋਂ ਇਲਾਵਾ ਏਰੇਕਾ ਪਾਮ, ਇੰਗਲਿਸ਼ ਆਈਵੀ, ਬੋਸਟਨ ਫਰਨ ਅਤੇ ਪੀਸ ਲਿਲੀ ਵਰਗੇ ਪੌਦੇ ਵੀ ਭਾਰਤ ਵਿਚ ਅਸਾਨੀ ਨਾਲ ਮਿਲ ਜਾਂਦੇ ਹਨ ਅਤੇ ਵਾਤਾਵਰਨ ਦੇ ਦੋਸਤ ਮੰਨੇ ਜਾਂਦੇ ਹਨ।
**


ਖ਼ਬਰ ਸ਼ੇਅਰ ਕਰੋ

ਕਿਵੇਂ ਬਿਤਾਉਣ ਦੁਪਹਿਰਾ ਘਰੇਲੂ ਔਰਤਾਂ

ਸਮੇਂ ਦੀ ਸਹੀ ਵਰਤੋਂ ਇਸ ਤਰ੍ਹਾਂ ਕਰੋ, ਜਿਸ ਨਾਲ ਮਨ ਨੂੰ ਆਤਮਸੰਤੁਸ਼ਟੀ ਮਿਲੇ। ਤੁਸੀਂ ਹੇਠ ਲਿਖੇ ਕੰਮਾਂ ਵਿਚੋਂ ਆਪਣੀ ਰੁਚੀ ਵਾਲਾ ਕੰਮ ਕਰਕੇ ਆਪਣਾ ਸਮਾਂ ਬਿਤਾਅ ਸਕਦੇ ਹੋ :
ਪੜ੍ਹਾਉਣਾ : ਸਭ ਤੋਂ ਪਹਿਲਾਂ ਤੁਸੀਂ ਗੁਆਂਢ ਦੇ ਛੋਟੇ ਬੱਚਿਆਂ ਨੂੰ ਪੜ੍ਹਾ ਕੇ ਸਮੇਂ ਦੀ ਸਹੀ ਵਰਤੋਂ ਕਰ ਸਕਦੇ ਹੋ। ਬੱਚਿਆਂ ਨੂੰ ਆਮ ਗੱਲਾਂ ਦੀ ਜਾਣਕਾਰੀ ਵੀ ਦੇ ਸਕਦੇ ਹੋ। ਬੱਚਿਆਂ ਵਿਚ ਦੇਸ਼-ਭਗਤੀ ਦੀ ਭਾਵਨਾ ਵਿਕਸਿਤ ਕਰਨ ਦੀ ਕੋਸ਼ਿਸ਼ ਕਰੋ।
ਸਿਲਾਈ-ਕਢਾਈ ਅਤੇ ਬੁਣਾਈ ਨੂੰ ਅਪਣਾਓ : ਘਰ ਵਿਚ ਖੁਦ ਮਸ਼ੀਨ ਲਗਾਓ। ਆਧੁਨਿਕ ਸਮਾਜ ਦੀ ਲੋੜ ਅਨੁਸਾਰ ਸਿਲਾਈ, ਕਢਾਈ ਅਤੇ ਬੁਣਾਈ ਦਾ ਕੰਮ ਕਰਕੇ ਖਾਲੀ ਸਮੇਂ ਦੀ ਸਹੀ ਵਰਤੋਂ ਕਰ ਸਕਦੇ ਹੋ। ਇਸ ਨਾਲ ਤੁਸੀਂ ਘਰ ਦੀ ਆਮਦਨ ਵਿਚ ਵੀ ਵਾਧਾ ਕਰ ਸਕਦੇ ਹੋ। ਇਸ ਨੂੰ ਵਪਾਰ ਦੇ ਰੂਪ ਵਿਚ ਵੀ ਲੈ ਸਕਦੇ ਹੋ।
ਚਿੱਤਰ ਕਲਾ : ਇਹ ਇਕ ਹੋਰ ਮਾਧਿਅਮ ਹੈ, ਜਿਸ ਨੂੰ ਤੁਸੀਂ ਅਜ਼ਮਾ ਸਕਦੇ ਹੋ। ਆਪਣੀ ਰੁਚੀ ਦੀਆਂ ਤਸਵੀਰਾਂ ਬਣਾ ਸਕਦੇ ਹੋ। ਵਪਾਰਕ ਦ੍ਰਿਸ਼ਟੀ ਤੋਂ ਵੀ ਇਸ ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ। ਬੱਚਿਆਂ ਨੂੰ ਵੀ ਸਿਖਾ ਸਕਦੇ ਹੋ।
ਪਾਕ-ਕਲਾ : ਤੁਸੀਂ ਤਰ੍ਹਾਂ-ਤਰ੍ਹਾਂ ਦੇ ਪਕਵਾਨ ਬਣਾ ਸਕਦੇ ਹੋ। ਉਨ੍ਹਾਂ ਦਾ ਅਨੁਭਵ ਹਾਸਲ ਕਰਕੇ ਮੁਟਿਆਰਾਂ ਨੂੰ ਇਸ ਦੀ ਜਾਣਕਾਰੀ ਦੇ ਸਕਦੇ ਹੋ। ਅੱਜਕਲ੍ਹ ਕਿਤਾਬਾਂ ਵਿਚ ਅਨੇਕਾਂ ਤਰ੍ਹਾਂ ਦੀਆਂ ਵਿਧੀਆਂ ਪ੍ਰਕਾਸ਼ਿਤ ਹੁੰਦੀਆਂ ਰਹਿੰਦੀਆਂ ਹਨ। ਉਨ੍ਹਾਂ ਨੂੰ ਘਰ ਵਿਚ ਬਣਾ ਕੇ ਉਨ੍ਹਾਂ ਦਾ ਆਨੰਦ ਲੈ ਸਕਦੇ ਹੋ।
ਖਿਡੌਣੇ ਬਣਾਉਣ ਵਿਚ ਰੁਚੀ ਪੈਦਾ ਕਰੋ : ਸਮਾਜ ਵਿਚ ਇਸ ਦਾ ਮਹੱਤਵ ਵਧਦਾ ਜਾ ਰਿਹਾ ਹੈ, ਪਾਰਕਾਂ ਅਤੇ ਮੈਦਾਨਾਂ ਦੀ ਕਮੀ ਕਾਰਨ ਬੱਚੇ ਜ਼ਿਆਦਾ ਸਮਾਂ ਘਰ ਵਿਚ ਬਤੀਤ ਕਰਦੇ ਹਨ। ਅਜਿਹੇ ਵਿਚ ਬੱਚਿਆਂ ਨੂੰ ਘਰ ਵਿਚ ਰਹਿਣਾ ਪੈਂਦਾ ਹੈ ਅਤੇ ਖਿਡੌਣੇ ਹੀ ਮਨੋਰੰਜਨ ਦਾ ਸਾਧਨ ਬਣ ਜਾਂਦੇ ਹਨ। ਇਨ੍ਹਾਂ ਦਾ ਨਿਰਮਾਣ ਕਰੋ ਅਤੇ ਵਪਾਰ ਦੇ ਰੂਪ ਵਿਚ ਵੀ ਇਸ ਦੀ ਵਰਤੋਂ ਕਰੋ। ਸਮਾਂ ਵੀ ਅਸਾਨੀ ਨਾਲ ਬੀਤ ਜਾਵੇਗਾ ਅਤੇ ਮਨ ਨੂੰ ਖੁਸ਼ੀ ਵੀ ਮਿਲੇਗੀ।
ਘਰ ਦੀ ਸਜਾਵਟ : ਅੱਜ ਦੇ ਜ਼ਮਾਨੇ ਵਿਚ ਇਸ ਦਾ ਮਹੱਤਵ ਵਧ ਗਿਆ ਹੈ। ਸੱਭਿਅ ਘਰ ਦੀ ਪਛਾਣ ਵਿਚ ਇਸ ਦਾ ਪ੍ਰਭਾਵ ਸਪੱਸ਼ਟ ਰੂਪ ਵਿਚ ਆ ਰਿਹਾ ਹੈ। ਘਰ ਦੀ ਸਜਾਵਟ ਗਮਲਿਆਂ, ਫੁੱਲਾਂ ਅਤੇ ਪਰਦਿਆਂ ਦੇ ਰੱਖ-ਰਖਾਅ ਅਤੇ ਬਦਲਾਅ ਦੇ ਨਾਲ ਬਣਾਈ ਰੱਖੋ, ਤਾਂ ਕਿ ਘਰ ਵਿਚ ਆਉਣ ਵਾਲੇ ਵਿਅਕਤੀ ਇਸ ਤੋਂ ਪ੍ਰਭਾਵਿਤ ਹੋਣ ਅਤੇ ਸੁੰਦਰਤਾ ਦੀ ਤਾਰੀਫ ਵੀ ਕਰਨ।
ਖਾਲੀ ਸਮੇਂ ਵਿਚ ਮਨੋਰੰਜਕ ਕਿਤਾਬਾਂ ਪੜ੍ਹੋ : ਆਧੁਨਿਕ ਯੁੱਗ ਵਿਚ ਬਹੁਤ ਸਾਰੀਆਂ ਕਿਤਾਬਾਂ ਪ੍ਰਕਾਸ਼ਿਤ ਹੁੰਦੀਆਂ ਰਹਿੰਦੀਆਂ ਹਨ, ਜੋ ਔਰਤਾਂ ਦੀਆਂ ਸਮੱਸਿਆਵਾਂ ਨਾਲ ਸਬੰਧਤ ਹੁੰਦੀਆਂ ਹਨ। ਉਨ੍ਹਾਂ ਨੂੰ ਪੜ੍ਹੋ ਅਤੇ ਛੁਟਕਾਰਾ ਪਾਓ। ਲਿਖਣ ਦੀ ਰੁਚੀ ਹੋਵੇ ਤਾਂ ਇਸ ਨੂੰ ਸ਼ੌਕ ਦੇ ਤੌਰ 'ਤੇ ਅਜ਼ਮਾਓ। ਹੋ ਸਕੇ ਤਾਂ ਅਖ਼ਬਾਰਾਂ-ਰਸਾਲਿਆਂ ਵਿਚ ਪ੍ਰਕਾਸ਼ਿਤ ਹੋਣ ਲਈ ਭੇਜੋ।
ਬਾਗਬਾਨੀ : ਸਵੇਰੇ-ਸ਼ਾਮ ਘਰ ਦੇ ਨਾਲ ਬਣੇ ਬਾਗ ਵਿਚ ਪੌਦਿਆਂ ਨੂੰ ਪਾਣੀ ਦਿਓ। ਘਰ ਵਿਚ ਵੀ ਗਮਲੇ ਲਗਾਓ। ਤਰ੍ਹਾਂ-ਤਰ੍ਹਾਂ ਦੇ ਫੁੱਲ ਅਤੇ ਸਬਜ਼ੀਆਂ ਲਗਾਓ, ਉਨ੍ਹਾਂ ਦੀ ਦੇਖਭਾਲ ਉਚਿਤ ਤਰੀਕੇ ਨਾਲ ਕਰੋ ਅਤੇ ਮਨ ਨੂੰ ਕੁਦਰਤ ਦੇ ਨਾਲ ਜੋੜੋ। ਕੁਦਰਤ ਨਾਲ ਜੁੜਿਆ ਮਨ ਬਹੁਤ ਖੁਸ਼ ਰਹਿੰਦਾ ਹੈ।

ਚਟਪਟੀ ਤਵਾ ਇਡਲੀ

ਸਮੱਗਰੀ : 8 ਇਡਲੀਆਂ ਨੂੰ ਟੁਕੜਿਆਂ (ਕਿਊਬ) ਵਿਚ ਕੱਟ ਲਓ, 1 ਚਮਚਾ ਮੱਖਣ, 1/2 ਚਮਚਾ ਲਸਣ ਪੇਸਟ, 1/2 ਕੱਪ ਪਿਆਜ਼ (ਬਰੀਕ ਕੱਟੇ ਹੋਏ), 1/2 ਕੱਪ ਟਮਾਟਰ (ਬਰੀਕ ਕੱਟੇ ਹੋਏ), 1/4 ਚਮਚ ਹਲਦੀ ਪਾਊਡਰ, 1/2 ਚਮਚਾ ਮਿਰਚੀ ਪਾਊਡਰ, 1 ਚਮਚਾ ਪਾਵ ਭਾਜੀ ਮਸਾਲਾ, ਨਮਕ ਸਵਾਦ ਅਨੁਸਾਰ, 1 ਚਮਚਾ ਨਿੰਬੂ ਦਾ ਰਸ, 2 ਚਮਚੇ ਧਨੀਆ (ਬਰੀਕ ਕੱਟਿਆ ਹੋਇਆ)।
ਸਜਾਵਟ ਲਈ : 2 ਚਮਚੇ ਬਰੀਕ ਕੱਟਿਆ ਹੋਇਆ ਧਨੀਆ।
ਵਿਧੀ : * ਚੌੜੇ ਨਾਨਸਟਿਕ ਪੈਨ ਵਿਚ ਮੱਖਣ ਨੂੰ ਗਰਮ ਕਰੋ, ਇਸ ਵਿਚ ਲਸਣ ਪੇਸਟ ਪਾ ਕੇ ਹਲਕੀ ਅੱਗ 'ਤੇ 30 ਸਕਿੰਟ ਤੱਕ ਗਰਮ ਕਰੋ।
* ਹੁਣ ਪਿਆਜ਼ ਪਾ ਕੇ 2-3 ਮਿੰਟ ਤੱਕ ਚੰਗੀ ਤਰ੍ਹਾਂ ਭੂਰਾ ਹੋਣ ਤੱਕ ਅੱਗ 'ਤੇ ਰੱਖੋ।
* ਇਸ ਵਿਚ ਟਮਾਟਰ ਪਾ ਕੇ 1 ਤੋਂ 2 ਮਿੰਟ ਤੱਕ ਚੰਗੀ ਤਰ੍ਹਾਂ ਪਕਾਓ। ਇਸ ਨੂੰ ਕੜਛੀ ਨਾਲ ਹਿਲਾਉਂਦੇ ਜਾਓ।
* ਹੁਣ ਹਲਦੀ ਪਾਊਡਰ, ਲਾਲ ਮਿਰਚ, ਪਾਵ ਭਾਜੀ ਮਸਾਲਾ ਪਾ ਕੇ ਇਕ ਮਿੰਟ ਤੱਕ ਮੱਧਮ ਅੱਗ 'ਤੇ ਚੰਗੀ ਤਰ੍ਹਾਂ ਹਿਲਾਓ।
* ਇਸ ਵਿਚ 2 ਚਮਚੇ ਪਾਣੀ ਅਤੇ ਨਮਕ ਪਾ ਕੇ 1 ਮਿੰਟ ਤੱਕ ਹੋਰ ਪਕਾਓ।
* ਹੁਣ ਨਿੰਬੂ ਦਾ ਰਸ, ਧਨੀਆ ਦੇ ਪੱਤੇ ਪਾ ਕੇ ਮੱਧਮ ਅੱਗ 'ਤੇ 1 ਮਿੰਟ ਤੱਕ ਪਕਾਓ, ਨਾਲੋ-ਨਾਲ ਹਿਲਾਉਂਦੇ ਰਹੋ।
* ਇਸ ਵਿਚ ਇਡਲੀਆਂ ਪਾਓ। ਮੱਧਮ ਅੱਗ 'ਤੇ 1 ਤੋਂ 2 ਮਿੰਟ ਪਕਾਓ। ਪਕਾਉਂਦੇ ਸਮੇਂ ਲਗਾਤਾਰ ਹੌਲੀ-ਹੌਲੀ ਹਿਲਾਉਂਦੇ ਰਹੋ।
* ਧਨੀਆ ਦੇ ਪੱਤੇ ਸਜਾ ਕੇ ਗਰਮਾ-ਗਰਮ ਪਰੋਸੋ।

ਰਸੋਈ-ਘਰ ਵਿਚ ਹੋਣ ਵਾਲੀਆਂ ਦੁਰਘਟਨਾਵਾਂ ਨੂੰ ਰੋਕੋ

ਰਸੋਈ ਪਕਵਾਨ ਬਣਾਉਣ ਦੀ ਜਗ੍ਹਾ ਹੈ। ਇਸ ਨੂੰ ਦੁਰਘਟਨਾਵਾਂ ਦਾ ਘਰ ਬਣਨ ਤੋਂ ਬਚਾਓ। ਅਕਸਰ ਗ੍ਰਹਿਣੀਆਂ ਰਸੋਈ ਵਿਚ ਹੀ ਦੁਰਘਟਨਾਵਾਂ ਦਾ ਸ਼ਿਕਾਰ ਹੁੰਦੀਆਂ ਹਨ। ਇਸ ਨੂੰ ਸਿਰਫ ਥੋੜ੍ਹੀ ਜਿਹੀ ਸੂਝ-ਬੂਝ ਨਾਲ ਸਾਵਧਾਨ ਰਹਿੰਦੇ ਹੋਏ ਰੋਕਿਆ ਜਾ ਸਕਦਾ ਹੈ।
* ਰਸੋਈ ਵਿਚ ਖਾਣਾ ਬਣਾਉਂਦੇ ਸਮੇਂ ਗ੍ਰਹਿਣੀ ਨੂੰ ਸੂਤੀ ਕੱਪੜੇ ਪਹਿਨਣੇ ਚਾਹੀਦੇ ਹਨ। ਇਹ ਸਰੀਰ ਲਈ ਆਰਾਮਦਾਇਕ ਤਾਂ ਹੁੰਦੇ ਹੀ ਹਨ, ਨਾਲ ਹੀ ਇਨ੍ਹਾਂ ਨਾਲ ਅੱਗ ਫੜਨ ਦੀ ਸੰਭਾਵਨਾ ਵੀ ਘੱਟ ਹੋ ਜਾਂਦੀ ਹੈ।
* ਰਸੋਈ ਵਿਚ ਕੰਮ ਕਰਦੇ ਸਮੇਂ ਚੁੰਨੀ ਦਾ ਵਿਸ਼ੇਸ਼ ਧਿਆਨ ਰੱਖੋ। ਚੁੰਨੀ ਕਾਫੀ ਵਾਰ ਤਿਲਕ ਕੇ ਡਿਗ ਜਾਂਦੀ ਹੈ ਅਤੇ ਗੈਸ ਆਦਿ 'ਤੇ ਡਿਗਣ ਨਾਲ ਕੱਪੜਿਆਂ ਵਿਚ ਅੱਗ ਵੀ ਲੱਗ ਸਕਦੀ ਹੈ। ਜੇ ਚੁੰਨੀ ਵਰਤਣੀ ਚਾਹੋ ਤਾਂ ਫਿਰ ਉਸ ਨੂੰ ਦੋਵੇਂ ਪਾਸੇ ਪਿਨ ਲਗਾ ਕੇ ਪੂਰੀ ਤਰ੍ਹਾਂ ਕਾਬੂ ਵਿਚ ਰੱਖੋ।
* ਸਬਜ਼ੀ ਨੂੰ ਤੁੜਕਾ ਲਗਾਉਂਦੇ ਸਮੇਂ ਅਤੇ ਤੇਲ ਵਿਚ ਕਿਸੇ ਚੀਜ਼ ਨੂੰ ਪਾਉਂਦੇ ਸਮੇਂ ਮੂੰਹ ਨੂੰ ਹਮੇਸ਼ਾ ਦੂਰ ਰੱਖਣਾ ਚਾਹੀਦਾ ਹੈ ਅਤੇ ਤੇਲ ਅਤੇ ਸਬਜ਼ੀ ਲਈ ਵਰਤੋਂ ਵਿਚ ਲਿਆਂਦਾ ਜਾਣ ਵਾਲਾ ਚਮਚ ਲੰਬੀ ਡੰਡੀ ਵਾਲਾ ਹੋਣਾ ਚਾਹੀਦਾ ਹੈ।
* ਖਾਣਾ ਬਣਾਉਂਦੇ ਸਮੇਂ ਰਸੋਈ ਵਿਚ ਇਕ ਸ਼ੁੱਧ ਸੂਤੀ ਕੱਪੜਾ ਜ਼ਰੂਰ ਰੱਖਣਾ ਚਾਹੀਦਾ ਹੈ, ਜਿਸ ਨਾਲ ਗੈਸ ਉੱਪਰੋਂ ਗਰਮ ਭਾਂਡਿਆਂ ਨੂੰ ਕੱਪੜੇ ਦੀ ਸਹਾਇਤਾ ਨਾਲ ਸਫ਼ਲਤਾਪੂਰਵਕ ਉਨ੍ਹਾਂ ਦੀ ਜਗ੍ਹਾ 'ਤੇ ਰੱਖਿਆ ਜਾ ਸਕੇ। * ਰਸੋਈ ਵਿਚ ਜਲਣਸ਼ੀਲ ਤਰਲ ਪਦਾਰਥਾਂ ਨੂੰ ਕਦੇ ਵੀ ਨਾ ਰੱਖੋ।
* ਰਸੋਈ ਵਿਚ ਸਬਜ਼ੀ ਤੁੜਕਦੇ ਸਮੇਂ ਗ਼ਲਤੀ ਨਾਲ ਹੱਥ ਜਾਂ ਚਿਹਰੇ 'ਤੇ ਤੇਲ ਦੇ ਛਿੱਟੇ ਪੈ ਜਾਣ ਜਾਂ ਸਾੜ੍ਹੀ ਦਾ ਪੱਲੂ ਜਾਂ ਚੁੰਨੀ ਵਿਚ ਅੱਗ ਲੱਗ ਜਾਵੇ ਤਾਂ ਠੰਢੇ ਪਾਣੀ ਵਿਚ ਉਹ ਭਾਗ ਰੱਖੋ ਅਤੇ ਛਿੱਟੇ ਮਾਰੋ।
* ਗੈਸ ਸਿਲੰਡਰ ਦਾ ਹਮੇਸ਼ਾ ਧਿਆਨ ਰੱਖੋ। ਰਸੋਈ ਵਿਚ ਖਾਣਾ ਬਣਾਉਣ ਤੋਂ ਬਾਅਦ ਗੈਸ ਚੁੱਲ੍ਹੇ ਨੂੰ ਬੰਦ ਕਰਨ ਦੇ ਨਾਲ ਹੀ ਸਿਲੰਡਰ ਦੇ ਸਵਿੱਚ ਨੂੰ ਵੀ ਬੰਦ ਕਰ ਦਿਓ, ਜਿਸ ਨਾਲ ਜੇ ਪਾਈਪ ਲੀਕ ਵੀ ਹੈ ਤਾਂ ਉਸ ਵਿਚੋਂ ਗੈਸ ਨਾ ਨਿਕਲ ਸਕੇ।
* ਗੈਸ ਚੁੱਲ੍ਹੇ ਨੂੰ ਹਮੇਸ਼ਾ ਸਿਲੰਡਰ ਦੀ ਉਚਾਈ ਤੋਂ ਉੱਪਰ ਰੱਖੋ। ਜੇ ਗੈਸ ਪਾਈਪ ਜ਼ਿਆਦਾ ਪੁਰਾਣਾ ਹੋਣ ਕਾਰਨ ਕਈ ਜਗ੍ਹਾ ਤੋਂ ਮੋੜ ਖਾ ਚੁੱਕਾ ਹੈ ਤਾਂ ਅਜਿਹੇ ਪਾਈਪ ਨੂੰ ਤੁਰੰਤ ਬਦਲ ਦੇਣਾ ਚਾਹੀਦਾ ਹੈ।
* ਜੇ ਗੈਸ ਲੀਕ ਹੋ ਚੁੱਕੀ ਹੈ ਅਤੇ ਗੈਸ ਦੀ ਬਦਬੂ ਆ ਰਹੀ ਹੈ ਤਾਂ ਰਸੋਈ ਦੇ ਦਰਵਾਜ਼ੇ-ਖਿੜਕੀ ਸਵਿੱਚ ਆਦਿ ਨੂੰ ਬਿਨਾਂ ਆਨ-ਆਫ ਕਰਦੇ ਹੋਏ ਘਰ ਦੇ ਦੂਜੇ ਦਰਵਾਜ਼ੇ ਅਤੇ ਖਿੜਕੀਆਂ ਵੀ ਖੋਲ੍ਹ ਦਿਓ, ਜਿਸ ਨਾਲ ਗੈਸ ਘਰੋਂ ਬਾਹਰ ਸਫ਼ਲਤਾਪੂਰਵਕ ਜਾ ਸਕੇ।
* ਰਸੋਈ ਦੇ ਦਰਵਾਜ਼ੇ ਦੇ ਬਾਹਰ ਅੱਗ-ਰੋਕੂ ਗੈਸ ਸਿਲੰਡਰ, ਫਾਇਰ ਫਾਈਟਰ ਗੈਸ ਸਿਲੰਡਰ ਲਗਾ ਕੇ ਰੱਖੋ ਤਾਂ ਤੁਸੀਂ ਸੁਰੱਖਿਆ ਦਾ ਦਾਇਰਾ ਜ਼ਿਆਦਾ ਵਧਾ ਸਕਦੇ ਹੋ। ਇਸ ਨਾਲ ਰਸੋਈ ਅਤੇ ਬਿਜਲੀ ਦੇ ਸ਼ਾਰਟ ਸਰਕਟ ਅਤੇ ਹੋਰ ਕਾਰਨਾਂ ਕਰਕੇ ਲੱਗਣ ਵਾਲੀ ਅੱਗ 'ਤੇ ਵੀ ਕਾਬੂ ਪਾਇਆ ਜਾ ਸਕਦਾ ਹੈ।
* ਰਸੋਈ ਦਾ ਫਰਸ਼, ਵਿਹੜਾ ਚਿਕਣਾ ਨਾ ਰੱਖੋ। ਜੇ ਰਸੋਈ ਦੇ ਫਰਸ਼ 'ਤੇ ਤੇਲ ਡਿਗ ਗਿਆ ਹੋਵੇ ਤਾਂ ਉਸ ਨੂੰ ਤੁਰੰਤ ਸਰਫ ਵਾਲੇ ਪਾਣੀ ਨਾਲ ਪੋਚਾ ਮਾਰ ਕੇ ਸਾਫ਼ ਕਰੋ। ਚਿਕਣੇ ਫਰਸ਼ 'ਤੇ ਤਿਲਕਣ ਨਾਲ ਕਿਸੇ ਦੀ ਵੀ ਹੱਡੀ ਟੁੱਟ ਸਕਦੀ ਹੈ। * ਕਦੇ ਵੀ ਨੰਗੇ ਹੱਥਾਂ ਨਾਲ ਝਾੜ ਕੇ ਅੱਗ ਬੁਝਾਉਣ ਦੀ ਕੋਸ਼ਿਸ਼ ਨਾ ਕਰੋ।

ਆਓ ਜਾਂਚੀਏ ਤੁਹਾਡੀ ਖੇਡਾਂ ਪ੍ਰਤੀ ਦਿਲਚਸਪੀ

ਆਮ ਤੌਰ 'ਤੇ ਹੁਣ ਬਹੁਤ ਥੋੜ੍ਹੇ ਜਿਹੇ ਅਜਿਹੇ ਖੇਤਰ ਬਚੇ ਹਨ, ਜਿਨ੍ਹਾਂ ਵਿਚ ਮੰਨਿਆ ਜਾਂਦਾ ਹੈ ਕਿ ਔਰਤਾਂ ਦੀ ਰੁਚੀ ਮਰਦਾਂ ਦੇ ਮੁਕਾਬਲੇ ਘੱਟ ਹੁੰਦੀ ਹੈ। ਇਨ੍ਹਾਂ ਵਿਚੋਂ ਇਕ ਪ੍ਰਮੁੱਖ ਖੇਤਰ ਹੈ ਖੇਡ। ਖੇਡਾਂ ਨੂੰ ਲੈ ਕੇ ਲੋਕਾਂ ਵਿਚ ਇਹ ਮਜ਼ਬੂਤ ਧਾਰਨਾ ਹੈ ਕਿ ਔਰਤਾਂ ਨੂੰ ਖੇਡਾਂ ਵਿਚ ਰੁਚੀ ਘੱਟ ਹੁੰਦੀ ਹੈ, ਜਦੋਂ ਕਿ ਸਾਡੇ ਇਥੇ ਅਜਿਹਾ ਵੀ ਹੋਇਆ ਹੈ ਕਿ ਕਿਸੇ ਉਲੰਪਿਕ ਵਿਚ ਮਰਦ ਅਤੇ ਔਰਤਾਂ ਦੋਵੇਂ ਹੀ ਖਿਡਾਰੀ ਗਏ ਪਰ ਔਰਤਾਂ ਤਗਮਾ ਲੈ ਕੇ ਆਈਆਂ ਅਤੇ ਮਰਦ ਖਾਲੀ ਹੱਥ ਆਏ। ਫਿਰ ਵੀ ਇਹ ਧਾਰਨਾ ਹੈ ਤਾਂ ਆਓ ਇਸ ਕੁਇਜ਼ ਰਾਹੀਂ ਜਾਂਚ ਹੀ ਲੈਂਦੇ ਹਾਂ ਕਿ ਇਹ ਕਿੰਨੀ ਸਹੀ ਹੈ ਅਤੇ ਕਿੰਨੀ ਸਾਜਿਸ਼?
1. ਪਿਛਲੀਆਂ ਉਲੰਪਿਕ ਖੇਡਾਂ ਕਦੋਂ ਅਤੇ ਕਿਥੇ ਹੋਈਆਂ ਸੀ?
(ਕ) ਸਾਲ 2016, ਰੀਓ-ਡੀ-ਜਨੇਰੋ
(ਖ) ਸਾਲ 2016, ਲੰਡਨ
(ਗ) ਸਾਲ 2015, ਯੂਨਾਨ
2. ਸਾਲ 2018 ਦਾ ਫੁੱਟਬਾਲ ਵਿਸ਼ਵ ਕੱਪ ਕਿਸ ਦੇਸ਼ ਵਿਚ ਖੇਡਿਆ ਗਿਆ?
(ਕ) ਆਸਟ੍ਰੇਲੀਆ (ਖ) ਇੰਗਲੈਂਡ (ਗ) ਰੂਸ
3. ਸਾਲ 2003 ਦੇ ਐਫਰੋ-ਏਸ਼ਿਆਈ ਖੇਡਾਂ ਭਾਰਤ ਦੇ ਕਿਸ ਸ਼ਹਿਰ ਵਿਚ ਹੋਈਆਂ ਸੀ?
(ਕ) ਬੈਂਗਲੁਰੂ (ਖ) ਹੈਦਰਾਬਾਦ (ਗ) ਪੁਣੇ
4. ਏਸ਼ਿਆਈ ਖੇਡਾਂ ਦੀ ਸ਼ੁਰੂਆਤ ਕਿਸ ਦੇਸ਼ ਦੇ ਕਿਸ ਸ਼ਹਿਰ ਵਿਚ ਹੋਈ ਸੀ?
(ਕ) ਇੰਚਿਓਨ, ਦੱਖਣੀ ਕੋਰੀਆ, (ਖ) ਕਾਠਮੰਡੂ, ਨਿਪਾਲ, (ਗ) ਨਵੀਂ ਦਿੱਲੀ, ਭਾਰਤ
5. ਸਾਲ 2019 ਦੇ ਕ੍ਰਿਕਟ ਵਿਸ਼ਵ ਕੱਪ ਦੀ ਮੇਜ਼ਬਾਨੀ ਕਿਹੜਾ ਦੇਸ਼ ਕਰ ਰਿਹਾ ਹੈ?
(ਕ) ਵੈਸਟ ਇੰਡੀਜ਼ (ਖ) ਇੰਗਲੈਂਡ (ਗ) ਪਾਕਿਸਤਾਨ
ਨਤੀਜਾ : ਜੇ ਤੁਸੀਂ ਸਾਰੇ ਸਵਾਲਾਂ ਦੇ ਉਨ੍ਹਾਂ ਜਵਾਬਾਂ 'ਤੇ ਸਹੀ ਦਾ ਨਿਸ਼ਾਨ ਲਗਾਇਆ ਹੈ, ਜੋ ਤੁਹਾਡੇ ਹਿਸਾਬ ਨਾਲ ਸਹੀ ਹਨ ਤਾਂ ਖੇਡਾਂ ਦੇ ਸਬੰਧ ਵਿਚ ਤੁਹਾਡੀ ਜਾਣਕਾਰੀ ਕੁਝ ਇਸ ਤਰ੍ਹਾਂ ਹੈ।
ਕ-ਜੇ ਤੁਸੀਂ 10 ਜਾਂ ਇਸ ਤੋਂ ਘੱਟ ਅੰਕ ਹਾਸਲ ਕੀਤੇ ਹਨ ਤਾਂ ਤੁਹਾਡੀ ਖੇਡਾਂ ਬਾਰੇ ਜਾਣਕਾਰੀ ਬਸ ਨਾਮਾਤਰ ਹੈ ਭਾਵ ਤੁਹਾਡੀਆਂ ਜ਼ਿਆਦਾਤਰ ਜਾਣਕਾਰੀਆਂ ਸੁਣੀਆਂ-ਸੁਣਾਈਆਂ ਹਨ ਅਤੇ ਇਨ੍ਹਾਂ ਵਿਚ ਵਿਸ਼ਵਾਸਯੋਗਤਾ ਦੀ ਕਮੀ ਹੈ।
ਖ-ਜੇ ਤੁਹਾਡੇ ਹਾਸਲ ਅੰਕ 10 ਤੋਂ ਜ਼ਿਆਦਾ ਅਤੇ 15 ਤੋਂ ਘੱਟ ਹਨ ਤਾਂ ਸਾਫ਼ ਹੈ ਕਿ ਤੁਹਾਨੂੰ ਖੇਡਾਂ ਦੇ ਬਾਰੇ ਵਿਚ ਓਨੀ ਹੀ ਜਾਣਕਾਰੀ ਹੈ, ਜਿੰਨੀ ਕਿ ਕਿਸੇ ਵੀ ਆਮ ਪਰ ਜਾਣਕਾਰੀਆਂ ਦੇ ਸੁਚੇਤ ਵਿਅਕਤੀ ਨੂੰ ਹੁੰਦੀ ਹੈ। ਕਹਿਣ ਦਾ ਭਾਵ ਇਹ ਹੈ ਕਿ ਤੁਹਾਡੇ ਵਿਚ ਖੇਡਾਂ ਨੂੰ ਲੈ ਕੇ ਖਾਸ ਕਿਸਮ ਦੇ ਵਾਧੂ ਲਗਾਅ ਦੀ ਕਮੀ ਹੈ।
ਗ-ਜੇ ਤੁਹਾਡੇ ਹਾਸਲ ਅੰਕ 15 ਤੋਂ ਜ਼ਿਆਦਾ ਹਨ ਤਾਂ ਤੁਹਾਡੀ ਖੇਡਾਂ ਵਿਚ ਜ਼ਬਰਦਸਤ ਦਿਲਚਸਪੀ ਹੈ। ਤੁਸੀਂ ਖੇਡਾਂ ਦੇ ਬਾਰੇ ਵਿਚ ਨਾ ਸਿਰਫ ਜਾਣਦੇ ਹੋ, ਸਗੋਂ ਅਨੇਕਾਂ ਖੇਡ ਪ੍ਰਸਥਿਤੀਆਂ ਵਿਚ ਹਾਰ-ਜਿੱਤ ਨੂੰ ਲੈ ਕੇ ਵੀ ਤੁਹਾਡੇ ਤਰਕਪੂਰਨ ਅਨੁਮਾਨ ਹੁੰਦੇ ਹਨ।


-ਪਿੰਕੀ ਅਰੋੜਾ

ਜ਼ਰੂਰੀ ਹੈ ਤੁਹਾਡੇ ਲਈ ਚੰਗੇ ਅਤੇ ਬੁਰੇ ਦੀ ਪਛਾਣ

ਅਕਸਰ ਕਈ ਵਾਰ ਸਾਡੀਆਂ ਨਜ਼ਰਾਂ ਸਾਨੂੰ ਧੋਖਾ ਦੇ ਜਾਂਦੀਆਂ ਹਨ। ਨਜ਼ਰਾਂ ਦੇ ਪਿੱਛੇ ਦ੍ਰਿਸ਼ਟੀਕੋਣ ਕੱਚਾ ਹੋਵੇ ਤਾਂ ਅਕਸਰ ਨਜ਼ਰਾਂ ਨਾਲ ਕੀਤੇ ਫੈਸਲੇ ਗ਼ਲਤ ਹੁੰਦੇ ਹਨ। ਜਦੋਂ ਸਾਡੀਆਂ ਜਵਾਨ ਹੋ ਰਹੀਆਂ ਬੇਟੀਆਂ ਚੰਗੇ ਅਤੇ ਬੁਰੇ ਦੇ ਫਰਕ ਨੂੰ ਸਮਝਣ ਦੇ ਸਮਰੱਥ ਹੋ ਜਾਣਗੀਆਂ, ਉਸ ਦਿਨ ਉਨ੍ਹਾਂ ਨਾਲ ਮਾਪਿਆਂ ਦੀਆਂ ਜੁੜੀਆਂ ਕਈ ਚਿੰਤਾਵਾਂ ਆਪਣੇ-ਆਪ ਦੂਰ ਹੋ ਜਾਣਗੀਆਂ। ਬੱਚਿਆਂ ਦੇ ਸਹੀ ਫੈਸਲੇ ਮਾਪਿਆਂ ਦੇ ਤੁਹਾਡੇ ਪ੍ਰਤੀ ਯਕੀਨ ਨੂੰ ਪੱਕਾ ਕਰਦੇ ਹਨ। ਗ਼ਲਤ ਲੋਕਾਂ 'ਤੇ ਉਮੀਦ ਰੱਖਣ ਨਾਲ ਪ੍ਰੇਸ਼ਾਨੀਆਂ ਵਧਦੀਆਂ ਹਨ ਅਤੇ ਸੱਚੇ ਲੋਕਾਂ 'ਤੇ ਸ਼ੱਕ ਕਰਨ ਨਾਲ ਅਸਫਲਤਾ ਦੀ ਸੰਭਾਵਨਾ ਵਧਦੀ ਹੈ। ਗ਼ਲਤੀਆਂ ਐਨੀਆਂ ਵੀ ਨਾ ਕਰੋ ਕਿ ਪੈਨਸਿਲ ਦੇ ਲਿਖੇ ਤੋਂ ਪਹਿਲਾਂ ਰਬੜ ਖ਼ਤਮ ਹੋ ਜਾਵੇ ਅਤੇ ਰਬੜ ਨੂੰ ਐਨਾ ਵੀ ਨਾ ਰਗੜੋ ਕਿ ਜ਼ਿੰਦਗੀ ਦੇ ਪੇਜ ਹੀ ਫਟ ਜਾਣ। ਕਈ ਵਾਰ 'ਨਹੀਂ' ਜਲਦਬਾਜ਼ੀ ਵਿਚ ਬੋਲਣ ਨਾਲ ਅਤੇ 'ਹਾਂ' ਦੇਰ ਨਾਲ ਬੋਲਿਆਂ ਅਸੀਂ ਕਈ ਕੀਮਤੀ ਰਿਸ਼ਤੇ ਅਤੇ ਭਰੋਸਾ ਗੁਆ ਦਿੰਦੇ ਹਾਂ। ਜੋ ਤੁਹਾਡੇ ਲਈ ਸਹੀ ਨਹੀਂ ਹੈ, ਉਸ ਨੂੰ ਛੇਤੀ ਪਛਾਣ ਲੈਣਾ ਅਨੇਕਾਂ ਮੁਸ਼ਕਿਲਾਂ ਦਾ ਸਹੀ ਹੱਲ ਹੈ। ਕਈ ਗ਼ਲਤੀਆਂ ਤੁਹਾਨੂੰ ਸਹੀ ਫੈਸਲਾ ਲੈਣ ਦੀ ਅਕਲ ਸਿਖਾਉਂਦੀਆਂ ਹਨ। ਅਕਸਰ ਦਿਖਾਵੇ ਦੀ ਹਮਦਰਦੀ ਨਾਲ ਕਈ ਵਾਰ ਤੁਹਾਡੇ ਭੋਲੇਪਣ ਨੂੰ ਅਸਾਨੀ ਨਾਲ ਸ਼ਿਕਾਰ ਬਣਾ ਲਿਆ ਜਾਂਦਾ ਹੈ। ਕੋਸ਼ਿਸ਼ ਕਰੋ ਕਿ ਕਿਸੇ ਦੀ ਖੁਸ਼ੀ ਤੁਹਾਡਾ ਦਰਦ ਨਾ ਬਣੇ। ਕਿਸੇ ਦੀ ਸਫਲਤਾ ਤੁਹਾਡੀ ਈਰਖਾ ਨਾ ਬਣੇ। ਪੈਸੇ ਦੀ ਅਮੀਰੀ ਤੁਹਾਡਾ ਘੁਮੰਡ ਨਾ ਬਣੇ। ਤੁਹਾਡੇ ਕੰਮਾਂ ਦੀ ਪ੍ਰਸੰਸਾ ਕਰਨ ਵਾਲਾ ਵਿਅਕਤੀ ਉਸ ਵਿਅਕਤੀ ਨਾਲੋਂ ਵੱਧ ਚੰਗਾ ਹੁੰਦਾ ਹੈ, ਜੋ ਸਿਰਫ ਤੁਹਾਡੀ ਪ੍ਰਸੰਸਾ ਕਰਦਾ ਹੈ। ਅਕਸਰ ਕਈ ਲੜਕੀਆਂ ਆਪਣੇ ਭੋਲੇਪਣ ਵਿਚ ਉਸ ਵਿਅਕਤੀ ਨਾਲ ਰਿਸ਼ਤਾ ਜੋੜ ਲੈਂਦੀਆਂ ਹਨ, ਜਿਹੜੇ ਉਨ੍ਹਾਂ ਦੀਆਂ ਕਮਜ਼ੋਰੀਆਂ ਨੂੰ ਛੇਤੀ ਭਾਂਪ ਜਾਂਦੇ ਹਨ ਅਤੇ ਫਿਰ ਉਹੀ ਵਿਅਕਤੀ ਉਨ੍ਹਾਂ ਕਮਜ਼ੋਰੀਆਂ ਨਾਲ ਵਿਸ਼ਵਾਸਘਾਤ ਕਰਦੇ ਹਨ। ਤੁਸੀਂ ਆਪਣੀ ਜ਼ਿੰਦਗੀ ਨੂੰ ਆਪਣੇ ਤਰੀਕੇ ਨਾਲ ਜੀਓ, ਕਿਉਂਕਿ ਦੂਜਿਆਂ ਦੇ ਤਰੀਕਿਆਂ ਨਾਲ ਜੀਓਗੇ ਤਾਂ ਹਮੇਸ਼ਾ ਦੁਚਿੱਤੀ ਬਣੀ ਰਹੇਗੀ। ਚੰਗੀ ਸਲਾਹ ਗ਼ਲਤ ਮਦਦ ਨਾਲੋਂ ਕਿਤੇ ਵੱਧ ਫਾਇਦੇਮੰਦ ਹੁੰਦੀ ਹੈ। ਤੁਹਾਡੀ ਆਪਣੀ ਚੰਗੀ ਆਦਤ ਤੋਂ ਵੱਧ ਚੰਗਾ ਕੋਈ ਤੁਹਾਡਾ ਮਿੱਤਰ ਨਹੀਂ ਹੁੰਦਾ ਅਤੇ ਤੁਹਾਡੀ ਆਪਣੀ ਬੁਰੀ ਆਦਤ ਤੋਂ ਵੱਧ ਤੁਹਾਡਾ ਕੋਈ ਦੁਸ਼ਮਣ ਨਹੀਂ ਹੁੰਦਾ। ਗ਼ਲਤ ਨੂੰ ਗ਼ਲਤ ਕਹਿ ਦੇਣਾ ਕਦੇ ਵੀ ਗ਼ਲਤ ਨਹੀਂ ਹੁੰਦਾ। ਕਈ ਵਾਰ ਸਾਡੀ ਚੁੱਪ ਹੀ ਸਭ ਤੋਂ ਵਧੀਆ ਜਵਾਬ ਹੁੰਦੀ ਹੈ।
ਅੱਖਾਂ ਮੀਚ ਕੇ ਕੀਤਾ ਵਿਸ਼ਵਾਸ ਛੇਤੀ ਹੀ ਤੁਹਾਡੀਆਂ ਅੱਖਾਂ ਖੋਲ੍ਹ ਦਿੰਦਾ ਹੈ। ਚੰਗਿਆਈ ਦਾ ਵਿਖਾਵਾ ਕਰਨ ਵਾਲੇ ਲੋਕ ਸਭ ਤੋਂ ਵੱਧ ਖਤਰਨਾਕ ਹੁੰਦੇ ਹਨ। ਬਹੁਤ ਵੱਡੇ ਵਾਅਦੇ ਕਰਨ ਵਾਲੇ ਅਕਸਰ ਅੰਦਰੋਂ ਬਹੁਤ ਖੋਖਲੇ ਹੁੰਦੇ ਹਨ। ਸਭ ਤੋਂ ਵੱਡੇ ਧੋਖੇ ਸਾਡੇ ਉਹ ਦੋਸਤ ਕਰਦੇ ਹਨ, ਜਿਨ੍ਹਾਂ 'ਤੇ ਅਸੀਂ ਬੇਹੱਦ ਯਕੀਨ ਕੀਤਾ ਹੁੰਦਾ ਹੈ। ਲਾਲਚੀ, ਬੇਈਮਾਨ, ਲਾਈਲੱਗ ਤੇ ਸੁਆਰਥੀ ਲੋਕ ਯਕੀਨ ਦੀ ਕੀਮਤ ਨੂੰ ਨਹੀਂ ਜਾਣਦੇ। ਕਈ ਆਪਣਿਆਂ ਵਿਚ ਬਿਗਾਨੇ ਅਤੇ ਕਈ ਬਿਗਾਨਿਆਂ ਵਿਚ ਆਪਣੇ ਹੁੰਦੇ ਹਨ, ਜਿਨ੍ਹਾਂ ਦੀ ਪਹਿਚਾਣ ਕਰਨਾ ਲਾਜ਼ਮੀ ਹੁੰਦਾ ਹੈ। ਤੁਸੀਂ ਰਿਸ਼ਤੇ ਦੀ ਚੋਣ ਕਰੋ, ਸ਼ੱਕ ਦੇ ਆਧਾਰ 'ਤੇ ਨਹੀਂ, ਬਲਕਿ ਆਪਣੀ ਸਮਝ ਦੇ ਆਧਾਰ 'ਤੇ। ਨਫਰਤ ਬੁਰੇ ਨਾਲ ਨਹੀਂ, ਸਗੋਂ ਬੁਰਾਈ ਨਾਲ ਹੋਣੀ ਚਾਹੀਦੀ ਹੈ। ਅਕਸਰ ਲੜਕੀਆਂ ਭਾਵਨਾਵਾਂ ਦੇ ਵੇਗ ਵਿਚ ਕਈ ਵਾਰ ਫੈਸਲਾ ਛੇਤੀ ਲੈ ਲੈਂਦੀਆਂ ਹਨ। ਉਨ੍ਹਾਂ ਦੇ ਬੇਕਾਬੂ ਜਜ਼ਬਾਤ ਅਤੇ ਭਵਿੱਖ ਦੇ ਨਤੀਜਿਆਂ ਤੋਂ ਬੇਖਬਰ ਅਗਿਆਨਤਾ ਉਨ੍ਹਾਂ ਨੂੰ ਅਜਿਹੇ ਰਸਤੇ 'ਤੇ ਲੈ ਜਾਂਦੀ ਹੈ, ਜਿਥੇ ਸਿਰਫ ਭਟਕਣਾ ਹੀ ਪੱਲੇ ਪੈਂਦੀ ਹੈ। ਸਬਰ ਰੱਖੋ ਅਤੇ ਇੰਤਜ਼ਾਰ ਕਰੋ, ਕਿਉਂਕਿ ਕਈ ਚੀਜ਼ਾਂ ਵਕਤ ਨਾਲ ਅਤੇ ਕਈ ਕਿਸਮਤ ਨਾਲ ਮਿਲਦੀਆਂ ਹਨ। ਨਕਲ ਅਤੇ ਅਸਲ ਦੇ ਫਰਕ ਨੂੰ ਸਮਝੋ। ਕਈ ਲਾਲਚ ਤੁਹਾਡੇ ਤੋਂ ਉਹ ਕੁਝ ਵੀ ਖੋਹ ਕੇ ਲੈ ਜਾਂਦੇ ਹਨ, ਜਿਸ ਦੇ ਤੁਸੀਂ ਹੱਕਦਾਰ ਹੁੰਦੇ ਹੋ। ਕਈਆਂ ਕੋਲ ਸਿਰਫ ਦੌਲਤ ਹੁੰਦੀ ਹੈ ਪਰ ਦਿਲ ਨਹੀਂ। ਕਈਆਂ ਕੋਲ ਮਹਿੰਗਾ ਪਹਿਰਾਵਾ ਹੁੰਦਾ ਹੈ ਪਰ ਉਨ੍ਹਾਂ ਦੀ ਸੋਚ ਬਹੁਤ ਸਸਤੀ ਹੁੰਦੀ ਹੈ। ਜਿਸ ਦਿਨ ਵਿਚ ਪਿਆਰ ਨਹੀਂ, ਉਥੇ ਹਮਦਰਦੀ ਵੀ ਨਹੀਂ। ਕਈ ਰਿਸ਼ਤਾ ਬਣਾਉਣ ਲਈ ਤੁਹਾਡੇ ਸਾਹਮਣੇ ਉਮੀਦਾਂ ਦਾ ਇਕ ਪਹਾੜ ਖੜ੍ਹਾ ਕਰ ਦਿੰਦੇ ਹਨ ਪਰ ਰਿਸ਼ਤਾ ਨਿਭਾਉਣ ਲਈ ਉਨ੍ਹਾਂ ਕੋਲ ਨਾ ਦਿਲ ਹੁੰਦਾ ਹੈ ਅਤੇ ਨਾ ਦਿਮਾਗ। ਅਜਿਹੇ ਲੋਕ ਸੋਚ ਅਤੇ ਸਮਝ ਦੇ ਪੱਖ ਤੋਂ ਬਹੁਤ ਗਰੀਬ ਹੁੰਦੇ ਹਨ।
ਯਾਤਰਾ ਦੇ ਆਰੰਭ ਵਿਚ ਹੀ ਤੁਹਾਨੂੰ ਇਹ ਪਤਾ ਹੋਣਾ ਚਾਹੀਦਾ ਹੈ ਕਿ ਇਹ ਰਸਤਾ ਤੁਹਾਨੂੰ ਕਿਥੇ ਲੈ ਕੇ ਜਾਵੇਗਾ। ਗ਼ਲਤ ਰਿਸ਼ਤਾ ਗ਼ਲਤ ਰਸਤੇ 'ਤੇ ਤੋਰਦਾ ਹੈ ਤੇ ਇਕ ਗ਼ਲਤ ਨਤੀਜਾ ਤੁਹਾਡੀ ਸੋਚ ਨੂੰ ਨਾਂਹ-ਪੱਖੀ ਕਰ ਦਿੰਦਾ ਹੈ। ਇਕ ਬੁਰੀ ਆਦਤ ਤਿੰਨ ਚੰਗੀਆਂ ਆਦਤਾਂ ਨੂੰ ਖ਼ਤਮ ਕਰ ਦਿੰਦੀ ਹੈ। ਕਈ ਕੋਲ ਹੁੰਦਿਆਂ ਵੀ ਤੁਹਾਡੇ ਨਹੀਂ ਹੁੰਦੇ ਅਤੇ ਕਈ ਦੂਰੀਆਂ ਹੁੰਦਿਆਂ ਵੀ ਵੱਖ ਨਹੀਂ ਹੁੰਦੇ। ਭੱਜੋ ਨਾ, ਸਗੋਂ ਅਸਲੀਅਤ ਨੂੰ ਸਮਝੋ। ਆਪਣੀ ਮਰਜ਼ੀ ਤੋਂ ਪਹਿਲਾਂ ਉਨ੍ਹਾਂ ਵਿਸ਼ਿਆਂ 'ਤੇ ਦੂਜਿਆਂ ਨਾਲ ਸਲਾਹ ਕਰ ਲੈਣੀ ਚੰਗੀ ਹੈ, ਜਿਸ ਬਾਰੇ ਤੁਸੀਂ ਪੂਰੀ ਜਾਣਕਾਰੀ ਨਹੀਂ ਰੱਖਦੇ। ਸਮਾਜਿਕ ਵਿਸ਼ਿਆਂ 'ਤੇ ਤੁਹਾਡੇ ਮਾਪਿਆਂ ਦਾ, ਅਧਿਆਪਕਾਂ ਅਤੇ ਕਈ ਕਰੀਬੀ ਦੋਸਤਾਂ ਅਤੇ ਰਿਸ਼ਤੇਦਾਰਾਂ ਦਾ ਤਜਰਬਾ ਤੁਹਾਡੇ ਨਾਲੋਂ ਵੱਧ ਕੰਮ ਕਰਦਾ ਹੈ। ਜਿਨ੍ਹਾਂ ਕੰਮਾਂ ਵਿਚ ਸਿਆਣੇ ਅਤੇ ਅਨੁਭਵੀ ਲੋਕਾਂ ਦੀ ਸਲਾਹ ਵਿਚ ਹੋਵੇ, ਉਨ੍ਹਾਂ ਕੰਮਾਂ ਵਿਚ ਫਾਇਦੇ ਦੀ ਸੰਭਾਵਨਾ ਵੱਧ ਅਤੇ ਨੁਕਸਾਨ ਦੀ ਸੰਭਾਵਨਾ ਬਹੁਤ ਘੱਟ ਹੁੰਦੀ ਹੈ। ਜਾਂਚ-ਪੜਤਾਲ, ਸਲਾਹ-ਮਸ਼ਵਰਾ ਕਈ ਧੋਖਿਆਂ ਤੋਂ ਬਚਾਉਂਦਾ ਹੈ।


-ਪਿੰਡ ਗੋਲੇਵਾਲਾ (ਫਰੀਦਕੋਟ)। ਮੋਬਾ: 94179-49079

ਸ਼ੱਕ ਅਤੇ ਚੁਗ਼ਲੀ ਵਿਵਾਹਿਕ ਜੀਵਨ ਵਿਚ ਪਾਉਂਦੀ ਖ਼ਾਰ

ਇਸ ਰੰਗਲੀ ਦੁਨੀਆ 'ਤੇ ਅਕਾਲ ਪੁਰਖ ਪਰਮਾਤਮਾ ਦੁਆਰਾ ਬਖ਼ਸ਼ੀ ਥੋੜ੍ਹੀ ਜਿਹੀ ਸੁਆਸਾਂ ਭਰੀ ਜ਼ਿੰਦਗੀ ਨੂੰ ਬਿਤਾਉਣ ਲਈ ਅਤੇ ਦੁਨੀਆ ਨੂੰ ਆਖ਼ਰੀ ਅਲਵਿਦਾ ਕਹਿਣ ਤੋਂ ਬਾਅਦ ਆਪਣੇ ਵਜੂਦ ਅਤੇ ਯਾਦ ਨੂੰ ਜਿਊਂਦਾ ਰੱਖਣ ਅਤੇ ਦੂਜਿਆਂ ਲਈ ਪ੍ਰੇਰਨਾ ਸਰੋਤ ਬਣਨ ਲਈ ਆਪਣੇ ਪਿਆਰ ਤੇ ਮੋਹ ਭਰੇ ਵਰਤ-ਵਰਤਾਅ ਦੇ ਜ਼ਰੀਏ ਦੋਸਤਾਂ ਅਤੇ ਰਿਸ਼ਤੇ ਨਾਤਿਆਂ ਵਿਚ ਆਪਣੀ ਅਹਿਮੀਅਤ ਨੂੰ ਦਿਲਾਂ ਵਿਚ ਰਹਿੰਦੀ ਦੁਨੀਆ ਤੱਕ ਆਪਣੇ ਬੇਸ਼ਕੀਮਤੀ ਗੁਣਾਂ ਦੇ ਖ਼ਜ਼ਾਨੇ ਨੂੰ ਯਾਦਾਂ ਦੇ ਸੁਨਹਿਰੇ ਦੀਵੇ ਵਾਂਗਰਾਂ ਰੁਸ਼ਨਾਇਆ ਜਾ ਸਕਦਾ ਹੈ।
ਇਨਸਾਨੀ ਜੀਵਨ ਵਿਚ ਰਿਸ਼ਤਿਆਂ ਦੀ ਅਹਿਮੀਅਤ ਵੀ ਇੰਨੀ ਹੈ ਕਿ ਇਸ ਤੋਂ ਬਗੈਰ ਤਾਂ ਰੱਬ ਵੀ ਆਪਣੀ ਸਲਤਨਤ ਨੂੰ ਸੁੰਨਾ ਜਿਹਾ ਮਹਿਸੂਸ ਕਰਦਾ ਹੋਵੇਗਾ। ਰਿਸ਼ਤੇਦਾਰਾਂ ਅਤੇ ਦੋਸਤਾਂ ਦੀਆਂ ਮੋਹ ਭਰੇ ਰਿਸ਼ਤਿਆਂ ਦੀਆਂ ਤੰਦਾਂ ਵਿਚ ਦੁੱਖ-ਸੁਖ ਸਾਂਝੇ ਕਰਕੇ ਦੁੱਖਾਂ ਵਿਚ ਦਿਲਾਸਾ ਅਤੇ ਸੁੱਖਾਂ ਨੂੰ ਦੂਣਾ ਕਰਕੇ ਇਸ ਜ਼ਿੰਦਗੀ ਵਿਚ ਖ਼ੁਸ਼ੀਆਂ ਭਰਿਆ ਖੇੜਾ ਮਹਿਕਾਇਆ ਜਾ ਸਕਦਾ ਹੈ। ਜੇਕਰ ਵਿਸਥਾਰਪੂਰਵਕ ਗੱਲ ਕਰੀਏ ਤਾਂ ਇਕ-ਦੂਜੇ ਨਾਲ ਭਾਵਨਾਵਾਂ ਵਾਲੇ ਕੱਚੇ ਧਾਗੇ ਨਾਲ ਬਣੀ ਇਸ ਮੋਹ ਅਤੇ ਪਿਆਰ ਵਾਲੀ ਲੜੀ ਨੂੰ ਦੁਨੀਆ ਨੇ ਰਿਸ਼ਤਿਆਂ ਦਾ ਨਾਂਅ ਦਿੱਤਾ ਹੋਇਆ ਹੈ। ਇਨ੍ਹਾਂ ਰਿਸ਼ਤਿਆਂ ਵਿਚੋਂ ਜਨਮ ਦੇ ਕੇ ਜਹਾਨ ਦਿਖਾਉਣ ਵਾਲੇ ਰੱਬ ਰੂਪ ਮਾਂ-ਬਾਪ, ਦਾਦਾ-ਦਾਦੀ, ਨਾਨਾ-ਨਾਨੀ, ਮਾਮਾ-ਮਾਮੀ, ਚਾਚਾ-ਚਾਚੀ, ਤਾਇਆ-ਤਾਈ, ਮਾਸੀ-ਮਾਸੜ, ਭੂਆ-ਫੁੱਫੜ, ਜੀਜਾ-ਸਾਲਾ-ਸਾਲੀ, ਦਿਉਰ-ਭਰਜਾਈ, ਨਣਦ-ਭਰਜਾਈ, ਦੋਸਤ-ਮਿੱਤਰ ਆਦਿ ਹੋਰ ਕਿੰਨੇ ਪਿਆਰੇ ਰਿਸ਼ਤੇ ਸਮਾਜਿਕ ਜੀਵਨ ਦੀ ਗੱਡੀ ਨੂੰ ਮੋਹ ਨਾਲ ਤੋਰਨ ਲਈ ਅਹਿਮ ਜ਼ਰੂਰਤ ਰੱਖਦੇ ਹਨ।
ਇਨ੍ਹਾਂ ਰਿਸ਼ਤੇ-ਨਾਤਿਆਂ ਵਿਚ ਉਦੋਂ ਖ਼ਾਰ ਪੈ ਜਾਂਦੀ ਹੈ, ਜਦੋਂ ਉਸ ਵਿਚ ਕੁਝ ਦੀਵਾਰਾਂ ਖੜ੍ਹੀਆਂ ਹੋ ਜਾਂਦੀਆਂ ਹਨ। ਉਨ੍ਹਾਂ ਦੀਵਾਰਾਂ ਦਾ ਨਾਂਅ ਹੈ ਸ਼ੱਕ ਅਤੇ ਚੁਗ਼ਲੀ। ਇਹ ਦੀਵਾਰਾਂ ਵੀ ਕੁਝ ਇਹੋ ਜਿਹੀਆਂ ਹੁੰਦੀਆਂ ਹਨ ਕਿ ਇਕ ਵਾਰ ਜੇ ਇਨ੍ਹਾਂ ਵਿਚ ਤਰੇੜ ਵੀ ਆ ਜਾਂਦੀ ਹੈ ਤਾਂ ਇਨ੍ਹਾਂ ਤਰੇੜਾਂ ਨੂੰ ਮੁੜ ਵਿਸ਼ਵਾਸਾਂ ਨਾਲ ਭਰਨਾ ਤੇ ਉਸਾਰਨਾ ਔਖਾ ਵੀ ਡਾਢਾ ਹੋ ਜਾਂਦਾ ਹੈ, ਖ਼ਾਸ ਕਰਕੇ ਹੋਰ ਰਿਸ਼ਤਿਆਂ ਨੂੰ ਛੱਡ ਕੇ ਜੇ ਇਕ ਇਹੋ ਜਿਹੇ ਰਿਸ਼ਤੇ ਦੀ ਗੱਲ ਕਰਾਂ, ਜਿਸ ਵਿਚ ਉਮਰਾਂ ਦਾ ਲੰਬਾ ਪੈਂਡਾ ਇਕੋ ਰਾਹ 'ਤੇ ਇਕੋ ਹੀ ਕਦਮਾਂ ਦੀਆਂ ਪੈੜਾਂ ਦੀ ਚਾਲ ਨੂੰ ਮਿਲਾ ਕੇ ਦੋਵਾਂ ਨੂੰ ਨਾਲ ਤੁਰਨਾ ਪੈਂਦਾ ਹੈ, ਉਹ ਹੈ ਪਤੀ ਤੇ ਪਤਨੀ ਦਾ ਰਿਸ਼ਤਾ। ਖ਼ਾਸਕਰ ਇਹੀ ਤਾਂ ਇਕ ਇਹੋ ਜਿਹਾ ਰਿਸ਼ਤਾ ਹੈ, ਜਿਸ ਵਿਚ ਉਨ੍ਹਾਂ ਜ਼ਿੰਦਗੀ ਦੇ ਹਮਸਫ਼ਰਾਂ ਨੂੰ ਦੋ ਪਰਿਵਾਰਾਂ ਦੀ ਸਹਿਮਤੀ ਨਾਲ ਜੋੜਿਆ ਜਾਂਦਾ ਹੈ, ਜਿਸ ਨਾਲ ਜ਼ਿੰਦਗੀ ਵਿਚ ਆਉਣ ਵਾਲੇ ਉਨ੍ਹਾਂ ਦੁੱਖਾਂ ਨੂੰ ਸਾਂਝਾ ਕਰਕੇ ਮਨ ਹੌਲਾ ਅਤੇ ਹੱਲ ਕਰਿਆ ਜਾਵੇ, ਜਿਨ੍ਹਾਂ ਨੂੰ ਹੋਰ ਨੇੜਲੇ ਰਿਸ਼ਤਿਆਂ ਜਿਵੇਂ ਮਾਂ-ਪਿਉ, ਭੈਣ ਅਤੇ ਭਰਾ ਨਾਲ ਇਸ ਕਰਕੇ ਨਹੀਂ ਕੀਤੇ ਜਾ ਸਕਦੇ, ਕਿਉਂਕਿ ਜਿਨ੍ਹਾਂ ਜਨਮ ਦੇ ਕੇ, ਪਾਲ-ਪੋਸ ਕੇ ਅਤੇ ਜਿਨ੍ਹਾਂ ਨਾਲ ਇਕੱਠਿਆਂ ਖੇਡ-ਲਾਡ ਪਿਆਰ ਨਾਲ ਵੱਡੇ ਹੋਏ, ਉਨ੍ਹਾਂ ਸਾਰੇ ਅਧਿਕਾਰਾਂ ਨੂੰ ਮੋਹ ਅਤੇ ਪਿਆਰ ਨਾਲ ਨਿਭਾ ਕੇ ਵਿਆਹ ਵਰਗੇ ਪਵਿੱਤਰ ਰਿਸ਼ਤੇ ਵਿਚ ਬੰਨ੍ਹ ਕੇ ਇਕ ਇਹੋ ਜਿਹੇ ਸਾਥੀ ਦੇ ਰੂਪ ਵਿਚ ਸੌਗਾਤ ਦਿੱਤੀ ਹੈ, ਜਿਸ ਨੂੰ ਜੇ ਸਹੀ ਅਰਥਾਂ ਵਿਚ ਸਮਝਿਆ ਜਾਵੇ ਤਾਂ ਔਰਤ ਲਈ ਉਸ ਦਾ ਪਤੀ ਰੱਬ ਤੇ ਪਤੀ ਲਈ ਉਸ ਦੀ ਪਤਨੀ ਜੋ ਉਸ ਦੀ ਲੰਬੀ ਉਮਰ ਲਈ ਆਪ ਭੁੱਖੀ ਰਹਿ ਕੇ ਉਸ ਦੇ ਆਉਣ ਤੋਂ ਬਾਅਦ ਰੋਟੀ ਦਾ ਨਿਵਾਲਾ ਆਪਣੇ ਮੂੰਹ ਵਿਚ ਪਾਉਂਦੀ ਹੋਵੇ, ਇਹੀ ਤਾਂ ਹੁੰਦੀ ਸੀ ਸੱਚੇ ਪਿਆਰ ਦੀ ਨਿਸ਼ਾਨੀ।
ਪਰ ਅਜੋਕੇ ਸਮੇਂ ਵਿਚ ਜਿਵੇਂ-ਜਿਵੇਂ ਨਵੇਂ ਤਕਨੀਕੀ ਉਪਕਰਨਾਂ ਅਤੇ ਸੋਸ਼ਲ ਮੀਡੀਆ ਦਾ ਵਿਕਾਸ ਅਤੇ ਵਾਧਾ ਹੋਇਆ, ਉਸ ਦਾ ਜਿੰਨਾ ਫ਼ਾਇਦਾ ਵਪਾਰਕ ਅਦਾਰਿਆਂ ਨੂੰ ਹੋਇਆ, ਉਸ ਤੋਂ ਜ਼ਿਆਦਾ ਨੁਕਸਾਨ ਪਰਿਵਾਰਕ ਖ਼ਾਸਕਰ ਵਿਵਾਹਿਕ ਜੀਵਨ ਵਿਚ ਹੋਇਆ ਹੈ। ਉਦਾਹਰਨ ਦੇ ਤੌਰ 'ਤੇ ਮੋਬਾਈਲ ਫੋਨ ਉੱਤੇ ਆਉਣ ਵਾਲੇ ਫ਼ੋਨ ਹੋਣ ਚਾਹੇ ਭੁਲੇਖੇ ਨਾਲ ਕੋਈ ਲੱਗੀ ਹੋਈ ਮਿਸ ਕਾਲ ਜਾਂ ਗ਼ਲਤ ਫ਼ੋਨ ਦੇ ਆ ਜਾਣ ਕਰਕੇ ਜਾਂ ਫ਼ੋਨ 'ਤੇ ਵੱਧ ਸਮੇਂ ਤੱਕ ਰੁੱਝੇ ਰਹਿਣਾ, ਮੈਸੇਜ ਜਾਂ ਅੱਜਕਲ੍ਹ ਵਟਸਐਪ ਤੋਂ ਇਲਾਵਾ ਜੇਕਰ ਅਜੋਕੇ ਵਿਗਿਆਨਕ ਯੁੱਗ ਦੀ ਮੁੱਖ ਲੋੜ ਕੰਪਿਊਟਰ ਦੀ ਗੱਲ ਕਰੀਏ ਤਾਂ ਇੰਟਰਨੈੱਟ ਦੇ ਜ਼ਰੀਏ ਚੈਟਿੰਗ ਜਾਂ ਫੇਸਬੁੱਕ ਹੋਰ ਪਤਾ ਨਹੀਂ ਕਿੰਨੀਆਂ ਹੀ ਇਹੋ ਜਿਹੀਆਂ ਹੋਰ ਐਪਲੀਕੇਸ਼ਨਾਂ ਹਨ, ਚਾਹੇ ਇਨ੍ਹਾਂ ਦੀ ਵਰਤੋ ਸਿਰਫ਼ ਵਿਹਲੇ ਸਮੇਂ ਦੌਰਾਨ ਮਨੋਰੰਜਨ ਲਈ ਹੀ ਕਰ ਰਹੇ ਹੋਈਏ, ਪਰ ਇਨ੍ਹਾਂ ਦਾ ਪ੍ਰਭਾਵ ਵਿਵਾਹਿਕ ਜੀਵਨ 'ਤੇ ਬਹੁਤ ਮਾੜਾ ਪੈ ਰਿਹਾ ਹੈ। ਦੋਵਾਂ ਜੀਵਨ ਸਾਥੀਆਂ ਵਲੋਂ ਇਕ-ਦੂਜੇ ਕੋਲ ਦੋ ਪਲ ਵੀ ਨਾ ਬੈਠਣਾ ਕਾਰਨ ਜਾਂ ਘੱਟ ਸਮਾਂ ਮਿਲਣ ਕਰਕੇ ਉਨ੍ਹਾਂ ਦਾ ਸ਼ੱਕ ਦੇ ਘੇਰੇ ਵਿਚ ਆ ਜਾਣਾ ਸੁਭਾਵਿਕ ਹੋ ਜਾਂਦਾ ਹੈ। ਇਹ ਵੀ ਇਕ ਕਾਰਨ ਬਣਦਾ ਜਾ ਰਿਹਾ ਰਿਸ਼ਤਿਆਂ ਵਿਚ ਆ ਰਹੀ ਨਿਘਾਰ ਦਾ।
ਇਕ ਹੋਰ ਕਾਰਨ ਵੀ ਗੰਭੀਰ ਹੋ ਰਿਹਾ ਹੈ, ਜਿਵੇਂ ਇਸ ਮਹਿੰਗਾਈ ਭਰੇ ਸਮੇਂ ਦੌਰਾਨ ਅੱਜਕਲ੍ਹ ਦੋਵਾਂ ਦਾ ਨੌਕਰੀਪੇਸ਼ਾ ਹੋਣਾ ਵੀ ਜ਼ਰੂਰੀ ਹੈ। ਹਰੇਕ ਦਫ਼ਤਰਾਂ ਵਿਚ ਮਰਦ ਤੇ ਔਰਤਾਂ ਇਕੱਠੇ ਦਫ਼ਤਰੀ ਕਾਰਜਾਂ ਵਿਚ ਦੇਖੇ ਜਾ ਸਕਦੇ ਹਨ। ਕੋਈ ਇਹੋ ਜਿਹਾ ਮਹਿਕਮਾ ਨਹੀਂ ਰਿਹਾ, ਜਿੱਥੇ ਹੁਣ ਔਰਤ ਨਾ ਨੌਕਰੀ ਕਰਦੀ ਹੋਵੇ। ਪਰ ਪਹਿਲੇ ਕੁਝ ਸਾਲ ਤਾਂ ਸਮਾਂ ਅਨੰਦਿਤ ਗੁਜ਼ਰਦਾ ਹੈ, ਫਿਰ ਅਚਾਨਕ ਦਫ਼ਤਰ ਵਿਚ ਜਾਂ ਕਿਸੇ ਪਾਰਟੀ-ਵਿਆਹਾਂ ਵਿਚ ਸਟਾਫ਼ ਦੇ ਮੈਂਬਰਾਂ ਨਾਲ ਆਪਸੀ ਹਾਸੇ-ਮਜ਼ਾਕ ਦੌਰਾਨ ਕਈ ਤਰ੍ਹਾਂ ਦੀਆਂ ਗ਼ਲਤ-ਫ਼ਹਿਮੀਆਂ ਆਪਣੇ-ਆਪ ਪੈਦਾ ਹੋ ਜਾਂਦੀਆਂ ਹਨ। ਕਾਰਨ ਤਾਂ ਇਹ ਵੀ ਹੈ ਕਿ ਕਈ ਤਰ੍ਹਾਂ ਦੀਆਂ ਇਹੋ ਜਿਹੀਆਂ ਮਾੜੀਆਂ ਸ਼ਖ਼ਸੀਅਤਾਂ ਵੀ ਹਨ, ਜੋ ਆਪਣੇ ਫ਼ਾਇਦੇ ਅਤੇ ਹੱਸਦੇ-ਵੱਸਦੇ ਪਰਿਵਾਰਾਂ ਵਿਚ ਫਿੱਕ ਤੇ ਪਾੜਾ ਪਵਾਉਣ ਲਈ ਵਿਸ਼ਵਾਸ ਵਾਲੀ ਪੱਕੀ ਡੋਰ ਵਿਚ ਆਪਣੀ ਚੁਗ਼ਲੀ ਦੀ ਜ਼ਬਾਨ ਦੀ ਕੈਂਚੀ ਤੋਂ ਕੱਟ ਕੇ ਹੀ ਦਮ ਲੈਂਦੀਆਂ ਹਨ। ਇਸ ਕਰਕੇ ਰਿਸ਼ਤਿਆਂ ਵਿਚ ਸ਼ੱਕ ਅਤੇ ਚੁਗ਼ਲਖ਼ੋਰਾਂ ਦੀ ਚੁਗ਼ਲੀ ਤੋਂ ਬਚਾਅ ਕਰਕੇ ਕਦੇ ਵੀ ਆਪਣੇ ਵਿਸ਼ਵਾਸ ਨੂੰ ਘੱਟ ਨਾ ਹੋਣ ਦਿਓ, ਸਗੋਂ ਆਪਣੇ ਸਾਥੀ ਦੀਆਂ ਭਾਵਨਾਵਾਂ ਅਤੇ ਸੁਭਾਅ ਨੂੰ ਸਮਝ ਕੇ ਉਸ ਪ੍ਰਤੀ ਨੇੜਤਾ ਵਧਾਉਂਦੇ ਹੋਏ ਆਪਣੇ ਰਿਸ਼ਤੇ ਨੂੰ ਮਿਸਾਲ ਬਣਾਇਆ ਜਾਵੇ ਅਤੇ ਇਕ ਗੱਲ ਹੋਰ, ਜੋ ਕਿ ਧਿਆਨਯੋਗ ਅਤੇ ਵਿਚਾਰਨਯੋਗ ਵੀ ਬੇਹੱਦ ਜ਼ਰੂਰੀ ਹੈ, ਕਿਉਂਕਿ ਕਿਸੇ ਦੇ ਗੁਣਾਂ ਅਤੇ ਸੁਹੱਪਣ ਤੇ ਛੋਟੀ ਉਮਰੇ ਅਣਭੋਲ ਅਵਸਥਾ ਹੋਣ ਕਰਕੇ ਆਕਰਸ਼ਿਤ ਹੋਣਾ ਲਾਜ਼ਮੀ ਹੁੰਦਾ ਹੈ, ਇਸ ਕਰਕੇ ਮੇਰੇ ਨਿੱਜੀ ਤਜਰਬੇ ਅਨੁਸਾਰ ਵੀ ਖ਼ਾਸ ਕਰ ਵਿਵਾਹਿਕ ਜੀਵਨ ਵਿਚ ਪਿਛੋਕੜ ਜੀਵਨ ਬਾਰੇ ਵੀ ਕੋਈ ਬਹੁਤੀ ਝਾਤ ਨਾ ਮਾਰੀ ਜਾਵੇ।


-ਬਿਸਨਗੜ੍ਹ (ਬਈਏਵਾਲ), ਜ਼ਿਲ੍ਹਾ ਸੰਗਰੂਰ।
ਮੋਬਾ: 9914062205

ਧਾਤ ਦੀਆਂ ਚੀਜ਼ਾਂ ਨੂੰ ਇੰਜ ਸਾਫ਼ ਕਰੋ

...ਤਾਂ ਕਿ ਚਮਕ ਬਣੀ ਰਹੇ

ਸਫ਼ਾਈ ਵਿਚ ਕਰੋ ਦਸਤਾਨਿਆਂ ਦੀ ਵਰਤੋਂ : ਚੀਜ਼ਾਂ ਦੀ ਸਫ਼ਾਈ ਸੂਤੀ ਦਸਤਾਨੇ ਪਹਿਨ ਕੇ ਕਰੋ। ਰਸੋਈ ਵਿਚ ਵਰਤੇ ਜਾਣ ਵਾਲੇ ਦਸਤਾਨੇ ਵੀ ਇਸ ਕੰਮ ਵਿਚ ਆ ਸਕਦੇ ਹਨ। ਪਰ ਇਨ੍ਹਾਂ ਦੀ ਵਰਤੋਂ ਸਾਵਧਾਨੀ ਨਾਲ ਕਰੋ, ਕਿਉਂਕਿ ਇਸ ਵਿਚ ਸਲਫਰ ਹੁੰਦਾ ਹੈ, ਜੋ ਧਾਤ ਦੀਆਂ ਚੀਜ਼ਾਂ ਨੂੰ ਖਰਾਬ ਕਰ ਸਕਦਾ ਹੈ। ਕਿਉਂਕਿ ਸਰਜੀਕਲ ਦਸਤਾਨੇ ਪਤਲੇ ਅਤੇ ਕਮਜ਼ੋਰ ਹੁੰਦੇ ਹਨ, ਤੇਲ ਅਤੇ ਪਾਲਿਸ਼ ਦੇ ਸੰਪਰਕ ਵਿਚ ਆਉਣ 'ਤੇ ਇਹ ਖਰਾਬ ਹੋ ਸਕਦੇ ਹਨ। ਇਸ ਲਈ ਇਸ ਕੰਮ ਲਈ ਸੂਤੀ ਦਸਤਾਨੇ ਹੀ ਪਹਿਨੋ।
ਨਾਨ-ਮੈਟਲ ਹਿੱਸੇ ਦੀ ਸੁਰੱਖਿਆ : ਜਦੋਂ ਪੁਰਾਣੀਆਂ ਵਸਤਾਂ ਨੂੰ ਗਰਮ ਪਾਣੀ ਨਾਲ ਧੋਂਦੇ ਹੋ ਤਾਂ ਉਸ ਨੂੰ ਸੂਤੀ ਤੌਲੀਏ ਨਾਲ ਹਲਕਾ-ਹਲਕਾ ਸੁਕਾਓ। ਉਸ ਟੁਕੜੇ ਵਿਚ ਜਦੋਂ ਕੋਈ ਹਿੱਸਾ ਨਾਨ-ਮੈਟਲ ਦਾ, ਜਿਵੇਂ ਲੱਕੜੀ ਦਾ ਹੈਂਡਲ ਆਦਿ ਹੋਵੇ ਤਾਂ ਉਸ ਹਿੱਸੇ ਨੂੰ ਪਲਾਸਟਿਕ ਨਾਲ ਪਹਿਲਾਂ ਲਪੇਟ ਦਿਓ। ਅਜਿਹੇ ਸ਼ੋਅ ਪੀਸ ਨੂੰ ਖੋਲ੍ਹਦੇ ਹੀ ਪਾਣੀ ਵਿਚ ਨਾ ਪਾਓ, ਕਿਉਂਕਿ ਇਨ੍ਹਾਂ ਦੀ ਲੱਕੜੀ ਜਾਂ ਪਲਾਸਟਿਕ ਖਰਾਬ ਹੋ ਸਕਦੇ ਹਨ।
ਕੋਨੇ ਤੋਂ ਸ਼ੁਰੂਆਤ ਕਰੋ : ਧਾਤ ਨੂੰ ਧੋਣ ਤੋਂ ਪਹਿਲਾਂ ਉਸ ਦੇ ਛੋਟੇ ਜਿਹੇ ਭਾਗ ਨੂੰ ਸਾਫ਼ ਕਰੋ। ਪੂਰੇ ਧਾਤ ਦੇ ਪੀਸ ਨੂੰ ਇਕ ਹੀ ਵਾਰ ਸਾਫ਼ ਨਾ ਕਰੋ। ਉਸ ਦੇ ਅਸਲੀ ਰੰਗ ਨੂੰ ਬਰਕਰਾਰ ਰੱਖਣ ਲਈ ਜੇ ਤੁਸੀਂ ਕਿਸੇ ਪਾਲਿਸ਼ ਦੀ ਵਰਤੋਂ ਕਰ ਰਹੇ ਹੋ ਤਾਂ ਪਹਿਲਾਂ ਉਸ ਨੂੰ ਕਿਸੇ ਕੋਨੇ 'ਤੇ ਲਗਾ ਕੇ ਦੇਖੋ। ਜੇ ਉਸੇ ਤਰ੍ਹਾਂ ਦੀ ਹੀ ਦਿਖਾਈ ਦੇਵੇ ਤਾਂ ਪੂਰੇ ਪੀਸ ਦੀ ਸਫ਼ਾਈ ਕਰੋ।
ਸੋਨੇ-ਚਾਂਦੀ ਦੇ ਗਹਿਣੇ : ਇਨ੍ਹਾਂ ਨੂੰ ਖੌਲਦੇ ਪਾਣੀ ਨਾਲ ਸਾਫ਼ ਕੀਤਾ ਜਾ ਸਕਦਾ ਹੈ। ਇਸ ਵਾਸਤੇ ਇਕ ਵੱਡੇ ਭਾਂਡੇ ਵਿਚ ਪਾਣੀ ਉਬਾਲੋ ਅਤੇ ਉਸ ਦੇ ਅੰਦਰ ਆਪਣੇ ਗਹਿਣੇ ਪਾਓ। ਥੋੜ੍ਹੀ ਦੇਰ ਪਈ ਰਹਿਣ ਦਿਓ, ਫਿਰ ਇਸ ਨੂੰ ਬਾਹਰ ਕੱਢੋ ਅਤੇ ਸੁੱਕੇ ਸੂਤੀ ਕੱਪੜੇ ਨਾਲ ਰਗੜ ਕੇ ਸਾਫ਼ ਕਰੋ।
ਬੁਰਸ਼ ਨਾਲ ਰਗੜੋ : ਮੈਟਲ ਦੇ ਸ਼ੋਅ ਪੀਸ ਜਾਂ ਸਾਮਾਨ ਨੂੰ ਨਿਯਮਤ ਬੁਰਸ਼ ਨਾਲ ਸਾਫ਼ ਕਰੋ ਤਾਂ ਕਿ ਇਨ੍ਹਾਂ ਦੇ ਡਿਜ਼ਾਈਨ ਵਿਚ ਫਸੀ ਧੂੜ-ਮਿੱਟੀ ਸਾਫ਼ ਹੋ ਸਕੇ। ਇਸ ਵਾਸਤੇ ਘੋੜੇ ਦੇ ਵਾਲਾਂ ਨਾਲ ਬਣੇ ਬੁਰਸ਼ ਦੀ ਵਰਤੋਂ ਕਰੋ।
* ਗਹਿਣਿਆਂ ਅਤੇ ਧਾਤ ਦੀਆਂ ਚੀਜ਼ਾਂ ਨੂੰ ਸਾਫ਼ ਕਰਨ ਲਈ ਇਕ ਕੱਪ ਬੇਕਿੰਗ ਸੋਢੇ ਵਿਚ ਨਮਕ ਪਾ ਕੇ ਉਬਾਲੋ ਅਤੇ ਇਸ ਦਾ ਮਿਕਸਚਰ ਤਿਆਰ ਕਰੋ। ਚਾਂਦੀ ਜਾਂ ਸੋਨੇ ਦੇ ਪੀਸ 'ਤੇ ਇਸ ਮਿਕਸਚਰ ਨੂੰ ਪਾਓ ਅਤੇ ਥੋੜ੍ਹੀ ਦੇਰ ਇੰਜ ਹੀ ਛੱਡ ਦਿਓ। ਇਸ ਤੋਂ ਬਾਅਦ ਇਸ ਨੂੰ ਸੁੱਕੇ ਕੱਪੜੇ ਨਾਲ ਚੰਗੀ ਤਰ੍ਹਾਂ ਰਗੜ ਕੇ ਸਾਫ਼ ਕਰੋ।
* ਪਿੱਤਲ ਅਤੇ ਤਾਂਬੇ ਦੀਆਂ ਚੀਜ਼ਾਂ ਨੂੰ ਨਿੰਬੂ ਅਤੇ ਨਮਕ ਦੀ ਸਹਾਇਤਾ ਨਾਲ ਸਾਫ਼ ਕਰੋ। ਇਕ ਬਾਊਲ ਵਿਚ ਨਿੰਬੂ ਦਾ ਰਸ ਨਿਚੋੜ ਕੇ ਉਸ ਵਿਚ ਨਮਕ ਪਾ ਕੇ ਪੇਸਟ ਬਣਾਓ ਅਤੇ ਪਿੱਤਲ ਜਾਂ ਤਾਂਬੇ ਦੀਆਂ ਚੀਜ਼ਾਂ 'ਤੇ ਲਗਾ ਕੇ ਸੁੱਕੇ ਕੱਪੜੇ ਨਾਲ ਰਗੜ ਕੇ ਪੂੰਝੋ। ਜੇ ਇਹ ਚੰਗੀ ਤਰ੍ਹਾਂ ਸਾਫ਼ ਨਾ ਹੋਵੇ ਤਾਂ ਦੁਬਾਰਾ ਇਸ ਪ੍ਰਕਿਰਿਆ ਨੂੰ ਦੁਹਰਾਓ।


-ਮਧੂ ਸਿੰਘ

ਨਣਦ-ਭਰਜਾਈ ਦਾ ਰਿਸ਼ਤਾ

ਮਨੁੱਖ ਇਕ ਸਮਾਜਿਕ ਪ੍ਰਾਣੀ ਹੈ। ਸਮਾਜ ਵਿਚ ਰਹਿੰਦਿਆਂ ਉਹ ਅਨੇਕਾਂ ਰਿਸ਼ਤਿਆਂ ਦਾ ਨਿੱਘ ਮਾਣਦਾ ਹੈ। ਇਹ ਰਿਸ਼ਤੇ ਸਾਡੇ ਸਮਾਜਿਕ ਜੀਵਨ ਦਾ ਆਧਾਰ ਹਨ। ਹਰ ਰਿਸ਼ਤੇ ਦੀ ਆਪਣੀ ਇਕ ਪਰਿਭਾਸ਼ਾ ਹੈ, ਹਰ ਰਿਸ਼ਤੇ ਦਾ ਆਪਣਾ ਇਕ ਮਹੱਤਵ ਹੈ। ਰਿਸ਼ਤਿਆਂ ਦੀ ਮਾਲਾ ਵਿਚ ਅਨੇਕਾਂ ਹੀ ਖੱਟੇ-ਮਿੱਠੇ ਰਿਸ਼ਤੇ ਪਰੋਏ ਹੁੰਦੇ ਹਨ। ਅਜਿਹੇ ਹੀ ਖੱਟੇ-ਮਿੱਠੇ ਅਨੁਭਵਾਂ ਨਾਲ ਭਰਪੂਰ ਇਕ ਰਿਸ਼ਤਾ ਹੈ, ਨਣਦ-ਭਰਜਾਈ ਦਾ ਰਿਸ਼ਤਾ। ਜੇਕਰ ਇਸ ਰਿਸ਼ਤੇ ਵਿਚ ਸਮਝਦਾਰੀ, ਪਿਆਰ ਹੋਵੇ ਤਾਂ ਇਸ ਰਿਸ਼ਤੇ ਜਿਹਾ ਪਿਆਰਾ ਰਿਸ਼ਤਾ ਹੋਰ ਕੋਈ ਨਹੀਂ ਪਰ ਜੇਕਰ ਇਸ ਵਿਚ ਸਿਰਫ ਈਰਖਾ ਤੇ ਨਫਰਤ ਹੋਵੇ ਤਾਂ ਘਰ ਵਿਚ ਕਾਟੋ ਕਲੇਸ਼ ਦਾ ਕਾਰਨ ਵੀ ਇਹੀ ਰਿਸ਼ਤਾ ਬਣਦਾ ਹੈ।
ਜਿਸ ਘਰ ਨਣਦ-ਭਰਜਾਈ ਦੇ ਰਿਸ਼ਤੇ ਵਿਚ ਭੈਣਾਂ ਵਾਲਾ ਪਿਆਰ ਹੋਵੇ, ਸਹੇਲੀਆਂ ਵਾਂਗ ਉਹ ਇਕ-ਦੂਸਰੀ ਨਾਲ ਦੁੱਖ-ਸੁੱਖ ਸਾਂਝੇ ਕਰਨ, ਇਕ-ਦੂਸਰੀ ਦੇ ਦੁੱਖ-ਸੁੱਖ ਦੀਆਂ ਰਾਜ਼ਦਾਰ ਬਣਨ, ਉਹ ਘਰ ਸਵਰਗ ਬਣ ਜਾਂਦਾ ਹੈ ਪਰ ਦੂਸਰੇ ਪਾਸੇ ਜੇਕਰ ਦੋਵੇਂ ਹਮੇਸ਼ਾ ਇਕ-ਦੂਸਰੀ ਨੂੰ ਨੀਵਾਂ ਦਿਖਾਉਣ ਦੀ ਕੋਸ਼ਿਸ਼ ਕਰਨ ਤਾਂ ਉਹੀ ਹੱਸਦਾ-ਵੱਸਦਾ ਘਰ ਨਰਕ ਬਣ ਜਾਂਦਾ ਹੈ। ਇਸ ਰਿਸ਼ਤੇ ਨੂੰ ਫੁੱਲਾਂ ਵਾਂਗ ਮਹਿਕਾਉਣਾ ਹੈ ਜਾਂ ਕੰਡਿਆਂ ਦੀ ਤਰ੍ਹਾਂ ਚੋਭਦਾਰ ਬਣਾਉਣਾ ਹੈ, ਇਸ ਦੀ ਜ਼ਿੰਮੇਵਾਰੀ ਨਣਦ-ਭਰਜਾਈ ਦੋਵਾਂ ਦੀ ਹੀ ਹੁੰਦੀ ਹੈ, ਕਿਉਂਕਿ ਜੇ ਇਕ ਧਿਰ ਵੀ ਆਪਣੀ ਜ਼ਿੰਮੇਵਾਰੀ ਤੋਂ ਅਵੇਸਲੀ ਹੋ ਜਾਵੇ ਤਾਂ ਰਿਸ਼ਤਿਆਂ ਵਿਚਲਾ ਪਿਆਰ ਖਤਮ ਹੋ ਜਾਂਦਾ ਹੈ ਤੇ ਰਿਸ਼ਤੇ ਸਮਝੌਤੇ ਦਾ ਰੂਪ ਧਾਰਨ ਕਰ ਲੈਂਦੇ ਹਨ।
ਇਕ ਕੁੜੀ ਵਿਆਹ ਕੇ ਜਦੋਂ ਆਪਣੇ ਸਹੁਰੇ ਘਰ ਜਾਂਦੀ ਹੈ ਤਾਂ ਉਸ ਨੂੰ ਸਭ ਤੋਂ ਵੱਧ ਸਹਾਰਾ ਆਪਣੀ ਨਣਦ ਦਾ ਹੀ ਹੁੰਦਾ ਹੈ, ਕਿਉਂਕਿ ਸੱਸ ਉਮਰ ਤੇ ਅਹੁਦੇ ਵਿਚ ਉਸ ਤੋਂ ਵੱਡੀ ਹੋਣ ਕਰਕੇ ਉਹ ਹਰ ਗੱਲ ਉਸ ਨਾਲ ਸਾਂਝੀ ਨਹੀਂ ਕਰ ਸਕਦੀ ਪਰ ਨਣਦ ਉਸ ਦੀ ਹਮਉਮਰ ਹੋਣ ਕਾਰਨ ਉਹ ਉਸ ਨਾਲ ਹਰ ਦੁੱਖ-ਸੁੱਖ ਫਰੋਲ ਸਕਦੀ ਹੈ। ਨਣਦ-ਭਰਜਾਈ ਦਾ ਰਿਸ਼ਤਾ ਸਹੇਲੀਆਂ ਵਾਲਾ ਰਿਸ਼ਤਾ ਹੀ ਤਾਂ ਹੁੰਦਾ ਹੈ, ਜਿਥੇ ਬੇਝਿਜਕ ਆਪਣੇ ਦਿਲ ਦੀ ਗੱਲ ਇਕ-ਦੂਸਰੇ ਨੂੰ ਕਹਿ ਸਕਦੀਆਂ ਹਨ। ਜੇਕਰ ਥੋੜ੍ਹੀ ਜਿਹੀ ਸੂਝ-ਬੂਝ ਨਾਲ ਇਸ ਰਿਸ਼ਤੇ ਨੂੰ ਨਿਭਾਇਆ ਜਾਵੇ ਤਾਂ ਇਹ ਰਿਸ਼ਤਾ ਖੂਬਸੂਰਤ ਅਤੇ ਯਾਦਗਾਰ ਹੋ ਨਿਬੜਦਾ ਹੈ।
ਕਈ ਵਾਰ ਛੋਟੇ-ਛੋਟੇ ਕਾਰਨਾਂ ਕਰਕੇ ਇਸ ਰਿਸ਼ਤੇ ਵਿਚ ਕੁੜੱਤਣ ਆ ਜਾਂਦੀ ਹੈ। ਆਪਣੇ ਬਾਬੁਲ ਦੇ ਘਰ ਹਰ ਧੀ ਦੀ ਸਰਦਾਰੀ ਹੁੰਦੀ ਹੈ ਪਰ ਜਦੋਂ ਬਾਬੁਲ ਦੇ ਵਿਹੜੇ ਨੂੰਹ ਧੀ ਬਣ ਕੇ ਆ ਜਾਵੇ ਤਾਂ ਧੀਆਂ ਨੂੰ ਉਹ ਸਰਦਾਰੀ ਭਰਜਾਈਆਂ ਨੂੰ ਦੇ ਦੇਣੀ ਚਾਹੀਦੀ ਹੈ, ਕਿਉਂਕਿ ਹਰ ਧੀ ਨੇ ਇਕ ਨਾ ਇਕ ਦਿਨ ਬਾਬਲ ਦਾ ਘਰ ਛੱਡ ਪ੍ਰਦੇਸਣ ਹੋਣਾ ਹੀ ਹੁੰਦਾ ਹੈ। ਉਸ ਘਰ ਨੂੰ ਸੰਭਾਲਣ ਦੀ ਜ਼ਿੰਮੇਵਾਰੀ ਤਾਂ ਨੂੰਹ ਦੀ ਹੀ ਹੁੰਦੀ ਹੈ। ਇਸੇ ਲਈ ਜ਼ਰੂਰੀ ਹੈ ਕਿ ਨੂੰਹ ਨੂੰ ਉਸ ਦਾ ਬਣਦਾ ਮਾਣ-ਸਤਿਕਾਰ ਪਹਿਲਾਂ ਹੀ ਦੇ ਦਿੱਤਾ ਜਾਵੇ, ਤਾਂ ਕਿ ਨਣਦ-ਭਰਜਾਈ ਦੇ ਰਿਸ਼ਤੇ ਵਿਚ ਕੁੜੱਤਣ ਨਾ ਆਵੇ।
ਇਸੇ ਤਰ੍ਹਾਂ ਭਰਜਾਈ ਦਾ ਵੀ ਫਰਜ਼ ਬਣਦਾ ਹੈ ਕਿ ਉਹ ਆਪਣੀ ਨਣਦ, ਚਾਹੇ ਛੋਟੀ ਹੋਵੇ ਜਾਂ ਵੱਡੀ, ਉਸ ਨੂੰ ਪੂਰਾ ਪਿਆਰ ਸਤਿਕਾਰ ਦੇਵੇ। ਉਸੇ ਤਰ੍ਹਾਂ ਨਣਦ ਦੇ ਚਾਅ-ਲਾਡ ਕਰੇ, ਜਿਸ ਤਰ੍ਹਾਂ ਉਹ ਆਪਣੇ ਮਾਪਿਆਂ ਦੇ ਕਰਦੀ ਹੈ ਤਾਂ ਇਸ ਰਿਸ਼ਤੇ ਵਿਚ ਸ਼ਾਇਦ ਨਫਰਤ ਕਦੇ ਆਵੇ ਹੀ ਨਾ। ਕਈ ਵਾਰ ਘਰ ਦੇ ਛੋਟੇ-ਛੋਟੇ ਕੰਮਾਂ ਨੂੰ ਲੈ ਕੇ ਨਣਦ-ਭਰਜਾਈ ਦੀ ਆਪਸ ਵਿਚ ਨੋਕ-ਝੋਕ ਹੁੰਦੀ ਰਹਿੰਦੀ ਹੈ। ਅਜਿਹੇ ਵਿਚ ਸੱਸ ਦੀ ਭੂਮਿਕਾ ਬਹੁਤ ਮਹੱਤਵਪੂਰਨ ਹੁੰਦੀ ਹੈ। ਜੇਕਰ ਸੱਸ ਨੂੰਹ ਤੇ ਧੀ ਵਿਚ ਫਰਕ ਨਾ ਕਰੇ ਤੇ ਘਰ ਦੇ ਕੰਮ ਦੋਵਾਂ ਨੂੰ ਵੰਡ ਕੇ ਦੇ ਦੇਵੇ ਤਾਂ ਇਹ ਸਮੱਸਿਆ ਵੀ ਖਤਮ ਹੋ ਜਾਵੇਗੀ। ਜੇਕਰ ਘਰ ਵਿਚ ਨੂੰਹ ਨੂੰ ਧੀ ਵਾਂਗ ਪਿਆਰ ਦਿੱਤਾ ਜਾਵੇ ਤਾਂ ਨਣਦ-ਭਰਜਾਈ ਆਪਣੇ-ਆਪ ਦੋਵੇਂ ਭੈਣਾਂ ਵਾਂਗ ਰਹਿਣਗੀਆਂ। ਸੱਚ ਇਹੀ ਹੈ ਕਿ ਮਾਂ-ਬਾਪ ਤੋਂ ਬਾਅਦ ਪੇਕੇ ਭਰਾਵਾਂ-ਭਰਜਾਈਆਂ ਨਾਲ ਹੀ ਹੁੰਦੇ ਹਨ। ਜੇਕਰ ਰਿਸ਼ਤੇ ਵਿਚ ਪਿਆਰ ਹੋਵੇ ਤਾਂ ਪੇਕਿਆਂ ਦਾ ਸਾਥ ਸਦਾ ਸਲਾਮਤ ਰਹਿੰਦਾ ਹੈ ਤੇ ਜੇਕਰ ਨਣਦ-ਭਰਜਾਈ ਦੇ ਰਿਸ਼ਤੇ ਵਿਚ ਕੁੜੱਤਣ ਆ ਜਾਵੇ ਤਾਂ ਭਰਾਵਾਂ ਦਾ ਸਾਥ ਵੀ ਹੌਲੀ-ਹੌਲੀ ਛੁੱਟ ਹੀ ਜਾਂਦਾ ਹੈ। ਅਸਲ ਵਿਚ ਪੇਕਾ ਘਰ ਹੁੰਦਾ ਹੀ ਭਰਜਾਈਆਂ ਨਾਲ ਹੈ।


-ਪਿੰਡ ਤਨੂੰਲੀ, ਜ਼ਿਲ੍ਹਾ ਹੁਸ਼ਿਆਰਪੁਰ। ਮੋਬਾ: 99150-33176

ਝੁਰੜੀਆਂ ਹਟਾਉਣ ਦੇ ਘਰੇਲੂ ਉਪਾਅ

ਵਧਦੀ ਉਮਰ ਦੇ ਨਾਲ ਚਮੜੀ 'ਤੇ ਪੈਣ ਵਾਲੀਆਂ ਝੁਰੜੀਆਂ ਨੂੰ ਬਿਲਕੁਲ ਤਾਂ ਨਹੀਂ ਰੋਕਿਆ ਜਾ ਸਕਦਾ ਪਰ ਚਮੜੀ ਦੀ ਦੇਖਭਾਲ ਦੁਆਰਾ ਝੁਰੜੀਆਂ ਪੈਣ ਦੀ ਰਫ਼ਤਾਰ ਨੂੰ ਘੱਟ ਕੀਤਾ ਜਾ ਸਕਦਾ ਹੈ। ਚਮੜੀ ਦੀਆਂ ਝੁਰੜੀਆਂ ਨੂੰ ਦੂਰ ਕਰਕੇ ਚਮੜੀ ਨੂੰ ਆਕਰਸ਼ਕ ਬਣਾਇਆ ਜਾ ਸਕਦਾ ਹੈ। ਹੇਠ ਲਿਖੇ ਇਲਾਜ ਦੁਆਰਾ ਚਮੜੀ ਦੀਆਂ ਝੁਰੜੀਆਂ ਨੂੰ ਹਟਾਇਆ ਜਾ ਸਕਦਾ ਹੈ-
* ਪੱਕਿਆ ਪਪੀਤਾ ਕੱਟ ਕੇ ਚਿਹਰੇ 'ਤੇ ਮਲੋ ਅਤੇ 15-20 ਮਿੰਟ ਬਾਅਦ ਚਿਹਰਾ ਧੋ ਲਓ। ਇਸ ਪ੍ਰਯੋਗ ਨੂੰ ਲਗਾਤਾਰ ਕੁਝ ਦਿਨ ਕਰਨ ਨਾਲ ਚਮੜੀ ਦੀਆਂ ਝੁਰੜੀਆਂ ਦੂਰ ਹੁੰਦੀਆਂ ਹਨ।
* ਵਿਟਾਮਿਨ 'ਈ' ਨਾਲ ਝੁਰੜੀਆਂ ਮਿਟਦੀਆਂ ਹਨ। ਪੁੰਗਰੇ ਛੋਲੇ ਅਤੇ ਮੂੰਗੀ ਵਿਚ ਵਿਟਾਮਿਨ 'ਈ' ਭਰਪੂਰ ਮਾਤਰਾ ਵਿਚ ਹੁੰਦਾ ਹੈ। ਸਵੇਰੇ-ਸ਼ਾਮ ਪੁੰਗਰੇ ਅਨਾਜ ਸੇਵਨ ਕਰਨ ਨਾਲ ਝੁਰੜੀਆਂ ਤੋਂ ਬਚਾਅ ਹੁੰਦਾ ਹੈ।
* ਅੱਧਾ ਚਮਚ ਦੁੱਧ ਦੀ ਠੰਢੀ ਮਲਾਈ ਵਿਚ ਨਿੰਬੂ ਦੇ ਰਸ ਦੀਆਂ 4-5 ਬੂੰਦਾਂ ਮਿਲਾ ਕੇ ਰਾਤ ਨੂੰ ਸੌਣ ਸਮੇਂ ਝੁਰੜੀਆਂ ਵਾਲੀ ਚਮੜੀ 'ਤੇ ਚੰਗੀ ਤਰ੍ਹਾਂ ਮਲੋ ਤਾਂ ਕਿ ਉਹ ਚਮੜੀ ਵਿਚ ਪੂਰੀ ਤਰ੍ਹਾਂ ਰਮ ਜਾਏ। ਅੱਧੇ ਘੰਟੇ ਬਾਅਦ ਚਮੜੀ ਨੂੰ ਧੋ ਦਿਓ। ਲਗਾਤਾਰ 15-20 ਦਿਨ ਅਜਿਹਾ ਕਰਨ ਨਾਲ ਚਿਹਰੇ ਦੀਆਂ ਝੁਰੜੀਆਂ ਦੂਰ ਹੋ ਜਾਂਦੀਆਂ ਹਨ।
* ਇਸ਼ਨਾਨ ਕਰਨ ਤੋਂ ਬਾਅਦ ਜੈਤੂਨ ਦੇ ਤੇਲ ਨਾਲ ਚਮੜੀ ਦੀ ਮਾਲਿਸ਼ ਕਰੋ। ਉਂਗਲੀਆਂ ਦੇ ਪੋਰਾਂ ਨੂੰ ਤੇਲ ਵਿਚ ਡੁਬੋ ਕੇ ਝੁਰੜੀਆਂ ਦੀ ਉਲਟ ਦਿਸ਼ਾ ਵਿਚ ਮਾਲਿਸ਼ ਕਰੋ। ਇਸ ਨਾਲ ਚਮੜੀ ਦੀਆਂ ਝੁਰੜੀਆਂ ਦੂਰ ਹੋਣਗੀਆਂ।
* ਕੋਸੇ ਪਾਣੀ ਵਿਚ ਥੋੜ੍ਹਾ ਜਿਹਾ ਬੇਸਣ ਘੋਲ ਕੇ ਪੇਸਟ ਜਿਹਾ ਬਣਾ ਲਓ। ਇਸ ਨੂੰ ਚਿਹਰੇ ਦੀ ਚਮੜੀ 'ਤੇ ਮਲ ਕੇ ਚਮੜੀ ਸਾਫ਼ ਕਰ ਲਓ। ਹੁਣ ਇਕ ਚਮਚ ਸ਼ਹਿਦ ਲੈ ਕੇ ਚਮੜੀ 'ਤੇ ਲਗਾਓ। ਚਿਹਰੇ 'ਤੇ ਸ਼ਹਿਦ ਹੇਠਾਂ ਤੋਂ ਉੱਪਰ ਵੱਲ ਲਗਾਓ। ਅੱਧੇ ਘੰਟੇ ਬਾਅਦ ਚਿਹਰਾ ਅਤੇ ਸ਼ਹਿਦ ਲੱਗੇ ਹੋਏ ਬਾਕੀ ਭਾਗਾਂ ਨੂੰ ਧੋ ਦਿਓ। ਅਜਿਹਾ ਲਗਾਤਾਰ 6-7 ਹਫ਼ਤੇ ਕਰਦੇ ਰਹਿਣ ਨਾਲ ਵਧਦੀ ਉਮਰ ਦੇ ਕਾਰਨ ਪਈਆਂ ਝੁਰੜੀਆਂ ਦੂਰ ਹੁੰਦੀਆਂ ਹਨ। * ਕੱਚੇ ਦੁੱਧ ਵਿਚ ਰੂੰ ਦਾ ਫੈਹਾ ਭਿਉਂ ਕੇ ਚਿਹਰਾ, ਗਰਦਨ ਅਤੇ ਹੱਥਾਂ ਦੀ ਚਮੜੀ 'ਤੇ 5-10 ਵਾਰ ਹੌਲੀ-ਹੌਲੀ ਮਲੋ। 10-15 ਮਿੰਟ ਬਾਅਦ ਚਮੜੀ ਠੰਢੇ ਪਾਣੀ ਨਾਲ ਧੋ ਦਿਓ।


-ਅਰਪਿਤਾ ਤਾਲੁਕਦਾਰ

ਸ਼ਾਮ ਦੇ ਪਕਵਾਨ

ਮਿੱਠਾ ਸਮੋਸਾ
ਸਮੱਗਰੀ : ਮੈਦਾ-250 ਗ੍ਰਾਮ, ਬਦਾਮ ਗਿਰੀ-5 ਗ੍ਰਾਮ, ਪਿਸਤਾ-5 ਗ੍ਰਾਮ, ਬੇਕਿੰਗ ਪਾਊਡਰ-ਚੁਟਕੀ ਭਰ, ਕਿਸ਼ਮਿਸ਼-5 ਗ੍ਰਾਮ, ਚੀਨੀ-175 ਗ੍ਰਾਮ, ਖੋਆ-100 ਗ੍ਰਾਮ, ਘਿਓ-ਤਲਣ ਲਈ।
ਵਿਧੀ : ਪਿਸਤਾ ਅਤੇ ਬਦਾਮ ਗਿਰੀ ਨੂੰ ਬਰੀਕ ਕੱਟ ਲਓ। ਇਸ ਤੋਂ ਬਾਅਦ ਚੀਨੀ ਦੀ ਇਕ ਤਾਰ ਦੀ ਚਾਸ਼ਣੀ ਬਣਾ ਲਓ। ਹੁਣ ਕੜਾਹੀ ਵਿਚ ਮੱਧਮ ਸੇਕ 'ਤੇ ਖੋਆ ਭੁੰਨ ਲਓ ਅਤੇ ਉਸ ਵਿਚ ਪਿਸਤਾ ਬਦਾਮ, ਕਿਸ਼ਮਿਸ਼ ਮਿਲਾ ਦਿਓ। ਫਿਰ ਮੈਦੇ ਵਿਚ ਬੇਕਿੰਗ ਪਾਊਡਰ ਪਾ ਕੇ ਚੰਗੀ ਤਰ੍ਹਾਂ ਗੁੰਨ੍ਹ ਲਓ। ਹੁਣ ਛੋਟੀ-ਛੋਟੀ ਲੋਈ ਬਣਾ ਕੇ ਵੇਲ ਲਵੋ ਅਤੇ ਉਸ ਵਿਚ ਖੋਆ ਭਰ ਕੇ ਉਸ ਨੂੰ ਸਮੋਸੇ ਦਾ ਆਕਾਰ ਦਿਓ। ਹੁਣ ਕੜਾਹੀ ਵਿਚ ਘਿਓ ਗਰਮ ਕਰੋ ਅਤੇ ਸਮੋਸੇ ਤਲ ਲਓ। ਕੜਾਹੀ ਵਿਚੋਂ ਕੱਢ ਕੇ ਉਨ੍ਹਾਂ ਨੂੰ ਚਾਸ਼ਣੀ ਵਿਚ ਪਾਉਂਦੇ ਜਾਓ।


-ਰੀਤਿਕਾ (ਰੀਤੂ)
ਮੋਬਾ: 88721-83545

ਆਪਣੇ ਬੱਚਿਆਂ ਨੂੰ ਵੀ ਸਮਾਂ ਦਿਓ

ਅੱਜ ਦੀ ਰੁਝੇਵਿਆਂ ਭਰੀ ਜ਼ਿੰਦਗੀ ਵਿਚ ਆਪਣੇ ਬੱਚਿਆਂ ਦੀ ਦੇਖਭਾਲ ਕਰਨੀ, ਕਿਸੇ ਚੁਣੌਤੀ ਤੋਂ ਘੱਟ ਨਹੀਂ ਸਮਝੀ ਜਾਂਦੀ। ਪੁਰਾਤਨ ਸਮੇਂ ਵਿਚ ਕੇਵਲ ਮਰਦ ਕੰਮ ਕਰਦੇ ਸਨ ਅਤੇ ਔਰਤ ਸਿਰਫ ਤੇ ਸਿਰਫ ਘਰ ਦੇ ਕੰਮਾਂ ਵਿਚ ਰੁੱਝੀ ਰਹਿੰਦੀ ਸੀ ਪਰ ਆਧੁਨਿਕ ਯੁੱਗ ਵਿਚ ਇਸਤਰੀ-ਪੁਰਸ਼ ਇਕ-ਦੂਜੇ ਦੇ ਬਰਾਬਰ ਆ ਖੜ੍ਹੇ ਹੋਏ ਹਨ ਅਤੇ ਉੱਚ ਸਿੱਖਿਆ ਪ੍ਰਾਪਤ ਕਰਨ ਨਾਲ ਹੁਣ ਇਸਤਰੀਆਂ ਵੀ ਮਰਦਾਂ ਨਾਲ ਬਰਾਬਰ ਕੰਮ ਕਰ ਰਹੀਆਂ ਹਨ। ਇਸ ਦੇ ਨਾਲ ਹੀ ਅੱਜਕਲ੍ਹ ਉਹ ਸਾਂਝੇ ਪਰਿਵਾਰ ਦੀ ਥਾਂ ਇਕੱਲੇ ਪਰਿਵਾਰ ਨੂੰ ਵੀ ਤਰਜੀਹ ਦੇਣ ਲੱਗ ਪਏ ਹਨ। ਜੇ ਪਰਿਵਾਰ ਵਿਚ ਪਤੀ-ਪਤਨੀ ਦੋਵੇਂ ਕੰਮ ਕਰ ਰਹੇ ਹਨ ਤਾਂ ਇਸ ਨਾਲ ਘਰੇਲੂ ਸੰਤੁਲਨ ਬਣਾਉਣਾ ਮੁਸ਼ਕਿਲ ਹੋ ਜਾਂਦਾ ਹੈ, ਕਿਉਂਕਿ ਹੁਣ ਇਸਤਰੀ ਵੀ ਪੁਰਸ਼ ਵਾਂਗ ਨੌਕਰੀ ਤੋਂ ਥੱਕੀ ਘਰ ਆ ਕੇ ਆਰਾਮ ਕਰਨਾ ਪਸੰਦ ਕਰਦੀ ਹੈ, ਜਿਸ ਨੂੰ ਲੈ ਕੇ ਇਸਤਰੀ-ਪੁਰਸ਼ ਵਿਚ ਨੋਕ-ਝੋਕ ਹੁੰਦੀ ਰਹਿੰਦੀ ਹੈ, ਜਿਸ ਦਾ ਸਭ ਤੋਂ ਜ਼ਿਆਦਾ ਅਸਰ ਉਨ੍ਹਾਂ ਦੇ ਬੱਚਿਆਂ 'ਤੇ ਪੈਂਦਾ ਹੈ। ਬੱਚਿਆਂ ਨੂੰ ਚੰਗੇ ਕੱਪੜੇ ਪਹਿਨਾਉਣਾ ਅਤੇ ਉਨ੍ਹਾਂ ਨੂੰ ਚੰਗੇ ਸਕੂਲ ਵਿਚ ਪੜ੍ਹਾਉਣਾ ਹੀ ਚੰਗਾ ਪਾਲਣ-ਪਾਸ਼ਣ ਨਹੀਂ ਹੈ। ਸਾਨੂੰ ਉਨ੍ਹਾਂ ਨੂੰ ਥੋੜ੍ਹਾ ਹਰ ਚੰਗਾ ਸਮਾਂ ਦੇਣਾ ਪਵੇਗਾ।
ਨੌਕਰੀ-ਪੇਸ਼ੇ ਪਰਿਵਾਰ ਅੰਦਰ ਦੇਖਿਆ ਗਿਆ ਹੈ ਕਿ ਕਈ-ਕਈ ਘੰਟੇ ਉਨ੍ਹਾਂ ਦਾ ਘਰ ਤੋਂ ਬਾਹਰ ਰਹਿਣਾ, ਉਨ੍ਹਾਂ ਦੇ ਬੱਚੇ ਨੂੰ ਇਕੱਲਾਪਨ ਮਹਿਸੂਸ ਕਰਵਾਉਂਦਾ ਹੈ। ਕੰਮ-ਕਾਜੀ ਮਾਤਾ-ਪਿਤਾ ਨੂੰ ਚਾਹੀਦਾ ਹੈ ਕਿ ਉਹ ਆਪਣੇ ਬੱਚਿਆਂ ਦੀਆਂ ਭਾਵਨਾਵਾਂ ਨੂੰ ਸਮਝਣ ਅਤੇ ਉਨ੍ਹਾਂ ਨਾਲ ਇਕ ਚੰਗੇ ਮਿੱਤਰ ਵਰਗਾ ਵਰਤਾਓ ਕਰਨ ਤਾਂ ਜੋ ਬੱਚਿਆਂ ਦੇ ਕੋਮਲ ਮਨਾਂ ਵਿਚ ਆਪਣੇ ਮਾਤਾ-ਪਿਤਾ ਪ੍ਰਤੀ ਜੋ ਤਰ੍ਹਾਂ-ਤਰ੍ਹਾਂ ਦੀਆਂ ਕਮੀਆਂ ਘਰ ਬਣਾ ਰਹੀਆਂ ਹਨ, ਉਨ੍ਹਾਂ ਨੂੰ ਦੂਰ ਕੀਤਾ ਜਾ ਸਕੇ। ਮਾਤਾ-ਪਿਤਾ ਦਾ ਫਰਜ਼ ਹੈ ਕਿ ਉਹ ਆਪਣੇ ਬੱਚਿਆਂ ਦਾ ਆਤਮਵਿਸ਼ਵਾਸ ਵਧਾਉਣ, ਤਾਂ ਜੋ ਉਨ੍ਹਾਂ ਵਿਚਲੀਆਂ ਵਧਦੀਆਂ ਦੂਰੀਆਂ ਅੱਗੇ ਜਾ ਕੇ ਪ੍ਰੇਸ਼ਾਨੀਆਂ ਨਾ ਬਣ ਸਕਣ। ਕਿਉਂਕਿ ਬੱਚਾ ਹਮੇਸ਼ਾ ਆਪਣੀਆਂ ਸਮੱਸਿਆਵਾਂ ਦੇ ਹੱਲ ਲਈ ਕਿਸੇ ਹੋਰ ਵੱਲ ਆਕਰਸ਼ਤ ਹੋਣ ਦੀ ਬਜਾਏ ਆਪਣੇ ਮਾਤਾ-ਪਿਤਾ ਤੋਂ ਹੀ ਚਾਹੁੰਦਾ ਹੈ।
ਕਈ ਵਾਰ ਨੌਕਰੀ ਅਤੇ ਘਰ ਦੀਆਂ ਜ਼ਿੰਮੇਵਾਰੀਆਂ ਵਿਚਕਾਰ ਮਾਤਾ-ਪਿਤਾ ਐਨਾ ਫਸ ਜਾਂਦੇ ਹਨ ਕਿ ਉਹ ਬੱਚਿਆਂ ਲਈ ਤਾਂ ਕੀ, ਖੁਦ ਲਈ ਵੀ ਸਮਾਂ ਨਹੀਂ ਕੱਢ ਸਕਦੇ। ਇਸੇ ਵਿਚ ਕਈ ਵਾਰ ਸਾਰਾ ਤਣਾਅ ਅਤੇ ਗੁੱਸਾ ਬੱਚਿਆਂ 'ਤੇ ਨਿਕਲ ਜਾਂਦਾ ਹੈ ਪਰ ਅਜਿਹਾ ਕਰਨਾ ਬਿਲਕੁਲ ਗ਼ਲਤ ਹੈ। ਅਕਸਰ ਮਾਤਾ-ਪਿਤਾ ਆਪਣੇ ਬੱਚੇ ਦੀ ਤੁਲਨਾ ਕਿਸੇ ਦੂਜੇ ਪਰਿਵਾਰ ਦੇ ਬੱਚਿਆਂ ਨਾਲ ਕਰਨ ਲੱਗ ਜਾਂਦੇ ਹਨ ਅਤੇ ਪੜ੍ਹਾਈ-ਲਿਖਾਈ ਨੂੰ ਲੈ ਕੇ ਉਸ ਨੂੰ ਕਈ ਤਰ੍ਹਾਂ ਦੇ ਤਾਅਨੇ-ਮਿਹਣੇ ਮਾਰੇ ਜਾਂਦੇ ਹਨ। ਇਸ ਤਰ੍ਹਾਂ ਕਰਨ ਨਾਲ ਬੱਚਾ ਹੀਣਤਾ ਦਾ ਸ਼ਿਕਾਰ ਹੋ ਜਾਂਦਾ ਹੈ। ਉਹ ਇਹ ਨਹੀਂ ਸਮਝਦਾ ਕਿ ਤੁਸੀਂ ਉਸ ਤੋਂ ਕੀ ਚਾਹੁੰਦੇ ਹੋ। ਉਸ ਨੂੰ ਤਾਂ ਬਸ ਏਨਾ ਪਤਾ ਹੁੰਦਾ ਹੈ ਕਿ ਤੁਸੀਂ ਉਸ ਤੋਂ ਖੁਸ਼ ਨਹੀਂ ਹੋ। ਇਸ ਲਈ ਚੰਗਾ ਹੋਵੇਗਾ ਕਿ ਉਸ ਨਾਲ ਕਿਸੇ ਹੋਰ ਬੱਚੇ ਦੀ ਤੁਲਨਾ ਕਰਨ ਦੀ ਬਜਾਏ, ਉਸ ਨੂੰ ਹੀ ਸਮਝਾਓ ਕਿ ਉਹ ਕਿਸ ਤਰ੍ਹਾਂ ਹੋਰ ਬਿਹਤਰ ਬਣ ਸਕਦਾ ਹੈ।


-ਹਰਵਿੰਦਰ ਸਿੰਘ ਸੰਧੂ,
ਇੰਚਾਰਜ, ਸ: ਐ: ਸਕੂਲ, ਰਾਜਗੜ੍ਹ, ਬਲਾਕ ਸਮਾਣਾ-2 (ਪਟਿਆਲਾ)। ਮੋਬਾ: 94175-43175






Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX