ਤਾਜਾ ਖ਼ਬਰਾਂ


ਹਵਾਈ ਫ਼ੌਜ ਨੂੰ ਇਸਰਾਈਲ 'ਚ ਬਣੇ ਸਪਾਈਸ-2000 ਬਿਲਡਿੰਗ ਬਲਾਸਟਰ ਬੰਬ ਮਿਲਣੇ ਸ਼ੁਰੂ
. . .  1 day ago
ਨਵੀਂ ਦਿੱਲੀ, 15 ਸਤੰਬਰ ਭਾਰਤੀ ਹਵਾਈ ਫ਼ੌਜ ਨੂੰ ਇਸਰਾਈਲ 'ਚ ਬਣੇ ਸਪਾਈਸ-2000 ਬਿਲਡਿੰਗ ਬਲਾਸਟਰ ਬੰਬ ਮਿਲਣੇ ਸ਼ੁਰੂ ਹੋ ਗਏ ਹਨ। ਇਸ ਨਾਲ ਹਵਾਈ ਫ਼ੌਜ ਦੀ ਤਾਕਤ ਹੋਰ...
ਰਾਜੀਵ ਗਾਂਧੀ ਹੱਤਿਆਕਾਂਡ ਦੀ ਦੋਸ਼ੀ ਨਲਿਨੀ ਨੂੰ ਮੁੜ ਤੋਂ ਭੇਜਿਆ ਗਿਆ ਜੇਲ੍ਹ
. . .  1 day ago
ਚੇਨਈ, 15 ਸਤੰਬਰ - ਰਾਜੀਵ ਗਾਂਧੀ ਹੱਤਿਆਕਾਂਡ ਦੀ ਦੋਸ਼ੀ ਨਲਿਨੀ ਨੂੰ ਅੱਜ ਮੁੜ ਤੋਂ ਵੇਲੌਰ ਦੀ ਮਹਿਲਾ ਜੇਲ੍ਹ 'ਚ ਭੇਜ ਦਿੱਤਾ ਗਿਆ। ਮਦਰਾਸ ਹਾਈਕੋਰਟ ਨੇ ਨਲਿਨੀ ਨੂੰ ਬੇਟੀ ਦੇ ਵਿਆਹ ਲਈ ਇੱਕ...
ਮੀਂਹ ਕਾਰਨ ਭਾਰਤ ਦੱਖਣੀ ਅਫ਼ਰੀਕਾ ਪਹਿਲਾ ਟੀ-20 ਮੈਚ ਰੱਦ
. . .  1 day ago
ਧਰਮਸ਼ਾਲਾ, 15 ਸਤੰਬਰ - ਮੀਂਹ ਕਾਰਨ ਧਰਮਸ਼ਾਲਾ ਵਿਖੇ ਭਾਰਤ ਅਤੇ ਦੱਖਣੀ ਅਫ਼ਰੀਕਾ ਵਿਚਕਾਰ ਹੋਣ ਵਾਲਾ ਪਹਿਲਾ ਟੀ-20 ਮੈਚ ਰੱਦ ਕਰ ਦਿੱਤਾ ਗਿਆ...
ਪਾਕਿ 'ਚ ਇਸਲਾਮ ਵਿਰੁੱਧ ਗਲਤ ਸ਼ਬਦਾਵਲੀ ਬੋਲਣ ਦਾ ਝੂਠਾ ਦੋਸ਼ ਲਗਾ ਕੇ ਹਿੰਦੂ ਪ੍ਰਿੰਸੀਪਲ 'ਤੇ ਹਮਲਾ
. . .  1 day ago
ਅੰਮ੍ਰਿਤਸਰ, 15 ਸਤੰਬਰ (ਸੁਰਿੰਦਰ ਕੋਛੜ)- ਪਾਕਿਸਤਾਨ ਦੇ ਸੂਬਾ ਸਿੰਧ ਦੇ ਗੋਟਕੀ ਸ਼ਹਿਰ 'ਚ ਇੱਕ ਹਿੰਦੂ ਪ੍ਰਿੰਸੀਪਲ 'ਤੇ ਇਸਲਾਮ...
ਨਸ਼ੇ ਦੀ ਓਵਰ ਡੋਜ਼ ਕਾਰਨ ਨੌਜਵਾਨ ਦੀ ਹੋਈ ਮੌਤ
. . .  1 day ago
ਮੋਗਾ, 15 ਸਤੰਬਰ (ਗੁਰਦੇਵ ਭਾਮ)- ਹਲਕਾ ਧਰਮਕੋਟ ਦੇ ਪਿੰਡ ਢੋਲੇਵਾਲ ਦੇ ਰਹਿਣ ਵਾਲੇ ਇਕ ਨੌਜਵਾਨ ਦੀ ਨਸ਼ੇ ਦੀ ਓਵਰ ਡੋਜ਼ ਕਾਰਨ ਮੌਤ ਹੋ ਜਾਣ ਦੀ ਖ਼ਬਰ ...
ਅਸਮ ਦੀ ਤਰ੍ਹਾਂ ਹਰਿਆਣਾ 'ਚ ਵੀ ਲਾਗੂ ਹੋਵੇਗੀ ਐਨ.ਆਰ.ਸੀ : ਮਨੋਹਰ ਲਾਲ ਖੱਟੜ
. . .  1 day ago
ਚੰਡੀਗੜ੍ਹ, 15 ਸਤੰਬਰ- ਹਰਿਆਣਾ ਦੇ ਮੁੱਖ ਮੰਤਰੀ ਮਨੋਹਰ ਲਾਲ ਖੱਟੜ ਨੇ ਅਸਮ ਦੀ ਤਰ੍ਹਾਂ ਹਰਿਆਣਾ 'ਚ ਵੀ ਐਨ.ਆਰ.ਸੀ ਲਾਗੂ ਕਰਨ ਦਾ ਐਲਾਨ ...
ਭਾਰਤ ਅਤੇ ਦੱਖਣੀ ਅਫ਼ਰੀਕਾ ਵਿਚਾਲੇ ਪਹਿਲਾ ਟੀ-20 ਮੈਚ : ਮੀਂਹ ਕਾਰਨ ਟਾਸ 'ਚ ਦੇਰੀ
. . .  1 day ago
ਇੰਦਰਜੀਤ ਸਿੰਘ ਤਲਵੰਡੀ ਭੰਗੇਰੀਆਂ ਦੇ ਸਿਰ ਸਜਿਆ ਜ਼ਿਲ੍ਹਾ ਪਰੀਸ਼ਦ ਦੀ ਚੇਅਰਮੈਨੀ ਦਾ ਤਾਜ
. . .  1 day ago
ਮੋਗਾ, 15 ਸਤੰਬਰ (ਗੁਰਤੇਜ ਸਿੰਘ/ਸੁਰਿੰਦਰ ਪਾਲ ਸਿੰਘ) - ਅੱਜ ਮੋਗਾ ਵਿਖੇ ਜ਼ਿਲ੍ਹਾ ਪਰੀਸ਼ਦ ਦੇ ਮੈਂਬਰਾਂ ਦੀ ਹੋਈ ਚੋਣ 'ਚ ਇੰਦਰਜੀਤ ਸਿੰਘ ਤਲਵੰਡੀ ਭੰਗੇਰੀਆਂ ਆਪਣੇ...
ਪੁਲਿਸ ਮੁਲਾਜ਼ਮ ਕੁੱਟਮਾਰ ਮਾਮਲਾ: ਕਥਿਤ 6 ਦੋਸ਼ੀਆਂ ਨੂੰ ਅਦਾਲਤ ਵੱਲੋਂ ਇਕ ਦਿਨ ਦੇ ਪੁਲਿਸ ਰਿਮਾਂਡ 'ਤੇ ਭੇਜਿਆ ਗਿਆ
. . .  1 day ago
ਅਜਨਾਲਾ, 15 ਸਤੰਬਰ (ਗੁਰਪ੍ਰੀਤ ਸਿੰਘ ਢਿੱਲੋਂ)- ਚੋਗਾਵਾਂ ਸਬ ਇੰਸਪੈਕਟਰ ਕੁੱਟਮਾਰ ਮਾਮਲੇ 'ਚ ਗ੍ਰਿਫ਼ਤਾਰ ਕੀਤੇ ਗਏ ਕਥਿਤ 6 ਦੋਸ਼ੀਆਂ ਨੂੰ ਅਦਾਲਤ ਵੱਲੋਂ ਇਕ ਦਿਨ ਦੇ ਪੁਲਿਸ ਰਿਮਾਂਡ 'ਤੇ ਭੇਜਿਆ...
ਕਿਸਾਨਾਂ ਵੱਲੋਂ ਭੁੱਚੋ ਖ਼ੁਰਦ ਵਿਖੇ ਧਰਨਾ ਲਾ ਕੇ ਬਠਿੰਡਾ-ਜ਼ੀਰਕਪੁਰ ਕੌਮੀ ਸ਼ਾਹ ਮਾਰਗ ਜਾਮ
. . .  1 day ago
ਬਠਿੰਡਾ ਛਾਉਣੀ, 15 ਸਤੰਬਰ (ਪਰਵਿੰਦਰ ਸਿੰਘ ਜੌੜਾ)- ਚੰਡੀਗੜ੍ਹ ਜਾਣੋ ਰੋਕਣ 'ਤੇ ਰੋਹ 'ਚ ਆਏ ਕਸ਼ਮੀਰ ਹਮਾਇਤੀ ਸੰਘਰਸ਼ਕਾਰੀ ਸੈਂਕੜੇ ਲੋਕਾਂ ਨੇ ਭੁੱਚੋ ਖ਼ੁਰਦ ਵਿਖੇ...
ਹੋਰ ਖ਼ਬਰਾਂ..

ਖੇਡ ਜਗਤ

ਕੋਰੀ ਗੌਫ ਦਾ ਵਿੰਬਲਡਨ ਵਿਚ ਧਮਾਕੇਦਾਰ ਉਲਟਫੇਰ

ਸੰਸਾਰ ਵਿਚ ਖੇਡਾਂ ਦੇ ਖੇਤਰ ਵਿਚ ਕਈ ਅਜਿਹੀਆਂ ਸਨਸਨੀਖੇਜ਼ ਕਿਸੇ ਖਾਸ ਖੇਡ ਨੂੰ ਲੈ ਕੇ ਖੇਡ ਘਟਨਾਵਾਂ ਘਟ ਜਾਂਦੀਆਂ ਹਨ ਕਿ ਸਦਾ ਲਈ ਇਹ ਮਨ ਵਿਚ ਬੈਠ ਜਾਂਦੀਆਂ ਹਨ। ਕੁਝ ਅਜਿਹਾ ਹੀ ਇਸ ਸਾਲ ਟੈਨਿਸ ਵਿੰਬਲਡਨ ਵਿਚ ਇਕ ਧਮਾਕਾ ਦੇਖਣ ਨੂੰ ਮਿਲਿਆ, ਜਦੋਂ ਇਕ ਸਕੂਲ ਦੀ 15 ਸਾਲ ਦੀ ਅੱਲ੍ਹੜ ਕੁੜੀ ਕੋਰੀ ਗੌਫ ਨੇ ਸੰਸਾਰ ਦੀ ਮਹਾਨ ਖਿਡਾਰਨ ਵੀਨਸ ਵਿਲੀਅਮ ਨੂੰ ਸਿੱਧੇ ਸੈੱਟਾਂ ਵਿਚ 6-4, 6-4 ਨਾਲ ਹਰਾ ਕੇ ਇਕ ਅਜਿਹਾ ਧਮਾਕਾ ਕੀਤਾ ਕਿ ਜਿਸ ਦੀ ਗੂੰਜ ਸਦਾ ਮਨ ਵਿਚ ਗੂੰਜਦੀ ਰਹੇਗੀ। ਇਸ ਹੈਰਾਨ ਕਰਨ ਵਾਲੀ ਸਫਲਤਾ ਨਾਲ ਹੁਣ ਕਈ ਦਿਲਚਸਪ ਗੱਲਾਂ ਜੁੜ ਗਈਆਂ ਹਨ।
ਅੱਜ ਤੋਂ ਠੀਕ 15 ਸਾਲ ਪਹਿਲਾਂ ਕੋਰੀ ਗੌਫ ਦਾ ਜਨਮ ਹੋਇਆ ਤਾਂ ਵੀਨਸ ਵਿਲੀਅਮ ਉਸ ਸਮੇਂ ਤੱਕ 2 ਵਾਰ ਗਰੈਂਡ ਸਲੈਮ ਚੈਂਪੀਅਨਸ਼ਿਪ ਜਿੱਤ ਚੁੱਕੀ ਸੀ। ਸੰਸਾਰ ਵਿਚ ਅਮਰੀਕਾ ਦੀਆਂ ਵਿਲੀਅਮ ਭੈਣਾਂ ਦਾ ਸਦਾ ਬੋਲਬਾਲਾ ਰਿਹਾ ਹੈ। ਇਸ ਪੱਧਰ 'ਤੇ ਪਹੁੰਚ ਕੇ ਜਦੋਂ ਵੀਨਸ ਦਾ ਮੁਕਾਬਲਾ ਕੋਰੀ ਗੌਫ ਨਾਲ ਹੋਇਆ ਤਾਂ ਵੀਨਸ ਜੋ ਕਿ ਕਈ ਵਾਰ ਦੁਨੀਆ ਦੀ ਨੰਬਰ ਇਕ ਰਹਿ ਚੁੱਕੀ ਹੈ ਤੇ 5 ਵਾਰ ਇਹ ਵੱਕਾਰੀ ਗਰੈਂਡ ਸਲੈਮ ਆਪਣੇ ਨਾਂਅ ਕਰ ਚੁੱਕੀ ਹੈ ਤੇ ਦੂਜੇ ਪਾਸੇ ਬਾਲੜੀ ਕੋਰੀ ਗੌਫ, ਜੋ ਦੁਨੀਆ ਦੀ ਸਦਾ ਹੀ 300 ਤੋਂ ਉੱਪਰ ਰੈਂਕ ਦੀ ਖਿਡਾਰਨ ਰਹੀ ਹੈ, ਪਹਿਲਾਂ ਤਾਂ ਦਰਸ਼ਕਾਂ ਨੇ ਇਸ ਨੂੰ ਇਕ ਸਾਧਾਰਨ ਮੁਕਾਬਲਾ ਸਮਝਿਆ ਤਾਂ ਕਿਸ ਨੂੰ ਆਸ ਸੀ ਕਿ ਕੋਰੀ ਗੌਫ ਕੋਈ ਇਤਿਹਾਸ ਸਿਰਜਣ ਜਾ ਰਹੀ ਹੈ। ਪਰ ਜਿਉਂ-ਜਿਉਂ ਮੁਕਾਬਲਾ ਅੱਗੇ ਵਧਣ ਲੱਗਾ ਤਾਂ ਦਰਸ਼ਕਾਂ ਦੀ ਉਤਸੁਕਤਾ ਮੈਚ ਵਿਚ ਵਧਦੀ ਗਈ।
ਮਾਹਿਰਾਂ ਨੇ ਇਸ ਨੂੰ ਨੌਜਵਾਨ ਸ਼ਕਤੀ ਤੇ ਅਨੁਭਵ ਨਾਲ ਮੈਚ ਦੀ ਟੱਕਰ ਪ੍ਰਦਾਨ ਕੀਤੀ। ਇਸ ਖੇਡ ਨਾਲ ਜੁੜੇ ਹੋਏ ਮਾਹਿਰਾਂ ਦਾ ਇਹ ਕਹਿਣਾ ਹੈ ਕਿ ਸਰਵਿਸ ਕਰਨ ਦਾ ਢੰਗ ਇਸ ਖੇਡ ਵਿਚ ਬਹੁਤ ਮਹਾਨਤਾ ਰੱਖਦਾ ਹੈ। ਕੋਰੀ ਗੌਫ ਦੀ ਸਰਵਿਸ ਇੰਨੀ ਸਮਰੱਥ ਸੀ ਕਿ ਵੀਨਸ ਕੋਲ ਇਸ ਦਾ ਕੋਈ ਜਵਾਬ ਨਹੀਂ ਸੀ।
ਸਾਰੀ ਖੇਡ ਵਿਚ 15 ਸਾਲ ਦੀ ਇਸ ਕੁੜੀ ਨੇ ਉਸ ਤੋਂ 24 ਸਾਲ ਵੱਡੀ ਵੀਨਸ ਨੂੰ ਖੇਡ ਦੇ ਨੇੜੇ ਨਹੀਂ ਆਉਣ ਦਿੱਤਾ ਤੇ ਆਸਾਨੀ ਨਾਲ ਇਹ ਮੈਚ ਆਪਣੇ ਨਾਂਅ ਕਰ ਲਿਆ। ਸੰਸਾਰ ਵਿਚ ਅਜਿਹੀਆ ਗੱਲਾਂ ਘਰ-ਘਰ ਦੀ ਕਹਾਣੀ ਬਣ ਜਾਂਦੀਆਂ ਹਨ। ਹਰ ਖੇਡ ਵਿਚ ਇਹ ਉਲਟਫੇਰ ਦੇਖਣ ਨੂੰ ਮਿਲਦੇ ਹਨ। ਖੁਦ ਵੀਨਸ ਨੇ ਬੜੇ ਖੁੱਲ੍ਹੇ ਦਿਲ ਨਾਲ ਇਸ ਬੱਚੀ ਦੀ ਖੇਡ ਦੀ ਪ੍ਰਸੰਸਾ ਕੀਤੀ ਹੈ ਤੇ ਇਸ ਦੇ ਉਜਵਲ ਭਵਿੱਖ ਦੀ ਕਾਮਨਾ ਕੀਤੀ ਹੈ। ਕੋਰੀ ਕੌਫ ਨੇ ਕਿਹਾ ਹੈ ਕਿ ਵੀਨਸ ਸਦਾ ਬਚਪਨ ਤੋਂ ਹੀ ਉਸ ਦਾ ਆਦਰਸ਼ ਬਣੀ ਰਹੀ ਹੈ ਤੇ ਉਸ ਦਾ ਨਿਸ਼ਾਨਾ ਵਿੰਬਲਡਨ ਜਿੱਤਣਾ ਹੈ।
ਰੈਕਿਟ ਨਾਲ ਖੇਡੀ ਜਾਣ ਵਾਲੀ ਬੈਡਮਿੰਟਨ ਵਿਚ ਵੀ ਜਦੋਂ ਪ੍ਰਕਾਸ਼ ਪਾਦੂਕੋਨ ਨੇ ਇਕ ਸਾਲ ਵਿਚ ਹੀ ਜੂਨੀਅਰ ਤੇ ਸੀਨੀਅਰ ਟਾਈਟਲ ਜਿੱਤੇ ਸਨ ਤਾਂ ਇਸ ਤਰ੍ਹਾਂ ਦਾ ਹੀ ਹੁਲਾਸ ਭਰਿਆ ਮਾਹੌਲ ਸਿਰਜਿਆ ਗਿਆ ਸੀ। ਭਾਰਤ ਸਦਾ ਇਸ ਖੇਡ ਵਿਚ ਪਛੜਿਆ ਰਿਹਾ ਹੈ। ਕੇਵਲ ਡਬਲਜ਼ ਵਿਚ ਸਾਨੀਆ ਮਿਰਜ਼ਾ ਨੇ ਇਸ ਵਿਚ ਨਾਂਅ ਕਮਾਇਆ ਹੈ ਤੇ ਉਹ ਇਸ ਵੰਨਗੀ ਵਿਚ ਨੰਬਰ ਇਕ 'ਤੇ ਵੀ ਰਹਿ ਚੁੱਕੀ ਹੈ। ਪੁਰਸ਼ਾਂ ਵਿਚ ਵੀ ਸਾਡਾ ਨਾਂਅ ਕੇਵਲ ਇਸ ਖੇਡ ਵਿਚ ਡਬਲਜ਼ ਵਿਚ ਹੀ ਰਿਹਾ ਹੈ।
ਚਾਹੇ ਲਇਏਂਡਰ ਪੇਸ ਜਾਂ ਸਾਨੀਆ ਮਿਰਜ਼ਾ ਹੋਵੇ, ਅਸੀਂ ਇਸ ਖੇਤਰ ਵਿਚ ਦੂਜੇ ਦੇਸ਼ ਦੇ ਖਿਡਾਰੀਆਂ ਕਾਰਨ ਹੀ ਸਿਖਰ 'ਤੇ ਪਹੁੰਚੇ ਹਾਂ। ਭਾਰਤ ਵਿਚ ਇਹ ਖੇਡ ਸਦਾ ਸ਼ਹਿਰਾਂ ਤੱਕ ਹੀ ਸੀਮਤ ਰਹੀ ਹੈ ਤੇ ਪਿੰਡਾਂ ਵਿਚ ਇਹ ਖੇਡ ਅਜੇ ਤੱਕ ਨਹੀਂ ਗਈ। ਬਹੁਤ ਸਾਰੇ ਕੁਲੀਨ ਵਰਗ ਦੇ ਲੋਕ ਹੀ ਇਸ ਨੂੰ ਖੇਡਦੇ ਰਹੇ ਹਨ ਤੇ ਖੇਡ ਮੈਦਾਨ ਵੀ ਸੀਮਤ ਹਨ।
ਹੁਣ ਲੋੜ ਹੈ ਇਸ ਨੂੰ ਆਮ ਲੋਕਾਂ ਦੀ ਖੇਡ ਬਣਾਇਆ ਜਾਵੇ। ਹੁਣ ਇਸ ਸਮੇਂ ਭਾਰਤੀ ਕੁੜੀਆਂ ਨੂੰ ਇਹ ਸਬਕ ਸਿੱਖਣ ਦੀ ਲੋੜ ਹੈ ਕਿ ਜਵਾਨੀ ਦੀ ਉਮਰ ਇਸ ਖੇਡ ਵਿਚ ਖੇਡਣ ਦੀ ਸਹੀ ਉਮਰ ਹੈ, ਕਿਉਂਕਿ ਇਹ ਖੇਡ ਬਹੁਤੀ ਸਰੀਰਕ ਸ਼ਕਤੀ ਦੀ ਹੈ। ਭਾਰਤ ਇਸ ਖੇਡ ਵਿਚ ਸਦਾ ਪਛੜਿਆ ਰਿਹਾ ਹੈ। ਹੁਣ ਭਾਰਤੀ ਕੁੜੀਆਂ ਸਕੂਲ ਵਿਚ ਜਾਣ ਵਾਲੀ ਇਕ ਬਾਲੜੀ ਤੋਂ ਪ੍ਰੇਰਿਤ ਹੋ ਕੇ ਆਪਣਾ ਨਾਂਅ ਰੌਸ਼ਨ ਕਰ ਸਕਦੀਆਂ ਹਨ।


-274-ਏ. ਐਕਸ. ਮਾਡਲ ਟਾਊਨ ਐਕਸਟੈਨਸ਼ਨ, ਲੁਧਿਆਣਾ।
ਮੋਬਾ: 98152-55295


ਖ਼ਬਰ ਸ਼ੇਅਰ ਕਰੋ

ਧਮਾਕੇਦਾਰ ਹੋਵੇਗਾ ਪ੍ਰੋ ਕਬੱਡੀ ਦਾ ਸੱਤਵਾਂ ਅਖਾੜਾ

ਇਸ ਵਾਰ ਬਹੁਚਰਚਿਤ ਪ੍ਰੋ ਕਬੱਡੀ ਲੀਗ ਦੇ ਸੱਤਵੇਂ ਅਖਾੜੇ ਦੀ ਸ਼ੁਰੂਆਤ 19 ਜੁਲਾਈ ਨੂੰ ਹੈਦਰਾਬਾਦ ਵਿਚ ਹੋਵੇਗੀ। 3 ਮਹੀਨੇ ਖੇਡੀ ਜਾਣ ਵਾਲੀ ਇਸ ਵੱਕਾਰੀ ਲੀਗ ਦਾ ਫਾਈਨਲ 19 ਅਕਤੂਬਰ ਨੂੰ ਖੇਡਿਆ ਜਾਵੇਗਾ। ਲੀਗ ਦਾ ਉਦਘਾਟਨੀ ਮੈਚ ਘਰੇਲੂ ਟੀਮ ਤੇਲਗੂ ਟਾਈਟਨਸ ਦਾ ਮੁਕਾਬਲਾ ਦੂਜੇ ਸੀਜ਼ਨ ਦੀ ਜੇਤੂ ਟੀਮ ਯੂ. ਮੁੰਬਾ ਨਾਲ ਹੋਵੇਗਾ। ਇਸੇ ਦਿਨ ਪਿਛਲੀ ਵਿਜੇਤਾ ਬੈਂਗਲੁਰੂ ਬੁਲਸ 3 ਵਾਰ ਦੀ ਚੈਂਪੀਅਨ ਪਟਨਾ ਪਾਇਰੇਟਸ ਦੇ ਖਿਲਾਫ ਮੈਦਾਨ 'ਚ ਉਤਰੇਗੀ।
ਪਿਛਲੇ ਦੋ ਸਾਲਾਂ ਦੀ ਤਰ੍ਹਾਂ ਇਸ ਵਾਰ ਵੀ ਇਸ ਲੀਗ ਵਿਚ 12 ਟੀਮਾਂ ਤੇਲਗੂ ਟਾਈਟਨਜ਼, ਯੂ. ਮੁੰਬਾ, ਪਟਨਾ ਪਾਇਰੇਟਸ, ਗੁਜਰਾਤ ਫਾਰਚੂਨਾਈਟਸ, ਤਾਮਿਲ ਥਲਾਈਵਾਜ਼, ਦਬੰਗ ਦਿੱਲੀ, ਬੈਂਗਲੁਰੂ ਬੁਲਸ, ਬੰਗਾਲ ਵਾਰੀਅਰਸ, ਪੁਨੇਰੀ ਪਲਟਣ, ਜੈਪੁਰ ਪਿੰਕ ਪੈਂਥਰਜ਼, ਹਰਿਆਣਾ ਸਟੀਲਰਸ, ਯੂ. ਪੀ. ਯੋਧਾ ਖਿਤਾਬੀ ਦਾਅਵੇਦਾਰੀ ਪੇਸ਼ ਕਰਨਗੀਆਂ।
ਪ੍ਰੋ ਕਬੱਡੀ ਲੀਗ ਫਾਰਮੈਟ ਵਿਚ ਵੀ ਇਸ ਵਾਰ ਬਦਲਾਅ ਕੀਤਾ ਹੈ। ਇਸ ਵਾਰ ਇੰਟਰ ਜ਼ੋਨਲ, ਇੰਟਰਾ ਜ਼ੋਨਲ ਅਤੇ ਵਾਈਲਡ ਕਾਰਡ ਮੈਚਾਂ ਨੂੰ ਹਟਾ ਦਿੱਤਾ ਗਿਆ ਹੈ। ਇਸ ਵਾਰ ਮੁਕਾਬਲੇ ਰਾਊਂਡ ਰੋਬਿਨ ਫਾਰਮੈਟ ਦੇ ਆਧਾਰ 'ਤੇ ਖੇਡੇ ਜਾਣਗੇ। ਹਰ ਇਕ ਟੀਮ ਦੇ ਗਰੁੱਪ ਸਟੇਜ 'ਤੇ 22 ਮੈਚ ਖੇਡਣੇ ਹੋਣਗੇ ਅਤੇ ਸਿਖਰ 'ਤੇ ਰਹਿਣ ਵਾਲੀਆਂ 6 ਟੀਮਾਂ ਪਲੇਅ ਆਫ ਲਈ ਕੁਆਲੀਫਾਈ ਕਰਨਗੀਆਂ। ਇਸ ਵਾਰ ਪਲੇਅ ਆਫ ਫਾਰਮੈਟ 'ਚ ਵੀ ਬਦਲਾਅ ਕੀਤਾ ਗਿਆ ਹੈ। ਪਹਿਲੇ ਅਲੀਮੀਨੇਟਰ 'ਚ ਤੀਜੇ ਸਥਾਨ 'ਤੇ ਰਹਿਣ ਵਾਲੀ ਟੀਮ ਦਾ ਮੁਕਾਬਲਾ 6ਵੇਂ ਸਥਾਨ 'ਤੇ ਰਹਿਣ ਵਾਲੀ ਟੀਮ ਨਾਲ ਹੋਵੇਗਾ ਅਤੇ ਦੂਜੇ ਐਲੀਮੀਨੇਟਰ 'ਚ ਚੌਥੇ ਨੰਬਰ 'ਤੇ ਰਹਿਣ ਵਾਲੀ ਟੀਮ ਦਾ ਮੁਕਾਬਲਾ 6ਵੇਂ ਸਥਾਨ 'ਤੇ ਰਹਿਣ ਵਾਲੀ ਟੀਮ ਨਾਲ ਹੋਵੇਗਾ। ਦੋਵੇਂ ਐਲੀਮੀਨੇਟਰ ਮੁਕਾਬਲੇ (ਨਾਕ ਆਊਟ) 14 ਅਕਤੂਬਰ ਨੂੰ ਖੇਡੇ ਜਾਣਗੇ। ਆਖਰੀ ਚਾਰ 'ਚ ਅੱਪੜਨ ਵਾਲੀਆਂ ਟੀਮਾਂ 16 ਅਕਤੂਬਰ ਨੂੰ ਸੈਮੀਫਾਈਨਲ 'ਚ ਟਕਰਾਉਣਗੀਆਂ ਅਤੇ ਫਾਈਨਲ ਮੁਕਾਬਲਾ 19 ਅਕਤੂਬਰ, 2019 ਨੂੰ ਖੇਡਿਆ ਜਾਵੇਗਾ।
ਟੈਲੀਵਿਜ਼ਨ ਪ੍ਰਸਾਰਨ ਦੀ ਵਜ੍ਹਾ ਕਰਕੇ ਕਬੱਡੀ ਹੁਣ ਤਮਾਮ ਦੇਸ਼ਾਂ ਵਿਚ ਦੇਖੀ ਜਾਂਦੀ ਹੈ। ਮਸ਼ਾਲ ਸਪੋਰਟਸ ਅਤੇ ਸਟਾਰ ਖੇਡ ਚੈਨਲ ਦੇ ਉੱਦਮ ਨਾਲ ਕਬੱਡੀ ਲੀਗ ਨੂੰ ਆਈ.ਪੀ.ਐਲ. ਦੀ ਤਰਜ਼ 'ਤੇ ਖੇਡ ਪ੍ਰੇਮੀਆਂ ਅੱਗੇ ਪੇਸ਼ ਕੀਤਾ ਗਿਆ ਹੈ। ਕਬੱਡੀ ਹੁਣ ਪੇਸ਼ੇਵਰ ਲੀਗ ਆਈ.ਪੀ.ਐਲ. ਅਤੇ ਆਈ.ਐਸ.ਐਲ. ਤੋਂ ਬਾਅਦ ਤੀਜੀ ਅਜਿਹੀ ਖੇਡ ਹੈ, ਜਿਸ ਨੂੰ ਭਾਰਤ ਵਿਚ ਸਭ ਤੋਂ ਜ਼ਿਆਦਾ ਦੇਖਿਆ ਜਾਂਦਾ ਹੈ। ਕਬੱਡੀ ਲੀਗ ਦੀ ਵਧ ਰਹੀ ਲੋਕਪ੍ਰਿਅਤਾ ਦਾ ਵੱਡਾ ਕਾਰਨ ਵਿਸ਼ਵ ਦੇ ਚੋਟੀ ਦੇ ਖਿਡਾਰੀਆਂ ਦਾ ਇਕ ਮੰਚ 'ਤੇ ਖੇਡਣਾ ਹੈ। ਇਤਿਹਾਸਕ ਨਜ਼ਰਸਾਨੀ ਮੁਤਾਬਿਕ ਹੁਣ ਤੱਕ ਇਸ ਲੀਗ ਨੂੰ ਬਤੌਰ ਚੈਂਪੀਅਨ ਜੈਪੁਰ ਪਿੰਕ ਪੈਥਰਸ, ਯੂ. ਮੁੰਬਾ, ਪਟਨਾ ਪਾਇਰੇਟਸ ਅਤੇ ਬੈਂਗਲੁਰੂ ਬੁਲਸ ਨੇ ਆਪਣੇ ਨਾਂਅ ਕੀਤਾ ਹੈ। ਪਟਨਾ ਪਾਇਰੇਟਸ ਅਤੇ ਯੂ. ਮੁੰਬਾ ਇਸ ਲੀਗ ਦੀਆਂ ਸਭ ਤੋਂ ਸਫ਼ਲ ਟੀਮਾਂ ਹਨ। ਹਾਲਾਂਕਿ ਇਸ ਕਬੱਡੀ ਲੀਗ ਵਿਚ ਹਿੱਸਾ ਲੈਣ ਵਾਲੀਆਂ ਟੀਮਾਂ ਖਿਤਾਬੀ ਜੰਗ ਵਿਚ ਆਪਣਾ ਸਭ ਕੁਝ ਦਾਅ 'ਤੇ ਲਗਾ ਦੇਣਗੀਆਂ, ਮੁਕਾਬਲੇ ਬੇਹੱਦ ਕਾਂਟੇਦਾਰ ਹੋਣਗੇ ਪਰ ਕਬੱਡੀ ਪੰਡਿਤਾਂ ਦੀਆਂ ਨਜ਼ਰਾਂ ਵਿਚ ਯੂ.ਪੀ. ਯੋਧਾ, ਪਟਨਾ ਪਾਇਰੇਟਸ ਅਤੇ ਤਮਿਲ ਥਲਾਈਵਾਜ਼ ਇਸ ਵਾਰ ਦਮਦਾਰ ਦਾਅਵੇਦਾਰੀ ਵਜੋਂ ਮੈਦਾਨ 'ਚ ਉਤਰਨਗੇ। ਭਾਰਤ ਦੀ ਸਭ ਤੋਂ ਵੱਡੀ ਕਬੱਡੀ ਲੀਗ ਦੇ ਸਾਰੇ ਮੈਚਾਂ ਦੀ ਸ਼ੁਰੂਆਤ ਸਨਿਚਰਵਾਰ ਸ਼ਾਮ 7.30 ਵਜੇ ਹੋਵੇਗੀ। ਖੈਰ, ਕੌਣ ਬਣੇਗਾ ਚੈਂਪੀਅਨ, ਇਹ ਤਾਂ ਵਕਤ ਹੀ ਦੱਸੇਗਾ ਪਰ ਨਿਰਸੰਦੇਹ ਧਮਾਕੇਦਾਰ ਹੋਵੇਗਾ ਪ੍ਰੋ ਕਬੱਡੀ ਦਾ ਸੱਤਵਾਂ ਅਖਾੜਾ।


-ਪਿੰਡ ਤੇ ਡਾਕ: ਪਲਾਹੀ, ਫਗਵਾੜਾ। ਮੋਬਾ: 94636-12204

ਖੇਡਾਂ ਲਈ ਇੱਛਾ ਸ਼ਕਤੀ ਤੇ ਜਜ਼ਬਾ ਹੋਣਾ ਜ਼ਰੂਰੀ

ਸੰਸਾਰ ਵਿਚ ਜਿਸ ਨੇ ਵੀ ਕਿਸੇ ਨਾ ਕਿਸੇ ਕੰਮ ਵਿਚ ਮੁਕਾਮ ਹਾਸਲ ਕੀਤੇ ਹਨ, ਉਸ ਨੇ ਦ੍ਰਿੜ੍ਹ ਸੰਕਲਪ ਨਾਲ ਆਪਣੇ ਕੰਮ ਨੂੰ ਹੀ ਆਪਣੀ ਪੂਜਾ ਮੰਨ ਕੇ ਉਸ ਖੇਤਰ ਵਿਚ ਜੀਅ ਤੋੜ ਮਿਹਨਤ ਕੀਤੀ ਹੈ ਤੇ ਸਫਲਤਾ ਹਾਸਲ ਕੀਤੀ ਹੈ। ਕਿਸੇ ਵੀ ਕੰਮ ਲਈ ਜਨੂੰਨ ਹੋਣਾ ਉਸ ਕੰਮ ਦੀ ਸਫਲਤਾ 'ਤੇ ਮੋਹਰ ਲਗਾ ਦਿੰਦਾ ਹੈ। ਖੇਡਾਂ ਦੇ ਖੇਤਰ ਨਾਲ ਜੁੜੇ ਹੋਣ ਕਰਕੇ ਅੱਜ ਅਸੀਂ ਖੇਡਾਂ ਵਿਚ ਖਿਡਾਰੀਆਂ ਅੰਦਰਲੇ ਉਸ ਮਨੋਵਿਗਿਆਨਕ ਪੱਖ ਦੀ ਗੱਲ ਕਰਾਂਗੇ, ਜਿਸ ਨਾਲ ਖਿਡਾਰੀ ਆਪਣੇ ਅੰਦਰ ਸਫਲਤਾ ਦੀ ਭੁੱਖ ਹਮੇਸ਼ਾ ਜਗਾ ਕੇ ਰੱਖਦੇ ਹਨ। ਖਿਡਾਰੀਆਂ ਅੰਦਰ ਇੱਛਾ ਸ਼ਕਤੀ ਅਤੇ ਜਜ਼ਬਾ ਇਕ ਇਹੋ ਜਿਹੀ ਮਨੋਭਾਵਨਾ ਹੈ, ਜਿਸ ਨਾਲ ਖਿਡਾਰੀ ਹਰ ਮੁਸ਼ਕਿਲ ਨਾਲ ਲੜਦਾ ਹੋਇਆ ਆਪਣੇ ਮੁਕਾਮ 'ਤੇ ਪਹੁੰਚਣ ਵਿਚ ਕਾਮਯਾਬ ਰਹਿੰਦਾ ਹੈ।
ਅੱਜ ਹਰ ਖੇਤਰ ਵਿਚ ਆਧੁਨਿਕਤਾ ਆਉਣ ਕਰਕੇ ਮੁਕਾਬਲੇ ਬਹੁਤ ਸਖ਼ਤ ਹੋ ਗਏ ਹਨ ਅਤੇ ਸਖ਼ਤ ਮੁਕਾਬਲਿਆਂ ਵਿਚੋਂ ਇੱਛਾ ਸ਼ਕਤੀ ਅਤੇ ਦ੍ਰਿੜ੍ਹ ਸੰਕਲਪ ਵਾਲੇ ਖਿਡਾਰੀ ਹੀ ਅੱਵਲ ਰਹਿਣ ਵਿਚ ਸਫਲ ਹੁੰਦੇ ਹਨ। ਇਹ ਆਮ ਦੇਖਣ ਵਿਚ ਆਂਉਦਾ ਹੈ ਕਿ ਸਾਡੇ ਦੇਸ਼ ਦੇ ਖਿਡਾਰੀ ਰਾਸ਼ਟਰੀ ਪੱਧਰ 'ਤੇ ਬਹੁਤ ਵਧੀਆ ਪ੍ਰਦਰਸ਼ਨ ਕਰਦੇ ਹਨ ਪਰ ਅੰਤਰਰਾਸ਼ਟਰੀ ਪੱਧਰ 'ਤੇ ਜਾ ਕੇ ਉਹ ਮਨੋਵਿਗਿਆਨਕ ਤੌਰ 'ਤੇ ਕਮਜ਼ੋਰ ਨਜ਼ਰ ਆਉਂਦੇ ਹਨ ਤੇ ਆਪਣਾ ਅਸਲ ਪ੍ਰਦਰਸ਼ਨ ਨਹੀਂ ਕਰ ਪਾਉਂਦੇ। ਇਸ ਤੋਂ ਇਲਾਵਾ ਬਹੁਤ ਸਾਰੇ ਖਿਡਾਰੀ ਸਿਰਫ ਅੰਤਰਰਾਸ਼ਟਰੀ ਪੱਧਰ 'ਤੇ ਪਹੁੰਚਣ ਅਤੇ ਉਸ ਆਧਾਰ 'ਤੇ ਆਪਣੇ ਭਵਿੱਖ ਨੂੰ ਸੁਧਾਰਨ ਤੱਕ ਹੀ ਸੀਮਤ ਹੁੰਦੇ ਹਨ। ਬਹੁਤੇ ਖਿਡਾਰੀ ਆਪੋ-ਆਪਣਾ ਰੁਜ਼ਗਾਰ ਮਿਲਣ ਤੱਕ ਹੀ ਸੀਮਤ ਹੁੰਦੇ ਹਨ, ਤਾਂ ਹੀ ਸਾਡੇ ਦੇਸ਼ ਦਾ ਖੇਡ ਪ੍ਰਦਰਸ਼ਨ ਅੰਤਰਰਾਸ਼ਟਰੀ ਪੱਧਰ 'ਤੇ ਹੇਠਲੇ ਦਰਜੇ ਦਾ ਹੀ ਰਹਿੰਦਾ ਹੈ, ਜਦੋਂਕਿ ਭਾਰਤ ਕੋਲ ਦੁਨੀਆ ਦੀ ਦੂਸਰੀ ਸਭ ਤੋਂ ਵੱਡੀ ਆਬਾਦੀ ਹੈ ਅਤੇ ਨੌਜਵਾਨ ਸ਼ਕਤੀ ਦੀ ਕੋਈ ਘਾਟ ਨਹੀਂ।
ਕਿਤੇ ਨਾ ਕਿਤੇ ਸਰਕਾਰੀ ਖੇਡ ਨੀਤੀਆਂ ਦੀ ਘਾਟ ਵੀ ਇਸ ਲਈ ਵੱਡੀ ਜ਼ਿੰਮੇਵਾਰ ਹੈ। ਬਹੁਤੇ ਖਿਡਾਰੀ ਅੰਤਰਰਾਸ਼ਟਰੀ ਪੱਧਰ 'ਤੇ ਮਨੋਵਿਗਿਆਨਕ ਸੰਤੁਲਨ ਗਵਾ ਬੈਠਦੇ ਹਨ ਤੇ ਆਪਣੇ ਪ੍ਰਦਰਸ਼ਨ ਨੂੰ ਜਾਰੀ ਨਹੀਂ ਰੱਖ ਪਾਉਂਦੇ। ਪਰ ਜੇਕਰ ਜਜ਼ਬੇ ਅਤੇ ਦ੍ਰਿੜ੍ਹ ਇੱਛਾ ਸ਼ਕਤੀ ਦੀ ਗੱਲ ਕਰੀਏ ਤਾਂ ਬਹੁਤ ਵਾਰ ਇਹ ਦੇਖਣ ਵਿਚ ਆਇਆ ਹੈ ਕਿ ਸਾਡੇ ਦੇਸ਼ ਦੇ ਖਿਡਾਰੀ ਅਤੇ ਖਿਡਾਰਨਾਂ ਵਲੋਂ ਮੁਸ਼ਕਿਲ ਦੌਰ ਵਿਚੋਂ ਗੁਜ਼ਰਦਿਆਂ ਵੀ ਆਪਣੇ ਦੇਸ਼ ਲਈ ਕੁਝ ਕਰਨ ਦਾ ਜਜ਼ਬਾ ਹੁੰਦਾ ਹੈ ਅਤੇ ਉਹ ਦੇਸ਼ ਦੇ ਝੰਡੇ ਨੂੰ ਬੁਲੰਦ ਕਰਨ ਲਈ ਜਾਨ ਦੀ ਬਾਜ਼ੀ ਤੱਕ ਲਗਾ ਜਾਂਦੇ ਹਨ। 2018 ਦੀਆਂ ਏਸ਼ੀਅਨ ਖੇਡਾਂ ਦੀ ਇਕ ਉਦਾਹਰਨ ਸਾਡੇ ਸਭ ਦੇ ਸਾਹਮਣੇ ਹੈ, ਜਿਸ ਵਿਚ ਭਾਰਤੀ ਮੁਟਿਆਰ ਸਵਪਨਾ ਬਰਮਨ ਨੇ ਆਪਣੀ ਸੱਟ ਦੀ ਪ੍ਰਵਾਹ ਨਾ ਕਰਦੇ ਹੋਏ ਭਾਰਤ ਲਈ ਹੈਪਟਾਥਲਨ ਵਿਚ ਸੋਨ ਤਗਮਾ ਜਿੱਤਿਆ ਸੀ। ਉਸ ਮੁਟਿਆਰ ਦੇ ਚਿਹਰੇ ਦੇ ਹਾਵ-ਭਾਵ ਉਨ੍ਹਾਂ ਖੇਡਾਂ ਵਿਚ ਸਾਫ ਦਿਖਾਈ ਦੇ ਰਹੇ ਸਨ ਕਿ ਉਹ ਕਿਸ ਦ੍ਰਿੜ੍ਹ ਇਰਾਦੇ ਨਾਲ ਦੇਸ਼ ਲਈ ਤਗਮਾ ਜਿੱਤਣਾ ਚਾਹੁੰਦੀ ਹੈ। ਖੇਡਾਂ ਵਿਚ ਭਾਗ ਲੈਣਾ ਕੋਈ ਮੁਸ਼ਕਿਲ ਕੰਮ ਨਹੀਂ ਪਰ ਇੱਛਾ ਸ਼ਕਤੀ ਨਾਲ ਆਪਣੇ-ਆਪ ਨੂੰ ਸਾਬਤ ਕਰਨਾ ਮਾਅਨੇ ਰੱਖਦਾ ਹੈ। ਇਤਿਹਾਸ ਵੀ ਇਸ ਗੱਲ ਦਾ ਗਵਾਹ ਹੈ ਕਿ ਜਿਸ ਨੇ ਵੀ ਮੁਸ਼ਕਿਲ ਦੌਰ ਵਿਚੋਂ ਗੁਜ਼ਰਦੇ ਹੋਏ ਅਤੇ ਔਕੜਾਂ ਦੀ ਪ੍ਰਵਾਹ ਨਾ ਕਰਦੇ ਹੋਏ ਆਪਣੀ ਮਿਹਨਤ ਜਾਰੀ ਰੱਖੀ ਹੈ, ਉਸ ਨੂੰ ਉਸ ਦਾ ਮੁਕਾਮ ਜ਼ਰੂਰ ਮਿਲਿਆ ਹੈ ਇਸ ਦੀ ਸਭ ਤੋਂ ਵੱਡੀ ਉਦਾਹਰਨ ਹੈ ਉਡਣਾ ਸਿੱਖ ਮਿਲਖਾ ਸਿੰਘ, ਜਿਸ ਨੇ ਪੂਰੀ ਦੁਨੀਆ ਵਿਚ ਆਪਣੇ ਜਜ਼ਬੇ ਨਾਲ ਭਾਰਤ ਨੂੰ ਇਕ ਵੱਖਰੀ ਪਹਿਚਾਣ ਦਿੱਤੀ।
ਹੋਰ ਅਨੇਕਾਂ ਭਾਰਤੀ ਖੇਡ ਸਿਤਾਰੇ ਜਿਵੇਂ ਕਪਿਲ ਦੇਵ, ਸਚਿਨ ਤੇਂਦੁਲਕਰ, ਮਹਿੰਦਰ ਸਿੰਘ ਧੋਨੀ, ਵਿਰਾਟ ਕੋਹਲੀ ਆਦਿ ਨੇ ਆਪਣੀ ਸਖ਼ਤ ਮਿਹਨਤ ਅਤੇ ਇੱਛਾ ਸ਼ਕਤੀ ਨਾਲ ਇਕ ਵੱਖਰਾ ਮੁਕਾਮ ਹਾਸਲ ਕੀਤਾ ਹੈ। ਅੱਜ ਭਾਰਤੀ ਖੇਡ ਦਲਾਂ ਨਾਲ ਮਨੋਵਿਗਿਆਨਕ ਮਾਹਿਰਾਂ ਦਾ ਹੋਣਾ ਵੀ ਇਸੇ ਗੱਲ ਦਾ ਸਬੂਤ ਹੈ ਕਿ ਮਨੋਵਿਗਿਆਨਕ ਤੌਰ 'ਤੇ ਖਿਡਾਰੀਆਂ ਨੂੰ ਫਿੱਟ ਰੱਖਣਾ ਅਤੇ ਉਨ੍ਹਾਂ ਨੂੰ ਹੱਲਾਸ਼ੇਰੀ ਦੇਣੀ ਕਿੰਨੀ ਕਾਰਗਰ ਸਾਬਤ ਹੁੰਦੀ ਹੈ। ਇਕ ਸਭ ਤੋਂ ਤਾਜ਼ੀ ਉਦਾਹਰਨ ਨੇ ਦੇਸ਼ ਦੇ ਖੇਡ ਖੇਤਰ ਅਤੇ ਖੇਡ ਪ੍ਰਸੰਸਕਾਂ ਨੂੰ ਮਾਣ ਨਾਲ ਭਰ ਦਿੱਤਾ, ਜਦੋਂ ਬੀਤੇ ਹਫਤੇ ਭਾਰਤੀ ਕੁੜੀਆਂ ਦੀ ਹਾਕੀ ਟੀਮ ਉਲੰਪਿਕ ਦੇ ਸੁਪਨੇ ਨੂੰ ਜਿਊਂਦਾ ਰੱਖਣ ਲਈ ਜਾਪਾਨ ਵਿਚ ਟੂਰਨਾਮੈਂਟ ਖੇਡ ਰਹੀ ਸੀ ਤਾਂ ਭਾਰਤੀ ਖਿਡਾਰਨ ਦੇ ਪਿਤਾ ਦਾ ਦਿਹਾਂਤ ਹੋ ਗਿਆ ਅਤੇ ਜਦੋਂ ਭਾਰਤੀ ਅਧਿਕਾਰੀਆਂ ਨੇ ਇਸ ਕੁੜੀ ਨੂੰ ਘਰ ਪਰਤਣ ਦੀ ਸਲਾਹ ਦਿੱਤੀ ਤਾਂ ਇਸ ਕੁੜੀ ਨੇ ਦੇਸ਼ ਲਈ ਆਪਣੇ ਫਰਜ਼ ਨੂੰ ਪਹਿਲ ਦਿੰਦੇ ਹੋਏ ਦੇਸ਼ ਲਈ ਖੇਡਣ ਨੂੰ ਪਹਿਲ ਦਿੱਤੀ ਅਤੇ ਔਖੇ ਵੇਲੇ ਘਰ ਨਾ ਪਰਤ ਕੇ ਦੇਸ਼ ਲਈ ਸੋਨ ਤਗਮਾ ਜਿੱਤ ਕੇ ਉਲੰਪਿਕ ਸੁਪਨੇ ਨੂੰ ਜਿਊਂਦਾ ਰੱਖਿਆ। ਸੋ ਇਹੋ ਜਿਹਾ ਜਜ਼ਬਾ ਜਦੋਂ ਦੇਸ਼ ਦੇ ਨੌਜਵਾਨਾਂ ਅਤੇ ਮੁਟਿਆਰਾਂ ਵਿਚ ਹੋਵੇਗਾ ਅਤੇ ਉਹ ਦੇਸ਼ ਨੂੰ ਪਹਿਲ ਦੇ ਕੇ ਆਪਣੇ ਖੂਨ-ਪਸੀਨੇ ਨੂੰ ਦੇਸ਼ ਲਈ ਵਹਾਉਣਗੇ ਤਾਂ ਦੇਸ਼ ਦਾ ਖੇਡ ਕੌਸ਼ਲ ਨਿਖਰ ਕੇ ਸਾਹਮਣੇ ਆਵੇਗਾ।


-ਮੋਬਾ: 94174-79449

ਲਿਮਕਾ ਬੁੱਕ ਆਫ਼ ਵਰਲਡ ਰਿਕਾਰਡ ਵਿਚ ਨਾਂਅ ਦਰਜ ਹੈ ਆਦਿਲ ਅੰਸਾਰੀ ਦਾ

ਆਦਿਲ ਅੰਸਾਰੀ ਮੁੰਬਈ ਦਾ ਹੀ ਮਾਣ ਨਹੀਂ, ਸਗੋਂ ਦੇਸ਼ ਦਾ ਮਾਣ ਹੈ, ਇਸੇ ਲਈ ਤਾਂ ਉਸ ਨੂੰ ਲਿਮਕਾ ਬੁੱਕ ਆਫ ਵਰਲਡ ਰਿਕਾਰਡ ਵਿਚ ਨਾਂਅ ਸ਼ਾਮਿਲ ਹੋਣ ਦਾ ਮਾਣ ਹਾਸਲ ਹੈ ਅਤੇ ਉਸ ਨੇ ਵਿਸ਼ਵ ਪੱਧਰ ਦੇ ਮੁਕਾਬਲਿਆਂ ਵਿਚ ਹਿੱਸਾ ਲੈ ਕੇ ਇਹ ਸਾਬਤ ਕਰ ਦਿੱਤਾ ਹੈ ਕਿ ਹੌਸਲੇ ਬੁਲੰਦ ਹੋਣ ਤਾਂ ਮੰਜ਼ਿਲਾਂ ਪਾਉਣ ਤੋਂ ਰੋਕਿਆ ਨਹੀਂ ਜਾ ਸਕਦਾ। ਆਦਿਲ ਅੰਸਾਰੀ ਮੁੰਬਈ ਦੇ ਥਾਣਾ ਜ਼ਿਲ੍ਹੇ ਦੇ ਕਸਬਾ ਭਿਵੰਡੀ ਦਾ ਜੰਮਪਲ ਹੈ ਅਤੇ ਸਾਲ 2002 ਵਿਚ ਉਹ ਆਪਣੇ ਦੋਸਤਾਂ ਨਾਲ ਆਪਣੇ ਸ਼ਹਿਰ ਦੇ ਨਾਲ ਲਗਦੀ ਨਦੀ ਵਿਚ ਤੈਰਨ ਲਈ ਗਿਆ ਸੀ ਅਤੇ ਜਦ ਉਹ ਗੋਤਾ ਲਗਾਉਣ ਲਈ ਨਦੀ ਦੇ ਅੰਦਰ ਗਿਆ ਤਾਂ ਉਸ ਦਾ ਸਿਰ ਇਕ ਪੱਥਰ ਨਾਲ ਟਕਰਾ ਗਿਆ ਅਤੇ ਉਹ ਬੇਹੋਸ਼ੀ ਦੀ ਹਾਲਤ ਵਿਚ ਚਲਾ ਗਿਆ। ਉਸ ਨੂੰ ਡਾਕਟਰ ਦੇ ਕੋਲ ਲਿਜਾਇਆ ਗਿਆ, ਜਿਥੇ ਡਾਕਟਰਾਂ ਨੇ ਉਸ ਦੀ ਰੀੜ੍ਹ ਦੀ ਹੱਡੀ ਵਿਚ ਸੱਟ ਲੱਗਣ ਦੀ ਪੁਸ਼ਟੀ ਕਰ ਦਿੱਤੀ, ਜਿਸ ਦਾ ਕੋਈ ਇਲਾਜ ਨਹੀਂ ਸੀ ਅਤੇ ਆਦਿਲ ਅੰਸਾਰੀ ਦਾ ਹੇਠਲਾ ਹਿੱਸਾ ਸੁੰਨ ਹੋ ਗਿਆ ਅਤੇ ਆਦਿਲ ਸਾਰੀ ਉਮਰ ਲਈ ਵੀਲ੍ਹਚੇਅਰ ਦੇ ਸਹਾਰੇ ਤੁਰਨ ਲਈ ਮਜਬੂਰ ਹੋ ਗਿਆ।
ਅਦਿਲ ਅੰਸਾਰੀ ਨੂੰ ਰੰਗਲਾ ਸੰਸਾਰ ਇਕ ਵਾਰ ਧੁੰਦਲਾ ਹੁੰਦਾ ਜਾਪਿਆ ਪਰ ਕੁਦਰਤ ਦਾ ਭਾਣਾ ਮੰਨ ਕੇ ਉਸ ਨੇ ਇਹ ਸਵੀਕਾਰ ਕਰ ਲਿਆ ਅਤੇ ਵੀਲ੍ਹਚੇਅਰ 'ਤੇ ਬੈਠ ਹੀ ਆਪਣਾ ਭਵਿੱਖ ਤਲਾਸ਼ਣ ਲੱਗਿਆ। ਆਦਿਲ ਨੇ ਸੋਚਿਆ ਕਿ ਕੁਝ ਅਜਿਹਾ ਕੀਤਾ ਜਾਵੇ ਕਿ ਲੋਕ ਉਸ ਨੂੰ ਅਪਾਹਜ ਨਹੀਂ, ਸਗੋਂ ਜਾਂਬਾਜ਼ ਕਹਿਣ। ਆਦਿਲ ਅੰਸਾਰੀ ਨੇ ਅਪਾਹਜ ਹੋਣ ਦੇ ਬਾਵਜੂਦ ਡਰਾਈਵਿੰਗ ਯਾਨਿ ਕਾਰ ਚਲਾਉਣੀ ਸਿੱਖ ਲਈ ਅਤੇ 90 ਫੀਸਦੀ ਅਪਾਹਜ ਹੋਣ ਦੇ ਬਾਵਜੂਦ ਉਸ ਨੇ ਕਾਰ ਦੀ ਰੇਸ ਲਗਾਉਣ ਦੀ ਠਾਣ ਲਈ ਅਤੇ 29 ਜਨਵਰੀ, 2015 ਨੂੰ ਮੁੰਬਈ ਦੇ ਸਾਂਤਾਕਰੁਜ਼ ਡੋਮੈਸਟਿਕ ਏਅਰਪੋਰਟ ਤੋਂ ਕਾਰ ਦੌੜਾਈ ਅਤੇ ਮੁੰਬਈ ਤੋਂ ਦਿੱਲੀ, ਕਲਕੱਤਾ, ਚੇਨਈ ਹੁੰਦਾ ਹੋਇਆ ਉਹ 7 ਦਿਨਾਂ ਵਿਚ 6000 ਕਿਲੋਮੀਟਰ ਦਾ ਸਫ਼ਰ ਤੈਅ ਕਰਕੇ ਜਦ ਮੁੰਬਈ ਵਾਪਸ ਪਰਤਿਆ ਤਾਂ ਉਸ ਦੇ ਜਜ਼ਬੇ ਨੂੰ ਪੂਰੀ ਮੁੰਬਈ ਨੇ ਸਲਾਮ ਕੀਤਾ ਅਤੇ ਉਸ ਨੇ ਲਿਮਕਾ ਬੁੱਕ ਆਫ ਵਰਲਡ ਰਿਕਾਰਡ ਵਿਚ ਆਪਣਾ ਨਾਂਅ ਦਰਜ ਕਰਵਾ ਕੇ ਸਭ ਨੂੰ ਹੈਰਾਨ ਕਰ ਦਿੱਤਾ। ਆਦਿਲ ਨੇ 3 ਦਸੰਬਰ, 2013 ਵਿਚ ਹੀ ਐਕਟਿਵਾ ਸਕੂਟਰੀ ਨੂੰ ਮੋਡੀਫਾਈ ਕਰਕੇ ਡਰਾਈਵਿੰਗ ਸ਼ੁਰੂ ਕਰ ਦਿੱਤੀ ਸੀ ਅਤੇ ਅੱਜ ਉਸ ਦੇ ਨਾਂਅ ਕਈ ਵੱਡੇ ਰਿਕਾਰਡ ਬੋਲਦੇ ਹਨ। ਇਥੇ ਹੀ ਬਸ ਨਹੀਂ, ਆਦਿਲ ਅੰਸਾਰੀ ਇਕ ਵੱਡਾ ਤੀਰਅੰਦਾਜ਼ ਵੀ ਹੈ। ਸਾਲ 2016 ਵਿਚ ਹਰਿਆਣਾ ਦੇ ਸ਼ਹਿਰ ਰੋਹਤਕ ਵਿਖੇ ਹੋਈ ਪੈਰਾ ਨੈਸ਼ਨਲ ਆਰਚਰੀ ਚੈਂਪੀਅਨਸ਼ਿਪ ਵਿਚ ਹਿੱਸਾ ਲਿਆ, ਜਿਥੇ ਉਸ ਨੇ ਸੋਨ ਤਗਮਾ ਆਪਣੇ ਨਾਂਅ ਕਰਕੇ ਕਾਰ ਰੇਸਰ ਹੋਣ ਦੇ ਨਾਲ-ਨਾਲ ਇਕ ਸਫਲ ਤੀਰਅੰਦਾਜ਼ ਹੋਣ ਦਾ ਰਿਕਾਰਡ ਵੀ ਆਪਣੇ ਨਾਂਅ ਕਰ ਲਿਆ।
ਸਾਲ 2017 ਵਿਚ ਹੀ ਇਕ ਵਾਰ ਫਿਰ ਰੋਹਤਕ ਵਿਖੇ ਨੈਸ਼ਨਲ ਪੈਰਾ ਆਰਚਰੀ ਚੈਂਪੀਅਨਸ਼ਿਪ ਵਿਚ ਭਾਗ ਲਿਆ ਅਤੇ ਸੋਨ ਤਗਮਾ ਜਿੱਤ ਕੇ ਚੈਂਪੀਅਨ ਬਣਿਆ ਅਤੇ ਹਰਿਆਣਾ ਵਿਖੇ ਹੀ ਸਾਲ 2018 ਵਿਚ ਤੀਸਰੀ ਆਰਚਰੀ ਚੈਂਪੀਅਨਸ਼ਿਪ ਵਿਚ ਤੀਰਅੰਦਾਜ਼ੀ ਕਰਕੇ 2 ਸੋਨ ਤਗਮੇ ਜਿੱਤ ਕੇ ਤੀਜੀ ਵਾਰ ਚੈਂਪੀਅਨ ਬਣਿਆ। ਸਾਲ 2017 ਵਿਚ ਚੀਨ ਦੀ ਰਾਜਧਾਨੀ ਬੀਜਿੰਗ ਵਿਖੇ ਵਰਲਡ ਪੈਰਾ ਆਰਚਰੀ ਚੈਂਪੀਅਨਸ਼ਿਪ ਵਿਚ ਭਾਰਤ ਦੀ ਪ੍ਰਤੀਨਿਧਤਾ ਕੀਤੀ। ਸਾਲ 2018 ਵਿਚ ਵਰਲਡ ਪੈਰਾ ਆਰਚਰੀ ਰੈਂਕਿੰਗ ਟੂਰਨਾਮੈਂਟ ਵਿਚ ਵੀ ਭਾਰਤ ਵਲੋਂ ਹਿੱਸਾ ਲਿਆ ਅਤੇ ਸਾਲ 2019 ਵਿਚ ਦੁਬਈ ਵਿਚ ਫਾਜਾ ਪੈਰਾ ਆਰਚਰੀ ਟੂਰਨਾਮੈਂਟ ਅਤੇ ਨੀਦਰਲੈਂਡ ਵਿਚ ਵੀ ਵਰਲਡ ਪੈਰਾ ਆਰਚਰੀ ਚੈਂਪੀਅਨਸ਼ਿਪ ਵਿਚ ਵੀ ਉਸ ਨੇ ਭਾਗ ਲਿਆ ਅਤੇ ਤਗਮੇ ਜਿੱਤ ਕੇ ਭਾਰਤ ਦੀ ਸ਼ਾਨ ਉੱਚੀ ਕੀਤੀ। ਆਦਿਲ ਅੰਸਾਰੀ ਦਾ ਸਫ਼ਰ ਅਤੇ ਪ੍ਰਾਪਤੀਆਂ ਲਗਾਤਾਰ ਜਾਰੀ ਹਨ ਅਤੇ ਉਸ ਦਾ ਸੁਪਨਾ ਹੈ ਕਿ ਉਹ ਭਾਰਤ ਦੀ ਪ੍ਰਤੀਨਿਧਤਾ ਕਰਦਾ ਹੋਇਆ ਉਲੰਪਿਕ ਵਿਚ ਸੋਨ ਤਗਮਾ ਲੈ ਕੇ ਆਵੇ। ਆਦਿਲ ਅੰਸਾਰੀ ਦੀਆਂ ਪ੍ਰਾਪਤੀਆਂ ਤੋਂ ਖੁਸ਼ ਹੋ ਕੇ ਸਾਲ 2017-2018 ਵਿਚ ਮਹਾਰਾਸ਼ਟਰ ਸਰਕਾਰ ਨੇ ਆਦਿਲ ਅੰਸਾਰੀ ਨੂੰ ਸਟੇਟ ਪੁਰਸਕਾਰ ਏਕਲਵਿਆ ਰਾਜ ਪੁਰਸਕਾਰ ਦੇ ਨਾਲ ਸਨਮਾਨਿਤ ਕੀਤਾ। ਆਦਿਲ ਅੰਸਾਰੀ ਆਖਦਾ ਹੈ ਕਿ, 'ਅਪਾਹਜ ਹੋਨੇ ਕੇ ਬਾਅਦ ਜ਼ਿੰਦਗੀ ਰੁਕ ਨਹੀਂ ਜਾਤੀ, ਹੌਸਲੇ ਸੇ ਚਲੋਗੇ ਤੋ ਮੰਜ਼ਿਲੇਂ ਛੁਪ ਨਹੀਂ ਜਾਤੀ।'


-ਪਿੰਡ ਬੁੱਕਣ ਵਾਲਾ, ਤਹਿ: ਤੇ ਜ਼ਿਲ੍ਹਾ ਮੋਗਾ। ਮੋਬਾ: 98551-14484

ਭਾਰਤੀ ਤੀਰਅੰਦਾਜ਼ੀ ਦਾ ਨਵਾਂ ਹਸਤਾਖ਼ਰ ਵਿਨਾਇਕ ਵਰਮਾ

ਸਰਕਾਰੀ ਕੋ-ਐਡ ਮਲਟੀਪਰਪਜ਼ ਸੀਨੀਅਰ ਸੈਕੰਡਰੀ ਸਕੂਲ, ਪਾਸੀ ਰੋਡ, ਪਟਿਆਲਾ ਵਿਖੇ 11ਵੀਂ ਜਮਾਤ 'ਚ ਪੜ੍ਹ ਰਿਹਾ ਤੀਰਅੰਦਾਜ਼ ਵਿਨਾਇਕ ਵਰਮਾ ਜਿਸ ਅੰਦਾਜ਼ 'ਚ ਆਪਣੀਆਂ ਖੇਡ ਪ੍ਰਾਪਤੀਆਂ ਦਾ ਗ੍ਰਾਫ ਦਿਨੋ-ਦਿਨ ਉੱਪਰ ਲਿਜਾ ਰਿਹਾ ਹੈ, ਨਗਰ ਨਿਗਮ ਪਟਿਆਲਾ ਦੇ ਮੁਲਾਜ਼ਮ ਵਿਸ਼ਾਲ ਵਰਮਾ ਤੇ ਸ੍ਰੀਮਤੀ ਮੁਨੀਸ਼ਾ ਵਰਮਾ ਦੇ ਘਰ 25 ਜੁਲਾਈ, 2003 ਨੂੰ ਜਨਮੇ ਵਿਨਾਇਕ ਵਰਮਾ ਨੇ 9 ਸਾਲ ਦੀ ਉਮਰ 'ਚ ਐਨ.ਆਈ.ਐਸ. ਪਟਿਆਲਾ ਦੇ ਕੋਚ ਵਿਕਾਸ ਸ਼ਾਸਤਰੀ ਤੋਂ ਤੀਰਅੰਦਾਜ਼ੀ ਦੀ ਸਿਖਲਾਈ ਲੈਣੀ ਸ਼ੁਰੂ ਕੀਤੀ। ਉਸ ਨੇ ਪਹਿਲੀ ਵਾਰ ਕੌਮੀ ਸਕੂਲ ਖੇਡਾਂ ਦੇ ਅੰਡਰ-14 ਵਰਗ (ਰਿਕਰਵ) 'ਚ ਇੰਦੌਰ ਵਿਖੇ ਚਾਂਦੀ ਦਾ ਤਗਮਾ ਜਿੱਤਿਆ। ਵਿਨਾਇਕ ਦੇ ਦਾਦਾ ਸ੍ਰੀ ਰਾਮ ਪ੍ਰਕਾਸ਼ ਤੇ ਮਾਤਾ-ਪਿਤਾ ਨੇ ਉਕਤ ਪ੍ਰਾਪਤੀਆਂ ਨੂੰ ਦੇਖਦੇ ਹੋਏ, ਆਪਣੇ ਬੇਟੇ ਦੀ ਖੇਡ ਨੂੰ ਪੂਰੀ ਗੰਭੀਰਤਾ ਨਾਲ ਲੈਂਦਿਆਂ ਉਸ ਨੂੰ ਹਰ ਸੰਭਵ ਸਹੂਲਤ ਪ੍ਰਦਾਨ ਕੀਤੀ। ਪਿਛਲੇ 3 ਸਾਲ ਤੋਂ ਕੋਚ ਗੌਰਵ ਸ਼ਰਮਾ ਤੋਂ ਸਿਖਲਾਈ ਲੈ ਰਹੇ ਵਿਨਾਇਕ ਨੇ ਅੰਡਰ-17 (ਰਿਕਰਵ) ਤਹਿਤ ਕੌਮੀ ਸਕੂਲ ਖੇਡਾਂ ਜਗਦਲਪੁਰ (ਛਤੀਸਗੜ੍ਹ) ਵਿਖੇ ਵਿਅਕਤੀਗਤ ਤੇ ਟੀਮ ਮੁਕਾਬਲਿਆਂ 'ਚੋਂ ਪਹਿਲੀ ਵਾਰ ਸੋਨ ਤਗਮੇ ਜਿੱਤੇ। ਫਿਰ ਉਸ ਨੇ ਰਾਂਚੀ (ਝਾਰਖੰਡ) ਵਿਖੇ ਹੋਈਆਂ ਕੌਮੀ ਸਕੂਲ ਖੇਡਾਂ 'ਚੋਂ ਵੀ 2 ਸੋਨ ਤਗਮੇ ਜਿੱਤੇ।
ਪਿਛਲੇ ਵਰ੍ਹੇ ਵਿਨਾਇਕ ਨੇ ਖੇਲੋ ਇੰਡੀਆ ਖੇਡਾਂ 'ਚੋਂ ਸੋਨ ਤਗਮਾ ਜਿੱਤਣ ਦੇ ਨਾਲ ਅੰਡਰ-17 ਵਰਗ 'ਚ ਨਵਾਂ ਕੌਮੀ ਕੀਰਤੀਮਾਨ (676/720) ਸਿਰਜਿਆ, ਜੋ ਅੱਜ ਵੀ ਕਾਇਮ ਹੈ। ਜਿਸ ਸਦਕਾ ਵਿਨਾਇਕ ਦੇਸ਼ ਦਾ ਸਰਬੋਤਮ ਤੀਰਅੰਦਾਜ਼ ਚੁਣਿਆ ਗਿਆ। ਪਿਛਲੇ ਵਰ੍ਹੇ ਵਿਨਾਇਕ ਨੇ ਬੰਗਲਾਦੇਸ਼ ਵਿਖੇ ਹੋਈ ਦੱਖਣੀ ਏਸ਼ੀਆ ਤੀਰਅੰਦਾਜ਼ੀ ਚੈਂਪੀਅਨਸ਼ਿਪ 'ਚੋਂ ਚਾਂਦੀ ਦਾ ਅਤੇ ਮੁੰਬਈ ਦੇ ਅਜਮੇਰ ਆਈਲੈਂਡ ਵਿਖੇ ਹੋਏ ਕੌਮਾਂਤਰੀ ਟੂਰਨਾਮੈਂਟ 'ਚੋਂ ਸੋਨ ਤਗਮਾ ਜਿੱਤ ਕੇ, ਆਪਣਾ ਕੌਮਾਂਤਰੀ ਸਫਰ ਸ਼ੁਰੂ ਕੀਤਾ। ਇਨ੍ਹਾਂ ਪ੍ਰਾਪਤੀਆਂ ਸਦਕਾ ਵਿਨਾਇਕ ਵਰਮਾ ਨੂੰ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਰਾਜ ਪੱਧਰੀ ਪੁਰਸਕਾਰ ਨਾਲ ਅਤੇ ਉਸ ਦੇ ਸਰਕਾਰੀ ਕੋ-ਐਡ ਮਲਟੀਪਰਪਜ਼ ਸੈਕੰਡਰੀ ਸਕੂਲ ਪਟਿਆਲਾ ਵਲੋਂ ਪ੍ਰਿੰ: ਤੋਤਾ ਸਿੰਘ ਚਹਿਲ ਦੀ ਅਗਵਾਈ 'ਚ ਨਕਦ ਰਾਸ਼ੀ ਨਾਲ ਸਨਮਾਨਿਤ ਕੀਤਾ ਗਿਆ। ਵਿਨਾਇਕ ਵਰਮਾ ਦੀ ਹਾਲ ਹੀ ਵਿੱਚ ਵਿਸ਼ਵ ਯੂਥ ਤੀਰਅੰਦਾਜ਼ੀ ਚੈਂਪੀਅਨਸ਼ਿਪ ਮੈਡਰਿਡ (ਸਪੇਨ) ਲਈ ਚੋਣ ਭਾਰਤੀ ਟੀਮ 'ਚ ਚੋਣ ਹੋਈ ਹੈ, ਜੋ 16 ਅਗਸਤ ਤੋਂ ਆਰੰਭ ਹੋਣੀ ਹੈ।


-ਡਾ: ਸੁਖਦਰਸ਼ਨ ਸਿੰਘ ਚਹਿਲ
ਪਟਿਆਲਾ। ਮੋਬਾ: 9779590575

ਖੇਡ ਪ੍ਰਬੰਧਕ ਦੂਰਦ੍ਰਿਸ਼ਟੀ ਵਾਲੇ ਹੋਣ

ਖੇਡਾਂ ਦੀ ਦੁਨੀਆ 'ਚ ਵਿਚਰਨ ਵਾਲਾ ਆਦਮੀ ਅਕਸਰ ਇਸ ਜਗਤ ਦੇ ਵੱਖ-ਵੱਖ ਪੱਖਾਂ, ਵੱਖ-ਵੱਖ ਪਾਸਾਰਾਂ ਨੂੰ ਆਲੋਚਨਾਤਮਕ ਦ੍ਰਿਸ਼ਟੀ ਤੋਂ ਦੇਖਦਾ ਰਹਿੰਦਾ ਹੈ ਤੇ ਵਿਚਾਰਦਾ ਵੀ ਹੈ। ਸਾਡੀ ਜਾਚੇ ਖੇਡ ਜਗਤ 'ਚ ਜਦੋਂ ਅਸੀਂ ਸੁਧਾਰ ਲਿਆਉਣ ਦੀ ਗੱਲ ਕਰਦੇ ਹਾਂ ਤਾਂ ਇਕ ਵੱਡਾ ਮੁੱਦਾ ਜੋ ਸਾਡੇ ਰੂਬਰੂ ਆਉਂਦਾ ਹੈ, ਉਹ ਹੈ ਚੰਗੇ ਖੇਡ ਪ੍ਰਬੰਧਕਾਂ ਦੀ ਘਾਟ। ਇਹ ਉਹ ਕਮੀ ਹੈ, ਜੋ ਚੰਗੀਆਂ ਸਹੂਲਤਾਂ ਹੋਣ ਦੇ ਬਾਵਜੂਦ ਖੇਡਾਂ ਦੇ ਸਹੀ ਵਿਕਾਸ ਦੇ ਰਾਹ 'ਚ ਰੁਕਾਵਟ ਹੈ। ਜਦੋਂ ਅਸੀਂ ਪ੍ਰਬੰਧਕ ਦੀ ਗੱਲ ਕਰਦੇ ਹਾਂ ਤਾਂ ਸਾਡੀ ਮੁਰਾਦ ਸਕੂਲਾਂ-ਕਾਲਜਾਂ ਦੇ ਖੇਡ ਵਿਭਾਗ, ਖੇਡ ਕਲੱਬ, ਖੇਡ ਅਕੈਡਮੀਆਂ ਜ਼ਿਲ੍ਹਾ, ਰਾਜ ਪੱਧਰ ਅਤੇ ਰਾਸ਼ਟਰੀ ਪੱਧਰ 'ਤੇ ਖੇਡਾਂ ਨੂੰ ਚਲਾਉਣ ਵਾਲੀਆਂ ਸਾਰੀਆਂ ਸੰਸਥਾਵਾਂ ਤੋਂ ਹੈ। ਸਾਨੂੰ ਇਨ੍ਹਾਂ ਸਭਨਾਂ ਖੇਡ ਇਕਾਈਆਂ 'ਚ ਕੁਝ ਕਮੀਆਂ ਨਜ਼ਰ ਆਉਂਦੀਆਂ ਹਨ। ਇਥੋਂ ਤੱਕ ਕਿ ਵੱਖ-ਵੱਖ ਖੇਡਾਂ ਦੇ ਟੂਰਨਾਮੈਂਟ ਆਯੋਜਕਾਂ ਦਾ ਸ਼ੁਮਾਰ ਵੀ ਅਸੀਂ ਖੇਡ ਪ੍ਰਬੰਧਕਾਂ 'ਚ ਹੀ ਕਰਦੇ ਹਾਂ।
ਸਾਡੇ ਖੇਡ ਪ੍ਰਬੰਧਕ ਜਦ ਤੱਕ ਖੇਡਾਂ ਨੂੰ ਸਮਰਪਿਤ ਨਹੀਂ ਹੁੰਦੇ, ਤਦ ਤੱਕ ਉਨ੍ਹਾਂ ਦੇ ਮਾਰਗ ਦਰਸ਼ਨ 'ਚ ਚੱਲ ਰਹੀ ਖੇਡ ਸੰਸਥਾ ਤੋਂ ਚੰਗੇ ਨਤੀਜਿਆਂ ਦੀ ਆਸ ਨਹੀਂ ਰੱਖੀ ਜਾ ਸਕਦੀ। ਉਨ੍ਹਾਂ ਪ੍ਰਬੰਧਕਾਂ ਨੂੰ ਆਪਣੇ ਨਿੱਜੀ ਹਿਤ ਜ਼ਿਆਦਾ ਪਿਆਰੇ ਹੁੰਦੇ ਹਨ। ਚੌਧਰ ਦੀ ਭੁੱਖ ਅਤੇ ਕੁਰਸੀ ਦਾ ਮੋਹ ਉਨ੍ਹਾਂ ਨੂੰ ਪ੍ਰਤਿਭਾਸ਼ਾਲੀ ਖਿਡਾਰੀਆਂ ਨਾਲ ਕਦੇ ਇਨਸਾਫ਼ ਨਹੀਂ ਕਰਨ ਦਿੰਦਾ। ਉਹ ਇਹ ਭੁੱਲ ਜਾਂਦੇ ਹਨ ਕਿ ਉਨ੍ਹਾਂ ਨੂੰ ਜੋ ਚੌਧਰ ਅਤੇ ਕੁਰਸੀ ਮਿਲੀ ਹੈ, ਉਸ ਦਾ ਕਾਰਨ ਖਿਡਾਰੀ ਹਨ, ਖਿਡਾਰੀਆਂ ਦੀਆਂ ਕੀ ਜ਼ਰੂਰਤਾਂ ਹਨ, ਕੀ-ਕੀ ਸਮੱਸਿਆਵਾਂ ਹਨ, ਖਿਡਾਰੀ ਆਪਣੀ ਖੇਡ 'ਚ ਕਿਵੇਂ ਅੱਗੇ ਵਧ ਸਕਦੇ ਹਨ। ਖੇਡ ਪ੍ਰਬੰਧਕਾਂ ਨੂੰ ਇਸ ਗੱਲ ਦਾ ਕੋਈ ਇਲਮ ਨਹੀਂ ਹੁੰਦਾ। ਵੱਡੇ-ਵੱਡੇ ਖੇਡ ਪ੍ਰਬੰਧਕ ਸਿਰਫ ਨਾਂਅ ਦੇ ਹੀ ਉਸ ਖੇਡ ਸੰਸਥਾ ਦੇ ਮੁਖੀ ਹੁੰਦੇ ਹਨ, ਕੰਮ ਉਨ੍ਹਾਂ ਦਾ ਕੋਈ ਹੋਰ ਬੰਦੇ ਚਲਾ ਰਹੇ ਹੁੰਦੇ ਹਨ, ਜਿਨ੍ਹਾਂ ਦੇ ਆਪਣੇ ਨਿੱਜੀ ਹਿਤ ਵੀ ਹੁੰਦੇ ਹਨ।
ਖਿਡਾਰੀਆਂ ਲਈ ਚੰਗੇ ਮੈਦਾਨ ਪੈਦਾ ਕਰਨੇ, ਖੇਡ ਵਿੰਗਾਂ ਦੀ ਰਕਮ ਨੂੰ ਸਹੀ ਇਸਤੇਮਾਲ ਕਰਨਾ, ਪ੍ਰਦਰਸ਼ਨੀ ਮੈਚਾਂ ਦਾ ਆਯੋਜਨ ਕਰਵਾਉਣਾ, ਖੇਡ ਟੂਰਨਾਮੈਂਟਾਂ ਨੂੰ ਸਹੀ ਤਰੀਕੇ ਨਾਲ ਆਯੋਜਿਤ ਕਰਵਾਉਣਾ, ਖੇਡ ਪ੍ਰੇਮੀਆਂ ਦਾ ਭਰਵਾਂ ਇਕੱਠ ਕਰਨਾ, ਨੌਜਵਾਨ ਪੀੜ੍ਹੀ ਦੀ ਸ਼ਮੂਲੀਅਤ ਯਕੀਨੀ ਬਣਾਉਣੀ, ਖਿਡਾਰੀਆਂ ਦੀ ਪੜ੍ਹਾਈ ਦਾ ਵੀ ਉਚਿਤ ਧਿਆਨ ਰੱਖਣਾ, ਉਨ੍ਹਾਂ ਦੀ ਸ਼ਖ਼ਸੀਅਤ ਬਹੁਪੱਖੀ ਬਣਾਉਣੀ, ਉਨ੍ਹਾਂ ਲਈ ਉਚਿਤ ਮੈਡੀਕਲ ਸਹੂਲਤਾਂ ਦਾ ਇੰਤਜ਼ਾਮ ਕਰਨਾ, ਇਨ੍ਹਾਂ ਸਾਰੇ ਪੱਖਾਂ ਦੀ ਇਨ੍ਹਾਂ ਖੇਡ ਸੰਸਥਾਵਾਂ 'ਚ ਕਮੀ ਹੁੰਦੀ ਹੈ।
ਸਾਡੀਆਂ ਕੌਮੀ ਖੇਡ ਸੰਸਥਾਵਾਂ ਵੀ ਜਿਸ ਖੇਡ ਲਈ ਹੋਂਦ 'ਚ ਆਈਆਂ ਹੁੰਦੀਆਂ ਹਨ, ਉਸ ਖੇਡ ਦਾ ਮੁਕੰਮਲ ਵਿਕਾਸ ਨਹੀਂ ਕਰ ਪਾਉਂਦੀਆਂ। ਇਨ੍ਹਾਂ ਖੇਡ ਸੰਸਥਾਵਾਂ ਦੇ ਚੌਧਰੀ ਵੱਡੇ-ਵੱਡੇ ਐਲਾਨ ਕਰਦੇ ਹਨ ਕਿ ਉਹ ਲੱਖਾਂ ਰੁਪਏ ਭੁਚਾਲ ਪੀੜਤਾਂ ਅਤੇ ਹੜ੍ਹ ਪੀੜਤਾਂ ਨੂੰ ਭੇਜ ਰਹੇ ਹਨ ਪਰ ਸਹੀ ਮਾਅਨਿਆਂ 'ਚ ਜਿਸ ਖੇਡ ਦੇ ਵਿਕਾਸ ਲਈ ਉਹ ਬਣੀਆਂ ਹਨ, ਉਸ ਖੇਡ 'ਚ ਸਹੂਲਤਾਂ ਤੇ ਚੰਗੇ ਤਾਣੇ-ਬਾਣੇ ਦਾ ਜੋ ਸੋਕਾ ਪਿਆ ਹੈ, ਉਹ ਇਨ੍ਹਾਂ ਚੌਧਰੀਆਂ ਨੂੰ ਨਹੀਂ ਦਿਸਦਾ, ਕਿਉਂਕਿ ਉਨ੍ਹਾਂ ਦੀ ਦ੍ਰਿਸ਼ਟੀ ਦੂਰਦਰਸ਼ੀ ਨਹੀਂ ਹੁੰਦੀ। ਉਨ੍ਹਾਂ ਦੇ ਕੁਰਸੀ ਸੰਭਾਲਣ ਤੋਂ ਲੈ ਕੇ ਕੁਰਸੀ ਛੱਡਣ ਤੱਕ, ਉਹ ਖੇਡ ਉਥੇ ਹੀ ਖੜ੍ਹੀ ਰਹਿੰਦੀ ਹੈ। ਕੁਝ ਸਾਲ ਆਪਣੀ ਚੌਧਰ ਦਿਖਾ ਕੇ, ਕੁਝ ਸਮਾਜ ਸੁਧਾਰ ਸੰਸਥਾਵਾਂ ਵਲੋਂ ਕੰਮ ਕਰਕੇ ਉਹ ਤੁਰਦੇ ਬਣ ਗਏ। ਖੇਡ ਅਤੇ ਖਿਡਾਰੀਆਂ ਦਾ ਕੁਝ ਨਾ ਸੰਵਾਰਿਆ। ਸਾਡੀ ਮੁਰਾਦ ਹੈ, ਜੋ ਵੀ ਖੇਡ ਸੰਸਥਾ ਹੈ, ਚਾਹੇ ਉਹ ਕਿਸੇ ਵੀ ਰੂਪ 'ਚ ਹੋਵੇ, ਕਿਸੇ ਵੀ ਪੱਧਰ ਦੀ ਹੋਵੇ, ਉਸ ਨੂੰ ਆਪਣੀ ਖੇਡ ਪ੍ਰਤੀ ਸਮਰਪਿਤ ਹੋਣ ਦੀ ਲੋੜ ਹੈ, ਉਹ ਜਾਂ ਤਾਂ ਧਾਰਮਿਕ ਸੰਸਥਾਵਾਂ ਵਾਲੇ ਕੰਮ ਕਰ ਰਹੀਆਂ ਹੁੰਦੀਆਂ ਹਨ ਜਾਂ ਸਮਾਜ ਸੇਵੀ ਸੰਸਥਾਵਾਂ ਵਾਲੇ। ਖੇਡ ਦੀ ਲੋਕਪ੍ਰਿਅਤਾ ਵਧਾਉਣੀ, ਖੇਡ ਨੂੰ ਮਾਰਕੀਟਿੰਗ ਕਰਨ ਦੀ ਕੋਈ ਨੀਤੀ ਬਣਾਉਣੀ, ਆਉਣ ਵਾਲੀ ਪੀੜ੍ਹੀ ਨੂੰ ਉਸ ਖੇਡ ਨਾਲ ਜੋੜਨ ਦੇ ਉਪਰਾਲੇ ਕਰਨ ਲਈ ਚੰਗੀ ਸੂਝ-ਬੂਝ ਦੀ ਲੋੜ ਹੁੰਦੀ ਹੈ ਜੋ ਕਿ ਸਾਡੀਆਂ ਖੇਡ ਸੰਸਥਾਵਾਂ ਦੇ ਮੁਖੀਆਂ ਕੋਲ ਨਹੀਂ ਹੁੰਦੀ। ਖੇਡ ਜਗਤ ਦੇ ਭਲੇ ਲਈ ਜ਼ਰੂਰੀ ਹੈ ਕਿ ਵੱਖ-ਵੱਖ ਖੇਡ ਸੰਸਥਾਵਾਂ ਦੇ ਮੁਖੀ ਉਸ ਖੇਡ ਦੇ ਵਿਕਾਸ ਲਈ ਦੂਰਦ੍ਰਿਸ਼ਟੀ ਦੇ ਮਾਲਕ ਹੋਣ।


-ਡੀ. ਏ. ਵੀ. ਕਾਲਜ, ਅੰਮ੍ਰਿਤਸਰ।
ਫੋਨ : 98155-35410

2019 ਵਿਸ਼ਵ ਕੱਪ ਦੀਆਂ ਤਿੰਨ ਯਾਦਗਾਰ ਗੇਂਦਾਂ

ਕ੍ਰਿਕਟ ਦੇ ਇਤਿਹਾਸ ਵਿਚ ਅਨੇਕ ਸਟਾਈਲਿਸ਼ ਬੱਲੇਬਾਜ਼ ਹੋਏ ਹਨ-ਗੁੰਡੱਪਾ ਵਿਸ਼ਵਨਾਥ, ਜ਼ਹੀਰ ਅੱਬਾਸ, ਡੇਵਿਡ ਗਾਵਰ, ਐਲਵਿਨ ਕਾਲੀਚਰਨ ਅਤੇ ਹੁਣ ਵਿਰਾਟ ਕੋਹਲੀ, ਜਿਨ੍ਹਾਂ ਦੀ ਬੱਲੇਬਾਜ਼ੀ ਨੂੰ ਦੇਖਣ ਦਾ ਅਨੁਭਵ ਆਸ਼ਾ ਭੌਂਸਲੇ ਦੀ ਆਵਾਜ਼ ਵਿਚ ਖ਼ਿਆਮ ਦੇ ਸੰਗੀਤ 'ਤੇ ਸ਼ਹਿਰਯਾਰ ਦੀ ਗ਼ਜ਼ਲ ਸੁਣਨ ਵਰਗਾ ਹੁੰਦਾ ਹੈ, ਦੇਖਣਯੋਗ ਕਵਰ ਡਰਾਈਵ, ਕੋਮਲ ਲੈੱਗ ਗਲਾਸ ਜਾਂ ਫਿਰ ਸਿੱਧੇ ਟੈਕਸਟ-ਬੁੱਕ ਤੋਂ ਨਿਕਲਿਆ ਸਟ੍ਰੇਟ ਡ੍ਰਾਈਵ। ਪਰ ਇਨ੍ਹਾਂ ਬੱਲੇਬਾਜ਼ਾਂ ਦਾ ਵੀ ਕੋਈ 'ਸ਼ਾਟ' ਉਹ 'ਕਲਟ ਸਟੈੱਟਸ' ਨਹੀਂ ਰੱਖਦਾ ਜੋ ਕਿਸੇ ਗਾਇਕ ਦਾ ਏਕਲ ਗੀਤ ਰੱਖਦਾ ਹੈ, ਜਿਵੇਂ ਮੁਹੰਮਦ ਰਫ਼ੀ ਦਾ 'ਹਾਂ ਤੁਮ ਮੁਝੇ ਯੂੰ ਭੁਲਾ ਨਾ ਪਾਓਗੇ' ਜਾਂ ਫਿਰ ਲਤਾ ਮੰਗੇਸ਼ਕਰ ਦਾ 'ਏ ਮੇਰੇ ਵਤਨ ਕੇ ਲੋਗੋ, ਜ਼ਰਾ ਆਂਖ ਮੇਂ ਭਰ ਲੋ ਪਾਨੀ।'
ਪਰ ਇਹ ਗੱਲ ਗੇਂਦਬਾਜ਼ਾਂ 'ਤੇ ਲਾਗੂ ਨਹੀਂ ਹੁੰਦੀ ਹੈ। ਕ੍ਰਿਕਟ ਵਿਚ ਇਕ ਜਾਦੂਈ ਗੇਂਦ ਤੋਂ ਜ਼ਿਆਦਾ ਕੁਝ ਵੀ ਏਨਾ ਯਾਦਗਾਰ ਨਹੀਂ ਹੁੰਦਾ ਹੈ। ਹਾਲਾਂਕਿ ਕ੍ਰਿਕਟ ਦੇ ਜੋ ਛੋਟੇ ਫਾਰਮੈਟ (ਇਕ ਦਿਨਾ ਤੇ ਟੀ-20) ਹਨ। ਉਹ ਗੇਂਦਬਾਜ਼ਾਂ ਲਈ ਇਕ ਤਰ੍ਹਾਂ ਨਾਲ 'ਮੌਤ ਦਾ ਫਰਮਾਨ' ਹਨ (ਸਪਾਟ ਵਿਕੇਟ, ਗੇਂਦਾਂ ਤੇ ਖੇਤਰ ਰੱਖਿਅਕਾਂ 'ਤੇ ਪਾਬੰਦੀਆਂ, ਫ੍ਰੀ ਹਿੱਟ ਦੇ ਰੂਪ ਵਿਚ ਨੋ-ਬਾਲ ਦੀ ਸਜ਼ਾ ਆਦਿ) ਕਿਉਂਕਿ ਦਰਸ਼ਕ ਚੌਕੇ ਤੇ ਛੱਕੇ ਦੇਖਣਾ ਚਾਹੁੰਦੇ ਹਨ, ਪਰ ਇਨ੍ਹਾਂ ਹੱਦਾਂ ਦੇ ਬਾਵਜੂਦ ਗੇਂਦਬਾਜ਼ ਆਪਣੀ ਕਲਾ ਤੇ ਪ੍ਰਤਿਭਾ ਨਾਲ ਅਕਸਰ ਜਾਦੂ ਕਰ ਜਾਂਦੇ ਹਨ। ਇਸ ਲਈ ਕ੍ਰਿਕਟ ਵਿਚ 'ਬਾਲ ਆਫ਼ ਦ ਸੈਂਚੁਰੀ' (ਸ਼ੇਨ ਵਾਰਨ ਵਲੋਂ ਮਾਈਕ ਗੈਟਿੰਗ ਨੂੰ ਰਾਊਂਡ ਦ ਲੈੱਗਸ ਬੋਲਡ ਕਰਨਾ) ਤਾਂ ਹੈ, ਪਰ 'ਸ਼ਾਟ ਆਫ਼ ਦ ਸੈਂਚੁਰੀ' ਨਹੀਂ ਹੈ। ਇਸ ਤੋਂ ਇਲਾਵਾ ਵੀ ਬਹੁਤ ਸਾਰੀਆਂ ਗੇਂਦਾਂ ਹਨ ਜੋ ਯਾਦਗਾਰ ਬਣ ਗਈਆਂ ਹਨ, ਜਿਵੇਂ 1983 ਦੇ ਵਿਸ਼ਵ ਕੱਪ ਫਾਈਨਲ ਵਿਚ ਬਲਵਿੰਦਰ ਸਿੰਘ ਸੰਧੂ ਦੀ ਗੇਂਦ ਨੂੰ ਗੋਰਡਨ ਗ੍ਰੀਨਿਜ਼ ਵਲੋਂ ਛੱਡਣਾ ਅਤੇ ਫਿਰ ਬੋਲਡ ਹੋ ਜਾਣਾ ਜਾਂ ਫਿਰ 1985 ਵਿਚ ਚੈਂਪੀਅਨਜ਼ ਆਫ਼ ਚੈਂਪੀਅਨ ਟ੍ਰਾਫੀ ਦੇ ਫਾਈਨਲ ਵਿਚ ਕਪਿਲ ਦੇਵ ਵਲੋਂ ਕਾਸਿਮ ਉਮਰ ਨੂੰ ਸਵਿਨਿੰਗ ਯਾਰਕਰ ਨਾਲ ਬੋਲਡ ਕਰਨਾ।
ਇਸੇ ਤਰ੍ਹਾਂ ਇੰਗਲੈਂਡ ਤੇ ਵੇਲਸ ਵਿਚ ਇਸ ਸਮੇਂ ਖੇਡੇ ਜਾ ਰਹੇ ਵਿਸ਼ਵ ਕੱਪ ਵਿਚ ਤਿੰਨ ਇਸ ਤਰ੍ਹਾਂ ਦੀਆਂ ਗੇਂਦਾਂ ਸੁੱਟੀਆਂ ਗਈਆਂ ਹਨ ਜੋ ਹਮੇਸ਼ਾ ਲਈ ਯਾਦਗਾਰ ਬਣ ਗਈਆਂ ਹਨ। ਇਹ ਗੇਂਦਾਂ ਲਾਪ੍ਰਵਾਹ ਸੰਦਰਭ ਵਿਚ ਵੀ ਤੁਰੰਤ ਹੀ ਦਿਮਾਗ਼ੀ ਰੀਲ ਨੂੰ ਸਰਗਰਮ ਕਰ ਦਿੰਦੀਆਂ ਹਨ ਅਤੇ ਖੇਡ ਦਾ ਪੂਰਾ ਦ੍ਰਿਸ਼ ਅੱਖਾਂ ਸਾਹਮਣੇ ਆ ਜਾਂਦਾ ਹੈ। ਇਹ ਤਿੰਨ ਗੇਂਦਾਂ ਹਨ-ਮੁਹੰਮਦ ਸ਼ੰਮੀ ਦੀ ਅੰਦਰ ਆਉਂਦੀ ਹੋਈ ਗੇਂਦ ਜਿਸ ਨੇ ਸ਼ਾਈ ਹੋਪ ਨੂੰ ਬੋਲਡ ਕੀਤਾ, ਮਿਟਚੇਲ ਸਟਾਰਕ ਦੀ ਯੋਰਕਰ ਜਿਸ ਨੇ ਬੇਨ ਸਟੋਕਸ ਨੂੰ ਬੋਲਡ ਕੀਤਾ ਅਤੇ ਕੁਲਦੀਪ ਯਾਦਵ ਦੀ ਫਲੋਟਿੰਗ ਬਿਊਟੀ ਜਿਸ ਨੇ ਬਾਬਰ ਆਜ਼ਮ ਨੂੰ ਚਕਮਾ ਦਿੰਦੇ ਹੋਏ ਬੋਲਡ ਕੀਤਾ। ਇਨ੍ਹਾਂ ਤਿੰਨਾਂ ਗੇਂਦਾਂ ਵਿਚੋਂ ਸਭ ਤੋਂ ਚੰਗੀ ਕਿਹੜੀ ਸੀ? ਇਹ ਤੈਅ ਕਰਨਾ ਮੁਸ਼ਕਿਲ ਹੈ, ਇਸ ਲਈ ਇਨ੍ਹਾਂ ਨੂੰ ਕੋਈ ਲੜੀ ਨੰਬਰ ਨਹੀਂ ਦਿੱਤਾ ਗਿਆ ਹੈ। ਹਾਂ, ਏਨਾ ਤੈਅ ਹੈ ਕਿ ਤਿੰਨੇ ਹੀ ਹਮੇਸ਼ਾ ਯਾਦ ਕੀਤੀਆਂ ਜਾਣ ਵਾਲੀਆਂ ਯਾਦਗਾਰ ਗੇਂਦਾਂ ਹਨ।
ਦਰਅਸਲ, ਗੇਂਦ ਦੀ ਗੁਣਵਤਾ ਅਤੇ ਖੇਡ ਦੇ ਕਿਸ ਸੰਦਰਭ ਵਿਚ ਉਹ ਸੁੱਟੀ ਗਈ, ਇਹ ਦੋ ਗੱਲਾਂ ਤੈਅ ਕਰਦੀਆਂ ਹਨ ਕਿ ਉਸ ਗੇਂਦ ਨੂੰ ਕਿੰਨੇ ਲੰਮੇ ਸਮੇਂ ਤੱਕ ਯਾਦ ਕੀਤਾ ਜਾਵੇਗਾ। ਇਸ ਲਈ ਪਹਿਲਾਂ ਗੁਣਵੱਤਾ 'ਤੇ ਗੱਲ ਕਰਦੇ ਹਾਂ। ਸ਼ੰਮੀ ਦੀ ਗੇਂਦ ਅੰਦਰ ਸੀਮ ਹੋਣ ਤੋਂ ਪਹਿਲਾਂ ਹਵਾ ਵਿਚ ਘੁੰਮੀ। ਜ਼ਿਆਦਾ ਨਾਟਕੀ ਅੰਦਾਜ਼ ਵਿਚ ਸਟਾਰਕ ਨੇ ਕੋਣ ਦੇ ਨਾਲ ਗੇਂਦ ਨੂੰ ਬਾਹਰ ਘੁਮਾਇਆ ਅਤੇ ਫਿਰ ਉਹ ਜ਼ਿਆਦਾ ਘਾਤਕ ਅੰਦਾਜ਼ ਵਿਚ ਵਾਪਸ ਸਵਿੰਗ ਹੋਈ। ਜਿਥੋਂ ਤੱਕ ਕੁਲਦੀਪ ਦੀ ਗੱਲ ਹੈ ਤਾਂ ਉਨ੍ਹਾਂ ਦੀ ਫਲਾਈਟ ਕਰ ਰਹੀ ਗੇਂਦ ਪਹਿਲਾਂ ਬਾਹਰ ਨੂੰ ਡ੍ਰਿਫਟ ਹੋਈ ਅਤੇ ਫਿਰ ਵਾਪਸ ਸਟੰਪਸ ਵਿਚ ਮੁੜ ਗਈ। ਹੁਣ ਖੇਡ ਦੇ ਸੰਦਰਭ ਵਿਚ ਦੇਖਦੇ ਹਾਂ। ਭਾਰਤ ਸਿਰਫ਼ 268 ਦੌੜਾਂ ਦਾ ਬਚਾਅ ਕਰ ਰਿਹਾ ਸੀ ਅਤੇ ਇਹ ਕੋਈ ਵੱਡਾ ਸਕੋਰ ਨਹੀਂ ਸੀ ਜਦੋਂ ਟੀਮਾਂ 50 ਓਵਰ ਵਿਚ 300-350 ਦੇ ਟੀਚੇ ਨੂੰ ਵੀ ਸਫਲ਼ਤਾ ਨਾਲ ਮੁਕਾਬਲਾ ਕਰ ਰਹੀਆਂ ਹੋਣ।
ਇਸੇ ਤਰ੍ਹਾਂ ਸ਼ੰਮੀ ਨੇ ਵੈਸਟਇੰਡੀਜ਼ ਦੇ ਸ਼ਾਈ ਨੂੰ ਬੋਲਡ ਕੀਤਾ ਜੋ ਇਕ ਪਾਸੇ ਨੂੰ ਸੰਭਾਲਣ ਵਿਚ ਮਜ਼ਬੂਤ ਸੀ। ਸਟੋਕਸ ਇੰਗਲੈਂਡ ਨੂੰ ਸਫ਼ਲਤਾਪੂਰਨ ਸੰਕਟ ਤੋਂ ਉਭਾਰ ਰਹੇ ਸਨ ਕਿ ਉਦੋਂ ਸਟਾਰਕ ਦੀ ਬਿਜਲੀ ਚਮਕੀ। ਬਾਬਰ ਨੇ ਫ਼ਖ਼ਰ ਜਮਾਂ ਦੇ ਨਾਲ 104 ਦੌੜਾਂ ਦੀ ਸਾਂਝੇਦਾਰੀ ਕਰ ਲਈ ਸੀ ਉਦੋਂ ਕੁਲਦੀਪ ਨੇ ਆਪਣਾ ਜਲਵਾ ਦਿਖਾਇਆ। ਖੇਡ ਦਾ ਰੁਖ ਬਦਲਣ ਵਾਲੀਆਂ ਇਨ੍ਹਾਂ ਤਿੰਨ ਗੇਂਦਾਂ ਨੇ ਇਸ ਵਿਸ਼ਵ ਕੱਪ ਨੂੰ ਉਹ ਜੀਵਨ ਬਖ਼ਸ਼ਿਆ ਜਿਸ ਦੀ ਉਹ ਨਿਰਾਸ਼ਾ ਵਿਚ ਭਾਲ ਕਰ ਰਿਹਾ ਸੀ।
ਪਰ ਜਦੋਂ ਸ਼ੰਮੀ ਨੇ ਸਵਿੰਗ ਗੇਂਦ ਦੀ ਤਰ੍ਹਾਂ ਸੀਮ ਗੇਂਦ ਸੁੱਟ ਕੇ ਸ਼ਾਈ ਨੂੰ ਬੋਲਡ ਕੀਤਾ ਅਤੇ ਉਨ੍ਹਾਂ ਤੋਂ ਇਹ ਪਤਾ ਕੀਤਾ ਗਿਆ ਕਿ ਉਹ ਇਸ ਦਾ ਸਿਹਰਾ ਕਿਸ ਨੂੰ ਦਿੰਦੇ ਹਨ ਤਾਂ ਸ਼ੰਮੀ ਦਾ ਜਵਾਬ ਹੈਰਾਨ ਕਰਨ ਵਾਲਾ ਸੀ। ਸ਼ੰਮੀ ਨੇ ਕਿਹਾ, 'ਇਸ ਗੇਂਦ ਦਾ ਸਿਹਰਾ ਮੈਂ ਆਪਣੇ ਆਪ ਨੂੰ ਹੀ ਦੇਣਾ ਚਾਹਾਂਗਾ ਕਿਉਂਕਿ ਮੇਰੇ ਸਾਹਮਣੇ ਹੀ ਬਹੁਤ ਵੱਡੀਆਂ ਚੁਣੌਤੀਆਂ ਸਨ। ਪਿਛਲੇ ਡੇਢ ਦੋ ਸਾਲਾਂ ਦੌਰਾਨ ਜੋ ਕੁਝ ਹੋਇਆ, ਮੈਨੂੰ ਹੀ ਉਸ ਦਾ ਅਨੁਭਵ ਕਰਨਾ ਪਿਆ, ਮੈਨੂੰ ਹੀ ਸਾਹਮਣਾ ਕਰਨਾ ਪਿਆ ਅਤੇ ਮੈਂ ਹੀ ਉਸ ਤੋਂ ਬਾਹਰ ਨਿਕਲ ਕੇ ਆਇਆ। ਇਸ ਲਈ ਸਿਹਰਾ ਕਿਸ ਨੂੰ ਦਿੱਤਾ ਜਾਵੇ? ਸਿਹਰਾ ਮੈਂ ਸਿਰਫ਼ ਆਪਣੇ-ਆਪ ਨੂੰ ਹੀ ਦੇਣਾ ਚਾਹੁੰਦਾ ਹਾਂ।' ਸਾਇਦ ਇਹ ਠੀਕ ਵੀ ਹੈ, ਜਿਸ ਨੇ ਯਾਦਗਾਰ ਗੇਂਦ ਪਾਈ ਸਿਹਰਾ ਵੀ ਉਸ ਨੂੰ ਹੀ ਮਿਲਣਾ ਚਾਹੀਦਾ।

-ਇਮੇਜ ਰਿਫਲੈਕਸ਼ਨ ਸੈਂਟਰ

ਗ਼ਲਤ ਸਾਬਤ ਹੋਈਆਂ ਕਈ ਭਵਿੱਖਬਾਣੀਆਂ

ਵਿਸ਼ਵ ਕ੍ਰਿਕਟ ਕੱਪ ਦੇ ਰੰਗ

(ਲੜੀ ਜੋੜਨ ਲਈ ਪਿਛਲੇ ਮੰਗਲਵਾਰ ਦਾ ਅੰਕ ਦੇਖੋ)
ਸ੍ਰੀਲੰਕਾ ਵਰਗੀ ਸੰਘਰਸ਼ਮਈ ਦੌਰ 'ਚੋਂ ਗੁਜ਼ਰ ਰਹੀ ਆਸਟ੍ਰੇਲੀਆ ਅਤੇ ਪਾਕਿਸਤਾਨ ਵਰਗੀਆਂ ਟੀਮਾਂ ਤੋਂ ਮੈਚ ਹਾਰਨ ਕਰਕੇ ਇੰਗਲੈਂਡ ਦੀ ਟੀਮ ਨੂੰ ਆਖਰੀ ਪੜਾਅ 'ਤੇ ਆ ਕੇ ਸੈਮੀਫਾਈਨਲ 'ਚ ਪੁੱਜਣ ਲਈ ਹੋਰਨਾਂ ਟੀਮਾਂ ਦੀਆਂ ਜਿੱਤਾਂ-ਹਾਰਾਂ 'ਤੇ ਨਿਰਭਰ ਹੋਣਾ ਪੈ ਗਿਆ ਹੈ। ਟੇਵਿਆਂ ਨੂੰ ਝੂਠਾ ਪਾਉਂਦਿਆਂ ਨਿਊਜ਼ੀਲੈਂਡ ਦੀ ਟੀਮ ਨੇ ਅਜੇ ਤੱਕ ਇਕ ਮੈਚ ਹਾਰਿਆ ਹੈ ਅਤੇ ਆਖਰੀ 4 'ਚ ਥਾਂ ਬਣਾਉਣ ਵੱਲ ਕਦਮ ਵਧਾ ਲਏ ਹਨ। ਭਾਰਤੀ ਟੀਮ ਨੇ ਉਮੀਦਾਂ ਤੋਂ ਵੀ ਵਧੀਆ ਪ੍ਰਦਰਸ਼ਨ ਕੀਤਾ ਹੈ। ਆਸਟ੍ਰੇਲੀਆ ਦੀ ਟੀਮ ਨੇ ਆਰੰਭ 'ਚ ਭਾਰਤ ਹੱਥੋਂ ਮੈਚ ਹਾਰਨ ਉਪਰੰਤ ਚੈਂਪੀਅਨਾਂ ਵਾਂਗ ਅੱਗੇ ਵਧਣਾ ਸ਼ੁਰੂ ਕੀਤਾ ਅਤੇ ਸਭ ਤੋਂ ਪਹਿਲਾਂ ਸੈਮੀਫਾਈਨਲ 'ਚ ਥਾਂ ਬਣਾ ਲਈ ਹੈ। ਇਸੇ ਤਰ੍ਹਾਂ ਬੰਗਲਾਦੇਸ਼ ਦੀ ਟੀਮ ਨੇ ਵੀ ਭਵਿੱਖਬਾਣੀਆਂ ਤੋਂ ਉਲਟ ਸ਼ਾਨਦਾਰ ਪ੍ਰਦਰਸ਼ਨ ਕਰਕੇ ਵੈਸਟਇੰਡੀਜ਼ ਤੇ ਦੱਖਣੀ ਅਫਰੀਕਾ ਵਰਗੀਆਂ ਟੀਮਾਂ ਨੂੰ ਹਰਾ ਕੇ ਤਰਥੱਲੀ ਮਚਾ ਦਿੱਤੀ। ਅਫ਼ਗਾਨਿਸਤਾਨ ਦੀ ਟੀਮ ਟੇਵਿਆਂ ਤੋਂ ਉਲਟ ਚੰਗੀ ਮੁਕਾਬਲੇਬਾਜ਼ੀ ਵਾਲੀ ਟੀਮ ਤਾਂ ਸਾਬਤ ਹੋਈ ਪਰ ਜਿੱਤਾਂ ਲਈ ਤਰਸ ਰਹੀ ਹੈ।
ਖਿਡਾਰੀਆਂ ਦੇ ਪਲਟਵਾਰ
ਸੰਸਾਰ ਕੱਪ ਲਈ ਚੁਣੀ ਗਈ ਪਾਕਿਸਤਾਨ ਦੀ ਟੀਮ 'ਚ ਤੇਜ਼ ਗੇਂਦਬਾਜ਼ ਮੁਹੰਮਦ ਆਮਿਰ ਨੂੰ ਪਹਿਲਾਂ ਸ਼ਾਮਿਲ ਨਹੀਂ ਕੀਤਾ ਗਿਆ ਸੀ। ਫਿਰ ਪਾਕਿ ਦੇ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਦੇ ਦਖਲ ਉਪਰੰਤ ਮੁਹੰਮਦ ਆਮਿਰ ਨੂੰ ਟੀਮ 'ਚ ਪਾਇਆ ਗਿਆ। ਨਤੀਜਾ ਸਭ ਦੇ ਸਾਹਮਣੇ ਹੈ, ਆਮਿਰ ਇਸ ਵੇਲੇ ਵਿਸ਼ਵ ਕੱਪ 2019 'ਚ ਪਾਕਿ ਵਲੋਂ ਸਭ ਤੋਂ ਵੱਧ ਵਿਕਟਾਂ ਲੈਣ ਵਾਲਾ ਗੇਂਦਬਾਜ਼ ਬਣਿਆ ਹੋਇਆ ਹੈ। ਇਸੇ ਤਰ੍ਹਾਂ ਵੈਸਟਇੰਡੀਜ਼ ਮੂਲ ਦੇ ਤੇਜ਼ ਗੇਂਦਬਾਜ਼ ਜੋਫਰਾ ਆਰਚਰ ਨੂੰ ਪਹਿਲਾਂ ਇੰਗਲਿਸ਼ ਟੀਮ 'ਚ ਸ਼ਾਮਿਲ ਨਹੀਂ ਕੀਤਾ ਗਿਆ ਸੀ। ਸਲਾਮੀ ਬੱਲੇਬਾਜ਼ ਐਲੈਕਸ ਹੇਲਜ਼ ਦੇ ਆਖਰੀ ਸਮੇਂ ਟੀਮ 'ਚੋਂ ਬਾਹਰ ਹੋਣ ਉਪਰੰਤ ਜੋਫਰਾ ਨੂੰ ਇੰਗਲੈਂਡ ਦੀ ਟੀਮ 'ਚ ਥਾਂ ਮਿਲੀ ਅਤੇ ਉਹ ਇੰਗਲੈਂਡ ਦੇ ਗੇਂਦਬਾਜ਼ੀ ਹਮਲੇ ਦਾ ਸਭ ਤੋਂ ਵੱਡਾ ਹਥਿਆਰ ਸਾਬਤ ਹੋ ਰਿਹਾ ਹੈ। ਇਸੇ ਤਰ੍ਹਾਂ ਭਾਰਤੀ ਟੀਮ 'ਚ ਧਾਕੜ ਬੱਲੇਬਾਜ਼ ਤੇ ਵਿਕਟਕੀਪਰ ਰਿਸ਼ਭ ਪੰਤ ਨੂੰ ਸ਼ਾਮਿਲ ਨਹੀਂ ਕੀਤਾ ਗਿਆ ਸੀ ਪਰ ਕੁਦਰਤ ਉਸ ਦੇ ਹੱਕ 'ਚ ਸੀ। ਸ਼ਿਖਰ ਧਵਨ ਜ਼ਖਮੀ ਹੋਣ ਕਾਰਨ ਭਾਰਤੀ ਟੀਮ 'ਚੋਂ ਬਾਹਰ ਹੋ ਗਿਆ ਅਤੇ ਰਿਸ਼ਭ ਪੰਤ ਨੂੰ ਟੀਮ 'ਚ ਥਾਂ ਮਿਲ ਗਈ ਅਤੇ ਉਸ ਨੇ ਮੌਕੇ ਦਾ ਫਾਇਦਾ ਵੀ ਉਠਾਇਆ।
ਟੀਮਾਂ ਦੇ ਹਮਾਇਤੀ
ਸੰਸਾਰ ਕੱਪ ਲਈ ਵੱਖ-ਵੱਖ ਟੀਮਾਂ ਦੇ ਚਾਹੁਣ ਵਾਲੇ ਹੁੰਮ-ਹੁਮਾ ਕੇ ਇੰਗਲੈਂਡ ਪੁੱਜੇ ਹੋਏ ਹਨ। ਇਕ ਅੰਦਾਜ਼ੇ ਮੁਤਾਬਿਕ ਏਸ਼ੀਅਨ ਟੀਮਾਂ ਦੇ ਹਮਾਇਤੀ ਸਭ ਤੋਂ ਵੱਡੀ ਗਿਣਤੀ 'ਚ ਇੰਗਲੈਂਡ ਪੁੱਜੇ ਹੋਏ ਹਨ, ਜਿਨ੍ਹਾਂ ਦੀ ਗਿਣਤੀ 80 ਹਜ਼ਾਰ ਤੋਂ ਇਕ ਲੱਖ ਤੱਕ ਮੰਨੀ ਜਾ ਰਹੀ ਹੈ। ਸਿੰਗਾਪੁਰ ਤੋਂ ਆਪਣੀ ਗੱਡੀ ਰਾਹੀਂ 49 ਘੰਟੇ ਦਾ ਸੜਕੀ ਸਫਰ ਤੈਅ ਕਰਕੇ ਇੰਗਲੈਂਡ ਪੁੱਜਿਆ ਮਾਥੁਰ ਪਰਿਵਾਰ ਅਤੇ 87 ਸਾਲਾਂ ਦੀ ਮਾਤਾ ਚਾਰੂਲਤਾ ਪਟੇਲ ਚਰਚਾ ਦਾ ਵਿਸ਼ਾ ਬਣੇ ਹੋਏ ਹਨ। ਸ੍ਰੀਮਤੀ ਪਟੇਲ 1983 ਦੇ ਵਿਸ਼ਵ ਕੱਪ 'ਚ ਭਾਰਤੀ ਟੀਮ ਦੇ ਚੈਂਪੀਅਨ ਬਣਨ ਦਾ ਸਫਰ ਅੱਖੀਂ ਦੇਖਣ ਵਾਲਿਆਂ 'ਚ ਸ਼ਾਮਿਲ ਹੈ ਅਤੇ ਹੁਣ ਵੀ ਵਡੇਰੀ ਉਮਰ ਦੇ ਬਾਵਜੂਦ ਭਾਰਤੀ ਟੀਮ ਨੂੰ ਵੱਖ-ਵੱਖ ਮੈਚਾਂ 'ਚ ਉਤਸ਼ਾਹਿਤ ਕਰਦੀ ਨਜ਼ਰ ਆ ਰਹੀ ਹੈ। ਸ੍ਰੀਮਤੀ ਪਟੇਲ ਤੋਂ ਭਾਰਤੀ ਕਪਤਾਨ ਵਿਰਾਟ ਕੋਹਲੀ ਤੇ ਹੋਰਨਾਂ ਖਿਡਾਰੀਆਂ ਨੇ ਬੰਗਲਾਦੇਸ਼ ਖਿਲਾਫ ਮੈਚ ਤੋਂ ਬਾਅਦ ਅਸ਼ੀਰਵਾਦ ਵੀ ਲਿਆ। ਇਸ ਤਰ੍ਹਾਂ ਦੇ ਹੋਰ ਵੀ ਬਹੁਤ ਸਾਰੇ ਫੈਨ ਭਾਰਤੀ ਟੀਮ ਨੂੰ ਉਤਸ਼ਾਹਿਤ ਕਰਨ ਤੇ ਕ੍ਰਿਕਟ ਦਾ ਅਨੰਦ ਮਾਣਨ ਲਈ ਵਲੈਤ ਪੁੱਜੇ ਹੋਏ ਹਨ।
ਚੰਗੀ ਮੁਕਾਬਲੇਬਾਜ਼ੀ
12ਵਾਂ ਵਿਸ਼ਵ ਕ੍ਰਿਕਟ ਕੱਪ ਚੰਗੀ ਮੁਕਾਬਲੇਬਾਜ਼ੀ ਲਈ ਯਾਦ ਰੱਖਿਆ ਜਾਵੇਗਾ। ਇਸ ਕੱਪ ਦੌਰਾਨ ਤਕਰੀਬਨ ਸਾਰੇ ਮੈਚ ਹੀ ਵਧੀਆ ਮੁਕਾਬਲੇਬਾਜ਼ੀ ਵਾਲੇ ਸਾਬਤ ਹੋਏ। ਕੱਪ ਦੌਰਾਨ ਮਾੜੀ ਕਮਜ਼ੋਰ ਸਮਝੀ ਜਾਣ ਵਾਲੀ ਅਫ਼ਗਾਨਿਸਤਾਨ ਦੀ ਟੀਮ ਨੇ ਲਗਭਗ ਹਰੇਕ ਮੈਚ 'ਚ ਵਿਰੋਧੀ ਟੀਮਾਂ ਨੂੰ ਚੰਗੀ ਚੁਣੌਤੀ ਦਿੱਤੀ। ਇਹ ਟੀਮ ਕੱਪ ਦੌਰਾਨ ਭਾਵੇਂ ਕੋਈ ਮੈਚ ਨਹੀਂ ਜਿੱਤ ਸਕੀ ਪਰ ਭਾਰਤ ਤੇ ਪਾਕਿਸਤਾਨ ਦੀਆਂ ਟੀਮਾਂ ਨੂੰ ਜਿਸ ਤਰ੍ਹਾਂ ਸਖਤ ਚੁਣੌਤੀ ਦਿੱਤੀ, ਉਹ ਕਾਬਿਲੇ ਤਾਰੀਫ ਹੈ। ਅਫ਼ਗਾਨ ਟੀਮ ਤਜਰਬੇ ਦੀ ਘਾਟ ਕਾਰਨ ਉਕਤ ਦੋਵੇਂ ਟੀਮਾਂ ਖਿਲਾਫ ਮੈਚ ਹਾਰੀ। ਇਸ ਟੀਮ ਦੀ ਚੋਣ 'ਤੇ ਵੀ ਕਈ ਤਰ੍ਹਾਂ ਦੀਆਂ ਉਂਗਲਾਂ ਉੱਠੀਆਂ। ਇਸੇ ਤਰ੍ਹਾਂ ਵੈਸਟ ਇੰਡੀਜ਼ ਦੀ ਟੀਮ ਵੀ ਕੇਰੇਨ ਪੋਲਾਰਡ, ਸੁਨੀਲ ਨਰਾਇਣ ਤੇ ਡੈਰੇਨ ਬਰਾਵੋ ਵਰਗੇ ਖਿਡਾਰੀਆਂ ਦੀ ਚੋਣ ਨਾ ਕਰਨ ਕਰਕੇ, ਕੁਝ ਮੈਚ ਜਿੱਤ ਦੇ ਦੁਆਰ 'ਤੇ ਜਾ ਕੇ ਹਾਰੀ। ਸ੍ਰੀਲੰਕਾ ਦੀ ਟੀਮ ਨੇ ਉਮੀਦਾਂ ਤੋਂ ਵਧੀਆ ਖੇਡ ਦਿਖਾਈ। ਇਸ ਟੀਮ ਨੇ ਇੰਗਲੈਂਡ ਨੂੰ ਹਰਾ ਕੇ ਵਿਸ਼ਵ ਕੱਪ ਨੂੰ ਰੌਚਿਕਤਾ ਪ੍ਰਦਾਨ ਕਰ ਦਿੱਤੀ। ਬੰਗਲਾਦੇਸ਼ ਦੀ ਟੀਮ ਨੇ ਆਪਣੇ-ਆਪ ਨੂੰ ਭਵਿੱਖ ਦੀ ਤਾਕਤ ਵਜੋਂ ਉਭਾਰਿਆ। (ਸਮਾਪਤ)


-ਪਟਿਆਲਾ।
ਮੋਬਾ: 97795-90575

ਪੁਰਾਤਨ ਉਲੰਪਿਕ ਖੇਡਾਂ ਦੀ ਰੌਚਿਕ ਗਾਥਾ

(ਲੜੀ ਜੋੜਨ ਲਈ ਪਿਛਲੇ ਮੰਗਲਵਾਰ ਦਾ ਅੰਕ ਦੇਖੋ)
ਏਥਨ ਦਾ ਰਾਜ ਪ੍ਰਬੰਧ ਜਿਥੇ ਅਪਣੇ ਨਾਗਰਿਕਾਂ ਦੇ ਸਰੀਰਕ ਅਤੇ ਮਾਨਸਿਕ ਵਿਕਾਸ ਵੱਲ ਧਿਆਨ ਦਿੰਦਾ ਸੀ, ਉਥੇ ਸਪਾਰਟਾ ਦਾ ਰਾਜਾ ਆਪਣੇ ਨਾਗਰਿਕਾਂ ਦੇ ਮਹਿਜ਼ ਸਰੀਰਕ ਪੱਖੋਂ ਰਿਸ਼ਟ-ਪੁਸ਼ਟ ਹੋਣ 'ਤੇ ਜ਼ੋਰ ਦਿੰਦਾ ਸੀ। ਇਨ੍ਹਾਂ ਵੱਖ-ਵੱਖ ਰਾਜ ਪ੍ਰਣਾਲੀਆਂ ਦੇ ਫਲਸਰੂਪ ਏਥਨ ਵਿਚ ਯੋਧੇ ਅਤੇ ਵਿਦਵਾਨ ਦੋਵੇਂ ਪੈਦਾ ਹੋਏ ਜਿਵੇਂ ਸੁਕਰਾਤ ਅਰਸਤੂ ਅਤੇ ਸਿਕੰਦਰ ਮਹਾਨ ਆਦਿ। ਜਦੋਂ ਕਿ ਸਪਾਰਟਾ ਰਿਆਸਤ ਵਿਚ ਕੇਵਲ ਬਲਸ਼ਾਲੀ ਯੋਧੇ ਪੈਦਾ ਹੋਏ। ਸਪਾਰਟਾ ਦੀ ਫੌਜੀ ਹਕੂਮਤ ਵਲੋਂ ਸਰੀਰਕ ਤੌਰ 'ਤੇ ਅਪਾਹਜ ਜਾਂ ਕਮਜ਼ੋਰ ਬੱਚਿਆਂ ਨੂੰ ਟਿਬਰੀ ਨਾਂਅ ਦੀ ਪਹਾੜੀ ਤੋਂ ਸੁੱਟ ਕੇ ਮਾਰ ਦਿੱਤਾ ਜਾਂਦਾ ਸੀ। ਬੱਚਿਆਂ ਦੀ ਸ਼ਨਾਖਤੀ ਪਰੇਡ ਕਰਵਾਈ ਜਾਂਦੀ ਸੀ। ਬਚਪਨ ਦੌਰਾਨ ਹੀ ਉਨ੍ਹਾਂ ਨੂੰ ਕੁਝ ਸਮੇਂ ਵਾਸਤੇ ਫੌਜੀ ਬੈਰਕਾਂ ਵਿਚ ਰੱਖਿਆ ਜਾਂਦਾ ਸੀ। ਸਪਾਰਟਾ ਦੇ ਰਾਜੇ ਦਾ ਫੁਰਮਾਨ ਸੀ ਕਿ ਉਸ ਨੂੰ ਕੇਵਲ ਤੇ ਕੇਵਲ ਸਰੀਰਕ ਪੱਖੋਂ ਰਿਸ਼ਟ-ਪੁਸ਼ਟ ਨਾਗਰਿਕਾਂ ਦੀ ਲੋੜ ਹੈ। ਫੌਜੀ ਸਿਖਲਾਈ ਹਰ ਇਕ ਨਾਗਰਿਕ ਵਾਸਤੇ ਲਾਜ਼ਮੀ ਸੀ। ਉਨ੍ਹਾਂ ਸਮਿਆਂ ਦੌਰਾਨ ਹੀ ਏਥਨ ਵਾਸੀਆਂ ਵਲੋਂ ਇਸ ਕਹਾਵਤ ਨੂੰ ਜਨਮ ਦਿੱਤਾ ਗਿਆ ਪ੍ਰਤੀਤ ਹੁੰਦਾ ਹੈ ਕਿ 'ਤੰਦਰੁਸਤ ਸਰੀਰ ਵਿਚ ਹੀ ਤੰਦਰੁਸਤ ਮਨ ਦਾ ਨਿਵਾਸ ਹੁੰਦਾ ਹੈ'।
ਇਨ੍ਹਾਂ ਖੇਡਾਂ ਦੀ ਸ਼ੁਰੂਆਤ ਦੇ ਧਾਰਮਿਕ ਕਾਰਨ ਤੋਂ ਇਲਾਵਾ ਇਕ ਹੋਰ ਦੰਦ ਕਥਾ ਇਨ੍ਹਾਂ ਦੀ ਸ਼ੁਰੂਆਤ ਨਾਲ ਜੁੜੀ ਹੋਈ ਹੈ। ਕਿਹਾ ਜਾਂਦਾ ਹੈ ਕਿ ਯੂਨਾਨ ਦੀ ਇਕ ਰਿਆਸਤ ਦੇ ਤਾਕਤਵਰ ਰਾਜੇ ਨੇ ਆਪਣੀ ਧੀ ਦੇ ਵਿਆਹ ਵਾਸਤੇ ਇਹ ਸ਼ਰਤ ਰੱਖੀ ਕਿ ਜਿਹੜਾ ਰਾਜਕੁਮਾਰ ਉਸ ਦੀ ਧੀ ਨੂੰ ਆਪਣੇ ਰੱਥ 'ਤੇ ਬਿਠਾ ਕੇ ਸਹੀ ਸਲਾਮਤ ਉਸ ਤੋਂ ਜਾਂ ਉਸ ਵਲੋਂ ਨਿਯਤ ਕੀਤੇ ਯੋਧਿਆਂ ਤੋਂ ਬਚ ਕੇ ਮਿਥੀ ਹੱਦ ਨੂੰ ਪਾਰ ਕਰ ਜਾਵੇਗਾ, ਉਹ ਆਪਣੀ ਧੀ ਦਾ ਵਿਆਹ ਉਸੇ ਰਾਜਕੁਮਾਰ ਨਾਲ ਕਰੇਗਾ। ਇਸ ਸ਼ਰਤ ਨੂੰ ਪੂਰਾ ਕਰਦਿਆਂ ਕਈ ਰਾਜਕੁਮਾਰ ਰਾਜੇ ਹੱਥੋਂ ਕਤਲ ਹੋ ਗਏ। ਆਖਰ ਏਥਨ ਦਾ ਰਾਜਕੁਮਾਰ ਇਹ ਸ਼ਰਤ ਪੂਰੀ ਕਰਨ ਵਿਚ ਸਫ਼ਲ ਹੋ ਗਿਆ। ਉਸ ਨੇ ਸ਼ਰਤ ਵਿਚ ਹਿੱਸਾ ਲੈਣ ਤੋਂ ਪਹਿਲਾਂ ਉਸ ਸਾਰਥੀ ਨਾਲ ਗੰਢਤੁੱਪ ਕਰ ਲਈ ਸੀ, ਜਿਸ ਨੇ ਉਸ ਦਾ ਪਿੱਛਾ ਕਰਨ ਵਾਲੇ ਰੱਥ ਦੀ ਰਥਵਾਨੀ ਕਰਨੀ ਸੀ। ਉਸ ਰਥਵਾਨ ਨੇ ਮਿਲੀਭੁਗਤ ਨਾਲ ਸਬੰਧਿਤ ਰੱਥ ਦਾ ਪਹੀਆ ਕਮਜ਼ੋਰ ਪਾ ਲਿਆ, ਜੋ ਕੁਝ ਦੂਰੀ ਉੱਤੇ ਜਾ ਕੇ ਤੈਅਸ਼ੁਦਾ ਸਕੀਮ ਅਨੁਸਾਰ ਟੁੱਟ ਗਿਆ ਅਤੇ ਰਾਜ ਕੁਮਾਰ ਮਿਥੀ ਹੱਦ ਟੱਪਣ ਵਿਚ ਸਫ਼ਲ ਹੋ ਗਿਆ। ਇਸ ਵਿਆਹ ਦੀ ਖੁਸ਼ੀ ਵਿਚ ਉਸ ਨੇ ਜੀਅਸ ਦੇਵਤਾ ਦੇ ਮੰਦਰ ਵਿਖੇ ਇਕ ਬਹੁਤ ਵੱਡਾ ਸਮਾਗਮ ਕਰਵਾਇਆ, ਜਿਸ ਦੌਰਾਨ ਤਰ੍ਹਾਂ-ਤਰ੍ਹਾਂ ਦੇ ਕਰਤਵ ਮੁਕਾਬਲੇ ਕਰਵਾਏ ਗਏ, ਜੋ ਅੱਗੇ ਜਾ ਕੇ ਪੁਰਾਤਨ ਉਲੰਪਿਕ ਖੇਡਾਂ ਦੀ ਬੁਨਿਆਦ ਬਣੇ।
ਔਰਤਾਂ ਨੂੰ ਪੁਰਾਤਨ ਉਲੰਪਿਕ ਖੇਡਾਂ ਵਿਚ ਭਾਗ ਲੈਣ ਅਤੇ ਖੇਡਾਂ ਨੂੰ ਦੇਖਣ ਦੀ ਸਖ਼ਤ ਮਨਾਹੀ ਸੀ। ਇਸ ਨਿਯਮ ਦੀ ਉਲੰਘਣਾ ਕਰਨ ਵਾਲੀ ਔਰਤ ਵਾਸਤੇ ਮੌਤ ਦੀ ਸਜ਼ਾ ਦਾ ਕਾਨੂੰਨ ਸੀ। ਇਕ ਵਾਰ 'ਕਾਲਿਪੇਤੀਆਰਾ' ਨਾਂਅ ਦੀ ਔਰਤ ਮਰਦਾਵਾਂ ਭੇਸ ਬਦਲ ਕੇ ਇਸ ਲਈ ਇਨ੍ਹਾਂ ਖੇਡਾਂ ਨੂੰ ਦੇਖਣ ਚਲੇ ਗਈ, ਤਾਂ ਕਿ ਉਹ ਆਪਣੇ ਪੁੱਤਰ ਨੂੰ ਖੇਡਾਂ 'ਚ ਭਾਗ ਲੈਂਦਿਆਂ ਦੇਖ ਸਕੇ। ਜਦੋਂ ਉਹਦਾ ਪੁੱਤਰ ਮੁਕਾਬਲਾ ਜਿੱਤ ਕੇ ਉਲੰਪਿਕ ਚੈਂਪੀਅਨ ਬਣਿਆ ਤਾਂ ਉਹ ਖੁਸ਼ੀ ਵਿਚ ਉਛਲਣ ਲੱਗ ਪਈ। ਇਸ ਦੌਰਾਨ ਉਸ ਦੇ ਔਰਤ ਹੋਣ ਬਾਰੇ ਭੇਦ ਖੁੱਲ੍ਹ ਗਿਆ। ਉਸ ਔਰਤ ਦੇ ਪੁੱਤਰ ਤੋਂ ਇਲਾਵਾ ਉਸ ਦਾ ਪਿਤਾ ਅਤੇ ਭਰਾ ਵੀ ਆਪਣੇ ਸਮੇਂ ਦੇ ਚੈਂਪੀਅਨ ਸਨ, ਜਿਨ੍ਹਾਂ ਦਾ ਸਤਿਕਾਰ ਕਰਕੇ ਔਰਤ ਨੂੰ ਮੁਆਫ਼ ਕਰ ਦਿੱਤਾ ਗਿਆ। ਇਸ ਉਪਰੰਤ ਉਲੰਪੀਆਡ ਸਟੇਡੀਅਮ ਵਿਚ ਦਾਖਲ ਹੋਣ ਵਾਲਿਆਂ ਦੀ ਬਕਾਇਦਾ ਜਾਂਚ ਕਰਨੀ ਆਰੰਭ ਕਰ ਦਿੱਤੀ ਗਈ। ਖੁਦਾਈ ਦੌਰਾਨ ਮਿਲੀਆਂ ਮੂਰਤੀਆਂ ਅਤੇ ਧਾਤੂ ਵਸਤਾਂ ਉੱਤੇ ਉਕਰੀਆਂ ਤਸਵੀਰਾਂ ਤੋਂ ਪਤਾ ਲਗਦਾ ਹੈ ਕਿ ਖਿਡਾਰੀ ਅਲਫ਼ ਨੰਗੇ ਹੋ ਕੇ ਇਨ੍ਹਾਂ ਖੇਡਾਂ ਵਿਚ ਸ਼ਿਰਕਤ ਕਰਦੇ ਸਨ। ਅਜਿਹਾ ਵੱਧ ਤੋਂ ਵੱਧ ਕਾਰਗੁਜ਼ਾਰੀ ਦਿਖਾਉਣ ਦੀ ਗਰਜ਼ ਨਾਲ ਕੀਤਾ ਜਾਂਦਾ ਸੀ, ਕਿਉਂਕੀ ਉਸ ਜ਼ਮਾਨੇ ਦੇ ਕੱਪੜੇ ਖਿਡਾਰੀਆਂ ਦੀ ਕਾਰਗੁਜ਼ਾਰੀ ਵਿਚ ਰੁਕਾਵਟ ਪੈਦਾ ਕਰਦੇ ਸਨ।
ਪੁਰਾਤਨ ਉਲੰਪਿਕ ਖੇਡਾਂ 4 ਸਾਲ ਬਾਅਦ 6 ਅਗਸਤ ਤੋਂ 18 ਸਤੰਬਰ ਦੇ ਵਿਚਕਾਰ ਕਰਵਾਈਆਂ ਜਾਂਦੀਆਂ ਸਨ। ਇਨ੍ਹਾਂ ਦੀ ਅਟਲਤਾ ਕਾਰਨ ਸਮਕਾਲੀ ਇਤਿਹਾਸਕਾਰ ਘਟਨਾਵਾਂ ਦਾ ਹਵਾਲਾ ਦੇਣ ਸਮੇਂ ਉਲੰਪਿਕ ਖੇਡਾਂ ਦੀ ਪੈਰਵੀ ਕਰਦੇ ਸਨ। ਪੁਰਾਣੀਆਂ ਉਲੰਪਿਕ ਖੇਡਾਂ ਵਿਚ ਸਮੇਂ ਦੇ ਨਾਲ ਈਵੈਂਟਸ ਦੀ ਗਿਣਤੀ ਵਧਦੀ ਗਈ। ਇਨ੍ਹਾਂ ਵਿਚ ਮੁੱਖ ਤੌਰ 'ਤੇ ਰੱਥ ਦੌੜਾਂ, ਘੋੜ ਦੌੜਾਂ, ਮੱਲ ਯੁੱਧ (ਕੁਸ਼ਤੀ ਅਤੇ ਮੁੱਕੇਬਾਜ਼ੀ ਦਾ ਸੁਮੇਲ), ਵੱਖ-ਵੱਖ ਦੂਰੀ ਦੀਆਂ ਦੌੜਾਂ, ਲੰਬੀ ਛਾਲ, ਉੱਚੀ ਛਾਲ, ਡਿਸਕਸ ਥਰੋਅ, ਜੈਵਲੀਅਨ ਥਰੋਅ, ਤਲਵਾਰਬਾਜ਼ੀ, ਤੀਰਅੰਦਾਜ਼ੀ ਅਤੇ ਪਟੈਥਲਿਨ (ਪੰਜ ਟਰੈਕ ਅਤੇ ਫ਼ੀਲਡ ਇਵੈਂਟਸ) ਆਦਿ ਪ੍ਰਮੁੱਖ ਖੇਡ ਪ੍ਰਤੀਯੋਗਤਾਵਾਂ ਸ਼ਾਮਿਲ ਸਨ। ਰੱਥ ਦੌੜਾਂ ਦੀ ਈਵੈਂਟ ਨੂੰ ਸਭ ਤੋਂ ਖ਼ਤਰਨਾਕ ਅਤੇ ਜੋਖ਼ਮ ਵਾਲੀ ਮੰਨਿਆ ਜਾਂਦਾ ਸੀ। ਰੱਥ ਅੱਗੇ 2 ਅਤੇ 4 ਘੋੜੇ ਜੋੜੇ ਜਾਂਦੇ ਸਨ। ਰੱਥ ਦੌੜ ਦਾ ਫ਼ਾਸਲਾ 2.5 ਮੀਲ ਤੋਂ 8 ਮੀਲ ਦਾ ਰੱਖਿਆ ਹੁੰਦਾ ਸੀ। ਲੰਬੀ ਦੂਰੀ ਦੀ ਮੈਰਾਥਨ ਦੌੜ ਭਾਵੇਂ ਪੁਰਾਤਨ ਉਲੰਪਿਕ ਖੇਡਾਂ ਦੀ ਸੂਚੀ ਵਿਚ ਸ਼ਾਮਿਲ ਨਹੀਂ ਸੀ ਪਰ ਯੂਨਾਨੀ ਇਤਿਹਾਸ ਨਾਲ ਸਬੰਧਿਤ ਇਕ ਦਿਲਚਸਪ ਘਟਨਾ ਤੋਂ ਪ੍ਰਭਾਵਿਤ ਹੋ ਕੇ ਸੰਨ 1908 ਦੀਆਂ ਉਲੰਪਿਕ ਖੇਡਾਂ ਵਿਚ ਇਸ ਮਹੱਤਵਪੂਰਨ ਅਤੇ ਜਾਨ ਹਲੂਣਵੀਂ ਈਵੈਂਟ ਨੂੰ ਆਧੁਨਿਕ ਉਲੰਪਿਕ ਖੇਡਾਂ ਵਿਚ ਸ਼ਾਮਿਲ ਕੀਤਾ ਗਿਆ।
ਇਸ ਘਟਨਾ ਅਨੁਸਾਰ ਏਥਨ ਰਾਜ ਦੀਆਂ ਫੌਜਾਂ ਦਾ ਦੁਸ਼ਮਣ ਰਿਆਸਤ ਦੀਆਂ ਫੌਜਾਂ ਨਾਲ ਯੁੱਧ ਏਥਨ ਤੋਂ 26 ਮੀਲ ਦੀ ਦੂਰੀ 'ਤੇ ਸਥਿਤ ਮੈਰਾਥਨ ਮੈਦਾਨ ਵਿਚ ਹੋਇਆ ਸੀ। ਫਿਡਪੀਡਸ ਨਾਂਅ ਦੇ ਜਿਸ ਸੈਨਿਕ ਨੇ ਫੌਜੀ ਹੁਕਮ ਦੀ ਪਾਲਣਾ ਕਰਦਿਆਂ ਸੂਰਜ ਦੇ ਅਸਤ ਹੋਣ ਤੋਂ ਪਹਿਲਾਂ ਏਥਨ ਵਾਸੀਆਂ ਨੂੰ ਜਿੱਤ ਦੀ ਖਬਰ ਦਿੱਤੀ ਸੀ, ਉਹ ਤੇਜ਼ੀ ਨਾਲ ਖਤਮ ਕੀਤੇ ਪੰਧ ਕਾਰਨ ਲੱਗੇ ਹੱਦੋਂ ਵੱਧ ਜ਼ੋਰ ਸਦਕਾ ਖਬਰ ਦਿੰਦੇ ਸਾਰ ਦਮ ਤੋੜ ਗਿਆ ਸੀ। ਉਸ ਜਾਂਬਾਜ ਸੈਨਿਕ ਦੀ ਯਾਦ ਨੂੰ ਤਰੋਤਾਜ਼ਾ ਰੱਖਣ ਲਈ ਇਹ ਦੌੜ ਸ਼ੁਰੂ ਕੀਤੀ ਗਈ, ਜਿਸ ਦੀ ਲੰਬਾਈ 26 ਮੀਲ 385 ਗਜ਼ ਰੱਖੀ ਗਈ ਹੈ। ਸਭ ਤੋਂ ਦਿਲਚਸਪ ਗੱਲ ਇਹ ਹੈ ਕਿ ਪੁਰਾਤਨ ਉਲੰਪਿਕ ਖੇਡਾਂ ਦੇ ਜੇਤੂ ਖਿਡਾਰੀਆਂ ਨੂੰ ਉਲੰਪੀਆਡ ਸਥਿਤ ਜੀਅਸ ਦੇਵਤਾ ਦੇ ਮੰਦਰ ਵਿਖੇ ਲੱਗੇ ਪਵਿਤਰ ਮੰਨੇ ਜਾਂਦੇ ਜੈਤੂਨ ਦੇ ਰੁੱਖਾਂ ਦੀ ਛਿੱਲ, ਟਾਹਣੀਆਂ ਅਤੇ ਪੱਤਿਆਂ ਤੋਂ ਬਣੇ ਤਾਜ ਪਹਿਨਾਏ ਜਾਂਦੇ ਸਨ। ਉਸ ਵਕਤ ਇਸ ਨੂੰ ਸਭ ਤੋਂ ਕੀਮਤੀ ਇਨਾਮ ਮੰਨਿਆ ਜਾਂਦਾ ਸੀ। ਇਸ ਤੋਂ ਇਲਾਵਾ ਜੈਤੂਨ ਦਾ ਤੇਲ ਵੀ ਜੇਤੂਆਂ ਨੂੰ ਦਿੱਤਾ ਜਾਂਦਾ ਸੀ। ਯੂਨਾਨੀ ਲੋਕ ਜੈਤੂਨ ਨੂੰ ਤਾਕਤ ਅਤੇ ਬੁੱਧੀ ਦੀ ਦੇਵੀ ਦੇ ਪ੍ਰਤੀਕ ਵਜੋਂ ਮਾਨਤਾ ਦਿੰਦੇ ਆਏ ਹਨ। (ਸਮਾਪਤ)


-ਮੋਬਾ: 98722-38722

ਰਿਸ਼ੀਕੇਸ਼ ਦਾ ਮਾਣ ਸੋਨ ਤਗਮਾ ਜੇਤੂ ਖਿਡਾਰੀ ਧਨਵੀਰ ਸਿੰਘ ਭੰਡਾਰੀ

ਧਨਵੀਰ ਸਿੰਘ ਭੰਡਾਰੀ ਨੂੰ ਜੇਕਰ ਪੂਰੇ ਉੱਤਰਾਖੰਡ ਦਾ ਮਾਣ ਆਖ ਦਿੱਤਾ ਜਾਵੇ ਤਾਂ ਅਤਿਕਥਨੀ ਨਹੀਂ ਆਖੀ ਜਾ ਸਕਦੀ ਪਰ ਇਸ ਦੇ ਨਾਲ ਹੀ ਪਵਿੱਤਰ ਗੰਗਾ ਨਦੀ ਦੇ ਕਿਨਾਰੇ ਵਸੇ ਸ਼ਹਿਰ ਰਿਸ਼ੀਕੇਸ ਦੇ ਵਾਸੀ ਆਖਦੇ ਹਨ ਕਿ ਧਨਵੀਰ ਸਿੰਘ ਸਾਡਾ ਮਾਣ ਹੈ। ਧਨਵੀਰ ਸਿੰਘ ਦਾ ਜਨਮ ਰਿਸ਼ੀਕੇਸ ਵਿਖੇ 10 ਮਈ, 1985 ਨੂੰ ਪਿਤਾ ਸੱਤਿਆ ਸਿੰਘ ਦੇ ਘਰ ਮਾਤਾ ਗਨੇਸੀ ਦੇਵੀ ਦੀ ਕੁੱਖੋਂ ਤਪੋਵਨ ਲਖਸ਼ਮਣ ਝੂਲਾ ਵਿਖੇ ਹੋਇਆ। ਧਨਵੀਰ ਸਿੰਘ ਨੂੰ ਖੇਡਾਂ ਦਾ ਬਹੁਤ ਸ਼ੌਕ ਸੀ ਅਤੇ ਉਹ ਸਕੂਲੀ ਪੱਧਰ 'ਤੇ ਹੀ ਇਕ ਚੰਗੇ ਦੌੜਾਕ ਵਜੋਂ ਉੱਭਰਿਆ ਅਤੇ ਉਹ 1500 ਮੀਟਰ, 3000 ਮੀਟਰ ਅਤੇ 5000 ਮੀਟਰ ਦੌੜ ਵਿਚ ਸਕੂਲ ਵਜੋਂ ਚੈਂਪੀਅਨ ਬਣਿਆ ਅਤੇ ਧਨਵੀਰ ਸਿੰਘ ਦੀ ਇਹ ਦਿਲੀ ਇੱਛਾ ਸੀ ਕਿ ਉਹ ਅੰਤਰਰਾਸ਼ਟਰੀ ਪੱਧਰ 'ਤੇ ਦੇਸ਼ ਲਈ ਦੌੜੇਗਾ ਅਤੇ ਆਪਣਾ ਤੇ ਆਪਣੇ ਦੇਸ਼ ਦਾ ਨਾਂਅ ਰੌਸ਼ਨ ਕਰੇਗਾ ਪਰ ਸ਼ਾਇਦ ਕੁਦਰਤ ਨੂੰ ਕੁਝ ਹੋਰ ਹੀ ਮਨਜ਼ੂਰ ਸੀ ਕਿ ਸਾਲ 2009 ਵਿਚ ਉਹ ਆਪਣੇ ਇਕ ਦੋਸਤ ਨਾਲ ਬਾਜ਼ਾਰ ਤੋਂ ਘਰ ਵਾਪਸ ਆ ਰਿਹਾ ਸੀ ਤਾਂ ਉਨ੍ਹਾਂ ਨੂੰ ਇਕ ਅਣਪਛਾਤੇ ਵਾਹਨ ਨੇ ਬੁਰੀ ਤਰ੍ਹਾਂ ਲਪੇਟ ਵਿਚ ਲੈ ਲਿਆ ਅਤੇ ਉਹ ਦੋਵੇਂ ਦੋਸਤ ਜ਼ਖਮੀ ਹੋ ਗਏ।
ਬੁਰੀ ਤਰ੍ਹਾਂ ਜ਼ਖ਼ਮੀ ਹੋਏ ਧਨਵੀਰ ਸਿੰਘ ਦਾ ਡਾਕਟਰੀ ਇਲਾਜ ਚੱਲਿਆ ਪਰ ਇਲਾਜ ਹੋਣ ਤੋਂ ਬਾਅਦ ਡਾਕਟਰਾਂ ਨੇ ਉਸ ਨੂੰ ਸਪਾਈਨਲ ਕੋਰਡ ਇੰਜਰੀ ਹੋ ਜਾਣ ਦੀ ਪੁਸ਼ਟੀ ਕਰ ਦਿੱਤੀ ਭਾਵ ਉਸ ਦੇ ਨਿਚਲੇ ਹਿੱਸੇ ਨੇ ਕੰਮ ਕਰਨਾ ਛੱਡ ਦਿੱਤਾ ਅਤੇ ਜਦ ਇਸ ਗੱਲ ਦਾ ਪਤਾ ਧਨਵੀਰ ਸਿੰਘ ਨੂੰ ਲੱਗਾ ਤਾਂ ਉਸ ਦੇ ਪੈਰਾਂ ਥੱਲਿਓਂ ਜ਼ਮੀਨ ਨਿਕਲ ਗਈ ਅਤੇ ਉਹ ਸੋਚਣ ਲੱਗਾ ਕਿ ਕੀ ਤੋਂ ਕੀ ਹੋ ਗਿਆ। ਧਨਵੀਰ ਸਿੰਘ ਇਸ ਹਾਦਸੇ ਤੋਂ ਬਾਅਦ ਡੂੰਘੇ ਸਦਮੇ ਵਿਚ ਚਲਾ ਗਿਆ। ਮਾਂ-ਬਾਪ ਨੇ ਆਸਰਾ ਦਿੱਤਾ ਅਤੇ ਉਸ ਨੂੰ ਬੈਸਾਖੀਆਂ ਦੇ ਸਹਾਰੇ ਚੱਲਣ ਦੇ ਸਮਰੱਥ ਕਰ ਦਿੱਤਾ। ਇਕ ਦਿਨ ਉਹ ਘਰ ਵਿਚ ਬੈਠਾ ਦੂਰ ਤੱਕ ਵਿਸ਼ਾਲ ਹਿਮਾਲਿਆ ਦੇ ਪਹਾੜ ਤੱਕ ਰਿਹਾ ਸੀ ਅਤੇ ਧਨਵੀਰ ਸਿੰਘ ਨੇ ਸੋਚਿਆ ਕਿ ਕੁਦਰਤ ਵੀ ਕਿੰਨੀ ਮਹਾਨ ਹੈ, ਪਹਾੜਾਂ ਵਿਚੋਂ ਦੀ ਦੁੱਧ ਰੰਗੀ ਇਕ ਬੱਦਲੀ ਉੱਚੀ ਉਡਾਨ ਭਰਦੀ ਦਿਖਾਈ ਦਿੱਤੀ ਤਾਂ ਧਨਵੀਰ ਸਿੰਘ ਸੋਚਣ ਲੱਗਾ ਕਿ, 'ਇਤਨੀ ਠੋਕਰੇਂ ਦੇਨੇ ਕੇ ਲੀਏ ਸ਼ੁਕਰੀਆਂ ਏ ਜ਼ਿੰਦਗੀ, ਚਲਨੇ ਕਾ ਨਾ ਸਹੀ ਸੰਭਲਨੇ ਕਾ ਹੁਨਰ ਤੋ ਆ ਈ ਜਾਏਗਾ...।' ਕੁਦਰਤ ਦਾ ਭਾਣਾ ਸਵੀਕਾਰ ਕਰ ਧਨਵੀਰ ਹੌਂਸਲੇ ਵਿਚ ਆਇਆ ਅਤੇ ਮਨ ਨੇ ਉਡ ਰਹੀ ਬੱਦਲੀ ਵਾਂਗ ਉਡਾਨ ਭਰੀ ਅਤੇ ਅੰਗੜਾਈ ਲੈ ਕੇ ਬੋਲਿਆ, 'ਜ਼ਿੰਦਗੀ ਚੱਲਨੇ ਕਾ ਨਾਮ ਹੈ...।' ਧਨਵੀਰ ਸਿੰਘ ਨੇ ਯੋਗਾ ਕਰਨਾ ਅਤੇ ਸਿੱਖਣਾ ਸ਼ੁਰੂ ਕਰ ਦਿੱਤਾ ਅਤੇ ਉਹ ਇਸ ਖੇਤਰ ਵਿਚ ਯੋਗ ਗੁਰੂ ਬਣਿਆ। ਇਕ ਦਿਨ ਉਸ ਨੂੰ ਸਪਾਈਨਲ ਕੋਰਡ ਇੰਜਰੀ ਤੋਂ ਹੀ ਪੀੜਤ ਅਤੇ ਪੈਰਾ ਖਿਡਾਰੀ ਗਜਿੰਦਰ ਸਿੰਘ ਨੇਗੀ ਦਾ ਫੋਨ ਆਇਆ। ਉਸ ਨੇ ਉਸ ਨੂੰ ਅੰਗਹੀਣ ਭਾਵ ਪੈਰਾ ਖੇਡਾਂ ਬਾਰੇ ਜਾਣਕਾਰੀ ਦਿੱਤੀ ਅਤੇ ਧਨਵੀਰ ਸਿੰਘ ਨੂੰ ਲੱਗਾ ਕਿ ਜਿਵੇਂ ਉਸ ਦੀ ਉਡਾਨ ਨੂੰ ਹੋਰ ਪੰਖ ਲੱਗ ਗਏ ਅਤੇ ਧਨਵੀਰ ਸਿੰਘ ਵੀਲ੍ਹਚੇਅਰ ਉੱਪਰ ਖੇਡਾਂ ਦੀ ਤਿਆਰੀ ਕਰਨ ਲੱਗਿਆ ਅਤੇ ਗਜਿੰਦਰ ਸਿੰਘ ਨੇਗੀ ਹੀ ਉਸ ਨੂੰ ਪੰਜਾਬ ਦੇ ਜਲੰਧਰ ਸ਼ਹਿਰ ਵਿਚ ਲਵਲੀ ਯੂਨੀਵਰਸਿਟੀ ਵਿਚ ਹੋਣ ਵਾਲੀਆਂ ਪੈਰਾ ਖੇਡਾਂ ਵਿਚ ਹਿੱਸਾ ਦਿਵਾਉਣ ਲਈ ਲੈ ਕੇ ਆਇਆ, ਜਿੱਥੇ ਧਨਵੀਰ ਸਿੰਘ ਨੇ ਸ਼ਾਟਪੁੱਟ ਵਿਚ ਸੋਨ ਤਗਮਾ ਅਤੇ ਡਿਸਕਸ ਥਰੋ ਅਤੇ ਜੈਵਲਿਨ ਥਰੋ ਵਿਚ ਚਾਂਦੀ ਦਾ ਤਗਮਾ ਆਪਣੇ ਨਾਂਅ ਕਰ ਲਿਆ।
ਫਿਰ ਧਨਵੀਰ ਸਿੰਘ ਨੇ ਪਿੱਛੇ ਮੁੜ ਕੇ ਨਹੀਂ ਵੇਖਿਆ ਅਤੇ ਇਕ ਤੋਂ ਇਕ ਪ੍ਰਾਪਤੀਆਂ ਕਰਨ ਲੱਗਿਆ। ਜਦ ਉਸ ਦਾ ਨਾਂਅ ਉੱਤਰਾਖੰਡ ਵਿਚ ਚਰਚਾ ਵਿਚ ਆਇਆ ਤਾਂ ਉੱਤਰਾਖੰਡ ਦੀ ਵੀਲ੍ਹਚੇਅਰ ਕ੍ਰਿਕਟ ਟੀਮ ਦੇ ਕੋਚ ਹਰੀਸ਼ ਚੌਧਰੀ ਨੇ ਉਸ ਨਾਲ ਸੰਪਰਕ ਕੀਤਾ ਤਾਂ ਉਸ ਦੀ ਚੋਣ ਵੀਲ੍ਹਚੇਅਰ ਕ੍ਰਿਕਟ ਟੀਮ ਵਿਚ ਹੋ ਗਈ ਅਤੇ ਟੀਮ ਵਿਚ ਇਕ ਸਫਲ ਬੈਟਸਮੈਨ ਬਣਿਆ ਅਤੇ ਬਹੁਤ ਸਾਰੇ ਮੈਚਾਂ ਵਿਚ ਉਹ ਮੈਨ ਆਫ ਦਾ ਮੈਚ ਚੁਣਿਆ ਗਿਆ। ਸਾਲ 2019 ਦੇ ਖੇਲ ਮਹਾਂਕੁੰਭ ਵਿਚ ਉਸ ਨੇ ਸ਼ਾਟਪੁੱਟ ਅਤੇ ਡਿਸਕਸ ਥਰੋ ਵਿਚ 2 ਸੋਨ ਤਗਮੇ ਜਿੱਤੇ ਅਤੇ ਉੱਤਰਾਖੰਡ ਦੀਆਂ ਸਟੇਟ ਖੇਡਾਂ ਵਿਚ ਵੀ ਉਸ ਨੇ ਭਾਗ ਲਿਆ, ਜਿਥੇ ਇਕ ਸੋਨ ਤਗਮਾ ਅਤੇ ਇਕ ਕਾਂਸੀ ਦਾ ਤਗਮਾ ਆਪਣੀ ਝੋਲੀ ਪਾ ਕੇ ਆਪਣੇ ਪ੍ਰਾਂਤ ਦਾ ਮਾਣ ਵਧਾਇਆ। ਧਨਵੀਰ ਸਿੰਘ ਮਾਣ ਨਾਲ ਆਖਦਾ ਹੈ ਕਿ ਖੇਡਣਾ ਉਸ ਦਾ ਸ਼ੌਕ ਵੀ ਹੈ ਅਤੇ ਉਸ ਦੀ ਆਦਤ ਵੀ ਹੈ। ਧਨਵੀਰ ਸਿੰਘ ਖੇਡਾਂ ਦੇ ਨਾਲ-ਨਾਲ ਜਿੱਥੇ ਸਕੂਲ ਵਿਚ ਬੱਚਿਆਂ ਨੂੰ ਸਿੱਖਿਅਕ ਬਣਾ ਰਿਹਾ ਹੈ, ਉਥੇ ਉਹ ਯੋਗਾ ਵਿਚ ਵੀ ਐਮ. ਏ. ਕਰ ਰਿਹਾ ਹੈ ਅਤੇ ਯੋਗ ਸਾਧਨਾ ਨਾਲ ਉਹ ਯੋਗ ਸਿਖਾ ਕੇ ਲੋਕਾਂ ਨੂੰ ਬਿਮਾਰੀਆਂ ਤੋਂ ਵੀ ਬਚਾ ਰਿਹਾ ਹੈ।


-ਮੋਗਾ। ਮੋਬਾ: 98551-14484

ਜਿੱਤਿਆ ਰਿਕਾਰਡ 12ਵਾਂ ਫਰੈਂਚ ਓਪਨ ਖ਼ਿਤਾਬ

ਲਾਲ ਬਜਰੀ 'ਤੇ ਕਾਇਮ ਰਹੀ ਨਡਾਲ ਦੀ ਬਾਦਸ਼ਾਹਤ

ਸਾਲ 2019 ਦਾ ਪਹਿਲਾ ਅੱਧ ਰਾਫੇਲ ਨਡਾਲ ਦੇ ਕੈਰੀਅਰ ਦੇ ਇਤਿਹਾਸ ਵਿਚ ਸੁਨਹਿਰੀ ਪ੍ਰਾਪਤੀ ਵਜੋਂ ਯਾਦ ਕੀਤਾ ਜਾਵੇਗਾ। ਇਸ ਵਰ੍ਹੇ ਟੈਨਿਸ ਕੋਰਟ 'ਤੇ ਉਹ ਮੁਕੱਦਰ ਦਾ ਸਿਕੰਦਰ ਬਣ ਕੇ ਛਾਇਆ ਹੋਇਆ ਹੈ, ਜਿੱਤ ਦੀ ਦੇਵੀ ਉਸ ਉੱਤੇ ਪੂਰੀ ਤਰ੍ਹਾਂ ਮਿਹਰਬਾਨ ਹੈ। ਹਾਲ ਹੀ 'ਚ ਫਰੈਂਚ ਓਪਨ 'ਚ ਸਪੇਨ ਦੇ ਟੈਨਿਸ ਸਟਾਰ ਨਡਾਲ ਨੇ ਇਕ ਵਾਰ ਫਿਰ ਸਾਬਤ ਕਰ ਦਿੱਤਾ ਹੈ ਕਿ ਉਸ ਨੂੰ ਕਲੇ ਕੋਰਟ ਦਾ ਕਿੰਗ (ਲਾਲ ਬਜਰੀ ਦਾ ਬਾਦਸ਼ਾਹ) ਕਿਉਂ ਕਿਹਾ ਜਾਂਦਾ ਹੈ? 33 ਸਾਲਾਂ ਦੇ ਨਡਾਲ ਨੇ ਫਾਈਨਲ ਮੁਕਾਬਲੇ ਵਿਚ ਆਸਟ੍ਰੇਲੀਆ ਦੇ ਡੋਮੀਨਿਕ ਥਇਏਮ ਨੂੰ ਹਰਾ ਕੇ ਆਪਣਾ ਰਿਕਾਰਡ 12ਵਾਂ ਫਰੈਂਚ ਓਪਨ ਖਿਤਾਬ ਜਿੱਤ ਲਿਆ। ਇਸ ਜਿੱਤ ਦੇ ਨਾਲ ਹੀ ਉਸ ਦੇ ਗਰੈਂਡ ਸਲੈਮ ਖਿਤਾਬਾਂ ਦੀ ਲੜੀ 18 ਤੱਕ ਪਹੁੰਚ ਗਈ ਹੈ। ਇਸ ਤੋਂ ਪਹਿਲਾਂ ਉਹ 11 ਫਰੈਂਚ ਓਪਨ, ਇਕ ਆਸਟ੍ਰੇਲੀਆ ਓਪਨ, ਦੋ ਵਿੰਬਲਡਨ ਅਤੇ 3 ਯੂ. ਐਸ. ਓਪਨ ਖਿਤਾਬ ਜਿੱਤ ਚੁੱਕਾ ਹੈ। ਫਰੈਂਚ ਓਪਨ 'ਚ ਨਡਾਲ ਨੇ ਹੁਣ ਤੱਕ 94 ਮੈਚ ਖੇਡੇ ਹਨ, ਜਿਨ੍ਹਾਂ ਵਿਚੋਂ ਸਿਰਫ ਦੋ ਹੀ ਹਾਰੇ ਹਨ। ਦੂਜੇ ਪਾਸੇ ਇਕ ਵਾਰ ਫਿਰ ਕੈਰੀਅਰ ਦੇ ਪਹਿਲੇ ਗਰੈਂਡ ਸਲੈਮ ਜਿੱਤਣ ਦੀ ਡੋਮੀਨਿਕ ਥਇਏਮ ਦੀ ਹਸਰਤ ਪੂਰੀ ਨਾ ਹੋ ਸਕੀ। ਦੁਨੀਆ ਦੇ ਦੂਜੇ ਨੰਬਰ ਦੇ ਖਿਡਾਰੀ ਨਡਾਲ ਨੇ ਚੌਥੇ ਨੰਬਰ ਦੇ ਖਿਡਾਰੀ ਥਇਏਮ ਨੂੰ ਚਾਰ ਸੈਟਾਂ 'ਚ 6-3, 5-7, 6-1, 6-1 ਨਾਲ ਹਰਾ ਕੇ ਇਹ ਖਿਤਾਬ ਜਿੱਤ ਲਿਆ।
ਫਰੈਂਚ ਓਪਨ ਦੇ ਫਾਈਨਲ 'ਤੇ ਸਰਸਰੀ ਨਜ਼ਰ ਮਾਰੀਏ ਤਾਂ ਵਿਸ਼ਵ ਨੰਬਰ 4 ਥਇਏਮ 'ਤੇ ਨਡਾਲ ਸ਼ੁਰੂਆਤ ਤੋਂ ਹੀ ਹਾਵੀ ਰਿਹਾ, ਹਾਲਾਂਕਿ ਥਇਏਮ ਨੇ ਉਸ ਨੂੰ ਪੂਰੀ ਚੁਣੌਤੀ ਦਿੱਤੀ। ਪਹਿਲੇ ਸੈਟ 'ਚ ਇਕ ਸਮੇਂ ਸਕੋਰ 3-3 'ਤੇ ਬਰਾਬਰ ਸੀ ਪਰ ਨਡਾਲ ਨੇ ਖੇਡ 'ਤੇ ਪਕੜ ਬਣਾਉਂਦਿਆਂ ਫੋਰਹੈਡ ਅਤੇ ਬੈਕਹੈਡ ਦਾ ਮੁਹਾਰਤ ਭਰਿਆ ਮੁਜ਼ਾਹਰਾ ਕਰਦਿਆਂ ਜਿੱਤ ਹਾਸਲ ਕੀਤੀ। ਦੋਵਾਂ ਖਿਡਾਰੀਆਂ ਦਰਮਿਆਨ ਦੂਜਾ ਸੈੱਟ ਬੇਹੱਦ ਰੁਮਾਂਚਿਕ ਰਿਹਾ, 5-5 ਦੀ ਬਰਾਬਰੀ ਤੋਂ ਬਾਅਦ ਥਇਏਮ ਨੇ ਦਮਦਾਰ ਗਰਾਊਂਡ ਸਟਰੋਕ ਖੇਡੇ ਤੇ ਦੂਜਾ ਸੈੱਟ ਆਪਣੇ ਨਾਂਅ ਕਰ ਲਿਆ। ਤੀਜੇ ਸੈਟ ਵਿਚ ਨਡਾਲ ਨੇ ਥਇਏਮ ਨੂੰ ਕੋਈ ਮੌਕਾ ਨਹੀਂ ਦਿੱਤਾ ਅਤੇ ਅਸਾਨੀ ਨਾਲ ਅਗਲੇ ਸੈਟ 6-1, 6-1 ਦੇ ਵੱਡੇ ਫਰਕ ਨਾਲ ਮੈਚ 'ਤੇ ਜੇਤੂ ਹਸਤਾਖਰ ਕੀਤੇ। ਇਸ ਮੈਚ ਵਿਚ ਨਡਾਲ ਨੇ ਕੁਲ 38 ਵਿਨਰਜ਼ ਲਗਾਏ, ਜਦਕਿ ਥਇਏਮ 31 ਵਿਨਰਜ਼ ਹੀ ਲਗਾ ਸਕੇ।
ਫਰੈਂਚ ਓਪਨ ਦੇ ਸੈਮੀਫਾਈਨਲ ਮੁਕਾਬਲੇ ਦੀ ਗੱਲ ਕਰੀਏ ਤਾਂ ਰਾਫੇਲ ਨਡਾਲ ਨੇ ਵਿਸ਼ਵ ਰੈਂਕਿੰਗ ਵਿਚ ਤੀਜੇ ਨੰਬਰ ਦੇ ਖਿਡਾਰੀ ਸਵਿਟਜ਼ਰਲੈਂਡ ਦੇ ਰੋਜਰ ਫੈਡਰਰ ਨੂੰ ਅਸਾਨੀ ਨਾਲ ਹਰਾ ਕੇ 26ਵੀਂ ਵਾਰ ਕਿਸੇ ਗਰੈਂਡ ਸਲੈਮ ਟੂਰਨਾਮੈਂਟ ਦੇ ਫਾਈਨਲ 'ਚ ਪਹੁੰਚੇ। ਇਸ ਤੋਂ ਪਹਿਲਾਂ 2005 ਵਿਚ ਦੋਵੇਂ ਸੈਮੀਫਾਈਨਲ 'ਚ ਭਿੜ ਚੁੱਕੇ ਹਨ। ਸੰਨ 2006, 2007, 2008, 2011 'ਚ ਦੋਵੇਂ ਫਰੈਂਚ ਓਪਨ ਦੇ ਫਾਈਨਲ 'ਚ ਆਹਮੋ-ਸਾਹਮਣੇ ਹੋਏ ਪਰ ਜਿੱਤ ਦੀ ਇਬਾਰਤ ਨਡਾਲ ਦੇ ਨਾਂਅ ਹੀ ਲਿਖੀ ਗਈ। ਦੂਜਾ ਸੈਮੀਫਾਈਨਲ ਵੱਡੇ ਉਲਟਫੇਰ ਵਾਲਾ ਸਾਬਤ ਹੋਇਆ। ਖਿਤਾਬ ਦੇ ਵੱਡੇ ਦਾਅਵੇਦਾਰ ਦੁਨੀਆ ਦੇ ਨੰਬਰ ਇਕ ਖਿਡਾਰੀ ਸਰਬੀਆ ਦੇ ਨੋਵਾਕ ਜੋਕੋਵਿਕ ਨੂੰ ਹਰਾ ਕੇ ਥਇਏਮ ਨੇ ਜਿਥੇ ਪਹਿਲੀ ਵਾਰ ਫਾਈਨਲ ਖੇਡਣ ਦਾ ਹੱਕ ਹਾਸਲ ਕੀਤਾ, ਉਥੇ ਜੋਕੋਵਿਕ ਦੇ ਲਗਾਤਾਰ 26 ਮੈਚ ਜਿੱਤਣ ਦੀ ਲੈਅ ਨੂੰ ਵੀ ਤੋੜ ਦਿਖਾਇਆ। ਫਾਈਨਲ 'ਚ ਥਇਏਮ ਤਜਰਬੇਕਾਰ ਨਡਾਲ ਅੱਗੇ ਟਿਕ ਨਾ ਸਕੇ ਤੇ ਨਡਾਲ ਨੇ ਰਿਕਾਰਡ 12ਵੀਂ ਵਾਰ ਫਰੈਂਚ ਓਪਨ ਦਾ ਖਿਤਾਬ ਜਿੱਤ ਕੇ ਸਾਬਤ ਕਰ ਦਿੱਤਾ, ਲਾਲ ਬਜਰੀ 'ਤੇ ਉਸ ਦੀ ਬਾਦਸ਼ਾਹਤ ਕਾਇਮ ਹੈ।
ਫਰੈਂਚ ਓਪਨ ਦਾ ਮਹਿਲਾ ਸਿੰਗਲ ਖਿਤਾਬ ਇਸ ਵਾਰ ਆਸਟ੍ਰੇਲੀਆ ਦੀ ਐਸ਼ਲੇ ਬਾਰਟੀ ਨੇ ਚੈਕ ਗਣਰਾਜ ਦੀ ਮਾਰਕੇਤਾ ਬੋਰਡੂਸੋਵਾ ਨੂੰ ਹਰਾ ਕੇ ਜਿੱਤਿਆ। ਦੋਵੇਂ ਖਿਡਾਰਨਾਂ ਕਿਸੇ ਗਰੈਂਡਸਲੈਮ ਦੇ ਖਿਤਾਬੀ ਮੁਕਾਬਲੇ 'ਚ ਪਹਿਲੀ ਵਾਰ ਪਹੁੰਚੀਆਂ ਸਨ। ਇਹ ਖਿਤਾਬ ਜਿੱਤਣ ਵਾਲੀ ਬਾਰਟੀ ਪੰਜਵੀਂ ਆਸਟ੍ਰੇਲੀਅਨ ਮਹਿਲਾ ਹੈ। ਪਿਛਲੀ ਵਾਰ ਆਸਟ੍ਰੇਲੀਆ ਲਈ ਮਾਰਗ੍ਰੇਟ ਕੋਰਟ ਨੇ 1973 'ਚ ਫਾਈਨਲ ਜਿੱਤਿਆ ਸੀ। 23 ਸਾਲਾਂ ਦੀ ਬਾਰਟੀ ਇਸ ਜਿੱਤ ਨਾਲ ਰੈਂਕਿੰਗ 'ਚ ਦੂਜੇ ਨੰਬਰ 'ਤੇ ਪਹੁੰਚ ਗਈ ਹੈ। ਬਾਰਟੀ ਨੇ 8 ਸਾਲ ਬਾਅਦ ਆਸਟ੍ਰੇਲੀਆ ਨੂੰ ਕੋਈ ਗਰੈਂਡ ਸਲੈਮ ਦਿਵਾਇਆ ਹੈ। ਪਿਛਲੀ ਵਾਰ ਸਮਾਥਾ ਸਟੋਰਸ ਨੇ 2011 'ਚ ਯੂ.ਐਸ. ਓਪਨ ਜਿੱਤਿਆ ਸੀ। 5 ਸਾਲ ਪਹਿਲਾਂ ਬਾਰਟੀ ਟੈਨਿਸ ਛੱਡ ਕੇ ਕ੍ਰਿਕਟ ਖਿਡਾਰੀ ਬਣ ਗਈ ਸੀ ਪਰ ਸ਼ਾਨਦਾਰ ਟੈਨਿਸ ਕੋਰਟ 'ਚ ਵਾਪਸੀ ਕਰਦਿਆਂ ਆਸਟ੍ਰੇਲੀਆਈ ਸਨਸਨੀ ਨੇ ਪਲੇਠਾ ਖਿਤਾਬ ਜਿੱਤ ਕੇ ਸਭ ਨੂੰ ਹੈਰਾਨ ਕਰ ਦਿੱਤਾ।


-ਮੋਬਾ: 94636-12204





Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX