ਜਨਤਾ ਦਾ ਵਿਸ਼ਵਾਸ ਮੇਰੀ ਸੁਰੱਖਿਆ ਢਾਲ-ਮੋਦੀ

• ਕਿਹਾ, 2014 ਤੋਂ ਪਹਿਲਾਂ ਦੇ 10 ਸਾਲ ਗੁੰਮ ਹੋਇਆ ਦਹਾਕਾ
• ਮੋਦੀ ਨੇ ਸਵਾ ਘੰਟੇ ਦੇ ਭਾਸ਼ਨ 'ਚ ਨਹੀਂ ਕੀਤਾ ਅਡਾਨੀ ਦਾ ਜ਼ਿਕਰ
ਨਵੀਂ ਦਿੱਲੀ, 8 ਫਰਵਰੀ (ਉਪਮਾ ਡਾਗਾ ਪਾਰਥ)-ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ 2014 ਤੋਂ ਪਹਿਲਾਂ (2004 ਤੋਂ 2014) ਦੇ ਸਮੇਂ ਨੂੰ ‘Lost 4ecade’ ਭਾਵ ਗੁੰਮ ਦਹਾਕਾ ਕਰਾਰ ਦਿੰਦਿਆਂ ਕਿਹਾ ਕਿ ਕਾਂਗਰਸ ਨੇ ਉਸ ਸਮੇਂ ਹਰ ਮੌਕੇ ਨੂੰ ਮੁਸੀਬਤ 'ਚ ਪਲਟ ਦਿੱਤਾ | ਮੋਦੀ ਨੇ ਕਾਂਗਰਸ ਸ਼ਾਸਿਤ 2004 ਤੋਂ 2014 ਦੇ 10 ਸਾਲਾਂ ਦੇ ਸਮੇਂ ਨੂੰ ਕੇਂਦਰ 'ਚ ਰੱਖਦਿਆਂ ਅਤੇ ਆਪਣੇ 9 ਸਾਲਾਂ ਦੇ ਕਾਰਜਕਾਲ ਨਾਲ ਤੁਲਨਾ ਨੂੰ ਭਾਸ਼ਨ ਦਾ ਆਧਾਰ ਬਣਾ ਕੇ ਸਰਕਾਰ ਦੀ ਸਥਿਰਤਾ ਅਤੇ ਫ਼ੈਸਲਾਕੁੰਨ ਰਵੱਈਏ ਨੂੰ ਜਨਤਾ ਦੀ ਭਰੋਸੇਯੋਗਤਾ ਦਾ ਕਾਰਨ ਦੱਸਿਆ, ਨਾਲ ਹੀ ਵਿਰੋਧੀ ਧਿਰ, ਜੋ ਕਿ ਅਡਾਨੀ ਸਮੂਹ ਨੂੰ ਕੇਂਦਰ ਸਰਕਾਰ ਵਲੋਂ ਦਿੱਤੀ ਜਾਣ ਵਾਲੀ ਕਥਿਤ ਮਦਦ ਦੇ ਮੁੱਦੇ 'ਤੇ ਹਮਲਾਵਰ ਹੋਈ ਹੈ, ਨੂੰ ਅਸਿੱਧੇ ਢੰਗ ਨਾਲ ਸੰਦੇਸ਼ ਪਹੁੰਚਾਉਂਦਿਆਂ ਕਿਹਾ ਕਿ ਭਾਰਤ ਦਾ ਆਮ ਨਾਗਰਿਕ ਹਾਂ-ਪੱਖੀ ਸੋਚ ਨਾਲ ਭਰਪੂਰ ਹੈ | ਉਹ ਨਾਂਹ-ਪੱਖੀ ਵਿਚਾਰਾਂ ਨੂੰ ਸਹਿਣ ਤਾਂ ਕਰ ਲੈਂਦਾ ਹੈ ਪਰ ਸਵੀਕਾਰ ਨਹੀਂ ਕਰਦਾ | ਪੂਰੇ ਭਾਸ਼ਨ 'ਚ ਮੋਦੀ ਨੇ ਅਡਾਨੀ ਨੂੰ ਲੈ ਕੇ ਕੁਝ ਬਿਆਨ ਨਹੀਂ ਦਿੱਤਾ | ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਉਕਤ ਵਿਚਾਰ ਬੁੱਧਵਾਰ ਨੂੰ ਲੋਕ ਸਭਾ 'ਚ ਰਾਸ਼ਟਰਪਤੀ ਦੇ ਭਾਸ਼ਨ 'ਤੇ ਧੰਨਵਾਦ ਮਤੇ 'ਤੇ ਜਵਾਬ ਦਿੰਦਿਆਂ ਪ੍ਰਗਟਾਏ | ਮੋਦੀ ਨੇ ਲੋਕ ਸਭਾ 'ਚ ਦਿੱਤੇ ਤਕਰੀਬਨ ਸਵਾ ਘੰਟੇ ਦੇ ਭਾਸ਼ਨ 'ਚ ਇਕ ਵਾਰ ਵੀ ਵਿਰੋਧੀ ਧਿਰ ਦੇ ਕਿਸੇ ਵੀ ਨੇਤਾ ਦਾ ਨਾਂਅ ਨਹੀਂ ਲਿਆ ਪਰ ਅਸਿੱਧੇ ਤੌਰ 'ਤੇ ਰਾਹੁਲ ਗਾਂਧੀ ਅਤੇ ਕਾਂਗਰਸ ਨੂੰ ਸ਼ਬਦੀ ਤੀਰਾਂ ਦਾ ਨਿਸ਼ਾਨਾ ਬਣਾਇਆ, ਜਿਸ 'ਤੇ ਕਾਂਗਰਸ ਦੇ ਭਾਸ਼ਨ ਦੇ ਸਮੇਂ ਕਈ ਵਾਰ ਹੰਗਾਮਾ ਕੀਤਾ ਅਤੇ ਵਾਕਆਊਟ ਵੀ ਕੀਤਾ | ਸਪੀਕਰ ਓਮ ਬਿਰਲਾ ਨੇ ਸਮੇਂ-ਸਮੇਂ 'ਤੇ ਕਾਂਗਰਸੀ ਸੰਸਦ ਮੈਂਬਰਾਂ ਨੂੰ ਸਦਨ ਦੀ ਮਰਿਆਦਾ ਦਾ ਹਵਾਲਾ ਦਿੰਦਿਆਂ ਸੰਜਮ 'ਚ ਰਹਿਣ ਨੂੰ ਕਿਹਾ |
ਭਾਜਪਾ ਨੇਤਾਵਾਂ ਦੇ ਨਿਸ਼ਾਨੇ 'ਤੇ ਰਹੇ ਰਾਹੁਲ ਗਾਂਧੀ
ਲੋਕ ਸਭਾ 'ਚ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਭਾਵੇਂ ਆਪਣੇ ਭਾਸ਼ਨ 'ਚ ਯੂ.ਪੀ.ਏ. ਦੇ ਸ਼ਾਸਨ ਕਾਲ ਬਨਾਮ ਮੌਜੂਦਾ ਸਰਕਾਰ ਦੇ ਕਾਰਜਕਾਲ ਨੂੰ ਹੀ ਆਧਾਰ ਬਣਾਇਆ ਪਰ ਭਾਜਪਾ ਦੇ ਨੇਤਾਵਾਂ ਵਲੋਂ ਕੀਤੀ ਚਰਚਾ ਦੇ ਕੇਂਦਰ 'ਚ ਰਾਹੁਲ ਗਾਂਧੀ ਦਾ ਮੰਗਲਵਾਰ ਨੂੰ ਲੋਕ ਸਭਾ 'ਚ ਦਿੱਤਾ ਭਾਸ਼ਨ ਹੀ ਰਿਹਾ ਅਤੇ ਉਨ੍ਹਾਂ ਨੇ ਉਸ ਨੂੰ ਆਧਾਰ ਬਣਾ ਕੇ ਰਾਹੁਲ ਗਾਂਧੀ 'ਤੇ ਜੰਮ ਕੇ ਸ਼ਬਦੀ ਹਮਲਾ ਕੀਤਾ | ਭਾਜਪਾ ਨੇਤਾ ਅਤੇ ਸਾਬਕਾ ਕਾਨੂੰਨ ਮੰਤਰੀ ਰਵੀਸ਼ੰਕਰ ਪ੍ਰਸਾਦ ਨੇ ਆਪਣੇ ਭਾਸ਼ਨ 'ਚ ਬੋਫੋਰਸ, ਕੋਲਾ ਘੁਟਾਲਾ, 2-ਜੀ ਘੁਟਾਲਾ, ਰਾਫ਼ੇਲ ਸਮੇਤ ਕਈ ਮੁੱਦਿਆਂ 'ਤੇ ਕਾਂਗਰਸ ਨੂੰ ਘੇਰਿਆ | ਰਵੀਸ਼ੰਕਰ ਪ੍ਰਸਾਦ ਨੇ ਰਾਹੁਲ ਗਾਂਧੀ ਦੇ ਭਾਸ਼ਨ ਨੂੰ ਸਦਨ ਨੂੰ ਗੁੰਮਰਾਹ ਕਰਨ ਵਾਲਾ ਭਾਸ਼ਨ ਦੱਸਿਆ | ਪ੍ਰਸਾਦ ਨੇ ਰਾਹੁਲ ਗਾਂਧੀ ਤੋਂ ਇਲਾਵਾ ਪਿ੍ਅੰਕਾ ਗਾਂਧੀ ਦੇ ਪਤੀ ਰਾਬਰਟ ਵਾਡਰਾ ਅਤੇ ਓਾਤਾਵਿਓ ਕਵਾਤਰਾਨੋਚੀ ਨੂੰ ਲੈ ਕੇ ਨਿੱਜੀ ਹਮਲੇ ਵੀ ਕੀਤੇ | ਪ੍ਰਸਾਦ ਨੇ ਨੈਸ਼ਨਲ ਹੈਰਾਲਡ ਮਾਮਲੇ ਦੇ ਹਵਾਲੇ ਨਾਲ ਰਾਹੁਲ ਗਾਂਧੀ ਨੂੰ ਜ਼ਮਾਨਤ 'ਤੇ ਬਾਹਰ ਸਿਆਸੀ ਨੇਤਾ ਦੱਸਿਆ | ਉਨ੍ਹਾਂ ਦਾਅਵਾ ਕਰਦਿਆਂ ਕਿਹਾ ਕਿ ਕਾਂਗਰਸ ਦੇਸ਼ ਦੀ ਤਰੱਕੀ ਤੋਂ ਇਸ ਲਈ ਪ੍ਰੇਸ਼ਾਨ ਹੈ ਕਿ ਉਨ੍ਹਾਂ ਦੀ ਕਮਿਸ਼ਨ ਬੰਦ ਹੋ ਗਈ ਹੈ | ਰਾਹੁਲ ਗਾਂਧੀ ਨੇ ਮੰਗਲਵਾਰ ਦੇ ਭਾਸ਼ਨ 'ਚ ਪ੍ਰਧਾਨ ਮੰਤਰੀ ਨਾਲ ਨੇੜਲੇ ਸੰਬੰਧਾਂ ਨੂੰ ਅਡਾਨੀ ਸਮੂਹ ਦੇ ਉਭਾਰ ਦਾ ਕਾਰਨ ਦੱਸਿਆ ਸੀ | ਪ੍ਰਸਾਦ ਨੇ ਪਿਛਲੀਆਂ ਸਰਕਾਰਾਂ 'ਚ ਅਡਾਨੀ ਦੇ ਦੌਰਿਆਂ ਦਾ ਬਿਓਰਾ ਦਿੰਦਿਆਂ ਕਿ 2008, 2010 ਅਤੇ 2011 'ਚ ਅਡਾਨੀ ਨੂੰ ਜੋ ਬਾਹਰਲੇ ਪ੍ਰਾਜੈਕਟ ਮਿਲੇ ਤਾਂ ਕੀ ਉਸ ਦਾ ਕਾਰਨ ਪ੍ਰਧਾਨ ਮੰਤਰੀ ਮਨਮੋਹਨ ਸਿੰਘ ਸਨ? ਪ੍ਰਸਾਦ ਨੇ ਕਾਂਗਰਸ ਸ਼ਾਸਿਤ ਰਾਜਾਂ ਛੱਤੀਸਗੜ੍ਹ ਅਤੇ ਰਾਜਸਥਾਨ 'ਚ ਅਡਾਨੀ ਦੇ ਨਿਵੇਸ਼ ਨੂੰ ਲੈ ਕੇ ਘੇਰਦਿਆਂ ਕਿਹਾ ਕਿ ਕੀ ਉੱਥੇ ਵੀ ਕੋਈ ਡੀਲ ਹੋਈ ਹੈ |
'ਨਿਰਾਸ਼ਾ ਮੇਂ ਡੂਬੇ ਲੋਗ'
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਆਪਣੇ ਭਾਸ਼ਨ 'ਚ ਸਿੱਧੇ ਤੌਰ 'ਤੇ ਕਾਂਗਰਸ ਨੇਤਾ ਰਾਹੁਲ ਗਾਂਧੀ ਨੂੰ ਸੰਬੋਧਨ ਨਹੀਂ ਕੀਤਾ ਪਰ ਭਾਸ਼ਨ 'ਚ ਵਾਰ-ਵਾਰ 'ਨਿਰਾਸ਼ਾ ਮੇਂ ਡੂਬੇ ਲੋਗ' ਕਹਿ ਕੇ ਉਨ੍ਹਾਂ ਵੱਲ ਇਸ਼ਾਰਾ ਕੀਤਾ | ਮੋਦੀ ਨੇ ਸਰਕਾਰ ਦੀਆਂ ਪ੍ਰਾਪਤੀਆਂ ਗਿਣਾਉਂਦਿਆਂ ਕਿਹਾ ਕਿ ਏਨੀ ਵੱਡੀ ਆਲਮੀ ਮਹਾਂਮਾਰੀ ਅਤੇ ਵਿਸ਼ਵ ਭਰ 'ਚ ਏਨੀ ਉਥਲ-ਪੁਥਲ ਤੋਂ ਬਾਅਦ ਵੀ ਭਾਰਤ ਪੰਜਵੀਂ ਵੱਡੀ ਅਰਥਵਿਵਸਥਾ ਬਣਿਆ ਹੋਇਆ ਹੈ | ਸਟਾਰਟ ਅੱਪ ਦੇ ਮਾਮਲੇ 'ਚ ਵਿਸ਼ਵ 'ਚ ਤੀਜੇ ਨੰਬਰ 'ਤੇ ਹੈ | ਮੋਬਾਈਲ ਬਣਾਉਣ 'ਚ ਦੂਜੇ ਅਤੇ ਘਰੇਲੂ ਹਵਾਈ ਟ੍ਰੈਫ਼ਿਕ ਅਤੇ ਊਰਜਾ ਖਪਤਕਾਰੀ ਅਤੇ ਮੁੜ ਨਵਿਆਉਣਯੋਗ ਊਰਜਾ ਖੇਤਰ 'ਚ ਤੀਜੇ ਨੰਬਰ 'ਤੇ ਹੈ | ਅਜਿਹੀਆਂ ਹੋਰ ਉਪਲਬਧੀਆਂ ਦਾ ਦਾਅਵਾ ਕਰਦਿਆਂ ਮੋਦੀ ਨੇ ਕਿਹਾ ਕਿ ਦੇਸ਼ ਦੀ 140 ਕਰੋੜ ਜਨਤਾ ਨੂੰ ਇਸ ਸਭ 'ਤੇ ਫ਼ਖ਼ਰ ਹੈ ਪਰ ਕੁਝ 'ਨਿਰਾਸ਼ਾ ਮੇਂ ਡੂਬੇ ਲੋਗ' ਦੇਸ਼ ਦੀ ਤਰੱਕੀ ਤੋਂ ਵੀ ਨਿਰਾਸ਼ ਹਨ | ਮੋਦੀ ਨੇ ਭਾਸ਼ਨ 'ਚ ਕਾਫ਼ੀ ਚਿਰ ਯੂ.ਪੀ.ਏ. ਦੇ ਸ਼ਾਸਨ ਕਾਲ ਨੂੰ ਦਿੰਦਿਆਂ ਕਿਹਾ ਕਿ 10 ਸਾਲਾਂ 'ਚ (2004 ਤੋਂ 2014) ਭਾਰਤੀ ਅਰਥਚਾਰੇ ਦੀ ਖਸਤਾਹਾਲ ਸੀ, ਮਹਿੰਗਾਈ ਦਰ ਦਹਾਈ ਦੇ ਅੰਕੜੇ ਨੂੰ ਪਾਰ ਕਰ ਗਈ ਸੀ, ਬੇਰੁਜ਼ਗਾਰੀ ਕਾਫ਼ੀ ਜ਼ਿਆਦਾ ਸੀ | ਜੰਮੂ-ਕਸ਼ਮੀਰ ਤੋਂ ਲੈ ਕੇ ਉੱਤਰ-ਪੂਰਬੀ ਖਿੱਤੇ 'ਚ ਹਿੰਸਾ ਸੀ, ਆਲਮੀ ਮੰਚ 'ਤੇ ਭਾਰਤ ਦੀ ਆਵਾਜ਼ ਬਹੁਤ ਕਮਜ਼ੋਰ ਸੀ |
ਭਾਰਤ ਵਾਸੀ ਨਾਂਹ ਪੱਖੀ ਵਿਚਾਰ ਸਹਿਣ ਤਾਂ ਕਰ ਲੈਂਦੇ ਹਨ ਪਰ ਸਵੀਕਾਰ ਨਹੀਂ ਕਰਦੇ
ਮੋਦੀ ਨੇ ਰਾਹੁਲ ਗਾਂਧੀ ਦੇ ਮੰਗਲਵਾਰ ਦੇ ਭਾਸ਼ਨ ਨੂੰ ਅਸਿੱਧੇ ਢੰਗ ਨਾਲ ਨਿਸ਼ਾਨੇ 'ਤੇ ਲੈਂਦਿਆਂ ਕਿਹਾ ਕਿ ਆਮ ਭਾਰਤ ਵਾਸੀ ਹਾਂ-ਪੱਖੀ ਸੋਚ ਨਾਲ ਭਰਿਆ ਹੋਇਆ ਹੈ | ਉਹ ਨਾਂਹ-ਪੱਖੀ ਵਿਚਾਰ ਨੂੰ ਸਹਿ ਤਾਂ ਲੈਂਦਾ ਹੈ ਪਰ ਸਵੀਕਾਰ ਨਹੀਂ ਕਰਦਾ | ਨਾਲ ਹੀ ਸਿਰਜਣਸ਼ੀਲ ਆਲੋਚਨਾ ਦੀ ਘਾਟ ਹੋਣ ਦਾ ਦਾਅਵਾ ਕਰਦਿਆਂ ਕਿਹਾ ਕਿ ਆਲੋਚਨਾ ਲੋਕਤੰਤਰ ਦੀ ਮਜ਼ਬੂਤੀ ਲਈ ਹੈ ਪਰ ਵਿਰੋਧੀ ਧਿਰਾਂ (ਕਾਂਗਰਸ) ਨੇ ਉਸਾਰੂ ਆਲੋਚਨਾ ਦੀ ਥਾਂ 'ਤੇ ਲਾਜ਼ਮੀ ਆਲੋਚਨਾ ਨੂੰ ਆਪਣਾ ਆਧਾਰ ਬਣਾ ਲਿਆ ਹੈ | ਇਸ ਨੂੰ ਹੋਰ ਅੱਗੇ ਲਿਜਾਂਦਿਆਂ ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ (ਕਾਂਗਰਸ) ਨੇ ਆਲੋਚਨਾ ਦਾ ਸਮਾਂ ਇਲਜ਼ਾਮਾਂ 'ਚ ਗੁਆ ਦਿੱਤਾ | ਚੁਣਾਵੀ ਹਾਰ 'ਤੇ ਈ.ਵੀ.ਐੱਮ.'ਤੇ ਇਲਜ਼ਾਮ ਚੋਣ ਕਮਿਸ਼ਨ 'ਤੇ ਇਲਜ਼ਾਮ ਭਿ੍ਸ਼ਟਾਚਾਰ ਦੀ ਜਾਂਚ ਲਈ ਜਾਂਚ ਏਜੰਸੀਆਂ 'ਤੇ ਇਲਜ਼ਾਮ ਅਤੇ ਆਰਥਿਕ ਵਿਕਾਸ 'ਤੇ ਆਰ.ਬੀ.ਆਈ. 'ਤੇ ਇਲਜ਼ਾਮ |
ਈ.ਡੀ. ਨੇ ਸਾਰੀਆਂ ਵਿਰੋਧੀ ਧਿਰਾਂ ਨੂੰ ਇਕ ਮੰਚ 'ਤੇ ਲਿਆ ਦਿੱਤਾ
ਪ੍ਰਧਾਨ ਮੰਤਰੀ ਨੇ ਵਿਰੋਧੀ ਇਕਜੁੱਟਤਾ 'ਤੇ ਤਨਜ਼ ਕਰਦਿਆਂ ਕਿਹਾ ਕਿ ਈ.ਡੀ. ਨੇ ਸਾਰੀਆਂ ਵਿਰੋਧੀ ਪਾਰਟੀਆਂ ਨੂੰ ਇਕ ਮੰਚ 'ਤੇ ਲਿਆ ਦਿੱਤਾ ਹੈ | ਦੱਸਣਯੋਗ ਹੈ ਕਿ ਸੰਸਦ ਦੇ ਬਜਟ ਇਜਲਾਸ 'ਚ ਕਾਂਗਰਸ ਦੀ ਅਗਵਾਈ ਹੇਠ 16 ਪਾਰਟੀਆਂ ਨੇ ਇਕਜੁੱਟਤਾ ਦਾ ਵਿਖਾਵਾ ਕਰਦਿਆਂ ਅਡਾਨੀ ਮੁੱਦੇ 'ਤੇ ਸਰਕਾਰ ਦੀ ਘੇਰਾਬੰਦੀ ਕੀਤੀ | ਹੰਗਾਮਿਆਂ ਕਾਰਨ ਸੰਸਦ ਦੀ ਕਾਰਵਾਈ 4 ਦਿਨਾਂ ਤੱਕ ਪ੍ਰਭਾਵਿਤ ਰਹੀ ਅਤੇ ਰਾਸ਼ਟਰਪਤੀ ਦੇ ਭਾਸ਼ਨ 'ਤੇ ਚਰਚਾ ਸ਼ੁਰੂ ਨਹੀਂ ਹੋ ਸਕੀ |
ਭਵਿੱਖ 'ਚ ਕਾਂਗਰਸ ਦੀ ਬਰਬਾਦੀ 'ਤੇ ਹੋਵੇਗੀ ਕੇਸ ਸਟੱਡੀ
ਪ੍ਰਧਾਨ ਮੰਤਰੀ ਨੇ ਆਪਣੇ ਭਾਸ਼ਨ 'ਚ ਕਾਂਗਰਸ ਨੂੰ ਨਿਸ਼ਾਨਾ ਬਣਾਉਂਦਿਆਂ ਕਿਹਾ ਕਿ ਹਾਲ 'ਚ ਹਾਰਵਰਡ ਯੂਨੀਵਰਸਿਟੀ 'ਚ ਕੇਸ ਸਟੱਡੀ ਹੋਈ ਸੀ, ਜਿਸ 'ਚ ਭਾਰਤ 'ਚ ਕਾਂਗਰਸ ਦੇ ਉਭਾਰ ਤੇ ਪਤਨ 'ਤੇ ਚਰਚਾ ਕੀਤੀ ਗਈ ਸੀ | ਉਨ੍ਹਾਂ ਤਨਜ਼ ਕਰਦਿਆਂ ਕਿਹਾ ਕਿ ਭਵਿੱਖ 'ਚ ਕਾਂਗਰਸ ਦੀ ਬਰਬਾਦੀ 'ਤੇ ਸਿਰਫ ਹਾਰਵਰਡ ਹੀ ਨਹੀਂ ਹੋਰ ਸੰਸਥਾਵਾਂ 'ਚ ਵੀ ਖੋਜ ਹੋਵੇਗੀ | ਮੋਦੀ ਦੇ ਇਸ ਬਿਆਨ ਦੇ ਪਿਛੋਕੜ 'ਚ ਅਸਿੱਧੇ ਤੌਰ 'ਤੇ ਰਾਹੁਲ ਗਾਂਧੀ ਦਾ ਮੰਗਲਵਾਰ ਦਾ ਉਹ ਬਿਆਨ ਹੈ, ਜਿਸ 'ਚ ਉਨ੍ਹਾਂ ਕਿਹਾ ਸੀ ਕਿ ਭਵਿੱਖ 'ਚ ਹਾਰਵਰਡ 'ਚ ਮੋਦੀ ਅਤੇ ਅਡਾਨੀ ਦੇ ਸੰਬੰਧਾਂ ਅਤੇ ਅਡਾਨੀ ਦੇ ਉਭਾਰ 'ਤੇ ਕੇਸ ਸਟੱਡੀ ਹੋਵੇਗੀ |
ਜਦੋਂ ਸਦਨ 'ਚ ਲੱਗੇ 'ਮੋਦੀ-ਮੋਦੀ' ਦੇ ਨਾਅਰੇ
ਪ੍ਰਧਾਨ ਮੰਤਰੀ ਦੇ ਭਾਸ਼ਨ ਦੌਰਾਨ ਤਕਰੀਬਨ 3 ਵਾਰ ਸੱਤਾ ਧਿਰ ਨੇ ਮੇਜ਼ ਥਪਥਪਾ ਕੇ 'ਮੋਦੀ-ਮੋਦੀ' ਦੇ ਨਾਅਰੇ ਲਾਏ, ਜਦਕਿ ਵਿਰੋਧੀ ਧਿਰਾਂ ਨੇ ਨਾਲ ਹੀ ਪ੍ਰਤੀਕਰਮ ਵਜੋਂ ਅਡਾਨੀ-ਅਡਾਨੀ ਕਹਿੰਦਿਆਂ ਇਸ ਦਾ ਵਿਰੋਧ ਕੀਤਾ |
2047 ਲਈ ਇਕੱਠੇ ਅੱਗੇ ਵਧਣ ਦਾ ਦਿੱਤਾ ਸੱਦਾ
ਪ੍ਰਧਾਨ ਮੰਤਰੀ ਨੇ ਭਾਸ਼ਨ ਦੇ ਆਖਿਰ 'ਚ ਰਾਸ਼ਟਰਪਤੀ ਦੇ ਭਾਸ਼ਨ 'ਚ ਸ਼ਾਮਿਲ 2047 ਦੇ ਸੰਕਲਪ ਨੂੰ ਦੁਹਰਾਉਂਦਿਆਂ ਕਿਹਾ ਕਿ ਸਿਆਸੀ ਮੱਤਭੇਦ ਹੋ ਸਕਦੇ ਹਨ, ਪਰ ਦੇਸ਼ ਅਜਰ ਅਮਰ ਹੈ | ਇਸ ਲਈ ਦੇਸ਼ ਦੇ ਪੂਰੀ ਸਮਰੱਥਾ ਨਾਲ ਆਓ, 2047 (ਜਦੋਂ ਦੇਸ਼ ਦੀ ਆਜ਼ਾਦੀ ਦੇ 100 ਸਾਲ ਹੋਣਗੇ) ਵੱਲ ਅੱਗੇ ਵਧੀਏ |
ਦਫ਼ਨ ਕਰ ਦਿੱਤਾ ਗਿਆ ਲੋਕਤੰਤਰ-ਜੈਰਾਮ ਰਮੇਸ਼
ਮੰਗਲਵਾਰ ਨੂੰ ਰਾਹੁਲ ਗਾਂਧੀ ਵਲੋਂ ਦਿੱਤੇ ਗਏ ਭਾਸ਼ਨ ਦਾ ਕੁਝ ਹਿੱਸਾ ਹਟਾ ਦਿੱਤਾ ਗਿਆ ਹੈ | ਰਾਹੁਲ ਗਾਂਧੀ ਦੇ ਭਾਸ਼ਨ 'ਚ ਉਦਯੋਗਪਤੀ ਗੌਤਮ ਅਡਾਨੀ ਅਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਨਾਂਅ ਲੈ ਕੇ ਦਿੱਤੇ ਬਿਆਨਾਂ ਦੇ ਹਿੱਸੇ ਨੂੰ ਲੋਕ ਸਭਾ ਸਕੱਤਰੇਤ ਵਲੋਂ ਹਟਾ ਦਿੱਤਾ ਗਿਆ ਹੈ, ਜਿਸ ਆਧਾਰ 'ਚ ਉਨ੍ਹਾਂ ਹਿੱਸਾ ਸਦਨ ਦੀ ਕਾਰਵਾਈ ਦੇ ਰਿਕਾਰਡ ਦਾ ਹਿੱਸਾ ਨਹੀਂ ਰਹੇਗਾ | ਕਾਂਗਰਸੀ ਨੇਤਾ ਜੈਰਾਮ ਰਮੇਸ਼ ਨੇ ਇਸ 'ਤੇ ਤਿੱਖਾ ਪ੍ਰਤੀਕਰਮ ਕਰਦਿਆਂ ਕਿਹਾ ਕਿ ਲੋਕਤੰਤਰ ਦਫ਼ਨ ਕਰ ਦਿੱਤਾ ਗਿਆ ਹੈ | ਜੈਰਾਮ ਰਮੇਸ਼ ਨੇ ਟਵਿਟਰ 'ਤੇ ਪਾਏ ਸੰਦੇਸ਼ 'ਚ ਕਿਹਾ ਕਿ ਪ੍ਰਧਾਨ ਮੰਤਰੀ ਨਾਲ ਜੁੜੇ ਅਡਾਨੀ ਮਹਾਂਮੈਗਾਸਕੈਮ 'ਤੇ ਰਾਹੁਲ ਗਾਂਧੀ ਦੀ ਟਿੱਪਣੀ ਨੂੰ ਹਟਾਉਣ ਦੇ ਨਾਲ ਹੀ ਲੋਕ ਸਭਾ 'ਚ ਲੋਕਤੰਤਰ ਦਾ ਅੰਤਿਮ ਸੰਸਕਾਰ ਕਰ ਦਿੱਤਾ ਗਿਆ ਹੈ |

ਅਡਾਨੀ ਨੂੰ ਬਚਾ ਰਹੇ ਹਨ ਪ੍ਰਧਾਨ ਮੰਤਰੀ-ਰਾਹੁਲ ਗਾਂਧੀ

ਨਵੀਂ ਦਿੱਲੀ, 8 ਫਰਵਰੀ (ਉਪਮਾ ਡਾਗਾ ਪਾਰਥ)-ਕਾਂਗਰਸ ਨੇਤਾ ਰਾਹੁਲ ਗਾਂਧੀ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਭਾਸ਼ਨ ਤੋਂ ਬਾਅਦ ਪ੍ਰਤੀਕਰਮ ਕਰਦਿਆਂ ਕਿਹਾ ਕਿ ਉਹ ਅਡਾਨੀ ਨੂੰ ਬਚਾ ਰਹੇ ਹਨ | ਰਾਹੁਲ ਗਾਂਧੀ ਨੇ ਕਿਹਾ ਕਿ ਪ੍ਰਧਾਨ ਮੰਤਰੀ ਉਨ੍ਹਾਂ ਵਲੋਂ ਪੁੱਛੇ ਇਕ ਵੀ ਸਵਾਲ ਦਾ ਜਵਾਬ ਨਹੀਂ ਦਿੱਤਾ, ਜਿਸ ਤੋਂ ਸਮਝ ਆਉਂਦਾ ਹੈ ਕਿ ਉਹ (ਮੋਦੀ) ਅਡਾਨੀ ਨੂੰ ਬਚਾ ਰਹੇ ਹਨ | ਰਾਹੁਲ ਗਾਂਧੀ ਨੇ ਕਿਹਾ ਕਿ ਉਹ ਪ੍ਰਧਾਨ ਮੰਤਰੀ ਦੇ ਭਾਸ਼ਨ ਤੋਂ ਸੰਤੁਸ਼ਟ ਨਹੀਂ ਹਨ, ਪਰ ਇਸ ਤੋਂ ਸਚਾਈ ਸਾਹਮਣੇ ਆ ਰਹੀ ਹੈ | ਰਾਹੁਲ ਗਾਂਧੀ ਨੇ ਟਵਿੱਟਰ 'ਤੇ ਪਾਏ ਸੰਦੇਸ਼ ਰਾਹੀਂ ਵੀ ਪ੍ਰਧਾਨ ਮੰਤਰੀ ਨੂੰ ਨਿਸ਼ਾਨਾ ਬਣਾਉਂਦਿਆਂ ਕਿਹਾ ਕਿ 'ਨਾ ਜਾਂਚ ਕਰਾਏਾਗੇ, ਨਾ ਜਵਾਬ ਦੇਂਗੇਂ' ਪ੍ਰਧਾਨ ਮੰਤਰੀ ਜੀ ਬੱਸ ਆਪਣੇ ਮਿੱਤਰ ਕਾ ਸਾਥ ਦੇਗੇਂ |

ਆਰ.ਬੀ.ਆਈ. ਨੇ ਲਗਾਤਾਰ ਛੇਵੀਂ ਵਾਰ ਵਧਾਈਆਂ ਵਿਆਜ ਦਰਾਂ

ਮੁੰਬਈ, 8 ਫਰਵਰੀ (ਏਜੰਸੀ)-ਭਾਰਤੀ ਰਿਜ਼ਰਵ ਬੈਂਕ (ਆਰ. ਬੀ. ਆਈ.) ਨੇ ਵਿਆਜ ਦਰਾਂ 'ਚ ਲਗਾਤਾਰ ਛੇਵੀਂ ਵਾਰ ਵਾਧਾ ਕੀਤਾ ਹੈ, ਆਰ. ਬੀ. ਆਈ. ਗਵਰਨਰ ਨੇ ਰੈਪੋ ਰੇਟ 'ਚ 0.25 ਫ਼ੀਸਦੀ ਦੇ ਵਾਧੇ ਦਾ ਐਲਾਨ ਕੀਤਾ | ਜਿਸ ਤੋਂ ਬਾਅਦ ਪ੍ਰਮੁੱਖ ਵਿਆਜ ਦਰ ਭਾਵ ਰੈਪੋ ਰੇਟ 6.25 ਫ਼ੀਸਦੀ ਤੋਂ ਵੱਧ ਕੇ 6.50 ਫ਼ੀਸਦੀ ਹੋ ਗਈ ਹੈ | ਮੌਦਰਿਕ ਨੀਤੀ ਕਮੇਟੀ (ਐਮ.ਪੀ.ਸੀ.) ਦੀ ਤਿੰਨ ਦਿਨਾ ਬੈਠਕ ਦੇ ਆਖਰੀ ਦਿਨ ਜਾਣਕਾਰੀ ਦਿੰਦਿਆਂ ਹੋਇਆਂ ਆਰ.ਬੀ.ਆਈ. ਗਵਰਨਰ ਸ਼ਕਤੀਕਾਂਤ ਦਾਸ ਨੇ ਕਿਹਾ ਕਿ ਮੌਜੂਦਾ ਆਰਥਿਕ ਸਥਿਤੀ 'ਤੇ ਵਿਚਾਰ ਕਰਦਿਆਂ ਹੋਇਆਂ ਐਮ.ਪੀ.ਸੀ. ਨੇ ਨੀਤੀਗਤ ਦਰ ਨੂੰ 0.25 ਫ਼ੀਸਦੀ ਵਧਾ ਕੇ 6.50 ਫ਼ੀਸਦੀ ਕਰਨ ਦਾ ਫ਼ੈਸਲਾ ਕੀਤਾ ਹੈ | ਹੁਣ ਘਰ ਦੇ ਕਰਜ਼ੇ ਤੋਂ ਲੈ ਕੇ ਆਟੋ ਅਤੇ ਨਿੱਜੀ ਕਰਜ਼ ਸਭ ਕੁਝ ਮਹਿੰਗਾ ਹੋ ਜਾਵੇਗਾ ਅਤੇ ਹੁਣ ਜ਼ਿਆਦਾ ਮਹੀਨਾਵਾਰ ਕਿਸ਼ਤਾਂ ਚੁਕਾਉਣੀਆਂ ਹੋਣਗੀਆਂ | ਹਾਲਾਂਕਿ ਐਫ.ਡੀ. 'ਤੇ ਹੁਣ ਜ਼ਿਆਦਾ ਵਿਆਜ ਦਰਾਂ ਮਿਲਣਗੀਆਂ | ਸ਼ਕਤੀਕਾਂਤ ਦਾਸ ਨੇ ਕਿਹਾ ਕਿ ਮੌਦਰਿਕ ਨੀਤੀ ਕਮੇਟੀ ਦੇ 6 ਮੈਂਬਰਾਂ 'ਚੋਂ 4 ਨੇ ਰੈਪੋ ਰੇਟ ਵਧਾਉਣ ਦੇ ਪੱਖ 'ਚ ਮਤਦਾਨ ਕੀਤਾ | ਇਸ ਦੇ ਨਾਲ ਹੀ ਆਰ.ਬੀ.ਆਈ. ਨੇ ਮੌਜੂਦਾ ਵਿੱਤੀ ਵਰ੍ਹੇ 2022-23 ਲਈ ਕੁੱਲ ਘਰੇਲੂ ਉਤਪਾਦ (ਜੀ.ਡੀ.ਪੀ.) ਦੀ ਵਿਕਾਸ ਦਰ ਦਾ ਅਨੁਮਾਨ 6.8 ਫ਼ੀਸਦੀ ਤੋਂ ਵਧਾ ਕੇ 7 ਫ਼ੀਸਦੀ ਕਰ ਦਿੱਤਾ ਹੈ | ਇਸ ਦੇ ਨਾਲ ਹੀ ਅਗਲੇ ਵਿੱਤੀ ਵਰ੍ਹੇ 'ਚ ਜੀ.ਡੀ.ਪੀ. ਦੀ ਵਾਧਾ ਦਰ 6.4 ਫ਼ੀਸਦੀ ਰਹਿਣ ਦਾ ਅਨੁਮਾਨ ਲਗਾਇਆ ਹੈ |
ਹੁਣ ਏ.ਟੀ.ਐਮ. 'ਚੋਂ ਨਿਕਲਣਗੇ ਸਿੱਕੇ
ਹੁਣ ਯੂ.ਪੀ.ਆਈ. ਜ਼ਰੀਏ ਏ.ਟੀ.ਐਮ. 'ਚੋਂ ਸਿੱਕੇ ਕਢਵਾਏ ਜਾ ਸਕਣਗੇ | ਆਰ.ਬੀ.ਆਈ. ਨੇ ਸਿੱਕਿਆਂ ਲਈ ਵੈਂਡਿੰਗ ਮਸ਼ੀਨ ਲਗਾਉਣ ਦਾ ਐਲਾਨ ਕੀਤਾ ਹੈ | ਸ਼ਕਤੀਕਾਂਤ ਦਾਸ ਨੇ ਦੱਸਿਆ ਕਿ ਉਨ੍ਹਾਂ ਦੀ ਯੋਜਨਾ ਕਿਊ.ਆਰ ਕੋਡ 'ਤੇ ਆਧਾਰਿਤ ਕੁਆਇਨ ਵੈਂਡਿੰਗ ਮਸ਼ੀਨ ਲਗਾਉਣ ਦੀ ਹੈ | ਉਹ ਇਸ ਲਈ ਪਾਇਲਟ ਪ੍ਰੋਜੈਕਟ ਸ਼ੁਰੂ ਕਰਨ ਜਾ ਰਹੇ ਹਨ | ਇਸ ਦਾ ਉਦੇਸ਼ ਸਿੱਕਿਆਂ ਦੀ ਉਪਲਬਧਤਾ ਨੂੰ ਵਧਾਉਣਾ ਹੈ | ਸ਼ੁਰੂਆਤੀ ਗੇੜ 'ਚ ਇਸ ਯੋਜਨਾ ਨੂੰ ਦੇਸ਼ ਦੇ 12 ਸ਼ਹਿਰਾਂ 'ਚ ਸ਼ੁਰੂ ਕੀਤਾ ਜਾਵੇਗਾ |
ਬੈਂਕਾਂ ਦੀ ਸਥਿਤੀ ਮਜ਼ਬੂਤ, ਅਡਾਨੀ ਮਾਮਲੇ 'ਤੇ ਬੋਲੇ ਸ਼ਕਤੀਕਾਂਤ ਦਾਸ
ਅਡਾਨੀ ਗਰੁੱਪ ਮਾਮਲੇ 'ਤੇ ਆਰ. ਬੀ. ਆਈ. ਦੇ ਗਵਰਨਰ ਸ਼ਕਤੀਕਾਂਤ ਦਾਸ ਨੇ ਕਿਹਾ ਕਿ ਦੇਸ਼ ਦੇ ਬੈਂਕ ਏਨੇ ਵੱਡੇ ਅਤੇ ਮਜ਼ਬੂਤ ਹਨ ਕਿ ਉਨ੍ਹਾਂ 'ਤੇ ਅਜਿਹੇ ਮਾਮਲਿਆਂ ਦਾ ਅਸਰ ਨਹੀਂ ਪਵੇਗਾ | ਅਡਾਨੀ ਗਰੁੱਪ ਨਾਲ ਜੁੜੇ ਇਕ ਸਵਾਲ ਦੇ ਜਵਾਬ 'ਚ ਦਾਸ ਨੇ ਕਿਹਾ ਕਿ ਆਰ.ਬੀ.ਆਈ. ਨੇ ਖ਼ੁਦ ਆਪਣਾ ਮੁਲਾਂਕਣ ਕੀਤਾ ਹੈ | ਅਜੋਕੇ ਸਮੇਂ 'ਚ ਭਾਰਤੀ ਬੈਂਕਾਂ ਦਾ ਆਕਾਰ, ਉਨ੍ਹਾਂ ਦੀ ਸਮਰੱਥਾ ਕਾਫ਼ੀ ਮਜ਼ਬੂਤ ਹੈ | ਉਹ ਇਸ ਤਰ੍ਹਾਂ ਦੇ ਮਾਮਲਿਆਂ ਤੋਂ ਪ੍ਰਭਾਵਿਤ ਹੋਣ ਵਾਲੇ ਨਹੀਂ ਹਨ | ਅਡਾਨੀ ਗਰੁੱਪ ਦੀਆਂ ਕੰਪਨੀਆਂ ਨੂੰ ਦਿੱਤੇ ਗਏ ਕਰਜ਼ੇ ਸੰਬੰਧੀ ਪੁੱਛੇ ਸਵਾਲ ਦੇ ਜਵਾਬ 'ਚ ਦਾਸ ਨੇ ਕਿਹਾ ਕਿ ਬੈਂਕ ਕਰਜ਼ ਦੇਣ ਸਮੇਂ, ਸੰਬੰਧਿਤ ਕੰਪਨੀ ਦੀ ਬੁਨਿਆਦ ਅਤੇ ਸੰਬੰਧਿਤ ਪ੍ਰਾਜੈਕਟਾਂ ਲਈ ਨਕਦ ਪ੍ਰਵਾਹ ਦੀ ਸਥਿਤੀ 'ਤੇ ਗੌਰ ਕਰਦੇ ਹਨ | ਕਰਜ਼ ਦੇ ਮਾਮਲੇ 'ਚ ਕੰਪਨੀਆਂ ਦੇ ਬਾਜ਼ਾਰ ਪੂੰਜੀਕਰਨ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਹੁੰਦਾ ਹੈ | ਆਰ.ਬੀ.ਆਈ. ਦੇ ਡਿਪਟੀ ਗਵਰਨਰ ਐਮ.ਕੇ. ਜੈਨ ਨੇ ਕਿਹਾ ਕਿ ਘਰੇਲੂ ਬੈਂਕਾਂ ਦਾ ਅਡਾਨੀ ਗਰੁੱਪ ਨੂੰ ਦਿੱਤਾ ਗਿਆ ਕਰਜ਼ਾ ਕੋਈ ਬਹੁਤ ਜ਼ਿਆਦਾ ਨਹੀਂ ਹੈ | ਸ਼ੇਅਰਾਂ ਦੇ ਬਦਲੇ ਜੋ ਕਰਜ਼ ਦਿੱਤਾ ਗਿਆ ਹੈ, ਉਹ ਬਹੁਤ ਘੱਟ ਹੈ |

ਚੰਡੀਗੜ੍ਹ ਪੁਲਿਸ ਅਤੇ ਨੌਜਵਾਨਾਂ ਦਰਮਿਆਨ ਜ਼ਬਰਦਸਤ ਝੜਪਾਂ

• ਪੁਲਿਸ ਦੇ ਵਾਹਨਾਂ ਦੀ ਭੰਨਤੋੜ, ਕਈ ਪੁਲਿਸ ਮੁਲਾਜ਼ਮ ਜ਼ਖ਼ਮੀ
• ਕੌਮੀ ਇਨਸਾਫ਼ ਮੋਰਚੇ ਦਾ ਤੀਸਰਾ ਜਥਾ ਚੰਡੀਗੜ੍ਹ 'ਚ ਹੋਇਆ ਦਾਖ਼ਲ
ਐੱਸ. ਏ. ਐੱਸ. ਨਗਰ, 8 ਫਰਵਰੀ (ਕੇ. ਐੱਸ. ਰਾਣਾ)-ਕੌਮੀ ਇਨਸਾਫ਼ ਮੋਰਚੇ ਦੇ ਮੰਚ ਤੋਂ ਅਰਦਾਸ ਉਪਰੰਤ ਅੱਜ ਜਦੋਂ ਤੀਸਰਾ ਜਥਾ ਚੰਡੀਗੜ੍ਹ ਸਥਿਤ ਮੁੱਖ ਮੰਤਰੀ ਦੀ ਰਿਹਾਇਸ਼ ਵੱਲ ਰਵਾਨਾ ਹੋਇਆ ਤਾਂ ਰਸਤੇ 'ਚ ਚੰਡੀਗੜ੍ਹ ਪੁਲਿਸ ਵਲੋਂ ਲਗਾਈਆਂ ਗਈਆਂ ਰੋਕਾਂ ਦੇ ਚੱਲਦਿਆਂ ਇਸ ਜਥੇ ਵਲੋਂ ਮੁਹਾਲੀ-ਚੰਡੀਗੜ੍ਹ ਬਾਰਡਰ 'ਤੇ ਰੋਸ ਧਰਨਾ ਦਿੱਤਾ ਗਿਆ | ਇਸੇ ਦੌਰਾਨ ਅਚਾਨਕ ਕਿਸੇ ਪਾਸਿਓਾ ਪੁਲਿਸ 'ਤੇ ਪਥਰਾਅ ਹੋ ਗਿਆ ਅਤੇ ਪੁਲਿਸ ਨੇ ਜਵਾਬੀ ਕਾਰਵਾਈ ਕਰਦਿਆਂ ਸਿੰਘਾਂ 'ਤੇ ਹਲਕਾ ਲਾਠੀਚਾਰਜ ਕਰਨ ਦੇ ਨਾਲ ਹੀ ਪਾਣੀ ਦੀਆਂ ਬੁਛਾੜਾਂ ਮਾਰਨੀਆਂ ਸ਼ੁਰੂ ਕਰ ਦਿੱਤੀਆਂ | ਇਸ ਤੋਂ ਬਾਅਦ ਗੁੱਸੇ 'ਚ ਆਏ ਨੌਜਵਾਨਾਂ ਅਤੇ ਪੁਲਿਸ ਮੁਲਾਜ਼ਮਾਂ 'ਚ ਜ਼ਬਰਦਸਤ ਝੜਪਾਂ ਹੋਈਆਂ ਅਤੇ ਇਸੇ ਦੌਰਾਨ ਨੌਜਵਾਨਾਂ ਨੇ ਚੰਡੀਗੜ੍ਹ ਪੁਲਿਸ ਦੇ ਕਈ ਵਾਹਨਾਂ ਨੂੰ ਵੀ ਨੁਕਸਾਨ ਪਹੁੰਚਾਇਆ | ਪਿਛਲੇ ਲਗਾਤਾਰ ਦੋ ਦਿਨਾਂ ਤੋਂ ਰੋਜ਼ਾਨਾ ਇਕ ਜਥਾ ਮੁੱਖ ਮੰਤਰੀ ਦੀ ਚੰਡੀਗੜ੍ਹ ਸਥਿਤ ਰਿਹਾਇਸ਼ ਵੱਲ ਰਵਾਨਾ ਹੁੰਦਾ ਸੀ ਅਤੇ ਫਿਰ ਜਥੇ ਦੇ ਮੈਂਬਰ ਚੰਡੀਗੜ੍ਹ ਪੁਲਿਸ ਨੂੰ ਆਪਣੀਆਂ ਗਿ੍ਫ਼ਤਾਰੀਆਂ ਦੇ ਦਿੰਦੇ ਸਨ ਪਰ ਅੱਜ ਜਿਵੇਂ ਹੀ ਤੀਸਰਾ ਜਥਾ ਚੰਡੀਗੜ੍ਹ-ਮੁਹਾਲੀ ਬਾਰਡਰ 'ਤੇ ਪੁੱਜਾ ਤਾਂ ਸਥਿਤੀ ਉਸ ਸਮੇਂ ਤਣਾਅਪੂਰਨ ਬਣ ਗਈ, ਜਦੋਂ ਕਿਸੇ ਸ਼ਰਾਰਤੀ ਅਨਸਰ ਨੇ ਪੁਲਿਸ 'ਤੇ ਪਥਰਾਅ ਕਰ ਦਿੱਤਾ ਅਤੇ ਜਵਾਬੀ ਕਾਰਵਾਈ 'ਚ ਪੁਲਿਸ ਨੇ ਲਾਠੀਚਾਰਜ ਕਰਦਿਆਂ ਵਾਟਰ ਕੈਨਨ ਦੀ ਵਰਤੋਂ ਕੀਤੀ, ਜਿਸ ਕਾਰਨ ਗੁੱਸੇ 'ਚ ਆਏ ਨੌਜਵਾਨ ਟਰੈਕਟਰਾਂ ਦੀ ਮਦਦ ਨਾਲ ਪੁਲਿਸ ਵਲੋਂ ਲਗਾਈਆਂ ਰੋਕਾਂ ਨੂੰ ਤੋੜ ਕੇ ਚੰਡੀਗੜ੍ਹ 'ਚ ਦਾਖ਼ਲ ਹੋ ਗਏ ਅਤੇ ਉੱਥੇ ਮੌਜੂਦ ਪੁਲਿਸ ਵਾਹਨਾਂ ਨੂੰ ਤੋੜ ਦਿੱਤਾ | ਇਸ ਸਾਰੇ ਘਟਨਾਕ੍ਰਮ 'ਚ ਬਹੁਤ ਸਾਰੇ ਪੁਲਿਸ ਮੁਲਾਜ਼ਮਾਂ ਸਮੇਤ ਪ੍ਰਦਰਸ਼ਨਕਾਰੀ ਵੀ ਜ਼ਖ਼ਮੀ ਹੋ ਗਏ | ਜ਼ਿਕਰਯੋਗ ਹੈ ਕਿ ਚੰਡੀਗੜ੍ਹ ਪੁਲਿਸ ਦੀਆਂ ਰੋਕਾਂ ਨੂੰ ਤੋੜ ਕੇ ਚੰਡੀਗੜ੍ਹ 'ਚ ਦਾਖ਼ਲ ਹੋਏ ਜਥੇ ਦੇ ਮੈਂਬਰਾਂ ਕੋਲ ਕੋਈ ਅਗਲਾ ਰੋਡ ਮੈਪ ਨਾ ਹੋਣ ਅਤੇ ਕੌਮੀ ਇਨਸਾਫ਼ ਮੋਰਚੇ ਦੇ ਪ੍ਰਮੁੱਖ ਆਗੂਆਂ ਦੀ ਅਪੀਲ ਅਨੁਸਾਰ ਸਾਰੇ ਨੌਜਵਾਨ ਅਤੇ ਹੋਰ ਸੰਗਤ ਸ਼ਾਮ ਨੂੰ ਮੁੜ ਕੌਮੀ ਇਨਸਾਫ਼ ਮੋਰਚੇ 'ਚ ਵਾਪਸ ਪਰਤ ਆਈ | ਜ਼ਿਕਰਯੋਗ ਹੈ ਕਿ ਜਦੋਂ ਇਹ ਹਿੰਸਕ ਝੜਪਾਂ ਹੋਈਆਂ ਤਾਂ ਇਨਸਾਫ਼ ਮੋਰਚੇ ਦੇ ਆਗੂ ਨੌਜਵਾਨਾਂ ਨੂੰ ਇਹ ਸਮਝਾਉਂਦੇ ਨਜ਼ਰ ਆਏ ਕਿ ਉਹ ਇਸ ਢੰਗ ਨਾਲ ਹਿੰਸਕ ਨਾ ਹੋਣ, ਬਲਕਿ ਸ਼ਾਂਤੀਪੂਰਵਕ ਢੰਗ ਨਾਲ ਆਪਣਾ ਰੋਸ ਪ੍ਰਦਰਸ਼ਨ ਜ਼ਾਹਿਰ ਕਰਨ |
ਪ੍ਰਸ਼ਾਸਨ ਨੇ ਨੌਜਵਾਨਾਂ ਨੂੰ ਭੜਕਾਇਆ-ਸਿੱਖ ਆਗੂ
ਬੁੱਧਵਾਰ ਨੂੰ ਪੁਲਿਸ ਅਤੇ ਸਿੱਖ ਨੌਜਵਾਨਾਂ ਵਿਚਕਾਰ ਹੋਈਆਂ ਝੜਪਾਂ 'ਤੇ ਆਪਣਾ ਸਪੱਸ਼ਟੀਕਰਨ ਦਿੰਦਿਆਂ ਕੌਮੀ ਇਨਸਾਫ਼ ਮੋਰਚੇ ਦੇ ਆਗੂਆਂ ਬਾਪੂ ਗੁਰਚਰਨ ਸਿੰਘ, ਪਲਵਿੰਦਰ ਸਿੰਘ ਤਲਵਾੜਾ ਅਤੇ ਹੋਰਨਾਂ ਨੇ ਕਿਹਾ ਕਿ ਬੰਦੀ ਸਿੰਘਾਂ ਦੀ ਰਿਹਾਈ ਨੂੰ ਲੈ ਕੇ ਮੁਹਾਲੀ-ਚੰਡੀਗੜ੍ਹ ਬਾਰਡਰ 'ਤੇ ਜਾਰੀ ਕੌਮੀ ਇਨਸਾਫ਼ ਮੋਰਚੇ ਤੋਂ ਅਰਦਾਸ ਉਪਰੰਤ ਸੋਮਵਾਰ ਤੋਂ ਰੋਜ਼ਾਨਾ ਇਕ ਜਥਾ ਮੁੱਖ ਮੰਤਰੀ ਦੀ ਚੰਡੀਗੜ੍ਹ ਸਥਿਤ ਰਿਹਾਇਸ਼ ਵੱਲ ਰਵਾਨਾ ਹੁੰਦਾ ਸੀ ਅਤੇ ਇਸੇ ਤਹਿਤ ਜਦੋਂ ਬੁੱਧਵਾਰ ਨੂੰ ਤੀਸਰਾ ਜਥਾ ਚੰਡੀਗੜ੍ਹ ਲਈ ਰਵਾਨਾ ਹੋਇਆ ਤਾਂ ਪ੍ਰਸ਼ਾਸਨ ਨੇ ਕੋਝੀ ਚਾਲ ਚੱਲਦਿਆਂ ਪ੍ਰਵਾਸੀ ਵਿਅਕਤੀਆਂ ਨੂੰ ਇਸ ਜਥੇ 'ਚ ਸ਼ਾਮਿਲ ਕਰ ਕੇ ਪੁਲਿਸ 'ਤੇ ਪਥਰਾਅ ਕਰਵਾ ਕੇ ਜਵਾਬੀ ਕਾਰਵਾਈ ਦੇ ਰੂਪ 'ਚ ਜਥੇ 'ਚ ਸ਼ਾਮਿਲ ਬੀਬੀਆਂ ਅਤੇ ਨੌਜਵਾਨਾਂ 'ਤੇ ਲਾਠੀਚਾਰਜ ਅਤੇ ਪਾਣੀ ਦੀਆਂ ਬੁਛਾੜਾਂ ਦੀ ਵਰਤੋਂ ਕੀਤੀ, ਜਿਸ ਕਾਰਨ ਰੋਹ 'ਚ ਆਏ ਨੌਜਵਾਨ ਬੈਰੀਕੇਡ ਤੋੜ ਕੇ ਚੰਡੀਗੜ੍ਹ 'ਚ ਦਾਖ਼ਲ ਹੋ ਗਏ, ਜਿਨ੍ਹਾਂ ਨੂੰ ਬਾਅਦ ਦੁਪਹਿਰ ਕੌਮੀ ਇਨਸਾਫ਼ ਮੋਰਚੇ ਦੇ ਪ੍ਰਮੁੱਖ ਆਗੂ ਵਾਪਸ ਮੋਰਚੇ ਵਾਲੀ ਥਾਂ 'ਤੇ ਲੈ ਆਏ |
29 ਪੁਲਿਸ ਮੁਲਾਜ਼ਮ ਹੋਏ ਜ਼ਖ਼ਮੀ
ਨੌਜਵਾਨਾਂ ਅਤੇ ਪੁਲਿਸ ਦਰਮਿਆਨ ਹੋਈਆਂ ਝੜਪਾਂ 'ਚ 29 ਪੁਲਿਸ ਮੁਲਾਜ਼ਮ ਜ਼ਖ਼ਮੀ ਹੋਣ ਦੀ ਸੂਚਨਾ ਮਿਲੀ ਹੈ, ਜਿਸ 'ਚ 7 ਮਹਿਲਾ ਪੁਲਿਸ ਕਰਮਚਾਰੀ ਵੀ ਹਨ, ਜਿਨ੍ਹਾਂ ਨੂੰ ਚੰਡੀਗੜ੍ਹ ਦੇ ਸੈਕਟਰ-16 ਵਿਚਲੇ ਹਸਪਤਾਲ ਵਿਖੇ ਇਲਾਜ ਲਈ ਦਾਖ਼ਲ ਕਰਵਾਇਆ ਗਿਆ ਹੈ |
ਸੀ. ਆਰ. ਪੀ. ਐਫ. ਤੇ ਆਰ. ਏ. ਐਫ. ਦੇ 800 ਹੋਰ ਜਵਾਨ ਬੁਲਾਏ
ਨੌਜਵਾਨਾਂ ਅਤੇ ਪੁਲਿਸ ਦਰਮਿਆਨ ਹੋਈਆਂ ਝੜਪਾਂ ਤੋਂ ਬਾਅਦ ਅਗਲੇ ਹਾਲਾਤ ਨੂੰ ਕਾਬੂ ਪਾਉਣ ਲਈ ਚੰਡੀਗੜ੍ਹ ਪ੍ਰਸ਼ਾਸਨ ਨੇ ਸਖ਼ਤ ਰੁਖ਼ ਅਖ਼ਤਿਆਰ ਕਰਦਿਆਂ ਸੀ. ਆਰ. ਪੀ. ਐਫ. ਤੇ ਆਰ. ਏ. ਐਫ. ਦੇ 800 ਹੋਰ ਜਵਾਨ ਬੁਲਾਏ ਹਨ | ਇਸ ਤੋਂ ਇਲਾਵਾ ਪ੍ਰਸ਼ਾਸਨ ਵਲੋਂ ਭੰਨ-ਤੋੜ ਕਰਨ ਵਾਲਿਆਂ ਦੀਆਂ ਵੀਡੀਓਜ਼ ਖੰਘਾਲ ਕੇ ਸੰਬੰਧਿਤ ਲੋਕਾਂ ਖ਼ਿਲਾਫ਼ ਕਾਰਵਾਈ ਕਰਨ ਦਾ ਵੀ ਪਤਾ ਚੱਲਿਆ ਹੈ |
ਮੁਲਜ਼ਮਾਂ ਵਿਰੁੱਧ ਕੀਤੀ ਜਾਵੇਗੀ ਕਾਰਵਾਈ-ਡੀ. ਜੀ. ਪੀ
ਚੰਡੀਗੜ੍ਹ, (ਤਰੁਣ ਭਜਨੀ)- ਚੰਡੀਗੜ੍ਹ ਦੇ ਡੀ. ਜੀ. ਪੀ. ਪਰਵੀਰ ਰੰਜਨ ਨੇ ਸੈਕਟਰ-16 ਦੇ ਸਰਕਾਰੀ ਹਸਪਤਾਲ ਪੁੱਜ ਕੇ ਜ਼ਖ਼ਮੀ ਪੁਲਿਸ ਕਰਮਚਾਰੀਆਂ ਦਾ ਹਾਲ-ਚਾਲ ਪੁੱਛਿਆ | ਇਸ ਤੋਂ ਪਹਿਲਾਂ ਘਟਨਾ ਸਥਾਨ 'ਤੇ ਪਹੁੰਚੇ ਚੰਡੀਗੜ੍ਹ ਦੇ ਡੀ. ਜੀ. ਪੀ. ਪਰਵੀਰ ਰੰਜਨ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਕਈ ਪ੍ਰਦਰਸ਼ਨਕਾਰੀਆਂ ਦੇ ਕੋਲ ਹਥਿਆਰ, ਡੰਡੇ ਅਤੇ ਰਾਡਾਂ ਸਨ | ਪੁਲਿਸ ਕਰਮਚਾਰੀਆਂ ਵਲੋਂ ਰੋਕੇ ਜਾਣ 'ਤੇ ਪ੍ਰਦਰਸ਼ਨਕਾਰੀ ਨੇ ਉਨ੍ਹਾਂ 'ਤੇ ਹਮਲਾ ਕਰ ਦਿੱਤਾ, ਜਿਸ ਦੌਰਾਨ ਕਈ ਪੁਲਿਸ ਕਰਮਚਾਰੀਆਂ ਨੂੰ ਗੰਭੀਰ ਸੱਟਾਂ ਲੱਗੀਆਂ ਹਨ | ਡੀ. ਜੀ. ਪੀ. ਨੇ ਦੱਸਿਆ ਕਿ ਕੁਝ ਪ੍ਰਦਰਸ਼ਨਕਾਰੀ ਘੋੜਿਆਂ 'ਤੇ ਸਵਾਰ ਸਨ ਅਤੇ ਉਨ੍ਹਾਂ ਕੋਲ ਹਥਿਆਰ ਵੀ ਸਨ | ਉਨ੍ਹਾਂ ਦੱਸਿਆ ਕਿ ਚੰਡੀਗੜ੍ਹ ਪੁਲਿਸ ਲਗਾਤਾਰ ਪੰਜਾਬ ਪੁਲਿਸ ਨਾਲ ਤਾਲਮੇਲ ਕਰ ਕੇ ਚੱਲ ਰਹੀ ਹੈ | ਪੰਜਾਬ ਪੁਲਿਸ ਨੇ ਸੁਰੱਖਿਆ ਦਾ ਭਰੋਸਾ ਦਿੱਤਾ ਸੀ, ਪ੍ਰੰਤੂ ਕਿਸ ਤਰ੍ਹਾਂ ਪ੍ਰਦਰਸ਼ਨਕਾਰੀ ਹਥਿਆਰਾਂ ਸਮੇਤ ਚੰਡੀਗੜ੍ਹ ਬਾਰਡਰ ਤੱਕ ਪਹੁੰਚ ਗਏ ਇਹ ਜਾਂਚ ਦਾ ਵਿਸ਼ਾ ਹੈ | ਡੀ. ਜੀ. ਪੀ. ਨੇ ਇਸ ਘਟਨਾ ਦੇ ਪਿੱਛੇ ਕੌਮੀ ਇਨਸਾਫ਼ ਮੋਰਚੇ ਨੂੰ ਜ਼ਿੰਮੇਵਾਰ ਦੱਸਦਿਆਂ ਕਿਹਾ ਕਿ ਚੰਡੀਗੜ੍ਹ ਪੁਲਿਸ ਕੋਲ ਪੂਰੇ ਸਬੂਤ ਹਨ ਅਤੇ ਸੰਬੰਧਿਤ ਵਿਅਕਤੀਆਂ ਵਿਰੁੱਧ ਕਾਰਵਾਈ ਕੀਤੀ ਜਾਵੇਗੀ |

ਸਾਰੇ ਸਰਕਾਰੀ ਵਿਭਾਗਾਂ 'ਚ ਸਮਾਰਟ ਪ੍ਰੀ-ਪੇਡ ਮੀਟਰ ਲਾਉਣ ਦੀ ਤਿਆਰੀ

ਇਕ ਮਹੀਨੇ 'ਚ ਕਰਨਾ ਹੋਵੇਗਾ ਬਕਾਇਆਂ ਦਾ ਭੁਗਤਾਨ
ਵਿਕਰਮਜੀਤ ਸਿੰਘ ਮਾਨ
ਚੰਡੀਗੜ੍ਹ, 8 ਫ਼ਰਵਰੀ-ਪੰਜਾਬ ਦੇ ਸਾਰੇ ਸਰਕਾਰੀ ਦਫ਼ਤਰਾਂ 'ਚ ਪ੍ਰੀ-ਪੇਡ ਬਿਜਲੀ ਮੀਟਰ ਲਗਾਏ ਜਾਣਗੇ | ਪੰਜਾਬ ਰਾਜ ਪਾਵਰ ਕਾਰਪੋਰੇਸ਼ਨ ਲਿਮਟਿਡ (ਪੀ.ਐਸ.ਪੀ.ਸੀ.ਐਲ.) ਨੇ ਇਸ ਸੰਬੰਧੀ ਹੁਕਮ ਜਾਰੀ ਕੀਤਾ ਹੈ | ਇਸ ਫ਼ੈਸਲੇ ਤਹਿਤ 1 ਮਾਰਚ ਤੋਂ ਸਾਰੇ ਸਰਕਾਰੀ ਦਫ਼ਤਰਾਂ ਨੂੰ ਬਿਜਲੀ ਲੈਣ ਲਈ ਅਗਾਊਾ ਅਦਾਇਗੀ ਕਰਨੀ ਪਵੇਗੀ ਅਤੇ ਜਿਵੇਂ ਹੀ ਅਦਾ ਕੀਤੀ ਰਕਮ ਖ਼ਤਮ ਹੋ ਜਾਵੇਗੀ, ਦਫ਼ਤਰ ਦੀ ਬਿਜਲੀ ਬੰਦ ਕਰ ਦਿੱਤੀ ਜਾਵੇਗੀ | ਉਕਤ ਮੀਟਰ ਲਗਾਉਣ ਲਈ ਸਾਰੇ ਸਰਕਾਰੀ ਦਫ਼ਤਰਾਂ ਨੂੰ 15 ਦਿਨਾਂ ਦਾ ਨੋਟਿਸ ਭੇਜਿਆ ਜਾ ਰਿਹਾ ਹੈ | ਦੱਸਣਯੋਗ ਹੈ ਕਿ ਸੂਬੇ ਦੇ ਵੱਖ-ਵੱਖ ਸਰਕਾਰੀ ਵਿਭਾਗਾਂ 'ਤੇ ਬਿਜਲੀ ਦੇ ਬਿੱਲਾਂ ਦੇ ਲੱਖਾਂ ਰੁਪਏ ਬਕਾਇਆ ਹਨ | ਪ੍ਰੀ-ਪੇਡ ਮੀਟਰ ਲਈ ਭੇਜੇ ਜਾ ਰਹੇ ਨੋਟਿਸ ਦੇ ਨਾਲ-ਨਾਲ ਜਿੱਥੇ ਸੰਬੰਧਿਤ ਦਫ਼ਤਰ ਨੂੰ ਪਿਛਲੇ 12 ਮਹੀਨਿਆਂ ਦੀ ਊਰਜਾ ਖਪਤ ਦਾ ਵੇਰਵਾ ਭੇਜਿਆ ਜਾ ਰਿਹਾ ਹੈ, ਉੱਥੇ ਪਿਛਲੇ ਬਿੱਲਾਂ ਦੀ ਬਕਾਇਆ ਰਾਸ਼ੀ, ਡਿਫਾਲਟ ਦੀ ਰਕਮ ਵੀ ਜਮ੍ਹਾਂ ਕਰਵਾਉਣ ਲਈ ਕਿਹਾ ਗਿਆ ਹੈ | ਪੀ. ਐਸ. ਪੀ. ਸੀ. ਐਲ. ਵਲੋਂ ਸੋਧੀ ਗਈ ਨੀਤੀ ਅਨੁਸਾਰ 15 ਫਰਵਰੀ ਤੋਂ ਬਾਅਦ ਸੂਬੇ 'ਚ ਨਵੇਂ ਸਰਕਾਰੀ ਬਿਜਲੀ ਕੁਨੈਕਸ਼ਨ ਵੀ ਸਮਾਰਟ ਪ੍ਰੀ-ਪੇਡ ਮੀਟਰਾਂ ਨਾਲ ਦਿੱਤੇ ਜਾਣਗੇ | ਇਨ੍ਹਾਂ ਪ੍ਰੀ-ਪੇਡ ਮੀਟਰਾਂ 'ਤੇ ਉਨ੍ਹਾਂ ਦੀ ਲੋਡ ਸਮਰੱਥਾ ਅਨੁਸਾਰ ਟੈਰਿਫ਼ ਲਾਗੂ ਹੋਣਗੇ | ਹਾਲਾਂਕਿ ਅਜਿਹੇ ਮੀਟਰਾਂ 'ਤੇ ਊਰਜਾ ਚਾਰਜ 'ਚ ਇਕ ਫ਼ੀਸਦੀ ਦੀ ਛੋਟ ਦਿੱਤੀ ਜਾਵੇਗੀ | ਪੀ.ਐਸ.ਪੀ.ਸੀ.ਐਲ. ਦੀ ਤਰਫ਼ੋਂ ਕਿਹਾ ਗਿਆ ਹੈ ਕਿ ਵਿਭਾਗਾਂ ਨੂੰ ਕੁਨੈਕਸ਼ਨ ਲਈ ਅਗਾਊਾ ਅਦਾਇਗੀ ਕਰਨੀ ਪਵੇਗੀ, ਇਸ ਲਈ ਉਹ ਆਪਣੇ ਪੱਧਰ 'ਤੇ ਇਸ ਲਈ ਢੁਕਵੀਂ ਲੇਖਾ ਪ੍ਰਣਾਲੀ ਬਣਾ ਸਕਦੇ ਹਨ | ਇਸ ਦੇ ਨਾਲ ਹੀ ਸਰਕਾਰੀ ਵਿਭਾਗਾਂ ਨੂੰ ਆਪਣੇ ਹਰੇਕ ਬਿਜਲੀ ਕੁਨੈਕਸ਼ਨ ਲਈ ਇਕ ਨੋਡਲ ਅਫ਼ਸਰ ਨਿਯੁਕਤ ਕਰਨਾ ਹੋਵੇਗਾ, ਜਿਸ ਦਾ ਮੋਬਾਈਲ ਨੰਬਰ ਅਤੇ ਈ-ਮੇਲ ਪੀ. ਐਸ. ਪੀ. ਸੀ. ਐਲ. ਦੇ ਡਾਟਾਬੇਸ 'ਚ ਦਰਜ ਹੋਵੇਗੀ | ਖਪਤਕਾਰਾਂ ਨੂੰ ਮਾਸਿਕ ਆਧਾਰ 'ਤੇ ਇਲੈਕਟ੍ਰਾਨਿਕ ਬਿੱਲ ਵੀ ਜਾਰੀ ਕੀਤਾ ਜਾਵੇਗਾ | ਸਰਕਾਰੀ ਦਫ਼ਤਰਾਂ ਲਈ ਘੱਟੋ-ਘੱਟ ਰੀਚਾਰਜ ਰਾਸ਼ੀ 1000 ਰੁਪਏ ਪ੍ਰਤੀ ਕੁਨੈਕਸ਼ਨ ਤੈਅ ਕੀਤੀ ਗਈ ਹੈ | ਦਫ਼ਤਰਾਂ ਨੂੰ ਆਪਣੇ ਪਿਛਲੇ ਸਾਲ ਦੇ ਬਿਜਲੀ ਬਿੱਲ ਦੇ ਹਿਸਾਬ ਨਾਲ ਰੀਚਾਰਜ ਦੀ ਰਕਮ ਜਮ੍ਹਾਂ ਕਰਵਾਉਣ ਦਾ ਸੁਝਾਅ ਦਿੱਤਾ ਗਿਆ ਹੈ, ਤਾਂ ਜੋ ਰੀਚਾਰਜ ਦੀ ਰਕਮ ਖ਼ਤਮ ਹੋਣ 'ਤੇ ਕੁਨੈਕਸ਼ਨ ਨਾ ਕੱਟਿਆ ਜਾਵੇ | ਹਾਲਾਂਕਿ, ਰੀਚਾਰਜ ਦੀ ਰਕਮ 50 ਫ਼ੀਸਦੀ, 25 ਫ਼ੀਸਦੀ ਤੇ 10 ਫ਼ੀਸਦੀ ਤੱਕ ਘੱਟ ਹੋਣ 'ਤੇ ਪੀ.ਐਸ.ਪੀ.ਸੀ.ਐਲ. ਦੁਆਰਾ ਹਰੇਕ ਖਪਤਕਾਰ ਨੂੰ ਐਸ.ਐਮ.ਐਸ. ਅਤੇ ਈ-ਮੇਲ ਚਿਤਾਵਨੀਆਂ ਵੀ ਭੇਜੀਆਂ ਜਾਣਗੀਆਂ ਤਾਂ ਜੋ ਸਮੇਂ ਸਿਰ ਰੀਚਾਰਜ ਕੀਤਾ ਜਾ ਸਕੇ |
ਫ਼ੈਸਲੇ ਦਾ ਵਿਰੋਧ ਸ਼ੁਰੂ
ਪੰਜਾਬ ਸਰਕਾਰ ਵਲੋਂ ਸਰਕਾਰੀ ਬਿਜਲੀ ਕੁਨੈਕਸ਼ਨਾਂ 'ਤੇ ਸਮਾਰਟ ਪ੍ਰੀ-ਪੇਡ ਮੀਟਰ ਲਾਉਣੇ ਲਾਜ਼ਮੀ ਕਰਨ ਖ਼ਿਲਾਫ਼ ਡੈਮੋਕ੍ਰੇਟਿਕ ਟੀਚਰਜ਼ ਫ਼ਰੰਟ ਪੰਜਾਬ ਵਲੋਂ ਸੰਘਰਸ਼ ਦਾ ਬਿਗਲ ਵਜਾ ਦਿੱਤਾ ਗਿਆ ਹੈ | ਇਸ ਸੰਬੰਧੀ ਡੀ.ਟੀ.ਐੱਫ. ਪੰਜਾਬ ਦੇ ਸੂਬਾ ਪ੍ਰਧਾਨ ਵਿਕਰਮ ਦੇਵ ਸਿੰਘ, ਜਨਰਲ ਸਕੱਤਰ ਮੁਕੇਸ਼ ਕੁਮਾਰ ਅਤੇ ਵਿੱਤ ਸਕੱਤਰ ਅਸ਼ਵਨੀ ਅਵਸਥੀ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਦੀ ਸਰਕਾਰ ਸੂਬੇ ਦੇ ਸਰਕਾਰੀ ਢਾਂਚੇ ਨੂੰ ਬਿਹਤਰ ਬਣਾਉਣ ਦੀ ਥਾਂ ਤਹਿਸ-ਨਹਿਸ ਕਰਨ ਲਈ ਕੰਮ ਕਰ ਰਹੀ ਹੈ | ਉਨ੍ਹਾਂ ਕਿਹਾ ਕਿ ਸੂਬੇ ਦੇ ਸਰਕਾਰੀ ਸਕੂਲ ਅਤੇ ਸਰਕਾਰੀ ਹਸਪਤਾਲ ਗ਼ਰੀਬ ਲੋਕਾਂ ਦਾ ਇਕ ਮਾਤਰ ਸਹਾਰਾ ਹਨ, ਇਸ ਲਈ ਬਣਦਾ ਤਾਂ ਇਹ ਸੀ ਕਿ ਇਨ੍ਹਾਂ ਸੰਸਥਾਵਾਂ ਨੂੰ ਵੱਧ ਤੋਂ ਵੱਧ ਸਹੂਲਤਾਂ ਪ੍ਰਦਾਨ ਕਰਦਿਆਂ ਲੋਕਾਂ ਲਈ ਉਪਯੋਗੀ ਬਣਾਇਆ ਜਾਵੇ ਪਰ ਸਰਕਾਰ ਨਿੱਜੀਕਰਨ ਦੀਆਂ ਨੀਤੀਆਂ ਨੂੰ ਲਾਗੂ ਕਰਨ ਲਈ ਤਤਪਰ ਨਜ਼ਰ ਆ ਰਹੀ ਹੈ | ਆਗੂਆਂ ਨੇ ਕਿਹਾ ਕਿ ਸੂਬਾ ਸਰਕਾਰ ਦਾ ਇਹ ਫ਼ੈਸਲਾ ਕੇਂਦਰ ਸਰਕਾਰ ਦੇ ਬਿਜਲੀ ਸੋਧ ਬਿੱਲ ਦੀ ਤਰਜਮਾਨੀ ਕਰਦਿਆਂ ਨਿੱਜੀਕਰਨ ਨੂੰ ਉਤਸ਼ਾਹਿਤ ਕਰਨ ਲਈ ਲਿਆ ਗਿਆ ਹੈ |

ਛਾਵਲਾ ਜਬਰ ਜਨਾਹ ਮਾਮਲਾ

ਦੋਸ਼ੀਆਂ ਨੂੰ ਬਰੀ ਕਰਨ ਦੇ ਫ਼ੈਸਲੇ 'ਤੇ ਨਜ਼ਰਸਾਨੀ ਪਟੀਸ਼ਨ 'ਤੇ ਜਲਦ ਸੁਣਵਾਈ ਕਰੇਗੀ ਸੁਪਰੀਮ ਕੋਰਟ

ਨਵੀਂ ਦਿੱਲੀ, 8 ਫਰਵਰੀ (ਜਗਤਾਰ ਸਿੰਘ)-ਛਾਵਲਾ ਸਮੂਹਿਕ ਜਬਰ ਜਨਾਹ ਮਾਮਲੇ 'ਚ ਤਿੰਨ ਦੋਸ਼ੀਆਂ ਨੂੰ ਬਰੀ ਕੀਤੇ ਜਾਣ ਦੇ ਫ਼ੈਸਲੇ ਬਾਰੇ ਦਾਇਰ ਸਮੀਖਿਆ ਪਟੀਸ਼ਨ 'ਤੇ ਸੁਪਰੀਮ ਕੋਰਟ ਛੇਤੀ ਸੁਣਵਾਈ ਲਈ ਤਿਆਰ ਹੋ ਗਈ ਹੈ | ਚੀਫ਼ ਜਸਟਿਸ ਡੀ.ਵਾਈ. ਚੰਦਰਚੂੜ ਨੇ ਦਿੱਲੀ ਪੁਲਿਸ ਨੂੰ ਭਰੋਸਾ ਦਿੱਤਾ ਕਿ ਉਨ੍ਹਾਂ ਦੀ ਅਗਵਾਈ 'ਚ ਤਿੰਨ ਜੱਜਾਂ ਦਾ ਬੈਂਚ ਗਠਿਤ ਕੀਤਾ ਜਾਵੇਗਾ | ਦਿੱਲੀ ਪੁਲਿਸ ਵਲੋਂ ਸਾਲਿਸਟਰ ਜਨਰਲ ਤੁਸ਼ਾਰ ਮਹਿਤਾ ਨੇ ਸੀ.ਜੇ.ਆਈ. ਡੀ.ਵਾਈ. ਚੰਦਰਚੂੜ ਦੇ ਬੈਂਚ ਤੋਂ ਜਲਦੀ ਸੁਣਵਾਈ ਦੀ ਮੰਗ ਕਰਦੇ ਹੋਏ ਕਿਹਾ ਕਿ ਇਕ ਲੜਕੀ ਨਾਲ ਨਾਲ ਜਬਰ ਜਨਾਹ ਕਰਨ ਤੋਂ ਬਾਅਦ ਬੇਰਹਿਮੀ ਨਾਲ ਉਸ ਦੀ ਹੱਤਿਆ ਕੀਤੀ ਗਈ ਸੀ ਪਰ ਉਕਤ ਮੁਲਜ਼ਮਾਂ ਨੂੰ ਸੁਪਰੀਮ ਕੋਰਟ ਨੇ ਬਰੀ ਕਰ ਦਿੱਤਾ ਪਰ ਇਕ ਦੋਸ਼ੀ ਨੇ ਫਿਰ ਕਤਲ ਕਰ ਦਿੱਤਾ | ਇਹ ਲੋਕ ਦੋਸ਼ੀ ਹਨ | ਇਸ ਮਾਮਲੇ ਦੀ ਖੁੱਲ੍ਹੀ ਅਦਾਲਤ ਵਿਚ ਜਲਦੀ ਸੁਣਵਾਈ ਹੋਣੀ ਚਾਹੀਦੀ ਹੈ | ਸੀ.ਜੇ.ਆਈ. ਨੇ ਕਿਹਾ ਕਿ ਉਹ ਖ਼ੁਦ ਜਸਟਿਸ ਐਸ. ਰਵਿੰਦਰ ਭੱਟ ਅਤੇ ਜਸਟਿਸ ਬੇਲਾ ਐਮ.ਤਿ੍ਵੇਦੀ ਨਾਲ ਬੈਂਚ ਬਣਾਉਣ ਬਾਰੇ ਵਿਚਾਰ ਕਰਨਗੇ | ਉਹ ਇਹ ਵੀ ਦੇਖਣਗੇ ਕਿ ਇਸ ਕੇਸ ਦੀ ਸੁਣਵਾਈ ਖੁੱਲ੍ਹੀ ਅਦਾਲਤ ਵਿਚ ਹੋਣੀ ਚਾਹੀਦੀ ਹੈ | ਦੱਸਣਯੋਗ ਹੈ ਕਿ ਦਿੱਲੀ ਪੁਲਿਸ ਨੇ ਤਿੰਨਾਂ ਦੋਸ਼ੀਆਂ ਨੂੰ ਬਰੀ ਕਰਨ ਦੇ ਆਦੇਸ਼ 'ਤੇ ਸੁਪਰੀਮ ਕੋਰਟ ਦਾ ਰੁਖ਼ ਕੀਤਾ ਹੈ ਅਤੇ ਸਮੀਖਿਆ ਪਟੀਸ਼ਨ ਦਾਇਰ ਕੀਤੀ ਹੈ | ਪਟੀਸ਼ਨ 'ਚ ਕਿਹਾ ਗਿਆ ਹੈ ਕਿ ਮੈਡੀਕਲ ਸਬੂਤ, ਮੁਲਜ਼ਮਾਂ ਖ਼ਿਲਾਫ਼ ਪੁਖ਼ਤਾ ਸਬੂਤ ਹਨ |

ਦਿੱਲੀ ਸ਼ਰਾਬ ਘੁਟਾਲਾ

ਪੰਜਾਬ ਦਾ ਸ਼ਰਾਬ ਕਾਰੋਬਾਰੀ ਗੌਤਮ ਮਲਹੋਤਰਾ ਗਿ੍ਫ਼ਤਾਰ

7 ਦਿਨਾਂ ਲਈ ਈ.ਡੀ. ਦੀ ਹਿਰਾਸਤ 'ਚ ਭੇਜਿਆ
ਨਵੀਂ ਦਿੱਲੀ, 8 ਫਰਵਰੀ (ਜਗਤਾਰ ਸਿੰਘ)-ਈ.ਡੀ. ਨੇ ਦਿੱਲੀ ਆਬਕਾਰੀ ਨੀਤੀ 2021-22 ਦੇ ਹਵਾਲਾ ਰਾਸ਼ੀ ਮਾਮਲੇ 'ਚ ਪੰਜਾਬ ਦੇ ਸਾਬਕਾ ਵਿਧਾਇਕ ਅਤੇ ਸ਼ੋ੍ਰਮਣੀ ਅਕਾਲੀ ਦਲ ਦੇ ਆਗੂੂ ਦੀਪ ਮਲਹੋਤਰਾ ਦੇ ਪੁੱਤਰ ਗੌਤਮ ਮਲਹੋਤਰਾ ਨੂੰ ਗਿ੍ਫ਼ਤਾਰ ਕੀਤਾ ਹੈ | ਸ਼ਰਾਬ ਕੰਪਨੀ ਓਏਸਿਸ ਗਰੁੱਪ ਦੇ ਡਾਇਰੈਕਟਰ ਗੌਤਮ ਨੂੰ ਹਵਾਲਾ ਰਾਸ਼ੀ ਮਾਮਲੇ ਦੇ ਦੋਸ਼ 'ਚ ਮੰਗਲਵਾਰ ਨੂੰ ਗਿ੍ਫ਼ਤਾਰ ਕੀਤਾ ਗਿਆ ਸੀ | ਇਥੇ ਦੱਸਣਯੋਗ ਹੈ ਕਿ ਪਿਛਲੇ 2 ਦਿਨਾਂ 'ਚ ਇਸ ਮਾਮਲੇ 'ਚ ਇਹ ਦੂਸਰੀ ਗਿ੍ਫ਼ਤਾਰੀ ਸੀ | ਪਿਛਲੇ ਸਾਲ ਅਕਤੂਬਰ 'ਚ ਈ.ਡੀ. ਨੇ ਪੰਜਾਬ 'ਚ ਗੌਤਮ ਅਤੇ ਉਸ ਦੇ ਪਿਤਾ ਦੀ ਜਾਇਦਾਦ 'ਤੇ ਛਾਪੇ ਮਾਰੇ ਸਨ | ਗੌਤਮ ਨੂੰ ਦਿੱਲੀ ਅਤੇ ਉੱਤਰ ਪ੍ਰਦੇਸ਼ ਦੇ ਬਾਜ਼ਾਰਾਂ ਦਾ ਪ੍ਰਬੰਧਨ ਕਰਨ ਤੋਂ ਇਲਾਵਾ ਅੰਬਾਲਾ ਅਤੇ ਇੰਦੌਰ 'ਚ ਓਏਸਿਸ ਗਰੁੱਪ ਦੀ ਸ਼ਰਾਬ ਕੰਪਨੀ ਚਲਾਉਣ ਲਈ ਵੀ ਮੰਨਿਆ ਜਾਂਦਾ ਹੈ | ਦਿੱਲੀ ਦੀ ਰਾਊਜ਼ ਐਵਨਿਊ ਕੋਰਟ ਨੇ ਇਨਫੋਰਸਮੈਂਟ ਡਾਇਰੈਕਟਰ (ਈ. ਡੀ.) ਦੁਆਰਾ ਪੰਜਾਬ ਦੇ ਸ਼ਰਾਬ ਕਾਰੋਬਾਰੀ ਗੌਤਮ ਮਲਹੋਤਰਾ ਦੇ 14 ਦਿਨ ਦੇ ਰਿਮਾਂਡ ਮੰਗੇ ਜਾਣ ਬਾਰੇ ਫ਼ੈਸਲਾ ਰਾਖਵਾਂ ਰੱਖ ਲਿਆ ਸੀ, ਜਿਸ 'ਤੇ ਫ਼ੈਸਲਾ ਲੈਂਦਿਆਂ ਅਦਾਲਤ ਨੇ ਗੌਤਮ ਮਲਹੋਤਰਾ ਨੂੰ 7 ਦਿਨਾਂ ਲਈ ਈ.ਡੀ. ਦੀ ਰਿਮਾਂਡ 'ਤੇ ਭੇਜ ਦਿੱਤਾ |
ਹੈਦਰਾਬਾਦ ਦਾ ਸੀ.ਏ. ਗਿ੍ਫ਼ਤਾਰ
ਸੀ. ਬੀ. ਆਈ. ਨੇ ਦਿੱਲੀ ਸਰਕਾਰ ਦੀ ਨਵੀਂ ਆਬਕਾਰੀ ਨੀਤੀ 'ਚ ਕਥਿਤ ਘੁਟਾਲੇ ਦੇ ਮਾਮਲੇ 'ਚ ਇਕ ਹੋਰ ਵਿਅਕਤੀ ਨੂੰ ਗਿ੍ਫ਼ਤਾਰ ਕੀਤਾ | ਸੀ. ਬੀ. ਆਈ. ਨੇ ਹੈਦਰਾਬਾਦ ਦੇ ਚਾਰਟਰਡ ਅਕਾਊਾਟੈਂਟ (ਸੀ.ਏ.) ਬੁੱਚੀਬਾਬੂ ਗੋਰੰਟਲਾ ਨੂੰ ਗਿ੍ਫ਼ਤਾਰ ਕੀਤਾ |

ਤੁਰਕੀ ਤੇ ਸੀਰੀਆ 'ਚ ਰਾਹਤ ਕਾਰਜਾਂ 'ਚ ਆਈ ਤੇਜ਼ੀ-ਮੌਤਾਂ ਦਾ ਅੰਕੜਾ 11 ਹਜ਼ਾਰ ਤੋਂ ਪਾਰ

ਭਾਰਤ ਨੇ ਇਕ ਹੋਰ ਰਾਹਤ ਟੀਮ ਭੇਜੀ ਗਾਜ਼ੀਅਨਟੇਪ (ਤੁਰਕੀ), 8 ਫਰਵਰੀ (ਏਜੰਸੀ)-ਤੁਰਕੀ ਤੇ ਸੀਰੀਆ 'ਚ ਭੁਚਾਲ ਕਾਰਨ ਮਰਨ ਵਾਲਿਆਂ ਦੀ ਗਿਣਤੀ 11 ਹਜ਼ਾਰ ਤੋਂ ਪਾਰ ਹੋ ਗਈ ਹੈ | ਇਸ ਭੁਚਾਲ ਨੂੰ ਇਕ ਦਹਾਕੇ ਤੋਂ ਵੱਧ ਸਮੇਂ 'ਚ ਸਭ ਤੋਂ ਘਾਤਕ ਕੁਦਰਤੀ ਆਫਤ ਮੰਨਿਆ ਜਾ ਰਿਹਾ ਹੈ | ...

ਪੂਰੀ ਖ਼ਬਰ »

ਨੇਤਨਯਾਹੂ ਤੇ ਮੋਦੀ ਵਲੋਂ ਦੁਵੱਲੇ ਸੰਬੰਧਾਂ ਨੂੰ ਹੋਰ ਮਜ਼ਬੂਤ ਕਰਨ 'ਤੇ ਚਰਚਾ-ਇਜ਼ਰਾਈਲੀ ਪੀ.ਐਮ.ਓ.

ਯੇਰੂਸ਼ਲਮ, 8 ਫਰਵਰੀ (ਏਜੰਸੀ)- ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਤੇ ਆਪਣੇ ਭਾਰਤੀ ਹਮਰੁਤਬਾ ਨਰਿੰਦਰ ਮੋਦੀ ਨਾਲ ਬੁੱਧਵਾਰ ਨੂੰ ਦੋਹਾਂ ਦੇਸ਼ਾਂ ਦੇ 'ਨੇੜੇ ਦੇ ਮਹੱਤਵਪੂਰਨ ਸੰਬੰਧਾਂ' ਨੂੰ ਹੋਰ ਮਜ਼ਬੂਤ ਕਰਨ ਬਾਰੇ ਫੋਨ 'ਤੇ ਵਿਚਾਰ-ਵਟਾਂਦਰਾ ...

ਪੂਰੀ ਖ਼ਬਰ »