ਤਾਜਾ ਖ਼ਬਰਾਂ


ਅੱਜ ਦਾ ਵਿਚਾਰ
. . .  1 minute ago
ਸੀ.ਬੀ.ਆਈ ਵੱਲੋਂ ਸਾਂਈ ਦੇ ਠਿਕਾਣਿਆਂ 'ਤੇ ਛਾਪੇਮਾਰੀ
. . .  1 day ago
ਨਵੀਂ ਦਿੱਲੀ, 17 ਜਨਵਰੀ - ਸੀ.ਬੀ.ਆਈ ਵੱਲੋਂ ਰਿਸ਼ਵਤ ਦੇ ਮਾਮਲੇ 'ਚ ਸਪੋਰਟਸ ਅਥਾਰਿਟੀ ਆਫ਼ ਇੰਡੀਆ (ਸਾਈ) ਦੇ ਠਿਕਾਣਿਆਂ 'ਤੇ ਛਾਪੇਮਾਰੀ ਕੀਤੀ ਗਈ ਹੈ।
ਨਵੇਂ ਸਰਪੰਚਾਂ ਨੂੰ ਗਰਾਮ ਪੰਚਾਇਤਾਂ ਦਾ ਰਿਕਾਰਡ 21 ਤੱਕ ਦੇਣ ਦੇ ਹੁਕਮ
. . .  1 day ago
ਖਮਾਣੋਂ ,17 ਜਨਵਰੀ {ਮਨਮੋਹਣ ਸਿੰਘ ਕਲੇਰ}- ਰਾਜ ਦੇ ਪੇਂਡੂ ਵਿਕਾਸ ਅਤੇ ਪੰਚਾਇਤ ਵਿਭਾਗ {ਚੋਣ ਸ਼ਾਖਾ} ਵੱਲੋਂ ਰਾਜ ਸਮੂਹ ਜ਼ਿਲ੍ਹਾ ਵਿਕਾਸ ਅਫ਼ਸਰਾਂ ਅਤੇ ਬਲਾਕ ਵਿਕਾਸ ਅਫ਼ਸਰਾਂ ਨੂੰ ਇਕ ਪੱਤਰ ਜਾਰੀ ਕਰਦੇ ਹੋਏ ਮੌਜੂਦਾ ...
ਕੈਬਨਿਟ ਦੀ ਨਿਯੁਕਤ ਕਮੇਟੀ ਨੇ ਘਟਾਇਆ ਰਾਕੇਸ਼ ਅਸਥਾਨਾ ਸਮੇਤ 4 ਅਫਸਰਾਂ ਦਾ ਕਾਰਜਕਾਲ
. . .  1 day ago
ਨਵੀਂ ਦਿੱਲੀ, 17 ਜਨਵਰੀ - ਸੀ.ਬੀ.ਆਈ ਦੇ ਵਿਸ਼ੇਸ਼ ਨਿਰਦੇਸ਼ਕ ਰਾਕੇਸ਼ ਅਸਥਾਨਾ ਅਤੇ ਤਿੰਨ ਹੋਰ ਸੀ.ਬੀ.ਆਈ ਅਫਸਰਾਂ ਦਾ ਕਾਰਜਕਾਲ ਕੇਂਦਰੀ ਕੈਬਨਿਟ ਦੀ ਨਿਯੁਕਤ ਕਮੇਟੀ ਵੱਲੋਂ...
ਸੱਚ ਦੀ ਜਿੱਤ ਹੋਈ ਹੈ - ਅੰਸ਼ੁਲ ਛਤਰਪਤੀ
. . .  1 day ago
ਪੰਚਕੂਲਾ, 17 ਜਨਵਰੀ - ਪੱਤਰਕਾਰ ਰਾਮਚੰਦਰ ਛਤਰਪਤੀ ਹੱਤਿਆ ਮਾਮਲੇ 'ਚ ਡੇਰਾ ਸਿਰਸਾ ਪ੍ਰਮੁੱਖ ਗੁਰਮੀਤ ਰਾਮ ਰਹੀਮ ਸਮੇਤ ਚਾਰ ਦੋਸ਼ੀਆਂ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਏ...
ਸੈਰ ਸਪਾਟਾ ਵਿਭਾਗ ਨੇ 7.90 ਕਰੋੜ ਦੀ ਲਾਗਤ ਨਾਲ ਛੱਤਬੀੜ ਦੀ ਕੀਤੀ ਕਾਇਆ ਕਲਪ - ਸਿੱਧੂ
. . .  1 day ago
ਜ਼ੀਰਕਪੁਰ, 17 ਜਨਵਰੀ (ਹਰਦੀਪ ਸਿੰਘ ਹੈਪੀ ਪੰਡਵਾਲਾ) - ਪੰਜਾਬ ਵਿੱਚ ਜੰਗਲੀ ਜੀਵ ਸੈਲਾਨੀਆਂ ਦੀ ਗਿਣਤੀ ਨੂੰ ਵਧਾਉਣ ਲਈ ਪੰਜਾਬ ਹੈਰੀਟੇਜ ਐਂਡ ਟੂਰਿਜ਼ਮ ਪ੍ਰਮੋਸ਼ਨ ਬੋਰਡ ਵੱਲੋਂ ਛੱਤਬੀੜ...
ਛਤਰਪਤੀ ਹੱਤਿਆ ਮਾਮਲੇ 'ਚ ਰਾਮ ਰਹੀਮ ਨੂੰ ਉਮਰ ਕੈਦ ਦੀ ਸਜ਼ਾ
. . .  1 day ago
ਪੰਚਕੂਲਾ, 17 ਜਨਵਰੀ (ਰਾਮ ਸਿੰਘ ਬਰਾੜ) - ਪੱਤਰਕਾਰ ਰਾਮਚੰਦਰ ਛਤਰਪਤੀ ਹੱਤਿਆ ਮਾਮਲੇ 'ਚ ਸੀ.ਬੀ.ਆਈ ਦੀ ਵਿਸ਼ੇਸ਼ ਅਦਾਲਤ ਨੇ ਡੇਰਾ ਸੱਚਾ ਸੌਦਾ ਪ੍ਰਮੁੱਖ ਗੁਰਮੀਤ ਰਾਮ ਰਹੀਮ...
ਭਾਰਤ ਅਤੇ ਆਸਟ੍ਰੇਲੀਆ ਵਿਚਕਾਰ ਤੀਸਰਾ ਇੱਕ ਦਿਨਾਂ ਮੈਚ ਕੱਲ੍ਹ
. . .  1 day ago
ਮੈਲਬੌਰਨ, 17 ਜਨਵਰੀ - ਭਾਰਤ ਅਤੇ ਆਸਟ੍ਰੇਲੀਆ ਵਿਚਕਾਰ ਤੀਸਰਾ ਅਤੇ ਆਖ਼ਰੀ ਇੱਕ ਦਿਨਾਂ ਮੈਚ 18 ਜਨਵਰੀ ਨੂੰ ਮੈਲਬੌਰਨ 'ਚ ਖੇਡਿਆ ਜਾਵੇਗਾ। ਦੋਵੇਂ ਟੀਮਾਂ 1-1 ਮੈਚ ਜਿੱਤ...
ਮਹਿਲਾ ਕ੍ਰਿਕਟ : ਬੀ.ਸੀ.ਸੀ.ਆਈ ਵੱਲੋਂ ਇੰਗਲੈਂਡ ਖ਼ਿਲਾਫ਼ ਘਰੇਲੂ ਲੜੀ ਲਈ ਪ੍ਰੋਗਰਾਮ ਦਾ ਐਲਾਨ
. . .  1 day ago
ਮੁੰਬਈ, 17 ਜਨਵਰੀ - ਬੀ.ਸੀ.ਸੀ.ਆਈ ਨੇ ਇੰਗਲੈਂਡ ਖ਼ਿਲਾਫ਼ ਘਰੇਲੂ ਲੜੀ ਲਈ ਪ੍ਰੋਗਰਾਮ ਦਾ ਐਲਾਨ ਕਰ ਦਿੱਤਾ ਹੈ। ਇਸ ਲੜੀ ਤਹਿਤ ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਅਤੇ ਇੰਗਲੈਂਡ...
ਸੋਸ਼ਲ ਮੀਡੀਆ 'ਤੇ ਆਮ ਚੋਣਾਂ ਦੀ ਫ਼ਰਜ਼ੀ ਤਾਰੀਖ਼ ਜਾਰੀ ਕਰਨ ਵਾਲਿਆ ਖ਼ਿਲਾਫ਼ ਕਾਰਵਾਈ ਹੋਵੇ - ਚੋਣ ਕਮਿਸ਼ਨ
. . .  1 day ago
ਨਵੀਂ ਦਿੱਲੀ, 10 ਜਨਵਰੀ - ਚੋਣ ਕਮਿਸ਼ਨ ਨੇ ਦਿੱਲੀ ਦੇ ਚੋਣ ਅਧਿਕਾਰੀ ਨੂੰ ਸੋਸ਼ਲ ਮੀਡੀਆ 'ਤੇ ਆਮ ਚੋਣਾਂ ਦੀ ਫ਼ਰਜ਼ੀ ਤਾਰੀਖ਼ ਜਾਰੀ ਕਰਨ ਵਾਲਿਆ ਖ਼ਿਲਾਫ਼ ਕਾਰਵਾਈ...
ਹੋਰ ਖ਼ਬਰਾਂ..

ਖੇਡ ਜਗਤ

ਆਓ ਜਾਣੀਏ 'ਬੋਸ਼ੀਆ' (ਪੈਰਾ ਉਲੰਪਿਕ ਖੇਡ) ਕੀ ਹੈ?

ਭਾਰਤ ਯੋਧਿਆਂ, ਸੂਰਬੀਰਾਂ, ਗੁਰੂਆਂ, ਪੀਰਾਂ, ਰਾਜਿਆਂ, ਮਹਾਰਾਜਿਆਂ, ਖਿਡਾਰੀਆਂ ਦਾ ਦੇਸ਼ ਹੈ। ਵੱਖ-ਵੱਖ ਖੇਡਾਂ ਦੇ ਖਿਡਾਰੀ ਭਾਰਤ ਦਾ ਨਾਂਅ ਦੁਨੀਆ ਭਰ 'ਚ ਰੌਸ਼ਨ ਕਰ ਚੁੱਕੇ ਹਨ। ਭਾਰਤ ਵਿਚ ਅਨੇਕਾ ਖੇਡਾਂ ਖੇਡੀਆਂ ਜਾਂਦੀਆਂ ਹਨ, ਜਿਨ੍ਹਾਂ ਤੋਂ ਅਸੀਂ ਚੰਗੀ ਤਰ੍ਹਾਂ ਵਾਕਿਫ਼ ਹਾਂ, ਜਿਵੇਂ ਕ੍ਰਿਕਟ, ਕਬੱਡੀ, ਹਾਕੀ ਅਤੇ ਅਥਲੈਟਿਕਸ ਆਦਿ ਇਹ ਸਭ ਖੇਡਾਂ ਇਕ ਤੰਦਰੁਸਤ ਸਰੀਰ ਵਾਲਾ ਆਦਮੀ ਹੀ ਖੇਡ ਸਕਦਾ ਹੈ ਪਰ ਇਸ ਦੇ ਨਾਲ ਹੀ ਕੁਝ ਅਪਾਹਜ ਵਿਅਕਤੀਆਂ ਦੁਆਰਾ ਵੀ ਖੇਡਾਂ ਖੇਡੀਆਂ ਜਾਂਦੀਆ ਹਨ। ਇਨ੍ਹਾਂ ਖੇਡਾਂ ਨੂੰ ਪੈਰਾ ਉਲੰਪਿਕ ਖੇਡਾਂ ਦਾ ਨਾਂਅ ਦਿੱਤਾ ਗਿਆ ਹੈ। ਇਨ੍ਹਾਂ ਖੇਡਾਂ ਵਿਚ ਭਾਰਤ ਦੇ ਪੈਰਾ ਖਿਡਾਰੀਆਂ ਨੇ ਵੱਖ-ਵੱਖ ਸਮੇਂ ਵਧੀਆ ਪ੍ਰਦਰਸ਼ਨ ਕਰਕੇ ਭਾਰਤ ਦਾ ਨਾਂਅ ਰੌਸ਼ਨ ਕੀਤਾ ਹੈ। ਇਨ੍ਹਾਂ ਵਿਚ ਪ੍ਰਮੁੱਖ ਨਾਂਅ ਦਵਿੰਦਰ ਝੰਜਰੀਆ (ਜੈਵਲਿਨ ਥ੍ਰੋਅ), ਦੀਪਾ ਮਲਿਕ (ਸ਼ਾਟਪੁੱਟ), ਸੰਦੀਪ ਸਿੰਘ ਮਾਨ (200, 400 ਮੀਟਰ ਰੇਸ) ਆਦਿ ਹਨ, ਜਿਨ੍ਹਾਂ ਨੇ ਆਪਣੇ ਪ੍ਰਦਰਸ਼ਨ ਨਾਲ ਸਾਬਤ ਕਰ ਦਿੱਤਾ ਹੈ ਕਿ ਉਹ ਵੀ ਕਿਸੇ ਨਾਲੋਂ ਘੱਟ ਨਹੀਂ ਹਨ। ਇਸ ਤੋਂ ਇਲਾਵਾ ਅਸੀਂ ਅੱਜ ਜਿਸ ਖੇਡ ਦੀ ਗੱਲ ਕਰਨੀ ਹੈ, ਉਹ ਬਾਕੀ ਪੈਰਾ ਉਲੰਪਿਕ ਖੇਡਾਂ ਤੋਂ ਆਪਣੀ ਇਕ ਖਾਸ ਵਿਲੱਖਣਤਾ ਰੱਖਦੀ ਹੈ, ਜਿਸ ਨੂੰ ਉਨ੍ਹਾਂ ਅਪਾਹਜ ਖਿਡਾਰੀਆਂ ਦੁਆਰਾ ਖੇਡਿਆ ਜਾਂਦਾ ਹੈ, ਜੋ ਨਾ ਹੀ ਆਪਣੇ-ਆਪ ਕੁਝ ਖਾ ਸਕਦੇ ਹਨ, ਨਾ ਉੱਠ ਸਕਦੇ ਹਨ, ਨਾ ਹੀ ਆਪਣੇ-ਆਪ ਬੈਠ ਸਕਦੇ ਹਨ, ਨਾ ਹੀ ਕੋਈ ਜ਼ਿਆਦਾ ਭਾਰੀ ਵਸਤੂ ਚੁੱਕਣ ਵਿਚ ਸਮਰੱਥ ਹੁੰਦੇ ਹਨ। ਇਸ ਖੇਡ ਦਾ ਨਾਂਅ ਹੈ 'ਬੋਸ਼ੀਆ'। ਇਹ ਖੇਡ 1984 ਤੋਂ ਪੈਰਾ ਉਲੰਪਿਕ ਖੇਡਾਂ ਵਿਚ ਖੇਡੀ ਜਾਣ ਵਾਲੀ ਅਪੰਗ ਖਿਡਾਰੀਆ ਦੀ ਖੇਡ ਹੈ, ਜੋ ਅੱਜ ਲਗਪਗ 120 ਦੇਸ਼ਾਂ ਵਿਚ ਖੇਡੀ ਜਾਂਦੀ ਹੈ ਅਤੇ ਪਸੰਦ ਕੀਤੀ ਜਾ ਰਹੀ ਹੈ ਪਰ ਭਾਰਤ ਵਿਚ ਇਸ ਖੇਡ ਨੂੰ 2016 ਵਿਚ ਸ਼ੁਰੂ ਕੀਤਾ ਗਿਆ ਹੈ। ਇਸ ਦੀ ਨੈਸ਼ਨਲ ਸਪੋਰਟਸ ਫੈਡਰੇਸ਼ਨ ਦਾ ਨਾਂਅ 'ਪੈਰਾ ਬੋਸ਼ੀਆ ਸਪੋਰਟਸ ਵੈੱਲਫੇਅਰ ਸੁਸਾਇਟੀ ਇੰਡੀਆ' ਹੈ। ਇਸ ਦਾ ਮੁੱਖ ਦਫਤਰ ਜ਼ਿਲ੍ਹਾ ਬਠਿੰਡਾ, ਪੰਜਾਬ ਵਿਖੇ ਸਥਿਤ ਹੈ। ਇਸ ਖੇਡ ਨੂੰ ਭਾਰਤ ਵਿਚ ਲੈ ਕੇ ਆਉਣ ਵਾਲੀ ਸ਼ਖ਼ਸੀਅਤ ਸ: ਜਸਪ੍ਰੀਤ ਸਿੰਘ ਧਾਲੀਵਾਲ ਹਨ, ਜੋ ਇਕ ਨਿੱਕੇ ਜਿਹੇ ਪਿੰਡ ਅਬਲੂ ਜ਼ਿਲ੍ਹਾ ਬਠਿੰਡਾ (ਪੰਜਾਬ) ਦੇ ਰਹਿਣ ਵਾਲੇ ਹਨ। ਇਨ੍ਹਾਂ ਤੋਂ ਇਲਾਵਾ ਸ: ਮਨਜੀਤ ਸਿੰਘ ਰਾਏ ਮੈਂਬਰ 'ਮਨਿਓਰਟੀ ਕਮਿਸ਼ਨ ਆਫ਼ ਇੰਡੀਆ' ਨੇ 'ਬੋਸ਼ੀਆ' ਖੇਡ ਨੂੰ ਭਾਰਤ ਵਿਚ ਲਿਆਉਣ ਅਤੇ ਸਪੋਰਟ ਕਰਨ ਵਿਚ ਮਹੱਤਵਪੂਰਨ ਭੂਮਿਕਾ ਨਿਭਾਈ ਹੈ। ਪਿਛਲੇ ਸੱਤ ਸਾਲਾਂ ਤੋਂ ਜਸਪ੍ਰੀਤ ਸਿੰਘ ਧਾਲੀਵਾਲ ਆਪਣੀ ਛੋਟੀ ਅਜਿਹੀ ਟੀਮ ਸਰਪੰਚ ਸ਼ਮਿੰਦਰ ਸਿੰਘ ਢਿੱਲੋਂ, ਗੁਰਜੀਤ ਸਿੰਘ, ਟੱਫੀ ਬਰਾੜ, ਗੁਰਪ੍ਰੀਤ ਸਿੰਘ, ਜਸਵਿੰਦਰ ਸਿੰਘ ਧਾਲੀਵਾਲ, ਡਾ: ਰਮਨਦੀਪ ਸਿੰਘ, ਗੁਰਪ੍ਰੀਤ ਸਿੰਘ ਧਾਲੀਵਾਲ, ਮਨਪ੍ਰੀਤ ਸਿੰਘ ਸੇਖੋਂ, ਪ੍ਰਮੋਦ ਕੁਮਾਰ ਧੀਰ, ਜਸਵਿੰਦਰ ਢਿੱਲੋਂ, ਗੁਰਵੀਰ ਬਰਾੜ ਆਦਿ ਮੈਂਬਰਾਂ ਦੇ ਸਹਿਯੋਗ ਨਾਲ ਇਸ ਖੇਡ ਨੂੰ ਭਾਰਤ ਵਿਚ ਵਿਕਸਿਤ ਕਰਨ ਲਈ ਭਰਪੂਰ ਯਤਨ ਕਰ ਰਹੇ ਹਨ। ਆਪਣੀ ਮਿਹਨਤ ਅਤੇ ਯਤਨ ਸਦਕਾ ਉਹ ਇਸ ਖੇਡ ਨੂੰ ਭਾਰਤ ਵਿਚ ਲੈ ਕੇ ਆਉਣ ਵਿਚ ਕਾਮਯਾਬ ਹੋਏ ਹਨ। ਇਸ ਦੇ ਪਿਛਕੋੜ ਨੂੰ ਜਾਣਨ ਤੋਂ ਬਾਅਦ ਹੁਣ ਪਤਾ ਕਰਦੇ ਹਾਂ ਕਿ ਇਸ ਨੂੰ ਕਿਵੇਂ ਖੇਡਿਆ ਜਾਂਦਾ ਹੈ? ਕੌਣ-ਕੌਣ ਇਸ ਨੂੰ ਖੇਡ ਸਕਦਾ ਹੈ? ਆਓ ਇਸ ਬਾਰੇ ਵਿਸਥਾਰਪੂਰਵਕ ਜਾਣੀਏ। ਬੋਸ਼ੀਆ ਉਨ੍ਹਾਂ ਅਪਾਹਜ ਵਿਅਕਤੀਆਂ ਦੁਆਰਾ ਖੇਡੀ ਜਾਂਦੀ ਹੈ, ਜੋ ਸੈਰੇਬਿਲ ਪਾਲਸੀ ਨਾਮਕ ਬਿਮਾਰੀ ਤੋਂ ਪੀੜਤ ਹੁੰਦੇ ਹਨ ਜਾਂ ਜਿਨ੍ਹਾਂ ਦਾ ਇੰਜੁਰੀ ਲੈਵਲ ਸੀ-1 ਤੋਂ ਸੀ -5 ਤੱਕ ਹੁੰਦਾ ਹੈ ਇਸ ਨੂੰ ਖੇਡਣ ਲਈ 13 ਗੇਂਦਾਂ ਦੀ ਵਰਤੋਂ ਕੀਤੀ ਜਾਂਦੀ ਹੈ, ਜਿਸ ਵਿਚ 6 ਗੇਂਦਾਂ ਲਾਲ ਰੰਗ ਦੀਆਂ, 3 ਨੀਲੇ ਰੰਗ ਦੀਆਂ ਅਤੇ 1 ਚਿੱਟੇ ਰੰਗ ਦੀ ਹੁੰਦੀ ਹੈ। ਜੋ ਗੇਂਦ ਚਿੱਟੇ ਰੰਗ ਦੀ ਹੁੰਦੀ ਹੈ, ਉਹ ਖੇਡਣ ਸਮੇਂ ਟਾਰਗੇਟ ਬਾਲ ਦਾ ਕੰਮ ਕਰਦੀ ਹੈ।
ਇਸ ਖੇਡ ਨੂੰ ਖੇਡਣ ਦੀ ਵਿਧੀ
ਇਸ ਵਿਚ ਕੁੱਲ 3 ਈਵੈਂਟ ਹਨ-ਸਿੰਗਲ, ਡਬਲ ਅਤੇ ਟੀਮ। ਇਨ੍ਹਾਂ ਵਿਚ ਸਭ ਨੂੰ 6-6 ਗੇਂਦਾਂ ਦਿੱਤੀਆਂ ਜਾਂਦੀਆਂ ਹਨ। ਇਸ ਵਿਚ ਖਿਡਾਰੀਆਂ ਦਾ ਮੁੱਖ ਮੰਤਵ ਖੇਡ ਵਿਚ ਆਪਣੀ ਗੇਂਦ ਨੂੰ ਟਾਰਗੇਟ ਗੇਂਦ ਦੇ ਕੋਲ ਰੋਕਣਾ ਹੁੰਦਾ ਹੈ। ਲਗਾਤਾਰ ਖੇਡਣ ਸਮੇਂ ਰੈਫਰੀ ਦੁਆਰਾ ਸਮੇਂ-ਸਮੇਂ ਉੱਪਰ ਗੇਂਦਾਂ ਦੀ ਆਪਸੀ ਦੂਰੀ ਦੀ ਜਾਂਚ ਕੀਤੀ ਜਾਂਦੀ ਹੈ। ਕਿਸ ਖਿਡਾਰੀ ਦੀ ਗੇਂਦ ਟਾਰਗੇਟ ਬਾਲ (ਗੇਂਦ) ਦੇ ਨੇੜੇ ਹੈ, ਜਿਸ ਖਿਡਾਰੀ ਦੀ ਬਾਲ ਟਾਰਗੇਟ ਬਾਲ ਦੇ ਨੇੜੇ ਹੁੰਦੀ ਹੈ, ਉਸ ਦੇ ਵਿਰੋਧੀ ਨੂੰ ਰੈਫ਼ਰੀ ਦੁਆਰਾ ਆਪਣੀ ਗੇਂਦ ਨਾਲ ਖੇਡਣ ਦਾ ਇਸ਼ਾਰਾ ਕੀਤਾ ਜਾਂਦਾ ਹੈ। ਖੇਡ ਦੇ ਅੰਤ ਵਿਚ ਰੈਫ਼ਰੀ ਸਾਰੀਆਂ ਗੇਂਦਾਂ ਦੀ ਜਾਂਚ ਕਰਦਾ ਹੈ ਅਤੇ ਦੇਖਦਾ ਹੈ ਕਿ ਕਿਹੜੀ ਗੇਂਦ ਟਾਰਗੇਟ ਬਾਲ ਦੇ ਸਭ ਤੋਂ ਜ਼ਿਆਦਾ ਨਜ਼ਦੀਕ ਹੈ। ਉਸ ਦੇ ਆਧਾਰ 'ਤੇ ਖਿਡਾਰੀਆਂ ਨੂੰ ਅੰਕ ਦਿੱਤੇ ਜਾਂਦੇ ਹਨ, ਇਸ ਵਿਚ 4 ਰਾਊਂਡ ਦੀ ਖੇਡ ਖੇਡੀ ਜਾਂਦੀ ਹੈ। ਜਿਸ ਖਿਡਾਰੀ ਦੇ ਅੰਕ ਜ਼ਿਆਦਾ ਹੋਣ, ਉਸ ਨੂੰ ਜੇਤੂ ਕਰਾਰ ਦਿੱਤਾ ਜਾਂਦਾ ਹੈ। ਇਸ ਖੇਡ ਵਿਚ ਵਰਤੀ ਜਾਣ ਵਾਲੀ ਗੇਂਦ ਕੋਈ ਆਮ ਗੇਂਦ ਨਹੀਂ ਹੁੰਦੀ। ਇਹ ਅਲੱਗ-ਅਲੱਗ ਤਰ੍ਹਾਂ ਨਾਲ ਬਣਾਈਆਂ ਜਾਂਦੀਆਂ ਹਨ। ਭਾਰਤ ਵਿਚ ਇਨ੍ਹਾਂ ਨੂੰ ਤਿਆਰ ਨਹੀਂ ਕੀਤਾ ਜਾਂਦਾ। ਇਨ੍ਹਾਂ ਵਿਚ ਗੇਂਦਾਂ ਦੀਆਂ ਵੀ ਅਲੱਗ-ਅਲੱਗ ਕਿਸਮਾਂ ਹਨ। ਇਨ੍ਹਾਂ ਦਾ ਭਾਰ 775 ਗ੍ਰਾਮ ਹੁੰਦਾ ਹੈ। ਖੇਡ ਤੋਂ ਪਹਿਲਾਂ ਖਿਡਾਰੀਆਂ ਨੂੰ ਉਨ੍ਹਾਂ ਦੀਆਂ ਸੱਟਾਂ ਦੇ ਆਧਾਰ 'ਤੇ ਡਾਕਟਰਾਂ ਦੁਆਰਾ ਕਲਾਸੀਫਾਈ ਕੀਤਾ ਜਾਂਦਾ ਹੈ। ਇਨ੍ਹਾਂ ਦੀਆਂ ਵੱਖ-ਵੱਖ ਸ਼੍ਰੇਣੀਆਂ ਹਨ, ਜਿਵੇਂ ਬੀਸੀ-1, ਬੀਸੀ-2, ਬੀਸੀ-3, ਬੀਸੀ-4। ਜਿਸ ਤੋਂ ਬਾਅਦ ਖਿਡਾਰੀਆਂ ਨੂੰ ਆਪਣੀ-ਆਪਣੀ ਸ਼੍ਰੇਣੀ ਵਿਚ ਖੇਡਣ ਦੀ ਆਗਿਆ ਦਿੱਤੀ ਜਾਂਦੀ ਹੈ। (ਚਲਦਾ)


-ਕੰਪਿਊਟਰ ਅਧਿਆਪਕ, ਸ: ਹਾ: ਸਕੂਲ ਢੈਪਈ (ਫਰੀਦਕੋਟ)।
ਈਮੇਲ: pkjaitu@gmail.com


ਖ਼ਬਰ ਸ਼ੇਅਰ ਕਰੋ

ਫ਼ਿਲਮੀ ਸਿਤਾਰੇ ਵੀ ਸਨ ਕਦੇ ਹਾਕੀ ਦੇ ਦੀਵਾਨੇ

ਭੁਵਨੇਸ਼ਵਰ ਵਿਖੇ ਚੱਲ ਰਿਹਾ ਵਿਸ਼ਵ ਕੱਪ ਹਾਕੀ ਟੂਰਨਾਮੈਂਟ ਸਾਨੂੰ ਉਨ੍ਹਾਂ ਦਿਨਾਂ ਦੀ ਯਾਦ ਕਰਵਾਉਂਦਾ ਹੈ, ਜਦੋਂ ਫਿਲਮ ਹਸਤੀਆਂ ਵੀ ਹਾਕੀ ਦੀਆਂ ਦੀਵਾਨੀਆਂ ਸਨ। ਉਹ 1975 ਵਿਸ਼ਵ ਕੱਪ ਹਾਕੀ ਵਾਲਾ ਯਾਦਗਾਰੀ ਦੌਰ ਸੀ। ਅੱਜ ਉਨ੍ਹਾਂ ਪੁਰਾਣੇ ਸੁਨਹਿਰੀ ਦਿਨਾਂ ਦੀ ਯਾਦ ਤਾਜ਼ਾ ਕਰਨ ਨੂੰ ਮਨ ਕਰਦਾ ਹੈ, ਜਦੋਂ ਹਾਕੀ ਦੇ ਜਾਦੂਗਰਾਂ ਨੇ ਪੂਰੇ ਦੇਸ਼ ਨੂੰ ਆਪਣੇ ਜਾਦੂ ਨਾਲ ਮੰਤਰ-ਮੁਗਧ ਕੀਤਾ ਹੋਇਆ ਸੀ। ਭਾਰਤ ਤਾਂ ਕੀ, ਪੂਰੇ ਵਿਸ਼ਵ ਵਿਚ ਭਾਰਤੀ ਹਾਕੀ ਦੀ ਚਰਚਾ ਸੀ। ਹਾਕੀ ਦੇ ਦਿਨਾਂ 'ਚ ਜਾਦੂਗਰਾਂ ਨੇ ਆਪਣੀ ਕਲਾ ਦੇ ਬਲਬੂਤੇ ਫਿਲਮੀ ਅਦਾਕਾਰਾਂ ਨੂੰ ਵੀ ਕਾਫੀ ਪ੍ਰਭਾਵਿਤ ਕੀਤਾ ਹੋਇਆ ਸੀ। ਆਪਣੇ ਵੱਲ ਖਿੱਚਿਆ ਹੋਇਆ ਸੀ। ਉਨ੍ਹਾਂ ਨੂੰ ਬੇਨਤੀ ਕਰਨ ਦੀ ਲੋੜ ਨਹੀਂ।
ਇਹ ਜ਼ਿਕਰਯੋਗ ਹੈ ਕਿ ਭਾਰਤ ਅਤੇ ਵਿਸ਼ਵ ਦੇ ਦੂਜੇ ਦੇਸ਼ਾਂ ਵਿਚ ਫਿਲਮੀ ਸਿਤਾਰੇ ਹਮੇਸ਼ਾ ਖੇਡਾਂ ਦੀ ਦੁਨੀਆ ਨਾਲ ਜੁੜੇ ਰਹੇ ਹਨ ਜਾਂ ਫਿਰ ਚਮਕ-ਦਮਕ ਵਾਲੇ ਦੂਜੇ ਖੇਤਰਾਂ ਨਾਲ। ਬਿਹਤਰੀਨ ਫਿਲਮੀ ਸਿਤਾਰਿਆਂ ਦੀਆਂ ਬਿਹਤਰੀਨ ਫਿਲਮਾਂ ਦੇਖਣ ਲਈ ਜਿਸ ਤਰ੍ਹਾਂ ਹਾਕੀ ਦੇ ਸਿਤਾਰੇ ਭਾਰੀ ਇਕੱਠ ਵਿਚ ਜੁੜਦੇ ਸਨ, ਉਸ ਤਰ੍ਹਾਂ ਇਸ ਲੋਕਪ੍ਰਿਆ ਤੇ ਕੌਮੀ ਖੇਡ ਨੂੰ ਵਧੀਆ-ਵਧੀਆ ਮੈਦਾਨਾਂ ਵਿਚ ਦੇਖਣ ਲਈ ਫਿਲਮੀ ਅਦਾਕਾਰ ਖੇਡ ਦੇ ਮੈਦਾਨਾਂ ਵਿਚ ਪਹੁੰਚਦੇ ਸਨ। ਪਰ ਉਨ੍ਹਾਂ ਲਈ ਮੁਸੀਬਤ ਇਹ ਹੁੰਦੀ ਸੀ ਕਿ ਉਹ ਆਪਣੇ ਚਹੇਤਿਆਂ ਤੋਂ ਲੁਕ-ਲੁਕ ਕੇ ਇਕ ਸਾਈਡ 'ਤੇ ਬੈਠ ਕੇ ਹਾਕੀ ਦੇ ਮੈਦਾਨਾਂ ਵਿਚ ਹਾਕੀ ਸਿਤਾਰਿਆਂ ਦਾ ਖੂਬਸੂਰਤ ਪ੍ਰਦਰਸ਼ਨ ਦੇਖਦੇ ਹੁੰਦੇ ਸਨ। ਮੁੰਬਈ ਵਿਚ ਹੋਣ ਵਾਲੇ 'ਆਗਾ ਖ਼ਾਨ' ਟੂਰਨਾਮੈਂਟ ਵਿਚ ਫਿਲਮੀ ਸਿਤਾਰਿਆਂ ਦੀ ਭੀੜ ਹੁੰਦੀ ਸੀ। ਰਾਜ ਕਪੂਰ, ਪ੍ਰਾਣ, ਸ਼ਸ਼ੀ ਕਪੂਰ, ਰਾਜ ਖੋਸਲਾ, ਓਮ ਪ੍ਰਕਾਸ਼, ਮਨੋਜ ਕੁਮਾਰ, ਧਰਮਿੰਦਰ, ਜਤਿੰਦਰ, ਰਣਜੀਤ, ਵਿਨੋਦ ਖੰਨਾ, ਸਿੰਪਲ ਕਪਾਡੀਆ, ਸ਼ਸ਼ੀ ਕਪੂਰ ਅਤੇ ਦਾਰਾ ਸਿੰਘ ਵਰਗੇ ਕਈ ਫਿਲਮੀ ਸਿਤਾਰੇ ਵਿਸ਼ੇਸ਼ ਕਰਕੇ ਪੰਜਾਬੀ ਫਿਲਮੀ ਅਦਾਕਾਰ ਅਤੇ ਫਿਲਮੀ ਐਕਟਰਸਾਂ ਹਾਕੀ ਦੀਆਂ ਦੀਵਾਨੀਆਂ ਸਨ।
ਤੁਹਾਨੂੰ ਯਾਦ ਰਹੇ ਕਿ 1975 ਵਿਚ ਜਦੋਂ ਭਾਰਤ ਨੇ ਕੁਆਲਾਲੰਪੁਰ ਵਿਖੇ ਪਹਿਲਾ ਵਿਸ਼ਵ ਕੱਪ ਜਿੱਤਿਆ ਤਾਂ ਉਸ ਸਮੇਂ ਭਾਰਤੀ ਹਾਕੀ ਬੁਲੰਦੀ 'ਤੇ ਸੀ। ਕਿਉਂਕਿ ਇਸ ਤੋਂ ਪਹਿਲਾਂ ਭਾਰਤ ਅੱਠ ਵਾਰ ਉਲੰਪਿਕ ਜੇਤੂ ਰਹਿ ਚੁੱਕਾ ਸੀ ਅਤੇ ਇਸ ਸਮੇਂ ਵਿਸ਼ਵ ਕੱਪ ਜੇਤੂ ਬਣ ਕੇ ਇਸ ਖੇਡ ਨੂੰ ਹੋਰ ਵੀ ਲੋਕਪ੍ਰਿਆ ਕਰ ਦਿੱਤਾ। ਇਸ ਲੋਕਪ੍ਰਿਅਤਾ ਕਰਕੇ ਕਈ ਹੋਰ ਫਿਲਮੀ ਸਿਤਾਰੇ ਵੀ ਹਾਕੀ ਦੇ ਨਾਲ ਜੁੜਦੇ ਗਏ। ਉਸ ਸਮੇਂ ਭਾਰਤ ਵਿਚ ਹਾਕੀ ਵਾਲਿਆਂ ਦੀ ਬੜੀ ਤਾਰੀਫ ਹੋਈ ਸੀ ਕਿ ਇਹ ਹਾਕੀ ਦੇ ਸਿਤਾਰੇ ਫਿਲਮੀ ਸਿਤਾਰਿਆਂ ਦੀ ਤਰ੍ਹਾਂ ਛਾ ਗਏ। ਦੱਸਦਾ ਜਾਵਾਂ ਕਿ ਉਨ੍ਹਾਂ ਦਿਨਾਂ ਵਿਚ ਮੁੰਬਈ ਦੇ ਇਕ ਸਟੇਡੀਅਮ ਵਿਚ ਫਿਲਮੀ ਸਿਤਾਰਿਆਂ ਵਲੋਂ ਉਸ ਟੀਮ ਦਾ ਸਨਮਾਨ ਵੀ ਕੀਤਾ ਗਿਆ, ਜੋ ਕਪਤਾਨ ਅਜੀਤਪਾਲ ਦੀ ਕਪਤਾਨੀ ਵਿਚ ਇਹ ਵਿਸ਼ਵ ਕੱਪ ਜਿੱਤੀ ਸੀ। ਦਿਲੀ ਸ਼ਰਧਾ ਤੇ ਦਿਲੀ ਸਤਿਕਾਰ ਨਾਲ ਫਿਲਮੀ ਸਿਤਾਰਿਆਂ ਨੇ ਦੇਸ਼ ਦੀ ਰਾਸ਼ਟਰੀਖੇਡ ਹਾਕੀ ਦੇ ਜੇਤੂ ਸਿਤਾਰਿਆਂ ਨੂੰ ਆਪਣੇ ਵਲੋਂ ਇੱਜ਼ਤ ਦੇਣ ਦਾ ਖੂਬਸੂਰਤ ਉਪਰਾਲਾ ਕੀਤਾ। ਦਿਲਚਸਪ ਗੱਲ ਇਸ ਦੌਰਾਨ ਫਿਲਮੀ ਸਿਤਾਰਿਆਂ ਅਤੇ ਜੇਤੂ ਹਾਕੀ ਸਿਤਾਰਿਆਂ ਦੇ ਦਰਮਿਆਨ ਇਕ ਦੋਸਤਾਨਾ ਮੈਚ ਵੀ ਖੇਡਿਆ ਗਿਆ, ਜਿਸ ਨੂੰ ਦੇਖਣ ਲਈ 40 ਹਜ਼ਾਰ ਦੇ ਕਰੀਬ ਦਰਸ਼ਕਾਂ ਨੇ ਮੈਦਾਨ ਨੂੰ ਸੁਸ਼ੋਭਿਤ ਕੀਤਾ, ਆਪਣੀ ਹਾਜ਼ਰੀ ਨਾਲ।
ਦੂਜੇ ਪਾਸੇ ਹਾਕੀ ਵਾਲੇ ਵੀ ਆਪਣੇ ਦਮ-ਖਮ ਨਾਲ ਦਿਲਾਂ ਦੇ ਬਹੁਤ ਕਰੀਬ ਹੋ ਗਏ ਸਨ। ਇਕ ਪਾਸੇ ਅਜੀਤਪਾਲ ਕਪਤਾਨ ਹਾਕੀ ਸਿਤਾਰਿਆਂ ਵਲੋਂ, ਦੂਜੇ ਪਾਸੇ ਰਾਜ ਕਪੂਰ ਕਪਤਾਨ ਫਿਲਮੀ ਸਿਤਾਰਿਆਂ ਵਲੋਂ, ਦੋਵਾਂ ਦੀ ਕਪਤਾਨੀ ਵਿਚ ਮੈਦਾਨ ਕੁਝ ਅਜੀਬ ਹੀ ਪ੍ਰਕਾਰ ਦਾ ਰੁਮਾਂਚਿਕ ਮਾਹੌਲ ਸੀ। ਕਿਸ ਕਦਰ ਉਸ ਸਮੇਂ ਹਾਕੀ ਦੇ ਮਸ਼ਹੂਰ ਸਿਤਾਰੇ ਗੋਬਿੰਦਾ ਦੀ ਖੇਡ ਸ਼ੈਲੀ ਦੀ ਤਾਰੀਫ ਹੋਈ, ਕਿਸ ਕਦਰ ਲੋਕਾਂ ਨੇ ਅਸਲਮ ਸ਼ੇਰ ਖਾਨ, ਹਰਚਰਨ ਸਿੰਘ, ਅਸ਼ੋਕ ਦੀਵਾਨ, ਸੁਰਜੀਤ ਸਿੰਘ, ਵਰਿੰਦਰ ਸਿੰਘ, ਉਂਕਾਰ ਸਿੰਘ, ਮਹਿੰਦਰ ਸਿੰਘ, ਐਚ. ਚਿਮਨੀ ਲਈ ਤਾੜੀਆਂ ਵਜਾਈਆਂ। ਕਿਸ ਕਦਰ ਐਮ. ਕਿੰਡੋ ਵੀ. ਜੇ. ਫਿਲਿਪਸ, ਐਚ.ਆਰ.ਪਵਾਰ, ਅਸ਼ੋਕ ਕੁਮਾਰ ਆਦਿ ਹਾਕੀ ਸਿਤਾਰਿਆਂ ਨੂੰ ਲੋਕਾਂ ਉੱਠ-ਉੱਠ ਕੇ ਚੀਕ-ਚੀਕ ਕੇ ਦਾਦ ਦਿੱਤੀ, ਉਨ੍ਹਾਂ ਨੂੰ ਯਾਦ ਕਰਕੇ ਅੱਜ ਵੀ ਹਾਕੀ ਪ੍ਰੇਮੀ ਆਹ ਭਰਦੇ ਹਨ। ਇਹ ਰੁਮਾਂਚਕਾਰੀ ਪ੍ਰਦਰਸ਼ਨ ਇਸ ਗੱਲ ਦਾ ਸਬੂਤ ਹੈ ਕਿ ਉਸ ਸਮੇਂ ਕਿਸ ਤਰ੍ਹਾਂ ਲੋਕ ਆਪਣੇ ਦੇਸ਼ ਦੀ ਰਾਸ਼ਟਰੀ ਖੇਡ ਹਾਕੀ ਨੂੰ ਪਿਆਰਦੇ ਸਨ।


-ਡੀ. ਏ. ਵੀ. ਕਾਲਜ, ਅੰਮ੍ਰਿਤਸਰ। ਮੋਬਾ: 98155-35410

ਕ੍ਰਿਕਟ ਮੈਦਾਨ 'ਤੇ ਹੋਇਆ ਮਿਥਾਲੀ ਰਾਜ...

ਅੱਜ ਸਾਡੇ ਦੇਸ਼ ਦੀਆਂ ਧੀਆਂ ਜਿਸ ਤੇਜ਼ੀ ਨਾਲ ਹਰ ਖੇਤਰ ਵਿਚ ਅੱਗੇ ਵਧ ਰਹੀਆਂ ਹਨ, ਉਹ ਆਪਣੇ-ਆਪ ਵਿਚ ਇਕ ਵਿਲੱਖਣ ਉਦਾਹਰਨ ਹੈ। ਖੇਡਾਂ ਦੇ ਖੇਤਰ ਵਿਚ ਵੀ ਇਨ੍ਹਾਂ ਨੇ ਮੈਡਲ ਸੂਚੀ ਵਿਚ ਪੁਰਸ਼ਾਂ ਨੂੰ ਪਿੱਛੇ ਛੱਡਣਾ ਸ਼ੁਰੂ ਕਰ ਦਿੱਤਾ ਹੈ। ਆਓ ਅੱਜ ਦੇਸ਼ ਦੀ ਉਸ ਧੀ ਬਾਰੇ ਗੱਲ ਕਰਦੇ ਹਾਂ, ਜਿਸ ਨੇ ਨਾ ਸਿਰਫ ਇਕ ਵਿਸ਼ੇਸ਼ ਮਾਅਰਕਾ ਮਾਰਿਆ ਹੈ, ਬਲਕਿ ਆਪਣੇ-ਆਪ ਨੂੰ ਉਸ ਸਥਾਨ 'ਤੇ ਲਿਆ ਖੜ੍ਹਾ ਕੀਤਾ ਹੈ, ਜਿੱਥੇ ਅਜੇ ਤੱਕ ਕੋਈ ਪੁਰਸ਼ ਖਿਡਾਰੀ ਵੀ ਨਹੀਂ ਪਹੁੰਚ ਪਾਇਆ ਹੈ...। ਜੀ ਹਾਂ, ਅਸੀਂ ਗੱਲ ਕਰ ਰਹੇ ਹਾਂ ਖੇਡ ਜਗਤ ਦੀਆਂ ਸੁਰਖੀਆਂ ਦਾ ਵਿਸ਼ਾ ਬਣੀ ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਦੀ ਖਿਡਾਰਨ ਮਿਥਾਲੀ ਰਾਜ ਦੀ, ਜਿਸ ਨੇ ਆਪਣੇ ਨਾਂਅ ਦੇ ਮੁਤਾਬਿਕ ਕ੍ਰਿਕਟ ਮੈਦਾਨ 'ਤੇ ਆਪਣਾ ਰਾਜ ਕਾਇਮ ਕਰ ਲਿਆ ਹੈ। ਮਿਥਾਲੀ ਦੀਆਂ ਹੋਰ ਵਿਸ਼ਵ ਪੱਧਰੀ ਪ੍ਰਾਪਤੀਆਂ ਦਾ ਜ਼ਿਕਰ ਕਰਨ ਤੋਂ ਪਹਿਲਾਂ ਦੱਸ ਦੇਈਏ ਕਿ ਕਿਵੇਂ ਉਸ ਨੇ ਆਪਣੇ ਨਾਂਅ ਦਾ ਝੰਡਾ ਵਿਸ਼ਵ ਕ੍ਰਿਕਟ ਮੈਦਾਨ 'ਤੇ ਗੱਡਿਆ ਹੈ। ਵੈਸਟ ਇੰਡੀਜ਼ ਵਿਚ ਚੱਲ ਰਹੇ ਟੀ-20 ਕ੍ਰਿਕਟ ਵਿਸ਼ਵ ਕੱਪ ਵਿਚ ਮਿਥਾਲੀ ਨੇ ਆਪਣੇ ਸ਼ਾਨਦਾਰ ਪ੍ਰਦਰਸ਼ਨ ਨਾਲ ਸਭ ਤੋਂ ਵੱਧ ਅੰਤਰਰਾਸ਼ਟਰੀ ਟੀ-20 ਮੈਚ ਦੌੜਾਂ (ਪੁਰਸ਼ ਅਤੇ ਮਹਿਲਾਵਾਂ ਦੋਵਾਂ ਵਿਚ) ਬਣਾਉਣ ਦਾ ਕਾਰਨਾਮਾ ਕਰ ਦਿਖਾਇਆ ਹੈ।
ਮਿਥਾਲੀ ਨੇ ਹੁਣ ਤੱਕ ਆਪਣੇ ਅੰਤਰਰਾਸ਼ਟਰੀ ਟੀ-20 ਕੈਰੀਅਰ ਦੇ 85 ਮੈਚਾਂ ਵਿਚ 37.42 ਦੀ ਔਸਤ ਨਾਲ ਕੁੱਲ 2283 ਦੌੜਾਂ ਬਣਾ ਕੇ ਸਭ ਤੋਂ ਵੱਧ ਟੀ-20 ਦੌੜਾਂ ਬਣਾਉਣ ਵਾਲੇ ਭਾਰਤੀ ਖਿਡਾਰੀ ਰੋਹਿਤ ਸ਼ਰਮਾ ਨੂੰ ਵੀ ਪਿੱਛੇ ਛੱਡ ਦਿੱਤਾ ਹੈ ਅਤੇ ਸਭ ਤੋਂ ਵੱਧ ਟੀ-20 ਦੌੜਾਂ ਬਣਾਉਣ ਵਾਲੀ ਭਾਰਤੀ ਖਿਡਾਰੀ ਬਣ ਗਈ ਹੈ। ਦੂਸਰੇ ਨੰਬਰ 'ਤੇ ਇਸ ਸਮੇਂ ਰੋਹਿਤ ਸ਼ਰਮਾ ਹੈ, ਜਿਸ ਨੇ ਕਿ 87 ਮੈਚਾਂ ਵਿਚ 33.43 ਦੀ ਔਸਤ ਨਾਲ 2207 ਦੌੜਾਂ ਅਜੇ ਤੱਕ ਬਣਾਈਆਂ ਹਨ ਅਤੇ ਤੀਸਰੇ ਨੰਬਰ 'ਤੇ 2012 ਦੌੜਾਂ ਨਾਲ ਭਾਰਤੀ ਕਪਤਾਨ ਵਿਰਾਟ ਕੋਹਲੀ ਹੈ। ਇਹ ਇਤਿਹਾਸ ਰਚ ਕੇ ਇਸ ਭਾਰਤੀ ਸ਼ੇਰਨੀ ਨੇ ਇਹ ਸਾਬਤ ਕਰ ਦਿੱਤਾ ਹੈ ਕਿ ਔਰਤਾਂ ਨੂੰ ਚੁੱਲ੍ਹੇ-ਚੌਕੇ ਤੱਕ ਸੀਮਿਤ ਰੱਖਣ ਦੀਆਂ ਗੱਲਾਂ ਹੁਣ ਪੁਰਾਣੀਆਂ ਹੋ ਚੁੱਕੀਆਂ ਹਨ। ਆਓ ਨਜ਼ਰ ਮਾਰੀਏ ਇਸ ਇਤਿਹਾਸ ਰਚੇਤਾ ਦੇ ਖੇਡ ਕੈਰੀਅਰ 'ਤੇ।
3 ਦਸੰਬਰ, 1982 ਨੂੰ ਪਿਤਾ ਦੌਰਾਈ ਰਾਜ ਅਤੇ ਮਾਤਾ ਲੀਲਾ ਰਾਜ ਦੇ ਘਰ ਮਿਥਾਲੀ ਦਾ ਜਨਮ ਰਾਜਸਥਾਨ ਦੇ ਜੋਧਪੁਰ ਸ਼ਹਿਰ ਵਿਚ ਹੋਇਆ। ਇਸ ਦੇ ਪਿਤਾ ਜੀ ਭਾਰਤੀ ਹਵਾਈ ਸੈਨਾ ਵਿਚ ਕੰਮ ਕਰਦੇ ਸਨ। 10 ਸਾਲ ਦੀ ਉਮਰ ਵਿਚ ਕ੍ਰਿਕਟ ਦਾ ਬੱਲਾ ਫੜਨ ਵਾਲੀ ਮਿਥਾਲੀ ਸੱਜੇ ਹੱਥ ਦੀ ਬੱਲੇਬਾਜ਼ ਹੈ ਅਤੇ 17 ਸਾਲ ਦੀ ਉਮਰ ਵਿਚ ਭਾਰਤੀ ਮਹਿਲਾ ਟੀਮ ਲਈ ਚੁਣੀ ਗਈ ਸੀ ਅਤੇ 1999 ਵਿਚ ਆਪਣੇ ਪਹਿਲੇ ਹੀ ਅੰਤਰਰਾਸ਼ਟਰੀ ਇਕ-ਦਿਨਾ ਮੈਚ ਵਿਚ ਉਸ ਨੇ ਨਾਬਾਦ 114 ਦੌੜਾਂ ਬਣਾਈਆਂ ਸਨ। ਮਿਥਾਲੀ ਨੇ ਆਪਣੀ ਕਪਤਾਨੀ ਵਿਚ ਭਾਰਤ ਨੂੰ 2005 ਦੇ ਵਿਸ਼ਵ ਕੱਪ ਫਾਈਨਲ ਤੱਕ ਪਹੁੰਚਾਇਆ ਅਤੇ 2017 ਦੇ ਵਿਸ਼ਵ ਕੱਪ ਫਾਈਨਲ ਤੱਕ ਦਾ ਸਫਰ ਵੀ ਮਿਥਾਲੀ ਰਾਜ ਦੀ ਕਪਤਾਨੀ ਹੇਠ ਹੀ ਭਾਰਤ ਨੇ ਤੈਅ ਕੀਤਾ। ਇਸ ਸਮੇਂ ਭਾਰਤ ਦੀ ਇਕ-ਦਿਨਾ ਅਤੇ ਟੈਸਟ ਮੈਚ ਦੀ ਕਪਤਾਨੀ ਕਰ ਰਹੀ ਮਿਥਾਲੀ ਦੁਨੀਆ ਦੀ ਇਕਲੌਤੀ ਇਹੋ ਜਿਹੀ ਖਿਡਾਰਨ ਹੈ, ਜਿਸ ਦੇ ਨਾਂਅ 6,000 ਅੰਤਰਰਾਸ਼ਟਰੀ ਇਕ-ਦਿਨਾ ਮੈਚਾਂ ਦੀਆਂ ਦੌੜਾਂ ਹਨ ਅਤੇ ਹੁਣ ਸਭ ਤੋਂ ਵੱਧ ਟੀ-20 ਅੰਤਰਰਾਸ਼ਟਰੀ ਦੌੜਾਂ ਬਣਾਉਣ ਵਾਲੀ ਵੀ ਭਾਰਤੀ ਖਿਡਾਰੀ ਬਣ ਚੁੱਕੀ ਮਿਥਾਲੀ ਕਰੋੜਾਂ ਭਾਰਤੀ ਕੁੜੀਆਂ ਲਈ ਇਕ ਮਿਸਾਲ ਬਣ ਗਈ ਹੈ, ਜਿਸ ਤੋਂ ਪ੍ਰੇਰਣਾ ਲੈ ਕੇ ਹੋਰ ਕੁੜੀਆਂ ਵੀ ਭਾਰਤ ਦਾ ਨਾਂਅ ਰੌਸ਼ਨ ਕਰਨ ਲਈ ਅੱਗੇ ਆਉਣਗੀਆਂ। ਇਸ ਤੋਂ ਇਲਾਵਾ ਮਿਥਾਲੀ ਨੇ 17 ਅਗਸਤ, 2002 ਨੂੰ ਇੰਗਲੈਂਡ ਖਿਲਾਫ ਆਪਣੇ ਤੀਸਰੇ ਹੀ ਟੈਸਟ ਮੈਚ ਵਿਚ ਕੈਰੇਨ ਰੋਲਟਨ ਦਾ 209 ਸਕੋਰਾਂ ਦਾ ਰਿਕਾਰਡ ਤੋੜ ਕੇ 214 ਸਕੋਰ ਬਣਾਏ ਸਨ। 2017 ਮਿਥਾਲੀ ਨੂੰ ਆਈ.ਸੀ.ਸੀ. ਦੀ ਇਕ-ਦਿਨਾ ਟੀਮ ਲਈ ਵੀ ਨਾਮਾਂਕਿਤ ਕੀਤਾ ਗਿਆ ਸੀ। ਬੱਲੇਬਾਜ਼ੀ ਤੋਂ ਇਲਾਵਾ ਮਿਥਾਲੀ ਭਾਰਤ ਲਈ ਪਾਰਟ ਟਾਈਮ ਗੇਂਦਬਾਜ਼ੀ ਵੀ ਕਰਦੀ ਹੈ। 2005 ਵਿਚ ਮਿਥਾਲੀ ਨੂੰ ਅਰਜਨ ਐਵਾਰਡ ਅਤੇ 2015 ਵਿਚ ਪਦਮ ਸ੍ਰੀ ਐਵਾਰਡ ਨਾਲ ਸਨਮਾਨਿਤ ਕੀਤਾ ਜਾ ਚੁੱਕਾ ਹੈ।


-ਮੋਬਾ: 94174-79449

21ਵਾਰ ਵਿਸ਼ਵ ਚੈਂਪੀਅਨ

ਪੰਕਜ ਅਡਵਾਨੀ ਦਾ ਨਵਾਂ ਖੇਡ ਕੀਰਤੀਮਾਨ

ਭਾਰਤ ਅੰਦਰ ਅਕਸਰ ਇਹ ਸਮੱਸਿਆ ਰਹੀ ਹੈ ਕਿ ਕ੍ਰਿਕਟ ਤੋਂ ਛੁੱਟ ਬਾਕੀ ਖੇਡਾਂ ਦੇ ਖਿਡਾਰੀਆਂ ਨੂੰ, ਚਾਹੇ ਉਹ ਜਿੰਨਾ ਮਰਜ਼ੀ ਵਧੀਆ ਪ੍ਰਦਰਸ਼ਨ ਕਰੀ ਜਾਣ, ਉਹ ਮਾਣ-ਸਨਮਾਨ ਨਹੀਂ ਮਿਲਦਾ, ਜਿਸ ਦੇ ਉਹ ਹੱਕਦਾਰ ਹੁੰਦੇ ਹਨ, ਪਰ ਭਾਰਤ ਦੇ ਪੰਕਜ ਅਡਵਾਨੀ ਨੇ ਪਹਿਲਾਂ ਵੀ ਇਸ ਪ੍ਰਥਾ ਨੂੰ ਤੋੜਿਆ ਹੈ ਅਤੇ ਹੁਣ ਵੀ ਇਸ ਪਾਸੇ ਇਕ ਨਵਾਂ ਮਾਅਰਕਾ ਮਾਰਿਆ ਹੈ। ਬੀਤੇ ਦਿਨੀਂ ਭਾਰਤ ਦੇ ਪੰਕਜ ਅਡਵਾਨੀ ਨੇ ਆਈ. ਬੀ. ਐੱਸ. ਐੱਫ. ਵਿਸ਼ਵ ਬਿਲੀਅਰਡਜ਼ ਚੈਂਪੀਅਨਸ਼ਿਪ ਦੇ ਲੰਬੇ ਤੇ ਛੋਟੇ ਦੋਵੇਂ ਸਰੂਪਾਂ ਦੇ ਖਿਤਾਬ ਨੂੰ ਰਿਕਾਰਡ ਚੌਥੀ ਵਾਰ ਆਪਣੇ ਨਾਂਅ ਕੀਤਾ। ਕਰਨਾਟਕ ਸੂਬੇ ਦੇ ਸ਼ਹਿਰ ਬੈਂਗਲੁਰੂ ਦੇ 33 ਸਾਲਾ ਅਡਵਾਨੀ ਲਈ ਇਹ ਕੁੱਲ 21ਵਾਂ ਵਿਸ਼ਵ ਖਿਤਾਬ ਹੈ, ਜੋ ਕਿ ਆਪਣੇ-ਆਪ ਵਿਚ ਇਕ ਹੋਰ ਵੱਡਾ ਵਿਸ਼ਵ ਰਿਕਾਰਡ ਹੈ। ਅਡਵਾਨੀ ਨੇ ਫਾਈਨਲ ਵਿਚ ਦੋ ਵਾਰ ਦੇ ਏਸ਼ਿਆਈ ਚਾਂਦੀ ਤਗਮਾ ਜੇਤੂ ਭਾਰਤ ਦੇ ਹੀ ਬੀ. ਭਾਸਕਰ ਨੂੰ 1500 ਅੰਕ ਪਹਿਲਾਂ ਪੂਰੇ ਕਰਨ ਦੇ ਮੁਕਾਬਲੇ ਵਿਚ ਹਰਾਇਆ ਅਤੇ ਖਿਤਾਬ ਜਿੱਤਿਆ। ਉਸ ਦੀ ਖਿਤਾਬੀ ਜਿੱਤ ਦਾ ਇਕ ਪਹਿਲੂ ਇਹ ਵੀ ਸੀ ਕਿ ਪੰਕਜ ਅਡਵਾਨੀ ਨੇ ਭਾਸਕਰ ਉੱਤੇ ਵੱਡੀ ਬੜ੍ਹਤ ਕਾਇਮ ਕਰ ਲਈ ਸੀ ਅਤੇ ਉਹ ਜਦੋਂ 1000 ਅੰਕਾਂ ਤੱਕ ਪਹੁੰਚਿਆ, ਉਸ ਸਮੇਂ ਭਾਸਕਰ ਦੇ ਸਿਰਫ 206 ਅੰਕ ਸਨ। ਅਡਵਾਨੀ ਦੁਨੀਆ ਦਾ ਇਕਲੌਤਾ ਖਿਡਾਰੀ ਹੈ, ਜਿਹੜਾ ਵਿਸ਼ਵ ਪੱਧਰ ਉੱਤੇ ਬਿਲੀਅਰਡਜ਼ ਤੇ ਸਨੂਕਰ ਖੇਡਦਾ ਹੈ ਅਤੇ ਨਿਰੰਤਰ ਜਿੱਤ ਹਾਸਲ ਕਰਦਾ ਹੈ। ਇਹੀ ਬਸ ਨਹੀਂ, ਪੰਕਜ ਅਡਵਾਨੀ ਸਿਰਫ ਇਸ ਸਾਲ ਅੰਦਰ ਹੀ ਤਿੰਨ ਵਿਸ਼ਵ ਖਿਤਾਬ ਜਿੱਤ ਚੁੱਕਾ ਹੈ। ਰਿਕਾਰਡ 21 ਵਾਰ ਦੇ ਵਿਸ਼ਵ ਚੈਂਪੀਅਨ ਪੰਕਜ ਅਡਵਾਨੀ ਨੇ ਆਉਣ ਵਾਲੀ ਵਿਸ਼ਵ ਚੈਂਪੀਅਨਸ਼ਿਪ ਲਈ ਆਪਣੀ ਦਾਅਵੇਦਾਰੀ ਮਜ਼ਬੂਤ ਕਰਦੇ ਹੋਏ ਚੀਨ ਦੇ ਜਿਨਾਨ ਵਿਚ ਏਸ਼ੀਆ ਸਨੂਕਰ ਟੂਰ ਦੇ ਦੂਸਰੇ ਪੜਾਅ ਦਾ ਖਿਤਾਬ ਜਿੱਤਿਆ ਹੋਇਆ ਹੈ। ਉਹ ਏਸ਼ਿਆਈ ਸਨੂਕਰ ਟੂਰ ਪ੍ਰਤੀਯੋਗਿਤਾ ਜਿੱਤਣ ਵਾਲਾ ਇਕਲੌਤਾ ਭਾਰਤੀ ਖਿਡਾਰੀ ਵੀ ਹੈ।
ਪੰਕਜ ਅਡਵਾਨੀ ਦੇ ਲਈ ਇਹੋ ਜਿਹੀ ਵੱਡੀ ਜਿੱਤ ਪਹਿਲੀ ਵਾਰ ਨਹੀਂ ਆਈ, ਬਲਕਿ ਉਸ ਨੇ ਹਮੇਸ਼ਾ ਵਧੀਆ ਪ੍ਰਦਰਸ਼ਨ ਕੀਤਾ ਹੈ। ਉਸ ਨੇ ਸਾਲ 2005 ਵਿਚ ਆਪਣਾ ਪਹਿਲਾ ਵਿਸ਼ਵ ਬਿਲਿਅਰਡਜ਼ ਖ਼ਿਤਾਬ ਜਿੱਤਿਆ ਸੀ। ਇਸੇ ਸਾਲ ਉਸ ਨੇ ਆਈ.ਬੀ.ਐਸ.ਐਫ. ਵਿਸ਼ਵ ਬਿਲੀਅਰਡਜ਼ ਚੈਂਪੀਅਨਸ਼ਿਪ ਵਿਚ ਸਮੇਂ ਅਤੇ ਅੰਕ ਦੇ ਵਰਗਾਂ ਦੇ ਦੋਵੇਂ ਖ਼ਿਤਾਬ ਜਿੱਤੇ ਸਨ ਅਤੇ ਇਹ ਪ੍ਰਾਪਤੀ ਹਾਸਲ ਕਰਨ ਵਾਲਾ ਉਹ ਦੁਨੀਆ ਦਾ ਪਹਿਲਾ ਖਿਡਾਰੀ ਬਣ ਗਿਆ ਸੀ। ਇਹੀ ਬਸ ਨਹੀਂ, ਉਸ ਨੇ ਇਹੀ ਵਿਲੱਖਣ ਕਾਰਨਾਮਾ ਸਾਲ 2008 ਵਿਚ ਵੀ ਦੁਹਰਾਇਆ ਸੀ। ਅਡਵਾਨੀ ਨੇ ਸੰਨ 2007 ਵਿਚ ਆਈ.ਬੀ.ਐਸ.ਐਫ. ਵਿਸ਼ਵ ਬਿਲੀਅਰਡਜ਼ ਚੈਂਪੀਅਨਸ਼ਿਪ (ਸਮਾਂ ਵਰਗ) ਅਤੇ 2009 ਵਿਚ ਵਿਸ਼ਵ ਪੇਸ਼ੇਵਰ ਬਿਲੀਅਰਡਜ਼ ਖ਼ਿਤਾਬ ਵੀ ਜਿੱਤਿਆ ਸੀ। ਦਰਅਸਲ, ਇਸ ਖੇਡ ਦੇ ਦੋ ਹਿੱਸੇ ਹੁੰਦੇ ਹਨ, ਪਹਿਲਾ ਬਿਲੀਅਰਡਜ਼ ਅਤੇ ਦੂਜਾ ਸਨੂਕਰ। ਬਹੁਤ ਥੋੜ੍ਹੇ ਖਿਡਾਰੀ ਹਨ, ਜੋ ਦੋਵੇਂ ਹਿੱਸਿਆਂ ਨੂੰ ਹੱਥ ਪਾਉਂਦੇ ਹਨ। ਅਡਵਾਨੀ ਨੇ ਸ਼ੁਰੂ ਤੋਂ ਹੀ ਕੌਮਾਂਤਰੀ ਪੱਧਰ ਉੱਤੇ ਬਿਲੀਅਰਡਜ਼ ਅਤੇ ਸਨੂਕਰ, ਦੋਵੇਂ ਖੇਡਣ ਦਾ ਮੁਸ਼ਕਿਲ ਫੈਸਲਾ ਕੀਤਾ ਸੀ ਅਤੇ ਦੋਵਾਂ ਵਰਗਾਂ ਵਿਚ ਉਹ ਬਿਹਤਰੀਨ ਫਾਰਮ ਬਰਕਰਾਰ ਰੱਖਣ ਵਿਚ ਸਫਲ ਰਿਹਾ ਸੀ। ਇਹ ਵੀ ਉਸ ਦੀ ਇਕ ਵੱਡੀ ਪ੍ਰਾਪਤੀ ਹੀ ਕਹੀ ਜਾਵੇਗੀ।


-ਪਿੰਡ ਢਿੱਲਵਾਂ, ਡਾਕ: ਦਕੋਹਾ, ਜ਼ਿਲ੍ਹਾ ਜਲੰਧਰ-144023
E-mail : sudeepsdhillon@ymail.com

ਕੌਮਾਂਤਰੀ ਨਿਸ਼ਾਨੇਬਾਜ਼ ਹੈ ਵੀਲ੍ਹਚੇਅਰ ਖਿਡਾਰਨ ਮਿਤਾਲੀ ਗਾਇਕਵਾਡ

'ਲੋ ਮੈਂ ਫਿਰ ਆ ਰਹੀ ਹੂੰ ਹਵਾਓਂ ਕਾ ਰੁਖ਼ ਬਦਲਨੇ, ਜੋ ਕਹਤੇ ਥੇ ਹਮਸੇ ਨਾ ਹੋਗਾ, ਤੁਮਨੇ ਕਹਿ ਦਿਆ ਹਮਨੇ ਕਰ ਵਿਖਾਇਆ।' ਜੀ ਹਾਂ, ਮੈਂ ਗੱਲ ਕਰ ਰਿਹਾ ਹਾਂ ਮਹਾਰਾਸ਼ਟਰ ਰਾਜ ਦੀ ਮਾਣਮੱਤੀ ਧੀ ਮਿਤਾਲੀ ਗਾਇਕਵਾਡ ਦੀ, ਜਿਸ ਨੇ ਉਹ ਕਰ ਵਿਖਾਇਆ, ਜੋ ਕਹਿੰਦੇ ਸੀ ਮਿਤਾਲੀ ਤੂੰ ਇਹ ਨਹੀਂ ਕਰ ਸਕੇਂਗੀ ਕਿਉਂਕਿ ਤੂੰ ਵੀਲ੍ਹਚੇਅਰ 'ਤੇ ਹੈਂ ਪਰ ਜਿਨ੍ਹਾਂ ਦੇ ਹੌਸਲੇ ਬੁਲੰਦ ਅਤੇ ਇਰਾਦੇ ਮਜ਼ਬੂਤ ਹੋਣ, ਉਹ ਕਰਕੇ ਹੀ ਦਮ ਲੈਂਦੇ ਹਨ ਅਤੇ ਮਿਤਾਲੀ ਗਾਇਕਵਾਡ ਵੀ ਉਨ੍ਹਾਂ 'ਚੋਂ ਇਕ ਹੈ, ਜਿਸ ਨੇ ਵੀਲ੍ਹਚੇਅਰ 'ਤੇ ਹੁੰਦਿਆਂ ਹੋਇਆਂ ਵੀ ਨਿਸ਼ਾਨੇਬਾਜ਼ੀ ਵਿਚ ਬੁਲੰਦੀਆਂ ਛੂਹੀਆਂ ਹਨ। ਮਿਤਾਲੀ ਗਾਇਕਵਾਡ ਦਾ ਜਨਮ ਮਹਾਰਾਸ਼ਟਰ ਦੀ ਧਰਤੀ ਦੇ ਸ਼ਹਿਰ ਨਾਸਿਕ ਵਿਚ ਪਿਤਾ ਸ੍ਰੀਕਾਂਤ ਗਾਇਕਵਾਡ ਦੇ ਘਰ ਮਾਤਾ ਸੰਗੀਤਾ ਗਾਇਕਵਾਡ ਦੀ ਕੁੱਖੋਂ 29 ਅਕਤੂਬਰ, 1994 ਨੂੰ ਹੋਇਆ। ਮਿਤਾਲੀ ਗਾਇਕਵਾਡ ਨੂੰ ਜਿੱਥੇ ਖੇਡਾਂ ਦਾ ਸ਼ੌਕ ਸੀ, ਉਥੇ ਉਸ ਨੂੰ ਆਪਣੀਆਂ ਸਹੇਲੀਆਂ, ਸਹਿਪਾਠੀਆਂ ਦੇ ਨਾਲ ਪਾਰਟੀਆਂ ਕਰਨੀਆਂ, ਨੱਚਣ-ਟੱਪਣ ਦਾ ਵੀ ਸ਼ੌਕ ਸੀ ਅਤੇ ਉਹ ਹਮੇਸ਼ਾ ਖੁਸ਼ ਤਬੀਅਤ ਦੀ ਮਾਲਕ ਸੀ।
ਥੋੜ੍ਹਾ ਵਕਤ ਬੀਤਿਆ ਤਾਂ ਸਮੇਂ ਨੇ ਕਰਵਟ ਬਦਲੀ ਮਿਤਾਲੀ ਦੀ ਰੀੜ੍ਹ ਦੀ ਹੱਡੀ ਕੋਲ ਇਕ ਖੂਨ ਦੇ ਗੁੱਛੇ ਦੀ ਗੰਢ ਬਣ ਗਈ ਅਤੇ ਉਸ ਦੇ ਇਲਾਜ ਲਈ ਉਸ ਨੂੰ ਡਾਕਟਰ ਕੋਲ ਲਿਜਾਇਆ ਗਿਆ, ਜਿਥੇ ਉਸ ਦਾ ਆਪ੍ਰੇਸ਼ਨ ਹੋਇਆ ਅਤੇ ਜਦ ਆਪ੍ਰੇਸ਼ਨ ਹੋਣ ਤੋਂ ਬਾਅਦ ਮਿਤਾਲੀ ਨੇ ਤੁਰਨ ਲਈ ਅਗਾਂਹ ਕਦਮ ਪੁੱਟਿਆ ਤਾਂ ਉਸ ਨੂੰ ਅਹਿਸਾਸ ਹੋਇਆ ਕਿ ਉਹ ਚੱਲ ਨਹੀਂ ਸਕੇਗੀ। ਇਸ ਵਾਪਰੀ ਘਟਨਾ ਨਾਲ ਜਿਥੇ ਮਾਂ-ਬਾਪ ਡੂੰਘੇ ਸਦਮੇ ਵਿਚ ਚਲੇ ਗਏ, ਉਥੇ ਮਿਤਾਲੀ ਦੇ ਸਜਾਏ ਸੁਪਨੇ ਵੀ ਚੂਰ-ਚੂਰ ਹੋ ਗਏ ਅਤੇ ਉਹ ਸੋਚਣ ਲੱਗੀ ਕਿ ਆਖਰ ਹੋ ਕੀ ਗਿਆ? ਕੱਲ੍ਹ ਜਿਹੜੀ ਮਿਤਾਲੀ ਆਪਣੀਆਂ ਦੋਸਤਾਂ ਵਿਚ ਹਠਖੇਲੀਆਂ ਕਰਦੀ ਹਾਸਾ-ਠੱਠਾ ਕਰਦੀ ਨਹੀਂ ਸੀ ਥੱਕਦੀ, ਅੱਜ ਉਹੀ ਮਿਤਾਲੀ ਇਕਦਮ ਖਾਮੋਸ਼ ਹੋ ਗਈ। ਇਸ ਸਦਮੇ 'ਚੋਂ ਮਿਤਾਲੀ ਨੂੰ ਬਾਹਰ ਕੱਢਣ ਲਈ ਮਾਂ-ਬਾਪ ਨੇ ਉਸ ਨੂੰ ਹੌਸਲਾ ਦਿੱਤਾ ਅਤੇ ਮਿਤਾਲੀ ਸੋਚਣ ਲੱਗੀ ਸ਼ਾਇਦ ਇਹ ਵੀਲ੍ਹਚੇਅਰ ਹੀ ਹੁਣ ਉਸ ਦੀ ਜ਼ਿੰਦਗੀ ਦੀ ਅਸਲ ਦੋਸਤ ਹੋਵੇਗੀ ਅਤੇ ਉਸ ਨੇ ਲੰਮਾ ਸਾਹ ਲਿਆ ਅਤੇ ਵੀਲ੍ਹਚੇਅਰ ਦੌੜਾਉਣ ਲੱਗੀ ਅਤੇ ਐਸੀ ਵੀਲ੍ਹਚੇਅਰ ਦੌੜਾਈ ਕਿ ਅੱਜ ਤੱਕ ਰੁਕੀ ਨਹੀਂ ਅਤੇ ਹੁਣ ਉਹ ਮਹਾਰਾਸ਼ਟਰ ਦਾ ਮਾਣ ਨਹੀਂ, ਸਗੋਂ ਪੂਰੇ ਭਾਰਤ ਦਾ ਮਾਣ ਹੈ। ਮਿਤਾਲੀ ਨੇ ਵੀਲ੍ਹਚੇਅਰ ਨਾਲ ਦੋਸਤੀ ਕਰ ਲਈ ਅਤੇ ਹੁਣ ਉਹ ਵੀਲ੍ਹਚੇਅਰ 'ਤੇ ਹੀ ਆਪਣੇ-ਆਪ ਨੂੰ ਸਾਬਤ ਕਰਨ ਲਈ ਆਰਚਰੀ ਯਾਨਿ ਨਿਸ਼ਾਨਾ ਸਾਧਣਾ ਦੀ ਖੇਡ ਵਿਚ ਆਪਣੇ-ਆਪ ਨੂੰ ਨਿਪੁੰਨ ਕਰਨ ਲੱਗੀ ਅਤੇ ਉਸ ਦੇ ਕੋਚ ਅਸ਼ਵਨੀ ਥੇਟੇ ਨੇ ਵੀ ਉਸ ਨੂੰ ਆਰਚਰੀ ਵਿਚ ਐਸਾ ਤਰਾਸ਼ਿਆ ਕਿ ਛੇਤੀ ਹੀ ਮਿਤਾਲੀ ਨਿਸ਼ਾਨੇਬਾਜ਼ੀ ਵਿਚ ਜਿੱਤਾਂ ਦਰਜ ਕਰਨ ਲੱਗੀ।
ਮਿਤਾਲੀ ਨੇ ਆਰਚਰੀ ਸਿੱਖਣ ਲਈ ਏਨੀ ਮਿਹਨਤ ਕੀਤੀ ਕਿ ਉਹ ਖਾਣਾ ਵੀ ਭੁੱਲ ਜਾਂਦੀ ਅਤੇ ਦਿਨ ਦੇ ਕਈ ਘੰਟੇ ਉਸ ਨੇ ਅਭਿਆਸ ਲਈ ਖੇਡ ਮੈਦਾਨ ਨੂੰ ਸਮਰਪਿਤ ਕਰ ਦਿੱਤੇ। ਹੁਣੇ-ਹੁਣੇ ਜਕਾਰਤਾ ਵਿਖੇ ਹੋਈਆਂ ਏਸ਼ੀਅਨ ਪੈਰਾ ਖੇਡਾਂ ਵਿਚ ਮਿਤਾਲੀ ਗਾਇਕਵਾਡ ਨਿਸ਼ਾਨੇਬਾਜ਼ੀ ਵਿਚ ਪੂਰੇ ਭਾਰਤ 'ਚੋਂ 11 ਖਿਡਾਰੀਆਂ ਵਿਚ ਚੁਣੀ ਗਈ ਅਤੇ ਉਸ ਨੇ ਏਸ਼ਿਆਈ ਖੇਡਾਂ ਵਿਚ ਭਾਰਤ ਦੀ ਨੁਮਾਇੰਦਗੀ ਕਰਦਿਆਂ ਭਾਰਤ ਦੀ ਝੋਲੀ ਤਗਮੇ ਨਾਲ ਸਰਸ਼ਾਰ ਕੀਤੀ। ਮਿਤਾਲੀ ਦੇ ਕੋਚ ਅਸ਼ਵਨੀ ਥੇਟੇ ਅਤੇ ਨਾਸਿਕ ਆਰਚਰੀ ਐਸੋਸੀਏਸ਼ਨ ਦੇ ਪ੍ਰਧਾਨ ਮੰਗਲ ਪਾਟਿਲ ਮਿਤਾਲੀ ਬਾਰੇ ਆਖਦੇ ਹਨ ਕਿ ਮਿਤਾਲੀ ਦੇ ਮਜ਼ਬੂਤ ਇਰਾਦੇ ਅਤੇ ਕੁਝ ਕਰ ਸਕਣ ਦੀ ਮਿੱਠੀ ਚਾਹਤ ਨੇ ਉਨ੍ਹਾਂ ਦੇ ਕੱਦ ਨੂੰ ਹੋਰ ਉੱਚਾ ਕੀਤਾ ਹੈ ਅਤੇ ਉਹ ਹਮੇਸ਼ਾ ਮਿਤਾਲੀ 'ਤੇ ਮਾਣ ਕਰਦੇ ਹਨ ਅਤੇ ਮਿਤਾਲੀ ਵੀ ਆਖਦੀ ਹੈ ਕਿ 'ਕੁਝ ਭੀ ਤੋ ਮੁਸ਼ਕਿਲ ਨਹੀਂ ਅਗਰ ਕਰਨੇ ਕੀ ਠਾਨ ਲੋ, ਮੰਜ਼ਿਲ ਮਿਲ ਹੀ ਜਾਤੀ ਹੈ ਹਿੰਮਤ ਸੇ ਇਨਸਾਨ ਕੋ।'


-ਮੋਬਾ: 98551-14484

ਹਾਕੀ ਮੇਰੀ ਜ਼ਿੰਦਗੀ : ਪ੍ਰਭਜੋਤ ਸਿੰਘ

ਹਾਕੀ ਨੂੰ ਜੇਕਰ ਪੰਜਾਬੀਆਂ ਦੀ ਰੂਹ ਦੀ ਖੇਡ ਕਿਹਾ ਜਾਵੇ ਤਾਂ ਇਸ ਵਿਚ ਕੋਈ ਅਤਿਕਥਨੀ ਨਹੀਂ ਹੋਵੇਗੀ। ਪੰਜਾਬੀ ਜਵਾਨਾਂ ਦੀਆਂ ਰਗਾਂ ਵਿਚ ਦੌੜਦਾ ਹੋਇਆ ਫੁਰਤੀਲਾ ਖੂਨ ਅਤੇ ਰਿਸ਼ਟ-ਪੁਸ਼ਟ ਡੀਲ-ਡੌਲ ਨੇ ਹਾਕੀ ਨਾਲ ਖੂਬ ਨਿਭਾਈ। ਪੰਜਾਬ ਦੀ ਧਰਤੀ ਨੇ ਅਨੇਕਾਂ ਹਾਕੀ ਦੇ ਜਰਨੈਲਾਂ ਨੂੰ ਜਨਮ ਦਿੱਤਾ, ਜਿਨ੍ਹਾਂ ਨੇ ਆਪਣਾ ਨਾਂਅ ਪੂਰੀ ਦੁਨੀਆ ਵਿਚ ਚਮਕਾਇਆ। ਜਿਸ ਹਾਕੀ ਦੇ ਮਹਾਂਰਥੀ ਦਾ ਜ਼ਿਕਰ ਹੋਣ ਲੱਗਾ ਹੈ, ਉਹ ਹੈ ਪਿੰਡ ਬੁਤਾਲਾ ਜ਼ਿਲ੍ਹਾ ਅੰਮ੍ਰਿਤਸਰ ਦੀ ਧਰਤੀ 'ਤੇ ਜੰਮਿਆ ਪ੍ਰਭਜੋਤ ਸਿੰਘ। ਹਲਕੇ ਜਿਹੇ ਸਰੀਰ ਦਾ ਮਾਲਕ ਅਤੇ 17 ਵਰ੍ਹਿਆਂ ਦਾ ਜਵਾਨ, ਜੋ ਹਾਕੀ ਨੂੰ ਆਪਣੀ ਜ਼ਿੰਦਗੀ ਬਣਾ ਚੁੱਕਾ ਹੈ। ਉਹ ਹਾਕੀ ਦੇ ਖੇਤਰ ਵਿਚ ਆਪਣੇ-ਆਪ ਨੂੰ ਸਥਾਪਿਤ ਕਰਨ ਲਈ ਯਤਨਸ਼ੀਲ ਹੈ।
ਇਸ ਤਰ੍ਹਾਂ ਪ੍ਰਭਜੋਤ ਨੇ ਹਾਕੀ ਨੂੰ ਜਾਂ ਹਾਕੀ ਨੇ ਪ੍ਰਭਜੋਤ ਨੂੰ ਚੁਣਿਆ। ਪਿੰਡ ਵਿਚ ਖੇਡਦਾ ਹੋਇਆ ਉਹ ਕਈ ਪਿੰਡ ਪੱਧਰੀ ਟੂਰਨਾਮੈਂਟ ਵੀ ਖੇਡਿਆ। ਉਹ ਕਿਸੇ ਵੀ ਮੌਕੇ ਨੂੰ ਆਪਣੇ ਹੱਥੋਂ ਨਹੀਂ ਸੀ ਗਵਾਉਣਾ ਚਾਹੁੰਦਾ। ਸਾਲ 2014 ਵਿਚ ਜਦ ਉਹ ਅਜੇ ਸੱੱਤਵੀਂ ਜਮਾਤ ਵਿਚ ਪੜ੍ਹਦਾ ਸੀ ਤਾਂ ਉਸ ਨੇ ਹਾਕੀ ਲਈ ਘਰ ਛੱਡ ਦਿੱਤਾ। ਉਹ ਅੱਠ ਗੁਰੂ ਸਾਹਿਬਾਨ ਦੀ ਪਾਵਨ ਚਰਨ ਛੋਹ ਪ੍ਰਾਪਤ ਧਰਤੀ ਖਡੂਰ ਸਾਹਿਬ ਵਿਖੇ ਕਾਰ ਸੇਵਾ ਖਡੂਰ ਸਾਹਿਬ ਵਲੋਂ ਚਲਾਈ ਜਾ ਰਹੀ 'ਬਾਬਾ ਉੱਤਮ ਸਿੰਘ ਨੈਸ਼ਨਲ ਹਾਕੀ ਅਕੈਡਮੀ' ਵਿਚ ਆ ਗਿਆ, ਜਿੱਥੇ ਆ ਕੇ ਉਸ ਨੇ ਆਪਣੀ ਖੇਡ ਨੂੰ ਲਿਸ਼ਕਾਉਣਾ ਆਰੰਭ ਕਰ ਦਿੱਤਾ। ਉਹ ਮਿਹਨਤ ਤੋਂ ਕਦੇ ਮੂੰਹ ਨਾ ਮੋੜਦਾ ਅਤੇ ਲਗਾਤਾਰ ਅਭਿਆਸ ਵਿਚ ਜੁਟਿਆ ਰਹਿੰਦਾ।
ਪ੍ਰਸਿੱਧ ਹਾਕੀ ਟੂਰਨਾਮੈਂਟ ਜਿਵੇਂ ਐੱਸ. ਐਨ. ਵੋਹਰਾ ਮੈਮੋਰੀਅਲ ਹਾਕੀ ਟੂਰਨਾਮੈਂਟ ਚੰਡੀਗੜ੍ਹ, ਮਹਿੰਦਰ ਮੁਨਸ਼ੀ ਹਾਕੀ ਟੂਰਨਾਮੈਂਟ ਜਲੰਧਰ, ਆਲ ਇੰਡੀਆ ਬਲਵੰਤ ਕਪੂਰ ਹਾਕੀ ਟੂਰਨਾਮੈਂਟ ਜਲੰਧਰ, ਜਵਾਹਰ ਲਾਲ ਨਹਿਰੂ ਹਾਕੀ ਟੂਰਨਾਮੈਂਟ ਅਤੇ ਆਲ ਇੰਡੀਆ ਇੰਟਰ ਸਕੂਲ ਟੂਰਨਾਮੈਂਟ ਨਾਗਪੁਰ ਆਦਿ ਖੇਡ ਕੇ ਉਸ ਨੇ ਆਪਣੀ ਪਛਾਣ ਕਾਇਮ ਕੀਤੀ। ਮਲੇਸ਼ੀਆ ਵਿਚ ਇਸੇ ਸਾਲ ਛੇ ਦੇਸ਼ਾਂ (ਭਾਰਤ, ਇੰਗਲੈਂਡ, ਆਸਟ੍ਰੇਲੀਆ, ਮਲੇਸ਼ੀਆ, ਜਾਪਾਨ ਅਤੇ ਨਿਊਜ਼ੀਲੈਂਡ) ਦੀਆਂ ਟੀਮਾਂ ਵਿਚਕਾਰ ਹੋਏ ਅੱਠਵੇਂ ਸੁਲਤਾਨ ਆਫ ਜੌਹਰ ਕੱਪ 2018 ਵਿਚ ਉਹ ਜੂਨੀਅਰ ਇੰਡੀਆ ਹਾਕੀ ਟੀਮ ਵਿਚ ਖੇਡਿਆ। ਉਸ ਦੇ ਸ਼ਾਨਦਾਰ ਪ੍ਰਦਰਸ਼ਨ ਵਜੋਂ ਉਸ ਨੂੰ ਸੁਲਤਾਨ ਆਫ ਜੌਹਰ ਕੱਪ 2018 ਵਿਚ ਸਭ ਤੋਂ ਵਧੀਆ ਖਿਡਾਰੀ ਦੇ ਖਿਤਾਬ ਨਾਲ ਸਨਮਾਨਿਤ ਕੀਤਾ ਗਿਆ। ਇਹ ਉਸ ਲਈ ਅਹਿਮ ਪ੍ਰਾਪਤੀ ਸੀ। ਹੁਣ ਉਹ ਆਉਣ ਵਾਲੇ ਸਮੇਂ ਵਿਚ ਹੋਣ ਵਾਲੇ ਹਾਕੀ ਦੇ ਮਹਾਂਯੁੱਧਾਂ ਲਈ ਆਪਣੇ ਆਪ ਨੂੰ ਤਿਆਰ ਕਰਨ ਵਿਚ ਜੁਟਿਆ ਹੋਇਆ ਹੈ।
ਪ੍ਰਭਜੋਤ ਸਿੰਘ ਲਈ ਇਹ ਸਮਾਂ ਸੰਘਰਸ਼ ਦਾ ਹੈ। ਉਸ ਦਾ ਕਹਿਣਾ ਹੈ ਕਿ ਇਸ ਰਸਤੇ ਨੂੰ ਮੈਂ ਆਪ ਚੁਣਿਆ ਹੈ। ਇਸ ਲਈ ਮੇਰਾ ਇਹ ਸੰਘਰਸ਼ ਮੇਰਾ ਸ਼ੌਕ ਹੈ, ਜਿਸ ਨਾਲ ਮੇਰੀ ਖੂਬ ਨਿਭ ਰਹੀ ਹੈ। ਉਹ ਕਹਿੰਦਾ ਹੈ ਕਿ ਖਡੂਰ ਸਾਹਿਬ ਵਿਖੇ ਸ੍ਰੀ ਗੁਰੂ ਅੰਗਦ ਦੇਵ ਜੀ ਦੁਆਰਾ ਕੀਤੀ ਗਈ ਮੱਲ ਅਖਾੜੇ ਦੀ ਸਥਾਪਨਾ ਸਦਾ ਮੇਰੇ ਲਈ ਪ੍ਰੇਰਨਾ ਰਹੀ। ਇਸ ਤਰ੍ਹਾਂ ਮੇਰੀ ਖੇਡ ਨੇ ਮੈਨੂੰ ਉੱਚਾ-ਸੁੱਚਾ ਜੀਵਨ ਬਖਸ਼ਿਆ। ਇਸ ਨੇ ਮੈਨੂੰ ਬਹੁਤ ਸਾਰੀਆਂ ਭੈੜੀਆਂ ਅਲਾਮਤਾਂ ਤੋਂ ਬਚਾਇਆ ਅਤੇ ਜੇਕਰ ਪੰਜਾਬ ਦੀ ਜਵਾਨੀ ਵੀ ਇਸੇ ਰਸਤੇ 'ਤੇ ਚੱਲ ਪਵੇ ਤਾਂ ਭੈੜੀਆਂ ਕੁਰੀਤੀਆਂ ਦੇ ਪਹਾੜ ਚਕਨਾਚੂਰ ਹੋ ਜਾਣਗੇ ਅਤੇ ਰੰਗਲਾ, ਹੱਸਦਾ-ਵਸਦਾ ਪੰਜਾਬ ਫਿਰ ਮਹਿਕ ਉੱਠੇਗਾ, ਜਿਸ ਦੀ ਮਿੱਠੀ ਮਹਿਕ ਦਾ ਜ਼ਿਕਰ ਅੱਜ ਕੇਵਲ ਕਵਿਤਾ-ਕਹਾਣੀਆਂ ਅਤੇ ਗੱਲਾਂ-ਬਾਤਾਂ ਵਿਚ ਹੀ ਰਹਿ ਗਿਆ ਹੈ।


-ਵਿਕਰਮਜੀਤ ਸਿੰਘ ਤਿਹਾੜਾ
ਵਿਦਿਆਰਥੀ, ਸ੍ਰੀ ਗੁਰੂ ਅੰਗਦ ਦੇਵ ਇੰਸਟੀਚਿਊਟ ਆਫ਼ ਰਿਲੀਜੀਅਸ ਸਟੱਡੀਜ਼, ਨਿਸ਼ਾਨ-ਏ-ਸਿੱਖੀ, ਖਡੂਰ ਸਾਹਿਬ। ਮੋਬਾ: 98555-34961

ਵਿਸ਼ਵ ਰੇਲਵੇ ਸਾਈਕਲਿੰਗ ਚੈਂਪੀਅਨਸ਼ਿਪ 'ਚ ਭਾਰਤ ਨੇ ਜਿੱਤੇ ਇਕ ਸੋਨ ਅਤੇ ਦੋ ਚਾਂਦੀ ਦੇ ਤਗਮੇ

ਭਾਰਤ ਅੰਦਰ ਜਿਥੇ ਖੇਡ ਫੈਡਰੇਸ਼ਨਾਂ ਅਤੇ ਰਾਜਾਂ ਦੀਆਂ ਖੇਡ ਐਸੋਸੀਏਸ਼ਨਾਂ ਖੇਡਾਂ ਦਾ ਆਯੋਜਨ ਕਰਦੀਆਂ ਹਨ, ਉੱਥੇ ਭਾਰਤ ਦੇ ਵੱਖ-ਵੱਖ ਵਿਭਾਗਾਂ ਦੀਆਂ ਖੇਡ ਐਸੋਸੀਏਸ਼ਨਾਂ ਵੀ ਖੇਡਾਂ ਨੂੰ ਪ੍ਰਫ਼ੁੱਲਿਤ ਕਰਨ ਲਈ ਟੂਰਨਾਮੈਂਟਾਂ ਦਾ ਆਯੋਜਨ ਕਰਵਾਉਂਦੀਆਂ ਹਨ | ਭਾਰਤੀ ਰੇਲਵੇ ਏਸ਼ੀਆ ਦਾ ਸਭ ਤੋਂ ਵੱਡਾ ਕਰਮਚਾਰੀਆਂ ਵਾਲਾ ਸੰਗਠਨ ਹੋਣ ਦੇ ਨਾਲ ਖੇਡਾਂ ਦੇ ਖੇਤਰ ਵਿਚ ਵੀ ਸਭ ਤੋਂ ਅੱਗੇ ਹੈ ਅਤੇ ਰੇਲਵੇ ਸੰਗਠਨ ਵਿਚ ਸਭ ਤੋਂ ਵੱਧ ਖਿਡਾਰੀ ਦੇਸ਼ ਲਈ ਖੇਡਦੇ ਹਨ, ਭਾਵੇਂ ਉਲੰਪਿਕ ਖੇਡਾਂ ਹੋਣ, ਭਾਵੇਂ ਏਸ਼ਿਆਈ ਖੇਡਾਂ ਹੋਣ, ਭਾਵੇਂ ਰਾਸ਼ਟਰਮੰਡਲ ਖੇਡਾਂ ਹੋਣ ਜਾਂ ਕੋਈ ਏਸ਼ੀਅਨ ਚੈਂਪੀਅਨਸ਼ਿਪ, ਏਸ਼ੀਆ ਕੱਪ ਟੂਰਨਾਮੈਂਟ ਹੋਣ, ਹਰ ਇਕ ਚੈਂਪੀਅਨਸ਼ਿਪ ਵਿਚ ਭਾਰਤੀ ਰੇਲਵੇ ਦੇ ਖਿਡਾਰੀਆਂ ਦੀ ਗਿਣਤੀ ਸਭ ਤੋਂ ਵੱਧ ਹੁੰਦੀ ਹੈ | ਭਾਰਤੀ ਰੇਲਵੇ ਦਾ ਖੇਡ ਪ੍ਰਬੰਧ ਰੇਲਵੇ ਸਪੋਰਟਸ ਪ੍ਰਮੋਸ਼ਨ ਬੋਰਡ ਕਰਦਾ ਹੈ ਤੇ ਖਿਡਾਰੀਆਂ ਨੂੰ ਹਰ ਪ੍ਰਕਾਰ ਦੀ ਸਹੂਲਤ ਮੁਹੱਈਆ ਕਰਵਾਉਂਦਾ ਹੈ | ਅਸੀਂ ਗ਼ੱਲ ਕਰ ਰਹੇ ਹਾਂ ਪਿਛਲੇ ਦਿਨੀਂ ਹੋਈ 13ਵੀਂ ਯੂ.ਐੱਸ.ਆਈ.ਸੀ. ਵਰਲਡ ਰੇਲਵੇ ਸਾਈਕਲਿੰਗ ਚੈਂਪੀਅਨਸ਼ਿਪ ਦੀ, ਜੋ 12 ਤੋਂ 16 ਨਵੰਬਰ ਤੱਕ ਬੀਕਾਨੇਰ ਵਿਖੇ ਕਰਵਾਈ ਗਈ | ਇਸ ਚੈਂਪੀਅਨਸ਼ਿਪ ਦਾ ਆਯੋਜਨ ਰੇਲਵੇ ਸਪੋਰਟਸ ਪ੍ਰਮੋਸ਼ਨ ਬੋਰਡ ਤੇ ਬੀਕਾਨੇਰ ਡਵੀਜ਼ਨ ਨੇ ਸਾਂਝੇ ਤੌਰ 'ਤੇ ਕੀਤਾ |
ਇਸ ਚੈਂਪੀਅਨਸ਼ਿਪ ਵਿਚ ਫ਼ਰਾਂਸ, ਨੀਦਰਲੈਂਡ, ਨਾਰਵੇ ਤੇੇ ਭਾਰਤ ਸਮੇਤ 7 ਟੀਮਾਂ ਦੇ 100 ਸਾਈਕਲਿਸਟਾਂ ਨੇ ਭਾਗ ਲਿਆ | ਇਹ ਚੈਂਪੀਅਨਸ਼ਿਪ ਯੂ.ਐੱਸ.ਆਈ.ਸੀ. ਰੇਲਵੇ ਸੰਗਠਨ ਦੀ ਅੰਤਰਰਾਸ਼ਟਰੀ ਖੇਡ ਸੰਸਥਾ ਦੇ ਅਧੀਨ ਕਰਵਾਈ ਗਈ | ਸਾਲ 1963 ਤੋਂ ਹਰ ਚਾਰ ਸਾਲਾਂ ਬਾਅਦ ਇਨ੍ਹਾਂ ਖੇਡਾਂ ਦਾ ਆਯੋਜਨ ਕਰਵਾਇਆ ਜਾਂਦਾ ਹੈ | ਇਸ ਖੇਡ ਸੰਸਥਾ ਦਾ ਮੁੱਖ ਟੀਚਾ ਉਲੰਪਿਕ ਪੱਧਰ ਦੀਆਂ ਖੇਡਾਂ ਲਈ ਰੇਲਵੇ ਦੇ ਖਿਡਾਰੀਆ ਨੂੰ ਉਤਸ਼ਾਹਿਤ ਕਰਨਾ ਹੈ | ਵਰਲਡ ਰੇਲਵੇ ਸਾਈਕਲਿੰਗ ਚੈਂਪੀਅਨਸ਼ਿਪ ਭਾਰਤ ਵਿਚ ਪਹਿਲੀ ਵਾਰ ਕਰਵਾਈ ਗਈ ਹੈ | ਵਰਲਡ ਰੇਲਵੇ ਸਾਈਕਲਿੰਗ ਚੈਂਪੀਅਨਸ਼ਿਪ 2012 ਵਿਚ ਭਾਰਤੀ ਰੇਲਵੇ ਦੀ ਟੀਮ ਨੇ ਇਕ ਕਾਂਸੀ ਦਾ ਤਗਮਾ ਜਿੱਤਿਆ ਸੀ ਅਤੇ ਉਸ ਤੋਂ ਬਾਅਦ ਪਹਿਲੀ ਵਾਰ ਭਾਰਤੀ ਰੇਲਵੇ ਨੇ ਇਕ ਸੋਨ ਅਤੇ ਦੋ ਚਾਂਦੀ ਦੇ ਤਗਮੇ ਜਿੱਤੇ ਹਨ | ਪਹਿਲੇ ਦਿਨ 40 ਕਿਲੋਮੀਟਰ ਟੀਮ ਟਾਈਮ ਟਰਾਇਲ ਈਵੈਂਟ ਵਿਚ ਫਰਾਂਸ ਦੀ ਟੀਮ ਨੇ ਸੋਨ, ਭਾਰਤ ਦੀ ਟੀਮ ਨੇ ਚਾਂਦੀ ਅਤੇ ਸਵਿਟਜ਼ਰਲੈਂਡ ਦੀ ਟੀਮ ਨੇ ਕਾਂਸੇ ਦਾ ਤਗਮਾ ਜਿੱਤਿਆ | ਦੂਜੇ ਦਿਨ 100 ਕਿਲੋਮੀਟਰ ਮਾਸਸਟਰਾਟ ਈਵੈਂਟ ਵਿਚ ਫਰਾਂਸ ਦੇ ਸਾਊਾਡ ਬ੍ਰੇਸ ਯੋਹਾਨ ਨੇ 2 ਘੰਟੇ 15 ਮਿੰਟ ਦਾ ਸਮਾਂ ਲੈ ਕੇ ਸੋਨ ਤਗਮਾ ਜਿੱਤਿਆ, ਸਵਿਜ਼ਰਲੈਂਡ ਦੇ ਮੁਲਾਰ ਬਰੇਗੇਨ ਨੇ ਚਾਂਦੀ ਅਤੇ ਚੈੱਕਗਣਰਾਜ ਦੇ ਪਟਾਕੀ ਟੋਮਾਸ ਨੇ ਕਾਂਸੀ ਦਾ ਤਗ਼ਮਾ ਜਿੱਤਿਆ ਅਤੇ ਭਾਰਤ ਦੇ ਅਰਵਿੰਦ ਪਵਾਰ ਚੌਥੇ ਸਥਾਨ 'ਤੇ ਰਹੇ |
ਤੀਜੇ ਦਿਨ 20 ਕਿਲੋਮੀਟਰ ਟਾਈਮ ਟਰਾਇਲ ਈਵੈਂਟ ਵਿਚ ਭਾਰਤ ਦੇ ਅਰਵਿੰਦ ਪਵਾਰ ਨੇ ਸੋਨ ਤਗਮਾ ਅਤੇ ਭਾਰਤ ਦੇ ਹੀ ਮਨੋਹਰ ਲਾਲ ਬਿਸ਼ਨੋਈ ਨੇ ਚਾਂਦੀ ਦਾ ਤਗਮਾ ਅਤੇ ਸਵਿਟਜ਼ਰਲੈਂਡ ਦੇ ਬੁਲਾਰਨ ਬਿ੍ਜਾਂ ਨੇ ਕਾਂਸੇ ਦਾ ਤਗਮਾ ਜਿੱਤਿਆ | ਇਸ ਚੈਂਪੀਅਨਸ਼ਿਪ ਵਿਚ ਫਰਾਂਸ ਓਵਰਆਲ ਚੈਂਪੀਅਨ ਬਣਿਆ | ਸਵਿਟਜ਼ਰਲੈਂਡ ਦੂਜੇ ਸਥਾਨ 'ਤੇ, ਭਾਰਤ ਤੀਸਰੇ ਸਥਾਨ 'ਤੇ ਰਿਹਾ | ਇੱਥੇ ਇਹ ਵੀ ਦੱਸਣਯੋਗ ਹੈ ਕਿ ਪਿਛਲੀਆਂ ਰਾਸ਼ਟਰਮੰਡਲ ਖੇਡਾਂ, ਏਸ਼ਿਆਈ ਖੇਡਾਂ, ਵਰਲਡ ਚੈਂਪੀਅਨਸ਼ਿਪ, ਏਸ਼ੀਆ ਕੱਪ, ਏਸ਼ੀਅਨ ਚੈਂਪੀਅਨਸ਼ਿਪ ਵਿਚ ਭਾਰਤੀ ਰੇਲਵੇ ਦੇ ਖਿਡਾਰੀਆਂ ਦੀ ਭਾਗੀਦਾਰੀ ਬਹੁਤ ਜ਼ਿਆਦਾ ਰਹੀ ਹੈ | ਭਾਰਤੀ ਰੇਲਵੇ ਦੇ ਖਿਡਾਰੀਆਂ ਨੇ ਵੱਡੇ ਟੂਰਨਾਮੈਂਟਾਂ ਵਿਚ ਭਾਰਤੀ ਰੇਲਵੇ ਦਾ ਨਾਂਅ ਰੌਸ਼ਨ ਕੀਤਾ ਹੈ | ਭਾਰਤੀ ਰੇਲਵੇ ਕਰਮਚਾਰੀਆਂ ਪੱਖੋਂ ਸਭ ਤੋਂ ਵੱਡਾ ਸੰਗਠਨ ਹੋਣ ਦੇ ਨਾਲ-ਨਾਲ ਖੇਡਾਂ ਪ੍ਰਤੀ ਵੀ ਆਪਣੀ ਪੂਰੀ ਜ਼ਿੰਮੇਵਾਰੀ ਨਿਭਾਅ ਰਿਹਾ ਹੈ | ਉਮੀਦ ਕਰਦੇ ਹਾਂ ਕਿ ਆਉਣ ਵਾਲੇ ਦਿਨਾਂ ਵਿਚ ਭਾਰਤੀ ਰੇਲਵੇ ਦੇ ਖਿਡਾਰੀ ਰਾਸ਼ਟਰਮੰਡਲ ਖੇਡਾਂ, 2020 ਟੋਕੀਓ ਉਲੰਪਿਕ ਖੇਡਾਂ ਵਿਚ ਭਾਰਤ ਲਈ ਸੋਨ ਤਗਮੇ ਜਿੱਤਣਗੇ |

-ਮੋਬਾ: 82888-47042

ਛੇਵੀਂ ਵਾਰ ਜਿੱਤਿਆ ਵਿਸ਼ਵ ਿਖ਼ਤਾਬ

ਮੈਰੀਕਾਮ ਦੇ ਮੱੁਕਿਆਂ ਨੂੰ ਯਾਦ ਕਰੇਗੀ ਦੁਨੀਆ

ਵਿਸ਼ਵ ਮੱੁਕੇਬਾਜ਼ੀ ਦੀ ਸੁਪਰ ਸਟਾਰ, ਤਿੰਨ ਬੱਚਿਆਂ ਦੀ ਮਾਂ, ਪਾਰਲੀਮੈਂਟ ਮੈਂਬਰ (ਰਾਜ ਸਭਾ) ਉੱਭਰ ਰਹੇ ਮਹਿਲਾ ਖਿਡਾਰੀਆਂ ਲਈ ਪ੍ਰੇਰਨਾ ਸਰੋਤ, ਵਿਸ਼ਵ ਖੇਡ ਮੰਚ ਦੀ ਸਨਮਾਨਜਨਕ ਹਸਤੀ, ਭਾਰਤ ਦੀ ਸਰਬੋਤਮ ਮੱੁਕੇਬਾਜ਼ ਐਮ. ਸੀ. ਮੈਰੀਕਾਮ ਦੀਆਂ 17 ਸਾਲ ਲੰਬੇ ਖੇਡ ਕਰੀਅਰ ਦੀਆਂ ਪ੍ਰਾਪਤੀਆਂ ਦੀ ਅੰਬਰ ਟਾਕੀ ਲਾਉਣ ਵਰਗੀ ਪਰਵਾਜ਼ ਨੂੰ ਅੰਕੜਿਆਂ ਜਾਂ ਲਫਜ਼ਾਂ ਦੀ ਦਰਗਾਹ 'ਚ ਬਿਆਨ ਕਰਨਾ ਸ਼ਾਇਦ ਖੇਡ ਜਗਤ ਦੀ ਇਤਿਹਾਸਕ ਗਾਥਾ ਹੈ | ਪਿਛਲੇ ਦਿਨੀਂ ਦਿੱਲੀ 'ਚ ਹੋਈ ਵਿਸ਼ਵ ਚੈਂਪੀਅਨਸ਼ਿਪ 'ਚ ਉਲੰਪਿਕ ਖੇਡਾਂ (2012 ਲੰਡਨ) 'ਚ ਕਾਂਸੇ ਦਾ ਤਗਮਾ ਜੇਤੂ ਭਾਰਤ ਦੀ ਦਿੱਗਜ਼ਮਹਿਲਾ ਮੱੁਕੇਬਾਜ਼ ਨੇ ਛੇਵੀਂ ਵਾਰ ਵਿਸ਼ਵ ਚੈਂਪੀਅਨ ਖਿਤਾਬ ਜਿੱਤ ਕੇ ਨਵਾਂ ਇਤਿਹਾਸ ਲਿਖਿਆ | ਇਸ ਪ੍ਰਾਪਤੀ ਨਾਲ ਮੈਰੀਕਾਮ ਵਿਸ਼ਵ ਚੈਂਪੀਅਨਸ਼ਿਪ 'ਚ 6 ਸੋਨੇ ਦੇ ਤਗਮੇ ਜਿੱਤਣ ਵਾਲੀ ਪਹਿਲੀ ਮਹਿਲਾ ਮੁੱਕੇਬਾਜ਼ ਬਣ ਗਈ | 35 ਵਰਿ੍ਹਆਂ ਦੀ ਮੈਰੀਕਾਮ ਨੇ 48 ਕਿਲੋ ਭਾਰ ਵਰਗ ਦੇ ਫਾਈਨਲ ਵਿਚ ਯੂਕਰੇਨ ਦੀ ਹਾਨਾ ਉਖੋਟਾ ਨੂੰ 5-0 ਨਾਲ ਚਿੱਤ ਕਰਕੇ ਸੋਨ ਤਗਮਾ ਆਪਣੇ ਨਾਂਅ ਕੀਤਾ | ਮੈਰੀ ਨੇ ਛੇਵੀਂ ਵਾਰ ਚੈਂਪੀਅਨ ਬਣ ਕੇ ਕਿਊਬਾ ਦੇ ਮਹਾਨ ਪੁਰਸ਼ ਮੱੁਕੇਬਾਜ਼ ਫੈਲਿਕਸ ਸੇਵੋਨ ਦੀ ਬਰਾਬਰੀ ਕਰ ਲਈ, ਜੋ ਵਿਸ਼ਵ ਚੈਂਪੀਅਨਸ਼ਿਪ ਵਿਚ ਛੇ ਖਿਤਾਬ ਜਿੱਤ ਚੱੁਕਾ ਹੈ | ਇਸ ਤੋਂ ਪਹਿਲਾਂ ਉਹ ਆਇਰਲੈਂਡ ਦੀ ਕੇਟੀ ਟੇਲਰ ਦੀ ਬਰਾਬਰੀ 'ਤੇ ਸੀ, ਜੋ 5 ਵਾਰ ਵਿਸ਼ਵ ਚੈਂਪੀਅਨ ਰਹਿ ਚੱੁਕੀ ਹੈ | ਇਹੀ ਨਹੀਂ, ਮੈਰੀਕਾਮ ਵਿਸ਼ਵ ਚੈਂਪੀਅਨਸ਼ਿਪ (ਮਹਿਲਾ ਅਤੇ ਪੁਰਸ਼ ਮੱੁਕੇਬਾਜ਼ੀ) 'ਚ ਸਭ ਤੋਂ ਜ਼ਿਆਦਾ ਤਗਮੇ ਜਿੱਤਣ ਵਾਲੀ ਖਿਡਾਰਨ ਵੀ ਬਣ ਗਈ ਹੈ | ਮੈਰੀਕਾਮ ਵਿਸ਼ਵ ਚੈਂਪੀਅਨਸ਼ਿਪ 6 ਸੋਨੇ ਅਤੇ 1 ਚਾਂਦੀ ਦਾ ਤਗਮਾ ਜਿੱਤ ਚੱੁਕੀ ਹੈ |
ਮੈਰੀਕਾਮ ਨੂੰ 2001 ਵਿਚ ਚਾਂਦੀ ਦੇ ਤਗਮੇ ਨਾਲ ਸਬਰ ਕਰਨਾ ਪਿਆ ਸੀ | ਸੰਨ 2002, 2005, 2006, 2008 ਅਤੇ 2018 ਮੈਰੀਕਾਮ ਦੇ ਮੱੁਕਿਆਂ ਦਾ ਸਫ਼ਰ ਸੁਨਹਿਰੀ ਤਗਮਿਆਂ ਨਾਲ ਚਮਕਿਆ ਸੀ | ਮੈਰੀਕਾਮ ਨੇ ਹਾਲ ਹੀ ਵਿਚ ਗੋਲਡ ਕੋਸਟ ਵਿਚ ਹੋਈਆਂ ਰਾਸ਼ਟਰਮੰਡਲ ਖੇਡਾਂ 'ਚ ਵੀ ਸੋਨ ਤਗਮਾ ਆਪਣੇ ਨਾਂਅ ਨਾਲ ਜੋੜਿਆ ਸੀ | ਸ਼ਾਨਦਾਰ ਜੇਤੂ ਇਬਾਰਤ ਲਿਖਣ ਵਾਲੀ ਮਨੀਪੁਰ ਦੀ ਇਸ ਕੁੜੀ ਨੇ ਏਸ਼ੀਅਨ ਚੈਂਪੀਅਨਸ਼ਿਪ 'ਚ 5 ਸੋਨ ਤਗਮੇ ਅਤੇ ਇਕ ਚਾਂਦੀ ਤਗਮਾ ਜਿੱਤਣ 'ਚ ਕਾਮਯਾਬੀ ਹਾਸਲ ਕੀਤੀ ਸੀ | ਖਾਸ ਗੱਲ ਇਹ ਹੈ ਕਿ ਮਾਂ ਬਣਨ ਤੋਂ ਬਾਅਦ ਵਾਪਸੀ ਕਰਦੇ ਹੋਏ ਮੈਰੀਕਾਮ ਨੇ ਅੰਤਰਰਾਸ਼ਟਰੀ ਮੁਕਾਬਲਿਆਂ 'ਚ ਸੁਨਹਿਰੀ ਗਾਥਾ ਲਿਖਦਿਆਂ ਜਿੱਤ ਦੇ ਝੰਡੇ ਗੱਡੇ ਅਤੇ ਆਪਣੇ ਆਲੋਚਕਾਂ ਨੂੰ ਕਰਾਰਾ ਜਵਾਬ ਦਿੱਤਾ | ਪ੍ਰਾਪਤੀਆਂ ਦੀ ਲੜੀ 'ਚ ਇਸ ਦਿਗਜ਼ ਮਹਿਲਾ ਮੱੁਕੇਬਾਜ਼ ਨੇ 2012 ਲੰਡਨ ਉਲੰਪਿਕ 'ਚ ਕਾਂਸੀ ਤਗਮਾ, 2010 ਏਸ਼ੀਅਨ ਖੇਡਾਂ 'ਚ ਕਾਂਸੀ ਅਤੇ 2014 ਏਸ਼ੀਅਨ ਖੇਡਾਂ 'ਚ ਸੋਨ ਤਗਮਾ ਜੋੜਿਆ ਸੀ | ਵਿਸ਼ਵ ਮੱੁਕੇਬਾਜ਼ੀ 'ਚ ਵਿਲੱਖਣ ਪ੍ਰਾਪਤੀਆਂ ਦੀ ਇਵਜ਼ 'ਚ ਭਾਰਤ ਸਰਕਾਰ ਨੇ ਉਸ ਨੂੰ 2003 'ਚ ਅਰਜਨ ਐਵਾਰਡ, 2006 'ਚ ਪਦਮਸ੍ਰੀ, 2009 'ਚ ਰਾਜੀਵ ਗਾਂਧੀ ਖੇਡ ਰਤਨ ਅਤੇ 2013 'ਚ ਪਦਮ ਭੂਸ਼ਣ ਐਵਾਰਡ ਨਾਲ ਸਨਮਾਨਿਆ ਸੀ |
ਮਨੀਪੁਰ ਦੀ ਰਾਜਧਾਨੀ ਇੰਫਾਲ ਦੇ ਨਾਲ ਲਗਦੇ ਚੁਰਾਚਾਦਪੁਰ ਜ਼ਿਲ੍ਹੇ ਦੇ ਪਿੰਡ ਕਾਡਬੇਈ 'ਚ ਜਨਮੀ ਮੰਗਤੇ ਚੰਗਾਜੇਈਨੇਗ ਮੈਰੀਕਾਮ (ਪੂਰਾ ਨਾਂਅ) ਨੂੰ ਗੁਰਬਤ ਭਰੀ ਜ਼ਿੰਦਗੀ ਨਾਲ ਲੜਾਈ ਲੜਨੀ ਪਈ | ਕਿਸਾਨ ਦੀ ਬੇਟੀ ਨੂੰ ਪਿਤਾ ਨਾਲ ਖੇਤਾਂ 'ਚ ਕੰਮ ਕਰਨਾ, ਦੋ ਛੋਟੇ ਭੈਣ-ਭਰਾਵਾਂ ਦੀ ਦੇਖਭਾਲ, ਮੱਛੀਆਂ ਫੜਨਾ ਅਤੇ ਫਿਰ ਪੜ੍ਹਾਈ ਕਰਨੀ | ਨਿਰਸੰਦੇਹ ਪੇਂਡੂ ਪਿਛੋਕੜ 'ਚੋਂ ਨਿਕਲ ਕੇ ਤੇ ਫਿਰ ਪੂਰੀ ਦੁਨੀਆ 'ਤੇ ਛਾਅ ਜਾਣਾ ਵਾਕਿਆ ਹੀ ਇਕ ਜਨੂਨ ਦਾ ਨਾਂਅ ਹੈ ਮੈਰੀਕਾਮ | ਸਕੂਲ 'ਚ ਸ਼ੁਰੂਆਤੀ ਦਿਨਾਂ ਵਿਚ ਉਹ ਇਕ ਆਲ ਰਾਊਾਡਰ ਅਥਲੀਟ ਸੀ ਪਰ ਬੈਕਾਂਕ ਏਸ਼ੀਆਈ ਖੇਡਾਂ 'ਚ ਮਨੀਪੁਰ ਦੇ ਹੀ ਮੱੁਕੇਬਾਜ਼ ਡਿਕੋ ਸਿੰਘ ਨੇ ਜਦੋਂ ਸੋਨ ਤਗਮਾ ਜਿੱਤਿਆ ਤਾਂ ਉਹ ਪੂਰੀ ਤਰ੍ਹਾਂ ਇਸ ਖੇਡ ਨਾਲ ਜੁੜ ਗਈ | ਜਦੋਂ ਉਹ ਸਕੂਲ ਵਿਚ ਪੜ੍ਹਦੀ ਸੀ ਤਾਂ ਅਧਿਆਪਕ ਉਸ ਦੇ ਜ਼ਿੱਦੀ ਸੁਭਾਅ, ਕਾਬਲੀਅਤ ਅਤੇ ਗਜਬ ਦੇ ਜੋਸ਼ ਤੋਂ ਬੇਹੱਦ ਪ੍ਰਭਾਵਿਤ ਸਨ | ਸੰਨ 2001 'ਚ ਉਸ ਨੇ ਪਹਿਲੀ ਵਾਰ ਨੈਸ਼ਨਲ ਮਹਿਲਾ ਮੱੁਕੇਬਾਜ਼ੀ ਜਿੱਤੀ ਤੇ ਹੁਣ ਤੱਕ ਉਹ 10 ਰਾਸ਼ਟਰੀ ਖਿਤਾਬ ਜਿੱਤ ਚੱੁਕੀ ਹੈ | ਮਜ਼ੇਦਾਰ ਗੱਲ ਕਿ ਰਾਸ਼ਟਰੀ ਚੈਂਪੀਅਨ ਬਣਨ ਤੱਕ ਮੈਰੀਕਾਮ ਦੇ ਪਿਤਾ ਨੂੰ ਇਹ ਨਹੀਂ ਸੀ ਪਤਾ ਕਿ ਉਸ ਦੀ ਬੇਟੀ ਕੀ ਖੇਡਦੀ ਹੈ | ਪਿਤਾ ਨੂੰ ਮੈਰੀਕਾਮ ਦੀ ਰੁਚੀ ਬਾਰੇ ਉਦੋਂ ਪਤਾ ਲੱਗਾ ਜਦੋਂ ਇਕ ਅਖ਼ਬਾਰ 'ਚ ਉਸ ਦੀ ਫੋਟੋ ਦੇਖੀ | ਮੱੁਕੇਬਾਜ਼ੀ 'ਚ ਸਿਖਰਾਂ ਛੂਹਣ ਵਾਲੀ ਮੈਰੀਕਾਮ ਮਹਾਨ ਮੱੁਕੇਬਾਜ਼ ਮੁਹੰਮਦ ਅਲੀ ਦੀ ਬੇਟੀ ਲੈਲਾ ਅਲੀ ਨੂੰ ਆਪਣਾ ਰੋਲ ਮਾਡਲ ਮੰਨਦੀ ਹੈ ਅਤੇ ਨੌਕਰੀ ਪੇਸ਼ੇ ਵਜੋਂ ਮਨੀਪੁਰ ਪੁਲਿਸ 'ਚ ਉੱਚ ਅਹੁਦੇ 'ਤੇ ਬਿਰਾਜਮਾਨ ਹੈ | ਖੈਰ, ਕੱੁਲ ਮਿਲਾ ਕੇ ਭਾਰਤੀ ਖੇਡ ਮੰਚ ਦੀ ਝੰਡਾ ਅਲੰਬਰਦਾਰ, ਵਿਆਹੁਤਾ ਜ਼ਿੰਦਗੀ ਨੂੰ ਪਟੜੀ 'ਤੇ ਰੱਖਦੇ ਹੋਏ ਮੱੁਕੇਬਾਜ਼ੀ 'ਚ ਸਿਖਰ ਛੂਹਣ ਦੇ ਬਾਵਜੂਦ ਉਹ ਬੇਹੱਦ ਨਿਮਰ ਹੈ | ਬੱਚਿਆਂ ਵਰਗੀ ਮਾਸੂਮੀਅਤ ਉਸ ਦੇ ਚਿਹਰੇ ਤੋਂ ਹਮੇਸ਼ਾ ਝਲਕਦੀ ਹੈ | ਵਿਸ਼ਵ ਖਿਤਾਬ ਜਿੱਤਣ ਤੋਂ ਬਾਅਦ ਤਿਰੰਗਾ ਲਹਿਰਾਉਂਦੀ ਖੁਸ਼ੀ 'ਚ ਭਾਵਕ ਹੋਈ ਮੈਰੀਕਾਮ ਦੀਆਂ ਅੱਖਾਂ 'ਚੋਂ ਹੰਝੂ ਛਲਕ ਤੁਰੇ | ਮੁਸੀਬਤ 'ਚ ਵੀ ਮੁਸਕਰਾਉਂਦੇ ਰਹਿਣ ਤੇ ਦੂਜਿਆਂ ਦੀ ਮਦਦ ਲਈ ਹਮੇਸ਼ਾ ਤਿਆਰ ਰਹਿਣ ਵਾਲੀ ਗੋਲਡਨ ਗਰਲ ਮੈਰੀਕਾਮ ਦਾ ਅਗਲਾ ਨਿਸ਼ਾਨਾ 2020 ਟੋਕੀਓ ਉਲੰਪਿਕ 'ਚ ਤਗਮਾ ਜਿੱਤਣਾ ਹੈ |

-ਪਿੰਡ ਤੇ ਡਾਕ: ਪਲਾਹੀ, ਫਗਵਾੜਾ | ਮੋਬਾ: 94636-12204

ਸ਼ਿਵਾ ਦੀ ਗੇਂਦ 'ਤੇ ਰੌਲਾ ਕਿਉਂ?

ਕੀ ਗੇਂਦਬਾਜ਼ਾਂ ਦੇ ਖੰਭ ਇਸੇ ਤਰ੍ਹਾਂ ਕੁਤਰਦੇ ਰਹਿਣਗੇ?

(ਲੜੀ ਜੋੜਨ ਲਈ ਪਿਛਲੇ ਮੰਗਲਵਾਰ ਦਾ ਅੰਕ ਦੇਖੋ)
ਪੁਰਾਣੇ ਸਮਿਆਂ ਦੀ ਗੱਲ ਹੈ, ਸਾਲ 1932-33 ਦੀ 'ਐਸ਼ਜ਼' ਲੜੀ ਦੌਰਾਨ ਆਸਟ੍ਰੇਲੀਆ ਦੇ ਬਹੁਮੁਖੀ ਪ੍ਰਤਿਭਾ ਵਾਲੇ ਬੱਲੇਬਾਜ਼ ਡਾਨ ਬਰੈਡਮੈਨ ਦੇ ਬੱਲੇ ਦੀ ਰਫ਼ਤਾਰ ਰੋਕਣ ਲਈ ਇੰਗਲੈਂਡ ਦੇ ਕਪਤਾਨ ਡਗਲਸ ਜਾਰਡਿਨ ਨੇ ਆਪਣੇ ਤੇਜ਼ ਗੇਂਦਬਾਜ਼ ਹੈਰਾਲਡ ਲਾਰਵੱੁਡ ਨੂੰ ਖਾਸ ਤੌਰ 'ਤੇ 'ਬਾਡੀਲਾਈਨ' ਗੇਂਦਾਂ ਸੱੁਟਣ ਲਈ ਕਿਹਾ | ਇਹ ਤਰੀਕਾ ਉਸ ਨੇ ਆਸਟ੍ਰੇਲੀਆ ਦੇ ਬਾਕੀ ਬੱਲੇਬਾਜ਼ਾਂ 'ਤੇ ਵੀ ਅਪਣਾਇਆ | ਇਹ ਉਹ ਸਮਾਂ ਸੀ, ਜਦੋਂ ਬੱਲੇਬਾਜ਼ਾਂ ਦੇ ਬਚਾਅ ਲਈ ਹੈਲਮੈਟ ਤੇ ਹੋਰ ਸੁਰੱਖਿਆ ਸਾਧਨ ਨਹੀਂ ਹੁੰਦੇ ਸਨ | ਹੋਰ ਵੱਡੀ ਗੱਲ ਸੀ ਕਿ ਨਿਯਮਾਂ 'ਚ ਲੈਗ ਸਾਈਡ 'ਤੇ ਖਿਡਾਰੀ ਖੜ੍ਹੇ ਕਰਨ ਦੀ ਕੋਈ ਗਿਣਤੀ ਵੀ ਮਿਥੀ ਹੋਈ ਨਹੀਂ ਸੀ | ਗੇਂਦਬਾਜ਼ ਪਹਿਲਾਂ ਵੀ ਲੈਗ ਸਾਈਡ 'ਤੇ ਗੇਂਦਬਾਜ਼ੀ ਕਰਦੇ ਸਨ ਪਰ ਕਦੇ ਕਿਸੇ ਨੂੰ ਕੋਈ ਇਤਰਾਜ਼ ਨਹੀਂ ਹੋਇਆ | ਚਰਚਾ ਤਾਂ ਉਦੋਂ ਸ਼ੁਰੂ ਹੋਈ ਜਦੋਂ ਲਾਰਵੱੁਡ ਨੇ ਬੱਲੇਬਾਜ਼ ਦੇ ਸਰੀਰ ਨੂੰ ਨਿਸ਼ਾਨਾ ਬਣਾਉਂਦਿਆਂ ਗੇਂਦਾਂ ਸੱੁਟੀਆਂ | ਆਪਣਾ ਸਰੀਰ ਬਚਾਉਣ ਦੇ ਚੱਕਰ 'ਚ ਗੇਂਦ ਬੱਲੇ ਨੂੰ ਲੱਗ ਕੇ ਲੈਗ ਸਾਈਡ ਵੱਲ ਜਾਂਦੀ ਰਹੀ ਤੇ ਲੈਗ ਵਾਲੇ ਪਾਸੇ ਖੜ੍ਹੇ ਬੇਸ਼ੁਮਾਰ ਖਿਡਾਰੀ ਕੈਚ ਫੜਦੇ ਗਏ | ਬੜਾ ਭੜਥੂ ਪਿਆ ਬਾਅਦ 'ਚ ਪਰ ਫਿਰ ਵੀ ਕਈ ਸਾਲ ਲੱਗ ਗਏ ਨਿਯਮ ਬਣਦਿਆਂ ਕਿ ਅੰਪਾਇਰ ਲੈਗ ਸਾਈਡ 'ਤੇ ਨੈਗਟਿਵ ਗੇਂਦ ਲਗਾਤਾਰ ਸੱੁਟਣ 'ਤੇ ਗੇਂਦ 'ਨੋ ਬਾਲ' ਕਰ ਸਕਦਾ ਹੈ | ਲੈਗ ਸਾਈਡ 'ਤੇ ਅੰਪਾਇਰ ਦੇ ਸੱਜੇ ਪਾਸੇ ਵੀ ਦੋ ਤੋਂ ਵੱਧ ਖਿਡਾਰੀ ਖੜ੍ਹੇ ਕਰਨ 'ਤੇ ਪਾਬੰਦੀ ਲਗਾ ਦਿੱਤੀ ਗਈ | ਚਲੋ, ਨਾਂਹ-ਪੱਖੀ ਕ੍ਰਿਕਟ ਰੋਕਣ ਲਈ ਅਤੇ ਖੇਡ ਭਾਵਨਾ ਬਣਾਈ ਰੱਖਣ ਲਈ ਅਜਿਹੀ ਕੁਝ ਸਖ਼ਤੀ ਹੋਣੀ ਵੀ ਚਾਹੀਦੀ ਸੀ ਪਰ ਸਮਾਂ ਪੈਣ 'ਤੇ ਇਸੇ ਖੇਡ ਭਾਵਨਾ ਦੀ ਆੜ 'ਚ ਗੇਂਦਬਾਜ਼ਾਂ ਦਾ ਅਜਿਹਾ ਘਾਣ ਕੀਤਾ ਗਿਆ ਕਿ ਪੁੱਛੋ ਹੀ ਕੁਝ ਨਾ |
ਇਹ ਸਿਰਫ ਸ਼ਿਵਾ ਸਿੰਘ ਹੀ ਨਹੀਂ ਹੈ, ਜਿਸ ਦੀ ਪ੍ਰਤਿਭਾ ਨੂੰ ਠੱਲ੍ਹ ਪਾਉਣ ਦੀ ਕੋਸ਼ਿਸ਼ ਹੋਈ ਹੈ, ਸਗੋਂ ਸਮੇਂ ਦੇ ਨਾਲ-ਨਾਲ ਸਿਰਫ ਤੇ ਸਿਰਫ ਗੇਂਦਬਾਜ਼ਾਂ ਦਾ ਹੀ ਹਰ ਪਾਸਿਓਾ ਗਲਾ ਘੱੁਟਿਆ ਗਿਆ | ਇਕ-ਦਿਨਾ ਮੈਚਾਂ ਦੇ ਆਉਣ ਨਾਲ ਤਾਂ ਇਹ ਸਮਝਿਆ ਜਾਣ ਲੱਗ ਪਿਆ ਕਿ ਕ੍ਰਿਕਟ ਸਿਰਫ ਤੇ ਸਿਰਫ ਮਨੋਰੰਜਨ ਹੀ ਹੈ | ਜਿੰਨਾ ਵੱਧ ਮਨੋਰੰਜਨ ਹੋਵੇਗਾ, ਜਿੰਨਾ ਤੜਕਾ ਵੱਧ ਲੱਗੇਗਾ, ਓਨਾ ਹੀ ਸਵਾਦ ਵੱਧ ਆਵੇਗਾ | ਕ੍ਰਿਕਟ 'ਚ ਸਵਾਦ ਵਧੇਗਾ ਤਾਂ ਸਟੇਡੀਅਮਾਂ 'ਚ ਲੋਕ ਮਹਿੰਗੀਆਂ ਟਿਕਟਾਂ ਖਰੀਦ ਕੇ ਵੀ ਆਉਣਗੇ, ਸਪਾਂਸਰ ਨੋਟਾਂ ਦੀ ਵਰਖਾ ਕਰਨਗੇ, ਘਰ ਬੈਠੇ ਸਿੱਧੇ ਪ੍ਰਸਾਰਨ ਦੇਖਣ ਨੂੰ ਮਿਲਣਗੇ ਪਰ ਜਦੋਂ ਗੇਂਦਬਾਜ਼ਾਂ ਨੇ ਵਿਕਟਾਂ ਲੈ ਕੇ ਕੁਝ ਮੈਚ ਛੇਤੀ ਖ਼ਤਮ ਕੀਤੇ ਤਾਂ ਸਟੇਡੀਅਮ ਖਾਲੀ ਹੋਣ ਲੱਗ ਪਏ ਤਾਂ ਇਹ ਸਮਝਿਆ ਜਾਣ ਲੱਗ ਪਿਆ ਕਿ ਦਰਸ਼ਕ ਤਾਂ ਪੈਸੇ ਖਰਚ ਕਰਨਗੇ ਜੇ ਵੱਡੇ ਸਕੋਰ ਬਣਨਗੇ, ਚੌਕੇ-ਛੱਕਿਆਂ ਦੀ ਵਾਛੜ ਹੋਵੇਗੀ | ਇਸੇ ਨੂੰ ਦੇਖਦੇ ਹੋਏ ਹੌਲੀ-ਹੌਲੀ ਗੇਂਦਬਾਜ਼ਾਂ ਦੇ ਪਰ ਕੁਤਰੇ ਜਾਣ ਲੱਗ ਪਏ, ਜਿਹੜੇ ਕਿ ਅੱਜ ਵੀ ਜਾਰੀ ਹਨ | ਇਕ-ਦਿਨਾ ਮੈਚਾਂ 'ਚ ਗੇਂਦਬਾਜ਼ਾਂ ਦੇ ਓਵਰਾਂ ਦੀ ਹੱਦ ਮਿਥ ਦਿੱਤੀ ਗਈ | ਮੈਦਾਨ ਦੀ ਬਾਊਾਡਰੀ ਤਾਂ ਸੀ ਪਰ 30 ਗਜ਼ ਦਾ ਇਕ ਅੰਦਰੂਨੀ ਗੋਲਾ ਵੀ ਲਗਾ ਕੇ ਉਸ ਤੋਂ ਬਾਹਰ ਪਹਿਲੇ 15 ਓਵਰਾਂ 'ਚ ਸਿਰਫ ਦੋ ਖਿਡਾਰੀ ਖੜ੍ਹੇ ਹੋਣ ਦੀ ਪਾਬੰਦੀ ਲਗਾ ਦਿੱਤੀ ਗਈ |
ਮਤਲਬ ਸਾਫ਼ ਸੀ ਕਿ ਪਹਿਲੇ 15 ਓਵਰ ਦੱਬ ਕੇ ਠੁਕਾਈ ਕੀਤੀ ਜਾਵੇ, ਗੇਂਦਬਾਜ਼ਾਂ ਦੀ | ਪਾਵਰ ਪਲੇ ਵਧ ਕੇ ਤਿੰਨ ਹੋ ਗਏ | ਤੇਜ਼ ਗੇਂਦਬਾਜ਼ਾਂ ਦੇ ਮੱੁਖ ਹਥਿਆਰ ਬਾਊਾਸਰ 'ਤੇ ਪਾਬੰਦੀ ਲੱਗ ਗਈ | ਹੁਣ ਭਾਵੇਂ ਇਕ ਬਾਊਾਸਰ ਦੀ ਛੋਟ ਦਿੱਤੀ ਗਈ ਹੈ ਇਕ ਓਵਰ 'ਚ ਪਰ ਉਹ ਵੀ ਹੈਲਮੇਟ ਤੋਂ ਥੱਲੇ-ਥੱਲੇ ਹੀ ਹੈ | ਦੂਜਾ ਬਾਊਾਸਰ ਸੱੁਟਣ 'ਤੇ ਗੇਂਦ ਵਾਈਡ ਐਲਾਨੀ ਜਾਂਦੀ ਹੈ | ਗੇਂਦਬਾਜ਼ ਦੀ ਵਧੀਆ ਗੇਂਦ ਵੀ ਜੇ ਲੈਗ ਸਟੰਪ ਤੋਂ ਬਾਹਰ ਚਲੇ ਜਾਂਦੀ ਹੈ ਤਾਂ ਵਾਈਡ ਹੋ ਜਾਂਦੀ ਹੈ | ਵਾਈਡ ਦਾ ਪੈਮਾਨਾ ਤੈਅ ਕਰਨ ਲਈ ਕ੍ਰੀਜ਼ ਵੀ ਛੋਟੀ ਕੀਤੀ ਗਈ | 'ਬੈਨਿਫਿਟ ਆਫ ਡਾਊਟ' ਵੀ ਬੱਲੇਬਾਜ਼ ਦੇ ਪੱਖ 'ਚ ਹੈ | ਫਟਾਫਟ ਕ੍ਰਿਕਟ ਦੇ ਚੱਕਰ 'ਚ ਹੀ ਟੀ-20 ਕ੍ਰਿਕਟ ਸ਼ੁਰੂ ਹੋਈ ਪਰ ਇਥੇ ਵੀ ਬੱਲੇਬਾਜ਼ਾਂ ਦਾ ਪੱਖ ਪੂਰਨ ਲਈ ਮੈਦਾਨ ਦੀ ਲੰਬਾਈ ਛੋਟੀ ਕਰਨ ਦਾ ਪ੍ਰਚਲਨ ਸ਼ੁਰੂ ਹੋ ਗਿਆ | ਗੇਂਦਬਾਜ਼ਾਂ ਦਾ ਜਲੂਸ ਨਿਕਲੇ ਅਤੇ ਬੱਲੇਬਾਜ਼ ਚੌਕੇ-ਛਿੱਕੇ ਲਗਾ ਕੇ 'ਬਾਦਸ਼ਾਹ' ਬਣ ਜਾਵੇ, ਇਹੋ ਕੁਝ ਦੇਖਣ ਨੂੰ ਰਹਿ ਗਿਆ ਹੈ | ਭੱਦਰ ਪੁਰਸ਼ਾਂ ਦੀ ਖੇਡ ਕਹੀ ਜਾਣ ਵਾਲੀ ਇਸ ਕ੍ਰਿਕਟ 'ਚ ਭੱਦਰ ਪੁਰਸ਼ ਸਿਰਫ ਬੱਲੇਬਾਜ਼ ਹੀ ਰਹਿ ਗਏ ਹਨ | ਉਹ ਖੇਡ ਭਾਵਨਾ ਨਾਲ ਕੁਝ ਵੀ ਕਰਨ, ਨਿਯਮ ਉਨ੍ਹਾਂ ਨੂੰ ਛੋਟ ਦਿੰਦੇ ਹਨ ਤੇ ਗੇਂਦਬਾਜ਼ ਕੁਝ ਨਿਵੇਕਲਾ ਕਰ ਲਵੇ ਤਾਂ ਨਿਯਮ ਨਾ ਹੁੰਦੇ ਹੋਏ ਵੀ ਜ਼ਬਰਦਸਤੀ ਉਸ ਨੂੰ ਤੁੰਨ ਕੇ ਰੱਖ ਦਿੱਤਾ ਜਾਂਦਾ ਹੈ |
ਸ਼ਿਵਾ ਸਿੰਘ ਦੀ ਇਸ 360 ਡਿਗਦੀ ਗੇਂਦ ਦੀ ਆਵਾਜ਼ ਆਈ.ਸੀ.ਸੀ. ਤੱਕ ਜ਼ਰੂਰ ਪੱੁਜ ਚੱੁਕੀ ਹੋਵੇਗੀ | ਇਹ ਪੱਕਾ ਹੈ ਕਿ ਜਾਂ ਤਾਂ ਉਨ੍ਹਾਂ ਨੇ ਇਸ ਗੱਲ ਨੂੰ ਅਣਦੇਖਿਆਂ ਕਰਕੇ ਇਸ ਨੂੰ ਇਥੇ ਹੀ ਠੱਪ ਕਰ ਦੇਣਾ ਹੈ ਜਾਂ ਫਿਰ ਨਵਾਂ ਨਿਯਮ ਬਣਾ ਕੇ ਕੁਝ ਨਵਾਂ ਕਰਨ ਵਾਲੇ ਨੂੰ ਨੱਪ ਕੇ ਰੱਖ ਦੇਣਾ ਹੈ | ਦੇਖਦੇ ਹਾਂ, ਬੱਲੇਬਾਜ਼ਾਂ ਲਈ ਫਾਇਦੇਮੰਦ ਬਣਦੇ ਜਾ ਰਹੇ ਕ੍ਰਿਕਟ 'ਚ ਸ਼ਿਵਾ ਸਿੰਘ ਦੀ ਤਰ੍ਹਾਂ ਕੋਈ ਹੋਰ ਗੇਂਦਬਾਜ਼ ਵੀ ਨਵਾਂ ਤਜਰਬਾ ਕਰਕੇ ਆਈ.ਸੀ.ਸੀ. ਦਾ ਦਰਵਾਜ਼ਾ ਖੜਕਾਵੇਗਾ ਜਾਂ ਫਿਰ ਸਮੇਂ ਦੇ ਹਿਸਾਬ ਨਾਲ ਚੱੁਪੀ ਧਾਰਨ ਕਰਕੇ ਹੀ ਗੁਜ਼ਾਰਾ ਕਰ ਲਵੇਗਾ | ਕ੍ਰਿਕਟ 'ਚ ਹੈ ਕੋਈ ਆਕਾ ਜਿਹੜਾ ਗੇਂਦਬਾਜ਼ਾਂ ਦੇ ਜਾਇਜ਼ ਹੱਕਾਂ 'ਚ ਖੜ੍ਹਾ ਹੋ ਸਕੇ? ਹੈ ਕੋਈ ਜਿਹੜਾ ਕ੍ਰਿਕਟ 'ਚ ਖੇਡ ਭਾਵਨਾ ਨੂੰ ਬਹਾਲ ਕਰਨ ਲਈ ਬੱਲੇਬਾਜ਼ਾਂ ਤੇ ਗੇਂਦਬਾਜ਼ਾਂ ਨੂੰ ਬਰਾਬਰ ਦਾ ਹੱਕ ਦਿਵਾਉਣ ਲਈ ਪਹਿਲ ਕਰ ਸਕੇ? ਹੈ ਕੋਈ, ਜਿਹੜਾ ਕ੍ਰਿਕਟ ਦੀ ਮੂਲ ਭਾਵਨਾ ਨੂੰ ਵਾਪਸ ਲਿਆਉਣ ਲਈ ਯਤਨ ਕਰੇ? ਸ਼ਾਇਦ ਸਿੱਕਿਆਂ ਦੀ ਖਣਨ 'ਚ ਸ਼ਿਵਾ ਸਿੰਘ ਸਮੇਤ ਬਾਕੀ ਗੇਂਦਬਾਜ਼ਾਂ ਦੀ ਆਵਾਜ਼ ਵੀ ਗੁਆਚ ਜਾਵੇ ਪਰ ਚੇਤੇ ਰੱਖਿਆ ਜਾਵੇ ਕਿ ਕ੍ਰਿਕਟ ਦੇ ਸੰਪੂਰਨ ਵਿਕਾਸ ਲਈ ਸਾਰੇ ਖਿਡਾਰੀਆਂ ਨੂੰ ਬਰਾਬਰੀ ਦੇ ਹੱਕ ਦੇਣ ਲਈ ਨਿਯਮ ਬਣਨੇ ਚਾਹੀਦੇ ਹਨ | ਇਕਪਾਸੜ ਸੋਚ ਨਾਲ ਫੌਰੀ ਤੌਰ 'ਤੇ ਤਾਂ ਫਾਇਦਾ ਜ਼ਰੂਰ ਨਜ਼ਰ ਆਉਂਦਾ ਹੈ ਪਰ ਭਵਿੱਖ 'ਚ, ਲੰਮੇ ਸਮੇਂ ਤੱਕ ਇਸ ਖੇਡ ਦੀ ਹੋਂਦ ਨੂੰ ਬਚਾਉਣ ਲਈ ਹੁਣ ਤੋਂ ਹੀ ਇਸ ਪਾਸੇ ਸੋਚਣਾ ਹੋਵੇਗਾ | (ਸਮਾਪਤ)

-ਮੋਬਾ: 98141-32420

 

ਵੱਡੇ ਉਲਟਫੇਰ ਕਰਨ ਲਈ ਕੋਸ਼ਿਸ਼ਾਂ 'ਚ ਹਨ ਸਭ ਟੀਮਾਂ

ਹਾਕੀ ਦਾ ਮਹਾਂਭਾਰਤ ਓਡੀਸ਼ਾ ਦੀ ਰਾਜਧਾਨੀ ਭੁਵਨੇਸ਼ਵਰ ਵਿਖੇ 28 ਨਵੰਬਰ ਦਾ ਸ਼ੁਰੂ ਹੋ ਚੱੁਕਾ ਹੈ | 5 ਮਹਾਂਦੀਪਾਂ ਦੀਆਂ ਸਭ ਟੀਮਾਂ ਦੀਆਂ ਅੱਖਾਂ 'ਚ ਸੁਨਹਿਰੀ ਸੁਪਨੇ ਹਨ ਤੇ ਸੁਨਹਿਰੀ ਇਤਿਹਾਸ ਲਿਖਣ ਲਈ ਯਤਨਸ਼ੀਲ ਹਨ | ਹੁਣ ਤੱਕ ਹਰ ਟੀਮ ਆਪਣੇ ਪੂਲ 'ਚ 2 ਜਾਂ 3 ਮੈਚ ਖੇਡ ਚੱੁਕੀ ਹੈ | ਜੇਤੂ ਟੀਮਾਂ ਲਈ ਆਪਣੇ ਪੂਲ 'ਚੋਂ ਹੁਣ ਅਗਲੇ ਪੜਾਅ ਤੱਕ ਪਹੁੰਚਣਾ ਸੌਖਾ ਹੈ |
ਅਫਸੋਸ ਦੀ ਗੱਲ ਤਾਂ ਇਹ ਹੈ ਕਿ ਭਾਰਤ ਦੀ ਧਰਤੀ 'ਤੇ ਇਸ ਵਿਸ਼ਵ ਕੱਪ ਨੂੰ ਉਤਸ਼ਾਹਿਤ ਕਰਨ ਲਈ ਕੋਈ ਵਿਸ਼ੇਸ਼ ਉਪਰਾਲੇ ਸਾਨੂੰ ਨਜ਼ਰ ਨਹੀਂ ਆਏ | ਹੁਣ ਤਾਂ ਭਾਰਤ ਦੀ ਟੀਮ ਹੀ ਕੋਈ ਕਮਾਲ ਕਰਕੇ ਸੁਰਖੀਆਂ 'ਚ ਬਣੀ ਰਹੇ ਤਾਂ ਬਹੁਤ ਹੈ | ਇਹ ਵਿਸ਼ਵ ਕੱਪ ਪੰਜਾਬ ਦੀ ਧਰਤੀ 'ਤੇ ਹੁੰਦਾ ਤਾਂ ਸ਼ਾਇਦ ਏਨਾ ਭਰਵਾਂ ਹੁੰਗਾਰਾ ਨਹੀਂ ਸੀ ਮਿਲਣਾ | ਓਡੀਸ਼ਾ ਦੀ ਧਰਤੀ 'ਤੇ ਜੋ ਹਾਕੀ ਪ੍ਰੇਮੀ ਠਾਠਾਂ ਮਾਰ ਰਿਹਾ ਹੈ, ਹੁਣ ਉਹ ਪੰਜਾਬੀਆਂ ਦੀ ਧਰਤੀ 'ਤੇ ਕਿਥੇ? ਪੂਲ 'ਏ' ਦੇ ਵਿਚ ਜਿਥੋਂ ਤੱਕ ਅਰਜਨਟੀਨਾ ਦੀ ਟੀਮ ਦਾ ਸਬੰਧ ਹੈ, ਉਹ ਉਲੰਪਿਕ ਚੈਂਪੀਅਨ ਹੈ, ਟੀਮ ਦੀ ਨਿਰਭਰਤਾ ਗੋਲ ਮਸ਼ੀਨ ਗੋਂਜੈਲੋ ਪੈਲੇਟ 'ਤੇ ਹੈ, ਜਿਸ ਨੇ 2014 ਵਾਲੇ ਵਿਸ਼ਵ ਕੱਪ, 2016 ਦੀ ਰੀਓ ਉਲੰਪਿਕ ਅਤੇ ਚੈਂਪੀਅਨ ਟਰਾਫੀ 2018 'ਚ ਸਭ ਤੋਂ ਜ਼ਿਆਦਾ ਗੋਲ ਕੀਤੇ ਹਨ | ਚੀਫ ਕੋਚ ਜਰਮਨ ਓਰੋਜੋ ਨੂੰ ਲੁਕਾਸ ਵਿਲਾ, ਮੈਟਿਅਸ ਪੈਰਾਡੇਸ 'ਤੇ ਪੂਰਨ ਭਰੋਸਾ ਹੈ | ਉਸ ਦੀ ਟੀਮ 'ਚ ਦੂਜੇ ਖਿਡਾਰੀ ਪੇਡਰੋ ਇਬਾਰਾ ਜੁਆਨ ਮਾਰਟਿਨ, ਮੈਕੋ ਕਸੇਲਾ ਵੀ ਧਮਾਕੇਦਾਰ ਖੇਡ ਦਾ ਮੁਜ਼ਾਹਰਾ ਕਰਨ ਦੇ ਆਦੀ ਹਨ |
ਇਸੇ ਪੂਲ ਵਿਚ ਸਪੇਨ ਦੀ ਟੀਮ ਚੀਫ਼ ਕੋਚ ਫਰੈਂਡ ਸੋਇਜ ਦੀ ਰਹਿਨੁਮਾਈ 'ਚ ਖੇਡ ਰਹੀ ਹੈ | 2008 'ਚ ਬੀਜਿੰਗ ਉਲੰਪਿਕ ਹਾਕੀ 'ਚ ਚਾਂਦੀ ਦਾ ਤਗਮਾ ਜਿੱਤਣ ਵਾਲੀ ਟੀਮ ਦੇ ਖਿਡਾਰੀ ਜਾਣੀ ਸਰਗੀ ਏਨਰਿਕੂ ਅਤੇ ਗੋਲਕੀਪਰ ਕੇਰਟਸ, ਡੀਗੋ ਅਰਾਨਾ, ਐਲਬਰਟ, ਮਾਰਕ ਬੋਲਟੋ ਆਦਿ ਪ੍ਰਤਿਭਾਸ਼ਾਲੀ ਖਿਡਾਰੀਆਂ 'ਚ ਗਿਣੇ ਜਾਂਦੇ ਹਨ | ਇਹ ਯੂਰਪੀਨ ਟੀਮ ਇਕ ਸਖ਼ਤ ਚੁਣੌਤੀ ਬਣ ਸਕਦੀ ਹੈ |
ਇਸ 'ਏ' ਪੂਲ 'ਚ ਨਿਊਜ਼ੀਲੈਂਡ ਦੀ ਟੀਮ ਕੋਚ ਡੇਰਿਨ ਸਮਿਥ ਦੇ ਮਾਰਗ ਦਰਸ਼ਨ 'ਚ ਵਿਸ਼ਵ ਕੱਪ ਹਾਕੀ ਖੇਡੇਗੀ | 'ਬਲੈਕ ਸਟਿਕਜ' ਦੇ ਨਾਂਅ ਨਾਲ ਜਾਣੀ ਜਾਂਦੀ ਇਹ ਟੀਮ ਕਿਸੇ ਦਿਨ ਦੁਨੀਆ ਦੀ ਸਭ ਤੋਂ ਸ਼ਕਤੀਸ਼ਾਲੀ ਟੀਮ ਨੂੰ ਹਰਾਉਣ ਦਾ ਦਮ ਰੱਖਦੀ ਹੈ | ਰਿਚਰਡ ਜੋਇਸ, ਜਾਰਜ, ਨਿੱਕ ਵੁਡਜ਼, ਕੇਨ ਰਸਲ, ਜਾਰਜ ਮੂਇਰ, ਮਾਰਕਸ ਚਾਇਲਡ ਆਦਿ ਖਿਡਾਰੀਆਂ 'ਤੇ ਸਭ ਦੀਆਂ ਨਿਗਾਹਾਂ ਰਹਿਣਗੀਆਂ | ਫਰਾਂਸ ਦੀ ਟੀਮ ਕੋਚ ਜੋਰਿਇਕ ਡੈਲਮ ਦੀ ਅਗਵਾਈ 'ਚ ਆਪਣੀ ਚੁਣੌਤੀ ਪੇਸ਼ ਕਰੇਗੀ | ਹੁਗੋ ਅਤੇ ਟੋਮ ਸਭ ਤੋਂ ਅਨੁਭਵੀ ਖਿਡਾਰੀ ਹਨ | ਵਿਕਟਰ ਚਾਰਲੈਂਡ ਵਧੀਆ ਡਰੈਗ ਫਲਿਕਰ ਹੈ | ਬਾਕੀ ਖਿਡਾਰੀ ਲੁਕਵੱਡ, ਕਲੇਮੰਟ ਨਿਕੇਲਸ ਵੀ ਦਮਦਾਰ ਸਾਬਤ ਹੋ ਸਕਦੇ ਹਨ | ਪੂਲ 'ਬੀ' 'ਚ ਓਸੀਨਿਆ ਮਹਾਂਦੀਪ ਦੀ ਦੂਜੀ ਵੱਡੀ ਤੋਪ ਆਸਟ੍ਰੇਲੀਆ ਦੀ ਟੀਮ ਹੈ | ਕੋਚ ਕੋਲਿਨ ਬੈਚ ਇਸ ਦਾ ਕੋਚ ਹੈ | ਗੋਲਕੀਪਰ ਐਡਰਿਓ ਚਾਰਟਰ ਦੇ ਨਾਲ-ਨਾਲ ਡੇਨੀਅਲ, ਟੋਮ ਕਰੇਗ, ਟਰੈਟ ਮਿਟਨ, ਜੇਲ ਵਸਕੀ, ਬਲੇਕ ਗਰੋਵਜ਼, ਡੇਨੀਅਲ ਆਦਿ ਖਿਡਾਰੀਆਂ ਵਾਲੀ ਆਸਟ੍ਰੇਲੀਆ ਟੀਮ ਅਸੀਂ ਸਮਝਦੇ ਹਾਂ ਕਿ ਵੱਡੀਆਂ ਉਮੀਦਾਂ ਲੈ ਕੇ ਇਸ ਵਿਸ਼ਵ ਕੱਪ ਨੂੰ ਖੇਡਣ ਆਈ ਹੋਵੇਗੀ | ਇੰਗਲੈਂਡ ਦੀ ਟੀਮ ਕੋਚ ਡੇਨੀ ਕੈਰੀ ਦੀ ਰਹਿਨੁਮਾਈ 'ਚ ਇਹ ਟੂਰਨਾਮੈਂਟ ਖੇਡ ਰਹੀ ਹੈ | ਬੈਰੀ ਮਿਡਲਟਨ, ਐਡਮ ਡਿਕਸਨ, ਸਾਮ ਵਾਰਡ, ਡੇਵਿਡ ਐਮਜ, ਕਰੀਡ ਆਦਿ ਅਨੁਭਵੀ ਖਿਡਾਰੀਆਂ ਨਾਲ ਸਜੀ ਇੰਗਲੈਂਡ ਦੀ ਟੀਮ ਛੁਪੇ ਰੁਸਤਕ ਸਾਬਤ ਹੋ ਸਕਦੀ ਹੈ | ਗੋਲਕੀਪਰ ਜਾਰਜ ਪਿਨਰ 'ਤੇ ਇੰਗਲੈਂਡ ਨੂੰ ਬਹੁਤ ਸਾਰੀਆਂ ਆਸਾਂ ਹਨ |
'ਬੀ' ਪੂਲ ਦੀ ਹੀ ਆਇਰਲੈਂਡ ਦੀ ਟੀਮ ਕੋਚ ਅਲੈਗਜ਼ੈਂਡਰ ਕੋਕਸ ਦੀ ਰਹਿਨੁਮਾਈ 'ਚ ਇਸ ਵਿਸ਼ਵ ਕੱਪ ਹਾਕੀ ਸਭ ਨੂੰ ਹੈਰਾਨ ਕਰਨ ਆਈ ਹੈ | ਗੋਲਕੀਪਰ ਡੇਵਿਡ ਹਾਰਟੇ, ਕ੍ਰਿਸ ਕਾਰਗੋ, ਮਿਚ ਡਾਰਲਿੰਗ, ਲੀ, ਕੋਟੇ, ਐਲਨ ਸੋਥਨ, ਲਿਊਕ ਮੇਡਲੇ ਆਦਿ ਖਿਡਾਰੀ ਆਇਰਲੈਂਡ ਦੀ ਟੀਮ ਦੀ ਸ਼ਕਤੀ ਹਨ | ਇਸੇ ਪੂਲ 'ਚ ਚੀਨ ਦੀ ਟੀਮ ਇਕ ਬਹੁਤ ਹੀ ਅਨੁਭਵੀ ਅਤੇ ਕਾਮਯਾਬ ਦੱਖਣੀ ਕੋਰੀਆ ਕੋਚ ਕਿਮ ਸੈਂਗ ਰੀਓਲ ਦੇ ਮਾਰਗ ਦਰਸ਼ਨ 'ਚ ਹੈ | ਗੋਲਕੀਪਰ ਜੀਵਏ, ਗਿਉਜਿਨ, ਮੈਗ ਡੀਹਾਓ, ਸੂਲਿਕਸਿੰਗ, ਵੈਨਲੋਂਗ, ਸੂ ਜੁਨ ਆਦਿ ਖਿਡਾਰੀ ਚੀਨ ਦੀ ਟੀਮ ਦੀ ਜਿੰਦਜਾਨ ਹਨ | ਜ਼ਿਕਰਯੋਗ ਹੈ ਕਿ ਚੀਨ ਦੀ ਟੀਮ ਪਹਿਲੀ ਵਾਰ ਵਿਸ਼ਵ ਕੱਪ ਹਾਕੀ ਖੇਡ ਰਹੀ ਹੈ | ਜਿਥੋਂ ਤੱਕ ਪੂਲ 'ਸੀ' 'ਚ ਬੈਲਜੀਅਮ ਦੀ ਟੀਮ ਦਾ ਸਵਾਲ ਹੈ, ਭਾਵੇਂ ਚੈਂਪੀਅਨਜ਼ ਟਰਾਫੀ ਹਾਕੀ 'ਚ ਉਸ ਨੇ ਵਧੀਆ ਖੇਡ ਦਾ ਮੁਜ਼ਾਹਰਾ ਨਹੀਂ ਕੀਤਾ ਪਰ 'ਲਾਲ ਸ਼ੇਰ' ਕਹੀ ਜਾਣ ਵਾਲੀ ਬੈਲਜ਼ੀਅਮ ਦੀ ਟੀਮ ਸ਼ਕਤੀਸ਼ਾਲੀ ਟੀਮਾਂ ਲਈ ਪ੍ਰੇਸ਼ਾਨੀ ਦਾ ਸਬੱਬ ਬਣ ਸਕਦੀ ਹੈ | ਕੋਚ ਸ਼ਾਨੇ ਮਕਲਿਊਡ ਨੂੰ ਆਪਣੇ ਖਿਡਾਰੀਆਂ ਵਿਨਸੈਂਟ, ਵਾਨ ਡਾਰੇਨ, ਅਲੈਂਗਜ਼ੈਂਡਰ, ਆਰਥਰ, ਸਾਇਮਨ 'ਤੇ ਪੂਰਾ ਭਰੋਸਾ ਹੈ ਕਿ ਉਹ ਟੇਮ ਬੂਨ, ਕੇਡਰਿਕ ਚਾਰਲੀਅਰ ਆਦਿ ਨਾਲ ਮਿਲ ਕੇ ਵੱਡੇ ਉਲਟਫੇਰ ਕਰ ਸਕਦੇ ਹਨ | ਭਾਰਤੀ ਟੀਮ ਕੋਚ ਹਰਿੰਦਰ ਦੇ ਮਾਰਗ ਦਰਸ਼ਨ 'ਚ ਵਿਸ਼ਵ ਹਾਕੀ 'ਚ ਕਿਸੇ ਬਹੁਤ ਵੱਡੀ ਕਾਮਯਾਬੀ ਨੂੰ ਪ੍ਰਾਪਤ ਕਰਨਾ ਚਾਹੇਗੀ | ਟੀਮ 'ਚ ਜ਼ਿਆਦਾ ਖਿਡਾਰੀ ਘੱਟ ਅਨੁਭਵੀ ਵੀ ਹਨ ਪਰ ਦੂਜੇ ਪਾਸੇ ਗੋਲਕੀਪਰ ਸ੍ਰੀ ਜੇਸ, ਹਰਮਨਪ੍ਰੀਤ ਸਿੰਘ, ਬਰਿੰਦਰ ਲਾਕੜਾ, ਕੋਥਾਜੀਤ ਸਿੰਘ, ਮਨਪ੍ਰੀਤ ਸਿੰਘ, ਅਕਾਸ਼ਦੀਪ ਸਿੰਘ, ਚਿੰਗਲੇਨਸਨਾ, ਸੁਮਿਤ, ਲਲਿਤ ਕੁਮਾਰ, ਹਾਰਦਿਕ ਸਿੰਘ ਆਦਿ ਟੀਮ 'ਚ ਆਪਣੇ ਬੁਲੰਦ ਇਰਾਦਿਆਂ ਨਾਲ ਜਾਨ ਫੂਕ ਰਹੇ ਹਨ | ਭਾਰਤ ਦੀ ਦੱਖਣੀ ਅਫਰੀਕਾ ਵਿਰੱੁਧ ਜਿੱਤ ਪ੍ਰਭਾਵਸ਼ਾਲੀ ਰਹੀ |
ਦੱਖਣੀ ਅਫਰੀਕਾ ਦੀ ਟੀਮ ਕੋਚ ਮਾਰਕ ਹੋਪਕਿਨਜ਼ ਦੀ ਰਹਿਨੁਮਾਈ 'ਚ ਖੇਡਣ ਆਈ ਹੈ | ਅਫਰੀਕਾ ਕੱਪ ਦੀ ਜੇਤੂ ਇਹ ਟੀਮ ਕੈਪਟਨ ਟਿਮ, ਆਸਟਿਨ ਸਮਿੱਥ ਅਤੇ ਹਾਲਕਿੱਟ ਭੁਵਨੇਸ਼ਵਰ ਵਿਖੇ ਇਕ ਪ੍ਰਭਾਵਸ਼ਾਲੀ ਪ੍ਰਦਰਸ਼ਨ ਦੀ ਆਸ ਲੈ ਕੇ ਆਏ ਹਨ | ਗੋਲਕੀਪਰ ਗੋਵਾਨ, ਟੇਅਲਰ, ਜੂਲੀਅਨ, ਨਿਕ ਸਪੂਨਰ, ਰਿਦਰਡ, ਟਾਈਸਨ, ਬਿਲੀ ਆਦਿ ਖਿਡਾਰੀ ਦੱਖਣੀ ਅਫਰੀਕਾ ਦੇ ਗੌਰਵ ਲਈ ਪੂਰੀ ਵਾਹ ਲਾਉਣਗੇ | 'ਸੀ' ਪੂਲ ਦੀ ਕੈਨੇਡਾ ਦੀ ਟੀਮ ਪਾਲ ਬੰਡੀ ਕੋਚ ਦੀ ਅਗਵਾਈ 'ਚ ਖੇਡ ਰਹੀ ਹੈ | ਗੋਲਕੀਪਰ ਡੇਵਿਡ ਕਾਰਟਰ, ਬਰੈਡਡਨ, ਓਲੀਵਰ, ਜੋਹਨ, ਜੈਮੀ, ਮਾਰਕ ਪੀਅਰਸਨ, ਮੈਥਿਊ, ਸਕੋਟ ਆਦਿ ਕੈਨੇਡਾ ਦੀ ਟੀਮ ਦੇ ਸ਼ਕਤੀਸ਼ਾਲੀ ਖਿਡਾਰੀ ਹਨ ਅਤੇ ਵੱਡੇ ਉਲਟਫੇਰ ਕਰ ਸਕਦੇ ਹਨ |
ਜਿਥੋਂ ਤੱਕ ਪੂਲ 'ਡੀ' ਦਾ ਸਬੰਧ ਹੈ, ਇਹ ਦੁਨੀਆ ਦੀਆਂ ਸ਼ਕਤੀਸ਼ਾਲੀ ਟੀਮਾਂ ਨਾਲ ਲਬਰੇਜ ਹੈ | ਨੀਦਰਲੈਂਡ ਦੀ ਟੀਮ ਕੋਚ ਮੈਕਸ ਕਾਲਡਸ ਦੀ ਰਹਿਨੁਮਾਈ 'ਚ ਖੇਡ ਰਹੀ ਹੈ | ਗੋਲਕੀਪਰ ਸੇਮ ਵਨਡਰ ਬਿਲੀ ਬੇਕਰ, ਲਾਰਸ ਬਲਕ, ਫਲੋਰਿਸ, ਬਿ੍ਕਮੇਨ, ਸੂਮੈਨ ਆਦਿ ਖਿਡਾਰੀ ਟੀਮ ਦੀ ਸ਼ਕਤੀ ਹਨ | ਵੀਡਨ ਦੀ ਟੀਮ 'ਚ ਵਾਪਸੀ ਡਚ ਈਮ ਲਈ ਬਹੁਤ ਸਹਾਇਕ ਹੋਵੇਗੀ | ਡਚ ਟੀਮ ਖਤਰਨਾਕ ਇਰਾਦਿਆਂ ਨਾਲ ਵਿਸ਼ਵ ਕੱਪ ਹਾਕੀ ਵਿਚ ਤਹਿਲਕਾ ਮਚਾਉਣ ਆਈ ਹੈ |
ਇਸੇ ਪੂਲ 'ਚ ਜਰਮਨੀ ਦੀ ਟੀਮ ਸਟੀਫਨ ਕੇਰਮਸ ਕੋਚ ਦੀ ਰਹਿਨੁਮਾਈ 'ਚ ਹੈ | ਗੋਲਕੀਪਰ ਮਾਰਕ ਐਪਲ, ਫਲੋਰੀਅਨ ਟੋਮ, ਵਿੰਡ ਫੀਡਰ, ਵੈਲਨ, ਮਾਰਟਿਨ ਹੇਨਰ, ਗ੍ਰੈਮ ਬੁਚ ਆਦਿ ਖਿਡਾਰੀ ਜਰਮਨ ਟੀਮ ਦੀ ਜਿੰਦਜਾਨ ਹਨ | ਆਖਰੀ ਵਾਰ ਵਰਲਡ ਹਾਕੀ ਲੀਗ 'ਚ ਭੁਵਨੇਸ਼ਵਰ ਵਿਖੇ ਹੀ ਇਸ ਟੀਮ ਨੇ ਵਧੀਆ ਪ੍ਰਦਰਸ਼ਨ ਕੀਤਾ ਸੀ |
ਇਸ ਪੂਲ ਦੀ ਮਲੇਸ਼ੀਆ ਦੀ ਟੀਮ ਏਸ਼ੀਆ ਮਹਾਂਦੀਪ ਦੀ ਹੁਣ ਸ਼ਕਤੀਸ਼ਾਲੀ ਟੀਮ ਹੈ | ਡੱਚ ਕੋਚ ਰੋਏਲੈਟ ਓਲਟਮੈਂਜ ਦੇ ਮਾਰਗ ਦਰਸ਼ਨ 'ਚ ਇਹ ਟੀਮ ਫੈਜ਼ ਅਲੀ, ਹਸਨ, ਰੋਜ਼ਮੀ ਆਦਿ ਖਿਡਾਰੀਆਂ ਵਾਲੀ ਟੀਮ ਗੋਲਕੀਪਰ ਕੁਮਾਰ ਸੁਭਰਾਮਨੀਅਮ, ਸਈਅਦ, ਨਬੀ ਨੂਰ ਆਦਿ ਪ੍ਰਤਿਭਾਸ਼ਾਲੀ ਖਿਡਾਰੀਆਂ ਨਾਲ ਮਿਲ ਕੇ ਵਿਸ਼ਵ ਕੱਪ ਹਾਕੀ 'ਚ ਇਕ ਵੱਡੀ ਚੁਣੌਤੀ ਵੀ ਸਾਬਤ ਹੋ ਸਕਦੀ ਹੈ | ਇਸ ਪੂਲ ਦੀ ਆਖਰੀ ਟੀਮ ਏਸ਼ੀਆ ਮਹਾਂਦੀਪ ਦੀ ਇਕ ਹੋਰ ਵੱਡੀ ਤੋਪ ਪਾਕਿਸਤਾਨ ਦੀ ਟੀਮ ਸਵਦੇਸ਼ੀ ਕੋਚ ਤਾਕੀਰ ਦਾਰ ਦੇ ਮਾਰਗ ਦਰਸ਼ਨ 'ਚ ਵਿਸ਼ਵ ਕੱਪ ਹਾਕੀ ਖੇਡ ਰਹੀ ਹੈ | ਗੋਲਕੀਪਰ ਇਮਰਾਨ ਭੱਟ, ਰਾਸ਼ਿਦ ਮਹਿਮੂਦ, ਮੁਹੰਮਦ ਜੁਬੈਰ, ਮੁਹੰਮਦ ਰਿਜਵਾਨ, ਇਰਫਾਨ, ਅਲੀਸ਼ਾਨ, ਅਲੀਮ ਬਲਾਲ ਆਦਿ ਖਿਡਾਰੀ ਪਾਕਿਸਤਾਨ ਦੀ ਟੀਮ ਨੂੰ ਸ਼ਕਤੀਸ਼ਾਲੀ ਬਣਾਉਂਦੇ ਹਨ |
ਅਸੀਂ ਇੰਤਜ਼ਾਰ ਕਰਾਂਗੇ ਇਹ ਦੇਖਣ ਲਈ ਕਿ ਭੁਵਨੇਸ਼ਵਰ ਵਿਖੇ ਕਿਹੜੀ ਟੀਮ ਚੈਂਪੀਅਨ ਬਣਦੀ ਹੈ ਤੇ ਕਿਹੜੀ ਫਾਡੀ ਰਹਿ ਜਾਂਦੀ ਹੈ |

-ਡੀ. ਏ. ਵੀ. ਕਾਲਜ, ਅੰਮਿ੍ਤਸਰ |
ਮੋਬਾ: 98155-35410

ਬੈਡਮਿੰਟਨ ਵਿਚ ਲਕਸ਼ੇ ਸੇਨ ਇਕ ਨਵੀਂ ਪ੍ਰਤਿਭਾ-ਜੂਨੀਅਰ ਵਿਚ ਕਾਂਸੀ ਦਾ ਤਗਮਾ

ਲਕਸ਼ੇ ਸੇਨ 18 ਅਗਸਤ, 2001 ਨੂੰ ਅਲਮੋਰਾ ਉੱਤਰਾਖੰਡ ਵਿਚ ਸਾਧਾਰਨ ਮੱਧਵਰਗੀ ਪਰਿਵਾਰ ਵਿਚ ਜਨਮਿਆ | ਉਸ ਨੇ ਜੂਨੀਅਰ ਵਿਸ਼ਵ ਕੱਪ ਵਿਚ ਇਕ ਨਵਾਂ ਇਤਿਹਾਸ ਰਚ ਕੇ ਰੱਖ ਦਿੱਤਾ ਹੈ | ਇਸ ਸਾਲ ਦਾ ਇਹ ਭਾਰਤ ਦਾ ਇਕਲੌਤਾ ਤਗਮਾ ਹੈ ਜੋ ਲਕਸ਼ੇ ਨੇ ਭਾਰਤ ਦੇ ਨਾਂਅ ਕਾਂਸੀ ਦਾ ਤਗਮਾ ਕੀਤਾ ਹੈ | ਇਹ ਭਾਰਤ ਦੀ ਇਸ ਖੇਡ ਪੁਰਸ਼ ਸਿੰਗਲਜ਼ ਵਿਚ 7 ਸਾਲ ਦੇ ਸੋਕੇ ਤੋਂ ਬਾਅਦ ਪ੍ਰਾਪਤੀ ਹੈ | ਇਸ ਤੋਂ ਪਹਿਲਾਂ ਸਮੀਰ ਵਰਮਾ ਤੇ ਪਰਣੀਤ ਨੇ ਇਹ ਤਗਮੇ ਜਿੱਤੇ ਸਨ | ਪਹਿਲਾਂ ਸਾਇਨਾ ਨੇਹਵਾਲ ਨੇ ਇਸ ਦਾ ਸੁਨਹਿਰੀ ਆਗਮਨ 2008 ਵਿਚ ਸੋਨੇ ਦਾ ਤਗਮਾ ਜਿੱਤ ਕੇ ਕੀਤਾ ਸੀ |
ਸੈਮੀਫਾਈਨਲ ਵਿਚ ਉਸ ਦਾ ਮੁਕਾਬਲਾ ਥਾਈਲੈਂਡ ਦੇ ਖਿਡਾਰੀ ਕੁਲਨਾਵਰਤ ਨਾਲ ਸੀ, ਜਿਸ ਦੀ ਰੈਂਕਿੰਗ ਵਿਚ ਬਹੁਤ ਫਰਕ ਸੀ | ਪਹਿਲੀ ਗੇਮ ਲਕਸ਼ੇ ਨੇ ਜਿੱਤੀ ਪਰ ਮੈਚ ਤਿੰਨ ਗੇਮਾਂ ਤੱਕ ਚਲਿਆ ਗਿਆ |
ਥਾਈਲੈਂਡ ਦਾ ਖਿਡਾਰੀ ਉਸ ਤੋਂ ਉੱਤਮ ਰੈਂਕਿੰਗ ਵਾਲਾ ਖਿਡਾਰੀ ਸੀ ਤੇ ਇਹ ਮੈਚ ਉਸ ਨੇ 20-22, 21-16, 21-13 ਨਾਲ ਜਿੱਤ ਲਿਆ | ਲਕਸ਼ੇ ਦੀ ਵਿਸ਼ਵ ਰੈਂਕਿੰਗ ਕਿਸੇ ਸਮੇਂ 8 ਜੂਨ, 2018 ਨੂੰ 69 'ਤੇ ਪਹੁੰਚ ਗਈ ਸੀ, ਜੋ ਕਿ ਇਸ ਸਮੇ ਕੁਝ ਵਧ ਕੇ 87 ਹੋ ਗਈ ਹੈ | ਇਸ ਦਾ ਕਾਰਨ ਅੰਤਰਰਾਸ਼ਟਰੀ ਮੈਚ ਖੇਡਣ ਦਾ ਅਵਸਰ ਨਾ ਮਿਲਣਾ ਹੈ | ਪਰ ਲਕਸ਼ੇ ਨੇ ਸੈਮੀ-ਫਾਈਨਲ ਤੱਕ ਦੇ ਸਫਰ ਵਿਚ ਕਈ ਦਿੱਗਜ ਖਿਡਾਰੀਆਂ ਨੂੰ ਮਾਤ ਦੇ ਕੇ ਇਹ ਆਸ ਜਗਾ ਦਿੱਤੀ ਸੀ ਕਿ ਉਹ ਜ਼ਰੂਰ ਹੀ ਸੋਨੇ ਦਾ ਤਗਮਾ ਜਿੱਤੇਗਾ | ਉਸ ਨੇ ਬਹੁਤ ਹੀ ਸੰਘਰਸ਼ਮਈ ਖੇਡ ਖੇਡੀ ਤੇ ਇਹ ਸਾਬਤ ਕਰ ਦਿੱਤਾ ਕਿ ਭਾਰਤ ਵਿਚ ਸੰਸਾਰ ਪੱਧਰ ਦੇ ਖਿਡਾਰੀਆਂ ਦੀ ਕੋਈ ਕਮੀ ਨਹੀਂ | ਭਾਰਤ ਵਿਚ ਬੈਡਮਿੰਟਨ ਅਕੈਡਮੀਆਂ ਨੇ ਇਸ ਖੇਡ ਨੂੰ ਪ੍ਰਫੁੱਲਿਤ ਕਰਨ ਕਈ ਉਪਰਾਲੇ ਕੀਤੇ ਹਨ | ਲਕਸ਼ੈ ਸੇਨ ਵੀ ਇਸ ਦੀ ਦੇਣ ਹੈ | ਇਹ ਅਜਿਹੀ ਖੇਡ ਹੈ ਜਿਸ ਤੋਂ ਭਾਰਤ ਨੂੰ ਆਸ ਹੋ ਸਕਦੀ ਹੈ ਕਿ ਟੋਕੀਓ ਉਲੰਪਿਕ ਵਿਚ ਭਾਰਤ ਦੀ ਝੋਲੀ ਵਿਚ ਤਗਮੇ ਪੈ ਸਕਦੇ ਹਨ |

-274-ਏ.ਐਕਸ. ਮਾਡਲ ਟਾਊਨ ਐਕਸਟੈਨਸ਼ਨ, ਲੁਧਿਆਣਾ | ਮੋਬਾ: 98152-55295

ਪੰਜਾਬੀਆਂ ਦੀ ਮਹਿਬੂਬ ਖੇਡ ਕਬੱਡੀ ਦਾ ਡਿਗਿਆ ਵੱਡਾ ਥੰਮ੍ਹ-ਸੁਖਮਨ ਸਿੰਘ ਚੋਹਲਾ ਸਾਹਿਬ

ਕਰੀਬ ਇਕ ਦਹਾਕਾ ਕਬੱਡੀ ਗਰਾਊਾਡਾਂ ਅੰਦਰ ਸ਼ੇਰ ਵਾਂਗ ਗਰਜੇ ਹਰਫਨਮੌਲਾ ਖਿਡਾਰੀ ਸੁਖਮਨ ਸਿੰਘ ਚੋਹਲਾ ਸਾਹਿਬ ਦਾ ਭਰ ਜੋਬਨ 'ਚ ਇਸ ਫਾਨੀ ਸੰਸਾਰ ਤੋਂ ਰੁਖਸਤ ਹੋਣਾ ਕਬੱਡੀ ਜਗਤ ਲਈ ਅਕਹਿ ਤੇ ਅਸਹਿ ਸਦਮਾ ਹੈ | ਨਰੋਏ ਭਰਵੇਂ ਜੁੱਸੇ ਤੇ ਕਬੱਡੀ ਦੇ ਕੌਤਕੀ ਦਾਅ-ਪੇਚਾਂ ਨਾਲ ਲਬਰੇਜ਼ ਲੰਬੇ-ਲੰਝੇ ਸੁਖਮਨ ਨੇ ਇਮਾਨਦਾਰੀ ਨਾਲ ਹਮੇਸ਼ਾ ਸਾਫ਼-ਸੁਥਰੀ ਕਬੱਡੀ ਖੇਡੀ ਤੇ ਖੇਡ ਨੂੰ ਖੇਡ ਕਰਕੇ ਜਾਣਿਆ ਅਤੇ ਮਾਣਿਆ | ਪੌਣੇ ਕੁ ਤਿੰਨ ਦਹਾਕੇ ਪਹਿਲਾਂ ਜ਼ਿਲ੍ਹਾ ਤਰਨ ਤਾਰਨ ਦੇ ਇਤਿਹਾਸਕ ਨਗਰ ਚੋਹਲਾ ਸਾਹਿਬ ਵਿਖੇ ਪਿਤਾ ਕੁਲਵੰਤ ਸਿੰਘ ਦੇ ਘਰ ਮਾਤਾ ਸੁਖਜੀਤ ਕੌਰ ਦੀ ਕੁੱਖੋਂ ਪੈਦਾ ਹੋਇਆ ਸੁਖਮਨ ਸਾਫ ਦਿਲ ਤੇ ਸੱਚਾ-ਸੁੱਚਾ ਇਨਸਾਨ ਸੀ | ਸ਼ੁਰੂਆਤੀ ਦਿਨਾਂ ਵਿਚ ਫਰੀਦਕੋਟ ਦੇ ਪਹਿਲਵਾਨੀ ਆਖਾੜੇ 'ਚ ਥੋੜ੍ਹਾ ਸਮਾਂ ਸੁਖਮਨ ਨੇ ਪਹਿਲਵਾਨੀ ਦੇ ਦਾਅ-ਪੇਚ ਵੀ ਸਿੱਖੇ, ਪਰ ਉਸ ਦੇ ਤਾਏ ਪਹਿਲਵਾਨ ਲੱਖਾ ਸਿੰਘ ਦੀ ਸਖ਼ਤ ਮਿਹਨਤ ਸਦਕਾ ਸੁਖਮਨ ਨੇ 2008 'ਚ ਖੇਡ ਕਬੱਡੀ ਦਾ ਸਫ਼ਲ ਆਗਾਜ਼ ਕੀਤਾ | ਗਜ਼ ਚੌੜੀ ਛਾਤੀ ਤੇ ਸੁਡੌਲ ਸਰੀਰ ਵਾਲੇ ਗੱਭਰੂ ਸੁਖਮਨ ਨੇ ਜਦ ਸਿੱਧਾ ਪ੍ਰਵੇਸ਼ ਕਬੱਡੀ ਓਪਨ ਵਿਚ ਕੀਤਾ ਤਾਂ ਕਬੱਡੀ ਜਗਤ ਦੇ ਮਾਹਿਰਾਂ ਨੇ ਇਸ ਚੋਬਰ 'ਤੇ ਖੇਡ ਕਬੱਡੀ ਦੇ ਵੱਡੇ ਮੱਲ ਹੋਣ ਦੀ ਵਿਲੱਖਣ ਤੇ ਅਮਿੱਟ ਮੋਹਰ ਲਗਾਈ | 2013 ਵਿਚ ਫਿਰ ਇੰਗਲੈਂਡ ਦੇ ਸਮੁੱਚੇ ਖੇਡ ਸੀਜ਼ਨ ਦਾ ਪ੍ਰਥਮ ਧਾਵੀ ਬਣ ਖੇਡ ਕਬੱਡੀ ਦੇ ਬੇਤਾਜ ਬਾਦਸ਼ਾਹ ਦਾ ਮਾਣ ਪ੍ਰਾਪਤ ਕੀਤਾ | 2014 'ਚ ਕੈਨੇਡਾ ਦੀਆਂ ਘਾਹਦਾਰ ਕਬੱਡੀ ਗਰਾਊਾਡਾਂ 'ਚ ਸੁਖਮਨ ਦੀ ਖੂਬ ਤੂਤੀ ਬੋਲੀ | ਉਸ ਨੇ ਪੰਜਾਬ ਦੇ ਵੀ ਵੱਡੇ ਨਾਮੀ ਕਬੱਡੀ ਖੇਡ ਮੇਲਿਆਂ ਸ੍ਰੀ ਅਨੰਦਪੁਰ ਸਾਹਿਬ, ਸ੍ਰੀ ਹਜ਼ੂਰ ਸਾਹਿਬ, ਹਕੀਮਪੁਰ, ਕਪੂਰਥਲਾ, ਪਰਸਰਾਮਪੁਰ, ਕਮਾਲਪੁਰਾ, ਘਰਿਆਲਾ, ਰਾਏਕੋਟ, ਸੁਲਤਾਨਵਿੰਡ, ਸੁਰ ਸਿੰਘ ਵਾਲਾ, ਜਲੰਧਰ, ਚੋਹਲਾ ਸਾਹਿਬ, ਮੁਠੱਡਾ, ਸੈਦੋਕੇ, ਕੈਰੋਂ, ਰਾਣੀਵਲਾਹ ਆਦਿ ਤੋਂ ਅਣਗਿਣਤ ਕਬੱਡੀ ਕੱਪਾਂ 'ਤੇ ਆਪਣੀ ਜਾਨਦਾਰ ਖੇਡ ਦੇ ਜੌਹਰ ਦਿਖਾਏ | 2018 'ਚ ਚੋਹਲਾ ਸਾਹਿਬ ਦੇ ਵੱਡਆਕਾਰੀ ਕਬੱਡੀ ਕੱਪ 'ਤੇ ਉੱਘੇ ਪ੍ਰਮੋਟਰ ਰਣਜੀਤ ਢੰਡਾ, ਲਾਲੀ ਢੇਸੀ, ਟੀਟੂ ਕੰਗ ਤੇ ਬਿੰਦਰ ਮਾਹਲ ਵਲੋਂ ਫਾਰਚੂਨਰ ਗੱਡੀ ਨਾਲ ਸੁਖਮਨ ਨੂੰ ਨਵਾਜਿਆ ਗਿਆ, ਜੋ ਮਾਝਾ ਖੇਤਰ 'ਚ ਕਬੱਡੀ ਖੇਡ ਅੰਦਰ ਪਹਿਲਾ ਵੱਡਾ ਇਨਾਮ ਚੋਬਰ ਸੁਖਮਨ ਦੇ ਹਿੱਸੇ ਆਇਆ | ਕਬੱਡੀ ਦੇ ਰੁਸਤਮ ਖਿਡਾਰੀ ਹਰਜੀਤ ਬਰਾੜ ਦੀ 20 ਵਰ੍ਹੇ ਪਹਿਲਾਂ ਹੋਈ ਮੌਤ ਨੇ ਕਬੱਡੀ ਪ੍ਰੇਮੀਆਂ ਨੂੰ ਧੁਰ ਅੰਦਰੋਂ ਝੰਜੋੜ ਕੇ ਰੱਖ ਦਿੱਤਾ ਸੀ, ਅੱਜ ਇਕ ਫੇਰ ਜੱਗ ਜੇਤੂ ਖਿਡਾਰੀ ਸੁਖਮਨ ਦੀ ਹੋਈ ਅਚਨਚੇਤ ਮੌਤ ਨਾਲ ਜਿੱਥੇ ਪਰਿਵਾਰ ਗਹਿਰੇ ਸਦਮੇ 'ਚ ਹੈ, ਉੱਥੇ ਕਬੱਡੀ ਪ੍ਰੇਮੀਆਂ ਦੇ ਮਨ ਵੀ ਅਫਸੋਸੇ ਹੋਏ ਨੇ, ਕਬੱਡੀ ਜਗਤ 'ਚ ਹਰ ਪਾਸੇ ਸੋਗ ਦੀ ਲਹਿਰ ਹੈ | ਕਬੱਡੀ ਜਗਤ ਅਤੇ ਪਰਿਵਾਰ ਨੂੰ ਕਦੇ ਵੀ ਨਾ ਪੂਰਾ ਹੋਣ ਵਾਲਾ ਘਾਟਾ ਹੈ ਸੁਖਮਨ ਦਾ ਭਰ ਜਵਾਨੀ 'ਚ ਫਾਨੀ ਸੰਸਾਰ ਨੂੰ ਅਲਵਿਦਾ ਕਹਿਣਾ |

-ਬੱਬੀ ਪੱਤੋ
ਪਿੰਡ ਤੇ ਡਾਕ: ਪੱਤੋ ਹੀਰਾ ਸਿੰਘ (ਮੋਗਾ) | ਮੋਬਾ: 98147-45867






Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX