ਤਾਜਾ ਖ਼ਬਰਾਂ


ਨਵੀਂ ਦਿੱਲੀ- ਬ੍ਰਾਜ਼ੀਲ ਵਿਚ ਬ੍ਰਿਕਸ ਸੰਮੇਲਨ ਵਿਚ ਹਿੱਸਾ ਲੈਣ ਤੋਂ ਬਾਅਦ ਭਾਰਤ ਵਾਪਸ ਆਏ ਪ੍ਰਧਾਨ ਮੰਤਰੀ ਮੋਦੀ
. . .  1 day ago
ਹੋਟਲ ਦੇ ਕਮਰੇ 'ਚੋਂ ਔਰਤ ਦੀ ਲਾਸ਼ ਮਿਲੀ
. . .  1 day ago
ਜ਼ੀਰਕਪੁਰ,15 ਨਵੰਬਰ, {ਹੈਪੀ ਪੰਡਵਾਲਾ} - ਇੱਥੋਂ ਦੇ ਬਲਟਾਣਾ ਖੇਤਰ 'ਚ ਪੈਂਦੇ ਕਲਗ਼ੀਧਰ ਐਨਕਲੇਵ ਵਿਖੇ ਇੱਕ ਹੋਟਲ ਦੇ ਕਮਰੇ 'ਚੋਂ ਔਰਤ ਦੀ ਪੱਖੇ ਨਾਲ ਲਟਕਦੀ ਲਾਸ਼ ਮਿਲੀ। ਪੁਲਿਸ ਨੇ ਲਾਸ਼ ਕਬਜ਼ੇ 'ਚ ਲੈ ਕੇ ਪੋਸਟਮਾਰਟਮ ...
ਵਿਦੇਸ਼ੀ ਫੰਡਿੰਗ ਕੇਸ : ਐਮਨੇਸਟੀ ਇੰਟਰਨੈਸ਼ਨਲ ਦੇ ਦਫ਼ਤਰ 'ਤੇ ਸੀਬੀਆਈ ਦਾ ਛਾਪਾ
. . .  1 day ago
ਮਹਾਰਾਸ਼ਟਰ : ਕ੍ਰਿਪਟੋ ਇੰਜੀਨੀਅਰਿੰਗ ਪ੍ਰਾਈਵੇਟ ਲਿਮਟਿਡ ਦੀ ਇਮਾਰਤ ਵਿਚ ਧਮਾਕਾ, 17 ਮਜ਼ਦੂਰ ਜ਼ਖ਼ਮੀ
. . .  1 day ago
ਮੁੰਬਈ, 15 ਨਵੰਬਰ - ਮਹਾਰਾਸ਼ਟਰ ਦੇ ਰਾਏਗੜ੍ਹ ਸ਼ਹਿਰ ਦੀ ਐਮਆਈਡੀਸੀ ਉਦਯੋਗਿਕ ਖੇਤਰ ਵਿਚ ਕ੍ਰਿਪਟੋ ਇੰਜੀਨੀਅਰਿੰਗ ਪ੍ਰਾਈਵੇਟ ਲਿਮਟਿਡ ਦੀ ਇਮਾਰਤ ਵਿਚ ਧਮਾਕਾ ਹੋਣ ਨਾਲ 17 ਮਜ਼ਦੂਰ ਜ਼ਖ਼ਮੀ ਹੋ
ਹਸਪਤਾਲ ਦੇ ਐਮਰਜੈਂਸੀ ਵਿਭਾਗ 'ਚ ਕਾਂਗਰਸੀ ਸਰਪੰਚ ਅਤੇ ਉਸ ਦੇ ਭਰਾ 'ਤੇ ਕਾਤਲਾਨਾ ਹਮਲਾ
. . .  1 day ago
ਰਾਜਪੁਰਾ ,15 ਨਵੰਬਰ (ਰਣਜੀਤ ਸਿੰਘ)- ਅੱਜ ਸਿਵਲ ਹਸਪਤਾਲ ਦੇ ਐਮਰਜੈਂਸੀ ਵਿਭਾਗ ਵਿਚ ਨੇੜਲੇ ਪਿੰਡ ਤਖਤੁ ਮਾਜਰਾ ਦੇ ਮੌਜੂਦਾ ਕਾਂਗਰਸੀ ਸਰਪੰਚ ਹਰ ਸੰਗਤ ਸਿੰਘ ਅਤੇ ਉਸ ਦੇ ਭਰਾ 'ਤੇ ਕਾਤਲਾਨਾ ਹਮਲਾ ਕਰਕੇ ਸਖ਼ਤ ...
ਕਾਂਗਰਸ ਦੇ ਅਹੁਦੇਦਾਰਾਂ ਦੀ ਮੀਟਿੰਗ 16 ਨੂੰ
. . .  1 day ago
ਨਵੀਂ ਦਿੱਲੀ, 15 ਨਵੰਬਰ - ਜ਼ਰੂਰੀ ਸਿਆਸੀ ਮੁੱਦਿਆਂ ਉੱਪਰ ਚਰਚਾ ਲਈ ਆਲ ਇੰਡੀਆ ਕਾਂਗਰਸ ਕਮੇਟੀ ਦੇ ਜਨਰਲ ਸਕੱਤਰਾਂ, ਸਕੱਤਰਾਂ, ਪੀ.ਸੀ.ਸੀ ਪ੍ਰਧਾਨਾਂ ਅਤੇ ਸੀ.ਐਲ.ਪੀ ਆਗੂਆਂ ਦੀ ਮੀਟਿੰਗ 16 ਨਵੰਬਰ...
ਮਹਿਬੂਬਾ ਮੁਫ਼ਤੀ ਨੂੰ ਸਰਕਾਰੀ ਕੁਆਟਰ 'ਚ ਕੀਤਾ ਗਿਆ ਸ਼ਿਫ਼ਟ
. . .  1 day ago
ਸ੍ਰੀਨਗਰ, 15 ਨਵੰਬਰ - ਜੰਮੂ ਕਸ਼ਮੀਰ ਦੀ ਸਾਬਕਾ ਮੁੱਖ ਮੰਤਰੀ ਅਤੇ ਪੀ.ਡੀ.ਪੀ ਆਗੂ ਮਹਿਬੂਬਾ ਮੁਫ਼ਤੀ ਜਿਨ੍ਹਾਂ ਨੂੰ ਧਾਰਾ 370 ਹਟਾਏ ਜਾਣ ਤੋਂ ਬਾਅਦ ਸ੍ਰੀਨਗਰ ਦੇ ਚਸ਼ਮਾ ਸ਼ਾਹੀ ਹਟ ਵਿਚ ਨਜ਼ਰਬੰਦ ਕੀਤਾ ਗਿਆ ਸੀ ਨੂੰ ਸ੍ਰੀਨਗਰ...
ਟਰਾਈ ਵੱਲੋਂ ਇੰਟਰਕੁਨੈਕਸ਼ਨ ਯੂਜੇਸ ਚਾਰਜਸ ਦੀ ਸਮੀਖਿਆ
. . .  1 day ago
ਨਵੀਂ ਦਿੱਲੀ, 15 ਨਵੰਬਰ - ਟੈਲੀਕਾਮ ਰੈਗੂਲੇਟਰੀ ਅਥਾਰਿਟੀ ਆਫ਼ ਇੰਡੀਆ (ਟਰਾਈ) ਵੱਲੋਂ ਅੱਜ ਇੰਟਰਕੁਨੈਕਸ਼ਨ ਯੂਜੇਸ ਚਾਰਜਸ ਦੀ ਸਮੀਖਿਆ ਸਬੰਧੀ ਚਰਚਾ ਕੀਤੀ ਗਈ। ਟਰਾਈ...
ਇੰਦੌਰ ਟੈੱਸਟ ਦੂਸਰਾ ਦਿਨ : ਭਾਰਤ ਨੇ ਹਾਸਲ ਕੀਤੀ 343 ਦੌੜਾਂ ਦੀ ਲੀਡ
. . .  1 day ago
ਇੰਦੌਰ, 15 ਨਵੰਬਰ - ਬੰਗਲਾਦੇਸ਼ ਖ਼ਿਲਾਫ਼ ਇੰਦੌਰ ਟੈਸਟ ਦੇ ਦੂਸਰੇ ਦਿਨ ਦੀ ਖੇਡ ਖ਼ਤਮ ਹੋਣ ਤੱਕ ਭਾਰਤ ਨੇ ਆਪਣੀ ਪਹਿਲੀ ਪਾਰੀ 'ਚ 6 ਵਿਕਟਾਂ ਦੇ ਨੁਕਸਾਨ 'ਤੇ 493 ਦੌੜਾਂ ਬਣਾ ਲਈਆਂ...
ਇੰਦੌਰ ਟੈੱਸਟ ਦੂਸਰਾ ਦਿਨ : ਦਿਨ ਦਾ ਖੇਡ ਖ਼ਤਮ ਹੋਣ 'ਤੇ ਭਾਰਤ 493/6
. . .  1 day ago
ਹੋਰ ਖ਼ਬਰਾਂ..

ਫ਼ਿਲਮ ਅੰਕ

ਦੀਪਿਕਾ ਪਾਦੂਕੋਨ ਹਰ ਪਾਸੇ ਤੇਰਾ ਜਲਵਾ

ਬਹੁਤ ਹੀ ਧਾਰਮਿਕ ਕੁੜੀ ਏ ਦੀਪੀ ਤੇ ਇਸ ਦਾ ਸਬੂਤ ਉਸ ਦਾ ਨੰਗੇ ਪੈਰੀਂ ਬੱਪਾ ਦੇ ਮੰਦਰ ਜਾਣਾ ਸੀ। ਪ੍ਰਕਾਸ਼ ਪਾਦੂਕੋਨ ਦੀ ਇਸ ਪਿਆਰੀ ਬੇਟੀ ਨੇ ਸ਼ਰਧਾ ਲਈ ਮੰਦਰ ਜਾ ਕੇ ਗ਼ਰੀਬ-ਗੁਰਬਿਆਂ ਨੂੰ ਪੈਸੇ, ਫਲ ਤੇ ਕੱਪੜੇ ਵੀ ਵੰਡੇ। ਦੀਪਿਕਾ ਪਾਦੂਕੋਨ ਹਿੰਦੁਸਤਾਨ ਦੀ ਸਟਾਰ ਨਾਇਕਾ ਹੈ ਤੇ ਇਸ ਦਾ ਪ੍ਰਭਾਵ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਤੋਂ ਲੈ ਕੇ ਸਚਿਨ ਤੇਂਦੁਲਕਰ ਤੱਕ ਕਈ ਖੇਤਰਾਂ ਦੀਆਂ ਹਸਤੀਆਂ ਉੱਪਰ ਵੀ ਹੈ। ਹੁਣ ਇਕ ਹੋਰ ਸੋਨ ਤਗਮਾ ਜੇਤੂ ਪੀ.ਵੀ. ਸਿੰਧੂ ਵੀ ਦੀਪੀ ਦੀ ਦੀਵਾਨੀ ਹੋਈ ਨਜ਼ਰ ਆਈ ਹੈ ਤੇ ਸਿੰਧੂ ਨੇ ਕਿਹਾ ਕਿ ਉਸ ਦੀ ਬਾਇਓਪਿਕ ਤਿਆਰ ਕਰਨ ਵਾਲਾ ਨਿਰਮਾਤਾ ਦੀਪਿਕਾ ਪਾਦੂਕੋਨ ਨੂੰ ਨਾਇਕਾ ਵਜੋਂ ਫ਼ਿਲਮ 'ਚ ਲਏ।
ਜਦ ਐਨਾ ਆਕਰਸ਼ਣ ਹੋਏ ਤਾਂ ਫ਼ਖਰ ਨਾਲ ਇਨਸਾਨ ਉੱਡਦਾ ਫਿਰਦਾ ਹੈ, ਦੀਪੀ ਇਸ ਮਾਣ ਵਿਚ ਭੁੱਲ ਗਈ ਕਿ ਉਹ ਵਿਆਹੀ ਹੋਈ ਹੈ।
ਇਕ ਸ਼ੋਅ ਵਿਚ ਪੇਸ਼ਕਾਰ ਨੂੰ ਦੀਪੀ ਨੇ ਕਿਹਾ, 'ਉਹ ਬੇਟੀ ਹੈ, ਅਭਿਨੇਤਰੀ ਹੈ, ਦੀਦੀ ਹੈ' ਤਾਂ ਪੇਸ਼ ਕਰਨ ਵਾਲੀ ਹੱਸ ਕੇ ਬੋਲੀ, 'ਪਤਨੀ ਵੀ ਹੈ।' ਦੀਪੀ ਹੱਸ ਪਈ ਤੇ ਜਵਾਬ ਦਿੱਤਾ ਕਿ, 'ਓ ਮੇਰੇ ਅੱਬਾ, ਓ ਮੇਰੇ ਰੱਬਾ, ਮੈਂ ਤਾਂ ਭੁੱਲ ਹੀ ਗਈ ਸੀ ਕਿ ਹੁਣ ਮੈਂ ਕੁਆਰੀ ਨਹੀਂ, ਵਿਆਹੁਤਾ ਹਾਂ।' ਯਾਦ ਰਹੇ ਇਹ ਲਿਵ, ਲਾਫ਼, ਲਵ ਨਾਮ ਦੀ ਸੰਸਥਾ ਚਲਾ ਰਹੀ ਹੈ।
ਇਸ ਸਮੇਂ ਉਸ ਨੇ ਫ਼ਿਲਮ '83' ਸ਼ੂਟ ਕੀਤੀ ਹੈ ਤੇ 'ਐਸਿਡ ਅਟੈਕ' ਫ਼ਿਲਮ ਵਿਚ ਵੀ ਆ ਰਹੀ ਹੈ।
ਦੀਪੀ ਦਾ ਜਦ ਦਾ ਵਿਆਹ ਹੋਇਆ ਹੈ, ਦੀਪੀ ਹੱਸਮੁੱਖ ਬਾਹਲੀ ਹੋ ਗਈ ਹੈ ਤੇ ਪਤਨੀ ਦੇ ਤੌਰ 'ਤੇ ਪਤੀ ਨੂੰ ਮਜ਼ਾਕ ਤੇ ਇਹ ਸਭ ਕੁਝ ਲੋਕਾਂ ਤੱਕ ਸੋਸ਼ਲ ਮੰਚ ਰਾਹੀਂ ਉਹ ਭੇਜ ਰਹੀ ਹੈ। ਇੰਸਟਾਗ੍ਰਾਮ 'ਤੇ ਪਤੀ-ਪਤਨੀ ਦੇ ਚੁਟਕਲੇ ਉਹ ਰੋਜ਼ ਪਾ ਰਹੀ ਹੈ, ਨਾਲ ਕਾਰਟੂਨ ਆਪਣਾ ਤੇ ਰਣਵੀਰ ਦਾ।


ਖ਼ਬਰ ਸ਼ੇਅਰ ਕਰੋ

ਮ੍ਰਿਣਾਲ ਠਾਕੁਰ ਗੋਲੀ ਵਾਂਗ ਫ਼ੁਰਤੀਲੀ

ਇਕ ਕੰਪਨੀ ਦੇ ਫੈਸ਼ਨ ਸ਼ੋਅ ਹਰ ਹਫ਼ਤੇ ਮੁੰਬਈ 'ਚ ਹੋ ਰਹੇ ਨੇ ਤੇ ਇਸ ਹਫ਼ਤੇ ਇਨ੍ਹਾਂ 'ਚ ਮੁੱਖ ਆਕਰਸ਼ਣ ਮ੍ਰਿਣਾਲ ਠਾਕਰ ਸੀ। ਡਿਜ਼ਾਈਨਰ ਅਲਕਾ ਸ਼ਰਮਾ ਲਈ ਮ੍ਰਿਣਾਲ ਰੈਂਪ 'ਤੇ ਚਲਦੀ ਨਜ਼ਰ ਆਈ। ਰਿਤਿਕ ਰੌਸ਼ਨ ਨਾਲ 'ਸੁਪਰ-30' ਕਰ ਚੁੱਕੀ ਇਹ ਅਭਿਨੇਤਰੀ ਜਾਨ ਅਬਰਾਹਮ ਨਾਲ 'ਬਾਟਲਾ ਹਾਊਸ' 'ਚ ਨਜ਼ਰ ਆਈ ਸੀ। ਟੀ.ਵੀ. ਦੇ ਸਭ ਤੋਂ ਚਰਚਿਤ ਲੜੀਵਾਰ 'ਕੁਮ ਕੁਮ ਭਾਗਿਆ' ਨੇ ਮ੍ਰਿਣਾਲ ਦੀ ਤਕਦੀਰ ਦੇ ਪਾਸੇ ਪਲਟੇ ਹਨ। ਚਾਹੇ ਉਸ ਦੀ ਫ਼ਿਲਮ 'ਲਵ ਯੂ ਸੋਨੀਆ' ਨਹੀਂ ਸੀ ਚਲ ਸਕੀ ਪਰ ਲੋਕਾਂ ਨੇ ਤਕਰੀਬਨ ਮ੍ਰਿਣਾਲ ਦੇ ਕੰਮ ਦੀ ਸ਼ਲਾਘਾ ਹੀ ਕੀਤੀ। ਬੀ. ਟੈੱਕ ਤੇ ਪੱਤਕਾਰਿਤਾ ਦੇ ਦੋ ਦੋ ਕੋਰਸ ਉਸ ਨੇ ਕੀਤੇ ਹਨ ਪਰ ਕਿੱਤਾ ਉਸ ਨੇ ਫ਼ਿਲਮੀ ਦੁਨੀਆ ਤੇ ਟੀ.ਵੀ. ਦਾ ਹੀ ਚੁਣਿਆ ਹੈ। ਮਰਾਠੀ ਪਰਿਵਾਰ ਨਾਲ ਸਬੰਧਿਤ ਇਹ ਟੀ.ਵੀ. ਤੋਂ ਸਫਲ ਹੋ ਕੇ ਫ਼ਿਲਮਾਂ ਦਾ ਹਿੱਸਾ ਬਣੀ ਹੈ। ਮ੍ਰਿਣਾਲ ਦੱਸਦੀ ਹੈ ਕਿ ਉਸ ਦਾ ਘਰ ਦਾ ਨਾਂਅ 'ਗੋਲੀ' ਹੈ ਤੇ 'ਗੋਲੀ' ਦੀ ਤਰ੍ਹਾਂ ਹੀ ਉਹ ਤੇਜ਼-ਤਰਾਰ ਦੌੜਨ 'ਚ ਵਿਸ਼ਵਾਸ ਰੱਖਦੀ ਹੈ ਕਿਉਂਕਿ ਅੱਜ ਦੇ ਸਮੇਂ 'ਚ 'ਆਰਾਮ ਹੈ ਹਰਾਮ', 'ਜੋ ਜੀਤਾ ਵੋਹੀ ਸਿਕੰਦਰ', 'ਜੋ ਰਹਿ ਗਿਆ, ਸੋ ਰਹਿ ਗਿਆ।' ਇੰਡੋਨੇਸ਼ੀਅਨ ਟੀ.ਵੀ. 'ਤੇ ਵੀ ਉਸ ਨੇ ਕੰਮ ਕੀਤਾ ਹੈ। ਉਥੇ ਉਸ ਦੇ ਲੱਖਾਂ ਪ੍ਰਸੰਸਕ ਹਨ। ਮ੍ਰਿਣਾਲ ਨੇ ਮਰਾਠੀ ਸਿਨੇਮਾ 'ਚ ਆਪਣਾ 'ਵੱਕਾਰ' ਬਣਾਇਆ ਹੈ। ਤਿੰਨ ਸਾਲ ਪਹਿਲਾਂ ਟੈਲੀਵਿਜ਼ਨ ਨੂੰ ਅਲਵਿਦਾ ਕਹਿਣ ਵਾਲੀ ਮ੍ਰਿਣਾਲ ਹੁਣ ਕਿਸੇ ਵੀ ਕੀਮਤ 'ਤੇ ਲੜੀਵਾਰ ਨਹੀਂ ਕਰੇਗੀ। ਮਿਊਜ਼ਿਕ ਵੀਡੀਓਜ਼ ਉਹ ਜ਼ਰੂਰ ਕਰਦੀ ਰਹੇਗੀ। ਮ੍ਰਿਣਾਲ ਨਾਲ ਜ਼ੀ ਟੀ.ਵੀ. ਨੇ ਸੰਪਰਕ ਕਰ ਕੇ 'ਮੋਟੀ ਰਕਮ' ਵੀ ਦੇਣੀ ਚਾਹੀ ਪਰ ਮ੍ਰਿਣਾਲ ਪਿੱਛੇ ਮੁੜ ਕੇ ਦੇਖਣ 'ਚ ਵਿਸ਼ਵਾਸ ਨਹੀਂ ਰੱਖਦੀ। ਮ੍ਰਿਣਾਲ ਠਾਕੁਰ 'ਚ ਅਗਾਂਹ ਵਧਣ ਦੇ ਗੁਣ ਹਨ ਤੇ ਇਨ੍ਹਾਂ ਦਾ ਪ੍ਰਯੋਗ ਉਹ ਸਹੀ ਕਰ ਰਹੀ ਹੈ।

ਵਿੱਕੀ ਕੌਸ਼ਲ ਮੈਂ ਸ਼ਰਾਬੀ...?

ਚਾਰ ਸਾਲ ਦੇ ਕੈਰੀਅਰ 'ਚ ਕਾਮਯਾਬੀਆਂ ਦੇ ਪਰਚਮ ਵਿੱਕੀ ਕੌਸ਼ਲ ਨੇ ਲਹਿਰਾਅ ਕੇ ਦਰਸਾ ਦਿੱਤਾ ਹੈ ਕਿ ਸਵਰਗੀ ਐਕਸ਼ਨ ਮਾਸਟਰ ਸ਼ਾਮ ਕੌਸ਼ਲ ਦੇ ਇਸ ਪੁੱਤ 'ਚ ਕੁਝ ਕਰ ਦਿਖਾਉਣ ਦੀ ਸਮਰੱਥਾ ਹੱਦੋਂ ਵੱਧ ਹੈ। ਅਸੁਰੱਖਿਆ ਵਿਚੀਂ ਗੁਜ਼ਰਨਾ ਸੁਭਾਵਿਕ ਹੈ ਪਰ ਇਸ ਨੂੰ ਇਨਸਾਨੀ ਗੁਣ ਸਮਝ ਵਿੱਕੀ ਨੇ ਆਪਣਾ ਕੰਮ ਜਾਰੀ ਰੱਖਿਆ ਹੈ। ਜਿਹੜੇ ਬੰਦੇ ਇਨਸਾਨ ਦੇ ਗੁਣ ਰੱਖਦੇ ਨੇ ਵਿੱਕੀ ਦਾ ਹੌਸਲਾ ਸੂਤਰ ਰਹੇ ਹਨ। 2015 ਦੀ 'ਮਸਾਣ' ਤੋਂ ਲੈ ਕੇ 31 ਸਾਲ ਦੇ ਕੌਸ਼ਲ ਨੇ ਜ਼ਿੰਦਗੀ ਦੇ ਸਬਕ ਇਸ ਇੰਡਸਟਰੀ ਤੋਂ ਹੀ ਸਿੱਖੇ ਹਨ। 'ਉੜੀ : ਦਾ ਸਰਜੀਕਲ ਸਟਰਾਈਕ' ਨੇ ਪਾਈਆਂ ਧੁੰਮਾਂ ਤੇ ਵਿੱਕੀ ਦੀ ਹੋਈ ਪੂਰੀ ਚੜ੍ਹਤ। ਇਥੋਂ ਤੱਕ ਕਿ ਫੇਸਬੁੱਕ 'ਤੇ ਵਿੱਕੀ ਕੌਸ਼ਲ ਨਾਲ ਗੱਲਾਂ ਕਰਦੀ ਇਕ ਔਰਤ ਵਿੱਕੀ ਦੇ ਘਰੇ ਮੁੰਬਈ ਪਹੁੰਚ ਗਈ। ਵਿੱਕੀ ਨੇ ਦੱਸਿਆ ਕਿ ਫੇਸਬੁੱਕ 'ਤੇ ਨਕਲੀ ਖਾਤਾ ਉਸ ਦੇ ਨਾਂਅ 'ਤੇ ਕਿਸੇ ਨੇ ਬਣਾ ਕੇ ਔਰਤ ਦੇ ਅਰਮਾਨਾਂ ਨੂੰ ਲੁੱਟਿਆ ਪਰ ਸ਼ੁਕਰ ਹੈ ਕਿ ਉਹ ਉਸ ਨੂੰ ਮਿਲੀ ਤੇ ਉਸ ਨੇ ਨਕਲੀ ਖਾਤਾ ਬੰਦ ਕਰਵਾ ਕੇ ਆਪਣਾ 'ਵੈਰੀਫਾਈਰ ਖਾਤਾ' ਬਣਾਇਆ। ਅਰਿਜੀਤ ਸਿੰਘ ਦੇ ਸਿੰਗਲ ਗਾਣੇ 'ਪਛਤਾਉਗੇ' 'ਚ ਆਏ ਵਿੱਕੀ ਨੇ ਹੁਣ ਸੋਸ਼ਲ ਮੀਡੀਆ ਵੱਲ ਪੂਰਾ ਧਿਆਨ ਲਾਇਆ ਹੈ। ਸ਼ਹੀਦ ਊਧਮ ਸਿੰਘ ਦੀ ਬਾਇਓਪਿਕ ਕਰ ਰਹੇ ਵਿੱਕੀ ਨੂੰ ਮਾਣ ਹੈ ਕਿ ਉਹ ਮਹਾਨ ਸ਼ਹੀਦ ਦਾ ਕਿਰਦਾਰ ਨਿਭਾਅ ਰਿਹਾ ਹੈ। ਕਰਨ ਜੌਹਰ ਦੀ 'ਭੂਤ ਪਾਰਟ ਵੰਨ: ਦਾ ਹਾਂਟੇਡਸ਼ਿਪ' ਵੀ ਵਿੱਕੀ ਕੌਸ਼ਲ ਕੋਲ ਹੈ। ਖੈਰ ਕਰਨ ਦੀ ਪਾਰਟੀ 'ਚ ਨਿੰਬੂ ਪਾਣੀ ਪੀ ਰਹੇ ਵਿੱਕੀ (ਉਸ ਅਨੁਸਾਰ) 'ਤੇ ਆਰੋਪ ਹੈ ਕਿ ਉਸ ਨੇ 'ਡਰੱਗਜ਼' ਲਈ ਤੇ ਮਾਮਲਾ ਅਦਾਲਤ ਤੱਕ ਅਕਾਲੀ ਦਲ ਦੇ ਮਨਜਿੰਦਰ ਸਿੰਘ ਸਿਰਸਾ ਲੈ ਕੇ ਗਏ ਹਨ ਜਦ ਕਿ ਪਾਕਿ ਸਾਫ਼ ਹੋਣ ਦੀਆਂ ਦੁਹਾਈਆਂ ਵਿੱਕੀ ਕੌਸ਼ਲ ਦੇ ਰਿਹਾ ਹੈ ਕਿ ਉਹ ਸ਼ਰਾਬੀ ਨਹੀਂ ਹੈ। ਲੋਕ ਵਾਇਰਲ ਵੀਡੀਓ ਦੇ ਆਧਾਰ 'ਤੇ ਉਸ ਨੂੰ ਬਦਨਾਮ ਹੀਰੋ ਸਮਝ ਰਹੇ ਹਨ ਪਰ ਇਸ ਸੱਚ ਨਹੀਂ ਹੈ।
-ਸੁਖਜੀਤ ਕੌਰ

ਨੋਰਾ ਫਤੇਹੀ ਪਊ ਪਛਤਾਉਣਾ

ਤਹਿਲਕਾ ਤੇ ਤਹਿਲਕਾ। ਰੋਜ਼ ਹੀ ਤਹਿਲਕਾ ਨੋਰਾ ਫਤੇਹੀ ਮਚਾ ਰਹੀ ਹੈ। ਇੰਸਟਾਗ੍ਰਾਮ ਉਸ ਦੇ ਡਾਂਸ ਵੀਡੀਓਜ਼ ਨਾਲ ਭਰੇ ਪਏ ਹਨ। 4 ਲੱਖ 89 ਹਜ਼ਾਰ ਤੋਂ ਜ਼ਿਆਦਾ ਵਾਰ ਉਸ ਦਾ ਨਵਾਂ ਡਾਂਸ ਵੀਡੀਓ ਦੇਖਿਆ ਗਿਆ ਹੈ। ਧਮਾਕੇਦਾਰ ਨਾਚ ਦੇ ਕਦਮ ਦੇਖਣਯੋਗ ਹਨ। 'ਪੇਪੇਟਾ' ਗੀਤ ਯੂ-ਟਿਊਬ 'ਤੇ ਪਹਿਲਾਂ ਹੀ ਕੋਹਰਾਮ ਮਚਾ ਰਿਹਾ ਹੈ। 'ਬਿੱਗ ਬੌਸ' ਤੋਂ ਪਛਾਣ ਮਿਲੀ ਨੋਰਾ ਨੂੰ ਤੇ 'ਭਾਰਤ', 'ਬਾਟਲਾ ਹਾਊਸ' ਫ਼ਿਲਮਾਂ 'ਚ ਵੀ ਉਹ ਆਈ। 'ਸਟਰੀਟ ਡਾਂਸਰ' 'ਚ ਵੀ ਨੋਰਾ ਹੈ ਤੇ ਨਾਲ ਸ਼ਰਧਾ ਕਪੂਰ-ਵਰੁਣ ਧਵਨ ਹਨ। ਪ੍ਰੱਗਿਆ ਕਪੂਰ ਨੇ 'ਸਵੱਛ ਭਾਰਤ' ਲਹਿਰ ਹੇਠ ਬੀਚ 'ਤੇ ਇਕ ਸਮਾਰੋਹ ਕਰਵਾਇਆ। ਨੋਰਾ ਉਥੇ ਝਾੜੂ ਫੜ ਕੇ ਸਫਾਈ ਕਰ ਰਹੀ ਸੀ, ਨਾਲ ਹੀ ਕਦਮ ਥਿਰਕ ਰਹੇ ਸਨ ਤੇ ਹਰ ਕੋਈ ਮਜ਼ੇਦਾਰ ਮਾਹੌਲ 'ਚ ਬੀਚ ਦੀ ਸਫਾਈ ਕਰ ਰਿਹਾ ਸੀ। ਇਥੇ ਹੀ ਨੇਹਾ ਧੂਪੀਆ ਦੇ ਨਾਲ ਉਸ ਦਾ ਪਤੀ ਅੰਗਦ ਬੇਦੀ ਆਇਆ। ਅੰਗਦ ਨਾਲ ਨੋਰਾ ਦਾ ਪ੍ਰੇਮ ਸੀ, ਕਈਆਂ ਨੂੰ ਪਤਾ ਹੈ ਤੇ ਅੰਗਦ ਦੇ ਆਉਂਦੇ ਹੀ ਨੋਰਾ ਹੱਥੋਂ ਝਾੜੂ ਡਿੱਗ ਪਿਆ, ਤੀਲੇ ਖਿਲਰ ਗਏ ਤੇ ਖਿਲਰੀਆਂ ਯਾਦਾਂ ਨਾਲ ਨੋਰਾ ਉਥੋਂ ਚੁੱਪ-ਚਾਪ ਹੌਲੀ ਜਿਹੀ ਖਿਸਕ ਗਈ। ਇਧਰ 'ਬੜਾ ਪਛਤਾਉਗੇ' ਸਿੰਗਲ ਗੀਤ ਦੇ ਵੀਡੀਓ 'ਚ ਵਿੱਕੀ ਕੌਸ਼ਲ ਨਾਲ ਨੋਰਾ ਫਤੇਹੀ ਦਾ ਕੰਮ ਲੋਕ ਪਸੰਦ ਕਰ ਰਹੇ ਹਨ। ਇਕ ਪੱਤਰਕਾਰ ਵਾਰਤਾ 'ਚ ਵਿੱਕੀ ਕੌਸ਼ਲ 'ਤੇ ਇਸ ਗੀਤ 'ਤੇ ਨੱਚਣ ਦਾ ਫੁਰਮਾਨ ਆਇਆ ਤਾਂ ਉਹ ਤਿਆਰ ਸੀ ਪਰ ਨੋਰਾ ਦਾ ਪਹਿਰਾਵਾ ਤੇ ਸੰਗ ਇਸ ਕਾਰਨ ਨੋਰਾ ਦਾ ਕੰਮ ਹੀ ਵਿਚਾਲੇ ਰੁਕ ਗਿਆ। ਵਿੱਕੀ ਨੇ ਨੋਰਾ ਨੂੰ ਇਸ ਸਭ ਲਈ ਝਿੜਕਿਆ ਵੀ ਤੇ ਨੋਰਾ ਨੇ ਸਭ ਸਹਿਜ 'ਚ ਲੈ ਕੇ ਆਪਣੇ-ਆਪ ਨੂੰ ਸੰਭਾਲਿਆ। ਨੋਰਾ ਦੇ ਆਪਣੇ ਯੂ-ਟਿਊਬ ਚੈਨਲ 'ਤੇ ਅੰਤਰਰਾਸ਼ਟਰੀ ਉਸ ਦਾ ਗੀਤ 'ਪੇਪੇਟਾ' ਜੋ ਅੰਗਰੇਜ਼ੀ ਹੈ, ਸਫਲ ਹੈ। 'ਬੇਬੀ ਡਾਲ' ਦਾ ਤਮਗਾ ਇਸ ਗੀਤ ਨੇ ਨੋਰਾ ਨੂੰ ਦੇ ਦਿੱਤਾ ਹੈ। ਸਟਰੀਟ ਡਾਂਸਰ ਨੂੰ ਲੈ ਕੇ ਜ਼ਿਆਦਾ ਹੀ ਆਸ ਰੱਖੀ ਹੈ, ਨੋਰਾ ਨੇ। ਗੀਤ ਹੀ ਨਹੀਂ, ਨਾਚ ਹੀ ਨਹੀਂ, ਉਹ ਅਭਿਨੈ ਦੇ ਮੈਦਾਨ 'ਚ ਵੀ ਜਿੱਤ ਹੀ ਪ੍ਰਾਪਤ ਕਰੇਗੀ।

ਆਮਿਰ ਦੀ 'ਮੋਗੁਲ' ਵਿਚ ਵਾਪਸੀ

ਸੰਗੀਤ ਦੇ ਨਾਲ-ਨਾਲ ਫ਼ਿਲਮ ਨਿਰਮਾਣ ਵਿਚ ਰੁੱਝੇ ਟੀ-ਸੀਰੀਜ਼ ਦੇ ਭੂਸ਼ਣ ਕੁਮਾਰ ਨੇ ਕੁਝ ਸਾਲ ਪਹਿਲਾਂ ਆਪਣੇ ਪਿਤਾ ਗੁਲਸ਼ਨ ਕੁਮਾਰ ਦੀ ਜ਼ਿੰਦਗੀ 'ਤੇ ਫ਼ਿਲਮ ਬਣਾਉਣ ਦਾ ਐਲਾਨ ਕੀਤਾ ਸੀ ਅਤੇ ਇਸ ਦਾ ਨਾਂਅ 'ਮੋਗੁਲ' ਰੱਖਿਆ ਗਿਆ ਸੀ। ਉਦੋਂ ਟੀ-ਸੀਰੀਜ਼ ਦੀਆਂ ਦੀਵਾਰਾਂ 'ਤੇ ਵੀ ਇਸ ਦੇ ਪੋਸਟਰ ਲਗਾ ਦਿੱਤੇ ਗਏ ਸਨ ਅਤੇ ਫ਼ਿਲਮ ਲਈ ਉਨ੍ਹਾਂ ਵਲੋਂ ਦਿੱਤੀ ਜਾਂਦੀ ਸਲਾਹ ਤੇ ਸੁਝਾਅ ਨੂੰ ਗੰਭੀਰਤਾ ਨਾਲ ਲਿਆ ਜਾਂਦਾ ਸੀ। ਫ਼ਿਲਮ ਦੇ ਨਿਰੇਦਸ਼ਨ ਦੀ ਵਾਗਡੋਰ 'ਜੌਲੀ ਐਲ ਐਲ ਬੀ' ਰਾਹੀਂ ਪ੍ਰਸਿੱਧ ਨਿਰਦੇਸ਼ਕ ਸੁਭਾਸ਼ ਕੁਮਾਰ ਨੂੰ ਸੌਂਪੀ ਗਈ ਸੀ ਅਤੇ ਇਹ ਤੈਅ ਹੋਇਆ ਸੀ ਕਿ ਇਸ ਵਿਚ ਗੁਲਸ਼ਨ ਕੁਮਾਰ ਦੀ ਭੂਮਿਕਾ ਅਕਸ਼ੈ ਕੁਮਾਰ ਵਲੋਂ ਨਿਭਾਈ ਜਾਵੇਗੀ। ਹੁਣ ਇੰਤਜ਼ਾਰ ਸੀ ਤਾਂ ਸ਼ੂਟਿੰਗ ਸ਼ੁਰੂ ਹੋਣ ਦਾ।
ਇਸ ਤੋਂ ਪਹਿਲਾਂ ਕਿ ਸ਼ੂਟਿੰਗ ਸ਼ੁਰੂ ਹੋਵੇ ਨਿਰਦੇਸ਼ਕ ਸੁਭਾਸ਼ ਕੁਮਾਰ ਮੀ ਟੂ ਮੂਵਮੈਂਟ ਦੀ ਬਲੀ ਚੜ੍ਹ ਗਏ। ਐਂਕਰ ਤੇ ਟੀ. ਵੀ. ਅਭਿਨੇਤਰੀ ਗੀਤਿਕਾ ਤਿਆਗੀ ਨੇ ਉਨ੍ਹਾਂ 'ਤੇ ਸੋਸ਼ਣ ਦਾ ਦੋਸ਼ ਲਗਾਇਆ ਅਤੇ ਉਹ ਵੀਡੀਓ ਵੀ ਬਹੁਤ ਵਾਇਰਲ ਹੋਈ ਜਿਸ ਵਿਚ ਗੀਤਿਕਾ ਉਨ੍ਹਾਂ ਨੂੰ ਥੱਪੜ ਮਾਰਦੀ ਦਿਖਾਈ ਦਿੰਦੀ ਹੈ। ਸੁਭਾਸ਼ ਦਾ ਅਸਲੀ ਚਿਹਰਾ ਸਾਹਮਣੇ ਆਇਆ ਦੇਖ ਕੇ ਆਮਿਰ ਨੇ ਫ਼ਿਲਮ ਦੇ ਨਿਰਮਾਣ ਤੋਂ ਹੱਥ ਪਿੱਛੇ ਖਿੱਚ ਲਏ ਅਤੇ ਫ਼ਿਲਮ ਦੇ ਭਵਿੱਖ 'ਤੇ ਸਵਾਲੀਆ ਨਿਸ਼ਾਨ ਲੱਗ ਗਿਆ।
ਹੁਣ ਆਮਿਰ ਨੇ ਫ਼ਿਲਮ ਵਿਚ ਆਪਣੀ ਵਾਪਸੀ ਕਰ ਲਈ ਹੈ ਅਤੇ ਉਹ ਹੀ ਇਸ ਵਿਚ ਗੁਲਸ਼ਨ ਕੁਮਾਰ ਦੀ ਭੂਮਿਕਾ ਨਿਭਾਉਣਗੇ। ਭਾਵ ਫ਼ਿਲਮ ਤੋਂ ਅਕਸ਼ੈ ਦੀ ਛੁੱਟੀ ਹੋ ਗਈ ਹੈ। ਜਦੋਂ ਇਸ ਫ਼ਿਲਮ ਦਾ ਨਿਰਮਾਣ ਹਨ੍ਹੇਰੇ ਵਿਚ ਲਟਕ ਗਿਆ ਸੀ ਤਾਂ ਅਕਸ਼ੈ ਨੇ ਹੋਰ ਫ਼ਿਲਮਾਂ ਹੱਥ ਵਿਚ ਲੈ ਲਈਆਂ ਅਤੇ ਹੁਣ ਉਨ੍ਹਾਂ ਲਈ 'ਮੋਗੁਲ' ਲਈ ਸਮਾਂ ਕੱਢ ਪਾਉਣਾ ਅਸੰਭਵ ਸੀ। ਇਸ ਤਰ੍ਹਾਂ ਗੁਲਸ਼ਨ ਕੁਮਾਰ ਦੀ ਭੂਮਿਕਾ ਲਈ ਕਪਿਲ ਸ਼ਰਮਾ ਦੇ ਨਾਂਅ 'ਤੇ ਵੀ ਸੋਚ-ਵਿਚਾਰ ਕੀਤਾ ਗਿਆ ਪਰ ਭੂਸ਼ਣ ਕੁਮਾਰ ਨੂੰ ਲੱਗਿਆ ਕਿ ਕਪਿਲ ਦੇ ਆਉਣ ਨਾਲ ਫ਼ਿਲਮ 'ਤੇ ਕਾਮੇਡੀ ਫ਼ਿਲਮ ਦਾ ਠੱਪਾ ਲੱਗ ਜਾਵੇਗਾ ਜਦਕਿ ਇਹ ਸੰਵੇਦਨਸ਼ੀਲ ਫ਼ਿਲਮ ਹੈ। ਫ਼ਿਲਮ ਪ੍ਰਤੀ ਆਮਿਰ ਦਾ ਕ੍ਰਇਏਟਿਵ ਯੋਗਦਾਨ ਦੇਖ ਕੇ ਭੂਸ਼ਣ ਨੇ ਆਮਿਰ ਨੂੰ ਗੁਲਸ਼ਨ ਕੁਮਾਰ ਦੀ ਭੂਮਿਕਾ ਨਿਭਾਉਣ ਦੀ ਪੇਸ਼ਕਸ਼ ਕੀਤੀ ਅਤੇ ਆਪਣੇ ਪਿਤਾ ਦੀ ਫ਼ਿਲਮ ਪ੍ਰਤੀ ਭੂਸ਼ਣ ਦਾ ਸੰਵੇਦਨਾਤਮਕ ਨਾਤਾ ਦੇਖ ਕੇ ਆਮਿਰ ਇਸ ਵਿਚ ਕੰਮ ਕਰਨ ਨੂੰ ਤਿਆਰ ਹੋ ਗਿਆ। ਇਹ ਫ਼ਿਲਮ ਸੁਭਾਸ਼ ਵਲੋਂ ਵੀ ਨਿਰਦੇਸ਼ਿਤ ਕੀਤੀ ਜਾਵੇਗੀ ਅਤੇ ਆਮਿਰ ਦਾ ਕਹਿਣਾ ਹੈ ਕਿ ਕਿਉਂਕਿ ਨਿਰਦੇਸ਼ਕ ਦੇ ਖਿਲਾਫ਼ ਕਿਸੇ ਫ਼ਿਲਮ ਐਸੋਸੀਏਸ਼ਨ ਵਿਚ ਸ਼ਿਕਾਇਤ ਦਰਜ ਨਹੀਂ ਹੋਈ ਹੈ, ਸੋ, ਉਹ ਇਸ ਵਿਚ ਕੰਮ ਕਰਨ ਨੂੰ ਰਾਜ਼ੀ ਹੋ ਗਏ ਹਨ।
ਇਸ ਨੂੰ ਕਹਿੰਦੇ ਹਨ 'ਅੰਤ ਭਲਾ, ਸੋ ਸਭ ਭਲਾ।'

ਕਾਜੋਲ ਨਾਇਕਾ ਬਣੀ ਪਰ ਗ੍ਰੈਜੂਏਟ ਨਹੀਂ

ਬਿਲਕੁਲ ਮੀਨਾ ਕੁਮਾਰੀ, ਨੂਰਜਹਾਂ, ਨਰਗਿਸ, ਮਧੂਬਾਲਾ ਦੀ ਤਰ੍ਹਾਂ ਸਦਾਬਹਾਰ ਨਾਇਕਾ ਕਾਜੋਲ ਧਰਮਪਤਨੀ ਸ੍ਰੀਮਾਨ ਅਜੈ ਦੇਵਗਨ 45 ਸਾਲ ਦੀ ਹੋ ਗਈ ਹੈ। ਇਹ ਉਸ ਨੂੰ ਦੇਖ ਕੇ ਲਗਦਾ ਹੀ ਨਹੀਂ ਹੈ। ਪਤਾ ਜੇ ਕਾਜੋਲ ਵੇਦ ਪ੍ਰਕਾਸ਼ ਸ਼ਰਮਾ ਦੇ ਲਿਖੇ ਨਾਵਲਾਂ ਦੀ ਬੁਹਤ ਵੱਡੀ ਪ੍ਰਸੰਸਕਾ ਹੈ। ਕਾਜੋਲ ਫਿਰ ਵੱਡੇ ਪਰਦੇ 'ਤੇ, ਇਹ ਖ਼ਬਰ ਸੁਣ ਕੇ ਇੰਡਸਟਰੀ ਦੇ ਪੰਡਿਤ ਖੁਸ਼ ਹਨ। ਪਰਿਵਾਰਕ ਫ਼ਿਲਮਾਂ ਦੇ ਦੀਵਾਨੇ ਖ਼ੁਸ਼ ਹਨ। 'ਤਾਨਾ ਜੀ' ਦੀ ਇਹ ਅਜੈ-ਕਾਜੋਲ ਦੀ ਜੋੜੀ ਹੁਣ ਇਹ ਹਾਸਰਸ ਫ਼ਿਲਮ ਕਰਨ ਜਾ ਰਹੀ ਹੈ। 'ਧੋਖਾ-ਅਰਾਊਂਡ ਦਾ ਕਾਰਨਰ' ਪਹਿਲਾਂ ਇਸ ਫ਼ਿਲਮ ਦਾ ਟਾਈਟਲ ਰੱਖਿਆ ਗਿਆ ਸੀ। ਹੋ ਸਕਦਾ ਹੈ 'ਰਾਜੂ ਚਾਚਾ', 'ਇਸ਼ਕ', 'ਗੁੰਡਾਰਾਜ' ਦੀ ਤਰ੍ਹਾਂ ਕਾਜੋਲ ਦੀ ਇਹ ਨਵੀਂ ਫ਼ਿਲਮ 2020 ਸ਼ੁਰੂ ਹੁੰਦਿਆਂ ਹੀ ਸੈੱਟ 'ਤੇ ਚਲੀ ਜਾਏ। ਆਪਣੀ ਨਾਨੀ ਸ਼ੋਭਨਾ ਸਮਰੱਥ ਦੇ ਪਿਆਰ ਨੂੰ ਹੀ ਆਪਣੀ ਕਾਮਯਾਬੀ ਦਾ ਰਾਜ਼ ਸਮਝਣ ਵਾਲੀ ਕਾਜੋਲ ਨੇ ਸੋਲਵੇਂ ਸਾਲ 'ਚ ਹੀਰੋਇਨ ਬਣਨ ਦਾ ਸੁਪਨਾ ਤਾਂ ਪੂਰਾ ਕਰ ਲਿਆ ਪਰ ਅਫ਼ਸੋਸ ਉਹ ਗ੍ਰੈਜੂਏਟ ਨਹੀਂ ਬਣ ਸਕੀ। ਭਗਵਾਨ ਸ਼ਿਵ ਦੀ ਉਹ ਅਥਾਹ ਭਗਤਣੀ ਹੈ ਤੇ ਸ਼ਿਵ ਦੀ ਅਰਾਧਨਾ ਉਸ ਲਈ ਜ਼ਰੂਰੀ ਹੈ। 'ਓਮ' ਜਿਸ ਅੰਗੂਠੀ 'ਤੇ ਲਿਖਿਆ ਹੈ, ਉਹ ਕਾਜੋਲ ਪਹਿਨਦੀ ਹੈ 16 ਸਾਲ ਦੀ ਉਮਰ ਤੋਂ ਅੱਜ 45 ਸਾਲ ਦੀ ਹੋਣ ਤੱਕ। 'ਕਲਰਜ਼ ਚੈਨਲ' ਦੇ 'ਡਾਂਸ ਦੀਵਾਨੇ' ਸ਼ੋਅ 'ਚ 'ਯੇ ਕਾਲੀ ਕਾਲੀ ਜੁਲਫੇਂ' 'ਤੇ ਕਾਜੋਲ ਦੇ ਨਾਚ ਨੇ ਤਾਂ ਅੱਜ ਦੀਆਂ ਕੈਟਰੀਨਾ-ਕਰੀਨਾਵਾਂ ਤੇ ਅਨੁਸ਼ਕਾਵਾਂ ਨੂੰ ਹੱਥਾਂ-ਪੈਰਾਂ ਦੀ ਪਾ ਦਿੱਤੀ।

ਆ ਰਹੀ ਨਵੀਂ ਫ਼ਿਲਮ 'ਜੰਕਸ਼ਨ ਵਾਰਾਣਸੀ'

ਅਦਾਕਾਰ ਤੋਂ ਨਿਰਦੇਸ਼ਕ ਬਣੇ ਧੀਰਜ ਪੰਡਿਤ ਨੇ ਫ਼ਿਲਮ 'ਜੰਕਸ਼ਨ ਵਾਰਾਣਸੀ' ਦੇ ਨਿਰਦੇਸ਼ਨ ਦੀ ਵਾਗਡੋਰ ਆਪਣੇ ਹੱਥ ਵਿਚ ਫੜ ਕੇ ਆਪਣੀ ਨਵੀਂ ਪਾਰੀ ਦੀ ਸ਼ੁਰੂਆਤ ਕੀਤੀ ਹੈ। ਅਮਰ (ਦੇਵ ਸ਼ਰਮਾ) ਤੇ ਬਿੰਦੂ ਪ੍ਰੇਮ (ਧੀਰਜ ਪੰਡਿਤ) ਵਾਰਾਣਸੀ ਨਾਲ ਲਗਦੇ ਛੋਟੇ ਜਿਹੇ ਪਿੰਡ ਪਿੰਪਰੀ ਵਿਚ ਰਹਿੰਦੇ ਹੁੰਦੇ ਹਨ। ਇਨ੍ਹਾਂ ਦੇ ਪਰਿਵਾਰ ਦੀ ਸਾਧੂ ਚਰਨ (ਅਨੁਪਮ ਸ਼ਿਆਮ ਓਝਾ) ਨਾਲ ਪੁਰਾਣੀ ਦੁਸ਼ਮਣੀ ਹੈ ਅਤੇ ਇਕ ਦਿਨ ਸਾਧੂ ਚਰਨ ਵਲੋਂ ਰਚੇ ਗਏ ਪ੍ਰਪੰਚ ਦਾ ਸ਼ਿਕਾਰ ਬਿੰਦੂ ਪ੍ਰੇਮ ਹੋ ਜਾਂਦਾ ਹੈ ਪਰ ਉਹ ਆਪਣੇ ਭਰਾ ਅਮਰ ਨੂੰ ਬਚਾਅ ਲੈਣ ਵਿਚ ਕਾਮਯਾਬ ਰਹਿੰਦਾ ਹੈ। ਇਸ ਪ੍ਰਪੰਚ ਦੀ ਵਜ੍ਹਾ ਨਾਲ ਬਿੰਦੂ ਪ੍ਰੇਮ ਨੂੰ ਦਿਮਾਗ਼ੀ ਠੇਸ ਪਹੁੰਚਦੀ ਹੈ ਅਤੇ ਉਹ ਸੋਚਣ ਤੇ ਸਮਝਣ ਦੀ ਸ਼ਕਤੀ ਗਵਾ ਬੈਠਦਾ ਹੈ। ਬਿੰਦੂ ਪ੍ਰੇਮ ਦੀ ਇਸ ਕਮਜ਼ੋਰੀ ਦੀ ਵਜ੍ਹਾ ਕਰਕੇ ਸਾਧੂ ਚਰਨ ਉਸ ਨੂੰ ਸ਼ਰਾਬ ਤੇ ਜੂਏ ਦੀ ਆਦਤ ਲਗਾ ਦਿੰਦਾ ਹੈ, ਤਾਂ ਕਿ ਉਹ ਆਪਣੇ ਪਰਿਵਾਰ ਨੂੰ ਬਰਬਾਦ ਕਰ ਦੇਵੇ। ਵਿਗੜੇ ਬੇਟੇ ਨੂੰ ਸਹੀ ਰਸਤੇ ਲਿਆਉਣ ਲਈ ਮਾਂ (ਜ਼ਰੀਨਾ ਵਹਾਬ) ਉਸ ਦਾ ਵਿਆਹ ਅੰਜਲੀ (ਅੰਜਲੀ ਅਬਰੋਲ) ਨਾਲ ਕਰਵਾ ਦਿੰਦੀ ਹੈ। ਅਸਲ ਵਿਚ ਅੰਜਲੀ ਨੂੰ ਅਮਰ ਨਾਲ ਪਿਆਰ ਹੈ ਅਤੇ ਅਮਰ ਵੀ ਉਸ ਨੂੰ ਚਾਹੁੰਦਾ ਹੁੰਦਾ ਹੈ ਪਰ ਜਦੋਂ ਅਮਰ ਨੂੰ ਮਾਂ ਵਲੋਂ ਤੈਅ ਕੀਤੇ ਗਏ ਰਿਸ਼ਤੇ ਬਾਰੇ ਪਤਾ ਲੱਗਦਾ ਹੈ ਤਾਂ ਉਹ ਖ਼ੁਦ 'ਤੇ ਆਪਣੇ ਭਰਾ ਦਾ ਪੁਰਾਣਾ ਅਹਿਸਾਨ ਦੇਖ ਕੇ ਆਪਣੇ ਪਿਆਰ ਦੀ ਕੁਰਬਾਨੀ ਦੇਣਾ ਠੀਕ ਸਮਝਦਾ ਹੈ। ਇਸ ਦਾ ਨਤੀਜਾ ਕੀ ਆਉਂਦਾ ਹੈ, ਇਹ ਇਸ ਦੀ ਕਹਾਣੀ ਹੈ। ਪੂਰੀ ਤਰ੍ਹਾਂ ਨਾਲ ਵਾਰਾਣਸੀ ਭਾਵ ਬਨਾਰਸ ਤੇ ਇਸ ਦੇ ਆਲੇ-ਦੁਆਲੇ ਫ਼ਿਲਮਾਈ ਗਈ ਇਸ ਫ਼ਿਲਮ ਵਿਚ ਉਥੋਂ ਦੇ ਸੱਭਿਆਚਾਰ ਨੂੰ ਪੇਸ਼ ਕੀਤਾ ਗਿਆ ਹੈ।

-ਮੁੰਬਈ ਪ੍ਰਤੀਨਿਧ

ਮੁੜ ਹੋਈ ਸਰਗਰਮ ਆਰਤੀ ਨਾਗਪਾਲ

ਬਾਲੀਵੁੱਡ ਵਿਚ ਆਰਤੀ ਨਾਗਪਾਲ ਦੀ ਪਛਾਣ ਦੇਵ ਆਨੰਦ ਦੀ ਖੋਜ ਦੇ ਤੌਰ 'ਤੇ ਹੁੰਦੀ ਹੈ। ਉਸ ਨੂੰ ਦੇਵ ਆਨੰਦ ਵਲੋਂ ਫ਼ਿਲਮ 'ਗੈਂਗਸਟਰ' ਵਿਚ ਮੌਕਾ ਦਿੱਤਾ ਗਿਆ ਸੀ। ਉਸ ਤੋਂ ਬਾਅਦ ਆਰਤੀ ਨੇ 'ਵਜ੍ਹਾ', 'ਏਕ ਥਾ ਰਾਜਾ', 'ਹੋਲੀਡੇ', 'ਖੁੱਦਾਰ' (ਗੋਵਿੰਦਾ) ਸਮੇਤ ਕਈ ਫ਼ਿਲਮਾਂ ਕੀਤੀਆਂ ਤੇ ਲੜੀਵਾਰਾਂ ਵਿਚ ਵੀ ਕੰਮ ਕੀਤਾ। ਪਹਿਲਾਂ ਉਸ ਦਾ ਨਾਂਅ ਆਕ੍ਰਿਤੀ ਸੀ ਜੋ ਬਾਅਦ ਵਿਚ ਬਦਲ ਕੇ ਆਰਤੀ ਕਰ ਦਿੱਤਾ।
ਹੁਣ ਆਰਤੀ ਨੇ ਇਕ ਗੀਤ 'ਐਲੀਫੈਂਟ ਹੈੱਡ' ਲਈ ਬਣੇ ਵੀਡੀਓ ਵਿਚ ਕੰਮ ਕੀਤਾ ਹੈ। ਇਹ ਗੀਤ ਗਣੇਸ਼ ਜੀ 'ਤੇ ਬਣਾਇਆ ਗਿਆ ਹੈ ਅਤੇ ਆਰਤੀ ਦੇ ਬੇਟੇ ਵੇਦਾਂਤ ਇਸ ਗੀਤ ਦੇ ਰਚੇਤਾ, ਗਾਇਕ ਤੇ ਸੰਗੀਤਕਾਰ ਹਨ। ਬੇਟੇ ਦੀ ਇਸ ਰਚਨਾ ਤੋਂ ਮਾਂ ਕਾਫੀ ਖ਼ੁਸ਼ ਹੈ ਅਤੇ ਉਹ ਕਹਿੰਦੀ ਹੈ, 'ਵੇਦਾਂਤ ਦੀ ਫ਼ਿਲਮ ਮੇਕਿੰਗ ਵੱਲ ਰੁਚੀ ਸ਼ੁਰੂ ਤੋਂ ਰਹੀ ਹੈ। ਜਦੋਂ ਉਹ 18 ਸਾਲ ਦਾ ਸੀ ਉਦੋਂ ਉਸ ਨੇ ਆਪਣੇ ਦੋਸਤ ਨਾਲ ਮਿਲ ਕੇ ਇਕ ਲਘੂ ਫ਼ਿਲਮ 'ਸਟਾਪ ਰਨਿੰਗ' ਬਣਾਈ ਸੀ ਅਤੇ ਇਸ ਵਿਚ ਆਪਣੀਆਂ ਜ਼ਿੰਮੇਵਾਰੀਆਂ ਤੋਂ ਨਾ ਭੱਜਣ ਦਾ ਸੰਦੇਸ਼ ਦਿੱਤਾ ਗਿਆ ਸੀ। ਫਿਰ ਉਸ ਨੇ ਇਕ ਹੋਰ ਲਘੂ ਫ਼ਿਲਮ 'ਡਜ਼ ਇਟ ਹਰਟ' ਬਣਾਈ ਸੀ ਅਤੇ ਇਸ ਦੀ ਖ਼ਾਸ ਗੱਲ ਇਹ ਸੀ ਕਿ ਤਿੰਨ ਮਿੰਟ ਦੀ ਇਹ ਲਘੂ ਫ਼ਿਲਮ ਇਕ ਹੀ ਸ਼ਾਟ ਵਿਚ ਫ਼ਿਲਮਾਈ ਗਈ ਸੀ। ਇਹ ਗੀਤ 'ਐਲੀਫੰਟ ਹੈੱਡ' ਵੀ ਉਸ ਦੀ ਕਲਪਨਾ ਹੈ। ਮੈਂ ਵਰਸੋਵਾ ਵਿਚ ਰਹਿੰਦੀ ਹਾਂ ਅਤੇ ਸਾਹਮਣੇ ਸਮੁੰਦਰ ਹੈ ਜਿਥੇ ਗਣਪਤੀ ਦੀਆਂ ਮੂਰਤੀਆਂ ਨੂੰ ਵਿਸਰਜਿਤ ਕੀਤਾ ਜਾਂਦਾ ਹੈ। ਵਿਸਰਜਨ ਦੇ ਦੂਜੇ ਦਿਨ ਹਜ਼ਾਰਾਂ ਮੂਰਤੀਆਂ ਮਾੜੀ ਹਾਲਤ ਵਿਚ ਸਮੁੰਦਰ ਕਿਨਾਰੇ ਪਾਈਆਂ ਜਾਂਦੀਆਂ ਹਨ। ਇਹ ਦੇਖ ਕੇ ਵੇਦਾਂਤ ਦਾ ਦਿਲ ਦੁਖੀ ਹੋ ਉੱਠਦਾ ਹੈ ਅਤੇ ਆਪਣਾ ਦਰਦ ਉਸ ਨੇ ਗੀਤ ਜ਼ਰੀਏ ਪੇਸ਼ ਕੀਤਾ ਹੈ।'
ਇਸ ਵੀਡੀਓ ਵਿਚ ਆਰਤੀ ਨੂੰ ਕਾਲੇ ਕੱਪੜੇ ਪਾਈ ਨ੍ਰਿਤ ਕਰਦੇ ਦਿਖਾਇਆ ਗਿਆ ਹੈ। ਕਾਲੇ ਕੱਪੜੇ ਪਾਉਣ ਦੀ ਵਜ੍ਹਾ ਬਾਰੇ ਉਹ ਕਹਿੰਦੀ ਹੈ ਕਿ ਉਹ ਵੀਡੀਓ ਵਿਚ ਮਾਨਵ ਜਾਤੀ ਦੀ ਅਗਵਾਈ ਕਰ ਰਹੀ ਹੈ। ਕਾਲੇ ਕੱਪੜੇ ਨਾਂਹਪੱਖੀ ਐਨਰਜੀ ਦਾ ਪ੍ਰਤੀਕ ਹਨ ਅਤੇ ਗਣੇਸ਼ ਜੀ ਦੀ ਮੂਰਤੀ ਸਾਹਮਣੇ ਨ੍ਰਿਤ ਕਰ ਕੇ ਇਹ ਦਿਖਾਇਆ ਗਿਆ ਹੈ ਕਿ ਆਪਣੇ ਸਵਾਰਥ ਲਈ ਮਾਨਵ ਜਾਤੀ ਭਗਵਾਨ ਨੂੰ ਵੀ ਠੱਗ ਰਹੀ ਹੈ। ਆਰਤੀ ਦੇ ਕਈ ਜਾਣੂ ਨਿਰਮਾਤਾ ਤੇ ਨਿਰਦੇਸ਼ਕਾਂ ਨੇ ਇਸ ਵੀਡੀਓ ਦੀ ਤਾਰੀਫ਼ ਕੀਤੀ ਹੈ ਅਤੇ ਇਸ ਤਾਰੀਫ਼ ਦੀ ਬਦੌਲਤ ਮਾਂ-ਬੇਟੇ ਦਾ ਹੌਸਲਾ ਵਧਣਾ ਸੁਭਾਵਿਕ ਹੀ ਹੈ।
-ਮੁੰਬਈ ਪ੍ਰਤੀਨਿਧ

ਗੌਰਵ ਡਾਗਰ ਦਾ ਵੱਡੇ ਪਰਦੇ ਦਾ ਸਫ਼ਰ ਸ਼ੁਰੂ

ਮੇਰਠ ਵਾਸੀ ਗੌਰਵ ਡਾਗਰ ਜਦੋਂ ਪੜ੍ਹਾਈ ਕਰ ਰਹੇ ਸਨ, ਉਨ੍ਹਾਂ ਉਦੋਂ ਹੀ ਸੋਚ ਲਿਆ ਸੀ ਕਿ ਜ਼ਿੰਦਗੀ ਵਿਚ ਕੁਝ ਵੱਡਾ ਕਰਨਾ ਹੈ। ਉਨ੍ਹਾਂ ਦੇ ਜ਼ਿਆਦਾਤਰ ਰਿਸ਼ਤੇਦਾਰ ਫ਼ੌਜ ਵਿਚ ਹਨ। ਸੋ, ਘਰਵਾਲਿਆਂ ਦੀ ਇੱਛਾ ਸੀ ਕਿ ਬੇਟਾ ਵੀ ਫ਼ੌਜ ਵਿਚ ਜਾਵੇ ਪਰ ਕੁਝ ਵੱਡਾ ਕਰਨ ਦੀ ਇੱਛਾ ਗੌਰਵ ਨੂੰ ਫ਼ੌਜ ਵਿਚ ਜਾਣ ਤੋਂ ਰੋਕ ਰਹੀ ਸੀ ਅਤੇ ਇਹੀ ਇੱਛਾ ਉਸ ਨੂੰ ਅਭਿਨੈ ਦੀ ਦੁਨੀਆ ਵਿਚ ਲੈ ਆਈ। ਇਥੇ ਉਸ ਨੂੰ ਕਾਫ਼ੀ ਸੰਘਰਸ਼ ਕਰਨਾ ਪਿਆ ਪਰ ਉਸ ਦੇ ਹੌਸਲੇ ਪਸਤ ਨਹੀਂ ਹੋਏ। ਇਸ ਮਹਾਨਗਰ ਦੀਆਂ ਕਾਫ਼ੀ ਸੜਕਾਂ ਨਾਪ ਲੈਣ ਤੋਂ ਬਾਅਦ ਉਸ ਨੂੰ ਲੜੀਵਾਰ 'ਪੇਸ਼ਵਾ ਬਾਜੀਰਾਓ' ਵਿਚ ਮੁਗ਼ਲ ਸੈਨਾਪਤੀ ਦੀ ਭੂਮਿਕਾ ਮਿਲੀ। ਇਸ ਭੂਮਿਕਾ ਨਾਲ ਉਹ ਨਿਆਂ ਕਰਨ ਵਿਚ ਸਫ਼ਲ ਰਿਹਾ ਤਾਂ ਅਤੇ ਲੜੀਵਾਰ ਮਿਲੇ ਅਤੇ ਹੁਣ ਤੱਕ ਉਹ ਪੰਜਾਹ ਤੋਂ ਜ਼ਿਆਦਾ ਲੜੀਵਾਰ ਕਰ ਚੁੱਕਿਆ ਹੈ ਅਤੇ ਇਨ੍ਹਾਂ ਵਿਚ 'ਏਕਲਵਿਆ', 'ਇਸ਼ਕ ਮੇਂ ਮਰਜਾਵਾਂ', 'ਸ਼ਕਤੀ ਅਹਿਸਾਸ ਕੀ', 'ਮੁਸਕਾਨ', 'ਯੇ ਰਿਸ਼ਤਾ ਕਿਆ ਕਹਿਲਾਤਾ ਹੈ' ਮੁੱਖ ਹਨ। ਜੁਰਮ 'ਤੇ ਆਧਾਰਿਤ ਸ਼ੋਅ 'ਕ੍ਰਾਈਮ ਪੈਟਰੋਲ' ਦੇ ਵੀ ਕਈ ਐਪੀਸੋਡ ਕੀਤੇ ਹਨ ਅਤੇ ਜ਼ਿਆਦਾਤਰ ਵਿਚ ਉਹ ਪੁਲਿਸ ਦੀ ਵਰਦੀ ਵਿਚ ਨਜ਼ਰ ਆਏ ਸਨ। ਹੁਣ ਕੁਝ ਵੱਡਾ ਕਰਨ ਦੀ ਇੱਛਾ ਉਸ ਨੂੰ ਵੱਡੇ ਪਰਦੇ 'ਤੇ ਲੈ ਆਈ ਹੈ ਅਤੇ ਉਹ ਦੋ ਫ਼ਿਲਮਾਂ ਰਾਹੀਂ ਵੱਡੇ ਪਰਦੇ 'ਤੇ ਆਪਣਾ ਆਗਮਨ ਕਰ ਰਹੇ ਹਨ। ਇਨ੍ਹਾਂ ਵਿਚੋਂ ਇਕ ਹੈ-'ਗੁਲ ਮਕਾਹ' ਜੋ ਪਾਕਿਸਤਾਨੀ ਲੜਕੀ ਮਲਾਲਾ ਯੂਸਫ਼ਜ਼ਈ ਦੇ ਜੀਵਨ 'ਤੇ ਆਧਾਰਿਤ ਹੈ। ਇਸ ਵਿਚ ਗੌਰਵ ਦੇ ਹਿੱਸੇ ਪਾਕਿਸਤਾਨੀ ਪੁਲਿਸ ਅਧਿਕਾਰੀ ਦੀ ਭੂਮਿਕਾ ਆਈ ਹੈ ਅਤੇ ਗੌਰਵ ਅਨੁਸਾਰ 'ਕ੍ਰਾਈਮ ਪੈਟਰੋਲ' ਵਿਚ ਪੁਲਸੀਆ ਵਰਦੀ ਪਾਉਣ ਦਾ ਅਨੁਭਵ ਇਥੇ ਕਾਫ਼ੀ ਕੰਮ ਆਇਆ ਸੀ। ਉਸ ਦੀ ਦੂਜੀ ਫ਼ਿਲਮ ਹੈ 'ਫ਼ੌਜੀ ਕਾਲਿੰਗ' ਅਤੇ ਇਸ ਵਿਚ ਸ਼ਰਮਨ ਜੋਸ਼ੀ, ਮੁਗਧਾ ਗੋਡਸੇ, ਜ਼ਰੀਨਾ ਵਹਾਬ ਵੀ ਹਨ। ਗੌਰਵ ਨੂੰ ਮਨੋਜ ਵਾਜਪਾਈ ਦੀ ਵੈੱਬ ਸੀਰੀਜ਼ 'ਫੈਮਲੀ ਮੈਨ' ਵਿਚ ਵੀ ਲਿਆ ਗਿਆ ਹੈ ਅਤੇ ਇਹ ਐਮਾਜ਼ੋਨ ਲਈ ਬਣਾਈ ਗਈ ਹੈ। ਗੌਰਵ ਨੇ ਆਪਣਾ ਬੈਨਰ ਸਥਾਪਿਤ ਕਰ ਕੇ ਫ਼ਿਲਮ ਨਿਰਮਾਣ ਵੱਲ ਵੀ ਆਪਣਾ ਰੁਖ਼ ਕੀਤਾ ਹੈ। ਉਸ ਦੇ ਬੈਨਰ ਦਾ ਨਾਂਅ ਹੈ ਕਲਾਕਾਰਜ਼ ਐਂਟਰਟੇਨਮੈਂਟ ਅਤੇ ਇਸ ਰਾਹੀਂ ਲਘੂ ਫ਼ਿਲਮ 'ਜਾਨਿਬ-ਏ-ਮੰਝਿਲ' ਦਾ ਨਿਰਮਾਣ ਕੀਤਾ ਗਿਆ ਹੈ ਅਤੇ ਇਸ ਦਾ ਨਿਰਮਾਣ ਕੌਮਾਂਤਰੀ ਐਵਾਰਡ ਹਾਸਲ ਕਰਨ ਦੇ ਮਕਸਦ ਨਾਲ ਕੀਤਾ ਗਿਆ ਹੈ। ਉਹ ਕਹਿੰਦੇ ਹਨ, 'ਸਾਡੇ ਦੇਸ਼ ਕੋਲ ਦੋ ਕ੍ਰਿਕਟ ਵਰਲਡ ਕੱਪ ਹਨ ਪਰ ਕੋਈ ਦੋ ਨਾਮੀ ਕੌਮਾਂਤਰੀ ਐਵਾਰਡ ਨਹੀਂ ਹੈ। ਇਹੀ ਦਿਖਾਉਂਦਾ ਹੈ ਕਿ ਮਿਆਰੀ ਫ਼ਿਲਮਾਂ ਬਣਾਉਣ ਵਿਚ ਅਸੀਂ ਹੁਣ ਵੀ ਪਿੱਛੇ ਹਾਂ। ਮੇਰੀ ਇੱਛਾ ਵੱਡੇ ਐਵਾਰਡ ਜਿੱਤਣ ਲਾਇਕ ਫ਼ਿਲਮਾਂ ਬਣਾਉਣ ਦੀ ਹੈ।'
ਉਮੀਦ ਹੈ ਕਿ ਦੇਸ਼ ਦਾ ਨਾਂਅ ਰੌਸ਼ਨ ਕਰਨ ਦੇ ਮਕਸਦ ਵਿਚ ਉਹ ਜ਼ਰੂਰ ਕਾਮਯਾਬ ਹੋਣਗੇ।

ਟੀਨਾ ਆਹੂਜਾ ਕੰਮ ਦੇਖ ਭਾਵੁਕ ਹੋਏ ਗੋਵਿੰਦਾ

ਗੋਵਿੰਦਾ ਦੀ ਬੇਟੀ ਟੀਨਾ ਆਹੂਜਾ ਨੇ ਫ਼ਿਲਮ 'ਸੈਕਿੰਡ ਹੈਂਡ ਹਸਬੈਂਡ' ਰਾਹੀਂ ਅਭਿਨੈ ਦੀ ਦੁਨੀਆ ਵਿਚ ਦਾਖ਼ਲਾ ਲਿਆ ਸੀ। ਇਹ ਗੱਲ ਵੱਖਰੀ ਹੈ ਕਿ ਇਹ ਫ਼ਿਲਮ ਟੀਨਾ ਦਾ ਫ਼ਿਲਮੀ ਕੈਰੀਅਰ ਸੰਵਾਰਨ ਵਿਚ ਨਾਕਾਮਯਾਬ ਰਹੀ ਅਤੇ ਟੀਨਾ ਬਤੌਰ ਅਭਿਨੇਤਰੀ ਰੁੱਝੀ ਨਹੀਂ ਰਹਿ ਸਕੀ।
ਹੁਣ ਬਾਲੀਵੁੱਡ ਵਿਚ ਆਪਣੀ ਮੌਜੂਦਗੀ ਦੀ ਯਾਦ ਦਿਵਾਉਂਦੇ ਹੋਏ ਟੀਨਾ ਨੇ ਇਕ ਗੀਤ 'ਮਿਲੋ ਨਾ ਤੁਮ' ਦੇ ਵੀਡੀਓ ਵਿਚ ਕੰਮ ਕੀਤਾ ਹੈ। ਫ਼ਿਲਮ 'ਹੀਰ ਰਾਂਝਾ' ਦੇ ਇਸ ਗੀਤ ਨੂੰ ਗਾਇਕ-ਸੰਗੀਤਕਾਰ ਗਜੇਂਦਰ ਵਰਮਾ ਵਲੋਂ ਨਵੇਂ ਰੂਪ ਵਿਚ ਪੇਸ਼ ਕੀਤਾ ਗਿਆ ਹੈ ਅਤੇ ਉਹ ਹੀ ਟੀਨਾ ਦੇ ਨਾਲ ਇਸ ਵੀਡੀਓ ਵਿਚ ਚਮਕੇ ਹਨ।
ਖਰਚੀਲੇ ਫ਼ਿਲਮਾਂਕਣ ਵਾਲੇ ਇਸ ਵੀਡੀਓ ਦਾ ਨਿਰਮਾਣ ਹਿਤੇਂਦਰ ਕਪੋਪਾਰਾ ਵਲੋਂ ਕੀਤਾ ਗਿਆ ਹੈ ਅਤੇ ਇਸ ਗੀਤ ਤੇ ਵੀਡੀਓ ਦੇ ਉਦਘਾਟਨ ਲਈ ਕੀਤੇ ਗਏ ਸਮਾਰੋਹ ਵਿਚ ਗੋਵਿੰਦਾ ਵਿਸ਼ੇਸ਼ ਤੌਰ 'ਤੇ ਮੌਜੂਦ ਰਹੇ ਸਨ।
ਉਥੇ ਜਦੋਂ ਸਕਰੀਨ 'ਤੇ ਵੀਡੀਓ ਦਿਖਾਇਆ ਗਿਆ ਤਾਂ ਪਰਦੇ 'ਤੇ ਬੇਟੀ ਨੂੰ ਦੇਖ ਕੇ ਗੋਵਿੰਦਾ ਭਾਵੁਕ ਹੋ ਗਏ ਸਨ। ਵੀਡੀਓ ਬਾਰੇ ਉਹ ਕਹਿਣ ਲੱਗੇ, 'ਮੈਂ ਗਜੇਂਦਰ ਵਰਮਾ ਤੇ ਹਿਤੇਂਦਰ ਕਪੋਪਾਰਾ ਨੂੰ ਪਹਿਲਾਂ ਤੋਂ ਜਾਣਦਾ ਹਾਂ। ਜਦੋਂ ਉਹ ਆਪਣੇ ਵੀਡੀਓ ਵਿਚ ਟੀਨਾ ਨੂੰ ਚਮਕਾਉਣ ਦੀ ਪੇਸ਼ਕਸ਼ ਲੈ ਕੇ ਮੇਰੇ ਕੋਲ ਆਏ ਤਾਂ ਇਹ ਵਿਸ਼ਵਾਸ ਦਿਵਾਇਆ ਸੀ ਕਿ ਉਹ ਇਸ ਦੇ ਫ਼ਿਲਮਾਂਕਣ ਵਿਚ ਕੋਈ ਘਾਟ ਨਹੀਂ ਰਹਿਣ ਦੇਣਗੇ ਅਤੇ ਹੁਣ ਜਦੋਂ ਇਹ ਵੀਡੀਓ ਦੇਖਿਆ ਤਾਂ ਮੈਂ ਇਹ ਕਹਿ ਸਕਦਾ ਹਾਂ ਕਿ ਇਹ ਮੇਰੀਆਂ ਉਮੀਦਾਂ ਤੋਂ ਵੀ ਜ਼ਿਆਦਾ ਚੰਗਾ ਬਣਿਆ ਹੈ। ਖ਼ਾਸ ਗੱਲ ਇਹ ਹੈ ਕਿ ਵੀਡੀਓ ਵਿਚ ਨੌਜਵਾਨ ਅਪੀਲ ਹੈ ਪਰ ਕਿਤੇ ਵੀ ਸਸਤਾਪਣ ਨਹੀਂ ਹੈ। ਟੀਨਾ ਨੂੰ ਇਸ ਵਿਚ ਆਕਰਸ਼ਕ ਢੰਗ ਨਾਲ ਪੇਸ਼ ਕੀਤਾ ਗਿਆ ਹੈ ਅਤੇ ਉਸ ਦੇ ਕੰਮ ਤੋਂ ਮੈਂ ਬਹੁਤ ਖੁਸ਼ ਹਾਂ।'
ਉਂਝ ਪਹਿਲਾਂ ਕਈ ਵਾਰ ਇਹ ਦੇਖਣ ਵਿਚ ਆਇਆ ਹੈ ਕਿ ਇਕ ਵੀਡੀਓ ਦੀ ਬਦੌਲਤ ਕਲਾਕਾਰ ਦਾ ਕੈਰੀਅਰ ਸੰਵਰ ਜਾਂਦਾ ਹੈ। ਹੁਣ ਇਹ ਵੀਡੀਓ ਟੀਨਾ ਦਾ ਕੈਰੀਅਰ ਸੰਵਾਰਨ ਵਿਚ ਕਿੰਨਾ ਸਫ਼ਲ ਰਹਿੰਦਾ ਹੈ, ਇਹ ਤਾਂ ਆਉਣ ਵਾਲਾ ਸਮਾਂ ਹੀ ਦੱਸੇਗਾ।

ਲੱਚਰ ਗਾਇਕੀ ਤੋਂ ਦੂਰ ਰਹਿਣ ਵਾਲੀ ਦੋਗਾਣਾ ਜੋੜੀ ਵੀਰ ਸਤਵੰਤ ਤੇ ਸ਼ੈਲੀ ਸਾਜਨ

'ਮੁੰਡਾ ਦੁਬਈ ਚੱਲਿਆ', 'ਬਾਰਾਂ ਬੋਰ ਦੋਨਾਲੀ', 'ਪੁੱਤ ਅਣਖੀ ਜੱਟਾਂ ਦੇ', 'ਸੁਭਾਅ ਦਾ ਸਾਧੂ' ਆਦਿ ਦੋਗਾਣਾ ਕੈਸੇਟਾਂ ਨਾਲ ਸੰਗੀਤ ਪ੍ਰੇਮੀਆਂ ਦਾ ਮੋਹ ਪਿਆਰ ਹਾਸਲ ਕਰਨ ਵਾਲੀ ਗਾਇਕ ਜੋੜੀ ਵੀਰ ਸਤਵੰਤ ਸਾਜਨ ਤੇ ਸ਼ੈਲੀ ਸਾਜਨ ਪਿਛਲੇ ਦੋ ਦਹਾਕਿਆਂ ਤੋਂ ਗਾਇਕੀ ਖੇਤਰ ਵਿਚ ਛਾਈ ਹੋਈ ਹੈ। ਵੀਰ ਸਤਵੰਤ ਸਾਜਨ ਨੇ ਕਰੀਬ ਪੰਝੀ ਸਾਲ ਪਹਿਲਾਂ ਉਸਤਾਦ ਸ੍ਰੀ ਪ੍ਰੇਮ ਅਣਜਾਣ ਪਾਸੋਂ ਸੰਗੀਤ ਦੀਆਂ ਬਾਰੀਕੀਆਂ ਸਿੱਖੀਆਂ ਤੇ 'ਸੋਨੇ ਦਾ ਹਾਰ', 'ਲਲਕਾਰਾ ਜੱਟ ਦਾ' ਤੋਂ ਇਲਾਵਾ ਮਾਤਾ ਦੀਆਂ ਭੇਟਾਂ ਦੇ ਸਿੰਗਲ ਟਰੈਕ ਵੀ ਰਿਕਾਰਡ ਕਰਵਾਏ।
ਹੁਣ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ 550 ਸਾਲਾ ਪ੍ਰਕਾਸ਼ ਪੁਰਬ ਨੂੰ ਸਮਰਪਿਤ ਸਿੰਗਲ ਟਰੈਕ 'ਮੇਰੇ ਬਾਬਾ ਨਾਨਕ ਜੀ' ਵੀ ਸਰੋਤਿਆਂ ਵਿਚ ਪ੍ਰਵਾਨ ਹੋ ਰਿਹਾ ਹੈ। ਵੀਰ ਸਤਵੰਤ ਸਾਜਨ ਦਾ ਜਨਮ ਜ਼ਿਲ੍ਹਾ ਅੰਮ੍ਰਿਤਸਰ ਦੇ ਪਿੰਡ ਠੱਠੀਆਂ ਵਿਚ ਮਾਤਾ ਸੇਵਾ ਕੌਰ ਦੀ ਕੁੱਖੋਂ ਪਿਤਾ ਸਰਦਾਰ ਠਾਕਰ ਸਿੰਘ ਦੇ ਗ੍ਰਹਿ ਵਿਖੇ ਹੋਇਆ। ਬਚਪਨ ਤੋਂ ਹੀ ਗਾਇਕੀ ਦਾ ਸ਼ੌਕ ਪਾਲਣ ਵਾਲੇ ਵੀਰ ਸਾਜਨ ਦੀ ਰੋਜ਼ੀ-ਰੋਟੀ ਦਾ ਵਸੀਲਾ ਵੀ ਗਾਇਕੀ ਹੀ ਬਣੀ ਹੈ। 100 ਦੇ ਕਰੀਬ ਗੀਤ ਰਿਕਾਰਡ ਕਰਵਾ ਚੁੱਕੀ ਇਸ ਮਾਝੇ ਦੀ ਮਸ਼ਹੂਰ ਗਾਇਕ ਜੋੜੀ ਦੇ ਅਨੇਕਾਂ ਗੀਤ ਦੂਰਦਰਸ਼ਨ ਸਮੇਤ ਕਈ ਚੈਨਲਾਂ ਦਾ ਸ਼ਿੰਗਾਰ ਵੀ ਬਣੇ ਹਨ।
ਸੰਗੀਤਕਾਰ ਗੌਤਮ, ਸਰਦਾਰ ਗੁਰਮੀਤ ਸਿੰਘ ਦੇ ਸੰਗੀਤ ਵਿਚ ਗੀਤ ਰਿਕਾਰਡ ਕਰਵਾਉਣ ਵਾਲੀ ਇਸ ਗਾਇਕ ਜੋੜੀ ਨੇ ਹੁਣ ਤੱਕ ਨਿਸ਼ਾਨ ਕਲੇਰ, ਝਿਰਮਲ ਘੁੱਕੇਵਾਲੀ, ਪੰਛੀ ਰਣਗੜ੍ਹ, ਪਰਿੰਦਾ ਬਰਵਾਲਾ, ਬਾਗਾ ਲੱਧੜ, ਮਨਜੀਤ ਕਲੇਰ ਆਦਿ ਗੀਤਕਾਰਾਂ ਦੇ ਗੀਤਾਂ ਨੂੰ ਆਪਣੀ ਆਵਾਜ਼ ਨਾਲ ਸ਼ਿੰਗਾਰਿਆ ਹੈ। ਅਨੇਕਾਂ ਸੱਭਿਆਚਾਰਕ ਮੇਲਿਆਂ 'ਚੋਂ ਮਾਣ-ਸਨਮਾਨ ਪ੍ਰਾਪਤ ਕਰ ਚੁੱਕੀ ਇਸ ਦੋਗਾਣਾ ਗਾਇਕ ਜੋੜੀ ਨੇ ਹਮੇਸ਼ਾ ਲੱਚਰ ਗਾਇਕੀ ਤੋਂ ਦੂਰ ਰਹਿ ਕੇ ਸੱਭਿਆਚਾਰਕ ਅਤੇ ਪਰਿਵਾਰਕ ਗੀਤਾਂ ਨੂੰ ਪਹਿਲ ਦਿੱਤੀ ਹੈ। ਨਸ਼ਿਆਂ ਅਤੇ ਹਥਿਆਰਾਂ ਦਾ ਪ੍ਰਦਰਸ਼ਨ ਕਰਨ ਵਾਲੀ ਗਾਇਕੀ ਦੀ ਆਲੋਚਨਾ ਕਰਦਿਆਂ ਵੀਰ ਸਾਜਨ ਨੇ ਕਿਹਾ ਕਿ ਉਨ੍ਹਾਂ ਦਾ ਸੁਪਨਾ ਹੈ ਕਿ ਪੰਜਾਬ ਨਸ਼ਾ ਮੁਕਤ ਹੋਵੇ, ਇਸ ਵਾਸਤੇ ਸਾਰੇ ਸਮਾਜ, ਲੇਖਕਾਂ, ਗਾਇਕਾਂ ਅਤੇ ਗੀਤਕਾਰਾਂ ਦਾ ਵੀ ਇਹ ਫ਼ਰਜ਼ ਬਣਦਾ ਹੈ ਕਿ ਉਹ ਆਪਣਾ ਬਣਦਾ ਯੋਗਦਾਨ ਪਾਉਣ।
-ਪ੍ਰਤੀਨਿਧ, ਰਾਮ ਤੀਰਥ (ਅੰਮ੍ਰਿਤਸਰ)

ਕ੍ਰਿਕਟ ਦੀ ਰਾਜਨੀਤੀ ਨੂੰ ਉਜਾਗਰ ਕਰਦੀ ਫ਼ਿਲਮ ਕਿਰਕੇਟ

ਸਾਬਕਾ ਕ੍ਰਿਕਟ ਖਿਡਾਰੀ ਮਹਿੰਦਰ ਸਿੰਘ ਧੋਨੀ ਤੇ ਅਜ਼ਹਰ ਦੇ ਜੀਵਨ ਪ੍ਰਸੰਗਾਂ 'ਤੇ ਆਧਾਰਿਤ ਫ਼ਿਲਮਾਂ ਬਣੀਆਂ। ਹੁਣ ਸਾਬਕਾ ਕ੍ਰਿਕਟ ਖਿਡਾਰੀ ਕੀਰਤੀ ਆਜ਼ਾਦ ਨੂੰ ਮੁੱਖ ਭੂਮਿਕਾ ਵਿਚ ਚਮਕਾਉਂਦੀ ਫ਼ਿਲਮ 'ਕਿਰਕੇਟ' ਆ ਰਹੀ ਹੈ ਅਤੇ ਇਸ ਵਿਚ ਕੀਰਤੀ ਆਜ਼ਾਦ ਦੇ ਨਾਲ-ਨਾਲ ਸਾਬਕਾ ਕ੍ਰਿਕਟ ਖਿਡਾਰੀ ਅਤੁਲ ਵਾਸਨ, ਮਨੋਜ ਪ੍ਰਭਾਕਰ, ਮਨਿੰਦਰ ਸਿੰਘ ਤੇ ਵਿਵੇਕ ਰਾਜਦਾਨ ਨੇ ਵੀ ਅਭਿਨੈ ਕੀਤਾ ਹੈ ਅਤੇ ਇਹ ਸਾਰੇ ਖ਼ੁਦ ਦਾ ਹੀ ਕਿਰਦਾਰ ਨਿਭਾਅ ਰਹੇ ਹਨ।
ਯੋਗੇਂਦਰ ਸਿੰਘ ਵਲੋਂ ਨਿਰਦੇਸ਼ਿਤ ਇਸ ਫ਼ਿਲਮ ਬਾਰੇ ਕੀਰਤੀ ਆਜ਼ਾਦ ਪਹਿਲਾਂ ਹੀ ਇਹ ਸਫਾਈ ਦੇ ਦਿੰਦੇ ਹਨ ਕਿ ਇਹ ਉਨ੍ਹਾਂ ਦੀ ਜ਼ਿੰਦਗੀ 'ਤੇ ਬਣੀ ਬਾਇਓਪਿਕ ਨਹੀਂ ਹੈ। ਫ਼ਿਲਮ ਬਾਰੇ ਵਿਸਤਾਰ ਨਾਲ ਦੱਸਦੇ ਹੋਏ ਉਹ ਕਹਿੰਦੇ ਹਨ, 'ਪਹਿਲੀ ਗੱਲ ਤਾਂ ਇਹ ਕਿ ਫ਼ਿਲਮ ਵਿਚ ਪੇਸ਼ ਕੀਤਾ ਗਿਆ ਵਿਸ਼ਾ ਮੇਰੇ ਦਿਮਾਗ਼ ਦੀ ਉਪਜ ਨਹੀਂ ਹੈ। ਇਸ ਫ਼ਿਲਮ ਦੇ ਇਕ ਨਿਰਮਾਤਾ ਸੋਨੂੰ ਝਾਅ ਵਿਸਥਾਰ ਨਾਲ ਦੱਸਦੇ ਹਨ ਕਿ ਬਿਹਾਰ ਵਿਚ ਕ੍ਰਿਕਟ ਦੇ ਵਿਕਾਸ ਲਈ ਮੈਨੂੰ ਕਿਸ ਤਰ੍ਹਾਂ ਦੀ ਲੜਾਈ ਲੜਨੀ ਪਈ ਹੈ। ਉਨ੍ਹਾਂ ਨੇ ਮੇਰੇ ਇਸ ਸੰਘਰਸ਼ ਨੂੰ ਮੁੱਖ ਰੱਖ ਕੇ ਕਹਾਣੀ ਲਿਖੀ ਅਤੇ ਮੇਰੇ ਨਾਲ ਸੰਪਰਕ ਕੀਤਾ। ਗੱਲਾਂ-ਗੱਲਾਂ ਵਿਚ ਸੋਨੂੰ ਨੇ ਦੱਸਿਆ ਕਿ ਉਹ ਫ਼ਿਲਮ ਵਿਚ ਜਿਨ੍ਹਾਂ ਕਲਾਕਾਰਾਂ ਨੂੰ ਲੈਣਾ ਚਾਹੁੰਦੇ ਹਨ, ਉਨ੍ਹਾਂ ਨੂੰ ਸਾਈਨ ਕਰਨ ਵਿਚ ਮੁਸ਼ਕਿਲਾਂ ਆ ਰਹੀਆਂ ਹਨ ਤੇ ਮੈਂ ਕਿਹਾ ਕਿ ਮੇਰੀ ਭੂਮਿਕਾ ਲਈ ਮੈਨੂੰ ਹੀ ਲਿਆ ਜਾ ਜਾਵੇ ਅਤੇ ਇਸ ਤਰ੍ਹਾਂ ਫ਼ਿਲਮ ਵਿਚ ਮੇਰਾ ਦਾਖਲਾ ਹੋ ਗਿਆ।
ਇਸ ਫ਼ਿਲਮ ਵਿਚ ਬਿਹਾਰ ਵਿਚ ਕ੍ਰਿਕਟ ਦੀ ਮਾਲੀ ਹਾਲਤ ਬਾਰੇ ਦਿਖਾਇਆ ਗਿਆ ਹੈ। ਅੱਜ ਵੀ ਨਾ ਤਾਂ ਬਿਹਾਰ ਵਿਚ ਕ੍ਰਿਕਟ ਸਟੇਡੀਅਮ ਹੈ ਤੇ ਨਾ ਹੀ ਬਿਹਾਰ ਦਾ ਕੋਈ ਖਿਡਾਰੀ ਕ੍ਰਿਕਟ ਵਿਚ ਆਪਣਾ ਨਾਂਅ ਰੌਸ਼ਨ ਕਰ ਸਕਣ ਵਿਚ ਸਫ਼ਲ ਰਿਹਾ ਹੈ। ਕ੍ਰਿਕਟ ਦੀ ਖੇਡ ਵਿਚ ਪਰਦੇ ਦੇ ਪਿੱਛੇ ਖੇਡੀ ਜਾਂਦੀ ਰਾਜਨੀਤੀ ਦੀ ਵਜ੍ਹਾ ਕਰਕੇ ਬਿਹਾਰ ਵਿਚ ਕ੍ਰਿਕਟ ਦਾ ਵਿਕਾਸ ਨਹੀਂ ਹੋ ਸਕਿਆ ਹੈ।

-ਮੁੰਬਈ ਪ੍ਰਤੀਨਿਧ

ਜੈਕਲਿਨ

ਸੁਨ ਸਾਹਿਬਾ ਸੁਨ

ਸੋਸ਼ਲ ਮੰਚ 'ਤੇ ਜੈਕੀ ਕਾਫੀ ਸਰਗਰਮ ਰਹਿੰਦੀ ਹੈ ਤੇ ਖਾਸ ਕਰ ਕੇ ਸਮਾਜਿਕ ਐਪਲੀਕੇਸ਼ਨਜ਼ 'ਤੇ ਕੁਝ ਨਾ ਕੁਝ ਜੈਕਲਿਨ ਸਬੰਧੀ ਨਵਾਂ ਮਿਲ ਹੀ ਜਾਂਦਾ ਹੈ। ਅਧਿਆਪਕ ਦਿਵਸ 'ਤੇ ਉਹ ਫਿਰ ਸਰਗਰਮ ਸੀ। 'ਕਥਕ' ਵਾਲੀ ਵੀਡੀਓ ਉਸ ਨੇ ਆਪਣੇ ਸਮਾਜਿਕ ਖਾਤਿਆਂ 'ਚ ਪਾਈ ਤੇ ਪ੍ਰਸੰਸਕਾਂ ਤੱਕ ਚੰਗੇ-ਚੰਗੇ ਲਫ਼ਜ਼ਾਂ ਨਾਲ ਪਹੁੰਚਾਈ। 'ਬਾਜੀਰਾਓ ਮਸਤਾਨੀ' ਦੇ ਗੀਤ 'ਤੇ ਡਾਂਸ ਦੇ ਪਲ ਵੀ ਇਸ ਵੀਡੀਓ 'ਚ ਸਨ। ਇਕ ਵੀਡੀਓ ਉਸ ਨੇ ਆਪਣੀ ਮਾਤਾ ਜੀ ਨਾਲ ਵੀ ਪਾਈ। ਵੈਸੇ ਸ੍ਰੀਲੰਕਨ ਮੁਟਿਆਰ ਦੇ ਜਲਵੇ ਕਾਫ਼ੀ ਮਹਿੰਗੇ ਹਨ, ਲੋਕਾਂ ਲਈ, ਸ਼ੋਅ ਪ੍ਰਬੰਧਕਾਂ ਤੇ ਨਿਰਮਾਤਾਵਾਂ ਲਈ 2 ਮਿੰਟ, 16 ਸੈਕਿੰਡ ਦਾ ਫ਼ਿਲਮ 'ਸਾਹੋ' ਦਾ ਗਾਣਾ ਹੈ 'ਬੈਡ ਬੁਆਏ'। ਇਸ ਗੀਤ 'ਤੇ ਜੈਕਲਿਨ ਫਰਨਾਂਡਿਜ਼ ਦੇ ਜਲਵੇ 'ਅੱਲਾ ਮੇਰੀ ਤੌਬਾ-ਅੱਲਾ ਮੇਰੀ ਤੌਬਾ' ਵਾਲੀ ਗੱਲ ਹੈ। ਹੈਰਾਨਗੀ ਇਹ ਕਿ 2 ਮਿੰਟ ਲਈ 2 ਕਰੋੜ ਰੁਪਏ ਜੈਕੀ ਨੇ 'ਸਾਹੋ' ਵਾਲਿਆਂ ਤੋਂ ਵਸੂਲ ਕੇ ਆਪਣੇ ਬੈਂਕ ਖਾਤੇ ਦੀ ਸ਼ਾਨ ਵਧਾਈ ਹੈ। 'ਮਿਸਿਜ਼ ਸੀਰੀਅਲ ਕਿੱਲਰ' ਬਣੀ ਜੈਕੀ ਦੀ ਇਕ ਫ਼ਿਲਮ 'ਡਰਾਈਵ' ਅੱਧ ਵਿਚਾਲੇ ਲਟਕ ਰਹੀ ਹੈ। ਫਿਟਨੈੱਸ ਤੇ ਚਮਕ-ਦਮਕ ਇਸ ਹੀਰੋਇਨ ਦੇ ਕੀ ਕਹਿਣੇ? 'ਰੇਸ-3' ਤੋਂ ਬਾਅਦ 'ਬੈਡ ਬੁਆਏ' ਗਾਣੇ 'ਚ ਹੀ ਨਜ਼ਰ ਆਈ ਜੈਕੀ ਨੂੰ ਇੰਸਟਾਗ੍ਰਾਮ ਦਾ ਸਹਾਰਾ ਸਭ ਤੋਂ ਵੱਧ ਹੈ। ਚੰਗੀ ਗੱਲ ਇਹ ਕਿ 6 ਸਾਲ ਚੁੱਪ-ਚੁੱਪ ਇਕ ਦੂਜੇ ਤੋਂ ਵੱਖ ਤੇ ਬੋਲ-ਬੁਲਾਰਾ ਬੰਦ ਕਰ ਚੁੱਕੇ ਜੈਕੀ-ਸਾਜਿਦ ਨਾਡਿਆਡਵਾਲਾ ਫਿਰ ਦੋਸਤ ਬਣ ਗਏ ਹਨ। ਨਾਲ ਹੀ 'ਅਰਥ' ਦੇ ਰੀਮੇਕ ਦੀ ਖ਼ਬਰ ਗਰਮ ਹੈ। ਸਵਰਾ ਭਾਸਕਰ ਦੇ ਨਾਲ ਜੈਕਲਿਨ ਵੀ ਰੀਮੇਕ 'ਅਰਥ' 'ਚ ਹੈ। ਕੈਟੀ ਬਿਨ 'ਟਾਈਗਰ' ਦਾ ਰੀਮੇਕ ਨਹੀਂ ਤੇ ਜੈਕੀ ਬਿਨ 'ਕਿੱਕ' ਦਾ ਰੀਮੇਕ ਨਹੀਂ। ਸਲਮਾਨ ਖ਼ਾਨ ਨੇ ਇਹ ਕਹਿ ਕੇ ਜੈਕਲਿਨ ਫਰਨਾਡਿਜ਼ ਦੇ ਚਿਹਰੇ 'ਤੇ ਚਮਕ ਦੀ ਲਿਸ਼ਕੋਰ ਲਿਆਂਦੀ ਹੈ। ਸੁਨ ਸਾਹਿਬਾ ਸੁਨ ਜੈਕਲਿਨ ਦਾ ਸਮਾਂ ਸ਼ੁੱਭ ਹੈ, ਸ਼ੁੱਭ ਮੰਗਲਮ... ਸੁਨਹਿਰਾ ਤੇ ਚੰਗਾ...।

ਪ੍ਰਿਅੰਕਾ ਚੋਪੜਾ

ਗ੍ਰਹਿਸਥੀ ਦਾ ਮੋਹ

ਸਵਰਗੀ ਵੀਰੂ ਕ੍ਰਿਸ਼ਨਨ ਕਥਕ ਨ੍ਰਿਤ ਦੇ ਮਾਹਿਰ ਸਨ ਤੇ ਬੀਤੇ ਦਿਨੀਂ ਹੀ ਨਾਚ ਦੁਨੀਆ ਦੇ ਇਸ ਮਾਹਿਰ ਤੇ ਅਭਿਨੇਤਾ ਵੀਰੂ ਕ੍ਰਿਸ਼ਨਨ ਰੱਬ ਦੀ ਗੋਦ 'ਚ ਜਾ ਬੈਠੇ। ਇਸ ਮੌਤ ਨੇ ਪ੍ਰਿਅੰਕਾ ਚੋਪੜਾ ਨੂੰ ਬਹੁਤ ਹੀ ਸਦਮਾ ਪਹੁੰਚਾਇਆ, ਕਿਉਂਕਿ ਪੀ.ਸੀ. ਨੇ ਵੀਰੂ ਮਾਸਟਰ ਜੀ ਤੋਂ ਕਥਕ ਦੀ ਸਿੱਖਿਆ ਲਈ ਸੀ। ਟਵੀਟ ਰਾਹੀਂ ਪ੍ਰਿਅੰਕਾ ਦਾ ਦਰਦ ਵੀਰੂ ਜੀ ਪ੍ਰਤੀ ਛਲਕਿਆ ਤੇ ਲੱਗਿਆ ਕਿ ਦਿਲੋਂ ਪੀ.ਸੀ. ਨੂੰ ਉਨ੍ਹਾਂ ਦੇ ਦਿਹਾਂਤ 'ਤੇ ਗਹਿਰਾ ਦੁੱਖ ਮਹਿਸੂਸ ਹੋਇਆ ਹੈ। ਪੀ.ਸੀ. ਨੇ ਅਮਰੀਕਾ ਤੋਂ ਮੁੰਬਈ ਆ ਕੇ ਆਪਣੇ ਕਥਕ ਨਾਚ ਗੁਰੂ ਸਵਰਗੀ ਵੀਰੂ ਕ੍ਰਿਸ਼ਨਨ ਦੀ ਯਾਦ ਵਿਚ ਇਕ ਸ਼ੋਕ ਸਭਾ ਕਰਵਾਉਣੀ ਹੈ ਤੇ ਦਾਨ-ਪੁੰਨ ਵੀ ਕਰਨਾ ਹੈ। ਇਸ ਦੌਰਾਨ ਦੁੱਖ 'ਚੋਂ ਬਾਹਰ ਨਿਕਲਣ ਦੀ ਕੋਸ਼ਿਸ਼ ਕਰ ਰਹੀ ਪੀ.ਸੀ. ਨੇ ਹੁਣ ਮਾਂ ਬਣਨ ਦੀ ਤਮੰਨਾ ਵੀ ਸਭ ਨੂੰ ਦੱਸ ਦਿੱਤੀ ਹੈ। ਲਾਸ ਏਂਜਲਸ 'ਚ ਨਵਾਂ ਘਰ ਤੇ ਇਸ ਨਵੇਂ ਘਰ 'ਚ ਨਵੇਂ ਮਹਿਮਾਨ ਦੀਆਂ ਕਿਲਕਾਰੀਆਂ ਸੁਣਨ ਲਈ ਹਰਿਆਣਵੀ ਪੰਜਾਬਣ ਅਮਰੀਕਾ ਦੀ ਨੂੰਹ ਪ੍ਰਿਅੰਕਾ ਚੋਪੜਾ ਬੇਤਾਬ ਹੈ। ਆਪਣਾ ਘਰ ਹੋਵੇ, ਆਪਣਾ ਬੱਚਾ ਹੋਵੇ, ਇਹ ਦੋ ਚੀਜ਼ਾਂ ਪ੍ਰਿਅੰਕਾ ਅਨੁਸਾਰ ਉਸ ਦੀ ਚਾਹਤ ਲਿਸਟ 'ਚ ਸਭ ਤੋਂ ਉੱਪਰ ਹਨ। 'ਦਾ ਸਕਾਈ ਇਜ਼ ਪਿੰਕ' ਫ਼ਿਲਮ 'ਚ ਆ ਰਹੀ ਪ੍ਰਿਅੰਕਾ ਹੁਣ ਅਮਰੀਕਾ 'ਚ ਸਥਾਪਤ ਹੈ। ਨਿੱਕ ਪਿਆਨੋ ਵਜਾਉਂਦਾ ਹੈ ਤਾਂ ਪੀ.ਸੀ. ਘਰੇ ਗਾਉਂਦੀ ਹੈ ਪਰ ਨਿੱਕ ਦੀ ਗਾਇਕੀ 'ਚ ਉਹ ਦਖ਼ਲਅੰਦਾਜ਼ੀ ਨਹੀਂ ਕਰਦੀ। 'ਦੇਸੀ ਗਰਲ' 'ਵਿਦੇਸ਼ੀ ਨੂੰਹ' ਪ੍ਰਿਅੰਕਾ ਚੋਪੜਾ ਦੀ ਫ਼ਿਲਮ 'ਦਾ ਸਕਾਈ ਇਜ਼ ਪਿੰਕ' ਦੇ ਇਕ ਭਾਵੁਕ ਦ੍ਰਿਸ਼ ਦੀ ਸ਼ੂਟਿੰਗ ਨੇ ਉਸ ਦੇ ਹਮਸਫ਼ਰ ਨਿੱਕ ਨੂੰ ਜਜ਼ਬਾਤੀ ਕਰ ਦਿੱਤਾ। ਖ਼ੈਰ, ਪ੍ਰਿਅੰਕਾ ਚੋਪੜਾ ਹੁਣ ਜਜ਼ਬਾਤ ਦੀ ਥਾਂ 'ਮਮਤਾ', 'ਘਰ ਪਿਆਰ', 'ਕਾਮਯਾਬ ਗ੍ਰਹਿਣੀ', 'ਚੰਗੀ ਮਾਂ' ਤੇ ਸੋਹਣੇ ਘਰ ਦੀ ਮਾਲਕਣ ਦੇ ਸੁਪਨੇ ਹੀ ਜ਼ਿਆਦਾ ਦੇਖ ਰਹੀ ਹੈ।

ਰਕੁਲਪ੍ਰੀਤ ਸਿੰਘ

ਸੰਭਲ ਜ਼ਰਾ...

ਸਪੇਨ ਦੇ ਆਈਲੈਂਡ ਇਬੀਜ਼ਾ ਪਹੁੰਚੀ ਹੋਈ ਰਕੁਲਪ੍ਰੀਤ ਸਿੰਘ ਤੇ ਨੀਲਾ ਤੈਰਾਕੀ ਪਹਿਰਾਵਾ ਪਹਿਨ ਕੇ ਪਾਣੀ 'ਚ ਛਾਲਾਂ ਮਾਰਨ ਦੀ ਫੋਟੋ ਰਕੁਲ ਵਲੋਂ ਸਪੇਨਿਸ਼ ਆਈਲੈਂਡ ਤੋਂ ਆਈ ਹੈ। ਉੱਪਰ ਆਕਾਸ਼, ਥੱਲੇ ਰੇਤ ਤੇ ਵਿਚਕਾਰ ਸ਼ਾਂਤੀ, ਚਾਰੇ ਪਾਸੇ ਖੁਸ਼ੀਆਂ ਦੀ ਬਰਫ਼ ਪੈ ਰਹੀ ਹੈ ਤੇ ਇਹ ਕੈਪਸ਼ਨ ਰਕੁਲ ਨੇ ਆਪਣੀ ਤਸਵੀਰ ਨਾਲ ਲਿਖੀ ਹੈ। ਰਕੁਲ ਨੇ 'ਬੈਲੇ ਨਾਚ' ਸਿੱਖ ਲਿਆ ਹੈ ਤੇ ਟੱਕਰ ਉਹ ਨੋਰਾ ਫਤੇਹੀ ਨੂੰ ਦੇਣ ਲਈ ਤਿਆਰ ਹੈ। ਮਿਲਾਪ ਜ਼ਵੇਰੀ ਦੀ 'ਮਰਜਾਵਾਂ' ਦੀਆਂ ਗੱਲਾਂ ਉਹ ਵਾਰ-ਵਾਰ ਕਰ ਰਹੀ ਹੈ। ਦੱਖਣ 'ਚ ਕਰਵਾਇਆ ਉਸ ਦਾ ਤਸਵੀਰ ਸੈਸ਼ਨ ਪਹਿਲਾਂ ਹੀ ਚਰਚਾ 'ਚ ਹੈ। 'ਦੇ ਦੇ ਪਿਆਰ ਦੇ' ਵਿਚ ਅਜੈ ਤੇ ਤੱਬੂ ਨਾਲ ਰਕੁਲ ਨੇ ਕਮਾਲ ਕਰ ਦਿਖਾਇਆ ਤੇ ਆਲੋਚਕ ਵੀ ਉਸ ਦੇ ਦੀਵਾਨੇ ਹੋ ਗਏ। ਰਕੁਲ ਤੇ ਵਿਵਾਦ ਤੇ ਇਹ ਵੀ ਆਮ ਹੀ ਗੱਲ ਤੇ ਨੀਲੀ ਪੈਂਟ ਪਹਿਨ ਕੇ, ਬਟਨ ਖੁੱਲ੍ਹੇ ਛੱਡ ਕੇ ਰਕੁਲ ਨੇ ਤਸਵੀਰ ਇੰਸਟਾ 'ਤੇ ਪੋਸਟ ਲਿਖਿਆ ਕਿ ਖੁੱਲ੍ਹੀ ਥਾਂ 'ਤੇ ਮੈਨੂੰ ਇਸੇ ਹੀ ਪਹਿਰਾਵੇ 'ਚ ਸੁੱਟ ਦਿਓ। ਭੇਡੂ ਜਾਂ ਸ਼ੇਰ, ਚੀਤਾ ਜਾਂ ਹਾਥੀ, ਕੁੱਤਾ ਜਾਂ ਹੋਰ ਜਾਨਵਰ ਆਏ ਤੇ ਮੇਰੇ 'ਤੇ ਝਪਟ ਜਾਵੇ। ਭਲਾ ਇਹ ਕੀ ਗੱਲ ਹੋਈ, ਬੇਸ਼ਰਮ ਫੋਟੋ ਤੇ ਉਸ ਤੋਂ ਵੱਧ ਸ਼ਰਮਨਾਕ ਲਫ਼ਜ਼ ਰਕੁਲ ਦੇ। ਨਾਲ ਹੀ ਲਿਖਿਆ ਉਹ ਸਾਰੇ ਜਾਨਵਰ ਹਰਾ ਕੇ ਮੈਂ ਵਾਪਸ ਆਵਾਂਗੀ ਤੇ 'ਹੈਸ਼ ਟੈਗ' 'ਗਰਲ ਪਾਵਰ' ਉਸ ਨੇ ਦਿੱਤਾ ਹੈ। ਕੀ ਕੁੜੀਆਂ ਦੀ ਇਹੀ ਸ਼ਕਤੀ ਹੈ ਰਕੁਲ? ਸਵਾਲ ਇਹੀ ਹੈ? ਪੈਂਟ ਦਾ ਬਟਨ ਖੁੱਲ੍ਹਾ ਤੇ ਇਹ ਬਕਵਾਸ, ਅਸ਼ਲੀਲ ਹੈ। ਕੇਸ ਕਰੋ ਰਕੁਲ ਤੇ ਕਈਆਂ ਨੇ ਜਵਾਬ 'ਚ ਰਕੁਲ ਨੂੰ ਕਿਹਾ ਹੈ ਕਿ ਫਿਰ ਹੋਸ਼ ਟਿਕਾਣੇ ਆਊ? ਪੈਂਟ ਦਾ ਖੁੱਲ੍ਹਾ ਬਟਨ, ਇਹ 'ਗਰਲ ਪਾਵਰ' ਕਿਧਰ ਦੀ? ਕੁੜੀਆਂ ਦੀ ਬੇਇੱਜ਼ਤੀ ਦੇ ਜੁਰਮ ਵਿਚ ਰਕੁਲ ਮੁਆਫ਼ੀ ਮੰਗੇ, ਆਵਾਜ਼ਾਂ ਉੱਠ ਰਹੀਆਂ ਹਨ। ਸੋਚ ਕੇ ਬੋਲਦੀ, ਰਕੁਲ ਤਾਂ ਠੀਕ ਸੀ, ਨਹੀਂ ਤਾਂ 'ਬੇਸ਼ਰਮ ਨਾਇਕਾ' ਦਾ ਟੈਗ' ਉਹ ਲਵਾਏਗੀ।


-ਸੁਖਜੀਤ ਕੌਰ

ਵਿਦਿਉਤ ਜਾਮਵਾਲ

ਬਚ ਕੇ ਮੋੜ ਤੋਂ

'ਕਮਾਂਡੋ' ਵਿਦਿਉਤ ਜਾਮਵਾਲ ਨੇ ਹੱਥ ਵਿਚ ਅੰਡਾ ਲੈ ਕੇ ਇੱਟ ਤੋੜੀ ਤੇ ਇਹ ਸੋਸ਼ਲ ਮੀਡੀਆ 'ਤੇ ਵੀਡੀਓ ਬਣ ਕੇ ਖੂਬ ਚਰਚੇ ਲੈ ਰਿਹਾ ਹੈ। ਪੰਜ ਲੱਖ ਦੇ ਕਰੀਬ 'ਪਸੰਦੀ' ਦੇ ਨਿਸ਼ਾਨ ਇਸ ਵੀਡੀਓ ਲਈ ਵਿਦਿਉਤ ਦੇ ਇੰਸਟਾ ਅਕਾਊਂਟ 'ਤੇ ਲੱਗ ਜਾਣੇ ਪ੍ਰਭਾਵ ਹੈ ਕਿ ਪੂਰੀ ਗੱਲਬਾਤ ਆਪਣੇ ਸਟੰਟਬਾਜ਼ 'ਕਮਾਂਡੋ' ਵਿਦਿਉਤ ਜਾਮਵਾਲ ਦੀ ਹੈ। ਜਨਾਬ ਨੇ ਆਪ ਹੀ ਆਪਣੀ ਤੁਲਨਾ ਜੈਕੀ ਚੇਨ ਨਾਲ ਕਰਦਿਆਂ ਇਹ ਵੀਡੀਓ ਜੈਕੀ ਨੂੰ ਸਮਰਪਿਤ ਕੀਤਾ ਹੈ। ਮਾਰਸ਼ਲ ਆਰਟ ਤੇ ਸਟੰਟਬਾਜ਼ ਦਾ ਚਿਹਰਾ ਵਿਦਿਉਤ ਲੋਕਾਂ 'ਚ ਸਥਾਪਤ ਕਰ ਰਿਹਾ ਹੈ। ਫ਼ਿਲਮਾਂ ਤਾਂ ਰਹੀਆਂ-ਰਹੀਆਂ 'ਦਿਲਲਗੀ' ਤੇ 'ਗੱਲ ਬਣ ਗਈ' ਦੋਵੇਂ ਵੀਡੀਓ ਗੀਤ ਵਿਦਿਉਤ ਦੀ ਪ੍ਰਸੰਸਕ ਸੰਖਿਆ 'ਚ ਵਾਧਾ ਕਰ ਗਏ ਹਨ। ਯਾਦ ਕਰੋ ਕਿ 12 ਸਾਲ ਪਹਿਲਾਂ 2007 'ਚ ਸਿਰ 'ਚ ਬੋਤਲ ਮਾਰਨ ਦੇ ਦੋਸ਼ ਵਿਚ ਵਿਦਿਉਤ 'ਤੇ ਪਰਚਾ ਹੋਇਆ ਸੀ। ਰੱਬ ਦਾ ਸ਼ੁਕਰ ਕਿ ਪਿਛਲੇ ਸੋਮਵਾਰ ਨੂੰ ਵਿਦਿਉਤ ਨੂੰ ਮੁੰਬਈ ਦੀ ਅਦਾਲਤ ਨੇ ਇਸ ਕੁੱਟ-ਮਾਰ ਦੇ ਪਰਚੇ 'ਚੋਂ 'ਕਲੀਨ ਚਿੱਟ' ਦੇ ਕੇ ਰਿਹਾਅ ਕਰਨ (ਬਰੀ) ਦੇ ਹੁਕਮ ਦਿੱਤੇ ਹਨ। ਹੁਣ 'ਕਮਾਂਡੋ-3' ਉਹ ਅਦਾ ਸ਼ਰਮਾ ਨਾਲ ਕਰੇਗਾ। ਚਾਹੇ 'ਕਮਾਂਡੋ' ਵਿਦਿਉਤ ਦੀ 'ਜੰਗਲੀ' ਫਲਾਪ ਹੀ ਰਹੀ ਸੀ ਪਰ ਕਦੇ ਆਂਡੇ ਫੜ ਇੱਟਾਂ ਤੋੜਨੀਆਂ ਤੇ ਹੁਣ ਹੱਥ 'ਚ ਗੈਸ ਦਾ ਭਰਿਆ ਸਿਲੰਡਰ ਲੈ ਕੇ ਫੁੱਟਬਾਲ ਦੀ ਤਰ੍ਹਾਂ ਉਸ ਨੂੰ ਘੁਮਾਇਆ ਹੈ। ਠੀਕ ਹੈ ਕਿ ਜਨਾਬ ਅਸਲ ਹੀਰੋ ਵੀ ਹਨ। ਸਟੰਟਬਾਜ਼ ਪੱਕੇ ਹਨ ਪਰ 'ਖ਼ਤਰਿਆਂ ਦੇ ਖਿਡਾਰੀ' ਪਰਦੇ 'ਤੇ ਹੀ ਜਚਦੇ ਨੇ, ਅਸਲੀ ਜ਼ਿੰਦਗੀ 'ਚ ਅਸਲ ਕਰਨਾ ਜਾਨ ਖ਼ਤਰੇ 'ਚ ਆਪਣੀ ਵੀ ਪਾਉਣੀ ਤੇ ਪ੍ਰਸੰਸਕਾਂ 'ਚ ਵੀ ਅਜਿਹਾ ਕਰਨ ਦੀ ਭਾਵਨਾ ਭਰ ਕੇ ਉਨ੍ਹਾਂ ਨੂੰ ਖ਼ਤਰਿਆਂ ਦੀ ਭੱਠੀ 'ਚ ਝੋਕਣ ਵਾਲੀ ਗੱਲ ਹੈ। ਬਚ ਕੇ ਮੋੜ ਤੋਂ ਵਿਦਿਉਤ, ਕਈ ਵਾਰ ਹਾਸੇ ਦਾ ਮੜਾਸਾ ਹੋ ਜਾਂਦਾ ਹੈ। ਬਹੁਤ ਮਾੜਾ... ਬਚ ਕੇ ਮੋੜ ਤੋਂ...।

ਹੁਣ ਸਿਰਫ਼ ਅਭਿਨੈ ਵੱਲ ਧਿਆਨ ਹੈ : ਨੋਰਾ ਫ਼ਤੇਹੀ

ਨੋਰਾ ਫਤੇਹੀ। ਇਹ ਨਾਂਅ ਸੁਣਦਿਆਂ ਹੀ ਅੱਖਾਂ ਸਾਹਮਣੇ ਉੱਭਰ ਆਉਂਦੇ ਹਨ ਉਹ ਗੀਤ, ਜਿਸ ਵਿਚ ਉਸ ਨੂੰ ਗਲੈਮਰਸ ਅੰਦਾਜ਼ ਵਿਚ ਪੇਸ਼ ਕੀਤਾ ਗਿਆ ਸੀ। 'ਬਾਹੂਬਲੀ', 'ਰਾਕੀ ਹੈਂਡਸਮ', 'ਸਤਿਆਮੇਵ ਜਯਤੇ', 'ਇਸਤਰੀ', 'ਮਰਜਾਵਾਂ', 'ਬਾਟਲਾ ਹਾਊਸ' ਸਮੇਤ ਕੁਝ ਹੋਰ ਫ਼ਿਲਮਾਂ ਵਿਚ ਨੋਰਾ ਨੂੰ ਕੈਮਰੇ ਸਾਹਮਣੇ ਥਿਰਕਦੀ ਨੂੰ ਪੇਸ਼ ਕੀਤਾ ਗਿਆ ਸੀ।
ਇਨ੍ਹਾਂ ਫ਼ਿਲਮਾਂ ਦੀ ਵਜ੍ਹਾ ਨਾਲ ਨੋਰਾ ਦੀ ਇਮੇਜ ਆਈਟਮ ਡਾਂਸਰ ਦੇ ਤੌਰ 'ਤੇ ਮਜ਼ਬੂਤ ਹੋ ਗਈ ਸੀ ਪਰ ਹੁਣ ਨੋਰਾ ਆਪਣੀ ਇਸ ਦਿੱਖ ਤੋਂ ਛੁਟਕਾਰਾ ਪਾਉਣਾ ਚਾਹੁੰਦੀ ਹੈ ਅਤੇ ਉਹ ਬਾਲੀਵੁੱਡ ਵਿਚ ਖ਼ੁਦ ਨੂੰ ਇਕ ਅਭਿਨੇਤਰੀ ਦੇ ਤੌਰ 'ਤੇ ਸਥਾਪਿਤ ਕਰਨਾ ਚਾਹੁੰਦੀ ਹੈ। ਆਪਣੀ ਦਿੱਖ ਵਿਚ ਬਦਲਾਅ ਲਿਆਉਣ ਬਾਰੇ ਉਹ ਕਹਿੰਦੀ ਹੈ, 'ਜਦੋਂ ਮੈਂ ਕੈਨੇਡਾ ਤੋਂ ਇਥੇ ਆਈ ਸੀ ਤਾਂ ਸੋਚਿਆ ਸੀ ਕਿ ਹੀਰੋਇਨ ਬਣ ਕੇ ਲੋਕਾਂ ਦੇ ਦਿਲਾਂ 'ਤੇ ਰਾਜ ਕਰਾਂਗੀ ਪਰ ਇਥੇ ਮੈਨੂੰ ਭੂਮਿਕਾ ਦੀ ਬਜਾਏ ਆਈਟਮ ਗੀਤ ਹੀ ਜ਼ਿਆਦਾ ਪੇਸ਼ ਹੋਏ ਅਤੇ ਮੈਂ ਕਰਦੀ ਚਲੀ ਗਈ। ਹੁਣ ਜਦੋਂ 'ਬਾਟਲਾ ਹਾਊਸ' ਵਿਚ ਮੇਰੇ 'ਤੇ ਕੁਝ ਦ੍ਰਿਸ਼ ਵੀ ਫ਼ਿਲਮਾਏ ਗਏ ਹਨ ਅਤੇ ਐਲਬਮ 'ਪਛਤਾਓਗੇ' ਵਿਚ ਵੀ ਅਭਿਨੈ ਕਰਨਾ ਪਿਆ ਤਾਂ ਲੋਕਾਂ ਨੂੰ ਮੇਰਾ ਕੰਮ ਪਸੰਦ ਆਇਆ ਅਤੇ ਮੈਨੂੰ ਸਲਾਹ ਦਿੱਤੀ ਜਾਣ ਲੱਗੀ ਕਿ ਹੁਣ ਜਦੋਂ ਮੈਂ ਚੰਗੀ ਐਕਟਿੰਗ ਕਰ ਲੈਂਦੀ ਹਾਂ ਤਾਂ ਮੈਨੂੰ ਆਪਣਾ ਧਿਆਨ ਚੰਗੀ ਭੂਮਿਕਾ ਵੱਲ ਦੇਣਾ ਚਾਹੀਦਾ ਹੈ। ਮੈਂ ਆਪਣੀ ਜਾਣ-ਪਛਾਣ ਦੇ ਸਾਰੇ ਨਿਰਦੇਸ਼ਕਾਂ ਨੂੰ ਕਹਿ ਦਿੱਤਾ ਹੈ ਕਿ ਚੰਗੀ ਭੂਮਿਕਾ ਲਈ ਉਹ ਮੈਨੂੰ ਕਦੀ ਵੀ ਫੋਨ ਕਰ ਸਕਦੇ ਹਨ। ਇਸ ਤੋਂ ਅੰਦਾਜ਼ਾ ਲੱਗ ਸਕਦਾ ਹੈ ਕਿ ਹੁਣ ਉਹ ਅਭਿਨੈ ਪ੍ਰਤੀ ਕਿੰਨੀ ਗੰਭੀਰ ਹੈ। ਉਂਝ, ਨੋਰਾ ਨੇ ਆਈਟਮ ਗੀਤ ਤੋਂ ਭਾਵੇਂ ਹੀ ਦੂਰੀ ਬਣਾ ਲਈ ਹੋਵੇ ਪਰ ਉਸ ਦੀ ਇੱਛਾ ਹੈ ਕਿ 'ਸ਼ੋਅਲੇ' ਦਾ 'ਮਹਿਬੂਬਾ ਓ ਮਹਿਬੂਬਾ...' ਗੀਤ ਜਦੋਂ ਕਦੀ ਰੀਮਿਕਸ ਰੂਪ ਵਿਚ ਬਣਾਇਆ ਜਾਵੇ ਤਾਂ ਉਸ 'ਤੇ ਫ਼ਿਲਮਾਇਆ ਜਾਵੇ। ਭਾਵ ਇਸ ਵਿਦੇਸ਼ੀ ਕੁੜੀ ਦੇ ਦਿਲ ਵਿਚ ਹੁਣ ਵੀ ਆਈਟਮ ਗੀਤ ਲਈ ਥਾਂ ਹੈ।

ਦਿਵਿਆਂਕਾ ਤ੍ਰਿਪਾਠੀ ਧਰਮ ਸੰਕਟ ਵਿਚ

'ਬਨੂ ਮੈਂ ਤੇਰੀ ਦੁਲਹਨ', 'ਕਾਨਪੁਰ ਵਾਲੇ ਖੁਰਾਨਾਜ਼' ਆਦਿ ਲੜੀਵਾਰ ਫੇਮ ਦਿਵਿਆਂਕਾ ਤ੍ਰਿਪਾਠੀ ਨੇ ਹੁਣ ਵੈੱਬ ਸੀਰੀਜ਼ ਵੱਲ ਵੀ ਆਪਣਾ ਧਿਆਨ ਕੇਂਦਰਿਤ ਕਰਨਾ ਸ਼ੁਰੂ ਕੀਤਾ ਹੈ। ਇਸ ਦੇ ਨਤੀਜੇ ਵਜੋਂ ਏਕਤਾ ਕਪੂਰ ਨੇ ਉਸ ਨੂੰ ਆਪਣੀ ਵੈੱਬ ਸੀਰੀਜ਼ 'ਕੋਲਡ ਲੱਸੀ ਔਰ ਚਿਕਨ ਮਸਾਲਾ' ਵਿਚ ਅਹਿਮ ਭੂਮਿਕਾ ਵਿਚ ਲਿਆ ਹੈ। ਆਪਣੇ ਕੈਰੀਅਰ ਦੀ ਇਸ ਪਹਿਲੀ ਵੈੱਬ ਸੀਰੀਜ਼ ਨੂੰ ਹਾਸਲ ਕਰ ਕੇ ਦਿਵਿਆਂਕਾ ਬਹੁਤ ਉਤਸ਼ਾਹੀ ਸੀ ਪਰ ਇਹ ਉਤਸ਼ਾਹ ਉਦੋਂ ਠੰਢਾ ਪੈ ਗਿਆ ਜਦੋਂ ਉਸ ਨੂੰ ਸ਼ੂਟਿੰਗ ਦੇ ਪਹਿਲੇ ਦਿਨ ਦ੍ਰਿਸ਼ ਸਮਝਾਇਆ ਗਿਆ। ਦ੍ਰਿਸ਼ ਬਾਰੇ ਜਾਣ ਕੇ ਉਸ ਦੇ ਸਾਹਮਣੇ ਧਰਮ ਸੰਕਟ ਆ ਖੜ੍ਹਾ ਹੋਇਆ। ਅਸਲ ਵਿਚ ਦਿਵਿਆਂਕਾ ਬ੍ਰਾਹਮਣ ਪਰਿਵਾਰ ਤੋਂ ਹੈ। ਘਰ ਵਿਚ ਮਾਸ-ਮੱਛੀ ਪਕਾਉਣਾ ਤਾਂ ਦੂਰ ਇਨ੍ਹਾਂ ਦਾ ਨਾਂਅ ਲੈਣਾ ਵੀ ਪਾਪ ਮੰਨਿਆ ਜਾਂਦਾ ਰਿਹਾ ਹੈ। ਇਸ ਤਰ੍ਹਾਂ ਸਾਤਵਿਕ ਮਾਹੌਲ ਵਿਚ ਪਲੀ ਹੋਈ ਦਿਵਿਆਂਕਾ ਆਪਣੀ ਇਸ ਪਹਿਲੀ ਵੈੱਬ ਸੀਰੀਜ਼ ਵਿਚ ਸ਼ੈਫ ਦਾ ਕਿਰਦਾਰ ਨਿਭਾਅ ਰਹੀ ਹੈ ਅਤੇ ਕੈਮਰੇ ਸਾਹਮਣੇ ਕੁਕਿੰਗ ਵੀ ਕਰਨੀ ਹੈ। ਪਹਿਲੇ ਹੀ ਦਿਨ ਉਸ ਨੇ ਚਿਕਨ ਦੇ ਟੁਕੜੇ ਕਰ ਕੇ ਇਕ ਨਾਨਵੈੱਜ਼ ਡਿਸ਼ ਬਣਾਉਣੀ ਸੀ ਅਤੇ ਆਪਣੇ ਸਾਹਮਣੇ ਚਿਕਨ ਨੂੰ ਦੇਖ ਕੇ ਉਸ ਦੇ ਹੋਸ਼ ਉੱਡ ਗਏ। ਫਿਰ ਉਸ ਨੇ ਖ਼ੁਦ ਨੂੰ ਠੀਕ ਕੀਤਾ ਅਤੇ ਇਕ ਪ੍ਰੋਫੈਸ਼ਨਲ ਕਲਾਕਾਰ ਦੀ ਤਰ੍ਹਾਂ ਉਹ ਉਹੀ ਸਭ ਕਰਦੀ ਚਲੀ ਗਈ ਜੋ ਨਿਰਦੇਸ਼ਕ ਕਹਿੰਦੇ ਗਏ।
ਦਿਵਿਆਂਕਾ ਕਿੰਨੀ ਪ੍ਰੋਫੈਸ਼ਨਲ ਹੈ, ਇਸ ਦਾ ਨਜ਼ਾਰਾ ਉਦੋਂ ਹੀ ਪੇਸ਼ ਹੋ ਗਿਆ ਸੀ ਜਦੋਂ ਉਹ ਮੁੰਬਈ ਦੇ ਬੋਰੀਵਲੀ ਇਲਾਕੇ ਵਿਚ ਸਥਿਤ ਇਕ ਹੋਟਲ ਦੇ ਉਦਘਾਟਨ ਮੌਕੇ ਪਹੁੰਚੀ ਸੀ। ਹੋਟਲ ਦੇ ਨਾਂਅ ਵਿਚ ਐੱਗ ਇਸ ਲਈ ਰੱਖਿਆ ਗਿਆ ਹੈ, ਕਿਉਂਕਿ ਉਥੇ ਅੰਡੇ ਨਾਲ ਬਣੇ ਪਕਵਾਨ ਹੀ ਬਣਾਏ ਜਾਂਦੇ ਹਨ। ਕਿਉਂਕਿ ਰਿਬਨ ਕੱਟਣ ਲਈ ਦਿਵਿਆਂਕਾ ਨੂੰ ਚੰਗੀ ਰਕਮ ਦਿੱਤੀ ਗਈ ਸੀ। ਸੋ, ਉਹ ਉਥੇ ਆਈ ਅਤੇ ਉਦਘਾਟਨ ਦੀ ਰਸਮ ਨੂੰ ਅੰਜਾਮ ਦਿੱਤਾ ਤੇ ਮਾਲਿਕ ਨੂੰ ਸ਼ੁੱਭਕਾਮਨਾਵਾਂ ਵੀ ਦਿੱਤੀਆਂ। ਇਸ ਦੌਰਾਨ ਦਿਵਿਆਂਕਾ ਨੇ ਹੋਟਲ ਦਾ ਪਾਣੀ ਤੱਕ ਨਹੀਂ ਪੀਤਾ ਅਤੇ ਪਾਣੀ ਦੀ ਬੋਤਲ ਉਹ ਆਪਣੇ ਘਰ ਤੋਂ ਲੈ ਕੇ ਆਈ ਸੀ।

ਸੋਨਾਕਸ਼ੀ ਸਿਨਹਾ

'ਰੱਜੋ' ਦਾ 'ਮੰਗਲ ਮਿਸ਼ਨ' ਸਫ਼ਲ

ਕਈ ਫਲਾਪ ਫ਼ਿਲਮਾਂ ਤੋਂ ਬਾਅਦ ਸੋਨਾਕਸ਼ੀ ਸਿਨਹਾ ਨੂੰ ਇਕ ਵੱਡੀ ਕਾਮਯਾਬੀ ਮਿਲੀ ਹੈ। 'ਮਿਸ਼ਨ ਮੰਗਲ' ਨੇ 200 ਕਰੋੜ ਦੇ ਕਰੀਬ ਵਪਾਰ ਕੀਤਾ ਹੈ। ਸੋਨਾ ਨੂੰ ਚੰਗਾ-ਚੰਗਾ ਮਹਿਸੂਸ ਹੋ ਰਿਹਾ ਹੈ। ਇਹ ਉਸ ਲਈ ਖਾਸ ਫ਼ਿਲਮ ਹੈ। ਉਸ ਲਈ ਇਕ ਚੰਗਾ ਅਹਿਸਾਸ ਹੈ। ਹੁਣ ਤਾਂ ਸੋਨਾ ਇਹ ਵੀ ਆਖ ਰਹੀ ਹੈ ਕਿ ਦੇਸ਼-ਪਿਆਰ 'ਤੇ ਬਣੀ ਕੋਈ ਵੀ ਫ਼ਿਲਮ ਹਿੱਟ ਹੋ ਸਕਦੀ ਹੈ। 'ਤੇਵਰ', 'ਅਕੀਰਾ', 'ਨੂਰ', 'ਹੈਪੀ ਫਿਰ ਭਾਗ ਜਾਏਗੀ' ਅਸਫ਼ਲ ਰਹੀਆਂ ਹਨ। 32 ਸਾਲ ਦੀ ਇਹ ਅਭਿਨੇਤਰੀ ਨਾਂਹ ਪੱਖੀ ਗੱਲਾਂ ਤੋਂ ਬਚਦੀ ਹੈ। ਦਸੰਬਰ ਸੋਨਾ ਨੂੰ 'ਦਬੰਗ-3' ਦੀ ਕਾਮਯਾਬੀ ਦਿਖਾਏਗਾ। ਪਟੜੀ ਤੋਂ ਲਾਂਭੇ ਹੋਏ ਸੋਨਾਕਸ਼ੀ ਸਿਨਹਾ ਦੇ ਕਰੀਅਰ ਦੀ ਫ਼ਿਲਮ ਟਰੇਨ ਫਿਰ ਸੁਪਰ ਫਾਸਟ ਬਣ ਕੇ ਚੱਲਣ ਵਾਲੀ ਹੈ। ਹੁਣ ਤਾਂ ਸੋਨਾ ਨੇ ਗਾਇਕਾ ਬਣਨ ਦਾ ਸੁਨਹਿਰੀ ਭਰਮ ਵੀ ਪਾਲ ਲਿਆ ਹੈ। 'ਆਜ ਮੂਡ...' ਹੈ ਇਕ ਸਿੰਗਲ ਗੀਤ ਸੋਨਾ ਦੀ ਆਵਾਜ਼ ਵਿਚ ਆ ਚੁੱਕਾ ਹੈ। 'ਦਬੰਗ' ਲੜੀ ਦੀ ਤੀਸਰੀ ਫ਼ਿਲਮ ਨੇ ਫਿਰ 'ਰੱਜੋ' ਦਾ ਚਿਹਰਾ ਲੋਕਾਂ 'ਚ ਮਕਬੂਲ ਕਰਨਾ ਹੈ। ਮੁਰਾਦਾਬਾਦ 'ਚ ਦਰਜ ਧੋਖਾਧੜੀ ਦੇ ਕੇਸ 'ਚ ਸੋਨਾ ਨੇ ਥਾਣੇ ਜਾ ਕੇ ਆਪਣੇ ਬਿਆਨ ਦਰਜ ਕਰਵਾਏ। 37 ਲੱਖ ਆਨਲਾਈਨ ਤੇ ਵੱਖ-ਵੱਖ ਖਾਤਿਆਂ 'ਚ ਸੋਨਾ ਨੂੰ ਪ੍ਰਸੰਸਕਾਂ ਨੇ ਇਕ ਸ਼ੋਅ ਲਈ ਦਿੱਤੇ ਸਨ ਪਰ ਉਹ ਨਹੀਂ ਸੀ ਉਥੇ ਪਹੁੰਚ ਸਕੀ। ਇਸ ਕਾਰਨ ਸੋਨਾ ਨੂੰ ਕਾਨੂੰਨੀ ਜਾਲ 'ਚ ਫਸਣ ਲਈ ਮਜਬੂਰ ਹੋਣਾ ਪਿਆ ਹੈ। 'ਬੌਸ' ਦੇ 'ਹੈੱਡ ਫੋਨ' ਅਮੇਜੋਨ ਐਪ ਤੋਂ ਮੰਗਵਾਉਣ ਵਾਲੀ ਸੋਨਾਕਸ਼ੀ ਸਿਨਹਾ ਨੂੰ ਇਥੇ ਵੀ ਧੋਖਾ ਹੀ ਮਿਲਿਆ ਤੇ ਉਸ ਨੂੰ ਪੈਸੇ ਉਜਾੜਨੇ ਪਏ। ਕੀ ਆਪ ਧੋਖਾ ਖਾ ਕੇ ਸੋਨਾ ਲੋਕਾਂ ਨੂੰ ਧੋਖਾ ਦੇ ਕੇ ਆਪਣਾ ਮਨ ਸ਼ਾਂਤ ਕਰ ਰਹੀ ਹੈ। ਸੋਨਾਕਸ਼ੀ ਸਿਨਹਾ ਕਾਮਯਾਬੀ ਦੇ ਰੱਥ 'ਤੇ ਸਵਾਰ ਹੋ ਕੇ ਪੁਰਾਣੀਆਂ ਅਸਫ਼ਲਤਾਵਾਂ ਨੂੰ ਭੁੱਲ ਚੁੱਕੀ ਹੈ।

ਆਯੁਸ਼ਮਾਨ ਨੂੰ ਮੁੱਖ ਭੂਮਿਕਾ ਵਿਚ ਚਮਕਾਉਂਦੀ 'ਡ੍ਰੀਮ ਗਰਲ'

ਹੇਮਾ ਮਾਲਿਨੀ ਨੂੰ ਮੁੱਖ ਭੂਮਿਕਾ ਵਿਚ ਚਮਕਾਉਂਦੀ ਫਿਮਲ 'ਡ੍ਰੀਮ ਗਰਲ' ਸਾਲ 1977 ਵਿਚ ਪ੍ਰਦਰਸ਼ਿਤ ਹੋਈ ਸੀ। ਉਦੋਂ ਇਸ ਫ਼ਿਲਮ ਦੀ ਚਰਚਾ ਇਸ ਗੱਲ ਨੂੰ ਲੈ ਕੇ ਖ਼ੂਬ ਹੁੰਦੀ ਸੀ ਕਿ ਫ਼ਿਲਮ ਦੇ ਟਾਈਟਲ ਗੀਤ ਵਿਚ ਹੇਮਾ ਮਾਲਿਨੀ ਨੇ ਕਿੰਨੀ ਵਾਰ ਸਾੜ੍ਹੀਆਂ ਬਦਲੀਆਂ ਹਨ। ਹੁਣ ਆਯੁਸ਼ਮਾਨ ਖੁਰਾਣਾ ਨੂੰ ਮੁੱਖ ਭੂਮਿਕਾ ਵਿਚ ਪੇਸ਼ ਕਰਦੀ 'ਡ੍ਰੀਮ ਗਰਲ' ਆ ਰਹੀ ਹੈ ਅਤੇ ਇਸ ਫ਼ਿਲਮ ਦੀ ਚਰਚਾ ਵੀ ਸਾੜ੍ਹੀਆਂ ਨੂੰ ਲੈ ਕੇ ਹੋਣੀ ਸੁਭਾਵਿਕ ਹੀ ਹੈ। ਦੋਵੇਂ 'ਡ੍ਰੀਮ ਗਰਲ' ਵਿਚ ਮੁੱਖ ਫਰਕ ਇਹ ਹੈ ਕਿ ਉਥੇ ਹੀਰੋਇਨ ਨੂੰ ਸਾੜ੍ਹੀ ਵਿਚ ਪੇਸ਼ ਕੀਤਾ ਗਿਆ ਸੀ ਤੇ ਇਥੇ ਹੀਰੋ ਨੂੰ।
ਫ਼ਿਲਮ ਦੇ ਕਈ ਦ੍ਰਿਸ਼ਾਂ ਵਿਚ ਸਾੜ੍ਹੀ ਪਾਈ ਨਜ਼ਰ ਆਉਣ ਵਾਲੇ ਆਯੁਸ਼ਮਾਨ ਇਥੇ ਇਕ ਇਸ ਤਰ੍ਹਾਂ ਦੇ ਮੁੰਡੇ ਦੀ ਭੂਮਿਕਾ ਨਿਭਾਅ ਰਹੇ ਹਨ ਜਿਸ ਦੀ ਮਾਂ ਨੇ ਕਈ ਮੰਨਤਾਂ ਬਾਅਦ ਇਸ ਨੂੰ ਪਾਇਆ ਹੁੰਦਾ ਹੈ। ਇਹ ਮੁੰਡਾ ਚੰਗਾ ਕਲਾਕਾਰ ਵੀ ਹੈ। ਸੋ ਸਾੜ੍ਹੀ ਪਾ ਕੇ ਉਹ ਰੰਗਮੰਚ 'ਤੇ ਕਦੀ ਸੀਤਾ ਤੇ ਕਦੀ ਰਾਧਾ ਬਣਦਾ ਰਹਿੰਦਾ ਹੈ। ਉਸ ਨੂੰ ਔਰਤ ਦੀ ਆਵਾਜ਼ ਕੱਢਣ ਦੀ ਕਲਾ ਵਿਚ ਮੁਹਾਰਤ ਹਾਸਲ ਹੈ ਅਤੇ ਇਸ ਕਲਾ ਦੀ ਵਜ੍ਹਾ ਕਰਕੇ ਉਸ ਨੂੰ ਔਰਤ ਆਰ ਜੇ ਦਾ ਕੰਮ ਮਿਲ ਜਾਂਦਾ ਹੈ। ਹੁਣ ਇਸ ਕੰਮ ਦੀ ਵਜ੍ਹਾ ਨਾਲ ਕਿਵੇਂ ਪੰਗਾ ਖੜ੍ਹਾ ਹੁੰਦਾ ਹੈ, ਇਹ ਫ਼ਿਲਮ ਦੀ ਕਹਾਣੀ ਹੈ।
ਕਈ ਟੀ. ਵੀ. ਕਾਮੇਡੀ ਸ਼ੋਆਂ ਵਿਚ ਆਪਣੀ ਲੇਖਣੀ ਦਾ ਕਮਾਲ ਦਿਖਾ ਕੇ ਲੋਕਾਂ ਨੂੰ ਹਸਾਉਣ ਵਾਲੇ ਰਾਜ ਸ਼ਾਂਡਲਿਆ ਵਲੋਂ ਇਹ ਫ਼ਿਲਮ ਨਿਰਦੇਸ਼ਿਤ ਕੀਤੀ ਗਈ ਹੈ ਅਤੇ ਇਸ ਫ਼ਿਲਮ ਲਈ ਆਯੁਸ਼ਮਾਨ ਨੂੰ ਔਰਤ ਦੀ ਆਵਾਜ਼ ਕੱਢਣ ਦੀ ਵਿਸ਼ੇਸ਼ ਰਿਹਰਸਲ ਵੀ ਕਰਨੀ ਪਈ ਸੀ। ਹਾਸਰਸ ਨਾਲ ਭਰੀ ਇਸ ਫ਼ਿਲਮ ਵਿਚ ਨੁਸਰਤ ਭਰੁਚਾ, ਅਨੂ ਕਪੂਰ, ਮਨਜੋਤ ਸਿੰਘ, ਨਿਧੀ ਬਿਸ਼ਟ, ਰਾਜੇਸ਼ ਸ਼ਰਮਾ ਤੇ ਸੁਮੋਨਾ ਚੱਕਰਵਰਤੀ ਨੇ ਵੀ ਕੰਮ ਕੀਤਾ ਹੈ ਅਤੇ ਇਹ 13 ਸਤੰਬਰ ਨੂੰ ਪ੍ਰਦਰਸ਼ਿਤ ਹੋ ਰਹੀ ਹੈ।


-ਮੁੰਬਈ ਪ੍ਰਤੀਨਿਧ

ਫ਼ਿਲਮੀ ਖ਼ਬਰਾਂ

ਧੋਨੀ ਹੁਣ ਫ਼ਿਲਮ
ਨਿਰਮਾਣ ਵਿਚ?

ਸਾਬਕਾ ਭਾਰਤੀ ਕ੍ਰਿਕਟ ਕਪਤਾਨ ਮਹਿੰਦਰ ਸਿੰਘ ਧੋਨੀ ਬਾਰੇ ਕ੍ਰਿਕਟ ਜਗਤ ਵਿਚ ਉਨ੍ਹਾਂ ਦੀ ਸੇਵਾਮੁਕਤੀ ਨੂੰ ਲੈ ਕੇ ਕਈ ਤਰ੍ਹਾਂ ਦੇ ਅੰਦਾਜ਼ੇ ਲਗਾਏ ਜਾ ਰਹੇ ਹਨ। ਉਥੇ ਹੁਣ ਬਾਲੀਵੁੱਡ ਵਿਚ ਇਹ ਚਰਚਾ ਜ਼ੋਰਾਂ 'ਤੇ ਹੈ ਕਿ ਕ੍ਰਿਕਟ ਤੋਂ ਸੰਨਿਆਸ ਲੈ ਕੇ ਧੋਨੀ ਫ਼ਿਲਮ ਨਿਰਮਾਣ ਦੇ ਖੇਤਰ ਵਿਚ ਆਪਣਾ ਆਗਮਨ ਕਰਨਗੇ। ਇਸ ਬਾਰੇ ਤਰਕ ਇਹ ਦਿੱਤਾ ਜਾ ਰਿਹਾ ਹੈ ਕਿ ਕਿਉਂਕਿ ਧੋਨੀ ਸਾਲਾਂ ਤੋਂ ਐਡ ਫ਼ਿਲਮਾਂ ਵਿਚ ਕੰਮ ਕਰਦੇ ਆਏ ਹਨ। ਸੋ, ਹੁਣ ਫ਼ਿਲਮ ਨਿਰਮਾਣ ਦੀਆਂ ਸਰਗਮਰੀਆਂ ਤੋਂ ਜਾਣੂ ਹੋ ਗਏ ਹਨ। ਆਪਣੀ ਜ਼ਿੰਦਗੀ 'ਤੇ ਬਣੀ ਫ਼ਿਲਮ ਦੀ ਵਜ੍ਹਾ ਕਰਕੇ ਉਹ ਮੇਨ ਸਟ੍ਰੀਮ ਸਿਨੇਮਾ ਨਾਲ ਜੁੜੇ ਲੋਕਾਂ ਦੀ ਪਛਾਣ ਵਿਚ ਆਏ ਹਨ ਅਤੇ ਇਸ ਦੇ ਬਾਅਦ ਉਹ ਫ਼ਿਲਮ ਨਿਰਮਾਣ ਬਾਰੇ ਗੰਭੀਰਤਾ ਨਾਲ ਸੋਚਣ ਲੱਗੇ ਹਨ। ਕਿਹਾ ਤਾਂ ਇਹ ਵੀ ਜਾ ਰਿਹਾ ਹੈ ਕਿ ਉਹ ਆਪਣੀ ਬਾਇਓਪਿਕ ਦੇ ਨਿਰਦੇਸ਼ਕ ਨੀਰਜ ਪਾਂਡੇ ਜਾਂ ਫਿਰ ਆਪਣੇ ਨਿੱਜੀ ਮਿੱਤਰ ਜਾਨ ਅਬ੍ਰਾਹਮ ਦੇ ਨਾਲ ਮਿਲ ਕੇ ਫ਼ਿਲਮ ਦਾ ਨਿਰਮਾਣ ਕਰਨਗੇ। ਹੁਣ ਦੇਖੋ, ਧੋਨੀ ਨਿਰਮਾਤਾ ਬਣ ਕੇ ਆਪਣੀ ਫ਼ਿਲਮ ਦਾ ਰਸਮੀ ਐਲਾਨ ਕਦੋਂ ਕਰਦੇ ਹਨ।
ਮੀਰਾ ਨਾਇਰ ਦੀ ਫ਼ਿਲਮ ਵਿਚ ਤੱਬੂ-ਇਸ਼ਾਨ

ਨਿਰਦੇਸ਼ਿਕਾ ਮੀਰਾ ਨਾਇਰ ਨੇ ਆਪਣੀ ਅਗਾਮੀ ਫ਼ਿਲਮ ਲਈ ਇਸ਼ਾਨ ਖੱਟਰ ਤੇ ਤੱਬੂ ਨੂੰ ਕਰਾਰਬੱਧ ਕਰ ਲਿਆ ਹੈ। ਮੀਰਾ ਦੀ ਇਹ ਫ਼ਿਲਮ ਨਾਮੀ ਲੇਖਕ ਵਿਕਰਮ ਸੇਠ ਵਲੋਂ ਲਿਖੀ ਗਈ ਕਿਤਾਬ 'ਏ ਸੁਇਟਏਬਲ ਬਾਏ' ਤੋਂ ਪ੍ਰੇਰਿਤ ਹੈ। ਟੀ. ਵੀ. ਲੜੀਵਾਰ 'ਫਲੈਮਜ਼' ਫੇਮ ਅਭਿਨੇਤਰੀ ਤਾਨਿਆ ਮਾਨਿਕਤਾਲਾ ਵੀ ਇਸ ਫ਼ਿਲਮ ਵਿਚ ਕੰਮ ਕਰ ਰਹੀ ਹੈ। ਫ਼ਿਲਮ ਦੀ ਕਹਾਣੀ 1950 ਦੇ ਸਮੇਂ ਦੇ ਭਾਰਤ 'ਤੇ ਆਧਾਰਿਤ ਹੈ ਅਤੇ ਇਸ ਦੀ ਸ਼ੂਟਿੰਗ ਜਲਦੀ ਸ਼ੁਰੂ ਕੀਤੀ ਜਾਵੇਗੀ।
ਅਨੁਰਾਗ ਬਾਸੂ ਦੀ ਫ਼ਿਲਮ ਵਿਚ ਅਭਿਸ਼ੇਕ-ਆਸ਼ਾ

ਨਿਰਦੇਸ਼ਕ ਅਨੁਰਾਗ ਬਾਸੂ ਨੇ ਆਪਣੀ ਅਗਲੀ ਫ਼ਿਲਮ ਲਈ ਅਭਿਸ਼ੇਕ ਬੱਚਨ ਤੇ ਆਸ਼ਾ ਨੇਗੀ ਨੂੰ ਕਰਾਰਬੱਧ ਕਰ ਲਿਆ ਹੈ। ਮੌਨੀ ਰਾਏ, ਅੰਕਿਤਾ ਲੋਖੰਡੇ, ਮ੍ਰਿਣਾਲ ਠਾਕੁਰ ਤੇ ਰਾਧਿਕਾ ਮਦਾਨ ਤੋਂ ਬਾਅਦ ਹੁਣ ਆਸ਼ਾ ਨੇਗੀ ਨੇ ਵੀ ਛੋਟੇ ਪਰਦੇ ਤੋਂ ਫ਼ਿਲਮਾਂ ਵਿਚ ਆਪਣਾ ਆਗਮਨ ਕਰ ਲਿਆ ਹੈ। ਅਨੁਰਾਗ ਦੀ ਇਸ ਨਵੀਂ ਫ਼ਿਲਮ ਵਿਚ ਰਾਜ ਕੁਮਾਰ ਰਾਓ ਤੇ ਆਦਿਤਿਆ ਰਾਏ ਕਪੂਰ ਵੀ ਹੋਣਗੇ ਅਤੇ ਫ਼ਿਲਮ ਦੀ ਖ਼ਾਸ ਗੱਲ ਇਹ ਹੈ ਕਿ 'ਦੰਗਲ' ਤੋਂ ਬਾਅਦ ਫਾਤਿਮਾ ਸਨਾ ਸ਼ੇਖ ਤੇ ਸਾਨਿਆ ਮਲਹੋਤਰਾ ਇਸ ਵਿਚ ਇਕੱਠੇ ਦਿਸਣਗੇ। ਲੜੀਵਾਰ 'ਪਵਿੱਤਰ ਰਿਸ਼ਤਾ' ਤੋਂ ਹਰਮਨਪਿਆਰਤਾ ਹਾਸਲ ਕਰਨ ਵਾਲੀ ਆਸ਼ਾ ਨੇਗੀ ਨੂੰ ਉਮੀਦ ਹੈ ਕਿ ਇਹ ਫ਼ਿਲਮ ਉਸ ਦੇ ਫ਼ਿਲਮੀ ਕੈਰੀਅਰ ਨੂੰ ਸਹੀ ਦਿਸ਼ਾ ਦੇਵੇਗੀ।


-ਮੁੰਬਈ ਪ੍ਰਤੀਨਿਧ

ਕ੍ਰਿਸ਼ਨਾਅਭਿਸ਼ੇਕ 'ਤੂ ਆਇਆ ਨਾ'

ਆਸਾਮ ਦੇ ਗੁਹਾਟੀ ਦੀ ਵਾਸੀ ਸੌਮਿੱਤਰਾ ਦੇਵ ਬਰਮਨ ਨੇ ਆਪਣੀ ਆਵਾਜ਼ ਨਾਲ ਸਜਿਆ ਇਕ ਗੀਤ 'ਤੂ ਆਇਆ ਨਾ' ਪੇਸ਼ ਕੀਤਾ ਹੈ। ਹੈਰੀ ਆਨੰਦ ਵਲੋਂ ਸੰਗੀਤਬੱਧ ਇਸ ਗੀਤ ਨੂੰ ਸੰਗੀਤ ਕੰਪਨੀ ਟੀ-ਸੀਰੀਜ਼ ਵਲੋਂ ਜਾਰੀ ਕੀਤਾ ਗਿਆ ਹੈ। ਗੀਤ ਵਿਚ ਇਕ ਪਤਨੀ ਦੀ ਬਿਰਹਾ ਦੀ ਵੇਦਨਾ ਪੇਸ਼ ਕੀਤੀ ਗਈ ਹੈ ਅਤੇ ਇਸ ਦੀ ਪਹਿਲੀ ਪੰਕਤੀ ਦੇ ਬੋਲ ਹਨ 'ਹਰ ਇਕ ਬੂੰਦ ਬਾਰਿਸ਼ ਕੀ ਤੇਰੀ ਯਾਦ ਦਿਲਾਯੇ'।
ਇਸ ਗੀਤ ਨੂੰ ਲੈ ਕੇ ਜੋ ਵੀਡੀਓ ਬਣਾਇਆ ਗਿਆ ਹੈ, ਇਸ ਦਾ ਫ਼ਿਲਮਾਂਕਣ ਗਣੇਸ਼ ਆਚਾਰਿਆ ਵਲੋਂ ਕੀਤਾ ਗਿਆ ਹੈ। ਵੀਡੀਓ ਵਿਚ ਸੌਮਿੱਤਰਾ ਦੇ ਨਾਲ ਕ੍ਰਿਸ਼ਨਾਅਭਿਸ਼ੇਕ ਤੇ ਕੰਨੜ ਅਭਿਨੇਤਰੀ ਮਾਨਿਵਤਾ ਕਾਮਤ ਨੂੰ ਚਮਕਾਇਆ ਗਿਆ ਹੈ। ਵੀਡੀਓ ਦੀ ਖ਼ਾਸ ਗੱਲ ਇਹ ਹੈ ਕਿ ਇਸ ਵਿਚ ਕ੍ਰਿਸ਼ਨਾ ਨੂੰ ਫ਼ੌਜੀ ਦੇ ਰੂਪ ਵਿਚ ਪੇਸ਼ ਕੀਤਾ ਗਿਆ ਹੈ।
ਵੀਡੀਓ ਬਾਰੇ ਸੌਮਿੱਤਰਾ ਕਹਿੰਦੀ ਹੈ, 'ਗੀਤ ਰਿਕਾਰਡ ਕਰਨ ਤੋਂ ਬਾਅਦ ਇਸ 'ਤੇ ਸੋਚ-ਵਿਚਾਰ ਚੱਲ ਰਿਹਾ ਸੀ ਕਿ ਇਸ ਦੇ ਵੀਡੀਓ ਨੂੰ ਕਿਸ ਅੰਦਾਜ਼ ਵਿਚ ਬਣਾਇਆ ਜਾਵੇ। ਗੀਤ ਵਿਚ ਵਿਆਹੁਤਾ ਦੇ ਦਰਦ ਨੂੰ ਪੇਸ਼ ਕੀਤਾ ਗਿਆ ਹੈ। ਸੋ, ਮਨ ਵਿਚ ਖ਼ਿਆਲ ਆਇਆ ਕਿ ਕਿਉਂ ਨਾ ਫ਼ੌਜੀ ਦੀ ਪਤਨੀ ਦੇ ਕੋਣ ਤੋਂ ਇਸ ਨੂੰ ਸ਼ੂਟ ਕੀਤਾ ਜਾਵੇ ਅਤੇ ਗਣੇਸ਼ ਅਚਾਰਿਆ ਤੇ ਹੈਰੀ ਵੀ ਝੱਟ ਇਸ ਲਈ ਰਾਜ਼ੀ ਹੋ ਗਏ। ਕ੍ਰਿਸ਼ਨਾ ਕਾਮੇਡੀ ਲਈ ਜਾਣੇ ਜਾਂਦੇ ਹਨ ਪਰ ਇਥੇ ਉਹ ਫ਼ੌਜੀ ਬਣਨ ਨੂੰ ਰਾਜ਼ੀ ਹੋ ਗਏ ਅਤੇ ਇਥੇ ਉਨ੍ਹਾਂ ਨੂੰ ਨਵੇਂ ਰੂਪ ਵਿਚ ਪੇਸ਼ ਕੀਤਾ ਗਿਆ ਹੈ। ਮੇਰੇ ਪਿਤਾ ਪੁਲਿਸ ਵਿਚ ਸਨ। ਸੋ, ਮੈਨੂੰ ਵਰਦੀ ਪ੍ਰਤੀ ਬਹੁਤ ਮਾਣ ਹੈ। ਇਹ ਵੀਡੀਓ ਦੇਸ਼ ਦੇ ਸੁਰੱਖਿਆ ਬਲਾਂ ਨੂੰ ਸਮਰਪਿਤ ਹੈ।'
ਵੀਡੀਓ ਬਾਰੇ ਕ੍ਰਿਸ਼ਨਾ ਕਹਿੰਦੇ ਹਨ, 'ਇਸ ਦਾ ਫ਼ਿਲਮਾਂਕਣ ਪੁਲਵਾਮਾ ਵਿਚ ਸ਼ਹੀਦ ਹੋਏ ਫ਼ੌਜੀਆਂ ਤੋਂ ਪ੍ਰੇਰਿਤ ਹੈ, ਨਾਲ ਹੀ ਇਸ ਵਿਚ ਫ਼ੌਜੀ ਦੀ ਜ਼ਿੰਦਗੀ ਦੀ ਸੱਚਾਈ ਵੀ ਦਿਖਾਈ ਗਈ ਹੈ ਕਿ ਅਗਲੇ ਪਲ ਕੀ ਹੋਵੇਗਾ, ਕੋਈ ਨਹੀਂ ਜਾਣਦਾ। ਜਦੋਂ ਮੈਨੂੰ ਇਸ ਵੀਡੀਓ ਦੀ ਪੇਸ਼ਕਸ਼ ਆਈ ਤੱਦ ਮਨ ਵਿਚ ਸ਼ੱਕ ਸੀ ਕਿ ਕਿਤੇ ਇਸ ਦਾ ਰਟਿਆ-ਰਟਾਇਆ ਫ਼ਿਲਮਾਂਕਣ ਨਾ ਹੋਵੇ। ਜਦੋਂ ਗਣੇਸ਼ ਜੀ ਨੇ ਦੱਸਿਆ ਕਿ ਇਥੇ ਮੈਨੂੰ ਫ਼ੌਜੀ ਦੀ ਵਰਦੀ ਵਿਚ ਪੇਸ਼ ਕੀਤਾ ਜਾਵੇਗਾ ਤਾਂ ਮੈਂ ਤੁਰੰਤ ਰਾਜ਼ੀ ਹੋ ਗਿਆ।'
ਸੌਮਿੱਤਰਾ ਨੇ ਜਿਸ ਦਰਦੀਲੇ ਅੰਦਾਜ਼ ਵਿਚ ਗੀਤ ਗਾਇਆ ਹੈ, ਇਸ ਵਜ੍ਹਾ ਨਾਲ ਇਹ ਗੀਤ ਅਨੋਖਾ ਬਣਿਆ ਹੈ।


-ਪੰਨੂੰ

ਸ਼ੇਮਾਰੂ ਦਾ ਭਗਤੀ ਸਟੂਡੀਓ

ਭਗਤੀ ਸੰਗੀਤ ਨੂੰ ਵਧਾਉਣ ਲਈ ਤੇ ਨੌਜਵਾਨਾਂ ਵਿਚ ਭਗਤੀ ਰਸ ਨੂੰ ਪੈਦਾ ਕਰਨ ਲਈ ਸ਼ੇਮਾਰੂ ਵਲੋਂ ਇਕ ਚੰਗੀ ਤੇ ਨਵੀਂ ਪਹਿਲ ਕੀਤੀ ਗਈ ਹੈ। ਕਦੀ ਵੀਡੀਓ ਹੱਕ ਖਰੀਦਣ ਦੇ ਮਾਮਲੇ ਵਿਚ ਮਸ਼ਹੂਰ ਹੋਈ ਇਹ ਕੰਪਨੀ ਸ਼ੇਮਾਰੂ ਹੁਣ ਬਦਲਦੇ ਸਮੇਂ ਨੂੰ ਦੇਖ ਕੇ ਇੰਟਰਨੈੱਟ ਵਲ ਆਪਣਾ ਧਿਆਨ ਜ਼ਿਆਦਾ ਦੇ ਰਹੀ ਹੈ ਅਤੇ ਇਸੇ ਲੜੀ ਵਿਚ ਹੁਣ ਕੰਪਨੀ ਵਲੋਂ 'ਸ਼ੇਮਾਰੂ ਭਗਤੀ ਸਟੂਡੀਓ' ਜਾਰੀ ਕੀਤਾ ਗਿਆ ਹੈ। ਇਸ ਨਵੇਂ ਪਲੇਟਫਾਰਮ ਰਾਹੀਂ ਉਨ੍ਹਾਂ ਪ੍ਰਤਿਭਾਵਾਂ ਨੂੰ ਮੌਕਾ ਦਿੱਤਾ ਜਾਵੇਗਾ ਜਿਨ੍ਹਾਂ ਦੀ ਭਜਨ ਗਾਇਕੀ ਵਿਚ ਰੁਚੀ ੋਹੋਵੇਗੀ। ਸ਼ੇਮਾਰੂ ਵਲੋਂ ਇਸ ਭਗਤੀ ਸਟੂਡੀਓ ਦੀ ਕਮਾਨ ਅਨੂਪ ਜਲੋਟਾ, ਸੁਰੇਸ਼ ਵਾਡੇਕਰ ਤੇ ਸਰੋਜ ਖਾਨ ਦੇ ਹੱਥਾਂ ਵਿਚ ਸੌਂਪੀ ਗਈ ਹੈ। ਇਸ ਕੰਪਨੀ ਦੇ ਇਕ ਮਾਲਿਕ ਹਿਰੇਨ ਗੜ੍ਹਾ ਅਨੁਸਾਰ ਅਨੂਪ ਜਲੋਟਾ ਤੇ ਸੁਰੇਸ਼ ਵਾਡੇਕਰ ਦਾ ਨਾਂਅ ਭਜਨ ਗਾਇਕੀ ਦੇ ਖੇਤਰ ਵਿਚ ਬਹੁਤ ਇੱਜ਼ਤ ਨਾਲ ਲਿਆ ਜਾਂਦਾ ਹੈ। ਸੋ, ਭਗਤੀ ਸਟੂਡੀਓ ਲਈ ਇਨ੍ਹਾਂ ਦਾ ਸਾਥ ਹਾਸਲ ਕਰਨਾ ਇੱਜ਼ਤ ਦੀ ਗੱਲ ਹੈ। ਭਗਤੀ ਰਸ ਵਿਚ ਨ੍ਰਿਤ ਵੀ ਸ਼ਾਮਿਲ ਹੋ ਜਾਂਦਾ ਹੈ। ਇਸ ਵਜ੍ਹਾ ਕਰਕੇ ਸਰੋਜ ਖਾਨ ਨੂੰ ਚੁਣਿਆ ਗਿਆ ਹੈ। ਭਗਤੀ ਸਟੂਡੀਓ ਦੇ ਐਲਾਨ ਮੌਕੇ ਸਰੋਜ ਖਾਨ ਆਪਣੀ ਖਰਾਬ ਸਿਹਤ ਦੀ ਵਜ੍ਹਾ ਕਰਕੇ ਮੌਜੂਦ ਨਹੀਂ ਹੋ ਸਕੀ ਸੀ ਪਰ ਅਨੂਪ ਜਲੋਟਾ ਤੇ ਸੁਰੇਸ਼ ਵਾਡੇਕਰ ਪਹੁੰਚੇ ਹੋਏ ਸਨ।
ਉਥੇ ਅਨੂਪ ਜਲੋਟਾ ਨੇ ਕਿਹਾ, 'ਲੋਕ ਕਹਿੰਦੇ ਹਨ ਕਿ ਅੱਜ ਦੇ ਨੌਜਵਾਨ ਭਗਤੀ ਰਸ ਤੋਂ ਦੂਰ ਹੁੰਦੇ ਜਾ ਰਹੇ ਹਨ। ਪਰ ਮੈਂ ਇਸ ਨਾਲ ਸਹਿਮਤ ਨਹੀਂ ਹਾਂ। ਮੈਂ ਦੇਖਿਆ ਹੈ ਕਿ ਇਮਤਿਹਾਨਾਂ ਦੇ ਦਿਨਾਂ ਵਿਚ ਜਦੋਂ ਅੱਜ ਦਾ ਨੌਜਵਾਨ ਮੰਦਰ ਜਾਂਦਾ ਹੈ, ਉਦੋਂ ਮੰਦਰ ਦੀਆਂ ਪੌੜੀਆਂ ਚੜ੍ਹਦੇ ਸਮੇਂ ਉਸ ਦੇ ਮੂੰਹ 'ਤੇ ਪ੍ਰਭੂ ਦਾ ਨਾਂਅ ਹੁੰਦਾ ਹੈ ਨਾ ਕਿ ਮਾਈਕਲ ਜੈਕਸਨ ਦਾ ਗੀਤ। ਭਾਵ ਉਹ ਭਗਤੀ ਤੋਂ ਅਛੂਤੇ ਨਹੀਂ ਹੁੰਦੇ, ਬਸ ਕਮੀ ਹੈ ਤਾਂ ਉਨ੍ਹਾਂ ਨੂੰ ਭਗਤੀ ਦੇ ਨਾਲ ਸਹੀ ਤਰ੍ਹਾਂ ਨਾਲ ਜੋੜਨ ਦੀ ਅਤੇ ਇਸ ਭਗਤੀ ਸਟੂਡੀਓ ਵਲੋਂ ਉਹ ਕਮੀ ਪੂਰੀ ਕੀਤੀ ਜਾਵੇਗੀ।'
ਸੁਰੇਸ਼ ਵਾਡੇਕਰ ਨੇ ਕਿਹਾ, 'ਭਗਤੀ ਰਸ ਦੇ ਰੱਥ ਨੂੰ ਖਿੱਚਣ ਲਈ ਨਵੇਂ ਘੋੜੇ ਜੋੜਨੇ ਚਾਹੀਦੇ ਅਤੇ ਇਸ ਪਲੇਟਫਾਰਮ ਦੀ ਬਦੌਲਤ ਭਗਤੀ ਦੇ ਰੱਥ ਨੂੰ ਨਵੀਂ ਸ਼ਕਤੀ ਮਿਲੇਗੀ।'


-ਮੁੰਬਈ ਪ੍ਰਤੀਨਿਧ

ਮੰਦਾਕਿਨੀ-ਰਾਖੀ ਦੀ 'ਛੱਪਨ ਛੁਰੀ'

ਚਾਲੀ ਤੋਂ ਜ਼ਿਆਦਾ ਅਸਾਮੀ ਫ਼ਿਲਮੀ ਗੀਤ ਗਾਉਣ ਵਾਲੀ ਤੇ ਬਾਲੀਵੁੱਡ ਵਿਚ ਆ ਕੇ 'ਤਿਸ਼ਨਗੀ', 'ਸਾਹਬ ਬੀਵੀ ਔਰ ਗੈਂਗਸਟਰ', 'ਬੰਜਾਰਾ' ਆਦਿ ਫ਼ਿਲਮਾਂ ਦੇ ਗੀਤਾਂ ਲਈ ਆਪਣੀ ਆਵਾਜ਼ ਦੇਣ ਵਾਲੀ ਗਾਇਕਾ ਮੰਦਾਕਿਨੀ ਬੋਰਾ ਹੁਣ ਸੋਲੋ ਗੀਤ 'ਛੱਪਨ ਛੁਰੀ' ਲੈ ਕੇ ਪੇਸ਼ ਹੋਈ ਹੈ। ਇਹ ਟਿਪੀਕਲ ਦੇਸੀ ਗੀਤ ਹੈ ਅਤੇ ਇਸ ਦੇ ਵੀਡੀਓ ਵਿਚ ਮੰਦਾਕਿਨੀ ਦੇ ਨਾਲ ਰਾਖੀ ਸਾਵੰਤ ਨੂੰ ਚਮਕਾਇਆ ਗਿਆ ਹੈ।
ਵੀਡੀਓ ਲਈ ਰਾਖੀ ਦੀ ਚੋਣ ਬਾਰੇ ਇਹ ਗਾਇਕਾ ਕਹਿੰਦੀ ਹੈ, 'ਇਹ ਆਈਟਮ ਗੀਤ ਹੈ। ਰਾਖੀ ਦੀ ਇਮੇਜ ਵੀ ਆਈਟਮ ਗਰਲ ਦੀ ਹੈ। ਗੀਤ ਦੇ ਬੋਲ ਵਿਚ ਛੱਪਨ ਛੁਰੀ ਸ਼ਬਦ ਸਮਾਏ ਹੋਏ ਹਨ ਅਤੇ ਰਾਖੀ ਵੀ ਕਿਸੇ ਛੱਪਨ ਛੁਰੀ ਤੋਂ ਘੱਟ ਨਹੀਂ ਹੈ। ਉਹ ਛੁਰੀ ਜਿਹੀ ਤੇਜ਼ ਹੈ। ਉਸ ਵਿਚ ਛੁਰੀ ਵਾਲੇ ਗੁਣ ਦੇਖ ਕੇ ਸਾਨੂੰ ਉਹ ਇਸ ਵੀਡੀਓ ਲਈ ਸਹੀ ਲੱਗੀ।'
ਇਹ ਗੀਤ ਦੀਪਕ ਨੂਰ ਵਲੋਂ ਲਿਖਿਆ ਗਿਆ ਹੈ ਅਤੇ ਇਸ ਨੂੰ ਜਾਵੇਦ ਹੁਸੈਨ ਵਲੋਂ ਸੰਗੀਤਬੱਧ ਕੀਤਾ ਗਿਆ ਹੈ। ਵੀਡੀਓ ਦਾ ਫ਼ਿਲਮਾਂਕਣ ਰਾਜੀਵ ਖਿਨਚੀ ਵਲੋਂ ਕੀਤਾ ਗਿਆ ਹੈ।
ਇਸ ਵੀਡੀਓ ਬਾਰੇ ਰਾਖੀ ਕਹਿੰਦੀ ਹੈ, 'ਇਹ ਧਮਾਲ ਗੀਤ ਹੈ ਅਤੇ ਯੂ. ਪੀ.-ਬਿਹਾਰ ਵਾਲੇ ਟਚ ਵਾਲਾ ਹੈ। ਗੀਤ ਦੇ ਬੋਲਾਂ ਦੀ ਖ਼ਾਸ ਗੱਲ ਇਹ ਲੱਗੀ ਕਿ ਇਸ ਵਿਚ ਔਰਤਾਂ ਨਾਲ ਛੇੜਛਾੜ ਦੇ ਖਿਲਾਫ਼ ਸੰਦੇਸ਼ ਦਿੱਤਾ ਗਿਆ ਹੈ। ਗੀਤ ਵਿਚ ਅੱਜ ਦੀਆਂ ਔਰਤਾਂ ਨੂੰ ਛੁਰੀ ਦਾ ਗੁਣ ਅਪਣਾਉਣ ਦੀ ਗੱਲ ਕੀਤੀ ਗਈ ਹੈ। ਛੁਰੀ ਨਾਲ ਸਬਜ਼ੀ ਕੱਟੀ ਜਾ ਸਕਦੀ ਹੈ ਤੇ ਸਮਾਂ ਪੈਣ 'ਤੇ ਆਤਮ ਰੱਖਿਆ ਲਈ ਵੀ ਕੰਮ ਆ ਸਕਦੀ ਹੈ। ਗੀਤ ਵਿਚ ਪੇਸ਼ ਕੀਤਾ ਗਿਆ ਸੰਦੇਸ਼ ਦੇਖ ਕੇ ਮੈਂ ਇਸ ਦੇ ਵੀਡੀਓ ਵਿਚ ਥਿਰਕਣ ਲਈ ਰਾਜ਼ੀ ਹੋ ਗਈ।' ਇਸ ਵੀਡੀਓ ਵਿਚ ਡੁਪਲੀਕੇਟ ਅਮਿਤਾਭ ਤੇ ਸ਼ਤਰੂਘਨ ਸਿਨਹਾ ਵੀ ਹਨ।

-ਮੁੰਬਈ ਪ੍ਰਤੀਨਿਧ





Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX