ਤਾਜਾ ਖ਼ਬਰਾਂ


ਭਾਰਤ -ਵੈਸਟ ਇੰਡੀਜ਼ ਪਹਿਲਾ ਟੈੱਸਟ ਮੈਚ : ਪਹਿਲੀ ਪਾਰੀ 'ਚ ਵੈਸਟ ਇੰਡੀਜ਼ ਦੀ ਪੂਰੀ ਟੀਮ 224 ਦੌੜਾਂ ਬਣਾ ਕੇ ਆਊਟ
. . .  about 1 hour ago
ਆਰਥਿਕ ਤੰਗੀ ਤੋਂ ਪ੍ਰੇਸ਼ਾਨ ਕਿਸਾਨ ਵੱਲੋਂ ਖ਼ੁਦਕੁਸ਼ੀ
. . .  about 2 hours ago
ਮਹਿਲ ਕਲਾਂ ,24 ਅਗਸਤ (ਤਰਸੇਮ ਸਿੰਘ ਚੰਨਣਵਾਲ)- ਪੁਲਿਸ ਥਾਣਾ ਮਹਿਲ ਕਲਾਂ ਅਧੀਨ ਆਉਂਦੇ ਪਿੰਡ ਕਲਾਲਾ ਵਿਖੇ ਇੱਕ ਕਿਸਾਨ ਵੱਲੋਂ ਆਰਥਿਕ ਤੰਗੀ ਤੋਂ ਪ੍ਰੇਸ਼ਾਨ ਹੋ ਜ਼ਹਿਰੀਲੀ ਦਵਾਈ ਨਿਗਲ ਕੇ ਖ਼ੁਦਕੁਸ਼ੀ ਕਰ ਲਈ ...
ਰੌਕਸੀ ਚਾਵਲਾ ਦੀ ਲਾਸ਼ ਕੈਨੇਡਾ ਤੋਂ ਪੁੱਜੀ, ਕੋਟਕਪੂਰਾ 'ਚ ਹੋਇਆ ਅੰਤਿਮ ਸੰਸਕਾਰ
. . .  about 3 hours ago
ਕੋਟਕਪੂਰਾ, 24 ਅਗਸਤ (ਮੋਹਰ ਸਿੰਘ ਗਿੱਲ)-ਕੈਨੇਡਾ ਵਿਖੇ ਪੜ੍ਹਾਈ ਕਰਨ ਲਈ ਗਏ ਕੋਟਕਪੂਰਾ ਸ਼ਹਿਰ ਦੇ 23 ਸਾਲਾ ਨੌਜਵਾਨ ਰੌਕਸੀ ਚਾਵਲਾ ਦੀ ਮ੍ਰਿਤਕ ਦੇਹ ਅੱਜ ਜਿਉਂ ਹੀ ਉਸ ਦੇ ਘਰ ਪੁੱਜੀ ਤਾਂ ਘਰ 'ਚ ...
ਆਸ਼ੂ ਵਲੋਂ ਅਧਿਕਾਰੀਆਂ ਨੂੰ ਫਿਲੌਰ 'ਚ ਪਏ 8 ਪਾੜਾਂ ਨੂੰ ਜਲਦ ਪੂਰਨ ਦੀਆਂ ਹਦਾਇਤਾਂ
. . .  about 3 hours ago
ਫਿਲੌਰ, 24 ਅਗਸਤ (ਇੰਦਰਜੀਤ ਚੰਦੜ੍ਹ) - ਖ਼ੁਰਾਕ, ਸਿਵਲ ਤੇ ਸਪਲਾਈ ਅਤੇ ਖਪਤਕਾਰ ਮਾਮਲਿਆਂ ਬਾਰੇ ਮੰਤਰੀ ਪੰਜਾਬ....
ਪਿੰਡ ਘੋਲੀਆ ਖ਼ੁਰਦ ਨੂੰ ਨਸ਼ਾ ਮੁਕਤ ਕਰਨ ਸਬੰਧੀ ਕੀਤੀ ਗਈ ਵਿਸ਼ਾਲ ਮੀਟਿੰਗ
. . .  about 3 hours ago
ਸਮਾਧ ਭਾਈ, 24 ਅਗਸਤ (ਗੁਰਮੀਤ ਸਿੰਘ ਮਾਣੂੰਕੇ)- ਪਿੰਡ ਘੋਲੀਆ ਖ਼ੁਰਦ ਦੀ ਦਾਣਾ ਮੰਡੀ 'ਚ ਨਸ਼ਾ ਮੁਕਤ ਕਰਨ ...
ਸ੍ਰੀਨਗਰ ਤੋਂ ਵਾਪਸ ਆਏ ਵਿਰੋਧੀ ਧਿਰ ਦੇ ਵਫ਼ਦ ਨੇ ਬਡਗਾਮ ਦੇ ਜ਼ਿਲ੍ਹਾ ਮੈਜਿਸਟਰੇਟ ਨੂੰ ਲਿਖਿਆ ਪੱਤਰ
. . .  about 3 hours ago
ਨਵੀਂ ਦਿੱਲੀ, 24 ਅਗਸਤ- ਸ੍ਰੀਨਗਰ ਤੋਂ ਵਾਪਸ ਆਏ ਵਿਰੋਧੀ ਧਿਰ ਦੇ ਵਫ਼ਦ ਨੇ ਬਡਗਾਮ ਦੇ ਜ਼ਿਲ੍ਹਾ ਮੈਜਿਸਟਰੇਟ ਨੂੰ ਇਕ ਪੱਤਰ...
ਲਾਲ ਕ੍ਰਿਸ਼ਨ ਅਡਵਾਨੀ ਨੇ ਅਰੁਣ ਜੇਤਲੀ ਨੂੰ ਦਿੱਤੀ ਸ਼ਰਧਾਂਜਲੀ
. . .  about 3 hours ago
ਨਵੀਂ ਦਿੱਲੀ, 24 ਅਗਸਤ- ਭਾਜਪਾ ਦੇ ਸੀਨੀਅਰ ਨੇਤਾ ਲਾਲ ਕ੍ਰਿਸ਼ਨ ਅਡਵਾਨੀ ਨੇ ਸਾਬਕਾ ਵਿੱਤ ਮੰਤਰੀ ਅਰੁਣ ਜੇਤਲੀ...
ਦਿੱਲੀ ਪਹੁੰਚਿਆ ਸ੍ਰੀਨਗਰ ਤੋਂ ਵਾਪਸ ਭੇਜਿਆ ਗਿਆ ਵਿਰੋਧੀ ਧਿਰ ਦਾ ਵਫ਼ਦ
. . .  about 4 hours ago
ਨਵੀਂ ਦਿੱਲੀ, 24 ਅਗਸਤ- ਸ੍ਰੀਨਗਰ ਤੋਂ ਵਾਪਸ ਭੇਜਿਆ ਗਿਆ ਵਿਰੋਧੀ ਧਿਰ ਦਾ ਵਫ਼ਦ ਦਿੱਤੀ ਪਹੁੰਚ ਗਿਆ...
ਕਸ਼ਮੀਰ ਘਾਟੀ ਦੇ 69 ਪੁਲਿਸ ਥਾਣਿਆਂ ਤੋਂ ਹਟਾ ਲਈ ਗਈ ਦਿਨ ਦੀ ਪਾਬੰਦੀ- ਰੋਹਿਤ ਕਾਂਸਲ
. . .  about 4 hours ago
ਸ੍ਰੀਨਗਰ, 24 ਅਗਸਤ- ਜੰਮੂ-ਕਸ਼ਮੀਰ ਦੇ ਪ੍ਰਮੁੱਖ ਯੋਜਨਾ ਸਕੱਤਰ ਰੋਹਿਤ ਕਾਂਸਲ ਨੇ ਇਹ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ...
ਰਾਹੁਲ ਗਾਂਧੀ ਨੂੰ ਹੁਣ ਜੰਮੂ-ਕਸ਼ਮੀਰ 'ਚ ਆਉਣ ਲੋੜ ਨਹੀਂ- ਸਤਿਆਪਾਲ ਮਲਿਕ
. . .  about 4 hours ago
ਸ੍ਰੀਨਗਰ, 24 ਅਗਸਤ- ਰਾਹੁਲ ਗਾਂਧੀ ਸਮੇਤ ਵਿਰੋਧੀ ਧਿਰਾਂ ਦੇ ਨੇਤਾਵਾਂ ਦੇ ਅੱਜ ਸ੍ਰੀਨਗਰ ਆਉਣ 'ਤੇ ਜੰਮੂ-ਕਸ਼ਮੀਰ ਦੇ ਰਾਜਪਾਲ ਸਤਿਆਪਾਲ ਮਲਿਕ ਨੇ ਕਿਹਾ, ''ਹੁਣ ਉਨ੍ਹਾਂ ਨੂੰ ਇੱਥੇ ਆਉਣ ਦੀ ਲੋੜ ਨਹੀਂ, ਉਨ੍ਹਾਂ ਦੀ ਲੋੜ ਉਸ ਸਮੇਂ ਸੀ, ਜਦੋਂ ਉਨ੍ਹਾਂ ਦੇ ਸਹਿਯੋਗੀ ਸੰਸਦ...
ਹੋਰ ਖ਼ਬਰਾਂ..

ਖੇਡ ਜਗਤ

ਕਬੱਡੀ ਦੀ ਦੁਨੀਆ ਦੇ ਖੌਫ਼ਨਾਕ ਜਾਫੀਆਂ ਦੀ ਗੱਲ ਕਰਦਿਆਂ...

ਸਰਕਲ ਸਟਾਈਲ ਕਬੱਡੀ ਪੰਜਾਬੀ ਖਿੱਤੇ ਦੀ ਹਰਮਨ ਪਿਆਰੀ ਖੇਡ ਹੈ। ਇਸ ਖੇਡ ਨੂੰ ਬੁਲੰਦੀਆਂ 'ਤੇ ਪਹੁੰਚਾਉਣ ਵਾਲੇ ਵਧੇਰੇ ਖਿਡਾਰੀਆਂ ਦੀ ਹਾਲਤ ਭਾਵੇਂ ਇੰਨੀ ਵਧੀਆ ਨਹੀਂ ਹੈ। ਕਬੱਡੀ ਖੇਡ ਨੂੰ ਦੁਨੀਆ ਭਰ ਵਿਚ ਪ੍ਰਸਿੱਧ ਕਰਨ ਵਾਲੇ ਕੁਝ ਇਕ ਖਿਡਾਰੀਆਂ ਦੀ ਜੇ ਗੱਲ ਕਰੀਏ ਤਾਂ ਇਹ ਨਾਂਅ ਬੜੇ ਮਾਣ ਨਾਲ ਲਏ ਜਾਂਦੇ ਹਨ।
ਰਾਣਾ ਵੰਝ
ਮਾਝੇ ਦੀ ਧਰਤੀ ਦਾ ਜੰਮਪਲ ਰਣਜੀਤ ਸਿੰਘ ਰਾਣਾ ਵੰਝ ਕਬੱਡੀ ਦੀ ਦੁਨੀਆ ਦਾ ਆਫਤ ਜਾਫੀ ਹੋਇਆ ਹੈ। ਉਹਦੀ ਖੇਡ ਦਾ ਐਨਾ ਖੌਫ ਸੀ ਕਿ ਮਾਲਵੇ, ਦੁਆਬੇ ਦੇ ਵਧੇਰੇ ਧਾਵੀ ਉਸ ਨਾਲ ਖੇਡਣ ਤੋਂ ਕੰਨੀ ਕਤਰਾਉਂਦੇ ਸਨ। ਰਾਣੇ ਵੰਝ ਨੂੰ ਲੋਕ ਥੱਪੜ ਵਾਲੀ ਮਸ਼ੀਨ ਕਹਿੰਦੇ ਸਨ। ਰੂਪੋਵਾਲ ਚੌਗਾਵਾਂ ਪਿੰਡ ਦਾ ਰਾਣਾ ਵੰਝ ਭਾਰਤ ਸਮੇਤ ਵਿਦੇਸ਼ਾਂ ਵਿਚ ਵੀ ਆਪਣੀ ਖੇਡ ਦਾ ਲੋਹਾ ਮੰਨਵਾ ਚੁੱਕਾ ਹੈ। ਉਸ ਨੂੰ ਦੇਖ ਕੇ ਕਈ ਵਾਰ ਧਾਵੀਆਂ ਨੂੰ ਬੁਖਾਰ ਚੜ੍ਹ ਜਾਂਦਾ ਸੀ।
ਸੁਖਰਾਜ ਗੁਰਦਾਸਪੁਰੀਆ
ਬਟਾਲੇ ਨੇੜਲੇ ਪਿੰਡ ਕੋਟਲਾ ਨਵਾਬ ਦਾ ਸੁਖਰਾਜ ਸਿੰਘ ਵੀ ਪੰਜਾਬ ਦੀ ਕਬੱਡੀ ਵਿਚ ਕਹਿਰ ਜਾਫੀ ਵਜੋਂ ਜਾਣਿਆ ਜਾਂਦਾ ਹੈ, ਉਸ ਦੀ ਖੇਡ ਦਾ ਜਲਵਾ ਜਿਨ੍ਹਾਂ ਨੇ ਵੇਖਿਆ ਹੈ, ਉਨ੍ਹਾਂ ਦਾ ਮੰਨਣਾ ਹੈ ਕਿ ਰਾਣੇ ਵੰਝ ਤੋਂ ਬਾਅਦ ਉਹ ਮਾਝੇ ਦਾ ਅਜਿਹਾ ਖਿਡਾਰੀ ਹੋਇਆ, ਜਿਸ ਦੀ ਤਾਬ ਹਰ ਕੋਈ ਨਹੀਂ ਝੱਲ ਸਕਦਾ ਸੀ। ਕਬੱਡੀ ਦੀ ਦੁਨੀਆ ਵਿਚ ਉਸ ਦਾ ਨਾਂਅ ਵੀ ਬੜੇ ਫਖ਼ਰ ਨਾਲ ਲਿਆ ਜਾਂਦਾ ਹੈ।
ਫੌਜੀ ਕੁਰੜ ਛਾਪਾ
ਮਾਲਵੇ ਦੀ ਕਬੱਡੀ ਵਿਚ ਜਗਜੀਤ ਸਿੰਘ ਫੌਜੀ ਕੁਰੜ ਦੀ ਖੇਡ ਨੇ ਕਬੱਡੀ ਨੂੰ ਬਹੁਤ ਵੱਡਾ ਹੁਲਾਰਾ ਦਿੱਤਾ ਹੈ। ਅੰਗਰੇਜ਼ਾਂ ਵਰਗਾ ਲੰਮ-ਸਲੰਮਾ, ਗੋਰੇ ਨਿਛੋਹ ਰੰਗ ਦਾ ਫੌਜੀ 'ਵਨ ਮੈਨ ਆਰਮੀ' ਦੇ ਤੌਰ 'ਤੇ ਖੇਡਦਾ ਸੀ। ਪੰਜਾਬ ਰਾਜ ਬਿਜਲੀ ਬੋਰਡ ਲਈ ਉਹ ਕਈ ਸਾਲ ਖੇਡਦਾ ਰਿਹਾ। ਡੈਨੀਅਨ ਤੂਫਾਨ ਨੂੰ ਜੱਫੇ ਲਾਉਣ ਵਾਲੇ ਜਾਫੀਆਂ ਵਿਚ ਉਸ ਦਾ ਵੱਡਾ ਸ਼ੁਮਾਰ ਹੈ। ਫੌਜੀ ਨੂੰ ਵੇਖ ਕੇ ਰੇਡਰ ਮੈਦਾਨ ਛੱਡ ਕੇ ਭੱਜ ਜਾਂਦੇ ਸਨ।
ਰੌਂਤਿਆਂ ਵਾਲਾ ਫੌਜੀ
ਮੋਗੇ ਜ਼ਿਲ੍ਹੇ ਦੇ ਮਸ਼ਹੂਰ ਪਿੰਡ ਰੌਂਤੇ ਦਾ ਸੁਰਜੀਤ ਸਿੰਘ ਫੌਜੀ ਵੀ ਕਬੱਡੀ ਦਾ ਅੱਥਰਾ ਜਾਫੀ ਹੋਇਆ ਹੈ। ਜਿਹੜਾ ਧਾਵੀ ਨੂੰ ਫੜਦਾ ਘੱਟ ਤੇ ਕੁੱਟਦਾ ਬਹੁਤ ਸੀ। ਫੌਜੀ ਦੀ ਮਾਰ ਸਹਿਣ ਦਾ ਹਰ ਧਾਵੀ ਵਿਚ ਦਮ ਨਹੀਂ ਸੀ। ਉਹ ਕੈਨੇਡਾ ਦੀ ਹਰਜੀਤ ਕਲੱਬ ਵਲੋਂ ਖੇਡਿਆ, ਜਿਸ ਦੀਆਂ ਲੋਕ ਅੱਜ ਵੀ ਉਦਾਹਰਨਾਂ ਦਿੰਦੇ ਹਨ। ਫੌਜੀ ਦੇ ਸੁਭਾਅ ਵਾਂਗ ਉਸ ਦੀ ਖੇਡ ਵੀ ਅੜਬ ਰਵੱਈਏ ਵਾਲੀ ਸੀ।
ਜਿੰਦਰ ਖਾਨੋਵਾਲ
ਦੁਆਬੇ ਦੀ ਧਰਤੀ 'ਤੇ ਕਬੱਡੀ ਦੇ ਗੜ੍ਹ ਨਕੋਦਰ ਨੇੜਲੇ ਪਿੰਡ ਖਾਨੋਵਾਲ ਦੇ ਹਰਜਿੰਦਰ ਸਿੰਘ ਨੂੰ ਕਬੱਡੀ ਜਗਤ ਵਿਚ 'ਜਹਾਜ਼' ਦੇ ਨਾਂਅ ਨਾਲ ਵੀ ਸੱਦਿਆ ਗਿਆ ਹੈ, ਜਿਸ ਦੇ ਮਾਰੇ ਥੱਪੜਾਂ ਦੇ ਖੜਕੇ ਦੂਰ ਤੱਕ ਸੁਣਾਈ ਦਿੰਦੇ ਸਨ। ਕਬੱਡੀ ਦੀ ਲੰਮੀ ਪਾਰੀ ਖੇਡਣ ਤੋਂ ਬਾਅਦ ਉਸ ਨੇ ਨਵੀਂ ਪਨੀਰੀ ਨੂੰ ਕਬੱਡੀ ਨਾਲ ਜੋੜਨ ਲਈ ਦਸਮੇਸ਼ ਕਲੱਬ ਨਕੋਦਰ ਅਕੈਡਮੀ ਸਥਾਪਿਤ ਕੀਤੀ।
ਪੱਪੂ ਚੂਹੜਚੱਕ
ਮੋਗਾ ਨੇੜਲੇ ਪਿੰਡ ਚੂਹੜਚੱਕ ਦਾ ਗੁਰਸ਼ਰਨ ਸਿੰਘ ਪੱਪੂ ਕਬੱਡੀ ਦਾ ਵੱਡਾ ਮੱਲ ਸਾਬਤ ਹੋਇਆ ਹੈ, ਜਿਸ ਨੇ ਆਪਣੀਆਂ ਬਾਹਵਾਂ ਦੇ ਜ਼ੋਰ ਨਾਲ ਕਹਿੰਦੇ-ਕਹਾਉਂਦੇ ਧਾਵੀਆਂ ਨੂੰ ਰੋਕਿਆ ਹੈ। ਲੋਕ-ਗੀਤ ਵਾਂਗ ਪੱਪੂ ਦਾ ਨਾਂਅ ਕਬੱਡੀ ਪ੍ਰੇਮੀਆਂ ਦੇ ਮੂੰਹ ਚੜ੍ਹਿਆ ਹੋਇਆ ਹੈ।
ਸੋਨੀ ਸੁਨੇਤ
ਕਬੱਡੀ ਵਿਚ ਜਤਿੰਦਰ ਸਿੰਘ ਸੋਨੀ ਸੁਨੇਤ ਨੂੰ ਲੋਕ 'ਚੀਨ ਦੀ ਕੰਧ' ਕਹਿ ਕੇ ਬੁਲਾਉਂਦੇ ਸਨ। ਉਹ ਦੋ ਵਾਰ ਕੈਨੇਡਾ ਕੱਪ ਦਾ ਸਰਬੋਤਮ ਜਾਫੀ ਰਿਹਾ ਹੈ। 2009 ਵਿਚ ਇਕ ਮੈਚ ਵਿਚ 2 ਲੱਖ ਦੇ ਜੱਫੇ ਲਾਉਣ ਦਾ ਰਿਕਾਰਡ ਵੀ ਸੋਨੀ ਸੁਨੇਤ ਦੇ ਨਾਂਅ ਹੈ। ਬਗਲ ਭਰਨਾ, ਗੁੱਟ ਫੜਨਾ ਤੇ ਕੈਂਚੀ ਮਾਰਨ ਵਰਗੇ ਉਸ ਦੇ ਮੁੱਖ ਦਾਅ ਰਹੇ ਹਨ। ਕਬੱਡੀ ਵਿਚ ਪੂਰਾ ਇਕ ਦਹਾਕਾ ਸੋਨੀ ਸੁਨੇਤ ਦਾ ਨਾਂਅ ਚੱਲਿਆ ਹੈ।
ਮੰਗਤ ਸਿੰਘ ਮੰਗੀ ਬੱਗਾਪਿੰਡ
ਅਜੋਕੇ ਦੌਰ ਦੇ ਵੱਡੇ ਜਾਫੀਆਂ ਵਿਚ ਮੰਗੀ ਬੱਗਾਪਿੰਡ ਕਿਸੇ ਜਾਣ-ਪਛਾਣ ਦਾ ਮੁਥਾਜ ਨਹੀਂ ਹੈ। ਪੰਜਾਬ ਵਿਸ਼ਵ ਕੱਪ ਵਿਚ ਲਗਾਤਾਰ 2010-11 ਵਿਚ ਭਾਰਤੀ ਟੀਮ ਦੀ ਕਪਤਾਨੀ ਕਰਨ ਦੇ ਨਾਲ-ਨਾਲ ਸਰਬੋਤਮ ਜਾਫੀ ਦੇ ਤੌਰ 'ਤੇ ਟਰੈਕਟਰ ਜਿੱਤਣ ਦਾ ਮਾਣ ਵੀ ਇਸ ਖਿਡਾਰੀ ਦੇ ਨਾਂਅ ਰਿਹਾ ਹੈ। ਦੇਸ਼-ਵਿਦੇਸ਼ ਦੀਆਂ ਵੱਡੀਆਂ ਖੇਡ ਕਲੱਬਾਂ ਲਈ ਖੇਡਣਾ ਤੇ ਮੈਚ ਦੇ ਰੁਖ਼ ਬਦਲਣ ਵਾਲੇ ਖਿਡਾਰੀਆਂ ਵਿਚ ਮੰਗੀ ਬੱਗਾਪਿੰਡ ਦਾ ਨਾਂਅ ਬੜੇ ਫਖਰ ਨਾਲ ਲਿਆ ਜਾਂਦਾ ਹੈ। ਕੈਨੇਡਾ ਵਿਸ਼ਵ ਕੱਪ ਸਮੇਤ ਉਹ ਵਿਦੇਸ਼ਾਂ ਦੇ ਅਨੇਕਾਂ ਖੇਡ ਮੇਲਿਆਂ ਦਾ ਅੱਵਲ ਨੰਬਰ ਜਾਫੀ ਰਿਹੈ।
ਅਰਸ਼ ਚੋਹਲਾ ਸਾਹਿਬ
ਚੋਹਲਾ ਸਾਹਿਬ ਦੇ ਅਰਸ਼ ਨੂੰ ਕਬੱਡੀ ਵਿਚ ਲੋਕ ਡੀ.ਟੀ.ਓ. ਵੀ ਕਹਿੰਦੇ ਹਨ। ਛੋਟੀ ਉਮਰੇ ਅਰਸ਼ ਨੇ ਕਬੱਡੀ ਦੇ ਅੰਬਰ ਨੂੰ ਛੂਹ ਲਿਆ ਹੈ। 2013 ਵਿਚ ਇੰਗਲੈਂਡ ਖੇਡ ਸੀਜ਼ਨ ਸਮੇਤ 2018 ਕੈਨੇਡਾ ਸੀਜ਼ਨ ਤੇ ਵਿਸ਼ਵ ਕੱਪ ਕੈਨੇਡਾ ਦਾ ਉਹ ਬੈਸਟ ਜਾਫੀ ਚੁਣਿਆ ਗਿਆ ਹੈ। ਬਾਬਾ ਭਗਵਾਨ ਸਿੰਘ ਅਕੈਡਮੀ ਮਾਝਾ ਭਗਵਾਨਪੁਰ ਵਲੋਂ ਖੇਡਦਿਆਂ ਅਰਸ਼ 2019 ਵਿਚ ਸ੍ਰੀ ਅਨੰਦਪੁਰ ਸਾਹਿਬ ਸਮੇਤ ਪੰਜਾਬ ਖੇਡ ਸੀਜ਼ਨ ਦਾ ਵੀ ਸਰਬੋਤਮ ਜਾਫੀ ਹੈ। ਉੱਚੇ-ਲੰਮੇ ਕੱਦ-ਕਾਠ ਵਾਲੇ ਮਝੈਲ ਗੱਭਰੂ ਨੇ ਕਬੱਡੀ ਖੇਡ ਨੂੰ ਹੋਰ ਹੁਲਾਰਾ ਦਿੱਤਾ ਹੈ, ਜਿਸ ਦੀ ਖੇਡ ਦੀ ਗੁੱਡੀ ਅੰਬਰੀਂ ਚੜ੍ਹੀ ਹੋਈ ਹੈ।
ਇਹ ਕੁਝ ਇਕ ਖਿਡਾਰੀ ਹਨ, ਜਿਨ੍ਹਾਂ ਦਾ ਨਾਂਅ ਲੋਕ-ਗੀਤਾਂ ਵਾਂਗ ਪੰਜਾਬੀਆਂ ਦੇ ਬੁੱਲ੍ਹਾਂ 'ਤੇ ਚੜ੍ਹਿਆ ਹੋਇਆ ਹੈ, ਜਿਨ੍ਹਾਂ ਨੂੰ ਦੇਖ ਕੇ ਬਹੁਤ ਸਾਰੇ ਨੌਜਵਾਨ ਕਬੱਡੀ ਨਾਲ ਜੁੜ ਰਹੇ ਹਨ। ਪੰਜਾਬੀਆਂ ਦੀ ਹਰਮਨ ਪਿਆਰੀ ਖੇਡ ਕਬੱਡੀ ਨੂੰ ਇਨ੍ਹਾਂ ਖਿਡਾਰੀਆਂ 'ਤੇ ਹਮੇਸ਼ਾ ਮਾਣ ਰਹੇਗਾ।


-ਸੰਗਰੂਰ। ਮੋਬਾ: 98724-59691


ਖ਼ਬਰ ਸ਼ੇਅਰ ਕਰੋ

ਪੈਰਾ-ਬੈਡਮਿੰਟਨ ਚੈਂਪੀਅਨ ਨੂੰ ਸਟੇਟ ਐਵਾਰਡ ਤਾਂ ਮਿਲ ਗਿਆ, ਪਰ ਨੌਕਰੀ ਨਾ ਮਿਲੀ

ਲੰਘੀ 9 ਜੁਲਾਈ ਨੂੰ ਪੰਜਾਬ ਸਰਕਾਰ ਨੇ ਚੰਡੀਗੜ੍ਹ ਦੇ ਹਯਾਤ ਹੋਟਲ 'ਚ ਸੂਬੇ ਦੇ ਬਿਹਤਰੀਨ ਖਿਡਾਰੀਆਂ ਲਈ ਸਟੇਟ ਦੇ ਸਭ ਤੋਂ ਵੱਡੇ ਐਵਾਰਡ ਮਹਾਰਾਜਾ ਰਣਜੀਤ ਸਿੰਘ ਐਵਾਰਡ ਨਾਲ ਸਨਮਾਨਿਆ। ਕੁੱਲ 101 ਖਿਡਾਰੀਆਂ ਨੇ ਇਸ ਐਵਾਰਡ ਸਮਾਰੋਹ 'ਚ ਸਨਮਾਨ ਹਾਸਲ ਕੀਤਾ। ਮੈਨੂੰ ਵੀ ਇਸ ਸਮਾਰੋਹ 'ਚ ਜਾਣ ਦਾ ਮੌਕਾ ਮਿਲਿਆ, ਜਿਸ ਦਾ ਮੁੱਖ ਕਾਰਨ ਉਨ੍ਹਾਂ ਖਿਡਾਰੀਆਂ ਦੇ ਇਸ ਮਹਾਨ ਐਵਾਰਡ ਨੂੰ ਹਾਸਲ ਕਰਨ ਦੀ ਖੁਸ਼ੀ ਦੇ ਨਾਲ-ਨਾਲ ਉਨ੍ਹਾਂ ਦੇ ਮਨ ਅੰਦਰ ਚੱਲ ਰਹੇ ਦੁੱਖ ਦਾ ਅਹਿਸਾਸ ਕਰਨਾ ਸੀ ਤੇ ਦੂਜਾ ਮੇਰੇ ਪਰਮ ਮਿੱਤਰ ਕੌਮਾਂਤਰੀ ਸਾਈਕਲਿਸਟ ਜਗਦੀਪ ਕਾਹਲੋਂ ਨੂੰ ਸਨਮਾਨਿਤ ਹੁੰਦੇ ਹੋਏ ਦੇਖਣਾ ਸੀ। ਇਸ ਐਵਾਰਡ ਫੰਕਸ਼ਨ 'ਚ ਸਰਕਾਰ ਨੇ ਕਿਸੇ ਤਰ੍ਹਾਂ ਦੀ ਕੋਈ ਕਮੀ ਨਹੀਂ ਛੱਡੀ। ਇਕ ਤਰਫ ਤਾਂ ਇਸ ਸਰਕਾਰ ਨੂੰ ਸ਼ਾਬਾਸ਼ ਦੇਣੀ ਬਣਦੀ ਹੈ ਕਿ ਦੇਰ ਆਏ ਦਰੁਸਤ ਆਏ, ਇਸ ਸਰਕਾਰ ਨੇ ਪਿਛਲੇ 8 ਸਾਲਾਂ ਤੋਂ ਅੜੇ ਇਸ ਐਵਾਰਡ ਨੂੰ ਦੇਣ ਦਾ ਜ਼ਿੰਮਾ ਤਾਂ ਚੁੱਕਿਆ ਹੀ, ਪਰ ਨਾਲ ਹੀ ਸਰਕਾਰ ਦੀਆਂ ਕਮਜ਼ੋਰੀਆਂ ਦੇਖ ਥੋੜ੍ਹਾ ਮਨ ਉਦਾਸ ਵੀ ਹੋਇਆ ਕਿ ਅਜਿਹੇ ਐਵਾਰਡ ਦੇਣ ਨਾਲ ਖਿਡਾਰੀਆਂ ਨੂੰ ਸਿਰਫ ਇਕ ਮਾਣ ਹੀ ਮਿਲਦਾ ਹੈ, ਰੋਟੀ ਨਹੀਂ ਮਿਲਦੀ।
ਐਵਾਰਡ ਸਮਾਰੋਹ ਦੌਰਾਨ ਇਨ੍ਹਾਂ ਮਹਾਨ ਖਿਡਾਰੀਆਂ 'ਚੋਂ ਤਕਰੀਬਨ 8 ਜਾਂ 10 ਖਿਡਾਰੀਆਂ ਨਾਲ ਨਿੱਜੀ ਤੌਰ 'ਤੇ ਇੰਟਰਵਿਊ ਕਰਨ ਦਾ ਮੌਕਾ ਮਿਲਿਆ, ਜਿਸ 'ਚ ਸਭ ਤੋਂ ਪਹਿਲਾ ਖਿਡਾਰੀ ਜੋ ਮਿਲਿਆ, ਉਹ ਸੀ ਅਬੋਹਰ ਜ਼ਿਲ੍ਹੇ ਦੇ ਪਿੰਡ ਤੇਲੂਪੁਰਾ ਦਾ ਅਪੰਗ ਖਿਡਾਰੀ ਸੰਜੀਵ ਕੁਮਾਰ। ਸੰਜੀਵ ਕੁਮਾਰ ਭਾਰਤ ਦਾ ਇਕਲੌਤਾ ਹੀ ਪੈਰਾਬੈਡਮਿੰਟਨ ਖਿਡਾਰੀ ਹੈ, ਜੋ ਭਾਰਤ ਨੂੰ ਕੌਮਾਂਤਰੀ ਪੱਧਰ 'ਤੇ ਕਾਫੀ ਤਗਮੇ ਦੁਆ ਚੁੱਕਾ ਹੈ। ਸੰਜੀਵ ਇਸ ਐਵਾਰਡ ਫੰਕਸ਼ਨ 'ਚ ਆਪਣੀ ਵਿਧਵਾ ਮਾਂ ਤੇ ਆਪਣੇ ਭਰਾ ਨਾਲ ਆਇਆ ਸੀ। ਪਰਿਵਾਰ ਦੇ ਚਿਹਰਿਆਂ 'ਤੇ ਆਪਣੇ ਪੁੱਤ ਨੂੰ ਮਿਲ ਰਹੇ ਐਵਾਰਡ ਦੀ ਖੁਸ਼ੀ ਨਾਲੋਂ ਕਿਤੇ ਜ਼ਿਆਦਾ ਆਪਣੇ ਪੁੱਤ ਕੋਲ ਨੌਕਰੀ ਨਾ ਹੋਣ ਦਾ ਗਮ ਸੀ। ਇੰਜ ਲੱਗ ਰਿਹਾ ਸੀ ਜਿਵੇਂ ਸੰਜੀਵ ਦੀ ਮਾਂ ਆਪਣੇ ਪੁੱਤ ਲਈ ਨੌਕਰੀ ਦੀ ਫਰਿਆਦ ਕਰਨ ਇਸ ਸਮਾਗਮ 'ਚ ਆਈ ਹੋਵੇ। ਸੰਜੀਵ ਸਾਲ 2017-18 'ਚ ਵਿਸ਼ਵ ਚੈਂਪੀਅਨਸ਼ਿਪ 'ਚ 3 ਸੋਨ ਤਗਮੇ ਜਿੱਤ ਚੁੱਕਾ ਹੈ। ਸੰਜੀਵ ਨੇ ਕਿਹਾ ਕਿ ਉਸ ਨੂੰ ਐਵਾਰਡ ਮਿਲਣ ਦੀ ਖੁਸ਼ੀ ਤਾਂ ਹੈ ਹੀ, ਪਰ ਸਭ ਤੋਂ ਵੱਡਾ ਗਮ ਹੈ ਕਿ ਭਾਰਤ ਤੇ ਪੰਜਾਬ ਲਈ ਇੰਨੇ ਤਗਮੇ ਹਾਸਲ ਕਰਕੇ ਵੀ ਉਸ ਦੀ ਝੋਲੀ ਅੱਜ ਖਾਲੀ ਹੈ ਤੇ ਉਹ ਦਿਹਾੜੀ ਜੋਤਾ ਕਰਨ ਲਈ ਮਜਬੂਰ ਹੈ। ਉਸ ਨੇ ਕਿਹਾ ਕਿ ਉਹ ਐਵਾਰਡ ਵੀ ਕਿਸ ਕੰਮ ਦੇ ਜੋ ਤੁਹਾਨੂੰ ਨੌਕਰੀ ਹੀ ਨਾ ਦੁਆ ਸਕਣ ਤੇ ਪਰਿਵਾਰ ਦਾ ਪੇਟ ਹੀ ਨਾ ਪਾਲਿਆ ਜਾ ਸਕੇ। ਸੰਜੀਵ ਦੇ ਦੱਸਣ ਅਨੁਸਾਰ ਉਸ ਨੇ ਲੋਕਲ ਮੰਤਰੀ ਕੀ, ਸਗੋਂ ਮੁੱਖ ਮੰਤਰੀ ਤੱਕ ਆਪਣੀ ਫਰਿਆਦ ਲਾਈ ਹੈ, ਪਰ ਅਜੇ ਤੱਕ ਉਸ ਨੂੰ ਨੌਕਰੀ ਨਹੀਂ ਮਿਲੀ। ਉਸ ਨੇ ਕਿਹਾ ਕਿ ਕੈਪਟਨ ਅਮਰਿੰਦਰ ਨੇ ਉਸ ਨੂੰ ਜਨਵਰੀ ਮਹੀਨੇ 1 ਲੱਖ ਰੁਪਏ ਦੀ ਸਹਾਇਤਾ ਰਾਸ਼ੀ ਦੇ ਕੇ ਨੌਕਰੀ ਦੇਣ ਦਾ ਵਾਅਦਾ ਵੀ ਕੀਤਾ ਸੀ। ਪਰ 6 ਮਹੀਨੇ ਨਿਕਲਣ ਤੋਂ ਬਾਅਦ ਵੀ ਉਸ ਨੂੰ ਨੌਕਰੀ ਨਹੀਂ ਮਿਲੀ। ਸੰਜੀਵ ਨੇ ਉਨ੍ਹਾਂ ਪੈਸਿਆਂ ਨਾਲ ਇਕ ਅੰਤਰਰਾਸ਼ਟਰੀ ਚੱਕਰ ਲਾਇਆ ਅਤੇ ਉਥੋਂ ਤਗਮੇ ਜਿੱਤ ਕੇ ਭਾਰਤ ਦੀ ਝੋਲੀ ਪਾਏ। ਜਿੱਥੋਂ ਤੱਕ ਖਰਚੇ ਦੀ ਗੱਲ ਹੈ, ਤਾਂ ਸੰਜੀਵ ਨੂੰ ਖੇਡ ਵਿਭਾਗ ਨਾਲ ਭਾਰੀ ਰੋਸ ਹੈ ਕਿ ਉਸ ਨੂੰ ਖੇਡ ਵਿਭਾਗ ਕੋਈ ਵੀ ਸਹਾਇਤਾ ਪ੍ਰਦਾਨ ਨਹੀਂ ਕਰਦਾ। ਉਸ ਨੇ ਦੱਸਿਆ ਕਿ ਖੇਡ ਮੰਤਰੀ ਨੇ ਵੀ ਨੌਕਰੀ ਦੇਣ ਦਾ ਸਿਰਫ ਭਰੋਸਾ ਹੀ ਦਿੱਤਾ। ਉਸ ਨੇ ਕਿਹਾ ਕਿ ਉਹ ਲੋਕਾਂ ਕੋਲੋਂ ਉਧਾਰ ਲੈ-ਲੈ ਕੇ ਜਾਂ ਘਰ ਦਾ ਸੋਨਾ ਗਿਰਵੀ ਰੱਖ ਕੇ ਕੁਆਲੀਫਾਈ ਮੈਚ ਖੇਡ ਰਿਹਾ ਹੈ। ਸੰਜੀਵ ਨੇ ਸਰਕਾਰ 'ਤੇ ਨਿਸ਼ਾਨਾ ਸਾਧਦਿਆਂ ਕਿਹਾ ਕਿ ਜੇਕਰ ਸਰਕਾਰ ਕ੍ਰਿਕਟ ਖਿਡਾਰੀਆਂ ਨੂੰ ਨੌਕਰੀ ਦੇ ਸਕਦੀ ਹੈ ਤਾਂ ਸਾਨੂੰ ਕਿਉਂ ਨਹੀਂ ਨੌਕਰੀ ਦੇ ਸਕਦੀ? ਉਸ ਨੇ ਕਿਹਾ ਕਿ ਪੰਜਾਬ 'ਚ ਅਪੰਗ ਖਿਡਾਰੀਆਂ ਦੀ ਕੋਈ ਸਾਰ ਨਹੀਂ ਲੈਂਦਾ ਤੇ ਉਨ੍ਹਾਂ ਵਰਗੇ ਖਿਡਾਰੀ ਸਰਕਾਰ ਦੀ ਅਣਦੇਖੀ ਦਾ ਸ਼ਿਕਾਰ ਹੋ ਰਹੇ ਹਨ।
ਉਥੇ ਹੀ ਇਕ ਹੋਰ ਸਰੀਰਕ ਤੌਰ 'ਤੇ ਅਪੰਗ ਖਿਡਾਰੀ ਪੈਰਾਲਿਫਟਰ ਰਾਜਿੰਦਰ ਸਿੰਘ ਰਹੇਲੂ ਨਾਲ ਮੁਲਾਕਾਤ ਹੋਈ, ਜੋ ਵੀ ਪੰਜਾਬ ਸਰਕਾਰ ਤੋਂ ਖ਼ਫ਼ਾ ਹੀ ਨਜ਼ਰ ਆਏ। ਰਹੇਲੂ ਦਾ ਕਹਿਣਾ ਸੀ ਕਿ ਪੰਜਾਬ 'ਚ ਪੈਰਾ ਖਿਡਾਰੀਆਂ ਦਾ ਕੋਈ ਵਰਤਮਾਨ ਤੇ ਭਵਿੱਖ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਗਰਾਊਂਡ ਪੱਧਰ 'ਤੇ ਸਾਡੇ ਵਰਗੇ ਖਿਡਾਰੀਆਂ ਲਈ ਕੁਝ ਨਹੀਂ ਕੀਤਾ ਜਾ ਰਿਹਾ ਤੇ ਸਰਕਾਰ ਨੂੰ ਇਸ ਵੱਲ ਧਿਆਨ ਦੇਣ ਦੀ ਖਾਸ ਲੋੜ ਹੈ। ਅਜਿਹੇ ਹੋਰ ਵੀ ਖਿਡਾਰੀ ਮਿਲੇ, ਜਿਨ੍ਹਾਂ ਦੇ ਚਿਹਰਿਆਂ 'ਤੇ ਸਟੇਟ ਦਾ ਸਭ ਤੋਂ ਵੱਡਾ ਐਵਾਰਡ ਮਿਲਣ ਦੀ ਬਣਾਉਟੀ ਖ਼ੁਸ਼ੀ ਸੀ, ਪਰ ਮਨ 'ਚ ਨੌਕਰੀਆਂ ਨਾ ਲੱਗਣ ਦੇ ਗਮਾਂ ਦੇ ਪਹਾੜ ਸਨ। ਸਰਕਾਰ ਵਲੋਂ ਅਜਿਹੇ ਫੰਕਸ਼ਨ ਕਰਨੇ ਜਿਥੇ ਲਾਜ਼ਮੀ ਹਨ, ਉਥੇ ਹੀ ਅਜਿਹੇ ਖਿਡਾਰੀਆਂ ਦੀ ਜ਼ਿੰਦਗੀ ਬਣਾਉਣ ਲਈ ਉਨ੍ਹਾਂ ਨੂੰ ਨੌਕਰੀਆਂ ਦੇਣੀਆਂ ਵੀ ਬਹੁਤ ਲਾਜ਼ਮੀ ਹਨ। ਵੈਸੇ ਵੀ ਸਰਕਾਰੀ ਅਦਾਰਿਆਂ 'ਚ ਢਿੱਡਲ ਤੇ ਵਿਹਲੜ ਸਰਕਾਰੀ ਅਫਸਰਾਂ ਦੀ ਥੋੜ ਨਹੀਂ ਹੈ। ਜੇ ਉਹੋ ਜਿਹੇ ਵਿਹਲੇ ਅਫਸਰਾਂ ਦੀ ਥਾਂ ਅਜਿਹੇ ਸੂਝਵਾਨ ਨੌਜਵਾਨ ਖਿਡਾਰੀਆਂ ਨੂੰ ਅਫਸਰ ਲਾ ਦਿੱਤਾ ਜਾਵੇ ਤਾਂ ਪੰਜਾਬ ਖੁਦ-ਬ-ਖੁਦ ਨੌਜਵਾਨਾਂ ਦੇ ਹੱਥ 'ਚ ਆ ਜਾਏਗਾ ਤੇ ਪੰਜਾਬ ਦੀ ਤਰੱਕੀ ਨਿਸ਼ਚਤ ਹੈ।
ਖ਼ੈਰ, ਤਾਜ਼ੇ ਹੀ ਪੰਜਾਬ ਸਰਕਾਰ ਨੇ ਖਿਡਾਰੀਆਂ ਨੂੰ ਐਵਾਰਡ ਵੰਡੇ ਹਨ, ਉਮੀਦ ਕਰਦੇ ਹਾਂ ਕਿ ਭਵਿੱਖ 'ਚ ਵੀ ਸਰਕਾਰ ਇਹੋ ਜਿਹੇ ਖਿਡਾਰੀਆਂ ਦੀ ਸਾਰ ਲੈਂਦੀ ਰਹੇਗੀ। ਕਿਤੇ ਇਹ ਨਾ ਹੋਵੇ ਕਿ ਜਿਵੇਂ 8 ਸਾਲ ਬਾਅਦ ਹੁਣ ਸਰਕਾਰ ਨੇ ਖਿਡਾਰੀਆਂ ਦੀ ਸਾਰ ਲਈ, ਉਸੇ ਤਰ੍ਹਾਂ ਭਵਿੱਖ 'ਚ ਵੀ ਅਜਿਹਾ ਹੀ ਕੁਝ ਹੋਵੇ। ਸਭ ਤੋਂ ਵੱਡੀ ਗੱਲ, ਐਵਾਰਡਾਂ ਦੇ ਨਾਲ ਨਾਲ ਇਨ੍ਹਾਂ ਖਿਡਾਰੀਆਂ ਨੂੰ ਨੌਕਰੀਆਂ ਦੀਆਂ ਚਿੱਠੀਆਂ ਵੀ ਜੇ ਸਰਕਾਰ ਮੌਕੇ 'ਤੇ ਹੀ ਵੰਡ ਦੇਵੇ ਤਾਂ ਮੇਰੇ ਪੰਜਾਬ ਦੀ ਜਵਾਨੀ ਜਹਾਜ਼ਾਂ ਦੀਆਂ ਤਾਕੀਆਂ ਫੜ ਅਮਰੀਕਾ ਤੇ ਕੈਨੇਡਾ ਜਾਣ ਲਈ ਮਜਬੂਰ ਨਾ ਹੋਵੇ।


-ਮੋਬਾ: 95015-82626

ਸੰਸਾਰ ਪੱਧਰ 'ਤੇ 100 ਮੀਟਰ ਦਾ ਗੋਲਡ ਤਗਮਾ ਜਿੱਤਣ ਵਾਲੀ ਪਹਿਲੀ ਔਰਤ ਅਥਲੀਟ ਹੈ ਦੂਤੀ ਚੰਦ

'ਮੈਨੂੰ ਹੇਠਾਂ ਸੁੱਟੋਗੇ, ਤਾਂ ਮੈਂ ਹੋਰ ਜ਼ਿਆਦਾ ਮਜ਼ਬੂਤੀ ਨਾਲ ਵਾਪਸ ਆਵਾਂਗੀ।' ਨਾਪੋਲੀ ਵਿਚ ਆਯੋਜਿਤ ਸੰਸਾਰ ਪੱਧਰ ਦੀ ਪ੍ਰਤੀਯੋਗਤਾ 'ਵਰਲਡ ਯੂਨੀਵਰਸੀਏਡ' ਵਿਚ 100 ਮੀਟਰ ਦਾ ਸੋਨ ਤਗਮਾ ਜਿੱਤਣ ਤੋਂ ਬਾਅਦ ਦੂਤੀ ਚੰਦ ਨੇ ਇਹ ਟਵੀਟ ਕੀਤਾ। ਸੰਸਾਰ ਪੱਧਰ ਦੀ ਕਿਸੇ ਵੀ ਕੌਮਾਂਤਰੀ ਪ੍ਰਤੀਯੋਗਤਾ ਵਿਚ 100 ਮੀਟਰ ਦਾ ਸੋਨ ਤਗਮਾ ਜਿੱਤਣ ਵਾਲੀ ਦੂਤੀ ਚੰਦ ਪਹਿਲੀ ਭਾਰਤੀ ਔਰਤ ਅਥਲੀਟ ਹੈ। ਇਤਿਹਾਸ ਬਣਾਉਣ ਤੋਂ ਬਾਅਦ ਇਹ ਟਵੀਟ ਦੂਤੀ ਚੰਦ ਦਾ ਖ਼ਾਸ ਅੰਦਾਜ਼ ਸੀ। ਆਪਣੇ ਉਨ੍ਹਾਂ ਆਲੋਚਕਾਂ ਨੂੰ ਉੱਤਰ ਦੇਣ ਦਾ ਜੋ ਸਮੇਂ-ਸਮੇਂ 'ਤੇ ਉਸ ਦੇ ਸਾਧਾਰਨ ਮਨੁੱਖ ਹੋਣ 'ਤੇ ਸ਼ੱਕ ਕਰਦੇ ਰਹੇ ਹਨ ਅਤੇ ਉਸ ਦੀ ਨਿੱਜੀ ਪਸੰਦ 'ਤੇ ਸਵਾਲ ਉਠਾਉਂਦੇ ਰਹੇ ਹਨ।
ਬਾਅਦ ਵਿਚ ਇਟਲੀ ਦੇ ਦੱਖਣੀ ਸ਼ਹਿਰ ਨਾਪੋਲੀ ਵਿਚ ਹੀ ਆਪਣੇ ਉਕਤ ਟਵੀਟ ਦੀ ਵਿਆਖਿਆ ਕਰਦੇ ਹੋਏ ਦੂਤੀ ਚੰਦ ਨੇ ਦੱਸਿਆ, 'ਉਹ ਸੰਦੇਸ਼ ਮੇਰੇ ਪਰਿਵਾਰ, ਮੇਰੀ ਵੱਡੀ ਭੈਣ ਸਰਸਵਤੀ ਅਤੇ ਮਾਂ ਅਖੂਜੀ ਲਈ ਸੀ, ਜੋ ਮੇਰੇ ਸਮਲਿੰਗੀ ਸਬੰਧ ਦੇ ਵਿਰੋਧ ਵਿਚ ਹਨ। ਇਹ ਸੋਨ ਤਗਮਾ ਉਨ੍ਹਾਂ ਲੋਕਾਂ ਲਈ ਮੇਰਾ ਜਵਾਬ ਹੈ ਅਤੇ ਮੇਰੇ ਆਲੋਚਕਾਂ ਲਈ ਵੀ ਕਿ ਮੈਂ ਦੋਵਾਂ ਗੱਲਾਂ ਦਾ ਪ੍ਰਬੰਧਨ ਕਰ ਸਕਦੀ ਹਾਂ-ਆਪਣੀ ਚੁਣੀ ਹੋਈ ਪਾਰਟਨਰ ਦੇ ਨਾਲ ਨਿੱਜੀ ਜੀਵਨ ਅਤੇ ਆਪਣਾ ਅਥਲੈਟਿਕਸ ਕਰੀਅਰ। ਮੈਨੂੰ ਉਨ੍ਹਾਂ ਦੀ ਸਲਾਹ ਨਹੀਂ ਚਾਹੀਦੀ। ਮੈਂ ਆਪਣੇ ਨਿਰਣੇ ਲੈਣ ਲਈ ਦ੍ਰਿੜ੍ਹ ਹਾਂ। ਇਹ ਤਗਮਾ ਸ਼ਾਇਦ ਉਨ੍ਹਾਂ ਸਾਰਿਆਂ ਨੂੰ ਖਾਮੋਸ਼ ਕਰ ਦੇਵੇ, ਜੋ ਮੇਰੇ ਬਾਰੇ ਵਿਚ, ਮੇਰੀ ਹੋਂਦ ਦੇ ਬਾਰੇ ਵਿਚ ਅਤੇ ਮੇਰੇ ਜੀਵਨ ਸਾਥੀ ਚੋਣ ਬਾਰੇ ਵਿਚ ਟਿੱਪਣੀ ਕਰ ਰਹੇ ਹਨ।'
ਵਰਣਨਯੋਗ ਹੈ ਕਿ ਦੂਤੀ ਚੰਦ ਨੇ ਆਪਣੇ ਸਬੰਧਾਂ ਦਾ ਸਰਵਜਨਕ ਐਲਾਨ ਇਸੇ ਸਾਲ 19 ਮਈ ਨੂੰ ਕੀਤਾ ਸੀ। ਇਹ ਭਾਰਤੀ ਖੇਡ ਸੰਸਾਰ ਵਿਚ ਅਤਿ ਮਹੱਤਵਪੂਰਨ ਪਲ ਸੀ। ਵੱਖ-ਵੱਖ ਖੇਡਾਂ ਦੇ ਅਨੇਕ ਖਿਡਾਰੀਆਂ ਬਾਰੇ ਇਹ ਅਫ਼ਵਾਹ (ਜਾਂ ਸੱਚ) ਤਾਂ ਅਕਸਰ ਸੁਣਨ ਨੂੰ ਮਿਲਦਾ ਰਿਹਾ ਹੈ ਕਿ ਉਹ ਸਮਲਿੰਗੀ ਹੈ, ਪਰ ਖੁੱਲ੍ਹ ਕੇ ਸਾਹਮਣੇ ਆਉਣ ਦਾ ਸਾਹਸ ਦੂਤੀ ਚੰਦ ਨੇ ਹੀ ਦਿਖਾਇਆ ਹੈ। ਹਾਲਾਂਕਿ ਉਨ੍ਹਾਂ ਦੇ ਇਸ ਐਲਾਨ 'ਤੇ ਉਨ੍ਹਾਂ ਦੇ ਘਰ ਪਰਿਵਾਰ ਵਲੋਂ ਜ਼ਬਰਦਸਤ ਵਿਰੋਧ ਹੋ ਰਿਹਾ, ਪਰ ਬਾਕੀ ਲੋਕਾਂ ਨੇ ਉਨ੍ਹਾਂ ਦੇ ਨਿਰਣੇ ਦਾ ਖੁੱਲ੍ਹ ਕੇ ਸਵਾਗਤ ਕੀਤਾ, ਜਿਸ ਤੋਂ ਉਹ ਕਾਫ਼ੀ ਖ਼ੁਸ਼ ਹੈ। ਉਹ ਦੱਸਦੀ ਹੈ, 'ਮੈਨੂੰ ਸੈਂਕੜੇ ਫੋਨ ਆਏ। ਮੈਂ ਜਾਣਦੀ ਸੀ ਕਿ ਮੇਰਾ ਐਲਾਨ ਖ਼ਬਰ ਬਣੇਗੀ, ਪਰ ਇਹ ਅੰਦਾਜ਼ਾ ਨਹੀਂ ਸੀ ਕਿ ਇਹ ਵੱਡੀ ਚਰਚਾ ਦਾ ਵਿਸ਼ਾ ਬਣ ਜਾਵੇਗੀ, ਲੋਕ ਇਸ 'ਤੇ ਬਹਿਸ ਕਰਨਗੇ, ਟਵੀਟ ਕਰਨਗੇ ਅਤੇ ਮੇਰੇ ਤੋਂ ਇਸ 'ਤੇ ਗੱਲਾਂ ਕਰਨਾ ਚਾਹੁਣਗੇ।'
ਐਕਟਰ ਤੇ ਲੇਖਿਕ ਟਵਿੰਕਲ ਖੰਨਾ ਨੇ ਇਸ 'ਤੇ ਸਾਕਾਰਾਤਮਕ ਟਿੱਪਣੀ ਕੀਤੀ। ਅਮਰੀਕਨ ਟਾਕ ਹੋਸਟ ਐਲਨ ਡੀਜੇਨਰਸ ਨੇ ਟਵੀਟ ਕੀਤਾ ਅਤੇ ਭਾਰਤ ਦੇ ਸਾਬਕਾ ਹਾਕੀ ਕਪਤਾਨ ਵਿਰੇਨ ਰਸਕੁਝਨਾ ਨੇ ਮੇਰੇ ਸਮਰਥਨ ਵਿਚ ਲੇਖ ਲਿਖਿਆ। ਇਸੇ ਤਰ੍ਹਾਂ ਦੂਤੀ ਚੰਦ ਨੇ ਹੁਣ ਜੋ ਇਤਿਹਾਸ ਰਚਿਆ ਹੈ, ਉਸ ਲਈ ਉਨ੍ਹਾਂ ਨੂੰ ਰਾਸ਼ਟਰਪਤੀ ਤੋਂ ਲੈ ਕੇ ਫ਼ਿਲਮ ਤੇ ਖੇਡਾਂ ਦੀ ਦੁਨੀਆ ਦੀਆਂ ਹਸਤੀਆਂ ਤੱਕ ਨੇ ਉਸ ਨੂੰ ਮੁਬਾਰਕਬਾਦ ਦਿੱਤੀ ਹੈ। ਪੂਰੇ ਦੇਸ਼ ਨੂੰ ਉਨ੍ਹਾਂ ਦੀ ਉਪਲਬੱਧੀ 'ਤੇ ਫ਼ਖਰ ਹੈ। ਸਾਰਿਆਂ ਨੂੰ ਉਮੀਦ ਹੈ ਕਿ ਉਹ ਟੋਕੀਓ ਉਲੰਪਿਕਸ ਵਿਚ ਵੀ ਕੁਝ ਵਿਸ਼ੇਸ਼ ਕਰੇਗੀ। ਨਾਪੋਲੀ ਵਿਚ ਚਾਕਾ ਗੋਪਾਲਪੁਰ ਪਿੰਡ, ਓਡੀਸ਼ਾ ਦੀ 23 ਸਾਲਾ ਦੂਤੀ ਚੰਦ ਨੇ ਸੋਨ ਤਗਮਾ ਹਾਸਲ ਕਰਨ ਲਈ 11.32 ਸੈਕਿੰਡ ਦਾ ਸਮਾਂ ਲਿਆ ਅਤੇ ਉਹ ਸ਼ੁਰੂ ਤੋਂ ਅਖੀਰ ਤੱਕ ਸਭ ਤੋਂ ਅੱਗੇ ਰਹੀ। ਅੱਠ ਔਰਤਾਂ ਦੇ ਫਾਈਨਲ ਵਿਚ ਉਹ ਬਲਾਕ ਤੋਂ ਸਭ ਤੋਂ ਪਹਿਲਾਂ ਨਿਕਲੀ ਅਤੇ ਆਖਰੀ ਸਮੇਂ ਵਿਚ ਸਵਿਟਜ਼ਰਲੈਂਡ ਦੀ ਡੇਲ ਪੋਂਟੇ (11.33 ਸੈਕਿੰਡ) ਨੂੰ ਹਰਾ ਕੇ ਜੇਤੂ ਰਹੀ। ਪੋਡੀਅਮ 'ਤੇ ਤੀਜਾ ਥਾਂ ਜਰਮਨੀ ਦੀ ਲੀਜਾ ਕਵਾ ਯੀ (11.39 ਸੈਕਿੰਡ) ਨੇ ਲਿਆ।
ਕੌਮੀ ਰਿਕਾਰਡ ਧਾਰਕ (11.24 ਸੈਕਿੰਡ) ਦੂਤੀ ਚੰਦ ਭਾਰਤ ਦੀ ਦੂਜੀ ਔਰਤ ਦੌੜਾਕ ਹੈ, ਜਿਸ ਨੇ ਸੰਸਾਰ ਪ੍ਰਤੀਯੋਗਤਾ ਵਿਚ ਸੋਨ ਤਗਮਾ ਜਿੱਤਿਆ ਹੈ। ਪਿਛਲੇ ਸਾਲ ਆਸਾਮ ਦੀ ਹਿਮਾ ਦਾਸ ਨੇ ਵਰਲਡ ਜੂਨੀਅਰ ਅਥਲੈਟਿਕਸ ਚੈਂਪੀਅਨਸ਼ਿਪ ਵਿਚ 400 ਮੀਟਰ ਦਾ ਸੋਨ ਤਗਮਾ ਜਿੱਤਿਆ ਸੀ। ਪਰ ਹਿਮਾ ਦੀ ਸਫ਼ਲਤਾ ਜੂਨੀਅਰ ਪੱਧਰ 'ਤੇ ਆਈ ਸੀ ਅਤੇ ਦੂਤੀ ਚੰਦ ਸੀਨੀਅਰ ਪੱਧਰ 'ਤੇ ਕਾਮਯਾਬ ਹੋਈ ਹੈ। ਦੂਤੀ ਚੰਦ ਨੇ ਜਕਾਰਤਾ ਏਸ਼ਿਆਡ 2018 ਵਿਚ ਦੋਨੋਂ 100 ਮੀਟਰ ਤੇ 200 ਮੀਟਰ ਵਿਚ ਚਾਂਦੀ ਦਾ ਤਗਮਾ ਜਿੱਤਿਆ ਸੀ। ਵਰਲਡ ਯੂਨੀਵਰਸਇਏਡ ਵਿਚ ਸੋਨ ਤਗਮਾ ਜਿੱਤਣ ਵਾਲੀ ਉਹ ਦੂਜੀ ਭਾਰਤੀ ਹੈ। ਇੰਦਰਜੀਤ ਸਿੰਘ ਨੇ ਇਸ ਪ੍ਰਤੀਯੋਗਤਾ ਦੇ 2015 ਦੇ ਮੁਕਾਬਲੇ ਵਿਚ ਸ਼ਾਟਪੁੱਟ ਦਾ ਸੋਨ ਤਗਮਾ ਜਿੱਤਿਆ ਸੀ।
ਦੂਤੀ ਚੰਦ ਦੱਸਦੀ ਹੈ, 'ਪਿਛਲੇ ਕੁਝ ਸਾਲ ਮੇਰੇ ਲਈ ਕਾਫੀ ਦਰਦ ਭਰੇ ਰਹੇ ਹਨ ਕਿ ਇਕ ਸਾਧਾਰਨ ਮਨੁੱਖ ਦੇ ਰੂਪ ਵਿਚ ਮੇਰੀ ਹੋਂਦ 'ਤੇ ਵਾਰ-ਵਾਰ ਪ੍ਰਸ਼ਨ ਚੁੱਕੇ ਗਏ। ਜਦੋਂ ਮੈਂ ਇਸ ਮੁਸ਼ਕਿਲ 'ਚੋਂ ਉੱਭਰੀ ਤਾਂ ਲੋਕ ਮੇਰੇ ਸਮਲਿੰਗੀ ਸਬੰਧ 'ਤੇ ਹਾਏ-ਤੌਬਾ ਕਰਨ ਲੱਗੇ। ਮੈਂ ਦੁਨੀਆ ਨੂੰ ਦੱਸਣਾ ਚਾਹਾਂਗੀ ਕਿ ਮੈਂ ਖੁਸ਼ ਹਾਂ ਅਤੇ ਮੈਂ ਜਾਣਦੀ ਹਾਂ ਕਿ ਓਡੀਸ਼ਾ ਵਿਚ ਮੇਰੀ ਸਾਥੀ ਮੇਰੇ ਤੋਂ ਵੀ ਜ਼ਿਆਦਾ ਖੁਸ਼ ਹੋਵੇਗੀ। ਜਦੋਂ ਉਹ ਮੇਰੇ ਜੀਵਨ ਵਿਚ ਆਈ ਹੈ, ਮੈਂ ਸਭ ਥਾਂ ਤਗਮਾ ਜਿੱਤ ਰਹੀ ਹਾਂ। ਉਸ ਨੇ ਮੇਰੀ ਜਿੱਤ ਲਈ ਪ੍ਰਾਰਥਨਾ ਕੀਤੀ ਅਤੇ ਉਸ ਦੀ ਦੁਆ ਕਬੂਲ ਹੋ ਗਈ।' ਦੂਤੀ ਚੰਦ ਹੁਣ ਆਪਣੀ ਰਫ਼ਤਾਰ 'ਤੇ ਧਿਆਨ ਦੇਣ ਲੱਗੀ ਹੈ, ਪਹਿਲਾਂ 30 ਮੀਟਰ ਦੇ ਦੌਰਾਨ ਅਤੇ ਫਿਰ ਅਖੀਰ ਤੱਕ ਉਸ ਨੂੰ ਘੱਟ ਨਹੀਂ ਕਰਦੀ ਹੈ, ਜਿਸ ਨਾਲ ਉਸ ਦੀ ਟਾਈਮਿੰਗ ਵਿਚ ਸੁਧਾਰ ਆਇਆ ਹੈ। ਪਹਿਲਾਂ ਦੀ ਤਰ੍ਹਾਂ ਹੁਣ ਉਹ ਹੀਟਸ ਤੇ ਸੈਮੀ ਫਾਈਨਲ ਵਿਚ ਜ਼ਿਆਦਾ ਕੋਸ਼ਿਸ਼ ਨਹੀਂ ਕਰਦੀ, ਬਲਕਿ ਫਾਈਨਲ ਦੌੜ ਲਈ ਆਪਣੀ ਊਰਜਾ ਬਚਾ ਕੇ ਰੱਖਦੀ ਹੈ। -0-

ਦੋਵੇਂ ਲੱਤਾਂ ਨਾ ਹੋਣ ਦੇ ਬਾਵਜੂਦ ਵੀ ਤੈਰਾਕੀ ਵਿਚ ਜਿੱਤੇ ਸੋਨ ਤਗਮੇ ਗੋਪੀਚੰਦ ਨੇ

'ਮਾਂ ਕਾ ਨੰਨ੍ਹਾ ਪਿਤਾ ਕਾ ਦੁਲਾਰਾ ਹੂੰ, ਛੂਹਤੇ ਹੂੰਏ ਆਸਮਾਨ ਕਾ ਚਮਕਤਾ ਤਾਰਾ ਹੂੰ, ਮੁਜੇ ਅਪਾਹਜ ਮੱਤ ਕਹੀਏ, ਮੈਂ ਆਨੇ ਵਾਲੇ ਕੱਲ੍ਹ ਕਾ ਰੌਸ਼ਨ ਸਿਤਾਰਾ ਹੂੰ।' ਜੀ ਹਾਂ, ਇਹ ਆਉਣ ਵਾਲੇ ਕੱਲ੍ਹ ਦਾ ਰੌਸ਼ਨ ਸਿਤਾਰਾ ਹੈ ਕਰਨਾਟਕ ਪ੍ਰਾਂਤ ਦਾ ਗੋਪੀਚੰਦ, ਜਿਹੜਾ ਦੋਵੇਂ ਲੱਤਾਂ ਤੋਂ ਅਪਾਹਜ ਹੈ ਪਰ ਤੈਰਾਕੀ ਦੇ ਖੇਤਰ ਵਿਚ ਉਹ ਨੰਨ੍ਹੀ ਉਮਰ ਵਿਚ ਹੀ ਵੱਡੀਆਂ ਪ੍ਰਾਪਤੀਆਂ ਕਰ ਰਿਹਾ ਹੈ ਅਤੇ ਉਹ ਮਾਣਮੱਤਾ ਸੋਨ ਤਗਮਾ ਵਿਜੇਤਾ ਹੈ। ਗੋਪੀਚੰਦ ਦਾ ਜਨਮ ਕਰਨਾਟਕ ਪ੍ਰਾਂਤ ਦੇ ਤਹਿਸੀਲ ਬਲਾਰੀ ਦੇ ਦਰੋਜੀ ਸਾਂਦਰ ਵਿਚ ਪਿਤਾ ਰਾਜਾਸ਼ੇਖਰ ਦੇ ਘਰ ਮਾਤਾ ਵਿਸਾਂਤਾ ਦੀ ਕੁੱਖੋਂ 14 ਜੁਲਾਈ, 2006 ਵਿਚ ਹੋਇਆ ਅਤੇ ਇਕ ਦਿਨ ਗੋਪੀਚੰਦ ਆਪਣੇ ਘਰ ਦੇ ਸਾਹਮਣੇ ਸੜਕ ਪਾਰ ਕਰ ਰਿਹਾ ਸੀ ਤਾਂ ਉਸ ਨੂੰ ਆ ਰਹੀ ਤੇਜ਼ ਰਫ਼ਤਾਰ ਸਰਕਾਰੀ ਬੱਸ ਨੇ ਆਪਣੀ ਲਪੇਟ ਵਿਚ ਲੈ ਲਿਆ ਅਤੇ ਉਸ ਦੀਆਂ ਦੋਵੇਂ ਲੱਤਾਂ ਬੁਰੀ ਤਰ੍ਹਾਂ ਕੁਚਲੀਆਂ ਗਈਆਂ। ਆਖਰ ਗੋਪੀਚੰਦ ਦੀ ਜਾਨ ਤਾਂ ਬਚ ਗਈ ਪਰ ਉਹ ਦੋਵੇਂ ਲੱਤਾਂ ਤੋਂ ਅਪਾਹਜ ਹੋ ਗਿਆ ਅਤੇ ਵੀਲ੍ਹਚੇਅਰ ਦੇ ਸਹਾਰੇ ਤੁਰਨ ਲਈ ਮਜਬੂਰ ਹੋ ਗਿਆ। ਮਾਂ-ਬਾਪ ਨੇ ਆਖਰ ਉਸ ਨੂੰ ਸਕੂਲੀ ਵਿੱਦਿਆ ਲਈ ਬਲਾਰੀ ਦੇ ਹੀ ਕੇਂਦਰੀ ਵਿਦਿਆਲਿਆ ਵਿਚ ਦਾਖਲ ਕਰਵਾ ਦਿੱਤਾ ਜਿੱਥੇ ਉਸ ਦਾ ਬਾਪ ਉਸ ਨੂੰ ਆਪ ਹੀ ਛੱਡ ਕੇ ਆਉਂਦਾ ਅਤੇ ਆਪ ਹੀ ਲੈ ਕੇ ਆਉਂਦਾ ਅਤੇ ਅੱਜ ਉਹ ਛੇਵੀਂ ਕਲਾਸ ਦਾ ਵਿਦਿਆਰਥੀ ਹੈ। ਸਕੂਲ ਪੜ੍ਹਦੇ ਹੀ ਬਲਾਰੀ ਸ਼ਹਿਰ ਦੀ ਸਮਾਜ ਸੇਵਕਾ ਅਤੇ ਤੈਰਾਕੀ ਦੀ ਕੋਚ ਜੋ ਕਿ ਸਿਰਫ ਅਪਾਹਜ ਬੱਚਿਆਂ ਨੂੰ ਹੀ ਤੈਰਾਕੀ ਦੇ ਖੇਤਰ ਵਿਚ ਤਰਾਸ਼ਦੀ ਹੈ, ਰਜਨੀ ਲਾਕਾ ਦੀ ਨਜ਼ਰ ਗੋਪੀਚੰਦ 'ਤੇ ਪਈ ਤਾਂ ਉਸ ਨੂੰ ਗੋਪੀਚੰਦ ਅੰਦਰ ਤੈਰਾਕੀ ਦੇ ਖੇਤਰ ਵਿਚ ਛੁਪੀ ਹੋਈ ਪ੍ਰਤਿਭਾ ਦਾ ਅਹਿਸਾਸ ਹੋਇਆ। ਬਸ ਉਸੇ ਹੀ ਦਿਨ ਤੋਂ ਉਸ ਨੇ ਗੋਪੀਚੰਦ ਦੀ ਉਂਗਲ ਫੜ ਲਈ ਅਤੇ ਆਪਣੇ ਕੈਂਪ ਵਿਚ ਬਣਾਏ ਹੋਏ ਸਵਿਮਿੰਗ ਪੂਲ ਵਿਚ ਹੋਰ ਬੱਚਿਆਂ ਦੇ ਨਾਲ ਟ੍ਰੇਨਿੰਗ ਦੇਣ ਲੱਗੀ। ਕੋਚ ਰਜਨੀ ਲਾਕਾ ਗੋਪੀਚੰਦ ਨੂੰ ਸਾਲ 2006 ਵਿਚ ਬੈਂਗਲੂਰੂ ਵਿਖੇ ਹੋਈ ਸਟੇਟ ਪੈਰਾ ਸਵਿਮਿੰਗ ਮੀਟ ਵਿਚ ਲੈ ਕੇ ਗਈ, ਜਿੱਥੇ ਗੋਪੀਚੰਦ ਨੇ 200 ਮੀਟਰ ਸਵਿਮਿੰਗ ਦੌੜ ਵਿਚ ਪਹਿਲਾ ਸਥਾਨ ਹਾਸਲ ਕਰਕੇ ਸੋਨ ਤਗਮਾ ਆਪਣੇ ਨਾਂਅ ਕਰ ਲਿਆ ਅਤੇ 50 ਮੀਟਰ ਬੈਕ ਸਟਰੋਕ ਸਵਿਮਿੰਗ ਵਿਚ ਦੂਸਰਾ, 50 ਮੀਟਰ ਫਰੀ ਸਟਾਈਲ ਵਿਚ ਦੂਸਰਾ ਅਤੇ 50 ਮੀਟਰ ਬਰੈਸਟ ਸਟਰੋਕ ਵਿਚ ਵੀ ਦੂਸਰਾ ਸਥਾਨ ਹਾਸਲ ਕਰਕੇ 3 ਸਿਲਵਰ ਤਗਮੇ ਆਪਣੇ ਨਾਂਅ ਕਰਕੇ ਆਪਣਾ ਅਤੇ ਆਪਣੀ ਕੋਚ ਦਾ ਸਿਰ ਮਾਣ ਨਾਲ ਉੱਚਾ ਕਰ ਦਿੱਤਾ।
ਸਾਲ 2006 ਵਿਚ ਹੀ ਨੈਸ਼ਨਲ ਪੈਰਾ ਸਵਿਮਿੰਗ ਚੈਂਪੀਅਨਸ਼ਿਪ ਜੋ ਰਾਜਸਥਾਨ ਪ੍ਰਾਂਤ ਦੇ ਸ਼ਹਿਰ ਜੈਪੁਰ ਵਿਖੇ ਹੋਈ, ਉਸ ਵਿਚ ਵੀ ਗੋਪੀਚੰਦ ਨੇ ਕਮਾਲ ਦਾ ਪ੍ਰਦਰਸ਼ਨ ਕੀਤਾ, ਜਿੱਥੇ ਉਸ ਨੇ 200 ਮੀਟਰ, 50 ਮੀਟਰ ਬੈਕ ਸਟਰੋਕ ਅਤੇ 50 ਮੀਟਰ ਫਰੀ ਸਟਾਈਲ ਵਿਚ ਵੀ ਪਹਿਲਾ ਸਥਾਨ ਹਾਸਲ ਕਰਕੇ 3 ਸੋਨ ਤਗਮੇ ਜਿੱਤ ਕੇ ਆਪਣੇ ਪ੍ਰਾਂਤ ਦਾ ਨਾਂਅ ਰੌਸ਼ਨ ਕੀਤਾ। ਸਾਲ 2017 ਵਿਚ ਹੀ ਕਰਨਾਟਕ ਪ੍ਰਾਂਤ ਦੇ ਹੀ ਗੋਪੀਚੰਦ ਦੇ ਆਪਣੇ ਹੀ ਸ਼ਹਿਰ ਬਲਾਰੀ ਵਿਖੇ ਹੋਈ ਸਟੇਟ ਪੈਰਾ ਸਵਿਮਿੰਗ ਮੀਟ ਵਿਚ 200 ਮੀਟਰ, 50 ਮੀਟਰ ਬੈਕ ਸਟਰੋਕ ਅਤੇ 100 ਮੀਟਰ ਬਟਰਫਲਾਈ ਵਿਚ ਵੀ ਪਹਿਲਾ ਸਥਾਨ ਹਾਸਲ ਕਰਕੇ ਤਿੰਨੇ ਹੀ ਸਵਿਮਿੰਗ ਦੌੜਾਂ ਵਿਚ 3 ਸੋਨ ਤਗਮਿਆਂ 'ਤੇ ਜਾ ਕਾਬਜ਼ ਹੋਇਆ। ਸਾਲ 2017 ਵਿਚ ਰਾਜਸਥਾਨ ਦੇ ਸ਼ਹਿਰ ਉਦੇਪੁਰ ਵਿਚ ਹੋਈ ਨੈਸ਼ਨਲ ਪੈਰਾ ਸਵਿਮਿੰਗ ਚੈਂਪੀਅਨਸ਼ਿਪ ਵਿਚ ਵੀ ਗੋਪੀਚੰਦ ਨੇ ਆਪਣਾ ਜਿੱਤ ਦਾ ਇਤਿਹਾਸ ਦੁਹਰਾਉਂਦਿਆਂ 200 ਮੀਟਰ, 50 ਮੀਟਰ ਫਰੀ ਸਟਾਈਲ ਅਤੇ 100 ਮੀਟਰ ਬਟਰਫਲਾਈ ਸਵਿਮਿੰਗ ਦੌੜ ਵਿਚ ਵੀ ਪਹਿਲਾ ਸਥਾਨ ਹਾਸਲ ਕਰਕੇ 3 ਸੋਨ ਤਗਮੇ ਆਪਣੇ ਨਾਂਅ ਕਰਕੇ ਆਪਣੀ ਜਿੱਤ ਨੂੰ ਬਰਕਰਾਰ ਰੱਖਿਆ। ਇਥੇ ਹੀ ਬਸ ਨਹੀਂ, ਉਸ ਨੇ ਅੰਤਰਰਾਸ਼ਟਰੀ ਪੱਧਰ 'ਤੇ ਸ੍ਰੀ ਲੰਕਾ ਵਿਚ ਅੰਤਰਰਾਸ਼ਟਰੀ ਪੈਰਾ ਖੇਡਾਂ ਵਿਚ ਪ੍ਰਦਰਸ਼ਨ ਕਰਦਿਆਂ 200 ਮੀਟਰ ਅਤੇ 100 ਮੀਟਰ ਬਟਰਫਲਾਈ ਵਿਚ 2 ਸੋਨ ਤਗਮੇ ਜਿੱਤ ਕੇ ਛੋਟੀ ਉਮਰ ਵਿਚ ਹੀ ਭਾਰਤ ਮਾਤਾ ਦੀ ਝੋਲੀ ਸੋਨ ਤਗਮੇ ਪਾਉਣ ਦਾ ਮਾਣ ਹਾਸਲ ਕੀਤਾ। ਗੋਪੀਚੰਦ ਦੀ ਕੋਚ ਰਜਨੀ ਲਾਕਾ ਨੇ ਗੱਲਬਾਤ ਦੌਰਾਨ ਦੱਸਿਆ ਕਿ ਗੋਪੀਚੰਦ ਕਰਨਾਟਕ ਦਾ ਹੀ ਨਹੀਂ, ਸਗੋਂ ਛੋਟੀ ਉਮਰ ਵਿਚ ਭਾਰਤ ਦਾ ਵੱਡਾ ਮਾਣ ਬਣੇਗਾ ਅਤੇ ਉਹ ਆਉਣ ਵਾਲੀਆਂ ਉਲੰਪਕ ਖੇਡਾਂ ਜੋ ਟੋਕੀਓ ਵਿਚ ਸਾਲ 2020 ਵਿਚ ਹੋ ਰਹੀਆਂ ਹਨ, ਵਿਚ ਵੀ ਭਾਰਤ ਦੀ ਪ੍ਰਤੀਨਿਧਤਾ ਕਰੇਗਾ।


-ਪਿੰਡ ਬੁੱਕਣ ਵਾਲਾ, ਤਹਿ: ਤੇ ਜ਼ਿਲ੍ਹਾ ਮੋਗਾ। ਮੋਬਾ: 98551-14484

'ਭਾਰਤ ਰਤਨ' ਪੁਰਸਕਾਰ ਦਾ ਸਹੀ ਹੱਕਦਾਰ ਹੈ ਬਲਬੀਰ ਸਿੰਘ

ਬਲਬੀਰ ਸਿੰਘ ਹਾਕੀ ਦਾ 'ਗੋਲ ਕਿੰਗ' ਹੈ। ਉਲੰਪਿਕ ਖੇਡਾਂ ਦੇ ਕਿਸੇ ਵੀ ਫਾਈਨਲ ਮੈਚ ਵਿਚ ਸਭ ਤੋਂ ਵੱਧ ਗੋਲ ਕਰਨ ਦਾ ਉਲੰਪਿਕ ਰਿਕਾਰਡ ਅਜੇ ਵੀ ਉਸ ਦੇ ਨਾਂਅ ਹੈ। ਹੈਲਸਿੰਕੀ-1952 ਦੀਆਂ ਉਲੰਪਿਕ ਖੇਡਾਂ ਦੇ ਫਾਈਨਲ ਮੈਚ ਵਿਚ ਉਸ ਨੇ ਹਾਲੈਂਡ ਵਿਰੁੱਧ 5 ਗੋਲ ਕੀਤੇ ਸਨ। ਉਥੇ ਭਾਰਤੀ ਟੀਮ ਨੇ 6-1 ਗੋਲਾਂ ਨਾਲ ਸੋਨ ਤਗਮਾ ਜਿੱਤਿਆ ਸੀ। 2012 ਵਿਚ ਲੰਡਨ ਦੀਆਂ ਉਲੰਪਿਕ ਖੇਡਾਂ ਮੌਕੇ ਉਲੰਪਿਕ ਖੇਡਾਂ ਦੇ ਸਫ਼ਰ 'ਚੋਂ ਜਿਹੜੇ 16 'ਆਈਕਾਨਿਕ ਉਲੰਪੀਅਨ' ਚੁਣੇ ਗਏ, ਉਨ੍ਹਾਂ ਵਿਚ ਏਸ਼ੀਆ ਦੇ ਸਿਰਫ਼ 2 ਤੇ ਹਿੰਦ ਮਹਾਂਦੀਪ ਦਾ ਕੇਵਲ ਬਲਬੀਰ ਸਿੰਘ ਹੀ ਚੁਣਿਆ ਗਿਆ ਸੀ।
ਉਲੰਪਿਕ ਖੇਡਾਂ ਦੇ 3 ਸੋਨ ਤਗਮੇ, ਏਸ਼ਿਆਈ ਖੇਡਾਂ ਦਾ 1 ਅਤੇ ਭਾਰਤੀ ਟੀਮਾਂ ਦਾ ਕੋਚ/ਮੈਨੇਜਰ ਬਣ ਕੇ ਭਾਰਤ ਨੂੰ 7 ਤਗਮੇ ਤੇ ਵਿਸ਼ਵ ਹਾਕੀ ਕੱਪ ਜਿਤਾਉਣ ਵਾਲੇ ਬਲਬੀਰ ਸਿੰਘ ਨੂੰ ਭਾਰਤ ਸਰਕਾਰ ਨੇ ਅਜੇ ਤਕ 'ਪਦਮਸ੍ਰੀ' ਤੱਕ ਹੀ ਸੀਮਤ ਰੱਖਿਆ ਹੋਇਐ। ਉਲਟਾ ਸਪੋਟਰਸ ਅਥਾਰਟੀ ਆਫ਼ ਇੰਡੀਆ ਨੇ ਉਸ ਦੀਆਂ ਅਨਮੋਲ ਖੇਡ ਨਿਸ਼ਾਨੀਆਂ ਵੀ 'ਗੁਆ' ਦਿੱਤੀਆਂ ਹਨ। ਇਹ ਹਾਲ ਹੈ ਉਲੰਪਿਕ ਖੇਡਾਂ 'ਚੋਂ ਭਾਰਤ ਲਈ ਸਭ ਤੋਂ ਵੱਧ ਵਾਰ ਸੋਨ ਤਗਮਾ ਜਿੱਤਣ ਵਾਲੀ ਖੇਡ ਹਾਕੀ ਦੀ ਅਨਮੋਲ ਵਿਰਾਸਤ ਨੂੰ ਸੰਭਾਲਣ ਦਾ!
1962 ਦੀ ਹਿੰਦ-ਚੀਨ ਜੰਗ ਸਮੇਂ ਬਲਬੀਰ ਸਿੰਘ ਨੇ ਆਪਣੇ ਤਿੰਨੇ ਉਲੰਪਿਕ ਸੋਨ ਤਗਮੇ ਪ੍ਰਧਾਨ ਮੰਤਰੀ ਫੰਡ ਲਈ ਦਾਨ ਕਰ ਦਿੱਤੇ ਸਨ। ਉਹ ਤਾਂ ਪੰਜਾਬ ਦੇ ਤਤਕਾਲੀ ਮੁੱਖ ਮੰਤਰੀ ਸ: ਪ੍ਰਤਾਪ ਸਿੰਘ ਕੈਰੋਂ ਦੀ ਦੂਰਅੰਦੇਸ਼ੀ ਸੀ ਕਿ ਉਸ ਨੇ ਤਗਮੇ ਸੰਭਾਲ ਰੱਖੇ ਤੇ ਬਲਬੀਰ ਸਿੰਘ ਨੂੰ ਮੋੜ ਦਿੱਤੇ। ਜੇ ਉਹ ਵੀ 'ਸਾਈ' ਨੂੰ ਦੇ ਦਿੱਤੇ ਹੁੰਦੇ ਤਾਂ ਉਹ ਵੀ 'ਜਾਂਦੇ' ਰਹਿਣੇ ਸਨ! ਬਲਬੀਰ ਸਿੰਘ ਨੇ ਹਾਕੀ ਦੀ ਖੇਡ ਬਾਰੇ 'ਦੀ ਗੋਲਡਨ ਯਾਰਡਸਟਿਕ' ਪੁਸਤਕ ਵੀ ਲਿਖੀ, ਜਿਸ ਦਾ ਮੁੱਖਬੰਦ ਅੰਤਰਰਾਸ਼ਟਰੀ ਉਲੰਪਿਕ ਕਮੇਟੀ ਦੇ ਸਾਬਕਾ ਪ੍ਰਧਾਨ ਯੈਕ ਰੋਜ਼ ਨੇ ਲਿਖਿਆ-
'ਇਕ ਉਲੰਪੀਅਨ ਵਜੋਂ ਮੈਨੂੰ 'ਗੋਲਡਨ ਹੈਟ ਟ੍ਰਿਕ' ਮਾਰਨ ਵਾਲੇ ਲੀਜੈਂਡਰੀ ਹਾਕੀ ਖਿਡਾਰੀ ਬਲਬੀਰ ਸਿੰਘ ਦੀ ਪੁਸਤਕ ਦਾ ਮੁੱਖ ਬੰਦ ਲਿਖਦਿਆਂ ਖ਼ੁਸ਼ੀ ਹੋ ਰਹੀ ਹੈ। ਸਾਡੇ ਸਮੇਂ ਦੇ ਖਿਡਾਰੀਆਂ, ਟੀਮ ਕਪਤਾਨਾਂ, ਕੋਚਾਂ ਤੇ ਮੈਨੇਜਰਾਂ ਨੇ ਬਲਬੀਰ ਸਿੰਘ ਨੂੰ ਹਾਕੀ ਦਾ ਸਰਬੋਤਮ ਖਿਡਾਰੀ ਮੰਨਿਆ ਹੈ। ਇਸ ਪੁਸਤਕ ਦੀ ਪ੍ਰਕਾਸ਼ਨਾ ਨਾਲ ਬਲਬੀਰ ਸਿੰਘ ਨੇ ਹਾਕੀ ਨਾਲ ਆਪਣਾ ਸੱਚਾ ਸਨੇਹ ਜਤਾਇਆ ਹੈ ਤੇ ਹਾਕੀ ਦਾ ਸੰਦੇਸ਼ ਭਾਰਤ ਤੇ ਬਾਹਰ ਸਾਰੀ ਦੁਨੀਆ ਤੱਕ ਪਹੁੰਚਾਇਆ ਹੈ। ਹਾਕੀ ਨਾਲ ਉਸ ਦੀ ਲਗਨ ਅਤੇ ਖੇਡਾਂ ਦੀਆਂ ਕਦਰਾਂ ਨਾਲ ਪਿਆਰ ਅਗਲੀਆਂ ਪੀੜ੍ਹੀਆਂ ਨੂੰ ਉਤਸ਼ਾਹਿਤ ਕਰਦਾ ਰਹੇਗਾ। ਦੇਸ਼-ਵਿਦੇਸ਼ ਦੇ ਬੱਚੇ ਤੇ ਨੌਜਵਾਨ ਉਸ ਦੇ ਵਿਖਾਏ ਖੇਡ ਮਾਰਗ 'ਤੇ ਚੱਲਣਗੇ। ਉਲੰਪਿਕ ਲਹਿਰ ਬਲਬੀਰ ਸਿੰਘ ਜਿਹੇ ਖਿਡਾਰੀਆਂ ਦੀ ਰਿਣੀ ਹੈ, ਜਿਨ੍ਹਾਂ ਨੇ 20ਵੀਂ ਸਦੀ ਦੇ ਖੇਡ ਇਤਿਹਾਸ ਨੂੰ ਸੁਨਹਿਰੀ ਬਣਾਇਆ।
2014 ਵਿਚ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਨੇ ਕੇਂਦਰ ਸਰਕਾਰ ਨੂੰ ਚਿੱਠੀ ਲਿਖੀ ਸੀ ਕਿ ਬਲਬੀਰ ਸਿੰਘ ਨੂੰ 'ਭਾਰਤ ਰਤਨ' ਪੁਰਸਕਾਰ ਦਿੱਤਾ ਜਾਵੇ, ਜਿਸ ਦਾ ਉਹ ਸਹੀ ਹੱਕਦਾਰ ਹੈ। ਉਸ ਦੀਆਂ ਖੇਡ ਪ੍ਰਾਪਤੀਆਂ ਭਾਰਤ ਵਿਚ ਸਭ ਤੋਂ ਵੱਧ ਹਨ। ਇਹ ਤੱਥ ਇੰਟਰਨੈਸ਼ਨਲ ਉਲੰਪਿਕ ਕਮੇਟੀ ਨੇ ਵੀ ਤਸਲੀਮ ਕੀਤਾ ਹੈ। ਧਿਆਨ ਚੰਦ ਨੇ ਐਂਗਲੋ ਇੰਡੀਅਨ ਖਿਡਾਰੀਆਂ ਵਾਲੀ ਟੀਮ ਨਾਲ ਬ੍ਰਿਟਿਸ਼ ਇੰਡੀਆ ਲਈ 3 ਸੋਨ ਤਗਮੇ ਜਿੱਤੇ ਸਨ, ਜਿਨ੍ਹਾਂ ਨਾਲ ਯੂਨੀਅਨ ਜੈਕ ਝੁਲਾਏ ਗਏ ਸਨ, ਜਦ ਕਿ ਬਲਬੀਰ ਸਿੰਘ ਨੇ ਆਜ਼ਾਦ ਭਾਰਤ ਲਈ ਨਿਰੋਲ ਭਾਰਤੀ ਖਿਡਾਰੀਆਂ ਨਾਲ 3 ਸੋਨ ਤਗਮੇ ਜਿੱਤੇ ਤੇ ਤਿਰੰਗੇ ਲਹਿਰਾਏ ਹਨ।
ਬਲਬੀਰ ਸਿੰਘ ਦਾ ਜਨਮ ਸੁਤੰਤਰਤਾ ਸੰਗਰਾਮ ਵਿਚ ਜੇਲ੍ਹਾਂ ਕੱਟਣ ਵਾਲੇ ਗਿਆਨੀ ਦਲੀਪ ਸਿੰਘ ਦੇ ਘਰ ਮਾਤਾ ਕਰਮ ਕੌਰ ਦੀ ਕੁੱਖੋਂ 31 ਦਸੰਬਰ, 1923 ਨੂੰ ਉਸ ਦੇ ਨਾਨਕੇ ਪਿੰਡ ਹਰੀਪੁਰ ਖ਼ਾਲਸਾ, ਤਹਿਸੀਲ ਫਿਲੌਰ ਵਿਚ ਹੋਇਆ ਸੀ। ਉਹ ਸਹੀ ਅਰਥਾਂ ਵਿਚ ਰਾਸ਼ਟਰਵਾਦੀ ਅਤੇ ਖੁੱਲ੍ਹੇ ਦਿਲ ਵਾਲਾ ਮਾਨਵਵਾਦੀ ਇਨਸਾਨ ਹੈ। ਕ੍ਰਿਕਟ ਦੇ ਨੌਜਵਾਨ ਖਿਡਾਰੀ ਸਚਿਨ ਤੇਂਦੁਲਕਰ ਨੂੰ ਭਾਰਤ ਰਤਨ ਪੁਰਸਕਾਰ ਚਿਰੋਕਣਾ ਦੇ ਦਿੱਤਾ ਗਿਆ ਹੈ। ਪਰ ਬਲਬੀਰ ਸਿੰਘ ਨੂੰ?
ਇਨ੍ਹੀਂ ਦਿਨੀਂ ਉਲੰਪਿਕ ਰਤਨ ਬਲਬੀਰ ਸਿੰਘ ਪੀ. ਜੀ. ਆਈ. ਚੰਡੀਗੜ੍ਹ ਵਿਚ ਜ਼ੇਰੇ ਇਲਾਜ ਹੈ। ਕੈਪਟਨ ਅਮਰਿੰਦਰ ਸਿੰਘ ਮੁੱਖ ਮੰਤਰੀ ਤੇ ਰਾਣਾ ਗੁਰਮੀਤ ਸਿੰਘ ਖੇਡ ਮੰਤਰੀ ਨੇ ਪੀ. ਜੀ. ਆਈ. ਜਾ ਕੇ ਉਸ ਦਾ ਮਹਾਰਾਜਾ ਰਣਜੀਤ ਸਿੰਘ ਪੁਰਸਕਾਰ ਨਾਲ ਮਾਣ-ਸਨਮਾਨ ਕੀਤਾ ਹੈ। ਇਹ ਵੀ ਕਿਹਾ ਕਿ ਉਹ ਭਾਰਤ ਸਰਕਾਰ ਨੂੰ ਲਿਖਣਗੇ ਕਿ ਬਲਬੀਰ ਸਿੰਘ ਨੂੰ ਭਾਰਤ ਰਤਨ ਪੁਰਸਕਾਰ ਦਿੱਤਾ ਜਾਵੇ।
ਸੈਂਚਰੀ ਨੇੜੇ ਢੁੱਕਾ ਬਲਬੀਰ ਸਿੰਘ ਹਾਲ ਦੀ ਘੜੀ ਮੌਤ ਨਾਲ ਅੰਤਲਾ ਮੈਚ ਖੇਡ ਰਿਹੈ। ਮੈਂ ਉਸ ਦੀ ਜੀਵਨੀ ਦਾ ਨਾਂਅ 'ਗੋਲਡਨ ਗੋਲ' ਰੱਖਿਆ ਹੈ। ਉਸ ਦੀਆਂ ਅੰਤਲੀਆਂ ਸਤਰਾਂ ਹਨ-'ਅੰਤਰਰਾਸ਼ਟਰੀ ਉਲੰਪਿਕ ਕਮੇਟੀ ਨੇ ਤਾਂ ਉਸ ਨੂੰ ਉਲੰਪਿਕ ਰਤਨ ਬਣਾ ਦਿੱਤਾ ਹੈ, ਭਾਰਤ ਸਰਕਾਰ ਪਤਾ ਨਹੀਂ ਕਦੋਂ ਭਾਰਤ ਰਤਨ ਬਣਾਵੇ?' ਬਲਬੀਰ ਸਿੰਘ ਦਾ ਕਹਿਣਾ ਹੈ, 'ਜਿਵੇਂ ਮੈਚ ਬਰਾਬਰ ਰਹਿ ਜਾਣ ਪਿੱਛੋਂ ਐਕਸਟਰਾ ਟਾਈਮ ਦਿੱਤਾ ਜਾਂਦੈ, ਐਕਸਟਰਾ ਟਾਈਮ ਵਿਚ ਮੈਚ ਬਰਾਬਰ ਰਹੇ ਤਾਂ ਗੋਲਡਨ ਗੋਲ ਦਾ ਸਮਾਂ ਹੁੰਦੈ, ਉਵੇਂ ਮੈਂ ਵੀ ਹੁਣ ਗੋਲਡਨ ਗੋਲ ਦੀ ਉਡੀਕ ਵਿਚ ਹਾਂ। ਖੇਡ ਹੁਣ ਉਪਰਲੇ ਨਾਲ ਹੈ। ਜਦੋਂ 'ਗੋਲਡਨ ਗੋਲ' ਹੋ ਗਿਆ ਤਾਂ ਖੇਡ ਮੁੱਕ ਜਾਣੀ ਹੈ।'
ਕੀ ਭਾਰਤ ਸਰਕਾਰ ਬਲਬੀਰ ਸਿੰਘ ਦੇ 'ਗੋਲਡਨ ਗੋਲ' ਦੀ ਉਡੀਕ ਵਿਚ ਹੈ? ਵੇਖਦੇ ਹਾਂ ਬਲਬੀਰ ਸਿੰਘ ਨੂੰ 'ਭਾਰਤ ਰਤਨ' ਉਹਦੇ ਜਿਊਂਦੇ ਜੀਅ ਮਿਲਦਾ ਹੈ ਜਾਂ ਜੀਵਨ ਉਪਰੰਤ?

ਕੋਰੀ ਗੌਫ ਦਾ ਵਿੰਬਲਡਨ ਵਿਚ ਧਮਾਕੇਦਾਰ ਉਲਟਫੇਰ

ਸੰਸਾਰ ਵਿਚ ਖੇਡਾਂ ਦੇ ਖੇਤਰ ਵਿਚ ਕਈ ਅਜਿਹੀਆਂ ਸਨਸਨੀਖੇਜ਼ ਕਿਸੇ ਖਾਸ ਖੇਡ ਨੂੰ ਲੈ ਕੇ ਖੇਡ ਘਟਨਾਵਾਂ ਘਟ ਜਾਂਦੀਆਂ ਹਨ ਕਿ ਸਦਾ ਲਈ ਇਹ ਮਨ ਵਿਚ ਬੈਠ ਜਾਂਦੀਆਂ ਹਨ। ਕੁਝ ਅਜਿਹਾ ਹੀ ਇਸ ਸਾਲ ਟੈਨਿਸ ਵਿੰਬਲਡਨ ਵਿਚ ਇਕ ਧਮਾਕਾ ਦੇਖਣ ਨੂੰ ਮਿਲਿਆ, ਜਦੋਂ ਇਕ ਸਕੂਲ ਦੀ 15 ਸਾਲ ਦੀ ਅੱਲ੍ਹੜ ਕੁੜੀ ਕੋਰੀ ਗੌਫ ਨੇ ਸੰਸਾਰ ਦੀ ਮਹਾਨ ਖਿਡਾਰਨ ਵੀਨਸ ਵਿਲੀਅਮ ਨੂੰ ਸਿੱਧੇ ਸੈੱਟਾਂ ਵਿਚ 6-4, 6-4 ਨਾਲ ਹਰਾ ਕੇ ਇਕ ਅਜਿਹਾ ਧਮਾਕਾ ਕੀਤਾ ਕਿ ਜਿਸ ਦੀ ਗੂੰਜ ਸਦਾ ਮਨ ਵਿਚ ਗੂੰਜਦੀ ਰਹੇਗੀ। ਇਸ ਹੈਰਾਨ ਕਰਨ ਵਾਲੀ ਸਫਲਤਾ ਨਾਲ ਹੁਣ ਕਈ ਦਿਲਚਸਪ ਗੱਲਾਂ ਜੁੜ ਗਈਆਂ ਹਨ।
ਅੱਜ ਤੋਂ ਠੀਕ 15 ਸਾਲ ਪਹਿਲਾਂ ਕੋਰੀ ਗੌਫ ਦਾ ਜਨਮ ਹੋਇਆ ਤਾਂ ਵੀਨਸ ਵਿਲੀਅਮ ਉਸ ਸਮੇਂ ਤੱਕ 2 ਵਾਰ ਗਰੈਂਡ ਸਲੈਮ ਚੈਂਪੀਅਨਸ਼ਿਪ ਜਿੱਤ ਚੁੱਕੀ ਸੀ। ਸੰਸਾਰ ਵਿਚ ਅਮਰੀਕਾ ਦੀਆਂ ਵਿਲੀਅਮ ਭੈਣਾਂ ਦਾ ਸਦਾ ਬੋਲਬਾਲਾ ਰਿਹਾ ਹੈ। ਇਸ ਪੱਧਰ 'ਤੇ ਪਹੁੰਚ ਕੇ ਜਦੋਂ ਵੀਨਸ ਦਾ ਮੁਕਾਬਲਾ ਕੋਰੀ ਗੌਫ ਨਾਲ ਹੋਇਆ ਤਾਂ ਵੀਨਸ ਜੋ ਕਿ ਕਈ ਵਾਰ ਦੁਨੀਆ ਦੀ ਨੰਬਰ ਇਕ ਰਹਿ ਚੁੱਕੀ ਹੈ ਤੇ 5 ਵਾਰ ਇਹ ਵੱਕਾਰੀ ਗਰੈਂਡ ਸਲੈਮ ਆਪਣੇ ਨਾਂਅ ਕਰ ਚੁੱਕੀ ਹੈ ਤੇ ਦੂਜੇ ਪਾਸੇ ਬਾਲੜੀ ਕੋਰੀ ਗੌਫ, ਜੋ ਦੁਨੀਆ ਦੀ ਸਦਾ ਹੀ 300 ਤੋਂ ਉੱਪਰ ਰੈਂਕ ਦੀ ਖਿਡਾਰਨ ਰਹੀ ਹੈ, ਪਹਿਲਾਂ ਤਾਂ ਦਰਸ਼ਕਾਂ ਨੇ ਇਸ ਨੂੰ ਇਕ ਸਾਧਾਰਨ ਮੁਕਾਬਲਾ ਸਮਝਿਆ ਤਾਂ ਕਿਸ ਨੂੰ ਆਸ ਸੀ ਕਿ ਕੋਰੀ ਗੌਫ ਕੋਈ ਇਤਿਹਾਸ ਸਿਰਜਣ ਜਾ ਰਹੀ ਹੈ। ਪਰ ਜਿਉਂ-ਜਿਉਂ ਮੁਕਾਬਲਾ ਅੱਗੇ ਵਧਣ ਲੱਗਾ ਤਾਂ ਦਰਸ਼ਕਾਂ ਦੀ ਉਤਸੁਕਤਾ ਮੈਚ ਵਿਚ ਵਧਦੀ ਗਈ।
ਮਾਹਿਰਾਂ ਨੇ ਇਸ ਨੂੰ ਨੌਜਵਾਨ ਸ਼ਕਤੀ ਤੇ ਅਨੁਭਵ ਨਾਲ ਮੈਚ ਦੀ ਟੱਕਰ ਪ੍ਰਦਾਨ ਕੀਤੀ। ਇਸ ਖੇਡ ਨਾਲ ਜੁੜੇ ਹੋਏ ਮਾਹਿਰਾਂ ਦਾ ਇਹ ਕਹਿਣਾ ਹੈ ਕਿ ਸਰਵਿਸ ਕਰਨ ਦਾ ਢੰਗ ਇਸ ਖੇਡ ਵਿਚ ਬਹੁਤ ਮਹਾਨਤਾ ਰੱਖਦਾ ਹੈ। ਕੋਰੀ ਗੌਫ ਦੀ ਸਰਵਿਸ ਇੰਨੀ ਸਮਰੱਥ ਸੀ ਕਿ ਵੀਨਸ ਕੋਲ ਇਸ ਦਾ ਕੋਈ ਜਵਾਬ ਨਹੀਂ ਸੀ।
ਸਾਰੀ ਖੇਡ ਵਿਚ 15 ਸਾਲ ਦੀ ਇਸ ਕੁੜੀ ਨੇ ਉਸ ਤੋਂ 24 ਸਾਲ ਵੱਡੀ ਵੀਨਸ ਨੂੰ ਖੇਡ ਦੇ ਨੇੜੇ ਨਹੀਂ ਆਉਣ ਦਿੱਤਾ ਤੇ ਆਸਾਨੀ ਨਾਲ ਇਹ ਮੈਚ ਆਪਣੇ ਨਾਂਅ ਕਰ ਲਿਆ। ਸੰਸਾਰ ਵਿਚ ਅਜਿਹੀਆ ਗੱਲਾਂ ਘਰ-ਘਰ ਦੀ ਕਹਾਣੀ ਬਣ ਜਾਂਦੀਆਂ ਹਨ। ਹਰ ਖੇਡ ਵਿਚ ਇਹ ਉਲਟਫੇਰ ਦੇਖਣ ਨੂੰ ਮਿਲਦੇ ਹਨ। ਖੁਦ ਵੀਨਸ ਨੇ ਬੜੇ ਖੁੱਲ੍ਹੇ ਦਿਲ ਨਾਲ ਇਸ ਬੱਚੀ ਦੀ ਖੇਡ ਦੀ ਪ੍ਰਸੰਸਾ ਕੀਤੀ ਹੈ ਤੇ ਇਸ ਦੇ ਉਜਵਲ ਭਵਿੱਖ ਦੀ ਕਾਮਨਾ ਕੀਤੀ ਹੈ। ਕੋਰੀ ਕੌਫ ਨੇ ਕਿਹਾ ਹੈ ਕਿ ਵੀਨਸ ਸਦਾ ਬਚਪਨ ਤੋਂ ਹੀ ਉਸ ਦਾ ਆਦਰਸ਼ ਬਣੀ ਰਹੀ ਹੈ ਤੇ ਉਸ ਦਾ ਨਿਸ਼ਾਨਾ ਵਿੰਬਲਡਨ ਜਿੱਤਣਾ ਹੈ।
ਰੈਕਿਟ ਨਾਲ ਖੇਡੀ ਜਾਣ ਵਾਲੀ ਬੈਡਮਿੰਟਨ ਵਿਚ ਵੀ ਜਦੋਂ ਪ੍ਰਕਾਸ਼ ਪਾਦੂਕੋਨ ਨੇ ਇਕ ਸਾਲ ਵਿਚ ਹੀ ਜੂਨੀਅਰ ਤੇ ਸੀਨੀਅਰ ਟਾਈਟਲ ਜਿੱਤੇ ਸਨ ਤਾਂ ਇਸ ਤਰ੍ਹਾਂ ਦਾ ਹੀ ਹੁਲਾਸ ਭਰਿਆ ਮਾਹੌਲ ਸਿਰਜਿਆ ਗਿਆ ਸੀ। ਭਾਰਤ ਸਦਾ ਇਸ ਖੇਡ ਵਿਚ ਪਛੜਿਆ ਰਿਹਾ ਹੈ। ਕੇਵਲ ਡਬਲਜ਼ ਵਿਚ ਸਾਨੀਆ ਮਿਰਜ਼ਾ ਨੇ ਇਸ ਵਿਚ ਨਾਂਅ ਕਮਾਇਆ ਹੈ ਤੇ ਉਹ ਇਸ ਵੰਨਗੀ ਵਿਚ ਨੰਬਰ ਇਕ 'ਤੇ ਵੀ ਰਹਿ ਚੁੱਕੀ ਹੈ। ਪੁਰਸ਼ਾਂ ਵਿਚ ਵੀ ਸਾਡਾ ਨਾਂਅ ਕੇਵਲ ਇਸ ਖੇਡ ਵਿਚ ਡਬਲਜ਼ ਵਿਚ ਹੀ ਰਿਹਾ ਹੈ।
ਚਾਹੇ ਲਇਏਂਡਰ ਪੇਸ ਜਾਂ ਸਾਨੀਆ ਮਿਰਜ਼ਾ ਹੋਵੇ, ਅਸੀਂ ਇਸ ਖੇਤਰ ਵਿਚ ਦੂਜੇ ਦੇਸ਼ ਦੇ ਖਿਡਾਰੀਆਂ ਕਾਰਨ ਹੀ ਸਿਖਰ 'ਤੇ ਪਹੁੰਚੇ ਹਾਂ। ਭਾਰਤ ਵਿਚ ਇਹ ਖੇਡ ਸਦਾ ਸ਼ਹਿਰਾਂ ਤੱਕ ਹੀ ਸੀਮਤ ਰਹੀ ਹੈ ਤੇ ਪਿੰਡਾਂ ਵਿਚ ਇਹ ਖੇਡ ਅਜੇ ਤੱਕ ਨਹੀਂ ਗਈ। ਬਹੁਤ ਸਾਰੇ ਕੁਲੀਨ ਵਰਗ ਦੇ ਲੋਕ ਹੀ ਇਸ ਨੂੰ ਖੇਡਦੇ ਰਹੇ ਹਨ ਤੇ ਖੇਡ ਮੈਦਾਨ ਵੀ ਸੀਮਤ ਹਨ।
ਹੁਣ ਲੋੜ ਹੈ ਇਸ ਨੂੰ ਆਮ ਲੋਕਾਂ ਦੀ ਖੇਡ ਬਣਾਇਆ ਜਾਵੇ। ਹੁਣ ਇਸ ਸਮੇਂ ਭਾਰਤੀ ਕੁੜੀਆਂ ਨੂੰ ਇਹ ਸਬਕ ਸਿੱਖਣ ਦੀ ਲੋੜ ਹੈ ਕਿ ਜਵਾਨੀ ਦੀ ਉਮਰ ਇਸ ਖੇਡ ਵਿਚ ਖੇਡਣ ਦੀ ਸਹੀ ਉਮਰ ਹੈ, ਕਿਉਂਕਿ ਇਹ ਖੇਡ ਬਹੁਤੀ ਸਰੀਰਕ ਸ਼ਕਤੀ ਦੀ ਹੈ। ਭਾਰਤ ਇਸ ਖੇਡ ਵਿਚ ਸਦਾ ਪਛੜਿਆ ਰਿਹਾ ਹੈ। ਹੁਣ ਭਾਰਤੀ ਕੁੜੀਆਂ ਸਕੂਲ ਵਿਚ ਜਾਣ ਵਾਲੀ ਇਕ ਬਾਲੜੀ ਤੋਂ ਪ੍ਰੇਰਿਤ ਹੋ ਕੇ ਆਪਣਾ ਨਾਂਅ ਰੌਸ਼ਨ ਕਰ ਸਕਦੀਆਂ ਹਨ।


-274-ਏ. ਐਕਸ. ਮਾਡਲ ਟਾਊਨ ਐਕਸਟੈਨਸ਼ਨ, ਲੁਧਿਆਣਾ।
ਮੋਬਾ: 98152-55295

ਧਮਾਕੇਦਾਰ ਹੋਵੇਗਾ ਪ੍ਰੋ ਕਬੱਡੀ ਦਾ ਸੱਤਵਾਂ ਅਖਾੜਾ

ਇਸ ਵਾਰ ਬਹੁਚਰਚਿਤ ਪ੍ਰੋ ਕਬੱਡੀ ਲੀਗ ਦੇ ਸੱਤਵੇਂ ਅਖਾੜੇ ਦੀ ਸ਼ੁਰੂਆਤ 19 ਜੁਲਾਈ ਨੂੰ ਹੈਦਰਾਬਾਦ ਵਿਚ ਹੋਵੇਗੀ। 3 ਮਹੀਨੇ ਖੇਡੀ ਜਾਣ ਵਾਲੀ ਇਸ ਵੱਕਾਰੀ ਲੀਗ ਦਾ ਫਾਈਨਲ 19 ਅਕਤੂਬਰ ਨੂੰ ਖੇਡਿਆ ਜਾਵੇਗਾ। ਲੀਗ ਦਾ ਉਦਘਾਟਨੀ ਮੈਚ ਘਰੇਲੂ ਟੀਮ ਤੇਲਗੂ ਟਾਈਟਨਸ ਦਾ ਮੁਕਾਬਲਾ ਦੂਜੇ ਸੀਜ਼ਨ ਦੀ ਜੇਤੂ ਟੀਮ ਯੂ. ਮੁੰਬਾ ਨਾਲ ਹੋਵੇਗਾ। ਇਸੇ ਦਿਨ ਪਿਛਲੀ ਵਿਜੇਤਾ ਬੈਂਗਲੁਰੂ ਬੁਲਸ 3 ਵਾਰ ਦੀ ਚੈਂਪੀਅਨ ਪਟਨਾ ਪਾਇਰੇਟਸ ਦੇ ਖਿਲਾਫ ਮੈਦਾਨ 'ਚ ਉਤਰੇਗੀ।
ਪਿਛਲੇ ਦੋ ਸਾਲਾਂ ਦੀ ਤਰ੍ਹਾਂ ਇਸ ਵਾਰ ਵੀ ਇਸ ਲੀਗ ਵਿਚ 12 ਟੀਮਾਂ ਤੇਲਗੂ ਟਾਈਟਨਜ਼, ਯੂ. ਮੁੰਬਾ, ਪਟਨਾ ਪਾਇਰੇਟਸ, ਗੁਜਰਾਤ ਫਾਰਚੂਨਾਈਟਸ, ਤਾਮਿਲ ਥਲਾਈਵਾਜ਼, ਦਬੰਗ ਦਿੱਲੀ, ਬੈਂਗਲੁਰੂ ਬੁਲਸ, ਬੰਗਾਲ ਵਾਰੀਅਰਸ, ਪੁਨੇਰੀ ਪਲਟਣ, ਜੈਪੁਰ ਪਿੰਕ ਪੈਂਥਰਜ਼, ਹਰਿਆਣਾ ਸਟੀਲਰਸ, ਯੂ. ਪੀ. ਯੋਧਾ ਖਿਤਾਬੀ ਦਾਅਵੇਦਾਰੀ ਪੇਸ਼ ਕਰਨਗੀਆਂ।
ਪ੍ਰੋ ਕਬੱਡੀ ਲੀਗ ਫਾਰਮੈਟ ਵਿਚ ਵੀ ਇਸ ਵਾਰ ਬਦਲਾਅ ਕੀਤਾ ਹੈ। ਇਸ ਵਾਰ ਇੰਟਰ ਜ਼ੋਨਲ, ਇੰਟਰਾ ਜ਼ੋਨਲ ਅਤੇ ਵਾਈਲਡ ਕਾਰਡ ਮੈਚਾਂ ਨੂੰ ਹਟਾ ਦਿੱਤਾ ਗਿਆ ਹੈ। ਇਸ ਵਾਰ ਮੁਕਾਬਲੇ ਰਾਊਂਡ ਰੋਬਿਨ ਫਾਰਮੈਟ ਦੇ ਆਧਾਰ 'ਤੇ ਖੇਡੇ ਜਾਣਗੇ। ਹਰ ਇਕ ਟੀਮ ਦੇ ਗਰੁੱਪ ਸਟੇਜ 'ਤੇ 22 ਮੈਚ ਖੇਡਣੇ ਹੋਣਗੇ ਅਤੇ ਸਿਖਰ 'ਤੇ ਰਹਿਣ ਵਾਲੀਆਂ 6 ਟੀਮਾਂ ਪਲੇਅ ਆਫ ਲਈ ਕੁਆਲੀਫਾਈ ਕਰਨਗੀਆਂ। ਇਸ ਵਾਰ ਪਲੇਅ ਆਫ ਫਾਰਮੈਟ 'ਚ ਵੀ ਬਦਲਾਅ ਕੀਤਾ ਗਿਆ ਹੈ। ਪਹਿਲੇ ਅਲੀਮੀਨੇਟਰ 'ਚ ਤੀਜੇ ਸਥਾਨ 'ਤੇ ਰਹਿਣ ਵਾਲੀ ਟੀਮ ਦਾ ਮੁਕਾਬਲਾ 6ਵੇਂ ਸਥਾਨ 'ਤੇ ਰਹਿਣ ਵਾਲੀ ਟੀਮ ਨਾਲ ਹੋਵੇਗਾ ਅਤੇ ਦੂਜੇ ਐਲੀਮੀਨੇਟਰ 'ਚ ਚੌਥੇ ਨੰਬਰ 'ਤੇ ਰਹਿਣ ਵਾਲੀ ਟੀਮ ਦਾ ਮੁਕਾਬਲਾ 6ਵੇਂ ਸਥਾਨ 'ਤੇ ਰਹਿਣ ਵਾਲੀ ਟੀਮ ਨਾਲ ਹੋਵੇਗਾ। ਦੋਵੇਂ ਐਲੀਮੀਨੇਟਰ ਮੁਕਾਬਲੇ (ਨਾਕ ਆਊਟ) 14 ਅਕਤੂਬਰ ਨੂੰ ਖੇਡੇ ਜਾਣਗੇ। ਆਖਰੀ ਚਾਰ 'ਚ ਅੱਪੜਨ ਵਾਲੀਆਂ ਟੀਮਾਂ 16 ਅਕਤੂਬਰ ਨੂੰ ਸੈਮੀਫਾਈਨਲ 'ਚ ਟਕਰਾਉਣਗੀਆਂ ਅਤੇ ਫਾਈਨਲ ਮੁਕਾਬਲਾ 19 ਅਕਤੂਬਰ, 2019 ਨੂੰ ਖੇਡਿਆ ਜਾਵੇਗਾ।
ਟੈਲੀਵਿਜ਼ਨ ਪ੍ਰਸਾਰਨ ਦੀ ਵਜ੍ਹਾ ਕਰਕੇ ਕਬੱਡੀ ਹੁਣ ਤਮਾਮ ਦੇਸ਼ਾਂ ਵਿਚ ਦੇਖੀ ਜਾਂਦੀ ਹੈ। ਮਸ਼ਾਲ ਸਪੋਰਟਸ ਅਤੇ ਸਟਾਰ ਖੇਡ ਚੈਨਲ ਦੇ ਉੱਦਮ ਨਾਲ ਕਬੱਡੀ ਲੀਗ ਨੂੰ ਆਈ.ਪੀ.ਐਲ. ਦੀ ਤਰਜ਼ 'ਤੇ ਖੇਡ ਪ੍ਰੇਮੀਆਂ ਅੱਗੇ ਪੇਸ਼ ਕੀਤਾ ਗਿਆ ਹੈ। ਕਬੱਡੀ ਹੁਣ ਪੇਸ਼ੇਵਰ ਲੀਗ ਆਈ.ਪੀ.ਐਲ. ਅਤੇ ਆਈ.ਐਸ.ਐਲ. ਤੋਂ ਬਾਅਦ ਤੀਜੀ ਅਜਿਹੀ ਖੇਡ ਹੈ, ਜਿਸ ਨੂੰ ਭਾਰਤ ਵਿਚ ਸਭ ਤੋਂ ਜ਼ਿਆਦਾ ਦੇਖਿਆ ਜਾਂਦਾ ਹੈ। ਕਬੱਡੀ ਲੀਗ ਦੀ ਵਧ ਰਹੀ ਲੋਕਪ੍ਰਿਅਤਾ ਦਾ ਵੱਡਾ ਕਾਰਨ ਵਿਸ਼ਵ ਦੇ ਚੋਟੀ ਦੇ ਖਿਡਾਰੀਆਂ ਦਾ ਇਕ ਮੰਚ 'ਤੇ ਖੇਡਣਾ ਹੈ। ਇਤਿਹਾਸਕ ਨਜ਼ਰਸਾਨੀ ਮੁਤਾਬਿਕ ਹੁਣ ਤੱਕ ਇਸ ਲੀਗ ਨੂੰ ਬਤੌਰ ਚੈਂਪੀਅਨ ਜੈਪੁਰ ਪਿੰਕ ਪੈਥਰਸ, ਯੂ. ਮੁੰਬਾ, ਪਟਨਾ ਪਾਇਰੇਟਸ ਅਤੇ ਬੈਂਗਲੁਰੂ ਬੁਲਸ ਨੇ ਆਪਣੇ ਨਾਂਅ ਕੀਤਾ ਹੈ। ਪਟਨਾ ਪਾਇਰੇਟਸ ਅਤੇ ਯੂ. ਮੁੰਬਾ ਇਸ ਲੀਗ ਦੀਆਂ ਸਭ ਤੋਂ ਸਫ਼ਲ ਟੀਮਾਂ ਹਨ। ਹਾਲਾਂਕਿ ਇਸ ਕਬੱਡੀ ਲੀਗ ਵਿਚ ਹਿੱਸਾ ਲੈਣ ਵਾਲੀਆਂ ਟੀਮਾਂ ਖਿਤਾਬੀ ਜੰਗ ਵਿਚ ਆਪਣਾ ਸਭ ਕੁਝ ਦਾਅ 'ਤੇ ਲਗਾ ਦੇਣਗੀਆਂ, ਮੁਕਾਬਲੇ ਬੇਹੱਦ ਕਾਂਟੇਦਾਰ ਹੋਣਗੇ ਪਰ ਕਬੱਡੀ ਪੰਡਿਤਾਂ ਦੀਆਂ ਨਜ਼ਰਾਂ ਵਿਚ ਯੂ.ਪੀ. ਯੋਧਾ, ਪਟਨਾ ਪਾਇਰੇਟਸ ਅਤੇ ਤਮਿਲ ਥਲਾਈਵਾਜ਼ ਇਸ ਵਾਰ ਦਮਦਾਰ ਦਾਅਵੇਦਾਰੀ ਵਜੋਂ ਮੈਦਾਨ 'ਚ ਉਤਰਨਗੇ। ਭਾਰਤ ਦੀ ਸਭ ਤੋਂ ਵੱਡੀ ਕਬੱਡੀ ਲੀਗ ਦੇ ਸਾਰੇ ਮੈਚਾਂ ਦੀ ਸ਼ੁਰੂਆਤ ਸਨਿਚਰਵਾਰ ਸ਼ਾਮ 7.30 ਵਜੇ ਹੋਵੇਗੀ। ਖੈਰ, ਕੌਣ ਬਣੇਗਾ ਚੈਂਪੀਅਨ, ਇਹ ਤਾਂ ਵਕਤ ਹੀ ਦੱਸੇਗਾ ਪਰ ਨਿਰਸੰਦੇਹ ਧਮਾਕੇਦਾਰ ਹੋਵੇਗਾ ਪ੍ਰੋ ਕਬੱਡੀ ਦਾ ਸੱਤਵਾਂ ਅਖਾੜਾ।


-ਪਿੰਡ ਤੇ ਡਾਕ: ਪਲਾਹੀ, ਫਗਵਾੜਾ। ਮੋਬਾ: 94636-12204

ਖੇਡਾਂ ਲਈ ਇੱਛਾ ਸ਼ਕਤੀ ਤੇ ਜਜ਼ਬਾ ਹੋਣਾ ਜ਼ਰੂਰੀ

ਸੰਸਾਰ ਵਿਚ ਜਿਸ ਨੇ ਵੀ ਕਿਸੇ ਨਾ ਕਿਸੇ ਕੰਮ ਵਿਚ ਮੁਕਾਮ ਹਾਸਲ ਕੀਤੇ ਹਨ, ਉਸ ਨੇ ਦ੍ਰਿੜ੍ਹ ਸੰਕਲਪ ਨਾਲ ਆਪਣੇ ਕੰਮ ਨੂੰ ਹੀ ਆਪਣੀ ਪੂਜਾ ਮੰਨ ਕੇ ਉਸ ਖੇਤਰ ਵਿਚ ਜੀਅ ਤੋੜ ਮਿਹਨਤ ਕੀਤੀ ਹੈ ਤੇ ਸਫਲਤਾ ਹਾਸਲ ਕੀਤੀ ਹੈ। ਕਿਸੇ ਵੀ ਕੰਮ ਲਈ ਜਨੂੰਨ ਹੋਣਾ ਉਸ ਕੰਮ ਦੀ ਸਫਲਤਾ 'ਤੇ ਮੋਹਰ ਲਗਾ ਦਿੰਦਾ ਹੈ। ਖੇਡਾਂ ਦੇ ਖੇਤਰ ਨਾਲ ਜੁੜੇ ਹੋਣ ਕਰਕੇ ਅੱਜ ਅਸੀਂ ਖੇਡਾਂ ਵਿਚ ਖਿਡਾਰੀਆਂ ਅੰਦਰਲੇ ਉਸ ਮਨੋਵਿਗਿਆਨਕ ਪੱਖ ਦੀ ਗੱਲ ਕਰਾਂਗੇ, ਜਿਸ ਨਾਲ ਖਿਡਾਰੀ ਆਪਣੇ ਅੰਦਰ ਸਫਲਤਾ ਦੀ ਭੁੱਖ ਹਮੇਸ਼ਾ ਜਗਾ ਕੇ ਰੱਖਦੇ ਹਨ। ਖਿਡਾਰੀਆਂ ਅੰਦਰ ਇੱਛਾ ਸ਼ਕਤੀ ਅਤੇ ਜਜ਼ਬਾ ਇਕ ਇਹੋ ਜਿਹੀ ਮਨੋਭਾਵਨਾ ਹੈ, ਜਿਸ ਨਾਲ ਖਿਡਾਰੀ ਹਰ ਮੁਸ਼ਕਿਲ ਨਾਲ ਲੜਦਾ ਹੋਇਆ ਆਪਣੇ ਮੁਕਾਮ 'ਤੇ ਪਹੁੰਚਣ ਵਿਚ ਕਾਮਯਾਬ ਰਹਿੰਦਾ ਹੈ।
ਅੱਜ ਹਰ ਖੇਤਰ ਵਿਚ ਆਧੁਨਿਕਤਾ ਆਉਣ ਕਰਕੇ ਮੁਕਾਬਲੇ ਬਹੁਤ ਸਖ਼ਤ ਹੋ ਗਏ ਹਨ ਅਤੇ ਸਖ਼ਤ ਮੁਕਾਬਲਿਆਂ ਵਿਚੋਂ ਇੱਛਾ ਸ਼ਕਤੀ ਅਤੇ ਦ੍ਰਿੜ੍ਹ ਸੰਕਲਪ ਵਾਲੇ ਖਿਡਾਰੀ ਹੀ ਅੱਵਲ ਰਹਿਣ ਵਿਚ ਸਫਲ ਹੁੰਦੇ ਹਨ। ਇਹ ਆਮ ਦੇਖਣ ਵਿਚ ਆਂਉਦਾ ਹੈ ਕਿ ਸਾਡੇ ਦੇਸ਼ ਦੇ ਖਿਡਾਰੀ ਰਾਸ਼ਟਰੀ ਪੱਧਰ 'ਤੇ ਬਹੁਤ ਵਧੀਆ ਪ੍ਰਦਰਸ਼ਨ ਕਰਦੇ ਹਨ ਪਰ ਅੰਤਰਰਾਸ਼ਟਰੀ ਪੱਧਰ 'ਤੇ ਜਾ ਕੇ ਉਹ ਮਨੋਵਿਗਿਆਨਕ ਤੌਰ 'ਤੇ ਕਮਜ਼ੋਰ ਨਜ਼ਰ ਆਉਂਦੇ ਹਨ ਤੇ ਆਪਣਾ ਅਸਲ ਪ੍ਰਦਰਸ਼ਨ ਨਹੀਂ ਕਰ ਪਾਉਂਦੇ। ਇਸ ਤੋਂ ਇਲਾਵਾ ਬਹੁਤ ਸਾਰੇ ਖਿਡਾਰੀ ਸਿਰਫ ਅੰਤਰਰਾਸ਼ਟਰੀ ਪੱਧਰ 'ਤੇ ਪਹੁੰਚਣ ਅਤੇ ਉਸ ਆਧਾਰ 'ਤੇ ਆਪਣੇ ਭਵਿੱਖ ਨੂੰ ਸੁਧਾਰਨ ਤੱਕ ਹੀ ਸੀਮਤ ਹੁੰਦੇ ਹਨ। ਬਹੁਤੇ ਖਿਡਾਰੀ ਆਪੋ-ਆਪਣਾ ਰੁਜ਼ਗਾਰ ਮਿਲਣ ਤੱਕ ਹੀ ਸੀਮਤ ਹੁੰਦੇ ਹਨ, ਤਾਂ ਹੀ ਸਾਡੇ ਦੇਸ਼ ਦਾ ਖੇਡ ਪ੍ਰਦਰਸ਼ਨ ਅੰਤਰਰਾਸ਼ਟਰੀ ਪੱਧਰ 'ਤੇ ਹੇਠਲੇ ਦਰਜੇ ਦਾ ਹੀ ਰਹਿੰਦਾ ਹੈ, ਜਦੋਂਕਿ ਭਾਰਤ ਕੋਲ ਦੁਨੀਆ ਦੀ ਦੂਸਰੀ ਸਭ ਤੋਂ ਵੱਡੀ ਆਬਾਦੀ ਹੈ ਅਤੇ ਨੌਜਵਾਨ ਸ਼ਕਤੀ ਦੀ ਕੋਈ ਘਾਟ ਨਹੀਂ।
ਕਿਤੇ ਨਾ ਕਿਤੇ ਸਰਕਾਰੀ ਖੇਡ ਨੀਤੀਆਂ ਦੀ ਘਾਟ ਵੀ ਇਸ ਲਈ ਵੱਡੀ ਜ਼ਿੰਮੇਵਾਰ ਹੈ। ਬਹੁਤੇ ਖਿਡਾਰੀ ਅੰਤਰਰਾਸ਼ਟਰੀ ਪੱਧਰ 'ਤੇ ਮਨੋਵਿਗਿਆਨਕ ਸੰਤੁਲਨ ਗਵਾ ਬੈਠਦੇ ਹਨ ਤੇ ਆਪਣੇ ਪ੍ਰਦਰਸ਼ਨ ਨੂੰ ਜਾਰੀ ਨਹੀਂ ਰੱਖ ਪਾਉਂਦੇ। ਪਰ ਜੇਕਰ ਜਜ਼ਬੇ ਅਤੇ ਦ੍ਰਿੜ੍ਹ ਇੱਛਾ ਸ਼ਕਤੀ ਦੀ ਗੱਲ ਕਰੀਏ ਤਾਂ ਬਹੁਤ ਵਾਰ ਇਹ ਦੇਖਣ ਵਿਚ ਆਇਆ ਹੈ ਕਿ ਸਾਡੇ ਦੇਸ਼ ਦੇ ਖਿਡਾਰੀ ਅਤੇ ਖਿਡਾਰਨਾਂ ਵਲੋਂ ਮੁਸ਼ਕਿਲ ਦੌਰ ਵਿਚੋਂ ਗੁਜ਼ਰਦਿਆਂ ਵੀ ਆਪਣੇ ਦੇਸ਼ ਲਈ ਕੁਝ ਕਰਨ ਦਾ ਜਜ਼ਬਾ ਹੁੰਦਾ ਹੈ ਅਤੇ ਉਹ ਦੇਸ਼ ਦੇ ਝੰਡੇ ਨੂੰ ਬੁਲੰਦ ਕਰਨ ਲਈ ਜਾਨ ਦੀ ਬਾਜ਼ੀ ਤੱਕ ਲਗਾ ਜਾਂਦੇ ਹਨ। 2018 ਦੀਆਂ ਏਸ਼ੀਅਨ ਖੇਡਾਂ ਦੀ ਇਕ ਉਦਾਹਰਨ ਸਾਡੇ ਸਭ ਦੇ ਸਾਹਮਣੇ ਹੈ, ਜਿਸ ਵਿਚ ਭਾਰਤੀ ਮੁਟਿਆਰ ਸਵਪਨਾ ਬਰਮਨ ਨੇ ਆਪਣੀ ਸੱਟ ਦੀ ਪ੍ਰਵਾਹ ਨਾ ਕਰਦੇ ਹੋਏ ਭਾਰਤ ਲਈ ਹੈਪਟਾਥਲਨ ਵਿਚ ਸੋਨ ਤਗਮਾ ਜਿੱਤਿਆ ਸੀ। ਉਸ ਮੁਟਿਆਰ ਦੇ ਚਿਹਰੇ ਦੇ ਹਾਵ-ਭਾਵ ਉਨ੍ਹਾਂ ਖੇਡਾਂ ਵਿਚ ਸਾਫ ਦਿਖਾਈ ਦੇ ਰਹੇ ਸਨ ਕਿ ਉਹ ਕਿਸ ਦ੍ਰਿੜ੍ਹ ਇਰਾਦੇ ਨਾਲ ਦੇਸ਼ ਲਈ ਤਗਮਾ ਜਿੱਤਣਾ ਚਾਹੁੰਦੀ ਹੈ। ਖੇਡਾਂ ਵਿਚ ਭਾਗ ਲੈਣਾ ਕੋਈ ਮੁਸ਼ਕਿਲ ਕੰਮ ਨਹੀਂ ਪਰ ਇੱਛਾ ਸ਼ਕਤੀ ਨਾਲ ਆਪਣੇ-ਆਪ ਨੂੰ ਸਾਬਤ ਕਰਨਾ ਮਾਅਨੇ ਰੱਖਦਾ ਹੈ। ਇਤਿਹਾਸ ਵੀ ਇਸ ਗੱਲ ਦਾ ਗਵਾਹ ਹੈ ਕਿ ਜਿਸ ਨੇ ਵੀ ਮੁਸ਼ਕਿਲ ਦੌਰ ਵਿਚੋਂ ਗੁਜ਼ਰਦੇ ਹੋਏ ਅਤੇ ਔਕੜਾਂ ਦੀ ਪ੍ਰਵਾਹ ਨਾ ਕਰਦੇ ਹੋਏ ਆਪਣੀ ਮਿਹਨਤ ਜਾਰੀ ਰੱਖੀ ਹੈ, ਉਸ ਨੂੰ ਉਸ ਦਾ ਮੁਕਾਮ ਜ਼ਰੂਰ ਮਿਲਿਆ ਹੈ ਇਸ ਦੀ ਸਭ ਤੋਂ ਵੱਡੀ ਉਦਾਹਰਨ ਹੈ ਉਡਣਾ ਸਿੱਖ ਮਿਲਖਾ ਸਿੰਘ, ਜਿਸ ਨੇ ਪੂਰੀ ਦੁਨੀਆ ਵਿਚ ਆਪਣੇ ਜਜ਼ਬੇ ਨਾਲ ਭਾਰਤ ਨੂੰ ਇਕ ਵੱਖਰੀ ਪਹਿਚਾਣ ਦਿੱਤੀ।
ਹੋਰ ਅਨੇਕਾਂ ਭਾਰਤੀ ਖੇਡ ਸਿਤਾਰੇ ਜਿਵੇਂ ਕਪਿਲ ਦੇਵ, ਸਚਿਨ ਤੇਂਦੁਲਕਰ, ਮਹਿੰਦਰ ਸਿੰਘ ਧੋਨੀ, ਵਿਰਾਟ ਕੋਹਲੀ ਆਦਿ ਨੇ ਆਪਣੀ ਸਖ਼ਤ ਮਿਹਨਤ ਅਤੇ ਇੱਛਾ ਸ਼ਕਤੀ ਨਾਲ ਇਕ ਵੱਖਰਾ ਮੁਕਾਮ ਹਾਸਲ ਕੀਤਾ ਹੈ। ਅੱਜ ਭਾਰਤੀ ਖੇਡ ਦਲਾਂ ਨਾਲ ਮਨੋਵਿਗਿਆਨਕ ਮਾਹਿਰਾਂ ਦਾ ਹੋਣਾ ਵੀ ਇਸੇ ਗੱਲ ਦਾ ਸਬੂਤ ਹੈ ਕਿ ਮਨੋਵਿਗਿਆਨਕ ਤੌਰ 'ਤੇ ਖਿਡਾਰੀਆਂ ਨੂੰ ਫਿੱਟ ਰੱਖਣਾ ਅਤੇ ਉਨ੍ਹਾਂ ਨੂੰ ਹੱਲਾਸ਼ੇਰੀ ਦੇਣੀ ਕਿੰਨੀ ਕਾਰਗਰ ਸਾਬਤ ਹੁੰਦੀ ਹੈ। ਇਕ ਸਭ ਤੋਂ ਤਾਜ਼ੀ ਉਦਾਹਰਨ ਨੇ ਦੇਸ਼ ਦੇ ਖੇਡ ਖੇਤਰ ਅਤੇ ਖੇਡ ਪ੍ਰਸੰਸਕਾਂ ਨੂੰ ਮਾਣ ਨਾਲ ਭਰ ਦਿੱਤਾ, ਜਦੋਂ ਬੀਤੇ ਹਫਤੇ ਭਾਰਤੀ ਕੁੜੀਆਂ ਦੀ ਹਾਕੀ ਟੀਮ ਉਲੰਪਿਕ ਦੇ ਸੁਪਨੇ ਨੂੰ ਜਿਊਂਦਾ ਰੱਖਣ ਲਈ ਜਾਪਾਨ ਵਿਚ ਟੂਰਨਾਮੈਂਟ ਖੇਡ ਰਹੀ ਸੀ ਤਾਂ ਭਾਰਤੀ ਖਿਡਾਰਨ ਦੇ ਪਿਤਾ ਦਾ ਦਿਹਾਂਤ ਹੋ ਗਿਆ ਅਤੇ ਜਦੋਂ ਭਾਰਤੀ ਅਧਿਕਾਰੀਆਂ ਨੇ ਇਸ ਕੁੜੀ ਨੂੰ ਘਰ ਪਰਤਣ ਦੀ ਸਲਾਹ ਦਿੱਤੀ ਤਾਂ ਇਸ ਕੁੜੀ ਨੇ ਦੇਸ਼ ਲਈ ਆਪਣੇ ਫਰਜ਼ ਨੂੰ ਪਹਿਲ ਦਿੰਦੇ ਹੋਏ ਦੇਸ਼ ਲਈ ਖੇਡਣ ਨੂੰ ਪਹਿਲ ਦਿੱਤੀ ਅਤੇ ਔਖੇ ਵੇਲੇ ਘਰ ਨਾ ਪਰਤ ਕੇ ਦੇਸ਼ ਲਈ ਸੋਨ ਤਗਮਾ ਜਿੱਤ ਕੇ ਉਲੰਪਿਕ ਸੁਪਨੇ ਨੂੰ ਜਿਊਂਦਾ ਰੱਖਿਆ। ਸੋ ਇਹੋ ਜਿਹਾ ਜਜ਼ਬਾ ਜਦੋਂ ਦੇਸ਼ ਦੇ ਨੌਜਵਾਨਾਂ ਅਤੇ ਮੁਟਿਆਰਾਂ ਵਿਚ ਹੋਵੇਗਾ ਅਤੇ ਉਹ ਦੇਸ਼ ਨੂੰ ਪਹਿਲ ਦੇ ਕੇ ਆਪਣੇ ਖੂਨ-ਪਸੀਨੇ ਨੂੰ ਦੇਸ਼ ਲਈ ਵਹਾਉਣਗੇ ਤਾਂ ਦੇਸ਼ ਦਾ ਖੇਡ ਕੌਸ਼ਲ ਨਿਖਰ ਕੇ ਸਾਹਮਣੇ ਆਵੇਗਾ।


-ਮੋਬਾ: 94174-79449

ਲਿਮਕਾ ਬੁੱਕ ਆਫ਼ ਵਰਲਡ ਰਿਕਾਰਡ ਵਿਚ ਨਾਂਅ ਦਰਜ ਹੈ ਆਦਿਲ ਅੰਸਾਰੀ ਦਾ

ਆਦਿਲ ਅੰਸਾਰੀ ਮੁੰਬਈ ਦਾ ਹੀ ਮਾਣ ਨਹੀਂ, ਸਗੋਂ ਦੇਸ਼ ਦਾ ਮਾਣ ਹੈ, ਇਸੇ ਲਈ ਤਾਂ ਉਸ ਨੂੰ ਲਿਮਕਾ ਬੁੱਕ ਆਫ ਵਰਲਡ ਰਿਕਾਰਡ ਵਿਚ ਨਾਂਅ ਸ਼ਾਮਿਲ ਹੋਣ ਦਾ ਮਾਣ ਹਾਸਲ ਹੈ ਅਤੇ ਉਸ ਨੇ ਵਿਸ਼ਵ ਪੱਧਰ ਦੇ ਮੁਕਾਬਲਿਆਂ ਵਿਚ ਹਿੱਸਾ ਲੈ ਕੇ ਇਹ ਸਾਬਤ ਕਰ ਦਿੱਤਾ ਹੈ ਕਿ ਹੌਸਲੇ ਬੁਲੰਦ ਹੋਣ ਤਾਂ ਮੰਜ਼ਿਲਾਂ ਪਾਉਣ ਤੋਂ ਰੋਕਿਆ ਨਹੀਂ ਜਾ ਸਕਦਾ। ਆਦਿਲ ਅੰਸਾਰੀ ਮੁੰਬਈ ਦੇ ਥਾਣਾ ਜ਼ਿਲ੍ਹੇ ਦੇ ਕਸਬਾ ਭਿਵੰਡੀ ਦਾ ਜੰਮਪਲ ਹੈ ਅਤੇ ਸਾਲ 2002 ਵਿਚ ਉਹ ਆਪਣੇ ਦੋਸਤਾਂ ਨਾਲ ਆਪਣੇ ਸ਼ਹਿਰ ਦੇ ਨਾਲ ਲਗਦੀ ਨਦੀ ਵਿਚ ਤੈਰਨ ਲਈ ਗਿਆ ਸੀ ਅਤੇ ਜਦ ਉਹ ਗੋਤਾ ਲਗਾਉਣ ਲਈ ਨਦੀ ਦੇ ਅੰਦਰ ਗਿਆ ਤਾਂ ਉਸ ਦਾ ਸਿਰ ਇਕ ਪੱਥਰ ਨਾਲ ਟਕਰਾ ਗਿਆ ਅਤੇ ਉਹ ਬੇਹੋਸ਼ੀ ਦੀ ਹਾਲਤ ਵਿਚ ਚਲਾ ਗਿਆ। ਉਸ ਨੂੰ ਡਾਕਟਰ ਦੇ ਕੋਲ ਲਿਜਾਇਆ ਗਿਆ, ਜਿਥੇ ਡਾਕਟਰਾਂ ਨੇ ਉਸ ਦੀ ਰੀੜ੍ਹ ਦੀ ਹੱਡੀ ਵਿਚ ਸੱਟ ਲੱਗਣ ਦੀ ਪੁਸ਼ਟੀ ਕਰ ਦਿੱਤੀ, ਜਿਸ ਦਾ ਕੋਈ ਇਲਾਜ ਨਹੀਂ ਸੀ ਅਤੇ ਆਦਿਲ ਅੰਸਾਰੀ ਦਾ ਹੇਠਲਾ ਹਿੱਸਾ ਸੁੰਨ ਹੋ ਗਿਆ ਅਤੇ ਆਦਿਲ ਸਾਰੀ ਉਮਰ ਲਈ ਵੀਲ੍ਹਚੇਅਰ ਦੇ ਸਹਾਰੇ ਤੁਰਨ ਲਈ ਮਜਬੂਰ ਹੋ ਗਿਆ।
ਅਦਿਲ ਅੰਸਾਰੀ ਨੂੰ ਰੰਗਲਾ ਸੰਸਾਰ ਇਕ ਵਾਰ ਧੁੰਦਲਾ ਹੁੰਦਾ ਜਾਪਿਆ ਪਰ ਕੁਦਰਤ ਦਾ ਭਾਣਾ ਮੰਨ ਕੇ ਉਸ ਨੇ ਇਹ ਸਵੀਕਾਰ ਕਰ ਲਿਆ ਅਤੇ ਵੀਲ੍ਹਚੇਅਰ 'ਤੇ ਬੈਠ ਹੀ ਆਪਣਾ ਭਵਿੱਖ ਤਲਾਸ਼ਣ ਲੱਗਿਆ। ਆਦਿਲ ਨੇ ਸੋਚਿਆ ਕਿ ਕੁਝ ਅਜਿਹਾ ਕੀਤਾ ਜਾਵੇ ਕਿ ਲੋਕ ਉਸ ਨੂੰ ਅਪਾਹਜ ਨਹੀਂ, ਸਗੋਂ ਜਾਂਬਾਜ਼ ਕਹਿਣ। ਆਦਿਲ ਅੰਸਾਰੀ ਨੇ ਅਪਾਹਜ ਹੋਣ ਦੇ ਬਾਵਜੂਦ ਡਰਾਈਵਿੰਗ ਯਾਨਿ ਕਾਰ ਚਲਾਉਣੀ ਸਿੱਖ ਲਈ ਅਤੇ 90 ਫੀਸਦੀ ਅਪਾਹਜ ਹੋਣ ਦੇ ਬਾਵਜੂਦ ਉਸ ਨੇ ਕਾਰ ਦੀ ਰੇਸ ਲਗਾਉਣ ਦੀ ਠਾਣ ਲਈ ਅਤੇ 29 ਜਨਵਰੀ, 2015 ਨੂੰ ਮੁੰਬਈ ਦੇ ਸਾਂਤਾਕਰੁਜ਼ ਡੋਮੈਸਟਿਕ ਏਅਰਪੋਰਟ ਤੋਂ ਕਾਰ ਦੌੜਾਈ ਅਤੇ ਮੁੰਬਈ ਤੋਂ ਦਿੱਲੀ, ਕਲਕੱਤਾ, ਚੇਨਈ ਹੁੰਦਾ ਹੋਇਆ ਉਹ 7 ਦਿਨਾਂ ਵਿਚ 6000 ਕਿਲੋਮੀਟਰ ਦਾ ਸਫ਼ਰ ਤੈਅ ਕਰਕੇ ਜਦ ਮੁੰਬਈ ਵਾਪਸ ਪਰਤਿਆ ਤਾਂ ਉਸ ਦੇ ਜਜ਼ਬੇ ਨੂੰ ਪੂਰੀ ਮੁੰਬਈ ਨੇ ਸਲਾਮ ਕੀਤਾ ਅਤੇ ਉਸ ਨੇ ਲਿਮਕਾ ਬੁੱਕ ਆਫ ਵਰਲਡ ਰਿਕਾਰਡ ਵਿਚ ਆਪਣਾ ਨਾਂਅ ਦਰਜ ਕਰਵਾ ਕੇ ਸਭ ਨੂੰ ਹੈਰਾਨ ਕਰ ਦਿੱਤਾ। ਆਦਿਲ ਨੇ 3 ਦਸੰਬਰ, 2013 ਵਿਚ ਹੀ ਐਕਟਿਵਾ ਸਕੂਟਰੀ ਨੂੰ ਮੋਡੀਫਾਈ ਕਰਕੇ ਡਰਾਈਵਿੰਗ ਸ਼ੁਰੂ ਕਰ ਦਿੱਤੀ ਸੀ ਅਤੇ ਅੱਜ ਉਸ ਦੇ ਨਾਂਅ ਕਈ ਵੱਡੇ ਰਿਕਾਰਡ ਬੋਲਦੇ ਹਨ। ਇਥੇ ਹੀ ਬਸ ਨਹੀਂ, ਆਦਿਲ ਅੰਸਾਰੀ ਇਕ ਵੱਡਾ ਤੀਰਅੰਦਾਜ਼ ਵੀ ਹੈ। ਸਾਲ 2016 ਵਿਚ ਹਰਿਆਣਾ ਦੇ ਸ਼ਹਿਰ ਰੋਹਤਕ ਵਿਖੇ ਹੋਈ ਪੈਰਾ ਨੈਸ਼ਨਲ ਆਰਚਰੀ ਚੈਂਪੀਅਨਸ਼ਿਪ ਵਿਚ ਹਿੱਸਾ ਲਿਆ, ਜਿਥੇ ਉਸ ਨੇ ਸੋਨ ਤਗਮਾ ਆਪਣੇ ਨਾਂਅ ਕਰਕੇ ਕਾਰ ਰੇਸਰ ਹੋਣ ਦੇ ਨਾਲ-ਨਾਲ ਇਕ ਸਫਲ ਤੀਰਅੰਦਾਜ਼ ਹੋਣ ਦਾ ਰਿਕਾਰਡ ਵੀ ਆਪਣੇ ਨਾਂਅ ਕਰ ਲਿਆ।
ਸਾਲ 2017 ਵਿਚ ਹੀ ਇਕ ਵਾਰ ਫਿਰ ਰੋਹਤਕ ਵਿਖੇ ਨੈਸ਼ਨਲ ਪੈਰਾ ਆਰਚਰੀ ਚੈਂਪੀਅਨਸ਼ਿਪ ਵਿਚ ਭਾਗ ਲਿਆ ਅਤੇ ਸੋਨ ਤਗਮਾ ਜਿੱਤ ਕੇ ਚੈਂਪੀਅਨ ਬਣਿਆ ਅਤੇ ਹਰਿਆਣਾ ਵਿਖੇ ਹੀ ਸਾਲ 2018 ਵਿਚ ਤੀਸਰੀ ਆਰਚਰੀ ਚੈਂਪੀਅਨਸ਼ਿਪ ਵਿਚ ਤੀਰਅੰਦਾਜ਼ੀ ਕਰਕੇ 2 ਸੋਨ ਤਗਮੇ ਜਿੱਤ ਕੇ ਤੀਜੀ ਵਾਰ ਚੈਂਪੀਅਨ ਬਣਿਆ। ਸਾਲ 2017 ਵਿਚ ਚੀਨ ਦੀ ਰਾਜਧਾਨੀ ਬੀਜਿੰਗ ਵਿਖੇ ਵਰਲਡ ਪੈਰਾ ਆਰਚਰੀ ਚੈਂਪੀਅਨਸ਼ਿਪ ਵਿਚ ਭਾਰਤ ਦੀ ਪ੍ਰਤੀਨਿਧਤਾ ਕੀਤੀ। ਸਾਲ 2018 ਵਿਚ ਵਰਲਡ ਪੈਰਾ ਆਰਚਰੀ ਰੈਂਕਿੰਗ ਟੂਰਨਾਮੈਂਟ ਵਿਚ ਵੀ ਭਾਰਤ ਵਲੋਂ ਹਿੱਸਾ ਲਿਆ ਅਤੇ ਸਾਲ 2019 ਵਿਚ ਦੁਬਈ ਵਿਚ ਫਾਜਾ ਪੈਰਾ ਆਰਚਰੀ ਟੂਰਨਾਮੈਂਟ ਅਤੇ ਨੀਦਰਲੈਂਡ ਵਿਚ ਵੀ ਵਰਲਡ ਪੈਰਾ ਆਰਚਰੀ ਚੈਂਪੀਅਨਸ਼ਿਪ ਵਿਚ ਵੀ ਉਸ ਨੇ ਭਾਗ ਲਿਆ ਅਤੇ ਤਗਮੇ ਜਿੱਤ ਕੇ ਭਾਰਤ ਦੀ ਸ਼ਾਨ ਉੱਚੀ ਕੀਤੀ। ਆਦਿਲ ਅੰਸਾਰੀ ਦਾ ਸਫ਼ਰ ਅਤੇ ਪ੍ਰਾਪਤੀਆਂ ਲਗਾਤਾਰ ਜਾਰੀ ਹਨ ਅਤੇ ਉਸ ਦਾ ਸੁਪਨਾ ਹੈ ਕਿ ਉਹ ਭਾਰਤ ਦੀ ਪ੍ਰਤੀਨਿਧਤਾ ਕਰਦਾ ਹੋਇਆ ਉਲੰਪਿਕ ਵਿਚ ਸੋਨ ਤਗਮਾ ਲੈ ਕੇ ਆਵੇ। ਆਦਿਲ ਅੰਸਾਰੀ ਦੀਆਂ ਪ੍ਰਾਪਤੀਆਂ ਤੋਂ ਖੁਸ਼ ਹੋ ਕੇ ਸਾਲ 2017-2018 ਵਿਚ ਮਹਾਰਾਸ਼ਟਰ ਸਰਕਾਰ ਨੇ ਆਦਿਲ ਅੰਸਾਰੀ ਨੂੰ ਸਟੇਟ ਪੁਰਸਕਾਰ ਏਕਲਵਿਆ ਰਾਜ ਪੁਰਸਕਾਰ ਦੇ ਨਾਲ ਸਨਮਾਨਿਤ ਕੀਤਾ। ਆਦਿਲ ਅੰਸਾਰੀ ਆਖਦਾ ਹੈ ਕਿ, 'ਅਪਾਹਜ ਹੋਨੇ ਕੇ ਬਾਅਦ ਜ਼ਿੰਦਗੀ ਰੁਕ ਨਹੀਂ ਜਾਤੀ, ਹੌਸਲੇ ਸੇ ਚਲੋਗੇ ਤੋ ਮੰਜ਼ਿਲੇਂ ਛੁਪ ਨਹੀਂ ਜਾਤੀ।'


-ਪਿੰਡ ਬੁੱਕਣ ਵਾਲਾ, ਤਹਿ: ਤੇ ਜ਼ਿਲ੍ਹਾ ਮੋਗਾ। ਮੋਬਾ: 98551-14484

ਭਾਰਤੀ ਤੀਰਅੰਦਾਜ਼ੀ ਦਾ ਨਵਾਂ ਹਸਤਾਖ਼ਰ ਵਿਨਾਇਕ ਵਰਮਾ

ਸਰਕਾਰੀ ਕੋ-ਐਡ ਮਲਟੀਪਰਪਜ਼ ਸੀਨੀਅਰ ਸੈਕੰਡਰੀ ਸਕੂਲ, ਪਾਸੀ ਰੋਡ, ਪਟਿਆਲਾ ਵਿਖੇ 11ਵੀਂ ਜਮਾਤ 'ਚ ਪੜ੍ਹ ਰਿਹਾ ਤੀਰਅੰਦਾਜ਼ ਵਿਨਾਇਕ ਵਰਮਾ ਜਿਸ ਅੰਦਾਜ਼ 'ਚ ਆਪਣੀਆਂ ਖੇਡ ਪ੍ਰਾਪਤੀਆਂ ਦਾ ਗ੍ਰਾਫ ਦਿਨੋ-ਦਿਨ ਉੱਪਰ ਲਿਜਾ ਰਿਹਾ ਹੈ, ਨਗਰ ਨਿਗਮ ਪਟਿਆਲਾ ਦੇ ਮੁਲਾਜ਼ਮ ਵਿਸ਼ਾਲ ਵਰਮਾ ਤੇ ਸ੍ਰੀਮਤੀ ਮੁਨੀਸ਼ਾ ਵਰਮਾ ਦੇ ਘਰ 25 ਜੁਲਾਈ, 2003 ਨੂੰ ਜਨਮੇ ਵਿਨਾਇਕ ਵਰਮਾ ਨੇ 9 ਸਾਲ ਦੀ ਉਮਰ 'ਚ ਐਨ.ਆਈ.ਐਸ. ਪਟਿਆਲਾ ਦੇ ਕੋਚ ਵਿਕਾਸ ਸ਼ਾਸਤਰੀ ਤੋਂ ਤੀਰਅੰਦਾਜ਼ੀ ਦੀ ਸਿਖਲਾਈ ਲੈਣੀ ਸ਼ੁਰੂ ਕੀਤੀ। ਉਸ ਨੇ ਪਹਿਲੀ ਵਾਰ ਕੌਮੀ ਸਕੂਲ ਖੇਡਾਂ ਦੇ ਅੰਡਰ-14 ਵਰਗ (ਰਿਕਰਵ) 'ਚ ਇੰਦੌਰ ਵਿਖੇ ਚਾਂਦੀ ਦਾ ਤਗਮਾ ਜਿੱਤਿਆ। ਵਿਨਾਇਕ ਦੇ ਦਾਦਾ ਸ੍ਰੀ ਰਾਮ ਪ੍ਰਕਾਸ਼ ਤੇ ਮਾਤਾ-ਪਿਤਾ ਨੇ ਉਕਤ ਪ੍ਰਾਪਤੀਆਂ ਨੂੰ ਦੇਖਦੇ ਹੋਏ, ਆਪਣੇ ਬੇਟੇ ਦੀ ਖੇਡ ਨੂੰ ਪੂਰੀ ਗੰਭੀਰਤਾ ਨਾਲ ਲੈਂਦਿਆਂ ਉਸ ਨੂੰ ਹਰ ਸੰਭਵ ਸਹੂਲਤ ਪ੍ਰਦਾਨ ਕੀਤੀ। ਪਿਛਲੇ 3 ਸਾਲ ਤੋਂ ਕੋਚ ਗੌਰਵ ਸ਼ਰਮਾ ਤੋਂ ਸਿਖਲਾਈ ਲੈ ਰਹੇ ਵਿਨਾਇਕ ਨੇ ਅੰਡਰ-17 (ਰਿਕਰਵ) ਤਹਿਤ ਕੌਮੀ ਸਕੂਲ ਖੇਡਾਂ ਜਗਦਲਪੁਰ (ਛਤੀਸਗੜ੍ਹ) ਵਿਖੇ ਵਿਅਕਤੀਗਤ ਤੇ ਟੀਮ ਮੁਕਾਬਲਿਆਂ 'ਚੋਂ ਪਹਿਲੀ ਵਾਰ ਸੋਨ ਤਗਮੇ ਜਿੱਤੇ। ਫਿਰ ਉਸ ਨੇ ਰਾਂਚੀ (ਝਾਰਖੰਡ) ਵਿਖੇ ਹੋਈਆਂ ਕੌਮੀ ਸਕੂਲ ਖੇਡਾਂ 'ਚੋਂ ਵੀ 2 ਸੋਨ ਤਗਮੇ ਜਿੱਤੇ।
ਪਿਛਲੇ ਵਰ੍ਹੇ ਵਿਨਾਇਕ ਨੇ ਖੇਲੋ ਇੰਡੀਆ ਖੇਡਾਂ 'ਚੋਂ ਸੋਨ ਤਗਮਾ ਜਿੱਤਣ ਦੇ ਨਾਲ ਅੰਡਰ-17 ਵਰਗ 'ਚ ਨਵਾਂ ਕੌਮੀ ਕੀਰਤੀਮਾਨ (676/720) ਸਿਰਜਿਆ, ਜੋ ਅੱਜ ਵੀ ਕਾਇਮ ਹੈ। ਜਿਸ ਸਦਕਾ ਵਿਨਾਇਕ ਦੇਸ਼ ਦਾ ਸਰਬੋਤਮ ਤੀਰਅੰਦਾਜ਼ ਚੁਣਿਆ ਗਿਆ। ਪਿਛਲੇ ਵਰ੍ਹੇ ਵਿਨਾਇਕ ਨੇ ਬੰਗਲਾਦੇਸ਼ ਵਿਖੇ ਹੋਈ ਦੱਖਣੀ ਏਸ਼ੀਆ ਤੀਰਅੰਦਾਜ਼ੀ ਚੈਂਪੀਅਨਸ਼ਿਪ 'ਚੋਂ ਚਾਂਦੀ ਦਾ ਅਤੇ ਮੁੰਬਈ ਦੇ ਅਜਮੇਰ ਆਈਲੈਂਡ ਵਿਖੇ ਹੋਏ ਕੌਮਾਂਤਰੀ ਟੂਰਨਾਮੈਂਟ 'ਚੋਂ ਸੋਨ ਤਗਮਾ ਜਿੱਤ ਕੇ, ਆਪਣਾ ਕੌਮਾਂਤਰੀ ਸਫਰ ਸ਼ੁਰੂ ਕੀਤਾ। ਇਨ੍ਹਾਂ ਪ੍ਰਾਪਤੀਆਂ ਸਦਕਾ ਵਿਨਾਇਕ ਵਰਮਾ ਨੂੰ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਰਾਜ ਪੱਧਰੀ ਪੁਰਸਕਾਰ ਨਾਲ ਅਤੇ ਉਸ ਦੇ ਸਰਕਾਰੀ ਕੋ-ਐਡ ਮਲਟੀਪਰਪਜ਼ ਸੈਕੰਡਰੀ ਸਕੂਲ ਪਟਿਆਲਾ ਵਲੋਂ ਪ੍ਰਿੰ: ਤੋਤਾ ਸਿੰਘ ਚਹਿਲ ਦੀ ਅਗਵਾਈ 'ਚ ਨਕਦ ਰਾਸ਼ੀ ਨਾਲ ਸਨਮਾਨਿਤ ਕੀਤਾ ਗਿਆ। ਵਿਨਾਇਕ ਵਰਮਾ ਦੀ ਹਾਲ ਹੀ ਵਿੱਚ ਵਿਸ਼ਵ ਯੂਥ ਤੀਰਅੰਦਾਜ਼ੀ ਚੈਂਪੀਅਨਸ਼ਿਪ ਮੈਡਰਿਡ (ਸਪੇਨ) ਲਈ ਚੋਣ ਭਾਰਤੀ ਟੀਮ 'ਚ ਚੋਣ ਹੋਈ ਹੈ, ਜੋ 16 ਅਗਸਤ ਤੋਂ ਆਰੰਭ ਹੋਣੀ ਹੈ।


-ਡਾ: ਸੁਖਦਰਸ਼ਨ ਸਿੰਘ ਚਹਿਲ
ਪਟਿਆਲਾ। ਮੋਬਾ: 9779590575

ਖੇਡ ਪ੍ਰਬੰਧਕ ਦੂਰਦ੍ਰਿਸ਼ਟੀ ਵਾਲੇ ਹੋਣ

ਖੇਡਾਂ ਦੀ ਦੁਨੀਆ 'ਚ ਵਿਚਰਨ ਵਾਲਾ ਆਦਮੀ ਅਕਸਰ ਇਸ ਜਗਤ ਦੇ ਵੱਖ-ਵੱਖ ਪੱਖਾਂ, ਵੱਖ-ਵੱਖ ਪਾਸਾਰਾਂ ਨੂੰ ਆਲੋਚਨਾਤਮਕ ਦ੍ਰਿਸ਼ਟੀ ਤੋਂ ਦੇਖਦਾ ਰਹਿੰਦਾ ਹੈ ਤੇ ਵਿਚਾਰਦਾ ਵੀ ਹੈ। ਸਾਡੀ ਜਾਚੇ ਖੇਡ ਜਗਤ 'ਚ ਜਦੋਂ ਅਸੀਂ ਸੁਧਾਰ ਲਿਆਉਣ ਦੀ ਗੱਲ ਕਰਦੇ ਹਾਂ ਤਾਂ ਇਕ ਵੱਡਾ ਮੁੱਦਾ ਜੋ ਸਾਡੇ ਰੂਬਰੂ ਆਉਂਦਾ ਹੈ, ਉਹ ਹੈ ਚੰਗੇ ਖੇਡ ਪ੍ਰਬੰਧਕਾਂ ਦੀ ਘਾਟ। ਇਹ ਉਹ ਕਮੀ ਹੈ, ਜੋ ਚੰਗੀਆਂ ਸਹੂਲਤਾਂ ਹੋਣ ਦੇ ਬਾਵਜੂਦ ਖੇਡਾਂ ਦੇ ਸਹੀ ਵਿਕਾਸ ਦੇ ਰਾਹ 'ਚ ਰੁਕਾਵਟ ਹੈ। ਜਦੋਂ ਅਸੀਂ ਪ੍ਰਬੰਧਕ ਦੀ ਗੱਲ ਕਰਦੇ ਹਾਂ ਤਾਂ ਸਾਡੀ ਮੁਰਾਦ ਸਕੂਲਾਂ-ਕਾਲਜਾਂ ਦੇ ਖੇਡ ਵਿਭਾਗ, ਖੇਡ ਕਲੱਬ, ਖੇਡ ਅਕੈਡਮੀਆਂ ਜ਼ਿਲ੍ਹਾ, ਰਾਜ ਪੱਧਰ ਅਤੇ ਰਾਸ਼ਟਰੀ ਪੱਧਰ 'ਤੇ ਖੇਡਾਂ ਨੂੰ ਚਲਾਉਣ ਵਾਲੀਆਂ ਸਾਰੀਆਂ ਸੰਸਥਾਵਾਂ ਤੋਂ ਹੈ। ਸਾਨੂੰ ਇਨ੍ਹਾਂ ਸਭਨਾਂ ਖੇਡ ਇਕਾਈਆਂ 'ਚ ਕੁਝ ਕਮੀਆਂ ਨਜ਼ਰ ਆਉਂਦੀਆਂ ਹਨ। ਇਥੋਂ ਤੱਕ ਕਿ ਵੱਖ-ਵੱਖ ਖੇਡਾਂ ਦੇ ਟੂਰਨਾਮੈਂਟ ਆਯੋਜਕਾਂ ਦਾ ਸ਼ੁਮਾਰ ਵੀ ਅਸੀਂ ਖੇਡ ਪ੍ਰਬੰਧਕਾਂ 'ਚ ਹੀ ਕਰਦੇ ਹਾਂ।
ਸਾਡੇ ਖੇਡ ਪ੍ਰਬੰਧਕ ਜਦ ਤੱਕ ਖੇਡਾਂ ਨੂੰ ਸਮਰਪਿਤ ਨਹੀਂ ਹੁੰਦੇ, ਤਦ ਤੱਕ ਉਨ੍ਹਾਂ ਦੇ ਮਾਰਗ ਦਰਸ਼ਨ 'ਚ ਚੱਲ ਰਹੀ ਖੇਡ ਸੰਸਥਾ ਤੋਂ ਚੰਗੇ ਨਤੀਜਿਆਂ ਦੀ ਆਸ ਨਹੀਂ ਰੱਖੀ ਜਾ ਸਕਦੀ। ਉਨ੍ਹਾਂ ਪ੍ਰਬੰਧਕਾਂ ਨੂੰ ਆਪਣੇ ਨਿੱਜੀ ਹਿਤ ਜ਼ਿਆਦਾ ਪਿਆਰੇ ਹੁੰਦੇ ਹਨ। ਚੌਧਰ ਦੀ ਭੁੱਖ ਅਤੇ ਕੁਰਸੀ ਦਾ ਮੋਹ ਉਨ੍ਹਾਂ ਨੂੰ ਪ੍ਰਤਿਭਾਸ਼ਾਲੀ ਖਿਡਾਰੀਆਂ ਨਾਲ ਕਦੇ ਇਨਸਾਫ਼ ਨਹੀਂ ਕਰਨ ਦਿੰਦਾ। ਉਹ ਇਹ ਭੁੱਲ ਜਾਂਦੇ ਹਨ ਕਿ ਉਨ੍ਹਾਂ ਨੂੰ ਜੋ ਚੌਧਰ ਅਤੇ ਕੁਰਸੀ ਮਿਲੀ ਹੈ, ਉਸ ਦਾ ਕਾਰਨ ਖਿਡਾਰੀ ਹਨ, ਖਿਡਾਰੀਆਂ ਦੀਆਂ ਕੀ ਜ਼ਰੂਰਤਾਂ ਹਨ, ਕੀ-ਕੀ ਸਮੱਸਿਆਵਾਂ ਹਨ, ਖਿਡਾਰੀ ਆਪਣੀ ਖੇਡ 'ਚ ਕਿਵੇਂ ਅੱਗੇ ਵਧ ਸਕਦੇ ਹਨ। ਖੇਡ ਪ੍ਰਬੰਧਕਾਂ ਨੂੰ ਇਸ ਗੱਲ ਦਾ ਕੋਈ ਇਲਮ ਨਹੀਂ ਹੁੰਦਾ। ਵੱਡੇ-ਵੱਡੇ ਖੇਡ ਪ੍ਰਬੰਧਕ ਸਿਰਫ ਨਾਂਅ ਦੇ ਹੀ ਉਸ ਖੇਡ ਸੰਸਥਾ ਦੇ ਮੁਖੀ ਹੁੰਦੇ ਹਨ, ਕੰਮ ਉਨ੍ਹਾਂ ਦਾ ਕੋਈ ਹੋਰ ਬੰਦੇ ਚਲਾ ਰਹੇ ਹੁੰਦੇ ਹਨ, ਜਿਨ੍ਹਾਂ ਦੇ ਆਪਣੇ ਨਿੱਜੀ ਹਿਤ ਵੀ ਹੁੰਦੇ ਹਨ।
ਖਿਡਾਰੀਆਂ ਲਈ ਚੰਗੇ ਮੈਦਾਨ ਪੈਦਾ ਕਰਨੇ, ਖੇਡ ਵਿੰਗਾਂ ਦੀ ਰਕਮ ਨੂੰ ਸਹੀ ਇਸਤੇਮਾਲ ਕਰਨਾ, ਪ੍ਰਦਰਸ਼ਨੀ ਮੈਚਾਂ ਦਾ ਆਯੋਜਨ ਕਰਵਾਉਣਾ, ਖੇਡ ਟੂਰਨਾਮੈਂਟਾਂ ਨੂੰ ਸਹੀ ਤਰੀਕੇ ਨਾਲ ਆਯੋਜਿਤ ਕਰਵਾਉਣਾ, ਖੇਡ ਪ੍ਰੇਮੀਆਂ ਦਾ ਭਰਵਾਂ ਇਕੱਠ ਕਰਨਾ, ਨੌਜਵਾਨ ਪੀੜ੍ਹੀ ਦੀ ਸ਼ਮੂਲੀਅਤ ਯਕੀਨੀ ਬਣਾਉਣੀ, ਖਿਡਾਰੀਆਂ ਦੀ ਪੜ੍ਹਾਈ ਦਾ ਵੀ ਉਚਿਤ ਧਿਆਨ ਰੱਖਣਾ, ਉਨ੍ਹਾਂ ਦੀ ਸ਼ਖ਼ਸੀਅਤ ਬਹੁਪੱਖੀ ਬਣਾਉਣੀ, ਉਨ੍ਹਾਂ ਲਈ ਉਚਿਤ ਮੈਡੀਕਲ ਸਹੂਲਤਾਂ ਦਾ ਇੰਤਜ਼ਾਮ ਕਰਨਾ, ਇਨ੍ਹਾਂ ਸਾਰੇ ਪੱਖਾਂ ਦੀ ਇਨ੍ਹਾਂ ਖੇਡ ਸੰਸਥਾਵਾਂ 'ਚ ਕਮੀ ਹੁੰਦੀ ਹੈ।
ਸਾਡੀਆਂ ਕੌਮੀ ਖੇਡ ਸੰਸਥਾਵਾਂ ਵੀ ਜਿਸ ਖੇਡ ਲਈ ਹੋਂਦ 'ਚ ਆਈਆਂ ਹੁੰਦੀਆਂ ਹਨ, ਉਸ ਖੇਡ ਦਾ ਮੁਕੰਮਲ ਵਿਕਾਸ ਨਹੀਂ ਕਰ ਪਾਉਂਦੀਆਂ। ਇਨ੍ਹਾਂ ਖੇਡ ਸੰਸਥਾਵਾਂ ਦੇ ਚੌਧਰੀ ਵੱਡੇ-ਵੱਡੇ ਐਲਾਨ ਕਰਦੇ ਹਨ ਕਿ ਉਹ ਲੱਖਾਂ ਰੁਪਏ ਭੁਚਾਲ ਪੀੜਤਾਂ ਅਤੇ ਹੜ੍ਹ ਪੀੜਤਾਂ ਨੂੰ ਭੇਜ ਰਹੇ ਹਨ ਪਰ ਸਹੀ ਮਾਅਨਿਆਂ 'ਚ ਜਿਸ ਖੇਡ ਦੇ ਵਿਕਾਸ ਲਈ ਉਹ ਬਣੀਆਂ ਹਨ, ਉਸ ਖੇਡ 'ਚ ਸਹੂਲਤਾਂ ਤੇ ਚੰਗੇ ਤਾਣੇ-ਬਾਣੇ ਦਾ ਜੋ ਸੋਕਾ ਪਿਆ ਹੈ, ਉਹ ਇਨ੍ਹਾਂ ਚੌਧਰੀਆਂ ਨੂੰ ਨਹੀਂ ਦਿਸਦਾ, ਕਿਉਂਕਿ ਉਨ੍ਹਾਂ ਦੀ ਦ੍ਰਿਸ਼ਟੀ ਦੂਰਦਰਸ਼ੀ ਨਹੀਂ ਹੁੰਦੀ। ਉਨ੍ਹਾਂ ਦੇ ਕੁਰਸੀ ਸੰਭਾਲਣ ਤੋਂ ਲੈ ਕੇ ਕੁਰਸੀ ਛੱਡਣ ਤੱਕ, ਉਹ ਖੇਡ ਉਥੇ ਹੀ ਖੜ੍ਹੀ ਰਹਿੰਦੀ ਹੈ। ਕੁਝ ਸਾਲ ਆਪਣੀ ਚੌਧਰ ਦਿਖਾ ਕੇ, ਕੁਝ ਸਮਾਜ ਸੁਧਾਰ ਸੰਸਥਾਵਾਂ ਵਲੋਂ ਕੰਮ ਕਰਕੇ ਉਹ ਤੁਰਦੇ ਬਣ ਗਏ। ਖੇਡ ਅਤੇ ਖਿਡਾਰੀਆਂ ਦਾ ਕੁਝ ਨਾ ਸੰਵਾਰਿਆ। ਸਾਡੀ ਮੁਰਾਦ ਹੈ, ਜੋ ਵੀ ਖੇਡ ਸੰਸਥਾ ਹੈ, ਚਾਹੇ ਉਹ ਕਿਸੇ ਵੀ ਰੂਪ 'ਚ ਹੋਵੇ, ਕਿਸੇ ਵੀ ਪੱਧਰ ਦੀ ਹੋਵੇ, ਉਸ ਨੂੰ ਆਪਣੀ ਖੇਡ ਪ੍ਰਤੀ ਸਮਰਪਿਤ ਹੋਣ ਦੀ ਲੋੜ ਹੈ, ਉਹ ਜਾਂ ਤਾਂ ਧਾਰਮਿਕ ਸੰਸਥਾਵਾਂ ਵਾਲੇ ਕੰਮ ਕਰ ਰਹੀਆਂ ਹੁੰਦੀਆਂ ਹਨ ਜਾਂ ਸਮਾਜ ਸੇਵੀ ਸੰਸਥਾਵਾਂ ਵਾਲੇ। ਖੇਡ ਦੀ ਲੋਕਪ੍ਰਿਅਤਾ ਵਧਾਉਣੀ, ਖੇਡ ਨੂੰ ਮਾਰਕੀਟਿੰਗ ਕਰਨ ਦੀ ਕੋਈ ਨੀਤੀ ਬਣਾਉਣੀ, ਆਉਣ ਵਾਲੀ ਪੀੜ੍ਹੀ ਨੂੰ ਉਸ ਖੇਡ ਨਾਲ ਜੋੜਨ ਦੇ ਉਪਰਾਲੇ ਕਰਨ ਲਈ ਚੰਗੀ ਸੂਝ-ਬੂਝ ਦੀ ਲੋੜ ਹੁੰਦੀ ਹੈ ਜੋ ਕਿ ਸਾਡੀਆਂ ਖੇਡ ਸੰਸਥਾਵਾਂ ਦੇ ਮੁਖੀਆਂ ਕੋਲ ਨਹੀਂ ਹੁੰਦੀ। ਖੇਡ ਜਗਤ ਦੇ ਭਲੇ ਲਈ ਜ਼ਰੂਰੀ ਹੈ ਕਿ ਵੱਖ-ਵੱਖ ਖੇਡ ਸੰਸਥਾਵਾਂ ਦੇ ਮੁਖੀ ਉਸ ਖੇਡ ਦੇ ਵਿਕਾਸ ਲਈ ਦੂਰਦ੍ਰਿਸ਼ਟੀ ਦੇ ਮਾਲਕ ਹੋਣ।


-ਡੀ. ਏ. ਵੀ. ਕਾਲਜ, ਅੰਮ੍ਰਿਤਸਰ।
ਫੋਨ : 98155-35410





Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX