ਤਾਜਾ ਖ਼ਬਰਾਂ


ਵਾਪਰ ਰਹੇ ਸੜਕ ਹਾਦਸਿਆਂ 'ਤੇ ਲਗਾਮ ਲਗਾਉਣ ਲਈ ਟਰੈਫਿਕ ਪੁਲਿਸ ਵੱਲੋਂ ਲਿਆ ਗਿਆ ਇਹ ਫ਼ੈਸਲਾ
. . .  6 minutes ago
ਚੰਡੀਗੜ੍ਹ, 17 ਜੁਲਾਈ (ਵਿਕਰਮਜੀਤ ਸਿੰਘ ਮਾਨ)- ਸੂਬੇ 'ਚ ਵੱਧ ਰਹੇ ਸੜਕ ਹਾਦਸਿਆਂ 'ਚ ਕਈ ਲੋਕਾਂ ਦੀ ਜਾਨ ਚਲੀ ਜਾਂਦੀ ਹੈ ਜਿਸ ਨੂੰ ਬਚਾਇਆ ਜਾ ਸਕਦਾ ਹੈ। ਇਸੇ ਨੂੰ ਦੇਖਦੇ ਹੋਏ ਟਰੈਫ਼ਿਕ ਏ.ਡੀ.ਜੀ.ਪੀ. ਐੱਸ.ਐੱਸ. ਚੌਹਾਨ ਵੱਲੋਂ ਜਾਰੀ ਹੁਕਮਾਂ ਮੁਤਾਬਿਕ ਟਰੈਫ਼ਿਕ ...
ਆਈ.ਪੀ.ਐੱਸ ਅਹੁਦੇ ਦੇ ਤਿੰਨ ਅਧਿਕਾਰੀ ਪਦ ਉੱਨਤ ਹੋ ਕੇ ਬਣੇ ਡੀ.ਜੀ.ਪੀ
. . .  36 minutes ago
ਚੰਡੀਗੜ੍ਹ, 17 ਜੁਲਾਈ (ਵਿਕਰਮਜੀਤ ਸਿੰਘ ਮਾਨ)- ਪੰਜਾਬ ਦੇ ਰਾਜਪਾਲ ਵੱਲੋਂ ਅੱਜ ਹੁਕਮ ਜਾਰੀ ਕਰ ਕੇ ਸਾਲ 1988 ਬੈਚ ਦੇ ਤਿੰਨ ਆਈ.ਪੀ.ਐੱਸ ਅਹੁਦੇ ਦੇ ਅਧਿਕਾਰੀਆਂ ਨੂੰ ਤਰੱਕੀ ਦੇ ਕੇ ਡੀ.ਜੀ.ਪੀ. ਬਣਾਇਆ ਗਿਆ ਹੈ। ਜਿਨ੍ਹਾਂ ਦੇ ਨਾਂਅ ਪ੍ਰਬੋਧ ਕੁਮਾਰ, ਰੋਹਿਤ ....
ਕੁਮਾਰਸਵਾਮੀ ਵੱਲੋਂ ਕਾਂਗਰਸੀ ਵਿਧਾਇਕਾਂ ਦੇ ਨਾਲ ਬੈਠਕ
. . .  1 minute ago
ਬੈਂਗਲੁਰੂ, 17 ਜੁਲਾਈ- ਸੁਪਰੀਮ ਕੋਰਟ ਵੱਲੋਂ ਬਾਗ਼ੀ ਵਿਧਾਇਕਾਂ ਦੀ ਪਟੀਸ਼ਨ 'ਤੇ ਫ਼ੈਸਲਾ ਸੁਣਾਏ ਜਾਣ ਤੋਂ ਬਾਅਦ ਬੈਂਗਲੁਰੂ 'ਚ ਮੁੱਖ ਮੰਤਰੀ ਐੱਚ.ਡੀ. ਕੁਮਾਰਸਵਾਮੀ ਬੈਂਗਲੁਰੂ 'ਚ ਕਾਂਗਰਸੀ ਵਿਧਾਇਕਾਂ ਦੇ ਨਾਲ ਬੈਠਕ ਕਰ ਰਹੇ...
ਸੰਵਿਧਾਨ, ਅਦਾਲਤ ਅਤੇ ਲੋਕਪਾਲ ਨੂੰ ਧਿਆਨ 'ਚ ਰੱਖਦੇ ਹੋਏ ਲਿਆ ਜਾਵੇਗਾ ਫ਼ੈਸਲਾ- ਕਰਨਾਟਕ ਦੇ ਸਪੀਕਰ
. . .  about 1 hour ago
ਨਵੀਂ ਦਿੱਲੀ, 17 ਜੁਲਾਈ- ਕਰਨਾਟਕ ਸੰਕਟ ਨੂੰ ਲੈ ਕੇ 15 ਬਾਗ਼ੀ ਵਿਧਾਇਕਾਂ ਦੀ ਪਟੀਸ਼ਨ 'ਤੇ ਸੁਪਰੀਮ ਕੋਰਟ ਨੇ ਫ਼ੈਸਲਾ ਸੁਣਾਉਂਦੇ ਹੋਏ ਸਪੀਕਰ ਨੂੰ ਵਿਧਾਇਕਾਂ ਦੇ ਅਸਤੀਫ਼ਿਆਂ 'ਤੇ ਫ਼ੈਸਲਾ ਲੈਣ ਲਈ ਕਿਹਾ ਹੈ। ਸੁਪਰੀਮ ਕੋਰਟ ਦੇ ਇਸ ਫ਼ੈਸਲੇ ਦਾ ਸਵਾਗਤ ਕਰਦਿਆਂ ...
ਜੈਤੋ ਵਿਖੇ ਪੰਡਿਤ ਜਵਾਹਰ ਲਾਲ ਨਹਿਰੂ ਦੀ ਯਾਦਗਾਰ ਵਾਲੀ ਜੇਲ੍ਹ ਦੀ ਕੋਠੜੀ ਦੀ ਡਿੱਗੀ ਛੱਤ
. . .  about 1 hour ago
ਜੈਤੋ, 17 ਜੁਲਾਈ (ਗੁਰਚਰਨ ਸਿੰਘ ਗਾਬੜੀਆ, ਨਿੱਜੀ ਪੱਤਰ ਪ੍ਰੇਰਕ)- ਦੋ ਦਿਨ ਲਗਾਤਾਰ ਪਏ ਰਹੇ ਮੀਂਹ ਨੇ ਜੈਤੋ ਵਿਖੇ ਸਥਿਤ ਪੰਡਿਤ ਜਵਾਹਰ ਲਾਲ ਨਹਿਰੂ ਜੀ ਦੀ ਯਾਦਗਾਰ ਵਾਲੀ ਜੇਲ੍ਹ ਦੀ ਕੋਠੜੀ ਦੀ ਛੱਤ ਡਿੱਗ ਗਈ ਹੈ ਅਤੇ ਦੂਜੀ ਬਿਲਡਿੰਗ ਦਾ ਹਿੱਸਾ ਵੀ ਕਿਸੇ ਸਮੇਂ ...
ਆਵਾਰਾ ਸਾਨ੍ਹ ਨਾਲ ਟਕਰਾਉਣ ਕਾਰਨ ਸੜਕ 'ਤੇ ਪਲਟਿਆ ਵਾਹਨ, ਵਾਲ-ਵਾਲ ਬਚਿਆ ਚਾਲਕ
. . .  about 1 hour ago
ਮੋਗਾ, 17 ਜੁਲਾਈ- ਮੋਗਾ ਦੇ ਕੋਟਕਪੂਰਾ ਬਾਈਪਾਸ 'ਤੇ ਅੱਜ ਤੜਕੇ ਟਾਟਾ 407 ਦੀ ਆਵਾਰਾ ਸਾਨ੍ਹ ਨਾਲ ਟੱਕਰ ਹੋ ਗਈ। ਇਸ ਹਾਦਸੇ 'ਚ ਸਾਨ੍ਹ ਦੀ ਮੌਤ ਹੋ ਗਈ ਅਤੇ ਵਾਹਨ ਚਾਲਕ ਵਾਲ-ਵਾਲ ਬਚ ਗਿਆ। ਹਾਲਾਂਕਿ ਟੱਕਰ 'ਚ ਟਾਟਾ 407 ਸੜਕ 'ਤੇ ਪਲਟ ਕੇ ਬੁਰੀ ....
ਡਰੇਨ 'ਚ ਪਾਣੀ ਜ਼ਿਆਦਾ ਆਉਣ ਕਾਰਨ ਦਰਜਨਾਂ ਏਕੜ ਫ਼ਸਲ ਹੋਈ ਤਬਾਹ
. . .  about 1 hour ago
ਭਗਤਾ ਭਾਈਕਾ, 17 ਜੁਲਾਈ (ਸੁਖਪਾਲ ਸਿੰਘ ਸੋਨੀ)- ਪਿਛਲੇ ਦੋ ਦਿਨ ਤੋ ਹੋ ਰਹੀ ਬਰਸਾਤ ਕਾਰਨ ਬਠਿੰਡਾ ਜ਼ਿਲ੍ਹੇ ਦੇ ਪਿੰਡ ਨਿਓੁਰ ਵਿਖੇ ਡਰੇਨ 'ਚ ਪਾਣੀ ਵਧੇਰੇ ਆਉਣ ਕਾਰਨ ਪਾਣੀ ਖੇਤਾਂ 'ਚ ਵੜ ਗਿਆ। ਡਰੇਨ ਦੇ ਪਾਣੀ ਨਾਲ ਤਕਰੀਬਨ ਦਰਜਨਾਂ ਏਕੜ ਫ਼ਸਲ ...
ਮੁੰਬਈ ਹਮਲੇ ਦਾ ਮਾਸਟਰਮਾਈਂਡ ਹਾਫ਼ਿਜ਼ ਸਈਦ ਗ੍ਰਿਫ਼ਤਾਰ
. . .  57 minutes ago
ਇਸਲਾਮਾਬਾਦ, 17 ਜੁਲਾਈ- ਲਾਹੌਰ ਤੋਂ ਗੁੱਜਰਾਂਵਾਲਾ ਜਾ ਰਹੇ ਮੁੰਬਈ ਹਮਲੇ ਦੇ ਮਾਸਟਰਮਾਈਂਡ ਹਾਫ਼ਿਜ਼ ਸਈਦ ਨੂੰ ਪਾਕਿਸਤਾਨ 'ਚ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਪਾਕਿਸਤਾਨੀ ਮੀਡੀਆ ਅਨੁਸਾਰ, ਹਾਫ਼ਿਜ਼ ਨੂੰ ਗ੍ਰਿਫ਼ਤਾਰ ਕਰਨ ਤੋਂ ਬਾਅਦ ਨਿਆਇਕ ਹਿਰਾਸਤ 'ਚ ...
ਮੁੰਬਈ ਹਮਲੇ ਦਾ ਮਾਸਟਰਮਾਈਂਡ ਹਾਫ਼ਿਜ਼ ਸਈਦ ਗ੍ਰਿਫ਼ਤਾਰ
. . .  1 minute ago
ਮੁੰਬਈ ਹਮਲੇ ਦਾ ਮਾਸਟਰਮਾਈਂਡ ਹਾਫ਼ਿਜ਼ ਸਈਦ ਗ੍ਰਿਫ਼ਤਾਰ........................
ਪੇਸ਼ੀ ਲਈ ਪਟਿਆਲਾ ਦੀ ਮਾਨਯੋਗ ਅਦਾਲਤ ਪਹੁੰਚੇ ਬ੍ਰਹਮ ਮਹਿੰਦਰਾ
. . .  about 2 hours ago
ਪਟਿਆਲਾ, 17 ਜੁਲਾਈ(ਅਮਨਦੀਪ ਸਿੰਘ)- ਸਿਮਰਨਜੀਤ ਸਿੰਘ ਬੈਂਸ 'ਤੇ ਪੰਜਾਬ ਦੇ ਕੈਬਿਨੇਟ ਮੰਤਰੀ ਬ੍ਰਹਮ ਮਹਿੰਦਰਾ ਵਲੋਂ ਕੀਤੇ ਮਾਣਹਾਨੀ ਦੇ ਮੁਕੱਦਮੇ ਨੂੰ ਲੈ ਖ਼ੁਦ ਮਹਿੰਦਰਾ ਅੱਜ ਪਟਿਆਲਾ ਦੀ ਮਾਨਯੋਗ ਅਦਾਲਤ 'ਚ ਪੇਸ਼ੀ ਲਈ ....
ਹੋਰ ਖ਼ਬਰਾਂ..

ਫ਼ਿਲਮ ਅੰਕ

ਕਰੀਨਾ ਕਪੂਰ ਖ਼ਾਨ

ਡਿਗਦੀ ਨੂੰ ਸਹਾਰਾ ਸੈਫ਼ ਦਾ

ਲੰਡਨ ਵਿਖੇ ਘੁੰਮਣ-ਫਿਰਨ ਲਈ 'ਬੇਬੋ' ਸਿਰਫ਼ 12 ਘੰਟੇ ਲਈ ਉਥੇ ਹਵਾਈ ਯਾਤਰਾ ਕਰਕੇ ਮੁੰਬਈ ਆ ਗਈ। ਯੂ.ਕੇ. 'ਚ ਉਹ ਤੈਮੂਰ ਨੂੰ ਘੁੰਮਾਉਣ-ਫਿਰਾਉਣ ਗਈ ਹੈ। 'ਡਾਂਸ ਇੰਡੀਆ ਡਾਂਸ' ਦੀ ਸ਼ੂਟਿੰਗ ਲਈ ਖਾਸ ਤੌਰ 'ਤੇ ਮੁੰਬਈ ਆਈ। ਇਸ ਸ਼ੋਅ ਰਾਹੀਂ ਉਹ ਟੀ.ਵੀ. 'ਤੇ ਪ੍ਰਵੇਸ਼ ਕਰ ਰਹੀ ਹੈ। ਇਸ 'ਡਾਂਸ ਇੰਡੀਆ ਡਾਂਸ' ਦੀ ਉਹ ਜੱਜ ਹੋਵੇਗੀ। ਇਹ ਹੈ ਕੰਮ ਲਈ ਸਮਰਪਣ, ਯੂ.ਕੇ. ਤੋਂ 12 ਘੰਟੇ ਲਈ ਮੁੰਬਈ ਆਉਣਾ। ਯੂਰਪ ਨਾਲ ਕਰੀਨਾ ਕਪੂਰ ਨੂੰ ਖਾਸ ਪਿਆਰ ਹੈ। ਉਥੇ ਜਾ ਕੇ ਵੀ ਉਹ ਕਸਰਤ ਨਹੀਂ ਭੁੱਲਦੀ। ਇਧਰ ਕਰੀਨਾ ਫਿਰ ਆਮਿਰ ਖ਼ਾਨ ਨਾਲ ਆ ਰਹੀ ਹੈ 'ਥ੍ਰੀ-ਈਡੀਅਟਸ' ਤੋਂ ਬਾਅਦ 'ਲਾਲ ਸਿੰਘ ਚੱਢਾ', ਨਵੀਂ ਫ਼ਿਲਮ ਕਰੀਨਾ ਨੇ ਆਮਿਰ ਨਾਲ ਸਾਈਨ ਕੀਤੀ ਹੈ। ਯੋਗ ਆਸਨ 'ਚ ਵੀ ਉਹ ਮਾਹਿਰ ਹੈ ਤੇ ਪਰਿਵਾਰ ਨਾਲ ਯੂ.ਕੇ. 'ਚ ਉਸ ਨੇ ਯੋਗਾ ਦਿਨ 'ਤੇ ਯੋਗ ਵੀ ਕੀਤਾ। ਕਰਨ ਜੌਹਰ ਲਈ ਇਕ ਵੈੱਬ ਸੀਰੀਜ਼ ਵੀ ਉਹ ਕਰ ਰਹੀ ਹੈ। 'ਲਾਲ ਸਿੰਘ ਚੱਢਾ' ਕਰੀਨਾ ਲਈ ਬਹੁਤ ਵੱਡੀ ਫ਼ਿਲਮ ਹੋਵੇਗੀ। ਇਸ ਦੌਰਾਨ ਕਰੀਨਾ ਨੇ ਕਿਹਾ ਕਿ ਫ਼ਿਲਮ ਦੇ ਸੰਪਾਦਨ ਸਮੇਂ ਔਰਤਾਂ ਦੇ ਕਿਰਦਾਰ 'ਤੇ ਵੀ ਕੈਂਚੀ ਚਲਦੀ ਹੈ ਤੇ ਬਹਾਨਾ ਲੰਬਾਈ ਦਾ ਲਾ ਦਿੱਤਾ ਜਾਂਦਾ ਹੈ। ਵੈੱਬ ਸੀਰੀਜ਼ 'ਚ ਅਜਿਹਾ ਨਹੀਂ ਹੈ। ਇਸ ਲਈ ਉਸ ਨੂੰ ਵੈੱਬ ਸੀਰੀਜ਼ ਪਸੰਦ ਹਨ। 20 ਸਾਲ ਦਾ ਉਸ ਦਾ ਕੈਰੀਅਰ ਸਫ਼ਲ ਹੈ। ਪਿਆਰੀ ਮਾਂ, ਸਫ਼ਲ ਗ੍ਰਹਿਣੀ ਤੇ ਮਤਰੇਈ ਧੀ ਸਾਰਾ ਨਾਲ ਵੀ ਪਿਆਰ ਕਰੀਨਾ ਸਭ ਦਾ ਦਿਲ ਜਿੱਤ ਰਹੀ ਹੈ। ਡਿਗਦੀ ਕਰੀਨਾ ਨੂੰ ਸੈਫ਼ ਨੇ ਹੀ ਸਹਾਰਾ ਦਿੱਤਾ ਸੀ। ਅਕਸਰ ਇਹ ਗੱਲ ਉਹ ਸਾਰਿਆਂ ਨੂੰ ਦੱਸਦੀ ਹੈ। 38 ਸਾਲ ਦੀ ਕਰੀਨਾ ਕੁਝ ਦਿਨ ਇਟਲੀ ਘੁੰਮ ਕੇ ਵੀ ਆਈ ਹੈ। ਧੁੱਪ 'ਚ ਬੇਹਾਲ ਕਰੀਨਾ ਦੀ ਇਕ ਫੋਟੋ 'ਤੇ ਲੋਕਾਂ ਨੇ 'ਆਂਟੀ', 'ਬੁੱਢੀ' ਲਿਖਿਆ ਤਾਂ ਉਹ ਭੜਕ ਪਈ ਕਿ ਥੋੜ੍ਹਾ ਖਿਆਲ ਕਰੋ। ਕਦੇ ਰਾਣੀ ਕਹਿੰਦੇ ਹੋ, ਜ਼ਰਾ ਇਹ ਫੋਟੋ ਕੀ ਆਈ ਕਿ ਰਾਤੋ-ਰਾਤ ਬੁੱਢੀ ਕਰੀਨਾ ਕਿਹਾ ਜਾ ਰਿਹਾ ਹੈ।


ਖ਼ਬਰ ਸ਼ੇਅਰ ਕਰੋ

ਯਾਮੀ ਗੌਤਮ

ਲਖਨਊ ਦੀ ਸੁਪਰ ਮਾਡਲ

'ਬਦਲਾਪੁਰ' ਤੋਂ ਬਾਅਦ ਦਿਨੇਸ਼ ਵਿਜਾਨ ਨੇ ਯਾਮੀ ਗੌਤਮ ਨੂੰ ਚੁਣਿਆ ਹੈ। ਆਯੂਸ਼ਮਨ ਖੁਰਾਣਾ ਨਾਲ ਯਾਮੀ ਗੌਤਮ ਨੂੰ ਲਿਆ ਗਿਆ ਹੈ। 'ਲਖਨਊ ਦੀ ਸੁਪਰ ਮਾਡਲ' ਦਾ ਕਿਰਦਾਰ ਯਾਮੀ ਨੂੰ ਮਿਲਿਆ ਹੈ। ਗੰਜੇਪਨ ਦੀ ਸਮੱਸਿਆ ਫ਼ਿਲਮ ਦਾ ਵਿਸ਼ਾ ਤੇ 'ਗਲੋਬਲ ਮੈਗਜ਼ੀਨ' ਲਈ ਯਾਮੀ ਦੀ ਚੋਣ ਹੋਈ ਹੈ। ਰਿਤਿਕ ਰੌਸ਼ਨ ਨਾਲ 'ਕਾਬਿਲ' ਕਰ ਚੁੱਕੀ ਚੰਡੀਗੜ੍ਹ ਸ਼ਹਿਰ ਦੀ ਕੁੜੀ ਯਾਮੀ ਨੇ ਪੰਜਾਬੀ ਸਿਨੇਮਾ ਲਈ ਵੀ ਕੰਮ ਕੀਤਾ ਹੈ। ਯਾਮੀ ਦੇ ਚੀਨ 'ਚ ਵੀ ਕਈ ਪ੍ਰਸੰਸਕ ਹਨ। 'ਵਿੱਕੀ ਡੋਨਰ' ਤੋਂ ਯਾਮੀ ਦਾ ਕਰੀਅਰ ਚਮਕਿਆ ਸੀ। 'ਪਾਨੀ ਕਾ ਰੰਗ' ਯਾਮੀ ਨੂੰ ਦੇਖਦੇ ਹੀ ਪ੍ਰਸੰਸਕ ਗਾਉਣ ਲੱਗ ਪੈਂਦੇ ਹਨ। ਯਾਮੀ ਇਸ ਸਮੇਂ ਕਰਨ ਜੌਹਰ ਦੀ ਵੀ ਚਹੇਤੀ ਹੈ। ਯਾਮੀ ਹਾਲੇ ਵੀ ਪੰਜਾਬੀ ਸਿਨੇਮਾ ਨਾਲ ਪਿਆਰ ਕਰਦੀ ਹੈ ਪਰ ਵਧੇਰੇ ਕੰਟੈਂਟ ਵਾਲੀ ਹੀ ਫ਼ਿਲਮ ਉਹ ਕਰੇਗੀ। ਇਕ ਸਮਾਗਮ 'ਚ ਡਿਗਣ ਤੋਂ ਬਚੀ ਯਾਮੀ ਨੂੰ 'ਉੜੀ' ਫ਼ਿਲਮ ਨੇ ਵੀ ਲੋਕਪ੍ਰਿਯਤਾ ਦਿੱਤੀ ਹੈ। ਇੰਟਰਨੈੱਟ 'ਤੇ ਯਾਮੀ ਦੇ ਇੰਟਰਵਿਊ ਕਾਫ਼ੀ ਚਰਚਿਤ ਹੋਏ ਹਨ। 32 ਸਾਲ ਦੀ ਯਾਮੀ ਹੋ ਗਈ ਹੈ। ਅਸਲ 'ਚ ਯਾਮੀ ਦੀ ਸੁੰਦਰਤਾ ਦੇਸੀ ਨੁਸਖਿਆਂ ਨਾਲ ਕਾਇਮ ਹੈ। ਵਾਲਾਂ ਤੋਂ ਲੈ ਕੇ ਚਮੜੀ ਤੱਕ ਦਾ ਖਿਆਲ ਯਾਮੀ ਦੇਸੀ ਨੁਸਖਿਆਂ ਨਾਲ ਕਰਦੀ ਹੈ। ਐਲੋਵਰਾ ਜੈੱਲ, ਵਿਟਾਮਿਨ ਈ ਤੇ ਕੇਸਰ ਦਾ ਤੇਲ ਉਸ ਦੀਆਂ ਰੇਸ਼ਮੀ ਜੁਲਵਾਂ ਦਾ ਰਾਜ਼ ਹੈ। ਨਾਰੀਅਲ ਪਾਣੀ ਨਿੱਤ ਪੀਣਾ ਹੈ ਤੇ ਇਕ ਤਰਲ ਤੇ ਲਚਕੀਲਾ ਜਿਸਮ ਬਣਾਉਂਦਾ ਹੈ। ਖੰਡ, ਸ਼ਹਿਦ ਤੇ ਹਲਦੀ ਮਿਲਾ ਕੇ ਬਣਾਏ ਲੇਪ ਨਾਲ ਉਹ ਚਿਹਰਾ ਸਾਫ਼ ਕਰਦੀ ਹੈ। ਇਸ ਸਭ ਨਾਲ 'ਲਖਨਊ ਦੀ ਸੁਪਰ ਮਾਡਲ' ਉਹ ਕੁਦਰਤੀ ਲੱਗ ਰਹੀ ਹੈ ਤਾਂ ਹੀ ਦਿਨੇਸ਼ ਵਿਜਾਨ ਨੇ ਅਯੂਸ਼ਮਨ ਖੁਰਾਣਾ ਨਾਲ ਯਾਮੀ ਨੂੰ ਆਪਣੀ ਨਵੀਂ ਫ਼ਿਲਮ 'ਚ ਇਹੀ ਕਿਰਦਾਰ ਦਿੱਤਾ ਹੈ। ਯਾਮੀ ਗੌਤਮ ਆ ਰਹੇ ਸਮੇਂ 'ਚ ਹੋਰ ਸਟਾਰਡੰਮ ਵੱਲ ਕਦਮ ਪੁਟਦੀ ਨਜ਼ਰ ਆਏਗੀ।

ਰਣਵੀਰ ਸਿੰਘ

ਜਯੇਸ਼ ਭਾਈ ਜ਼ੋਰਦਾਰ

ਬਹੁਤ ਚਲਾਕੀ, ਚੁਸਤੀ ਕਦੇ-ਕਦੇ ਮਹਿੰਗੀ ਪੈਂਦੀ ਹੈ ਤੇ ਰਣਵੀਰ ਸਿੰਘ ਨਾਲ ਅਜਿਹਾ ਹੋਇਆ ਹੈ, ਕਿਉਂਕਿ ਪਾਕਿ-ਭਾਰਤ ਕ੍ਰਿਕਟ ਮੈਚ ਦੌਰਾਨ ਰਣਵੀਰ ਨੇ ਕੁਮੈਂਟਰੀ ਸਮੇਂ ਹਾਰਦਿਕ ਪੰਡਿਆ ਲਈ 'ਐਸ਼ ਕਰੋ, ਖਾਓ-ਪੀਓ' ਸ਼ਬਦ ਵਰਤੇ ਤੇ ਇਹੀ ਹਾਰਦਿਕ ਨਾਲ ਸੈਲਫੀ ਖਿੱਚ ਟਵਿੱਟਰ 'ਤੇ ਪਾਏ ਤੇ ਭਲਵਾਨ ਬਲਾਕ ਪ੍ਰੈਸਨਰ ਦੇ ਵਕੀਲ ਪਾਲ ਨੇ ਉਸ ਨੂੰ ਨੋਟਿਸ ਘੱਲਿਆ ਹੈ ਕਿ ਇਹ ਲਫ਼ਜ਼ ਤੇ ਉਨ੍ਹਾਂ ਦਾ ਕਾਨੂੰਨੀ ਅਧਿਕਾਰ ਹੈ। ਕਾਪੀ ਰਾਈਟ ਹੈ। ਹੁਣ ਰਣਵੀਰ ਨੇ ਜੇ ਮੁਆਫ਼ੀ ਨਾ ਮੰਗੀ ਤਾਂ ਅਦਾਲਤ ਦਾ ਚੱਕਰ ਲਾਉਣਾ ਪੈਣਾ ਹੈ। '83' ਫ਼ਿਲਮ ਕਰ ਰਹੇ ਰਣਵੀਰ ਸਿੰਘ ਨੇ ਕਪਿਲ ਦੇਵ ਦੀ ਬਾਇਓਪਿਕ ਕਰਨੀ ਹੈ। ਇਸ ਲਈ ਨੇੜਿਓਂ ਉਹ ਕ੍ਰਿਕਟ ਦੇਖ ਰਿਹਾ ਹੈ। 'ਜਯੇਸ਼ ਭਾਈ ਜ਼ੋਰਦਾਰ' ਯਸ਼ਰਾਜ ਬੈਨਰ ਦੀ ਇਹ ਨਵੀਂ ਫ਼ਿਲਮ ਰਣਵੀਰ ਸਿੰਘ ਨੇ ਹੁਣੇ ਹੀ ਸਾਈਨ ਕੀਤੀ ਹੈ। ਡਰਾਮਾ, ਬਾਇਓਪਿਕ, ਰੋਮਾਂਸ ਤੇ ਹੀਰੋ ਬਣੇ ਰਣਵੀਰ ਦੀ ਇਹ ਪਹਿਲੀ ਕਾਮੇਡੀ ਫ਼ਿਲਮ ਹੋਵੇਗੀ। ਇਧਰ ਇਸ ਹੀਰੋ ਦੇ ਅਥਾਹ ਪ੍ਰਸੰਸਕ ਜਤਿਨ ਦੇ ਦਿਹਾਂਤ 'ਤੇ ਰਣਵੀਰ ਨੇ ਇੰਸਟਾਗ੍ਰਾਮ 'ਤੇ ਦੁੱਖ ਪ੍ਰਗਟਾਇਆ ਹੈ। ਇਹ ਹੀਰੋ ਜਨਜੀਵਨ, ਜਨੂੰਨ ਤੇ ਲੋਕਾਂ ਨਾਲ ਜੁੜਿਆ ਹੋਇਆ ਹੈ। ਇਧਰ ਰਣਵੀਰ ਸਿੰਘ '83' ਕਰ ਰਿਹਾ ਹੈ ਤਾਂ ਲਾਭ ਪਤਨੀ ਦੀਪਿਕਾ ਨੂੰ ਵੀ ਉਸ ਨੇ ਦਿਵਾ ਦਿੱਤਾ ਹੈ। 14 ਕਰੋੜ 'ਚ ਦੀਪਿਕਾ '83' ਲਈ ਸਾਈਨ ਹੋਈ ਹੈ। ਮਤਲਬ ਭਾਰਤ-ਪਾਕਿ ਮੈਚ, ਕ੍ਰਿਕਟ ਸੰਸਾਰ ਕੱਪ, ਸਟਾਰ ਸਪੋਰਟਸ ਤੇ ਕੁਮੈਂਟਰੀ ਨੇ ਰਣਵੀਰ ਸਿੰਘ ਦੀ ਟੀ.ਆਰ.ਪੀ. ਵਧਾ ਦਿੱਤੀ ਹੈ। ਉਧਰ ਫ਼ਿਲਮ ਵੀ ਉਹ ਕ੍ਰਿਕਟ 'ਤੇ ਹੀ ਕਰ ਰਿਹਾ ਹੈ। '83' ਵਾਲਾ ਰਣਵੀਰ ਸਿੰਘ 'ਜਯੇਸ਼ ਭਾਈ ਜ਼ੋਰਦਾਰ' ਬਣ ਰਿਹਾ ਹੈ। ਪਾਲ ਤੋਂ ਮੁਆਫ਼ੀ ਮੰਗ ਲਈ ਤਾਂ 'ਜਯੇਸ਼ ਭਾਈ ਜ਼ੋਰਦਾਰ' ਦੀ '83' ਫ਼ਿਲਮ 2019 'ਚ ਸੁਪਰ ਫ਼ਿਲਮ ਹੋਵੇਗੀ। ਸਲਮਾਨ, ਸ਼ਾਹਰੁਖ ਦੀ ਥਾਂ ਸਿਰਫ਼ ਰਣਵੀਰ ਸਿੰਘ ਹੀ ਲਏਗਾ। ਲਗਦਾ ਕੁਝ ਅਜਿਹਾ ਹੀ ਹੈ।


-ਸੁਖਜੀਤ ਕੌਰ

ਅਮਾਇਰਾ ਦਸਤੂਰ

ਅੱਜਕਲ੍ਹ ਚੜ੍ਹਾਈਆਂ

ਅਮਾਇਰਾ ਰੁੱਝੀ ਹੋਈ ਅਭਿਨੇਤਰੀ ਹੈ। ਚਾਰ ਹਿੰਦੀ ਦੀਆਂ ਤੇ ਦੋ ਦੱਖਣ ਦੀਆਂ ਫ਼ਿਲਮਾਂ ਲਗਾਤਾਰ ਦੌੜ-ਭੱਜ ਕੇ ਕੀਤੀਆਂ ਤੇ ਅਮਾਇਰਾ ਦਾ ਨਾਂਅ ਇਸ ਸਾਲ ਪੂਰਾ ਚਰਚਿਤ ਰਹੇਗਾ। ਚਰਿੱਤਰ ਤੇ ਪ੍ਰਦਰਸ਼ਨ ਵਧੀਆ ਹੋਏ ਇਸ ਲਈ ਉਹ ਖਾਸ ਤੌਰ 'ਤੇ ਤਾਮਿਲ ਸਿੱਖ ਰਹੀ ਹੈ। ਤਾਮਿਲ ਭਾਸ਼ਾ ਦੀ ਟਿਊਸ਼ਨ ਪੜ੍ਹ ਰਹੀ ਹੈ। ਪ੍ਰਭੂ ਦੇਵਾ ਨਾਲ ਫ਼ਿਲਮ ਮਿਲ ਗਈ ਤੇ ਅਮਾਇਰਾ ਦਾ ਨਾਂਅ ਬਣ ਗਿਆ। 'ਮੇਡ ਇਨ ਚਾਈਨਾ', 'ਪ੍ਰਸਥਾਨਮ', 'ਕੋਈ ਜਾਨੇ ਨਾ' ਖਾਸ ਫ਼ਿਲਮਾਂ ਅਮਾਇਰਾ ਕੋਲ ਹਨ। 'ਰਾਜਮਾਂਹ ਚਾਵਲ' ਨੇ ਉਸ ਦੀ ਪਛਾਣ ਪੱਕੀ ਕੀਤੀ ਹੈ। 'ਮੈਂਟਲ ਹੈ ਕਿਆ' 'ਚ ਖਾਸ ਕੰਮ ਕੀਤਾ ਹੈ। ਅਮਾਇਰਾ ਕੋਲ ਕੰਮ ਦੀ ਘਾਟ ਹੀ ਨਹੀਂ। 'ਵਰਲਡ ਆਫ਼ ਐਨੀਮਲਜ਼' ਨਾਲ ਉਸ ਦਾ ਨਾਤਾ ਹੈ। ਖਾਣੇ ਦੀ ਬਰਬਾਦੀ ਰੋਕੋ ਉਹ ਅਕਸਰ ਆਖਦੀ ਹੈ। ਕੜਕਦੀ ਧੁੱਪ ਦੀ ਪ੍ਰਵਾਹ ਨਹੀਂ ਜੇ ਕੰਮ ਹੈ ਤਾਂ ਫਿਰ 'ਪ੍ਰਸਥਾਨਮ' ਦੀ ਸ਼ੂਟਿੰਗ ਉੱਤਰ ਭਾਰਤ ਦੀ ਤਿੱਖੜ ਗਰਮੀ ਤੇ ਗਰਮੀ 'ਚ ਰੁਮਾਂਟਿਕ ਗਾਣਾ, ਗਰਮੀ ਨਾਲ ਬੇਹੋਸ਼ ਹੋ ਗਈ ਪਰ ਮਾਂ ਦੀ ਧੀ ਨੇ ਹੌਸਲਾ ਨਹੀਂ ਹਾਰਿਆ ਤੇ ਧੁੱਪ 'ਚ ਹੀ ਸ਼ੂਟਿੰਗ ਜਾਰੀ ਰੱਖੀ। ਜਵਾਨ ਅਭਿਨੇਤਰੀ ਅਮਾਇਰਾ ਨੇ 'ਕਾਲਾਕੰਦੀ' 'ਚ ਸੈਫ਼ ਅਲੀ ਨਾਲ ਕੰਮ ਕਰਕੇ ਵਧੀਆ ਪ੍ਰਤੀਕਿਰਿਆਵਾਂ ਲਈਆਂ ਸਨ। ਸੰਜੇ ਦੱਤ ਤੇ ਅਲੀ ਫ਼ਜ਼ਲ ਨਾਲ 'ਪ੍ਰਸਥਾਨਮ' ਉਸ ਦੀ ਪ੍ਰਮੁੱਖ ਫ਼ਿਲਮ ਹੈ। ਰਾਜਕੁਮਾਰ ਰਾਓ ਤੇ ਕੰਗਨਾ ਨਾਲ ਮਿਲ ਕੇ ਅਮਾਇਰਾ ਨੂੰ ਨਵੀਂ ਊਰਜਾ ਹਾਸਲ ਹੋਈ ਹੈ। ਜੈਕੀ ਚੇਨ ਨਾਲ ਵੀ ਫ਼ਿਲਮ ਕਰ ਚੁੱਕੀ ਇਹ ਅਭਿਨੇਤਰੀ ਇਸ ਸਾਲ ਪ੍ਰਿਅੰਕਾ, ਅਨੁਸ਼ਕਾ, ਆਲੀਆ ਦੀ ਸ਼੍ਰੇਣੀ ਵੱਲ ਵਧਦੀ ਦਿਖਾਈ ਦੇਵੇਗੀ। ਕੁਨਾਲ ਕਪੂਰ ਨਾਲ 'ਕੋਈ ਜਾਨੇ ਨਾ' ਦੇ ਸੈੱਟ 'ਤੇ ਗਈ ਹੈ। ਅਮੀਨ ਹਾਜ਼ੀ ਦੀ ਡਾਇਰੈਕਸ਼ਨ 'ਚ ਬਣ ਰਹੀ ਇਹ ਫ਼ਿਲਮ ਭੂਸ਼ਨ ਕੁਮਾਰ ਦੀ ਹੈ। ਇਸ ਤਰ੍ਹਾਂ ਅਮਾਇਰਾ ਦਸਤੂਰ ਦੇ ਸਿਤਾਰੇ 2019 ਵਿਚ ਖੂਬ ਚਮਕਣ ਵਾਲੇ ਹਨ। ਅਮਾਇਰਾ ਦਸਤੂਰ ਦੋ ਫ਼ਿਲਮਾਂ ਨਾਲ ਹੀ ਚੋਟੀ 'ਤੇ ਕਾਬਜ਼ ਹੋਣਵੱਲ ਵਧ ਰਹੀ ਹੈ।

ਕੈਨੇਡਾ ਵਿਚ ਪੰਜਾਬੀ ਸੱਭਿਆਚਾਰ ਨੂੰ ਹੋਰ ਪ੍ਰਫ਼ੁਲਿਤ ਕਰ ਰਹੀ ਹੈ ਮੁਟਿਆਰ ਨਵਦੀਪ ਕੌਰ ਪੰਧੇਰ

26 ਕੁ ਸਾਲ ਦੀ ਛੈਲ-ਛਬੀਲੀ, ਉੱਚੇ ਕੱਦ-ਕਾਠ ਵਾਲੀ, ਘੁੰਗਰਾਲੇ ਵਾਲਾਂ ਦੀ ਦਿੱਖ ਵਾਲੀ ਨਵਦੀਪ ਕੌਰ ਪੰਧੇਰ ਕੈਨੇਡਾ ਦੇ ਮਸ਼ਹੂਰ ਖੂਬਸੂਰਤ ਸ਼ਹਿਰ ਐਡਮਿੰਟਨ ਵਿਖੇ ਰਹਿੰਦੀ ਹੈ। ਉਥੋਂ ਦੀ ਜੰਮਪਲ ਹੈ। ਉਸ ਦੇ ਮਾਤਾ-ਪਿਤਾ 1982 ਵਿਚ ਇਥੇ ਆ ਕੇ ਵਸ ਗਏ ਸੀ। ਉਹ ਜ਼ਿਲ੍ਹਾ ਸੰਗਰੂਰ ਦੇ ਪਿੰਡ ਨੱਥੂਮਾਜਰਾ ਦੇ ਰਹਿਣ ਵਾਲੇ ਹਨ। ਉਸ ਨੂੰ ਸੱਭਿਆਚਾਰ ਦੀਆਂ ਕਈ ਕਲਾਵਾਂ ਵਿਚ ਪ੍ਰਪੱਕਤਾ ਹਾਸਲ ਹੈ, ਜਿਥੇ ਉਹ ਇਕ ਕਰਮਠ, ਸਮਝਦਾਰ, ਤਜਰਬੇਕਾਰ, ਪ੍ਰਾਚੀਨ ਤੇ ਆਧੁਨਿਕਤਾ ਦੀ ਸੁਮੇਲ ਕਲਾਸਿਕ ਗਿੱਧਾ ਕਲਾਕਾਰ ਹੈ, ਉਸ ਦੇ ਨਾਲ-ਨਾਲ ਉਹ ਇਕ ਵਧੀਆ ਪੰਜਾਬੀ ਗਾਇਕਾ, ਮਰਮਸਪਰਸ਼ੀ ਭੰਗੜਾ ਕਲਾਕਾਰ, ਬੀ.ਏ. ਬੀ.ਐੱਡ ਅਤੇ ਖਾਸ ਕਰਕੇ ਇਨ੍ਹਾਂ ਗੁਣਾਂ ਦੇ ਨਾਲ-ਨਾਲ ਉਹ 'ਮਿਸ ਪੰਜਾਬਣ ਐਡਮਿੰਟਨ' ਦਾ ਵੀ ਖਿਤਾਬ ਹਾਸਲ ਕਰ ਚੱਕੀ ਹੈ। ਹੋਰ ਖ਼ੁਸ਼ੀ ਵਾਲੀ ਗੱਲ ਇਹ ਹੈ ਕਿ ਉਹ ਤਿੰਨ ਪੁਸਤਕਾਂ ਸਾਹਿਤ ਦੀ ਝੋਲੀ ਵਿਚ (ਖਰੜੇ ਦੇ ਰੂਪ ਵਿਚ, ਛਪਣ ਅਧੀਨ) ਪਾ ਚੁੱਕੀ ਹੈ। ਇਹ ਪੁਸਤਕਾਂ ਭਾਵੇਂ ਅੰਗਰੇਜ਼ੀ ਵਿਚ ਹਨ ਪਰ ਹਨ ਪੰਜਾਬੀ ਸੱਭਿਆਚਾਰ-ਇਤਿਹਾਸ ਨਾਲ ਸਬੰਧਿਤ। ਇਹ ਪੁਸਤਕਾਂ ਭਗਤਾਂ ਤੋਂ ਲੈ ਕੇ ਅੱਜ ਦੇ ਪੰਜਾਬ ਦੇ ਵਾਤਾਵਰਨ ਹਾਲਾਤ ਉੱਪਰ ਕੇਂਦਰਿਤ ਹਨ। ਬਤੌਰ ਅਧਿਆਪਕਾ ਉਹ ਸਕੂਲਾਂ ਵਿਚ ਸਿੱਖ ਪੰਜਾਬੀ ਇਤਿਹਾਸ ਪੜ੍ਹਾਉਂਦੀ ਹੈ। ਉਸ ਨੇ ਸ਼ਿਕਾਗੋ ਅਤੇ ਐਡਮਿੰਟਨ ਦੇ ਕਈ ਸਕੂਲਾਂ ਵਿਚ ਪੰਜਾਬੀ ਵੀ ਪੜ੍ਹਾਈ ਹੈ ਅਤੇ ਪੜ੍ਹਾ ਰਹੀ ਹੈ।
ਤਿੱਖੇ ਆਕਰਸ਼ਕ ਛਬੀਲੇ ਨੈਣ-ਨਕਸ਼ਾਂ ਵਾਲੀ ਨਵਦੀਪ ਭਾਵੇਂ ਡਿਊਟੀ ਦੌਰਾਨ ਕੈਨੇਡੀਅਨ ਪਹਿਰਾਵਾ ਪਾਉਂਦੀ ਹੈ ਪਰ ਉਸ ਨੂੰ ਪੰਜਾਬੀ ਪਹਿਰਾਵਾ ਜ਼ਿਾਅਦਾ ਪਸੰਦ ਹੈ।
ਐਡਮਿੰਟਨ ਦੇ ਪ੍ਰਸਿੱਧ ਕੈਟ ਕੈਚਵਿਨ ਸਕੂਲ ਵਿਖੇ ਉਸ ਨੂੰ ਮਿਲਣ ਦਾ ਸੁਭਾਗ ਪ੍ਰਾਪਤ ਹੋਇਆ। ਇਸ ਸਕੂਲ ਵਿਖੇ ਪੰਜਾਬੀ ਬੱਚਿਆਂ ਦਾ 15 ਰੋਜ਼ਾ ਸਮਰਕੈਂਪ ਚੱਲ ਰਿਹਾ ਸੀ। ਲਗਪਗ ਦੋ ਸਕੂਲਾਂ ਵਿਚ ਲਗਪਗ 700 ਬੱਚੇ-ਬੱਚੀਆਂ ਨੇ ਭਾਗ ਲਿਆ ਜਿਨ੍ਹਾਂ ਦੀ ਉਮਰ ਕੋਈ ਚਾਰ ਸਾਲ ਤੋਂ ਲੈ ਕੇ 15 ਸਾਲਾਂ ਤੱਕ ਸੀ। ਨਵਦੀਪ ਨੇ ਦੱਸਿਆ ਕਿ ਇਸ ਕੈਂਪ ਵਿਚ ਬੱਚਿਆਂ ਨੂੰ ਗਿੱਧੇ-ਭੰਗੜੇ ਦੀ ਟ੍ਰੇਨਿੰਗ ਦੇ ਨਾਲ-ਨਾਲ ਪੰਜਾਬੀ ਲਿਖਣੀ, ਬੋਲਣੀ, ਪੜ੍ਹਨੀ ਅਤੇ ਸਮਝਣ ਦਾ ਅਭਿਆਸ ਕਰਵਾਇਆ ਜਾਂਦਾ ਹੈ ਤਾਂ ਜੋ ਵਿਦੇਸ਼ ਵਿਚ ਰਹਿ ਕੇ ਵੀ ਬੱਚੇ ਆਪਣੀ ਮਾਤ-ਭਾਸ਼ਾ, ਸੱਭਿਆਚਾਰ, ਵਿਰਸਾ ਅਤੇ ਵਿਰਾਸਤ ਨਾਲ ਜੁੜੇ ਰਹਿਣ।
ਇਸ ਕੈਂਪ ਵਿਚ ਸਭ ਤੋਂ ਮਹੱਤਵਪੂਰਨ ਗੱਲ ਇਹ ਸੀ ਕਿ ਨਵਦੀਪ ਨੇ ਗਿੱਧੇ ਦੇ ਤਾਲ-ਲੈਅ ਲਈ ਜਿਹੜੇ ਗੀਤਾਂ ਦੀ ਚੋਣ ਕੀਤੀ ਸੀ, ਉਹ ਬਹੁਤ ਹੀ ਸਰਾਹੁਣਯੋਗ ਸੀ। ਸੁਰਿੰਦਰ ਕੌਰ ਦੇ ਗਾਏ ਪੁਰਾਣੇ ਦਿਲਕਸ਼, ਸੀਨੇ 'ਚ ਹੂਕ ਤੇ ਲਲਕ ਪਾਉਣ ਵਾਲੇ ਗੀਤ ਜੋ ਨੰਦ ਲਾਲ ਨੂਰਪੁਰੀ ਤੇ ਹੋਰਨਾਂ ਦੇ ਲਿਖੇ ਹੋਏ ਸਨ, ਕਮਾਲ ਸੀ।
ਖਾਸ ਕਰਕੇ ਗਿੱਧੇ ਨੂੰ ਬੁਲੰਦੀਆਂ ਅਤੇ ਪੰਜਾਬੀ ਸੱਭਿਆਚਾਰ ਦੀ ਅਗਵਾਈ ਕਰਦੇ ਇਹ ਗੀਤ ਜੋ ਪੰਜਾਬੀ ਦੇ ਠੇਠ ਸ਼ਬਦ ਅਤੇ ਅਲੋਪ ਹੋ ਚੁੱਕੇ ਸ਼ਬਦਾਂ ਨੂੰ ਜ਼ਿੰਦਾ ਕਰਨ ਦੇ ਪਰਾਏਵਾਚੀ ਹਨ, ਜਿਵੇਂ ਕਿ 'ਗੋਰੀ ਦੀਆਂ ਝਾਂਜਰਾਂ ਬੁਲਾਉਂਦੀਆਂ ਗਈਆਂ', 'ਚੰਨ ਵੇ ਕਿ ਸ਼ੌਂਕਣ ਮੇਲੇ ਦੀ, ਪੈਰ ਧੋ ਕੇ ਝਾਂਜਰਾਂ ਪਾਉਂਦੀ ਮੇਲਦੀ ਆਉਂਦੀ', 'ਮਧਾਣੀਆਂ... ਹਾਏ ਉਏ ਮੇਰੇ ਡਾਢਿਆ ਰੱਬਾ', 'ਜੁੱਤੀ ਕਸੂਰੀ ਪੈਰੀਂ ਨਾ ਪੂਰੀ' ਆਦਿ ਗੀਤ ਪੰਜਾਬੀ ਸੱਭਿਆਚਾਰ ਨੂੰ ਜੀਵਤ ਰੱਖਣਗੇ, ਚੰਨ ਸੂਰਜ ਤੇ ਤਾਰਿਆਂ ਦੇ ਵਾਂਗ।
ਨਵਦੀਪ ਗਿੱਧੇ ਦੀਆਂ ਕਿਰਿਆਵਾਂ ਦੇ ਨਵੇਂ-ਨਵੇਂ ਅਤੇ ਪ੍ਰਾਚੀਨ ਅਭਿਆਸ ਕਰਵਾਉਣ ਵਿਚ ਮੁਹਾਰਤ ਰੱਖਦੀ ਹੈ। ਨਵਦੀਪ ਨੇ ਦੱਸਿਆ ਕਿ ਸੰਗੀਤ, ਲੈਅ ਅਤੇ ਅਭਿਆਸ ਜਦ ਅੰਤਰਮੁਖੀ ਹੋ ਕੇ ਬਾਹਰ ਨਿਕਲਦਾ ਹੈ ਤਾਂ ਸਾਰਾ ਵਾਤਾਵਰਨ ਗਿੱਧਾਮਈ ਹੋ ਜਾਂਦਾ ਹੈ।
ਨਵਦੀਪ ਨੇ ਦੱਸਿਆ ਕਿ ਐਡਮਿੰਟਨ ਵਿਚ ਹਰ ਸਾਲ ਮਨਾਏ ਜਾਂਦੇ ਤੀਆਂ ਦੇ ਤਿਉਹਾਰ, ਸਾਵਣ ਤਿਉਹਾਰ ਅਤੇ ਹੋਰ ਪੰਜਾਬੀ ਸੱਭਿਆਚਾਰ ਦੇ ਦਿਨ ਤਿਉਹਾਰਾਂ ਵਿਚ ਉਹ ਗਿੱਧੇ ਅਤੇ ਨੱਚਣ-ਕੁੱਦਣ ਅਤੇ ਹੋਰ ਮਨੋਰੰਜਨ ਕਿਰਿਆਵਾਂ ਦੀ ਅਗਵਾਈ ਵੀ ਕਰਦੀ ਹੈ।


-ਬਲਵਿੰਦਰ ਬਾਲਮ, ਗੁਰਦਾਸਪੁਰ
ਉਂਕਾਰ ਨਗਰ, ਗੁਰਦਾਸਪੁਰ (ਪੰਜਾਬ)।

ਦਿਸ਼ਾ ਪਟਾਨੀ

ਨਾਦਾਨ ਕੁੜੀ!

'ਐਕਸ਼ਨ ਗਰਲ', 'ਕਮਾਲ ਦੀ ਨ੍ਰਤਕੀ' ਦਿਸ਼ਾ ਪਟਾਨੀ ਕਰ ਰਹੀ ਸੀ 'ਮਲੰਗ' ਫ਼ਿਲਮ ਦੀ ਸ਼ੂਟਿੰਗ ਕਿ ਹਾਦਸਾ ਵਾਪਰ ਗਿਆ। ਜ਼ਖ਼ਮੀ ਦਿਸ਼ਾ ਦਾ ਵੀਡੀਓ ਆਇਆ ਸੋਸ਼ਲ ਮੰਚ 'ਤੇ ਸਾਹਮਣੇ ਤੇ ਦਿਸ਼ਾ ਦੇ ਚਹੇਤਿਆਂ ਨੇ ਇਸ ਨੂੰ ਖੂਬ ਸ਼ੇਅਰ ਕੀਤਾ। ਦੁਆਵਾਂ ਦਾ ਦੌਰ ਸ਼ੁਰੂ ਹੋਇਆ ਕਿ ਦਿਸ਼ਾ ਜਲਦੀ ਸੱਟ ਤੋਂ ਉੱਭਰ ਜਾਵੇ। ਅਦਿਤਯ ਰਾਏ ਕਪੂਰ 'ਮਲੰਗ' 'ਚ ਉਸ ਦਾ ਹੀਰੋ ਹੈ। ਦਿਸ਼ਾ ਨੇ ਹਸਪਤਾਲ ਜਾ ਕੇ ਜਿਹੜਾ ਟੀਕਾ ਲਗਾਇਆ, ਉਸ ਦੀ ਫੋਟੋ ਵੀ ਆ ਗਈ ਤੇ ਹਮਦਰਦੀਆਂ ਦਾ ਦੌਰ ਜਾਰੀ ਹੈ। ਦਿਸ਼ਾ ਦਾ ਜਨਮ ਦਿਨ ਸੀ ਤੇ ਰੈਸਟੋਰੈਂਟ 'ਚ ਭੀੜ ਨੇ ਉਸ ਨੂੰ ਦੇਖ ਲਿਆ। ਲੰਗੜਾ ਕੇ ਸੱਟ ਕਾਰਨ ਉਹ ਚੱਲ ਰਹੀ ਸੀ। ਟਾਈਗਰ ਸ਼ਰਾਫ਼ ਨੇ ਰੈਸਟੋਰੈਂਟ 'ਚ ਭੀੜ ਤੋਂ ਦਿਸ਼ਾ ਨੂੰ ਬਚਾਇਆ। ਅਮਰੀਕੀ ਗਾਇਕਾ ਸੇਲੇਨਾ ਗੇਮਜ਼ ਦੇ ਗੀਤ 'ਆਈ ਕਾਂਟ ਗੈਟ ਐਨ' ਤੇ ਦਿਸ਼ਾ ਨੇ ਨਾਚ ਵੀ ਕੀਤਾ ਤੇ ਇਸ ਦਾ ਵੀਡੀਓ ਵੀ ਤਿਆਰ ਕੀਤਾ। ਡਾਂਸ ਟ੍ਰੇਨਰ ਡਿੰਪਲ ਵੀ ਦਿਸ਼ਾ ਦੇ ਨਾਲ ਇਸ ਵੀਡੀਓ 'ਚ ਹੈ। ਤਦ ਦਿਸ਼ਾ ਨੂੰ ਸੱਟ ਨਹੀਂ ਸੀ ਲੱਗੀ। 'ਭਾਰਤ' ਫ਼ਿਲਮ ਨਾਲ ਮਸ਼ਹੂਰੀ ਖੱਟ ਰਹੀ ਦਿਸ਼ਾ ਪਟਾਨੀ ਨੇ ਸ਼ਿਵ ਸੈਨਾ ਮੁਖੀ ਊਧਵ ਦੇ ਪੁੱਤਰ ਅਦਿਤਯ ਠਾਕਰੇ ਨਾਲ ਡਿਨਰ ਕੀਤਾ। ਲੋਕਾਂ ਨੇ ਰਾਈ ਦਾ ਪਹਾੜ ਬਣਾ ਦਿੱਤਾ। ਦਿਸ਼ਾ ਨੇ ਨਵਾਂ ਬਲੂੰਗੜਾ (ਬਿੱਲੀ ਦਾ ਬੱਚਾ) ਆਪਣੇ ਜਨਮ ਦਿਨ 'ਤੇ ਲਿਆਂਦਾ ਹੈ। ਦਿਸ਼ਾ ਬਿੱਲੀਆਂ ਨੂੰ ਬਹੁਤ ਪਿਆਰ ਕਰਦੀ ਹੈ। 'ਮਲੰਗ' ਦੀ ਸ਼ੂਟਿੰਗ 'ਤੇ ਅਕਸਰ ਉਹ ਆਪਣੇ ਡਰਾਈਵਰ ਤੋਂ ਪੁੱਛਦੀ ਸੀ ਕਿ ਬਲੂੰਗੜੇ ਦਾ ਰੋਟੀ-ਪਾਣੀ ਹੋ ਗਿਆ ਸੀ ਨਾ, ਨਹੀਂ ਤਾਂ ਘਰੇ ਫੋਨ ਕਰੋ। ਵਾਹ ਬੇਜ਼ੁਬਾਨਿਆਂ ਨਾਲ ਏਨਾ ਪਿਆਰ! ਦਿਸ਼ਾ ਇਸ ਨਾਲ ਸਭ ਦੀਆਂ ਨਜ਼ਰਾਂ 'ਚ ਸਤਿਕਾਰਤ ਅਭਿਨੇਤਰੀ ਬਣੀ ਹੈ। ਹਾਂ, ਉਮਰ ਦਾ ਫ਼ਰਕ ਉਸ ਦੇ ਤੇ ਸਲਮਾਨ ਖ਼ਾਨ 'ਚ ਜ਼ਰੂਰ ਹੈ। ਕਿਥੇ ਜਵਾਨ ਕੁੜੀ, ਕਿਥੇ ਅਧਖੜ ਤੋਂ ਵੀ ਉੱਪਰ ਸਲਮਾਨ ਕਹਿ ਕੇ ਦਿਸ਼ਾ ਪਟਾਨੀ ਨੇ ਭਵਿੱਖ 'ਚ ਸਲਮਾਨ ਨਾਲ ਫ਼ਿਲਮ ਕਰਨ ਦੇ ਦਰਵਾਜ਼ੇ ਆਪ ਹੀ ਬੰਦ ਕਰ ਲਏ ਹਨ। ਦਿਸ਼ਾ ਨੂੰ ਕੌਣ ਸਮਝਾਵੇ ਕਿ ਇਥੇ ਉਮਰਾਂ ਨਹੀਂ, ਚੜ੍ਹਦੇ ਸੂਰਜ ਨੂੰ ਸਲਾਮਾਂ ਹੁੰਦੀਆਂ ਹਨ।

'ਅਰਥ' ਦੀ ਰੀਮੇਕ ਵਿਚ ਜੈਕਲਿਨ-ਸਵਰਾ

ਮਹੇਸ਼ ਭੱਟ ਵਲੋਂ ਨਿਰਦੇਸ਼ਿਤ 'ਅਰਥ' ਵਿਚ ਕੁਲਭੂਸ਼ਣ ਖਰਬੰਦਾ, ਸਮਿਤਾ ਪਾਟਿਲ ਤੇ ਸ਼ਬਾਨਾ ਆਜ਼ਮੀ ਨੇ ਅਭਿਨੈ ਕੀਤਾ ਸੀ। ਹੁਣ ਅਦਾਕਾਰਾ-ਨਿਰੇਦਸ਼ਿਕਾ ਰੇਵਤੀ ਇਸ ਨੂੰ ਨਵੇਂ ਰੂਪ ਵਿਚ ਬਣਾਉਣ ਜਾ ਰਹੀ ਹੈ ਅਤੇ ਇਸ ਰੀਮੇਕ ਲਈ ਰੇਵਤੀ ਨੇ ਜੈਕਲੀਨ ਫਰਨਾਂਡਿਸ ਤੇ ਸਵਰਾ ਭਾਸਕਰ ਨੂੰ ਕਰਾਰਬੱਧ ਕਰ ਲਿਆ ਹੈ। ਜੈਕਲੀਨ ਉਹ ਭੂਮਿਕਾ ਨਿਭਾਏਗੀ ਜੋ ਅਸਲ ਭਾਗ ਵਿਚ ਸਮਿਤਾ ਪਾਟਿਲ ਵਲੋਂ ਨਿਭਾਈ ਗਈ ਸੀ, ਜਦਕਿ ਸ਼ਬਾਨਾ ਆਜ਼ਮੀ ਵਲੋਂ ਨਿਭਾਈ ਗਈ ਭੂਮਿਕਾ ਸਵਰਾ ਦੇ ਹਿੱਸੇ ਆਈ ਹੈ। ਹੁਣ ਦੇਖਣਾ ਇਹ ਹੈ ਕਿ ਕੁਲਭੂਸ਼ਣ ਵਲੋਂ ਨਿਭਾਏ ਗਏ ਇੰਦਰ ਦੇ ਕਿਰਦਾਰ ਨੂੰ ਨਿਭਾਉਣ ਦਾ ਮੌਕਾ ਕਿਸ ਨੂੰ ਮਿਲਦਾ ਹੈ।

'ਪਾਨੀਪਤ' ਵਿਚ ਜ਼ੀਨਤ ਅਮਾਨ

'ਲਗਾਨ', 'ਜੋਧਾ ਅਕਬਰ' ਫੇਮ ਨਿਰਦੇਸ਼ਕ ਆਸ਼ੂਤੋਸ਼ ਗੋਵਾਰੀਕਰ ਇਨ੍ਹੀਂ ਦਿਨੀਂ ਫ਼ਿਲਮ 'ਪਾਨੀਪਤ' ਦਾ ਨਿਰਮਾਣ ਕਰ ਰਿਹਾ ਹੈ। ਅਰਜੁਨ ਕਪੂਰ, ਕ੍ਰਿਤੀ ਸੇਨਨ ਤੇ ਸੰਜੈ ਦੱਤ ਨੂੰ ਚਮਕਾਉਂਦੀ ਇਸ ਫ਼ਿਲਮ ਲਈ ਹੁਣ ਜ਼ੀਨਤ ਅਮਾਨ ਨੂੰ ਵੀ ਕਾਸਟ ਕੀਤਾ ਗਿਆ ਹੈ। ਉਹ ਇਸ ਵਿਚ ਸਕੀਨਾ ਬੇਗਮ ਦੀ ਭੂਮਿਕਾ ਨਿਭਾਏਗੀ। ਇਹ ਵੀ ਇਕ ਸੰਯੋਗ ਰਿਹਾ ਕਿ ਸਾਲ 1989 ਵਿਚ ਆਈ ਸਸਪੈਂਸ ਫ਼ਿਲਮ 'ਗਵਾਹੀ' ਵਿਚ ਜ਼ੀਨਤ ਅਮਾਨ ਦੇ ਨਾਲ ਆਸ਼ੂਤੋਸ਼ ਗੋਵਾਰੀਕਰ ਸਨ ਅਤੇ ਆਸ਼ੂਤੋਸ਼ ਬਾਲੀਵੁੱਡ ਵਿਚ ਆਪਣੇ ਪੈਰ ਜਮਾਉਣ ਲਈ ਸੰਘਰਸ਼ ਕਰ ਰਹੇ ਸਨ। ਅੱਜ ਜ਼ੀਨਤ ਅਮਾਨ ਨੂੰ ਆਪਣੀ ਫ਼ਿਲਮ ਲਈ ਨਿਰਦੇਸ਼ਿਤ ਕਰਕੇ ਆਸ਼ੂਤੋਸ਼ ਨੂੰ ਲੱਗ ਰਿਹਾ ਹੈ ਕਿ ਉਨ੍ਹਾਂ ਨੇ ਬਾਲੀਵੁੱਡ ਵਿਚ ਇਕ ਹੋਰ ਚੋਟੀ ਸਰ ਕਰ ਲਈ ਹੈ।
'ਪਾਨੀਪਤ' ਵਿਚ ਪਦਮਿਨੀ ਕੋਲਹਾਪੁਰੀ ਵੀ ਹੈ ਅਤੇ ਆਪਣੇ ਜ਼ਮਾਨੇ ਦੀ ਚਰਚਿਤ ਫ਼ਿਲਮ 'ਇਨਸਾਫ਼ ਕਾ ਤਰਾਜ਼ੂ' ਤੋਂ ਬਾਅਦ ਜ਼ੀਨਤ ਤੇ ਪਦਮਿਨੀ ਫਿਰ ਇਕ ਵਾਰ ਵੱਡੇ ਪਰਦੇ 'ਤੇ ਇਕੱਠੀਆਂ ਦਿਸਣਗੀਆਂ।

ਮੈਂ ਦਰੱਖ਼ਤਾਂ ਨਾਲ ਗੱਲ ਕਰਦਾ ਹਾਂ : ਚੰਦਨ ਰਾਏ ਸਾਨਿਆਲ

ਫ਼ਿਲਮ 'ਰੰਗ ਦੇ ਬਸੰਤੀ' ਵਿਚ ਛੋਟੀ ਜਿਹੀ ਭੂਮਿਕਾ ਨਿਭਾ ਕੇ ਬਾਲੀਵੁੱਡ ਵਿਚ ਆਪਣੀ ਸ਼ੁਰੂਆਤ ਕਰਨ ਵਾਲੇ ਚੰਦਨ ਰਾਏ ਸਾਨਿਆਲ ਦੇ ਨਾਂਅ ਹੁਣ 'ਕਮੀਨੇ', 'ਡੀ. ਡੇੇ.', 'ਮੰਟੋ', 'ਜਜ਼ਬਾ', 'ਸ਼ੈਫ', 'ਜਬ ਹੈਰੀ ਮੈਟ ਸੇਜਲ' ਆਦਿ ਫ਼ਿਲਮਾਂ ਦਰਜ ਹਨ। ਅੱਜ ਜਿਥੇ ਵੈੱਬ ਸੀਰੀਜ਼ ਵਿਚ ਕਹਾਣੀ ਦੇ ਨਾਂਅ 'ਤੇ ਗਾਲ਼ਾਂ ਤੇ ਗੰਦਗੀ ਪੇਸ਼ ਕੀਤੀ ਜਾ ਰਹੀ ਹੈ ਤਾਂ ਇਸ ਤਰ੍ਹਾਂ ਚੰਦਨ ਨੇ 'ਦ ਸ਼ੋਅਲੇ ਗਰਲ' ਦੇ ਰੂਪ ਵਿਚ ਇਕ ਇਸ ਤਰ੍ਹਾਂ ਦੀ ਵੈੱਬ ਸੀਰੀਜ਼ ਕੀਤੀ ਜੋ ਔਰਤ ਸਟੰਟ ਕਲਾਕਾਰ ਦੀ ਜ਼ਿੰਦਗੀ 'ਤੇ ਆਧਾਰਿਤ ਸੀ। ਹੁਣ ਚੰਦਨ ਨੇ ਇਕ ਹੋਰ ਵੈੱਬ ਸੀਰੀਜ਼ 'ਹਵਾ ਬਦਲੇ ਹੱਸੂ' ਕੀਤੀ ਹੈ ਅਤੇ ਇਸ ਵਿਚ ਵਾਤਾਵਰਨ ਦੇ ਵਧਦੇ ਦੁਸ਼ਪ੍ਰਭਾਵ 'ਤੇ ਚਿੰਤਾ ਪ੍ਰਗਟਾਈ ਗਈ ਹੈ।
ਚੰਦਨ ਵਲੋਂ ਇਸ ਵਿਚ ਰਿਕਸ਼ਾ ਡਰਾਈਵਰ ਹਸਮੁਖ ਪਾਂਡੇ ਦਾ ਕਿਰਦਾਰ ਨਿਭਾਇਆ ਗਿਆ ਹੈ ਜੋ ਸਵਾਰੀਆਂ ਨਾਲ ਗੱਲਬਾਤ ਕਰ ਕੇ ਉਨ੍ਹਾਂ ਨੂੰ ਵਾਤਾਵਰਨ ਬਾਰੇ ਜਾਗਰੂਕ ਕਰਦਾ ਹੈ।
ਇਸ ਵੈੱਬ ਸੀਰੀਜ਼ ਵਿਚ ਵਾਤਾਵਰਨ ਪ੍ਰਤੀ ਜਾਗਰੂਕਤਾ ਫੈਲਾਉਣ ਦਾ ਸੰਦੇਸ਼ ਦਿੱਤਾ ਗਿਆ ਹੈ। ਇਸ ਲਈ ਚੰਦਨ ਮਹਿਸੂਸ ਕਰਦੇ ਹਨ ਕਿ ਇਸ ਵਿਚ ਕੰਮ ਕਰ ਕੇ ਉਨ੍ਹਾਂ ਨੇ ਸਮਾਜ ਸੇਵਾ ਦਾ ਕੰਮ ਕੀਤਾ ਹੈ। ਉਹ ਕਹਿੰਦੇ ਹਨ, 'ਅੱਜ ਦੁਨੀਆ ਵਿਚ ਪ੍ਰਦੂਸ਼ਣ ਦਾ ਵਧਦਾ ਪੱਧਰ ਡੂੰਘੀ ਚਿੰਤਾ ਦਾ ਵਿਸ਼ਾ ਹੈ। ਪ੍ਰਦੂਸ਼ਣ ਦੀ ਵਜ੍ਹਾ ਕਰਕੇ ਨਵੀਆਂ-ਨਵੀਆਂ ਬਿਮਾਰੀਆਂ ਫੈਲਣ ਲੱਗੀਆਂ ਹਨ।
* ਤੁਸੀਂ ਖ਼ੁਦ ਕਿੰਨੇ ਵਾਤਾਵਰਨ ਪ੍ਰੇਮੀ ਹੋ?
-ਮੈਂ ਜਿਥੇ ਰਹਿੰਦਾ ਹਾਂ, ਉਸ ਸੁਸਾਇਟੀ ਵਿਚ ਮੇਰੀ ਪਛਾਣ ਵਾਤਾਵਰਨ ਪ੍ਰੇਮੀ ਦੇ ਤੌਰ 'ਤੇ ਹੋ ਚੁੱਕੀ ਹੈ। ਜਦੋਂ ਲੋਕ ਪਾਣੀ ਨੂੰ ਫਜ਼ੂਲ ਜਾਣ ਦਿੰਦੇ ਹਨ ਤਾਂ ਮੈਨੂੰ ਗੁੱਸਾ ਆ ਜਾਂਦਾ ਹੈ। ਮੈਂ ਆਪਣੀ ਸੁਸਾਇਟੀ ਦੇ ਕਰਤਾ-ਧਰਤਾ ਲੋਕਾਂ ਨੂੰ ਕਈ ਵਾਰ ਕਿਹਾ ਵੀ ਹੈ ਕਿ ਦਿਨ ਵਿਚ ਦੋ ਵਾਰ ਦੋ ਘੰਟੇ ਪਾਣੀ ਦਿੱਤਾ ਜਾਣਾ ਚਾਹੀਦਾ ਹੈ ਤਾਂ ਕਿ ਲੋਕਾਂ ਨੂੰ ਪਾਣੀ ਦਾ ਮਹੱਤਵ ਸਮਝ ਆਵੇ। ਮੈਂ ਆਪਣੇ ਘਰ ਦੇ ਆਲੇ-ਦੁਆਲੇ ਕਈ ਦਰੱਖ਼ਤ ਵੀ ਲਗਾਏ ਹਨ। ਉਨ੍ਹਾਂ ਦਰੱਖ਼ਤਾਂ ਨਾਲ ਮੈਂ ਗੱਲਾਂ ਵੀ ਕਰਦਾ ਹਾਂ। ਮੇਰੇ ਕੁਝ ਦੋਸਤ ਮੈਨੂੰ ਪਾਗਲ ਕਹਿੰਦੇ ਹਨ ਪਰ ਮੈਨੂੰ ਪਰਵਾਹ ਨਹੀਂ ਹੈ। ਮੈਂ ਦਰੱਖ਼ਤਾਂ ਨੂੰ ਧਰਤੀ ਦਾ ਸ਼ਿੰਗਾਰ ਮੰਨਦਾ ਹਾਂ। ਇਸ ਸ਼ਿੰਗਾਰ ਦੀ ਰੱਖਿਆ ਤਾਂ ਹੋਣੀ ਹੀ ਚਾਹੀਦੀ ਹੈ।
* ਹੁਣ ਹਿੰਦੀ ਫ਼ਿਲਮਾਂ ਵਿਚ ਅੱਗੇ ਕੁਝ...?
-ਮੇਰੀ ਇਕ ਫ਼ਿਲਮ ਆ ਰਹੀ ਹੈ 'ਜਬਰੀਆ ਜੋੜੀ'। ਇਸ ਵਿਚ ਮੈਂ ਬਿਹਾਰੀ ਗੁੰਡਾ ਬਣਿਆ ਹਾਂ ਅਤੇ ਇਥੇ ਮੇਰਾ ਪੇਸ਼ਾ ਜਬਰਨ ਵਿਆਹ ਕਰਵਾਉਣ ਦਾ ਹੈ। ਇਹ ਕਾਮੇਡੀ ਭੂਮਿਕਾ ਹੈ ਅਤੇ ਮੈਨੂੰ ਲਗਦਾ ਹੈ ਕਿ ਆਪਣੇ ਵਿਸ਼ੇ 'ਤੇ ਮਨੋਰੰਜਨ ਦੀ ਪੁਟ ਚਾੜ੍ਹਨ ਦੀ ਵਜ੍ਹਾ ਕਰਕੇ ਇਹ ਫ਼ਿਲਮ ਧਮਾਲ ਮਚਾ ਦੇਵੇਗੀ।


-ਮੁੰਬਈ ਪ੍ਰਤੀਨਿਧ

ਨਵਾਂ ਰਾਈਜ਼ਿੰਗ ਸਟਾਰ

ਮੈਨੂੰ ਪਿਛੋਕੜ ਨਹੀਂ ਭੁੱਲਦਾ-ਆਫ਼ਤਾਬ

ਦ੍ਰਿੜ੍ਹ ਨਿਸ਼ਚੇ ਅਤੇ ਲਗਨ ਨਾਲ ਕੀਤੀ ਗਈ ਮਿਹਨਤ ਕਦੇ ਅਜਾਈਂ ਨਹੀਂ ਜਾਂਦੀ ਤੇ ਇਕ ਦਿਨ ਆਪਣਾ ਰੰਗ ਜ਼ਰੂਰ ਵਿਖਾਉਂਦੀ ਹੈ। ਪੰਜਾਬੀ ਦੀ ਕਹਾਵਤ 'ਉੱਦਮ ਅੱਗੇ ਲੱਛਮੀ, ਪੱਖੇ ਅੱਗੇ ਪੌਣ' ਨੂੰ ਗਰੀਬੀ ਵਿਚ ਰਹਿੰਦਿਆਂ ਆਪਣੇ ਹੌਸਲੇ ਨੂੰ ਬੁਲੰਦ ਰੱਖਦਿਆਂ ਸਿੱਧ ਕਰ ਵਿਖਾਇਆ। ਪਿਤਾ ਮਹੇਸ਼ ਸਿੰਘ ਅਤੇ ਮਾਤਾ ਸਤਵਿੰਦਰ ਕੌਰ ਵਾਸੀ ਪਿੰਡ ਦੀਪ ਸਿੰਘ ਵਾਲਾ ਦੇ ਰਾਈਜ਼ਿੰਗ ਸਟਾਰ-3 ਦੇ ਜੇਤੂ ਬਾਲ ਗਾਇਕ ਆਫ਼ਤਾਬ ਸਿੰਘ ਨੇ, ਜਿਸ ਨੇ ਆਪਣੀ 12 ਸਾਲ ਦੀ ਉਮਰ ਵਿਚ ਇਸ ਖ਼ਿਤਾਬ ਦੇ ਨਾਲ ਟਰਾਫੀ ਅਤੇ 10 ਲੱਖ ਰੁਪਏ ਦੀ ਇਨਾਮੀ ਰਾਸ਼ੀ ਵੀ ਜਿੱਤੀ ਹੈ, ਨਾਲ ਹੋਈ ਗੱਲਬਾਤ ਦੇ ਕੁਝ ਅੰਸ਼ ਪੇਸ਼ ਹਨ:
* ਕਲਰਜ਼ ਟੀ.ਵੀ ਦੇ ਇਸ ਮੁਕਾਬਲੇ ਵਿਚ ਜਾਣ ਦਾ ਕਿਵੇਂ ਸਬੱਬ ਬਣਿਆ?
-ਇਸ ਸ਼ੋਅ ਤੋਂ ਪਹਿਲਾਂ ਵੀ ਮੈਂ ਵੱਖ-ਵੱਖ ਟੀ.ਵੀ ਚੈਨਲਾਂ ਵੱਲੋਂ ਚਲਾਏ ਜਾ ਰਹੇ ਪ੍ਰੋਗਰਾਮਾਂ ਵਿਚ ਵਿਚ ਹਿੱਸਾ ਲੈਂਦਾ ਰਿਹਾ ਹਾਂ ਅਤੇ ਜ਼ੀ.ਟੀ.ਵੀ ਦੇ ਸ਼ੋਅ ਸਾਰੇ ਗਾ ਮਾ ਪਾ ਦੇ ਅਖੀਰਲੇ ਪੰਜਾਂ ਵਿਚ ਆਇਆ ਸੀ ਤੇ ਉਸ ਤੋਂ ਬਾਅਦ ਮੈਨੂੰ ਕਲਰਜ਼ ਟੀ.ਵੀ. ਵਲੋਂ ਸੱਦਾ ਆਇਆ ਜਿਸ ਦਾ ਨਤੀਜਾ ਤੁਹਾਡੇ ਸਾਹਮਣੇ ਹੈ।
* ਤੁਸੀਂ ਇਹ ਸ਼ੋਅ ਜਿੱਤ ਕੇ ਕੀ ਮਹਿਸੂਸ ਕਰਦੇ ਹੋ ਤੇ ਇਨਾਮੀ ਰਾਸ਼ੀ ਦਾ ਕੀ ਕਰੋਗੇ?
-ਮੈਂ ਆਪਣੇ-ਆਪ ਨੂੰ ਬਹੁਤ ਖ਼ੁਸ਼ਨਸੀਬ ਸਮਝਦਾ ਹਾਂ ਕਿ ਇਕ ਗ਼ਰੀਬ ਪਰਿਵਾਰ ਦੇ ਬੱਚੇ ਨੂੰ ਦੇਸ਼ ਦੇ ਅਵਾਮ ਨੇ ਐਨਾ ਪਿਆਰ ਦਿੱਤਾ। ਮੇਰੇ ਕੋਲ ਕੋਈ ਸ਼ਬਦ ਨਹੀਂ, ਜਿਸ ਨਾਲ ਮੈਂ ਲੋਕਾਂ ਦਾ ਧੰਨਵਾਦ ਕਰ ਸਕਾਂ। ਜਿੱਤੀ ਇਨਾਮੀ ਰਾਸ਼ੀ ਨਾਲ ਮੈਂ ਆਪਣੀ ਵੱਡੀ ਭੈਣ ਦਾ ਵਿਆਹ ਕਰਾਂਗਾ, ਪਿਤਾ ਜੀ ਦੇ ਸਿਰ ਤੇ ਚੜ੍ਹਿਆ ਕਰਜ਼ਾ ਉਤਾਰਾਂਗਾ।
* ਆਫ਼ਤਾਬ ਐਨੀ ਛੋਟੀ ਉਮਰ ਵਿਚ ਮਿਲੀ ਸ਼ੌਹਰਤ ਨੂੰ ਕਿਵੇਂ ਸੰਭਾਲੇਗਾ?
-ਮੈਂ ਅਤੇ ਮੇਰੇ ਪ੍ਰੀਵਾਰ ਨੇ ਬਹੁਤ ਮੁਸ਼ਕਿਲਾਂ ਦਾ ਸਾਹਮਣਾ ਕੀਤਾ ਹੈ। ਸਾਡੇ ਕੋਲ ਆਪਣਾ ਘਰ ਨਾ ਹੋਣ ਕਾਰਨ ਕੁਝ ਸਮਾਂ ਅਸੀਂ ਬਾਬਾ ਕਾਲਾ ਮਹਿਰ ਜੀ ਦੇ ਅਸਥਾਨ 'ਤੇ ਸੇਵਾ ਕੀਤੀ ਅਤੇ ਉਥੇ ਹੀ ਆਪਣਾ ਸਮਾਂ ਗੁਜ਼ਾਰਿਆ। ਮੈਨੂੰ ਆਪਣਾ ਪਿਛੋਕੜ ਹਰ ਸਮੇਂ ਯਾਦ ਰਹਿੰਦਾ ਹੈ। ਇਸ ਲਈ ਮੈਂ ਆਪਣੇ ਪੈਰ ਹਮੇਸ਼ਾ ਧਰਤੀ 'ਤੇ ਹੀ ਰੱਖਾਗਾਂ ਤੇ ਕਿਸੇ ਨੂੰ ਕਦੇ ਨਿਰਾਸ਼ ਨਹੀਂ ਕਰਾਂਗਾ ਕਿਉਂਕਿ ਇਹ ਜਿੱਤ ਮੇਰੀ ਨਹੀਂ ਪਿੰਡ ਦੀਪ ਸਿੰਘ ਵਾਲਾ ਸਮੇਤ ਪੂਰੇ ਭਾਰਤ ਦੇ ਲੋਕਾਂ ਦੀ ਹੈ।
* ਗਾਉਣ ਦੀ ਗੁੜ੍ਹਤੀ ਤਾਂ ਵਿਰਸੇ 'ਚ ਮਿਲੀ ਪਰ ਕੀ ਹੋਰ ਕਿਤੋਂ ਵੀ ਸੰਗੀਤ ਸਿੱਖਿਆ?
-ਮੇਰੇ ਪਾਪਾ ਜੀ ਗਾਉਂਦੇ ਸਨ ਤੇ ਜਦੋਂ ਉਨ੍ਹਾਂ ਰਿਆਜ਼ ਕਰਨਾ ਤਾਂ ਮੈਂ ਕੋਲ ਬੈਠ ਜਾਣਾ। ਤਿੰਨ ਸਾਲ ਦੀ ਉਮਰ ਵਿਚ ਮੈਂ ਗਾਉਣਾ ਸ਼ੁਰੂ ਕਰ ਦਿੱਤਾ ਸੀ। ਫਿਰ ਪਾਪਾ ਜੀ ਕਹਿੰਦੇ ਹੁਣ ਤੁਸੀਂ ਗਾਓ ਤੇ ਉਨ੍ਹਾਂ ਗਾਉਣਾ ਛੱਡ ਦਿੱਤਾ।


-ਆਰ. ਐਸ. ਧੁੰਨਾ
ਪੱਤਰ ਪ੍ਰੇਰਕ, ਸਾਦਿਕ (ਫ਼ਰੀਦਕੋਟ)।

ਹੁਣ ਆ ਰਿਹਾ ਹੈ ਅਘੋਰੀ

ਕਈ ਸਾਲ ਪਹਿਲਾਂ ਜ਼ੀ ਚੈਨਲ 'ਤੇ ਇਕ ਸ਼ੋਅ 'ਕਾਲ ਕਪਾਲ ਮਹਾਕਾਲ' ਪ੍ਰਸਾਰਿਤ ਹੋਇਆ ਕਰਦਾ ਸੀ ਅਤੇ ਇਸ ਵਿਚ ਅਘੋਰੀ ਲੋਕਾਂ ਦੀ ਜ਼ਿੰਦਗੀ 'ਤੇ ਵੀ ਰੌਸ਼ਨੀ ਪਾਈ ਗਈ ਸੀ। ਹੁਣ ਜ਼ੀ ਚੈਨਲ 'ਅਘੋਰੀ' ਨਾਂਅ ਨਾਲ ਇਕ ਲੜੀਵਾਰ ਲੈ ਆਇਆ ਹੈ ਅਤੇ ਇਸ ਵਿਚ ਗੌਰਵ ਚੋਪੜਾ, ਸਿਮਰਨ ਕੌਰ, ਪਰਾਗ ਤਿਆਗੀ, ਪ੍ਰੀਤੀ ਪੁਰੀ, ਮਲਹਾਰ ਪਾਂਡਿਆ, ਜ਼ਫਰ ਰਾਜਧਾਨੀ ਅਭਿਨੈ ਕਰ ਰਹੇ ਹਨ।
ਲੜੀਵਾਰ ਦੀ ਕਹਾਣੀ ਇਹ ਹੈ ਕਿ ਇਕ ਸਿੱਧੀ-ਸਾਦੀ ਕੁੜੀ ਇਕ ਮੁੰਡੇ ਨੂੰ ਆਪਣਾ ਦਿਲ ਦੇ ਬੈਠਦੀ ਹੈ। ਬਾਅਦ ਵਿਚ ਕੁੜੀ ਨੂੰ ਪਤਾ ਲੱਗਦਾ ਹੈ ਕਿ ਆਮ ਜਿਹਾ ਦਿਸਣ ਵਾਲਾ ਇਹ ਮੁੰਡਾ ਹਕੀਕਤ ਵਿਚ ਅਘੋਰੀ ਹੈ। ਮੁੰਡੇ ਦੀ ਇਹ ਅਸਲੀਅਤ ਕੀ ਰੰਗ ਲਿਆਉਂਦੀ ਹੈ?' ਇਹ ਇਸ ਵਿਚ ਰੌਚਕ ਢੰਗ ਨਾਲ ਪੇਸ਼ ਕੀਤਾ ਗਿਆ ਹੈ।
ਗੌਰਵ ਚੋਪੜਾ ਵਲੋਂ ਇਸ ਵਿਚ ਮੁੱਖ ਭੂਮਿਕਾ ਨਿਭਾਈ ਗਈ ਹੈ ਅਤੇ ਉਨ੍ਹਾਂ ਦਾ ਕਹਿਣਾ ਹੈ ਕਿ ਦੋ ਉਲਟ ਸ਼ੇਡਜ਼ ਵਾਲੀ ਇਸ ਤਰ੍ਹਾਂ ਦੀ ਭੂਮਿਕਾ ਨਿਭਾਉਣ ਦਾ ਉਨ੍ਹਾਂ ਨੂੰ ਪਹਿਲੀ ਵਾਰ ਮੌਕਾ ਮਿਲਿਆ ਹੈ। ਇਸ ਅਨੋਖੇ ਕਿਰਦਾਰ ਬਾਰੇ ਉਹ ਕਹਿੰਦੇ ਹਨ, 'ਆਮ ਤੌਰ 'ਤੇ ਲੋਕਾਂ ਵਿਚ ਇਹ ਮਾਨਤਾ ਹੈ ਕਿ ਅਘੋਰੀ ਲੋਕ ਜੰਗਲ ਜਾਂ ਗੁਫਾ ਵਿਚ ਰਹਿ ਕੇ ਸਾਧਨਾ ਕਰਦੇ ਹੁੰਦੇ ਹਨ। ਪਰ ਇਹ ਸੱਚ ਨਹੀਂ ਹੈ। ਆਮ ਕਰਕੇ ਅਘੋਰੀ ਲੋਕ ਆਮ ਜ਼ਿੰਦਗੀ ਜਿਊਂਦੇ ਹੁੰਦੇ ਹਨ।
ਪਰਾਗ ਤਿਆਗੀ ਵੀ ਇਸ ਵਿਚ ਅਘੋਰੀ ਬਣੇ ਹਨ। ਇਥੇ ਉਨ੍ਹਾਂ ਦੇ ਕਿਰਦਾਰ ਦਾ ਨਾਂਅ ਰੁਦਰਾਨਾਥ ਹੈ। ਸਿਮਰਨ ਇਸ ਗੱਲ ਤੋਂ ਖੁਸ਼ ਹੈ ਕਿ ਇਸ ਲੜੀਵਾਰ ਵਿਚ ਨਾ ਤਾਂ ਉਹ ਨੂੰਹ ਬਣੀ ਹੈ ਅਤੇ ਨਾ ਹੀ ਉਨ੍ਹਾਂ ਦਾ ਵਾਹ ਸੱਸ ਨਾਲ ਪੈਂਦਾ ਹੈ। 'ਇਹ ਵਾਕਈ ਵੱਖਰੀ ਜਿਹੀ ਭੂਮਿਕਾ ਹੈ।


-ਮੁੰਬਈ ਪ੍ਰਤੀਨਿਧ

2 ਜੁਲਾਈ ਨੂੰ ਜਨਮ ਦਿਨ 'ਤੇ ਵਿਸ਼ੇਸ਼

'ਦਿਲ ਮੇਂ ਬਸਨੇ ਵਾਲੇ ਮਰ ਕੇ ਭੀ ਦਿਲ ਸੇ ਨਿਕਲਤੇ ਨਹੀਂ...' ਮੁਹੰਮਦ ਅਜ਼ੀਜ਼

ਪ੍ਰਸਿੱਧ ਗਾਇਕ 'ਮੁਹੰਮਦ ਅਜ਼ੀਜ਼' ਦਾ ਨਾਂਅ ਸੁਣਦਿਆਂ ਹੀ ਉਨ੍ਹਾਂ ਦੇ ਗਾਏ ਗਾਣਿਆਂ 'ਆਜ ਕਲ੍ਹ ਯਾਦ ਕੁਛ ਔਰ ਰਹਿਤਾ ਨਹੀਂ...', 'ਦਿਲ ਮੇਂ ਬਸਨੇ ਵਾਲੇ ਮਰ ਕੇ ਭੀ ਦਿਲ ਸੇ ਨਿਕਲਤੇ ਨਹੀਂ...' , '...ਕਿ ਲੋਗ ਹਮੇਂ ਯਾਦ ਕਰੇਂਗੇ.... ਦੀ ਯਾਦ ਆ ਜਾਂਦੀ ਹੈ। 'ਮੁਹੰਮਦ ਅਜ਼ੀਜ਼' ਵਰਗੇ ਸੁਰੀਲੇ ਗਾਇਕ ਦਾ ਅਚਾਨਕ ਇਸ ਦੁਨੀਆ ਤੋਂ ਚਲੇ ਜਾਣਾ ਸੰਗੀਤ ਪ੍ਰੇਮੀਆਂ ਦੀਆਂ ਅੱਖਾਂ 'ਚ ਅੱਥਰੂ ਲੈ ਆਇਆ। ਪਿਤਾ 'ਸਈਅਦ ਵਾਹੀਦੁਨ ਨਬੀ' ਤੇ ਮਾਤਾ 'ਸਲੇਹਾ ਨਬੀ' ਦੇ ਘਰ 2 ਜੁਲਾਈ 1954 ਨੂੰ ਪੈਦਾ ਹੋਏ 'ਮੁਹੰਮਦ ਅਜ਼ੀਜ਼' ਦੀ ਪ੍ਰਤਿਭਾ ਨੂੰ ਸਭ ਤੋਂ ਪਹਿਲਾਂ ਪਰਖਣ ਵਾਲੇ ਸੰਗੀਤਕਾਰ ਸਨ 'ਸਪਨ ਜਗਮੋਹਨ'। ਉਨ੍ਹਾਂ ਨੇ ਫ਼ਿਲਮ 'ਅੰਬਰ' 'ਚ ਉਨ੍ਹਾਂ ਤੋਂ ਗਵਾਇਆ ਸੀ। ਇਸ ਤੋਂ ਬਾਅਦ ਸੰਗੀਤਕਾਰ ਅਨੁ ਮਲਿਕ ਨੇ ਫ਼ਿਲਮ 'ਮਰਦ' 'ਚ 'ਅਜ਼ੀਜ਼' ਨੂੰ ਅਮਿਤਾਭ ਬੱਚਨ ਲਈ ਗਵਾਇਆ। ਫ਼ਿਲਮ ਦੇ ਗਾਣੇ 'ਮਰਦ ਤਾਂਗੇ ਵਾਲਾ ਮੈਂ ਹੂੰ ਮਰਦ ਤਾਂਗੇ ਵਾਲਾ' ਨੇ ਚਾਰੇ ਪਾਸੇ ਧੁੰਮਾਂ ਪਾ ਦਿੱਤੀਆਂ। ਇਸ ਤੋਂ ਪਹਿਲਾਂ 'ਮੁਹੰਮਦ ਅਜ਼ੀਜ਼' ਨੇ ਰਾਹੁਲ ਦੇਵ ਬਰਮਨ ਤੇ 'ਲਕਸ਼ਮੀ ਕਾਂਤ-ਪਿਆਰੇ ਲਾਲ' ਸਮੇਤ ਕਈ ਸੰਗੀਤਕਾਰਾਂ ਨੂੰ ਆਪਣੀ ਆਵਾਜ਼ ਸੁਣਾਉਣ ਲਈ ਧੱਕੇ ਖਾਧੇ ਪਰ ਕਿਸੇ ਨੇ ਵੀ 'ਅਜ਼ੀਜ਼ ਸਾਹਿਬ' ਦੀ ਫਰਿਆਦ ਨਹੀਂ ਸੁਣੀ। 'ਮਰਦ ਤਾਂਗੇ ਵਾਲਾ..' ਗੀਤ ਦੇ ਹਿੱਟ ਹੋਣ ਤੇ ਸੰਗੀਤਕਾਰ 'ਰਾਹੁਲ ਦੇਵ ਬਰਮਨ' ਤੇ 'ਲਕਸ਼ਮੀਕਾਂਤ ਪਿਆਰੇ ਲਾਲ' ਨੇ ਉਨ੍ਹਾਂ ਤੋਂ ਧੜਾਧੜ ਗੀਤ ਗਵਾਉਣੇ ਸ਼ੁਰੂ ਕਰ ਦਿੱਤੇ। ਰਾਹੁਲ ਦੇਵ ਬਰਮਨ ਉਹੀ ਸੰਗੀਤਕਾਰ ਸੀ, ਜਿਸ ਨੇ ਕਦੇ ਅਜ਼ੀਜ਼ ਸਾਹਿਬ ਨੂੰ ਕਿਹਾ ਸੀ ਕਿ ਤੇਰਾ ਸੁਰ ਵਿਗੜਿਆ ਹੋਇਆ ਹੈ ਤੇ ਤੇਰੀ ਉਰਦੂ ਵੀ ਖਾਰਾਬ ਹੈ। ਇਸੇ ਤਰ੍ਹਾਂ ਹੀ ਸੰਗੀਤਕਾਰ 'ਲਕਸ਼ਮੀ-ਪਿਆਰੇ' ਨੇ ਅਜ਼ੀਜ਼ ਨੂੰ ਇਹ ਕਹਿ ਕੇ ਸਟੂਡੀਓ ਤੋਂ ਬਾਹਰ ਦਾ ਰਸਤਾ ਦਿਖਾ ਦਿੱਤਾ ਸੀ ਕਿ 'ਜਾਹ ਭਾਈ ਜਾਹ, ਤੇਰੀ ਆਵਾਜ਼ 'ਚ ਪ੍ਰਪੱਕਤਾ ਨਹੀਂ ਹੈ ਤੇ ਬਿਨਾਂ ਦੱਸੇ ਪੁੱਛੇ ਮੂੰਹ ਚੱਕ ਕੇ ਆ ਜਾਨਾ ਏਂ।' ਸੰਘਰਸ਼ ਦੇ ਦੌਰਾਨ ਇਸ ਕਦਰ ਬੇਇੱਜ਼ਤੀ ਸਹਿਣ ਵਾਲੇ ਮੁਹੰਮਦ ਅਜ਼ੀਜ਼ ਦੇ ਜਦ ਦਿਨ ਫਿਰੇ ਤਾਂ ਸੰਗੀਤਕਾਰ ਲਕਸ਼ਮੀ ਕਾਂਤ-ਪਿਆਰੇ ਲਾਲ ਨੇ 'ਅਜ਼ੀਜ਼' ਤੋਂ 'ਮੇਰਾ ਦੁੱਖ ਕਿਤਨਾ ਕਮ ਹੈ', 'ਮੁਹੰਮਦ ਰਫ਼ੀ ਤੂ ਬਹੁਤ ਯਾਦ ਆਇਆ ..' ਤੇ 'ਦਿਲ ਦੀਆ ਹੈ ਜਾਨ ਭੀ ਦੇਂਗੇ ਐ ਵਤਨ ਤੇਰੇ ਲੀਏ...' ਵਰਗੇ ਗੀਤ ਗਵਾ ਕੇ ਇਕ ਅਮਰ ਗਾਇਕ ਬਣਾ ਦਿੱਤਾ। ਫ਼ਿਲਮ 'ਬੰਜਾਰਨ' 'ਚ ਉਨ੍ਹਾਂ ਨੇ ਇਕ ਗੀਤ ਗਾਇਆ ਸੀ। ਬੋਲ ਸਨ, 'ਦਿਲ ਮੇਂ ਬਸਨੇ ਵਾਲੇ ਮਰ ਕੇ ਭੀ ਦਿਲ ਸੇ ਨਿਕਲਤੇ ਨਹੀਂ...।' ਗੀਤ ਸੁਣਦੇ ਹਾਂ ਤਾਂ ਮਨ 'ਚੋਂ ਇਕ ਚੀਸ ਉੱਠਦੀ ਹੈ। 'ਮੁਹੰਮਦ ਅਜ਼ੀਜ਼' ਸੰਗੀਤ ਪ੍ਰੇਮੀਆਂ ਦੇ ਦਿਲਾਂ 'ਚ ਹਮੇਸ਼ਾ ਹੀ ਵਸਦੇ ਰਹਿਣਗੇ ਚਾਹੇ ਉਹ ਅੱਜ ਇਸ ਦੁਨੀਆ 'ਚ ਨਹੀਂ ਹਨ।


-ਸਿਮਰਨ, ਜਗਰਾਉਂ

'ਲਿਵ ਟੂਗੈਦਰ' ਵਿਚ ਅਨੰਗ ਦੇਸਾਈ

ਮੋਬਾਈਲ ਫੋਨ ਦੇ ਆਗਮਨ ਤੋਂ ਬਾਅਦ ਸੰਪਰਕ ਖੇਤਰ ਵਿਚ ਤਾਂ ਕ੍ਰਾਂਤੀ ਆਈ ਹੀ ਹੈ ਪਰ ਹੁਣ ਸਮਾਰਟ ਫੋਨ ਆਉਣ ਨਾਲ ਵੈੱਬ ਸੀਰੀਜ਼ ਦੇ ਨਿਰਮਾਣ ਵਿਚ ਵੀ ਭਾਰੀ ਉਛਾਲ ਆਇਆ ਹੈ। ਵੈੱਬ ਸੀਰੀਜ਼ ਨੂੰ ਲੈ ਕੇ ਨਵੇਂ ਐਪ ਲਾਂਚ ਹੋ ਰਹੇ ਹਨ ਅਤੇ ਇਸੇ ਲੜੀ ਵਿਚ ਹੁਣ ਜੀਓਗੁਰੂ ਐਪ ਦਾ ਵੀ ਆਗਮਨ ਹੋ ਗਿਆ ਹੈ। ਇਸ ਐਪ ਦੀ ਬਦੌਲਤ ਵੈੱਬ ਸੀਰੀਜ਼ ਦੇ ਨਾਲ-ਨਾਲ ਉੱਭਰਦੇ ਗਾਇਕਾਂ ਲਈ 'ਸਿੰਗਿੰਗ ਸਟਾਰ' ਤੇ ਸੁੰਦਰਤਾ ਪ੍ਰਤੀਯੋਗਤਾ 'ਜੀਓ ਕਿੰਗ ਐਂਡ ਕਵੀਨ' ਵਰਗੇ ਸ਼ੋਅ ਵੀ ਪੇਸ਼ ਕੀਤੇ ਗਏ ਹਨ।
ਇਸ ਐਪ 'ਤੇ ਵੈੱਬ ਸੀਰੀਜ਼ 'ਲਿਵ ਟੂਗੈਦਰ' ਵੀ ਉਪਲਬਧ ਹੈ ਅਤੇ ਅਨੰਗ ਦੇਸਾਈ ਨੇ ਇਸ ਵਿਚ ਅਭਿਨੈ ਕੀਤਾ ਹੈ। ਹਾਸ ਲੜੀਵਾਰ 'ਖਿਚੜੀ' ਵਿਚ ਤੁਲਸੀਦਾਸ ਪਾਰੇਖ ਦੀ ਭੂਮਿਕਾ ਨਿਭਾਅ ਕੇ ਮਨੋਰੰਜਨ ਪੇਸ਼ ਕਰਨ ਵਾਲੇ ਅਨੰਗ ਦੀ ਇਹ ਪਹਿਲੀ ਵੈੱਬ ਸੀਰੀਜ਼ ਹੈ। ਅਨੰਗ ਅਨੁਸਾਰ ਪਹਿਲਾਂ ਵੀ ਉਨ੍ਹਾਂ ਨੂੰ ਵੈੱਬ ਸੀਰੀਜ਼ ਦੀਆਂ ਪੇਸ਼ਕਸ਼ ਆਉਂਦੀਆਂ ਰਹੀਆਂ ਸਨ ਪਰ ਕਿਉਂਕਿ ਵੈੱਬ ਸੀਰੀਜ਼ ਵਿਚ ਬੋਲਡਨੈੱਸ ਜ਼ਿਆਦਾ ਪੇਸ਼ ਕੀਤੀ ਜਾਂਦੀ ਹੈ, ਇਸ ਵਜ੍ਹਾ ਕਰਕੇ ਉਹ ਇਸ ਵਿਚ ਕੰਮ ਕਰਨ ਤੋਂ ਹਿਚਕਚਾ ਰਹੇ ਸਨ। ਪਰ ਜਦੋਂ ਜੀਓਗੁਰੂ ਦੇ ਸੌਮਿਆਜੀਤ ਗਾਂਗੁਲੀ ਨੇ ਉਨ੍ਹਾਂ ਨੂੰ ਭਰੋਸਾ ਦਿੱਤਾ ਕਿ 'ਲਿਵ ਟੂਗੈਦਰ' ਸਾਫ-ਸੁਥਰੀ ਸੀਰੀਜ਼ ਹੋਵੇਗੀ ਤਾਂ ਉਹ ਇਸ ਵਿਚ ਕੰਮ ਕਰਨ ਨੂੰ ਰਾਜ਼ੀ ਹੋ ਗਏ। ਇਸ ਸੀਰੀਜ਼ ਵਿਚ ਵਿਆਹੁਤਾ ਜੋੜੇ ਨੂੰ ਆਪਣੀ ਵਿਆਹੁਤਾ ਜ਼ਿੰਦਗੀ ਕਿਵੇਂ ਸਫ਼ਲ ਬਣਾਈ ਜਾਵੇ, ਇਸ ਦਾ ਸੰਦੇਸ਼ ਵੀ ਦਿੱਤਾ ਗਿਆ ਹੈ। ਹਾਂ, ਇਸ ਗੱਲ ਦਾ ਵੀ ਖਿਆਲ ਜ਼ਰੂਰ ਰੱਖਿਆ ਗਿਆ ਹੈ ਕਿ ਇਹ ਸੀਰੀਜ਼ ਜ਼ਿਆਦਾ ਉਪਦੇਸ਼ਾਤਮਕ ਨਾ ਬਣ ਜਾਵੇ।
ਅਨੰਗ ਨੇ ਕੋਲਕਾਤਾ ਜਾ ਕੇ ਇਸ ਦੀ ਸ਼ੂਟਿੰਗ ਕੀਤੀ ਸੀ ਅਤੇ ਜਦੋਂ ਪਹਿਲਾ ਅਨੁਭਵ ਚੰਗਾ ਰਿਹਾ ਤਾਂ ਉਹ ਇਸੇ ਐਪ ਲਈ ਹੋਰ ਸੀਰੀਜ਼ ਕਰਨ ਲਈ ਵੀ ਰਾਜ਼ੀ ਹੋ ਗਏ। ਇਸ ਹੇਠ ਉਨ੍ਹਾਂ ਨੇ ਇਕ ਸਨਸਨੀਖੇਜ ਸੀਰੀਜ਼ ਵਿਚ ਵੀ ਕੰਮ ਕੀਤਾ ਹੈ। ਇਸ ਵਿਚ ਉਹ ਇੰਟੈਲੀਜੈਂਸ ਅਫ਼ਸਰ ਬਣੇ ਹਨ ਅਤੇ ਅਨੰਗ ਦਾ ਕਹਿਣਾ ਹੈ ਕਿ ਇਹ ਕਿਰਦਾਰ ਸਾਡੇ ਦੇਸ਼ ਦੇ ਕੌਮੀ ਸੁਰੱਖਿਆ ਸਲਾਹਕਾਰ ਤੋਂ ਪ੍ਰੇਰਿਤ ਹੈ।
ਇਹ ਵੀ ਸੰਯੋਗ ਹੈ ਕਿ ਸੁਰੱਖਿਆ ਸਲਾਹਕਾਰ ਉੱਤਰਾਖੰਡ ਤੋਂ ਹਨ ਪਰ ਪਰਦੇ 'ਤੇ ਉਨ੍ਹਾਂ ਨੂੰ ਜਿਨ੍ਹਾਂ ਦੋ ਕਲਾਕਾਰਾਂ ਨੇ ਨਿਭਾਇਆ ਹੈ, ਉਹ ਦੋਵੇਂ ਗੁਜਰਾਤੀ ਹਨ। ਪਹਿਲਾਂ ਪਰੇਸ਼ ਰਾਵਲ ਨੇ 'ਉਰੀ' ਵਿਚ ਉਨ੍ਹਾਂ ਦਾ ਕਿਰਦਾਰ ਨਿਭਾਇਆ ਤੇ ਹੁਣ ਵੈੱਬ ਸੀਰੀਜ਼ ਵਿਚ ਅਨੰਗ ਦੇਸਾਈ ਨਿਭਾਅ ਰਹੇ ਹਨ।
ਪਰੇਸ਼ ਰਾਵਲ ਦੀ 'ਉਰੀ' ਤਾਂ ਸੁਪਰ ਹਿੱਟ ਰਹੀ ਸੀ, ਹੁਣ ਦੇਖੋ ਅਨੰਗ ਦੀ ਵੈੱਬ ਸੀਰੀਜ਼ ਕੀ ਰੰਗ ਲਿਆਉਂਦੀ ਹੈ।


-ਮੁੰਬਈ ਪ੍ਰਤੀਨਿਧ

ਜੈਕਲਿਨ

ਬਣੂੰ ਪੀ.ਟੀ. ਊਸ਼ਾ

ਆਪਣੇ ਚਮਕੀਲੇ ਰੂਪ, ਰੁਖ਼, ਅੰਦਾਜ਼ ਨੂੰ ਲੈ ਕੇ ਜੈਕੀ ਹਮੇਸ਼ਾ ਚਰਚਿਤ ਰਹੀ ਹੈ। ਜੈਕਲਿਨ ਦਾ ਫੈਸ਼ਨ ਸੈਂਸ ਵੀ ਲੋਕਾਂ ਨੂੰ ਖੂਬ ਪਸੰਦ ਆਉਂਦਾ ਹੈ। ਰੁਝੇਵੇਂ 'ਚੋਂ ਸਮਾਂ ਕੱਢ ਕੇ ਉਹ ਸੋਸ਼ਲ ਮੀਡੀਆ 'ਤੇ ਸਰਗਰਮ ਰਹਿੰਦੀ ਹੈ। 'ਗਰਲ ਫਰੈਂਡ ਤੋਂ ਬ੍ਰੇਕ ਅੱਪ ਤੇ ਫਿਰ ਕਾਲਾ ਸੂਟ' ਉਹ ਇਹ ਕਿਹੜਾ ਗੀਤ ਪਰ ਸ਼ਾਇਦ ਮੇਰਾ ਨਹੀਂ, ਇਹ ਅਟਪਟੀ ਜਿਹੀ ਕੈਪਸ਼ਨ ਲਿਖ ਕੇ ਜੈਕੀ ਨੇ ਤਸਵੀਰ ਇੰਸਟਾਗ੍ਰਾਮ 'ਤੇ ਪਾਈ ਹੈ। 10 ਲੱਖ ਤੋਂ ਵੱਧ ਲਾਈਕਸ ਉਸ ਨੂੰ ਮਿਲੇ ਹਨ। ਲੋਕਾਂ ਨੇ ਤੁਰੰਤ ਜੈਕੀ ਨੂੰ ਨੱਥੀ ਕਰ ਕੇ ਪੋਸਟ ਕੀਤਾ, ਮੈਡਮ ਤੁਹਾਡੇ ਲਈ ਸੱਤ ਖੂਨ ਕਰ ਸਕਦੇ ਹਾਂ। ਸੋਨੂੰ ਹੁਣ ਕੈਟੀ ਲਈ ਦਿਲਚਸਪੀ ਲੈਂਦੇ ਹਨ ਤਾਂ ਹੀ ਅਟਪਟੀਆਂ ਗੱਲਾਂ। ਇਕ ਹੋਰ ਬੰਦੇ ਨੇ ਜੈਕੀ ਨੂੰ ਪ੍ਰਤੀਕਿਰਿਆ ਦਿੱਤੀ ਹੈ। ਇਸ ਸਮੇਂ 'ਡਰਾਈਵ' ਫ਼ਿਲਮ ਹੀ ਉਸ ਕੋਲ ਹੈ ਜਾਂ ਫਿਰ 'ਮਿਸਿਜ਼ ਕਿੱਲਰ' ਵੈੱਬ ਸੀਰੀਜ਼ ਉਸ ਕੋਲ ਹੈ। ਉਮੀਦਾਂ 'ਤੇ ਸੰਸਾਰ ਚਲਦਾ ਹੈ...ਤੇ... 'ਕਿੱਕ-2' ਦਾ ਕੰਮ ਸ਼ੁਰੂ ਹੋ ਗਿਆ ਹੈ। ਇਥੇ ਵੀ ਜੈਕੀ ਨੂੰ ਉਮੀਦ ਟੁੱਟਦੀ ਨਜ਼ਰ ਆ ਰਹੀ ਹੈ ਕਿਉਂਕਿ ਇਸ ਵਾਰ ਸੱਲੂ ਮੀਆਂ ਚਾਹੁੰਦੇ ਹਨ ਦੀਪਿਕਾ ਨਾਲ ਜੋੜੀ... ਤੇ ਇਧਰ ਰੇਵਤੀ ਵਰਮਾ ਨੇ ਪੀ.ਟੀ. ਊਸ਼ਾ 'ਤੇ ਫ਼ਿਲਮ ਸ਼ੁਰੂ ਕੀਤੀ ਹੈ। ਗੱਲ ਜੈਕੀ 'ਤੇ ਆ ਟਿਕੀ ਹੈ ਕਿਉਂਕਿ ਕੈਟੀ ਤਾਂ ਰੇਵਤੀ ਦੇ ਬਜਟ 'ਚ ਨਹੀਂ ਹੈ। ਜੈਕੀ ਦਾ ਜਿੰਮ ਪ੍ਰੇਮ ਇਹ ਬਾਇਓਪਿਕ ਉਸ ਨੂੰ ਦਿਵਾ ਸਕਦਾ ਹੈ। ਆਪਣੀ ਦੀਦੀ ਨਾਲ ਜੈਕੀ ਹੁਣੇ ਹੀ ਛੁੱਟੀਆਂ ਮਨਾ ਕੇ ਆਈ ਹੈ। ਗੁਲਾਬੀ ਰੰਗ ਦਾ ਤੈਰਾਕੀ ਸੂਟ ਜਿਸ 'ਤੇ 'ਬੌਬੀ' ਲਿਖਿਆ ਹੈ, ਪਹਿਨ ਕੇ ਜੈਕੀ ਨੇ ਫੋਟੋਆਂ ਖਿਚਵਾਈਆਂ। ਇਹ ਸਭ ਕੁਝ 'ਡਰਾਈਵ' ਤੋਂ ਬਾਅਦ ਖਾਲੀ ਪਏ ਆਪਣੇ ਕੈਰੀਅਰ ਨੂੰ ਭਰਨ ਦੀਆਂ ਸਕੀਮਾਂ ਹਨ। ਸਲਮਾਨ ਤੋਂ 'ਨਾਂਹ' ਤੇ ਰੇਵਤੀ ਵਲੋਂ ਥੋੜੀ ਦਿਲਚਸਪੀ ਤੇ ਪੀ.ਟੀ. ਊਸ਼ਾ ਦੀ ਬਾਇਓਪਿਕ ਕਰਕੇ ਲੀਹ ਤੋਂ ਲਹਿ ਗਈ ਜੈਕੀ ਦੀ ਫ਼ਿਲਮੀ ਰੇਲ ਫਿਰ ਸਰਪਟ ਸੁਪਰ ਫਾਸਟ ਬਣ ਕੇ ਦੌੜੇਗੀ। ਚਮਕਦੀਆਂ ਤੇ ਭੜਕਾਊ ਤਸਵੀਰਾਂ ਚਰਚਾ ਦੇਣਗੀਆਂ। ਚਰਚਾ ਹੋਵੇਗੀ ਤਾਂ ਇਥੇ ਪੁੱਛਗਿੱਛ ਹੋਊ... ਜੈਕਲਿਨ ਦੀ ਵਿਉਂਤਬੰਦੀ ਸਹੀ ਹੈ, ਅੱਗੇ ਰੱਬ ਜਾਣੇ...।

ਨੋਰਾ ਫਤੇਹੀ

ਚੁਸਤ ਤੇ ਚਲਾਕ

ਅਕਸਰ ਨਵੇਂ-ਨਵੇਂ ਸ਼ੋਸ਼ੇ ਤੇ ਵੀਡੀਓ ਨੋਰਾ ਫਤੇਹੀ ਦੇ ਤੁਸੀਂ ਇੰਟਰਨੈੱਟ 'ਤੇ ਦੇਖਦੇ ਹੋਵੋਗੇ। ਬੈਲੇ ਡਾਂਸ ਲਈ ਮਸ਼ਹੂਰ ਇਹ ਕੁੜੀ 'ਭਾਰਤ' ਨਾਲ ਚਰਚਿਤ ਹੋਈ ਹੈ। ਸ਼ਰਧਾ ਤੇ ਵਰੁਣ ਨਾਲ 'ਸਟਰੀਟ ਡਾਂਸਰ' 'ਚ ਵੀ ਹੈ। ਡਾਂਸ ਲਈ ਤਾਂ ਜਾਨੂੰਨ ਕੁੱਟ-ਕੁੱਟ ਉਸ ਅੰਦਰ ਭਰਿਆ ਪਿਆ ਹੈ। ਵਿਦੇਸ਼ 'ਚ ਸੜਕਾਂ 'ਤੇ ਕੱਪੜੇ ਵੇਚਦੀ ਨੋਰਾ ਦਾ ਵੀਡੀਓ ਵੀ ਕਾਫ਼ੀ ਵਾਇਰਲ ਹੋਇਆ ਹੈ। ਸਥਾਨਕ ਭਾਸ਼ਾ 'ਚ ਉਹ ਕੱਪੜਿਆਂ ਦੀ ਕੀਮਤ ਵੀ ਦੱਸ ਰਹੀ ਹੈ। ਯਾਦ ਕਰੋ 'ਇਸਤਰੀ', 'ਬਾਹੂਬਲੀ', 'ਕਿੱਕ-2' 'ਚ ਨੋਰਾ ਦੇ ਆਈਟਮ ਨੰਬਰ ਹਨ। 'ਸਟਰੀਟ ਡਾਂਸਰ-3 ਡੀ' 1999 ਦੀ 'ਸਿਰਫ਼ ਤੁਮ' ਦਾ ਰੀਮੇਕ ਨੋਰਾ ਨੂੰ ਬਹੁਤ ਪਿਆਰਾ ਲੱਗਦਾ ਹੈ। ਇਹ ਸ਼ਾਇਦ 'ਸਟਰੀਟ ਡਾਂਸਰ' 'ਚ ਨੋਰਾ 'ਤੇ ਹੀ ਹੈ। ਨੋਰਾ ਨੇ ਇਹ ਬਿਆਨ ਦੇ ਕੇ ਨੇਹਾ ਧੂਪੀਆ ਦਾ ਦਿਲ ਸਾੜ ਦਿੱਤਾ ਹੈ ਕਿ ਅੰਗਦ ਬੇਦੀ ਨਾਲ ਉਸ ਦਾ ਪਿਆਰ ਜਗ ਤੋਂ ਨਿਰਾਲਾ ਸੀ। ਕੀ ਨੋਰਾ ਇਹ ਸਭ ਸਸਤੇ ਪ੍ਰਚਾਰ ਲਈ ਕਰ ਰਹੀ ਹੈ? ਪ੍ਰਚਾਰ ਲਈ ਤੇ ਨੋਰਾ ਬੱਚਿਆਂ ਨੂੰ ਵੀ ਹਥਿਆਰ ਬਣਾ ਲੈਂਦੀ ਹੈ। 'ਸਤਿਆਮੇਵ ਜਯਤੇ' ਦੇ 'ਦਿਲਬਰ ਦਿਲਬਰ' ਗਾਣੇ 'ਤੇ ਲੰਦਨ 'ਚ ਉਸ ਨੇ ਸਥਾਨਕ ਬੱਚੇ ਨਚਾ ਦਿੱਤੇ ਤੇ ਉਨ੍ਹਾਂ ਤੋਂ ਠੁਮਕੇ ਲੁਆਏ। ਨੋਰਾ ਚਾਹੁੰਦੀ ਹੈ ਕਿ ਉਹ ਅਭਿਨੇਤਰੀ ਬਣੇ ਪਰ ਬਾਲੀਵੁੱਡ ਉਸ ਨੂੰ 'ਆਈਟਮ ਗਰਲ' ਤੱਕ ਰੱਖਣਾ ਚਾਹੁੰਦਾ ਹੈ। ਸਾਫ਼ ਗੱਲ ਹੈ ਕਿ ਨੋਰਾ ਪੂਰੀ ਚਲਾਕ-ਚੁਸਤ ਤੇ ਮੌਕਾ ਦੇਖ ਕੇ ਤੀਰ ਲਾਉਣ ਦੀਆਂ ਕੋਸ਼ਿਸ਼ਾਂ 'ਚ ਹੈ।

ਰਿਤਿਕ ਰੌਸ਼ਨ

ਸੁਪਰ-30

'ਸੁਪਰ-30' ਲਈ ਰਿਤਿਕ ਰੌਸ਼ਨ ਕਈ ਆਸਾਂ ਦੀ ਗਾਗਰ ਸਿਰ 'ਤੇ ਲੈ ਘੁੰਮ ਰਿਹਾ ਹੈ। ਤਾਂ ਹੀ ਹਰ ਦਿਨ ਸੋਸ਼ਲ ਮੀਡੀਆ 'ਤੇ ਉਹ ਇਸ ਫ਼ਿਲਮ ਬਾਰੇ ਕੋਈ ਨਾ ਕੋਈ ਖ਼ਬਰ, ਪੋਸਟ, ਫੋਟੋ ਜਾਂ ਵੀਡੀਓ ਪਾਉਂਦਾ ਰਹਿੰਦਾ ਹੈ। 'ਸੁਪਰ-30' ਲਈ ਤਾਜ਼ਾ ਟਵੀਟ 'ਚ ਰਿਤਿਕ ਨੇ ਜ਼ਿੰਦਗੀ ਤੇ ਗਣਿਤ ਦੇ ਨੰਬਰਾਂ 'ਚ ਅੰਤਰ ਦੀ ਹੈਰਾਨੀਜਨਕ ਗੱਲ ਲੋਕਾਂ ਨਾਲ ਸਾਂਝੀ ਕੀਤੀ ਹੈ। ਦੋਵੇਂ ਹੀ ਰਿਤਿਕ ਅਨੁਸਾਰ ਸਮੱਸਿਆਵਾਂ ਨਾਲ ਭਰਪੂਰ ਹਨ। 'ਸੁਪਰ-30' 'ਚ ਰਿਤਿਕ ਨੇ ਬਿਹਾਰ ਦੇ ਗਣਿਤ ਮਾਹਿਰ ਆਨੰਦ ਕੁਮਾਰ ਦੇ ਸੰਘਰਸ਼ ਦੀ ਕਹਾਣੀ ਦਾ ਬਿਰਤਾਂਤ ਪਾਇਆ ਹੈ। ਮ੍ਰਿਣਾਲ ਠਾਕੁਰ 'ਸੁਪਰ-30' 'ਚ ਰਿਤਿਕ ਦੇ ਨਾਲ ਹੈ। 12 ਜੁਲਾਈ ਨੂੰ ਰਿਤਿਕ ਦੀ 'ਸੁਪਰ-30' ਆ ਰਹੀ ਹੈ। ਵਿਕਾਸ ਬਹਿਲ ਇਸ ਫ਼ਿਲਮ ਦਾ ਨਿਰਦੇਸ਼ਕ ਹੈ। 'ਸੁਪਰ-30' ਦਾ ਗਾਣਾ ਵੀ ਪ੍ਰਸਿੱਧ ਹੈ। 'ਕੁਮ ਕੁਮ ਭਾਗਾਂ' ਵਾਲੀ ਹੈ। ਮ੍ਰਿਣਾਲ ਠਾਕੁਰ ਦੀ ਰਿਤਿਕ ਨੇ ਕਿਸਮਤ ਹੀ ਬਣਾ ਦਿੱਤੀ ਹੈ, ਜੋ ਰਿਤਿਕ ਨਾਲ 'ਸੁਪਰ-30' 'ਚ ਹੀਰੋਇਨ ਹੈ। ਮ੍ਰਿਣਾਲ ਦੀ ਜ਼ਿੰਦਗੀ ਦਾ ਭੂਗੋਲ ਹੀ ਰਿਤਿਕ ਨੇ 'ਸੁਪਰ-30' ਨਾਲ ਬਦਲ ਦਿੱਤਾ ਹੈ।

ਨਵਨੀਤ ਕੌਰ

ਫ਼ਿਲਮਾਂ, ਸਿਆਸਤ ਨਾਲੋ-ਨਾਲ

ਕੰਨੜ ਦੀ 'ਨੰਦਿਨੀ' ਤੇਲਗੂ ਦੀਆਂ 'ਗੁੱਡ ਬੁਆਏ', 'ਮਹਾਰਾਣੀ', 'ਰੂਮਾ', 'ਟੈਰਰ', 'ਫਲੈਸ਼ ਨਿਊਜ਼', 'ਕਾਲ-ਚਕਰਮ' ਸਮੇਤ ਕਾਫੀ ਫ਼ਿਲਮਾਂ ਕਰ ਚੁੱਕੀ ਨਵਨੀਤ ਕੌਰ ਨੇ ਹਿੰਦੀ ਦੀ 'ਚੇਤਨਾ' ਤੋਂ ਇਲਾਵਾ 9 ਸਾਲ ਪਹਿਲਾਂ ਪੰਜਾਬੀ ਫ਼ਿਲਮ 'ਲੜ ਗਿਆ ਪੇਚਾ' ਕੀਤੀ ਸੀ ਤੇ 'ਛੇਵਾਂ ਦਰਿਆ' 'ਚ ਵੀ ਉਹ ਹੈ ਸੀ। ਖਾਸ ਗੱਲ ਇਹ ਹੈ ਕਿ ਨਵਨੀਤ ਇਸ ਸਮੇਂ ਸੰਸਦ ਮੈਂਬਰ ਹੈ ਤੇ ਹੁਣੇ ਹੋਈਆਂ ਲੋਕ ਸਭਾ ਚੋਣਾਂ 'ਚ ਨਵਨੀਤ ਰਵੀ ਰਾਣਾ ਯਾਨੀ ਨਵਨੀਤ ਕੌਰ ਅਮਰਾਵਤੀ ਤੋਂ ਆਜ਼ਾਦ ਚੋਣ ਲੜ ਕੇ ਸੰਸਦ ਮੈਂਬਰ ਚੁਣੀ ਗਈ ਹੈ। ਅੰਦਾਜ਼ਾ ਲਾਓ ਕਿ ਦੱਖਣ 'ਚ ਲੋਕ ਹੱਥੀਂ ਛਾਵਾਂ ਨਵੀ ਨੂੰ ਕਰਦੇ ਹਨ। ਸ਼ਿਵ ਸੈਨਾ ਨੂੰ ਹਰਾਉਣਾ ਉਸ ਦੇ ਗੜ੍ਹ 'ਚ ਖਾਲਾ ਜੀ ਦਾ ਵਾੜਾ ਨਹੀਂ ਸੀ ਪਰ ਨਵੀ ਨੇ ਇਹ ਕਰ ਦਿਖਾਇਆ ਹੈ। 33 ਸਾਲ ਦੀ ਨਵਨੀਤ ਨੇ ਆਜ਼ਾਦ ਵਿਧਾਇਕ ਰਵੀ ਰਾਣਾ ਨਾਲ ਵਿਆਹ ਕਰਵਾਇਆ ਹੈ। ਵੈਸੇ ਰਾਜਨੀਤੀ ਤੇ ਫ਼ਿਲਮਾਂ ਹੁਣ ਰਿਵਾਜ ਹੀ ਹੈ। ਤਾਂ ਹੀ ਕਦੇ ਜਾਤ ਦੇ ਪ੍ਰਮਾਣ ਪੱਤਰ 'ਤੇ ਕਦੇ ਹੋਰ ਰੌਲੇ-ਰੱਪੇ ਉਸ ਨੂੰ ਲੈ ਕੇ ਪਏ ਹਨ ਪਰ ਉਹ ਬੇਫ਼ਿਕਰ ਆਪਣੇ ਸਫ਼ਰ 'ਤੇ ਚੱਲ ਰਹੀ ਹੈ। ਮਾਡਲ ਰਹੀ ਨਵੀ ਨੇ 6 ਸੰਗੀਤ ਵੀਡੀਓ ਵੀ ਕੀਤੇ ਹਨ। ਯੋਗਾ ਨਾਲ ਪਿਆਰ ਨੇ ਹੀ ਬਾਬਾ ਰਾਮਦੇਵ ਦੇ ਆਸ਼ਰਮ 'ਚ ਉਸ ਨੂੰ ਨੇਤਾ ਰਵੀ ਰਾਣਾ ਨਾਲ ਮਿਲਾਇਆ ਤੇ ਸਮੂਹਿਕ ਵਿਆਹ ਸਮਾਰੋਹ 'ਚ ਉਹ ਵਿਆਹੀ ਗਈ। 8 ਸਾਲ ਪਹਿਲਾਂ 3162 ਜੋੜਿਆਂ 'ਚ ਵਿਆਹ ਕਰਵਾ ਇਕ ਪਾਸੇ 'ਗਲੈਮਰ ਦੁਨੀਆ' ਤੇ ਦੂਜੇ ਪਾਸੇ ਸਾਦਾ ਵਿਆਹ ਨਵੀ ਨੇ ਮਿਸਾਲ ਪੈਦਾ ਕੀਤੀ ਹੈ। ਤੇਲਗੂ ਫ਼ਿਲਮਾਂ ਕਰਕੇ ਹੀ ਸਟਾਰਡੰਮ ਉਸ ਨੇ ਹਾਸਲ ਕੀਤਾ ਹੈ। ਸਿਰਫ਼ ਪਲੱਸ ਟੂ ਹੀ ਕੀਤੀ ਹੈ ਪਰ ਵਿਆਹ 'ਤੇ ਨਾਮਵਰ ਹਸਤੀਆਂ, ਸਹਾਰਾ ਮੁਖੀ ਤੇ ਹੋਰ ਨੇਤਾ ਵੀ ਪਹੁੰਚੇ ਸਨ। ਜੂਨੀਅਰ ਐਨ.ਟੀ.ਆਰ. ਤੇ ਵਿਜੈ ਕਾਂਤ ਨਾਲ ਦੱਖਣ 'ਚ ਉਸ ਦੀ ਜੋੜੀ ਕਾਫ਼ੀ ਮਸ਼ਹੂਰ ਹੋਈ। ਗੱਲ ਭਵਿੱਖ ਦੀ ਕਰੀਏ ਤਾਂ ਫ਼ਿਲਮਾਂ ਲਈ ਸਮਾਂ ਕੱਢਣਾ ਹੈ, ਰਾਜਨੀਤੀ ਵੀ ਕਰਨੀ ਹੈ, ਲੋਕਾਂ ਦੇ ਕੰਮ ਵੀ ਤੇ ਨਵਨੀਤ ਇਕ ਦਿਨ ਮੰਤਰੀ ਬਣ ਕੇ ਜ਼ਰੂਰ ਕੁਝ ਕਰਨ ਦੇ ਸੁਪਨੇ ਰੱਖਦੀ ਹੈ। ਇੰਜ ਹੀ ਇਹ ਪੂਰੇ ਵੀ ਹੋ ਜਾਣੇ ਹਨ।


-ਸੁਖਜੀਤ ਕੌਰ

'ਛੜਾ' ਫ਼ਿਲਮ ਰਾਹੀਂ ਇਕ ਵਾਰ ਫੇਰ ਵੱਡੇ ਪਰਦੇ 'ਤੇ ਧੁੰਮਾਂ ਪਾਵੇਗੀ ਦਿਲਜੀਤ ਦੁਸਾਂਝ ਤੇ ਨੀਰੂ ਬਾਜਵਾ ਦੀ ਜੋੜੀ

ਬਾਲੀਵੁੱਡ ਅਦਾਕਾਰ ਤੇ ਗਾਇਕ ਦਿਲਜੀਤ ਦੁਸਾਂਝ ਅਤੇ ਪੰਜਾਬੀ ਫ਼ਿਲਮਾਂ ਦੀ ਸੁਪਰਹਿੱਟ ਅਦਾਕਾਰਾ ਨੀਰੂ ਬਾਜਵਾ ਦੀ ਜੋੜੀ 4 ਸਾਲਾਂ ਬਾਅਦ 21 ਜੂਨ ਨੂੰ ਵਿਸ਼ਵ ਭਰ ਵਿਚ ਰਿਲੀਜ਼ ਹੋਣ ਵਾਲੀ ਆਪਣੀ ਨਵੀਂ ਫ਼ਿਲਮ 'ਛੜਾ' ਰਾਹੀਂ ਇਕ ਵਾਰ ਫੇਰ ਵੱਡੇ ਪਰਦੇ 'ਤੇ ਧੁੰਮਾਂ ਪਾਉਣ ਲਈ ਆ ਰਹੀ ਹੈ।
'ਛੜਾ' ਫ਼ਿਲਮ ਦੇ ਟਾਈਟਲ ਤੋਂ ਹੀ ਪਤਾ ਲੱਗ ਰਿਹਾ ਹੈ ਕਿ ਫ਼ਿਲਮ ਛੜਿਆਂ ਦੀ ਜ਼ਿੰਦਗੀ ਨਾਲ ਸਬੰਧਿਤ ਹੈ। ਫ਼ਿਲਮ ਦੇ ਟਰੇਲਰ ਅਤੇ ਗੀਤ ਛੜਾ, ਟੌਮੀ, ਐਕਸਪੈਨਸਿਵ, ਮਹਿਫ਼ਲ, ਮੋਰ ਨੂੰ ਲੱਖਾਂ ਲੋਕਾਂ ਨੇ ਦੇਖ ਕੇ ਤੇ ਪਸੰਦ ਕਰ ਕੇ ਸੁਪਰਹਿੱਟ ਕਰ ਦਿੱਤਾ ਹੈ। ਫ਼ਿਲਮ ਦੇ ਟਰੇਲਰ ਤੇ ਪੋਸਟਰਾਂ ਵਿਚ ਦਿਲਜੀਤ ਦੀ ਕੌਮਾਂਤਰੀ ਸੁਪਰ ਸਟਾਰ ਕੈਲੀ ਜੈਨਰ ਪ੍ਰਤੀ ਦੀਵਾਨਗੀ ਦਿਖਾਈ ਗਈ ਹੈ ਅਤੇ ਉਸ ਦੇ ਹੱਥ ਵਿਚ ਦੇਸੀ ਪੰਜਾਬੀ ਛੜਾ ਪਲਾਸਟਿਕ ਦੀ ਗੁੱਡੀ ਫੜ੍ਹੀ ਹੋਈ ਹੈ। ਫ਼ਿਲਮ ਦੀ ਰੋਚਕ ਟੈਗਲਾਈਨ 'ਕੁੱਤਾ ਹੋਵੇ ਜਿਹੜਾ ਵਿਆਹ ਕਰਵਾਵੇ' ਸਾਰਿਆਂ ਦੀ ਜ਼ੁਬਾਨ 'ਤੇ ਚੜ੍ਹੀ ਹੋਈ ਹੈ। 'ਛੜਾ' ਫ਼ਿਲਮ ਵਿਚ ਦਿਲਜੀਤ ਇਕ ਪਿਆਰ ਦੇਸੀ ਕਿਰਦਾਰ ਵਿਚ ਨਜ਼ਰ ਆਵੇਗਾ, ਫ਼ਿਲਮ ਵਿਚ ਛੜਿਆਂ ਦੀ ਜ਼ਿੰਦਗੀ ਦੇ ਹਰ ਰੰਗ ਨੂੰ ਬੜੇ ਵਧੀਆ ਅੰਦਾਜ਼ ਵਿਚ ਪੇਸ਼ ਕੀਤਾ ਗਿਆ ਹੈ। ਨੀਰੂ ਬਾਜਵਾ ਨੂੰ ਵਿਆਹ ਤੇ ਮੁੰਡਿਆਂ ਤੋਂ ਦੂਰ ਰਹਿਣਾ ਚੰਗਾ ਲੱਗਦਾ ਹੈ। ਦੂਸਰੇ ਪਾਸੇ ਦਿਲਜੀਤ ਵਿਆਹ ਨੂੰ ਬੇਲੋੜਾ ਤੇ ਇਨਸਾਨ ਵੱਲੋਂ ਧੱਕੇ ਨਾਲ ਬਣਾਇਆ ਗਿਆ ਰਿਸ਼ਤਾ ਦੱਸਦਾ ਹੈ। ਛੜਿਆਂ ਤੇ ਵਿਆਹਿਆਂ ਦੀ ਜ਼ਿੰਦਗੀ ਨੂੰ ਫ਼ਿਲਮ ਵਿਚ ਬੜੀ ਖ਼ੂਬਸੂਰਤੀ ਨਾਲ ਦਰਸਾਉਣ ਦਾ ਉਪਰਾਲਾ ਕੀਤਾ ਗਿਆ ਹੈ।
ਫ਼ਿਲਮ ਦੇ ਲੇਖਕ ਤੇ ਨਿਰਦੇਸ਼ਕ ਪੰਜਾਬੀ ਫ਼ਿਲਮ ਸਨਅਤ ਦੀ ਝੌਲੀ ਵਿਚ ਕਈ ਸਪੁਰਹਿੱਟ ਫ਼ਿਲਮਾਂ ਪਾਉਣ ਵਾਲੇ ਜਗਦੀਪ ਸਿੰਘ ਸਿੱਧੂ ਹਨ ਅਤੇ ਫ਼ਿਲਮ ਦੇ ਸੰਵਾਦ ਵੀ ਉਨ੍ਹਾਂ ਨੇ ਹੀ ਲਿਖੇ ਹਨ ਜਦਕਿ ਫ਼ਿਲਮ ਦੇ ਨਿਰਮਾਤਾ 'ਕੈਰੀ ਆਨ ਜੱਟਾ-2' ਤੇ 'ਵਧਾਈਆਂ ਜੀ ਵਧਾਈਆਂ' ਬਣਾਉਣ ਵਾਲੇ ਏ.ਐਡ.ਏ. ਐਡਵਾਈਜ਼ਰਸ ਦੇ ਅਤੁਲ ਭੱਲਾ, ਅਮਿਤ ਭੱਲਾ ਅਤੇ 'ਉੜਤਾ ਪੰਜਾਬ', 'ਕੇਸਰੀ', 'ਜੱਟ ਐਂਡ ਜੂੁਲੀਅਟ-1', 'ਜੱਟ ਐਂਡ ਜੂੁਲੀਅਟ-2' ਤੇ 'ਪੰਜਾਬ 1984' ਦਾ ਨਿਰਦੇਸ਼ਨ ਕਰਨ ਵਾਲੇ ਬਰੈਟ ਪ੍ਰੋਡਕਸ਼ਨ ਦੇ ਅਨੁਰਾਗ ਸਿੰਘ, ਅਮਨ ਗਿੱਲ, ਪਵਨ ਗਿੱਲ ਹਨ। ਫ਼ਿਲਮ ਦਾ ਸੰਗੀਤ ਨਿੱਕ ਧੰਮੂ, ਜੇ.ਐਸ.ਐਲ. ਸਿੰਘ, ਵੀ. ਰੈਕ. ਐਕਸ ਮਿਊਜ਼ਿਕ ਦੇ ਰਾਕੇਸ਼ ਵਰਮਾ ਨੇ ਤਿਆਰ ਕੀਤਾ ਹੈ। ਗੀਤਾਂ ਦੇ ਬੋਲ ਹੈਪੀ ਰਾਏਕੋਟੀ, ਰਾਜ ਰਣਜੋਧ, ਰੈਵ ਹੰਜਰਾ ਨੇ ਲਿਖੇ ਹਨ। ਫ਼ਿਲਮ ਦੇ ਗੀਤਾਂ ਨੂੰ ਦਿਲਜੀਤ ਦੁਸਾਂਝ, ਰਾਜ ਰਣਜੋਧ ਨੇ ਗਾਇਆ, ਅਦਾਕਾਰ ਦਿਲਜੀਤ ਦੁਸਾਂਝ ਤੇ ਨੀਰੂ ਬਾਜਵਾ ਦੀ ਜੋੜੀ ਜੱਟ ਐਂਡ ਜੂਲੀਅਟ, ਜੱਟ ਐਂਡ ਜੂਲੀਅਟ-2, ਸਰਦਾਰ ਜੀ, ਜਿਹਨੇ ਮੇਰਾ ਦਿਲ ਲੁੱਟਿਆ ਰਾਹੀਂ ਬਾਕਸ ਆਫ਼ਿਸ ਦੇ ਸਾਰੇ ਰਿਕਾਰਡ ਤੋੜ ਚੁੱਕੀ ਹੈ। 4 ਸਾਲ ਬਾਅਦ ਇਹ ਜੋੜੀ ਮੁੜ ਨਵੀਂ ਕਹਾਣੀ ਤੇ ਨਵਾਂ ਅੰਦਾਜ਼ ਲੈ ਕੇ ਦਰਸ਼ਕਾਂ ਦੇ ਸਾਹਮਣੇ ਆ ਰਹੀ ਹੈ। ਦਿਲਜੀਤ ਤੇ ਨੀਰੂ ਬਾਜਵਾ ਦੀ ਜੋੜੀ ਬਾਲੀਵੁੱਡ ਦੀ ਸੁਪਰਹਿੱਟ ਧਰਮਿੰਦਰ ਤੇ ਹੇਮਾ ਮਾਲਿਨੀ, ਸ਼ਾਹਰੁਖ ਖ਼ਾਨ ਤੇ ਕਾਜੋਲ, ਗੁਰਦਾਸ ਮਾਨ ਤੇ ਪਰੀਤੀ ਸਪਰੂ ਦੀ ਜੋੜੀ ਵਾਂਗ ਬਣ ਗਈ ਹੈ, ਜਿਸ ਨੇ ਜਿੰਨੀਆਂ ਵੀ ਫ਼ਿਲਮਾਂ ਵਿਚ ਕੰਮ ਕੀਤਾ ਉਹ ਫ਼ਿਲਮਾਂ ਸੁਪਰਹਿੱਟ ਰਹੀਆਂ। ਫਿਲਮ ਦੇ ਨਿਰਦੇਸ਼ਕ ਤੇ ਨਿਰਮਾਤਾ ਅਤੇ ਕਲਾਕਾਰਾਂ ਨੂੰ ਇਸ ਫ਼ਿਲਮ ਤੋਂ ਬਹੁਤ ਜ਼ਿਆਦਾ ਆਸਾਂ ਹਨ।


-ਪੁਨੀਤ ਬਾਵਾ,
ਵਿਸ਼ੇਸ਼ ਪ੍ਰਤੀਨਿਧ, ਲੁਧਿਆਣਾ।

ਤਮੰਨਾ ਭਾਟੀਆ

ਜ਼ਿੰਦਗੀ ਸ਼ੁੱਕਰਵਾਰ ਤੱਕ

ਤਮੰਨਾ ਭਾਟੀਆ ਚਾਹੇ ਹਿੰਦੀ ਫ਼ਿਲਮਾਂ ਦੀ ਸੁਪਰ ਹੀਰੋਇਨ ਨਹੀਂ ਬਣ ਸਕੀ ਪਰ ਦੱਖਣ ਦੀਆਂ ਫ਼ਿਲਮਾਂ 'ਚ ਉਹ ਛਾਈ ਹੋਈ ਹੈ। 'ਬਾਹੂਬਲੀ' ਨੇ ਉਸ ਦੀ ਪਛਾਣ ਬਣਾਈ ਹੈ। ਤਮੰਨਾ ਨੇ ਕਿਹਾ ਕਿ ਉਹ ਉਚਾਈ ਤੋਂ ਡਰਦੀ ਹੈ। ਉਹ ਕਹਿੰਦੀ ਹੈ ਕਲਾਕਾਰ ਬਣਨ ਲਈ ਨਿਕਲੀ ਸਾਂ ਪਰ ਬਣ ਗਈ ਨਾਇਕਾ ਤੇ ਮਹਿਸੂਸ ਹੋਇਆ ਕਿ ਸਟਾਰਡਮ ਮਿਲਣਾ ਆਮ ਹੀ ਹੈ। ਇਹ ਪਹੁੰਚ ਤੋਂ ਬਾਹਰ ਦੀ ਗੱਲ ਨਹੀਂ। ਉਹ ਕਿਸਮਤ ਵਾਲੀ ਹੈ ਕਿ ਦੱਖਣ 'ਚ ਉਸ ਕੋਲ ਵਫਾਦਾਰ ਪ੍ਰਸੰਸਕ ਹਨ। ਤਮੰਨਾ ਕਹਿੰਦੀ ਹੈ ਕਿ ਉਨ੍ਹਾਂ ਦੀ ਜ਼ਿੰਦਗੀ ਸ਼ੁੱਕਰਵਾਰ ਤੋਂ ਸ਼ੁੱਕਰਵਾਰ ਤੱਕ ਵਾਲੀ ਹੈ। ਇਸ ਦਿਨ ਦੇ ਨਾਲ ਹੀ ਬਹੁਤ ਕੁਝ ਬਦਲ ਜਾਂਦਾ ਹੈ। ਕੁਝ ਚੰਗੇ ਸ਼ੁੱਕਰਵਾਰ ਤੇ ਕੁਝ ਮਾੜੇ ਸ਼ੁੱਕਰਵਾਰ ਤਮੰਨਾ ਨੇ ਦੇਖੇ ਹਨ। 'ਖ਼ਾਮੋਸ਼ੀ' ਫ਼ਿਲਮ ਲਈ ਉਸ ਨੇ ਗੂੰਗਿਆਂ ਤੇ ਬੋਲਿਆਂ ਦੀ ਸੰਕੇਤਕ ਭਾਸ਼ਾ ਵੀ ਸਿੱਖੀ ਹੈ। ਅੱਜਕਲ੍ਹ ਉਸ ਅਨੁਸਾਰ ਹਰੇਕ ਫ਼ਿਲਮ ਲਈ ਕੁਝ ਨਾ ਕੁਝ ਸਿੱਖਣਾ ਪੈਂਦਾ ਹੈ। ਹਾਲਾਂਕਿ ਤਮੰਨਾ ਦਾ ਆਨਲਾਈਨ ਵਪਾਰ ਵੀ ਹੈ ਪਰ ਜ਼ਿਆਦਾ ਧਿਆਨ ਉਸ ਦਾ ਫ਼ਿਲਮਾਂ ਵੱਲ ਹੈ। ਸਿਤਾਰਿਆਂ ਨਾਲ ਪ੍ਰਸੰਸਕਾਂ ਦੀ ਬਦਸਲੂਕੀ ਤੇ ਸੋਸ਼ਲ ਮੀਡੀਆ 'ਤੇ ਆਲੋਚਨਾ ਇਸ ਕੰਮ ਤੋਂ ਉਹ ਦੁਖੀ ਹੈ। ਤਮੰਨਾ ਨੇ ਵਿਰਾਟ ਕੋਹਲੀ ਪ੍ਰਤੀ ਝੁਕਾਅ ਨੂੰ ਗ਼ਲਤ ਦੱਸਿਆ ਹੈ, ਜਦਕਿ ਅਭਿਨੇਤਾ ਵਿੱਕੀ ਕੌਸ਼ਲ ਪ੍ਰਤੀ ਉਸ ਦਾ ਉਤਸ਼ਾਹ ਦੇਖਣ-ਸੁਣਨਯੋਗ ਹੈ। 'ਹਿੰਮਤਵਾਲਾ' ਤੋਂ 'ਸੂਰਮਾ', 'ਮਨਮਰਜ਼ੀਆਂ' ਫ਼ਿਲਮਾਂ ਕੀਤੀਆਂ ਪਰ ਤਮੰਨਾ ਦਾ ਅਸਲੀ ਟਿਕਾਣਾ ਦੱਖਣ ਹੀ ਹੈ। ਅਰਜੁਨ ਕਪੂਰ ਤੇ ਸੁਸ਼ਾਂਤ ਸਿੰਘ ਰਾਜਪੂਤ ਨਾਲ ਤਮੰਨਾ ਨੇ ਸਟੇਜ ਸ਼ੋਅ ਵੀ ਕੀਤੇ ਹਨ। ਫਿਰ ਗੱਲ ਫ਼ਿਲਮਾਂ 'ਤੇ ਹੀ ਮੁੱਕਦੀ ਹੈ ਤੇ ਤਮੰਨਾ ਜ਼ਿਆਦਾ ਚਿੰਤਾ ਬਾਲੀਵੁੱਡ ਲਈ ਨਹੀਂ ਕਰੇਗੀ। ਦੱਖਣ 'ਚ ਉਸ ਦਾ ਸਿੱਕਾ ਚਲ ਰਿਹਾ ਹੈ। ਤਾਂ ਹੀ ਬਾਲੀਵੁੱਡ ਦੀ ਘੱਟ ਤੇ ਦੱਖਣ ਦੀ ਉਹ ਜ਼ਿਆਦਾ ਤਾਰੀਫ਼ ਕਰਦੀ ਹੈ।

ਵੱਖਰੀ ਜਿਹੀ ਭੂਮਿਕਾ ਵਿਚ ਅਦਾ ਸ਼ਰਮਾ

'1920', 'ਕਮਾਂਡੋ' ਫੇਮ ਅਦਾ ਸ਼ਰਮਾ ਹੁਣ ਆਪਣੀ ਅਗਲੀ ਫ਼ਿਲਮ 'ਮੈਨ ਟੂ ਮੈਨ' ਵਿਚ ਵੱਖਰੀ ਜਿਹੀ ਭੂਮਿਕਾ ਨਿਭਾਉਂਦੀ ਦਿਸੇਗੀ। ਫ਼ਿਲਮ ਵਿਚ ਉਹ ਇਕ ਇਸ ਤਰ੍ਹਾਂ ਦਾ ਕਿਰਦਾਰ ਨਿਭਾਅ ਰਹੀ ਹੈ ਜਿਸ ਦੇ ਪਿਆਰ ਵਿਚ ਇਕ ਮੁੰਡਾ ਪੈ ਜਾਂਦਾ ਹੈ। ਬਾਅਦ ਵਿਚ ਜਦੋਂ ਉਸ ਮੁੰਡੇ ਨੂੰ ਪਤਾ ਲਗਦਾ ਹੈ ਕਿ ਉਹ ਜਿਸ ਕੁੜੀ ਨੂੰ ਆਪਣਾ ਦਿਲ ਦੇ ਬੈਠਾ ਹੈ, ਉਹ ਅਸਲ ਵਿਚ ਮੁੰਡਾ ਹੈ ਤੇ ਉਸ ਤੋਂ ਬਾਅਦ ਕੀ ਹੰਗਾਮਾ ਹੋ ਜਾਂਦਾ ਹੈ, ਇਹ ਇਸ ਦੀ ਕਹਾਣੀ ਹੈ।
ਆਪਣੀ ਇਸ ਫ਼ਿਲਮ ਨੂੰ ਪ੍ਰਚਾਰਿਤ ਕਰਨ ਲਈ ਅਦਾ ਨੇ ਸੋਸ਼ਲ ਮੀਡੀਆ 'ਤੇ ਆਪਣੀ ਉਹ ਤਸਵੀਰ ਪੇਸ਼ ਕੀਤੀ ਹੈ ਜਿਸ ਵਿਚ ਉਹ ਮੁੱਛਾਂ ਲਗਾਈ ਨਜ਼ਰ ਆਉਂਦੀ ਹੈ। ਕਹਿਣਾ ਨਾ ਹੋਵੇਗਾ ਕਿ ਖ਼ੂਬਸੂਰਤ ਅਦਾ ਨੂੰ ਇਸ ਰੂਪ ਵਿਚ ਦੇਖ ਕੇ ਸੋਸ਼ਲ ਮੀਡੀਆ 'ਤੇ ਫ਼ਿਲਮ ਦੀ ਚਰਚਾ ਜ਼ੋਰਾਂ 'ਤੇ ਹੋਣ ਲੱਗ ਗਈ ਹੈ। ਦੇਖੋ, ਇਸ ਫ਼ਿਲਮ ਵਿਚ ਅਦਾ ਦੀ ਅਦਾ ਕੀ ਰੰਗ ਲਿਆਉਂਦੀ ਹੈ।


-ਮੁੰਬਈ ਪ੍ਰਤੀਨਿਧ

ਫ਼ਿਲਮੀ ਖ਼ਬਰਸਾਰ

ਹੁਣ 'ਮੁੰਨਾ ਬਦਨਾਮ ਹੁਆ...'

ਸਲਮਾਨ ਖਾਨ ਨੂੰ ਪੁਲਿਸ ਅਫ਼ਸਰ ਚੁਲਬੁਲ ਪਾਂਡੇ ਦੀ ਭੂਮਿਕਾ ਵਿਚ ਚਮਕਾਉਂਦੀ 'ਦਬੰਗ' ਜਦੋਂ ਪ੍ਰਦਰਸ਼ਿਤ ਹੋਈ ਸੀ ਤਾਂ ਇਸ ਨੂੰ ਹਿਟ ਕਰਾਉਣ ਦੇ ਪਿੱਛੇ ਫ਼ਿਲਮ ਦੇ ਆਈਟਮ ਗੀਤ 'ਮੁੰਨੀ ਬਦਨਾਮ ਹੁਈ...' ਦਾ ਵੀ ਵੱਡਾ ਯੋਗਦਾਨ ਰਿਹਾ ਸੀ। ਮਲਾਇਕਾ ਅਰੋੜਾ 'ਤੇ ਇਹ ਗੀਤ ਫ਼ਿਲਮਾਇਆ ਗਿਆ ਸੀ। ਬਾਅਦ ਵਿਚ ਇਸੇ ਗੀਤ ਤੋਂ ਪ੍ਰੇਰਿਤ ਹੋ ਕੇ 'ਦਬੰਗ-2' ਵਿਚ ਆਈਟਮ ਗੀਤ 'ਫੈਵੀਕੋਲ ਸੇ...' ਰੱਖਿਆ ਗਿਆ ਅਤੇ ਇਥੇ ਕਰੀਨਾ ਕਪੂਰ ਲੱਕ ਹਿਲਾਉਂਦੀ ਨਜ਼ਰ ਆਈ ਸੀ।
ਹੁਣ ਜਦੋਂ 'ਦਬੰਗ-3' ਬਣ ਰਹੀ ਹੈ ਤਾਂ ਲੋਕਾਂ ਨੂੰ ਫ਼ਿਲਮ ਵੱਲ ਆਕਰਸ਼ਿਤ ਕਰਨ ਲਈ ਫਿਰ ਇਕ ਵਾਰ ਆਈਟਮ ਗੀਤ ਦਾ ਸਹਾਰਾ ਲਿਆ ਜਾ ਰਿਹਾ ਹੈ। ਹੁਣ ਦੀ ਵਾਰ ਫ਼ਿਲਮ ਵਿਚ ਜੋ ਗੀਤ ਰੱਖਿਆ ਗਿਆ ਹੈ, ਉਸ ਦੇ ਬੋਲ ਹਨ, 'ਮੁੰਨਾ ਬਦਨਾਮ ਹੁਆ...' ਅਤੇ ਇਹ ਵਰੀਨਾ ਹੁਸੈਨ 'ਤੇ ਫ਼ਿਲਮਾਇਆ ਗਿਆ ਹੈ। ਵਰੀਨਾ ਨੂੰ ਸਲਮਾਨ ਖਾਨ ਵਲੋਂ 'ਲਵ ਯਾਤਰੀ' ਵਿਚ ਚਮਕਾਇਆ ਗਿਆ ਸੀ। ਸਲਮਾਨ ਨੇ ਆਪਣੇ ਜੀਜਾ ਆਯੂਸ਼ ਸ਼ਰਮਾ ਨੂੰ ਬਾਲੀਵੁੱਡ ਵਿਚ ਮੌਕਾ ਦੇਣ ਲਈ ਇਸ ਫ਼ਿਲਮ ਦਾ ਨਿਰਮਾਣ ਕੀਤਾ ਸੀ ਅਤੇ ਇਸ ਵਿਚ ਵਰੀਨਾ ਨੂੰ ਆਯੂਬ ਦੀ ਹੀਰੋਇਨ ਦੇ ਤੌਰ 'ਤੇ ਮੌਕਾ ਦਿੱਤਾ ਗਿਆ ਸੀ।
'ਮੁੰਨਾ ਬਦਨਾਮ ਹੁਆ...' ਨੂੰ ਸਾਜਿਦ-ਵਾਜਿਦ ਵਲੋਂ ਸੰਗੀਤਬੱਧ ਕੀਤਾ ਗਿਆ ਹੈ ਅਤੇ ਇਸ ਲਈ 'ਓ ਓ ਜਾਨੇ ਜਾਨਾ...' ਫੇਮ ਕਮਾਲ ਖਾਨ ਤੇ ਬਾਦਸ਼ਾਹ ਨੇ ਆਵਾਜ਼ ਦਿੱਤੀ ਹੈ। ਮੁੰਬਈ ਦੇ ਮਹਿਬੂਬ ਸਟੂਡੀਓ ਵਿਚ ਢਾਬੇ ਦਾ ਸੈੱਟ ਖੜ੍ਹਾ ਕਰ ਇਹ ਗੀਤ ਸਲਮਾਨ ਤੇ ਵਰੀਨਾ 'ਤੇ ਫ਼ਿਲਮਾਇਆ ਗਿਆ ਹੈ। 'ਮੁੰਨੀ...' ਨੇ ਤਾਂ 'ਦਬੰਗ' ਹਿੱਟ ਕਰਵਾ ਦਿੱਤੀ ਸੀ। ਹੁਣ ਦੇਖੋ 'ਮੁੰਨਾ...', 'ਦਬੰਗ-3' ਲਈ ਕੀ ਕਮਾਲ ਦਿਖਾਉਂਦਾ ਹੈ।

ਕਰਨ ਜੌਹਰ

ਲਿਆ ਰਹੇ ਹਨ

ਭੂਤ

ਇਕ ਜ਼ਮਾਨਾ ਸੀ ਜਦੋਂ ਰਾਮਗੋਪਾਲ ਵਰਮਾ ਅਤੇ ਕਰਨ ਜੌਹਰ ਸੋਸ਼ਲ ਮੀਡੀਆ 'ਤੇ ਇਕ ਦੂਜੇ ਦੀ ਲੱਤ ਖਿੱਚਦੇ ਰਹਿੰਦੇ ਸਨ। ਹੁਣ ਕਰਨ ਨੇ ਰਾਮਗੋਪਾਲ ਵਰਮਾ ਤੋਂ 'ਭੂਤ' ਸਿਰਲੇਖ ਮੰਗ ਕੇ ਆਪਣੀ ਨਵੀਂ ਫ਼ਿਲਮ ਬਣਾਉਣੀ ਸ਼ੁਰੂ ਕਰ ਦਿੱਤੀ ਹੈ। 'ਭੂਤ-ਪਾਰਟ ਵਨ - ਦ ਹਾਂਟੇਡ ਸ਼ਿਪ' ਨਾਂਅ ਰੱਖ ਕੇ ਕਰਨ ਹੁਣ ਡਰਾਉਣੀ ਫ਼ਿਲਮ ਬਣਾ ਰਹੇ ਹਨ ਅਤੇ ਇਸ ਦੇ ਨਾਇਕ ਹਨ ਵਿੱਕੀ ਕੌਸ਼ਲ। ਨਵੇਂ ਨਿਰਦੇਸ਼ਕ ਭਾਨੂ ਪ੍ਰਤਾਪ ਸਿੰਘ ਵਲੋਂ ਨਿਰਦੇਸ਼ਿਤ ਕੀਤੀ ਜਾ ਰਹੀ ਇਸ ਫ਼ਿਲਮ ਦੀ ਜ਼ਿਆਦਾਤਰ ਸ਼ੂਟਿੰਗ ਪਾਣੀ ਦੇ ਜਹਾਜ਼ 'ਤੇ ਕੀਤੀ ਜਾਣੀ ਹੈ।
**

ਗੁਜਰਾਤੀ ਬਣ ਕੇ ਕਾਮੇਡੀ ਕਰੇਗਾ

ਰਣਵੀਰ ਸਿੰਘ

'ਪਦਮਾਵਤ' ਵਿਚ ਖੂੰਖਾਰ ਖਿਲਜੀ ਤੇ 'ਗਲੀ ਬੁਆਏ' ਵਿਚ ਗ਼ਰੀਬ ਪਰਿਵਾਰ ਦੇ ਮੁੰਡੇ ਦੀ ਭੂਮਿਕਾ ਨਿਭਾਉਣ ਵਾਲੇ ਰਣਵੀਰ ਸਿੰਘ ਨੂੰ ਹੁਣ ਯਸ਼ਰਾਜ ਬੈਨਰ ਵਲੋਂ ਕਾਮੇਡੀ ਫ਼ਿਲਮ 'ਜਯੇਸ਼ ਭਾਈ ਜ਼ੋਰਦਾਰ' ਲਈ ਇਕਰਾਰਬੱਧ ਕੀਤਾ ਗਿਆ ਹੈ। ਨਵੇਂ ਨਿਰਦੇਸ਼ਕ ਦਿਵਿਆਂਗ ਠੱਕਰ ਵਲੋਂ ਨਿਰਦੇਸ਼ਿਤ ਕੀਤੀ ਜਾਣ ਵਾਲੀ ਇਸ ਫ਼ਿਲਮ ਵਿਚ ਰਣਵੀਰ ਸਿੰਘ ਨੂੰ ਇਕ ਗੁਜਰਾਤੀ ਦੀ ਭੂਮਿਕਾ ਵਿਚ ਪੇਸ਼ ਕੀਤਾ ਜਾਵੇਗਾ।
ਇਸ ਕਾਮੇਡੀ ਫ਼ਿਲਮ ਨੂੰ ਲੈ ਕੇ ਰਣਵੀਰ ਚੰਗੇ ਉਤਸ਼ਾਹੀ ਵੀ ਹਨ। ਉਹ ਕਹਿੰਦੇ ਹਨ, 'ਪਿਛਲੇ ਕੁਝ ਸਮੇਂ ਤੋਂ ਮੈਂ ਪ੍ਰਭਾਵਸ਼ਾਲੀ ਭੂਮਿਕਾਵਾਂ ਕਰ ਰਿਹਾ ਸੀ। ਇਸ ਤਰ੍ਹਾਂ ਦੀ ਭੂਮਿਕਾ ਲਈ ਮੈਨੂੰ ਬਹੁਤ ਮਿਹਨਤ ਕਰਨੀ ਪਈ ਸੀ। ਇਸ ਤਰ੍ਹਾਂ ਮੈਨੂੰ ਇਹ ਲੱਗਣ ਲੱਗਾ ਸੀ ਕਿ ਖ਼ੁਦ ਨੂੰ ਤਣਾਅ ਤੋਂ ਮੁਕਤ ਕਰਨ ਲਈ ਮੈਨੂੰ ਕਾਮੇਡੀ ਭੂਮਿਕਾਵਾਂ ਕਰਨੀਆਂ ਚਾਹੀਦੀਆਂ ਹਨ। ਹਾਂ, 'ਸਿੰਬਾ' ਵਿਚ ਕੁਝ ਕਾਮੇਡੀ ਦ੍ਰਿਸ਼ ਸਨ ਪਰ ਫ਼ਿਲਮ ਵਿਚ ਐਕਸ਼ਨ ਦਾ ਡੋਜ਼ ਜ਼ਿਆਦਾ ਸੀ। ਇਸ ਤਰ੍ਹਾਂ ਜਦੋਂ ਯਸ਼ ਰਾਜ ਬੈਨਰ ਵਲੋਂ 'ਜਯੇਸ਼ਭਾਈ ਜ਼ੋਰਦਾਰ' ਦੀ ਪੇਸ਼ਕਸ਼ ਕੀਤੀ ਗਈ ਤਾਂ ਲੱਗਿਆ ਕਿ ਮੂੰਹੋਂ ਮੰਗੀ ਮੁਰਾਦ ਪੂਰੀ ਹੋ ਗਈ। ਮੇਰੇ ਦਿਲ ਵਿਚ ਇਸ ਬੈਨਰ ਲਈ ਵਿਸ਼ੇਸ਼ ਥਾਂ ਹੈ। ਇਥੋਂ ਹੀ ਮੈਂ 'ਬੈਂਡ ਬਾਜਾ ਬਾਰਾਤ' ਨਾਲ ਆਪਣੀ ਸ਼ੁਰੂਆਤ ਕੀਤੀ ਸੀ। ਮੈਂ ਜਾਣਦਾ ਹਾਂ ਕਿ ਜਦੋਂ ਕਦੀ ਇਸ ਬੈਨਰ ਵਲੋਂ ਮੈਨੂੰ ਫ਼ਿਲਮ ਦੀ ਪੇਸ਼ਕਸ਼ ਕੀਤੀ ਜਾਵੇਗੀ ਤਾਂ ਉਸ ਵਿਚ ਜ਼ਰੂਰ ਕੁਝ ਨਵੀਂ ਗੱਲ ਹੋਵੇਗੀ। 'ਜਯੇਸ਼ਭਾਈ' ਵਿਚ ਮੇਰੀ ਜੋ ਭੂਮਿਕਾ ਹੈ, ਉਸ ਤਰ੍ਹਾਂ ਦੀ ਪਹਿਲਾਂ ਕਦੀ ਨਹੀਂ ਨਿਭਾਈ ਅਤੇ ਇਸ ਭੂਮਿਕਾ ਲਈ ਵੱਖਰੇ ਤਰ੍ਹਾਂ ਦੀਆਂ ਤਿਆਰੀਆਂ ਕਰਨੀਆਂ ਪਈਆਂ। ਜਿਵੇਂ ਕਿ ਗੁਜਰਾਤੀ ਲੋਕਾਂ ਦੀ ਬੋਲ-ਚਾਲ, ਉਨ੍ਹਾਂ ਦਾ ਕੰਮ ਕਰਨ ਦਾ ਅੰਦਾਜ਼ ਆਦਿ। ਇਸ ਫ਼ਿਲਮ ਨੂੰ ਸਾਈਨ ਕਰਨ ਤੋਂ ਬਾਅਦ ਮੈਂ ਗੁਜਰਾਤੀ ਲੋਕਾਂ ਦਾ ਬਾਰੀਕੀ ਨਾਲ ਨਿਰੀਖਣ ਕਰਨ ਲੱਗਿਆ ਹਾਂ ਤਾਂ ਕਿ ਕਿਰਦਾਰ ਅਸਲ ਵਾਂਗ ਜਾਪੇ।
ਉਮੀਦ ਹੈ ਕਿ ਫ਼ਿਲਮ ਵਿਚ ਰਣਵੀਰ ਵਲੋਂ ਨਿਭਾਇਆ ਗਿਆ ਗੁਜਰਾਤੀ ਦਾ ਕਿਰਦਾਰ ਦੇਸ਼ ਦੇ ਦੋ ਵੱਡੇ ਗੁਜਰਾਤੀ ਮੋਦੀ ਤੇ ਸ਼ਾਹ ਨੂੰ ਵੀ ਅਪੀਲ ਕਰ ਜਾਵੇਗਾ।

'ਭਾਰਤ' ਦੀ ਵਜ੍ਹਾ ਨਾਲ ਕਸ਼ਮੀਰਾ ਦੇ ਭਾਅ ਵਧੇ

ਹਾਲੀਆ ਰਿਲੀਜ਼ ਹੋਈ ਫ਼ਿਲਮ 'ਭਾਰਤ' ਵਿਚ ਕਸ਼ਮੀਰਾ ਇਰਾਨੀ ਵਲੋਂ ਸਲਮਾਨ ਖਾਨ ਦੀ ਭੈਣ ਦੀ ਭੂਮਿਕਾ ਨਿਭਾਈ ਗਈ ਹੈ। ਇਸ ਭੂਮਿਕਾ ਦੀ ਖ਼ਾਸ ਗੱਲ ਇਹ ਹੈ ਕਿ ਫ਼ਿਲਮ ਵਿਚ ਇਸ ਦਾ ਆਪਣਾ ਵੱਖਰਾ ਮਹੱਤਵ ਹੈ। ਸਲਮਾਨ ਦੀ ਤਰ੍ਹਾਂ ਇਥੇ ਕਸ਼ਮੀਰਾ ਨੂੰ ਵੀ 20 ਤੋਂ ਲੈ ਕੇ 55 ਸਾਲ ਦੀ ਉਮਰ ਦੀ ਔਰਤ ਦੇ ਰੂਪ ਵਿਚ ਪੇਸ਼ ਕੀਤਾ ਗਿਆ ਹੈ। ਇਸ ਤੋਂ ਪਹਿਲਾਂ ਕਸ਼ਮੀਰਾ ਨੇ 'ਟਾਈਗਰ ਜ਼ਿੰਦਾ ਹੈ' ਵਿਚ ਵੀ ਕੰਮ ਕੀਤਾ ਸੀ ਪਰ ਹੁਣ 'ਭਾਰਤ' ਦੀ ਵਜ੍ਹਾ ਕਰਕੇ ਬਾਲੀਵੁੱਡ ਵਿਚ ਉਸ ਦੀ ਪੁੱਛਗਿੱਛ ਵਧ ਗਈ ਹੈ ਅਤੇ ਉਸ ਦੇ ਭਾਅ ਵੀ ਵਧ ਗਏ ਹਨ। ਉਂਝ ਤਾਂ ਤੱਬੂ ਨੇ ਵੀ 'ਭਾਰਤ' ਵਿਚ ਸਲਮਾਨ ਦੀ ਭੈਣ ਦੀ ਭੂਮਿਕਾ ਨਿਭਾਈ ਹੈ ਪਰ ਫ਼ਿਲਮ ਦਾ ਫਾਇਦਾ ਕਸ਼ਮੀਰਾ ਨੂੰ ਜ਼ਿਆਦਾ ਮਿਲ ਰਿਹਾ ਹੈ।
ਕਿਰਨ ਜ਼ਵੇਰੀ ਉਤਰੀ ਫ਼ਿਲਮ ਨਿਰਮਾਣ ਵਿਚ
ਫ਼ਿਲਮ 'ਜੋ ਜੀਤਾ ਵਹੀ ਸਿਕੰਦਰ' ਵਿਚ ਮਾਮਿਕ ਦੀ ਮਾਸ਼ੂਕਾ ਦੀ ਭੂਮਿਕਾ ਨਿਭਾਉਣ ਵਾਲੀ ਕਿਰਨ ਜ਼ਵੇਰੀ ਨੇ 'ਬਾਦਸ਼ਾਹ', 'ਰੌਸ਼ਨੀ' ਆਦਿ ਫ਼ਿਲਮਾਂ ਵਿਚ ਵੀ ਕੰਮ ਕੀਤਾ ਸੀ। ਹੁਣ ਕਿਰਨ ਨੇ ਫ਼ਿਲਮ ਨਿਰਮਾਣ ਵੱਲ ਆਪਣੇ ਕਦਮ ਵਧਾ ਲਏ ਹਨ ਅਤੇ ਇਨ੍ਹੀਂ ਦਿਨੀਂ ਉਹ 'ਮੋਤੀਚੂਰ ਚਕਨਾਚੂਰ', 'ਬੋਲੇ ਚੂੜੀਆਂ', 'ਰਸਟੀ ਔਰ ਡਸਟੀ' ਤੇ 'ਪਿਆਰ ਕਾ ਅਚਾਰ' ਫ਼ਿਲਮਾਂ ਦਾ ਨਿਰਮਾਣ ਕਰ ਰਹੀ ਹੈ। ਉਹ ਇਨ੍ਹਾਂ ਫ਼ਿਲਮਾਂ ਦਾ ਨਿਰਮਾਣ ਹੋਰ ਕਾਰਪੋਰੇਟ ਕੰਪਨੀਆਂ ਦੇ ਨਾਲ ਮਿਲ ਕੇ ਕਰ ਰਹੀ ਹੈ। ਇਹੀ ਨਹੀਂ, ਉਹ ਇਕ ਫ਼ਿਲਮ ਵੀ ਨਿਰਦੇਸ਼ਿਤ ਕਰੇਗੀ ਅਤੇ ਇਸ ਦਾ ਨਾਂਅ 'ਹਵੇਲੀ ਮੇਂ ਹੰਗਾਮਾ' ਰੱਖਿਆ ਗਿਆ ਹੈ। ਕਿਰਨ ਅਨੁਸਾਰ ਇਸ ਫ਼ਿਲਮ ਵਿਚ ਮਾਰਵਾੜੀ ਪਰਿਵਾਰਾਂ ਦੇ ਦੋਹਰੇ ਮਾਪਦੰਡ ਦੀ ਕਹਾਣੀ ਪੇਸ਼ ਕੀਤੀ ਜਾਵੇਗੀ।

ਹੁਣ ਨਾਂਹ ਪੱਖੀ ਭੂਮਿਕਾ ਕਰਨਾ ਚਾਹੁੰਦਾ ਹੈ ਅੰਜਨ

2 ਜੂਨ ਨੂੰ ਅਭਿਨੇਤਾ ਅੰਜਨ ਸ੍ਰੀਵਾਸਤਵ ਨੇ ਆਪਣਾ 72ਵਾਂ ਜਨਮ ਦਿਨ ਮਨਾਇਆ। ਇਸ ਮੌਕੇ ਉਨ੍ਹਾਂ ਨੇ ਆਪਣੇ ਘਰ ਜੋ ਪਾਰਟੀ ਰੱਖੀ ਸੀ, ਉਥੇ ਨਾਟ ਸੰਸਥਾ 'ਇਪਟਾ' ਦੇ ਕਈ ਮੈਂਬਰਾਂ ਨੂੰ ਸੱਦਾ ਦਿੱਤਾ ਗਿਆ ਸੀ। ਜਦੋਂ ਇਹ ਪੁੱਛਿਆ ਗਿਆ ਕਿ ਆਪਣੇ ਕੈਰੀਅਰ ਵਿਚ ਉਨ੍ਹਾਂ ਨੂੰ ਕਿਸ ਚੀਜ਼ ਦੀ ਘਾਟ ਰੜਕਦੀ ਹੈ ਤਾਂ ਉਹ ਸ਼ਬਦਾਂ ਨੂੰ ਚੋਰੀ ਕੀਤੇ ਬਿਨਾਂ ਕਹਿਣ ਲੱਗੇ, 'ਮੈਂ 31 ਸਾਲਾਂ ਤੱਕ ਇਲਾਹਾਬਾਦ ਬੈਂਕ ਵਿਚ ਨੌਕਰੀ ਕੀਤੀ ਅਤੇ ਇਸ ਬੈਂਕ ਨੂੰ ਬਹੁਤ ਪ੍ਰਮੋਟ ਕੀਤਾ। ਅਮਿਤਾਭ ਬੱਚਨ ਅਤੇ ਰਾਜ ਬੱਬਰ ਤੋਂ ਲੈ ਕੇ ਕਈ ਟੀ. ਵੀ. ਕਲਾਕਾਰਾਂ ਦਾ ਖਾਤਾ ਇਸ ਬੈਂਕ ਵਿਚ ਖੁੱਲ੍ਹਵਾਇਆ ਅਤੇ ਬੈਂਕ ਦਾ ਕਾਰੋਬਾਰ ਵਧਾਇਆ। ਮੈਂ ਆਪਣੀ ਬੈਂਕ ਨੂੰ ਤਾਂ ਪ੍ਰਮੋਟ ਕੀਤਾ ਪਰ ਮੈਂ ਖ਼ੁਦ ਨੂੰ ਪਰਮੋਟ ਨਹੀਂ ਕਰ ਸਕਿਆ। ਇਸ ਮਾਮਲੇ ਵਿਚ ਮੈਂ ਪਰੇਸ਼ ਰਾਵਲ ਨੂੰ ਮਾਸਟਰ ਮੰਨਦਾ ਹਾਂ। ਉਹ ਆਪਣੀਆਂ ਸ਼ਰਤਾਂ 'ਤੇ ਫ਼ਿਲਮਾਂ ਕਰਦੇ ਹਨ ਅਤੇ ਫ਼ਿਲਮ ਦੇ ਪ੍ਰਚਾਰ ਵਿਚ ਵੀ ਉਨ੍ਹਾਂ ਨੂੰ ਪੂੁਰੀ ਅਹਿਮੀਅਤ ਦਿੱਤੀ ਜਾਂਦੀ ਹੈ। ਅੱਜ ਜ਼ਮਾਨਾ ਮਾਰਕੀਟਿੰਗ ਦਾ ਹੈ ਅਤੇ ਮੈਨੂੰ ਲਗਦਾ ਹੈ ਕਿ ਆਪਣੀ ਮਰਾਕੀਟਿੰਗ ਕਰਵਾਉਣ ਦੇ ਮਾਮਲੇ ਵਿਚ ਮੈਂ ਜ਼ਰਾ ਕਮਜ਼ੋਰ ਰਿਹਾ।' ਅਭਿਨੈ ਦੇ ਮਾਮਲੇ ਵਿਚ ਅਧੂਰੀ ਇੱਛਾ ਬਾਰੇ ਪੁੱਛਣ 'ਤੇ ਉਹ ਕਹਿੰਦੇ ਹਨ, 'ਹੁਣ ਮੈਂ ਨਾਂਹਪੱਖੀ ਭੂਮਿਕਾ ਕਰਨਾ ਚਾਹੁੰਦਾ ਹਾਂ। 'ਪੁਕਾਰ' ਵਿਚ ਮੈਂ ਨਾਂਹਪੱਖੀ ਭੂਮਿਕਾ ਕੀਤੀ ਸੀ ਅਤੇ ਇਸ ਦਾ ਹੁੰਗਾਰਾ ਵੀ ਚੰਗਾ ਮਿਲਿਆ ਸੀ। ਸੱਜਨ ਜਾਂ ਮੱਧਵਰਗੀ ਆਦਮੀ ਵਾਲੀਆਂ ਭੂਮਿਕਾਵਾਂ ਤਾਂ ਬਹੁਤ ਕੀਤੀਆਂ ਅਤੇ ਲੋਕਾਂ ਦਾ ਬਹੁਤ ਪਿਆਰ ਹਾਸਲ ਕੀਤਾ। ਹੁਣ ਖਲਨਾਇਕ ਬਣ ਕੇ ਉਨ੍ਹਾਂ ਦੀ ਨਫ਼ਰਤ ਹਾਸਲ ਕਰਨਾ ਚਾਹੁੰਦਾ ਹਾਂ।

ਫਿਰ ਮੇਕਅੱਪ ਬਗ਼ੈਰ ਨਜ਼ਰ ਆਏਗੀ ਆਲੀਆ ਭੱਟ

ਆਪਣੀ ਪਹਿਲੀ ਫ਼ਿਲਮ 'ਸਟੂਡੈਂਟ ਆਫ਼ ਦ ਯੀਅਰ' ਵਿਚ ਗਲੈਮਰਸ ਅੰਦਾਜ਼ ਵਿਚ ਨਜ਼ਰ ਆਈ ਆਲੀਆ ਭੱਟ ਨੂੰ ਆਪਣੀ ਦਿੱਖ ਨੂੰ ਲੈ ਕੇ ਨਵੇਂ-ਨਵੇਂ ਪ੍ਰਯੋਗ ਕਰਨੇ ਪਸੰਦ ਹਨ। ਇਹੀ ਵਜ੍ਹਾ ਹੈ ਕਿ 'ਉੜਤਾ ਪੰਜਾਬ', 'ਹਾਈਵੇ' ਆਦਿ ਫ਼ਿਲਮਾਂ ਵਿਚ ਉਹ ਵੱਖਰੇ ਰੰਗ ਵਿਚ ਨਜ਼ਰ ਆਈ ਸੀ। ਹੁਣ 'ਸੜਕ-2' ਵਿਚ ਫਿਰ ਇਕ ਵਾਰ ਨਵਾਂ ਪ੍ਰਯੋਗ ਕਰਦੇ ਹੋਏ ਉਹ ਇਸ ਵਿਚ ਬਗ਼ੈਰ ਮੇਕਅੱਪ ਤੋਂ ਨਜ਼ਰ ਆਵੇਗੀ। ਇਹੀ ਵਜ੍ਹਾ ਹੈ ਕਿ ਉਹ ਮਹਿਜ ਪੰਦਰਾਂ ਮਿੰਟ ਵਿਚ ਤਿਆਰ ਹੋ ਕੇ ਸੈੱਟ 'ਤੇ ਆ ਜਾਂਦੀ ਹੈ। ਆਲੀਆ ਨੂੰ ਇਸ ਵਿਚ ਨਕਲੀ ਬਾਬਾ ਦੀਆਂ ਕਰਤੂਤਾਂ ਦਾ ਪਰਦਾਫਾਸ਼ ਕਰਨ ਵਾਲੀ ਕੁੜੀ ਦੀ ਭੂਮਿਕਾ ਵਿਚ ਪੇਸ਼ ਕੀਤਾ ਜਾ ਰਿਹਾ ਹੈ।

ਦੁਬਾਰਾ ਜਿਊਂਦਾ ਹੋਵੇਗਾ 'ਬੰਬੇ ਟਾਕੀਜ਼' ਬੈਨਰ

ਇਕ ਜ਼ਮਾਨਾ ਸੀ ਜਦੋਂ ਬਾਲੀਵੁੱਡ ਵਿਚ 'ਬੰਬੇ ਟਾਕੀਜ਼' ਬੈਨਰ ਦਾ ਆਪਣਾ ਰੁਤਬਾ ਹੋਇਆ ਕਰਦਾ ਸੀ। ਇਸ ਬੈਨਰ ਦੀ ਸਥਾਪਨਾ ਹਿਮਾਂਸ਼ੂ ਰਾਏ, ਦੇਵਿਕਾ ਰਾਣੀ ਤੇ ਰਾਜਨਾਰਾਇਣ ਦੂਬੇ ਵਲੋਂ ਕੀਤੀ ਗਈ ਸੀ। 'ਅਛੂਤ ਕੰਨਿਆ', 'ਮਹੱਲ', 'ਜਵਾਰ ਭਾਟਾ' ਆਦਿ ਕਾਲਜਈ ਫ਼ਿਲਮਾਂ ਇਸ ਬੈਨਰ ਦੀ ਦੇਣ ਹਨ। ਬਦਲਦੇ ਸਮੇਂ ਦੇ ਨਾਲ ਇਹ ਬੈਨਰ ਭੂਤਕਾਲ ਦੀ ਗੱਲ ਬਣ ਗਿਆ ਅਤੇ ਆਪਣੀਆਂ ਫ਼ਿਲਮਾਂ ਦੀ ਬਦੌਲਤ ਇਹ ਸਿਨੇ ਪ੍ਰੇਮੀਆਂ ਦੀਆਂ ਯਾਦਾਂ ਵਿਚ ਬਣਿਆ ਰਿਹਾ। ਹੁਣ ਰਾਜਨਾਰਾਇਣ ਦੂਬੇ ਦੇ ਪੋਤੇ ਆਜ਼ਾਦ ਨੇ ਇਸ ਬੈਨਰ ਨੂੰ ਦੁਬਾਰਾ ਜਿਊਂਂਦਾ ਕਰਨ ਦਾ ਨਿਰਣਾ ਲਿਆ ਹੈ ਅਤੇ ਆਪਣੇ ਪਹਿਲੇ ਕਦਮ ਰਾਹੀਂ ਉਨ੍ਹਾਂ ਨੇ ਫ਼ਿਲਮ 'ਰਾਸ਼ਟਰਪੁੱਤਰ' ਦਾ ਨਿਰਮਾਣ ਕੀਤਾ ਹੈ। ਇਸ ਫ਼ਿਲਮ ਵਿਚ ਸੁਤੰਤਰਤਾ ਸੈਨਾਨੀ ਚੰਦਰਸ਼ੇਖਰ ਆਜ਼ਾਦ ਦੇ ਜੀਵਨ ਪ੍ਰਸੰਗਾਂ ਨੂੰ ਕਹਾਣੀ ਵਿਚ ਬੁਣਿਆ ਗਿਆ ਹੈ।
ਹਾਲੀਆ ਆਯੋਜਿਤ ਕਾਂਸ ਫ਼ਿਲਮ ਸਮਾਰੋਹ ਵਿਚ ਵੀ ਇਹ ਦਿਖਾਇਆ ਗਿਆ ਸੀ ਅਤੇ ਇਹ ਭਾਰਤ ਦੀ ਪਹਿਲੀ ਇਸ ਤਰ੍ਹਾਂ ਦੀ ਰਾਸ਼ਟਰਵਾਦੀ ਫ਼ਿਲਮ ਸੀ ਜੋ ਉਥੇ ਦਿਖਾਈ ਗਈ। ਫ਼ਿਲਮ ਨੂੰ ਮਿਲੇ ਹੁੰਗਾਰੇ ਤੋਂ ਉਤਸ਼ਾਹਿਤ ਹੋ ਕੇ ਆਜ਼ਾਦ ਨੇ ਹੁਣ 'ਬੰਬੇ ਟਾਕੀਜ਼' ਬੈਨਰ ਹੇਠ ਹੋਰ ਫ਼ਿਲਮਾਂ ਬਣਾਉਣ ਦੀ ਯੋਜਨਾ ਬਣਾਈ ਹੈ। ਯੋਜਨਾ ਦੀ ਰੂਪਰੇਖਾ ਬਾਰੇ ਉਹ ਕਹਿੰਦੇ ਹਨ, 'ਆਪਣੇ ਜ਼ਮਾਨੇ ਵਿਚ 'ਬੰਬੇ ਟਾਕੀਜ਼' ਵਲੋਂ ਕਈ ਇਸ ਤਰ੍ਹਾਂ ਦੀਆਂ ਫ਼ਿਲਮਾਂ ਬਣਾਈਆਂ ਗਈਆਂ ਜਿਸ ਵਿਚ ਸਮਾਜਿਕ ਸੁਨੇਹਾ ਦਿੱਤਾ ਗਿਆ ਸੀ। ਛੂਆਛਾਤ ਦੇ ਵਿਰੁੱਧ ਸੰਦੇਸ਼ ਦਿੰਦੀ 'ਅਛੂਤ ਕੰਨਿਆ' ਨੂੰ 'ਕਲਟ' ਫ਼ਿਲਮ ਦਾ ਦਰਜਾ ਦਿੱਤਾ ਹੈ। ਹੁਣ ਮੇਰੀ ਇੱਛਾ ਇਸ ਤਰ੍ਹਾਂ ਦੀਆਂ ਉਪਦੇਸ਼ਾਤਮਕ ਫ਼ਿਲਮਾਂ ਬਣਾਉਣ ਦੀ ਹੈ। ਮੈਂ ਚਾਹੁੰਦਾ ਹਾਂ ਕਿ ਸਹੀ ਢੰਗ ਦੀਆਂ ਫ਼ਿਲਮਾਂ ਦੀ ਬਦੌਲਤ ਇਸ ਬੈਨਰ ਦੇ ਸੁਨਹਿਰੀ ਦਿਨ ਵਾਪਸ ਆਉਣ। ਦੋ-ਤਿੰਨ ਕਹਾਣੀਆਂ 'ਤੇ ਕੰਮ ਚੱਲ ਰਿਹਾ ਹੈ ਅਤੇ ਜਲਦੀ ਫ਼ਿਲਮਾਂ ਦਾ ਐਲਾਨ ਕਰ ਦਿੱਤਾ ਜਾਵੇਗਾ।


-ਮੁੰਬਈ ਪ੍ਰਤੀਨਿਧ






Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX