ਤਾਜਾ ਖ਼ਬਰਾਂ


ਸੀ.ਬੀ.ਆਈ ਵੱਲੋਂ ਸਾਂਈ ਦੇ ਠਿਕਾਣਿਆਂ 'ਤੇ ਛਾਪੇਮਾਰੀ
. . .  1 day ago
ਨਵੀਂ ਦਿੱਲੀ, 17 ਜਨਵਰੀ - ਸੀ.ਬੀ.ਆਈ ਵੱਲੋਂ ਰਿਸ਼ਵਤ ਦੇ ਮਾਮਲੇ 'ਚ ਸਪੋਰਟਸ ਅਥਾਰਿਟੀ ਆਫ਼ ਇੰਡੀਆ (ਸਾਈ) ਦੇ ਠਿਕਾਣਿਆਂ 'ਤੇ ਛਾਪੇਮਾਰੀ ਕੀਤੀ ਗਈ ਹੈ।
ਨਵੇਂ ਸਰਪੰਚਾਂ ਨੂੰ ਗਰਾਮ ਪੰਚਾਇਤਾਂ ਦਾ ਰਿਕਾਰਡ 21 ਤੱਕ ਦੇਣ ਦੇ ਹੁਕਮ
. . .  1 day ago
ਖਮਾਣੋਂ ,17 ਜਨਵਰੀ {ਮਨਮੋਹਣ ਸਿੰਘ ਕਲੇਰ}- ਰਾਜ ਦੇ ਪੇਂਡੂ ਵਿਕਾਸ ਅਤੇ ਪੰਚਾਇਤ ਵਿਭਾਗ {ਚੋਣ ਸ਼ਾਖਾ} ਵੱਲੋਂ ਰਾਜ ਸਮੂਹ ਜ਼ਿਲ੍ਹਾ ਵਿਕਾਸ ਅਫ਼ਸਰਾਂ ਅਤੇ ਬਲਾਕ ਵਿਕਾਸ ਅਫ਼ਸਰਾਂ ਨੂੰ ਇਕ ਪੱਤਰ ਜਾਰੀ ਕਰਦੇ ਹੋਏ ਮੌਜੂਦਾ ...
ਕੈਬਨਿਟ ਦੀ ਨਿਯੁਕਤ ਕਮੇਟੀ ਨੇ ਘਟਾਇਆ ਰਾਕੇਸ਼ ਅਸਥਾਨਾ ਸਮੇਤ 4 ਅਫਸਰਾਂ ਦਾ ਕਾਰਜਕਾਲ
. . .  1 day ago
ਨਵੀਂ ਦਿੱਲੀ, 17 ਜਨਵਰੀ - ਸੀ.ਬੀ.ਆਈ ਦੇ ਵਿਸ਼ੇਸ਼ ਨਿਰਦੇਸ਼ਕ ਰਾਕੇਸ਼ ਅਸਥਾਨਾ ਅਤੇ ਤਿੰਨ ਹੋਰ ਸੀ.ਬੀ.ਆਈ ਅਫਸਰਾਂ ਦਾ ਕਾਰਜਕਾਲ ਕੇਂਦਰੀ ਕੈਬਨਿਟ ਦੀ ਨਿਯੁਕਤ ਕਮੇਟੀ ਵੱਲੋਂ...
ਸੱਚ ਦੀ ਜਿੱਤ ਹੋਈ ਹੈ - ਅੰਸ਼ੁਲ ਛਤਰਪਤੀ
. . .  1 day ago
ਪੰਚਕੂਲਾ, 17 ਜਨਵਰੀ - ਪੱਤਰਕਾਰ ਰਾਮਚੰਦਰ ਛਤਰਪਤੀ ਹੱਤਿਆ ਮਾਮਲੇ 'ਚ ਡੇਰਾ ਸਿਰਸਾ ਪ੍ਰਮੁੱਖ ਗੁਰਮੀਤ ਰਾਮ ਰਹੀਮ ਸਮੇਤ ਚਾਰ ਦੋਸ਼ੀਆਂ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਏ...
ਸੈਰ ਸਪਾਟਾ ਵਿਭਾਗ ਨੇ 7.90 ਕਰੋੜ ਦੀ ਲਾਗਤ ਨਾਲ ਛੱਤਬੀੜ ਦੀ ਕੀਤੀ ਕਾਇਆ ਕਲਪ - ਸਿੱਧੂ
. . .  1 day ago
ਜ਼ੀਰਕਪੁਰ, 17 ਜਨਵਰੀ (ਹਰਦੀਪ ਸਿੰਘ ਹੈਪੀ ਪੰਡਵਾਲਾ) - ਪੰਜਾਬ ਵਿੱਚ ਜੰਗਲੀ ਜੀਵ ਸੈਲਾਨੀਆਂ ਦੀ ਗਿਣਤੀ ਨੂੰ ਵਧਾਉਣ ਲਈ ਪੰਜਾਬ ਹੈਰੀਟੇਜ ਐਂਡ ਟੂਰਿਜ਼ਮ ਪ੍ਰਮੋਸ਼ਨ ਬੋਰਡ ਵੱਲੋਂ ਛੱਤਬੀੜ...
ਛਤਰਪਤੀ ਹੱਤਿਆ ਮਾਮਲੇ 'ਚ ਰਾਮ ਰਹੀਮ ਨੂੰ ਉਮਰ ਕੈਦ ਦੀ ਸਜ਼ਾ
. . .  1 day ago
ਪੰਚਕੂਲਾ, 17 ਜਨਵਰੀ (ਰਾਮ ਸਿੰਘ ਬਰਾੜ) - ਪੱਤਰਕਾਰ ਰਾਮਚੰਦਰ ਛਤਰਪਤੀ ਹੱਤਿਆ ਮਾਮਲੇ 'ਚ ਸੀ.ਬੀ.ਆਈ ਦੀ ਵਿਸ਼ੇਸ਼ ਅਦਾਲਤ ਨੇ ਡੇਰਾ ਸੱਚਾ ਸੌਦਾ ਪ੍ਰਮੁੱਖ ਗੁਰਮੀਤ ਰਾਮ ਰਹੀਮ...
ਭਾਰਤ ਅਤੇ ਆਸਟ੍ਰੇਲੀਆ ਵਿਚਕਾਰ ਤੀਸਰਾ ਇੱਕ ਦਿਨਾਂ ਮੈਚ ਕੱਲ੍ਹ
. . .  1 day ago
ਮੈਲਬੌਰਨ, 17 ਜਨਵਰੀ - ਭਾਰਤ ਅਤੇ ਆਸਟ੍ਰੇਲੀਆ ਵਿਚਕਾਰ ਤੀਸਰਾ ਅਤੇ ਆਖ਼ਰੀ ਇੱਕ ਦਿਨਾਂ ਮੈਚ 18 ਜਨਵਰੀ ਨੂੰ ਮੈਲਬੌਰਨ 'ਚ ਖੇਡਿਆ ਜਾਵੇਗਾ। ਦੋਵੇਂ ਟੀਮਾਂ 1-1 ਮੈਚ ਜਿੱਤ...
ਮਹਿਲਾ ਕ੍ਰਿਕਟ : ਬੀ.ਸੀ.ਸੀ.ਆਈ ਵੱਲੋਂ ਇੰਗਲੈਂਡ ਖ਼ਿਲਾਫ਼ ਘਰੇਲੂ ਲੜੀ ਲਈ ਪ੍ਰੋਗਰਾਮ ਦਾ ਐਲਾਨ
. . .  1 day ago
ਮੁੰਬਈ, 17 ਜਨਵਰੀ - ਬੀ.ਸੀ.ਸੀ.ਆਈ ਨੇ ਇੰਗਲੈਂਡ ਖ਼ਿਲਾਫ਼ ਘਰੇਲੂ ਲੜੀ ਲਈ ਪ੍ਰੋਗਰਾਮ ਦਾ ਐਲਾਨ ਕਰ ਦਿੱਤਾ ਹੈ। ਇਸ ਲੜੀ ਤਹਿਤ ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਅਤੇ ਇੰਗਲੈਂਡ...
ਸੋਸ਼ਲ ਮੀਡੀਆ 'ਤੇ ਆਮ ਚੋਣਾਂ ਦੀ ਫ਼ਰਜ਼ੀ ਤਾਰੀਖ਼ ਜਾਰੀ ਕਰਨ ਵਾਲਿਆ ਖ਼ਿਲਾਫ਼ ਕਾਰਵਾਈ ਹੋਵੇ - ਚੋਣ ਕਮਿਸ਼ਨ
. . .  1 day ago
ਨਵੀਂ ਦਿੱਲੀ, 10 ਜਨਵਰੀ - ਚੋਣ ਕਮਿਸ਼ਨ ਨੇ ਦਿੱਲੀ ਦੇ ਚੋਣ ਅਧਿਕਾਰੀ ਨੂੰ ਸੋਸ਼ਲ ਮੀਡੀਆ 'ਤੇ ਆਮ ਚੋਣਾਂ ਦੀ ਫ਼ਰਜ਼ੀ ਤਾਰੀਖ਼ ਜਾਰੀ ਕਰਨ ਵਾਲਿਆ ਖ਼ਿਲਾਫ਼ ਕਾਰਵਾਈ...
ਬੱਚਿਆ ਨਾਲ ਕਥਿਤ ਸ਼ੋਸ਼ਣ ਨੂੰ ਲੈ ਕੇ ਸੀ.ਬੀ.ਆਈ ਵੱਲੋਂ ਐੱਫ.ਆਈ.ਆਰ ਦਰਜ
. . .  1 day ago
ਪਟਨਾ, 17 ਜਨਵਰੀ - ਬਿਹਾਰ ਦੇ ਸ਼ੈਲਟਰ ਹੋਮ 'ਚ ਬੱਚਿਆ ਨਾਲ ਕਥਿਤ ਸ਼ੋਸ਼ਣ ਨੂੰ ਲੈ ਕੇ ਸੀ.ਬੀ.ਆਈ ਨੇ 8 ਐੱਫ.ਆਈ.ਆਰ ਦਰਜ ਕੀਤੀਆਂ...
ਹੋਰ ਖ਼ਬਰਾਂ..

ਫ਼ਿਲਮ ਅੰਕ

ਦਿਸ਼ਾ ਪਟਾਨੀ

ਸਹੀ ਦਿਸ਼ਾ ਵੱਲ

ਨਜ਼ਰਾਂ ਮਿਲਾਈਆਂ ਹੀ ਦਿਸ਼ਾ ਪਟਾਨੀ ਤੇ ਸ਼ਰਾਫ਼ ਟਾਈਗਰ ਨੇ ਕਿ ਲੋਕਾਂ ਦੇ ਬੁੱਲ੍ਹਾਂ 'ਤੇ ਇਨ੍ਹਾਂ ਪ੍ਰੇਮ ਪੰਛੀਆਂ ਦੇ ਚਰਚੇ ਗਲੀ-ਗਲੀ ਫ਼ਿਲਮੀ ਮੁਹੱਲੇ-ਮੁਹੱਲੇ ਹੋ ਗਏ। ਦਿਸ਼ਾ ਦੀ ਦਸ਼ਾ ਸਹੀ ਚੱਲ ਰਹੀ ਹੈ ਤੇ ਕੁਮਾਰੀ ਪਟਾਨੀ ਇਸ ਵੇਲੇ 'ਭਾਰਤ' ਦੀ ਹੀਰੋਇਨ ਹੈ। ਸਲਮਾਨ ਖਾਨ ਦੇ ਨਾਲ ਤੇ 'ਭਾਰਤ' 'ਚ ਦਿਸ਼ਾ ਦੇ ਐਕਸ਼ਨ ਤਕੜੇ ਹਨ। ਦਿਸ਼ਾ ਦੇ ਐਕਸ਼ਨ ਦੇਖ ਕੇ ਟਾਈਗਰ ਨੇ ਤਾੜੀਆਂ ਵਜਾ ਕੇ ਉਸ ਨੂੰ ਹੌਸਲਾ ਦਿੱਤਾ ਕਿ ਆਪਾਂ ਹਾਲੇ ਇਕੱਠੇ ਹਾਂ। ਰਾਹ ਵੱਖਰੇ-ਵੱਖਰੇ ਪਰ ਮੰਜ਼ਿਲ ਇਕ ਤੇ ਏਕ-ਦੂਜੇ ਕੇ ਲੀਏ ਦਿਸ਼ਾ-ਟਾਈਗਰ। ਪੰਜਾਬ ਦੀ ਸੈਰ 'ਭਾਰਤ' ਦੇ ਫ਼ਿਲਮਾਂਕਣ ਸਮੇਂ ਦਿਸ਼ਾ ਨੇ ਪੰਜਾਬ ਨੇੜਿਓਂ ਤੱਕਿਆ ਤੇ ਮੱਕੀ ਦੀ ਰੋਟੀ ਤੇ ਸਰ੍ਹੋਂ ਦੇ ਸਾਗ ਦਾ ਮਜ਼ਾ ਵੀ ਲਿਆ। 'ਮੰਗਲਯਾਨ' ਦਿਸ਼ਾ ਨੇ ਛੱਡ ਦਿੱਤੀ ਹੈ। ਅਕਸ਼ੈ ਤਦ ਤੋਂ ਹੀ ਦਿਸ਼ਾ ਨਾਲ ਨਾਰਾਜ਼ ਹੈ। ਦਿਸ਼ਾ ਨੇ ਚਾਹੇ 'ਮੰਗਲਯਾਨ' ਠੁਕਰਾਈ ਹੈ ਪਰ ਇਧਰ ਕਿਆਰਾ ਅਡਵਾਨੀ ਨੇ ਦਿਸ਼ਾ ਹੱਥੋਂ 'ਟੈਲਕਮ' ਪਾਊਡਰ ਦਾ ਵਿਗਿਆਪਨ ਖੋਹ ਲਿਆ ਹੈ। ਲਾਲ ਰੰਗ ਦਾ ਲਹਿੰਗਾ ਪਾ ਕੇ ਲੱਖ ਰੈਂਪ ਕਰੇ ਦਿਸ਼ਾ ਪਟਾਨੀ ਪਰ ਇਕੱਲੇ 'ਭਾਰਤ' ਦੇ ਸਿਰ 'ਤੇ ਉਸ ਦੀ ਛਾਲ ਬਹੁਤ ਉੱਚੀ ਨਹੀਂ ਜਾ ਸਕਦੀ। ਆਪਣੇ ਖੁੱਲ੍ਹੇ-ਡੁੱਲ੍ਹੇ ਅੰਦਾਜ਼ ਤੇ ਵਿਚਾਰਾਂ ਲਈ ਪ੍ਰਸਿੱਧ ਦਿਸ਼ਾ ਪਟਾਨੀ ਬੀਤੇ ਦਿਨੀਂ ਖਾਸ ਤੌਰ 'ਤੇ ਬਰੇਲੀ ਗਈ। ਕਾਰਨ ਇਹ ਕਿ ਪ੍ਰਿਅੰਕਾ ਚੋਪੜਾ ਦੇ ਵਿਆਹ ਮੌਕੇ ਉਸ ਦੇ ਪੁਰਾਣੇ ਇਕੱਲੇ ਪਏ ਬਰੇਲੀ ਵਾਲੇ ਘਰ ਨੂੰ ਦਿਸ਼ਾ ਨੇ ਆਪਣੇ ਪਾਪਾ ਜਗਦੀਸ਼ ਪਟਾਨੀ ਨਾਲ ਮਿਲ ਕੇ ਸੰਵਾਰਿਆ। ਯਾਦ ਰਹੇ ਬਰੇਲੀ 'ਚ ਪ੍ਰਿਅੰਕਾ-ਦਿਸ਼ਾ ਇਕੱਠੀਆਂ ਵੀ ਰਹੀਆਂ ਹਨ। ਸਿੱਧੀ ਗੱਲ ਕਿ ਦਿਸ਼ਾ ਪਟਾਨੀ ਇਸ ਸਮੇਂ ਪ੍ਰਿਅੰਕਾ ਨਾਲ ਦੋਸਤੀ ਨਿਭਾਅ ਰਹੀ ਹੈ। ਉਸ ਦਾ ਅਸ਼ੀਰਵਾਦ ਲੈ ਰਹੀ ਹੈ। ਇਹ ਅਸ਼ੀਰਵਾਦ ਹੀ ਉਸ ਦਾ ਭਵਿੱਖ ਸੰਵਾਰੇਗਾ। ਐਮ.ਐਸ. ਧੋਨੀ ਦੀ ਅਨਟੋਲਡ ਸਟੋਰੀ', 'ਬਾਗੀ-2' ਵਾਲੀ ਅੰਤਰਮੁਖੀ ਕੁੜੀ ਦਿਸ਼ਾ ਪਟਾਨੀ ਫੈਸ਼ਨ ਸ਼ੋਅਜ਼ ਹੁਣ ਘੱਟ ਕਰੇਗੀ। ਟਾਈਗਰ ਨਾਲ ਨਵੇਂ ਸਾਲ 'ਚ ਰਿਸ਼ਤੇ ਕਿੱਧਰ ਜਾਣਗੇ? ਬਿਕਨੀ ਪਾ ਕੇ ਐਕਸ਼ਨ ਕਰ ਕੇ ਸਲਮਾਨ ਖ਼ਾਨ ਨਾਲ 'ਭਾਰਤ' 'ਚ ਭੂਮਿਕਾ ਤੇ ਅਕਸ਼ੈ ਨਾਲ ਨਾਰਾਜ਼ਗੀ, ਖੱਟੀਆਂ-ਮਿੱਠੀਆਂ ਗੱਲਾਂ, ਦਿਸ਼ਾ ਪਟਾਨੀ ਨੂੰ ਚਾਹੇ ਯਾਦ ਰਹਿਣ ਜਾਂ ਭੁੱਲ ਜਾਣ ਪਰ ਇਹ ਨਹੀਂ ਭੁੱਲੇਗਾ ਕਿ ਉਸ ਦੀ ਦਿਸ਼ਾ ਤੇ ਦਸ਼ਾ 2018 'ਚ ਸਹੀ ਹੀ ਰਹੀ ਹੈ।


ਖ਼ਬਰ ਸ਼ੇਅਰ ਕਰੋ

ਹੁਣ ਮੇਰੀ ਆਖ਼ਰੀ ਇੱਛਾ ਵੀ ਪੂਰੀ ਹੋ ਗਈ : ਅਨੁਸ਼ਕਾ ਸ਼ਰਮਾ

12 ਦਸੰਬਰ 2008 ਵਾਲੇ ਦਿਨ 'ਰੱਬ ਨੇ ਬਨਾ ਦੀ ਜੋੜੀ' ਪ੍ਰਦਰਸ਼ਿਤ ਹੋਈ ਸੀ ਅਤੇ ਇਸ ਦੀ ਰਿਲੀਜ਼ ਦੇ ਨਾਲ ਬਾਲੀਵੁੱਡ ਨੂੰ ਅਨੁਸ਼ਕਾ ਸ਼ਰਮਾ ਦੇ ਰੂਪ ਵਿਚ ਇਕ ਖ਼ੂਬਸੂਰਤ ਨਾਇਕਾ ਮਿਲੀ। ਅਨੁਸ਼ਕਾ ਦੀ ਅਭਿਨੈ ਯਾਤਰਾ ਨੇ ਦਸ ਸਾਲ ਪੂਰੇ ਕਰ ਲਏ ਹਨ ਅਤੇ ਆਪਣੇ ਇਸ ਸਫ਼ਰ ਦੌਰਾਨ ਅਨੁਸ਼ਕਾ ਨੇ 'ਬੈਂਡ ਬਾਜਾ ਬਾਰਾਤ', 'ਪੀਕੇ', 'ਸੁਲਤਾਨ', 'ਸੂਈ ਧਾਗਾ' ਸਮੇਤ ਕਈ ਹਿੱਟ ਫ਼ਿਲਮਾਂ ਦਿੱਤੀਆਂ। ਹੁਣ ਉਹ ਆਪਣੀ ਪਹਿਲੀ ਫ਼ਿਲਮ ਦੇ ਨਾਇਕ ਸ਼ਾਹਰੁਖ ਖਾਨ ਦੇ ਨਾਲ 'ਜ਼ੀਰੋ' ਵਿਚ ਆ ਰਹੀ ਹੈ। ਭਾਵ ਆਪਣੇ ਕੈਰੀਅਰ ਦੀ ਸ਼ੁਰੂਆਤ ਤੋਂ ਬਾਅਦ ਹੁਣ ਦਸਵੇਂ ਸਾਲ ਦੇ ਪੜਾਅ ਦੇ ਅਖੀਰ ਵਿਚ ਉਹ ਸ਼ਾਹਰੁਖ ਨਾਲ ਕੰਮ ਕਰ ਰਹੀ ਹੈ।
ਆਪਣੇ ਇਸ ਹੀਰੋ ਬਾਰੇ ਉਹ ਕਹਿੰਦੀ ਹੈ, 'ਮੈਂ ਦਸ ਸਾਲ ਦੇ ਸਮੇਂ ਦੌਰਾਨ ਸ਼ਾਹਰੁਖ ਨਾਲ ਚਾਰ ਫ਼ਿਲਮਾਂ ਕੀਤੀਆਂ ਹਨ। ਮੇਰੀ ਪਹਿਲੀ ਫ਼ਿਲਮ ਉਨ੍ਹਾਂ ਨਾਲ ਸੀ ਤੇ ਹੁਣ 'ਜ਼ੀਰੋ' ਉਨ੍ਹਾਂ ਨਾਲ ਹੈ। ਦੋਵਾਂ ਨੇ 'ਜਬ ਤਕ ਹੈ ਜਾਨ' ਤੇ 'ਜਬ ਹੈਰੀ ਮੈਟ ਸੇਜਲ' ਵੀ ਕੀਤੀਆਂ। ਉਮੀਦ ਹੈ ਕਿ ਅੱਗੇ ਵੀ ਇਕੱਠਿਆਂ ਕੰਮ ਕਰਨ ਦੇ ਮੌਕੇ ਮਿਲਦੇ ਰਹਿਣਗੇ।'
* ਉਂਜ ਹੁਣ ਜਦੋਂ ਤੁਸੀਂ ਆਪਣੇ ਦਸ ਸਾਲ ਦੇ ਕੈਰੀਅਰ ਨੂੰ ਲੈ ਕੇ ਪਿੱਛੇ ਮੁੜ ਕੇ ਦੇਖਦੇ ਹੋ ਤਾਂ ਕੀ ਕੁਝ ਖ਼ਾਸ ਨਜ਼ਰ ਆਉਂਦਾ ਹੈ?
-ਜਦੋਂ ਮੈਂ ਆਪਣੇ ਕੈਰੀਅਰ ਬਾਰੇ ਸੋਚਦੀ ਹਾਂ ਤਾਂ ਸਭ ਤੋਂ ਪਹਿਲਾਂ ਮੈਨੂੰ ਆਪਣੀ ਪਹਿਲੀ ਫ਼ਿਲਮ 'ਰੱਬ ਨੇ ਬਨਾ ਦੀ ਜੋੜੀ' ਯਾਦ ਆਉਂਦੀ ਹੈ। ਯਸ਼ਰਾਜ ਬੈਨਰ ਨੇ ਮੈਨੂੰ ਮੌਕਾ ਦਿੱਤਾ ਅਤੇ ਮੈਨੂੰ ਸ਼ਾਹਰੁਖ ਦੀ ਹੀਰੋਇਨ ਦੇ ਰੂਪ ਵਿਚ ਪੇਸ਼ ਕੀਤਾ ਗਿਆ। ਇਸ ਤਰ੍ਹਾਂ ਦਾ ਵੱਡਾ ਮੌਕਾ ਪਾਉਣਾ ਹੀ ਮੇਰੇ ਲਈ ਬਹੁਤ ਵੱਡੀ ਗੱਲ ਸੀ। ਫਿਰ ਮੇਰੀ ਦੂਜੀ ਫ਼ਿਲਮ 'ਬੈਂਡ ਬਾਜਾ ਬਾਰਾਤ' ਨੇ ਬਾਲੀਵੁੱਡ ਵਿਚ ਮੇਰੀ ਮੌਜੂਦਗੀ ਬਹੁਤ ਮਜ਼ਬੂਤ ਕੀਤੀ ਹੈ। ਮੇਰੀ ਪਹਿਲੀ ਫ਼ਿਲਮ ਦੀ ਸਫਲਤਾ ਦਾ ਸਿਹਰਾ ਸ਼ਾਹਰੁਖ ਨੂੰ ਦਿੱਤਾ ਗਿਆ ਪਰ 'ਬੈਂਡ ਬਾਜਾ ਬਾਰਾਤ ਦੀ ਸਫਲਤਾ ਲਈ ਮੈਨੂੰ ਵੀ ਜ਼ਿੰਮੇਦਾਰ ਮੰਨਿਆ ਗਿਆ। ਮੈਂ ਜਦੋਂ ਫ਼ਿਲਮਾਂ ਵਿਚ ਆਈ ਸੀ, ਉਦੋਂ ਮੈਂ ਉਨ੍ਹਾਂ ਨਿਰਦੇਸ਼ਕਾਂ ਦੀ ਸੂਚੀ ਤਿਆਰ ਕੀਤੀ ਸੀ ਕਿ ਜਿਨ੍ਹਾਂ ਦੇ ਨਾਲ ਮੈਂ ਕੰਮ ਕਰਨਾ ਚਾਹੁੰਦੀ ਸੀ ਅਤੇ ਇਨ੍ਹਾਂ ਦਸ ਸਾਲਾਂ ਵਿਚ ਉਨ੍ਹਾਂ ਸਾਰੇ ਨਿਰਦੇਸ਼ਕਾਂ ਦੇ ਨਾਲ ਮੈਂ ਫ਼ਿਲਮਾਂ ਕਰ ਲਈਆਂ। ਫ਼ਿਲਮ ਨਿਰਮਾਣ ਕਰਨ ਦੀ ਇੱਛਾ ਵੀ ਦਹਾਕੇ ਦੌਰਾਨ ਪੂਰੀ ਹੋ ਗਈ ਅਤੇ ਮੈਂ 'ਫਿਲੌਰੀ' ਤੇ 'ਪਰੀ' ਬਣਾ ਕੇ ਆਪਣੇ ਬੈਨਰ ਨੂੰ ਵੀ ਸਥਾਪਿਤ ਕਰ ਲਿਆ ਹੈ। ਵੱਡੇ ਬ੍ਰਾਂਡ ਦੇ ਉਤਪਾਦਾਂ ਲਈ ਮੈਂ ਆਪਣਾ ਚਿਹਰਾ ਚਮਕਾਉਣਾ ਚਾਹੁੰਦੀ ਸੀ ਅਤੇ ਕਈ ਨਾਮੀ ਬ੍ਰਾਂਡ ਲਈ ਮਾਡਲਿੰਗ ਕਰ ਕੇ ਇਹ ਇੱਛਾ ਵੀ ਪੂਰੀ ਕਰ ਲਈ। ਮੈਂ ਕਿ ਵੱਖਰੇ ਤਰ੍ਹਾਂ ਦੀ ਭੂਮਿਕਾ ਨਿਭਾਉਣਾ ਚਾਹੁੰਦੀ ਸੀ ਅਤੇ ਇਹ ਇੱਛਾ ਹੁਣ 'ਜ਼ੀਰੋ' ਰਾਹੀਂ ਪੂਰੀ ਹੋ ਰਹੀ ਹੈ। ਭਾਵ ਹੁਣ ਤਕ ਦਸ ਸਾਲ ਦਾ ਕੈਰੀਅਰ ਸ਼ਾਨਦਾਰ ਰਿਹਾ।

ਤਮੰਨਾ ਭਾਟੀਆ : ਪ੍ਰੇਸ਼ਾਨੀ ਕੰਮ ਘਟਣ ਦੀ

ਔਰਤਾਂ ਦੇ ਹੱਕਾਂ ਲਈ ਤਮੰਨਾ ਭਾਟੀਆ ਹੱਥੀਂ ਪੈਣ ਤੱਕ ਜਾਂਦੀ ਹੈ। 'ਮੀ ਟੂ' ਦੀ ਚਰਚਾ ਹੋਵੇ ਤੇ ਤਮੰਨਾ ਚੁੱਪ ਰਹੇ, ਨਹੀਂ ਜੀ ਨਹੀਂ, ਉਸ ਨੇ ਤਾਂ ਬਲਦੀ 'ਤੇ ਤੇਲ ਪਾਉਣਾ ਹੈ। ਤਮੰਨਾ ਦਾ ਵੱਸ ਚੱਲੇ ਤਾਂ ਸੰਸਦ 'ਚ ਅਜਿਹੇ ਕਾਨੂੰਨ ਘੜ ਦੇਵੇ ਕਿ ਮੁੰਡੇ ਪੁੱਛ ਕੇ ਘਰੋਂ ਤੁਰਿਆ ਕਰਨ ਕਿ ਸਾਹਮਣੇ ਕੁੜੀ ਆ ਗਈ ਤਾਂ ਕਿਸ ਤਰ੍ਹਾਂ ਸਾਹਮਣਾ ਕਰਨਾ ਹੈ ਜਾਂ ਰਾਹ ਛੱਡ ਦੂਜੇ ਰਾਹ ਹੋ ਜਾਣਾ ਹੈ। ਅਸੀਂ ਨਹੀਂ ਇਹ ਗੱਲਾਂ ਸੋਸ਼ਲ ਮੀਡੀਆ 'ਤੇ ਤਮੰਨਾ ਦੀਆਂ ਟਿੱਪਣੀਆਂ ਤੋਂ ਅੱਕੇ ਬੰਦਿਆਂ ਨੇ ਕੀਤੀਆਂ ਹਨ ਤੇ ਤਮੰਨਾ ਨੂੰ ਸਲਾਹ ਦਿੱਤੀ ਹੈ ਕਿ 'ਬਾਹੂਬਲੀ' ਔਰਤ ਬਣਨ ਦੀ ਥਾਂ ਉਹ ਰਾਜਨੀਤੀ 'ਚ ਆ ਜਾਵੇ ਤੇ ਅਭਿਨੈ ਦੀ ਦੁਨੀਆ ਤੋਂ ਪਰ੍ਹਾਂ ਹੋ ਜਾਏ। ਤਮੰਨਾ ਨੇ ਬਾਕਾਇਦਾ ਪੋਸਟ ਪਾਈ ਹੈ ਕਿ ਜਬਰੀ ਗਲੇ ਲਾਉਣਾ, ਛੂਹ ਲੈਣਾ ਜਾਂ ਚੂੰਢੀ-ਥੱਪਾ ਕਰਨਾ ਇਹ ਵੀ 'ਕਾਮੁਕ ਸ਼ੋਸ਼ਣ' ਤੇ ਪ੍ਰੇਸ਼ਾਨ ਕਰਨ ਵਾਲੀ ਅਵਸਥਾ ਹੈ। ਇਸ ਲਈ ਸਜ਼ਾ ਸਖ਼ਤ ਹੋਵੇ। ਇਥੇ ਹੀ ਬੱਸ ਨਹੀਂ, ਤਮੰਨਾ ਨੇ ਬਕਾਇਦਾ ਇਕ ਅਖ਼ਬਾਰੀ ਮੁਲਾਕਾਤ ਵਿਚ ਕਿਹਾ ਕਿ ਕੱਪੜਿਆਂ 'ਤੇ ਫੱਬਤੀ ਕੱਸਣੀ, ਗੰਦੀ ਗਾਲ੍ਹ, ਗੰਦੇ ਚੁਟਕਲੇ ਜਾਂ ਸੁਨੇਹੇ ਘੱਲਣੇ ਇਹ ਵੀ ਅਪਰਾਧਯੋਗ ਹੈ। ਦੇਖੋ ਫ਼ਿਲਮਾਂ ਘੱਟ ਹਨ ਤਾਂ ਤਮੰਨਾ ਭਾਟੀਆ ਇਸ ਵਿਸ਼ੇ 'ਤੇ ਗੱਲਾਂ ਕਰ ਕੇ ਮੌਜੂਦਾ ਸਮੇਂ ਦੀ ਨਾਰੀ ਸ਼ਕਤੀ ਦਾ ਬਿੰਬ ਬਣਨ ਦੀ ਕੋਸ਼ਿਸ਼ 'ਚ ਹੈ। ਸਟਾਰ ਪਲੱਸ ਦੇ ਸ਼ੋਅ 'ਲਿਪ ਸਿੰਗ ਬੈਟਲ' 'ਚ ਰਜਨੀਕਾਂਤ ਬਣ 'ਲੂੰਗੀ ਡਾਂਸ' ਕਰਨ ਵਾਲੀ ਤਮੰਨਾ ਭਾਟੀਆ ਨੂੰ ਜਦ ਕਿਸੇ ਨੇ ਕਿਹਾ ਕਿ ਪਿਆਰ ਦ੍ਰਿਸ਼ਾਂ 'ਚ ਹੀਰੋ ਤੁਹਾਨੂੰ ਚੁੰਮਣ ਤੱਕ ਜਾਂਦਾ ਹੈ, ਕੇਸ ਕਰ ਦਿਓ ਤਾਂ ਤਮੰਨਾ ਝੂਠੀ ਜਿਹੀ ਪੈ ਗਈ ਤੇ ਅਭਿਨੈ ਕਹਿ ਕੇ ਟਾਲਾ ਵੱਟ ਗਈ। ਆਪਣੀਆਂ ਵਿਵਾਦਤ ਗੱਲਾਂ ਲਈ ਤਮੰਨਾ ਭਾਟੀਆ ਨੇ ਪਿਛਲੇ ਦਿਨੀਂ ਹੈਦਰਾਬਾਦ 'ਚ ਆਪਣੇ 'ਤੇ 'ਜੁੱਤੀ ਵਰਖਾ' ਹੁੰਦੀ ਵੀ ਤੱਕੀ। ਤਮੰਨਾ ਬੇਸ਼ੱਕ ਚੰਗੀ ਅਭਿਨੇਤਰੀ ਹੈ, ਸਫ਼ਲ ਹੀਰੋਇਨ ਹੈ, ਦੱਖਣ ਤੋਂ ਬਾਅਦ ਹਿੰਦੀ 'ਚ ਵੀ ਕਹਿੰਦੀਆਂ-ਕਹਾਉਂਦੀਆਂ ਹੀਰੋਇਨਾਂ ਦੀ ਕਤਾਰ 'ਚ ਮੂਹਰੇ ਹੈ ਪਰ ਕੰਮ ਉਮੀਦ ਨਾਲੋਂ ਕਿਤੇ ਘੱਟ ਮਿਲਣ ਕਾਰਨ ਪ੍ਰੇਸ਼ਾਨ ਹੈ। ਲੋਕਾਂ ਨਾਲ ਪੁੱਠੇ-ਸਿੱਧੇ ਬਿਆਨ ਦੇ ਕੇ ਨਾਰਾਜ਼ਗੀ ਹੋਰ ਵਧਾ ਰਹੀ ਹੈ ਤੇ ਪ੍ਰਸੰਸਕ ਸੰਖਿਆ ਵੀ ਉਸ ਦੀ ਘਟ ਰਹੀ ਹੈ। ਅਭਿਨੇਤਾ ਵੀ ਵੋਟਾਂ ਨਾਲ ਹੁੰਦੇ ਹਨ ਤੇ ਜਨਤਾ ਵੋਟ ਹੱਥੋਂ ਗਈ ਤਾਂ ਤਮੰਨਾ ਭਾਟੀਆ ਦੀ ਹਰ ਤਮੰਨਾ ਨੂੰ 'ਬਰੇਕ' ਲੱਗਣੀ ਸ਼ੁਰੂ ਹੋ ਜਾਵੇਗੀ ਤੇ ਇਕ ਰੋਜ਼ ਕਿਤੇ ਬਰੇਕ... ਪੱਕੀ ਹੀ ਨਾ ਲੱਗ ਜਾਏ।

ਸ਼ਾਹਰੁਖ ਖ਼ਾਨ : 'ਹੀਰੋ' ਜਾਂ ਫਿਰ 'ਜ਼ੀਰੋ'

ਸ਼ਾਹਰੁਖ ਦੀ 'ਜ਼ੀਰੋ' ਦਾ ਇਕ ਪੋਸਟਰ ਨੂੰ ਲੈ ਕੇ ਸਿੱਖ ਕੌਮ ਨਾਲ ਵਿਵਾਦ ਵੀ ਹੈ ਤੇ ਇਹ ਹਟਣਾ ਚਾਹੀਦਾ ਹੈ 'ਕ੍ਰਿਸਮਸ' ਦਾ ਦਿਨ ਚੁਣਿਆ ਹੈ 'ਜ਼ੀਰੋ' ਲਈ ਸ਼ਾਹਰੁਖ ਨੇ ਤੇ ਪੱਛਮੀ ਬੰਗਾਲ ਦੀ ਮਾਣਯੋਗ ਮੁੱਖ ਮੰਤਰੀ ਕੁਮਾਰੀ ਮਮਤਾ ਬੈਨਰਜੀ ਨੇ ਸ਼ਾਹਰੁਖ ਦਾ ਕੋਲਕਾਤਾ ਵਿਚ ਆਉਣ 'ਤੇ ਸਵਾਗਤ ਕਰਦਿਆਂ ਕਿਹਾ, 'ਹੀਰੋ' 'ਜ਼ੀਰੋ' ਕਿਵੇਂ ਹੋ ਗਿਆ? ਮਤਲਬ ਸਾਫ਼ ਹੈ ਕਿ 'ਜ਼ੀਰੋ' ਲਈ ਪੱਛਮੀ ਬੰਗਾਲ 'ਚ ਸ਼ਾਹਰੁਖ ਦਾ ਪ੍ਰਚਾਰ ਵੱਡੇ ਹੱਥੀਂ ਹੈ। ਇਧਰ ਸ਼ਾਹਰੁਖ ਦੀ ਧੀ ਸੁਹਾਨਾ ਥੀਏਟਰ ਪ੍ਰੇਮਣ ਹੈ। ਸੁਹਾਨਾ ਨੇ ਹੁਣੇ ਜਿਹੇ ਹੀ ਪਾਪਾ ਦੇ ਅਸ਼ੀਰਵਾਦ ਨਾਲ ਨਾਟਕ 'ਜੂਲੀਅਟ' ਖੇਡਿਆ ਹੈ। 'ਜ਼ੀਰੋ' ਲਈ ਹਰ ਹਰਬਾ ਸ਼ਾਹਰੁਖ ਮੀਆਂ ਵਰਤ ਰਹੇ ਹਨ, ਚਾਹੇ ਲੰਦਨ ਜਾ ਕੇ ਥੀਏਟਰ 'ਜੂਲੀਅਟ' ਨਾਟਕ, ਬੇਟੀ ਸੁਹਾਨਾ ਦਾ ਜ਼ਿਕਰ ਜਾਂ ਨਿੱਕੇ ਅਬਰਾਹਮ ਦਾ ਮੋਹ ਹੋਵੇ, ਗੱਲ 'ਜ਼ੀਰੋ' ਨਾਲ ਜੋੜ ਦਿੰਦੇ ਹਨ ਕਿ 'ਜ਼ੀਰੋ' ਕਰਦੇ ਸਮੇਂ ਇਨ੍ਹਾਂ ਚੀਜ਼ਾਂ ਨੇ ਅਸਰ ਪਾਇਆ। 'ਜ਼ੀਰੋ' ਦਾ ਗੀਤ 'ਇਸ਼ਕਬਾਜ਼ੀ' ਚਰਚਾ ਵਿਚ ਹੈ। 'ਜ਼ੀਰੋ' ਨੂੰ ਲੈ ਕੇ ਸ਼ਾਹਰੁਖ ਦੀਆਂ ਸਕੀਮਾਂ ਬਹੁਤ ਹਨ। ਜਾਂਦੇ ਸਾਲ 'ਚ 'ਜ਼ੀਰੋ' ਹਿੱਟ ਤਾਂ ਸ਼ਾਹਰੁਖ ਫਿਰ ਬੀ-ਟਾਊਨ ਦਾ 2018 ਦਾ ਹਿੱਟ 'ਹੀਰੋ' ਬਾਕੀ ਸਾਰੇ 'ਜ਼ੀਰੋ'। ਵੈਸੇ 'ਜ਼ੀਰੋ' 'ਚ ਅਪਾਹਜ ਬੌਣੇ ਬਣੇ ਸ਼ਾਹਰੁਖ ਨਾਲ ਸਵਰਗੀ ਸ੍ਰੀਦੇਵੀ ਵੀ ਹੈ। ਸ੍ਰੀਦੇਵੀ ਦੀ ਮੌਜੂਦਗੀ ਵਾਲੇ 'ਜ਼ੀਰੋ' ਦੇ ਗਾਣੇ 'ਚ ਆਲੀਆ ਤੇ ਕ੍ਰਿਸ਼ਮਾ ਕਪੂਰ ਵੀ ਹਨ। ਦਰਅਸਲ 'ਜ਼ੀਰੋ' ਦੇ 'ਕੈਮਿਓ' 'ਚ ਸਲਮਾਨ, ਕਾਜੋਲ, ਮਾਧੁਰੀ, ਸ੍ਰੀਦੇਵੀ ਵੀ ਹਨ। 21 ਨੂੰ ਇਹ ਫ਼ਿਲਮ ਆ ਰਹੀ ਹੈ।


-ਸੁਖਜੀਤ ਕੌਰ

ਸੋਨਮ ਕਪੂਰ : ਪੁਲਿਸ ਅਫ਼ਸਰ ਬਣੇਗੀ

ਸੋਨਮ ਕਪੂਰ 'ਏਕ ਲੜਕੀ ਕੋ ਦੇਖਾ' ਲਈ ਰਾਜਕੁਮਾਰ ਰਾਓ ਤੇ ਪਿਤਾ ਅਨਿਲ ਕਪੂਰ ਨਾਲ ਦਿਨ-ਰਾਤ ਸਮਾਂ ਦੇ ਕੇ ਫ਼ਿਲਮਾਂਕਣ ਪ੍ਰਕਿਰਿਆ 'ਚ ਭਾਗ ਲੈ ਰਹੀ ਹੈ। 'ਖ਼ੂਬਸੂਰਤ' ਫ਼ਿਲਮ ਦੇ ਚਾਰ ਸਾਲ ਪੂਰੇ ਹੋਣ 'ਤੇ ਕੁਝ ਜ਼ਿਆਦਾ ਹੀ ਇਹ ਮੂੰਹ ਫੱਟ ਨਾਇਕਾ ਭਾਵੁਕ ਹੈ। ਫਵਾਦ ਖ਼ਾਨ ਨਾਲ ਬਿਤਾਏ ਪਲ ਉਹ ਅੱਜ ਵੀ ਯਾਦ ਕਰ ਰਹੀ ਹੈ ਪਰ ਕੀ ਇਹ ਆਨੰਦ ਆਹੂਜਾ ਦੀ ਤੌਹੀਨ ਨਹੀਂ ਹੈ? ਚਲੋ ਨਿਖਿਲ ਅਡਵਾਨੀ ਨੇ ਸੋਨਮ ਨੂੰ 'ਖ਼ੂਬਸੂਰਤ' ਤੋਹਫ਼ਾ ਦੇਣ ਦਾ ਫ਼ੈਸਲਾ ਲਿਆ ਹੈ। ਸਭ ਠੀਕ ਰਿਹਾ ਤਾਂ ਨਿਖਿਲ ਦੀ ਫ਼ਿਲਮ 'ਸਨੋਅ' 'ਚ ਸੋਨਮ ਕਪੂਰ ਪੁਲਿਸ ਅਫ਼ਸਰ ਬਣ ਆਏਗੀ। 'ਨੀਰਜਾ' ਤੋਂ ਬਾਅਦ 'ਸਨੋੋਅ' ਨਾਲ ਫਿਰ ਉਸ ਦੀ 'ਚਮਕੀਲੀ ਦਿੱਖ' ਤਬਦੀਲ ਹੋ ਜਾਵੇਗੀ। 'ਵੀਰੇ ਦੀ ਵੈਡਿੰਗ', 'ਸੰਜੂ' ਨੇ ਸੋਨਮ ਦਾ ਕੱਦ ਵਧਾਇਆ ਹੈ। 'ਸਨੋਅ' ਇਕ ਐਕਸ਼ਨ ਫ਼ਿਲਮ ਹੋਵੇਗੀ। ਆਨੰਦ ਆਹੂਜਾ ਨੂੰ ਬੋਲਣ ਜੋਗਾ ਸੋਨਮ ਨੇ ਛੱਡਣਾ ਹੀ ਨਹੀਂ ਹੈ ਕਿਉਂਕਿ 'ਏਕ ਲੜਕੀ ਕੋ ਦੇਖਾ' ਦੀ ਰਿਪੋਰਟ ਵੀ ਗਰਮ ਹੈ ਤੇ ਨਿਖਿਲ ਦੀ 'ਸਨੋਅ' ਸੋਨਮ ਦਾ ਸਮਾਂ ਹਾਲੇ ਹੈ, ਦਾ ਪ੍ਰਮਾਣ ਹੈ। ਆਨੰਦ ਦੇ ਘਰ ਜਾ ਕੇ ਪੰਜ ਮਹੀਨੇ ਤਾਂ ਉਹ ਮਸਤੀ ਕਰਦੀ ਰਹੀ ਹੈ ਤੇ ਰਿਸ਼ਤੇਦਾਰੀਆਂ 'ਚ ਘੁੰਮਦੀ ਰਹੀ ਪਰ ਹੁਣ ਕੰਮ 'ਤੇ ਆ ਕੇ 'ਜ਼ੋਯਾ ਫੈਕਟਰ' 'ਏਕ ਲੜਕੀ ਕੋ ਦੇਖਾ' ਦੇ ਫ਼ਿਲਮਾਂਕਣ ਸੋਨਮ ਫਿਰ ਰੁੱਝ ਗਈ ਹੈ। ਸੋਨਮ ਨੇ ਕੰਗਨਾ ਰਣੌਤ ਨਾਲ ਲੜਾਈ 'ਚ ਆਪ ਚੁੱਪ ਕਰ ਕੇ ਮਾਮਲਾ ਠੰਢਾ ਕਰ ਲਿਆ ਹੈ। ਤਿੰਨ ਮਹੀਨੇ ਪਹਿਲਾਂ 11.45 'ਤੇ ਸੋਨਮ ਨੇ ਟਵਿੱਟਰ ਤੋਂ ਅਲਵਿਦਾ ਲਈ ਸੀ। ਅਸਲ 'ਚ ਟਵਿਟਰ ਤੇ ਸੋਨਮ ਦਾ ਮਖੌਲ ਉੱਡ ਰਿਹਾ ਸੀ ਤੇ ਲੋਕਾਂ ਨੇ ਕਿਹਾ ਹੈ ਕਿ ਸੋਨਮ ਦੇ ਟਵਿੱਟਰ ਛੱਡਣ ਨਾਲ ਕਿਹੜੀ ਹਨੇਰੀ ਆ ਗਈ ਹੈ ਚੰਗਾ ਹੋਵੇ ਸੋਨਮ ਅਜਿਹੇ ਫੈਸਲੇ ਕਰਨ ਦੀ ਥਾਂ ਆਪਣੇ ਵਧੀਆ ਚੱਲ ਰਹੇ ਕੈਰੀਅਰ 'ਚ ਹੀ ਕੇਂਦਰਿਤ ਰੱਖੇ ਧਿਆਨ ਕਿਉਂਕਿ ਅਜੇ ਵੀ ਉਸ ਦਾ ਸਮਾਂ ਵਧੀਆ ਹੈ ਤੇ ਤਕੜੀਆਂ ਫ਼ਿਲਮਾਂ ਉਸ ਕੋਲ ਹਨ।

ਛੜਿਆਂ ਦੀ ਕਹਾਣੀ ਹੈ 'ਭੱਜੋ ਵੀਰੋ ਵੇ...'

ਛੜਾ ਸਾਡੇ ਸਮਾਜ ਦਾ ਇਕ ਅਹਿਮ ਪਾਤਰ ਰਿਹਾ ਹੈ। ਜਿਸ ਬਾਰੇ ਬਹੁਤ ਸਾਰੇ ਗਾਇਕਾਂ ਨੇ ਗੀਤ ਵੀ ਗਾਏ ਹਨ। 'ਰੰਨਾਂ ਵਾਲਿਆਂ ਦੇ ਪੱਕਣ ਪਰੌਠੇ ਛੜਿਆਂ ਦੀ ਅੱਗ ਨਾ ਬਲੇ' ਕਹਾਵਤ ਅਸੀ ਗੀਤਾਂ ਅਤੇ ਲੋਕ ਬੋਲੀਆਂ 'ਚ ਚਿਰਾਂ ਤੋਂ ਸੁਣਦੇ ਆਏ ਹਾਂ ਪਰ ਲੇਖਕ ਤੇ ਨਿਰਦੇਸਕ ਅੰਬਰਦੀਪ ਸਿੰਘ ਦੀ ਨਵੀਂ ਫ਼ਿਲਮ 'ਭੱਜੋ ਵੀਰੋ ਵੇ' 'ਚ ਛੜਿਆਂ ਦਾ ਹਾਲ ਤੁਸੀਂ ਅੱਖੀਂ ਵੇਖ ਸਕੋਗੇ। ਛੜਿਆਂ ਦੇ ਦੌਰ ਦੀ ਗੱਲ ਕਰਦੀ ਇਹ ਫ਼ਿਲਮ ਇਕ ਕਾਮੇਡੀ ਅਤੇ ਪਰਿਵਾਰਕ ਫ਼ਿਲਮ ਹੈ, ਇਸ ਵਿਚ ਅੰਬਰਦੀਪ, ਅਦਾਕਾਰਾ ਸਿੰਮੀ ਚਾਹਲ ਨਾਲ ਬਤੌਰ ਨਾਇਕ ਨਜ਼ਰ ਆਵੇਗਾ।
ਰਿੱਦਮ ਬੁਆਏਜ਼,ਹੇਅਰ ਓਮ ਜੀ ਸਟੂਡੀਓ ਦੀ ਪੇਸ਼ਕਸ ਇਸ ਫ਼ਿਲਮ ਦੀ ਕਹਾਣੀ 1960 ਦੇ ਸਮਿਆਂ ਦੀ ਹੈ, ਜੋ ਪੁਰਾਤਨ ਪੰਜਾਬ ਦੇ ਉਸ ਦੌਰ ਦੀ ਗੱਲ ਕਰੇਗੀ ਜਦੋਂ ਬਹੁਤੇ ਸਾਂਝੇ ਪਰਿਵਾਰਾਂ ਵਿਚ ਇਕ ਬੰਦੇ ਦਾ ਹੀ ਵਿਆਹ ਹੁੰਦਾ ਸੀ ਤੇ ਬਾਕੀ ਛੜੇ ਹੁੰਦੇ ਸੀ। ਛੜੇ ਬੰਦੇ ਦੀ ਜ਼ਿੰਦਗੀ 'ਚ ਤੀਂਵੀ ਦੀ ਕੀ ਅਹਿਮੀਅਤ ਹੁੰਦੀ ਸੀ, ਇਹੋ ਫ਼ਿਲਮ ਦਾ ਮੁੱਖ ਵਿਸ਼ਾ ਹੈ ਜਿਸ ਨੂੰ ਕਾਮੇਡੀ ਦਾ ਤੜਕਾ ਲਗਾ ਕੇ ਮਨੋਰੰਜਨ ਭਰਪੂਰ ਬਣਾਇਆ ਗਿਆ ਹੈ। ਫ਼ਿਲਮ ਦੇ ਨਿਰਮਾਤਾ ਕਾਰਜ ਗਿੱਲ, ਤਲਵਿੰਦਰ ਹੇਅਰ ਤੇ ਸਹਿ ਨਿਰਮਾਤਾ ਮੁਨੀਸ਼ ਸਾਹਨੀ ਹਨ। ਫ਼ਿਲਮ ਵਿਚ ਅੰਬਰਦੀਪ, ਸਿੰਮੀ ਚਾਹਲ, ਗੁੱਗੂ ਗਿੱਲ, ਨਿਰਮਲ ਰਿਸ਼ੀ, ਹੌਬੀ ਧਾਲੀਵਾਲ, ਹਰਦੀਪ ਗਿੱਲ, ਯਾਦ ਗਰੇਵਾਲ ਤੇ ਸੁਖਵਿੰਦਰ ਰਾਜ ਨੇ ਅਹਿਮ ਕਿਰਦਾਰ ਨਿਭਾਏ ਹਨ। ਫ਼ਿਲਮ ਦਾ ਸੰਗੀਤ ਜਤਿੰਦਰ ਸ਼ਾਹ ਵਲੋਂ ਤਿਆਰ ਕੀਤਾ ਗਿਆ ਹੈ। ਅਮਰਿੰਦਰ ਗਿੱਲ, ਸੁਰਿੰਦਰ ਛਿੰਦਾ, ਗੁਰਸ਼ਬਦ, ਬੀਰ ਸਿੰਘ ਤੇ ਗੁਰਪ੍ਰੀਤ ਮਾਨ ਨੇ ਪਲੇਅ ਬੈਕ ਗਾਇਆ ਹੈ। 14 ਦਸੰਬਰ ਨੂੰ ਇਹ ਫ਼ਿਲਮ ਓਮ ਜੀ ਗਰੁੱਪ ਵਲੋਂ ਰਿਲੀਜ਼ ਕੀਤੀ ਜਾਵੇਗੀ।


-ਸੁਰਜੀਤ ਜੱਸਲ

ਬਿਨਾਂ ਖੋਜ ਕੰਮ ਨਹੀਂ ਕਰਦੇ ਸ਼ੇਖਰ ਸੇਨ

ਜਦੋਂ 30 ਨਵੰਬਰ ਨੂੰ ਸ਼ੇਖਰ ਸੇਨ ਨੇ ਆਪਣੇ ਸ਼ੋਅ 'ਕਬੀਰ' ਨੂੰ ਮੁੰਬਈ ਵਿਚ ਪੇਸ਼ ਕੀਤਾ ਅਤੇ ਇਸ ਦੇ ਨਾਲ ਇਕ ਹਜ਼ਾਰ ਸ਼ੋਅ ਕਰਨ ਦੀ ਅਨੋਖੀ ਸਿੱਧੀ ਉਨ੍ਹਾਂ ਦੇ ਨਾਂਅ ਦਰਜ ਹੋ ਗਈ। ਇਕ ਜ਼ਮਾਨੇ ਵਿਚ ਸੰਗੀਤਕਾਰ ਬਣਨ ਲਈ ਮੁੰਬਈ ਆਏ ਸ਼ੇਖਰ ਸੇਨ ਨੇ ਉਦੋਂ ਸੁਪਨੇ ਵਿਚ ਵੀ ਨਹੀਂ ਸੋਚਿਆ ਸੀ ਕਿ ਇਥੇ ਸਫ਼ਲਤਾ ਉਨ੍ਹਾਂ ਨੂੰ ਰੰਗਮੰਚ ਦੀ ਬਦੌਲਤ ਮਿਲੇਗੀ। ਆਪਣੇ ਕੈਰੀਅਰ ਦੇ ਸ਼ੁਰੂਆਤੀ ਦੌਰ ਵਿਚ ਸ਼ੇਖਰ ਨੇ ਭਜਨ ਐਲਬਮਾਂ ਲਈ ਸੰਗੀਤ ਦਿੱਤਾ ਸੀ ਅਤੇ ਨਾਲ ਹੀ ਆਪਣੀ ਆਵਾਜ਼ ਵਿਚ ਭਜਨ ਐਲਬਮਾਂ ਨੂੰ ਵੀ ਪੇਸ਼ ਕੀਤਾ। ਕੁਝ ਸਾਲ ਤੱਕ ਇਹੀ ਕੰਮ ਕਰਦੇ ਰਹਿਣ ਤੋਂ ਬਾਅਦ ਉਨ੍ਹਾਂ ਨੂੰ ਇਸ ਵਿਚ ਰੁਟੀਨ ਕੰਮ ਵਾਲੀ ਗੱਲ ਲੱਗਣ ਲੱਗੀ ਅਤੇ ਉਦੋਂ ਤੋਂ ਕੁਝ ਨਵਾਂ ਕਰਨ ਬਾਰੇ ਸੋਚਣ ਲੱਗੇ। ਉਨ੍ਹਾਂ ਸੋਚਿਆ ਕਿ ਕਿਉਂ ਨਾ ਸੰਤ ਤੁਲਸੀ ਦਾਸ ਦੀ ਜੀਵਨੀ ਨੂੰ ਮੰਚ 'ਤੇ ਪੇਸ਼ ਕੀਤਾ ਜਾਵੇ। ਬਚਪਨ ਵਿਚ ਉਹ ਆਪਣੀ ਮਾਂ ਦੇ ਮੂੰਹੋਂ ਰਾਮ ਚਰਿਤ ਮਾਨਸ ਸੁਣਿਆ ਕਰਦੇ ਸੀ ਅਤੇ ਇਨ੍ਹਾਂ ਸੰਸਕਾਰਾਂ ਦੀ ਵਜ੍ਹਾ ਕਰਕੇ ਉਹ ਤੁਲਸੀਦਾਸ ਦੀ ਜੀਵਨੀ ਨੂੰ ਮੰਚ 'ਤੇ ਲਿਆਉਣ ਬਾਰੇ ਸੋਚਣ ਲੱਗੇ। 10 ਅਪ੍ਰੈਲ, 1998 'ਚ ਉਨ੍ਹਾਂ ਨੇ 'ਤੁਲਸੀ' ਦਾ ਪਹਿਲਾ ਸ਼ੋਅ ਪੇਸ਼ ਕੀਤਾ ਅਤੇ ਦੇਖਦੇ ਹੀ ਦੇਖਦੇ ਸ਼ੋਅ ਨੂੰ ਹਰਮਨ-ਪਿਆਰਤਾ ਮਿਲਣ ਲੱਗੀ। ਫਿਰ ਉਨ੍ਹਾਂ ਨੇ 'ਕਬੀਰ', 'ਵਿਵੇਕਾਨੰਦ', 'ਸਾਹਿਬ', 'ਸੂਰਦਾਸ' ਅਤੇ 'ਸੰਮਤੀ' ਸ਼ੋਅ ਪੇਸ਼ ਕੀਤੇ। ਇਹ ਸਾਰੇ ਸ਼ੋਅ ਇਕ ਪਾਤਰੀ ਹਨ ਅਤੇ ਇਨ੍ਹਾਂ ਦਾ ਲੇਖਨ ਪੱਖ ਵੀ ਸ਼ੇਖਰ ਸੇਨ ਵਲੋਂ ਕੀਤਾ ਗਿਆ ਹੈ ਤੇ ਸੰਗੀਤ ਵੀ ਉੁਨ੍ਹਾਂ ਨੇ ਦਿੱਤਾ ਹੈ। ਇਨ੍ਹਾਂ ਦੇ ਸ਼ੋਅ ਦੇ ਵਿਸ਼ੇ ਸੱਭਿਆਚਾਰ ਦੀਆਂ ਜੜ੍ਹਾਂ ਨਾਲ ਜੁੜੇ ਹੋਏ ਹਨ। ਇਸ ਵਜ੍ਹਾ ਕਰਕੇ ਉਹ ਆਪਣੇ ਸ਼ੋਅ ਵਿਚ ਕੀ-ਬੋਰਡ ਰਾਹੀਂ ਪੈਦਾ ਕੀਤਾ ਗਿਆ ਸੰਗੀਤ ਵਰਤਦੇ ਹਨ। ਸ਼ੇਖਰ ਸੇਨ ਨੂੰ ਆਪਣੇ ਸਾਰੇ ਨਾਟਕ ਪਿਆਰੇ ਹਨ, ਦਿਲ ਦੇ ਨੇੜੇ ਹਨ ਪਰ ਉਨ੍ਹਾਂ ਅਨੁਸਾਰ ਜਨਤਾ ਵਲੋਂ 'ਕਬੀਰ' ਨੂੰ ਜ਼ਿਆਦਾ ਪਿਆਰ ਨਸੀਬ ਹੋਇਆ ਹੈ ਅਤੇ ਇਸ ਵਜ੍ਹਾ ਕਰਕੇ ਇਸ ਦੇ ਹੁਣ ਤੱਕ 426 ਸ਼ੋਅ ਪੇਸ਼ ਹੋ ਚੁੱਕੇ ਹਨ। ਯੂਰਪ ਤੇ ਅਮਰੀਕਾ ਤੋਂ ਲੈ ਕੇ ਜਾਪਾਨ ਤੇ ਵੈਸਟਇੰਡੀਜ਼ ਸਮੇਤ ਕਈ ਦੇਸ਼ਾਂ ਵਿਚ ਉਹ ਆਪਣੇ ਸ਼ੋਅ ਪੇਸ਼ ਕਰ ਚੁੱਕੇ ਹਨ। ਦੇਸ਼ ਦੀ ਲੋਕ ਸਭਾ ਤੇ ਰਾਸ਼ਟਰਪਤੀ ਭਵਨ ਵੀ ਇਨ੍ਹਾਂ ਦੇ ਸ਼ੋਅ ਦੇ ਗਵਾਹ ਬਣੇ ਹਨ। ਸ਼ੇਖਰ ਸੇਨ ਆਪਣੇ ਹਰ ਸ਼ੋਅ ਦੇ ਵਿਸ਼ੇ ਲਈ ਬਹੁਤ ਮਿਹਨਤ ਕਰਦੇ ਹਨ। ਜਦੋਂ ਉਹ 'ਸੂਰਦਾਸ' ਦਾ ਲੇਖਨ ਪੱਖ ਤਿਆਰ ਕਰ ਰਹੇ ਸਨ, ਉਦੋਂ ਉਨ੍ਹਾਂ ਤਾਨਸੇਨ, ਅਬੁਲ ਫਜ਼ਲ, ਲੋਦੀ ਸਾਮਰਾਜ 'ਤੇ ਵੀ ਕਾਫ਼ੀ ਖੋਜ ਕੀਤੀ ਸੀ, ਕਿਉਂਕਿ ਉਹ ਸਾਰੇ ਸੂਰਦਾਸ ਦੇ ਕਾਲ-ਖੰਡ ਨਾਲ ਸਬੰਧ ਰੱਖਦੇ ਹਨ।
ਹਾਂ, ਉਨ੍ਹਾਂ ਨੂੰ ਅਫ਼ਸੋਸ ਇਸ ਗੱਲ ਦਾ ਹੈ ਕਿ ਸਾਡੇ ਦੇਸ਼ ਵਿਚ ਰੰਗਮੰਚ ਦਾ ਏਨਾ ਵਿਕਾਸ ਨਹੀਂ ਹੋਇਆ ਜਿੰਨਾ ਹੋਣਾ ਚਾਹੀਦਾ ਸੀ। ਉਹ ਕਹਿੰਦੇ ਹਨ, 'ਲਗਪਗ ਚੌਵੀ ਸੌ ਸਾਲ ਪਹਿਲਾਂ ਇਸੇ ਦੇਸ਼ ਵਿਚ ਭਰਤ ਮੁਨੀ ਵਲੋਂ ਨਾਟਸ਼ਾਸਤਰ ਲਿਖਿਆ ਲਿਆ ਗਿਆ ਅਤੇ ਉਸ ਵਿਚ ਨਾਟਕਾਂ ਦੇ ਨੌਂ ਰਸ ਤੋਂ ਲੈ ਕੇ ਰੰਗਮੰਚ ਦੇ ਨਾਪ ਤੱਕ ਬਾਰੇ ਵਿਸਥਾਰ ਨਾਲ ਲਿਖਿਆ ਗਿਆ। ਇਸ ਤਰ੍ਹਾਂ ਦੇ ਗੁਣੀ ਜਨ ਦੇ ਦੇਸ਼ ਵਿਚ ਨਾਟਕ ਦਾ ਵਿਕਾਸ ਜ਼ਿਆਦਾ ਨਾ ਹੋਇਆ ਦੇਖ ਕੇ ਅਫ਼ਸੋਸ ਹੁੰਦਾ ਹੈ।

ਕੁਝ ਬਣਨਾ ਹੈ ਦੁਨੀਆ 'ਚ...

ਕਮਲ ਖੰਗੂੜਾ

ਰਵੀ ਪੁੰਜ ਦੀ ਆ ਰਹੀ ਪੰਜਾਬੀ ਫ਼ਿਲਮ 'ਟਾਈਟੈਨਿਕ' ਦੀ ਹੀਰੋਇਨ ਕਮਲ ਖੰਗੂੜਾ ਦੀ ਪ੍ਰੋਫਾਇਲ ਦੇਖੋ ਤਾਂ ਪਤਾ ਲਗਦਾ ਹੈ ਕਿ ਰੱਜ ਕੇ ਸੋਹਣੀ, ਨੈਣ-ਨਕਸ਼ ਕੁਦਰਤ ਦੀ ਮੀਨਾਕਾਰੀ, ਉੱਚਾ-ਲੰਮਾ ਕੱਦ-ਕਾਠ, ਸੋਹਣੀ ਸਰੀਰਕ ਬਣਤਰ, ਸੁੰਦਰ ਚਿਹਰਾ, ਮੋਹਣੀਆਂ ਅੱਖਾਂ ਤੇ ਬੋਲ-ਬਾਣੀ ਸਭ 'ਏਕ ਸੇ ਬੜ ਕਰ ਏਕ' ਹੈ ਤਾਂ ਹੀ 250 ਦੇ ਕਰੀਬ ਪੰਜਾਬੀ ਐਲਬਮ ਗੀਤਾਂ ਦੀ ਮੁੱਖ ਮਾਡਲ, ਤਿੰਨ ਦਰਜਨ ਗੀਤਾਂ ਦੀ ਵੀਡੀਓ ਡਾਇਰੈਕਟਰ ਹੈ। ਪੜ੍ਹੀ ਵੀ ਚੰਡੀਗੜ੍ਹ, ਪੋਸਟ ਗਰੈਜੂਏਟ ਤੇ ਅਭਿਨੈ ਨਾਲ ਸਕੂਲ ਤੋਂ ਹੀ ਸਬੰਧ। ਬਲਜਿੰਦਰ ਸਿੰਘ, ਹੈਰੀ ਪੁੰਜ ਤੇ ਕਰਮਪ੍ਰੀਤ ਸਮਰਾ ਨੇ ਜਦ ਸਟਾਰ ਗਾਇਕ-ਨਾਇਕ ਦਿਲਜੀਤ ਦੁਸਾਂਝ ਦਾ ਵੀਡੀਓ ਗੀਤ 'ਅੱਖਰਾਂ 'ਚ ਤੂੰ ਦਿਸਦੀ' ਦੇਖਿਆ ਤਾਂ ਉਸ ਦੀ ਨਾਇਕਾ ਕਮਲ ਖੰਗੂੜਾ ਦੇ ਘਰੇ ਤੜਕੇ ਹੀ ਪੁੱਜ ਗਏ ਤੇ ਕਹਾਣੀ ਸੁਣਾ 'ਟਾਈਟੈਨਿਕ' ਫ਼ਿਲਮ ਦੀ ਹੀਰੋਇਨ ਲੈ ਲਿਆ। ਜੱਸੀ ਸਿੱਧੂ ਦੇ ਗੀਤ 'ਚੰਡੀਗੜ੍ਹ ਕਰੇ ਆਸ਼ਕੀ' ਨਾਲ ਮਾਡਲ ਬਣ ਰਾਤੋ-ਰਾਤ ਪ੍ਰਸਿੱਧ ਹੋਈ ਪੰਜਾਬਣ ਕੁੜੀ ਕਮਲ ਖੰਗੂੜਾ ਨੇ ਫਿਰ ਗਿੱਪੀ ਗਰੇਵਾਲ, ਨਛੱਤਰ ਗਿੱਲ, ਅਮਰਿੰਦਰ ਗਿੱਲ, ਜੱਸੀ ਸੋਹਲ ਦੇ ਵੀਡੀਓ ਗੀਤਾਂ ਦੀ ਨਾਇਕਾ ਬਣ ਵੀਡੀਓ ਕਾਮਯਾਬੀ 'ਚ ਆਪਣਾ ਹਿੱਸਾ ਪਾਇਆ ਤੇ ਫਿਰ ਕੈਨੇਡਾ ਐਕਟਿੰਗ ਕੋਰਸ ਕਰਨ ਲਈ ਕੈਨੇਡੀਅਨ ਪੱਕੀ ਨਾਗਰਿਕ ਬਣ ਕੇ ਪਰਤੀ ਤਾਂ ਰਵੀ ਪੁੰਜ ਨੇ ਰਾਜ ਸਿੰਘ ਝਿੰਜਰ (ਹਰਜੀਤਾ ਫ਼ਿਲਮ ਫੇਮ) ਨਾਲ ਕਮਲ ਖੰਗੂੜਾ ਨੂੰ ਨਾਇਕਾ ਲੈ ਅੱਜ ਰਿਲੀਜ਼ 'ਤੇ ਪਹੁੰਚਾ ਦਿੱਤਾ ਹੈ। 'ਟਾਈਟੈਨਿਕ' 'ਚ ਉਸ ਨਾਲ ਪਾਲੀਵੁੱਡ ਸਟਾਰਜ਼ ਹੌਬੀ ਧਾਲੀਵਾਲ, ਮਲਕੀਤ ਰੌਣੀ, ਸਿਮਰਨ ਸਹਿਜਪਾਲ, ਨਿਹਾਲ ਪੁਰਬਾ ਤੇ ਗੁਰਪ੍ਰੀਤ ਕੌਰ ਭੰਗੂ ਵੀ ਹਨ। ਕਮਲ ਕਹਿ ਰਹੀ ਹੈ ਕਿ 'ਟਾਈਟੈਨਿਕ' ਵੱਖਰੀ ਕਿਸਮ ਦੀ ਫ਼ਿਲਮ ਹੈ, ਜਿਸ 'ਚ ਐਕਸ਼ਨ, ਡਰਾਮਾ, ਮਨੋਰੰਜਨ ਦੇ ਨਾਲ ਨਿੰਜਾ, ਗੁਰਨਾਮ ਭੁੱਲਰ, ਦੀਪਕ ਢਿੱਲੋਂ, ਫਿਰੋਜ਼ ਖ਼ਾਨ ਜਿਹੇ ਗਾਇਕਾਂ ਦੇ ਗੀਤ ਹਨ। ਮਤਲਬ ਸੰਗੀਤ ਪੱਖੋਂ ਵੀ ਅਮੀਰ ਤੇ ਕਹਾਣੀ ਉਹੀ ਘਿਸੇ-ਪਿੱਟੇ ਵਿਸ਼ੇ ਨਹੀਂ, ਬਲਕਿ ਭ੍ਰਿਸ਼ਟ ਸਿਸਟਮ, ਬੇਰੁਜ਼ਗਾਰੀ ਤੇ ਜਵਾਨੀ ਦੇ ਸੁਪਨਿਆਂ ਦੀ ਗੱਲ 'ਕੁਝ ਬਣਨਾ ਹੈ ਦੁਨੀਆ 'ਤੇ' ਆਧਾਰਿਤ ਹੈ। 'ਟਾਈਟੈਨਿਕ' ਰਿਲੀਜ਼ ਦਾ ਚਾਅ ਉਸ ਨੂੰ ਵਿਆਹ ਜਿਹਾ ਹੈ, ਕਿਉਂਕਿ ਪਤਾ ਹੈ ਕਿ ਫਿਰ ਮਾਡਲਿੰਗ ਦੀ ਤਰ੍ਹਾਂ ਹੀ ਉਹ ਪਾਲੀਵੁੱਡ ਦੀ ਚਹੇਤੀ ਹੀਰੋਇਨ ਬਣ ਜਾਏਗੀ। ਕੰਮ ਪੰਜਾਬ 'ਚ ਹੀ 24 ਘੰਟੇ 7 ਦਿਨ ਨਹੀਂ ਮੁੱਕਣਾ, ਮੁੰਬਈ ਦੀ ਤਾਂ ਕੀ, ਕੈਨੇਡਾ ਦੀ ਵੀ ਯਾਦ ਭੁੱਲ ਜੂ, ਆਤਮ-ਵਿਸ਼ਵਾਸ ਹੋਵੇ ਤਾਂ ਕਮਲ ਖੰਗੂੜਾ ਜਿਹਾ।


-ਅੰਮ੍ਰਿਤ ਪਵਾਰ

ਬਾਲੀਵੁੱਡ ਫ਼ਲੈਸ਼ਬੈਕ

ਗੀਤਾ ਬਾਲੀ ਨੇ ਕੀਤਾ ਸੀ ਦੋ ਕਪੂਰ ਖ਼ਾਨਦਾਨਾਂ 'ਤੇ ਵੱਡਾ ਅਹਿਸਾਨ

ਆਪਣੇ ਜ਼ਮਾਨੇ ਦੀ ਬੇਹੱਦ ਹਸੀਨ ਅਦਾਕਾਰਾ ਗੀਤਾ ਬਾਲੀ ਦਾ ਅਸਲ ਨਾਂ ਹਰਕੀਰਤਨ ਕੌਰ ਸੀ। ਫ਼ਿਲਮ 'ਮਿਸ ਕੋਕਾ ਕੋਲਾ' ਦੀ ਸ਼ੂਟਿੰਗ ਦੌਰਾਨ ਗੀਤਾ ਬਾਲੀ ਦੀ ਨੇੜਤਾ ਕਪੂਰ ਖ਼ਾਨਦਾਨ ਦੇ ਰੌਸ਼ਨ ਚਿਰਾਗ਼ ਸ਼ੰਮੀ ਕਪੂਰ ਨਾਲ ਹੋ ਗਈ ਸੀ ਤੇ ਵਧਦੀ ਵਧਦੀ ਗੱਲ ਸ਼ਾਦੀ ਤੱਕ ਜਾ ਪੁੱਜੀ ਸੀ। ਪ੍ਰਿਥਵੀ ਰਾਜ ਕਪੂਰ ਦੇ ਦਬਦਬਾ ਹੇਠ ਚੱਲਣ ਵਾਲੇ ਕਪੂਰ ਪਰਿਵਾਰ ਨੂੰ ਇਹ ਪ੍ਰੇਮ ਵਿਆਹ ਦਾ ਪ੍ਰਸਤਾਵ ਸਵੀਕਾਰ ਨਹੀਂ ਸੀ। ਕਪੂਰ ਪਰਿਵਾਰ ਨਾਲ ਕਈ ਮੁਲਾਕਾਤਾਂ ਅਤੇ ਢੇਰ ਸਾਰੀ ਬਹਿਸਬਾਜ਼ੀ ਤੇ ਸ਼ੋਰ ਸ਼ਰਾਬੇ ਪਿੱਛੋਂ ਅਖ਼ੀਰ ਗੀਤਾ ਆਪਣੀ ਜ਼ਿਦ ਮੰਨਵਾ ਕੇ ਹੀ ਹਟੀ ਤੇ ਉਸ ਦੀ ਸ਼ਾਦੀ ਸ਼ੰਮੀ ਕਪੂਰ ਨਾਲ ਹੋ ਹੀ ਗਈ। ਅਸਲ ਗੱਲ ਇਹ ਸੀ ਕਿ ਕਪੂਰ ਖ਼ਾਨਦਾਨ ਕਿਸੇ ਅਦਾਕਾਰਾ ਨੂੰ ਆਪਣੇ ਪਰਿਵਾਰ ਵਿਚ ਬਹੂ ਬਣਾ ਕੇ ਨਹੀਂ ਲਿਆਉਣਾ ਚਾਹੁੰਦਾ ਸੀ ਪਰ ਗੀਤਾ ਦੀਆਂ ਵਜ਼ਨਦਾਰ ਦਲੀਲਾਂ ਅਤੇ ਦਿਲਕਸ਼ ਸ਼ਖ਼ਸੀਅਤ ਨੇ ਆਖ਼ਿਰ ਇਸ ਖ਼ਾਨਦਾਨ ਨੂੰ ਆਪਣੀ ਸੋਚ ਅਤੇ ਆਪਣਾ ਫ਼ੈਸਲਾ ਬਦਲਣ ਲਈ ਮਜਬੂਰ ਕਰ ਦਿੱਤਾ। ਗੀਤਾ ਬਾਲੀ ਦੀ ਇਸ ਪਹਿਲ ਦਾ ਸਿੱਟਾ ਇਹ ਨਿੱਕਲਿਆ ਸੀ ਕਿ ਉਸ ਤੋਂ ਬਾਅਦ ਬਬੀਤਾ, ਨੀਤੂ ਸਿੰਘ ਅਤੇ ਜੈਨੀਫ਼ਰ ਕੈਂਡਲ ਆਦਿ ਜਿਹੀਆਂ ਅਭਿਨੇਤਰੀਆਂ ਵੀ ਕਪੂਰ ਖ਼ਾਨਦਾਨ ਦੀਆਂ ਬਹੂਆਂ ਬਣਨ ਵਿਚ ਸਫ਼ਲ ਰਹੀਆਂ ਸਨ। ਉਪਰੋਕਤ ਤਿੰਨੇ ਕਾਬਿਲ ਤੇ ਸੂਝਵਾਨ ਅਦਾਕਾਰਾਵਾਂ ਦਾ ਕਪੂਰ ਖ਼ਾਨਦਾਨ ਵਿਚ ਪ੍ਰਵੇਸ਼ ਸੰਭਵ ਬਣਾਉਣ ਲਈ ਸਮੁੱਚਾ ਕਪੂਰ ਪਰਿਵਾਰ ਗੀਤਾ ਬਾਲੀ ਦਾ ਸਦਾ ਹੀ ਅਹਿਸਾਨ ਮਹਿਸੂਸ ਕਰਦਾ ਹੈ। ਅਦਾਕਾਰ ਸ਼ੰਮੀ ਕਪੂਰ ਦੇ ਸੈਕਟਰੀ ਸੁਰਿੰਦਰ ਕਪੂਰ ਨੂੰ ਗੀਤਾ ਬਾਲੀ ਨੇ ਹੀ ਫ਼ਿਲਮ ਨਿਰਮਾਤਾ ਬਣਨ ਲਈ ਪ੍ਰੇਰਿਤ ਕੀਤਾ ਸੀ ਤੇ ਉਸਦੀ ਪ੍ਰੇਰਨਾ ਦਾ ਲੜ ਫੜ ਕੇ ਫ਼ਿਲਮ ਨਿਰਮਾਣ ਦੇ ਖੇਤਰ ਵਿਚ ਉਤਰੇ ਸੁਰਿੰਦਰ ਕਪੂਰ ਸਾਹਿਬ ਛੇਤੀ ਹੀ ਬਾਲੀਵੁੱਡ ਦੇ ਨਾਮਵਰ ਫ਼ਿਲਮ ਨਿਰਮਾਤਾ ਹੋ ਨਿੱਬੜੇ ਸਨ। ਅੱਜ ਵੀ ਸੁਰਿੰਦਰ ਕਪੂਰ ਦੇ ਹੋਣਹਾਰ ਫ਼ਰਜ਼ੰਦ ਬੋਨੀ ਕਪੂਰ, ਅਨਿਲ ਕਪੂਰ ਅਤੇ ਸੰਜੇ ਕਪੂਰ ਬਾਲੀਵੁੱਡ ਵਿਚ ਬਤੌਰ ਫ਼ਿਲਮ ਨਿਰਮਾਤਾ ਅਤੇ ਅਦਾਕਾਰ ਚੰਗਾ ਰਸੂਖ਼ ਰੱਖਦੇ ਹਨ।


-ਪ੍ਰੋ: ਪਰਮਜੀਤ ਸਿੰਘ ਨਿੱਕੇ ਘੁੰਮਣ

ਛੋਟੇ ਪਰਦੇ 'ਤੇ ਇਕ ਹੋਰ ਭੂਤਾਂ ਵਾਲਾ ਲੜੀਵਾਰ ਡਾਇਣ

ਹੁਣ ਏਕਤਾ ਕਪੂਰ ਐਂਡ ਟੀ. ਵੀ. ਚੈਨਲ 'ਤੇ 'ਡਾਇਣ' ਲੜੀਵਾਰ ਲੈ ਆਈ ਹੈ। ਇਸ ਦੇ ਨਾਂਅ ਕਰਕੇ ਇਹ ਦੱਸਣ ਦੀ ਜ਼ਰੂਰਤ ਨਹੀਂ ਕਿ ਇਸ ਵਿਚ ਕੀ ਕੁਝ ਪੇਸ਼ ਕੀਤਾ ਜਾਵੇਗਾ। ਉਂਜ ਇਸ ਦਾ ਇਕ ਨਜ਼ਾਰਾ ਤਾਂ ਇਸ ਲੜੀਵਾਰ ਦੇ ਸਿਲਸਿਲੇ ਵਿਚ ਆਯੋਜਿਤ ਕੀਤੀ ਗਈ ਪ੍ਰੈੱਸ ਕਾਨਫਰੰਸ ਵਿਚ ਹੀ ਪੇਸ਼ ਕਰ ਦਿੱਤਾ ਗਿਆ ਸੀ। ਜਿਸ ਹੋਟਲ ਵਿਚ ਇਸ ਦਾ ਆਯੋਜਨ ਕੀਤਾ ਗਿਆ ਸੀ, ਉਸ ਦੀਆਂ ਪੌੜੀਆਂ 'ਤੇ ਕਾਲੇ ਕੱਪੜੇ ਪਾ ਕੇ ਕ੍ਰਿਸ਼ਨਾ ਬੰਸਲ ਨਾਮੀ ਕਲਾਕਾਰ ਨੂੰ ਬਿਠਾਇਆ ਗਿਆ ਸੀ। ਹੱਥ ਵਿਚ ਮੋਰ ਖੰਭਾਂ ਦਾ ਗੁੱਛਾ ਫੜੀ ਉਹ ਹਰ ਕਿਸੇ 'ਤੇ ਨਕਲੀ ਝਾੜ-ਭੂਕ ਕਰ ਕੇ ਹਾਲ ਵਿਚ ਦਾਖਲ ਹੋਣ ਦਿੰਦਾ ਸੀ।
ਇਸ ਤਰ੍ਹਾਂ ਦੇ ਮਾਹੌਲ ਵਿਚ ਲੜੀਵਾਰ ਦੇ ਕਲਾਕਾਰਾਂ ਦੀ ਪਛਾਣ ਕੀਤੀ ਗਈ। ਇਥੇ ਟੀਨਾ ਦੱਤਾ ਵਲੋਂ ਜਾਹਨਵੀ ਮੌਰਿਆ ਦੀ ਭੂਮਿਕਾ ਨਿਭਾਈ ਜਾ ਰਹੀ ਹੈ। ਕਹਾਣੀ ਅਨੁਸਾਰ ਉਹ ਦਿੱਲੀ ਤੋਂ ਆਪਣੇ ਸ਼ਹਿਰ ਉਜੈਨ ਆਉਂਦੀ ਹੈ ਅਤੇ ਇਥੇ ਦੋ ਬੱਚੇ ਉਸ ਅੱਗੇ ਆਪਣੀ ਜਾਨ ਬਚਾ ਲੈਣ ਦੀ ਗੁਹਾਰ ਲਗਾਉਂਦੇ ਹਨ ਅਤੇ ਇਸ ਦੇ ਨਾਲ ਹੀ ਅਜੀਬੋ-ਗਰੀਬ ਘਟਨਾਵਾਂ ਦਾ ਚੱਕਰ ਸ਼ੁਰੂ ਹੋ ਜਾਂਦਾ ਹੈ। ਜਾਹਨਵੀ ਦੇ ਬਚਪਨ ਦੇ ਦੋਸਤ ਆਕਰਸ਼ ਸ਼ਰਮਾ ਦੀ ਭੂਮਿਕਾ ਮੋਹਿਤ ਮਲਹੋਤਰਾ ਵਲੋਂ ਨਿਭਾਈ ਗਈ ਹੈ ਅਤੇ ਇਨ੍ਹਾਂ ਦੇ ਨਾਲ ਆਕਾਸ਼ ਤਲਵਾਰ, ਅਮਿਤ ਠਾਕੁਰ, ਰਿਸ਼ੀਤਾ ਨਾਗ, ਕਨਿਕਾ ਸ਼ਿਵਪੁਰੀ, ਪ੍ਰਭਾਤ ਭੱਟਾਚਾਰੀਆ, ਪ੍ਰਿਆ ਭਤੀਜਾ ਵੀ ਇਸ ਵਿਚ ਅਭਿਨੈ ਕਰ ਰਹੇ ਹਨ। ਕਹਾਣੀ ਦੀ ਖ਼ਾਸ ਗੱਲ ਇਹ ਹੈ ਕਿ ਕਿਰਦਾਰਾਂ ਵਿਚੋਂ ਕਿਹੜਾ ਡਾਇਣ ਹੈ, ਇਸ ਤੋਂ ਅਖੀਰ ਵਿਚ ਪਰਦਾ ਚੁੱਕਿਆ ਜਾਵੇਗਾ। 15 ਦਸੰਬਰ ਤੋਂ ਐਂਡ ਟੀ. ਵੀ. 'ਤੇ ਹਰ ਸਨਿੱਚਰਵਾਰ ਰਾਤ ਨੌਂ ਵਜੇ ਪ੍ਰਸਾਰਿਤ ਹੋ ਰਿਹਾ ਇਹ ਲੜੀਵਾਰ ਦਰਸ਼ਕਾਂ ਨੂੰ ਡਰਾਉਣ ਵਿਚ ਕਿੰਨਾ ਸਫਲ ਹੋਵੇਗਾ, ਇਹ ਆਉਣ ਵਾਲਾ ਸਮਾਂ ਹੀ ਦੱਸੇਗਾ।


-ਮੁੰਬਈ ਪ੍ਰਤੀਨਿਧ

ਰਣਵਿਜੇ ਸਿੰਘ ਨੇ ਵੰਡੇ ਇਨਾਮ

ਅੱਜ ਦੇ ਆਨਲਾਈਨ ਜ਼ਮਾਨੇ ਵਿਚ ਖੇਡਾਂ ਵੀ ਘਰ ਬੈਠੇ ਖੇਡੀਆਂ ਜਾਣ ਲੱਗੀਆਂ ਹਨ। ਕ੍ਰਿਕਟ, ਲੁਡੂ ਤੇ ਹੋਰ ਖੇਡਾਂ ਦੇ ਨਾਲ-ਨਾਲ ਪੋਕਰ ਵੀ ਕੰਪਿਊਟਰ ਜਾਂ ਮੋਬਾਈਲ ਫੋਨ ਦੀ ਸਕਰੀਨ 'ਤੇ ਖੇਡਿਆ ਜਾਣ ਲੱਗਿਆ ਹੈ। ਆਨਲਾਈਨ ਦੇ ਖੇਤਰ ਵਿਚ ਪੋਕਰ ਦੀ ਖੇਡ ਨੂੰ ਲੋਕਪ੍ਰਿਆ ਬਣਾਉਣ ਦਾ ਸਿਹਰਾ ਅਮੀਨ ਰੋਝਾਨੀ ਨੂੰ ਜਾਂਦਾ ਹੈ ਜਿਨ੍ਹਾਂ ਨੇ ਸਪਾਰਟਨ ਪੋਕਰ ਐਪ ਰਾਹੀਂ ਇਸ ਖੇਡ ਦਾ ਵਿਸਤਾਰ ਬਹੁਤ ਵਧਾ ਦਿੱਤਾ ਹੈ। ਇਥੇ ਹੀ ਬੱਸ ਨਹੀਂ, ਉਹ ਇੰਡੀਅਨ ਪੋਕਰ ਚੈਂਪੀਅਨਸ਼ਿਪ ਰਾਹੀਂ ਜੇਤੂਆਂ ਨੂੰ ਵੱਡੀ ਰਕਮ ਦੇ ਇਨਾਮ ਵੀ ਦਿੰਦੇ ਹਨ। ਇਸ ਚੈਂਪੀਅਨਸ਼ਿਪ ਦੀ ਦੂਜੇ ਸੀਜ਼ਨ ਦੇ ਮੁੱਖ ਜੇਤੂ ਰਿਸ਼ਭ ਜੈਨ ਰਹੇ ਅਤੇ ਟੀ. ਵੀ. ਹੋਸਟ ਅਤੇ ਅਦਾਕਾਰ ਰਣਵਿਜੇ ਸਿੰਘ ਦੇ ਹੱਥੋਂ ਉਨ੍ਹਾਂ ਨੂੰ ਇਨਾਮ ਦਿੱਤਾ ਗਿਆ। ਆਪਣੇ ਬਿਆਨ ਵਿਚ ਨੌਜਵਾਨਾਂ ਨੂੰ ਆਪਣਾ ਸੰਦੇਸ਼ ਦਿੰਦੇ ਹੋਏ ਰਣਵਿਜੇ ਸਿੰਘ ਨੇ ਕਿਹਾ ਕਿ ਅੱਜ ਦੇ ਸਮੇਂ ਵਿਚ ਸਰੀਰਕ ਖੇਡ ਦੇ ਨਾਲ-ਨਾਲ ਮਾਨਸਿਕ ਖੇਡਾਂ ਵੀ ਜ਼ਰੂਰੀ ਬਣ ਗਈਆਂ ਹਨ। ਆਨਲਾਈਨ ਖੇਡਾਂ ਦੀ ਵਜ੍ਹਾ ਕਰਕੇ ਦੇਸ਼ ਦੇ ਬੌਧਿਕ ਧਨ ਵਿਚ ਬਹੁਤ ਵਾਧਾ ਹੋਇਆ ਹੈ ਅਤੇ ਇਹ ਤਾਂ ਵਿਗਿਆਨ ਵੀ ਕਹਿੰਦਾ ਹੈ ਕਿ ਦਿਮਾਗ਼ੀ ਖੇਡ ਖੇਡਣ ਨਾਲ ਬੁੱਧੀ ਵਧਦੀ ਹੈ। ਉਨ੍ਹਾਂ ਨੇ ਇਹ ਵੀ ਉਮੀਦ ਪ੍ਰਗਟਾਈ ਕਿ ਅਗਲੀ ਪ੍ਰਤੀਯੋਗਤਾ ਵਿਚ ਪ੍ਰਤੀਯੋਗੀਆਂ ਦੀ ਗਿਣਤੀ ਹੋਰ ਜ਼ਿਆਦਾ ਹੋਵੇਗੀ ਤਾਂ ਕਿ ਇਸ ਖੇਡ ਜ਼ਰੀਏ ਹੋਰ ਜ਼ਿਆਦਾ ਲੋਕ ਆਪਣੇ ਦਿਮਾਗ਼ ਨੂੰ ਤੇਜ਼ ਕਰ ਸਕਣ।


-ਮੁੰਬਈ ਪ੍ਰਤੀਨਿਧ

ਸ਼ਹੀਦ ਸਿਪਾਹੀਆਂ ਲਈ ਅੱਗੇ ਆਏ ਫ਼ਿਲਮ ਕਲਾਕਾਰ

ਭਾਰਤੀ ਫ਼ੌਜ ਦੇ ਸ਼ਹੀਦਾਂ ਅਤੇ ਸੂਰਵੀਰਾਂ ਲਈ ਅਥਰਵ ਫਾਊਂਡੇਸ਼ਨ ਵਲੋਂ ਇਕ ਪ੍ਰੋਗਰਾਮ 'ਵਨ ਫਾਰ ਆਲ, ਆਲ ਫਾਰ ਵਨ' ਪਹਿਲਾਂ ਆਯੋਜਿਤ ਕੀਤਾ ਗਿਆ ਸੀ। ਹੁਣ ਇਸ ਦੇ ਦੂਜੇ ਭਾਗ ਦਾ ਐਲਾਨ ਕੀਤਾ ਗਿਆ ਹੈ ਅਤੇ ਇਹ ਪ੍ਰੋਗਰਾਮ 31 ਜਨਵਰੀ ਨੂੰ ਮੁੰਬਈ ਵਿਚ ਆਯੋਜਿਤ ਹੋਵੇਗਾ। ਇਸ ਐਲਾਨ ਦੇ ਮੌਕੇ 'ਤੇ ਅਥਰਵ ਫਾਊਂਡੇਸ਼ਨ ਦੇ ਸੁਨੀਲ ਰਾਣੇ ਦੇ ਨਾਲ-ਨਾਲ ਮਹਿਮਾ ਚੌਧਰੀ, ਜਾਏਦ ਖਾਨ, ਰਜ਼ਾ ਮੁਰਾਦ, ਅਰਚਨਾ ਵੇਦਾ, ਮੋਨਿਕਾ ਸ਼ਰਮਾ ਆਦਿ ਕਲਾਕਾਰ ਵੀ ਮੌਜੂਦ ਰਹੇ ਸਨ। ਨਾਲ ਹੀ ਕਈ ਰਿਟਾਇਰਡ ਫ਼ੌਜੀ ਅਫ਼ਸਰ ਵੀ ਸਨ। ਇਸ ਮੌਕੇ 'ਤੇ ਸਾਰੇ ਕਲਾਕਾਰਾਂ ਨੇ ਦੇਸ਼ ਦੇ ਫ਼ੌਜੀਆਂ ਦੇ ਜਜ਼ਬੇ ਨੂੰ ਸਲਾਮ ਕੀਤਾ ਅਤੇ ਇਕ ਆਵਾਜ਼ ਵਿਚ ਇਹ ਕਿਹਾ ਕਿ ਫ਼ੌਜੀ ਭਰਾ ਤੇ ਉਨ੍ਹਾਂ ਦੇ ਪਰਿਵਾਰ ਨੂੰ ਸਹਾਇਤਾ ਕਰਨ ਲਈ ਉਹ ਹਰ ਵੇਲੇ ਤਿਆਰ ਹਨ। ਇਸ ਮੌਕੇ 'ਤੇ ਮਹਿਮਾ ਨੇ ਸ਼ਹੀਦ ਫ਼ੌਜੀਆਂ ਦੀਆਂ ਬੇਟੀਆਂ ਨੂੰ ਲੈਪਟਾਪ ਵੰਡਣ ਦੀ ਯੋਜਨਾ ਦਾ ਸਵਾਗਤ ਕੀਤਾ ਅਤੇ ਕਿਹਾ ਕਿ ਇਸ ਨਾਲ ਦੇਸ਼ ਦੀਆਂ ਬੇਟੀਆਂ ਨੂੰ ਆਪਣੀ ਜ਼ਿੰਦਗੀ ਵਿਚ ਅੱਗੇ ਵਧਣ ਵਿਚ ਕਾਫ਼ੀ ਸਹੂਲਤ ਹੋਵੇਗੀ।


-ਮੁੰਬਈ ਪ੍ਰਤੀਨਿਧ

ਹੁਣ ਬਾਲੀਵੁੱਡ ਵਿਚ ਆਪਣੀ ਪਛਾਣ ਬਣਾਉਣਾ ਚਾਹੁੰਦਾ ਹਾਂ : ਰਾਜਿੰਦਰ ਸਿੰਘ ਅਰੋੜਾ

ਮੂਲ ਤੌਰ 'ਤੇ ਲੁਧਿਆਣਾ ਵਾਸੀ ਰਾਜਿੰਦਰ ਸਿੰਘ ਅਰੋੜਾ ਲੰਬੇ ਸਮੇਂ ਤੋਂ ਦਿੱਲੀ ਵਿਚ ਸਥਾਈ ਤੌਰ 'ਤੇ ਰਹਿ ਰਹੇ ਹਨ ਅਤੇ ਉਹ ਬਤੌਰ ਟੈਕਸ ਸਲਾਹਕਾਰ ਤੇ ਕਾਰਪੋਰੇਟ ਵਕੀਲ ਦੇ ਤੌਰ 'ਤੇ ਚੰਗੇ ਰੁੱਝੇ ਰਹਿੰਦੇ ਹਨ। ਵਕੀਲ ਦੇ ਨਾਲ-ਨਾਲ ਉਨ੍ਹਾਂ ਦੀ ਇਕ ਵੱਖਰੀ ਪਛਾਣ ਇਹ ਵੀ ਹੈ ਕਿ ਉਹ ਚੰਗੇ ਸ਼ਾਇਰ ਵੀ ਹਨ। ਦਿੱਲੀ ਦੇ ਸਾਹਿਤਕ ਖੇਤਰਾਂ ਵਿਚ ਉਹ ਦਿਲਦਾਰ ਦੇਹਲਵੀ ਦੇ ਨਾਂਅ ਨਾਲ ਜਾਣੇ ਜਾਂਦੇ ਹਨ। ਉਨ੍ਹਾਂ ਵਲੋਂ ਲਿਖੀਆਂ ਗ਼ਜ਼ਲਾਂ ਅਖ਼ਬਾਰਾਂ, ਮੈਗਜ਼ੀਨਾਂ ਵਿਚ ਪ੍ਰਕਾਸ਼ਿਤ ਹੁੰਦੀਆਂ ਰਹਿੰਦੀਆਂ ਹਨ ਅਤੇ ਉਹ ਤਾਰੀਫ਼ਾਂ ਖੱਟਦੇ ਰਹਿੰਦੇ ਹਨ। ਗ਼ਜ਼ਲਾਂ 'ਤੇ ਉਨ੍ਹਾਂ ਵਲੋਂ ਲਿਖੀ ਕਿਤਾਬ 'ਸੂਰਜ ਕਾ ਖ਼ਵਾਬ ਹੈ' ਪ੍ਰਕਾਸ਼ਿਤ ਹੋ ਚੁੱਕੀ ਹੈ ਅਤੇ ਗ਼ਜ਼ਲਾਂ ਦਾ ਗੁਲਦਸਤਾ ਨੁਮਾ ਉਨ੍ਹਾਂ ਦੀ ਦੂਜੀ ਕਿਤਾਬ 'ਤੋ ਜ਼ਿੰਦਗੀ ਸੰਵਰ ਗਈ' ਦਾ ਉਦਘਾਟਨ ਮੁੰਬਈ ਵਿਚ ਕੀਤਾ ਗਿਆ।
ਆਪਣੀ ਇਸ ਨਵੀਂ ਕਿਤਾਬ ਵਿਚ ਪੇਸ਼ ਕੀਤੀਆਂ ਗ਼ਜ਼ਲਾਂ ਬਾਰੇ ਉਹ ਕਹਿੰਦੇ ਹਨ, 'ਮੈਂ ਇਸ ਵਿਚ ਸਰਲ ਸ਼ਬਦਾਂ ਵਿਚ ਗ਼ਜ਼ਲਾਂ ਪੇਸ਼ ਕੀਤੀਆਂ ਹਨ ਤਾਂ ਕਿ ਆਮ ਆਦਮੀ ਇਸ ਦਾ ਲੁਤਫ਼ ਲੈ ਸਕੇ। ਆਮ ਇਨਸਾਨ ਦੀ ਦਿਮਾਗ਼ੀ ਸੋਚ ਇਨ੍ਹਾਂ ਗ਼ਜ਼ਲਾਂ ਵਿਚ ਪੇਸ਼ ਕੀਤੀ ਗਈ ਹੈ। ਇਨ੍ਹਾਂ ਵਿਚੋਂ ਕੁਝ ਰੋਮਾਂਟਿਕ ਹਨ ਤੇ ਕੁਝ ਦਿਲਾਂ ਦਾ ਦਰਦ ਬਿਆਨ ਕਰਦੀਆਂ ਹਨ। ਇਨ੍ਹਾਂ ਗ਼ਜ਼ਲਾਂ ਵਿਚ ਉਸ ਦਰਦ ਦੀ ਗੱਲ ਕੀਤੀ ਗਈ ਹੈ ਜੋ ਆਲੇ-ਦੁਆਲੇ ਦੀ ਦੁਨੀਆ ਵਿਚ ਦੇਖ ਕੇ ਦਿਲ ਵਿਚ ਹੁੰਦਾ ਹੈ।'
ਕਈ ਨਾਮੀ ਗਾਇਕ ਇਨ੍ਹਾਂ ਦੀਆਂ ਗ਼ਜ਼ਲਾਂ ਨੂੰ ਆਵਾਜ਼ ਦੇ ਚੁੱਕੇ ਹਨ ਅਤੇ ਹੁਣ ਇਸ ਗ਼ਜ਼ਲਕਾਰ ਨੇ ਫ਼ਿਲਮੀ ਗੀਤਾਂ ਵੱਲ ਆਪਣਾ ਰੁਖ਼ ਕੀਤਾ ਹੈ। ਉਹ ਕਹਿੰਦੇ ਹਨ, 'ਮੈਂ ਇਕ ਪੰਜਾਬੀ ਫ਼ਿਲਮ ਲਈ ਗੀਤ ਲਿਖੇ ਹਨ ਅਤੇ ਇਹ ਫ਼ਿਲਮ ਨਿਰਮਾਣ ਅਧੀਨ ਹੈ। ਮੈਂ ਹੁਣ ਬਾਲੀਵੁੱਡ ਵਿਚ ਆਪਣੀ ਪਛਾਣ ਬਣਾਉਣੀ ਚਾਹੁੰਦਾ ਹਾਂ ਅਤੇ ਇਸੇ ਵਜ੍ਹਾ ਕਰਕੇ ਮੈਂ ਇਸ ਕਿਤਾਬ ਦਾ ਉਦਘਾਟਨ ਪ੍ਰੋਗਰਾਮ ਦਿੱਲੀ ਦੀ ਬਜਾਏ ਮੁੰਬਈ ਵਿਚ ਕਰਨਾ ਚੰਗਾ ਸਮਝਿਆ ਤਾਂ ਕਿ ਇਥੇ ਮੇਰੀ ਪਛਾਣ ਮਜ਼ਬੂਤ ਹੋ ਸਕੇ। ਮੈਂ ਆਪਣੇ ਫ਼ਿਲਮੀ ਗੀਤਾਂ ਵਿਚ ਵੀ ਗ਼ਜ਼ਲ ਦਾ ਟਚ ਰੱਖਣਾ ਚਾਹਾਂਗਾ ਕਿਉਂਕਿ ਗ਼ਜ਼ਲਾਂ ਦੀ ਉਮਰ ਬਹੁਤ ਲੰਬੀ ਹੁੰਦੀ ਹੈ। ਇਕ ਚੰਗੀ ਗ਼ਜ਼ਲ ਇਸ ਦੇ ਰਚਨਾਕਾਰ ਨੂੰ ਅਮਰ ਬਣਾ ਦਿੰਦੀ ਹੈ ਅਤੇ ਆਪਣੀ ਕਲਮ ਦੇ ਦਮ 'ਤੇ ਅਮਰਤਾ ਹਾਸਲ ਕਰਨ ਦੀ ਇੱਛਾ ਕਿਸ ਕਲਾਕਾਰ ਵਿਚ ਨਹੀਂ ਹੁੰਦੀ।' ਇਹ ਕਹਿ ਕੇ ਉਹ ਆਪਣੀ ਗੱਲ ਖ਼ਤਮ ਕਰਦੇ ਹਨ ਕਿ 'ਜ਼ਿੰਦਗੀ ਕੀ ਜ਼ਰੂਰਤੋਂ ਨੇ ਮੁਝੇ ਲਾਇਰ ਬਨਾ ਦਿਆ, ਪਰ ਮੇਰੇ ਸ਼ੌਕ ਨੇ ਮੁਝੇ ਸ਼ਾਇਰ ਬਨਾ ਦਿਆ।'

-ਮੁੰਬਈ ਪ੍ਰਤੀਨਿਧ

ਬਹੁਪੱਖੀ ਪ੍ਰਤਿਭਾ ਦੀ ਮਾਲਕ ਅਨੁਪਮਾ ਸ਼ਰਮਾ

ਅਨੁਮਪਮਾ ਨੇ ਭਾਰਤ ਦੀ ਪ੍ਰਤੀਨਿੱਧਤਾ ਕਰਦਿਆਂ 'ਮਿਸੇਜ਼ ਯੂਨੀਵਰਸ 2017' ਡਰਬਨ, ਸਾਊਥ ਅਫ਼ਰੀਕਾ ਅਤੇ 'ਵੁਮੈਨ ਮਿਸੇਜ਼ ਯੂਨੀਵਰਸ ਗੋਲਡਨ ਹਾਰਟ 2017' ਦਾ ਖ਼ਿਤਾਬ ਆਪਣੇ ਨਾਂਅ ਕੀਤਾ। ਇਸਦੇ ਇਲਾਵਾ ਅਨੁਪਮਾ ਨੇ 'ਮਿਸੇਜ਼ ਯੂਨੀਵਰਸ ਅਰਬ ਏਸ਼ੀਆ 2017' 'ਮਿਸੇਜ਼ ਇੰਡੀਆ 2016' 'ਮਿਸੇਜ਼ ਪੰਜਾਬਣ ਇੰਟਰਨੈਸ਼ਨਲ 2016' ਸੁੰਦਰਤਾ ਪ੍ਰਤੀਯੋਗਤਾਵਾਂ ਵੀ ਜਿੱਤ ਚੁੱਕੀ ਹੈ ਅਤੇ ਇਸਦੇ ਨਾਲ-ਨਾਲ ਹੀ ਦਰਜ਼ਨਾਂ ਅਵਾਰਡਜ਼ ਅਤੇ ਟਾਈਟਲ ਵੀ ਆਪਣੇ ਨਾਂਅ ਕਰ ਚੁੱਕੀ ਹੈ। ਅਨੁਪਮਾ ਦਾ ਜਨਮ ਨਾਲਾਗੜ੍ਹ 'ਚ ਹੋਇਆ। ਉਨ੍ਹਾਂ ਨੇ ਸਿਰਫ਼ ਪਰਿਵਾਰ, ਸ਼ਹਿਰ, ਜ਼ਿਲ੍ਹੇ ਅਤੇ ਸੂਬੇ ਦਾ ਹੀ ਨਹੀਂ ਬਲਕਿ ਆਪਣੇ ਦੇਸ਼ ਦਾ ਨਾਂਅ ਵੀ ਵਿਸ਼ਵ ਪੱਧਰ 'ਤੇ ਚਮਕਾਇਆ ਹੈ। ਇਕ ਕੌਮਾਂਤਰੀ ਖ਼ਿਤਾਬ ਜਿੱਤਣਾ ਅਤੇ ਆਪਣੇ ਦੇਸ਼ ਦੀ ਪ੍ਰਤੀਨਿਧ ਹੋਣਾ ਬਹੁਤ ਹੀ ਗ਼ੌਰਵਸ਼ਾਲੀ ਗੱਲ ਹੈ। ਇਨ੍ਹਾਂ ਪ੍ਰਾਪਤੀਆਂ ਦੇ ਲਈ ਉਸ ਦਾ ਕਹਿਣਾ ਹੈ ਕਿ ਇਸਦਾ ਸਾਰਾ ਸਿਹਰਾ ਆਪਣੇ ਮਾਤਾ-ਪਿਤਾ, ਪਤੀ 'ਤੇ ਸਮੂਹ ਪਰਿਵਾਰ ਨੂੰ ਦਿੰਦੀ ਹਾਂ, ਜਿਨ੍ਹਾਂ ਨੇ ਹਮੇਸ਼ਾ ਉਸਨੂੰ ਅਜਿਹੇ ਮੁਕਾਬਲਿਆਂ ਲਈ ਉਤਸ਼ਾਹਿਤ ਕੀਤਾ 'ਤੇ ਮੇਰੇ ਹਰ ਫ਼ੈਸਲੇ 'ਚ ਮੇਰਾ ਡਟ ਕੇ ਸਾਥ ਦਿੱਤਾ। ਅਨੁਪਮਾ ਦਾ ਕਹਿਣਾ ਹੈ ਕਿ ਮੇਰਾ ਨਿਸ਼ਾਨਾ 'ਘਰੇਲੂ ਹਿੰਸਾ' ਜੋ ਔਰਤਾਂ ਅਤੇ ਬੱਚਿਆਂ ਦੇ ਪ੍ਰਤੀ ਔਰਤਾਂ ਅੰਦਰ ਜਾਗਰੂਕਤਾ ਫ਼ੈਲਾਉਣਾ ਹੈ।


-ਮੁਹੰਮਦ ਹਨੀਫ਼ ਥਿੰਦ
ਪ੍ਰਤੀਨਿਧ ਰੋਜ਼ਾਨਾ ਅਜੀਤ ਮਲੇਰਕੋਟਲਾ।

ਸੋਨਾਕਸ਼ੀ ਸਿਨਹਾ

ਮੌਕਾ ਸੰਭਲਣ ਦਾ

'ਬ੍ਰਾਂਜੀ' ਨਾਂਅ ਦਾ ਨਵਾਂ ਮਹਿਮਾਨ ਸੋਨਾ ਦੇ ਘਰੇ ਆਇਆ ਹੈ ਤੇ ਸੋਨਾ ਆਪਣੇ ਇਸ ਨਵੇਂ ਮਹਿਮਾਨ ਦੀ ਆਓ-ਭਗਤ 'ਚ ਲੱਗੀ ਹੋਈ ਹੈ। ਇਸ ਤੋਂ ਪਹਿਲਾਂ 'ਨੈਨਸੀ' ਸੋਨਾਕਸ਼ੀ ਦੇ ਘਰੇ ਮਹਿਮਾਨ ਸੀ ਜੀ ਹਾਂ, 'ਨੈਨਸੀ' ਉਸ ਦਾ ਪਿਆਰਾ ਕੁੱਤਾ ਸੀ ਤੇ ਸੋਨਾਕਸ਼ੀ ਸਿਨਹਾ ਦਾ 'ਕੁੱਤਿਆਂ' ਨਾਲ ਪਿਆਰ ਜੱਗ ਜ਼ਾਹਰ ਹੈ ਤੇ ਹੁਣ 'ਬ੍ਰਾਂਜੀ' ਨਾਂਅ ਦੇ ਨਵੇਂ ਕੁੱਤੇ ਨੂੰ ਲੈ ਕੇ ਉਹ ਫੁੱਲੀ ਨਹੀਂ ਸਮਾ ਰਹੀ। ਸੋਨਾ 'ਪੇਟਾ' ਦੀ ਮੈਂਬਰ ਹੈ, ਜੋ ਜਾਨਵਰਾਂ ਦੀ ਖਾਸ ਸੰਸਥਾ ਹੈ ਤੇ 'ਕੁੱਤਾ ਪ੍ਰੇਮ' 'ਚ 'ਇੰਸਟਾਗ੍ਰਾਮ' ਪ੍ਰੇਮ ਵੀ ਜਾਰੀ ਹੈ। ਦੀਪਿਕਾ ਪਰਾਈ ਹੋ ਗਈ ਤੇ ਸੋਨਾ ਨੇ ਤੁਰੰਤ ਉਸ ਨੂੰ ਵਧਾਈ ਦਿੰਦਿਆਂ ਇੰਸਟਾਗ੍ਰਾਮ ਭਰ ਦਿੱਤੀ ਕਿ 'ਬਾਬਾ' ਤੇ 'ਬੇਬੀ' ਵਿਆਹੇ ਗਏ ਹੁਣ ਦੇਖੋ ਕਦ ਉਸ ਦਾ ਵੀ ਹੁੰਦਾ ਹੈ ਵਿਆਹ? ਨਾਂਅ ਤੇ ਕਿਸੇ ਨਾਲ ਜੁੜਿਆ ਨਹੀਂ ਪਰ ਵਿਆਹ ਦਾ ਲੱਡੂ ਸੋਨਾ ਦੇ ਦਿਲ-ਦਿਮਾਗ 'ਚ ਘੁੰਮ ਰਿਹਾ ਹੈ, ਖਾਏਗੀ ਕਦ? ਘੱਟੋ-ਘੱਟ ਇਸ ਸਾਲ ਤਾਂ ਨਹੀਂ, 2019 'ਚ ਦੇਖਾਂਗੇ। ਉਧਰ ਦਿੱਲੀ ਦੀਆਂ ਦੋ ਕੰਪਨੀਆਂ ਨੇ 37 ਲੱਖ ਦੀ ਧੋਖਾਧੜੀ ਦਾ ਮਾਮਲਾ ਉਸ 'ਤੇ ਦਰਜ ਕਰਵਾਇਆ ਹੈ। ਆਨਲਾਈਨ ਆਰ.ਟੀ.ਜੀ.ਐਸ. ਨਾਲ ਸੋਨਾ ਨੂੰ ਪੈਸੇ ਦਿੱਤੇ ਗਏ ਪਰ ਸੋਨਾ ਹੈ ਕਿ ਸ਼ਰਤ ਲਾ ਕੇ ਫਿਰ 10 ਨਹੀਂ 3 ਵਜੇ ਦੀ ਜਹਾਜ਼ ਟਿਕਟ ਕਰਵਾਓ ਕਹਿ ਕੇ ਵੀ ਨਹੀਂ ਪਹੁੰਚੀ ਸੀ। ਵੈਸੇ ਸੋਨਾ ਲਈ ਇਹ ਕਿੰਨੀ ਮਾੜੀ ਗੱਲ ਹੈ। ਜੇਕਰ ਸਹੀ ਜਾਂਚ ਹੋਈ ਤਾਂ ਸੋਨਾਕਸ਼ੀ ਸਿਨਹਾ ਹਰਜਾਨਾ ਵੀ ਭਰ ਸਕਦੀ ਹੈ, ਅਦਾਲਤ ਦਾ ਮੂੰਹ ਵੀ ਦੇਖੇਗੀ। ਮੁਰਦਾਬਾਦ ਸੋਨਾ ਦੇ ਨਾਅਰੇ ਲੱਗ ਰਹੇ ਹਨ ਤੇ ਸੋਨਾ ਨੇ ਸਮੇਂ ਸਿਰ ਮਾਮਲਾ ਨਾ ਸੰਭਾਲਿਆ ਤਾਂ ਲੈਣੇ ਦੇ ਦੇਣੇ ਪੈਣੇ ਲਾਜ਼ਮੀ ਹਨ। ਗ਼ਲਤ ਕਾਰਨ ਦੇ ਚਲਦਿਆਂ ਵਿਆਹ ਨਾ ਕਰੋ, ਆਪਣੇ ਚਹੇਤੇ ਨਾਲ ਸ਼ਾਦੀ ਕਰੋ, ਅਜਿਹੀ ਸਲਾਹ ਦੇ ਰਹੀ ਸੋਨਾਕਸ਼ੀ ਸਿਨਹਾ ਨੂੰ ਸਾਰੇ ਸਲਾਹ ਦੇ ਰਹੇ ਹਨ ਕਿ ਧੋਖਾਧੜੀ ਵੀ ਪਾਪ ਹੈ। ਐਫ.ਆਈ.ਆਰ. ਦਰਜ ਤੇ ਦੋਸ਼ ਗੰਭੀਰ 'ਮਿਸ਼ਨ ਮੰਗਲ' ਉਹ ਕਰ ਸਕਦੀ ਹੈ। 'ਮੁਗ਼ਲ' ਲਈ ਉਸ ਤੱਕ ਪਹੁੰਚ ਹੋਈ ਹੈ। ਇਸ ਲਈ 'ਮਿਸ਼ਨ ਧੋਖਾਦੇਹੀ' ਤੋਂ ਕਿਨਾਰਾ ਕਰ ਲਵੇ, ਸੋਨਾ ਤਾਂ ਠੀਕ ਰਹੇਗਾ। 'ਲੁਟੇਰਾ' ਤਾਂ ਵਿਆਹਿਆ ਗਿਆ ਹੈ ਤੇ 'ਪਦਮਾਵਤ' ਉਸ ਦੇ ਘਰ ਦਾ ਸ਼ਿੰਗਾਰ ਹੈ, ਇਸ ਲਈ 'ਮੁਗ਼ਲ' ਬਣਨ ਤੋਂ ਪਹਿਲਾਂ-ਪਹਿਲਾਂ 'ਦਬੰਗ' ਗਰਲ ਬਣਨ ਦੀ ਥਾਂ 'ਮਿਸ਼ਨ ਕਲੀਨ' 'ਤੇ ਕੰਮ ਕਰਦੀ ਉਹ ਪ੍ਰਬੰਧਕਾਂ ਨਾਲ ਮਸਲਾ ਨਿਬੇੜ ਲਵੇ ਤਾਂ ਚੰਗਾ ਹੈ। ਫਿਰ ਹੀ ਅਕਸ਼ੈ ਕੁਮਾਰ ਨਾਲ 'ਮੰਗਲ ਮਿਸ਼ਨ' ਮੰਗਲਮਈ ਹੋਵੇਗਾ।

ਆਲੀਆ ਭੱਟ

ਤਿਆਰੀ ਵਿਆਹ ਕਰਵਾਉਣ ਦੀ?

'ਡੀਅਰ ਜ਼ਿੰਦਗੀ' 'ਚ ਆਲੀਆ ਭੱਟ ਆਈ ਸੀ ਕਿੰਗ ਖ਼ਾਨ ਨਾਲ ਤੇ ਸ਼ਾਹਰੁਖ-ਆਲੀਆ ਦਾ ਤਾਲਮੇਲ ਲੋਕਾਂ ਪਸੰਦ ਕੀਤਾ ਸੀ। ਇਕ ਸਟੇਜ ਪ੍ਰੋਗਰਾਮ 'ਚ ਦੋਵੇਂ ਇਕੱਠੇ ਸਨ ਤੇ ਆਲੀਆ ਬਿੱਗ ਬੀ ਦੇ ਡਾਇਲਾਗ ਬੋਲ ਰਹੀ ਸੀ, ਜੋ 'ਦੀਵਾਰ' ਫ਼ਿਲਮ 'ਚ ਸਨ ਪਰ ਸ਼ਾਹਰੁਖ ਸ਼ਰਾਰਤਾਂ ਕਰ ਰਹੇ ਸਨ ਤੇ ਆਲੀਆ ਦਾ ਧਿਆਨ ਭੰਗ ਕਰਵਾ ਰਹੇ ਸਨ। ਜ਼ੀਨਤ, ਹੇਮਾ, ਰੇਖਾ ਲੋਕਾਂ 'ਚ ਮੌਜੂਦ ਇਸ ਸ਼ਰਾਰਤ ਭਰੇ ਮਾਹੌਲ ਦਾ ਮਜ਼ਾ ਲੈ ਰਹੇ ਸਨ। ਆਲੀਆ ਬੋਲ ਰਹੀ ਸੀ, 'ਆਜ ਬਹੁਤ ਖੁਸ਼ ਹੋਗੇ ਤੁਮ, ਜੋ ਆਜ ਤੱਕ ਤੁਮਹਾਰੇ ਮੰਦਰ ਕੀ ਸੀੜੀਆਂ ਨਹੀਂ ਚੜ੍ਹਾ ਆਜ ਤੁਮਹਾਰੇ ਸਾਹਮਨੇ ਹਾਥ ਫੈਲਾਏ ਖੜ੍ਹਾ ਹੈ', ਡਾਇਲਾਗ ਬੋਲ ਰਹੀ ਸੀ। ਚਾਹੇ ਸ਼ਾਹਰੁਖ ਨੇ ਹੱਥ 'ਚ 'ਭੌਂਪੂ ਵਾਜਾ' ਲੈ ਕੇ ਆਵਾਜ਼ਾਂ ਕੱਢੀਆਂ ਪਰ ਅਭਿਨੈ ਨੂੰ ਸਮਰਪਣ ਆਲੀਆ ਨਹੀਂ ਘਬਰਾਈ ਤੇ ਸਾਰੇ ਹੀ ਮੰਨ ਗਏ ਆਲੀਆ ਨੂੰ ਕਿ ਵਾਕਿਆ ਹੀ ਉਹ ਸਮਰਪਿਤ ਅਭਿਨੇਤਰੀ ਹੈ। ਸ਼ਾਹਰੁਖ ਵੀ ਮੰਨ ਗਏ, ਜਿਨ੍ਹਾਂ ਆਲੀਆ ਦਾ ਟੈਸਟ ਲੈਣ ਲਈ ਇਹ ਸਭ ਕੀਤਾ ਸੀ। ਚਲੋ ਵਿਆਹਾਂ ਦਾ ਮੌਸਮ ਹੈ, ਕੁਝ ਹੱਸ-ਖੇਡ ਵੀ ਲਈਏ। ਪ੍ਰਿਅੰਕਾ, ਦੀਪਿਕਾ, ਅਨੂ ਤੋਂ ਬਾਅਦ ਹੁਣ ਆਲੀਆ ਭੱਟ ਵੀ 2019 'ਚ ਸ਼ਾਦੀ ਬੰਧਨ 'ਚ ਬੱਝਣ ਦੀ ਸੋਚ ਰਹੀ ਹੈ, ਰੱਬ ਸਹੀ ਰੱਖੇ। ਆਲੀਆ ਨੂੰਹ ਕਪੂਰ ਖਾਨਦਾਨ ਦੀ ਬਣੇਗੀ ਤੇ ਲਾੜਾ ਰਣਬੀਰ ਕਪੂਰ ਹੋਵੇਗਾ। 'ਬ੍ਰਹਮ ਸ਼ਾਸਤਰ' ਫ਼ਿਲਮ 'ਚ ਦੋਵੇਂ ਇਕੱਠੇ ਆ ਰਹੇ ਹਨ। ਉਂਜ ਵੀ ਅੱਜਕਲ੍ਹ ਆਲੀਆ-ਰਣਬੀਰ ਅਕਸਰ ਇਕੱਠੇ ਦਿਖਾਈ ਦਿੰਦੇ ਹਨ। ਆਲੀਆ ਖਾਸ ਕਰ ਸਾਰੇ ਵਿਆਹ ਦੇਖ ਰਹੀ ਹੈ ਕਿ ਕਿਹੜੀ ਦੁਲਹਨ ਕਿਹੜਾ ਲਿਬਾਸ ਪਹਿਨਦੀ ਹੈ। ਆਲੀਆ ਦੇ ਪ੍ਰਸੰਸਕ ਲੱਖਾਂ ਹਨ। 'ਹਾਈਵੇਅ', 'ਟੂ ਸਟੇਟਸ', 'ਰਾਜ਼ੀ', 'ਡੀਅਰ ਜ਼ਿੰਦਗੀ', 'ਸਟੂਡੈਂਟ ਆਫ਼ ਦਾ ਯੀਅਰ' ਵਾਲੀ ਆਲੀਆ ਹੁਣ ਦੀਪਿਕਾ ਦੇ ਪਤੀ ਰਣਵੀਰ ਸਿੰਘ ਨਾਲ 'ਗਲੀ ਬੁਆਏ' ਤੇ ਹੋਣ ਵਾਲੇ ਪਤੀ ਪਰਮੇਸ਼ਵਰ ਰਣਬੀਰ ਕਪੂਰ ਨਾਲ 'ਬ੍ਰਹਮ ਸ਼ਾਸਤਰ' 'ਚ ਨਜ਼ਰ ਆਏਗੀ।


-ਸੁਖਜੀਤ ਕੌਰ

ਜਾਹਨਵੀ ਕਪੂਰ

'ਤਖ਼ਤ' ਸੰਭਾਲੇਗੀ

'ਧੜਕ' ਨਾਲ ਧੜਕਣ ਬੀ-ਟਾਊਨ ਦੀ ਬਣੀ ਜਾਹਨਵੀ ਕਪੂਰ 'ਰੈਂਪ ਵਾਕ', ਫ਼ਿਲਮੀ ਸ਼ੂਟਿੰਗਾਂ ਤੇ ਫੋਟੋ ਸੈਸ਼ਨ ਸਭ 'ਚ ਰੁੱਝੀ ਹੋਈ ਹੈ ਤੇ ਮਾਂ ਸ੍ਰੀਦੇਵੀ ਦੀ ਤਰ੍ਹਾਂ ਪੂਰੀ ਵਪਾਰਕ ਪਰ ਸਹਿਯੋਗਣ ਪ੍ਰਤੀਤ ਹੋ ਰਹੀ ਹੈ। ਰੂਪ ਸੱਜਾ ਕਮਰੇ 'ਚ ਤਿਆਰ ਹੁੰਦੀ ਦਾ ਵਾਇਰਲ ਵੀਡੀਓ ਸਭ ਨੇ ਉਸ ਦਾ ਤੱਕਿਆ ਹੈ। ਖਾਣਾ ਖਾਂਦੀ, ਸ਼ਰਾਰਤਾਂ ਕਰਦੀ ਜਾਹਨਵੀ ਦਾ ਇਹ ਵੀਡੀਓ ਪਹਿਲਾਂ ਹੀ ਆਉਣ ਨਾਲ ਉਸ ਦਾ ਮਜ਼ਾਕ ਹੀ ਬਣਿਆ। ਇਸ ਸਮੇਂ 'ਤਖ਼ਤ' ਫ਼ਿਲਮ ਉਸ ਕੋਲ ਹੈ। ਇਸ 'ਚ ਇਸ਼ਾਨ ਖੱਟੜ ਜਿਹਾ ਨਵਾਂ ਹੀਰੋ ਨਹੀਂ, ਬਲਕਿ ਰਣਵੀਰ ਸਿੰਘ, ਕਰੀਨਾ ਕਪੂਰ ਤੇ ਅਨਿਲ ਕਪੂਰ ਜਿਹੇ ਮੰਝੇ ਹੋਏ ਸਿਤਾਰੇ ਹਨ। ਇਹ ਇਕ ਇਤਿਹਾਸਕ ਫ਼ਿਲਮ ਹੈ। 'ਤਖ਼ਤ' 'ਚ ਉਸ ਨਾਲ ਭੂਮੀ ਪੇਡਨੇਕਰ ਵੀ ਹੈ। ਹਾਲਾਂਕਿ ਅਜੇ ਵੀ ਉਸ ਦੇ ਵਿਰੋਧੀ 'ਧੜਕ' ਸਮੇਂ ਹੋਏ ਸਰਵੇਖਣ ਨੂੰ ਸੰਪਾਦਤ ਕਰਕੇ ਸੋਸ਼ਲ ਮੀਡੀਆ 'ਤੇ ਪੋਸਟ ਪਾ ਰਹੇ ਹਨ, ਸ਼ੇਅਰ ਕਰ ਰਹੇ ਹਨ, ਲਾਇਕ ਕਰ ਰਹੇ ਹਨ। 6370 ਲੋਕ ਉਸ ਨੂੰ ਅਭਿਨੈ 'ਚ ਫੇਲ੍ਹ ਕਹਿ ਰਹੇ ਹਨ, 2740 ਲੋਕਾਂ ਨੇ ਹੀ ਉਸ ਨੂੰ ਪਾਸ ਕਿਹਾ ਹੈ। ਜਾਹਨਵੀ ਨੂੰ ਇਸ ਦੀ ਪ੍ਰਵਾਹ ਤਾਂ ਨਹੀਂ ਪਰ ਚਿੰਤਾ ਜ਼ਰੂਰ ਹੈ 'ਤਖ਼ਤ' ਤੋਂ ਉਮੀਦ ਹੈ ਕਿ ਇਹ ਜ਼ਰੂਰੀ ਕਾਮਯਾਬੀ ਦੇ 'ਤਖ਼ਤ' 'ਤੇ ਉਸ ਨੂੰ ਬਿਠਾਏਗੀ। ਜਾਹਨਵੀ ਆਪਣੀ ਤੁਲਨਾ ਮਾਂ ਜਾਂ ਸਾਰਾ ਅਲੀ ਖ਼ਾਨ ਨਾਲ ਕਰਨ ਤੋਂ ਨਰਾਜ਼ ਹੈ। ਉਹ ਕਹਿ ਰਹੀ ਹੈ ਕਿ ਔਰਤਾਂ ਨੂੰ ਲੜਾਉਣ ਲਈ ਹੀ ਉਸ ਦੀ ਤੁਲਨਾ ਕੀਤੀ ਜਾਂਦੀ ਹੈ। ਇਧਰ ਪ੍ਰਸੰਸਕ ਹਨ ਕਿ ਲਗਾਤਾਰ ਜਾਹਨਵੀ ਦੇ ਬਚਪਨੇ 'ਤੇ ਹੱਸ ਰਹੇ ਹਨ। ਹੁਣ ਸਵਾ ਲੱਖ ਦੀ ਉਸ ਨੇ ਜੁੱਤੀ ਕੀ ਪਾ ਲਈ ਲੋਕਾਂ ਨੇ ਉਸ ਨੂੰ 'ਭੱਦੀ' ਕਿਹਾ। ਲੋਕੀਂ ਕਹਿ ਰਹੇ ਹਨ ਕਿ ਬੇਕਾਰ ਜੁੱਤੀਆਂ ਪਾ ਕੇ ਸਵਾ ਲੱਖ ਦੀ ਜੁੱਤੀ ਪਾਈ ਕਹਿਣ ਵਾਲੀ ਜਾਹਨਵੀ ਲੱਗਦੀ ਤਾਂ ਇਸ ਜੋੜੇ 'ਚ ਭੈੜੀ ਹੈ, ਕੀ ਲਾਭ ਪੈਸੇ ਖਰਚਣ ਦਾ। ਜਾਹਨਵੀ ਕਪੂਰ ਦੇ ਲੋਕਾਂ ਨੇ ਮਹਿੰਗੀ ਜੁੱਤੀ ਲਈ ਕਾਰਟੂਨ ਵੀ ਬਣਾ ਕੇ ਪਾਏ ਹਨ। ਸਵਿਟਜ਼ਰਲੈਂਡ ਮਾਂ ਸ੍ਰੀਦੇਵੀ ਦੀ ਮੂਰਤੀ ਦੇ ਉਦਘਾਟਨ 'ਤੇ ਜਾ ਕੇ ਜਾਹਨਵੀ ਨੇ ਇਨ੍ਹਾਂ ਮੁਸੀਬਤਾਂ ਤੋਂ ਲਾਂਭੇ ਹੋਣ ਲਈ ਚਾਰ ਦਿਨ ਫੋਨ ਬੰਦ ਕਰਕੇ ਆਰਾਮ ਕੀਤਾ। ਕੀ ਜਾਣੇ ਕਿ ਫ਼ਿਲਮੀ 'ਤਖ਼ਤ' 'ਤੇ ਬੈਠਣ ਲਈ ਮਹਿੰਗੀ ਜੁੱਤੀ ਨਹੀਂ ਪ੍ਰਤਿਭਾ ਚਾਹੀਦੀ ਹੈ।

ਆਯੁਸ਼ਮਨ ਖੁਰਾਣਾ

ਖ਼ੁਸ਼ੀ ਵੀ ਤੇ ਚਿੰਤਾ ਵੀ

ਵੱਖਰੀ ਹੀ ਕਿਸਮ ਦੀਆਂ ਕਹਾਣੀਆਂ ਵਾਲੀਆਂ ਫ਼ਿਲਮਾਂ ਗਾਇਕ ਤੇ ਨਾਇਕ ਆਯੁਸ਼ਮਨ ਖੁਰਾਣਾ ਕਰਦੇ ਹਨ। 'ਦਮ ਲਗਾ ਕੇ ਹਈਸ਼ਾ' ਉਸ ਨੇ ਚਾਰ ਕੁ ਸਾਲ ਪਹਿਲਾਂ ਭੂਮੀ ਪੇਡਨੇਕਰ ਨਾਲ ਕੀਤੀ ਸੀ ਤਾਂ ਰੌਲਾ ਇਹ ਵੀ ਪਿਆ ਸੀ ਕਿ ਭੂਮੀ ਉਸ ਲਈ ਦਿਲ ਹਾਰ ਬੈਠੀ ਹੈ। ਹੁਣ ਭਾਵੇਂ ਭੂਮੀ ਇਹ ਕਹੇ ਕਿ ਉਹ ਆਯੁਸ਼ ਦਾ ਫੋਨ ਨੰਬਰ ਹੀ 'ਬਲਾਕ' ਕਰ ਦਿੰਦੀ ਹੈ। ਆਯੁਸ਼ ਚਾਹੇ ਕੁਝ ਵੀ ਹੈ, ਇਕ ਪ੍ਰਤਿਭਾਵਾਨ ਹੀਰੋ ਹੈ ਪਰ ਉਸ ਦੀ ਪਤਨੀ ਛਾਤੀ ਦੇ ਕੈਂਸਰ ਨਾਲ ਜੂਝ ਰਹੀ ਹੈ, ਜਿਸ ਨੇ ਉਸ ਦੀ 'ਬਧਾਈ ਹੋ' ਦੀ ਸਫ਼ਲਤਾ ਫਿੱਕੀ ਕਰ ਦਿੱਤੀ ਹੈ ਉਸ ਲਈ। ਸਾਨੀਆ ਮਲਹੋਤਰਾ ਨਾਲ ਆਯੁਸ਼ ਦੀ ਇਹ ਫ਼ਿਲਮ 100 ਕਰੋੜ ਕਲੱਬ 'ਚ ਜਾ ਕੇ ਵੱਡਿਆਂ-ਵੱਡਿਆਂ ਨੂੰ ਸੋਚਾਂ 'ਚ ਪਾ ਗਈ ਹੈ। ਵਪਾਰਕ ਤੌਰ 'ਤੇ ਇਹ ਜਾ ਰਿਹਾ ਸਾਲ ਉਸ ਲਈ ਸਹੀ ਰਿਹਾ ਹੈ। ਪਤਨੀ ਤਾਹਿਰਾ ਜ਼ਰੂਰ ਗੰਭੀਰ ਬਿਮਾਰ ਹੈ ਤੇ ਇਧਰ 200 ਕਰੋੜ ਨੂੰ 'ਬਧਾਈ ਹੋ' ਜਾ ਰਹੀ ਹੈ, ਆਯੁਸ਼ ਲਈ ਇਸ ਤੋਂ ਵੱਡੀ ਖੁਸ਼ੀ ਕੀ ਹੋਊ? 'ਠੱਗਜ਼ ਆਫ ਹਿੰਦੁਸਤਾਨ' ਨੂੰ ਮੂਧੇ ਮੂੰਹ ਆਯੁਸ਼ਮਨ ਦੀ ਫ਼ਿਲਮ ਨੇ ਸੁੱਟ ਕੇ ਨਵਾਂ ਰਿਕਾਰਡ ਬਣਾ ਦਿੱਤਾ ਹੈ। 'ਵਿੱਕੀ ਡੋਨਰ' 34 ਸਾਲ ਦਾ ਹੋ ਗਿਆ ਹੈ। ਚੰਡੀਗੜ੍ਹੀਏ ਗੱਭਰੂ ਆਯੁਸ਼ ਨੂੰ 'ਪਾਨੀ ਕਾ ਰੰਗ' ਲਈ ਸਨਮਾਨ ਵੀ ਮਿਲਿਆ ਸੀ। ਵਿਰਾਜਵੀਰ ਅਤੇ ਵਰੂਸਕਾ ਖੁਰਾਣਾ ਦਾ ਡੈਡੀ ਆਯੁਸ਼ ਚਾਹੁੰਦਾ ਹੈ ਕਿ 16 ਸਾਲ ਉਸ ਦੀ ਪ੍ਰੇਮ ਪਿਆਰੀ ਰਹੀ ਜੋ ਹੁਣ ਉਸ ਦੀ ਜੀਵਨ ਸਾਥਣ ਹੈ, ਤਾਹਿਰਾ ਪਹਿਲੀ ਸਟੇਜ ਦੇ ਕੈਂਸਰ ਤੋਂ ਮੁਕਤ ਹੋ ਕੇ ਘਰੇ ਆਏ ਫਿਰ 'ਬਧਾਈ ਹੋ' ਦਾ ਅਸਲੀ ਤਾਂਤਾ ਲੱਗੇ ਤਾਂ ਉਹ ਖੁਸ਼ ਹੋਏਗਾ। 'ਨੌਟੰਕੀਸ਼ਾਲਾ', 'ਹਵਾਈਜ਼ਾਦਾ', 'ਬੇਵਕੂਫ਼ੀਆਂ' ਵਾਲਾ ਆਯੁਸ਼ ਅੱਜ 'ਬਧਾਈ ਹੋ' ਨਾਲ ਸਭ ਤੋਂ ਉੱਪਰ ਹੈ।

ਰਿਚਾ ਚੱਢਾ ਬਣੇਗੀ ਸ਼ਕੀਲਾ

ਹਿੰਦੀ ਫ਼ਿਲਮਾਂ ਦੇ ਦਰਸ਼ਕ ਸ਼ਕੀਲਾ ਨਾਮੀ ਅਭਿਨੇਤਰੀ ਤੋਂ ਅਣਜਾਨ ਹੋ ਸਕਦੇ ਹਨ ਪਰ ਇਸੇ ਸ਼ਕੀਲਾ ਨੇ ਇਕ ਜ਼ਮਾਨੇ ਵਿਚ ਦੱਖਣ ਦੀਆਂ ਫ਼ਿਲਮਾਂ ਵਿਚ ਧੁੰਮ ਪਾ ਰੱਖੀ ਸੀ। ਖ਼ਾਸ ਕਰਕੇ ਮਲਿਆਲਮ ਫ਼ਿਲਮਾਂ 'ਚ ਤਾਂ ਉਸ ਨੇ ਆਪਣੀਆਂ ਅਦਾਵਾਂ ਦੀ ਬਦੌਲਤ ਹੰਗਾਮਾ ਮਚਾਇਆ ਹੋਇਆ ਸੀ। ਸ਼ਕੀਲਾ ਦੀ ਜ਼ਿੰਦਗੀ 'ਤੇ ਹੁਣ ਹਿੰਦੀ ਫ਼ਿਲਮ 'ਸ਼ਕੀਲਾ' ਦਾ ਨਿਰਮਾਣ ਕੀਤਾ ਜਾ ਰਿਹਾ ਹੈ ਅਤੇ ਰਿਚਾ ਚੱਢਾ ਵਲੋਂ ਇਸ ਵਿਚ ਸ਼ਕੀਲਾ ਦੀ ਭੂਮਿਕਾ ਨਿਭਾਈ ਜਾ ਰਹੀ ਹੈ। ਦੱਖਣ ਦੀ ਚਰਚਿਤ ਅਦਾਕਾਰਾ ਸਿਲਕ ਸਮਿਤਾ ਦੀ ਜ਼ਿੰਦਗੀ 'ਤੇ 'ਦ ਡਰਟੀ ਪਿਕਚਰ' ਬਣਾਈ ਗਈ ਅਤੇ ਉਸੇ ਤਰਜ਼ 'ਤੇ ਹੁਣ 'ਸ਼ਕੀਲਾ' ਬਣਾਈ ਜਾ ਰਹੀ ਹੈ। ਗ਼ਰੀਬ ਪਰਿਵਾਰ ਵਿਚ ਜਨਮੀ ਸ਼ਕੀਲਾ ਪੜ੍ਹਾਈ ਵਿਚ ਵੀ ਕਮਜ਼ੋਰ ਸੀ ਪਰ ਅਭਿਨੈ ਪ੍ਰਤੀ ਉਹ ਸ਼ੁਰੂ ਤੋਂ ਆਕਰਸ਼ਿਤ ਰਹੀ ਸੀ। ਸ਼ੁਰੂ ਵਿਚ ਉਸ ਨੇ ਦੱਖਣ ਦੀਆਂ ਫ਼ਿਲਮਾਂ ਵਿਚ ਛੋਟੀਆਂ-ਮੋਟੀਆਂ ਭੂਮਿਕਾਵਾਂ ਕੀਤੀਆਂ ਪਰ ਮਲਿਆਲਮ ਫ਼ਿਲਮ 'ਕਿਨਾਰਥੁਮਬਿਕਲ' ਦੀ ਸਫ਼ਲਤਾ ਨੇ ਉਸ ਨੂੰ ਸਟਾਰ ਬਣਾ ਦਿੱਤਾ। ਹਾਲਾਂਕਿ ਉਹ ਬੀ ਗ੍ਰੇਡ ਦੀਆਂ ਫ਼ਿਲਮਾਂ ਹੀ ਕਰਦੀ ਰਹੀ ਪਰ ਫਿਰ ਵੀ ਉਸ ਦੇ ਚਾਹੁਣ ਵਾਲਿਆਂ ਦੀ ਵੱਡੀ ਗਿਣਤੀ ਸੀ। ਦੱਖਣ ਵਿਚ ਉਹ ਤਕਰੀਬਨ ਢਾਈ ਸੌ ਫ਼ਿਲਮਾਂ ਕਰ ਚੁੱਕੀ ਹੈ।
ਇਸ ਤਰ੍ਹਾਂ ਦੀ ਅਭਿਨੇਤਰੀ ਨੂੰ ਪਰਦੇ 'ਤੇ ਜਿਊਂਦਾ ਕਰਨ ਬਾਰੇ ਰਿਚਾ ਕਹਿੰਦੀ ਹੈ, 'ਇਹ ਫ਼ਿਲਮ ਸਾਈਨ ਕਰਨ ਤੋਂ ਬਾਅਦ ਮੈਂ ਸ਼ਕੀਲਾ ਨੂੰ ਮਿਲੀ ਸੀ ਅਤੇ ਉਸ ਨੇ ਮੈਨੂੰ ਵਜ਼ਨ ਵਧਾਉਣ ਦੀ ਸਲਾਹ ਦਿੱਤੀ ਸੀ। ਪੰਜ ਕਿੱਲੋ ਵਜ਼ਨ ਵਧਾਉਣ ਤੋਂ ਬਾਅਦ ਮੈਨੂੰ ਲੱਗਿਆ ਕਿ ਮੈਂ ਕੈਮਰੇ ਸਾਹਮਣੇ ਸ਼ਕੀਲਾ ਦਾ ਕਿਰਦਾਰ ਸਹੀ ਢੰਗ ਨਾਲ ਪੇਸ਼ ਕਰ ਸਕਾਂਗੀ। ਮੈਂ ਇਸ ਗੱਲ ਤੋਂ ਵੀ ਜਾਣੂ ਹਾਂ ਕਿ ਇਸ ਫ਼ਿਲਮ ਦੀ ਤੁਲਨਾ 'ਦ ਡਰਟੀ ਪਿਕਚਰ' ਨਾਲ ਹੋਵੇਗੀ ਪਰ ਲੋਕ ਇਹ ਨਹੀਂ ਜਾਣਦੇ ਕਿ ਸਿਲਕ ਸਮਿਤਾ ਦੀ ਮੌਤ ਤੋਂ ਬਾਅਦ ਸ਼ਕੀਲਾ ਦਾ ਫ਼ਿਲਮਾਂ ਵਿਚ ਆਗਮਨ ਹੋਇਆ ਸੀ। ਸਿਲਕ ਨੇ ਤਾਮਿਲ ਫ਼ਿਲਮਾਂ ਜ਼ਿਆਦਾ ਕੀਤੀਆਂ ਤੇ ਸ਼ਕੀਲਾ ਨੇ ਮਲਿਆਲਮ। ਦੋਵੇਂ ਅਭਿਨੇਤਰੀਆਂ ਦੀ ਪਿੱਠਭੂਮੀ ਵੱਖਰੀ ਰਹੀ ਹੈ। ਇਸ ਤਰ੍ਹਾਂ ਦੋਵਾਂ ਫ਼ਿਲਮਾਂ ਦੀ ਤੁਲਨਾ ਕਰਨਾ ਸਹੀ ਨਹੀਂ ਹੋਵੇਗਾ।


-ਮੁੰਬਈ ਪ੍ਰਤੀਨਿਧ

ਨਥਾਲੀਆ ਕੌਰ

ਗੁੰਮਨਾਮ ਪੰਜਾਬਣ

ਭਾਵੇਂ 'ਰੌਕੀ ਹੈਂਡਸਮ' ਫ਼ਿਲਮ ਨਥਾਲੀਆ ਕੌਰ ਨੇ ਜਾਨ ਅਬਰਾਹਮ ਨਾਲ ਕੀਤੀ ਹੋਵੇ ਪਰ ਇੰਟਰਨੈੱਟ ਦੀ ਸਨਸਨੀ ਕਰਕੇ ਉਸ ਦੀ ਗੱਲ ਜ਼ਿਆਦਾ ਹੁੰਦੀ ਹੈ ਸੱਤ ਸਾਲ ਪਹਿਲਾਂ ਰਾਮ ਗੋਪਾਲ ਵਰਮਾ ਦੀ ਫ਼ਿਲਮ 'ਡਿਪਾਰਟਮੈਂਟ' ਨਥਾਲੀਆ ਨੇ ਹੀ ਕੀਤੀ ਸੀ। ਵੈਸੇ ਉਹ ਬ੍ਰਾਜ਼ੀਲ 'ਚ ਜੰਮੀ-ਪਲੀ ਭਾਰਤੀ ਕੁੜੀ ਹੈ ਪਰ ਜਨਮ ਹੀ ਅਜਿਹੇ ਮੁਲਕ 'ਚ ਹੋਇਆ ਕਿ ਉਥੋਂ ਦੇ ਸੰਸਕਾਰ ਉਸ 'ਤੇ ਭਾਰੀ ਪਏ ਹਨ। 'ਹਾਂ, 'ਖ਼ਤਰੋਂ ਕੇ ਖਿਲਾੜੀ' ਸ਼ੋਅ ਸਮੇਂ ਵੀ ਉਸ ਨੂੰ ਲੈ ਕੇ ਹੰਗਾਮਾ ਹੋਇਆ ਸੀ ਤੇ ਉਹ ਇਹ ਰਿਆਲਿਟੀ ਸ਼ੋਅ ਪੂਰਾ ਨਹੀਂ ਸੀ ਕਰ ਸਕੀ। ਉਹ 'ਅੱਧੀ ਪੰਜਾਬਣ' ਆਪਣੇ-ਆਪ ਨੂੰ ਦੱਸਦੀ ਹੈ। ਦਾਦਾ ਜੀ ਪੰਜਾਬੀ ਸਨ ਤੇ ਦਾਦੀ ਪੁਰਤਗਾਲ ਦੀ ਸੀ। ਮਿਸ ਬ੍ਰਾਜ਼ੀਲ ਰਹੀ ਨਥਾਲੀਆ ਕੌਰ ਭਾਰਤ ਆਈ ਸੀ ਮਾਡਲ ਬਣ ਕੇ, ਕਿਉਂਕਿ ਬ੍ਰਾਜ਼ੀਲ 'ਚ ਉਹ ਮਾਡਲ ਸੀ। 'ਕਿੰਗਫਿਸ਼ਰ' ਕੈਲੰਡਰ ਦੀ ਮਾਡਲ ਬਣ ਕੇ ਚਮਕ-ਦਮਕ ਦੀ ਹਨੇਰੀ ਉਸ ਲਿਆਂਦੀ ਤੇ 'ਕੰਨੜ' ਫ਼ਿਲਮ ਕਰਕੇ ਦੱਖਣ ਤੋਂ ਮੁੰਬਈ ਆਈ। ਅਸਲੀ ਖੋਜ ਉਹ ਪੂਜਾ ਭੱਟ ਦੀ ਹੈ ਤੇ ਅਜੇ ਵੀ ਪੂਜਾ ਉਸ ਨੂੰ ਲੈ ਕੇ ਫ਼ਿਲਮ ਬਣਾਉਣ ਸਬੰਧੀ ਸੋਚਦੀ ਹੈ ਪਰ ਅਧਿਕਾਰਤ ਤੌਰ 'ਤੇ ਐਲਾਨ ਨਹੀਂ ਹੋਇਆ। 'ਵੰਨ ਮੈਨ ਆਰਮੀ' 'ਚ ਵੀ ਉਹ ਖਾਸ ਭੂਮਿਕਾ 'ਚ ਸੀ। ਤੇਲਗੂ, ਤਾਮਿਲ ਤੋਂ ਇਲਾਵਾ ਹੁਣ ਉਹ ਹਿੰਦੀ ਦੀ 'ਗੰਨਜ਼ ਆਫ਼ ਬਨਾਰਸ' ਕਰ ਰਹੀ ਹੈ ਤੇ ਪੂਜਾ ਭੱਟ ਦੀ 'ਜਿਸਮ-3' ਵੀ ਕਰ ਸਕਦੀ ਹੈ।

ਮੈਂ ਜਾਨਵਰਾਂ 'ਤੇ ਫ਼ਿਲਮ ਨਹੀਂ ਬਣਾਵਾਂਗਾ : ਅਨੰਤ ਮਹਾਦੇਵਨ

ਫ਼ਿਲਮ ਨਿਰਦੇਸ਼ਕ ਅਨੰਤ ਮਹਾਦੇਵਨ ਪਸ਼ੂ ਪ੍ਰੇਮੀ ਵੀ ਹਨ। ਉਹ ਕਹਿੰਦੇ ਹਨ, 'ਅਸੀਂ ਫ਼ਿਲਮ ਵਾਲੇ ਜਾਨਵਰਾਂ ਦਾ ਫ਼ਾਇਦਾ ਲੈਣ ਦੇ ਮਾਮਲੇ ਵਿਚ ਹਰ ਵੇਲੇ ਅੱਗੇ ਰਹਿੰਦੇ ਹਾਂ। 'ਹਾਥੀ ਮੇਰੇ ਸਾਥੀ', 'ਜਾਨਵਰ ਔਰ ਇਨਸਾਨ' ਤੇ 'ਗਾਏ ਔਰ ਗੌਰੀ' ਵਰਗੀਆਂ ਫ਼ਿਲਮਾਂ ਤਾਂ ਠੀਕ ਪਰ ਫ਼ਿਲਮਾਂ ਦੇ ਨਾਂਅ 'ਸ਼ੇਰਨੀ', 'ਚੀਤਾ', 'ਜ਼ਖ਼ਮੀ ਸ਼ੇਰ' ਵਰਗੇ ਜਾਨਵਰਾਂ ਦਾ ਲਾਹਾ ਲਿਆ ਜਾਂਦਾ ਰਿਹਾ ਹੈ। ਹੁਣ ਜਦੋਂ ਜਾਨਵਰਾਂ ਦਾ ਅੰਨ੍ਹੇਵਾਹ ਸ਼ਿਕਾਰ ਕਰ ਕੇ ਧਰਤੀ ਦਾ ਸੰਤੁਲਨ ਵਿਗਾੜਿਆ ਜਾ ਰਿਹਾ ਹੈ, ਉਦੋਂ ਹਰ ਕੋਈ ਚੁੱਪ ਹੈ। ਮੰਨਿਆ ਕਿ ਹੁਣ ਫ਼ਿਲਮਾਂ ਵਿਚ ਸ਼ੂਟਿੰਗ ਦੌਰਾਨ ਜਾਨਵਰਾਂ 'ਤੇ ਹੁੰਦੇ ਅੱਤਿਆਚਾਰ ਰੋਕਣ ਲਈ ਐਨੀਮਲ ਵੈੱਲਫ਼ੇਅਰ ਬੋਰਡ ਦਾ ਗਠਨ ਕੀਤਾ ਗਿਆ ਹੈ ਪਰ ਅਜੇ ਵੀ ਬਹੁਤ ਕੰਮ ਕਰਨਾ ਬਾਕੀ ਹੈ। ਮੈਂ ਆਪਣੀ ਗੱਲ ਕਹਾਂ ਤਾਂ ਮੈਂ ਜਾਨਵਰਾਂ 'ਤੇ ਆਧਾਰਿਤ ਇਕ ਲੜੀਵਾਰ 'ਚਿੰਪੂ ਸ਼ਿਕਾਰੀ' ਬਣਾਇਆ ਸੀ। ਉਦੋਂ ਸ਼ਿਕਾਰੀ ਸ਼ਬਦ 'ਤੇ ਇਤਰਾਜ਼ ਕੀਤਾ ਗਿਆ ਅਤੇ ਮੈਨੂੰ ਇਸ ਦਾ ਨਾਂਅ 'ਚਿੰਪੂ ਸਫ਼ਾਰੀ' ਰੱਖਣਾ ਪੈ ਗਿਆ ਸੀ। ਉਦੋਂ ਮੈਂ ਕੁੱਤਾ, ਬੱਕਰੀ, ਘੋੜਾ ਆਦਿ ਤੋਂ ਕੰਮ ਲਿਆ ਸੀ। ਉਸ ਲੜੀਵਾਰ ਦੇ ਅਨੁਭਵ ਤੋਂ ਬਾਅਦ ਮੈਂ ਤੈਅ ਕਰ ਲਿਆ ਕਿ ਮੈਂ ਕਦੀ ਜਾਨਵਰਾਂ 'ਤੇ ਫ਼ਿਲਮ ਨਹੀਂ ਬਣਾਵਾਂਗਾ। ਕੈਮਰੇ ਸਾਹਮਣੇ ਉਨ੍ਹਾਂ ਤੋਂ ਅਭਿਨੈ ਕਰਵਾਉਣਾ ਹੀ ਉਨ੍ਹਾਂ ਦੇ ਸੁਭਾਅ ਦੇ ਖਿਲਾਫ਼ ਹੈ।
-ਮੁੰਬਈ ਪ੍ਰਤੀਨਿਧ

ਯੂਲੀਆ ਵੇਂਤੂਰ ਬਣੀ ਰਾਧਾ

ਸਾਲ 2009 ਵਿਚ ਸਲਮਾਨ ਨੇ ਪ੍ਰੇਮ ਸੋਨੀ ਨੂੰ ਨਿਰਦੇਸ਼ਕ ਦੇ ਤੌਰ 'ਤੇ ਮੌਕਾ ਦਿੱਤਾ ਸੀ ਅਤੇ ਇਸ ਦੀ ਬਦੌਲਤ ਪ੍ਰੇਮ ਨੂੰ ਸਲਮਾਨ-ਕਰੀਨਾ ਦੀ ਫ਼ਿਲਮ 'ਮੈਂ ਔਰ ਮਿਸਿਜ਼ ਖੰਨਾ' ਨਿਰਦੇਸ਼ਿਤ ਕਰਨ ਦਾ ਮੌਕਾ ਮਿਲਿਆ ਸੀ। ਸਲਮਾਨ ਦੇ ਇਸ ਅਹਿਸਾਨ ਦਾ ਕਰਜ਼ ਉਤਾਰਦੇ ਹੋਏ ਹੁਣ ਪ੍ਰੇਮ ਸੋਨੀ ਨੇ 'ਰਾਧਾ ਕਿਉਂ ਗੋਰੀ ਮੈਂ ਕਿਉਂ ਕਾਲਾ' ਵਿਚ ਸਲਮਾਨ ਦੀ ਪ੍ਰੇਮਿਕਾ ਯੂਲੀਆ ਵੇਂਤੂਰ ਨੂੰ ਮੌਕਾ ਦਿੱਤਾ ਹੈ। ਹਾਂ, ਪ੍ਰੇਮ ਦੀ ਇਸ ਫ਼ਿਲਮ ਦਾ ਨਾਇਕ ਸਲਮਾਨ ਨਹੀਂ ਸਗੋਂ ਜਿੰਮੀ ਸ਼ੇਰਗਿੱਲ ਹੈ। ਫ਼ਿਲਮ ਦਾ ਨਿਰਮਾਣ ਫਾਈਵ ਐਲੀਮੈਂਟਸ ਬੈਨਰ ਹੇਠ ਕੀਤਾ ਜਾ ਰਿਹਾ ਹੈ ਅਤੇ ਇਸ ਦੀ ਕਹਾਣੀ ਸੱਚੀ ਘਟਨਾ ਤੋਂ ਪ੍ਰੇਰਿਤ ਹੈ ਅਤੇ ਕਹਾਣੀ ਖ਼ੁਦ ਪ੍ਰੇਮ ਵਲੋਂ ਲਿਖੀ ਗਈ ਹੈ। ਇਸ ਵਿਚ ਯੂਲੀਆ ਵਲੋਂ ਰੁਮਾਨੀਆ ਦੀ ਕੁੜੀ ਦੀ ਭੂਮਿਕਾ ਨਿਭਾਈ ਜਾ ਰਹੀ ਹੈ। ਕਹਾਣੀ ਅਨੁਸਾਰ ਰੁਮਾਨੀਆ ਵਿਚ ਰਹਿੰਦੀ ਇਹ ਕੁੜੀ ਕ੍ਰਿਸ਼ਨ ਭਗਤ ਹੈ ਅਤੇ ਉਸ ਦੀ ਦਿਲੀ ਇੱਛਾ ਮਥੁਰਾ-ਵ੍ਰਿੰਦਾਵਨ ਆਉਣ ਦੀ ਹੈ। ਉਹ ਭਾਰਤ ਦੇਸ਼ ਪ੍ਰਤੀ ਆਕਰਸ਼ਣ ਮਹਿਸੂਸ ਕਰਦੀ ਹੁੰਦੀ ਹੈ। ਆਪਣੇ ਪਤੀ ਨਾਲ ਉਹ ਭਾਰਤ ਆਉਂਦੀ ਹੈ ਅਤੇ ਇਥੇ ਕੁਝ ਗੁੰਡਿਆਂ ਵਲੋਂ ਉਸ ਦੀ ਇੱਜ਼ਤ ਲੁੱਟ ਲਈ ਜਾਂਦੀ ਹੈ। ਇਸ ਘਟਨਾ ਤੋਂ ਬਾਅਦ ਕੁੜੀ ਦੇ ਜੀਵਨ ਵਿਚ ਕੀ ਬਦਲਾਅ ਆਉਂਦਾ ਹੈ, ਇਹ ਇਸ ਵਿਚ ਦਿਖਾਇਆ ਜਾਵੇਗਾ।
ਆਪਣੀ ਇਸ ਪਹਿਲੀ ਫ਼ਿਲਮ ਬਾਰੇ ਯੂਲੀਆ ਕਹਿੰਦੀ ਹੈ, 'ਜਦੋਂ ਮੈਂ ਕਹਾਣੀ ਸੁਣੀ ਤਾਂ ਲੱਗਿਆ ਕਿ ਇਸ ਦਾ ਕਿਰਦਾਰ ਮੇਰੇ 'ਤੇ ਕਾਫੀ ਹੱਦ ਤੱਕ ਮੇਲ ਖਾਂਦਾ ਹੈ। ਪਤਾ ਨਹੀਂ ਕਿਉਂ ਮੈਨੂੰ ਸ਼ੁਰੂ ਤੋਂ ਹੀ ਭਾਰਤ ਵੱਲ ਆਕਰਸ਼ਣ ਰਿਹਾ ਹੈ ਅਤੇ ਮੇਰੀ ਦਿਲੀ ਇੱਛਾ ਭਾਰਤ ਆਉਣ ਦੀ ਸੀ। ਮੈਨੂੰ ਅਕਸਰ ਇਹ ਲਗਦਾ ਸੀ ਕਿ ਇਹ ਦੇਸ਼ ਮੈਨੂੰ ਬੁਲਾ ਰਿਹਾ ਹੈ। ਜਦੋਂ ਮੈਂ ਇਥੇ ਆਈ ਤਾਂ ਮੇਰਾ ਇਰਾਦਾ ਗਾਇਕਾ ਜਾਂ ਅਭਿਨੇਤਰੀ ਬਣਨ ਦਾ ਬਿਲਕੁਲ ਨਹੀਂ ਸੀ। ਇਹ ਤਾਂ ਬਸ, ਇਥੇ ਆ ਕੇ ਹੁੰਦਾ ਚਲਾ ਗਿਆ। ਇਥੇ ਆ ਕੇ ਮੇਰੀ ਜ਼ਿੰਦਗੀ ਬਦਲ ਗਈ। ਮੈਂ ਕਦੀ ਇਹ ਨਹੀਂ ਸੋਚਿਆ ਸੀ ਕਿ ਇਥੇ ਆ ਕੇ ਮੀਡੀਆ ਸਾਹਮਣੇ ਮੈਂ ਆਪਣੀ ਫ਼ਿਲਮ ਬਾਰੇ ਗੱਲਾਂ ਕਰਾਂਗੀ। ਇਸ ਫ਼ਿਲਮ ਲਈ ਹਾਂ ਕਹਿਣ ਦੀ ਇਕ ਵਜ੍ਹਾ ਇਹ ਵੀ ਹੈ ਕਿ ਇਸ ਵਿਚ ਸਮਾਜਿਕ ਸੰਦੇਸ਼ ਵੀ ਦਿੱਤਾ ਗਿਆ ਹੈ। ਮੈਨੂੰ ਇਸ ਗੱਲ ਦੀ ਵੀ ਖੁਸ਼ੀ ਹੈ ਕਿ ਇਸ ਦੀ ਕੁਝ ਸ਼ੂਟਿੰਗ ਮੇਰੇ ਦੇਸ਼ ਰੁਮਾਨੀਆ ਵਿਚ ਵੀ ਕੀਤੀ ਜਾਵੇਗੀ। ਭਾਵ ਇਹ ਫ਼ਿਲਮ ਮੈਨੂੰ ਮੇਰੇ ਦੇਸ਼ ਦੇ ਨਾਲ ਵੀ ਜੋੜਦੀ ਹੈ। ਰੁਮਾਨੀਆ ਤੋਂ ਇਲਾਵਾ ਇਸ ਦੀ ਸ਼ੂਟਿੰਗ ਉੱਤਰ ਪ੍ਰਦੇਸ਼ ਤੇ ਦਿੱਲੀ ਵਿਚ ਵੀ ਕੀਤੀ ਜਾਵੇਗੀ ਅਤੇ ਫ਼ਿਲਮ ਲਈ ਕੁਝ ਹੋਰ ਕਲਾਕਾਰਾਂ ਦੀ ਚੋਣ ਹੋਣੀ ਅਜੇ ਬਾਕੀ ਹੈ।


-ਮੁੰਬਈ ਪ੍ਰਤੀਨਿਧ

ਯੂਥ ਮਾਫ਼ੀਆ 'ਤੇ ਬਣੀ 'ਧੱਪਾ'

ਲੜੀਵਾਰ ਨਿਰਮਾਣ ਦੇ ਖੇਤਰ ਵਿਚ ਸਿਧਾਰਥ ਨਾਗਰ ਦਾ ਵੱਡਾ ਨਾਂਅ ਹੈ। ਉਨ੍ਹਾਂ ਵਲੋਂ ਲਖਨਊ ਦੂਰਦਰਸ਼ਨ ਲਈ ਬਣਾਏ ਗਏ ਲੜੀਵਾਰ 'ਅਸ਼ਟਭੁਜੀ' ਅੱਜ ਵੀ ਲੋਕ ਭੁੱਲੇ ਨਹੀਂ ਹਨ। ਇਹ ਕਹਿਣਾ ਗ਼ਲਤ ਨਾ ਹੋਵੇਗਾ ਕਿ ਉਨ੍ਹਾਂ ਦੀਆਂ ਰਗਾਂ ਵਿਚ ਖ਼ੂਨ ਨਹੀਂ ਸਗੋਂ ਸਿਆਹੀ ਦੌੜ ਰਹੀ ਹੈ ਕਿਉਂਕਿ ਉਹ ਸਾਹਿਤਕ ਪਰਿਵਾਰ ਤੋਂ ਹਨ। ਉਨ੍ਹਾਂ ਦੀ ਮਾਤਾ ਡਾ: ਅਚਲਾ ਨਾਗਰ ਹਿੰਦੀ ਫ਼ਿਲਮਾਂ ਦੀ ਨਾਮੀ ਲੇਖਿਕਾ ਹੈ ਤੇ ਨਾਨਾ ਪੰਡਿਤ ਅੰਮ੍ਰਿਤ ਲਾਲ ਨਾਗਰ ਦਾ ਹਿੰਦੀ ਸਾਹਿਤ ਦੀ ਦੁਨੀਆ ਵਿਚ ਵੱਡਾ ਨਾਂਅ ਰਿਹਾ ਹੈ। ਇਸ ਤਰ੍ਹਾਂ ਦੇ ਪਰਿਵਾਰ ਦੇ ਵੰਸ਼ਜ ਸਿਧਾਰਥ ਨੇ ਹੁਣ ਫ਼ੀਚਰ ਫ਼ਿਲਮ 'ਧੱਪਾ' ਦਾ ਨਿਰਮਾਣ-ਨਿਰਦੇਸ਼ਨ ਕੀਤਾ ਹੈ।
ਉਨ੍ਹਾਂ ਦਾ ਪਰਿਵਾਰ ਉੱਤਰ ਪ੍ਰਦੇਸ਼ ਤੋਂ ਹੈ ਅਤੇ ਕਿਉਂਕਿ ਉਹ ਉਥੋਂ ਦੇ ਸੱਭਿਆਚਾਰ ਤੋਂ ਚੰਗੀ ਤਰ੍ਹਾਂ ਜਾਣੂ ਹਨ। ਸੋ, ਆਪਣੀ ਇਸ ਫ਼ਿਲਮ ਦੀ ਕਹਾਣੀ ਵੀ ਉਥੋਂ ਦੀ ਰੱਖੀ ਹੈ। ਲਖਨਊ, ਆਗਰਾ ਤੇ ਯੂ. ਪੀ. ਦੀਆਂ ਹੋਰ ਲੋਕੇਸ਼ਨਾਂ 'ਤੇ ਸ਼ੂਟ ਕੀਤੀ ਗਈ ਇਸ ਫ਼ਿਲਮ ਵਿਚ ਸਿਧਾਰਥ ਨੇ ਅੱਜ ਦੇ ਨੌਜਵਾਨਾਂ ਦੀ ਕਹਾਣੀ ਪੇਸ਼ ਕੀਤੀ ਹੈ। ਇਥੇ ਇਕ ਇਸ ਤਰ੍ਹਾਂ ਦੇ ਨੌਜਵਾਨ ਦੀ ਕਹਾਣੀ ਪੇਸ਼ ਕੀਤੀ ਗਈ ਹੈ ਜੋ ਆਮ ਪਰਿਵਾਰ ਤੋਂ ਹੈ। ਮਾਂ ਦੀ ਇੱਛਾ ਹੈ ਕਿ ਬੇਟਾ ਪੜ੍ਹ-ਲਿਖ ਕੇ ਵੱਡਾ ਆਦਮੀ ਬਣੇ। ਆਪਣੀ ਮਾਂ ਦੇ ਸੁਪਨਿਆਂ ਨੂੰ ਪੂਰਾ ਕਰਨ ਲਈ ਬੇਟਾ ਕਾਲਜ ਵਿਚ ਦਾਖ਼ਲਾ ਲੈ ਲੈਂਦਾ ਹੈ। ਉਥੇ ਹਾਲਾਤ ਕੁਝ ਇਸ ਤਰ੍ਹਾਂ ਦੇ ਬਣਦੇ ਹਨ ਕਿ ਬੇਟੇ ਦੇ ਹੱਥ ਵਿਚ ਕਲਮ ਦੀ ਥਾਂ ਕੱਟਾ ਆ ਜਾਂਦਾ ਹੈ ਅਤੇ ਉਸ ਦੀ ਜ਼ਿੰਦਗੀ ਦਾ ਰਸਤਾ ਬਦਲ ਜਾਂਦਾ ਹੈ। ਬੰਦੂਕ ਦੇ ਦਮ 'ਤੇ ਦੁਨੀਆ ਬਦਲਣ ਚੱਲੇ ਇਸ ਨੌਜਵਾਨ ਨੂੰ ਆਖਿਰ ਬੰਦੂਕ ਕਿਵੇਂ ਖਾ ਜਾਂਦੀ ਹੈ, ਇਹ ਗੱਲ ਇਸ ਵਿਚ ਪੇਸ਼ ਕੀਤੀ ਗਈ ਹੈ।
ਮਾਂ ਦੀ ਭੂਮਿਕਾ ਜਯਾ ਭੱਟਾਚਾਰੀਆ ਵਲੋਂ ਨਿਭਾਈ ਗਈ ਹੈ। ਬੇਟੇ ਦੀ ਭੂਮਿਕਾ ਵਿਚ ਸ੍ਰੇਸ਼ਠ ਕੁਮਾਰ ਹਨ। ਇਨ੍ਹਾਂ ਦੇ ਨਾਲ ਅਯੂਬ ਖ਼ਾਨ, ਦੀਪ ਰਾਜ ਰਾਣਾ, ਅਮਿਤ ਬਹਿਲ, ਅਵਿਨਾਸ਼ ਸੇਜਵਾਨੀ, ਵਰਸ਼ਾ ਮਾਨਿਕਚੰਦ ਤੇ ਬਰਜੇਂਦਰ ਕਾਲਾ ਇਸ ਵਿਚ ਹਨ। ਪੂਰੀ ਸ਼ੂਟਿੰਗ ਯੂ. ਪੀ. ਵਿਚ ਕੀਤੀ ਗਈ ਹੈ। ਸੋ, ਉਥੇ ਦੇ ਰੰਗਮੰਚ ਤੇ ਨੌਟੰਕੀ ਦੇ ਕਈ ਕਲਾਕਾਰਾਂ ਨੂੰ ਵੀ ਇਸ ਵਿਚ ਮੌਕਾ ਦਿੱਤਾ ਗਿਆ ਹੈ ਜਿਨ੍ਹਾਂ ਵਿਚੋਂ ਪੁਨੀਤਾ ਅਵਸਥੀ, ਭਾਨੂਮਤੀ ਸਿੰਘ, ਐਚ. ਡੀ. ਸਿੰਘ, ਸੰਦੀਪਨ ਨਾਗਰ, ਯਸ਼ ਸਿਨਹਾ ਦੇ ਨਾਂਅ ਮੁੱਖ ਹਨ। ਫ਼ਿਲਮ ਦੇ ਅੱਸੀ ਫ਼ੀਸਦੀ ਤਕਨੀਸ਼ੀਅਨ ਵੀ ਯੂ. ਪੀ. ਦੇ ਹਨ।
ਸਿਧਾਰਥ ਅਨੁਸਾਰ ਫ਼ਿਲਮ ਨੂੰ ਬਣਾਉਂਦੇ ਸਮੇਂ ਮਾਂ ਤੇ ਨਾਨਾ ਜੀ ਦੇ ਨਾਂਅ 'ਤੇ ਇੱਜ਼ਤ ਦਾ ਵੱਡਾ ਖ਼ਿਆਲ ਰੱਖਿਆ ਹੈ। ਇਹੀ ਵਜ੍ਹਾ ਹੈ ਕਿ ਇਕ ਆਈਟਮ ਗੀਤ ਦੇ ਬੋਲ ਵੀ ਸਾਫ਼-ਸੁਥਰੇ ਰੱਖੇ ਗਏ ਅਤੇ ਸੰਵਾਦਾਂ ਵਿਚ ਗਾਲ੍ਹਾਂ ਰੱਖਣ ਤੋਂ ਵੀ ਪਰਹੇਜ਼ ਕੀਤਾ। ਮਾਂ ਨੇ ਜਦੋਂ ਫ਼ਿਲਮ ਦੇਖੀ ਤਾਂ ਉਨ੍ਹਾਂ ਨੇ ਫ਼ਿਲਮ ਦੀ ਤਾਰੀਫ਼ ਤਾਂ ਕੀਤੀ ਹੀ, ਨਾਲ ਹੀ ਬੇਟੇ ਦੀ ਲੇਖਣੀ ਦੀ ਤਾਰੀਫ਼ ਵਿਚ ਕਿਹਾ, 'ਮੈਨੂੰ ਫਖ਼ਰ ਹੈ ਕਿ ਤੂੰ ਆਪਣੀ ਕਲਮ ਨੂੰ ਫਿਸਲਣ ਨਹੀਂ ਦਿੱਤਾ।'
ਇਕ ਚੰਗੀ ਫ਼ਿਲਮ ਬਣਾਉਣ ਦੀ ਇੱਛਾ ਬਚਪਨ ਤੋਂ ਸਿਧਾਰਥ ਵਿਚ ਪਨਪ ਰਹੀ ਸੀ। ਉਹ ਇਸ ਲਈ ਕਿਉਂਕਿ ਲਖਨਊ ਵਿਚ ਉਨ੍ਹਾਂ ਦੀ ਹਵੇਲੀ ਵਿਚ 'ਸ਼ਤਰੰਜ ਕੇ ਖਿਲਾੜੀ' ਤੇ 'ਜਨੂੰਨ' ਦੀ ਸ਼ੂਟਿੰਗ ਹੋਈ ਸੀ। ਇਨ੍ਹਾਂ ਫ਼ਿਲਮਾਂ ਨੂੰ ਕੌਮਾਂਤਰੀ ਪੱਧਰ 'ਤੇ ਪ੍ਰਸਿੱਧੀ ਹਾਸਲ ਹੁੰਦੀ ਦੇਖ ਕੇ ਸਿਧਾਰਥ ਨੇ ਉੱਚ ਪੱਧਰੀ ਫ਼ਿਲਮਾਂ ਬਣਾਉਣ ਦਾ ਸੁਪਨਾ ਉਦੋਂ ਹੀ ਲੈ ਲਿਆ ਸੀ ਅਤੇ ਆਪਣੇ ਇਸ ਸੁਪਨੇ ਨੂੰ ਪੂਰਾ ਕਰਨ ਦੀ ਸ਼ੁਰੂਆਤ ਉਨ੍ਹਾਂ ਨੇ 'ਧੱਪਾ' ਤੋਂ ਕੀਤੀ ਹੈ।

ਏ. ਕੇ. ਬੀਰ ਦੀ ਅੰਤਰਧਵਨੀ

ਕੈਮਰਾਮੈਨ-ਨਿਰਦੇਸ਼ਕ ਏ. ਕੇ. ਬੀਰ ਦਾ ਨਾਂਅ ਕਲਾ ਫਿਮਲਾਂ ਦੇ ਖੇਤਰ ਵਿਚ ਕਾਫੀ ਵੱਡਾ ਹੈ। '27 ਡਾਊਨ', 'ਘਰੌਂਦਾ', 'ਗੋਧੂਲੀ', 'ਦੂਰੀਆਂ', 'ਪੋਸਤਨਜੀ', 'ਦਾਸੀ' ਸਮੇਤ ਕਈ ਫ਼ਿਲਮਾਂ ਨੂੰ ਇਨ੍ਹਾਂ ਨੇ ਆਪਣੀ ਫੋਟੋਗ੍ਰਾਫ਼ੀ ਦੇ ਕਮਾਲ ਨਾਲ ਸਜਾਇਆ ਤੇ 'ਆਦਿ ਮਿਮਾਂਸਾ', 'ਬਾਜਾ', 'ਲਾਵਣਿਆ ਪ੍ਰੀਤੀ' ਵਗੈਰਾ ਫ਼ਿਲਮਾਂ ਨਿਰਦੇਸ਼ਿਤ ਕਰ ਕੇ ਕਈ ਵੱਡੇ ਪੁਰਸਕਾਰ ਵੀ ਜਿੱਤੇ। ਹੁਣ ਜਨਾਬ ਬੀਰ ਨੇ 'ਅੰਤਰਧਵਨੀ' ਨਿਰੇਦਸ਼ਿਤ ਕੀਤੀ ਹੈ ਅਤੇ ਇਸ ਵਿਚ ਆਪਣੀ ਅੰਤਰ ਆਤਮਾ ਦੀ ਆਵਾਜ਼ ਸੁਣਨ ਦੀ ਗੱਲ ਕਹੀ ਗਈ ਹੈ।
ਰਾਜੇਸ਼ ਕੁਮਾਰ ਮੋਹੰਤੀ ਵਲੋਂ ਬਣਾਈ ਇਸ ਫ਼ਿਲਮ ਵਿਚ ਸਵਪਨਾ ਪਤੀ, ਗੌਰਵ ਪਾਸਵਾਲਾ, ਦੀਪਕ ਦਾਮਲੇ, ਚੈਤਨਿਆ ਸੋਲਨਕਰ ਤੇ ਤਲਵਿੰਦਰ ਸਿੰਘ ਨੇ ਅਭਿਨੈ ਕੀਤਾ ਹੈ ਅਤੇ ਇਹ ਮੁੰਬਈ, ਉੱਤਰਾਖੰਡ ਤੇ ਉੜੀਸ਼ਾ ਵਿਚ ਫ਼ਿਲਮਾਈ ਗਈ ਹੈ। ਇਥੇ ਸ਼ਾਂਤਨੂ ਨਾਮੀ ਇਕ ਇਸ ਤਰ੍ਹਾਂ ਦੇ ਮੁੰਡੇ ਦੀ ਕਹਾਣੀ ਪੇਸ਼ ਕੀਤੀ ਗਈ ਹੈ ਜਿਸ ਨੂੰ ਕਾਲਜ ਵਿਚ ਪੜ੍ਹਾਈ ਦੌਰਾਨ ਇਕ ਕੁੜੀ ਨਾਲ ਪਿਆਰ ਹੋ ਜਾਂਦਾ ਹੈ। ਬਾਅਦ ਵਿਚ ਜਦੋਂ ਉਹ ਕੁੜੀ ਉਸ ਤੋਂ ਦੂਰ ਚਲੀ ਜਾਂਦੀ ਹੈ ਤਾਂ ਸ਼ਾਂਤਨੂ ਦੇ ਅੰਦਰ ਦਾ ਸ਼ੈਤਾਨ ਜਾਗ ਉੱਠਦਾ ਹੈ ਅਤੇ ਇਸ ਸ਼ੈਤਾਨ ਦੀ ਬਦੌਲਤ ਸ਼ਾਂਤਨੂੰ ਦੀ ਜ਼ਿੰਦਗੀ ਕਿੰਨੀ ਬਦਲ ਜਾਂਦੀ ਹੈ, ਇਹ ਇਸ ਵਿਚ ਦਿਖਾਇਆ ਗਿਆ ਹੈ। ਅਪੂਰਵਾ ਕਿਸ਼ੋਰ ਬੀਰ ਉਰਫ਼ ਏ. ਕੇ. ਬੀਰ ਅਨੁਸਾਰ ਇਸ ਕਹਾਣੀ ਦਾ ਖਿਆਲ ਤਕਰੀਬਨ ਚਾਰ ਸਾਲ ਪਹਿਲਾਂ ਉਨ੍ਹਾਂ ਨੂੰ ਉਦੋਂ ਆਇਆ ਜਦੋਂ ਉਹ ਉਪਨਿਸ਼ਦ ਪੜ੍ਹ ਰਹੇ ਸਨ। ਇਸ ਵਿਚੋਂ ਉਨ੍ਹਾਂ ਨੇ ਇਕ ਪੰਕਤੀ ਪੜ੍ਹੀ ਕਿ ਜ਼ਿੰਦਗੀ ਅਤੇ ਸਾਹ ਦਾ ਨਾਤਾ ਮੌਤ ਤੱਕ ਰਹਿੰਦਾ ਹੈ। ਜਦੋਂ ਇਹ ਦੋਵੇਂ ਇਕੱਠੇ ਹੁੰਦੇ ਹਨ ਮੌਤ ਇਨ੍ਹਾਂ ਤੋਂ ਜਿੱਤ ਨਹੀਂ ਸਕਦੀ। ਇਸ ਪੰਕਤੀ ਤੋਂ ਪ੍ਰੇਰਿਤ ਹੋ ਕੇ ਉਨ੍ਹਾਂ ਦੀ ਇਹ ਫ਼ਿਲਮ ਬਣ ਕੇ ਤਿਆਰ ਹੈ ਅਤੇ ਆਪਣੀਆਂ ਪਹਿਲਾਂ ਦੀਆਂ ਫ਼ਿਲਮਾਂ ਦੀ ਤਰ੍ਹਾਂ ਉਹ ਇਸ ਨੂੰ ਕਈ ਅੰਤਰਰਾਸ਼ਟਰੀ ਫ਼ਿਲਮ ਸਮਾਰੋਹਾਂ ਵਿਚ ਭੇਜਣਗੇ ਅਤੇ ਉਸ ਤੋਂ ਬਾਅਦ ਭਾਰਤ ਵਿਚ ਇਸ ਨੂੰ ਪ੍ਰਦਰਸ਼ਿਤ ਕਰਨਗੇ।

ਏਕਤਾ ਕਪੂਰ ਦੀ ਨਵੀਂ ਸਰਗਰਮੀ

ਇਕ ਜ਼ਮਾਨੇ ਵਿਚ ਏਕਤਾ ਕਪੂਰ ਨੇ ਧੜੱਲੇ ਨਾਲ ਲੜੀਵਾਰਾਂ ਦਾ ਨਿਰਮਾਣ ਕੀਤਾ ਸੀ। ਹੁਣ ਜਦੋਂ ਵੈੱਬ ਸੀਰੀਜ਼ ਦਾ ਦੌਰ ਸ਼ੁਰੂ ਹੋਇਆ ਹੈ ਤਾਂ ਆਪਣੀ ਉਹੀ ਪੁਰਾਣੀ ਨੀਤੀ ਅਪਣਾਉਂਦੇ ਹੋਏ ਉਹ ਵੈੱਬ ਸੀਰੀਜ਼ ਵੀ ਲਗਾਤਾਰ ਬਣਾਈ ਜਾ ਰਹੀ ਹੈ। 'ਬੌਸ-ਡੈੱਡ ਅਲਾਈਵ', 'ਹੱਕ ਸੇ', 'ਹੋਮ', 'ਹਮ', 'ਦ ਗ੍ਰੇਟ ਇੰਡੀਅਨ ਡਾਈਫੰਕਸ਼ਨਲ ਫੈਮਿਲੀ' ਸਮੇਤ ਹੋਰ ਵੈੱਬ ਸੀਰੀਜ਼ ਦਾ ਨਿਰਮਾਣ ਕਰਨ ਵਾਲੀ ਏਕਤਾ ਹੁਣ 'ਬ੍ਰੋਕਨ ਬਟ ਬਿਊਟੀਫਲ' ਦੇ ਰੂਪ ਵਿਚ ਨਵੀਂ ਵੈੱਬ ਸੀਰੀਜ਼ ਲੈ ਆਈ ਹੈ। ਇਸ ਦਾ ਨਿਰਮਾਣ ਸਰਿਤਾ ਤੰਵਰ ਦੇ ਨਾਲ ਕੀਤਾ ਗਿਆ ਹੈ। ਅੰਗਰੇਜ਼ੀ ਫ਼ਿਲਮ ਮੈਗਜ਼ੀਨ 'ਸਟਾਰ ਡਸਟ' ਦੀ ਸੰਪਾਦਿਕਾ ਰਹਿ ਚੁੱਕੀ ਸਰਿਤਾ ਨੇ ਹੁਣ ਫ਼ਿਲਮ ਮੈਗਜ਼ੀਨ ਨੂੰ ਅਲਵਿਦਾ ਕਹਿ ਕੇ ਵੈੱਬ ਸੀਰੀਜ਼ ਨਿਰਮਾਣ ਵਲ ਆਪਣੇ ਕਦਮ ਵਧਾ ਲਏ ਹਨ ਅਤੇ ਬਤੌਰ ਨਿਰਮਾਤਰੀ ਇਹ ਉਨ੍ਹਾਂ ਦੀ ਪਹਿਲੀ ਵੈੱਬ ਸੀਰੀਜ਼ ਹੈ। ਵਿਕਰਾਂਤ ਮੈਸੀ, ਸਿਮਰਨ ਕੌਰ ਮੁੰਡੀ, ਹਰਲੀਨ ਕੌਰ, ਸ਼ੀਤਲ ਠਾਕੁਰ, ਆਕ੍ਰਿਤੀ ਸਿੰਘ ਆਦਿ ਦੇ ਅਭਿਨੈ ਨਾਲ ਸਜੀ ਗਿਆਰਾਂ ਐਪੀਸੋਡ ਵਾਲੀ ਇਸ ਸੀਰੀਜ਼ ਬਾਰੇ ਏਕਤਾ ਕਪੂਰ ਦਾ ਕਹਿਣਾ ਹੈ ਕਿ ਇਸ ਵਿਚ ਦਿਲ ਟੁੱਟਣ 'ਤੇ ਜਸ਼ਨ ਮਨਾਉਣ ਦੀ ਗੱਲ ਕੀਤੀ ਗਈ ਹੈ।
ਇਸ ਸੀਰੀਜ਼ ਦੀ ਖ਼ਾਸ ਗੱਲ ਇਹ ਹੈ ਕਿ ਇਸ ਨੂੰ ਮਧੁਰ ਗੀਤਾਂ ਨਾਲ ਸਜਾਇਆ ਗਿਆ ਹੈ। ਇਨ੍ਹਾਂ ਗੀਤਾਂ ਲਈ ਸ਼੍ਰੇਆ ਘੋਸ਼ਾਲ, ਪਾਪੋਨ ਤੇ ਪੰਜਾਬ ਦੀ ਗਾਇਕਾ ਪੂਜਾ ਕੁਮਾਰ ਨੇ ਆਵਾਜ਼ ਦਿੱਤੀ ਹੈ। ਖ਼ਾਸ ਕਰਕੇ ਪੂਜਾ ਕੁਮਾਰ ਵਲੋਂ ਗਾਇਆ ਗੀਤ 'ਸੋਹਣਿਆ...' ਵਿਚ ਹਰਮਨ ਪਿਆਰੇ ਹੋਣ ਦੇ ਸਾਰੇ ਗੁਣ ਮੌਜੂਦ ਹਨ।
ਫ਼ਿਲਮ ਪੱਤਰਕਾਰਤਾ ਦਾ ਲੰਬਾ ਅਨੁਭਵ ਹੋਣ ਦੇ ਨਾਤੇ ਸਰਿਤਾ ਕੋਲ ਬਾਲੀਵੁੱਡ ਦੀਆਂ ਅੰਤਰੰਗ ਕਹਾਣੀਆਂ ਦਾ ਖਜ਼ਾਨਾ ਹੈ ਪਰ ਸਰਿਤਾ ਅਨੁਸਾਰ ਉਨ੍ਹਾਂ ਵਿਚੋਂ ਕੋਈ ਵੀ ਕਹਾਣੀ ਇਸ ਸੀਰੀਜ਼ ਵਿਚ ਪੇਸ਼ ਨਹੀਂ ਕੀਤੀ ਗਈ ਹੈ। ਇਸ ਵਿਚ ਜੋ ਦ੍ਰਿਸ਼ ਹਨ, ਉਨ੍ਹਾਂ ਵਿਚੋਂ ਕੁਝ ਸਰਿਤਾ ਦੀ ਆਪਣੀ ਜ਼ਿੰਦਗੀ ਵਿਚੋਂ ਹਨ ਤੇ ਕੁਝ ਏਕਤਾ ਦੀ। ਆਮ ਤੌਰ 'ਤੇ ਵੈੱਬ ਸੀਰੀਜ਼ ਵਿਚ ਬੋਲਡ ਦ੍ਰਿਸ਼ ਜਾਂ ਗਾਲੀ-ਗਲੋਚ ਹੋਣਾ ਆਮ ਗੱਲ ਹੈ ਪਰ ਇਹ ਲੜੀ ਕਾਫੀ ਸੁਥਰੀ ਹੈ। ਖ਼ੁਦ ਏਕਤਾ ਇਹ ਮੰਨਦੀ ਹੈ ਕਿ ਇਹ ਸੀਰੀਜ਼ ਉਸ ਦੀ ਹੋਰ ਲੜੀਆਂ ਦੇ ਮੁਕਾਬਲੇ ਸਾਫ-ਸੁਥਰੀ ਹੈ ਅਤੇ ਇਸ ਦਾ ਸਿਹਰਾ ਸਰਿਤਾ ਨੂੰ ਜਾਣਾ ਚਾਹੀਦਾ ਹੈ ਕਿਉਂਕਿ ਉਹ ਕਹਾਣੀ ਦੇ ਦਮ 'ਤੇ ਆਪਣੀ ਸੀਰੀਜ਼ ਨੂੰ ਹਰਮਨਪਿਆਰਾ ਬਣਾਉਣਾ ਚਾਹੁੰਦੀ ਹੈ ਨਾ ਕਿ ਬਾਜ਼ਾਰੂ ਟੋਟਕੇ ਅਜ਼ਮਾ ਕੇ।


-ਮੁੰਬਈ ਪ੍ਰਤੀਨਿਧ

ਬਹੁਤ ਕੁਝ ਕਰਨ ਦੀ ਤਮੰਨਾ ਰੱਖਦੀ ਹੈ : ਅਨੁਪਮਾ ਸੋਨੀ

ਮਿਸਜ਼ ਏਸ਼ੀਆ ਇੰਟਰਨੈਸ਼ਨਲ-2018 ਦਾ ਤਾਜ ਹਾਸਲ ਕਰਨ ਵਿਚ ਕਾਮਯਾਬ ਰਹੀ ਅਨੁਪਮਾ ਸੋਨੀ ਜੈਪੁਰ ਦੀ ਰਹਿਣ ਵਾਲੀ ਹੈ ਅਤੇ ਉਹ ਦੰਦਾਂ ਦੀ ਡਾਕਟਰ ਹੈ। ਕੋਟਾ ਵਿਚ ਜਨਮੀ ਅਨੁਪਮਾ ਜਦੋਂ ਕਾਲਜ ਵਿਚ ਪੜ੍ਹਾਈ ਕਰ ਰਹੀ ਸੀ ਤਾਂ ਉਦੋਂ ਸੁੰਦਰਤਾ ਮੁਕਾਬਲੇ ਵਿਚ ਹਿੱਸਾ ਲੈਣ ਦੀ ਇੱਛਾ ਹੋਈ ਸੀ ਪਰ ਘਰ ਵਾਲਿਆਂ ਨੇ ਕੋਈ ਖ਼ਾਸ ਹੁੰਗਾਰਾ ਨਹੀਂ ਦਿੱਤਾ ਸੀ। ਖੁਸ਼ਨਸੀਬੀ ਨਾਲ ਵਿਆਹ ਤੋਂ ਬਾਅਦ ਪਤੀ ਅਤੇ ਸਹੁਰੇ ਪਰਿਵਾਰ ਵਲੋਂ ਚੰਗਾ ਹੁੰਗਾਰਾ ਮਿਲਿਆ ਤੇ ਪਹਿਲਾਂ ਉਹ ਮਿਸਜ਼ ਰਾਜਸਥਾਨ ਦਾ ਤਾਜ ਜਿੱਤਣ ਵਿਚ ਕਾਮਯਾਬ ਰਹੀ, ਫਿਰ ਮਿਸਜ਼ ਇੰਡੀਆ ਅਤੇ ਹੁਣ ਮਿਸਜ਼ ਏਸ਼ੀਆ ਸੁੰਦਰਤਾ ਮੁਕਾਬਲਾ ਜਿੱਤੀ ਹੈ। ਅੱਜ ਉਹ ਕਈ ਵਿਆਹੁਤਾ ਔਰਤਾਂ ਲਈ 'ਰੋਲ ਮਾਡਲ' ਬਣ ਗਈ ਹੈ ਪਰ ਅਨੁਪਮਾ ਖ਼ੁਦ ਇਹ ਗੱਲ ਕਬੂਲ ਕਰਦੀ ਹੈ ਕਿ ਦੂਜਿਆਂ ਤੋਂ ਪ੍ਰੇਰਨਾ ਲੈ ਕੇ ਉਹ ਜ਼ਿੰਦਗੀ ਵਿਚ ਅੱਗੇ ਵਧਦੀ ਆਈ ਹੈ। ਉਹ ਕਹਿੰਦੀ ਹੈ, 'ਜਦੋਂ ਮੈਂ ਪੜ੍ਹਾਈ ਕਰ ਰਹੀ ਸੀ, ਉਦੋਂ ਸੁਸ਼ਮਿਤਾ ਸੇਨ ਤੋਂ ਬਹੁਤ ਪ੍ਰਭਾਵਿਤ ਸੀ। ਖ਼ਾਸ ਕਰਕੇ ਉਸ ਦੇ ਆਤਮਵਿਸ਼ਵਾਸ ਨੂੰ ਦੇਖ ਕੇ ਮੈਨੂੰ ਕਾਫੀ ਪ੍ਰੇਰਨਾ ਮਿਲੀ। ਮੈਂ ਪ੍ਰਿਅੰਕਾ ਚੋਪੜਾ ਤੋਂ ਵੀ ਪ੍ਰਭਾਵਿਤ ਰਹੀ ਹਾਂ। ਛੋਟੇ ਸ਼ਹਿਰ ਤੋਂ ਆਈ ਪ੍ਰਿਅੰਕਾ ਅੱਜ ਹਾਲੀਵੁੱਡ ਵਿਚ ਆਪਣੀ ਥਾਂ ਬਣਾਉਣ ਵਿਚ ਕਾਮਯਾਬ ਰਹੀ ਹੈ। ਉਹ ਆਪਣੇ-ਆਪ ਵਿਚ ਆਈਕੋਨ ਹੈ। ਅੱਜ ਜਦੋਂ ਔਰਤਾਂ ਮੈਨੂੰ ਸੁੰਦਰਤਾ ਮੁਕਾਬਲੇ ਬਾਰੇ ਪੁੱਛਦੀਆਂ ਹਨ ਤਾਂ ਮੇਰਾ ਇਹ ਜਵਾਬ ਹੁੰਦਾ ਹੈ ਕਿ ਮੌਕਾ ਮਿਲਣ 'ਤੇ ਕਿਸੇ ਵੀ ਮੁਕਾਬਲੇ ਵਿਚ ਹਿੱਸਾ ਲੈਣਾ ਚਾਹੀਦਾ ਹੈ। ਇਸ ਨਾਲ ਆਤਮਵਿਸ਼ਵਾਸ ਵੱਧਦਾ ਹੈ। ਸੁੰਦਰਤਾ ਮੁਕਾਬਲੇ ਦੀ ਬਦੌਲਤ ਸਟਾਈਲਿੰਗ, ਗਰੂਮਿੰਗ, ਮੇਕਅੱਪ ਆਦਿ ਬਾਰੇ ਵੀ ਬਹੁਤ ਜਾਣਨ ਨੂੰ ਮਿਲਦਾ ਹੈ।' ਸੁਸ਼ਮਿਤਾ, ਪ੍ਰਿਅੰਕਾ ਤੋਂ ਪ੍ਰਭਾਵਿਤ ਅਨੁਪਮਾ ਹੁਣ ਖ਼ੁਦ ਉਨ੍ਹਾਂ ਦੀ ਤਰ੍ਹਾਂ ਸਮਾਜ ਸੇਵਾ ਦੇ ਕੰਮ ਵਿਚ ਆਪਣਾ ਯੋਗਦਾਨ ਦੇਣ ਲੱਗੀ ਹੈ। ਰਾਜਸਥਾਨ ਸਰਕਾਰ ਵਲੋਂ ਉਸ ਨੂੰ ਸੜਕ ਸੁਰੱਖਿਆ ਦੀ ਅੰਬੈਸਡਰ ਦੇ ਤੌਰ 'ਤੇ ਨਿਯੁਕਤ ਕੀਤਾ ਗਿਆ ਹੈ। ਕਿਉਂਕਿ ਉਹ ਮਿਸਜ਼ ਫੋਟੋਜਨਿਕ ਵੀ ਚੁਣੀ ਗਈ ਸੀ, ਇਸ ਵਜ੍ਹਾ ਕਰਕੇ ਉਹ ਹੁਣ ਮਾਡਲਿੰਗ ਵਿਚ ਵੀ ਅੱਗੇ ਆਉਣਾ ਚਾਹੁੰਦੀ ਹੈ ਅਤੇ ਅਭਿਨੈ ਵਿਚ ਵੀ ਆਪਣੀ ਤਕਦੀਰ ਅਜ਼ਮਾਉਣਾ ਚਾਹੁੰਦੀ ਹੈ। ਉਨ੍ਹਾਂ ਦੀ ਇੱਛਾ ਦੇਸ਼ ਦੀ ਕਿਸੇ ਨਾਮੀ ਔਰਤ 'ਤੇ ਬਣਨ ਵਾਲੀ ਬਾਇਓਪਿਕ ਵਿਚ ਮੁੱਖ ਭੂਮਿਕਾ ਨਿਭਾਉਣ ਦੀ ਹੈ।


-ਮੁੰਬਈ ਪ੍ਰਤੀਨਿਧ

ਗਾਇਕ ਤੇ ਗੀਤਕਾਰ ਬਿੰਦ ਸਿੰਘ

ਗਾਇਕੀ ਤੇ ਗੀਤਕਾਰੀ ਦੇ ਸੰਘਰਸ਼ ਭਰੇ ਖੇਤਰ ਵਿਚ ਥੋੜ੍ਹੇ ਸਮੇਂ ਵਿਚ ਹੀ ਨਾਮਣਾ ਖੱਟਣ ਵਾਲੇ ਗਾਇਕ ਤੇ ਗੀਤਕਾਰ ਬਿੰਦ ਸਿੰਘ (ਹਰਬਰਿੰਦਰ ਸਿੰਘ) ਦਾ ਜਨਮ ਜ਼ਿਲ੍ਹਾ ਅੰਮ੍ਰਿਤਸਰ ਦੇ ਪਿੰਡ ਧਨੇਲ ਵਿਖੇ ਪਿਤਾ ਸ: ਪਿਆਰਾ ਸਿੰਘ ਦੇ ਗ੍ਰਹਿ ਵਿਖੇ ਮਾਤਾ ਚਰਨ ਕੌਰ ਦੀ ਕੁੱਖੋਂ ਹੋਇਆ। ਬਿੰਦ ਸਿੰਘ ਨੇ 10+2 ਤੱਕ ਦੀ ਪੜ੍ਹਾਈ ਗੁਰੂ ਕੇ ਬੇਰ ਸਕੂਲ ਪਿੰਡ ਬੋਪਾਰਾਏ (ਅੰਮ੍ਰਿਤਸਰ) ਤੋਂ ਕਰਨ ਉਪਰੰਤ ਰਿਆਤ ਐਂਡ ਬਾਹਰਾ ਕਾਲਜ, ਰੈਲ ਮਾਜਰਾ (ਰੋਪੜ) ਤੋਂ ਫਾਰਮੇਸੀ ਦੀ ਡਿਗਰੀ ਹਾਸਲ ਕੀਤੀ। ਬਿੰਦ ਸਿੰਘ ਨੇ ਇਸ ਖੇਤਰ ਵਿਚ ਸੰਗੀਤ ਦੀ ਅਧਿਆਪਕਾ ਮੈਡਮ ਰਿਤੂ ਰਾਜਪੁਰਾ ਤੋਂ ਤਾਲੀਮ ਲੈਣੀ ਆਰੰਭ ਕੀਤੀ। ਬਿੰਦ ਸਿੰਘ ਨੇ 2014 ਵਿਚ ਆਪਣੇ ਲਿਖੇ ਧਾਰਮਿਕ ਗੀਤ 'ਬਾਬਾ ਨਾਨਕ' ਨਾਲ ਗਾਇਕੀ ਤੇ ਗੀਤਕਾਰੀ ਦੇ ਖੇਤਰ ਵਿਚ ਪ੍ਰਵੇਸ਼ ਕੀਤਾ ਤੇ ਬਾਅਦ ਵਿਚ ਰੌਮਾਂਟਿਕ ਗੀਤ 'ਅੱਖੀਆਂ' ਨਾਲ ਆਪਣੀ ਪਹਿਚਾਣ 'ਚ ਹੋਰ ਵਾਧਾ ਕਰ ਲਿਆ। ਬਿੰਦ ਸਿੰਘ ਦੇ ਲਿਖੇ ਗੀਤ 'ਇਫ਼ ਆਈ ਲਵ ਯੂ' ਨੂੰ ਰੌਸ਼ਨ ਪ੍ਰਿੰਸ ਅਤੇ 'ਸਾਡਾ ਹੋ ਜਾ ਵੇ ਤੂੰ ਯਾਰਾ' ਨੂੰ ਗਾਇਕ ਦਿਲਜਾਨ ਵਲੋਂ ਗਾਏ ਜਾਣ ਨਾਲ ਬਿੰਦ ਸਿੰਘ ਉੱਭਰ ਰਹੇ ਗੀਤਕਾਰ ਵਜੋਂ ਵੀ ਚਰਚਿਤ ਹੋਇਆ ਹੈ। ਬਿੰਦ ਸਿੰਘ ਦੇ ਧਾਰਮਿਕ ਗੀਤ 'ਬਾਬਾ ਨਾਨਕ' ਦੀ ਪੀ.ਟੀ.ਸੀ. ਪੰਜਾਬੀ ਮਿਊਜ਼ਿਕ ਐਵਾਰਡ 'ਚ ਬੈਸਟ ਗੀਤਕਾਰ ਵਜੋਂ ਨਾਮੀਨੇਸ਼ਨ ਹੋਣ ਨਾਲ ਉਸ ਨੇ ਗਾਇਕੀ ਤੇ ਗੀਤਕਾਰ ਦੇ ਖੇਤਰ 'ਚ ਨਵੀਂ ਪੁਲਾਂਘ ਪੁੱਟੀ। ਬਿੰਦ ਸਿੰਘ ਨੇ ਦੱਸਿਆ ਕਿ ਉਹ ਜਲਦ ਹੀ ਨਵੇਂ ਗੀਤ 'ਚੁੰਨੀਆਂ' ਅਤੇ 'ਪਾਗਲ' ਨਾਲ ਹਾਜ਼ਰੀ ਲਵਾਉਣ ਜਾ ਰਿਹਾ ਹੈ। ਉਸ ਨੇ ਕਿਹਾ ਕਿ ਗੀਤਕਾਰੀ ਤੇ ਗਾਇਕੀ ਦੇ ਖੇਤਰ 'ਚ ਮੈਂ ਹਮੇਸ਼ਾ ਪੰਜਾਬੀ ਮਾਂ-ਬੋਲੀ ਦੀ ਸੇਵਾ ਨੂੰ ਸਮਰਪਿਤ ਰਹਾਂਗਾ।


-ਲਖਵਿੰਦਰ ਸਿੰਘ ਧਾਲੀਵਾਲ,
ਪਿੰਡ ਤੇ ਡਾਕ : ਗੋਗੋ, ਜ਼ਿਲ੍ਹਾ ਹੁਸ਼ਿਆਰਪੁਰ।

ਫ਼ਿਲਮੀ ਖ਼ਬਰਾਂ

ਮਾਰਚ ਤੋਂ ਅਭਿਨੈ ਵਿਚ ਰੁੱਝੀ ਹੋਵੇਗੀ ਦੀਪਿਕਾ

ਰਣਵੀਰ ਸਿੰਘ ਨਾਲ ਵਿਆਹ ਕਰਾ ਲੈਣ ਤੋਂ ਬਾਅਦ ਦੀਪਿਕਾ ਪਾਦੂਕੋਨ ਅਗਲੇ ਸਾਲ ਦੇ ਮਾਰਚ ਮਹੀਨੇ ਤੋਂ ਫਿਰ ਇਕ ਵਾਰ ਅਭਿਨੈ ਵਿਚ ਵਾਪਸੀ ਕਰ ਲਵੇਗੀ ਅਤੇ ਮੇਘਨਾ ਗੁਲਜ਼ਾਰ ਵਲੋਂ ਨਿਰਦੇਸ਼ਿਤ ਕੀਤੀ ਜਾਣ ਵਾਲੀ ਫ਼ਿਲਮ ਤੋਂ ਉਹ ਕੰਮ ਕਰਨਾ ਸ਼ੁਰੂ ਕਰ ਦੇਵੇਗੀ। ਇਸ ਫ਼ਿਲਮ ਵਿਚ ਉਹ ਅਸਲ ਜ਼ਿੰਦਗੀ ਤੋਂ ਪ੍ਰੇਰਿਤ ਇਕ ਕੁੜੀ ਦਾ ਕਿਰਦਾਰ ਨਿਭਾਏਗੀ ਜੋ ਤੇਜ਼ਾਬ ਹਮਲੇ ਦਾ ਸ਼ਿਕਾਰ ਹੋਈ ਸੀ।

-ਪੰਨੂੰ

ਫ਼ਿਲਮੀ ਖ਼ਬਰਾਂ

'ਸਿੰਘਮ' ਹੁਣ ਪੰਜਾਬੀ ਵਿਚ

ਰੋਹਿਤ ਸ਼ੈਟੀ ਵਲੋਂ ਨਿਰਦੇਸ਼ਿਤ ਅਤੇ ਅਜੈ ਦੇਵਗਨ ਦੇ ਅਭਿਨੈ ਵਾਲੀ ਇਸ ਫ਼ਿਲਮ ਨੂੰ ਹੁਣ ਪੰਜਾਬੀ ਵਿਚ ਬਣਾਇਆ ਜਾ ਰਿਹਾ ਹੈ ਅਤੇ ਇਸ ਦਾ ਨਿਰਮਾਣ ਭੂਸ਼ਣ ਕੁਮਾਰ, ਅਜੈ ਦੇਵਗਨ ਤੇ ਕੁਮਾਰ ਮੰਗਤ ਵਲੋਂ ਮਿਲ ਕੇ ਕੀਤਾ ਜਾ ਰਿਹਾ ਹੈ। ਇਹ ਨਵਨਿਆਤ ਸਿੰਘ ਵਲੋਂ ਨਿਰਦੇਸ਼ਿਤ ਕੀਤੀ ਜਾ ਰਹੀ ਹੈ ਅਤੇ ਇਸ ਦੇ ਮੁੱਖ ਕਲਾਕਾਰ ਹਨ ਪਰਮੀਸ਼ ਵਰਮਾ, ਸੋਨਮ ਬਾਜਵਾ ਅਤੇ ਕਰਤਾਰ ਚੀਮਾ।

-ਪੰਨੂੰ






Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX