ਤਾਜਾ ਖ਼ਬਰਾਂ


ਐੱਫ ਸੀ ਆਈ ਇੰਸਪੈਕਟਰ 22000 ਰੁਪਏ ਦੀ ਰਿਸ਼ਵਤ ਸਣੇ ਕਾਬੂ
. . .  2 minutes ago
ਜਲੰਧਰ ,22 ਨਵੰਬਰ - ਕਰਤਾਰਪੁਰ ਵਿਖੇ ਤਾਇਨਾਤ ਐਫ ਸੀ ਆਈ ਇੰਸਪੈਕਟਰ ਰਾਜ ਸ਼ੇਖਰ ਚੌਹਾਨ ਨੂੰ ਵਿਜੀਲੈਂਸ ਬਿਊਰੋ ਨੇ 22000 ਰੁਪਏ ਦੀ ਰਿਸ਼ਵਤ ਸਣੇ ਗ੍ਰਿਫ਼ਤਾਰ ਕੀਤਾ ਹੈ । ਇੰਸਪੈਕਟਰ ਰਾਜ ...
ਸਰਕਾਰੀ ਸਕੂਲ 'ਚੋਂ ਗੁੰਮ 3 ਲੜਕੀਆਂ ਦਿੱਲੀ ਤੋਂ ਮਿਲੀਆਂ
. . .  12 minutes ago
ਬਠਿੰਡਾ ,22 ਨਵੰਬਰ ਨਾਇਬ ਸਿੰਘ -ਬਠਿੰਡਾ ਦੇ ਸਰਕਾਰੀ ਸਕੂਲ ਵਿਚੋਂ ਪਿਛਲੇ ਦਿਨੀਂ ਭੇਦ ਭਰੇ ਹਾਲਤਾਂ ਵਿਚ ਗੁੰਮ ਹੋਈਆਂ ਤਿੰਨ ਨਾਬਾਲਗ ਲੜਕੀਆਂ ਮਿਲ ਗਈਆਂਾਂ ਹਨ । ਉਨ੍ਹਾਂ ਨੂੰ ਦਿੱਲੀ ਤੋ ਲਿਆ ਕੇ ਉਨ੍ਹਾਂ ...
ਨਵੀਂ ਦਿੱਲੀ : ਉਧਵ ਠਾਕਰੇ ਮਹਾਰਾਸ਼ਟਰ ਨੇ ਅਗਲੇ ਹੋਣਗੇ ਸੀ ਐੱਮ , ਕੱਲ੍ਹ ਹੋਵੇਗੀ ਤਿੰਨੇ ਦਲਾਂ ਦੀ ਪ੍ਰੈੱਸ ਕਾਨਫ਼ਰੰਸ
. . .  13 minutes ago
ਕੰਧ ਥੱਲੇ ਆਉਣ ਕਰਕੇ ਕਵੀਸ਼ਰ ਕੁਲਵਿੰਦਰ ਸਿੰਘ ਭਿੰਡਰ ਸਮੇਤ ਇੱਕ ਮਜ਼ਦੂਰ ਦੀ ਮੌਤ
. . .  24 minutes ago
ਕਾਲਾ ਅਫ਼ਗ਼ਾਨਾਂ ,22 ਨਵੰਬਰ {ਅਵਤਾਰ ਸਿੰਘ ਰੰਧਾਵਾ} - ਅੱਜ ਜ਼ਿਲ੍ਹਾ ਗੁਰਦਾਸਪੁਰ ਦੇ ਫ਼ਤਿਹਗੜ੍ਹ ਚੂੜੀਆਂ ਹਲਕੇ ਦੇ ਪਿੰਡ ਰੂਪੋ ਵਾਲੀ ਵਿਚ ਪੰਥਕ ਕਵੀਸ਼ਰ ਕੁਲਵਿੰਦਰ ਸਿੰਘ ਭਿੰਡਰ ਰੂਪੋ ਵਾਲੀ ਅਤੇ ਇੱਕ ...
ਇੰਫਾਲ 'ਚ ਹੋਏ ਧਮਾਕੇ 'ਚ ਸੀ.ਆਰ.ਪੀ.ਐਫ ਦੇ 2 ਜਵਾਨ ਜ਼ਖਮੀ
. . .  40 minutes ago
ਇੰਫਾਲ, 22 ਨਵੰਬਰ- ਮਨੀਪੁਰ ਦੀ ਰਾਜਧਾਨੀ ਇੰਫਾਲ 'ਚ ਅੱਜ ਹੋਏ ਧਮਾਕੇ 'ਚ ਸੀ.ਆਰ.ਪੀ.ਐਫ ਦੇ 2 ਜਵਾਨ ਜ਼ਖਮੀ ਹੋਏ ਹਨ। ਇਹ ਧਮਾਕਾ ਮਨੀਪੁਰ ਵਿਧਾਨਸਭਾ ਭਵਨ...
ਪੰਡੋਰੀ ਦੀ ਖੱਡ ਤੋਂ ਮਿਲੀ ਅਣਪਛਾਤੇ ਵਿਅਕਤੀ ਦੀ ਲਾਸ਼
. . .  about 1 hour ago
ਬੀਣੇਵਾਲ, 22 ਨਵੰਬਰ (ਬੈਜ ਚੌਧਰੀ) - ਅੱਜ ਬਾਅਦ ਦੁਪਹਿਰ ਕਰੀਬ ਤਿੰਨ ਵਜੇ ਪੁਲਿਸ ਚੌਕੀ ਬੀਣੇਵਾਲ ਦੇ ਇੰਚਾਰਜ ਵਾਸਦੇਵ ਚੇਚੀ ਦੀ ਅਗਵਾਈ 'ਚ ਪੰਡੋਰੀਇ-ਬੀਤ ਦੀ ਖੱਡ ਤੋਂ ਸੜਕ ਕੰਢੇ ਪਈ ...
ਵਿਸ਼ਵ ਕਬੱਡੀ ਕੱਪ ਸਬੰਧੀ ਡਾਇਰੈਕਟਰ ਸਪੋਰਟਸ ਪੰਜਾਬ ਵੱਲੋਂ ਤਿਆਰੀਆਂ ਦਾ ਲਿਆ ਗਿਆ ਜਾਇਜ਼ਾ
. . .  about 1 hour ago
ਗੁਰੂ ਹਰ ਸਹਾਏ, 22 ਨਵੰਬਰ (ਕਪਿਲ ਕੰਧਾਰੀ) - ਗੁਰੂ ਨਾਨਕ ਦੇਵ ਜੀ ਦੇ 550 ਸਾਲਾ ਪ੍ਰਕਾਸ਼ ਪੁਰਬ ਨੂੰ ਸਮਰਪਿਤ ਵਿਸ਼ਵ ਕਬੱਡੀ ਕੱਪ ਕਰਵਾਇਆ ਜਾ ਰਿਹਾ ਹੈ, ਜਿਸ ਦੇ ਦੋ ਮੈਚ 4 ਦਸੰਬਰ ਦਿਨ ਬੁੱਧਵਾਰ ਨੂੰ ਗੁਰੂ ਹਰ ਸਹਾਏ ਦੇ ਗੁਰੂ ਰਾਮ ਦਾਸ ਸਟੇਡੀਅਮ ਵਿਚ ਕਰਵਾਏ...
ਫ਼ੌਜ ਨੇ ਆਪਣੇ ਸਟਾਫ਼ ਨੂੰ ਵਟਸ ਐਪ ਸਬੰਧੀ ਕੀਤਾ ਸੁਚੇਤ
. . .  about 1 hour ago
ਨਵੀਂ ਦਿੱਲੀ, 22 ਨਵੰਬਰ - ਵਟਸ ਐਪ ਦੇ ਇਸਤੇਮਾਲ 'ਤੇ ਚੱਲ ਰਹੀ ਬਹਿਸ ਵਿਚਕਾਰ ਫ਼ੌਜ ਨੇ ਆਪਣੇ ਅਧਿਕਾਰੀਆਂ ਨੂੰ ਅਲਰਟ ਜਾਰੀ ਕੀਤਾ ਹੈ। ਮੀਡੀਆ 'ਚ ਆਈਆਂ ਖ਼ਬਰਾਂ ਮੁਤਾਬਿਕ ਪਾਕਿਸਤਾਨੀ ਖੁਫੀਆ ਏਜੰਸੀਆਂ ਵਟਸ ਐਪ ਰਾਹੀਂ ਭਾਰਤੀ ਫ਼ੌਜ ਦੀ ਨਿੱਜੀ ਜਾਣਕਾਰੀ ਹਾਸਲ...
ਕੋਲਕਾਤਾ ਦਿਨ ਰਾਤ ਟੈੱਸਟ ਮੈਚ : ਭਾਰਤ ਨੂੰ ਲੱਗਾ ਪਹਿਲਾ ਝਟਕਾ-26 ਦੇ ਸਕੋਰ 'ਤੇ ਮਅੰਕ ਅਗਰਵਾਲ 14 ਦੌੜਾਂ ਬਣਾ ਕੇ ਆਊਟ
. . .  about 2 hours ago
ਮਹਾਰਾਸ਼ਟਰ ਵਿਚ ਸਰਕਾਰ ਬਣਾਉਣ ਲਈ ਕਾਂਗਰਸ, ਐਨ.ਸੀ.ਪੀ. ਤੇ ਸ਼ਿਵ ਸੈਨਾ ਵਿਚਾਲੇ ਬੈਠਕ ਜਾਰੀ
. . .  about 2 hours ago
ਮੁੰਬਈ, 22 ਨਵੰਬਰ - ਮਹਾਰਾਸ਼ਟਰ ਵਿਚ ਨਵੀਂ ਸਰਕਾਰ ਦੇ ਗਠਨ ਨੂੰ ਲੈ ਕੇ ਬੈਠਕਾਂ ਦਾ ਦੌਰ ਜਾਰੀ ਹੈ। ਮੁੰਬਈ ਦੇ ਵਰਲੀ ਇਲਾਕੇ ਸਥਿਤ ਨਹਿਰੂ ਸੈਂਟਰ ਵਿਚ ਕਾਂਗਰਸ, ਸ਼ਿਵ ਸੈਨਾ ਤੇ ਐਨ.ਸੀ.ਪੀ. ਵਿਚਾਲੇ ਬੈਠਕ ਹੋ ਰਹੀ ਹੈ। ਇਸ ਬੈਠਕ 'ਚ ਤਿੰਨਾਂ ਪਾਰਟੀਆਂ ਦੇ ਵੱਡੇ ਵੱਡੇ ਨੇਤਾ...
ਹੋਰ ਖ਼ਬਰਾਂ..

ਫ਼ਿਲਮ ਅੰਕ

ਸ਼ਰਧਾ

ਉਸਾਰੂ ਸੋਚ ਰੱਖੋ

ਬੇਟੀ ਵੀ ਬਾਪ ਲਈ ਆਪਣੇ ਕੁਝ ਫ਼ਰਜ਼ ਰੱਖਦੀ ਹੈ ਤੇ ਇਹ ਫ਼ਰਜ਼ ਸ਼ਰਧਾ ਕਪੂਰ ਨਿਭਾਅ ਰਹੀ ਹੈ। ਇਹ ਤੇ ਸਭ ਨੂੰ ਪਤਾ ਹੈ ਕਿ ਬਾਲੀਵੁੱਡ ਦੇ ਥੰਮ੍ਹ ਅਭਿਨੇਤਾ ਰਹੇ ਸ਼ਕਤੀ ਕਪੂਰ ਦੀ ਬੇਟੀ ਹੈ ਸ਼ਰਧਾ ਕਪੂਰ, ਜਿਸ ਨੇ 55 ਸਾਲ ਪੁਰਾਣੀ ਆਪਣੇ ਅਭਿਨੇਤਾ ਬਾਪ ਸ਼ਕਤੀ ਕਪੂਰ ਦੀ ਤਸਵੀਰ ਆਪਣੇ ਇੰਸਟਾਗ੍ਰਾਮ ਖਾਤੇ 'ਚ ਪਾ ਕੇ ਲੋਕਾਂ ਨੂੰ ਸਵਾਲ ਕੀਤਾ ਕਿ ਪਛਾਣੋ ਇਸ ਫੋਟੋ 'ਚ ਉਸ ਦੇ ਪਿਤਾ ਜੀ ਕਿਥੇ ਹਨ ਜਾਂ ਕੌਣ ਹਨ? ਅਸਲ 'ਚ ਇਹ ਫੋਟੋ ਸ਼ਰਧਾ ਦੇ ਡੈਡੀ ਦੀ ਉਦੋਂ ਦੀ ਹੈ ਜਦ ਦਿੱਲੀ ਦੇ ਸਲਵਾਨ ਪਬਲਿਕ ਸਕੂਲ 'ਚ ਸਕੂਲ ਦੀ ਕ੍ਰਿਕਟ ਟੀਮ ਦੇ ਕਪਤਾਨ ਉਸ ਦੇ ਪਿਤਾ ਸ੍ਰੀ ਸ਼ਕਤੀ ਕਪੂਰ ਸਨ ਤੇ ਸਾਰੇ ਖਿਡਾਰੀਆਂ ਨਾਲ 'ਕਪਤਾਨ ਪਿਤਾ' ਦੀ ਫੋਟੋ ਹੈ। ਸ਼ਰਧਾ ਨੇ ਨਾਲ ਹੀ ਕਿਹਾ ਕਿ 700 ਫ਼ਿਲਮਾਂ 'ਚ ਕੰਮ ਕਰਨਾ, ਕਾਦਰ ਖ਼ਾਨ ਨਾਲ ਕਾਮੇਡੀ ਜੋੜੀ ਉਸ ਦੇ ਪਿਤਾ ਸ਼ਕਤੀ ਕਪੂਰ ਦੀਆਂ ਖੂਬੀਆਂ ਰਹੀਆਂ ਹਨ। ਨਕਾਰਾਤਮਕ ਪੱਖ ਕਦੇ ਆਪਣੇ 'ਤੇ ਭਾਰੂ ਨਾ ਹੋਣ ਦਿਓ, ਇਹ ਸਲਾਹ ਸ਼ਰਧਾ ਨੇ ਅੱਜ ਦੀਆਂ ਅਭਿਨੇਤਰੀਆਂ ਨੂੰ ਦਿੱਤੀ ਹੈ। 'ਛਿਛੋਰੇ', 'ਸਾਹੋ' ਸਫ਼ਲ ਫ਼ਿਲਮਾਂ ਹੁਣੇ ਜਿਹੇ ਹੀ ਆਈਆਂ ਹਨ ਸ਼ਰਧਾ ਦੀਆਂ। 'ਸਟੀਰਟ ਡਾਂਸਰ-3 ਡੀ' ਉਹ ਇਸ ਸਮੇਂ ਕਰ ਰਹੀ ਹੈ। ਸ਼ਰਧਾ ਕਹਿੰਦੀ ਹੈ ਕਿ ਦੀਵਾਲੀ ਆ ਰਹੀ ਹੈ ਤੇ ਮੈਂ ਇਸ ਮੌਕੇ 'ਤੇ ਦੇਸ਼ ਵਾਸੀਆਂ ਨੂੰ ਬੇਨਤੀ ਕਰਨੀ ਚਾਹੁੰਦੀ ਹਾਂ ਕਿ ਖੁਸ਼ੀ ਮਨਾਇਓ ਪਰ ਵਾਤਾਵਰਨ ਦਾ ਧਿਆਨ ਜ਼ਰੂਰ ਰੱਖਿਓ। ਹਵਾ ਗੰਦੀ ਨਾ ਹੋਵੇ ਤੇ ਕੰਨ ਸ਼ੋਰ ਨਾਲ ਨਾ ਦੁਖਣ।


ਖ਼ਬਰ ਸ਼ੇਅਰ ਕਰੋ

ਦਿਸ਼ਾ ਪਟਾਨੀ : 'ਰਾਧੇ' ਦਾ ਜਾਨਵਰ ਪ੍ਰੇਮ

ਦੀਵਾਲੀ 'ਤੇ ਲੋਕ ਆਤਿਸ਼ਬਾਜ਼ੀ ਖਰੀਦ ਕਰਦੇ ਹਨ ਜਾਂ ਫਿਰ ਹੋਰ ਚੀਜ਼ਾਂ ਪਰ ਅੱਜ ਦੇ ਫ਼ਿਲਮੀ ਸਿਤਾਰੇ ਦੀਵਾਲੀ ਦੇ ਨੇੜੇ-ਤੇੜੇ ਇਸ ਦੌੜ ਵਿਚ ਹਨ ਕਿ ਇੰਸਟਾਗ੍ਰਾਮ 'ਤੇ ਜ਼ਿਆਦਾ ਫੋਟੋਆਂ, ਪੋਸਟਾਂ ਤੇ ਦਿਲਚਸਪ ਪਲ ਕਿਹੜਾ ਸਿਤਾਰਾ ਜਾਂ ਹੀਰੋਇਨ ਪਾਉਂਦੀ ਹੈ। ਦਿਸ਼ਾ ਪਟਾਨੀ ਨੇ ਆਪ ਇਹ ਗੱਲ ਸਵੀਕਾਰ ਕੀਤੀ ਹੈ। ਦਿਸ਼ਾ ਨੇ ਇਕ ਵੀਡੀਓ ਲੱਭਿਆ ਜਾਂ ਬਣਾਇਆ, ਜਿਸ 'ਚ 36 ਘੰਟੇ ਤੱਕ ਰੇਲ ਦੀ ਪਟੜੀ 'ਤੇ ਜ਼ਖ਼ਮੀ ਪਿਆ ਹਾਥੀ ਦਿਖਾਇਆ ਗਿਆ ਹੈ। ਆਖਿਰ ਜਾਨਵਰਾਂ ਦੇ ਹਸਪਤਾਲ ਜਾ ਕੇ ਟਰੇਨ ਨਾਲ ਟੱਕਰ 'ਚ ਜ਼ਖ਼ਮੀ ਹੋਏ ਇਸ ਹਾਥੀ ਦੀ ਮੌਤ ਹੋ ਗਈ। ਦਿਸ਼ਾ ਬਹੁਤ ਰੋਈ ਤੇ ਉਸ ਨੇ ਲਿਖਿਆ ਕਿ 'ਬੇਜ਼ੁਬਾਨਿਆਂ' ਦੀ ਰੱਖਿਆ ਲਈ ਕੀ ਇਨਸਾਨ ਕਦੇ ਅੱਗੇ ਨਹੀਂ ਆਉਣਗੇ। ਖ਼ੈਰ ਦੀਵਾਲੀ 'ਤੇ ਦਿਸ਼ਾ ਪਟਾਨੀ ਨੇ ਇਨਸਾਨਾਂ ਨੂੰ ਇਹ ਸਵਾਲ ਕਰਕੇ ਲੋਕਾਂ ਦੀ ਡੂੰਘੀ ਹਮਦਰਦੀ ਪ੍ਰਾਪਤ ਕੀਤੀ ਹੈ। 'ਇੰਡੀਅਨ ਸੁਪਰ ਲੀਗ' ਦੀ ਸਟੇਜ 'ਤੇ ਪੁਰਾਣੇ ਮਿੱਤਰ ਟਾਈਗਰ ਸ਼ਰਾਫ਼ ਨਾਲ ਖੁੱਲ੍ਹ ਕੇ ਨੱਚਣ ਵਾਲੀ ਦਿਸ਼ਾ ਪਟਾਨੀ ਸਬੰਧੀ ਤਾਜ਼ਾ ਖ਼ਬਰ ਤੇ ਦਿਸ਼ਾ ਦੇ ਪ੍ਰਸੰਸਕਾਂ ਲਈ ਦੀਵਾਲੀ ਤੋਹਫ਼ਾ ਕਿ 2020 ਦੀ ਈਦ 'ਤੇ ਸਲਮਾਨ ਖ਼ਾਨ ਦੀ ਆ ਰਹੀ ਫ਼ਿਲਮ 'ਰਾਧੇ' ਦੇ ਇਕ ਖਾਸ ਗੀਤ 'ਚ ਜਾਨਵਰਾਂ ਦੀ ਹਮਦਰਦ ਦਿਸ਼ਾ ਨਜ਼ਰ ਆਏਗੀ। 'ਰਾਧੇ' ਦਾ ਨਿਰਦੇਸ਼ਕ ਪ੍ਰਭੂ ਦੇਵਾ ਹੈ। ਉਸ ਨੂੰ ਪ੍ਰਭਾਵਿਤ ਕਰਨ ਲਈ ਅੱਡੀ ਚੋਟੀ ਦਾ ਜ਼ੋਰ ਦਿਸ਼ਾ ਲਾ ਦੇਵੇਗੀ। ਪੁਰਾਣੇ ਸੱਜਣ ਕੰਮ ਆਏ ਤੇ ਟਾਈਗਰ ਹੀ ਦਿਸ਼ਾ ਨੂੰ 'ਡਾਂਸ' ਦੇ ਹੋਰ ਗੁਣ 'ਰਾਧੇ' ਫ਼ਿਲਮ ਲਈ ਸਿਖਾ ਰਿਹਾ ਹੈ। 'ਭਾਰਤ' ਵਾਲੀ 'ਰਾਧੇ' ਦਿਸ਼ਾ ਨੇ ਟਾਈਗਰ-ਰਿਤਿਕ ਦੀ 'ਵਾਰ' ਤੋਂ ਬਾਅਦ ਦੋਵਾਂ ਨੇ ਇੰਡਸਟਰੀ ਦੀ ਸੋਹਣੀ ਜੋੜੀ ਕਿਹਾ ਹੈ। ਟਾਈਗਰ ਨੂੰ ਫਿਰ ਉਹ ਮਨਾ ਰਹੀ ਹੈ ਤੇ ਰਿਤਿਕ ਦਾ ਸਾਥ ਉਸ ਨੂੰ ਮਿਲੇਗਾ ਹੀ... ਫਿਰ ਖਾਸ ਦੀਵਾਲੀ ਤਾਂ ਦਿਸ਼ਾ ਦੀ ਹੀ ਹੈ।

ਯਾਮੀ ਗੌਤਮ

ਪੁਆੜੇ ਨੰਬਰ ਦੇ

ਬਿਲਾਸਪੁਰ ਦੀਆਂ ਰਮਣੀਕ ਥਾਵਾਂ 'ਤੇ ਜਗਾਈਆਂ ਮੋਮਬੱਤੀਆਂ ਤੇ ਦੀਵੇ ਯਾਮੀ ਗੌਤਮ ਨੂੰ ਅੱਜ ਵੀ ਯਾਦ ਹਨ ਜਦ ਉਹ ਹਿੰਦੀ ਫ਼ਿਲਮ ਨਗਰੀ ਦੀ ਕਹਿੰਦੀ-ਕਹਾਉਂਦੀ ਨਾਇਕਾ ਹੈ ਤੇ ਦੱਖਣ ਦੀ ਸੁਪਰ-ਸਟਾਰ ਅਭਿਨੇਤਰੀ ਹੈ ਜਦ ਕਿ 'ਜੀ ਆਇਆਂ ਨੂੰ' ਉਸ ਲਈ ਪਾਲੀਵੁੱਡ ਨੇ ਵੀ ਹਮੇਸ਼ਾ ਸ਼ਬਦ ਵਰਤਿਆ ਹੈ। ਪੰਜਾਬੀ ਪਿਤਾ ਮੁਕੇਸ਼ ਗੌਤਮ ਦੀ ਇਹ ਅਭਿਨੇਤਰੀ ਬੇਟੀ ਨੂੰ ਪਹਾੜਨ ਮਾਂ ਦੀ ਗੁੜ੍ਹਤੀ ਨੇ ਸੁਭਾਅ ਦੀ ਤਰ੍ਹਾਂ ਹੀ ਰਮਣੀਕ ਬਣਾਇਆ ਹੈ। 'ਮਾਂ ਅੰਜਲੀ ਗੌਤਮ ਨਾਲ, ਦੀਦੀ ਸੁਰੀਲੀ ਨਾਲ ਚਾਹੇ ਕਈ 'ਦੀਵਾਲੀਆਂ' ਉਹ ਨਹੀਂ ਮਨਾ ਸਕੀ ਪਰ ਸੰਦੇਸ਼ ਦੇ ਇਸ ਜ਼ਮਾਨੇ 'ਚ 'ਵੀਡੀਓ ਕਾਲਿੰਗ' ਤੇ ਹੋਰ ਕਈ ਤਰ੍ਹਾਂ ਨਾਲ ਇਸ ਦਿਨ ਉਹ ਪਰਿਵਾਰ ਨਾਲ ਜੁੜੀ ਜ਼ਰੂਰ ਹੈ। ਪੁਲਿਸ ਦੀ ਥਾਣੇਦਾਰਨੀ ਬਣਨ ਦਾ ਸੁਪਨਾ, ਕਾਨੂੰਨ ਦੀ ਲਈ ਡਿਗਰੀ ਪਰ ਮਨ ਲੈ ਆਇਆ ਅਭਿਨੈ ਦੀ ਫੁਲਵਾੜੀ 'ਚ ਫੁੱਲ ਚਮੇਲੀ ਦਾ ਬਣ-ਮਹਿਕਣ ਲਈ। ਯਾਮੀ ਅੱਜ ਰਿਤਿਕ ਰੌਸ਼ਨ ਜਿਹੇ ਸੁਪਰ ਸਿਤਾਰੇ ਦੀ ਹੀਰੋਇਨ ਬਣ ਚੁੱਕੀ ਹੈ। ਪਹਾੜੀ ਭਾਸ਼ਾ ਤੇ ਪੰਜਾਬੀ ਉਸ ਦੀਆਂ ਘਰੇਲੂ ਭਾਸ਼ਾਵਾਂ ਤੇ ਹਿੰਦੀ, ਤਾਮਿਲ ਤੇ ਤੇਲਗੂ 'ਚ ਵੀ ਉਸ ਦੀ ਪਕੜ ਮਜ਼ਬੂਤ ਹੈ। ਤੈਰਾਕੀ, ਘਰ 'ਚ ਕੀਤਾ ਯੋਗਾ, ਕਲਰਜ਼ ਚੈਨਲ ਨਾਲ ਬਿਤਾਏ ਸੰਘਰਸ਼ ਦੇ ਦਿਨ ਕਦੇ ਉਹ ਭੁਲਾ ਸਕੇਗੀ, ਜਵਾਬ ਨਹੀਂ ਹੈ। 'ਵਿੱਕੀ ਡੋਨਰ' ਨਾਲ ਤਾਂ ਉਹ ਸਨਮਾਨ ਵੀ ਲੈ ਗਈ। 'ਉਰੀ' ਯਾਮੀ ਦੀ ਇਹ ਫ਼ਿਲਮ ਐਤਕਾਂ ਦਾ 'ਨੈਸ਼ਨਲ ਫ਼ਿਲਮ ਐਵਾਰਡ' ਲੈ ਕੇ ਉਸ ਦੀ ਦੀਵਾਲੀ ਸ਼ੁੱਭ ਬਣਾ ਚੁੱਕੀ ਹੈ। ਰਾਹੁਲ ਮਿਰਜ਼ਾ ਨੇ ਆਪਣੀ ਨਵੀਂ ਫ਼ਿਲਮ 'ਚ ਸ਼ਿਲਪਾ ਸ਼ੈਟੀ ਤੇ ਦਿਲਜੀਤ ਦੋਸਾਂਝ ਨਾਲ ਯਾਮੀ ਗੌਤਮ ਨੂੰ ਲਿਆ ਹੈ। ਯਾਮੀ ਲਈ ਮੁਸੀਬਤ ਤਾਂ ਪਿਛਲੇ ਦਿਨੀਂ ਘਰੇ ਆਈ ਜਦ ਇਕ 'ਐਪ' ਦੀ ਗੜਬੜੀ ਕਾਰਨ ਉਸ ਦਾ ਪਰਸਨਲ (ਨਿੱਜੀ) ਨੰਬਰ ਜਨਤਕ ਹੋ ਗਿਆ। ਸਾਰਾ ਦਿਨ ਤਰ੍ਹਾਂ-ਤਰ੍ਹਾਂ ਦੇ ਕਈ ਭੈੜੇ ਗੰਦੇ-ਮੰਦੇ ਫੋਨ ਆਏ ਤੇ ਯਾਮੀ ਬਹੁਤ ਪ੍ਰੇਸ਼ਾਨ ਰਹੀ। 'ਸਾਈਲੈਂਟ ਮੋਡ' ਵੀ ਕੰਮ ਨਹੀਂ ਆਇਆ। ਹੁਣ ਯਾਮੀ ਨੇ ਆਪਣਾ ਫੋਨ ਨੰਬਰ ਹੀ ਬਦਲ ਲਿਆ ਹੈ। 'ਵੱਡੇ ਤੇ ਸਿਤਾਰੇ ਹੋਣ ਦਾ ਇਹ ਨੁਕਸਾਨ ਵੀ ਉਠਾਉਣਾ ਪੈਂਦਾ ਹੈ' ਠੰਢਾ ਹਓਕਾ ਭਰਦੇ ਯਾਮੀ ਨੇ ਭੜਾਸ ਕੱਢੀ ਹੈ।

ਆਯੂਸ਼ਮਨ ਖੁਰਾਣਾ : 'ਬਾਲਾ' ਦਾ 'ਉਜੜਾ ਚਮਨ'

ਭੂਮੀ ਪੇਡਨੇਕਰ ਦੇ ਨਾਲ ਆਯੂਸਮਨ ਖੁਰਾਣਾ ਦੀ ਫ਼ਿਲਮ 'ਬਾਲਾ' ਆ ਰਹੀ ਹੈ, ਜਿਸ ਦਾ ਟਰੇਲਰ ਵਧੀਆ ਕਿਹਾ ਜਾ ਸਕਦਾ ਹੈ। 'ਬਾਲਾ' ਦੇ ਪ੍ਰਚਾਰ 'ਤੇ ਆਯੂਸ਼ ਪੂਰਾ ਜ਼ੋਰ ਵੱਖ-ਵੱਖ ਤਰੀਕਿਆਂ ਨਾਲ ਲਾ ਰਿਹਾ ਹੈ। ਇਸ ਦਾ ਹੀ ਹਿੱਸਾ ਆਯੂਸ਼ ਨੇ ਆਪਣੀ ਫੇਸਬੁੱਕ ਇੰਸਟਾਗ੍ਰਾਮ ਕਹਾਣੀ 'ਚ ਦਿਖਾਇਆ ਹੈ। ਇਕ ਮਜ਼ਾਹੀਆ ਵੀਡੀਓ ਪਾ ਕੇ ਜਿਥੇ ਇਕ ਸੈਲੂਨ 'ਚ ਵਾਲ ਕਟਵਾ ਰਹੇ ਵਿਅਕਤੀ ਨੂੰ ਵਾਰ-ਵਾਰ ਫੋਨ ਆ ਰਹੇ ਹਨ ਤੇ ਗੁੱਸੇ 'ਚ ਉਹ ਆਪਣੀ ਵਿੱਗ ਲਾਹ ਕੇ ਸੈਲੂਨ ਵਾਲੇ ਨੂੰ ਕਹਿੰਦਾ ਹੈ ਕਿ ਹੁਣ 'ਕੈਂਚੀ ਮਾਰ ਜਲਦੀ 'ਤੇ... ਵਾਲ... ਕੱਟ' ਤਾਂ ਉਥੇ ਬੈਠੇ ਗਾਹਕ ਹੱਸ ਪੈਂਦੇ ਹਨ। ਅਸਲ 'ਚ ਆਯੂਸ਼ਮਨ ਨੇ ਇਹ ਵੀ ਦਿਖਾਇਆ ਹੈ ਕਿ ਉਸ ਦੀ ਫ਼ਿਲਮ 'ਬਾਲਾ' ਵੀ ਅਜਿਹੀ ਹੀ ਮਜ਼ਾਹੀਆ ਕਿਰਦਾਰਾਂ ਵਾਲੀ ਫ਼ਿਲਮ ਹੈ। ਇਸ ਦੀਵਾਲੀ 'ਤੇ ਆਯੂਸ਼ਮਨ ਲਈ ਪੰਗਾ ਪਿਆ ਹੈ। ਬਾਲਾ ਦੀ 7 ਨਵੰਬਰ ਨੂੰ ਰਿਲੀਜ਼ ਹੈ, ਕਿਉਂਕਿ 'ਉਜੜਾ ਚਮਨ' ਫ਼ਿਲਮ ਦੇ ਅਭਿਸ਼ੇਕ ਅਨੁਸਾਰ 'ਬਾਲਾ' ਦਾ ਪੋਸਟਰ ਉਸ ਦੀ ਫ਼ਿਲਮ ਦੇ ਪੋਸਟਰ ਦੀ ਨਕਲ ਹੈ ਤੇ 'ਉਜੜਾ ਚਮਨ' 20 ਨੂੰ ਆ ਰਹੀ ਹੈ। ਕਿਤੇ ਦੀਵਾਲੀ 'ਤੇ ਕਾਨੂੰਨੀ ਲੜਾਈ ਆਯੂਸ਼ਮਨ ਦਾ ਚਮਨ ਉਜਾੜ ਨਾ ਦੇਵੇ।

ਦੀਵਾਲੀ ਫ਼ਿਲਮੀ ਸਿਤਾਰਿਆਂ ਦੀ

ਕੀ ਬਾਲੀਵੁੱਡ, ਕੀ ਟੀ.ਵੀ. ਦੀ ਦੁਨੀਆ, ਕੀ ਦੱਖਣ ਦੀ ਫ਼ਿਲਮ ਨਗਰੀ ਅਤੇ ਕੀ ਆਪਣਾ ਪਾਲੀਵੁੱਡ, ਸਾਰੇ ਹੀ ਦੀਵਾਲੀ 'ਤੇ ਰੌਸ਼ਨੀਆਂ ਸਜਾਉਂਦੇ, ਪੂਜਾ ਕਰਦੇ, ਈਸ਼ਵਰ ਦਾ ਸ਼ੁਕਰਾਨਾ ਕਰ ਵਧੀਆ ਪਕਵਾਨ ਤੇ ਮਠਿਆਈਆਂ ਖਾਂਦੇ, ਇਕ-ਦੂਜੇ ਨੂੰ ਤੋਹਫ਼ੇ ਦਿੰਦੇ ਹਨ। 'ਹੈਪੀ ਦੀਵਾਲੀ', 'ਸ਼ੁੱਭ ਦੀਵਾਲੀ' ਮਨਾਉਂਦੇ ਹਨ ਤੇ ਇਸ ਵਾਰ ਚਾਹੇ ਦੌਰ ਮੰਦੀ ਦਾ, ਸਾਡੇ-ਤੁਹਾਡੇ ਲਈ ਦੀਵਾਲੀ ਦਾ ਸੁਆਦ ਥੋੜ੍ਹਾ ਫਿੱਕਾ ਕਰੇ ਪਰ ਇਹ ਅਜਬ-ਗ਼ਜ਼ਬ ਨਗਰੀਆਂ ਦੀਵਾਲੀ ਧੂਮ-ਧਾਮ ਨਾਲ ਮਨਾਉਣਗੀਆਂ। ਪੂਰਾ ਬੱਚਨ ਪਰਿਵਾਰ ਅਮਿਤਾਭ, ਜਯਾ, ਅਭਿਸ਼ੇਕ, ਅਰਾਧਿਆ, ਸ਼ਵੇਤਾ, ਐਸ਼ਵਰਿਆ ਦੀਵਾਲੀ 'ਤੇ ਧਮਾਲ ਪਾਵੇਗਾ। ਪ੍ਰਾਹੁਣਿਆਂ ਦੀ ਲੰਬੀ ਸੂਚੀ ਬਣਾ ਉਨ੍ਹਾਂ ਨੂੰ ਸੱਦੇ ਦਿੱਤੇ ਗਏ ਹਨ। ਦੀਪਿਕਾ ਸਿੰਘ ਦੀ ਵਿਆਹ ਤੋਂ ਬਾਅਦ ਪਹਿਲੀ ਦੀਵਾਲੀ ਹੈ ਤੇ ਘਰੇ ਹੀ ਉਹ ਰਣਵੀਰ ਨਾਲ ਇਸ ਦਿਨ ਰੌਸ਼ਨੀਆਂ ਦੇ ਨਾਲ ਸੋਹਣੇ ਪਕਵਾਨ ਤਿਆਰ ਕਰੇਗੀ। ਲੂਲੀਆ ਵੈਂਤੁਰ ਹੁਣ ਭਾਰਤੀ ਸੰਸਕ੍ਰਿਤੀ ਦਾ ਗੂੜ੍ਹਾ ਗਿਆਨ ਹਾਸਲ ਕਰ ਚੁੱਕੀ ਹੈ ਤੇ ਸਲਮਾਨ ਖ਼ਾਨ ਨੂੰ ਤੋਹਫੇ ਦੇਣ ਤੋਂ ਬਾਅਦ ਘਰੇ ਲੜੀਆਂ ਦੀ ਸਜਾਵਟ ਕਰਨ ਜਾ ਰਹੀ ਹੈ। ਜਾਹਨਵੀ ਕਪੂਰ ਨੂੰ ਮਾਂ ਦੀ ਯਾਦ ਸਤਾਏਗੀ ਤੇ ਸਿਰਫ਼ ਦੀਵਾਲੀ ਸਮੇਂ ਚੰਦ ਰਸਮਾਂ ਹੀ ਉਹ ਕਰੇਗੀ। ਗੱਲ ਸੈਫ਼ ਅਲੀ ਖ਼ਾਨ ਤੇ ਕਰੀਨਾ ਕਪੂਰ ਦੀ ਤਾਂ ਲਕਸ਼ਮੀ ਪੂਜਾ ਬਹੁਤ ਜ਼ਰੂਰੀ ਹੈ, ਬੇਬੋ ਆਖਦੀ ਹੈ। ਸ਼ਾਹਰੁਖ ਖ਼ਾਨ ਦਾ ਸਾਫ਼ ਕਹਿਣਾ ਹੈ ਕਿ ਯਾਰਾਂ ਬਿਨਾਂ ਕਾਹਦੀ ਦੀਵਾਲੀ ਤੇ ਘਰ ਰੌਸ਼ਨ ਕਰੂ ਗੌਰੀ ਆਪਾਂ ਕਰਾਂਗੇ ਯਾਰ ਅਣਮੁੱਲਿਆਂ ਨਾਲ ਮੌਜਮਸਤੀ। ਕ੍ਰਿਸ਼ਮਾ ਕਪੂਰ ਕਹਿੰਦੀ ਹੈ ਕਿ ਪਿਛਲੀ ਵਾਰ ਉਹ ਦੀਵਾਲੀ 'ਤੇ ਨਵੇਂ ਕੱਪੜੇ ਨਹੀਂ ਸੀ ਪਾ ਸਕੀ ਪਰ ਐਤਕੀਂ ਅਨੁਸ਼ਕਾ ਸ਼ਰਮਾ ਦੀ ਤਰ੍ਹਾਂ ਮਹਿੰਗਾ ਸੂਟ ਤਾਂ ਉਸੇ ਹੀ ਦੁਕਾਨ ਤੋਂ ਲਿਆ ਹੈ, ਜਿਥੋਂ ਸ਼ਰਧਾ ਕਪੂਰ ਖਰੀਦਦੀ ਹੈ ਤੇ ਲੈ ਕੇ ਪਹਿਨਦੀ ਹੈ। ਕੈਟਰੀਨਾ ਕੈਫ਼ ਆਖਦੀ ਹੈ ਕਿ ਇਹ ਤਿਉਹਾਰ ਰੌਸ਼ਨੀਆਂ ਦਾ ਹੈ ਤੇ ਪਟਾਕੇ ਚਲਾਉਣ ਦੀ ਤਾਂ ਜ਼ਰੂਰਤ ਹੀ ਨਹੀਂ।
ਨਰਗਿਸ ਫਾਖਰੀ ਕਹਿ ਰਹੀ ਹੈ ਕਿ ਦੀਵਾਲੀ 'ਤੇ ਘਰ ਦੀ ਸਫ਼ਾਈ ਦਾ ਅਰਥ ਹੈ ਕਿ ਜੋ ਬੀਤ ਗਿਆ ਉਹ ਸਾਫ਼ ਕਰੋ ਤੇ ਨਵੇਂ ਸਿਰਿਉਂ ਜੀਵਨ ਦੀਵਿਆਂ ਦੀ ਲੋਅ ਨਾਲ ਸ਼ੁਰੂ ਕਰੋ। ਨਵਨੀਤ ਕੌਰ ਢਿੱਲੋਂ 'ਸ਼ੋਰ-ਸ਼ਰਾਬਾ' ਰਹਿਤ 'ਪ੍ਰਦੂਸ਼ਣ' ਭਰੇ ਵਾਤਾਵਰਨ 'ਚੋਂ ਨਿਕਲ ਕੇ ਪਿੰਡ ਆ ਕੇ ਢੇਰ ਸਾਰੀ ਰੌਸ਼ਨੀ ਕਰ ਕੇ ਦੀਵਾਲੀ ਮਨਾਏਗੀ, ਕਿਉਂਕਿ ਧੂੰਏਂ ਤੋਂ ਉਹਨੂੰ ਸੋਨਮ ਕਪੂਰ ਦੀ ਤਰ੍ਹਾਂ ਸਖ਼ਤ ਨਫ਼ਰਤ ਹੈ। 'ਦੇਹਰਾਦੂਨ' ਜਾ ਕੇ ਸੋਨਾਕਸ਼ੀ ਸਿਨਹਾ ਦੀਵਾਲੀ ਦਾ ਪਹਿਲਾ ਦੀਵਾ ਜਗਾਏਗੀ।
ਰੌਲਾ ਮੁਕਤ ਦੀਵਾਲੀ ਮਨਾਉਣ ਦੀ ਗੱਲ ਮਾਨ ਸਾਹਬ ਹੋਰੀਂ ਵੀ ਕਰ ਰਹੇ ਨੇ ਤੇ ਨੀਰੂ ਬਾਜਵਾ ਵੀ। ਕਵਿਤਾ ਕੌਸ਼ਲ, ਸੁਖਮਿੰਦਰ ਧੰਜਲ, ਬੀਨੂੰ ਢਿੱਲੋਂ ਤੇ ਗੁਰਪ੍ਰੀਤ ਘੁੱਗੀ ਦਾ ਕਹਿਣਾ ਹੈ ਕਿ ਖੂਬ ਮਸਤੀ, ਖੂਬ ਖਾਣਾ ਪਰ ਪਟਾਕੇ ਨਹੀਂ, ਇਹੀ ਸਾਡੀ ਦੀਵਾਲੀ ਹੈ। ਮਨਮੋਹਨ ਵਾਰਿਸ, ਕਮਲ ਹੀਰ, ਸੰਗਤਾਰ ਤੇ ਵਨੀਤ ਅਟਵਾਲ ਕਹਿੰਦੇ ਨੇ ਘਰ ਰੌਸ਼ਨ ਕਰੋ ਪਰ ਕਿਸੇ ਨੂੰ ਨੁਕਸਾਨ ਪਹੁੰਚਾਉਣ ਵਾਲੇ ਕੰਮ ਨਾ ਕਰੋ। ਗੁਰਦੀਪ ਸੰਧੂ, ਜਸ਼ਨ ਅਗਨੀਹੋਤਰੀ, ਸੰਦੀਪ ਕੰਬੋਜ, ਜੱਸੀ ਬੰਗਾ ਤੇ ਦਰਸ਼ਨ ਔਲਖ ਪਾਲੀਵੁੱਡ ਦੇ ਮਹਾਂਰਥੀ ਦੱਸਦੇ ਹਨ ਕਿ ਪਲਾਸਟਿਕ ਦੀ ਬਾਲਟੀ ਨੇ ਟੁੱਟੀਆਂ ਬੋਤਲਾਂ ਨਾਲ ਪਟਾਕੇ ਢਕ ਕੇ ਨਿੱਕੇ ਹੁੰਦੇ ਉਹ ਚਲਾਉਂਦੇ ਸਨ, ਤਾਂ ਜੋ ਆਵਾਜ਼ ਤੇਜ਼ ਹੋਵੇ ਪਰ ਇਹ ਬਚਪਨ ਦੀਆਂ ਸ਼ਰਾਰਤਾਂ ਹਨ, ਹੁਣ ਸਿਰਫ਼ 'ਹਰੀ-ਭਰੀ ਦੀਵਾਲੀ' ਮਨਾਵਾਂਗੇ।
ਗੱਲ ਕੀ ਦੀਵਾਲੀ ਹਮੇਸ਼ਾ ਹੀ ਆਪਣਿਆਂ ਤੇ ਪਿਆਰੇ ਲੋਕਾਂ ਨਾਲ ਸਮਾਂ ਬਿਤਾਉਣਾ, ਘਰ ਲਾਈਟਾਂ ਨਾਲ ਰੌਸ਼ਨ ਕਰਨ ਦਾ ਦਿਨ ਰਿਹਾ ਹੈ। ਕੰਗਨਾ ਰਣੌਤ ਜੇ ਇਸ ਦਿਨ ਘਰੇ ਸੁੰਦਰ ਰੰਗੋਲੀ ਬਣਾਉਂਦੀ ਆਈ ਹੈ ਤਾਂ ਜਪੁਜੀ ਖਹਿਰਾ, ਦਿਲਜੋਤ, ਕਮਲ ਖੰਗੂਰਾ, ਮੰਨਤ ਸਿੰਘ ਗੁਰੂ ਘਰ ਜਾ ਕੇ ਕੀਰਤਨ ਸਰਵਣ ਕਰਨ ਨਾਲ ਦੀਵਾਲੀ ਨੂੰ ਸ਼ੁੱਭ ਮੰਨਦੇ ਹਨ। ਲਓ ਫਰਹਾ ਖ਼ਾਨ, ਕਰਨ ਜੌਹਰ ਕਹਿ ਰਹੇ ਨੇ 'ਜ਼ੋਇਯਾ ਫੈਕਟਰ', 'ਖਾਨਦਾਨੀ ਸ਼ਫ਼ਾਖਾਨਾ', 'ਇੰਡੀਅਨ ਮੋਸਟ ਵਾਂਟੇਡ', 'ਜਬਰੀਆ ਜੋੜੀ', 'ਏਕ ਲੜਕੀ ਕੋ ਦੇਖਾ', 'ਕਲੰਕ' ਆਦਿ ਫ਼ਿਲਮਾਂ ਨੇ ਇਨ੍ਹਾਂ ਦੇ ਨਿਰਮਾਤਾਵਾਂ ਦਾ ਦਿਵਾਲਾ ਦੀਵਾਲੀ ਤੋਂ ਪਹਿਲਾਂ ਕੱਢ ਦਿੱਤਾ ਹੈ। ਇਕ ਮੰਦੀ ਸਾਡੀ ਤੇ ਇਕ ਮੰਦੀ ਇਨ੍ਹਾਂ ਦੀ ਪਰ ਦੀਵਾਲੀ ਹੈ, ਹੋਰ ਨਹੀਂ ਤਾਂ ਸਰ੍ਹੋਂ ਦਾ ਤੇਲ ਪਾ ਕੇ ਦੀਵੇ ਹੀ ਜਗਾ ਲਏ ਜਾਣ।
ਦੀਵਾਲੀ ਦਿਨ ਖ਼ੁਸ਼ੀਆਂ ਦਾ ਗਿੱਪੀ ਗਰੇਵਾਲ ਤੋਂ ਲੈ ਕੇ ਪ੍ਰੀਤ ਮੁਹੱਦੀਪੁਰ, ਭੂਮੀ ਪੇਡਨੇਕਰ ਤੋਂ ਤਾਪਸੀ ਪੰਨੂ, ਦਿਸ਼ਾ ਪਟਾਨੀ ਤੋਂ ਸਿਧਾਰਥ ਨਿਗਮ ਆਪਣੇਪਨ ਦੀ ਮਿਠਾਸ, ਕਿਤੇ ਕਲਾ-ਦਵਾਤ ਇਸ ਦਿਨ ਪੂਜਾ ਉਨ੍ਹਾਂ ਅਨੁਸਾਰ ਹੁੰਦੀ ਹੈ। ਹਾਂ ਬੰਦੀ ਛੋੜ ਦਿਵਸ ਪੰਜਾਬੀ ਫ਼ਿਲਮਾਂ ਵਾਲੇ ਕਹਿੰਦੇ ਨੇ ਇਸ ਦਿਨ ਮਨਾਈਦਾ ਹੈ। 'ਦਾਲ ਰੋਟੀ ਘਰ ਦੀ ਤੇ ਦੀਵਾਲੀ ਅੰਮ੍ਰਿਤਸਰ ਦੀ' ਦਾ ਚੇਤਾ ਇਕਬਾਲ ਢਿੱਲੋਂ, ਯੋਗਰਾਜ ਸਿੰਘ ਦਿਵਾਉਂਦੇ ਹਨ।
ਕੁੱਲ ਮਿਲਾ ਕੇ ਬਾਲੀਵੁੱਡ ਤੇ ਪਾਲੀਵੁੱਡ ਸਭ ਦਾ ਸੁਨੇਹਾ ਹੈ ਕਿ ਜ਼ਰੂਰਤਮੰਦਾਂ ਦੀ ਮਦਦ ਕਰੋ, ਪਰਿਵਾਰ ਨਾਲ ਖ਼ੁਸ਼ੀਆਂ ਵੰਡੋ। ਤੋਹਫ਼ੇ ਦਿਓ, ਲਵੋ, ਆਲਾ-ਦੁਆਲਾ ਸਾਫ਼ ਰੱਖੋ, ਚੰਗੇ ਖਾਣੇ ਬਣਾਓ, ਇਹੀ ਹੈ ਪ੍ਰਦੂਸ਼ਣ ਰਹਿਤ ਘੱਟ ਆਤਿਸ਼ਬਾਜ਼ੀ ਵਾਲੀ ਦੀਵਾਲੀ। ਅਕਸ਼ੈ ਕੁਮਾਰ, ਟਾਈਗਰ ਸ਼ਰਾਫ਼ ਤੋਂ ਇਧਰ ਪਾਲੀਵੁੱਡ ਗੁਰਨਾਮ ਭੁੱਲਰ, ਸਰਗੁਣ ਮਹਿਤਾ, ਅਮਰਿੰਦਰ ਗਿੱਲ, ਪ੍ਰਵੀਨ ਅਖ਼ਤਰ, ਐਮੀ ਵਿਰਕ ਸਭ ਦਾ ਕਹਿਣਾ ਹੈ ਕਿ ਜਗਮਗ ਸਭ ਪਾਸੇ ਹੋਵੇ, ਦੀਵੇ ਸਾਰੀ ਰਾਤ ਬਲਦੇ ਰਹਿਣ, ਪਟਾਕਿਆਂ ਦੀ ਘੱਟ ਵਰਤੋਂ ਤੇ ਸੰਜਮ-ਸਾਵਧਾਨੀ ਨਾਲ ਮਿਲ ਕੇ ਬਾਲੀਵੁੱਡ-ਪਾਲੀਵੁੱਡ ਤੇ ਟੈਲੀਵੁੱਡ ਮਨਾਏ। ਸ਼ੁੱਭ ਦੀਵਾਲੀ ਸਾਰੇ ਕਹੋ ਪਰ ਨੁਕਸਾਨ ਤੋਂ ਬਚ ਕੇ ਰਹੋ ਜ਼ਿਆਦਾ ਸਾਵਧਾਨ।

ਥਾਈਲੈਂਡ ਤੋਂ ਆਈ ਐਨ. ਮਿਤਚਾਈ

ਵਿਦੇਸ਼ੀ ਕਲਾਕਾਰਾਂ ਦਾ ਬਾਲੀਵੁੱਡ ਵੱਲ ਆਕਰਸ਼ਿਤ ਹੋਣਾ ਹੁਣ ਨਵੀਂ ਗੱਲ ਨਹੀਂ ਹੈ। ਹਾਂ, ਨਵੀਂ ਗੱਲ ਇਹ ਜ਼ਰੂਰ ਹੈ ਕਿ ਹੁਣ ਥਾਈਲੈਂਡ ਦੇ ਕਲਾਕਾਰ ਵੀ ਬਾਲੀਵੁੱਡ ਵਿਚ ਚਮਕਣਾ ਚਾਹੁੰਦੇ ਹਨ। ਉਥੋਂ ਦੀ ਨਾਮੀ ਕਲਾਕਾਰ ਤੇ ਗਾਇਕਾ ਐਨ. ਮਿਤਚਾਈ ਨੇ ਹੁਣ ਬਾਲੀਵੁੱਡ ਦੇ ਦਰਵਾਜ਼ੇ 'ਤੇ ਦਸਤਕ ਦਿੱਤੀ ਹੈ।
ਐਨ. ਮਿਤਚਾਈ ਗਾਇਕਾ ਦੇ ਨਾਲ-ਨਾਲ ਸ਼ਾਸਤਰੀ ਨ੍ਰਿਤ ਵਿਚ ਵੀ ਮਾਹਿਰ ਹੈ। ਉਹ ਦੁਨੀਆ ਦੇ ਕਈ ਦੇਸ਼ਾਂ ਵਿਚ ਸ਼ੋਅ ਪੇਸ਼ ਕਰ ਚੁੱਕੀ ਹੈ ਅਤੇ ਹੁਣ ਆਪਣੇ ਨਵੇਂ ਐਲਬਮ 'ਪ੍ਰਿਆਵਤਾਰ' ਦੇ ਉਦਘਾਟਨ ਮੌਕੇ ਉਸ ਨੇ ਮੁੰਬਈ ਮਹਾਨਗਰ 'ਤੇ ਆਪਣੀ ਪਸੰਦ ਉਤਾਰੀ। ਐਲਬਮ ਰਿਲੀਜ਼ ਮੌਕੇ ਉਸ ਨੇ ਬਾਲੀਵੁੱਡ ਦੀਆਂ ਕਈ ਹਸਤੀਆਂ ਨੂੰ ਸੱਦਾ ਭੇਜਿਆ ਸੀ ਅਤੇ ਉਸ ਦੇ ਸੱਦੇ ਨੂੰ ਮਾਣ ਦਿੰਦੇ ਹੋਏ ਉਦਘਾਟਨ ਸਮਾਰੋਹ ਵਿਚ ਸੰਗੀਤਕਾਰ ਦਲੀਪ ਸੇਨ ਤੇ ਨਿਖਿਲ ਕਾਮਤ, ਗਾਇਕਾ ਮਧੂਸ੍ਰੀ, ਆਰਤੀ ਨਾਗਪਾਲ, ਪੰਕਜ ਬੇਰੀ, ਪੀਹੂ ਚੌਹਾਨ ਆਦਿ ਪਹੁੰਚੇ ਸਨ ਅਤੇ ਨਿਰਦੇਸ਼ਕ ਮੇਹੁਲ ਕੁਮਾਰ ਦੇ ਹੱਥੋਂ ਐਲਬਮ ਦੇ ਉਦਘਾਟਨ ਦੀ ਰਸਮ ਅਦਾ ਕੀਤੀ ਗਈ।
ਮਿਤਚਾਈ ਅਨੁਸਾਰ ਉਹ ਬਚਪਨ ਤੋਂ ਹੀ ਹਿੰਦੀ ਫ਼ਿਲਮਾਂ ਵੱਲ ਆਕਰਸ਼ਿਤ ਰਹੀ ਹੈ। ਪੰਜ ਸਾਲ ਦੀ ਉਮਰ ਵਿਚ ਜਦੋਂ ਉਹ ਗਾਇਕੀ ਦੇ ਗੁਰ ਸਿੱਖ ਰਹੀ ਸੀ, ਉਦੋਂ ਉਸ ਦਾ ਪਸੰਦੀਦਾ ਗੀਤ 'ਪਾਕੀਜ਼ਾ' ਦਾ 'ਇਨਹੀਂ ਲੋਗੋਂ ਨੇ...' ਸੀ ਅਤੇ ਅੱਜ ਵੀ ਇਹ ਗੀਤ ਉਸ ਦਾ ਪਸੰਦੀਦਾ ਗੀਤ ਹੈ। ਉਹ ਜਿਥੇ ਕਿਤੇ ਸ਼ੋਅ ਕਰਨ ਜਾਂਦੀ ਹੈ ਤਾਂ ਉਥੇ ਭਾਰਤੀ ਦਰਸ਼ਕ ਵੀ ਮੌਜੂਦ ਹੁੰਦੇ ਹਨ ਅਤੇ ਉਨ੍ਹਾਂ ਨੂੰ ਧਿਆਨ ਵਿਚ ਰੱਖ ਕੇ 'ਢੋਲੀ ਤਾਰੋ ਢੋਲ...' ਤੇ 'ਮੁੰਨੀ ਬਦਨਾਮ ਹੂਈ...' ਜ਼ਰੂਰੀ ਗਾਉਂਦੀ ਹੈ ਅਤੇ ਵਾਹਵਾਹੀ ਖੱਟਦੀ ਹੈ। ਇਹੀ ਨਹੀਂ, ਉਹ ਗਾਂਧੀ ਜੀ ਦਾ ਪਸੰਦੀਦਾ ਭਜਨ 'ਵੈਸ਼ਣਵ ਜਨ ਤੋ...' ਵੀ ਗਾਉਣਾ ਪਸੰਦ ਕਰਦੀ ਹੈ। ਇਹ ਉਸ ਦੀ ਗਾਇਕੀ ਦਾ ਹੀ ਕਮਾਲ ਕਿਹਾ ਜਾਵੇਗਾ ਕਿ ਨਰਿੰਦਰ ਮੋਦੀ ਤੇ ਸੁਸ਼ਮਾ ਸਵਰਾਜ ਨੇ ਵੀ ਉਸ ਦੀ ਗਾਇਕੀ ਦੀ ਤਾਰੀਫ਼ ਕੀਤੀ ਸੀ। ਥਾਈਲੈਂਡ ਦੀ ਇਸ ਅਭਿਨੇਤਰੀ-ਗਾਇਕਾ ਦੀ ਇੱਛਾ ਹੁਣ ਬਾਲੀਵੁੱਡ ਵਿਚ ਨਾਂਅ ਕਮਾਉਣ ਦੀ ਹੈ ਅਤੇ ਉਸ ਅਨੁਸਾਰ ਇਥੇ ਉਸ ਨੂੰ ਉਤਸ਼ਾਹਪੂਰਨ ਹੁੰਗਾਰਾ ਮਿਲ ਰਿਹਾ ਹੈ।


-ਮੁੰਬਈ ਪ੍ਰਤੀਨਿਧ

ਹਰ ਸਵੇਰ ਝੋਲਾ ਚੁੱਕ ਕੇ ਕੰਮ ਲੱਭਣ ਨਿਕਲ ਪੈਂਦੀ ਸੀ

ਸ਼ੁਭਾ ਰਾਜਪੂਤ

ਜੰਮੂ ਦੀ ਰਹਿਣ ਵਾਲੀ ਸ਼ੁਭਾ ਰਾਜਪੂਤ ਨੇ ਇੰਜੀਨੀਅਰਿੰਗ ਦੀ ਪੜ੍ਹਾਈ ਪੂਰੀ ਕਰ ਲੈਣ ਤੋਂ ਬਾਅਦ ਜਦੋਂ ਇਕ ਮਲਟੀਨੈਸ਼ਨਲ ਕੰਪਨੀ ਵਿਚ ਨੌਕਰੀ ਕਰਨੀ ਸ਼ੁਰੂ ਕੀਤੀ ਤਾਂ ਉਸ ਦੇ ਘਰਵਾਲੇ ਉਸ ਦਾ ਵਿਆਹ ਕਰਨ ਬਾਰੇ ਸੋਚਣ ਲੱਗੇ ਅਤੇ ਸਹੀ ਮੁੰਡੇ ਦੀ ਭਾਲ ਸ਼ੁਰੂ ਕਰ ਦਿੱਤੀ। ਸ਼ੁਭਾ ਆਪਣੀ ਜ਼ਿੰਦਗੀ ਵਿਚ ਕਾਫ਼ੀ ਕੁਝ ਕਰਨਾ ਚਾਹੁੰਦੀ ਸੀ ਅਤੇ ਉਸ ਨੂੰ ਲੱਗਿਆ ਕਿ ਉਸ ਦੇ ਸੁਪਨਿਆਂ ਦੇ ਆੜੇ ਉਸ ਦਾ ਵਿਆਹ ਆ ਸਕਦਾ ਹੈ। ਉਸ ਦੀ ਇੱਛਾ ਅਭਿਨੈ ਵਿਚ ਨਾਂਅ ਕਮਾਉਣ ਦੀ ਵੀ ਸੀ। ਸੋ, ਘਰ ਵਾਲਿਆਂ ਸਾਹਮਣੇ ਆਪਣੇ ਦਿਲ ਦੀ ਗੱਲ ਕਹੀ। ਮੁੰਬਈ ਜਾਣ ਲਈ ਉਸ ਨੇ ਛੇ ਮਹੀਨੇ ਦਾ ਸਮਾਂ ਮੰਗ ਲਿਆ ਅਤੇ ਘਰ ਵਾਲਿਆਂ ਨੇ ਵੀ ਇਹ ਸੋਚ ਕੇ ਇਜਾਜ਼ਤ ਦੇ ਦਿੱਤੀ ਕਿ ਏਨੀ ਜਲਦੀ ਕਿਥੇ ਉਸ ਨੂੰ ਫ਼ਿਲਮਾਂ ਵਿਚ ਕੰਮ ਮਿਲ ਜਾਵੇਗਾ ਅਤੇ ਆਪੇ ਉਹ ਵਾਪਸ ਆ ਜਾਵੇਗੀ। ਪਰ ਸ਼ੁਭਾ ਨੇ ਉਨ੍ਹਾਂ ਨੂੰ ਗ਼ਲਤ ਸਾਬਤ ਕੀਤਾ। ਉਹ ਆਪਣੇ ਦਮ 'ਤੇ ਫ਼ਿਲਮਾਂ ਵਿਚ ਕੰਮ ਹਾਸਲ ਕਰਨ ਵਿਚ ਕਾਮਯਾਬ ਰਹੀ।
ਆਪਣੇ ਸੰਘਰਸ਼ ਬਾਰੇ ਉਹ ਕਹਿੰਦੀ ਹੈ, 'ਇਥੇ ਮੈਂ ਪਹਿਲੀ ਵਾਰ ਆ ਰਹੀ ਸੀ। ਮੁੰਬਈ ਵਿਚ ਮੇਰਾ ਕੋਈ ਜਾਣੂ ਨਹੀਂ ਸੀ। ਇਸ ਅਣਜਾਣ ਸ਼ਹਿਰ ਵਿਚ ਮੈਨੂੰ ਇਹ ਵੀ ਪਤਾ ਨਹੀਂ ਸੀ ਕਿ ਯਸ਼ ਰਾਜ ਸਟੂਡੀਓ ਕਿਥੇ ਹੈ ਅਤੇ ਫ਼ਿਲਮਸਿਟੀ ਸਟੂਡੀਓ ਕਿਸ ਇਲਾਕੇ ਵਿਚ ਹੈ। ਮੈਨੂੰ ਇਹ ਵੀ ਪਤਾ ਨਹੀਂ ਸੀ ਕਿ ਇਥੇ ਅਸਲੀ ਫ਼ਿਲਮ ਨਿਰਮਾਤਾ ਕਿਹੜਾ ਹੈ ਅਤੇ ਫਰਾਡ ਨਿਰਮਾਤਾ ਕਿਹੜਾ। ਇਥੇ ਮੇਰਾ ਕੋਈ ਗਾਡ ਫਾਦਰ ਨਹੀਂ ਸੀ। ਸੋ, ਖ਼ੁਦ ਹੀ ਆਪਣਾ ਰਸਤਾ ਬਣਾਉਣਾ ਸੀ। ਮੈਨੂੰ ਐਡ ਫ਼ਿਲਮਾਂ ਤੋਂ ਆਪਣੀ ਸ਼ੁਰੂਆਤ ਕਰਨਾ ਸਹੀ ਲੱਗਿਆ ਅਤੇ ਮੈਂ ਐਡ ਏਜੰਸੀਆਂ ਦੇ ਚੱਕਰ ਲਗਾਉਣੇ ਸ਼ੁਰੂ ਕਰ ਦਿੱਤੇ। ਹਰ ਸਵੇਰ ਮੈਂ ਝੋਲਾ ਚੁੱਕ ਕੇ ਨਿਕਲ ਪੈਂਦੀ ਸੀ। ਉਸ ਵਿਚ ਕੱਪੜੇ ਤੇ ਰੋਟੀ ਵਾਲਾ ਡੱਬਾ ਹੁੰਦਾ ਸੀ, ਤਾਂ ਕਿ ਆਡੀਸ਼ਨ ਦੌਰਾਨ ਜਿਵੇਂ ਜ਼ਰੂਰਤ ਹੋਵੇ ਉਸ ਅਨੁਸਾਰ ਖ਼ੁਦ ਨੂੰ ਤਿਆਰ ਕਰ ਸਕਾਂ। ਮੇਰੀ ਮਿਹਨਤ ਰੰਗ ਲਿਆਉਣ ਲੱਗੀ ਅਤੇ ਮੈਨੂੰ ਐਡ ਫ਼ਿਲਮਾਂ ਮਿਲਣ ਲੱਗੀਆਂ। ਫਿਰ ਵੱਡੇ ਪਰਦੇ 'ਤੇ ਚਮਕਣ ਦਾ ਮੌਕਾ 'ਸਨਸ਼ਾਈਨ ਮਿਊਜ਼ਿਕ ਟੂਰਸ ਐਂਡ ਟ੍ਰੈਵਲਸ' ਫ਼ਿਲਮ ਰਾਹੀਂ ਮਿਲਿਆ ਅਤੇ ਹੁਣ ਮੇਰੀ ਦੂਜੀ ਫ਼ਿਲਮ 'ਯਾਰਮ' ਵੀ ਰਿਲੀਜ਼ ਹੋ ਰਹੀ ਹੈ।
'ਯਾਰਮ' ਵਿਚ ਸ਼ੁਭਾ ਵਲੋਂ ਮੀਰਾ ਦਾ ਕਿਰਦਾਰ ਨਿਭਾਇਆ ਗਿਆ ਹੈ ਅਤੇ ਇਸ ਵਿਚ ਪ੍ਰਤੀਕ ਬੱਬਰ ਤੇ ਸਿਧਾਂਤ ਕਪੂਰ ਵੀ ਹੈ। ਸ਼ੁਭਾ ਅਨੁਸਾਰ ਇਨ੍ਹਾਂ ਦੋਵਾਂ ਨੇ ਫ਼ਿਲਮ ਇੰਡਸਟਰੀ ਵਿਚ ਆਪਣੀਆਂ ਅੱਖਾਂ ਖੋਲ੍ਹੀਆਂ ਹਨ। ਸੋ, ਸ਼ੂਟਿੰਗ ਦਾ ਤਾਮ-ਝਾਮ ਉਸ ਲਈ ਨਵੀਂ ਗੱਲ ਨਹੀਂ ਸੀ, ਜਦ ਕਿ ਫ਼ਿਲਮੀ ਮਾਹੌਲ ਵਿਚ ਨਵੀਂ ਹੋਣ ਦੀ ਵਜ੍ਹਾ ਕਰਕੇ ਸ਼ੁਭਾ ਕਾਫ਼ੀ ਘਬਰਾਈ ਹੋਈ ਸੀ। ਪਰ ਪ੍ਰਤੀਕ ਤੇ ਸਿਧਾਂਤ ਨੇ ਉਸ ਨੂੰ ਕਦੀ ਇਹ ਮਹਿਸੂਸ ਨਹੀਂ ਹੋਣ ਦਿੱਤਾ ਕਿ ਉਹ ਨਵੀਂ ਹੈ। ਸ਼ੁਭਾ ਅਨੁਸਾਰ ਫ਼ਿਲਮ ਵਿਚ ਉਸ ਵਲੋਂ ਚੰਗਾ ਅਭਿਨੈ ਕਰ ਸਕਣਾ ਸਿਹਰਾ ਇਨ੍ਹਾਂ ਦੋਵਾਂ ਨੂੰ ਜਾਂਦਾ ਹੈ। ਹੁਣ ਕਾਸਟਿੰਗ ਏਜੰਟ ਕੁਨਾਲ ਸ਼ਾਹ ਦੀ ਮਦਦ ਨਾਲ ਸ਼ੁਭਾ ਨੂੰ ਦੋ ਹੋਰ ਫ਼ਿਲਮਾਂ ਮਿਲੀਆਂ ਹਨ ਪਰ ਉਹ ਇਸ ਬਾਰੇ ਤਦ ਹੀ ਗੱਲ ਕਰਨਾ ਚਾਹੇਗੀ, ਜਦੋਂ ਸ਼ੂਟਿੰਗ ਸ਼ੁਰੂ ਹੋਵੇਗੀ, ਕਿਉਂਕਿ ਫ਼ਿਲਮ ਸ਼ੁਰੂ ਹੋਣ ਦਰਮਿਆਨ ਕਾਫ਼ੀ ਕੁਝ ਬਦਲ ਜਾਂਦਾ ਹੈ, ਉਸ ਨੇ ਦੇਖਿਆ ਹੈ ਤੇ ਅਨੁਭਵ ਵੀ ਕਰ ਚੁੱਕੀ ਹੈ।
ਉਮੀਦ ਹੈ ਕਿ ਆਪਣੀਆਂ ਅਗਾਮੀ ਫ਼ਿਲਮਾਂ ਬਾਰੇ ਗੱਲ ਕਰਨ ਦਾ ਮੌਕਾ ਉਸ ਨੂੰ ਜਲਦੀ ਹੀ ਮਿਲੇਗਾ।


-ਮੁੰਬਈ ਪ੍ਰਤੀਨਿਧ

ਸੁਪਨਾ ਸਟਾਰ ਬਣਨ ਦਾ ਹੈ-ਸੰਦੀਪ ਕੰਬੋਜ

'ਮਜਾਜਣ', 'ਕੌਣ ਕਿਸੇ ਦਾ ਬੇਲੀ' ਫ਼ਿਲਮਾਂ 'ਚ ਕੰਮ ਕਰਕੇ ਅੱਜ ਤੋਂ 10 ਸਾਲ ਪਹਿਲਾਂ ਸੰਦੀਪ ਕੰਬੋਜ ਨੇ ਆਪਣਾ ਅਭਿਨੈ ਸਫ਼ਰ ਸ਼ੁਰੂ ਕੀਤਾ ਸੀ। ਆਸਟ੍ਰੇਲੀਆ ਵਾਸੀ ਸੰਦੀਪ ਨੇ ਕਿਹਾ ਕਿ ਬਚਪਨ ਦੇ ਸ਼ੌਕ ਹਮੇਸ਼ਾ ਕਿਤੇ ਨਾ ਕਿਤੇ ਜਾ ਕੇ ਪੂਰੇ ਹੋਣ ਵੱਲ ਕਦਮ ਪੁਟਦੇ ਹਨ। ਬਸ ਲਗਨ, ਸੰਘਰਸ਼, ਮਿਹਨਤ ਤੇ ਜਜ਼ਬਾ ਹੋਣਾ ਚਾਹੀਦਾ ਹੈ। ਸ਼ੁਰੂਆਤ ਉਸ ਨੇ ਸੁਰਜੀਤ ਭੁੱਲਰ, ਸਤਵਿੰਦਰ ਬਿੱਟੀ, ਸ਼ੇਰਾ ਬੋਹੜਵਾਲੀਆ ਨਾਲ ਸਟੇਜ ਐਂਕਰਿੰਗ ਤੋਂ ਕੀਤੀ ਤੇ ਨਾਲ ਹੀ ਕੁਝ ਗੀਤਾਂ 'ਚ ਮਾਡਲਿੰਗ ਵੀ ਜਦ ਕਿ ਆਸਟ੍ਰੇਲੀਆ ਜਾ ਕੇ ਉਸ ਨੇ ਜਿਥੇ ਅਭਿਨੈ ਦੇ ਹੋਰ ਗੁਣ ਹਾਸਲ ਕੀਤੇ, ਉਥੇ ਕੁਝ ਉਤਪਾਦਾਂ ਲਈ ਚਿਹਰਾ ਵੀ ਦਿਖਾਇਆ। ਹੁਣ ਫਿਰ ਕੁਝ ਦੇਰ ਲਈ ਇੰਡੀਆ ਆ ਕੇ ਸੰਦੀਪ ਨੇ 'ਸ਼ੂਦਰ ਏ ਖ਼ਾਲਸਾ' ਬਾਲੀਵੁੱਡ ਫ਼ਿਲਮ 'ਚ ਨੈਗੇਟਿਵ ਕਿਰਦਾਰ ਕੀਤਾ ਹੈ ਜਦਕਿ 'ਕਰਜ਼ਾ' ਫ਼ਿਲਮ 'ਚ ਉਹ ਹੀਰੋ ਦੀ ਭੂਮਿਕਾ ਨਿਭਾਉਣ ਜਾ ਰਿਹਾ ਹੈ। ਭੂਸ਼ਨ ਮਦਾਨ, ਇਕਬਾਲ ਢਿੱਲੋਂ, ਵਨੀਤ ਅਟਵਾਲ ਤੇ ਠਾਕਰ ਤਪੱਸਵੀ ਤੋਂ ਪ੍ਰਭਾਵਿਤ ਸੰਦੀਪ ਕੰਬੋਜ ਨੇ ਦੱਸਿਆ ਕਿ ਮਸ਼ਹੂਰ ਫ਼ਿਲਮ ਅਦਾਕਾਰ ਯੋਗਰਾਜ ਸਿੰਘ ਨੂੰ ਉਹ ਆਪਣਾ 'ਰੋਲ ਮਾਡਲ' ਸਮਝਦਾ ਹੈ ਤੇ ਸਖ਼ਤ ਸੰਘਰਸ਼ ਕਰਕੇ ਉਹ ਪਾਲੀਵੁੱਡ ਦਾ ਸਟਾਰ ਅਦਾਕਾਰ ਬਣਨਾ ਚਾਹੁੰਦਾ ਹੈ। ਆਪਣੀ ਐਕਟਿੰਗ, ਵਿਅਕਤੀਗਤ 'ਤੇ ਦਿਖ 'ਤੇ ਉਸ ਨੂੰ ਪੂਰਾ ਵਿਸ਼ਵਾਸ ਹੈ। ਅੱਜ ਦੇ ਪਾਲੀਵੁੱਡ 'ਚ ਨਵੀਂ ਤਕਨੀਕ ਦੀ ਵਰਤੋਂ ਤੇ ਸੁਧਾਰਾਂ ਤੋਂ ਖੁਸ਼ ਸੰਦੀਪ ਨੂੰ ਉਮੀਦ ਹੈ ਕਿ ਜਲਦੀ ਹੀ ਪ੍ਰਤਿਭਾ ਦੀ ਕਦਰ ਹੋਵੇਗੀ ਨਾ ਕਿ 'ਸੈਲੀਬ੍ਰਿਟੀ' ਪਿੱਛੇ ਹੀ ਨਿਰਮਾਤਾ ਘੁੰਮਣਗੇ।


-ਅੰਮ੍ਰਿਤ ਪਵਾਰ

ਆਵਿਕਾ ਗੋਰ ਕੰਮ ਦੇ ਮੌਕੇ ਰੋਜ਼-ਰੋਜ਼ ਨਹੀਂ ਮਿਲਦੇ

ਲੜੀਵਾਰ 'ਬਾਲਿਕਾ ਵਧੂ' ਵਿਚ ਨੰਨ੍ਹੀ ਆਨੰਦੀ ਦਾ ਕਿਰਦਾਰ ਨਿਭਾਅ ਕੇ ਜ਼ਬਰਦਸਤ ਕਾਮਯਾਬੀ ਹਾਸਲ ਕਰਨ ਵਾਲੀ ਆਵਿਕਾ ਗੋਰ ਨੇ ਜਵਾਨੀ ਵਿਚ ਕਦਮ ਰੱਖਣ ਤੋਂ ਬਾਅਦ 'ਸਸੁਰਾਲ ਸਿਮਰ ਕਾ' ਲੜੀਵਾਰ ਦੀ ਬਦੌਲਤ ਵੀ ਚੰਗਾ ਨਾਂਅ ਕਮਾਇਆ ਸੀ। ਬਚਪਨ ਵਿਚ ਦਿੱਤੇ ਗਏ ਕਈ ਇੰਟਰਵਿਊ ਵਿਚ ਉਹ ਵੱਡੀ ਹੋ ਕੇ ਮਿਸ ਯੂਨੀਵਰਸ ਬਣਨ ਦੀ ਗੱਲ ਕਿਹਾ ਕਰਦੀ ਸੀ। ਉਦੋਂ ਸੁੰਦਰਤਾ ਪ੍ਰਤੀਯੋਗਤਾ ਦੀ ਜੇਤੂ ਬਣਨ ਦਾ ਸੁਪਨਾ ਸੰਜੋਅ ਕੇ ਰੱਖਣ ਵਾਲੀ ਆਵਿਕਾ ਹੁਣ ਤੇਲਗੂ ਫ਼ਿਲਮਾਂ ਦੀ ਨਾਮੀ ਸਟਾਰ ਬਣ ਗਈ ਹੈ। ਉਥੋਂ ਦੇ ਰੁਝੇਵਿਆਂ ਦੀ ਵਜ੍ਹਾ ਕਰਕੇ ਆਵਿਕਾ ਦੀ ਬਾਲੀਵੁੱਡ ਤੋਂ ਦੂਰੀ ਬਣ ਗਈ ਸੀ। ਹਾਂ, ਉਸ ਦੇ ਚਾਹੁਣ ਵਾਲਿਆਂ ਲਈ ਚੰਗੀ ਖ਼ਬਰ ਇਹ ਹੈ ਕਿ ਉਸ ਨੇ ਇਕ ਵੀਡੀਓ ਐਲਬਮ ਵਿਚ ਕੰਮ ਕੀਤਾ ਹੈ ਅਤੇ ਇਸ ਐਲਬਮ ਦਾ ਨਾਂਅ ਹੈ 'ਡਾਗੀ'। ਇਸ ਵਿਚ ਇਸ਼ਾਨ ਖਾਨ ਵਲੋਂ ਗਾਇਆ ਗੀਤ ਹੈ ਅਤੇ ਇਸ ਦੇ ਬੋਲ ਹਨ 'ਤੇਰੇ ਤੋਂ ਚੰਗਾ ਤੇਰਾ ਡਾਗੀ ਮੈਨੂੰ ਪਿਆਰ ਕਰਦਾ...'। ਇਸ਼ਾਨ ਤੇ ਆਵਿਕਾ 'ਤੇ ਇਹ ਗੀਤ ਥਾਈਲੈਂਡ ਵਿਚ ਸ਼ੂਟ ਕੀਤਾ ਗਿਆ ਹੈ ਅਤੇ ਇਕ ਕੁੱਤੇ ਨੂੰ ਵੀ ਇਸ ਵਿਚ ਚਮਕਾਇਆ ਗਿਆ ਹੈ।
ਇਹ ਆਵਿਕਾ ਦਾ ਪਹਿਲਾ ਵੀਡੀਓ ਐਲਬਮ ਹੈ। ਇਸ ਲਈ ਹਾਂ ਕਹਿਣ ਬਾਰੇ ਉਹ ਕਹਿੰਦੀ ਹੈ, 'ਨਾ ਕਹਿਣ ਦਾ ਤਾਂ ਸਵਾਲ ਹੀ ਨਹੀਂ ਸੀ। ਪਹਿਲੀ ਗੱਲ ਤਾਂ ਇਹ ਕਿ ਮੈਨੂੰ ਪੰਜਾਬੀ ਗੀਤ ਪਸੰਦ ਹਨ। ਜਦੋਂ ਵੀ ਸਮਾਂ ਮਿਲਦਾ ਹੈ ਤਾਂ ਮੈਂ ਪੰਜਾਬੀ ਗੀਤ ਸੁਣਦੀ ਤੇ ਦੇਖਦੀ ਹਾਂ। ਕਾਫੀ ਸਮੇਂ ਤੋਂ ਇੱਛਾ ਸੀ ਕਿ ਕਾਸ਼! ਮੈਨੂੰ ਕੋਈ ਪੰਜਾਬੀ ਵੀਡੀਓ ਦੀ ਪੇਸ਼ਕਸ਼ ਮਿਲੇ। ਦੂਜੀ ਗੱਲ ਇਹ ਕਿ ਇਸ ਵੀਡੀਓ ਵਿਚ ਇਕ ਕੁੱਤੇ ਤੋਂ ਵੀ ਕੰਮ ਲਿਆ ਗਿਆ ਹੈ। ਮੈਂ ਖ਼ੁਦ 'ਐਨੀਮਲ ਲਵਰ' ਹਾਂ ਅਤੇ ਮੈਂ ਕੁੱਤਾ ਵੀ ਪਾਲ ਰੱਖਿਆ ਹੈ। ਇਹ ਵੀਡੀਓ ਥਾਈਲੈਂਡ ਵਿਚ ਸ਼ੂਟ ਹੋਣਾ ਸੀ। ਸੋ, ਮੈਂ ਆਪਣੇ ਮੰਮੀ-ਪਾਪਾ ਨੂੰ ਨਾਲ ਲੈ ਗਈ ਸੀ। ਉਥੇ ਦੋ ਦਿਨ ਸ਼ੂਟਿੰਗ ਕਰਨ ਤੋਂ ਬਾਅਦ ਮੈਂ ਘੁੰਮਣ ਚਲੀ ਗਈ। ਇਸ ਤਰ੍ਹਾਂ ਇਹ ਸ਼ੂਟਿੰਗ ਮੇਰੇ ਲਈ ਪਿਕਨਿਕ ਵਰਗੀ ਸੀ। ਇਸ ਤਰ੍ਹਾਂ ਦੇ ਕੰਮ ਕਰਨ ਦੇ ਮੌਕੇ ਭਲਾ ਰੋਜ਼-ਰੋਜ਼ ਥੋੜ੍ਹਾ ਮਿਲਦੇ ਹਨ।'
ਹੁਣ ਆਵਿਕਾ ਦੀ ਇਕ ਤੇਲਗੂ ਫ਼ਿਲਮ 'ਰਾਜੁ ਗਾਰੀ ਗਾਧੀ' ਪ੍ਰਦਰਸ਼ਿਤ ਹੋਣ ਵਾਲੀ ਹੈ ਅਤੇ ਇਹ ਡਰਾਉਣੀ ਫ਼ਿਲਮ ਹੈ। ਆਵਿਕਾ ਅਨੁਸਾਰ ਉਹ ਇਸ ਵਿਚ ਦਰਸ਼ਕਾਂ ਨੂੰ ਡਰਾਏਗੀ ਅਤੇ ਫ਼ਿਲਮ ਦੇ ਕੁਝ ਦ੍ਰਿਸ਼ਾਂ ਵਿਚ ਆਪਣਾ ਮੇਕਅੱਪ ਦੇਖ ਕੇ ਉਹ ਖ਼ੁਦ ਤੋਂ ਹੀ ਡਰਨ ਲੱਗੀ ਸੀ।
ਹਾਂ, ਰਹੀ ਗੱਲ ਮਿਸ ਯੂਨੀਵਰਸ ਦੀ ਤੇ ਹੁਣ ਉਹ ਬਤੌਰ ਪ੍ਰਤੀਯੋਗੀ ਨਹੀਂ ਪਰ ਬਤੌਰ ਜੱਜ ਇਸ ਵਿਚ ਹਿੱਸਾ ਲੈਣਾ ਚਾਹੁੰਦੀ ਹੈ। ਦੇਖੋ, ਇਸ ਪ੍ਰਤੀਯੋਗਤਾ ਤੋਂ ਉਸ ਨੂੰ ਜੱਜ ਦੀ ਕੁਰਸੀ 'ਤੇ ਬੈਠਣ ਦਾ ਬੁਲਾਵਾ ਕਦੋਂ ਆਉਂਦਾ ਹੈ।

ਬਚਪਨ ਤੋਂ ਹੀ ਦਿਲ ਵਿਚ ਡਰ ਬੈਠਿਆ ਹੋਇਆ ਹੈ : ਵਿਕਾਸ ਵਰਮਾ

ਫ਼ਿਲਮ 'ਮੋਮ' ਵਿਚ ਸ੍ਰੀਦੇਵੀ ਦੀ ਬੇਟੀ 'ਤੇ ਕਹਿਰ ਢਾਹ ਕੇ ਦਰਸ਼ਕਾਂ ਦੇ ਦਿਲਾਂ ਵਿਚ ਆਪਣਾ ਡਰ ਪੈਦਾ ਕਰਨ ਵਾਲੇ ਵਿਕਾਸ ਵਰਮਾ ਖ਼ੁਦ ਨੂੰ ਡਰਪੋਕ ਇਨਸਾਨ ਦੱਸਦੇ ਹਨ। ਹਾਲ ਹੀ ਵਿਚ ਪ੍ਰਦਰਸ਼ਿਤ ਹੋਈ ਫ਼ਿਲਮ 'ਮੈਂ ਜ਼ਰੂਰ ਆਊਂਗਾ' ਵਿਚ ਉਨ੍ਹਾਂ ਨੂੰ ਅਰਬਾਜ਼ ਖਾਨ ਦੀ ਲਾਸ਼ ਤੋਂ ਡਰਦੇ ਦਿਖਾਇਆ ਗਿਆ ਸੀ। ਫ਼ਿਲਮ ਦੇ ਕਈ ਦ੍ਰਿਸ਼ਾਂ ਵਿਚ ਉਹ ਲਾਸ਼ ਦੇਖ ਕੇ ਹੈਰਾਨ ਹੋ ਜਾਂਦੇ ਹਨ। ਵਿਕਾਸ ਅਨੁਸਾਰ ਇਹ ਉਨ੍ਹਾਂ ਦਾ ਕੁਦਰਤੀ ਅਭਿਨੈ ਸੀ, ਕਿਉਂਕਿ ਉਸ ਨੂੰ ਸੌਖਿਆਂ ਹੀ ਡਰਾਇਆ ਜਾ ਸਕਦਾ ਹੈ।
ਆਪਣੇ ਡਰ ਬਾਰੇ ਉਹ ਕਹਿੰਦੇ ਹਨ, 'ਪਤਾ ਨਹੀਂ ਕਿਉਂ ਬਚਪਨ ਤੋਂ ਹੀ ਦਿਲ ਵਿਚ ਡਰ ਬੈਠਿਆ ਹੋਇਆ ਹੈ ਅਤੇ ਅੱਜ ਵੀ ਇਸ ਡਰ ਨੂੰ ਮੈਂ ਬਾਹਰ ਨਹੀਂ ਕੱਢ ਸਕਿਆ ਹਾਂ। ਇਸ ਡਰ ਦੀ ਵਜ੍ਹਾ ਨਾਲ ਮੈਂ ਆਪਣੇ ਘਰ ਵਿਚ ਕਦੀ ਇਕੱਲਾ ਨਹੀਂ ਸੌਂਦਾ। ਪੂਰੀ ਰਾਤ ਲਾਈਟ ਜਗਾ ਕੇ ਸੌਂਦਾ ਹਾਂ। ਮੈਂ ਇਕ ਕੁੱਤਾ ਤੇ ਬਿੱਲੀ ਪਾਲੇ ਹੋਏ ਹਨ ਜੋ ਰਾਤ ਨੂੰ ਮੇਰੇ ਕਮਰੇ ਵਿਚ ਸੌਂਦੇ ਹਨ। ਜਦੋਂ 'ਮੈਂ ਜ਼ਰੂਰ ਆਊਂਗਾ' ਦੀ ਸ਼ੂਟਿੰਗ ਲਈ ਸਵਿਟਜ਼ਰਲੈਂਡ ਗਿਆ ਸੀ ਤਾਂ ਉਥੇ ਵੀ ਪੂਰੀ ਰਾਤ ਹੋਟਲ ਦੇ ਕਮਰੇ ਦੀ ਲਾਈਟ ਜਗਾ ਕੇ ਸੌਂਦਾ ਸੀ। ਸਭ ਤੋਂ ਜ਼ਿਆਦਾ ਡਰ ਉਸ ਰਾਤ ਲੱਗਿਆ ਜਦੋਂ ਅਸੀਂ ਉਥੇ ਅਰੋਸਾ ਵਿਚ ਇਕ ਬੰਦ ਪਏ ਹੋਟਲ ਵਿਚ ਸ਼ੂਟਿੰਗ ਕਰ ਰਹੇ ਸੀ। ਸਾਨੂੰ ਦੱਸਿਆ ਗਿਆ ਸੀ ਕਿ ਕਾਫ਼ੀ ਸਮੇਂ ਤੋਂ ਇਹ ਹੋਟਲ ਬੰਦ ਪਿਆ ਹੋਇਆ ਹੈ। ਉਸ ਵਿਰਾਨ ਜਿਹੇ ਹੋਟਲ ਵਿਚ ਕੋਈ ਨਹੀਂ ਰਹਿ ਰਿਹਾ ਸੀ। ਮੇਰੇ ਦਿਲ ਦੀਆਂ ਧੜਕਣਾਂ ਉਦੋਂ ਤੋਜ਼ ਹੋ ਗਈਆਂ ਸਨ ਜਦੋਂ ਉੱਪਰ ਦੇ ਕਮਰੇ ਤੋਂ ਥਪ-ਥਪ ਦੀ ਆਵਾਜ਼ ਆਈ। ਇੰਜ ਲੱਗਿਆ ਕਿ ਕੋਈ ਦੌੜ ਕੇ ਗਿਆ ਹੋਵੇ। ਸੱਚ ਇਹ ਵੀ ਸੀ ਕਿ ਉੱਪਰ ਦੀ ਪੂਰੀ ਮੰਜ਼ਿਲ ਖਾਲੀ ਸੀ ਤੇ ਫਿਰ ਉਹ ਆਵਾਜ਼ ਕਿਥੋਂ ਆਈ ਇਹ ਅੱਜ ਤੱਕ ਸਮਝ ਨਹੀਂ ਸਕਿਆ ਹਾਂ। ਉਸ ਰਾਤ ਮੈਂ ਯੂਨਿਟ ਵਾਲਿਆਂ ਦੇ ਕਮਰੇ ਵਿਚ ਸੁੱਤਾ ਹੋਇਆ ਸੀ। ਡਰ ਦੀ ਵਜ੍ਹਾ ਨਾਲ ਨਾ ਤਾਂ ਮੈਂ ਡਰਾਉਣੀ ਫ਼ਿਲਮ ਦੇਖਦਾ ਹਾਂ ਤੇ ਨਾ ਹੀ ਡਰਾਉਣੀਆਂ ਕਹਾਣੀਆਂ ਪੜ੍ਹਦਾ ਹਾਂ। ਦਿਲ ਵਿਚ ਵਸੇ ਡਰ ਤੋਂ ਛੁਟਕਾਰਾ ਪਾਉਣ ਲਈ ਮੈਂ ਇਸ ਡਰਾਉਣੀ ਫ਼ਿਲਮ ਵਿਚ ਕੰਮ ਕੀਤਾ। ਫ਼ਿਲਮ ਤਾਂ ਰਿਲੀਜ਼ ਹੋ ਗਈ ਪਰ ਡਰ ਤੋਂ ਛੁਟਕਾਰਾ ਨਹੀਂ ਪਾ ਸਕਿਆ ਹਾਂ।
ਆਪਣੇ ਡਰ ਬਾਰੇ ਬੇਝਿਜਕ ਗੱਲ ਕਰਨ ਵਾਲੇ ਵਿਕਾਸ ਹੁਣ ਬਤੌਰ ਖ਼ਲਨਾਇਕ 'ਕੁਲੀ ਨੰ 1' ਵਿਚ ਦਿਸਣਗੇ। ਫ਼ਿਲਮ ਵਿਚ ਉਨ੍ਹਾਂ ਦੇ ਕਿਰਦਾਰ ਦਾ ਨਾਂਅ ਕੁੰਵਰ ਮਹਿੰਦਰ ਪ੍ਰਤਾਪ ਸਿੰਘ ਹੈ ਅਤੇ ਉਹ ਇਸ ਵਿਚ ਇਕਲੌਤੇ ਖ਼ਲਨਾਇਕ ਹਨ। ਉਹ ਲੜੀਵਾਰ 'ਜੈ ਮਾਂ ਵੈਸ਼ਣੋ ਦੇਵੀ' ਵਿਚ ਵੀ ਕੰਮ ਕਰ ਰਹੇ ਹਨ ਅਤੇ ਇਸ ਵਿਚ ਉਨ੍ਹਾਂ ਦੀ ਭੂਮਿਕਾ ਕਲੀ ਦੀ ਹੈ।
ਦੇਖੋ, ਇਸ ਧਾਰਮਿਕ ਲੜੀਵਾਰ ਵਿਚ ਕੰਮ ਕਰਨ ਤੋਂ ਬਾਅਦ ਉਨ੍ਹਾਂ ਨੂੰ ਆਪਣੇ ਅੰਦਰ ਵਸੇ ਡਰ 'ਤੇ ਜਿੱਤ ਹਾਸਲ ਕਰਨ ਵਿਚ ਕਾਮਯਾਬੀ ਮਿਲਦੀ ਹੈ ਜਾਂ ਨਹੀਂ।

ਜੈਕਲਿਨ

ਮੋਟੀ ਕਮਾਈ

ਕਮਾਲ ਹੈ ਦੋ ਮਿੰਟ 16 ਸੈਕਿੰਡ ਦੇ ਗਾਣੇ ਲਈ ਜੈਕਲਿਨ ਫਰਨਾਂਡਿਜ਼ ਨੇ ਦੋ ਕਰੋੜ ਦੀ ਫੀਸ ਪ੍ਰਾਪਤ ਕੀਤੀ ਹੈ। 'ਸਾਹੋ' ਦੇ ਇਸ ਗਾਣੇ 'ਚ ਕੰਮ ਕਰ ਕੇ ਮੋਟੇ ਪੈਸੇ ਪ੍ਰਾਪਤ ਕਰ ਕੇ ਜੈਕੀ ਨੇ ਦਰਸਾ ਦਿੱਤਾ ਹੈ ਕਿ ਉਸ ਦਾ ਆਕਰਸ਼ਣ ਬਰਕਰਾਰ ਹੈ। ਇਧਰ ਨਵੇਂ ਵੀਡੀਓ, ਜਿਸ 'ਚ ਜੈਕੀ ਨੇ ਟੈਟੂ ਬਣਵਾਇਆ ਹੈ, ਨਾਲ ਫਿਰ ਉਹ ਚਰਚਾ ਲੈ ਰਹੀ ਹੈ। 'ਮਿੱਤਰਾਂ ਦੀ ਟੋਲੀ' ਨਾਲ ਜੈਕੀ ਆਪਣਾ ਟੈਟੂ ਬਣਵਾ ਰਹੀ ਹੈ। 'ਅਲਾਦੀਨ' ਤੋਂ 'ਕਿੱਕ' ਤੱਕ ਕਾਮਯਾਬ ਇਹ ਨਾਇਕਾ ਚਾਹੇ ਇਸ ਸਮੇਂ 'ਡਰਾਈਵ' ਫ਼ਿਲਮ 'ਤੇ ਵੀ ਨਿਰਭਰ ਹੈ ਪਰ ਦੋ ਸੈਕਿੰਡ ਦੇ ਗਾਣੇ ਲਈ 2 ਕਰੋੜ ਦੀ ਕਮਾਈ ਸਬੂਤ ਹੈ ਕਿ ਹਾਲੇ ਉਸ 'ਚ ਬਹੁਤ ਦਮ-ਖਮ ਹੈ। 'ਡਰਾਈਵ' ਦੀ ਰਿਲੀਜ਼ ਤਰੀਕ ਵੀ ਲਾਗੇ ਆ ਗਈ ਹੈ। ਫ਼ਿਲਮ ਦਾ ਪਹਿਲਾ ਗਾਣਾ 'ਮੱਖਣਾ' ਆ ਗਿਆ ਹੈ। ਜੈਕੀ ਅਨੁਸਾਰ ਇਹ ਇਕ ਮਜ਼ੇਦਾਰ ਗੀਤ ਹੈ। 'ਡਰਾਈਵ' ਇਕ ਐਕਸ਼ਨ ਥ੍ਰਿਲਰ ਫ਼ਿਲਮ ਹੈ। ਸੈਲਫ਼ੀ ਕੈਮਰਾ ਅੰਦਾਜ਼ 'ਚ ਫ਼ਿਲਮਾਇਆ ਇਹ ਗਾਣਾ 'ਮੱਖਣਾ' ਜ਼ਰੂਰ 'ਬੈਡ ਬੁਆਏ' ਦੀ ਤਰ੍ਹਾਂ ਜੈਕਲਿਨ ਨੂੰ ਉਚਾਈਆਂ 'ਤੇ ਪਹੁੰਚਾਏਗਾ। ਨੈਟਫਲਿਕਸ 'ਤੇ ਜੈਕਲਿਨ ਨੂੰ ਮਾਣ ਹੈ ਕਿ ਉਹ 'ਡਰਾਈਵ' ਦੀ ਸ਼ਾਨਦਾਰ ਰਿਲੀਜ਼ ਕਰੇਗੀ। ਯੂ-ਟਿਊਬ ਦੀ ਸਨਸਨੀ ਲਿੱਲੀ ਸਿੰਘ ਨਾਲ ਜੈਕੀ ਨੇ ਖਾਸ ਤੌਰ 'ਤੇ ਮੁਲਾਕਾਤ ਕੀਤੀ। ਜੈਕੀ ਨੇ ਉਸ ਦਾ ਨਾਂਅ 'ਸੁਪਰ ਵੋਮੈਨ' ਪਾਇਆ ਹੈ। ਇਧਰ ਸਲਮਾਨ ਖ਼ਾਨ ਨਾਲ ਉਸ ਦੀ ਹੋਰ ਫ਼ਿਲਮ ਆਉਣ ਨੂੰ ਤਿਆਰ ਹੈ। 'ਮਿਸਿਜ਼ ਸੀਰੀਅਲ ਕਿਲਰ' ਡਿਜੀਟਲ ਲੜੀ ਵੀ ਜੈਕਲਿਨ ਨੇ ਕੀਤੀ ਹੈ। ਸੋਸ਼ਲ ਮੀਡੀਆ 'ਤੇ ਬਲਾਗ ਉਹ ਨਿਰੰਤਰ ਲਿਖ ਰਹੀ ਹੈ। 'ਟਰੈਵਲ ਲੰਕਾਜ਼' ਵੀਡੀਓ ਯੂ-ਟਿਊਬ 'ਤੇ ਪਾ ਕੇ ਜੈਕੀ ਨੇ ਆਪਣੇ 'ਮੁਲਕ ਪਿਆਰ' ਦੀ ਝਲਕ ਦਿਖਾਈ ਹੈ। ਆਪਣੇ-ਆਪ ਨੂੰ 'ਜਲ ਪਰੀ' ਕਹਾ ਰਹੀ ਮਿਸ ਜੈਕਲਿਨ ਫਰਨਾਡਿਜ਼ 'ਕਿੱਕ-2' ਨਾਲ ਫਿਰ ਸਲਮਾਨ ਦੀ ਜੋੜੀ ਦਾਰ ਬਣ ਕੇ ਸਾਹਮਣੇ ਵੀ ਆ ਰਹੀ ਹੈ। ਜੈਕਲਿਨ ਫਰਨਾਡਿਜ਼ ਵਿਹਲੀ ਨਹੀਂ ਹੈ।

ਨੁਸਰਤ ਭਰੁਚਾ

'ਤੁੱਰਮ ਖ਼ਾਨ' ਦੀ 'ਡਰੀਮ ਗਰਲ'

ਹੰਸਲ ਮਹਿਤਾ ਦੀ ਫ਼ਿਲਮ 'ਤੁੱਰਮ ਖ਼ਾਨ' ਨੂੰ 31 ਜਨਵਰੀ, 2020 ਰਿਲੀਜ਼ ਦੀ ਮਿਤੀ ਮਿਲੀ ਹੈ। ਇਸ ਫ਼ਿਲਮ 'ਚ ਨੁਸਰਤ ਭਰੁਚਾ ਦੇ ਨਾਲ ਰਾਜਕੁਮਾਰ ਰਾਵ ਹੈ। 'ਲਵ ਸੈਕਸ ਔਰ ਧੋਖਾ' ਫ਼ਿਲਮ 'ਚ ਨੁਸਰਤ ਪਹਿਲੀ ਵਾਰ ਰਾਜਕੁਮਾਰ ਰਾਵ ਨਾਲ ਆਈ ਸੀ। 'ਡਰੀਮ ਗਰਲ' ਫ਼ਿਲਮ ਦੀ ਸਫ਼ਲਤਾ ਨੇ ਨੁਸਰਤ ਨੂੰ ਉਤਸ਼ਾਹਿਤ ਕੀਤਾ ਹੈ। ਇਸ ਤੋਂ ਖ਼ੁਸ਼ ਨੁਸਰਤ 10 ਦਿਨ ਦੀਆਂ ਛੁੱਟੀਆਂ ਮਨਾਉਣ ਥਾਈਲੈਂਡ ਆਪਣੀਆਂ ਸਹੇਲੀਆਂ ਨਾਲ ਗਈ ਹੈ। ਥਾਈਲੈਂਡ 'ਚ ਨੁਸਰਤ ਨੇ ਫੁਕੇਟ ਦਾ ਪੁਰਾਣਾ ਸ਼ਹਿਰ ਵੀ ਦੇਖਿਆ। ਕਾਫ਼ੀ ਦੀਆਂ ਦੁਕਾਨਾਂ 'ਤੇ ਮਸਤੀ ਵੀ ਕੀਤੀ। ਹਰ ਰਾਤ ਉਹ ਉਥੇ ਪਾਰਟੀ ਕਰ ਰਹੀ ਹੈ। ਨੁਸਰਤ ਨੇ ਆਪਣੇ ਗਰੁੱਪ ਦੀ ਪ੍ਰਧਾਨਗੀ ਕੀਤੀ ਹੈ ਤੇ ਨਿਯਮ ਬਣਾਇਆ ਹੈ ਕਿ ਥਾਈਲੈਂਡ 'ਚ ਜਾਗਣਾ ਜ਼ਿਆਦਾ ਤੇ ਸੌਣਾ ਘੱਟ ਹੈ। ਸਮੁੰਦਰ ਕਿਨਾਰੇ ਰੋਜ਼ ਜਾ ਕੇ ਉਹ ਆਪਣੇ ਮਨ ਨੂੰ ਤਾਜ਼ਗੀ ਦੇ ਰਹੀ ਹੈ। ਲਹਿਰਾਂ 'ਤੇ ਪਾਣੀ ਦੀ ਖੇਡ ਦੇਖ ਕੇ ਉਹ ਰੁਮਾਂਟਿਕ ਹੋ ਰਹੀ ਹੈ। ਬਾਕੀ 'ਡਰੀਮ ਗਰਲ' ਹਿੱਟ ਹੈ ਤੇ ਅਗਾਂਹ 'ਤੁੱਰਮ ਖ਼ਾਨ' ਚੰਗੀ ਫ਼ਿਲਮ ਬਣ ਰਹੀ ਹੈ। 'ਸੋਨੂੰ ਕੇ ਟੀਟੂ ਕੀ ਸਵੀਟੀ' ਫ਼ਿਲਮ ਨਾਲ ਉਹ ਲੋਕਾਂ ਵਿਚਕਾਰ ਵਿਚਰੀ ਪਰ ਉਹ ਮਹਿਸੂਸ ਕਰਦੀ ਹੈ ਕਿ ਇਥੇ ਆਪਣੀ 'ਦਿਖ ਬਦਲ ਲੈਣੀ' ਸਭ ਤੋਂ ਔਖਾ ਕੰਮ ਹੈ। 1990 ਦੇ ਸਮੇਂ ਨੂੰ ਦਰਸਾਉਂਦੀ ਇਕ ਹੋਰ ਫ਼ਿਲਮ 'ਹੁੜਦੰਗ' ਵੀ ਨੁਸਰਤ ਨੂੰ ਮਿਲ ਗਈ ਹੈ। 'ਤੁੱਰਮ ਖ਼ਾਨ', 'ਹੁੜਦੰਗ' ਨਾਲ ਲਗਦਾ ਹੈ ਕਿ ਨੁਸਰਤ ਦਾ ਸਟਾਰ ਹੀਰੋਇਨ ਬਣਨ ਦਾ ਸੁਪਨਾ ਸੱਚ ਹੋਣ ਜਾ ਰਿਹਾ ਹੈ। 'ਪਿਆਰ ਕਾ ਪੰਚਨਾਮਾ' ਫ਼ਿਲਮ ਸਮੇਂ ਉਸ ਨੇ ਸੋਚਿਆ ਵੀ ਨਹੀਂ ਸੀ ਕਿ ਇਕ ਦਿਨ ਉਹ ਵੀ 'ਡਰੀਮ ਗਰਲ' ਬੀ-ਟਾਊਨ ਦੀ ਬਣੇਗੀ। 'ਸਲੱਮ ਡਾਗ ਲਿੀਅਨੇਅਰ' ਫ਼ਿਲਮ ਪਹਿਲਾਂ ਉਹ ਕਰ ਰਹੀ ਸੀ ਪਰ ਫਿਰ ਨਹੀਂ ਮਿਲੀ, ਕਾਰਨ ਉਹ ਨਹੀਂ ਦੱਸ ਰਹੀ ਪਰ ਇਹ ਸਾਬਤ ਹੋ ਗਿਆ ਹੈ ਕਿ ਨੁਸਰਤ ਨੇ ਸਾਰੀ ਕਸਰ ਪੂਰੀ ਕਰ ਦਿੱਤੀ ਹੈ ਤੇ ਚੰਗੇ ਸਥਾਨ 'ਤੇ ਆ ਗਈ ਹੈ।
**

ਰਿਤਿਕ ਰੌਸ਼ਨ

ਕਮਾਊ ਪੁੱਤਰ

'ਬਿਹਾਰੀ' ਬਣ ਕੇ ਸਧਾਰਨ ਕਿਰਦਾਰ ਤੇ 'ਵਾਰ' 'ਚ ਇਕਦਮ ਉਲਟ ਕੰਮ ਬਹੁਤ ਔਖਾ ਸੀ ਰਿਤਿਕ ਰੌਸ਼ਨ ਲਈ ਤਾਲਮੇਲ ਬਿਠਾਉਣਾ ਪਰ ਉਸ ਨੇ ਪ੍ਰਵਾਹ ਨਹੀਂ ਕੀਤੀ ਤੇ ਪਿੱਠ ਦੀ ਦਰਦ ਦੇ ਬਾਵਜੂਦ ਸਰੀਰਕ ਤੌਰ 'ਤੇ ਆਪਣੇ-ਆਪ ਨੂੰ ਫਿੱਟ ਕਰਕੇ 'ਸੁਪਰ-30' ਵਾਲਾ ਰਿਤਿਕ 'ਵਾਰ' 'ਚ 'ਕਬੀਰ' ਬਣ ਕੇ ਅਜਿਹਾ ਜਚਿਆ ਕਿ ਦੇਸ਼-ਵਿਦੇਸ਼ ਵਿਚ 'ਵਾਰ' ਦੀ ਕਮਾਈ ਦਾ ਅੰਕੜਾ 300 ਕਰੋੜ ਦੇ ਕਰੀਬ ਪਹੁੰਚਣ ਵਾਲਾ ਹੈ। ਰਿਤਿਕ ਦੀ 'ਵਾਰ' ਵਾਲੀ ਦਿੱਖ ਤੋਂ ਉਸ ਦੀ ਸਾਬਕਾ ਪਤਨੀ ਸੁਜ਼ੈਨ ਖ਼ਾਨ ਵੀ ਪ੍ਰਭਾਵਿਤ ਹੋਈ ਹੈ। ਇੰਸਟਾਗ੍ਰਾਮ 'ਤੇ ਸੁਜ਼ੈਨ ਨੇ ਰਿਤਿਕ ਲਈ ਉਫ...ਉਫ... ਦਾ ਸ਼ਾਨਦਾਰ ਪ੍ਰਤੀਕਰਮ ਦਿੱਤਾ, ਜਿਸ ਨੂੰ ਰਿਤਿਕ ਨੇ ਆਪਣੇ ਇੰਸਟਾਗ੍ਰਾਮ 'ਤੇ ਸ਼ੇਅਰ ਵੀ ਕੀਤਾ। ਰਿਤਿਕ ਚਾਹੇ ਸੁਜ਼ੈਨ ਨਾਲੋਂ ਅੱਡ ਹੋ ਚੁੱਕਾ ਹੈ ਪਰ ਸੁਜ਼ੈਨ ਨਾਲ ਉਸ ਦੀ ਦੋਸਤੀ ਬਰਕਰਾਰ ਹੈ ਤੇ ਰਿਤਿਕ ਆਪਣੇ ਬੱਚਿਆਂ ਦੀਆਂ ਛੁੱਟੀਆਂ ਸਮੇਂ ਸੁਜ਼ੈਨ ਨਾਲ ਹੀ ਵਿਦੇਸ਼ ਗਿਆ। 'ਸੁਪਰ-30' ਤੇ 'ਵਾਰ' ਫ਼ਿਲਮਾਂ ਨੇ ਰਿਤਿਕ ਦੀ ਤਕਦੀਰ ਦਾ ਸਿਤਾਰਾ ਹੀ ਬੁਲੰਦ ਕਰ ਦਿੱਤੀ ਹੈ। ਹੁਣ ਉਹ 'ਕ੍ਰਿਸ਼-4' ਦੀ ਤਿਆਰੀ ਕਰੇਗਾ? ਯਕੀਨ ਕੀਤਾ ਜਾਵੇ ਇਕ ਰਿਪੋਰਟ 'ਤੇ ਤਾਂ ਰਾਕੇਸ਼ ਰੌਸ਼ਨ ਨੇ 'ਕ੍ਰਿਸ਼-4' ਦੀ ਕਾਗਜ਼ੀ ਕਾਰਵਾਈ ਪੂਰੀ ਕਰ ਲਈ ਹੈ। 'ਕ੍ਰਿਸ਼-4' ਵਿਚ ਵੀ 'ਹਾਈ ਐਕਸ਼ਨ' ਹੋਵੇਗਾ ਕਿਉਂਕਿ ਇਹ ਐਕਸ਼ਨ ਰਿਤਿਕ ਨੂੰ ਰਾਸ ਆਇਆ ਹੈ। 'ਕ੍ਰਿਸ਼-4' ਪਹਿਲਾਂ 250 ਕਰੋੜ 'ਚ ਬਣਦੀ ਸੀ ਹੁਣ ਰਿਤਿਕ ਦੀ ਇਹ ਫ਼ਿਲਮ 300 ਕਰੋੜ ਦੇ ਬਜਟ ਨਾਲ ਬਣੇਗੀ। 'ਕ੍ਰਿਸ਼-4' ਦਾ ਅੰਗੇਰਜ਼ੀ ਭਾਗ ਵੀ ਬਣੇਗਾ। ਵਿਦੇਸ਼ਾਂ ਲਈ ਰਿਤਿਕ ਦੀ ਅੰਤਰਰਾਸ਼ਟਰੀ ਦਿਖ ਬਣਾਈ ਜਾਵੇਗੀ। ਰਿਤਿਕ 'ਕ੍ਰਿਸ਼-4' ਤੋਂ ਪਹਿਲਾਂ ਇਕ ਹੋਰ ਫ਼ਿਲਮ ਵੀ ਕਰੇਗਾ। 'ਕ੍ਰਿਸ਼-3' ਨੇ 240 ਕਰੋੜ ਦਾ ਵਪਾਰ ਕੀਤਾ ਸੀ। ਇਹ ਰਿਤਿਕ ਰੌਸ਼ਨ ਦੀ ਸਭ ਤੋਂ ਵੱਧ ਕਮਾਈ ਵਾਲੀ ਫ਼ਿਲਮ ਸੀ।

ਪਰਣੀਤੀ ਚੋਪੜਾ

ਸਾਇਨਾ ਦਾ ਜਾਦੂ ਸਿਰ ਚੜ੍ਹਿਆ

ਅਮਰੀਕਾ ਦੇਸ਼ ਦੀ ਨੂੰਹ ਰਾਣੀ ਪ੍ਰਿਅੰਕਾ ਚੋਪੜਾ ਦੀ ਰਿਸ਼ਤੇਦਾਰੀ 'ਚੋਂ ਦੀਦੀ ਲੱਗਦੀ ਪਰਣੀਤੀ ਚੋਪੜਾ ਨੇ ਹਿੰਦੀ ਫ਼ਿਲਮ ਨਗਰੀ 'ਚ ਆਪਣੀ ਅਲੱਗ ਤੇ ਚੰਗੀ ਪਛਾਣ ਕਾਇਮ ਕੀਤੀ ਹੈ। ਚਾਹੇ ਟਿਕਟ ਖਿੜਕੀ 'ਤੇ ਪਰਣੀਤੀ ਦੇ ਕਰਮ ਹੌਲੇ ਹੀ ਹਨ ਪਰ ਇਹ ਗੱਲ ਸੌਲਾਂ ਆਨੇ ਸੱਚ ਹੈ ਕਿ ਉਹ ਇਕ ਪ੍ਰਤਿਭਾਵਾਨ ਤੇ ਲਾਜਵਾਬ ਅਭਿਨੇਤਰੀ ਹੈ। ਹਾਲੀਵੁੱਡ ਫ਼ਿਲਮ 'ਦਾ ਗਰਲ ਆਨ ਦਾ ਟਰੇਨ' ਦੇ ਹਿੰਦੀ ਭਾਗ 'ਚ ਪਰੀ ਮੁੱਖ ਭੂਮਿਕਾ ਨਿਭਾਅ ਰਹੀ ਹੈ। ਲੰਡਨ ਜਾ ਕੇ ਉਹ ਇਸ ਫ਼ਿਲਮ ਦੇ ਫ਼ਿਲਮਾਂਕਣ 'ਚ ਰੁੱਝੀ ਹੋਣ ਦੇ ਬਾਵਜੂਦ ਫ਼ਿਲਮ ਸਬੰਧੀ ਤੇ ਹੋਰ ਵੇਰਵੇ ਆਪਣੇ 'ਇੰਸਟਾ' ਵਾਲੇ ਖਾਤੇ 'ਚ ਨਿੱਤ ਦਰਜ ਕਰਕੇ ਪ੍ਰਸੰਸਕਾਂ ਸਨਮੁਖ ਹਾਜ਼ਰ ਹੁੰਦੀ ਹੈ। ਫ਼ਿਲਮ ਦੇ ਡਾਇਰੈਕਟਰ ਆਫ਼ ਫੋਟੋਗ੍ਰਾਫੀ ਤ੍ਰਿਭਵਨ ਬਾਬੂ ਨਾਲ ਉਸ ਦੀ ਦੋਸਤੀ ਗਹਿਰੀ ਹੈ ਤੇ ਕੈਮਰਾਮੈਨ ਬਾਬੂ ਜੀ ਪਰੀ ਲਈ ਹਰ ਫੋਟੋ ਖਿੱਚ ਰਹੇ ਹਨ, ਜੋ ਪ੍ਰਸੰਸਕਾਂ ਤੱਕ ਪਹੁੰਚ ਰਹੀ ਹੈ। ਇਹ ਪਰੀ ਦੀ 'ਸਸਪੈਂਸ ਥ੍ਰਿਲਰ' ਫ਼ਿਲਮ ਹੋਵੇਗੀ। 'ਕੇਸਰੀ', 'ਜਬਰੀਆ ਜੋੜੀ' ਦਾ ਲਾਭ ਉਸ ਨੂੰ ਘੱਟ ਹੀ ਮਿਲਿਆ ਪਰ 'ਦਾ ਗਰਲ ਆਨ ਦਾ ਟਰੇਨ', 'ਦਾ ਭੁਜ ਪ੍ਰਾਈਡ ਆਫ ਇੰਡੀਆ' ਫ਼ਿਲਮ ਤੋਂ ਪਰੀ ਨੂੰ ਪੂਰੀਆਂ ਆਸਾਂ ਉਮੀਦਾਂ ਹਨ। 'ਖੜਕੇ ਗਲਾਸੀ' ਇਹ ਪੰਜਾਬੀ ਗੀਤ ਅੱਜ ਤੱਕ ਪਰਣੀਤੀ ਦੀਆਂ ਬੁੱਲ੍ਹੀਆਂ ਦਾ ਸ਼ਿੰਗਾਰ ਬਣਿਆ ਹੋਇਆ ਹੈ ਤੇ ਹਾਂ, ਪਰੀ ਦੀ ਜਨਰਲ ਨਾਲਜ਼ ਕਮਜ਼ੋਰ ਹੈ, ਜਿਸ ਕਾਰਨ ਸੋਸ਼ਲ ਮੀਡੀਆ 'ਤੇ ਉਸ ਦੀ ਲਾਹ-ਪਾਹ ਬਹੁਤ ਹੁੰਦੀ ਹੈ। ਹੁਣ ਆਜ਼ਾਦੀ ਦਿਨ ਉਹ 16 ਅਗਸਤ ਤੇ ਗਣਤੰਤਰ ਦਿਵਸ ਨੂੰ ਆਜ਼ਾਦੀ ਦਿਨ ਕਹਿ ਕੇ ਵਧਾਈ ਦਿੰਦੀ ਹੈ ਤਾਂ ਲੋਕ ਉਸ ਦਾ ਮਜ਼ਾਕ ਉਡਾਉਂਦੇ ਹਨ। ਸਾਇਨਾ ਨੇਹਵਾਲ ਦੀ ਬਾਇਓਪਿਕ ਕਰ ਰਹੀ ਹੈ ਤਾਂ ਸਾਇਨਾ ਉਸ ਦਾ ਹੌਸਲਾ ਵਧਾ ਰਹੀ ਹੈ। ਪਰੀ ਵੀ ਮੈਂ, ਅੱਜ, ਦਿਨ-ਰਾਤ ਤੇ 24 ਘੰਟੇ ਸਾਇਨਾ ਸਬੰਧੀ ਸੋਚਣਾ ਕਹਿ ਕੇ ਫ਼ਿਲਮ ਨਾਲ ਜੁੜ ਰਹੀ ਹੈ। ਚਾਹੇ ਜਨਰਲ ਨਾਲਜ ਪੱਖੋਂ ਕੋਰੀ ਹੈ ਪਰ ਅਭਿਨੇਤਰੀ ਉਹ ਜ਼ਬਰਦਸਤ ਹੈ।


-ਸੁਖਜੀਤ ਕੌਰ

ਗੂੰਗੀ ਕੁੜੀ ਦੀ ਭੂਮਿਕਾ ਕਰੇਗੀ ਤਾਰਾ ਸੁਤਾਰੀਆ

ਜਦੋਂ ਤਾਰਾ ਸੁਤਾਰੀਆ ਨੇ 'ਸਟੂਡੈਂਟ ਆਫ਼ ਦ ਯੀਅਰ-2' ਰਾਹੀਂ ਬਾਲੀਵੁੱਡ ਵਿਚ ਦਾਖ਼ਲਾ ਲਿਆ ਤਾਂ ਉਦੋਂ ਕੁਝ ਆਲੋਚਕਾਂ ਨੇ ਇਹ ਕਿਹਾ ਸੀ ਕਿ ਤਾਰਾ ਦੇ ਰੂਪ ਵਿਚ ਇਕ ਹੋਰ ਗਲੈਮਰ ਕੁੜੀ ਦਾ ਆਗਮਨ ਹੋਇਆ ਹੈ। ਫ਼ਿਲਮ ਵਿਚ ਤਾਰਾ ਦੇ ਕਿਰਦਾਰ ਨੂੰ ਦੇਖ ਕੇ ਇਹ ਟਿੱਪਣੀ ਕੀਤੀ ਗਈ ਸੀ। ਹੁਣ ਤਾਰਾ ਦੀ 'ਮਰਜਾਵਾਂ' ਆ ਰਹੀ ਹੈ ਅਤੇ ਫ਼ਿਲਮ ਦੀ ਖ਼ਾਸ ਗੱਲ ਇਹ ਹੈ ਕਿ ਇਸ ਵਿਚ ਤਾਰਾ ਨੂੰ ਗੂੰਗੀ ਕੁੜੀ ਦੀ ਭੂਮਿਕਾ ਵਿਚ ਪੇਸ਼ ਕੀਤਾ ਗਿਆ ਹੈ। ਆਪਣੇ ਕੈਰੀਅਰ ਦੀ ਦੂਜੀ ਫ਼ਿਲਮ ਵਿਚ ਇਸ ਤਰ੍ਹਾਂ ਦੀ ਚੁਣੌਤੀਪੂਰਨ ਭੂਮਿਕਾ ਲਈ ਤਾਰਾ ਨੂੰ ਚੰਗੀ ਮਿਹਨਤ ਕਰਨੀ ਪਈ ਅਤੇ ਇਸ ਲਈ ਉਸ ਨੂੰ ਸਾਈਨ ਭਾਸ਼ਾ ਵੀ ਸਿੱਖਣੀ ਪਈ। ਸਾਈਨ ਭਾਸ਼ਾ ਦੀ ਅਧਿਆਪਕਾ ਸੰਗੀਤਾ ਗਾਲਾ ਤੋਂ ਉਸ ਨੇ ਗੂੰਗਿਆਂ ਦੇ ਇਸ਼ਾਰੇ ਵਾਲੀ ਭਾਸ਼ਾ ਸਿੱਖੀ ਅਤੇ ਇਹ ਭਾਸ਼ਾ ਸਿੱਖਣ ਵਿਚ ਉਸ ਨੂੰ ਦੋ ਮਹੀਨੇ ਲੱਗੇ ਸਨ।
ਫ਼ਿਲਮ ਵਿਚ ਤਾਰਾ ਦੇ ਕਿਰਦਾਰ ਦਾ ਨਾਂਅ ਜ਼ੋਇਆ ਹੈ ਅਤੇ ਤਾਰਾ ਦਾ ਕਹਿਣਾ ਹੈ ਕਿ ਇਸ ਕਿਰਦਾਰ ਨੂੰ ਨਿਭਾਉਣ ਤੋਂ ਬਾਅਦ ਉਸ ਦੀ ਗੂੰਗੇ-ਬੋਲੇ ਲੋਕਾਂ ਪ੍ਰਤੀ ਹਮਦਰਦੀ ਹੋਰ ਵਧ ਗਈ ਹੈ।
ਉਮੀਦ ਹੈ ਕਿ ਗੂੰਗੀ ਕੁੜੀ ਦੇ ਇਸ ਕਿਰਦਾਰ ਜ਼ਰੀਏ ਤਾਰਾ ਆਪਣੇ ਆਲੋਚਕਾਂ ਦੀ ਬੋਲਤੀ ਬੰਦ ਕਰ ਦੇਵੇਗੀ।

'ਬਾਲਾ', 'ਉਜੜਾ ਚਮਨ' ਵਿਚ ਟੱਕਰ

ਦਿਨੇਸ਼ ਵਿਜ਼ਨ ਵਲੋਂ ਬਣਾਈ 'ਬਾਲਾ' ਅਤੇ ਕੁਮਾਰ ਮੰਗਤ ਵਲੋਂ ਬਣਾਈ ਜਾ ਰਹੀ ਫ਼ਿਲਮ 'ਉਜੜਾ ਚਮਨ' ਵਿਚ ਸਮਾਨਤਾ ਇਹ ਹੈ ਕਿ ਦੋਵਾਂ ਵਿਚ ਗੰਜੇ ਕਿਰਦਾਰ ਦੀ ਕਹਾਣੀ ਪੇਸ਼ ਕੀਤੀ ਗਈ ਹੈ। ਵਿਸ਼ੇ ਵਿਚ ਸਮਾਨਤਾ ਹੋਣ ਦੀ ਵਜ੍ਹਾ ਕਰਕੇ ਹੁਣ ਬਾਲੀਵੁੱਡ ਦੀਆਂ ਇਨ੍ਹਾਂ ਦੋ ਫ਼ਿਲਮਾਂ ਦੀ ਟੱਕਰ ਪ੍ਰਤੀ ਰੁਚੀ ਵਧ ਗਈ ਹੈ। ਦੋਵੇਂ ਫ਼ਿਲਮਾਂ ਇਕ ਹਫ਼ਤੇ ਦੇ ਫਰਕ ਨਾਲ ਪ੍ਰਦਰਸ਼ਿਤ ਹੋ ਰਹੀਆਂ ਹਨ। 'ਉਜੜਾ ਚਮਨ' ਅੱਠ ਨਵੰਬਰ ਨੂੰ ਰਿਲੀਜ਼ ਹੋ ਰਹੀ ਹੈ ਤੇ 'ਬਾਲਾ' 15 ਨਵੰਬਰ ਨੂੰ। ਉਂਜ ਇਕੋ ਜਿਹੇ ਵਿਸ਼ਿਆਂ ਵਾਲੀਆਂ ਫ਼ਿਲਮਾਂ ਦੀ ਆਪਸੀ ਟੱਕਰ ਵਾਲੀ ਗੱਲ ਬਾਲੀਵੁੱਡ ਲਈ ਨਵੀਂ ਨਹੀਂ ਹੈ। ਪਹਿਲਾਂ ਸ਼ਹੀਦ ਭਗਤ ਸਿੰਘ 'ਤੇ ਬਣੀਆਂ ਤਿੰਨ ਫ਼ਿਲਮਾਂ ਆਪਸ ਵਿਚ ਟਕਰਾਈਆਂ ਸਨ ਤੇ ਹੀਰੋ ਵਲੋਂ ਭ੍ਰਿਸ਼ਟ ਨੇਤਾਵਾਂ ਦੇ ਖ਼ਿਲਾਫ਼ ਲੜੀ ਗਈ ਲੜਾਈ ਦੇ ਵਿਸ਼ੇ 'ਤੇ ਬਣੀ 'ਇਨਕਲਾਬ', 'ਯੇ ਦੇਸ਼' ਤੇ 'ਆਜ ਕਾ ਐਮ. ਐਲ. ਏ. ਰਾਮ ਅਵਤਾਰ' ਵੀ ਆਪਸ ਵਿਚ ਟਕਰਾਈਆਂ ਸਨ। 'ਜਯੋਤੀ ਬਨੇ ਜਵਾਲਾ' ਤੇ 'ਜਵਾਲਾਮੁਖੀ' ਦੀ ਟੱਕਰ ਨੇ ਵੀ ਆਪਣੇ ਜ਼ਮਾਨੇ ਵਿਚ ਕਾਫ਼ੀ ਉਤਸੁਕਤਾ ਪੈਦਾ ਕੀਤੀ ਸੀ।

ਕੈਟਰੀਨਾ ਕੈਫ਼

ਮਜ਼ਦੂਰ!

ਕਰਨ ਜੌਹਰ ਤੇ ਰੋਹਿਤ ਸ਼ੈਟੀ ਨੂੰ 'ਟੈਗ' ਕਰਕੇ ਕੈਟਰੀਨਾ ਕੈਫ਼ ਨੇ ਆਪਣੀ ਨਵੀਂ ਫ਼ਿਲਮ 'ਸੂਰਯਾਵੰਸ਼ੀ' ਦੀ ਇਕ ਝਲਕ ਲੋਕਾਂ ਤੱਕ ਪਹੁੰਚਾਈ ਹੈ। 'ਭਾਰਤ' ਤੋਂ ਬਾਅਦ ਕੈਟੀ ਦੀ ਇਹ ਵੱਡੀ ਫ਼ਿਲਮ ਹੈ, ਜੋ ਆਉਂਦੇ ਸਾਲ ਗਰਮੀ ਦਾ ਮੌਸਮ ਸ਼ੁਰੂ ਹੁੰਦੇ ਹੀ ਮਾਰਚ 'ਚ ਆਏਗੀ। ਇਧਰ ਵਿੱਕੀ ਕੌਸ਼ਲ ਨਾਲ ਨਾਂਅ ਜੁੜਨ 'ਤੇ ਕੈਟੀ ਨੇ ਕਿਹਾ ਹੈ ਕਿ 16 ਸਾਲ ਤੋਂ ਸਾਡੀ ਮਿੱਤਰਤਾ ਪਾਕਿ-ਪਵਿੱਤਰ ਹੋਣ ਦੀ ਤਰ੍ਹਾਂ ਤੁਸੀਂ ਲੋਕ ਕਿਉਂ ਨਹੀਂ ਸਮਝਦੇ? ਸੱਲੂ ਉਸ ਲਈ ਰਾਹ-ਦਸੇਰਾ ਹੈ, ਮਦਦਗਾਰ ਹੈ ਤੇ ਨੇਕ-ਇਨਸਾਨ ਹੈ। 'ਆਈਫਾ ਐਵਾਰਡ' ਸਮੇਂ ਨੱਚਣ 'ਤੇ ਜ਼ੋਰ ਕੈਟੀ ਦਾ ਲਗਦਾ ਹੈ ਤੇ ਤਾੜੀਆਂ ਮਾਰ-ਮਾਰ ਹੱਥ ਸਲਮਾਨ ਮੀਆਂ ਦੇ ਹੰਭ ਜਾਂਦੇ ਹਨ। ਇਹੀ ਤਾਂ ਫਿਰ ਖਾਸ ਮਿੱਤਰਤਾ ਹੈ। ਕਦੇ ਸਲਮਾਨ ਤੇ ਹੁਣ ਵਿੱਕੀ ਕੌਸ਼ਲ ਇਹ ਕਿੱਤਾ ਹੀ ਨਾਂਅ ਜੁੜਨ, ਜੋੜਨ, ਅਫ਼ਵਾਹਾਂ ਉਡਾਉਣ-ਫੈਲਾਉਣ ਤੇ ਬਾਤਾਂ ਦੇ ਬਤੰਗੜ ਬਣਾਉਣ ਦਾ ਹੈ। ਤਿੰਨ ਸਾਲ ਪਹਿਲਾਂ ਕੈਟੀ ਤਾਂ 'ਕਪੂਰ ਖਾਨਦਾਨ' ਦੀ ਨੂੰਹ ਬਣਨ ਵਾਲੀ ਸੀ। ਰਣਬੀਰ ਕਪੂਰ ਉਸ ਦੀ ਹਰ ਸਾਹ 'ਚ ਧੜਕਦਾ ਸੀ ਪਰ ਫਿਰ ਦਿਨ ਨਹੀਂ ਚੜ੍ਹਿਆ ਕਿ ਨੂੰਹ ਬਣਦੀ-ਬਣਦੀ ਉਹ 'ਕਪੂਰ ਖਾਨਦਾਨ' ਦੀ 'ਦੁਸ਼ਮਣ' ਬਣ ਗਈ। ਰਣਬੀਰ ਨੇ ਵੀ ਕੈਟੀ ਨਾਲ ਫ਼ਿਲਮਾਂ ਤੋਂ ਨਾਂਹ ਕੀਤੀ ਪਰ 3 ਸਾਲ ਬਾਅਦ ਇਕ ਮੋਬਾਈਲ ਫੋਨ ਦੀ ਮਸ਼ਹੂਰੀ 'ਚ ਕੈਟੀ-ਰਣਬੀਰ ਨਾਲ ਆ ਰਹੀ ਹੈ। ਰਿਤਿਕ ਰੌਸ਼ਨ ਦੀ ਨਜ਼ਰ 'ਚ ਮਿਸ ਕੈਫ਼ 'ਮਜ਼ਦੂਰ' ਹੈ ਤੇ ਉਸ ਦੀ ਮੰਨੀਏ ਤਾਂ ਇਹ ਵਲੈਤਣ ਬਾਹਰੋਂ ਦਿਲਖਿਚਵੀਂ/ਆਕਰਸ਼ਕ ਲਗਦੀ ਹੈ ਪਰ ਅੰਦਰੋਂ ਉਹ ਮਜ਼ਦੂਰ ਹੈ।

ਲਘੂ ਫ਼ਿਲਮ 'ਲੁਤਫ਼' ਵਿਚ ਮੋਨਾ ਸਿੰਘ

ਪਹਿਲਾਂ ਉਹ ਵੈੱਬ ਸੀਰੀਜ਼ 'ਕਹਿਨੇ ਕੋ ਹਮਸਫ਼ਰ ਹੈ', 'ਯੇ ਮੇਰੀ ਫੈਮਿਲੀ' ਤੇ 'ਮੋਮ-ਮਿਸ਼ਨ ਓਵਰ ਮਾਰਸ' ਵਿਚ ਅਭਿਨੈ ਕਰਨ ਵਾਲੀ ਮੋਨਾ ਸਿੰਘ ਹੁਣ ਲਘੂ ਫ਼ਿਲਮ 'ਲੁਤਫ਼' ਵਿਚ ਨਜ਼ਰ ਆਵੇਗੀ।
ਕਦੀ ਜੱਸੀ ਬਣ ਕੇ ਲੋਕਾਂ ਦਾ ਦਿਲ ਜਿੱਤਣ ਵਾਲੀ ਮੋਨਾ ਸਿੰਘ ਨੇ ਇਸ ਲਘੂ ਫ਼ਿਲਮ ਵਿਚ 'ਹਾਊਸਵਾਈਫ਼' ਦੀ ਭੂਮਿਕਾ ਨਿਭਾਈ ਹੈ। ਇਕ ਇਸ ਤਰ੍ਹਾਂ ਦੀ ਗ੍ਰਹਿਣੀ, ਜਿਸ ਦੇ ਕੋਲ ਜ਼ਿੰਦਗੀ ਵਿਚ ਸਭ ਕੁਝ ਹੈ ਪਰ ਫਿਰ ਵੀ ਉਹ ਤਣਾਅ ਦਾ ਸ਼ਿਕਾਰ ਹੋ ਜਾਂਦੀ ਹੈ।
ਇਸ ਵੱਖਰੀ ਜਿਹੀ ਭੂਮਿਕਾ ਬਾਰੇ ਮੋਨਾ ਕਹਿੰਦੀ ਹੈ, 'ਅੱਜ ਲੋਕ ਤਣਾਅ ਭਰੀ ਜ਼ਿੰਦਗੀ ਜੀਅ ਰਹੇ ਹਨ ਅਤੇ ਇਸ ਵਜ੍ਹਾ ਨਾਲ ਤਣਾਅ ਦਾ ਸ਼ਿਕਾਰ ਹੋ ਜਾਣਾ ਆਮ ਗੱਲ ਹੈ। ਇਸ ਬਿਮਾਰੀ ਦੀ ਇਕ ਖ਼ਾਸ ਗੱਲ ਇਹ ਹੈ ਕਿ ਕਈ ਵਾਰ ਤਾਂ ਮਰੀਜ਼ ਨੂੰ ਪਤਾ ਹੀ ਨਹੀਂ ਹੁੰਦਾ ਕਿ ਉਹ ਤਣਾਅ ਦੀ ਬਿਮਾਰੀ ਨਾਲ ਪੀੜਤ ਹੈ, ਕਿਉਂਕਿ ਇਹ ਮਾਨਸਿਕ ਬਿਮਾਰੀ ਹੈ ਨਾ ਕਿ ਸਰੀਰਕ। 'ਥ੍ਰੀ ਇਡੀਅਟਸ' ਤੋਂ ਬਾਅਦ ਮੈਂ ਚਾਹੁੰਦੀ ਸੀ ਕਿ ਕੁਝ ਹੋਰ ਇਸ ਤਰ੍ਹਾਂ ਦੀਆਂ ਫ਼ਿਲਮਾਂ ਕੀਤੀਆਂ ਜਾਣ, ਜਿਸ ਵਿਚ ਮਨੋਰੰਜਨ ਦੇ ਨਾਲ ਕੁਝ ਸੰਦੇਸ਼ ਵੀ ਹੋਵੇ। 'ਲੁਤਫ਼' ਵਿਚ ਮਾਨਸਿਕ ਬਿਮਾਰੀ ਦੀ ਗੱਲ ਕਹੀ ਗਈ ਹੈ ਅਤੇ ਘਰੇਲੂ ਔਰਤਾਂ ਤੱਕ ਇਸ ਬਿਮਾਰੀ ਬਾਰੇ ਜਾਗਰੂਕਤਾ ਲਿਆਉਣ ਦੇ ਇਰਾਦੇ ਨਾਲ ਮੈਂ ਇਹ ਫ਼ਿਲਮ ਵਿਚ ਕੰਮ ਕੀਤਾ ਹੈ।'


-ਮੁੰਬਈ ਪ੍ਰਤੀਨਿਧ

ਹਾਲੀਵੁੱਡ ਫ਼ਿਲਮਾਂ ਦਾ ਪੰਜਾਬੀ ਸਟਾਰ-ਸੰਨੀ ਸਿੰਘ ਕੋਹਲੀ

ਪੰਜਾਬੀ ਦੁਨੀਆ ਵਿਚ ਕਿਤੇ ਵੀ ਵਸੇ ਹੋਣ ਪਰ ਆਪਣੀ ਮਾਂ-ਬੋਲੀ ਅਤੇ ਵਤਨ ਦਾ ਮੋਹ ਨਹੀਂ ਛੱਡਦੇ। ਇਸ ਦੀ ਮਿਸਾਲ ਹੈ, ਪੰਜਾਹ ਤੋਂ ਵੱਧ ਹਾਲੀਵੁੱਡ ਫ਼ਿਲਮਾਂ ਵਿਚ ਅਦਾਕਾਰੀ ਕਰਨ ਵਾਲਾ ਅਮਰਪਾਲ ਸਿੰਘ ਉਰਫ਼ ਸੰਨੀ ਸਿੰਘ ਕੋਹਲੀ, ਜੋ ਕਿ ਕੈਨੇਡਾ ਦਾ ਸਾਬਕਾ ਲਾਅ ਐਨਫੋਰਸਮੈਂਟ ਅਫ਼ਸਰ ਹੈ। ਸ: ਤਰਲੋਚਨ ਸਿੰਘ ਕੋਹਲੀ ਅਤੇ ਮਾਤਾ ਸਤਨਾਮ ਕੌਰ ਦੇ ਇਸ ਲਾਡਲੇ ਸਪੁੱਤਰ ਦਾ ਬਚਪਨ ਲੁਧਿਆਣਾ ਸ਼ਹਿਰ ਵਿਚ ਗੁਜ਼ਰਿਆ। ਜਵਾਨੀ ਦੀ ਦਹਿਲੀਜ਼ ਉੱਪਰ ਪੈਰ ਰੱਖਦਿਆਂ ਹੀ ਸੰਨੀ ਇੰਗਲੈਂਡ ਚਲਾ ਗਿਆ, ਜਿਥੇ ਉਸ ਨੇ ਮਾਰਸ਼ਲ ਆਰਟਸ ਦੀ ਗੇਮ ਤਾਈਕਵਾਂਡੋ ਖੇਡਣੀ ਸ਼ੁਰੂ ਕੀਤੀ। ਫਿਰ 150 ਤੋਂ ਵੱਧ ਰਾਸ਼ਟਰੀ ਅਤੇ ਅੰਤਰਰਾਸ਼ਟਰੀ ਮੁਕਾਬਲਿਆਂ ਵਿਚ ਭਾਗ ਲਿਆ। 2005 ਵਿਚ ਆਪਣੀ ਗੇਮ ਨੂੰ ਹੋਰ ਖਿਾਰਨ ਲਈ ਉਹ ਕੈਨੇਡਾ ਚਲਾ ਗਿਆ। ਕੈਨੇਡਾ ਦੇ ਕੈਲਗਰੀ ਵਿਚ ਪੁਲਿਸ ਮੁੱਖ ਅਧਿਕਾਰੀ ਵਜੋਂ ਨੌਕਰੀ ਕਰਦਿਆਂ ਤਿੰਨ ਵਾਰ ਵਿਸ਼ਵ ਪੁਲਿਸ ਖੇਡਾਂ ਵਿਚ ਗੋਲਡ ਮੈਡਲ ਜਿੱਤੇ। ਉਸ ਕੋਲ ਕੈਨੇਡਾ ਅਤੇ ਇੰਗਲੈਂਡ ਦੀ ਦੋਹਰੀ ਨਾਗਰਿਕਤਾ ਹੈ। ਇਸ ਤੋਂ ਇਲਾਵਾ ਅਮਰੀਕਾ, ਸਵਿਟਜ਼ਰਲੈਂਡ, ਯੂਰਪ, ਨਿਊਜ਼ੀਲੈਂਡ, ਸਿੰਗਾਪੁਰ ਤੇ ਥਾਈਲੈਂਡ ਆਦਿ ਦੀ ਉਹ ਯਾਤਰਾ ਕਰ ਚੁੱਕਾ ਹੈ। ਉਸ ਨੇ ਹਾਲੀਵੁੱਡ ਐਕਸ਼ਨ ਫ਼ਿਲਮਾਂ ਵਿਚ ਸਟੰਟ ਪੇਸ਼ਕਾਰ ਅਤੇ ਫਾਈਟ ਕੋਰੀਓਗ੍ਰਾਫਰ ਵਜੋਂ ਸ਼ੁਰੂਆਤ ਕੀਤੀ। ਫ਼ਿਲਮਾਂ 'ਜਨ' ਅਤੇ 'ਰੈਪਲਿਕਨ' ਵਿਚ ਦਮਦਾਰ ਭੂਮਿਕਾ ਨਿਭਾਈ। ਮਾਰਸ਼ਲ ਆਰਟਸ ਦੇ ਸੱਤ ਸਟਾਈਲਾਂ ਤਾਈਕਵਾਂਡੋ, ਕਰਾਟੇ, ਕੁੰਗਫੂ, ਨੌਰਥ ਸਾਊਲਿਨ ਵੁਸ਼ੂ ਆਦਿ ਵਿਚ ਬਲੈਕ ਬੈਲਟ ਹੋਣ ਕਾਰਨ ਉਸ ਦੇ ਐਕਸ਼ਨ ਸਟੰਟਾਂ ਦੀ ਮੰਗ ਅਤੇ ਪ੍ਰਸਿੱਧੀ ਬਹੁਤ ਵਧ ਗਈ। ਉਸ ਨੂੰ ਕੈਲੀਫੋਰਨੀਆ ਵਿਚ 'ਲੀਜੇਂਡ ਆਫ਼ ਦਾ ਮਾਰਸ਼ਲ ਆਰਟ ਆਫ ਈਅਰ' ਅਤੇ ਓਬਾਮਾ ਪ੍ਰਸ਼ਾਸਨ ਵਲੋਂ 'ਲਾਈਫ਼ ਟਾਈਮ ਅਚੀਵਮੈਂਟ' ਸਨਮਾਨ ਮਿਲਿਆ। ਹਾਲੀਵੁੱਡ ਵਿਚ 'ਡਰੈਗਨ ਲੇਡੀ' ਦੇ ਨਾਂਅ ਨਾਲ ਮਸ਼ਹੂਰ ਸਿੰਥੀਆ ਰੋਥਰੌਕ ਦੀ ਫ਼ਿਲਮ 'ਟੂ ਡੇਜ਼ ਐਂਡ ਟੂ ਕਿਲ' ਵਿਚ ਸੰਨੀ ਸਿੰਘ ਉਸ ਦੇ ਮੁੱਖ ਬਾਡੀਗਾਰਡ ਦਾ ਕਿਰਦਾਰ ਨਿਭਾਅ ਰਿਹਾ ਹੈ। ਉਸ ਦੀਆਂ ਆਉਣ ਵਾਲੀਆਂ ਫ਼ਿਲਮਾਂ ਵਿਚ ਦਾ ਲਾਸਟ ਵਿਸ਼, ਅਮਰੀਕਨ, ਗੁਨਲਿੰਨਗਰਸ, ਓਵਰ ਦਾ ਬਾਰਡਰ, ਰਾਈਜ਼ ਆਫ਼ ਕਿੱਟ ਬਾਕਸਰ, ਅਨਟਾਰਿਸ, ਉਪਰੇਸ਼ਨ ਲੋਨੀ ਬਿਨ, ਵੌਰਟੈਕਸ ਇੰਫੈਕਟ, ਜਿਨ ਜੰਗ ਐਂਡ ਦਾ ਟੀਜ਼ਰ, ਵਿਲੈਨਟੀਕਾ, ਹੌਨਰੈਬਲ ਸੀਨਜ਼ ਆਦਿ ਹਨ। ਚੰਡੀਗੜ੍ਹ ਵਿਚ ਉਹ ਪੰਜਾਬੀ ਫ਼ਿਲਮਾਂ 'ਗੁਰਮੁਖ' ਦੀ ਸ਼ੂਟਿੰਗ ਲਈ ਆਏ ਸਨ, ਜਿਸ ਵਿਚ ਉਹ ਪਾਲੀਵੁੱਡ ਦੇ ਮਸ਼ਹੂਰ ਕਲਾਕਾਰਾਂ ਨਾਲ ਐਕਸ਼ਨ ਕਰਦੇ ਨਜ਼ਰ ਆਉਣਗੇ। ਅਮ੍ਰਿਤਜੀਤ ਸਿੰਘ ਸਰ੍ਹਾ ਦੀ ਇਕ ਨਵੀਂ ਫ਼ਿਲਮ, ਜੋ ਕਿ ਆਪਣਾ ਹੈਰੀਟੇਜ਼ ਪ੍ਰੋਡਕਸ਼ਨ ਹਾਊਸ ਦੇ ਬੈਨਰ ਹੇਠ ਬਣ ਰਹੀ ਹੈ, ਦੀ ਸ਼ੂਟਿੰਗ ਲਈ ਫਿਰ ਇੰਡੀਆ ਆਉਣਗੇ ਅਤੇ ਬਾਲੀਵੁੱਡ ਦੀਆਂ ਕੁਝ ਫ਼ਿਲਮਾਂ ਵਿਚ ਅਦਾਕਾਰੀ ਲਈ ਮੁੰਬਈ ਜਾਣਗੇ। ਉਹ ਪੰਜਾਬ ਵਿਚ ਤਾਈਕਵਾਂਡੋ ਅਕੈਡਮੀ ਖੋਲ੍ਹਣਾ ਚਾਹੁੰਦੇ ਹਨ, ਤਾਂ ਜੋ ਇੰਡੀਆ ਨੂੰ ਉਲੰਪਿਕਸ ਵਿਚੋਂ ਮੈਡਲ ਦਿਵਾ ਸਕਣ। ਉਹ ਪੰਜਾਬ ਦੀਆਂ ਯਾਦਾਂ ਤਾਜ਼ਾ ਕਰਨ ਲਈ ਆਪਣੇ ਦੋਸਤਾਂ ਦਲਜੀਤ ਰੇੜਵਾਂ ਆਦਿ ਨਾਲ ਹਮੇਸ਼ਾ ਸੰਪਰਕ 'ਚ ਰਹਿੰਦੇ ਹਨ। ਉਹ ਪੰਜਾਬ ਨੂੰ ਨਸ਼ਾ ਮੁਕਤ ਦੇਖਣਾ ਚਾਹੁੰਦੇ ਹਨ। ਪਰਮਾਤਮਾ ਇਸ ਦੁਨੀਆ 'ਤੇ ਵਿਲੱਖਣ ਕਲਾਕਾਰ ਨੂੰ ਹੋਰ ਤਰੱਕੀ ਬਖ਼ਸ਼ੇ।


-ਗੁਰਸਿਮਰਨ ਸਿੰਘ

ਇਟਲੀ 'ਚ ਪੰਜਾਬੀ ਬੋਲੀ ਤੇ ਸੱਭਿਆਚਾਰ ਨੂੰ ਤਨਦੇਹੀ ਨਾਲ ਸਮਰਪਿਤ ਹੈ ਮੰਚ ਸੰਚਾਲਕ : ਰਾਜੂ ਚਮਕੌਰ ਵਾਲਾ

ਵਿਦੇਸ਼ਾਂ ਵਿਚ ਪੰਜਾਬੀ ਮਾਂ ਬੋਲੀ ਤੇ ਸੱਭਿਆਚਾਰ ਨੂੰ ਪ੍ਰਫੁਲਿੱਤ ਕਰਨ ਵਾਲੇ ਮਾਣਮੱਤੇ ਕਲਾਕਾਰਾਂ ਵਿਚ ਮੰਚ ਸੰਚਾਲਕ ਰਾਜੂ ਚਮਕੌਰ ਵਾਲਾ ਇਕ ਅਜਿਹਾ ਸ਼ਖ਼ਸ ਹੈ ਜੋ ਕਿ ਪ੍ਰਭਾਵਸ਼ਾਲੀ ਤੇ ਦਮਦਾਰ ਮੰਚ ਸੰਚਾਲਨਾ ਕਰਕੇ ਪੂਰੇ ਯੂਰਪ ਭਰ ਦੇ ਸਰੋਤਿਆਂ ਦੇ ਦਿਲਾਂ ਵਿਚ ਇਕ ਸਤਿਕਾਰਯੋਗ ਸਥਾਨ ਰੱਖਦਾ ਹੈ। ਇਟਲੀ ਦੇ ਸ਼ਹਿਰ ਤਰਵੀਜੋ ਵਿਖੇ ਰਹਿਣ ਵਾਲਾ ਰਾਜੂ ਜਿੱਥੇ ਪੰਜਾਬ ਦੇ ਅਨੇਕਾਂ ਪ੍ਰਮੁੱਖ ਕਲਾਕਾਰਾਂ ਨਾਲ ਮੰਚ ਸੰਚਾਲਨ ਕਰ ਚੁੱਕਾ ਹੈ, ਉੱਥੇ ਉਹ ਇਟਲੀ 'ਚ ਹੋਣ ਵਾਲੇ ਸੱਭਿਆਚਾਰਕ ਤੇ ਸਾਹਿਤਕ ਸਮਾਗਮਾਂ ਤੇ ਮੇਲਿਆਂ ਵਿਚ ਵੀ ਸਟੇਜ ਸੰਚਾਲਕ ਦੇ ਤੌਰ 'ਤੇ ਵਿਚਰਦਿਆਂ ਦੇਖਿਆ ਗਿਆ ਹੈ। ਪੰਜਾਬ ਯੂਥ ਕਲੱਬਾਂ ਆਰਗੇਨਾਈਜੇਸ਼ਨ ਇਟਲੀ ਵਲੋਂ ਕਰਵਾਏ ਜਾਂਦੇ ਸਾਲਾਨਾ ਸਵ: ਢਾਡੀ ਅਮਰ ਸਿੰਘ ਸ਼ੌਕੀ ਮੇਲੇ 'ਤੇ ਉਹ ਕਈ ਸਾਲਾਂ ਤੋਂ ਲਗਾਤਾਰ ਸਟੇਜ ਸੰਚਾਲਨ ਦੀ ਜ਼ਿੰਮੇਵਾਰੀ ਨਿਭਾਉਂਦਾ ਆ ਰਿਹਾ ਹੈ। ਸ਼ਾਇਰੋ-ਸ਼ਾਇਰੀ, ਹਾਸਿਆਂ, ਟੋਟਕਿਆਂ ਤੇ ਮੁਹਾਵਰਿਆਂ ਨਾਲ ਭਰਪੂਰ ਤੁਕਬੰਦੀ ਕਰਕੇ ਰਾਜੂ ਸਟੇਜ ਨੂੰ ਚਾਰ ਚੰਨ ਲਗਾ ਦਿੰਦਾ ਹੈ ਅਤੇ ਸਰੋਤਿਆਂ ਨੂੰ ਅਖੀਰ ਤੱਕ ਸਮਾਗਮ ਨਾਲ ਜੋੜੀ ਰੱਖਦਾ ਹੈ। ਸਟੇਜ ਉੱਤੇ ਉਸ ਦੁਆਰਾ ਬੋਲੇ ਗਏ ਅਲਫਾਜ਼ ਮਨੋਰੰਜਨ ਦੇ ਨਾਲ-ਨਾਲ ਜੀਵਨ ਦੀਆਂ ਸੱਚਾਈਆਂ ਨਾਲ ਵੀ ਪੂਰੇ ਸਬੰਧਿਤ ਹੁੰਦੇ ਹਨ। ਉਹ ਆਪਣੇ ਸ਼ੇਅਰਾਂ ਵਿਚ ਪੇਸ਼ ਕਰਨ ਵਾਲੇ ਕਲਾਕਾਰਾਂ ਦੀ ਸ਼ਬਦਾਂ ਦੇ ਨਾਲ ਅਜਿਹੀ ਤਸਵੀਰ ਬਣਾ ਦਿੰਦਾ ਹੈ ਕਿ ਸਰੋਤੇ ਅੱਡੀਆਂ ਚੁੱਕ ਕੇ ਕਲਾਕਾਰ ਦਾ ਇੰਤਜ਼ਾਰ ਕਰਦੇ ਹਨ। ਸਟੇਜ ਤੋਂ ਉਹ ਸਮਾਜਿਕ ਬੁਰਾਈਆਂ ਨਸ਼ਿਆਂ, ਦਾਜ-ਦਹੇਜ ਆਦਿ ਦੇ ਖਿਲਾਫ਼ ਵੀ ਇਕ ਸੁਨੇਹਾ ਦੇਣਾ ਆਪਣਾ ਫਰਜ਼ ਸਮਝਦਾ ਹੈ। ਰਾਜੂ ਚਮਕੌਰ ਵਾਲਾ ਇਤਿਹਾਸਕ ਸ਼ਹਿਰ ਚਮਕੌਰ ਸਾਹਿਬ ਨਾਲ ਸਬੰਧਿਤ ਹੈ ਤੇ ਪਿਛਲੇ ਲਗਪਗ 14 ਸਾਲ ਤੋਂ ਇਟਲੀ 'ਚ ਪੱਕੇ ਤੌਰ 'ਤੇ ਰਹਿ ਰਿਹਾ ਹੈ। ਸੰਗੀਤ ਨਾਲ਼ ਰੱਜ ਕੇ ਪ੍ਰੇਮ ਕਰਨ ਵਾਲਾ ਰਾਜੂ ਪ੍ਰਸਿੱਧ ਗਾਇਕ ਦੁਰਗਾ ਰੰਗੀਲਾ ਨੂੰ ਆਪਣਾ ਆਦਰਸ਼ ਮੰਨਦਾ ਹੈ, ਜਿਨ੍ਹਾਂ ਨੇ ਉਸ ਦੀ ਬਾਂਹ ਫੜ ਕੇ ਸਟੇਜ ਸੰਚਾਲਨਾ ਵੱਲ ਪ੍ਰੇਰਿਤ ਕੀਤਾ। ਆਪਣੀ ਸਟੇਜੀ ਕਲਾ ਸਦਕਾ ਜਿੱਥੇ ਰਾਜੂ ਅੱਜ ਯੂਰਪ ਭਰ ਦੇ ਪੰਜਾਬੀਆਂ ਵਿਚ ਜਾਣ-ਪਹਿਚਾਣ ਦਾ ਮੁਥਾਜ ਨਹੀਂ ਹੈ, ਉੱਥੇ ਸੁਭਾਅ ਪੱਖੋਂ ਵੀ ਉਹ ਅਤਿ ਮਿਲਾਪੜੇ ਤੇ ਚੰਗੇ ਸੁਭਾਅ ਦਾ ਮਾਲਕ ਹੈ।


-ਹਰਦੀਪ ਸਿੰਘ ਕੰਗ 'ਠੌਣਾ'
ਪੱਤਰਕਾਰ ਅਜੀਤ ਵੀਨਸ ਇਟਲੀ

ਦੋਸਤੀ 'ਤੇ ਬਣੀ ਇਕ ਹੋਰ ਫ਼ਿਲਮ ਯਾਰਮ

ਦੋਸਤੀ ਇਕ ਇਸ ਤਰ੍ਹਾਂ ਦਾ ਵਿਸ਼ਾ ਹੈ, ਜੋ ਬਾਲੀਵੁੱਡ ਦੇ ਕਾਹਣੀ ਲੇਖਕਾਂ ਨੂੰ ਬਹੁਤ ਆਕਰਸ਼ਿਤ ਕਰਦਾ ਰਿਹਾ ਹੈ ਅਤੇ ਇਹੀ ਵਜ੍ਹਾ ਹੈ ਕਿ ਇਸ ਵਿਸ਼ੇ 'ਤੇ ਸਮੇਂ-ਸਮੇਂ 'ਤੇ ਫ਼ਿਲਮਾਂ ਬਣਦੀਆਂ ਰਹੀਆਂ ਹਨ। ਉਂਜ ਤਾਂ ਹੁਣ ਬਾਲੀਵੁੱਡ ਵਿਚ ਵੀ ਬਦਲਾਅ ਆਉਣ ਲੱਗਿਆ ਹੈ ਪਰ ਦੋਸਤੀ ਦੇ ਵਿਸ਼ੇ 'ਤੇ ਇਸ ਦਾ ਅਸਰ ਨਹੀਂ ਪਿਆ ਹੈ। ਹਾਲ ਹੀ ਵਿਚ ਪ੍ਰਦਰਸ਼ਿਤ ਹੋਈ 'ਛਿਛੋਰੇ' ਵਿਚ ਦੋਸਤਾਂ ਦੀ ਕਹਾਣੀ ਪੇਸ਼ ਕੀਤੀ ਗਈ ਸੀ। ਹੁਣ 'ਯਾਰਮ' ਵਿਚ ਵੀ ਇਹ ਵਿਸ਼ਾ ਲਿਆ ਗਿਆ ਹੈ। ਔਵੈਸ ਖਾਨ ਵਲੋਂ ਨਿਰਦੇਸ਼ਿਤ ਇਸ ਫ਼ਿਲਮ ਵਿਚ ਪ੍ਰਤੀਕ ਬੱਬਰ, ਸਿਧਾਂਤ ਕਪੂਰ, ਸ਼ੁਭਾ ਰਾਜਪੂਤ, ਇਸ਼ਿਤਾ ਰਾਜ, ਅਨੀਤਾ ਰਾਜ ਨੇ ਅਭਿਨੈ ਕੀਤਾ ਅਤੇ ਫ਼ਿਲਮ ਦੀ ਸ਼ੂਟਿੰਗ ਮੁੱਖ ਰੂਪ ਨਾਲ ਮਾਰੀਸ਼ੀਅਸ ਵਿਚ ਕੀਤੀ ਗਈ ਹੈ।
ਫ਼ਿਲਮ ਵਿਚ ਦੋ ਇਸ ਤਰ੍ਹਾਂ ਦੇ ਦੋਸਤਾਂ ਦੀ ਕਹਾਣੀ ਹੈ, ਜੋ ਬਚਪਨ ਦੇ ਦੋਸਤ ਹਨ। ਦੋਵਾਂ ਨੇ ਪੜ੍ਹਾਈ ਵੀ ਇਕੱਠੇ ਕੀਤੀ ਹੈ। ਜਵਾਨੀ ਵਿਚ ਕਦਮ ਰੱਖਣ ਤੋਂ ਬਾਅਦ ਇਕ ਕੁੜੀ ਦੀ ਵਜ੍ਹਾ ਕਰਕੇ ਦੋਵੇਂ ਦੋਸਤਾਂ ਵਿਚਾਲੇ ਕਿਵੇਂ ਦੀਵਾਰ ਖੜ੍ਹੀ ਹੋ ਜਾਂਦੀ ਹੈ, ਇਹ ਇਸ ਦੀ ਕਹਾਣੀ ਹੈ। ਕਹਾਣੀ ਨੂੰ ਹੋਰ ਰੌਚਕ ਬਣਾਉਣ ਲਈ ਤੇ ਇਸ ਨੂੰ ਅੱਜ ਦੇ ਜ਼ਮਾਨੇ ਨਾਲ ਜੋੜਨ ਲਈ ਇਸ ਵਿਚ ਲਵ ਜਿਹਾਦ ਦਾ ਕੋਣ ਵੀ ਪੇਸ਼ ਕੀਤਾ ਗਿਆ ਹੈ।
ਫ਼ਿਲਮ ਵਿਚ ਪ੍ਰਤੀਕ ਤੇ ਸਿਧਾਂਤ ਨੂੰ ਬਚਪਨ ਦੇ ਦੋਸਤ ਦੇ ਰੂਪ ਵਿਚ ਪੇਸ਼ ਕੀਤਾ ਗਿਆ ਹੈ। ਸੰਯੋਗ ਦੀ ਗੱਲ ਇਹ ਹੈ ਕਿ ਪ੍ਰਤੀਕ ਦੇ ਪਿਤਾ ਰਾਜ ਬੱਬਰ ਤੇ ਸਿਧਾਂਤ ਦੇ ਪਿਤਾ ਸ਼ਕਤੀ ਕਪੂਰ ਸਾਲਾਂ ਤੋਂ ਅਭਿਨੈ ਕਰ ਰਹੇ ਹਨ। ਦੋਵਾਂ ਨੇ ਕਈ ਫ਼ਿਲਮਾਂ ਵਿਚ ਇਕੱਠਿਆਂ ਕੰਮ ਵੀ ਕੀਤਾ ਹੈ ਅਤੇ ਇਸ ਵਜ੍ਹਾ ਕਰਕੇ ਪ੍ਰਤੀਕ ਤੇ ਸਿਧਾਂਤ ਵਿਚਾਲੇ ਵੀ ਬਚਪਨ ਤੋਂ ਦੋਸਤੀ ਰਹੀ ਹੈ। ਇਹੀ ਵਜ੍ਹਾ ਸੀ ਕਿ ਇਥੇ ਕੰਮ ਕਰਦੇ ਸਮੇਂ ਦੋਵਾਂ ਨੂੰ ਲੱਗਿਆ ਹੀ ਨਹੀਂ ਕਿ ਉਹ ਸਾਥੀ ਕਲਾਕਾਰ ਨਾਲ ਕੰਮ ਕਰ ਰਹੇ ਹਨ। ਬਲਕਿ ਇਹੀ ਲੱਗਿਆ ਕਿ ਉਹ ਜ਼ਿੰਦਗੀ ਦੇ ਅਸਲ ਦੋਸਤ ਦੇ ਨਾਲ ਕੰਮ ਕਰ ਰਹੇ ਹਨ। ਇਸ ਵਜ੍ਹਾ ਕਰਕੇ ਦੋਵਾਂ ਦੀ ਆਪਸੀ ਕੈਮਿਸਟਰੀ ਵਿਚ ਬਹੁਤ ਨਿਖਾਰ ਆਇਆ ਹੈ ਅਤੇ ਇਸ ਦਾ ਫਾਇਦਾ ਫ਼ਿਲਮ ਨੂੰ ਕਾਫੀ ਮਿਲਿਆ ਹੈ।
ਸ਼ੁਭਾ ਰਾਜਪੂਤ ਨੂੰ ਇਥੇ ਅਹਿਮ ਭੂਮਿਕਾ ਨਿਭਾਉਣ ਨੂੰ ਮਿਲੀ ਹੈ ਤੇ ਇਸ਼ਤਾ ਰਾਜ ਦੇ ਹਿੱਸੇ ਇਥੇ ਮੁਸਲਿਮ ਕੁੜੀ ਜ਼ੋਇਆ ਦਾ ਕਿਰਦਾਰ ਆਇਆ ਹੈ, ਕਿਉਂਕਿ ਇਹ ਮੁਸਲਿਮ ਪਿੱਠਭੂਮੀ ਦੀ ਕਹਾਣੀ ਨਹੀਂ ਹੈ ਤੇ ਕਾਲਜ ਦੇ ਦੋਸਤਾਂ ਦੀ ਕਹਾਣੀ ਹੈ। ਸੋ, ਇਸ ਕਿਰਦਾਰ ਲਈ ਇਸ਼ਿਤਾ ਨੂੰ ਜ਼ਿਆਦਾ ਮਿਹਨਤ ਨਹੀਂ ਕਰਨੀ ਪਈ ਸੀ। ਅੱਜ ਦੇ ਜ਼ਮਾਨੇ ਦੇ ਰੂਪ ਨਾਲ ਬਣੀ ਇਹ ਫ਼ਿਲਮ 18 ਅਕਤੂਬਰ ਨੂੰ ਪ੍ਰਦਰਸ਼ਿਤ ਹੋਣ ਜਾ ਰਹੀ ਹੈ।


-ਮੁੰਬਈ ਪ੍ਰਤੀਨਿਧ

'ਲਵਲੀ ਦਾ ਢਾਬਾ' ਵਿਚ ਈਸ਼ਾ ਕੋਪੀਕਰ

'ਪਿਆਰ ਇਸ਼ਕ ਔਰ ਮੁਹੱਬਤ', 'ਪਿੰਜਰ', 'ਦਿਲ ਕਾ ਰਿਸ਼ਤਾ' ਸਮੇਤ ਹੋਰ ਕਈ ਫ਼ਿਲਮਾਂ ਵਿਚ ਚਮਕਣ ਵਾਲੀ ਈਸ਼ਾ ਕੋਪੀਕਰ ਨੇ ਹੋਟਲ ਕਾਰੋਬਾਰੀ ਟਿੰਮੀ ਨਾਰੰਗ ਨਾਲ ਵਿਆਹ ਕਰਾਇਆ ਹੈ। ਵਿਆਹ ਦੀ ਵਜ੍ਹਾ ਨਾਲ ਈਸ਼ਾ ਨੂੰ ਕਾਫੀ ਸਮੇਂ ਤੱਕ ਅਭਿਨੈ ਤੋਂ ਦੂਰ ਰਹਿਣਾ ਪਿਆ ਅਤੇ ਹੁਣ ਜਦ ਉਹ ਦੁਬਾਰਾ ਅਭਿਨੈ ਵਿਚ ਰੁਝੇਵੇਂ ਵਧਾ ਰਹੀ ਹੈ ਤਾਂ ਸੰਯੋਗ ਦੇਖੋ ਕਿ ਹੋਟਲ ਮਾਲਕ ਦੀ ਬੀਵੀ ਨੂੰ ਢਾਬੇ ਦੀ ਮਾਲਕਣ ਦਾ ਕਿਰਦਾਰ ਨਿਭਾਉਣਾ ਹਿੱਸੇ ਆਇਆ ਹੈ।
ਨਿਰਦੇਸ਼ਕ ਕੇਨੀ ਛਾਬੜਾ ਵਲੋਂ ਨਿਰਦੇਸ਼ਿਤ ਵੈੱਬ ਸੀਰੀਜ਼ 'ਲਵਲੀ ਦਾ ਢਾਬਾ' ਵਿਚ ਈਸ਼ਾ ਨੂੰ ਢਾਬੇ ਦੀ ਮਾਲਕਣ ਲਵਲੀ ਕੌਰ ਢਿੱਲੋਂ ਦੀ ਭੂਮਿਕਾ ਵਿਚ ਪੇਸ਼ ਕੀਤਾ ਜਾ ਰਿਹਾ ਹੈ ਅਤੇ ਇਹ ਈਸ਼ਾ ਦੀ ਇਹ ਪਹਿਲੀ ਵੈੱਬ ਸੀਰੀਜ਼ ਹੈ। ਇਸ ਭੂਮਿਕਾ ਬਾਰੇ ਈਸ਼ਾ ਕਹਿੰਦੀ ਹੈ, 'ਇਹ ਜੋ ਲਵਲੀ ਹੈ, ਉਹ ਆਪਣਾ ਪਤੀ ਗਵਾ ਚੁੱਕੀ ਹੈ ਅਤੇ ਉਸ ਦੇ ਪਤੀ ਕੈਪਟਨ ਰੁਪਿੰਦਰ ਸਿੰਘ ਫ਼ੌਜ ਵਿਚ ਸਨ ਅਤੇ ਦੇਸ਼ ਲਈ ਸ਼ਹੀਦ ਹੋ ਗਏ ਸਨ। ਲਵਲੀ ਨੂੰ ਖਾਲੀ ਦਿਨ ਬਿਤਾਉਣਾ ਪਸੰਦ ਨਹੀਂ ਹੈ। ਇਸ ਵਜ੍ਹਾ ਕਰਕੇ ਉਹ ਆਪਣਾ ਢਾਬਾ ਖੋਲ੍ਹ ਲੈਂਦੀ ਹੈ ਤਾਂ ਕਿ ਇਸੇ ਬਹਾਨੇ ਭੁੱਖਿਆਂ ਦਾ ਪੇਟ ਭਰਿਆ ਜਾ ਸਕੇ ਤੇ ਲੋਕਾਂ ਦੀ ਸੇਵਾ ਕੀਤੀ ਜਾ ਸਕੇ। ਉਹ ਆਪਣੀ ਪਕਾਉਣ ਕਲਾ ਦੇ ਕੌਸ਼ਲ ਦੇ ਜ਼ਰੀਏ ਲੋਕਾਂ ਦੀ ਜ਼ਿੰਦਗੀ ਵਿਚ ਖੁਸ਼ੀਆਂ ਬਿਖੇਰਨਾ ਚਾਹੁੰਦੀ ਹੈ। ਮੈਂ ਖ਼ੁਦ ਮਹਾਰਾਸ਼ਟਰੀਅਨ ਹਾਂ, ਜਦ ਕਿ ਲਵਲੀ ਪੰਜਾਬਣ ਹੈ। ਸੋ, ਇਥੇ ਅਭਿਨੈ ਕਰਦੇ ਸਮੇਂ ਕਾਫੀ ਸਾਵਧਾਨੀ ਵਰਤਣੀ ਪਈ ਹੈ। ਖ਼ਾਸ ਕਰਕੇ ਸੰਵਾਦ ਬੋਲਦੇ ਸਮੇਂ ਇਸ ਗੱਲ ਦਾ ਖਿਆਲ ਰੱਖਣਾ ਪੈਂਦਾ ਹੈ ਕਿ ਕਿਤੇ ਮਰਾਠੀ ਟੋਨ ਨਾ ਆ ਜਾਵੇ। ਸੱਚ ਕਹਾਂ ਤਾਂ ਲਵਲੀ ਦਾ ਕਿਰਦਾਰ ਕਾਫੀ ਹੱਦ ਤੱਕ ਮੇਰੇ ਨਾਲ ਮੇਲ ਖਾਂਦਾ ਹੈ। ਮੇਰੀ ਤਰ੍ਹਾਂ ਉਹ ਵੀ ਜ਼ਿੰਦਾਦਿਲ ਸੁਭਾਅ ਦੀ ਹੈ ਅਤੇ ਉਹ ਵੀ ਹੌਸਪਿਟਾਲਿਟੀ ਸਨਅਤ ਦਾ ਹਿੱਸਾ ਬਣੀ ਹੋਈ ਹੈ। ਇਸ ਤਰ੍ਹਾਂ ਦੀ ਭੂਮਿਕਾ ਨਿਭਾਉਂਦੇ ਸਮੇਂ ਇਹੀ ਲਗਦਾ ਹੈ ਕਿ ਮੈਂ ਖ਼ੁਦ ਨੂੰ ਹੀ ਕੈਮਰੇ ਸਾਹਮਣੇ ਦੁਹਰਾ ਰਹੀ ਹਾਂ।'


-ਮੁੰਬਈ ਪ੍ਰਤੀਨਿਧ

ਪ੍ਰਿਆਂਸ਼ੂ ਚੈਟਰਜੀ ਦੀ

ਆਫ਼ਿਸਰ ਅਰੁਜਨ ਸਿੰਘ ਆਈ. ਪੀ. ਐਸ.

ਹਿੰਦੀ ਸਿਨੇਮਾ ਦੇ ਕਈ ਇਸ ਤਰ੍ਹਾਂ ਦੇ ਹੀਰੋ ਹਨ, ਜਿਨ੍ਹਾਂ ਨੂੰ ਪੁਲਿਸ ਦੀ ਵਰਦੀ ਬਹੁਤ ਫਲੀ ਹੈ। 'ਜ਼ੰਜੀਰ' ਵਿਚ ਅਮਿਤਾਭ ਨੇ ਵਰਦੀ ਪਾਈ ਤਾਂ ਉਹ ਸਟਾਰ ਬਣ ਗਏ। ਅਜੇ ਦੇਵਗਨ 'ਸਿੰਘਮ' ਵਿਚ ਵਰਦੀ ਪਾ ਕੇ ਆਪਣੇ ਕੈਰੀਅਰ ਵਿਚ ਨਵੀਂ ਜਾਨ ਫੂਕਣ ਵਿਚ ਕਾਮਯਾਬ ਰਹੇ ਤੇ ਐਕਸ਼ਨ ਫ਼ਿਲਮਾਂ ਦੇ ਦੌਰ ਦੌਰਾਨ ਵਿਨੋਦ ਖੰਨਾ, ਜੈਕੀ ਸ਼ਰਾਫ, ਸੁਨੀਲ ਸ਼ੈਟੀ, ਅਕਸ਼ੇ ਕੁਮਾਰ ਆਦਿ ਸਮੇਂ-ਸਮੇਂ 'ਤੇ ਵਰਦੀ ਵਿਚ ਨਜ਼ਰ ਆਏ ਸਨ। ਹੁਣ ਆਪਣੇ ਫ਼ਿਲਮੀ ਕੈਰੀਅਰ ਵਿਚ ਉਭਾਰ ਲਿਆਉਣ ਲਈ ਪ੍ਰਿਆਂਸ਼ੂ ਚੈਟਰਜੀ ਨੇ ਵੀ ਖਾਕੀ ਵਰਦੀ ਪਾ ਲਈ ਹੈ। 'ਤੁਮ ਬਿਨ' ਤੋਂ ਪੇਸ਼ ਹੋਏ ਪ੍ਰਿਆਂਸ਼ੂ ਲਈ ਇਹ ਪਹਿਲਾ ਮੌਕਾ ਹੈ, ਜਦੋਂ ਉਨ੍ਹਾਂ ਨੇ ਵਰਦੀ ਪਾਈ ਹੈ ਅਤੇ ਉਨ੍ਹਾਂ ਨੂੰ ਪੁਲਿਸ ਅਫ਼ਸਰ ਵਜੋਂ ਚਮਕਾਉਂਦੀ ਫ਼ਿਲਮ ਦਾ ਨਾਂਅ ਹੈ 'ਆਫ਼ਿਸਰ ਅਰੁਜਨ ਸਿੰਘ ਆਈ. ਪੀ. ਐਸ.'।
ਅਰਸ਼ਦ ਸਿਦੀਕੀ ਵਲੋਂ ਲਿਖੀ ਤੇ ਨਿਰਦੇਸ਼ਿਤ ਇਸ ਫ਼ਿਲਮ ਵਿਚ ਇਮਾਨਦਾਰ ਤੇ ਫ਼ਰਜ਼ ਨਿਭਾਉਣ ਵਾਲੇ ਪੁਲਿਸ ਅਧਿਕਾਰੀ ਤੇ ਭ੍ਰਿਸ਼ਟ ਨੇਤਾਵਾਂ ਦੀ ਟੱਕਰ ਦੀ ਕਹਾਣੀ ਪੇਸ਼ ਕੀਤੀ ਗਈ ਹੈ। ਅਰਜੁਨ ਸਿੰਘ (ਪ੍ਰਿਆਂਸ਼ੂ ਚੈਟਰਜੀ) ਪੁਲਿਸ ਅਧਿਕਾਰੀ ਹੈ ਅਤੇ ਉਸ ਦਾ ਤਬਾਦਲਾ ਪ੍ਰਯਾਗ ਰਾਜ ਕਰ ਦਿੱਤਾ ਜਾਂਦਾ ਹੈ। ਇਸ ਸ਼ਹਿਰ ਦੇ ਨਾਰੀ ਨਿਕੇਤਨ ਤੋਂ ਇਕ ਕੁੜੀ ਮਾਇਆ (ਰੀਟਾ ਜੋਸ਼ੀ) ਗਵਾਚ ਜਾਂਦੀ ਹੈ ਅਤੇ ਅਰਜੁਨ ਸਿੰਘ ਉਸ ਦੀ ਭਾਲ ਵਿਚ ਲੱਗ ਜਾਂਦਾ ਹੈ। ਇਹ ਭਾਲ ਉਸ ਨੂੰ ਭ੍ਰਿਸ਼ਟ ਨੇਤਾ ਬਾਲਕ ਨਾਥ ਚੌਧਰੀ (ਗੋਵਿੰਦ ਨਾਮਦੇਵ) ਤੇ ਉਸ ਦੇ ਬੇਟੇ ਕੁੰਦਨ (ਵਿਜੇ ਰਾਜ) ਤੱਕ ਲੈ ਜਾਂਦੀ ਹੈ। ਇਸ ਦੌਰਾਨ ਅਰਜੁਨ ਦੀ ਮੁਲਾਕਾਤ ਦੁਰਗਾ (ਰਾਏ ਲਕਸ਼ਮੀ) ਨਾਲ ਹੁੰਦੀ ਹੈ ਅਤੇ ਉਹ ਮਾਇਆ ਦੇ ਕੇਸ ਵਿਚ ਬਾਲਕ ਨਾਥ ਤੇ ਕੁੰਦਨ ਦੇ ਵਿਰੁੱਧ ਗਵਾਹੀ ਦੇਣ ਨੂੰ ਤਿਆਰ ਹੋ ਜਾਂਦੀ ਹੈ। ਆਪਣੀ ਸੱਤਾ ਨਾਲ ਪਾਲੇ ਹੋਏ ਗੁੰਡਿਆਂ ਦੇ ਜ਼ਰੀਏ ਬਾਲਕ ਨਾਥ ਅਰਜੁਨ ਨੂੰ ਤਬਾਹ ਕਰ ਦੇਣਾ ਚਾਹੁੰਦਾ ਹੈ ਪਰ ਕਾਨੂੰਨੀ ਤਾਕਤ ਦੀ ਮਦਦ ਨਾਲ ਕਿਸ ਤਰ੍ਹਾਂ ਅਰਜੁਨ ਇਨ੍ਹਾਂ ਤੋਂ ਛੁਟਕਾਰਾ ਪਾਉਂਦਾ ਹੈ, ਇਹ ਇਸ ਦੀ ਕਹਾਣੀ ਹੈ।
ਪੂਰੀ ਤਰ੍ਹਾਂ ਨਾਲ ਉੱਤਰ ਪ੍ਰਦੇਸ਼ ਵਿਚ ਸ਼ੂਟ ਕੀਤੀ ਗਈ ਇਸ ਫ਼ਿਲਮ ਦੀ ਨਾਇਕਾ ਰਾਏ ਲਕਸ਼ਮੀ ਹੈ। ਪਹਿਲਾਂ 'ਅਕੀਰਾ' ਤੇ ਜੂਲੀ-2' ਵਿਚ ਅਭਿਨੈ ਕਰ ਚੁੱਕੀ ਇਹ ਉਹੀ ਰਾਏ ਲਕਸ਼ਮੀ ਹੈ, ਜਿਸ ਦਾ ਨਾਂਅ ਕਦੀ ਕ੍ਰਿਕਟਰ ਧੋਨੀ ਦੇ ਨਾਲ ਜੋੜਿਆ ਗਿਆ ਸੀ। ਉਸ ਦੇ ਨਾਲ ਇਸ ਫ਼ਿਲਮ ਵਿਚ ਦੀਪਰਾਜ ਰਾਣਾ, ਅਹਿਸਾਨ ਖਾਨ, ਐਸ. ਐਮ. ਜ਼ਹੀਰ, ਸ਼ਬਨਮ ਕਪੂਰ, ਗਿਆਨ ਪ੍ਰਕਾਸ਼ ਤੇ ਲਕਸ਼ਮੀ ਕਾਂਤ ਪਾਂਡੇ ਨੇ ਅਭਿਨੈ ਕੀਤਾ ਹੈ।


-ਮੁੰਬਈ ਪ੍ਰਤੀਨਿਧ

ਸਲਮਾਨ-ਪ੍ਰਭੂਦੇਵਾ ਦੀ ਹੈਟ੍ਰਿਕ

ਬਤੌਰ ਨਿਰਦੇਸ਼ਕ ਪ੍ਰਭੂ ਦੇਵਾ ਨੇ ਸਲਮਾਨ ਖਾਨ ਦੇ ਨਾਲ ਫ਼ਿਲਮ 'ਵਾਂਟੇਡ' ਵਿਚ ਕੰਮ ਕੀਤਾ ਸੀ। ਸਲਮਾਨ ਨੂੰ ਪ੍ਰਭੂ ਦੇਵਾ ਦਾ ਕੰਮ ਕਰਨ ਦਾ ਅੰਦਾਜ਼ ਪਸੰਦ ਆਇਆ ਸੀ। ਸੋ, 'ਦਬੰਗ-3' ਦੇ ਨਿਰਦੇਸ਼ਨ ਦੀ ਵਾਗਡੋਰ ਉਨ੍ਹਾਂ ਨੂੰ ਹੀ ਫੜਾਈ ਗਈ। ਹੁਣ ਬਤੌਰ ਨਿਰਮਾਤਾ ਸਲਮਾਨ ਨੇ ਇਕ ਕੋਰੀਆਈ ਫ਼ਿਲਮ 'ਦ ਆਊਟਰਲਾ' ਦੇ ਹਿੰਦੀ ਰੀਮੇਕ ਹੱਕ ਖਰੀਦ ਲਏ ਹਨ। ਇਨ੍ਹੀਂ ਦਿਨੀਂ ਇਸ ਫ਼ਿਲਮ ਦੀ ਪਟਕਥਾ ਨੂੰ ਹਿੰਦੀ ਦਰਸ਼ਕਾਂ ਦੀ ਪਸੰਦ ਮੁਤਾਬਿਕ ਦੁਬਾਰਾ ਲਿਖਿਆ ਜਾ ਰਿਹਾ ਹੈ। ਭਾਵ ਕੋਰੀਆਈ ਕਹਾਣੀ ਦਾ ਭਾਰਤੀਕਰਨ ਕੀਤਾ ਜਾ ਰਿਹਾ ਹੈ। ਹਿੰਦੀ ਵਰਸ਼ਨ ਦਾ ਟਾਈਟਲ 'ਰਾਧੇ' ਰੱਖਿਆ ਗਿਆ ਹੈ ਅਤੇ ਇਸ ਨੂੰ ਵੀ ਪ੍ਰਭੂ ਦੇਵਾ ਹੀ ਨਿਰਦੇਸ਼ਿਤ ਕਰਨਗੇ ਅਤੇ ਇਹ ਸਲਮਾਨ-ਪ੍ਰਭੂ ਦੇਵਾ ਦੇ ਇਕੱਠਿਆਂ ਤੀਜੀ ਫ਼ਿਲਮ ਹੋਵੇਗੀ। ਫ਼ਿਲਮ ਦੇ ਟਾਈਟਲ 'ਰਾਧੇ' ਦੀ ਚੋਣ ਸਲਮਾਨ ਵਲੋਂ ਨਿਭਾਏ 'ਤੇਰੇ ਨਾਮ' ਤੋਂ ਕੀਤੀ ਗਈ ਹੈ। ਉਸ ਫ਼ਿਲਮ ਵਿਚ ਸਲਮਾਨ ਦੇ ਕਿਰਦਾਰ ਦਾ ਨਾਂਅ ਰਾਧੇ ਸੀ ਅਤੇ ਇਹ ਹਿਟ ਫ਼ਿਲਮ ਸੀ।





Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX