ਤਾਜਾ ਖ਼ਬਰਾਂ


ਹਵਾਈ ਫ਼ੌਜ ਨੂੰ ਇਸਰਾਈਲ 'ਚ ਬਣੇ ਸਪਾਈਸ-2000 ਬਿਲਡਿੰਗ ਬਲਾਸਟਰ ਬੰਬ ਮਿਲਣੇ ਸ਼ੁਰੂ
. . .  1 day ago
ਨਵੀਂ ਦਿੱਲੀ, 15 ਸਤੰਬਰ ਭਾਰਤੀ ਹਵਾਈ ਫ਼ੌਜ ਨੂੰ ਇਸਰਾਈਲ 'ਚ ਬਣੇ ਸਪਾਈਸ-2000 ਬਿਲਡਿੰਗ ਬਲਾਸਟਰ ਬੰਬ ਮਿਲਣੇ ਸ਼ੁਰੂ ਹੋ ਗਏ ਹਨ। ਇਸ ਨਾਲ ਹਵਾਈ ਫ਼ੌਜ ਦੀ ਤਾਕਤ ਹੋਰ...
ਰਾਜੀਵ ਗਾਂਧੀ ਹੱਤਿਆਕਾਂਡ ਦੀ ਦੋਸ਼ੀ ਨਲਿਨੀ ਨੂੰ ਮੁੜ ਤੋਂ ਭੇਜਿਆ ਗਿਆ ਜੇਲ੍ਹ
. . .  1 day ago
ਚੇਨਈ, 15 ਸਤੰਬਰ - ਰਾਜੀਵ ਗਾਂਧੀ ਹੱਤਿਆਕਾਂਡ ਦੀ ਦੋਸ਼ੀ ਨਲਿਨੀ ਨੂੰ ਅੱਜ ਮੁੜ ਤੋਂ ਵੇਲੌਰ ਦੀ ਮਹਿਲਾ ਜੇਲ੍ਹ 'ਚ ਭੇਜ ਦਿੱਤਾ ਗਿਆ। ਮਦਰਾਸ ਹਾਈਕੋਰਟ ਨੇ ਨਲਿਨੀ ਨੂੰ ਬੇਟੀ ਦੇ ਵਿਆਹ ਲਈ ਇੱਕ...
ਮੀਂਹ ਕਾਰਨ ਭਾਰਤ ਦੱਖਣੀ ਅਫ਼ਰੀਕਾ ਪਹਿਲਾ ਟੀ-20 ਮੈਚ ਰੱਦ
. . .  1 day ago
ਧਰਮਸ਼ਾਲਾ, 15 ਸਤੰਬਰ - ਮੀਂਹ ਕਾਰਨ ਧਰਮਸ਼ਾਲਾ ਵਿਖੇ ਭਾਰਤ ਅਤੇ ਦੱਖਣੀ ਅਫ਼ਰੀਕਾ ਵਿਚਕਾਰ ਹੋਣ ਵਾਲਾ ਪਹਿਲਾ ਟੀ-20 ਮੈਚ ਰੱਦ ਕਰ ਦਿੱਤਾ ਗਿਆ...
ਪਾਕਿ 'ਚ ਇਸਲਾਮ ਵਿਰੁੱਧ ਗਲਤ ਸ਼ਬਦਾਵਲੀ ਬੋਲਣ ਦਾ ਝੂਠਾ ਦੋਸ਼ ਲਗਾ ਕੇ ਹਿੰਦੂ ਪ੍ਰਿੰਸੀਪਲ 'ਤੇ ਹਮਲਾ
. . .  1 day ago
ਅੰਮ੍ਰਿਤਸਰ, 15 ਸਤੰਬਰ (ਸੁਰਿੰਦਰ ਕੋਛੜ)- ਪਾਕਿਸਤਾਨ ਦੇ ਸੂਬਾ ਸਿੰਧ ਦੇ ਗੋਟਕੀ ਸ਼ਹਿਰ 'ਚ ਇੱਕ ਹਿੰਦੂ ਪ੍ਰਿੰਸੀਪਲ 'ਤੇ ਇਸਲਾਮ...
ਨਸ਼ੇ ਦੀ ਓਵਰ ਡੋਜ਼ ਕਾਰਨ ਨੌਜਵਾਨ ਦੀ ਹੋਈ ਮੌਤ
. . .  1 day ago
ਮੋਗਾ, 15 ਸਤੰਬਰ (ਗੁਰਦੇਵ ਭਾਮ)- ਹਲਕਾ ਧਰਮਕੋਟ ਦੇ ਪਿੰਡ ਢੋਲੇਵਾਲ ਦੇ ਰਹਿਣ ਵਾਲੇ ਇਕ ਨੌਜਵਾਨ ਦੀ ਨਸ਼ੇ ਦੀ ਓਵਰ ਡੋਜ਼ ਕਾਰਨ ਮੌਤ ਹੋ ਜਾਣ ਦੀ ਖ਼ਬਰ ...
ਅਸਮ ਦੀ ਤਰ੍ਹਾਂ ਹਰਿਆਣਾ 'ਚ ਵੀ ਲਾਗੂ ਹੋਵੇਗੀ ਐਨ.ਆਰ.ਸੀ : ਮਨੋਹਰ ਲਾਲ ਖੱਟੜ
. . .  1 day ago
ਚੰਡੀਗੜ੍ਹ, 15 ਸਤੰਬਰ- ਹਰਿਆਣਾ ਦੇ ਮੁੱਖ ਮੰਤਰੀ ਮਨੋਹਰ ਲਾਲ ਖੱਟੜ ਨੇ ਅਸਮ ਦੀ ਤਰ੍ਹਾਂ ਹਰਿਆਣਾ 'ਚ ਵੀ ਐਨ.ਆਰ.ਸੀ ਲਾਗੂ ਕਰਨ ਦਾ ਐਲਾਨ ...
ਭਾਰਤ ਅਤੇ ਦੱਖਣੀ ਅਫ਼ਰੀਕਾ ਵਿਚਾਲੇ ਪਹਿਲਾ ਟੀ-20 ਮੈਚ : ਮੀਂਹ ਕਾਰਨ ਟਾਸ 'ਚ ਦੇਰੀ
. . .  1 day ago
ਇੰਦਰਜੀਤ ਸਿੰਘ ਤਲਵੰਡੀ ਭੰਗੇਰੀਆਂ ਦੇ ਸਿਰ ਸਜਿਆ ਜ਼ਿਲ੍ਹਾ ਪਰੀਸ਼ਦ ਦੀ ਚੇਅਰਮੈਨੀ ਦਾ ਤਾਜ
. . .  1 day ago
ਮੋਗਾ, 15 ਸਤੰਬਰ (ਗੁਰਤੇਜ ਸਿੰਘ/ਸੁਰਿੰਦਰ ਪਾਲ ਸਿੰਘ) - ਅੱਜ ਮੋਗਾ ਵਿਖੇ ਜ਼ਿਲ੍ਹਾ ਪਰੀਸ਼ਦ ਦੇ ਮੈਂਬਰਾਂ ਦੀ ਹੋਈ ਚੋਣ 'ਚ ਇੰਦਰਜੀਤ ਸਿੰਘ ਤਲਵੰਡੀ ਭੰਗੇਰੀਆਂ ਆਪਣੇ...
ਪੁਲਿਸ ਮੁਲਾਜ਼ਮ ਕੁੱਟਮਾਰ ਮਾਮਲਾ: ਕਥਿਤ 6 ਦੋਸ਼ੀਆਂ ਨੂੰ ਅਦਾਲਤ ਵੱਲੋਂ ਇਕ ਦਿਨ ਦੇ ਪੁਲਿਸ ਰਿਮਾਂਡ 'ਤੇ ਭੇਜਿਆ ਗਿਆ
. . .  1 day ago
ਅਜਨਾਲਾ, 15 ਸਤੰਬਰ (ਗੁਰਪ੍ਰੀਤ ਸਿੰਘ ਢਿੱਲੋਂ)- ਚੋਗਾਵਾਂ ਸਬ ਇੰਸਪੈਕਟਰ ਕੁੱਟਮਾਰ ਮਾਮਲੇ 'ਚ ਗ੍ਰਿਫ਼ਤਾਰ ਕੀਤੇ ਗਏ ਕਥਿਤ 6 ਦੋਸ਼ੀਆਂ ਨੂੰ ਅਦਾਲਤ ਵੱਲੋਂ ਇਕ ਦਿਨ ਦੇ ਪੁਲਿਸ ਰਿਮਾਂਡ 'ਤੇ ਭੇਜਿਆ...
ਕਿਸਾਨਾਂ ਵੱਲੋਂ ਭੁੱਚੋ ਖ਼ੁਰਦ ਵਿਖੇ ਧਰਨਾ ਲਾ ਕੇ ਬਠਿੰਡਾ-ਜ਼ੀਰਕਪੁਰ ਕੌਮੀ ਸ਼ਾਹ ਮਾਰਗ ਜਾਮ
. . .  1 day ago
ਬਠਿੰਡਾ ਛਾਉਣੀ, 15 ਸਤੰਬਰ (ਪਰਵਿੰਦਰ ਸਿੰਘ ਜੌੜਾ)- ਚੰਡੀਗੜ੍ਹ ਜਾਣੋ ਰੋਕਣ 'ਤੇ ਰੋਹ 'ਚ ਆਏ ਕਸ਼ਮੀਰ ਹਮਾਇਤੀ ਸੰਘਰਸ਼ਕਾਰੀ ਸੈਂਕੜੇ ਲੋਕਾਂ ਨੇ ਭੁੱਚੋ ਖ਼ੁਰਦ ਵਿਖੇ...
ਹੋਰ ਖ਼ਬਰਾਂ..

ਫ਼ਿਲਮ ਅੰਕ

ਜੈਕਲਿਨ : ਚਿੰਤਾਮੁਕਤ ਅਭਿਨੇਤਰੀ

'ਕਿੱਕ', 'ਜੁੜਵਾ-2' ਕਾਮਯਾਬ ਫ਼ਿਲਮਾਂ ਵਾਲੀ ਸ੍ਰੀਲੰਕਨ ਤੇ ਹੁਣ ਬੀ-ਟਾਊਨ ਦੀ ਸਟਾਰ ਨਾਇਕਾ ਜੈਕਲਿਨ ਫਰਨਾਂਡਿਜ਼ ਰੋਜ਼ ਹੀ ਉਠਦੇ-ਸਾਰ ਆਪਣੇ ਫੋਨ 'ਤੇ 'ਸੋਸ਼ਲ ਐਪਸ' ਦੀ ਵਰਤੋਂ ਕਰਦੀ ਹੈ। ਨਵਾਂ ਵੀਡੀਓ ਜੈਕੀ ਨੇ ਪਾਇਆ ਹੈ ਜਿਸ 'ਚ ਐਤਵਾਰ ਨੂੰ ਵੀ ਉਹ ਘਰੇ ਆਰਾਮ ਕਰਨ ਦੀ ਥਾਂ ਕੰਮ ਕਰ ਰਹੀ ਹੈ। 'ਅਲਾਦੀਨ' ਤੋਂ 'ਡਰਾਈਵ' ਤੱਕ ਪਹੁੰਚੀ ਇਹ ਨਾਇਕਾ ਪ੍ਰਭਾਵ ਦੇ ਰਹੀ ਹੈ ਕਿ ਕੰਮ ਹੀ ਪੂਜਾ ਹੈ। ਆਰਾਮ-ਹਰਾਮ ਹੈ। ਇਧਰ ਉਸ ਦੀ ਤੈਰਾਕੀ ਪਹਿਰਾਵੇ 'ਚ ਆਈ ਤਸਵੀਰ ਨੇ ਧੁੰਮਾਂ ਪਾਈਆਂ ਹੋਈਆਂ ਹਨ। 'ਟਿਕ-ਟਾਕ' ਬਿਨਾਂ ਉਸ ਦੀ ਜ਼ਿੰਦਗੀ ਅਧੂਰੀ ਹੈ। 'ਆਓ! ਸਜ-ਧਜ ਚੱਲੀਏ' ਕੈਪਸ਼ਨ ਦੇ ਕੇ ਉਹ 'ਲਾਈਵ' ਹੋਈ ਹੈ ਤੇ ਘੱਟ ਤੋਂ ਘੱਟ ਦੋ ਕਰੋੜ ਦੇ ਕਰੀਬ ਕੁਮੈਂਟ ਇਹੀ ਸਨ ਕਿ ਐਸ਼ ਤੇ ਕੰਮ। ਮਸਤੀ 'ਤੇ ਰੂਪ ਸੱਜਾ ਸਭ ਕੁਝ ਜੈਕਲਿਨ ਤੋਂ ਸਿੱਖਣ ਵਾਲਾ ਕਾਮਯਾਬ ਹੈ। ਖ਼ਬਰ ਸੀ ਕਿ ਜੈਕਲਿਨ ਨੇ ਆਖਿਰ ਉਰਦੂ 'ਤੇ ਮੁਹਾਰਤ ਪਾ ਹੀ ਲਈ ਹੈ। ਬਿਲਕੁਲ ਸੱਚ ਹੈ। ਪ੍ਰਭਾਸ਼ ਨੇ 'ਸਾਹੋ' 'ਚ ਜੈਕਲਿਨ 'ਤੇ ਇਕ ਗੀਤ ਪਾਇਆ ਹੈ। 300 ਕਰੋੜ ਦੇ ਬਜਟ ਵਾਲੀ ਇਹ ਫ਼ਿਲਮ ਮੋਟੀ ਰਕਮ, ਮਸ਼ਹੂਰੀ ਤੇ ਇਕ ਹੋਰ ਫ਼ਿਲਮ ਖਾਤੇ 'ਚ ਜੈਕਲਿਨ ਨੂੰ ਦੇਵੇਗੀ। ਮਨੋਜ ਵਾਜਪਾਈ ਨਾਲ ਵੈੱਬ ਲੜੀ 'ਮਿਸਿਜ਼ ਸੀਰੀਅਲ ਕਿੱਲਰ' ਕਰਨ ਵਾਲੀ ਜੈਕੀ ਦੀ ਨਜ਼ਰ ਹੁਣ ਫ਼ਿਲਮ 'ਅਰਥ' ਦੇ ਰੀਮੇਕ 'ਤੇ ਹੈ। 1982 'ਚ ਆਈ ਮਹੇਸ਼ ਭੱਟ ਦੀ ਇਸ ਫ਼ਿਲਮ 'ਚ ਹੁਣ ਰੀਮੇਕ ਵਾਲੇ ਹਿੱਸੇ ਲਈ ਦੱਖਣ ਦੀ ਰੋਵਤੀ ਦੇ ਨਾਲ ਜੈਕੀ ਵੀ ਹੋਵੇਗੀ ਤੇ ਉਹ ਸਮਿਤਾ ਪਾਟਿਲ ਦਾ ਕਿਰਦਾਰ ਨਿਭਾਏਗੀ। ਇੰਸਟਾਗ੍ਰਾਮ 'ਤੇ 3 ਕਰੋੜ ਉਸ ਦੇ ਫਾਲੋਅਰਜ਼ ਹੋ ਗਏ ਹਨ। ਭਾਰਤ ਨੂੰ ਮਿਸਟਰ ਸੁਪਰ ਨੈਸ਼ਨਲ ਖਿਤਾਬ ਦਿਵਾ ਚੁੱਕੇ ਪ੍ਰਾਥਮੇਸ਼ ਨਾਲ ਵੀ ਜੈਕਲਿਨ ਦੇ ਨਵੀਂ ਫ਼ਿਲਮ ਕਰਨ ਦੀ ਖ਼ਬਰ ਹੈ। ਆਪਣੀ ਪਾਲਤੂ ਬਿੱਲੀ, 'ਮਿਆਊਂ ਮਿਆਊਂ' ਨਾਲ ਜੈਕਲਿਨ ਫਰਨਾਂਡਿਜ਼ ਸਮਾਂ ਬਤੀਤ ਕਰ ਪਿਆਰ ਦੇ ਲਮਹੇ ਹੀ ਮਹਿਸੂਸ ਕਰ ਰਹੀ ਹੈ। ਜੈਕੀ ਆਪਣੀਆਂ ਬਿੱਲੀਆਂ ਨਾਲ ਬਹੁਤ ਪਿਆਰ ਕਰਦੀ ਹੈ। ਕਈ ਵਾਰ ਚਮੜੀ ਦੀ ਸਮੱਸਿਆ ਹੁੰਦੀ ਹੈ ਪਰ ਜੈਕਲਿਨ ਅਨੁਸਾਰ ਇਹ ਖਾਨਦਾਨੀ ਹੈ ਤੇ ਇਹ ਉਸ ਨੂੰ ਆਪਣੀ ਮਾਂ ਤੋਂ ਮਿਲੀ ਹੈ। ਸਭ ਸਹੀ ਚੱਲ ਰਿਹਾ ਹੈ, ਭਵਿੱਖ ਦੀ ਤਾਂ ਉਸ ਨੂੰ ਚਿੰਤਾ ਹੀ ਨਹੀਂ ਹੈ।


ਖ਼ਬਰ ਸ਼ੇਅਰ ਕਰੋ

ਫ਼ਾਤਿਮਾ ਸਨਾ ਸ਼ੇਖ਼

ਦੁਨੀਆ ਦੋ ਧਾਰੀ

ਲੋਕ ਬਹੁਤ ਸਿਆਣੇ ਹਨ, ਘੱਟੋ-ਘੱਟ ਦੂਸਰਿਆਂ ਦੇ ਮਾਮਲੇ 'ਚ ਤਾਂ 'ਬੋਲਡ' ਫਾਤਿਮਾ ਸਨਾ ਸ਼ੇਖ ਨੇ ਆਪਣੀ ਨਵੀਂ ਤਸਵੀਰ ਨਾਲ ਲੋਕ ਨਾਰਾਜ਼ ਕਰ ਲਏ। ਲੋਕਾਂ ਨੇ ਕਿਹਾ ਕਿ ਧਾਰਮਿਕ ਦਿਨ ਦੇ ਮੌਕੇ ਫਾਤਿਮਾ ਦੀ 'ਬੋਲਡ' ਤਸਵੀਰ ਆਉਣੀ ਦਰਸਾ ਰਹੀ ਹੈ ਕਿ ਅਕਲ ਤੋਂ ਉਹ ਕੋਰੀ ਹੈ। 'ਦੰਗਲ' ਵਾਲੀ ਫਾਤਿਮਾ ਕੋਲ ਹੁਣ ਕੰਮ ਹੈ। 'ਭੂਤ ਪੁਲਿਸ' ਫ਼ਿਲਮ ਉਹ ਸੈਫ਼ ਅਲੀ ਖ਼ਾਨ ਨਾਲ ਕਰ ਰਹੀ ਹੈ। ਪਵਨ ਕ੍ਰਿਪਲਾਨੀ ਫਾਤਿਮਾ ਨੂੰ ਇਸ 'ਭੂਤ ਪੁਲਿਸ' 'ਚ ਨਿਰਦੇਸ਼ਿਤ ਕਰ ਰਹੇ ਹਨ। ਫਾਤਿਮਾ ਜਾਣਦੀ ਹੈ ਕਿ ਇਹ ਉਦਯੋਗ ਸਤਾਉਂਦਾ ਬਹੁਤ ਹੈ। ਖਾਹਮਖਾਹ ਪ੍ਰੇਸ਼ਾਨੀਆਂ ਦਿੰਦਾ ਹੈ। ਅਪਾਰਸ਼ਕਤੀ ਖੁਰਾਨਾ ਤੇ ਆਮਿਰ ਖ਼ਾਨ ਨਾਲ ਨਾਂਅ ਜੁੜਨ 'ਤੇ ਉਹ ਬੇਪ੍ਰਵਾਹ ਹੈ, ਕਿਉਂਕਿ ਜਾਣਦੀ ਹੈ ਕਿ ਇਹ ਸਭ ਉਸ ਦੀ ਦਿੱਖ ਖਰਾਬ ਕਰਨ ਦੀ ਗੱਲ ਹੈ। 'ਚਾਚੀ 420' ਤੋਂ ਚੱਲਣ ਵਾਲੀ ਫਾਤਿਮਾ ਨੇ ਕਿਹਾ ਸੀ ਕਿ ਉਸ ਨਾਲ ਵੀ ਸੋਸ਼ਣ ਕਰਨ ਦੀ ਕੋਸ਼ਿਸ਼ ਹੋਈ ਹੈ। ਫਿਰ ਵੀ ਉਹ ਇਸ ਦਾ ਖੁਲਾਸਾ ਨਹੀਂ ਕਰੇਗੀ। ਗੱਲ 'ਭੂਤ ਪੁਲਿਸ' ਫ਼ਿਲਮ ਦੀ ਤਾਂ ਫਾਤਿਮਾ ਇਸ ਨੂੰ ਭਾਰਤ ਦੀ ਪਹਿਲੀ ਡਰਾਉਣੀ ਕਾਮੇਡੀ ਫਰੈਂਚਾਈਨਜ਼ ਫ਼ਿਲਮ ਕਹਿ ਰਹੀ ਹੈ। ਫਾਕਸ ਸਟਾਰ ਦੀ 'ਭੂਤ ਪੁਲਿਸ', 'ਰਾਗਿਨੀ ਐਮ.ਐਮ.ਐਸ.' ਜਿਹੀ ਹੈ, ਫਾਤਿਮਾ ਨੇ ਉਦਾਹਰਨ ਦਿੱਤੀ ਹੈ। ਦੋ ਸਾਲ ਤੱਕ ਉਸ ਨੇ ਆਪਣਾ ਜਨਮ ਦਿਨ ਨਹੀਂ ਸੀ ਮਨਾਇਆ। ਕਾਰਨ ਚਿੰਤਾ ਸੀ ਪਰ ਜ਼ਾਹਿਰ ਨਹੀਂ ਕੀਤੀ। ਲੋਕਾਂ ਨੇ ਉਸ ਨੂੰ ਬਾਲੀਵੁੱਡ ਦੀ ਨਵੀਂ ਕੈਟਰੀਨਾ ਕੈਫ਼ ਤੱਕ ਕਿਹਾ ਪਰ ਫਾਤਿਮਾ ਦਾ ਜਵਾਬ ਸੀ ਕਿ ਇਹੀ ਲੋਕ ਨਾਸ਼ਤਾ ਕਿਸੇ ਧਾਰਮਿਕ ਦਿਨ ਕਰਦੇ ਹੋਏ, ਸੈਲਫ਼ੀ ਖਿੱਚ ਪਾ ਦੇਈਏ ਤਾਂ ਧਾਰਮਿਕ ਭਾਵਨਾਵਾਂ ਦੀ ਆੜ 'ਚ ਪ੍ਰੇਸ਼ਾਨ ਕਰਦੇ ਹਨ। ਦੁਨੀਆ ਦੇ ਦੋ ਰੰਗ ਹਨ। ਬਚ ਜਾਵੋ ਇਸ ਜ਼ਾਲਿਮ ਦੁਨੀਆ ਤੋਂ। 'ਦਬੰਗ', 'ਠੱਗਜ਼ ਆਫ਼ ਹਿੰਦੁਸਤਾਨ' ਤੇ ਹੁਣ 'ਭੂਤ ਪੁਲਿਸ' ਹੌਲੀ-ਹੌਲੀ ਹੀ ਸਹੀ ਉਹ ਆਪਣੇ ਰਸਤੇ 'ਤੇ ਕਾਮਯਾਬੀ ਦੀਆਂ ਪੈੜਾਂ ਦੇ ਨਿਸ਼ਾਨ ਛੱਡ ਰਹੀ ਹੈ। 'ਭੂਤ ਪੁਲਿਸ' ਕਰੇਗੀ ਨਵਾਂ ਕੁਝ ਉਸ ਦੇ ਕੈਰੀਅਰ 'ਚ ਤੇ ਫਾਤਿਮਾ ਸਨਾ ਸ਼ੇਖ਼ ਇਕ ਦਿਨ ਰੁੱਝੀ ਹੋਈ, ਸਟਾਰ ਅਭਿਨੇਤਰੀ ਅਖਵਾਏਗੀ। ਇਹ ਯਕੀਨ ਉਸ ਨੂੰ ਹੈ ਤੇ ਆਤਮ-ਵਿਸ਼ਵਾਸੀ ਲੋਕ ਕਾਮਯਾਬ ਪੱਕੇ ਹੁੰਦੇ ਹਨ।

ਜਾਨ ਅਬਰਾਹਮ

'ਮਾਚੋਮੈਨ' ਦਾ 'ਅਟੈਕ'

ਇਧਰ ਇਕ ਹੋਰ ਪੰਗਾ 'ਬਾਟਲਾ ਹਾਊਸ' ਫ਼ਿਲਮ ਦਾ ਪਿਆ ਹੋਇਆ ਹੈ। ਇਸ 'ਚ ਗੀਤ 'ਓ ਸਾਕੀ ਸਾਕੀ' ਨੂੰ ਲੈ ਕੇ ਵਾਵੇਲਾ ਮਚਿਆ ਹੋਇਆ ਹੈ। ਇਹ 15 ਸਾਲ ਪਹਿਲਾਂ ਆਈ 'ਮੁਸਾਫਿਰ' ਫ਼ਿਲਮ ਦੇ ਗਾਣੇ ਦਾ ਪੁਨਰ ਹਿੱਸਾ ਹੈ। ਪੁਰਾਣਾ ਗਾਣਾ ਵਿਸ਼ਾਲ ਸ਼ੇਖਰ ਦੇ ਸੰਗੀਤ 'ਚ ਸੀ ਤੇ ਇਹ ਕੋਇਨਾ ਮਿੱਤਰਾ 'ਤੇ ਫ਼ਿਲਮਾਇਆ ਗਿਆ ਸੀ। ਸੁਨਿਧੀ ਚੌਹਾਨ-ਸੁਖਵਿੰਦਰ ਸਿੰਘ ਦਾ ਗਾਇਆ ਹੋਇਆ ਸੀ। 'ਬਾਟਲਾ ਹਾਊਸ' ਦੇ ਗਾਣੇ ਦਾ ਨਵਾਂ ਹਿੱਸਾ ਕੋਇਨਾ ਨੂੰ ਪਸੰਦ ਨਹੀਂ। 'ਬਾਟਲਾ ਹਾਊਸ' 'ਚ ਜਾਨ ਅਬਰਾਹਮ ਹੈ। ਜਾਨ ਜੋ ਆਜ਼ਾਦੀ ਦਿਹਾੜੇ 'ਤੇ 'ਬਾਟਲਾ ਹਾਊਸ' ਲੈ ਕੇ ਅਗਲੇ ਸਾਲ ਤੱਕ, 'ਸਤਿਆਮੇਵ ਜਯਤੇ-2' ਲਿਆਉਣਾ ਚਾਹੁੰਦਾ ਹੈ ਪਰ 'ਸਾਕੀ' ਦੇ ਪੰਗੇ 'ਚ ਉਸ ਦੀ 'ਬਾਟਲਾ ਹਾਊਸ' ਫਸ ਗਈ ਹੈ। ਇਧਰ ਜਾਨ ਨੇ ਸਾਰਾ ਕੁਝ ਜੋ ਹੋਊ ਦੇਖਿਆ ਜਾਵੇਗਾ 'ਤੇ ਛੱਡ ਕੇ ਨਵੀਂ ਫ਼ਿਲਮ 'ਅਟੈਕ' ਪ੍ਰਾਪਤ ਕੀਤੀ ਹੈ। ਬਾਲੀਵੁੱਡ ਦੇ 'ਮਾਚੋਮੈਨ' ਜਾਨ ਅਬਰਾਹਮ ਨੇ ਨੋਰਾ ਫਤੇਹੀ ਨੂੰ ਕਿਸਮਤ ਦੀ ਪੁੜੀ ਕਿਹਾ ਹੈ। 'ਸਤਿਆਮੇਵ ਜਯਤੇ' ਤੋਂ ਬਾਅਦ 'ਬਾਟਲਾ ਹਾਊਸ' 'ਚ ਫਿਰ ਨੋਰਾ ਫਤੇਹੀ ਹੀ ਹੈ। 'ਬਾਟਲਾ ਹਾਊਸ' 'ਚ ਜਾਨ ਨੇ ਡੀ.ਸੀ.ਪੀ. ਸੰਜੀਵ ਕੁਮਾਰ ਦਾ ਕਿਰਦਾਰ ਅਦਾ ਕੀਤਾ ਹੈ। 19 ਸਤੰਬਰ, 2008 ਨੂੰ 'ਬਾਟਲਾ ਹਾਊਸ' ਮੁਕਾਬਲਾ ਸੰਜੀਵ ਨੇ ਹੀ ਕੀਤਾ ਸੀ। 'ਪਾਗਲਪੰਤੀ' ਵੀ ਜਾਨ ਕੋਲ ਹੈ। ਇਕ ਖੜਕੇ-ਦੜਕੇ ਵਾਲਾ ਦ੍ਰਿਸ਼ ਦਿੰਦਾ ਜਾਨ ਜ਼ਖ਼ਮੀ ਹੋ ਗਿਆ ਤੇ ਹੁਣ 20 ਦਿਨ ਦੇ ਡਾਕਟਰੀ ਆਰਾਮ ਦੇ ਹੁਕਮ ਨੇ ਤੇ 'ਸਾਕੀ' ਦੇ ਵਿਵਾਦ ਨੇ ਜਾਨ ਦੀ ਚਿੰਤਾ ਵਧਾਈ ਹੈ। 'ਸਤਿਆਮੇਵ ਜਯਤੇ' ਸੱਚ ਦੀ ਜਿੱਤ ਹੋਊ ਤੇ 'ਬਾਟਲਾ ਹਾਊਸ' ਸ਼ਾਨ ਨਾਲ ਆਏਗੀ, ਜਾਨ ਕਹਿ ਤਾਂ ਇਹੀ ਰਿਹਾ ਹੈ। ਅਕਸ਼ੈ ਕੁਮਾਰ ਦੀ 'ਮੰਗਲ ਮਿਸ਼ਨ' ਸਾਹਮਣੇ ਆਪਣੀ ਫ਼ਿਲਮ ਲਾਉਣ ਨੂੰ ਉਹ ਕੋਈ ਈਰਖਾ ਦਾ 'ਅਟੈਕ' ਨਹੀਂ ਮੰਨਦਾ, ਬਲਕਿ ਸੰਯੋਗ ਹੀ ਕਹਿੰਦਾ ਹੈ ਕਿ 'ਮਾਚੋਮੈਨ' ਦੀ 'ਪਾਗਲਪੰਤੀ' ਵੀ ਚੰਗੀ ਲੱਗਦੀ ਹੈ। ਵੈਸੇ ਵੀ ਕਾਮਯਾਬੀ ਦੇ ਰੱਥ 'ਤੇ ਜਾਨ ਅਬਰਾਹਮ ਸਵਾਰ ਹੈ, ਫਿਰ ਕਿਸੇ 'ਅਟੈਕ' ਦੀ ਕੀ ਪ੍ਰਵਾਹ?


-ਸੁਖਜੀਤ ਕੌਰ

ਐਮੀ ਜੈਕਸਨ

ਆਧੁਨਿਕਤਾ ਦੀ ਪ੍ਰਤੀਕ

ਜਾਰਜ ਪੀ. ਦੀ ਧਰਮਪਤਨੀ ਬਣ ਚੁੱਕੀ ਅਭਿਨੇਤਰੀ ਐਮੀ ਜੈਕਸਨ ਪਿਛਲੇ ਮਹੀਨੇ ਕੁੜਮਾਈ ਦੀ ਸ਼ਾਨਦਾਰ ਪਾਰਟੀ ਦੇ ਚੁੱਕੀ ਹੈ। ਹਾਲਾਂਕਿ ਐਮੀ ਦਾ ਵਿਆਹ 2020 'ਚ ਹੋਣਾ ਹੈ। ਪਾਰਟੀ ਤੋਂ ਬਾਅਦ ਐਮੀ ਰੋਮ ਗਈ ਤੇ ਉਥੇ ਕਿਸ਼ਤੀ 'ਚ ਬੈਠ ਕੇ ਚਿੱਟੇ ਰੰਗ ਦਾ ਪਹਿਰਾਵਾ ਉਹ ਵੀ ਤੰਗ ਪਹਿਨ ਕੇ ਉਸ ਨੇ 'ਤਸਵੀਰ' ਪੋਸਟ ਕਰ ਕੇ ਦਿਖਾਇਆ। ਤਾਮਿਲ ਫ਼ਿਲਮਾਂ ਨਾਲ ਅਭਿਨੈ ਖੇਤਰ 'ਚ ਆਈ ਐਮੀ ਨੇ 'ਏਕ ਦੀਵਾਨਾ ਥਾ', 'ਸਿੰਘ ਇਜ਼ ਬਲਿੰਗ', '...ਫਰੀਕੀ ਅਲੀ' ਆਦਿ ਫ਼ਿਲਮਾਂ ਕੀਤੀਆਂ ਹਨ। ਟਾਪਲੈੱਸ ਹੋ ਕੇ ਸੂਟ-ਪੈਂਟ ਪਹਿਨਣ ਦੇ ਤਰੀਕੇ ਵੀ ਕੋਈ ਐਮੀ ਤੋਂ ਪੁੱਛੇ। ਖ਼ੈਰ ਐਮੀ ਹੁਣ ਫ਼ਿਲਮਾਂ ਦੀ ਥਾਂ ਆਪਣੇ ਹੋਣ ਜਾ ਰਹੇ ਵਿਆਹ, ਮਾਂ ਬਣਨ ਦੇ ਸੁਪਨੇ ਤੇ ਮੰਗੇਤਰ ਸਬੰਧੀ ਗੱਲਾਂ ਕਰ ਰਹੀ ਹੈ। '2.0' ਨਾਲ ਚਰਚਿਤ ਹੋਈ ਐਮੀ ਜੈਕਸਨ ਦਾ ਮੰਗੇਤਰ ਜਾਰਜ ਕਰੋੜਪਤੀ ਹੈ। ਲੰਡਨ 'ਚ ਕਈ ਹੋਟਲ ਤੇ ਕਾਫ਼ੀ ਜਾਇਦਾਦ ਉਸ ਦੀ ਹੈ। 'ਗਾਡ ਫਾਦਰ' ਅਕਸ਼ੈ ਨਾਲ ਫਲਾਪ ਫ਼ਿਲਮ ਤੇ ਰਜਨੀਕਾਂਤ ਨਾਲ ਹਿੱਟ ਫ਼ਿਲਮ ਤੇ ਐਮੀ ਦੱਖਣ ਦੀ ਸਟਾਰ ਨਾਇਕਾ ਹੈ। ਐਮੀ ਮੁਟਿਆਰਾਂ ਨੂੰ ਦੱਸ ਰਹੀ ਹੈ ਕਿ ਕਸਰਤ ਬਹੁਤ ਜ਼ਰੂਰੀ ਹੈ। ਐਮੀ ਜੈਕਸਨ ਆਧੁਨਿਕ ਖਿਆਲਾਂ ਵਾਲੀ ਅਭਿਨੇਤਰੀ ਹੈ ਤੇ ਹੁਣ ਆਧੁਨਿਕ ਤਰੀਕੇ ਨਾਲ ਵਿਆਹ ਕਰਵਾ ਰਹੀ ਹੈ।

ਸੰਜੀਦਾ ਸਿਨੇਮਾ ਦੀ ਵਿਲੱਖਣ ਪੇਸ਼ਕਾਰੀ 'ਅਰਦਾਸ ਕਰਾਂ'

ਹੰਬਲ ਮੋਸਨ ਪਿਕਚਰਜ਼ ਦੇ ਬੈਨਰ ਹੇਠ ਨਿਰਮਾਤਾ-ਨਿਰਦੇਸ਼ਕ ਗਿੱਪੀ ਗਰੇਵਾਲ ਦੀ ਫ਼ਿਲਮ 'ਅਰਦਾਸ ਕਰਾਂ' ਜ਼ਿੰਦਗੀ ਤੋਂ ਨਿਰਾਸ਼ ਹੋਏ ਮਨੁੱਖ ਨੂੰ ਹੱਸ ਕੇ ਜਿਊਣ ਦਾ ਤਰੀਕਾ ਦੱਸਦੀ ਹੈ। ਸੁੱਖ-ਦੁੱਖ ਜ਼ਿੰਦਗੀ ਦਾ ਹਿੱਸਾ ਹਨ। ਦੁੱਖ ਸਮੇਂ ਹਿੰਮਤ ਹਾਰ ਜਾਣਾ ਆਮ ਗੱਲ ਹੈ ਪਰ ਇਹ ਫ਼ਿਲਮ ਅਜਿਹੇ ਹਾਲਾਤ 'ਚ ਘਿਰੇ ਮਨੁੱਖ ਨੂੰ ਜ਼ਿੰਦਗੀ ਨਾਲ ਲੜਨ ਦਾ ਵੱਲ ਸਿਖਾਉਂਦੀ ਹੈ। ਗਿੱਪੀ ਗਰੇਵਾਲ ਨੇ ਦੱਸਿਆ ਕਿ ਇਹ ਕਹਾਣੀ ਦੋ ਪੀੜ੍ਹੀਆਂ ਦੇ ਫਾਸਲੇ ਨੂੰ ਬਿਆਨ ਕਰਦੀ ਹੈ। ਇਹ ਹਰੇਕ ਘਰ ਦੀ ਕਹਾਣੀ ਹੈ, ਚਾਹੇ ਉਹ ਘਰ ਪੰਜਾਬ ਦਾ ਹੋਵੇ ਜਾਂ ਫਿਰ ਵਿਦੇਸ਼ ਦਾ। ਵੱਖ ਵੱਖ ਜਾਤਾਂ-ਧਰਮਾਂ ਦੀ ਕਹਾਣੀ ਨੂੰ ਇਕ ਧਾਗੇ 'ਚ ਪ੍ਰੋਅ ਕੇ ਬਣਾਈ ਇਹ ਫ਼ਿਲਮ ਜ਼ਿੰਦਗੀ ਦਾ ਹਰੇਕ ਰੰਗ ਪੇਸ਼ ਕਰਦੀ ਹੈ। ਸਾਡੀ ਪਹਿਲੀ ਫ਼ਿਲਮ 'ਅਰਦਾਸ' ਵਾਂਗ ਇਹ ਫ਼ਿਲਮ ਵੀ ਦਰਸ਼ਕਾਂ ਨੂੰ ਇਕ ਨਵੇਂ ਮਨੋਰੰਜਨ ਸਮੇਤ ਸਮਾਜਿਕ ਸੁਨੇਹੇ ਦਾ ਫਰਜ ਨਿਭਾਏਗੀ।
ਫ਼ਿਲਮ ਦਾ ਨਿਰਦੇਸ਼ਨ ਖੁਦ ਗਿੱਪੀ ਗਰੇਵਾਲ ਨੇ ਕੀਤਾ ਹੈ। ਫ਼ਿਲਮ ਦੀ ਕਹਾਣੀ ਤੇ ਸਕਰੀਨ ਪਲੇਅ ਵੀ ਗਿੱਪੀ ਗਰੇਵਾਲ ਦਾ ਲਿਖਿਆ ਹੈ। ਡਾਇਲਾਗ ਰਾਣਾ ਰਣਬੀਰ ਨੇ ਲਿਖੇ ਹਨ। ਫ਼ਿਲਮ ਦੇ ਸਿਨਮੇਟੋਗਰਾਫ਼ਰ ਬਲਜੀਤ ਸਿੰਘ ਦਿਓ ਹਨ। ਫ਼ਿਲਮ 'ਚ ਗਿੱਪੀ ਗਰੇਵਾਲ, ਗੁਰਪ੍ਰੀਤ ਘੁੱਗੀ, ਜਪੁਜੀ ਖਹਿਰਾ, ਮੇਹਰ ਵਿੱਜ, ਸਰਦਾਰ ਸੋਹੀ, ਯੋਗਰਾਜ ਸਿੰਘ, ਸਪਨਾ ਪੱਬੀ, ਮਲਕੀਤ ਰੌਣੀ, ਰਾਣਾ ਜੰਗ ਬਹਾਦਰ, ਸੀਮਾ ਕੌਸ਼ਲ, ਗੁਰਪ੍ਰੀਤ ਕੌਰ ਭੰਗੂ, ਹੌਬੀ ਧਾਲੀਵਾਲ, ਕੁਲਜਿੰਦਰ ਸਿੱਧੂ, ਆਦਿ ਨੇ ਅਹਿਮ ਕਿਰਦਾਰ ਨਿਭਾਏ ਹਨ। ਜ਼ਿਕਰਯੋਗ ਹੈ ਕਿ ਗਿੱਪੀ ਗਰੇਵਾਲ ਦਾ ਬੇਟਾ ਗੁਰਫਤਿਹ ਸਿੰਘ ਗਰੇਵਾਲ ਵੀ ਬਾਲ ਕਲਾਕਾਰ ਦੇ ਰੂਪ 'ਚ ਪਹਿਲੀ ਵਾਰ ਪਰਦੇ 'ਤੇ ਨਜ਼ਰ ਆਵੇਗਾ। ਫ਼ਿਲਮ ਦਾ ਸੰਗੀਤ ਸਾਗਾ ਮਿਊਜ਼ਿਕ ਵਲੋਂ ਰਿਲੀਜ਼ ਕੀਤਾ ਗਿਆ ਹੈ ਜੋ ਜਤਿੰਦਰ ਸ਼ਾਹ ਨੇ ਤਿਆਰ ਕੀਤਾ ਹੈ। ਅੱਜ 19 ਜੁਲਾਈ ਨੂੰ ਇਹ ਫ਼ਿਲਮ ਪੰਜਾਬ ਅਤੇ ਵਿਦੇਸ਼ਾਂ ਵਿਚ ਵੱਡੀ ਪੱਧਰ 'ਤੇ ਰਿਲੀਜ਼ ਹੋ ਰਹੀ ਹੈ।


-ਸੁਰਜੀਤ ਜੱਸਲ

ਦਿਲਜੀਤ ਨਾਲ ਨਜ਼ਰ ਆਏਗੀ ਕ੍ਰਿਤੀ ਸੈਨਨ

ਅਦਾਕਾਰਾ ਕ੍ਰਿਤੀ ਸੈਨਨ ਨੇ ਆਪਣੇ ਕਰੀਅਰ ਦੀ ਸ਼ੁਰੂਆਤ ਜ਼ਬਰਦਸਤ ਅਦਾਕਾਰੀ ਨਾਲ ਕੀਤੀ। ਉਸ ਦੀ ਪਹਿਲੀ ਫਿਲਮ ਤੋਂ ਬਾਅਦ ਉਸ ਦੀ ਮੰਗ ਫਿਲਮ ਸਨਅਤ ਵਿਚ ਘੱਟ ਹੋ ਗਈ। ਪਰ ਕ੍ਰਿਤੀ ਨੇ ਆਪਣੇ ਕਰੀਅਰ ਨੂੰ ਨਕਾਰਾਤਮਕ ਰੂਪ ਵਿਚ ਨਹੀਂ ਲਿਆ। ਚਾਹੇ ਉਸ ਨੂੰ ਫਿਲਮਾਂ ਮਿਲੀਆਂ ਪਰ ਉਹ ਵੀ ਕੁਝ ਖ਼ਾਸ ਨਹੀਂ ਸਨ। ਕ੍ਰਿਤੀ ਨੇ ਹਾਲ ਹੀ 'ਚ ਦਿਲਜੀਤ ਦੋਸਾਂਝ ਨਾਲ ਫਿਲਮ 'ਅਰਜੁਨ ਪਟਿਆਲਾ' ਕੀਤੀ ਹੈ। ਜਿਥੇ ਕ੍ਰਿਤੀ ਪਹਿਲੀ ਵਾਰ ਦਿਲਜੀਤ ਦੋਸਾਂਝ ਨਾਲ ਨਜ਼ਰ ਆਏਗੀ ਉਥੇ ਪਹਿਲੀ ਵਾਰ ਉਹ ਪੱਤਰਕਾਰ ਦਾ ਕਿਰਦਾਰ ਨਿਭਾਉਂਦੀ ਵੀ ਨਜ਼ਰ ਆਏਗੀ। ਇਸ ਫਿਲਮ ਵਿਚ ਇਨ੍ਹਾਂ ਦੋਵਾਂ ਤੋਂ ਇਲਾਵਾ ਤੀਜੀ ਮੁੱਖ ਭੂਮਿਕਾ 'ਚ ਹੀਰੋ ਵਰੁਣ ਸ਼ਰਮਾ ਹੈ। ਇਸ ਤਿੱਕੜੀ ਦਾ ਕਮਾਲ ਹੁਣ ਜਲਦੀ ਹੀ ਵੱਡੇ ਪਰਦੇ 'ਤੇ ਦੇਖਣ ਨੂੰ ਮਿਲੇਗਾ। ਕੰਪਨੀ ਵਲੋਂ ਇਸ ਦੇ ਟ੍ਰੇਲਰ ਨੂੰ ਹਾਲੇ ਕੁਝ ਦਿਨ ਪਹਿਲਾਂ ਹੀ ਜਾਰੀ ਕੀਤਾ ਗਿਆ ਹੈ। ਫਿਲਮ ਐਕਸ਼ਨ, ਡਰਾਮਾ, ਰੋਮਾਂਸ ਤੇ ਕਾਮੇਡੀ ਨਾਲ ਭਰਪੂਰ ਹੈ। ਰਾਹੁਲ ਢੋਲਕੀਆ ਵਲੋਂ ਨਿਰਦੇਸ਼ਤ ਇਸ ਫਿਲਮ ਬਾਰੇ ਕ੍ਰਿਤੀ ਦਾ ਕਹਿਣਾ ਹੈ ਕਿ ਮੈਂ ਕਾਫੀ ਲੰਮੇ ਸਮੇਂ ਤੋਂ ਚੰਗੀ ਫਿਲਮ ਦਾ ਇੰਤਜ਼ਾਰ ਕਰ ਰਹੀ ਸੀ ਜੋ ਮੈਨੂੰ ਹੁਣ ਮਿਲ ਗਈ ਹੈ। ਮੈਨੂੰ ਉਮੀਦ ਹੈ ਕਿ ਇਹ ਇਕ ਕਮਰਸ਼ੀਅਲ ਫਿਲਮ ਸਾਬਤ ਹੋਵੇਗੀ। ਨਾਲ ਹੀ ਕ੍ਰਿਤੀ ਅਕਸ਼ੈ ਦੇ ਨਾਲ 'ਹਾਊਸਫੁਲ' ਦੀ ਲੜੀ ਵਿਚ ਵੀ ਕੰਮ ਕਰ ਰਹੀ ਹੈ। ਅਰਜੁਨ ਕਪੂਰ ਦੀ 'ਪਾਨੀਪਤ' ਦੀ ਸ਼ੂਟਿੰਗ ਵੀ ਹਾਲੇ ਚਲ ਰਹੀ ਹੈ। ਕ੍ਰਿਤੀ ਜਲਦੀ ਹੀ 'ਨੇਟਫਲਿਕਸ' ਦੇ ਸੋਸ਼ਲ ਮੀਡੀਆ 'ਤੇ ਇਕ ਛੋਟੀ ਫਿਲਮ ਵਿਚ ਹੱਥ ਅਜ਼ਮਾਉਣ ਦੀ ਕੋਸ਼ਿਸ਼ ਕਰੇਗੀ। ਇਸ ਪ੍ਰਾਜੈਕਟ ਦਾ ਨਾਂਅ ਹੈ 'ਦ ਬਾਰਡ ਆਫ਼ ਬਲੱਡ' ਜੋ ਕਿ ਬਿਲਾਲ ਸਿਦੀਕੀ ਵਲੋਂ ਬਣਾਈ ਜਾਵੇਗੀ।

'ਦੁਲਹਨ ਬਣਨ ਦਾ ਰੋਮਾਂਚ ਹੀ ਵੱਖਰਾ ਹੈ' : ਪੀਆ ਵਾਜਪਾਈ

ਗਾਇਕ ਮੁਹੰਮਦ ਕਲਾਮ ਦੀ ਆਵਾਜ਼ ਨਾਲ ਸਜੇ ਗੀਤ 'ਤੇਰਾ ਸ਼ਹਿਰ...' ਲਈ ਬਣਾਏ ਗਏ ਵੀਡੀਓ ਵਿਚ ਅਭਿਨੇਤਰੀ ਪੀਆ ਵਾਜਪਾਈ ਤੇ ਹਿਮਾਂਸ਼ ਕੋਹਲੀ ਨੂੰ ਚਮਕਾਇਆ ਗਿਆ ਹੈ। ਸ਼ੇਬੀ ਸਿੰਘ ਵਲੋਂ ਨਿਰਦੇਸ਼ਿਤ ਇਸ ਵੀਡੀਓ ਦੀ ਖ਼ਾਸ ਗੱਲ ਇਹ ਹੈ ਕਿ ਇਸ ਵਿਚ ਪੀਆ ਨੂੰ ਦੁਲਹਨ ਦੇ ਰੂਪ ਵਿਚ ਪੇਸ਼ ਕੀਤਾ ਗਿਆ ਹੈ।
ਕੈਮਰੇ ਲਈ ਵਿਆਹ ਦਾ ਜੋੜਾ ਪਹਿਣਨ ਬਾਰੇ ਉਹ ਕਹਿੰਦੀ ਹੈ, 'ਜਦੋਂ ਮੈਨੂੰ ਵੀਡੀਓ ਐਲਬਮ ਦੇ ਥੀਮ ਬਾਰੇ ਦੱਸਿਆ ਗਿਆ ਅਤੇ ਇਹ ਕਿਹਾ ਗਿਆ ਕਿ ਇਥੇ ਮੈਨੂੰ ਦੁਲਹਨ ਦੇ ਰੂਪ ਵਿਚ ਦਿਖਾਇਆ ਜਾਵੇਗਾ ਤਾਂ ਮੈਂ ਰੋਮਾਂਚਿਤ ਹੋ ਉੱਠੀ ਸੀ। ਆਮ ਤੌਰ 'ਤੇ ਹਰ ਕੁੜੀ ਦਾ ਸੁਪਨਾ ਹੁੰਦਾ ਹੈ ਖ਼ੁਦ ਨੂੰ ਦੁਲਹਨ ਦੇ ਰੂਪ ਵਿਚ ਸਜਿਆਂ ਦੇਖਣਾ। ਇਹ ਮੌਕਾ ਜ਼ਿੰਦਗੀ ਵਿਚ ਇਕ ਵਾਰ ਆਉਂਦਾ ਹੈ ਅਤੇ ਉਹ ਵੀ ਕੈਮਰੇ ਸਾਹਮਣੇ। ਜਿਸ ਦਿਨ ਸ਼ੂਟਿੰਗ ਲਈ ਨਿਕਲੀ ਸੀ, ਉਦੋਂ ਰਸਤੇ 'ਚ ਇਹੀ ਸੋਚ ਕੇ ਰੋਮਾਂਚਿਤ ਹੋ ਰਹੀ ਸੀ ਕਿ ਦੁਲਹਨ ਦੇ ਜੋੜੇ ਵਿਚ ਮੈਂ ਕਿਵੇਂ ਦੀ ਲੱਗਾਂਗੀ। ਹਾਂ, ਇਹ ਤਣਾਅ ਵੀ ਸੀ ਕਿ ਜੋੜਾ ਜ਼ਿਆਦਾ ਭਾਰੀ ਨਾ ਹੋਵੇ ਕਿਉਂਕਿ ਭਾਰੀ ਜੋੜੇ ਨੂੰ ਪੂਰਾ ਦਿਨ ਪਾ ਕੇ ਸ਼ੂਟਿੰਗ ਕਰਨਾ ਕਾਫ਼ੀ ਮੁਸ਼ਕਿਲ ਕੰਮ ਹੁੰਦਾ ਹੈ। ਸੈੱਟ 'ਤੇ ਜਦੋਂ ਤਿਆਰ ਹੋ ਕੇ ਖ਼ੁਦ ਨੂੰ ਸ਼ੀਸ਼ੇ ਵਿਚ ਦੇਖਿਆ ਤਾਂ ਅਹਿਸਾਸ ਹੋਇਆ ਕਿ ਦੁਲਹਨ ਬਣਨ ਦਾ ਰੋਮਾਂਚ ਹੀ ਕੁਝ ਹੋਰ ਹੁੰਦਾ ਹੈ। ਮੈਂ ਇਸ ਸ਼ੂਟਿੰਗ ਦੀ ਇਕ ਖ਼ਾਸ ਤਸਵੀਰ ਆਪਣੇ ਕਮਰੇ ਵਿਚ ਸਜਾ ਰੱਖੀ ਹੈ ਅਤੇ ਇਹ ਤਸਵੀਰ ਮੈਨੂੰ ਇਸ ਬਿਹਤਰੀਨ ਅਨੁਭਵ ਦੀ ਯਾਦ ਦਿਵਾਉਂਦੀ ਰਹਿੰਦੀ ਹੈ। ਇਸ ਵੀਡੀਓ ਵਿਚ ਵਿਆਹ ਚਰਚ ਵਿਚ ਹੁੰਦਾ ਹੈ ਦਿਖਾਇਆ ਗਿਆ ਹੈ। ਸੋ, ਕੈਥਲਿਕ ਧਰਮ ਦੀ ਰਸਮ ਦਾ ਵੀ ਅਨੁਭਵ ਮਿਲ ਗਿਆ।
'ਤੇਰਾ ਸ਼ਹਿਰ...' ਗੀਤ 'ਤੇ ਬਣੇ ਇਸ ਵੀਡੀਓ ਦਾ ਫ਼ਿਲਮਾਂਕਣ ਕੁਝ ਇਸ ਅੰਦਾਜ਼ ਵਿਚ ਕੀਤਾ ਗਿਆ ਹੈ ਕਿ ਇਸ ਵਿਚ ਦੋ ਪ੍ਰੇਮੀਆਂ ਦੀ ਕਹਾਣੀ ਪੇਸ਼ ਕੀਤੀ ਗਈ ਹੈ ਅਤੇ ਮੁੰਡੇ ਨੂੰ 'ਸਾਇਲੈਂਟ ਲਵਰ' ਦੇ ਤੌਰ 'ਤੇ ਦਿਖਾਇਆ ਗਿਆ ਹੈ।

-ਮੁੰਬਈ ਪ੍ਰਤੀਨਿਧ

ਅਸਲੀ ਘਟਨਾ 'ਤੇ ਬਣੀ 'ਬਾਟਲਾ ਹਾਊਸ'

19 ਸਤੰਬਰ, 2008 ਵਾਲੇ ਦਿਨ ਦਿੱਲੀ ਦੇ ਜ਼ਾਮੀਆ ਨਗਰ ਇਲਾਕੇ ਵਿਚ ਸਥਿਤ ਇਮਾਰਤ ਬਾਟਲਾ ਹਾਊਸ 'ਤੇ ਪੁਲਿਸ ਨੇ ਧਾਵਾ ਬੋਲ ਕੇ ਇੰਡੀਅਨ ਮੁਜ਼ਾਹਦੀਨ ਦੇ ਦੋ ਅੱਤਵਾਦੀਆਂ ਨੂੰ ਮਾਰ ਸੁੱਟਿਆ ਸੀ ਅਤੇ ਦੋ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਇਸ ਘਟਨਾ ਨੂੰ ਰਾਜਨੀਤੀ ਦਾ ਜਾਮਾ ਪਵਾ ਕੇ ਕੁਝ ਰਾਜਨੀਤਕ ਪਾਰਟੀਆਂ ਨੇ ਇਸ ਦਾ ਸਖ਼ਤ ਵਿਰੋਧ ਕੀਤਾ ਸੀ ਅਤੇ ਪੁਲਿਸ 'ਤੇ ਇਥੋਂ ਤੱਕ ਇਲਜ਼ਾਮ ਲਗਾਇਆ ਗਿਆ ਕਿ ਉਹ ਬੇਕਸੂਰ ਵਿਦਿਆਰਥੀਆਂ ਦੀਆਂ ਹੱਤਿਆਵਾਂ ਕਰ ਰਹੀ ਹੈ। ਉਦੋਂ ਅੱਤਵਾਦੀਆਂ ਵਲੋਂ ਕੀਤੀ ਗਈ ਜਵਾਬੀ ਫਾਇਰਿੰਗ ਵਿਚ ਦਿੱਲੀ ਪੁਲਿਸ ਦੇ ਮੋਹਨ ਚੰਦ ਸ਼ਰਮਾ ਸ਼ਹੀਦ ਹੋਏ ਸਨ।
ਹੁਣ ਇਸ ਘਟਨਾ 'ਤੇ ਨਿਰਦੇਸ਼ਕ ਨਿਖਿਲ ਆਡਵਾਨੀ ਨੇ ਉਸ ਵਿਵਾਦਤ ਇਮਾਰਤ ਦੇ ਨਾਂਅ ਤੋਂ ਫ਼ਿਲਮ ਬਣਾਈ ਹੈ ਅਤੇ ਇਸ ਵਿਚ ਪੁਲਿਸ ਦੀ ਕਾਰਵਾਈ ਨੂੰ ਵਿਸਥਾਰ ਨਾਲ ਪੇਸ਼ ਕੀਤਾ ਗਿਆ ਹੈ। ਜਾਨ ਆਬ੍ਰਾਹਮ ਵਲੋਂ ਇਥੇ ਡੀ. ਸੀ. ਪੀ. ਸੰਜੀਵ ਕੁਮਾਰ ਦੀ ਭੂਮਿਕਾ ਨਿਭਾਈ ਗਈ ਹੈ ਅਤੇ ਇਨ੍ਹਾਂ ਦੀ ਪਤਨੀ ਦੀ ਭੂਮਿਕਾ ਵਿਚ ਹੈ ਮ੍ਰਿਣਾਲ ਠਾਕੁਰ। ਜਾਨ ਆਪਣੇ ਲਈ ਇਹ ਫ਼ਿਲਮ ਕਾਫੀ ਅਹਿਮ ਮੰਨਦੇ ਹਨ ਕਿਉਂਕਿ ਇਥੇ ਉਨ੍ਹਾਂ ਦਾ ਜੋ ਕਿਰਦਾਰ ਹੈ ਉਹ ਅਸਲ ਜ਼ਿੰਦਗੀ ਤੋਂ ਪ੍ਰੇਰਿਤ ਹੈ।


-ਮੁੰਬਈ ਪ੍ਰਤੀਨਿਧ

ਜਸਬੀਰ ਜੱਸੀ ਹੁਣ ਬਾਲੀਵੁੱਡ ਦੇ ਪਰਦੇ 'ਤੇ

'ਦਿਲ ਲੈ ਗਈ ਕੁੜੀ ਗੁਜਰਾਤ ਦੀ...' ਗਾ ਕੇ ਮਸ਼ਹੂਰ ਹੋਏ ਗਾਇਕ ਜਸਬੀਰ ਜੱਸੀ ਦਾ ਸਬੰਧ ਅਭਿਨੈ ਨਾਲ ਵੀ ਰਿਹਾ ਹੈ। ਕਦੀ ਉਹ ਰੰਗਮੰਚ 'ਤੇ ਅਭਿਨੈ ਕਰਿਆ ਕਰਦੇ ਸਨ ਅਤੇ ਬਾਅਦ ਵਿਚ 'ਖ਼ਸ਼ੀਆਂ', 'ਹੀਰ ਰਾਂਝਾ' ਸਮੇਤ ਕੁਝ ਪੰਜਾਬੀ ਫ਼ਿਲਮਾਂ ਵੀ ਕੀਤੀਆਂ। ਹੁਣ ਅਦਾਕਾਰ ਦੇ ਤੌਰ 'ਤੇ ਜੱਸੀ ਨੇ ਬਾਲੀਵੁੱਡ ਦੇ ਦਰਵਾਜ਼ੇ 'ਤੇ ਦਸਤਕ ਦਿੱਤੀ ਹੈ ਅਤੇ ਇਨ੍ਹੀਂ ਦਿਨੀਂ ਉਹ ਹਿੰਦੀ ਫ਼ਿਲਮ 'ਬੈਂਡ ਆਫ਼ ਮਹਾਰਾਜਾ' ਵਿਚ ਅਭਿਨੈ ਕਰ ਰਹੇ ਹਨ। ਆਪਣੀ ਇਸ ਪਹਿਲੀ ਹਿੰਦੀ ਫ਼ਿਲਮ ਵਿਚ ਉਹ ਇਕ ਇਸ ਤਰ੍ਹਾਂ ਬੰਦੇ ਦਾ ਕਿਰਦਾਰ ਨਿਭਾਅ ਰਹੇ ਹਨ ਜੋ ਫਕਰੀਨਾ ਤਬੀਅਤ ਦਾ ਹੈ। ਉਹ ਇਕ ਪਾਸੇ ਹਿੰਦੀ ਫ਼ਿਲਮ ਵੀ ਕਰ ਰਹੇ ਹਨ ਅਤੇ ਉਨ੍ਹਾਂ ਅਨੁਸਾਰ ਇਸ ਵਿਚ ਉਨ੍ਹਾਂ ਦੀ ਵੱਖਰੀ ਜਿਹੀ ਭੂਮਿਕਾ ਹੈ।
ਗਾਇਕ ਬਾਦਸ਼ਾਹ ਨੂੰ ਅਦਾਕਾਰ ਦੇ ਤੌਰ 'ਤੇ ਚਮਕਾਉਂਦੀ ਫ਼ਿਲਮ 'ਖਾਨਦਾਨੀ ਸ਼ਫਾਖਾਨਾ' ਵਿਚ ਜੱਸੀ ਵਲੋਂ ਗਾਏ ਗੀਤ 'ਕੋਕਾ...' ਨੂੰ ਨਵੇਂ ਅੰਦਾਜ਼ ਵਿਚ ਪੇਸ਼ ਕੀਤਾ ਗਿਆ ਹੈ ਅਤੇ ਇਨ੍ਹੀਂ ਦਿਨੀਂ ਇਹ ਸੰਗੀਤ ਦੇ ਚਾਰਟ 'ਤੇ ਸਿਖਰ 'ਤੇ ਚੱਲ ਰਿਹਾ ਹੈ।
ਜੱਸੀ ਬਾਰੇ ਇਹ ਮਸ਼ਹੂਰ ਹੈ ਕਿ ਉਹ ਉਨ੍ਹਾਂ ਗੀਤਾਂ ਨੂੰ ਗਾਉਣ ਤੋਂ ਸਾਫ਼ ਮਨ੍ਹਾਂ ਕਰ ਦਿੰਦੇ ਹਨ ਜਿਸ ਵਿਚ ਅਸ਼ਲੀਲਤਾ ਝਲਕਦੀ ਹੋਵੇ ਜਾਂ ਸ਼ਰਾਬ ਦਾ ਪ੍ਰਚਾਰ ਹੋਵੇ। ਇਸ ਤਰ੍ਹਾਂ ਦੇ ਗੀਤ ਨਕਾਰ ਕੇ ਉਨ੍ਹਾਂ ਨੂੰ ਕਈ ਵਾਰ ਨੁਕਸਾਨ ਵੀ ਚੁੱਕਣਾ ਪਿਆ ਪਰ ਉਹ ਇਸ ਗੱਲ ਨਾਲ ਸਬਰ ਲੈਂਦੇ ਹਨ ਕਿ ਉਨ੍ਹਾਂ ਨੇ ਪੰਜਾਬ ਦੇ ਨੌਜਵਾਨਾਂ ਨੂੰ ਭਟਕਾਉਣ ਦੀ ਕੋਸ਼ਿਸ਼ ਨਹੀਂ ਕੀਤੀ।
ਜੱਸੀ ਨੇ ਇਹੀ ਨੀਤੀ ਫ਼ਿਲਮਾਂ ਦੀ ਚੋਣ ਦੇ ਮਾਮਲੇ ਵਿਚ ਵੀ ਅਪਣਾ ਰੱਖੀ ਹੈ। ਇਨ੍ਹੀਂ ਦਿਨੀਂ ਉਹ ਦੋ ਪੰਜਾਬੀ ਫ਼ਿਲਮਾਂ 'ਦੇਸ਼ ਪੰਜਾਬ' ਤੇ 'ਸਿਖ ਸੋਲ' 'ਤੇ ਵੀ ਕੰਮ ਕਰ ਰਹੇ ਹਨ ਅਤੇ ਇਨ੍ਹਾਂ ਫ਼ਿਲਮਾਂ ਰਾਹੀਂ ਵੀ ਸਹੀ ਸੰਦੇਸ਼ ਪੇਸ਼ ਕੀਤਾ ਜਾਵੇਗਾ। 'ਮੇਰੀ ਇਹੀ ਕੋਸ਼ਿਸ਼ ਰਹਿੰਦੀ ਹੈ ਕਿ ਮੇਰੀ ਹਰ ਫ਼ਿਲਮ ਵਿਚ ਦਰਸ਼ਕਾਂ ਲਈ ਕੁਝ ਗ੍ਰਹਿਣ ਕਰਨ ਲਾਇਕ ਚੰਗੀ ਗੱਲ ਹੋਵੇ। ਕਿਤੇ ਗੁਰਬਾਣੀ ਤੋਂ ਲਿਆ ਗਿਆ ਸੰਦੇਸ਼ ਹੋਵੇ ਜਾਂ ਏਕਤਾ ਜਾਂ ਫਿਰ ਸਮਾਜ ਪ੍ਰਤੀ ਫ਼ਰਜ਼ ਵਾਲਾ ਸੰਦੇਸ਼ ਹੋਵੇ', ਉਹ ਕਹਿੰਦੇ ਹਨ।
ਜੱਸੀ ਇਸ ਗੱਲੋਂ ਤੋਂ ਕਾਫੀ ਖਫ਼ਾ ਤੇ ਨਰਾਜ ਹੈ ਕਿ ਲੋਕ ਕਲਾ ਦੇ ਨਾਂਅ 'ਤੇ ਗੰਦਗੀ ਫੈਲਾਉਂਦੇ ਹਨ। 'ਮੈਂ ਇਸ ਤਰ੍ਹਾਂ ਦੇ ਕੰਮ ਨੂੰ 'ਕਲਚਰ ਕ੍ਰਾਈਮ' ਦਾ ਨਾਂਅ ਦਿੰਦਾ ਹਾਂ। ਇਸ ਤਰ੍ਹਾਂ ਦੇ ਲੋਕਾਂ ਦੀਆਂ ਹਰਕਤਾਂ ਨੇ ਪੰਜਾਬ ਦੀ ਜਵਾਨੀ ਖ਼ਤਮ ਕਰ ਦਿੱਤੀ ਹੈ।


-ਮੁੰਬਈ ਪ੍ਰਤੀਨਿਧ

21 ਜੁਲਾਈ ਨੂੰ ਜਨਮ ਦਿਨ 'ਤੇ ਵਿਸ਼ੇਸ਼

ਸਵ: ਗਾਇਕ ਜੋੜੀ ਚਮਕੀਲਾ-ਅਮਰਜੋਤ

ਲੁਧਿਆਣਾ ਨੇੜੇ ਗਿੱਲਾਂ ਵਾਲੀ ਨਹਿਰ ਉੱਪਰ ਜਾਖਲ-ਲੁਧਿਆਣਾ ਰੇਲਵੇ ਲਾਇਨ 'ਤੇ ਸਥਿਤ ਛੋਟੇ ਜਿਹੇ ਪਿੰਡ ਦੁੱਗਰੀ ਵਿਚ ਗ਼ਰੀਬ ਪਰਿਵਾਰ ਵਿਚ ਜਨਮਿਆਂ ਚਮਕੀਲਾ ਮਰਨ ਤੱਕ ਇੱਥੋਂ ਦੀ ਮਿੱਟੀ ਤੇ ਲੋਕਾਂ ਨਾਲ ਜੁੜਿਆ ਰਿਹਾ।
ਚਮਕੀਲੇ ਨੇ ਸੁਰਿੰਦਰ ਸੋਨੀਆ ਨਾਲ ਗਾਇਕੀ ਦੇ ਵਿਚ ਪ੍ਰਵੇਸ਼ ਕੀਤਾ ਤੇ ਬਾਅਦ ਵਿਚ ਅਮਰਜੋਤ ਨਾਲ ਵਿਆਹ ਬੰਧਨ ਵਿਚ ਬੱਝ ਕੇ ਗੀਤ ਰਿਕਾਰਡ ਕਰਵਾਏ ਤੇ ਅਖਾੜੇ ਲਾਏ। ਸੰਨ 1979 ਤੋਂ ਲੈ ਕੇ 1988 ਤੱਕ ਚਮਕੀਲਾ ਲੋਕਾਂ ਦੀ ਪਹਿਲੀ ਪਸੰਦ ਸੀ। ਚਮਕੀਲੇ ਨੂੰ ਤੂੰਬੀ, ਢੋਲਕ ਤੇ ਹਰਮੋਨੀਅਮ ਵਜਾਉਣ ਵਿਚ ਪੂਰੀ ਮੁਹਾਰਤ ਹਾਸਲ ਸੀ। ਉਸ ਨੇ, ਉਸ ਦੌਰ ਵਿਚ ਲੋਕਾਂ ਦਾ ਮਨੋਰੰਜਨ ਕੀਤਾ, ਜਦੋਂ ਸਾਊਂਡ ਸਿਸਟਮ ਦਾ ਪ੍ਰਬੰਧ ਕੋਈ ਬਹੁਤਾ ਵਧੀਆ ਨਹੀਂ ਸੀ। ਹਿੱਕ ਦੇ ਜ਼ੋਰ ਨਾਲ ਚਮਕੀਲੇ ਨੇ ਇਕ ਦਿਨ ਵਿਚ ਤਿੰਨ-ਤਿੰਨ ਅਖਾੜੇ ਵੀ ਲਾਏ। ਸੰਨ 1986 ਵਿਚ ਉਸ ਨੇ 293 ਅਖਾੜੇ ਲਾ ਕੇ 280 ਅਖਾੜੇ ਲਾਉਣ ਦਾ ਰਿਕਾਰਡ ਤੋੜਿਆ, 1987 ਵਿਚ ਉਸ ਨੇ 363 ਅਖਾੜੇ ਲਾਏ। ਪਿੰਡਾਂ ਤੋਂ ਲੈ ਕੇ ਸ਼ਹਿਰਾਂ ਤੱਕ, ਪੰਜਾਬੀਆਂ ਤੋਂ ਲੈ ਕੇ ਗ਼ੈਰ-ਪੰਜਾਬੀਆਂ ਤੱਕ ਲੋਕ ਚਮਕੀਲੇ ਦੀ ਗਾਇਕੀ ਦੇ ਮੁਰੀਦ ਸਨ। ਉਹਦੀ ਘੁੱਗੀ ਰੰਗੀ ਅੰਬੈਸਡਰ ਕਾਰ ਰਾਜਸਥਾਨ ਤੱਕ ਵੀ ਅਖਾੜੇ ਲਾਉਣ ਜਾਂਦੀ ਰਹੀ। ਰੁਮਾਂਟਿਕ ਗੀਤ ਲਿਖਣ ਕਰਕੇ ਚਮਕੀਲਾ, ਅਕਸਰ ਆਲੋਚਨਾਵਾਂ ਦਾ ਸ਼ਿਕਾਰ ਰਿਹਾ ਪਰ ਉਦਾਸ ਲਹਿਜੇ ਵਾਲੇ ਗੀਤਾਂ 'ਕੀ ਜ਼ੋਰ ਗਰੀਬਾਂ ਦਾ', 'ਪੱਤਣਾਂ 'ਤੇ ਕੂਕ ਪਵੇ' ਤੇ 'ਰੋਂਦੀ ਕੁਰਲਾਉਂਦੀ ਨੂੰ' ਨਾਲ ਉਸ ਨੇ ਆਪਣੀ ਕਲਾ ਦਾ ਲੋਹਾ ਮਨਵਾਇਆ। ਉੱਘੇ ਗੀਤਕਾਰ ਸਵਰਨ ਸਿਵੀਏ ਨੇ 'ਬਾਬਾ ਤੇਰਾ ਨਨਕਾਣਾ', 'ਕੰਧੇ ਸਰਹਿੰਦ ਦੀਏ', 'ਦਸਤਾਰਾ ਕੇਸਰੀ', 'ਪਟਨੇ ਸ਼ਹਿਰ ਵਿਚ ਚੰਨ ਚੜ੍ਹਿਆ', 'ਬਾਬਾ ਦੀਪ ਸਿੰਘ' ਤੇ ਕਈ ਹੋਰ ਧਾਰਮਿਕ ਗੀਤ ਰਿਕਾਰਡ ਕਰਵਾ ਕੇ ਚਮਕੀਲੇ ਦੀ ਦਿੱਖ ਨੂੰ ਹੋਰ ਨਿਖਾਰਿਆ। ਇਸ ਖੇਤਰ ਵਿਚ ਵੀ ਲੋਕਾਂ ਨੇ ਉਸ ਨੂੰ ਮਣਾਂ-ਮੂੰਹੀਂ ਪਿਆਰ ਦਿੱਤਾ।
21 ਜੁਲਾਈ ਨੂੰ ਪਿੰਡ ਦੁੱਗਰੀ ਵਿਚ ਉਸ ਦੇ ਪਰਿਵਾਰ ਵਲੋਂ ਚਮਕੀਲੇ ਦਾ 59ਵਾਂ ਜਨਮ ਦਿਨ ਮਨਾਇਆ ਜਾ ਰਿਹਾ ਹੈ, ਜਿੱਥੇ ਸੱਭਿਆਚਾਰਕ ਪ੍ਰੋਗਰਾਮ ਪੇਸ਼ ਕੀਤਾ ਜਾਵੇਗਾ।


-ਮੇਜਰ ਸਿੰਘ ਜਖੇਪਲ
ਪਿੰਡ ਅਤੇ ਡਾਕ ਜਖੇਪਲ, ਤਹਿਸੀਲ ਸੁਨਾਮ, ਜ਼ਿਲ੍ਹਾ ਸੰਗਰੂਰ ।

ਕੈਲਾਸ਼ ਖ਼ੇਰ ਦੀ 'ਨਵੀਂ ਉਡਾਨ'

ਨਵੇਂ ਗਾਇਕ-ਗਾਇਕਾਵਾਂ ਲਈ ਕੈਲਾਸ਼ ਖ਼ੇਰ ਵਲੋਂ ਇਕ ਚੰਗੀ ਖ਼ਬਰ ਆਈ ਹੈ। ਪ੍ਰਤਿਭਾਸ਼ਾਲੀ ਗਾਇਕਾਂ ਲਈ ਉਨ੍ਹਾਂ ਵਲੋਂ 'ਨਵੀਂ ਉਡਾਨ' ਨਾਮੀ ਇਕ ਕੰਸੈਪਟ ਪੇਸ਼ ਕੀਤਾ ਗਿਆ ਹੈ। ਇਸ ਕੰਸੈਪਟ ਰਾਹੀਂ ਲੱਭੀਆਂ ਗਈਆਂ ਪ੍ਰਤਿਭਾਵਾਂ ਨੂੰ ਦੁਨੀਆ ਸਾਹਮਣੇ ਪੇਸ਼ ਕਰਨ ਲਈ ਕੈਲਾਸ਼ ਖ਼ੇਰ ਵਲੋਂ ਜੋ ਸੰਗੀਤਮਈ ਪ੍ਰੋਗਰਾਮ ਦਾ ਆਯੋਜਨ ਕੀਤਾ ਗਿਆ, ਉਥੇ ਮੁੱਖ ਮਹਿਮਾਨ ਦੇ ਤੌਰ 'ਤੇ ਕੇਂਦਰੀ ਖੇਡ ਮੰਤਰੀ ਕਿਰਨ ਰਿਜੀਜ਼ੂ ਨੂੰ ਵਿਸ਼ੇਸ਼ ਤੌਰ 'ਤੇ ਸੱਦਾ ਦਿੱਤਾ ਗਿਆ ਸੀ।
ਇਸ ਮੌਕੇ 'ਨਵੀਂ ਉਡਾਨ' ਦੇ ਕੰਸੈਪਟ 'ਤੇ ਰੌਸ਼ਨੀ ਪਾਉਂਦੇ ਹੋਏ ਕੈਲਾਸ਼ ਖ਼ੇਰ ਨੇ ਕਿਹਾ, 'ਸਾਡੇ ਦੇਸ਼ ਵਿਚ ਪ੍ਰਤਿਭਾ ਤਾਂ ਬਹੁਤ ਹੈ, ਜ਼ਰੂਰਤ ਹੈ ਸਹੀ ਪ੍ਰਤਿਭਾ ਲੱਭਣ ਦੀ। ਅੱਜ ਚੈਨਲਾਂ 'ਤੇ ਰਿਆਲਿਟੀ ਸ਼ੋਅ ਦੇ ਨਾਂਅ 'ਤੇ ਜੋ ਗਾਇਕ ਲੱਭੇ ਜਾਂਦੇ ਹਨ, ਉਨ੍ਹਾਂ ਵਿਚ ਫ਼ਿਲਮੀ ਗੀਤ ਗਾਉਣ ਦੀ ਕਾਬਲੀਅਤ ਦੇਖੀ ਜਾਂਦੀ ਹੈ। ਇਹ ਦੇਖਿਆ ਜਾਂਦਾ ਹੈ ਕਿ ਉਹ ਕਿਸ ਨਾਮੀ ਗਾਇਕ ਦੀ ਨਕਲ ਕਿਸ ਹੱਦ ਤਕ ਸਫ਼ਲਤਾਪੂਰਨ ਕਰ ਸਕਦੇ ਹਨ। ਇਸ ਸ਼ੋਅ ਰਾਹੀਂ ਬਾਲੀਵੁੱਡ ਗਾਇਕ ਪੈਦਾ ਹੁੰਦੇ ਹਨ, ਜਦ ਕਿ 'ਨਵੀਂ ਉਡਾਨ' ਰਾਹੀਂ ਜਦੋਂ ਸਾਡੀ ਟੀਮ ਵਲੋਂ ਗਾਇਕ ਲੱਭੇ ਜਾਂਦੇ ਹਨ ਤਾਂ ਇਹ ਦੇਖਿਆ ਜਾਂਦਾ ਹੈ ਕਿ ਉਸ ਦੀ ਗਾਇਕੀ ਵਿਚ ਸਚਾਈ ਕਿੰਨੀ ਹੈ। ਉਹ ਸੁਰ ਵਿਚ ਹੈ ਜਾਂ ਨਹੀਂ। ਇਸ ਟੀਮ ਵਲੋਂ ਲੱਭੀ ਗਈ ਪ੍ਰਤਿਭਾ ਨੂੰ ਫਿਲਟਰ ਪ੍ਰੋਸੈਸ ਵਿਚੀਂ ਲੰਘਣਾ ਪੈਂਦਾ ਹੈ। ਭਾਵ ਚਾਰ ਜੱਜਾਂ ਦੇ ਪੈਨਲ ਵਲੋਂ ਉਸ ਦੀ ਪ੍ਰਤਿਭਾ ਦਾ ਮੁਲਾਂਕਣ ਕੀਤਾ ਜਾਂਦਾ ਹੈ। ਇਹ ਜੱਜ ਹਨ ਰੇਖਾ ਭਾਰਦਵਾਜ, ਹੰਸਰਾਜ ਹੰਸ, ਹਰੀਪ੍ਰਸਾਦ ਚੌਰਸੀਆ ਅਤੇ ਮੈਂ ਖ਼ੁਦ। ਜੋ ਪ੍ਰਤਿਯੋਗੀ ਇਸ ਪੈਨਲ ਦੀ ਨਜ਼ਰ ਵਿਚ ਸਹੀ ਸਾਬਤ ਹੁੰਦਾ ਹੈ, ਉਸ ਨੂੰ ਸਿਖਲਾਈ ਦਿੱਤੀ ਜਾਂਦੀ ਹੈ ਅਤੇ ਫਿਰ ਸਰਟੀਫਿਕੇਟ ਵੀ। ਇਸ ਕੰਸੈਪਟ ਦੇ ਨਾਂਅ ਵਿਚ ਉਡਾਨ ਸ਼ਬਦ ਸ਼ਾਮਿਲ ਹੈ। ਸੋ, ਅਸੀਂ ਇਨ੍ਹਾਂ ਪ੍ਰਤੀਯੋਗੀਆਂ ਨੂੰ ਉਡਾਨ ਲਈ ਪੰਖ ਦਿੱਤੇ ਹਨ। ਉਨ੍ਹਾਂ ਦੀ ਪਰਵਾਜ਼ ਲਈ ਨਵਾਂ ਆਸਮਾਨ ਦਿੰਦੇ ਹਨ। ਅਸੀਂ ਉਨ੍ਹਾਂ ਨੂੰ ਕਰਾਰ ਦੀਆਂ ਸ਼ਰਤਾਂ ਰਾਹੀਂ ਬੰਨ੍ਹ ਕੇ ਨਹੀਂ ਰੱਖਦੇ। ਕਿਸੇ ਵੀ ਕਲਾਕਾਰ ਨੂੰ ਚੁਣਨ ਤੋਂ ਪਹਿਲਾਂ ਇਹ ਦੇਖਿਆ ਜਾਂਦਾ ਹੈ ਕਿ ਉਹ ਨਦੀ ਹੈ ਜਾਂ ਨਹਿਰ/ਨਦੀ ਆਪਣਾ ਰਸਤਾ ਖ਼ੁਦ ਬਣਾਉਂਦੀ ਹੈ ਜਦ ਕਿ ਨਹਿਰ ਬਣਾਉਣੀ ਪੈਂਦੀ ਹੈ। ਇਥੇ ਅਸੀਂ ਨਦੀ ਵਰਗੇ ਕਲਾਕਾਰ ਚੁਣਦੇ ਹਾਂ। ਇਹ ਕਲਾਕਾਰ ਸੰਗੀਤ ਦੀ ਦੁਨੀਆ ਵਿਚ ਟਿਕੇ ਰਹਿਣ, ਇਸ ਲਈ ਇਨ੍ਹਾਂ ਤੋਂ ਸ਼ੋਅ ਵੀ ਕਰਵਾਏ ਜਾਂਦੇ ਹਨ ਤਾਂ ਕਿ ਚੰਗੀ ਆਮਦਨ ਵੀ ਹੋਵੇ ਅਤੇ ਰੋਟੀ ਦੀ ਚਿੰਤਾ ਨਾ ਹੋਵੇ। ਸਾਡਾ ਮਕਸਦ ਲੋਕ ਸੰਗੀਤ ਨੂੰ ਜਿਊਂਦਾ ਰੱਖਣਾ ਤੇ ਇਸ ਨੂੰ ਅੱਗੇ ਲੈ ਜਾਣਾ ਹੈ। ਲੋਕ ਸੰਗੀਤ ਸਾਡੀ ਨਿਸ਼ਾਨੀ ਹੈ। ਇਸ ਦੀ ਰੱਖਿਆ ਅਸੀਂ ਨਹੀਂ ਕਰਾਂਗੇ ਤਾਂ ਕੌਣ ਕਰੇਗਾ।' ਉਥੇ ਕਿਰਨ ਰਿਜੀਜ਼ੂ ਨੇ ਵੀ ਕੈਲਾਸ਼ ਖ਼ੇਰ ਦੇ ਇਸ ਕਦਮ ਦੀ ਤਾਰੀਫ਼ ਕੀਤੀ ਅਤੇ ਪ੍ਰਤੀਯੋਗੀਆਂ ਨੂੰ ਸ਼ੁੱਭਕਾਮਨਾਵਾਂ ਵੀ ਦਿੱਤੀਆਂ।

'ਮਿਸ਼ਨ ਮੰਗਲ' 15 ਅਗਸਤ ਨੂੰ

ਇਨ੍ਹੀਂ ਦਿਨੀਂ ਕਈ ਇਸ ਤਰ੍ਹਾਂ ਦੀਆਂ ਫ਼ਿਲਮਾਂ ਬਣੀਆਂ ਹਨ ਜਿਸ ਵਿਚ ਦੇਸ਼ ਨਾਲ ਜੁੜੀਆਂ ਮਹੱਤਵਪੂਰਨ ਘਟਨਾਵਾਂ ਨੂੰ ਕਹਾਣੀ ਦਾ ਜਾਮਾ ਪਵਾ ਕੇ ਵੱਡੇ ਪਰਦੇ 'ਤੇ ਪੇਸ਼ ਕੀਤਾ ਗਿਆ। 'ਦ ਗਾਜ਼ੀ ਅਟੈਕ', 'ਪਰਮਾਣੂ', 'ਰੈੱਡ', 'ਉੜੀ' ਆਦਿ ਫ਼ਿਲਮਾਂ ਇਸ ਸੂਚੀ ਵਿਚ ਆਉਂਦੀਆਂ ਹਨ। ਹੁਣ 'ਮਿਸ਼ਨ ਮੰਗਲ' ਦੇ ਰੂਪ ਵਿਚ ਇਕ ਹੋਰ ਫ਼ਿਲਮ ਆ ਰਹੀ ਹੈ, ਜਿਸ ਵਿਚ ਸਾਡੇ ਦੇਸ਼ ਦੀ ਸੰਸਥਾ 'ਇਸਰੋ' ਤੇ ਇਸ ਨਾਲ ਜੁੜੇ ਵਿਗਿਆਨੀਆਂ ਦੀ ਇਕ ਵੱਡੀ ਉਪਲਬੱਧੀ ਨੂੰ ਕਹਾਣੀ ਦੇ ਰੂਪ ਵਿਚ ਪੇਸ਼ ਕੀਤਾ ਗਿਆ ਹੈ।
ਇਹ ਫ਼ਿਲਮ ਜਗਨ ਸ਼ਕਤੀ ਵਲੋਂ ਨਿਰਦੇਸ਼ਿਤ ਕੀਤੀ ਗਈ ਹੈ। ਜਦੋਂ ਅਕਸ਼ੈ ਕੁਮਾਰ 'ਹਾਲੀਡੇ' ਤੇ 'ਪੈਡਮੈਨ' ਵਿਚ ਕੰਮ ਕਰ ਰਹੇ ਸਨ, ਉਦੋਂ ਜਗਨ ਇਨ੍ਹਾਂ ਫ਼ਿਲਮਾਂ ਦੇ ਨਾਲ ਬਤੌਰ ਸਹਾਇਕ ਨਿਰਦੇਸ਼ਕ ਜੁੜੇ ਹੋਏ ਸਨ। ਜਗਨ ਦੇ ਇਕ ਨੇੜਲੇ ਰਿਸ਼ਤੇਦਾਰ ਇੰਡੀਅਨ ਸਪੇਸ ਰੀਸਰਚ ਆਰਗੇਨਾਈਜ਼ੇਸ਼ਨ (ਇਸਰੋ) ਵਿਚ ਨੌਕਰੀ ਕਰਦੇ ਸਨ ਅਤੇ ਉਹ 'ਮਾਰਸ ਆਰਬਿਟਰ ਮਿਸ਼ਨ' ਟੀਮ ਦੇ ਮੈਂਬਰ ਵੀ ਸਨ। ਇਨ੍ਹਾਂ ਜ਼ਰੀਏ ਜਗਨ ਨੂੰ ਪਤਾ ਲੱਗਿਆ ਕਿ ਭਾਰਤੀ ਵਿਗਿਆਨੀਆਂ ਵਲੋਂ ਛੱਡੇ ਗਏ ਮੰਗਲਯਾਨ ਲਈ ਕਿਸ ਤਰ੍ਹਾਂ ਦੀ ਮਿਹਨਤ ਕੀਤੀ ਗਈ ਸੀ। ਸਾਡੇ ਵਿਗਿਆਨੀਆਂ ਵਲੋਂ ਕੀਤੀਆਂ ਗਈਆਂ ਕੋਸ਼ਿਸ਼ਾਂ ਵਿਚ ਜਗਨ ਨੂੰ ਫ਼ਿਲਮ ਦੀ ਕਹਾਣੀ ਨਜ਼ਰ ਆਈ ਅਤੇ ਤਿੰਨ ਸਾਲ ਤੱਕ ਖੋਜ ਕਰਨ ਤੋਂ ਬਾਅਦ ਉਨ੍ਹਾਂ ਨੇ ਫ਼ਿਲਮ ਦੀ ਕਹਾਣੀ ਤਿਆਰ ਕੀਤੀ। ਇਹ ਕਹਾਣੀ ਉਨ੍ਹਾਂ ਨੇ ਅਕਸ਼ੈ ਕੁਮਾਰ ਨੂੰ ਸੁਣਾਈ ਅਤੇ ਉਹ ਇਸ ਵਿਚ ਕੰਮ ਕਰਨ ਨੂੰ ਰਾਜ਼ੀ ਹੋ ਗਏ।
ਅਕਸ਼ੈ ਵਲੋਂ ਇਸ ਵਿਚ ਇਸਰੋ ਦੇ ਵਿਗਿਆਨੀ ਦੀ ਭੂਮਿਕਾ ਨਿਭਾਈ ਗਈ ਹੈ। ਇਸਰੋ ਵਿਚ ਔਰਤ ਵਿਗਿਆਨੀ ਵੀ ਕਾਫੀ ਗਿਣਤੀ ਵਿਚ ਹਨ। ਸੋ, ਫ਼ਿਲਮ ਵਿਚ ਔਰਤ ਵਿਗਿਆਨੀਆਂ ਦੇ ਤੌਰ 'ਤੇ ਸੋਨਾਕਸ਼ੀ ਸਿਨਹਾ, ਵਿੱਦਿਆ ਬਾਲਨ, ਤਾਪਸੀ ਪੰਨੂੰ ਨਿਤਿਆ ਮੈਨਨ ਤੇ ਕੀਰਤੀ ਕੁਲਹਰੀ ਨੂੰ ਚਮਕਾਇਆ ਗਿਆ ਹੈ।
ਆਮ ਭਾਰਤੀ ਨਾਗਰਿਕ ਇਸ ਗੱਲ ਤੋਂ ਜਾਣੂ ਨਹੀਂ ਹਨ ਕਿ ਕਿਸੇ ਉੱਪਗ੍ਰਹਿ ਨੂੰ ਪੁਲਾੜ ਵਿਚ ਛੱਡਣ ਵਿਚ ਲਈ ਕੀ ਕੁਝ ਕਰਨਾ ਪੈਂਦਾ ਹੈ, ਕਿਸ ਤਰ੍ਹਾਂ ਦੀ ਖੋਜ ਕਰਨੀ ਪੈਂਦੀ ਹੈ। ਹੁਣ ਇਸ ਫ਼ਿਲਮ ਰਾਹੀਂ ਇਸਰੋ ਦੀ ਕਾਰਜਪ੍ਰਣਾਲੀ 'ਤੇ ਰੌਸ਼ਨੀ ਪਾਈ ਜਾਵੇਗੀ।

ਸੋਨਮ ਕਪੂਰ : ਮੌਜਾਂ ਹੀ ਮੌਜਾਂ

ਆਨੰਦ ਆਹੂਜਾ ਦੀ ਧਰਮਪਤਨੀ ਅਦਾਕਾਰਾ ਸੋਨਮ ਕਪੂਰ ਅਹੂਜਾ ਨੇ ਜਾਹਨਵੀ ਕਪੂਰ ਨੂੰ ਬੇਨਤੀ ਕੀਤੀ ਹੈ ਕਿ ਉਸ ਦੀਆਂ ਉਸ ਦੇ ਸਬੰਧ 'ਚ ਨੇਹਾ ਧੂਪੀਆ ਦੇ ਸ਼ੋਅ 'ਚ ਕਹੀਆਂ ਗੱਲਾਂ ਦਾ ਗੁੱਸਾ ਨਹੀਂ ਕਿਉਂਕਿ ਕਦੇ-ਕਦੇ ਮਜ਼ਾਕ 'ਚ ਉਹ ਕਈ ਕੁਝ ਬੋਲ ਜਾਂਦੀ ਹੈ। ਦੁਨੀਆ ਦੇ ਵਧੀਆ ਭੋਜਨ ਤਾਂ ਬਾਕੀਆਂ ਦੀ ਥਾਂ ਸੋਨਮ ਨੂੰ ਰੇਹੜੀਆਂ 'ਤੇ ਵਿਕਦਾ ਭੋਜਨ ਸੁਆਦਲਾ ਲਗਦਾ ਹੈ। ਰੇਹੜੀ ਦੇ ਗੋਲ-ਗੱਪੇ ਖਾਣ ਨੂੰ ਉਹ ਲੋਚਦੀ ਰਹਿੰਦੀ ਹੈ, ਤਰਸਦੀ ਰਹਿੰਦੀ ਹੈ। ਗੋਲ-ਗੱਪਿਆਂ ਦੀ ਸ਼ੌਕੀਨਣ ਸੋਨਮ ਦੇ ਵਿਆਹ ਨੂੰ ਸਾਲ ਹੋ ਗਿਆ ਹੈ। ਕਰੋ ਗੱਲ ਤਦ ਵਿਹਲ ਨਹੀਂ ਸੀ ਤੇ ਹੁਣ ਜਾਪਾਨ ਜਾ ਕੇ ਸੋਨਮ ਨੇ ਅਧੂਰੇ ਰਹਿ ਗਏ ਵਿਆਹ ਦੇ ਚਾਅ ਪੂਰੇ ਕੀਤੇ ਹਨ। ਜਨਮ ਦਿਨ, ਹਨੀਮੂਨ ਤੇ ਵਿਆਹ ਦੀ ਵਰ੍ਹੇਗੰਢ ਇਹ ਤਿੰਨ ਅਹਿਮ ਦਿਨ ਸੋਨਮ ਨੇ ਮਨਾ ਕੇ ਆਪਣੇ-ਆਪ ਨੂੰ ਸੰਸਾਰ ਦੀ ਸਭ ਤੋਂ ਜ਼ਿਆਦਾ ਖੁਸ਼ਕਿਸਮਤ ਔਰਤ ਮੰਨਿਆ ਹੈ। ਇਥੇ ਔਰਤ ਪ੍ਰਧਾਨ ਫ਼ਿਲਮਾਂ ਬਹੁਤ ਔਖੀਆਂ ਬਣਦੀਆਂ ਹਨ ਤੇ ਸੋਨਮ ਨੇ ਜਾਪਾਨ 'ਚ ਜਾ ਕੇ ਇਕ 'ਵੈੱਬ ਚੈਨਲ' ਨੂੰ ਕਿਹਾ ਕਿ 'ਆਇਸ਼ਾ', 'ਨੀਰਜਾ', 'ਖੂਬਸੂਰਤ' ਫ਼ਿਲਮਾਂ ਲਈ ਤਾਂ ਇਥੋਂ ਦੇ ਹੀਰੋਜ਼ ਨੇ ਨੱਕ-ਬੁੱਲ੍ਹ ਵੱਟ ਲਏ ਤੇ ਪਾਕਿਸਤਾਨੀ ਹੀਰੋ ਫਵਾਦ ਖ਼ਾਨ ਦਾ ਹੋਵੇ ਭਲਾ, ਉਸ ਨਾਲ ਉਸ ਦੀ ਕੀਤੀ ਫ਼ਿਲਮ ਲੋਕਾਂ ਨੇ ਪਸੰਦ ਕੀਤੀ। ਸੋਨਮ ਫ਼ਿਲਮੀ ਲੋਕਾਂ ਨੂੰ ਭੁੱਲ ਕੇ ਆਪਣੇ-ਆਪ ਨੂੰ ਸਹੀ ਸਾਬਤ ਕਰ ਕੇ ਜਾਪਾਨ ਦੀ ਸੈਰ, ਵਿਆਹ ਦੇ ਅਧੂਰੇ ਚਾਅ ਤੇ ਮਸਤੀ ਕਰ ਰਹੀ ਹੈ।

ਕੈਟਰੀਨਾ ਕੈਫ਼

ਬਣੇਗੀ ਪੀ. ਟੀ. ਊਸ਼ਾ

ਬਹੁਤ ਦੀਵਾਨੇ ਹਨ ਕੈਟਰੀਨਾ ਕੈਫ਼ ਦੇ ਤੇ ਕੈਟੀ ਦਾ ਨਵਾਂ ਵੀਡੀਓ ਤਾਂ ਧੁੰਮਾਂ ਪਾ ਰਿਹਾ ਹੈ। ਇਸ ਵੀਡੀਓ ਵਿਚ ਆਪਣੇ ਚਹੇਤਿਆਂ 'ਚ ਘਿਰੀ ਹੋਈ ਉਹ ਨਜ਼ਰ ਆ ਰਹੀ ਹੈ। ਉਸ ਨਾਲ ਫੋਟੋਆਂ, ਸੈਲਫੀ ਲਈ ਮਾਰੋ-ਮਾਰੀ ਪਈ ਹੋਈ ਹੈ। ਇਕ ਚਹੇਤੇ ਨੇ ਸੈਲਫੀ ਦੇ ਚੱਕਰ 'ਚ ਆਪਣਾ ਫੋਨ ਤੁੜਵਾ ਲਿਆ ਤੇ ਦੂਸਰੇ ਪ੍ਰਸੰਸਕ ਨੂੰ ਕੈਟੀ ਤੋਂ ਝਿੜਕਾਂ ਪਈਆਂ। ਅਕਸ਼ੈ ਨਾਲ ਉਹ ਇਸ ਸਮੇਂ 'ਸੂਰਜਵੰਸ਼ੀ' ਫ਼ਿਲਮ ਕਰ ਰਹੀ ਹੈ। ਰੋਹਿਤ ਸ਼ੈਟੀ ਦੀ ਇਹ ਫ਼ਿਲਮ ਹੈ। ਕੈਟੀ ਹਰ ਬਿਆਨ ਸੋਚ-ਸਮਝ ਕੇ ਦੇ ਰਹੀ ਹੈ। ਦੂਸਰੀ ਵਰਗੀ ਸੋਹਣੀ ਹੋਣ ਲਈ ਕੋਈ ਫਾਰਮੂਲਾ ਉਸ ਅਨੁਸਾਰ ਨਹੀਂ ਹੈ ਤੇ ਇਸ ਲਈ ਤਣਾਅ ਨਹੀਂ ਲੈਣਾ ਚਾਹੁੰਦੀ। ਕੀ ਕੈਟੀ ਫ਼ਿਲਮਾਂ ਤੋਂ ਕੋਈ 'ਬਰੇਕ' ਲੈ ਰਹੀ ਹੈ, ਇਹ ਗੱਲ ਵੀ ਸੋਸ਼ਲ ਮੀਡੀਆ 'ਤੇ ਆ ਰਹੀ ਹੈ। 36 ਸਾਲ ਦੀ ਉਹ ਹੋ ਗਈ ਹੈ। ਕਸਰਤ 'ਤੇ ਹੀ ਉਹ ਜ਼ੋਰ ਦਿੰਦੀ ਹੈ। ਉਂਜ 'ਬਰੇਕ' ਤੋਂ ਪਹਿਲਾਂ ਵੀ ਕੈਟੀ ਸਮਾਂ ਕੱਢ ਕੇ ਮਨੋਰੰਜਨ ਪਾਰਟੀਆਂ ਤੇ ਨਿੱਜੀ ਸਮਾਰੋਹਾਂ 'ਚ ਜਾ ਕੇ ਮਨ ਨੂੰ ਤਰੋਤਾਜ਼ਾ ਕਰਦੀ ਨਜ਼ਰ ਆਈ ਹੈ। ਬਾਦਸ਼ਾਹ ਦੇ ਨਾਲ ਉੱਤਰਾਖੰਡ 'ਚ ਕੈਟੀ ਨੇ ਇਕ ਵਿਆਹ ਦੇਖਿਆ ਤੇ ਉਸ 'ਚ ਉਹ ਖੂਬ ਨੱਚੀ ਵੀ। ਰੇਵਤੀ ਸ਼ਰਮਾ ਨੇ ਪੀ.ਟੀ. ਊਸ਼ਾ ਦੀ ਬਾਇਓਪਿਕ ਲਈ ਕੈਟਰੀਨਾ ਨੂੰ ਹੀ ਲਿਆ ਹੈ। ਹਾਲਾਂਕਿ ਅਧਿਕਾਰਕ ਤੌਰ 'ਤੇ ਇਸ ਦਾ ਐਲਾਨ ਨਹੀਂ ਹੋਇਆ। 24 ਘੰਟਿਆਂ 'ਚੋਂ 40 ਮਿੰਟ ਹੀ ਕਸਰਤ ਲਈ ਕੱਢੋ ਕੈਟੀ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ। ਹਰ ਮੁਸਕਰਾਉਂਦੇ ਚਿਹਰੇ ਦੇ ਪਿੱਛੇ ਦਰਦ ਲੁਕਿਆ ਹੁੰਦਾ ਹੈ, ਕਹਿ ਕੇ ਸਲਮਾਨ ਖ਼ਾਨ ਦਾ ਜ਼ਿਕਰ ਕਰਨ ਵਾਲੀ ਕੈਟਰੀਨਾ ਕੈਫ਼ ਦੇ ਕਰੀਅਰ ਨੂੰ ਕਦੇ ਨਿਵਾਣ ਵੱਲ ਨਹੀਂ ਦੇਖਿਆ ਗਿਆ। ਕਾਰਨ ਸੁਹੱਪਣ, ਪ੍ਰਤਿਭਾ, ਫਿਟਨੈੱਸ, ਅਭਿਨੈ, ਡਾਂਸ ਤੇ ਤਾਲਮੇਲ ਦੀ ਕਲਾ ਸਭ 'ਚ ਉਹ ਨਿਪੁੰਨ ਹੈ।... ਤੇ ਹਾਂ ਪੀ.ਟੀ. ਊਸ਼ਾ ਬਣ ਗਈ ਤਾਂ ਬਾਇਓਪਿਕ ਵਾਲੀ ਰੀਝ ਵੀ ਪੂਰੀ ਹੋ ਜਾਵੇਗੀ।

ਸਨਾ ਖ਼ਾਨ : ਚੱਲ ਸੋ ਚੱਲ

ਮਸ਼ਹੂਰ ਡਾਂਸਰ, ਮਾਡਲ ਤੇ ਅਭਿਨੇਤਰੀ ਸਨਾ ਖ਼ਾਨ 'ਯੇ ਹੈ ਹਾਈ ਸੁਸਾਇਟੀ' ਫ਼ਿਲਮ 'ਚ ਸੋਨੀਆ ਦੀ ਭੂਮਿਕਾ ਵਿਚ ਸੀ। 'ਗੋਲ', 'ਬਾਂਬੇ ਟੂ ਗੋਆ', 'ਜਯ ਹੋ', 'ਵਜਹ ਤੁਮ ਹੋ', 'ਅਯੋਗਯ', 'ਟਾਇਲਟ-ਏਕ ਪ੍ਰੇਮ ਕਥਾ' ਆਦਿ ਹਿੰਦੀ ਫ਼ਿਲਮਾਂ ਵੀ ਸਨਾ ਨੇ ਕੀਤੀਆਂ। ਤੇਲਗੂ ਫ਼ਿਲਮਾਂ ਵੀ ਕਰ ਚੁੱਕੀ ਸਨਾ ਦਾ ਤਾਜ਼ਾ ਵੀਡੀਓ ਦੇਖ ਕੇ ਅੰਦਾਜ਼ਾ ਇਹ ਹੀ ਲਗਦਾ ਹੈ ਕਿ ਸਨਾ ਸੰਤੁਸ਼ਟ ਹੈ ਤੇ ਫ਼ਿਲਮੀ ਜੀਵਨ ਦਾ ਅਨੰਦ ਲੈ ਰਹੀ ਹੈ। 'ਬਿੱਗ ਬੌਸ-6' 'ਚ ਸਲਮਾਨ ਖ਼ਾਨ ਦੀ ਸਭ ਤੋਂ ਵੱਧ ਪਸੰਦੀਦਾ ਸਨਾ ਖ਼ਾਨ ਸੀ ਤੇ 'ਜਯ ਹੋ' 'ਚ ਮੰਤਰੀ ਦੀ ਬੇਟੀ ਦਾ ਕਿਰਦਾਰ ਖਾਸ ਤੌਰ 'ਤੇ ਸਨਾ ਖ਼ਾਨ ਨੇ ਨਿਭਾਇਆ ਸੀ। ਅਰਥਾਤ ਸੱਲੂ ਦੀ ਨਜ਼ਰ 'ਚ ਸਨਾ ਪ੍ਰਵਾਨ ਅਭਿਨੇਤਰੀ ਹੈ। ਸਨਾ ਦੇ 'ਬੈਲੇ ਡਾਂਸ' ਵਾਲੇ ਵੀਡੀਓ ਨੂੰ 6 ਲੱਖ ਤੋਂ ਵੱਧ ਲੋਕਾਂ ਨੇ ਇਕ ਦਿਨ 'ਚ ਦੇਖ ਕੇ ਰਿਕਾਰਡ ਕਾਇਮ ਕੀਤਾ ਹੈ। ਕੋਰੀਓਗ੍ਰਾਫਰ ਐਲਵਿਨ ਲੂਈਸ ਨਾਲ ਪਿਆਰ ਦਾ ਇਜ਼ਹਾਰ ਉਹ ਵੀਡੀਓ 'ਚ ਕਰ ਚੁੱਕੀ ਹੈ। ਗੰਦੇ ਟਰਿੱਕ ਵਰਤ ਕੇ ਅਕਸਰ ਸੁਰਖੀਆਂ 'ਚ ਉਹ ਰਹਿੰਦੀ ਹੈ। ਬਹੁਤ ਹੀ ਪਤਲੀ ਜਿਹੀ ਪਾਰਦਰਸ਼ੀ ਸਾੜ੍ਹੀ ਪਹਿਨ ਕੇ ਇਕ ਪਾਰਟੀ 'ਚ ਉਹ ਆਈ ਤਾਂ ਸਾਰੇ ਉਸ ਦੇ ਇਸ ਪਹਿਰਾਵੇ ਨੂੰ ਦੇਖ ਮੂੰਹ 'ਚ ਉਂਗਲੀਆਂ ਪਾਉਣ ਲਈ ਮਜਬੂਰ ਹੋਏ। ਤਿਉਹਾਰਾਂ ਦੀ ਗੱਲ ਕਰੀਏ ਤਾਂ ਉਹ 'ਹੋਲੀ' ਨਹੀਂ ਭੁੱਲਦੀ ਤੇ ਹਾਂ ਇਕੋ ਹੀ ਨਾਂਅ ਹੋਣ ਕਾਰਨ ਸਨਾ ਨੂੰ ਲੋਕਾਂ ਨੇ ਬਹੁਤ ਸਤਾਇਆ ਕਿਉਂਕਿ ਸੜਕ ਹਾਦਸੇ ਵਿਚ ਸਨਾ ਖ਼ਾਨ ਅਭਿਨੇਤਰੀ ਦੀ ਮੌਤ ਦੀ ਖ਼ਬਰ ਆ ਗਈ ਸੀ ਪਰ ਇਹ ਸਨਾ ਖ਼ਾਨ ਪਾਕਿਸਤਾਨ ਦੀ ਨਾਇਕਾ ਸੀ। ਇਧਰ ਕਈ ਪ੍ਰਸੰਸਕ ਇਥੇ ਦੀ ਸਨਾ ਖ਼ਾਨ ਨੂੰ ਸਮਝ ਰਹੇ ਸਨ। ਸਨਾ ਦਾ ਵਿਚਾਰ ਇਹੀ ਹੈ ਕਿ ਇਕੱਲਾ ਹਿੰਦੀ ਫ਼ਿਲਮਾਂ 'ਤੇ ਨਿਰਭਰ ਰਹਿ ਕੇ ਭੁੱਖੇ ਰਹਿ ਕੇ ਮਰਨ ਵਾਲੀ ਗੱਲ ਹੈ। ਇਸ ਲਈ ਸਨਾ ਟੀ.ਵੀ. 'ਤੇ ਵੀ ਸਰਗਰਮ ਹੈ ਤੇ ਦੱਖਣ ਦੀਆਂ ਫ਼ਿਲਮਾਂ ਉਹ ਵੱਧ ਤੋਂ ਵੱਧ ਕਰਨ ਨੂੰ ਤਿਆਰ ਹੈ। ਸਨਾ ਇਹੀ ਚਾਹੁੰਦੀ ਹੈ ਕਿ ਹਾਲੇ 5-7 ਸਾਲ ਹੋਰ ਉਸ ਦੇ ਕਰੀਅਰ ਨੂੰ ਚਮਕਾ ਸਕਦੇ ਹਨ। ਇਸ ਲਈ ਜਿੱਧਰ ਵੀ ਕੰਮ ਹੈ, ਕੰਮ ਕੀਤਾ ਜਾਵੇ।


-ਸੁਖਜੀਤ ਕੌਰ

ਕਾਰਤਿਕ ਆਰੀਅਨ

ਸਾਊ ਤੇ ਕਮਾਊ

ਹੁਣ ਤਾਂ ਪਤਾ ਲਗ ਹੀ ਰਿਹਾ ਹੈ ਕਿ ਕਾਰਤਿਕ ਆਰੀਅਨ ਦਾ ਸਾਰਾ ਅਲੀ ਖ਼ਾਨ ਨਾਲ ਮੋਹ ਦਾ ਰਿਸ਼ਤਾ ਪਕੇਰਾ ਹੁੰਦਾ ਜਾ ਰਿਹਾ ਹੈ। ਇਸ ਦੌਰਾਨ ਕਾਰਤਿਕ ਦਾ ਇਕ ਪੁਰਾਣਾ ਵੀਡੀਓ ਵਾਇਰਲ ਹੋਇਆ ਹੈ ਜਿਸ 'ਚ ਸ਼ਰਮਾਉਂਦੇ ਹੋਏ ਆਰੀਅਨ ਸਾਬ੍ਹ ਕਹਿ ਰਹੇ ਨੇ ਕਿ ਕਿਸੇ ਨਾਲ ਅਤਿ-ਰੁਮਾਂਟਿਕ ਦ੍ਰਿਸ਼ ਦੇਣੇ ਹੋਣ ਤਾਂ ਉਹ ਸਾਰਾ ਅਲੀ ਦਾ ਨਾਂਅ ਹੀ ਲਏਗਾ। ਇਮਤਿਆਜ਼ ਅਲੀ ਦੀ 'ਲਵ ਆਜਕਲ੍ਹ-2' 'ਚ ਕਾਰਤਿਕ ਦੇ ਨਾਲ ਇਹੀ ਸਾਰਾ ਅਲੀ ਹੀਰੋਇਨ ਹੈ। ਸ਼ਿਮਲਾ ਵਿਖੇ ਹਫ਼ਤਾ ਕੁ ਪਹਿਲਾਂ ਕਾਰਤਿਕ ਭਾਈਜਾਨ ਸ਼ੂਟਿੰਗ 'ਤੇ ਸਨ। ਇਥੇ ਬਹੁਤ ਸਾਰੇ ਪ੍ਰਸੰਸਕਾਂ ਨੂੰ ਮਿਲ ਕੇ ਕਾਰਤਿਕ ਖੂਬ ਖੁਸ਼ ਹੋਇਆ ਸੀ। ਸਾਰਾ ਨਾਲ ਜਦ ਸ਼ੂਟਿੰਗ ਖਤਮ ਹੋਈ ਤਦ ਵਿਛੜਨ ਲੱਗਿਆਂ ਉਹ ਬਹੁਤ ਭਾਵੁਕ ਹੋਇਆ ਤੇ ਰਣਵੀਰ ਸਿੰਘ ਨੇ ਇਹ ਸਭ ਦੇਖ ਕੇ ਕਿਹਾ ਕਿ ਫਿਕਰ ਨਾ ਕਰ ਸਾਰਾ ਮੁੰਬਈ ਹੀ ਰਹਿੰਦੀ ਹੈ। ਸੁਣਿਆ ਹੈ ਕਿ ਕਾਰਤਿਕ ਦੇ ਇਸ ਪ੍ਰੇਮ ਰਿਸ਼ਤੇ 'ਚ ਰਣਵੀਰ ਸਿੰਘ ਵਿਚੋਲਾ ਹੈ। ਸੱਚ ਹੈ ਕਾਰਤਿਕ ਨੇ ਵਿਆਹ ਸਾਰਾ ਨਾਲ ਹੀ ਕਰਵਾਉਣ ਦੀ ਗੱਲ ਪੱਲੇ ਬੰਨ੍ਹ ਲਈ ਹੈ। ਸੈਫ਼ ਅਲੀ ਦੀਆਂ ਨਜ਼ਰਾਂ 'ਚ ਸਾਊ ਮੁੰਡਾ ਬਣਨ ਦੀ ਉਹ ਹਰ ਕੋਸ਼ਿਸ਼ ਕਰ ਰਿਹਾ ਹੈ। ਧੜਾਧੜ ਪੈਸੇ ਕਮਾਉਣੇ ਨੇ ਤਾਂ ਜੋ ਸੈਫ਼ ਦੀਆਂ ਨਜ਼ਰਾਂ 'ਚ ਉਹ 'ਸਾਊ ਤੇ ਕਮਾਊ' ਨਜ਼ਰ ਆਏ। ਸਾਰਾ ਖਾਨਦਾਨੀ ਨਵਾਬਾਂ 'ਚੋਂ ਹੈ ਤੇ ਢੇਰ ਸਾਰਾ ਪੈਸਾ ਕਾਰਤਿਕ ਆਪਣੀ ਰਾਜ ਕੁਮਾਰੀ ਲਈ ਜੋੜਨਾ ਚਾਹੁੰਦਾ ਹੈ। ਹੁਣ ਸਾਫ਼ ਸੰਕੇਤ ਹਨ ਕਿ ਕਾਰਤਿਕ ਆਰੀਅਨ ਦਾ ਦਿਲੀ ਪਿਆਰ ਸਾਰਾ ਨਾਲ ਹੈ ਤੇ ਇਹ ਦਿਨੋ-ਦਿਨ ਵਧਦਾ ਜਾ ਰਿਹਾ ਹੈ। ਇਹ 'ਲਵ ਆਜਕਲ੍ਹ' ਵੀ ਕਿਆ ਸ਼ੈਅ ਹੈ।

ਸਕੂਲ ਵਿਚ ਮੁੰਡੇ ਕੁੱਟਦੀ ਸੀ ਈਸ਼ਾ ਗੁਪਤਾ

ਫ਼ਿਲਮ 'ਚੱਕਰਵਿਊ' ਵਿਚ ਪੁਲਿਸੀਆ ਵਰਦੀ ਪਾ ਕੇ ਰੀਆ ਮੈਨਨ ਦਾ ਕਿਰਦਾਰ ਨਿਭਾਉਣ ਵਾਲੀ ਈਸ਼ਾ ਗੁਪਤਾ ਨੇ ਹੁਣ 'ਵਨ ਡੇ' ਵਿਚ ਫਿਰ ਇਕ ਵਾਰ ਔਰਤ ਪੁਲਿਸ ਅਧਿਕਾਰੀ ਦੀ ਭੂਮਿਕਾ ਨਿਭਾਈ ਹੈ। ਇਥੇ ਉਸ ਦੇ ਕਿਰਦਾਰ ਦਾ ਨਾਂਅ ਲਕਸ਼ਮੀ ਰਾਠੀ ਹੈ ਅਤੇ ਉਸ ਨੂੰ ਹਰਿਆਣਾ ਦੀ ਦਿਖਾਇਆ ਗਿਆ ਹੈ।
ਦੋ ਫ਼ਿਲਮਾਂ ਵਿਚ ਵਰਦੀ ਵਿਚ ਨਜ਼ਰ ਆਈ ਈਸ਼ਾ ਨੂੰ ਵਰਦੀ ਨਾਲ ਕਾਫੀ ਲਗਾਅ ਹੈ। ਉਹ ਇਸ ਲਈ ਕਿਉਂਕਿ ਪਿਤਾ ਏਅਰਫੋਰਸ ਵਿਚ ਸਨ। ਉਹ ਕਹਿੰਦੀ ਹੈ, 'ਪਾਪਾ ਨੂੰ ਜਦੋਂ ਵਰਦੀ ਵਿਚ ਦੇਖਦੀ ਸੀ ਤਾਂ ਮੈਨੂੰ ਵੀ ਵਰਦੀ ਪਾਉਣ ਦੀ ਇੱਛਾ ਹੁੰਦੀ ਸੀ। ਵਰਦੀ ਵਿਚ ਉਨ੍ਹਾਂ ਦਾ ਰੋਅਬ ਹੀ ਕੁਝ ਹੋਰ ਹੋ ਜਾਂਦਾ ਸੀ। ਵਰਦੀ ਤੁਹਾਡੇ ਰੁਤਬੇ ਦਾ ਪ੍ਰਤੀਕ ਹੁੰਦੀ ਹੈ ਅਤੇ ਇਸ ਨੂੰ ਪਾਉਣਾ ਮਾਣ ਦੀ ਗੱਲ ਹੁੰਦੀ ਹੈ। ਆਪਣੀਆਂ ਦੋ ਫ਼ਿਲਮਾਂ ਵਿਚ ਵਰਦੀ ਪਾ ਕੇ ਮੈਂ ਪਾਇਆ ਕਿ ਇਸ ਨੂੰ ਪਾਉਂਦੇ ਹੀ ਖ਼ੁਦ ਵਿਚ ਕਿੰਨਾ ਬਦਲਾਅ ਮਹਿਸੂਸ ਕੀਤਾ ਜਾਂਦਾ ਹੈ। ਸ਼ੂਟਿੰਗ ਦੌਰਾਨ ਜਦੋਂ ਕਦੀ ਵਰਦੀ ਪਾਈ ਉਦੋਂ ਪਾਪਾ ਨੂੰ ਜ਼ਰੂਰ ਯਾਦ ਕਰਿਆ ਕਰਦੀ ਸੀ।'
ਪਾਪਾ ਦੀ ਇਸ ਲਾਡਲੀ ਦੀ ਵਜ੍ਹਾ ਕਰਕੇ ਪਾਪਾ ਨੂੰ ਕਈ ਵਾਰ ਬੇਟੀ ਦੇ ਸਕੂਲ ਜਾਣਾ ਪਿਆ ਸੀ। ਉਹ ਇਸ ਲਈ ਕਿ ਬੇਟੀ ਸਕੂਲ ਵਿਚ ਮੁੰਡਿਆਂ ਨੂੰ ਕੁੱਟ ਦਿੰਦੀ ਸੀ। ਉਨ੍ਹਾਂ ਦਿਨਾਂ ਨੂੰ ਯਾਦ ਕਰਦੇ ਹੋਏ ਈਸ਼ਾ ਕਹਿੰਦੀ ਹੈ, 'ਇਹ ਉਦੋਂ ਦੀ ਗੱਲ ਹੈ ਜਦੋਂ ਅਸੀਂ ਦਿੱਲੀ ਵਿਚ ਰਹਿੰਦੇ ਸੀ। ਖੇਡਾਂ ਵਿਚ ਮੇਰੀ ਰੁਚੀ ਬਹੁਤ ਸੀ ਅਤੇ ਮੈਂ ਚੰਗੀ ਖਿਡਾਰਨ ਵੀ ਸੀ। ਕਈ ਵਾਰ ਖੇਡਾਂ ਦੀ ਵਜ੍ਹਾ ਨਾਲ ਮੁੰਡਿਆਂ ਨਾਲ ਪੰਗਾ ਹੋ ਜਾਂਦਾ ਸੀ ਅਤੇ ਮੈਂ ਸਕੂਲ ਵਿਚ ਕਈ ਮੁੰਡਿਆਂ ਨੂੰ ਕੁੱਟਿਆ ਸੀ। ਫਿਰ ਪਾਪਾ ਨੂੰ ਸਕੂਲ ਵਿਚ ਬੁਲਾਇਆ ਜਾਂਦਾ ਅਤੇ ਸਾਡੀ ਅਧਿਆਪਕਾ ਅਕਸਰ ਉਨ੍ਹਾਂ ਨੂੰ ਇਹੀ ਸ਼ਿਕਾਇਤ ਕਰਦੀ ਕਿ 'ਗੁਪਤਾ ਜੀ, ਤੁਹਾਡੀ ਬੇਟੀ ਇਸ ਤਰ੍ਹਾਂ ਦੀ ਕਿਉਂ ਹੈ?' ਬਾਅਦ ਵਿਚ ਪਾਪਾ ਅਕਸਰ ਮੈਨੂੰ ਇਹੀ ਕਹਿੰਦੇ ਕਿ, 'ਮੈਂ ਤੈਨੂੰ ਮੁੰਡਿਆਂ ਦੀ ਤਰ੍ਹਾਂ ਪਾਲਿਆ ਹੈ ਤੇ ਇਸ ਦਾ ਮਤਲਬ ਇਹ ਨਹੀਂ ਕਿ ਮੁੰਡਿਆਂ ਨੂੰ ਕੁੱਟਿਆ ਕਰੇਂ।'
ਸਕੂਲ ਵਿਚ ਮੁੰਡਿਆਂ ਨਾਲ ਦੋ-ਦੋ ਹੱਥ ਕਰਨ ਵਾਲੀ ਈਸ਼ਾ ਨੇ ਬਾਅਦ ਵਿਚ ਵਕੀਲ ਬਣਨ ਦੀ ਸੋਚੀ ਪਰ ਉਸ ਦਾ ਨਸੀਬ ਉਸ ਨੂੰ ਫ਼ਿਲਮਾਂ ਵਿਚ ਲੈ ਆਇਆ। ਫ਼ਿਲਮਾਂ ਵਿਚ ਵੀ ਉਸ ਨੂੰ ਕੋਈ ਸੰਘਰਸ਼ ਨਹੀਂ ਕਰਨਾ ਪਿਆ ਸੀ। ਅਨੁਪਮ ਖੇਰ ਦੇ ਐਕਟਿੰਗ ਸਕੂਲ ਵਿਚ ਅਭਿਨੈ ਦਾ ਕੋਰਸ ਕਰਨ ਤੋਂ ਬਾਅਦ ਉਸ ਨੇ ਸੋਚਿਆ ਕਿ ਹੁਣ ਨਿਰਮਾਤਾਵਾਂ ਦੇ ਦਫ਼ਤਰਾਂ ਦੇ ਚੱਕਰ ਕੱਟਣੇ ਪੈਣਗੇ। ਪਹਿਲਾਂ ਇਕ ਵੱਡੇ ਨਿਰਮਾਤਾ ਨੂੰ ਮਿਲੀ ਅਤੇ ਦੋ-ਤਿੰਨ ਦਿਨ ਬਾਅਦ ਉਹ ਮੁਕੇਸ਼ ਭੱਟ ਦੇ ਦਫ਼ਤਰ ਗਈ। ਉਥੇ ਨਿਰਦੇਸ਼ਕ ਕੁਨਾਲ ਦੇਸ਼ਮੁਖ ਵੀ ਸਨ ਅਤੇ ਉਨ੍ਹਾਂ ਨੇ ਅਗਲੇ ਦਿਨ ਫੋਨ ਕਰ ਕੇ ਖ਼ੁਸ਼ਖ਼ਬਰੀ ਦਿੱਤੀ ਕਿ 'ਜੰਨਤ-2' ਵਿਚ ਉਸ ਨੂੰ ਕਾਸਟ ਕੀਤਾ ਗਿਆ ਹੈ। ਪਹਿਲਾਂ ਇਸ ਫ਼ਿਲਮ ਲਈ ਪ੍ਰਾਚੀ ਦੇਸਾਈ ਫਾਈਨਲ ਹੋਈ ਸੀ ਪਰ ਕੁਝ ਕਾਰਨਾਂ ਕਰਕੇ ਉਹ ਇਹ ਫ਼ਿਲਮ ਕਰ ਸਕਣ ਵਿਚ ਅਸਮਰੱਥ ਸੀ ਤੇ ਈਸ਼ਾ ਨੂੰ ਲਿਆ ਗਿਆ। 'ਵਨ ਡੇ' ਲਈ ਵੀ ਪਹਿਲਾਂ ਜ਼ਰੀਨ ਖਾਨ ਨਾਲ ਗੱਲਬਾਤ ਹੋਈ ਸੀ ਪਰ ਬਾਅਦ ਵਿਚ ਈਸ਼ਾ ਦਾ ਦਾਖਲਾ ਹੋ ਗਿਆ।
ਹੁਣ ਉਹ ਇਕ ਵੈੱਬ ਸੀਰੀਜ਼ ਵਿਚ ਵੀ ਕੰਮ ਕਰ ਰਹੀ ਹੈ ਅਤੇ ਇਹ ਸਤੰਬਰ ਵਿਚ ਨੈੱਟਫਲਿਕਸ 'ਤੇ ਆਏਗੀ। ਆਪਣੇ ਐਗਰੀਮੈਂਟ ਦੇ ਚਲਦਿਆਂ ਉਹ ਇਸ ਲੜੀ ਦਾ ਨਾਂਅ ਤੇ ਕੰਮ ਬਾਰੇ ਦੱਸ ਨਹੀਂ ਸਕਦੀ।
ਭਾਵ ਇਸ ਬਾਰੇ ਜਾਣਨ ਲਈ ਸਤੰਬਰ ਤੱਕ ਇੰਤਜ਼ਾਰ ਕਰਨਾ ਹੋਵੇਗਾ।

ਤਾਪਸੀ ਨਿਭਾਏਗੀ ਮਿਤਾਲੀ ਰਾਜ ਦੀ ਭੂਮਿਕਾ

ਫ਼ਿਲਮ 'ਸੂਰਮਾ' ਵਿਚ ਹਾਕੀ ਖਿਡਾਰਨ ਦੀ ਭੂਮਿਕਾ ਨਿਭਾਉਣ ਤੋਂ ਬਾਅਦ ਹੁਣ ਤਾਪਸੀ ਪੰਨੂੰ ਕ੍ਰਿਕਟ ਖਿਡਾਰਨ ਦੀ ਭੂਮਿਕਾ ਨਿਭਾਏਗੀ। ਨਾਮੀ ਔਰਤ ਕ੍ਰਿਕਟਰ ਮਿਤਾਲੀ ਰਾਜ ਦੀ ਜ਼ਿੰਦਗੀ 'ਤੇ ਬਣਨ ਵਾਲੀ ਫ਼ਿਲਮ ਲਈ ਤਾਪਸੀ ਨੂੰ ਕਰਾਰਬੱਧ ਕੀਤਾ ਗਿਆ ਹੈ ਅਤੇ ਉਹ ਇਸ ਵਿਚ ਮਿਤਾਲੀ ਰਾਜ ਦੀ ਭੂਮਿਕਾ ਨਿਭਾਏਗੀ।
ਮਿਤਾਲੀ ਰਾਜ ਇਕਮਾਤਰ ਇਸ ਤਰ੍ਹਾਂ ਦੀ ਔਰਤ ਕ੍ਰਿਕਟਰ ਹੈ ਜਿਸ ਦੇ ਨਾਂਅ ਇਕ ਦਿਨਾ ਮੈਚਾਂ ਵਿਚ ਛੇ ਹਜ਼ਾਰ ਤੋਂ ਜ਼ਿਆਦਾ ਦੌੜਾਂ ਹਨ। ਇਸ ਤਰ੍ਹਾਂ ਦੀ ਕ੍ਰਿਕਟਰ ਦੀ ਭੂਮਿਕਾ ਨਿਭਾਉਣ ਲਈ ਤਾਪਸੀ ਵੀ ਚੰਗੀ ਉਤਸ਼ਾਹਿਤ ਹੈ। ਇਨ੍ਹੀਂ ਦਿਨੀਂ 'ਸਾਂਡ ਕੀ ਆਂਖ' ਦੀ ਸ਼ੂਟਿੰਗ ਵਿਚ ਰੁੱਝੀ ਤਾਪਸੀ ਲਈ ਇਹ ਦੂਜਾ ਮੌਕਾ ਹੈ ਜਦੋਂ ਉਹ ਅਸਲ ਜ਼ਿੰਦਗੀ ਤੋਂ ਪ੍ਰੇਰਿਤ ਕਿਰਦਾਰ ਨਿਭਾਏਗੀ। 'ਸਾਂਡ ਕੀ ਆਂਖ' ਵਿਚ ਉਹ ਅਧੇੜ ਉਮਰ ਦੀ ਸ਼ਾਰਪਸ਼ੂਟਰ ਦੀ ਭੂਮਿਕਾ ਨਿਭਾਅ ਰਹੀ ਹੈ ਅਤੇ ਇਹ ਕਿਰਦਾਰ ਵੀ ਅਸਲ ਜ਼ਿੰਦਗੀ ਤੋਂ ਪ੍ਰੇਰਿਤ ਹੈ। ਤਾਪਸੀ ਨੂੰ ਇੰਡੀਅਨ ਕ੍ਰਿਕਟ ਜਰਸੀ ਵਿਚ ਪੇਸ਼ ਕਰ ਰਹੀ ਫ਼ਿਲਮ ਦਾ ਨਿਰਮਾਣ ਵਾਏਕਾਮ 18 ਵਲੋਂ ਕੀਤਾ ਜਾ ਰਿਹਾ ਹੈ ਅਤੇ ਫ਼ਿਲਮ ਲਈ ਨਿਰਦੇਸ਼ਕ ਦੀ ਭਾਲ ਜਾਰੀ ਹੈ।

ਡਾਕਟਰੀ ਛੱਡ ਅਭਿਨੇਤਰੀ ਬਣੀ ਮੋਨਿਕਾ ਰਾਵਣ

ਹਾਲੀਆ ਪ੍ਰਦਰਸ਼ਿਤ ਫ਼ਿਲਮ 'ਵਨ ਡੇ' ਦਾ ਪ੍ਰਮੋਸ਼ਨ ਗੀਤ ਮੋਨਿਕਾ ਰਾਵਣ ਤੇ ਈਸ਼ਾ ਗੁਪਤਾ 'ਤੇ ਫ਼ਿਲਮਾਇਆ ਗਿਆ ਹੈ। ਰਾਜਸਥਾਨ ਦੇ ਸ੍ਰੀਗੰਗਾਨਗਰ ਸ਼ਹਿਰ ਦੀ ਰਹਿਣ ਵਾਲੀ ਮੋਨਿਕਾ ਹੁਣ ਹੌਲੀ-ਹੌਲੀ ਬਾਲੀਵੁੱਡ ਵਿਚ ਆਪਣੇ ਪੈਰ ਜਮਾਉਂਦੀ ਜਾ ਰਹੀ ਹੈ। ਪੰਜਾਬੀ ਫ਼ਿਲਮ ਸਨਅਤ ਲਈ ਵੀ ਉਸ ਦਾ ਚਿਹਰਾ ਨਵਾਂ ਨਹੀਂ ਹੈ। 2015 ਵਿਚ ਆਈ ਪੰਜਾਬੀ ਫ਼ਿਲਮ 'ਆਜ਼ਾਦੀ-ਦ-ਫ੍ਰੀਡਮ' ਵਿਚ ਉਸ ਨੇ ਅਭਿਨੈ ਕੀਤਾ ਸੀ, ਨਾਲ ਹੀ ਕਈ ਸੰਗੀਤ ਵੀਡੀਓ ਵੀ ਕੀਤੇ। ਜਦੋਂ ਉਹ ਮੁੰਬਈ ਆਈ ਸੀ ਤਾਂ ਇਥੇ ਵੀ ਇਕ ਸੰਗੀਤ ਕੰਪਨੀ ਲਈ ਕਈ ਐਲਬਮ ਕੀਤੇ। ਬਾਅਦ ਵਿਚ ਫ਼ਿਲਮ 'ਵਿਰਾਮ' ਵਿਚ ਵੀ ਕੰਮ ਕੀਤਾ। ਉਸ ਨੂੰ ਮਾਡਲਿੰਗ ਅਸਾਈਨਮੈਂਟ ਵੀ ਮਿਲਦੇ ਰਹੇ ਅਤੇ ਕੁਝ ਟੀ. ਵੀ. ਸ਼ੋਅ ਲਈ ਐਂਕਰਿੰਗ ਵੀ ਕੀਤੀ। ਆਪਣੇ ਦਮ 'ਤੇ ਮੋਨਿਕਾ ਨੇ ਇਹ ਸਭ ਕੀਤਾ ਅਤੇ ਉਸ ਨੂੰ ਖ਼ੁਸ਼ੀ ਹੈ ਕਿ ਉਸ ਨੇ ਅਭਿਨੈ ਦਾ ਰਸਤਾ ਚੁਣਿਆ।
ਉਂਝ, ਉਹ ਜਦੋਂ ਪੜ੍ਹਾਈ ਕਰ ਰਹੀ ਸੀ ਉਦੋਂ ਮਾਂ-ਬਾਪ ਦੀ ਇੱਛਾ ਸੀ ਕਿ ਬੇਟੀ ਬਹੁਤ ਪੜ੍ਹਾਈ ਕਰੇ ਅਤੇ ਮੋਨਿਕਾ ਨੇ ਵੀ ਦਿਲ ਲਗਾ ਕੇ ਪੜ੍ਹਾਈ ਕੀਤੀ ਅਤੇ ਉਹ ਦੰਦਾਂ ਦੀ ਸਰਜਨ ਬਣ ਗਈ। ਬਤੌਰ ਸਰਜਨ ਉਸ ਨੇ ਸ੍ਰੀਗੰਗਾਨਗਰ ਵਿਚ ਪ੍ਰੈਕਟਿਸ ਵੀ ਸ਼ੁਰੂ ਕਰ ਦਿੱਤੀ। ਛੇ ਮਹੀਨੇ ਬਾਅਦ ਲੱਗਿਆ ਕਿ ਅਭਿਨੈ ਦੀ ਦੁਨੀਆ ਉਸ ਨੂੰ ਬੁਲਾ ਰਹੀ ਹੈ। ਸੋ, ਮੈਡੀਕਲ ਦੀ ਦੁਨੀਆ ਨੂੰ ਅਲਵਿਦਾ ਕਹਿ ਦਿੱਤਾ।
ਮੋਨਿਕਾ ਅਨੁਸਾਰ ਅਕਸਰ ਇਹ ਦੇਖਿਆ ਗਿਆ ਹੈ ਕਿ ਮਾਂ-ਬਾਪ ਆਪਣੀ ਮਰਜ਼ੀ ਬੱਚਿਆਂ 'ਤੇ ਠੋਸ ਦਿੰਦੇ ਹਨ ਅਤੇ ਇਸ ਵਜ੍ਹਾ ਕਰਕੇ ਬੱਚੇ ਅੱਗੇ ਚੱਲ ਕੇ ਘੁਟਨ ਮਹਿਸੂਸ ਕਰਨ ਲਗਦੇ ਹਨ। 'ਮੇਰੀ ਦਿਲਚਸਪੀ ਅਭਿਨੈ ਵਿਚ ਸੀ ਪਰ ਮੇਰੇ ਮਾਪਿਆਂ ਦੀ ਇੱਛਾ ਸੀ ਕਿ ਮੈਂ ਡਾਕਟਰ ਬਣਾਂ, ਸੋ ਬਣ ਗਈ। ਪਰ ਮਨ ਵਿਚ ਅਧੂਰਾਪਨ ਸੀ। ਅਭਿਨੈ ਤੋਂ ਦੂਰੀ ਬਣਾ ਲੈਣ ਦਾ ਰੰਜ ਵੀ ਸੀ। ਆਖ਼ਿਰ ਦਿਲ ਦੀ ਗੱਲ ਮੰਨ ਕੇ ਮੈਂ ਅਭਿਨੈ ਵਲ ਰੁਖ ਕਰ ਲਿਆ। ਚੰਗੀ ਗੱਲ ਇਹ ਰਹੀ ਕਿ ਮੇਰੇ ਮਾਂ-ਬਾਪ ਨੇ ਮੇਰੇ ਫੈਸਲੇ ਦਾ ਸਵਾਗਤ ਕੀਤਾ ਅਤੇ ਹੁਣ ਮੈਨੂੰ ਆਪਣੇ ਦਮ 'ਤੇ ਨਾਂਅ ਕਮਾਉਂਦਿਆਂ ਦੇਖ ਕੇ ਉਹ ਖ਼ੁਸ਼ ਹਨ, ਉਹ ਕਹਿੰਦੀ ਹੈ।
ਆਪਣੇ ਨਾਂਅ ਨੂੰ ਹੋਰ ਮਸ਼ਹੂਰ ਕਰਨ ਲਈ ਉਹ ਕਹਿੰਦੀ ਹੈ ਕਿ ਫ਼ਿਲਮ 'ਕਾਰਵਾਂ' ਦਾ ਗੀਤ 'ਮੋਨਿਕਾ ਓ ਮਾਈ ਡਾਰਲਿੰਗ...' ਦਾ ਰੀਮਿਕਸ ਵਰਸ਼ਨ ਬਣੇ ਅਤੇ ਉਸ 'ਤੇ ਫ਼ਿਲਮਾਇਆ ਜਾਵੇ। ਇਸ ਨਾਲ ਉਸ ਦਾ ਨਾਂਅ ਹੋਰ ਹਰਮਨਪਿਆਰਾ ਹੋਵੇਗਾ। ਇਨ੍ਹੀਂ ਦਿਨੀਂ ਉਹ ਇਕ ਮਰਾਠੀ ਫ਼ਿਲਮ ਕਰ ਰਹੀ ਹੈ ਤੇ ਇਕ ਡਰਾਉਣੀ ਫ਼ਿਲਮ ਲਈ ਵੀ ਗੱਲਬਾਤ ਜਾਰੀ ਹੈ। ਉਹ ਪੰਜਾਬੀ ਫ਼ਿਲਮਾਂ ਵੀ ਕਰਨਾ ਚਾਹੁੰਦੀ ਹੈ। 'ਮੇਰੀ ਸ਼ੁਰੂਆਤ ਪੰਜਾਬੀ ਫ਼ਿਲਮ ਤੋਂ ਹੋਈ ਸੀ। ਹੁਣ ਜਦੋਂ ਮੈਂ ਮਰਾਠੀ ਫ਼ਿਲਮ ਕਰ ਸਕਦੀ ਹਾਂ ਤਾਂ ਪੰਜਾਬੀ ਫ਼ਿਲਮ ਕਰਨ ਵਿਚ ਕੀ ਹਰਜ਼ ਹੈ, ਬਸ਼ਰਤੇ ਭੂਮਿਕਾ ਚੰਗੀ ਹੋਣੀ ਚਾਹੀਦੀ' ਉਹ ਦੱਸਦੀ ਹੈ।


-ਮੁੰਬਈ ਪ੍ਰਤੀਨਿਧ

ਫਲੈਸ਼ ਬੈਕ

ਪੰਜਾਬੀ ਫ਼ਿਲਮ : ਮਾਮਾ ਜੀ

ਗੋਪਾਲ ਸਹਿਗਲ ਦੀ ਪੇਸ਼ਕਸ਼ ਪੰਜਾਬੀ ਫ਼ਿਲਮ 'ਮਾਮਾ ਜੀ' 1964 ਵਿਚ ਬਣੀ ਸੀ। ਇਸ ਫ਼ਿਲਮ ਦਾ ਨਿਰਦੇਸ਼ਨ ਰੌਸ਼ਨ ਭਾਰਦਵਾਜ ਦਾ ਤੇ ਨਿਰਮਾਣ ਗੋਪਾਲ ਸਹਿਗਲ ਤੇ ਐਸ.ਪੀ. ਮਲਹੋਤਰਾ ਦਾ ਸੀ। ਮੁੱਖ ਭੂਮਿਕਾ ਸਿੱਧ-ਪੱਧਰੇ ਜਿਹੇ ਕਿਰਦਾਰ ਦੀ ਗੋਪਾਲ ਸਹਿਗਲ ਦੀ ਸੀ, ਸਾਥੀ ਨਾਇਕਾ ਇੰਦਰਾ ਬਿੱਲੀ ਸੀ। ਇਸ ਫ਼ਿਲਮ 'ਚ ਕਾਮੇਡੀ, ਰੁਮਾਂਸ ਤੇ ਸਮਾਜਿਕ ਕਦਰਾਂ-ਕੀਮਤਾਂ ਦਾ ਤਾਣਾ-ਬਾਣਾ ਪੇਸ਼ ਕੀਤਾ ਗਿਆ। ਗੋਪਾਲ ਸਹਿਗਲ ਦਾ ਕਿਰਦਾਰ ਬੜਾ ਸਧਾਰਨ ਜਿਹਾ ਸੀ, ਜੋ ਆਪਣੀ ਭੈਣ ਦੇ ਘਰ ਰਹਿੰਦਾ ਹੈ। ਆਪਣੇ ਜੀਜੇ ਦੇ ਤਾਅਨੇ-ਮਿਹਣੇ ਵੀ ਸੁਣਦਾ ਰਹਿੰਦਾ ਹੈ। ਘਰ ਦਾ ਕੰਮ ਜਿਹੜਾ ਵੀ ਕਰਨ ਜਾਂਦਾ ਹੈ, ਉਹ ਉਲਟਾ ਹੋ ਜਾਂਦਾ ਹੈ। ਅਖੀਰ ਉਹ ਘਰੋਂ ਚਲੇ ਜਾਂਦਾ ਹੈ। ਜਾਂਦਾ-ਜਾਂਦਾ ਆਪਣੇ ਨਾਨਾ ਜੀ ਦੀ ਫੋਟੋ ਲਾਗੇ ਖਲੋ ਕੇ ਕਹਿੰਦਾ ਹੈ, 'ਤੁਸੀਂ ਤਾਂ ਚਲੇ ਗਏ ਓ ਅਫਰੀਕਾ, ਪਰ ਮੈਨੂੰ ਇਥੇ ਛੱਡ ਗਏ, ਕੋਈ ਨਹੀਂ ਪਿਆਰ ਕਰਦਾ, ਫਿਰ ਉਹ ਘਰੋਂ ਨਿਕਲ ਜਾਂਦਾ ਹੈ। ਜਿਵੇਂ ਹੀ ਘਰੋਂ ਬਾਹਰ ਚਲਿਆ ਜਾਂਦਾ ਹੈ ਤਾਂ ਸਾਥਣ ਲਾਲੀ ਮਿਲਦੀ ਹੈ। ਇਸ ਕਿਰਦਾਰ ਨੂੰ ਇੰਦਰਾ ਬਿੱਲੀ ਨੇ ਨਿਭਾਇਆ ਸੀ। ਕੁਝ ਦਿਨਾਂ ਬਾਅਦ ਘਰ ਵਕੀਲ ਆਉਂਦਾ ਹੈ ਕਿ ਬੰਸੀ ਗੋਪਾਲ (ਗੋਪਾਲ ਸਹਿਗਲ) ਦੇ ਨਾਨਾ ਜੀ ਸਵਰਗਵਾਸ ਹੋ ਗਏ ਹਨ ਤੇ ਸਾਰੀ ਜਾਇਦਾਦ ਬੰਸੀ ਦੇ ਨਾਂਅ ਕਰ ਗਏ ਹਨ। ਬੰਸੀ ਦਸਤਖ਼ਤ ਕਰਕੇ ਨਗਦੀ ਤੇ ਜਾਇਦਾਦ ਲੈ ਲਵੇ। ਬਸ ਫਿਰ ਕੀ ਸੀ, ਜੀਜਾ ਬੰਸੀ ਨੂੰ ਲੱਭ ਲੈਂਦਾ ਹੈ।
ਵਰਮਾ ਮਲਿਕ ਤੇ ਨਕਸ਼ ਲਾਇਲਪੁਰੀ ਦੇ ਗੀਤਾਂ ਨੂੰ ਸੰਗੀਤਕਾਰ ਐਸ. ਮਦਨ ਨੇ ਮਹਿੰਦਰ ਕਪੂਰ, ਸੁਮਨ ਕਲਿਆਣਪੁਰ, ਸ਼ਮਸ਼ਾਦ ਬੇਗਮ, ਊਸ਼ਾ ਮੰਗੇਸ਼ਕਰ ਤੇ ਮੀਨੂ ਪ੍ਰਸ਼ੋਤਮ ਤੋਂ ਗਵਾਇਆ ਹੈ। ਫ਼ਿਲਮ ਦੀ ਕਹਾਣੀ ਤੇ ਸੰਵਾਦ ਮੁਲਖ ਰਾਜ ਭਾਖੜੀ ਦੇ ਹਨ। ਮਹਿਮੂਦ ਦਾ 'ਮਦਾਰੀ' ਗੀਤ ਵੀ ਕਾਫ਼ੀ ਵਧੀਆ ਹੈ। ਗੋਪਾਲ ਸਹਿਗਲ 'ਤੇ ਫ਼ਿਲਮਾਇਆ ਗੀਤ 'ਕਰ ਪੰਜਾਬ ਦੀ ਸੈਰ' ਕਈ ਥਾਵਾਂ 'ਤੇ ਫ਼ਿਲਮਾਇਆ ਗਿਆ। ਇਸ ਗੀਤ ਨੂੰ ਰਫੀ ਸਾਹਿਬ ਨੇ ਗਾਇਆ ਹੈ। 'ਤੇਰਾ ਵਿਛੋੜਾ ਜ਼ਾਲਮਾ', 'ਇਹ ਗੱਲ ਕਿਸੇ ਨੂੰ ਦੱਸੀਂ ਨਾ', 'ਜੁੱਤੀ ਲੈਣੀ ਸਿਤਾਰਿਆਂ ਵਾਲੀ ਭਾਵੇਂ ਤੂੰ ਲੈ ਦੇ' ਆਦਿ ਗੀਤਾਂ ਦੀ ਮਿਠਾਸ ਅੱਜ ਵੀ ਬਰਕਰਾਰ ਹੈ। ਸੰਗੀਤਕਾਰ ਐਸ. ਮਦਨ ਕਿਹਾ ਕਰਦੇ ਸਨ ਕਿ ਇਨ੍ਹਾਂ ਗੀਤਾਂ ਨੂੰ ਤਿਆਰ ਕਰਨ ਲਈ ਅਸੀਂ ਕਈ-ਕਈ ਦਿਨ ਰਿਹਰਸਲ ਕਰਿਆ ਕਰਦੇ ਸਾਂ। ਫਿਰ ਕਈ ਦਿਨਾਂ ਬਾਅਦ ਜਾ ਕੇ ਗੀਤ ਰਿਕਾਰਡ ਕਰਦੇ ਸੀ।
ਇਸ ਫ਼ਿਲਮ 'ਚ ਜ਼ਿੰਦਗੀ ਦੇ ਕਈ ਰੰਗ ਦਿਖਾਏ ਗਏ ਹਨ। ਜਿਵੇਂ ਗ਼ਰੀਬੀ, ਫਕੀਰੀ, ਅਮੀਰੀ, ਬਰਬਾਦੀ ਆਦਿ। ਹਰੇਕ ਤਰ੍ਹਾਂ ਦੇ ਰੋਲ ਨੂੰ ਗੋਪਾਲ ਸਹਿਗਲ ਨੇ ਆਪਣੇ ਹੀ ਸਟਾਈਲ ਦੇ ਅਭਿਨੈ ਨਾਲ ਨਿਭਾਇਆ। ਇੰਦਰਾ ਬਿੱਲੀ ਤੇ ਖਰੈਤੀ ਭੈਂਗੇ ਦਾ ਰੋਲ ਵਧੀਆ ਰਿਹਾ। ਮਧੂਮਤੀ ਤੇ ਅਰੁਣਾ ਦਾ ਡਾਂਸ ਵਧੀਆ ਸੀ। ਅੱਜ ਵੀ ਇਸ ਫ਼ਿਲਮ ਦਾ ਨਾਂਅ ਇਤਿਹਾਸ ਦੇ ਪੰਨਿਆਂ 'ਚ ਦਰਜ ਹੈ।


-ਤਰਸੇਮ ਬੱਧਣ

ਸ਼ਬਾਨਾ-ਸ਼ੈਫਾਲੀ ਇਕੱਠੀਆਂ ਲੜੀਵਾਰ 'ਚ

ਸ਼ਬਾਨਾ ਆਜ਼ਮੀ ਅਤੇ ਸ਼ੈਫਾਲੀ ਸ਼ਾਹ ਨੇ ਸਾਲ 2005 ਵਿਚ ਬਣੀ ਫ਼ਿਲਮ '15 ਪਾਰਕ ਐਵਨਿਊ' ਵਿਚ ਇਕੱਠਿਆਂ ਕੰਮ ਕੀਤਾ ਸੀ। ਉਸ ਤੋਂ ਬਾਅਦ ਹੁਣ ਦੋਵੇਂ ਵਿਪੁਲ ਸ਼ਾਹ ਵਲੋਂ ਬਣਾਏ ਜਾ ਰਹੇ ਲੜੀਵਾਰ ਵਿਚ ਇਕੱਠੀਆਂ ਦਿਸਣਗੀਆਂ। ਇਸ ਦੀ ਕਹਾਣੀ ਇਹ ਹੈ ਕਿ ਦੂਰ-ਦਰਾਜ ਦੇ ਪਿੰਡਾਂ ਦੇ ਹਸਪਤਾਲਾਂ ਵਿਚ ਇਲਾਜ ਦੇ ਨਾਂਅ 'ਤੇ ਮਰੀਜ਼ ਦੀ ਜ਼ਿੰਦਗੀ ਨਾਲ ਕਿਵੇਂ ਖਿਲਵਾੜ ਕੀਤਾ ਜਾਂਦਾ ਹੈ। ਸ਼ੈਫਾਲੀ ਇਸ ਵਿਚ ਡਾਕਟਰ ਦੀ ਭੂਮਿਕਾ ਨਿਭਾਅ ਰਹੀ ਹੈ ਤੇ ਸ਼ਬਾਨਾ ਇਥੇ ਹਸਪਤਾਲ ਦੇ ਮਾਲਕ ਦੀ ਭੂਮਿਕਾ ਵਿਚ ਹੈ। ਵਿਪੁਲ ਨੇ ਜਦੋਂ ਕਹਾਣੀ ਲਿਖੀ ਤਾਂ ਉਹ ਇਸ 'ਤੇ ਫ਼ਿਲਮ ਬਣਾਉਣਾ ਚਾਹੁੰਦੇ ਸਨ। ਜਦੋਂ ਕਹਾਣੀ ਦਾ ਵਿਸਾਤਰ ਵਧਦਾ ਚਲਿਆ ਗਿਆ ਤਾਂ ਲੱਗਿਆ ਕਿ ਇਸ 'ਤੇ ਦੋ ਘੰਟੇ ਦੀ ਫ਼ਿਲਮ ਬਣਾਉਣਾ ਸੰਭਵ ਨਹੀਂ ਹੈ। ਸੋ, ਕਹਾਣੀ ਨੂੰ ਲੜੀਵਾਰ ਵਿਚ ਤਬਦੀਲ ਕਰ ਦਿੱਤਾ ਗਿਆ।
ਲੜੀਵਾਰ ਵਿਚ ਥ੍ਰਿਲਰ ਦਾ ਪੁਟ ਵੀ ਰੱਖਿਆ ਗਿਆ ਹੈ ਅਤੇ ਇਸ ਦਾ ਨਾਮਕਰਨ ਹੋਣਾ ਬਾਕੀ ਹੈ। ਇਸ ਦੀ ਸ਼ੂਟਿੰਗ ਇੰਦੌਰ ਤੇ ਭੁਪਾਲ ਵਿਚ ਕੀਤੀ ਜਾਵੇਗੀ ਅਤੇ ਇਹ ਤੈਅ ਹੋਣਾ ਬਾਕੀ ਹੈ ਕਿ ਕਿਸ ਚੈਨਲ 'ਤੇ ਇਹ ਪ੍ਰਸਾਰਿਤ ਹੋਵੇਗਾ।


-ਮੁੰਬਈ ਪ੍ਰਤੀਨਿਧ

'ਕਬਜ਼ਾ' ਵਿਚ ਬਲਰਾਜ ਦੀ ਲੇਖਨੀ ਦਾ ਕਮਾਲ

'ਕਾਮੇਡੀ ਸਰਕਸ', 'ਏਂਟਰਟੇਨਮੈਂਟ ਕੀ ਰਾਤ' ਫੇਮ ਕਾਮੇਡੀਅਨ ਬਲਰਾਜ ਸਮੇਂ-ਸਮੇਂ 'ਤੇ ਪੰਜਾਬੀ ਫ਼ਿਲਮਾਂ ਲਈ ਆਪਣੀ ਲੇਖਨੀ ਰਾਹੀਂ ਯੋਗਦਾਨ ਦਿੰਦੇ ਆਏ ਹਨ। 'ਅੰਬਰਸਰੀਆ', 'ਕਪਤਾਨ', 'ਸਾਡੇ ਸੀ ਐਮ ਸਾਅਬ' ਆਦਿ ਪੰਜਾਬੀ ਫ਼ਿਲਮਾਂ ਲਈ ਲੇਖਨ ਦਾ ਕੰਮ ਕਰਨ ਵਾਲੇ ਬਲਰਾਜ ਨੇ ਹੁਣ ਲੇਖਕ ਮਿੱਤਰ ਸੁਮੀਤ ਮਾਵੀ ਦੇ ਨਾਲ ਮਿਲ ਕੇ ਪੰਜਾਬੀ ਫ਼ਿਲਮ 'ਕਬਜ਼ਾ-ਸਰਹੱਦਾਂ 'ਤੇ' ਦੀ ਕਹਾਣੀ ਲਿਖੀ ਹੈ। ਬਲਰਾਜ ਅਨੁਸਾਰ ਇਹ ਕਾਮੇਡੀ ਫ਼ਿਲਮ ਹੈ ਅਤੇ ਇਸ ਵਿਚ ਭਾਰਤ-ਪਾਕਿ ਸਰਹੱਦ ਨੂੰ ਕੇਂਦਰ ਵਿਚ ਰੱਖ ਕੇ ਕਹਾਣੀ ਲਿਖੀ ਗਈ ਹੈ।


-ਮੁੰਬਈ ਪ੍ਰਤੀਨਿਧ

ਰੋਨਿਤ ਨੂੰ ਨਿਰਦੇਸ਼ਿਤ ਕਰਨਗੇ ਰੋਹਿਤ

ਉਂਝ ਤਾਂ ਰਾਏ ਭਰਾ ਰੋਹਿਤ ਤੇ ਰੋਨਿਤ ਨੇ ਕਈ ਫ਼ਿਲਮਾਂ ਵਿਚ ਕੰਮ ਕੀਤਾ ਹੈ ਪਰ ਰਿਤਿਕ ਰੌਸ਼ਨ ਦੀ ਫ਼ਿਲਮ 'ਕਾਬਿਲ' ਵਿਚ ਦੋਵੇਂ ਭਰਾ ਪਰਦੇ 'ਤੇ ਇਕੱਠੇ ਦਿਸੇ ਸਨ। ਹੁਣ ਨਿਰਦੇਸ਼ਕ ਬਣ ਕੇ ਰੋਹਿਤ ਆਪਣੇ ਭਰਾ ਰੋਨਿਤ ਨੂੰ ਨਿਰਦੇਸ਼ਿਤ ਕਰਨਗੇ। ਉਹ ਆਪਣੀ ਫ਼ਿਲਮ ਵਿਚ ਬਾਪ-ਬੇਟੇ ਦੀ ਕਹਾਣੀ ਪੇਸ਼ ਕਰਨਗੇ ਅਤੇ ਰੋਨਿਤ ਇਸ ਵਿਚ ਪਿਤਾ ਦੀ ਭੂਮਿਕਾ ਨਿਭਾਉਣਗੇ। ਸੰਜੈ ਗੁਪਤਾ ਵਲੋਂ ਬਣਾਈ ਫ਼ਿਲਮ 'ਦਸ ਕਹਾਨੀਆਂ' ਵਿਚ ਰੋਹਿਤ ਵਲੋਂ ਨਿਰਦੇਸ਼ਿਤ 'ਰਾਈਸ ਪਲੇਟ' ਵੀ ਸੀ ਅਤੇ ਉਦੋਂ ਤੋਂ ਉਸ ਦੇ ਦਿਲ ਵਿਚ ਫੀਚਰ ਫ਼ਿਲਮ ਨਿਰਦੇਸ਼ਿਤ ਕਰਨ ਦੀ ਤਮੰਨਾ ਪੈਦਾ ਹੋ ਰਹੀ ਸੀ, ਜੋ ਹੁਣ ਪੂਰੀ ਹੋਣ ਜਾ ਰਹੀ ਹੈ।


-ਮੁੰਬਈ ਪ੍ਰਤੀਨਿਧ

ਬਿਦਿਤਾ, ਮੇਘਨਾ ਦੀ 'ਮੋਕਸ਼ ਟੂ ਮਾਇਆ'

ਨਿਰਦੇਸ਼ਿਕ ਮਨੋਜ ਸਿੰਘ ਨੇ ਬਿਦਿਤਾ ਬਾਗ਼ ਅਤੇ ਮੇਘਨਾ ਮਲਿਕ (ਲੜੀਵਾਰ 'ਲਾਡੋ' ਦੀ ਅੰਮਾ ਜੀ) ਨੂੰ ਲੈ ਕੇ 'ਮੋਕਸ਼ ਟੂ ਮਾਇਆ' ਦੀ ਸ਼ੂਟਿੰਗ ਪੂਰੀ ਕਰ ਲਈ ਹੈ। ਫ਼ਿਲਮ ਵਿਚ ਇਹ ਦਿਖਾਇਆ ਗਿਆ ਹੈ ਕਿ ਮੋਹ-ਮਾਇਆ ਦੇ ਭੰਵਰ ਜਾਲ ਵਿਚ ਫਸ ਕੇ ਇਨਸਾਨ ਦੀ ਕੀ ਹਾਲਤ ਹੋ ਜਾਂਦੀ ਹੈ। ਫ਼ਿਲਮ ਵਿਚ ਅਹਿਸਾਨ ਖ਼ਾਨ, ਰਾਜ ਪ੍ਰੇਮੀ, ਨੀਰਜ ਭਾਰਦਵਾਜ, ਮੁਨੀ ਝਾਅ, ਸ਼ਵੇਤਾ ਠਾਕੁਰ ਤੇ ਮੇਘਾ ਭੱਟ ਨੇ ਵੀ ਅਭਿਨੈ ਕੀਤਾ ਹੈ ਅਤੇ ਇਹ 26 ਜੁਲਾਈ ਨੂੰ ਪ੍ਰਦਰਸ਼ਿਤ ਹੋਵੇਗੀ।


-ਮੁੰਬਈ ਪ੍ਰਤੀਨਿਧ

ਅਦਾਕਾਰੀ ਦਾ ਮੁਜੱਸਮਾ : ਅਨੀਤਾ ਦੇਵਗਨ

ਪੰਜਾਬੀ ਫ਼ਿਲਮਾਂ ਵਿਚ ਆਪਣਾ ਮਹੱਤਵਪੂਰਨ ਯੋਗਦਾਨ ਪਾਉਣ ਵਾਲੀ ਸ਼ਖ਼ਸੀਅਤ ਅਨੀਤਾ ਦੇਵਗਨ ਨਾਲ ਕੁਝ ਪਲ ਬਿਤਾਉਣ ਦਾ ਸਬੱਬ ਬਣਿਆ ਤਾਂ ਮੈਂ ਉਨ੍ਹਾਂ ਦੀ ਜ਼ਿੰਦਗੀ ਅਤੇ ਫ਼ਿਲਮੀ ਅਨੁਭਵ ਬਾਰੇ ਕੁਝ ਗੱਲਾਂ ਸਾਂਝੀਆਂ ਕੀਤੀਆਂ। ਅੰਮ੍ਰਿਤਸਰ ਦੀ ਧਰਤੀ ਨਾਲ ਸਬੰਧ ਰੱਖਣ ਵਾਲੀ ਅਨੀਤਾ ਨੂੰ ਥੀਏਟਰ ਨਾਲ ਡਾਹਢਾ ਪਿਆਰ ਹੈ। ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਅੰਮ੍ਰਿਤਸਰ ਵਿਚ ਪੜ੍ਹਦਿਆਂ ਹੀ ਉਸ ਨੂੰ ਥੀਏਟਰ ਦੀ ਲਗਨ ਲੱਗ ਗਈ ਤੇ ਉਸ ਨੇ ਬਹੁਤ ਸਾਰੇ ਨਾਟਕਾਂ ਵਿਚ 1992 ਤੋਂ ਅਦਾਕਾਰੀ ਸ਼ੁਰੂ ਕੀਤੀ ਤੇ ਆਪਣੇ ਹਮਸਫ਼ਰ ਹਰਦੀਪ ਗਿੱਲ ਜੋ ਕਿ ਇਕ ਬੇਹਤਰੀਨ ਕਲਾਕਾਰ ਅਤੇ ਪੰਜਾਬੀ ਫ਼ਿਲਮਾਂ ਵਿਚ ਜਾਨਦਾਰ ਭੂਮਿਕਾ ਨਿਭਾਉਂਦਾ ਹੈ, ਨਾਲ ਮਿਲਣ ਦਾ ਮੌਕਾ ਵੀ ਇਸ ਥੀਏਟਰ ਦੀ ਦੁਨੀਆ ਰਾਹੀਂ ਹੀ ਪ੍ਰਾਪਤ ਹੋਇਆ।
ਖਾਣਾ ਪਕਾਉਣਾ, ਸੰਗੀਤ ਸੁਣਨਾ, ਪੁਸਤਕਾਂ ਪੜ੍ਹਨਾ ਕਵਿਤਾਵਾਂ ਅਤੇ ਲੇਖ ਲਿਖਣਾ ਤੇ ਕਿਸੇ ਡਰਾਮੇ ਜਾਂ ਕਹਾਣੀ ਦੀ ਸਕ੍ਰਿਪਟ ਲਿਖਣੀ ਉਸ ਦੇ ਮੁਢਲੇ ਸ਼ੌਕ ਹਨ। ਅਨੀਤਾ ਨੇ ਪੰਜਾਬੀ ਫ਼ਿਲਮਾਂ ਰਾਹੀਂ ਅਤੇ ਥੀਏਟਰ ਰਾਹੀਂ ਪੰਜਾਬੀ ਪਿਆਰਿਆਂ ਦੇ ਦਿਲਾਂ ਉੱਪਰ ਰਾਜ ਕੀਤਾ ਹੈ ਅਤੇ ਆਪਣੇ ਹੁਨਰ ਨਾਲ ਸਭ ਨੂੰ ਮੋਹਿਆ ਹੈ।
ਅਨੀਤਾ ਦੀ ਕਲਾ ਵਿਚ ਇਕ ਸੁਭਾਵਿਕਤਾ ਹੈ, ਪੰਜਾਬੀ ਬੋਲੀ ਬੋਲਣ ਦਾ ਸੁਭਾਵਿਕ ਲਹਿਜ਼ਾ ਉਸ ਦੀ ਭੂਮਿਕਾ ਅਤੇ ਕਾਮੇਡੀ ਨੂੰ ਹੋਰ ਜਾਨਦਾਰ ਬਣਾ ਦਿੰਦਾ ਹੈ। 1992 ਤੋਂ ਥੀਏਟਰ ਜਗਤ ਵਿਚ ਨਾਮਣਾ ਖੱਟ ਰਹੀ ਇਸ ਅਦਾਕਾਰਾ ਨੇ ਫ਼ਿਲਮਾਂ ਵਿਚ ਆਪਣੀ ਵਿਸ਼ੇਸ਼ ਕਿਰਦਾਰਾਂ ਨਾਲ ਪਛਾਣ ਬਣਾਉਣ ਦੇ ਬਾਵਜੂਦ ਥੀਏਟਰ ਕਰਨਾ ਨਹੀਂ ਛੱਡਿਆ। ਕੇਵਲ ਧਾਲੀਵਾਲ ਅਤੇ ਹੋਰ ਮੰਝੇ ਹੋਏ ਨਿਰਦੇਸ਼ਕਾਂ ਦੇ ਨਿਰਦੇਸ਼ਨ ਹੇਠ ਉਹ ਹਾਲੇ ਵੀ ਥੀਏਟਰ ਕਰ ਰਹੀ ਹੈ। ਉਸ ਨੇ ਟੀ.ਵੀ. ਸੀਰੀਅਲਾਂ ਰਾਹੀਂ ਵੀ ਆਪਣੀ ਛਾਪ ਛੱਡੀ, ਜਿਨ੍ਹਾਂ ਵਿਚ ਲੂਰੀ, ਪੰਚਣੀ, ਹਕੀਮ ਤਾਰਾ ਚੰਦ ਵਿਸ਼ੇਸ਼ ਤੌਰ 'ਤੇ ਸਲਾਹੁਣਯੋਗ ਹਨ। ਉਹ ਆਪਣੀ ਕਲਾ ਨੂੰ ਸਿਖ਼ਰਾਂ ਤੱਕ ਲੈ ਜਾਣ ਵਿਚ ਆਪਣੇ ਹਮਸਫ਼ਰ ਹਰਦੀਪ ਗਿੱਲ ਦਾ ਵਿਸ਼ੇਸ਼ ਯੋਗਦਾਨ ਮੰਨਦੀ ਹੈ। ਉਸ ਨੇ 'ਜੱਟ ਐਂਡ ਜੂਲੀਅਟ-1', 'ਜੱਟ ਐਂਡ ਜੂਲੀਅਟ-2', 'ਅੰਗਰੇਜ਼', 'ਬੰਬੂਕਾਟ', 'ਮੰਜੇ ਬਿਸਤਰੇ', 'ਰੱਬ ਦਾ ਰੇਡੀਓ', 'ਕੁੜਮਾਈਆਂ' ਅਤੇ 'ਛੜਾ' ਵਰਗੀਆਂ ਬਿਹਤਰੀਨ ਫ਼ਿਲਮਾਂ ਵਿਚ ਆਪਣੀ ਅਦਾਕਾਰੀ ਦੀਆਂ ਧੁੰਮਾਂ ਪਾਈਆਂ ਹਨ। ਉਸ ਨੇ ਮਾਂ ਦੇ ਰੋਲ ਵਿਚ ਭਾਵਨਾਵਾਂ, ਜਜ਼ਬੇ ਅਤੇ ਚੰਗੀ ਅਦਾਕਾਰੀ ਦੇ ਜੌਹਰ ਵਿਖਾਏ ਹਨ।
ਉਸ ਨੇ ਥੀਏਟਰ ਅਤੇ ਫ਼ਿਲਮਾਂ ਵਿਚ ਬਰਾਬਰ ਦਾ ਸੰਤੁਲਨ ਬਣਾਈ ਰੱਖਿਆ ਤੇ ਵੱਡੇ ਸ਼ਹਿਰਾਂ ਵਿਚ ਉਹ ਆਪਣੇ ਸ਼ੋਅ ਕਰਕੇ ਪੰਜਾਬੀ ਰੰਗਮੰਚ ਵਿਚ ਆਪਣਾ ਸੁਚੱਜਾ ਯੋਗਦਾਨ ਦੇ ਰਹੀ ਹੈ। ਉਹ ਪੰਜਾਬੀ ਫ਼ਿਲਮਾਂ ਦੀ ਵਰਤਮਾਨ ਸਥਿਤੀ ਤੋਂ ਸੰਤੁਸ਼ਟ ਹੈ ਤੇ ਉਸ ਨੇ ਲਗਪਗ ਹਰ ਹੀਰੋ ਦਲਜੀਤ ਦੁਸਾਂਝ, ਅਮਰਿੰਦਰ ਗਿੱਲ, ਤਰਸੇਮ ਜੱਸੜ, ਗਿੱਪੀ ਗਰੇਵਾਲ, ਬੀਨੂੰ ਢਿੱਲੋਂ ਆਦਿ ਨਾਲ ਵੀ ਫ਼ਿਲਮਾਂ ਕੀਤੀਆਂ ਹਨ ਤੇ ਇਕ ਤਸੱਲੀ ਦਾ ਅਹਿਸਾਸ ਉਸ ਦੇ ਚਿਹਰੇ ਤੋਂ ਝਲਕਦਾ ਹੈ। ਉਹ ਸਮਝਦੀ ਹੈ ਕਿ ਪੰਜਾਬੀ ਫ਼ਿਲਮਾਂ ਵਿਚ ਪੇਂਡੂ ਜੀਵਨ ਸੱਭਿਆਚਾਰ ਦੀਆਂ ਝਲਕਾਂ ਇਸ ਦੀ ਅਮੀਰੀ ਵਿਚ ਵਾਧਾ ਕਰਦੀਆਂ ਹਨ। ਉਸ ਦੇ ਅਨੁਸਾਰ ਪੰਜਾਬੀ ਫ਼ਿਲਮਾਂ ਵਿਚ ਪ੍ਰੋਫੈਸ਼ਨਲਿਜ਼ਮ ਹਾਵੀ ਹੈ। ਉਸ ਦੀ ਹਿੰਦੀ ਫ਼ਿਲਮਾਂ ਵਿਚ ਕੰਮ ਕਰਨ ਦੀ ਵੀ ਇੱਛਾ ਹੈ। ਜੇਕਰ ਚੰਗੇ ਮਹੱਤਵਪੂਰਨ ਰੋਲ ਵਾਲੀ ਫ਼ਿਲਮ ਮਿਲੇ ਤਾਂ ਉਹ ਆਪਣਾ ਕਿਰਦਾਰ ਬਾਖੂਬੀ ਨਿਭਾਉਣਾ ਚਾਹੇਗੀ।
ਜਦ ਮੈਂ ਪੁੱਛਿਆ ਕਿ ਉਸ ਦੀ ਕੋਈ ਹੋਰ ਖਾਹਿਸ਼ ਹੈ ਕਿ ਉਹ ਕੋਈ ਰੋਲ ਕਰਨਾ ਚਾਹੁੰਦੀ ਹੋਵੇ ਜਿਸ ਦੀ ਉਸ ਨੇ ਕਲਪਨਾ ਕੀਤੀ ਪਰ ਅਜੇ ਤੱਕ ਕੀਤਾ ਨਹੀਂ ਤਾਂ ਉਸ ਨੇ ਬੜੇ ਆਤਮ-ਵਿਸ਼ਵਾਸ ਤੇ ਭਾਵੁਕਤਾ ਨਾਲ ਕਿਹਾ ਕਿ ਉਹ ਕਰੈਕਟਰ ਰੋਲ ਵਿਚ ਮੁੱਖ ਭੂਮਿਕਾ ਨਿਭਾਅ ਕੇ ਆਪਣੀ ਸੰਤੁਸ਼ਟੀ ਦੀ ਚਰਮ ਸੀਮਾ ਹਾਸਲ ਕਰ ਲਵੇਗੀ। ਜੇਕਰ ਉਸ ਨੂੰ ਕੋਈ ਅਜਿਹੀ ਸਕ੍ਰਿਪਟ ਮਿਲੇ ਤਾਂ ਉਹ ਬਿਲਕੁਲ ਤਸੱਲੀ ਅਨੁਭਵ ਕਰੇਗੀ। ਬਹੁਤ ਹੀ ਸੁਭਾਵਿਕ ਸਾਦਗੀ ਭਰਪੂਰ ਸ਼ਖ਼ਸੀਅਤ ਅਨੀਤਾ ਦੇਵਗਨ ਮੰਨਦੀ ਹੈ ਕਿ ਆਪਣੇ ਦਰਸ਼ਕਾਂ ਨੂੰ ਹਮੇਸ਼ਾ ਨਵਾਂਪਨ ਦੇਣਾ ਅਦਾਕਾਰ ਦਾ ਕੰਮ ਹੈ। ਉਹ ਸਮਝਦੀ ਹੈ ਕਿ ਹਰ ਭੂਮਿਕਾ ਕਰਦਿਆਂ ਆਪਣੇ-ਆਪ ਨੂੰ ਭੁੱਲ ਕੇ ਕੀਤੀ ਅਦਾਕਾਰੀ ਹੀ ਕਿਸੇ ਵੀ ਕਰੈਕਟਰ ਦੀ ਸਫ਼ਲਤਾ ਨੂੰ ਨਿਰਧਾਰਤ ਕਰਦੀ ਹੈ।
ਉਸ ਦੇ ਅਨੁਸਾਰ ਹਰ ਰਿਸ਼ਤਾ ਆਪਣੀ ਛਾਂ ਦਾ ਮੁੱਲ ਮੰਗਦਾ ਹੈ ਤੇ ਅਦਾਕਾਰੀ ਦਾ ਰਿਸ਼ਤਾ ਵੀ ਦਰਸ਼ਕਾਂ ਨਾਲ ਛਾਂ ਦਾ ਰਿਸ਼ਤਾ ਮੰਗਦਾ ਹੈ। ਉਹ ਸਮਝਦੇ ਹਨ ਕਿ ਅਦਾਕਾਰਾਂ ਦੀ ਜ਼ਿੰਦਗੀ ਵਿਚ ਆਪਣੀ ਕਲਾ ਦੀ ਪਹਿਲ ਹੁੰਦੀ ਹੈ ਤੇ ਕਈ ਵਾਰ ਨਿੱਜੀ ਰੁਝੇਵੇਂ ਛੱਡਣੇ ਪੈਂਦੇ ਹਨ।
ਪਰ ਸਾਕਾਰਾਤਮਿਕ ਊਰਜਾ ਰੱਖਣਾ ਤੇ ਸਾਫ਼ ਸਪੱਸ਼ਟ ਢੰਗ ਨਾਲ ਆਪਣੀ ਅਦਾਕਾਰੀ ਕਰਨਾ ਕਲਾ ਨੂੰ ਹੋਰ ਨਿਖਾਰ ਦਿੰਦਾ ਹੈ। ਪੂਰਬਲੇ ਪੰਜਾਬੀ ਸਿਨੇਮਾ ਤੇ ਹੁਣ ਦੇ ਪੰਜਾਬੀ ਸਿਨੇਮਾ ਦੀ ਤੁਲਨਾ ਕਰਦਿਆਂ ਉਹ ਤਸੱਲੀ ਪ੍ਰਗਟ ਕਰਦੀ ਹੈ, ਹੁਣ ਪੰਜਾਬੀ ਸਿਨੇਮਾ ਸਮੇਂ ਦਾ ਹਾਣੀ ਹੈ। ਉਹ ਸਾਰੇ ਕਿਰਦਾਰ ਜੋ ਦਰਸ਼ਕ ਪਸੰਦ ਕਰਦੇ ਹਨ, ਉਹ ਉਸ ਨੂੰ ਵੀ ਚੰਗੇ ਲਗਦੇ ਹਨ। 'ਯਮਲਾ ਪਗਲਾ ਦੀਵਾਨਾ ਅਗੇਨ' ਵਿਚ ਵੀ ਉਸ ਨੇ ਮਹੱਤਵਪੂਰਨ ਭੂਮਿਕਾ ਨਿਭਾਈ ਹੈ।
ਅਨੀਤਾ ਦੇਵਗਨ ਨੇ ਫ਼ਿਲਮਾਂ ਦੀ ਗਿਣਤੀ ਵਧਾਉਣ ਵਿਚ ਯਕੀਨ ਨਹੀਂ ਰੱਖਿਆ ਸਗੋਂ ਗੁਣਾਤਮਿਕਤਾ ਵਧਾਈ ਹੈ। 2007-08 ਤੋਂ ਫ਼ਿਲਮੀ ਸਫ਼ਰ ਸ਼ੁਰੂ ਕਰਕੇ ਅੱਜ ਤੱਕ ਲਗਾਤਾਰ ਹਿੱਟ ਫ਼ਿਲਮਾਂ ਕਰ ਰਹੀ ਅਨੀਤਾ ਦੇਵਗਨ ਤੋਂ ਪੰਜਾਬੀ ਫ਼ਿਲਮ ਇੰਡਸਟਰੀ ਨੂੰ ਢੇਰ ਸਾਰੀਆਂ ਉਮੀਦਾਂ ਹਨ।


-ਐਚ.ਐਮ.ਵੀ. ਜਲੰਧਰ।





Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX