ਤਾਜਾ ਖ਼ਬਰਾਂ


ਬੱਸ ਮੈਨੇਜਰ ਖ਼ਿਲਾਫ਼ ਕਾਰਵਾਈ ਦੀ ਮੰਗ ਨੂੰ ਲੈ ਕੇ ਸਾਂਝੀ ਐਕਸ਼ਨ ਕਮੇਟੀ ਵਲੋਂ ਮੁਜ਼ਾਹਰਾ
. . .  20 minutes ago
ਸ੍ਰੀ ਮੁਕਤਸਰ ਸਾਹਿਬ, 19 ਦਸੰਬਰ (ਰਣਜੀਤ ਸਿੰਘ ਢਿੱਲੋਂ)- ਚੰਡੀਗੜ੍ਹ ਨੂੰ ਜਾਂਦੀ ਪੰਜਾਬ ਰੋਡਵੇਜ਼ ਸ੍ਰੀ ਮੁਕਤਸਰ ਸਾਹਿਬ ਡੀਪੂ ਦੀ ਵਾਲਵੋ ਬੱਸ ਨੂੰ ਰੋਕਣ ਦੇ ਮਾਮਲੇ ਨੂੰ ਲੈ ਕੇ ਪੰਜਾਬ ਰੋਡਵੇਜ਼ ਕਾਮਿਆਂ ਅਤੇ ਆਰਬਿਟ ਬੱਸ ਦੇ ਮੈਨੇਜਰ ਵਿਚਕਾਰ ਤਖ਼ਲਕਲਾਮੀ ਹੋਈ। ....
ਪੰਚਾਇਤੀ ਚੋਣਾਂ 'ਚ ਵਰਤੀ ਜਾਣ ਵਾਲੀ 200 ਪੇਟੀ ਨਜਾਇਜ਼ ਸ਼ਰਾਬ ਬਰਾਮਦ
. . .  24 minutes ago
ਟਾਂਡਾ ਉੜਮੁੜ, 19 ਦਸੰਬਰ (ਦੀਪਕ ਬਹਿਲ)- ਪੰਚਾਇਤੀ ਚੋਣਾਂ ਦੇ ਮੱਦੇਨਜ਼ਰ ਸ਼ਰਾਬ ਦੇ ਠੇਕੇਦਾਰਾਂ ਵੱਲੋਂ ਵੋਟਰਾਂ ਨੂੰ ਕਥਿਤ ਤੌਰ 'ਤੇ ਜਾਅਲੀ ਸ਼ਰਾਬ ਤਿਆਰ ਕਰ ਕੇ ਠੇਕਿਆਂ 'ਚ ਸਪਲਾਈ ਕਰਨ ਦੇ ਮੰਤਵ ਨਾਲ ਵਰਤੀ ਜਾਣ ਵਾਲੀ ਸ਼ਰਾਬ ਦੀ ਇਕ ਵੱਡੀ ਖੇਪ ਜਿਸ 'ਚ .....
ਬਰਗਾੜੀ ਮੋਰਚੇ ਦੀ ਸਮਾਪਤੀ ਦੇ ਐਲਾਨ 'ਤੇ ਭਾਈ ਹਵਾਰਾ ਨੇ ਲਿਖਿਆ ਪੱਤਰ
. . .  29 minutes ago
ਚੰਡੀਗੜ੍ਹ, 19 ਦਸੰਬਰ (ਅਜਾਇਬ ਸਿੰਘ ਔਜਲਾ)- ਤਿਹਾੜ ਜੇਲ੍ਹ ਦਿੱਲੀ 'ਚ ਬੰਦ ਭਾਈ ਜਗਤਾਰ ਸਿੰਘ ਹਵਾਰਾ ਦਾ ਇੱਕ ਪੱਤਰ ਅੱਜ ਚੰਡੀਗੜ੍ਹ 'ਚ ਐਡਵੋਕੇਟ ਅਮਰ ਸਿੰਘ ਚਾਹਲ ਵੱਲੋਂ ਪੱਤਰਕਾਰਾਂ ਨੂੰ ਸੌਂਪਿਆ ਗਿਆ। ਇਸ 'ਚ ਭਾਈ ਜਗਤਾਰ ਸਿੰਘ ਹਵਾਰਾ ਨੇ ਲਿਖਿਆ .....
'84 ਸਿੱਖ ਕਤਲੇਆਮ : ਦੋਸ਼ੀਆਂ ਨੂੰ ਸਜ਼ਾ ਦਿਵਾਉਣ ਵਾਲਿਆਂ ਨੂੰ ਸ੍ਰੀ ਅਕਾਲ ਤਖਤ ਸਾਹਿਬ ਵਿਖੇ ਕੀਤਾ ਜਾਵੇਗਾ ਸਨਮਾਨਿਤ- ਲੌਂਗੋਵਾਲ
. . .  43 minutes ago
ਚੰਡੀਗੜ੍ਹ, 19 ਦਸੰਬਰ (ਵਿਕਰਮਜੀਤ ਸਿੰਘ ਮਾਨ)- 1984 ਦੇ ਸਿੱਖ ਕਤਲੇਆਮ ਮਾਮਲੇ 'ਚ 34 ਸਾਲ ਗਵਾਹ ਬਣੇ ਰਹੇ ਗਵਾਹਾਂ, ਵਕੀਲਾਂ ਅਤੇ ਇਸ ਕੇਸ 'ਚ ਮੌਜੂਦ ਲੋਕਾਂ ਅਤੇ ਐਚ.ਐਸ. ਫੂਲਕਾ ਨੂੰ ਸ਼੍ਰੋਮਣੀ ਕਮੇਟੀ ਵੱਲੋਂ 26 ਦਸੰਬਰ ਨੂੰ ਅਕਾਲ ਤਖਤ 'ਚ ਸਨਮਾਨਿਤ .....
ਐਮਾਜ਼ੋਨ ਨੇ ਸ਼੍ਰੀ ਹਰਿਮੰਦਰ ਸਾਹਿਬ ਦੀਆਂ ਤਸਵੀਰਾਂ ਦੀ ਕੀਤੀ ਬੇਅਦਬੀ, ਐਸ.ਜੀ.ਪੀ.ਸੀ. ਨੇ ਭੇਜਿਆ ਨੋਟਿਸ
. . .  49 minutes ago
ਜਲੰਧਰ, 19 ਦਸੰਬਰ -ਸ਼੍ਰੀ ਹਰਿਮੰਦਰ ਸਾਹਿਬ ਦੀਆਂ ਤਸਵੀਰਾਂ ਦੀ ਬੇਅਦਬੀ ਕਰਨ ਦੇ ਮਾਮਲੇ 'ਚ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਆਨ ਲਾਈਨ ਚੀਜ਼ਾਂ-ਵਸਤਾਂ ਵੇਚਣ ਵਾਲੀ ਕੰਪਨੀ ਐਮਾਜ਼ੋਨ ਡਾਟ ਕਾਮ ਨੂੰ ਨੋਟਿਸ ਭੇਜਿਆ ਗਿਆ.....
ਇਸਰੋ ਨੇ ਸ੍ਰੀਹਰੀਕੋਟਾ ਤੋਂ ਜੀ.ਸੈਟ-7ਏ ਨੂੰ ਕੀਤਾ ਲਾਂਚ
. . .  about 1 hour ago
ਨਵੀਂ ਦਿੱਲੀ, 19 ਦਸੰਬਰ- ਸ੍ਰੀਹਰੀਕੋਟਾ ਦੇ ਸਤੀਸ਼ ਧਵਨ ਸਪੇਸ ਸੈਂਟਰ 'ਚ ਇਸਰੋ (ਭਾਰਤੀ ਪੁਲਾੜ ਖੋਜ ਸੰਸਥਾ) ਨੇ ਜੀ.ਸੈਟ-7ਏ ਨੂੰ ਲਾਂਚ ਕਰ ਦਿੱਤਾ ਹੈ। ਜੀ.ਸੈਟ-7ਏ ਇਕ ਭੂਗੋਲਿਕ ਉਪਗ੍ਰਹਿ ਹੈ ਜੋ ਭਾਰਤ ਦੀ ਸੰਚਾਰ ਪ੍ਰਣਾਲੀ ਨੂੰ ਮਜ਼ਬੂਤ ਕਰਨ ਲਈ ਕੰਮ ਕਰੇਗਾ.....
ਲੋਕ ਸਭਾ 'ਚ ਪਾਸ ਹੋਇਆ ਸਰੋਗੇਸੀ ਬਿਲ
. . .  about 1 hour ago
ਬਠਿੰਡਾ ਫ਼ੈਕਟਰੀ ਧਮਾਕਾ: ਸੂਬਾ ਸਰਕਾਰ ਵੱਲੋਂ ਮ੍ਰਿਤਕ ਦੇ ਪਰਿਵਾਰ ਅਤੇ ਜ਼ਖਮੀ ਵਿਅਕਤੀ ਨੂੰ ਮੁਆਵਜ਼ਾ ਦੇਣ ਦਾ ਐਲਾਨ
. . .  about 1 hour ago
ਬਠਿੰਡਾ, 19 ਦਸੰਬਰ (ਵਿਕਰਮ) - ਬਠਿੰਡਾ ਦੇ ਗਰੋਥ ਸੈਂਟਰ ਵਿਖੇ ਮਾਚਸ ਬਣਾਉਣ ਵਾਲੀ ਫ਼ੈਕਟਰੀ 'ਚ ਹੋਏ ਧਮਾਕੇ 'ਚ ਮਾਰੇ ਗਏ ਵਿਅਕਤੀ ਦੇ ਪਰਿਵਾਰ ਨੂੰ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ 3 ਲੱਖ ਅਤੇ ਗੰਭੀਰ ਜ਼ਖਮੀ ਹੋਏ ਵਿਅਕਤੀ ਨੂੰ 50 ....
ਪੰਜਾਬ ਸਰਕਾਰ ਵੱਲੋਂ ਨਵੇਂ ਵਰ੍ਹੇ ਦੇ ਸਬੰਧ 'ਚ ਸਰਕਾਰੀ ਛੁੱਟੀਆਂ ਦਾ ਐਲਾਨ
. . .  about 1 hour ago
ਚੰਡੀਗੜ੍ਹ, 19 ਦਸੰਬਰ (ਅਜਾਇਬ ਸਿੰਘ ਔਜਲਾ)- ਪੰਜਾਬ ਸਰਕਾਰ ਵੱਲੋਂ ਅੱਜ ਆਗਾਮੀ ਨਵੇਂ ਵਰ੍ਹੇ ਦੇ ਸਬੰਧ 'ਚ ਸਰਕਾਰੀ ਛੁੱਟੀਆਂ ਦਾ ਐਲਾਨ ਕਰ ਦਿੱਤਾ ਗਿਆ ਹੈ ।ਸਰਕਾਰ ਵੱਲੋਂ ਇਸ ਬਾਰੇ ਬਕਾਇਦਾ ਪੱਤਰ ਵੀ ਜਾਰੀ ਕਰ ਦਿੱਤਾ ਗਿਆ
ਰਾਫੇਲ 'ਤੇ ਮੁਆਫ਼ੀ ਦੀ ਮੰਗ ਨੂੰ ਲੈ ਕੇ ਰਾਹੁਲ ਗਾਂਧੀ ਖ਼ਿਲਾਫ਼ ਭਾਜਪਾ ਦਾ ਪ੍ਰਦਰਸ਼ਨ
. . .  about 2 hours ago
ਲੁਧਿਆਣਾ, 19 ਦਸੰਬਰ (ਰੁਪੇਸ਼)- ਰਾਫੇਲ ਮੁੱਦੇ 'ਤੇ ਭਾਜਪਾ ਦੇ ਪੰਜਾਬ ਪ੍ਰਧਾਨ ਸ਼ਵੇਤ ਮਲਿਕ ਦੀ ਅਗਵਾਈ 'ਚ ਭਾਜਪਾ ਵਰਕਰਾਂ ਨੇ ਕਾਂਗਰਸ ਪਾਰਟੀ ਖ਼ਿਲਾਫ਼ ਜੰਮ ਕੇ ਨਾਅਰੇਬਾਜ਼ੀ ਕੀਤੀ। ਕਾਂਗਰਸ ਪਾਰਟੀ ਨੂੰ ਇਕ ਝੂਠੀ ਪਾਰਟੀ ਕਰਾਰ ਦੇ ਹੋਏ ਭਾਜਪਾ ਵਰਕਰਾਂ .....
ਹੋਰ ਖ਼ਬਰਾਂ..

ਸਾਡੀ ਸਿਹਤ

ਗੰਭੀਰ ਰੋਗਾਂ ਤੋਂ ਬਚਣ ਦੇ ਉਪਾਅ

ਸਾਡੀ ਜੀਵਨ ਸ਼ੈਲੀ ਕੁਝ ਅਜਿਹੀ ਹੁੰਦੀ ਜਾ ਰਹੀ ਹੈ ਕਿ ਹਰ ਵਿਅਕਤੀ ਰੋਗਾਂ ਦਾ ਸ਼ਿਕਾਰ ਬਣਦਾ ਜਾ ਰਿਹਾ ਹੈ। ਅਜਿਹਾ ਨਹੀਂ ਕਿ ਪਹਿਲੇ ਸਮੇਂ ਵਿਚ ਵਿਅਕਤੀ ਬਿਮਾਰ ਨਹੀਂ ਹੁੰਦੇ ਸਨ, ਪਰ ਵਧਦੀ ਉਮਰ ਵਿਚ ਹੀ ਉਨ੍ਹਾਂ ਨੂੰ ਬਿਮਾਰੀਆਂ ਘੇਰਦੀਆਂ ਸਨ। ਅੱਜ ਛੋਟੇ-ਛੋਟੇ ਬੱਚੇ, ਜਵਾਨ ਵਰਗ ਵੀ ਦਿਲ ਦੇ ਰੋਗਾਂ, ਸ਼ੂਗਰ ਤੇ ਕੈਂਸਰ ਵਰਗੇ ਰੋਗਾਂ ਦਾ ਸ਼ਿਕਾਰ ਹੋ ਰਹੇ ਹਨ।
ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਸ ਸਭ ਕੁਝ ਦਾ ਕਾਰਨ ਸਾਡੇ ਵਲੋਂ ਸਹੀ ਭੋਜਨ ਨਾ ਗ੍ਰਹਿਣ ਕਰਨਾ ਅਤੇ ਗ਼ਲਤ ਅਤੇ ਗਤੀਹੀਣ ਜੀਵਨ ਸ਼ੈਲੀ ਹੈ। ਜੇ ਅਸੀਂ ਆਪਣੇ ਜੀਵਨ ਵਿਚ ਕੁਝ ਗੱਲਾਂ ਨੂੰ ਸ਼ਾਮਿਲ ਕਰ ਲਈਏ ਤਾਂ ਤੰਦਰੁਸਤ ਜੀਵਨ ਬਿਤਾ ਸਕਦੇ ਹਾਂ। ਆਓ ਜਾਣੀਏ ਕੁਝ ਆਸਾਨ ਰਸਤੇ, ਜਿਨ੍ਹਾਂ ਨੂੰ ਅਪਣਾਅ ਕੇ ਅਸੀਂ ਤੰਦਰੁਸਤ ਰਹਿ ਸਕਦੇ ਹਾਂ।
ਨਾਸ਼ਤਾ ਜ਼ਰੂਰ ਕਰੋ : ਅੱਜ ਬਹੁਤੇ ਲੋਕ ਰੁਝੇਵਿਆਂ ਦੇ ਕਾਰਨ ਦਿਨ ਦਾ ਸਭ ਤੋਂ ਜ਼ਰੂਰੀ ਆਹਾਰ ਨਾਸ਼ਤਾ ਨਹੀਂ ਕਰਦੇ ਜਦੋਂ ਕਿ ਨਾਸ਼ਤਾ ਬਹੁਤ ਹੀ ਜ਼ਰੂਰੀ ਹੈ। ਸਵੇਰੇ ਅਤੇ ਰਾਤ ਵਿਚ ਇਕ ਲੰਬੇ ਸਮੇਂ ਦਾ ਫਰਕ ਹੁੰਦਾ ਹੈ ਅਤੇ ਏਨੀ ਦੇਰ ਸਾਡਾ ਸਰੀਰ ਭੁੱਖਾ ਰਹਿੰਦਾ ਹੈ। ਸਵੇਰੇ ਸਰੀਰ ਅਤੇ ਦਿਮਾਗ ਨੂੰ ਕੰਮ ਕਰਨ ਲਈ ਊਰਜਾ ਦੀ ਲੋੜ ਹੁੰਦੀ ਹੈ ਅਤੇ ਇਹ ਊਰਜਾ ਸਾਨੂੰ ਨਾਸ਼ਤਾ ਹੀ ਦਿੰਦਾ ਹੈ। ਜੇ ਵਿਅਕਤੀ ਸਵੇਰੇ ਨਾਸ਼ਤਾ ਨਹੀਂ ਕਰਦਾ ਤਾਂ ਦੁਪਹਿਰ ਨੂੰ ਉਹ ਜ਼ਿਆਦਾ ਭੋਜਨ ਖਾਂਦਾ ਹੈ, ਜੋ ਮੋਟਾਪੇ ਦਾ ਕਾਰਨ ਬਣ ਸਕਦਾ ਹੈ।
ਕਸਰਤ ਕਰੋ : ਜੇ ਤੁਸੀਂ ਹਰ ਰੋਜ਼ 30 ਮਿੰਟ ਕੋਈ ਵੀ ਐਰੋਬਿਕ ਕਸਰਤ ਕਰਦੇ ਹੋ ਤਾਂ ਤੁਹਾਡਾ ਸਰੀਰ ਅਤੇ ਦਿਲ ਸੁਚਾਰੂ ਰੂਪ ਨਾਲ ਕੰਮ ਕਰਦਾ ਹੈ ਅਤੇ ਤੁਸੀਂ ਦਿਲ ਦੇ ਰੋਗਾਂ ਦੀ ਸੰਭਾਵਨਾ ਨੂੰ ਘੱਟ ਕਰ ਸਕਦੇ ਹੋ।
ਮੱਛੀ ਨੂੰ ਆਪਣੇ ਭੋਜਨ ਵਿਚ ਸ਼ਾਮਿਲ ਕਰੋ : ਮੱਛੀ ਵਿਚ ਓਮੇਗਾ 3 ਫੈਟੀ ਐਸਿਡ ਪਾਇਆ ਜਾਂਦਾ ਹੈ, ਜੋ ਸਿਹਤ ਲਈ ਚੰਗਾ ਮੰਨਿਆ ਜਾਂਦਾ ਹੈ। ਮਾਹਿਰਾਂ ਅਨੁਸਾਰ ਓਮੇਗਾ 3 ਫੈਟੀ ਐਸਿਡ ਦਿਲ ਦੀ ਤੰਦਰੁਸਤੀ ਲਈ ਜ਼ਰੂਰੀ ਹੈ। ਓਮੇਗਾ 3 ਫੈਟੀ ਐਸਿਡ ਕੋਲੈਸਟ੍ਰੋਲ 'ਤੇ ਕਾਬੂ ਰੱਖਦਾ ਹੈ। ਚਮੜੀ ਦੀ ਤੰਦਰੁਸਤੀ ਲਈ ਵੀ ਇਸ ਨੂੰ ਚੰਗਾ ਮੰਨਿਆ ਜਾਂਦਾ ਹੈ। ਕਈ ਖੋਜਾਂ ਦੌਰਾਨ ਇਹ ਵੀ ਸਾਹਮਣੇ ਆਇਆ ਹੈ ਕਿ ਇਸ ਦਾ ਸੇਵਨ ਤਣਾਅ ਨੂੰ ਦੂਰ ਕਰਦਾ ਹੈ।
ਧਿਆਨ ਲਗਾਓ : ਕਈ ਖੋਜਾਂ ਤੋਂ ਇਹ ਸਾਬਤ ਹੋਇਆ ਹੈ ਕਿ ਜੇ ਤੁਸੀਂ ਨਿਯਮਤ ਧਿਆਨ ਲਗਾਉਂਦੇ ਹੋ ਤਾਂ ਤੁਸੀਂ ਘੱਟ ਤਣਾਅ ਮਹਿਸੂਸ ਕਰਦੇ ਹੋ, ਤੁਹਾਡਾ ਖੂਨ ਦਾ ਦਬਾਅ ਕਾਬੂ ਵਿਚ ਰਹਿੰਦਾ ਹੈ ਅਤੇ ਤੁਸੀਂ ਸਰੀਰਕ ਅਤੇ ਮਾਨਸਿਕ ਤੌਰ 'ਤੇ ਚੰਗਾ ਮਹਿਸੂਸ ਕਰਦੇ ਹੋ।
ਐਂਟੀ-ਆਕਸੀਡੈਂਟ ਵਾਲੇ ਖਾਧ ਪਦਾਰਥਾਂ ਦਾ ਸੇਵਨ ਕਰੋ : ਫਲ ਅਤੇ ਸਬਜ਼ੀਆਂ ਐਂਟੀ-ਆਕਸੀਡੈਂਟਸ ਦਾ ਚੰਗਾ ਸਰੋਤ ਹਨ। ਟਮਾਟਰ, ਗਾਜਰ, ਚੁਕੰਦਰ, ਬੰਦਗੋਭੀ ਅਤੇ ਫਲ਼ਾਂ ਦਾ ਸੇਵਨ ਕਰੋ। ਟਮਾਟਰ ਵਿਚ ਲਾਈਕੋਪੀਨ ਨਾਮਕ ਐਂਟੀ-ਆਕਸੀਡੈਂਟ ਪਾਇਆ ਜਾਂਦਾ ਹੈ ਜੋ ਕਈ ਤਰ੍ਹਾਂ ਦੇ ਕੈਂਸਰ ਜਿਵੇਂ ਸਤਨ ਕੈਂਸਰ, ਪੇਟ ਅਤੇ ਫੇਫੜਿਆਂ ਦਾ ਕੈਂਸਰ, ਅੰਤੜੀਆਂ ਦੇ ਕੈਂਸਰ ਤੋਂ ਸੁਰੱਖਿਆ ਦਿੰਦਾ ਹੈ। ਐਂਟੀ-ਆਕਸੀਡੈਂਟਸ ਫ੍ਰੀ ਰੈਡੀਕਲਸ ਤੋਂ ਵੀ ਸੁਰੱਖਿਆ ਦਿੰਦੇ ਹਨ, ਇਸ ਲਈ ਐਂਟੀ-ਆਕਸੀਡੈਂਟਸ ਵਾਲੇ ਖਾਧ ਪਦਾਰਥਾਂ ਦਾ ਸੇਵਨ ਕਰੋ।
ਗਹਿਰੀ ਨੀਂਦ ਲਓ : ਜੇ ਤੁਸੀਂ ਚਾਹੁੰਦੇ ਹੋ ਕਿ ਤੁਹਾਡਾ ਇਮਿਊਨ ਸਿਸਟਮ ਤੰਦਰੁਸਤ ਅਤੇ ਸ਼ਕਤੀਸ਼ਾਲੀ ਬਣੇ ਤਾਂ ਹਰ ਰੋਜ਼ 8 ਘੰਟੇ ਦੀ ਨੀਂਦ ਜ਼ਰੂਰ ਲਓ। ਗੂੜ੍ਹੀ ਅਤੇ ਲੋੜੀਂਦੀ ਨੀਂਦ ਨਵੇਂ ਸੈੱਲ ਬਣਾਉਣ ਵਿਚ ਸਹਾਇਤਾ ਕਰਦੀ ਹੈ ਅਤੇ ਦਿਮਾਗ ਨੂੰ ਆਰਾਮ ਪਹੁੰਚਾਉਂਦੀ ਹੈ।
ਹੱਸੋ ਅਤੇ ਰੋਗ ਦੂਰ ਭਜਾਓ : 'ਹੱਸੋ ਅਤੇ ਤੰਦਰੁਸਤ ਰਹੋ', ਇਹ ਸਭ ਤੋਂ ਆਸਾਨ ਅਤੇ ਸਸਤਾ ਤਰੀਕਾ ਹੈ ਤੰਦਰੁਸਤ ਰਹਿਣ ਦਾ। ਜੇ ਤੁਹਾਨੂੰ ਹਾਸਾ ਨਾ ਵੀ ਆ ਰਿਹਾ ਹੋਵੇ ਅਤੇ ਤੁਸੀਂ ਝੂਠਾ ਹਾਸਾ ਵੀ ਹੱਸੋ ਤਾਂ ਉਹ ਵੀ ਤੁਹਾਨੂੰ ਲਾਭ ਪਹੁੰਚਾ ਸਕਦਾ ਹੈ। ਜਦੋਂ ਤੁਸੀਂ ਦਿਲ ਖੋਲ੍ਹ ਕੇ ਹੱਸਦੇ ਹੋ ਤਾਂ ਸਰੀਰ ਵਿਚ ਕੁਝ ਅਜਿਹੇ ਰਸਾਇਣ ਜਿਵੇਂ 'ਇੰਡੋਫ੍ਰਿੰਸ' ਪੈਦਾ ਹੁੰਦੇ ਹਨ, ਜੋ ਤਣਾਅ, ਡਿਪ੍ਰੈਸ਼ਨ, ਟੈਨਸ਼ਨ ਦੂਰ ਕਰਦੇ ਹਨ। ਨਵੀਆਂ ਖੋਜਾਂ ਨਾਲ ਇਹ ਸਾਹਮਣੇ ਆਇਆ ਹੈ ਕਿ ਹੱਸਣ ਨਾਲ ਦਿਲ ਦੇ ਰੋਗੀਆਂ ਅਤੇ ਕੈਂਸਰ ਦੇ ਰੋਗੀਆਂ ਵਿਚ ਵੀ ਸੁਧਾਰ ਆਉਂਦਾ ਹੈ ਅਤੇ ਵਿਅਕਤੀ ਨੂੰ ਦਰਦ ਘੱਟ ਮਹਿਸੂਸ ਹੁੰਦੀ ਹੈ ਅਤੇ ਰੋਗਾਂ ਨਾਲ ਲੜਨ ਦੀ ਸ਼ਕਤੀ ਵਧਦੀ ਹੈ।
ਆਪਣੇ ਸਰੀਰ ਦੀ ਸਫ਼ਾਈ ਵੱਲ ਧਿਆਨ ਦਿਓ : ਸਰੀਰ ਦੀ ਸਫ਼ਾਈ, ਖਾਸ ਕਰਕੇ ਦੰਦਾਂ ਦੀ ਸਫ਼ਾਈ ਪ੍ਰਤੀ ਲਾਪ੍ਰਵਾਹੀ ਨਾ ਵਰਤੋ। ਕਈ ਖੋਜਾਂ ਤੋਂ ਇਹ ਸਾਹਮਣੇ ਆਇਆ ਹੈ ਕਿ ਬੈਕਟੀਰੀਆ ਜੋ ਮਸੂੜਿਆਂ ਸਬੰਧੀ ਰੋਗਾਂ ਦਾ ਕਾਰਨ ਬਣਦੇ ਹਨ, ਦਿਲ ਦੇ ਰੋਗਾਂ ਦੀ ਸੰਭਾਵਨਾ ਨੂੰ ਵੀ ਵਧਾਉਂਦੇ ਹਨ, ਇਸ ਲਈ ਹਰ ਰੋਜ਼ ਆਪਣੇ ਦੰਦਾਂ ਨੂੰ ਸਵੇਰੇ ਅਤੇ ਸੌਣ ਤੋਂ ਪਹਿਲਾਂ ਜ਼ਰੂਰ ਸਾਫ਼ ਕਰੋ।
ਅਲਕੋਹਲ ਦਾ ਸੇਵਨ ਨਾ ਕਰੋ : ਅਲਕੋਹਲ ਦਾ ਸੇਵਨ ਵੀ ਕਈ ਰੋਗਾਂ ਦੀ ਸੰਭਾਵਨਾ ਨੂੰ ਵਧਾਉਂਦਾ ਹੈ, ਇਸ ਲਈ ਇਸ ਦਾ ਸੇਵਨ ਨਾ ਕਰੋ। ਨਵੀਆਂ ਖੋਜਾਂ ਨਾਲ ਇਹ ਸਾਹਮਣੇ ਆਇਆ ਹੈ ਕਿ ਰੈਡ ਵਾਈਨ ਸਿਹਤ ਲਈ ਹਾਨੀਕਾਰਕ ਨਹੀਂ, ਕਿਉਂਕਿ ਇਸ ਵਿਚ ਫਲੇਵੋਨਾਈਡਸ ਐਂਟੀ-ਆਕਸੀਡੈਂਟ ਹੁੰਦੇ ਹਨ ਜੋ ਕੈਂਸਰ ਤੋਂ ਸੁਰੱਖਿਆ ਦਿੰਦੇ ਹਨ। ਇਸ ਲਈ ਮਾਹਿਰ ਰੈਡ ਵਾਈਨ ਦੇ ਇਕ ਪੈੱਗ ਨੂੰ ਹਾਨੀਕਾਰਕ ਨਹੀਂ ਮੰਨਦੇ ਪਰ ਸੀਮਤ ਮਾਤਰਾ 'ਤੇ ਜ਼ੋਰ ਦਿੰਦੇ ਹਨ।


ਖ਼ਬਰ ਸ਼ੇਅਰ ਕਰੋ

ਆਪਣੀ ਰੋਗ ਪ੍ਰਤੀਰੋਧਕ ਸਮਰੱਥਾ ਨੂੰ ਵਧਾਓ

ਰੋਗਾਂ ਤੋਂ ਬਚਾਉਣ ਦੀ ਸਮਰੱਥਾ ਨੂੰ ਰੋਗ ਪ੍ਰਤੀਰੋਧਕ ਸਮਰੱਥਾ ਕਹਿੰਦੇ ਹਨ। ਆਮ ਤੌਰ 'ਤੇ ਪੋਲੀਓ, ਕਸ਼ਯ ਰੋਗ, ਪੀਲੀਆ, ਟੈਟਨੇਸ, ਖਸਰਾ ਆਦਿ ਬਿਮਾਰੀਆਂ ਲਈ ਟੀਕਾਕਰਨ ਕੀਤਾ ਜਾਂਦਾ ਹੈ। ਗ਼ੈਰ-ਸੰਕ੍ਰਾਮਕ ਰੋਗਾਂ ਤੋਂ ਰੱਖਿਆ ਲਈ ਅੰਤਰਰਾਸ਼ਟਰੀ ਪੱਧਰ 'ਤੇ ਵਿਗਿਆਨੀ ਟੀਕੇ ਨੂੰ ਵਿਕਸਿਤ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ। ਦੁਨੀਆ ਭਰ ਵਿਚ ਸ਼ੂਗਰ ਅਤੇ ਏਡਜ਼ ਦੇ ਖ਼ਤਰੇ ਨੂੰ ਧਿਆਨ ਵਿਚ ਰੱਖਦੇ ਹੋਏ ਇਨ੍ਹਾਂ ਤੋਂ ਬਚਾਅ ਲਈ ਵੀ ਟੀਕਿਆਂ 'ਤੇ ਖੋਜ ਹੋ ਰਹੀ ਹੈ।
ਅਮਰੀਕਾ ਦੇ ਰਾਸ਼ਟਰੀ ਸਿਹਤ ਸੰਸਥਾਨ ਅਤੇ ਹੋਰ ਵਿਸ਼ਵ ਵਿਦਿਆਲਿਆਂ ਵਿਚ ਹੋਈਆਂ ਖੋਜਾਂ ਵਿਚ ਇਸ ਗੱਲ 'ਤੇ ਸਾਰੇ ਇਕਮਤ ਹਨ ਕਿ ਆਤਮਰੱਖਿਆ ਪ੍ਰਣਾਲੀ ਦੀ ਪ੍ਰਭਾਵੀ ਕਿਰਿਆਸ਼ੀਲਤਾ ਵਿਅਕਤੀ ਦੀ ਖੁਦ ਦੀ ਸੋਚ ਅਤੇ ਆਚਰਣ 'ਤੇ ਨਿਰਭਰ ਕਰਦੀ ਹੈ। ਸਾਡਾ ਭੋਜਨ, ਜੀਵਨ ਸ਼ੈਲੀ ਅਤੇ ਜੀਵਨ ਦੇ ਪ੍ਰਤੀ ਸਾਡੀ ਦ੍ਰਿਸ਼ਟੀ ਸਾਡੀ ਆਤਮਰੱਖਿਆ ਪ੍ਰਣਾਲੀ ਨੂੰ ਮਜ਼ਬੂਤ ਕਰਦੀ ਹੈ।
ਖੋਜਾਂ ਇਹ ਵੀ ਦੱਸਦੀਆਂ ਹਨ ਕਿ ਦਵਾਈਆਂ ਦਾ ਸੇਵਨ ਸਿਹਤ ਲਾਭ ਲਈ ਜ਼ਰੂਰੀ ਹੈ ਪਰ ਕੁਝ ਦਵਾਈਆਂ (ਮੁੱਖ ਤੌਰ 'ਤੇ ਐਂਟੀ-ਬਾਇਓਟਿਕਸ) ਆਤਮਰੱਖਿਆ ਪ੍ਰਣਾਲੀ ਨੂੰ ਕਮਜ਼ੋਰ ਕਰਦੀਆਂ ਹਨ। ਜਿਥੇ ਦਵਾਈਆਂ ਦਾ ਲੰਮੇ ਸਮੇਂ ਤੱਕ ਸੇਵਨ ਆਤਮਰੱਖਿਆ ਨੂੰ ਕਮਜ਼ੋਰ ਕਰਦਾ ਹੈ, ਉਥੇ ਆਤਮਰੱਖਿਆ ਪ੍ਰਣਾਲੀ ਨੂੰ ਮਜ਼ਬੂਤ ਬਣਾਉਣ ਲਈ ਅਪਣਾਇਆ ਗਿਆ ਲੰਮੇ ਸਮੇਂ ਦਾ ਕਾਰਜਕ੍ਰਮ ਸਾਨੂੰ ਸਿਹਤ ਦੇ ਖ਼ਤਰਿਆਂ ਤੋਂ ਦੂਰ ਰੱਖਦਾ ਹੈ।
ਸਰੀਰ ਵਿਚ ਮੌਜੂਦ ਆਤਮਰੱਖਿਆ ਪ੍ਰਣਾਲੀ ਬਹੁਤ ਹੀ ਸ਼ਕਤੀਸ਼ਾਲੀ ਅਸਤਰ ਹੈ ਅਤੇ ਇਸ ਦੀ ਲੋੜ ਸਾਨੂੰ ਉਦੋਂ ਹੋਰ ਵੀ ਮਹਿਸੂਸ ਹੁੰਦੀ ਹੈ, ਜਦੋਂ ਕੋਈ ਰੋਗ ਵੈਰੀ ਬਣ ਕੇ ਸਾਡੀ ਆਤਮਰੱਖਿਆ ਪ੍ਰਣਾਲੀ ਨੂੰ ਨਸ਼ਟ ਕਰਨ ਦੀ ਕੋਸ਼ਿਸ਼ ਕਰਦਾ ਹੈ। ਜੇ ਅਸੀਂ ਆਪਣੀ ਆਤਮਰੱਖਿਆ ਪ੍ਰਣਾਲੀ ਨੂੰ ਲੋੜੀਂਦੀ ਸ਼ਕਤੀ ਨਹੀਂ ਦਿੰਦੇ ਤਾਂ ਅਸੀਂ ਕਿਸੇ ਨਾ ਕਿਸੇ ਰੋਗ ਦੀ ਗ੍ਰਿਫ਼ਤ ਵਿਚ ਫਸ ਜਾਂਦੇ ਹਾਂ। ਸਾਡੀ ਆਤਮਰੱਖਿਆ ਪ੍ਰਣਾਲੀ ਦੀ ਰੱਖਿਆ ਲਈ ਹੇਠ ਲਿਖੇ ਉਪਾਅ ਕਾਰਗਰ ਹੋ ਸਕਦੇ ਹਨ-
ਪਚਣਯੋਗ ਪੋਸ਼ਕ ਭੋਜਨ : ਭੋਜਨ ਸੰਤੁਲਿਤ ਅਤੇ ਪਚਣਯੋਗ ਹੋਣਾ ਚਾਹੀਦਾ ਹੈ। ਭੋਜਨ ਵਿਚ ਕਾਰਬੋਹਾਈਡ੍ਰੇਟ ਅਤੇ ਚਰਬੀ ਦੀ ਬਹੁਤਾਤ ਆਤਮਰੱਖਿਆ ਪ੍ਰਣਾਲੀ ਲਈ ਘਾਤਕ ਹੋ ਸਕਦੀ ਹੈ। ਵਧਦੀ ਉਮਰ ਵਿਚ ਉਨ੍ਹਾਂ ਵਾਧੂ ਤੱਤਾਂ ਦੀ ਲੋੜ ਹੁੰਦੀ ਹੈ ਜੋ ਆਕਸੀਕਰਨ ਪ੍ਰਕਿਰਿਆ ਨੂੰ ਬੰਦ ਕਰਨ ਅਤੇ ਕੋਸ਼ਾਣੂਆਂ ਅਤੇ ਊਤਕਾਂ ਨੂੰ ਕਮਜ਼ੋਰ ਨਾ ਹੋਣ ਦੇਣ।
ਔਸ਼ਧੀ ਜੜ੍ਹੀ ਬੂਟੀਆਂ ਅਤੇ ਖਾਧ ਮਸਾਲੇ : ਕੁਝ ਔਸ਼ਧੀ ਜੜ੍ਹੀ ਬੂਟੀਆਂ ਅਤੇ ਖਾਧ ਮਸਾਲੇ ਕੋਸ਼ਾਣੂਆਂ ਅਤੇ ਊਤਕਾਂ ਨੂੰ ਸਮਰੱਥ ਬਣਾਉਂਦੇ ਹਨ। ਲਸਣ, ਜੀਰਾ, ਹਲਦੀ, ਅਦਰਕ, ਲੌਂਗ ਆਦਿ ਖਾਧ ਪਦਾਰਥ ਆਤਮਰੱਖਿਆ ਪ੍ਰਣਾਲੀ ਲਈ ਉਪਯੋਗੀ ਮੰਨੇ ਗਏ ਹਨ।
ਕਸਰਤ : ਮਰਿਆਦਤ ਕਸਰਤ ਵੀ ਆਤਮਰੱਖਿਆ ਦੀ ਦ੍ਰਿਸ਼ਟੀ ਤੋਂ ਮਹੱਤਵਪੂਰਨ ਹੈ। ਕਸਰਤ ਕੈਂਸਰ, ਦਮਾ, ਦਿਲ ਦੇ ਰੋਗ, ਤਣਾਅ ਅਤੇ ਅਨੇਕ ਸੰਕ੍ਰਮਣਾਂ ਤੋਂ ਰੱਖਿਆ ਕਰਦੀ ਹੈ। ਨਿਯਮਤ ਕਸਰਤ ਅਤੇ ਧਿਆਨ ਕਰਨ ਨਾਲ ਮਨੁੱਖ ਲੰਮੀ ਉਮਰ ਜਿਉਂਦਾ ਹੈ।
ਸਾਕਾਰਾਤਮਕ ਸੋਚ : ਨਕਾਰਾਤਮਿਕ ਸੋਚ ਆਤਮਰੱਖਿਆ ਨੂੰ ਕਮਜ਼ੋਰ ਬਣਾਉਂਦੀ ਹੈ। ਘਿਰਣਾ, ਅਹੰਕਾਰ ਆਦਿ ਨਕਾਰਾਤਮਕ ਵਿਚਾਰ ਸਿਹਤ ਲਈ ਘਾਤਕ ਹੋ ਸਕਦੇ ਹਨ। ਖੋਜਾਂ ਇਸ ਗੱਲ ਦੀ ਪੁਸ਼ਟੀ ਕਰਦੀਆਂ ਹਨ ਕਿ ਉਲਟ ਹਾਲਤਾਂ ਵਿਚ ਜਦੋਂ ਮਨੁੱਖ ਸ਼ਾਂਤ ਰਹਿੰਦਾ ਹੈ ਤਾਂ ਉਹ ਲੰਮੀ ਉਮਰ ਜਿਉਂਦਾ ਹੈ।
ਹੱਸਣ ਨਾਲ ਮਨੋਭਾਵਾਂ ਵਿਚ ਪਰਿਵਰਤਨ ਹੁੰਦਾ ਹੈ ਜੋ ਆਤਮਰੱਖਿਆ ਪ੍ਰਣਾਲੀ ਨੂੰ ਸ਼ਕਤੀ ਦਿੰਦਾ ਹੈ। ਤਣਾਅ ਨੂੰ ਘੱਟ ਕਰਨ ਲਈ ਪ੍ਰਾਰਥਨਾ, ਜਾਪ ਅਤੇ ਸ਼ਾਂਤ ਮਨ ਨਾਲ ਧਿਆਨ ਕਿਰਿਆਵਾਂ ਲਾਭਕਾਰੀ ਮੰਨੀਆਂ ਗਈਆਂ ਹਨ। ਹਾਲ ਹੀ ਵਿਚ ਹੋਈਆਂ ਖੋਜਾਂ ਤੋਂ ਇਹ ਪਤਾ ਲੱਗਾ ਹੈ ਕਿ ਵਿਆਹੇ ਹੋਏ ਵਿਅਕਤੀਆਂ ਦੀ ਆਤਮਰੱਖਿਆ ਪ੍ਰਣਾਲੀ ਜ਼ਿਆਦਾ ਮਜ਼ਬੂਤ ਹੁੰਦੀ ਹੈ। ਮਿੱਤਰਤਾ ਅਤੇ ਸਬੰਧ ਆਤਮਰੱਖਿਆ ਨੂੰ ਮਜ਼ਬੂਤ ਬਣਾਉਂਦੇ ਹਨ।
ਮਨੋਵਿਗਿਆਨੀਆਂ ਦਾ ਮੰਨਣਾ ਹੈ ਕਿ ਦਰਦ ਦੀ ਅਭਿਵਿਅਕਤੀ ਦਰਦ ਨੂੰ ਘੱਟ ਕਰਦੀ ਹੈ। ਜਿਸ ਵਿਅਕਤੀ ਦੇ ਗੂੜ੍ਹੇ ਸਮਾਜਿਕ ਸਬੰਧ ਹੁੰਦੇ ਹਨ, ਉਸ ਦੀ ਆਤਮਰੱਖਿਆ ਪ੍ਰਣਾਲੀ ਮਜ਼ਬੂਤ ਹੁੰਦੀ ਹੈ। ਸੰਤੁਲਤ ਜੀਵਨ, ਲੋੜੀਂਦਾ ਭੋਜਨ, ਕਸਰਤ ਅਤੇ ਆਰਾਮ ਅਤੇ ਸਾਕਾਰਾਤਮਕ ਸੋਚ ਜੀਵਨ ਦੀ ਤੰਦਰੁਸਤੀ ਵਿਚ ਵਾਧਾ ਹੀ ਨਹੀਂ ਕਰਦੀ, ਸਗੋਂ ਆਤਮਰੱਖਿਆ ਪ੍ਰਣਾਲੀ ਨੂੰ ਯੋਗ ਵੀ ਬਣਾਉਂਦੀ ਹੈ।


-ਕਰਮਵੀਰ ਅਨੁਰਾਗੀ

ਬਿਮਾਰੀਆਂ ਤੋਂ ਦੂਰ ਰੱਖਦੇ ਹਨ ਮਸਾਲੇ

ਆਪਣੀ ਨਿੱਜੀ ਜ਼ਿੰਦਗੀ ਵਿਚ ਅਸੀਂ ਸਾਰੇ ਹਮੇਸ਼ਾ ਕਿਸੇ ਨਾ ਕਿਸੇ ਰੋਗ ਤੋਂ ਪੀੜਤ ਰਹਿੰਦੇ ਹਾਂ, ਚਾਹੇ ਉਹ ਕਬਜ਼, ਭੁੱਖ ਨਾ ਲੱਗਣਾ, ਦਮਾ ਜਾਂ ਦਿਲ ਨਾਲ ਸਬੰਧਤ ਬਿਮਾਰੀ ਹੀ ਕਿਉਂ ਨਾ ਹੋਵੇ। ਇਨ੍ਹਾਂ ਬਿਮਾਰੀਆਂ ਨੂੰ ਠੀਕ ਕਰਨ ਲਈ ਸਾਨੂੰ ਚੰਗੇ-ਖਾਸੇ ਪੈਸੇ ਵੀ ਖਰਚ ਕਰਨੇ ਪੈਂਦੇ ਹਨ ਪਰ ਉਨ੍ਹਾਂ ਨਾਲ ਵੀ ਕੋਈ ਫਰਕ ਨਹੀਂ ਪੈਂਦਾ। ਇਸ ਲਈ ਅਸੀਂ ਤੁਹਾਨੂੰ ਦੱਸਣਾ ਚਾਹਾਂਗੇ ਕਿ ਸਾਡੀ ਰਸੋਈ ਵਿਚ ਵੀ ਕੁਝ ਅਜਿਹੀ ਸਮੱਗਰੀ ਹਮੇਸ਼ਾ ਮੌਜੂਦ ਰਹਿੰਦੀ ਹੈ, ਜੋ ਦਵਾਈਆਂ ਨੂੰ ਵੀ ਫੇਲ੍ਹ ਕਰ ਸਕਦੀ ਹੈ। ਰਸੋਈ ਵਿਚ ਰੱਖੇ ਮਸਾਲੇ ਨਾ ਸਿਰਫ ਭੋਜਨ ਨੂੰ ਸਵਾਦੀ ਬਣਾਉਣ ਦੇ ਕੰਮ ਆਉਂਦੇ ਹਨ, ਸਗੋਂ ਇਹ ਸਿਹਤ ਲਈ ਵੀ ਫਾਇਦੇਮੰਦ ਮੰਨੇ ਜਾਂਦੇ ਹਨ। ਆਓ ਗੱਲ ਕਰਦੇ ਹਾਂ ਅਜਿਹੇ ਹੀ ਕੁਝ ਮਸਾਲਿਆਂ ਦੇ ਚਮਤਕਾਰੀ ਦਵਾਈਆਂ ਵਾਲੇ ਗੁਣਾਂ ਬਾਰੇ, ਜੋ ਸਾਡੇ ਸਰੀਰ ਨੂੰ ਅਨੇਕ ਬਿਮਾਰੀਆਂ ਤੋਂ ਬਚਾਉਂਦੇ ਹੋਏ ਰਾਹਤ ਦਿੰਦੇ ਹਨ-
ਅਦਰਕ : ਪੇਨ ਕਿੱਲਰ ਦੇ ਰੂਪ ਵਿਚ ਅਦਰਕ ਜੋ ਇਕ ਤੇਜ਼ ਖੁਸ਼ਬੂ ਅਤੇ ਸਵਾਦ ਵਾਲਾ ਹੁੰਦਾ ਹੈ, ਆਮ ਤੌਰ 'ਤੇ ਪੀਣ ਵਾਲੇ ਪਦਾਰਥਾਂ ਵਿਚ ਮਿਲਾ ਕੇ ਅਮਲ ਵਿਚ ਲਿਆਂਦਾ ਜਾਂਦਾ ਹੈ। ਅਦਰਕ ਆਪਣੇ ਐਂਟੀਬਾਇਓਟਿਕ ਗੁਣਾਂ ਦੇ ਕਾਰਨ ਹੀ ਸਰਦੀ, ਖਾਂਸੀ, ਜ਼ੁਕਾਮ, ਨਜ਼ਲਾ ਅਤੇ ਬੁਖਾਰ ਵਰਗੀਆਂ ਆਮ ਬਿਮਾਰੀਆਂ ਲਈ ਰਾਮਬਾਣ ਹੈ। ਇਸ ਤੋਂ ਇਲਾਵਾ ਸਾਹ ਅਤੇ ਪਾਚਣ ਸਬੰਧੀ ਬਿਮਾਰੀਆਂ ਦੇ ਨਾਲ-ਨਾਲ ਮੋਟਾਪੇ, ਦਿਲ ਦੇ ਰੋਗ, ਜੋੜਾਂ ਵਿਚ ਹੋਣ ਵਾਲੇ ਦਰਦ, ਔਰਤਾਂ ਨੂੰ ਗਰਭਪਾਤ, ਸਰਦੀ, ਖੰਘ ਆਦਿ ਜ਼ੁਕਾਮ ਵਿਚ ਵੀ ਰਾਹਤ ਦਿੰਦਾ ਹੈ।
ਹਲਦੀ : ਧਾਰਮਿਕ ਕੰਮਾਂ ਵਿਚ ਕੰਮ ਆਉਣ ਵਾਲੀ ਹਲਦੀ ਜਿੰਨੀ ਸਰੀਰ ਲਈ ਫਾਇਦੇਮੰਦ ਹੁੰਦੀ ਹੈ, ਓਨੀ ਹੀ ਚਮੜੀ ਲਈ ਵੀ। ਇਹ ਅਕਸਰ ਸੁੰਦਰਤਾ ਵਧਾਉਣ ਲਈ ਅਮਲ ਵਿਚ ਲਿਆਈ ਜਾਂਦੀ ਹੈ। ਆਰਥਰਾਈਟਿਸ, ਹਾਰਟ ਬਰਨ, ਪੇਟ ਵਿਚ ਕੀੜੇ, ਪੇਟ ਦਰਦ, ਸਿਰਦਰਦ, ਦੰਦ ਦਾ ਦਰਦ, ਤਣਾਅ, ਫੇਫੜਿਆਂ ਦੇ ਇਨਫੈਕਸ਼ਨ, ਬ੍ਰਾਂਕਾਯਟਿਸ ਆਦਿ ਰੋਗਾਂ ਵਿਚ ਵੀ ਇਹ ਇਕ ਚਮਤਕਾਰੀ ਦਵਾਈ ਦੇ ਰੂਪ ਵਿਚ ਵਰਤੀ ਜਾਂਦੀ ਹੈ।
ਲਸਣ : ਮਸਾਲੇ ਦੇ ਰੂਪ ਵਿਚ ਲਸਣ ਕੁਦਰਤੀ ਰੂਪ ਨਾਲ ਦਰਦ ਅਤੇ ਸੋਜ ਨੂੰ ਬੜੀ ਤੇਜ਼ੀ ਨਾਲ ਘੱਟ ਕਰਦਾ ਹੈ।
ਲੌਂਗ : ਲੌਂਗ ਵਿਚ ਐਂਟੀ-ਬਾਇਓਟਿਕ, ਐਂਟੀ-ਸੈਪਟਿਕ, ਐਂਟੀ-ਮਾਈਕ੍ਰੋਬਿਯਲ, ਐਂਟੀ-ਫੰਗਲ ਅਤੇ ਐਂਟੀ-ਵਾਇਰਲ ਆਦਿ ਸਾਰੇ ਗੁਣ ਹਨ, ਜੋ ਅਲੱਗ-ਅਲੱਗ ਪ੍ਰੇਸ਼ਾਨੀਆਂ ਜਿਵੇਂ ਦੰਦ ਦਰਦ, ਸਿਰਦਰਦ ਅਤੇ ਦਮਾ ਆਦਿ ਬਿਮਾਰੀਆਂ ਤੋਂ ਬਚਾਈ ਰੱਖਦੇ ਹਨ। ਏਨਾ ਹੀ ਨਹੀਂ, ਸਾਡੇ ਖੂਨ ਵਿਚ ਮੌਜੂਦ ਅਸ਼ੁੱਧੀਆਂ ਨੂੰ ਦੂਰ ਕਰਨ ਅਤੇ ਪਾਚਣ ਤੰਤਰ ਨੂੰ ਦਰੁਸਤ ਕਰਨ ਵਿਚ ਵੀ ਇਹ ਕਾਫੀ ਕਾਰਗਰ ਹੈ। ਦੰਦ ਦਰਦ ਤੋਂ ਬਚਣ ਲਈ ਲੌਂਗ ਦੇ ਤੇਲ ਦੀ ਵਰਤੋਂ ਅਕਸਰ ਲੋਕਾਂ ਦੁਆਰਾ ਕੀਤੀ ਜਾਂਦੀ ਹੈ। ਆਪਣੇ ਐਂਟੀ-ਸੈਪਟਿਕ ਗੁਣਾਂ ਕਾਰਨ ਹੀ ਅਸੀਂ ਇਸ ਨੂੰ ਇਕ ਬਿਹਤਰ ਮਾਊਥਵਾਸ਼ ਦੇ ਰੂਪ ਵਿਚ ਦੇਖਦੇ ਹਾਂ। ਇਹੀ ਨਹੀਂ, ਚਿਹਰੇ ਦੇ ਮੁਹਾਸਿਆਂ ਨੂੰ ਦੂਰ ਕਰਨ ਵਿਚ ਵੀ ਇਹ ਆਪਣੀ ਇਕ ਅਹਿਮ ਭੂਮਿਕਾ ਅਦਾ ਕਰਦਾ ਹੈ।
ਅਜ਼ਵਾਇਣ : ਸਵਾਦ ਅਤੇ ਪਾਚਕ ਅਜ਼ਵਾਇਣ ਹਮੇਸ਼ਾ ਸੁਗੰਧ ਅਤੇ ਸਰੀਰ ਨੂੰ ਤੰਦਰੁਸਤ ਬਣਾਈ ਰੱਖਣ ਵਿਚ ਅੱਵਲ ਹੈ। ਇਸ ਵਿਚ ਮੌਜੂਦ ਐਂਟੀ-ਆਕਸੀਡੈਂਟ ਦਿਮਾਗ ਲਈ ਕਿਸੇ ਦਵਾਈ ਤੋਂ ਘੱਟ ਨਹੀਂ ਹੈ। ਇਹ ਭੁੱਖ ਅਤੇ ਪਾਚਣ ਸ਼ਕਤੀ ਵਿਚ ਵਾਧਾ ਕਰਦੇ ਹੋਏ ਪੇਟ ਸਬੰਧੀ ਅਨੇਕ ਰੋਗ ਜਿਵੇਂ ਗੈਸ, ਬਦਹਜ਼ਮੀ, ਕਬਜ਼ ਆਦਿ ਨੂੰ ਦੂਰ ਕਰਨ ਵਿਚ ਬਹੁਤ ਲਾਭਦਾਇਕ ਹੈ। ਅਜ਼ਵਾਇਣ ਸ਼ੂਗਰ ਰੋਗੀਆਂ ਨੂੰ ਫੰਗਲ ਇਨਫੈਕਸ਼ਨ ਤੋਂ ਵੀ ਬਚਾਉਂਦੀ ਹੈ।
ਧਨੀਆ : ਡਾਕਟਰਾਂ ਦੇ ਸ਼ਬਦਾਂ ਮੁਤਾਬਿਕ ਸਾਬਤ ਧਨੀਏ ਵਿਚ ਬਲੱਡ ਸ਼ੂਗਰ ਨੂੰ ਕੰਟਰੋਲ ਕਰਨ ਦੀ ਅਦਭੁੱਤ ਸਮਰੱਥਾ ਹੁੰਦੀ ਹੈ। ਇਸ ਦੇ ਬੀਜਾਂ ਵਿਚ ਐਂਟੀ-ਆਕਸੀਡੈਂਟ, ਮਿਨਰਲ, ਵਿਟਾਮਿਨ 'ਏ', 'ਸੀ' ਅਤੇ ਆਇਰਨ ਹੁੰਦਾ ਹੈ, ਜੋ ਕਿ ਅਨੀਮੀਆ ਦੀ ਸਮੱਸਿਆ ਤੋਂ ਛੁਟਕਾਰਾ ਦਿਵਾਉਣ, ਕੈਂਸਰ ਵਰਗੇ ਵੱਡੇ ਰੋਗ ਨਾਲ ਲੜਨ ਵਿਚ ਕਾਫੀ ਮਦਦਗਾਰ ਹੈ।
ਮੇਥੀ : ਸਵਾਦ ਅਤੇ ਸੁੰਦਰਤਾ ਵਧਾਉਣ ਵਿਚ ਸਰਬਸ੍ਰੇਸ਼ਠ ਮੇਥੀ ਦੀ ਵਰਤੋਂ ਕੈਂਸਰ ਰੋਧਕ ਤੱਤ ਦੇ ਕਾਰਨ ਸ਼ੂਗਰ, ਉੱਚ ਖੂਨ ਦਬਾਅ ਅਤੇ ਪੇਟ ਸਬੰਧੀ ਸਮੱਸਿਆ ਤੋਂ ਛੁਟਕਾਰੇ ਲਈ ਕੀਤੀ ਜਾਂਦੀ ਹੈ।

ਛਿੱਲਾਂ ਵਿਚ ਛੁਪਿਆ ਹੈ ਸਿਹਤ ਦਾ ਰਾਜ਼

ਅਕਸਰ ਦੇਖਣ ਵਿਚ ਆਉਂਦਾ ਹੈ ਕਿ ਅਸੀਂ ਸਾਰੇ ਲੋਕ ਫਲਾਂ ਅਤੇ ਸਬਜ਼ੀਆਂ ਦੀ ਵਰਤੋਂ ਕਰਦੇ ਸਮੇਂ ਉਨ੍ਹਾਂ ਦੀਆਂ ਛਿੱਲਾਂ ਅਤੇ ਪੱਤਿਆਂ ਨੂੰ ਲਾਹ ਕੇ ਬਾਹਰ ਸੁੱਟ ਦਿੰਦੇ ਹਾਂ, ਜਦੋਂ ਕਿ ਇਕ ਖੋਜ ਵਿਚ ਇਹ ਗੱਲ ਸਾਹਮਣੇ ਆਈ ਹੈ ਕਿ ਉਨ੍ਹਾਂ ਦੀਆਂ ਇਹ ਛਿੱਲਾਂ ਉਨ੍ਹਾਂ ਫਲਾਂ ਅਤੇ ਸਬਜ਼ੀਆਂ ਨਾਲੋਂ ਕਿਤੇ ਜ਼ਿਆਦਾ ਪੌਸ਼ਟਿਕ ਅਤੇ ਫਾਇਦੇਮੰਦ ਹੁੰਦੀਆਂ ਹਨ। ਦੂਜੇ ਸ਼ਬਦਾਂ ਵਿਚ ਅਸੀਂ ਕਹਿ ਸਕਦੇ ਹਾਂ ਕਿ ਸਬਜ਼ੀਆਂ ਦੇ ਪੱਤੇ ਸਬਜ਼ੀਆਂ ਨਾਲੋਂ ਜ਼ਿਆਦਾ ਪੌਸ਼ਟਿਕ ਅਤੇ ਭਰਪੂਰ ਹੁੰਦੇ ਹਨ, ਜਿਨ੍ਹਾਂ ਦੀ ਸਹੀ ਤਰੀਕੇ ਨਾਲ ਵਰਤੋਂ ਕਰਦੇ ਹੋਏ ਅਸੀਂ ਕਈ ਹੋਰ ਸਬਜ਼ੀਆਂ ਦਾ ਚੰਗੀ ਤਰ੍ਹਾਂ ਨਿਰਮਾਣ ਕਰ ਸਕਦੇ ਹਾਂ। ਇਸ ਲਈ ਸਾਨੂੰ ਇਨ੍ਹਾਂ ਛਿੱਲਾਂ ਨੂੰ ਸੁੱਟਣਾ ਨਹੀਂ ਚਾਹੀਦਾ, ਸਗੋਂ ਇਨ੍ਹਾਂ ਦੀ ਵੱਧ ਤੋਂ ਵੱਧ ਵਰਤੋਂ ਕਰਦੇ ਹੋਏ ਸਰੀਰ ਨੂੰ ਤੰਦਰੁਸਤ ਬਣਾਉਣਾ ਚਾਹੀਦਾ ਹੈ।
ਡਾਕਟਰਾਂ ਦੀ ਮੰਨੀਏ ਤਾਂ ਸਬਜ਼ੀਆਂ ਤੋਂ ਇਲਾਵਾ ਸੇਬ ਦੀਆਂ ਛਿੱਲਾਂ ਵਿਚ ਸਭ ਤੋਂ ਵੱਧ ਆਇਰਨ ਮੌਜੂਦ ਹੁੰਦਾ ਹੈ, ਜਿਸ ਨੂੰ ਕੱਢ ਕੇ ਸੁੱਟਣ ਨਾਲ ਉਨ੍ਹਾਂ ਦੇ ਪੌਸ਼ਟਿਕ ਤੱਤਾਂ ਦਾ ਨਾਸ਼ ਹੋ ਜਾਂਦਾ ਹੈ। ਇਸੇ ਲਈ ਹਮੇਸ਼ਾ ਕੋਸ਼ਿਸ਼ ਕਰੋ ਕਿ ਫਲ ਅਤੇ ਸਬਜ਼ੀਆਂ ਨੂੰ ਛਿੱਲਾਂ ਸਮੇਤ ਖਾਓ। ਬਿਨਾਂ ਸ਼ੱਕ ਕੁਝ ਦਿਨਾਂ ਬਾਅਦ ਹੀ ਇਸ ਦਾ ਵਧੀਆ ਪ੍ਰਭਾਵ ਤੁਹਾਡੇ ਚਿਹਰੇ ਅਤੇ ਸਿਹਤ 'ਤੇ ਜ਼ਰੂਰ ਦਿਖਾਈ ਦੇਣ ਲੱਗੇਗਾ। ਆਓ, ਹੁਣ ਇਕ ਨਜ਼ਰ ਮਾਰਦੇ ਹਾਂ ਇਨ੍ਹਾਂ ਫਾਲਤੂ ਸਮਝੀਆਂ ਜਾਣ ਵਾਲੀਆਂ ਛਿੱਲਾਂ ਵਿਚ ਮੌਜੂਦ ਦਵਾਈ ਵਾਲੇ ਗੁਣਾਂ 'ਤੇ।
* ਅਨਾਰ ਦੀ ਛਿੱਲ ਨੂੰ ਧੁੱਪ ਵਿਚ ਸੁਕਾ ਕੇ ਪਾਊਡਰ ਦੇ ਰੂਪ ਵਿਚ ਤਿਆਰ ਕਰਨ ਤੋਂ ਬਾਅਦ ਇਸ ਨੂੰ ਸ਼ੁੱਧ ਪਾਣੀ ਨਾਲ ਫੱਕਣ ਨਾਲ ਪੁਰਾਣੀ ਤੋਂ ਪੁਰਾਣੀ ਪੇਚਿਸ਼ ਦਾ ਨਾਸ਼ ਹੋ ਜਾਂਦਾ ਹੈ।
* ਕੌੜੇ ਕਰੇਲੇ ਦੀਆਂ ਛਿੱਲਾਂ ਨੂੰ ਨਿਚੋੜ ਕੇ ਨਮਕ ਲਪੇਟ ਕੇ ਲਗਪਗ ਇਕ ਘੰਟੇ ਤੱਕ ਤੇਜ਼ ਸੂਰਜ ਦੀਆਂ ਕਿਰਨਾਂ ਵਿਚ ਸੁਕਾਓ। ਫਿਰ ਇਸ ਨੂੰ ਤਲ ਕੇ ਵਰਤੋਂ ਵਿਚ ਲਿਆਓ। ਯਕੀਨਨ ਸ਼ੂਗਰ ਦੀ ਮਾਰ ਝੱਲ ਰਹੇ ਰੋਗੀਆਂ ਲਈ ਇਹ ਕਿਸੇ ਰਾਮਬਾਣ ਦਵਾਈ ਤੋਂ ਘੱਟ ਸਾਬਤ ਨਹੀਂ ਹੋਵੇਗੀ।
* ਬਵਾਸੀਰ ਦੇ ਮਰੀਜ਼ ਨੂੰ ਸ਼ਲਗਮ ਦੀਆਂ ਛਿੱਲਾਂ ਨੂੰ ਉਬਲੇ ਹੋਏ ਆਲੂ ਅਤੇ ਵੇਸਣ ਵਿਚ ਮਿਲਾ ਕੇ ਕੋਫਤੇ ਬਣਾ ਕੇ ਖਵਾਉਣ ਨਾਲ ਸਾਫੀ ਆਰਾਮ ਮਿਲਦਾ ਹੈ। ਇਸ ਨਾਲ ਪੇਟ ਵੀ ਸਾਫ ਹੋ ਜਾਂਦਾ ਹੈ।
* ਸਬਜ਼ੀਆਂ ਵਿਚ ਸਭ ਤੋਂ ਜ਼ਿਆਦਾ ਪਸੰਦ ਕੀਤੇ ਜਾਣ ਵਾਲੇ ਮਟਰਾਂ ਦੀਆਂ ਛਿੱਲਾਂ ਉੱਪਰੋਂ ਪਤਲੀ ਪਰਤ ਉਤਾਰ ਕੇ ਉਸ ਵਿਚ ਆਲੂ ਦਾ ਮਿਸ਼ਰਣ ਕਰਕੇ ਸਬਜ਼ੀ ਬਣਾਉਣ ਤੋਂ ਬਾਅਦ ਸੇਵਨ ਵਿਚ ਲੈਣ ਨਾਲ ਪੇਟ ਸਾਫ ਤਾਂ ਰਹਿੰਦਾ ਹੀ ਹੈ, ਨਾਲ ਹੀ ਚਮੜੀ ਵੀ ਚਮਕੀਲੀ ਹੋ ਉਠਦੀ ਹੈ ਅਤੇ ਕਦੇ ਵੀ ਮੂੰਹ 'ਤੇ ਮੁਹਾਸੇ ਦਸਤਕ ਨਹੀਂ ਦਿੰਦੇ।
* ਤੁਰਈ ਦੀਆਂ ਛਿੱਲਾਂ ਨੂੰ ਬਰੀਕ ਕੱਟ ਕੇ ਪਿਆਜ਼, ਹਰੀ ਮਿਰਚ, ਨਮਕ ਅਤੇ ਲਾਲ ਮਿਰਚ ਮਿਲਾ ਕੇ ਆਟੇ ਵਿਚ ਮਿਸ਼ਰਤ ਕਰਕੇ ਗੁੰਨ੍ਹੋ। ਫਿਰ ਇਸ ਆਟੇ ਨਾਲ ਖਸਤਾ ਪਰੌਂਠੇ ਬਣਾਓ ਅਤੇ ਚਟਣੀ ਦੇ ਨਾਲ ਲੋਕਾਂ ਦੇ ਅੱਗੇ ਪਰੋਸੋ। ਯਕੀਨ ਮੰਨੋ, ਲੋਕ ਤੁਹਾਡੀ ਤਾਰੀਫ ਕਰਦੇ ਨਹੀਂ ਥੱਕਣਗੇ।
* ਇਸੇ ਤਰ੍ਹਾਂ ਇਲਾਇਚੀ ਦੇ ਦਾਣੇ ਕੱਢਣ ਤੋਂ ਬਾਅਦ ਇਸ ਦੀਆਂ ਛਿੱਲਾਂ ਨੂੰ ਵਰਤੋਂ ਵਿਚ ਲਿਆਉਂਦੇ ਹੋਏ ਬਰੀਕ ਪਾਊਡਰ ਬਣਾ ਲਓ ਅਤੇ ਚਾਹ ਦੀ ਪੱਤੀ ਦੇ ਡੱਬੇ ਵਿਚ ਰੱਖ ਦਿਓ। ਚਾਹ ਦਾ ਸਵਾਦ ਬਦਲਣ ਦੇ ਨਾਲ-ਨਾਲ ਖੁਸ਼ਬੂ ਕਾਫੀ ਦੂਰ ਤੱਕ ਬਿਖਰਦੀ ਨਜ਼ਰ ਆਵੇਗੀ। ਇਸ ਤੋਂ ਇਲਾਵਾ ਇਹ ਪਾਊਡਰ ਤੁਸੀਂ ਵੱਖ-ਵੱਖ ਤਰ੍ਹਾਂ ਦੇ ਪਕਵਾਨਾਂ ਦਾ ਸਵਾਦ ਵਧਾਉਣ ਲਈ ਵੀ ਵਰਤ ਸਕਦੇ ਹੋ।
* ਹਰੀਆਂ ਸਬਜ਼ੀਆਂ ਵਿਚ ਰਾਜਾ ਕਹਾਉਣ ਵਾਲੀ ਪਾਲਕ ਦੀਆਂ ਡੰਡੀਆਂ ਨੂੰ ਵੀ ਵਿਅਰਥ ਸਮਝ ਕੇ ਸੁੱਟੋ ਨਾ, ਸਗੋਂ ਇਸ ਵਿਚ ਮਟਰ ਦੀਆਂ ਤਾਜ਼ਾ ਛਿੱਲਾਂ ਅਤੇ ਹਰਾ ਧਨੀਆ ਬਰੀਕ ਕੱਟ ਕੇ ਪਾਓ ਅਤੇ ਇਸ ਦਾ ਸੂਪ ਤਿਆਰ ਕਰੋ। ਇਸ ਤੋਂ ਬਾਅਦ ਇਸ ਵਿਚ ਨਿੰਬੂ ਪਾ ਕੇ ਗਰਮਾਗਰਮ ਸੇਵਨ ਕਰੋ। ਅਨੀਮਿਕ ਅਤੇ ਗਰਭਵਤੀ ਔਰਤਾਂ ਨੂੰ ਫਾਇਦਾ ਹੀ ਫਾਇਦਾ ਮਿਲੇਗਾ, ਕਿਉਂਕਿ ਪਾਲਕ ਦੀਆਂ ਡੰਡੀਆਂ ਵਿਚ ਆਇਰਨ ਵੱਡੀ ਮਾਤਰਾ ਵਿਚ ਪਾਇਆ ਜਾਂਦਾ ਹੈ। ਗਰਭਵਤੀ ਔਰਤਾਂ ਲਈ ਇਹ ਅੰਮ੍ਰਿਤ ਬਰਾਬਰ ਹੈ।
ਇਸ ਤੋਂ ਇਲਾਵਾ ਤੁਸੀਂ ਸਿਹਤਮੰਦ ਸਮਝੀਆਂ ਜਾਣ ਵਾਲੀਆਂ ਇਨ੍ਹਾਂ ਸਾਰੀਆਂ ਛਿੱਲਾਂ ਦੀ ਵਰਤੋਂ ਦਾਲ, ਇਡਲੀ, ਸਾਂਭਰ, ਖਿਚੜੀ ਅਤੇ ਸੈਂਡਵਿਚ ਬਣਾਉਣ ਵਿਚ ਵੀ ਬਾਖੂਬੀ ਕਰ ਸਕਦੇ ਹੋ ਜਦੋਂ ਕਿ ਇਸ ਦੁਆਰਾ ਬਣਾਏ ਗਏ ਪਾਊਡਰ ਨੂੰ ਖੀਰ ਲਜੀਜ ਬਣਾਉਣ ਲਈ ਵੀ ਵਰਤਿਆ ਜਾ ਸਕਦਾ ਹੈ। ਤਾਂ ਫਿਰ ਦੇਰ ਕਿਸ ਗੱਲ ਦੀ? ਜੋ ਛਿੱਲਾਂ ਅਸੀਂ ਸੁੱਟ ਰਹੇ ਹਾਂ, ਅੱਜ ਤੋਂ ਹੀ ਉਨ੍ਹਾਂ ਨੂੰ ਆਪਣੇ ਭੋਜਨ ਵਿਚ ਸ਼ਾਮਿਲ ਕਰਕੇ ਤੰਦਰੁਸਤ ਰਹਿਣ ਲਈ ਵਰਤੋ ਅਤੇ ਇਨ੍ਹਾਂ ਵਿਚ ਛੁਪੇ ਸਿਹਤ ਰੂਪੀ ਰਾਜ਼ ਨੂੰ ਖੋਲ੍ਹ ਕੇ ਦੁਨੀਆ ਭਰ ਦੇ ਲੋਕਾਂ ਨੂੰ ਜਾਣੂ ਕਰਾਓ।


-ਅਨੂਪ ਮਿਸ਼ਰਾ

40 ਸਾਲ ਤੋਂ ਬਾਅਦ ਵੀ ਰਹੋ ਚੁਸਤ-ਦਰੁਸਤ

ਸਿਹਤ ਮਾਹਿਰਾਂ ਦਾ ਮੰਨਣਾ ਹੈ ਕਿ ਕੁੱਲ 15 ਕਾਰਨ ਹਨ, ਜਿਨ੍ਹਾਂ ਕਾਰਨ 40 ਸਾਲ ਤੱਕ ਪਹੁੰਚਦੇ-ਪਹੁੰਚਦੇ ਨਾ ਸਿਰਫ ਵਿਅਕਤੀ ਕਈ ਤਰ੍ਹਾਂ ਦੀਆਂ ਬਿਮਾਰੀਆਂ ਨਾਲ ਘਿਰਨ ਲਗਦਾ ਹੈ, ਸਗੋਂ ਸਮੇਂ ਤੋਂ ਪਹਿਲਾਂ ਹੀ ਬੁੱਢਾ ਵੀ ਦਿਖਾਈ ਦੇਣ ਲਗਦਾ ਹੈ। ਇਹ ਕਾਰਨ ਹਨ-ਜ਼ਿਆਦਾ ਖਾਣਾ, ਤਲਿਆ ਅਤੇ ਚਰਬੀ ਵਾਲਾ ਭੋਜਨ, ਮਾਸਾਹਾਰੀ ਭੋਜਨ ਦਾ ਜ਼ਿਆਦਾ ਮਾਤਰਾ ਵਿਚ ਸੇਵਨ, ਜ਼ਿਆਦਾ ਪੱਕਿਆ ਹੋਇਆ ਖਾਣਾ, ਜਿਸ ਨਾਲ ਪੌਸ਼ਟਿਕ ਤੱਤ ਨਸ਼ਟ ਹੋ ਜਾਂਦੇ ਹਨ, ਭੋਜਨ ਦਾ ਗ਼ਲਤ ਤਾਲਮੇਲ, ਬੇਹਾ ਖਾਣਾ, ਪਾਣੀ ਘੱਟ ਪੀਣਾ, ਕਸਰਤ ਦੀ ਕਮੀ, ਧੁੱਪ ਵਿਚੋਂ ਮਿਲਦੇ ਵਿਟਾਮਿਨ 'ਡੀ' ਦੀ ਕਮੀ, ਅਨਿਯਮਤ ਖਾਣਾ, ਘੱਟ ਸੌਣਾ ਅਤੇ ਕਸਰਤ, ਸਿਗਰਟਨੋਸ਼ੀ, ਜ਼ਿਆਦਾ ਮਦਸੇਵਨ, ਆਪਣੀ ਉਮਰ ਦੇ ਨਾਲ ਖਾਣ-ਪੀਣ ਵਿਚ ਉਚਿਤ ਬਦਲਾਅ ਨਾ ਕਰਨਾ, ਤਣਾਅ, ਜੀਵਨ ਦੇ ਪ੍ਰਤੀ ਉਦਾਸੀਨਤਾ ਅਤੇ ਆਪਣੇ ਪ੍ਰਤੀ ਲਾਪ੍ਰਵਾਹੀ।
ਮਨੁੱਖੀ ਦੇਹ ਦੀਆਂ ਕੋਸ਼ਿਕਾਵਾਂ ਹਮੇਸ਼ਾ ਬਣਦੀਆਂ-ਵਿਗੜਦੀਆਂ ਰਹਿੰਦੀਆਂ ਹਨ, ਇਹ ਕਦੇ ਸਥਿਰ ਨਹੀਂ ਰਹਿੰਦੀਆਂ। ਇਸ ਲਈ ਉਚਿਤ ਆਹਾਰ ਇਸ ਵਿਚ ਆਪਣੀ ਮਹੱਤਵਪੂਰਨ ਭੂਮਿਕਾ ਨਿਭਾਅ ਸਕਦਾ ਹੈ। ਕੁਝ ਵਿਸ਼ੇਸ਼ ਆਹਾਰ ਤੁਸੀਂ ਆਪਣੇ ਭੋਜਨ ਵਿਚ ਸ਼ਾਮਿਲ ਕਰੋ।
ਦਹੀਂ : 40 ਸਾਲ ਦੀ ਉਮਰ ਤੋਂ ਹੀ ਹਾਜ਼ਮੇ ਵਿਚ ਗੜਬੜੀ ਦੇਖਣ ਨੂੰ ਮਿਲਦੀ ਹੈ। ਕਿਸੇ ਨੂੰ ਕਬਜ਼ ਤੇ ਕਿਸੇ ਦੀ ਪਾਚਣ ਕਿਰਿਆ ਨੁਕਸਾਨੀ ਜਾਂਦੀ ਹੈ। ਜੋ ਆਪਣੀ ਸਿਹਤ ਪ੍ਰਤੀ ਸੁਚੇਤ ਹੁੰਦੇ ਹਨ, ਉਚਿਤ ਭੋਜਨ ਨੂੰ ਅਪਣਾਉਂਦੇ ਹਨ, ਉਹ ਇਸ ਤਰ੍ਹਾਂ ਦੀਆਂ ਸ਼ਿਕਾਇਤਾਂ ਤੋਂ ਦੂਰ ਰਹਿੰਦੇ ਹਨ। ਦੁੱਧ ਅਤੇ ਮਲਾਈ ਆਦਿ ਤੋਂ ਬਣੀ ਸਮੱਗਰੀ ਦਾ ਤਿਆਗ ਕਰਕੇ ਸਿਰਫ ਮਲਾਈ ਰਹਿਤ ਦਹੀਂ ਵਰਤੋਂ ਵਿਚ ਲਿਆਓ ਤਾਂ ਇਸ ਤੋਂ ਬਿਹਤਰ ਕੁਝ ਨਹੀਂ, ਕਿਉਂਕਿ ਦਹੀਂ ਨਾ ਸਿਰਫ ਤੁਹਾਡਾ ਹਾਜ਼ਮਾ ਠੀਕ ਰੱਖਦਾ ਹੈ, ਸਗੋਂ ਪੇਟ ਦੀਆਂ ਅੰਤੜੀਆਂ ਨੂੰ ਵੀ ਠੀਕ ਰੱਖਦਾ ਹੈ।
ਬਿਟਾਮਿਨ 'ਬੀ' : ਸਿਹਤ ਮਾਹਿਰਾਂ ਦਾ ਅਜਿਹਾ ਮੰਨਣਾ ਹੈ ਕਿ ਵਿਟਾਮਿਨ 'ਬੀ' ਦਾ ਹੋਣਾ ਬਹੁਤ ਜ਼ਰੂਰੀ ਹੈ, ਕਿਉਂਕਿ ਇਹ ਤੁਹਾਨੂੰ ਜਵਾਨ ਰੱਖਣ ਵਿਚ ਸਹਾਇਕ ਸਿੱਧ ਹੁੰਦਾ ਹੈ, ਵਾਲ ਚਿੱਟੇ ਹੋਣ ਦੀ ਸ਼ਿਕਾਇਤ ਨੂੰ ਦੂਰ ਕਰਦਾ ਹੈ, ਮਾਸਪੇਸ਼ੀਆਂ ਦਰਦ ਹੋਣ ਦੀ ਸ਼ਿਕਾਇਤ ਨਹੀਂ ਹੁੰਦੀ, ਮੂੰਹ ਦੇ ਅੰਦਰ ਛਾਲੇ ਆਦਿ ਦੀ ਸ਼ਿਕਾਇਤ ਤੋਂ ਦੂਰ ਰਹਿ ਸਕਦੇ ਹੋ। ਬਦਾਮ, ਆੜੂ, ਸੁੱਕੇ ਮੇਵੇ, ਟਮਾਟਰ, ਸੇਬ, ਜਵਾਰ ਵਿਚ ਇਸ ਦੇ ਉੱਤਮ ਗੁਣ ਪਾਏ ਜਾਂਦੇ ਹਨ। ਇਨ੍ਹਾਂ ਨੂੰ ਤੁਸੀਂ ਆਪਣੇ ਭੋਜਨ ਵਿਚ ਸ਼ਾਮਿਲ ਕਰੋ।
ਵਿਟਾਮਿਨ 'ਸੀ' : ਸਾਡੇ ਜੀਵਨ ਦਾ ਰਾਖਾ ਅਤੇ ਜਵਾਨ ਹੋਣ ਦੇ ਰਾਜ਼ ਦਾ ਸਿਹਰਾ ਤੁਸੀਂ ਨਿਸਚਿਤ ਰੂਪ ਨਾਲ ਵਿਟਾਮਿਨ 'ਸੀ' ਨੂੰ ਹੀ ਦੇ ਸਕਦੇ ਹੋ। ਇਸੇ ਕਾਰਨ ਤੁਸੀਂ ਨਾ ਸਿਰਫ਼ ਚੁਸਤ-ਦਰੁਸਤ ਅਤੇ ਜਵਾਨ ਦਿਸਦੇ ਹੋ, ਸਗੋਂ ਖੁਦ ਨੂੰ ਹਲਕਾ ਮਹਿਸੂਸ ਕਰਦੇ ਹੋ। ਇਹ ਅਨੇਕਾਂ ਤਰ੍ਹਾਂ ਦੀਆਂ ਬਿਮਾਰੀਆਂ ਤੋਂ ਤੁਹਾਨੂੰ ਦੂਰ ਰੱਖਦਾ ਹੈ। ਕਈ ਬਿਮਾਰੀਆਂ ਨਾਲ ਲੜਨ ਦੀ ਪ੍ਰਤੀਰੋਧਕ ਸ਼ਕਤੀ ਸਰੀਰ ਵਿਚ ਬਣਾਈ ਰੱਖਦਾ ਹੈ। ਅਨੇਕਾਂ ਸੰਕ੍ਰਾਮਕ ਰੋਗਾਂ ਤੋਂ ਬਚਾਈ ਰੱਖਦਾ ਹੈ। ਇਸ ਲਈ ਔਲਾ, ਨਿੰਬੂ ਵਰਗੇ ਵਿਟਾਮਿਨ 'ਸੀ' ਨਾਲ ਭਰਪੂਰ ਫਲਾਂ ਨੂੰ ਆਪਣੇ ਭੋਜਨ ਵਿਚ ਸ਼ਾਮਿਲ ਕਰੋ।
ਧੁੱਪ : ਕਿਉਂਕਿ ਮਨੁੱਖ ਕੁਦਰਤ ਦਾ ਅਟੁੱਟ ਰੂਪ ਹੈ, ਇਸ ਲਈ ਧੁੱਪ ਅਤੇ ਪਾਣੀ ਉਸ ਦੇ ਲਈ ਲਾਭਦਾਇਕ ਮੰਨੇ ਗਏ ਹਨ। ਧੁੱਪ ਵਿਚੋਂ ਵਿਟਾਮਿਨ 'ਡੀ' ਮਿਲਦਾ ਹੈ। ਇਸ ਵਿਚ ਇਹ ਵੀ ਧਿਆਨ ਰੱਖਣ ਵਾਲੀ ਗੱਲ ਹੈ ਕਿ ਦੁਪਹਿਰ ਦੀ ਧੁੱਪ ਨਾ ਹੋਵੇ। ਸਵੇਰ ਵੇਲੇ ਸੈਰ ਦੇ ਨਾਲ-ਨਾਲ ਸਵੇਰ ਦੀ ਧੁੱਪ ਲੈਣੀ ਲਾਭਦਾਇਕ ਹੈ। 40 ਸਾਲ ਤੋਂ ਬਾਅਦ ਵਿਅਕਤੀ ਨੂੰ ਆਪਣੇ ਦੰਦ ਅਤੇ ਹੱਡੀਆਂ ਦੇ ਪ੍ਰਤੀ ਵਿਸ਼ੇਸ਼ ਸੁਚੇਤ ਰਹਿਣ ਦੀ ਲੋੜ ਹੈ। ਰੌਂਗੀ, ਛੋਲੇ, ਦਾਲ, ਸੋਇਆਬੀਨ, ਤਾਜ਼ੀਆਂ ਹਰੀਆਂ ਪੱਤੇਦਾਰ ਸਬਜ਼ੀਆਂ, ਮੱਛੀ ਦਾ ਤੇਲ ਇਸ ਲਈ ਠੀਕ ਮੰਨਿਆ ਗਿਆ ਹੈ।
ਵਿਟਾਮਿਨ 'ਈ' : ਜਵਾਨ ਰਹਿਣ ਲਈ ਵਿਟਾਮਿਨ 'ਈ' ਸਰੀਰ ਲਈ ਫਾਇਦੇਮੰਦ ਮੰਨਿਆ ਗਿਆ ਹੈ। ਇਸ ਨਾਲ ਨਾ ਸਿਰਫ ਸਰੀਰ ਦੀ ਚਮੜੀ ਤੰਦਰਸੁਤ, ਆਭਾਯੁਕਤ ਰਹਿੰਦੀ ਹੈ, ਸਗੋਂ ਇਸ ਵਿਚ ਕੈਂਸਰ ਰੋਧਕ ਸਮਰੱਥਾ ਵੀ ਪਾਈ ਗਈ ਹੈ। 40 ਸਾਲਾ ਵਿਅਕਤੀ ਨੂੰ ਹਰ ਰੋਜ਼ 300 ਤੋਂ 400 ਮਿਲੀਗ੍ਰਾਮ ਤੱਕ ਵਿਟਾਮਿਨ 'ਈ' ਦੀ ਖੁਰਾਕ ਲੈਣੀ ਚਾਹੀਦੀ ਹੈ, ਚਾਹੇ ਉਹ ਦਵਾਈ ਦੇ ਰੂਪ ਵਿਚ ਹੋਵੇ ਜਾਂ ਕੁਦਰਤੀ ਖਾਧ ਪਦਾਰਥਾਂ ਦੇ ਰੂਪ ਵਿਚ।
ਲੋਹ ਤੱਤ (ਆਇਰਨ) : ਸਾਡੇ ਸਰੀਰ ਵਿਚ ਜੇ ਲੋਹ ਤੱਤ ਦੀ ਮਾਤਰਾ ਘੱਟ ਹੋਵੇਗੀ ਤਾਂ ਅਸੀਂ ਜੀਵਤ ਨਹੀਂ ਰਹਿ ਸਕਦੇ। ਸਰੀਰ ਵਿਚ ਲੋਹ ਤੱਤ ਜ਼ਰੂਰੀ ਮੰਨਿਆ ਜਾਂਦਾ ਹੈ। 40 ਸਾਲ ਤੋਂ ਬਾਅਦ ਮੋਟਾਪਾ, ਜੋੜਾਂ ਦਾ ਦਰਦ, ਮਾਸਪੇਸ਼ੀਆਂ ਦਾ ਦਰਦ, ਸਾਹ ਲੈਣ ਵਿਚ ਤਕਲੀਫ, ਪੀਲਾਪਨ ਆਦਿ ਸਰੀਰ ਵਿਚ ਲੋਹ ਤੱਤ ਦੀ ਕਮੀ ਕਾਰਨ ਹੁੰਦਾ ਹੈ, ਜਿਸ ਨੂੰ ਤੁਸੀਂ ਖਜੂਰ, ਹਰੀਆਂ ਸਬਜ਼ੀਆਂ, ਸੋਇਆਬੀਨ, ਖਸਖਸ ਦੁਆਰਾ ਕੁਦਰਤੀ ਰੂਪ ਨਾਲ ਦੂਰ ਕਰ ਸਕਦੇ ਹੋ, ਪਰ ਦਵਾਈ ਦੇ ਰੂਪ ਵਿਚ ਲੈਣ ਤੋਂ ਪਹਿਲਾਂ ਡਾਕਟਰ ਨਾਲ ਸਲਾਹ ਜ਼ਰੂਰੀ ਹੈ।

ਬੱਚਿਆਂ ਲਈ ਖ਼ਤਰਨਾਕ ਹੋ ਸਕਦਾ ਹੈ ਨਮਕ

ਕੁਝ ਮਨੋਵਿਗਿਆਨੀਆਂ ਅਨੁਸਾਰ ਕੁਝ ਨਵੇਂ ਜਨਮੇ ਬੱਚਿਆਂ ਵਿਚ ਨਮਕ ਦੀ ਥੋੜ੍ਹੀ ਜਿਹੀ ਵੀ ਜ਼ਿਆਦਾ ਮਾਤਰਾ ਨਾਲ ਉਨ੍ਹਾਂ ਦਾ ਖੂਨ ਦਾ ਦਬਾਅ ਆਮ ਬੱਚਿਆਂ ਨਾਲੋਂ ਬਹੁਤ ਜ਼ਿਆਦਾ ਵਧ ਜਾਂਦਾ ਹੈ।
ਅਮਰੀਕਨ ਹਾਰਟ ਐਸੋਸੀਏਸ਼ਨ ਦੇ ਡਾਕਟਰਾਂ ਨੇ ਇਕ ਖੋਜ ਵਿਚ ਇਹ ਪਤਾ ਲਗਾਇਆ ਹੈ ਕਿ ਕੁਝ ਨਵਜਨਮੇ ਬੱਚਿਆਂ ਨੂੰ ਨਮਕ ਖਾਣਾ ਬਹੁਤ ਚੰਗਾ ਲਗਦਾ ਹੈ ਪਰ ਇਹ ਉਨ੍ਹਾਂ ਲਈ ਬਹੁਤ ਹੀ ਖ਼ਤਰਨਾਕ ਸਿੱਧ ਹੋ ਸਕਦਾ ਹੈ। ਇਸ ਨਾਲ ਉਨ੍ਹਾਂ ਨੂੰ ਉੱਚ ਖੂਨ ਦਬਾਅ ਦੀ ਬਿਮਾਰੀ ਬਚਪਨ ਤੋਂ ਹੀ ਹੋ ਜਾਂਦੀ ਹੈ।
ਡਾਕਟਰਾਂ ਦਾ ਇਹ ਵੀ ਮੰਨਣਾ ਹੈ ਕਿ ਇਹ ਬਿਮਾਰੀ ਅਕਸਰ ਉਨ੍ਹਾਂ ਬੱਚਿਆਂ ਨੂੰ ਹੁੰਦੀ ਹੈ, ਜਿਨ੍ਹਾਂ ਦੇ ਪਰਿਵਾਰ ਵਿਚ ਵੱਡੇ ਬਜ਼ੁਰਗ ਇਸ ਬਿਮਾਰੀ ਤੋਂ ਪੀੜਤ ਹੁੰਦੇ ਹਨ। ਉਨ੍ਹਾਂ ਅਨੁਸਾਰ ਇਸ ਤਰ੍ਹਾਂ ਦੇ ਬੱਚਿਆਂ ਵਿਚ ਜਦੋਂ ਥੋੜ੍ਹੇ ਜਿਹੇ ਵੱਡੇ ਹੋਣ 'ਤੇ ਸਿਰਦਰਦ ਦੀ ਸ਼ਿਕਾਇਤ ਹੁੰਦੀ ਹੈ ਤਾਂ ਇਸ ਦਾ ਮਤਲਬ ਇਹ ਹੈ ਕਿ ਉਨ੍ਹਾਂ ਨੂੰ ਜ਼ਿੰਦਗੀ ਭਰ ਆਪਣਾ ਖੂਨ ਦਾ ਦਬਾਅ ਠੀਕ ਰੱਖਣ ਲਈ ਲੂਣ ਤੋਂ ਪ੍ਰਹੇਜ਼ ਕਰਨਾ ਪਵੇਗਾ।
ਹਾਲਾਂਕਿ ਕੁਝ ਵਿਦਵਾਨਾਂ ਦੇ ਅਨੁਸਾਰ ਨਮਕ ਨਾਲ ਬੱਚਿਆਂ ਦੇ ਖੂਨ ਦੇ ਦਬਾਅ ਵਿਚ ਕਿਸੇ ਤਰ੍ਹਾਂ ਦਾ ਕੋਈ ਵਾਧਾ ਨਹੀਂ ਹੁੰਦਾ ਪਰ ਡਾਕਟਰਾਂ ਨੇ ਉਨ੍ਹਾਂ ਦੀ ਗੱਲ ਨੂੰ ਗ਼ਲਤ ਠਹਿਰਾ ਦਿੱਤਾ ਹੈ। ਹਸਪਤਾਲ ਵਿਚ ਕਰੀਬ 234 ਨਵੇਂ ਜਨਮੇ ਬੱਚਿਆਂ 'ਤੇ ਕੀਤੇ ਗਏ ਆਪਣੇ ਨਿਰੀਖਣ ਤੋਂ ਬਾਅਦ ਤਿਆਰ ਰਿਪੋਰਟ ਨਾਲ ਮਨੋਚਿਕਿਤਸਕਾਂ ਨੇ ਇਹ ਦੱਸਿਆ ਕਿ ਕਿਸ ਤਰ੍ਹਾਂ ਇਨ੍ਹਾਂ ਬੱਚਿਆਂ ਨੂੰ ਪੈਦਾ ਹੋਣ ਦੇ ਕੁਝ ਦਿਨ ਬਾਅਦ ਉਨ੍ਹਾਂ ਨੂੰ ਨਮਕ ਦਿੱਤਾ ਅਤੇ ਫਿਰ ਇਕ ਹਫ਼ਤੇ ਬਾਅਦ ਦੁਬਾਰਾ ਦਿੱਤਾ।
ਦੋਵੇਂ ਵਾਰ ਬੱਚਿਆਂ ਦਾ ਖੂਨ ਦਾ ਦਬਾਅ ਉਨ੍ਹਾਂ ਦੇ ਨਮਕ ਖਾਣ ਤੋਂ ਬਾਅਦ ਨਾਪਿਆ ਗਿਆ, ਜਿਸ ਨੂੰ ਦੇਖ ਕੇ ਇਹ ਪੂਰੀ ਤਰ੍ਹਾਂ ਸਪੱਸ਼ਟ ਹੋ ਗਿਆ ਕਿ ਜਿਨ੍ਹਾਂ ਬੱਚਿਆਂ ਨੂੰ ਨਮਕ ਖਾਣਾ ਚੰਗਾ ਲਗਦਾ ਹੈ, ਉਨ੍ਹਾਂ ਦੀ ਹਾਲਤ ਬਚਪਨ ਤੋਂ ਹੀ ਖਰਾਬ ਹੋਣੀ ਸ਼ੁਰੂ ਹੋ ਜਾਂਦੀ ਹੈ ਅਤੇ ਫਿਰ ਹੌਲੀ-ਹੌਲੀ ਉਨ੍ਹਾਂ ਦਾ ਖੂਨ ਦਾ ਦਬਾਅ ਆਮ ਬੱਚਿਆਂ ਨਾਲੋਂ ਜ਼ਿਆਦਾ ਹੁੰਦਾ ਜਾਂਦਾ ਹੈ।


-ਸਪਨਾ ਜੈਨ

ਸਰਦੀਆਂ ਵਿਚ ਜ਼ਰਾ ਸੰਭਲ ਕੇ

ਸਰਦੀਆਂ ਜਿੰਨੀਆਂ ਚੰਗੀਆਂ ਲਗਦੀਆਂ ਹਨ, ਓਨੀਆਂ ਹੀ ਪ੍ਰੇਸ਼ਾਨੀਆਂ ਵੀ ਲੈ ਕੇ ਆਉਂਦੀਆਂ ਹਨ। ਛੋਟੀਆਂ-ਮੋਟੀਆਂ ਪ੍ਰੇਸ਼ਾਨੀਆਂ ਤਾਂ ਹਰ ਮੌਸਮ ਦੇ ਬਦਲਣ 'ਤੇ ਹੁੰਦੀਆਂ ਹੀ ਹਨ ਪਰ ਠੰਢ ਦੇ ਮੌਸਮ ਵਿਚ ਪ੍ਰੇਸ਼ਾਨੀਆਂ ਦੂਜੇ ਮੌਸਮਾਂ ਨਾਲੋਂ ਕੁਝ ਜ਼ਿਆਦਾ ਹੋ ਜਾਂਦੀਆਂ ਹਨ। ਇਸ ਲਈ ਸਾਰੇ ਲੋਕ ਇਸ ਪਿਆਰ ਭਰੇ ਮੌਸਮ ਦਾ ਖੁੱਲ੍ਹ ਕੇ ਲੁਤਫ ਨਹੀਂ ਲੈ ਸਕਦੇ ਪਰ ਜੇ ਛੋਟੀਆਂ-ਛੋਟੀਆਂ ਗੱਲਾਂ ਦਾ ਖਿਆਲ ਰੱਖਿਆ ਜਾਵੇ ਤਾਂ ਸਾਰੇ ਲੋਕ ਖੁੱਲ੍ਹ ਕੇ ਇਸ ਪਿਆਰ ਭਰੇ ਮੌਸਮ ਦਾ ਅਨੰਦ ਲੈ ਸਕਦੇ ਹਨ। ਸਰਦੀਆਂ ਵਿਚ ਆਮ ਹੋਣ ਵਾਲੀ ਖੰਘ-ਜ਼ੁਕਾਮ ਤੋਂ ਬਚਣ ਲਈ ਚਾਹ ਵਿਚ ਕਾਲੀ ਮਿਰਚ ਦੇ ਨਾਲ ਬਤਾਸ਼ੇ ਪਾ ਕੇ ਪੀਓ। ਇਸ ਨਾਲ ਠੰਢ ਨਾਲ ਹੋਣ ਵਾਲੇ ਸਿਰਦਰਦ ਤੋਂ ਵੀ ਰਾਹਤ ਮਿਲਦੀ ਹੈ। ਸ਼ਹਿਦ ਵਿਚ ਅਦਰਕ ਮਿਲਾ ਕੇ ਖਾਣ ਨਾਲ ਖੰਘ ਠੀਕ ਹੋ ਜਾਂਦੀ ਹੈ। ਠੰਢ ਵਿਚ ਹੋਣ ਵਾਲੇ ਬੁਖਾਰ ਤੋਂ ਜੇ ਤੁਸੀਂ ਬਚਣਾ ਚਾਹੁੰਦੇ ਹੋ ਤਾਂ ਰੋਜ਼ਾਨਾ ਤੁਲਸੀ, ਅਦਰਕ ਦੀ ਚਾਹ ਪੀਣੀ ਸ਼ੁਰੂ ਕਰ ਦਿਓ। ਛੁਹਾਰਾ ਪਾ ਕੇ ਦੁੱਧ ਉਬਾਲਣ ਤੋਂ ਬਾਅਦ ਜੇ ਉਸ ਵਿਚ ਇਲਾਇਚੀ ਅਤੇ ਕੇਸਰ ਪਾ ਕੇ ਪੀਤਾ ਜਾਵੇ ਤਾਂ ਜ਼ੁਕਾਮ ਦੇ ਸਾਰੇ ਰੋਗਾਣੂ ਖ਼ਤਮ ਹੋ ਜਾਂਦੇ ਹਨ। ਖਾਣੇ ਤੋਂ ਬਾਅਦ ਗੁੜ ਖਾਣ ਨਾਲ ਨਾ ਸਿਰਫ ਪਾਚਣ ਪ੍ਰਕਿਰਿਆ ਚੰਗੀ ਹੋ ਜਾਂਦੀ ਹੈ, ਸਗੋਂ ਜ਼ੁਕਾਮ ਅਤੇ ਖੰਘ ਤੋਂ ਵੀ ਤੁਸੀਂ ਬਚੇ ਰਹਿੰਦੇ ਹੋ। ਜੇ ਤੁਸੀਂ ਇਨ੍ਹਾਂ ਸਰਦੀਆਂ ਵਿਚ ਸਾਰੇ ਤਰ੍ਹਾਂ ਦੀਆਂ ਬਿਮਾਰੀਆਂ ਦੀ ਪਕੜ ਤੋਂ ਬਚਣਾ ਚਾਹੁੰਦੇ ਹੋ ਤਾਂ ਜ਼ਰੂਰੀ ਹੈ ਕਿ ਤੁਸੀਂ ਰੋਜ਼ ਸਵੇਰੇ ਇਕ ਲੌਂਗ ਜ਼ਰੂਰ ਖਾਓ।
ਬੱਚਿਆਂ ਅਤੇ ਬਜ਼ੁਰਗਾਂ ਦਾ ਸਰਦੀਆਂ ਵਿਚ ਰੱਖੋ ਵਿਸ਼ੇਸ਼ ਖਿਆਲ-
* ਠੰਢ ਵਿਚ ਚੱਲਣ ਵਾਲੀ ਹਵਾ ਕਾਰਨ ਅਕਸਰ ਬਜ਼ੁਰਗਾਂ ਦੇ ਹੱਥਾਂ-ਪੈਰਾਂ ਅਤੇ ਕਮਰ ਦੀਆਂ ਹੱਡੀਆਂ ਵਿਚ ਦਰਦ ਹੋਣ ਲੱਗ ਪੈਂਦੀ ਹੈ। ਇਸ ਲਈ ਅਜਿਹੇ ਵਿਚ ਧਿਆਨ ਰੱਖਿਆ ਜਾਵੇ ਕਿ ਬਜ਼ੁਰਗਾਂ ਨੇ ਵੀ ਜ਼ਰੂਰੀ ਗਰਮ ਕੱਪੜੇ ਪਹਿਨੇ ਹੋਣ।
* ਵੱਡੇ ਬਜ਼ੁਰਗਾਂ ਨੂੰ ਕਦੇ ਵੀ ਸਵੇਰੇ-ਸਵੇਰੇ ਸਰਦੀਆਂ ਵਿਚ ਸੈਰ 'ਤੇ ਨਾ ਭੇਜੋ।
* ਸਰਦੀ ਜ਼ਿਆਦਾਤਰ ਸਿਰ, ਕੰਨ ਅਤੇ ਪੈਰਾਂ ਤੋਂ ਲਗਦੀ ਹੈ, ਇਸ ਲਈ ਇਨ੍ਹਾਂ ਨੂੰ ਢਕ ਕੇ ਹੀ ਰੱਖੋ।
* ਬੱਚਿਆਂ ਨੂੰ ਨਹਾਉਣ ਤੋਂ ਤੁਰੰਤ ਬਾਅਦ ਹੀ ਗਰਮ ਕੱਪੜੇ ਪਹਿਨਾ ਦਿਓ।
* ਬੱਚਿਆਂ ਅਤੇ ਬਜ਼ੁਰਗਾਂ ਨੂੰ ਹਮੇਸ਼ਾ ਹਲਕੇ ਗਰਮ ਪਾਣੀ ਨਾਲ ਹੀ ਨਹਿਲਾਓ।
* ਬੱਚਿਆਂ ਦੀ ਤੇਲ ਨਾਲ ਮਾਲਿਸ਼ ਕਰੋ।
* 12 ਵਜੇ ਦੇ ਨੇੜੇ-ਤੇੜੇ ਨਿਕਲਣ ਵਾਲੀ ਧੁੱਪ ਵਿਚ ਬੱਚਿਆਂ ਨੂੰ ਤੇਲ ਲਗਾ ਕੇ ਜ਼ਰੂਰ ਲਿਟਾਉਣਾ ਚਾਹੀਦਾ ਹੈ।
* ਨਵਜੰਮੇ ਬੱਚਿਆਂ ਨੂੰ ਮਾਂ ਸਮੇਂ-ਸਮੇਂ 'ਤੇ ਦੁੱਧ ਜ਼ਰੂਰ ਪਿਲਾਵੇ।
* ਠੰਢ ਦਾ ਮੌਸਮ ਅਨੇਕ ਸਰਦੀ, ਖੰਘ ਵਰਗੀਆਂ ਬਿਮਾਰੀਆਂ ਅਤੇ ਪ੍ਰੇਸ਼ਾਨੀਆਂ ਤਾਂ ਲੈ ਕੇ ਆਉਂਦਾ ਹੀ ਹੈ ਪਰ ਜੋ ਲੋਕ ਸ਼ੂਗਰ, ਦਮੇ, ਉੱਚ ਖੂਨ ਦਬਾਅ ਅਤੇ ਦਿਲ ਦੀ ਬਿਮਾਰੀਆਂ ਤੋਂ ਪੀੜਤ ਹੁੰਦੇ ਹਨ, ਉਨ੍ਹਾਂ ਲਈ ਵੀ ਬਹੁਤ ਵੱਡੀ ਸਮੱਸਿਆ ਲੈ ਕੇ ਆਉਂਦਾ ਹੈ।
* ਉੱਚ ਖੂਨ ਦਬਾਅ ਨਾਲ ਕਿਤੇ ਕੋਈ ਅਣਹੋਣੀ ਨਾ ਹੋ ਜਾਵੇ। ਠੰਢ ਦੇ ਮੌਸਮ ਵਿਚ ਖੂਨ ਦੀਆਂ ਨਾੜੀਆਂ ਸੁੰਗੜ ਜਾਂਦੀਆਂ ਹਨ, ਜਿਸ ਕਾਰਨ ਖੂਨ ਦਾ ਪ੍ਰਵਾਹ ਰੁਕਣ ਲੱਗ ਜਾਂਦਾ ਹੈ। ਜਿਨ੍ਹਾਂ ਲੋਕਾਂ ਨੂੰ ਉੱਚ ਖੂਨ ਦਬਾਅ ਦੀ ਸ਼ਿਕਾਇਤ ਹੁੰਦੀ ਹੈ, ਉਨ੍ਹਾਂ ਨੂੰ ਮਾਨਸਿਕ ਅਤੇ ਸਰੀਰਕ ਬਹੁਤ ਸਾਰੇ ਰੋਗ ਹੋ ਜਾਂਦੇ ਹਨ।
* ਲਕਵਾ ਮਾਰਨ ਦੀ ਬਿਮਾਰੀ ਵੀ ਠੰਢ ਦੇ ਮੌਸਮ ਵਿਚ ਜ਼ਿਆਦਾ ਹੁੰਦੀ ਹੈ। ਇਸ ਲਈ ਜ਼ਰੂਰੀ ਹੈ ਕਿ ਠੰਢ ਦੇ ਮੌਸਮ ਵਿਚ ਉੱਚ ਖੂਨ ਦਬਾਅ ਵਾਲੇ ਮਰੀਜ਼ਾਂ ਦਾ ਵਿਸ਼ੇਸ਼ ਖਿਆਲ ਰੱਖਿਆ ਜਾਵੇ ਅਤੇ ਉੱਚ ਖੂਨ ਦਬਾਅ ਦੇ ਰੋਗੀ ਦਾ ਸਮੇਂ-ਸਮੇਂ 'ਤੇ ਡਾਕਟਰ ਦੇ ਕੋਲ ਜਾ ਕੇ ਖੂਨ ਦਾ ਦਬਾਅ ਚੈੱਕ ਕਰਾਉਂਦੇ ਰਹਿਣਾ ਚਾਹੀਦਾ ਹੈ।
ਮਰੀਜ਼ ਦਾ ਕੁਝ ਇੰਜ ਰੱਖੋ ਖਿਆਲ
* ਸਰਦੀਆਂ ਦੇ ਮੌਸਮ ਵਿਚ ਦਮੇ ਦੇ ਮਰੀਜ਼ ਦਾ ਵੀ ਵਿਸ਼ੇਸ਼ ਖਿਆਲ ਰੱਖਣ ਦੀ ਲੋੜ ਹੁੰਦੀ ਹੈ, ਕਿਉਂਕਿ ਜਿਵੇਂ-ਜਿਵੇਂ ਠੰਢ ਵਧਦੀ ਜਾਂਦੀ ਹੈ, ਉਵੇਂ-ਉਵੇਂ ਦਮੇ ਦੇ ਮਰੀਜ਼ ਨੂੰ ਸਾਹ ਲੈਣ ਵਿਚ ਸਮੱਸਿਆ ਜ਼ਿਆਦਾ ਹੋਣ ਲਗਦੀ ਹੈ।
* ਜੇ ਤੁਹਾਡੇ ਘਰ ਵਿਚ ਕੋਈ ਵੀ ਦਮੇ ਦੀ ਬਿਮਾਰੀ ਦਾ ਸ਼ਿਕਾਰ ਹੈ ਤਾਂ ਧਿਆਨ ਰੱਖੋ ਕਿ ਤੁਸੀਂ ਉਸ ਨੂੰ ਸਮੇਂ ਸਿਰ ਦਵਾਈ ਦਿਓ ਅਤੇ ਇਨਹੇਲਰ ਹਮੇਸ਼ਾ ਮਰੀਜ਼ ਦੇ ਕੋਲ ਹੀ ਰੱਖੋ।
* ਸ਼ੂਗਰ ਦੇ ਰੋਗੀਆਂ ਨੂੰ ਆਪਣੀ ਜੀਭ 'ਤੇ ਕੰਟਰੋਲ ਕਰਨਾ ਚਾਹੀਦਾ ਹੈ। ਠੰਢ ਵਿਚ ਆਉਣ ਵਾਲੇ ਗੁੜ, ਗੱਚਕ, ਰਿਓੜੀ ਵਰਗੀਆਂ ਚੀਜ਼ਾਂ ਨੂੰ ਦੇਖ ਕੇ ਅਕਸਰ ਜੀਭ 'ਤੇ ਕਾਬੂ ਕਰਨਾ ਮੁਸ਼ਕਿਲ ਹੁੰਦਾ ਹੈ ਪਰ ਜੇ ਤੁਸੀਂ ਸ਼ੂਗਰ ਦੇ ਰੋਗੀ ਹੋ ਤਾਂ ਤੁਹਾਨੂੰ ਕੰਟਰੋਲ ਕਰਨਾ ਪਵੇਗਾ, ਨਹੀਂ ਤਾਂ ਤੁਹਾਡੀ ਬਿਮਾਰੀ ਵਧ ਸਕਦੀ ਹੈ।

ਸਾਹ ਦੀ ਬਿਮਾਰੀ ਗੰਭੀਰ ਰੂਪ ਧਾਰਨ ਕਰ ਸਕਦੀ ਹੈ

ਪ੍ਰਦੂਸ਼ਿਤ ਵਾਤਾਵਰਨ, ਮਿਲਾਵਟੀ ਖਾਧ-ਪਦਾਰਥ ਅਤੇ ਬਦਲਦੀ ਜੀਵਨ ਸ਼ੈਲੀ ਦੇ ਕਾਰਨ ਸਾਹ ਦੀਆਂ ਬਿਮਾਰੀਆਂ ਕਾਫੀ ਤੇਜ਼ੀ ਨਾਲ ਵਧ ਰਹੀਆਂ ਹਨ। ਸਾਹ ਦੀਆਂ ਬਿਮਾਰੀਆਂ ਦੀ ਵਧਦੀ ਰਫਤਾਰ ਨੂੰ ਦੇਖ ਕੇ ਲਗਦਾ ਹੈ ਕਿ ਆਉਣ ਵਾਲੇ ਦਿਨਾਂ ਵਿਚ ਏਡਜ਼ ਅਤੇ ਕੈਂਸਰ ਤੋਂ ਬਾਅਦ ਦੁਨੀਆ ਦੀ ਤੀਜੀ ਖ਼ਤਰਨਾਕ ਜਾਨਲੇਵਾ ਬਿਮਾਰੀ ਇਹੀ ਹੋਵੇਗੀ।
'ਕ੍ਰਾਨਿਕ ਆਬਸਟ੍ਰਕਿਟਵ ਪਲਮੋਨਰੀ ਡਿਜ਼ੀਜ਼' ਸਾਹ ਦੀ ਇਕ ਅਜਿਹੀ ਬਿਮਾਰੀ ਹੈ, ਜਿਸ ਨਾਲ ਦੁਨੀਆ ਭਰ ਵਿਚ ਸਭ ਤੋਂ ਜ਼ਿਆਦਾ ਲੋਕ ਪੀੜਤ ਹਨ। ਅਮਰੀਕਨ ਕਾਲਜ ਆਫ ਚੈਸਟ ਫਿਜ਼ੀਸ਼ੀਅਨਜ਼ ਦੇ ਮੁਖੀ ਡਾ: ਸਿਡਨੀ ਬ੍ਰਾਮੈਨ ਅਨੁਸਾਰ ਪੂਰੀ ਦੁਨੀਆ ਵਿਚ ਸਾਹ ਦੀ ਇਕ ਬਿਮਾਰੀ ਕ੍ਰਾਨਿਕ ਆਬਸਟ੍ਰਾਕਿਟਵ ਪਲਮੋਨਰੀ ਡਿਜ਼ੀਜ਼ ਤੋਂ ਲੋਕ ਪੀੜਤ ਹਨ ਪਰ ਭਾਰਤ ਵਿਚ ਜ਼ਿਆਦਾ ਲੋਕ ਪਲਮੋਨਰੀ ਟਿਊਬਰਕਲੋਸਿਸ ਤੋਂ ਪੀੜਤ ਹਨ। ਇਸ ਬਿਮਾਰੀ ਦੇ ਕਾਰਨ ਫੇਫੜਿਆਂ ਦੀ ਕਾਰਜ ਪ੍ਰਣਾਲੀ ਵਿਗੜਦੀ ਹੈ। ਫਿਰ ਸਰੀਰ ਵਿਚ ਲੋੜੀਂਦੀ ਮਾਤਰਾ ਵਿਚ ਆਕਸੀਜਨ ਨਹੀਂ ਪਹੁੰਚਦੀ, ਜਿਸ ਨਾਲ ਸਾਹ ਦੀ ਸਮੱਸਿਆ ਪੈਦਾ ਹੁੰਦੀ ਹੈ। ਥਕਾਵਟ ਛੇਤੀ ਆਉਂਦੀ ਹੈ। ਰੋਗ ਦੇ ਪ੍ਰਤੀ ਲਾਪ੍ਰਵਾਹੀ ਵਰਤਣ 'ਤੇ ਸਥਿਤੀ ਗੰਭੀਰ ਹੋ ਜਾਂਦੀ ਹੈ ਅਤੇ ਇਲਾਜ ਮੁਸ਼ਕਿਲ ਹੋ ਜਾਂਦਾ ਹੈ।
ਡਾ: ਬ੍ਰਾਮੈਨ ਅਨੁਸਾਰ ਇਸ ਦੇ ਕਈ ਕਾਰਨ ਹਨ, ਪਰ ਕਫ ਇਕ ਆਮ ਕਾਰਨ ਹੈ। ਕਫ ਤੋਂ ਛੁਟਕਾਰਾ ਪਾਉਣ ਲਈ ਰੋਗੀ ਜਦੋਂ ਡਾਕਟਰ ਦੇ ਕੋਲ ਜਾਂਦਾ ਹੈ ਤਾਂ ਡਾਕਟਰ ਕੁਝ ਐਂਟੀਬਾਇਓਟਿਕਸ ਦੇ ਦਿੰਦੇ ਹਨ, ਜਿਸ ਨੂੰ ਖਾ ਕੇ ਰੋਗੀ ਆਪਣੇ-ਆਪ ਨੂੰ ਠੀਕ ਮਹਿਸੂਸ ਕਰਦਾ ਹੈ। ਫਿਰ ਕਫ ਦੀ ਸਮੱਸਿਆ ਹੋਣ 'ਤੇ ਡਾਕਟਰ ਫਿਰ ਐਂਟੀਬਾਇਓਟਿਕਸ ਦਿੰਦੇ ਹਨ। ਵਾਰ-ਵਾਰ ਐਂਟੀਬਾਇਓਟਿਕਸ ਦਵਾਈਆਂ ਖਾਣ ਨਾਲ ਹੌਲੀ-ਹੌਲੀ ਸਾਹ ਦੀਆਂ ਸਮੱਸਿਆਵਾਂ ਪੈਦਾ ਹੋਣ ਲਗਦੀਆਂ ਹਨ, ਜਿਨ੍ਹਾਂ ਦਾ ਪਤਾ ਨਹੀਂ ਲਗਦਾ ਪਰ ਅੱਗੇ ਜਾ ਕੇ ਸਮੱਸਿਆ ਗੰਭੀਰ ਹੋ ਜਾਂਦੀ ਹੈ।
ਸਾਹ ਦੀ ਬਿਮਾਰੀ ਪੈਦਾ ਹੋਣ ਦਾ ਮੁੱਖ ਕਾਰਨ ਸਿਗਰਿਟ ਹੈ। ਸਿਗਰਿਟ ਦੇ ਧੂੰਏਂ ਦਾ ਸਾਹ ਨਲੀ 'ਤੇ ਬਹੁਤ ਬੁਰਾ ਪ੍ਰਭਾਵ ਪੈਂਦਾ ਹੈ। ਇਸ ਦਾ ਮਾੜਾ ਪ੍ਰਭਾਵ ਸਾਹ ਨਲੀ 'ਤੇ ਹੌਲੀ-ਹੌਲੀ ਪੈਂਦਾ ਹੈ, ਜਿਸ ਦਾ ਪਤਾ ਰੋਗੀ ਨੂੰ ਨਹੀਂ ਲਗਦਾ ਅਤੇ ਡਾਕਟਰ ਵੀ ਇਸ ਦਾ ਪਤਾ ਲਗਾਉਣ ਵਿਚ ਅਸਮਰੱਥ ਹੁੰਦੇ ਹਨ। ਚੁੱਲ੍ਹੇ ਅਤੇ ਸਟੋਪ ਦੇ ਧੂੰਏਂ ਦਾ ਵੀ ਹਾਨੀਕਾਰਕ ਪ੍ਰਭਾਵ ਸਾਹ ਨਲੀ 'ਤੇ ਪੈਂਦਾ ਹੈ। ਵਿਸ਼ਵ ਭਰ ਵਿਚ ਸਾਹ ਦੀਆਂ ਬਿਮਾਰੀਆਂ ਵਧ ਰਹੀਆਂ ਹਨ। ਭਾਰਤ ਵਿਚ 20 ਤੋਂ 30 ਸਾਲ ਦੀ ਉਮਰ ਦੇ ਵਿਚ ਹੀ ਲੋਕ ਸਾਹ ਦੀਆਂ ਬਿਮਾਰੀਆਂ ਦਾ ਸ਼ਿਕਾਰ ਹੋ ਰਹੇ ਹਨ। ਇਸ ਜਾਨਲੇਵਾ ਸਮੱਸਿਆ ਦਾ ਪ੍ਰਹੇਜ਼ ਕੀ ਹੈ? ਇਸ ਸਬੰਧ ਵਿਚ ਡਾ: ਬ੍ਰਾਮੈਨ ਦਾ ਕਹਿਣਾ ਹੈ ਕਿ ਆਦਮੀ ਹਾਨੀਕਾਰਕ ਤੱਤਾਂ ਤੋਂ ਪ੍ਰਹੇਜ਼ ਕਰਕੇ ਆਪਣੇ-ਆਪ ਨੂੰ ਇਸ ਜਾਨਲੇਵਾ ਰੋਗ ਤੋਂ ਬਚਾ ਸਕਦਾ ਹੈ। ਡਾਕਟਰ ਵੀ ਇਸ ਸਮੱਸਿਆ ਨੂੰ ਹੱਲ ਕਰਨ ਵਿਚ ਮਹੱਤਵਪੂਰਨ ਭੂਮਿਕਾ ਨਿਭਾਅ ਸਕਦੇ ਹਨ। ਡਾਕਟਰੀ ਵਿਗਿਆਨੀਆਂ ਅਤੇ ਡਾਕਟਰਾਂ ਨੂੰ ਪ੍ਰਸਿੱਖਿਅਤ ਕਰਨਾ ਪਵੇਗਾ ਤਾਂ ਕਿ ਉਹ ਸਾਹ ਨਾੜੀਆਂ ਵਿਚ ਮਾੜੇ ਪ੍ਰਭਾਵ ਸ਼ੁਰੂ ਹੁੰਦੇ ਹੀ ਉਸ ਦਾ ਪਤਾ ਲਗਾ ਸਕਣ ਅਤੇ ਸ਼ੁਰੂਆਤ ਵਿਚ ਹੀ ਇਲਾਜ ਕਰਕੇ ਰੋਗ ਦੂਰ ਕਰ ਸਕਣ। ਅਕਸਰ ਲੋਕ ਰੋਗ ਗੰਭੀਰ ਹੋ ਜਾਣ 'ਤੇ ਹੀ ਇਲਾਜ ਲਈ ਡਾਕਟਰ ਦੇ ਕੋਲ ਜਾਂਦੇ ਹਨ। ਅਜਿਹੀ ਹਾਲਤ ਵਿਚ ਡਾਕਟਰ ਨੂੰ ਚਾਹੀਦਾ ਹੈ ਕਿ ਰੋਗੀ ਦੀ ਮੈਡੀਕਲ ਹਿਸਟਰੀ ਤਿਆਰ ਕਰਨ ਅਤੇ ਫੇਫੜਿਆਂ ਦੀ ਜਾਂਚ ਕਰਨ। ਡਾਕਟਰ ਨੂੰ ਜਾਂਚ ਵਿਚ ਏਨਾ ਨਿਪੁੰਨ ਹੋਣਾ ਚਾਹੀਦਾ ਹੈ ਕਿ ਉਹ ਰੋਗ ਦਾ ਸ਼ੁਰੂਆਤ ਵਿਚ ਹੀ ਪਤਾ ਲਗਾ ਸਕੇ।
ਸਾਹ ਨਲੀ ਵਿਚ ਰੁਕਾਵਟ ਪੈਦਾ ਹੋ ਜਾਣ 'ਤੇ ਉਸ ਨੂੰ ਪੂਰੀ ਤਰ੍ਹਾਂ ਦੂਰ ਨਹੀਂ ਕੀਤਾ ਜਾ ਸਕਦਾ ਪਰ ਫੇਫੜਿਆਂ ਦੇ ਟੈਸਟ ਨਾਲ ਸਾਹ ਦੀਆਂ ਬਿਮਾਰੀਆਂ 'ਤੇ ਕਾਫੀ ਹੱਦ ਤੱਕ ਕਾਬੂ ਪਾਇਆ ਜਾ ਸਕਦਾ ਹੈ। ਫੇਫੜਿਆਂ ਦੀ ਜਾਂਚ ਕਰਨ ਦੀ ਮਸ਼ੀਨ ਮਹਿੰਗੀ ਨਹੀਂ ਹੈ। 30 ਹਜ਼ਾਰ ਤੋਂ ਇਕ ਲੱਖ ਦੇ ਵਿਚ ਮਸ਼ੀਨ ਦੀ ਕੀਮਤ ਹੈ। ਛਾਤੀ ਮਾਹਿਰ ਦੇ ਅਨੁਸਾਰ ਈ.ਸੀ.ਜੀ. ਮਸ਼ੀਨ ਦੀ ਤੁਲਨਾ ਵਿਚ ਇਹ ਮਸ਼ੀਨ ਜ਼ਿਆਦਾ ਖਰਚੀਲੀ ਨਹੀਂ ਹੈ।
ਲੋਕਾਂ ਵਿਚ ਜਾਗਰੂਕਤਾ ਪੈਦਾ ਕਰਕੇ ਸਾਹ ਦੀਆਂ ਬਿਮਾਰੀਆਂ ਤੋਂ ਉਨ੍ਹਾਂ ਨੂੰ ਬਚਾਇਆ ਜਾ ਸਕਦਾ ਹੈ। ਸੁਰੱਖਿਆਤਮਕ ਉਪਾਵਾਂ ਨਾਲ ਵੀ ਇਸ ਨੂੰ ਘੱਟ ਕੀਤਾ ਜਾ ਸਕਦਾ ਹੈ, ਅਜਿਹਾ ਡਾਕਟਰੀ ਵਿਗਿਆਨੀਆਂ ਦਾ ਕਹਿਣਾ ਹੈ।

ਯੂਰਿਕ ਐਸਿਡ ਨੇ ਸਰੀਰ ਨੂੰ ਜਕੜ ਰੱਖਿਆ ਹੈ

ਯੂਰਿਕ ਐਸਿਡ ਇਕ ਤਰ੍ਹਾਂ ਨਾਲ ਹੱਡੀਆਂ, ਜੋੜਾਂ ਅਤੇ ਅੰਗਾਂ ਦੇ ਵਿਚ ਜੰਮਣ ਵਾਲੇ ਐਸਿਡ ਕ੍ਰਿਸਟਲ ਹਨ। ਇਸ ਨਾਲ ਤੁਰਨ-ਫਿਰਨ ਵਿਚ ਚੁਭਣ ਅਤੇ ਜਕੜਨ ਨਾਲ ਦਰਦ ਹੁੰਦੀ ਹੈ। ਯੂਰਿਕ ਐਸਿਡ ਨੂੰ ਸਰੀਰ ਵਿਚ ਜੰਮਣ ਵਾਲੇ ਕਾਰਬਨ, ਹਾਈਡ੍ਰੋਜਨ, ਆਕਸੀਜਨ, ਨਾਈਟ੍ਰੋਜਨ ਦਾ ਸਮਾਯੋਜਕ ਮੰਨਿਆ ਜਾਂਦਾ ਹੈ। ਯੂਰਿਕ ਐਸਿਡ ਨੂੰ ਸਮੇਂ ਸਿਰ ਕਾਬੂ ਕਰਨਾ ਬਹੁਤ ਜ਼ਰੂਰੀ ਹੈ। ਯੂਰਿਕ ਐਸਿਡ ਵਧਣ 'ਤੇ ਸਮੇਂ ਸਿਰ ਇਲਾਜ ਨਾ ਕਰਨ ਨਾਲ ਜੋੜਾਂ ਵਿਚ ਦਰਦ, ਗਠੀਆ ਰੋਗ, ਗੁਰਦੇ ਦੀ ਪੱਥਰੀ, ਸ਼ੂਗਰ, ਖੂਨ ਵਿਕਾਰ ਹੋਣ ਦੀਆਂ ਸੰਭਾਵਨਾਵਾਂ ਵਧ ਜਾਂਦੀਆਂ ਹਨ। ਖੂਨ ਵਿਚ ਯੂਰਿਕ ਐਸਿਡ ਦੀ ਮਾਤਰਾ ਨੂੰ ਕਾਬੂ ਕਰਨਾ ਬਹੁਤ ਜ਼ਰੂਰੀ ਹੈ।
ਯੂਰਿਕ ਐਸਿਡ ਦੇ ਲੱਛਣ
* ਪੈਰਾਂ-ਜੋੜਾਂ ਵਿਚ ਦਰਦ ਹੋਣਾ, ਪੈਰਾਂ-ਅੱਡੀਆਂ ਵਿਚ ਦਰਦ ਰਹਿਣਾ, ਗੰਢਾਂ ਵਿਚ ਸੋਜ, ਜੋੜਾਂ ਵਿਚ ਸਵੇਰੇ-ਸ਼ਾਮ ਤੇਜ਼ ਦਰਦ ਹੋਣਾ। * ਇਕ ਜਗ੍ਹਾ ਦੇਰ ਤੱਕ ਬੈਠਣ ਤੋਂ ਬਾਅਦ ਉੱਠਣ 'ਤੇ ਪੈਰਾਂ ਦੀਆਂ ਅੱਡੀਆਂ ਵਿਚ ਬਹੁਤ ਜ਼ਿਆਦਾ ਦਰਦ ਹੋਣੀ। ਸਿਰਦਰਦ ਆਮ ਹੋ ਜਾਣੀ। * ਪੈਰਾਂ, ਜੋੜਾਂ, ਉਂਗਲੀਆਂ, ਗੰਢਾਂ ਵਿਚ ਸੋਜ ਹੋਣੀ। * ਸ਼ੂਗਰ ਦਾ ਪੱਧਰ ਵਧਣਾ।
ਇਸ ਤਰ੍ਹਾਂ ਦੀ ਕੋਈ ਵੀ ਸਮੱਸਿਆ ਹੋਣ 'ਤੇ ਤੁਰੰਤ ਯੂਰਿਕ ਐਸਿਡ ਦੀ ਜਾਂਚ ਕਰਵਾਓ।
ਕਾਬੂ ਕਰਨ ਦੇ ਤਰੀਕੇ
* ਯੂਰਿਕ ਐਸਿਡ ਵਧਣ 'ਤੇ ਹਾਈ ਫਾਈਬਰ ਵਾਲੇ ਆਹਾਰ ਖਾਓ, ਜਿਸ ਵਿਚ ਪਾਲਕ, ਬ੍ਰੋਕਲੀ, ਓਟਸ, ਦਲੀਆ, ਈਸਬਗੋਲ ਭੂਸੀ ਫਾਇਦੇਮੰਦ ਹਨ। * ਔਲੇ ਦਾ ਰਸ ਅਤੇ ਐਲੋਵੇਰਾ ਦਾ ਰਸ ਮਿਲਾ ਕੇ ਸਵੇਰੇ-ਸ਼ਾਮ ਖਾਣੇ ਤੋਂ 10 ਮਿੰਟ ਪਹਿਲਾਂ ਪੀਣ ਨਾਲ ਯੂਰਿਕ ਐਸਿਡ ਘੱਟ ਹੁੰਦਾ ਹੈ। * ਟਮਾਟਰ ਅਤੇ ਅੰਗੂਰ ਦਾ ਰਸ ਯੂਰਿਕ ਐਸਿਡ ਤੇਜ਼ੀ ਨਾਲ ਘੱਟ ਕਰਨ ਦੇ ਸਮਰੱਥ ਹੈ। * ਤਿੰਨੋ ਵੇਲੇ ਖਾਣਾ ਖਾਣ ਤੋਂ 5 ਮਿੰਟ ਬਾਅਦ ਇਕ ਚਮਚ ਅਲਸੀ ਦੇ ਬੀਜ ਨੂੰ ਬਰੀਕ ਚਬਾ ਕੇ ਖਾਣ ਨਾਲ ਭੋਜਨ ਪਾਚਣ ਕਿਰਿਆ ਵਿਚ ਯੂਰਿਕ ਐਸਿਡ ਨਹੀਂ ਬਣਦਾ। * ਇਕ ਚਮਚ ਸ਼ਹਿਦ ਅਤੇ ਇਕ ਚਮਚ ਅਸ਼ਵਗੰਧਾ ਪਾਊਡਰ ਨੂੰ ਇਕ ਕੱਪ ਗਰਮ ਦੁੱਧ ਵਿਚ ਘੋਲ ਕੇ ਪੀਣ ਨਾਲ ਯੂਰਿਕ ਐਸਿਡ ਘੱਟ ਹੁੰਦਾ ਹੈ।
* ਯੂਰਿਕ ਐਸਿਡ ਵਧਣ ਦੇ ਦੌਰਾਨ ਜੈਤੂਨ ਦੇ ਤੇਲ ਦੀ ਵਰਤੋਂ ਖਾਣਾ ਬਣਾਉਣ ਵਿਚ ਕਰੋ। ਜੈਤੂਨ ਦੇ ਤੇਲ ਵਿਚ ਵਿਟਾਮਿਨ 'ਈ' ਅਤੇ ਮਿਨਰਲਸ ਮੌਜੂਦ ਹਨ ਜੋ ਯੂਰਿਕ ਐਸਿਡ ਨੂੰ ਕਾਬੂ ਕਰਨ ਵਿਚ ਸਹਾਇਕ ਹਨ।
* ਯੂਰਿਕ ਐਸਿਡ ਵਧਣ 'ਤੇ ਖਾਣੇ ਤੋਂ 15 ਮਿੰਟ ਪਹਿਲਾਂ ਅਖਰੋਟ ਖਾਣ ਨਾਲ ਪਾਚਣ ਕਿਰਿਆ ਸ਼ੂਗਰ ਨੂੰ ਅਮੀਨੋ ਐਸਿਡ ਕਾਬੂ ਕਰਦੀ ਹੈ ਜੋ ਕਿ ਪ੍ਰੋਟੀਨ ਨੂੰ ਯੂਰਿਕ ਐਸਿਡ ਵਿਚ ਬਦਲਣ ਤੋਂ ਰੋਕਣ ਵਿਚ ਸਹਾਇਕ ਹੈ। * ਵਿਟਾਮਿਨ 'ਸੀ' ਵਾਲੀਆਂ ਚੀਜ਼ਾਂ ਖਾਣੇ ਵਿਚ ਸ਼ਾਮਿਲ ਕਰੋ। ਵਿਟਾਮਿਨ 'ਸੀ' ਯੂਰਿਕ ਐਸਿਡ ਨੂੰ ਪਿਸ਼ਾਬ ਰਾਹੀਂ ਬਾਹਰ ਕੱਢਣ ਵਿਚ ਸਹਾਇਕ ਹੈ।
* ਰੋਜ਼ 2-3 ਚੈਰੀ ਦਾ ਸੇਵਨ ਯੂਰਿਕ ਐਸਿਡ ਨੂੰ ਕਾਬੂ ਵਿਚ ਰੱਖਣ ਦੇ ਸਮਰੱਥ ਹੈ। ਚੈਰੀ ਗੰਢਾਂ ਵਿਚ ਐਸਿਡ ਕ੍ਰਿਸਟਲ ਨਹੀਂ ਜੰਮਣ ਦਿੰਦੀ।
* ਸਲਾਦ ਵਿਚ ਅੱਧਾ ਨਿੰਬੂ ਨਿਚੋੜ ਕੇ ਖਾਓ। ਦਿਨ ਵਿਚ 3 ਵਾਰ 2 ਗਿਲਾਸ ਪਾਣੀ ਵਿਚ 1 ਨਿੰਬੂ ਨਿਚੋੜ ਕੇ ਪੀਣ ਨਾਲ ਯੂਰਿਕ ਐਸਿਡ ਨੂੰ ਪਿਸ਼ਾਬ ਰਾਹੀਂ ਨਿਕਲਣ ਵਿਚ ਮਦਦ ਮਿਲਦੀ ਹੈ। ਖੰਡ, ਸ਼ਹਿਦ ਨਾ ਮਿਲਾਓ।
* ਤੇਜ਼ੀ ਨਾਲ ਯੂਰਿਕ ਐਸਿਡ ਘਟਾਉਣ ਲਈ ਰੋਜ਼ ਸਵੇਰੇ-ਸ਼ਾਮ 45-45 ਮਿੰਟ ਤੇਜ਼ ਪੈਦਲ ਤੁਰ ਕੇ ਪਸੀਨਾ ਵਹਾਓ। ਤੇਜ਼ ਪੈਦਲ ਚੱਲਣ ਨਾਲ ਐਸਿਡ ਕ੍ਰਿਸਟਲ ਜੋੜਾਂ-ਗੰਢਾਂ ਵਿਚ ਜੰਮਣ ਤੋਂ ਰੁਕਦਾ ਹੈ। ਨਾਲ ਹੀ ਖੂਨ ਸੰਚਾਰ ਨੂੰ ਤੇਜ਼ ਕਰਕੇ ਖੂਨ ਸੰਚਾਰ ਸੁਚਾਰੂ ਕਰਨ ਵਿਚ ਸਮਰੱਥ ਹੈ। ਪੈਦਲ ਚੱਲਣ ਨਾਲ ਸਰੀਰ ਵਿਚ ਹੋਣ ਵਾਲੀਆਂ ਸੈਂਕੜੇ ਬਿਮਾਰੀਆਂ ਤੋਂ ਆਸਾਨੀ ਨਾਲ ਛੁਟਕਾਰਾ ਪਾਇਆ ਜਾ ਸਕਦਾ ਹੈ। ਤੇਜ਼ ਪੈਦਲ ਚੱਲਣਾ ਐਸਿਡ ਨੂੰ ਛੇਤੀ ਕਾਬੂ ਕਰਨ ਵਿਚ ਸਮਰੱਥ ਪਾਇਆ ਗਿਆ ਹੈ।
* ਬਾਹਰ ਦਾ ਖਾਣਾ ਪੂਰੀ ਤਰ੍ਹਾਂ ਬੰਦ ਕਰ ਦਿਓ। ਘਰ ਦਾ ਬਣਿਆ ਸਾਤਵਿਕ ਤਾਜ਼ਾ ਭੋਜਨ ਖਾਓ। ਖਾਣੇ ਵਿਚ ਤਾਜ਼ੇ ਫਲ, ਹਰੀਆਂ ਸਬਜ਼ੀਆਂ, ਸਲਾਦ, ਫਾਈਬਰ ਵਾਲੇ ਸੰਤੁਲਿਤ ਪੌਸ਼ਟਿਕ ਆਹਾਰ ਲਓ।
* ਰੋਜ਼ ਯੋਗ ਆਸਣ, ਕਸਰਤ ਕਰੋ। ਯੋਗ ਆਸਣ ਅਤੇ ਕਸਰਤ ਯੂਰਿਕ ਐਸਿਡ ਨੂੰ ਘਟਾਉਣ ਵਿਚ ਮਦਦਗਾਰ ਹੈ। ਨਾਲ ਹੀ ਯੋਗ ਆਸਣ, ਕਸਰਤ ਕਰਨ ਨਾਲ ਮੋਟਾਪਾ ਤੇ ਭਾਰ ਕਾਬੂ ਵਿਚ ਰਹੇਗਾ। * ਜ਼ਿਆਦਾ ਸੋਜ ਅਤੇ ਦਰਦ ਤੋਂ ਆਰਾਮ ਲਈ ਗਰਮ ਪਾਣੀ ਵਿਚ ਸੂਤੀ ਕੱਪੜੇ ਭਿਉਂ ਕੇ ਸੇਕ ਦਿਓ। * ਯੂਰਿਕ ਐਸਿਡ ਸਮੱਸਿਆ ਸ਼ੁਰੂ ਹੋਣ 'ਤੇ ਤੁਰੰਤ ਜਾਂਚ, ਇਲਾਜ ਕਰਵਾਓ। ਯੂਰਿਕ ਐਸਿਡ ਜ਼ਿਆਦਾ ਦਿਨਾਂ ਤੱਕ ਰਹਿਣ ਨਾਲ ਹੋਰ ਰੋਗ ਆਸਾਨੀ ਨਾਲ ਘਰ ਬਣਾ ਲੈਂਦੇ ਹਨ।
ਯੂਰਿਕ ਐਸਿਡ ਵਧਣ 'ਤੇ ਖਾਣ-ਪੀਣ
* ਯੂਰਿਕ ਐਸਿਡ ਵਧਣ 'ਤੇ ਮੀਟ-ਮੱਛੀ ਦਾ ਸੇਵਨ ਤੁਰੰਤ ਬੰਦ ਕਰ ਦਿਓ। ਮਾਸਾਹਾਰੀ ਖਾਣੇ ਨਾਲ ਯੂਰਿਕ ਐਸਿਡ ਤੇਜ਼ੀ ਨਾਲ ਵਧਦਾ ਹੈ। ਦਵਾਈਆਂ ਵੀ ਅਸਰ ਘੱਟ ਕਰਦੀਆਂ ਹਨ। * ਯੂਰਿਕ ਐਸਿਡ ਵਧਣ 'ਤੇ ਆਂਡੇ ਦਾ ਸੇਵਨ ਪੂਰੀ ਤਰ੍ਹਾਂ ਬੰਦ ਕਰ ਦਿਓ। ਆਂਡਾ ਰਿਚ ਪ੍ਰੋਟੀਨ ਚਰਬੀ ਨਾਲ ਭਰਪੂਰ ਹੈ ਜੋ ਕਿ ਯੂਰਿਕ ਐਸਿਡ ਨੂੰ ਵਧਾਉਂਦਾ ਹੈ। * ਬੇਕਰੀ ਨਾਲ ਬਣੀ ਖਾਧ ਸਮੱਗਰੀ ਬੰਦ ਕਰ ਦਿਓ। ਬੇਕਰੀ ਫੂਡ ਵਿਚ ਪ੍ਰਿਜ਼ਰਵੇਟਿਵ ਮਿਲਿਆ ਹੁੰਦਾ ਹੈ ਜਿਵੇਂ ਕਿ ਪੇਸਟਰੀ, ਕੇਸ, ਪੈਨਕੇਕ, ਬੰਨ, ਕ੍ਰੀਮ ਅਤੇ ਬਿਸਕੁਟ ਆਦਿ। * ਯੂਰਿਕ ਐਸਿਡ ਵਧਣ 'ਤੇ ਤੁਰੰਤ ਜੰਕ-ਫੂਡ, ਫਾਸਟ ਫੂਡ, ਠੰਢਾ ਸੋਢਾ, ਤਲੀਆਂ-ਭੁੰਨੀਆਂ ਚੀਜ਼ਾਂ ਬੰਦ ਕਰ ਦਿਓ। ਜੰਕ ਫੂਡ, ਫਾਸਟ ਫੂਡ, ਸੋਢਾ, ਠੰਢੇ ਪੀਣ ਵਾਲੇ ਪਦਾਰਥ ਪਾਚਣ ਕਿਰਿਆ ਨੂੰ ਹੋਰ ਵੀ ਵਿਗਾੜਦੇ ਹਨ, ਜਿਸ ਕਰਕੇ ਐਸਿਡ ਤੇਜ਼ੀ ਨਾਲ ਵਧਦਾ ਹੈ। * ਚੌਲ, ਆਲੂ, ਤਿੱਖੇ ਮਿਰਚ-ਮਸਾਲੇ ਵਾਲੇ, ਚਟਪਟੇ, ਤਲੇ ਪਕਵਾਨ ਪੂਰੀ ਤਰ੍ਹਾਂ ਬੰਦ ਕਰ ਦਿਓ। ਡੱਬਾਬੰਦ ਖਾਣ-ਪੀਣ ਦੀਆਂ ਚੀਜ਼ਾਂ ਵਿਚ ਭੰਡਾਰਨ ਦੇ ਸਮੇਂ ਰਸਾਇਣ ਮਿਲਾਇਆ ਜਾਂਦਾ ਹੈ। ਹਜ਼ਾਰਾਂ ਤਰ੍ਹਾਂ ਦੇ ਬੰਦ ਡੱਬਿਆਂ ਅਤੇ ਪੈਕਟਾਂ ਦੀ ਖਾਧ ਸਮੱਗਰੀ ਯੂਰਿਕ ਐਸਿਡ ਤੇਜ਼ੀ ਨਾਲ ਵਧਾਉਣ ਵਿਚ ਸਹਾਇਕ ਹੈ। * ਅਲਕੋਹਲ ਦਾ ਸੇਵਨ ਪੂਰੀ ਤਰ੍ਹਾਂ ਬੰਦ ਕਰ ਦਿਓ। ਬੀਅਰ ਅਤੇ ਸ਼ਰਾਬ ਯੂਰਿਕ ਐਸਿਡ ਨੂੰ ਤੇਜ਼ੀ ਨਾਲ ਵਧਾਉਂਦੀ ਹੈ। ਖੋਜ ਵਿਚ ਪਾਇਆ ਗਿਆ ਹੈ ਕਿ ਜੋ ਲੋਕ ਲਗਾਤਾਰ ਬੀਅਰ ਜਾਂ ਸ਼ਰਾਬ ਦਾ ਸੇਵਨ ਕਰਦੇ ਹਨ, 70 ਫੀਸਦੀ ਉਨ੍ਹਾਂ ਨੂੰ ਸਭ ਤੋਂ ਜ਼ਿਆਦਾ ਯੂਰਿਕ ਐਸਿਡ ਦੀ ਸ਼ਿਕਾਇਤ ਹੁੰਦੀ ਹੈ। ਯੂਰਿਕ ਐਸਿਡ ਵਧਣ 'ਤੇ ਤੁਰੰਤ ਬੀਅਰ, ਸ਼ਰਾਬ ਪੀਣੀ ਬੰਦ ਕਰ ਦਿਓ। ਬੀਅਰ ਅਤੇ ਸ਼ਰਾਬ ਤੰਦਰੁਸਤ ਵਿਅਕਤੀ ਨੂੰ ਵੀ ਰੋਗੀ ਬਣਾ ਦਿੰਦੀ ਹੈ। ਬੀਅਰ, ਸ਼ਰਾਬ ਤੇ ਨਸ਼ੀਲੀਆਂ ਚੀਜ਼ਾਂ ਸਿਹਤ ਲਈ ਹਾਨੀਕਾਰਕ ਹਨ।

ਪ੍ਰਦੂਸ਼ਣ ਤੋਂ ਗਲੇ ਨੂੰ ਬਚਾ ਕੇ ਰੱਖੋ

ਅਜੋਕੇ ਸ਼ਹਿਰੀ ਜੀਵਨ ਵਿਚ ਪ੍ਰਦੂਸ਼ਣ ਦਾ ਕਹਿਰ ਵਧਦਾ ਹੀ ਜਾ ਰਿਹਾ ਹੈ। ਅਜਿਹੇ ਵਿਚ ਉਸ ਦਾ ਸਭ ਤੋਂ ਵੱਧ ਪ੍ਰਭਾਵ ਸਾਡੇ ਗਲੇ 'ਤੇ ਪੈਂਦਾ ਹੈ। ਗਲਾ ਸਰੀਰ ਦਾ ਅਜਿਹਾ ਅੰਗ ਹੈ ਜੋ ਬਾਹਰੀ ਤੱਤਾਂ ਦੇ ਸੰਪਰਕ ਵਿਚ ਸਭ ਤੋਂ ਵੱਧ ਆਉਂਦਾ ਹੈ।
ਅਸੀਂ ਜੋ ਵੀ ਖਾਂਦੇ ਹਾਂ, ਉਹ ਸਾਡੇ ਗਲੇ ਰਾਹੀਂ ਹੋ ਕੇ ਭੋਜਨ ਨਲੀ ਅਤੇ ਪੇਟ ਵਿਚ ਜਾਂਦਾ ਹੈ। ਅਸੀਂ ਜੋ ਵੀ ਪੀਂਦੇ ਹਾਂ, ਉਹ ਵੀ ਸਾਡੇ ਗਲੇ ਰਾਹੀਂ ਹੋ ਕੇ ਹੀ ਜਾਂਦਾ ਹੈ। ਇਥੋਂ ਤੱਕ ਕਿ ਸਾਡੇ ਸਾਹ ਵੀ ਗਲੇ ਰਾਹੀਂ ਹੋ ਕੇ ਫੇਫੜਿਆਂ ਤੱਕ ਜਾਂਦੇ ਹਨ। ਅਜਿਹੇ ਵਿਚ ਕਿਸੇ ਵੀ ਤਰ੍ਹਾਂ ਦੇ ਪ੍ਰਦੂਸ਼ਣ ਦਾ ਸਭ ਤੋਂ ਵੱਧ ਅਸਰ ਸਾਡੇ ਗਲੇ 'ਤੇ ਪੈਂਦਾ ਹੈ, ਜਿਸ ਨਾਲ ਆਮ ਤੌਰ 'ਤੇ ਨਜ਼ਲਾ, ਜ਼ੁਕਾਮ ਅਤੇ ਗਲੇ ਦੀ ਖਰਾਸ਼ ਤਾਂ ਹੋ ਜਾਂਦੀ ਹੈ, ਹੋਰ ਵੀ ਕਈ ਬਿਮਾਰੀਆਂ ਹੋ ਜਾਂਦੀਆਂ ਹਨ। ਆਓ ਦੇਖੀਏ ਇਸ ਪ੍ਰਦੂਸ਼ਣ ਭਰੇ ਵਾਤਾਵਰਨ ਵਿਚ ਅਸੀਂ ਆਪਣੇ ਗਲੇ ਨੂੰ ਕਿਵੇਂ ਬਚਾਅ ਕੇ ਰੱਖ ਸਕਦੇ ਹਾਂ-
* ਪਾਣੀ ਦਾ ਸੇਵਨ ਵੱਧ ਤੋਂ ਵੱਧ ਕਰੋ। ਘੱਟ ਤੋਂ ਘੱਟ 2 ਲਿਟਰ ਪਾਣੀ ਜ਼ਰੂਰ ਹਰ ਰੋਜ਼ ਪੀਓ।
* ਆਪਣੇ ਭੋਜਨ ਵਿਚ ਵਿਟਾਮਿਨ 'ਸੀ' ਦੀ ਮਾਤਰਾ ਵਧਾ ਦਿਓ।
* ਸਰਦੀ ਦੇ ਮੌਸਮ ਵਿਚ ਸਵੇਰ ਦੀ ਚਾਹ ਅਦਰਕ ਅਤੇ ਤੁਲਸੀ ਦੇ ਪੱਤਿਆਂ ਵਾਲੀ ਪੀਓ। ਹਰਬਲ ਚਾਹ ਵੀ ਗਲੇ ਨੂੰ ਆਰਾਮ ਪਹੁੰਚਾਉਂਦੀ ਹੈ। ਕੋਸੇ ਪਾਣੀ ਵਿਚ ਨਿੰਬੂ, ਸ਼ਹਿਦ ਮਿਲਾ ਕੇ ਲੈਣ ਨਾਲ ਗਲੇ ਨੂੰ ਆਰਾਮ ਮਿਲਦਾ ਹੈ।
* ਗਲੇ ਦੀ ਰਾਹਤ ਲਈ ਸਵੇਰੇ-ਸ਼ਾਮ ਲੂਣ ਮਿਲੇ ਹੋਏ ਗਰਮ ਪਾਣੀ ਨਾਲ ਗਰਾਰੇ ਕਰੋ। ਹੋ ਸਕੇ ਤਾਂ ਚਾਹ ਪੀਂਦੇ ਸਮੇਂ ਚੁਟਕੀ ਕੁ ਲੂਣ ਉਸ ਵਿਚ ਮਿਲਾ ਕੇ ਪੀਓ।
* ਦਵਾਈ ਦੀਆਂ ਚੂਸਣ ਵਾਲੀਆਂ ਗੋਲੀਆਂ ਨਾਲ ਵੀ ਗਲੇ ਦੀ ਖਰਾਸ਼ ਘੱਟ ਹੁੰਦੀ ਹੈ।
* ਬਾਹਰ ਨਿਕਲਦੇ ਸਮੇਂ ਮਲਮਲ ਦੇ ਰੁਮਾਲ ਨਾਲ ਮੂੰਹ ਢਕ ਕੇ ਨਿਕਲੋ।
* ਬਾਹਰੋਂ ਘੁੰਮ ਕੇ ਘਰ ਵਿਚ ਪ੍ਰਵੇਸ਼ ਕਰਦੇ ਹੀ ਪਾਣੀ ਨਾ ਪੀਓ। ਥੋੜ੍ਹਾ ਰੁਕ ਕੇ ਪਾਣੀ ਪੀਓ।
* ਗਰਮ ਭੋਜਨ ਦੇ ਨਾਲ ਠੰਢੇ ਪਾਣੀ ਦਾ ਸੇਵਨ ਨਾ ਕਰੋ। ਹੋ ਸਕੇ ਤਾਂ ਘੱਟ ਤੋਂ ਘੱਟ ਅੱਧਾ ਘੰਟਾ ਰੁਕ ਕੇ ਪਾਣੀ ਪੀਓ।
* ਰਾਤ ਨੂੰ ਭਾਫ ਲੈਣ ਨਾਲ ਵੀ ਗਲੇ ਨੂੰ ਆਰਾਮ ਮਿਲਦਾ ਹੈ।
* ਫਾਸਟ ਫੂਡ, ਚਟਣੀ, ਟਿੰਡ ਜੂਸ ਅਤੇ ਸਾਫਟ ਡ੍ਰਿੰਕਸ ਦਾ ਸੇਵਨ ਮਜਬੂਰੀ ਵਿਚ ਹੀ ਕਰੋ।

ਤੰਦਰੁਸਤੀ ਦਾ ਰਹੱਸ ਹੈ ਮਧੁਰ ਮੁਸਕਾਨ

ਰੱਬ ਵਲੋਂ ਦਿੱਤੀ ਹੋਈ ਬਹੁਤ ਵੱਡੀ ਦਾਤ ਹੈ ਮੁਸਕਾਨ। ਚਿਹਰਾ ਦਿਲ ਦਾ ਦਰਪਣ ਹੁੰਦਾ ਹੈ। ਜੋ ਸਾਡੇ ਦਿਮਾਗ ਵਿਚ ਹੁੰਦਾ ਹੈ, ਉਸ ਦਾ ਪ੍ਰਭਾਵ ਚਲ-ਚਿੱਤਰ ਵਾਂਗ ਚਿਹਰੇ 'ਤੇ ਦ੍ਰਿਸ਼ਟੀਗੋਚਰ ਹੋ ਜਾਂਦਾ ਹੈ। ਦੇਖਣ ਵਾਲਾ ਪਹਿਚਾਣ ਜਾਂਦਾ ਹੈ ਕਿ ਵਿਅਕਤੀ ਬਿਮਾਰ ਹੈ ਜਾਂ ਖੁਸ਼। ਸ਼ਾਸਤਰ ਕਹਿੰਦੇ ਹਨ ਕਿ ਸਾਡੇ ਸਰੀਰ ਦੀਆਂ 80 ਫੀਸਦੀ ਬਿਮਾਰੀਆਂ ਸਰੀਰਕ ਨਹੀਂ, ਮਾਨਸਿਕ ਹੁੰਦੀਆਂ ਹਨ, ਜਿਨ੍ਹਾਂ ਦਾ ਸਿੱਧਾ ਪ੍ਰਭਾਵ ਸਰੀਰ 'ਤੇ ਹੁੰਦਾ ਹੈ।
ਮਨੁੱਖ ਲਈ ਮਨਚਾਹੇ ਹਾਲਾਤ ਕਦੇ ਨਹੀਂ ਹੁੰਦੀ, ਇਸ ਲਈ ਉਲਟ ਹਾਲਾਤ ਵਿਚ ਵੀ ਆਪਣੇ-ਆਪ ਨੂੰ ਖੁਸ਼ ਰੱਖਣਾ ਇਕ ਕਲਾ ਹੈ।
ਜੀਵਨ ਅਤੇ ਕੁਦਰਤ ਦਾ ਘਟਨਾਕ੍ਰਮ ਚਲਦਾ ਰਹਿੰਦਾ ਹੈ। ਤੁਸੀਂ ਚਿੰਤਾ ਜਾਂ ਫਿਕਰ ਨਾਲ ਕੁਝ ਨਹੀਂ ਬਦਲ ਸਕਦੇ, ਇਸ ਲਈ ਖੁਸ਼ ਅਤੇ ਤੰਦਰੁਸਤ ਰਹਿਣਾ ਸੁਭਾਅ ਬਣਾ ਲਓ। ਗੱਲ-ਗੱਲ 'ਤੇ ਗੁੱਸੇ ਵਿਚ ਆਉਣਾ ਤੁਹਾਡੇ ਚਿਹਰੇ ਨੂੰ ਮੁਰਝਾ ਦਿੰਦਾ ਹੈ, ਇਸ ਲਈ ਗੁੱਸੇ ਤੋਂ ਬਚੋ। ਖਿਝ-ਖਿਝ ਕੇ ਵਿਅੰਗਾਤਮਕ ਭਾਵ ਨਾਲ ਕਟਾਕਸ਼ ਨਾ ਕਰੋ। ਤੁਹਾਡੀ ਆਪਣੀ ਮਾਨਸਿਕ ਅਵਸਥਾ ਵੀ ਪ੍ਰਭਾਵਿਤ ਹੋ ਸਕਦੀ ਹੈ। ਮਿੱਤਰ ਮੰਡਲੀ ਅਤੇ ਘਰ ਵਿਚ ਲੜਾਈ ਦਾ ਮਾਹੌਲ ਨਾ ਬਣਾਓ। ਇਸ ਨਾਲ ਤੁਹਾਡੇ ਪਰਿਵਾਰ ਦੀ ਸਰੀਰਕ ਹਾਲਤ 'ਤੇ ਅਸਰ ਪੈਂਦਾ ਹੈ। ਦੂਜਿਆਂ ਦੀ ਤਰੱਕੀ ਤੋਂ ਖੁਸ਼ ਰਹੋ। ਜਲੋ, ਭੁੱਜੋ, ਕੁੜ੍ਹੋ ਨਾ, ਆਪਣਾ ਹੀ ਨੁਕਸਾਨ ਕਰੋਗੇ।
ਮਨ ਅਤੇ ਸਰੀਰ ਨੂੰ ਤੰਦਰੁਸਤ ਰੱਖਣ ਦਾ ਸਿਰਫ ਇਕ ਸੌਖਾ ਅਤੇ ਸਸਤਾ ਉਪਾਅ ਹੈ ਕਿ ਖੁਦ ਅਤੇ ਦੂਜਿਆਂ ਨੂੰ ਖੁਸ਼ ਰੱਖੋ। ਕਠਿਨ ਹਾਲਾਤ ਨੂੰ ਵੀ ਸਹਿਜ ਭਾਵ ਨਾਲ ਲਓ। ਦਿਮਾਗ ਨੂੰ ਸੰਤੁਲਿਤ ਰੱਖੋ। ਖੁਸ਼ੀ ਦੀ ਸੰਵੇਦਨਾ ਸਦਾ ਸਰੀਰ ਵਿਚ ਵਗਦੀ ਰਹੇ, ਇਸ ਵਾਸਤੇ ਸਾਨੂੰ ਆਪਣੇ ਸੁਭਾਅ ਵਿਚ ਤਬਦੀਲੀ ਕਰਨੀ ਪਵੇਗੀ। ਤੰਦਰੁਸਤੀ, ਖੁਸ਼ੀ ਅਤੇ ਹੱਸਦੇ ਰਹਿਣ ਦਾ ਚੋਲੀ-ਦਾਮਨ ਵਾਲਾ ਸਾਥ ਹੈ। ਤੰਦਰੁਸਤ ਅਤੇ ਖੁਸ਼ ਵਿਅਕਤੀ ਦੀ ਬੁੱਧੀ ਵੀ ਪ੍ਰਪੱਕ ਹੁੰਦੀ ਹੈ। ਚਿਹਰਾ ਗੁਲਾਬ ਦੀ ਤਰ੍ਹਾਂ ਖਿੜਿਆ ਰਹਿੰਦਾ ਹੈ। ਹਰ ਵਿਅਕਤੀ ਉਸ ਨੂੰ ਮਿਲ ਕੇ ਖੁਸ਼ ਹੁੰਦਾ ਹੈ। ਉਸ ਦੀ ਹਰ ਕੋਸ਼ਿਕਾ ਵਿਚ ਪੂਰਨ ਖੂਨ ਪ੍ਰਵਾਹਿਤ ਹੁੰਦਾ ਹੈ। ਮੁਸਕੁਰਾਉਣ ਲਈ ਬੁੱਲ੍ਹਾਂ ਦਾ ਫੜੜਾਉਣਾ ਹੀ ਕਾਫ਼ੀ ਹੈ। ਇਹ ਹਸਮੁੱਖ ਵਿਅਕਤੀ ਇਕ ਫਵਾਰਾ ਹੁੰਦਾ ਹੈ, ਜਿਸ ਦੇ ਠੰਢੇ ਛਿੱਟੇ ਸਭ ਨੂੰ ਪ੍ਰਫੁੱਲਤ ਕਰਦੇ ਹਨ। ਹਸਮੁੱਖ ਸੁਭਾਅ ਲੰਮੀ ਉਮਰ ਦਾ ਵਧੀਆ ਸਾਧਨ ਹੈ। ਜੇ ਤੁਸੀਂ ਦੁੱਖ ਵਿਚ ਵੀ ਸੁਖ ਦਾ ਅਹਿਸਾਸ ਚਾਹੁੰਦੇ ਹੋ ਤਾਂ ਹੱਸਮੁੱਖ ਬਣੋ। ਮੁਸਕੁਰਾਉਂਦਾ ਚਿਹਰਾ ਸਭ ਨੂੰ ਲੁਭਾਉਂਦਾ ਹੈ।
ਹਸਮੁੱਖ ਵਿਅਕਤੀ ਕਦੇ ਕਿਸੇ ਦੀ ਗੱਲ ਦਾ ਬੁਰਾ ਨਹੀਂ ਮੰਨਦਾ। ਗੰਭੀਰ ਤੋਂ ਗੰਭੀਰ ਗੱਲ ਨੂੰ ਹੱਸ ਕੇ ਟਾਲ ਜਾਂਦਾ ਹੈ, ਇਸ ਲਈ ਉਹ ਕਈ ਮੁਸੀਬਤਾਂ ਨੂੰ ਟਾਲ ਜਾਂਦਾ ਹੈ। ਖੁਸ਼ ਰਹਿਣ ਨਾਲ ਜੀਵਨ ਦੇ ਸਭ ਦੁੱਖ ਦੂਰ ਹੋ ਜਾਂਦੇ ਹਨ। ਆਪਣੇ ਕੰਮ ਵਿਚ ਰੁੱਝੇ ਰਹਿਣ ਨਾਲ ਬੜਾ ਆਨੰਦ ਮਿਲਦਾ ਹੈ। ਜਿਸ ਦਾ ਮਨ ਖੁਸ਼ ਰਹਿੰਦਾ ਹੈ, ਉਸ ਦਾ ਵਿਵਹਾਰ ਵੀ ਉਦਾਰ ਹੋ ਜਾਂਦਾ ਹੈ। ਖੁਸ਼ ਰਹਿਣ ਵਾਲੇ ਦਾ ਜੀਵਨ ਦੂਜਿਆਂ ਦੇ ਮੁਕਾਬਲੇ ਜ਼ਿਆਦਾ ਹੁੰਦਾ ਹੈ। ਖੁਸ਼ੀ ਨੂੰ ਅਸੀਂ ਜਿੰਨਾ ਲੁਟਾਵਾਂਗੇ, ਉਹ ਓਨੀ ਜ਼ਿਆਦਾ ਸਾਡੇ ਕੋਲ ਆਵੇਗੀ।
ਵਿਗਿਆਨੀਆਂ ਦਾ ਕਹਿਣਾ ਹੈ ਕਿ ਠਹਾਕਾ ਲਗਾ ਕੇ ਹੱਸਣ ਨਾਲ ਫੇਫੜਿਆਂ ਵਿਚ ਜ਼ਿਆਦਾ ਆਕਸੀਜਨ ਜਾਂਦੀ ਹੈ। ਖੂਨ ਸ਼ੁੱਧ ਹੁੰਦਾ ਹੈ। ਵਾਤਾਵਰਨ ਹਲਕਾ-ਫੁਲਕਾ ਰਹਿੰਦਾ ਹੈ। ਤੁਹਾਡੇ ਜਾਣ-ਪਛਾਣ ਵਾਲੇ ਤੁਹਾਡੇ ਕੋਲ ਬੈਠਣਾ ਪਸੰਦ ਕਰਦੇ ਹਨ ਅਤੇ ਆਨੰਦ ਮਹਿਸੂਸ ਕਰਦੇ ਹਨ। ਪੱਥਰੀ, ਕੈਂਸਰ, ਅਵਸਾਦ, ਉਦਾਸੀ ਤੁਹਾਡੇ ਤੋਂ ਦੂਰ ਰਹਿੰਦੇ ਹਨ। ਇਹ ਕਈ ਰੋਗਾਂ ਨੂੰ ਦੂਰ ਕਰ ਦਿੰਦੀ ਹੈ।
ਤੁਸੀਂ ਵੀ ਗ਼ਮ, ਦੁੱਖ, ਮੁਸੀਬਤ ਅਤੇ ਕੰਮ ਦਾ ਬੋਝ ਛੱਡੋ। ਖੁਦ ਵੀ ਖੁਸ਼ ਰਹੋ, ਪਰਿਵਾਰ ਅਤੇ ਮਿੱਤਰਾਂ ਨੂੰ ਵੀ ਖੁਸ਼ ਰੱਖੋ। ਜੀਵਨ ਵਿਚ ਹੱਸਦੇ-ਖੇਡਦੇ ਰਹਿਣ ਦੇ ਨਵੇਂ ਸਾਧਨ, ਢੰਗ ਅਤੇ ਬਹਾਨੇ ਖੋਜਦੇ ਰਹੋ ਅਤੇ ਤੰਦਰੁਸਤੀ ਰਤਨ ਪਾਓ।
ਹੱਸਦੇ ਹੋਏ ਲੋਕਾਂ ਤੋਂ ਬਿਮਾਰੀ ਵੀ ਸ਼ਰਮਾ ਕੇ ਵਾਪਸ ਮੁੜ ਜਾਂਦੀ ਹੈ। ਮਧੁਰ ਮੁਸਕਾਨ, ਖਾਸ ਕਰਕੇ ਨਾਰੀ ਦਾ ਗਹਿਣਾ ਮੰਨਿਆ ਜਾਂਦਾ ਹੈ ਜੋ ਸਭ ਨੂੰ ਚੰਗੀ ਲਗਦੀ ਹੈ। ਆਓ, ਮੁਸਕੁਰਾਉਣਾ ਸਿੱਖੀਏ ਅਤੇ ਫੁੱਲਾਂ ਦੀ ਤਰ੍ਹਾਂ ਚਾਰੋ ਪਾਸੇ ਮਹਿਕ ਫੈਲਾਈਏ ਅਤੇ ਦੇਸ਼ ਨੂੰ ਖੁਸ਼ਹਾਲ ਬਣਾਈਏ। ਸੱਚ ਹੀ ਕਿਹਾ ਹੈ, 'ਇਕ ਮਧੁਰ ਮੁਸਕਾਨ ਵਿਚ ਹੈ ਨਾਰੀ ਦੀ ਸ਼ਾਨ।'
**

ਸਿਹਤ ਖ਼ਬਰਨਾਮਾ

ਸੰਤਰਾ ਬਚਾਉਂਦਾ ਹੈ ਕੋਲੋਨ ਕੈਂਸਰ ਤੋਂ

ਅਮਰੀਕਨ ਇੰਸਟੀਚਿਊਟ ਆਫ ਕੈਂਸਰ ਰਿਸਰਚ ਦੇ ਮਾਹਿਰਾਂ ਦੁਆਰਾ ਪਸ਼ੂਆਂ 'ਤੇ ਕੀਤੀ ਗਈ ਇਕ ਖੋਜ ਅਨੁਸਾਰ ਨਿਯਮਤ ਸੰਤਰੇ ਦੇ ਰਸ ਦੇ ਸੇਵਨ ਨਾਲ ਕੋਲੋਨ ਕੈਂਸਰ ਦੀ ਸੰਭਾਵਨਾ ਘੱਟ ਹੋਈ। ਸੰਤਰੇ ਵਿਚ ਬੀਟਾ ਕ੍ਰਾਯਪਟੋਇਕਸਾਨਥਿਨ ਪਾਇਆ ਜਾਂਦਾ ਹੈ, ਜੋ ਕਈ ਤਰ੍ਹਾਂ ਦੇ ਕੈਂਸਰ ਦੀ ਸੰਭਾਵਨਾ ਨੂੰ ਘੱਟ ਕਰਦਾ ਹੈ। ਸੰਤਰੇ ਵਿਚ ਪਾਏ ਜਾਣ ਵਾਲੇ ਕੇਰੋਟਿਨਾਇਡਸ ਲਿਊਟਿਨ ਅਤੇ ਜਿਯਾਇਕਜਾਨਧੀਨ ਅੱਖਾਂ ਦੀ ਤੰਦਰੁਸਤੀ ਲਈ ਬਹੁਤ ਚੰਗੇ ਹਨ। ਸੰਤਰੇ ਦੀਆਂ ਛਿੱਲਾਂ ਵਿਚ ਵੀ ਕਈ ਲਾਭਕਾਰੀ ਤੱਤ ਜਿਵੇਂ ਡੀ ਲਾਈਮੋਨੇਨਨ ਅਤੇ ਕੋਯਮੇਰਿੰਸ ਪਾਏ ਜਾਂਦੇ ਹਨ ਜੋ ਕੈਂਸਰ ਦੀ ਸੰਭਾਵਨਾ ਨੂੰ ਘੱਟ ਕਰਨ ਦੇ ਨਾਲ-ਨਾਲ ਖੂਨ ਦੇ ਥੱਕੇ ਜਮਾਉਣ ਦੀ ਪ੍ਰਕਿਰਿਆ ਨੂੰ ਵੀ ਘੱਟ ਕਰਦੇ ਹਨ। ਏਨੇ ਸਾਰੇ ਲਾਭਦਾਇਕ ਤੱਤ ਜੇ ਤੁਸੀਂ ਵੀ ਪਾਉਣੇ ਚਾਹੁੰਦੇ ਹੋ ਤਾਂ ਅੱਜ ਤੋਂ ਹੀ ਸੰਤਰੇ ਨੂੰ ਆਪਣੇ ਭੋਜਨ ਦਾ ਅੰਗ ਬਣਾਓ।
ਸਮੇਂ ਤੋਂ ਪਹਿਲਾਂ ਝੁਰੜੀਆਂ ਦਾ ਕਾਰਨ

ਮਾਹਿਰਾਂ ਅਨੁਸਾਰ ਫਲਾਂ, ਸਬਜ਼ੀਆਂ ਅਤੇ ਅਸੰਤ੍ਰਪਤ ਚਰਬੀ ਦਾ ਸੇਵਨ ਝੁਰੜੀਆਂ ਘੱਟ ਕਰਦਾ ਹੈ। ਹਾਲ ਹੀ ਵਿਚ ਕੀਤੀ ਗਈ ਇਕ ਖੋਜ ਵਿਚ ਮਾਹਿਰਾਂ ਨੇ ਭੋਜਨ ਦਾ ਚਮੜੀ 'ਤੇ ਪ੍ਰਭਾਵ ਜਾਨਣ ਦੀ ਕੋਸ਼ਿਸ਼ ਕੀਤੀ ਅਤੇ ਪਾਇਆ ਕਿ ਸਾਂਵਲੀ ਅਤੇ ਗੋਰੀ ਚਮੜੀ ਵਾਲੇ ਵਿਅਕਤੀ ਜੋ ਹਰੀਆਂ ਸਬਜ਼ੀਆਂ, ਬੀਨਸ, ਜੈਤੂਨ ਦੇ ਤੇਲ, ਗਿਰੀਦਾਰ ਫਲ ਅਤੇ ਅਨਾਜ ਦਾ ਸੇਵਨ ਕਰਦੇ ਹਨ, ਉਨ੍ਹਾਂ ਦੀ ਚਮੜੀ ਜ਼ਿਆਦਾ ਸਮੇਂ ਤੱਕ ਜਵਾਨ ਰਹਿੰਦੀ ਹੈ ਅਤੇ ਝੁਰੜੀਆਂ ਦਾ ਸ਼ਿਕਾਰ ਨਹੀਂ ਹੁੰਦੀ।
ਅਮਰੀਕਨ ਕਾਲਜ ਆਫ ਨਿਊਟ੍ਰੀਸ਼ਨ ਦੁਆਰਾ ਪ੍ਰਕਾਸ਼ਿਤ ਮੋਨੇਸ਼ ਯੂਨੀਵਰਸਿਟੀ ਦੇ ਮਾਹਿਰ ਡਾ: ਮਾਰਕ ਦੁਆਰਾ ਕੀਤੀ ਗਈ ਇਕ ਖੋਜ ਅਨੁਸਾਰ ਉਮਰ ਵਧਣਾ ਅਤੇ ਸਿਗਰਟਨੋਸ਼ੀ ਜਿਥੇ ਝੁਰੜੀਆਂ ਦੇ ਕਾਰਨ ਹਨ, ਉਥੇ ਸਾਡਾ ਭੋਜਨ ਵੀ ਚਮੜੀ 'ਤੇ ਪ੍ਰਭਾਵ ਪਾਉਂਦਾ ਹੈ ਅਤੇ ਵਿਟਾਮਿਨ 'ਏ', 'ਸੀ', 'ਈ' ਅਤੇ ਐਂਟੀਆਕਸੀਡੈਂਟ ਝੁਰੜੀਆਂ ਰੋਕਣ ਵਿਚ ਸਹਾਇਕ ਸਿੱਧ ਹੁੰਦੇ ਹਨ। ਜੈਤੂਨ ਦਾ ਤੇਲ ਵੀ ਸਮੇਂ ਤੋਂ ਪਹਿਲਾਂ ਝੁਰੜੀਆਂ ਤੋਂ ਚਮੜੀ ਦੀ ਰੱਖਿਆ ਕਰਦਾ ਹੈ।





Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX