ਤਾਜਾ ਖ਼ਬਰਾਂ


ਓਨਾਊ ਜਬਰ ਜਨਾਹ ਮਾਮਲੇ 'ਚ ਭਾਜਪਾ ਵਿਧਾਇਕ ਕੁਲਦੀਪ ਸੇਂਗਰ ਦੋਸ਼ੀ ਕਰਾਰ
. . .  4 minutes ago
ਨਵੀਂ ਦਿੱਲੀ, 16 ਦਸੰਬਰ- ਓਨਾਊ ਜਬਰ ਜਨਾਹ ਅਤੇ ਅਗਵਾ ਮਾਮਲੇ 'ਚ ਦਿੱਲੀ ਦੀ ਤੀਸ ਹਜ਼ਾਰੀ ਕੋਰਟ ਨੇ ਭਾਜਪਾ ਵਿਧਾਇਕ ਕੁਲਦੀਪ ਸੇਂਗਰ ਨੂੰ ਦੋਸ਼ੀ ਕਰਾਰ...
ਨਾਗਰਿਕਤਾ ਸੋਧ ਕਾਨੂੰਨ ਅਤੇ ਐੱਨ. ਆਰ. ਸੀ. ਦੇ ਵਿਰੋਧ 'ਚ ਮਮਤਾ ਬੈਨਰਜੀ ਨੇ ਕੋਲਕਾਤਾ 'ਚ ਕੱਢਿਆ ਮਾਰਚ
. . .  11 minutes ago
ਕੋਲਕਾਤਾ, 16 ਦਸੰਬਰ- ਪੱਛਮੀ ਬੰਗਾਲ ਦੀ ਮੰਤਰੀ ਮਮਤਾ ਬੈਨਰਜੀ ਨੇ ਅੱਜ ਕੋਲਕਾਤਾ ਨਾਗਰਿਕਤਾ ਸੋਧ ਕਾਨੂੰਨ ਅਤੇ ਐੱਨ. ਆਰ. ਸੀ. ਦੇ ਖ਼ਿਲਾਫ਼ ਮਾਰਚ ਕੱਢਿਆ ਹੈ। ਦੱਸ ਦਈਏ ਕਿ...
ਫਗਵਾੜਾ ਦੇ ਪਿੰਡ ਰਾਣੀਪੁਰ ਵਿਖੇ ਡਰੱਗ ਇੰਸਪੈਕਟਰ ਵਲੋਂ ਮੈਡੀਕਲ ਸਟੋਰਾਂ 'ਤੇ ਛਾਪੇਮਾਰੀ
. . .  22 minutes ago
ਫਗਵਾੜਾ, 16 ਦਸੰਬਰ (ਅਸ਼ੋਕ ਕੁਮਾਰ ਵਾਲੀਆ)- ਫਗਵਾੜਾ ਦਾ ਪਿੰਡ ਰਾਣੀਪੁਰ ਵਿਖੇ ਮੈਡੀਕਲ ਸਟੋਰਾਂ 'ਤੇ ਡਰੱਗ ਇੰਸਪੈਕਟਰ ਅਨੁਪਮਾ ਕਾਲੀਆ ਵਲੋਂ ਅੱਜ ਅਚਨਚੇਤ ਚੈਕਿੰਗ ਕੀਤੀ ਜਾ ਰਹੀ ਹੈ। ਇਸ ਸੰਬੰਧੀ ਡਰੱਗ...
ਨਾਭਾ ਪੁਲਿਸ ਵਲੋਂ 50 ਪੇਟੀਆਂ ਅੰਗਰੇਜ਼ੀ ਸ਼ਰਾਬ ਬਰਾਮਦ
. . .  29 minutes ago
ਨਾਭਾ, 16 ਦਸੰਬਰ (ਕਰਮਜੀਤ ਸਿੰਘ)- ਥਾਣਾ ਕੋਤਵਾਲੀ ਦੇ ਸਹਾਇਕ ਥਾਣੇਦਾਰ ਸੁਖਚੈਨ ਸਿੰਘ ਨੇ ਨਾਕੇਬੰਦੀ ਦੌਰਾਨ 50 ਪੇਟੀਆਂ ਸ਼ਰਾਬ ਨੈਨਾ ਪ੍ਰੀਮੀਅਮ ਵਿਸਕੀ ਚੰਡੀਗੜ੍ਹ ਮਾਰਕਾ, ਜਿਹੜੀਆਂ ਕਿ ਸਮੱਗਲ...
ਬਰਫ਼ ਦੀ ਚਿੱਟੀ ਚਾਦਰ ਨਾਲ ਢਕਿਆ ਲਾਹੌਲ ਸਪਿਤੀ
. . .  39 minutes ago
ਸ਼ਿਮਲਾ, 16 ਦਸੰਬਰ- ਹਿਮਾਚਲ ਪ੍ਰਦੇਸ਼ ਦੇ ਲਾਹੌਲ ਸਪਿਤੀ ਜ਼ਿਲ੍ਹੇ ਦੇ ਕੋਕਸਰ ਇਲਾਕੇ 'ਚ ਅੱਜ ਤਾਜ਼ਾ ਬਰਫ਼ਬਾਰੀ ਹੋਈ। ਇਸ ਤੋਂ ਬਾਅਦ ਹਰ ਪਾਸੇ ਬਰਫ਼ ਦੀ ਚਿੱਟੀ ਚਾਦਰ...
ਦਿੱਲੀ ਦੇ ਹਾਲਾਤ 'ਤੇ ਕੇਜਰੀਵਾਲ ਨੇ ਅਮਿਤ ਸ਼ਾਹ ਨਾਲ ਮੁਲਾਕਾਤ ਲਈ ਮੰਗਿਆ ਸਮਾਂ
. . .  about 1 hour ago
ਨਵੀਂ ਦਿੱਲੀ, 16 ਦਸੰਬਰ- ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਟਵੀਟ ਕਰਕੇ ਲਿਖਿਆ ਹੈ ਕਿ ਉਹ ਦਿੱਲੀ ਦੀ ਵਿਗੜੀ ਕਾਨੂੰਨ ਵਿਵਸਥਾ ਨੂੰ ਲੈ ਕੇ ਚਿੰਤਾ 'ਚ ਹਨ। ਕੇਜਰੀਵਾਲ ਨੇ ਅੱਗੇ ਲਿਖਿਆ ਹੈ...
ਹਿੰਸਾ 'ਤੇ ਬੋਲੀ ਜਾਮੀਆ ਦੀ ਵੀ. ਸੀ.- ਬਿਨਾਂ ਆਗਿਆ ਯੂਨੀਵਰਸਿਟੀ 'ਚ ਵੜੀ ਪੁਲਿਸ, ਦਰਜ ਕਰਾਵਾਂਗੇ ਐੱਫ. ਆਈ. ਆਰ.
. . .  about 1 hour ago
ਨਵੀਂ ਦਿੱਲੀ, 16 ਦਸੰਬਰ- ਜਾਮੀਆ ਮਿਲੀਆ ਇਸਲਾਮੀਆ ਯੂਨੀਵਰਸਿਟੀ ਦੀ ਵਾਇਸ ਚਾਂਸਲਰ ਨਜ਼ਮਾ ਅਖ਼ਤਰ ਨੇ ਯੂਨੀਵਰਸਿਟੀ ਕੈਂਪਸ 'ਚ ਦਿੱਲੀ ਪੁਲਿਸ ਦੇ ਦਾਖ਼ਲੇ ਵਿਰੁੱਧ ਐੱਫ. ਆਈ. ਆਰ. ਦਰਜ ਕਰਾਉਣ ਦੀ ਗੱਲ...
ਸੜਕ ਹਾਦਸੇ 'ਚ ਮੋਟਰਸਾਈਕਲ ਚਾਲਕ ਦੀ ਮੌਤ
. . .  about 1 hour ago
ਕਾਹਨੂੰਵਾਨ, 16 ਦਸੰਬਰ (ਹਰਜਿੰਦਰ ਸਿੰਘ ਜੱਜ)- ਥਾਣਾ ਕਾਹਨੂੰਵਾਨ ਅਧੀਨ ਪੈਂਦੇ ਪਿੰਡ ਮੱਲੀਆਂ ਦੇ ਨਜ਼ਦੀਕ ਕਾਹਨੂੰਵਾਨ-ਬਟਾਲਾ ਰੋਡ 'ਤੇ ਵਾਪਰੇ ਹਾਦਸੇ 'ਚ ਮੋਟਰਸਾਈਕਲ ਸਵਾਰ ਇੱਕ ਨੌਜਵਾਨ ਦੀ ਮੌਤ ਹੋ...
ਕਾਦੀਆਂ ਵਿਖੇ 54ਵੀਂ ਓਪਨ ਪੰਜਾਬ ਚੈਂਪੀਅਨਸ਼ਿਪ ਸ਼ੁਰੂ
. . .  1 minute ago
ਬਟਾਲਾ, 16 ਦਸੰਬਰ (ਕਾਹਲੋਂ)- ਜ਼ਿਲ੍ਹਾ ਐਥਲੈਟਿਕਸ ਐਸੋਸੀਏਸ਼ਨ ਗੁਰਦਾਸਪੁਰ ਵਲੋਂ ਕਰਾਈ ਜਾ ਰਹੀ 54ਵੀਂ ਓਪਨ ਪੰਜਾਬ ਕਰਾਸ ਕੰਟਰੀ ਚੈਂਪੀਅਨਸ਼ਿਪ ਅੱਜ ਸ਼ੁਰੂ ਹੋ ਗਈ। ਕੈਬਨਿਟ ਮੰਤਰੀ ਓ. ਪੀ. ਸੋਨੀ ਅਤੇ...
ਵਿਰੋਧੀ ਦਲਾਂ ਨੇ ਰਾਸ਼ਟਰਪਤੀ ਰਾਮਨਾਥ ਕੋਵਿੰਦ ਨਾਲ ਮੁਲਾਕਾਤ ਲਈ ਮੰਗਿਆ ਸਮਾਂ
. . .  about 1 hour ago
ਨਵੀਂ ਦਿੱਲੀ, 16 ਦਸੰਬਰ- ਸੂਤਰਾਂ ਵਲੋਂ ਦਿੱਲੀ ਜਾਣਕਾਰੀ ਮੁਤਾਬਕ ਨਾਗਰਿਕਤਾ ਸੋਧ ਕਾਨੂੰਨ ਵਿਰੁੱਧ ਹੋ ਰਹੇ ਵਿਰੋਧ-ਪ੍ਰਦਰਸ਼ਨਾਂ ਦੇ ਮੱਦੇਨਜ਼ਰ ਦੇਸ਼ ਦੇ ਮੌਜੂਦਾ ਹਾਲਾਤ ਤੋਂ ਜਾਣੂੰ ਕਰਾਉਣ ਲਈ...
ਹੋਰ ਖ਼ਬਰਾਂ..

ਫ਼ਿਲਮ ਅੰਕ

ਜੈਕਲਿਨ

ਮੋਟੀ ਕਮਾਈ

ਕਮਾਲ ਹੈ ਦੋ ਮਿੰਟ 16 ਸੈਕਿੰਡ ਦੇ ਗਾਣੇ ਲਈ ਜੈਕਲਿਨ ਫਰਨਾਂਡਿਜ਼ ਨੇ ਦੋ ਕਰੋੜ ਦੀ ਫੀਸ ਪ੍ਰਾਪਤ ਕੀਤੀ ਹੈ। 'ਸਾਹੋ' ਦੇ ਇਸ ਗਾਣੇ 'ਚ ਕੰਮ ਕਰ ਕੇ ਮੋਟੇ ਪੈਸੇ ਪ੍ਰਾਪਤ ਕਰ ਕੇ ਜੈਕੀ ਨੇ ਦਰਸਾ ਦਿੱਤਾ ਹੈ ਕਿ ਉਸ ਦਾ ਆਕਰਸ਼ਣ ਬਰਕਰਾਰ ਹੈ। ਇਧਰ ਨਵੇਂ ਵੀਡੀਓ, ਜਿਸ 'ਚ ਜੈਕੀ ਨੇ ਟੈਟੂ ਬਣਵਾਇਆ ਹੈ, ਨਾਲ ਫਿਰ ਉਹ ਚਰਚਾ ਲੈ ਰਹੀ ਹੈ। 'ਮਿੱਤਰਾਂ ਦੀ ਟੋਲੀ' ਨਾਲ ਜੈਕੀ ਆਪਣਾ ਟੈਟੂ ਬਣਵਾ ਰਹੀ ਹੈ। 'ਅਲਾਦੀਨ' ਤੋਂ 'ਕਿੱਕ' ਤੱਕ ਕਾਮਯਾਬ ਇਹ ਨਾਇਕਾ ਚਾਹੇ ਇਸ ਸਮੇਂ 'ਡਰਾਈਵ' ਫ਼ਿਲਮ 'ਤੇ ਵੀ ਨਿਰਭਰ ਹੈ ਪਰ ਦੋ ਸੈਕਿੰਡ ਦੇ ਗਾਣੇ ਲਈ 2 ਕਰੋੜ ਦੀ ਕਮਾਈ ਸਬੂਤ ਹੈ ਕਿ ਹਾਲੇ ਉਸ 'ਚ ਬਹੁਤ ਦਮ-ਖਮ ਹੈ। 'ਡਰਾਈਵ' ਦੀ ਰਿਲੀਜ਼ ਤਰੀਕ ਵੀ ਲਾਗੇ ਆ ਗਈ ਹੈ। ਫ਼ਿਲਮ ਦਾ ਪਹਿਲਾ ਗਾਣਾ 'ਮੱਖਣਾ' ਆ ਗਿਆ ਹੈ। ਜੈਕੀ ਅਨੁਸਾਰ ਇਹ ਇਕ ਮਜ਼ੇਦਾਰ ਗੀਤ ਹੈ। 'ਡਰਾਈਵ' ਇਕ ਐਕਸ਼ਨ ਥ੍ਰਿਲਰ ਫ਼ਿਲਮ ਹੈ। ਸੈਲਫ਼ੀ ਕੈਮਰਾ ਅੰਦਾਜ਼ 'ਚ ਫ਼ਿਲਮਾਇਆ ਇਹ ਗਾਣਾ 'ਮੱਖਣਾ' ਜ਼ਰੂਰ 'ਬੈਡ ਬੁਆਏ' ਦੀ ਤਰ੍ਹਾਂ ਜੈਕਲਿਨ ਨੂੰ ਉਚਾਈਆਂ 'ਤੇ ਪਹੁੰਚਾਏਗਾ। ਨੈਟਫਲਿਕਸ 'ਤੇ ਜੈਕਲਿਨ ਨੂੰ ਮਾਣ ਹੈ ਕਿ ਉਹ 'ਡਰਾਈਵ' ਦੀ ਸ਼ਾਨਦਾਰ ਰਿਲੀਜ਼ ਕਰੇਗੀ। ਯੂ-ਟਿਊਬ ਦੀ ਸਨਸਨੀ ਲਿੱਲੀ ਸਿੰਘ ਨਾਲ ਜੈਕੀ ਨੇ ਖਾਸ ਤੌਰ 'ਤੇ ਮੁਲਾਕਾਤ ਕੀਤੀ। ਜੈਕੀ ਨੇ ਉਸ ਦਾ ਨਾਂਅ 'ਸੁਪਰ ਵੋਮੈਨ' ਪਾਇਆ ਹੈ। ਇਧਰ ਸਲਮਾਨ ਖ਼ਾਨ ਨਾਲ ਉਸ ਦੀ ਹੋਰ ਫ਼ਿਲਮ ਆਉਣ ਨੂੰ ਤਿਆਰ ਹੈ। 'ਮਿਸਿਜ਼ ਸੀਰੀਅਲ ਕਿਲਰ' ਡਿਜੀਟਲ ਲੜੀ ਵੀ ਜੈਕਲਿਨ ਨੇ ਕੀਤੀ ਹੈ। ਸੋਸ਼ਲ ਮੀਡੀਆ 'ਤੇ ਬਲਾਗ ਉਹ ਨਿਰੰਤਰ ਲਿਖ ਰਹੀ ਹੈ। 'ਟਰੈਵਲ ਲੰਕਾਜ਼' ਵੀਡੀਓ ਯੂ-ਟਿਊਬ 'ਤੇ ਪਾ ਕੇ ਜੈਕੀ ਨੇ ਆਪਣੇ 'ਮੁਲਕ ਪਿਆਰ' ਦੀ ਝਲਕ ਦਿਖਾਈ ਹੈ। ਆਪਣੇ-ਆਪ ਨੂੰ 'ਜਲ ਪਰੀ' ਕਹਾ ਰਹੀ ਮਿਸ ਜੈਕਲਿਨ ਫਰਨਾਡਿਜ਼ 'ਕਿੱਕ-2' ਨਾਲ ਫਿਰ ਸਲਮਾਨ ਦੀ ਜੋੜੀ ਦਾਰ ਬਣ ਕੇ ਸਾਹਮਣੇ ਵੀ ਆ ਰਹੀ ਹੈ। ਜੈਕਲਿਨ ਫਰਨਾਡਿਜ਼ ਵਿਹਲੀ ਨਹੀਂ ਹੈ।


ਖ਼ਬਰ ਸ਼ੇਅਰ ਕਰੋ

ਨੁਸਰਤ ਭਰੁਚਾ

'ਤੁੱਰਮ ਖ਼ਾਨ' ਦੀ 'ਡਰੀਮ ਗਰਲ'

ਹੰਸਲ ਮਹਿਤਾ ਦੀ ਫ਼ਿਲਮ 'ਤੁੱਰਮ ਖ਼ਾਨ' ਨੂੰ 31 ਜਨਵਰੀ, 2020 ਰਿਲੀਜ਼ ਦੀ ਮਿਤੀ ਮਿਲੀ ਹੈ। ਇਸ ਫ਼ਿਲਮ 'ਚ ਨੁਸਰਤ ਭਰੁਚਾ ਦੇ ਨਾਲ ਰਾਜਕੁਮਾਰ ਰਾਵ ਹੈ। 'ਲਵ ਸੈਕਸ ਔਰ ਧੋਖਾ' ਫ਼ਿਲਮ 'ਚ ਨੁਸਰਤ ਪਹਿਲੀ ਵਾਰ ਰਾਜਕੁਮਾਰ ਰਾਵ ਨਾਲ ਆਈ ਸੀ। 'ਡਰੀਮ ਗਰਲ' ਫ਼ਿਲਮ ਦੀ ਸਫ਼ਲਤਾ ਨੇ ਨੁਸਰਤ ਨੂੰ ਉਤਸ਼ਾਹਿਤ ਕੀਤਾ ਹੈ। ਇਸ ਤੋਂ ਖ਼ੁਸ਼ ਨੁਸਰਤ 10 ਦਿਨ ਦੀਆਂ ਛੁੱਟੀਆਂ ਮਨਾਉਣ ਥਾਈਲੈਂਡ ਆਪਣੀਆਂ ਸਹੇਲੀਆਂ ਨਾਲ ਗਈ ਹੈ। ਥਾਈਲੈਂਡ 'ਚ ਨੁਸਰਤ ਨੇ ਫੁਕੇਟ ਦਾ ਪੁਰਾਣਾ ਸ਼ਹਿਰ ਵੀ ਦੇਖਿਆ। ਕਾਫ਼ੀ ਦੀਆਂ ਦੁਕਾਨਾਂ 'ਤੇ ਮਸਤੀ ਵੀ ਕੀਤੀ। ਹਰ ਰਾਤ ਉਹ ਉਥੇ ਪਾਰਟੀ ਕਰ ਰਹੀ ਹੈ। ਨੁਸਰਤ ਨੇ ਆਪਣੇ ਗਰੁੱਪ ਦੀ ਪ੍ਰਧਾਨਗੀ ਕੀਤੀ ਹੈ ਤੇ ਨਿਯਮ ਬਣਾਇਆ ਹੈ ਕਿ ਥਾਈਲੈਂਡ 'ਚ ਜਾਗਣਾ ਜ਼ਿਆਦਾ ਤੇ ਸੌਣਾ ਘੱਟ ਹੈ। ਸਮੁੰਦਰ ਕਿਨਾਰੇ ਰੋਜ਼ ਜਾ ਕੇ ਉਹ ਆਪਣੇ ਮਨ ਨੂੰ ਤਾਜ਼ਗੀ ਦੇ ਰਹੀ ਹੈ। ਲਹਿਰਾਂ 'ਤੇ ਪਾਣੀ ਦੀ ਖੇਡ ਦੇਖ ਕੇ ਉਹ ਰੁਮਾਂਟਿਕ ਹੋ ਰਹੀ ਹੈ। ਬਾਕੀ 'ਡਰੀਮ ਗਰਲ' ਹਿੱਟ ਹੈ ਤੇ ਅਗਾਂਹ 'ਤੁੱਰਮ ਖ਼ਾਨ' ਚੰਗੀ ਫ਼ਿਲਮ ਬਣ ਰਹੀ ਹੈ। 'ਸੋਨੂੰ ਕੇ ਟੀਟੂ ਕੀ ਸਵੀਟੀ' ਫ਼ਿਲਮ ਨਾਲ ਉਹ ਲੋਕਾਂ ਵਿਚਕਾਰ ਵਿਚਰੀ ਪਰ ਉਹ ਮਹਿਸੂਸ ਕਰਦੀ ਹੈ ਕਿ ਇਥੇ ਆਪਣੀ 'ਦਿਖ ਬਦਲ ਲੈਣੀ' ਸਭ ਤੋਂ ਔਖਾ ਕੰਮ ਹੈ। 1990 ਦੇ ਸਮੇਂ ਨੂੰ ਦਰਸਾਉਂਦੀ ਇਕ ਹੋਰ ਫ਼ਿਲਮ 'ਹੁੜਦੰਗ' ਵੀ ਨੁਸਰਤ ਨੂੰ ਮਿਲ ਗਈ ਹੈ। 'ਤੁੱਰਮ ਖ਼ਾਨ', 'ਹੁੜਦੰਗ' ਨਾਲ ਲਗਦਾ ਹੈ ਕਿ ਨੁਸਰਤ ਦਾ ਸਟਾਰ ਹੀਰੋਇਨ ਬਣਨ ਦਾ ਸੁਪਨਾ ਸੱਚ ਹੋਣ ਜਾ ਰਿਹਾ ਹੈ। 'ਪਿਆਰ ਕਾ ਪੰਚਨਾਮਾ' ਫ਼ਿਲਮ ਸਮੇਂ ਉਸ ਨੇ ਸੋਚਿਆ ਵੀ ਨਹੀਂ ਸੀ ਕਿ ਇਕ ਦਿਨ ਉਹ ਵੀ 'ਡਰੀਮ ਗਰਲ' ਬੀ-ਟਾਊਨ ਦੀ ਬਣੇਗੀ। 'ਸਲੱਮ ਡਾਗ ਲਿੀਅਨੇਅਰ' ਫ਼ਿਲਮ ਪਹਿਲਾਂ ਉਹ ਕਰ ਰਹੀ ਸੀ ਪਰ ਫਿਰ ਨਹੀਂ ਮਿਲੀ, ਕਾਰਨ ਉਹ ਨਹੀਂ ਦੱਸ ਰਹੀ ਪਰ ਇਹ ਸਾਬਤ ਹੋ ਗਿਆ ਹੈ ਕਿ ਨੁਸਰਤ ਨੇ ਸਾਰੀ ਕਸਰ ਪੂਰੀ ਕਰ ਦਿੱਤੀ ਹੈ ਤੇ ਚੰਗੇ ਸਥਾਨ 'ਤੇ ਆ ਗਈ ਹੈ।
**

ਰਿਤਿਕ ਰੌਸ਼ਨ

ਕਮਾਊ ਪੁੱਤਰ

'ਬਿਹਾਰੀ' ਬਣ ਕੇ ਸਧਾਰਨ ਕਿਰਦਾਰ ਤੇ 'ਵਾਰ' 'ਚ ਇਕਦਮ ਉਲਟ ਕੰਮ ਬਹੁਤ ਔਖਾ ਸੀ ਰਿਤਿਕ ਰੌਸ਼ਨ ਲਈ ਤਾਲਮੇਲ ਬਿਠਾਉਣਾ ਪਰ ਉਸ ਨੇ ਪ੍ਰਵਾਹ ਨਹੀਂ ਕੀਤੀ ਤੇ ਪਿੱਠ ਦੀ ਦਰਦ ਦੇ ਬਾਵਜੂਦ ਸਰੀਰਕ ਤੌਰ 'ਤੇ ਆਪਣੇ-ਆਪ ਨੂੰ ਫਿੱਟ ਕਰਕੇ 'ਸੁਪਰ-30' ਵਾਲਾ ਰਿਤਿਕ 'ਵਾਰ' 'ਚ 'ਕਬੀਰ' ਬਣ ਕੇ ਅਜਿਹਾ ਜਚਿਆ ਕਿ ਦੇਸ਼-ਵਿਦੇਸ਼ ਵਿਚ 'ਵਾਰ' ਦੀ ਕਮਾਈ ਦਾ ਅੰਕੜਾ 300 ਕਰੋੜ ਦੇ ਕਰੀਬ ਪਹੁੰਚਣ ਵਾਲਾ ਹੈ। ਰਿਤਿਕ ਦੀ 'ਵਾਰ' ਵਾਲੀ ਦਿੱਖ ਤੋਂ ਉਸ ਦੀ ਸਾਬਕਾ ਪਤਨੀ ਸੁਜ਼ੈਨ ਖ਼ਾਨ ਵੀ ਪ੍ਰਭਾਵਿਤ ਹੋਈ ਹੈ। ਇੰਸਟਾਗ੍ਰਾਮ 'ਤੇ ਸੁਜ਼ੈਨ ਨੇ ਰਿਤਿਕ ਲਈ ਉਫ...ਉਫ... ਦਾ ਸ਼ਾਨਦਾਰ ਪ੍ਰਤੀਕਰਮ ਦਿੱਤਾ, ਜਿਸ ਨੂੰ ਰਿਤਿਕ ਨੇ ਆਪਣੇ ਇੰਸਟਾਗ੍ਰਾਮ 'ਤੇ ਸ਼ੇਅਰ ਵੀ ਕੀਤਾ। ਰਿਤਿਕ ਚਾਹੇ ਸੁਜ਼ੈਨ ਨਾਲੋਂ ਅੱਡ ਹੋ ਚੁੱਕਾ ਹੈ ਪਰ ਸੁਜ਼ੈਨ ਨਾਲ ਉਸ ਦੀ ਦੋਸਤੀ ਬਰਕਰਾਰ ਹੈ ਤੇ ਰਿਤਿਕ ਆਪਣੇ ਬੱਚਿਆਂ ਦੀਆਂ ਛੁੱਟੀਆਂ ਸਮੇਂ ਸੁਜ਼ੈਨ ਨਾਲ ਹੀ ਵਿਦੇਸ਼ ਗਿਆ। 'ਸੁਪਰ-30' ਤੇ 'ਵਾਰ' ਫ਼ਿਲਮਾਂ ਨੇ ਰਿਤਿਕ ਦੀ ਤਕਦੀਰ ਦਾ ਸਿਤਾਰਾ ਹੀ ਬੁਲੰਦ ਕਰ ਦਿੱਤੀ ਹੈ। ਹੁਣ ਉਹ 'ਕ੍ਰਿਸ਼-4' ਦੀ ਤਿਆਰੀ ਕਰੇਗਾ? ਯਕੀਨ ਕੀਤਾ ਜਾਵੇ ਇਕ ਰਿਪੋਰਟ 'ਤੇ ਤਾਂ ਰਾਕੇਸ਼ ਰੌਸ਼ਨ ਨੇ 'ਕ੍ਰਿਸ਼-4' ਦੀ ਕਾਗਜ਼ੀ ਕਾਰਵਾਈ ਪੂਰੀ ਕਰ ਲਈ ਹੈ। 'ਕ੍ਰਿਸ਼-4' ਵਿਚ ਵੀ 'ਹਾਈ ਐਕਸ਼ਨ' ਹੋਵੇਗਾ ਕਿਉਂਕਿ ਇਹ ਐਕਸ਼ਨ ਰਿਤਿਕ ਨੂੰ ਰਾਸ ਆਇਆ ਹੈ। 'ਕ੍ਰਿਸ਼-4' ਪਹਿਲਾਂ 250 ਕਰੋੜ 'ਚ ਬਣਦੀ ਸੀ ਹੁਣ ਰਿਤਿਕ ਦੀ ਇਹ ਫ਼ਿਲਮ 300 ਕਰੋੜ ਦੇ ਬਜਟ ਨਾਲ ਬਣੇਗੀ। 'ਕ੍ਰਿਸ਼-4' ਦਾ ਅੰਗੇਰਜ਼ੀ ਭਾਗ ਵੀ ਬਣੇਗਾ। ਵਿਦੇਸ਼ਾਂ ਲਈ ਰਿਤਿਕ ਦੀ ਅੰਤਰਰਾਸ਼ਟਰੀ ਦਿਖ ਬਣਾਈ ਜਾਵੇਗੀ। ਰਿਤਿਕ 'ਕ੍ਰਿਸ਼-4' ਤੋਂ ਪਹਿਲਾਂ ਇਕ ਹੋਰ ਫ਼ਿਲਮ ਵੀ ਕਰੇਗਾ। 'ਕ੍ਰਿਸ਼-3' ਨੇ 240 ਕਰੋੜ ਦਾ ਵਪਾਰ ਕੀਤਾ ਸੀ। ਇਹ ਰਿਤਿਕ ਰੌਸ਼ਨ ਦੀ ਸਭ ਤੋਂ ਵੱਧ ਕਮਾਈ ਵਾਲੀ ਫ਼ਿਲਮ ਸੀ।

ਪਰਣੀਤੀ ਚੋਪੜਾ

ਸਾਇਨਾ ਦਾ ਜਾਦੂ ਸਿਰ ਚੜ੍ਹਿਆ

ਅਮਰੀਕਾ ਦੇਸ਼ ਦੀ ਨੂੰਹ ਰਾਣੀ ਪ੍ਰਿਅੰਕਾ ਚੋਪੜਾ ਦੀ ਰਿਸ਼ਤੇਦਾਰੀ 'ਚੋਂ ਦੀਦੀ ਲੱਗਦੀ ਪਰਣੀਤੀ ਚੋਪੜਾ ਨੇ ਹਿੰਦੀ ਫ਼ਿਲਮ ਨਗਰੀ 'ਚ ਆਪਣੀ ਅਲੱਗ ਤੇ ਚੰਗੀ ਪਛਾਣ ਕਾਇਮ ਕੀਤੀ ਹੈ। ਚਾਹੇ ਟਿਕਟ ਖਿੜਕੀ 'ਤੇ ਪਰਣੀਤੀ ਦੇ ਕਰਮ ਹੌਲੇ ਹੀ ਹਨ ਪਰ ਇਹ ਗੱਲ ਸੌਲਾਂ ਆਨੇ ਸੱਚ ਹੈ ਕਿ ਉਹ ਇਕ ਪ੍ਰਤਿਭਾਵਾਨ ਤੇ ਲਾਜਵਾਬ ਅਭਿਨੇਤਰੀ ਹੈ। ਹਾਲੀਵੁੱਡ ਫ਼ਿਲਮ 'ਦਾ ਗਰਲ ਆਨ ਦਾ ਟਰੇਨ' ਦੇ ਹਿੰਦੀ ਭਾਗ 'ਚ ਪਰੀ ਮੁੱਖ ਭੂਮਿਕਾ ਨਿਭਾਅ ਰਹੀ ਹੈ। ਲੰਡਨ ਜਾ ਕੇ ਉਹ ਇਸ ਫ਼ਿਲਮ ਦੇ ਫ਼ਿਲਮਾਂਕਣ 'ਚ ਰੁੱਝੀ ਹੋਣ ਦੇ ਬਾਵਜੂਦ ਫ਼ਿਲਮ ਸਬੰਧੀ ਤੇ ਹੋਰ ਵੇਰਵੇ ਆਪਣੇ 'ਇੰਸਟਾ' ਵਾਲੇ ਖਾਤੇ 'ਚ ਨਿੱਤ ਦਰਜ ਕਰਕੇ ਪ੍ਰਸੰਸਕਾਂ ਸਨਮੁਖ ਹਾਜ਼ਰ ਹੁੰਦੀ ਹੈ। ਫ਼ਿਲਮ ਦੇ ਡਾਇਰੈਕਟਰ ਆਫ਼ ਫੋਟੋਗ੍ਰਾਫੀ ਤ੍ਰਿਭਵਨ ਬਾਬੂ ਨਾਲ ਉਸ ਦੀ ਦੋਸਤੀ ਗਹਿਰੀ ਹੈ ਤੇ ਕੈਮਰਾਮੈਨ ਬਾਬੂ ਜੀ ਪਰੀ ਲਈ ਹਰ ਫੋਟੋ ਖਿੱਚ ਰਹੇ ਹਨ, ਜੋ ਪ੍ਰਸੰਸਕਾਂ ਤੱਕ ਪਹੁੰਚ ਰਹੀ ਹੈ। ਇਹ ਪਰੀ ਦੀ 'ਸਸਪੈਂਸ ਥ੍ਰਿਲਰ' ਫ਼ਿਲਮ ਹੋਵੇਗੀ। 'ਕੇਸਰੀ', 'ਜਬਰੀਆ ਜੋੜੀ' ਦਾ ਲਾਭ ਉਸ ਨੂੰ ਘੱਟ ਹੀ ਮਿਲਿਆ ਪਰ 'ਦਾ ਗਰਲ ਆਨ ਦਾ ਟਰੇਨ', 'ਦਾ ਭੁਜ ਪ੍ਰਾਈਡ ਆਫ ਇੰਡੀਆ' ਫ਼ਿਲਮ ਤੋਂ ਪਰੀ ਨੂੰ ਪੂਰੀਆਂ ਆਸਾਂ ਉਮੀਦਾਂ ਹਨ। 'ਖੜਕੇ ਗਲਾਸੀ' ਇਹ ਪੰਜਾਬੀ ਗੀਤ ਅੱਜ ਤੱਕ ਪਰਣੀਤੀ ਦੀਆਂ ਬੁੱਲ੍ਹੀਆਂ ਦਾ ਸ਼ਿੰਗਾਰ ਬਣਿਆ ਹੋਇਆ ਹੈ ਤੇ ਹਾਂ, ਪਰੀ ਦੀ ਜਨਰਲ ਨਾਲਜ਼ ਕਮਜ਼ੋਰ ਹੈ, ਜਿਸ ਕਾਰਨ ਸੋਸ਼ਲ ਮੀਡੀਆ 'ਤੇ ਉਸ ਦੀ ਲਾਹ-ਪਾਹ ਬਹੁਤ ਹੁੰਦੀ ਹੈ। ਹੁਣ ਆਜ਼ਾਦੀ ਦਿਨ ਉਹ 16 ਅਗਸਤ ਤੇ ਗਣਤੰਤਰ ਦਿਵਸ ਨੂੰ ਆਜ਼ਾਦੀ ਦਿਨ ਕਹਿ ਕੇ ਵਧਾਈ ਦਿੰਦੀ ਹੈ ਤਾਂ ਲੋਕ ਉਸ ਦਾ ਮਜ਼ਾਕ ਉਡਾਉਂਦੇ ਹਨ। ਸਾਇਨਾ ਨੇਹਵਾਲ ਦੀ ਬਾਇਓਪਿਕ ਕਰ ਰਹੀ ਹੈ ਤਾਂ ਸਾਇਨਾ ਉਸ ਦਾ ਹੌਸਲਾ ਵਧਾ ਰਹੀ ਹੈ। ਪਰੀ ਵੀ ਮੈਂ, ਅੱਜ, ਦਿਨ-ਰਾਤ ਤੇ 24 ਘੰਟੇ ਸਾਇਨਾ ਸਬੰਧੀ ਸੋਚਣਾ ਕਹਿ ਕੇ ਫ਼ਿਲਮ ਨਾਲ ਜੁੜ ਰਹੀ ਹੈ। ਚਾਹੇ ਜਨਰਲ ਨਾਲਜ ਪੱਖੋਂ ਕੋਰੀ ਹੈ ਪਰ ਅਭਿਨੇਤਰੀ ਉਹ ਜ਼ਬਰਦਸਤ ਹੈ।


-ਸੁਖਜੀਤ ਕੌਰ

ਗੂੰਗੀ ਕੁੜੀ ਦੀ ਭੂਮਿਕਾ ਕਰੇਗੀ ਤਾਰਾ ਸੁਤਾਰੀਆ

ਜਦੋਂ ਤਾਰਾ ਸੁਤਾਰੀਆ ਨੇ 'ਸਟੂਡੈਂਟ ਆਫ਼ ਦ ਯੀਅਰ-2' ਰਾਹੀਂ ਬਾਲੀਵੁੱਡ ਵਿਚ ਦਾਖ਼ਲਾ ਲਿਆ ਤਾਂ ਉਦੋਂ ਕੁਝ ਆਲੋਚਕਾਂ ਨੇ ਇਹ ਕਿਹਾ ਸੀ ਕਿ ਤਾਰਾ ਦੇ ਰੂਪ ਵਿਚ ਇਕ ਹੋਰ ਗਲੈਮਰ ਕੁੜੀ ਦਾ ਆਗਮਨ ਹੋਇਆ ਹੈ। ਫ਼ਿਲਮ ਵਿਚ ਤਾਰਾ ਦੇ ਕਿਰਦਾਰ ਨੂੰ ਦੇਖ ਕੇ ਇਹ ਟਿੱਪਣੀ ਕੀਤੀ ਗਈ ਸੀ। ਹੁਣ ਤਾਰਾ ਦੀ 'ਮਰਜਾਵਾਂ' ਆ ਰਹੀ ਹੈ ਅਤੇ ਫ਼ਿਲਮ ਦੀ ਖ਼ਾਸ ਗੱਲ ਇਹ ਹੈ ਕਿ ਇਸ ਵਿਚ ਤਾਰਾ ਨੂੰ ਗੂੰਗੀ ਕੁੜੀ ਦੀ ਭੂਮਿਕਾ ਵਿਚ ਪੇਸ਼ ਕੀਤਾ ਗਿਆ ਹੈ। ਆਪਣੇ ਕੈਰੀਅਰ ਦੀ ਦੂਜੀ ਫ਼ਿਲਮ ਵਿਚ ਇਸ ਤਰ੍ਹਾਂ ਦੀ ਚੁਣੌਤੀਪੂਰਨ ਭੂਮਿਕਾ ਲਈ ਤਾਰਾ ਨੂੰ ਚੰਗੀ ਮਿਹਨਤ ਕਰਨੀ ਪਈ ਅਤੇ ਇਸ ਲਈ ਉਸ ਨੂੰ ਸਾਈਨ ਭਾਸ਼ਾ ਵੀ ਸਿੱਖਣੀ ਪਈ। ਸਾਈਨ ਭਾਸ਼ਾ ਦੀ ਅਧਿਆਪਕਾ ਸੰਗੀਤਾ ਗਾਲਾ ਤੋਂ ਉਸ ਨੇ ਗੂੰਗਿਆਂ ਦੇ ਇਸ਼ਾਰੇ ਵਾਲੀ ਭਾਸ਼ਾ ਸਿੱਖੀ ਅਤੇ ਇਹ ਭਾਸ਼ਾ ਸਿੱਖਣ ਵਿਚ ਉਸ ਨੂੰ ਦੋ ਮਹੀਨੇ ਲੱਗੇ ਸਨ।
ਫ਼ਿਲਮ ਵਿਚ ਤਾਰਾ ਦੇ ਕਿਰਦਾਰ ਦਾ ਨਾਂਅ ਜ਼ੋਇਆ ਹੈ ਅਤੇ ਤਾਰਾ ਦਾ ਕਹਿਣਾ ਹੈ ਕਿ ਇਸ ਕਿਰਦਾਰ ਨੂੰ ਨਿਭਾਉਣ ਤੋਂ ਬਾਅਦ ਉਸ ਦੀ ਗੂੰਗੇ-ਬੋਲੇ ਲੋਕਾਂ ਪ੍ਰਤੀ ਹਮਦਰਦੀ ਹੋਰ ਵਧ ਗਈ ਹੈ।
ਉਮੀਦ ਹੈ ਕਿ ਗੂੰਗੀ ਕੁੜੀ ਦੇ ਇਸ ਕਿਰਦਾਰ ਜ਼ਰੀਏ ਤਾਰਾ ਆਪਣੇ ਆਲੋਚਕਾਂ ਦੀ ਬੋਲਤੀ ਬੰਦ ਕਰ ਦੇਵੇਗੀ।

'ਬਾਲਾ', 'ਉਜੜਾ ਚਮਨ' ਵਿਚ ਟੱਕਰ

ਦਿਨੇਸ਼ ਵਿਜ਼ਨ ਵਲੋਂ ਬਣਾਈ 'ਬਾਲਾ' ਅਤੇ ਕੁਮਾਰ ਮੰਗਤ ਵਲੋਂ ਬਣਾਈ ਜਾ ਰਹੀ ਫ਼ਿਲਮ 'ਉਜੜਾ ਚਮਨ' ਵਿਚ ਸਮਾਨਤਾ ਇਹ ਹੈ ਕਿ ਦੋਵਾਂ ਵਿਚ ਗੰਜੇ ਕਿਰਦਾਰ ਦੀ ਕਹਾਣੀ ਪੇਸ਼ ਕੀਤੀ ਗਈ ਹੈ। ਵਿਸ਼ੇ ਵਿਚ ਸਮਾਨਤਾ ਹੋਣ ਦੀ ਵਜ੍ਹਾ ਕਰਕੇ ਹੁਣ ਬਾਲੀਵੁੱਡ ਦੀਆਂ ਇਨ੍ਹਾਂ ਦੋ ਫ਼ਿਲਮਾਂ ਦੀ ਟੱਕਰ ਪ੍ਰਤੀ ਰੁਚੀ ਵਧ ਗਈ ਹੈ। ਦੋਵੇਂ ਫ਼ਿਲਮਾਂ ਇਕ ਹਫ਼ਤੇ ਦੇ ਫਰਕ ਨਾਲ ਪ੍ਰਦਰਸ਼ਿਤ ਹੋ ਰਹੀਆਂ ਹਨ। 'ਉਜੜਾ ਚਮਨ' ਅੱਠ ਨਵੰਬਰ ਨੂੰ ਰਿਲੀਜ਼ ਹੋ ਰਹੀ ਹੈ ਤੇ 'ਬਾਲਾ' 15 ਨਵੰਬਰ ਨੂੰ। ਉਂਜ ਇਕੋ ਜਿਹੇ ਵਿਸ਼ਿਆਂ ਵਾਲੀਆਂ ਫ਼ਿਲਮਾਂ ਦੀ ਆਪਸੀ ਟੱਕਰ ਵਾਲੀ ਗੱਲ ਬਾਲੀਵੁੱਡ ਲਈ ਨਵੀਂ ਨਹੀਂ ਹੈ। ਪਹਿਲਾਂ ਸ਼ਹੀਦ ਭਗਤ ਸਿੰਘ 'ਤੇ ਬਣੀਆਂ ਤਿੰਨ ਫ਼ਿਲਮਾਂ ਆਪਸ ਵਿਚ ਟਕਰਾਈਆਂ ਸਨ ਤੇ ਹੀਰੋ ਵਲੋਂ ਭ੍ਰਿਸ਼ਟ ਨੇਤਾਵਾਂ ਦੇ ਖ਼ਿਲਾਫ਼ ਲੜੀ ਗਈ ਲੜਾਈ ਦੇ ਵਿਸ਼ੇ 'ਤੇ ਬਣੀ 'ਇਨਕਲਾਬ', 'ਯੇ ਦੇਸ਼' ਤੇ 'ਆਜ ਕਾ ਐਮ. ਐਲ. ਏ. ਰਾਮ ਅਵਤਾਰ' ਵੀ ਆਪਸ ਵਿਚ ਟਕਰਾਈਆਂ ਸਨ। 'ਜਯੋਤੀ ਬਨੇ ਜਵਾਲਾ' ਤੇ 'ਜਵਾਲਾਮੁਖੀ' ਦੀ ਟੱਕਰ ਨੇ ਵੀ ਆਪਣੇ ਜ਼ਮਾਨੇ ਵਿਚ ਕਾਫ਼ੀ ਉਤਸੁਕਤਾ ਪੈਦਾ ਕੀਤੀ ਸੀ।

ਕੈਟਰੀਨਾ ਕੈਫ਼

ਮਜ਼ਦੂਰ!

ਕਰਨ ਜੌਹਰ ਤੇ ਰੋਹਿਤ ਸ਼ੈਟੀ ਨੂੰ 'ਟੈਗ' ਕਰਕੇ ਕੈਟਰੀਨਾ ਕੈਫ਼ ਨੇ ਆਪਣੀ ਨਵੀਂ ਫ਼ਿਲਮ 'ਸੂਰਯਾਵੰਸ਼ੀ' ਦੀ ਇਕ ਝਲਕ ਲੋਕਾਂ ਤੱਕ ਪਹੁੰਚਾਈ ਹੈ। 'ਭਾਰਤ' ਤੋਂ ਬਾਅਦ ਕੈਟੀ ਦੀ ਇਹ ਵੱਡੀ ਫ਼ਿਲਮ ਹੈ, ਜੋ ਆਉਂਦੇ ਸਾਲ ਗਰਮੀ ਦਾ ਮੌਸਮ ਸ਼ੁਰੂ ਹੁੰਦੇ ਹੀ ਮਾਰਚ 'ਚ ਆਏਗੀ। ਇਧਰ ਵਿੱਕੀ ਕੌਸ਼ਲ ਨਾਲ ਨਾਂਅ ਜੁੜਨ 'ਤੇ ਕੈਟੀ ਨੇ ਕਿਹਾ ਹੈ ਕਿ 16 ਸਾਲ ਤੋਂ ਸਾਡੀ ਮਿੱਤਰਤਾ ਪਾਕਿ-ਪਵਿੱਤਰ ਹੋਣ ਦੀ ਤਰ੍ਹਾਂ ਤੁਸੀਂ ਲੋਕ ਕਿਉਂ ਨਹੀਂ ਸਮਝਦੇ? ਸੱਲੂ ਉਸ ਲਈ ਰਾਹ-ਦਸੇਰਾ ਹੈ, ਮਦਦਗਾਰ ਹੈ ਤੇ ਨੇਕ-ਇਨਸਾਨ ਹੈ। 'ਆਈਫਾ ਐਵਾਰਡ' ਸਮੇਂ ਨੱਚਣ 'ਤੇ ਜ਼ੋਰ ਕੈਟੀ ਦਾ ਲਗਦਾ ਹੈ ਤੇ ਤਾੜੀਆਂ ਮਾਰ-ਮਾਰ ਹੱਥ ਸਲਮਾਨ ਮੀਆਂ ਦੇ ਹੰਭ ਜਾਂਦੇ ਹਨ। ਇਹੀ ਤਾਂ ਫਿਰ ਖਾਸ ਮਿੱਤਰਤਾ ਹੈ। ਕਦੇ ਸਲਮਾਨ ਤੇ ਹੁਣ ਵਿੱਕੀ ਕੌਸ਼ਲ ਇਹ ਕਿੱਤਾ ਹੀ ਨਾਂਅ ਜੁੜਨ, ਜੋੜਨ, ਅਫ਼ਵਾਹਾਂ ਉਡਾਉਣ-ਫੈਲਾਉਣ ਤੇ ਬਾਤਾਂ ਦੇ ਬਤੰਗੜ ਬਣਾਉਣ ਦਾ ਹੈ। ਤਿੰਨ ਸਾਲ ਪਹਿਲਾਂ ਕੈਟੀ ਤਾਂ 'ਕਪੂਰ ਖਾਨਦਾਨ' ਦੀ ਨੂੰਹ ਬਣਨ ਵਾਲੀ ਸੀ। ਰਣਬੀਰ ਕਪੂਰ ਉਸ ਦੀ ਹਰ ਸਾਹ 'ਚ ਧੜਕਦਾ ਸੀ ਪਰ ਫਿਰ ਦਿਨ ਨਹੀਂ ਚੜ੍ਹਿਆ ਕਿ ਨੂੰਹ ਬਣਦੀ-ਬਣਦੀ ਉਹ 'ਕਪੂਰ ਖਾਨਦਾਨ' ਦੀ 'ਦੁਸ਼ਮਣ' ਬਣ ਗਈ। ਰਣਬੀਰ ਨੇ ਵੀ ਕੈਟੀ ਨਾਲ ਫ਼ਿਲਮਾਂ ਤੋਂ ਨਾਂਹ ਕੀਤੀ ਪਰ 3 ਸਾਲ ਬਾਅਦ ਇਕ ਮੋਬਾਈਲ ਫੋਨ ਦੀ ਮਸ਼ਹੂਰੀ 'ਚ ਕੈਟੀ-ਰਣਬੀਰ ਨਾਲ ਆ ਰਹੀ ਹੈ। ਰਿਤਿਕ ਰੌਸ਼ਨ ਦੀ ਨਜ਼ਰ 'ਚ ਮਿਸ ਕੈਫ਼ 'ਮਜ਼ਦੂਰ' ਹੈ ਤੇ ਉਸ ਦੀ ਮੰਨੀਏ ਤਾਂ ਇਹ ਵਲੈਤਣ ਬਾਹਰੋਂ ਦਿਲਖਿਚਵੀਂ/ਆਕਰਸ਼ਕ ਲਗਦੀ ਹੈ ਪਰ ਅੰਦਰੋਂ ਉਹ ਮਜ਼ਦੂਰ ਹੈ।

ਲਘੂ ਫ਼ਿਲਮ 'ਲੁਤਫ਼' ਵਿਚ ਮੋਨਾ ਸਿੰਘ

ਪਹਿਲਾਂ ਉਹ ਵੈੱਬ ਸੀਰੀਜ਼ 'ਕਹਿਨੇ ਕੋ ਹਮਸਫ਼ਰ ਹੈ', 'ਯੇ ਮੇਰੀ ਫੈਮਿਲੀ' ਤੇ 'ਮੋਮ-ਮਿਸ਼ਨ ਓਵਰ ਮਾਰਸ' ਵਿਚ ਅਭਿਨੈ ਕਰਨ ਵਾਲੀ ਮੋਨਾ ਸਿੰਘ ਹੁਣ ਲਘੂ ਫ਼ਿਲਮ 'ਲੁਤਫ਼' ਵਿਚ ਨਜ਼ਰ ਆਵੇਗੀ।
ਕਦੀ ਜੱਸੀ ਬਣ ਕੇ ਲੋਕਾਂ ਦਾ ਦਿਲ ਜਿੱਤਣ ਵਾਲੀ ਮੋਨਾ ਸਿੰਘ ਨੇ ਇਸ ਲਘੂ ਫ਼ਿਲਮ ਵਿਚ 'ਹਾਊਸਵਾਈਫ਼' ਦੀ ਭੂਮਿਕਾ ਨਿਭਾਈ ਹੈ। ਇਕ ਇਸ ਤਰ੍ਹਾਂ ਦੀ ਗ੍ਰਹਿਣੀ, ਜਿਸ ਦੇ ਕੋਲ ਜ਼ਿੰਦਗੀ ਵਿਚ ਸਭ ਕੁਝ ਹੈ ਪਰ ਫਿਰ ਵੀ ਉਹ ਤਣਾਅ ਦਾ ਸ਼ਿਕਾਰ ਹੋ ਜਾਂਦੀ ਹੈ।
ਇਸ ਵੱਖਰੀ ਜਿਹੀ ਭੂਮਿਕਾ ਬਾਰੇ ਮੋਨਾ ਕਹਿੰਦੀ ਹੈ, 'ਅੱਜ ਲੋਕ ਤਣਾਅ ਭਰੀ ਜ਼ਿੰਦਗੀ ਜੀਅ ਰਹੇ ਹਨ ਅਤੇ ਇਸ ਵਜ੍ਹਾ ਨਾਲ ਤਣਾਅ ਦਾ ਸ਼ਿਕਾਰ ਹੋ ਜਾਣਾ ਆਮ ਗੱਲ ਹੈ। ਇਸ ਬਿਮਾਰੀ ਦੀ ਇਕ ਖ਼ਾਸ ਗੱਲ ਇਹ ਹੈ ਕਿ ਕਈ ਵਾਰ ਤਾਂ ਮਰੀਜ਼ ਨੂੰ ਪਤਾ ਹੀ ਨਹੀਂ ਹੁੰਦਾ ਕਿ ਉਹ ਤਣਾਅ ਦੀ ਬਿਮਾਰੀ ਨਾਲ ਪੀੜਤ ਹੈ, ਕਿਉਂਕਿ ਇਹ ਮਾਨਸਿਕ ਬਿਮਾਰੀ ਹੈ ਨਾ ਕਿ ਸਰੀਰਕ। 'ਥ੍ਰੀ ਇਡੀਅਟਸ' ਤੋਂ ਬਾਅਦ ਮੈਂ ਚਾਹੁੰਦੀ ਸੀ ਕਿ ਕੁਝ ਹੋਰ ਇਸ ਤਰ੍ਹਾਂ ਦੀਆਂ ਫ਼ਿਲਮਾਂ ਕੀਤੀਆਂ ਜਾਣ, ਜਿਸ ਵਿਚ ਮਨੋਰੰਜਨ ਦੇ ਨਾਲ ਕੁਝ ਸੰਦੇਸ਼ ਵੀ ਹੋਵੇ। 'ਲੁਤਫ਼' ਵਿਚ ਮਾਨਸਿਕ ਬਿਮਾਰੀ ਦੀ ਗੱਲ ਕਹੀ ਗਈ ਹੈ ਅਤੇ ਘਰੇਲੂ ਔਰਤਾਂ ਤੱਕ ਇਸ ਬਿਮਾਰੀ ਬਾਰੇ ਜਾਗਰੂਕਤਾ ਲਿਆਉਣ ਦੇ ਇਰਾਦੇ ਨਾਲ ਮੈਂ ਇਹ ਫ਼ਿਲਮ ਵਿਚ ਕੰਮ ਕੀਤਾ ਹੈ।'


-ਮੁੰਬਈ ਪ੍ਰਤੀਨਿਧ

ਹਾਲੀਵੁੱਡ ਫ਼ਿਲਮਾਂ ਦਾ ਪੰਜਾਬੀ ਸਟਾਰ-ਸੰਨੀ ਸਿੰਘ ਕੋਹਲੀ

ਪੰਜਾਬੀ ਦੁਨੀਆ ਵਿਚ ਕਿਤੇ ਵੀ ਵਸੇ ਹੋਣ ਪਰ ਆਪਣੀ ਮਾਂ-ਬੋਲੀ ਅਤੇ ਵਤਨ ਦਾ ਮੋਹ ਨਹੀਂ ਛੱਡਦੇ। ਇਸ ਦੀ ਮਿਸਾਲ ਹੈ, ਪੰਜਾਹ ਤੋਂ ਵੱਧ ਹਾਲੀਵੁੱਡ ਫ਼ਿਲਮਾਂ ਵਿਚ ਅਦਾਕਾਰੀ ਕਰਨ ਵਾਲਾ ਅਮਰਪਾਲ ਸਿੰਘ ਉਰਫ਼ ਸੰਨੀ ਸਿੰਘ ਕੋਹਲੀ, ਜੋ ਕਿ ਕੈਨੇਡਾ ਦਾ ਸਾਬਕਾ ਲਾਅ ਐਨਫੋਰਸਮੈਂਟ ਅਫ਼ਸਰ ਹੈ। ਸ: ਤਰਲੋਚਨ ਸਿੰਘ ਕੋਹਲੀ ਅਤੇ ਮਾਤਾ ਸਤਨਾਮ ਕੌਰ ਦੇ ਇਸ ਲਾਡਲੇ ਸਪੁੱਤਰ ਦਾ ਬਚਪਨ ਲੁਧਿਆਣਾ ਸ਼ਹਿਰ ਵਿਚ ਗੁਜ਼ਰਿਆ। ਜਵਾਨੀ ਦੀ ਦਹਿਲੀਜ਼ ਉੱਪਰ ਪੈਰ ਰੱਖਦਿਆਂ ਹੀ ਸੰਨੀ ਇੰਗਲੈਂਡ ਚਲਾ ਗਿਆ, ਜਿਥੇ ਉਸ ਨੇ ਮਾਰਸ਼ਲ ਆਰਟਸ ਦੀ ਗੇਮ ਤਾਈਕਵਾਂਡੋ ਖੇਡਣੀ ਸ਼ੁਰੂ ਕੀਤੀ। ਫਿਰ 150 ਤੋਂ ਵੱਧ ਰਾਸ਼ਟਰੀ ਅਤੇ ਅੰਤਰਰਾਸ਼ਟਰੀ ਮੁਕਾਬਲਿਆਂ ਵਿਚ ਭਾਗ ਲਿਆ। 2005 ਵਿਚ ਆਪਣੀ ਗੇਮ ਨੂੰ ਹੋਰ ਖਿਾਰਨ ਲਈ ਉਹ ਕੈਨੇਡਾ ਚਲਾ ਗਿਆ। ਕੈਨੇਡਾ ਦੇ ਕੈਲਗਰੀ ਵਿਚ ਪੁਲਿਸ ਮੁੱਖ ਅਧਿਕਾਰੀ ਵਜੋਂ ਨੌਕਰੀ ਕਰਦਿਆਂ ਤਿੰਨ ਵਾਰ ਵਿਸ਼ਵ ਪੁਲਿਸ ਖੇਡਾਂ ਵਿਚ ਗੋਲਡ ਮੈਡਲ ਜਿੱਤੇ। ਉਸ ਕੋਲ ਕੈਨੇਡਾ ਅਤੇ ਇੰਗਲੈਂਡ ਦੀ ਦੋਹਰੀ ਨਾਗਰਿਕਤਾ ਹੈ। ਇਸ ਤੋਂ ਇਲਾਵਾ ਅਮਰੀਕਾ, ਸਵਿਟਜ਼ਰਲੈਂਡ, ਯੂਰਪ, ਨਿਊਜ਼ੀਲੈਂਡ, ਸਿੰਗਾਪੁਰ ਤੇ ਥਾਈਲੈਂਡ ਆਦਿ ਦੀ ਉਹ ਯਾਤਰਾ ਕਰ ਚੁੱਕਾ ਹੈ। ਉਸ ਨੇ ਹਾਲੀਵੁੱਡ ਐਕਸ਼ਨ ਫ਼ਿਲਮਾਂ ਵਿਚ ਸਟੰਟ ਪੇਸ਼ਕਾਰ ਅਤੇ ਫਾਈਟ ਕੋਰੀਓਗ੍ਰਾਫਰ ਵਜੋਂ ਸ਼ੁਰੂਆਤ ਕੀਤੀ। ਫ਼ਿਲਮਾਂ 'ਜਨ' ਅਤੇ 'ਰੈਪਲਿਕਨ' ਵਿਚ ਦਮਦਾਰ ਭੂਮਿਕਾ ਨਿਭਾਈ। ਮਾਰਸ਼ਲ ਆਰਟਸ ਦੇ ਸੱਤ ਸਟਾਈਲਾਂ ਤਾਈਕਵਾਂਡੋ, ਕਰਾਟੇ, ਕੁੰਗਫੂ, ਨੌਰਥ ਸਾਊਲਿਨ ਵੁਸ਼ੂ ਆਦਿ ਵਿਚ ਬਲੈਕ ਬੈਲਟ ਹੋਣ ਕਾਰਨ ਉਸ ਦੇ ਐਕਸ਼ਨ ਸਟੰਟਾਂ ਦੀ ਮੰਗ ਅਤੇ ਪ੍ਰਸਿੱਧੀ ਬਹੁਤ ਵਧ ਗਈ। ਉਸ ਨੂੰ ਕੈਲੀਫੋਰਨੀਆ ਵਿਚ 'ਲੀਜੇਂਡ ਆਫ਼ ਦਾ ਮਾਰਸ਼ਲ ਆਰਟ ਆਫ ਈਅਰ' ਅਤੇ ਓਬਾਮਾ ਪ੍ਰਸ਼ਾਸਨ ਵਲੋਂ 'ਲਾਈਫ਼ ਟਾਈਮ ਅਚੀਵਮੈਂਟ' ਸਨਮਾਨ ਮਿਲਿਆ। ਹਾਲੀਵੁੱਡ ਵਿਚ 'ਡਰੈਗਨ ਲੇਡੀ' ਦੇ ਨਾਂਅ ਨਾਲ ਮਸ਼ਹੂਰ ਸਿੰਥੀਆ ਰੋਥਰੌਕ ਦੀ ਫ਼ਿਲਮ 'ਟੂ ਡੇਜ਼ ਐਂਡ ਟੂ ਕਿਲ' ਵਿਚ ਸੰਨੀ ਸਿੰਘ ਉਸ ਦੇ ਮੁੱਖ ਬਾਡੀਗਾਰਡ ਦਾ ਕਿਰਦਾਰ ਨਿਭਾਅ ਰਿਹਾ ਹੈ। ਉਸ ਦੀਆਂ ਆਉਣ ਵਾਲੀਆਂ ਫ਼ਿਲਮਾਂ ਵਿਚ ਦਾ ਲਾਸਟ ਵਿਸ਼, ਅਮਰੀਕਨ, ਗੁਨਲਿੰਨਗਰਸ, ਓਵਰ ਦਾ ਬਾਰਡਰ, ਰਾਈਜ਼ ਆਫ਼ ਕਿੱਟ ਬਾਕਸਰ, ਅਨਟਾਰਿਸ, ਉਪਰੇਸ਼ਨ ਲੋਨੀ ਬਿਨ, ਵੌਰਟੈਕਸ ਇੰਫੈਕਟ, ਜਿਨ ਜੰਗ ਐਂਡ ਦਾ ਟੀਜ਼ਰ, ਵਿਲੈਨਟੀਕਾ, ਹੌਨਰੈਬਲ ਸੀਨਜ਼ ਆਦਿ ਹਨ। ਚੰਡੀਗੜ੍ਹ ਵਿਚ ਉਹ ਪੰਜਾਬੀ ਫ਼ਿਲਮਾਂ 'ਗੁਰਮੁਖ' ਦੀ ਸ਼ੂਟਿੰਗ ਲਈ ਆਏ ਸਨ, ਜਿਸ ਵਿਚ ਉਹ ਪਾਲੀਵੁੱਡ ਦੇ ਮਸ਼ਹੂਰ ਕਲਾਕਾਰਾਂ ਨਾਲ ਐਕਸ਼ਨ ਕਰਦੇ ਨਜ਼ਰ ਆਉਣਗੇ। ਅਮ੍ਰਿਤਜੀਤ ਸਿੰਘ ਸਰ੍ਹਾ ਦੀ ਇਕ ਨਵੀਂ ਫ਼ਿਲਮ, ਜੋ ਕਿ ਆਪਣਾ ਹੈਰੀਟੇਜ਼ ਪ੍ਰੋਡਕਸ਼ਨ ਹਾਊਸ ਦੇ ਬੈਨਰ ਹੇਠ ਬਣ ਰਹੀ ਹੈ, ਦੀ ਸ਼ੂਟਿੰਗ ਲਈ ਫਿਰ ਇੰਡੀਆ ਆਉਣਗੇ ਅਤੇ ਬਾਲੀਵੁੱਡ ਦੀਆਂ ਕੁਝ ਫ਼ਿਲਮਾਂ ਵਿਚ ਅਦਾਕਾਰੀ ਲਈ ਮੁੰਬਈ ਜਾਣਗੇ। ਉਹ ਪੰਜਾਬ ਵਿਚ ਤਾਈਕਵਾਂਡੋ ਅਕੈਡਮੀ ਖੋਲ੍ਹਣਾ ਚਾਹੁੰਦੇ ਹਨ, ਤਾਂ ਜੋ ਇੰਡੀਆ ਨੂੰ ਉਲੰਪਿਕਸ ਵਿਚੋਂ ਮੈਡਲ ਦਿਵਾ ਸਕਣ। ਉਹ ਪੰਜਾਬ ਦੀਆਂ ਯਾਦਾਂ ਤਾਜ਼ਾ ਕਰਨ ਲਈ ਆਪਣੇ ਦੋਸਤਾਂ ਦਲਜੀਤ ਰੇੜਵਾਂ ਆਦਿ ਨਾਲ ਹਮੇਸ਼ਾ ਸੰਪਰਕ 'ਚ ਰਹਿੰਦੇ ਹਨ। ਉਹ ਪੰਜਾਬ ਨੂੰ ਨਸ਼ਾ ਮੁਕਤ ਦੇਖਣਾ ਚਾਹੁੰਦੇ ਹਨ। ਪਰਮਾਤਮਾ ਇਸ ਦੁਨੀਆ 'ਤੇ ਵਿਲੱਖਣ ਕਲਾਕਾਰ ਨੂੰ ਹੋਰ ਤਰੱਕੀ ਬਖ਼ਸ਼ੇ।


-ਗੁਰਸਿਮਰਨ ਸਿੰਘ

ਇਟਲੀ 'ਚ ਪੰਜਾਬੀ ਬੋਲੀ ਤੇ ਸੱਭਿਆਚਾਰ ਨੂੰ ਤਨਦੇਹੀ ਨਾਲ ਸਮਰਪਿਤ ਹੈ ਮੰਚ ਸੰਚਾਲਕ : ਰਾਜੂ ਚਮਕੌਰ ਵਾਲਾ

ਵਿਦੇਸ਼ਾਂ ਵਿਚ ਪੰਜਾਬੀ ਮਾਂ ਬੋਲੀ ਤੇ ਸੱਭਿਆਚਾਰ ਨੂੰ ਪ੍ਰਫੁਲਿੱਤ ਕਰਨ ਵਾਲੇ ਮਾਣਮੱਤੇ ਕਲਾਕਾਰਾਂ ਵਿਚ ਮੰਚ ਸੰਚਾਲਕ ਰਾਜੂ ਚਮਕੌਰ ਵਾਲਾ ਇਕ ਅਜਿਹਾ ਸ਼ਖ਼ਸ ਹੈ ਜੋ ਕਿ ਪ੍ਰਭਾਵਸ਼ਾਲੀ ਤੇ ਦਮਦਾਰ ਮੰਚ ਸੰਚਾਲਨਾ ਕਰਕੇ ਪੂਰੇ ਯੂਰਪ ਭਰ ਦੇ ਸਰੋਤਿਆਂ ਦੇ ਦਿਲਾਂ ਵਿਚ ਇਕ ਸਤਿਕਾਰਯੋਗ ਸਥਾਨ ਰੱਖਦਾ ਹੈ। ਇਟਲੀ ਦੇ ਸ਼ਹਿਰ ਤਰਵੀਜੋ ਵਿਖੇ ਰਹਿਣ ਵਾਲਾ ਰਾਜੂ ਜਿੱਥੇ ਪੰਜਾਬ ਦੇ ਅਨੇਕਾਂ ਪ੍ਰਮੁੱਖ ਕਲਾਕਾਰਾਂ ਨਾਲ ਮੰਚ ਸੰਚਾਲਨ ਕਰ ਚੁੱਕਾ ਹੈ, ਉੱਥੇ ਉਹ ਇਟਲੀ 'ਚ ਹੋਣ ਵਾਲੇ ਸੱਭਿਆਚਾਰਕ ਤੇ ਸਾਹਿਤਕ ਸਮਾਗਮਾਂ ਤੇ ਮੇਲਿਆਂ ਵਿਚ ਵੀ ਸਟੇਜ ਸੰਚਾਲਕ ਦੇ ਤੌਰ 'ਤੇ ਵਿਚਰਦਿਆਂ ਦੇਖਿਆ ਗਿਆ ਹੈ। ਪੰਜਾਬ ਯੂਥ ਕਲੱਬਾਂ ਆਰਗੇਨਾਈਜੇਸ਼ਨ ਇਟਲੀ ਵਲੋਂ ਕਰਵਾਏ ਜਾਂਦੇ ਸਾਲਾਨਾ ਸਵ: ਢਾਡੀ ਅਮਰ ਸਿੰਘ ਸ਼ੌਕੀ ਮੇਲੇ 'ਤੇ ਉਹ ਕਈ ਸਾਲਾਂ ਤੋਂ ਲਗਾਤਾਰ ਸਟੇਜ ਸੰਚਾਲਨ ਦੀ ਜ਼ਿੰਮੇਵਾਰੀ ਨਿਭਾਉਂਦਾ ਆ ਰਿਹਾ ਹੈ। ਸ਼ਾਇਰੋ-ਸ਼ਾਇਰੀ, ਹਾਸਿਆਂ, ਟੋਟਕਿਆਂ ਤੇ ਮੁਹਾਵਰਿਆਂ ਨਾਲ ਭਰਪੂਰ ਤੁਕਬੰਦੀ ਕਰਕੇ ਰਾਜੂ ਸਟੇਜ ਨੂੰ ਚਾਰ ਚੰਨ ਲਗਾ ਦਿੰਦਾ ਹੈ ਅਤੇ ਸਰੋਤਿਆਂ ਨੂੰ ਅਖੀਰ ਤੱਕ ਸਮਾਗਮ ਨਾਲ ਜੋੜੀ ਰੱਖਦਾ ਹੈ। ਸਟੇਜ ਉੱਤੇ ਉਸ ਦੁਆਰਾ ਬੋਲੇ ਗਏ ਅਲਫਾਜ਼ ਮਨੋਰੰਜਨ ਦੇ ਨਾਲ-ਨਾਲ ਜੀਵਨ ਦੀਆਂ ਸੱਚਾਈਆਂ ਨਾਲ ਵੀ ਪੂਰੇ ਸਬੰਧਿਤ ਹੁੰਦੇ ਹਨ। ਉਹ ਆਪਣੇ ਸ਼ੇਅਰਾਂ ਵਿਚ ਪੇਸ਼ ਕਰਨ ਵਾਲੇ ਕਲਾਕਾਰਾਂ ਦੀ ਸ਼ਬਦਾਂ ਦੇ ਨਾਲ ਅਜਿਹੀ ਤਸਵੀਰ ਬਣਾ ਦਿੰਦਾ ਹੈ ਕਿ ਸਰੋਤੇ ਅੱਡੀਆਂ ਚੁੱਕ ਕੇ ਕਲਾਕਾਰ ਦਾ ਇੰਤਜ਼ਾਰ ਕਰਦੇ ਹਨ। ਸਟੇਜ ਤੋਂ ਉਹ ਸਮਾਜਿਕ ਬੁਰਾਈਆਂ ਨਸ਼ਿਆਂ, ਦਾਜ-ਦਹੇਜ ਆਦਿ ਦੇ ਖਿਲਾਫ਼ ਵੀ ਇਕ ਸੁਨੇਹਾ ਦੇਣਾ ਆਪਣਾ ਫਰਜ਼ ਸਮਝਦਾ ਹੈ। ਰਾਜੂ ਚਮਕੌਰ ਵਾਲਾ ਇਤਿਹਾਸਕ ਸ਼ਹਿਰ ਚਮਕੌਰ ਸਾਹਿਬ ਨਾਲ ਸਬੰਧਿਤ ਹੈ ਤੇ ਪਿਛਲੇ ਲਗਪਗ 14 ਸਾਲ ਤੋਂ ਇਟਲੀ 'ਚ ਪੱਕੇ ਤੌਰ 'ਤੇ ਰਹਿ ਰਿਹਾ ਹੈ। ਸੰਗੀਤ ਨਾਲ਼ ਰੱਜ ਕੇ ਪ੍ਰੇਮ ਕਰਨ ਵਾਲਾ ਰਾਜੂ ਪ੍ਰਸਿੱਧ ਗਾਇਕ ਦੁਰਗਾ ਰੰਗੀਲਾ ਨੂੰ ਆਪਣਾ ਆਦਰਸ਼ ਮੰਨਦਾ ਹੈ, ਜਿਨ੍ਹਾਂ ਨੇ ਉਸ ਦੀ ਬਾਂਹ ਫੜ ਕੇ ਸਟੇਜ ਸੰਚਾਲਨਾ ਵੱਲ ਪ੍ਰੇਰਿਤ ਕੀਤਾ। ਆਪਣੀ ਸਟੇਜੀ ਕਲਾ ਸਦਕਾ ਜਿੱਥੇ ਰਾਜੂ ਅੱਜ ਯੂਰਪ ਭਰ ਦੇ ਪੰਜਾਬੀਆਂ ਵਿਚ ਜਾਣ-ਪਹਿਚਾਣ ਦਾ ਮੁਥਾਜ ਨਹੀਂ ਹੈ, ਉੱਥੇ ਸੁਭਾਅ ਪੱਖੋਂ ਵੀ ਉਹ ਅਤਿ ਮਿਲਾਪੜੇ ਤੇ ਚੰਗੇ ਸੁਭਾਅ ਦਾ ਮਾਲਕ ਹੈ।


-ਹਰਦੀਪ ਸਿੰਘ ਕੰਗ 'ਠੌਣਾ'
ਪੱਤਰਕਾਰ ਅਜੀਤ ਵੀਨਸ ਇਟਲੀ

ਦੋਸਤੀ 'ਤੇ ਬਣੀ ਇਕ ਹੋਰ ਫ਼ਿਲਮ ਯਾਰਮ

ਦੋਸਤੀ ਇਕ ਇਸ ਤਰ੍ਹਾਂ ਦਾ ਵਿਸ਼ਾ ਹੈ, ਜੋ ਬਾਲੀਵੁੱਡ ਦੇ ਕਾਹਣੀ ਲੇਖਕਾਂ ਨੂੰ ਬਹੁਤ ਆਕਰਸ਼ਿਤ ਕਰਦਾ ਰਿਹਾ ਹੈ ਅਤੇ ਇਹੀ ਵਜ੍ਹਾ ਹੈ ਕਿ ਇਸ ਵਿਸ਼ੇ 'ਤੇ ਸਮੇਂ-ਸਮੇਂ 'ਤੇ ਫ਼ਿਲਮਾਂ ਬਣਦੀਆਂ ਰਹੀਆਂ ਹਨ। ਉਂਜ ਤਾਂ ਹੁਣ ਬਾਲੀਵੁੱਡ ਵਿਚ ਵੀ ਬਦਲਾਅ ਆਉਣ ਲੱਗਿਆ ਹੈ ਪਰ ਦੋਸਤੀ ਦੇ ਵਿਸ਼ੇ 'ਤੇ ਇਸ ਦਾ ਅਸਰ ਨਹੀਂ ਪਿਆ ਹੈ। ਹਾਲ ਹੀ ਵਿਚ ਪ੍ਰਦਰਸ਼ਿਤ ਹੋਈ 'ਛਿਛੋਰੇ' ਵਿਚ ਦੋਸਤਾਂ ਦੀ ਕਹਾਣੀ ਪੇਸ਼ ਕੀਤੀ ਗਈ ਸੀ। ਹੁਣ 'ਯਾਰਮ' ਵਿਚ ਵੀ ਇਹ ਵਿਸ਼ਾ ਲਿਆ ਗਿਆ ਹੈ। ਔਵੈਸ ਖਾਨ ਵਲੋਂ ਨਿਰਦੇਸ਼ਿਤ ਇਸ ਫ਼ਿਲਮ ਵਿਚ ਪ੍ਰਤੀਕ ਬੱਬਰ, ਸਿਧਾਂਤ ਕਪੂਰ, ਸ਼ੁਭਾ ਰਾਜਪੂਤ, ਇਸ਼ਿਤਾ ਰਾਜ, ਅਨੀਤਾ ਰਾਜ ਨੇ ਅਭਿਨੈ ਕੀਤਾ ਅਤੇ ਫ਼ਿਲਮ ਦੀ ਸ਼ੂਟਿੰਗ ਮੁੱਖ ਰੂਪ ਨਾਲ ਮਾਰੀਸ਼ੀਅਸ ਵਿਚ ਕੀਤੀ ਗਈ ਹੈ।
ਫ਼ਿਲਮ ਵਿਚ ਦੋ ਇਸ ਤਰ੍ਹਾਂ ਦੇ ਦੋਸਤਾਂ ਦੀ ਕਹਾਣੀ ਹੈ, ਜੋ ਬਚਪਨ ਦੇ ਦੋਸਤ ਹਨ। ਦੋਵਾਂ ਨੇ ਪੜ੍ਹਾਈ ਵੀ ਇਕੱਠੇ ਕੀਤੀ ਹੈ। ਜਵਾਨੀ ਵਿਚ ਕਦਮ ਰੱਖਣ ਤੋਂ ਬਾਅਦ ਇਕ ਕੁੜੀ ਦੀ ਵਜ੍ਹਾ ਕਰਕੇ ਦੋਵੇਂ ਦੋਸਤਾਂ ਵਿਚਾਲੇ ਕਿਵੇਂ ਦੀਵਾਰ ਖੜ੍ਹੀ ਹੋ ਜਾਂਦੀ ਹੈ, ਇਹ ਇਸ ਦੀ ਕਹਾਣੀ ਹੈ। ਕਹਾਣੀ ਨੂੰ ਹੋਰ ਰੌਚਕ ਬਣਾਉਣ ਲਈ ਤੇ ਇਸ ਨੂੰ ਅੱਜ ਦੇ ਜ਼ਮਾਨੇ ਨਾਲ ਜੋੜਨ ਲਈ ਇਸ ਵਿਚ ਲਵ ਜਿਹਾਦ ਦਾ ਕੋਣ ਵੀ ਪੇਸ਼ ਕੀਤਾ ਗਿਆ ਹੈ।
ਫ਼ਿਲਮ ਵਿਚ ਪ੍ਰਤੀਕ ਤੇ ਸਿਧਾਂਤ ਨੂੰ ਬਚਪਨ ਦੇ ਦੋਸਤ ਦੇ ਰੂਪ ਵਿਚ ਪੇਸ਼ ਕੀਤਾ ਗਿਆ ਹੈ। ਸੰਯੋਗ ਦੀ ਗੱਲ ਇਹ ਹੈ ਕਿ ਪ੍ਰਤੀਕ ਦੇ ਪਿਤਾ ਰਾਜ ਬੱਬਰ ਤੇ ਸਿਧਾਂਤ ਦੇ ਪਿਤਾ ਸ਼ਕਤੀ ਕਪੂਰ ਸਾਲਾਂ ਤੋਂ ਅਭਿਨੈ ਕਰ ਰਹੇ ਹਨ। ਦੋਵਾਂ ਨੇ ਕਈ ਫ਼ਿਲਮਾਂ ਵਿਚ ਇਕੱਠਿਆਂ ਕੰਮ ਵੀ ਕੀਤਾ ਹੈ ਅਤੇ ਇਸ ਵਜ੍ਹਾ ਕਰਕੇ ਪ੍ਰਤੀਕ ਤੇ ਸਿਧਾਂਤ ਵਿਚਾਲੇ ਵੀ ਬਚਪਨ ਤੋਂ ਦੋਸਤੀ ਰਹੀ ਹੈ। ਇਹੀ ਵਜ੍ਹਾ ਸੀ ਕਿ ਇਥੇ ਕੰਮ ਕਰਦੇ ਸਮੇਂ ਦੋਵਾਂ ਨੂੰ ਲੱਗਿਆ ਹੀ ਨਹੀਂ ਕਿ ਉਹ ਸਾਥੀ ਕਲਾਕਾਰ ਨਾਲ ਕੰਮ ਕਰ ਰਹੇ ਹਨ। ਬਲਕਿ ਇਹੀ ਲੱਗਿਆ ਕਿ ਉਹ ਜ਼ਿੰਦਗੀ ਦੇ ਅਸਲ ਦੋਸਤ ਦੇ ਨਾਲ ਕੰਮ ਕਰ ਰਹੇ ਹਨ। ਇਸ ਵਜ੍ਹਾ ਕਰਕੇ ਦੋਵਾਂ ਦੀ ਆਪਸੀ ਕੈਮਿਸਟਰੀ ਵਿਚ ਬਹੁਤ ਨਿਖਾਰ ਆਇਆ ਹੈ ਅਤੇ ਇਸ ਦਾ ਫਾਇਦਾ ਫ਼ਿਲਮ ਨੂੰ ਕਾਫੀ ਮਿਲਿਆ ਹੈ।
ਸ਼ੁਭਾ ਰਾਜਪੂਤ ਨੂੰ ਇਥੇ ਅਹਿਮ ਭੂਮਿਕਾ ਨਿਭਾਉਣ ਨੂੰ ਮਿਲੀ ਹੈ ਤੇ ਇਸ਼ਤਾ ਰਾਜ ਦੇ ਹਿੱਸੇ ਇਥੇ ਮੁਸਲਿਮ ਕੁੜੀ ਜ਼ੋਇਆ ਦਾ ਕਿਰਦਾਰ ਆਇਆ ਹੈ, ਕਿਉਂਕਿ ਇਹ ਮੁਸਲਿਮ ਪਿੱਠਭੂਮੀ ਦੀ ਕਹਾਣੀ ਨਹੀਂ ਹੈ ਤੇ ਕਾਲਜ ਦੇ ਦੋਸਤਾਂ ਦੀ ਕਹਾਣੀ ਹੈ। ਸੋ, ਇਸ ਕਿਰਦਾਰ ਲਈ ਇਸ਼ਿਤਾ ਨੂੰ ਜ਼ਿਆਦਾ ਮਿਹਨਤ ਨਹੀਂ ਕਰਨੀ ਪਈ ਸੀ। ਅੱਜ ਦੇ ਜ਼ਮਾਨੇ ਦੇ ਰੂਪ ਨਾਲ ਬਣੀ ਇਹ ਫ਼ਿਲਮ 18 ਅਕਤੂਬਰ ਨੂੰ ਪ੍ਰਦਰਸ਼ਿਤ ਹੋਣ ਜਾ ਰਹੀ ਹੈ।


-ਮੁੰਬਈ ਪ੍ਰਤੀਨਿਧ

'ਲਵਲੀ ਦਾ ਢਾਬਾ' ਵਿਚ ਈਸ਼ਾ ਕੋਪੀਕਰ

'ਪਿਆਰ ਇਸ਼ਕ ਔਰ ਮੁਹੱਬਤ', 'ਪਿੰਜਰ', 'ਦਿਲ ਕਾ ਰਿਸ਼ਤਾ' ਸਮੇਤ ਹੋਰ ਕਈ ਫ਼ਿਲਮਾਂ ਵਿਚ ਚਮਕਣ ਵਾਲੀ ਈਸ਼ਾ ਕੋਪੀਕਰ ਨੇ ਹੋਟਲ ਕਾਰੋਬਾਰੀ ਟਿੰਮੀ ਨਾਰੰਗ ਨਾਲ ਵਿਆਹ ਕਰਾਇਆ ਹੈ। ਵਿਆਹ ਦੀ ਵਜ੍ਹਾ ਨਾਲ ਈਸ਼ਾ ਨੂੰ ਕਾਫੀ ਸਮੇਂ ਤੱਕ ਅਭਿਨੈ ਤੋਂ ਦੂਰ ਰਹਿਣਾ ਪਿਆ ਅਤੇ ਹੁਣ ਜਦ ਉਹ ਦੁਬਾਰਾ ਅਭਿਨੈ ਵਿਚ ਰੁਝੇਵੇਂ ਵਧਾ ਰਹੀ ਹੈ ਤਾਂ ਸੰਯੋਗ ਦੇਖੋ ਕਿ ਹੋਟਲ ਮਾਲਕ ਦੀ ਬੀਵੀ ਨੂੰ ਢਾਬੇ ਦੀ ਮਾਲਕਣ ਦਾ ਕਿਰਦਾਰ ਨਿਭਾਉਣਾ ਹਿੱਸੇ ਆਇਆ ਹੈ।
ਨਿਰਦੇਸ਼ਕ ਕੇਨੀ ਛਾਬੜਾ ਵਲੋਂ ਨਿਰਦੇਸ਼ਿਤ ਵੈੱਬ ਸੀਰੀਜ਼ 'ਲਵਲੀ ਦਾ ਢਾਬਾ' ਵਿਚ ਈਸ਼ਾ ਨੂੰ ਢਾਬੇ ਦੀ ਮਾਲਕਣ ਲਵਲੀ ਕੌਰ ਢਿੱਲੋਂ ਦੀ ਭੂਮਿਕਾ ਵਿਚ ਪੇਸ਼ ਕੀਤਾ ਜਾ ਰਿਹਾ ਹੈ ਅਤੇ ਇਹ ਈਸ਼ਾ ਦੀ ਇਹ ਪਹਿਲੀ ਵੈੱਬ ਸੀਰੀਜ਼ ਹੈ। ਇਸ ਭੂਮਿਕਾ ਬਾਰੇ ਈਸ਼ਾ ਕਹਿੰਦੀ ਹੈ, 'ਇਹ ਜੋ ਲਵਲੀ ਹੈ, ਉਹ ਆਪਣਾ ਪਤੀ ਗਵਾ ਚੁੱਕੀ ਹੈ ਅਤੇ ਉਸ ਦੇ ਪਤੀ ਕੈਪਟਨ ਰੁਪਿੰਦਰ ਸਿੰਘ ਫ਼ੌਜ ਵਿਚ ਸਨ ਅਤੇ ਦੇਸ਼ ਲਈ ਸ਼ਹੀਦ ਹੋ ਗਏ ਸਨ। ਲਵਲੀ ਨੂੰ ਖਾਲੀ ਦਿਨ ਬਿਤਾਉਣਾ ਪਸੰਦ ਨਹੀਂ ਹੈ। ਇਸ ਵਜ੍ਹਾ ਕਰਕੇ ਉਹ ਆਪਣਾ ਢਾਬਾ ਖੋਲ੍ਹ ਲੈਂਦੀ ਹੈ ਤਾਂ ਕਿ ਇਸੇ ਬਹਾਨੇ ਭੁੱਖਿਆਂ ਦਾ ਪੇਟ ਭਰਿਆ ਜਾ ਸਕੇ ਤੇ ਲੋਕਾਂ ਦੀ ਸੇਵਾ ਕੀਤੀ ਜਾ ਸਕੇ। ਉਹ ਆਪਣੀ ਪਕਾਉਣ ਕਲਾ ਦੇ ਕੌਸ਼ਲ ਦੇ ਜ਼ਰੀਏ ਲੋਕਾਂ ਦੀ ਜ਼ਿੰਦਗੀ ਵਿਚ ਖੁਸ਼ੀਆਂ ਬਿਖੇਰਨਾ ਚਾਹੁੰਦੀ ਹੈ। ਮੈਂ ਖ਼ੁਦ ਮਹਾਰਾਸ਼ਟਰੀਅਨ ਹਾਂ, ਜਦ ਕਿ ਲਵਲੀ ਪੰਜਾਬਣ ਹੈ। ਸੋ, ਇਥੇ ਅਭਿਨੈ ਕਰਦੇ ਸਮੇਂ ਕਾਫੀ ਸਾਵਧਾਨੀ ਵਰਤਣੀ ਪਈ ਹੈ। ਖ਼ਾਸ ਕਰਕੇ ਸੰਵਾਦ ਬੋਲਦੇ ਸਮੇਂ ਇਸ ਗੱਲ ਦਾ ਖਿਆਲ ਰੱਖਣਾ ਪੈਂਦਾ ਹੈ ਕਿ ਕਿਤੇ ਮਰਾਠੀ ਟੋਨ ਨਾ ਆ ਜਾਵੇ। ਸੱਚ ਕਹਾਂ ਤਾਂ ਲਵਲੀ ਦਾ ਕਿਰਦਾਰ ਕਾਫੀ ਹੱਦ ਤੱਕ ਮੇਰੇ ਨਾਲ ਮੇਲ ਖਾਂਦਾ ਹੈ। ਮੇਰੀ ਤਰ੍ਹਾਂ ਉਹ ਵੀ ਜ਼ਿੰਦਾਦਿਲ ਸੁਭਾਅ ਦੀ ਹੈ ਅਤੇ ਉਹ ਵੀ ਹੌਸਪਿਟਾਲਿਟੀ ਸਨਅਤ ਦਾ ਹਿੱਸਾ ਬਣੀ ਹੋਈ ਹੈ। ਇਸ ਤਰ੍ਹਾਂ ਦੀ ਭੂਮਿਕਾ ਨਿਭਾਉਂਦੇ ਸਮੇਂ ਇਹੀ ਲਗਦਾ ਹੈ ਕਿ ਮੈਂ ਖ਼ੁਦ ਨੂੰ ਹੀ ਕੈਮਰੇ ਸਾਹਮਣੇ ਦੁਹਰਾ ਰਹੀ ਹਾਂ।'


-ਮੁੰਬਈ ਪ੍ਰਤੀਨਿਧ

ਪ੍ਰਿਆਂਸ਼ੂ ਚੈਟਰਜੀ ਦੀ

ਆਫ਼ਿਸਰ ਅਰੁਜਨ ਸਿੰਘ ਆਈ. ਪੀ. ਐਸ.

ਹਿੰਦੀ ਸਿਨੇਮਾ ਦੇ ਕਈ ਇਸ ਤਰ੍ਹਾਂ ਦੇ ਹੀਰੋ ਹਨ, ਜਿਨ੍ਹਾਂ ਨੂੰ ਪੁਲਿਸ ਦੀ ਵਰਦੀ ਬਹੁਤ ਫਲੀ ਹੈ। 'ਜ਼ੰਜੀਰ' ਵਿਚ ਅਮਿਤਾਭ ਨੇ ਵਰਦੀ ਪਾਈ ਤਾਂ ਉਹ ਸਟਾਰ ਬਣ ਗਏ। ਅਜੇ ਦੇਵਗਨ 'ਸਿੰਘਮ' ਵਿਚ ਵਰਦੀ ਪਾ ਕੇ ਆਪਣੇ ਕੈਰੀਅਰ ਵਿਚ ਨਵੀਂ ਜਾਨ ਫੂਕਣ ਵਿਚ ਕਾਮਯਾਬ ਰਹੇ ਤੇ ਐਕਸ਼ਨ ਫ਼ਿਲਮਾਂ ਦੇ ਦੌਰ ਦੌਰਾਨ ਵਿਨੋਦ ਖੰਨਾ, ਜੈਕੀ ਸ਼ਰਾਫ, ਸੁਨੀਲ ਸ਼ੈਟੀ, ਅਕਸ਼ੇ ਕੁਮਾਰ ਆਦਿ ਸਮੇਂ-ਸਮੇਂ 'ਤੇ ਵਰਦੀ ਵਿਚ ਨਜ਼ਰ ਆਏ ਸਨ। ਹੁਣ ਆਪਣੇ ਫ਼ਿਲਮੀ ਕੈਰੀਅਰ ਵਿਚ ਉਭਾਰ ਲਿਆਉਣ ਲਈ ਪ੍ਰਿਆਂਸ਼ੂ ਚੈਟਰਜੀ ਨੇ ਵੀ ਖਾਕੀ ਵਰਦੀ ਪਾ ਲਈ ਹੈ। 'ਤੁਮ ਬਿਨ' ਤੋਂ ਪੇਸ਼ ਹੋਏ ਪ੍ਰਿਆਂਸ਼ੂ ਲਈ ਇਹ ਪਹਿਲਾ ਮੌਕਾ ਹੈ, ਜਦੋਂ ਉਨ੍ਹਾਂ ਨੇ ਵਰਦੀ ਪਾਈ ਹੈ ਅਤੇ ਉਨ੍ਹਾਂ ਨੂੰ ਪੁਲਿਸ ਅਫ਼ਸਰ ਵਜੋਂ ਚਮਕਾਉਂਦੀ ਫ਼ਿਲਮ ਦਾ ਨਾਂਅ ਹੈ 'ਆਫ਼ਿਸਰ ਅਰੁਜਨ ਸਿੰਘ ਆਈ. ਪੀ. ਐਸ.'।
ਅਰਸ਼ਦ ਸਿਦੀਕੀ ਵਲੋਂ ਲਿਖੀ ਤੇ ਨਿਰਦੇਸ਼ਿਤ ਇਸ ਫ਼ਿਲਮ ਵਿਚ ਇਮਾਨਦਾਰ ਤੇ ਫ਼ਰਜ਼ ਨਿਭਾਉਣ ਵਾਲੇ ਪੁਲਿਸ ਅਧਿਕਾਰੀ ਤੇ ਭ੍ਰਿਸ਼ਟ ਨੇਤਾਵਾਂ ਦੀ ਟੱਕਰ ਦੀ ਕਹਾਣੀ ਪੇਸ਼ ਕੀਤੀ ਗਈ ਹੈ। ਅਰਜੁਨ ਸਿੰਘ (ਪ੍ਰਿਆਂਸ਼ੂ ਚੈਟਰਜੀ) ਪੁਲਿਸ ਅਧਿਕਾਰੀ ਹੈ ਅਤੇ ਉਸ ਦਾ ਤਬਾਦਲਾ ਪ੍ਰਯਾਗ ਰਾਜ ਕਰ ਦਿੱਤਾ ਜਾਂਦਾ ਹੈ। ਇਸ ਸ਼ਹਿਰ ਦੇ ਨਾਰੀ ਨਿਕੇਤਨ ਤੋਂ ਇਕ ਕੁੜੀ ਮਾਇਆ (ਰੀਟਾ ਜੋਸ਼ੀ) ਗਵਾਚ ਜਾਂਦੀ ਹੈ ਅਤੇ ਅਰਜੁਨ ਸਿੰਘ ਉਸ ਦੀ ਭਾਲ ਵਿਚ ਲੱਗ ਜਾਂਦਾ ਹੈ। ਇਹ ਭਾਲ ਉਸ ਨੂੰ ਭ੍ਰਿਸ਼ਟ ਨੇਤਾ ਬਾਲਕ ਨਾਥ ਚੌਧਰੀ (ਗੋਵਿੰਦ ਨਾਮਦੇਵ) ਤੇ ਉਸ ਦੇ ਬੇਟੇ ਕੁੰਦਨ (ਵਿਜੇ ਰਾਜ) ਤੱਕ ਲੈ ਜਾਂਦੀ ਹੈ। ਇਸ ਦੌਰਾਨ ਅਰਜੁਨ ਦੀ ਮੁਲਾਕਾਤ ਦੁਰਗਾ (ਰਾਏ ਲਕਸ਼ਮੀ) ਨਾਲ ਹੁੰਦੀ ਹੈ ਅਤੇ ਉਹ ਮਾਇਆ ਦੇ ਕੇਸ ਵਿਚ ਬਾਲਕ ਨਾਥ ਤੇ ਕੁੰਦਨ ਦੇ ਵਿਰੁੱਧ ਗਵਾਹੀ ਦੇਣ ਨੂੰ ਤਿਆਰ ਹੋ ਜਾਂਦੀ ਹੈ। ਆਪਣੀ ਸੱਤਾ ਨਾਲ ਪਾਲੇ ਹੋਏ ਗੁੰਡਿਆਂ ਦੇ ਜ਼ਰੀਏ ਬਾਲਕ ਨਾਥ ਅਰਜੁਨ ਨੂੰ ਤਬਾਹ ਕਰ ਦੇਣਾ ਚਾਹੁੰਦਾ ਹੈ ਪਰ ਕਾਨੂੰਨੀ ਤਾਕਤ ਦੀ ਮਦਦ ਨਾਲ ਕਿਸ ਤਰ੍ਹਾਂ ਅਰਜੁਨ ਇਨ੍ਹਾਂ ਤੋਂ ਛੁਟਕਾਰਾ ਪਾਉਂਦਾ ਹੈ, ਇਹ ਇਸ ਦੀ ਕਹਾਣੀ ਹੈ।
ਪੂਰੀ ਤਰ੍ਹਾਂ ਨਾਲ ਉੱਤਰ ਪ੍ਰਦੇਸ਼ ਵਿਚ ਸ਼ੂਟ ਕੀਤੀ ਗਈ ਇਸ ਫ਼ਿਲਮ ਦੀ ਨਾਇਕਾ ਰਾਏ ਲਕਸ਼ਮੀ ਹੈ। ਪਹਿਲਾਂ 'ਅਕੀਰਾ' ਤੇ ਜੂਲੀ-2' ਵਿਚ ਅਭਿਨੈ ਕਰ ਚੁੱਕੀ ਇਹ ਉਹੀ ਰਾਏ ਲਕਸ਼ਮੀ ਹੈ, ਜਿਸ ਦਾ ਨਾਂਅ ਕਦੀ ਕ੍ਰਿਕਟਰ ਧੋਨੀ ਦੇ ਨਾਲ ਜੋੜਿਆ ਗਿਆ ਸੀ। ਉਸ ਦੇ ਨਾਲ ਇਸ ਫ਼ਿਲਮ ਵਿਚ ਦੀਪਰਾਜ ਰਾਣਾ, ਅਹਿਸਾਨ ਖਾਨ, ਐਸ. ਐਮ. ਜ਼ਹੀਰ, ਸ਼ਬਨਮ ਕਪੂਰ, ਗਿਆਨ ਪ੍ਰਕਾਸ਼ ਤੇ ਲਕਸ਼ਮੀ ਕਾਂਤ ਪਾਂਡੇ ਨੇ ਅਭਿਨੈ ਕੀਤਾ ਹੈ।


-ਮੁੰਬਈ ਪ੍ਰਤੀਨਿਧ

ਸਲਮਾਨ-ਪ੍ਰਭੂਦੇਵਾ ਦੀ ਹੈਟ੍ਰਿਕ

ਬਤੌਰ ਨਿਰਦੇਸ਼ਕ ਪ੍ਰਭੂ ਦੇਵਾ ਨੇ ਸਲਮਾਨ ਖਾਨ ਦੇ ਨਾਲ ਫ਼ਿਲਮ 'ਵਾਂਟੇਡ' ਵਿਚ ਕੰਮ ਕੀਤਾ ਸੀ। ਸਲਮਾਨ ਨੂੰ ਪ੍ਰਭੂ ਦੇਵਾ ਦਾ ਕੰਮ ਕਰਨ ਦਾ ਅੰਦਾਜ਼ ਪਸੰਦ ਆਇਆ ਸੀ। ਸੋ, 'ਦਬੰਗ-3' ਦੇ ਨਿਰਦੇਸ਼ਨ ਦੀ ਵਾਗਡੋਰ ਉਨ੍ਹਾਂ ਨੂੰ ਹੀ ਫੜਾਈ ਗਈ। ਹੁਣ ਬਤੌਰ ਨਿਰਮਾਤਾ ਸਲਮਾਨ ਨੇ ਇਕ ਕੋਰੀਆਈ ਫ਼ਿਲਮ 'ਦ ਆਊਟਰਲਾ' ਦੇ ਹਿੰਦੀ ਰੀਮੇਕ ਹੱਕ ਖਰੀਦ ਲਏ ਹਨ। ਇਨ੍ਹੀਂ ਦਿਨੀਂ ਇਸ ਫ਼ਿਲਮ ਦੀ ਪਟਕਥਾ ਨੂੰ ਹਿੰਦੀ ਦਰਸ਼ਕਾਂ ਦੀ ਪਸੰਦ ਮੁਤਾਬਿਕ ਦੁਬਾਰਾ ਲਿਖਿਆ ਜਾ ਰਿਹਾ ਹੈ। ਭਾਵ ਕੋਰੀਆਈ ਕਹਾਣੀ ਦਾ ਭਾਰਤੀਕਰਨ ਕੀਤਾ ਜਾ ਰਿਹਾ ਹੈ। ਹਿੰਦੀ ਵਰਸ਼ਨ ਦਾ ਟਾਈਟਲ 'ਰਾਧੇ' ਰੱਖਿਆ ਗਿਆ ਹੈ ਅਤੇ ਇਸ ਨੂੰ ਵੀ ਪ੍ਰਭੂ ਦੇਵਾ ਹੀ ਨਿਰਦੇਸ਼ਿਤ ਕਰਨਗੇ ਅਤੇ ਇਹ ਸਲਮਾਨ-ਪ੍ਰਭੂ ਦੇਵਾ ਦੇ ਇਕੱਠਿਆਂ ਤੀਜੀ ਫ਼ਿਲਮ ਹੋਵੇਗੀ। ਫ਼ਿਲਮ ਦੇ ਟਾਈਟਲ 'ਰਾਧੇ' ਦੀ ਚੋਣ ਸਲਮਾਨ ਵਲੋਂ ਨਿਭਾਏ 'ਤੇਰੇ ਨਾਮ' ਤੋਂ ਕੀਤੀ ਗਈ ਹੈ। ਉਸ ਫ਼ਿਲਮ ਵਿਚ ਸਲਮਾਨ ਦੇ ਕਿਰਦਾਰ ਦਾ ਨਾਂਅ ਰਾਧੇ ਸੀ ਅਤੇ ਇਹ ਹਿਟ ਫ਼ਿਲਮ ਸੀ।

ਤਮੰਨਾ

ਬੋਲੇਂ ਚੂੜੀਆਂ

ਨਵਾਜ਼ੂਦੀਨ ਸਿਦੀਕੀ ਨਾਲ ਤਮੰਨਾ ਭਾਟੀਆ ਦੀ ਜੋੜੀ ਇਕ ਸ਼ਾਨਦਾਰ ਧਮਾਕਾ ਹੋਣ ਵਾਲਾ ਹੈ। ਦਿਲਚਸਪ ਗੱਲ ਇਹ ਹੈ ਕਿ ਨਵਾਜ਼ੂ ਨੇ ਖੁਦ ਤਮੰਨਾ ਭਾਟੀਆ ਦੀ ਬਹੁਤ ਜ਼ਿਆਦਾ ਤਾਰੀਫ਼ ਕੀਤੀ ਹੈ। ਕਰੇ ਵੀ ਕਿਉਂ ਨਾ ਦੱਖਣ ਦੀ ਰਾਣੀ ਨੂੰ ਦੁੱਧ ਰੰਗੀ' ਤਮੰਨਾ ਨਾਲ ਉਹ 'ਬੋਲੇ ਚੂੜੀਆਂ' ਫ਼ਿਲਮ ਕਰ ਰਿਹਾ ਹੈ ਤੇ ਤਮੰਨਾ ਨੇ ਕਿਹਾ ਕਿ ਪਹਿਲੀ ਫ਼ਿਲਮ ਹੈ 'ਬੋਲੇ ਚੂੜੀਆਂ' ਜਿਸ 'ਚ ਕੋਈ 'ਲੜਾਈ-ਝਗੜਾ' ਨਹੀਂ। ਸਿਰਫ਼ ਤੇ ਸਿਰਫ਼ ਪਿਆਰ-ਪਿਆਰ-ਪਿਆਰ 'ਬੋਲੇ ਚੂੜੀਆਂ' ਵਿਚ ਹੋਵੇਗਾ। ਤਮੰਨਾ ਨੇ ਨਵਾਜ਼ੂ ਨਾਲ ਇਕ ਰੁਮਾਂਟਿਕ ਵੀਡੀਓ ਵੀ ਸਾਂਝਾ ਕੀਤਾ ਹੈ। ਪਹਿਲਾਂ ਇਹ ਫ਼ਿਲਮ ਮੌਨੀ ਰਾਏ ਕਰਨ ਵਾਲੀ ਸੀ। ਨਵਾਜ਼ੂਦੀਨ ਨਾਲ ਪਹਿਲੀ ਵਾਰ ਤਮੰਨਾ ਦੀ ਜੋੜੀ ਬਣ ਰਹੀ ਹੈ। ਤਮੰਨਾ ਲਈ ਖਾਸ ਗੱਲ ਇਹ ਵੀ ਹੈ ਕਿ 'ਬੋਲੇ ਚੂੜੀਆਂ' ਨੂੰ ਨਵਾਜ਼ੂਦੀਨ ਦਾ ਭਰਾ ਸਮਸ਼ ਨਵਾਬ ਸਿਦੀਕੀ ਨਿਰਦੇਸ਼ਤ ਕਰ ਰਿਹਾ ਹੈ। ਇਧਰ, ਚਿੰਰੀਜੀਵੀ ਤੇ ਅਮਿਤਾਭ ਬੱਚਨ ਨਾਲ 'ਸਾਈਰਾ ਨਰਸਿਮਾ' ਕੀਤੀ ਹੈ ਜਿਸ ਦੇ ਟੀਜ਼ਰ ਨੇ ਯੂ-ਟਿਊਬ 'ਤੇ ਜ਼ਬਰਦਸਤ ਹੁੰਗਾਰਾ ਲਿਆ ਹੈ। ਤਾਮਿਲ, ਤੇਲਗੂ, ਕੰਨੜ, ਮਾਲਿਅਲਮ ਤੇ ਹਿੰਦੀ 'ਚ ਇਹ ਫ਼ਿਲਮ ਆਜ਼ਾਦੀ ਸੰਗਰਾਮੀਏ ਨਰਸਿਮ੍ਹਾ ਰਾਓ ਰੈਡੀ 'ਤੇ ਆਧਾਰਿਤ ਹੈ। ਦੇਸ਼ ਪਿਆਰ ਦੀ ਫ਼ਿਲਮ ਦਾ ਹਿੱਸਾ ਤੇ 'ਬੋਲੇ ਚੂੜੀਆਂ' ਬਿਨ ਇਕ ਵੀ ਖੜਕੇ-ਦੜਕੇ ਵਾਲੇ ਤੇ ਹਾਸਮਈ ਦ੍ਰਿਸ਼ ਦੇ ਸ਼ੁੱਧ ਰੁਮਾਂਟਿਕ ਫ਼ਿਲਮ ਕਰਕੇ ਬਹੁਪੱਖੀ ਅਭਿਨੇਤਰੀ, ਸਦਾਬਹਾਰ ਤਮੰਨਾ ਭਾਟੀਆ ਬਣਨ ਦਾ ਸੁਪਨਾ ਉਹ ਸਾਕਾਰ ਰਹੀ ਹੈ। 'ਹਿੰਮਤਵਾਲਾ' ਤੋਂ 'ਬੋਲੇ ਚੂੜੀਆਂ' ਤੇ ਅਨੇਕਾਂ ਹੋਰ ਕਾਮਯਾਬ ਫ਼ਿਲਮਾਂ ਤਾਂ ਉਸ ਦੇ ਖਾਤੇ ਵਿਚ ਹਨ ਹੀ ਪਰ 'ਬੋਲੇ ਚੂੜੀਆਂ' ਤੇ 'ਸਾਈਰਾ' ਨਾਲ ਦੋ ਵੱਖਰੇ-ਵੱਖਰੇ ਰੂਪ ਦਿਖਾ ਕੇ ਤਮੰਨਾ ਭਾਟੀਆ ਹਰ ਫ਼ਿਲਮ 'ਚ ਵੱਖਰਾ ਕਿਰਦਾਰ/ਵੱਖਰਾ ਕੰਮ, ਨਵੀਂ ਦਿੱਖ ਦਿਖਾਉਣ ਵਾਲੀ ਹੈ। ਅਸ਼ਕੇ ਤਮੰਨਾ....ਦੇ।

ਨਰਗਿਸ ਫਾਖਰੀ : ਕਹਾਨੀ ਕਿਸਮਤ ਕੀ

ਇਕ ਉਦੈ ਚੋਪੜਾ ਵਲੋਂ ਧੋਖਾ ਤੇ ਦੂਸਰਾ ਵਿਦੇਸ਼ੀ ਮਿੱਤਰ ਦੇ ਬੱਚੇ ਦੀ ਮਾਂ ਬਣੇਗੀ ਵਰਗਾ ਕੋਰਾ ਝੂਠ ਫੈਲਾਵੇ ਤਾਂ ਗੁੱਸੇ 'ਚ ਨਰਗਿਸ ਨੇ 'ਵੈੱਬਸਾਈਟ' ਦੇ ਪ੍ਰਬੰਧਕਾਂ ਨੂੰ ਕਿਹਾ ਕਿ ਤੁਸੀਂ 'ਮੈਂਟਲ ਹਸਪਤਾਲ' ਭਰਤੀ ਹੋ ਜਾਵੋ, ਵਰਨਾ ਉਹ ਥਾਣੇ ਕਚਹਿਰੀ ਲੈ ਜਾਵੇਗੀ। ਮੁਆਫ਼ੀ ਮੰਗ ਕੇ ਪ੍ਰਬੰਧਕਾਂ ਨੇ ਜਾਨ ਤਾਂ ਬਚਾਈ। ਨਿਊਯਾਰਕ ਦੀ ਸੜਕ 'ਤੇ ਡਿੱਗ ਕੇ ਉਸ ਨੇ ਗਿੱਟਾ ਵੀ ਤੁੜਵਾਇਆ ਸੀ ਪਰ ਕੰਮ ਪ੍ਰਤੀ ਸਮਰਪਣ ਹੈ ਕਿ ਪੱਟੀਆਂ ਕਰਵਾ ਕੇ ਉਹ 'ਫੈਸ਼ਨ ਵੀਕ' ਦਾ ਹਿੱਸਾ ਬਣੀ ਸੀ। ਹੁਣ ਉਹ ਕੀ ਕਰ ਰਹੀ ਹੈ? ਅਸੀਂ ਪੂਰੀ ਛਾਣਬੀਣ ਕਰਨ ਦੀ ਚਾਲ ਚੱਲੀ ਤੇ ਪਤਾ ਚੱਲਿਆ ਕਿ 'ਰਾਕ ਸਟਾਰ' ਨਰਗਿਸ ਦਾ ਤਰਜ਼ਕਾਰ ਤੇ ਸੰਗੀਤਕਾਰ ਮੈਂਟ ਅਲਾਂਜੇ ਨਾਲ ਚੱਲ ਰਿਹਾ ਪਿਆਰ-ਕਿੱਸਾ ਹੁਣ ਆਖਰੀ ਵਰਕੇ 'ਤੇ ਜਾ ਕੇ ਕੋਰਾ ਵਰਕਾ ਬਣ ਸ਼ਾਇਦ ਸਦਾ ਲਈ ਟੁੱਟ ਹੀ ਗਿਆ ਹੈ। ਨਰਗਿਸ ਨੇ ਮੈਂਟ ਦੀਆਂ ਤਸਵੀਰਾਂ ਆਪਣੇ ਸੋਸ਼ਲ ਮੀਡੀਆ ਪਲੇਟਫਾਰਮਜ਼ ਤੋਂ ਉਤਾਰ ਲਈਆਂ ਹਨ। ਚਾਹੇ ਨਰਗਿਸ ਦਾ ਫ਼ਿਲਮੀ ਕੈਰੀਅਰ ਸਧਾਰਨ ਹੀ ਰਿਹਾ ਹੈ ਪਰ ਉਸ ਦੇ ਕੰਮ ਦੀ ਹਮੇਸ਼ਾ ਸ਼ਲਾਘਾ ਹੀ ਹੋਈ ਹੈ। ਸੁਪਨੇ ਪੂਰੇ ਕਰਨ ਲਈ ਕਈ ਕੁਰਬਾਨੀਆਂ ਦੇਣੀਆਂ ਪੈਂਦੀਆਂ ਹਨ। ਇਹ ਗੱਲ ਨਰਗਿਸ ਨੇ ਕਹੀ ਹੈ। ਤਿੰਨ ਸਾਲ ਬਾਅਦ ਹੁਣ ਉਹ ਫਿਰ ਆਪਣੀ ਮਾਂ ਨੂੰ ਮਿਲੀ ਹੈ। ਉਹ ਵੀ ਤਾਂ ਕਿਉਂਕਿ ਮਾਂ ਨੇ ਈਮੇਲ ਕਰਕੇ ਨਰਗਿਸ ਨੂੰ ਪੁੱਛਿਆ ਸੀ ਕਿ ਉਸ ਦੀ ਧੀ ਜਿਊਂਦੀ ਵੀ ਹੈ। ਅਸਲ 'ਚ ਪਿਆਰ ਅੰਨ੍ਹਾ ਹੁੰਦਾ ਹੈ ਤੇ ਇਨ੍ਹਾਂ ਚੱਕਰਾਂ 'ਚ ਘਰ-ਬਾਰ, ਪਰਿਵਾਰ ਤੇ ਕੈਰੀਅਰ ਚੌਪਟ ਕਰਕੇ ਬਹਿ ਗਈ ਨਰਗਿਸ ਨੂੰ ਹੁਣ ਕਿਸਮਤ ਤੇ ਚੰਗੀ ਤਕਦੀਰ ਹੀ ਕਾਮਯਾਬ ਕਰ ਸਕਦੀ ਹੈ।

ਯਾਮੀ ਗੌਤਮ

ਗਿੰਨੀ ਵੈੱਡਜ਼ ਸੰਨੀ

ਦਿਨੇਸ਼ ਵਿਜ਼ਨ ਨੇ ਪੂਰੇ ਚਾਅ-ਮਲ੍ਹਾਰ ਨਾਲ ਯਾਮੀ ਗੌਤਮ ਨੂੰ 'ਬਦਲਾਪੁਰ' ਤੋਂ ਬਾਅਦ ਆਪਣੀ ਨਵੀਂ ਫ਼ਿਲਮ ਲਈ ਚੁਣ ਲਿਆ ਹੈ। ਯਾਮੀ ਦੇ ਨਾਲ ਹੀਰੋ ਆਯੂਸ਼ਮਨ ਖੁਰਾਨਾ ਹੈ। 'ਲਖਨਊ ਕੀ ਸੁਪਰ ਮਾਡਲ' ਉਹ ਇਸ ਫ਼ਿਲਮ 'ਚ ਬਣ ਰਹੀ ਹੈ। ਗੰਜੇਪਨ ਨਾਲ ਜੂਝਦੇ ਮੁੰਡੇ ਦੀ ਪ੍ਰੇਮਿਕਾ ਉਹ ਦਿਨੇਸ਼ ਵਿਜ਼ਨ ਦੀ ਇਸ ਨਵੀਂ ਫ਼ਿਲਮ 'ਚ ਬਣੀ ਹੈ। ਵੈਸੇ ਮੁਕੇਸ਼ ਗੌਤਮ ਦੀ ਲਾਡਾਂ ਪਲੀ ਇਹ ਬਿਟੀਆ ਰਾਣੀ ਆਪਣੀ ਸੁੰਦਰਤਾ ਨਾਲ ਹਰ ਦਿਲ 'ਤੇ ਵਾਰ ਕਰਦੀ ਹੈ। ਔਰਤਾਂ ਚਾਹੁੰਦੀਆਂ ਨੇ ਜਿਸਮ ਹੋਵੇ ਤਾਂ ਯਾਮੀ ਜਿਹਾ, ਚਮਕਦਾ ਚਿਹਰਾ ਹਰ ਕੁੜੀ ਚਾਹੁੰਦੀ ਹੈ ਤੇ ਯਾਮੀ ਆਖਦੀ ਹੈ ਅਲੋਏਵੇਰਾ ਜੈਲ, ਵਿਟਾਮਿਨ ਸੀ ਤੇ ਕੈਸਟਰ ਤੇਲ ਮਿਲਾ ਕੇ ਉਸ ਦਾ ਘੋਲ ਉਹ ਚਿਹਰੇ 'ਤੇ ਲਾਉਂਦੀ ਹੈ। ਨਾਰੀਅਲ ਪਾਣੀ ਪੀਣਾ, ਸਿਰਕੇ ਨਾਲ ਵਾਲ ਧੋਣੇ, ਜੈਲ ਤੇ ਸਪਰੇਅ ਜੁਲਫ਼ਾਂ 'ਤੇ ਨਹੀਂ ਲਾਉਂਦੀ ਤੇ ਖੰਡ, ਸ਼ਹਿਦ, ਹਲਦੀ ਦੇ ਘੋਲ ਨਾਲ ਲੇਪ ਲਾ ਕੇ ਫਿਰ ਚਿਹਰਾ ਧੋ ਲੈਣਾ, ਇਹ ਸਭ ਕਰਦੀ ਹੈ ਸੁੰਦਰਤਾ ਦੀ ਰਾਣੀ ਯਾਮੀ ਗੌਤਮ। 'ਗਿੰਨੀ ਵੈਡਜ਼ ਸੰਨੀ' ਫ਼ਿਲਮ ਵੀ 'ਲਖਨਊ ਦੀ ਸੁਪਰ ਮਾਡਲ' ਚੰਡੀਗੜ੍ਹ ਵਾਲੀ ਯਾਮੀ ਕਰ ਰਹੀ ਹੈ। ਜੈਵਿਕ ਖੇਤੀ ਕਰਨ ਲਈ ਯਾਮੀ ਹਿਮਾਚਲ ਪ੍ਰਦੇਸ਼ ਆਪਣੀ ਜ਼ਮੀਨ 'ਤੇ ਜਾਣ ਲਈ ਉਤਾਵਲੀ ਹੈ। ਯਾਮੀ ਨੇ ਹਿਮਾਚਲ 'ਚ ਆਪਣਾ 'ਗਰੀਨ ਹਾਊਸ' ਵੀ ਬਣਾਇਆ ਹੈ। 'ਜੈਵਿਕ ਗਾਰਡਨ' ਵੀ ਉਸ ਦਾ ਤਿਆਰ ਹੈ। ਸਮਝਦਾਰ, ਸੁੱਘੜ-ਸਿਆਣੀ ਅਭਿਨੇਤਰੀ ਯਾਮੀ ਹੈ... ਕੋਈ ਸ਼ੱਕ ਦੀ ਗੁੰਜਾਇਸ਼ ਨਹੀਂ ਹੈ।


-ਸੁਖਜੀਤ ਕੌਰ

ਵਰੁਣ ਧਵਨ

ਸਟਰੀਟ ਡਾਂਸਰ ਖ਼ੁਸ਼ ਹੁਆ

ਬਹੁਤ ਹੀ ਖ਼ੁਸ਼ ਹੈ, ਖ਼ੁਸ਼ ਹੱਦ ਤੋਂ ਵੱਧ ਕਿਉਂਕਿ ਪ੍ਰਧਾਨ ਮੰਤਰੀ ਸ੍ਰੀ ਨਰਿੰਦਰ ਮੋਦੀ ਨੇ ਵਰੁਣ ਧਵਨ ਦੀ ਫ਼ਿਲਮ 'ਕੁਲੀ ਨੰਬਰ-1' ਲਈ ਟਵੀਟ ਕੀਤਾ ਹੈ। ਅਸਲ 'ਚ ਵਰੁਣ ਨੇ ਕਿਹਾ ਸੀ ਕਿ ਉਸ ਦੀ ਇਸ ਫ਼ਿਲਮ 'ਤੇ ਪਲਾਸਟਿਕ ਦੀ ਵਰਤੋਂ ਨਹੀਂ ਹੋਵੇਗੀ ਤੇ ਅਜਿਹਾ ਹੀ ਹੋਇਆ। ਵਰੁਣ ਨੇ ਮੋਦੀ ਜੀ ਨੂੰ 'ਟੈਗ' ਕਰਕੇ ਟਵੀਟ ਕੀਤਾ ਕਿ 'ਪਲਾਸਟਿਕ-ਮੁਕਤ ਭਾਰਤ-ਸਮੇਂ ਦੀ ਲੋੜ' ਹੈ। ਨਰਿੰਦਰ ਮੋਦੀ ਨੇ ਕਰ ਦਿੱਤੀ 'ਕੁਲੀ ਨੰਬਰ-1' ਦੀ ਟੀਮ ਦੀ ਸਿਫ਼ਤ ਤੇ ਉਨ੍ਹਾਂ ਥਾਪੜਾ ਦਿੱਤਾ ਟਵੀਟ ਦਾ ਸ਼ਾਬਾਸ਼! ਵਰਣ ਧਵਨ...। ਵੈਸੇ ਅੱਜਕਲ੍ਹ ਜਿਧਰ ਦੇਖੋ ਵਰੁਣ ਛਾਇਆ ਹੋਇਆ ਹੈ। ਸਚਿਨ ਤੇਂਦੁਲਕਰ 'ਕ੍ਰਿਕਟ ਦਾ ਭਗਵਾਨ' ਤੇ ਉਸ ਦੇ ਨਵੇਂ ਆਏ ਵੀਡੀਓ 'ਚ ਸਚਿਨ ਨੂੰ ਬੈਟਿੰਗ ਵਰੁਣ ਧਵਨ ਕਰਵਾ ਰਿਹਾ ਹੈ ਤੇ ਦੂਸਰਾ ਬਾਬਰ ਅਭਿਸ਼ੇਕ ਨੇ ਇਹ ਵੀਡੀਓ ਬਣਾਇਆ। ਵਰੁਣ ਦੀ ਇਕ ਹੋਰ ਫ਼ਿਲਮ 'ਸਟਰੀਟ ਡਾਂਸਰ' ਵੀ ਹੈ। ਵਰੁਣ... ਵਰੁਣ... ਹੋ ਰਹੀ ਹੈ, ਸਾਰਾ ਅਲੀ ਖ਼ਾਨ ਨੇ ਤਾਂ ਕਹਿ ਹੀ ਦਿੱਤਾ ਹੈ ਕਿ ਵਰੁਣ ਨਾਲ ਫ਼ਿਲਮ... ਵਾਹ... ਉਹ ਤੇ ਅਭਿਨੈ ਕੈਮਰੇ ਦਾ ਸਾਹਮਣਾ ਕਰਨਾ ਬਹੁਤ ਕੁਝ ਸਿਖਾਉਂਦੀ ਹੈ। ਉਹ 'ਸਟਰੀਟ ਡਾਂਸਰ' ਵੀ ਹੈ ਤੇ 'ਕੁਲੀ ਨੰਬਰ-1' ਵੀ ਤੇ 'ਪਲਾਸਟਿਕ ਮੁਕਤ' ਭਾਰਤ ਦੇ ਸੁਪਨੇ ਨੂੰ ਸਾਕਾਰ ਕਰਨ ਵਾਲਾ ਪ੍ਰਧਾਨ ਮੰਤਰੀ ਸ੍ਰੀ ਨਰਿੰਦਰ ਮੋਦੀ ਦਾ ਚਹੇਤਾ ਨਾਇਕ ਵੀ। 'ਸਟਰੀਟ ਡਾਂਸਰ-3 ਡੀ' ਦੀ ਤਿਆਰੀ ਵੀ ਉਹ ਕਰ ਰਿਹਾ ਹੈ। ਭੂਸ਼ਨ ਕੁਮਾਰ ਦੀ ਬਾਇਓਪਿਕ 'ਮੁਗਲ' ਨਾ ਕਰ ਸਕਣ ਦਾ ਉਸ ਨੂੰ ਦੁੱਖ ਹੈ ਪਰ ਆਮਿਰ ਖ਼ਾਨ ਹੁਣ 'ਮੁਗਲ' ਕਰ ਰਹੇ ਨੇ, ਉਹ ਖੁਸ਼ ਹੈ। ਵੈਸੇ ਲੋਕੀਂ ਕਹਿੰਦੇ ਹਨ ਅੰਦਰਲੀ ਖ਼ੁਸ਼ੀ ਨਤਾਸ਼ਾ ਦਲਾਲ ਨਾਲ ਉਸ ਦੀ ਹੋਈ ਮੰਗਣੀ ਤੇ ਜਲਦ ਹੋ ਰਹੀ ਸ਼ਾਦੀ ਦੀ ਹੈ। ਇਹ ਦੁਸਹਿਰਾ ਵਰੁਣ ਲਈ ਵਧੀਆ ਰਿਹਾ ਤੇ 'ਪਲਾਸਟਿਕ ਮੁਕਤ' ਭਾਰਤ ਲਈ ਪ੍ਰਧਾਨ ਮੰਤਰੀ ਦੇ ਦਿੱਤੇ ਹੌਸਲੇ ਨੇ 'ਸਟਰੀਟ ਡਾਂਸਰ-3 ਡੀ' ਵਰੁਣ ਧਵਨ ਨੂੰ ਨਵੀਂ ਊਰਜਾ ਦਿੱਤੀ ਹੈ।

ਇਲੀਆਨਾ ਡੀਕਰੂਜ਼

ਬੇਪ੍ਰਵਾਹ ਨਾਇਕਾ

ਹੈ ਤਾਂ 'ਬਰਫ਼ੀ' ਵਾਲੀ ਇਲੀਆਨਾ ਡੀਕਰੂਜ਼ ਵਿਹਲੀ ਪਰ ਚਰਚਾ ਐਨੀ ਕੁ ਅੱਜ ਤੱਕ ਮੁੰਬਈ ਨਗਰੀ 'ਚ ਹੈ ਕਿ ਪੁੱਛੋ ਹੀ ਨਾ ਤੇ ਚਰਚਾ ਉਸ ਦੇ ਰਿਸ਼ਤੇ ਨੂੰ ਲੈ ਕੇ ਹੈ। ਮੁਕੇਸ਼ ਅੰਬਾਨੀ ਦੇ ਘਰੇ ਨੀਤਾ ਅੰਬਾਨੀ ਦੇ ਬੁਲਾਵੇ 'ਤੇ ਉਹ ਦੁਸਹਿਰਾ ਮਨਾਉਣ ਪਹੁੰਚੀ। ਉਸ ਦਾ ਪਹਿਰਾਵਾ ਤੇ ਤੱਕਣੀ ਤਾਂ ਇਹੀ ਪ੍ਰਭਾਵ ਦੇ ਰਹੀ ਸੀ ਕਿ ਉਹ ਬਹੁਤ ਖ਼ੁਸ਼ ਹੈ, ਤਰੋ-ਤਾਜ਼ਾ ਹੈ। ਕੋਈ ਲੱਥੀ-ਚੜ੍ਹੀ ਉਸ ਨੂੰ ਯਾਦ ਨਹੀਂ ਹੈ। ਅਗਲੇ ਮਹੀਨੇ ਜਾਨ ਅਬਰਾਹਮ ਦੇ ਨਾਲ ਉਸ ਦੀ ਫ਼ਿਲਮ 'ਪਾਗਲਪੰਤੀ' ਆ ਰਹੀ ਹੈ। ਤੇ ਹਾਂ ਨੀਂਦ 'ਚ ਤੁਰਨ ਦੀ ਬਿਮਾਰੀ ਤਾਂ ਉਸ ਦੀ ਪੁਰਾਣੀ ਹੀ ਹੈ। ਫ਼ਿਲਮਾਂ ਉਸ ਨੇ ਚੰਗੀਆਂ ਕੀਤੀਆਂ 'ਬਰਫ਼ੀ' ਤੋਂ 'ਰੇਡ' ਤੱਕ ਪਰ ਆਸਟ੍ਰੇਲੀਅਨ ਐਂਡਰਿਊ ਦੇ ਪਿਆਰ 'ਚ ਹੁਣੇ ਹੀ ਉਸ ਨੇ ਤਾਜ਼ਾ ਧੋਖਾ ਖਾਧਾ ਹੈ। ਸੁਣਿਆ ਹੈ ਕਿ ਇਹ ਸਬੰਧ ਹੁਣ ਟੁੱਟ ਗਿਆ ਹੈ। 'ਜਨਤਾ ਦਾ ਚਿਹਰਾ ਹਾਂ, ਪਰ ਇਸ ਦਾ ਅਰਥ ਇਹ ਨਹੀਂ ਕਿ ਲੋਕਾਂ ਮੈਨੂੰ ਮੁੱਲ ਲੈ ਲਿਆ ਹੈ', ਕਹਿਣ ਵਾਲੀ ਇਲੀਆਨਾ ਡੀਕਰੂਜ਼ ਦਾ ਸਾਫ਼ ਵਿਚਾਰ ਇਹ ਹੈ ਕਿ ਉਹ ਦੁਨੀਆ ਦੀ ਪ੍ਰਵਾਹ ਨਹੀਂ ਕਰਦੀ।

ਅਧਿਆਪਕਾ ਤੋਂ ਨਾਇਕਾ ਬਣੀ ਜੋਤੀ ਗੌਬਾ

ਫ਼ਿਲਮ 'ਇਡੀਅਟ ਬਾਕਸ' ਵਿਚ ਏਕਤਾ ਕਪੂਰ ਤੋਂ ਪ੍ਰੇਰਿਤ ਕਿਰਦਾਰ ਨਿਭਾਅ ਕੇ ਅਭਿਨੈ ਦੀ ਦੁਨੀਆ ਵਿਚ ਆਪਣਾ ਆਗਮਨ ਕਰਨ ਵਾਲੀ ਜੋਤੀ ਗੌਬਾ ਨੇ 'ਥੋੜ੍ਹਾ ਪਿਆਰ ਥੋੜ੍ਹਾ ਮੈਜ਼ਿਕ', 'ਟੇਕ ਇਟ ਈਜ਼ੀ' ਫ਼ਿਲਮਾਂ ਦੇ ਨਾਲ-ਨਾਲ 'ਏਕ ਹਸੀਨਾ ਥੀ', 'ਕਵਚ', 'ਬੜੀ ਦੇਵਰਾਨੀ' ਆਦਿ ਲੜੀਵਾਰਾਂ ਵਿਚ ਵੀ ਕੰਮ ਕੀਤਾ ਹੈ। ਹੋਇਆ ਇੰਜ ਕਿ ਜੋਤੀ ਇਕ ਦਿਨ ਲੜੀਵਾਰ 'ਏਕ ਹਸੀਨਾ ਥੀ' ਦੀ ਸ਼ੂਟਿੰਗ ਕਰ ਰਹੀ ਸੀ ਕਿ ਉਦੋਂ ਉਸ ਦਾ ਸਾਹਮਣਾ ਲੜੀਵਾਰ ਦੇ ਨਾਇਕ ਵਤਸਲ ਸੇਠ ਨਾਲ ਹੋ ਗਿਆ। ਵਤਸਲ ਨੂੰ ਇਹ ਦੱਸਿਆ ਗਿਆ ਸੀ ਕਿ ਹੁਣ ਕਹਾਣੀ ਵਿਚ ਮਾਸੀ ਦੇ ਕਿਰਦਾਰ ਨੂੰ ਲਿਆਂਦਾ ਜਾ ਰਿਹਾ ਹੈ ਅਤੇ ਇਸ ਕਿਰਦਾਰ ਲਈ ਜੋਤੀ ਦੀ ਚੋਣ ਕੀਤੀ ਗਈ ਸੀ। ਜਦੋਂ ਵਤਸਲ ਦੀ ਜਾਣ-ਪਛਾਣ ਉਸ ਨਾਲ ਕਰਵਾਈ ਤਾਂ ਜੋਤੀ ਨੂੰ ਦੇਖ ਕੇ ਉਨ੍ਹਾਂ ਨੂੰ ਲੱਗਿਆ ਕਿ ਉਹ ਉਸ ਨੂੰ ਪਹਿਲਾਂ ਵੀ ਕਿਤੇ ਮਿਲ ਚੁੱਕਿਆ ਹੈ ਅਤੇ ਉਸ ਨੂੰ ਜੋਤੀ ਦਾ ਚਿਹਰਾ ਜਾਣਿਆ-ਪਛਾਣਿਆ ਜਿਹਾ ਲੱਗਿਆ। ਦਿਮਾਗ਼ 'ਤੇ ਕਾਫ਼ੀ ਜ਼ੋਰ ਦੇਣ ਤੋਂ ਬਾਅਦ ਉਸ ਨੂੰ ਇਹ ਯਾਦ ਆਇਆ ਕਿ ਜਦੋਂ ਉਹ ਉਤਪਲ ਸੰਘਵੀ ਸਕੂਲ ਵਿਚ ਪੜ੍ਹਾਈ ਕਰ ਰਿਹਾ ਸੀ, ਉਦੋਂ ਜੋਤੀ ਉਥੇ ਗਣਿਤ ਦੀ ਅਧਿਆਪਕਾ ਸੀ ਅਤੇ ਉਸ ਨੂੰ ਗਣਿਤ ਸਿਖਾਉਂਦੀ ਸੀ।

-ਮੁੰਬਈ ਪ੍ਰਤੀਨਿਧ

ਹਾਲੀਵੁੱਡ ਵਿਚ ਜ਼ੀਰੋ ਤੋਂ ਸ਼ੁਰੂਆਤ ਕਰਨੀ ਪਈ ਸੀ : ਪ੍ਰਿਅੰਕਾ ਚੋਪੜਾ

ਪ੍ਰਿਅੰਕਾ ਚੋਪੜਾ ਪਿਛਲੇ ਕਾਫੀ ਸਮੇਂ ਤੋਂ ਹਾਲੀਵੁੱਡ ਵਿਚ ਰੁੱਝੀ ਹੋਈ ਹੈ। ਉਹ ਉਥੇ ਫ਼ਿਲਮਾਂ ਤੇ ਲੜੀਵਾਰਾਂ ਵਿਚ ਆਪਣੇ ਨਾਂਅ ਦੇ ਝੰਡੇ ਗੱਡ ਰਹੀ ਹੈ। ਇਕ ਸਮੇਂ ਬਾਅਦ ਪ੍ਰਿਅੰਕਾ ਨੇ ਹਿੰਦੀ ਫ਼ਿਲਮ 'ਦ ਸਕਾਈ ਇਜ਼ ਪਿੰਕ' ਵਿਚ ਕੰਮ ਕੀਤਾ ਹੈ ਅਤੇ ਇਥੇ ਉਸ ਨੇ ਇਕ ਇਸ ਤਰ੍ਹਾਂ ਦੀ ਮਾਂ ਦੀ ਭੂਮਿਕਾ ਨਿਭਾਈ ਹੈ, ਜਿਸ ਦੀ ਬੇਟੀ ਅੱਲੜ੍ਹ ਉਮਰ ਦੀ ਹੈ ਤੇ ਗੰਭੀਰ ਬਿਮਾਰੀ ਨਾਲ ਪੀੜਤ ਹੈ।
ਇਸ ਭੂਮਿਕਾ ਬਾਰੇ ਉਹ ਕਹਿੰਦੀ ਹੈ, 'ਇਹ ਫ਼ਿਲਮ ਅਸਲ ਕਿਰਦਾਰਾਂ 'ਤੇ ਆਧਾਰਿਤ ਹੈ। ਇਥੇ ਆਮ ਜ਼ਿੰਦਗੀ ਜੀਅ ਰਹੇ ਕਿਰਦਾਰ ਹਨ। ਨਾ ਤਾਂ ਨਾਮੀ ਖਿਡਾਰੀ ਹਨ ਤੇ ਨਾ ਹੀ ਸਟਾਰ। ਜਦੋਂ ਨਿਰਦੇਸ਼ਿਕਾ ਸ਼ੋਨਾਲੀ ਨੇ ਫ਼ਿਲਮ ਦੀ ਕਹਾਣੀ ਦੱਸੀ ਤਾਂ ਲੱਗਿਆ ਸੀ ਕਿ ਇਹ ਸਪੈਸ਼ਲ ਫ਼ਿਲਮ ਹੈ। ਮੈਨੂੰ ਮਾਂ ਦੀ ਭੂਮਿਕਾ ਅਪੀਲ ਕਰ ਗਈ ਸੀ। ਉਂਜ ਵੀ ਮਾਂ ਦੀ ਭੂਮਿਕਾ ਨਿਭਾਉਣਾ ਮੇਰੇ ਲਈ ਨਵਾਂ ਤਜਰਬਾ ਨਹੀਂ ਸੀ। 'ਮੈਰੀ ਕਾਮ' ਸਮੇਤ ਕੁਝ ਹੋਰ ਫ਼ਿਲਮਾਂ ਵਿਚ ਮੈਨੂੰ ਮਾਂ ਦੀ ਭੂਮਿਕਾ ਵਿਚ ਪੇਸ਼ ਕੀਤਾ ਗਿਆ ਸੀ। 'ਸਾਤ ਖੂਨ ਮਾਫ਼' ਵਿਚ ਮੈਂ ਨਸੀਰੂਦੀਨ ਸ਼ਾਹ ਵਰਗੇ ਸੀਨੀਅਰ ਐਕਟਰ ਦੀ ਪਤਨੀ ਦੀ ਭੂਮਿਕਾ ਵਿਚ ਸੀ। ਮੇਰੇ ਲਈ ਕਿਰਦਾਰ ਮਹੱਤਵ ਰੱਖਦਾ ਹੈ ਨਾ ਕਿ ਕਿਰਦਾਰ ਦੀ ਉਮਰ। ਇਸ ਫ਼ਿਲਮ ਵਿਚ ਇਕ ਮਾਂ ਨੂੰ ਆਪਣੀ ਬੇਟੀ ਦੀ ਬਿਮਾਰੀ ਦੀ ਬਦੌਲਤ ਕੀ ਕੁਝ ਸਹਿਣਾ ਪੈਂਦਾ ਹੈ, ਬੇਟੀ ਦੀ ਬਿਮਾਰੀ ਦੇ ਚਲਦਿਆਂ ਮਾਂ ਦੀ ਜ਼ਿੰਦਗੀ ਕਿਵੇਂ ਬਿਖਰ ਜਾਂਦੀ ਹੈ, ਇਹ ਕਹਾਣੀ ਇਸ ਵਿਚ ਹੈ। ਇਕ ਸੁਲਝੀ ਹੋਈ ਹਿੰਦੀ ਫ਼ਿਲਮ ਰਾਹੀਂ ਦਰਸ਼ਕਾਂ ਸਾਹਮਣੇ ਦੁਬਾਰਾ ਆਉਣਾ ਮੈਨੂੰ ਚੰਗਾ ਲੱਗ ਰਿਹਾ ਹੈ।'
* ਇਸ ਵੱਖਰੀ ਜਿਹੀ ਭੂਮਿਕਾ ਰਾਹੀਂ ਹਿੰਦੀ ਦਰਸ਼ਕਾਂ ਸਾਹਮਣੇ ਆਉਣ ਨੂੰ ਕੀ ਤੁਸੀਂ ਚੁਣੌਤੀ ਦੇ ਰੂਪ ਵਿਚ ਲਿਆ ਸੀ?
-ਜੀ ਨਹੀਂ, ਚੁਣੌਤੀ ਸਵੀਕਾਰ ਕਰਕੇ ਮੈਂ ਕੀ ਸਾਬਤ ਕਰ ਲਵਾਂਗੀ। ਸੱਚ ਤਾਂ ਇਹ ਹੈ ਕਿ ਜਦੋਂ ਮੈਂ ਫ਼ਿਲਮਾਂ ਵਿਚ ਆਈ ਸੀ ਉਦੋਂ ਇਥੇ ਮੇਰਾ ਮਾਰਗ ਦਰਸ਼ਨ ਕਰਨ ਵਾਲਾ ਕੋਈ ਨਹੀਂ ਸੀ। ਗ਼ੈਰ-ਫ਼ਿਲਮੀ ਪਰਿਵਾਰ ਦੀ ਹੋਣ ਦੀ ਵਜ੍ਹਾ ਕਰਕੇ ਪਤਾ ਨਹੀਂ ਸੀ ਕਿ ਕਿਸ ਤਰ੍ਹਾਂ ਦੀਆਂ ਫ਼ਿਲਮਾਂ ਹੱਥ ਵਿਚ ਲੈਣੀਆਂ ਚਾਹੀਦੀਆਂ ਹਨ। ਇਸ ਨਾ-ਸਮਝੀ ਦੀ ਵਜ੍ਹਾ ਕਰਕੇ ਨਾਂਹ-ਪੱਖੀ ਭੂਮਿਾਵਾਂ ਵੀ ਕੀਤੀਆਂ। ਇਸ ਦਾ ਫਾਇਦਾ ਇਹ ਹੋਇਆ ਕਿ ਇਕ ਕਲਾਕਾਰ ਦੇ ਤੌਰ 'ਤੇ ਮੇਰਾ ਆਤਮ-ਵਿਸ਼ਵਾਸ ਵਧਿਆ ਅਤੇ ਇਸ ਵਿਸ਼ਵਾਸ ਦੀ ਵਜ੍ਹਾ ਕਰਕੇ ਮੈਂ ਇਥੋਂ ਤੱਕ ਪਹੁੰਚਣ ਵਿਚ ਕਾਮਯਾਬ ਰਹੀ ਹਾਂ।
* ਇਸੇ ਆਤਮ-ਵਿਸ਼ਵਾਸ ਦੀ ਵਜ੍ਹਾ ਕਰਕੇ ਤੁਸੀਂ ਹਾਲੀਵੁੱਡ ਦੀ ਵੀ ਨਾਮੀ ਸਟਾਰ ਬਣ ਗਏ ਹੋ, ਠੀਕ ਹੈ ਨਾ?
-ਹਾਂ, ਉਥੇ ਵੀ ਆਤਮ-ਵਿਸ਼ਵਾਸ ਬਹੁਤ ਕੰਮ ਆਇਆ। ਨਾਲ ਹੀ ਉਥੇ ਜਿਸ ਸੂਝ-ਬੂਝ ਤੋਂ ਕੰਮ ਲਿਆ ਇਸ ਦਾ ਵੀ ਫਾਇਦਾ ਮਿਲਿਆ। ਜਦੋਂ ਮੈਂ ਬਾਲੀਵੁੱਡ ਵਿਚ ਦਾਖ਼ਲ ਹੋਈ ਤਾਂ ਮੇਰੇ ਸਿਰ 'ਤੇ ਸੁੰਦਰਤਾ ਪ੍ਰਤੀਯੋਗਤਾ ਦਾ ਤਾਜ ਸੀ। ਮੇਰੀ ਇਕ ਪਛਾਣ ਬਣੀ ਹੋਈ ਸੀ। ਸੋ, ਜ਼ਿਆਦਾ ਸੰਘਰਸ਼ ਨਹੀਂ ਕਰਨਾ ਪਿਆ। ਪਰ ਜਦੋਂ ਹਾਲੀਵੁੱਡ ਗਈ ਤਾਂ ਉਥੇ ਜ਼ੀਰੋ ਤੋਂ ਸ਼ੁਰੂਆਤ ਕਰਨੀ ਪਈ। ਜਦੋਂ ਮੈਂ ਉਥੇ ਗਈ ਉਦੋਂ 31 ਸਾਲ ਦੀ ਸੀ। ਪਤਾ ਸੀ ਕਿ ਕੀ ਭੂਮਿਕਾ ਮਿਲ ਸਕਦੀ ਹੈ। ਮੇਰੇ ਕੋਲ ਬਾਲੀਵੁੱਡ ਦੀਆਂ ਫ਼ਿਲਮਾਂ ਦਾ ਅਨੁਭਵ ਸੀ ਪਰ ਹਾਲੀਵੁੱਡ ਵਿਚ ਇਹ ਪ੍ਰਚਲਿਤ ਰਾਇ ਹੈ ਕਿ ਹਿੰਦੀ ਫ਼ਿਲਮਾਂ ਵਿਚ ਹੀਰੋਇਨ ਦੇ ਹਿੱਸੇ ਨਾਚ-ਗਾਣਾ ਤੇ ਮੈਲੋਡ੍ਰਾਮਾ ਭਰੇ ਦ੍ਰਿਸ਼ ਹੀ ਆਉਂਦੇ ਹਨ। ਮੈਂ ਉਨ੍ਹਾਂ ਦੀ ਇਹ ਮਿੱਥ ਤੋੜਨੀ ਸੀ। ਉਸ ਦੇ ਬਾਅਦ ਉਹ ਮੈਨੂੰ ਗੰਭੀਰਤਾ ਨਾਲ ਲੈ ਸਕਦੇ ਸਨ। ਮੈਂ ਜਦੋਂ ਹਾਲੀਵੁੱਡ ਲਈ ਪਹਿਲੀ ਵਾਰ ਉਡਾਨ ਭਰੀ ਸੀ ਉਦੋਂ ਆਪਣਾ ਈਗੋ, ਆਪਣਾ ਸਟਾਰਡਮ ਇਥੇ ਏਅਰਪੋਰਟ 'ਤੇ ਹੀ ਛੱਡ ਗਈ ਸੀ। ਉਥੇ ਮੈਨੂੰ ਬਹੁਤ ਆਡੀਸ਼ਨ ਦੇਣੇ ਪਏ ਜਦ ਕਿ ਭਾਰਤ ਵਿਚ ਆਡੀਸ਼ਨ ਦੇਣ ਦੀ ਨੌਬਤ ਹੀ ਨਹੀਂ ਆਈ ਸੀ। ਉਥੇ ਨਵੇਂ ਕਲਾਕਾਰਾਂ ਦੇ ਨਾਲ ਆਡੀਸ਼ਨ ਦਿੱਤੇ। ਆਡੀਸ਼ਨ ਦਿੰਦੇ ਸਮੇਂ ਇਹ ਨਹੀਂ ਪ੍ਰਗਟਾਇਆ ਕਿ ਮੈਂ ਇੰਡੀਆ ਤੋਂ ਆਈ ਸਟਾਰ ਹਾਂ। ਇਥੇ ਮੈਨੂੰ ਕਿਸੇ ਨਿਰਦੇਸ਼ਕ ਨੂੰ ਆਪਣੀ ਪਛਾਣ ਦੇਣ ਦੀ ਲੋੜ ਨਹੀਂ ਪਈ ਸੀ ਪਰ ਉਥੇ ਹਰ ਕਿਸੇ ਨੂੰ ਆਪਣੀ ਪਛਾਣ ਦੇਣੀ ਪੈਂਦੀ ਸੀ। ਸੰਘਰਸ਼ ਕੀ ਹੁੰਦਾ ਹੈ, ਇਸ ਦਾ ਪਤਾ ਉਥੇ ਜਾ ਕੇ ਲੱਗਿਆ। ਸ਼ੁਕਰ ਪਰਮਾਤਮਾ ਦਾ, ਇਸ ਸੰਘਰਸ਼ ਤੋਂ ਬਾਅਦ ਉਥੇ ਕਾਮਯਾਬੀ ਮਿਲੀ।'


-ਇੰਦਰਮੋਹਨ ਪੰਨੂੰ

ਅਮਿਤਾਭ ਮੇਰੇ ਗੁਰੂ ਹਨ

ਚਿਰੰਜੀਵੀ

ਤਕਰੀਬਨ ਤੀਹ ਸਾਲ ਪਹਿਲਾਂ ਤੇਲਗੂ ਫ਼ਿਲਮਾਂ ਦੇ ਸੁਪਰ ਸਟਾਰ ਚਿਰੰਜੀਵੀ ਨੇ ਫ਼ਿਲਮ 'ਪ੍ਰਤੀਬੰਧ' ਰਾਹੀਂ ਹਿੰਦੀ ਫ਼ਿਲਮਾਂ ਵਿਚ ਦਾਖ਼ਲਾ ਲਿਆ ਸੀ। ਉਸ ਤੋਂ ਬਾਅਦ 'ਦ ਜੈਂਟਲਮੈਨ' ਤੇ 'ਆਜ ਕਾ ਗੁੰਡਾਰਾਜ' ਵਿਚ ਵੀ ਕੰਮ ਕੀਤਾ ਸੀ। ਇਨ੍ਹਾਂ ਦੋ ਫ਼ਿਲਮਾਂ ਦੇ ਅਸਫ਼ਲ ਹੋਣ 'ਤੇ ਉਨ੍ਹਾਂ ਨੂੰ ਬਾਲੀਵੁੱਡ ਵਲੋਂ ਜ਼ਿਆਦਾ ਤਵੱਜੋ ਨਾ ਦਿੱਤੇ ਜਾਣ 'ਤੇ ਉਹ ਤੇਲਗੂ ਫ਼ਿਲਮਾਂ ਵੱਲ ਚਲੇ ਗਏ। ਲੰਮੇ ਸਮੇਂ ਤੋਂ ਹਿੰਦੀ ਫ਼ਿਲਮਾਂ ਤੋਂ ਦੂਰ ਰਹੇ ਚਿਰੰਜੀਵੀ ਦੀਆਂ ਹਿਟ ਤੇਲਗੂ ਫ਼ਿਲਮਾਂ ਹਿੰਦੀ ਵਿਚ ਡਬ ਕਰਕੇ ਟੀ. ਵੀ. 'ਤੇ ਦਿਖਾਈਆਂ ਜਾਂਦੀਆਂ ਰਹੀਆਂ ਹਨ ਪਰ ਹਿੰਦੀ ਦਰਸ਼ਕਾਂ ਨੂੰ ਵੱਡੇ ਪਰਦੇ 'ਤੇ ਉਨ੍ਹਾਂ ਨੂੰ ਦੇਖਿਆਂ ਲੰਮਾ ਸਮਾਂ ਹੋ ਗਿਆ। ਹੁਣ ਉਹ 'ਸਈ ਰਾ ਨਰਸਿਮਹਾ ਰੈਡੀ' ਰਾਹੀਂ ਹਿੰਦੀ ਦਰਸ਼ਕਾਂ ਸਾਹਮਣੇ ਆ ਰਹੇ ਹਨ। ਇਸ ਫ਼ਿਲਮ ਦੀ ਖ਼ਾਸ ਗੱਲ ਇਹ ਹੈ ਕਿ ਇਸ ਵਿਚ ਅਮਿਤਾਭ ਬੱਚਨ ਉਨ੍ਹਾਂ ਨਾਲ ਹਨ। ਅਮਿਤਾਭ ਦੇ ਨਾਲ ਕੰਮ ਕਰਨ ਦੀ ਉਨ੍ਹਾਂ ਦੀ ਸਾਲਾਂ ਪੁਰਾਣੀ ਤਮੰਨਾ ਹੁਣ ਇਸ ਫ਼ਿਲਮ ਰਾਹੀਂ ਪੂਰੀ ਹੋਈ ਹੈ।
ਅਮਿਤਾਭ ਦੇ ਨਾਲ ਕੰਮ ਕਰਨ ਦਾ ਸੰਯੋਗ ਕਿਵੇਂ ਬਣਿਆ, ਇਸ ਬਾਰੇ ਉਹ ਦੱਸਦੇ ਹੋਏ ਕਹਿੰਦੇ ਹਨ, 'ਜਦੋਂ ਮੈਂ ਕਾਲਜ ਵਿਚ ਪੜ੍ਹਾਈ ਕਰ ਰਿਹਾ ਸੀ ਉਦੋਂ ਤੋਂ ਅਮਿਤਾਭ ਬੱਚਨ ਦਾ ਪ੍ਰਸੰਸਕ ਹਾਂ। ਅਭਿਨੈ ਦੇ ਕਈ ਫਨ ਮੈਂ ਉਨ੍ਹਾਂ ਦੀਆਂ ਫ਼ਿਲਮਾਂ ਦੇਖ ਕੇ ਸਿੱਖੇ ਹਨ। ਜਦੋਂ ਮੇਰੀ ਹਿੰਦੀ ਫ਼ਿਲਮ 'ਪ੍ਰਤੀਬੰਧ' ਬਣ ਕੇ ਤਿਆਰ ਹੋ ਗਈ ਤਾਂ ਮਨ ਵਿਚ ਬਹੁਤ ਇੱਛਾ ਸੀ ਕਿ ਅਮਿਤ ਜੀ ਇਹ ਫ਼ਿਲਮ ਦੇਖਣ। ਉਹ 'ਜ਼ੰਜੀਰ' ਵਿਚ ਪੁਲਿਸ ਦੀ ਵਰਦੀ ਪਾ ਕੇ ਸਟਾਰ ਬਣੇ ਅਤੇ ਉਨ੍ਹਾਂ ਨੂੰ 'ਐਂਗਰੀ ਯੰਗਮੈਨ' ਦਾ ਖ਼ਿਤਾਬ ਦਿੱਤਾ ਗਿਆ। 'ਪ੍ਰਤੀਬੰਧ' ਵਿਚ ਮੈਂ ਗੁਸੈਲ ਸੁਭਾਅ ਦੇ ਪੁਲਿਸ ਅਧਿਕਾਰੀ ਦੀ ਭੂਮਿਕਾ ਨਿਭਾਈ ਸੀ ਅਤੇ ਮੈਂ ਚਾਹੁੰਦਾ ਸੀ ਕਿ ਅਮਿਤ ਜੀ ਇਹ ਫ਼ਿਲਮ ਦੇਖ ਕੇ ਆਪਣੀ ਰਾਇ ਦੇਣ। ਸੱਦਾ ਦੇਣ 'ਤੇ ਉਹ ਫ਼ਿਲਮ ਦੇਖਣ ਆਏ ਅਤੇ ਮੇਰੇ ਕੰਮ ਦੀ ਬਹੁਤ ਪ੍ਰਸੰਸਾ ਕੀਤੀ। ਉਸ ਤੋਂ ਬਾਅਦ ਸਾਡੇ ਦੋਵਾਂ ਵਿਚਾਲੇ ਚੰਗਾ ਰਿਸ਼ਤਾ ਬਣ ਗਿਆ ਅਤੇ ਜਦੋਂ ਕਦੀ ਉਨ੍ਹਾਂ ਦੇ ਇਥੇ ਕੋਈ ਸਮਾਰੋਹ ਹੁੰਦਾ ਹੈ ਤਾਂ ਉਹ ਮੈਨੂੰ ਤੇ ਪਤਨੀ ਨੂੰ ਸੱਦਾ ਦੇਣਾ ਨਹੀਂ ਭੁੱਲਦੇ। ਉਨ੍ਹਾਂ ਨੇ ਆਪਣੇ ਸੱਤਰਵੇਂ ਜਨਮ ਦਿਨ ਮੌਕੇ ਜੋ ਪਾਰਟੀ ਦਿੱਤੀ ਸੀ, ਉਦੋਂ ਮੈਨੂੰ ਪਰਿਵਾਰ ਸਮੇਤ ਸੱਦਾ ਦਿੱਤਾ ਸੀ। ਜਦੋਂ ਇਸ ਫ਼ਿਲਮ ਦੇ ਨਿਰਮਾਣ ਦੀ ਯੋਜਨਾ ਬਣਾਈ ਜਾ ਰਹੀ ਸੀ' ਉਦੋਂ ਮੇਰੇ ਨਿਰਦੇਸ਼ਕ ਨੇ ਕਿਹਾ ਸੀ ਕਿ ਇਸ ਵਿਚ ਨਰਸਿਮਹਾ ਰੈਡੀ ਦੇ ਗੁਰੂ ਗੋਸਾਈ ਵੇਕੰਨਾ ਦੀ ਭੂਮਿਕਾ ਵਿਚ ਉਹ ਅਮਿਤਾਭ ਨੂੰ ਲੈਣਾ ਚਾਹੁੰਦਾ ਹਨ। ਉਨ੍ਹਾਂ ਦਿਨਾਂ ਵਿਚ ਮੈਂ ਸੰਸਦ ਮੈਂਬਰ ਸੀ। ਸੋ, ਸੰਸਦ ਵਿਚ ਜਯਾ ਜੀ ਨਾਲ ਮੁਲਾਕਾਤ ਹੋ ਗਈ ਅਤੇ ਮੈਂ ਉਨ੍ਹਾਂ ਨੂੰ ਕਿਹਾ ਕਿ ਮੈਂ ਆਪਣੀ ਫ਼ਿਲਮ ਵਿਚ ਅਮਿਤਾਭ ਜੀ ਨੂੰ ਲੈਣਾ ਚਾਹੁੰਦਾ ਹਾਂ। ਉਨ੍ਹਾਂ ਨੇ ਭਰੋਸਾ ਦਿੱਤਾ ਕਿ ਉਹ ਮੇਰਾ ਸੁਨੇਹਾ ਜ਼ਰੂਰ ਉਨ੍ਹਾਂ ਤੱਕ ਪਹੁੰਚਾ ਦੇਵੇਗੀ। ਕੁਝ ਦਿਨ ਬਾਅਦ ਜਦੋਂ ਮੈਂ ਉਨ੍ਹਾਂ ਨੂੰ ਸੁਨੇਹਾ ਭੇਜਿਆ ਤਾਂ ਤੁਰੰਤ ਉਨ੍ਹਾਂ ਦਾ ਜਵਾਬ ਆਇਆ ਅਤੇ ਫਿਰ ਉਹ ਕੰਮ ਕਰਨ ਲਈ ਤਿਆਰ ਹੋ ਗਏ। ਉਹ ਆਪਣੇ ਪ੍ਰਾਈਵੇਟ ਜੈੱਟ ਰਾਹੀਂ ਹੈਦਰਾਬਾਦ ਆਏ ਸਨ ਅਤੇ ਇਸ ਦੇ ਕਿਰਾਏ ਦਾ ਭੁਗਤਾਨ ਵੀ ਖ਼ੁਦ ਹੀ ਕੀਤਾ ਸੀ। ਉਹ ਮੇਰੇ ਗੁਰੂ ਹਨ ਅਤੇ ਹੁਣ ਜਦੋਂ ਪਰਦੇ 'ਤੇ ਉਨ੍ਹਾਂ ਨੇ ਮੇਰੇ ਗੁਰੂ ਦਾ ਕਿਰਦਾਰ ਨਿਭਾਇਆ ਤਾਂ ਮੈਂ ਧੰਨ ਹੋ ਗਿਆ। ਮੇਰੇ ਲਈ ਇਹ ਵੱਡੀ ਗੱਲ ਹੈ ਕਿ ਮੇਰੀ ਫ਼ਿਲਮ ਵਿਚ ਅਮਿਤਾਭ ਨੇ ਕੰਮ ਕੀਤਾ ਹੈ ਅਤੇ ਇਸ ਦਾ ਫ਼ਖਰ ਮੈਨੂੰ ਤਾਉਮਰ ਰਹੇਗਾ।' ਇਹ ਕਹਿੰਦੇ ਹੋਏ ਉਨ੍ਹਾਂ ਦੇ ਚਿਹਰੇ 'ਤੇ ਗੌਰਵ ਦੇ ਭਾਅ ਪ੍ਰਗਟ ਹੋ ਰਹੇ ਸਨ।


-ਮੁੰਬਈ ਪ੍ਰਤੀਨਿਧ

ਅੜ੍ਹਬ ਮੁਟਿਆਰ ਸੋਨਮ ਬਾਜਵਾ ਦਾ ਨਵਾਂ ਰੂਪ

'ਮੁਕਲਾਵਾ' ਫ਼ਿਲਮ ਨੂੰ ਮਿਲੀ ਵੱਡੀ ਸਫ਼ਲਤਾ ਤੋਂ ਬਾਅਦ ਹੁਣ ਨਿਰਮਾਤਾ ਗੁਣਬੀਰ ਸਿੰਘ ਸਿੱਧੂ ਅਤੇ ਮਨਮੋਰਡ ਸਿੱਧੂ ਆਪਣੀ ਨਵੀਂ ਫ਼ਿਲਮ 'ਅੜਬ ਮੁਟਿਆਰਾਂ' ਲੈ ਕੇ ਆਏ ਹਨ। ਸੋਨਮ ਬਾਜਵਾ ਨੂੰ ਦਰਸ਼ਕਾਂ ਨੇ ਜ਼ਿਆਦਤਰ ਐਮੀ ਵਿਰਕ ਨਾਲ ਪਰਿਵਾਰਕ ਕਿਰਦਾਰਾਂ ਵਿਚ ਹੀ ਵੇਖਿਆ ਹੈ, ਜਦ ਕਿ ਇਸ ਔਰਤ ਪ੍ਰਧਾਨ ਫ਼ਿਲਮ ਵਿਚ ਦਰਸ਼ਕ ਸੋਨਮ ਬਾਜਵਾ ਨੂੰ ਉਸ ਦੀਆਂ ਪਹਿਲੀਆਂ ਫ਼ਿਲਮਾਂ ਤੋਂ ਬਿਲਕੁਲ ਹਟਵੇਂ, ਇਕ ਬੜੇ ਹੀ ਪ੍ਰਭਾਵਸ਼ਾਲੀ ਅਤੇ ਰੋਹਬਦਾਰ ਕਿਰਦਾਰ ਵਿਚ ਵੇਖਣਗੇ।
'ਵਾਈਟ ਹਿੱਲ ਸਟੂਡੀਓ' ਅਤੇ ਤਾਓ ਚੇਨ ਮੋਸ਼ਨ ਪਿਕਚਰਜ਼ ਦੇ ਬੈਨਰ ਹੇਠ ਬਣੀ ਇਹ ਫ਼ਿਲਮ ਅਜੋਕੇ ਸਮਾਜ ਵਿਚ ਔਰਤ ਦੀ ਸ਼ਖ਼ਸੀਅਤ ਪਹਿਲੂਆਂ ਦੀ ਪੇਸ਼ਕਾਰੀ ਕਰਦੀ, ਅੰਤਰਜਾਤੀ ਵਿਆਹਾਂ ਅਤੇ ਪਰਿਵਾਰਕ ਰਿਸ਼ਤਿਆਂ ਦੀ ਸਾਂਝ, ਸਤਿਕਾਰ ਭਾਵਨਾ ਦੀ ਗੱਲ ਕਰਦੀ ਵਿਅੰਗਮਈ ਪਰਿਵਾਰਕ ਕਹਾਣੀ ਹੈ, ਜੋ ਸਾਡੇ ਸਮਾਜ ਦੇ ਕੌੜੇ ਸੱਚ ਤੋਂ ਪਰਦਾ ਚੁੱਕੇਗੀ। ਇਸ ਫ਼ਿਲਮ ਵਿਚ ਨਿੰਜਾ, ਸੋਨਮ ਬਾਜਵਾ, ਅਜੈ ਸਰਕਾਰੀਆ ਮਹਿਰੀਨ ਪੀਰਜਾਦਾ, ਬੀ. ਐਨ. ਸ਼ਰਮਾ, ਸੁਦੇਸ਼ ਲਹਿਰੀ, ਉਪਾਸਨਾ ਸਿੰਘ, ਨਵਨੀਤ ਨਿਸ਼ਾਨ, ਮਾਇਰਾ ਸਿੰਘ, ਇੰਦਰਪਾਲ ਅਤੇ ਰਾਜੀਵ ਮਹਿਰਾ ਨੇ ਅਹਿਮ ਕਿਰਦਾਰ ਨਿਭਾਏ ਹਨ। ਫ਼ਿਲਮ ਦਾ ਨਿਰਦੇਸ਼ਨ ਮਾਨਵ ਸ਼ਾਹ ਨੇ ਦਿੱਤਾ ਹੈ। ਇਸ ਫ਼ਿਲਮ ਦੀ ਕਹਾਣੀ ਅਤੇ ਸਕਰੀਨ ਪਲੇਅ ਧੀਰਜ ਰਤਨ ਨੇ ਲਿਖਿਆ ਹੈ ਤੇ ਡਾਇਲਾਗ ਰਾਕੇਸ਼ ਧਵਨ ਨੇ ਲਿਖੇ ਹਨ। ਸਿੱਧੂ ਮੂਸੇਵਾਲਾ ਦੇ ਗੀਤਾਂ ਕਰਕੇ ਫ਼ਿਲਮ ਦਾ ਸੰਗੀਤ ਪਹਿਲਾਂ ਹੀ ਕਾਫ਼ੀ ਚਰਚਾ ਵਿਚ ਹੈ। ਯਕੀਨਨ ਇਹ ਫਿਲਮ 'ਗੁੱਡੀਆਂ ਪਟੋਲੇ' ਵਾਂਗ ਸੋਨਮ ਬਾਜਵਾ ਦੇ ਫ਼ਿਲਮੀ ਕੈਰੀਅਰ ਨੂੰ ਇਕ ਨਵਾਂ ਮੋੜ ਦੇਵੇਗੀ। ਸੋਨਮ ਬਾਜਵਾ ਪਹਿਲੀ ਵਾਰ ਅੰਬਰਸਰੀ ਅੜ੍ਹਬ ਮੁਟਿਆਰ 'ਬੱਬੂ ਬੈਂਸ' ਦੇ ਕਿਰਦਾਰ 'ਚ ਨਜ਼ਰ ਆਵੇਗੀ। ਫ਼ਿਲਮ ਦਾ ਵਿਸ਼ਾ ਕਾਮੇਡੀ ਅਧਾਰਤ ਮਨੋਰੰਜਨ ਭਰਪੂਰ ਹੈ। 18 ਅਕਤੂਬਰ ਨੂੰ ਇਹ ਫ਼ਿਲਮ ਦੇਸ਼-ਵਿਦੇਸ਼ਾਂ ਵਿਚ ਪੰਜਾਬੀ ਸਿਨੇਮਿਆਂ ਦਾ ਸ਼ਿੰਗਾਰ ਬਣਨ ਜਾ ਰਹੀ ਹੈ।


-ਸੁਰਜੀਤ ਜੱਸਲ

ਦਾਨਿਸ਼ ਜੇ ਸਿੰਘ ਨੇ ਆਪਣੀ ਪਲੇਠੀ ਫ਼ਿਲਮ 'ਉਜੜਾ ਚਮਨ' ਨਾਲ ਬਾਲੀਵੁੱਡ ਵਿਚ ਪੈਰ ਧਰਿਆ

8 ਨਵੰਬਰ ਨੂੰ ਦੁਨੀਆ ਭਰ 'ਚ ਰਿਲੀਜ਼ ਹੋਣ ਵਾਲੀ ਇਸ ਫ਼ਿਲਮ ਤੋਂ ਦਾਨਿਸ਼ ਜੇ ਸਿੰਘ ਨੂੰ ਵੱਡੀਆਂ ਆਸਾਂ
ਪੰਜਾਬ ਦੇ ਉੱਭਰਦੇ ਗਾਇਕ ਤੇ ਗੀਤਕਾਰ ਦਾਨਿਸ਼ ਜੇ ਸਿੰਘ ਦੇ ਪਲੇਠੇ ਗੀਤ 'ਕੋਕਾ ਗੋਰੀਏ' ਤੇ 'ਰੱਬ ਮੰਨਿਆ' ਨੂੰ ਦੇਸ਼ ਵਿਦੇਸ਼ ਦੇ ਲੱਖਾਂ ਸਰੋਤਿਆਂ ਦੇ ਭਰਵੇਂ ਹੁੰਗਾਰੇ ਤੋਂ ਬਾਅਦ ਉਨ੍ਹਾਂ ਵਲੋਂ ਲਿਖੀ ਗਈ ਪਰਿਵਾਰਕ ਹਿੰਦੀ ਕਾਮੇਡੀ ਫ਼ਿਲਮ 'ਉਜੜਾ ਚਮਨ' ਦੇ ਇਕ ਅਕਤੂਬਰ ਨੂੰ ਰਿਲੀਜ਼ ਹੋਏ ਟਰੇਲਰ ਨੂੰ ਯੂ.ਟਿਊਬ ਦੇ ਕਰੋੜਾਂ ਸਰੋਤਿਆਂ ਨੇ ਅਥਾਹ ਪਿਆਰ ਦਿੱਤਾ ਹੈ। ਇਸ ਫ਼ਿਲਮ ਦਾ ਟਰੇਲਰ ਰਿਲੀਜ਼ ਹੋਣ ਉਪਰੰਤ ਫ਼ਿਲਮ ਜਗਤ ਵਿਚ ਵੀ ਉਨ੍ਹਾਂ ਦੀ ਚਰਚਾ ਹੋ ਰਹੀ ਹੈ। 8 ਨਵੰਬਰ ਨੂੰ ਦੁਨੀਆ ਭਰ ਵਿਚ ਰਿਲੀਜ਼ ਹੋ ਰਹੀ ਫ਼ਿਲਮ 'ਉਜੜਾ ਚਮਨ' ਤੋਂ ਦਾਨਿਸ਼ ਜੇ ਸਿੰਘ ਨੂੰ ਬਹੁਤ ਵੱਡੀਆਂ ਆਸਾਂ ਹਨ। ਮੁੰਬਈ ਦੀ ਪ੍ਰਸਿੱਧ ਨਿਰਮਾਤਾ ਕੰਪਨੀ ਪੈਰੋਨਾਮਾ ਸਟੂਡੀਓ ਜਿਨ੍ਹਾਂ ਨੇ ਫ਼ਿਲਮ ਜਗਤ ਨੂੰ 'ਪਿਆਰ ਕਾ ਪੰਚਨਾਮਾ', ਦਰਿਸ਼ਮ, ਸਿੰਘਮ, ਰੇਡ ਵਰਗੀਆਂ ਸੁਪਰਹਿੱਟ ਫ਼ਿਲਮਾਂ ਦਿੱਤੀਆਂ ਹਨ, ਵਲੋਂ ਤਿਆਰ ਕੀਤੀ ਕਾਮੇਡੀ ਫ਼ਿਲਮ ਉਜੜਾ ਚਮਨ ਫ਼ਿਲਮ ਦੀ ਸਟੋਰੀ ਦੇ ਲੇਖਕ ਤੇ ਕ੍ਰਇਏਟਿਵ ਨਿਰਦੇਸ਼ਕ ਦਾਨਿਸ਼ ਜੇ ਸਿੰਘ ਹਨ ਤੇ ਫ਼ਿਲਮ ਦੇ ਡਾਇਲਾਗ ਤੇ ਸਕਰੀਨ ਪਲੇਅ ਵੀ ਉਨ੍ਹਾਂ ਵਲੋਂ ਹੀ ਲਿਖੇ ਗਏ ਹਨ। ਆਪਣੀ ਮਿਹਨਤ, ਲਗਨ ਤੇ ਦ੍ਰਿੜ੍ਹ ਇੱਛਾ ਸ਼ਕਤੀ ਸਦਕਾ ਦਾਨਿਸ਼ ਜੇ ਸਿੰਘ ਨੇ ਛੋਟੀ ਉਮਰ ਵਿਚ ਜਿਹੜਾ ਮੁਕਾਮ ਹਾਸਲ ਕੀਤਾ ਹੈ, ਉਸ ਮੁਕਾਮ 'ਤੇ ਪੁੱਜਦਿਆਂ ਕਈ ਵਰ੍ਹੇ ਲੱਗ ਜਾਂਦੇ ਹਨ। ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਤੋਂ ਇੰਜੀਨੀਅਰਿੰਗ ਦੀ ਡਿਗਰੀ ਪ੍ਰਾਪਤ ਕਰਨ ਉਪਰੰਤ ਦਾਨਿਸ਼ ਜੇ ਸਿੰਘ ਨੇ ਮੁੰਬਈ ਦੇ ਫ਼ਿਲਮ ਇੰਸਟੀਚਿਊਟ ਤੋਂ ਫ਼ਿਲਮ ਨਿਰਦੇਸ਼ਨ ਵਿਚ ਸਿੱਖਿਆ ਪ੍ਰਾਪਤ ਕੀਤੀ। ਭਾਵੇਂ ਉਨ੍ਹਾਂ ਦਾ ਕੋਈ ਸੰਗੀਤਕ ਪਿਛੋਕੜ ਨਹੀਂ, ਪਰ ਬਚਪਨ ਤੋਂ ਸੰਗੀਤ ਵਿਚ ਉਨ੍ਹਾਂ ਦੀ ਦਿਲਚਸਪੀ ਤੇ ਸਖ਼ਤ ਮਿਹਨਤ ਦਾਨਿਸ਼ ਜੇ ਸਿੰਘ ਨੂੰ ਗਾਇਕੀ ਤੋਂ ਫ਼ਿਲਮਾਂ ਵੱਲ ਲੈ ਆਈ। ਆਪਣੀ ਪਲੇਠੀ ਕਾਮੇਡੀ ਫ਼ਿਲਮ 'ਉਜੜਾ ਚਮਨ' ਨਾਲ ਉਨ੍ਹਾਂ ਬਾਲੀਵੁੱਡ ਵਿਚ ਪ੍ਰਵੇਸ਼ ਕੀਤਾ ਹੈ। ਕਪੂਰਥਲਾ ਜ਼ਿਲ੍ਹੇ ਦੇ ਇਤਿਹਾਸਕ ਸ਼ਹਿਰ ਸੁਲਤਾਨਪੁਰ ਲੋਧੀ ਨਾਲ ਸਬੰਧਿਤ ਦਾਨਿਸ਼ ਜੇ ਸਿੰਘ ਨੂੰ ਆਸ ਹੈ ਕਿ ਹਿੰਦੀ ਸਿਨੇਮਾ ਨਾਲ ਸਬੰਧਿਤ ਦਰਸ਼ਕ ਉਨ੍ਹਾਂ ਦੀ ਆਉਣ ਵਾਲੀ ਇਸ ਫ਼ਿਲਮ ਨੂੰ ਭਰਵਾਂ ਹੁੰਗਾਰਾ ਦੇਣਗੇ।


-ਅਮਰਜੀਤ ਕੋਮਲ

ਫ਼ਿਲਮੀ ਖ਼ਬਰਾਂ

'ਸਤਿਆਮੇਵ ਜਯਤੇ-2' ਵਿਚ ਜਾਨ-ਦਿਵਿਆ

ਸੰਗੀਤ ਕੰਪਨੀ ਟੀ-ਸੀਰੀਜ਼ ਵਲੋਂ ਬਣਾਈ ਗਈ ਐਕਸ਼ਨ ਫ਼ਿਲਮ 'ਸਤਿਆਮੇਵ ਜਯਤੇ' ਵਿਚ ਜਾਨ ਅਬ੍ਰਾਹਮ ਵਲੋਂ ਜਾਂਬਾਜ਼ ਪੁਲਿਸ ਅਫ਼ਸਰ ਦੀ ਭੂਮਿਕਾ ਨਿਭਾਈ ਗਈ ਸੀ। ਮਿਲਾਪ ਜ਼ਵੇਰੀ ਵਲੋਂ ਨਿਰਦੇਸ਼ਿਤ ਇਸ ਫ਼ਿਲਮ ਨੂੰ ਦਰਸ਼ਕਾਂ ਵਲੋਂ ਚੰਗਾ ਹੁੰਗਾਰਾ ਮਿਲਿਆ ਤਾਂ ਹੁਣ ਇਸ ਦਾ ਵਿਸਥਾਰ ਬਣਾਉਣ ਦਾ ਐਲਾਨ ਕੀਤਾ ਗਿਆ ਹੈ। ਇਸ ਵਿਚ ਵੀ ਜਾਨ ਅਬ੍ਰਾਹਮ ਹੋਣਗੇ ਪਰ ਇਥੇ ਉਨ੍ਹਾਂ ਨਾਲ ਦਿਵਿਆ ਖੋਸਲਾ ਹੋਵੇਗੀ। 'ਅਬ ਤੁਮਹਾਰੇ ਹਵਾਲੇ ਵਤਨ ਸਾਥੀਓ' ਤੋਂ ਪੇਸ਼ ਹੋਈ ਦਿਵਿਆ ਨੇ ਵਿਆਹ ਕਰਵਾ ਕੇ ਅਭਿਨੈ ਤੋਂ ਦੂਰੀ ਬਣਾ ਲਈ ਸੀ। ਬਾਅਦ ਵਿਚ ਆਪਣੀ ਵਾਪਸੀ ਕਰਦੇ ਹੋਏ ਕੁਝ ਵੀਡੀਓ ਐਲਬਮ ਨਿਰਦੇਸ਼ਿਤ ਕੀਤੇ ਤਾਂ 'ਯਾਰੀਆਂ' ਤੇ 'ਸਨਮ ਰੇ' ਫ਼ਿਲਮਾਂ ਵੀ ਨਿਰਦੇਸ਼ਿਤ ਕੀਤੀਆਂ। ਲਘੂ ਫ਼ਿਲਮ 'ਬੁਲਬੁਲ' ਵਿਚ ਅਭਿਨੈ ਕਰਨ ਤੋਂ ਬਾਅਦ ਹੁਣ ਉਹ ਵੱਡੇ ਪਰਦੇ 'ਤੇ ਆਪਣੀ ਵਾਪਸੀ ਕਰ ਰਹੀ ਹੈ।
ਆਸ਼ਾ ਭੱਟ ਨੂੰ ਮਿਲੀ ਕੰਨੜ ਫ਼ਿਲਮ

ਕੰਨੜ ਸੁੰਦਰੀ ਆਸ਼ਾ ਭੱਟ ਨੇ ਫ਼ਿਲਮ 'ਜੰਗਲੀ' ਰਾਹੀਂ ਹਿੰਦੀ ਫ਼ਿਲਮਾਂ ਵਿਚ ਦਾਖ਼ਲਾ ਕੀਤਾ ਸੀ। ਵਿਧੁਤ ਜਾਮਵਾਲ ਨੂੰ ਨਾਇਕ ਦੀ ਭੂਮਿਕਾ ਵਿਚ ਪੇਸ਼ ਕਰਦੀ ਇਹ ਫ਼ਿਲਮ ਖ਼ਾਸ ਚੱਲੀ ਨਹੀਂ ਸੀ। ਸੋ, ਆਸ਼ਾ ਦਾ ਕੈਰੀਅਰ ਵੀ ਸੰਵਰ ਨਹੀਂ ਸਕਿਆ। ਇਸ ਤਰ੍ਹਾਂ ਹੁਣ ਉਸ ਨੇ ਕੰਨੜ ਫ਼ਿਲਮਾਂ ਵੱਲ ਰੁਖ਼ ਕਰ ਲਿਆ ਹੈ ਅਤੇ ਕੰਨੜ ਫ਼ਿਲਮ 'ਰੋਬਰਟ' ਲਈ ਉਸ ਨੂੰ ਕਰਾਰਬੱਧ ਕਰ ਲਿਆ ਗਿਆ ਹੈ। ਇਸ ਫ਼ਿਲਮ ਦੇ ਨਿਰਦੇਸ਼ਕ ਹਨ ਤਰੁਣ ਸੁਧੀਰ ਅਤੇ ਨਾਇਕ ਹਨ ਕੰਨੜ ਫ਼ਿਲਮਾਂ ਦੇ ਸਟਾਰ ਦਰਸ਼ਨ।
ਹੁਣ ਹਿੰਦੀ ਵਿਚ ਡਬ ਹੋਵੇਗੀ 'ਰਘੂ ਸੀ. ਐਨ. ਜੀ.'

ਸਾਲ 2015 ਵਿਚ ਗੁਜਰਾਤੀ ਫ਼ਿਲਮ 'ਫ਼ਿਲਮ' ਬਣਾਉਣ ਵਾਲੇ ਨਿਰਦੇਸ਼ਕ ਵਿਸ਼ਾਲ ਵਡਾਵਾਲਾ ਨੇ ਹੁਣ ਸਸਪੈਂਸ ਥ੍ਰਿਲਰ ਗੁਜਰਾਤੀ ਫ਼ਿਲਮ 'ਰਘੂ ਸੀ. ਐਨ. ਜੀ.' ਬਣਾਈ ਹੈ। ਰਾਜਕੋਟ ਵਿਚ ਮੁੱਖ ਤੌਰ 'ਤੇ ਸ਼ੂਟ ਕੀਤੀ ਗਈ ਇਸ ਫ਼ਿਲਮ ਵਿਚ ਇਕ ਸਾਇਕਿਕ ਰਿਕਸ਼ਾ ਵਾਲੇ ਦੀ ਕਹਾਣੀ ਪੇਸ਼ ਕੀਤੀ ਗਈ ਹੈ, ਜੋ ਇਕ ਜੋੜੇ ਨੂੰ ਅਗਵਾ ਕਰ ਲੈਂਦਾ ਹੈ। ਇਸ ਫ਼ਿਲਮ ਦਾ ਪ੍ਰੋਮੋ ਬਾਹਰ ਆਉਣ ਤੋਂ ਬਾਅਦ ਵਿਸ਼ਾਲ ਦੇ ਕੋਲ ਇਹ ਸੁਝਾਅ ਆਉਣ ਲੱਗੇ ਕਿ ਇਸ ਨੂੰ ਹਿੰਦੀ ਵਿਚ ਡੱਬ ਕਰ ਕੇ ਪੇਸ਼ ਕਰਨਾ ਸਹੀ ਰਹੇਗਾ।


-ਮੁੰਬਈ ਪ੍ਰਤੀਨਿਧ

ਬੋਲੀ ਤੇ ਸੱਭਿਆਚਾਰ ਦਾ ਮੁਦਈ ਪਰਵਿੰਦਰ ਸਿੰਘ ਸਾਬੀ

ਇਸ ਰੰਗਲੀ ਦੁਨੀਆ 'ਤੇ ਜੋ ਕਹਾਵਤਾਂ ਬਣੀਆਂ ਹਨ, ਉਨ੍ਹਾਂ ਸੱਚਾਈਆਂ ਦਾ ਬੰਦੇ ਨੂੰ ਉਮਰ ਦੇ ਹਿਸਾਬ ਨਾਲ ਪਤਾ ਲਗਦਾ ਹੈ। ਜੋ ਇਨਸਾਨ ਦ੍ਰਿੜ੍ਹ ਇਰਾਦੇ ਵਾਲੇ ਹੁੰਦੇ ਹਨ, ਸੁਨਹਿਰੀ ਸੁਪਨੇ ਸਜਾਉਂਦੇ ਹਨ ਅਤੇ ਉਨ੍ਹਾਂ ਸੁਪਨਿਆਂ ਨੂੰ ਸਾਕਾਰ ਕਰਨ ਲੀ ਯਤਨਸ਼ੀਲ ਰਹਿੰਦੇ ਹਨ। ਉਹ ਵਾਕਿਆ ਹੀ ਬਚਪਨ ਵਿਚ ਜਾਂਬਾਜ਼ ਹੁੰਦੇ ਹਨ, ਸਿਰਕੱਢ ਤੇ ਉਸਾਰੂ ਸੋਚ ਵਾਲੇ ਹੁੰਦੇ ਹਨ। ਅਜਿਹਾ ਹੀ ਪਿੰਡ ਪਧਿਆਣਾ, ਨੇੜੇ ਆਦਮਪੁਰ ਦੁਆਬਾ ਦਾ ਜੰਮਪਲ ਪਰਵਿੰਦਰ ਸਿੰਘ ਸਾਬੀ ਹੈ। ਉਹ ਸੰਨ 1976 ਵਿਚ ਪਿਤਾ ਸ੍ਰੀ ਹਰਦੇਵ ਸਿੰਘ ਤੇ ਮਾਤਾ ਸ੍ਰੀਮਤੀ ਅਵਿਨਾਸ਼ ਕੌਰ ਦੇ ਘਰ ਜਨਮਿਆ ਤੇ ਪਿੰਡ ਦੇ ਸਕੂਲ ਤੋਂ ਦਸਵੀਂ ਕਰਨ ਉਪਰੰਤ ਸੀਨੀਅਰ ਸੈਕੰਡਰੀ ਡਰੋਲੀ ਕਲਾਂ ਅਤੇ ਸਟੈਮਫੋਰਡ ਯੂਨੀਵਰਸਿਟੀ ਤੋਂ ਸਕਾਲਰਸ਼ਿਪ ਦੇ ਨਾਲ ਐਮ.ਬੀ.ਏ. ਡਿਗਰੀ ਹਾਸਲ ਕੀਤੀ। ਇਸ ਦਰਮਿਆਨ ਆਪਣੇ ਤਾਇਆ ਮਹਿੰਦਰ ਸਿੰਘ ਸਰਪੰਚ ਨਾਲ ਰਾਜਸੀ ਸਰਗਰਮੀਆਂ 'ਚ ਰੁਝ ਗਿਆ। ਸਾਬੀ ਦੇ ਪ੍ਰੇਰਨਾ ਸਰੋਤ ਸ: ਪਰਮਜੀਤ ਸਿੰਘ ਸਰੋਆ ਅਤੇ ਸ: ਕਿਰਪਾਲ ਸਿੰਘ ਬਡੂੰਗਰ ਹਨ, ਬਿਜ਼ਨੈਸਮੈਨ ਦੇ ਤੌਰ 'ਤੇ 14 ਸਾਲ ਪਹਿਲਾਂ ਉਸ ਬੈਂਕਾਕ ਵਿਚ ਇਕ ਛੋਟੇ ਜਿਹੇ ਗੈਸਟ ਹਾਊਸ ਨੂੰ ਲੈ ਕੇ ਕੰਮ ਸ਼ੁਰੂ ਕੀਤਾ, ਜੋ ਬਾਅਦ ਵਿਚ ਹੋਟਲਾਂ ਵਿਚ ਤਬਦੀਲ ਹੋ ਗਿਆ। ਵੱਖ-ਵੱਖ ਦੇਸ਼ਾਂ ਦੇ ਪ੍ਰਧਾਨ ਮੰਤਰੀਆਂ ਤੋਂ ਸਨਮਾਨਿਤ ਸਾਬੀ ਮਾਂ-ਬੋਲੀ ਪੰਜਾਬੀ ਅਤੇ ਸੱਭਿਆਚਾਰ ਨੂੰ ਵਿਦੇਸ਼ਾਂ ਵਿਚ ਵੀ ਪ੍ਰਫੁੱਲਿਤ ਕਰਦਾ ਰਿਹਾ ਹੈ। ਗਾਇਕ ਸੁਰਿੰਦਰ ਲਾਡੀ, ਲਖਵਿੰਦਰ ਲੱਕੀ, ਮਿਸ ਰੇਸ਼ਮਾ ਅਤੇ ਗਾਇਕ ਤਾਜ ਨਗੀਨਾ ਅਤੇ ਹੋਰ ਕਲਾਕਾਰਾਂ ਨੂੰ ਅੱਗੇ ਵਧਣ 'ਚ ਸਹਾਈ ਹੋਇਆ ਹੈ। ਕਈ ਵਾਰੀ ਨਵੇਂ ਸਾਲ ਦੇ ਵਰਾਇਟੀ ਸ਼ੋਅ ਵੀ ਆਯੋਜਿਤ ਕੀਤੇ ਹਨ। ਬਹੁਤ ਹੀ ਹੱਸਮੁੱਖ ਸੁਭਾਅ ਤੇ ਮਿਲਣਸਾਰ ਪਰਵਿੰਦਰ ਸਿੰਘ ਸਾਬੀ ਪੰਜਾਬ, ਪੰਜਾਬੀ ਅਤੇ ਪੰਜਾਬੀਅਤ ਦੀ ਚੜ੍ਹਦੀ ਕਲਾ ਲਈ ਸਦਾ ਯਤਨਸ਼ੀਲ ਰਹਿੰਦਾ ਹੈ। ਇਸ ਦੇ ਮਾਤਾ-ਪਿਤਾ 35 ਸਾਲ ਤੋਂ ਅਮਰੀਕਾ ਵਿਚ ਰਹਿ ਰਹੇ ਹਨ ਪਰ ਆਪ ਖੁਦ ਬੈਂਕਾਕ ਦਾ ਪੱਕਾ ਵਸਨੀਕ ਹੋ ਕੇ ਪੂਰੇ ਸੰਸਾਰ ਵਿਚ ਆਪਣਾ ਵੱਖਰਾ ਪ੍ਰਭਾਵ ਕਾਇਮ ਕਰ ਚੁੱਕਾ ਹੈ। ਲੋੜਵੰਦ ਪੰਜਾਬੀਆਂ ਦੀ ਸਹਾਇਤਾ ਕਰਨਾ ਇਸ ਦਾ ਸੁਭਾਅ ਹੈ। ਇਸ ਦੇ ਪਿੰਡ ਪਧਿਆਣਾ ਦੇ ਉੱਘੇ ਸ਼ਾਇਰ ਸਾਧੂ ਸਿੰਘ ਆਂਚਲ ਗੀਤ (ਮਹਿਰਮ ਦਿਲਾਂ ਦੇ ਮਾਹੀ-ਮੋੜੇਂਗਾ ਕੱਦ ਮੁਹਾਰਾਂ) ਗਾਇਕਾ ਸੁਰਿੰਦਰ ਕੌਰ ਅਤੇ ਲਾਲੀ ਪਧਿਆਣਵੀ ਦੇ ਗੀਤ ਕੋਕਾ ਗਾਇਕਾ ਸਰਬਜੀਤ ਕੌਰ ਦੀ ਰੰਗਤ ਸਦਕਾ ਪਰਵਿੰਦਰ ਸਾਬੀ ਮਿਆਰੀ ਤੇ ਸਾਫ਼-ਸੁਥਰੀ ਕਲਮ ਦਾ ਵਾਰਸ ਹੈ।


-ਬਲਦੇਵ ਰਾਹੀ

ਕੰਨੜ ਫ਼ਿਲਮਾਂ ਤੋਂ ਆਈ ਐਨਦ੍ਰਿਤਾ ਰੇਅ

ਤਕਰੀਬਨ ਤੀਹ ਕੰਨੜ ਅਤੇ ਦੋ ਬੰਗਲਾ ਫ਼ਿਲਮਾਂ ਕਰਨ ਤੋਂ ਬਾਅਦ ਹੁਣ ਐਨਦ੍ਰਿਤਾ ਰੇਅ ਨੇ ਬਾਲੀਵੁੱਡ ਵੱਲ ਆਪਣੇ ਕਦਮ ਵਧਾ ਲਏ ਹਨ। ਅਰਬਾਜ਼ ਖਾਨ ਨੂੰ ਮੁੱਖ ਭੂਮਿਕਾ ਵਿਚ ਚਮਕਾਉਂਦੀ ਡਰਾਉਣੀ, ਥ੍ਰਿਲਰ ਫ਼ਿਲਮ 'ਮੈਂ ਜ਼ਰੂਰ ਆਊਂਗਾ' ਵਿਚ ਉਹ ਅਰਬਾਜ਼ ਦੀ ਪਤਨੀ ਦੀ ਭੂਮਿਕਾ ਨਿਭਾਅ ਰਹੀ ਹੈ।
ਐਨਦ੍ਰਿਤਾ ਕਈ ਐਡ ਫ਼ਿਲਮਾਂ ਕਰ ਚੁੱਕੀ ਹੈ ਅਤੇ ਇਨ੍ਹਾਂ ਵਿਚ ਉਸ ਦਾ ਖ਼ੂਬਸੂਰਤ ਚਿਹਰਾ ਦੇਖ ਕੇ ਕਈ ਫ਼ਿਲਮ ਵਾਲੇ ਉਸ ਨੂੰ ਆਪਣੀਆਂ ਫ਼ਿਲਮਾਂ ਵਿਚ ਲੈਣਾ ਚਾਹੁੰਦੇ ਸਨ ਪਰ ਉਹ ਕੰਨੜ ਫ਼ਿਲਮਾਂ ਵਿਚ ਰੁੱਝੀ ਹੋਈ ਸੀ। ਸੋ, ਹੁਣ ਜਾ ਕੇ ਹਿੰਦੀ ਫ਼ਿਲਮਾਂ ਵਿਚ ਉਸ ਦਾ ਦਾਖ਼ਲਾ ਹੋਇਆ ਹੈ। ਇਸ ਫ਼ਿਲਮ ਵਿਚ ਐਨਦ੍ਰਿਤਾ ਦਾ ਕਿਰਦਾਰ ਆਪਣੇ ਪਤੀ ਨਾਲ ਧੋਖਾ ਕਰਨ ਵਾਲੀ ਪਤਨੀ ਦਾ ਹੈ। ਇਕ ਇਸ ਤਰ੍ਹਾਂ ਦੀ ਪਤਨੀ ਜੋ ਆਪਣੇ ਜਿਊਂਦੇ ਪਤੀ ਨੂੰ ਦਫ਼ਨਾ ਦਿੰਦੀ ਹੈ। ਇਸ ਤਰ੍ਹਾਂ ਦੀ ਬੋਲਡ ਭੂਮਿਕਾ ਰਾਹੀਂ ਹਿੰਦੀ ਫ਼ਿਲਮਾਂ ਵਿਚ ਆਪਣੀ ਪਾਰੀ ਦੀ ਸ਼ੁਰੂਆਤ ਕਰਨ ਬਾਰੇ ਉਹ ਕਹਿੰਦੀ ਹੈ, 'ਮੈਂ ਮੰਨਦੀ ਹਾਂ ਕਿ ਇਹ ਆਮ ਹੀਰੋਇਨ ਵਾਲੀ ਭੂਮਿਕਾ ਨਹੀਂ ਹੈ, ਫ਼ਿਲਮ ਵਿਚ ਮੇਰੇ ਹਿੱਸੇ ਬੋਲਡ ਦ੍ਰਿਸ਼ ਵੀ ਆਏ ਹਨ। ਮੇਰੀ ਇੱਛਾ ਸੀ ਕਿ ਬਾਲੀਵੁੱਡ ਵਿਚ ਮੈਂ ਆਪਣੀ ਸ਼ੁਰੂਆਤ ਚੁਣੌਤੀਪੂਰਨ ਫ਼ਿਲਮਾਂ ਨਾਲ ਕਰਾਂ, ਤਾਂ ਕਿ ਫ਼ਿਲਮ ਵਾਲਿਆਂ ਦਾ ਧਿਆਨ ਆਪਣੇ ਵੱਲ ਆਕਰਸ਼ਿਤ ਕਰ ਸਕਾਂ। ਇਸ ਤਰ੍ਹਾਂ ਮੈਨੂੰ ਲਗਦਾ ਹੈ ਕਿ ਇਕ ਸਹੀ ਭੂਮਿਕਾ ਨਾਲ ਹਿੰਦੀ ਫ਼ਿਲਮਾਂ ਵਿਚ ਮੇਰੀ ਸ਼ੁਰੂਆਤ ਹੋ ਰਹੀ ਹੈ।'
ਐਨਦ੍ਰਿਤਾ ਲਈ ਇਹ ਭੂਮਿਕਾ ਨਿਭਾਉਣਾ ਇਸ ਲਈ ਵੀ ਚੁਣੌਤੀਪੂਰਨ ਰਿਹਾ, ਕਿਉਂਕਿ ਸਵਿਟਜ਼ਰਲੈਂਡ ਵਿਚ ਮੁੱਖ ਤੌਰ 'ਤੇ ਫ਼ਿਲਮਾਈ ਗਈ ਇਸ ਫ਼ਿਲਮ ਵਿਚ ਕਈ ਥਾਂ ਬਰਫ਼ੀਲੀਆਂ ਥਾਵਾਂ ਹਨ। ਉਥੇ ਮਾਈਨਿਸ 17 ਡਿਗਰੀ ਦੀ ਭਾਰੀ ਢੰਡ ਦੇ ਮਾਹੌਲ ਵਿਚ ਆਮ ਕੱਪੜੇ ਪਾ ਕੇ ਕੈਮਰੇ ਸਾਹਮਣੇ ਅਭਿਨੈ ਕਰਦੇ ਸਮੇਂ ਉਸ ਨੂੰ ਨਾਨੀ ਯਾਦ ਆ ਗਈ ਸੀ।
ਇਸ ਫ਼ਿਲਮ ਤੋਂ ਬਾਅਦ ਉਸ ਦੀ ਇਕ ਹੋਰ ਹਿੰਦੀ ਫ਼ਿਲਮ ਆਏਗੀ, ਜਿਸ ਦੇ ਨਿਰਦੇਸ਼ਕ ਹਾਰਦਿਕ ਗੱਜਰ ਹਨ। ਇਸ ਵਿਚ ਉਹ ਨੌਟੰਕੀ ਕੰਪਨੀ ਵਿਚ ਕੰਮ ਕਰਨ ਵਾਲੀ ਕਲਾਕਾਰ ਦੀ ਭੂਮਿਕਾ ਨਿਭਾਅ ਰਹੀ ਹੈ ਅਤੇ ਇਥੇ ਉਸ ਦੇ ਹਿੱਸੇ ਸੀਤਾ ਮਈਆ ਦੀ ਭੂਮਿਕਾ ਨਿਭਾਉਣਾ ਆਇਆ ਹੈ। ਹੁਣ ਤੱਕ ਫ਼ਿਲਮ ਦਾ ਨਾਂਅ ਨਹੀਂ ਰੱਖਿਆ ਗਿਆ ਹੈ ਪਰ ਐਨਦ੍ਰਿਤਾ ਦਾ ਕਹਿਣਾ ਹੈ ਕਿ ਸ਼ਾਇਦ ਫ਼ਿਲਮ ਦਾ ਨਾਂਅ 'ਭਵਾਈ' ਰੱਖਿਆ ਜਾਵੇ। ਉਂਝ ਭਵਾਈ ਗੁਜਰਾਤੀ ਸ਼ਬਦ ਹੈ ਅਤੇ ਇਸ ਦਾ ਅਰਥ ਨੌਟੰਕੀ ਹੁੰਦਾ ਹੈ।


-ਮੁੰਬਈ ਪ੍ਰਤੀਨਿਧ





Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX