ਤਾਜਾ ਖ਼ਬਰਾਂ


ਰਾਜੀਵ ਕੁਮਾਰ ਚੰਦਰ ਬਣੇ ਸੰਯੁਕਤ ਰਾਸ਼ਟਰ 'ਚ ਭਾਰਤ ਦੇ ਰਾਜਦੂਤ ਤੇ ਸਥਾਈ ਪ੍ਰਤੀਨਿਧੀ
. . .  1 day ago
ਛੱਤੀਸਗੜ੍ਹ 'ਚ ਜੰਗਲ ਨੂੰ ਲੱਗੀ ਅੱਗ
. . .  1 day ago
ਰਾਏਗੜ੍ਹ, 30 ਮਾਰਚ- ਛੱਤੀਸਗੜ੍ਹ ਦੇ ਰਾਏਗੜ੍ਹ ਦੇ ਜੰਗਲਾਂ 'ਚ ਅੱਗ ਲੱਗ...
ਅਮਰੀਕੀ ਪੁਲਾੜ ਯਾਤਰੀ ਨੇ ਸੁਨੀਤਾ ਵਿਲੀਅਮ ਦਾ 'ਪੁਲਾੜ 'ਚ ਤੁਰਨ' ਦਾ ਰਿਕਾਰਡ ਤੋਰਿਆ
. . .  1 day ago
ਸੰਤ ਸੀਚੇਵਾਲ ਸਮੇਤ 39 ਨੂੰ ਪਦਮ ਪੁਰਸਕਾਰ ਭੇਟ
. . .  1 day ago
ਨਵੀਂ ਦਿੱਲੀ, 30 ਮਾਰਚ - ਰਾਸ਼ਟਰਪਤੀ ਪ੍ਰਣਬ ਮੁਖਰਜੀ ਵੱਲੋਂ ਸੰਤ ਬਲਬੀਰ ਸਿੰਘ ਸੀਚੇਵਾਲ ਸਮੇਤ 39 ਸ਼ਖ਼ਸੀਅਤਾਂ ਨੂੰ ਅੱਜ ਪਦਮ ਪੁਰਸਕਾਰ...
ਕੇਜਰੀਵਾਲ ਨੇ ਦਿੱਲੀ ਦੀ ਜਨਤਾ ਨੂੰ ਧੋਖਾ ਦਿੱਤਾ- ਕੈਪਟਨ
. . .  1 day ago
ਨਵੀਂ ਦਿੱਲੀ, 30 ਮਾਰਚ- ਦਿੱਲੀ ਦੇ ਰਾਜੌਰੀ ਗਾਰਡਨ 'ਚ ਕਾਂਗਰਸੀ ਉਮੀਦਵਾਰ ਲਈ ਪ੍ਰਚਾਰ ਕਰਦਿਆਂ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਕਿਹਾ ਕਿ ਅਰਵਿੰਦ ਕੇਜਰੀਵਾਲ ਨੇ ਦਿੱਲੀ ਜੀ...
2 ਅਪ੍ਰੈਲ ਨੂੰ ਦੇਸ਼ ਦੀ ਸਭ ਤੋਂ ਲੰਬੀ ਸੁਰੰਗ ਦਾ ਉਦਘਾਟਨ ਕਰਨਗੇ ਪ੍ਰਧਾਨ ਮੰਤਰੀ
. . .  1 day ago
ਉੱਤਰ ਪ੍ਰਦੇਸ਼ : ਮੀਟ ਕਾਰੋਬਾਰੀਆਂ ਦੀ ਹੜਤਾਲ ਖ਼ਤਮ
. . .  1 day ago
ਲਖਨਊ, 30 ਮਾਰਚ- ਉੱਤਰ ਪ੍ਰਦੇਸ਼ 'ਚ ਮੀਟ ਕਾਰੋਬਾਰੀਆਂ ਨੇ ਹੜਤਾਲ ਖ਼ਤਮ ਕਰਨ ਦਾ ਐਲਾਨ ਕੀਤਾ ਹੈ। ਮੀਟ ਕਾਰੋਬਾਰੀਆਂ ਨੇ ਅੱਜ ਇੱਥੇ ਮੁੱਖ ਮੰਤਰੀ ਯੋਗੀ ਅਦਿੱਤਿਆ ਨਾਥ ਨਾਲ ਮੁਲਾਕਾਤ ਤੋਂ ਬਾਅਦ ਇਹ ਫ਼ੈਸਲਾ ਕੀਤਾ ਹੈ। ਕੱਲ੍ਹ...
ਏ.ਐੱਸ. ਰਾਏ ਨੇ ਆਈ.ਜੀ. ਪਟਿਆਲਾ ਜ਼ੋਨ ਵਜੋਂ ਅਹੁਦਾ ਸਾਂਭਿਆ
. . .  1 day ago
ਪਟਿਆਲਾ, 30 ਮਾਰਚ- ਆਈ.ਜੀ. ਪਟਿਆਲਾ ਜ਼ੋਨ ਵਜੋਂ ਏ.ਐੱਸ. ਰਾਏ ਵੱਲੋਂ ਅੱਜ ਪਟਿਆਲਾ ਵਿਖੇ ਸਥਿਤ ਦਫ਼ਤਰ ਵਿਖੇ ਅਹੁਦਾ ਸਾਂਭ ਲਿਆ ਗਿਆ ਹੈ। ਇਸ ਮੌਕੇ ਡੀ.ਆਈ.ਜੀ. ਪਟਿਆਲਾ ਰੇਂਜ ਅਸ਼ੀਸ਼ ਚੌਧਰੀ ਤੇ ਜ਼ਿਲ੍ਹਾ ਪੁਲਿਸ ਮੁਖੀ ਐੱਸ. ਭੂਪਤੀ ਵੱਲੋਂ ਉਨ੍ਹਾਂ ਦਾ ਸਵਾਗਤ ਕੀਤਾ ਗਿਆ। ਇਸ ਦੇ ਨਾਲ ਹੀ ਏ...
ਪੀ.ਆਰ.ਟੀ.ਸੀ.ਦੇ ਐਮਡੀ ਰਵਿੰਦਰ ਸਿੰਘ ਵੱਲੋਂ ਅਸਤੀਫ਼ਾ
. . .  1 day ago
ਹਥਿਆਰਾਂ ਸਮੇਤ ਪੰਜ ਨੌਜਵਾਨ ਕਾਬੂ
. . .  1 day ago
ਹੋਰ ਖ਼ਬਰਾਂ..
ਜਲੰਧਰ : ਵੀਰਵਾਰ 29 ਪੋਹ ਸੰਮਤ 548
ਵਿਚਾਰ ਪ੍ਰਵਾਹ: ਰਾਜਨੀਤੀ ਵਿਚ ਨਾ ਸਥਾਈ ਦੋਸਤੀ ਹੁੰਦੀ ਹੈ, ਨਾ ਹੀ ਦੁਸ਼ਮਣੀ, ਸਥਾਈ ਕੇਵਲ ਹਿਤ ਹੁੰਦੇ ਹਨ। -ਅਗਿਆਤ
  •     Confirm Target Language  

ਤੁਹਾਡੇ ਖ਼ਤ

12/01/2017

 ਵੋਟ ਸੋਚ ਸਮਝ ਕੇ ਪਾਇਓ
ਪੰਜਾਬ 'ਚ ਫਰਵਰੀ 'ਚ ਵੋਟਾਂ ਪੈ ਰਹੀਆਂ ਹਨ। ਸਾਰੀਆਂ ਪਾਰਟੀਆਂ ਅੱਡੀ-ਚੋਟੀ ਦਾ ਜ਼ੋਰ ਲਗਾ ਰਹੀਆਂ ਹਨ ਕਿ ਉਨ੍ਹਾਂ ਦੀ ਸਰਕਾਰ ਬਣ ਜਾਵੇ। ਪੰਜਾਬੀਓ ਇਸ ਵਾਰ ਆਪਣੀ ਵੋਟ ਦਾ ਇਸਤੇਮਾਲ ਸੋਚ ਕੇ ਕਰਿਓ, ਕਿਧਰੇ ਆਪਣੀ ਕੀਮਤੀ ਵੋਟ ਕਿਸੇ ਨੂੰ ਸ਼ਰਾਬ ਦੀ ਬੋਤਲ ਜਾਂ ਕਿਸੇ ਹੋਰ ਲਾਲਚ 'ਚ ਆ ਕੇ ਖਰਾਬ ਨਾ ਕਰ ਦਿਓ। ਵਾਸਤਾ ਤੁਹਾਨੂੰ ਸਾਡਾ ਪ੍ਰਦੇਸੀਂ ਬੈਠੇ ਤੁਹਾਡੇ ਸ਼ੁੱਭਚਿੰਤਕਾਂ ਦਾ, ਤੁਹਾਡਾ ਦੁੱਖ ਜ਼ਰਿਆ ਨਹੀਂ ਜਾਂਦਾ। ਰੋਜ਼ ਖ਼ਬਰਾਂ ਦੀਆਂ ਸੁਰਖੀਆਂ ਆਤਮ-ਹੱਤਿਆਵਾਂ ਅਤੇ ਕਈ ਹੋਰ ਬੇਰੁਜ਼ਗਾਰੀ ਅਤੇ ਗ਼ਰੀਬੀ ਤੋਂ ਤੰਗ ਆ ਕੇ ਮਰਦੇ ਲੋਕ। ਇਸ ਵਾਰ ਸਮਝਦਾਰੀ ਵਰਤਿਓ। ਸੋਚ ਸਮਝ ਕੇ ਉਸ ਨੂੰ ਹੀ ਵੋਟ ਦਿਓ, ਜਿਸ ਨੂੰ ਤੁਸੀਂ ਸਮਝਦੇ ਹੋ ਕਿ ਵੋਟ ਦੇਣ ਨਾਲ ਪੰਜਾਬ ਦਾ ਭਲਾ ਹੋ ਸਕੇਗਾ। ਇਸ ਸੂਬੇ ਦੀ ਹਾਲਤ ਅਜਿਹੀ ਬਣ ਚੁੱਕੀ ਹੈ ਕਿ ਇਸ ਵਾਰ ਤੁਸੀਂ ਆਪਣੇ ਅਧਿਕਾਰ ਦੀ ਸਹੀ ਵਰਤੋਂ ਕਰਕੇ ਇਸ ਦਾ ਭਲਾ ਕਰੋ। ਸਾਡਾ ਕਿਸੇ ਨਾਲ ਵਿਰੋਧ ਨਹੀਂ ਪਰ ਉਹੀ ਪੰਜਾਬ 'ਚ ਸਰਕਾਰ ਆਵੇ ਜੋ ਦਿਲੋਂ ਪੰਜਾਬੀਆਂ ਦਾ ਭਲਾ ਕਰ ਸਕੇ। ਤੁਸੀਂ ਸੋਚਣਾ ਹੈ ਅਤੇ ਸੋਚ ਸਮਝ ਕੇ ਵੋਟ ਪਾਉਣੀ ਹੈ।


-ਮਨਿੰਦਰ ਕੌਰ ਧੌਲ
ਮੈਲਬੌਰਨ (ਆਸਟਰੇਲੀਆ)।


ਸੜਕ ਹਾਦਸੇ
ਅੱਜ ਦੀ ਇਸ ਭੱਜ-ਨੱਸ ਦੀ ਦੌੜ ਵਿਚ ਬਹੁਤ ਹੀ ਕੀਮਤੀ ਜਾਨਾਂ ਸੜਕਾਂ 'ਤੇ ਅਜਾਈਂ ਜਾ ਰਹੀਆਂ ਹਨ। ਬਹੁਤ ਘਰਾਂ ਦੇ ਚੜ੍ਹਦੀ ਉਮਰ ਦੇ ਨੌਜਵਾਨ ਪੁੱਤਰ ਇਨ੍ਹਾਂ ਖੂਨੀ ਸੜਕਾਂ ਨੇ ਆਪਣੀ ਲਪੇਟ ਵਿਚ ਲੈ ਲਏ ਹਨ। ਘਰਾਂ ਦੇ ਇਕਲੌਤੇ ਚਿਰਾਗ ਬੁੱਝ ਗਏ ਹਨ ਪਰ ਸਰਕਾਰਾਂ ਦੇ ਲੱਖਾਂ ਯਤਨਾਂ ਦੇ ਬਾਵਜੂਦ ਅਸੀਂ ਮੌਤ ਦੇ ਖੂਹ ਵੱਲ ਆਪ ਵਧ ਰਹੇ ਹਾਂ। ਘਰੇ ਬੈਠੇ ਏਜੰਟਾਂ ਤੋਂ ਲਾਇਸੰਸ ਬਣਵਾ ਲਏ ਜਾਂਦੇ ਹਨ। ਛੋਟੀ ਉਮਰ ਦਾ ਬੱਚਾ ਬਾਈਕ ਜਾਂ ਗੱਡੀ ਚਲਾਉਂਦਾ ਹੋਵੇ ਤਾਂ ਮਾਂ-ਪਿਉ ਹੁਬ-ਹੁਬ ਦੱਸਣਗੇ ਕਿ ਇਹ ਤਾਂ ਬਹੁਤ ਤੇਜ਼ ਗੱਡੀ ਚਲਾਉਂਦਾ ਹੈ ਤੇ ਸਿੱਖ ਵੀ ਛੇਤੀ ਗਿਆ ਹੈ। ਉਹ ਇਸ ਗੱਲ ਤੋਂ ਅਨਜਾਣ ਹਨ ਕਿ ਉਨ੍ਹਾਂ ਦਾ ਹੁੱਬਣਾ ਹੀ ਇਕ ਦਿਨ ਘਰ 'ਚ ਵਿਛੇ ਸੱਥਰ ਦਾ ਕਾਰਨ ਬਣਨਾ ਹੈ। ਸੜਕਾਂ ਦੀ ਹਾਲਤ ਓਨੀ ਵਧੀਆ ਨਹੀਂ ਹੈ ਜਿੰਨੀ ਗੱਡੀਆਂ ਜਾਂ ਮੋਟਰਸਾਈਕਲਾਂ ਦੀ ਸਪੀਡ ਵਧਾ ਦਿੱਤੀ ਹੈ। ਇਸ ਪਾਸੇ ਵੱਲ ਸਾਰਿਆਂ ਖ਼ਾਸ ਕਰ ਮਾਂ-ਪਿਉ ਨੂੰ ਵਿਸ਼ੇਸ਼ ਤਵੱਜੋ ਦੇਣੀ ਚਾਹੀਦੀ ਹੈ। ਮਾਂ ਦੀ ਮਮਤਾ ਹੀ ਪੁੱਤ ਦੀ ਮੌਤ ਦਾ ਕਾਰਨ ਸਮਾਜ ਵਿਚ ਬਹੁਤ ਵਾਰੀ ਬਣਦੀ ਦੇਖੀ ਹੈ। ਲੋੜ ਹੈ ਜਾਗਣ ਦੀ ਤੇ ਸੰਭਲਣ ਦੀ।


-ਮਨਜੀਤ ਸਿੰਘ ਭਾਮ
ਸੂਬਾ ਪ੍ਰਧਾਨ, ਮਨੁੱਖੀ ਅਧਿਕਾਰ ਸੰਗਠਨ, ਹੁਸ਼ਿਆਰਪੁਰ।


ਡਾਂਸ ਮਜਬੂਰੀ ਜਾਂ ਸ਼ੌਕ?
ਲੋਕਾਂ ਵੱਲੋਂ ਖੁਸ਼ੀਆਂ ਦੇ ਮੌਕੇ 'ਤੇ ਬੁਲਾਏ ਜਾਂਦੇ ਆਰਕੈਸਟਰਾ ਗਰੁੱਪ ਦੇ ਨੌਜਵਾਨ ਮੁੰਡੇ-ਕੁੜੀਆਂ ਵੱਲੋਂ ਡੀ.ਜੇ. ਲਾ ਕੇ ਡਾਂਸ ਕਰਨਾ ਮਜਬੂਰੀ ਹੈ ਜਾਂ ਸ਼ੌਕ, ਇਸ ਬਾਰੇ ਵਿਸਥਾਰ 'ਚ ਕੋਈ ਪਤਾ ਨਹੀਂ ਲੱਗ ਸਕਿਆ। ਪਰ ਪਿਛਲੇ ਦਿਨੀਂ ਇਕ ਵਿਆਹ ਸਮੇਂ ਆਈ ਆਰਕੈਸਟਰਾ ਗਰੁੱਪ ਦੀ ਡਾਂਸਰ ਨੂੰ ਪੁੱਛਣ 'ਤੇ ਪਤਾ ਲੱਗਾ ਕਿ ਇਹ ਉਸ ਦੀ ਮਜਬੂਰੀ ਹੈ ਕੋਈ ਸ਼ੌਕ ਨਹੀਂ ਹੈ। ਉਸ ਨੇ ਦੱਸਿਆ ਕਿ ਉਹ ਦੋ ਭਰਾਵਾਂ ਦੀ ਭੈਣ ਹੈ। ਦੋਵੇਂ ਭਰਾ ਨਸ਼ਿਆਂ ਦੇ ਆਦੀ ਹਨ। ਪਿਤਾ ਸੱਤ ਸਾਲ ਪਹਿਲਾਂ ਘਰੋਂ ਚਲਾ ਗਿਆ, ਮੁੜ ਘਰ ਨਹੀਂ ਪਰਤਿਆ। ਜਦੋਂ ਕਿਹਾ ਕਿ ਇਹ ਸੱਭਿਆਚਾਰ ਦੇ ਨਾਂਅ 'ਤੇ ਪ੍ਰਦੂਸ਼ਣ ਫੈਲਾਇਆ ਜਾ ਰਿਹਾ ਹੈ ਤਾਂ ਉਸ ਕੁੜੀ ਦੇ ਅੱਖਾਂ ਵਿਚੋਂ ਪਾਣੀ ਵਹਿ ਤੁਰਿਆ, ਕਹਿਣ ਲੱਗੀ ਘਰ ਦਾ ਖਰਚ ਚਲਾਉਣ ਲਈ ਅਜਿਹਾ ਕਰਨਾ ਪੈ ਰਿਹਾ ਹੈ। ਮੇਰੇ ਭਰਾ ਨਸ਼ੇ ਖਾਣ ਤੋਂ ਸਿਵਾਏ ਕੋਈ ਕੰਮ ਨਹੀਂ ਕਰਦੇ। ਨੱਚਣ ਸਮੇਂ ਹੱਸਣਾ ਇਕ ਝੂਠਾ ਜਿਹਾ ਹੱਸਣਾ ਹੁੰਦਾ ਹੈ। ਜੇਕਰ ਖੁਸ਼ੀਆਂ ਦੇ ਮੌਕੇ ਮਸੋਸਿਆ ਜਿਹਾ ਮੂੰਹ ਬਣਾ ਕੇ ਨੱਚੀਏ ਤਾਂ ਸਾਡਾ ਮਾਲਿਕ ਅਗਲੇ ਪ੍ਰੋਗਰਾਮ 'ਚੋਂ ਨਾਂਅ ਕੱਟ ਦਿੰਦਾ ਹੈ ਤੇ ਸਾਨੂੰ ਫਿਰ ਆਰਥਿਕ ਤੰਗੀ ਨਾਲ ਜੂਝਣਾ ਪੈ ਜਾਂਦਾ ਹੈ। ਇਸ ਲਈ ਡਾਂਸ ਕਰਨ ਦੇ ਨਾਲ ਹੱਸਣਾ ਜ਼ਰੂਰੀ ਹੈ।


-ਸੁਖਵਿੰਦਰ ਕਲੇਰ ਬੱਸੀਆਂ
ਪਿੰਡ ਤੇ ਡਾਕ: ਬੱਸੀਆਂ, ਜ਼ਿਲ੍ਹਾ ਲੁਧਿਆਣਾ।

9/1/2017

 ਰਿਹਾਇਸ਼ੀ ਖੇਤਰਾਂ 'ਚ ਵਧਦਾ ਆਵਾਜ਼ ਪ੍ਰਦੂਸ਼ਣ
ਪਾਣੀ ਤੇ ਹਵਾ ਪ੍ਰਦੂਸ਼ਣ 'ਤੇ ਨਕੇਲ ਕੱਸਣ ਲਈ ਸਮੇਂ-ਸਮੇਂ 'ਤੇ ਮੌਜੂਦਾ ਸਰਕਾਰ, ਕਈ ਮਹਾਂਪੁਰਖਾਂ ਅਤੇ ਕਈ ਸੰਸਥਾਵਾਂ ਦੁਆਰਾ ਕੀਤੇ ਗਏ ਕਾਰਜ ਅਤਿ ਸ਼ਲਾਘਾਯੋਗ ਅਤੇ ਪ੍ਰੇਰਨਾਸਰੋਤ ਹਨ। ਸਖਤ ਕਾਨੂੰਨ ਹੋਣ ਦੇ ਬਾਵਜੂਦ ਲੋਕ ਲਗਾਤਾਰ ਲਾਊਡ ਸਪੀਕਰਾਂ ਅਤੇ ਮਲਟੀ ਮੀਡੀਆ ਸਪੀਕਰਾਂ ਦੀ ਵਰਤੋਂ ਕਰ ਰਹੇ ਹਨ ਜੋ ਕਿ ਪੜ੍ਹਨ ਵਾਲੇ ਬੱਚਿਆਂ, ਮੁਕਾਬਲੇ ਦੀ ਪ੍ਰੀਖਿਆ ਦੀ ਤਿਆਰੀ ਕਰ ਰਹੇ ਨੌਜਵਾਨਾਂ, ਬਜ਼ੁਰਗਾਂ ਅਤੇ ਛੋਟੇ ਬੱਚਿਆਂ ਅਤੇ ਬਿਮਾਰ ਲੋਕਾਂ ਲਈ ਲਗਾਤਾਰ ਪ੍ਰੇਸ਼ਾਨੀ ਦਾ ਕਾਰਨ ਬਣ ਰਹੇ ਹਨ। ਲੋੜ ਹੈ ਸਾਨੂੰ ਆਪਣੇ-ਆਪ ਨੂੰ ਧੁਨੀ ਪ੍ਰਦੂਸ਼ਣ ਨੂੰ ਘੱਟ ਕਰਨ ਪ੍ਰਤੀ ਜਾਗਰੂਕ ਹੋਣ ਦੀ ਅਤੇ ਦੂਸਰਿਆਂ ਦੀ ਪ੍ਰੇਸ਼ਾਨੀ ਪ੍ਰਤੀ ਸੰਵੇਦਨਸ਼ੀਲ ਹੋਣ ਦੀ।


-ਪ੍ਰੋ: ਉਪਦੇਸ਼ ਖਿੰਡਾ
ਸੁਲਤਾਨਪੁਰ ਲੋਧੀ, ਜ਼ਿਲ੍ਹਾ ਕਪੂਰਥਲਾ।


ਧਰਨੇ ਅਤੇ ਟ੍ਰੈਫਿਕ

ਅਸੀਂ ਅਕਸਰ ਹੀ ਦੇਖਦੇ ਹਾਂ ਕਿ ਲੋਕ ਆਪਣੀਆਂ ਮੰਗਾਂ ਮੰਨਵਾਉਣ ਕਰਨ ਲਈ ਧਰਨੇ ਲਾਉਂਦੇ ਹਨ ਅਤੇ ਕਈ ਵਾਰੀ ਆਵਾਜਾਈ ਰੋਕਦੇ ਹਨ। ਹਰ ਕਿਸੇ ਨੂੰ ਆਪਣੀਆਂ ਜਾਇਜ਼ ਮੰਗਾਂ ਨੂੰ ਮੰਨਾਉਣ ਦਾ ਹੱਕ ਹੈ ਪਰ ਇਸ ਹੱਕ ਦੀ ਕਿਸੇ ਨੂੰ ਵੀ ਦੁਰਵਰਤੋਂ ਕਰਨ ਦਾ ਕੋਈ ਅਧਿਕਾਰ ਨਹੀਂ ਹੈ। ਆਪਣੀਆਂ ਮੰਗਾਂ ਨੂੰ ਉੱਚ-ਅਧਿਕਾਰੀਆਂ ਤੱਕ ਪਹੁੰਚਾਉਣ ਲਈ ਕਈ ਕਿਸਮ ਦੇ ਰਸਤੇ ਅਪਣਾਏ ਜਾਂਦੇ ਹਨ। ਧਰਨੇ ਲਾਏ ਜਾਂਦੇ ਹਨ। ਆਮ ਲੋਕ ਇਸ ਜਾਮ ਵਿਚ ਫਸ ਜਾਂਦੇ ਹਨ। ਉਨ੍ਹਾਂ ਨੇ ਆਪਣੀ ਮੰਜ਼ਿਲ 'ਤੇ ਪਹੁੰਚਣਾ ਹੁੰਦਾ ਹੈ ਪਰ ਉਨ੍ਹਾਂ ਨੂੰ ਰਸਤੇ ਵਿਚ ਹੀ ਰੋਕ ਦਿੱਤਾ ਜਾਂਦਾ ਹੈ। ਉਹ ਆਮ ਲੋਕ ਹੁੰਦੇ ਹਨ। ਉਨ੍ਹਾਂ ਦਾ ਕੋਈ ਕਸੂਰ ਨਹੀਂ ਹੁੰਦਾ। ਕਈਆਂ ਮਰੀਜ਼ਾਂ ਨੂੰ ਹਸਪਤਾਲ ਜਲਦੀ ਪਹੁੰਚਣਾ ਹੁੰਦਾ ਹੈ। ਸੋਚਣ ਵੱਲੀ ਗੱਲ ਹੈ ਕਿ ਇਨ੍ਹਾਂ ਵਿਚਾਰਿਆਂ ਨੂੰ ਕਿਸ ਕਿਸਮ ਦੀ ਸਜ਼ਾ ਦਿੱਤੀ ਜਾਂਦੀ ਹੈ।


-ਸੁਖਪਾਲ ਸਿੰਘ ਫਾਰਮਾਸਿਸਟ
ਗੋਨਿਆਣਾ ਮੰਡੀ, ਬਠਿੰਡਾ।


ਸਮਾਂ
ਸਮਾਂ ਇਨਸਾਨ ਲਈ ਬਹੁਤ ਕੀਮਤੀ ਹੈ। ਸਾਡਾ ਸਾਰਿਆਂ ਦਾ ਫ਼ਰਜ਼ ਬਣਦਾ ਹੈ ਅਸੀਂ ਸਮੇਂ ਦੀ ਕਦਰ ਕਰੀਏ। ਜਿਹੜਾ ਇਨਸਾਨ ਸਮੇਂ ਦੀ ਕਦਰ ਕਰਦਾ ਹੈ, ਉਹ ਜ਼ਿੰਦਗੀ ਵਿਚ ਹਮੇਸ਼ਾ ਸਫ਼ਲ ਹੁੰਦਾ ਹੈ। ਅੱਜ ਦਾ ਕੰਮ ਕੱਲ੍ਹ 'ਤੇ ਨਹੀਂ ਛੱਡਣਾ ਚਾਹੀਦਾ। ਸਾਰੇ ਕੰਮ ਸਮੇਂ ਸਿਰ ਕਰਨੇ ਚਾਹੀਦੇ ਹਨ। ਬੀਤਿਆ ਸਮਾਂ ਕਦੀ ਵੀ ਮੁੜ ਕੇ ਹੱਥ ਨਹੀਂ ਆਉਂਦਾ। ਬਾਅਦ ਵਿਚ ਪਛਤਾਵਾ ਹੀ ਰਹਿ ਜਾਂਦਾ ਹੈ। ਸਾਨੂੰ ਕਦੇ ਵੀ ਸਮਾਂ ਫਜ਼ੂਲ ਗੱਲਾਂ ਕਰਕੇ ਨਹੀਂ ਗਵਾਉਣਾ ਚਾਹੀਦਾ। ਵਿਹਲੇ ਸਮੇਂ ਦੀ ਵੀ ਠੀਕ ਢੰਗ ਨਾਲ ਵਰਤੋਂ ਕਰਨੀ ਚਾਹੀਦੀ ਹੈ। ਹਰੇਕ ਇਨਸਾਨ ਨੂੰ ਚਾਹੀਦਾ ਹੈ ਕਿ ਆਪਣੀ ਜ਼ਿੰਦਗੀ ਨੂੰ ਵਧੀਆ ਬਣਾਉਣ ਲਈ ਮਿਹਨਤ ਅਤੇ ਸਮੇਂ ਦੀ ਕਦਰ ਕਰੇ।


-ਰਾਜਵੀਰ ਕੌਰ
ਪਿੰਡ ਰਾਜਪੁਰ ਭਾਈਆਂ, ਜ਼ਿਲ੍ਹਾ ਹੁਸ਼ਿਆਰਪੁਰ।


ਨਵੇਂ ਸਾਲ ਦੀ ਵਧਾਈ
ਪੰਜਾਬੀ ਮਾਂ-ਬੋਲੀ ਦੀ ਸੇਵਾ ਵਿਚ ਵਿਸ਼ੇਸ਼ ਨਾਮਣਾ ਖੱਟ ਰਿਹਾ 'ਅਜੀਤ' ਜਿਸ ਨੇ ਸਾਡੀ ਮਾਂ-ਬੋਲੀ ਪੰਜਾਬੀ ਜ਼ਬਾਨ ਨੂੰ ਸਿਖਰਾਂ 'ਤੇ ਪਹੁੰਚਾਇਆ ਹੈ ਤੇ ਮਾਣ ਕਰਨਯੋਗ ਕਾਰਜ ਕੀਤੇ ਹਨ। ਇਸ ਦੇ ਮੁੱਖ ਸੰਪਾਦਕ, ਪ੍ਰਬੰਧਕਾਂ ਅਤੇ ਸਮੁੱਚੇ ਸਟਾਫ਼ ਗੱਲ ਕੀ 'ਅਜੀਤ' ਨਾਲ ਜੁੜੀ ਹਰ ਰੂਹ ਨੂੰ ਸਾਡੇ ਵੱਲੋਂ ਨਵੇਂ ਸਾਲ 2017 ਦੀਆਂ ਦਿਲੋਂ ਮੁਬਾਰਕਾਂ। ਇਸੇ ਤਰ੍ਹਾਂ ਹੋਰ ਵਡਮੁੱਲੀ ਸੇਵਾ ਕਰਕੇ ਪੰਜਾਬੀ ਮਾਂ-ਬੋਲੀ ਦੀ ਸੰਦਲੀ ਝੋਲੀ ਹੋਰ ਨਵੇਂ ਪਰਾਗਿਆਂ ਨਾਲ ਭਰ ਕੇ ਪਾਠਕਾਂ ਦੇ ਸਨਮੁੱਖ ਕੀਤਾ ਜਾਵੇ। ਨਵੇਂ ਸਾਲ ਮੌਕੇ 'ਅਜੀਤ ਮੈਗਜ਼ੀਨ' ਵਿਚ ਨਵੇਂ ਸਾਲ ਸਬੰਧੀ ਦਿੱਤੀ ਜਾਣਕਾਰੀ ਅਤੇ ਕਾਵਿ ਮਹਿਫ਼ਲ ਸਲਾਹੁਣਯੋਗ ਸੀ।


-ਬਲਬੀਰ ਸਿੰਘ ਬੱਬੀ
ਪਿੰਡ ਤੱਖਰਾਂ (ਲੁਧਿਆਣਾ)। ਮੋਬਾਈਲ : 92175-92531.

7/1/2017

 ਕਾਲਾ ਧਨ ਖਿਲਾਫ਼ ਮੁਹਿੰਮ

ਦੇਸ਼ ਨੂੰ ਅੰਗਰੇਜ਼ਾਂ ਕੋਲੋਂ ਆਜ਼ਾਦੀ ਮਿਲਣ ਉਪਰੰਤ ਕਾਂਗਰਸ ਪਾਰਟੀ ਨੇ ਦੇਸ਼ ਉੱਤੇ ਲਗਾਤਾਰ 60 ਸਾਲ ਰਾਜ ਕੀਤਾ ਹੈ। ਜਨਤਾ ਦੀ ਆਸ ਦੇ ਉਲਟ ਦੇਸ਼ ਨੂੰ ਖੁਸ਼ਹਾਲ ਬਣਾਉਣ ਦੀ ਬਜਾਏ ਇਸ ਪਾਰਟੀ ਨੇ ਦੇਸ਼ ਵਿਚ ਭ੍ਰਿਸ਼ਟਾਚਾਰ ਤੇ ਰਿਸ਼ਵਤਖੋਰੀ ਫੈਲਾਅ ਕੇ ਦੇਸ਼ ਨੂੰ ਬਰਬਾਦ ਕੀਤਾ ਹੈ। ਦੇਸ਼ ਵਿਚ ਕਾਲੇ ਧਨ ਦਾ ਪਾਸਾਰ ਏਨਾ ਹੋ ਗਿਆ ਸੀ ਕਿ ਉਹ ਦੇਸ਼ ਦੀ ਸੁਰੱਖਿਆ ਲਈ ਖ਼ਤਰਾ ਬਣ ਗਿਆ ਸੀ। ਦੇਸ਼ ਦੇ ਲੋਕਾਂ ਨੇ ਕਾਂਗਰਸ ਪਾਰਟੀ ਨੂੰ ਨਕਾਰ ਕੇ ਸੰਨ 2014 ਦੀਆਂ ਲੋਕ ਸਭਾ ਚੋਣਾਂ ਵਿਚ ਪੂਰਨ ਬਹੁਮਤ ਦੇ ਕੇ ਸ੍ਰੀ ਮੋਦੀ ਦੀ ਅਗਵਾਈ ਵਾਲੀ ਭਾਰਤੀ ਜਨਤਾ ਪਾਰਟੀ ਨੂੰ ਦੇਸ਼ ਦੀ ਵਾਗਡੋਰ ਥਮਾ ਦਿੱਤੀ ਸੀ। ਹੁਣ ਜਦੋਂ ਸ੍ਰੀ ਮੋਦੀ ਦੀ ਸਰਕਾਰ ਨੇ ਕਾਲੇ ਧਨ ਦੇ ਖਿਲਾਫ਼ ਹੱਲਾ ਬੋਲ ਦਿੱਤਾ ਹੈ ਤਾਂ ਕਾਂਗਰਸ ਪਾਰਟੀ ਤੇ ਨਹਿਰੂ ਪਰਿਵਾਰ ਦੇ ਵਾਰਸ ਸ੍ਰੀ ਰਾਹੁਲ ਗਾਂਧੀ ਨੇ ਕਾਲੇ ਧਨ ਕੁਬੇਰਾਂ ਦੇ ਹੱਕ ਵਿਚ ਲੁਕਵੇਂ ਤੌਰ 'ਤੇ ਮੁਹਿੰਮ ਚਲਾ ਰੱਖੀ ਹੈ। ਸ੍ਰੀ ਮੋਦੀ ਇਕ ਮਜ਼ਬੂਤ ਇਰਾਦੇ ਵਾਲੇ ਪ੍ਰਧਾਨ ਮੰਤਰੀ ਹਨ ਤੇ ਦੇਸ਼ ਦੀ ਜਨਤਾ ਉਨ੍ਹਾਂ ਪਿੱਛੇ ਚਟਾਨ ਵਾਂਗ ਖੜ੍ਹੀ ਹੈ। ਦੇਸ਼ ਦੇ ਲੋਕਾਂ ਨੂੰ ਆਸ ਹੈ ਕਿ ਹੁਣ ਦੇਸ਼ ਖੁਸ਼ਹਾਲੀ ਦੇ ਰਸਤੇ ਪੈਰ ਧਰ ਸਕੇਗਾ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਅੰਮ੍ਰਿਤਸਰ।

ਨੋਟ ਤਸਕਰ

ਭਾਰਤ ਵਿਚ ਨੋਟਬੰਦੀ ਦੇ ਦਿਨ ਤੋਂ ਹੀ ਨੋਟ ਤਸਕਰੀ ਦਾ ਧੰਦਾ ਸ਼ੁਰੂ ਹੋ ਗਿਆ ਸੀ। ਇਕ ਪਾਸੇ ਤਾਂ ਦੋ ਹਜ਼ਾਰ ਦਾ ਇਕ ਨੋਟ ਪ੍ਰਾਪਤ ਕਰਨ ਲਈ ਆਮ ਲੋਕ ਕਈ-ਕਈ ਦਿਨ ਬੈਂਕਾਂ ਦੇ ਬਾਹਰ ਲਾਈਨਾਂ ਲਗਾਈ ਖੜ੍ਹੇ ਰਹਿੰਦੇ ਹਨ, ਫਿਰ ਵੀ ਕਈ ਵਾਰੀ ਤਾਂ ਖਾਲੀ ਹੱਥ ਹੀ ਵਾਪਸ ਮੁੜਨਾ ਪੈਂਦਾ ਹੈ। ਦੂਸਰੇ ਪਾਸੇ ਕਰੋੜਾਂ ਰੁਪਏ ਦੇ ਨਵੇਂ ਨੋਟ ਤਸਕਰਾਂ ਕੋਲੋਂ ਫੜੇ ਜਾ ਰਹੇ ਹਨ। ਹੈਰਾਨੀ ਦੀ ਗੱਲ ਹੈ ਕਿ ਇਹ ਨਵੇਂ ਕਰੰਸੀ ਤਸਕਰਾਂ ਦੇ ਘਰ ਕਿਵੇਂ ਪੁੱਜ ਗਈ। ਇਨ੍ਹਾਂ ਧਨ ਕੁਬੇਰਾਂ ਦੇ ਨਾਲ ਬੈਂਕ ਕਰਮਚਾਰੀਆਂ ਦੀ ਮਿਲੀਭੁਗਤ ਵੀ ਨਜ਼ਰ ਆ ਰਹੀ ਹੈ। ਬੈਂਕਾਂ ਅੱਗੇ ਲੰਮੀਆਂ ਲਾਈਨਾਂ ਅਜੇ ਵੀ ਜਾਰੀ ਹਨ ਅਤੇ ਹਰ ਰੋਜ਼ ਨਵੇਂ ਨੋਟ ਭਾਰੀ ਗਿਣਤੀ ਵਿਚ ਫੜੇ ਜਾ ਰਹੇ ਹਨ। ਅਗਰ ਇਹੀ ਨੋਟ ਬੈਂਕਾਂ ਵਿਚ ਜਮ੍ਹਾਂ ਹੁੰਦੇ ਤਾਂ ਆਮ ਜਨਤਾ ਨੂੰ ਏਨੀਆਂ ਤਕਲੀਫ਼ਾਂ ਨਾ ਝੱਲਣੀਆਂ ਪੈਂਦੀਆਂ। ਸਰਕਾਰ ਨੂੰ ਚਾਹੀਦਾ ਹੈ ਕਿ ਇਨ੍ਹਾਂ ਫੜੇ ਗਏ ਧਨ ਕੁਬੇਰਾਂ ਨੂੰ ਅਤੇ ਮਿਲੀਭੁਗਤ ਕਰਨ ਵਾਲੇ ਬੈਂਕ ਕਰਮਚਾਰੀਆਂ ਨੂੰ ਦੇਸ਼ਧ੍ਰੋਹ ਦਾ ਮੁਕੱਦਮਾ ਚਲਾ ਕੇ ਜਲਦੀ ਤੋਂ ਜਲਦੀ ਸਜ਼ਾ ਦੇਵੇ। ਇਹੀ ਵਕਤ ਅਤੇ ਇਨਸਾਫ਼ ਦਾ ਤਕਾਜ਼ਾ ਹੈ।

-ਮਾ: ਮਹਿੰਦਰ ਸਿੰਘ ਬਾਜਵਾ
ਪਿੰਡ ਮਸੀਤਾਂ, ਜ਼ਿਲ੍ਹਾ ਕਪੂਰਥਲਾ।

36 ਸੌ ਕਰੋੜ ਦੀ ਯਾਦਗਾਰ

ਅਸੀਂ ਵਿਕਾਸਸ਼ੀਲ ਦੇਸ਼ ਦੇ ਨਿਵਾਸੀ ਹਾਂ। ਯਥਾਰਥ ਨੂੰ ਭੁੱਲ ਕੇ ਵਿਕਸਤ ਹੋਣ ਦੀ ਕਲਪਨਾ ਪਾਲੀ ਬੈਠੇ ਹਾਂ। ਦੇਸ਼ ਦੀ 70 ਕਰੋੜ ਆਬਾਦੀ ਅੱਜ ਵੀ ਰੋਜ਼ਾਨਾ 20 ਰੁਪਏ ਨਾਲ ਗੁਜ਼ਾਰਾ ਕਰ ਰਹੀ ਹੈ। ਦੇਸ਼ ਕੋਲ ਅਜੇ ਤੱਕ ਔਸਤਨ 45 ਫ਼ੀਸਦੀ ਹੀ ਬਿਜਲੀ ਉਪਲਬਧ ਹੈ। ਦੇਸ਼ ਦਾ ਅੰਨਦਾਤਾ ਆਰਥਿਕ ਮੰਦਹਾਲੀ ਦਾ ਸ਼ਿਕਾਰ ਹੋ ਕੇ ਖ਼ੁਦਕੁਸ਼ੀਆਂ ਕਰਨ ਲਈ ਮਜਬੂਰ ਹੈ। ਦੇਸ਼ ਦਾ ਬਾਲ ਮਜ਼ਦੂਰੀ ਕਾਨੂੰਨ ਦੇਸ਼ ਦੇ ਲੱਖਾਂ ਬੱਚਿਆਂ ਨੂੰ ਅਜੇ ਤੱਕ ਸਕੂਲ ਨਹੀਂ ਭੇਜ ਸਕਿਆ। ਆਪਣੇ ਕੋਮਲ ਹੱਥਾਂ ਵਿਚ ਕਿਤਾਬਾਂ ਫੜਨ ਵਾਲੇ ਹਜ਼ਾਰਾਂ ਬੱਚੇ ਅਜੇ ਵੀ ਢਾਬਿਆਂ ਉੱਪਰ ਜੂਠੇ ਬਰਤਨ ਸਾਫ਼ ਕਰ ਰਹੇ ਹਨ। ਦੂਜੇ ਪਾਸੇ ਪੱਥਰ ਤਰਾਸ਼ ਕੇ ਇੱਟਾਂ, ਸੀਮੈਂਟ ਨਾਲ ਕਰੋੜਾਂ ਦੀਆਂ ਯਾਦਗਾਰਾਂ ਅਤੇ ਬੁੱਤ ਉਸਾਰੇ ਜਾ ਰਹੇ ਹਨ। ਹਾਲ ਹੀ ਵਿਚ ਮਹਾਰਾਸ਼ਟਰ ਦੇ ਮੁੰਬਈ ਤਟ 'ਤੇ ਅਰਬ ਸਾਗਰ ਦੇ ਇਕ ਟਾਪੂ 'ਤੇ ਛਤਰਪਤੀ ਸ਼ਿਵਾਜੀ ਦੀ 36 ਸੌ ਕਰੋੜ ਵਿਚ ਬਣ ਰਹੀ ਯਾਦਗਾਰ ਦਾ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੱਲੋਂ ਉਦਘਾਟਨ ਕੀਤਾ ਗਿਆ ਹੈ। ਇਸ ਯਾਦਗਾਰ 'ਤੇ ਖਰਚਿਆ ਜਾਣਾ ਵਾਲਾ 36 ਸੌ ਕਰੋੜ ਰੁਪਿਆ ਦੇਸ਼ ਦੀਆਂ ਹਜ਼ਾਰਾਂ ਗਰੀਬ ਜ਼ਿੰਦਗੀਆਂ ਨੂੰ ਰੁਸ਼ਨਾ ਸਕਦਾ ਹੈ, ਬਾਲ ਮਜ਼ਦੂਰੀ ਕਰ ਰਹੇ ਲੱਖਾਂ ਬੱਚਿਆਂ ਦੇ ਹੱਥਾਂ ਵਿਚ ਕਿਤਾਬਾਂ ਫੜਾ ਸਕਦਾ ਹੈ। ਆਰਥਿਕ ਮੰਦਹਾਲੀ ਦਾ ਸ਼ਿਕਾਰ ਹੋ ਰਹੇ ਲੱਖਾਂ ਕਿਸਾਨਾਂ ਦੀਆਂ ਖ਼ੁਦਕੁਸ਼ੀਆਂ ਰੋਕ ਸਕਦਾ ਹੈ। ਦੇਸ਼ ਵਿਚ ਅਰਬਾਂ ਰੁਪਏ ਦੀ ਹੋ ਰਹੀ ਬਰਬਾਦੀ ਅਤੇ ਬੁੱਤਾਂ ਅਤੇ ਯਾਦਗਾਰਾਂ ਦੀ ਰਾਜਨੀਤੀ ਕਦੋਂ ਬੰਦ ਹੋਵੇਗੀ।

-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀਖਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

6/1/2017

 ਲੋਕਾਂ ਦੀ ਪ੍ਰੇਸ਼ਾਨੀ

ਪੰਜਾਬ ਵਿਧਾਨ ਸਭਾ ਚੋਣ ਨੇ ਦਸਤਕ ਦੇ ਦਿੱਤੀ ਹੈ। ਹਰੇਕ ਪਾਰਟੀ ਦੇ ਨੁਮਾਇੰਦੇ ਆਪੋ-ਆਪਣੇ ਢੰਗ ਨਾਲ ਜ਼ੋਰ ਅਜਮਾਈ ਕਰਕੇ ਆਪਣੇ ਚੋਣ ਜੁਮਲਿਆਂ ਰਾਹੀਂ ਵੋਟਰਾਂ ਨੂੰ ਆਪਣੇ ਵੱਲ ਖਿੱਚਣ ਦਾ ਯਤਨ ਕਰ ਰਹੇ ਹਨ। ਪੰਜਾਬ ਦੇ ਮੁੱਖ ਮੰਤਰੀ ਸੰਗਤ ਦਰਸ਼ਨ ਪ੍ਰੋਗਰਾਮਾਂ ਲਈ ਅਜਿਹੇ ਵਿਧਾਨ ਸਭਾ ਹਲਕਿਆਂ ਨੂੰ ਤਰਜੀਹ ਦੇ ਰਹੇ ਹਨ, ਜਿਨ੍ਹਾਂ ਵਿਚ ਸ਼੍ਰੋਮਣੀ ਅਕਾਲੀ ਦਲ ਵੱਲੋਂ ਉਮੀਦਵਾਰਾਂ ਦੀ ਅਦਲਾ ਬਦਲੀ ਕੀਤੀ ਗਈ ਹੈ, ਨਾਲ ਹੀ ਇਨ੍ਹਾਂ ਹਲਕਿਆਂ ਅੰਦਰ ਉਮੀਦਵਾਰਾਂ ਦੀਆਂ ਚਣੌਤੀਆਂ ਨੂੰ ਗ੍ਰਾਂਟਾਂ ਦੇ ਜ਼ੋਰ ਨਾਲ ਦੂਰ ਕਰਨ ਦੇ ਯਤਨ ਕੀਤੇ ਜਾ ਰਹੇ ਹਨ।
ਪ੍ਰੰਤੂ ਪੰਜਾਬ ਅੰਦਰ ਸਮਰਾਲਾ ਇਕ ਅਜਿਹਾ ਵਿਧਾਨ ਸਭਾ ਹਲਕਾ ਵੀ ਹੈ, ਜਿੱਥੇ ਆਉਂਦੀਆਂ ਵਿਧਾਨ ਸਭਾ ਚੋਣਾਂ ਲਈ ਸ਼੍ਰੋਮਣੀ ਅਕਾਲੀ ਦਲ ਦਾ ਉਮੀਦਵਾਰ ਬਦਲ ਕੇ ਵੀ ਅਕਾਲੀ ਦਲ ਦੀ ਇਲਾਕੇ ਵਿਚ ਹਾਲਤ ਸੁਧਾਰਨ ਦੀ ਸੰਭਾਵਨਾ ਘਟ ਲਗਦੀ ਹੈ। ਸਮਰਾਲਾ ਸ਼ਹਿਰ ਸਮੇਤ ਇਲਾਕੇ ਦੀਆਂ ਸੜਕਾਂ ਦੇ ਬੇਹੱਦ ਮੰਦੇ ਹਾਲ ਹਨ ਅਤੇ ਸਰਕਾਰ ਵੱਲੋਂ ਪੰਜਾਬ ਦੇ ਕੀਤੇ ਵਿਕਾਸ ਦੇ ਵਾਅਦੇ ਸਮਰਾਲੇ ਦੀ ਹੱਦ ਅੰਦਰ ਦਾਖ਼ਲ ਹੁੰਦੇ ਹੀ ਖੋਖਲੇ ਨਜ਼ਰ ਆਉਣ ਲੱਗਦੇ ਹਨ। ਇਕ ਗੱਲ ਜ਼ਰੂਰ ਹੈ ਸਮਰਾਲਾ ਇਲਾਕੇ ਨੂੰ ਕੈਬਨਿਟ ਦਰਜੇ ਦੇ ਨੇਤਾ 'ਲਾਲੀਪਾਪ' ਦੀ ਤਰ੍ਹਾਂ ਜ਼ਰੂਰ ਦਿੱਤੇ ਹੋਏ ਹਨ ਜਿਨ੍ਹਾਂ ਵਿਚ ਪੰਜਾਬ ਮੰਡੀ ਬੋਰਡ ਦਾ ਚੇਅਰਮੈਨ, ਮੈਂਬਰ ਪੀ. ਏ. ਸੀ., ਚੇਅਰਮੈਨ ਮਾਰਕਫੈੱਡ, ਡਾਇਰੈਕਟਰ ਪੰਜਾਬ ਸਟੇਟ ਇੰਡਸਟਰੀਅਲ ਡਿਵੈੱਲਪਮੈਂਟ ਕਾਰਪੋਰੇਸ਼ਨ ਆਦਿ ਤੋਂ ਇਲਾਵਾ ਪੰਜਾਬ ਦੀਆਂ ਸਿਰਕੱਢ ਕਿਸਾਨ ਜਥੇਬੰਦੀਆਂ ਦੇ ਆਗੂ ਵੀ ਇਸੇ ਇਲਾਕੇ ਦਾ ਮਾਣ ਹਨ। 'ਕੱਟੇ ਨੂੰ ਮਣ ਦੁੱਧ ਦਾ ਕੀ ਭਾਅ' ਦੀ ਕਹਾਵਤ ਵਾਂਗ ਸਮਰਾਲਾ ਵਿਧਾਨ ਸਭਾ ਹਲਕੇ ਦੇ ਲੋਕ ਇੰਨੀਆਂ ਉੱਚ ਸ਼ਖ਼ਸੀਅਤਾਂ ਦਾ ਮਾਣ ਹਾਸਲ ਕਰਕੇ ਵੀ ਇਕ ਲਵਾਰਿਸ ਬੱਚੇ ਵਾਂਗ ਬੁਰੀ ਤਰ੍ਹਾਂ ਵਿਲਕ ਰਹੇ ਹਨ। ਸਰਕਾਰ ਦੀ ਇਸ ਬੇਰੁਖ਼ੀ ਦਾ ਸਥਾਨਕ ਪ੍ਰਸ਼ਾਸਨ ਅਤੇ ਹੋਰ ਸਰਕਾਰੀ ਮਹਿਕਮੇ ਕੰਮ ਪ੍ਰਤੀ ਧਿਆਨ ਨਾ ਦੇ ਕੇ ਪੂਰੀ ਖੁੱਲ੍ਹਦਿਲੀ ਨਾਲ ਫਾਇਦਾ ਲੈ ਰਹੇ ਹਨ। ਪਰ ਆਮ ਲੋਕਾਂ ਨੂੰ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

-ਇੰਦਰਜੀਤ ਸਿੰਘ ਕੰਗ
ਕੋਟਲਾ ਸਮਸ਼ਪੁਰ (ਸਮਰਾਲਾ), ਜ਼ਿਲ੍ਹਾ ਲੁਧਿਆਣਾ।

ਸੁਪਨਈ ਵਾਅਦੇ

ਪੰਜਾਬ ਵਿਧਾਨ ਸਭਾ ਚੋਣਾਂ ਦਾ ਸਿਆਸੀ ਬਾਜ਼ਾਰ ਪੂਰਾ ਗਰਮ ਹੋ ਚੁੱਕਾ ਹੈ। ਸੱਤਾ ਪ੍ਰਾਪਤ ਕਰਨ ਲਈ ਹਰ ਸਿਆਸੀ ਪਾਰਟੀ ਦੇ ਨੇਤਾ ਆਪਣੇ ਚੋਣ ਮਨੋਰਥ ਵਿਚ ਹਰ ਵਰਗ ਦੇ ਵੋਟਰਾਂ ਨੂੰ ਭਰਮਾਉਣ ਲਈ ਵੱਡੇ-ਵੱਡੇ ਦਾਅਵੇ ਤੇ ਵਾਅਦੇ ਕਰ ਰਹੇ ਹਨ, ਜੋ ਪੰਜਾਬ ਦੇ ਲੋਕਾਂ ਨੂੰ ਪਿਛਲੇ 67 ਵਰ੍ਹਿਆਂ ਤੋਂ ਚੋਣਾਂ ਸਮੇਂ ਹਰ ਵਾਰ ਸੁਣਨ ਨੂੰ ਮਿਲਦੇ ਹਨ। ਬੇਰੁਜ਼ਗਾਰੀ, ਨਸ਼ੇ, ਪਲੀਤ ਵਾਤਾਵਰਨ, ਮਹਿੰਗਾਈ, ਮਿਆਰੀ ਸਿਹਤ ਸਹੂਲਤਾਂ, ਸਿੱਖਿਆ ਦਾ ਡਿੱਗਦਾ ਪੱਧਰ, ਬਰਬਾਦ ਹੋ ਚੁੱਕੀ ਕਿਸਾਨੀ, ਤਰਸਯੋਗ ਮਜ਼ਦੂਰਾਂ ਦੀ ਹਾਲਤ, ਤਬਾਹ ਹੋ ਚੁੱਕੀਆਂ ਉਦਯੋਗਿਕ ਇਕਾਈਆਂ ਆਦਿ ਸਮੱਸਿਆਵਾਂ ਵਿਚੋਂ ਗੁਜ਼ਰ ਰਹੇ ਪੰਜਾਬ ਦੇ ਲੋਕਾਂ ਨੂੰ ਆਪਣੀ ਵੋਟ ਦਾ ਇਸਤੇਮਾਲ ਕਰਨ ਤੋਂ ਪਹਿਲਾਂ ਪੰਜਾਬ ਪ੍ਰਤੀ ਰਾਜਨੀਤਕ ਪਾਰਟੀਆਂ ਦੇ ਮੁੱਦਿਆਂ ਉੱਪਰ ਜ਼ਰੂਰ ਨਜ਼ਰ ਮਾਰਨ ਦੀ ਲੋੜ ਹੈ। ਇਸ ਤੋਂ ਇਲਾਵਾ ਸਾਨੂੰ ਸਿਆਸੀ ਪਾਰਟੀਆਂ ਤੋਂ ਸੁਪਨਮਈ ਵਾਅਦਿਆਂ ਦੀ ਥਾਂ ਯਥਾਰਥਮਈ ਪ੍ਰੋਗਰਾਮ ਮੰਗਣੇ ਚਾਹੀਦੇ ਹਨ ਤਾਂ ਕਿ ਪੰਜਾਬ ਮੁੜ ਖੁਸ਼ਹਾਲੀ ਦੀ ਰਾਹ ਉਪਰ ਪੈ ਸਕੇ।

-ਇਕਬਾਲ ਪਾਲੀ
ਪਿੰਡ ਫਲੌਂਡ ਕਲਾਂ (ਸੰਗਰੂਰ)।

5/1/2017

 ਵੋਟ ਦਾ ਅਧਿਕਾਰ
ਭਾਰਤ ਇਕ ਲੋਕਤੰਤਰੀ ਦੇਸ਼ ਹੈ, ਜਿਸ ਵਿਚ 18 ਸਾਲ ਦੀ ਉਮਰ ਪੂਰੀ ਕਰਨ 'ਤੇ ਹਰੇਕ ਨਾਗਰਿਕ ਨੂੰ ਵੋਟ ਦਾ ਅਧਿਕਾਰ ਪ੍ਰਾਪਤ ਹੁੰਦਾ ਹੈ। ਸਾਡਾ ਸਾਰਿਆਂ ਦਾ ਫ਼ਰਜ਼ ਬਣਦਾ ਹੈ ਕਿ ਅਸੀਂ ਵੋਟ ਦੇ ਅਧਿਕਾਰ ਦੀ ਠੀਕ ਢੰਗ ਨਾਲ ਵਰਤੋਂ ਕਰੀਏ। ਸਾਨੂੰ ਕਿਸੇ ਵੀ ਲਾਲਚ ਜਾਂ ਦਬਾਅ ਹੇਠਾਂ ਆ ਕੇ ਵੋਟ ਦੇ ਅਧਿਕਾਰ ਦੀ ਵਰਤੋਂ ਨਹੀਂ ਕਰਨੀ ਚਾਹੀਦੀ। ਹਰੇਕ ਪਾਰਟੀ ਜਿੱਤਣ ਲਈ ਵੱਧ ਤੋਂ ਵੱਧ ਚੋਣ ਪ੍ਰਚਾਰ ਕਰਨ, ਲੋਕਾਂ ਨੂੰ ਸਹੂਲਤਾਂ ਦੇਣ ਦੇ ਵਾਅਦੇ ਕਰ ਰਹੀ ਹੈ। ਦੇਸ਼ ਦੇ ਹਰੇਕ ਨਾਗਰਿਕ ਨੂੰ ਚਾਹੀਦਾ ਹੈ ਕਿ ਆਪਣੀ ਕੀਮਤੀ ਵੋਟ ਉਸ ਪਾਰਟੀ ਨੂੰ ਪਾਵੇ ਜਿਹੜੀ ਵਰਤਮਾਨ ਸਮੇਂ ਵਿਚ ਦੇਸ਼ ਵਿਚ ਚਲ ਰਹੀਆਂ ਸਮੱਸਿਆਵਾਂ ਗ਼ਰੀਬੀ, ਬੇਰੁਜ਼ਗਾਰੀ, ਨਸ਼ਾ, ਮਹਿੰਗਾਈ, ਭ੍ਰਿਸ਼ਟਾਚਾਰ ਨੂੰ ਦੂਰ ਕਰ ਸਕੇ। ਨਾਗਰਿਕਾਂ ਨੂੰ ਵੱਧ ਤੋਂ ਵੱਧ ਰੁਜ਼ਗਾਰ ਦੇ ਮੌਕੇ ਪ੍ਰਦਾਨ ਕਰ ਸਕੇ। ਆਮ ਲੋਕਾਂ ਦੇ ਜੀਵਨ ਪੱਧਰ ਨੂੰ ਉੱਚਾ ਉਠਾ ਸਕੇ।


-ਰਾਜਵੀਰ ਕੌਰ
ਪਿੰਡ ਰਾਜਪੁਰ ਭਾਈਆਂ, ਜ਼ਿਲ੍ਹਾ ਹੁਸ਼ਿਆਰਪੁਰ।


ਸਿਆਸੀ ਪਾਰਟੀਆਂ ਦਾ ਮੁੱਖ ਮਕਸਦ
ਪੰਜਾਬ ਵਿਧਾਨ ਸਭਾ ਚੋਣਾਂ 2017 ਦਾ ਬਿਗਲ ਵੱਜ ਚੁੱਕਾ ਹੈ ਅਤੇ ਸਾਰੀਆਂ ਸਿਆਸੀ ਪਾਰਟੀਆਂ ਨੇ ਆਪਣੀਆਂ ਤਿਆਰੀਆਂ ਖਿੱਚ ਲਈਆਂ ਹਨ। ਸਿਆਸੀ ਲੀਡਰਾਂ ਦੇ ਨਿੱਤ ਆਉਂਦੇ ਬਿਆਨ ਇਕ-ਦੂਸਰੇ ਲਈ ਤੋਹਮਤਬਾਜ਼ੀ ਅਤੇ ਦੂਸ਼ਣਬਾਜ਼ੀ ਨਾਲ ਭਰਪੂਰ ਹੁੰਦੇ ਹਨ। ਸਭ ਪਾਰਟੀਆਂ ਇਕ-ਦੂਸਰੇ ਉੱਪਰ ਅਜਿਹੇ ਇਲਜ਼ਾਮ ਜਾਂ ਤੋਹਮਤਾਂ ਲਾ ਰਹੀਆਂ ਹਨ ਕਿ ਜਿਨ੍ਹਾਂ ਨੂੰ ਸੁਣ ਕੇ ਕਈ ਵਾਰ ਸੋਚਣ ਲਈ ਮਜਬੂਰ ਹੋਣਾ ਪੈਂਦਾ ਹੈ ਕਿ ਪੰਜਾਬ ਦੀ ਸਿਆਸਤ ਕਿੱਧਰ ਨੂੰ ਜਾ ਰਹੀ ਹੈ ਅਤੇ ਕੀ ਕਿਸੇ ਨੂੰ ਸੱਚਮੁਚ ਪੰਜਾਬ ਦਾ ਫਿਕਰ ਹੈ? ਅਗਾਮੀ ਚੋਣਾਂ ਵਿਚ ਸੱਤਾ ਵਿਚ ਭਾਵੇਂ ਕੋਈ ਵੀ ਪਾਰਟੀ ਆਵੇ, ਪਰ ਸਭ ਪਾਰਟੀਆਂ ਦਾ ਕੇਵਲ ਇਕੋ-ਇਕ ਉਦੇਸ਼ ਹੋਵੇ ਅਤੇ ਇਹ ਉਦੇਸ਼ ਹੋਵੇ ਪੰਜਾਬ ਦੀ ਭਲਾਈ। ਪੜ੍ਹਾਈ ਅਤੇ ਖੇਡਾਂ ਦੇ ਨਾਲ-ਨਾਲ ਹੋਰ ਵੀ ਬਹੁਤ ਸਾਰੇ ਖੇਤਰਾਂ ਵਿਚ ਪਛੜ ਰਹੇ ਪੰਜਾਬ ਨੂੰ ਅਜਿਹੀ ਸਰਕਾਰ ਦੀ ਜ਼ਰੂਰਤ ਹੈ ਜੋ ਕਿ ਪੰਜਾਬ ਨੂੰ ਪੜ੍ਹਾਈ ਅਤੇ ਖੇਡਾਂ ਦੇ ਨਾਲ-ਨਾਲ ਸਭ ਖੇਤਰਾਂ ਵਿਚ ਮੋਹਰੀ ਬਣਾਉਣ ਦਾ ਯਤਨ ਕਰੇ। ਇਸ ਲਈ ਸਭ ਸਿਆਸੀ ਪਾਰਟੀਆਂ ਨੂੰ ਚਾਹੀਦਾ ਹੈ ਕਿ ਉਹ ਇਕ-ਦੂਸਰੇ ਉੱਪਰ ਹੋ ਰਹੀ ਬੇਤੁਕੀ ਤੋਹਮਤਬਾਜ਼ੀ ਨੂੰ ਤਿਆਗ ਕੇ ਪੰਜਾਬ ਦੇ ਭਲੇ ਲਈ ਸੋਚਣ ਅਤੇ ਪੰਜਾਬ ਦੇ ਭਲੇ ਲਈ ਕੰਮ ਕਰਨ ਤਾਂ ਜੋ ਸਾਡਾ ਪੰਜਾਬ ਸਭ ਖੇਤਰਾਂ ਵਿਚ ਮੋਹਰੀ ਬਣ ਕੇ ਭਾਰਤ ਮਾਤਾ ਦੇ ਗਲ ਦਾ ਰਾਣੀ ਹਾਰ ਬਣ ਸਕੇ।


-ਗੁਰਪ੍ਰੀਤ ਸਿੰਘ ਮੱਲ੍ਹੀ
ਪਿੰਡ ਤੇ ਡਾਕ: ਜਲਾਲਦੀਵਾਲ, ਤਹਿ: ਰਾਏਕੋਟ, ਜ਼ਿਲ੍ਹਾ ਲੁਧਿਆਣਾ।

3/1/2017

 ਕਿਸਾਨ ਹਿਤੈਸ਼ੀ ਕਾਂਗਰਸੀ ਪ੍ਰਤੀਨਿਧ ਮੰਡਲ
ਪੰਜਾਬ ਸਮੇਤ ਦੇਸ਼ ਦੇ ਵੱਖ-ਵੱਖ ਰਾਜਾਂ ਦੇ ਕਿਸਾਨਾਂ ਸਿਰ ਚੜ੍ਹੇ ਕਰਜ਼ੇ ਨੂੰ ਖ਼ਤਮ ਕਰਨ ਹਿਤ ਪ੍ਰਧਾਨ ਮੰਤਰੀ ਸ੍ਰੀ ਨਰਿੰਦਰ ਮੋਦੀ ਨੂੰ ਸੌਂਪੇ ਮੰਗ ਪੱਤਰ ਰਾਹੀਂ ਸੁਖਦ ਸੁਨੇਹਾ ਜ਼ਰੂਰ ਮਿਲਿਆ ਹੈ। ਕਿਸਾਨ ਹਿਤਾਂ ਦੀ ਰਾਖੀ ਲਈ ਆਮ ਤੌਰ 'ਤੇ ਰਾਜਸੀ ਪਾਰਟੀਆਂ ਕਈ ਤਰ੍ਹਾਂ ਦੇ ਸੰਘਰਸ਼ਾਂ ਰਾਹੀਂ ਸਮੇਂ-ਸਮੇਂ ਆਵਾਜ਼ ਬੁਲੰਦ ਕਰਦੀਆਂ ਰਹੀਆਂ ਹਨ ਪਰ ਕਿਸਾਨਾਂ ਲਈ ਅਮਲੀ ਰੂਪ ਵਿਚ ਅਜੇ ਤੱਕ ਕੁਝ ਖ਼ਾਸ ਨਹੀਂ ਕੀਤਾ ਗਿਆ। ਕਿਸਾਨ ਦੀ ਸਥਿਤੀ ਤੋਂ ਜਾਣੂ ਹੋਣ ਦੇ ਬਾਵਜੂਦ ਰਾਜਨੀਤਕ ਆਗੂ ਅੱਖਾਂ ਬੰਦ ਕਰੀ ਰੱਖਦੇ। ਦੇਸ਼ ਦੀ ਮੌਜੂਦਾ ਅਰਥ-ਵਿਵਸਥਾ ਵਿਚ ਵੱਧ ਪੀੜਤ ਕਿਸਾਨ ਵਰਗ ਹੈ। ਕਿਸਾਨ ਦੇਸ਼ ਵਿਚ ਆਤਮ-ਹੱਤਿਆਵਾਂ ਕਰ ਰਹੇ ਹਨ, ਜੋ ਕਿ ਦੇਸ਼ ਦਾ ਅੰਨਦਾਤਾ ਹੈ। ਰਾਜਨੀਤਕ ਪਾਰਟੀਆਂ ਨੂੰ ਕਿਸਾਨ ਦੀਆਂ ਸਮੱਸਿਆਵਾਂ ਨੂੰ ਗੰਭੀਰਤਾ ਨਾਲ ਲੈਣਾ ਚਾਹੀਦਾ ਹੈ। ਕਿਸਾਨਾਂ ਦੇ ਕਰਜ਼ੇ ਦੇ ਮੁੱਦੇ ਨੂੰ ਖ਼ਤਮ ਕਰਨ ਲਈ ਸਾਰਿਆਂ ਨੂੰ ਸਾਂਝਾ ਹੰਭਲਾ ਮਾਰਨ ਦੀ ਲੋੜ ਹੈ।


-ਪ੍ਰਗਟ ਸਿੰਘ ਵਜੀਦਪੁਰ
ਪਿੰਡ ਤੇ ਡਾਕ: ਵਜੀਦਪੁਰ, ਜ਼ਿਲ੍ਹਾ ਤੇ ਤਹਿਸੀਲ ਪਟਿਆਲਾ।


ਗੱਲ ਫ਼ਸਲੀ ਵਿਭਿੰਨਤਾ ਦੀ

ਕਿਸਾਨਾਂ ਦੀ ਆਰਥਿਕ ਹਾਲਤ ਨੂੰ ਸੁਧਾਰਨ ਲਈ ਸਰਕਾਰਾਂ ਫ਼ਸਲੀ ਵਿਭਿੰਨਤਾ ਦੀਆਂ ਸਲਾਹਾਂ ਤਾਂ ਦੇ ਰਹੀਆਂ ਹਨ ਪਰ ਅਸਲ ਤਸਵੀਰ ਕੁਝ ਹੋਰ ਹੈ। ਸੁਝਾਅ ਤਾਂ ਦਿੱਤੇ ਜਾਂਦੇ ਹਨ ਪਰ ਜਦੋਂ ਜਿਣਸਾਂ ਦੇ ਮੁੱਲ ਤੈਅ ਕਰਨ ਦੀ ਗੱਲ ਆਉਂਦੀ ਹੈ ਤਾਂ ਇਸ ਫ਼ਸਲੀ ਚੱਕਰ ਦੀ ਗੱਲ ਕਿਸਾਨਾਂ ਨੂੰ ਰਾਸ ਨਹੀਂ ਆਉਂਦੀ, ਜਿਸ ਕਰਕੇ ਕਿਸਾਨ ਵੱਧ ਆਮਦਨ ਦੀ ਬਜਾਏ ਘਾਟੇ ਵਿਚ ਰਹਿ ਜਾਂਦੇ ਹਨ। ਮਹਿੰਗੇ ਬੀਜ, ਦਵਾਈਆਂ, ਖਾਦਾਂ, ਖੇਤੀ ਮਸ਼ੀਨਰੀ ਆਦਿ ਵਰਤ ਕੇ ਤਿਆਰ ਕੀਤੀ ਸਬਜ਼ੀ ਜਦੋਂ ਮੰਡੀ 'ਚ ਪਹੁੰਚਦੀ ਹੈ ਤਾਂ ਸਬਜ਼ੀ ਵੇਚਣ ਵਾਲਿਆਂ ਦੀ ਕਮਿਸ਼ਨ ਸਮੇਤ ਕਿਸਾਨ ਖੁੱਲ੍ਹੀ ਮੰਡੀ ਵਿਚ ਲੁੱਟੇ ਜਾਂਦੇ ਹਨ। ਉਗਾਉਣ ਵਾਲੇ ਤੇ ਖਾਣ ਵਾਲੇ ਠੱਗੇ ਜਾਂਦੇ ਹਨ, ਜਦੋਂ ਕਿ ਵਿਚੋਲੇ ਦੋਵਾਂ ਧਿਰਾਂ ਨੂੰ ਚੂਨਾ ਲਗਾ ਲੈਂਦੇ ਹਨ। ਸਮਝ ਨਹੀਂ ਆਉਂਦੀ ਸਰਕਾਰ ਝੋਨੇ, ਕਣਕ, ਗੰਨੇ ਵਾਂਗ ਸਬਜ਼ੀਆਂ, ਫਲਾਂ ਆਦਿ ਦੇ ਮੁੱਲ ਨਿਸਚਿਤ ਕਿਉਂ ਨਹੀਂ ਕਰਦੀ? ਸਬਜ਼ੀ ਮੰਡੀ ਵਿਚ ਰੁਲ ਰਹੀ ਹੈ, ਕਿਸਾਨ ਮੰਡੀ ਵਿਚੋਂ ਮਾਯੂਸ ਹੋ ਕੇ ਖਾਲੀ ਹੱਥੀਂ ਮੁੜਦਾ ਹੈ। ਦੇਸ਼ ਦੀ ਰੀੜ੍ਹ ਦੀ ਹੱਡੀ ਕਹਾਉਂਦੀ ਕਿਰਸਾਨੀ ਦਾ ਲੱਕ ਟੁੱਟ ਰਿਹਾ ਹੈ। ਉਤੋਂ ਨੋਟਬੰਦੀ ਨੇ ਹੋਰ ਰੋਲ ਦਿੱਤਾ ਹੈ। ਕੀੜੇ ਮਾਰ ਦਵਾਈਆਂ, ਖਾਦਾਂ, ਖੇਤੀ ਮਸ਼ੀਨਰੀ ਬਣਾਉਣ ਵਾਲੀਆਂ ਕੰਪਨੀਆਂ ਬੇਲਗਾਮ ਹੋ ਕੇ ਬੇਹਿਸਾਬ ਰੇਟ ਵਧਾ ਕੇ ਕਿਸਾਨਾਂ ਦੀ ਲੁੱਟ ਕਰ ਰਹੀਆਂ ਹਨ। ਉਨ੍ਹਾਂ ਨੂੰ ਕੋਈ ਨਹੀਂ ਪੁੱਛਣ ਵਾਲਾ। ਫ਼ਸਲੀ ਵਿਭਿੰਨਤਾ ਦਾ ਨਾਅਰਾ ਦੇ ਕੇ ਕਿਸਾਨਾਂ ਨੂੰ ਸੰਤੁਸ਼ਟ ਨਹੀਂ ਕੀਤਾ ਜਾ ਸਕਦਾ। ਸਰਕਾਰ ਹਰ ਫ਼ਸਲ ਚਾਹੇ ਸਬਜ਼ੀ ਹੋਵੇ, ਫਲ ਹੋਣ, ਦੀ ਕੀਮਤ ਨਿਸਚਿਤ ਕਰੇ। ਖੇਤੀ ਲਾਗਤ ਘਟੇ ਪੂਰਾ ਮੁੱਲ ਮਿਲੇ ਕਿਸਾਨ ਨੂੰ ਉਸ ਦੇ ਖੂਨ ਪਸੀਨੇ ਦੀ ਕਮਾਈ ਦਾ। ਫ਼ਸਲੀ ਵਿਭਿੰਨਤਾ ਨਾਲ ਪਾਣੀ ਦੀ ਬੱਚਤ ਵੀ ਹੋਵੇਗੀ। ਖ਼ੁਦਕੁਸ਼ੀਆਂ ਦੇ ਰਾਹ ਪਈ ਕਿਸਾਨੀ ਨੂੰ ਸਰਕਾਰ ਬਚਾਵੇ।


-ਜਗਤਾਰ ਗਿੱਲ
ਅੰਮ੍ਰਿਤਸਰ।

1-1-2017

 ਰੁੱਖ ਤੇ ਮਨੁੱਖ
ਰੁੱਖ ਤੇ ਮਨੁੱਖ ਦਾ ਨਾਤਾ ਆਦਿ-ਜੁਗਾਦੀ ਹੈ | ਕੇਵਲ ਮਨੁੱਖ ਹੀ ਨਹੀਂ, ਪਸ਼ੂ ਅਤੇ ਪੰਛੀ ਵੀ ਰੁੱਖਾਂ ਉਤੇ ਨਿਰਭਰ ਹਨ | ਵੰਨ-ਸੁਵੰਨੇ ਪੰਛੀ ਰੁੱਖਾਂ ਦੇ ਟਾਹਣਿਆਂ 'ਤੇ ਆਲ੍ਹਣੇ ਬਣਾ ਕੇ ਰੌਣਕਾਂ ਲਾਉਂਦੇ ਹਨ | ਸਾਨੂੰ ਆਕਸੀਜਨ ਦਰੱਖਤਾਂ ਤੋਂ ਮਿਲਦੀ ਹੈ, ਜੋ ਸਾਹ ਪ੍ਰਣਾਲੀ ਦੀ ਧੜਕਣ ਹੈ ਤੇ ਧੜਕਦੇ ਜੀਵਾਂ ਨਾਲ ਹੀ ਸੰਸਾਰ ਹੈ | ਸੋ, ਜਿਊਾਦੇ ਰਹਿਣ ਲਈ ਦਰੱਖਤਾਂ ਦੀ ਬਹੁਤ ਲੋੜ ਹੈ | ਦਰੱਖਤਾਂ ਦੀ ਅੰਨ੍ਹੇਵਾਹ ਕਟਾਈ ਨੂੰ ਰੋਕਣ ਲਈ ਕਾਨੂੰਨੀ ਤੇ ਸਮਾਜਿਕ ਉੱਦਮਾਂ ਦੀ ਲੋੜ ਹੈ | ਨਵੇਂ ਦਰੱਖਤਾਂ ਨੂੰ ਲਗਾਉਣ ਲਈ ਵੱਡੇ ਯਤਨ ਬਹੁਤ ਜ਼ਰੂਰੀ ਹਨ | ਇਸ ਕੰਮ ਲਈ ਜਾਗਿ੍ਤੀ ਮੁਹਿੰਮ ਆਮ ਲੋਕਾਂ ਵਿਚ ਫੈਲਾਉਣ ਦੀ ਲੋੜ ਹੈ | ਇਕ ਰੁੱਖ-ਸੌ ਸੁੱਖ |

-ਮਨਿੰਦਰ ਸਿੰਘ ਰਾਜੂ
ਧਨੌਲਾ ਰੋਡ, ਬਰਨਾਲਾ |

ਪੰਜਾਬੀ ਮਾਂ-ਬੋਲੀ
ਗੁਰੂਆਂ-ਪੀਰਾਂ, ਰਿਸ਼ੀਆਂ-ਮੁਨੀਆਂ ਤੇ ਮਹਾਨ ਯੋਧਿਆਂ ਦੀ ਧਰਤੀ | ਪੰਜ+ਆਬ ਯਾਨਿ ਪੰਜਾਬ ਜਿਥੋਂ ਦੇ ਪਿੰਡਾਂ ਤੇ ਸ਼ਹਿਰਾਂ ਵਿਚ ਪੰਜਾਬੀ ਮਾਂ-ਬੋਲੀ ਪੜ੍ਹੀ, ਲਿਖੀ ਤੇ ਬੋਲੀ ਜਾਂਦੀ ਹੈ | ਜਿਥੇ ਗੁੜ੍ਹਤੀ ਹੀ ਪੰਜਾਬੀ ਮਾਂ-ਬੋਲੀ ਵਿਚ ਦਿੱਤੀ ਜਾਂਦੀ ਹੈ | ਪਰ ਅਫ਼ਸੋਸ ਪੰਜਾਬ ਅਤੇ ਕਈ ਯੂਨੀਵਰਸਿਟੀਆਂ ਅੰਦਰ ਪੰਜਾਬੀ ਮਾਂ-ਬੋਲੀ ਨਾਲ ਵਿਤਕਰਾ ਕੀਤਾ ਜਾਂਦਾ ਹੈ | ਜਦੋਂ ਕਿ ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਵੱਲੋਂ ਪੰਜਾਬੀ ਗਰੈਜੂਏਟ ਪੱਧਰ ਤੱਕ ਲਾਜ਼ਮੀ ਵਿਸ਼ੇ ਤੇ ਚੋਣਵੇਂ ਵਿਸ਼ੇ ਵਜੋਂ ਪੜ੍ਹਾਈ ਜਾ ਰਹੀ ਸੀ ਪਰ ਹੁਣ ਇਕ ਗਿਣੀ-ਮਿਥੀ ਸਾਜ਼ਿਸ਼ ਤਹਿਤ ਉਸ ਨੂੰ ਨਵੇਂ ਕੋਰਸ ਸਿਸਟਮ ਅਨੁਸਾਰ ਇੱਛਤ ਵਿਸ਼ਾ ਬਣਾਇਆ ਜਾ ਰਿਹਾ ਹੈ | ਪਰ ਸਾਰੇ ਸਮੈਸਟਰਾਂ 'ਚ ਪਹਿਲਾ ਅਤੇ ਚੋਣਵਾਂ ਵਿਸ਼ਾ ਪੰਜਾਬੀ ਲਾਜ਼ਮੀ ਸੀ | ਅਸਲ ਵਿਚ ਭਾਰਤੀ ਸੰਵਿਧਾਨ ਦੀਆਂ ਧਾਰਾਵਾਂ ਅਨੁਸਾਰ ਹਰ ਮਾਤ ਭਾਸ਼ਾ ਵਿਚ ਸਿੱਖਿਆ ਦੇਣੀ ਲਾਜ਼ਮੀ ਹੈ | ਪੰ੍ਰਤੂ ਸਰਕਾਰ ਦੀ ਮਾੜੀ ਨੀਤੀ ਕਾਰਨ ਪੰਜਾਬ ਵਿਚ ਸਬੰਧਤ ਯੂਨੀਵਰਸਿਟੀਆਂ ਵੀ ਪੰਜਾਬੀ ਮਾਂ-ਬੋਲੀ ਨਾਲ ਖਿਲਵਾੜ ਕਰਨ ਲੱਗ ਪਈਆਂ ਹਨ |
ਮਾਤ ਭਾਸ਼ਾ ਤੋਂ ਬਿਨਾਂ ਹੋਰ ਭਾਸ਼ਾਵਾਂ ਦਾ ਗਿਆਨ ਪ੍ਰਾਪਤ ਕਰਨਾ ਕੋਈ ਮਾੜੀ ਗੱਲ ਨਹੀਂ | ਆਪਣੀ ਮਾਤ ਭਾਸ਼ਾ ਤੋਂ ਦੂਰ ਹੋਣਾ ਸਭ ਤੋਂ ਵੱਡਾ ਦੁੱਖ ਹੈ | ਪੰਜਾਬੀ ਸਾਹਿਤ ਨਾਲ ਜੁੜੀਆਂ ਸਾਹਿਤਕ ਸੰਸਥਾਵਾਂ ਅਤੇ ਸਾਰੇ ਮਾਤ ਭਾਸ਼ਾ ਨਾਲ ਜੁੜੇ ਬੁੱਧੀਜੀਵੀਆਂ ਨੂੰ ਅਤੇ ਸ਼੍ਰੋਮਣੀ ਪ੍ਰਬੰਧਕ ਕਮੇਟੀ ਨੂੰ ਇਸ ਘਿਨੌਣੀ ਨੀਤੀ ਦਾ ਵਿਰੋਧ ਕਰਨਾ ਚਾਹੀਦਾ ਹੈ | ਅਜਿਹੇ ਸਮੇਂ ਪੰਜਾਬੀ ਦੇ ਮਾਣ-ਮੱਤੇ ਤੇ ਸਿਰਮੌਰ ਗਾਇਕ ਦੀਆਂ ਸਤਰਾਂ ਸਹੀ ਅਗਵਾਈ ਭਰਦੀਆਂ ਨਜ਼ਰ ਆਉਂਦੀਆਂ ਹਨ:
ਪੰਜਾਬੀਏ ਜ਼ੁਬਾਨੇ ਨੀ ਰੁਕਾਨੇ ਮੇਰੇ ਦੇਸ ਦੀਏ
ਫਿੱਕੀ ਪੈ ਗਈ ਚਿਹਰੇ ਦੀ ਨੁਹਾਰ
ਮੀਢੀਆਂ ਖਿਲਾਰੀ ਫਿਰੇਂ ਨੀ ਬੁੱਲੇ ਦੀਏ ਕਾਫੀਏ
ਕੀਹਨੇ ਤੇਰਾ ਲਾਹ ਲਿਆ ਸ਼ਿੰਗਾਰ... |

-ਰਣਜੀਤ ਸਿੰਘ ਬੱਸੀਆਂ
ਪਿੰਡ ਤੇ ਡਾਕ: ਬੱਸੀਆਂ, ਜ਼ਿਲ੍ਹਾ ਲੁਧਿਆਣਾ |
ਮੋਬਾਈਲ : 99884-67725.

ਨੋਟਬੰਦੀ
ਮੋਦੀ ਸਵਰਗ ਲਈ ਰਚੇ ਅਸ਼ਵਮੇਧ ਯੱਗ ਵਿਚ ਲਗਪਗ 100 ਦੇ ਕਰੀਬ ਲੋਕਾਂ ਨੇ ਆਪਣੀ ਜਾਨ ਦੀ ਆਹੂਤੀ ਦੇ ਦਿੱਤੀ ਹੈ ਤੇ ਅਜੇ ਪਤਾ ਨਹੀਂ ਹੋਰ ਕਿੰਨੀਆਂ ਜਾਣਗੀਆਂ? ਇਵੇਂ ਲੱਗਾ ਹੈ ਕਿ ਮੋਦੀ ਦੇ ਸਲਾਹਕਾਰਾਂ ਨੂੰ ਦੇਸ਼ ਦੇ ਪਿੰਡਾਂ ਦੀ ਆਰਥਿਕ ਅਤੇ ਸਮਾਜ ਸ਼ਾਸਤਰ ਦੀ ਜਾਣਕਾਰੀ ਨਹੀਂ ਹੈ ਕਿ ਪਿੰਡਾਂ ਵਿਚ ਲੋਕਾਂ ਦਾ ਰੋਜ਼ਮਰ੍ਹਾ ਦਾ ਜੀਵਨ ਪ੍ਰਵਾਹ ਕਿਵੇਂ ਚਲਦਾ ਹੈ | ਇਨ੍ਹਾਂ ਲੋਕਾਂ ਨੇ ਸ਼ਹਿਰੀ ਜੀਵਨ ਦੀ ਤਸਵੀਰ ਨੂੰ ਜ਼ਿਆਦਾ ਸਾਹਮਣੇ ਰੱਖਿਆ ਹੈ |
ਸਹਿਕਾਰੀ ਬੈਂਕਾਂ ਵਿਚੋਂ ਨੋਟਬੰਦੀ ਦਾ ਕੰਮ ਬੰਦ ਕਰਨ ਦਾ ਸਰਕਾਰ ਦਾ ਮੰਦਭਾਗਾ ਫ਼ੈਸਲਾ ਸੀ | ਇਸ ਨਾਲ ਪੰਜਾਬ ਦੇ ਪਿੰਡਾਂ ਦੇ ਅਰਥਚਾਰੇ ਨੂੰ ਵੱਡੇ ਪੱਧਰ 'ਤੇ ਸੱਟ ਵੱਜੀ ਹੈ | 80 ਫ਼ੀਸਦੀ ਮੁਦਰਾ ਦਾ ਲੈਣ-ਦੇਣ ਇਨ੍ਹਾਂ ਸਹਿਕਾਰੀ ਬੈਂਕਾਂ ਰਾਹੀਂ ਹੀ ਹੁੰਦਾ ਹੈ | ਇਹ ਸਹਿਕਾਰੀ ਬੈਂਕਾਂ ਪਿੰਡਾਂ ਲਈ ਰੀੜ੍ਹ ਦੀ ਹੱਡੀ ਹਨ | ਇਨ੍ਹਾਂ ਨੇ ਪਿੰਡਾਂ ਦੀ ਆਰਥਿਕਤਾ ਦੇ ਸੁਧਾਰ ਲਈ ਬਹੁਤ ਸ਼ਲਾਘਾਯੋਗ ਰੋਲ ਵੀ ਅਦਾ ਕੀਤਾ ਹੈ | ਕੁਝ ਕਾਲੀਆਂ ਭੇਡਾਂ ਦੀ ਕਾਲੀ ਕਰਤੂਤ ਕਾਰਨ ਸਾਰੇ ਪਿੰਡਾਂ ਨੂੰ ਸਜ਼ਾ ਕਿਸੇ ਵੀ ਸੂਰਤ ਵਿਚ ਜਾਇਜ਼ ਨਹੀਂ |

-ਹਰਜੀਤ ਸਿੰਘ ਰਾਜਾਸਾਂਸੀ
ਪਿੰਡ ਤੇ ਡਾਕ: ਰਾਜਾਸਾਂਸੀ, ਗਲੀ ਘਾਹ ਮੰਡੀ, ਜ਼ਿਲ੍ਹਾ ਅੰਮਿ੍ਤਸਰ |
<br/>

31-12-2016

 ਸੁਪਰੀਮ ਕੋਰਟ ਦੀ ਖ਼ਰੀ-ਖ਼ਰੀ

ਸੁਪਰੀਮ ਕੋਰਟ ਨੇ ਪੰਜਾਬ ਸਰਕਾਰ ਦੀ ਇਸ ਅਣਗਹਿਲੀ ਕਾਰਨ ਖਿਚਾਈ ਕੀਤੀ ਹੈ ਕਿ ਉਸ ਨੇ ਪੰਜਾਬ ਦੀਆਂ ਵੱਡੀਆਂ ਸੜਕਾਂ ਦੇ ਕਿਨਾਰਿਆਂ ਤੋਂ ਸ਼ਰਾਬ ਦੇ ਠੇਕੇ ਬੰਦ ਕਰਨ ਦੇ ਕਾਰਜ ਵਿਚ ਢਿੱਲਮਠ ਦਿਖਾਈ ਹੈ, ਜਦ ਕਿ ਕੋਰਟ ਨੇ ਸ਼ਰਾਬਬੰਦੀ ਲਈ ਬਿਹਾਰ ਸਰਕਾਰ ਦੀ ਪ੍ਰਸੰਸਾ ਕੀਤੀ ਹੈ। ਕੋਰਟ ਨੇ ਕਿਹਾ ਹੈ ਕਿ ਪੰਜਾਬ ਸਰਕਾਰ ਨੂੰ ਸ਼ਰਾਬੀਆਂ ਦੁਆਰਾ ਕਰਨ ਵਾਲੇ ਸੜਕੀ ਹਾਦਸਿਆਂ ਵਿਚ ਹੋਣ ਵਾਲੀਆਂ ਮੌਤਾਂ ਨਾਲ ਕੋਈ ਸਰੋਕਾਰ ਨਹੀਂ। ਭਾਰਤ ਦੀ ਸਭ ਤੋਂ ਵੱਡੀ ਅਦਾਲਤ ਦੀ ਟਿੱਪਣੀ ਪੰਜਾਬ ਸਰਕਾਰ ਦੇ ਨਸ਼ਿਆਂ ਪ੍ਰਤੀ ਮੋਹ ਨੂੰ ਉਜਾਗਰ ਕਰਦੀ ਹੈ। ਪ੍ਰੰਤੂ ਜਦੋਂ ਅਕਾਲੀ-ਭਾਜਪਾ ਗਠਜੋੜ ਸਰਕਾਰ ਦੇ ਲੀਡਰ ਇਹ ਕਹਿੰਦੇ ਹਨ ਕਿ ਪੰਜਾਬੀਆਂ ਨੂੰ ਨਸ਼ੇੜੀ ਕਹਿ ਕੇ ਬਦਨਾਮ ਕੀਤਾ ਜਾ ਰਿਹਾ ਹੈ ਤਾਂ ਲੀਡਰਾਂ ਦੇ ਸਫੈਦ ਝੂਠ ਤੇ ਪਰਦਾਪੋਸ਼ੀ ਉਤੇ ਹੈਰਾਨੀ ਹੁੰਦੀ ਹੈ। ਅੱਜ ਪੰਜਾਬ ਦਾ ਬੱਚਾ-ਬੱਚਾ ਪੰਜਾਬ ਵਿਚਲੇ ਨਸ਼ਿਆਂ ਦੇ ਛੇਵੇਂ ਦਰਿਆ ਦੀ ਗੱਲ ਕਰਦਾ ਹੈ। ਦੁੱਧ, ਘਿਓ, ਮੱਖਣ ਤੇ ਲੱਸੀ ਦੇ ਸ਼ੌਕੀਨ ਪੰਜਾਬੀਆਂ ਨੂੰ ਨਸ਼ਿਆਂ ਵੱਲ ਧੱਕਣ ਲਈ ਪੰਜਾਬ ਦੀਆਂ ਸਾਰੀਆਂ ਸਿਆਸੀ ਪਾਰਟੀਆਂ ਦੇ ਲੀਡਰ ਬਰਾਬਰ ਦੇ ਜ਼ਿੰਮੇਵਾਰ ਹਨ। ਇਨ੍ਹਾਂ ਲੀਡਰਾਂ ਨੇ ਐਕਸਾਈਜ਼ ਡਿਊਟੀ ਤੋਂ ਹੋਣ ਵਾਲੀ ਆਮਦਨ ਅਤੇ ਚੋਣਾਂ ਸਮੇਂ ਵੱਧ ਤੋਂ ਵੱਧ ਵੋਟਾਂ ਬਟੋਰਨ ਲਈ ਨਸ਼ਿਆਂ ਨੂੰ ਉਤਸ਼ਾਹਿਤ ਕੀਤਾ ਹੈ। ਪ੍ਰੰਤੂ ਯਾਦ ਰੱਖੋ, ਜਿਹੜਾ ਸ਼ਰੀਕਾਂ ਦੇ ਘਰ ਨੂੰ ਅੱਗ ਲਾਉਂਦਾ ਹੈ, ਉਸ ਦਾ ਸੇਕ ਉਸ ਦੇ ਆਪਣੇ ਘਰ ਤੱਕ ਵੀ ਪਹੁੰਚ ਜਾਂਦਾ ਹੈ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਅੰਮ੍ਰਿਤਸਰ।

'ਸੁਫ਼ਨਾ ਇਕ-ਖਰਚਾ ਕਰੋੜਾਂ ਦਾ'

ਬੀਤੇ ਦਿਨੀਂ ਹਰੀਕੇ ਝੀਲ ਵਿਚ ਬਸ ਚਲਵਾ ਕੇ ਪੰਜਾਬ ਦੇ ਉਪ ਮੁੱਖ ਮੰਤਰੀ ਸ: ਸੁਖਬੀਰ ਸਿੰਘ ਬਾਦਲ ਨੇ ਆਪਣਾ ਇਕ ਹੋਰ ਸੁਫ਼ਨਾ ਪੂਰਾ ਹੋਣ ਦੀ ਗੱਲ ਕਹੀ। ਉਨ੍ਹਾਂ ਦੇ ਇਸ ਬਿਆਨ ਨੇ ਆਮ ਲੋਕਾਂ ਦੇ ਮਨਾਂ ਅੰਦਰ ਕਈ ਤਰ੍ਹਾਂ ਦੇ ਸਵਾਲ ਖੜ੍ਹੇ ਕਰ ਦਿੱਤੇ। ਜੇਕਰ ਇਕ ਰਾਜ ਨੇਤਾ ਦਾ ਸੁਫ਼ਨਾ ਪੂਰਾ ਕਰਨ ਲਈ ਕਰੋੜਾਂ ਰੁਪਏ ਖਰਚੇ ਜਾ ਸਕਦੇ ਹਨ ਤਾਂ ਆਮ ਲੋਕਾਂ ਦੇ ਸੁਫ਼ਨਿਆਂ ਦਾ ਕੀ ਬਣੇਗਾ? ਮੇਰਾ ਮਨ ਵੀ ਇਹ ਘੋਖਣ ਲੱਗ ਪਿਆ ਕਿ ਕੀ ਭਾਰਤ ਹੁਣ ਸੱਚਮੁਚ ਹੀ ਲੋਕਤੰਤਰੀ ਦੇਸ਼ ਹੈ ਜਾਂ ਕੇਵਲ ਨਾਂਅ ਦਾ ਹੀ ਹੈ? ਲੋਕਤੰਤਰੀ ਦੇਸ਼ ਤਾਂ ਉਹ ਹੁੰਦਾ ਹੈ ਜਿੱਥੇ ਲੋਕਾਂ ਦੇ ਸੁਫ਼ਨੇ ਪੂਰੇ ਕਰਨ ਲਈ ਨੇਤਾ ਚੁਣੇ ਜਾਂਦੇ ਹਨ ਅਤੇ ਆਮ ਲੋਕਾਂ ਲਈ ਸੁਖ ਸਹੂਲਤਾਂ ਅਤੇ ਰੁਜ਼ਗਾਰ ਦੇ ਮੌਕੇ ਪੈਦਾ ਕੀਤੇ ਜਾਂਦੇ ਹਨ। ਪ੍ਰੰਤੂ ਸਾਡੇ ਪੰਜਾਬ ਸੂਬੇ ਦੇ ਅਸੂਲ ਹੀ ਵੱਖਰੇ ਹਨ, ਇੱਥੇ ਨੇਤਾਵਾਂ ਦੇ ਸੁਫ਼ਨੇ ਪੂਰੇ ਕਰਨ ਲਈ ਕਰੋੜਾਂ ਰੁਪਏ ਪਾਣੀ ਵਿਚ ਵਹਾਅ ਦਿੱਤੇ ਜਾਂਦੇ ਹਨ, ਆਮ ਲੋਕਾਂ ਨੂੰ ਕੋਈ ਲਾਭ ਜਾਂ ਰੁਜ਼ਗਾਰ ਮਿਲੇ ਜਾਂ ਨਾ ਮਿਲੇ। ਬੀਤੇ ਦਿਨੀਂ ਪੰਜਾਬ ਦੇ ਉੱਪ ਮੁੱਖ ਮੰਤਰੀ ਨੇ ਆਪਣਾ ਸੁਫ਼ਨਾ ਪੂਰਾ ਕਰਨ ਲਈ 10 ਕਰੋੜ ਰੁਪਏ ਖਰਚ ਕੇ ਜਲ ਬਸ ਨੂੰ ਹਰੀਕੇ ਝੀਲ ਵਿਚ ਉਤਾਰ ਦਿੱਤਾ। ਇਸ ਉਪਰੰਤ ਇਸ ਦੇ ਰੱਖ-ਰਖਾਓ, ਡਰਾਈਵਰ ਦੀ ਤਨਖਾਹ ਵਗੈਰਾ ਅਤੇ ਹੋਰ ਖਰਚੇ ਵੱਖਰੇ ਹਨ। ਜਲ ਬੱਸ ਦੇ 45 ਮਿੰਟ ਨਜ਼ਾਰੇ ਲੈਣ ਲਈ ਟਿਕਟ ਰੱਖ ਦਿੱਤੀ 800 ਰੁਪਏ, ਜਿਹੜੀ ਕਿ ਆਮ ਲੋਕਾਂ ਦੀ ਪਹੁੰਚ ਤੋਂ ਬਾਹਰ ਹੈ। ਜੇਕਰ ਅਜਿਹੇ ਕਾਰਜਾਂ ਦੀ ਥਾਂ 'ਤੇ ਆਮ ਲੋਕਾਂ ਦੇ ਸੁਫਨੇ ਪੂਰੇ ਕਰਨ ਲਈ ਰੁਜ਼ਗਾਰ ਦੇ ਮੌਕੇ ਪੈਦਾ ਕੀਤੇ ਜਾਂਦੇ ਤਾਂ ਸੱਚਮੁੱਚ ਹੀ ਇਕ ਵਿਅਕਤੀ ਦਾ ਸੁਫ਼ਨਾ ਪੂਰਾ ਕਰਨ ਦੀ ਥਾਂ ਹਜ਼ਾਰਾਂ ਘਰਾਂ ਦੇ ਚੁੱਲ੍ਹੇ ਮਘ ਕੇ ਲੱਖਾਂ ਲੋਕਾਂ ਦੇ ਸੁਫ਼ਨੇ ਪੂਰੇ ਹੁੰਦੇ। ਪੰਜਾਬ ਦੇ ਸਰਕਾਰੀ ਖਜ਼ਾਨੇ ਨੂੰ ਕਰੋੜਾਂ ਰੁਪਏ ਦਾ ਚੂਨਾ ਲੱਗ ਗਿਆ ਹੈ।

-ਇੰਦਰਜੀਤ ਸਿੰਘ ਕੰਗ
ਕੋਟਲਾ ਸਮਸ਼ਪੁਰ (ਸਮਰਾਲਾ), ਜ਼ਿਲ੍ਹਾ ਲੁਧਿਆਣਾ।

30/12/2016

 ਮਿਸਾਲੀ ਫ਼ੈਸਲਾ

ਪਿਛਲੇ ਦਿਨੀਂ 'ਅਜੀਤ' ਵਿਚ ਸੰਪਾਦਕੀ 'ਲੁਧਿਆਣਾ ਤੇਜਾਬ ਕਾਂਡ ਦਾ ਫ਼ੈਸਲਾ' ਬਹੁਤ ਹੀ ਪ੍ਰਭਾਵਸ਼ਾਲੀ ਸੀ। ਅਦਾਲਤ ਨੇ ਇਸ ਹਿਰਦੇਵੇਦਕ ਘਟਨਾ ਨੂੰ ਪੂਰੀ ਗੰਭੀਰਤਾ ਨਾਲ ਲੈਂਦੇ ਹੋਏ ਮਿਸਾਲੀ ਫ਼ੈਸਲਾ ਸੁਣਾਇਆ ਹੈ। ਅਜਿਹੇ ਫ਼ੈਸਲੇ ਨਾਲ ਸਮਾਜ ਵਿਰੋਧੀ ਅਨਸਰਾਂ ਨੂੰ ਇਕ ਸਖ਼ਤ ਸੰਦੇਸ਼ ਜਾਵੇਗਾ ਜੋ ਕਿ ਅਤਿ-ਜ਼ਰੂਰੀ ਵੀ ਹੈ। ਸਖ਼ਤ ਕਾਨੂੰਨੀ ਸਜ਼ਾਵਾਂ ਤੋਂ ਬਿਨਾਂ ਸਮਾਜ ਵਿਚ ਸਿਰ ਚੁੱਕ ਰਹੇ ਗੁੰਡਾ ਅਨਸਰਾਂ 'ਤੇ ਨਕੇਲ ਨਹੀਂ ਪਾਈ ਜਾ ਸਕਦੀ। ਇਸ ਤਰ੍ਹਾਂ ਦੇ ਕੇਸਾਂ ਦੇ ਫ਼ੈਸਲੇ ਇਕ ਤੈਅ-ਸ਼ੁਦਾ ਸਮਾਂ ਸੀਮਾ ਵਿਚ ਹਰ ਹਾਲਤ ਵਿਚ ਹੱਲ ਹੋਣੇ ਚਾਹੀਦੇ ਹਨ ਤਾਂ ਜੋ ਆਮ ਆਦਮੀ ਦਾ ਨਿਆਂਪਾਲਿਕਾ 'ਤੇ ਭਰੋਸਾ ਹੋਰ ਵੀ ਪ੍ਰਪੱਕ ਹੋ ਸਕੇ।

-ਬਿਕਰਮਜੀਤ ਸਿੰਘ
ਭਾਦਸੋਂ, ਜ਼ਿਲ੍ਹਾ ਪਟਿਆਲਾ।

ਕਦਰਾਂ-ਕੀਮਤਾਂ ਤੋਂ ਦੂਰੀ

ਅੱਜ ਅਸੀਂ ਰੀਤੀ-ਰਿਵਾਜ ਅਤੇ ਕਦਰਾਂ-ਕੀਮਤਾਂ ਤੋਂ ਬਹੁਤ ਦੂਰ ਹੋ ਚੁੱਕੇ ਹਾਂ। ਅੱਜ ਪੰਜਾਬੀ ਸਮਾਜ ਵੀ ਆਧੁਨਿਕਤਾ ਦੀ ਦੌੜ ਵਿਚ ਆਪਣੇ ਸੱਭਿਆਚਾਰ ਅਤੇ ਲੋਕ ਵਿਰਸੇ ਤੋਂ ਦੂਰ ਹੋ ਰਿਹਾ ਹੈ। ਅਜਿਹੇ ਵਿਰਸੇ ਤੋਂ ਜੋ ਲੋਕਾਂ ਨੂੰ ਮਿਲ ਬੈਠਣਾ ਅਤੇ ਆਪਸੀ ਭਾਈਚਾਰਾ ਸਿਖਾਉਂਦਾ ਹੈ। ਅੱਜ ਅਸੀਂ ਅਜਿਹੇ ਰਿਵਾਜ ਤੋਂ ਵਾਕਈ ਦੂਰ ਹੋ ਚੁੱਕੇ ਹਾਂ ਜੋ ਖੁਸ਼ੀ ਦਿਲੋਂ ਪ੍ਰਗਟ ਕਰਦੇ ਸਨ ਅਤੇ ਆਪਣੇ ਸਾਰੇ ਝਮੇਲਿਆਂ ਨੂੰ ਛੱਡ ਉਸ ਵਿਚ ਸ਼ਾਮਿਲ ਹੋਣ ਲਈ ਮਜਬੂਰ ਕਰ ਦਿੰਦੇ ਸਨ। ਅੱਜ ਜ਼ਰੂਰਤ ਹੈ ਕਿ ਅਸੀਂ ਆਪਣੇ ਇਨ੍ਹਾਂ ਰਿਵਾਜ ਨੂੰ ਅਲੋਪ ਹੋਣ ਤੋਂ ਬਚਾਈਏ, ਸੱਭਿਆਚਾਰ ਨੂੰ ਸਾਂਭੀਏ ਤਾਂ ਜੋ ਅਗਲੀਆਂ ਪੀੜ੍ਹੀਆਂ ਵੀ ਇਨ੍ਹਾਂ ਨੂੰ ਵੇਖ ਸਕਣ, ਮਾਣ ਸਕਣ। ਅੱਜ ਜ਼ਰੂਰਤ ਹੈ ਅਜਿਹੀਆਂ ਸੰਸਥਾਵਾਂ ਦੀ ਜੋ ਪੰਜਾਬੀ ਵਿਰਸੇ ਨੂੰ ਜ਼ਿੰਦਾ ਰੱਖਣ ਲਈ ਹੰਭਲਾ ਮਾਰਨ।

-ਮਨਿੰਦਰ ਸਿੰਘ ਰਾਜੂ
ਗਰਚਾ ਨਰਸਰੀ, ਧਨੌਲਾ ਰੋਡ, ਬਰਨਾਲਾ।

ਦਲ ਬਦਲੂਆਂ ਦੀ ਭਰਮਾਰ

ਜਿਵੇਂ-ਜਿਵੇਂ ਪੰਜਾਬ ਵਿਧਾਨ ਸਭਾ ਚੋਣਾਂ ਨੇੜੇ ਆ ਰਹੀਆਂ ਹਨ, ਉਵੇਂ-ਉਵੇਂ ਹੀ ਚੌਧਰ ਦੀ ਲਾਲਸਾ ਦੇ ਭੁੱਖੇ ਦਲ ਬਦਲੂਆਂ ਦੀ ਕਤਾਰ ਵੀ ਲੰਮੀ ਹੁੰਦੀ ਜਾ ਰਹੀ ਹੈ। ਕਿਸੇ ਵੀ ਦਲ ਬਦਲੂ ਨੇਤਾ ਨੂੰ ਜੇ ਦਲ ਬਦਲੀ ਬਾਰੇ ਪੁੱਛਿਆ ਜਾਂਦਾ ਹੈ ਤਾਂ ਉਹ ਬੜੇ ਫ਼ਕਰ ਨਾਲ ਕਹਿੰਦਾ ਹੈ ਕਿ ਉਸ ਨੇ ਲੋਕ ਹਿਤ ਵਿਚ ਪਾਰਟੀ ਜਾਂ ਦਲ ਬਦਲਿਆ ਹੈ, ਜਦੋਂ ਕਿ ਸੱਚ ਇਹ ਹੈ ਕਿ ਇਹ ਦਲ ਬਦਲੂ ਨਿੱਜੀ ਹਿਤਾਂ ਕਰਕੇ ਦਲ ਬਦਲ ਰਹੇ ਹਨ। ਜਿਹੜੀਆਂ ਪਾਰਟੀਆਂ ਰਾਹੀਂ ਇਨ੍ਹਾਂ ਦਲ ਬਦਲੂਆਂ ਨੇ ਲੰਮਾ ਸਮਾਂ ਸੱਤਾ ਸੁੱਖ ਭੋਗਿਆ ਹੈ, ਜਦੋਂ ਉਸ ਪਾਰਟੀ ਨੇ ਕਿਸੇ ਕਾਰਨ ਇਨ੍ਹਾਂ ਨੂੰ ਦੁਬਾਰਾ ਟਿਕਟ ਨਾ ਦਿੱਤੀ ਤਾਂ ਇਨ੍ਹਾਂ ਝੱਟ ਪਾਰਟੀ ਛੱਡ ਕੇ ਉਹ ਪਾਰਟੀ ਅਪਣਾ ਲਈ ਜਿਸ ਪਾਰਟੀ ਵੱਲੋਂ ਇਨ੍ਹਾਂ ਨੂੰ ਟਿਕਟ ਦੇਣ ਦਾ ਪੂਰਾ ਭਰੋਸਾ ਦਿੱਤਾ ਗਿਆ। ਅਸੀਂ ਚੋਣ ਕਮਿਸ਼ਨ ਨੂੰ ਪੁਰਜ਼ੋਰ ਬੇਨਤੀ ਕਰਦੇ ਹਾਂ ਕਿ ਉਹ ਇਨ੍ਹਾਂ ਦਲ ਬਦਲੂਆਂ ਦੀ ਆਮਦਨ ਅਤੇ ਇਨ੍ਹਾਂ ਦੀ ਆਮਦਨ ਦੇ ਸਰੋਤਾਂ ਦਾ ਪਤਾ ਲਗਾਏ। ਜੇ ਕੋਈ ਇਨ੍ਹਾਂ 'ਚੋਂ ਕਿਸੇ ਵੀ ਪੱਖ ਤੋਂ ਦੋਸ਼ੀ ਪਾਇਆ ਜਾਂਦਾ ਹੈ ਤਾਂ ਕਮਿਸ਼ਨ ਇਨ੍ਹਾਂ ਨੂੰ ਚੋਣ ਲੜਨ ਤੋਂ ਅਯੋਗ ਕਰਾਰ ਦੇ ਕੇ ਸਜ਼ਾ ਦਾ ਭਾਗੀ ਬਣਾਵੇ ਤਾਂ ਕਿ ਇਹ ਅਖੌਤੀ ਲੋਕ-ਹਿਤੂ ਲੋਕਾਂ ਦੇ ਜਜ਼ਬਾਤ ਨਾਲ ਖੇਡਣਾ ਬੰਦ ਕਰ ਸਕਣ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ : ਘੁਡਾਣੀ ਕਲਾਂ, ਲੁਧਿਆਣਾ।

29/12/2016

 ਇਹ ਰੁੱਤਾਂ ਕਹਿਰ ਦੀਆਂ

ਪੰਜਾਬ ਦੇ ਕਿਸੇ ਵੀ ਕੋਨੇ ਤੋਂ ਇਨ੍ਹੀਂ ਦਿਨੀਂ ਕੋਈ ਸੁਖਾਵੀਂ ਖ਼ਬਰ ਨਹੀਂ ਆ ਰਹੀ। ਅਖ਼ਬਾਰਾਂ ਦੇ ਪੰਨੇ ਦਿਲ ਨੂੰ ਲੂਹ ਲੈਣ ਵਾਲੀਆਂ ਖ਼ਬਰਾਂ ਨਾਲ ਭਰੇ ਆਉਂਦੇ ਹਨ। ਜਿਵੇਂ ਸਾਡੇ ਇਸ ਹੱਸਦੇ ਵਸਦੇ ਖਿੱਤੇ ਦੇ ਵਿਹੜੇ ਵਿਚੋਂ ਖੁਸ਼ੀਆਂ ਨੇ ਮੂੰਹ ਮੋੜ ਲਿਆ ਹੋਵੇ। ਪਹਿਲਾਂ ਬਠਿੰਡੇ ਰੋਜ਼ੀ-ਰੋਟੀ ਲਈ ਨੱਚਦੀ ਮੁਟਿਆਰ ਦਾ ਕਤਲ ਹੋਵੇ ਜਾਂ ਸੜਕਾਂ 'ਤੇ, ਟੈਂਕੀਆਂ 'ਤੇ ਆਪਣੇ-ਆਪ ਨੂੰ ਅੱਗਾਂ ਲਾਉਂਦੀ ਜਵਾਨੀ ਜਾਂ ਰੋਜ਼ ਖ਼ੁਦਕੁਸ਼ੀਆਂ ਕਰਦਾ ਅੰਨਦਾਤਾ ਹੋਵੇ। ਸੜਕਾਂ 'ਤੇ ਰੋਜ਼ ਤੇਜ਼ ਰਫ਼ਤਾਰੀ ਦੀ ਭੇਟ ਚੜ੍ਹਦੇ ਰਾਹਗੀਰ ਹੋਣ ਜਾਂ ਨੋਟਬੰਦੀ ਮਗਰੋਂ ਬੈਂਕਾਂ ਅੱਗੇ ਰੁਲਦੇ ਕੰਮਕਾਜੀ ਲੋਕ ਹੋਣ। ਸਾਡੇ ਸਮਾਜ ਦਾ ਸਮੁੱਚਾ ਤਾਣਾ-ਬਾਣਾ ਬੜੀ ਬੁਰੀ ਤਰ੍ਹਾਂ ਉਲਝਿਆ ਪਿਆ ਹੈ। ਕੀ ਇਹ ਹਾਲਾਤ ਸਿਰਫ ਚੰਦ ਵੋਟਾਂ ਦਾ ਵਪਾਰ ਕਰਨ ਵਾਲੇ ਲੋਕਾਂ ਨੇ ਸਿਰਜੇ ਹਨ ਜਾਂ ਕਿਤੇ ਅਸੀਂ ਖ਼ੁਦ ਸਮਾਜ ਦੀ ਇਸ ਤਰਸਯੋਗ ਤਸਵੀਰ ਦੇ ਰਚਨਹਾਰ ਤਾਂ ਨਹੀਂ।
ਬਿਨਾਂ ਸ਼ੱਕ ਸਿਆਸੀ ਸੌਦਿਆਂ ਦੀ ਮਾਰ ਨੇ ਅੱਜ ਪੰਜਾਬੀ ਸਮਾਜ ਦੀ ਸ਼ਕਲੋ ਸੂਰਤ ਵਿਗਾੜ ਕੇ ਰੱਖ ਦਿੱਤੀ ਹੈ। ਪਰ ਇਸ ਸਮੁੱਚੇ ਵਰਤਾਰੇ ਵਿਚ ਅਸੀਂ ਕਿਥੇ ਖੜ੍ਹੇ ਹਾਂ, ਇਹ ਵੀ ਵਿਚਾਰਨਯੋਗ ਮੁੱਦਾ ਹੈ। ਲੋਕਾਂ ਨੂੰ ਸਹੀ ਸੇਧ ਦੇਣ ਦੇ ਕਾਬਲ ਸਾਡਾ ਬੁੱਧੀਜੀਵੀ ਵਰਗ ਅਜੇ ਤੱਕ ਆਪਣੀ ਵਿਦਵਤਾ ਦੀ ਹਉਮੈ ਵਿਚੋਂ ਹੀ ਨਹੀਂ ਨਿਕਲ ਸਕਿਆ ਤਾਂ ਫਿਰ ਅਸੀਂ ਉਪਜੇ ਹਾਲਾਤ ਦਾ ਦੋਸ਼ ਕਿਸ ਦੇ ਸਿਰ ਮੜ੍ਹੀਏ। ਇਸ ਦਾ ਦੋਸ਼ ਹਰ ਜਾਗਰੂਕ ਸ਼ਖ਼ਸ ਨੂੰ ਆਪਣੇ ਸਿਰ ਲੈਣ ਦੀ ਲੋੜ ਹੈ ਤੇ ਸਮਾਜ ਦੇ ਇਸ ਨਿਘਾਰ ਵਾਲੀ ਬਿਮਾਰੀ ਦਾ ਇਲਾਜ ਵੀ ਸਾਨੂੰ ਖ਼ੁਦ ਹੀ ਕਰਨਾ ਪਵੇਗਾ। ਆਓ, ਸੜਕਾਂ 'ਤੇ ਬੰਦਿਆਂ ਵਾਂਗ ਵਿਵਹਾਰ ਕਰੀਏ, ਆਪਣੇ ਬੱਚਿਆਂ ਅੰਦਰ ਸਹੀ ਕਦਰਾਂ-ਕੀਮਤਾਂ ਉਪਜਾਈਏ। ਇਨ੍ਹਾਂ ਸਿਆਸੀ ਠੱਗਾਂ ਤੋਂ ਦੂਰ ਰਹੀਏ ਤਾਂ ਹੀ ਅਸੀਂ ਇਸ ਰੰਗਲੇ ਪੰਜਾਬ ਦੀ ਰੰਗਲੀ ਤਸਵੀਰ ਦੇ ਰੰਗ ਨਿਖੇਰ ਸਕਾਂਗੇ।

-ਬਲਜਿੰਦਰ ਸਿੰਘ ਸਮਾਘ
ਸ੍ਰੀ ਮੁਕਤਸਰ ਸਾਹਿਬ।

ਮਕਸਦ ਭਰਪੂਰ ਜ਼ਿੰਦਗੀ

ਮਨੁੱਖੀ ਜਨਮ ਨੂੰ ਪਰਮਾਤਮਾ ਦੀ ਸਰਬਉੱਤਮ ਰਚਨਾ ਮੰਨਿਆ ਗਿਆ ਹੈ। ਇਸ ਜ਼ਿੰਦਗੀ ਨੂੰ ਸੁਚੱਜੇ ਢੰਗ ਨਾਲ ਜਿਊਣ ਲਈ ਕੋਈ ਮਕਸਦ ਹੋਣਾ ਬਹੁਤ ਜ਼ਰੂਰੀ ਹੈ। ਮਕਸਦ ਭਰਪੂਰ ਵਿਅਕਤੀ ਨੂੰ ਕੁਦਰਤ ਦੀ ਹਰ ਸ਼ੈਅ ਕਿਸੇ ਨਾ ਕਿਸੇ ਆਹਰੇ ਲੱਗੀ ਨਜ਼ਰ ਆਉਂਦੀ ਹੈ। ਮਕਸਦ ਦੀ ਅਸਪੱਸ਼ਟਤਾ ਜੀਵਨ ਨੂੰ ਘੋਰ ਹਨੇਰੇ ਵੱਲ ਲੈ ਜਾਂਦੀ ਹੈ। ਮਕਸਦ ਵਿਅਕਤੀ ਤੋਂ ਵਿਅਕਤੀ ਵੱਖਰੇ-ਵੱਖਰੇ ਹੋ ਸਕਦੇ ਹਨ।
ਵਿਦਿਆਰਥੀ ਜੀਵਨ ਵਿਚ ਇਕ ਖਾਸ ਟੀਚਾ ਮੁਕਰੱਰ ਕਰਨ ਦੀ ਬਹੁਤ ਅਹਿਮੀਅਤ ਹੈ। ਵਿਦਿਆਰਥੀਆਂ ਨੂੰ ਚਾਹੀਦਾ ਹੈ ਕਿ ਉਹ ਆਪਣੀ ਆਰਥਿਕ ਸਥਿਤੀ, ਆਪਣੀ ਕਾਰਜ ਕੁਸ਼ਲਤਾ ਨੂੰ ਮੁੱਖ ਰੱਖ ਕੇ ਭਵਿੱਖੀ ਜ਼ਿੰਦਗੀ ਬਾਰੇ ਨਿਰਣਾ ਲੈਣ। ਡਾਵਾਂਡੋਲ ਦੀ ਮਿੱਟੀ ਹਮੇਸ਼ਾ ਗੋਲ ਹੀ ਰਹਿੰਦੀ ਹੈ। ਮਾਪਿਆਂ ਨੂੰ ਵੀ ਚਾਹੀਦਾ ਹੈ ਕਿ ਉਹ ਆਪਣੀਆਂ ਨਿੱਜੀ ਖਾਹਿਸ਼ਾਂ ਦੀ ਬੱਚਿਆਂ ਤੋਂ ਪੂਰਤੀ ਕਰਵਾਉਣ ਨਾਲੋਂ ਉਨ੍ਹਾਂ ਦੀਆਂ ਮਨੋਬਿਰਤੀਆਂ, ਸੰਭਾਵਨਾਵਾਂ, ਰੁਚੀਆਂ ਨੂੰ ਅਹਿਮੀਅਤ ਦੇਣ। ਮਕਸਦ ਵਿਹੂਣੀਆਂ ਜਾਂ ਮਕਸਦ ਤੋਂ ਭਟਕੀਆਂ ਜ਼ਿੰਦਗੀਆਂ ਨਸ਼ਿਆਂ, ਲੁੱਟ-ਮਾਰ ਤੇ ਘਰੇਲੂ ਝਗੜਿਆਂ ਦੇ ਰਾਹ 'ਤੇ ਤੁਰ ਪੈਂਦੀਆਂ ਹਨ, ਸੋ ਮਕਸਦ ਭਰਪੂਰ ਜ਼ਿੰਦਗੀ ਜ਼ਰੂਰੀ ਹੈ।

-ਮਾ: ਮਨਦੀਪ ਸਿਵੀਆ
ਪਿੰਡ ਤੇ ਡਾਕ: ਜੌੜਕੀ ਅੰਧੇਵਾਲੀ, ਫਾਜ਼ਿਲਕਾ।

27/12/2016

 ਜ਼ਿਮੀਂਦਾਰਾਂ ਦਾ ਘਾਣ
ਭਾਵੇਂ ਹਰ ਆਮ ਬੰਦਾ ਨੋਟਬੰਦੀ ਦਾ ਸ਼ਿਕਾਰ ਹੋਇਆ ਹੈ ਪਰ ਜ਼ਿਮੀਂਦਾਰ 'ਤੇ ਇਸ ਦਾ ਸਭ ਤੋਂ ਵੱਧ ਮਾੜਾ ਅਸਰ ਪਿਆ ਹੈ। ਨਵੰਬਰ 8 ਤੋਂ ਹੋਰ ਕਿਸੇ ਚੀਜ਼ ਦੇ ਭਾਅ ਨਹੀਂ ਡਿੱਗੇ ਜਿੰਨੇ ਸਬਜ਼ੀ ਦੇ ਭਾਅ ਡਿਗੇ ਹਨ। ਆਲੂ, ਮਟਰ, ਗੋਭੀ, ਗਾਜਰਾਂ, ਮੰਡੀਆਂ 'ਚ ਸਭ ਰੁਲ ਰਹੇ ਹਨ ਪਰ ਰਿਟੇਲ ਮਾਰਕਿਟ 'ਚ ਏਨੇ ਭਾਅ ਨਹੀਂ ਡਿਗੇ। ਜ਼ਿਮੀਂਦਾਰ ਦੀ ਲਾਗਤ ਵੀ ਪੂਰੀ ਨਹੀਂ ਹੋ ਰਹੀ ਤੇ ਉਹ ਵੇਚਣ ਲਈ ਮਜਬੂਰ ਹੋ ਰਿਹਾ ਹੈ। ਇਕ ਪਾਸੇ ਸਰਕਾਰ ਕਣਕ ਝੋਨੇ ਦਾ ਰਕਬਾ ਘਟਾ ਕੇ ਸਬਜ਼ੀਆਂ ਦੀ ਕਾਸ਼ਤ ਕਰਨ ਨੂੰ ਸਲਾਹ ਦਿੰਦੀ ਹੈ, ਦੂਸਰੇ ਪਾਸੇ ਮੰਡੀਆਂ 'ਚ ਕਿਸਾਨ ਦੀ ਹੋ ਰਹੀ ਦੁਰਦਸ਼ਾ ਵੱਲ ਧਿਆਨ ਦੇਣ ਤੋਂ ਵੀ ਪਾਸਾ ਵੱਟ ਰਹੀ ਹੈ। ਲੱਕੋਂ ਟੁੱਟਿਆ ਕਿਸਾਨ ਕਦੋਂ ਆਪਣੇ ਪੈਰਾਂ 'ਤੇ ਖੜ੍ਹਾ ਹੋਏਗਾ? ਕੀ ਸਰਕਾਰ ਨੂੰ ਨੋਟਬੰਦੀ ਦੇ ਇਸ ਮਾੜੇ ਪ੍ਰਭਾਵ ਦਾ ਪਤਾ ਨਹੀਂ ਸੀ? ਕਦੋਂ ਖੇਤੀ ਜਿਣਸਾਂ ਦੇ ਭਾਅ ਨੀਯਤ ਹੋਣਗੇ? ਕੀ ਅੰਨਦਾਤਾ ਇਵੇਂ ਹੀ ਭੁੱਖਾ ਮਰੇਗਾ?


-ਸਰਬਜੀਤ ਸਿੰਘ
126, ਮੋਹਨ ਵਿਹਾਰ, ਲੱਧੇਵਾਲੀ, ਜਲੰਧਰ।


ਦਿਖਾਵੇ ਦਾ ਰਿਵਾਜ
ਅੱਜਕਲ੍ਹ ਦੇ ਸਮੇਂ ਵਿਚ ਦਿਖਾਵੇ ਦਾ ਰਿਵਾਜ ਬਹੁਤ ਹੀ ਜ਼ਿਆਦਾ ਵਧ ਗਿਆ ਹੈ। ਇਨਸਾਨ ਨਾ ਚਾਹੁੰਦੇ ਹੋਏ ਵੀ ਇਕ ਦੂਸਰੇ ਨੂੰ ਦੇਖ ਕੇ ਇਸ ਜਾਲ ਵਿਚ ਫਸਦਾ ਜਾ ਰਿਹਾ ਹੈ। ਉਹ ਆਪਣੇ-ਆਪ ਨੂੰ ਦੂਸਰਿਆਂ ਤੋਂ ਘੱਟ ਨਹੀਂ ਸਮਝਦਾ। ਵਿਆਹ ਦੇ ਪ੍ਰੋਗਰਾਮ ਮਹਿੰਗੇ ਮੈਰਿਜ ਪੈਲੇਸਾਂ ਵਿਚ ਰੱਖੇ ਜਾਂਦੇ ਹਨ। ਗੀਤ-ਸੰਗੀਤ ਦੇ ਪ੍ਰੋਗਰਾਮ ਦੇ ਨਾਂਅ 'ਤੇ ਰੌਲੇ-ਰੱਪੇ ਦਾ ਕੰਨ ਪਾੜਵਾਂ ਰੌਲਾ ਪੈਂਦਾ ਹੈ, ਜਿਥੇ ਕਿ ਬੈਠਣਾ ਵੀ ਬਹੁਤ ਮੁਸ਼ਕਿਲ ਹੁੰਦਾ ਹੈ। ਇਕ-ਦੂਸਰੇ ਨਾਲ ਗੱਲਬਾਤ ਕਰਨੀ ਤਾਂ ਬਹੁਤ ਦੂਰ ਦੀ ਗੱਲ ਹੈ, ਪੈਸੇ ਖਰਚ ਕੇ ਸਿਰਦਰਦ ਲੈਣ ਵਾਲੀ ਗੱਲ ਹੋ ਨਿਬੜਦੀ ਹੈ। ਨਾਚ-ਗਾਣੇ ਦੇ ਪ੍ਰੋਗਰਾਮ ਵਿਚ ਘਟੀਆ ਕਿਸਮ ਦਾ ਪ੍ਰੋਗਰਾਮ ਹੁੰਦਾ ਹੈ, ਜਿਸ ਨੂੰ ਕਿ ਸਾਰੇ ਬਿਨਾਂ ਕਿਸੇ ਸੰਗ ਸ਼ਰਮ ਦੇ ਦੇਖਿਆ, ਸੁਣਿਆ ਜਾਂਦਾ ਹੈ। ਹਥਿਆਰਾਂ ਅਤੇ ਲੜਾਈਆਂ-ਝਗੜਿਆਂ ਦੀਆਂ ਗੱਲਾਂ ਕੀਤੀਆਂ ਜਾਂਦੀਆਂ ਹਨ। ਇਨ੍ਹਾਂ ਤੋਂ ਬਚਣ ਦੀ ਲੋੜ ਹੈ।


-ਸੁਖਪਾਲ ਸਿੰਘ ਫਾਰਮਾਸਿਸਟ
ਗੋਨਿਆਣਾ ਮੰਡੀ (ਬਠਿੰਡਾ)।


ਰਿਆਇਤਾਂ ਦੀ ਲੋੜ ਨਹੀਂ
ਸ਼ੁਰੂ ਫਰਵਰੀ ਵਿਚ ਵਿਧਾਨ ਸਭਾ ਦੀਆਂ ਚੋਣਾਂ ਹੋਣ ਜਾ ਰਹੀਆਂ ਹਨ। ਹਰੇਕ ਪਾਰਟੀ ਵੱਲੋਂ ਲੋਕਾਂ ਨੂੰ ਭਰਮਾਉਣ ਆਪਣੇ ਮੈਨੀਫੈਸਟੋ ਵਿਚ ਕਈ ਤਰ੍ਹਾਂ ਦੀਆਂ ਮੁਫ਼ਤ ਸਹੂਲਤਾਂ ਪ੍ਰਦਾਨ ਕਰਨ ਦਾ ਵਾਅਦਾ ਕੀਤਾ ਜਾਂਦਾ ਹੈ। ਭਾਵੇਂ ਮੈਨੀਫੈਸਟੋ ਵਿਚ ਬੇਰੁਜ਼ਗਾਰੀ ਦਾ ਮੁੱਦਾ ਸਭ ਤੋਂ ਉੱਪਰ ਲਿਖਿਆ ਜਾਂਦਾ ਹੈ ਪ੍ਰੰਤੂ ਇਸ ਦਾ ਕੋਈ ਸਾਰਥਿਕ ਹੱਲ ਅੱਜ ਤੱਕ ਨਹੀਂ ਨਿਕਲ ਸਕਿਆ। ਲੱਖਾਂ ਦੀ ਗਿਣਤੀ ਵਿਚ ਨੌਜਵਾਨ ਡਿਪਲੋਮੇ-ਡਿਗਰੀਆਂ ਚੁੱਕੀ ਫਿਰਦੇ ਹਨ। ਆਉਣ ਵਾਲੀ ਸਰਕਾਰ ਵੱਲੋਂ ਲੋਕਾਂ ਨੂੰ ਦਿੱਤੀਆਂ ਜਾਂਦੀਆਂ ਮੁਫ਼ਤ ਸਹੂਲਤਾਂ ਬਿਲਕੁਲ ਬੰਦ ਕਰ ਦੇਣੀਆਂ ਚਾਹੀਦੀਆਂ ਹਨ ਅਤੇ ਹਰੇਕ ਪਰਿਵਾਰ ਦੇ ਘੱਟੋ-ਘੱਟ ਇਕ ਮੈਂਬਰ ਨੂੰ ਯੋਗਤਾ ਮੁਤਾਬਿਕ ਸਰਕਾਰੀ ਨੌਕਰੀ ਦੇਣ ਦਾ ਉਪਰਾਲਾ ਕਰਨਾ ਚਾਹੀਦਾ ਹੈ। ਜੇ ਸਾਡੇ ਦੇਸ਼ ਵਿਚ ਬੇਰੁਜ਼ਗਾਰੀ ਨਹੀਂ ਹੋਵੇਗੀ ਤਾਂ ਸਾਨੂੰ ਮੁਫ਼ਤ ਸਹੂਲਤਾਂ ਦੀ ਹੀ ਲੋੜ ਨਹੀਂ ਪਵੇਗੀ। ਸੋ, ਆਉਣ ਵਾਲੀ ਸਰਕਾਰ ਨੂੰ ਬੇਨਤੀ ਹੈ ਕਿ ਹਰੇਕ ਪਰਿਵਾਰ ਦੇ ਇਕ ਮੈਂਬਰ ਨੂੰ ਸਰਕਾਰੀ ਨੌਕਰੀ ਦੇਣ ਦਾ ਬੰਦੋਬਸਤ ਕੀਤਾ ਜਾਵੇ।


-ਕੇਵਲ ਸਿੰਘ ਬਾਠਾਂ
ਮੋ: 98557-44211.

25/12/2016

  ਕਾਲਾ ਧਨ
ਸਵਿਸ ਬੈਂਕਿੰਗ ਐਸੋਸੀਏਸ਼ਨ ਦੀ 2006 ਦੀ ਰਿਪੋਰਟ ਅਨੁਸਾਰ ਸਵਿਸ ਬੈਂਕਾਂ ਵਿਚ ਸਭ ਤੋਂ ਵੱਧ ਧਨ ਭਾਰਤੀਆਂ ਦਾ ਹੈ | ਇਹ 1456 ਅਰਬ ਡਾਲਰ ਤੱਕ ਦੇ ਕਰੀਬ ਦੱਸਿਆ ਜਾ ਰਿਹਾ ਹੈ | ਰੌਾਗਟੇ ਖੜ੍ਹੇ ਕਰਨ ਵਾਲੀ ਗੱਲ ਇਹ ਹੈ ਕਿ ਵਿਸ਼ਵ ਦੇ ਬਾਕੀ ਸਾਰੇ ਦੇਸ਼ਾਂ ਦੀ ਜਿੰਨੀ ਰਕਮ ਉਥੇ ਜਮ੍ਹਾਂ ਹੈ, ਉਸ ਤੋਂ 3 ਗੁਣਾ ਜ਼ਿਆਦਾ ਪੈਸਾ ਭਾਰਤੀਆਂ ਦਾ ਹੈ | ਇਹ ਪੈਸਾ ਸਾਡੇ ਦੇਸ਼ 'ਤੇ ਚੜਿ੍ਹਆ ਵਿਦੇਸ਼ੀ ਕਰਜ਼ਾ ਲਾਹ ਕੇ ਵੀ ਇਸ ਵਿਚੋਂ ਵੱਡੀ ਰਕਮ ਬਚ ਸਕਦੀ ਹੈ | ਉਪਰੋਕਤ ਸਾਰੀ ਤਸਵੀਰ ਇਹ ਸਪੱਸ਼ਟ ਕਰਦੀ ਹੈ ਕਿ ਸਮੇਂ-ਸਮੇਂ 'ਤੇ ਬਣੇ ਦੇਸ਼ ਦੇ ਹੁਕਮਰਾਨਾਂ ਨੇ ਦੇਸ਼ ਨੂੰ ਦੱਬ ਕੇ ਲੁੱਟਿਆ ਹੈ | ਅੱਜ ਦੇਸ਼ ਵਿਚ 64 ਕਿਸਮ ਦੇ ਟੈਕਸਾਂ ਤੋਂ 20 ਲੱਖ ਕਰੋੜ ਰੁਪਿਆ ਦੇਸ਼ ਨੂੰ ਸਾਲਾਨਾ ਆਮਦਨ ਹੈ | ਇਹ ਰਕਮ ਜੇ ਸ਼ੁਰੂ ਤੋਂ ਸਹੀ ਅਰਥਾਂ 'ਚ ਦੇਸ਼ ਦੇ ਵਿਕਾਸ 'ਤੇ ਲਗਦੀ ਆਉਂਦੀ ਹੁੰਦੀ ਤਾਂ ਅੱਜ ਤਸਵੀਰ ਕੁਝ ਹੋਰ ਹੁੰਦੀ ਹੈ | ਦੇਸ਼ ਦੇ ਹੁਕਮਰਾਨਾਂ ਨੂੰ ਇਹ ਕਹਿਣ ਲਈ ਮਜਬੂਰ ਨਾ ਹੋਣਾ ਪੈਂਦਾ ਕਿ ਵਿਕਾਸ ਲਈ ਪੈਸਾ ਨਹੀਂ ਹੈ | ਜੇ ਕਾਲਾ ਧਨ ਅੱਜ ਦੇਸ਼ ਵਿਚ ਆਉਂਦਾ ਹੈ ਤਾਂ 50 ਸਾਲ ਤੱਕ ਦੇਸ਼ ਵਾਸੀਆਂ ਨੂੰ ਟੈਕਸਾਂ ਤੋਂ ਰਾਹਤ ਮਿਲ ਸਕਦੀ ਹੈ | ਅੱਜ ਦੇਸ਼ ਵਾਸੀ ਸਰਕਾਰ ਤੋਂ ਉਮੀਦ ਰੱਖਦੇ ਹਨ ਕਿ ਉਹ ਵਿਦੇਸ਼ਾਂ 'ਚ ਜਮ੍ਹਾਂ ਧਨ ਨੂੰ ਵਾਪਸ ਲਿਆ ਕੇ ਦੇਸ਼ ਦੇ ਵਡੇਰੇ ਹਿਤਾਂ ਲਈ ਵਰਤੇਗੀ |

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਜ਼ਿਲ੍ਹਾ ਲੁਧਿਆਣਾ |

ਰੁੱਖਾਂ ਦੀ ਸੰਭਾਲ
ਰੁੱਖ ਤੇ ਮਨੁੱਖ ਦਾ ਆਦਿ ਤੋਂ ਅੰਤ ਦਾ ਰਿਸ਼ਤਾ ਹੈ | ਰੁੱਖ ਦਾ ਕੋਈ ਨਾ ਕੋਈ ਰੂਪ ਹਮੇਸ਼ਾ ਮਨੁੱਖ ਦੇ ਅੰਗ-ਸੰਗ ਰਹਿੰਦਾ ਹੈ | ਰੁੱਖ ਸਾਡੀ ਭਾਵਨਾ ਸਮਝਣ ਵਾਲੇ ਅਤੇ ਦਰਦ ਵੰਡਾਉਣ ਵਾਲੇ ਹਨ | ਇਹ ਹਮੇਸ਼ਾ ਸਾਨੂੰ ਦਿੰਦੇ ਹੀ ਹਨ ਜਿਵੇਂ ਆਕਸੀਜਨ, ਮੀਂਹ, ਸ਼ੁੱਧ ਵਾਤਾਵਰਨ ਅਤੇ ਮਿੱਟੀ ਦੀ ਸੰਭਾਲ, ਦਵਾ-ਦਾਰੂ ਤੇ ਲੱਕੜ ਆਦਿ | ਆਲੇ-ਦੁਆਲੇ 'ਚੋਂ ਰੁੱਖ ਗ਼ਾਇਬ ਹਨ, ਰੁੱਖਾਂ, ਜੀਰਾਂਦਾਂ, ਬੀੜਾਂ ਬੀਤੇ ਦੀ ਗੱਲ ਬਣ ਚੁੱਕੀਆਂ ਹਨ ਨਹਿਰਾਂ ਦੇ ਕੰਢਿਆਂ ਤੋਂ ਚੋਰੀ-ਛਿਪੇ ਰਲ-ਮਿਲ ਕੇ ਅੰਨ੍ਹੇਵਾਹ ਰੁੱਖਾਂ ਦੀ ਕਟਾਈ ਹੋ ਰਹੀ ਹੈ | ਬਾਲਣ ਲਈ, ਮੋਟੀਆਂ ਕੀਮਤੀ ਲੱਕੜਾਂ, ਕਿੱਕਰਾਂ, ਟਾਹਲੀਆਂ ਦੇ ਮੁੱਢ ਤੱਕ ਗ਼ਾਇਬ ਹਨ | ਧਰਤੀ, ਪਾਣੀ, ਵਾਤਾਵਰਨ ਬਚਾਉਣ ਦੀ ਬੇਹੱਦ ਜ਼ਰਰੂਤ ਹੈ | ਬਨਸਪਤੀ ਨੂੰ ਪਿਆਰਨ ਤੇ ਹੋਰ ਰੁੱਖਾਂ ਨੂੰ ਲਾਉਣ ਦੀ ਬੜੀ ਲੋੜ ਹੈ |

-ਮਨਿੰਦਰ ਸਿੰਘ ਰਾਜੂ
ਧਨੌਲਾ ਰੋਡ, ਬਰਨਾਲਾ |

ਨੋਟਬੰਦੀ
ਅਚਨਚੇਤ ਨੋਟਬੰਦੀ ਕਾਲਾ ਧਨ ਕਢਾਉਣ, ਭਿ੍ਸ਼ਟਾਚਾਰ ਹਟਾਉਣ ਅਤੇ ਹੋਰ ਕਈ ਪੱਖਾਂ ਤੋਂ ਦੇਸ਼ ਨੂੰ ਬਚਾਉਣ ਲਈ ਇਕ ਸਾਰਥਿਕ ਨੀਤੀ ਹੈ | ਕੋਈ ਪਹਿਲਕਦਮੀ ਤਾਂ ਅਕਸਰ ਕਰਨੀ ਹੀ ਪੈਣੀ ਸੀ | ਨਵੀਂ ਕਰੰਸੀ ਬੈਂਕਾਂ ਤੱਕ ਪਹੁੰਚਾਉਣ ਵਿਚ ਕੋਤਾਹੀ ਜ਼ਰੂਰ ਹੋਈ ਹੈ | ਨਵੇਂ ਨੋਟਾਂ ਦੀ ਪ੍ਰਾਪਤੀ ਲਈ ਜੋ ਅਸੀਂ ਲੋਕ ਸੰਕਟ ਝੱਲ ਰਹੇ ਹਾਂ, ਇਹ ਸਮਝੋ ਮੋਦੀ ਜੀ ਵੱਲੋਂ ਉਠਾਏ ਇਕ ਚੰਗੇ ਕਦਮ ਦੀ ਸਫ਼ਲਤਾ ਲਈ ਜੰਗ ਲੜ ਰਹੇ ਹਾਂ | ਹਰ ਚੰਗੇ ਕੰਮ ਲਈ ਕਸ਼ਟ ਉਠਾਉਣਾ ਹੀ ਪੈਂਦਾ ਹੈ | ਇਨ੍ਹਾਂ ਦਿਨਾਂ ਵਿਚ ਫਜ਼ੂਲਖਰਚੀ ਦੀ ਥਾਂ ਘਰਾਂ ਵਿਚ ਸੰਜਮ ਆ ਗਿਆ ਹੈ | ਮੰਗਤੇ ਘੱਟ ਹੀ ਨਜ਼ਰ ਆਉਂਦੇ ਹਨ | ਸ਼ਰਾਬ ਦੀਆਂ ਦੁਕਾਨਾਂ 'ਤੇ ਵੀ ਕੋਈ ਟਾਵਾਂ-ਟਾਵਾਂ ਹੀ ਆਉਂਦਾ ਹੈ | ਇਹ ਵੀ ਤਾਂ ਛੋਟੀ ਬੱਚਤ ਹੈ | ਵਿਰੋਧੀ ਧਿਰ, ਕਾਲੇ ਧਨ ਵਾਲੇ ਅਤੇ ਭਿ੍ਸ਼ਟਾਚਾਰੀਆਂ ਨੇ ਤਾਂ ਵਿਰੋਧ ਕਰਨਾ ਹੀ ਹੁੰਦਾ ਹੈ | 1975 ਈ: ਵਿਚ ਐਮਰਜੈਂਸੀ ਲਾਈ ਗਈ ਭਾਵ ਸਾਰੇ ਦੇਸ਼ ਵਿਚ ਕਰਫਿਊ ਲੱਗ ਗਿਆ ਸੀ | ਹਜ਼ਾਰਾਂ ਦੀ ਗਿਣਤੀ ਵਿਚ ਲੀਡਰ ਤੇ ਵਰਕਰ ਜੇਲ੍ਹਾਂ ਵਿਚ ਡਕ ਦਿੱਤੇ ਗਏ ਸੀ | ਕੋਈ ਚੰੂ ਵੀ ਕਰਦਾ ਸੀ ਤਾਂ ਚਲ ਅੰਦਰ | ਮੀਡੀਆ 'ਤੇ ਸੈਂਸਰ ਬਿਠਾ ਦਿੱਤਾ ਗਿਆ | ਭਾਰੀ ਸਹਿਮ ਵਿਚ ਲੋਕ ਦਿਨ ਕਟੀ ਕਰ ਰਹੇ ਸਨ | ਉਹ ਸਮਾਂ ਵੀ ਅਸੀਂ ਜਰਿਆ ਹੈ | ਇਸ ਕ੍ਰਾਂਤੀ ਲਈ ਵੀ ਸਾਨੂੰ ਹੌਸਲੇ ਨਾਲ ਜੂਝਣਾ ਚਾਹੀਦਾ ਹੈ | ਜਿੱਤ ਲੋਕਾਂ ਦੇ ਹੱਥ ਵਿਚ ਹੈ |

-ਮਾ: ਮਹਿੰਦਰ ਸਿੰਘ ਸਿੱਧੂ
ਸਿੱਧਵਾਂ ਕਲਾਂ, ਜ਼ਿਲ੍ਹਾ ਲੁਧਿਆਣਾ | ਮੋਬਾਈਲ : 98720-86101.

ਗੰਦਗੀ ਦੀ ਭਰਮਾਰ
ਅੱਜਕਲ੍ਹ ਘਰ ਦੇ ਆਲੇ-ਦੁਆਲੇ ਤੇ ਹਰ ਪਾਸੇ ਗੰਦਗੀ ਬਹੁਤ ਫੈਲੀ ਹੋਈ ਹੈ | ਲੋਕ ਆਪਣੇ ਘਰਾਂ ਦਾ ਕੂੜਾ ਕਰਕਟ ਠੀਕ ਜਗ੍ਹਾ 'ਤੇ ਨਹੀਂ ਸੁੱਟਦੇ | ਸਾਡੇ ਮੁਹੱਲੇ ਦੀਆਂ ਨਾਲੀਆਂ ਵੀ ਸਾਫ਼ ਨਹੀਂ ਹਨ ਅਤੇ ਸਾਡੇ ਮੁਹੱਲੇ ਵਿਚ ਅਵਾਰਾ ਪਸ਼ੂ ਵੀ ਬਹੁਤ ਹਨ | ਉਹ ਮੁਹੱਲੇ ਵਿਚ ਜਿਸ ਥਾਂ 'ਤੇ ਕੂੜਾ ਕਰਕਟ ਹੁੰਦਾ ਹੈ, ਉਸ ਨੂੰ ਖਿਲਾਰ ਦਿੰਦੇ ਹਨ, ਜਿਸ ਦੇ ਕਾਰਨ ਸਾਰੇ ਮੁਹੱਲੇ ਵਿਚ ਕੂੜਾ ਕਰਕਟ ਖਿਲਰ ਜਾਂਦਾ ਹੈ | ਨਾਲੀਆਂ ਦਾ ਪਾਣੀ ਗਲੀਆਂ ਵਿਚ ਆ ਜਾਂਦਾ ਹੈ ਜਿਸ ਨਾਲ ਗਲੀਆਂ ਵਿਚ ਚਿੱਕੜ ਹੋ ਜਾਂਦਾ ਅਤੇ ਉਥੋਂ ਲੰਘਣ ਵਾਲੇ ਲੋਕਾਂ ਨੂੰ ਬਹੁਤ ਮੁਸ਼ਕਿਲ ਆਉਂਦੀ ਹੈ |

-ਅਮਰਜੀਤ ਕੌਰ
ਪਿੰਡ ਬਰਗਾੜੀ, ਫਰੀਦਕੋਟ |
<br/>

24/12/2016

 ਕਿਰਤੀ ਕਿੱਧਰ ਜਾਣ?

ਪੰਜਾਬ ਦੀ ਕਿਸਾਨੀ ਕਰਜ਼ੇ ਦੇ ਭਾਰ ਹੇਠ ਖ਼ੁਦਕੁਸ਼ੀਆਂ ਕਰ ਰਹੀ ਹੈ, ਜਿਸ ਵਿਚ ਪੰਜਾਬ ਪਹਿਲੇ ਸਥਾਨ 'ਤੇ ਪਹੁੰਚ ਗਿਆ ਹੈ। ਖ਼ੁਦਕੁਸ਼ੀਆਂ ਕਰਦੀ ਕਿਸਾਨੀ ਦੇ ਪੁੱਤਰ-ਧੀਆਂ ਕੀ ਕਰਨ? ਨਿੱਕੇ ਦੁਕਾਨਦਾਰਾਂ ਦੀ ਰੋਜ਼ੀ-ਰੋਟੀ ਵੱਡੇ ਸਟੋਰਾਂ ਨੇ ਖੋਹ ਲਈ ਹੈ। ਛੋਟੀਆਂ-ਛੋਟੀਆਂ ਦੁਕਾਨਾਂ ਚਲਾ ਕੇ ਰੋਜ਼ੀ-ਰੋਟੀ ਕਮਾਉਂਦੇ ਦੁਕਾਨਦਾਰ ਕਿੱਧਰ ਜਾਣ? ਅੱਜ ਕਈ ਸਵਾਲ ਖੜ੍ਹੇ ਹਨ, ਜਿਹੜੇ ਜਵਾਬ ਦੀ ਮੰਗ ਕਰਦੇ ਹਨ। ਜੇ ਇਨ੍ਹਾਂ ਵਾਰ-ਵਾਰ ਉੱਠਦੇ ਸਵਾਲਾਂ ਦਾ ਕੋਈ ਨਾ ਕੋਈ ਹੱਲ ਤਲਾਸ਼ਣਾ ਹੈ ਤਾਂ ਸਾਨੂੰ ਜ਼ਰੂਰੀ ਹੈ ਕਿ ਉਨ੍ਹਾਂ ਲੋਕਾਂ ਦੇ ਮੋਢੇ ਨਾਲ ਮੋਢਾ ਜੋੜੀਏ ਜਿਹੜੇ ਅੱਜ ਸਿਰ ਜੋੜ ਕੇ ਬੈਠੇ ਹਨ ਕਿ ਕਿਸਾਨ ਖ਼ੁਦਕੁਸ਼ੀਆਂ ਨਾ ਕਰੇ, ਮਜ਼ਦੂਰ ਭੁੱਖਾ ਨਾ ਸੌਵੇਂ, ਨੌਜਵਾਨ ਬੇਰੁਜ਼ਗਾਰ ਨਾ ਫਿਰੇ, ਧੀਆਂ ਦਾਜ ਦੀ ਬਲੀ ਨਾ ਚੜ੍ਹਨ, ਤਾਂ ਆਓ ਸੰਸਥਾਵਾਂ ਬਣਾਈਏ ਅਤੇ ਮੁਸ਼ਕਿਲਾਂ ਦਾ ਹੱਲ ਇਕੱਠੇ ਹੋ ਕੇ ਤਲਾਸ਼ੀਏ।

-ਰਾਜਵੰਤ ਸਿੰਘ ਰਾਜੂ
ਗੁਰੂ ਨਾਨਕ ਆਟੋ ਸਪੇਅਰਜ਼, ਰਾਏਕੋਟ।

ਪਿਆਰ ਤੇ ਮੁਹੱਬਤ ਦੇ ਜਜ਼ਬੇ

ਸਿਆਣਪ ਦੀ ਗੱਲ ਇਹ ਹੁੰਦੀ ਹੈ ਕਿ ਵਰਤਮਾਨ ਵਿਚ ਵਿਚਰਦਿਆਂ ਸਮੇਂ-ਸਮੇਂ ਸਾਨੂੰ ਸਹਿਣਸ਼ੀਲ ਹੋਣਾ ਚਾਹੀਦਾ ਹੈ। ਸਭ ਦਾ ਮਾਣ-ਸਤਿਕਾਰ ਕਰਨਾ ਚਾਹੀਦਾ ਹੈ। ਧੀਰਜ ਅਤੇ ਠਰੰਮੇ ਨਾਲ ਜੀਵਨ ਦੀ ਯਾਤਰਾ ਕਰੋ। ਭੱਜੋ ਨੱਸੀ ਅਤੇ ਭੀੜ ਤੋਂ ਹਮੇਸ਼ਾ ਹੀ ਬਚਾਓ ਕਰੋ। ਆਪਣੀ ਮਾਨਸਿਕਤਾ ਦਾ ਵਿਕਾਸ ਕਰਕੇ ਇਕ-ਦੂਜੇ ਨਾਲ ਏਕਤਾ, ਨੇੜਤਾ ਪੈਦਾ ਕਰੋ। 21ਵੀਂ ਸਦੀ ਵਿਚ ਵੀ ਅੰਧ-ਵਿਸ਼ਵਾਸ ਵਿਚ ਉਲਝ ਰਹੇ ਹੋ। ਸਭ ਕੁਝ ਹੁੰਦੇ-ਸੁੰਦੇ ਵੀ ਅਸੀਂ ਨੀਤ ਦੀ ਭੁੱਖ ਨਹੀਂ ਮਿਟਾ ਸਕਦੇ। ਬੌਧਿਕ ਵਿਕਾਸ ਕਰਨ ਦੀ ਬਜਾਏ ਅਸੀਂ ਕੱਚੇ ਵਿਸ਼ਵਾਸ ਵਿਚ ਹੀ ਫਸ ਰਹੇ ਹਾਂ। ਆਪਣੀ ਸੋਚ ਨੂੰ ਵਿਗਿਆਨਕ ਬਣਾਉਣ ਦੀ ਲੋੜ ਹੈ।
ਮਾੜੀ-ਮੋਟੀ ਸਰੀਰਕ ਢਿੱਲਮੱਠ ਹੋਣ 'ਤੇ ਅਸੀਂ ਕਿਸੇ ਡਾਕਟਰੀ ਇਲਾਜ ਕਰਾਉਣ ਦੀ ਥਾਂ ਕਿਸੇ ਸਿਆਣੇ ਕੋਲ ਪੁੱਛਾਂ ਪੁਆਉਣ ਚੱਲ ਪੈਂਦੇ ਹਾਂ। ਸੋ, ਲੋੜ ਹੈ ਆਪੇ ਦੀ ਪੜਚੋਲ ਕਰਨ ਦੀ। ਚੰਗੀਆਂ ਕਿਤਾਬਾਂ, ਰਸਾਲੇ, ਅਖ਼ਬਾਰ ਪੜ੍ਹਨ ਨਾਲ ਆਪਣੇ ਆਮ ਗਿਆਨ ਵਿਚ ਵਾਧਾ ਕਰਕੇ ਆਪਣੇ ਅੰਦਰਲੇ ਡਰ ਨੂੰ ਦੂਰ ਕਰੋ। ਸਮਾਜ ਵਿਚ ਭਾਈਚਾਰਕ ਸਾਂਝ ਬਣਾ ਕੇ ਜਿਊਣ ਦਾ ਅਨੰਦ ਹੀ ਵੱਖਰਾ ਹੈ। ਪਿਆਰ, ਮੁਹੱਬਤ ਦੇ ਜਜ਼ਬਿਆਂ ਨੂੰ ਪੈਦਾ ਕਰਕੇ ਸਹਿਣਸ਼ੀਲਤਾ ਵਾਲਾ ਜੀਵਨ ਜੀਓ।

-ਸਨੇਹਇੰਦਰ ਮੀਲੂ ਫਰੌਰ
ਖੰਨਾ।

ਪਾਣੀ ਦੀ ਦੁਰਵਰਤੋਂ

ਪੰਜ ਪਾਣੀਆਂ ਦੀ ਧਰਤੀ ਵਜੋਂ ਜਾਣਿਆ ਜਾਂਦਾ ਪੰਜਾਬ ਅੱਜ ਖ਼ੁਦ ਪਿਆਸਾ ਹੁੰਦਾ ਨਜ਼ਰ ਆ ਰਿਹਾ ਹੈ। ਆਏ ਸਾਲ ਧਰਤੀ ਹੇਠਲਾ ਪਾਣੀ ਲਗਾਤਾਰ ਹੇਠਾਂ ਹੁੰਦਾ ਜਾ ਰਿਹਾ ਹੈ। ਅਸੀਂ ਸਭ ਭਲੀਭਾਂਤ ਜਾਣਦੇ ਹਾਂ ਕਿ ਪਾਣੀ ਬਿਨਾਂ ਜੀਵਨ ਦੀ ਕਲਪਨਾ ਵੀ ਨਹੀਂ ਕੀਤੀ ਜਾ ਸਕਦੀ ਪਰ ਇਹ ਸਭ ਜਾਣਦੇ ਹੋਏ ਵੀ ਅਸੀਂ ਸਭ ਇਸ ਅਣਮੁੱਲੀ ਵਸਤੂ ਦੀ ਦੁਰਵਰਤੋਂ ਕਰਨ 'ਤੇ ਤੁਲੇ ਹੋਏ ਹਾਂ। ਸਮਾਂ ਰਹਿੰਦੇ ਜੇਕਰ ਅਸੀਂ ਇਸ ਗੰਭੀਰ ਮਸਲੇ ਪ੍ਰਤੀ ਸੁਚੇਤ ਨਾ ਹੋਏ ਤਾਂ ਉਹ ਦਿਨ ਦੂਰ ਨਹੀਂ ਜਦੋਂ ਇਸ ਦੀ ਘਾਟ ਕਾਰਨ ਅਸੀਂ ਅਨੇਕਾਂ ਮੁਸ਼ਕਿਲਾਂ ਵਿਚ ਘਿਰ ਜਾਵਾਂਗੇ। ਸੋ, ਸਰਕਾਰਾਂ ਦੇ ਨਾਲ-ਨਾਲ ਸਾਨੂੰ ਸਭ ਨੂੰ ਇਸ ਪ੍ਰਤੀ ਸੋਚਣ ਦੀ ਅਹਿਮ ਲੋੜ ਹੈ।

-ਰਾਜਾ ਗਿੱਲ ਚੜਿੱਕ
ਪਿੰਡ ਤੇ ਡਾਕ: ਚੜਿੱਕ (ਮੋਗਾ)।

23/12/2016

 ਬੇਰੁਜ਼ਗਾਰਾਂ ਦੀਆਂ ਉਮੀਦਾਂ

ਬੇਰੁਜ਼ਗਾਰੀ ਦਾ ਸੰਤਾਪ ਹੰਢਾਅ ਰਹੇ ਨੌਜਵਾਨਾਂ ਨੂੰ ਭਾਵੇਂ ਹੁਣ ਪੰਜਾਬ ਸਰਕਾਰ ਵੱਲੋਂ ਵੱਖ-ਵੱਖ ਵਿਭਾਗਾਂ ਵਿਚ ਕੀਤੀਆਂ ਜਾ ਰਹੀਆਂ ਭਰਤੀਆਂ ਕਾਰਨ ਰੁਜ਼ਗਾਰ ਪ੍ਰਾਪਤੀ ਦੀ ਆਸ ਦੀ ਕਿਰਨ ਨਜ਼ਰ ਆਈ ਸੀ ਪਰ ਇਨ੍ਹਾਂ ਭਰਤੀਆਂ ਦੀਆਂ ਚੱਲ ਰਹੀਆਂ ਪ੍ਰਕਿਰਿਆਵਾਂ 'ਚ ਹੋ ਰਹੀ ਬੇਲੋੜੀ ਦੇਰੀ ਨੇ ਬੇਰੁਜ਼ਗਾਰਾਂ ਦੇ ਸਾਹ ਸੂਤੇ ਹੋਏ ਹਨ। ਚੋਣ ਜ਼ਾਬਤਾ ਜਲਦ ਲਾਗੂ ਹੋਣ ਦੀਆਂ ਖ਼ਬਰਾਂ ਨਾਲ ਇਨ੍ਹਾਂ ਰੁਜ਼ਗਾਰ ਪ੍ਰਾਪਤੀ ਲਈ ਤਰਸ ਰਹੇ ਨੌਜਵਾਨਾਂ ਦੀਆਂ ਉਮੀਦਾਂ 'ਤੇ ਕਾਲੇ ਬੱਦਲ ਮੰਡਰਾ ਰਹੇ ਹਨ। ਅੱਧ ਵਿਚਕਾਰ ਲਟਕ ਰਹੀਆਂ ਈਟੀਟੀ ਅਧਿਆਪਕਾਂ ਦੀ 4500 ਤੇ 2005 ਦੀ ਭਰਤੀ, ਜੇਲ੍ਹ ਵਾਰਡਨਾਂ ਦੀ ਭਰਤੀ, ਪੰਚਾਇਤ ਸਕੱਤਰਾਂ ਦੀ ਭਰਤੀ ਅਤੇ 28000 ਕੱਚੇ ਮੁਲਾਜ਼ਮ ਜੋ ਸਰਕਾਰ ਦੇ ਲਾਰੇ ਉਪਰੰਤ ਵੀ ਪੱਕੇ ਹੋਣ ਤੋਂ ਵਾਂਝੇ ਹਨ, ਨੂੰ ਭਵਿੱਖ ਦੀ ਚਿੰਤਾ ਘੁਣ ਵਾਂਗ ਖਾ ਰਹੀ ਹੈ। ਇਨ੍ਹਾਂ ਭਰਤੀ ਪ੍ਰਕਿਰਿਆਵਾਂ 'ਚ ਵਿਭਾਗਾਂ ਦੀਆਂ ਨਾਕਾਮੀਆਂ ਨੇ ਬੇਰੁਜ਼ਗਾਰਾਂ ਦੀਆਂ ਰਾਤਾਂ ਦੀਆਂ ਨੀਂਦਾਂ ਉੱਡਾਈਆਂ ਹੋਈਆਂ ਹਨ। ਜੇਕਰ ਭਰਤੀਆਂ ਨੇਪਰੇ ਨਾ ਚੜ੍ਹੀਆਂ ਤਾਂ ਸੱਤਾਧਾਰੀ ਪਾਰਟੀ ਨੂੰ ਵੀ ਅਗਾਮੀ ਵਿਧਾਨ ਸਭਾ ਚੋਣਾਂ 'ਚ ਖਮਿਆਜ਼ਾ ਭੁਗਤਾਣ ਪੈ ਸਕਦਾ ਹੈ।

-ਰਵਿੰਦਰ ਕਸਾਣਾ ਸੂਰਾਪੁਰੀ
ਕਾਠਗੜ੍ਹ, ਮੋ: 9417100073

ਸਮਾਜਿਕ ਈਰਖਾ

ਅਜੋਕੇ ਸਮੇਂ ਵਿਚ ਮਨੁੱਖ ਕੁਝ ਜ਼ਿਆਦਾ ਹੀ ਸਵਾਰਥੀ ਹੋ ਚੁੱਕਾ ਹੈ। ਉਹ ਲੋਭ ਲਾਲਚ ਵੱਸ ਦੂਸਰੇ ਮਨੁੱਖਾਂ ਪ੍ਰਤੀ ਈਰਖਾ ਜਾਂ ਗੁੱਸੇ ਦੀ ਭਾਵਨਾ ਰੱਖਦਾ ਹੈ। ਸਾਡਾ ਆਦਰਸ਼ ਬੁਰੇ ਦਾ ਭਲਾ ਕਰਨ ਅਤੇ ਸਰਬੱਤ ਦਾ ਭਲਾ ਮੰਗਣ ਦਾ ਹੋਣਾ ਚਾਹੀਦਾ ਹੈ। ਕਿਉਂ ਅਸੀਂ ਕਿਸੇ ਦੀ ਤਰੱਕੀ ਜਾਂ ਕਾਮਯਾਬੀ ਨੂੰ ਹਜ਼ਮ ਨਹੀਂ ਕਰ ਸਕਦੇ? ਅੱਜ ਤੱਕ ਮਨੁੱਖ ਦੂਸਰੇ ਮਨੁੱਖ ਦੀ ਗੁਣ ਚੰਗਿਆਈ ਨੂੰ ਦਬਾ ਕੇ ਖ਼ੁਦ ਸਮਾਜ ਵਿਚ ਉੱਚਾ ਅਹੁਦਾ ਪ੍ਰਾਪਤ ਕਰਨਾ ਚਾਹੁੰਦਾ ਹੈ ਪਰ ਇਹ ਸੰਭਵ ਨਹੀਂ ਕਿਉਂਕਿ ਸੂਰਜ ਨੂੰ ਚਮਕਣ ਤੋਂ ਕੋਈ ਰੋਕ ਨਹੀਂ ਸਕਦਾ ਅਤੇ ਨਾ ਹੀ ਸੂਰਜ ਨੂੰ ਪਰਦੇ ਵਿਚ ਰੱਖ ਸਕਦਾ ਹੈ। ਆਓ! ਅਸੀਂ ਦੂਸਰਿਆਂ ਪ੍ਰਤੀ ਆਪਣੀ ਸੋਚ ਦਾ ਨਜ਼ਰੀਆ ਬਦਲੀਏ ਅਤੇ ਨਿੱਗਰ ਸੋਚ ਨੂੰ ਅਪਣਾਈਏ।

-ਲੱਖੀ ਗਿੱਲ ਧਨਾਨਸੂ
ਲੁਧਿਆਣਾ।

ਧੁੰਦ ਦਾ ਕਹਿਰ

ਪੰਜਾਬ ਵਿਚ ਹਰ ਸਾਲ ਦੀ ਤਰ੍ਹਾਂ ਦਸੰਬਰ ਮਹੀਨੇ ਦੇ ਸ਼ੁਰੂ ਤੋਂ ਹੀ ਠੰਢ ਦੇ ਨਾਲ-ਨਾਲ ਸਵੇਰੇ ਸੰਘਣੀ ਧੁੰਦ ਦੀ ਚਾਦਰ ਵੀ ਵਿਛਣੀ ਸ਼ੁਰੂ ਹੋ ਗਈ ਹੈ। ਇਸ ਧੁੰਦ ਨਾਲ ਜਿਥੇ ਆਮ ਲੋਕਾਂ ਦਾ ਜੀਵਨ ਬੇਹੱਦ ਪ੍ਰਭਾਵਿਤ ਹੁੰਦਾ ਹੈ, ਉਥੇ ਇਨ੍ਹਾਂ ਦਿਨਾਂ ਵਿਚ ਸੜਕੀ ਹਾਦਸਿਆਂ ਦੀ ਗਿਣਤੀ ਵਿਚ ਵੀ ਵਾਧਾ ਹੋ ਜਾਂਦਾ ਹੈ। 9 ਦਸੰਬਰ ਦੀ ਸਵੇਰ ਨੂੰ ਧੁੰਦ ਕਾਰਨ ਇਕ ਭਿਆਨਕ ਸੜਕ ਹਾਦਸਾ ਹੋਣ ਨਾਲ ਆਪਣੀ ਡਿਊਟੀ 'ਤੇ ਸਕੂਲ ਜਾ ਰਹੇ 12 ਅਧਿਆਪਕ ਅਤੇ ਇਕ ਡਰਾਈਵਰ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਇਹ ਜੋ ਵੀ ਹੋਇਆ ਸੁਣ ਕੇ ਹਰ ਕਿਸੇ ਨੂੰ ਬੇਹੱਦ ਦੁੱਖ ਮਹਿਸੂਸ ਹੋਇਆ। ਜੇਕਰ ਧੁੰਦ ਦੇ ਦਿਨਾਂ ਵਿਚ ਡਰਾਈਵਿੰਗ ਕਰਦੇ ਸਮੇਂ ਕੁਝ ਖ਼ਾਸ ਗੱਲਾਂ ਦਾ ਖਿਆਲ ਰੱਖਿਆ ਜਾਵੇ ਤਾਂ ਕੁਝ ਹੱਦ ਤੱਕ ਇਨ੍ਹਾਂ ਘਟਨਾਵਾਂ ਨੂੰ ਘੱਟ ਕੀਤਾ ਜਾ ਸਕਦਾ ਹੈ। ਸੋ, ਧੁੰਦ ਦੇ ਦਿਨਾਂ ਵਿਚ ਜਿਥੇ ਆਪਣੇ ਵਹੀਕਲ ਹੌਲੀ ਸਪੀਡ 'ਤੇ ਚਲਾਉਣੇ ਚਾਹੀਦੇ ਹਨ, ਉਥੇ ਆਪਣੇ ਵਹੀਕਲਾਂ ਦੀਆਂ ਦਿਸਣਯੋਗ ਲਾਈਟਾਂ ਦਾ ਵੀ ਪ੍ਰਬੰਧ ਕਰਨਾ ਚਾਹੀਦਾ ਹੈ। ਇਸ ਲਈ ਖ਼ੁਦ ਵੀ ਬਚੋ ਅਤੇ ਹੋਰਨਾਂ ਨੂੰ ਵੀ ਬਚਾਓ।

-ਰਾਜਾ ਗਿੱਲ ਚੜਿੱਕ
ਮੋ: 94654-11585.

20/12/2016

 ਨੋਟਬੰਦੀ
ਨੋਟਬੰਦੀ ਨੂੰ ਭਾਵੇਂ ਜਨਤਾ ਦੇ ਭਲੇ ਲਈ ਦੱਸਿਆ ਜਾ ਰਿਹਾ ਹੈ ਪਰ ਲੋਕਾਂ ਨੂੰ ਭਾਰੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਕਾਲੇ ਧਨ ਨੂੰ ਰੋਕਣ ਲਈ ਲੱਗੀ ਇਸ ਆਰਥਿਕ ਐਮਰਜੈਂਸੀ ਨਾਲ ਅਸਲ ਚੋਰਾਂ ਨੂੰ ਮੁਸ਼ਕਿਲਾਂ ਤਾਂ ਆਉਣੀਆਂ ਹੀ ਸਨ ਪਰ ਦੇਸ਼ ਦੀ ਆਮ ਜਨਤਾ ਵੀ ਆਪਣੇ ਆਪਣੇ ਘਰਾਂ ਦੇ ਚੁੱਲ੍ਹੇ ਮਘਦੇ ਰੱਖਣ ਵਾਸਤੇ ਕੰਮ ਕਾਰ ਛੱਡ ਇਕ ਮਹੀਨਾ ਬੀਤਣ ਬਾਅਦ ਵੀ 2 ਜਾਂ 4 ਹਜ਼ਾਰ ਦੀ ਨਵੀਂ ਕਰੰਸੀ ਲਈ ਦਿਨ ਰਾਤ ਲਾਈਨਾਂ 'ਚ ਖੜ੍ਹੀ ਵਾਰੀ ਦੀ ਇੰਤਜ਼ਾਰ ਕਰ ਰਹੀ ਹੈ। ਕੀ ਨੋਟਬੰਦੀ ਦੇ ਐਲਾਨ ਤੋਂ ਬਾਅਦ ਖਰੀਦੀ ਗਈ ਕਰੋੜਾਂ ਰੁਪਏ ਦੀ ਜ਼ਮੀਨ, ਸੋਨਾ, ਚਾਂਦੀ ਉਸ ਕਾਲੇ ਧਨ ਦਾ ਹਿੱਸਾ ਨਹੀਂ? ਅਰਬਾਂ ਖਰਬਾਂ ਦੇ ਧਨ ਵਿਚੋਂ 5-6 ਫ਼ੀਸਦੀ ਹਿੱਸਾ ਫੜ ਕੇ ਇਸ ਦੇ ਖ਼ਾਤਮੇ ਦੇ ਨੇੜੇ ਹੋਣ ਦੇ ਦਾਅਵੇ ਕਰਨਾ ਇਕ ਕੋਝਾ ਮਜ਼ਾਕ ਲਗਦਾ ਹੈ।
ਇਕ ਪਾਸੇ ਚਹੇਤਿਆਂ ਲਈ ਵੱਡੇ-ਵੱਡੇ ਕਰਜ਼ਿਆਂ ਲਈ ਪ੍ਰਬੰਧ ਕਰਨਾ ਤੇ ਸੱਤਾ ਦੀ ਦੁਰਵਰਤੋਂ ਕਰਦਿਆਂ ਮਾਫ਼ ਕਰ ਦੇਣਾ, ਉਨ੍ਹਾਂ ਕਿਸਾਨਾਂ ਨਾਲ ਕਿੰਨੀ ਵੱਡੀ ਬੇਇਨਸਾਫ਼ੀ ਹੈ ਜਿਹੜੇ ਕੁਝ ਹਜ਼ਾਰਾਂ ਦੇ ਕਰਜ਼ੇ ਕਾਰਨ ਬੈਂਕ ਵੱਲੋਂ ਮਿਲ ਰਹੀ ਜ਼ਮੀਨ ਕੁਰਕੀ ਕਰਨ ਦੀ ਧਮਕੀ ਦੀ ਵਜ੍ਹਾ ਕਰਕੇ ਆਪਣੀ ਜੀਵਨ ਲੀਲ੍ਹਾ ਖ਼ਤਮ ਕਰ ਬੈਠਦੇ ਹਨ। ਅੱਜ ਰਾਜਨੀਤਕ ਹਸਤੀਆਂ ਆਪਣੇ ਬੇਟੇ ਬੇਟੀਆਂ ਦੇ ਵਿਆਹਾਂ 'ਤੇ 50 ਤੋਂ 500 ਕਰੋੜ ਤੱਕ ਖਰਚ ਕਰਦੇ ਹਨ ਪਰ ਆਮ ਜਨਤਾ ਦੇ ਵਿਆਹ ਸਮਾਗਮਾਂ ਲਈ 2.50 ਲੱਖ ਦੀ ਐਲਾਨੀ ਰਕਮ ਵੀ ਬੈਂਕ ਵਿਚ ਮੌਜੂਦ ਨਹੀਂ। ਅਜਿਹੇ ਅੱਛੇ ਦਿਨਾਂ ਦੀ ਆਸ ਤਾਂ ਜਨਤਾ ਦੀ ਕਲਪਨਾ ਵਿਚ ਵੀ ਨਹੀਂ ਸੀ। ਇਸ ਫ਼ੈਸਲੇ ਨਾਲ ਆਉਣ ਵਾਲੇ ਸਮੇਂ ਵਿਚ ਕਾਲਾ ਬਾਜ਼ਾਰੀ ਦੀ ਰੋਕ 'ਤੇ ਤੋਲਾ ਮਾਸਾ ਫ਼ਰਕ ਪਵੇ ਜਾਂ ਨਾ ਪਵੇ ਪਰ ਉਹ ਲੋਕ ਇਸ ਸਰਕਾਰ ਨੂੰ ਉਮਰ ਭਰ ਕੋਸਦੇ ਰਹਿਣਗੇ ਜਿਨ੍ਹਾਂ ਦੇ ਘਰ ਵਿਆਹ ਹੋਣ ਦੇ ਬਾਵਜੂਦ ਸੱਥਰ ਵਿਛਣ ਲੱਗ ਪਏ ਹਨ।


-ਐਡਵੋਕੇਟ ਰਵਿੰਦਰ ਸਿੰਘ ਧਾਲੀਵਾਲ
ਪਿੰਡ ਨੱਥੂ ਮਾਜਰਾ, ਜ਼ਿਲ੍ਹਾ ਸੰਗਰੂਰ।


ਅਵਾਰਾ ਪਸ਼ੂਆਂ ਦੀ ਭਰਮਾਰ
ਮੈਂ ਇਲਾਕੇ ਵਿਚ ਅਵਾਰਾ ਪਸ਼ੂਆਂ ਦੀ ਭਰਮਾਰ ਵੱਲ ਸਰਕਾਰ ਦਾ ਧਿਆਨ ਦਿਵਾਉਣਾ ਚਾਹੁੰਦਾ ਹਾਂ। ਕਹਿਣ ਨੂੰ ਵੱਖ-ਵੱਖ ਸਮਾਜ ਸੇਵੀ ਜਥੇਬੰਦੀਆਂ ਵੱਲੋਂ ਤੇ ਸਰਕਾਰ ਵੱਲੋਂ ਮਾਨਤਾ ਪ੍ਰਾਪਤ ਗਊਸ਼ਾਲਾਵਾਂ ਖੋਲ੍ਹੀਆਂ ਗਈਆਂ ਹਨ, ਤਾਂ ਕਿ ਅਵਾਰਾ ਪਸ਼ੂਆਂ ਦੀ ਨਾਜਾਇਜ਼ ਕੁੱਟਮਾਰ ਨਾ ਹੋਵੇ ਤੇ ਉਨ੍ਹਾਂ ਦੀ ਸਾਂਭ-ਸੰਭਾਲ ਗਊਸ਼ਾਲਾ ਵਿਚ ਕੀਤੀ ਜਾ ਸਕੇ। ਪਰ ਹੋ ਇਸ ਦੇ ਬਿਲਕੁਲ ਉਲਟ ਰਿਹਾ ਹੈ।
ਜਿਥੇ ਸਰਕਾਰ ਵੱਲੋਂ ਵੱਖ-ਵੱਖ ਮਾਲ ਮਹਿਕਮੇ ਤੇ ਬਿਜਲੀ ਵਿਭਾਗ ਵੱਲੋਂ ਤੇ ਹੋਰ ਬਹੁਤ ਪਾਸਿਆਂ ਤੋਂ ਟੈਕਸ ਗਊਸ਼ਾਲਾ ਦੇ ਨਾਂਅ 'ਤੇ ਇਕੱਠਾ ਕੀਤਾ ਜਾਂਦਾ ਹੈ, ਉਸ ਦੇ ਉਲਟ ਉਨ੍ਹਾਂ ਦੀ ਦੇਖ-ਭਾਲ ਲਈ ਕੋਈ ਵੀ ਉਸਾਰੂ ਕਦਮ ਨਹੀਂ ਚੁੱਕੇ ਜਾ ਰਹੇ। ਕਈ ਗਊਸ਼ਾਲਾ ਵਾਲੇ ਪ੍ਰਤੀ ਪਸ਼ੂ ਦੇ ਹਿਸਾਬ ਪੈਸੇ ਮੰਗ ਰਹੇ ਹਨ। ਸਰਕਾਰ ਨੂੰ ਅਵਾਰਾ ਪਸ਼ੂਆਂ ਦੀ ਭਰਮਾਰ ਨੂੰ ਮੁੱਖ ਰੱਖ ਕੇ ਕੋਈ ਠੋਸ ਪ੍ਰਬੰਧ ਕਰਨਾ ਚਾਹੀਦਾ ਹੈ।


-ਮਨਜੀਤ ਸਿੰਘ ਭਾਮ
ਸੂਬਾ ਪ੍ਰਧਾਨ ਮਨੁੱਖੀ ਅਧਿਕਾਰ ਸੰਗਠਨ, ਪੰਜਾਬ, ਹੁਸ਼ਿਆਰਪੁਰ।

19/12/2016

  ਬਰਾਬਰ ਕੰਮ ਬਰਾਬਰ ਤਨਖਾਹ
ਮਾਣਯੋਗ ਸੁਪਰੀਮ ਕੋਰਟ ਆਫ਼ ਇੰਡੀਆ ਨੇ ਦੇਸ਼ ਦੇ ਸਰਕਾਰੀ ਮਹਿਕਮਿਆਂ ਵਿਚ ਬਰਾਬਰ ਕੰਮ ਲਈ ਬਰਾਬਰ ਤਨਖਾਹ ਦੇਣ ਦਾ ਇਤਿਹਾਸਕ ਫ਼ੈਸਲਾ ਸੁਣਾਇਆ ਹੈ। ਇਹ ਫ਼ੈਸਲਾ ਲੋਕ ਹਿਤ ਅਤੇ ਦੇਸ਼ ਹਿਤ ਵਿਚ ਹੈ। ਇਹ ਫ਼ੈਸਲਾ ਅਦਾਲਤੀ ਅਤੇ ਪ੍ਰਸ਼ਾਸਨਿਕ ਇਤਿਹਾਸ ਵਿਚ ਇਕ ਮੀਲ ਪੱਥਰ ਸਾਬਤ ਹੋਵੇਗਾ। ਕੀ ਹੁਣ ਸਰਕਾਰ ਉਨ੍ਹਾਂ ਲੱਖਾਂ ਉੱਚ ਯੋਗਤਾ ਪ੍ਰਾਪਤ ਟੀਚਰਾਂ ਦੀ ਸਾਰ ਵੀ ਲਵੇਗੀ, ਜਿਹੜੇ ਪ੍ਰਾਈਵੇਟ ਸਕੂਲਾਂ ਵਿਚ ਸਰਕਾਰੀ ਤਨਖਾਹ ਨਾਲੋਂ ਅੱਧੀ ਤਨਖਾਹ ਤੋਂ ਵੀ ਘੱਟ ਤਨਖਾਹ ਉਤੇ ਪਿਛਲੇ ਕਈ ਸਾਲਾਂ ਤੋਂ ਸੇਵਾ ਨਿਭਾਅ ਰਹੇ ਹਨ? ਦੇਸ਼ ਦੇ ਉਸਰੱਈਏ ਟੀਚਰਾਂ ਨੂੰ ਆਪਣਾ ਵਾਜਬ ਹੱਕ ਦਿਵਾਉਣਾ, ਦੇਸ਼ ਦੀ ਉੱਚ ਦਰਜੇ ਦੀ ਸੇਵਾ ਮੰਨੀ ਜਾਏਗੀ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਗੁਰੂ ਨਾਨਕ ਵਾੜਾ, ਅੰਮ੍ਰਿਤਸਰ।

ਪ੍ਰੇਰਨਾ ਦਾ ਸਰੋਤ ਪੰਛੀ
ਹਰ ਸਾਲ ਦੀ ਤਰ੍ਹਾਂ ਇਸ ਸਾਲ ਵੀ ਪ੍ਰਵਾਸੀ ਪੰਛੀਆਂ ਨੇ ਭਾਰਤ ਦੀਆਂ ਵੱਖ-ਵੱਖ ਝੀਲਾਂ ਤੇ ਪੱਤਣਾਂ ਵੱਲ ਨੂੰ ਉਡਾਰੀਆਂ ਭਰ ਲਈਆਂ ਹਨ। ਇਹ ਪ੍ਰਵਾਸੀ ਪੰਛੀ ਹਰ ਸਾਲ ਅਕਸਰ ਸਤੰਬਰ-ਅਕਤੂਬਰ ਦੇ ਮਹੀਨਿਆਂ 'ਚ ਹੀ ਆਉਣਾ ਸ਼ੁਰੂ ਕਰ ਦਿੰਦੇ ਹਨ। ਅੱਜ ਸਾਡੇ ਦੇਸ਼ ਵਿਚ ਜਿਥੇ ਇਹ ਲੱਖਾਂ ਦੀ ਗਿਣਤੀ 'ਚ ਪਹੁੰਚ ਚੁੱਕੇ ਹਨ, ਉਥੇ ਆਉਂਦੇ ਦਿਨਾਂ 'ਚ ਇਨ੍ਹਾਂ ਦੀ ਗਿਣਤੀ ਹੋਰ ਵਧਣ ਦੀ ਉਮੀਦ ਕੀਤੀ ਜਾ ਰਹੀ ਹੈ। ਪੰਜਾਬ ਦੀ ਹਰੀਕੇ ਝੀਲ ਵਿਖੇ ਪ੍ਰਵਾਸੀ ਪੰਛੀ ਤੇ ਸਥਾਨਕ ਪੰਛੀਆਂ ਦੀ ਗਿਣਤੀ ਇਨ੍ਹਾਂ ਦਿਨਾਂ ਵਿਚ ਪੌਣੇ ਦੋ ਲੱਖ ਦੇ ਕਰੀਬ ਹੋ ਜਾਂਦੀ ਹੈ। ਇਸ ਤੋਂ ਇਲਾਵਾ ਭਾਰਤ ਦੇ ਹੋਰ ਸਮੁੰਦਰਾਂ, ਦਰਿਆਵਾਂ, ਝੀਲਾਂ, ਪੱਤਣਾਂ 'ਚ ਵੀ ਪ੍ਰਵਾਸੀ ਪੰਛੀਆਂ ਦੀ ਵੱਡੀ ਆਮਦ ਹੁੰਦੀ ਹੈ। ਕੁਦਰਤ ਵੱਲੋਂ ਬਖ਼ਸ਼ੀ ਸੋਝੀ ਅਨੁਸਾਰ ਇਹ ਪ੍ਰਵਾਸੀ ਪੰਛੀ ਲੰਮਾ ਸਫ਼ਰ ਤੈਅ ਕਰਕੇ ਆਪਣੇ ਮਿਥੇ ਸਥਾਨਾਂ 'ਤੇ ਆ ਰੁਕਦੇ ਹਨ। ਇਨ੍ਹਾਂ ਦੇ ਆਉਣ ਦਾ ਕਾਰਨ ਸਰਦੀ ਦੀ ਰੁੱਤ ਬਤੀਤ ਕਰਨਾ ਹੈ ਤੇ ਅਖੀਰ ਇਹ ਫਰਵਰੀ ਮਹੀਨੇ ਦੇ ਆਖਰੀ ਦਿਨਾਂ 'ਚ ਮੁੜ ਆਪਣੇ ਵਤਨਾਂ ਵੱਲ ਨੂੰ ਵਹੀਰਾਂ ਘੱਤ ਦਿੰਦੇ ਹਨ। ਇਹ ਪ੍ਰਵਾਸੀ ਪੰਛੀ ਆਲਸੀ ਲੋਕਾਂ ਲਈ ਪ੍ਰੇਰਨਾ ਦਾ ਸਰੋਤ ਬਣ ਗਏ ਹਨ, ਜੋ ਹਿੰਮਤ ਨਾ ਹਾਰਦੇ ਹੋਏ ਆਪਣੀ ਮੰਜ਼ਿਲ ਪਾਉਣ ਲਈ ਹਰ ਪਲ ਉਡਾਰੀ ਭਰੀ ਰੱਖਦੇ ਹਨ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਜ਼ਿਲ੍ਹਾ ਲੁਧਿਆਣਾ।
ਮੋਬਾਈਲ : 98551-81104.

ਫੁਕਰਪੁਣੇ ਦੀ ਹੱਦ
ਪਿਛਲੇ ਦਿਨੀਂ ਐਸ. ਅਸ਼ੋਕ ਭੋਰਾ ਦਾ 'ਮੌੜ ਮੰਡੀ' ਵਿਚ ਵਾਪਰੇ ਉਸ ਦੁਖਾਂਤ 'ਤੇ ਲਿਖਿਆ ਲੇਖ ਪੜ੍ਹਿਆ, ਜਿਸ ਨਾਲ ਹਰੇਕ ਇਨਸਾਨੀ ਦਿਲ ਪਸੀਜਿਆ ਗਿਆ। ਸਟੇਜਾਂ 'ਤੇ ਕੋਈ ਖੁਸ਼ੀਨਾਮੇ ਨਹੀਂ ਨੱਚਦਾ ਢਿੱਡ ਨੂੰ ਝੁਲਕਾ ਦੇਣ ਲਈ ਜਾਂ ਲੋਕਾਂ ਦਾ ਮਨ ਬਹਿਲਾਉਣ ਲਈ ਸਟੇਜੀ ਪ੍ਰੋਗਰਾਮ ਕਰ ਰਹੇ ਕੁੜੀਆਂ-ਮੁੰਡਿਆਂ ਨਾਲ ਧੱਕਾ ਜਾਂ ਹੁੱਲ੍ਹੜਬਾਜ਼ੀ ਕਰਨ ਵਾਲੇ ਲੋਕਾਂ ਨਾਲ ਕਾਨੂੰਨ ਨੂੰ ਸਖ਼ਤੀ ਵਿਖਾਉਣੀ ਚਾਹੀਦੀ ਹੈ ਤਾਂ ਕਿ ਕਦੇ ਵੀ ਕਿਸੇ ਦਾ ਹੀਆ ਨਾ ਪਵੇ ਧੱਕਾ ਕਰਨ ਦਾ। ਲਾਈਸੈਂਸ ਅਵਾਗੌਣ ਦੇਣ ਨਾਲ ਵੀ ਪਿਛਲੇ ਸਮੇਂ ਵਿਚ ਘਾਤਕ ਨਤੀਜੇ ਸਾਹਮਣੇ ਆਏ ਹਨ। ਸਰਕਾਰ ਨੂੰ ਸਖ਼ਤੀ ਨਾਲ ਪੇਸ਼ ਆਉਣਾ ਚਾਹੀਦਾ ਹੈ ਹੁੱਲ੍ਹੜਬਾਜ਼ ਤੇ ਫੁਕਰਪੁਣੇ ਦੀ ਹੱਦ ਤੋਂ ਬਾਹਰ ਜਾਣ ਵਾਲਿਆਂ ਨਾਲ। ਇਨ੍ਹਾਂ ਨੂੰ ਇਹ ਨਹੀਂ ਪਤਾ ਹੁੰਦਾ ਕਿ ਉਹ ਕੁੜੀਆਂ ਵੀ ਕਿਸੇ ਘਰ ਵਿਚ ਮਾਂ-ਭੈਣ ਜਾਂ ਪਤਨੀ ਹੁੰਦੀਆਂ ਹਨ। ਕਿਸ ਦਾ ਦਿਲ ਕਰਦਾ ਹੈ ਲੋਕਾਂ ਸਾਹਮਣੇ ਜਾਂ ਸ਼ਰਾਬੀਆਂ ਸਾਹਮਣੇ ਨੱਚਣ ਨੂੰ, ਸਭ ਮਜਬੂਰੀ ਦੀ ਖੇਡ ਹੈ। ਪੰਜਾਬੀ ਫ਼ਿਲਮਾਂ ਤੇ ਪੰਜਾਬੀ ਗੀਤ ਹੀ ਇਨ੍ਹਾਂ ਨੂੰ ਬੜਾਵਾ ਦੇ ਰਹੇ ਹਨ। ਲੋੜ ਹੈ ਸੱਭਿਆਚਾਰ ਨੂੰ ਸਾਂਭਣ ਦੀ। ਲੋੜ ਹੈ ਬੇਗਾਨੀਆਂ ਧੀਆਂ-ਭੈਣਾਂ ਦੀਆਂ ਮਜਬੂਰੀਆਂ ਨੂੰ ਸਮਝਣ ਦੀ।

-ਮਨਜੀਤ ਸਿੰਘ ਭਾਮ
ਸੂਬਾ ਪ੍ਰਧਾਨ ਮਨੁੱਖੀ ਅਕਾਰ ਸੰਗਠਨ, ਪੰਜਾਬ ਹੁਸ਼ਿਆਰਪੁਰ।

ਲੰਮੀਆਂ ਕਤਾਰਾਂ ਦਾ ਹੱਲ
ਜੋ ਫ਼ੈਸਲਾ ਨੋਟਬੰਦੀ ਦਾ ਮੋਦੀ ਸਰਕਾਰ ਨੇ ਲਿਆ ਹੈ, ਬਹੁਤ ਹੀ ਵਧੀਆ ਅਤੇ ਦੇਸ਼ ਨੂੰ ਤਰੱਕੀ ਵੱਲ ਲਿਜਾਣ ਵਾਲਾ ਫ਼ੈਸਲਾ ਹੈ, ਕਿਉਂਕਿ ਬਲੈਕਮਨੀ ਜਮ੍ਹਾਂ ਹੋਣ ਕਰਕੇ ਗ਼ਰੀਬ ਅੱਤ ਦਾ ਗਰੀਬ ਅਤੇ ਅਮੀਰ ਅੱਤ ਦਾ ਅਮੀਰ ਹੁੰਦਾ ਜਾ ਰਿਹਾ ਹੈ। ਪੰਜ ਸੌ ਅਤੇ ਇਕ ਹਜ਼ਾਰ ਦਾ ਨੋਟ ਬੰਦ ਹੋਣ ਨਾਲ ਆਮ ਜਨਤਾ ਨੂੰ ਬਹੁਤ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਕਈ ਥਾਵਾਂ 'ਤੇ ਲਾਈਨਾਂ ਵਿਚ ਲੱਗੇ ਲੋਕਾਂ ਦੀ ਮੌਤ ਵੀ ਹੋ ਚੁੱਕੀ ਹੈ, ਜੋ ਕਿ ਬਹੁਤ ਹੀ ਮੰਦਭਾਗੀ ਗੱਲ ਹੈ।

-ਕੇਵਲ ਸਿੰਘ ਬਾਠਾਂ
ਮੋਬਾਈਲ : 98557-44211.

17/12/2016

 ਝੂਠ ਦੇ ਪੈਰ ਨਹੀਂ ਹੁੰਦੇ

ਬੜਾ ਅਨੋਖਾ ਅਖਾਣ ਹੈ ਕਿ 'ਝੂਠ ਦੇ ਪੈਰ ਨਹੀਂ ਹੁੰਦੇ'। ਜੇ ਝੂਠ ਦੇ ਪੈਰ ਨਾ ਹੁੰਦੇ ਤਾਂ ਉਹ ਦੇਸ਼ ਦੇ ਇਕ ਕੋਨੇ ਤੋਂ ਅਖੀਰਲੇ ਕੋਨੇ ਤੀਕ ਨਾ ਫੈਲਦਾ। ਲੋਕਾਂ ਲਈ ਕੁਝ ਠੋਸ ਕਰਨ ਤੋਂ ਬਿਨਾਂ ਲੀਡਰ ਝੂਠੇ ਨਾਅਰਿਆਂ ਤੇ ਝੂਠੇ ਵਾਅਦਿਆਂ ਨਾਲ ਵਾਰ-ਵਾਰ ਗੱਦੀਨਸ਼ੀਨ ਨਾ ਹੁੰਦੇ। ਉਹ ਭ੍ਰਿਸ਼ਟਾਚਾਰੀ ਤੇ ਰਿਸ਼ਵਤਖੋਰ ਹੋਣ ਦੇ ਬਾਵਜੂਦ ਨਾਤ੍ਹੇ-ਧੋਤੇ ਨਾ ਬਣੇ ਰਹਿੰਦੇ। ਆਜ਼ਾਦੀ ਦੇ ਸੱਤਰ ਸਾਲ ਬੀਤਣ 'ਤੇ ਵੀ ਸਾਡਾ ਦੇਸ਼, ਸੰਸਾਰ ਦੇ ਖ਼ੁਸ਼ਹਾਲ ਦੇਸ਼ਾਂ ਤੋਂ ਪਛੜਿਆ ਹੋਇਆ ਹੈ। ਸੋ, ਦੇਸ਼ ਦੇ ਨੇਤਾਵਾਂ ਨੇ ਡਾਕਟਰ ਦੀ ਨਰਮ ਤੇ ਤੇਜ਼ ਦਵਾਈ ਵਾਂਗ ਝੂਠ ਦੀ ਖੁਰਾਕ ਜਾਂ ਤੀਬਰਤਾ ਵਧਾ ਦਿੱਤੀ ਹੈ। ਲੀਡਰਾਂ ਦੀ ਰਿਸ਼ਵਤਖੋਰੀ ਅਤੇ ਪੁਲਿਸ ਦੀਆਂ ਡਾਂਗਾਂ ਦੇ ਸਤਾਏ ਪੰਜਾਹ ਲੱਖ ਨੌਜਵਾਨ ਪਰਵਾਸ ਕਰ ਚੁੱਕੇ ਹਨ। ਉਨ੍ਹਾਂ ਦੇ ਬਿਰਧ ਮਾਪੇ ਇਕੱਲੇ ਰੋਂਦੇ ਕਲਪਦੇ ਹਨ। ਪ੍ਰੰਤੂ ਲੀਡਰ ਲੋਕ ਜਾਅਲੀ ਸਬੂਤਾਂ ਦੇ ਆਸਰੇ ਸੁਥਰੇ ਬਣਦੇ ਰਹਿੰਦੇ ਹਨ। ਦੇਸ਼ ਨੂੰ ਲਗਾਤਾਰ ਲੁੱਟਿਆ ਜਾ ਰਿਹਾ ਹੈ ਤੇ ਨੌਕਰੀਆਂ ਮੰਗਣ ਵਾਲਿਆਂ ਨੂੰ ਕੁੱਟਿਆ ਜਾ ਰਿਹਾ ਹੈ। ਲੀਡਰਾਂ ਦੁਆਰਾ ਵਿਦੇਸ਼ੀ ਲੁਟੇਰਿਆਂ ਵਾਂਗ ਦੇਸ਼ ਦਾ ਲੁੱਟਿਆ ਧਨ ਵਿਦੇਸ਼ੀ ਬੈਂਕਾਂ ਵਿਚ ਭਰਿਆ ਜਾ ਰਿਹਾ ਹੈ। ਦੇਸ਼ ਦੇ ਨੇਤਾ, ਲੋਕਰਾਜੀ ਸਿਸਟਮ ਤੋਂ ਮੂੰਹ ਮੋੜ ਕੇ ਪਰਿਵਾਰਵਾਦ ਦੇ ਰਜਵਾੜਾ ਸ਼ਾਹੀ ਵੱਲ ਵਧਣ ਲੱਗ ਪਏ ਹਨ। ਹੇ ਦੇਸ਼ ਦੇ ਨਾਖ਼ੁਦਾਓ, ਰੁੱਕ ਜਾਓ ਝੂਠ ਬੋਲਣ ਤੋਂ। ਸੱਚ ਦਾ ਦਾਮਨ ਫੜ ਕੇ ਦੇਸ਼ ਦੀ ਕਾਇਆ ਕਲਪ ਕਰੋ। ਬਹੁਤ ਹੋ ਗਿਆ, ਹੁਣ ਤਾਂ ਜਨਤਾ ਦੀਆਂ ਘਸ ਚੁੱਕੀਆਂ ਜੁੱਤੀਆਂ ਵਾਂਗ ਬਿਨਾਂ ਪੈਰਾਂ ਵਾਲਾ ਝੂਠ ਆਪਣਾ ਢਿੱਡ ਵੀ ਘਸਾ ਬੈਠਾ ਹੈ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਗੁਰੂ ਨਾਨਕ ਵਾੜਾ, ਅੰਮ੍ਰਿਤਸਰ।

\ਭਟਕਣ ਵਿਚ ਪਾ ਰਹੀ ਹੈ ਮੀਲ-ਪੱਥਰਾਂ ਨਾਲ ਛੇੜਖਾਨੀ

ਅਕਸਰ ਦੇਖਿਆ ਜਾਂਦਾ ਹੈ ਕਿ ਸੜਕਾਂ ਦੇ ਕਿਨਾਰੇ ਲੱਗੇ ਮੀਲ-ਪੱਥਰ ਰਾਹਗੀਰਾਂ ਲਈ ਮਾਰਗ ਦਰਸ਼ਕ ਦਾ ਕੰਮ ਕਰਦੇੇ ਹਨ। ਅਸੀਂ ਜਦੋਂ ਵੀ ਕਿਸੇ ਅਨਜਾਣ ਜਗ੍ਹਾ ਜਾਣਾ ਹੋਵੇ ਤਾਂ ਮੀਲ-ਪੱਥਰਾਂ ਤੋਂ ਪਿੰਡ ਜਾਂ ਸ਼ਹਿਰ ਦਾ ਨਾਂਅ ਤੇ ਦੂਰੀ ਦੇਖ ਕੇ ਉਸ ਸਥਾਨ 'ਤੇ ਆਸਾਨੀ ਨਾਲ ਪਹੁੰਚ ਜਾਂਦੇ ਹਾਂ। ਪ੍ਰੰਤੂ ਬੜੇ ਦੁੱਖ ਦੀ ਗੱਲ ਹੈ ਕਿ ਅੱਜ ਮੀਲ-ਪੱਥਰਾਂ ਨਾਲ ਛੇੜਖਾਨੀ ਕਰਕੇ ਪਿੰਡਾਂ ਅਤੇ ਸ਼ਹਿਰਾਂ ਦੇ ਨਾਂਅ ਬਿਲਕੁਲ ਉਲਟ ਉਕਰ ਦਿੱਤੇ ਜਾਂਦੇ ਹਨ, ਜਿਸ ਤਰ੍ਹਾਂ (ਰ) ਸ਼ਬਦ ਦਾ (ਹ) ਸ਼ਬਦ ਕਰ ਦੇੇਣਾ ਤੇ (ਹ) ਸ਼ਬਦ ਦਾ (ਰ) ਕਰ ਦੇਣਾ ਅਤੇ (ਚ) ਦਾ (ਦ) ਕਰ ਦੇਣਾ ਅਤੇ (ਦ) ਦਾ (ਚ) ਕਰ ਦੇਣਾ ਰਾਹਗੀਰਾਂ ਲਈ ਪ੍ਰੇਸ਼ਾਨੀ ਪੈਦਾ ਕਰ ਦਿੰਦਾ ਹੈ। ਨਾਲ ਹੀ ਦੂਰੀ ਨੂੰ ਕੱਟ ਕੇ ਘਟਾ ਵਧਾ ਦਿੱਤਾ ਜਾਂਦਾ ਹੈ। ਜਿਵੇ ਕਿ 4 ਕਿਲੋਮੀਟਰ ਦਾ 1 ਕਿਲੋਮੀਟਰ ਕਰ ਦੇਣਾ ਅਤੇ 10 ਦਾ 1 ਕੱਟ ਕੇ 0 ਕਰ ਦੇਣਾ, ਇਹ ਬਹੁਤ ਹੀ ਮੰਦਭਾਗੀਆਂ ਘਟਨਾਵਾਂ ਹਨ। ਇਥੇ ਹੀ ਬਸ ਨਹੀਂ ਪਿੰਡਾਂ ਅਤੇ ਸ਼ਹਿਰਾਂ ਲਈ ਲੱਗੇ ਪਹੁੰਚ ਮਾਰਗ ਨਿਸ਼ਾਨ ਵੀ ਕੱਟ ਦਿੱਤੇ ਜਾਂਦੇ ਹਨ, ਜਿਸ ਨਾਲ ਯਾਤਰੀ ਕਈ ਵਾਰ ਉਲਟ ਦਿਸ਼ਾ ਵੱਲ ਚਲੇ ਜਾਂਦੇ ਹਨ। ਕਈ ਵਾਰ ਮੀਲ-ਪੱਥਰਾਂ ਨੂੰ ਚੌਂਕਾਂ ਜਾਂ ਰਸਤਿਆਂ ਉਪਰ ਤੋੜਿਆ ਹੋਇਆ ਵੀ ਵੇਖਣ ਨੂੰ ਮਿਲਦਾ ਹੈ। ਸਾਨੂੰ ਸਾਰਿਆਂ ਨੂੰ ਚਾਹੀਦਾ ਹੈ ਕਿ ਸੁੰਨੇ ਰਾਹਾਂ ਵਿਚ ਇਨ੍ਹਾਂ ਮੂੰਹ ਬੋਲਦੇ ਮੀਲ-ਪੱਥਰਾਂ ਨਾਲ ਛੇੜਖਾਨੀ ਨਾ ਕੀਤੀ ਜਾਵੇ। ਸਰਕਾਰ ਅਤੇ ਪ੍ਰਸ਼ਾਸਨ ਨੂੰ ਵੀ ਇਸ ਪ੍ਰਤੀ ਠੋਸ ਕਦਮ ਚੁੱਕਣੇ ਚਾਹੀਦੇ ਹਨ।

-ਰਵਿੰਦਰ ਸਿੰਘ ਰੇਸ਼ਮ
ਪਿੰਡ ਨੱਥੂਮਾਜਰਾ (ਸੰਗਰੂਰ)।

ਜ਼ਿੰਦਗੀ

ਜ਼ਿੰਦਗੀ ਇਕ ਖੇਡ ਦੇ ਮੈਦਾਨ ਦੀ ਤਰ੍ਹਾਂ ਹੈ। ਇਸ ਵਿਚ ਜਿੱਤ, ਹਾਰ, ਖੁਸ਼ੀ, ਗ਼ਮੀ, ਦੁੱਖ, ਸੁੱਖ ਦਾ ਸਿਲਸਿਲਾ ਜਾਰੀ ਰਹਿੰਦਾ ਹੈ। ਇਨਸਾਨ ਨੂੰ ਕਦੀ ਜਿੱਤ, ਕਦੀ ਹਾਰ ਪ੍ਰਾਪਤ ਹੁੰਦੀ ਹੈ। ਜ਼ਿੰਦਗੀ ਵਿਚ ਰਸਤੇ ਕਦੀ ਵੀ ਬੰਦ ਨਹੀਂ ਹੁੰਦੇ। ਕਈ ਵਾਰ ਇਨਸਾਨ ਹੀ ਹਿੰਮਤ ਹਾਰ ਜਾਂਦਾ ਹੈ। ਸਾਨੂੰ ਹਾਰਾਂ ਤੋਂ ਕਦੇ ਵੀ ਘਬਰਾਉਣਾ ਨਹੀਂ ਚਾਹੀਦਾ। ਸਗੋਂ ਹਾਰਾਂ ਤੋਂ ਸਬਕ ਲੈ ਕੇ ਲਗਾਤਾਰ ਮਿਹਨਤ ਕਰਕੇ ਮੰਜ਼ਿਲ ਦੀ ਪ੍ਰਾਪਤੀ ਕਰਨੀ ਚਾਹੀਦੀ ਹੈ। ਜ਼ਿੰਦਗੀ ਵਿਚ ਆਪਣੇ-ਆਪ ਨੂੰ ਕਦੇ ਵੀ ਕਮਜ਼ੋਰ ਨਹੀਂ ਸਮਝਣਾ ਚਾਹੀਦਾ। ਹਰੇਕ ਇਨਸਾਨ ਨੂੰ ਚਾਹੀਦਾ ਹੈ ਕਿ ਆਪਣੀ ਜ਼ਿੰਦਗੀ ਨੂੰ ਵਧੀਆ ਬਣਾਉਣ ਲਈ ਮਿਹਨਤ ਤੇ ਸਮੇਂ ਦੀ ਕਦਰ ਕਰੇ।

-ਰਾਜਵੀਰ ਕੌਰ
ਪਿੰਡ ਰਾਜਪੁਰ ਭਾਈਆਂ, ਜ਼ਿਲ੍ਹਾ ਹੁਸ਼ਿਆਰਪੁਰ।

16/12/2016

 ਬਿਮਾਰ ਮਾਨਸਿਕਤਾ

ਦੇਸ਼ ਵਿਚ ਅੱਜ ਸਰਕਾਰਾਂ ਦੀਆਂ ਗ਼ਲਤ ਨੀਤੀਆਂ ਕਾਰਨ ਦਿਨ-ਬਦਿਨ ਮਹਿੰਗਾਈ ਵਧਦੀ ਹੀ ਜਾ ਰਹੀ ਹੈ। ਮਹਿੰਗਾਈ ਦੇ ਇਸ ਦੌਰ ਵਿਚ ਦੇਸ਼ ਦਾ ਹਰ ਵਰਗ ਬੇਹੱਦ ਨਿਰਾਸ਼ਾ ਦੇ ਆਲਮ ਵਿਚੋਂ ਗੁਜ਼ਰ ਰਿਹਾ ਹੈ। ਅੱਜ ਆਮ ਆਦਮੀ ਨੂੰ ਆਪਣੀਆਂ ਜ਼ਰੂਰਤਾਂ ਪੂਰੀਆਂ ਕਰਨ ਲਈ ਬੇਹੱਦ ਮੁਸ਼ਕਿਲਾਂ ਆ ਰਹੀਆਂ ਹਨ। ਇਨ੍ਹਾਂ ਮੁਸ਼ਕਿਲਾਂ ਦੇ ਝੰਬੇ ਮਾਨਸਿਕ ਤੌਰ 'ਤੇ ਕਮਜ਼ੋਰ ਹੋਏ ਲੋਕ ਅੱਜ ਪਖੰਡੀ ਬਾਬਿਆਂ ਦੇ ਡੇਰਿਆਂ ਵਿਚ ਮੱਥੇ ਰਗੜਦੇ ਨਜ਼ਰ ਆ ਰਹੇ ਹਨ। ਇਨ੍ਹਾਂ ਡੇਰਿਆਂ ਵਿਚ ਬੈਠੇ ਵੱਡੀਆਂ-ਵੱਡੀਆਂ ਗੋਗੜਾਂ ਵਾਲੇ ਪਖੰਡੀ ਬਾਬਿਆਂ ਵੱਲੋਂ ਲੋਕਾਂ ਦੀ ਬਿਮਾਰ ਹੋ ਚੁੱਕੀ ਮਾਨਸਿਕਤਾ ਦਾ ਫਾਇਦਾ ਉਠਾ ਕੇ ਉਨ੍ਹਾਂ ਦੀ ਕਿਰਤ ਕਮਾਈ ਨੂੰ ਬੜੀ ਆਸਾਨੀ ਹੜੱਪਿਆ ਜਾ ਰਿਹਾ ਹੈ। ਸੋ, ਅੱਜ ਲੋੜ ਹੈ ਜਿਥੇ ਸਮੇਂ ਦੀਆਂ ਸਰਕਾਰਾਂ ਨੂੰ ਆਪਣੇ ਨਾਗਰਿਕਾਂ ਨੂੰ ਵੱਧ ਤੋਂ ਵੱਧ ਰੁਜ਼ਗਾਰ ਦੇ ਮੌਕੇ ਮੁਹੱਈਆ ਕਰਵਾਉਣੇ ਚਾਹੀਦੇ ਹਨ, ਉਥੇ ਸਾਨੂੰ ਵੀ ਇਨ੍ਹਾਂ ਪਖੰਡੀਆਂ ਦਾ ਖਹਿੜਾ ਛੱਡ ਕੇ ਆਪਣੀ ਮਿਹਨਤ ਦੇ ਬਲਬੂਤੇ ਆਪਣੀਆਂ ਸਮੱਸਿਆਵਾਂ ਦਾ ਹੱਲ ਲੱਭਣਾ ਚਾਹੀਦਾ ਹੈ ਤਾਂ ਜੋ ਇਨ੍ਹਾਂ ਪਿੱਛੇ ਬਰਬਾਦ ਹੁੰਦਾ ਸਾਡਾ ਬੇਸ਼ਕੀਮਤੀ ਸਮਾਂ ਅਤੇ ਪੈਸਾ ਬਚ ਸਕੇ।

-ਰਾਜਾ ਗਿੱਲ (ਚੜਿੱਕ)
ਮੋ: 94654-11585.

ਮੌਕਾਪ੍ਰਸਤ ਸਿਆਸਤ

ਆਗਾਮੀ ਚੋਣਾਂ ਨਾਲ ਸਬੰਧਤ ਸੀਟਾਂ ਦੀ ਵੰਡ ਤੋਂ ਨਾਰਾਜ਼ ਉਮੀਦਵਾਰ ਇੱਧਰ-ਉੱਧਰ ਦੀ ਪਾਰੀ ਖੇਡਦੇ ਦਿਖਾਈ ਦੇ ਰਹੇ ਹਨ। ਮਾਮਲਾ ਸਿਰਫ ਤਾਂ ਸਿਰਫ ਸੀਟ ਦਾ ਹੈ, ਨਾ ਕਿ ਪਾਰਟੀ ਪ੍ਰਤੀ ਵਫ਼ਾਦਾਰੀ ਦਾ। ਦਲਬਦਲੂ ਉਮੀਦਵਾਰ ਤਿਆਗੀ ਹੋਈ ਪਾਰਟੀ ਦੀ ਤਿੱਖੀ ਆਲੋਚਨਾ ਕਰਦੇ ਸਾਹ ਨਹੀਂ ਲੈ ਰਹੇ। ਜਿਨ੍ਹਾਂ ਉਮੀਦਵਾਰਾਂ ਨੂੰ ਤਾਂ ਸਹਿਜੇ ਹੀ ਸੀਟਾਂ ਕਾਰਜਸ਼ੀਲ ਪਾਰਟੀ 'ਚ ਹੀ ਮਿਲ ਗਈਆਂ, ਉਹ ਤਾਂ ਖੁਸ਼ ਹਨ, ਪਰ ਜਿਨ੍ਹਾਂ ਨੂੰ ਨਾਂਹ-ਨੁੱਕਰ ਹੋ ਰਹੀ ਹੈ, ਉਹ ਵਿਦਰੋਹੀ ਭਾਵਨਾ ਨਾਲ ਅਸਤੀਫ਼ੇ ਲਿਖੀ ਜਾ ਰਹੇ ਹਨ। ਸੀਟਾਂ ਤੋਂ ਵਾਂਝੇ ਰਹਿ ਚੁੱਕੇ ਉਮੀਦਵਾਰ ਮੌਕਾਪ੍ਰਸਤ ਸਿਆਸਤ ਸਦਕਾ ਜੀ ਆਇਆਂ ਕਹਿਣ ਵਾਲੀਆਂ ਪਾਰਟੀਆਂ ਵੱਲ ਕੂਚ ਕਰ ਰਹੇ ਹਨ। ਮਸਲਾ ਕੇਵਲ ਉਮੀਦਵਾਰ ਲਈ ਸੀਟ ਦਾ ਹੈ। ਗ਼ੌਰ-ਏ-ਤਲਬ ਇਹ ਵੀ ਹੈ ਕਿ ਉਮੀਦਵਾਰ ਜਿਸ ਪਾਰਟੀ ਵੱਲ ਜਾਵੇ ਤਾਂ ਉਸ ਦੇ ਵੋਟਰਾਂ/ਹਮਾਇਤੀਆਂ ਦਾ ਕਾਫਲਾ ਵੀ ਨਾਲ ਜਾਵੇਗਾ, ਕਿਉਂਕਿ ਕੁਝ ਵੋਟਰ ਪੁਰਾਣੀ ਪਾਰਟੀ ਦੇ ਸਮਰਥਨ 'ਚ ਹੀ ਮੌਜੂਦ ਰਹਿੰਦੇ ਹਨ। ਉਮੀਦਵਾਰ ਜਿਹੜਾ ਮਰਜ਼ੀ ਹੋਵੇ, ਪਰ ਕੁਝ ਲੋਕਾਂ ਦਾ ਮਤ ਹੈ ਕਿ ਗੰਗਾ ਗਏ ਤਾਂ ਗੰਗਾ ਰਾਮ, ਜਮਨਾ ਗਏ ਤਾਂ ਜਮਨਾ ਦਾਸ। ਦੋਸਤੋ ਉਮੀਦਵਾਰ ਤਾਂ ਮੌਕਾਪ੍ਰਸਤ ਸਿਆਸਤ ਖੇਡ ਰਹੇ ਹਨ, ਲੋੜ ਤਾਂ ਸਾਨੂੰ ਸਹੀ ਉਮੀਦਵਾਰ ਨੂੰ ਚੁਣਨ ਦੀ ਹੈ, ਕਿਉਂਕਿ ਇਕ-ਇਕ ਵੋਟ ਬੇਹੱਦ ਕੀਮਤੀ ਹੈ।

-ਕਮਲਜੀਤ ਸਿੰਘ
ਪਿੰਡ ਮੱਲ੍ਹੀਆਂ (ਕਰਤਾਰਪੁਰ)।

ਮਨਾਂ ਨੂੰ ਜਗਾਈਏ

ਦੀਵਾਲੀ ਦੇ ਨੇੜੇ ਆਉਂਦਿਆਂ ਅਸੀਂ ਸਾਰੇ ਆਪਣੇ ਘਰਾਂ ਦੀ ਸਫ਼ਾਈ ਕਰਨੀ ਸ਼ੁਰੂ ਕਰ ਦਿੰਦੇ ਹਾਂ ਇਕ ਸਾਲ ਦਾ ਜਿੰਨਾ ਵੀ ਕੂੜਾ ਕਰਕਟ ਖੱਲਾਂ-ਖੂੰਜਿਆਂ ਵਿਚ ਪਿਆ ਹੁੰਦਾ ਹੈ, ਉਹ ਸਾਰਾ ਹੀ ਬਾਹਰ ਕੱਢ ਕੇ ਧੋ ਦਿੱਤਾ ਜਾਂਦਾ ਹੈ। ਇਸ ਸਫ਼ਾਈ ਤੋਂ ਬਾਅਦ ਕਾਫੀ ਰਾਹਤ ਮਹਿਸੂਸ ਕਰਦੇ ਹਾਂ ਕਿ ਬਹੁਤ ਵੱਡਾ ਕੰਮ ਹੋ ਗਿਆ ਹੈ ਤੇ ਫਿਰ ਅਸੀਂ ਵਿਚ ਰੱਖਣ ਵਾਸਤੇ ਫੁੱਲ-ਬੂਟੇ ਜਾਂ ਹੋਰ ਕਈ ਪ੍ਰਕਾਰ ਦੀਆਂ ਵਸਤਾਂ ਲਿਆ ਕੇ ਖੁਸ਼ੀ ਮਹਿਸੂਸ ਕਰਦੇ ਹਾਂ। ਪ੍ਰੰਤੂ ਅੱਜ ਲੋੜ ਹੈ ਸਾਨੂੰ ਇਸ ਪ੍ਰਤੀ ਜਾਗਰੂਕ ਹੋਣ ਦੀ ਕਿ ਜਿੱਥੇ ਘਰਾਂ ਨੂੰ ਸਾਫ਼ ਕਰਕੇ ਸੋਹਣਾ ਬਣਾਇਆ ਜਾਂਦਾ ਹੈ ਕਿ ਜੋ ਵੀ ਘਰ ਵਿਚ ਆਵੇ ਉਹ ਖੁਸ਼ੀ ਮਹਿਸੂਸ ਕਰੇ, ਉਥੇ ਹੀ ਮਨ ਦੀ ਸਫ਼ਾਈ ਵੀ ਬਹੁਤ ਜ਼ਰੂਰੀ ਹੈ। ਮਨਾਂ ਵਿਚਲੀ ਨਫ਼ਰਤ, ਵੈਰ-ਈਰਖਾ ਦੁਰਵਿਹਾਰ ਦਾ ਭਾਵ ਸਭ ਸਾਫ਼ ਕਰੀਏ ਤਾਂ ਸਾਡੇ ਮਨਾਂ ਨੂੰ ਸਾਫ਼ ਦੇਖ ਕੇ ਕੋਈ ਸਾਡੇ ਮਨ ਵਿਚ ਬੈਠ ਜਾਵੇ। ਆਉ! ਸਾਰੇ ਰਲ ਮਿਲ ਕੇ ਮਨਾਂ ਵਿਚ ਪਿਆਰ ਦੇ ਦੀਵੇ ਬਾਲੀਏ ਤੇ ਮਨਾਂ ਨੂੰ ਜਗਾਈਏ।

-ਰਵਿੰਦਰ ਸਿੰਘ ਰੇਸ਼ਮ
ਪਿੰਡ ਨੱਥੂਮਾਜਰਾ (ਸੰਗਰੂਰ)।

15/12/2016

 ਮੋਦੀ ਸਰਕਾਰ ਨੂੰ ਸੱਚ ਦਾ ਸ਼ੀਸ਼ਾ ਦਿਖਾਇਆ
9 ਦਸੰਬਰ ਦੇ 'ਅਜੀਤ' ਵਿਚ ਡਾ: ਬਰਜਿੰਦਰ ਸਿੰਘ ਹਮਦਰਦ ਜੀ ਦੀ ਲਿਖੀ ਸੰਪਾਦਕੀ 'ਭਰਦਾ ਜਾ ਰਿਹੈ ਸਬਰ ਦਾ ਪਿਆਲਾ' ਪੜ੍ਹ ਕੇ ਅਨੰਦ ਆ ਗਿਆ। ਇਸ ਸੰਪਾਦਕੀ ਵਿਚ ਡਾ: ਬਰਜਿੰਦਰ ਸਿੰਘ ਹਮਦਰਦ ਜੀ ਨੇ ਮੋਦੀ ਸਰਕਾਰ ਨੂੰ ਸੱਚ ਦਾ ਸ਼ੀਸ਼ਾ ਦਿਖਾਇਆ ਹੈ। ਅੱਜ ਵੱਡੀ ਗਿਣਤੀ ਵਿਚ ਭਾਰਤੀ ਖ਼ਬਰਾਂ ਵਾਲੇ ਚੈਨਲ ਜਿਥੇ ਮੋਦੀ ਸਰਕਾਰ ਦਾ ਗੁਣਗਾਣ ਕਰ ਰਹੇ ਹਨ ਅਤੇ ਮੀਡੀਆ ਦਾ ਇਕ ਹਿੱਸਾ ਵੀ ਮੋਦੀ ਸਰਕਾਰ ਦੇ ਨੋਟਬੰਦੀ ਦੇ ਤੁਗਲਕੀ ਫੈਸਲੇ ਨੂੰ ਸਹੀ ਠਹਿਰਾਅ ਰਿਹਾ ਹੈ, ਉਥੇ ਡਾ: ਬਰਜਿੰਦਰ ਸਿੰਘ ਹਮਦਰਦ ਜੀ ਨੇ ਆਪਣੀ ਸੰਪਾਦਕੀ ਵਿਚ ਬਿਲਕੁਲ ਸੱਚ ਲਿਖ ਕੇ ਆਮ ਲੋਕਾਂ ਦੀ ਗੱਲ ਕੀਤੀ ਹੈ ਅਤੇ ਆਮ ਲੋਕਾਂ ਦੇ ਜ਼ਖ਼ਮਾਂ ਉੱਪਰ ਮੱਲ੍ਹਮ ਲਗਾਉਣ ਦਾ ਕੰਮ ਕੀਤਾ ਹੈ, ਜਿਸ ਲਈ ਡਾ: ਹਮਦਰਦ ਵਧਾਈ ਦੇ ਪਾਤਰ ਹਨ। ਇਨ੍ਹਾਂ ਗੱਲਾਂ ਕਾਰਨ ਹੀ 'ਅਜੀਤ' ਪੰਜਾਬੀ ਦਾ ਇਕ ਨੰਬਰ ਅਖ਼ਬਾਰ ਬਣਿਆ ਹੋਇਆ ਹੈ।


-ਜਗਮੋਹਨ ਸਿੰਘ ਲੱਕੀ
ਲੱਕੀ ਨਿਵਾਸ, 61-ਏ ਵਿੱਦਿਆ ਨਗਰ, ਪਟਿਆਲਾ।


ਅਵਾਰਾ ਪਸ਼ੂ
ਵਰਤਮਾਨ ਸਮੇਂ ਵਿਚ ਅਵਾਰਾ ਪਸ਼ੂਆਂ ਦੀ ਗਿਣਤੀ ਵਿਚ ਲਗਾਤਾਰ ਵਾਧਾ ਹੁੰਦਾ ਜਾ ਰਿਹਾ ਹੈ ਜੋ ਕਿ ਬਹੁਤ ਹੀ ਵੱਡੀ ਚਿੰਤਾ ਦਾ ਵਿਸ਼ਾ ਹੈ। ਸੜਕੀ ਦੁਰਘਟਨਾਵਾਂ ਤੋਂ ਲੈ ਕੇ ਫ਼ਸਲਾਂ ਦੀ ਬਰਬਾਦੀ ਤੱਕ ਅਵਾਰਾ ਪਸ਼ੂਆਂ ਵੱਲੋਂ ਕੀਤੇ ਜਾ ਰਹੇ ਨੁਕਸਾਨ ਤੋਂ ਅਸੀਂ ਸਾਰੇ ਭਲੀਭਾਂਤ ਜਾਣੂ ਹਾਂ। ਟੀ.ਵੀ. ਚੈਨਲਾਂ ਅਤੇ ਅਖ਼ਬਾਰਾਂ ਵਿਚ ਅਸੀਂ ਲਗਾਤਾਰ ਹਰ ਰੋਜ਼ ਇਸ ਬਾਰੇ ਸੁਣਦੇ ਹਾਂ। ਜ਼ਿਆਦਾਤਰ ਸੜਕੀ ਦੁਰਘਟਨਾਵਾਂ ਦੇ ਕਾਰਨ ਇਹ ਪਸ਼ੂ ਬਣ ਰਹੇ ਹਨ। ਸੜਕਾਂ 'ਤੇ ਜਾ ਰਹੇ ਵਾਹਨ ਚਾਲਕਾਂ ਨੂੰ ਇਹ ਵੀ ਨਹੀਂ ਪਤਾ ਚਲਦਾ ਕਿ ਕਦੋਂ ਇਹ ਅੱਗੇ ਆ ਜਾਣ ਤੇ ਜ਼ਿੰਦਗੀ ਤੋਂ ਹੱਥ ਧੋਣੇ ਪੈ ਜਾਣ। ਇਥੇ ਹੀ ਬਸ ਨਹੀਂ ਫ਼ਸਲਾਂ ਦੀ ਦਿਨ-ਬ-ਦਿਨ ਹੋ ਰਹੀ ਬਰਬਾਦੀ ਦਾ ਕਾਰਨ ਵੀ ਇਹ ਅਵਾਰਾ ਪਸ਼ੂ ਬਣ ਰਹੇ ਹਨ। ਕਿਸਾਨ ਦੀ ਫ਼ਸਲ ਨੂੰ ਇਹ ਪਸ਼ੂ ਖਾ ਕੇ ਤੇ ਲਿਤਾੜ ਕੇ ਬਹੁਤ ਵੱਡਾ ਨੁਕਸਾਨ ਕਰ ਰਹੇ ਹਨ। ਇਕ ਕਿਸਾਨ ਜੋ ਦਿਨ ਦਾ ਕੰਮ ਕਾਰ ਕਰਨ ਤੋਂ ਬਾਅਦ ਵੀ ਆਰਾਮ ਨਹੀਂ ਕਰ ਸਕਦਾ ਕਿਉਂਕਿ ਇਹ ਪਸ਼ੂ ਰਾਤ ਦੇ ਸਮੇਂ ਜ਼ਿਆਦਾ ਨੁਕਸਾਨ ਕਰਦੇ ਹਨ, ਜਿਸ ਤੋਂ ਕਿਸਾਨੀ ਜੀਵਨ ਵੀ ਬਹੁਤ ਪ੍ਰੇਸ਼ਾਨ ਹੈ। ਕਈ ਜਗ੍ਹਾ ਉੱਪਰ ਚਲਦਿਆਂ ਹੋਇਆਂ ਰਾਹੀਆਂ ਨੂੰ ਵੀ ਸਿੰਗਾਂ ਦੀ ਮਾਰ ਨਾਲ ਮਾਰ ਦਿੱਤਾ ਜਾਂਦਾ ਹੈ। ਹੁਣ ਸਵਾਲ ਇਹ ਖੜ੍ਹਾ ਹੁੰਦਾ ਹੈ ਕਿ ਇਸ ਹੋਣ ਵਾਲੇ ਨੁਕਸਾਨ ਦਾ ਜ਼ਿੰਮੇਵਾਰ ਕੌਣ ਹੈ? ਵੱਡੀਆਂ-ਵੱਡੀਆਂ ਦੁਰਘਟਨਾਵਾਂ ਤੋਂ ਬਾਅਦ ਵੀ ਸਥਿਤੀ ਜਿਉਂ ਦੀ ਤਿਉਂ ਬਣੀ ਹੋਈ ਹੈ ਕਿਉਂਕਿ ਸਰਕਾਰ ਤੇ ਪ੍ਰਸ਼ਾਸਨ ਇਸ ਵੱਲ ਕੋਈ ਠੋਸ ਕਦਮ ਨਹੀਂ ਚੁੱਕ ਰਿਹਾ, ਜਿਸ ਨਾਲ ਇਸ ਦਾ ਸਾਰਥਕ ਹੱਲ ਅਤੇ ਪੈਦਾ ਹੋ ਰਹੀਆਂ ਸਮੱਸਿਆਵਾਂ ਨਾਲ ਨਜਿੱਠਿਆ ਜਾਵੇ। ਪਿੰਡਾਂ ਅਤੇ ਸ਼ਹਿਰਾਂ ਵਿਚ ਗਾਵਾਂ, ਮੱਝਾਂ ਜਾਂ ਵੱਛਿਆਂ ਨੂੰ ਛੱਡਣ ਵਾਲਿਆਂ ਖਿਲਾਫ਼ ਸਖ਼ਤ ਕਾਰਵਾਈ ਹੋਣੀ ਚਾਹੀਦੀ ਹੈ ਤੇ ਪਤਾ ਲੱਗਣ 'ਤੇ ਜੁਰਮਾਨਾ ਹੋਣਾ ਜ਼ਰੂਰੀ ਹੈ। ਸਮੇਂ ਦੀਆਂ ਸਰਕਾਰਾਂ ਨੂੰ ਚਾਹੀਦਾ ਹੈ ਕਿ ਇਸ ਵਿਸ਼ੇ ਪ੍ਰਤੀ ਗੰਭੀਰ ਹੁੰਦਿਆਂ ਸਖ਼ਤ ਕਾਨੂੰਨ ਬਣਾਏ ਜਾਣ, ਜਿਸ ਨਾਲ ਅਜਿਹੀਆਂ ਸਮੱਸਿਆਵਾਂ ਦੁਬਾਰਾ ਪੈਦਾ ਨਾ ਹੋਣ।


-ਰਵਿੰਦਰ ਸਿੰਘ ਰੇਸ਼ਮ
ਪਿੰਡ ਉਮਰਪੁਰਾ, ਨੱਥੂਮਾਜਰਾ, ਸੰਗਰੂਰ।

14/12/2016

 ਮਾਤ ਭਾਸ਼ਾ ਦਾ ਸਤਿਕਾਰ ਵਧਾਓ

ਮਾਤਾ ਭਾਸ਼ਾ ਸੰਚਾਰ ਦਾ ਅਜਿਹਾ ਸਾਧਨ ਹੈ, ਜਿਸ ਰਾਹੀਂ ਅਸੀਂ ਆਪਣੇ ਵਿਚਾਰ ਲਿਖ ਕੇ ਜਾਂ ਬੋਲ ਕੇ ਪ੍ਰਗਟ ਕਰ ਸਕਦੇ ਹਾਂ। ਵਰਤਮਾਨ ਸਮੇਂ ਵਿਚ ਇਸ ਭਾਸ਼ਾ ਦਾ ਮਹੱਤਵ ਘਟ ਰਿਹਾ ਹੈ। ਅੰਗਰੇਜ਼ੀ ਤੇ ਹਿੰਦੀ ਭਾਸ਼ਾਵਾਂ ਦਾ ਪ੍ਰਭਾਵ ਵਧ ਰਿਹਾ ਹੈ। ਸਕੂਲਾਂ, ਕਾਲਜਾਂ, ਦਫ਼ਤਰਾਂ, ਘਰਾਂ ਵਿਚ ਵੀ ਅੰਗਰੇਜ਼ੀ ਭਾਸ਼ਾ ਨੂੰ ਪਹਿਲ ਦਿੱਤੀ ਜਾਣ ਲੱਗ ਪਈ ਹੈ। ਰਾਸ਼ਟਰੀ ਪੱਧਰ ਦੇ ਇਮਤਿਹਾਨ ਵੀ ਅੰਗਰੇਜ਼ੀ ਤੇ ਹਿੰਦੀ ਭਾਸ਼ਾ ਵਿਚ ਲਏ ਜਾਂਦੇ ਹਨ। ਸਾਡਾ ਸਾਰਿਆਂ ਦਾ ਫਰਜ਼ ਬਣਦਾ ਹੈ ਕਿ ਅਸੀਂ ਹੋਰ ਭਾਸ਼ਾਵਾਂ ਦੇ ਨਾਲ-ਨਾਲ ਮਾਤ-ਭਾਸ਼ਾ ਨੂੰ ਪਹਿਲ ਦੇਈਏ। ਵਿਦੇਸ਼ਾਂ ਵਿਚ ਜਾ ਕੇ ਵੀ ਇਸ ਭਾਸ਼ਾ ਦਾ ਪ੍ਰਚਾਰ ਕਰਨਾ ਚਾਹੀਦਾ ਹੈ। ਸਾਨੂੰ ਪੰਜਾਬੀ ਹੋਣ 'ਤੇ ਪੂਰਾ ਮਾਣ ਹੋਣਾ ਚਾਹੀਦਾ ਹੈ। ਮਾਤ ਭਾਸ਼ਾ ਨੂੰ ਕਦੇ ਵੀ ਭੁੱਲਣਾ ਨਹੀਂ ਚਾਹੀਦਾ। ਮਾਤ ਭਾਸ਼ਾ ਦਾ ਪ੍ਰਚਾਰ ਕਰਨ ਦੇ ਲਈ ਸਕੂਲਾਂ ਵਿਚ ਵੱਧ ਤੋਂ ਵੱਧ ਲੇਖ ਮੁਕਾਬਲੇ, ਭਾਸ਼ਣ ਮੁਕਾਬਲੇ ਕਰਵਾਉਣੇ ਚਾਹੀਦੇ ਹਨ। ਮਾਤਾ-ਪਿਤਾ ਤੇ ਅਧਿਆਪਕਾਂ ਦਾ ਫ਼ਰਜ਼ ਬਣਦਾ ਹੈ ਕਿ ਉਹ ਬੱਚਿਆਂ ਨੂੰ ਵੱਧ ਤੋਂ ਵੱਧ ਮਾਤ ਭਾਸ਼ਾ ਲਿਖਣ, ਬੋਲਣ ਲਈ ਪ੍ਰੇਰਿਤ ਕਰਨ। ਮਾਤ ਭਾਸ਼ਾ ਸਾਡੇ ਸਮਾਜਿਕ, ਮਾਨਸਿਕ, ਚਰਿੱਤਰ ਦੇ ਵਿਕਾਸ ਵਿਚ ਸਹਾਈ ਹੁੰਦੀ ਹੈ।

-ਰਾਜਵੀਰ ਕੌਰ
ਪਿੰਡ ਰਾਜਪੁਰ ਭਾਈਆਂ, ਜ਼ਿਲ੍ਹਾ ਹੁਸ਼ਿਆਰਪੁਰ।

ਤਕਨਾਲੋਜੀ ਤੇ ਨਸ਼ੇ ਦੀ ਗ਼ੁਲਾਮੀ

ਅੱਜ ਦੇ ਵਿਗਿਆਨਕ ਯੁੱਗ ਅੰਦਰ ਮਨੁੱਖ ਦੀ ਜ਼ਿੰਦਗੀ ਬਹੁਤ ਸੁਖਾਲੀ ਹੋ ਗਈ ਹੈ। ਉਸ ਨੇ ਵਿਗਿਆਨਕ ਦ੍ਰਿਸ਼ਟੀਕੋਣ ਨਾਲ ਬਹੁਤ ਸਾਰੀਆਂ ਸਮੱਸਿਆਵਾਂ 'ਤੇ ਕਾਬੂ ਪਾ ਲਿਆ ਹੈ। ਅੱਜ ਦੇ ਮਨੁੱਖ ਨੂੰ ਆਪਣੀਆਂ ਲੋੜਾਂ ਦੀ ਪੂਰਤੀ ਲਈ ਹੁਣ ਵਿਸ਼ੇਸ਼ ਯਤਨ ਨਹੀਂ ਕਰਨੇ ਪੈਂਦੇ। ਤਕਨਾਲੋਜੀ ਦੇ ਖੇਤਰ ਵਿਚ ਮਨੁੱਖ ਨੇ ਬੇਮਿਸਾਲ ਤਰੱਕੀ ਕੀਤੀ ਹੈ। ਪਰੰਤੂ ਕਿਤੇ ਨਾ ਕਿਤੇ ਵਿਗਿਆਨ ਅਤੇ ਤਕਨਾਲੋਜੀ ਦੀ ਮਾਰ ਪੜ੍ਹੀ-ਲਿਖੀ ਨੌਜਵਾਨ ਪੀੜ੍ਹੀ ਨੂੰ ਬਰਬਾਦ ਕਰ ਰਹੀ ਹੈ। ਉਹ ਨਵੀਂ ਤਕਨਾਲੋਜੀ ਦਾ ਗ਼ੁਲਾਮ ਬਣ ਕੇ ਰਹਿ ਗਿਆ ਹੈ। ਜੇਕਰ ਘਰ ਵਿਚ ਇਕ ਦਿਨ ਇੰਟਰਨੈੱਟ ਨਾ ਚੱਲੇ ਤਾਂ ਉਹ ਖਫ਼ਾ ਹੋ ਜਾਂਦਾ ਹੈ। ਮੋਬਾਈਲ 'ਤੇ ਨੈੱਟ 24 ਘੰਟੇ ਉਸ ਦਾ ਪਿੱਛਾ ਕਰਦਾ ਹੈ। ਇੰਟਰਨੈੱਟ ਤੇ ਮੋਬਾਈਲ ਤੋਂ ਬਿਨਾਂ ਅੱਜ ਉਹ ਆਪਣੇ-ਆਪ ਨੂੰ ਅਧੂਰਾ ਸਮਝਦਾ ਹੈ। ਇਹ ਨਜ਼ਾਰਾ ਅੱਜ ਹਰ ਪਿੰਡ ਅਤੇ ਸ਼ਹਿਰ ਵਿਚ ਦੇਖਿਆ ਜਾ ਸਕਦਾ ਹੈ। ਅੱਜ ਦੇ ਨੌਜਵਾਨ ਦੀ ਮਾਨਸਿਕ ਤੇ ਸਰੀਰਕ ਸਿਹਤ ਡਾਵਾਂਡੋਲ ਹੋ ਰਹੀ ਹੈ। ਅੱਖਾਂ ਖਰਾਬ ਹੋ ਰਹੀਆਂ ਹਨ ਅਤੇ ਹਾਜ਼ਮਾ ਦਰੁਸਤ ਨਹੀਂ ਰਿਹਾ। ਸਿੱਖਿਆ ਦਾ ਮਾਟੋ ਕੇਵਲ ਕਿਤਾਬੀ ਗਿਆਨ ਨਹੀਂ, ਵਿਵਹਾਰਕ ਤੇ ਨੈਤਿਕ ਸਿੱਖਿਆ ਵੀ ਇਸ ਦਾ ਹਿੱਸਾ ਹੈ। ਸਿੱਖਿਆ ਦਾ ਭਾਵ ਹੈ ਮਨੁੱਖ ਦਾ ਸਰਵਪੱਖੀ ਗਿਆਨ ਪ੍ਰੰਤੂ ਅੱਜ ਦਾ ਨੌਜਵਾਨ ਗ੍ਰੈਜੂਏਟ ਅਤੇ ਪੋਸਟ-ਗ੍ਰੈਜੂਏਟ ਹੋ ਕੇ ਵੀ ਸਿਰਫ ਕਿਤਾਬੀ ਤੇ ਪਾਠਕ੍ਰਮ ਦੇ ਗਿਆਨ ਤੱਕ ਹੀ ਸੀਮਤ ਰਹਿ ਗਿਆ ਹੈ। ਸਿਹਤ ਉਸ ਲਈ ਸੈਕੰਡਰੀ ਵਿਸ਼ਾ ਬਣ ਕੇ ਰਹਿ ਗਈ ਹੈ। ਨਸ਼ਿਆਂ ਦੀ ਦਲਦਲ ਵਿਚ ਫਸਿਆ ਉਹ ਆਧੁਨਿਕ ਸਹੂਲਤਾਂ ਲਈ ਤਰਸ ਰਿਹਾ ਹੈ। ਮਾਂ-ਪਿਓ ਦੀ ਦਸਾਂ ਨਹੁੰਆਂ ਦੀ ਕਮਾਈ ਉਸ ਨੇ ਪਾਣੀ ਵਾਂਗ ਰੋੜ੍ਹ ਦਿੱਤੀ ਹੈ। ਅੱਜ ਸਮੇਂ ਦੀ ਜ਼ਰੂਰਤ ਹੈ ਕਿ ਹਰ ਪੰਜਾਬੀ ਨੌਜਵਾਨ ਆਪਣੀ ਵਿਰਾਸਤ, ਆਪਣੇ ਸੱਭਿਆਚਾਰਕ ਪਿਛੋਕੜ ਨੂੰ ਦੇਖਦੇ ਹੋਏ ਆਧੁਨਿਕ ਤਕਨਾਲੋਜੀ ਅਤੇ ਨਸ਼ਿਆਂ ਦੇ ਮਕੜਜਾਲ ਵਿਚੋਂ ਨਿਕਲ ਕੇ ਅਸਲ ਪੰਜਾਬੀ ਹੋਣ ਦਾ ਆਪਣਾ ਫਰਜ਼ ਪਛਾਣੇ।

-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀ ਖ਼ਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

10/12/2016

 ਜ਼ਿੰਦਗੀ ਦਾ ਵਿਗੜਿਆ ਗਣਿਤ
ਨੋਟਬੰਦੀ ਨੇ ਭਾਰਤੀ ਜ਼ਿੰਦਗੀ ਦੀ ਰਫ਼ਤਾਰ ਨੂੰ ਬਰੇਕਾਂ ਲਗਾ ਦਿੱਤੀਆਂ ਹਨ। ਕਾਲੇ ਧਨ ਤੇ ਭ੍ਰਿਸ਼ਟਾਚਾਰ ਪ੍ਰਤੀ ਅਹਿਮ ਫ਼ੈਸਲੇ ਵਜੋਂ ਪ੍ਰਚਾਰੇ ਜਾ ਰਹੇ ਇਸ ਕਦਮ ਨਾਲ ਧਨਾਢ ਲੋਕਾਂ ਨੂੰ ਕੋਈ ਫ਼ਰਕ ਪਿਆ ਹੈ ਜਾਂ ਨਹੀਂ ਪਰ ਇਸ ਫ਼ੈਸਲੇ ਨੇ ਆਮ ਜ਼ਿੰਦਗੀ ਨੂੰ ਬਹੁਤ ਬੁਰੀ ਤਰ੍ਹਾਂ ਪ੍ਰਭਾਵਿਤ ਕੀਤਾ ਹੈ। ਅਜਿਹੇ ਫ਼ੈਸਲਿਆਂ ਦੀ ਜ਼ਰੂਰਤ ਹੈ ਜਿਸ ਨਾਲ ਕਾਲਾ ਬਾਜ਼ਾਰੀ ਤੇ ਭ੍ਰਿਸ਼ਟ ਤਰੀਕਿਆਂ ਨਾਲ ਧਨ ਇਕੱਠਾ ਕਰ ਰਹੇ ਲੋਕਾਂ ਦੇ ਨੈੱਟਵਰਕ ਨੂੰ ਤਬਾਹ ਕੀਤਾ ਜਾ ਸਕੇ। ਪਰ ਭਾਰਤੀ ਜਨਸੰਖਿਆ ਅਤੇ ਕਰੰਸੀ ਦੇ ਫੈਲਾਅ ਦੇ ਹਿਸਾਬ ਨਾਲ ਅਜਿਹੇ ਫ਼ੈਸਲੇ ਨੂੰ ਲਾਗੂ ਕਰਨ ਲਈ ਜ਼ਮੀਨੀ ਹਕੀਕਤਾਂ ਨੂੰ ਚੰਗੀ ਤਰ੍ਹਾਂ ਸਮਝਣ ਤੇ ਸੁਚੱਜੇ ਪ੍ਰਬੰਧ ਕਰਨ ਵਿਚ ਪ੍ਰਸ਼ਾਸਨਿਕ ਤਾਣਾ-ਬਾਣਾ ਪੂਰੀ ਤਰ੍ਹਾਂ ਫੇਲ੍ਹ ਸਿੱਧ ਹੋਇਆ। ਇਸ ਦਾ ਖਮਿਆਜ਼ਾ ਆਮ ਵਰਗ ਨੂੰ ਹੀ ਭੁਗਤਣਾ ਪੈ ਰਿਹਾ ਹੈ। ਲੋਕਾਂ ਦੀ ਜ਼ਿੰਦਗੀ ਬੈਂਕਾਂ ਦੇ ਗੇੜਿਆਂ ਵਿਚ ਉਲਝ ਕੇ ਰਹਿ ਗਈ ਹੈ। ਹਾਲਤ ਇਹ ਹੈ ਕਿ ਕਈ ਥਾਵਾਂ 'ਤੇ ਆਪਣਾ ਪੈਸਾ ਪ੍ਰਾਪਤ ਕਰਨ ਲਈ ਲੋਕ ਰਾਤਾਂ ਵੀ ਬੈਂਕਾਂ ਮੂਹਰੇ ਕੱਟ ਰਹੇ ਹਨ ਤੇ ਸਰਕਾਰ ਮੁਤਾਬਿਕ ਹਾਲਾਤ ਸੁਧਰਨ ਨੂੰ ਅਜੇ ਤਿੰਨ-ਚਾਰ ਮਹੀਨੇ ਹੋਰ ਲੱਗ ਸਕਦੇ ਹਨ। ਸੋ, ਲੋੜ ਹੈ ਕਿ ਲੋਕਾਂ ਨਾਲ ਜੁੜੇ ਹਰ ਫ਼ੈਸਲੇ ਨੂੰ ਪੂਰੀ ਤਿਆਰੀ ਤੇ ਚੰਗੀ ਤਰ੍ਹਾਂ ਸੋਚ, ਵਿਚਾਰ ਤੇ ਸਮਝ ਕੇ ਹੀ ਅਮਲ ਵਿਚ ਲਿਆਂਦਾ ਜਾਵੇ।


-ਬਲਜਿੰਦਰ ਸਿੰਘ ਸਮਾਘ
ਸ੍ਰੀ ਮੁਕਤਸਰ ਸਾਹਿਬ।

 

9/12/2016

 ਕਿਰਤ ਦਾ ਸਤਿਕਾਰ

ਮਨੁੱਖੀ ਜੀਵਨ ਵਿਚ ਕਿਰਤ ਦਾ ਅਹਿਮ ਸਥਾਨ ਹੈ। ਸ੍ਰੀ ਗੁਰੂ ਨਾਨਕ ਦੇਵ ਜੀ ਨੇ ਵੀ ਕਿਰਤ ਕਰਨ ਦੀ ਸਿੱਖਿਆ ਦਿੱਤੀ ਸੀ। ਪ੍ਰੰਤੂ ਅਜੋਕੇ ਸਮੇਂ ਵਿਚ ਆਧੁਨਿਕਤਾ ਦੀ ਦੌੜ ਵਿਚ ਨੌਜਵਾਨ ਪੀੜ੍ਹੀ ਹੱਥੀਂ ਕੰਮ ਕਰਨ ਤੋਂ ਮੁਨਕਰ ਹੋ ਰਹੀ ਹੈ। ਪੜ੍ਹਿਆ-ਲਿਖਿਆ ਨੌਜਵਾਨ ਵਰਗ ਆਪਣੇ ਦੇਸ਼ ਵਿਚ ਕੰਮ ਨੂੰ ਊਚ-ਨੀਚ ਦੀ ਕਸੌਟੀ 'ਤੇ ਪਰਖਦਾ ਹੈ, ਜਦ ਕਿ ਉਹੀ ਲੋਕ ਵਿਦੇਸ਼ਾਂ ਵਿਚ ਜਾ ਕੇ ਕੋਈ ਵੀ ਕੰਮ ਕਰਨ ਲਈ ਤਿਆਰ ਹੋ ਜਾਂਦੇ ਹਨ।
ਕੋਈ ਵੀ ਕੰਮ ਵੱਡਾ-ਛੋਟਾ ਨਹੀਂ ਹੁੰਦਾ, ਬਲਕਿ ਨਜ਼ਰੀਆ ਹੀ ਉਸ ਕੰਮ ਪ੍ਰਤੀ ਸਾਡੀ ਧਾਰਨਾ ਨੂੰ ਪੈਦਾ ਕਰਦਾ ਹੈ। ਨਿੱਤ ਵਧ ਰਹੀਆਂ ਲੁੱਟ-ਖੋਹ ਦੀਆਂ ਵਾਰਦਾਤਾਂ ਤੇ ਨਸ਼ਿਆਂ ਦਾ ਰੁਝਾਨ ਸਹੀ ਅਰਥਾਂ ਵਿਚ ਕੰਮ ਤੋਂ ਸੱਖਣੇ ਨੌਜਵਾਨ ਵਰਗ ਨੂੰ ਕਿੰਤੂ-ਪ੍ਰੰਤੂ ਦੇ ਘੇਰੇ ਵਿਚ ਲਿਆ ਖੜ੍ਹਾ ਕਰਦੇ ਹਨ। ਸਾਨੂੰ ਇਸ ਗੱਲ ਨੂੰ ਸਮਝਣਾ ਪਵੇਗਾ ਕਿ ਸਾਰੇ ਪੜ੍ਹੇ-ਲਿਖੇ ਵਰਗ ਨੂੰ ਸਰਕਾਰ ਨੌਕਰੀ 'ਤੇ ਨਹੀਂ ਲਗਾ ਸਕਦੀ ਤਾਂ ਸਾਨੂੰ ਚਾਹੀਦਾ ਹੈ ਕਿ ਸਰਕਾਰ ਵੱਲੋਂ ਚਲਾਈਆਂ ਲੋਕ ਸੇਵਾ ਯੋਜਨਾਵਾਂ ਜਿਵੇਂ ਬਾਗਬਾਨੀ, ਪਸ਼ੂ ਪਾਲਣ, ਮੱਛੀ ਪਾਲਣ ਤੇ ਹੋਰ ਵੀ ਖੇਤੀ ਸਹਾਇਕ, ਤਕਨੀਕੀ ਧੰਦਿਆਂ ਨੂੰ ਅਪਣਾ ਕੇ ਆਪਣੀ ਤੇ ਆਪਣੇ ਘਰ ਪਰਿਵਾਰ ਦੀ ਦਿਸ਼ਾ ਤੇ ਦਸ਼ਾ ਸੁਧਾਰੀਏ।

-ਮਾ: ਮਨਦੀਪ ਸਿਵੀਆ
ਪਿੰਡ ਤੇ ਡਾਕ: ਜੌੜਕੀ ਅੰਧੇ ਵਾਲੀ, ਫਾਜ਼ਿਲਕਾ।

ਨੋਟਬੰਦੀ

ਨੋਟਬੰਦੀ ਦੇ ਐਲਾਨ ਤੋਂ ਬਾਅਦ ਅਜੇ ਤੱਕ ਵੀ ਜਨਜੀਵਨ ਥਾਂ ਸਿਰ ਆਇਆ ਪ੍ਰਤੀਤ ਨਹੀਂ ਹੁੰਦਾ ਕਿਉਂਕਿ ਨੋਟਾਂ ਦੇ ਅਚਾਨਕ ਕਰਵਟ ਬਦਲਣ ਦਾ ਸਿੱਧਾ ਪ੍ਰਭਾਵ ਸਾਧਾਰਨ ਵਿਅਕਤੀਆਂ 'ਤੇ ਪਿਆ। ਕੇਂਦਰ ਸਰਕਾਰ ਵੱਲੋਂ ਸੁਚੱਜੀ ਵਿਉਂਤਬੰਦੀ ਨੂੰ ਮਨਫ਼ੀ ਕਰਕੇ ਪੁੱਟਿਆ ਇਹ ਕਦਮ ਸਾਧਾਰਨ ਲੋਕਾਂ ਲਈ ਟੇਢੀ ਖੀਰ ਬਣਿਆ ਹੋਇਆ ਹੈ।
ਸਰਕਾਰ ਨੂੰ ਚਾਹੀਦਾ ਹੈ ਕਿ ਆਮ ਵਿਅਕਤੀ ਵਾਸਤੇ ਕੁਝ ਰਾਹਤ ਮੁਹੱਈਆ ਕਰਵਾਏ ਤਾਂ ਜੋ ਸੁਚੱਜੀ ਵਿਉਂਤਬੰਦੀ ਅਨੁਸਾਰ ਪੈਸਿਆਂ ਦਾ ਲੈਣ-ਦੇਣ ਕੀਤਾ ਜਾ ਸਕੇ ਸਾਧਾਰਨ ਵਿਅਕਤੀ ਦਾ ਕਾਲੇ ਧਨ ਨਾਲ ਤਾਂ ਕੋਈ ਵਾਹ-ਵਾਸਤਾ ਨਹੀਂ, ਬਲਕਿ ਬੇਕਸੂਰਾਂ ਵਜੋਂ ਹੀ ਲੰਬੀਆਂ ਕਤਾਰਾਂ 'ਚ ਆਪਣੀ ਵਾਰੀ ਦੀ ਉਡੀਕ 'ਚ ਖੜ੍ਹਾ ਹੈ। ਡਾਵਾਂਡੋਲ ਸਥਿਤੀ ਨੂੰ ਭਾਂਪਦਿਆਂ ਸਰਕਾਰ ਨੂੰ ਨੋਟਬੰਦੀ ਦੀ ਸੁਚੱਜੀ ਵਿਉਂਤਬੰਦੀ ਅਪਣਾਅ ਕੇ ਸੁਖਦ ਸੇਵਾਵਾਂ ਮੁਹੱਈਆ ਕਰਵਾਉਣੀਆਂ ਚਾਹੀਦੀਆਂ ਹਨ।

-ਕਮਲਜੀਤ ਸਿੰਘ
ਪਿੰਡ ਮੱਲ੍ਹੀਆਂ (ਕਰਤਾਰਪੁਰ)।

ਸੜਕ ਹਾਦਸਿਆਂ ਦਾ ਕਹਿਰ

ਅੱਜਕਲ੍ਹ ਜ਼ਿਆਦਾ ਮੌਤਾਂ ਸੜਕ ਹਾਦਸਿਆਂ ਕਾਰਨ ਹੀ ਹੁੰਦੀਆਂ ਹਨ। ਪਤਾ ਨਹੀਂ ਕਿੰਨੇ ਘਰਾਂ ਵਿਚ ਹਰ ਰੋਜ਼ ਸੋਗ ਮਨਾਇਆ ਜਾਂਦਾ ਹੈ। ਨਿਯਮਾਂ ਦੀ ਇਥੋਂ ਤੱਕ ਉਲੰਘਣਾ ਕੀਤੀ ਜਾਂਦੀ ਹੈ ਕਿ ਕਈ ਵਾਹਨ ਚਾਲਕਾਂ ਕੋਲ ਲਾਇਸੰਸ ਵੀ ਨਹੀਂ ਹੁੰਦਾ। ਜਿਨ੍ਹਾਂ ਕੋਲ ਲਾਇਸੰਸ ਹੁੰਦਾ ਹੈ, ਉਨ੍ਹਾਂ ਵਿਚੋਂ ਬਹੁਤੇ ਅਣਜਾਣ ਹੀ ਹੁੰਦੇ ਹਨ। ਹਾਦਸਿਆਂ ਦਾ ਕਾਰਨ ਡਰਾਈਵਰਾਂ ਵੱਲੋਂ ਵਰਤੇ ਜਾਂਦੇ ਮੋਬਾਈਲ ਫੋਨ ਵੀ ਹੁੰਦੇ ਹਨ। ਵਾਹਨ ਚਲਾਉਂਦੇ ਹੋਏ ਫੋਨ ਦੀ ਵਰਤੋਂ ਸਖਤੀ ਨਾਲ ਬੰਦ ਕੀਤੀ ਜਾਵੇ। ਸੜਕਾਂ 'ਤੇ ਅਵਾਰਾ ਪਸ਼ੂਆਂ ਅਤੇ ਹੋਰ ਵਾਹਨਾਂ ਦਾ ਖੜ੍ਹਾ ਕਰਨਾ ਆਦਿ ਵੀ ਹਾਦਸਿਆਂ ਦਾ ਕਾਰਨ ਹਨ। ਲੋਕਾਂ ਵਿਚ ਜ਼ਿੰਮੇਵਾਰੀ ਦੇ ਅਹਿਸਾਸ ਅਤੇ ਸਰਕਾਰ ਦੇ ਸਹਿਯੋਗ ਨਾਲ ਹੀ ਹਾਦਸੇ ਘਟ ਸਕਦੇ ਹਨ ਅਤੇ ਕਈ ਅਨਮੋਲ ਜਾਨਾਂ ਬਚ ਸਕਦੀਆਂ ਹਨ।

-ਮਨਿੰਦਰ ਸਿੰਘ ਰਾਜੂ
ਗਰਚਾ ਨਰਸਰੀ, ਧਨੌਲਾ ਰੋਡ, ਬਰਨਾਲਾ।

08/12/2016

 ਰੁੱਖ ਅਤੇ ਪਾਣੀ
ਵਾਤਾਵਰਨ ਨੂੰ ਸ਼ੁੱਧ ਰੱਖਣ ਲਈ ਜਿਥੇ ਰੁੱਖਾਂ ਦੀ ਹੋਂਦ ਜ਼ਰੂਰੀ ਹੈ, ਉਥੇ ਪਾਣੀ ਦੀ ਬੂੰਦ-ਬੂੰਦ ਨੂੰ ਵੀ ਸੰਭਾਲਣ ਦੀ ਲੋੜ ਹੈ। ਸਾਡੀ ਸਾਰਿਆਂ ਦੀ ਡਿਊਟੀ ਬਣਦੀ ਹੈ ਕਿ ਅਸੀਂ ਰੁੱਖ ਲਗਾ ਕੇ ਆਪਣੇ ਵਾਤਾਵਰਨ ਨੂੰ ਸ਼ੁੱਧ ਰੱਖੀਏ। ਕੁਦਰਤ ਹੀ ਮਨੁੱਖ ਦੀ ਅਸਲ ਪਛਾਣ ਹੈ, ਇਸ ਲਈ ਵਾਤਾਵਰਨ ਨੂੰ ਦੂਸ਼ਿਤ ਹੋਣ ਤੋਂ ਬਚਾਉਣ ਲਈ ਸਾਨੂੰ ਉੱਚ ਕਦਮ ਚੁੱਕਣੇ ਚਾਹੀਦੇ ਹਨ ਅਤੇ ਕੁਦਰਤੀ ਸੋਮਿਆਂ ਨੂੰ ਬਚਾ ਕੇ ਰੱਖਣ ਵਾਸਤੇ ਹਰੇਕ ਘਰ, ਗਲੀ, ਮੁਹੱਲੇ, ਸੜਕਾਂ, ਸਕੂਲਾਂ ਅਤੇ ਕਾਲਜਾਂ ਵਿਚ ਰੁੱਖ ਲਗਾਉਣੇ ਚਾਹੀਦੇ ਹਨ। ਪਾਣੀ ਇਨਸਾਨ ਦੀਆਂ ਅਥਾਹ ਲੋੜਾਂ ਦਾ ਮਹਾਂਸਾਗਰ ਹੈ। ਪਾਣੀ ਇਨਸਾਨ ਤੋਂ ਲੈ ਕੇ ਹਰੇਕ ਜੀਵ ਦੇ ਜਿਊਂਦੇ ਰਹਿਣ ਵਾਸਤੇ ਜ਼ਰੂਰੀ ਹੈ। ਪਰ ਲੋੜ ਹੈ ਕਿ ਅਸੀਂ ਪਾਣੀ ਦੀ ਵਰਤੋਂ ਬੜੀ ਸਿਆਣਪ ਤੇ ਸੂਝਬੂਝ ਨਾਲ ਕਰੀਏ ਤਾਂ ਕਿ ਬੂੰਦ-ਬੂੰਦ ਬਚਾਇਆ ਪਾਣੀ ਕਿਸੇ ਦੂਜੇ ਦੀ ਲੋੜ ਨੂੰ ਪੂਰਾ ਕਰ ਸਕੇ। ਸੋ, ਆਓ ਪ੍ਰਣ ਕਰੀਏ ਕਿ ਸ਼ੁੱਧ ਵਾਤਾਵਰਨ ਦੀ ਸਿਰਜਣਾ ਲਈ ਰੁੱਖ ਲਗਾਈਏ ਤੇ ਪਾਣੀ ਨੂੰ ਬੇਅਰਥ ਹੋਣ ਤੋਂ ਬਚਾਈਏ।


-ਮਨਿੰਦਰ ਸਿੰਘ ਰਾਜੂ
ਗਰਚਾ ਨਰਸਰੀ, ਧਨੌਲਾ ਰੋਡ, ਬਰਨਾਲਾ।


ਬਹਿਸ ਸਾਰਥਿਕ ਹੋਵੇ
ਜਮਹੂਰੀਅਤ ਵਿਚ ਪ੍ਰੈੱਸ ਲੋਕ ਆਵਾਜ਼ ਹੁੰਦੀ ਹੈ। ਇਸੇ ਪ੍ਰਸੰਗ ਵਿਚ ਟੈਲੀਵਿਜ਼ਨ 'ਤੇ ਬਹਿਸ ਦਾ ਪ੍ਰੋਗਰਾਮ ਚਲਦਾ ਹੈ ਤਾਂ ਕਿ ਲੋਕ ਸਮੱਸਿਆ ਦਾ ਹੱਲ ਨਿਕਲੇ। ਪਿਛਲੇ ਕੁਝ ਸਮੇਂ ਤੋਂ ਬਹਿਸ ਦੇ ਕੁਝ ਭਾਗੀਦਾਰਾਂ ਉੱਤੇ ਸੈਕਸ਼ਪੀਅਰ ਦਾ ਕਥਨ 'ਜਿਸ ਬੰਦੇ ਦੇ ਪੱਲੇ ਕੁਝ ਨੀ ਹੁੰਦਾ ਉਹ ਲੋਕਾਂ ਵਿਚ ਨਮੋਸ਼ੀ ਤੋਂ ਬਚਣ ਲਈ ਉੱਚੀ ਆਵਾਜ਼ ਵਿਚ ਰੌਲਾ ਪਾਉਣਾ ਸ਼ੁਰੂ ਕਰ ਦਿੰਦਾ ਹੈ' ਪੂਰਾ ਢੁੱਕਦਾ ਹੈ। ਇਸ ਸਬੰਧੀ ਰਾਜਨੀਤਕ ਖੇਤਰ ਵੱਧ ਰੋਲ ਅਦਾ ਕਰਦਾ ਹੈ। ਸ਼ਿਸ਼ਟਾਚਾਰ ਇਹ ਹੈ ਕਿ ਬੰਦੇ ਨੂੰ ਗੱਲ ਪੂਰੀ ਕਰਨ ਦਾ ਮੌਕਾ ਮਿਲੇ ਉਸ ਤੋਂ ਬਾਅਦ ਦੂਜਾ ਜਵਾਬ ਦੇਵੇ। ਪਰ ਅੱਜ ਇਸ ਮੁੱਦੇ 'ਤੇ ਕਾਂਵਾਂ-ਰੌਲੀ ਪੈਂਦੀ ਹੈ। ਸੱਭਿਅਤਾ ਕੋਹਾਂ ਦੂਰ ਹੁੰਦੀ ਹੈ। ਸਰੋਤਿਆਂ ਨੂੰ ਇਹ ਲੋਕ ਕੀ ਸਮਝਦੇ ਹਨ, ਇਸ ਦਾ ਜਵਾਬ ਵੀ ਇਹੀ ਦੇ ਸਕਦੇ ਹਨ। ਲੋਕਾਂ ਦੀ ਲਾਚਾਰੀ ਦਾ ਜੋ ਫਾਇਦਾ ਮਿਲਣਾ ਸੀ, ਉਹ ਮਿਲ ਚੁੱਕਾ ਹੈ। ਨਵਾਂ ਅਧਿਆਏ ਸ਼ੁਰੂ ਹੋ ਚੁੱਕਾ ਹੈ। ਇਸ ਨੂੰ ਜਾਣਦੇ ਹੋਏ ਅਣਜਾਣ ਬਣੀ ਜਾਂਦੇ ਹਨ। ਕਾਂਵਾਂ-ਰੌਲੀ ਪਾ ਕੇ ਖੁਦ ਨੂੰ ਢਾਰਸ ਦੇ ਸਕਦੇ ਹਨ ਪਰ ਜਨਤਾ ਦੀ ਕਚਹਿਰੀ ਵਿਚ ਮਜ਼ਾਕ ਦੇ ਪਾਤਰ ਹੀ ਹੁੰਦੇ ਹਨ। ਚੈਨਲਾਂ ਨੂੰ ਲੋੜ ਹੈ ਇਨ੍ਹਾਂ ਲਈ ਨਿਯਮ ਨਿਰਧਾਰਤ ਕਰਨ ਦੀ ਤਾਂ ਜੋ ਜਨਤਾ ਸਾਹਮਣੇ ਨਤੀਜਾ ਸਾਰਥਿਕ ਪੇਸ਼ ਹੋਵੇ।


-ਸੁਖਪਾਲ ਸਿੰਘ ਗਿੱਲ
ਆਬਿਆਣਾ ਕਲਾਂ।


ਨਿੰਦਣਯੋਗ ਘਟਨਾ

ਮੈਰਜ ਪੈਲੇਸ ਵਿਚ ਇਕ ਡਾਂਸਰ ਨੂੰ ਲੜਕੇ ਵੱਲੋਂ ਸਟੇਜ 'ਤੇ ਨਾਲ ਨੱਚਣ ਦੀ ਜ਼ਿੱਦ ਪੂਰੀ ਨਾ ਹੋਣ 'ਤੇ ਗੋਲੀ ਮਾਰ ਦੇਣੀ ਬਹੁਤ ਹੀ ਨਿੰਦਣਯੋਗ ਘਟਨਾ ਹੈ। ਅੱਜ ਡਾਂਸਰ ਦੀ ਜਾਨ ਗਈ ਹੈ, ਕੱਲ੍ਹ ਨੂੰ ਕਿਸੇ ਲੇਡੀ ਸਿੰਗਰ ਤੇ ਵਿਆਹ ਸਮਾਗਮ ਵਿਚ ਸ਼ਾਮਿਲ ਕਿਸੇ ਵੀ ਵਿਅਕਤੀ ਦੀ ਜਾਨ ਜਾ ਸਕਦੀ ਹੈ। ਸਰਕਾਰ ਨੂੰ ਸਖ਼ਤ ਕਦਮ ਚੁੱਕਦਿਆਂ ਮੈਰਿਜ ਪੈਲੇਸਾਂ ਵਿਚ ਹਥਿਆਰ ਲਿਜਾਣ 'ਤੇ ਸਖ਼ਤ ਪਾਬੰਦੀ ਲਾਉਣੀ ਚਾਹੀਦੀ ਹੈ। ਅੱਜ ਦੇ ਸਾਰੇ ਗਾਇਕਾਂ ਨੂੰ ਵੀ ਚਾਹੀਦਾ ਹੈ ਕਿ ਆਪਣੇ ਗੀਤਾਂ ਵਿਚ ਹਥਿਆਰ ਵਰਤਣੇ ਜਾਂ ਚਲਾਉਣੇ ਬੰਦ ਕਰਨ। ਉਨ੍ਹਾਂ ਮੈਰਿਜ ਪੈਲੇਸਾਂ 'ਤੇ ਵੀ ਪਾਬੰਦੀ ਲਾਈ ਜਾਵੇ ਜੋ ਲੋਕਾਂ ਨੂੰ ਹਥਿਆਰ ਚਲਾਉਣ ਦੀ ਖੁੱਲ੍ਹ ਦਿੰਦੇ ਹਨ।


-ਸ਼ਮਸ਼ੇਰ ਸਿੰਘ ਸੋਹੀ
ਪਿੰਡ ਸੋਹੀਆਂ, ਡਾਕ: ਚੀਮਾਂ ਖੁੱਡੀ, ਤਹਿਸੀਲ ਬਟਾਲਾ, ਜ਼ਿਲ੍ਹਾ ਗੁਰਦਾਸਪੁਰ।

7-12-2016

 ਵਣਾਂ ਦਾ ਯੋਗਦਾਨ
ਕੁਦਰਤ ਦਾ ਸਮਤੋਲ ਰੱਖਣ ਲਈ ਮਨੁੱਖੀ ਜੀਵਨ ਵਿਚ ਵਣਾਂ ਦਾ ਵੱਡਾ ਯੋਗਦਾਨ ਹੈ, ਖ਼ਾਸ ਤੌਰ 'ਤੇ ਪੰਜਾਬੀਆਂ ਦੇ ਆਰਥਿਕ ਜੀਵਨ ਵਿਚ ਵਡਮੁੱਲਾ ਮਹੱਤਵ ਹੈ। ਪੰਜਾਬ ਵਿਚ 244236.18 ਹੈਕਟੇਅਰ ਰਕਬਾ ਵਣਾਂ ਹੇਠ ਹੈ। ਜਿਨ੍ਹਾਂ ਪੰਚਾਇਤਾਂ ਕੋਲ ਵਣਾਂ ਦੀ ਆਮਦਨੀ ਹੁੰਦੀ ਹੈ, ਉਨ੍ਹਾਂ ਨੂੰ ਗਾ੍ਰਂਟ ਲਈ ਸਰਕਾਰ ਦੇ ਰਹਿਮੋ ਕਰਮ ਨਹੀਂ ਰਹਿਣਾ ਪੈਂਦਾ। ਸਾਲ 2014-15 ਵਿਚ ਪੰਜਾਬ ਸਰਕਾਰ ਵੱਲੋਂ 2769 ਹੈਕਟੇਅਰ ਰਕਬੇ ਵਿਚ ਬੂਟੇ ਲਗਾਏ ਜਦੋਂ ਕਿ ਇਸੇ ਸਾਲ ਵਿਚ 74330 ਘਣਮੀਟਰ ਲੱਕੜ ਵੇਚ ਕੇ 345487828 ਰੁਪਏ ਦੀ ਆਮਦਨੀ ਇੱਕਠੀ ਕੀਤੀ। ਇਸ ਨਾਲ ਮਾਲੀਆ ਇਕੱਠਾ ਹੋਇਆ। ਨਾਜਾਇਜ਼ ਕਟਾਈ ਦਾ ਪੱਖ ਵਣਾਂ ਨੂੰ ਪ੍ਰਭਾਵਿਤ ਕਰਦਾ ਹੈ। ਭਾਰਤੀ ਫਾਰੈਸਟ ਐਕਟ 1927 ਅਤੇ ਪੰਜਾਬ ਫਾਰੈਸਟ ਮੈਨੂਅਲ ਵਣਾਂ ਨੂੰ ਨਿਯਮਤ ਕਰਦਾ ਹੈ। ਪਰ ਦਫਾ 4 ਅਤੇ 5 ਦੀ ਵਰਤੋਂ ਲੋਕਾਂ ਅਤੇ ਸਰਕਾਰ ਵਿਚਾਲੇ ਖਟਾਸ ਪੈਦਾ ਕਰਦੀ ਹੈ। ਲੋੜ ਹੈ ਸਰਕਾਰ ਅਤੇ ਲੋਕਾਂ ਨੂੰ ਵਣਾਂ ਦੀ ਰਖਵਾਲੀ ਲਈ ਤਾਲਮੇਲ ਰੱਖਣ ਦੀ ਤਾਂ ਜੋ ਸਰਕਾਰ, ਜਨਤਾ ਅਤੇ ਕੁਦਰਤ ਦਾ ਤਾਲਮੇਲ ਬਣਿਆ ਰਹੇ।

-ਸੁਖਪਾਲ ਸਿੰਘ ਗਿੱਲ
ਅਬਿਆਣਾ ਕਲਾਂ।

ਹੱਡਾਂ ਰੋੜੀਆਂ ਬਣੀਆਂ ਮੁਸੀਬਤ
ਅੱਜ ਪੰਜਾਬ ਦੇ ਬਹੁਤੇ ਪਿੰਡਾਂ ਲਾਗੇ ਬਣੀਆਂ ਹੱਡਾਂ ਰੋੜੀਆਂ ਵੱਡੀ ਮੁਸੀਬਤ ਦਾ ਕਾਰਨ ਬਣੀਆਂ ਹੋਈਆਂ ਹਨ। ਇਨ੍ਹਾਂ ਦੀ ਮੁਸੀਬਤ ਉਦੋਂ ਹੋਰ ਵੀ ਵੱਡੀ ਬਣ ਜਾਂਦੀ ਹੈ, ਜਦੋਂ ਹਵਾ ਦਾ ਵਹਾਅ ਨੇੜੇ ਦੇ ਪਿੰਡ ਵੱਲ ਨੂੰ ਹੋ ਜਾਂਦਾ ਹੈ। ਬਹੁਤੇ ਪਿੰਡ ਤਾਂ ਅਜਿਹੇ ਹਨ, ਜਿਥੇ ਹੱਡਾਂ ਰੋੜੀਆਂ ਬਿਲਕੁਲ ਨੇੜੇ ਹਨ। ਨੇੜੇ ਦੀਆਂ ਹੱਡਾਂ ਰੋੜੀਆਂ ਦੀ ਬਦਬੂ ਪਿੰਡ ਵਾਸੀਆਂ ਲਈ 24 ਘੰਟੇ ਨੱਕ 'ਚ ਦਮ ਕਰੀ ਰੱਖਦੀ ਹੈ। ਇਸ ਤੋਂ ਇਲਾਵਾ ਇਨ੍ਹਾਂ 'ਚ ਰਹਿੰਦੇ ਖੂੰਖਾਰ ਕੁੱਤੇ ਮਨੁੱਖੀ ਜਾਨਾਂ ਲਈ ਖੌਅ ਬਣੇ ਰਹਿੰਦੇ ਹਨ। ਇਹ ਖੂੰਖਾਰ ਕੁੱਤੇ ਪਿਛਲੇ ਸਮੇਂ 'ਚ ਕਈ ਮਨੁੱਖੀ ਜਾਨਾਂ ਲੈ ਚੁੱਕੇ ਹਨ ਤੇ ਪਸ਼ੂਆਂ ਦਾ ਵੀ ਨੁਕਸਾਨ ਕਰ ਚੁੱਕੇ ਹਨ। ਇਨ੍ਹਾਂ ਹੱਡਾਂ ਰੋੜੀਆਂ ਨੂੰ ਪਿੰਡਾਂ ਤੋਂ ਖ਼ਾਸ ਕਰਕੇ ਰਿਹਾਇਸ਼ੀ ਥਾਵਾਂ ਤੋਂ ਦੂਰ ਕਰਨ ਲਈ ਸਮੇਂ-ਸਮੇਂ 'ਤੇ ਮੰਗ ਉੱਠਦੀ ਰਹਿੰਦੀ ਹੈ। ਸਰਕਾਰ ਤੋਂ ਪੁਰਜ਼ੋਰ ਮੰਗ ਹੈ ਕਿ ਲੋਕਾਂ ਨੂੰ ਇਸ ਮੁਸੀਬਤ ਤੋਂ ਛੁਟਕਾਰਾ ਦਿਵਾਇਆ ਜਾਵੇ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

ਮੰਗਤਿਆਂ ਦੀ ਭਰਮਾਰ
ਗਹੁ ਨਾਲ ਵਾਚੀਏ ਤਾਂ ਉਹ ਇਨਸਾਨ ਤਾਂ ਤਰਸ ਦਾ ਪਾਤਰ ਹੈ, ਜਿਸ ਦਾ ਕਿ ਕੋਈ ਅੰਗ ਪੈਰ ਕੰਮ ਨਹੀਂ ਕਰਦਾ ਜਾਂ ਉਹ ਮਾਨਸਿਕ ਤੌਰ 'ਤੇ ਬੁਰੀ ਤਰ੍ਹਾਂ ਪ੍ਰੇਸ਼ਾਨ ਹੈ ਪਰ ਅਫ਼ਸੋਸ ਅੱਜ ਸਰੀਰਕ ਤੌਰ 'ਤੇ ਪੂਰੀ ਤਰ੍ਹਾਂ ਯੋਗ ਵਿਅਕਤੀ ਵੀ ਮੰਗਣ ਦੇ ਇਸ ਧੰਦੇ ਨੂੰ ਅਪਣਾਈ ਬੈਠੇ ਹਨ ਅਤੇ ਲੋਕ ਇਨ੍ਹਾਂ ਤੋਂ ਪਰਹੇਜ਼ ਕਰਨ ਦੀ ਬਜਾਏ ਇਨ੍ਹਾਂ ਨੂੰ ਹੁੰਗਾਰਾ ਦੇ ਰਹੇ ਹਨ। ਸਿਆਣੇ ਕਹਿੰਦੇ ਹਨ ਵਧਦੀ ਉਹ ਚੀਜ਼ ਹੈ, ਜਿਸ ਨੂੰ ਹੁੰਗਾਰਾ ਮਿਲਦਾ ਹੈ ਤਾਂ ਜ਼ਾਹਰ ਹੈ ਕਿਤੇ ਨਾ ਕਿਤੇ ਅਸੀਂ ਵੀ ਜ਼ਿੰਮੇਵਾਰ ਹਾਂ। ਸੋ, ਸਰਕਾਰੀ ਅਤੇ ਗ਼ੈਰ-ਸਰਕਾਰੀ ਸੰਸਥਾਵਾਂ ਨੂੰ ਬੇਨਤੀ ਹੈ ਕਿ ਥਾਂ-ਥਾਂ ਭਟਕ ਰਹੇ ਇਨ੍ਹਾਂ ਮੰਗਤਿਆਂ 'ਤੇ ਨਕੇਲ ਕੱਸੀ ਜਾਵੇ ਤੇ ਇਨ੍ਹਾਂ ਨੂੰ ਕਿਸੇ ਸਾਰਥਕ ਕੰਮਾਂ ਵਿਚ ਲਗਾ ਕੇ ਦੇਸ਼ ਦੀ ਤਰੱਕੀ ਵਿਚ ਯੋਗਦਾਨ ਪਾਇਆ ਜਾਵੇ।

-ਰਾਜਵੰਤ ਸਿੰਘ ਰਾਜੂ
ਗੁਰੂ ਨਾਨਕ ਆਟੋ ਸਪੇਅਰਜ਼, ਰਾਏਕੋਟ।

6-12-2016

 ਨੋਟਬੰਦੀ ਦੀ ਸ਼ਹਾਦਤ
ਦੇਸ਼ ਵਿਚ 8 ਨਵੰਬਰ, 2016 ਨੂੰ ਹੋਏ ਨੋਟਬੰਦੀ ਦੇ ਸਰਜੀਕਲ ਸਟ੍ਰਾਈਕ ਨੇ ਹੁਣ ਤੱਕ 80 ਤੋਂ ਵੱਧ ਦੇਸ਼ਵਾਸੀਆਂ ਦੀਆਂ ਜਾਨਾਂ ਲੈ ਲਈਆਂ ਹਨ। ਲੋਕ ਆਪਣੀਆਂ ਲੋੜਾਂ ਦੀ ਪੂਰਤੀ ਲਈ 8 ਨਵੰਬਰ ਤੋਂ ਹੀ ਬੈਂਕਾਂ ਅਤੇ ਏ.ਟੀ.ਐਮ. 'ਤੇ ਖੱਜਲ-ਖੁਆਰ ਹੋ ਰਹੇ ਹਨ। ਕਾਲੇ ਧਨ ਨੂੰ ਨੱਥ ਪਾਉਣ ਲਈ ਮੋਦੀ ਸਰਕਾਰ ਦੁਆਰਾ ਕੀਤਾ ਸਰਜੀਕਲ ਸਟ੍ਰਾਈਕ ਕਿੰਨਾ ਕੁ ਕਾਰਗਰ ਸਾਬਤ ਹੁੰਦਾ ਹੈ, ਇਹ ਤਾਂ ਆਉਣ ਵਾਲਾ ਸਮਾਂ ਹੀ ਦੱਸੇਗਾ ਪ੍ਰੰਤੂ ਇਸ ਨੋਟਬੰਦੀ ਕਾਰਨ ਮੌਤ ਦਾ ਜਾਮ ਪੀਣ ਵਾਲੇ ਲੋਕਾਂ ਦੇ ਵਿਹੜੇ ਜ਼ਰੂਰ ਸੁੰਨੇ ਹੋ ਗਏ ਹਨ। ਸ਼ਾਇਦ ਇਹ ਲੋੜਵੰਦ ਲੋਕਾਂ ਦੀਆਂ ਮੌਤਾਂ ਉੜੀ ਹਮਲੇ ਵਿਚ ਸ਼ਹੀਦ 19 ਫ਼ੌਜੀ ਜਵਾਨਾਂ ਦੀ ਮੌਤ ਤੋਂ ਘੱਟ ਨਹੀਂ। ਜੇਕਰ ਦੇਸ਼ ਦੀ ਰਾਖੀ ਕਰਨ ਵਾਲੇ ਸੁਰੱਖਿਆ ਜਵਾਨਾਂ ਦੀ ਸ਼ਹਾਦਤ ਨੂੰ ਸਲਾਮ ਕਰਦੇ ਹੋਏ ਉਨ੍ਹਾਂ ਦੇ ਪਰਿਵਾਰਾਂ ਦੀ ਆਰਥਿਕ ਮਦਦ ਕਰਕੇ ਸਮਾਜ ਵਿਚ ਸਨਮਾਨ ਨਾਲ ਜਿਊਣ ਦਾ ਜਜ਼ਬਾ ਸਿਖਾਇਆ ਜਾਂਦਾ ਹੈ ਤਾਂ ਫਿਰ ਇਨ੍ਹਾਂ ਨੋਟਬੰਦੀ ਦੇ ਸਰਜੀਕਲ ਸਟ੍ਰਾਈਕ ਨਾਲ ਜਾਨ ਗੁਆਉਣ ਵਾਲਿਆਂ ਦੀ ਸ਼ਹਾਦਤ ਦਾ ਸਨਮਾਨ ਕਿਉਂ ਨਹੀਂ? ਮੌਤ ਤਾਂ ਮੌਤ ਹੀ ਹੈ। ਮੋਦੀ ਸਰਕਾਰ ਨੂੰ ਚਾਹੀਦਾ ਹੈ ਕਿ ਇਨ੍ਹਾਂ 80 ਤੋਂ ਵੱਧ ਪਰਿਵਾਰਾਂ ਦੀ ਆਰਥਿਕ ਮਦਦ ਕਰਕੇ ਉਨ੍ਹਾਂ ਨੂੰ ਵੀ ਦੇਸ਼ ਦੇ ਸ਼ਹੀਦਾਂ ਵਾਂਗ ਸਨਮਾਨ ਦਿੱਤਾ ਜਾਵੇ।

-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀਖ਼ਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

ਕਿਰਤੀ ਲੋਕ ਗੰਭੀਰ ਹੋਣ

ਅੱਜ ਦੇਸ਼ ਵਿਚ ਸਮਾਜਿਕ ਸੁਰੱਖਿਆ ਦੀ ਘਾਟ ਕਾਰਨ ਘੱਟ-ਗਿਣਤੀਆਂ ਤੇ ਖ਼ਾਸ ਕਰਕੇ ਕਿਰਤੀ ਲੋਕਾਂ ਦੇ ਅਧਿਕਾਰਾਂ ਦਾ ਰੱਜ ਕੇ ਘਾਣ ਹੋ ਰਿਹਾ ਹੈ। ਅਖੌਤੀ ਰੁਜ਼ਗਾਰ ਦੇ ਨਾਂਅ 'ਤੇ ਗਰੀਬਾਂ ਤੇ ਮਜਬੂਰ ਲੋਕਾਂ ਤੋਂ ਹੱਦ ਨਾਲੋਂ ਵੱਧ ਕੰਮ ਲਿਆ ਜਾ ਰਿਹਾ ਹੈ। ਇਥੇ ਇਹ ਕਹਿਣ 'ਚ ਕੋਈ ਅਤਿਕਥਨੀ ਨਹੀਂ ਹੋਵੇਗੀ ਕਿ ਰੁਜ਼ਗਾਰ ਦੇ ਨਾਂਅ 'ਤੇ ਕਿਰਤੀ ਲੋਕਾਂ ਨੂੰ ਗੁਲਾਮ ਬਣਾ ਕੇ ਰੱਖਿਆ ਜਾ ਰਿਹਾ ਹੈ। ਕਿਰਤ ਦੇ ਵੱਖ-ਵੱਖ ਸਾਧਨਾਂ ਨਾਲ ਜੁੜੇ ਕਾਮੇ ਅਕਸਰ ਹੀ ਮੀਡੀਆ ਰਾਹੀਂ ਆਪਣੀਆਂ ਦੁੱਖ-ਤਕਲੀਫਾਂ ਬਿਆਨ ਕਰਦੇ ਰਹਿੰਦੇ ਹਨ। ਬਹੁਤ ਸਾਰੇ ਕਿਰਤੀ ਅਜਿਹੇ ਵੀ ਹਨ, ਜਿਹੜੇ ਫੈਕਟਰੀਆਂ, ਢਾਬਿਆਂ ਜਾਂ ਘਰਾਂ ਵਿਚ ਕੈਦੀਆਂ ਵਰਗਾ ਜੀਵਨ ਬਤੀਤ ਕਰ ਰਹੇ ਹਨ। ਕਈ ਵਾਰ ਇਹ ਕਿਰਤੀ ਲੋਕ ਇਹ ਕਹਿੰਦੇ ਆਮ ਸੁਣੇ ਜਾਂਦੇ ਹਨ ਕਿ ਉਨ੍ਹਾਂ ਕੋਲੋਂ ਕੰਮ ਜ਼ਿਆਦਾ ਲਿਆ ਜਾਂਦਾ ਹੈ, ਪਰ ਮਿਹਨਤ ਬਹੁਤ ਘੱਟ ਮਿਲਦੀ ਹੈ। ਇਹ ਵੀ ਸੁਣਨ 'ਚ ਆਉਂਦਾ ਹੈ ਕਿ ਕਈ ਵਾਰ ਇਨ੍ਹਾਂ ਨੂੰ ਮਿਹਨਤ ਦਾ ਪੈਸਾ ਹੀ ਨਹੀਂ ਦਿੱਤਾ ਜਾਂਦਾ। ਇਥੋਂ ਤੱਕ ਵੀ ਸੁਣਿਆ ਹੈ ਕਿ ਕਈ ਵਾਰ ਮਜ਼ਦੂਰ ਲੋਕਾਂ ਨੂੰ ਕੁੱਟਿਆ ਵੀ ਜਾਂਦਾ ਹੈ। ਅਜਿਹਾ ਸਭ ਸਮਾਜਿਕ ਸੁਰੱਖਿਆ ਦੀ ਘਾਟ ਕਾਰਨ ਹੋ ਰਿਹਾ ਹੈ ਅਤੇ ਕਾਨੂੰਨੀ ਤੌਰ 'ਤੇ ਲੋਕਾਂ ਨੂੰ ਸੁਰੱਖਿਅਤ ਰੱਖਣ ਦੀ ਕਮੀ ਵੀ ਇਸ ਬੁਰਾਈ ਨੂੰ ਬੜ੍ਹਾਵਾ ਦੇ ਰਹੀ ਹੈ। ਜ਼ਰੂਰੀ ਇਹ ਹੈ ਕਿ ਕਾਨੂੰਨੀ ਤੌਰ 'ਤੇ ਨਿਸਚਤ ਕੀਤਾ ਗਿਆ ਸਮਾਂ ਹਰ ਥਾਂ ਲਾਗੂ ਹੋਣਾ ਚਾਹੀਦਾ ਹੈ। ਪੰਜਾਬ ਵਿਧਾਨ ਸਭਾ ਚੋਣਾਂ ਨੇੜੇ ਹਨ। ਕਿਰਤੀ ਲੋਕ ਇਨ੍ਹਾਂ ਚੋਣਾਂ ਨੂੰ ਪੂਰੀ ਗੰਭੀਰਤਾ ਨਾਲ ਲੈਣਗੇ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

3-12-2016

 ਚੋਣ ਮੈਨੀਫੈਸਟੋ

ਸਾਡੇ ਦੇਸ਼ ਵਿਚ ਹਰ ਪੰਜ ਸਾਲ ਬਾਅਦ ਚੋਣਾਂ ਦਾ ਬਿਗਲ ਵੱਜ ਜਾਂਦਾ ਹੈ। ਚੋਣਾਂ ਚਾਹੇ ਪਾਰਲੀਮੈਂਟ ਵਾਲੀਆਂ ਹੋਣ ਜਾਂ ਫਿਰ ਵਿਧਾਨ ਸਭਾ ਵਾਲੀਆਂ ਹੋਣ। ਹਰੇਕ ਪਾਰਟੀ ਦੇ ਨੇਤਾ ਜਨਤਾ ਨੂੰ ਆਪਣੇ ਵੱਲ ਅਕਰਸ਼ਤ ਕਰਨ ਲਈ ਨਵੇਂ-ਨਵੇਂ ਚੋਣ ਵਾਅਦੇ ਕਰਦੇ ਹਨ। ਫਿਰ ਉਹ ਜਿੱਤਣ ਤੋਂ ਬਾਅਦ ਉਨਾਂ ਵਾਅਦਿਆਂ ਨੂੰ ਅਮਲੀ ਰੂਪ ਵਿਚ ਲਿਆਉਣ ਲਈ ਕਾਫੀ ਦੇਰੀ ਕਰਦੇ ਹਨ ਜਾਂ ਫਿਰ ਦੁਬਾਰਾ ਹੋਣ ਵਾਲੀਆਂ ਚੋਣਾਂ ਤੋਂ ਪਹਿਲਾਂ ਜਨਤਾ ਦੇ ਅੱਖੀਂ ਘੱਟਾ ਪਾ ਕੇ ਆਪਣੇ ਆਪ ਨੂੰ ਸ਼ਾਬਾਸ਼ ਦੇ ਦਿੰਦੇ ਹਨ ਕਿ ਅਸੀਂ ਜੋ ਵਾਅਦੇ ਆਪਣੇ ਮੈਨੀਫੈਸਟੋ ਵਿਚ ਕੀਤੇ ਸਨ, ਉਹ ਸਭ ਪੂਰੇ ਕੀਤੇ ਹਨ ਪਰ ਉਨਾਂ ਵਿਚੋਂ ਕਿੰਨੇ ਕੀਤੇ ਵਾਅਦੇ ਪੂਰੇ ਹੋਏ ਉਹ ਅੱਜ ਦੀ ਜਨਤਾ ਭਲੀ-ਭਾਂਤ ਜਾਣਦੀ ਹੀ ਹੁੰਦੀ ਹੈ। ਭਾਰਤ ਦੇ ਚੋਣ ਕਮਿਸ਼ਨ ਨੂੰ ਚਾਹੀਦਾ ਹੈ ਕਿ ਉਹ ਵੱਖ-ਵੱਖ ਪਾਰਟੀਆਂ ਵੱਲੋਂ ਜਾਰੀ ਕੀਤੇ ਜਾਂਦੇ ਚੋਣ ਮਨੋਰਥ ਪੱਤਰਾਂ ਨੂੰ ਕਾਨੂੰਨੀ ਦਰਜਾ ਦੇਵੇ। ਜੋ ਪਾਰਟੀ ਆਪਣੇ ਕਾਰਜਕਾਲ ਦੌਰਾਨ ਕੀਤੇ ਵਾਅਦੇ ਪੂਰੇ ਨਹੀਂ ਕਰ ਪਾਉਂਦੀ, ਉਸ ਪਾਰਟੀ ਦੀ ਮਾਨਤਾ ਰੱਦ ਕੀਤੀ ਜਾਵੇ ਜਾਂ ਉਸ 'ਤੇ ਅਗਲੇ ਪੰਜ ਸਾਲ ਚੋਣਾਂ ਲੜਨ 'ਤੇ ਪੱਕੀ ਰੋਕ ਲਗਾਈ ਜਾਵੇ।

-ਜਸਦੀਪ ਸਿੰਘ ਖ਼ਾਲਸਾ
ਕ੍ਰਿਸ਼ਨਾ ਨਗਰ, ਗਲੀ ਨੰ: 10, ਖੰਨਾ।

ਸਰੀਰ ਦਾਨ ਮਹਾਂਦਾਨ

ਮੌਤ ਤੋਂ ਬਾਅਦ ਸਰੀਰ ਦਾਨ ਕਰਨਾ ਇਕ ਬਹੁਤ ਵੱਡਾ ਦਾਨ ਹੈ। ਬਹੁਤ ਸਾਰੀਆਂ ਸੰਸਥਾਵਾਂ ਸਰੀਰ ਦਾਨ ਨਾਲ ਜੁੜੀਆਂ ਹੋਈਆਂ ਹਨ, ਜੋ ਕਿ ਬਹੁਤ ਵਧੀਆ ਉਪਰਾਲਾ ਹੈ, ਕਿਉਂਕਿ ਮੌਤ ਤੋਂ ਬਾਅਦ ਸਰੀਰ ਦੀ ਖੋਜ ਕਰਨ ਨਾਲ ਬਹੁਤ ਸਾਰੀਆਂ ਬਿਮਾਰੀਆਂ ਦਾ ਭੇਦ ਖੁੱਲ੍ਹਦਾ ਹੈ ਅਤੇ ਵੱਡੇ-ਵੱਡੇ ਹਸਪਤਾਲਾਂ ਵਿਚ ਮਨੁੱਖੀ ਖੋਜ ਕਰਕੇ ਬਹੁਤ ਵਧੀਆ ਨਤੀਜੇ ਸਾਹਮਣੇ ਆਉਂਦੇ ਹਨ ਜੋ ਕਿ ਜੀਵਤ ਪ੍ਰਾਣੀ ਦੇ ਕੰਮ ਆਉਂਦੇ ਹਨ। ਕਈ ਵਾਰ ਕਿਸੇ ਸੰਸਥਾ ਵੱਲੋਂ ਜਦੋਂ ਸਰੀਰ ਦਾਨ ਕਰਨ ਵਾਲਿਆਂ ਦੇ ਫਾਰਮ ਭਰਾਏ ਜਾਂਦੇ ਹਨ ਤਾਂ ਕਈ ਡਰਪੋਕ ਫਾਰਮ ਭਰਨ ਤੋਂ ਵੀ ਡਰਦੇ ਹਨ। ਸਾਨੂੰ ਅਜਿਹਾ ਕਦੇ ਵੀ ਨਹੀਂ ਕਰਨਾ ਚਾਹੀਦਾ ਅਤੇ ਹਰੇਕ ਵਿਅਕਤੀ ਨੂੰ ਸਰੀਰ ਦਾਨ, ਨੇਤਰ ਦਾਨ ਅਤੇ ਖੂਨਦਾਨ ਹਮੇਸ਼ਾ ਪਹਿਲ ਦੇ ਆਧਾਰ 'ਤੇ ਦੇਣਾ ਚਾਹੀਦਾ ਹੈ। ਮੌਤ ਤੋਂ ਬਾਅਦ ਦਾਨ ਕੀਤਾ ਹੋਇਆ ਸਰੀਰ ਪਤਾ ਨਹੀਂ ਕਿੰਨੀਆਂ ਕੁ ਬਿਮਾਰੀਆਂ ਲੱਭਣ ਵਿਚ ਸਹਾਈ ਹੋਵੇਗਾ। ਸੋ, ਸਾਨੂੰ ਹਰੇਕ ਮਨੁੱਖ ਨੂੰ ਮੌਤ ਤੋਂ ਬਾਅਦ ਸਰੀਰ ਦਾਨ ਕਰ ਦੇਣਾ ਚਾਹੀਦਾ ਹੈ।

-ਕੇਵਲ ਸਿੰਘ ਬਾਠਾਂ
ਮੋ: 98557-44211.

ਟੀਚਰ ਐਲਿਜੀਬਿਲਟੀ ਟੈਸਟ

ਟੀ.ਈ.ਟੀ. ਸਰਕਾਰੀ ਅਧਿਆਪਕ ਦੀ ਨੌਕਰੀ ਪ੍ਰਾਪਤ ਕਰਨ ਲਈ ਰੱਖੀ ਗਈ ਸ਼ਰਤ ਹੈ। ਇਹ ਟੈਸਟ ਹਰ ਸਾਲ ਲਿਆ ਜਾਂਦਾ ਹੈ। ਬਹੁਤ ਸਾਰੇ ਐਮ.ਏ.ਬੀ.ਐੱਡ. ਬੇਰੁਜ਼ਗਾਰ ਅਧਿਆਪਕ ਟੈਸਟ ਪਾਸ ਹਨ। ਜਿਨ੍ਹਾਂ ਨੇ ਇਹ ਟੈਸਟ ਪਾਸ ਵੀ ਕੀਤਾ ਹੈ, ਉਹ ਵੀ ਸਾਰੇ ਨੌਕਰੀ ਦੇ ਪੂਰੇ ਹੱਕਦਾਰ ਨਹੀਂ ਬਣ ਸਕੇ ਸਗੋਂ ਬੇਰੁਜ਼ਗਾਰੀ ਵਿਚ ਹੋਰ ਵਾਧਾ ਹੋ ਰਿਹਾ ਹੈ। ਉਹ ਧਰਨੇ ਦੇਣ, ਟੈਂਕੀਆਂ 'ਤੇ ਚੜ੍ਹਨ, ਪ੍ਰਾਈਵੇਟ ਸਕੂਲਾਂ ਵਿਚ ਘੱਟ ਤਨਖਾਹ 'ਤੇ ਨੌਕਰੀ ਕਰਨ ਦੇ ਲਈ ਮਜਬੂਰ ਹਨ। ਇਸ ਟੈਸਟ ਦਾ ਕੋਈ ਨਿਸਚਿਤ ਸਿਲੇਬਸ ਨਹੀਂ ਹੁੰਦਾ। ਬਹੁਤੇ ਪ੍ਰਸ਼ਨ ਕਿਤਾਬ ਵਿਚੋਂ ਨਹੀਂ ਪੁੱਛੇ ਜਾਂਦੇ। ਨਤੀਜੇ ਤੋਂ ਪਹਿਲਾਂ ਜਿਹੜੀ ਉੱਤਰ ਪੱਤਰੀ ਇੰਟਰਨੈੱਟ 'ਤੇ ਪਾਈ ਜਾਂਦੀ ਹੈ, ਉਹ ਵੀ ਪੂਰੀ ਤਰ੍ਹਾਂ ਨਾਲ ਤਸੱਲੀਯੋਗ ਨਹੀਂ ਹੁੰਦੀ। ਇਸ ਟੈਸਟ ਦਾ ਨਤੀਜਾ ਵੀ ਘਟੀਆ ਆਉਂਦਾ ਹੈ। ਸਰਕਾਰੀ ਅਧਿਆਪਕਾਂ ਨੂੰ ਨੌਕਰੀ ਟੈਸਟ ਦੇ ਆਧਾਰ 'ਤੇ ਨਹੀਂ ਸਗੋਂ ਮੈਰਿਟ ਦੇ ਆਧਾਰ 'ਤੇ ਮਿਲਣੀ ਚਾਹੀਦੀ ਹੈ। ਅਧਿਆਪਕ ਜਿਹੜਾ ਕਿ ਵਿਦਿਆਰਥੀ ਦਾ ਭਵਿੱਖ ਸੰਵਾਰਦਾ ਹੈ, ਉਸ ਦਾ ਆਪਣਾ ਭਵਿੱਖ ਖ਼ਤਰੇ ਵੱਲ ਜਾ ਰਿਹਾ ਹੈ। ਜੇਕਰ ਪੰਜਾਬ ਵਿਚ ਬੇਰੁਜ਼ਗਾਰੀ ਦਾ ਇਹੋ ਹਾਲ ਰਿਹਾ ਤਾਂ ਆਉਣ ਵਾਲੇ ਸਮੇਂ ਵਿਚ ਵਿਦਿਆਰਥੀਆਂ ਦੀ ਉੱਚ ਸਿੱਖਿਆ ਪ੍ਰਾਪਤ ਕਰਨ ਦੀ ਰੁਚੀ ਘਟ ਜਾਵੇਗੀ। ਸਰਕਾਰ ਨੂੰ ਚਾਹੀਦਾ ਹੈ ਕਿ ਪਹਿਲਾਂ ਟੀ.ਈ.ਟੀ. ਪਾਸ ਕਰ ਚੁੱਕੇ ਅਧਿਆਪਕਾਂ ਨੂੰ ਨੌਕਰੀ ਦਿੱਤੀ ਜਾਵੇ। ਆਉਣ ਵਾਲੇ ਸਮੇਂ ਵਿਚ ਇਹ ਟੈਸਟ ਬੰਦ ਕੀਤਾ ਜਾਵੇ।

-ਰਾਜਵੀਰ ਕੌਰ
ਪਿੰਡ ਰਾਜਪੁਰ ਭਾਈਆਂ, ਜ਼ਿਲ੍ਹਾ ਹੁਸ਼ਿਆਰਪੁਰ।

2-12-2016

 ਰੁੱਖ ਤੇ ਪਾਣੀ

ਰੁੱਖ ਤੇ ਪਾਣੀ ਹਰ ਸਮਾਜਿਕ ਪ੍ਰਾਣੀ ਦੀ ਜ਼ਿੰਦਗੀ ਦੀ ਬੁਨਿਆਦ ਹਨ। ਇਸ ਤੋਂ ਬਿਨਾਂ ਮਨੁੱਖੀ ਜੀਵਨ ਦੀ ਕਲਪਨਾ ਨਹੀਂ ਕੀਤੀ ਜਾ ਸਕਦੀ। ਅਕਸਰ ਹੀ ਸਮਾਜ ਵਿਚ ਵਾਤਾਵਰਨ ਪ੍ਰੇਮੀ ਰੁੱਖਾਂ ਦੀ ਸੰਭਾਲ ਲਈ ਸੁਹਿਰਦ ਯਤਨ ਕਰਦੇ ਆਏ ਹਨ। ਪੰਜਾਬ ਦੇ ਜੰਗਲਾਤ ਵਿਭਾਗ ਦੀ ਇਹ ਮੁਢਲੀ ਜ਼ਿੰਮੇਵਾਰੀ ਹੈ ਕਿ ਉਹ ਸਮੇਂ-ਸਮੇਂ 'ਤੇ ਜਨਤਕ ਥਾਵਾਂ ਉੱਪਰ ਵੱਧ ਤੋਂ ਵੱਧ ਰੁੱਖ ਲਗਵਾਏ। ਵਿਭਾਗ ਵੱਲੋਂ ਲੋਕਾਂ ਨੂੰ ਪ੍ਰੇਰਤ ਕੀਤਾ ਜਾਵੇ ਕਿ ਲੋਕ ਆਪਣੇ ਬੱਚਿਆਂ ਦੇ ਜਨਮ 'ਤੇ ਜ਼ਰੂਰ ਇਕ ਪੌਦਾ ਲਗਾਉਣ ਤੇ ਉਸ ਦੀ ਪਰਵਰਿਸ਼ ਆਪਣੇ ਬੱਚੇ ਵਾਂਗ ਹੀ ਕਰਨ। ਸਭ ਤੋਂ ਅਹਿਮ ਕਾਰਜ ਹੈ ਰੁੱਖਾਂ ਨੂੰ ਕੱਟਣ ਤੋਂ ਰੋਕਣਾ ਅਤੇ ਰੁੱਖ ਕੱਟਣ ਦੀ ਸਜ਼ਾ ਨਿਰਧਾਰਤ ਕਰਨਾ। ਇਸ ਲਈ ਜੰਗਲੀ ਜੀਵ ਸੁਰੱਖਿਆ ਐਕਟ ਵਰਗੇ ਕਾਨੂੰਨ ਦੀ ਜ਼ਰੂਰਤ ਹੈ। ਇਹ ਕਿਹਾ ਜਾਵੇ ਕਿ ਜੇਕਰ ਗੱਡੀਆਂ ਮੋਟਰਾਂ ਚਲਾਉਣ ਲਈ ਪੈਟਰੋਲ ਅਤੇ ਡੀਜ਼ਲ ਦੀ ਜ਼ਰੂਰਤ ਹੈ ਤਾਂ ਇਸੇ ਤਰ੍ਹਾਂ ਹੀ ਮਨੁੱਖੀ ਜ਼ਿੰਦਗੀ ਨੂੰ ਚਲਾਉਣ ਲਈ ਪਾਣੀ ਦੀ ਜ਼ਰੂਰਤ ਹੈ। ਅੱਜ ਸਮੇਂ ਦੀ ਜ਼ਰੂਰਤ ਹੈ ਕਿ ਰੋਜ਼ਾਨਾ ਜ਼ਿੰਦਗੀ ਵਿਚ ਪਾਣੀ ਦੀ ਦੁਰਵਰਤੋਂ ਨੂੰ ਰੋਕਿਆ ਜਾਵੇ। ਬੁਰਸ਼ ਆਦਿ ਕਰਦੇ ਸਮੇਂ ਜਾਂ ਰੋਜ਼ਾਨਾ ਨਹਾਉਂਦੇ ਸਮੇਂ ਜਾਂ ਗੱਡੀਆਂ ਮੋਟਰਾਂ ਧੋਂਦੇ ਸਮੇਂ ਅਸੀਂ ਲੋੜ ਤੋਂ ਬਿਨਾਂ ਹੀ ਹਜ਼ਾਰਾਂ ਲੀਟਰ ਪਾਣੀ ਅਜਾਈਂ ਗਵਾ ਦਿੰਦੇ ਹਾਂ। ਜ਼ਰਾ ਸੋਚੋ ਜੇਕਰ ਭਾਰਤ ਦਾ ਹਰੇਕ ਨਾਗਰਿਕ ਰੋਜ਼ਾਨਾ ਜ਼ਿੰਦਗੀ ਵਿਚ ਇਕ ਲੀਟਰ ਪਾਣੀ ਦੀ ਬੱਚਤ ਕਰੇ ਤਾਂ ਅਸੀਂ ਰੋਜ਼ਾਨਾ 125 ਕਰੋੜ ਲੀਟਰ ਪਾਣੀ ਬਚਾਅ ਸਕਦੇ ਹਾਂ।

-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀ ਖ਼ਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

ਸੜਕ ਦੁਰਘਟਨਾਵਾਂ

ਆਵਾਜਾਈ ਦੇ ਸਾਧਨਾਂ ਕਾਰਨ ਮਨੁੱਖ ਦਾ ਜੀਵਨ ਬਹੁਤ ਆਸਾਨ ਹੋ ਚੁੱਕਾ ਹੈ। ਘੰਟਿਆਂ ਦਾ ਸਫ਼ਰ ਮਿੰਟਾਂ ਵਿਚ ਪੂਰਾ ਹੋ ਜਾਂਦਾ ਹੈ। ਇਹ ਆਵਾਜਾਈ ਦੇ ਸਾਧਨ ਜਿਥੇ ਮਨੁੱਖ ਦੇ ਜੀਵਨ ਨੂੰ ਸੁਖੀ ਬਣਾਉਂਦੇ ਹਨ, ਉਥੇ ਇਨ੍ਹਾਂ ਸਾਧਨਾਂ ਕਾਰਨ ਹੋਣ ਵਾਲੀਆਂ ਸੜਕ ਦੁਰਘਟਨਾਵਾਂ ਕਈ ਵਾਰ ਮਨੁੱਖ ਦੀ ਜ਼ਿੰਦਗੀ ਤਬਾਹ ਕਰ ਦਿੰਦੀਆਂ ਹਨ। ਅੱਜ ਆਵਾਜਾਈ ਦੇ ਸਾਧਨਾਂ ਦੀ ਏਨੀ ਭਰਮਾਰ ਹੋ ਚੁੱਕੀ ਹੈ ਕਿ ਸੜਕ ਉੱਪਰ ਲੰਘਣਾ ਮੁਸ਼ਕਿਲ ਹੋ ਜਾਂਦਾ ਹੈ। ਉਸ ਦੇ ਮੁਕਾਬਲੇ ਸੜਕਾਂ ਦੀ ਚੌੜਾਈ ਅਜੇ ਵੀ ਘੱਟ ਹੈ। ਕੁਝ ਲੋਕ ਨਸ਼ਾ ਕਰਕੇ ਡਰਾਈਵਿੰਗ ਕਰਦੇ ਹਨ, ਜਿਸ ਨਾਲ ਉਹ ਆਪਣੀ ਅਤੇ ਦੂਸਰਿਆਂ ਦੀ ਜਾਨ ਨੂੰ ਖ਼ਤਰੇ ਵਿਚ ਪਾ ਦਿੰਦੇ ਹਨ। ਇਸ ਤੋਂ ਇਲਾਵਾ ਟ੍ਰੈਫਿਕ ਨਿਯਮਾਂ ਬਾਰੇ ਪੂਰੀ ਜਾਣਕਾਰੀ ਨਾ ਹੋਣਾ ਵੀ ਹਾਦਸਿਆਂ ਨੂੰ ਸੱਦਾ ਦੇਣਾ ਹੀ ਹੈ। ਕਈ ਵਾਰ ਡਰਾਈਵਰ ਇਕ-ਦੂਸਰੇ ਤੋਂ ਅੱਗੇ ਨਿਕਲਣ ਦੀ ਜ਼ਿੱਦ ਵਿਚ ਏਨੀ ਗ਼ਲਤ ਡਰਾਈਵਿੰਗ ਕਰਦੇ ਹਨ ਕਿ ਇਸ ਦਾ ਨਤੀਜਾ ਸੜਕ ਦੁਰਘਟਨਾਵਾਂ ਦੇ ਰੂਪ ਵਿਚ ਸਾਹਮਣੇ ਆਉਂਦਾ ਹੈ। ਜ਼ਿੰਦਗੀ ਬਹੁਤ ਕੀਮਤੀ ਹੈ, ਇਸ ਲਈ ਕੀਮਤੀ ਜ਼ਿੰਦਗੀ ਨੂੰ ਸੜਕ ਦੁਰਘਟਨਾਵਾਂ ਵਿਚ ਗੁਆਉਣਾ ਉਚਿਤ ਨਹੀਂ ਹੈ। ਇਕ-ਦੂਸਰੇ ਤੋਂ ਅੱਗੇ ਨਿਕਲਣ ਦੀ ਜ਼ਿੱਦ ਵਿਚ ਜਾਨੀ ਨੁਕਸਾਨ ਕਰਵਾਉਣ ਨਾਲੋਂ ਲੇਟ ਪਹੁੰਚਣਾ ਕਿਤੇ ਬਿਹਤਰ ਹੈ, ਕਿਉਂਕਿ 'ਜਾਨ ਹੈ ਤਾਂ ਹੀ ਜਹਾਨ ਹੈ।'

-ਜਸਪ੍ਰੀਤ ਕੌਰ 'ਸੰਘਾ'
ਪਿੰਡ ਤਨੂੰਲੀ, ਜ਼ਿਲ੍ਹਾ ਹੁਸ਼ਿਆਰਪੁਰ।

1-12-2016

 ਕਿਸਾਨ ਚੋਣ ਘੋਸ਼ਣਾ ਪੱਤਰ

ਪੰਜਾਬ ਦੇ ਕਰਜ਼ਾਈ ਹੋਏ ਕਿਸਾਨਾਂ ਨੂੰ ਖ਼ੁਦਕੁਸ਼ੀਆਂ ਦੇ ਰਾਹ ਤੋਂ ਡੱਕਣ ਲਈ ਪਿਛਲੇ ਦਿਨੀਂ ਆਮ ਆਦਮੀ ਪਾਰਟੀ ਵੱਲੋਂ 'ਕਿਸਾਨ ਚੋਣ ਘੋਸ਼ਣਾ ਪੱਤਰ' ਜਾਰੀ ਕੀਤਾ ਗਿਆ, ਜਿਸ ਵਿਚ ਛੋਟੇ ਅਤੇ ਵੱਡੇ ਕਿਸਾਨਾਂ ਨੂੰ ਵਾਰੀ-ਵਾਰੀ ਕਰਜ਼ੇ ਵਿਚੋਂ ਕੱਢਣ ਦੀ ਗੱਲ ਕਹੀ ਗਈ ਹੈ ਪਰ ਇਸ ਵਿਚ ਕੋਈ ਵੇਰਵਾ ਨਹੀਂ ਦਿੱਤਾ ਗਿਆ ਕਿ ਇਹ ਕਰਜ਼ਾ ਕਿਹੜੀ ਬੈਂਕ ਦਾ ਹੋਵੇਗਾ। ਕਿਉਂਕਿ ਖੇਤੀਬਾੜੀ ਬੈਂਕਾਂ ਤੋਂ ਇਲਾਵਾ ਕਿਸਾਨਾਂ ਸਿਰ ਕੁਝ ਨਿੱਜੀ ਅਤੇ ਵੱਡੇ ਬੈਂਕਾਂ ਦਾ ਵੀ ਕਰਜ਼ਾ ਹੈ। ਸ਼ਾਹੂਕਾਰਾ ਕਰਜ਼ ਦਿਨੋ-ਦਿਨ ਵਧ ਰਿਹਾ ਹੈ। ਸਾਰੀਆਂ ਸਿਆਸੀ ਪਾਰਟੀਆਂ ਨੂੰ ਇਸ ਨਾਜ਼ੁਕ ਮਸਲੇ 'ਤੇ ਕੁਝ ਵੀ ਐਲਾਨ ਕਰਨ ਤੋਂ ਪਹਿਲਾਂ ਇਹ ਜ਼ਰੂਰ ਵਾਚ ਲੈਣਾ ਚਾਹੀਦਾ ਹੈ ਕਿ ਕਿਸਾਨਾਂ ਸਿਰ ਕਿਹੜੀਆਂ-ਕਿਹੜੀਆਂ ਬੈਂਕਾਂ ਦਾ ਕੁੱਲ ਕਰਜ਼ ਕਿੰਨਾ ਹੈ ਅਤੇ ਇਸ ਕਰਜ਼ ਨੂੰ ਮੁਆਫ਼ ਕਰਨ ਲਈ ਸਰਕਾਰ ਦੀ ਕੀ ਪਲੈਨਿੰਗ ਹੋਵੇਗੀ? ਵਰਨਾ ਫੋਕੇ ਵਾਅਦੇ ਕਰਕੇ ਕਿਸਾਨਾਂ ਦਾ ਸਿਆਸੀ ਸ਼ੋਸ਼ਣ ਕਰਨ ਦੀ ਕੋਈ ਜ਼ਰੂਰਤ ਨਹੀਂ।

-ਲੱਖੀ ਗਿੱਲ ਧਨਾਨਸੂ
ਮੋ: 8872660007

ਸਮੇਂ ਦੀ ਕਦਰ

ਸਮੇਂ ਦੀ ਕਦਰ ਕਰਨਾ ਮਨੁੱਖੀ ਜੀਵਨ ਵਿਚ ਸਫਲਤਾ ਦੇ ਬੁਨਿਆਦੀ ਨਿਯਮਾਂ ਵਿਚੋਂ ਇਕ ਹੈ। ਸਮੇਂ ਦੀ ਕਦਰ ਕਰਨ ਵਾਲਾ ਮਨੁੱਖ ਹਰ ਕੰਮ ਨੂੰ ਵੇਲੇ ਸਿਰ ਕਰਦਾ ਹੈ। ਕੰਮ ਨੂੰ ਵੇਲੇ ਸਿਰ ਕਰਨ ਨਾਲ ਮਨੁੱਖ ਵਿਚ ਹੋਰ ਵੀ ਕਈ ਗੁਣ ਕਾਇਮ ਰਹਿੰਦੇ ਹਨ, ਜਿਵੇਂ ਕੰਮ ਨੂੰ ਤਰੀਕੇ ਨਾਲ ਕਰਨਾ, ਹਿਸਾਬ ਦਾ ਚੰਗੀ ਤਰ੍ਹਾਂ ਰਹਿਣਾ ਤੇ ਇਕਰਾਰ ਨੂੰ ਪੂਰਾ ਕਰਨਾ ਆਦਿ। ਦੁਨੀਆ ਦੇ ਮਹਾਨ ਵਿਅਕਤੀ ਸਮੇਂ ਦੀ ਕਦਰ ਕਰਨ ਕਾਰਨ ਹੀ ਮਹਾਨ ਬਣੇ ਹਨ। ਨੈਪੋਲੀਅਨ ਦਾ ਕਥਨ ਹੈ, 'ਹਰ ਘੜੀ ਜੋ ਅਸੀਂ ਗੁਆਉਂਦੇ ਹਾਂ, ਸਾਡੀ ਬਦਕਿਸਮਤੀ ਦੇ ਖਜ਼ਾਨੇ ਵਿਚ ਜਮ੍ਹਾਂ ਹੁੰਦੀ ਰਹਿੰਦੀ ਹੈ।' ਪ੍ਰੰਤੂ ਸਾਡੇ ਦੇਸ਼ ਵਿਚ ਸਮੇਂ ਦੀ ਕਦਰ ਬਹੁਤ ਘੱਟ ਲੋਕ ਹੀ ਕਰਦੇ ਹਨ। ਚੇਤੇ ਰੱਖਣਾ ਚਾਹੀਦਾ ਹੈ, 'ਕੱਲ੍ਹ ਕਰਨਾ, ਸੋ ਅੱਜ ਕਰ, ਅੱਜ ਕਰਨਾ ਸੋ ਹੁਣ, ਉਮਰ ਹੱਡਾਂ ਨੂੰ ਖਾ ਰਹੀ ਜਿਉਂ ਲੱਕੜੀ ਨੂੰ ਘੁਣ।' ਸੋ, ਵਕਤ ਦਾ ਪਾਬੰਦ ਹੋਣਾ ਸਾਡੇ ਸਾਰਿਆਂ ਲਈ ਜ਼ਰੂਰੀ ਹੈ।

-ਰਾਜਵੰਤ ਸਿੰਘ ਰਾਜੂ
ਗੁਰੂ ਨਾਨਕ ਆਟੋ ਸਪੇਅਰਜ਼, ਰਾਏਕੋਟ।

ਕਿਤਾਬਾਂ ਦਾ ਮਹੱਤਵ

ਕਿਤਾਬਾਂ ਇਨਸਾਨ ਦੀਆਂ ਸਭ ਤੋਂ ਸੱਚੀਆਂ ਦੋਸਤ ਹਨ ਜੋ ਇਨਸਾਨ ਨੂੰ ਸਹੀ ਗ਼ਲਤ ਦੀ ਪਛਾਣ ਕਰਨਾ ਸਿਖਾਉਂਦੀਆਂ ਹਨ। ਚੰਗੀਆਂ ਕਿਤਾਬਾਂ ਹਮੇਸ਼ਾ ਸਹੀ ਦਿਸ਼ਾ ਦਿਖਾਉਂਦੀਆਂ ਹਨ। ਕਿਤਾਬਾਂ ਪੜ੍ਹਨ ਨਾਲ ਜਿਥੇ ਸਾਡਾ ਦਿਲ ਪਰਚਾਵਾ ਹੁੰਦਾ ਹੈ, ਉਥੇ ਹੀ ਜ਼ਿੰਦਗੀ ਦੀਆਂ ਮੁਸ਼ਕਿਲਾਂ ਦਾ ਹੱਲ ਵੀ ਇਨ੍ਹਾਂ ਵਿਚ ਹੀ ਛੁਪਿਆ ਹੁੰਦਾ ਹੈ। ਇਹ ਸਾਡੇ ਚਰਿੱਤਰ ਨਿਰਮਾਣ ਵਿਚ ਵੀ ਬਹੁਤ ਯੋਗਦਾਨ ਪਾਉਂਦੀਆਂ ਹਨ ਪਰ ਅਫ਼ਸੋਸ ਅੱਜ ਦੀ ਨੌਜਵਾਨ ਪੀੜ੍ਹੀ ਇੰਟਰਨੈੱਟ ਦੀ ਦੁਨੀਆ ਵਿਚ ਅਜਿਹੀ ਖੁੱਭੀ ਹੋਈ ਹੈ ਕਿ ਉਨ੍ਹਾਂ ਕੋਲ ਕਿਤਾਬਾਂ ਪੜ੍ਹਨ ਦਾ ਸਮਾਂ ਹੀ ਨਹੀਂ ਹੁੰਦਾ। ਇਸੇ ਕਾਰਨ ਤਾਂ ਨੌਜਵਾਨਾਂ ਵਿਚ ਅਪਰਾਧਕ ਪ੍ਰਵਰਿਤੀਆਂ ਬਹੁਤ ਵੱਧ ਚੁੱਕੀਆਂ ਹਨ। ਚੰਗੀਆਂ ਕਿਤਾਬਾਂ ਇਨਸਾਨ ਦੀ ਗੰਦੀ ਸੋਚ ਨੂੰ ਬਦਲ ਦਿੰਦੀਆਂ ਹਨ। ਅੱਜ ਹਰ ਪਿੰਡ ਵਿਚ ਸਾਨੂੰ ਸ਼ਰਾਬ ਦਾ ਠੇਕਾ ਤਾਂ ਦੇਖਣ ਨੂੰ ਮਿਲ ਜਾਵੇਗਾ ਪਰ ਕੋਈ ਲਾਇਬ੍ਰੇਰੀ ਨਹੀਂ। ਪਰ ਅੱਜ ਲੋੜ ਹੈ ਕਿਤਾਬਾਂ ਨਾਲ ਦੋਸਤੀ ਕਰਕੇ ਸਮਾਜ ਨੂੰ ਇਕ ਨਵੀਂ ਦਿਸ਼ਾ ਤੇ ਨਵੀਂ ਸੋਚ ਦੇਣ ਦੀ।

-ਜਸਪ੍ਰੀਤ ਕੌਰ 'ਸੰਘਾ'
ਪਿੰਡ ਤਨੂੰਲੀ, ਹੁਸ਼ਿਆਰਪੁਰ।

30-11-2016

 ਪਾਣੀ ਦੀ ਸਮੱਸਿਆ

ਪਾਣੀ ਸਾਡੀ ਧਰਤੀ ਉੱਪਰ ਕੁਦਰਤੀ ਸੋਮਿਆਂ ਵਿਚ ਗਿਣਿਆ ਜਾਣ ਵਾਲਾ ਇਕ ਅਹਿਮ ਕੁਦਰਤੀ ਸਰੋਤ ਹੈ, ਜਿਸ ਤੋਂ ਬਿਨਾਂ ਇਸ ਧਰਤੀ ਉੱਪਰ ਕਿਸੇ ਵੀ ਪ੍ਰਾਣੀ, ਫ਼ਸਲਾਂ, ਪੌਦੇ ਅਤੇ ਬਨਸਪਤੀ ਦਾ ਜ਼ਿੰਦਾ ਰਹਿਣਾ ਨਾਮੁਮਕਿਨ ਹੈ। ਲੋਕਾਂ ਨੂੰ ਪਾਣੀ ਦੀ ਸੰਭਾਲ ਵਾਸਤੇ ਪ੍ਰੇਰਨ ਲਈ ਬਹੁਤ ਯਤਨ ਕਰਨ ਦੇ ਬਾਵਜੂਦ ਮਨੁੱਖ ਵੱਲੋਂ ਰੋਜ਼ਾਨਾ ਪਾਣੀ ਦੀ ਦੁਰਵਰਤੋਂ ਲਗਾਤਾਰ ਜਾਰੀ ਹੈ। ਜੇਕਰ ਤੁਸੀਂ ਸੱਚਮੁੱਚ ਪਾਣੀ ਦੀ ਸਮੱਸਿਆ ਪ੍ਰਤੀ ਗੰਭੀਰ ਹੋ ਤਾਂ ਤੁਸੀਂ ਪਾਣੀ ਨੂੰ ਲੈ ਕੇ ਘਰ-ਘਰ ਜਾ ਕੇ ਆਉਣ ਵਾਲੇ ਖ਼ਤਰਿਆਂ ਤੋਂ ਬਚਾਉਣ ਲਈ ਵੱਧ ਤੋਂ ਵੱਧ ਲੋਕਾਂ ਨੂੰ ਜਾਣਕਾਰੀ ਦਿਓ। ਸਰਕਾਰਾਂ ਅਤੇ ਸਮਾਜ ਨੂੰ ਚਾਹੀਦਾ ਹੈ ਕਿ ਉਹ ਵੱਧ ਤੋਂ ਵੱਧ ਆਮ ਜਨਤਾ ਨੂੰ ਇਸ ਪ੍ਰਤੀ ਜਾਗ੍ਰਿਤ ਕਰੇ। ਸਾਨੂੰ ਪਾਣੀ ਦੀ ਸਾਂਭ-ਸੰਭਾਲ ਲਈ ਇਕਜੁਟ ਹੋਣਾ ਚਾਹੀਦਾ ਹੈ, ਤਾਂ ਕਿ ਸਾਡੀ ਆਉਣ ਵਾਲੀ ਪੀੜ੍ਹੀ ਇਸ ਕੁਦਰਤੀ ਸੋਮੇ ਦਾ ਭਰਪੂਰ ਅਨੰਦ ਮਾਣ ਸਕੇ।

-ਮਨਿੰਦਰ ਸਿੰਘ ਰਾਜੂ
ਗਰਚਾ ਨਰਸਰੀ, ਧਨੌਲਾ ਰੋਡ, ਬਰਨਾਲਾ।

ਧਰਮ ਅਤੇ ਇਨਸਾਨੀਅਤ

ਵੱਖ-ਵੱਖ ਧਰਮ ਸ਼ਾਸਤਰਾਂ ਅਤੇ ਵਿਦਵਾਨਾਂ ਅਨੁਸਾਰ 'ਧਰਮ' ਦੇ ਅਰਥ ਹਨ-ਕਾਨੂੰਨ, ਕਰਤੱਵ, ਸੱਚਾਈ, ਹੱਕ, ਚੰਗੇ ਗੁਣ ਆਦਿ ਭਾਵ ਪਰਮਾਤਮਾ ਦੀ ਭਗਤੀ ਅਰਾਧਨਾ ਤੇ ਮਨੁੱਖ ਜਾਤੀ ਦੀ ਸੇਵਾ ਵਰਗੇ ਫ਼ਰਜ਼ ਮਿਲ ਕੇ ਧਰਮ ਅਖਵਾਉਂਦੇ ਹਨ। ਆਪਣੇ ਧਰਮ ਨਾਲ ਜੁੜਨ ਵਾਲਾ ਅਤੇ ਫ਼ਰਜ਼ਾਂ ਨੂੰ ਪਛਾਨਣ ਵਾਲਾ ਹੀ ਅਸਲੀ 'ਧਰਮ ਪੁਰਸ਼' ਹੁੰਦਾ ਹੈ। ਪ੍ਰੰਤੂ ਵਰਤਮਾਨ ਦੌਰ ਵਿਚ ਧਰਮ ਨੂੰ ਸੌੜੇ ਅਰਥਾਂ ਨਾਲ ਵਰਤਿਆ ਜਾ ਸਕਦਾ ਹੈ।
ਧਰਮ ਦੇ ਨਾਂਅ 'ਤੇ ਲੜਾਈਆਂ, ਝਗੜੇ ਤੇ ਦੰਗੇ ਫਸਾਦ ਹੋ ਰਹੇ ਹਨ। ਧਰਮ, ਜੀਵਨ-ਜਾਚ ਨਾ ਰਹਿ ਕੇ ਇਕ ਹਥਿਆਰ ਬਣਦਾ ਜਾ ਰਿਹਾ ਹੈ। ਸਮਾਜ ਇਸ ਦੇ ਨਤੀਜੇ ਭੁਗਤ ਰਿਹਾ ਹੈ। ਮਨੁੱਖ ਵਹਿਸ਼ੀ ਹੋ ਗਿਆ। ਉਸ ਵਿਚੋਂ ਇਨਸਾਨੀਅਤ ਮਰ ਗਈ ਹੈ। ਸਮਾਜ ਵਿਚ ਕਾਮ, ਕ੍ਰੋਧ, ਲੋਭ, ਮੋਹ, ਹੰਕਾਰ ਦੀ ਪ੍ਰਧਾਨਤਾ ਹੋ ਗਈ ਹੈ ਅਤੇ ਸਬਰ ਸੰਤੋਖ ਵਾਲੇ ਗੁਣ ਸਿਰਫ ਕਿਤਾਬਾਂ ਦੇ ਸਫ਼ਿਆਂ ਵਿਚ ਹੀ ਦਫ਼ਨ ਹੋ ਕੇ ਰਹਿ ਗਏ ਹਨ। ਇਹ ਸਭ ਕੁਝ ਪੈਸੇ ਨੇ ਕਰਵਾਇਆ ਹੈ। ਇਸ ਨੇ ਮਨੁੱਖ ਨੂੰ ਹੈਵਾਨ ਬਣਾ ਦਿੱਤਾ ਹੈ। ਇਨਸਾਨੀਅਤ ਇਥੋਂ ਤੱਕ ਮੁੱਕ ਗਈ ਹੈ ਕਿ ਜਿਊਂਦਿਆਂ ਨਾਲ ਤਾਂ ਹੇਰਾ-ਫੇਰੀਆਂ ਇਕ ਪਾਸੇ ਰਹੀਆਂ, ਲੋਕ ਤਾਂ ਮੁਰਦਿਆਂ ਨੂੰ ਵੀ ਨਹੀਂ ਬਖਸ਼ ਰਹੇ। ਉਨ੍ਹਾਂ ਦੀਆਂ ਜੇਬਾਂ ਵੀ ਫਰੋਲੀਆਂ ਜਾਂਦੀਆਂ ਹਨ। ਇਥੋਂ ਤੱਕ ਕਿ ਧਰਮ ਦੇ ਨਾਂਅ 'ਤੇ ਡੇਰੇ ਆਦਿ ਹੋਂਦ ਵਿਚ ਆ ਰਹੇ ਹਨ। ਜੇ ਅੱਜ ਸੰਸਾਰ ਸਥਿਰ ਹੈ ਤਾਂ ਇਨ੍ਹਾਂ ਧਰਮੀ ਪੁਰਖਾਂ ਦੀ ਬਦੌਲਤ ਹੈ। ਸੰਸਾਰ ਵਿਚ ਧਰਮ ਜਿੰਦਾ ਹੈ ਸਿਰਫ ਧਰਮੀ ਪੁਰਖਾਂ ਕਰਕੇ ਤੇ ਉਨ੍ਹਾਂ ਕਰਮ ਕਰਕੇ। ਬਹੁਤ ਸਾਰੇ ਲੋਕ ਅਧਰਮੀ ਬਣ ਗਏ ਹਨ ਤੇ ਉਹ ਧਰਮ ਤੋਂ ਡੋਲ ਗਏ ਹਨ। ਅੱਜ ਧਰਮ ਤਾਂ ਮੌਜੂਦ ਹੈ ਪਰ ਆਦਮੀ ਅੱਖਾਂ ਬੰਦ ਕਰਕੇ ਬੈਠਾ ਹੈ, ਜਿਵੇਂ ਵਰਖਾ ਤਾਂ ਹੋ ਰਹੀ ਹੈ ਪਰ ਉਹ ਭਿੱਜਣ ਤੋਂ ਬਚਦਾ ਹੈ। ਉਹ ਭਟਕ ਗਿਆ ਹੈ ਤੇ ਮਨੁੱਖ ਜਨਮ ਵਿਅਰਥ ਗੁਆ ਰਿਹਾ ਹੈ।

-ਸੋਨੀਆ
ਗੁਰੂ ਨਾਨਕ ਕਾਲਜ ਫਾਰ ਗਰਲਜ਼, ਸ੍ਰੀ ਮੁਕਤਸਰ ਸਾਹਿਬ।

29-11-2016

 ਸ਼ਲਾਘਾਯੋਗ ਫ਼ੈਸਲਾ

ਐਸ.ਵਾਈ.ਐਲ. ਦੇ ਮੁੱਦੇ 'ਤੇ ਪੰਜਾਬ ਦੇ ਖਿਲਾਫ਼ ਸੁਪਰੀਮ ਕੋਰਟ ਦੇ ਆਏ ਫ਼ੈਸਲੇ ਸਬੰਧੀ ਜਿਸ ਤਰ੍ਹਾਂ ਪੰਜਾਬ ਸਰਕਾਰ ਨੇ ਵਿਧਾਨ ਸਭਾ ਦੇ ਵਿਸ਼ੇਸ਼ ਸਮਾਗਮ ਰਾਹੀਂ ਸਖ਼ਤ ਰੁਖ਼ ਅਖ਼ਤਿਆਰ ਕੀਤਾ ਹੈ, ਉਸ ਲਈ ਮੁੱਖ ਮੰਤਰੀ ਅਤੇ ਪੰਜਾਬ ਸਰਕਾਰ ਸ਼ਲਾਘਾ ਦੀ ਪਾਤਰ ਹੈ। ਸ: ਬਾਦਲ ਨੇ ਦਿਖਾ ਦਿੱਤਾ ਹੈ ਕਿ ਪੰਜਾਬ ਨਾਲ ਹੋਰ ਧੱਕੇਸ਼ਾਹੀ ਨਹੀਂ ਚੱਲੇਗੀ। ਗ਼ੈਰ-ਰਿਪੇਰੀਅਨ ਰਾਜ ਰਾਜਸਥਾਨ, ਹਰਿਆਣਾ ਅਤੇ ਦਿੱਲੀ ਤੋਂ ਪੰਜਾਬ ਦੇ ਦਰਿਆਵਾਂ ਦੇ ਪਾਣੀਆਂ ਦੀ ਬਣਦੀ ਰਾਇਲਟੀ ਅਤੇ ਖਰਚ ਲੈਣ ਦਾ ਫ਼ੈਸਲਾ ਭਾਵੇਂ ਦੇਰ ਨਾਲ ਕੀਤਾ ਗਿਆ ਹੈ ਪਰ ਬਿਲਕੁਲ ਜਾਇਜ਼ ਹੈ, ਕਿਉਂਕਿ ਪੰਜਾਬ ਦਾ ਆਪਣੇ ਪਾਣੀਆਂ 'ਤੇ ਸੰਵਿਧਾਨਕ ਹੱਕ ਹੈ। ਹੁਣ ਸਮਾਂ ਆ ਗਿਆ ਹੈ ਕਿ ਅਸੀਂ ਸਮੂਹ ਪੰਜਾਬੀ ਪਾਰਟੀਬਾਜ਼ੀ ਤੋਂ ਉੱਪਰ ਉੱਠ ਕੇ ਇਕ ਪਲੇਟਫਾਰਮ 'ਤੇ ਇਕੱਠੇ ਹੋ ਕੇ ਪੰਜਾਬ ਦੇ ਹੱਕਾਂ ਦੀ ਲੜਾਈ ਲੜੀਏ।

-ਲੱਖੀ ਗਿੱਲ ਧਨਾਨਸੂ
ਵੈੱਲਫੇਅਰ ਸੁਸਾਇਟੀ ਧਨਾਨਸੂ, ਲੁਧਿਆਣਾ।

ਮਨੁੱਖ ਤੇ ਇੰਟਰਨੈੱਟ

ਇੰਟਰਨੈੱਟ ਮਨੁੱਖ ਦੀਆਂ ਮਹਾਨ ਖੋਜਾਂ ਵਿਚੋਂ ਇਕ ਹੈ। ਇੰਟਰਨੈੱਟ ਸਦਕਾ ਮਨੁੱਖੀ ਜੀਵਨ ਸੁਖਾਲਾ ਹੋ ਗਿਆ ਹੈ। ਰੇਲਵੇ, ਹਵਾਈ ਜਹਾਜ਼, ਬੈਂਕ ਵਿਚ ਪੈਸੇ ਜਮ੍ਹਾਂ ਕਰਕੇ ਤੇ ਕਢਵਾਉਣੇ, ਬਿੱਲਾਂ ਦਾ ਭੁਗਤਾਨ ਆਦਿ ਇੰਟਰਨੈੱਟ ਸਦਕਾ ਘਰ ਬੈਠੇ ਕੀਤੇ ਜਾ ਸਕਦੇ ਹਨ। ਜਿਥੇ ਇੰਟਰਨੈੱਟ ਦੇ ਏਨੇ ਫਾਇਦੇ ਹਨ, ਉਥੇ ਕਈ ਨੁਕਸਾਨ ਵੀ ਹਨ। ਸੋਸ਼ਲ ਮੀਡੀਆ ਜਿਵੇਂ ਕਿ ਵਟਸਐਪ, ਫੇਸਬੁੱਕ, ਟਵਿੱਟਰ ਆਦਿ ਨੇ ਮਨੁੱਖ ਨੂੰ ਬੇਕਾਰ ਕਰ ਦਿੱਤਾ ਹੈ। ਇਸ ਨਾਲ ਇਕ ਤਾਂ ਉਸ ਦਾ ਸਮਾਂ ਬਰਬਾਦ ਹੁੰਦਾ ਹੈ, ਦੂਜਾ ਅੱਖਾਂ ਦੀ ਰੌਸ਼ਨੀ ਘਟਦੀ ਹੈ। ਲੋੜ ਹੈ ਇਨ੍ਹਾਂ ਸਾਧਨਾਂ ਨੂੰ ਸਹੀ ਢੰਗ ਨਾਲ ਇਸਤੇਮਾਲ ਕਰਨ ਦੀ।

-ਮਨਿੰਦਰ ਸਿੰਘ ਰਾਜੂ
ਗਰਚਾ ਨਰਸਰੀ, ਧਨੌਲਾ ਰੋਡ, ਬਰਨਾਲਾ।

ਨੋਟਬੰਦੀ ਦਾ ਅਸਰ

ਭਾਰਤ ਸਰਕਾਰ ਵੱਲੋਂ ਲੰਘੀ 8 ਨਵੰਬਰ ਦੀ ਅੱਧੀ ਰਾਤ ਤੋਂ 500 ਤੇ 1000 ਦੇ ਨੋਟਾਂ ਉੱਪਰ ਪਾਬੰਦੀ ਲਗਾ ਦਿੱਤੀ ਗਈ ਸੀ। ਸਰਕਾਰ ਵੱਲੋਂ ਲਿਆ ਗਿਆ ਇਹ ਫ਼ੈਸਲਾ ਭਾਵੇਂ ਕਾਲੇ ਧਨ ਨੂੰ ਬਾਹਰ ਲਿਆਉਣ, ਭ੍ਰਿਸ਼ਟਾਚਾਰ ਖ਼ਤਮ ਕਰਨ ਅਤੇ ਅੱਤਵਾਦੀ ਕਾਰਵਾਈਆਂ ਰੋਕਣ ਲਈ ਕਾਰਗਰ ਵੀ ਮੰਨਿਆ ਜਾ ਰਿਹਾ ਹੈ ਪਰ ਦੂਸਰੇ ਪਾਸੇ ਇਸ ਫ਼ੈਸਲੇ ਨਾਲ ਦੇਸ਼ ਵਾਸੀਆਂ ਨੂੰ ਆ ਰਹੀਆਂ ਭਾਰੀ ਪ੍ਰੇਸ਼ਾਨੀਆਂ ਨੂੰ ਵੀ ਅੱਖੋਂ-ਪਰੋਖੇ ਨਹੀਂ ਕੀਤਾ ਜਾ ਸਕਦਾ।
ਅਸੀਂ ਦੇਖ ਹੀ ਰਹੇ ਹਾਂ ਕਿ ਪਿਛਲੇ ਕੁਝ ਦਿਨਾਂ ਤੋਂ ਲੋਕ ਕਿਵੇਂ ਬੈਂਕਾਂ ਅੱਗੇ ਆਪਣੀ ਪੁਰਾਣੀ ਕਰੰਸੀ ਬਦਲੇ ਨਵੀਂ ਕਰੰਸੀ ਲੈਣ ਲਈ ਖੱਜਲ-ਖੁਆਰ ਹੋ ਰਹੇ ਹਨ। ਹਰ ਬੈਂਕ ਅਤੇ ਏ.ਟੀ.ਐਮਾਂ. ਅੱਗੇ ਲੋਕਾਂ ਦੀਆਂ ਲੰਮੀਆਂ-ਲੰਮੀਆਂ ਲਾਈਨਾਂ ਨਜ਼ਰ ਆ ਰਹੀਆਂ ਹਨ ਅਤੇ ਕੁਝ ਲੋਕਾਂ ਨੂੰ 2000 ਦੇ ਨੋਟ ਮਿਲਣ ਤੋਂ ਬਾਅਦ ਬਾਕੀਆਂ ਦੇ ਪੱਲੇ ਨਿਰਾਸ਼ਾ ਹੀ ਪੈ ਰਹੀ ਹੈ। ਅਜਿਹੇ ਹਾਲਾਤ ਵਿਚ ਦਿਨ-ਬਦਿਨ ਲੋਕਾਂ ਦੇ ਘਰ ਚੱਲਣੇ ਮੁਸ਼ਕਿਲ ਹੁੰਦੇ ਜਾ ਰਹੇ ਹਨ। ਸਰਕਾਰ ਨੂੰ ਇਸ ਸੰਕਟ ਵਿਚੋਂ ਦੇਸ਼ ਨੂੰ ਬਾਹਰ ਕੱਢਣ ਲਈ ਫੁਰਤੀ ਨਾਲ ਠੋਸ ਕਦਮ ਚੁੱਕਣੇ ਚਾਹੀਦੇ ਹਨ ਤਾਂ ਜੋ ਜਲਦੀ ਤੋਂ ਜਲਦੀ ਦੇਸ਼ ਵਿਚ ਹਾਲਾਤ ਆਮ ਵਾਂਗ ਬਣ ਸਕਣ।

-ਰਾਜਾ ਗਿੱਲ (ਚੜਿੱਕ)
ਪਿੰਡ ਤੇ ਡਾਕ: ਚੜਿੱਕ, ਜ਼ਿਲ੍ਹਾ ਮੋਗਾ।

28-11-2016

 ਰੁੱਖਾਂ ਨਾਲ ਸਾਂਝ

ਰੁੱਖਾਂ ਦਾ ਮਨੁੱਖੀ ਜ਼ਿੰਦਗੀ ਵਿਚ ਬੜਾ ਵੱਡਾ ਯੋਗਦਾਨ ਹੈ | ਵਿਅਕਤੀ ਦੇ ਜਨਮ ਤੋਂ ਲੈ ਕੇ ਅਖੀਰ ਤੱਕ ਰੁੱਖ ਸਾਂਝਾਂ ਬਰਕਰਾਰ ਰੱਖਦਾ ਹੈ | ਆਪਣੀ ਇਨਸਾਨੀਅਤ ਦੇ ਨਾਤੇ ਫ਼ਰਜ਼ਾਂ ਦੀ ਪਾਲਣਾ ਕਰਦੇ ਹੋਏ ਹਰ ਵਿਅਕਤੀ ਨੂੰ ਮੁੜ ਜੰਗਲ ਸੁਰਜੀਤ ਕਰਨ ਲਈ ਹੰਭਲਾ ਮਾਰਨ ਦਾ ਪ੍ਰਣ ਕਰਨਾ ਚਾਹੀਦਾ ਹੈ, ਤਾਂ ਹੀ ਜਲ ਸੋਮਿਆਂ ਦੇ ਬਚਾਅ ਲਈ ਵੱਡੀ ਪੱਧਰ 'ਤੇ ਬਾਰਿਸ਼ਾਂ ਹੋ ਸਕਦੀਆਂ ਹਨ | ਫਜ਼ੂਲ ਖਰਚਿਆਂ ਨੂੰ ਛੱਡ ਕੇ ਬੱਚਿਆਂ ਦੇ ਜਨਮ ਦਿਨ 'ਤੇ ਰੁੱਖ ਲਗਾ ਕੇ ਮਨਾਉਣੇ ਚਾਹੀਦੇ ਹਨ ਅਤੇ ਧਾਰਮਿਕ ਸਮਾਗਮਾਂ ਰਾਹੀਂ ਹੀ ਹਰੇ ਪੌਦਿਆਂ ਦਾ ਪ੍ਰਸ਼ਾਦ ਵੰਡ ਕੇ ਰੁੱਖਾਂ ਪ੍ਰਤੀ ਪਿਆਰ ਦੀ ਭਾਵਨਾ ਪੈਦਾ ਕੀਤੀ ਜਾ ਸਕਦੀ ਹੈ | ਨੌਜਵਾਨਾਂ ਨੂੰ ਪਿੰਡਾਂ ਅੰਦਰ ਛਾਂਦਾਰ ਤੇ ਫਲਾਂ ਵਾਲੇ ਪੌਦਿਆਂ ਦੇ ਨਾਲ-ਨਾਲ ਪਿੰਡਾਂ ਦੀਆਂ ਸੱਥਾਂ 'ਚ ਤਿ੍ਵੈਣੀ ਜ਼ਰੂਰ ਲਗਾਉਣੀ ਚਾਹੀਦੀ ਹੈ, ਜਿਸ ਤੋਂ ਭਾਵ ਹੈ ਤਿੰਨ ਇਕੱਠੇ ਰੁੱਖ ਲਗਾਉਣੇ ਪਿੱਪਲ, ਬੋਹੜ ਤੇ ਨਿੰਮ | ਇਨ੍ਹਾਂ ਰੁੱਖਾਂ ਦਾ ਸਹੀ ਪਾਲਣ-ਪੋਸ਼ਣ ਕਰਨਾ ਚਾਹੀਦਾ ਹੈ |

-ਹਰਿੰਦਰ ਸਿੰਘ ਗਰਚਾ
ਆਤਮ ਨਗਰ, ਜਗਰਾਉਂ |

ਇਹ ਵੰਡਾਂ ਦੇ ਝਗੜੇ

ਅੰਗਰੇਜ਼ਾਂ ਦੀ ਇਹ ਇਕ ਵੱਡੀ ਦੇਣ ਸੀ ਕਿ ਉਨ੍ਹਾਂ ਨੇ ਸੈਂਕੜੇ ਰਿਆਸਤਾਂ ਵਿਚ ਵੰਡੇ ਦੇਸ਼ ਨੂੰ ਇਕੱਠਿਆਂ ਕਰਕੇ ਇਕ ਹਿੰਦੁਸਤਾਨ ਜਾਂ ਇੰਡੀਆ ਬਣਾ ਦਿੱਤਾ ਸੀ | ਦੇਸ਼ ਦੇ ਤਾਕਤਵਰ ਬਣਨ ਦੇ ਨਾਲ ਦੇਸ਼ ਉਤੇ ਕਦੇ ਵੀ ਬਾਹਰੋਂ ਹਮਲਾ ਨਹੀਂ ਸੀ ਹੋਇਆ | ਸੰਨ 1947 ਵਿਚ ਆਜ਼ਾਦੀ ਹਾਸਿਲ ਹੋਣ 'ਤੇ ਦੇਸ਼ ਹਿੰਦੁਸਤਾਨ ਤੇ ਪਾਕਿਸਤਾਨ ਵਿਚ ਵੰਡਿਆ ਗਿਆ | ਹੁਣ ਤੱਕ ਕਸ਼ਮੀਰ ਦੀ ਵੰਡ ਨੂੰ ਲੈ ਕੇ ਦੋਵਾਂ ਦੇਸ਼ਾਂ ਵਿਚਕਾਰ ਤਿੰਨ ਜੰਗਾਂ ਹੋ ਚੁੱਕੀਆਂ ਹਨ | ਪਿਛਲੇ ਕਈ ਸਾਲਾਂ ਤੋਂ ਦੇਸ਼ ਦੇ ਕਈ ਪ੍ਰਾਂਤਾਂ ਨੂੰ ਤੋੜ ਕੇ ਦੋ-ਦੋ ਪ੍ਰਾਂਤ ਬਣਾਏ ਜਾ ਰਹੇ ਹਨ | ਪੰਜਾਬ ਦੇ ਇਕ ਵੱਡੇ ਤੇ ਖੁਸ਼ਹਾਲ ਪ੍ਰਾਂਤ ਨੂੰ ਸੰਨ 1966 ਵਿਚ ਪੰਜਾਬ, ਹਰਿਆਣਾ ਤੇ ਹਿਮਾਚਲ ਦੇ ਤਿੰਨਾਂ ਪ੍ਰਾਂਤਾਂ ਵਿਚ ਵੰਡ ਦਿੱਤਾ ਗਿਆ | ਇਕ ਸਰਕਾਰ ਦੀ ਥਾਂ ਤਿੰਨ ਸਰਕਾਰਾਂ ਬਣੀਆਂ | ਇਸ ਖਿੱਤੇ ਦੇ ਰਾਜਸੀ ਲੋਕਾਂ ਨੂੰ ਮੌਜਾਂ ਲੱਗ ਗਈਆਂ | ਪੰ੍ਰਤੂ ਇਨ੍ਹਾਂ ਪ੍ਰਾਂਤਾਂ ਵਿਚਕਾਰ ਪਾਣੀ ਅਤੇ ਇਲਾਕਿਆਂ ਦੀ ਵੰਡ ਦੇ ਝਗੜੇ ਸ਼ੁਰੂ ਹੋ ਗਏ | ਇਨ੍ਹਾਂ ਪ੍ਰਾਂਤਾਂ ਦੇ ਲੋਕਾਂ ਵਿਚਕਾਰ ਆਪਸੀ ਨਫ਼ਰਤ ਪੈਦਾ ਹੋ ਗਈ | ਪੰਜਾਬ ਦੀ ਵੰਡ ਹੋਣ ਨਾਲ ਇਥੇ ਬੇਰੁਜ਼ਗਾਰੀ ਦਾ ਦੌਰ ਸ਼ੁਰੂ ਹੋ ਗਿਆ ਤੇ ਹੁਣ ਤੱਕ ਪੰਜਾਬ ਦੇ ਕੋਈ ਪੰਜਾਹ ਲੱਖ ਨੌਜਵਾਨ ਵਿਦੇਸ਼ਾਂ ਵਿਚ ਪ੍ਰਵਾਸ ਕਰ ਚੁੱਕੇ ਹਨ | ਦੇਸ਼ ਨੂੰ ਵੰਡਣ ਵਾਲੇ ਲੀਡਰ ਅਤੇ ਉਨ੍ਹਾਂ ਦੀਆਂ ਪਾਰਟੀਆਂ ਆਪਣੇ ਪਰਿਵਾਰ ਹੀ ਪਾਲਦੀਆਂ ਰਹੀਆਂ ਹਨ | ਉਹ ਪਰਜਾ ਪਾਲਕ ਨਹੀਂ ਹਨ | ਜੇ ਦੇਸ਼ ਦੇ ਲੋਕ ਨਾ ਜਾਗੇ ਤਾਂ ਉਨ੍ਹਾਂ ਦੀਆਂ ਆਉਣ ਵਾਲੀਆਂ ਨਸਲਾਂ ਨੂੰ ਭਾਰੀ ਕੀਮਤ ਚੁਕਾਉਣੀ ਪਵੇਗੀ |

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਗੁਰੂ ਨਾਨਕ ਵਾੜਾ, ਅੰਮਿ੍ਤਸਰ |

ਸੁਧਾਰਾਂ ਦੀ ਮਾਰ

ਪਹਿਲਾਂ ਹੀ ਮੰਦਹਾਲੀਆਂ ਦੇ ਦੌਰ ਵਿਚੋਂ ਗੁਜ਼ਰ ਰਹੀ ਲੋਕਾਈ ਲਈ ਨੋਟਬੰਦੀ ਨਵੀਂ ਆਫ਼ਤ ਬਣ ਕੇ ਉਭਰੀ ਹੈ | ਮਿਹਨਤ, ਮੁਸ਼ੱਕਤ ਨਾਲ ਕਮਾਏ ਚੰਦ ਰੁਪਏ ਮਿੱਟੀ ਹੋ ਜਾਣ ਦੇ ਡਰੋਂ ਜਨ-ਸਾਧਾਰਨ ਦੇ ਸਾਹ ਸੁੱਕਣੇ ਲਾਜ਼ਮੀ ਨੇ | ਨਤੀਜਾ ਇਹ ਹੋਇਆ ਕਿ ਸਭ ਜ਼ਰੂਰੀ ਕੰਮ ਛੱਡ ਕੇ ਲੋਕ ਬੈਂਕਾਂ ਦੀਆਂ ਲਾਈਨਾਂ ਵਿਚ ਜਾ ਖੜ੍ਹਦੇ ਨੇ, ਲੋਕਾਂ ਕੋਲ ਹੋਰ ਕੋਈ ਚਾਰਾ ਵੀ ਨਹੀਂ | ਬੇਸ਼ੱਕ ਅਜਿਹੇ ਦਲੇਰੀ ਭਰੇ ਫ਼ੈਸਲੇ ਅੱਜ ਦੇ ਹਾਲਾਤ ਮੁਤਾਬਿਕ ਲਿਆਉਣੇ ਬਹੁਤ ਜ਼ਰੂਰੀ ਹਨ ਤੇ ਨੋਟਬੰਦੀ ਦੇ ਇਸ ਫ਼ੈਸਲੇ ਵਿਚ ਸਰਕਾਰ ਦੀ ਮਨਸ਼ਾ ਉਤੇ ਫਿਲਹਾਲ ਕੋਈ ਕਿੰਤੂ-ਪੰ੍ਰਤੂ ਵੀ ਨਹੀਂ ਕੀਤਾ ਜਾ ਸਕਦਾ | ਲੋੜ ਹੈ ਨੀਤ ਦੇ ਨਾਲ-ਨਾਲ ਨੀਤੀਆਂ ਵੀ ਬਦਲੀਆਂ ਜਾਣ | ਨਵੇਂ ਦਾਅਵਿਆਂ ਤੇ ਵਾਅਦਿਆਂ ਨੂੰ ਜ਼ਮੀਨੀ ਹਕੀਕਤਾਂ ਨਾਲ ਜੋੜਿਆ ਜਾਵੇ | ਸਬਜ਼ਬਾਜ਼ਾਂ ਦੀ ਦੁਨੀਆ ਤਾਂ ਲੋਕ 70 ਸਾਲਾਂ ਤੋਂ ਦੇਖਦੇ ਆ ਰਹੇ ਨੇ | ਲੋੜ ਹੈ ਕੇਵਲ ਮੀਡੀਆ ਜ਼ਰੀਏ ਵਾਹ-ਵਾਹ ਖੱਟਣ ਤੇ ਸਿਆਸੀ ਫਾਇਦਿਆਂ ਨੂੰ ਸਨਮੁੱਖ ਰੱਖਣ ਦੀ ਥਾਂ ਲੋਕ ਹਿੱਤਾਂ ਦਾ ਵੀ ਖਿਆਲ ਰੱਖਿਆ ਜਾਵੇ... ਤਾਂ ਹੀ ਅਜਿਹੇ ਫ਼ੈਸਲਿਆਂ ਨੂੰ ਲੋਕ ਕਚਹਿਰੀ ਵਿਚ ਮਾਨਤਾ ਮਿਲ ਸਕਦੀ ਹੈ |

-ਬਲਜਿੰਦਰ ਸਿੰਘ ਸਮਾਅ
ਸ੍ਰੀ ਮੁਕਤਸਰ ਸਾਹਿਬ |

ਮਹਿੰਗਾਈ

ਮਨੁੱਖ ਇਕ ਸਮਾਜਿਕ ਪ੍ਰਾਣੀ ਹੈ | ਸਮਾਜ ਵਿਚ ਰਹਿੰਦਿਆਂ ਮਨੁੱਖ ਨੂੰ ਹਰ ਇਕ ਵਸਤੂ ਦੀ ਲੋੜ ਹੁੰਦੀ ਹੈ, ਜਿਵੇਂ ਕਿ ਕੁੱਲੀ, ਜੁੱਲੀ ਤੇ ਗੁੱਲੀ | ਪਰ ਅਜੋਕੇ ਸਮੇਂ 'ਚ ਇਨ੍ਹਾਂ ਦੀ ਪ੍ਰਾਪਤੀ ਕਰਨੀ ਸਾਧਾਰਨ ਇਨਸਾਨ ਲਈ ਬੇਹੱਦ ਮੁਸ਼ਕਿਲ ਹੁੰਦੀ ਜਾ ਰਹੀ ਹੈ | ਇਸ ਵਿਚ ਕੋਈ ਸ਼ੱਕ ਨਹੀਂ ਕਿ ਸਾਡਾ ਦੇਸ਼ ਤਰੱਕੀ ਕਰ ਰਿਹਾ ਹੈ | ਪਰ ਦੇਸ਼ ਦੀ ਤਰੱਕੀ ਦੇ ਨਾਲ-ਨਾਲ ਮਹਿੰਗਾਈ ਵੀ ਤਰੱਕੀ ਕਰ ਰਹੀ ਹੈ | ਇਸ ਮਹਿੰਗਾਈ ਦੀ ਤਰੱਕੀ ਦਾ ਮਾਰੂ ਪ੍ਰਭਾਵ ਆਮ ਲੋਕਾਂ ਉੱਪਰ ਵਧੇਰੇ ਪੈਂਦਾ ਹੈ | ਆਮ ਇਨਸਾਨ ਨੂੰ ਰੋਟੀ, ਕੱਪੜਾ ਤੇ ਮਕਾਨ ਦੀ ਸਖ਼ਤ ਜ਼ਰੂਰਤ ਹੁੰਦੀ ਹੈ ਪਰ ਜਿਸ ਚੀਜ਼ ਵੱਲ ਦੇਖਦੇ ਹਾਂ, ਉਹ ਮਹਿੰਗੀ ਹੀ ਨਜ਼ਰ ਆਉਂਦੀ ਹੈ | ਚਾਹੇ ਇਹ ਖਾਣ-ਪੀਣ ਵਾਲੀ, ਪਹਿਨਣ ਵਾਲੀ ਜਾਂ ਰਿਹਾਇਸ਼ ਸਬੰਧੀ ਹੀ ਕਿਉਂ ਨਾ ਹੋਵੇ | ਅਸੀਂ ਆਸ ਕਰਦੇ ਹਾਂ ਕਿ ਦੇਸ਼ ਦੀ ਤਰੱਕੀ ਨੂੰ ਹੋਰ ਵਧਾਇਆ ਜਾਵੇਗਾ ਅਤੇ ਮਹਿੰਗਾਈ ਦੀ ਤਰੱਕੀ ਨੂੰ ਨੱਥ ਪਾਈ ਜਾਵੇਗੀ |

-ਹਰਬੰਸ ਸਿੰਘ ਬੰਗਾ, ਰਾਏਕੋਟ |
<br/>

26-11-2016

 ਲੋਕਰਾਜ ਦਾ ਅਸਲੀ ਚਿਹਰਾ

ਦੇਸ਼ ਦੇ ਅਜੋਕੇ ਲੋਕ ਰਾਜ ਵਿਚ ਕੇਂਦਰ ਤੋਂ ਲੈ ਕੇ ਰਾਜ ਸਰਕਾਰਾਂ ਤੱਕ ਸਿਰਫ ਇਕੋ ਪਰਿਵਾਰ ਦੇ ਮੁੱਖ ਮੰਤਰੀ ਤੇ ਮੰਤਰੀ ਬਣੇ ਦਿਸਦੇ ਹਨ। ਵਾਰ-ਵਾਰ ਗੱਦੀਨਸ਼ੀਨ ਬਣਨ ਦੇ ਨਾਲ ਇਨ੍ਹਾਂ ਨੇ ਸਰਕਾਰੀ ਪੈਸਿਆਂ ਦੇ ਘਪਲਿਆਂ ਦੇ ਨਾਲ ਆਪਣੇ ਪ੍ਰਾਈਵੇਟ ਕਾਰੋਬਾਰ ਸ਼ੁਰੂ ਕਰਕੇ ਅਥਾਹ ਧਨ ਕਮਾ ਲਿਆ ਹੈ। ਇਹ ਲੋਕ ਹੁਣ ਪੈਸੇ ਨਾਲ ਵੋਟਾਂ ਖਰੀਦ ਕੇ ਸਫਲ ਹੁੰਦੇ ਹਨ, ਰਾਜ ਕਰਦੇ ਤੇ ਚੋਣਾਂ ਹੋਣ 'ਤੇ ਸਫਲ ਹੋ ਕੇ ਆਪਣੇ ਪਰਿਵਾਰਕ ਰਾਜ ਕਾਇਮ ਕਰੀ ਜਾ ਰਹੇ ਹਨ। ਕੇਂਦਰ ਵਿਚ ਨਹਿਰੂ ਗਾਂਧੀ ਪਰਿਵਾਰ ਦੀ ਹੀ ਇਕ ਅਜਿਹੀ ਮਿਸਾਲ ਹੈ। ਪੰਜਾਬ, ਜੰਮੂ-ਕਸ਼ਮੀਰ, ਹਿਮਾਚਲ, ਹਰਿਆਣਾ, ਉੱਤਰ ਪ੍ਰਦੇਸ਼ ਤੇ ਬਿਹਾਰ ਵਿਚ ਵੀ ਇਕ ਹੀ ਪਰਿਵਾਰ ਦਾ ਬੋਲਬਾਲਾ ਹੈ। ਹੌਲੀ-ਹੌਲੀ ਪਰਿਵਾਰਕ ਰਾਜ ਬਣਾਉਣ ਦਾ ਰਿਵਾਜ ਦੇਸ਼ ਦੇ ਬਾਕੀ ਰਹਿੰਦੇ ਰਾਜਾਂ ਵਿਚ ਵੀ ਫੈਲ ਜਾਏਗਾ। ਜਿਨ੍ਹਾਂ ਪਰਿਵਾਰਾਂ ਦੇ ਪਰਿਵਾਰਕ ਰਾਜ ਬਣ ਚੁੱਕੇ ਹਨ, ਉਹ ਉੱਚੀਆਂ ਪਦਵੀਆਂ ਉੱਤੇ ਆਪਣੇ ਨੇੜਲੇ ਰਿਸ਼ਤੇਦਾਰ ਨੂੰ ਹੀ ਤਾਇਨਾਤ ਕਰਦੇ ਹਨ। ਪੁਰਾਣੇ ਰਾਜੇ ਵੀ ਅਜਿਹਾ ਹੀ ਕਰਦੇ ਸਨ। ਜੇ ਲੋਕ ਰਾਜ ਦਾ ਅਜਿਹਾ ਹਾਲ ਰਿਹਾ ਤਾਂ ਸਮਾਂ ਬੀਤਣ 'ਤੇ ਅਜੋਕੇ ਸਿਆਸੀ ਲੀਡਰ ਪ੍ਰਾਂਤਾਂ ਦੇ ਰਾਜੇ ਅਤੇ ਉਨ੍ਹਾਂ ਦੇ ਰਿਸ਼ਤੇਦਾਰ ਨਾਜਾਇਜ਼ ਜਾਇਦਾਦਾਂ ਉੱਤੇ ਕਬਜ਼ੇ ਕਰਕੇ ਜਾਗੀਰਦਾਰ ਬਣ ਜਾਣਗੇ। ਦੇਸ਼ ਦੇ ਅਜੋਕੇ, ਸੱਤਰ ਸਾਲਾਂ ਦੇ ਬੀਤੇ ਲੋਕ ਰਾਜ ਦਾ ਚਿਹਰਾ ਤਾਂ ਅਜਿਹਾ ਹੀ ਨਜ਼ਰ ਆਉਂਦਾ ਹੈ। ਦੇਸ਼ ਦੀ ਕੁਝ ਜਨਤਾ ਸਮਝਦਾਰ ਹੈ ਪ੍ਰੰਤੂ ਜਿਹੜੀ ਅਨਪੜ੍ਹ ਤੇ ਗ਼ੈਰ-ਜਾਗਰੂਕ ਬਹੁਤੀ ਜਨਤਾ ਹੈ, ਉਸੇ ਦੀ ਸਿਰ 'ਤੇ ਹੀ ਭ੍ਰਿਸ਼ਟ ਲੀਡਰਾਂ ਨੇ ਜਿੱਤਣਾ ਹੈ। ਪੰਜਾਬ ਵਿਧਾਨ ਸਭਾ ਦੀਆਂ ਸੰਨ 2017 ਨੂੰ ਹੋਣ ਵਾਲੀਆਂ ਚੋਣਾਂ ਦੇ ਨਤੀਜੇ ਨਾ ਤਾਂ ਪੰਜਾਬ ਵਿਚੋਂ ਭ੍ਰਿਸ਼ਟਾਚਾਰ ਖ਼ਤਮ ਕਰਨਗੇ ਅਤੇ ਨਾ ਹੀ ਬੇਰੁਜ਼ਗਾਰੀ। ਪੰਜਾਬ ਦੇ ਨੌਜਵਾਨਾਂ ਦਾ ਵਿਦੇਸ਼ਾਂ ਵੱਲ ਪ੍ਰਵਾਸ ਇਸੇ ਤਰ੍ਹਾਂ ਹੁੰਦਾ ਰਹੇਗਾ ਅਤੇ ਬਿਰਧ ਮਾਪੇ ਇਕੱਲਤਾ ਦਾ ਸੰਤਾਪ ਭੋਗਦੇ ਰਹਿਣਗੇ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਗੁਰੂ ਨਾਨਕ ਵਾੜਾ, ਅੰਮ੍ਰਿਤਸਰ।

ਚੋਣ ਕਮਿਸ਼ਨ ਦੇ ਧਿਆਨ ਹਿਤ

ਪੰਜਾਬ ਵਿਧਾਨ ਸਭਾ ਚੋਣਾਂ ਨੇੜੇ ਆ ਰਹੀਆਂ ਹਨ। ਚੋਣਾਂ ਦੇ ਮੱਦੇਨਜ਼ਰ ਪੰਜਾਬ ਦਾ ਸਿਆਸੀ ਮਾਹੌਲ ਤਕਰੀਬਨ-ਤਕਰੀਬਨ ਪੂਰੀ ਤਰ੍ਹਾਂ ਭਖ ਗਿਆ ਹੈ। ਸਿਆਸਤ ਨਾਲ ਜੁੜੀਆਂ ਤਕਰੀਬਨ ਸਭ ਧਿਰਾਂ ਸਰਗਰਮ ਹੋ ਗਈਆਂ ਹਨ। ਸ਼ੰਕੇ ਖੜ੍ਹੇ ਹੋ ਰਹੇ ਹਨ ਕਿ ਇਨ੍ਹਾਂ ਚੋਣਾਂ ਵਿਚ ਸਿਆਸੀ ਪਾਰਟੀਆਂ ਵੱਲੋਂ ਨਸ਼ੇ ਵੰਡੇ ਜਾ ਸਕਦੇ ਹਨ। ਹੋ ਸਕਦਾ ਹੈ ਕਿ ਪੈਸੇ ਵੀ ਵੰਡੇ ਜਾਣ। ਮਾਰਧਾੜ ਵਰਗੀਆਂ ਘਟਨਾਵਾਂ ਦੇ ਵਾਪਰਨ ਤੋਂ ਵੀ ਮੁਨਕਰ ਨਹੀਂ ਹੋਇਆ ਜਾ ਸਕਦਾ। ਕੁੱਲ ਮਿਲਾ ਕੇ ਕਿਹਾ ਜਾ ਸਕਦਾ ਹੈ ਕਿ ਜਿਉਂ-ਜਿਉਂ ਚੋਣਾਂ ਨੇੜੇ ਆਉਣਗੀਆਂ, ਮਾਹੌਲ ਤਲਖੀ ਫੜਦਾ ਜਾਏਗਾ। ਅਸੀਂ ਚੋਣ ਕਮਿਸ਼ਨ ਦੇ ਧਿਆਨ 'ਚ ਲਿਆਉਣਾ ਚਾਹੁੰਦੇ ਹਾਂ ਕਿ ਮਾਹੌਲ ਨੂੰ ਸ਼ਾਂਤ ਬਣਾਈ ਰੱਖਣ ਲਈ ਲੋੜ ਮੁਤਾਬਿਕ ਸੁਰੱਖਿਆ ਪ੍ਰਬੰਧ ਮਜ਼ਬੂਤ ਕੀਤੇ ਜਾਣ। ਰਾਜ ਵਿਚਲੀ ਚੋਣ ਮਸ਼ੀਨਰੀ ਨੂੰ ਪੂਰੀ ਤਰ੍ਹਾਂ ਸਰਗਰਮ ਕੀਤਾ ਜਾਵੇ। ਇਸ ਤਰ੍ਹਾਂ ਦਾ ਮਾਹੌਲ ਸਿਰਜਿਆ ਜਾਵੇ ਕਿ ਵੋਟਰ ਬਿਨਾਂ ਡਰ-ਭੈ ਦੇ ਆਪਣੀ ਵੋਟ ਦਾ ਇਸਤੇਮਾਲ ਕਰ ਸਕੇ। ਪੂਰੀ ਗੰਭੀਰਤਾ ਨਾਲ ਪੇਸ਼ ਆਉਣ ਨਾਲ ਹੀ ਨਿਰਪੱਖ ਤੇ ਪਾਰਦਰਸ਼ੀ ਚੋਣ ਅਮਲ ਨੇਪਰੇ ਚੜ੍ਹਾਇਆ ਜਾ ਸਕਦਾ ਹੈ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

25-11-2016

 ਟੀਚਰ ਐਲਿਜੀਬਿਲਟੀ ਟੈਸਟ

ਟੀ.ਈ.ਟੀ. ਸਰਕਾਰੀ ਅਧਿਆਪਕ ਦੀ ਨੌਕਰੀ ਪ੍ਰਾਪਤ ਕਰਨ ਲਈ ਰੱਖੀ ਗਈ ਸ਼ਰਤ ਹੈ। ਇਹ ਟੈਸਟ ਹਰ ਸਾਲ ਲਿਆ ਜਾਂਦਾ ਹੈ। ਬਹੁਤ ਸਾਰੇ ਐਮ.ਏ., ਬੀ.ਐਡ, ਬੇਰੁਜ਼ਗਾਰ ਅਧਿਆਪਕ ਟੈਸਟ ਪਾਸ ਹਨ। ਜਿਨ੍ਹਾਂ ਨੇ ਇਹ ਟੈਸਟ ਵੀ ਪਾਸ ਕੀਤਾ ਹੈ, ਉਹ ਵੀ ਸਾਰੇ ਨੌਕਰੀ ਦੇ ਪੂਰੇ ਹੱਕਦਾਰ ਨਹੀਂ ਬਣ ਸਕੇ। ਸਗੋਂ ਬੇਰੁਜ਼ਗਾਰੀ ਵਿਚ ਹੋਰ ਵਾਧਾ ਹੋ ਰਿਹਾ ਹੈ। ਉਹ ਧਰਨੇ ਦੇਣ, ਟੈਂਕੀਆਂ 'ਤੇ ਚੜ੍ਹਨ, ਪ੍ਰਾਈਵੇਟ ਸਕੂਲਾਂ ਵਿਚ ਘੱਟ ਤਨਖ਼ਾਹ 'ਤੇ ਨੌਕਰੀ ਕਰਨ ਲਈ ਮਜਬੂਰ ਹਨ।
ਇਸ ਟੈਸਟ ਦਾ ਕੋਈ ਨਿਸਚਿਤ ਸਿਲੇਬਸ ਨਹੀਂ ਹੁੰਦਾ। ਬਹੁਤੇ ਪ੍ਰਸ਼ਨ ਕਿਤਾਬ ਵਿਚੋਂ ਨਹੀਂ ਪੁੱਛੇ ਜਾਂਦੇ। ਨਤੀਜੇ ਤੋਂ ਪਹਿਲਾਂ ਜਿਹੜੀ ਉੱਤਰ ਪੱਤਰੀ ਇੰਟਰਨੈਟ 'ਤੇ ਪਾਈ ਜਾਂਦੀ ਹੈ, ਕਈ ਵਾਰ ਪੂਰੀ ਤਰ੍ਹਾਂ ਨਾਲ ਤਸੱਲੀਬਖ਼ਸ਼ ਨਹੀਂ ਹੁੰਦੀ। ਇਸ ਟੈਸਟ ਦਾ ਨਤੀਜਾ ਵੀ ਘਟੀਆ ਆਉਂਦਾ ਹੈ। ਸਰਕਾਰੀ ਅਧਿਆਪਕ ਦੀ ਨੌਕਰੀ ਟੈਸਟ ਦੇ ਆਧਾਰ 'ਤੇ ਨਹੀਂ ਸਗੋਂ ਮੈਰਿਟ ਦੇ ਆਧਾਰ 'ਤੇ ਮਿਲਣੀ ਚਾਹੀਦੀ ਹੈ। ਅਧਿਆਪਕ ਜਿਹੜਾ ਕਿ ਵਿਦਿਆਰਥੀ ਦਾ ਭਵਿੱਖ ਸੰਵਾਰਦਾ ਹੈ, ਉਸ ਦਾ ਆਪਣਾ ਭਵਿੱਖ ਖ਼ਤਰੇ ਵੱਲ ਜਾ ਰਿਹਾ ਹੈ। ਜੇਕਰ ਪੰਜਾਬ ਵਿਚ ਬੇਰੁਜ਼ਗਾਰੀ ਦਾ ਇਹੋ ਹਾਲ ਰਿਹਾ ਤਾਂ ਆਉਣ ਵਾਲੇ ਸਮੇਂ ਵਿਚ ਵਿਦਿਆਰਥੀਆਂ ਦੀ ਉਚ ਸਿੱਖਿਆ ਪ੍ਰਾਪਤ ਕਰਨ ਦੀ ਰੂਚੀ ਘਟ ਜਾਵੇਗੀ। ਸਰਕਾਰ ਨੂੰ ਚਾਹੀਦਾ ਹੈ ਕਿ ਪਹਿਲਾ ਟੀ.ਈ.ਟੀ. ਪਾਸ ਕਰ ਚੁੱਕੇ ਅਧਿਆਪਕਾਂ ਨੂੰ ਨੌਕਰੀ ਦਿੱਤੀ ਜਾਵੇ ਅਤੇ ਆਉਣ ਵਾਲੇ ਸਮੇਂ ਵਿਚ ਇਹ ਟੈਸਟ ਬੰਦ ਕੀਤਾ ਜਾਵੇ।

-ਰਾਜਵੀਰ ਕੌਰ
ਪਿੰਡ ਰਾਜਪੁਰ ਭਾਈਆਂ, ਜ਼ਿਲ੍ਹਾ, ਹੁਸ਼ਿਆਰਪੁਰ।

ਨੋਟਬੰਦੀ ਦੀ ਤਰਾਸਦੀ

ਕਾਲੇ ਧਨ ਵਾਲੇ ਕੁਬੇਰਾਂ ਦਾ ਆਰਥਿਕ ਤੌਰ 'ਤੇ ਲੱਕ ਤੋੜਨ ਲਈ ਕੇਂਦਰ ਸਰਕਾਰ ਨੇ ਜਿਥੇ ਕ੍ਰਿਸ਼ਮੇ ਵਾਲਾ ਧਮਾਕਾ ਕਰਕੇ 'ਵਾਹ-ਵਾਹ' ਖੱਟੀ ਹੈ, ਉਥੇ ਨੋਟਬੰਦੀ ਕਰਕੇ ਆਮ ਖਾਤਾਧਾਰਕਾਂ ਦੀ ਜ਼ਿੰਦਗੀ ਵਿਚ ਭੁਚਾਲ ਵੀ ਆ ਗਿਆ ਹੈ। ਲੰਮੀਆਂ-ਲੰਮੀਆਂ ਕਤਾਰਾਂ ਵਿਚ ਖੜ੍ਹੇ ਸਭ ਤਰ੍ਹਾਂ ਦੇ ਖਾਤਾਧਾਰਕਾਂ ਦੀਆਂ ਲੱਤਾਂ ਵੀ ਜਵਾਬ ਦੇ ਰਹੀਆਂ ਹਨ। ਦੋ-ਤਿੰਨ ਬਜ਼ੁਰਗ ਤਾਂ ਖੜ੍ਹੇ ਹੋਣ ਕਾਰਨ ਦੌਰਾ ਪੈਣ ਕਰਕੇ ਵਾਰਸਾਂ ਨੂੰ ਰੋਂਦੇ ਛੱਡ ਗਏ ਹਨ। ਇਕ ਗਰਭਵਤੀ ਔਰਤ ਨੂੰ ਵੀ ਮੌਤ ਦੇ ਮੂੰਹ ਜਾਣਾ ਪਿਆ ਹੈ। ਗੱਲ ਕੀ ਨੋਟਬੰਦੀ ਕਾਰਨ ਚਾਰੇ ਪਾਸੇ ਹਾਹਾਕਾਰ ਵੀ ਮਚੀ ਹੋਈ ਹੈ। ਵਿਆਹ ਤੇ ਹੋਰ ਕਾਰਜ ਕਰਨ ਵਾਲਿਆਂ ਦੇ ਚਿਹਰੇ ਮੁਰਝਾ ਗਏ ਹਨ।
ਨੋਟਬੰਦੀ ਕਰਕੇ ਘਰਾਂ ਵਿਚ ਸ਼ੁੱਭ ਕਾਰਜਾਂ ਦੇ ਰੰਗ ਵਿਚ ਭੰਗ ਪੈ ਗਈ ਹੈ। ਮੋਦੀ ਸਰਕਾਰ ਆਪਣੀ ਵਡਿਆਈ ਖ਼ੁਦ ਕਰਕੇ ਕੁਝ ਰਾਜਾਂ ਦੀਆਂ ਚੋਣਾਂ ਵਿਚ ਜੱਸ ਖੱਟਣਾ ਚਾਹੁੰਦੀ ਹੈ। ਬੇਸ਼ੱਕ ਨੋਟਬੰਦੀ ਕ੍ਰਾਂਤੀਕਾਰੀ ਕਦਮ ਹੈ ਪਰ ਜੇ ਸੋਚ-ਵਿਚਾਰ ਕੇ ਬੈਂਕਾਂ ਵਿਚ ਰੁਪਿਆਂ ਦਾ, ਏ.ਟੀ.ਐਮ. ਦਾ ਸੁਚਾਰੂ ਪ੍ਰਬੰਧ ਕੀਤਾ ਹੁੰਦਾ ਤਾਂ ਫਿਰ ਵਿਰੋਧੀ ਪਾਰਟੀਆਂ ਨੂੰ ਆਲੋਚਨਾ ਕਰਨ ਦਾ ਮੌਕਾ ਨਾ ਮਿਲਦਾ, ਨਾ ਹੀ ਆਮ ਲੋਕ ਪ੍ਰੇਸ਼ਾਨੀ ਦੇ ਸਾਗਰ ਵਿਚ ਗੋਤੇ ਖਾਂਦੇ। ਹਾਲ ਦੀ ਘੜੀ ਤਾਂ ਨੋਟਬੰਦੀ ਦੀ ਤਰਾਸਦੀ (ਖਾਤਾਧਾਰਕਾਂ ਨੂੰ) ਦਾ ਸੰਤਾਪ ਭੋਗਣਾ ਪੈ ਰਿਹਾ ਹੈ। ਵਪਾਰਕ ਅਦਾਰੇ ਵੀ ਨੋਟਬੰਦੀ ਦਾ ਸ਼ਿਕਾਰ ਹਨ।

-ਸੁੰਦਰਪਾਲ ਪ੍ਰੇਮੀ
ਜੈਤੋ (ਫ਼ਰੀਦਕੋਟ)।

24-11-2016

 ਪ੍ਰਧਾਨ ਜੀ ਨੂੰ ਵਧਾਈ

ਜਦੋਂ ਤੋਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਸ੍ਰੀ ਅੰਮ੍ਰਿਤਸਰ ਸਾਹਿਬ ਹੋਂਦ ਵਿਚ ਆਈ ਹੈ, ਉਦੋਂ ਤੋਂ ਕਈ ਵਾਰ ਇਸ ਕਮੇਟੀ ਦੀਆਂ ਚੋਣਾਂ ਵਿਚ ਬਹੁਤ ਸਖ਼ਤ ਮੁਕਾਬਲੇ ਦੇਖਣ ਨੂੰ ਮਿਲੇ। ਪ੍ਰੰਤੂ ਇਸ ਵਾਰ ਸਰਬਸੰਮਤੀ ਨਾਲ ਆਮ ਇਜਲਾਸ ਵਿਚ ਪ੍ਰਧਾਨ ਦੀ ਚੋਣ ਹੋਈ, ਇਹ ਬਹੁਤ ਹੀ ਸ਼ਲਾਘਾਯੋਗ ਕਦਮ ਹੈ। ਇਸ ਦਾ ਸਿਹਰਾ ਪ੍ਰੋਫੈਸਰ ਕਿਰਪਾਲ ਸਿੰਘ ਬਡੂੰਗਰ ਜੀ ਨੂੰ ਜਾਂਦਾ ਹੈ, ਜੋ ਕਿ ਇਕ ਬਹੁਤ ਹੀ ਨੇਕ ਇਨਸਾਨ ਅਤੇ ਸਮੇਂ ਨੂੰ ਨਾਪਣ ਵਾਲੇ ਸੁਹਿਰਦ ਇਨਸਾਨ ਹਨ। ਸਾਡੀ ਪ੍ਰਧਾਨ ਜੀ ਨੂੰ ਸਨਿਮਰ ਬੇਨਤੀ ਹੈ ਕਿ ਅੱਜ ਪੰਜਾਬ ਵਿਚ ਵਧ ਰਿਹਾ ਡੇਰਾਬਾਦ ਸਿੱਖ ਪੰਥ ਲਈ ਬਹੁਤ ਘਾਟੇ ਵਾਲੀ ਗੱਲ ਹੈ। ਸ਼੍ਰੋਮਣੀ ਕਮੇਟੀ ਵੱਲੋਂ ਸ਼ਹਿਰਾਂ ਅਤੇ ਪਿੰਡਾਂ-ਪਿਡਾਂ ਵਿਚ ਜਾ ਕੇ ਸਿੱਖੀ ਦਾ ਪ੍ਰਚਾਰ ਕੀਤਾ ਜਾਵੇ ਤਾਂ ਜੋ ਵਧ ਰਿਹਾ ਡੇਰਾਵਾਦ, ਜਾਤੀਵਾਦ ਆਦਿ ਨੂੰ ਹਮੇਸ਼ਾ ਲਈ ਨੱਥ ਪਾਈ ਜਾ ਸਕੇ। ਇਸੇ ਵਿਚ ਹੀ ਸਿੱਖ ਧਰਮ ਦੀ ਭਲਾਈ ਹੋਵੇਗੀ।

-ਕੇਵਲ ਸਿੰਘ ਬਾਠਾਂ।

ਸ਼ਰੇਆਮ ਲੁੱਟ

ਨੋਟਬੰਦੀ ਦਾ ਪ੍ਰਧਾਨ ਮੰਤਰੀ ਦੁਆਰਾ ਐਲਾਨ ਕੀ ਹੋਇਆ, ਬਾਕੀ ਨੋਟਾਂ ਦਾ ਤਾਂ ਕਾਲ ਹੀ ਪੈ ਗਿਆ। ਕੋਈ ਵੀ ਦੁਕਾਨਦਾਰ 500 ਜਾਂ 1000 ਦਾ ਨੋਟ ਲੈ ਕੇ ਬਾਕੀ ਕੋਈ ਪੈਸਾ ਮੋੜਦਾ ਨਹੀਂ, ਅੱਖੇ ਸਾਡੇ ਕੋਲ ਖੁੱਲ੍ਹੇ ਹੈ ਹੀ ਨਹੀਂ। ਕਮਾਲ ਹੈ ਏਦਾਂ ਵੀ ਹੋ ਸਕਦਾ ਹੈ ਕਿ ਖੁੱਲ੍ਹੇ ਪੈਸੇ ਕੋਲ ਨਾ ਹੋਣ। ਹਰ ਇਕ ਨੇ ਬੱਸ ਨਾਜਾਇਜ਼ ਤਰੀਕੇ ਨਾਲ ਆਪਣੇ ਗਾਹਕਾਂ ਨਾਲ ਸਰੇਆਮ ਲੁੱਟ ਸ਼ੁਰੂ ਕਰ ਦਿੱਤੀ ਹੈ। ਮਜ਼ਦੂਰ ਵਿਅਕਤੀ ਜੋ ਆਪਣੀ ਦਿਹਾੜੀ ਖਰਾਬ ਕਰਕੇ ਲਾਈਨਾਂ ਵਿਚ ਨਹੀਂ ਲੱਗ ਸਕਦਾ, ਉਹ ਸਭ ਤੋਂ ਵੱਧ ਪ੍ਰੇਸ਼ਾਨ ਹੈ। ਜੋ ਦੁਕਾਨਦਾਰ ਖੁੱਲ੍ਹੇ ਪੈਸੇ ਬਾਕੀ ਨਹੀਂ ਮੋੜਦਾ, ਜੇਕਰ ਉਸ ਤੋਂ ਖੁੱਲ੍ਹੇ ਕਰਵਾਉਣ ਦੀ ਗੱਲ ਕਰੋ ਤਾਂ ਉਹ 500 ਦੇ ਬਦਲੇ 350 ਜਾਂ 400 ਵਿਚ ਸੌਦਾ ਤੈਅ ਕਰਨਾ ਮੰਨ ਜਾਂਦਾ ਹੈ, ਜਿਸ ਤੋਂ ਪਤਾ ਲਗਦਾ ਹੈ ਕਿ ਦੁਕਾਨਦਾਰਾਂ ਨੇ ਭ੍ਰਿਸ਼ਟਾਚਾਰ ਖ਼ਤਮ ਕਰਨ ਲਈ ਚੁੱਕੇ ਕਦਮ ਨੂੰ ਵੀ ਭ੍ਰਿਸ਼ਟ ਕਰ ਦਿੱਤਾ ਹੈ। ਪਰਮਾਤਮਾ ਕਰੇ ਕਿ ਇਹ ਲੁੱਟ ਜਲਦੀ ਬੰਦ ਹੋਵੇ।

-ਬਲਵੰਤ ਸਿੰਘ ਗਿਆਸਪੁਰਾ
ਮੋ: 98887-47151

ਚੋਣ ਜ਼ਾਬਤੇ ਦਾ ਹਊਆ

ਜਦੋਂ ਵੀ ਚੋਣਾਂ ਦੀ ਰੁੱਤ ਆਉਂਦੀ ਹੈ ਤਾਂ ਵਿਕਾਸ ਦੇ ਕੰਮਾਂ ਅਤੇ ਲੋਕ ਭਲਾਈ ਸਕੀਮਾਂ 'ਤੇ ਚੋਣ ਜ਼ਾਬਤੇ ਦਾ ਹਊਆ ਸਿਰ ਚੜ੍ਹ ਕੇ ਬੋਲਣ ਲੱਗ ਜਾਂਦਾ ਹੈ। ਚੋਣ ਜ਼ਾਬਤੇ ਦੇ ਡਰੋਂ ਵਿਕਾਸ ਅਤੇ ਲੋਕ ਭਲਾਈ ਸਕੀਮਾਂ ਵਿਚ ਤੇਜ਼ੀ ਆਉਂਦੀ ਜਾਂਦੀ ਹੈ। ਇਸ ਨਾਲ ਸਰਕਾਰੀ ਅਦਾਰੇ ਨੀਂਦ ਤੋਂ ਜਾਗ ਪੈਂਦੇ ਹਨ। ਪਰ ਹਫੜਾ-ਦਫੜੀ ਕਾਰਨ ਗ਼ਲਤੀਆਂ ਕਰਨ ਲਈ ਮਜਬੂਰ ਹੋ ਜਾਂਦੇ ਹਨ। ਬਹੁਤੀ ਵਾਰੀ ਚੋਣ ਤੋਂ ਬਾਅਦ ਮੁਲਾਜ਼ਮਾਂ ਦੀ ਹਾਲਤ ਗ਼ਲਤੀ ਨੂੰ ਢਕਣ ਲਈ ਹਨ੍ਹੇਰੀ ਵਿਚ ਡਾਂਵਾਂਡੋਲ ਹੋਏ ਪੰਛੀ ਵਾਂਗ ਹੁੰਦੀ ਹੈ। ਲੋੜ ਹੈ ਸਰਕਾਰਾਂ ਵੱਲੋਂ ਨਿਰੰਤਰ ਤਰੀਕੇ ਨਾਲ ਕੰਮ ਚਲਦਾ ਰਹੇ, ਜਿਸ ਨਾਲ ਵਿਕਾਸ ਦੀ ਰਫ਼ਤਾਰ ਦੇ ਨਾਲ-ਨਾਲ ਉਲਝਣਾਂ ਤੋਂ ਬਚਿਆ ਜਾ ਸਕੇ। ਅੱਜ ਚੋਣ ਜ਼ਾਬਤੇ ਦੇ ਹਊਏ ਨੇ ਲੋਕਾਂ ਅਤੇ ਮੁਲਾਜ਼ਮਾਂ ਨੂੰ ਆਪੇ ਵਿਚ ਗੁਆਚਣ ਲਈ ਮਜਬੂਰ ਦਿੱਤਾ ਹੈ। ਹਰ ਪਾਸੇ ਚੋਣ ਜ਼ਾਬਤੇ ਦਾ ਡਰ ਸਤਾ ਰਿਹਾ ਹੈ। ਲੋੜ ਹੈ ਹਰ ਵਾਰ ਚੋਣ ਜ਼ਾਬਤੇ ਦੇ ਡਰ ਤੋਂ ਗ਼ਲਤੀ ਕਰਨ ਨਾਲੋਂ ਨਿਰੰਤਰ ਕੰਮ ਕੀਤੇ ਜਾਣ, ਜਿਸ ਨਾਲ ਸਰਕਾਰਾਂ ਆਪਣੇ ਟੀਚੇ ਬਿਨਾਂ ਉਂਗਲ ਉੱਠਣ ਤੋਂ ਪ੍ਰਾਪਤ ਕਰ ਸਕਣ।

-ਸੁਖਪਾਲ ਸਿੰਘ ਗਿੱਲ
ਅਬਿਆਣਾ ਕਲਾਂ।

23-11-2016

 ਸੰਸਾਰ ਇਕ ਪਿੰਡ
ਕਦੇ ਇਹ ਕਥਨ ਬੜਾ ਪ੍ਰਚਲਿਤ ਸੀ ਕਿ 'ਜੋ ਸੁਖ ਛੱਜੂ ਦੇ ਚੁਬਾਰੇ, ਨਾ ਉਹ ਬਲਖ ਨਾ ਬੁਖਾਰੇ'। ਇਸ ਆਧਾਰ 'ਤੇ ਪ੍ਰਦੇਸੀਂ ਬੈਠੇ ਸੁਖ ਮਾਣ ਰਹੇ ਲੋਕ ਵੀ ਆਪਣੇ ਦੇਸ਼ ਦੇ ਦੁੱਖਾਂ ਦੇ ਬਾਵਜੂਦ ਉਸ ਨੂੰ ਵਡਿਆਉਂਦੇ ਨਹੀਂ ਸਨ ਥੱਕਦੇ। ਆਪਣੇ ਬਜ਼ੁਰਗਾਂ ਦੀ ਜੰਮਣ ਭੋਇੰ ਦਾ ਮੋਹ ਹੁੰਦਾ ਹੀ ਅਜਿਹਾ ਹੈ ਕਿ ਬੰਦਾ ਮੁੜ-ਮੁੜ ਉਸ ਵੱਲ ਭੱਜਦਾ ਹੈ। ਕਈ ਵਾਰ ਉਹ ਇਹ ਭੁੱਲ ਜਾਂਦਾ ਹੈ ਕਿ ਜਿਸ ਧਰਤੀ ਨੇ ਉਸ ਨੂੰ ਰੋਜ਼ੀ-ਰੋਟੀ ਤੇ ਸੁਖੀ ਜੀਵਨ ਦਿੱਤਾ, ਉਸ ਦਾ ਉਪਕਾਰ ਵੀ ਬਹੁਤ ਵੱਡਾ ਹੈ। ਅੱਜ ਸੰਸਾਰ ਇਕ ਪਿੰਡ ਬਣ ਚੁੱਕਿਆ ਹੈ। ਮਸ਼ੀਨੀ ਯੁੱਗ, ਇੰਟਰਨੈੱਟ ਤਕਨੀਕਾਂ, ਹਵਾਈ ਸਹੂਲਤਾਂ, ਕੌਮਾਂਤਰੀ ਮਾਪਦੰਡ ਆਦਿ ਅਜਿਹੇ ਪਹਿਲੂ ਹਨ, ਜਿਨ੍ਹਾਂ ਨੇ ਰਵਾਇਤਾਂ ਪਰਿਭਾਸ਼ਾਵਾਂ ਬਦਲ ਦਿੱਤੀਆਂ ਹਨ। ਮਹਾਨ ਲਿਖਾਰੀ ਡਾ: ਸੁਰਜੀਤ ਪਾਤਰ ਦੀਆਂ ਬਹੁ-ਚਰਚਿਤ ਸਤਰਾਂਂ'ਜੋ ਵਿਦੇਸ਼ਾਂ 'ਚ ਰੁਲਦੇ ਨੇ ਰੋਜ਼ੀ ਲਈ, ਉਹ ਜਦੋਂ ਦੇਸ਼ ਵਰਤਣਗੇ ਆਪਣੇ ਕਦੀ, ਕੁਝ ਤਾਂ ਸੇਕਣਗੇ ਮਾਂ ਦੇ ਸਿਵੇ ਦੀ ਅਗਨ, ਬਾਕੀ ਕਬਰਾਂ ਦੇ ਰੁੱਖ ਹੇਠ ਜਾ ਬਹਿਣਗੇ।'


-ਰਾਜਵੰਤ ਸਿੰਘ ਰਾਜੂ
ਗੁਰੂ ਨਾਨਕ ਆਟੋ ਸਪੇਅਰਜ਼, ਰਾਏਕੋਟ।


ਬੇਰੁਜ਼ਗਾਰੀ
ਜਿਸ ਤਰ੍ਹਾਂ ਬੇਰੁਜ਼ਗਾਰੀ ਲਗਾਤਾਰ ਵਧ ਰਹੀ ਹੈ, ਕੀ ਇਸ ਦੇ ਲਈ ਸਰਕਾਰਾਂ ਦੇ ਨਾਲ-ਨਾਲ ਅਸੀਂ ਖ਼ੁਦ ਵੀ ਜ਼ਿੰਮੇਵਾਰ ਨਹੀਂ ਹਾਂ? ਸਾਡੇ ਗੁਰੂਆਂ, ਪੀਰਾਂ ਨੇ ਵੀ ਸਾਨੂੰ ਉਪਦੇਸ਼ ਦਿੱਤਾ ਹੈ ਕਿ 'ਕਿਰਤ ਕਰੋ ਤੇ ਵੰਡ ਕੇ ਛਕੋ' ਪਰ ਅੱਜ ਅਸੀਂ ਇਸ ਉਪਦੇਸ਼ ਨੂੰ ਪੂਰੀ ਤਰ੍ਹਾਂ ਭੁੱਲ ਚੁੱਕੇ ਹਾਂ। ਹੱਥੀਂ ਕਿਰਤ ਕਰਨੀ ਅਸੀਂ ਛੱਡ ਦਿੱਤੀ ਹੈ। ਅੱਜ ਹਰ ਕੋਈ ਸਰਕਾਰੀ ਨੌਕਰੀ ਭਾਲ ਰਿਹਾ ਹੈ, ਜੋ ਕਿ ਮਿਲਣੀਆਂ ਅਸੰਭਵ ਹਨ। ਹੌਲੀ-ਹੌਲੀ ਅਸੀਂ ਆਪਣੇ ਕਿੱਤਾਮੁਖੀ ਕੰਮਾਂ ਤੋਂ ਦੂਰ ਹੁੰਦੇ ਜਾ ਰਹੇ ਹਾਂ, ਜਿਸ ਕਾਰਨ ਬੇਰੁਜ਼ਗਾਰੀ ਵਿਚ ਵਾਧਾ ਹੋ ਰਿਹਾ ਹੈ। ਹਰ ਨੌਜਵਾਨ ਨੂੰ ਕਿਸੇ ਨਾ ਕਿਸੇ ਕਿੱਤੇ ਵਿਚ ਨਿਪੁੰਨਤਾ ਹਾਸਲ ਕਰਨੀ ਚਾਹੀਦੀ ਹੈ ਤਾਂ ਕਿ ਉਹ ਬੇਰੁਜ਼ਗਾਰੀ ਦੀ ਸਮੱਸਿਆ ਦਾ ਸਾਹਮਣਾ ਕਰ ਸਕੇ ਅਤੇ ਆਪਣੇ ਪਰਿਵਾਰ ਦਾ ਸਹੀ ਪਾਲਣ-ਪੋਸ਼ਣ ਕਰ ਸਕੇ। ਸਰਕਾਰ ਨੂੰ ਵੀ ਬੇਰੁਜ਼ਗਾਰੀ ਦੀ ਸਮੱਸਿਆ ਨੂੰ ਠੱਲ੍ਹ ਪਾਉਣ ਲਈ ਵਿਸ਼ੇਸ਼ ਯਤਨ ਕਰਨੇ ਚਾਹੀਦੇ ਹਨ।


-ਹਰਿੰਦਰ ਸਿੰਘ ਗਰਚਾ
ਆਤਮ ਨਗਰ, ਜਗਰਾਉਂ।


ਸਰਕਾਰ ਦੇ ਧਿਆਨ ਹਿਤ

ਸਾਡੇ ਮਹਾਨ ਦੇਸ਼ ਭਾਰਤ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸਾਡੀ ਭਾਰਤੀ ਕਰੰਸੀ ਦੇ ਪੰਜ ਸੌ ਅਤੇ ਹਜ਼ਾਰ ਰੁਪਏ ਦੇ ਨੋਟ ਤਬਦੀਲ ਕਰਕੇ ਇਕ ਸ਼ਲਾਘਾਯੋਗ ਕਦਮ ਚੁੱਕਿਆ ਹੈ। ਇਸ ਨਾਲ ਜਿਥੇ ਭ੍ਰਿਸ਼ਟਾਚਾਰ ਅਤੇ ਕਾਲੇ ਧਨ ਉਪਰ ਸ਼ਿਕੰਜਾ ਕੱਸਿਆ ਜਾਵੇਗਾ। ਉਥੇ ਮਹਿੰਗਾਈ ਘੱਟ ਕਰਨ ਅਤੇ ਦੇਸ਼ ਦੀ ਅਰਥ ਵਿਵਸਥਾ ਨੂੰ ਮਜ਼ਬੂਤ ਕਰਨ ਲਈ ਬਲ ਮਿਲੇਗਾ। ਨਵੀਂ ਕਰੰਸੀ ਦੇ ਪੰਜ ਸੌ ਅਤੇ ਦੋ ਹਜ਼ਾਰ ਰੁਪਏ ਦੇ ਨੋਟਾਂ ਉੱਪਰ ਮਹਾਤਮਾ ਗਾਂਧੀ, ਲਾਲ ਕਿਲ੍ਹਾ ਅਤੇ ਚੰਦਰਯਾਨ ਦੀਆਂ ਤਸਵੀਰਾਂ ਹਨ। ਸਰਕਾਰ ਆਪਣੇ ਇਸ ਇਤਿਹਾਸਕ ਫ਼ੈਸਲੇ ਨੂੰ ਹੋਰ ਯਾਦਗਾਰੀ ਬਣਾਉਣ ਲਈ ਸੰਨ 2017 ਦੀ ਆਮਦ ਮੌਕੇ ਸੌ ਰੁਪਏ ਦੇ ਨੋਟਾਂ ਨੂੰ ਇਸੇ ਤਰਜ਼ 'ਤੇ ਸ਼ਹੀਦ-ਏ-ਆਜ਼ਮ ਸ: ਭਗਤ ਸਿੰਘ, ਰਾਜਗੁਰੂ, ਸੁਖਦੇਵ ਵਾਲੀ ਤਸਵੀਰ ਨਾਲ ਜਾਰੀ ਕਰੇ, ਇਸ ਨਾਲ ਭਾਰਤੀ ਲੋਕਤੰਤਰ ਦੀ ਭਾਈਚਾਰਕ ਸਾਂਝ ਹੋਰ ਮਜ਼ਬੂਤ ਹੋਵੇਗੀ।


-ਲੱਖੀ ਗਿੱਲ ਧਨਾਨਸੂ
ਮੋ: 88726-60007.

22-11-2016

 ਦੂਸ਼ਿਤ ਹੋਈ ਦਿੱਲੀ
ਧਰਤੀ ਗ੍ਰਹਿ ਉੱਪਰ ਉਤਪੰਨ ਹੋਏ ਸਮਾਜਿਕ ਪ੍ਰਾਣੀਆਂ ਵਿਚ ਮਨੁੱਖ ਸਭ ਤੋਂ ਸਰਵਸ੍ਰੇਸ਼ਟ ਗਿਣਿਆ ਜਾਂਦਾ ਹੈ, ਕਿਉਂਕਿ ਉਸ ਕੋਲ ਦਿਮਾਗ ਹੈ। ਆਪਣੇ ਦਿਮਾਗ ਨਾਲ ਹੀ ਉਸ ਨੇ ਧਰਤੀ ਉੱਪਰ ਆ ਕੇ ਇਥੇ ਦੀ ਹਰ ਚੀਜ਼ ਨੂੰ ਕਬਜ਼ੇ ਵਿਚ ਲੈ ਲਿਆ ਹੈ। ਵਿਗਿਆਨ ਅਤੇ ਤਕਨਾਲੋਜੀ ਦੇ ਯੁੱਗ ਦੀ ਸ਼ੁਰੂਆਤ ਕਰਕੇ ਉਸ ਨੇ ਅਨੇਕਾਂ ਸਹੂਲਤਾਂ ਪ੍ਰਾਪਤ ਕੀਤੀਆਂ ਹਨ। ਦੂਜੇ ਗ੍ਰਹਿਆਂ ਦੀ ਖੋਜ ਵਿਚ ਅੰਬਰ 'ਤੇ ਉਡਾਰੀਆਂ ਲਾਉਣ ਵਾਲਾ ਮਨੁੱਖ ਅੱਜ ਆਪਣੇ ਗ੍ਰਹਿ ਨੂੰ ਭੁੱਲ ਗਿਆ ਹੈ। ਉਸ ਨੇ ਵੰਡੀਆਂ ਪਾ ਕੇ ਸਰਹੱਦਾਂ ਬਣਾ ਲਈਆਂ ਤੇ ਆਪਣੀਆਂ ਹੀ ਨਸਲਾਂ ਦੇ ਵਿਨਾਸ਼ ਲਈ ਪ੍ਰਮਾਣੂ ਬੰਬ ਬਣਾ ਲਏ। ਆਪਣੇ ਹਿਤਾਂ ਦੇ ਵਪਾਰ ਲਈ ਕੁਦਰਤ ਨਾਲ ਹੀ ਛੇੜਛਾੜ ਆਰੰਭ ਹੋ ਗਈ। ਬਨਸਪਤੀ ਅਤੇ ਵਾਤਾਵਰਨ ਨੂੰ ਵਿਗਿਆਨਕ ਢੰਗਾਂ ਨਾਲ ਨਹੀਂ ਸਾਂਭਿਆ, ਜਿਸ ਦੀ ਬਦੌਲਤ ਹੀ ਅੱਜ ਸਾਡਾ ਸਾਹ ਘੁੱਟ ਰਿਹਾ ਹੈ। ਸਕੂਲਾਂ ਨੂੰ ਬੰਦ ਕਰਨਾ ਪੈ ਰਿਹਾ ਹੈ। ਵਿਦੇਸ਼ੀ ਮਾਸਕ ਪਾ ਕੇ ਹਵਾਈ ਜਹਾਜ਼ 'ਚੋਂ ਉੱਤਰ ਰਹੇ ਹਨ। ਹਵਾ ਵਿਚੋਂ ਆਕਸੀਜਨ ਦੀ ਮਾਤਰਾ ਘਟਣੀ ਪ੍ਰਮਾਣੂ ਬੰਬ ਦੇ ਵਿਸਫੋਟ ਵਾਂਗ ਹੀ ਹੈ। ਅੱਜ ਰਾਜਧਾਨੀ ਬਿਮਾਰ ਹੈ। ਕੱਲ੍ਹ ਨੂੰ ਦੇਸ਼ ਦੇ ਹੋਰ ਸ਼ਹਿਰ ਵੀ ਬਿਮਾਰ ਹੋ ਸਕਦੇ ਹਨ। ਅਸੀਂ ਦੁਨੀਆ ਲਈ ਤਮਾਸ਼ਾ ਬਣ ਰਹੇ ਹਾਂ। ਕੀ ਹੁਣ ਵੀ ਅਸੀਂ ਸਬਕ ਨਹੀਂ ਸਿਖਾਂਗੇ? ਕੀ ਰਾਜਨੀਤਕ ਲੋਕ ਵੋਟ ਬੈਂਕ ਦੀ ਰਾਜਨੀਤੀ ਤਿਆਗ ਕੇ ਵਾਤਾਵਰਨ ਦੀ ਸੰਭਾਲ ਲਈ ਕੁਝ ਕਰਨਗੇ? ਕੀ ਕਿਸਾਨਾਂ ਨੂੰ ਪਰਾਲੀ ਸਾੜਨ ਤੋਂ ਰੋਕਿਆ ਜਾ ਸਕੇਗਾ? ਕੀ ਅਸੀਂ ਕਾਨੂੰਨ ਰਾਹੀਂ ਦਰੱਖਤਾਂ ਦੀ ਕਟਾਈ ਰੋਕ ਸਕਾਂਗੇ? ਸਾਰੇ ਦੇਸ਼ ਦੇ ਲੋਕਾਂ ਨੂੰ ਆਪਣੇ ਪਰਿਵਾਰ ਦੇ ਮੈਂਬਰਾਂ ਦੀ ਗਿਣਤੀ ਅਨੁਸਾਰ ਹਰ ਸਾਲ ਨਿੰਮ, ਪਿੱਪਲ ਅਤੇ ਬਹੇੜੇ ਦੇ ਪੌਦੇ ਲਾਉਣੇ ਚਾਹੀਦੇ ਹਨ ਅਤੇ ਉਨ੍ਹਾਂ ਨੂੰ ਆਪਣੇ ਬੱਚਿਆਂ ਵਾਂਗ ਹੀ ਪਾਲਣਾ ਚਾਹੀਦਾ ਹੈ।


-ਮਾਸਟਰ ਕੇ. ਐਸ. ਅਮਰ
ਪਿੰਡ ਤੇ ਡਾਕ ਡਾਕ: ਕੋਟਲੀ ਖਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।


ਸੜਕ ਹਾਦਸੇ
ਅਖ਼ਬਾਰਾਂ ਦੀਆਂ ਸੁਰਖੀਆਂ 'ਚ ਨਿੱਤ ਸੜਕ ਹਾਦਸਿਆਂ ਦੀ ਖ਼ਬਰ ਸੁਣ ਸਭ ਦੁਖੀ ਤਾਂ ਹੁੰਦੇ ਹਨ ਪਰ ਆਪਣੇ-ਆਪ 'ਤੇ ਇਸ ਦਾ ਕੋਈ ਅਮਲ ਨਹੀਂ ਕਰਦਾ। ਇਕ-ਦੂਜੇ ਤੋਂ ਅੱਗੇ ਲੰਘਣ ਲਈ ਸੜਕ 'ਤੇ ਮੁਕਾਬਲੇ ਹੁੰਦੇ ਨਿੱਤ ਦੇਖੇ ਜਾ ਸਕਦੇ ਹਨ ਪਰ ਇਸ ਮੁਕਾਬਲੇ ਨੂੰ ਰੋਕਣ ਦਾ ਉਪਰਾਲਾ ਕੋਈ ਨਹੀਂ ਕਰਦਾ। ਪਤਾ ਨਹੀਂ ਕਿੰਨੀਆਂ ਜ਼ਿੰਦਗੀਆਂ ਰੋਜ਼ ਸੜਕਾਂ 'ਤੇ ਰੁਲਦੀਆਂ ਹਨ। ਅੱਜ ਤੇਜ਼ ਰਫ਼ਤਾਰ ਦੇ ਦੌਰ ਵਿਚ ਸਭ ਨੂੰ ਇਕ-ਦੂਜੇ ਤੋਂ ਅੱਗੇ ਲੰਘਣ ਦੀ ਕਾਹਲ ਹੈ ਪਰ ਇਹ ਕਾਹਲ ਇਕ-ਦੂਜੇ ਲਈ ਮੌਤ ਦਾ ਕਾਰਨ ਬਣ ਰਹੀ ਹੈ। ਸੜਕ ਹਾਦਸਿਆਂ ਬਾਰੇ ਬਹੁਤ ਸਾਰੀਆਂ ਮੁਹਿੰਮਾਂ ਵੀ ਚੱਲੀਆਂ ਹਨ ਪਰ ਇਨ੍ਹਾਂ ਦੇ ਬਾਵਜੂਦ ਹਾਦਸੇ ਨਹੀਂ ਟਲਦੇ। ਤੇਜ਼ ਰਫ਼ਤਾਰ 'ਚ ਅੱਗੇ ਲੰਘ ਕੇ ਆਪਣੇ ਨਾਲ ਦੂਜਿਆਂ ਨੂੰ ਮੁਸ਼ਕਿਲ 'ਚ ਨਾ ਪਾਉ, ਕਿਉਂਕਿ ਜ਼ਿੰਦਗੀ ਸਸਤੀ ਨਹੀਂ ਦੋਸਤੋ...।


-ਹਰਿੰਦਰ ਸਿੰਘ ਗਰਚਾ
ਆਤਮ ਨਗਰ, ਜਗਰਾਉਂ।

21-11-2016

 ਜਲ ਹੀ ਜੀਵਨ ਹੈ
ਪੰਜਾਬ ਦੀ ਭੂਗੋਲਿਕ ਸਥਿਤੀ ਅਜਿਹੀ ਹੈ ਕਿ ਇਥੇ ਪਾਣੀ ਦੀ ਕਮੀ ਤਾਂ ਨਹੀਂ ਰਹੀ ਪਰ ਅਜੋਕੇ ਸਮੇਂ ਵਿਚ ਇਥੇ ਵੀ ਪਾਣੀ ਦੀ ਘਾਟ ਦਾ ਸੰਕਟ ਸਾਡੇ ਸਿਰ 'ਤੇ ਆਣ ਖੜ੍ਹਾ ਹੋਇਆ ਹੈ ਤੇ ਸਾਨੂੰ ਇਸ ਪ੍ਰਤੀ ਗੰਭੀਰ ਹੋਣ ਦੀ ਲੋੜ ਹੈ।
ਗਰਮੀਆਂ ਵਿਚ ਲੋਕ ਵਾਰ-ਵਾਰ ਨਹਾਉਣ ਲਈ ਸਬਮਰਸੀਬਲ ਮੋਟਰਾਂ ਚਲਾ ਕੇ ਪਾਣੀ ਵਰਤਦੇ ਹਨ, ਜਿਸ ਕਰਕੇ ਹਜ਼ਾਰਾਂ ਲੀਟਰ ਪਾਣੀ ਬਰਬਾਦ ਹੁੰਦਾ ਹੈ, ਜਦਕਿ ਇਹੀ ਕੰਮ ਬਾਲਟੀ ਵਿਚ ਪਾਣੀ ਭਰ ਕੇ ਹੋ ਸਕਦਾ ਹੈ। ਕਾਰਾਂ, ਮੋਟਰ ਗੱਡੀਆਂ ਆਦਿ ਧੋਣ ਲਈ ਸਾਨੂੰ ਸਿੱਧੀ ਮੋਟਰ ਚਲਾਉਣ ਦੀ ਥਾਂ ਬਾਲਟੀ ਭਰ ਕੇ ਪਾਣੀ ਇਸਤੇਮਾਲ ਕਰਨਾ ਚਾਹੀਦਾ ਹੈ। ਛੱਪੜਾਂ ਦੀ ਸਫਾਈ ਕਰਕੇ ਮੀਂਹ ਦਾ ਪਾਣੀ ਸੁਰੱਖਿਅਤ ਰੱਖਿਆ ਜਾ ਸਕਦਾ ਹੈ। ਦੋਸਤੋ 'ਜਲ ਹੀ ਜੀਵਨ ਹੈ'। ਆਓ, ਅਸੀਂ ਸਾਰੇ ਪਾਣੀ ਦੀਵਰਤੋਂ ਸੰਜਮ ਨਾਲ ਕਰਕੇ ਪੰਜਾਂ ਪਾਣੀਆਂ ਦੀ ਧਰਤੀ ਨੂੰ ਬੰਜਰ ਹੋਣ ਤੋਂ ਬਚਾਈਏ।


-ਹਰਿੰਦਰ ਸਿੰਘ ਗਰਚਾ
ਆਤਮ ਨਗਰ, ਜਗਰਾਉਂ।


ਪ੍ਰਦੂਸ਼ਣ ਦਾ ਕਹਿਰ
ਸਰਕਾਰ ਅਤੇ ਆਮ ਲੋਕਾਂ ਦੇ ਰੁੱਖਾਂ ਤੋਂ ਬੇਮੁਖ ਹੋਣ ਕਾਰਨ ਆਖਰ ਪ੍ਰਦੂਸ਼ਣ ਨੇ ਆਪਣਾ ਭਿਆਨਕ ਚਿਹਰਾ ਰਾਜਧਾਨੀ ਦਿੱਲੀ ਵਿਚ ਦਿਖਾ ਦਿੱਤਾ ਹੈ। ਦਿੱਲੀ ਸ਼ਹਿਰ ਦੀ ਹਵਾ ਇਸ ਹੱਦ ਤੱਕ ਪਲੀਤ ਹੋ ਚੁੱਕੀ ਹੈ ਕਿ ਆਪਣੇ ਨੱਕ, ਮੂੰਹ ਢਕਣ ਦੇ ਬਾਵਜੂਦ ਸਾਹ ਲੈਣਾ ਮੁਸ਼ਕਿਲ ਬਣ ਗਿਆ ਹੈ। ਸੜਕੀ ਵਿਕਾਸ ਤੇ ਪ੍ਰਾਈਵੇਟ ਕਾਲੋਨੀਆਂ ਦੇ ਵੱਡੀ ਪੱਧਰ ਦੇ ਵਪਾਰ ਤੇ ਉਸਾਰੀ ਹੋਣ ਕਾਰਨ ਦੇਸ਼ ਦੇ ਬਹੁਤੇ ਹਿੱਸਿਆਂ ਦੇ ਜੰਗਲ ਅਤੇ ਸੜਕੀ ਰੁੱਖ ਲੱਖਾਂ ਦੀ ਗਿਣਤੀ ਵਿਚ ਕੱਟ ਦਿੱਤੇ ਗਏ ਹਨ। ਪੰਜਾਬ ਤੇ ਹਰਿਆਣਾ ਦੇ ਅੰਨ ਭੰਡਾਰ ਪ੍ਰਫੁਲਤ ਕਰਨ ਵਾਸਤੇ ਪੰਜਾਬ ਦੇ ਖੇਤਾਂ ਵਿਚੋਂ ਰੁੱਖਾਂ ਦਾ ਸਰਵ ਨਾਸ਼ ਕਰ ਦਿੱਤਾ ਗਿਆ ਹੈ। ਪੰਜਾਬ ਦੀ ਧਰਤੀ ਉਤੇ ਸਿਰਫ਼ ਤਿੰਨ ਫ਼ੀਸਦੀ ਰੁੱਖ ਹੀ ਬਚੇ ਹਨ। ਹਵਾ ਸਾਫ਼ ਕਰਨ ਵਾਲੇ ਰੁੱਖ ਤਾਂ ਵੱਢ ਦਿੱਤੇ ਗਏ ਪ੍ਰੰਤੂ ਖੇਤਾਂ ਵਿਚਲੀ ਪਰਾਲੀ ਸਾੜਨ ਦੇ ਰੁਝਾਨ ਨੇ ਬਲਦੀ ਉਤੇ ਤੇਲ ਪਾਉਣ ਦਾ ਕੰਮ ਕੀਤਾ ਹੈ।
ਪੰਜਾਬੀਓ, ਅਜੇ ਵੀ ਸੰਭਲ ਜਾਓ। ਆਪਣੇ ਪੁਰਖਿਆਂ ਦੀ ਰੀਸ ਕਰਦੇ ਹੋਏ ਬਰਸਾਤ ਅਤੇ ਬਸੰਤ ਦੇ ਮਹੀਨਿਆਂ ਦੌਰਾਨ ਸਭ ਖਾਲੀ ਥਾਵਾਂ ਉਤੇ ਰੁੱਖ ਲਗਾਉਣੇ ਸ਼ੁਰੂ ਕਰ ਦਿਓ। ਜੇ ਰੁੰਡ-ਮਰੁੰਡ ਕੀਤੀਆਂ ਸੜਕਾਂ ਉਤੇ ਸਰਕਾਰ ਰੁੱਖ ਨਹੀਂ ਲਗਾਉਂਦੀ ਤਾਂ ਤੁਸੀਂ ਖੁਦ ਛਾਂਦਾਰ ਰੁੱਖ ਲਗਾ ਕੇ ਪਾਲੋ ਤਾਂ ਕਿ ਜਿਥੇ ਪੰਜਾਬ ਹਰਿਆ-ਭਰਿਆ ਹੋਵੇਗਾ ਅਤੇ ਉਥੇ ਵਾਤਾਵਰਨ ਵੀ ਸਾਫ਼-ਸੁਥਰਾ ਹੋਵੇਗਾ।


-ਇੰਜ: ਕੁਲਦੀਪ ਸਿੰਘ ਲੁੱਧਰ
ਗੁਰੂ ਨਾਨਕ ਵਾੜਾ, ਅੰਮ੍ਰਿਤਸਰ।


ਨਵੀਂ ਲਕਸ਼ਮੀ
ਭਾਰਤ ਵਿਚ ਕਈ ਸਰਕਾਰਾਂ ਆਈਆਂ, ਕਈਆਂ ਗਈਆਂ। ਹਰ ਪਾਰਟੀ ਦਾ ਚੋਣ ਤੋਂ ਪਹਿਲਾਂ ਇਹ ਵਾਅਦਾ ਹੁੰਦਾ ਸੀ ਕਿ ਕਾਲਾ ਧਨ ਵਾਪਸ ਲਿਆਵਾਂਗੇ, ਭ੍ਰਿਸ਼ਟਾਚਾਰ ਹਟਾਵਾਂਗੇ। ਪ੍ਰੰਤੂ ਵੱਡੇ-ਵੱਡੇ ਘੁਟਾਲੇ ਕਰਕੇ ਕਾਲੇ ਧਨ ਤੇ ਸੰਪਤੀ ਵਿਚ ਵਾਧਾ ਹੀ ਹੁੰਦਾ ਗਿਆ। ਪ੍ਰਧਾਨ ਮੰਤਰੀ ਸ੍ਰੀ ਨਰਿੰਦਰ ਮੋਦੀ ਦਾ ਇਕ ਇਤਿਹਾਸਕ ਕਦਮ ਹੈ ਤੇ ਅਦਭੁਤ ਤਰੀਕਾ ਹੈ। ਦੋ ਦਿਨ ਦੇ ਮਾਮੂਲੀ ਸੰਕਟ ਤੋਂ ਬਾਅਦ ਜਦੋਂ ਨਵੀਂ ਲਕਸ਼ਮੀ ਘਰ ਆਈ ਤਾਂ 95 ਫ਼ੀਸਦੀ ਲੋਕਾਂ ਦੀ ਦੀਵਾਲੀ ਬਣ ਗਈ ਤੇ 5 ਫ਼ੀਸਦੀ ਸਿਆਸੀ ਆਗੂ, ਅਫਸਰਸ਼ਾਹੀ ਤੇ ਵੱਡੇ-ਵੱਡੇ ਧਾਰਮਿਕ ਮਹਾਂਪੁਰਸ਼ਾਂ ਲਈ ਕਾਲਾ ਦਿਨ ਹੈ ਜੋ ਕਰੋੜਾਂ, ਅਰਬਾਂ ਦੇ ਵੱਡੇ ਕਰੰਸੀ ਨੋਟ ਨੱਪੀ ਬੈਠੇ ਹਨ। ਗਹਿਰਾਈ ਨਾਲ ਵਿਚਾਰਿਆ ਜਾਵੇ ਤਾਂ ਇਹ ਇਕ ਬਹੁਪੱਖੀ ਯੋਜਨ ਹੈ। ਹੁਣ ਭ੍ਰਿਸ਼ਟਾਚਾਰੀਆਂ 'ਤੇ ਪੂਰੀ ਨਜ਼ਰ ਰੱਖਣ ਦੀ ਸਖ਼ਤ ਜ਼ਰੂਰਤ ਹੈ।


-ਮਾ: ਮਹਿੰਦਰ ਸਿੰਘ ਸਿੱਧੂ
ਸਿੱਧਵਾਂ ਕਲਾਂ, ਜ਼ਿਲ੍ਹਾ ਲੁਧਿਆਣਾ। ਮੋਬਾਈਲ : 98720-86101.


ਪੈਸੇ ਦੀ ਦੌੜ
ਅੱਜ ਪੈਸੇ ਦੀ ਦੌੜ ਨੇ ਦੁਨੀਆ ਦਾ ਚੈਨ ਖੋਹ ਲਿਆ ਹੈ। ਪੈਸਾ ਜ਼ਿੰਦਗੀ ਚਲਾਉਣ ਲਈ ਜ਼ਰੂਰੀ ਹੈ ਪਰ ਲੋਕਾਂ ਵਿਚ ਜਾਇਜ਼-ਨਾਜਾਇਜ਼ ਤਰੀਕੇ ਨਾਲ ਇਕ-ਦੂਜੇ ਨੂੰ ਪਿੱਛੇ ਛੱਡ ਕੇ ਸਿਰਫ਼ ਪੈਸੇ ਲਈ ਭੱਜਦੇ ਦੇਖਿਆ ਜਾ ਰਿਹਾ ਹੈ। ਜਿਨ੍ਹਾਂ ਲੋਕਾਂ ਕੋਲ ਪੈਸਾ ਨਹੀਂ ਹੈ, ਉਨ੍ਹਾਂ ਨੇ ਮਿਹਨਤ ਕਰਕੇ ਪੈਸਾ ਕਮਾਉਣਾ ਹੈ ਪਰ ਜਿਨ੍ਹਾਂ ਕੋਲ ਬਹੁਤ ਜਾਇਦਾਦ ਹੈ, ਉਨ੍ਹਾਂ ਨੂੰ ਵੀ ਸਬਰ ਨਹੀਂ। ਦੋ ਘੜੀਆਂ ਭਾਵੇਂ ਚੈਨ ਨੂੰ ਬੈਠਣ ਲਈ ਮਿਲੇ ਜਾਂ ਨਾ ਮਿਲੇ, ਪੈਸਾ ਹੋਰ ਜ਼ਿਆਦਾ ਕਮਾਉਣ ਲਈ ਨਵਾਂ ਤਰੀਕਾ ਸੋਚਿਆ ਜਾਂਦਾ ਹੈ।


-ਹਰਬੰਸ ਸਿੰਘ ਬੰਗਾ,
ਰਾਏਕੋਟ।

19/11/2016

 2000 ਦੇ ਨੋਟ 'ਤੇ ਛਪੀ ਮੰਗਲਯਾਨ ਦੀ ਤਸਵੀਰ

ਗੁਲਜ਼ਾਰ ਸਿੰਘ ਦੇ ਲੇਖ ਨਿੱਕ-ਸੁੱਕ ਵਿਚੋਂ ਪੁਰਾਣੇ ਨੋਟ ਤੇ ਨਵੇਂ ਨੋਟਾਂ ਬਾਰੇ ਭਰਪੂਰ ਜਾਣਕਾਰੀ ਮਿਲੀ ਹੈ। ਮੋਦੀ ਸਰਕਾਰ ਨੇ ਨੋਟ ਬੰਦ ਕਰਕੇ ਪੂਰੇ ਭਾਰਤ ਵਿਚ ਖਲਬਲੀ ਮਚਾ ਦਿੱਤੀ ਹੈ। ਲੇਖ ਤੋਂ ਜਾਣਕਾਰੀ ਮਿਲੀ ਹੈ ਕਿ ਅੰਗਰੇਜ਼ ਸਰਕਾਰ ਨੇ 1946 ਵਿਚ 1000 ਤੇ 10,000 ਵਾਲੇ ਨੋਟ ਬੰਦ ਕਰਕੇ ਲੋਕਾਂ ਵਿਚ ਹਾਹਕਾਰ ਲਿਆਂਦੀ ਸੀ। ਸਾਡੇ ਪ੍ਰਧਾਨ ਮੰਤਰੀ ਸ੍ਰੀ ਨਰਿੰਦਰ ਮੋਦੀ ਜੀ ਨੇ ਵਿਦੇਸ਼ੀ ਯਾਤਰਾ ਤੋਂ ਸ਼ਾਇਦ ਨੋਟ ਬਦਲਣ ਦੀ ਨੀਤੀ ਸਿੱਖ ਕੇ ਆਏ ਨੇ ਜਿਸ ਨਾਲ ਭਾਰਤ ਦੀ ਗਰੀਬ ਲੋਕਾਂ ਨੂੰ ਰੋਟੀ ਦੇ ਲਾਲੇ ਪੈਣ ਵਰਗੀ ਸਥਿਤੀ ਪੈਦਾ ਕਰ ਦਿੱਤੀ ਹੈ। ਮੋਦੀ ਸਰਕਾਰ ਨੇ 2000 ਰੁਪਏ ਦੇ ਨੋਟ 'ਤੇ ਮੰਗਲਯਾਨ ਦੀ ਤਸਵੀਰ ਛਾਪ ਕੇ ਕੀ ਸਾਬਤ ਕਰਨਾ ਚਾਹੁੰਦੇ ਹਨ। ਮੋਦੀ ਸਰਕਾਰ ਲੋਕਾਂ ਲਈ ਬੈਂਕਾ ਵਿਚ ਕਰੰਸੀ ਭੇਜ ਨਹੀਂ ਸਕੀ। ਜਿਸ ਕਰਕੇ ਬੈਂਕਾਂ ਦੇ ਅੱਗੇ ਲੋਕਾਂ ਦੀਆਂ ਲੰਬੀਆ ਕਤਾਰਾਂ ਲੱਗੀਆਂ ਹੋਈਆਂ ਹਨ। ਬੈਂਕਾਂ ਵਿਚੋਂ ਪੈਸਾ ਖ਼ਤਮ ਹੋਣ ਤੇ ਲੋਕਾਂ ਨੁੂੰ ਬੈਂਕ ਮੈਨੇਜਰ ਇਕ ਹਫ਼ਤੇ ਦਾ ਸਮਾਂ ਦੇ ਰਹੇ ਹਨ। ਭਾਵੇਂ ਕਿ ਕਾਲੇ ਧਨ ਨੂੰ ਰੋਕਣ ਲਈ ਵੱਡੇ ਨੋਟ ਬੰਦ ਕੀਤੇ ਹਨ ਪਰ ਦੇਸ਼ ਦੀ ਵਿੱਤੀ ਹਾਲਤ ਖ਼ਰਾਬ ਹੋ ਚੁੱਕੀ ਹੈ। ਕਾਰੋਬਾਰ 'ਤੇ ਮਾੜਾ ਅਸਰ ਪੈ ਚੁੱਕਾ ਹੈ। ਗਰੀਬ ਵਰਗ ਵਿਚ ਹਾਹਾਕਾਰ ਮਚੀ ਹੋਈ ਹੈ। ਲੋਕਾਂ ਦੇ ਗੁੱਸੇ ਦਾ ਸ਼ਿਕਾਰ ਭਾਜਪਾ ਪਾਰਟੀ ਦੇ ਪ੍ਰਧਾਨ ਮੰਤਰੀ ਮੋਦੀ ਜੀ ਹੋ ਰਹੇ ਹਨ। ਸ਼ਾਇਦ ਵਿਧਾਨ ਸਭਾ ਦੀਆਂ ਚੋਣਾਂ 'ਤੇ ਲੋਕ ਆਪਣੀ ਨਰਾਜ਼ਗੀ ਪ੍ਰਗਟ ਕਰ ਸਕਦੇ ਹਨ।

-ਮਾ: ਜਗੀਰ ਸਿੰਘ
ਸਠਿਆਲਾ (ਅੰਮ੍ਰਿਤਸਰ)।

ਪੁਲਿਸ ਅਤੇ ਬੇਰੁਜ਼ਗਾਰ

ਸਰਕਾਰ ਦੀਆਂ ਗ਼ਲਤ ਨੀਤੀਆਂ ਤੋਂ ਤੰਗ ਆ ਕੇ, ਆਪਣੇ ਹੱਕਾਂ ਲਈ ਵਿਰੋਧ ਕਰਨ ਵਾਲੇ ਬੇਰੁਜ਼ਗਾਰ ਨੌਕਰੀਆਂ ਲੈਣ ਲਈ ਹਰ ਰੋਜ਼ ਪੁਲਿਸ ਦੀਆਂ ਡਾਂਗਾਂ ਦੇ ਸ਼ਿਕਾਰ ਹੁੰਦੇ ਹਨ। ਪੁਲਿਸ ਨੂੰ ਇੰਨੀ ਕੁ ਸੋਝੀ ਤਾਂ ਹੋਣੀ ਹੀ ਚਾਹੀਦੀ ਹੈ ਕਿ ਇਹ ਬੇਰੁਜ਼ਗਾਰ ਪੜ੍ਹ-ਲਿਖ ਕੇ ਆਪਣੇ ਹੱਕਾਂ ਦੀ ਆਵਾਜ਼ ਹੀ ਉਠਾ ਰਹੇ ਹਨ, ਕੋਈ ਡਾਕਾ ਜਾਂ ਕਤਲ ਕਰਨ ਲਈ 'ਕੱਠੇ ਨਹੀਂ ਹੋ ਰਹੇ। ਇਨ੍ਹਾਂ ਨੌਜਵਾਨਾਂ ਦੀ ਸੁਰੱਖਿਆ ਕਰਨਾ ਪੁਲਿਸ ਦਾ ਫਰਜ਼ ਹੈ। ਪੁਲਿਸ ਸਾਡੀ ਸਹਾਇਤਾ ਵਾਸਤੇ ਹੈ ਨਾ ਕਿ ਸਾਡੀ ਦੁਸ਼ਮਣ। ਪੰਜਾਬ ਪੁਲਿਸ ਦਾ ਮਾਟੋ ਹੈ 'ਸ਼ੁਭ ਕਰਮਨ ਤੇ ਕਬਹੁ ਨਾ ਟਰੋ' ਭਾਵ 'ਚੰਗਾ ਕੰਮ ਕਰਨ ਤੋਂ ਮੈਂ ਕਦੇ ਵੀ ਪਿਛਾਂਹ ਨਾ ਹਟਾਂ' ਕੀ ਇਹ ਸ਼ੁਭ ਕਰਮ ਕੁੱਟਣਾ-ਮਾਰਨਾ ਹੀ ਹੈ? ਆਖਿਰ ਇਹ ਕਦੋਂ ਤੱਕ ਚਲਦਾ ਰਹੇਗਾ? ਕੀ ਪੜ੍ਹਿਆ ਲਿਖਿਆ ਵਰਗ ਸਿਰਫ਼ ਇਨ੍ਹਾਂ ਦੀਆਂ ਡਾਂਗਾਂ ਖਾਣ ਲਈ ਹੀ ਰਹਿ ਗਿਆ ਹੈ? ਪਰ ਹੁਣ ਪੰਜਾਬ ਪੁਲਿਸ ਵਿਚ ਬਹੁਤ ਸਾਰਾ ਆਧੁਨਿਕੀਕਰਨ ਹੋ ਗਿਆ ਹੈ, ਨਵੇਂ ਪੁਲਿਸ ਕਰਮਚਾਰੀਆਂ ਦੇ ਰਵੱਈਏ ਵਿਚ ਕਾਫ਼ੀ ਤਬਦੀਲੀ ਆਈ ਹੈ। ਸਿਆਸੀ ਦਬਾਅ ਕਾਰਨ ਪੁਲਿਸ ਨੂੰ ਬਹੁਤ ਸਾਰੀਆਂ ਮੁਸ਼ਕਿਲਾਂ ਅਤੇ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਪੁਲਿਸ ਅਤੇ ਆਮ ਲੋਕਾਂ ਦੇ ਸਬੰਧ ਇਸ ਤਰ੍ਹਾਂ ਹੋਣ ਕਿ ਦੋਵੇਂ ਇਕ-ਦੂਜੇ ਨੂੰ ਸਾਥੀ ਤੇ ਦੋਸਤ ਸਮਝਣ। ਗ਼ਲਤ ਅਨਸਰਾਂ ਨੇ ਪੁਲਿਸ ਨੂੰ ਚੰਗੇ ਮਾੜੇ ਦੀ ਪਰਖ ਬਰਾਬਰ ਕਰ ਦਿੱਤੀ। ਹਰ ਵਿਅਕਤੀ ਨੂੰ ਕਾਨੂੰਨੀ ਤੌਰ 'ਤੇ ਇਹ ਹੱਕ ਹੈ ਕਿ ਉਹ ਆਪਣੀ ਜਥੇਬੰਦੀ ਰਾਹੀਂ ਸਰਕਾਰ ਅੱਗੇ ਆਪਣਾ ਪੱਖ ਰੱਖ ਸਕੇ। ਕਸੂਰ ਸਾਰਾ ਸਰਕਾਰ ਦਾ ਹੈ। ਪੁਲਿਸ ਰਾਹੀਂ ਡਾਂਗਾਂ ਮਾਰਨੀਆਂ ਮਸਲੇ ਦਾ ਹੱਲ ਨਹੀਂ।

-ਪ੍ਰਸ਼ੋਤਮ ਪੱਤੋ
ਪਿੰਡ ਤੇ ਡਾਕ: ਪੱਤੋ ਹੀਰਾ ਸਿੰਘ, ਜ਼ਿਲ੍ਹਾ ਮੋਗਾ।

18/11/2016

 ਲੋਕਾਂ ਦੀ ਖੱਜਲ-ਖੁਆਰੀ

ਸਰਕਾਰ ਵੱਲੋਂ 500-1000 ਦੇ ਨੋਟ ਬੰਦ ਕਰਨ ਨਾਲ ਸਭ ਤੋਂ ਜ਼ਿਆਦਾ ਆਮ ਆਦਮੀ ਪ੍ਰੇਸ਼ਾਨ ਹੋ ਰਿਹਾ ਹੈ। ਗਰੀਬ ਮਜ਼ਦੂਰ ਦਿਹਾੜੀ ਭੰਨ ਕੇ ਲੰਬੀ ਲਾਈਨ ਵਿਚ ਲਗਦਾ ਹੈ ਪਰ ਵਾਰੀ ਆਉਣ 'ਤੇ ਉਸ ਨੂੰ ਕੈਸ਼ ਖ਼ਤਮ ਹੋ ਗਿਆ ਕਹਿ ਦਿੱਤਾ ਜਾਂਦਾ ਹੈ। ਬੈਂਕਾਂ ਬਾਹਰ ਲੰਮੀਆਂ ਲਾਈਨਾਂ ਕਾਰਨ ਲੜਾਈ-ਝਗੜੇ ਵਧ ਰਹੇ ਹਨ। ਵੱਡੀ ਮਾਤਰਾ ਵਿਚ ਪੁਰਾਣੇ ਨੋਟ ਬੈਂਕ ਵਿਚ ਜਮ੍ਹਾ ਹੋ ਰਹੇ ਹਨ ਪਰ ਨਕਦੀ ਘੱਟ ਮਿਲਣ ਕਾਰਨ ਵਿਆਹ ਸਮਾਗਮਾਂ ਵਾਲੇ ਜਾਂ ਹੋਰ ਪਰਿਵਾਰਾਂ ਦੀ ਜ਼ਿਆਦਾ ਖੱਜਲ-ਖੁਆਰੀ ਹੋਈ ਹੈ। ਸਰਕਾਰ ਨੂੰ ਇਸ ਸਬੰਧੀ ਹੋਰ ਪ੍ਰਬੰਧਾਂ ਦੀ ਲੋੜ ਹੈ ਤਾਂ ਜੋ ਜਨਤਾ ਨੂੰ ਪ੍ਰੇਸ਼ਾਨੀ ਨਾ ਹੋਵੇ।

-ਬਲਵਿੰਦਰ ਸਿੰਘ ਗੁਰਾਇਆ
ਮੋ: 94170-58020.

ਪ੍ਰਦੂਸ਼ਣ ਤੇ ਕਿਸਾਨ

ਪਿਛਲੇ ਦਿਨੀਂ ਇਕਦਮ ਬੇਹੱਦ ਪ੍ਰਦੂਸ਼ਣ ਵਧ ਗਿਆ। ਜਿਸ ਨਾਲ ਸਭਨਾਂ ਨੂੰ ਕਠਿਨਾਈਆਂ ਦਾ ਸਾਹਮਣਾ ਕਰਨਾ ਪਿਆ। ਕਈ ਲੀਡਰ ਕਹਿ ਰਹੇ ਸਨ ਕਿ ਇਹ ਸਭ ਕਿਸਾਨਾਂ ਦਾ ਕਸੂਰ ਹੈ। ਇਹ ਸਭ ਪਰਾਲੀ ਨੂੰ ਅੱਗ ਲਾਉਂਦੇ ਹਨ ਤੇ ਧੂੰਆਂ ਧੁੰਦ ਨਾਲ ਮਿਲ ਕੇ ਕਹਿਰ ਢਾਹੁੰਦਾ ਹੈ। ਇਸ ਬਾਬਤ ਸਾਡੇ ਪਿੰਡ ਦੇ ਸਿੱਧ-ਪੱਧਰ ਬੰਦੇ ਪੱਲੇ ਨੇ ਬੜੀ ਸਟੀਕ ਗੱਲ ਕੀਤੀ। ਉਸ ਨੇ ਕਿਹਾ ਕਿ ਲੀਡਰ ਇਲਜ਼ਾਮ ਤਾਂ ਕਿਸਾਨਾਂ ਸਿਰ ਲਾਈ ਜਾਂਦੇ ਨੇ ਕਿ ਪਰਾਲੀ ਸਾੜਦੇ ਨੇ ਤਾਂ ਪ੍ਰਦੂਸ਼ਣ ਵਧਦਾ ਤੇ ਜਿਹੜੇ ਇਹ ਪਤੰਦਰ ਲੀਡਰ ਆਪੋ ਵਿਚ ਆਪਣੇ ਵਿਰੋਧੀਆਂ ਦੇ ਪੁਤਲੇ ਫੂਕੀ ਜਾਂਦੇ ਆ। ਉਨ੍ਹਾਂ ਨਾਲ ਘੱਟ ਪ੍ਰਦੂਸ਼ਣ ਫੈਲਦਾ? ਇਨ੍ਹਾਂ ਨੇ ਕੋਈ ਇਕ-ਦੂਜੇ ਦਾ ਲੀਡਰ ਛੱਡਿਆ... ਫੂਕਣ ਵੰਨੀਓਂ।

-ਅਮਰਜੀਤ ਸ਼ਰਮਾ
ਆਸਾ ਬੁੱਟਰ।

ਕਿਸਾਨ ਦੀ ਲੁੱਟ

ਇਹ ਬਹੁਤ ਹੀ ਸ਼ਰਮਨਾਕ ਵਰਤਾਰਾ ਹੈ ਕਿ ਆਪਣੇ ਧੀਆਂ-ਪੁੱਤਾਂ ਵਾਂਗ ਪਾਲੀ ਸਾਉਣੀ ਦੀ ਫ਼ਸਲ ਨੂੰ ਵੇਚਣ ਲਈ ਕਿਸਾਨ ਆੜ੍ਹਤੀਆਂ ਅਤੇ ਸ਼ੈਲਰ ਮਾਲਕਾਂ ਦੀ ਲੁੱਟ ਦਾ ਸ਼ਿਕਾਰ ਹੁੰਦਾ ਹੈ। ਮੰਡੀਆਂ ਦੀ ਖੱਜਲ-ਖੁਆਰੀ ਨੇ ਉਸ ਦੀਆਂ ਰਾਤਾਂ ਦੀ ਨੀਂਦਾਂ ਉਡਾ ਦਿੱਤੀਆਂ ਹਨ। ਉਹ ਵਿਚਾਰਾ ਜਿਹਾ ਬਣ ਕੇ ਰਹਿ ਗਿਆ। ਕਰਜ਼ੇ ਦੀ ਘੁੰਮਣਘੇਰੀ ਵਿਚ ਫਸਿਆ ਉਹ ਆਖਰ ਨੂੰ ਜ਼ਿੰਦਗੀ ਨੂੰ ਅਲਵਿਦਾ ਕਹਿ ਜਾਂਦਾ ਹੈ। ਛੇ ਮਹੀਨਿਆਂ ਦੀ ਮਿਹਨਤ ਨਾਲ ਪਾਲੀ ਫਸਲ ਉਸ ਨੂੰ ਮੰਡੀ ਵਿਚ ਕੱਟ ਲਗਾ ਕੇ ਵੇਚਣੀ ਪੈ ਰਹੀ ਹੈ। ਇਹ ਕੱਟ 3 ਰੁਪਏ ਤੋਂ ਵਧ ਕੇ 10 ਰੁਪਏ ਪ੍ਰਤੀ ਕੁੁਇੰਟਲ ਤੱਕ ਪਹੁੰਚ ਗਿਆ ਹੈ। ਆੜ੍ਹਤੀ ਤੇ ਸ਼ੈਲਰ ਮਾਲਕਾਂ ਦਾ ਗਠਜੋੜ ਉਸ ਲਈ ਸਿਰਦਰਦੀ ਬਣ ਗਿਆ ਹੈ। ਅਜਿਹਾ ਵਰਤਾਰਾ ਮੁਕੇਰੀਆਂ ਬਲਾਕ ਦੀ ਹਰਦੋ-ਖੁੰਦਪੁਰ ਮੰਡੀ ਵਿਚ ਸ਼ਰੇਆਮ ਦੇਖਿਆ ਜਾ ਸਕਦਾ ਹੈ। ਪ੍ਰਸ਼ਾਸਨਿਕ ਅਧਿਕਾਰੀਆਂ, ਐਸ.ਡੀ.ਐਮ., ਤਹਿਸੀਲਦਾਰ ਦੇ ਦੌਰਿਆਂ ਦੇ ਬਾਵਜੂਦ ਪਰਨਾਲਾ ਉਥੇ ਦਾ ਉਥੇ ਹੀ ਹੈ। ਅਨਪੜ੍ਹ ਕਿਸਾਨ ਜਦ ਆਪਣਾ ਸੋਸ਼ਣ ਬਰਦਾਸ਼ਤ ਨਹੀਂ ਕਰ ਸਕਦਾ ਤਾਂ ਫਿਰ ਉਹ ਰੋਜ਼ਾਨਾ ਕਿਸੇ ਨਾ ਕਿਸੇ ਅਖ਼ਬਾਰ ਦੀ ਸੁਰਖੀ ਬਣ ਕੇ ਰਹਿ ਜਾਂਦਾ ਹੈ ਤੇ ਇਹ ਸੁਰਖੀਆਂ ਲਗਾਤਾਰ ਵਧ ਹੀ ਰਹੀਆਂ ਹਨ। ਮੁੱਖ ਮੰਤਰੀ ਪੰਜਾਬ ਇਸ ਪਾਸੇ ਵੀ ਥੋੜ੍ਹਾ ਧਿਆਨ ਦੇਣਗੇ।

-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀ ਖਾਸ, ਤਹਿਸੀਲ ਮੁਕੇਰੀਆਂ, ਜ਼ਿਲ੍ਹਾ ਹੁਸ਼ਿਆਰਪੁਰ।

17/11/2016

 ਨਵੇਂ ਨੋਟਾਂ ਦਾ ਸਤਿਕਾਰ
ਸਰਕਾਰ ਅਤੇ ਕੇਂਦਰੀ ਰਿਜ਼ਰਵ ਬੈਂਕ ਵੱਲੋਂ ਜਾਰੀ ਕੀਤੇ ਗਏ ਨਿਰਦੇਸ਼ਾਂ ਅਨੁਸਾਰ ਪੁਰਾਣੇ 500 ਤੇ 1000 ਦੇ ਨੋਟ ਬਦਲੇ ਨਵੇਂ ਨਿਕੋਰ 500 ਤੇ 2000 ਦੇ ਖੜਕਵੇਂ ਨੋਟ ਸਾਡੀਆਂ ਜੇਬਾਂ 'ਚ ਆ ਰਹੇ ਹਨ, ਜਿਸ ਦਾ ਭਾਰਤ ਵਾਸੀਆਂ ਵੱਲੋਂ ਸਵਾਗਤ ਕੀਤਾ ਜਾ ਰਿਹਾ ਹੈ। ਪਰ ਅਫਸੋਸ ਹੈ ਕਿ ਕੁਝ ਅਨਸਰਾਂ ਵੱਲੋਂ ਨੋਟਾਂ 'ਤੇ ਬਾਲ ਪੈੱਨ ਨਾਲ ਕੁਝ ਨਾ ਕੁਝ ਲਿਖ ਕੇ ਜਾਂ ਸਾਡੇ ਰਾਸ਼ਟਰ ਪਿਤਾ ਮਹਾਤਮਾ ਗਾਂਧੀ ਜੀ ਦੀ ਤਸਵੀਰ ਨਾਲ ਛੇੜ-ਛਾੜ ਕਰਕੇ ਨੋਟਾਂ ਦੀ ਬੇਕਦਰੀ ਕੀਤੀ ਜਾਂਦੀ ਹੈ, ਜਿਸ ਨੂੰ ਠੱਲ੍ਹ ਪੈਣੀ ਚਾਹੀਦੀ ਹੈ। ਸੋ, ਸਭ ਦੇਸ਼ ਵਾਸੀਆਂ ਨੂੰ ਚਾਹੀਦਾ ਹੈ ਕਿ ਅਸੀਂ ਆ ਰਹੀ ਨਵੀਂ ਕਰੰਸੀ ਦਾ ਸਤਿਕਾਰ ਕਰੀਏ ਤੇ ਇਨ੍ਹਾਂ ਨਵੇਂ ਨੋਟਾਂ 'ਤੇ ਪੈੱਨ ਨਾਲ ਕੁਝ ਅਜਿਹਾ ਨਾ ਲਿਖੀਏ ਜੋ ਆਪਣੇ ਆਪ ਨੂੰ ਹੀ ਭੱਦਾ ਲੱਗੇ।


-ਤਰਸੇਮ ਮਹਿਤੋ
ਪਿੰਡ- ਬਈਏਵਾਲ (ਸੰਗਰੂਰ)।


ਸਕੂਲਾਂ 'ਚ ਸਟਾਫ਼ ਦੀ ਘਾਟ

ਪੰਜਾਬ ਦੇ ਸਰਕਾਰੀ ਸਕੂਲਾਂ ਦਾ ਮਿਆਰ ਉੱਚਾ ਚੁੱਕਣ ਲਈ ਪਿਛਲੇ ਸਮੇਂ 'ਚ ਯਤਨ ਤਾਂ ਜ਼ਰੂਰ ਹੋਇਆ ਹੈ ਪਰ ਹਾਲੇ ਵੀ ਬਹੁਤ ਕੁਝ ਕਰਨ ਦੀ ਲੋੜ ਹੈ, ਤਾਂ ਕਿ ਸਰਕਾਰੀ ਸਕੂਲਾਂ ਦੀ ਨੁਹਾਰ ਬਦਲੀ ਜਾ ਸਕੇ। ਸਭ ਤੋਂ ਵੱਡੀ ਗੱਲ ਕਿ ਅੱਜ ਸਰਕਾਰੀ ਸਕੂਲਾਂ ਵਿਚ ਵੱਡੀ ਗਿਣਤੀ ਵਿਚ ਬੱਚਿਆਂ ਨੂੰ ਪੜ੍ਹਾਉਣ ਲਈ ਯੋਗ ਅਧਿਆਪਕ ਹੀ ਨਹੀਂ ਹਨ, ਜਿਸ ਕਾਰਨ ਬੱਚਿਆਂ ਦੀ ਪੜ੍ਹਾਈ 'ਤੇ ਮਾੜਾ ਅਸਰ ਪੈਣਾ ਹੀ ਹੈ। ਸਰਕਾਰ ਸਕੂਲਾਂ ਨੂੰ ਅਪਗ੍ਰੇਡ ਤਾਂ ਜ਼ਰੂਰ ਕਰ ਰਹੀ ਹੈ ਪਰ ਸਰਕਾਰੀ ਸਕੂਲਾਂ ਵਿਚ ਕਈ ਥਾਂ 'ਤੇ ਇਮਾਰਤਾਂ ਦੀ ਵੀ ਸਖ਼ਤ ਲੋੜ ਹੈ। ਗ਼ਰੀਬੀ ਨਾਲ ਜੂਝਦੇ ਲੋਕਾਂ ਦੇ ਬੱਚੇ ਹੀ ਸਰਕਾਰੀ ਸਕੂਲਾਂ ਵਿਚ ਪੜ੍ਹਦੇ ਹਨ। ਸਹੀ ਪੜ੍ਹਾਈ ਨਾ ਹੋਣ ਕਾਰਨ ਉਹ ਬੱਚੇ ਜ਼ਿੰਦਗੀ ਵਿਚ ਪਛੜ ਜਾਂਦੇ ਹਨ। ਬਹੁਤੇ ਅਧਿਆਪਕ ਵੀ ਪੇਂਡੂ ਸਕੂਲਾਂ 'ਚ ਨਹੀਂ ਜਾਣਾ ਪਸੰਦ ਕਰਦੇ। ਇਸ ਲਈ ਸਰਕਾਰ ਸਰਕਾਰੀ ਸਕੂਲਾਂ ਵੱਲ ਵੱਧ ਤੋਂ ਵੱਧ ਧਿਆਨ ਦੇਵੇ।


-ਅੰਮ੍ਰਿਤ ਸਿੰਘ, ਸੰਦੀਪ
ਜਮਾਤ ਦਸਵੀਂ, ਸ.ਸ.ਸ. ਸਕੂਲ ਤੱਖਚਾਂ (ਲੁਧਿਆਣਾ)।


ਬੇਰੁਜ਼ਗਾਰੀ ਭੱਤਾ ਰਾਸ਼ੀ
ਪੰਜਾਬ ਅੰਦਰ ਬੇਰੁਜ਼ਗਾਰ ਨੌਜਵਾਨਾਂ ਨੂੰ ਸਰਕਾਰ ਵੱਲੋਂ ਦਿੱਤੀ ਜਾਣ ਵਾਲੀ ਭੱਤਾ ਰਾਸ਼ੀ ਬੁਢਾਪਾ ਪੈਨਸ਼ਨ ਨਾਲੋਂ ਵੀ ਕਾਫੀ ਘੱਟ ਤੇ ਨਿਗੂਣੀ ਹੈ। ਭਾਵੇਂ ਲੋਕ-ਹਿਤੈਸ਼ੀ ਅਖਵਾਉਣ ਵਾਲੀ ਮੌਜੂਦਾ ਅਕਾਲੀ-ਭਾਜਪਾ ਸਰਕਾਰ ਨੇ ਸੱਤਾ ਵਿਚ ਆਉਣ ਤੋਂ ਪਹਿਲਾਂ ਬੇਰੁਜ਼ਗਾਰ ਨੌਜਵਾਨਾਂ ਨਾਲ ਭੱਤਾ ਰਾਸ਼ੀ ਵਿਚ ਵਾਧਾ ਕਰਨ ਦਾ ਵਾਅਦਾ ਕੀਤਾ ਸੀ ਪਰ ਅਫ਼ਸੋਸ ਅੱਜ ਸਾਢੇ ਚਾਰ ਸਾਲ ਦੇ ਲਗਪਗ ਦਾ ਸਮਾਂ ਮੌਜੂਦਾ ਸਰਕਾਰ ਨੂੰ ਰਾਜ ਕਰਦਿਆਂ ਹੋ ਗਿਆ ਹੈ ਪਰ ਬੇਰੁਜ਼ਗਾਰੀ ਭੱਤਾ ਰਾਸ਼ੀ ਵਿਚ ਵਾਧਾ ਕਰਨ ਦਾ ਵਾਅਦਾ ਸਰਕਾਰ ਨੇ ਪੂਰਾ ਨਹੀਂ ਕੀਤਾ, ਜਿਸ ਕਾਰਨ ਅੱਜ ਬੇਰੁਜ਼ਗਾਰਾਂ ਅੰਦਰ ਕਾਫੀ ਨਿਰਾਸ਼ਾ ਪਾਈ ਜਾ ਰਹੀ ਹੈ। ਸੋ ਲੋੜ ਹੈ ਸਰਕਾਰ ਨੂੰ ਆਪਣੇ ਵਾਅਦੇ ਮੁਤਾਬਿਕ ਭੱਤਾ ਰਾਸ਼ੀ ਵਿਚ ਲੋੜੀਂਦਾ ਵਾਧਾ ਕਰਨ ਦੀ ਤੇ ਇਸ ਦੇ ਨਾਲ ਬੇਰੁਜ਼ਗਾਰ ਭੱਤਾ ਲੈਣ ਲਈ ਰੱਖੀ ਸਾਲਾਨਾ ਆਮਦਨ ਨਾਲ ਅਜੋਕੀ ਮਹਿੰਗਾਈ ਦੀ ਤੁਲਨਾ ਨਾਲ ਕਰਨ ਦੀ, ਤਾਂ ਜੋ ਰਾਜ ਅੰਦਰ ਬੇਰੁਜ਼ਗਾਰ ਨੌਜਵਾਨਾਂ ਨੂੰ ਆਰਥਿਕ ਪੱਖੋਂ ਕੁਝ ਰਾਹਤ ਮਿਲ ਸਕੇ।


-ਇਕਬਾਲ ਪਾਲੀ
ਪਿੰਡ : ਫ਼ਲੌਂਡ ਕਲਾਂ, ਤਹਿ: ਮਲੇਰਕੋਟਲਾ।

15-11-2016

 ਸਾਫ਼-ਸੁਥਰਾ ਅੰਮ੍ਰਿਤਸਰ
ਸ੍ਰੀ ਹਰਿਮੰਦਰ ਸਾਹਿਬ ਦੀ ਹੋਂਦ ਕਾਰਨ, ਅੰਮ੍ਰਿਤਸਰ ਇਕ ਪਵਿੱਤਰ ਸ਼ਹਿਰ ਮੰਨਿਆ ਜਾਂਦਾ ਹੈ। ਪਵਿੱਤਰਤਾ, ਸਫ਼ਾਈ ਨਾਲ ਹੀ ਕਾਇਮ ਰਹਿ ਸਕਦੀ ਹੈ, ਪ੍ਰੰਤੂ ਸਫ਼ਾਈ ਦੇ ਮਾਮਲੇ ਵਿਚ ਇਹ ਸ਼ਹਿਰ ਫਾਡੀ ਹੈ। ਪਿਛਲੇ ਕਈ ਸਾਲਾਂ ਤੋਂ ਇਸ ਸ਼ਹਿਰ ਦੀਆਂ ਅੰਦਰੂਨੀ ਤੇ ਬਾਹਰਲੀਆਂ ਸੜਕਾਂ ਕੂੜੇ ਕਰਕਟ ਨਾਲ ਭਰੀਆਂ ਰਹਿੰਦੀਆਂ ਹਨ। ਲੀਡਰਾਂ ਦੇ ਵਾਅਦਿਆਂ ਮੁਤਾਬਿਕ ਨਾ ਕੋਈ ਕੂੜਾ ਡਿਸਪੋਜ਼ਲ ਪਲਾਂਟ ਲੱਗਾ ਹੈ ਅਤੇ ਨਾ ਹੀ ਕੂੜੇ ਤੋਂ ਖਾਦ ਬਣਾਉਣ ਵਾਲਾ ਕਾਰਖਾਨਾ ਕਾਇਮ ਕੀਤਾ ਗਿਆ ਹੈ। ਸਮੇਂ-ਸਮੇਂ ਅਖ਼ਬਾਰਾਂ ਦੀਆਂ ਸੁਰਖੀਆਂ ਇਹ ਜ਼ਰੂਰ ਦੱਸਦੀਆਂ ਰਹੀਆਂ ਹਨ ਕਿ ਕਿਸੇ ਪ੍ਰਾਈਵੇਟ ਕੰਪਨੀ ਨਾਲ ਕੂੜਾ ਚੁੱਕਣ ਦਾ ਸਮਝੌਤਾ ਹੋਇਆ ਸੀ ਪਰ ਬਾਅਦ ਵਿਚ ਟੁੱਟ ਗਿਆ। ਪੂਰੇ 9 ਸਾਲਾਂ ਦੌਰਾਨ ਸ਼ਹਿਰ ਦਾ ਕੂੜਾ ਚੁੱਕਣ ਤੋਂ ਅਸਫ਼ਲ ਰਹਿਣ ਤੋਂ ਬਾਅਦ, ਟਾਊਨ ਹਾਲ ਤੋਂ ਸ੍ਰੀ ਅੰਮ੍ਰਿਤਸਰ ਸਾਹਿਬ ਵੱਲ ਜਾਂਦੀ ਇਕ ਸੜਕ ਦਾ ਸੁੰਦਰੀਕਰਨ ਕਰਕੇ ਰਾਹ ਵਿਚ ਭੰਗੜੇ ਵਾਲੇ ਬੁੱਤ ਖੜ੍ਹੇ ਕੀਤੇ ਗਏ ਹਨ। ਪ੍ਰੰਤੂ ਜੇਕਰ ਇਸ ਸੜਕ ਦੇ ਦੋਵਾਂ ਕਿਨਾਰਿਆਂ 'ਤੇ ਰੰਗ-ਬਿਰੰਗੇ ਫੁੱਲਾਂ ਵਾਲੇ ਰੁੱਖ ਲਗਾਏ ਹੁੰਦੇ ਤਾਂ ਉਹ ਯਾਤਰੂਆਂ ਨੂੰ ਖੂਸ਼ਬੂਦਾਰ ਹਵਾ ਦੇ ਨਾਲ ਹਰਿਆਵਲ ਬਖਸ਼ ਕੇ ਉਨ੍ਹਾਂ ਦੇ ਦਿਲਾਂ ਨੂੰ ਸਕੂਨ ਅਦਾ ਕਰਦੇ।


-ਇੰਜ: ਕੁਲਦੀਪ ਸਿੰਘ ਲੁੱਧਰ
ਗੁਰੂ ਨਾਨਕ ਵਾੜਾ, ਅੰਮ੍ਰਿਤਸਰ।


ਅੰਗਹੀਣਾਂ ਪ੍ਰਤੀ ਸਰਕਾਰ ਦੀ ਬੇਰੁਖ਼ੀ
ਅੰਗਹੀਣਾਂ ਪ੍ਰਤੀ ਸਰਕਾਰ ਦੇ ਵਤੀਰੇ ਤੋਂ ਇਸ ਤਰ੍ਹਾਂ ਲਗਦਾ ਹੈ ਕਿ ਇਨ੍ਹਾਂ ਦੀਆਂ ਮੰਗਾਂ ਸਰਕਾਰ ਜਾਣਬੁੱਝ ਕੇ ਮੰਨਣਾ ਨਹੀਂ ਚਾਹੁੰਦੀ ਜਾਂ ਫਿਰ ਅਫ਼ਸਰਸ਼ਾਹੀ ਸਰਕਾਰ 'ਤੇ ਭਾਰੂ ਹੈ। ਪਹਿਲਾਂ ਤਾਂ ਸਰਕਾਰ ਪਿਛਲੇ 8-9 ਸਾਲਾਂ ਤੋਂ ਸਰਕਾਰੀ ਨੌਕਰੀਆਂ ਵਿਚ ਬਣਦਾ ਬੈਕਲਾਗ 3 ਫ਼ੀਸਦੀ ਭਰਨ ਵਿਚ ਆਨਾਕਾਨੀ ਕਰਦੀ ਰਹੀ। ਜੇਕਰ ਊਠ ਦਾ ਬੁੱਲ੍ਹ ਲੰਮੇ ਸਮੇਂ ਦੇ ਇੰਤਜ਼ਾਰ ਮਗਰੋਂ ਥੋੜ੍ਹਾ ਜਿਹਾ ਹਿਲਿਆ ਤਾਂ ਸਰਕਾਰ ਦੇ ਸਮਾਜਿਕ ਸੁਰੱਖਿਆ ਵਿਭਾਗ ਨੇ 47 ਵਿਭਾਗਾਂ ਵਿਚ 453 ਪੋਸਟਾਂ ਦਾ ਸਾਂਝਾ ਇਸ਼ਤਿਹਾਰ ਮਿਤੀ 2-12-2015 ਨੂੰ ਵੱਖ-ਵੱਖ ਅਖ਼ਬਾਰਾਂ ਵਿਚ ਜਾਰੀ ਕੀਤਾ। ਇਨ੍ਹਾਂ ਪੋਸਟਾਂ ਨੂੰ ਭਰਨ ਸਬੰਧੀ ਅਪ੍ਰੈਲ 2016 ਵਿਚ ਅੰਗਹੀਣ ਯੂਨੀਅਨ ਦਾ ਵਫ਼ਦ ਮੁੱਖ ਮੰਤਰੀ, ਪੰਜਾਬ ਨੂੰ ਮਿਲਿਆ। ਇਸ ਮੌਕੇ ਉਨ੍ਹਾਂ ਨੇ ਅਫ਼ਸਰਸ਼ਾਹੀ ਨੂੰ ਬੁਲਾ ਕੇ ਅੰਗਹੀਣਾਂ ਨੂੰ ਇਕ ਮਹੀਨੇ ਵਿਚ ਆਰਡਰ ਦੇਣ ਲਈ ਕਿਹਾ। ਪਰ ਸਿਰਫ ਇਕ ਮਹਿਕਮੇ ਨੂੰ ਛੱਡ ਕੇ ਅੱਜ ਤੱਕ ਕੋਈ ਵੀ ਭਰਤੀ ਨਹੀਂ ਹੋਈ। ਸਰਕਾਰਾਂ ਧਰਨੇ, ਰੈਲੀਆਂ, ਮੁਜ਼ਾਹਰੇ ਕਰਨ ਵਾਲਿਆਂ ਨੂੰ ਹੱਕ ਦਿੰਦੀਆਂ ਹਨ। ਪਰ ਅੰਗਹੀਣ ਵਿਚਾਰੇ ਰੱਬ ਦੇ ਮਾਰੇ ਅਜਿਹਾ ਕਰਨ ਵਿਚ ਅਸਮੱਰਥ ਹੁੰਦੇ ਹਨ। ਪੰਜਾਬ ਸਰਕਾਰ ਦੇ ਟਰਾਂਸਪੋਰਟ ਵਿਭਾਗ, ਨੇ ਕਿ 25-7-2015 ਨੂੰ 35 ਅੰਗਹੀਣ ਕਲਰਕਾਂ ਦੀ ਇੰਟਰਵੀਊ ਲਈ ਸੀ ਪਰ ਅੱਜ ਤੱਕ ਇਸ ਮਹਿਕਮੇ ਨੂੰ ਨਤੀਜਾ ਕੱਢਣ ਦਾ ਸਮਾਂ ਨਹੀਂ ਲੱਗਿਆ। ਅਕਤੂਬਰ ਦੇ ਅਖੀਰ ਵਿਚ ਮੰਤਰੀ ਮੰਡਲ ਦੀ ਬੈਠਕ ਵਿਚ ਅੰਗਹੀਣਾਂ ਦਾ ਬੈਕਲਾਗ ਭਰਤੀ ਕੈਂਪ ਲਾ ਕੇ ਇਕ ਮਹੀਨੇ 'ਚ ਭਰਨ ਦਾ ਅਦੇਸ਼ ਦਿੱਤਾ ਗਿਆ ਸੀ। ਪਰ ਅੱਜ ਤੱਕ ਕਿਸੇ ਮਹਿਕਮੇ ਵਿਚ ਕੋਈ ਭਰਤੀ ਨਹੀਂ ਹੋਈ। ਸਰਕਾਰ ਇਸ ਪਾਸੇ ਧਿਆਨ ਦੇਵੇ।


-ਤੇਜਿੰਦਰ ਸਿੰਘ
ਧੂਰੀ, ਜ਼ਿਲ੍ਹਾ ਸੰਗਰੂਰ।

12-11-2016

 ਜੰਗ-ਏ-ਆਜ਼ਾਦੀ ਯਾਦਗਾਰ

'ਜੰਗ-ਏ-ਆਜ਼ਾਦੀ' ਯਾਦਗਾਰ ਰਾਸ਼ਟਰੀ ਮਾਰਗ-1 ਜਲੰਧਰ-ਅੰਮ੍ਰਿਤਸਰ ਜੀ.ਟੀ. ਰੋਡ 'ਤੇ ਕਰਤਾਰਪੁਰ ਵਿਖੇ ਆਕਰਸ਼ਿਤ ਇਮਾਰਤ ਵਜੋਂ ਉਸਾਰੀ ਗਈ ਹੈ। ਇਸ ਦਾ ਉਦਘਾਟਨ ਪੰਜਾਬ ਸਰਕਾਰ ਦੁਆਰਾ ਕਰ ਦਿੱਤਾ ਗਿਆ ਹੈ। ਇਥੇ ਆਉਣ ਵਾਲੇ ਸੈਲਾਨੀਆਂ ਨੂੰ ਆਜ਼ਾਦੀ ਦੇ ਇਤਿਹਾਸ ਬਾਰੇ ਜਾਣਕਾਰੀ ਮੁਹੱਈਆ ਹੋਏਗੀ। ਰਾਜ ਸਰਕਾਰ ਦਾ ਇਹ ਸਰਬੋਤਮ ਉਪਰਾਲਾ ਹੈ, ਕਿਉਂਕਿ ਇਸ ਨਾਲ ਇਤਿਹਾਸਕ ਸ਼ਹਿਰ ਕਰਤਾਰਪੁਰ ਦਾ ਮਹੱਤਵ ਹੋਰ ਵੀ ਵਧ ਗਿਆ ਹੈ। 'ਗੁਰੂਆਂ ਦੀ ਨਗਰੀ' ਵਜੋਂ ਜਾਣੇ ਜਾਂਦੇ ਇਸ ਸ਼ਹਿਰ ਨੂੰ ਇਤਿਹਾਸਕ ਹੋਣ ਦਾ ਹਵਾਲਾ ਦਿੱਤਾ ਜਾਂਦਾ ਹੈ ਅਤੇ ਇਸ ਯਾਦਗਾਰ ਦੀ ਉਸਾਰੀ ਹੋਣ ਕਰਕੇ ਇਸ ਨਗਰ ਦੀ ਪ੍ਰਸਿੱਧੀ ਵਧੇਰੇ ਪ੍ਰਬਲ ਹੋ ਰਹੀ ਹੈ। ਇਹ ਉਪਰਾਲਾ ਵਾਕਿਆ ਹੀ ਕਾਬਿਲ-ਏ-ਤਾਰੀਫ਼ ਹੈ। ਦੇਸ਼ ਦੀ ਆਜ਼ਾਦੀ 'ਚ ਲੰਮੇ ਅਤੇ ਕਠਿਨ ਸੰਘਰਸ਼ ਦੌਰਾਨ ਪੰਜਾਬੀਆਂ ਨੇ ਜੋ ਭਰਪੂਰ ਹਿੱਸਾ ਪਾਇਆ ਹੈ, ਉਸ ਦੀ ਜਾਣਕਾਰੀ ਸਾਡੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਤੱਕ ਪਹੁੰਚਿਆ ਕਰੇਗੀ।

-ਕਮਲਜੀਤ ਸਿੰਘ
ਪਿੰਡ ਮੱਲ੍ਹੀਆਂ (ਕਰਤਾਰਪੁਰ)।

ਨਸ਼ਿਆਂ ਦੀ ਲਾਹਨਤ

ਜੇਕਰ ਸਾਡਾ ਨੌਜਵਾਨ ਵਰਗ ਨਸ਼ੇ ਆਦਿ ਵਿਚ ਡੁੱਬ ਗਿਆ ਤਾਂ ਦੇਸ਼ ਦਾ ਭਵਿੱਖ ਕਿਸ ਤਰਾਂ ਵਧੀਆ ਹੋ ਸਕਦਾ ਹੈ। ਸਰਕਾਰਾਂ ਨੂੰ ਹਮੇਸ਼ਾ ਨਸ਼ਿਆਂ ਪ੍ਰਤੀ ਸੁਹਿਰਦਤਾ ਨਾਲ ਫ਼ੈਸਲਾ ਲੈਣਾ ਚਾਹੀਦਾ ਹੈ। ਸਰਕਾਰਾਂ ਤੋਂ ਅਸੀਂ ਨਸ਼ਿਆਂ ਦੀ ਤਸਕਰੀ ਰੋਕਣ ਅਤੇ ਨਸ਼ਿਆਂ ਵਿਚ ਫਸੇ ਨੌਜਵਾਨਾਂ ਨੂੰ ਨਸ਼ਾ ਛਡਾਉਣ ਵਿਚ ਸਹਾਇਤਾ ਦੇਣ ਦੀ ਆਸ ਕਰ ਸਕਦੇ ਹਾਂ। ਪਰ ਸਾਡੇ ਸਮਾਜਿਕ ਕੁਝ ਫਰਜ਼ ਹਨ ਕਿ ਇਸ ਤੋਂ ਕਿਵੇਂ ਨਵੀਂ ਪੀੜ੍ਹੀ ਨੂੰ ਬਚਾਇਆ ਜਾ ਸਕੇ। ਨਸ਼ਿਆਂ ਦੇ ਇਸ ਜ਼ਹਿਰ ਤੋਂ ਆਪਣੇ ਨੌਜਵਾਨਾਂ ਨੂੰ ਬਚਾਉਣ ਲਈ ਸਾਨੂੰ ਆਪਣੇ ਘਰਾਂ, ਮੁਹੱਲਿਆਂ, ਪਿੰਡਾਂ ਅਤੇ ਸ਼ਹਿਰਾਂ ਤੋਂ ਨਸ਼ਿਆਂ ਵਿਰੋਧੀ ਸੰਘਰਸ਼ ਵਿੱਢਣਾ ਪਵੇਗਾ।

-ਅਮਰਜੀਤ ਸਿੰਘ ਰਾਏ
ਰਾਏਕੋਟ (ਲੁਧਿਆਣਾ)।

ਪ੍ਰਦੂਸ਼ਣ ਦੀ ਸਮੱਸਿਆ

ਅੱਜ ਦੇ ਸਮੇਂ ਵਿਚ ਜੋ ਸਭ ਤੋਂ ਅਹਿਮ ਮੁੱਦਾ ਸਾਹਮਣੇ ਆ ਰਿਹਾ ਹੈ, ਉਹ ਪ੍ਰਦੂਸ਼ਣ ਦਾ ਹੈ। ਭਾਵੇਂ ਉਹ ਹਵਾ ਦਾ ਪ੍ਰਦੂਸ਼ਣ ਹੋਵੇ ਜਾਂ ਪਾਣੀ ਦਾ ਪ੍ਰਦੂਸ਼ਣ। ਇਨਸਾਨ ਸਭ ਕੁਝ ਭੁਲਾ ਕੇ ਪੈਸੇ ਦੀ ਦੌੜ ਵਿਚ ਏਨਾ ਗੁਆਚ ਗਿਆ ਹੈ ਕਿ ਉਸ ਨੂੰ ਆਪਣੇ ਆਲੇ-ਦੁਆਲੇ ਹੋ ਰਹੇ ਪ੍ਰਦੂਸ਼ਣ ਬਾਰੇ ਜਾਨਣ ਦੀ ਕੋਈ ਇੱਛਾ ਨਹੀਂ ਜਾਪਦੀ। ਸ਼ਹਿਰਾਂ, ਕਸਬਿਆਂ ਦੀ ਸਾਰੀ ਗੰਦਗੀ ਪਾਣੀ ਵਿਚ ਮਿਲ ਰਹੀ ਹੈ। ਨਦੀਆਂ ਅਤੇ ਧਰਤੀ ਹੇਠਲਾ ਪਾਣੀ ਏਨਾ ਪ੍ਰਦੂਸ਼ਿਤ ਹੋ ਚੁੱਕਾ ਹੈ ਕਿ ਉਹ ਇਨਸਾਨਾਂ ਦੇ ਤਾਂ ਕੀ, ਜਾਨਵਰਾਂ ਦੇ ਪੀਣਯੋਗ ਵੀ ਨਹੀਂ ਰਹਿ ਗਿਆ। ਇਨਸਾਨ ਭਿਆਨਕ ਬਿਮਾਰੀਆਂ ਦਾ ਸ਼ਿਕਾਰ ਹੋਣ ਦੇ ਬਾਵਜੂਦ ਇਹ ਸਮਝਣ ਲਈ ਤਿਆਰ ਨਹੀਂ ਕਿ ਇਹ ਸਭ ਕੁਝ ਉਸੇ ਦੀ ਦੇਣ ਹੈ। ਤਿਉਹਾਰਾਂ, ਵਿਆਹਾਂ ਸ਼ਾਦੀਆਂ ਉੱਪਰ ਆਤਿਸ਼ਬਾਜ਼ੀ ਦੀ ਬੇਇੰਤਹਾ ਵਰਤੋਂ ਨੇ ਸਾਡੇ ਵਾਤਾਵਰਨ ਨੂੰ ਇਸ ਹੱਦ ਤੱਕ ਦੂਸ਼ਿਤ ਕਰ ਦਿੱਤਾ ਹੈ ਕਿ ਸਾਹ ਲੈਣਾ ਵੀ ਔਖਾ ਹੋ ਗਿਆ ਹੈ। ਇਨ੍ਹਾਂ ਗ਼ਲਤੀਆਂ ਦਾ ਖਮਿਆਜ਼ਾ ਸਾਡੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਨੂੰ ਬਹੁਤ ਬੁਰੀ ਤਰ੍ਹਾਂ ਭੁਗਤਣਾ ਪਵੇਗਾ। ਉਹ ਸਾਨੂੰ ਕਦੇ ਵੀ ਮੁਆਫ਼ ਨਹੀਂ ਕਰਨਗੀਆਂ। ਸੋ, ਹਾਲੇ ਵੀ ਵੇਲਾ ਹੈ ਕਿ ਅਸੀਂ ਸੰਭਲ ਜਾਈਏ ਅਤੇ ਆਪਣੇ ਚੁਗਿਰਦੇ ਦੀ ਸੰਭਾਲ ਕਰ ਲਈਏ। ਨਹੀਂ ਤਾਂ ਪਛਤਾਵੇ ਤੋਂ ਬਿਨਾਂ ਸਾਡੇ ਕੋਲ ਕੁਝ ਨਹੀਂ ਰਹੇਗਾ।

-ਕੰਵਲਜੀਤ ਸਿੰਘ ਕਾਹਲੋਂ ਅਗਵਾਨ
ਮੋ: 97808-44290.

11-11-2016

 ਚਿੱਟਾ ਧਨ

ਪ੍ਰਧਾਨ ਮੰਤਰੀ ਨੇ 500 ਤੇ 1000 ਰੁਪਏ ਦੇ ਨੋਟ ਬੰਦ ਕਰਕੇ ਇਕ ਸ਼ਲਾਘਾਯੋਗ ਕਦਮ ਚੁੱਕਿਆ ਹੈ। ਇਸ ਨਾਲ ਦੇਸ਼ ਵਿਚ ਚਿੱਟਾ ਧਨ ਜੋ ਸਰਮਾਏਦਾਰਾਂ ਨੇ ਤਿਜੋਰੀਆਂ 'ਚ ਬੰਦ ਕਰਕੇ ਉਸ ਨੂੰ ਕਾਲਾ ਧਨ ਬਣਾਇਆ ਹੋਇਆ ਸੀ, ਉਹ ਬਾਹਰ ਆ ਜਾਵੇਗਾ। ਬੈਂਕਾਂ 'ਚ ਪੈਸੇ ਜਮ੍ਹਾਂ ਕਰਾਉਣ ਵਾਲਿਆਂ ਤੇ ਵੀ ਇਨਕਮ ਟੈਕਸ ਵਿਭਾਗ ਨੂੰ ਨਜ਼ਰ ਰੱਖਣੀ ਚਾਹੀਦੀ ਹੈ ਜਿੰਨ੍ਹਾਂ ਨੇ ਟੈਕਸ ਚੋਰੀ ਕੀਤਾ ਹੈ। ਉਨ੍ਹਾਂ ਤੋਂ ਟੈਕਸ ਵਸੂਲਿਆ ਜਾਵੇ ਅਤੇ ਇਮਾਨਦਾਰ ਕਰ ਦਾਤਾ ਨੂੰ ਰਾਹਤ ਦਿੱਤੀ ਜਾਵੇ। ਸਾਂਝੇ ਸਿਵਲ ਕੋਡ ਅਨੁਸਾਰ ਹੀ ਐਮ.ਐਲ.ਏਜ਼ ਤੇ ਐਮ.ਪੀਆਂ ਨੂੰ ਮਿਲਦੀਆਂ ਸਹੂਲਤਾਂ ਬੰਦ ਕਰਕੇ ਮੁਲਾਜ਼ਮਾਂ ਵਾਂਗ ਤਨਖਾਹਾਂ ਦੇ ਕੇ ਉਨ੍ਹਾਂ ਤੋਂ ਵੀ ਮੁਲਾਜ਼ਮਾਂ ਵਾਂਗ ਹੀ ਇਨਕਮ ਟੈਕਸ ਵਸੂਲਿਆ ਜਾਵੇ। ਜਿਸ ਤਰ੍ਹਾਂ ਸਿਆਸਤਦਾਨਾਂ ਅਤੇ ਭ੍ਰਿਸ਼ਟ ਅਫ਼ਸਰਾਂ ਦੀਆਂ ਜਾਇਦਾਦਾਂ ਕੌੜੀ ਵੇਲ਼ ਵਾਂਗ ਦਿਨ ਰਾਤ ਵੱਧ ਰਹੀਆਂ ਹਨ, ਉਨ੍ਹਾਂ ਨੂੰ ਅਜਿਹਾ ਕਰਕੇ ਹੀ ਠੱਲ੍ਹ ਪੈ ਸਕਦੀ ਹੈ। ਵੱਡੇ ਵੱਡੇ ਅਫਸਰਸ਼ਾਹਾਂ ਅਤੇ ਸਿਆਸਤਦਾਨਾਂ ਦੀਆਂ ਜਾਇਦਾਦਾਂ ਦੀ ਹਰ ਸਾਲ ਪੜਤਾਲ ਹੋਣੀ ਚਾਹੀਦੀ ਹੈ। ਬਾਹਰਲੇ ਦੇਸ਼ਾਂ ਵਾਂਗ ਕੰਮ ਸਭਿਆਚਾਰ ਦੀ ਆਦਤ ਪਾਉਣੀ ਚਾਹੀਦੀ ਹੈ।

-ਸੁਖਮਿੰਦਰ ਬਾਗ਼ੀ
ਆਦਰਸ਼ ਨਗਰ, ਸਮਰਾਲਾ।

ਨੈੱਟ ਛੁਡਾਊ ਕੇਂਦਰ

ਅੱਜ ਤੋਂ ਕੁਝ ਵਰ੍ਹੇ ਪਹਿਲਾਂ ਜਦੋਂ ਮੋਬਾਈਲ ਸਾਡੇ ਹੱਥਾਂ ਵਿਚ ਨਵੇਂ-ਨਵੇਂ ਆਏ ਸਨ ਤਾਂ ਹਰ ਕੋਈ ਇਸ ਦੇ ਗੁਣ ਗਾਉਂਦਾ ਨਹੀਂ ਸੀ ਥੱਕਦਾ। ਇਸ ਨਿੱਕੀ ਜਿਹੀ ਚੀਜ਼ ਦੇ ਜ਼ਰੀਏ ਅਸੀਂ ਆਪਣੇ ਦੂਰ-ਦੁਰਾਡੇ ਬੈਠੇ ਕਿਸੇ ਵੀ ਨਜ਼ਦੀਕੀ ਨਾਲ ਮਿੰਟਾਂ-ਸਕਿੰਟਾਂ ਵਿਚ ਗੱਲਬਾਤ ਕਰ ਸਕਦੇ ਸਾਂ ਜਾਂ ਆਪਣਾ ਕੋਈ ਸੁਨੇਹਾ ਵੀ ਲਿਖ ਕੇ ਭੇਜ ਸਕਦੇ ਹਾਂ। ਪਰ ਅੱਜ ਨੌਜਵਾਨ ਪੀੜ੍ਹੀ ਆਪਣਾ ਬੇਸ਼ਕੀਮਤੀ ਸਮਾਂ ਇਸ ਮੋਬਾਈਲ ਉੱਪਰ ਉਂਗਲਾਂ ਮਾਰਨ ਵਿਚ ਹੀ ਵਿਅਰਥ ਗੁਆਉਂਦੀ ਨਜ਼ਰ ਆ ਰਹੀ ਹੈ। ਸਾਨੂੰ ਇਸ ਦੀ ਦੁਰਵਰਤੋਂ ਬੰਦ ਕਰਕੇ ਇਸ ਦੇ ਸਦਉਪਯੋਗ ਕਰਨ ਵੱਲ ਧਿਆਨ ਦੇਣਾ ਚਾਹੀਦਾ ਹੈ, ਨਹੀਂ ਤਾਂ ਉਹ ਦਿਨ ਦੂਰ ਨਹੀਂ, ਜਦੋਂ ਇਸ ਨੈੱਟ ਰੂਪੀ ਬਿਮਾਰੀ ਤੋਂ ਖਹਿੜਾ ਛੁਡਾਉਣ ਲਈ ਦੇਸ਼ ਵਿਚ ਨਸ਼ਾ ਛੁਡਾਊ ਕੇਂਦਰਾਂ ਵਾਂਗ ਨੈੱਟ ਛੁਡਾਊ ਕੇਂਦਰ ਵੀ ਖੁੱਲ੍ਹਣੇ ਆਮ ਜਿਹੀ ਗੱਲ ਹੋ ਜਾਵੇਗੀ।

-ਰਾਜਾ ਗਿੱਲ (ਚੜਿੱਕ)।

ਇਲਾਹਾਬਾਦ ਹਾਈਕੋਰਟ ਦਾ ਫ਼ੈਸਲਾ ਲਾਗੂ ਹੋਵੇ

ਪਿਛਲੇ ਸਮੇਂ ਦੌਰਾਨ ਇਲਾਹਾਬਾਦ ਹਾਈਕੋਰਟ ਦਾ ਆਇਆ ਫ਼ੈਸਲਾ ਸਿੱਖਿਆ ਦੇ ਖੇਤਰ ਵਿਚ ਨਵੀਂ ਰੂਹ ਫੂਕ ਸਕਦਾ ਹੈ, ਜਿਸ ਅਨੁਸਾਰ ਹਰੇਕ ਸਰਕਾਰੀ ਮੁਲਾਜ਼ਮ ਜੋ ਸਰਕਾਰੀ ਖਜ਼ਾਨੇ ਵਿਚੋਂ ਤਨਖਾਹ ਲੈਂਦਾ ਹੈ, ਉਸ ਨੂੰ ਆਪਣੇ ਬੱਚੇ ਸਰਕਾਰੀ ਸਕੂਲ ਵਿਚ ਹੀ ਪੜ੍ਹਾਉਣੇ ਪੈਣਗੇ। ਪੰਜਾਬ ਵਿਚ ਵੀ ਡਿਗ ਰਹੇ ਸਿੱਖਿਆ ਦੇ ਮਿਆਰ ਨੂੰ ਉੱਪਰ ਚੁੱਕਣ ਲਈ ਇਲਾਹਾਬਾਦ ਹਾਈਕੋਰਟ ਦਾ ਇਹ ਫ਼ੈਸਲਾ ਤੁਰੰਤ ਲਾਗੂ ਕਰਨਾ ਚਾਹੀਦਾ ਹੈ। ਰਾਜ ਦੇ ਨੇਤਾਵਾਂ, ਆਈ.ਏ.ਐਸ. ਅਫਸਰਾਂ ਦੇ ਬੱਚੇ ਜਦੋਂ ਸਰਕਾਰੀ ਸਕੂਲਾਂ ਵਿਚ ਪੜ੍ਹਨਗੇ ਤਾਂ ਸਰਕਾਰੀ ਸਕੂਲਾਂ ਨੂੰ ਵੀ ਪ੍ਰਾਈਵੇਟ ਸਕੂਲਾਂ ਵਾਂਗ ਸਹੂਲਤਾਂ ਮਿਲਣਗੀਆਂ. ਇਸ ਤਰ੍ਹਾਂ ਗ਼ਰੀਬ ਵਰਗ ਦੇ ਬੱਚੇ ਵੀ ਮਿਆਰੀ ਸਿੱਖਿਆ ਪ੍ਰਾਪਤ ਕਰ ਸਕਣਗੇ।

-ਕੇ.ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀ ਖਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

10-11-2016

 ਬਜ਼ੁਰਗਾਂ ਦੀ ਅਹਿਮੀਅਤ

ਅਸੀਂ ਜਾਣਦੇ ਹਾਂ ਕਿ ਬਜ਼ੁਰਗ ਸਾਡਾ ਸਰਮਾਇਆ ਹਨ, ਸਾਡੀ ਦੌਲਤ ਹਨ। ਇਨ੍ਹਾਂ ਨੇ ਸਾਨੂੰ ਜ਼ਿੰਦਗੀ ਜੀਣੀ ਸਿਖਾਈ ਹੁੰਦੀ ਹੈ। ਪਰ ਫਿਰ ਵੀ ਅੱਜ ਇਨ੍ਹਾਂ ਦੀ ਅਹਿਮੀਅਤ ਘਟ ਰਹੀ ਹੈ। ਅੱਜ ਦੇ ਸਮੇਂ ਵਿਚ ਬਹੁਤ ਹੀ ਘੱਟ ਲੋਕ ਹਨ, ਜੋ ਵੱਡੇ ਪਰਿਵਾਰ ਵਿਚ ਰਹਿਣਾ ਪਸੰਦ ਕਰਦੇ ਹਨ ਤੇ ਬਜ਼ੁਰਗਾਂ ਤੋਂ ਸੇਧ ਲੈ ਕੇ ਕੰਮ ਕਰਦੇ ਹਨ, ਜਦ ਕਿ ਬਚਪਨ ਤੋਂ ਲੈ ਕੇ ਜਵਾਨੀ ਤੱਕ ਸਾਡੇ ਬਜ਼ੁਰਗ ਮਾਂ-ਬਾਪ ਨੇ ਹੀ ਸਾਡਾ ਪਾਲਣ-ਪੋਸ਼ਣ ਕੀਤਾ ਹੁੰਦਾ ਹੈ ਤੇ ਸਾਡੀ ਹਰ ਮੁਸੀਬਤ ਆਪ ਝੱਲੀ ਹੁੰਦੀ ਹੈ। ਜਦੋਂ ਅਸੀਂ ਥੋੜ੍ਹੇ ਜਿਹੇ ਵੱਡੇ ਹੋ ਜਾਂਦੇ ਹਾਂ, ਆਪਣੇ ਪਰਿਵਾਰ ਵਸਾ ਲੈਂਦੇ ਹਾਂ ਤਾਂ ਆਪਣੇ ਮਾਂ-ਬਾਪ ਵਿਚ ਹੀ ਵੰਡੀਆਂ ਪਾਉਣੀਆਂ ਸ਼ੁਰੂ ਕਰ ਦਿੰਦੇ ਹਾਂ। ਰੋਟੀ ਤੱਕ ਫੜਾਉਣੀ ਔਖੀ ਲੱਗਣ ਲੱਗ ਪੈਂਦੀ ਹੈ ਅਤੇ ਅਕਸਰ ਲੋਕ ਤਾਂ ਆਪਣੇ ਘਰ ਦੇ ਬਜ਼ੁਰਗਾਂ ਨੂੰ ਗੁਰਦੁਆਰਿਆਂ ਜਾਂ ਆਸ਼ਰਮਾਂ ਵਿਚ ਹੀ ਪਹੁੰਚਾ ਦਿੰਦੇ ਹਨ। ਇਹ ਸਾਡੀ ਬੇਵਕੂਫ਼ੀ ਹੈ। ਕਈ ਵਾਰ ਕੋਈ ਇਕ ਇਨਸਾਨ ਸਾਡੇ ਸਾਹਮਣੇ ਕਿਸੇ ਬਜ਼ੁਰਗ ਦਾ ਅਪਮਾਨ ਕਰਦਾ ਹੈ ਜਾਂ ਸਾਡੇ ਭੈਣ-ਭਰਾ ਵਿਚੋਂ ਹੀ ਮਾਂ-ਬਾਪ ਨੂੰ ਕੁਝ ਗ਼ਲਤ ਬੋਲਦਾ ਹੈ ਤਾਂ ਅਸੀਂ ਚੁੱਪ ਰਹਿੰਦੇ ਹਾਂ। ਇਕ ਸਚਾਈ ਇਹ ਵੀ ਹੈ ਕਿ ਜੋ ਲੋਕ ਆਪਣੇ ਬਜ਼ੁਰਗਾਂ ਤੋਂ ਸੇਧ ਲੈ ਕੇ ਚਲਦੇ ਹਨ, ਉਨ੍ਹਾਂ ਦਾ ਸਤਿਕਾਰ ਕਰਦੇ ਹਨ, ਉਹ ਜ਼ਿੰਦਗੀ ਵਿਚ ਸਫਲ ਰਹਿੰਦੇ ਹਨ। ਸਾਨੂੰ ਆਪਣੇ ਦਾਦਾ-ਦਾਦੀ, ਮਾਂ-ਬਾਪ ਦੀ ਸੰਭਾਲ ਉਸੇ ਤਰ੍ਹਾਂ ਕਰਨੀ ਚਾਹੀਦੀ ਹੈ, ਜਿਸ ਤਰ੍ਹਾਂ ਬਚਪਨ ਵਿਚ ਉਹ ਏਨੇ ਕਸ਼ਟ ਸਹਿਣ ਦੇ ਬਾਅਦ ਵੀ ਸਾਡਾ ਪਾਲਣ-ਪੋਸ਼ਣ ਕਰਦੇ ਸਨ।

-ਨਵਲੀਨ ਕੌਰ
ਜਰਨਲਿਜ਼ਮ ਵਿਭਾਗ, ਗੁਰੂ ਨਾਨਕ ਕਾਲਜ ਫਾਰ ਗਰਲਜ਼, ਸ੍ਰੀ ਮੁਕਤਸਰ ਸਾਹਿਬ।

ਹੱਕਾਂ ਤੋਂ ਵਿਰਵੇ

ਦੇਸ਼ ਨੂੰ ਆਜ਼ਾਦ ਹੋਇਆਂ 70 ਸਾਲ ਹੋਣ ਜਾ ਰਹੇ ਹਨ। ਪਰ ਦੇਸ਼ ਦੇ ਕਰੋੜਾਂ ਲੋਕ ਅੱਜ ਵੀ ਆਜ਼ਾਦੀ ਦੇ ਮੁਢਲੇ ਹੱਕਾਂ ਤੋਂ ਵਿਰਵੇ ਹਨ। ਦੇਸ਼ ਦੇ ਹੁਕਮਰਾਨਾਂ ਨੂੰ ਚਾਹੀਦਾ ਹੈ ਕਿ ਉਹ ਹੁਣ ਆਮ ਲੋਕਾਂ ਨੂੰ ਫੋਕੇ ਲਾਰੇ, ਵਾਅਦੇ, ਭਰੋਸੇ ਜਾਂ ਦਿਲਾਸਿਆਂ ਦੀ ਪੁਰਾਣੀ ਰੱਟ ਤੱਕ ਹੀ ਸੀਮਤ ਨਾ ਰੱਖਣ। ਹੁਣ ਸਮਾਂ ਹੈ ਲੋਕ ਹਿਤ ਵਿਚ ਫ਼ੈਸਲੇ ਲੈਣ ਦਾ। ਦੇਸ਼ ਦੀ ਆਮ ਜਨਤਾ ਦੀ ਬਾਂਹ ਫੜਨ ਦਾ। ਉਨ੍ਹਾਂ ਦੇ ਦੁੱਖਾਂ-ਦਰਦਾਂ ਨੂੰ ਸਮਝਣ ਦਾ। ਰੁਜ਼ਗਾਰ ਦੇ ਨਵੇਂ-ਨਵੇਂ ਵਸੀਲੇ ਪੈਦਾ ਕਰਨ ਦਾ ਅਤੇ ਪ੍ਰਭਾਵੀ ਤੇ ਉਸਾਰੂ ਨੀਤੀਆਂ ਉਲੀਕਣ ਦਾ, ਜਿਸ ਨਾਲ ਲੋਕਾਂ ਦਾ ਜੀਵਨ ਪੱਧਰ ਉੱਚਾ ਹੁੰਦਾ ਹੋਵੇ। ਪਿਛਲੇ 69 ਸਾਲਾਂ ਤੋਂ ਲੋਕ ਚੰਗੇ ਭਵਿੱਖ ਦੀ ਆਸ ਨਾਲ ਹਰ ਪੰਜ ਸਾਲਾਂ ਬਾਅਦ ਸਰਕਾਰਾਂ ਬਦਲਦੇ ਆ ਰਹੇ ਹਨ ਪਰ ਬਦਲਿਆ ਬਹੁਤਾ ਕੁਝ ਨਹੀਂ। ਜੇ ਬਦਲਿਆ ਹੈ ਤਾਂ ਸਿਰਫ ਚਿਹਰੇ ਬਦਲਦੇ ਆ ਰਹੇ ਹਨ। ਨੀਤੀਆਂ ਸਭ ਉਹੀ ਹਨ। ਦੇਸ਼ ਦੀ ਆਜ਼ਾਦੀ ਲਈ ਕੁਰਬਾਨੀਆਂ ਹਰ ਵਰਗ, ਧਰਮ, ਜਾਤ ਦੇ ਲੋਕਾਂ ਨੇ ਦਿੱਤੀਆਂ। ਪਰ ਆਜ਼ਾਦੀ ਦਾ ਨਿੱਘ ਸ਼ੁਰੂ ਤੋਂ ਹੀ ਇਕ ਖ਼ਾਸ ਵਰਗ ਮਾਣਦਾ ਆ ਰਿਹਾ ਹੈ। ਦੇਸ਼ ਦੀ ਜਨਤਾ ਆਪਣੇ ਹੱਕ ਮੰਗ ਰਹੀ ਹੈ। ਹੱਕ ਮੰਗਣਾ ਜਨਤਾ ਦਾ ਅਧਿਕਾਰ ਹੈ। ਅੱਜ ਜਨਤਾ ਨੂੰ ਉਸ ਦੇ ਹੱਕਾਂ ਤੋਂ ਵਿਰਵੇ ਰੱਖਣਾ, ਉਸ ਨਾਲ ਘੋਰ ਬੇਇਨਸਾਫ਼ੀ ਹੈ। ਜਨਤਾ ਦੀ ਬਿਹਤਰੀ ਲਈ ਸਰਕਾਰਾਂ ਆਪਣੇ ਫ਼ਰਜ਼ਾਂ ਨੂੰ ਸਮਝਣ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

7-11-2016

 ਨਸ਼ਿਆਂ ਦੀ ਦਲਦਲ

ਅੱਜ ਦੀ ਮਹਿੰਗਾਈ ਵਿਚ ਨਸ਼ਾ ਤਾਂ ਰੋਟੀ ਦਾ ਪੂਰਾ ਹੋਈ ਜਾਵੇ, ਉਹ ਬਹੁਤ ਵੱਡੀ ਗੱਲ ਹੈ। ਪਰ ਨੌਜਵਾਨ ਪੀੜ੍ਹੀ ਨਸ਼ਿਆਂ ਦੀ ਦਲਦਲ ਵਿਚ ਬੁਰੀ ਤਰ੍ਹਾਂ ਫਸੀ ਜਾਪਦੀ ਹੈ। ਪਿੱਛੇ ਜਿਹੇ ਸਰਕਾਰ ਨੇ ਇਸ ਪ੍ਰਤੀ ਸਖ਼ਤ ਰੁਖ਼ ਅਪਣਾਇਆ ਸੀ ਅਤੇ ਨਸ਼ਾ ਛੁਡਾਊ ਕੇਂਦਰਾਂ ਵਿਚ ਲੱਗੀਆਂ ਕਤਾਰਾਂ ਇਸ ਗੱਲ ਦੀ ਗਵਾਹੀ ਭਰਦੀਆਂ ਸਨ ਕਿ ਅੱਜ ਦਾ ਨੌਜਵਾਨ ਕਿਧਰਲੇ ਪਾਸੇ ਵੱਲ ਤੁਰਿਆ ਜਾ ਰਿਹਾ ਹੈ। ਕਿਉਂਕਿ ਅੱਜ ਦਾ ਨੌਜਵਾਨ ਕੱਲ੍ਹ ਨੂੰ ਸਾਡੇ ਦੇਸ਼ ਦਾ ਭਵਿੱਖ ਹੈ ਅਤੇ ਸਰਕਾਰ ਨੂੰ ਨਸ਼ਿਆਂ ਪ੍ਰਤੀ ਹਮੇਸ਼ਾ ਸੁਹਿਰਦਤਾ ਨਾਲ ਫ਼ੈਸਲਾ ਲੈਣਾ ਚਾਹੀਦਾ ਹੈ। ਚਾਹੀਦਾ ਤਾਂ ਇਹ ਹੈ ਕਿ ਸਾਡਾ ਨੌਜਵਾਨ ਵਰਗ ਹੀ ਨਸ਼ਿਆਂ ਤੋਂ ਹਮੇਸ਼ਾ ਲਈ ਕਿਨਾਰਾ ਕਰੇ ਤਾਂ ਜੋ ਸਾਡੇ ਦੇਸ਼ ਦਾ ਨਾਂਅ ਵਧੀਆ ਰੌਸ਼ਨ ਹੋ ਸਕੇ। ਸੋ, ਮੇਰੀ ਅੱਜ ਦੇ ਨੌਜਵਾਨ ਵਰਗ ਨੂੰ ਹੱਥ ਜੋੜ ਕੇ ਅਪੀਲ ਹੈ ਕਿ ਆਉ, ਆਪਾਂ ਸਾਰੇ ਰਲ ਕੇ ਨਸ਼ਿਆਂ ਦੀ ਬਿਮਾਰੀ ਨੂੰ ਜੜ੍ਹੋਂ ਖ਼ਤਮ ਕਰੀਏ ਤਾਂ ਜੋ ਬਾਹਰਲੇ ਦੇਸ਼ ਨਸ਼ਿਆਂ ਪ੍ਰਤੀ ਸਾਡੇ ਦੇਸ਼ ਦਾ ਸ਼ੋਸ਼ਣ ਨਾ ਕਰਨ।

-ਕੇਵਲ ਸਿੰਘ ਬਾਠਾਂ
ਮੋ: 98557-44211


ਪੰਜਾਬੀ ਸੂਬੇ ਦੀ 50ਵੀਂ ਵਰ੍ਹੇਗੰਢ

ਪੰਜਾਬੀ ਸੂਬੇ ਦੀ 50ਵੀਂ ਵਰ੍ਹੇਗੰਢ ਪੰਜਾਬ ਸਰਕਾਰ ਵੱਲੋਂ ਧੂਮ ਧੜੱਕੇ ਨਾਲ ਮਨਾਈ ਗਈ। 'ਅਜੀਤ' ਵਿਚ ਪੰਜਾਬੀ ਸੂਬੇ ਬਾਰੇ ਲੇਖ ਪੜ੍ਹਿਆ। ਇਸ ਲੇਖ ਵਿਚੋਂ ਭਰਪੂਰ ਜਾਣਕਾਰੀ ਹਾਸਲ ਹੋਈ। ਇਸ ਲੇਖ ਵਿਚ ਪੰਜਾਬੀ ਸੂਬੇ ਦੇ ਲਈ ਲੰਮਾ ਸੰਘਰਸ਼ ਕਰਨ ਵਾਲੇ ਮਾਸਟਰ ਤਾਰਾ ਸਿੰਘ, ਗਿਆਨੀ ਕਰਤਾਰ ਸਿੰਘ, ਸ: ਹਾਕਮ ਸਿੰਘ, ਸੰਤ ਫ਼ਤਹਿ ਸਿੰਘ, ਸ: ਪ੍ਰਕਾਸ਼ ਸਿੰਘ ਬਾਦਲ ਅਤੇ ਗੁਰਚਰਨ ਸਿੰਘ ਟੌਹੜਾ, ਸ਼ਹੀਦ ਦਰਸ਼ਨ ਸਿੰਘ ਫੇਰੂਮਾਨ ਆਦਿ ਯੋਧੇ ਹੋਏ ਹਨ। ਪਰ ਹਮੇਸ਼ਾ ਕਾਂਗਰਸ ਸਰਕਾਰ ਨੇ ਪੰਜਾਬ ਨਾਲ ਧੋਖਾ ਕੀਤਾ। ਇਸ ਲੇਖ ਵਿਚ ਪੰਡਿਤ ਜਵਾਹਰ ਲਾਲ ਨਹਿਰੂ ਦੀ ਸੋਚ ਪੰਜਾਬ ਬਾਰੇ ਠੀਕ ਨਹੀਂ ਪੜ੍ਹਨ ਨੂੰ ਮਿਲੀ। ਕਾਂਗਰਸ ਸਰਕਾਰ ਨੇ ਪੰਜਾਬ ਨੂੰ ਆਪਣੇ ਰਾਜ ਵਿਚ ਪੰਜਾਬੀ ਬੋਲਦੇ ਇਲਾਕੇ ਨਹੀਂ ਦਿੱਤੇ। ਹੁਣ ਜੇਕਰ ਕੇਂਦਰ ਵਿਚ ਭਾਜਪਾ ਸਰਕਾਰ ਦਾ ਰਾਜ ਹੈ ਤੇ ਸ਼੍ਰੋਮਣੀ ਅਕਾਲੀ ਦਲ ਨਾਲ ਪੰਜਾਬ ਵਿਚ ਭਾਈਵਾਲੀ ਦੀ ਸਰਕਾਰ ਹੈ। ਪੰਜਾਬ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਹੁਰਾਂ ਨੂੰ ਚਾਹੀਦਾ ਸੀ ਕਿ 50ਵੀਂ ਵਰ੍ਹੇਗੰਢ ਦੇ ਮੌਕੇ ਕੇਂਦਰ ਸਰਕਾਰ ਪਾਸੋਂ ਪੰਜਾਬ ਦੇ ਲਈ ਵੱਖਰੀ ਰਾਜਧਾਨੀ ਦੀ ਮੰਗ ਰੱਖਦੇ ਪਰ ਅਕਾਲੀ ਭਾਜਪਾ ਸਰਕਾਰ ਦੇ ਮੰਤਰੀਆਂ ਨੇ ਆਪਣੇ ਕੰਮਾਂ ਦੀ ਸ਼ਲਾਘਾ ਕੀਤੀ। ਅਫਸੋਸ ਨਾਲ ਲਿਖਣਾ ਪੈ ਰਿਹਾ ਕਿ ਪੰਜਾਬ ਨੂੰ ਆਪਣੀ ਰਾਜਧਾਨੀ ਕਦੋਂ ਮਿਲੇਗੀ? ਜਦੋਂ ਚੋਣਾਂ ਸਿਰ 'ਤੇ ਆ ਜਾਂਦੀਆਂ ਹਨ ਤਾਂ ਹਰ ਪਾਰਟੀ ਦਾ ਪ੍ਰਚਾਰ ਜ਼ਰੂਰ ਹੁੰਦਾ ਹੈ ਕਿ ਚੰਡੀਗੜ੍ਹ ਪੰਜਾਬ ਨੂੰ ਦਿੱਤਾ ਜਾਵੇ। ਹੁਣ 50ਵੀਂ ਵਰ੍ਹੇਗੰਢ 'ਤੇ ਸ਼੍ਰੋਮਣੀ ਅਕਾਲੀ ਦਲ (ਬ) ਪਾਰਟੀ ਕਿਉ ਚੁੱਪ ਰਹੀ?

-ਮਾ: ਜਗੀਰ ਸਿੰਘ ਸਠਿਆਲਾ।

ਮੁਕਾਬਲੇਬਾਜ਼ੀ

ਅੱਜ ਦੇ ਯੁੱਗ ਨੂੰ ਜੇ ਮੁਕਾਬਲੇ ਦਾ ਯੁੱਗ ਕਿਹਾ ਜਾਵੇ ਤਾਂ ਕੋਈ ਅਤਿਕਥਨੀ ਨਹੀਂ ਹੋਵੇਗੀ। ਇਸ ਵਿਗਿਆਨਕ ਯੁੱਗ ਵਿਚ ਕੋਈ ਵੀ ਆਪਣੇ-ਆਪ ਨੂੰ ਕਿਸੇ ਤੋਂ ਘੱਟ ਨਹੀਂ ਕਹਾਉਣਾ ਚਾਹੁੰਦਾ। ਹਰੇਕ ਦੇ ਮਨ ਵਿਚ ਇਹੀ ਇੱਛਾ ਹੁੰਦੀ ਹੈ ਕਿ ਕਿਸੇ ਤਰ੍ਹਾਂ ਆਪਣੇ-ਆਪ ਨੂੰ ਸਰਵ-ਸ੍ਰੇਸ਼ਠ ਸਿੱਧ ਕੀਤਾ ਜਾਵੇ। ਫਿਰ ਚਾਹੇ ਉਹ ਵਿਦਿਅਕ ਖੇਤਰ ਹੋਵੇ ਜਾਂ ਸਾਡੀ ਆਮ ਵਿਹਾਰਕ ਜ਼ਿੰਦਗੀ। ਮੁਕਾਬਲੇ ਦੀ ਹਰ ਜਗ੍ਹਾ 'ਤੇ ਹਰ ਖੇਤਰ ਵਿਚ ਇਕ ਅਹਿਮ ਥਾਂ ਵੀ ਹੈ ਅਤੇ ਲੋੜ ਵੀ। ਪਰ ਸਾਨੂੰ ਅਕਸਰ ਹੀ ਇਹ ਪਤਾ ਨਹੀਂ ਲਗਦਾ ਕਿ ਇਹ ਮੁਕਾਬਲੇ ਕਦੋਂ ਸਾਡੇ ਮਨ ਵਿਚ ਦੂਸਰਿਆਂ ਪ੍ਰਤੀ ਈਰਖਾ ਦੇ ਰੂਪ ਵਿਚ ਪਰਿਵਰਤਿਤ ਹੋ ਜਾਂਦੇ ਹਨ ਅਤੇ ਅਸੀਂ ਆਪਣਿਆਂ ਨਾਲ ਹੀ ਵੱਡੀਆਂ-ਵੱਡੀਆਂ ਦੁਸ਼ਮਣੀਆਂ ਪਾਲ ਬੈਠਦੇ ਹਾਂ। ਮੁਕਾਬਲੇ ਦਾ ਅਸਲ ਵਿਚ ਅਰਥ ਇਹ ਹੁੰਦਾ ਹੈ ਕਿ ਆਪਣੀਆਂ ਕਮੀਆਂ ਨੂੰ ਦੂਰ ਕਰਕੇ ਆਪਣੇ-ਆਪ ਨੂੰ ਪ੍ਰਪੱਕ ਬਣਾਉਣਾ ਅਤੇ ਆਪਣੀ ਜ਼ਿੰਦਗੀ ਦੇ ਮਕਸਦ ਨੂੰ ਪ੍ਰਾਪਤ ਕਰਨਾ ਪਰ ਅਸੀਂ ਅੱਜ ਇਸ ਸਾਕਾਰਾਤਮਿਕ ਅਰਥ ਨੂੰ ਭੁੱਲ ਕੇ ਮੁਕਾਬਲੇ ਦਾ ਨਾਕਾਰਾਤਮਿਕ ਰਵੱਈਆ ਅਪਣਾਉਂਦੇ ਜਾ ਰਹੇ ਹਾਂ ਜੋ ਕਿ ਸਾਨੂੰ ਸਿਵਾਏ ਦੁੱਖ ਤੋਂ ਹੋਰ ਕੁਝ ਵੀ ਨਹੀਂ ਦੇਵੇਗਾ। ਸੋ, ਸਾਨੂੰ ਦੂਜਿਆਂ ਨਾਲ ਨਫ਼ਰਤ ਕਰਨੀ ਛੱਡ ਕੇ ਆਪਣੀਆਂ ਕਮੀਆਂ 'ਤੇ ਜਿੱਤ ਹਾਸਲ ਕਰਨੀ ਚਾਹੀਦੀ ਹੈ ਤਾਂ ਕਿ ਸਾਡਾ ਜੀਵਨ ਪੱਧਰ ਉੱਚਾ ਤੇ ਖੁਸ਼ਹਾਲ ਹੋ ਸਕੇ।

-ਤਾਨੀਆ
ਗੁਰੂ ਨਾਨਕ ਕਾਲਜ ਫਾਰ ਗਰਲਜ਼, ਜਰਨਲਿਜ਼ਮ ਵਿਭਾਗ।

6-11-2016

 'ਪੇਡ ਨਿਊਜ਼'

ਦੇਸ਼ ਵਿਚ ਸਮੇਂ-ਸਮੇਂ 'ਤੇ ਹੋਈਆਂ ਵੱਖ-ਵੱਖ ਚੋਣਾਂ ਮੌਕੇ 'ਪੇਡ ਨਿਊਜ਼' ਸਬੰਧੀ ਅਕਸਰ ਕਿੰਤੂ-ਪ੍ਰੰਤੂ ਸੁਣਨ ਨੂੰ ਮਿਲਦਾ ਰਿਹਾ ਹੈ। ਭਾਵੇਂ ਮੀਡੀਏ ਦੇ ਬਹੁਤੇ ਹਿੱਸੇ ਦਾ ਪੇਡ ਨਿਊਜ਼ ਨਾਲ ਕੋਈ ਸਬੰਧ ਨਹੀਂ ਹੈ ਪਰ ਪੇਡ ਨਿਊਜ਼ ਨੇ ਲੋਕਤੰਤਰ ਦੇ ਚੌਥੇ ਥੰਮ ਮੀਡੀਏ ਦੇ ਵਕਾਰ ਨੂੰ ਢਾਅ ਜ਼ਰੂਰ ਲਾਈ ਹੈ। ਪਿਛਲੇ ਸਮੇਂ ਵਿਚ ਹੋਈਆਂ ਵੱਖ-ਵੱਖ ਚੋਣਾਂ ਮੌਕੇ ਪੇਡ ਨਿਊਜ਼ ਸਬੰਧੀ ਸ਼ਿਕਾਇਤਾਂ ਚੋਣ ਕਮਿਸ਼ਨ ਕੋਲ ਜਾਂਦੀਆਂ ਰਹੀਆਂ ਹਨ। ਪਰ ਇਨ੍ਹਾਂ ਸ਼ਿਕਾਇਤਾਂ 'ਤੇ ਕਾਰਵਾਈ ਹੋਈ ਜਾਂ ਨਹੀਂ, ਇਹ ਸਭ ਦੇਸ਼ ਦਾ ਚੋਣ ਕਮਿਸ਼ਨ ਜਾਣਦਾ ਹੈ। ਪੇਡ ਨਿਊਜ਼ ਦੀ ਬਿਮਾਰੀ ਲੋਕਤੰਤਰੀ ਵਿਵਸਥਾ ਨੂੰ ਘੁਣ ਵਾਂਗ ਚਿੰਬੜਦੀ ਜਾ ਰਹੀ ਹੈ, ਜੋ ਜਨਤਾ ਨੂੰ ਖ਼ਾਸ ਕਰਕੇ ਵੋਟਰ ਨੂੰ ਗੁੰਮਰਾਹ ਕਰਨ 'ਚ ਕੋਈ ਕਸਰ ਨਹੀਂ ਛੱਡ ਰਹੀ। ਪੰਜਾਬ ਵਿਚ ਵਿਧਾਨ ਸਭਾ ਚੋਣਾਂ ਨੇੜੇ ਆ ਰਹੀਆਂ ਹਨ, ਜਿਥੇ ਪੇਡ ਨਿਊਜ਼ ਦੇ ਖ਼ਦਸ਼ੇ ਪ੍ਰਗਟਾਏ ਜਾ ਰਹੇ ਹਨ, ਇਸ ਦੇ ਨਾਲ ਹੀ ਇਨਸਾਫ਼ ਪਸੰਦ ਪੰਜਾਬੀਆਂ ਨੂੰ ਖ਼ਦਸ਼ਾ ਇਹ ਵੀ ਹੈ ਕਿ ਚੋਣਾਂ ਮੌਕੇ ਵੱਡੀ ਪੱਧਰ 'ਤੇ ਧੱਕੇਸ਼ਾਹੀ ਹੋ ਸਕਦੀ ਹੈ। ਇਸ ਲਈ ਜ਼ਰੂਰੀ ਹੈ ਕਿ ਚੋਣ ਕਮਿਸ਼ਨ ਆਪਣੇ ਹਿੱਸੇ ਆਉਂਦੀ ਜ਼ਿੰਮੇਵਾਰੀ ਨੂੰ ਪੂਰੀ ਗੰਭੀਰਤਾ ਨਾਲ ਨਿਭਾਵੇ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

ਸਵਾਰਥ ਦਾ ਰਾਗ

ਹੋਰ ਹੋਰ ਦੀ ਭੁੱਖ ਨੂੰ ਕਹਿੰਦੇ ਲਾਲਚ ਆਖਦੇ ਨੇ, ਪਦਾਰਥਵਾਦ ਦੇ ਇਸ ਯੁੱਗ ਵਿਚ ਮਨੁੱਖ ਏਨਾ ਖ਼ੁਦਗਰਜ਼ ਹੋ ਗਿਆ ਹੈ, ਆਪਣੇ ਨਿੱਜੀ ਮੰਤਵ ਦੀ ਪੂਰਤੀ ਲਈ ਹਰ ਗਲੀਜ਼ ਧੰਦਾ ਕਰਨ ਲਈ ਤਿਆਰ ਹੈ। ਮਾਇਆ ਦੇ ਅੰਬਾਰ ਇਕੱਠੇ ਕਰਨ ਦੀ ਦੌੜ 'ਚ ਅੱਜ ਇਨਸਾਨ ਆਪਣਿਆਂ ਤੋਂ ਹੀ ਤੋਤੇ ਵਾਂਗ ਅੱਖ ਬਦਲਣ ਲੱਗ ਪਿਆ। ਅੱਜ ਹਰ ਕੋਈ ਆਪਣੇ ਤੋਂ ਛੋਟੇ ਇਨਸਾਨ ਨਾਲ ਦੋ ਲਫ਼ਜ਼ ਸਾਂਝੇ ਕਰਨ ਨੂੰ ਵੀ ਆਪਣਾ ਟਾਈਮ ਵੇਸਟ ਸਮਝਦਾ ਹੈ ਕਿਉਂਕਿ ਉਸ ਕੋਲ ਦੁਨਿਆਵੀ ਧਨ ਨਹੀਂ ਜਦ ਕਿ ਸਾਡਾ ਇਥੋਂ ਜਾਣ ਦਾ ਰਸਤਾ ਇਕ ਹੈ। ਅਸਲ ਇਨਸਾਨ ਉਹ ਹੈ ਜੋ ਆਪਣੇ ਕੋਲ ਬੈਠੇ ਇਨਸਾਨ ਨੂੰ ਛੋਟਾ ਮਹਿਸੂਸ ਨਾ ਹੋਣ ਦੇਵੇ, ਉਸ ਦੇ ਪਰਦੇ ਕੱਜੇ ਪਰ ਅੱਜ ਉਲਟ ਹੈ। ਹਰ ਇਨਸਾਨ ਨੂੰ ਕੁਦਰਤ ਨੇ ਬਰਾਬਰ ਬਣਾਇਆ ਹੈ ਫਿਰ ਇਥੇ ਵਖਰੇਵਾਂ ਕਿਉਂ? ਅਸੀਂ ਦੂਸਰਿਆਂ ਦੀ ਮਨੋਬਿਰਤੀ ਨੂੰ ਸਮਝਣ ਦੀ ਕੋਸ਼ਿਸ਼ ਨਹੀਂ ਕਰਦੇ, ਬਲਕਿ ਆਪਣੇ ਸਵਾਰਥ ਦਾ ਰਾਗ ਅਲਾਪਦੇ ਰਹਿੰਦੇ ਹਾਂ। ਕਿੰਨਾ ਚੰਗਾ ਹੋਵੇ ਜੇ ਅਸੀਂ ਇਥੇ ਸਭ ਦੇ ਦੁੱਖ-ਦਰਦ ਤਕਲੀਫ਼ਾਂ ਨੂੰ ਸਮਝਣ ਦੀ ਸੋਝੀ ਰੱਖ ਉਨ੍ਹਾਂ ਨੂੰ ਵੰਡਾਉਣ ਦਾ ਯਤਨ ਕਰੀਏ ਤਾਂ ਇਨਸਾਨੀਅਤ ਦਾ ਪਹਿਲਾ ਸਬਕ ਸਿੱਖਿਆ ਜਾ ਸਕਦਾ ਹੈ, ਕਿਉਂਕਿ ਜ਼ਿੰਦਗੀ ਦੀ ਕਿਤਾਬ ਦੁੱਖਾਂ-ਸੁੱਖਾਂ ਦਾ ਸੰਗਮ ਹੈ। ਤੋਤਾਚਸ਼ਮ ਦਾ ਅਰਥ ਹੈ ਤੋਤੇ ਵਾਂਗ ਅੱਖ ਬਦਲਣ ਵਾਲਾ, ਸਵਾਰਥੀ ਮਨੁੱਖ ਆਓ! ਫਿਰ ਸਵੈ-ਪੜਚੋਲ ਕਰੀਏ ਕਿਤੇ ਅਸੀਂ ਆਪਣੇ ਹਿਤ ਖਾਤਰ ਦੂਜਿਆਂ ਦਾ ਨੁਕਸਾਨ ਤਾਂ ਨਹੀਂ ਕਰ ਰਹੇ, ਸਵਾਰਥ ਨੂੰ ਪਾਸੇ ਰੱਖ ਸਮੁੱਚੀ ਕਾਇਨਾਤ ਨਾਲ ਸਾਂਝ ਗੱਠਣ ਦੀ ਕੋਸ਼ਿਸ਼ ਕਰੋ, ਇਹੀ ਇਨਸਾਨੀਅਤ ਦਾ ਅਸੂਲ ਹੈ।

-ਜਸਬੀਰ ਦੱਧਾਹੂਰ
ਪਿੰਡ ਤੇ ਡਾਕ: ਦੱਧਾਹੂਰ, ਤਹਿ: ਰਾਏਕੋਟ, ਜ਼ਿਲ੍ਹਾ ਲੁਧਿਆਣਾ।

5-11-2016

 ਸਾਵਧਾਨ! ਚੀਨੀ ਮਾਲ ਤੋਂ

ਇਹ ਹੈਰਾਨੀਜਨਕ ਵਰਤਾਰਾ ਹੈ ਕਿ ਚੀਨ ਹਮੇਸ਼ਾ ਭਾਰਤ ਨਾਲ ਲਗਦੀ ਆਪਣੀ ਅੰਤਰਰਾਸ਼ਟਰੀ ਸੀਮਾ ਉੱਪਰ ਦਬਾਅ ਰੱਖਦਾ ਹੈ ਅਤੇ ਸਾਡੇ ਘਰੇਲੂ ਬਾਜ਼ਾਰ ਉੱਪਰ ਵੀ ਕਬਜ਼ਾ ਜਮਾਈ ਬੈਠਾ ਹੈ। ਉਹ ਘਟੀਆ ਤੋਂ ਘਟੀਆ ਸਮਾਨ ਭਾਰਤ ਵਿਚ ਵੇਚ ਰਿਹਾ ਹੈ। ਭਾਰਤੀ ਬਾਜ਼ਾਰ ਉਸ ਲਈ ਦੁਨੀਆ ਦੀ ਸਭ ਤੋਂ ਵੱਡੀ ਮੰਡੀ ਹੈ, ਜਿਥੇ ਸਭ ਕੁਝ ਆਸਾਨੀ ਨਾਲ ਵਿਕ ਜਾਂਦਾ ਹੈ। ਇਹ ਵੀ ਕੋਰੀ ਸਚਾਈ ਹੈ ਕਿ ਉਸ ਨੂੰ ਆਪਣੀ ਵਿਸ਼ਾਲ ਫ਼ੌਜ ਦਾ ਖਰਚ ਚਲਾਉਣ ਲਈ ਇਹ ਸਭ ਕੁਝ ਕਰਨਾ ਪੈਂਦਾ ਹੈ, ਵਰਨਾ ਉਸ ਦੀ ਹਾਲਤ ਵੀ ਸੋਵੀਅਤ ਸੰਘ (ਰੂਸ ਗਣਰਾਜ) ਵਰਗੀ ਹੋ ਸਕਦੀ ਹੈ। ਇਹ ਬੇਹੱਦ ਗੰਭੀਰ ਮਸਲਾ ਹੈ ਕਿ ਭਾਰਤੀ ਬਾਜ਼ਾਰਾਂ ਵਿਚ ਵਿਕ ਰਹੀ ਚਾਈਨਾ ਡੋਰ ਨੇ ਕਈ ਕੀਮਤੀ ਜਾਨਾਂ ਲਈਆਂ ਹਨ। ਚੀਨ ਪਾਕਿਸਤਾਨ ਵਿਚਲੇ ਅੱਤਵਾਦੀਆਂ ਨੂੰ ਸ਼ਹਿ ਵੀ ਦੇ ਰਿਹਾ ਹੈ। ਯੂ.ਐਨ.ਓ. ਵਿਚ ਉਨ੍ਹਾਂ ਨੂੰ ਬਚਾਉਣ ਦੀ ਪੈਰਵਾਈ ਵੀ ਕਰ ਰਿਹਾ ਹੈ। ਇਸ ਵਰਤਾਰੇ ਨੂੰ ਰੋਕਣ ਲਈ ਹਰ ਭਾਰਤੀ ਨਾਗਰਿਕ ਦਾ ਇਹ ਮੁਢਲਾ ਫਰਜ਼ ਬਣਦਾ ਹੈ ਕਿ ਉਹ ਚੀਨ ਦੀ ਬਣੀ ਹਰ ਚੀਜ਼ ਦਾ ਬਾਈਕਾਟ ਕਰੇ।

-ਕੇ.ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀਖਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

ਅਦਲੇ ਦਾ ਬਦਲਾ ਦੀ ਨੀਤੀ

ਅੱਜ ਲੋਕਤੰਤਰੀ ਰਾਜ ਵਿਚ ਸਾਰੀਆਂ ਪਾਰਟੀਆਂ ਆਪਣੀ ਸੱਤਾ ਕਾਇਮ ਕਰਨ ਵਿਚ ਲੱਗੀਆਂ ਹੋਈਆਂ ਹਨ। ਕੋਈ ਸਮਾਂ ਸੀ, ਜਦੋਂ ਭਾਰਤ ਆਜ਼ਾਦ ਹੋਇਆ ਤਾਂ ਕੇਵਲ ਕਾਂਗਰਸ ਪਾਰਟੀ ਹੀ ਸਥਾਪਿਤ ਹੋਈ ਪਰ ਅੱਜ ਦੇ ਦੌਰ ਵਿਚ ਅਨੇਕਾਂ ਹੀ ਪਾਰਟੀਆਂ ਆਪਣਾ ਰਾਜ ਸਥਾਪਿਤ ਕਰਨ ਦਾ ਯਤਨ ਕਰ ਰਹੀਆਂ ਹਨ। ਉਹ ਲੋਕਾਂ ਤੋਂ ਵੱਧ ਤੋਂ ਵੱਧ ਵੋਟਾਂ ਲੈਣ ਲਈ ਸਾਰੇ ਗ਼ੈਰ-ਕਾਨੂੰਨੀ ਢੰਗ ਅਪਣਾ ਰਹੀਆਂ ਹਨ। ਇਸ ਨੂੰ ਅਸੀਂ ਅਦਲੇ ਦਾ ਬਦਲਾ ਕਹਿ ਸਕਦੇ ਹਾਂ, ਜਿਸ ਤਰ੍ਹਾਂ ਲੋਕ ਆਪਣੇ ਨਾਲ ਹੋਏ ਕਿਸੇ ਨੂੰ ਬਦਸਲੂਕੀ ਵਾਲੇ ਵਿਵਹਾਰ ਦਾ ਅੱਗੋਂ ਬਦਲਾ ਲੈਣ ਲਈ ਕੋਈ ਨੀਤੀ ਨਹੀਂ ਛੱਡਦੇ। ਉਸ ਤਰ੍ਹਾਂ ਹੀ ਹਰੇਕ ਪਾਰਟੀ ਵੱਧ ਤੋਂ ਵੱਧ ਵੋਟਾਂ ਲੈਣ ਲਈ ਗਰੀਬਾਂ, ਬੇਰੁਜ਼ਗਾਰਾਂ ਅਤੇ ਕਿਸਾਨਾਂ ਦਾ ਸਹਾਰਾ ਲੈ ਰਹੀ ਹੈ ਉਹ ਉਨ੍ਹਾਂ ਤੋਂ ਵੋਟ ਤਾਂ ਲੈ ਲੈਂਦੀ ਹੈ ਪਰ ਉਸ ਦਾ ਬਦਲਾ ਉਦੋਂ ਲੈਂਦੀ ਹੈ, ਜਦੋਂ ਉਨ੍ਹਾਂ ਦੀ ਸਰਕਾਰ ਬਣਦੀ ਹੈ। ਚਾਹੇ ਕੋਈ ਵੀ ਪਾਰਟੀ ਸੱਤਾ ਵਿਚ ਆ ਜਾਵੇ, ਉਹ ਉਹੀ ਕੰਮ ਕਰੂ, ਜਿਸ ਨਾਲ ਉਸ ਨੂੰ ਫਾਇਦਾ ਹੋਵੇ ਨਾ ਕਿ ਕਿਸਾਨਾਂ, ਗ਼ਰੀਬਾਂ ਅਤੇ ਬੇਰੁਜ਼ਗਾਰਾਂ ਨੂੰ। ਇਸ ਕਰਕੇ ਸਾਨੂੰ ਸੰਸਦੀ ਪਾਰਟੀਆਂ ਦੇ ਇਨ੍ਹਾਂ ਚਾਪਲੂਸਾਂ ਤੋਂ ਬਚ ਕੇ ਆਪਣੇ ਦਿਮਾਗ ਦੀ ਵਰਤੋਂ ਕਰਨੀ ਚਾਹੀਦੀ ਹੈ। ਇਸ ਅਗਲੇ ਦੇ ਬਦਲੇ ਦੀ ਨੀਤੀ ਤੋਂ ਆਪਣੇ-ਆਪ ਨੂੰ ਮੁਕਤ ਕਰਕੇ ਇਕ ਅਜਿਹੀ ਸਰਕਾਰ ਲਿਆਉਣੀ ਚਾਹੀਦੀ ਹੈ, ਜੋ ਸਾਡੇ ਲਈ ਯਤਨਸ਼ੀਲ ਉਪਰਾਲੇ ਕਰੇ ਅਤੇ ਸਾਡੇ ਇਸ ਗੌਰਵਮਈ ਸਮਾਜ ਤੇ ਵਿਰਸੇ ਦਾ ਵਿਕਾਸ ਕਰ ਸਕੇ।

-ਹੋਮਪ੍ਰੀਤ ਕੌਰ
ਜਨਰਲਿਜ਼ਮ ਵਿਭਾਗ, ਗੁਰੂ ਨਾਨਕ ਕਾਲਜ ਫਾਰ ਗਰਲਜ਼, ਸ੍ਰੀ ਮੁਕਤਸਰ ਸਾਹਿਬ।

ਸਿੱਖਿਆ ਨੂੰ ਤਰਜੀਹ

ਹਰੇਕ ਖੇਤਰ ਦੀ ਤਰੱਕੀ ਲਈ ਚੋਣ ਮਨੋਰਥਾਂ ਵਿਚ ਪਾਰਟੀਆਂ ਵਾਅਦੇ ਕਰਦੀਆਂ ਹਨ ਪ੍ਰੰਤੂ ਸਿੱਖਿਆ ਦੇ ਸੁਧਾਰ ਤੇ ਮਿਆਰੀ ਸਿੱਖਿਆ ਦੇਣ ਦੇ ਪੱਕੇ ਵਾਅਦੇ ਦੇਣੇ ਵੀ ਜ਼ਰੂਰੀ ਹਨ ਤੇ ਸਮੇਂ ਦੀ ਲੋੜ ਵੀ ਹਨ। ਅਧਿਆਪਕਾਂ ਨੂੰ ਕੱਚੀ ਨੌਕਰੀ ਤੇ ਵਿੱਤੀ ਹਿਤਾਂ ਦਾ ਕੋਈ ਫ਼ਿਕਰ ਨਾ ਹੋਵੇ, ਅਧਿਆਪਕਾਂ ਨੂੰ ਮੰਗਾਂ ਲਈ ਧਰਨਿਆਂ ਤੇ ਮੁਜ਼ਾਹਰਿਆਂ ਦਾ ਸਹਾਰਾ ਨਾ ਲੈਣਾ ਪਵੇ, ਗਰੀਬਾਂ ਅਤੇ ਅਮੀਰਾਂ ਦੇ ਬੱਚਿਆਂ ਨੂੰ ਬਿਨਾਂ ਭਿੰਨ-ਭੇਦ ਇਕੋ ਜਿਹੀ ਮਿਆਰੀ ਸਿੱਖਿਆ ਮਿਲਣਾ ਜ਼ਰੂਰੀ ਹੋਵੇ, ਤਰੱਕੀਆਂ ਜਾਂ ਹੋਰ ਲਈ ਅਧਿਆਪਕਾਂ ਨੂੰ ਅਦਾਲਤਾਂ ਦਾ ਦਰਵਾਜ਼ਾ ਨਾ ਖੜਕਾਉਣਾ ਪਵੇ ਅਤੇ ਗ਼ੈਰ-ਵਿਦਿਅਕ ਕੰਮ ਨਾ ਲੈਣੇ ਆਦਿ ਦੀ ਬਜਾਏ ਕੇਵਲ ਸਕੂਲਾਂ ਅੰਦਰ ਪੜ੍ਹਾਈ ਕਰਾਉਣ 'ਤੇ ਪੂਰਾ ਸਮਾਂ ਬਚਾਉਣ ਲਈ ਯਕੀਨੀ ਬਣਾਉਣਾ ਉਪਰੰਤ ਗ਼ਰੀਬੀ ਕਾਰਨ ਜਾਂ ਹੋਰ ਕਾਰਨਾਂ ਕਾਰਨ ਵਿਚ-ਵਿਚਾਲੇ ਬੱਚੇ ਜੋ ਪੜ੍ਹਾਈ ਛੱਡ ਜਾਂਦੇ ਹਨ, ਪੱਕੇ ਹੱਲ ਲੱਭ ਕੇ ਮੁਕੰਮਲ ਪੜ੍ਹਾਈ ਲਈ ਮੌਕੇ ਪ੍ਰਧਾਨ ਕਰਨਾ ਆਦਿ ਯਕੀਨੀ ਬਣਾਉਣਾ, ਅਜਿਹੇ ਸਭ ਕਾਸੇ ਨੂੰ ਸਿਆਸੀ ਪਾਰਟੀਆਂ ਨੂੰ ਆਪਣੇ ਚੋਣ ਮਨੋਰਥ ਏਜੰਡੇ ਵਿਚ ਸ਼ਾਮਿਲ ਕਰਨਾ ਚਾਹੀਦਾ ਹੈ ਤਾਂ ਜੋ ਚੋਣਾਂ ਉਪਰੰਤ ਜਿਹੜੀ ਪਾਰਟੀ ਜਿੱਤ ਹਾਸਲ ਕਰਕੇ ਰਾਜ ਭਾਗ ਸੰਭਾਲਦੀ ਹੈ, ਉਹ ਸਿੱਖਿਆ ਲਈ ਤਰਜੀਹ ਦੇ ਆਧਾਰ 'ਤੇ ਕੰਮ ਕਰਨ ਲਈ ਹਰ ਸੰਭਵ ਕੋਸ਼ਿਸ਼ ਕਰੇ ਤਾਂ ਜੋ ਸਮਾਜ 'ਚ ਵੱਡੇ ਪੱਧਰ 'ਤੇ ਕ੍ਰਾਂਤੀ ਆਏ।

-ਮਾਸਟਰ ਦੇਵਰਾਜ ਖੁੰਡਾ
ਗੁਰਦਾਸਪੁਰ।

4-11-2016

 ਸਮੇਂ ਦੀ ਕਦਰ

ਸਮਾਂ ਨਿਰੰਤਰ ਆਪਣੀ ਚਾਲ ਨਾਲ ਚਲਦਾ ਰਹਿੰਦਾ ਹੈ। ਸਮੇਂ ਨੂੰ ਨਾ ਤਾਂ ਕਿਸੇ ਲਈ ਰੋਕਿਆ ਜਾ ਸਕਦਾ ਹੈ ਤੇ ਨਾ ਹੀ ਬੀਤਿਆ ਸਮਾਂ ਕਦੇ ਵਾਪਸ ਆਉਂਦਾ ਹੈ। ਇਸ ਲਈ ਸਮੇਂ ਦੇ ਨਾਲ ਚੱਲਣ ਵਿਚ ਹੀ ਸਮਝਦਾਰੀ ਹੈ। ਅੱਜ ਦਾ ਕੰਮ ਕੱਲ੍ਹ 'ਤੇ ਛੱਡਣ ਵਾਲਾ ਇਨਸਾਨ ਜ਼ਿੰਦਗੀ ਵਿਚ ਪਛੜ ਜਾਂਦਾ ਹੈ ਅਤੇ ਜੋ ਇਨਸਾਨ ਸਮੇਂ ਦੀ ਕਦਰ ਕਰਦਾ ਹੋਇਆ ਆਪਣਾ ਕੰਮ ਸਮੇਂ ਸਿਰ ਕਰਦਾ ਹੈ, ਉਹੀ ਇਨਸਾਨ ਜ਼ਿੰਦਗੀ ਵਿਚ ਆਪਣੀ ਮੰਜ਼ਿਲ ਪ੍ਰਾਪਤ ਕਰ ਸਕਦਾ ਹੈ। ਜੋ ਇਨਸਾਨ ਆਪਣੇ ਕੀਮਤੀ ਸਮੇਂ ਦਾ ਸਦਉਪਯੋਗ ਨਹੀਂ ਕਰਦੇ ਅਤੇ ਕੀਮਤੀ ਸਮੇਂ ਨੂੰ ਫਜ਼ੂਲ ਦੀਆਂ ਗੱਲਾਂ ਜਾਂ ਇਧਰ-ਉਧਰ ਬੈਠ ਉੱਠ ਕੇ ਗੁਆ ਦਿੰਦੇ ਹਨ, ਉਹ ਇਨਸਾਨ ਸਾਰੀ ਜ਼ਿੰਦਗੀ ਦੂਸਰਿਆਂ ਤੋਂ ਪਿੱਛੇ ਹੀ ਰਹਿੰਦੇ ਹਨ ਅਤੇ ਜ਼ਿੰਦਗੀ ਨੂੰ ਕੋਸਦੇ ਰਹਿੰਦੇ ਹਨ। ਜੇਕਰ ਹਰ ਕੰਮ ਨੂੰ ਉਸ ਦੇ ਸਹੀ ਸਮੇਂ ਅਨੁਸਾਰ ਕੀਤਾ ਜਾਵੇ ਤਾਂ ਉਸ ਕੰਮ ਦੇ ਨਤੀਜੇ ਵੀ ਸਾਰਥਕ ਹੀ ਹੁੰਦੇ ਹਨ। ਤਦ ਹੀ ਤਾਂ ਸਿਆਣਿਆਂ ਨੇ ਕਿਹਾ ਹੈ 'ਵੇਲੇ ਦੀ ਨਮਾਜ਼ ਤੇ ਕੁਵੇਲੇ ਦੀਆਂ ਟੱਕਰਾਂ' ਸਮੇਂ ਦਾ ਪਾਬੰਦ ਵਿਅਕਤੀ ਆਪਣੇ ਇਕਰਾਰ ਦਾ ਵੀ ਪੱਕਾ ਹੁੰਦਾ ਹੈ। ਹਮੇਸ਼ਾ ਚਲਦੇ ਰਹਿਣਾ ਇਹ ਜ਼ਿੰਦਗੀ ਦੀ ਕਿਰਿਆਸ਼ੀਲਤਾ ਹੈ ਤੇ ਹਮੇਸ਼ਾ ਸਮੇਂ ਦੇ ਨਾਲ ਚੱਲਣਾ ਇਹ ਜ਼ਿੰਦਗੀ ਜਿਊਣ ਦਾ ਸਭ ਤੋਂ ਉੱਤਮ ਢੰਗ ਹੈ।

-ਜਸਪ੍ਰੀਤ ਕੌਰ 'ਸੰਘਾ'
ਪਿੰਡ ਤਨੂੰਲੀ, ਜ਼ਿਲ੍ਹਾ ਹੁਸ਼ਿਆਰਪੁਰ।

ਧੰਦ ਪਿੱਟਦੀ ਦੁਨੀਆ

ਅੱਜ ਦੇਸ਼ ਦੀ 80 ਫ਼ੀਸਦੀ ਜਨਤਾ ਦੋ ਵਕਤ ਦੀ ਰੋਟੀ ਲਈ ਧੰਦ ਪਿੱਟਦੀ ਆਮ ਵੇਖੀ ਜਾ ਸਕਦੀ ਹੈ। ਮਹਿੰਗਾਈ ਨੇ ਸਿਖਰਾਂ ਛੂਹ ਲਈਆਂ ਹਨ। ਪ੍ਰਤੀ ਜੀਅ ਆਦਮਨ ਘਟਦੀ ਜਾ ਰਹੀ ਹੈ, ਜਦੋਂ ਕਿ ਖਰਚੇ ਵਧਦੇ ਜਾ ਰਹੇ ਹਨ। ਤਨ ਢਕਣ ਲਈ ਕੱਪੜਾ, ਸਿਰ ਉੱਪਰ ਛੱਤ ਤੇ ਪੇਟ ਭਰ ਕੇ ਖਾਣਾ ਆਮ ਬੰਦੇ ਦੇ ਵੱਸ ਤੋਂ ਬਾਹਰ ਹੁੰਦਾ ਜਾ ਰਿਹਾ ਹੈ। ਕੁੱਲੀਆਂ-ਝੁੱਗੀਆਂ ਤੋਂ ਅੱਗੇ ਫੁਟਪਾਥਾਂ 'ਤੇ ਦਿਨ ਕਟੀ ਕਰ ਰਹੀ ਜਨਤਾ ਦੀ ਤਰਸਯੋਗ ਹਾਲਤ ਬਿਆਨ ਕਰਨੀ ਬਹੁਤ ਔਖੀ ਹੈ। ਅੱਜ ਵੱਡੀ ਗਿਣਤੀ ਜਿਥੇ ਗੁਰਬਤ ਭਰਿਆ ਜੀਵਨ ਜਿਊਣ ਲਈ ਮਜਬੂਰ ਹੈ, ਉਥੇ ਆਪਣੇ ਹੀ ਦੇਸ਼ ਵਿਚ ਬੇਗਾਨਗੀ ਦਾ ਅਹਿਸਾਸ ਵੀ ਮਹਿਸੂਸ ਕਰ ਰਹੀ ਹੈ। ਤਰਾਸਦੀ ਇਹ ਵੀ ਹੈ ਕਿ ਦੇਸ਼ ਦੇ ਬਹੁਤੇ ਨਾਗਰਿਕ ਰੁਜ਼ਗਾਰ ਦੀ ਤਲਾਸ਼ ਕਰਦੇ-ਕਰਦੇ ਹੀ ਇਸ ਫ਼ਾਨੀ ਸੰਸਾਰ ਤੋਂ ਕੂਚ ਕਰ ਜਾਂਦੇ ਹਨ। ਇਹ ਭਿਆਨਕ ਵਰਤਾਰਾ ਜਾਰੀ ਹੈ, ਜੋ ਬੇਹੱਦ ਚਿੰਤਾਜਨਕ ਤੇ ਦੁੱਖਦਾਇਕ ਹੈ। ਕਾਰਨ ਇਹ ਹੈ ਕਿ ਸਰਕਾਰੀ ਨੀਤੀਆਂ ਆਮ ਲੋਕਾਂ ਦੀਆਂ ਮੁਢਲੀਆਂ ਲੋੜਾਂ ਨੂੰ ਮੁੱਖ ਰੱਖ ਕੇ ਨਹੀਂ ਬਣਾਈਆਂ ਜਾਂਦੀਆਂ। ਸਿੱਟੇ ਵਜੋਂ ਸੁਧਾਰ ਦੀ ਥਾਂ ਹਾਲਾਤ ਹੋਰ ਵਿਗੜ ਜਾਂਦੇ ਹਨ। ਸਰਕਾਰੀ ਨੀਤੀਆਂ ਹੀ ਅਮੀਰ-ਗ਼ਰੀਬ 'ਚ ਪਾੜਾ ਵਧਾ ਰਹੀਆਂ ਹਨ। ਅੱਜ ਜ਼ਰੂਰੀ ਹੋ ਗਿਆ ਹੈ ਕਿ ਦੇਸ਼ ਵਿਚਲਾ ਸਿਸਟਮ, ਇਸ ਤਰ੍ਹਾਂ ਉਸਾਰਿਆ ਜਾਵੇ ਕਿ ਹਰ ਨਾਗਰਿਕ ਲਈ ਰੁਜ਼ਗਾਰ ਦਾ ਸਾਧਨ ਹੋਵੇ। ਅਮਰਵੇਲ ਵਾਂਗ ਵਧਦੀ ਜਾ ਰਹੀ ਆਬਾਦੀ ਨੂੰ ਰੋਕਿਆ ਜਾਵੇ। ਸਰਕਾਰ ਦਾ ਮੁਢਲਾ ਫ਼ਰਜ਼ ਇਹੀ ਹੋਣਾ ਚਾਹੀਦਾ ਹੈ ਕਿ ਉਹ ਦੇਸ਼ ਦੀ ਆਮ ਜਨਤਾ ਦੇ ਜੀਵਨ ਪੱਧਰ ਨੂੰ ਉੱਪਰ ਚੁੱਕਣ ਲਈ ਪੂਰੀ ਗੰਭੀਰਤਾ ਨਾਲ ਵਿਸ਼ੇਸ਼ ਉਪਰਾਲੇ ਕਰੇ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

3-11-2016

 ਹਵਾ ਦੀ ਗੁਣਵੱਤਾ
ਪਿਛਲੇ ਦਿਨੀਂ ਸਾਹਮਣੇ ਆਏ 'ਵਿਸ਼ਵ ਸਿਹਤ ਸੰਗਠਨ' ਦੇ ਤਾਜ਼ਾ ਅੰਕੜਿਆਂ ਅਨੁਸਾਰ ਦੁਨੀਆ ਦੇ 90 ਫ਼ੀਸਦੀ ਲੋਕ ਪ੍ਰਦੂਸ਼ਿਤ ਹਵਾ ਵਿਚ ਸਾਹ ਲੈ ਰਹੇ ਹਨ। ਭਾਵ 10 ਵਿਅਕਤੀਆਂ ਵਿਚੋਂ 9 ਵਿਅਕਤੀ ਪ੍ਰਦੂਸ਼ਿਤ ਹਵਾ ਦਾ ਸ਼ਿਕਾਰ ਹੋ ਰਹੇ ਹਨ। ਅੰਕੜੇ ਇਹ ਵੀ ਦੱਸਦੇ ਹਨ ਕਿ ਹਵਾ ਦੀ ਗੁਣਵੱਤਾ 'ਚ ਆ ਰਹੇ ਨਿਘਾਰ ਕਾਰਨ ਹਰ ਸਾਲ 60 ਲੱਖ ਲੋਕ ਮੌਤ ਦੇ ਮੂੰਹ 'ਚ ਜਾ ਰਹੇ ਹਨ। ਅੱਜ ਲੋੜ ਹੈ ਸਰਕਾਰਾਂ ਦੇ ਨਾਲ-ਨਾਲ ਸਮੁੱਚੀ ਲੋਕਾਈ ਇਸ ਪੱਖੋਂ ਸੁਚੇਤ ਹੋਵੇ। ਫੈਕਟਰੀਆਂ, ਮਿੱਲਾਂ, ਇੱਟਾਂ ਦੇ ਭੱਠਿਆਂ ਅਤੇ ਮੋਟਰ ਗੱਡੀਆਂ 'ਚੋਂ ਨਿਕਲ ਰਹੇ ਧੂੰਏਂ ਨੂੰ ਗੰਭੀਰਤਾ ਨਾਲ ਲੈਣਾ ਹੁਣ ਜ਼ਰੂਰੀ ਹੋ ਗਿਆ ਹੈ। ਇਸ ਦੇ ਨਾਲ ਕਣਕ ਦੇ ਨਾੜ ਅਤੇ ਝੋਨੇ ਦੀ ਪਰਾਲੀ ਭਾਵ ਫ਼ਸਲਾਂ ਦੀ ਰਹਿੰਦ-ਖੂੰਹਦ ਨੂੰ ਸਾੜਨ ਦੀ ਬਜਾਏ ਕੋਈ ਵੱਖਰੇ ਢੰਗ-ਤਰੀਕੇ ਲੱਭਣੇ ਹੋਣਗੇ। ਇਸ ਤੋਂ ਇਲਾਵਾ ਪਿੰਡਾਂ ਅਤੇ ਸ਼ਹਿਰਾਂ ਵਿਚ ਪਲਾਸਟਿਕ ਦੇ ਲਿਫ਼ਾਫਿਆਂ ਅਤੇ ਹੋਰ ਰੱਦੀ ਆਦਿ ਨੂੰ ਸਾੜਨ 'ਤੇ ਮੁਕੰਮਲ ਪਾਬੰਦੀ ਲਾਈ ਜਾਵੇ। ਹਵਾ ਦੀ ਗੁਣਵੱਤਾ 'ਤੇ ਉੱਠੇ ਸਵਾਲਾਂ ਨੂੰ ਅੱਜ ਗੰਭੀਰਤਾ ਨਾਲ ਲੈਣਾ ਬੇਹੱਦ ਜ਼ਰੂਰੀ ਹੋ ਗਿਆ ਹੈ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਜ਼ਿਲ੍ਹਾ ਲੁਧਿਆਣਾ।


ਸੜਕ ਹਾਦਸੇ
ਸੜਕ ਹਾਦਸਿਆਂ ਦੇ ਕਈ ਕਾਰਨ ਹਨ। ਸਭ ਤੋਂ ਵੱਡਾ ਕਾਰਨ ਨਸ਼ਿਆਂ ਦਾ ਸੇਵਨ ਕਰਕੇ ਡਰਾਈਵਿੰਗ ਕਰਨਾ ਹੈ। ਨਸ਼ਿਆਂ ਦਾ ਸੇਵਨ ਕਰਕੇ ਡਰਾਈਵਿੰਗ ਕਰਨਾ ਕਾਨੂੰਨੀ ਜੁਰਮ ਹੈ ਫਿਰ ਵੀ ਅਕਸਰ ਲੋਕ ਜਾਨ-ਬੁੱਝ ਕੇ ਅਜਿਹਾ ਜੁਰਮ ਕਰਨ ਤੋਂ ਡਰਦੇ ਨਹੀਂ। ਦੂਜੇ ਪਾਸੇ ਅਜਿਹੇ ਨਿਯਮਾਂ ਦੀ ਉਲੰਘਣਾ ਰੋਕਣ ਵਿਚ ਊਣਤਾਈਆਂ ਵੀ ਹਨ, ਜਿਸ ਕਾਰਨ ਜੁਰਮ ਕਰਨ ਵਾਲਿਆਂ ਨੂੰ ਕੋਈ ਡਰ ਨਹੀਂ, ਇਨ੍ਹਾਂ 'ਤੇ ਲਗਾਮ ਕੱਸਣ ਦੀ ਲੋੜ ਹੈ। ਮਨੁੱਖੀ ਜ਼ਿੰਦਗੀ ਬਹੁਤ ਕੀਮਤੀ ਹੈ। ਟ੍ਰੈਫਿਕ ਨਿਯਮਾਂ ਦੀ ਪਾਲਣਾ ਕਰਨਾ ਹਰੇਕ ਨਾਗਰਿਕ ਦਾ ਮੁੱਢਲਾ ਫਰਜ਼ ਹੈ। ਅਕਸਰ ਅਸੀਂ ਵੇਖੋ-ਵੇਖੀ ਲਾਪ੍ਰਵਾਹੀਆਂ ਕਰਨ ਦਾ ਯਤਨ ਕਰਦੇ ਹਾਂ। ਤਾਂ ਹੀ, ਸੜਕ ਹਾਦਸਿਆਂ ਵਿਚ ਦਿਨ-ਬ-ਦਿਨ ਵਾਧਾ ਹੋ ਰਿਹਾ ਹੈ। ਨੈਸ਼ਨਲ ਕਰਾਈਮ ਰਿਕਾਰਡ ਬਿਊਰੋ ਵੀ ਅਜਿਹਾ ਮੰਨ ਰਹੀ ਹੈ। ਕੁੱਲ ਮਿਲਾ ਕੇ ਸਾਨੂੰ ਸਭ ਨੂੰ ਟ੍ਰੈਫਿਕ ਨਿਯਮਾਂ ਦੀ ਪਾਲਣਾ ਕਰਨੀ ਅਤਿ ਜ਼ਰੂਰੀ ਹੈ ਕਿਉਂਕਿ ਜ਼ਿੰਦਗੀ ਅਤਿ ਕੀਮਤੀ ਹੈ, ਕਿਸੇ ਹੋਰ ਨੂੰ ਦੋਸ਼ੀ ਕਹਿਣ ਦੀ ਬਜਾਏ ਆਪਣਾ ਸੁਧਾਰ ਕਰਨ ਨਾਲ ਹੀ ਹਾਦਸੇ ਘੱਟ ਸਕਦੇ ਹਨ।


-ਮਾ: ਦੇਵ ਰਾਜ ਖੁੰਡਾ
ਸ੍ਰੀ ਰਾਮ ਸ਼ਰਨਮ ਕਾਲੋਨੀ, ਗੁਰਦਾਸਪੁਰ।


ਸਿੱਖਿਆ ਪ੍ਰਤੀ ਫ਼ਰਜ਼
ਸਾਰੀਆਂ ਸਿਆਸੀ ਪਾਰਟੀਆਂ ਨੂੰ ਇਕਮੁੱਠ ਹੋ ਕੇ ਸਿੱਖਿਆ ਦੇ ਪੱਧਰ ਨੂੰ ਉੱਚਾ ਚੁੱਕਣ ਦੇ ਯਤਨ ਕਰਨੇ ਚਾਹੀਦੇ ਹਨ। ਸਿੱਖਿਆ ਦਾ ਮੁੱਖ ਆਧਾਰ ਸਕੂਲ, ਵਿਦਿਆਰਥੀ ਅਤੇ ਅਧਿਆਪਕ ਹਨ। ਸਰਕਾਰੀ ਸਕੂਲਾਂ ਦੀਆਂ ਇਮਾਰਤਾਂ ਵਧੀਆ ਹੋਣੀਆਂ ਚਾਹੀਦੀਆਂ ਹਨ, ਵਿਦਿਆਰਥੀਆਂ ਦੇ ਬੈਠਣ ਲਈ ਫਰਨੀਚਰ ਦਾ ਪ੍ਰਬੰਧ ਹੋਣਾ ਚਾਹੀਦਾ ਹੈ। ਅਧਿਆਪਕ, ਜਿਸ ਦੀ ਤੁਲਨਾ ਗੁਰੂ ਨਾਲ ਕੀਤੀ ਜਾਂਦੀ ਹੈ, ਨੂੰ ਗ਼ੈਰ-ਵਿਦਿਅਕ ਕੰਮਾਂ ਤੋਂ ਹਟਾ ਕੇ ਕੇਵਲ ਪੜ੍ਹਾਉਣ ਦਾ ਕੰਮ ਦੇਣਾ ਚਾਹੀਦਾ ਹੈ। ਅਧਿਆਪਕ ਵਰਗ ਦੀਆਂ ਸਮੱਸਿਆਵਾਂ ਦੂਰ ਕਰਨੀਆਂ ਚਾਹੀਦੀਆਂ ਹਨ, ਜਿਵੇਂ ਪੱਕੀ ਪੈਨਸ਼ਨ, ਕੱਚੀ ਨੌਕਰੀ ਪੱਕੀ ਆਦਿ ਤਾਂ ਜੋ ਅਧਿਆਪਕ ਅਦਾਲਤਾਂ ਅਤੇ ਮੁਜ਼ਾਹਰਿਆਂ ਦਾ ਸਹਾਰਾ ਲੈਣ ਦੀ ਬਜਾਏ ਵੱਧ ਤੋਂ ਵੱਧ ਸਮਾਂ ਸਕੂਲਾਂ ਵਿਚ ਵਿਦਿਆਰਥੀਆਂ ਨੂੰ ਪੜ੍ਹਾਉਣ ਵਿਚ ਲਗਾਉਣ।


-ਬਿਕਰਮਜੀਤ ਸਿੰਘ ਬੱਲ
ਸਠਿਆਲਾ (ਅੰਮ੍ਰਿਤਸਰ)।

2-11-2016

 ਤੂੰ ਮੇਰੀ ਖੰਡ ਮਿਸ਼ਰੀ
ਪੰਜਾਬ ਵਿਚ ਅਗਲੇ ਸਾਲ ਵਿਧਾਨ ਸਭਾ ਦੀਆਂ ਚੋਣਾਂ ਹੋਣ ਜਾ ਰਹੀਆਂ ਹਨ ਅਤੇ ਇਸ ਵੇਲੇ ਸਿਆਸੀ ਪਾਰਟੀਆਂ ਵਿਚ ਪੂਰੀ ਤਰ੍ਹਾਂ ਹਲਚਲ ਮਚੀ ਹੋਈ ਹੈ ਅਤੇ ਹਰੇਕ ਸਿਆਸੀ ਪਾਰਟੀ ਆਪਣਾ ਪੰਜ ਸਾਲ ਰਾਜ ਭਾਗ ਕਾਇਮ ਕਰਨ ਲਈ ਅੱਡੀ ਚੋਟੀ ਦਾ ਜ਼ੋਰ ਲਗਾਉਂਦੀ ਹੈ। ਪਰ ਪਿੰਡਾਂ ਵਿਚ ਅਜੇ ਆਮ ਲੋਕ ਚੋਣਾਂ ਨੂੰ ਕਾਰਗਰ ਤਰੀਕੇ ਨਾਲ ਨਹੀਂ ਲੈ ਰਹੇ। ਪਰ ਜਦੋਂ ਤੋਂ ਵੋਟਾਂ ਸਬੰਧੀ ਨੋਟੀਫਿਕੇਸ਼ਨ ਹੋ ਜਾਵੇਗਾ ਤਾਂ ਹਰੇਕ ਪਾਰਟੀ ਦੇ ਮੁਢਲੇ ਬੰਦੇ ਆਮ ਘਰਾਂ ਵਿਚ ਸੰਪਰਕ ਬਣਾਉਣ ਲੱਗ ਜਾਣਗੇ। ਜਿਨ੍ਹਾਂ ਲੋਕਾਂ ਪ੍ਰਤੀ ਹਮੇਸ਼ਾ ਓਪਰੀ ਅੱਖ ਨਾਲ ਦੇਖਿਆ ਜਾਂਦਾ ਹੈ, ਉਨ੍ਹਾਂ ਗਰੀਬ ਘਰਾਂ ਵਿਚ ਵੀ ਸਿਰਫ ਦਿਖਾਵੇ ਖਾਤਰ ਚਾਹ ਪਾਣੀ ਕੀਤਾ ਜਾਂਦਾ ਹੈ ਅਤੇ ਹਰੇਕ ਵੋਟਰ ਨੂੰ ਜੱਫੀਆਂ ਪਾ ਕੇ ਮਿਲਿਆ ਜਾਂਦਾ ਹੈ। ਕਹਿਣ ਤੋਂ ਭਾਵ ਤੂੰ ਮੇਰੀ ਖੰਡ ਮਿਸ਼ਰੀ ਲੱਗੇ ਜਾਨ ਤੋਂ ਪਿਆਰੀ ਵਾਲੀ ਗੱਲ ਵੋਟਾਂ ਵੇਲੇ ਸੱਚੀ ਦਿਖਾਈ ਦਿੰਦੀ ਹੈ। ਪਰ ਪੰਜਾਬ ਦਾ ਵੋਟਰ ਬਹੁਤ ਪੜ੍ਹਿਆ-ਲਿਖਿਆ ਅਤੇ ਸੂਝਵਾਨ ਹੋਣ ਦੇ ਨਾਤੇ ਇਹ ਸਭ ਸਮਝ ਕੇ ਸਹੀ ਵੋਟ ਦਾ ਇਸਤੇਮਾਲ ਕਰਦਾ ਹੈ ਅਤੇ ਪੰਜਾਬ ਦਾ ਵੋਟਰ ਕਿਸੇ ਦੇ ਝੂਠੇ ਲਾਰਿਆਂ, ਝੂਠੇ ਵਾਅਦਿਆਂ ਵਿਚ ਫਸਣ ਵਾਲਾ ਨਹੀਂ।


-ਕੇਵਲ ਸਿੰਘ ਬਾਠਾਂ
ਮੋ: 98557-44211


ਰਿਸ਼ਵਤਖੋਰੀ ਤੇ ਮਿਲਾਵਟਖੋਰੀ

ਅਜੋਕੇ ਦੌਰ ਵਿਚ ਰਿਸ਼ਵਤਖੋਰੀ ਤੇ ਮਿਲਾਵਟਖੋਰੀ ਪੰਜਾਬੀਆਂ ਦੇ ਹੱਡਾਂ ਦਾ ਨਾਸੂਰ ਬਣਿਆ ਹੋਇਆ ਹੈ। ਅੰਗਰੇਜ਼ੀ ਰਾਜ ਵੇਲੇ ਇਹ ਦੋਵੇਂ ਬੁਰਾਈਆਂ ਨਾਂਹ ਦੇ ਬਰਾਬਰ ਸਨ। ਆਜ਼ਾਦੀ ਮਿਲਣ ਤੋਂ 15 ਸਾਲ ਬਾਅਦ ਤੱਕ ਪ੍ਰਸ਼ਾਸਨ ਪੂਰਾ ਇਮਾਨਦਾਰ ਰਿਹਾ ਪਰ ਜਦੋਂ ਤੋਂ ਰਾਜਸੀ ਪਾਰਟੀਆਂ ਪੈਸੇ ਦੇ ਜ਼ੋਰ ਨਾਲ ਚੋਣਾਂ ਜਿੱਤਣ ਲੱਗ ਪਈਆਂ ਤਾਂ ਸਿਆਸੀ ਪਾਰਟੀਆਂ ਵਿਚ ਪੈਸਾ ਇਕੱਠਾ ਕਰਨ ਦੀ ਹੋੜ ਲੱਗ ਗਈ। ਨਤੀਜੇ ਵਜੋਂ ਪੰਜਾਬ ਵਿਚ ਪਿਛਲੇ 50 ਸਾਲਾਂ ਤੋਂ ਪੰਜਾਬ ਦੀਆਂ ਦੋਵੇਂ ਵੱਡੀਆਂ ਪਾਰਟੀਆਂ ਨੇ ਆਪਣੇ ਫ਼ਰਜ਼ ਤੇ ਧਰਮ ਈਮਾਨ ਛੱਡ ਕੇ ਸਰਕਾਰੀ ਮੁਲਾਜ਼ਮਾਂ ਤੇ ਅਫ਼ਸਰਾਂ ਦੀ ਭਰਤੀ ਦਾ ਰੇਟ 10 ਲੱਖ ਤੋਂ 50 ਲੱਖ ਰੁਪਏ ਨੀਯਤ ਕਰ ਦਿੱਤਾ ਹੈ। ਰਿਸ਼ਵਤ ਦੇ ਕੇ ਭਰਤੀ ਹੋਏ ਮੁਲਾਜ਼ਮ, ਜਨਤਾ ਕੋਲੋਂ ਰਿਸ਼ਵਤ ਲੈ ਕੇ ਹੀ ਕੰਮ ਕਰਦੇ ਹਨ। ਚੋਣਾਂ ਸਮੇਂ ਸਿਆਸੀ ਪਾਰਟੀਆਂ ਸਾਫ਼-ਸੁਥਰਾ ਪ੍ਰਸ਼ਾਸਨ ਦੇਣ ਦਾ ਜੋ ਵਾਅਦਾ ਕਰਦੀਆਂ ਹਨ, ਉਹ ਸਿਰਫ ਵੋਟਾਂ ਲੈਣ ਖ਼ਾਤਰ ਝੂਠ ਬੋਲਦੀਆਂ ਹਨ।
ਮਿਲਾਵਟਖੋਰੀ ਦੇ ਮਾਮਲੇ ਵਿਚ ਜਾਅਲੀ ਦੁੱਧ, ਪਨੀਰ ਤੇ ਖੋਆ ਇਨਸਾਨੀ ਸਿਹਤ ਲਈ ਜ਼ਹਿਰ ਹੈ। ਦਾਲਾਂ, ਮਸਾਲਿਆਂ ਤੇ ਹੋਰ ਖਾਣ-ਪੀਣ ਦੀਆਂ ਵਸਤਾਂ ਵਿਚ ਮਿਲਾਵਟ ਹੁੰਦੀ ਹੈ। ਜਦੋਂ ਕਦੇ ਵੀ ਮਹਿਕਮਾ ਸਿਹਤ ਹਰਕਤ ਵਿਚ ਆਉਂਦਾ ਹੈ ਤਾਂ ਵੱਡੇ ਅਮੀਰ ਵਪਾਰੀਆਂ ਦੀ ਲੀਡਰਾਂ ਨੂੰ ਮਾਰੀ ਘੁਰਕੀ, ਸਰਕਾਰੀ ਮਹਿਕਮੇ ਨੂੰ ਬੇਵੱਸ ਬਣਾ ਦਿੰਦੀ ਹੈ। ਨੇਤਾਵਾਂ ਨੂੰ ਆਪਣਾ ਸੁਧਾਰ ਕਰਨਾ ਚਾਹੀਦਾ ਹੈ ਅਤੇ ਲੋਕਾਂ ਦੀਆਂ ਆਸਾਂ ਉੱਤੇ ਪੂਰੇ ਉੱਤਰਨਾ ਚਾਹੀਦਾ ਹੈ।


-ਇੰਜ: ਕੁਲਦੀਪ ਸਿੰਘ ਲੁੱਧਰ
ਗੁਰੂ ਨਾਨਕ ਵਾੜਾ, ਅੰਮ੍ਰਿਤਸਰ।


ਚੋਣ ਪ੍ਰਚਾਰ
ਜਿਵੇਂ-ਜਿਵੇਂ ਪੰਜਾਬ 'ਚ ਵਿਧਾਨ ਸਭਾ ਚੋਣਾਂ ਨੇੜੇ ਆ ਰਹੀਆਂ ਹਨ, ਚੋਣ ਪ੍ਰਚਾਰ ਤੇਜ਼ ਹੁੰਦਾ ਜਾ ਰਿਹਾ ਹੈ। ਵੱਡੇ-ਵੱਡੇ ਰੋਡ ਸ਼ੋਅ, ਜਲਸੇ ਜਲੂਸ ਅਤੇ ਰੈਲੀਆਂ ਦਾ ਆਯੋਜਨ ਕੀਤਾ ਜਾ ਰਿਹਾ ਹੈ। ਇਨ੍ਹਾਂ ਜਲਸੇ ਜਲੂਸਾਂ ਅਤੇ ਰੈਲੀਆਂ 'ਚ ਜਿਥੇ ਲੱਖਾਂ ਦਾ ਪੈਟਰੋਲ ਫੂਕਿਆ ਜਾ ਰਿਹਾ ਹੈ, ਉਥੇ ਆਵਾਜਾਈ 'ਚ ਵੀ ਭਾਰੀ ਵਿਘਨ ਪੈ ਜਾਂਦਾ ਹੈ, ਜਿਸ ਨਾਲ ਜ਼ਰੂਰੀ ਕੰਮਾਂ 'ਤੇ ਜਾਣ ਵਾਲੇ ਲੋਕਾਂ ਅਤੇ ਮਰੀਜ਼ਾਂ ਆਦਿ ਲਈ ਭਾਰੀ ਪ੍ਰੇਸ਼ਾਨੀ ਪੈਦਾ ਹੁੰਦੀ ਹੈ। ਇਸ ਲਈ ਚੋਣ ਕਮਿਸ਼ਨ ਨੂੰ ਚਾਹੀਦਾ ਹੈ ਕਿ ਚੋਣ ਪ੍ਰਚਾਰ ਲਈ ਟੀ.ਵੀ. ਅਤੇ ਅਖ਼ਬਾਰਾਂ ਰਾਹੀਂ ਹੀ ਕਰਨ ਦੀ ਆਗਿਆ ਦੇਵੇ ਤਾਂ ਜੋ ਆਮ ਲੋਕਾਂ ਨੂੰ ਭਾਰੀ ਮੁਸ਼ਕਿਲਾਂ ਦਾ ਸਾਹਮਣਾ ਨਾ ਕਰਨਾ ਪਵੇ।


-ਮਾ: ਮਹਿੰਦਰ ਸਿੰਘ ਬਾਜਵਾ
ਪਿੰਡ ਮਸੀਤਾਂ, ਜ਼ਿਲ੍ਹਾ ਕਪੂਰਥਲਾ।

31-10-2016

 ਖ਼ੁਦਕੁਸ਼ੀਆਂ ਬਾਰੇ

'ਅਜੀਤ' ਅਖ਼ਬਾਰ ਵਿਚ ਰੋਜ਼ਾਨਾ ਇਕ ਜਾਂ ਦੋ ਕਿਸਾਨਾਂ ਵੱਲੋਂ ਖ਼ੁਦਕੁਸ਼ੀਆਂ ਪੜ੍ਹ ਕੇ ਮਨ ਨੂੰ ਬੜਾ ਦੁੱਖ ਹੁੰਦਾ ਹੈ। ਕਈ ਵਾਰ ਤਾਂ ਹੋਰ ਵੀ ਦੁੱਖ ਹੁੰਦਾ ਹੈ ਜਦੋਂ ਬੰਦੇ ਦੀ ਉਮਰ 35-40 ਸਾਲ ਦੀ ਹੁੰਦੀ ਹੈ ਤਾਂ ਖ਼ੁਦਕੁਸ਼ੀ ਕਰ ਲੈਂਦਾ ਹੈ। ਉਂਜ ਤਾਂ ਖ਼ੁਦਕੁਸ਼ੀ ਕੋਈ ਵੀ ਹੋਵੇ, ਮਾੜੀ ਹੈ। ਜਿਸ ਘਰ ਦਾ ਜੀਅ ਜਾਂਦਾ ਹੈ, ਉਸ ਨੂੰ ਪੁੱਛੋ ਕਿ ਉਸ ਘਰ 'ਤੇ ਕੀ ਬੀਤਦੀ ਹੈ। ਸਾਡੀ ਸਰਕਾਰ ਨੂੰ ਚਾਹੀਦਾ ਹੈ ਕਿ ਖ਼ੁਦਕੁਸ਼ੀ ਕਰਨ ਵਾਲੇ ਦੇ ਘਰ ਜਾਵੇ ਅਤੇ ਉਸ ਦੇ ਪਰਿਵਾਰ ਨੂੰ ਦਿਲਾਸਾ ਦੇਵੇ ਅਤੇ ਅੱਗੇ ਤੋਂ ਖ਼ੁਦਕੁਸ਼ੀਆਂ ਕਰਨ ਵਾਲਿਆਂ ਨੂੰ ਕੋਈ ਚੰਗਾ ਸੁਨੇਹਾ ਦੇਵੇ ਕਿ ਬਈ ਖ਼ੁਦਕੁਸ਼ੀਆਂ ਨਾ ਕਰੋ, ਅਸੀਂ ਤੁਹਾਡੇ ਬਾਰੇ ਹਮਦਰਦੀ ਨਾਲ ਸੋਚਾਂਗੇ। ਕਿਸਾਨ ਜਾਂ ਕੋਈ ਹੋਰ ਕਰਜ਼ਾ ਤਾਂ ਲੈਂਦੇ ਹਨ ਜ਼ਮੀਨ ਲਈ ਜਾਂ ਘਰ ਦੇ ਕਿਸੇ ਕੰਮ ਲਈ, ਉਹ ਤਾਂ ਮਿਹਨਤ ਕਰਕੇ ਉਤਰ ਜਾਂਦਾ ਹੈ ਪਰ ਜੇ ਕਰਜ਼ਾ ਲੈ ਕੇ ਫੋਕੀ ਟੌਹਰ ਲਈ ਖਰਚ ਕੀਤਾ ਜਾਵੇ ਤਾਂ ਫਿਰ ਉਹ ਜੀਅ ਦਾ ਜੰਜਾਲ ਬਣ ਜਾਂਦਾ ਹੈ। ਪਰ ਫਿਰ ਵੀ ਸਰਕਾਰ ਇਸ ਪਾਸੇ ਜ਼ਿਆਦਾ ਧਿਆਨ ਦੇਵੇ ਅਤੇ ਸਮਝਾਇਆ ਜਾਵੇ ਤਾਂ ਸ਼ਾਇਦ ਲੋਕ ਇਸ ਪਾਸੇ (ਖ਼ੁਦਕੁਸ਼ੀਆਂ) ਧਿਆਨ ਦੇਣ ਤੇ ਖ਼ੁਦਕੁਸ਼ੀਆਂ ਨਾ ਕਰਨ, ਕੁਝ ਸਰਕਾਰ ਆਪਣੇ ਕੋਲੋਂ ਕੁਝ ਦੇ ਕੇ ਕਰਜ਼ੇ ਦੀ ਪੰਡ ਹੌਲੀ ਕਰ ਸਕਦੀ ਹੈ। ਕਰਜ਼ਾ ਆਪਣੀ ਹੈਸੀਅਤ ਮੁਤਾਬਿਕ ਲਉ, ਆਪ ਵੀ ਖੁਸ਼ ਰਹੋ ਤੇ ਪਰਿਵਾਰ ਨੂੰ ਵੀ ਖੁਸ਼ ਰੱਖੋ।

-ਹਰਜਿੰਦਰਪਾਲ ਸਿੰਘ ਬਾਜਵਾ
ਕੋਠੀ 536, 5-ਬੀ ਗਲੀ, ਵਿਜੈ ਨਗਰ, ਹੁਸ਼ਿਆਰਪੁਰ।

ਪੈਸੇ ਦਾ ਕੀ ਹੈ....?


ਜੀਵਨ ਨੂੰ ਚਲਾਉਣ ਦੇ ਕਾਰਜਸ਼ੀਲ ਅੰਦੋਲਨ ਦਾ ਨਾਂਅ ਰਾਜਨੀਤੀ ਹੈ। ਰਾਜ ਅਤੇ ਨੀਤੀ ਦੇ ਸੁਮੇਲ ਤੋਂ ਬਣੇ ਇਸ ਸ਼ਬਦ ਤੋਂ ਭਾਵ ਹੈ ਰਾਜ ਕਰਨ ਦੀ ਨੀਤੀ। ਨੀਤੀ ਚੰਗੀ ਵੀ ਹੋ ਸਕਦੀ ਹੈ ਤੇ ਨੀਤੀ ਮਾੜਾ ਵੀ ਹੋ ਸਕਦੀ ਹੈ ਪਰ ਰਾਜਨੀਤੀ ਚੰਗੀ ਜਾਂ ਮਾੜੀ ਨਹੀਂ ਹੁੰਦੀ, ਬਲਕਿ ਰਾਜਨੇਤਾ ਚੰਗੇ ਜਾਂ ਮਾੜੇ ਹੁੰਦੇ ਹਨ। ਅਜੋਕੇ ਸਮੇਂ ਦੀ ਰਾਜਨੀਤੀ 'ਤੇ ਨਿਗ੍ਹਾ ਮਾਰੀ ਜਾਵੇ ਤਾਂ ਇੰਜ ਲਗਦਾ ਹੈ ਜਿਵੇਂ ਰਾਜਨੀਤੀ ਵਿਚ ਰਾਮ ਤਾਂ ਸ਼ਾਇਦ ਕੋਈ ਵੀ ਨਹੀਂ, ਲਗਪਗ ਸਾਰੇ ਰਾਵਣ ਹੀ ਨਜ਼ਰ ਆਉਂਦੇ ਹਨ। 30-40 ਸਾਲ ਪਹਿਲਾਂ ਇਕ ਸਮਾਂ ਸੀ ਜਦੋਂ ਲੋਕ ਕਹਿੰਦੇ ਸਨ ਕਿ 'ਪੈਸੇ ਦਾ ਕੀ ਹੈ ਪੈਸਾ ਤਾਂ 'ਕੰਜਰਾਂ' ਕੋਲ ਵੀ ਬਹੁਤ ਹੁੰਦਾ ਹੈ' ਗੱਲ ਤੇ ਇੱਜ਼ਤ, ਸਤਿਕਾਰ ਤੇ ਚਰਿੱਤਰ ਦੀ ਹੈ। ਉਸ ਵਕਤ ਜੇ ਕਿਸੇ ਦੇ ਚਰਿੱਤਰ 'ਤੇ ਮਾਮੂਲੀ ਜਿਹਾ ਇਲਜ਼ਾਮ ਵੀ ਲੱਗ ਜਾਂਦਾ ਸੀ ਤਾਂ ਉਸ ਨੂੰ ਧੋਣ ਲਈ ਉਹ ਆਪਣੀ ਜਾਨ ਤੱਕ ਕੁਰਬਾਨ ਕਰਨ ਲਈ ਤਿਆਰ ਹੋ ਜਾਂਦਾ ਸੀ। ਪੈਸੇ ਤੋਂ ਵੱਧ ਅਹਿਮੀਅਤ ਇੱਜ਼ਤ ਤੇ ਪਾਕ-ਸਾਫ਼ ਦਾਮਨ ਦੀ ਹੁੰਦੀ ਸੀ। ਪਰ ਹੁਣ ਇਸ ਤਰ੍ਹਾਂ ਲਗਦਾ ਹੈ ਕਿ ਜਿਵੇਂ ਪੈਸਾ ਹੀ ਸਭ ਕੁਝ ਹੈ।

-ਪ੍ਰਿੰ: ਗੁਰਬਚਨ ਸਿੰਘ ਲਾਲੀ
ਲੇਖਕ ਮੰਚ, ਪੱਟੀ।

29-10-2016

ਜੇ ਜਾਣਾ ਤੈਂ ਕਾਲਜ

ਹਰ ਬੱਚੇ ਦਾ ਸੁਪਨਾ ਹੁੰਦਾ ਕਿ ਉਹ ਵੱਧ ਤੋਂ ਵੱਧ ਪੜ੍ਹੇ ਤੇ ਆਪਣੀ ਮਨ ਪਸੰਦ ਕਾਲਜ ਵਿਚ ਪੜ੍ਹੇ, ਪਰ ਇਹ ਹਰ ਵਾਰ ਮੁਮਕਿਨ ਨਹੀਂ ਹੁੰਦਾ। ਬੱਚਾ ਕਈ ਥਾਂ 'ਤੇ ਅਪਲਾਈ ਕਰਦਾ ਹੈ ਤੇ ਇੰਟਰਵਿਊ ਵੇਲੇ ਕਈ ਥਾਂ 'ਤੇ ਉਸ ਨੂੰ ਦਾਖਲਾ ਮਿਲ ਸਕਦਾ ਹੁੰਦਾ ਹੈ। ਪਰ ਆਮ ਤੌਰ 'ਤੇ ਵੇਖਣ ਵਿਚ ਆਇਆ ਹੈ ਕਿ ਕਾਲਜਾਂ ਵਾਲੇ ਉਸ ਨੂੰ ਉਸੇ ਵੇਲੇ ਫੀਸ ਭਰਨ 'ਤੇ ਮਜਬੂਰ ਕਰਦੇ ਹਨ ਤੇ ਉਸ ਦੇ ਅਸਲ ਸਰਟੀਫੀਕੇਟ ਰੱਖ ਲੈਂਦੇ ਹਨ। ਇਸ ਨਾਲ ਬੱਚਾ ਹੋਰ ਕਿਤੇ ਦਾਖਲਾ ਨਹੀਂ ਲੈ ਸਕਦਾ। ਨਿੱਤ ਵਧਦੇ ਮੁਕਾਬਲੇ ਕਰਕੇ ਕਾਲਜਾਂ ਵਾਲੇ ਇਹ ਤਰੀਕਾ ਅਪਣਾਉਂਦੇ ਹਨ। ਇਸ ਨਾਲ ਬੱਚੇ ਨੂੰ ਆਪਣੇ ਹੱਕਾਂ ਤੋਂ ਵਾਂਝਿਆਂ ਹੋਣਾ ਪੈਂਦਾ ਹੈ। ਇਹ ਕਾਲਜਾਂ ਦਾ ਵਤੀਰਾ ਬਿਲਕੁਲ ਨਾਜ਼ਾਇਜ਼ ਅਤੇ ਬੇ-ਕਾਨੂੰਨਾ ਹੈ। ਭਾਰਤ ਦੀ ਸਭ ਤੋਂ ਵੱਡੀ ਅਦਾਲਤ, ਸੁਪਰੀਮ ਕੋਰਟ 2007 ਵਿਚ ਸਪੱਸ਼ਟ ਫੈਸਲਾ ਦੇ ਚੁੱਕੀ ਹੈ ਕਿ ਕਿਸੇ ਵੀ ਸਰਕਾਰੀ ਜਾਂ ਗ਼ੈਰ-ਸਰਕਾਰੀ ਅਦਾਰੇ, ਕਾਲਜ ਆਦਿ ਨੂੰ ਕੋਈ ਹੱਕ ਨਹੀਂ ਕਿ ਉਹ ਵਿਦਿਆਰਥੀ ਦੇ ਅਸਲ ਕਾਗਜ਼ ਜਾਂ ਸਰਟੀਫਿਕੇਟ ਇਕ ਮਿੰਟ ਲਈ ਵੀ ਰੱਖ ਸਕੇ। ਉਹ ਫੋਟੋ ਸਟੇਟ ਦੀ ਪ੍ਰਮਾਣਤਾ ਜਾਚਣ ਲਈ ਦੇਖ ਸਕਦੇ ਹਨ। ਇਹੀ ਨਹੀਂ, ਨੌਕਰੀ ਦੇਣ ਵਾਲੇ ਅਦਾਰੇ ਵੀ ਅਸਲ ਸਰਟੀਫਿਕੇਟ ਨਹੀਂ ਰੱਖ ਸਕਦੇ। ਅਦਾਲਤ ਦਾ ਮੰਨਣਾ ਹੈ ਕਿ ਇਹ ਮੌਲਿਕ ਅਧਿਕਾਰਾਂ 'ਤੇ ਡਾਕਾ ਹੈ। ਮੈਡੀਕਲ ਕੌਂਸਲ ਨੇ ਤਾਂ ਕਾਲਜਾਂ ਨੂੰ ਇਹ ਲਿਖਤੀ ਦੇਣ ਲਈ ਵੀ ਕਿਹਾ ਹੋਇਆ ਹੈ ਕਿ 'ਉਨ੍ਹਾਂ ਕੋਲ ਕਿਸੇ ਵਿਦਿਆਰਥੀ ਦਾ ਅਸਲ ਸਰਟੀਫਿਕੇਟ ਨਹੀਂ ਹੈ।' ਤਾਮਿਲਨਾਡੂ ਦੀ ਅਦਾਲਤ ਤਾਂ ਇਕ ਕਾਲਜ ਨੂੰ ਸਰਟੀਫਿਕੇਟ ਰੱਖਣ ਬਦਲੇ 50,000 ਰੁਪਏ ਦਾ ਜੁਰਮਾਨਾ ਵੀ ਕਰ ਚੁੱਕੀ ਹੈ। ਵਿਦਿਆਰਥੀਆਂ ਨੂੰ ਚਾਹੀਦਾ ਹੈ ਕਿ ਉਹ ਆਪਣੇ ਅਸਲ ਸਰਟੀਫਿਕੇਟ ਵਾਪਸ ਮੰਗਣ। ਕਾਲਜ ਦੇ ਨਾਂਹ ਕਰਨ ਤੇ ਯੂਨੀਵਰਸਿਟੀ ਅਤੇ ਹੋਰ ਕਈ ਅਦਾਰਿਆਂ ਨੂੰ ਸ਼ਿਕਾਇਤ ਕੀਤੀ ਜਾ ਸਕਦੀ ਹੈ। ਇਹ ਅਦਾਰੇ ਸਰਟੀਫਿਕੇਟ ਤਾਂ ਵਾਪਸ ਦਿਵਾਉਣਗੇ ਹੀ, ਅਦਾਲਤੀ ਹੁਕਮਾਂ ਨੂੰ ਨਾ ਮੰਨਣ ਕਰਕੇ ਕਾਲਜ ਨੂੰ ਭਾਰੀ ਜੁਰਮਾਨਾ ਅਤੇ ਮਾਨਤਾ ਵੀ ਰੱਦ ਕਰਵਾ ਸਕਦੇ ਹਨ। ਸ਼ਿਕਾਇਤ ਦਰਜ ਕਰਵਾਉਣ ਲਈ ਹੇਠ ਲਿਖੀਆਂ ਈਮੇਲਾਂ 'ਤੇ ਲਿਖਿਆ ਜਾ ਸਕਦਾ ਹੈ:
cm@ugc.ac.in; cm.ugc@nic.in; vcm.ugc@nic.in; jssandhu.ugc@nic.in; hrm@nic.in;
secy.dhe@nic.in; avinashpant@aicte-india.org; spgoyal@nic.in

-ਜਨਮੇਜਾ ਸਿੰਘ ਜੌਹਲ

ਖਿਲਵਾੜ ਬੰਦ ਹੋਵੇ

ਸਮਾਜਿਕ ਸੁਰੱਖਿਆ ਵਿਭਾਗ ਵੱਲੋਂ ਅੰਗਹੀਣ ਦੀਆਂ ਅਸਾਮੀਆਂ ਦਾ ਸਾਂਝਾ ਇਸ਼ਤਿਹਾਰ 2-12-2015 ਨੂੰ ਪੰਜਾਬ ਦੇ ਵੱਖ-ਵੱਖ ਅਖ਼ਬਾਰਾਂ ਵਿਚ ਆਇਆ, ਜਿਸ ਵਿਚ ਪੰਜਾਬ ਟਰਾਸਪੋਰਟ ਵਿਭਾਗ ਵਿਚ ਕਲਰਕਾਂ ਦੀਆਂ 35 ਅਸਾਮੀਆਂ ਸਨ, ਜਿਨ੍ਹਾਂ ਦੀ ਇੰਟਰਵਿਊ 25-7-2016 ਨੂੰ ਹੋ ਗਈ। ਲਗਪਗ ਤਿੰਨ ਮਹੀਨੇ ਤੋਂ ਇਨ੍ਹਾਂ ਅੰਗਹੀਣਾਂ ਨੂੰ ਆਰਡਰ ਨਹੀਂ ਦਿੱਤੇ ਗਏ। ਵਿਭਾਗ ਵੱਲੋਂ ਲਗਾਤਾਰ ਟਾਲ-ਮਟੋਲ ਦੀ ਨੀਤੀ ਅਪਣਾਈ ਹੋਈ ਹੈ। ਵਿਭਾਗ ਦਾ ਕਹਿਣਾ ਕਿ ਸਰਕਾਰ ਵੱਲੋਂ ਡਰਾਇਕੈਸਨ ਤੋਂ ਬਾਅਦ ਆਰਡਰ ਦਿੱਤੇ ਜਾਣਗੇ। ਤਿੰਨ ਮਹੀਨੇ ਤੋਂ ਊਠ ਦਾ ਬੁੱਲ੍ਹ ਡਿਗਣ ਦਾ ਨਾਂਅ ਨਹੀਂ ਲੈ ਰਿਹਾ। ਸਰਕਾਰ ਅਤੇ ਟਰਾਂਸਪੋਰਟ ਮੰਤਰੀ ਨੂੰ ਪਹਿਲਾਂ ਹੀ ਰੱਬ ਦੇ ਮਾਰੇ ਅੰਗਹੀਣਾਂ ਬਾਰੇ ਟਾਲ-ਮਟੋਲ ਦੀ ਨੀਤੀ ਅਪਣਾ ਕੇ ਇਨ੍ਹਾਂ ਦੇ ਜਜ਼ਬਾਤਾਂ ਨਾਲ ਖਿਲਵਾੜ ਨਹੀਂ ਕਰਨਾ ਚਾਹੀਦਾ।

-ਹਰਦੀਪ ਸਿੰਘ
ਪਿੰਡ ਤੇ ਡਾਕ: ਧੂਰੀ
ਮੋ: 9872446935

27-10-2016

 ਈਕੋ ਫ੍ਰੈਂਡਲੀ ਦੀਵਾਲੀ

ਠੰਢੇ-ਮਿੱਠੇ ਮੌਸਮ ਦੀ ਸ਼ੁਰੂਆਤ ਨਾਲ ਹੀ ਤਿਉਹਾਰਾਂ ਦਾ ਆਗਮਨ ਹੁੰਦਾ ਹੈ। ਹਾਲ ਹੀ ਵਿਚ ਦੁਸਹਿਰਾ ਲੰਘਿਆ ਅਤੇ ਥੋੜ੍ਹੇ ਦਿਨ ਪਹਿਲਾਂ ਹੀ ਕਰਵਾ ਚੌਥ ਦਾ ਤਿਉਹਾਰ ਰੌਣਕਾਂ ਲਗਾ ਕੇ ਗਿਆ। ਹੁਣ ਬੜੀ ਹੀ ਬੇਸਬਰੀ ਨਾਲ ਰੌਸ਼ਨੀ ਦੇ ਤਿਉਹਾਰ ਦੀਵਾਲੀ ਦੀ ਉਡੀਕ ਹਰ ਕੋਈ ਕਰ ਰਿਹਾ ਹੈ। ਦੀਵਾਲੀ ਨੂੰ ਹਰ ਧਰਮ ਦੇ ਲੋਕ ਮਾਨਤਾ ਅਨੁਸਾਰ ਅਲੱਗ-ਅਲੱਗ ਤਰੀਕਿਆਂ ਨਾਲ ਮਨਾਉਂਦੇ ਹਨ। ਪ੍ਰੰਤੂ ਸਮੇਂ ਦੇ ਨਾਲ-ਨਾਲ ਦੀਵਾਲੀ ਮਨਾਉਣ ਦੇ ਅੰਦਾਜ਼ ਖ਼ਤਰਨਾਕ ਅਤੇ ਭਿਆਨਕ ਹੁੰਦੇ ਜਾ ਰਹੇ ਹਨ। ਵੱਖ-ਵੱਖ ਤਰ੍ਹਾਂ ਦੇ ਪਟਾਕੇ ਨਾ ਕੇਵਲ ਪੈਸਾ ਬਰਬਾਦ ਕਰਦੇ ਹਨ, ਸਗੋਂ ਕਈ ਹਾਦਸਿਆਂ ਦਾ ਵੀ ਕਾਰਨ ਬਣਦੇ ਹਨ ਅਤੇ ਸਾਡੇ ਵਾਤਾਵਰਨ ਨੂੰ ਪ੍ਰਦੂਸ਼ਿਤ ਵੀ ਕਰਦੇ ਹਨ। ਇਸ ਲਈ ਆਓ, ਇਸ ਵਾਰ ਅਸੀਂ ਦੀਵਾਲੀ ਈਕੋ ਫ੍ਰੈਂਡਲੀ ਮਨਾਈਏ :
* ਆਪਣੇ ਘਰਾਂ ਅਤੇ ਹੋਰ ਅਸਥਾਨਾਂ ਨੂੰ ਦੀਵੇ, ਮੋਮਬੱਤੀਆਂ ਨਾਲ ਰੌਸ਼ਨ ਕਰੋ। ਦੀਵੇ ਅਤੇ ਮੋਮਬੱਤੀਆਂ ਨੂੰ ਵੱਖ-ਵੱਖ ਅਕਾਰਾਂ ਵਿਚ ਲਗਾ ਕੇ ਸੁੰਦਰ ਦ੍ਰਿਸ਼ ਬਣਾਏ ਜਾ ਸਕਦੇ ਹਨ। * ਮਹਿੰਗੇ ਅਤੇ ਹਾਨੀਕਾਰਕ ਪਟਾਕੇ ਨਾ ਖ਼ਰੀਦ ਕੇ ਹਲਕੇ ਤੇ ਛੋਟੇ ਪਟਾਕੇ ਜਿਵੇਂ ਕਿ ਫੁੱਲਝੜੀ ਖ਼ਰੀਦੋ ਤਾਂ ਜੋ ਕਿਸੇ ਤਰ੍ਹਾਂ ਦਾ ਜਾਨੀ-ਮਾਲੀ ਨੁਕਸਾਨ ਨਾ ਹੋਵੇ ਅਤੇ ਪ੍ਰਦੂਸ਼ਣ ਵੀ ਨਾ ਹੋਵੇ। * ਆਪਣੇ ਦੋਸਤਾਂ, ਰਿਸ਼ਤੇਦਾਰਾਂ ਨਾਲ ਤੋਹਫ਼ਿਆਂ ਦਾ ਅਦਾਨ-ਪ੍ਰਦਾਨ ਕਰੋ ਅਤੇ ਵਿਚਾਰ-ਵਟਾਂਦਰਾ ਕਰੋ ਤਾਂ ਜੋ ਸਭ ਪਰਿਵਾਰਕ ਮੈਂਬਰ ਇਕੱਠੇ ਹੋ ਸਕਣ ਅਤੇ ਅੱਜ ਦੀ ਨੌਜਵਾਨ ਪੀੜ੍ਹੀ ਇਸ ਤਿਉਹਾਰ ਦੇ ਪਿਛੋਕੜ ਤੋਂ ਜਾਣੂ ਹੋਏ। * ਬੰਬ, ਪਟਾਕਿਆਂ ਉੱਪਰ ਪੈਸੇ ਬਰਬਾਦ ਕਰਨ ਦੀ ਬਜਾਏ ਕਿਸੇ ਲੋੜਵੰਦ ਇਨਸਾਨ ਨੂੰ ਤੋਹਫ਼ਾ ਦਿਓ ਤਾਂ ਜੋ ਤੁਸੀਂ ਕਿਸੇ ਦੀ ਖੁਸ਼ੀ ਅਤੇ ਦੁਆ ਦੇ ਪਾਤਰ ਬਣ ਸਕੋ।

-ਪ੍ਰੋ: ਰਵਨੀਤ ਕੌਰ
ਪੰਜਾਬ ਕਾਲਜ
ravneetkaur੩੫੮0{ma}&.com

ਮਿਹਰ ਮਿੱਤਲ ਦਾ ਜਾਣਾ

ਮਿਹਰ ਮਿੱਤਲ ਨੂੰ ਭਲਾ ਕੌਣ ਭੁੱਲ ਸਕੇਗਾ? ਪਿੰਡਾਂ ਵਿਚ ਮਿਹਰ 'ਮਿੱਤਰ' ਦੇ ਨਾਂਅ ਨਾਲ ਜਾਣੇ ਜਾਂਦੇ ਮਿਹਰ ਮਿੱਤਲ ਵਿਚ ਕਿਸੇ ਵੇਲੇ ਪੰਜਾਬੀ ਫ਼ਿਲਮਾਂ ਦੀ ਜਾਨ ਬੋਲਦੀ ਸੀ। ਮਿਹਰ ਮਿੱਤਲ ਦੀ ਹੋਂਦ ਨਾਲ ਪੰਜਾਬੀ ਫ਼ਿਲਮ ਨੂੰ ਹਾਸੇ ਦਾ ਰੰਗ ਲੱਗਦਾ ਸੀ, ਚੜ੍ਹਦਾ ਸੀ। ਉਸ ਦਾ ਹਾਸਾ ਅਜੋਕੀਆਂ ਪੰਜਾਬੀ ਫ਼ਿਲਮਾਂ ਦੇ ਫ਼ੋਕੇ ਤੇ ਫਿੱਕੇ ਹਾਸੇ ਜਿਹਾ ਨਹੀਂ ਸੀ, ਉਹ ਤਾਂ ਨਿਰਛਲ ਅਤੇ ਸੁੱਚਾ ਹਾਸਾ ਸੀ, ਅਣਮੁੱਲੇ ਪੰਜਾਬੀ ਸੱਭਿਆਚਾਰ ਦੇ ਛਣਕਦੇ ਬੁੱਲ੍ਹਾਂ ਦਾ ਹਾਸਾ! ਉਹ ਤਾਂ ਰੂਹ ਦਾ ਹਾਸਾ ਸੀ ਜੋ ਦਰਸ਼ਕਾਂ ਦੇ ਜੀਵਨ ਵਿਚ ਇਕ ਨਵਾਂ ਰੌਂਅ ਭਰ ਦਿੰਦਾ ਸੀ। ਮਿਹਰ ਮਿੱਤਲ ਹਾਸਰਸ ਦਾ ਜਿਊਂਦਾ ਜਾਗਦਾ ਰੂਪ ਸੀ। ਇਹੋ ਜਿਹੇ ਕਲਾਕਾਰ ਵੀ ਭਲਾ ਕਦੀ ਮਰਦੇ ਹਨ, ਉਹ ਤਾਂ ਦਰਸ਼ਕਾਂ ਦੇ ਮਨਾਂ ਦੀ ਸਕਰੀਨ 'ਤੇ ਸਦਾ ਹੱਸਦੇ-ਖੇਡਦੇ ਰਹਿੰਦੇ ਹਨ।

-ਬਲਵੀਰ ਮੰਨਣ
ਖੋਜਾਰਥੀ, ਲਵਲੀ ਪ੍ਰੋਫ਼ੈਸ਼ਨਲ ਯੂਨੀਵਰਸਿਟੀ, ਫਗਵਾੜਾ।

26-10-2016

 ਫ਼ਰਕ ਕਿਉਂ?

ਇਕ ਗੱਲ ਵਿਚਾਰਨ ਵਾਲੀ ਹੈ ਕਿ ਇਕ ਅਧਿਆਪਕ ਜੋ ਕਲਾਸ ਵਿਚ ਬੱਚਿਆਂ ਨੂੰ ਪੜ੍ਹਾਉਂਦਾ ਹੈ, ਉਸ ਵੇਲੇ ਤਾਂ ਬੱਚਿਆਂ ਦੀ ਸਮਝ ਵਿਚ ਕੁਝ ਨਹੀਂ ਆਉਂਦਾ ਪਰ ਜਦੋਂ ਉਹੀ ਅਧਿਆਪਕ ਆਪਣੇ ਘਰ ਵਿਚ ਪੜ੍ਹਾਉਂਦਾ ਹੈ ਤਾਂ ਬੱਚੇ ਵੀ ਸਮਝ ਜਾਂਦੇ ਹਨ ਤੇ ਨੰਬਰ ਵੀ ਲੈ ਜਾਂਦੇ ਹਨ। ਇਥੇ ਇਕ ਗੱਲ ਸੋਚਣ ਵਾਲੀ ਹੈ ਕਿ ਇਥੇ ਅਧਿਆਪਕ ਵੀ ਉਹੀ ਹੈ ਤੇ ਬੱਚੇ ਵੀ ਉਹੀ ਜੋ ਕਲਾਸ ਵਿਚ ਅਧਿਆਪਕ ਸਾਹਮਣੇ ਸਨ। ਪਰ ਫਿਰ ਕੀ ਬਦਲਿਆ ਜੋ ਇਥੇ ਫਰਕ ਆਉਂਦਾ ਹੈ। ਜੇਕਰ ਅਸੀਂ ਆਸਾਨ ਸ਼ਬਦਾਂ ਵਿਚ ਸਮਝਣ ਦੀ ਕੋਸ਼ਿਸ਼ ਕਰੀਏ ਤਾਂ ਜ਼ਿਆਦਾ ਲੋਕਾਂ ਕੋਲੋਂ ਇਹੀ ਉੱਤਰ ਸੁਣਨ ਨੂੰ ਮਿਲੇਗਾ ਕਿ ਅਧਿਆਪਕ ਕਲਾਸ ਵਿਚ ਸਹੀ ਨਹੀਂ ਪੜ੍ਹਾਉਂਦੇ ਤਾਂ ਕਿ ਬੱਚੇ ਟਿਊਸ਼ਨ ਲੈਣ ਉਨ੍ਹਾਂ ਕੋਲ ਆਉਣ ਤੇ ਉਨ੍ਹਾਂ ਦੀ ਆਮਦਨ ਵਧਾ ਸਕਣ। ਅਧਿਆਪਕ ਦਾ ਦਰਜਾ ਸਮਾਜ ਵਿਚ ਸਭ ਤੋਂ ਉੱਪਰ ਹੁੰਦਾ ਹੈ ਕਿਉਂਕਿ ਚਾਹੇ ਕੋਈ ਡਾਕਟਰ, ਇੰਜੀਨੀਅਰ ਜਾਂ ਸਾਇੰਸਦਾਨ ਹੈ, ਉਹ ਅਧਿਆਪਕਾਂ ਦੀ ਬਦੌਲਤ ਹੀ ਹੁੰਦਾ ਹੈ ਪਰ ਜਾਪਦਾ ਹੈ ਅੱਜ ਕੁਝ ਕੁ ਅਧਿਆਪਕ ਹਨ ਜੋ ਸਹੀ ਸਿੱਖਿਆ ਦਿੰਦੇ ਹਨ, ਬਿਨਾਂ ਕਿਸੇ ਲਾਲਚ ਦੇ।

-ਸੰਦੀਪ ਸਿੰਘ
ਮੋਬਾਈਲ : 95929-43369.

ਅਵਾਰਾ ਫਿਰਦੇ ਪਸ਼ੂਆਂ ਦੇ ਝੁੰਡ

ਅੱਜ ਪੰਜਾਬ ਦਾ ਸ਼ਾਇਦ ਹੀ ਕੋਈ ਅਜਿਹਾ ਸ਼ਹਿਰ, ਪਿੰਡ ਜਾਂ ਇਨ੍ਹਾਂ ਨੂੰ ਆਪਸ ਵਿਚ ਮਿਲਾਉਂਦੀ ਕੋਈ ਸੜਕ ਹੋਵੇਗੀ, ਜਿਸ ਉਤੇ ਸਾਨੂੰ ਅਵਾਰਾ ਫਿਰਦੇ ਪਸ਼ੂਆਂ ਦੇ ਝੁੰਡ ਦਿਖਾਈ ਨਾ ਦਿੰਦੇ ਹੋਣ। ਥਾਂ-ਥਾਂ ਫਿਰਦੇ ਅਵਾਰਾ ਪਸ਼ੂਆਂ ਦੇ ਇਹ ਝੁੰਡ ਦਿਨ-ਬਦਿਨ ਸਾਡੇ ਸਭ ਲਈ ਬੇਹੱਦ ਖ਼ਤਰਨਾਕ ਹੁੰਦੇ ਜਾ ਰਹੇ ਹਨ। ਸਭ ਤੋਂ ਪਹਿਲਾਂ ਦੇਖਿਆ ਜਾਵੇ ਤਾਂ ਐਕਸੀਡੈਂਟਾਂ ਵਿਚ ਅਨੇਕਾਂ ਮਨੁੱਖੀ ਜਾਨਾਂ ਅਵਾਰਾ ਪਸ਼ੂਆਂ ਦੇ ਕਰਕੇ ਹੁੰਦੇ ਐਕਸੀਡੈਂਟਾਂ ਵਿਚ ਅਜਾਈਂ ਜਾ ਰਹੀਆਂ ਹਨ। ਅਨੇਕਾਂ ਵਾਰੀ ਕੋਈ ਮਨੁੱਖ ਜਦੋਂ ਆਪਣੇ ਕਿਸੇ ਵਾਹਨ ਖ਼ਾਸ ਕਰਕੇ ਮੋਟਰਸਾਈਕਲ ਆਦਿ ਉਪਰ ਆਪਣਾ ਸਫ਼ਰ ਤੈਅ ਕਰ ਰਿਹਾ ਹੁੰਦਾ ਹੈ ਤਾਂ ਅਚਨਚੇਤ ਸੜਕ ਦੇ ਆਸੇ-ਪਾਸੇ ਦੇ ਖੇਤਾਂ ਵਿਚੋਂ ਜਾਂ ਗਲੀਆਂ ਆਦਿ ਵਿਚੋਂ ਦੌੜਦੇ ਹੋਏ ਇਹ ਅਵਾਰਾ ਪਸ਼ੂ ਇਕਦਮ ਵਾਹਨ ਅੱਗੇ ਆ ਜਾਂਦੇ ਹਨ। ਅਜਿਹੀ ਸਥਿਤੀ ਵਿਚ ਬਹੁਤ ਸਾਰੇ ਵਾਹਨ ਚਾਲਕ ਇਨ੍ਹਾਂ ਨਾਲ ਟਕਰਾ ਕੇ ਜਾਂ ਇਨ੍ਹਾਂ ਨੂੰ ਬਚਾਉਂਦੇ ਹੋਏ ਆਪਣਾ ਅਜਿਹਾ ਸੰਤੁਲਨ ਗਵਾ ਬੈਠਦੇ ਹਨ, ਜਿਸ ਨਾਲ ਉਹ ਪੱਕੀ ਸੜਕ ਉੱਪਰ ਡਿਗ ਕੇ ਅਤੇ ਬੁਰੀ ਤਰ੍ਹਾਂ ਜ਼ਖ਼ਮੀ ਹੋ ਕੇ ਸਾਰੀ ਉਮਰ ਲਈ ਅਪਾਹਜ ਹੋ ਜਾਂਦੇ ਹਨ ਜਾਂ ਕਈ ਵਾਰ ਮੌਤ ਦੇ ਮੂੰਹ ਵਿਚ ਵੀ ਚਲੇ ਜਾਂਦੇ ਹਨ। ਇਸ ਤੋਂ ਇਲਾਵਾ ਇਨ੍ਹਾਂ ਅਵਾਰਾ ਫਿਰਦੇ ਪਸ਼ੂਆਂ ਦੁਆਰਾ ਕਿਸਾਨਾਂ ਦੇ ਖੇਤਾਂ ਵਿਚ ਵੜ ਕੇ ਉਨ੍ਹਾਂ ਦੀਆਂ ਫ਼ਸਲਾਂ ਦਾ ਬੇਹੱਦ ਉਜਾੜਾ ਵੀ ਕੀਤਾ ਜਾਂਦਾ ਹੈ। ਇਨ੍ਹਾਂ ਅਵਾਰਾ ਫਿਰਦੇ ਪਸ਼ੂਆਂ ਤੋਂ ਆਪਣੀਆਂ ਫ਼ਸਲਾਂ ਨੂੰ ਬਚਾਉਣ ਲਈ ਕਈ ਕਿਸਾਨਾਂ ਵੱਲੋਂ ਤਾਂ ਠੰਢ ਦੇ ਮਹੀਨਿਆਂ ਵਿਚ ਸਾਰੀ-ਸਾਰੀ ਰਾਤ ਜਾਗ ਕੇ ਕੱਟਣ ਲਈ ਵੀ ਮਜਬੂਰ ਹੋਣਾ ਪੈਂਦਾ ਹੈ। ਸਰਕਾਰ ਨੂੰ ਦਿਨ-ਬਦਿਨ ਗੰਭੀਰ ਹੁੰਦੀ ਜਾ ਰਹੀ ਇਸ ਸਮੱਸਿਆ ਦੇ ਹੱਲ ਲਈ ਕੋਈ ਠੋਸ ਨੀਤੀ ਘੜਨੀ ਚਾਹੀਦੀ ਹੈ ਤਾਂ ਜੋ ਲੋਕਾਂ ਦੇ ਜਾਨ-ਮਾਲ ਦੀ ਰੱਖਿਆ ਦੇ ਨਾਲ-ਨਾਲ ਦੇਸ਼ ਦੀ ਬਰਬਾਦ ਹੋ ਰਹੀ ਸੁੰਦਰਤਾ ਨੂੰ ਬਚਾਇਆ ਜਾ ਸਕੇ।

-ਰਾਜਾ ਗਿੱਲ ਚੜਿੱਕ
ਪਿੰਡ ਤੇ ਡਾਕ: ਚੜਿੱਕ (ਮੋਗਾ)।
ਮੋਬਾਈਲ : 94654-11585.

25-10-2016

 ਭਾਸ਼ਾ ਨਾਲ ਵਿਤਕਰਾ ਕਿਉਂ?

ਕੇਂਦਰ ਸ਼ਾਸ਼ਤ ਪ੍ਰਦੇਸ਼ ਚੰਡੀਗੜ੍ਹ ਪੰਜਾਬ ਦੇ ਪਿੰਡਾਂ ਨੂੰ ਉਜਾੜ ਕੇ ਵਸਾਇਆ ਗਿਆ ਸੀ। ਇਸ ਸ਼ਹਿਰ ਵਿਚ ਪੰਜਾਬੀ ਹਿਤੈਸ਼ੀਆਂ ਦੀ ਅੱਜ ਵੀ ਬਹੁਤਾਤ ਹੈ ਪਰ ਦੁੱਖ ਇਸ ਗੱਲ ਦਾ ਹੈ ਕਿ ਇਸ ਸ਼ਹਿਰ ਵਿਚ ਪੰਜਾਬੀ ਭਾਸ਼ਾ ਨੂੰ ਉਹ ਮਾਣ-ਸਨਮਾਨ ਨਹੀਂ ਮਿਲਿਆ, ਜਿਸ ਦੀ ਉਹ ਹੱਕਦਾਰ ਹੈ। ਪਿਛਲੇ ਦਿਨੀਂ ਚੰਡੀਗੜ੍ਹ ਦੇ ਪੰਜਾਬੀ ਲੇਖਕਾਂ, ਵਿਦਵਾਨਾਂ ਤੇ ਪੰਜਾਬੀ ਪ੍ਰੇਮੀਆਂ ਨੇ ਇਕ ਮੱਤ ਹੁੰਦਿਆਂ ਪੰਜਾਬੀ ਭਾਸ਼ਾ ਨੂੰ ਮਾਣ-ਸਨਮਾਨ ਦਿਵਾਉਣ ਲਈ ਰੋਸ ਧਰਨੇ, ਭੁੱਖ ਹੜਤਾਲਾਂ ਤੇ ਗ੍ਰਿਫਤਾਰੀਆਂ ਦੇਣ ਦਾ ਪ੍ਰੋਗਰਾਮ ਉਲੀਕਿਆ ਹੈ। ਉਲੀਕਿਆ ਗਿਆ ਪ੍ਰੋਗਰਾਮ ਇਸ ਗੱਲ ਦੀ ਸ਼ਾਹਦੀ ਭਰਦਾ ਹੈ ਕਿ ਪੰਜਾਬੀਆਂ ਨੂੰ ਆਪਣਾ ਬਣਦਾ ਹੱਕ ਲੈਣ ਲਈ ਸੰਘਰਸ਼ਾਂ ਦੇ ਰਾਹ ਤੁਰਨਾ ਪੈਂਦਾ ਹੈ।
ਪੰਜਾਬੀਆਂ ਨਾਲ ਕੀਤਾ ਜਾਂਦਾ ਮਾੜਾ ਵਤੀਰਾ ਸਮੂਹ ਪੰਜਾਬੀਆਂ ਨੂੰ ਠੇਸ ਪਹੁੰਚਾਉਂਦਾ ਹੈ। ਪੰਜਾਬੀ ਭਾਸ਼ਾ ਦੀ ਹੋਂਦ ਨੂੰ ਬਰਕਰਾਰ ਰੱਖਣਾ ਪੰਜਾਬੀ ਹਿਤੈਸ਼ੀਆਂ ਦਾ ਮੁਢਲਾ ਫਰਜ਼ ਹੈ। ਪੰਜਾਬੀ ਭਾਸ਼ਾ ਦੀ ਦੁਰਦਸ਼ਾ ਨੂੰ ਸਵੀਕਾਰਿਆ ਨਹੀਂ ਜਾ ਸਕਦਾ। ਪੰਜਾਬੀ ਹੋਰ ਭਾਸ਼ਾਵਾਂ ਦੇ ਵਿਰੋਧੀ ਨਹੀਂ ਪਰ ਮਾਤ ਭਾਸ਼ਾ ਨਾਲ ਹੁੰਦਾ ਵਖਰੇਵਾਂ ਅਸਹਿਣਯੋਗ ਹੈ। ਪੰਜਾਬੀ ਲੇਖਕ ਲਗਪਗ ਅੱਧੀ ਸਦੀ ਤੋਂ ਚੰਡੀਗੜ੍ਹ ਦੇ ਨਾਲ-ਨਾਲ ਪੰਜਾਬ ਵਿਚ ਭਾਸ਼ਾ ਨੂੰ ਬਣਦਾ ਹੱਕ ਦੁਆਉਣ ਲਈ ਸੰਘਰਸ਼ ਕਰਦੇ ਆ ਰਹੇ ਹਨ ਪਰ ਲੇਖਕਾਂ ਦੀਆਂ ਮੰਗਾਂ ਵੱਲ ਧਿਆਨ ਨਹੀਂ ਦਿੱਤਾ ਜਾਂਦਾ। ਭਾਸ਼ਾ ਦੇ ਮਾਮਲੇ 'ਤੇ ਇਕੱਲੇ ਲੇਖਕਾਂ ਨੂੰ ਨਹੀਂ, ਸਗੋਂ ਸਮੂਹ ਪੰਜਾਬੀਆਂ ਨੂੰ ਅੱਗੇ ਆਉਣਾ ਪਵੇਗਾ। ਚੰਡੀਗੜ੍ਹ ਦੇ ਲੇਖਕਾਂ ਵੱਲੋਂ ਵਿੱਢਿਆ ਸੰਘਰਸ਼ ਇਕ ਦਿਨ ਜ਼ਰੂਰ ਰੰਗ ਲਿਆਏਗਾ।

-ਬੰਤ ਘੁਡਾਣੀ,
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ (ਲੁਧਿਆਣਾ)।
ਮੋਬਾ: 98551-81104

ਬੇਤੁਕੀਆਂ ਨੀਤੀਆਂ

ਬੇਰੁਜ਼ਗਾਰੀ, ਗ਼ਰੀਬੀ, ਮਹਿੰਗਾਈ, ਔਰਤਾਂ ਨਾਲ ਹੋ ਰਹੇ ਜ਼ੁਲਮਾਂ ਵੱਲ ਧਿਆਨ ਕੇਂਦਰਿਤ ਕਰਨ ਦੀ ਬਜਾਏ ਕੇਂਦਰ ਸਰਕਾਰ 'ਸਮਾਰਟ ਸਿਟੀ' ਪਿੰਡ ਗੋਦ ਲੈਣ 'ਤੇ ਜ਼ੋਰ ਦੇ ਰਹੀ ਹੈ ਤੇ 'ਸਮਾਰਟ ਸਿਟੀ' 'ਤੇ ਕਰੋੜਾਂ ਰੁਪਿਆ ਲਾਉਣ ਦੀ ਨੀਤੀ ਬਣਾਈ ਬੈਠੀ ਹੈ। ਪਿੰਡ ਗੋਦ ਲੈਣ ਵਾਲੇ 'ਤੇ ਮੰਤਰੀ, ਸੰਸਦ ਮੈਂਬਰ ਬਾਕੀ ਪਿੰਡਾਂ ਨੂੰ ਨਜ਼ਰਅੰਦਾਜ਼ ਕਰਕੇ ਆਪਣੇ ਅਖ਼ਤਿਆਰੀ ਫੰਡ ਦੀ ਖੁੱਲ੍ਹ ਵਰਤਾ ਰਿਹਾ ਹੈ। ਸਾਰੇ ਸ਼ਹਿਰਾਂ, ਪਿੰਡਾਂ ਦੇ ਵਿਕਾਸ ਵਾਲੀ ਨਿਰਪੱਖ ਸੰਤੁਲਨ ਨੀਤੀ ਬਣਾਉਣ ਵਿਚ ਕਿਉਂ ਨਹੀਂ ਰੁਚੀ ਵਿਖਾਈ ਜਾਂਦੀ।
ਸਮਾਰਟ ਸਿਟੀ ਤੇ ਗੋਦ ਲਏ ਪਿੰਡਾਂ ਦੀ ਕਾਇਆ-ਕਲਪ ਕਰਨ ਦੀ ਬੇਤੁਕੀ ਨੀਤੀ ਵਿਚ ਸਰਕਾਰ ਮਗਨ ਹੈ। ਦੂਸਰੇ ਸ਼ਹਿਰਾਂ ਤੇ ਪਿੰਡਾਂ ਨੂੰ ਬਣਦੀਆਂ ਸਹੂਲਤਾਂ ਤੋਂ ਮੁੱਖ ਮੋੜਿਆ ਜਾ ਰਿਹਾ ਹੈ। ਸਮੁੱਚੇ ਵਿਕਾਸ ਦੀ ਨੀਤੀ 'ਤੇ ਜ਼ੋਰ ਦੇਣਾ ਚਾਹੀਦੈ।
ਬੇਰੁਜ਼ਗਾਰੀ, ਗਰੀਬੀ, ਮਹਿੰਗਾਈ 'ਤੇ ਨਕੇਲ ਕੱਸਣ ਲਈ ਕੇਂਦਰ ਸਰਕਾਰ ਨੂੰ (ਮੁੱਖ ਤੌਰ 'ਤੇ) ਠੋਸ ਨੀਤੀ ਬਣਾਉਣ ਵਿਚ ਵੀ ਜਿਥੇ ਆਪਣਾ ਤਨ, ਮਨ ਤੇ ਧਨ ਲਾਉਣਾ ਚਾਹੀਦੈ, ਉਥੇ ਔਰਤਾਂ 'ਤੇ ਰੌਂਗਟੇ ਖੜ੍ਹੇ ਕਰਨ ਵਾਲੇ ਜ਼ੁਲਮਾਂ ਨੂੰ ਸਖ਼ਤੀ ਨਾਲ ਕੁਚਲਣ ਲਈ ਵੀ ਰਾਜ ਦੀਆਂ ਸਰਕਾਰਾਂ ਨਾਲ ਮਿਲ ਕੇ ਠੋਸ ਉਪਰਾਲੇ ਕਰਨੇ ਚਾਹੀਦੇ ਹਨ।

-ਸੁੰਦਰ ਲਾਲ ਪ੍ਰੇਮੀ
ਜੈਤੋ।

24-10-2016

 ... ਸਦੀਓਂ ਨੇ ਸਜ਼ਾ ਪਾਈ

ਬ੍ਰਿਗੇਡੀਅਰ ਕੁਲਦੀਪ ਸਿੰਘ ਕਾਹਲੋਂ ਵੱਲੋਂ ਕਸ਼ਮੀਰ ਦੀ ਉਲਝੀ ਤਾਣੀ ਬਾਰੇ ਲਿਖਿਆ ਖੋਜ ਭਰਪੂਰ ਲੇਖ 'ਅਜੀਤ' ਰਾਹੀਂ ਦੋ ਕਿਸ਼ਤਾਂ ਵਿਚ ਪੜ੍ਹਿਆ। ਸਾਡੇ ਦੇਸ਼ ਵਿਖੇ ਹਰ ਕਾਰਜ ਵਿਚ ਸਿਆਸੀ ਦਖਲ ਕਰਮਚਾਰੀਆਂ, ਅਧਿਕਾਰੀਆਂ ਤੇ ਜਵਾਨਾਂ ਦੇ ਮਨੋਬਲ ਨੂੰ ਢਾਅ ਲਾਉਂਦਾ ਹੈ। ਰਾਖਵਾਂਕਰਨ ਯੋਗਤਾ ਵਿਚ ਸਿੱਧਾ ਵਿਤਕਰਾ ਹੈ। ਇਸ ਲਈ ਕਈ ਪੱਖਾਂ ਤੋਂ ਦੂਜੇ ਮੁਲਕਾਂ ਦੇ ਮੁਕਾਬਲੇ ਅਸੀਂ ਕੁਝ ਵੀ ਨਹੀਂ ਹਾਂ।
ਪਾਕਿਸਤਾਨ ਨੇ 22 ਅਕਤੂਬਰ, 1947 ਤੋਂ ਕਸ਼ਮੀਰ ਵਿਚ ਘੁਸਪੈਠ ਸ਼ੁਰੂ ਕਰ ਦਿੱਤੀ ਸੀ। ਸਾਡੇ ਦਲੇਰ ਅਤੇ ਸੂਝਵਾਨ ਫੌਜੀ ਅਫਸਰਾਂ ਨੇ ਬਿਹਤਰੀਨ ਢੰਗ ਨਾਲ ਦੁਸ਼ਮਣ ਨੂੰ ਗੁੱਠੇ ਲਾਇਆ। ਇਸ ਲੜਾਈ ਦਾ ਸਾਰਾ ਸਨਮਾਨ ਜਨਰਲ ਹਰਬਖਸ਼ ਸਿੰਘ ਨੂੰ ਜਾਂਦਾ ਹੈ। ਮਈ, 1948 ਵਿਚ ਘੁਸਪੈਠੀਆਂ ਦੇ ਰੂਪ ਵਿਚ ਪਾਕਿਸਤਾਨੀ ਫੌਜ ਨੂੰ ਕਸ਼ਮੀਰ ਵਿਚੋਂ ਪੂਰੀ ਤਰ੍ਹਾਂ ਕੱਢਣ ਲਈ ਕੁਝ ਸਮਾਂ ਹੋਰ ਲੱਗਣਾ ਸੀ। ਪਰ ਸਾਡੇ ਉਸ ਸਮੇਂ ਦੇ ਹਾਕਮ ਅਮਨ ਦੇ ਪੁਜਾਰੀਆਂ ਨੇ ਆਗਿਆ ਨਹੀਂ ਦਿੱਤੀ ਤੇ ਜੰਗਬੰਦੀ ਦਾ ਹੁਕਮ ਚਾੜ੍ਹ ਦਿੱਤਾ। 69 ਸਾਲ ਤੋਂ ਮਸਲਾ ਜਿਉਂ ਦਾ ਤਿਉਂ ਹੀ ਹੈ। ਜੇਕਰ ਫੌਜ ਦੀ ਗੱਲ ਮੰਨੀ ਹੁੰਦੀ, ਸਾਰਾ ਕਸ਼ਮੀਰ ਭਾਰਤ ਵਿਚ ਹੁੰਦਾ ਤੇ ਕੋਈ ਮਸਲਾ ਹੀ ਨਹੀਂ ਰਹਿਣਾ ਸੀ। ਠੀਕ ਕਿਹਾ ਹੈ-
ਤਾਰੀਖ ਕੀ ਨਜ਼ਰੋਂ ਨੇ ਵੁਹ ਦੌਰ ਭੀ ਦੇਖੇ ਹੈ,
ਲਮਹੋਂ ਨੇ ਖ਼ਤਾ ਕੀ ਥੀ ਸਦੀਓਂ ਨੇ ਸਜ਼ਾ ਪਾਈ।

-ਮਾ: ਮਹਿੰਦਰ ਸਿੰਘ ਸਿੱਧੂ,
ਸਿੱਧਵਾਂ ਕਲਾਂ (ਲੁਧਿਆਣਾ)। ਮੋਬਾ: 98720-86101

ਵਿਚਾਰੇ ਗ਼ਰੀਬ ਮਰੀਜ਼

ਦਿਨੋ-ਦਿਨ ਬਿਮਾਰੀਆਂ ਵਧ ਰਹੀਆਂ ਹਨ। ਇਕ ਬਿਮਾਰੀ ਦਾ ਹੱਲ ਨਹੀਂ ਹੁੰਦਾ, ਹੋਰ ਨਵੀਂ ਬਿਮਾਰੀ ਆ ਜਾਂਦੀ ਹੈ। ਕਿਸੇ ਵੀ ਤਰ੍ਹਾਂ ਦੀ ਬਿਮਾਰੀ ਲੱਗਣੀ ਜਾਂ ਬਿਮਾਰ ਹੋਣ ਦਾ ਹਰ ਇਕ ਨੂੰ ਡਰ ਰਹਿੰਦਾ ਹੈ। ਬਿਮਾਰੀਆਂ ਹਰ ਇਕ ਨੂੰ ਚਿੱਚੜ ਵਾਂਗ ਚਿੰਬੜ ਰਹੀਆਂ ਹਨ। ਜੇ ਹਸਪਤਾਲਾਂ ਦੀ ਗੱਲ ਕਰੀਏ ਤਾਂ ਮਰੀਜ਼ ਦਵਾਈ ਨਹੀਂ ਲੈ ਸਕਦਾ, ਜਿਸ ਦੀ ਕੀਮਤ ਬਹੁਤ ਜ਼ਿਆਦਾ ਹੁੰਦੀ ਹੈ। ਲੋਕ ਸਰਕਾਰੀ ਹਸਪਤਾਲਾਂ ਵਿਚ ਜਾਂਦੇ ਹਨ। ਡਾਕਟਰ ਜਿਹੜੀ ਦਵਾਈ ਲਿਖਦਾ ਹੈ, ਉਹ ਦਵਾਈ ਹਸਪਤਾਲ ਵਿਚੋਂ ਨਹੀਂ ਮਿਲਦੀ। ਉਹ ਹਸਪਤਾਲ ਤੋਂ ਬਾਹਰ ਦਵਾਈਆਂ ਵਾਲੀ ਦੁਕਾਨ ਤੋਂ ਮਿਲੂ ਪਰ ਦੁਕਾਨਾਂ ਵਾਲੇ ਮਰੀਜ਼ਾਂ ਦੀ ਜੇਬ ਉੱਪਰ ਡਾਕਾ ਮਾਰਦੇ ਹਨ। ਮਰੀਜ਼ ਦਵਾਈ ਦੀ ਕੀਮਤ ਸੁਣ ਕੇ ਆਪਣੇ-ਆਪ ਨੂੰ ਕੋਸਦਾ ਰਹਿ ਜਾਂਦਾ ਹੈ। ਕਈ ਵਾਰ ਮਰੀਜ਼ਾਂ ਨੂੰ ਦਵਾਈ ਵੀ ਸਹੀ ਨਹੀਂ ਮਿਲਦੀ। ਨਕਲੀ ਦਵਾਈਆਂ ਖਾ-ਖਾ ਕੇ ਮਰੀਜ਼ ਠੀਕ ਹੋਣ ਦੀ ਥਾਂ ਜ਼ਿਆਦਾ ਬਿਮਾਰ ਹੋ ਜਾਂਦਾ ਹੈ। ਖਾਸ ਕਰਕੇ ਅਨਪੜ੍ਹ ਵਿਅਕਤੀ ਨੂੰ ਇਸ ਪ੍ਰਤੀ ਬਹੁਤ ਪ੍ਰੇਸ਼ਾਨੀਆਂ ਆਉਂਦੀਆਂ ਹਨ। ਜੇ ਉਹ ਡਾਕਟਰ ਬਾਰੇ ਵੀ ਪੁੱਛਦਾ ਹੈ, ਤਾਂ ਉਸ ਨੂੰ ਕੋਈ ਦੱਸਣ ਲਈ ਤਿਆਰ ਨਹੀਂ। ਮਰੀਜ਼ਾਂ ਪ੍ਰਤੀ ਸਿਹਤ ਵਿਭਾਗ ਨੂੰ ਗੰਭੀਰਤਾ ਨਾਲ ਸੋਚਣ ਦੀ ਲੋੜ ਹੈ। ਸਿਹਤ ਵਿਭਾਗ ਨੂੰ ਚਾਹੀਦਾ ਹੈ ਕਿ ਉਹ ਪਿੰਡ-ਪਿੰਡ ਜਾ ਕੇ ਕੈਂਪ ਲਾਉਣ ਤੇ ਮਰੀਜ਼ਾਂ ਨੂੰ ਧਿਆਨ ਨਾਲ ਇਲਾਜ ਪ੍ਰਤੀ ਜਾਗਰੂਕ ਕਰਨ। ਇਸ ਤੋਂ ਬਚਣ ਦਾ ਸਹੀ ਢੰਗ ਦੱਸਣ, ਤਾਂ ਜੋ ਲੋਕ ਬਿਮਾਰੀ ਦੇ ਸ਼ਿਕਾਰ ਹੀ ਨਾ ਹੋਣ ਤੇ ਬਿਮਾਰੀਆਂ ਤੋਂ ਬਚੇ ਰਹਿਣ।

-ਗੁਰਜੰਟ ਸਿੰਘ,
ਪਿੰਡ ਚੁਹਾਣਕੇ ਖੁਰਦ, ਤਹਿ: ਤੇ ਜ਼ਿਲ੍ਹਾ ਬਰਨਾਲਾ। ਮੋਬਾ: 95016-24038

ਭਾਰਤ-ਪਾਕਿ ਸੰਬੰਧ

ਸੰਨ 1947 ਨੂੰ ਹਿੰਦੁਸਤਾਨ ਦੀ ਵੰਡ ਭਾਰਤ ਤੇ ਪਾਕਿਸਤਾਨ ਦੇ ਰੂਪ ਵਿਚ ਹੋਈ ਸੀ। ਪਾਕਿਸਤਾਨ ਇਕ ਇਸਲਾਮਿਕ ਦੇਸ਼ ਬਣਿਆ ਸੀ ਤੇ ਭਾਰਤ ਇਕ ਸੈਕੂਲਰ ਦੇਸ਼। ਪਰ ਦੋਵਾਂ ਹੀ ਦੇਸ਼ਾਂ ਵਿਚ ਹਿੰਦੂ, ਮੁਸਲਮਾਨ ਤੇ ਸਿੱਖ ਰਹਿੰਦੇ ਹਨ। ਭਾਰਤ ਵਿਚ ਖਾਸ ਕਰਕੇ 35 ਕਰੋੜ ਮੁਸਲਮਾਨ ਰਹਿੰਦੇ ਹਨ। ਵੰਡ ਤੋਂ ਬਾਅਦ ਕਸ਼ਮੀਰ ਦੇ ਮਸਲੇ ਕਾਰਨ ਇਨ੍ਹਾਂ ਦੇਸ਼ਾਂ ਵਿਚਕਾਰ ਤਿੰਨ ਜੰਗਾਂ ਹੋ ਚੁੱਕੀਆਂ ਹਨ। ਜੰਗ ਤੋਂ ਬਿਨਾਂ ਪਾਕਿਸਤਾਨੀ ਅੱਤਵਾਦੀ ਕਸ਼ਮੀਰ ਵਿਚ ਘੁਸਪੈਠ ਕਰਦੇ ਰਹਿੰਦੇ ਹਨ। ਫੌਜੀਆਂ, ਸ਼ਕਤੀ ਬਲਾਂ ਤੇ ਸਿਵਲੀਅਨ ਲੋਕਾਂ ਦੀਆਂ ਮੌਤਾਂ ਰੋਜ਼ਾਨਾ ਦੀ ਕਹਾਣੀ ਬਣ ਚੁੱਕੀ ਹੈ। ਦੂਜੇ ਪਾਸੇ ਇਨ੍ਹਾਂ ਮੁਲਕਾਂ ਵਿਚਕਾਰ ਵਪਾਰ ਚਲਦਾ ਰਹਿੰਦਾ ਹੈ। ਅਜੋਕੇ ਦੌਰ ਵਿਚ ਦੁਨੀਆ ਇਕ ਪਿੰਡ ਵਾਂਗ ਬਣ ਚੁੱਕੀ ਹੈ। ਸੰਸਾਰ ਦੇ ਉੱਨਤ ਦੇਸ਼ਾਂ ਵਿਚ ਰਹਿੰਦੇ ਭਾਰਤੀ ਤੇ ਪਾਕਿਸਤਾਨੀ ਨਾਗਰਿਕ ਅਮਨ ਤੇ ਮਿਲਜੁਲ ਕੇ ਰਹਿੰਦੇ ਹਨ। ਉਨ੍ਹਾਂ ਦੇਸ਼ਾਂ ਵਿਚ ਧਰਮ ਦੀ ਲੜਾਈ ਨਹੀਂ ਹੁੰਦੀ। ਸੰਸਾਰ ਦੇ ਬਦਲੇ ਹੋਏ ਹਾਲਾਤ ਅਨੁਸਾਰ ਅੱਜ ਇਸ ਗੱਲ ਦੀ ਵੱਡੀ ਲੋੜ ਹੈ ਕਿ ਦੋਵਾਂ ਦੇਸ਼ਾਂ ਵਿਚਕਾਰਲੀ ਸਰਹੱਦ ਖ਼ਤਮ ਕਰਕੇ ਇਹ ਦੋਵੇਂ ਦੇਸ਼ ਮੁੜ ਤੋਂ ਇਕ ਦੇਸ਼ ਬਣ ਜਾਣ। ਇਸ ਨਾਲ ਇਸ ਖਿੱਤੇ ਵਿਚ ਅਮਨ-ਸ਼ਾਂਤੀ ਬਹਾਲ ਹੋਣ ਨਾਲ ਦੋਵਾਂ ਦੇਸ਼ਾਂ ਦੇ ਲੋਕ ਖੁਸ਼ਹਾਲ ਹੋ ਜਾਣਗੇ। ਦੋਵਾਂ ਦੇਸ਼ਾਂ ਦੇ ਅਮਨ ਪਸੰਦ ਲੋਕ ਭਾਰਤ-ਪਾਕਿ ਏਕਤਾ ਦਾ ਭਰਪੂਰ ਸੁਆਗਤ ਕਰਨਗੇ। ਸਾਰੀਆਂ ਲੜਾਈਆਂ-ਝਗੜੇ ਆਪਣੇ-ਆਪ ਖਤਮ ਹੋ ਜਾਣਗੇ।

-ਇੰਜੀ: ਕੁਲਦੀਪ ਸਿੰਘ ਲੁੱਧਰ,
ਗੁਰੂ ਨਾਨਕ ਵਾੜਾ, ਅੰਮ੍ਰਿਤਸਰ।

 

21-10-2016

 ਸ਼ਬਦੀ ਚਾਂਦਮਾਰੀ

ਪਾਕਿਸਤਾਨ ਦੇ ਫ਼ੌਜ ਮੁਖੀ ਜਨਰਲ ਸ਼ਰੀਫ਼ ਨੇ ਇਕ ਖ਼ਬਰ ਅਨੁਸਾਰ ਭਾਰਤ ਨੂੰ ਲਲਕਾਰ ਕੇ ਕਿਹਾ ਹੈ ਜੇ ਜੰਗ ਹੋਈ ਤਾਂ ਭਾਰਤ ਨੂੰ ਕਾਬਲੇ ਬਰਦਾਸ਼ਤ ਨੁਕਸਾਨ ਸਹਿਣਾ ਪਵੇਗਾ ਇਕ ਬਹੁਤ ਹੀ ਹਾਸੋਹੀਣੀ, ਬੇਸਮਝੀ ਵਾਲੀ ਗੱਲ ਹੈ। ਸਾਰੀ ਦੁਨੀਆ ਜਾਣਦੀ ਹੈ ਕਿ ਫ਼ੌਜੀ ਸਮਰੱਥਾ ਅਨੁਸਾਰ ਪਾਕਿਸਤਾਨ ਭਾਰਤ ਨਾਲੋਂ ਬਹੁਤ ਕਮਜ਼ੋਰ ਹੈ ਤੇ ਸ਼ਬਦੀ ਚਾਂਦਮਾਰੀ 'ਤੇ ਆ ਗਿਆ ਹੈ। ਪਾਕਿਸਤਾਨ ਪਹਿਲਾਂ ਤਾਂ ਸਰਹੱਦਾਂ 'ਤੇ ਨਾਜਾਇਜ਼ ਗੋਲੀਆਂ ਚਲਾਉਂਦਾ ਸੀ, ਹੁਣ ਗਿੱਦੜ ਭਬਕੀਆਂ 'ਤੇ ਆ ਗਿਆ ਹੈ। ਲਗਦਾ ਹੈ ਪਾਕਿਸਤਾਨ ਪ੍ਰਸਥਿਤੀਆਂ ਵਿਚ ਘਿਰਨ ਕਰਕੇ ਆਪਣਾ ਤਵਾਜ਼ਨ ਗੁਆ ਚੁੱਕਾ ਹੈ। ਪਾਕਿਸਤਾਨ ਨੂੰ ਚਲਾਉਣ ਵਾਲੀਆਂ ਤਿੰਨ ਸ਼ਕਤੀਆਂ ਬਣ ਗਈਆਂ ਹਨ। ਅੱਤਵਾਦੀ, ਫ਼ੌਜੀ ਸ਼ਕਤੀ ਤੇ ਲੋਕਤੰਤਰ, ਪਰ ਲੋਕਤੰਤਰ ਸਭ ਤੋਂ ਕਮਜ਼ੋਰ ਕੜੀ ਹੈ। ਹੁਣ ਪਾਕਿਸਤਾਨ ਨੂੰ ਇਹ ਸ਼ਬਦੀ ਚਾਂਦਮਾਰੀ ਨੂੰ ਛੱਡ ਕੇ, ਇਕ ਮੇਜ਼ 'ਤੇ ਬੈਠ ਕੇ ਆਪਸੀ ਮਸਲੇ ਹੱਲ ਕਰਨੇ ਚਾਹੀਦੇ ਹਨ। ਲੋਕ ਤਾਂ ਦੋਸਤੀ ਤੇ ਪਿਆਰ ਚਾਹੁੰਦੇ ਹਨ ਪਰ ਸੱਤਾ 'ਤੇ ਬੈਠੇ ਲੋਕ ਵੰਡੀਆਂ ਪਾਉਂਦੇ ਹਨ।

-ਪ੍ਰੋ: ਜਤਿੰਦਰਬੀਰ ਸਿੰਘ ਨੰਦਾ
ਲੁਧਿਆਣਾ।

ਪਾਣੀ ਦੀ ਦੁਰਵਰਤੋਂ

ਪਾਣੀ ਦੀ ਦੁਰਵਰਤੋਂ ਤਾਂ ਹੀ ਰੋਕੀ ਜਾ ਸਕਦੀ ਹੈ, ਜੇਕਰ ਪਾਣੀ ਦੀਆਂ ਮੋਟਰਾਂ 'ਤੇ ਮੀਟਰ ਲਾ ਕੇ ਰੀਡਿੰਗ ਕਰਕੇ ਬਿੱਲਾਂ ਦੀ ਵਿਵਸਥਾ ਕੀਤੀ ਜਾਵੇ ਤਾਂ ਹੀ ਪਾਣੀ ਦੀ ਹੋ ਰਹੀ ਵੱਡੇ ਪੱਧਰ 'ਤੇ ਦੁਰਵਰਤੋਂ ਨੂੰ ਰੋਕਿਆ ਜਾ ਸਕਦਾ ਹੈ। ਪੀਣ ਵਾਲੇ ਪਾਣੀ ਦੀ ਦੁਰਵਰਤੋਂ ਕਾਫ਼ੀ ਹੱਦ ਤੱਕ ਕੰਟਰੋਲ ਵਿਚ ਹੋ ਗਈ ਹੈ। ਸਰਕਾਰ ਨੂੰ ਵੋਟਾਂ ਖ਼ਾਤਰ ਧੜਾਧੜ ਕੁਨੈਕਸ਼ਨ ਦੇਣ ਤੋਂ ਵੀ ਗੁਰੇਜ਼ ਕਰਨਾ ਚਾਹੀਦਾ ਹੈ। ਜਲ ਹੈ ਤਾਂ ਕੱਲ੍ਹ ਹੈ, ਬੈਨਰ ਹੇਠ ਲੋਕਾਂ ਨੂੰ ਜਾਗਰੂਕ ਕਰਨ ਦੀ ਲੋੜ ਹੈ।

-ਮਨਜੀਤ ਸਿੰਘ ਭਾਮ
ਹੁਸ਼ਿਆਰਪੁਰ।

ਲੋਕਤੰਤਰ ਕਿ...

ਵਿਕਸਤ ਦੇਸ਼ਾਂ ਦੀ ਪੁਲਿਸ ਆਪਣੇ ਨਾਗਰਿਕਾਂ ਨੂੰ ਵਧੀਆ ਸੇਵਾਵਾਂ ਦੇਣ ਲਈ ਹਮੇਸ਼ਾ ਤਤਪਰ ਰਹਿੰਦੀ ਹੈ। ਉਹ ਲੋਕ ਮਸਲਿਆਂ ਨੂੰ ਹੱਲ ਕਰਨ ਲਈ ਲੋਕਾਂ ਨੂੰ ਥਾਣੇ ਨਹੀਂ ਬੁਲਾਉਂਦੀ, ਆਨਲਾਈਨ ਸ਼ਿਕਾਇਤਾਂ ਨੋਟ ਕਰਨ ਤੋਂ ਬਾਅਦ ਨਿਆਂ ਹਰ ਨਾਗਰਿਕ ਨੂੰ ਉਸ ਦੇ ਘਰ ਦੇ ਦਰਵਾਜ਼ੇ 'ਤੇ ਹੀ ਮਿਲਦਾ ਹੈ। ਪੁਲਿਸ ਰਿਸ਼ਵਤ ਨਹੀਂ ਲੈਂਦੀ, ਸਿਆਸੀ ਲੋਕਾਂ ਦਾ ਹੱਥ ਠੋਕਾ ਨਹੀਂ ਬਣਦੀ, ਸੰਤਰੀ ਤੋਂ ਲੈ ਕੇ ਮੰਤਰੀ ਤੱਕ ਨਿਆਂ ਸਭ ਲਈ ਬਰਾਬਰ ਹੈ। ਇਸ ਦੇ ਬਿਲਕੁਲ ਉਲਟ ਸਾਡੇ ਦੇਸ਼ ਦੀ ਪੁਲਿਸ ਆਪਣੇ-ਆਪ ਨੂੰ ਤਾਨਾਸ਼ਾਹ ਸਮਝਦੀ ਹੈ। ਉਹ ਲੋਕਾਂ ਨੂੰ ਡਾਂਗਾਂ ਨਾਲ ਕੁੱਟਦੀ ਹੈ। ਇਹ ਸਭ ਕਾਰਨਾਮੇ ਆਮ ਵੇਖਣ ਨੂੰ ਮਿਲਦੇ ਹਨ। ਅਜਿਹੀ ਹੀ ਇਕ ਘਟਨਾ ਕੁਝ ਸਮਾਂ ਪਹਿਲਾਂ ਜਲੰਧਰ ਦੇ ਇਕ ਥਾਣੇ ਵਿਚ ਵਾਪਰੀ, ਜਿਥੇ ਤਿੰਨ ਨਬਾਲਗ ਬੱਚਿਆਂ ਨੂੰ ਛੱਲੀਆਂ ਵਾਂਗ ਕੁੱਟਿਆ ਗਿਆ। ਬੱਚਿਆਂ ਨੂੰ ਨੰਗੇ ਕਰਕੇ ਕੁੱਟਣਾ ਅਤੇ ਗੰਦੀਆਂ ਗਾਲ੍ਹਾਂ ਕੱਢਣੀਆਂ ਇਕ ਸ਼ਰਮਨਾਕ ਵਰਤਾਰਾ ਹੈ। ਕੀ ਪੁਲਿਸ ਨੂੰ ਪੁੱਛਣ ਵਾਲਾ ਕੋਈ ਨਹੀਂ ਹੈ? ਕੀ ਪੰਜਾਬ ਵਿਚ ਲੋਕਤੰਤਰ ਪੁਲਿਸ ਤੰਤਰ ਵਿਚ ਤਬਦੀਲ ਹੋ ਗਿਆ ਹੈ?

-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀ ਖ਼ਾਸ, ਤਹਿ: ਮੁਕੇਰੀਆਂ, ਜ਼ਿਲ੍ਹਾ ਹੁਸ਼ਿਆਰਪੁਰ।

20-10-2016

 ਸਿੱਖਿਆ ਮੰਤਰੀ ਧਿਆਨ ਦੇਣ
ਪੰਜਾਬ ਦੇ ਸਿੱਖਿਆ ਮੰਤਰੀ ਦੀ ਹੁਣ ਤੱਕ ਦੀ ਕਾਰਗੁਜ਼ਾਰੀ ਕਾਫੀ ਚੰਗੀ ਰਹੀ ਹੈ, ਜਿਸ ਕਰਕੇ ਉਨ੍ਹਾਂ ਦੀ ਸ਼ਲਾਘਾ ਵੀ ਹੋਈ ਹੈ। ਪਰ ਜਾਪਦਾ ਹੈ ਕਿ ਸਿੱਖਿਆ ਵਿਭਾਗ ਦੇ ਹੀ ਕੁਝ ਅਧਿਕਾਰੀ ਉਨ੍ਹਾਂ ਦਾ ਅਕਸ ਖਰਾਬ ਕਰਨ 'ਤੇ ਤੁਲੇ ਹੋਏ ਹਨ। ਮਾਸਟਰ ਕੇਡਰ ਦੇ ਅਧਿਆਪਕਾਂ ਦੀ ਭਰਤੀ ਦੀ ਹੀ ਗੱਲ ਲੈ ਲਵੋ। ਸਿੱਖਿਆ ਮੰਤਰੀ ਦੋ ਵਾਰ ਬਿਆਨ ਦੇ ਚੁੱਕੇ ਹਨ ਕਿ ਇਹ ਭਰਤੀ 15 ਦਿਨਾਂ 'ਚ ਮੁਕੰਮਲ ਹੋ ਜਾਵੇਗੀ। ਪਰ ਕਈ ਦਿਨ ਗੁਜ਼ਰ ਜਾਣ ਦੇ ਬਾਵਜੂਦ ਅਜੇ ਤੱਕ ਮਾਸਟਰ ਕੇਡਰ ਦੀ ਮੈਰਿਟ ਸੂਚੀ ਹੀ ਜਾਰੀ ਨਹੀਂ ਹੋਈ। ਉਪਰੋਂ ਚੋਣ ਜ਼ਾਬਤਾ ਲੱਗਣ ਵਾਲਾ ਹੈ। ਕੀ ਇਸ ਪਿੱਛੇ ਕਿਸੇ ਦੀ ਗੁੱਝੀ ਮਨਸ਼ਾ ਇਹ ਤਾਂ ਨਹੀਂ ਕਿ ਭਰਤੀ ਸਿਰੇ ਨਾ ਚੜ੍ਹੇ ਅਤੇ ਭਰਤੀ ਤੋਂ ਖੁਸ਼ ਹੋ ਕੇ ਇਨ੍ਹਾਂ ਉਮੀਦਵਾਰਾਂ ਤੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਦੀਆਂ ਜੋ 60-70 ਹਜ਼ਾਰ ਵੋਟਾਂ ਸੱਤਾਧਾਰੀ ਪਾਰਟੀ ਨੂੰ ਪੈਣੀਆਂ ਸਨ, ਉਹ ਇਸ ਦੇ ਖਿਲਾਫ਼ ਭੁਗਤ ਜਾਣ। ਮੁੱਖ ਮੰਤਰੀ ਅਤੇ ਸਿੱਖਿਆ ਮੰਤਰੀ ਸਾਹਿਬ ਵੱਲੋਂ ਇਸ ਭਰਤੀ ਨੂੰ ਤੁਰੰਤ ਸਿਰੇ ਚੜ੍ਹਾਉਣ ਲਈ ਨਿੱਜੀ ਦਿਲਚਸਪੀ ਲਈ ਜਾਣੀ ਚਾਹੀਦੀ ਹੈ।


-ਯੁਵਰਾਜ ਸਿੰਘ
ਰਣਜੀਤ ਐਵੇਨਿਊ, ਅੰਮ੍ਰਿਤਸਰ।


ਸੋਸ਼ਲ ਮੀਡੀਆ...

ਕੁਝ ਰਾਜਨੀਤਕ ਪਾਰਟੀਆਂ ਵੋਟ ਹਾਸਲ ਕਰਨ ਲਈ ਸੋਸ਼ਲ ਮੀਡੀਆ 'ਤੇ ਭੜਕਾਊ ਸਮੱਗਰੀ ਪਾ ਕੇ ਸਮਾਜ ਦਾ ਮਾਹੌਲ ਖਰਾਬ ਕਰ ਰਹੀਆਂ ਹਨ। ਪੰਜਾਬ ਵਿਚ ਜਿਸ ਤਰ੍ਹਾਂ ਦੇ ਧਾਰਮਿਕ ਅਤੇ ਕਿਸਾਨੀ ਮੁੱਦਿਆਂ ਨੂੰ ਲੈ ਕੇ ਹਾਲਾਤ ਬਣ ਰਹੇ ਹਨ, ਉਸ ਵਿਚ ਸੋਸ਼ਲ ਮੀਡੀਆ ਉਸਾਰੂ ਰੋਲ ਅਦਾ ਨਹੀਂ ਕਰ ਸਕਿਆ। ਫੇਸਬੁੱਕ, ਵਟਸਐਪ ਅਤੇ ਹੋਰ ਸੋਸ਼ਲ ਸਾਈਟਾਂ ਉੱਪਰ ਬਹੁਤ ਸਾਰੀਆਂ ਅਜਿਹੀਆਂ ਤਸਵੀਰਾਂ ਅਤੇ ਵੀਡੀਓਜ਼ ਅਪਲੋਡ ਕੀਤੀਆਂ ਜਾਂਦੀਆਂ ਹਨ, ਜਿਨ੍ਹਾਂ ਨੂੰ ਐਡਿਟ ਕਰਕੇ ਅਸਲੀਅਤ ਤੋਂ ਦੂਰ ਲਿਜਾਇਆ ਜਾਂਦਾ ਹੈ। ਅਜਿਹੀਆਂ ਅੱਗ ਲਾਉਣ ਵਾਲੀਆਂ ਖ਼ਬਰਾਂ ਤੋਂ ਪੰਜਾਬੀਆਂ ਨੂੰ ਸੁਚੇਤ ਹੋਣ ਦੀ ਲੋੜ ਹੈ। ਅਜਿਹਾ ਨਾ ਹੋਵੇ ਕਿ ਸਾਡਾ ਖੁਸ਼ਹਾਲ ਪੰਜਾਬ ਫਿਰ ਭੈੜੀ ਨਜ਼ਰ ਦਾ ਸ਼ਿਕਾਰ ਹੋ ਜਾਵੇ।


-ਅਵਤਾਰ ਸਿੰਘ ਕੈਂਥ
ਪਿੰਡ ਝੋਰੜਾਂ, ਜ਼ਿਲ੍ਹਾ ਲੁਧਿਆਣਾ।


ਯੋਜਨਾਵਾਂ ਦੇ ਨਤੀਜੇ
ਕਾਲਾ ਧਨ ਦੇਸ਼ ਵਿਚ ਲਿਆ ਕੇ ਹਰੇਕ ਵਿਅਕਤੀ ਨੂੰ ਲੱਖਾਂ ਵਿਚ ਨਕਦ, ਮੁਫ਼ਤ ਮਕਾਨ ਤੇ ਜ਼ਮੀਨ ਦੇ ਕੇ 'ਅੱਛੇ ਦਿਨ' ਲਿਆਉਣ ਵਾਲੀ ਸਰਕਾਰ ਦੇ ਦੋ ਸਾਲ ਪੂਰੇ ਹੋ ਚੁੱਕੇ ਹਨ। ਦੋ ਸਾਲਾਂ ਦੇ ਸਮੇਂ ਦੌਰਾਨ ਅਣਗਿਣਤ ਯੋਜਨਾਵਾਂ ਉਲੀਕੀਆਂ ਗਈਆਂ, ਜਿਨ੍ਹਾਂ ਦਾ ਮਕਸਦ ਦੇਸ਼ ਨੂੰ ਸਾਫ਼-ਸੁਥਰਾ ਬਣਾ ਕੇ, ਬੇਰੁਜ਼ਗਾਰਾਂ ਨੂੰ ਰੁਜ਼ਗਾਰ ਦੇ ਕੇ, ਕੰਪਿਊਟਰ ਯੁੱਗ ਵਿਚ ਕ੍ਰਾਂਤੀ ਲਿਆ ਕੇ, ਇਸਤਰੀਆਂ ਦੀ ਸੁਰੱਖਿਆ, ਬੈਂਕਾਂ, ਡਾਕਖਾਨਿਆਂ ਵਿਚ ਸੁਧਾਰ ਕਰਕੇ, ਖੇਤੀਬਾੜੀ ਖੇਤਰ ਨੂੰ ਅਗਾਂਹਵਧੂ ਬਣਾ ਕੇ ਦੇਸ਼ ਦਾ ਸਰਬਪੱਖੀ ਵਿਕਾਸ ਕਰਨਾ ਹੈ।
ਪ੍ਰੰਤੂ ਯੋਜਨਾਵਾਂ ਆਧਾਰਹੀਣ, ਹਵਾਈ ਕਿਲ੍ਹੇ, ਲੋੜ ਤੋਂ ਜ਼ਿਆਦਾ ਤੇਜ਼ੀ, ਆਤਮ-ਕੇਂਦਰਿਤ ਹੋਣ ਕਾਰਨ ਚੰਗੇ ਨਤੀਜੇ ਨਹੀਂ ਦੇ ਰਹੀਆਂ। ਦੇਸ਼ ਵਿਚ ਮੰਗਤਿਆਂ ਦੀ ਗਿਣਤੀ ਵਿਚ ਵਾਧਾ, ਅੱਤਵਾਦੀ ਹਮਲਿਆਂ ਵਿਚ ਵਾਧਾ, ਕਿਸਾਨਾਂ ਵਿਚ ਪ੍ਰੇਸ਼ਾਨੀ ਵਧੀ ਹੈ।


-ਕੁਲਵਿੰਦਰ ਸਿੰਘ
ਪਿੰਡ ਬਿਹਾਲਾ, ਜ਼ਿਲ੍ਹਾ ਹੁਸ਼ਿਆਰਪੁਰ
ਮੋਬਾਈਲ : 98722-35945.

 

19-10-2016

 ਪੰਜਾਬੀ ਸੂਬੇ ਦੀ 50ਵੀਂ ਵਰ੍ਹੇਗੰਢ

ਸਰਕਾਰ ਨੂੰ ਗ਼ਲਤੀਆਂ, ਭੁੱਲਾਂ, ਖਾਮੀਆਂ ਜਿਹੜੀਆਂ ਕਹਿੰਦੇ ਨੇ ਅਣਜਾਣੇ 'ਚ ਹੋ ਜਾਂਦੀਆਂ ਹਨ, ਨੂੰ ਸੁਧਾਰਨ, ਫੜਨ ਲਈ ਇਕ ਅਲੱਗ ਮਹਿਕਮਾ ਬਣਾ ਦੇਣਾ ਚਾਹੀਦਾ ਹੈ। ਮਿਤੀ 10-10-2016 ਨੂੰ ਵਰ੍ਹੇ ਗੰਢ ਦਾ ਪੂਰੇ ਸਫ਼ੇ ਦਾ ਇਸ਼ਤਿਹਾਰ ਅਖ਼ਬਾਰ ਵਿਚ ਛਪਿਆ ਜਿਸ ਵਿਚ ਗੋਲਡਨ ਜੁਬਲੀ, ਪੇਂਟਿੰਗ, ਹੈਰੀਟੇਜ ਰੋਡ, ਮੀਡੀਆ ਵਾਕ, ਆਨਲਾਈਨ, ਪੋਰਟਲ ਆਦਿ ਅੰਗਰੇਜ਼ੀ ਦੇ ਸ਼ਬਦ ਗੁਰਮੁਖੀ ਵਿਚ ਲਿਖੇ ਹਨ, ਬੜੇ ਅਫ਼ਸੋਸ ਦੀ ਗੱਲ ਹੈ ਕਿ ਇਨ੍ਹਾਂ ਸ਼ਬਦਾਂ ਦਾ ਪੰਜਾਬੀ'ਚ ਉਲੱਥਾ ਕਰਕੇ ਦੇਣ ਵਾਲਾ ਕੋਈ ਬੰਦਾ ਸਰਕਾਰ (ਮਹਿਕਮੇ) ਕੋਲ ਨਹੀਂ ਹੈ। ਇਥੇ ਹੀ ਬੱਸ ਨਹੀਂ ਹੈ ਵੈਸੇ ਵੀ ਜਿਹੜੇ ਸਾਡੇ ਪੰਜਾਬ (ਪੰਜਾਬ ਸਰਕਾਰ) ਦੇ ਬੋਰਡ ਨੇ ਜਿਵੇਂ ਦਫਤਰ, ਕੰਟਰੋਲਰ, ਪ੍ਰਿੰਟਿੰਗ ਐਂਡ ਸਟੇਸ਼ਨਰੀ ਵਿਭਾਗ, ਪੰਜਾਬ। ਦਫਤਰ ਜਨਰਲ ਮੈਨੇਜਰ ਤੇ ਵਰਕਸ਼ਾਪ, ਪੈਪਸੂ ਰੋਡ ਟਰਾਂਸਪੋਰਟ ਕਾਰਪੋਰੇਸ਼ਨ, ਐਸ.ਐਸ.ਪੀ., ਦਫਤਰ... ਸਟੇਟ ਟਰਾਂਸਪੋਰਟ ਕਮਿਸ਼ਨਰ, ਪੰਜਾਬ, ਸੀਨੀਅਰ ਮੈਡੀਕਲ ਅਫਸਰ, ਪੰਜਾਬ ਹੈਲਥ ਸਿਸਟਮ ਕਾਰਪੋਰੇਸ਼ਨ, ਕਾਮਰੇਡ ਜਗਦੀਸ਼ ਚੰਦਰ ਫਰੀਡਮ ਫਾਈਟਰ ਇੰ: ਸਿਵਲ ਹਸਪਤਾਲ ਸੰਗਰੂਰ ਇਹ ਤਾਂ ਹਨ ਕੁਝ ਕੁ ਦਫਤਰਾਂ ਦੇ ਨਾਵਾਂ ਦੇ ਬੋਰਡਾਂ ਦੇ ਨਮੂਨੇ। ਇਹ ਸਭ ਕੁਝ ਵੇਖ ਕੇ ਵਰ੍ਹੇ ਗੰਢ ਮਨਾਉਣੀ ਐਵੇਂ (ਫਜ਼ੂਲ) ਲਗਦੀ ਹੈ। ਕਿੰਨਾ ਚੰਗਾ ਹੋਵੇ ਜੇ ਇਸ ਉਪਰੋਕਤ ਨੂੰ ਸੁਧਾਰ ਕੇ ਇਸੇ ਨੂੰ ਪੰਜਾਬੀ ਰੂਪ ਦੇ ਕੇ, ਸ਼ਿੰਗਾਰ ਕੇ 'ਪੰਜਾਬੀ' ਦਾ ਮਾਣ ਬਿਨਾਂ ਕਿਸੇ ਬੜੇ ਅਡੰਬਰ ਤੇ ਖਰਚੇ ਤੋਂ ਹੋ ਜਾਵੇ।

-ਗੁਰਚਰਨ ਸਿੰਘ
ਪਿੰਡ ਤੇ ਡਾਕ: ਮਜਾਰਾ, ਜ਼ਿਲ੍ਹਾ ਸ਼ਹੀਦ ਭਗਤ ਸਿੰਘ ਨਗਰ।

ਮਨੁੱਖਤਾ ਦਾ ਘਾਣ

ਯੁੱਧ ਵਿਸ਼ਵ ਸ਼ਾਂਤੀ ਦੇ ਲਈ ਖਤਰਾ ਬਣਦੇ ਹਨ। ਯੁੱਧਾਂ ਕਾਰਨ ਜਾਨੀ-ਮਾਲੀ ਨੁਕਸਾਨ ਹੁੰਦਾ ਹੈ। ਕਈ ਘਰ ਉਜੜ ਜਾਂਦੇ ਹਨ। ਕਈ ਲੋਕ ਮੌਤ ਦੀ ਬਲੀ ਚੜ੍ਹ ਜਾਂਦੇ ਹਨ। ਯੁੱਧਾਂ ਕਾਰਨ ਦੇਸ਼ਾਂ ਵਿਚਕਾਰ ਸਬੰਧ ਸੁਧਰਨ ਦੀ ਬਜਾਏ ਹੋਰ ਵਿਗੜ ਜਾਂਦੇ ਹਨ। ਤਣਾਓ ਵਾਲੀ ਸਥਿਤੀ ਪੈਦਾ ਹੋ ਜਾਂਦੀ ਹੈ। ਕਿਸੇ ਵੀ ਸਮੱਸਿਆ ਦਾ ਹੱਲ ਯੁੱਧ ਨਹੀਂ ਹੁੰਦੇ ਸਗੋਂ ਸ਼ਾਂਤੀ ਨਾਲ ਕੰਮ ਲੈਣਾ ਚਾਹੀਦਾ ਹੈ। ਵਿਸ਼ਵ ਸ਼ਾਂਤੀ ਨੂੰ ਬਣਾਈ ਰੱਖਣ ਦੇ ਵਿਚ ਹੀ ਹਰ ਇਕ ਦੇਸ਼ ਦੀ ਭਲਾਈ ਹੈ। ਸਰਕਾਰ ਨੂੰ ਚਾਹੀਦਾ ਹੈ ਕਿ ਨਿਸਸ਼ਤਰੀਕਰਨ ਨੂੰ ਰੋਕਿਆ ਜਾਵੇ। ਹਰ ਇਕ ਦੇਸ਼ ਨੂੰ ਚਾਹੀਦਾ ਹੈ ਕਿ ਆਪਣੇ ਦੇਸ਼ ਦੇ ਨਾਲ-ਨਾਲ ਦੂਜੇ ਦੇਸ਼ ਦੀ ਪ੍ਰਭੂਸੱਤਾ, ਏਕਤਾ, ਅਖੰਡਤਾ ਨੂੰ ਬਣਾ ਕੇ ਰੱਖਿਆ ਜਾਵੇ। ਦੂਜੇ ਦੇਸ਼ ਦੇ ਅੰਦਰੂਨੀ ਬਾਹਰੀ ਮਾਮਲਿਆਂ ਦੇ ਵਿਚ ਕੋਈ ਵੀ ਦਖਲਅੰਦਾਜ਼ੀ ਨਾ ਕੀਤੀ ਜਾਵੇ।

-ਰਾਜਵੀਰ ਕੌਰ
ਪਿੰਡ ਰਾਜਪੁਰ ਭਾਈਆਂ, ਜ਼ਿਲ੍ਹਾ ਹੁਸ਼ਿਆਰਪੁਰ।

ਰਸਾਇਣ ਮੁਕਤ ਖੇਤੀ

ਨਵੀਆਂ ਖੋਜਾਂ ਨੇ ਇਹ ਸਿੱਧ ਕਰ ਦਿੱਤਾ ਹੈ ਕਿ ਖੇਤੀ ਵਿਚ ਵਰਤੀਆਂ ਜਾਂਦੀਆਂ ਖਾਦਾਂ ਤੇ ਕੀੜੇਮਾਰ ਦਵਾਈਆਂ ਨਾਲ ਫਸਲ ਦਾ ਝਾੜ ਤਾਂ ਵਧੇਰੇ ਹੋ ਸਕਦਾ ਹੈ ਪਰ ਅਜਿਹਾ ਸਿਹਤ ਲਈ ਠੀਕ ਨਹੀਂ ਹੈ। ਇਸ ਦੀ ਜਗ੍ਹਾ ਜੇਕਰ ਕੁਦਰਤੀ ਢੰਗ ਨਾਲ ਖੇਤੀ ਕਰਨ ਨੂੰ ਤਰਜੀਹ ਦਿੱਤੀ ਜਾਵੇ ਜਾਂ ਹਰੀਆਂ ਖਾਦਾਂ ਦੀ ਵਰਤੋਂ ਕੀਤੀ ਜਾਵੇ ਤਾਂ ਅਜਿਹਾ ਖੇਤੀ ਉਤਪਾਦਨ ਮਨੁੱਖੀ ਸਿਹਤ ਲਈ ਬੇਹੱਦ ਤੰਦਰੁਸਤੀ ਭਰਿਆ ਸਾਬਤ ਹੋ ਸਕਦਾ ਹੈ। ਆਪਣੇ ਤੌਰ 'ਤੇ ਵੱਖ-ਵੱਖ ਕਿਸਾਨਾਂ ਵੱਲੋਂ ਕੁਦਰਤੀ ਖੇਤੀ ਦੇ ਤਜਰਬੇ ਕੀਤੇ ਜਾਣ ਲੱਗੇ ਹਨ, ਜਿਨ੍ਹਾਂ ਦੇ ਨਤੀਜੇ ਸਾਰਥਿਕ ਨਿਕਲ ਰਹੇ ਹਨ।

-ਰਾਜਵੰਤ ਸਿੰਘ ਰਾਜੂ
ਰਾਏਕੋਟ।

18-10-2016

 ਬਾਲ ਮਜ਼ਦੂਰੀ
ਸਰਕਾਰ ਰਾਤ-ਦਿਨ ਯਤਨਾਂ ਵਿਚ ਹੈ ਕਿ ਭਾਰਤ ਦਾ ਹਰੇਕ ਬੱਚਾ ਸਕੂਲਾਂ ਅੰਦਰ ਪੜ੍ਹਾਈ ਕਰੇ ਅਤੇ ਕੋਈ ਵੀ ਬੱਚਾ ਮਜ਼ਦੂਰੀ ਕਰਦਾ ਨਜ਼ਰ ਨਾ ਆਵੇ। ਸੌ ਫ਼ੀਸਦੀ ਸਾਰਥਕ ਨਤੀਜੇ ਉਦੋਂ ਪ੍ਰਾਪਤ ਹੁੰਦੇ ਹਨ, ਜਦੋਂ ਦੋਵੇਂ ਧਿਰਾਂ ਸਰਕਾਰਾਂ ਅਤੇ ਜਨਤਾ ਪੂਰੀ ਤਰ੍ਹਾਂ ਸੁਹਿਰਦ ਹੋਣ। ਇਹ ਲੋਕ ਜੋ ਆਪਣੇ ਬੱਚਿਆਂ ਨੂੰ ਸਕੂਲ ਭੇਜ ਕੇ ਬਿਲਕੁਲ ਰਾਜ਼ੀ ਨਹੀਂ, ਉਹ ਬੱਚਿਆਂ ਦੇ ਭਵਿੱਖ ਨੂੰ ਲੈ ਕੇ ਬਿਲਕੁਲ ਬੇਫ਼ਿਕਰ ਹਨ। ਉਹ ਸੋਚਦੇ ਹਨ ਕਿ ਭੀਖ ਮੰਗ ਕੇ ਖਾਣਾ ਸੌਖਾ ਹੈ ਜੋ ਕਿ ਤਬਦੀਲੀ ਚਾਹੁੰਦੇ ਹੀ ਨਹੀਂ। ਅਜਿਹੇ ਹਾਲਾਤ 'ਚ ਸਰਕਾਰਾਂ ਆਪਣੇ ਅਸਲੀ ਮਨੋਰਥ ਤੇ ਟੀਚੇ ਹਾਸਲ ਨਹੀਂ ਕਰ ਸਕਦੀਆ। ਬਾਲ-ਮਜ਼ਦੂਰੀ ਤੇ ਅਨਪੜ੍ਹਤਾ ਅਜਿਹੇ ਕੰਮਚੋਰ ਲੋਕਾਂ ਕਾਰਨ ਬਰਕਰਾਰ ਹੈ ਭਾਵੇਂ ਸਰਕਾਰੀ ਉਪਰਾਲਿਆਂ ਕਾਰਨ ਅਨਪੜ੍ਹਤਾ ਤਾਂ ਘਟੀ ਹੈ ਪਰ ਬਾਲ-ਮਜ਼ਦੂਰੀ ਗ਼ਰੀਬੀ ਕਾਰਨ ਜਿਉਂ ਦੀ ਤਿਉਂ ਬਰਕਰਾਰ ਨਜ਼ਰ ਆਉਂਦੀ ਹੈ। ਸਾਨੂੰ ਸਰਕਾਰੀ ਉਪਰਾਲਿਆਂ ਦਾ ਸਹਿਯੋਗ ਦੇਣਾ ਬਣਦਾ ਹੈ ਤਾਂ ਹੀ ਅਨਪੜ੍ਹਤਾ, ਗ਼ਰੀਬੀ ਤੇ ਬਾਲ-ਮਜ਼ਦੂਰੀ ਵਰਗੀਆਂ ਸਮੱਸਿਆਵਾਂ ਤੋਂ ਨਿਜਾਤ ਪਾ ਸਕਦੇ ਹਾਂ।


-ਮਾਸਟਰ ਦੇਵ ਰਾਜ ਖੁੰਡਾ
ਸੈਂਟਰ ਹੈੱਡ ਟੀਚਰ (ਰਿਟਾ:)
ਸ੍ਰੀ ਰਾਮ ਸ਼ਰਮਨ ਕਾਲੋਨੀ, ਗੁਰਦਾਸਪੁਰ।


ਲੱਚਰ ਗਾਇਕੀ ਕਿਉਂ?

ਪੁਰਾਤਨ ਸਮੇਂ ਵਿਚ ਵੀ ਗਾਇਕ ਹੋਇਆ ਕਰਦੇ ਸਨ ਅਤੇ ਉਹ ਨਿਰੋਲ ਸੱਭਿਆਚਾਰਕ ਗੀਤ ਗਾਇਆ ਕਰਦੇ ਸਨ। ਪ੍ਰੰਤੂ ਅਜੋਕੇ ਸਮੇਂ ਵਿਚ ਅਸੀਂ ਪੱਛਮੀ ਸੱਭਿਆਚਾਰ ਦੇ ਪਿੱਛੇ ਪੈ ਗਏ ਹਾਂ। ਇਸੇ ਕਰਕੇ ਹੀ ਕੋਈ ਗੀਤ ਫ਼ਿਲਮਾਉਣ ਵੇਲੇ ਮਾਡਲਾਂ ਬਹੁਤ ਹੀ ਘੱਟ ਕੱਪੜੇ ਪਾ ਕੇ ਪੇਸ਼ ਹੁੰਦੀਆਂ ਹਨ, ਜਿਸ ਦਾ ਪ੍ਰਭਾਵ ਸਾਡੇ ਨੌਜਵਾਨ ਮੁੰਡੇ-ਕੁੜੀਆਂ 'ਤੇ ਸਿੱਧਾ ਪੈਂਦਾ ਹੈ ਅਤੇ ਤਰ੍ਹਾਂ-ਤਰ੍ਹਾਂ ਦੀਆਂ ਘਟਨਾਵਾਂ ਵਾਪਰਨੀਆਂ ਪੱਛਮੀ ਸੱਭਿਆਚਾਰ ਦਾ ਹੀ ਸਿੱਟਾ ਆਖ ਸਕਦੇ ਹਾਂ। ਸੋ, ਸਾਡੀ ਕਲਾਕਾਰਾਂ ਅਤੇ ਗੀਤਕਾਰਾਂ ਨੂੰ ਹੱਥ ਬੰਨ੍ਹ ਕੇ ਬੇਨਤੀ ਹੈ ਕਿ ਲੱਚਰ ਗਾਇਕੀ ਤੋਂ ਦੂਰ ਰਹਿ ਕੇ ਨਿਰੋਲ ਪੰਜਾਬੀ ਸੱਭਿਆਚਾਰ ਵਿਰਸੇ ਨੂੰ ਕਾਇਮ ਰੱਖਿਆ ਜਾਵੇ ਅਤੇ ਸਰਕਾਰ ਨੂੰ ਵੀ ਅਪੀਲ ਹੈ ਕਿ ਜਿਸ ਗਾਣੇ ਜਾਂ ਵੀਡੀਓ ਵਿਚ ਲੱਚਰ ਗਾਇਕੀ ਦਿਸਦੀ ਹੈ, ਉਸ ਨੂੰ ਰਿਲੀਜ਼ ਕਰਨ 'ਤੇ ਪਾਬੰਦੀ ਲਗਾਈ ਜਾਵੇ। ਇਸ ਵਿਚ ਹੀ ਸਰਬੱਤ ਦਾ ਭਲਾ ਹੈ।
ਨਿੱਤ ਵਾਪਰ ਰਹੀਆਂ ਸੜਕੀ ਦੁਰਘਟਨਾਵਾਂ ਨੇ ਹਰ ਇਕ ਸੰਜੀਦਾ ਮਨੁੱਖ ਨੂੰ ਝੰਜੋੜ ਕੇ ਰੱਖ ਦਿੱਤਾ ਹੈ ਤੇ ਹਰ ਇਨਸਾਨ ਨੂੰ ਫ਼ਿਕਰ ਲੱਗਾ ਰਹਿੰਦਾ ਹੈ ਕਿ ਉਹ ਸਫ਼ਰ ਦੌਰਾਨ ਆਪਣੀ ਮੰਜ਼ਿਲ 'ਤੇ ਸਹੀ ਸਲਾਮਤ ਵੀ ਪੁੱਜਣਗੇ ਜਾਂ ਨਹੀਂ ਤੇ ਇਸ ਤਰ੍ਹਾਂ ਲੱਗ ਰਿਹਾ ਹੈ ਕਿ ਕਿਸੇ ਨੂੰ ਕਿਸੇ ਦੀ ਕੋਈ ਪ੍ਰਵਾਹ ਹੀ ਨਹੀਂ ਹੈ, ਸਿਰਫ ਆਪਣੀ ਹੀ ਪ੍ਰਵਾਹ ਹੈ ਤੇ ਸਿਰਫ ਆਪਣੀ ਮੰਜ਼ਿਲ 'ਤੇ ਹੀ ਪਹੁੰਚਣ ਦੀ ਕਾਹਲੀ ਹੁੰਦੀ ਹੈ। ਪਹੁੰਚ ਤਾਂ ਉਸ ਨੇ ਵੀ ਜਾਣਾ ਹੈ, ਜਿਸ ਦੀ ਸਪੀਡ ਘੱਟ ਹੈ ਤੇ ਪਹੁੰਚ ਉਸ ਨੇ ਵੀ ਜਾਣਾ ਹੈ, ਜਿਸ ਦੀ ਸਪੀਡ ਵੱਧ। ਬਸ ਫ਼ਰਕ ਕੁਝ ਮਿੰਟਾਂ ਦਾ ਹੀ ਪੈਂਦਾ ਹੈ ਪਰ ਤੇਜ਼ ਤੇ ਵੱਧ ਸਪੀਡ 'ਤੇ ਚਲਾਉਣ ਦਾ ਜਨੂੰਨ ਹਰ ਚਾਲਕ ਉੱਪਰ ਭਾਰੀ ਹੈ। ਚਾਹੀਦਾ ਇਹ ਹੈ ਕਿ ਸਰਕਾਰ ਦੁਰਘਟਨਾਵਾਂ ਨੂੰ ਰੋਕਣ ਲਈ ਸਪੀਡ ਲਿਮਟ ਨਿਰਧਾਰਤ ਕਰੇ ਤੇ ਸੜਕਾਂ 'ਤੇ ਰੋਕ ਕੇ ਲਿਮਟ ਸਪੀਡ ਦੀ ਚੈੱਕ ਕੀਤੀ ਜਾਵੇ ਤਾਂ ਜੋ ਇਕ-ਦੂਜੇ ਤੋਂ ਅੱਗੇ ਨਿਕਲਣ ਦੀ ਹੋੜ ਨੂੰ ਕੁਝ ਠੱਲ੍ਹ ਪਵੇ ਅਤੇ ਆਮ ਲੋਕਾਂ ਦੀ ਕੁਝ ਜਾਨ ਬਖਸ਼ੀ ਹੋ ਸਕੇ।


-ਸੇਵਾ ਰਾਮ ਸਿੰਗਲਾ
ਮੇਨ ਅਜੀਤ ਰੋਡ, ਨੇੜੇ ਗਲੀ ਨੰ: 12, ਬਠਿੰਡਾ।\


ਰਫ਼ਤਾਰ 'ਤੇ ਕਾਬੂ ਪਾਇਆ ਜਾਵੇ

ਨਿੱਤ ਵਾਪਰ ਰਹੀਆਂ ਸੜਕੀ ਦੁਰਘਟਨਾਵਾਂ ਨੇ ਹਰ ਇਕ ਸੰਜੀਦਾ ਮਨੁੱਖ ਨੂੰ ਝੰਜੋੜ ਕੇ ਰੱਖ ਦਿੱਤਾ ਹੈ ਤੇ ਹਰ ਇਨਸਾਨ ਨੂੰ ਫ਼ਿਕਰ ਲੱਗਾ ਰਹਿੰਦਾ ਹੈ ਕਿ ਉਹ ਸਫ਼ਰ ਦੌਰਾਨ ਆਪਣੀ ਮੰਜ਼ਿਲ 'ਤੇ ਸਹੀ ਸਲਾਮਤ ਵੀ ਪੁੱਜਣਗੇ ਜਾਂ ਨਹੀਂ ਤੇ ਇਸ ਤਰ੍ਹਾਂ ਲੱਗ ਰਿਹਾ ਹੈ ਕਿ ਕਿਸੇ ਨੂੰ ਕਿਸੇ ਦੀ ਕੋਈ ਪ੍ਰਵਾਹ ਹੀ ਨਹੀਂ ਹੈ, ਸਿਰਫ ਆਪਣੀ ਹੀ ਪ੍ਰਵਾਹ ਹੈ ਤੇ ਸਿਰਫ ਆਪਣੀ ਮੰਜ਼ਿਲ 'ਤੇ ਹੀ ਪਹੁੰਚਣ ਦੀ ਕਾਹਲੀ ਹੁੰਦੀ ਹੈ। ਪਹੁੰਚ ਤਾਂ ਉਸ ਨੇ ਵੀ ਜਾਣਾ ਹੈ, ਜਿਸ ਦੀ ਸਪੀਡ ਘੱਟ ਹੈ ਤੇ ਪਹੁੰਚ ਉਸ ਨੇ ਵੀ ਜਾਣਾ ਹੈ, ਜਿਸ ਦੀ ਸਪੀਡ ਵੱਧ। ਬਸ ਫ਼ਰਕ ਕੁਝ ਮਿੰਟਾਂ ਦਾ ਹੀ ਪੈਂਦਾ ਹੈ ਪਰ ਤੇਜ਼ ਤੇ ਵੱਧ ਸਪੀਡ 'ਤੇ ਚਲਾਉਣ ਦਾ ਜਨੂੰਨ ਹਰ ਚਾਲਕ ਉੱਪਰ ਭਾਰੀ ਹੈ। ਚਾਹੀਦਾ ਇਹ ਹੈ ਕਿ ਸਰਕਾਰ ਦੁਰਘਟਨਾਵਾਂ ਨੂੰ ਰੋਕਣ ਲਈ ਸਪੀਡ ਲਿਮਟ ਨਿਰਧਾਰਤ ਕਰੇ ਤੇ ਸੜਕਾਂ 'ਤੇ ਰੋਕ ਕੇ ਲਿਮਟ ਸਪੀਡ ਦੀ ਚੈੱਕ ਕੀਤੀ ਜਾਵੇ ਤਾਂ ਜੋ ਇਕ-ਦੂਜੇ ਤੋਂ ਅੱਗੇ ਨਿਕਲਣ ਦੀ ਹੋੜ ਨੂੰ ਕੁਝ ਠੱਲ੍ਹ ਪਵੇ ਅਤੇ ਆਮ ਲੋਕਾਂ ਦੀ ਕੁਝ ਜਾਨ ਬਖਸ਼ੀ ਹੋ ਸਕੇ।

-ਸੇਵਾ ਰਾਮ ਸਿੰਗਲਾ
ਮੇਨ ਅਜੀਤ ਰੋਡ, ਨੇੜੇ ਗਲੀ ਨੰ: 12, ਬਠਿੰਡਾ

 

16-10-2016

 ਦਾਲ ਦੇ ਭਾਅ
ਛੋਲਿਆਂ ਦੀ ਦਾਲ ਅੱਜ ਹਦ ਤੋਂ ਜ਼ਿਆਦਾ ਮਹਿੰਗੀ ਹੋ ਗਈ ਹੈ ਕਿਉਂਕਿ ਕਾਲੇ ਛੋਲੇ ਘੱਟ ਹੋਣ ਕਰਕੇ ਇਹ ਤੇਜ਼ੀ ਆਈ ਹੈ। ਪਰਚੂਨ ਵਿਚ ਲੋਕਾਂ ਇਹ ਦਾਲ 150 ਰੁਪਏ ਕਿਲੋ ਅਤੇ ਵੇਸਣ 160 ਰੁਪਏ ਕਿਲੋ ਮਿਲ ਰਹੇ ਹਨ। ਇਸ ਦਾਲ ਅਤੇ ਵੇਸਣ ਦੀ ਵਰਤੋਂ ਸਾਰੇ ਲੋਕ ਕਰਦੇ ਹਨ।
ਸੋ, ਇਸ ਦੀਆਂ ਕੀਮਤਾਂ ਹੇਠਾਂ ਲਿਆਉਣ ਲਈ ਜਲਦੀ ਤੋਂ ਜਲਦੀ ਸਖਤ ਕਦਮ ਚੁੱਕੇ ਜਾਣ, ਕਿਹੜੇ ਕਾਰਨਾਂ ਕਰਕੇ ਕੀਮਤ ਏਨੀ ਉਛਲੀ ਜਾਂਚ ਕੀਤੀ ਜਾਵੇ ਅਤੇ ਜਨਤਾ ਨੂੰ ਇਸ ਤੋਂ ਜਾਣੂ ਕਰਵਾਇਆ ਜਾਵੇ। ਜਮ੍ਹਾਂਖੋਰਾਂ ਖਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇ, ਜਿੰਨਾ ਚਿਰ ਕੀਮਤਾਂ ਥੱਲੇ ਨਹੀਂ ਆਉਂਦੀਆਂ, ਤਦ ਤੱਕ ਲੋਕਾਂ ਨੂੰ (ਸਸਤੇ ਭਾਅ 'ਤੇ) ਸਰਕਾਰੀ ਮਸ਼ੀਨਰੀ, ਸਰਕਾਰੀ ਕੰਟਰੋਲ, ਸਰਕਾਰ ਰਾਹੀਂ ਸਸਤੇ ਭਾਅ ਤੇ ਛੋਲੇ, ਛੋਲਿਆਂ ਦੀ ਦਾਲ, ਵੇਸਣ ਹਰ ਮੁਹੱਲੇ, ਹਰ ਪਿੰਡ ਵਿਚ 2-2 ਕਿਲੋ, ਹਰ ਘਰ ਨੂੰ ਦਿੱਤੇ ਜਾਣ, ਕੋਈ ਕਾਰਡ ਦੀ ਸ਼ਰਤ ਨਾ ਹੋਵੇ, ਕੋਈ ਬੀ.ਪੀ.ਐਲ. ਜਾਂ ਹੋਰ ਸ਼੍ਰੇਣੀ ਦਾ ਵਿਤਕਰਾ ਨਾ ਹੋਵੇ, ਹਰ ਘਰ ਅਮੀਰ-ਗਰੀਬ ਸਭ ਨੂੰ ਇਹ ਸਹੂਲਤ ਮਿਲੇ।
ਸਰਕਾਰ ਦੇ ਭੋਜਨ ਸਮੱਗਰੀ, ਪੂਰਤੀ ਮੰਤਰਾਲੇ ਨੂੰ ਬੇਨਤੀ ਹੈ ਕਿ ਇਸ ਤਰਫ਼ ਪੂਰੀ ਤਵੱਜੋਂ ਦਿੱਤੀ ਜਾਵੇ ਅਤੇ ਛੋਲਿਆਂ ਦੀ ਦਾਲ, ਅਤੇ ਛੋਲੇ, ਵੇਸਨ ਦੀਆਂ ਕੀਮਤਾਂ ਥੱਲੇ ਲਿਆਂਦੀਆਂ ਜਾਣ।


-ਪੁਸ਼ਵਿੰਦਰ ਮਨਚੰਦਾ
ਪਿੰਡ ਤੇ ਡਾਕ: ਖਾਈ ਫੇਮੇ ਕੀ (ਫਿਰੋਜ਼ਪੁਰ)।
ਮੋਬਾਈਲ : 98157-29756.


ਅਧਿਆਪਕ ਤਨਖਾਹਾਂ ਤੋਂ ਵਾਂਝੇ
ਪੰਜਾਬ ਸਰਕਾਰ ਨੇ ਜਿਥੇ ਮਿਡਲ ਸਕੂਲਾਂ ਨੂੰ ਹਾਈ ਸਕੂਲਾਂ ਵਿਚ ਅਪਗਰੇਡ ਕਰਕੇ ਵਿਦਿਆਰਥੀਆਂ ਲਈ ਇਕ ਵਧੀਆ ਕੰਮ ਕੀਤਾ। ਉਥੇ ਨਾਲ ਹੀ ਇਨ੍ਹਾਂ ਅਪਗਰੇਡ ਹੋਏ ਹਾਈ ਸਕੂਲਾਂ ਦੇ ਅਧਿਆਪਕਾਂ ਨੂੰ ਫਾਕੇ ਕੱਟਣ ਲਈ ਮਜਬੂਰ ਕਰ ਦਿੱਤਾ। ਕਾਰਨ ਸੀ ਡੀ.ਡੀ.ਓ. ਕੋਡ ਨਾ ਮਿਲਣ ਕਰਕੇ ਤਨਖਾਹਾਂ ਤੋਂ ਸੱਖਣੇ ਹੋਣਾ। ਸਰਕਾਰ ਨੂੰ ਚਾਹੀਦਾ ਤਾਂ ਇਹ ਸੀ ਕਿ ਇਨ੍ਹਾਂ ਅਪਗਰੇਡ ਹੋਏ ਸਕੂਲਾਂ ਨੂੰ ਨਾਲ ਹੀ ਡੀ.ਡੀ.ਓ. ਕੋਡ ਦੇ ਦਿੱਤਾ ਜਾਂਦਾ ਪਰ ਏਨਾ ਸਮਾਂ ਬੀਤ ਜਾਣ ਬਾਅਦ ਵੀ ਇਹ ਦਿੱਤੇ ਨਹੀਂ ਗਏ, ਜਿਸ ਕਾਰਨ ਇਨ੍ਹਾਂ ਸਕੂਲਾਂ ਦੇ ਅਧਿਆਪਕ ਤਿਉਹਾਰਾਂ ਦੇ ਇਸ ਸੀਜ਼ਨ ਵਿਚ ਆਰਥਿਕ ਮੰਦੀ ਦਾ ਸ਼ਿਕਾਰ ਹੋ ਗਏ ਹਨ। ਸੋ, ਸਰਕਾਰ ਨੂੰ ਅਪੀਲ ਕੀਤੀ ਜਾਂਦੀ ਹੈਕਿ ਇਨ੍ਹਾਂ ਸਕੂਲਾਂ ਨੂੰ ਜਲਦੀ ਤੋਂ ਜਲਦੀ ਡੀ.ਡੀ.ਓ. ਕੋਡ ਦਿੱਤੇ ਜਾਣ ਤਾਂ ਕਿ ਇਨ੍ਹਾਂ ਸਕੂਲਾਂ ਦੇ ਅਧਿਆਪਕ ਵੀ ਆਪਣੇ ਪਰਿਵਾਰਾਂ ਨਾਲ ਇਨ੍ਹਾਂ ਤਿਉਹਾਰਾਂ ਦਾ ਅਨੰਦ ਮਾਣ ਸਕਣ।


-ਅੰਮ੍ਰਿਤ ਕੌਰ
ਮੁੱਖ ਅਧਿਆਪਕ, ਸਰਕਾਰੀ ਹਾਈ ਸਕੂਲ, ਰਣੀਆ (ਲੁਧਿਆਣਾ)।


ਪ੍ਰਦੂਸ਼ਣ ਕਿ ਮਹਾਂਮਾਰੀ

ਪੰਜਾਬ ਦੀ ਧਰਤੀ ਉਤੇ ਇਸ ਸਮੇਂ 33 ਫ਼ੀਸਦੀ ਰੁੱਖਾਂ ਦੀ ਥਾਂ ਕੇਵਲ 3 ਫ਼ੀਸਦੀ ਰੁੱਖ ਹੀ ਬਚੇ ਹਨ। ਮੋਹਲੇਧਾਰ ਬਾਰਸ਼ਾਂ ਤਾਂ ਬੰਦ ਹੋਈਆਂ ਹਨ ਪ੍ਰੰਤੂ ਰੁੱਖਾਂ ਦੀ ਕਮੀ ਨਾਲ ਪ੍ਰਦੂਸ਼ਣ ਇਕ ਮਹਾਂਮਾਰੀ ਦਾ ਰੂਪ ਵਟਾਈ ਜਾ ਰਿਹਾ ਹੈ। ਪ੍ਰਦੂਸ਼ਣ ਨਾਲ ਕਈ ਐਸੀਆਂ ਬਿਮਾਰੀਆਂ ਲਗਦੀਆਂ ਹਨ, ਜਿਨ੍ਹਾਂ ਦਾ ਕੋਈ ਇਲਾਜ ਹੀ ਨਹੀਂ। ਮਿਸਾਲ ਦੇ ਤੌਰ 'ਤੇ ਇਕ ਬਿਮਾਰੀ ਦਾ ਨਾਂਅ ਹੈ ਆਈ.ਐਲ.ਡੀ.। ਇਹ ਛਾਤੀ ਦੇ ਅੰਦਰਵਾਰ ਮਕੜੀ ਵਰਗਾ ਜਾਲਾ ਪੈਦਾ ਕਰ ਦਿੰਦੀ ਹੈ। ਇਹ ਜਾਲਾ ਲਗਾਤਾਰ ਵਧਦਾ ਰਹਿੰਦਾ ਹੈ। 6-7 ਸਾਲਾਂ ਵਿਚ ਛਾਤੀ ਇੰਨੀ ਸੁੰਗੜ ਜਾਂਦੀ ਹੈ ਕਿ ਫੇਫੜੇ ਸਾਹ ਪ੍ਰਣਾਲੀ ਨੂੰ ਕੰਮ ਵਿਚ ਨਹੀਂ ਲਿਆ ਸਕਦੇ। ਨਤੀਜੇ ਵਜੋਂ ਮਰੀਜ਼ ਮੌਤ ਦੇ ਮੂੰਹ ਵਿਚ ਜਾ ਡਿਗਦਾ ਹੈ। ਪ੍ਰਦੂਸ਼ਣ ਨੂੰ ਸਿਰਫ਼ ਰੁੱਖ ਹੀ ਹਟਾਉਂਦੇ ਹਨ। ਅੱਜ ਸਮੇਂ ਦੀ ਮੁੱਖ ਲੋੜ ਹੈ, ਪੰਜਾਬ ਵਿਚੋਂ ਰੁੱਖਾਂ ਦੀ ਕਮੀ ਨੂੰ ਦੂਰ ਕਰਨਾ। ਸੋ, ਸੜਕਾਂ ਨੂੰ ਚੌੜਾ ਕਰਨ ਜਾਂ ਖੇਤੀਬਾੜੀ ਹੇਠ ਰਕਬਾ ਵਧਾਉਣ ਖਾਤਰ ਹੁਣ ਤੱਕ ਪੰਜਾਬ ਵਿਚ ਰੁੱਖਾਂ ਦਾ ਜਿੰਨਾ ਵਿਨਾਸ਼ ਹੋਇਆ ਹੈ, ਉਸ ਦੀ ਪੂਰਤੀ ਲਈ ਸਭ ਵੱਡੀਆਂ-ਛੋਟੀਆਂ ਸੜਕਾਂ ਉਤੇ ਦੁਬਾਰਾ ਪਿੱਪਲ, ਬੋਹੜ, ਨਿੰਮਾਂ ਅਤੇ ਹੋਰ ਲਾਭਦਾਇਕ ਪੱਤੇਦਾਰ ਰੁੱਖ ਲਗਾਉਣੇ ਜ਼ਰੂਰੀ ਹੋ ਗਏ ਹਨ। ਸੋ, ਜਾਗੋ ਪੰਜਾਬ ਉਤੇ ਰਾਜ ਕਰਨ ਵਾਲਿਓ, ਜਾਗੋ ਪੰਜਾਬੀਓ ਅਤੇ ਜਾਗੋ ਸੰਤ ਮਹਾਂਪੁਰਸ਼ੋ। ਸਾਲ ਵਿਚ ਦੋ ਵਾਰ ਰੁੱਖ ਲਗਾਉਣੇ ਤੇ ਪਾਲਣੇ ਆਪਣਾ ਧਰਮ ਕਰਮ ਬਣਾ ਲਵੋ, ਆਪਣੇ ਬਜ਼ੁਰਗਾਂ ਵਾਂਗ। ਇਸ ਤੋਂ ਵੱਡੀ ਹੋਰ ਕੋਈ ਸੇਵਾ ਨਹੀਂ।


-ਇੰਜ: ਕੁਲਦੀਪ ਸਿੰਘ ਲੁੱਧਰ
ਗੁਰੂ ਨਾਨਕ ਵਾੜਾ, ਅੰਮ੍ਰਿਤਸਰ।
ਮੋਬਾਈਲ : 81463-44724.



ਸੜਕ ਦੁਰਘਟਨਾਵਾਂ

ਆਵਾਜਾਈ ਦੇ ਸਾਧਨਾਂ ਦੇ ਕਾਰਨ ਮਨੁੱਖ ਦਾ ਜੀਵਨ ਬਹੁਤ ਆਸਾਨ ਹੋ ਚੁੱਕਾ ਹੈ। ਘੰਟਿਆਂ ਦਾ ਸਫ਼ਰ ਮਿੰਟਾਂ ਵਿਚ ਪੂਰਾ ਹੋ ਜਾਂਦਾ ਹੈ। ਇਹ ਆਵਾਜਾਈ ਦੇ ਸਾਧਨ ਜਿਥੇ ਮਨੁੱਖ ਦੇ ਜੀਵਨ ਨੂੰ ਸੁਖੀ ਬਣਾਉਂਦੇ ਹਨ ਉਥੇ ਹੀ ਇਨ੍ਹਾਂ ਸਾਧਨਾਂ ਕਾਰਨ ਹੋਣ ਵਾਲੀਆਂ ਸੜਕ ਦੁਰਘਟਨਾਵਾਂ ਕਈ ਵਾਰ ਮਨੁੱਖ ਦੀ ਜ਼ਿੰਦਗੀ ਹੀ ਤਬਾਹ ਕਰ ਦਿੰਦੀਆਂ ਹਨ। ਸਾਡੇ ਦੇਸ਼ ਵਿਚ ਸੜਕ ਦੁਰਘਟਨਾਵਾਂ ਦੂਸਰੇ ਦੇਸ਼ਾਂ ਦੇ ਮੁਕਾਬਲੇ ਜ਼ਿਆਦਾ ਹੁੰਦੀਆਂ ਹਨ। ਆਵਾਜਾਈ ਦੇ ਸਾਧਨਾਂ ਦੀ ਇੰਨੀ ਭਰਮਾਰ ਹੋ ਚੁੱਕੀ ਹੈ ਕਿ ਸੜਕ ਉੱਪਰ ਲੰਘਣਾ ਮੁਸ਼ਕਿਲ ਹੋ ਜਾਂਦਾ ਹੈ ਪਰ ਉਸ ਦੇ ਮੁਕਾਬਲੇ ਸੜਕਾਂ ਦੀ ਚੌੜਾਈ ਅਜੇ ਵੀ ਘੱਟ ਹੈ। ਕੁਝ ਲੋਕ ਨਸ਼ਾ ਕਰਕੇ ਡਰਾਈਵਿੰਗ ਕਰਦੇ ਹਨ, ਜਿਸ ਨਾਲ ਉਹ ਆਪਣੀ ਅਤੇ ਦੂਸਰਿਆਂ ਦੀ ਜਾਨ ਨੂੰ ਖਤਰੇ ਵਿਚ ਪਾ ਦਿੰਦੇ ਹਨ। ਇਸ ਤੋਂ ਇਲਾਵਾ ਟ੍ਰੈਫਿਕ ਨਿਯਮਾਂ ਬਾਰੇ ਪੂਰੀ ਜਾਣਕਾਰੀ ਨਾ ਹੋਣਾ ਵੀ ਹਾਦਸਿਆਂ ਨੂੰ ਸੱਦਾ ਦੇਣਾ ਹੀ ਹੈ। ਦੁਰਘਟਨਾਵਾਂ ਦਾ ਇਕ ਕਾਰਨ ਚੌਕਾਂ/ਸੜਕਾਂ ਉੱਪਰ ਇਸ਼ਾਰਿਆਂ ਦਾ ਯੋਗ ਪ੍ਰਬੰਧ ਨਾ ਹੋਣਾ ਵੀ ਹੈ। ਜ਼ਿੰਦਗੀ ਬਹੁਤ ਕੀਮਤੀ ਹੈ, ਇਸ ਲਈ ਕੀਮਤੀ ਜ਼ਿੰਦਗੀ ਨੂੰ ਸੜਕ ਦੁਰਘਟਨਾਵਾਂ ਵਿਚ ਗੁਆਉਣਾ ਉਚਿਤ ਨਹੀਂ ਹੈ। ਇਕ-ਦੂਸਰੇ ਤੋਂ ਅੱਗੇ ਨਿਕਲਣ ਦੀ ਜ਼ਿੱਦ ਵਿਚ ਜਾਨੀ ਨੁਕਸਾਨ ਕਰਵਾਉਣ ਨਾਲੋਂ ਲੇਟ ਪਹੁੰਚਣਾ ਕਿਤੇ ਬਿਹਤਰ ਹੈ ਕਿਉਂਕਿ 'ਜਾਨ ਹੈ ਤਾਂ ਹੀ ਜਹਾਨ ਹੈ।'


-ਜਸਪ੍ਰੀਤ ਕੌਰ 'ਸੰਘਾ'
ਪਿੰਡ ਤਨੂੰਲੀ, ਜ਼ਿਲ੍ਹਾ ਹੁਸ਼ਿਆਰਪੁਰ।

15-10-2016

 ਭੜਕੀਲੇ ਫੈਸ਼ਨ ਦਾ ਦੌਰ

ਇਸ ਵਿਚ ਕੋਈ ਸ਼ੱਕ ਨਹੀਂ ਕਿ ਅੱਜਕਲ੍ਹ ਕੁੜੀਆਂ ਮੁੰਡਿਆਂ ਨਾਲੋਂ ਕਿਸੇ ਪੱਖੋਂ ਘੱਟ ਨਹੀਂ ਅਤੇ ਦੇਖਣ ਵਾਲੀ ਗੱਲ ਤਾਂ ਇਹ ਹੈ ਕਿ ਪਿਛਲੇ ਦਿਨੀਂ ਰੀਓ ਵਿਚ ਹੋਈਆਂ ਉਲੰਪਿਕ ਖੇਡਾਂ ਵਿਚ ਕੁੜੀਆਂ ਨੇ ਹੀ ਸਾਡੇ ਦੇਸ਼ ਦਾ ਨਾਂਅ ਰੌਸ਼ਨ ਕੀਤਾ ਹੈ। ਭਾਵੇਂ ਸਕੂਲਾਂ-ਕਾਲਜਾਂ ਅਤੇ ਆਮ ਥਾਵਾਂ 'ਤੇ ਕੁੜੀਆਂ ਦਾ ਪਹਿਰਾਵਾ ਮੁੰਡਿਆਂ ਦੇ ਸਮਾਨ ਹੈ ਅਤੇ ਮੁੰਡਿਆਂ ਦੀ ਤਰ੍ਹਾਂ ਕੁੜੀਆਂ ਵੀ ਪੈਂਟਾਂ ਜੀਨਸ ਆਦਿ ਦਾ ਇਸਤੇਮਾਲ ਕਰਦੀਆਂ ਹਨ, ਜਿਸ ਵਿਚ ਕੋਈ ਬੁਰੀ ਗੱਲ ਨਹੀਂ ਹੈ ਪ੍ਰੰਤੂ ਕਈ ਵਾਰ ਲੇਡੀਜ਼ ਬਹੁਤ ਭੜਕੀਲਾ ਪਹਿਰਾਵਾ ਪਹਿਨਦੀਆਂ ਹਨ ਜੋ ਕਿ ਅਜੋਕੇ ਸਮੇਂ ਵਿਚ ਸੋਭਾ ਨਹੀਂ ਦਿੰਦਾ ਅਤੇ ਇਹੋ ਜਿਹਾ ਪਹਿਰਾਵਾ ਕਈ ਵਾਰ ਲੋਕਾਂ ਵਿਚ ਗ਼ਲਤ ਪ੍ਰਭਾਵ ਛੱਡਦਾ ਹੈ। ਸੋ, ਮੇਰੀ ਅੱਜ ਦੀ ਨਾਰੀ ਨੂੰ ਨਿਮਰਤਾ ਸਹਿਤ ਬੇਨਤੀ ਹੈ ਕਿ ਹਮੇਸ਼ਾ ਸਾਦੇ ਪਹਿਰਾਵੇ ਨੂੰ ਤਰਜੀਹ ਦਿੱਤੀ ਜਾਵੇ ਅਤੇ ਚੱਲ ਰਹੇ ਭੜਕੀਲੇ ਫੈਸ਼ਨ ਤੋਂ ਕਿਨਾਰਾ ਕੀਤਾ ਜਾਵੇ।

-ਜਸਪ੍ਰੀਤ ਕੌਰ ਸ਼ੰਕਰ
ਲੁਧਿਆਣਾ।

ਗੱਲ ਸਥਾਈ ਮੈਂਬਰੀ

ਦੀਸੁਰੱਖਿਆ ਪ੍ਰੀਸ਼ਦ ਵਿਚ ਭਾਰਤ ਵੱਲੋਂ ਪੱਕੀ ਮੈਂਬਰੀ ਲੈਣ ਦੇ ਯਤਨਾਂ ਬਾਰੇ ਅਕਸਰ ਚਰਚਾ ਹੁੰਦੀ ਰਹਿੰਦੀ ਹੈ ਪਰ ਕਈ ਵਾਰ ਅਸੀਂ ਕਈ ਕੰਮ ਇਸ ਲਈ ਨਹੀਂ ਕਰਦੇ ਕਿ ਇਸ ਕੰਮ ਨੇ ਸਿਰੇ ਚੜ੍ਹਨਾ ਹੈ ਕਿ ਨਹੀਂ, ਸਗੋਂ ਅਸੀਂ ਉਹ ਕੰਮ ਸਿਰਫ ਆਪਣੇ ਮਨ ਨੂੰ ਢਾਰਸ ਦੇਣ ਲਈ ਹੀ ਕਰਦੇ ਹਾਂ। ਇਹੋ ਹਾਲ ਹੈ ਮੇਰੇ ਭਾਰਤ ਮਹਾਨ ਦਾ! ਸਾਨੂੰ ਸੁਰੱਖਿਆ ਪ੍ਰੀਸ਼ਦ ਵਿਚ ਸਥਾਈ ਮੈਂਬਰੀ ਮਿਲੇ ਜਾਂ ਨਾ ਮਿਲੇ, ਮਨ ਨੂੰ ਪਰਚਾਉਣ ਲਈ ਇਹ ਕੰਮ ਬਹੁਤ ਵਧੀਆ ਹੈ। ਪਰ ਸਾਡੇ ਵੱਡੇ ਸ਼ਰੀਕ ਚੀਨ ਨੂੰ ਕਦੋਂ ਠੰਢਾ ਕੱਢਦੇ। ਉਹ ਕਦੋਂ ਚਾਹੁੰਦਾ ਹੈ ਕਿ ਏਸ਼ੀਆ ਵਿਚ ਕੋਈ ਉਸ ਦੇ ਬਰਾਬਰ ਦਾ ਸ਼ਰੀਕ ਜੰਮੇ? ਭਾਵੇਂ ਅਸੀਂ ਸੰਯੁਕਤ ਰਾਸ਼ਟਰ ਸੰਘ ਨੂੰ ਸਭ ਤੋਂ ਵੱਧ ਫ਼ੌਜੀ ਭੇਜਦੇ ਹਾਂ ਅਤੇ ਹਾਂ ਵੀ ਮੁਢਲੇ ਮੈਂਬਰ, ਪਰ 'ਵੀਟੋ ਪਾਵਰ' ਵਾਲਾ ਊਠ ਦਾ ਬੁੱਲ ਡਿਗਣਾ ਨਹੀਂ, ਪਰ ਸੁਹਾਵਣੇ ਸੁਪਨੇ ਵੇਖਣ 'ਤੇ ਤਾਂ ਕੋਈ ਮੁੱਲ ਨਹੀਂ ਲਗਦਾ, ਕੋਈ ਹਰਜ਼ ਨਹੀਂ। ਮੇਰੇ ਖਾਤੇ ਵਿਚ ਅਜੇ ਤੱਕ 15 ਲੱਖ ਰੁਪਏ ਨਹੀਂ ਆਏ ਪਰ ਉਮੀਦ ਤਾਂ ਹੈ ਕਿ 'ਅੱਛੇ ਦਿਨ ਆਨੇ ਵਾਲੇ ਹੈਂ।'

-ਅਸਤਿੰਦਰ ਬਰਾੜ
ਚੰਡੀਗੜ੍ਹ।

ਸਮਾਂ

ਜਿਵੇਂ ਕਿ ਆਪਾਂ ਸਭ ਜਾਣਦੇ ਹੀ ਹਾਂ ਕਿ ਸਮੇਂ ਦਾ ਸਾਡੇ ਜੀਵਨ ਵਿਚ ਬਹੁਤ ਮਹੱਤਵ ਹੈ। ਇਸ ਕਰਕੇ ਸਾਨੂੰ ਸਮੇਂ ਨੂੰ ਅਜਾਈਂ ਨਹੀਂ ਗੁਆਉਣਾ ਚਾਹੀਦਾ। ਇਕ ਵਾਰ ਬੀਤਿਆਂ ਸਮਾਂ ਮੁੜ ਕਦੇ ਆਪਣੇ ਹੱਥ ਨਹੀਂ ਆ ਸਕਦਾ। ਜੋ ਸਮਾਂ ਬੀਤ ਜਾਂਦਾ ਹੈ, ਉਸ ਬਾਰੇ ਸੋਚ ਕੇ ਆਪਣਾ ਜੀਵਨ ਨਸ਼ਟ ਨਹੀਂ ਕਰਨਾ ਚਾਹੀਦਾ, ਸਗੋਂ ਜੋ ਸਮਾਂ ਚੱਲ ਰਿਹਾ ਹੈ ਅਤੇ ਆਉਣ ਵਾਲਾ ਹੈ, ਉਸ ਵਿਚ ਚੰਗੇ ਕੰਮ ਕਰਨ ਬਾਰੇ ਸੋਚੋ। ਜੇਕਰ ਆਪਾਂ ਇਹ ਸੋਚੀਏ ਕਿ ਮੈਂ ਆਉਣ ਵਾਲੇ ਸਮੇਂ ਵਿਚ ਇਹ ਕਰਕੇ ਹੀ ਵਿਖਾਉਣਾ ਹੈ ਅਤੇ ਜੇਕਰ ਆਪਣਾ ਇਰਾਦਾ ਦ੍ਰਿੜ੍ਹ ਹੈ ਤਾਂ ਆਪਾਂ ਉਹ ਜ਼ਰੂਰ ਕਰ ਸਕਾਂਗੇ, ਪ੍ਰੰਤੂ ਜੇਕਰ ਆਪਾਂ ਇਹ ਹੀ ਸੋਚ ਕੇ ਵਿਰਲਾਪ ਕਰਾਂਗੇ ਕਿ ਮੈਂ ਤਾਂ ਉਹ ਕੰਮ ਕਰਨਾ ਸੀ ਪਰ ਹੋਇਆ ਨਹੀਂ ਤਾਂ ਆਪਾਂ ਹੁਣ ਜੋ ਸਮਾਂ ਚੱਲ ਰਿਹਾ ਹੈ, ਉਸ ਨੂੰ ਵੀ ਇਹ ਸਭ ਵਾਰ-ਵਾਰ ਸੋਚ ਕੇ ਅਜਾਈਂ ਗੁਆ ਦਿਆਂਗੇ। ਸਭ ਤੋਂ ਜ਼ਿਆਦਾ ਕੀਮਤੀ ਚੀਜ਼ ਸਮਾਂ ਹੈ ਘੜੀ ਦੀਆਂ ਸੂਈਆਂ ਨੇ ਆਪਣੀ ਚਾਲ ਚਲਦੇ ਹੀ ਰਹਿਣਾ ਹੈ ਪਰ ਆਪਾਂ ਨੂੰ ਵੀ ਚਾਹੀਦਾ ਹੈ ਕਿ ਉਸ ਘੜੀ ਵੱਲ ਵੇਖ ਕੇ ਚੱਲੀਏ ਸਮੇਂ ਦਾ ਸਭ ਦੀ ਜ਼ਿੰਦਗੀ 'ਤੇ ਹੀ ਅਸਰ ਪੈਂਦਾ ਹੈ ਪਰ ਸਭ ਤੋਂ ਜ਼ਿਆਦਾ ਅਸਰ ਬੱਚਿਆਂ 'ਤੇ ਪੈਂਦਾ ਹੈ। ਕਈ ਬੱਚੇ ਆਪਣੇ ਬਾਰੇ ਬਿਲਕੁਲ ਨਹੀਂ ਸੋਚਦੇ ਤੇ ਬਹੁਤ ਅਣਗਹਿਲੀ ਵਰਤਦੇ ਹਨ। ਉਹ ਪੜ੍ਹਦੇ ਨਹੀਂ ਸਾਰਾ ਦਿਨ ਜਾਂ ਤਾਂ ਟੀ.ਵੀ. ਦੇਖਦੇ ਹਨ ਤੇ ਜਾਂ ਫਿਰ ਖੇਡਦੇ ਹਨ ਪਰ ਜਦੋਂ ਰਿਜ਼ਲਟ ਆਉਣ 'ਤੇ ਪਤਾ ਲਗਦਾ ਹੈ ਕਿ ਅਸੀਂ ਫੇਲ੍ਹ ਹਾਂ ਤਾਂ ਉਸ ਸਮੇਂ ਉਹ ਸੋਚਦੇ ਹਨ ਕਿ ਜਿਸ ਸਮੇਂ ਵਿਚ ਅਸੀਂ ਖੇਡਦੇ ਸੀ ਜਾਂ ਟੀ.ਵੀ. ਦੇਖਦੇ ਸੀ। ਜੇਕਰ ਉਹ ਸਮਾਂ ਪੜ੍ਹਨ ਵਿਚ ਲਗਉਣ ਲੱਗ ਜਾਂਦੇ ਤਾਂ ਅਸੀਂ ਵੀ ਬਾਕੀ ਬੱਚਿਆਂ ਵਾਂਗ ਅਗਾਂਹ ਵੱਧ ਪਾਉਂਦੇ ਅੱਜ ਦਾ ਕੰਮ ਕਦੇ ਵੀ ਕੱਲ੍ਹ 'ਤੇ ਨਹੀਂ ਛੱਡਣਾ ਚਾਹੀਦਾ। ਜ਼ਿੰਦਗੀ ਦਾ ਕੋਈ ਪਤਾ ਨਹੀਂ ਕਿ ਅੱਜ ਹੈ ਅਤੇ ਕੱਲ੍ਹ ਨਾ ਹੋਈਏ। ਜ਼ਿੰਦਗੀ ਵਿਚ ਇਕ-ਇਕ ਮਿੰਟ ਸਾਡੇ ਲਈ ਸਹਾਈ ਹੈ। ਇਸ ਲਈ ਸਮੇਂ ਨੂੰ ਅਜਾਈਂ ਨਾ ਗੁਆਓ ਅਤੇ ਆਪਣਾ ਟਾਈਮ ਟੇਬਲ ਬਣਾ ਲਓ। ਇਸ ਨਾਲ ਤੁਹਾਨੂੰ ਸਫ਼ਲਤਾ ਵੀ ਮਿਲੇਗੀ ਅਤੇ ਸਮੇਂ ਦੀ ਵੀ ਕੁਵਰਤੋਂ ਨਹੀਂ ਹੋਵੇਗੀ। ਕਿਉਂਕਿ ਬੀਤਿਆਂ ਵੇਲਾ ਮੁੜ ਹੱਥ ਨਹੀਂ ਆ ਸਕਦਾ, ਪਛਤਾਵਾ ਹੀ ਕੋਲ ਰਹਿ ਜਾਂਦਾ ਹੈ।

-ਰਮਨਦੀਪ ਕੌਰ
ਜਰਨਲਿਜ਼ਮ ਵਿਭਾਗ, ਗੁਰੂ ਨਾਨਕ ਕਾਲਜ ਫਾਰ ਗਰਲਜ਼, ਸ੍ਰੀ ਮੁਕਤਸਰ ਸਾਹਿਬ।

14-10-2016

 ਸਮਾਜ ਲਈ ਘਾਤਕ ਨਸ਼ੇ

ਅੱਜ ਸਭ ਤੋਂ ਭਿਆਨਕ ਬੁਰਾਈ ਨਸ਼ਾ ਹੈ ਜੋ ਸਾਡੇ ਸਮਾਜ ਨੂੰ ਘੁਣ ਵਾਂਗ ਅੰਦਰੋਂ-ਅੰਦਰ ਖਾਈ ਜਾ ਰਿਹਾ ਹੈ। ਅਨੇਕਾਂ ਰੂਪਾਂ ਵਿਚ ਇਥੇ ਘਾਤਕ ਨਸ਼ੇ ਪਾਏ ਜਾ ਰਹੇ ਹਨ। ਤੰਬਾਕੂ ਨਾਮਕ ਪਦਾਰਥ ਤੋਂ ਅਨੇਕਾਂ ਪ੍ਰਕਾਰ 'ਚ ਬਣੇ ਬੀੜੀ, ਸਿਗਰਟ, ਜ਼ਰਦਾ ਆਦਿ ਪੈਕਟਾਂ ਵਿਚ ਬੰਦ ਅਕਸਰ ਆਸਾਨੀ ਨਾਲ ਤੇ ਸਸਤੇ ਆਮ ਦੁਕਾਨਾਂ ਤੋਂ ਮਿਲ ਜਾਂਦੇ ਹਨ, ਭਾਵੇਂ ਕਿ ਸਿਹਤ ਵਿਭਾਗ ਤੇ ਪ੍ਰਸ਼ਾਸਨ ਵੱਲੋਂ ਅਨੇਕਾਂ ਜਨਤਕ ਥਾਵਾਂ 'ਤੇ 'ਤੰਬਾਕੂ ਰਹਿਤ ਖੇਤਰ' ਬੈਨਰ ਵੀ ਲਗਾ ਰੱਖੇ ਹਨ। ਜਿੰਨਾ ਜ਼ਿਆਦਾ ਪ੍ਰਚਾਰ ਇਨ੍ਹਾਂ ਨਸ਼ਿਆਂ ਖਿਲਾਫ਼ ਹੋ ਰਿਹਾ ਹੈ, ਓਨਾ ਹੀ ਜ਼ਿਆਦਾ ਇਸ ਦੀ ਵਰਤੋਂ ਵਿਚ ਵਾਧਾ ਹੁੰਦਾ ਨਜ਼ਰ ਆ ਰਿਹਾ ਹੈ। ਤੰਬਾਕੂ ਤੇ ਤੰਬਾਕੂ ਤੋਂ ਬਣੇ ਅਨੇਕਾਂ ਪ੍ਰਕਾਰ ਦੇ ਨਸ਼ੇ ਸਿਹਤ ਦਾ ਸਭ ਤੋਂ ਜ਼ਿਆਦਾ ਨੁਕਸਾਨ ਕਰਦੇ ਹਨ। ਖਾਂਸੀ, ਦਮਾ, ਛਾਤੀ ਦੇ ਰੋਗ ਆਦਿ ਤੰਬਾਕੂ ਦੀ ਵਰਤੋਂ ਕਾਰਨ ਹੀ ਪੈਦਾ ਹੋ ਰਹੇ ਹਨ। ਬੜੇ ਦੁੱਖ ਨਾਲ ਇਹ ਵੀ ਕਹਿਣਾ ਪੈ ਰਿਹਾ ਕਿ ਸਰਕਾਰਾਂ ਇਕ ਪਾਸੇ ਤੰਬਾਕੂ ਦੀ ਵਰਤੋਂ 'ਤੇ ਪੂਰੀ ਤਰ੍ਹਾਂ ਨਕੇਲ ਪਾਉਣ ਦੇ ਯਤਨ ਕਰ ਰਹੀਆਂ ਹਨ ਤੇ ਦੂਜੇ ਪਾਸੇ ਵੱਡੇ-ਵੱਡੇ ਸ਼ਹਿਰਾਂ ਅੰਦਰ 'ਹੁੱਕਾ-ਬਾਰ' ਰੈਸਟੋਰੈਂਟਾਂ ਅੰਦਰ ਲੋਕਾਂ ਲਈ ਨਸ਼ਾ ਮੁਹੱਈਆ ਕਰਨ 'ਚ ਰੁੱਝੇ ਹੋਏ ਹਨ। ਅਜਿਹਾ ਕਰਨਾ ਸਮਾਜਿਕ ਬੁਰਾਈਆਂ ਵਿਚ ਵਾਧਾ ਕਰਨਾ ਹੀ ਹੋਵੇਗਾ ਜੋ ਨਿੰਦਾ ਦੇ ਯੋਗ ਹੈ। ਸਾਨੂੰ ਸਭ ਨੂੰ ਸਮਾਜਿਕ ਬੁਰਾਈਆਂ ਖਿਲਾਫ਼ ਸਰਕਾਰਾਂ ਦੇ ਯਤਨਾਂ ਦਾ ਸਾਥ ਦੇਣਾ ਹੋਵੇਗਾ ਅਤੇ ਖ਼ੁਦ ਬਚਣਾ ਹੋਵੇਗਾ ਤਾਂ ਹੀ ਆਉਣ ਵਾਲੀਆਂ ਪੀੜ੍ਹੀਆਂ ਅਰੋਗ ਹੋ ਸਕਣਗੀਆਂ।

-ਮਾਸਟਰ ਦੇਵਰਾਜ ਖੁੰਡਾ
ਸ੍ਰੀ ਰਾਮ ਸ਼ਰਨਮ ਕਾਲੋਨੀ, ਗੁਰਦਾਸਪੁਰ।

ਸਿੱਖੀ ਸਰੂਪ

ਓਬਾਮਾ ਸਰਕਾਰ ਵੱਲੋਂ ਸਿੱਖਾਂ ਨੂੰ ਫ਼ੌਜ ਵਿਚ ਸਿੱਖੀ ਸਰੂਪ ਸਮੇਤ ਕੰਮ ਕਰਨ ਦੀ ਇਜਾਜ਼ਤ ਦੇਣ ਦੀ ਖ਼ਬਰ ਪੜ੍ਹ ਕੇ ਬਹੁਤ ਖੁਸ਼ੀ ਹੋਈ। ਇਹ ਹਰੇਕ ਵਿਅਕਤੀ ਦੀ ਨਿੱਜੀ ਅਤੇ ਧਾਰਮਿਕ ਆਜ਼ਾਦੀ ਨੂੰ ਮਜ਼ਬੂਤ ਕਰਨ ਵੱਲ ਇਕ ਅਹਿਮ ਕਦਮ ਹੈ। ਬਾਕੀ ਦੇਸ਼ਾਂ ਨੂੰ ਵੀ ਇਸ ਤੋਂ ਉਤਸ਼ਾਹਿਤ ਹੋ ਕੇ ਇਸ ਤਰ੍ਹਾਂ ਦੇ ਉਪਰਾਲੇ ਕਰਨੇ ਚਾਹੀਦੇ ਹਨ। ਸਿੱਖ ਕੌਮ ਦਾ ਆਪਣਾ ਇਕ ਵਿਲੱਖਣ ਸਰੂਪ ਅਤੇ ਇਤਿਹਾਸ ਹੈ, ਜਿਸ ਖਿਲਾਫ਼ ਕੋਈ ਭੇਦਭਾਵ ਨਹੀਂ ਹੋਣਾ ਚਾਹੀਦਾ।

-ਡਾ: ਜਸਪ੍ਰੀਤ ਸਿੰਘ ਗਾਬਾ
32, ਦੁਰਗਾ ਕਾਲੋਨੀ, ਜਲੰਧਰ।

ਬਦਲਦਾ ਦੌਰ

ਅੱਜਕਲ੍ਹ ਜਿਵੇਂ-ਜਿਵੇਂ ਸਮਾਜ ਤਰੱਕੀ ਦੇ ਰਾਹ ਵੱਲ ਵਧਦਾ ਜਾ ਰਿਹਾ ਹੈ, ਉਸੇ ਤਰ੍ਹਾਂ ਲੋਕਾਂ ਦੀ ਸੋਚ, ਪਛਾਣ, ਪਹਿਰਾਵਾ ਅਤੇ ਆਦਤਾਂ ਵੀ ਬਦਲਦੀਆਂ ਜਾ ਰਹੀਆਂ ਹਨ। ਅੱਜਕਲ੍ਹ ਦੇ ਨੌਜਵਾਨ ਆਪਣੇ ਪੰਜਾਬੀ ਸੱਭਿਆਚਾਰ ਤੋਂ ਕਾਫੀ ਦੂਰ ਹੁੰਦੇ ਜਾ ਰਹੇ ਹਨ। ਹਰ ਚੀਜ਼ ਵਿਚ ਸਮੇਂ ਦੇ ਨਾਲ-ਨਾਲ ਬਦਲਾਅ ਆਉਣਾ ਲਾਜ਼ਮੀ ਹੀ ਹੁੰਦਾ ਹੈ, ਕਿਉਂਕਿ ਹਰ ਕੋਈ ਸਮੇਂ ਅਨੁਸਾਰ ਢਲਣਾ ਪਸੰਦ ਕਰਦਾ ਹੈ। ਅਸੀਂ ਭਾਵੇਂ ਸਮੇਂ ਦੇ ਅਨੁਸਾਰ ਜਿੰਨਾ ਮਰਜ਼ੀ ਆਧੁਨਿਕ ਹੋ ਜਾਈਏ ਪਰ ਸਾਨੂੰ ਕੁਝ ਗੱਲਾਂ ਨੂੰ ਹਮੇਸ਼ਾ ਧਿਆਨ ਵਿਚ ਰੱਖ ਕੇ ਚੱਲਣਾ ਚਾਹੀਦਾ ਹੈ। ਸਾਨੂੰ ਹਮੇਸ਼ਾ ਵੱਡਿਆਂ ਦਾ ਸਤਿਕਾਰ ਕਰਨਾ ਚਾਹੀਦਾ ਹੈ। ਸਭ ਨਾਲ ਮਿਲਜੁਲ ਕੇ ਰਹਿਣਾ ਚਾਹੀਦਾ ਹੈ ਕਿਉਂਕਿ ਫੈਸ਼ਨ ਇਹ ਨਹੀਂ ਕਹਿੰਦਾ ਕਿ ਉਸ ਦੀ ਆੜ ਵਿਚ ਵਹਿ ਕੇ ਅਸੀਂ ਗ਼ਲਤ ਆਦਤਾਂ ਸਿੱਖੀਏ। ਫੈਸ਼ਨ ਕਰਨਾ ਆਪਣੀ ਜਗ੍ਹਾ 'ਤੇ ਬਿਲਕੁਲ ਠੀਕ ਹੈ ਪਰ ਇਕ ਸੀਮਤ ਹੱਦ ਵਿਚ ਰਹਿ ਕੇ ਕੀਤਾ ਜਾਏ ਤਾਂ ਠੀਕ ਰਹੇਗਾ। ਇਸ ਲਈ ਸਾਨੂੰ ਫੈਸ਼ਨ ਨੂੰ ਅਪਣਾਉਂਦੇ ਹੋਏ ਆਪਣੇ ਪੰਜਾਬੀ ਸੱਭਿਆਚਾਰ ਅਤੇ ਸਮਾਜ ਵਿਚ ਰਹਿਣ-ਸਹਿਣ ਆਦਿ ਵੀ ਧਿਆਨ ਦੇਣਾ ਚਾਹੀਦਾ ਹੈ। ਸਾਡਾ ਆਚਰਨ ਜੇਕਰ ਵਧੀਆ ਹੋਵੇਗਾ ਤਾਂ ਕੋਈ ਵੀ ਸਾਡੇ ਫੈਸ਼ਨ ਕਰਨ ਦੇ ਤਰੀਕੇ ਦਾ ਵਿਰੋਧ ਨਹੀਂ ਕਰੇਗਾ। ਸਾਨੂੰ ਆਪਣੀ ਸ਼ਖ਼ਸੀਅਤ ਨੂੰ ਵੱਧ ਤੋਂ ਵੱਧ ਨਿਖਾਰਨਾ ਚਾਹੀਦਾ ਹੈ ਤਾਂ ਜੋ ਲੋਕ ਫੈਸ਼ਨ ਨੂੰ ਮਾੜਾ, ਗ਼ਲਤ ਨਾ ਸਮਝਣ।

-ਸੰਦੀਪ ਕੌਰ
ਜਰਨਲਿਜ਼ਮ ਵਿਭਾਗ, ਗੁਰੂ ਨਾਨਕ ਕਾਲਜ ਫਾਰ ਗਰਲਜ਼, ਸ੍ਰੀ ਮੁਕਤਸਰ ਸਾਹਿਬ।

13-10-2016

 ਆਪਣੀ ਅਣਗਹਿਲੀ

ਸੂਬੇ 'ਚ ਕਾਨੂੰਨ ਦੀਆਂ ਧੱਜੀਆਂ ਉਡਾ ਕੇ ਲੋਕਾਂ ਦੀ ਜਾਨ ਨਾਲ ਖੇਡਿਆ ਜਾ ਰਿਹਾ ਹੈ। ਰੋਜ਼ਾਨਾ ਹੋ ਰਹੇ ਸੜਕ ਹਾਦਸਿਆਂ 'ਚ ਕਈ ਘਰਾਂ ਦੇ ਚਿਰਾਗ ਗੁਲ ਹੋ ਜਾਂਦੇ ਹਨ। ਸਰਕਾਰ ਦੀ ਢਿੱਲੀ ਕਾਰਗੁਜ਼ਾਰੀ ਤੇ ਪਬਲਿਕ ਦੀ ਆਪਣੀ ਅਣਗਹਿਲੀ ਕਾਰਨ ਦਿਲ ਦਹਿਲਾ ਦੇਣ ਵਾਲੇ ਹਾਦਸੇ ਰੋਜ਼ਾਨਾ ਅਖ਼ਬਾਰਾਂ ਦੀਆਂ ਸੁਰਖੀਆਂ 'ਚ ਹਨ। ਪਿਛਲੇ ਦਿਨੀਂ ਵਾਪਰੇ ਇਕ ਸੜਕ ਹਾਦਸੇ 'ਚ ਮਾਛੀਵਾੜਾ ਦੇ ਨਜ਼ਦੀਕੀ ਪਿੰਡ ਦੇ ਇਕ ਘਰ ਦੇ ਛੇ ਵਿਅਕਤੀਆਂ ਸਣੇ ਨੌ ਵਿਅਕਤੀ ਆਪਣੀਆਂ ਜਾਨਾਂ ਗੁਆ ਬੈਠੇ। ਇਸੇ ਤਰ੍ਹਾਂ ਸੰਗਰੂਰ ਨਜ਼ਦੀਕ ਪਿੰਡ ਦੇ ਭੈਣ ਭਰਾ ਸਦਾ ਦੀ ਨੀਂਦ ਸੌ ਗਏ ਤੇ 22 ਵਿਅਕਤੀ ਜ਼ਖ਼ਮੀ ਹੋ ਗਏ। ਧਾਰਮਿਕ ਅਸਥਾਨਾਂ ਦੀ ਯਾਤਰਾ, ਅੰਤਿਮ ਅਰਦਾਸ 'ਚ ਸ਼ਾਮਿਲ ਹੋਣ ਲਈ ਥੋੜ੍ਹੇ ਪੈਸਿਆਂ ਦੀ ਬੱਚਤ ਕਰਦੇ ਹੋਏ ਭਾਰ ਢੋਹਣ ਵਾਲੀਆਂ ਗੱਡੀਆਂ 'ਚ ਤੂੜੀ ਵਾਂਗ ਸਵਾਰੀਆਂ ਲੱਦ ਲੈਣਾ ਕੋਈ ਸਮਝਦਾਰੀ ਦੀ ਗੱਲ ਨਹੀਂ ਹੈ। ਆਪਣੀਆਂ ਹੀ ਗ਼ਲਤੀਆਂ ਕਾਰਨ ਸੂਬੇ ਅੰਦਰ ਹਰ ਰੋਜ਼ ਕੀਮਤੀ ਜਾਨਾਂ ਅਜਾਈਂ ਜਾਂਦੀਆਂ ਹਨ। ਇਨ੍ਹਾਂ ਮੌਕਿਆਂ 'ਤੇ ਪਰਮਿਟ ਵਾਲੀਆਂ ਟੂਰ ਟਰੈਵਲ ਗੱਡੀਆਂ ਆਦਿ ਨੂੰ ਪਹਿਲ ਦੇ ਕੇ ਸੜਕ ਹਾਦਸਿਆਂ ਤੋਂ ਬਚਿਆ ਜਾ ਸਕਦਾ ਹੈ। ਸਰਕਾਰ ਨੂੰ ਵੀ ਇਸ ਸਬੰਧੀ ਸਖ਼ਤੀ ਕਰਨਾ ਸਮੇਂ ਦੀ ਮੁੱਖ ਮੰਗ ਹੈ।

-ਮਾ: ਜਗਦੀਪ ਸਿੰਘ ਕਲਾਲ ਮਾਜਰਾ
ਸਮਰਾਲਾ ਰੋਡ, ਖੰਨਾ।

ਸੰਤੁਲਿਤ ਆਹਾਰ

ਸ੍ਰੀ ਕਾਂਚਾ ਇਲਈਆਹ ਦਾ ਲੇਖ 'ਕੀ ਲੋਕਾਂ 'ਤੇ ਸ਼ਾਕਾਹਾਰ ਠੋਸਣਾ ਸਹੀ ਹੈ?' 'ਅਜੀਤ' ਦੇ ਸੰਪਾਦਕੀ ਸਫ਼ੇ 'ਤੇ ਪੜ੍ਹਿਆ, ਜਿਸ ਵਿਚ ਸਾਡੇ ਦੇਸ਼ ਦੀਆਂ ਰੀਤੀਆਂ, ਨੀਤੀਆਂ ਅਤੇ ਪ੍ਰਚਾਰ 'ਤੇ ਸਾਰਥਿਕ ਟਿੱਪਣੀ ਕੀਤੀ ਹੈ। ਬੱਚਿਆਂ ਦੀਆਂ ਸਰੀਰਕ ਸਿੱਖਿਆ ਦੀਆਂ ਕਿਤਾਬਾਂ ਵਿਚ ਜਦੋਂ ਖੁਰਾਕੀ ਤੱਤ ਅਤੇ ਵਿਟਾਮਿਨ ਸਬੰਧੀ ਅਧਿਆਇ ਪੜ੍ਹਦੇ ਹਾਂ ਤਾਂ ਉਸ ਵਿਚ ਕਈ ਥਾਈਂ ਅੰਡਾ, ਮੀਟ ਤੇ ਮੱਛੀ ਦਾ ਜ਼ਿਕਰ ਆਉਂਦਾ ਹੈ। ਭੋਜਨ ਵਿਚ ਪੂਰੇ ਤੱਤ ਹੋਣ ਫਿਰ ਹੀ ਸਰੀਰਕ ਅਤੇ ਮਾਨਸਿਕ ਵਿਕਾਸ ਹੁੰਦਾ ਹੈ। ਭਾਰਤ ਵਾਸੀ ਅਹਿੰਸਾ ਦੇ ਪੁਜਾਰੀ, ਸ਼ਾਕਾਹਾਰੀ ਅਤੇ ਅੰਧਵਿਸ਼ਵਾਸੀ ਹੋਣ ਕਰਕੇ ਕਈ ਪੱਖਾਂ ਤੋਂ ਕਮਜ਼ੋਰ ਰਹੇ ਹਨ। ਜਦੋਂ ਅਸੀਂ ਸੋਨ ਤਗਮੇ ਜਿੱਤਣ ਵਾਲੇ ਖਿਡਾਰੀਆਂ ਦੀ ਰੋਜ਼ਾਨਾ ਖੁਰਾਕ ਬਾਰੇ ਪੜ੍ਹਦੇ ਹਾਂ ਤਾਂ ਕੰਨ ਖੁੱਲ੍ਹ ਜਾਂਦੇ ਹਨ। ਜਿਥੇ ਲੋਕਾਂ ਦੇ ਭੋਜਨ 'ਤੇ ਵੀ ਬਿਨਾਂ ਕਿਸੇ ਕਾਰਨ ਪਾਬੰਦੀ ਹੋਵੇ, ਉਨ੍ਹਾਂ ਲਈ ਆਜ਼ਾਦੀ ਕੀ ਅਰਥ ਰੱਖਦੀ ਹੈ? ਪਹਿਰਾਵੇ 'ਤੇ ਵੀ ਪਾਬੰਦੀ ਬਾਰੇ ਇਕ ਮੰਤਰੀ ਦਾ ਬਿਆਨ ਆਇਆ ਸੀ ਕਿ ਬਾਹਰਲੀਆਂ ਯਾਤਰੀ ਲੜਕੀਆਂ ਸਕਰਟ ਪਹਿਨ ਕੇ ਭਾਰਤ ਨਾ ਆਉਣ। ਗ਼ਰੀਬਾਂ, ਮਿਹਨਤਕਸ਼ਾਂ, ਕਿਸਾਨਾਂ ਤੇ ਮਜ਼ਦੂਰਾਂ ਦਾ ਖੂਨ ਚੂਸ ਕੇ ਧਨ ਇਕੱਠਾ ਕਰਨ 'ਤੇ ਅਜੇ ਤੱਕ ਕੋਈ ਪਾਬੰਦੀ ਨਹੀਂ ਲੱਗ ਸਕੀ। ਨਾ ਹੀ ਕਿਸੇ ਵੱਡੇ ਮਗਰਮੱਛ ਨੂੰ ਸਜ਼ਾ ਹੀ ਹੋਈ ਹੈ। ਭਾਰਤ ਦਾ ਰੱਬ ਹੀ ਰਾਖਾ ਹੈ।

-ਮਾ: ਮਹਿੰਦਰ ਸਿੰਘ ਸਿੱਧੂ
ਸਿੱਧਵਾਂ ਕਲਾਂ, ਜ਼ਿਲ੍ਹਾ ਲੁਧਿਆਣਾ।

ਪਰਾਲੀ ਨੂੰ ਅੱਗ

ਹੁਣ ਜਦੋਂ ਝੋਨੇ ਦੀ ਕਟਾਈ ਜ਼ੋਰਾਂ 'ਤੇ ਹੈ, ਕਿਸਾਨ ਹਾੜ੍ਹੀ ਦੀ ਫ਼ਸਲ ਬੀਜਣ ਲਈ ਜ਼ਮੀਨ ਨੂੰ ਤਿਆਰ ਕਰਨ ਲਈ ਬੇਲੋੜੀ ਕਾਹਲੀ ਵਿਚ ਬਾਵਜੂਦ ਸਰਕਾਰੀ ਹਦਾਇਤਾਂ ਦੇ, ਪਰਾਲੀ ਨੂੰ ਸਾੜਨ ਲਈ ਉਤਾਵਲੇ ਹਨ। ਪਰਾਲੀ ਸਾੜਨ ਨਾਲ ਜਿਥੇ ਵਾਤਾਵਰਨ ਪ੍ਰਦੂਸ਼ਿਤ ਹੁੰਦਾ ਹੈ, ਉਥੇ ਹੋਰ ਵੀ ਬਹੁਤ ਨੁਕਸਾਨ ਹੁੰਦੇ ਹਨ। ਜਿਥੇ ਜ਼ਿਲ੍ਹੇ ਦੇ ਡੀ.ਸੀ. ਸਾਹਿਬ ਵੱਲੋਂ ਪਰਾਲੀ ਨੂੰ ਨਾ ਸਾੜਨ ਦੀਆਂ ਹਦਾਇਤਾਂ ਦਿੱਤੀਆਂ ਜਾਂਦੀਆਂ ਹਨ, ਉਥੇ ਸਰਕਾਰ ਨੂੰ ਚਾਹੀਦਾ ਹੈ ਕਿ ਨੌਜਵਾਨਾਂ ਨੂੰ ਸਬਸਿਡੀਆਂ ਦੇ ਕੇ ਗੱਤਾ ਅਤੇ ਆਂਡਿਆਂ ਦੀਆਂ ਟਰੇਆਂ ਦੀਆਂ ਫੈਕਟਰੀਆਂ ਲਗਾਉਣੀਆਂ ਚਾਹੀਦੀਆਂ ਹਨ। ਝੋਨੇ ਦੀ ਪਰਾਲੀ ਨੂੰ ਰੀਪਰ ਨਾਲ ਕੱਟਣ ਤੋਂ ਬਾਅਦ ਜ਼ਮੀਨ ਨੂੰ ਪਾਣੀ ਨਾ ਦੇਣ ਨਾਲ ਪਰਾਲੀ ਗਲ ਕੇ ਖਾਦ ਬਣ ਜਾਂਦੀ ਹੈ। ਪਰਾਲੀ ਨੂੰ ਖੇਤ ਦੇ ਇਕ ਸਾਈਡ 'ਤੇ ਡੰਪ ਕੀਤਾ ਜਾਵੇ ਤੇ ਨਜ਼ਦੀਕੀ ਫੈਕਟਰੀਆਂ ਵਾਲਿਆਂ ਨੂੰ ਵੇਚੀ ਜਾਵੇ। ਕਿਸਾਨਾਂ ਨੂੰ ਕਾਹਲ ਤੋਂ ਕੰਮ ਨਾ ਲੈਂਦਿਆਂ ਪਰਾਲੀ ਨੂੰ ਉਪਰੋਕਤ ਵਸੀਲਿਆਂ ਰਾਹੀਂ ਨਿਪਟਾਉਣਾ ਚਾਹੀਦਾ ਹੈ। ਇਸ ਤਰ੍ਹਾਂ ਸਾਡੇ ਵਾਤਾਵਰਨ ਨੂੰ ਸ਼ੁੱਧ ਕਰਨ ਵਿਚ ਯੋਗਦਾਨ ਪਾਇਆ ਜਾ ਸਕਦਾ ਹੈ।

-ਸਰਵਨ ਸਿੰਘ 'ਪਤੰਗ'
ਪਿੰਡ ਮਾਣੂਕੇ (ਮੋਗਾ)।

12-10-2016

 ਜ਼ਰੂਰੀ ਹੈ ਆਪਸੀ ਭਾਈਚਾਰਾ

ਦੁਨੀਆ ਦੇ ਸਭ ਤੋਂ ਵੱਡੇ ਲੋਕਤੰਤਰ ਦਾ ਮਾਲਕ ਭਾਰਤ ਜਿਥੇ ਸੰਵਿਧਾਨ ਦੀ ਪ੍ਰਸਤਾਵਨਾ 'ਅਸੀਂ ਭਾਰਤ ਦੇ ਲੋਕ ਭਾਰਤ ਨੂੰ ਸੰਪੂਰਨ ਪ੍ਰਭੂਸੱਤਾ ਸੰਪੰਨ, ਸਮਾਜਵਾਦੀ, ਧਰਮ-ਨਿਰਪੱਖ ਲੋਕਰਾਜੀ ਗਣਰਾਜ ਬਣਾਉਣ ਦਾ ਪਵਿੱਤਰ ਵਚਨ ਕਰਦੇ ਹਾਂ' ਨਾਲ ਸ਼ੁਰੂ ਹੁੰਦੀ ਹੈ। ਭਾਵ ਅਸੀਂ ਸਭ ਇਕ ਹਾਂ, ਅਸੀਂ ਸਭ ਭਾਰਤੀ ਹਾਂ। ਪਰ ਅੱਜ ਦੀ ਰਾਜਨੀਤੀ ਰਾਸ਼ਟਰੀ ਮੁੱਦਿਆਂ ਨੂੰ ਭੁੱਲ ਕੇ ਨਿੱਜੀ ਰਾਜਸੀ ਨਫ਼ਰਤ ਕੱਢਣ ਤੇ ਸੱਤਾ ਲਾਲਚ ਤੱਕ ਸੀਮਤ ਰਹਿ ਗਈ ਹੈ। ਇਹ ਕੁਰਸੀ ਦੇ ਲਾਲਚ ਆਮ ਲੋਕਾਂ ਨੂੰ ਹਥਿਆਰ ਬਣਾਉਂਦੇ ਹਨ ਅਤੇ ਕਤਲੋਗਾਰਤ ਦੀ ਰਾਜਨੀਤੀ ਖੇਡਦੀਆਂ ਹਨ। ਆਪਣੀਆਂ ਗ਼ਲਤੀਆਂ ਲਈ ਇਹ ਲੋਕ ਆਮ ਜਨਤਾ ਮੋਹਰਾ ਬਣਾ ਕੇ ਅੱਗੇ ਕਰਦੇ ਹਨ ਅਤੇ ਆਮ ਜਨਤਾ ਜਜ਼ਬਾਤੀ ਹੋ ਕੇ ਕਾਨੂੰਨ ਨੂੰ ਆਪਣੇ ਹੱਥਾਂ 'ਚ ਲੈ ਕੇ ਸਮਾਜ ਦੇ ਮਾਹੌਲ ਨੂੰ ਗੰਧਲਾ ਅਤੇ ਭੈਅ ਵਾਲਾ ਬਣਾ ਰਹੀ ਹੈ। ਜੇਕਰ ਸਾਡੇ ਆਮ ਲੋਕ ਇਸ ਤਰ੍ਹਾਂ ਇਨ੍ਹਾਂ ਲੋਕਾਂ ਦੇ ਲਾਈਲੱਗ ਬਣਦੇ ਰਹੇ ਤਾਂ ਇਹ ਸਾਡੀ ਦੇਸ਼ ਦੀ ਏਕਤਾ ਅਤੇ ਅਖੰਡਤਾ ਲਈ ਠੀਕ ਨਹੀਂ। ਆਮ ਲੋਕਾਂ ਨੂੰ ਇਨ੍ਹਾਂ ਦਗੇਬਾਜ਼ ਲੋਕਾਂ ਦੀਆਂ ਚਾਲਾਂ ਨੂੰ ਸਮਝਣਾ ਚਾਹੀਦਾ ਹੈ ਤੇ ਉਨ੍ਹਾਂ ਦੇ ਸੁਰੱਖਿਆ ਕਵਚ ਨਾ ਬਣਨ।

-ਚੰਨਦੀਪ ਸਿੰਘ 'ਬੁਤਾਲਾ'
ਅੰਮ੍ਰਿਤਸਰ।

ਖ਼ੁਦਕੁਸ਼ੀ ਦਾ ਰਸਤਾ

ਨਿੱਤ ਦਿਹਾੜੇ ਦੋ-ਦੋ ਜਾਂ ਇਸ ਤੋਂ ਵੀ ਵੱਧ ਕਿਸਾਨਾਂ ਅਤੇ ਮਜ਼ਦੂਰਾਂ ਵੱਲੋਂ ਕੀਤੀ ਖ਼ੁਦਕੁਸ਼ੀਆਂ ਬਾਰੇ ਪੜ੍ਹ ਕੇ ਮਨ ਨੂੰ ਬਹੁਤ ਭਾਰੀ ਸੱਟ ਲਗਦੀ ਹੈ। ਖ਼ੁਦਕੁਸ਼ੀਆਂ ਕਰਨਾ ਕੋਈ ਵਧੀਆ ਗੱਲ ਨਹੀਂ। ਪਰ ਬੰਦਾ ਕਰੇ ਤਾਂ ਕਰੇ ਕੀ। ਅੱਜ ਦੀ ਮਹਿੰਗਾਈ ਨੇ ਆਮ ਜਨਤਾ ਦੇ ਨੱਕ ਵਿਚ ਦਮ ਕਰ ਰੱਖਿਆ ਹੋਇਆ ਹੈ ਅਤੇ ਜਦੋਂ ਕਿਸੇ ਸਿਰ ਚੜ੍ਹੇ ਕਰਜ਼ੇ ਦੀ ਪੰਡ ਭਾਰੂ ਹੋ ਜਾਂਦੀ ਹੈ ਤਾਂ ਬੰਦਾ ਅਜਿਹਾ ਕਰਨ ਲਈ ਮਜਬੂਰ ਹੋ ਜਾਂਦਾ ਹੈ। ਭਾਵੇਂ ਸਾਡੀ ਪੰਜਾਬ ਸਰਕਾਰ ਵੱਲੋਂ ਖ਼ੁਦਕੁਸ਼ੀ ਕਰਨ ਵਾਲੇ ਦੇ ਪਰਿਵਾਰ ਨੂੰ ਸਹਾਇਤਾ ਰਾਸ਼ੀ ਦਿੱਤੀ ਜਾਂਦੀ ਹੈ। ਇਹ ਕੋਈ ਸਾਰਥਿਕ ਹੱਲ ਨਹੀਂ। ਸਰਕਾਰ ਨੂੰ ਚਾਹੀਦਾ ਹੈ ਕਿ ਮਹਿੰਗਾਈ ਨੂੰ ਨੱਥ ਪਾਈ ਜਾਵੇ ਅਤੇ ਕਰਜ਼ਾ ਵਿਆਜ ਤੋਂ ਰਹਿਤ ਦਿੱਤਾ ਜਾਵੇ ਅਤੇ ਬੇਰੁਜ਼ਗਾਰੀ ਦਾ ਢੁਕਵਾਂ ਹੱਲ ਲੱਭਿਆ ਜਾਵੇ।

-ਕੇਵਲ ਸਿੰਘ ਬਾਠਾਂ
ਮੋ: 98557-44211.

ਧੁਨੀ ਪ੍ਰਦੂਸ਼ਣ

ਅੱਜ ਸਮਾਜ ਵਿਚ ਤੇਜ਼-ਤਰਾਰ, ਦਿਲ-ਕੰਬਾਊ, ਸੁਣਨ ਸ਼ਕਤੀ ਤੋਂ ਵੱਧ ਉੱਚੀਆਂ ਧੁਨੀ-ਤਰੰਗਾਂ ਡੀ.ਜੇ. ਆਦਿ ਨਾਲ ਪੈਦਾ ਕੀਤੀਆਂ ਜਾ ਰਹੀਆਂ ਹਨ, ਜੋ ਕਿ ਸਾਡੇ ਦਿਲ, ਮਾਨਸਿਕ ਸਥਿਤੀ, ਯਾਦਾਸ਼ਤ, ਸੁਭਾਅ 'ਤੇ ਤਾਂ ਕੁਪ੍ਰਭਾਵ ਪਾਉਂਦੀਆਂ ਹਨ ਹਨ, ਨਾਲ ਦੀ ਨਾਲ ਪਸ਼ੂ-ਪੰਛੀਆਂ, ਵਾਤਾਵਰਨ, ਪੰਛੀਆਂ ਦੇ ਅੰਡਿਆਂ ਅਤੇ ਗਰਭਵਤੀ ਇਸਤਰੀਆਂ ਲਈ ਵੀ ਖ਼ਤਰਨਾਕ ਸਾਬਤ ਹੋ ਰਹੀਆਂ ਹਨ। ਇਸ ਦੇ ਨਾਲ-ਨਾਲ ਵਿਦਿਆਰਥੀਆਂ ਦੀ ਪੜ੍ਹਾਈ ਵਿਚ ਵੀ ਵਿਘਨ ਪੈਂਦਾ ਹੈ ਅਤੇ ਬਿਮਾਰ ਵਿਅਕਤੀਆਂ ਅਤੇ ਬਜ਼ੁਰਗਾਂ ਦੀ ਮਾਨਸਿਕ ਸਿਹਤ 'ਤੇ ਵੀ ਇਹ ਉੱਚੀ ਆਵਾਜ਼ ਦੀਆਂ ਧੁਨੀ-ਤਰੰਗਾਂ ਆਪਣਾ ਗ਼ਲਤ ਪ੍ਰਭਾਵ ਪਾਉਂਦੀਆਂ ਹਨ। ਇਸ ਲਈ ਸਾਨੂੰ ਹਰ ਖੁਸ਼ੀ ਦੇ ਮੌਕੇ 'ਤੇ ਅਤੇ ਆਪਣੇ ਵਾਹਨ ਆਦਿ ਚਲਾਉਂਦੇ ਸਮੇਂ ਧੁਨੀ-ਪ੍ਰਦੂਸ਼ਣ ਤੋਂ ਬਚਣਾ ਚਾਹੀਦਾ ਹੈ। ਲੋੜ ਹੈ ਕਿ ਸਾਰੇ ਇਕਮੁੱਠ ਹੋ ਕੇ ਕੋਸ਼ਿਸ਼ ਕਰੀਏ ਅਤੇ ਧੁਨੀ-ਪ੍ਰਦੂਸ਼ਣ ਤੋਂ ਮੁਕਤੀ ਪਾਈਏ।

-ਮਾਸਟਰ ਸੰਜੀਵ ਧਰਮਾਣੀ
ਸੱਧੇਵਾਲੀਆ, ਸ੍ਰੀ ਅਨੰਦਪੁਰ ਸਾਹਿਬ।

11-10-2016

ਵਾਤਾਵਰਨ ਦੀ ਸ਼ੁੱਧਤਾ ਲਈ

ਪ੍ਰਦੂਸ਼ਣ ਵਾਤਾਵਰਨ ਅੱਜ ਸਾਡੇ ਲਈ ਗੰਭੀਰ ਚੁਣੌਤੀ ਬਣਦਾ ਜਾ ਰਿਹਾ ਹੈ। ਆਉਣ ਵਾਲੇ ਇਕ-ਦੋ ਮਹੀਨੇ ਕਿਸਾਨੀ ਸਮਾਜ ਲਈ ਰੁਝੇਵੇਂ ਭਰੇ ਹੁੰਦੇ ਹਨ। ਝੋਨੇ ਦੀ ਪਰਾਲੀ ਨੂੰ ਜਲਦੀ ਕਿਉਂਟ ਕਣਕ ਦੀ ਬਿਜਾਈ ਲਈ ਅੱਗ ਲਾ ਅਸੀਂ ਵੱਡੀ ਪੱਧਰ 'ਤੇ ਪ੍ਰਦੂਸ਼ਣ ਪੈਦਾ ਕਰਦੇ ਹਾਂ। ਭੁੱਲ ਬੈਠਦੇ ਹਾਂ ਬਰਸਾਤ ਦੇ ਦਿਨਾਂ ਵਿਚ ਲਾਏ ਛੋਟੇ-ਛੋਟੇ ਪੌਦਿਆਂ ਨੂੰ। ਅੱਗ ਨਾਲ ਪੌਦਿਆਂ ਦੀਆਂ ਕਰੂੰਬਲਾਂ ਸੜ ਜਾਂਦੀਆਂ ਨੇ। ਇਨ੍ਹੀਂ ਦਿਨੀਂ ਹੀ ਸਾਡੇ ਸਭ ਤੋਂ ਵੱਡੇ ਤਿਉਹਾਰ ਦੀਵਾਲੀ ਅਤੇ ਦੁਸਹਿਰਾ ਆਉਂਦੇ ਹਨ, ਜਿਨ੍ਹਾਂ 'ਤੇ ਪਟਾਕਿਆਂ ਨਾਲ ਵਾਤਾਵਰਨ ਖੂਬ ਪ੍ਰਦੂਸ਼ਣ ਹੁੰਦਾ ਹੈ। ਪਟਾਕਿਆਂ ਦੇ ਖੜਾਕ ਕਾਰਨ ਕਈ ਪੰਛੀ ਡਰ ਨਾਲ ਸਹਿਮ ਜਾਂਦੇ ਹਨ, ਸਾਹ ਦਮੇ ਦੇ ਰੋਗੀਆਂ ਨੂੰ ਸਾਹ ਲੈਣ ਵਿਚ ਮੁਸ਼ਕਿਲ ਪੇਸ਼ ਆਉਂਦੀ ਹੈ। ਦਿਨੋ-ਦਿਨ ਵਧ ਰਹੀ ਗੱਡੀਆਂ ਦੀ ਗਿਣਤੀ ਵਾਤਾਵਰਨ ਪ੍ਰਦੂਸ਼ਣ ਵਿਚ ਵਾਧਾ ਕਰ ਰਹੀ ਹੈ। ਤੇਜ਼ੀ ਨਾਲ ਪਲੀਤ ਹੋ ਰਹੀ ਆਬੋ-ਹਵਾ ਸਾਡੇ ਆਪਣੇ ਹੀ ਕਬੁੱਧਪੁਣੇ ਦਾ ਹੀ ਨਤੀਜਾ ਹੈ। ਸੋ ਸਾਨੂੰ ਸਮੁੱਚੇ ਆਵਾਮ ਦੀਆਂ ਮੁਸ਼ਕਿਲਾਂ ਨੂੰ ਮੱਦੇਨਜ਼ਰ ਰੱਖਦੇ ਹੋਏ ਪਰਾਲੀ ਨੂੰ ਅੱਗ ਨਾ ਅਤੇ ਤਿਉਹਾਰਾਂ ਨੂੰ ਪਟਾਕਿਆਂ ਰਹਿਤ ਸ਼ਾਂਤਮਈ ਢੰਗ ਨਾਲ ਮਨਾਉਣਾ ਚਾਹੀਦਾ ਹੈ ਤਾਂ ਕਿ ਸਾਡਾ ਚੌਗਿਰਦਾ ਹਰਿਆ-ਭਰਿਆ ਅਤੇ ਪ੍ਰਦੂਸ਼ਣ ਮੁਕਤ ਰਹੇ। ਕਦੇ ਕਲਪਨਾ ਕਰਿਉ ਕਿ ਜੇਕਰ ਪਾਣੀ ਸਾਫ਼ ਹਵਾ ਤੇ ਰੁੱਖ ਨਾ ਹੋਣ ਤਾਂ ਇਕੱਲਾ ਮਨੁੱਖੀ ਜੀਵਨ ਕਿਸ ਤਰ੍ਹਾਂ ਦਾ ਹੋਵੇਗਾ। ਆਓ! ਫਿਰ ਆਪਣੇ ਨਿੱਜੀ ਮੁਫ਼ਾਦਾਂ ਨੂੰ ਲਾਂਭੇ ਰੱਖ ਵਾਤਾਵਰਨ ਦੀ ਸ਼ੁੱਧਤਾ ਲਈ ਆਪਣੇ ਅੰਞਾਣੇ ਬਾਲਾਂ ਵਰਗੇ ਪੌਦਿਆਂ ਨੂੰ ਅੱਗ ਤੋਂ ਬਚਾਉਣ, ਇਸ ਪ੍ਰਦੂਸ਼ਿਤ ਹੋ ਰਹੀ ਹਵਾ ਨੂੰ ਬਚਾਉਣ ਲਈ ਆਪਣੇ-ਆਪਣੇ ਤੌਰ 'ਤੇ ਨਿੱਜੀ ਯਤਨ ਅਰੰਭੀਏ।

-ਜਸਬੀਰ ਦੱਧਾਹੂਰ
ਪਿੰਡ ਤੇ ਡਾਕ: ਦੱਧਾਹੂਰ, ਤਹਿ: ਰਾਏਕੋਟ, ਜ਼ਿਲ੍ਹਾ ਲੁਧਿਆਣਾ।

ਆਓ, ਰੁੱਖਾਂ ਦੀ ਗੱਲ ਕਰੀਏ

ਵਤਨ ਪੰਜਾਬ ਦੇ ਪੰਜਾਬੀ ਵੀਰੋ, ਕੀ ਤੁਸੀਂ ਜਾਣਦੇ ਹੋ ਕਿ ਜਿਸ ਧਰਤੀ ਦਾ 33 ਫ਼ੀਸਦੀ ਹਿੱਸਾ ਰੁੱਖਾਂ ਨਾਲ ਢਕਿਆ ਹੋਵੇ, ਉਤੇ ਹੀ ਮੋਹਲੇਧਾਰ ਬਾਰਿਸ਼ਾਂ ਹੁੰਦੀਆਂ ਹਨ। ਪੰਜਾਬ ਦੀ ਧਰਤੀ ਉੱਪਰ ਇਸ ਵਕਤ ਸਿਰਫ ਤਿੰਨ ਫ਼ੀਸਦੀ ਰੁੱਖ ਹੀ ਬਚੇ ਹਨ। ਰੁੱਖਾਂ ਦੀ ਕਮੀ ਨਾਲ ਝੜੀਦਾਰ ਬਾਰਿਸ਼ਾਂ ਬੰਦ ਹੋਈਆਂ ਹਨ, ਮਨੁੱਖ ਦੇ ਸਾਹ ਲੈਣ ਵਾਸਤੇ ਆਕਸੀਜਨ ਦੀ ਕਮੀ ਹੋਈ ਹੈ ਅਤੇ ਜਾਨਲੇਵਾ ਪ੍ਰਦੂਸ਼ਣ ਨੇ ਆਪਣਾ ਭਿਆਨਕ ਚਿਹਰਾ ਆ ਦਿਖਾਇਆ ਹੈ। ਬਾਰਿਸ਼ਾਂ ਦੀ ਕਮੀ ਨੇ ਖੇਤੀਬਾੜੀ ਲਈ ਧਰਤੀ ਹੇਠਲਾ ਪਾਣੀ ਵਰਤਣ ਲਈ 16 ਲੱਖ ਟਿਊਬਵੈੱਲਾਂ ਨੂੰ ਵਰਤੋਂ ਵਿਚ ਲਿਆਉਣ ਲਈ ਮਜਬੂਰ ਕੀਤਾ ਹੈ। ਪੀਣ ਵਾਲਾ ਪਾਣੀ ਪ੍ਰਾਪਤ ਕਰਨ ਲਈ 300 ਤੋਂ 400 ਫੁੱਟ ਤੱਕ ਡੂੰਘੇ ਬੋਰ ਕਰਨੇ ਪੈਂਦੇ ਹਨ। ਜੇਕਰ ਕਿੱਧਰੇ ਜੰਗ ਦੌਰਾਨ ਬਿਜਲੀ ਘਰ ਜਵਾਬ ਦੇ ਦੇਣ ਤਾਂ ਫਿਰ ਪੀਣ ਵਾਲਾ ਪਾਣੀ ਕਿੱਥੋਂ ਲੱਭੇਗਾ? ਲੋਕਾਂ ਨੂੰ ਬਿਨਾਂ ਬਿਜਲੀ, ਹੱਥ ਨਲਕਿਆਂ ਰਾਹੀਂ ਪਾਣੀ ਉਦੋਂ ਹੀ ਨਸੀਬ ਹੋ ਸਕਦਾ ਹੈ, ਜੇ ਪਾਣੀ 50 ਫੁੱਟ ਤੋਂ 100 ਫੁੱਟ ਤੱਕ ਨੀਵਾਂ ਹੋਵੇ। ਪਾਣੀ ਦੀ ਕਮੀ ਲੋੜੀਂਦੇ ਰੁੱਖ ਲਗਾ ਕੇ ਮੋਹਲੇਧਾਰ ਬਾਰਿਸ਼ਾਂ ਰਾਹੀਂ ਹੀ ਦੂਰ ਕੀਤੀ ਜਾ ਸਕਦੀ ਹੈ। ਜਾਗੋ ਪੰਜਾਬੀਓ! ਜਾਗੋ ਸ਼ਹਿਰ ਤੇ ਪਿੰਡ ਨਿਵਾਸੀਓ! ਜਾਗੋ ਸੰਤ ਮਹਾਂਪੁਰਸ਼ੋ! ਸਾਲ ਵਿਚ ਬਰਸਾਤਾਂ ਤੇ ਬਸੰਤ ਦੀ ਰੁੱਤੇ, ਥਾਂ-ਥਾਂ ਟੋਲੀਆਂ ਵਿਚ ਸਭ ਖਾਲੀ ਥਾਵਾਂ ਉੱਤੇ ਵੱਧ ਤੋਂ ਵੱਧ ਰੁੱਖ ਲਗਾਓ, ਪਾਲੋ ਤੇ ਵੱਡੇ ਕਰਕੇ ਸੁਖ ਪਾਓ। ਪੰਜਾਬ ਸਰਕਾਰ ਨੂੰ ਬੇਨਤੀ ਹੈ ਕਿ ਸੜਕਾਂ ਚੌੜੀਆਂ ਕਰਦੇ ਸਮੇਂ ਜਿਥੇ-ਜਿਥੇ ਰੁੱਖ ਕੱਟੇ ਹਨ, ਉਤੇ ਨਵੇਂ ਰੁੱਖ ਲਗਾਉਣ ਤੇ ਪਾਲਣ ਦੀ ਜ਼ਿੰਮੇਵਾਰੀ ਜੰਗਲਾਤ ਵਿਭਾਗ ਦੇ ਜ਼ਿੰਮੇ ਸੌਂਪੇ। ਇਕ ਰੁੱਖ ਸੌ ਸੁੱਖ। ਰੁੱਖਾਂ ਬਾਝੋਂ ਕਈ ਦੁੱਖ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਖ਼ਾਲਸਾ ਕਾਲਜ, ਅੰਮ੍ਰਿਤਸਰ।

10-10-2016

 ਸਮਾਜ ਵਿਚ ਅਧਿਆਪਕ ਦੀ ਹਾਲਤ

ਪਿਛਲੇ ਦਿਨੀਂ ਖ਼ਬਰ ਪੜ੍ਹੀ ਕਿ 'ਦੋ ਵਿਦਿਆਰਥੀਆਂ ਦੁਆਰਾ ਅਧਿਆਪਕ ਦੀ ਚਾਕੂ ਮਾਰ ਕੇ ਹੱਤਿਆ'। ਖ਼ਬਰ ਪੜ੍ਹ ਕੇ ਬਹੁਤ ਹੀ ਦੁੱਖ ਹੋਇਆ। ਇਹ ਘਟਨਾ ਦਿੱਲੀ ਦੇ ਸਰਕਾਰੀ ਸਕੂਲ ਨਾਗਲੋਈ ਦੀ ਹੈ। ਖ਼ਬਰ ਤੋਂ ਪਿਛਲੇ ਸਮੇਂ ਦੀ ਗੁਰੂ ਚੇਲੇ ਦੀ ਪਰੰਪਰਾ ਵੱਲ ਧਿਆਨ ਜਾਂਦਾ ਹੈ, ਜਦ ਅਧਿਆਪਕ ਦਾ ਦਰਜਾ ਮਾਤਾ-ਪਿਤਾ ਤੋਂ ਵੀ ਉੱਪਰ ਹੁੰਦਾ ਸੀ। ਇਹ ਅਧਿਆਪਕ ਹੀ ਹੈ ਜੋ ਡਾਕਟਰ, ਇੰਜੀਨੀਅਰ, ਅਫ਼ਸਰ, ਵਕੀਲ ਅਤੇ ਹੋਰ ਬਹੁਤ ਸਾਰੇ ਕਿੱਤਾਕਾਰਾਂ ਦਾ ਨਿਰਮਾਣ ਕਰ ਸਕਦਾ ਹੈ। ਇਕ ਅਧਿਆਪਕ ਹੀ ਕਿਸੇ ਦੇਸ਼ ਦਾ ਭਵਿੱਖ ਤੈਅ ਕਰਦਾ ਹੈ। ਉਪਰੋਕਤ ਘਟਨਾ ਦਾ ਦੋਸ਼ ਅੱਜ ਦੇ ਵਿਦਿਆਰਥੀ ਵਰਗ ਵਿਚ ਪਾਈ ਜਾ ਰਹੀ ਅਸਹਿਣਸ਼ੀਲਤਾ, ਗੁੱਸਾ ਅਤੇ ਨੈਤਿਕਤਾ ਦਾ ਡਿਗਣਾ ਹੈ। ਸਮਾਜ ਵਿਚ ਵੀ ਨੈਤਿਕਤਾ ਦਾ ਡਿਗਣਾ ਅਤੇ ਸਮਾਜਿਕ ਨਿਘਾਰ ਵੀ ਇਸ ਦਾ ਵੱਡਾ ਕਾਰਨ ਹੈ। ਉਪਰੋਕਤ ਘਟਨਾ ਵਿਦਿਆਰਥੀਆਂ ਵੱਲ ਧਿਆਨ ਦੀ ਮੰਗ ਕਰਦੀ ਹੈ। ਆਓ, ਅਸੀਂ ਸਾਰੇ ਸਮਾਜ ਵਿਚ ਆਏ ਨਿਘਾਰ ਵੱਲ ਧਿਆਨ ਦਈਏ ਅਤੇ ਇਸ ਤਰ੍ਹਾਂ ਦੀਆਂ ਘਟਨਾਵਾਂ ਨੂੰ ਹਲਕੇ ਤੌਰ 'ਤੇ ਨਾ ਲਈਏ। ਆਪਣੇ ਸਮਾਜ ਅਤੇ ਦੇਸ਼ ਦੇ ਭਵਿੱਖ ਵਿਦਿਆਰਥੀਆਂ ਨੂੰ ਚੰਗੀ ਅਗਵਾਈ ਦੇ ਕੇ ਇਸ ਤਰ੍ਹਾਂ ਦੀਆਂ ਘਟਨਾਵਾਂ 'ਤੇ ਰੋਕ ਲਗਾਈਏ।

-ਰਸ਼ਪਾਲ ਸਿੰਘ ਖਹਿਰਾ,
ਤਹਿਸੀਲ ਫਿਲੌਰ (ਜਲੰਧਰ)। ਮੋਬਾ: 98555-16424

ਪੂੰਜੀ ਨਿਵੇਸ਼ਕਾਂ ਨੂੰ ਧਨ ਵਾਪਸ ਮਿਲੇ

ਪਰਲਜ਼ ਗਰੁੱਪ ਦੇ ਪੂੰਜੀ ਨਿਵੇਸ਼ਕ ਬਹੁਤ ਸਮੇਂ ਤੋਂ ਆਪਣੀ ਮਿਹਨਤ ਦੀ ਕਮਾਈ ਦੇ ਪੈਸੇ ਵਿਆਜ ਸਮੇਤ ਵਾਪਸ ਕਰਵਾਉਣ ਲਈ ਜੱਦੋ-ਜਹਿਦ ਕਰ ਰਹੇ ਹਨ ਪਰ ਪਰਨਾਲਾ ਉਥੇ ਦਾ ਉਥੇ ਹੀ ਹੈ। ਇਸ ਗਰੁੱਪ ਵਿਚ ਲੱਖਾਂ ਹੀ ਲੋਕਾਂ ਨੇ ਆਪਣੀ ਦਿਨ-ਰਾਤ ਦੇ ਪਸੀਨੇ ਦੀ ਕਮਾਈ ਪਾਈ-ਪਾਈ ਜੋੜ ਕੇ ਇਸ ਉਮੀਦ ਨਾਲ ਜਮ੍ਹਾਂ ਕਰਵਾਈ ਸੀ ਕਿ ਉਨ੍ਹਾਂ ਨੂੰ ਵਿਆਜ ਸਮੇਤ ਇਹ ਪੈਸਾ ਵਾਪਸ ਮਿਲ ਜਾਵੇਗਾ। ਕਈ-ਕਈ ਸਾਲਾਂ ਤੱਕ ਬਣਦੀਆਂ ਪੂਰੀਆਂ ਕਿਸ਼ਤਾਂ ਭਰ ਕੇ ਵੀ ਪੂੰਜੀ ਦੇ ਵਾਪਸ ਆਉਣ ਦੀ ਕੋਈ ਉਮੀਦ ਨਹੀਂ ਲਗਦੀ। ਇਸੇ ਤਰ੍ਹਾਂ ਕਈ ਹੋਰ ਕੰਪਨੀਆਂ 'ਚ ਨਿਵੇਸ਼ ਕਰਨ ਵਾਲੇ ਲੋਕ ਵੀ ਆਪਣੇ ਪੈਸੇ ਵਾਪਸ ਕਰਵਾਉਣ ਲਈ ਭਟਕ ਰਹੇ ਹਨ। ਸਰਕਾਰਾਂ ਨੂੰ ਚਾਹੀਦਾ ਹੈ ਕਿ ਨਿਵੇਸ਼ਕਾਂ ਦੇ ਖੂਨ-ਪਸੀਨੇ ਦੀ ਕਮਾਈ ਸਬੰਧਤ ਮਾਲਕਾਂ ਤੋਂ ਵਾਪਸ ਕਰਵਾਈ ਜਾਵੇ, ਜੋ ਆਪਣਾ ਪੈਸਾ ਭਰ ਕੇ ਵੀ ਖੱਜਲ-ਖੁਆਰ ਹੋ ਰਹੇ ਹਨ।

-ਇਕਬਾਲ ਸੰਧੂ ਉੱਭਾ,
ਨੇੜੇ ਸ੍ਰੀ ਗੁਰੂ ਹਰਕ੍ਰਿਸ਼ਨ ਸਕੂਲ, ਪ੍ਰੀਤ ਨਗਰ (ਮਾਨਸਾ)> ਮੋਬਾ: 98723-45277

ਬੇਟੇ-ਬੇਟੀ ਦਾ ਫ਼ਰਕ

ਅੱਜ ਦੀ ਔਰਤ ਨੇ ਹਰੇਕ ਖੇਤਰ ਵਿਚ ਮੱਲਾਂ ਮਾਰੀਆਂ ਹਨ। ਉਹ ਖੇਤਰ ਚਾਹੇ ਵਿੱਦਿਆ ਦਾ ਹੋਵੇ ਜਾਂ ਖੇਡਾਂ ਦਾ ਪਰ ਫਿਰ ਵੀ ਔਰਤਾਂ ਨੂੰ ਭਾਰਤੀ ਸਮਾਜ ਵਿਚ ਮਰਦਾਂ ਦੇ ਬਰਾਬਰ ਕਿਉਂ ਨਹੀਂ ਸਮਝਿਆ ਜਾਂਦਾ? ਅੱਜ ਮਰਦਾਂ ਦੇ ਮੁਕਾਬਲੇ ਔਰਤਾਂ ਦੀ ਗਿਣਤੀ ਘਟਦੀ ਜਾ ਰਹੀ ਹੈ। ਪੰਜਾਬ ਵਿਚ ਇਹ ਗਿਣਤੀ 1000 ਲੜਕਿਆਂ ਪਿੱਛੇ 873 ਲੜਕੀਆਂ ਹੈ, ਜੋ ਇਕ ਗੰਭੀਰ ਗੱਲ ਹੈ। ਇਸ ਦਾ ਮੁੱਖ ਕਾਰਨ ਇਹ ਹੈ ਕਿ ਲੜਕੀਆਂ ਨੂੰ ਮਾਂ ਦੀ ਕੁੱਖ ਵਿਚ ਹੀ ਮਾਰ ਦਿੱਤਾ ਜਾਂਦਾ ਹੈ। ਅਲਟਰਾਸਾਊਂਡ ਸੈਂਟਰਾਂ ਰਾਹੀਂ ਬੱਚੇ ਦੇ ਲਿੰਗ ਦਾ ਪਤਾ ਕਰਵਾ ਕੇ ਲੜਕੀਆਂ ਨੂੰ ਮਾਂ ਦੀ ਕੁੱਖ ਵਿਚ ਮਰਵਾ ਦਿੱਤਾ ਜਾਂਦਾ ਹੈ। ਸਾਨੂੰ ਇਸ ਸੋਚ ਨੂੰ ਬਦਲਣਾ ਹੋਵੇਗਾ ਕਿ ਬੇਟੇ ਨਾਲ ਹੀ ਵੰਸ਼ ਚਲਦਾ ਹੈ। ਕੀ ਗਾਰੰਟੀ ਹੈ ਕਿ ਬੇਟਾ ਬੁਢਾਪੇ ਵਿਚ ਮਾਂ-ਪਿਓ ਦੀ ਸੇਵਾ ਕਰੇਗਾ? ਅੱਜ ਜ਼ਰੂਰਤ ਹੈ ਕਿ ਬੇਟੇ-ਬੇਟੀ ਦੇ ਫਰਕ ਨੂੰ ਭੁਲਾ ਕੇ ਦੋਵਾਂ ਦੇ ਜਨਮ ਨੂੰ ਇਕ ਨਜ਼ਰ ਨਾਲ ਦੇਖਿਆ ਜਾਵੇ। ਜੇ ਤੁਸੀਂ ਆਪਣੀ ਬੇਟੀ ਨੂੰ ਚੰਗੀ ਸਿੱਖਿਆ ਅਤੇ ਚੰਗੇ ਸੰਸਕਾਰ ਦਿਓਗੇ ਤਾਂ ਉਹ ਯਕੀਨਨ ਕਿਸੇ ਤਰ੍ਹਾਂ ਵੀ ਬੇਟੇ ਤੋਂ ਘੱਟ ਨਹੀਂ ਹੈ।

-ਮਨਿੰਦਰ ਸਿੰਘ ਰਾਜੂ,
ਗਰਚਾ ਨਰਸਰੀ, ਧਨੌਲਾ ਰੋਡ, ਬਰਨਾਲਾ।

ਪਾਣੀ ਦੀ ਮਹੱਤਤਾ

ਪਾਣੀ ਉਹ ਕੁਦਰਤੀ ਸੋਮਾ ਹੈ, ਜਿਸ ਨੂੰ ਅਕਾਲ ਪੁਰਖ ਨੇ ਸਭ ਤੋਂ ਪਹਿਲਾਂ ਬਣਾਇਆ ਤੇ ਇਸ ਨੂੰ ਗੁਰੂਆਂ, ਪੀਰਾਂ ਨੇ ਅਨਮੋਲ ਕਿਹਾ ਹੈ। ਬਾਣੀ ਵਿਚ ਵੀ ਇਸ ਦੀ ਵਡਿਆਈ ਕੀਤੀ ਹੈ। ਸਾਨੂੰ ਸਭ ਨੂੰ ਚਾਹੀਦਾ ਹੈ ਕਿ ਇਹ ਜੋ ਸਾਡੇ ਕੁਦਰਤੀ ਅਨਮੋਲ ਸੋਮੇ ਹਨ, ਇਨ੍ਹਾਂ ਪ੍ਰਤੀ ਸੁਚੇਤ ਹੋ ਜਾਈਏ, ਆਪਣੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਵੀ ਕੁਝ ਛੱਡ ਜਾਈਏ ਤਾਂ ਜੋ ਉਹ ਆਪਣਾ ਜੀਵਨ ਵਧੀਆ ਢੰਗ ਨਾਲ ਬਤੀਤ ਕਰ ਸਕਣ। ਪਾਣੀ ਦੀ ਸੁੱਚਮਤਾ ਪ੍ਰਤੀ ਵੀ ਸੁਚੇਤ ਹੋਣ ਦੀ ਲੋੜ ਹੈ। ਅੱਜ ਨਦੀਆਂ, ਦਰਿਆਵਾਂ 'ਚ ਵੀ ਅਸੀਂ ਫੈਕਟਰੀਆਂ ਦੀ ਰਹਿੰਦ-ਖੂੰਹਦ ਨਾਲ ਪਾਣੀ ਦੀ ਨਿਰਮਲਤਾ ਨੂੰ ਗੰਧਲਾ ਕਰੀ ਜਾ ਰਹੇ ਹਾਂ, ਜਿਸ ਨਾਲ ਇਹ ਪਾਣੀ ਪੀ ਕੇ ਜੀਵ-ਜੰਤੂ, ਪਸ਼ੂ-ਪੰਛੀਆਂ 'ਤੇ ਮਾੜਾ ਪ੍ਰਭਾਵ ਪੈ ਰਿਹਾ ਹੈ, ਜਿਸ ਨਾਲ ਮਨੁੱਖ ਨੂੰ ਨਾਮੁਰਾਦ ਬਿਮਾਰੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਇਸ ਦੇ ਨਾਲ ਹੀ ਕਿਸਾਨ ਵੀਰਾਂ ਨੂੰ ਵੀ ਬੇਨਤੀ ਹੈ ਕਿ ਉਹ ਸਿਰਫ ਉਹ ਫਸਲਾਂ ਹੀ ਬੀਜਣ ਜਿਨ੍ਹਾਂ ਨੂੰ ਘੱਟ ਤੋਂ ਘੱਟ ਪਾਣੀ ਲੱਗੇ, ਧਰਤੀ 'ਚੋਂ ਲੋੜ ਅਨੁਸਾਰ ਹੀ ਪਾਣੀ ਕੱਢਿਆ ਜਾਵੇ। ਵੀਰੋ! ਪਾਣੀ ਦੀ ਮਹੱਤਤਾ ਨੂੰ ਜਾਣੋ, ਪਾਣੀ ਹੀ ਹੈ ਜੋ ਸਾਨੂੰ ਜਿਉਣ ਦੀ ਸ਼ਕਤੀ ਦਿੰਦਾ ਹੈ ਤੇ ਸਾਡੇ ਸਰੀਰ ਨੂੰ ਵੀ ਸ਼ੁੱਧ ਕਰਦਾ ਹੈ।

-ਤਿਲਕ ਰਾਜ ਰਾਜੂ,
ਨੇੜੇ ਨਾਨਕ ਦਰਬਾਰ, ਬਸੀ ਗੁਲਾਮ ਹੁਸੈਨ (ਹੁਸ਼ਿਆਰਪੁਰ)-146021.
ਮੋਬਾ: 93560-42793

8-10-2016

 ਇਨਸਾਨੀਅਤ ਦੇ ਗੁਣ

ਮਰੀਜ਼ ਦੇ ਕੋਲ ਦੋ ਪਲ ਬਹਿਣਾ ਉਸ ਦੀ ਮਰਜ਼ ਨੂੰ ਮਾਨਸਿਕ ਤੌਰ 'ਤੇ ਜ਼ਰੂਰ ਘੱਟ ਕਰ ਦਿੰਦਾ ਹੈ। ਦੂਜਿਆਂ ਨਾਲ ਮਿਲਣ-ਗਿਲਣ ਨੂੰ ਹੀ ਇਨਸਾਨੀਅਤ ਦਾ ਗੁਣ ਕਿਹਾ ਜਾਂਦਾ ਹੈ। ਪਿਛਲੇ ਦਿਨੀਂ ਇਕ ਸੜਕ ਹਾਦਸੇ ਕਾਰਨ ਮੇਰੇ ਕੁਝ ਸੱਟਾਂ ਵੱਜਣ 'ਤੇ ਮੈਨੂੰ ਮੰਜੇ 'ਤੇ ਆਰਾਮ ਕਰਨਾ ਪਿਆ। ਇਹ ਦਿਨਾਂ ਵਿਚ ਮਿਲਣ-ਗਿਲਣ ਆਇਆਂ ਆਪਣੇ ਤੇ ਪਰਾਇਆਂ ਦੀਆਂ ਸ਼ੁੱਭ ਇੱਛਾਵਾਂ ਨਾਲ ਹੁਣ ਮੈਂ ਨੌ-ਬਰ-ਨੌ ਹਾਂ। ਮੇਰੇ ਗਲੀ-ਮੁਹੱਲੇ ਦੇ ਤਕਰੀਬਨ ਸਭ ਹੀ ਮੇਰੀ ਮਿਜਾਜ਼-ਪੁਰਸ਼ੀ ਲਈ ਮੇਰੇ ਕੋਲ ਆਏ ਤੇ ਹੌਸਲਾ ਦਿੰਦੇ ਰਹੇ। ਉਨ੍ਹਾਂ ਦਾ ਆਉਣਾ ਦੁਆ ਦੇ ਨਾਲ ਦਵਾ ਵੀ ਬਣਦਾ ਰਿਹਾ। ਸੋ ਜੀਵਨ ਵਿਚ ਆਲੇ-ਦੁਆਲੇ ਨਾਲ ਹਮਦਰਦੀ ਜ਼ਰੂਰੀ ਹੁੰਦੀ ਹੈ। ਪਤਾ ਨਹੀਂ ਕਦੋਂ ਕਿਸ ਵੇਲੇ ਕੀਹਦੀ ਲੋੜ ਪੈ ਜਾਵੇ। ਹਮਦਰਦੀ ਦੇ ਸ਼ਬਦਾਂ ਨਾਲ ਆਪਸੀ ਸਾਂਝ ਵਧਦੀ ਹੈ। ਅੱਜਕਲ੍ਹ ਤਾਂ ਮੋਬਾਈਲ ਦੁਆਰਾ ਵੀ ਹਾਲ-ਚਾਲ ਪੁੱਛਿਆ ਜਾ ਸਕਦਾ ਹੈ। ਸੋ ਨੇੜਲੇ ਰਿਸ਼ਤਿਆਂ 'ਚ ਕੁੜੱਤਣ ਦੀ ਥਾਂ ਮਿਠਾਸ ਭਰਨੀ ਚਾਹੀਦੀ ਹੈ।

-ਸਨੇਹਇੰਦਰ ਸਿੰਘ ਮੀਲੂ
#932/25, ਖੰਨਾ।

ਸਲਾਹੁਣਯੋਗ ਉੱਦਮ

ਨਵੇਂ ਲੇਖਕਾਂ ਵੱਲੋਂ ਆਪਣੀ ਗੱਲ ਲੋਕਾਂ ਸਾਹਮਣੇ ਰੱਖਣ ਵਾਸਤੇ ਸਿਰਫ ਅਖ਼ਬਾਰਾਂ, ਰਸਾਲੇ ਹੀ ਵਧੀਆ ਪਲੇਟਫਾਰਮ ਹੁੰਦੇ ਹਨ। ਬੜੀ ਖੁਸ਼ੀ ਦੀ ਗੱਲ ਹੈ ਕਿ ਤੁਸੀਂ ਉੱਭਰਦੇ ਲੇਖਕਾਂ ਨੂੰ ਉਤਸ਼ਾਹਿਤ ਕਰਨ ਲਈ ਪਿਛਲੇ ਕਾਫੀ ਸਮੇਂ ਤੋਂ 'ਲੋਕ ਮੰਚ' ਪੰਨਾ ਸ਼ੁਰੂ ਕੀਤਾ ਹੋਇਆ ਹੈ। ਸਾਹਿਤਕ ਖੇਤਰ ਲਈ ਤੁਹਾਡੇ ਵੱਲੋਂ ਕੀਤਾ ਜਾ ਰਿਹਾ ਇਹ ਉਪਰਾਲਾ ਬੇਹੱਦ ਸਲਾਹੁਣਯੋਗ ਹੈ। ਇਸ ਨਾਲ ਅਨੇਕਾਂ ਨਵੇਂ ਲੇਖਕ ਪੈਦਾ ਹੋਣਗੇ ਤੇ ਯਕੀਨਨ ਇਨ੍ਹਾਂ 'ਚੋਂ ਕਈ ਵਿਦਵਾਨ ਲੇਖਕ ਵੀ ਬਣਨਗੇ।

-ਯਸ਼ ਪੱਤੋ
ਪਿੰਡ ਤੇ ਡਾਕ: ਪੱਤੋ ਹੀਰਾ ਸਿੰਘ, ਜ਼ਿਲ੍ਹਾ ਮੋਗਾ।

ਰਿਸ਼ਤੇ ਨਹੀਂ, ਮੋਬਾਈਲ ਜ਼ਰੂਰੀ

ਅੱਜ ਦੇ ਯੁੱਗ ਨੂੰ ਵਿਗਿਆਨ ਯੁੱਗ ਮੰਨਿਆ ਜਾਂਦਾ ਹੈ, ਜਿਸ ਵਿਚ ਹਰ ਕੋਈ ਆਪਣੇ-ਆਪ ਨੂੰ 'ਮਾਡਰਨ' ਕਹਾਉਣਾ ਚਾਹੁੰਦਾ ਹੈ ਤੇ ਮੋਬਾਈਲ ਇਸ 'ਮਾਡਰਨ' ਕਹਾਉਣ ਦੀ ਹੋੜ ਦਾ ਇਕ ਅਹਿਮ ਹਿੱਸਾ ਮੰਨੇ ਜਾਂਦੇ ਹਨ। ਅੱਜਕਲ੍ਹ 4 ਤੋਂ 5 ਸਾਲ ਦੇ ਬੱਚੇ ਤੋਂ ਲੈ ਕੇ ਹਰ ਨੌਜਵਾਨ ਲੜਕੇ-ਲੜਕੀ ਦੇ ਹੱਥ ਵਿਚ ਮੋਬਾਈਲ ਆਮ ਹੀ ਦਿਸ ਪੈਂਦਾ ਹੈ। ਇੰਜ ਲਗਦਾ ਹੈ ਕਿ ਨੌਜਵਾਨ ਪੀੜ੍ਹੀ ਦਾ ਜੋ ਲਗਾਅ ਪਹਿਲਾਂ ਮਾਂ-ਪਿਉ, ਭੈਣ-ਭਰਾ ਅਤੇ ਹੋਰ ਰਿਸ਼ਤੇਦਾਰਾਂ ਨਾਲ ਹੁੰਦਾ ਸੀ, ਉਹ ਲਗਾਅ ਅੱਜ ਮੋਬਾਈਲ ਨਾਲ ਹੋ ਚੁੱਕਾ ਹੈ। ਅੱਜ ਦੇ ਨੌਜਵਾਨ ਘਰ ਆਏ ਰਿਸ਼ਤੇਦਾਰਾਂ ਨੂੰ 'ਨਮਸਤੇ', 'ਸਤਿ ਸ੍ਰੀ ਅਕਾਲ' ਬੁਲਾਉਣ ਦੀ ਬਜਾਏ ਅਲੱਗ ਕਮਰੇ ਵਿਚ ਬੈਠ ਕੇ ਮੋਬਾਈਲ 'ਤੇ ਚੈਟ ਅਤੇ ਗੱਲਾਂ ਕਰਨਾ ਜ਼ਿਆਦਾ ਪਸੰਦ ਕਰਦੇ ਹਨ। ਪਰ ਅੱਜ ਦੀ ਨੌਜਵਾਨ ਪੀੜ੍ਹੀ ਨੂੰ ਇਹ ਗੱਲ ਚੰਗੀ ਤਰ੍ਹਾਂ ਸਮਝ ਲੈਣੀ ਚਾਹੀਦੀ ਹੈ ਕਿ ਰਿਸ਼ਤਿਆਂ ਦੀ ਜੋ ਨਿੱਘ ਅਤੇ ਪਿਆਰ ਸਾਨੂੰ ਆਪਣੇ ਸਾਕ-ਸਬੰਧੀਆਂ ਨਾਲ ਬੈਠ ਕੇ ਗੱਲ ਕਰਨ ਨਾਲ ਮਿਲਦੀ ਹੈ, ਉਹ ਸਾਂਝ ਤੇ ਮਿੱਠਤ ਤਾਂ ਦੂਰ ਦੀ ਗੱਲ, ਉਸ ਦੀ ਲਲਕ ਵੀ ਮੋਬਾਈਲ ਨਹੀਂ ਦੇ ਸਕਦਾ। ਸੋ, ਮੋਬਾਈਲ ਨੂੰ ਹੀ ਆਪਣਾ ਸਭ ਕੁਝ ਬਣਾਉਣ ਦੀ ਬਜਾਏ, ਇਸ ਦੀ ਉਚਿਤ ਥਾਂ 'ਤੇ ਹੀ ਇਸ ਨੂੰ ਰੱਖਿਆ ਜਾਵੇ ਤਾਂ ਕਿ ਰਿਸ਼ਤਿਆਂ ਦੀ ਮਹਿਕ ਜੀਵਨ ਦੇ ਸਫ਼ਰ ਵਿਚ ਖੁਸ਼ਬੂਆਂ ਖਿਲਾਰ ਸਕੇ।

-ਤਾਨੀਆ
ਜਰਨਲਿਜ਼ਮ ਵਿਭਾਗ, ਗੁਰੂ ਨਾਨਕ ਕਾਲਜ ਫਾਰ ਗਰਲਜ਼, ਸ੍ਰੀ ਮੁਕਤਸਰ ਸਾਹਿਬ।

7-10-2016

 ਸਾਕਾ ਸਾਰਾਗੜ੍ਹੀ

ਜਦੋਂ ਅਸੀਂ ਆਪਣੇ ਪੁਰਖਿਆਂ ਵੱਲੋਂ ਕੀਤੀਆਂ ਕੁਰਬਾਨੀਆਂ ਅਤੇ ਮਹਾਨ ਕਾਰਜਾਂ 'ਤੇ ਝਾਤ ਮਾਰਦੇ ਹਾਂ ਤਾਂ ਸਾਡਾ ਸਿਰ ਫ਼ਖਰ ਦੇ ਨਾਲ ਹੋਰ ਉੱਚਾ ਹੋ ਜਾਂਦਾ ਹੈ। ਹੋਏ ਵੀ ਕਿਉਂ ਨਾ, ਉਨ੍ਹਾਂ ਦੀਆਂ ਕੁਰਬਾਨੀਆਂ ਸਦਕਾ ਅੱਜ ਦੇਸ਼-ਵਿਦੇਸ਼ 'ਚ ਸਾਡੀ ਇਕ ਵੱਖਰੀ ਪਛਾਣ ਕਾਇਮ ਹੈ। ਉਨ੍ਹਾਂ ਮਹਾਨ ਕਾਰਜਾਂ 'ਚੋਂ ਇਕ ਵਿਲੱਖਣ ਗਾਥਾ ਹੈ ਸਾਕਾ ਸਾਰਾਗੜ੍ਹੀ ਦੀ, ਜੋ 1897 ਵਿਚ ਘਟਿਤ ਹੋਈ। ਅੱਜ 119 ਸਾਲ ਲੰਘ ਜਾਣ 'ਤੇ ਵੀ ਮੌਜੂਦਾ ਸੰਦਰਭ ਵਿਚ ਸਾਡੇ ਸਭ ਲਈ ਕਿੰਨੀ ਮਹੱਤਵਪੂਰਨ ਹੈ ਕਿ ਉਸ ਸਮੇਂ ਬਰਤਾਨਵੀ ਪਾਰਲੀਮੈਂਟ ਵੱਲੋਂ ਉਨ੍ਹਾਂ ਮਹਾਨ ਪੰਜਾਬੀ ਯੋਧਿਆਂ ਨੂੰ ਸ਼ਰਧਾਂਜਲੀ ਦੇ ਕੇ ਸਾਰੇ ਦੇ ਸਾਰੇ 21 ਸ਼ਹੀਦਾਂ ਨੂੰ ਸਿਰਮੌਰ ਬਰਤਾਨਵੀ ਜੰਗੀ ਇਨਾਮ ਇੰਡੀਅਨ ਆਰਡਰ ਆਫ ਮੈਰਿਟ ਪੁਰਸਕਾਰ ਦਿੱਤਾ ਗਿਆ ਹੋਵੇ, ਜੋ ਸਾਡੇ ਪਰਮਵੀਰ ਚੱਕਰ ਦੇ ਬਰਾਬਰ ਹੈ।
ਸਾਰਾਗੜ੍ਹੀ ਦਾ ਇਹ ਮਹਾਨ ਸਾਕਾ ਬਰਤਾਨਵੀ ਇਤਿਹਾਸ ਦਾ ਹਿੱਸਾ ਹੈ ਅਤੇ ਸਕੂਲੀ ਪਾਠਕ੍ਰਮ ਦਾ ਭਾਗ ਹੈ। ਇਹ ਸਾਡੇ ਸਭ ਲਈ ਬੜੇ ਮਾਣ-ਸਨਮਾਨ ਵਾਲੀ ਗੱਲ ਹੈ। ਕਿੰਨਾ ਚੰਗਾ ਹੋਵੇ, ਜੇਕਰ ਸਾਡੇ ਬੱਚੇ ਅਤੇ ਆਉਣ ਵਾਲੀਆਂ ਨਸਲਾਂ ਇਸ ਇਤਿਹਾਸ ਨੂੰ ਕਿਤਾਬਾਂ ਵਿਚ ਪੜ੍ਹਨ। ਪੰਜਾਬ ਸਰਕਾਰ ਅਤੇ ਸਿੱਖਿਆ ਵਿਭਾਗ ਨੂੰ ਇਹ ਪੁਰਜ਼ੋਰ ਅਪੀਲ ਹੈ ਕਿ ਇਸ ਸਾਕਾ-ਏ-ਸਾਰਾਗੜ੍ਹੀ ਨੂੰ ਸਕੂਲੀ ਪਾਠਕ੍ਰਮ ਦਾ ਹਿੱਸਾ ਬਣਾਇਆ ਜਾਵੇ। ਇਹੀ ਸਾਡੀ ਉਨ੍ਹਾਂ ਮਹਾਨ ਸੂਰਬੀਰ ਯੋਧਿਆਂ ਨੂੰ ਸੱਚੀ ਅਤੇ ਸੁੱਚੀ ਸ਼ਰਧਾਂਜਲੀ ਹੋਵੇਗੀ।

-ਮਾਸਟਰ ਵਰਿੰਦਰ ਕੁਮਾਰ
ਸਰਕਾਰੀ ਹਾਈ ਸਕੂਲ, ਵਾੜਾ-ਭਾਈ (ਫਿਰੋਜ਼ਪੁਰ)।

ਕੌਣ ਜ਼ਿੰਮੇਵਾਰ

ਪਿਛਲੇ ਦਿਨੀਂ ਇਕ ਨਿੱਜੀ ਸਕੂਲ ਦੀ ਖਸਤਾ ਹਾਲ ਵੈਨ ਜਿਸ ਨੂੰ ਨਸ਼ਈ ਆਦਮੀ ਲੋੜੋਂ ਵੱਧ ਬੱਚੇ ਬਿਠਾ ਕੇ ਚਲਾ ਰਿਹਾ ਸੀ, ਹਾਦਸਾਗ੍ਰਸਤ ਹੋ ਕੇ ਬਿਨਾਂ ਰੇਲਿੰਗ ਵਾਲੇ ਪੁਲ ਤੋਂ ਗੰਦੇ ਨਾਲੇ ਵਿਚ ਜਾ ਡਿੱਗੀ। ਨਿੱਕੇ-ਨਿੱਕੇ ਸੱਤ ਬੱਚਿਆਂ ਦੀ ਮੌਤ ਨਾਲ ਕੋਮਲ ਹਿਰਦੇ ਵਲੂੰਧਰੇ ਗਏ। ਮਾਸੂਮ ਬੱਚਿਆਂ ਦੀਆਂ ਲਾਸ਼ਾਂ ਵੇਖ ਕੇ ਹਰੇਕ ਦਾ ਦਿਲ ਰੋਇਆ। ਦਸ ਬੱਚੇ ਜ਼ਖ਼ਮੀ ਵੀ ਹੋਏ।
ਜੇ ਵੱਡੀ ਜਮਾਤ ਦਾ ਦਲੇਰ ਬੱਚਾ ਵੈਨ ਵਿਚ ਨਾ ਹੁੰਦਾ ਤਾਂ ਜਾਨੀ ਨੁਕਸਾਨ ਜ਼ਿਆਦਾ ਹੋਣਾ ਸੀ। ਕੱਲ੍ਹ ਮੇਰੇ ਮੋਬਾਈਲ 'ਤੇ ਇਕ ਨਿੱਜੀ ਸਕੂਲ ਦਾ ਮੈਜਿਸ ਆਇਆ, ਜਿਥੇ ਮੇਰੇ ਪੋਤਰਾ-ਪੋਤਰੀ ਪੜ੍ਹਦੇ ਹਨ 'ਅਖੇ ਵੈਨਾਂ ਦੀ ਹੜਤਾਲ ਹੈ, ਬੱਚੇ ਸਕੂਲ ਛੱਡਣ ਤੇ ਲਿਆਉਣ ਦੀ ਜ਼ਿੰਮੇਵਾਰੀ ਸਕੂਲ ਦੀ ਨਹੀਂ। ਤੁਹਾਡੀ ਹੈ।' ਮਨ ਵਿਚ ਗੁੱਸਾ ਆਇਆ ਕਿ ਪੰਡ-ਪੰਡ ਫੀਸਾਂ, ਕਿਤਾਬਾਂ-ਕਾਪੀਆਂ ਤੇ ਵਰਦੀਆਂ 'ਚੋਂ ਕਮਾਈ, 50 ਫ਼ੀਸਦੀ ਲੱਕ-ਤੋੜਵਾਂ ਵੈਨ ਦਾ ਕਿਰਾਇਆ ਤੇ ਹੁਣ ਜ਼ਿੰਮੇਵਾਰੀ ਮਾਪਿਆਂ ਦੀ? ਕੌਣ ਜ਼ਿੰਮੇਵਾਰ ਬਣੇ?
ਹੁਣ ਹੜਤਾਲ ਦੌਰਾਨ ਪਤਾ ਲੱਗਾ ਹੈ ਕਿ ਨਿਯਮਾਂ 'ਤੇ ਕੋਈ ਵੀ ਸਕੂਲ ਵੈਨ ਪੂਰੀ ਨਹੀਂ ਉਤਰਦੀ। ਸਾਰਾ ਪ੍ਰਸ਼ਾਸਨ ਵੀ ਮੂਕ ਦਰਸ਼ਕ ਬਣਿਆ ਰਿਹਾ। ਆਓ, ਸਾਰੇ ਸੋਚੀਏ ਕੀ ਹੱਲ ਹੋ ਸਕਦਾ ਹੈ, ਇਸ ਸਾਰੇ ਸਿਸਟਮ ਦਾ। ਨਹੀਂ ਤਾਂ ਰੱਬ ਹੀ ਰਾਖਾ ਹੈ ਨੰਨ੍ਹੀਆਂ ਜਾਨਾਂ ਦਾ।

-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।

6-10-2016

 ਵੋਟਾਂ ਦੀ ਰੁੱਤ

ਭਾਰਤ ਇਕ ਲੋਕਤੰਤਰੀ ਦੇਸ਼ ਹੈ। ਇਥੇ ਸੂਬਿਆਂ ਅਤੇ ਕੇਂਦਰ ਸਰਕਾਰ ਲਈ ਜੋ ਲੋਕ ਮੰਤਰੀ ਦੇ ਰੂਪ ਵਿਚ ਚੁਣ ਕੇ ਜਾਂਦੇ ਹਨ, ਉਨ੍ਹਾਂ ਦੀ ਚੋਣ ਭਾਰਤੀ ਨਾਗਰਿਕ ਆਪਣੇ ਗੁਪਤ ਮਤ ਅਧਿਕਾਰ ਰਾਹੀਂ ਭਾਵ ਵੋਟਾਂ ਪਾ ਕੇ ਕਰਦੇ ਹਨ। ਪਰ ਦੁੱਖ ਦੀ ਗੱਲ ਹੈ ਕਿ ਭਾਰਤੀ ਲੋਕਾਂ ਨੂੰ ਜ਼ਿਆਦਾਤਰ ਆਪਣੇ ਚੁਣੇ ਨੁਮਾਇੰਦਿਆਂ ਪ੍ਰਤੀ ਇਹ ਨਿਰਾਸ਼ਾ ਰਹਿੰਦੀ ਹੈ ਕਿ ਸਾਡੀਆਂ ਵੋਟਾਂ ਨਾਲ ਜਿੱਤਣ ਤੋਂ ਬਾਅਦ ਇਹ ਨੁਮਾਇੰਦੇ ਉਨ੍ਹਾਂ ਦੇ ਪਿੰਡਾਂ, ਸ਼ਹਿਰਾਂ ਭਾਵ ਇਲਾਕਿਆਂ ਦੀ ਸਾਰ ਨਹੀਂ ਲੈਂਦੇ। ਉਹ ਸਿਰਫ਼ ਵੋਟਾਂ ਤੋਂ ਕੁਝ ਸਮਾਂ ਪਹਿਲਾਂ ਹੀ ਦਿਖਾਈ ਦਿੰਦੇ ਹਨ। ਹੋ ਸਕਦਾ ਹੈ ਕਿ ਇਹ ਗੱਲ ਸਾਰੇ ਚੁਣੇ ਹੋਏ ਨੁਮਾਇੰਦਿਆਂ 'ਤੇ ਨਾ ਢੁਕਦੀ ਹੋਵੇ, ਚਲੋ ਕੁਝ ਵੀ ਹੋਵੇ ਪਰ ਭਾਰਤੀ ਨਾਗਰਿਕੋ ਹੁਣ ਤੁਹਾਡਾ ਸਮਾਂ ਆ ਗਿਆ ਹੈ। ਵੋਟਾਂ ਦੀ ਰੁੱਤ ਤੁਹਾਡੇ ਬੂਹਿਆਂ 'ਤੇ ਦਸਤਕ ਦੇ ਰਹੀ ਹੈ। ਸੋਚ-ਸਮਝ ਕੇ ਉਨ੍ਹਾਂ ਉਮੀਦਵਾਰਾਂ ਨੂੰ ਹੀ ਚੁਣਿਓ, ਜੋ ਤੁਹਾਡੀਆਂ ਉਮੀਦਾਂ 'ਤੇ ਪੂਰੇ ਉਤਰਨ ਵਾਲੇ ਹੋਣ।

-ਜਿੰਦ ਜਗਤਾਰ
ਪਿੰਡ ਗੰਡੇਵਾਲ, ਤਹਿ: ਧੂਰੀ, ਜ਼ਿਲ੍ਹਾ ਸੰਗਰੂਰ। ਮੋਬਾ : 98552-89031.

ਬਜ਼ੁਰਗਾਂ ਦਾ ਘਟ ਰਿਹਾ ਸਤਿਕਾਰ

ਅਸੀਂ ਉਹੀ ਕੁਝ ਕੱਟਾਂਗੇ, ਜੋ ਬੀਜਾਂਗੇ। ਜੇਕਰ ਅਸੀਂ ਆਪਣੇ ਬਜ਼ੁਰਗਾਂ ਦਾ ਦਿੱਤਾ ਦੇਣ ਭੁਲਾ ਸਕਦੇ ਹਾਂ ਤਾਂ ਕੱਲ੍ਹ ਨੂੰ ਸਾਡੇ ਨਾਲ ਵੀ ਅਜਿਹਾ ਹੀ ਹੋਵੇਗਾ। ਜੇਕਰ ਅਸੀਂ ਆਪਣੇ ਬਜ਼ੁਰਗਾਂ ਦਾ ਸਤਿਕਾਰ ਨਹੀਂ ਕਰ ਸਕਦੇ ਤਾਂ ਕੱਲ੍ਹ ਨੂੰ ਆਪਣੇ ਬੱਚਿਆਂ ਕੋਲੋਂ ਵੀ ਸਤਿਕਾਰ ਦੀ ਆਸ ਨਹੀਂ ਰੱਖ ਸਕਦੇ। ਜਿਸ ਤਰ੍ਹਾਂ ਸਾਡੇ ਬਜ਼ੁਰਗ ਸਾਡੇ ਪਿਆਰ ਸਾਡੇ ਸਹਾਰੇ ਲਈ ਤਰਸ ਰਹੇ ਹਨ, ਉਸੇ ਤਰ੍ਹਾਂ ਕੱਲ੍ਹ ਨੂੰ ਸਾਨੂੰ ਵੀ ਸਹਾਰੇ ਦੀ ਲੋੜ ਪਵੇਗੀ। ਜਿਸ ਤਰ੍ਹਾਂ ਸਾਡੇ ਬਜ਼ੁਰਗਾਂ ਦੀਆਂ ਸੁੰਨੀਆਂ ਅੱਖਾਂ ਆਪਣੇ ਬੱਚਿਆਂ ਲਈ ਤਰਸ ਰਹੀਆਂ ਹਨ ਉਸੇ ਤਰ੍ਹਾਂ ਕੱਲ੍ਹ ਨੂੰ ਸਾਡੇ ਨਾਲ ਵੀ ਇਹੀ ਹੋਵੇਗਾ, ਕਿਉਂਕਿ ਜੇਕਰ ਅਸੀਂ ਆਪਣੇ ਬਜ਼ੁਰਗਾਂ ਦਾ ਸਤਿਕਾਰ ਨਹੀਂ ਕਰਦੇ ਤਾਂ ਸਾਡੇ ਬੱਚੇ ਬਜ਼ੁਰਗਾਂ ਦਾ ਸਤਿਕਾਰ ਕਰਨਾ ਕਿਵੇਂ ਸਿੱਖਣਗੇ। ਉਮਰ ਦੇ ਇਸ ਪੜਾਅ ਉਤੇ ਸਾਡੇ ਬਜ਼ੁਰਗਾਂ ਨੂੰ ਸਾਡੇ ਕੋਲੋਂ ਕੁਝ ਨਹੀਂ ਚਾਹੀਦਾ, ਸਿਰਫ਼ ਸਾਡੇ ਪਿਆਰ ਭਰੇ ਦੋ ਬੋਲ ਹੀ ਉਨ੍ਹਾਂ ਨੂੰ ਜਿਊਣ ਦੀ ਹਿੰਮਤ ਦੇ ਸਕਦੇ ਹਨ। ਲੋੜ ਹੈ ਇਸ ਗੱਲ ਨੂੰ ਸਮਝਣ ਦੀ ਕਿ, ਜਿਸ ਪਿਆਰ-ਸਤਿਕਾਰ ਦੀ ਆਸ ਅਸੀਂ ਆਪਣੇ ਬੱਚਿਆਂ ਤੋਂ ਰੱਖਦੇ ਹਾਂ, ਉਸੇ ਪਿਆਰ ਦੇ ਹੱਕਦਾਰ ਸਾਡੇ ਮਾਪੇ ਵੀ ਹਨ।

-ਜਸਪ੍ਰੀਤ ਕੌਰ 'ਸੰਘਾ'
ਪਿੰਡ ਤਨੂੰਲੀ, ਜ਼ਿਲ੍ਹਾ ਹੁਸ਼ਿਆਰਪੁਰ।

ਪਾਣੀ ਦੀ ਸੰਭਾਲ

ਪਾਣੀ ਤੋਂ ਬਿਨਾਂ ਜੀਵਨ ਦੀ ਕਲਪਨਾ ਨਹੀਂ ਕੀਤੀ ਜਾ ਸਕਦੀ। ਪਾਣੀ ਜੀਵਨ ਦਾ ਆਧਾਰ ਹੈ। ਜੇ ਹੁਣ ਵੀ ਅਸੀਂ ਪਾਣੀ ਦੀ ਸਾਂਭ-ਸੰਭਾਲ ਵੱਲ ਧਿਆਨ ਨਾ ਦਿੱਤਾ ਤਾਂ ਪਾਣੀ ਦੇ ਇਸ ਕੁਦਰਤੀ ਖਜ਼ਾਨੇ ਤੋਂ ਹੱਥ ਧੋ ਬੈਠਾਂਗੇ। ਕੁਦਰਤ ਨਾਲ ਖਿਲਵਾੜ ਕਰਕੇ ਕਦੇ ਵੀ ਵਿਕਾਸ ਨਹੀਂ ਕੀਤਾ ਜਾ ਸਕਦਾ। ਅਸੀਂ ਰੁੱਖ ਪੁੱਟੀ ਜਾ ਰਹੇ ਹਾਂ, ਦੂਸ਼ਿਤ ਰਸਾਇਣਾਂ ਵਿਚ ਵਾਧਾ ਹੋ ਰਿਹਾ ਹੈ, ਜਿਨ੍ਹਾਂ ਕਰਕੇ ਬਰਸਾਤ ਵੀ ਘੱਟ ਹੁੰਦੀ ਹੈ। ਬਰਸਾਤੀ ਪਾਣੀ ਦੀ ਸੰਭਾਲ ਲਈ ਪ੍ਰੋਜੈਕਟਾਂ ਦੀ ਅਣਹੋਂਦ ਹੈ। ਧਰਤੀ ਹੇਠਲੇ ਪਾਣੀ ਦਾ ਜਲ ਪੱਧਰ ਵਧਾਉਣ ਲਈ ਜ਼ਰੂਰੀ ਹੈ ਕਿ ਮੀਂਹ ਦੇ ਪਾਣੀ ਨੂੰ ਵੱਧ ਤੋਂ ਵੱਧ ਧਰਤੀ ਹੇਠ ਭੇਜਿਆ ਜਾਵੇ। ਇਸ ਲਈ ਛੱਪੜ ਮੁੱਖ ਭੂਮਿਕਾ ਨਿਭਾਅ ਸਕਦੇ ਹਨ।

-ਰਾਜਵੰਤ ਸਿੰਘ ਰਾਜੂ
ਗੁਰੂ ਨਾਨਕ ਆਟੋ ਸਪੇਅਰਜ਼, ਰਾਏਕੋਟ। ਮੋਬਾ: 98722-72782.

ਮੋਬਾਈਲ ਅਤੇ ਨੌਜਵਾਨ

ਹਰ ਕੋਈ ਅੱਜਕਲ੍ਹ ਚਾਹੁੰਦਾ ਹੈ ਕਿ ਉਸ ਦੇ ਹੱਥ ਵਿਚ ਇਕ ਵੱਡਾ ਸਾਰਾ ਮੋਬਾਈਲ ਹੋਵੇ, ਜਿਸ ਤੋਂ ਉਸ ਦੀਆਂ ਇਹ ਸਾਰੀਆਂ ਜ਼ਰੂਰਤਾਂ ਪੂਰੀਆਂ ਹੋਣ। ਪਰ ਇਹ ਵੀ ਜ਼ਰੂਰੀ ਨਹੀਂ ਕਿ ਹਰ ਕੋਈ ਹੀ ਅਜਿਹੀ ਹੈਸੀਅਤ ਰੱਖਦਾ ਹੈ ਕਿ ਉਹ ਆਪਣੀ ਇਸ ਜ਼ਰੂਰਤ ਨੂੰ ਪੂਰਾ ਕਰ ਸਕੇ। ਕੁਝ ਲੋਕਾਂ ਦੀ ਪਹੁੰਚ ਵਿਚ ਹੈ ਤੇ ਕੁਝ ਦੀ ਨਹੀਂ। ਪਰ ਨੌਜਵਾਨ ਪੀੜ੍ਹੀ ਇਸ ਗੱਲ ਨੂੰ ਨਹੀਂ ਸਮਝਦੀ, ਉਨ੍ਹਾਂ ਨੂੰ ਸਿਰਫ਼ ਖੁਦ ਤੋਂ ਮਤਲਬ ਹੈ। ਉਨ੍ਹਾਂ ਨੂੰ ਸਿਰਫ਼ ਵੱਡਾ ਮੋਬਾਈਲ ਚਾਹੀਦਾ ਹੈ ਤਾਂ ਕਿ ਉਹ ਆਪਣੇ ਦੋਸਤਾਂ ਵਿਚ ਆਪਣੀ ਟੌਹਰ ਬਣਾ ਲੈਣ। ਪਰ ਉਹ ਆਪਣੇ ਘਰ ਦੇ ਹਾਲਾਤਾਂ ਨੂੰ ਸਮਝਣ ਦੀ ਕੋਸ਼ਿਸ਼ ਨਹੀਂ ਕਰਦੇ। ਜੇਕਰ ਇਹ ਇਕ ਸਹੀ ਵਰਤੋਂ ਲਈ ਲਿਆ ਜਾਵੇ ਤਾਂ ਇਹ ਸਹੀ ਵੀ ਹੈ ਪਰ ਅੱਜਕਲ੍ਹ ਇਸ ਦੀ ਸਹੀ ਵਰਤੋਂ ਸਿਰਫ਼ ਗ਼ਲਤ ਕੰਮਾਂ ਵਿਚ ਹੀ ਸਮਝੀ ਜਾਂਦੀ ਹੈ। ਅੱਜਕਲ੍ਹ ਨਸ਼ਿਆਂ ਦੇ ਨਾਲ-ਨਾਲ ਇੰਟਰਨੈੱਟ ਵੀ ਮਾਪਿਆਂ ਦੇ ਲਈ ਚਿੰਤਾ ਦਾ ਇਕ ਵੱਡਾ ਕਾਰਨ ਬਣ ਚੁੱਕਾ ਹੈ। ਅੱਜਕਲ੍ਹ ਦੀ ਸਾਡੀ ਨੌਜਵਾਨ ਪੀੜ੍ਹੀ 'ਤੇ ਇਸ ਦਾ ਬਹੁਤ ਵੱਡਾ ਪ੍ਰਭਾਵ ਪੈ ਰਿਹਾ ਹੈ।

-ਰਮਨਦੀਪ ਕੌਰ
ਗੁਰੂ ਨਾਨਕ ਕਾਲਜ, ਸ੍ਰੀ ਮੁਕਤਸਰ ਸਾਹਿਬ।

5-10-2016

 ਹੁਨਰਮੰਦੀ ਦੀ ਸਿਖਲਾਈ

ਅੱਜ ਦੇਸ਼ ਦੀ ਵੱਡੀ ਗਿਣਤੀ ਬੇਰੁਜ਼ਗਾਰੀ ਦੇ ਚੱਕਰ 'ਚ ਉਲਝਦੀ ਜਾ ਰਹੀ ਹੈ। ਬੇਰੁਜ਼ਗਾਰੀ ਕਾਰਨ ਪੜ੍ਹਿਆ-ਲਿਖਿਆ ਵਰਗ ਮਾਨਸਿਕ ਸੰਤੁਲਨ ਗੁਆਉਂਦਾ ਜਾ ਰਿਹਾ ਹੈ। ਅੱਜ ਦੇਸ਼ ਵਿਚ ਬੇਰੁਜ਼ਗਾਰੀ ਇਸ ਕਦਰ ਪਹੁੰਚ ਗਈ ਹੈ ਕਿ ਇਸ ਦਾ ਛੇਤੀ ਕੀਤਿਆਂ ਕੋਈ ਢੁਕਵਾਂ ਹੱਲ ਨਿਕਲਦਾ ਨਹੀਂ ਦਿਸ ਰਿਹਾ। ਦੇਸ਼ ਨੂੰ ਵੱਡੇ ਰੂਪ ਵਿਚ ਬੇਰੁਜ਼ਗਾਰੀ ਦੇਣਾ ਪਿਛਲੇ ਸਮੇਂ 'ਚ ਬਣੀਆਂ ਵੱਖ-ਵੱਖ ਸਰਕਾਰਾਂ ਦੀਆਂ ਨੀਤੀਆਂ ਦੀ ਅਸਫਲਤਾ ਹੀ ਜ਼ਿੰਮੇਵਾਰ ਕਹੀ ਜਾ ਸਕਦੀ ਹੈ।
ਜੇਕਰ ਸਮੇਂ-ਸਮੇਂ ਦੀਆਂ ਸਰਕਾਰਾਂ ਬੇਰੁਜ਼ਗਾਰੀ ਨੂੰ ਗੰਭੀਰਤਾ ਨਾਲ ਲੈਂਦੀਆਂ ਤੇ ਠੋਸ ਨੀਤੀਆਂ ਬਣਾਉਂਦੀਆਂ ਤਾਂ ਅੱਜ ਕਾਫੀ ਹੱਦ ਤੱਕ ਬੇਰੁਜ਼ਗਾਰੀ 'ਤੇ ਕਾਬੂ ਪਾ ਲਿਆ ਗਿਆ ਹੁੰਦਾ। ਜੇਕਰ ਸ਼ੁਰੂ ਤੋਂ ਹੀ ਪੂਰੀ ਗੰਭੀਰਤਾ ਨਾਲ ਦੇਸ਼ ਦੇ ਹਰ ਨਾਗਰਿਕ ਲਈ ਰੁਜ਼ਗਾਰ ਦੇ ਮੌਕੇ ਪੈਦਾ ਕਰਨ ਦੀ ਵਿਉਂਤ ਘੜੀ ਹੁੰਦੀ ਤਾਂ ਸ਼ਾਇਦ ਅੱਜ ਬੇਰੁਜ਼ਗਾਰੀ ਦਾ ਮੁੱਦਾ ਹੀ ਨਾ ਹੁੰਦਾ। ਪਿੱਛੇ ਜਿਹੇ ਮੌਜੂਦਾ ਸਰਕਾਰ ਵੱਲੋਂ ਲੋਕਾਂ ਨੂੰ ਹੁਨਰਮੰਦ ਬਣਾਉਣ ਦੀ ਸਿਖਲਾਈ ਦੇਣ ਅਤੇ ਛੋਟੇ-ਛੋਟੇ ਉਦਮਾਂ ਨੂੰ ਉਤਸ਼ਾਹਿਤ ਕਰਨ ਦੀ ਨੀਤੀ ਅਪਣਾਈ ਗਈ ਹੈ। ਇਸ ਨੀਤੀ ਤਹਿਤ ਛੋਟੇ ਤੇ ਮੱਧ ਵਰਗ ਦੇ ਉਦਮੀ ਆਪਣਾ ਕਾਰੋਬਾਰ ਕਰਨ ਦੇ ਸਮਰੱਥ ਹੋ ਸਕਦੇ ਹਨ। ਜੇਕਰ ਸਰਕਾਰ ਦੀ ਇਹ ਨੀਤੀ ਸਫਲ ਹੁੰਦੀ ਹੈ ਤਾਂ ਕਾਫੀ ਹੱਦ ਤੱਕ ਬੇਰੁਜ਼ਗਾਰੀ 'ਤੇ ਕਾਬੂ ਪਾਉਣ ਦੇ ਨਾਲ-ਨਾਲ ਲੋਕਾਂ ਦਾ ਜੀਵਨ ਪੱਧਰ ਸੁਧਾਰਨ ਦੀ ਆਸ ਵੀ ਕੀਤੀ ਜਾ ਸਕਦੀ ਹੈ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

ਗੁੱਸਾ

ਅੱਜ ਦੀ ਨੌਜਵਾਨ ਪੀੜ੍ਹੀ ਵਿਚ ਗੁੱਸਾ ਬਹੁਤ ਜ਼ਿਆਦਾ ਹੈ, ਕਿਉਂਕਿ ਉਹ ਆਪਣੀ ਮਰਜ਼ੀ ਕਰਨਾ ਚਾਹੁੰਦੇ ਹਨ ਪਰ ਕੁਝ ਫ਼ੈਸਲੇ ਅਜਿਹੇ ਹੁੰਦੇ ਹਨ ਜਿਹੜੇ ਕਿ ਸਿਰਫ ਵੱਡੇ ਹੀ ਲੈ ਸਕਦੇ ਹਨ। ਇਹ ਗੱਲ ਨੌਜਵਾਨ ਸਹਿਣ ਨਹੀਂ ਕਰ ਸਕਦੇ ਅਤੇ ਗੁੱਸੇ ਵਿਚ ਆ ਜਾਂਦੇ ਹਨ। ਪਰ ਗੁੱਸੇ ਵਿਚ ਉਹ ਆਪਣਾ-ਆਪ ਹੀ ਖੋ ਬੈਠਦੇ ਹਨ ਤਾਂ ਉਹ ਕੋਈ ਨਾ ਕੋਈ ਜ਼ਰੂਰ ਗ਼ਲਤ ਕੰਮ ਕਰ ਬੈਠਦੇ ਹਨ। ਪਰ ਗੁੱਸਾ ਸ਼ਾਂਤ ਹੋਣ 'ਤੇ ਉਹ ਕਿਸੇ ਤੋਂ ਮਾਫ਼ੀ ਮੰਗਣ ਦੇ ਲਾਇਕ ਵੀ ਨਹੀਂ ਰਹਿੰਦੇ। ਫਿਰ ਉਨ੍ਹਾਂ ਕੋਲ ਸਿਵਾਏ ਅਫ਼ਸੋਸ ਦੇ ਕੁਝ ਪੱਲੇ ਨਹੀਂ ਰਹਿੰਦਾ। ਉਹ ਅਫ਼ਸੋਸ ਵਿਚ ਏਨਾ ਡੁੱਬ ਜਾਂਦੇ ਹਨ ਕਿ ਉਨ੍ਹਾਂ ਨੂੰ ਆਪਣੀ ਜ਼ਿੰਦਗੀ ਵਿਚ ਅੱਗੇ ਜਾਣ ਲਈ ਕੋਈ ਸਹਾਰਾ ਵੀ ਨਜ਼ਰ ਨਹੀਂ ਆਉਂਦਾ ਅਤੇ ਉਹ ਸਹਾਰੇ ਦੇ ਨਾਂਅ 'ਤੇ ਨਸ਼ਿਆਂ ਦਾ ਸੇਵਨ ਕਰ ਲੈਂਦੇ ਹਨ। ਪਰ ਗੁੱਸੇ ਵਿਚ ਉਨ੍ਹਾਂ ਨੂੰ ਇਹ ਨਹੀਂ ਪਤਾ ਹੁੰਦਾ ਕਿ ਜਿਹੜੇ ਨਸ਼ੇ ਉਹ ਸਹਾਰੇ ਲਈ ਵਰਤਦੇ ਹਨ, ਉਹ ਨਸ਼ੇ ਹੀ ਉਨ੍ਹਾਂ ਦੀ ਜ਼ਿੰਦਗੀ ਨੂੰ ਤਬਾਹ ਕਰ ਦਿੰਦੇ ਹਨ। ਇਸ ਲਈ ਅੰਤ ਵਿਚ ਮੈਂ ਨੌਜਵਾਨਾਂ ਨੂੰ ਇਹੀ ਸਲਾਹ ਦੇਣੀ ਚਾਹੁੰਦੀ ਹਾਂ ਕਿ ਆਪਣੀ ਜ਼ਿੰਦਗੀ ਨੂੰ ਗੁੱਸੇ ਵਿਚ ਤਬਾਹ ਕਰਨ ਦੀ ਥਾਂ, ਗੁੱਸੇ ਤੋਂ ਪ੍ਰਹੇਜ਼ ਕਰਕੇ ਆਪਣਾ ਜੀਵਨ ਹੱਸ ਕੇ ਖੁਸ਼ੀ-ਖੁਸ਼ੀ ਬਤੀਤ ਕਰਨਾ ਚਾਹੀਦਾ ਹੈ।

-ਗੁਰਵਿੰਦਰ ਕੌਰ
ਜਰਨਲਿਜ਼ਮ ਵਿਭਾਗ, ਗੁਰੂ ਨਾਨਕ ਕਾਲਜ ਫਾਰ ਗਰਲਜ਼, ਸ੍ਰੀ ਮੁਕਤਸਰ ਸਾਹਿਬ।

4-10-2016

 ਚਿਹਰਿਆਂ ਦੀ ਰਾਜਨੀਤੀ

ਪੰਜਾਬ ਦਾ ਸਿਆਸੀ ਅਖਾੜਾ ਸਜਣਾ ਸ਼ੁਰੂ ਹੋ ਗਿਆ ਹੈ। ਸਿਆਸੀ ਧਰਾਤਲ 'ਤੇ ਹੋ ਰਹੀ ਉਥਲ-ਪੁਥਲ ਦੇਖ ਕੇ ਇਸ ਤਰ੍ਹਾਂ ਪ੍ਰਤੀਤ ਹੁੰਦੈ ਜਿਵੇਂ ਆਉਣ ਵਾਲੀਆਂ ਚੋਣਾਂ ਜੰਗ ਦਾ ਬਹੁਤ ਵੱਡਾ ਮੈਦਾਨ ਹੋਣ। ਹਰ ਸਿਆਸੀ ਪਾਰਟੀ ਸ਼ਤਰੰਜ ਦੇ ਮੋਹਰਿਆਂ ਵਾਂਗ 'ਚਿਹਰਿਆਂ' ਨੂੰ ਵਰਤ ਰਹੀ ਹੈ। ਕਮਾਲ ਦੀ ਗੱਲ ਹੈ ਕਿ ਇਸ ਸਭ ਵਰਤਾਰੇ ਵਿਚ ਲੋਕਤੰਤਰ ਦਾ ਮਖੌਟਾ ਪਾਈ ਬੈਠੀਆਂ ਸਿਆਸੀ ਪਾਰਟੀਆਂ ਨੇ ਲੋਕਤੰਤਰ ਦੀ ਪਰਿਭਾਸ਼ਾ ਹੀ ਮਧੋਲ ਕੇ ਰੱਖ ਦਿੱਤੀ ਹੈ। ਹਰ ਪਾਰਟੀ ਵੱਲੋਂ 'ਇਕ ਵਿਅਕਤੀ' ਵਿਸ਼ੇਸ਼ ਨੂੰ ਜ਼ੋਰ-ਸ਼ੋਰ ਨਾਲ ਉਭਾਰਿਆ ਜਾ ਰਿਹਾ ਹੈ ਪਰ ਲੋਕਤੰਤਰ ਦਾ ਧੁਰਾ 'ਲੋਕ' ਚੁਣਾਵੀ ਮੁੱਦਿਆਂ ਵਿਚੋਂ ਗਾਇਬ ਹਨ। ਸਿੱਖਿਆ, ਸਿਹਤ, ਵਾਤਾਵਰਨ, ਬਿਹਤਰ ਸਮਾਜਿਕ ਢਾਂਚੇ ਵਰਗੇ ਅਤਿ ਜ਼ਰੂਰੀ ਮੁੱਦੇ ਵਿਸਾਰ ਕੇ ਲੋਕ-ਭਰਮਾਊ ਨਾਅਰੇ, ਮੁਫ਼ਤ ਦੀਆਂ ਸਹੂਲਤਾਂ ਤੇ ਵਿਰੋਧੀਆਂ 'ਤੇ ਦੂਸ਼ਣਬਾਜ਼ੀ ਜ਼ਰੀਏ ਲੋਕ-ਮਨਾਂ ਨੂੰ ਜਿੱਤਣ ਦੀ ਕਵਾਇਦ ਹੋ ਰਹੀ ਹੈ। ਪੰਜਾਬ ਦੀ ਅਜੋਕੀ ਸਮਾਜਿਕ ਤੇ ਆਰਥਿਕ ਵਿਵਸਥਾ ਦੇ ਸਨਮੁਖ ਇਸ ਨੂੰ ਸਿਹਤਮੰਦ ਰੁਝਾਨ ਨਹੀਂ ਕਿਹਾ ਜਾ ਸਕਦਾ। ਪੰਜਾਬ ਦਾ ਭਲਾ ਫੋਕੇ ਨਾਅਰਿਆਂ ਦੀ ਬੁੱਕਲ ਵਿਚ ਨਹੀਂ ਲੁਕਿਆ। ਸੋ, ਲੋੜ ਹੈ ਅਸਲ ਮੁੱਦਿਆਂ ਨੂੰ ਚੋਣਾਵੀ ਧੁਰਾ ਬਣਾਇਆ ਜਾਵੇ। ਸਿਆਸੀ ਧਿਰਾਂ ਵੀ ਫੋਕੇ ਜੁਮਲਿਆਂ ਨੂੰ ਵਿਸਾਰ ਕੇ ਇਕ ਭਵਿੱਖੀ ਯੋਜਨਾ ਲੋਕਾਂ ਸਾਹਮਣੇ ਰੱਖਣ। ਸਭ ਤੋਂ ਜ਼ਰੂਰੀ ਵੋਟਰਾਂ ਨੂੰ ਵੀ ਇਹ ਗੱਲ ਸਮਝਣ ਦੀ ਲੋੜ ਹੈ ਕਿ ਪਾਰਟੀਆਂ ਬਦਲਣ ਨਾਲ ਪੰਜਾਬ ਦਾ ਭਲਾ ਹੋਣ ਵਾਲਾ ਨਹੀਂ। ਇਕ ਸਹੀ ਸੋਚ, ਨਵੀਆਂ ਨੀਤੀਆਂ ਤੇ ਨਵੀਆਂ ਧਾਰਨਾਵਾਂ ਹੀ ਪੰਜਾਬ ਦੀ ਕਿਸਮਤ ਬਦਲਣ ਦੇ ਸਮਰੱਥ ਹਨ।

-ਬਲਜਿੰਦਰ ਸਿੰਘ ਸਮਾਘ
ਸ੍ਰੀ ਮੁਕਤਸਰ ਸਾਹਿਬ।

ਅੰਧ-ਵਿਸ਼ਵਾਸ

ਭਾਵੇਂ ਅੱਜ ਗਿਆਨ-ਵਿਗਿਆਨ ਤੇ ਵਿੱਦਿਆ ਦਾ ਕਾਫੀ ਪਸਾਰ ਹੋ ਚੁੱਕਾ ਹੈ ਪਰ ਇਸ ਦੇ ਬਾਵਜੂਦ ਅੰਧ-ਵਿਸ਼ਵਾਸ ਵੀ ਤੇਜ਼ੀ ਨਾਲ ਵਧ ਰਿਹਾ ਹੈ। ਪੂਜਾ-ਪਾਠ, ਜਾਦੂ-ਟੂਣੇ, ਕਰਮਕਾਂਡ, ਵਹਿਮ-ਭਰਮਾਂ ਵਿਚ ਵੀ ਚੋਖਾ ਵਾਧਾ ਹੁੰਦਾ ਜਾ ਰਿਹਾ ਹੈ। ਭੋਲੇ-ਭਾਲੇ ਗ਼ਰੀਬ ਤੇ ਅਨਪੜ੍ਹ ਲੋਕ ਆਪਣੇ ਘਰਾਂ ਦੇ ਦੁੱਖ-ਕਲੇਸ਼, ਮੰਦਹਾਲੀ ਕਾਰਨ ਅਖੌਤੀ ਸਾਧਾਂ ਤੇ ਸਿਆਣਿਆਂ ਪਾਸ ਜਾ ਕੇ ਮੱਥੇ ਰਗੜਦੇ ਤੇ ਚੜ੍ਹਾਵੇ ਚੜ੍ਹਾਉਂਦੇ ਹਨ। ਇਨ੍ਹਾਂ ਅਖੌਤੀ ਸਾਧਾਂ ਨੇ ਸਾਡੇ ਭੋਲੇ-ਭਾਲੇ ਸਮਾਜ ਦਾ ਬਹੁਤ ਨੁਕਸਾਨ ਕੀਤਾ ਹੈ ਅਤੇ ਕਰ ਰਹੇ ਹਨ। ਲੋੜ ਹੈ ਆਮ ਤੇ ਭੋਲੇ-ਭਾਲੇ ਲੋਕਾਂ ਨੂੰ ਅੰਧ-ਵਿਸ਼ਵਾਸ ਵਿਚੋਂ ਕੱਢਣ ਲਈ ਮੀਡੀਆ (ਅਖ਼ਬਾਰਾਂ, ਟੀ.ਵੀ. ਚੈਨਲ) ਆਪਣੇ ਉਸਾਰੂ ਯਤਨ ਕਰੇ। ਤਰਕਸ਼ੀਲ ਸੁਸਾਇਟੀਆਂ ਵੀ ਦਿਨ-ਰਾਤ ਲੋਕਾਂ ਨੂੰ ਸੁਚੇਤ ਕਰਨ 'ਚ ਜੁਟੀਆਂ ਹੋਈਆਂ ਹਨ। ਫਿਰ ਵੀ ਬੇਰੁਜ਼ਗਾਰੀ, ਗ਼ਰੀਬੀ ਵਿਚ ਪਿਸ ਰਹੇ ਲੋਕਾਂ ਨੂੰ ਉਹ ਪਖੰਡੀ ਤਾਂਤਰਿਕ ਆਪਣੇ ਮਗਰ ਲਾ ਲੈਂਦੇ ਹਨ। ਅਜਿਹੇ ਹਾਲਾਤ ਦਾ ਉਹ ਪੂਰੀ ਤਰ੍ਹਾਂ ਲਾਭ ਉਠਾਉਣ ਦੀ ਤਾਕ ਵਿਚ ਰਹਿੰਦੇ ਹਨ।

-ਮਾਸਟਰ ਦੇਵਰਾਜ ਖੁੰਡਾ
ਗੁਰਦਾਸਪੁਰ।

ਮਹਿੰਗਾਈ ਦੀ ਮਾਰ

ਮਹਿੰਗਾਈ ਦੀ ਮਾਰ ਅੱਜਕਲ੍ਹ ਮੇਲਿਆਂ ਅਤੇ ਪਰੰਪਰਾਗਤ ਤਿਉਹਾਰਾਂ 'ਤੇ ਵੀ ਸਾਫ਼ ਝਲਕਦੀ ਹੈ। ਤਿਉਹਾਰਾਂ 'ਤੇ ਉਹ ਰੌਣਕਾਂ ਮਨੁੱਖੀ ਮਨਾਂ 'ਚ ਚਾਅ-ਮਲਾਰ ਸਭ ਖ਼ਤਮ ਹਨ। ਦੇਸ਼ ਦੀ ਤਰੱਕੀ ਟੀ.ਵੀ. 'ਤੇ ਵੱਡੇ-ਵੱਡੇ ਇਸ਼ਤਿਹਾਰਾਂ ਨਾਲ ਨਹੀਂ ਹੁੰਦੀ ਬਲਕਿ ਅਵਾਮ ਦੇ ਚਿਹਰਿਆਂ ਦੀ ਰੌਣਕ ਤੋਂ ਹੁੰਦੀ ਹੈ। ਮਹਿੰਗਾਈ ਕਾਰਨ ਅੱਜ ਹਰ ਚੀਜ਼ ਗ਼ਰੀਬ ਵਰਗ ਦੀ ਪਹੁੰਚ ਤੋਂ ਬਾਹਰ ਹੁੰਦੀ ਜਾ ਰਹੀ ਹੈ। ਆਮ ਇਨਸਾਨ ਲਈ ਤਰੱਕੀ ਤਾਂ ਕੀ ਸਮਾਂ ਟਪਾਉਣਾ ਵੀ ਔਖਾ ਹੋਇਆ ਪਿਆ ਹੈ। ਚੋਣ ਮੁੱਦਿਆਂ 'ਚ ਮਹਿੰਗਾਈ ਦਾ ਮੁੱਦਾ ਕਿਉਂ ਗਾਇਬ ਹੈ। ਵਰ੍ਹਮੀ ਦੇ ਨਾਗ ਵਾਂਗ ਫੁੰਕਾਰੇ ਮਾਰਦੀ ਮਹਿੰਗਾਈ ਨੂੰ ਇਸ ਮਹਿੰਗੇ ਯੁੱਗ ਵਿਚ ਕੀਲਣਾ ਮੁਸ਼ਕਿਲ ਹੀ ਨਹੀਂ ਨਾਮੁਮਕਿਨ ਵੀ ਹੈ। ਆਓ! ਇਸ ਮਹਿੰਗੇ ਯੁੱਗ ਵਿਚ ਮਹਿੰਗਾਈ ਨੂੰ ਠੱਲ੍ਹਣ ਲਈ ਆਪਣੀਆਂ ਲੋੜਾਂ ਨੂੰ ਸੀਮਤ ਰੱਖ ਸਮੇਂ ਦੇ ਅਨੁਕੂਲ ਚੱਲਣ ਦਾ ਯਤਨ ਕਰ ਫਜ਼ੂਲ ਖਰਚਿਆਂ ਤੋਂ ਬਚੀਏ।

-ਜਸਬੀਰ ਦੱਧਾਹੂਰ
ਪਿੰਡ ਤੇ ਡਾਕ: ਦੱਧਾਹੂਰ, ਤਹਿ: ਰਾਏਕੋਟ, ਜ਼ਿਲ੍ਹਾ ਲੁਧਿਆਣਾ।

3-10-2016

 ਤਿੜਕਿਆ ਭਾਂਡਾ

ਭਾਰਤ ਅਤੇ ਪਾਕਿਸਤਾਨ ਵਿਚਕਾਰ ਚੱਲ ਰਹੇ ਤਣਾਅ ਕਾਰਨ ਪੈਦਾ ਹੋਏ ਹਾਲਾਤ ਕਾਫ਼ੀ ਚਿੰਤਾਯੋਗ ਵਿਸ਼ਾ ਬਣ ਚੁੱਕੇ ਹਨ। ਅਸਲ ਵਿਚ ਦੇਖਿਆ ਜਾਵੇ ਤਾਂ ਇਨ੍ਹਾਂ ਪਿੱਛੇ ਮਤਭੇਦ ਨਹੀਂ ਸਗੋਂ ਮਨਭੇਦ ਜ਼ਿੰਮੇਵਾਰ ਹਨ। ਜੋ ਕਿ ਰਾਜਸੀ ਨੇਤਾਵਾਂ ਜਾਂ ਰਾਜਨੀਤਕ ਕਲਾ ਦੁਆਰਾ ਪੈਦਾ ਕੀਤੇ ਗਏ ਹਨ। ਆਮ ਲੋਕਾਂ ਦੇ ਮਨਾਂ ਵਿਚ ਹਾਲੇ ਵੀਇਹ ਇੱਛਾ ਤੜਫਦੀ ਰਹਿੰਦੀ ਹੈ ਕਿ ਅਸੀਂ ਮੁੜ ਤੋਂ ਇਕ ਹੋ ਜਾਈਏ। ਪਰ ਕਿਸੇ ਨੇ ਸੱਚ ਹੀ ਲਿਖਿਆ ਹੈ,
'ਸੰਨ ਸੰਤਾਲੀ ਵਿਚ ਕੀ ਬੀਤੀ,
ਹਾਲੇ ਤੱਕ ਕੋਈ ਭੁੱਲਿਆ ਏ?
ਮੁੜ ਜੁੜਦਾ ਨਾ ਤਿੜਕਿਆ ਭਾਂਡਾ,
ਅੱਜ ਇਤਿਹਾਸ ਗਵਾਹ ਏ...।
ਰਾਜਨੀਤਕ ਝੰਜਟਾਂ ਤੇ ਮਸਲਿਆਂ ਤੋਂ ਉਪਰ ਉਠਣ ਦੀ ਲੋੜ ਹੈ। ਫਿਰ ਹੀ ਅਸੀਂ ਇਹ ਜਾਣ ਸਕਾਂਗੇ ਕਿ ਜਿਸ ਧਰਤੀ ਨੇ ਸਾਨੂੰ ਪੈਦਾ ਕੀਤਾ, ਪਨਾਹ ਦਿੱਤੀ, ਸੁਰੱਖਿਆ ਦਿੱਤੀ ਅਸੀਂ ਕਿਉਂ ਉਸ ਨੂੰ ਆਪਣੇ ਹੱਥੀਂ ਤਬਾਹ ਕਰ ਰਹੇ ਹਾਂ।

-ਕਰਮਜੀਤ ਕੌਰ
ਬੀ.ਏ. ਭਾਗ ਤੀਜਾ, ਗੁਰੂ ਨਾਨਕ ਕਾਲਜ ਫਾਰ ਗਰਲਜ਼, ਸ੍ਰੀ ਮੁਕਤਸਰ ਸਾਹਿਬ।
ਮੋਬਾਈਲ : 94176-11716.

ਮੌਕਾਪ੍ਰਸਤੀ ਹੋਈ ਭਾਰੂ

ਪੰਜਾਬ ਵਿਧਾਨ ਸਭਾ ਚੋਣਾਂ ਜਿਵੇਂ-ਜਿਵੇਂ ਨੇੜੇ ਆ ਰਹੀਆਂ ਹਨ, ਉਵੇਂ-ਉਵੇਂ ਹੀ ਮੌਕਾਪ੍ਰਸਤੀ ਦੀ ਸਿਆਸਤ ਵੀ ਭਾਰੂ ਹੁੰਦੀ ਜਾ ਰਹੀ ਹੈ। ਮੌਕਾਪ੍ਰਸਤੀ ਦੀ ਸਿਆਸਤ ਖੇਡਣ ਵਾਲੇ ਦਲ ਬਦਲੂ ਕਈ ਵਾਰ ਆਪਣੇ ਮਕਸਦ ਵਿਚ ਕਾਮਯਾਬ ਹੋ ਵੀ ਜਾਂਦੇ ਹਨ ਪਰ ਬਹੁਤੀ ਵਾਰ ਇਹ ਨਾ ਘਰ ਦੇ ਨਾ ਘਾਟ ਦੇ ਵਾਲੀ ਕਹਾਵਤ ਦੇ ਵੀ ਸ਼ਿਕਾਰ ਹੋ ਕੇ ਰਹਿ ਜਾਂਦੇ ਹਨ। ਸਿਆਸਤ ਵਿਚ ਮੌਕਾਪ੍ਰਸਤੀ ਦਾ ਰੁਝਾਨ ਭਾਵੇਂ ਸ਼ੁਰੂ ਤੋਂ ਹੀ ਹੈ ਪਰ ਅੱਜ ਜਿਸ ਤਰ੍ਹਾਂ ਇਹ ਰੁਝਾਨ ਵਧ ਰਿਹਾ ਹੈ, ਇਹ ਲੋਕਤੰਤਰ ਲਈ ਬੇਹੱਦ ਘਾਤਕ ਹੈ। ਮੌਕਾਪ੍ਰਸਤੀ ਦੀ ਸਿਆਸਤ ਖੇਡਣ ਵਾਲਿਆਂ ਜਾਂ ਇਹ ਕਹਿ ਲਓ ਕਿ ਦਲ ਬਦਲੂਆਂ ਨੂੰ ਇਸ ਗੱਲ ਨਾਲ ਕੋਈ ਮਤਲਬ ਨਹੀਂ ਹੁੰਦਾ ਕਿ ਜਿਹੜੇ ਲੋਕਾਂ ਨੇ ਉਸ ਨੂੰ ਸਿਆਸਤ ਦੀਆਂ ਬੁਲੰਦੀਆਂ 'ਤੇ ਪਹੁੰਚਾਇਆ ਹੈ ਉਹ ਕੀ ਕਹਿਣਗੇ ਜਾਂ ਉਹ ਕਿਸ ਹਾਲ 'ਚ ਜੀਅ ਰਹੇ ਹਨ ਜਾਂ ਜੋ ਮੈਂ ਉਨ੍ਹਾਂ ਨਾਲ ਵਾਅਦੇ ਕੀਤੇ ਸਨ, ਕੀ ਉਹ ਮੈਂ ਪੂਰੇ ਕੀਤੇ ਜਾਂ ਨਹੀਂ। ਅਜਿਹਾ ਸੋਚਣ ਲਈ ਮੌਕਾਪ੍ਰਸਤਾਂ ਕੋਲ ਸਮਾਂ ਹੀ ਨਹੀਂ ਹੁੰਦਾ। ਜੇ ਸੋਚਣ ਲਈ ਸਮਾਂ ਹੁੰਦਾ ਹੈ ਤਾਂ ਉਹ ਆਪਣੇ ਤੇ ਆਪਣੇ ਪਰਿਵਾਰ ਦੀ ਐਸ਼ੋ-ਆਰਾਮ ਨੂੰ ਬਣਾਈ ਰੱਖਣ ਲਈ ਹੁੰਦਾ ਹੈ। ਮੌਕਾਪ੍ਰਸਤਾਂ ਦੀ ਅਹਿਮ ਨਿਸ਼ਾਨੀ ਇਹ ਹੁੰਦੀ ਹੈ ਕਿ ਇਹ ਲੋਕ ਪਾਰਟੀ ਉਦੋਂ ਬਦਲਦੇ ਹਨ, ਜਦੋਂ ਚੋਣਾਂ ਬਿਲਕੁਲ ਨੇੜੇ ਹੁੰਦੀਆਂ ਹਨ। ਜਦੋਂ ਇਨ੍ਹਾਂ ਨੂੰ ਇਹ ਅਹਿਸਾਸ ਹੋ ਜਾਵੇ ਕਿ ਮੌਜੂਦਾ ਪਾਰਟੀ 'ਚ ਮੁੜ ਟਿਕਟ ਨਹੀਂ ਮਿਲੇਗੀ, ਤਾਂ ਇਹ ਪਾਰਟੀ ਨਿੰਦਣਾ ਸ਼ੁਰੂ ਕਰ ਦਿੰਦੇ ਹਨ ਤੇ ਜਿਸ ਪਾਰਟੀ ਦੀ ਟਿਕਟ ਦੀ ਆਸ ਹੁੰਦੀ ਹੈ ਉਸ ਦੇ ਸੋਹਲੇ ਗਾਉਣੇ ਸ਼ੁਰੂ ਕਰ ਦਿੰਦੇ ਹਨ। ਮੌਕਾ ਪ੍ਰਸਤੋ ਪੰਜਾਬੀਆਂ ਦੇ ਜਜ਼ਬਾਤਾਂ ਨਾਲ ਖੇਡਣਾ ਬੰਦ ਕਰੋ ਨਹੀਂ ਤਾਂ ਸਮਾਂ ਤੁਹਾਨੂੰ ਮੁਆਫ਼ ਨਹੀਂ ਕਰੇਗਾ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਜ਼ਿਲ੍ਹਾ ਲੁਧਿਆਣਾ।

ਵਧਦੀ ਆਬਾਦੀ

ਵਧਦੀ ਹੋਈ ਆਬਾਦੀ ਕਈ ਸਮੱਸਿਆਵਾਂ ਦੀ ਜੜ੍ਹ ਹੈ, ਜਿਸ ਦੇ ਕਾਰਨ ਗਰੀਬੀ, ਬੇਰੁਜ਼ਗਾਰੀ, ਮਹਿੰਗਾਈ ਆਦਿ ਸਮੱਸਿਆਵਾਂ ਵਿਚ ਵਾਧਾ ਹੋ ਰਿਹਾ ਹੈ। ਆਬਾਦੀ ਦੇ ਵਾਧੇ ਕਰਕੇ ਕੁਦਰਤੀ ਸਾਧਨਾਂ 'ਤੇ ਵੀ ਵੱਡਾ ਦਬਾਅ ਪੈਂਦਾ ਹੈ, ਇਹ ਸਾਧਨ ਪਹਿਲਾਂ ਹੀ ਸੀਮਤ ਮਾਤਰਾ ਵਿਚ ਹੋਣ ਕਾਰਨ ਆਉਣ ਵਾਲੇ ਸਮੇਂ 'ਚ ਵੱਡੇ ਕਾਲ ਵਰਗੀ ਸਥਿਤੀ ਬਣ ਸਕਦੀ ਹੈ। ਆਬਾਦੀ ਦੇ ਵਾਧੇ ਉੱਪਰ ਕਾਬੂ ਪਾਉਣਾ ਬਹੁਤ ਜ਼ਰੂਰੀ ਹੈ ਜੇ ਇਸ ਉੱਪਰ ਕਾਬੂ ਨਹੀਂ ਪਾਇਆ ਗਿਆ ਤਾਂ ਵਿਕਾਸ ਦੇ ਰਾਹ ਉੱਪਰ ਚੱਲਣਾ ਮੁਸ਼ਕਿਲ ਹੋ ਜਾਵੇਗਾ। ਚੀਨ ਨੇ ਵਧਦੀ ਜਨਸੰਖਿਆ ਉੱਪਰ ਕਾਬੂ ਕੀਤਾ ਹੈ, ਭਾਰਤ ਨੂੰ ਵੀ ਚੀਨ ਤੋਂ ਸਬਕ ਲੈ ਕੇ ਇਸ ਪਾਸੇ ਅਮਲ ਕਰਨਾ ਚਾਹੀਦਾ ਹੈ। ਨਹੀਂ ਤਾਂ ਆਉਣ ਵਾਲੇ ਕੁਝ ਸਾਲਾਂ ਵਿਚ ਸਥਿਤੀ ਕਾਬੂ ਤੋਂ ਬਾਹਰ ਹੋ ਜਾਵੇਗੀ।

-ਸੇਵਾ ਰਾਮ ਸਿੰਗਲਾ
ਸਮਾਜ ਸੇਵਕ, ਮੇਨ ਅਜੀਤ ਰੋਡ, ਬਠਿੰਡਾ।

30-09-2016

 ਰੁੱਖਾਂ ਦੀ ਸੰਭਾਲ
ਰੁੱਖ ਤੇ ਮਨੁੱਖ ਦਾ ਆਦਿ ਤੋਂ ਅੰਤ ਤੱਕ ਦਾ ਰਿਸ਼ਤਾ ਹੈ। ਰੁੱਖ ਦਾ ਕੋਈ ਨਾ ਕੋਈ ਰੂਪ ਹਮੇਸ਼ਾ ਮਨੁੱਖ ਦੇ ਅੰਗ-ਸੰਗ ਰਹਿੰਦਾ ਹੈ। ਰੁੱਖ ਸਾਡੀ ਭਾਵਨਾ ਸਮਝਣ ਵਾਲੇ ਅਤੇ ਦਰਦ ਵੰਡਾਉਣ ਵਾਲੇ ਹੁੰਦੇ ਹਨ। ਇਹ ਹਮੇਸ਼ਾ ਸਾਨੂੰ ਦਿੰਦੇ ਹੀ ਹਨ, ਆਕਸੀਜਨ, ਮੀਂਹ, ਸ਼ੁੱਧ ਵਾਤਾਵਰਨ ਅਤੇ ਮਿੱਟੀ ਦੀ ਸੰਭਾਲ, ਦਵਾ-ਦਾਰੂ ਆਦਿ...। ਆਲੇ-ਦੁਆਲੇ 'ਚੋਂ ਰੁੱਖ ਗਾਇਬ ਹਨ, ਰੱਖਾਂ, ਜੀਰਾਂਦਾਂ, ਬੀੜਾਂ ਬੀਤੇ ਦੀ ਗੱਲ ਬਣ ਚੁੱਕੀਆਂ ਹਨ ਪਰ ਨਹਿਰਾਂ ਦੇ ਕੰਢਿਆਂ ਤੋਂ ਚੋਰੀ ਛਿਪੇ ਰਲ-ਮਿਲ ਕੇ ਅੰਨ੍ਹੇਵਾਹ ਰੁੱਖਾਂ ਦੀ ਕਟਾਈ ਹੋ ਰਹੀ ਹੈ। ਬਾਲਣ ਨਹੀਂ ਮੋਟੀਆਂ ਕੀਮਤੀ ਲੱਕੜਾਂ, ਕਿੱਕਰਾਂ, ਟਾਹਲੀਆਂ ਦੇ ਮੁੱਢ ਗਾਇਬ ਹੋ ਰਹੇ ਹਨ। ਧਰਤੀ, ਪਾਣੀ, ਵਾਤਾਵਰਨ ਬਚਾਉਣ ਲਈ ਬੇਹੱਦ ਜ਼ਰੂਰਤ ਹੈ ਬਨਸਪਤੀ ਨੂੰ ਪਿਆਰਨ ਤੇ ਹੋਰ ਰੁੱਖ ਲਾਉਣ ਦੀ।


-ਮਨਿੰਦਰ ਸਿੰਘ ਰਾਜੂ
ਗਰਚਾ ਨਰਸਰੀ, ਧਨੌਲਾ ਰੋਡ, ਬਰਨਾਲਾ।


ਬੁਰਾਈਆਂ ਨੂੰ ਸਾੜੋ
ਹਰ ਸਾਲ ਦੁਸਹਿਰੇ ਤੋਂ ਪਹਿਲਾਂ ਸਾਰੇ ਭਾਰਤ ਵਿਚ ਲੱਖਾਂ ਦੀ ਗਿਣਤੀ ਵਿਚ ਲੱਕੜਾਂ, ਕਾਗਜ਼ਾਂ ਦੀ ਸਹਾਇਤਾ ਨਾਲ ਥਾਂ-ਥਾਂ ਰਾਵਣ ਬਣਾਉਣੇ ਸ਼ੁਰੂ ਕਰ ਦਿੱਤੇ ਜਾਂਦੇ ਹਨ। ਬੁਰਾਈ ਉੱਪਰ ਅੱਛਾਈ ਤੇ ਸਚਾਈ ਦੀ ਜਿੱਤ ਨੂੰ ਦਰਸਾਉਂਦਾ ਇਹ ਪਵਿੱਤਰ ਤਿਉਹਾਰ ਸਦੀਆਂ ਤੋਂ ਮਨਾਇਆ ਜਾਂਦਾ ਹੈ। ਦੁਸਹਿਰੇ ਵਾਲੇ ਦਿਨ ਬੁਰਾਈ ਦੇ ਪ੍ਰਤੀਕ ਰਾਵਣ ਨੂੰ ਸਾੜਿਆ ਜਾਂਦਾ ਹੈ। ਪਰ ਅੱਜ ਸਮੇਂ ਦੀ ਲੋੜ ਹੈ ਕਿ ਅਸੀਂ ਆਪਣੇ ਔਗੁਣਾਂ ਨੂੰ ਵੀ ਪਛਾਣ ਕੇ ਸਾੜੀਏ ਅਤੇ ਸਾਡੇ ਪਰਿਵਾਰਾਂ ਵਿਚ ਪਾਏ ਜਾਣ ਵਾਲੇ ਰਾਵਣਾਂ ਨੂੰ ਸੁਧਾਰਨ ਦੀ ਕੋਸ਼ਿਸ਼ ਕਰੀਏ। ਆਪਣੇ ਸਮਾਜ, ਦੇਸ਼ ਵਿਚੋਂ ਕਰੋੜਾਂ ਰਾਵਣਾਂ ਦਾ ਖ਼ਾਤਮਾ ਕਰੀਏ ਜਿਹੜੇ ਅਲੱਗ-ਅਲੱਗ ਰੂਪਾਂ ਵਿਚ ਇਸ ਦੇਸ਼ ਨੂੰ ਕਲੰਕਿਤ ਕਰ ਰਹੇ ਹਨ। ਆਪਣੇ ਬੱਚਿਆਂ ਨੂੰ ਗ਼ਲਤ ਲੀਹਾਂ ਤੋਂ ਮੋੜ ਕੇ ਚੰਗੀ ਸੇਧ ਦੇ ਕੇ ਚੰਗੇ ਗੁਣਾਂ ਦੇ ਧਾਰਨੀ ਬਣਾਈਏ। ਵੱਡਿਆਂ ਨੂੰ ਆਪ ਮਾਡਲ ਬਣਨਾ ਚਾਹੀਦਾ ਹੈ। ਦੁਸਹਿਰਾ ਮਨਾਉਣ ਦਾ ਇਹੀ ਸਹੀ ਤਰੀਕਾ ਹੋਵੇਗਾ।


-ਕੰਵਲਜੀਤ ਕੌਰ
697 ਡੀ, ਮਾਡਲ ਟਾਊਨ ਐਕਸ. ਲੁਧਿਆਣਾ।


ਆਲੇ-ਦੁਆਲੇ ਦੀ ਸਫ਼ਾਈ
ਇਕ ਚੰਗੇ ਸਮਾਜ ਦੀ ਸਿਰਜਣਾ ਕਰਨ ਲਈ ਸਾਨੂੰ ਆਪਣਾ ਆਲਾ-ਦੁਆਲਾ ਸਾਫ਼ ਰੱਖਣਾ ਚਾਹੀਦਾ ਹੈ। ਜਿਸ ਸਮਾਜ ਵਿਚ ਅਸੀਂ ਰਹਿ ਰਹੇ ਹਾਂ, ਉਸ ਸਮਾਜ ਦੀ ਸਫ਼ਾਈ ਰੱਖਣ ਦੀ ਜ਼ਿੰਮੇਵਾਰੀ ਸਾਡੀ ਹੀ ਹੁੰਦੀ ਹੈ। ਜਿਵੇਂ ਘਰ ਦੀ ਸਫ਼ਾਈ, ਆਲੇ-ਦੁਆਲੇ ਦੀ ਸਫ਼ਾਈ, ਸਕੂਲਾਂ ਤੇ ਕਾਲਜਾਂ ਦੀ ਸਫ਼ਾਈ ਰੱਖਣ ਸਬੰਧੀ ਸਾਨੂੰ ਠੋਸ ਕਦਮ ਚੁੱਕਣੇ ਚਾਹੀਦੇ ਹਨ। ਸਾਨੂੰ ਆਪਣੇ ਘਰ ਦਾ ਕੂੜਾ-ਕਰਕਟ ਆਸੇ-ਪਾਸੇ ਸੁੱਟਣ ਦੀ ਬਜਾਏ ਇਕ ਖ਼ਾਸ ਜਗ੍ਹਾ 'ਤੇ ਇਕੱਠਾ ਕਰਕੇ ਜਾਂ ਤਾਂ ਉਸ ਨੂੰ ਦਬਾਅ ਦੇਣਾ ਚਾਹੀਦਾ ਹੈ ਜਾਂ ਫਿਰ ਉਸ ਨੂੰ ਕਿਸੇ ਦੂਰ ਜਗ੍ਹਾ 'ਤੇ ਨਿਪਟਾਰਾ ਕਰ ਦੇਣਾ ਚਾਹੀਦਾ ਹੈ। ਖਾਣਾ ਬਣਾਉਣ ਸਮੇਂ ਵੀ ਖਾਣਾ ਨੰਗਾ ਨਹੀਂ ਛੱਡਣਾ ਚਾਹੀਦਾ, ਕਿਉਂਕਿ ਜੇ ਖਾਣਾ ਨੰਗਾ ਛੱਡ ਦਿੱਤਾ ਤਾਂ ਇਸ ਉੱਪਰ ਹਾਨੀਕਾਰਕ ਮੱਖੀਆਂ ਦਾ ਹਮਲਾ ਹੋਣ ਦਾ ਖ਼ਤਰਾ ਹੁੰਦਾ ਹੈ। ਘਰਾਂ ਵਿਚੋਂ ਨਿਕਲਣ ਵਾਲੇ ਗੰਦੇ ਪਾਣੀ ਦੇ ਨਿਕਾਸ ਲਈ ਨਾਲੀਆਂ ਅਤੇ ਸੀਵਰੇਜ ਦਾ ਪ੍ਰਬੰਧ ਕਰਨਾ ਚਾਹੀਦਾ ਹੈ ਤਾਂ ਜੋ ਗੰਦੇ ਪਾਣੀ ਕਾਰਨ ਫੈਲਣ ਵਾਲੀ ਗੰਦਗੀ ਤੋਂ ਬਚਿਆ ਜਾ ਸਕੇ। ਸਕੂਲਾਂ ਤੇ ਕਾਲਜਾਂ ਵਿਚ ਬੱਚਿਆਂ ਨੂੰ ਸਫ਼ਾਈ ਪ੍ਰਤੀ ਜਾਗਰੂਕ ਕਰਨ ਲਈ ਐਨ.ਐਸ.ਐਸ. ਦਾ ਕੈਂਪ ਲਗਾਉਣਾ ਚਾਹੀਦਾ ਹੈ। ਇਸ ਲਈ ਸਾਨੂੰ ਆਪਣੇ ਆਲੇ-ਦੁਆਲੇ ਵਿਚ ਰਹਿਣ ਵਾਲੇ ਲੋਕਾਂ ਨੂੰ ਵੀ ਸਫ਼ਾਈ ਪ੍ਰਤੀ ਜਾਣਕਾਰੀ ਦੇਣੀ ਚਾਹੀਦੀ ਹੈ ਸਾਡਾ ਆਲਾ-ਦੁਆਲਾ ਸਾਫ਼-ਸੁਥਰਾ ਹੋਵੇਗਾ ਤਾਂ ਹੀ ਅਸੀਂ ਤੰਦਰੁਸਤ ਰਹਿ ਸਕਾਂਗੇ।


-ਕਰਮਜੀਤ ਕੌਰ
ਜਰਨਲਿਸਟ ਵਿਭਾਗ, ਗੁਰੂ ਨਾਨਕ ਕਾਲਜ (ਫਾਰ ਗਰਲਜ਼) ਸ੍ਰੀ ਮੁਕਤਸਰ ਸਾਹਿਬ।

28-09-2016

 ਮੋਬਾਈਲ ਟਾਵਰ
ਪਿਛਲੇ ਲੰਮੇ ਸਮੇਂ ਤੋਂ ਮੋਬਾਈਲ ਕੰਪਨੀਆਂ ਵੱਲੋਂ ਪੇਂਡੂ ਖੇਤਰਾਂ 'ਚ ਮੋਬਾਈਲ ਟਾਵਰ ਲਾਏ ਜਾ ਰਹੇ ਹਨ। ਇਨ੍ਹਾਂ ਮੋਬਾਈਲ ਟਾਵਰਾਂ 'ਚੋਂ ਨਿਕਲ ਰਹੀ ਚੁੰਬਕੀ ਰੇਡੀਏਸ਼ਨ ਲੋਕਾਂ ਦੀ ਸਿਹਤ 'ਤੇ ਬੜਾ ਮਾੜਾ ਅਸਰ ਪਾ ਰਹੀ ਹੈ, ਜੋ ਬੇਹੱਦ ਚਿੰਤਾਜਨਕ ਹੈ। ਚੁੰਬਕੀ ਰੇਡੀਏਸ਼ਨ ਦੀ ਜਕੜ 'ਚ ਆ ਰਹੇ ਲੋਕ ਭਿਆਨਕ ਬਿਮਾਰੀਆਂ ਦਾ ਸ਼ਿਕਾਰ ਹੋ ਰਹੇ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਇਸ ਦਾ ਮਾਰੂ ਪ੍ਰਭਾਵ ਛੋਟੀ ਉਮਰ ਦੇ ਬੱਚਿਆਂ ਤੋਂ ਲੈ ਕੇ ਹਰ ਉਮਰ ਦੇ ਲੋਕਾਂ 'ਤੇ ਹੋ ਰਿਹਾ ਹੈ। ਭਾਵੇਂ ਮਾਣਯੋਗ ਸੁਪਰੀਮ ਕੋਰਟ ਦੇ ਨਾਲ-ਨਾਲ ਵਾਤਾਵਰਨ ਵਿਭਾਗ ਨੇ ਵੀ ਸ਼ੁਰੂ ਵਿਚ ਹੀ ਮੋਬਾਈਲ ਟਾਵਰ ਸੰਘਣੀ ਆਬਾਦੀ, ਰਿਹਾਇਸ਼ਾਂ, ਸਕੂਲਾਂ-ਕਾਲਜਾਂ ਤੇ ਹਸਪਤਾਲਾਂ ਆਦਿ ਦੇ ਨੇੜੇ ਬਿਲਕੁਲ ਨਾ ਲਾਏ ਜਾਣ ਬਾਰੇ ਚਿਤਾਵਨੀ ਦਿੱਤੀ ਸੀ, ਪਰ ਲਗਦਾ ਹੈ ਕਿ ਜਿਵੇਂ ਮੋਬਾਈਲ ਕੰਪਨੀਆਂ ਨੂੰ ਚਿਤਾਵਨੀਆਂ ਦੀ ਕੋਈ ਪ੍ਰਵਾਹ ਹੀ ਨਾ ਹੋਵੇ। ਮਨੁੱਖਤਾ ਦੇ ਨਾਲ-ਨਾਲ ਪਸ਼ੂ-ਪੰਛੀਆਂ 'ਤੇ ਵੀ ਇਹ ਚੁੰਬਕੀ ਰੇਡੀਏਸ਼ਨ ਮਾਰੂ ਹਮਲੇ ਕਰ ਰਹੀ ਹੈ। ਦੁੱਖ ਇਸ ਗੱਲ ਦਾ ਹੈ ਕਿ ਇਹ ਕੰਪਨੀਆਂ ਬਿਨਾਂ ਡਰ-ਭੈਅ ਦੇ ਅੱਜ ਵੀ ਰਿਹਾਇਸ਼ੀ ਥਾਵਾਂ 'ਤੇ ਮੋਬਾਈਲ ਟਾਵਰ ਲਾ ਰਹੀਆਂ ਹਨ। ਮਨੁੱਖਤਾ ਦੇ ਭਲੇ ਲਈ ਜ਼ਰੂਰੀ ਹੈ ਕਿ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲੀਆਂ ਇਨ੍ਹਾਂ ਕੰਪਨੀਆਂ 'ਤੇ ਤੁਰੰਤ ਸਖ਼ਤ ਕਾਰਵਾਈ ਕੀਤੀ ਜਾਵੇ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।


ਪਾਣੀ ਦੀ ਸੰਭਾਲ
ਆਏ ਦਿਨ ਪਾਣੀ ਦੀ ਦੁਰਵਰਤੋਂ ਸਬੰਧੀ ਅਨੇਕਾਂ ਬੁੱਧੀਜੀਵੀਆਂ ਵੱਲੋਂ ਆਪਣੀਆਂ ਲਿਖਤ ਰਾਹੀਂ ਲੋਕਾਂ ਨੂੰ ਸੁਚੇਤ ਕਰਨ ਦੇ ਸਮੇਂ-ਸਮੇਂ ਉਪਰਾਲੇ ਕੀਤੇ ਜਾ ਰਹੇ ਹਨ। ਪਾਣੀ ਦੀ ਦੁਰਵਰਤੋਂ, ਬੇਕਦਰੀ ਚਿੱਕੜ ਆਦਿ ਦਾ ਰੂਪ ਧਾਰ ਕੇ ਪ੍ਰੇਸ਼ਾਨੀਆਂ ਵੀ ਪੈਦਾ ਕਰਦਾ ਹੈ। ਕਈ ਸੂਬੇ ਪਾਣੀ ਦੀ ਕਮੀ ਕਾਰਨ ਬੜਾ ਜੂਝ ਰਹੇ ਹਨ। ਅਵਾਰਾ ਪਾਣੀ ਨਾਲਿਆਂ ਰਾਹੀਂ ਵਰਤਣਯੋਗ ਪਾਣੀ ਵਿਚ ਰਲਣ 'ਤੇ ਨੁਕਸਾਨਦੇਹ ਬਣਦਾ ਹੈ। ਮਾਨਯੋਗ ਲੇਖਕ ਦਾ ਮਨੋਰਥ ਸਾਫ਼ ਹੈ ਕਿ ਸਾਨੂੰ ਸਾਰਿਆਂ ਨੂੰ ਪਾਣੀ ਸੰਜਮ ਨਾਲ ਵਰਤਣਾ ਹੋਵੇਗਾ, ਇਸੇ ਵਿਚ ਸਭ ਦੀ ਭਲਾਈ ਹੈ। ਅੱਜ ਦੇ ਸੰਜਮ ਨਾਲ ਵਰਤੇ ਗਏ ਪਾਣੀ ਨਾਲ ਆਉਣ ਵਾਲੇ ਸਮੇਂ 'ਚ ਸਾਨੂੰ ਸਭ ਨੂੰ ਲੰਬਾ ਸਮਾਂ ਇਸ ਦਾ ਲਾਭ ਮਿਲ ਸਕਦਾ ਹੈ। ਇਸੇ ਤਰ੍ਹਾਂ ਧਰਤੀ 'ਤੇ ਜੰਗਲਾਂ ਦੀ ਵੀ ਜ਼ਿੰਮੇਵਾਰੀ ਨਾਲ ਵਰਤੋਂ ਤੇ ਸਾਂਭ-ਸੰਭਾਲ ਮਨੁੱਖ ਦੇ ਹੀ ਹਿੱਸੇ ਹੈ।


-ਮਾ: ਦੇਵ ਰਾਜ ਖੁੰਡਾ
ਰਾਮ ਸ਼ਰਨਮ ਕਾਲੋਨੀ, ਗੁਰਦਾਸਪੁਰ।
ਮੋਬਾਈਲ : 99883-13281.


ਕੁੱਖ ਵਿਚ ਕਤਲ
ਦੇਖਿਆ ਜਾਵੇ ਤਾਂ ਪਿਛਲੇ ਦੋ ਦਹਾਕਿਆਂ ਤੋਂ ਕੁੜੀਆਂ ਦੀ ਗਿਣਤੀ ਵਿਚ ਬਹੁਤ ਕਮੀ ਆਈ ਹੈ ਕਿਉਂਕਿ ਆਮ ਲੋਕ ਬੱਚੇ ਘੱਟ ਪੈਦਾ ਕਰਨ ਕਾਰਨ ਭਰੂਣ ਦਾ ਕੁੱਖ ਵਿਚ ਹੀ ਕਤਲ ਕਰਵਾ ਦਿੰਦੇ ਹਨ, ਜਦੋਂ ਕਿ ਇਹ ਕਾਰਾ ਜਿੰਨਾ ਨਿੰਦਿਆ ਜਾਵੇ, ਓਨਾ ਹੀ ਥੋੜ੍ਹਾ ਹੈ। ਭਰੂਣ ਹੱਤਿਆ ਸਬੰਧੀ ਕੇਂਦਰ ਅਤੇ ਰਾਜ ਸਰਕਾਰਾਂ ਨੇ ਬਹੁਤ ਸਖ਼ਤ ਰੁਖ਼ ਅਪਣਾਇਆ ਹੋਇਆ ਹੈ ਅਤੇ ਅਜਿਹਾ ਕਰਨ ਵਾਲੇ ਨੂੰ ਘੱਟੋ-ਘੱਟ ਕਤਲ ਕੇਸ ਦੀ ਸਜ਼ਾ ਵੀ ਦਿੱਤੀ ਜਾਂਦੀ ਹੈ ਪ੍ਰੰਤੂ ਬੜੇ ਅਫ਼ਸੋਸ ਦੀ ਗੱਲ ਹੈ ਕਿ ਲੁਕੇ-ਛਿਪੇ ਅੱਜ ਵੀ ਧੀਆਂ ਦੇ ਕੁੱਖ ਵਿਚ ਕਤਲ ਹੋ ਰਹੇ ਹਨ। ਜੇ ਅਸੀਂ ਧੀਆਂ ਦਾ ਕੁੱਖ ਵਿਚ ਕਤਲ ਕਰਵਾਉਂਦੇ ਰਹਾਂਗੇ ਤਾਂ ਅਸੀਂ ਮੁੰਡਿਆਂ ਦਾ ਵਿਆਹ ਕਿਸ ਨਾਲ ਕਰਾਂਗੇ। ਸੋ, ਬਹੁਤ ਹੀ ਸੋਚਣ ਤੇ ਸਮਝਣ ਵਾਲੀ ਗੱਲ ਹੈ। ਸਾਡੀ ਖ਼ਾਸ ਕਰ ਨਵੇਂ ਵਰਗਾਂ ਨੂੰ ਪੁਰਜ਼ੋਰ ਅਪੀਲ ਹੈ ਕਿ ਭਰੂਣ ਹੱਤਿਆ ਤੋਂ ਬਿਲਕੁਲ ਕਿਨਾਰਾ ਕੀਤਾ ਜਾਏ ਤਾਂ ਜੋ ਦੁਨੀਆ 'ਤੇ ਹੋ ਰਿਹਾ ਹੈ ਇਸ ਮਹਾਂਪਾਪ ਦਾ ਸਫ਼ਾਇਆ ਹੋ ਸਕੇ। ਖ਼ਾਸ ਕਰ ਔਰਤਾਂ ਨੂੰ ਵੀ ਇਸ ਪ੍ਰਤੀ ਜਾਗਰੂਕ ਹੋਣ ਦੀ ਬੇਹੱਦ ਲੋੜ ਹੈ।


-ਜਸਪ੍ਰੀਤ ਕੌਰ
ਲੁਧਿਆਣਾ।

27-09-2016

 ਤਿਉਹਾਰ ਬਨਾਮ ਮਿਲਾਵਟਖੋਰੀ

ਪਿਛਲੇ ਲੰਮੇ ਸਮੇਂ ਤੋਂ ਪੰਜਾਬ ਵਿਚ ਦੁੱਧ ਅਤੇ ਹੋਰ ਖੁਰਾਕੀ ਪਦਾਰਥਾਂ ਵਿਚ ਮਿਲਾਵਟ ਦੇ ਮਾਮਲੇ ਅਕਸਰ ਹੀ ਮੀਡੀਆ ਰਾਹੀਂ ਸਾਹਮਣੇ ਆਉਂਦੇ ਰਹਿੰਦੇ ਹਨ। ਅਕਤੂਬਰ ਮਹੀਨਾ ਤਿਉਹਾਰਾਂ ਦਾ ਮਹੀਨਾ ਹੈ। ਇਸ ਮਹੀਨੇ ਵੱਡੇ ਤਿਉਹਾਰ ਦੁਸਹਿਰਾ ਤੇ ਦੀਵਾਲੀ ਆ ਰਹੇ ਹਨ। ਇਨ੍ਹਾਂ ਤਿਉਹਾਰਾਂ 'ਤੇ ਮਠਿਆਈ ਦੀ ਖਪਤ ਵੱਡੀ ਪੱਧਰ 'ਤੇ ਹੁੰਦੀ ਹੈ। ਦੁਕਾਨਦਾਰ ਜ਼ਿਆਦਾ ਮੁਨਾਫ਼ਾ ਕਮਾਉਣ ਦੇ ਚੱਕਰ 'ਚ ਮਿਲਾਵਟ ਨੂੰ ਤਰਜੀਹ ਦਿੰਦੇ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਇਹ ਮਿਲਾਵਟੀ ਤੱਤ ਸਿਹਤ ਲਈ ਬੇਹੱਦ ਹਾਨੀਕਾਰਕ ਹਨ।
ਮਿਲਾਵਟਖੋਰੀ ਨੂੰ ਰੋਕਣ ਲਈ ਭਾਰਤ ਸਰਕਾਰ ਨੇ 2006 'ਚ ਇਕ ਖੁਰਾਕ ਸੁਰੱਖਿਆ ਅਤੇ ਮਾਨਕ (ਸਟੈਂਡਰਡਜ਼) ਐਕਟ ਬਣਾਇਆ ਸੀ, ਜੋ ਕਿ 2011 'ਚ ਲਾਗੂ ਕਰ ਦਿੱਤਾ ਗਿਆ ਸੀ। ਪਰ ਦੁੱਖ ਇਸ ਗੱਲ ਦਾ ਹੈ ਕਿ ਐਕਟ ਦੇ ਲਾਗੂ ਹੋਣ 'ਤੇ ਵੀ ਮਿਲਾਵਟਖੋਰੀ ਨੂੰ ਠੱਲ੍ਹ ਨਹੀਂ ਪਈ। ਸਿਹਤ ਵਿਭਾਗ ਪੰਜਾਬ ਨੇ 2013-14 'ਚ ਵੱਖ-ਵੱਖ ਜ਼ਿਲ੍ਹਿਆਂ 'ਚੋਂ ਖੁਰਾਕੀ ਪਦਾਰਥਾਂ ਦੇ 1412 ਨਮੂਨੇ ਲੈ ਕੇ ਪ੍ਰਯੋਗਸ਼ਾਲਾ 'ਚ ਜਾਂਚ ਲਈ ਭੇਜੇ ਸਨ। ਉਸ ਸਮੇਂ 200 ਨਮੂਨਿਆਂ 'ਚ ਮਿਲਾਵਟ ਸਾਹਮਣੇ ਆਈ ਸੀ। ਭਾਰਤ ਸਰਕਾਰ ਦੇ ਐਕਟ ਅਨੁਸਾਰ ਮਿਲਾਵਟਖੋਰਾਂ ਨੂੰ ਸਖ਼ਤ ਸਜ਼ਾ ਤੇ ਭਾਰੀ ਜੁਰਮਾਨੇ ਦੀ ਗੱਲ ਕੀਤੀ ਗਈ ਹੈ। ਐਕਟ ਲਾਗੂ ਹੋਣ ਸਮੇਂ ਦੇਸ਼ ਦੀ ਜਨਤਾ ਨੂੰ ਕੁਝ ਆਸ ਜਾਗੀ ਸੀ ਕਿ ਉਸ ਨੂੰ ਹੁਣ ਖੁਰਾਕੀ ਪਦਾਰਥ ਮਿਲਾਵਟ ਰਹਿਤ ਮਿਲਣਗੇ ਪਰ ਅਜਿਹਾ ਨਹੀਂ ਹੋਇਆ। ਅਸੀਂ ਦੇਸ਼ ਦੀ ਸਰਕਾਰ ਦੇ ਨਾਲ-ਨਾਲ ਸੂਬਾ ਸਰਕਾਰ ਨੂੰ ਬੇਨਤੀ ਕਰਦੇ ਹਾਂ ਕਿ ਮਿਲਾਵਟਖੋਰੀ ਦੇ ਕੋਹੜ ਨੂੰ ਜੜ੍ਹੋਂ ਖ਼ਤਮ ਕਰਨ ਲਈ ਪੂਰੀ ਗੰਭੀਰਤਾ ਨਾਲ ਪੇਸ਼ ਆਇਆ ਜਾਵੇ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

ਮਾਮਲਾ ਕੁਰਸੀ ਦਾ

2017 ਵਿਚ ਹੋਣ ਜਾ ਰਹੀਆਂ ਪੰਜਾਬ ਵਿਧਾਨ ਸਭਾ ਦੀਆਂ ਚੋਣਾਂ ਨੂੰ ਮੁੱਖ ਰੱਖਦੇ ਹੋਏ ਬਹੁਤ ਵੱਡੀ ਪੱਧਰ 'ਤੇ ਸਿਆਸੀ ਹਲਚਲ ਮਚੀ ਹੋਈ ਹੈ। ਸਿਆਣੇ ਲੋਕ ਇਹ ਸੋਚਣ ਲਈ ਮਜਬੂਰ ਹਨ ਕਿ ਆਖਰ ਪੰਜਾਬ ਦਾ ਬਣੂ ਤਾਂ ਬਣੂ ਕੀ। ਜਦੋਂ ਕਿਸੇ ਲੀਡਰ ਦੀ ਆਪਣੀ ਪਾਰਟੀ ਵਿਚ ਕੁਝ ਅਣਬਣ ਜਾਂ ਕੋਈ ਕਮਜ਼ੋਰੀ ਹੋ ਜਾਂਦੀ ਹੈ ਤਾਂ ਉਹ ਕੁਝ ਪਲਾਂ ਬਾਅਦ ਹੀ ਨਵੀਂ ਰਣਨੀਤੀ ਤਿਆਰ ਕਰ ਲੈਂਦਾ ਹੈ, ਜਦੋਂ ਕਿ ਹੋਣਾ ਇਹ ਚਾਹੀਦਾ ਹੈ ਕਿ ਪਾਰਟੀ ਵਿਚਲੇ ਸਿਆਣੇ ਲੀਡਰ ਕਮਜ਼ੋਰੀ ਦਾ ਅਹਿਸਾਸ ਕਰਨ ਅਤੇ ਉਸ ਨਾਲ ਹੋ ਰਹੀ ਵਧੀਕੀ ਦੂਰ ਕਰਨ। ਪਰ ਇਹ ਕੋਈ ਨਹੀਂ ਸੋਚਦਾ। ਇਕ-ਦੂਜੇ ਨੂੰ ਥੱਲੇ ਲਾਉਣ ਤੱਕ ਅਤੇ ਆਪ ਪਾਰਟੀ ਦਾ ਮੋਹਰੀ ਬਣਨ ਦੀ ਹਰੇਕ ਵਿਚ ਤਾਂਘ ਹੁੰਦੀ ਹੈ। ਅੱਜਕਲ੍ਹ ਪੰਜਾਬ ਵਿਚ ਕਈ ਸਿਆਸੀ ਪਾਰਟੀਆਂ ਨੇ ਜਨਮ ਲਿਆ ਹੋਇਆ ਹੈ ਅਤੇ ਪੰਜਾਬ ਦੇ ਵੋਟਰ ਬਹੁਤ ਸਿਆਣੇ ਅਤੇ ਸੂਝਬੂਝ ਰੱਖਦੇ ਹੋਏ ਸਭ ਨੂੰ ਪਛਾਣਦੇ ਹਨ। ਹਰੇਕ ਲੀਡਰ ਦੇ ਮਨ ਵਿਚ ਕੁਰਸੀ ਦਾ ਲਾਲਚ ਹੈ ਅਤੇ ਕੁਰਸੀ ਦੇ ਮਾਮਲੇ ਤੋਂ ਬਿਨਾਂ ਵੀ ਅਵਾਮ ਦੀ ਸੇਵਾ ਕੀਤੀ ਜਾ ਸਕਦੀ ਹੈ। ਜੇ ਅਸੀਂ ਲੋਕਾਂ ਦੀ ਸੱਚੀ ਸੇਵਾ ਕਰਨੀ ਚਾਹੁੰਦੇ ਹਾਂ ਤਾਂ ਸਾਨੂੰ ਕੁਰਸੀ ਵੱਲ ਨਹੀਂ, ਲੋਕ ਹਿਤਾਂ ਵੱਲ ਵਧੇਰੇ ਧਿਆਨ ਦੇਣ ਦੀ ਲੋੜ ਹੈ। ਅਜਿਹਾ ਕਰਕੇ ਹੀ ਪੰਜਾਬ ਨੂੰ ਖੁਸ਼ਹਾਲੀ ਵੱਲ ਲਿਜਾਇਆ ਜਾ ਸਕਦਾ ਹੈ।

-ਕੇਵਲ ਸਿੰਘ ਬਾਠਾਂ
ਮੋ: 98557-44211.

26-09-2016

 ਪੰਜਾਬ ਪੁਲਿਸ ਦੀ ਭਰਤੀ

ਪੰਜਾਬ ਪੁਲਿਸ ਵਿਚ ਕਾਂਸਟੇਬਲ ਦੀਆਂ 7600 ਦੇ ਕਰੀਬ ਅਸਾਮੀਆਂ ਵਾਸਤੇ ਜੋ ਭਰਤੀ ਪ੍ਰਕਿਰਿਆ ਚਲ ਰਹੀ ਹੈ, ਜਿਸ ਵਾਸਤੇ 6 ਲੱਖ, 15 ਹਜ਼ਾਰ ਦੇ ਕਰੀਬ ਬਿਨੈਕਾਰ ਜਿਸਮਾਨੀ ਪ੍ਰੀਖਿਆ ਦੇ ਚੁੱਕੇ ਹਨ ਤੇ ਜਿਸ ਵਿਚ 2 ਲੱਖ ਦੇ ਕਰੀਬ ਬਿਨੈਕਾਰ ਇਸ ਪ੍ਰੀਖਿਆ ਨੂੰ ਪਾਸ ਕਰ ਚੁੱਕੇ ਹਨ, ਪਰ ਪਾਸ ਉਮੀਦਵਾਰਾਂ ਵਿਚ ਇਸ ਗੱਲ ਦੀ ਬੇਚੈਨੀ ਪਾਈ ਜਾਂਦੀ ਹੈ ਕਿ ਅੱਗੇ ਕੀ ਹੋਵੇਗਾ, ਇੰਟਰਵਿਊ ਹੋਵੇਗੀ? ਜਾਂ ਫਿਰ 12ਵੀਂ ਜਮਾਤ ਦੇ ਆਧਾਰ 'ਤੇ ਭਰਤੀ ਪ੍ਰਕਿਰਿਆ ਮੁਕੰਮਲ ਹੋਵੇਗੀ। ਆਸ ਹੈ ਕਿ ਆਪ ਜੀ ਇਸ ਵਾਰ ਅਖ਼ਬਾਰਾਂ ਜਾਂ ਫਿਰ ਹੋਰਨਾਂ ਢੰਗਾਂ ਨਾਲ ਸਪੱਸ਼ਟ ਕਰੋਗੇ। ਪਰ ਆਪ ਨੂੰ ਮੇਰਾ ਸੁਝਾਅ ਹੈ ਕਿ ਬਿਨੈਕਾਰਾਂ ਦੁਆਰਾ ਲਿਖਤੀ ਪ੍ਰੀਖਿਆ ਵਿਚ ਪਾਸ ਨੰਬਰਾਂ ਦੇ ਆਧਾਰ 'ਤੇ ਹੀ ਚੋਣ ਪ੍ਰਕਿਰਿਆ ਮੁਕੰਮਲ ਕੀਤੀ ਜਾਵੇ। ਇਸ ਤਰ੍ਹਾਂ ਕਰਨ ਨਾਲ ਵੱਧ ਪੜ੍ਹੇ-ਲਿਖੇ ਬਿਨੈਕਾਰਾਂ ਨੂੰ ਆਪ ਦੀ ਫੋਰਸ ਵਿਚ ਸੇਵਾ ਕਰਨ ਦਾ ਮੌਕਾ ਮਿਲ ਸਕੇਗਾ ਅਤੇ ਇਸ ਪ੍ਰੀਖਿਆ ਸਮੇਂ ਸਾਰੇ ਪ੍ਰਬੰਧ ਮੁਕੰਮਲ ਹੋਣੇ ਚਾਹੀਦੇ ਹਨ ਤਾਂ ਜੋ ਪੜ੍ਹੇ-ਲਿਖੇ ਬਿਨੈਕਾਰਾਂ ਨਾਲ ਇਨਸਾਫ਼ ਹੋਵੇ ਨਾ ਕਿ ਬੇਇਨਸਾਫ਼ੀ।

-ਸਤਵਿੰਦਰ ਕੌਰ
ਪਿੰਡ ਤੇ ਡਾਕ: ਖੇੜੀ ਸਲਾਬਤਪੁਰ (ਰੂਪਨਗਰ)।
ਮੋਬਾਈਲ : 94178-62115.

ਗ਼ੈਰ-ਜ਼ਿੰਮੇਵਾਰੀ ਵਾਲੀ ਸਿਆਸਤ

ਜਿਸ ਤਰ੍ਹਾਂ ਆਪਣੀ ਨਿੱਜੀ ਜ਼ਿੰਦਗੀ ਵਿਚ ਸਾਡੇ ਲੀਡਰ ਸਾਹਿਬਾਨ ਕੁਝ ਖ਼ਾਸ ਮੌਕਿਆਂ 'ਤੇ ਆਪਣੇ ਟਿਕਟ ਵਿਰੋਧੀਆਂ ਨਾਲ ਚਾਹ, ਕੌਫੀ ਸਾਂਝੀ ਕਰਦੇ ਹਨ, ਠੀਕ ਉਸੇ ਤਰ੍ਹਾਂ ਜੇਕਰ ਪੰਜਾਬ ਸਰਕਾਰ ਦੇ ਆਖਰੀ ਇਜਲਾਸ ਨੂੰ ਯਾਦਗਾਰੀ ਬਣਾਉਣ ਲਈ ਦੋਵੇਂ ਧਿਰਾਂ ਸੰਜਮ ਤੋਂ ਕੰਮ ਲੈਂਦੀਆਂ ਤਾਂ ਚਾਰੇ ਪਾਸੇ ਤਾਰੀਫ਼ ਹੋਣੀ ਸੀ। ਗਠਜੋੜ ਸਰਕਾਰ ਨੂੰ ਆਪਣੇ ਕੀਤੇ ਕੰਮਾਂ 'ਤੇ ਫਖਰ ਹੋਣਾ ਚਾਹੀਦਾ ਸੀ। ਜਲਦੀ ਵਿਚ ਇਜਲਾਸ ਸਮੇਟਣ ਦੀ ਕਾਹਲ ਚੰਗੀ ਨਹੀਂ ਲੱਗੀ। ਵਿਰੋਧੀ ਧਿਰ ਨੇ ਪਹਿਲਾਂ ਤਾਂ ਕਦੀ ਏਨੀ ਅੜੀਅਲ ਰਣਨੀਤੀ ਨਹੀਂ ਕੀਤੀ, ਜਿਸ ਤਰ੍ਹਾਂ ਇਸ ਵਾਰ ਜੁੱਤੀਆਂ ਅਤੇ ਫਾਈਲਾਂ ਨਾਲ ਹਮਲੇ ਕੀਤੇ ਗਏ। ਇਸ ਨਾਲ ਸਾਡਾ ਲੋਕਤੰਤਰ ਸ਼ਰਮਸਾਰ ਹੋਇਆ ਹੈ। ਜ਼ਰੂਰੀ ਕੰਮ ਚਲਾਊ ਬਿੱਲਾਂ ਨੂੰ ਪਾਸ ਕਰਵਾਉਣ ਲਈ ਦੋਵੇਂ ਧਿਰਾਂ ਨੂੰ ਉਸਾਰੂ ਪਹੁੰਚ ਰੱਖਣੀ ਚਾਹੀਦੀ ਸੀ। ਪੰਜਾਬ ਦੇ ਭਲੇ ਲਈ ਗ਼ੈਰ-ਜ਼ਿੰਮੇਵਾਰਾਨਾ ਸਿਆਸਤ ਕਦੋਂ ਬੰਦ ਹੋਵੇਗੀ? ਹਰ ਪੰਜਾਬੀ ਸਰਕਾਰ ਤੋਂ ਇਹ ਆਸ ਲਗਾਈ ਬੈਠਾ ਹੈ।

-ਲੱਖੀ ਗਿੱਲ ਧਨਾਨਸੂ
ਫੋਨ : 88726-60007
.

ਵੋਟਾਂ ਵਾਲਾ ਦੇਸ਼

ਭਾਰਤੀ ਚੋਣ ਕਮਿਸ਼ਨ ਦੀ ਮੁੱਖ ਜ਼ਿੰਮੇਵਾਰੀ ਲੋਕ ਸਭਾ ਅਤੇ ਸੂਬਾਈ ਵਿਧਾਨ ਸਭਾ ਦੀਆਂ ਚੋਣਾਂ ਸੁਤੰਤਰ ਅਤੇ ਨਿਰਪੱਖ ਢੰਗ ਨਾਲ ਕਰਵਾਉਣ ਦੀ ਹੈ। ਇਹ ਇਕ ਸੰਵਿਧਾਨਕ ਅਦਾਰਾ ਹੈ ਅਤੇ ਸਰਕਾਰ ਇਸ ਵਿਚ ਕਿਸੇ ਤਰ੍ਹਾਂ ਦੀ ਦਖਲਅੰਦਾਜ਼ੀ ਨਹੀਂ ਕਰ ਸਕਦੀ। ਦੇਸ਼ 'ਚ ਚੋਣਾਂ ਦਾ ਮਾਹੌਲ ਕਿਤੇ ਨਾ ਕਿਤੇ ਬਣਿਆ ਹੀ ਰਹਿੰਦਾ ਹੈ, ਜਿਸ ਦੀ ਬਦੌਲਤ ਦੇਸ਼ ਵਿਚ ਸੁਧਾਰ ਵਾਲੀਆਂ ਨੀਤੀਆਂ ਲਾਗੂ ਕਰਨ ਲਈ ਸਖ਼ਤ ਫ਼ੈਸਲੇ ਵਾਲੀ ਸੋਚ ਚੋਣ ਦੰਗਲ ਦੀ ਭੇਟ ਚੜ੍ਹ ਜਾਂਦੀ ਹੈ। ਨਤੀਜੇ ਸਾਡੇ ਸਭ ਦੇ ਸਾਹਮਣੇ ਹਨ।
ਦੇਸ਼ ਦੀ ਆਬੋ-ਹਵਾ ਪਲੀਤ ਹੋ ਰਹੀ ਹੈ, ਸਿੱਖਿਆ ਦਾ ਮਿਆਰ ਦਿਨ-ਪ੍ਰਤੀ ਦਿਨ ਡਿਗ ਰਿਹਾ ਹੈ, ਨੈਤਿਕ ਕਦਰਾਂ-ਕੀਮਤਾਂ ਦਮ ਤੋੜ ਰਹੀਆਂ ਹਨ। ਬੇਈਮਾਨ ਨੇਤਾਵਾਂ ਦੀ ਗਿਣਤੀ ਵਿਚ ਭਾਰੀ ਇਜ਼ਾਫ਼ਾ ਹੋ ਰਿਹਾ ਹੈ। ਮੂੰਹ ਚਿੱਟੇ, ਦਿਲ ਕਾਲੇ ਵਾਲੇ ਲੋਕਾਂ ਦੀ ਗਿਣਤੀ ਵਧ ਰਹੀ ਹੈ। ਅਜਿਹਾ ਸਾਰਾ ਕੁਝ ਦੇਸ਼ ਦੇ ਪ੍ਰਬੰਧਕੀ ਢਾਂਚੇ ਵਿਚ ਆਏ ਨਿਘਾਰ ਕਾਰਨ ਹੋ ਰਿਹਾ ਹੈ ਕਿਉਂਕਿ ਸੁਧਾਰ ਵਾਲੀਆਂ ਨੀਤੀਆਂ ਦਮ ਤੋੜ ਰਹੀਆਂ ਹਨ।

-ਪ੍ਰਿੰ: ਗੁਰਬਚਨ ਸਿੰਘ ਲਾਲੀ
ਮੋਬਾਈਲ : 98147-64344.

23-09-2016

 ਪੈਰਾਲੰਪਿਕ ਵਿਚ ਭਾਰਤੀ ਖਿਡਾਰੀ
ਬੀਤੇ ਦਿਨੀਂ ਬ੍ਰਾਜ਼ੀਲ ਸ਼ਹਿਰ ਦੇ ਰੀਓ ਡੀ ਜੀ ਜੇਨੇਰੀਓ ਵਿਚ ਸ਼ੁਰੂ ਹੋਈਆਂ ਤੇ ਇਸ ਵਿਚ ਭਾਗ ਲੈ ਰਹੇ ਪੈਰਾ ਖਿਡਾਰੀਆਂ ਨੇ ਰੀਓ ਉਲੰਪਿਕ ਦੇ ਖਿਡਾਰੀਆਂ ਨੂੰ ਸ਼ਰਮਸਾਰ ਤੇ ਇਹ ਸੋਚਣ ਲਈ ਮਜਬੂਰ ਕਰ ਦਿੱਤਾ ਹੈ ਕਿ ਉਨ੍ਹਾਂ ਨੂੰ ਉਲੰਪਿਕ ਲਈ ਸਾਰੀਆਂ ਸੁਵਿਧਾਵਾਂ ਮਿਲਣ ਦੇ ਬਾਵਜੂਦ ਉਨ੍ਹਾਂ ਦੀ ਝੋਲੀ ਸਿਰਫ਼ ਦੋ ਮੈਡਲ ਹੀ ਹਿੱਸੇ ਆਏ। ਪੈਰਾਲੰਪਿਕ ਵਿਚ ਭਾਰਤੀ ਖਿਡਾਰੀਆਂ ਦੇ ਹਿੱਸੇ ਵਿਚ ਹੁਣ ਤੱਕ 4 ਮੈਡਲ ਆ ਚੁੱਕੇ ਹਨ, ਜਿਨ੍ਹਾਂ ਵਿਚੋਂ 2 ਗੋਲਡ ਅਤੇ 1 ਸਿਲਵਰ ਤੇ 1 ਕਾਂਸੀ ਦਾ ਮੈਡਲ ਸ਼ਾਮਿਲ ਹੈ। ਇਸ ਉਲੰਪਿਕ ਵਿਚ ਸਰੀਰਕ ਪੱਖੋਂ ਵਿਕਲਾਂਗ ਖਿਡਾਰੀ ਭਾਗ ਲੈ ਰਹੇ ਹਨ ਤੇ ਉਨ੍ਹਾਂ ਵੱਲੋਂ ਕੀਤੀ ਹੋਈ ਮਿਹਨਤ ਨੂੰ ਦੇਖ ਕੇ ਹੈਰਾਨੀ ਹੈ। ਭਾਰਤੀ ਦਲ ਦੇ ਇਕ ਖਿਡਾਰੀ ਦੇਵੇਂਦਰ ਝਾਝਰੀਆ ਨੇ ਇਸ ਵਾਰ ਆਪਣਾ ਹੀ ਰਿਕਾਰਡ ਤੋੜ ਕੇ ਸੋਨੇ ਦਾ ਤਗਮਾ ਹਾਸਲ ਕੀਤਾ। ਇਸ ਤੋਂ ਇਲਾਵਾ ਦੀਪਾ ਮਲਿਕ, ਜਿਸ ਦੇ 40 ਆਪ੍ਰੇਸ਼ਨ ਹੋਏ ਸਨ, ਉਸ ਨੇ ਵੀ ਚਾਂਦੀ ਦਾ ਤਗਮਾ ਹਾਸਲ ਕੀਤਾ। ਇਸ ਲਈ ਸਾਡੇ ਦਿਲ ਵਿਚ ਇਹ ਸਵਾਲ ਜ਼ਰੂਰ ਉੱਠਦਾ ਹੈ ਕਿ ਜਿਨ੍ਹਾਂ ਨੂੰ ਸਾਰੀਆਂ ਸਹੂਲਤਾਂ ਮਿਲ ਰਹੀਆਂ ਸਨ, ਉਹ ਕੇਵਲ 2 ਮੈਡਲ ਹੀ ਲੈ ਕੇ ਆਏ ਤੇ ਜੋ ਆਪਣੇ ਪੈਰਾਂ 'ਤੇ ਸਿੱਧਾ ਖੜ੍ਹ ਵੀ ਨਹੀਂ ਸਕਦੇ, ਉਨ੍ਹਾਂ ਨੇ ਭਾਰਤ ਦੀ ਝੋਲੀ ਵਿਚ 4 ਮੈਡਲ ਪਾ ਦਿੱਤੇ ਹਨ। ਸੋ, ਇਸ ਤੋਂ ਜ਼ਰੂਰ ਖਿਡਾਰੀਆਂ ਨੂੰ ਸੇਧ ਲੈਣ ਦੀ ਲੋੜ ਹੈ ਤੇ ਇਨ੍ਹਾਂ ਦੀਆਂ ਪ੍ਰਾਪਤੀਆਂ ਨਾਲ ਹੋਰਨਾਂ ਖਿਡਾਰੀਆਂ ਦਾ ਹੌਸਲਾ ਜ਼ਰੂਰ ਵਧੇਗਾ।


-ਕਮਰਪਾਲ ਸਿੰਘ ਸਾਗੀ
ਕੋਟਲਾ ਨਿਹੰਗ, ਰੋਪੜ।


ਸਮਾਂ
ਸਮਾਂ ਬਹੁਤ ਕੀਮਤੀ ਹੈ। ਜੇਕਰ ਕੋਈ ਚੀਜ਼ ਗੁਆਚ ਜਾਏ, ਉਹ ਤਾਂ ਵਾਪਸ ਮਿਲ ਸਕਦੀ ਹੈ ਪਰ ਬੀਤਿਆ ਸਮਾਂ ਕਿਸੇ ਤਰੀਕੇ ਨਾਲ ਜਾਂ ਕਿਸੇ ਕੀਮਤ 'ਤੇ ਵਾਪਸ ਨਹੀਂ ਆ ਸਕਦਾ। ਸਮੇਂ ਦੇ ਬੀਤਣ ਮਗਰੋਂ ਆਦਮੀ ਸਿਰਫ ਪਛਤਾਉਣ ਯੋਗ ਹੀ ਰਹਿ ਜਾਂਦਾ ਹੈ। ਇਸ ਲਈ ਬਾਅਦ ਵਿਚ ਪਛਤਾਉਣ ਨਾਲੋਂ ਪਹਿਲਾਂ ਹੀ, ਇਸ ਦੀ ਸੰਭਾਲ ਕਰਨੀ ਚਾਹੀਦੀ ਹੈ। ਬਹੁਤ ਲੋਕ ਸਮੇਂ ਦੀ ਕਦਰ ਨਹੀਂ ਕਰਦੇ, ਉਹ ਇਸ ਨੂੰ ਵਿਅਰਥ ਗੁਆਉਣ ਵਿਚ ਲੱਗੇ ਰਹਿੰਦੇ ਹਨ। ਜੇਕਰ ਕਿਸੇ ਕੰਮ ਵਿਚ ਵੱਧ ਸਮਾਂ ਲੱਗ ਜਾਂਦਾ ਹੈ ਤਾਂ ਉਹ ਉਸ ਨੂੰ ਇਕ ਛੋਟੀ ਜਿਹੀ ਗੱਲ ਸਮਝਦੇ ਹਨ। ਕਿਸੇ ਕੰਮ ਜਾਂ ਪੂਰੇ ਦਿਨ ਵਿਚ ਹੋਣ ਵਾਲੇ ਕੰਮਾਂ ਦਾ ਕੋਈ 'ਟਾਈਮ ਟੇਬਲ' ਨਹੀਂ ਹੁੰਦਾ। ਇਕ ਕੰਮ ਕਰਨ ਵਿਚ ਆਪਣਾ ਬਹੁਤ ਸਮਾਂ ਗੁਆ ਦਿੰਦੇ ਹਨ। ਕੁਝ ਇਨਸਾਨ ਤਾਂ ਇਸ ਤਰ੍ਹਾਂ ਦੇ ਹੁੰਦੇ ਹਨ, ਜੋ ਆਪਣਾ ਸਮਾਂ ਤਾਂ ਨਸ਼ਟ ਕਰਦੇ ਹੀ ਹਨ, ਨਾਲ ਹੀ ਦੂਜਿਆਂ ਦਾ ਵੀ ਕਰਦੇ ਹਨ। ਇਕ ਕਥਨ ਹੈ, ਜੋ ਸਮੇਂ ਨੂੰ ਨਸ਼ਟ ਕਰਦਾ ਹੈ ਤਾਂ ਸਮਾਂ ਉਸ ਨੂੰ ਨਸ਼ਟ ਕਰ ਦਿੰਦਾ ਹੈ। ਜੋ ਸਮੇਂ ਦੀ ਕਦਰ ਨਹੀਂ ਕਰਦੇ, ਉਹ ਬਹੁਤ ਨੁਕਸਾਨ ਉਠਾਉਂਦੇ ਹਨ। ਪ੍ਰੰਤੂ ਜੋ ਇਸ ਦੀ ਕਦਰ ਕਰਦੇ ਹਨ, ਉਹ ਹਮੇਸ਼ਾ ਸਫਲ ਹੁੰਦੇ ਹਨ। ਇਸ ਲਈ ਮੰਜ਼ਿਲ 'ਤੇ ਪਹੁੰਚਣ ਲਈ ਸਮੇਂ ਨੂੰ ਨਸ਼ਟ ਨਾ ਕਰਕੇ, ਸਗੋਂ ਇਸ ਦਾ ਲਾਭ ਉਠਾ ਕੇ ਆਪਣੀ ਜ਼ਿੰਦਗੀ ਨੂੰ ਸਫਲ ਬਣਾਓ।


-ਗਰੀਮਾ ਬੇਦੀ
ਪੱਤਰਕਾਰੀ ਵਿਭਾਗ, ਗੁਰੂ ਨਾਨਕ ਕਾਲਜ ਫਾਰ ਗਰਲਜ਼, ਸ੍ਰੀ ਮੁਕਤਸਰ ਸਾਹਿਬ।

21-09-2016

 ਸ਼ਲਾਘਾਯੋਗ ਕਦਮ

ਪਿਛਲੇ ਦਿਨੀਂ 'ਅਜੀਤ' ਵਿਚ ਛਪਿਆ ਲੇਖ 'ਸ਼ਾਨਦਾਰ ਢੰਗ ਨਾਲ ਪੰਜਾਬੀ ਸੂਬੇ ਦੀ 50ਵੀਂ ਵਰ੍ਹਗੰਢ ਮਨਾਏਗਾ ਸਿੱਖਿਆ ਵਿਭਾਗ' ਪੜ੍ਹਿਆ, ਜੋ ਬੜਾ ਹੀ ਵਧੀਆ ਲੱਗਾ। ਮੈਂ ਇਸ ਬਾਬਤ ਦੱਸਣਾ ਚਾਹੁੰਦੀ ਹਾਂ ਕਿ ਇਸੇ ਲੜੀ ਤਹਿਤ ਤਹਿਸੀਲ ਪੱਧਰ ਤੱਕ ਦੇ ਪ੍ਰੋਗਰਾਮ ਬੜੇ ਹੀ ਸੁੱਚਜੇ ਤੇ ਸੋਹਣੇ ਢੰਗ ਨਾਲ ਨੇਪਰੇ ਚਾੜ੍ਹੇ ਜਾ ਚੁੱਕੇ ਹਨ ਅਤੇ ਜ਼ਿਲ੍ਹਾ ਪੱਧਰ ਲਈ ਜ਼ੋਰਾਂ-ਸ਼ੋਰਾਂ ਨਾਲ ਤਿਆਰੀਆਂ ਚੱਲ ਰਹੀਆਂ ਹਨ। ਉੱਚ ਅਧਿਕਾਰੀਆਂ ਤੋਂ ਲੈ ਕੇ ਬੱਚਿਆਂ ਤੱਕ ਦਾ ਉਤਸ਼ਾਹ ਵੇਖਦੇ ਹੀ ਬਣਦਾ ਹੈ। ਪ੍ਰਾਇਮਰੀ ਸਕੂਲਾਂ ਦੇ ਬੱਚੇ ਭਾਵੇ ਛੋਟੇ ਹਨ ਪਰ ਉਹ ਕਿਸੇ ਪੱਖੋਂ ਵੀ ਵੱਡਿਆਂ ਤੋਂ ਘੱਟ ਨਹੀਂ ਹਨ, ਉਨ੍ਹਾਂ ਦਾ ਤੇ ਉਨ੍ਹਾਂ ਦੇ ਅਧਿਆਪਕਾਂ ਦਾ ਉਤਸ਼ਾਹ ਤੇ ਪ੍ਰਦਰਸ਼ਨ ਵੀ ਵੇਖਣ ਵਾਲਾ ਤੇ ਕਾਬਿਲੇ ਤਾਰੀਫ਼ ਹੈ। ਇਸ ਯਤਨ ਲਈ ਸਿੱਖਿਆ ਵਿਭਾਗ ਵਧਾਈ ਦਾ ਪਾਤਰ ਹੈ, ਉਸ ਦੀ ਸ਼ਲਾਘਾ ਕਰਨੀ ਬਣਦੀ ਹੈ। ਜੇਕਰ ਅਜਿਹੇ ਉਪਰਾਲੇ ਹੁੰਦੇ ਰਹਿਣ ਤਾਂ ਸਾਡੀ ਨਵੀਂ ਪੀੜ੍ਹੀ ਸਾਡੇ ਅਮੀਰ ਤੇ ਬਹੁਮੁੱਲੇ ਵਿਰਸੇ ਨੂੰ ਜਾਣ ਸਕੇਗੀ, ਇਨ੍ਹਾਂ ਪ੍ਰੋਗਾਰਾਮਾਂ ਰਾਹੀਂ ਉਨ੍ਹਾਂ ਅੰਦਰ ਬੀਜਿਆ ਇਹ ਬੀਜ ਸਾਡੇ ਵਿਰਸੇ ਨੂੰ ਜੀਵਤ ਰੱਖੇਗਾ। ਆਮੀਨ।

-ਗੁਰਪ੍ਰੀਤ ਕੌਰ ਧਾਲੀਵਾਲ
ਅਧਿਆਪਕਾ ਸਰਕਾਰੀ ਪ੍ਰਾਇਮਰੀ ਸਕੂਲ, ਧੌਲ ਖੁਰਦ, ਬਲਾਕ ਡੇਹਲੋਂ 2 (ਲੁਧਿਆਣਾ)।

ਤੀਰਥ ਯਾਤਰਾ

ਮੋਗੇ ਤੋਂ 3.9.2016 ਨੂੰ ਮੁੱਖ ਮੰਤਰੀ ਤੀਰਥ ਯਾਤਰਾ ਤਹਿਤ ਸ੍ਰੀ ਹਜ਼ੂਰ ਸਾਹਿਬ ਨਾਂਦੇੜ ਜਾਣ ਵਾਲੀ ਰੇਲ ਗੱਡੀ ਨੂੰ ਭਰਵਾਂ ਹੁੰਗਾਰਾ ਮਿਲਿਆ। ਬੁੱਢੇ ਅਤੇ ਗ਼ਰੀਬ ਲੋਕਾਂ ਵਿਚ ਭਾਰੀ ਉਤਸ਼ਾਹ ਸੀ। ਯਾਤਰੀਆਂ ਨੂੰ ਕਿਸੇ ਕਿਸਮ ਦੀ ਕੋਈ ਤਕਲੀਫ਼ ਨਹੀਂ ਹੋਈ। ਯਾਤਰੀ ਵਾਰ-ਵਾਰ ਕਹਿ ਰਹੇ ਸਨ ਕਿ ਇਸ ਤਰ੍ਹਾਂ ਯਾਤਰਾ ਹਰ ਸਾਲ ਹੋਣੀ ਚਾਹੀਦੀ ਹੈ। ਪਤਵੰਤਿਆਂ ਨੇ ਬੈਂਡ ਵਾਜਿਆਂ ਨਾਲ ਗੱਡੀ ਰਵਾਨਾ ਕੀਤੀ। ਖਾਣੇ ਅਤੇ ਡਾਕਟਰੀ ਸਹਾਇਤਾ ਦਾ ਬਹੁਤ ਵਧੀਆ ਪ੍ਰਬੰਧ ਸੀ। ਸਾਰੇ ਧਰਮਾਂ ਦੇ ਪ੍ਰਚਾਰ-ਪ੍ਰਸਾਰ ਲਈ ਅਜਿਹੇ ਉਪਰਾਲੇ ਹੁੰਦੇ ਰਹਿਣੇ ਚਾਹੀਦੇ ਹਨ। ਇਸ ਨਾਲ ਲੋਕਾਂ ਵਿਚ ਧਰਮ ਪ੍ਰਤੀ ਅਤੇ ਇਕ-ਦੂਜੇ ਪ੍ਰਤੀ ਸਤਿਕਾਰ ਵੀ ਵਧਦਾ ਹੈ।

-ਜਸਵੰਤ ਸਿੰਘ
ਲੋਹਾਮ ਨਗਰ, ਮੋਗਾ।

ਵੱਧ ਤੋਂ ਵੱਧ ਰੁੱਖ ਲਗਾਈਏ

ਸਾਡਾ ਸਾਰਿਆਂ ਦਾ ਫ਼ਰਜ਼ ਬਣਦਾ ਹੈ ਕਿ ਅਸੀਂ ਵੱਧ ਤੋਂ ਵੱਧ ਰੁੱਖ ਲਗਾਈਏ। ਰੁੱਖਾਂ ਦਾ ਸਾਡੀ ਜ਼ਿੰਦਗੀ ਵਿਚ ਬਹੁਤ ਜ਼ਿਆਦਾ ਮਹੱਤਵ ਹੈ। ਰੁੱਖ ਸਾਨੂੰ ਸਿਰਫ ਸਾਹ ਲੈਣ ਲਈ ਸਾਫ਼ ਹਵਾ ਹੀ ਨਹੀਂ ਦਿੰਦੇ, ਸਗੋਂ ਠੰਢੀ ਛਾਂ ਅਤੇ ਵੱਖ-ਵੱਖ ਕਿਸਮਾਂ ਦੇ ਫਲ ਵੀ ਦਿੰਦੇ ਹਨ। ਧਰਤੀ ਉੱਪਰ ਵਧ ਰਹੀ ਤਪਸ਼ ਦਾ ਮੁੱਖ ਕਾਰਨ ਦਿਨੋ-ਦਿਨ ਵਧ ਰਹੀ ਰੁੱਖਾਂ ਦੀ ਕਟਾਈ ਹੈ। ਜੇਕਰ ਇਹ ਵਰਤਾਰਾ ਜਾਰੀ ਰਿਹਾ ਤਾਂ ਉਹ ਦਿਨ ਦੂਰ ਨਹੀਂ ਜਦੋਂ ਅਸੀਂ ਵੱਡੇ ਪੱਧਰ 'ਤੇ ਭਿਆਨਕ ਬਿਮਾਰੀਆਂ ਦੀ ਲਪੇਟ ਵਿਚ ਆ ਜਾਵਾਂਗੇ। ਰੁੱਖ ਹਵਾ ਨੂੰ ਸਾਫ਼-ਸੁਥਰੀ ਰੱਖਣ ਅਤੇ ਪ੍ਰਦੂਸ਼ਣ ਤੋਂ ਬਚਾਉਣ ਵਿਚ ਸਹਾਈ ਹਨ। ਜੇਕਰ ਅਸੀਂ ਜੀਵਨ ਨੂੰ ਬਚਾਉਣਾ ਹੈ ਤਾਂ ਸਾਨੂੰ ਹਰਿਆਲੀ ਤੇ ਰੁੱਖਾਂ ਨੂੰ ਲਾਉਣ ਵਿਚ ਕਾਫੀ ਯੋਗਦਾਨ ਪਾਉਣਾ ਪੈਣਾ ਹੈ। ਅਸੀਂ ਸਕੂਲਾਂ, ਕਾਲਜਾਂ, ਸ਼ਮਸ਼ਾਨਘਾਟਾਂ, ਖੇਤਾਂ, ਛੱਪੜਾਂ, ਨਹਿਰਾਂ ਕਿਨਾਰੇ, ਖਾਲੀ ਥਾਵਾਂ 'ਤੇ ਰੁੱਖ ਲਾ ਸਕਦੇ ਹਾਂ। ਸਮਾਜਿਕ ਖੇਤਰ ਵਿਚ ਕੰਮ ਕਰ ਰਹੀਆਂ ਸਮਾਜਿਕ ਸੰਸਥਾਵਾਂ ਵੀ ਆਪਣੇ ਯਤਨਾਂ ਰਾਹੀਂ ਇਸ ਪਾਸੇ ਚੰਗੀ ਭੂਮਿਕਾ ਨਿਭਾਅ ਸਕਦੀਆਂ ਹਨ। ਇਸ ਸਭ ਦੇ ਸਿੱਟੇ ਵਜੋਂ ਅਸੀਂ ਆਪਣੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਨੂੰ ਚੰਗਾ ਭਵਿੱਖ ਅਤੇ ਜੀਵਨ ਦੇ ਸਕਦੇ ਹਾਂ।

-ਰਾਜਵੰਤ ਸਿੰਘ ਰਾਜੂ
ਗੁਰੂ ਨਾਨਕ ਆਟੋ ਸਪੇਅਰਜ਼, ਰਾਏਕੋਟ।

20-09-2016

 ਅਖੌਤੀ ਤਾਂਤਰਿਕ

ਪਿਛਲੇ ਦਿਨੀਂ ਖਡੂਰ ਸਾਹਿਬ ਲਾਗੇ ਇਕ ਅਖੌਤੀ ਤਾਂਤਰਿਕ ਵੱਲੋਂ ਇਕ ਵਿਅਕਤੀ ਨੂੰ ਔਲਾਦ ਦੇਣ ਦੀ ਖਾਤਰ ਇਕ ਢਾਈ ਸਾਲਾਂ ਦੇ ਮਾਸੂਮ ਨੂੰ ਬਲੀ ਦੇ ਨਾਂਅ 'ਤੇ ਤੜਫਾ-ਤੜਫਾ ਕੇ ਮਾਰ ਮੁਕਾਇਆ। ਅੱਜ ਦੇ ਵਿਗਿਆਨਕ ਯੁੱਗ ਵਿਚ ਖ਼ਾਸ ਕਰ ਪੰਜਾਬ ਵਿਚ ਇਸ ਤਰ੍ਹਾਂ ਦੀਆਂ ਘਟਨਾਵਾਂ ਦਾ ਵਾਪਰਨਾ ਬੇਹੱਦ ਦੁੱਖ ਦਿੰਦਾ ਹੈ, ਕਿਉਂਕਿ ਪੰਜਾਬੀਆਂ ਨੂੰ ਪੜ੍ਹੇ-ਲਿਖੇ ਤੇ ਉੱਚੀ-ਸੁੱਚੀ ਤੇ ਅਗਾਂਹ ਵਧੂ ਸੋਚ ਦੇ ਮਾਲਕ ਮੰਨਿਆ ਜਾਂਦਾ ਹੈ ਪਰ ਅੱਜ ਪੰਜਾਬ ਦੇ ਹਰ ਸ਼ਹਿਰ, ਕਸਬੇ ਤੇ ਪਿੰਡ-ਪਿੰਡ ਵਿਚ ਰਾਖ ਦੀਆਂ ਚੁਟਕੀਆਂ ਦੀਆਂ ਦੁਕਾਨਾਂ ਦੀ ਭਰਮਾਰ ਪੰਜਾਬੀਆਂ ਦੀ ਉਪਰੋਕਤ ਸੋਚ 'ਤੇ ਪ੍ਰਸ਼ਨ ਚਿੰਨ੍ਹ ਲਗਾ ਰਹੀਆਂ ਹਨ। ਹੈਰਾਨੀਜਨਕ ਗੱਲ ਇਹ ਹੈ ਕਿ ਇਨ੍ਹਾਂ ਤਾਂਤਰਿਕਾਂ ਦੀ ਚੁੰਗਲ 'ਚ ਫਸਿਆ ਪੜ੍ਹਿਆ-ਲਿਖਿਆ ਤਬਕਾ ਆਮ ਵੇਖਿਆ ਜਾ ਸਕਦਾ ਹੈ। ਇਥੇ ਇਹ ਗੱਲ ਕਹਿਣੀ ਬੇਹੱਦ ਵਾਜਬ ਹੈ ਕਿ ਅੱਜ ਵਿਗਿਆਨਕ ਚੇਤਨਾ ਦੀ ਵੱਡੀ ਪੱਧਰ 'ਤੇ ਤੁਰੰਤ ਲੋੜ ਹੈ। ਵਿਗਿਆਨ ਨਾਲ ਜੁੜੀਆਂ ਜਥੇਬੰਦੀਆਂ ਨੂੰ ਆਪਣੀਆਂ ਗਤੀਵਿਧੀਆਂ ਤੇਜ਼ ਕਰ ਦੇਣੀਆਂ ਚਾਹੀਦੀਆਂ ਹਨ। ਥਾਂ-ਥਾਂ ਬੈਠੇ ਇਨ੍ਹਾਂ ਅਖੌਤੀ ਤਾਂਤਰਿਕਾਂ 'ਤੇ ਹਰ ਕੋਈ ਨਜ਼ਰ ਰੱਖੇ ਤੇ ਲੋੜ ਪੈਣ 'ਤੇ ਇਨ੍ਹਾਂ ਨੂੰ ਕਾਨੂੰਨ ਅਨੁਸਾਰ ਸਜ਼ਾ ਦੇ ਭਾਗੀ ਬਣਾਇਆ ਜਾਵੇ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

ਪ੍ਰਦੂਸ਼ਣ

ਪ੍ਰਦੂਸ਼ਣ ਉੱਪਰ ਕਾਬੂ ਪਾਉਣਾ ਹੁਣ ਜ਼ਰੂਰੀ ਹੈ। ਲੋਕਾਂ ਨੂੰ ਪ੍ਰਦੂਸ਼ਣ ਦਾ ਸਾਹਮਣਾ ਕਰਨਾ ਹੁਣ ਮਜਬੂਰੀ ਹੋ ਗਿਆ ਹੈ। ਇਕ ਸਰਵੇਖਣ ਅਨੁਸਾਰ ਪ੍ਰਦੂਸ਼ਣ ਦਾ ਪੱਧਰ ਪਿਛਲੇ 10 ਸਾਲਾਂ ਵਿਚ 10 ਫ਼ੀਸਦੀ ਤੱਕ ਵੱਧ ਗਿਆ ਹੈ। ਪ੍ਰਦੂਸ਼ਣ ਚਾਹੇ ਕਿਸੇ ਵੀ ਤਰ੍ਹਾਂ ਦਾ ਹੋਵੇ, ਉਹ ਹਵਾ ਪ੍ਰਦੂਸ਼ਣ, ਪਾਣੀ ਜਾਂ ਹੋਰ, ਉਸ ਵਿਚ ਲਗਾਤਾਰ ਵਾਧਾ ਹੋ ਰਿਹਾ ਹੈ। ਪ੍ਰਦੂਸ਼ਣ ਦਾ ਅਸਰ ਪੇੜ-ਪੌਦੇ, ਜੀਵ-ਜੰਤੂਆਂ ਤੇ ਪਸ਼ੂ-ਪੰਛੀਆਂ ਉੱਪਰ ਹੋ ਰਿਹਾ ਹੈ। ਇਸ ਲਈ ਹੁਣ ਜ਼ਰੂਰੀ ਹੈ ਕਿ ਪ੍ਰਦੂਸ਼ਣ ਉੱਪਰ ਕਾਬੂ ਪਾਇਆ ਜਾਵੇ, ਨਹੀਂ ਤਾਂ ਬਹੁਤ ਦੇਰ ਹੋ ਜਾਵੇਗੀ।

-ਸੇਵਾ ਰਾਮ ਸਿੰਗਲਾ
ਮੇਨ ਅਜੀਤ ਰੋਡ, ਬਠਿੰਡਾ।

ਅਧਿਆਪਕਾਂ ਲਈ ਪੈਨਸ਼ਨ

ਇਕ ਸਾਫ਼ ਸਲੇਟ ਵਰਗਾ ਦਿਲ-ਦਿਮਾਗ ਲੈ ਕੇ ਸਕੂਲ ਦੀ ਨਰਸਰੀ ਕਲਾਸ ਵਿਚ ਦਾਖ਼ਲ ਹੋਣ ਵਾਲੇ ਭੋਲੇ-ਭਾਲੇ ਬੱਚਿਆਂ ਨੂੰ ਪੜ੍ਹਾ ਕੇ ਅਕਲਮੰਦ ਬਣਾਉਣ ਦਾ ਕੰਮ ਦੇਸ਼ ਦੇ ਸਤਿਕਾਰਯੋਗ ਅਧਿਆਪਕਾਂ ਦੇ ਜ਼ਿੰਮੇ ਆਇਆ ਹੈ। ਅਧਿਆਪਕ ਵਰਗ ਇਕ ਵੱਡੇ ਇਨਾਮ ਤੇ ਸਨਮਾਨ ਦਾ ਹੱਕਦਾਰ ਹੈ। ਉਨ੍ਹਾਂ ਦਾ ਆਪਣਾ ਜੀਵਨ ਖੁਸ਼ਹਾਲ ਹੋਣਾ ਚਾਹੀਦਾ ਹੈ। ਉਨ੍ਹਾਂ ਦਾ ਬੁਢੇਪਾ ਬੇਫ਼ਿਕਰ ਤੇ ਇੱਜ਼ਤਦਾਰ ਹੋਣਾ ਚਾਹੀਦਾ ਹੈ ਤਾਂ ਕਿ ਉਹ ਮਹਿਸੂਸ ਕਰਨ ਕਿ ਦੇਸ਼ ਤੇ ਸਰਕਾਰ ਨੇ ਉਨ੍ਹਾਂ ਦੀ ਜ਼ਿੰਦਗੀ ਭਰ ਦੀ ਮਿਹਨਤ ਦਾ ਸਨਮਾਨ ਕੀਤਾ ਹੈ। ਇਸ ਲਈ ਇਹ ਜ਼ਰੂਰੀ ਬਣਦਾ ਹੈ ਕਿ ਦੇਸ਼ ਦੇ ਸਾਰੇ ਹੀ ਪ੍ਰਾਈਵੇਟ ਮਨਜ਼ੂਰਸ਼ੁਦਾ ਸਕੂਲਾਂ ਅਤੇ ਕਾਲਜਾਂ ਦੇ ਅਧਿਆਪਕ ਸਾਹਿਬਾਨ ਨੂੰ ਉਨ੍ਹਾਂ ਦੀ ਸੇਵਾ-ਮੁਕਤੀ ਦੇ ਸਮੇਂ, ਸਰਕਾਰੀ ਅਧਿਆਪਕਾਂ ਵਾਂਗ ਪੈਨਸ਼ਨ ਦੇਣੀ ਲਾਜ਼ਮੀ ਬਣਾਈ ਜਾਵੇ। ਕੀ ਪੰਜਾਬ ਸਰਕਾਰ, ਚੋਣਾਂ ਤੋਂ ਪਹਿਲਾਂ ਪੈਨਸ਼ਨ ਦੇਣ ਦਾ ਐਲਾਨ ਕਰਕੇ ਦੇਸ਼ ਦੀ ਪਹਿਲੀ ਸਰਕਾਰ ਬਣੇਗੀ?

-ਇੰਜੀ: ਕੁਲਦੀਪ ਸਿੰਘ ਲੁੱਧਰ
ਅੰਮ੍ਰਿਤਸਰ।

19-09-2016

 ਬਿਮਾਰੀਆਂ ਦਾ ਕਾਰਨ ਬਣੇ ਅਵਾਰਾ ਜਾਨਵਰ

ਅੱਜਕਲ੍ਹ ਭਾਰਤ ਦੇ ਕਈ ਪ੍ਰਾਂਤਾਂ ਵਿਚ ਚਿਕਨਗੁਨੀਆ, ਡੇਂਗੂ ਆਦਿ ਬਿਮਾਰੀਆਂ ਨੇ ਦਸਤਕ ਦਿੱਤੀ ਹੋਈ ਹੈ। ਜਿਸ ਨਾਲ ਕਈ ਕੀਮਤੀ ਜਾਨਾਂ ਜਾ ਵੀ ਚੁੱਕੀਆਂ ਹਨ। ਸਿਹਤ ਵਿਭਾਗ ਵੱਲੋਂ ਇਸ ਦਾ ਕਾਰਨ ਸਾਡੇ ਆਲੇ-ਦੁਆਲੇ ਵਿਚ ਪਸਰਿਆ ਹੋਇਆ ਗੰਦ ਹੈ। ਜਿਸ ਕਾਰਨ ਬਿਮਾਰੀਆਂ ਫੈਲ ਰਹੀਆਂ ਹਨ। ਇਸ ਲਈ ਸਿਹਤ ਵਿਭਾਗ ਵੱਲੋਂ ਆਪਣੇ ਆਲੇ-ਦੁਆਲੇ ਦੀ ਸਫ਼ਾਈ ਰੱਖ ਕੇ ਬਿਮਾਰੀਆਂ ਤੋਂ ਬਚਣ ਦੀ ਪ੍ਰੇਰਨਾ ਦਿੱਤੀ ਜਾ ਰਹੀ ਹੈ। ਭਾਰਤ ਦੇ ਪ੍ਰਧਾਨ ਮੰਤਰੀ ਸ੍ਰੀ ਨਰਿੰਦਰ ਮੋਦੀ ਨੇ ਵੀ ਸੱਵਛ ਅਭਿਆਨ ਸ਼ੁਰੂ ਕੀਤਾ ਹੋਇਆ ਹੈ। ਜਿਸ ਵਿਚ ਉਨ੍ਹਾਂ ਨੇ ਵੀ ਕਈ ਥਾਈਂ ਸਫਾਈ ਦੀ ਮੁਹਿੰਮ ਵਿਚ ਆਪ ਸ਼ਮੂਲੀਅਤ ਕਰਕੇ ਦੇਸ਼ ਦੀ ਜਨਤਾ ਨੂੰ ਵੀ ਸਫਾਈ ਵੱਲ ਵਿਸ਼ੇਸ਼ ਧਿਆਨ ਦੇਣ ਲਈ ਪ੍ਰੇਰਿਤ ਕੀਤਾ ਹੈ। ਜੇਕਰ ਅਸੀਂ ਦੇਸ਼ ਵਿਚੋਂ ਗੰਦਗੀ ਨੂੰ ਬਾਹਰ ਕਰਕੇ ਦੇਸ਼ ਨੂੰ ਸਾਫ-ਸੁਥਰਾ ਰੱਖਣਾ ਚਾਹੁੰਦੇ ਹਾਂ ਤਾਂ ਕੇਂਦਰ ਦੀ ਸਰਕਾਰ ਨੂੰ ਸਭ ਤੋਂ ਪਹਿਲਾਂ ਅਵਾਰਾ ਜਾਨਵਰਾਂ ਸਬੰਧੀ ਬਣਾਏ ਕਾਨੂੰਨ 'ਤੇ ਝਾਤ ਮਾਰਨੀ ਪਵੇਗੀ। ਅੱਜ ਇਹ ਗੱਲ ਸਾਫ਼ ਤੌਰ 'ਤੇ ਸਾਹਮਣੇ ਆ ਗਈ ਹੈ ਕਿ ਅਵਾਰਾ ਜਾਨਵਰ ਜਿਥੇ ਕਿਸਾਨਾਂ, ਆਮ ਲੋਕਾਂ ਲਈ ਵੱਡੀ ਸਿਰਦਰਦੀ ਬਣੇ ਹੋਏ ਹਨ, ਉਥੇ ਉਹ ਸ਼ਹਿਰਾਂ ਕਸਬਿਆਂ, ਪਿੰਡਾਂ ਵਿਚ ਘੁੰਮ ਘੁੰਮ ਕੇ, ਗਲੀਆਂ, ਸੜਕਾਂ, ਬਜ਼ਾਰਾਂ ਵਿਚ ਗੰਦ ਖਿਲਾਰ ਕੇ ਬਿਮਾਰੀਆਂ ਨੂੰ ਸੱਦਾ ਦੇ ਰਹੇ ਹਨ। ਨਗਰ ਕੌਂਸਲਾਂ ਕੋਲ ਸਫਾਈ ਦੇ ਮੁਕੰਮਲ ਪ੍ਰਬੰਧਾਂ ਲਈ ਸਫਾਈ ਸੇਵਕਾਂ ਦੀ ਵੱਡੀ ਘਾਟ ਹੈ। ਦੂਸਰੇ ਪਾਸੇ ਅਵਾਰਾ ਜਾਨਵਰ ਸਭ ਪਾਸੇ ਗੰਦ ਖਿਲਾਰ ਰਹੇ ਹਨ। ਸਰਕਾਰ ਨੂੰ ਸਭ ਤੋਂ ਪਹਿਲਾਂ ਜੋ ਕੰਮ ਕਰਨਾ ਚਾਹੀਦਾ ਹੈ ਉਹ ਅਵਾਰਾ ਜਾਨਵਰਾਂ ਨੂੰ ਸ਼ਹਿਰਾਂ, ਕਸਬਿਆਂ, ਪਿੰਡਾਂ ਆਦਿ ਤੋਂ ਤੁਰੰਤ ਕੋਈ ਢੰਗ ਵਸੀਲਾ ਬਣਾ ਕੇ ਹਟਾਏ। ਸਰਕਾਰ ਜੇਕਰ ਸਫ਼ਾਈ ਲਈ ਗੰਭੀਰ ਹੋਵੇ ਤਾਂ ਉਹ ਸਭ ਕੁਝ ਕਰ ਸਕਦੀ ਹੈ ਇਸ ਨਾਲ ਵੱਡੇ ਪੱਧਰ 'ਤੇ ਗੰਦਗੀ ਹਟੇਗੀ, ਬਿਮਾਰੀਆਂ 'ਤੇ ਰੋਕ ਲੱਗੇਗੀ, ਕਿਸਾਨਾਂ ਦੀਆਂ ਫ਼ਸਲਾਂ ਬਰਬਾਦ ਹੋਣ ਤੋਂ ਬਚਣਗੀਆਂ, ਰੋਜ਼ਾਨਾ ਸੜਕਾਂ 'ਤੇ ਹੁੰਦੀਆਂ ਦੁਰਘਟਨਾਵਾਂ ਨਾਲ ਕੀਮਤੀ ਜਾਨਾਂ ਨਹੀਂ ਜਾਣਗੀਆਂ। ਜੇਕਰ ਇਸ ਗੰਭੀਰ ਬਣ ਰਹੇ ਮਸਲੇ ਵੱਲ ਧਿਆਨ ਨਾ ਦਿੱਤਾ ਗਿਆ ਤਾਂ ਇਹ ਅਵਾਰਾ ਜਾਨਵਰ ਬੜੀ ਜਲਦੀ ਬਿਮਾਰੀਆਂ ਦੇ ਫੈਲਣ ਦਾ ਸਭ ਤੋਂ ਵੱਡਾ ਕਾਰਨ ਬਣ ਕੇ ਸਾਹਮਣੇ ਆਉਣਗੇ।
ਕੀ ਪੰਜਾਬ ਦੀ ਸਰਕਾਰ ਕੇਂਦਰ ਦੀ ਸਰਕਾਰ 'ਤੇ ਇਨ੍ਹਾਂ ਅਵਾਰਾ ਜਾਨਵਰਾਂ ਨੂੰ ਨੱਥ ਪਾਉਣ 'ਤੇ ਨਿਗਰ ਕਾਰਵਾਈ ਕਰਨ ਲਈ ਜ਼ੋਰ ਪਾਵੇਗੀ।

-ਜੰਗ ਸਿੰਘ
# ਲੂਥਰਾ ਨਿਵਾਸ ਸੀਸ ਗੰਜ ਲਾਈਨ ਸ੍ਰੀ ਅਨੰਦਪੁਰਸਾਹਿਬ (ਰੋਪੜ)
ਮੋਬਾਈਲ : 94170-95965
.

ਪਰਵਾਸ ਦੀ ਇੱਛਾ

ਅਸੀਂ ਆਪਣੇ ਆਸ-ਪਾਸ ਦੇਖ ਰਹੇ ਹਾਂ ਕਿ ਨੌਜਵਾਨਾਂ ਵਿਚ ਵਿਦੇਸ਼ ਜਾ ਕੇ ਵਸਣ ਦੀ ਰੁਚੀ ਵਧ ਰਹੀ ਹੈ। ਆਪਣੀ ਇਸ ਇੱਛਾ ਨੂੰ ਪੂਰਾ ਕਰਨ ਲਈ ਉਹ ਹਰ ਰੋਜ਼ ਜਾਇਜ਼-ਨਾਜਾਇਜ਼ ਢੰਗ ਅਪਣਾਉਂਦੇ ਹਨ। ਇਥੇ ਇਹ ਸਵਾਲ ਉਠਦਾ ਹੈ ਕਿ ਨੌਜਵਾਨਾਂ ਵਿਚ ਵਿਦੇਸ਼ ਜਾਣ ਦੀ ਰੁਚੀ ਕਿਉਂ ਵਧ ਰਹੀ ਹੈ? ਇਸ ਦਾ ਕਾਰਨ ਇਹ ਹੈ ਕਿ ਨੌਜਵਾਨਾਂ ਨੂੰ ਆਪਣੇ ਦੇਸ਼ ਵਿਚ ਆਪਣਾ ਭਵਿੱਖ ਧੁੰਦਲਾ ਦਿਖਾਈ ਦਿੰਦਾ ਹੈ। ਕਿਉਂਕਿ ਪੜ੍ਹ-ਲਿਖ ਕੇ ਨੌਕਰੀ ਮਿਲਣ ਦੇ ਮੌਕੇ ਘੱਟ ਹਨ ਤੇ ਜੇ ਨੌਕਰੀ ਮਿਲ ਵੀ ਜਾਵੇ ਤਾਂ ਤਨਖਾਹ ਇੰਨੀ ਘੱਟ ਹੁੰਦੀ ਹੈ ਕਿ ਆਮ ਪਰਿਵਾਰ ਦਾ ਖਰਚ ਹੀ ਪੂਰਾ ਨਹੀਂ ਹੁੰਦਾ। ਇਥੇ ਇਕ ਹੋਰ ਗੱਲ 'ਤੇ ਧਿਆਨ ਦੇਣ ਦੀ ਜ਼ਰੂਰਤ ਹੈ ਕਿ ਅੱਜਕਲ੍ਹ ਅਨੇਕਾਂ ਏਜੰਟਾਂ ਨੇ ਆਪਣੀਆਂ ਦੁਕਾਨਾਂ ਖੋਲ੍ਹੀਆਂ ਹਨ ਤੇ ਪੈਸੇ ਠੱਗ ਕੇ ਨੌਜਵਾਨਾਂ ਨੂੰ ਜੇਲ੍ਹਾਂ ਵਿਚ ਫਸਾ ਦਿੰਦੇ ਹਨ। ਵਿਦੇਸ਼ ਜਾਣ ਤੋਂ ਪਹਿਲਾਂ ਲੋਕਾਂ ਤੇ ਨੌਜਵਾਨਾਂ ਨੂੰ ਚਾਹੀਦਾ ਹੈ ਕਿ ਕਾਨੂੰਨੀ ਤੌਰ 'ਤੇ ਹੀ ਵੀਜ਼ੇ ਲੈ ਕੇ ਜਾਣ। ਇਸ ਲਈ ਕਿਸੇ ਏਜੰਟ ਕੋਲ ਫਸਣ ਦੀ ਜ਼ਰੂਰਤ ਨਹੀਂ ਹੈ, ਸਾਰੀ ਜਾਣਕਾਰੀ ਇੰਟਰਨੈੱਟ 'ਤੇ ਹੀ ਉਪਲਬੱਧ ਹੈ। ਸਰਕਾਰ ਨੂੰ ਚਾਹੀਦਾ ਹੈ ਕਿ ਵੱਧ ਤੋਂ ਵੱਧ ਰੁਜ਼ਗਾਰ ਦੇ ਮੌਕੇ ਪ੍ਰਦਾਨ ਕਰੇ ਤੇ ਚੰਗੀਆਂ ਸਹੂਲਤਾਂ ਦੇ ਕੇ ਨੌਜਵਾਨਾਂ ਨੂੰ ਉਸਾਰੂ ਕੰਮਾਂ ਵੱਲ ਲਾਵੇ ਤਾਂ ਕਿ ਵਿਦੇਸ਼ ਜਾਣ ਦੀ ਲੋੜ ਹੀ ਨਾ ਪਵੇ। ਨੌਜਵਾਨਾਂ ਤੇ ਹੋਰਨਾਂ ਲੋਕਾਂ ਨੂੰ ਵੀ ਚਾਹੀਦਾ ਹੈ ਕਿ ਏਜੰਟਾਂ ਕੋਲ ਪੈਸੇ ਫਸਾਉਣ ਤੋਂ ਚੰਗਾ ਹੈ ਆਪਣੇ ਪ੍ਰਾਈਵੇਟ ਕੰਮ ਚਲਾ ਕੇ ਆਪਣੇ ਪਰਿਵਾਰ ਦਾ ਤੇ ਆਪਣਾ ਗੁਜ਼ਾਰਾ ਕਰਨ।

-ਨਵਲੀਨ ਕੌਰ
ਮੋਬਾਈਲ : 80540-65283.

15-09-2016

 ਰਿਸ਼ਤਿਆਂ ਵਿਚ ਬਦਲਾਅ

ਮੋਹ, ਮਮਤਾ ਤੇ ਤਿਆਗ ਦੇ ਆਧਾਰ 'ਤੇ ਰਿਸ਼ਤੇ ਬਣਦੇ ਹਨ ਤੇ ਇਹ ਪਿਆਰ ਭਰੇ ਰਿਸ਼ਤੇ ਹੀ ਜ਼ਿੰਦਗੀ ਨੂੰ ਖੂਬਸੂਰਤ ਬਣਾਉਂਦੇ ਹਨ। ਹਰ ਰਿਸ਼ਤੇ ਦਾ ਆਪਣਾ ਮਹੱਤਵ ਹੁੰਦਾ ਹੈ ਅਤੇ ਹਰ ਰਿਸ਼ਤੇ ਦੀ ਆਪਣੀ ਇਕ ਪਰਿਭਾਸ਼ਾ ਹੁੰਦੀ ਹੈ ਪਰ ਅੱਜ ਦੇ ਮਸ਼ੀਨੀ ਯੁੱਗ ਵਿਚ ਰਿਸ਼ਤਿਆਂ ਵਿਚਲੀ ਉਹ ਸਾਂਝ ਖ਼ਤਮ ਹੁੰਦੀ ਜਾ ਰਹੀ ਹੈ। ਹੁਣ ਰਿਸ਼ਤਿਆਂ ਵਿਚ ਉਹ ਆਪਣਾਪਣ, ਪਿਆਰ ਦਿਖਾਈ ਨਹੀਂ ਦਿੰਦਾ ਜੋ ਪੁਰਾਣੇ ਸਮਿਆਂ ਵਿਚ ਹੁੰਦਾ ਸੀ। ਅੱਜ ਹਰ ਰਿਸ਼ਤਾ ਮਤਲਬ ਦੇ ਲਈ ਵਰਤਿਆ ਜਾਂਦਾ ਹੈ ਕਿਉਂਕਿ ਹੁਣ ਸਾਨੂੰ ਪਿਆਰ ਨਾਲੋਂ ਵਪਾਰ ਜ਼ਿਆਦਾ ਕਰਨਾ ਆ ਗਿਆ ਹੈ। ਹੁਣ ਨਾ ਬਜ਼ੁਰਗਾਂ ਦਾ ਪਹਿਲਾਂ ਜਿਹਾ ਸਤਿਕਾਰ ਰਿਹਾ ਅਤੇ ਨਾ ਹੀ ਛੋਟਿਆਂ ਨਾਲ ਉਹ ਪਿਆਰ। ਹੁਣ ਤਾਂ ਪੈਸੇ ਦੀ ਖਾਤਰ ਭਰਾ-ਭਰਾ ਦਾ ਦੁਸ਼ਮਣ ਬਣਿਆ ਹੋਇਆ ਹੈ। ਇਸੇ ਪੈਸੇ ਦੀ ਖਾਤਰ ਆਪਣਿਆਂ ਹੱਥੋਂ ਆਪਣਿਆਂ ਦਾ ਹੀ ਖੂਨ ਵਹਾਇਆ ਜਾ ਰਿਹਾ ਹੈ। ਰਿਸ਼ਤਿਆਂ ਵਿਚ ਆਈ ਇਸ ਕੜਵਾਹਟ ਕਾਰਨ ਹੀ ਤਾਂ ਸਾਡਾ ਬੁਢਾਪਾ ਬਿਰਧ ਆਸ਼ਰਮ ਵਿਚ ਰੁਲ ਰਿਹਾ ਹੈ। ਰਿਸ਼ਤਿਆਂ ਵਿਚ ਆਏ ਇਸੇ ਨਿਘਾਰ ਕਾਰਨ ਸਾਡਾ ਸਮਾਜ ਅਸੱਭਿਅਕ ਬਣਦਾ ਜਾ ਰਿਹਾ ਹੈ। ਪਹਿਲਾਂ ਮੂੰਹ ਬੋਲੇ ਰਿਸ਼ਤੇ ਵੀ ਜਾਨ ਦੇ ਕੇ ਨਿਭਾਏ ਜਾਂਦੇ ਸਨ ਪਰ ਹੁਣ ਖੂਨ ਦੇ ਰਿਸ਼ਤਿਆਂ ਦਾ ਵੀ ਕੋਈ ਮਹੱਤਵ ਨਹੀਂ ਰਹਿ ਗਿਆ। ਮਸ਼ੀਨੀ ਯੁੱਗ ਵਿਚ ਇਨਸਾਨ ਖ਼ੁਦ ਇਕ ਮਸ਼ੀਨ ਬਣ ਚੁੱਕਾ ਹੈ, ਜਿਸ ਅੰਦਰ ਕੋਈ ਰੂਹ, ਕੋਈ ਭਾਵਨਾ ਹੈ ਹੀ ਨਹੀਂ। ਰਿਸ਼ਤਿਆਂ ਵਿਚ ਆ ਰਹੀ ਇਹ ਕੜਵਾਹਟ ਸਮਾਜ ਨੂੰ ਦਿਨੋ-ਦਿਨ ਵਿਨਾਸ਼ ਵੱਲ ਲੈ ਕੇ ਜਾ ਰਹੀ ਹੈ।

-ਜਸਪ੍ਰੀਤ ਕੌਰ 'ਸੰਘਾ'
ਪਿੰਡ ਤਨੂੰਲੀ, ਜ਼ਿਲ੍ਹਾ ਹੁਸ਼ਿਆਰਪੁਰ।

ਇਹ ਕੈਸੀ ਆਜ਼ਾਦੀ

ਸਾਡੇ ਦੇਸ਼ ਨੂੰ ਆਜ਼ਾਦ ਹੋਇਆਂ 70 ਸਾਲ ਬੀਤ ਚੁੱਕੇ ਹਨ। ਇਸ ਆਜ਼ਾਦੀ ਨੂੰ ਹਾਸਲ ਕਰਨ ਲਈ ਸ਼ਹੀਦ ਭਗਤ ਸਿੰਘ, ਸੁਖਦੇਵ, ਰਾਜਗੁਰੂ, ਸ਼ਹੀਦ ਊਧਮ ਸਿੰਘ ਅਤੇ ਕਰਤਾਰ ਸਿੰਘ ਸਰਾਭਾ ਵਰਗੇ ਨੌਜਵਾਨਾਂ ਨੇ ਦੇਸ਼ ਦੀ ਖਾਤਰ ਆਪਣੀਆਂ ਜਾਨਾਂ ਕੁਰਬਾਨ ਕਰ ਦਿੱਤੀਆਂ। ਪ੍ਰਣਾਮ ਹੈ! ਇਨ੍ਹਾਂ ਸ਼ਹੀਦਾਂ ਨੂੰ। ਪ੍ਰੰਤੂ ਅੰਗਰੇਜ਼ ਜਾਂਦੇ-ਜਾਂਦੇ ਪੰਜਾਬ ਦੀ ਵੰਡ ਕਰ ਗਏ। 70 ਸਾਲ ਬੀਤ ਜਾਣ 'ਤੇ ਵੀ ਬੇਰੁਜ਼ਗਾਰੀ ਅਤੇ ਮਹਿੰਗਾਈ ਦਿਨੋ-ਦਿਨ ਵਧਦੀ ਜਾ ਰਹੀ ਹੈ। ਰੋਜ਼ ਵਰਤੋਂ ਦੀਆਂ ਚੀਜ਼ਾਂ ਦਾਲਾਂ, ਚਾਹ ਪੱਤੀ ਅਤੇ ਖੰਡ ਦੀਆਂ ਕੀਮਤਾਂ 100 ਰੁਪਏ ਤੋਂ ਘੱਟ ਨਹੀਂ। ਗਰੀਬ ਗਰੀਬ ਹੁੰਦਾ ਜਾ ਰਿਹਾ ਹੈ ਅਤੇ ਅਮੀਰ ਅਮੀਰ ਹੁੰਦਾ ਜਾ ਰਿਹਾ ਹੈ।

-ਸੁਖਚੈਨ ਸਿੰਘ ਢਿੱਲੋਂ
ਖਿੱਪਾਂ ਵਾਲੀ (ਫਾਜ਼ਿਲਕਾ)।

ਜਵਾਨੀ ਸੁਚੇਤ ਹੋਵੇ

ਚੰਦ ਕੁ ਗਾਇਕਾਂ ਨੂੰ ਛੱਡ ਕੇ ਅੱਜ ਦੀ ਗਾਇਕੀ ਨੌਜਵਾਨ ਪੀੜ੍ਹੀ ਨੂੰ ਕੁਰਾਹੇ ਪਾ ਰਹੀ ਹੈ। ਇਸ ਨੂੰ ਰੋਕਣਾ ਤਾਂ ਮੁਸ਼ਕਿਲ ਹੈ ਪਰ ਮੇਰੀ ਪੰਜਾਬੀ ਗੱਭਰੂਆਂ ਨੂੰ ਬੇਨਤੀ ਹੈ ਕਿ ਉਹ ਆਪਣੇ ਅਮੀਰ ਵਿਰਸੇ ਦੀ ਕਦਰ ਕਰਨ। ਇਹ ਜੋ ਕੁਝ ਵੀ ਗੀਤਾਂ, ਫ਼ਿਲਮਾਂ ਆਦਿ ਦੀਆਂ ਵੀਡੀਓਜ਼ 'ਚ, ਮੋਬਾਈਲਾਂ 'ਚ ਦਿਖਾ ਰਹੇ ਹਨ, ਇਹ ਸਭ ਕੁਝ ਬਨਾਉਟੀ ਹੈ। ਇਨ੍ਹਾਂ ਵਿਚ ਆਸ਼ਕੀ-ਮਸ਼ੂਕੀ, ਨਸ਼ੇ, ਹਥਿਆਰ, ਬੁਝਦਿਲੀ, ਕੰਮਚੋਰ, ਆਲਸੀ, ਕਮਜ਼ੋਰ, ਅਨਪੜ੍ਹ, ਪ੍ਰੇਮੀ, ਦੁਸ਼ਮਣੀਆਂ, ਕਾਮੀ, ਕ੍ਰੋਧੀ, ਹੰਕਾਰੀ ਆਦਿ ਅਨੇਕਾਂ ਹੀ ਸਬਜ਼ਬਾਗ ਦਿਖਾਉਣ ਦੇ ਸਿਵਾਏ ਕੁਝ ਨਹੀਂ ਹੈ। ਇਹ ਅਸਲ ਜ਼ਿੰਦਗੀ ਤੋਂ ਕੋਹਾਂ ਦੂਰ ਹਨ। ਨੌਜਵਾਨ ਪੀੜ੍ਹੀ ਸੁਚੇਤ ਹੋਵੇ ਤੇ ਆਪਣੀ ਜ਼ਿੰਦਗੀ ਨੂੰ ਵਧੀਆ ਤਰੀਕੇ ਨਾਲ ਉਤਸ਼ਾਹਿਤ ਹੋ ਕੇ ਜੀਵੇ ਤਾਂ ਹੀ ਇਸ ਗ਼ੈਰ-ਇਖਲਾਕੀ ਤੇ ਅਸੱਭਿਅਕ ਹਨ੍ਹੇਰੀ ਨੂੰ ਠੱਲ੍ਹ ਪਵੇਗੀ।

-ਗੁਰਚਰਨ ਸਿੰਘ
ਪਿੰਡ ਤੇ ਡਾਕ: ਮਜਾਰਾ, ਜ਼ਿਲ੍ਹਾ ਸ਼ਹੀਦ ਭਗਤ ਸਿੰਘ ਨਗਰ।

14-09-2016

 ਪਾਣੀ ਬਚਾਓ
ਹਵਾ, ਪਾਣੀ, ਭੋਜਨ ਇਨ੍ਹਾਂ ਤਿੰਨਾਂ ਤੋਂ ਬਿਨਾਂ ਧਰਤੀ 'ਤੇ ਜੀਵਨ ਸੰਭਵ ਨਹੀਂ ਹੈ। ਮਨੁੱਖ ਪਸ਼ੂ, ਪੰਛੀ, ਪੇੜ ਪੌਦੇ ਸਭ ਦਾ ਜੀਵਨ ਪਾਣੀ 'ਤੇ ਨਿਰਭਰ ਹੈ। ਧਰਤੀ ਦਾ ਲਗਪਗ 97 ਫ਼ੀਸਦੀ ਭਾਗ ਪਾਣੀ ਨਾਲ ਢਕਿਆ ਹੋਇਆ ਹੈ। ਪ੍ਰਾਣੀਆਂ ਤੇ ਪੌਦਿਆਂ ਦੇ ਸਰੀਰ ਵਿਚ 60 ਤੋਂ 65 ਫੀਸਦੀ ਹਿੱਸਾ ਪਾਣੀ ਹੈ। ਪੀਣ ਲਈ, ਖਾਣਾ ਬਣਾਉਣ ਲਈ, ਨਹਾਉਣ ਲਈ, ਸਫ਼ਾਈ ਲਈ, ਸਿੰਚਾਈ ਲਈ, ਉਦਯੋਗ ਵਿਚ ਹਰ ਥਾਂ 'ਤੇ ਪਾਣੀ ਦਾ ਹੀ ਪ੍ਰਯੋਗ ਹੁੰਦਾ ਹੈ। ਅਸਲ ਵਿਚ ਪਾਣੀ ਹੀ ਜੀਵਨ ਹੈ ਪਰ ਫਿਰ ਵੀ ਅਸੀਂ ਇਸ ਦਾ ਮਹੱਤਵ ਨਹੀਂ ਸਮਝਦੇ ਤੇ ਰੋਜ਼ਾਨਾ ਇਸ ਦੀ ਦੁਰਵਰਤੋਂ ਕਰਦੇ ਹਾਂ। ਕਦੇ ਘਰਾਂ ਵਿਚ ਤੇ ਕਦੇ ਉਦਯੋਗਾਂ ਵਿਚ। ਸੀਵਰੇਜ ਕਾਰਨ, ਉਦਯੋਗ ਦੀ ਗੰਦਗੀ ਕਾਰਨ, ਖੇਤਾਂ ਵਿਚ ਛਿੜਕੀਆਂ ਜਾਂਦੀਆਂ ਕੀਟਨਾਸ਼ਕ ਦਵਾਈਆਂ ਕਾਰਨ ਧਰਤੀ ਹੇਠਲਾ ਪਾਣੀ ਲਗਾਤਾਰ ਦੂਸ਼ਿਤ ਹੋ ਰਿਹਾ ਹੈ। ਭਾਰਤ ਦੇ ਬਹੁਤ ਸਾਰੇ ਇਲਾਕੇ ਅਜਿਹੇ ਹਨ, ਜਿਥੇ ਲੋਕ ਪੀਣ ਵਾਲੇ ਪਾਣੀ ਲਈ ਵੀ ਤਰਸਦੇ ਹਨ। ਰੋਜ਼ਾਨਾ ਮੀਲਾਂ ਦੀ ਦੂਰੀ ਤੈਅ ਕਰਕੇ ਉਨ੍ਹਾਂ ਨੂੰ ਪਾਣੀ ਨਸੀਬ ਹੁੰਦਾ ਹੈ ਤੇ ਜਿਨ੍ਹਾਂ ਕੋਲ ਇਹ ਕੁਦਰਤ ਦਾ ਭੰਡਾਰ ਹੈ, ਉਨ੍ਹਾਂ ਨੂੰ ਇਸ ਦੀ ਕਦਰ ਨਹੀਂ ਹੈ।
ਲੋੜ ਹੈ ਪਾਣੀ ਦੇ ਮਹੱਤਵ ਨੂੰ ਸਮਝਣ ਤੇ ਬੂੰਦ-ਬੂੰਦ ਪਾਣੀ ਨੂੰ ਬਚਾਉਣ ਦੀ ਤਾਂ ਕਿ ਭਵਿੱਖ ਵਿਚ ਸਾਨੂੰ ਕਿਸੇ ਤਰ੍ਹਾਂ ਦੇ ਵੀ ਸੰਕਟ ਦਾ ਸਾਹਮਣਾ ਨਾ ਕਰਨਾ ਪਵੇ। ਇਸ ਲਈ ਜ਼ਰੂਰੀ ਹੈ ਕਿ ਵਰਖਾ ਦੇ ਪਾਣੀ ਨੂੰ ਵੀ ਸਹੀ ਢੰਗ ਨਾਲ ਵਰਤੋਂ ਵਿਚ ਲਿਆਂਦਾ ਜਾਵੇ ਅਤੇ ਪਾਣੀ ਨੂੰ ਦੂਸ਼ਿਤ ਹੋਣ ਤੋਂ ਬਚਾਇਆ ਜਾਵੇ। ਕੁਦਰਤ ਦੁਆਰਾ ਬਖਸ਼ੀ ਇਸ ਵਡਮੁੱਲੀ ਦਾਤ ਦੀ ਸਹੀ ਵਰਤੋਂ ਕਰਕੇ ਹੀ ਅਸੀਂ ਆਪਣਾ ਭਵਿੱਖ ਸੁਰੱਖਿਅਤ ਕਰ ਸਕਦੇ ਹਾਂ।


-ਜਸਪ੍ਰੀਤ ਕੌਰ 'ਸੰਘਾ'
ਪਿੰਡ ਤਨੂੰਲੀ (ਹੁਸ਼ਿਆਰਪੁਰ)।


ਭੇਡ ਚਾਲ

ਭੇਡ ਚਾਲ ਤੋਂ ਭਾਵ ਬਿਨਾਂ ਸੋਚੇ-ਸਮਝੇ ਕਿਸੇ ਦੀ ਨਕਲ ਕਰਨਾ। ਇਹ ਰੁਚੀ ਆਮ ਤੌਰ 'ਤੇ ਭੇਡਾਂ ਵਿਚ ਹੁੰਦੀ ਹੈ। ਜਿਵੇਂ ਇਕ ਪਾਸੇ ਇਕ ਭੇਡ ਜਾਂਦੀ ਹੈ, ਉਸ ਦੇ ਪਿੱਛੇ-ਪਿੱਛੇ ਸਾਰੀਆਂ ਹੀ ਉਸੇ ਥਾਂ ਵੱਲ ਤੁਰ ਪੈਂਦੀਆਂ ਹਨ। ਪਰ ਅੱਜਕਲ੍ਹ ਇਹੀ ਰੁਚੀ ਆਦਮੀਆਂ ਅਤੇ ਔਰਤਾਂ ਵਿਚ ਵੀ ਪੈਦਾ ਹੋ ਗਈ ਹੈ। ਲੋਕਾਂ ਦੇ ਕੋਲ ਆਪਣੀ ਸੁਤੰਤਰ ਸੋਚ ਨਹੀਂ। ਉਹ ਇਕ-ਦੂਸਰੇ ਦੇ ਪਿੱਛੇ ਲਗ ਰਹੇ ਹਨ। ਭੇਡ ਚਾਲ ਸਿਰਫ ਇਕ ਚੀਜ਼ ਵਿਚ ਨਹੀਂ, ਹਰ ਚੀਜ਼ ਵਿਚ ਹੈ। ਪਰ ਇਸ ਗੱਲ ਨੂੰ ਫੈਸ਼ਨ ਕਹਿ ਕੇ ਵਡਿਆਇਆ ਜਾਂਦਾ ਹੈ। ਇਸ ਭੇਡ ਚਾਲ ਦੇ ਸਭ ਤੋਂ ਵੱਧ ਨੁਕਸਾਨ ਗ਼ਰੀਬ ਲੋਕਾਂ ਨੂੰ ਹੋ ਰਹੇ ਹਨ ਜੋ ਕਿ ਆਪਣੇ ਅਮੀਰ ਰਿਸ਼ਤੇਦਾਰਾਂ ਦੀ ਰੀਸ ਕਰਦੇ ਹਨ। ਉਨ੍ਹਾਂ ਦੇ ਵਾਂਗ ਕੱਪੜੇ, ਗਹਿਣੇ, ਘਰ ਤੇ ਕਾਰਾਂ। ਕਿਸੇ ਨੇ ਸੱਚ ਹੀ ਕਿਹਾ ਹੈ ਕਿ ਸਾਨੂੰ ਆਪਣੀ ਚਾਦਰ ਨੂੰ ਵੇਖ ਕੇ ਹੀ ਪੈਰ ਪਸਾਰਨੇ ਚਾਹੀਦੇ ਹਨ। ਦੂਜੇ ਪਾਸੇ ਸਾਡੇ ਖਾਣ-ਪੀਣ ਦੀ ਗੱਲ ਕਰੀਏ ਤਾਂ ਉਸ ਵਿਚ ਵੀ ਭੇਡ ਚਾਲ ਹੈ। ਅਸੀਂ ਆਪਣੇ ਸੱਭਿਆਚਾਰ ਨੂੰ ਭੁੱਲ ਕੇ ਪਰਾਏ ਸੱਭਿਆਚਾਰ ਨੂੰ ਅਪਣਾ ਰਹੇ ਹਾਂ। ਇਸ ਭੇਡ ਚਾਲ ਵਿਚ ਅਸੀਂ ਸਵੱਛ ਚੀਜ਼ਾਂ ਛੱਡ ਕੇ ਗੰਦਗੀ ਸਹੇੜ ਰਹੇ ਹਾਂ। ਇਸ ਲਈ ਸਾਨੂੰ ਆਪਣੇ-ਆਪ ਦੇ ਪ੍ਰਤੀ ਜ਼ਿੰਮੇਵਾਰ ਹੋਣਾ ਜ਼ਰੂਰੀ ਹੈ, ਨਹੀਂ ਤਾਂ ਇਹ ਵਧ ਰਹੀਆਂ ਬਿਮਾਰੀਆਂ ਸਾਡਾ ਜੀਵਨ ਨਸ਼ਟ ਕਰ ਦੇਣਗੀਆਂ।


-ਰਮਨਦੀਪ ਕੌਰ
ਗੁਰੂ ਨਾਨਕ ਕਾਲਜ ਫਾਰ ਗਰਲਜ਼,
ਸ੍ਰੀ ਮੁਕਤਸਰ ਸਾਹਿਬ।

13-09-2016

 ਇਨਸਾਫ਼ ਦਾ ਰਾਜ

ਅਜੋਕੇ ਦੌਰ ਵਿਚ ਪੰਜਾਬ ਵਿਚੋਂ ਕੋਈ 50 ਲੱਖ ਨੌਜਵਾਨ ਬੇਰੁਜ਼ਗਾਰੀ ਤੋਂ ਦੁਖੀ ਹੋ ਕੇ ਆਸਟਰੇਲੀਆ, ਅਮਰੀਕਾ, ਕੈਨੇਡਾ, ਨਿਊਜ਼ੀਲੈਂਡ ਅਤੇ ਇਟਲੀ ਆਦਿ ਦੇਸ਼ਾਂ ਵਿਚ ਪਹੁੰਚ ਚੁੱਕੇ ਹਨ। ਇਨ੍ਹਾਂ ਦੇਸ਼ਾਂ ਵਿਚ ਇਨਸਾਫ਼ ਦਾ ਰਾਜ ਹੈ। ਦੇਸ਼ ਦੇ ਚੁਣੇ ਹੋਏ ਲੀਡਰ ਇਮਾਨਦਾਰ ਹਨ। ਸਰਕਾਰੀ ਪ੍ਰਸ਼ਾਸਨ ਬਿਨਾਂ ਕਿਸੇ ਰਿਸ਼ਵਤ ਦੇ ਲੋਕਾਂ ਦੇ ਕੰਮ ਨਿਪਟਾਉਂਦਾ ਹੈ। ਇਮਾਨਦਾਰ ਹੋਣ ਕਾਰਨ ਲੀਡਰ ਬਿਨਾਂ ਕਿਸੇ ਸਿਕਿਉਰਿਟੀ ਦੇ ਪਬਲਿਕ ਵਿਚ ਵਿਚਰਦੇ ਹਨ ਅਤੇ ਲੋਕਾਂ ਨਾਲ ਮਿਲਦੇ-ਜੁਲਦੇ ਹਨ। ਦੇਸ਼ ਵਿਚ ਨਾ ਬੇਇਨਸਾਫ਼ੀ ਹੈ, ਨਾ ਮਿਲਾਵਟਖੋਰੀ ਅਤੇ ਨਾ ਰਿਸ਼ਵਤ-ਖੋਰੀ ਹੈ। ਪੂਰੇ ਦੇਸ਼ ਵਿਚ ਹਰਿਆਵਲ, ਸਾਫ਼ ਹਵਾ ਪਾਣੀ ਅਤੇ ਸਫ਼ਾਈ ਦਾ ਪ੍ਰਬੰਧ ਹੈ। ਲੋਕ ਤੰਦਰੁਸਤ ਹਨ ਅਤੇ ਬੇਰੁਜ਼ਗਾਰੀ ਦਾ ਨਾਮੋਨਿਸ਼ਾਨ ਨਹੀਂ ਹੈ। ਦੂਜੇ ਪਾਸੇ ਭਾਰਤ ਦੇਸ਼ ਵਿਚ ਸਭ ਕੁਝ ਉਲਟ ਹੈ। ਪਿਛਲੇ 69 ਸਾਲਾਂ ਦੌਰਾਨ ਚੋਣਾਂ ਵੇਲੇ ਜਨਤਾ ਨੇ ਪਾਰਟੀਆਂ ਅਤੇ ਲੀਡਰ ਵਾਰ-ਵਾਰ ਬਦਲੇ ਹਨ ਪ੍ਰੰਤੂ ਇਥੇ ਕੋਈ ਸੁਧਾਰ ਨਹੀਂ ਹੋ ਰਿਹਾ। ਸਮਾਂ ਬੀਤਣ ਨਾਲ ਲੀਡਰ ਹੋਰ ਅਮੀਰ ਬਣੀ ਜਾ ਰਹੇ ਹਨ ਅਤੇ ਜਨਤਾ ਗਰੀਬ। ਇਥੋਂ ਦੇ ਲੀਡਰਾਂ ਨੇ ਸਰਕਾਰੀ ਖਜ਼ਾਨੇ ਦੇ ਬਲਬੂਤੇ ਸਿਆਸਤ ਨੂੰ ਆਪਣੇ ਪਰਿਵਾਰ ਦਾ ਵਪਾਰ ਬਣਾ ਲਿਆ ਹੈ। ਸਰਕਾਰੀ ਖਜ਼ਾਨੇ ਦੀ ਏਡੇ ਵੱਡੇ ਪੱਧਰ 'ਤੇ ਦੁਰਵਰਤੋਂ ਹੋਣ ਨਾਲ ਲੋਕ ਭਲਾਈ ਦੇ ਕੰਮ ਕਿਵੇਂ ਹੋ ਸਕਦੇ ਹਨ? ਪਾਣੀ ਸਿਰ ਤੋਂ ਲੰਘ ਚੁੱਕਾ ਹੈ ਅਤੇ ਜਨਤਾ ਲੀਡਰਾਂ ਦੀ ਕਾਰਗੁਜ਼ਾਰੀ ਤੋਂ ਉਕਤਾ ਚੁੱਕੀ ਹੈ। ਲੋਕਾਂ ਦਾ ਗੁੱਸਾ ਲਾਵੇ ਦੇ ਪਹਾੜ ਵਾਂਗ ਅੰਦਰੋਂ-ਅੰਦਰ ਸੁਲਗ ਰਿਹਾ ਹੈ। ਪਤਾ ਨਹੀਂ ਲਾਵੇ ਦੇ ਪਹਾੜ ਨੇ ਫੁੱਟ ਕੇ ਕਦੋਂ ਸਭ ਕੁਝ ਰੋੜ੍ਹ ਦੇਣਾ ਹੈ। ਸਮਾਂ ਹੈ ਕਿ ਅਜੇ ਵੀ ਇਮਾਨਦਾਰ ਸਿਆਸਤਦਾਨ, ਇਤਿਹਾਸ ਦੇ ਵਿਦਵਾਨ, ਕਾਨੂੰਨਦਾਨ ਅਤੇ ਖ਼ਾਸ ਕਰ ਨੌਜਵਾਨ ਇਕ ਮੰਚ ਉੱਤੇ ਸਿਰ ਜੋੜ ਕੇ ਬੈਠਣ, ਵਿਚਾਰ ਕਰਨ ਅਤੇ ਦੇਸ਼ ਦੀ ਜਨਤਾ ਨੂੰ ਦੇਸ਼ ਵਿਚ ਇਕ ਕੁਸ਼ਲ ਅਤੇ ਇਨਸਾਫ਼ ਵਾਲਾ ਰਾਜ ਪ੍ਰਬੰਧ ਕਾਇਮ ਕਰਨ ਦੇ ਢੰਗ-ਤਰੀਕੇ ਦੱਸਣ ਤੇ ਉਸ 'ਤੇ ਅਮਲ ਕਰਵਾਉਣ। ਦੇਸ਼ ਦੀ ਸੁਚੱਜੀ ਅਗਵਾਈ ਦੇਸ਼ ਦੀ ਮਹਾਨ ਸੇਵਾ ਗਿਣੀ ਜਾਵੇਗੀ।

-ਇੰਜੀ: ਕੁਲਦੀਪ ਸਿੰਘ ਲੁੱਧਰ
ਅੰਮ੍ਰਿਤਸਰ।

'ਪੈਨਸ਼ਨ' ਮੁਲਾਜ਼ਮਾਂ ਦਾ ਬੁਨਿਆਦੀ ਹੱਕ

ਸਰਕਾਰੀ ਮੁਲਾਜ਼ਮਾਂ ਨੂੰ ਪੈਨਸ਼ਨ ਦੇਣ ਦੀ ਸ਼ੁਰੂਆਤ ਅੰਗਰੇਜ਼ਾਂ ਦੇ ਰਾਜ ਸਮੇਂ ਸ਼ੁਰੂ ਹੋਈ ਸੀ। ਉਹ ਚੰਗੀ ਤਰ੍ਹਾਂ ਜਾਣਦੇ ਸਨ ਕਿ 10-15 ਸਾਲ ਪੜ੍ਹਾਈ ਅਤੇ ਕੋਰਸ ਕਰਕੇ ਬੰਦਾ ਨੌਕਰੀ ਸ਼ੁਰੂ ਕਰਦਾ ਹੈ ਅਤੇ 58 ਜਾਂ 60 ਸਾਲ ਦੀ ਉਮਰ ਤੱਕ ਸੇਵਾ ਕਰਦਾ ਰਹਿੰਦਾ ਹੈ। ਰਿਟਾਇਰਮੈਂਟ ਤੋਂ ਪਿੱਛੋਂ ਕੋਈ ਕੰਮ ਕਰਨਾ ਉਸ ਲਈ ਮੁਸ਼ਕਿਲ ਹੋ ਜਾਂਦਾ ਹੈ। ਕਈ ਬਿਮਾਰੀਆਂ ਵੀ ਘੇਰਾ ਪਾ ਲੈਂਦੀਆਂ ਹਨ। ਇਸ ਔਖੀ ਘੜੀ 'ਚ ਉਸ ਨੂੰ ਪੈਸਿਆਂ ਦੀ ਲੋੜ ਹੁੰਦੀ ਹੈ। ਜੇ ਪੈਨਸ਼ਨ ਦੇ ਚਾਰ ਪੈਸੇ ਪੱਲੇ ਹੋਣ ਤਾਂ ਉਹ ਦਵਾ-ਦਾਰੂ ਲੈ ਸਕੇਗਾ ਨਹੀਂ ਤਾਂ ਦੂਸਰਿਆਂ 'ਤੇ ਬੋਝ ਬਣ ਕੇ ਨਫ਼ਰਤ ਦਾ ਪਾਤਰ ਹੀ ਬਣੇਗਾ। ਇਸ ਲਈ ਬੰਦ ਕੀਤੀ ਪੈਨਸ਼ਨ ਲਾਗੂ ਕਰਨੀ ਅਤੀ ਜ਼ਰੂਰੀ ਹੈ।

-ਮਾ: ਮਹਿੰਦਰ ਸਿੰਘ ਬਾਜਵਾ
ਪਿੰਡ ਮਸੀਤਾਂ, ਜ਼ਿਲ੍ਹਾ ਕਪੂਰਥਲਾ।

ਜ਼ਿੰਦਗੀ

ਜ਼ਿੰਦਗੀ ਜੋ ਕਿ ਰੱਬ ਦੀ ਦਿੱਤੀ ਅਮੁੱਲੀ ਦਾਤ ਹੈ। ਇਹ ਸਿਰਫ ਇਕ ਵਾਰ ਹੀ ਮਿਲਦੀ ਹੈ। ਜ਼ਿੰਦਗੀ ਦਾ ਅਸਲ ਨਾਂਅ ਹੈ ਖੁਸ਼ੀਆਂ ਅਤੇ ਗ਼ਮੀਆਂ ਨੂੰ ਇਕ ਸਮਾਨ ਸਮਝ ਕੇ ਸਮਾਂ ਬਤੀਤ ਕਰਨਾ। ਹਰ ਇਨਸਾਨ ਦੀ ਜ਼ਿੰਦਗੀ 'ਚ ਖੁਸ਼ੀਆਂ ਵੀ ਆਉਂਦੀਆਂ ਹਨ ਅਤੇ ਗਮ ਵੀ ਆਉਂਦੇ ਹਨ ਪਰ ਇਨ੍ਹਾਂ ਦੀ ਅਹਿਮੀਅਤ ਨੂੰ ਕੋਈ-ਕੋਈ ਹੀ ਸਮਝ ਸਕਦਾ ਹੈ। ਜ਼ਿੰਦਗੀ ਦੇ ਹਰ ਇਕ ਪਲ 'ਚ ਸਾਨੂੰ ਕੁਝ ਨਾ ਕੁਝ ਨਵਾਂ ਸਿੱਖਣ ਨੂੰ ਮਿਲਦਾ ਹੈ। ਇਥੋਂ ਤੱਕ ਬੁਰਾਈ ਵਿਚ ਵੀ ਕੋਈ ਚੰਗਾ ਗੁਣ ਹੁੰਦਾ ਹੈ ਪਰ ਉਸ ਗੁਣ ਦੀ ਪਰਖ ਕੋਈ-ਕੋਈ ਹੀ ਕਰ ਪਾਉਂਦਾ ਹੈ। ਜ਼ਿੰਦਗੀ 'ਚ ਸਫਲਤਾ, ਪਿਆਰ ਤੇ ਸਹਿਣਸ਼ੀਲਤਾ ਹੋਣੀ ਬਹੁਤ ਜ਼ਰੂਰੀ ਹੈ, ਕਿਉਂਕਿ ਇਸ ਨਾਲ ਜ਼ਿੰਦਗੀ ਦੀਆਂ ਅੱਧੀਆਂ ਮੁਸ਼ਕਿਲਾਂ ਘਟ ਜਾਂਦੀਆਂ ਹਨ ਤੇ ਜ਼ਿੰਦਗੀ ਬਤੀਤ ਕਰਨਾ ਸੌਖਾ ਹੋ ਜਾਂਦਾ ਹੈ। ਜ਼ਿੰਦਗੀ ਅਨਮੋਲ ਹੈ, ਇਸ ਨੂੰ ਗਵਾਉਣਾ ਨਹੀਂ ਚਾਹੀਦਾ, ਕਿਉਂਕਿ ਇਹ ਦੁਬਾਰਾ ਨਹੀਂ ਮਿਲੇਗੀ। ਜ਼ਿੰਦਗੀ ਦਾ ਕੋਈ ਪਤਾ ਨਹੀਂ ਕਿ ਕਿਸ ਮੋੜ 'ਤੇ ਸਾਡਾ ਸਾਥ ਛੱਡ ਦੇਵੇਗੀ। ਮੌਤ ਜ਼ਿੰਦਗੀ ਦੀ ਅਟੱਲ ਸਚਾਈ ਹੈ। ਕਿਉਂਕਿ ਇਕ ਵੇਲਾ ਅਜਿਹਾ ਵੀ ਆਉਂਦਾ ਹੈ, ਜਦੋਂ ਜ਼ਿੰਦਗੀ ਵੀ ਸਾਨੂੰ ਧੋਖਾ ਦੇ ਜਾਂਦੀ ਹੈ।

-ਸਰਬਜੀਤ ਕੌਰ
ਗੁਰੂ ਨਾਨਕ ਕਾਲਜ ਫਾਰ ਗਰਲਜ਼, ਸ੍ਰੀ ਮੁਕਤਸਰ ਸਾਹਿਬ।

12-09-2016

 ਪੰਚਾਇਤਾਂ ਲਈ ਸ਼ੁੱਭ ਸ਼ਗਨ
ਪਿਛਲੇ ਦਿਨੀਂ ਪੰਜਾਬ-ਹਰਿਆਣਾ ਹਾਈਕੋਰਟ ਵੱਲੋਂ ਸਰਕਾਰੀ ਗਰਾਂਟਾਂ ਸਿੱਧੀਆਂ ਪੰਚਾਇਤੀ ਫੰਡ ਵਿਚ ਜਮ੍ਹਾਂ ਕਰਵਾਉਣ ਦਾ ਸੁਣਾਇਆ ਗਿਆ ਫੈਸਲਾ ਨਿਰਸੰਦੇਹ ਪੰਚਾਇਤਾਂ ਲਈ ਸ਼ੁੱਭ ਸ਼ਗਨ ਮੰਨਿਆ ਜਾ ਰਿਹਾ ਹੈ ਕਿਉਂਕਿ ਇਸ ਫ਼ੈਸਲੇ ਨਾਲ ਪੰਚਾਇਤਾਂ ਨੂੰ ਵਾਧੂ ਖੱਜਲ-ਖੁਆਰੀਆਂ ਤੋਂ ਨਿਜਾਤ ਮਿਲ ਜਾਵੇਗੀ। ਇਸ ਤੋਂ ਪਹਿਲਾਂ ਬਹੁਤੀਆਂ ਪੰਚਾਇਤਾਂ ਵੱਲੋਂ ਲਾਏ ਜਾਂਦੇ ਦੋਸ਼ ਕਿ ਉਨ੍ਹਾਂ ਨੂੰ ਪਹਿਲਾਂ ਤਾਂ ਪੂਰੀਆਂ ਗਰਾਂਟਾਂ ਹੀ ਨਹੀਂ ਮਿਲਦੀਆਂ ਪਰ ਜੋ ਮਿਲਦੀਆਂ ਵੀ ਹਨ, ਉਨ੍ਹਾਂ ਨੂੰ ਸਰਕਾਰੀ ਅਧਿਕਾਰੀਆਂ ਦੀ ਸਹਿਮਤੀ ਤੋਂ ਬਗੈਰ ਵਰਤਿਆ ਨਹੀਂ ਜਾ ਸਕਦਾ, ਜਿਸ ਕਰਕੇ ਬਹੁਤੀਆਂ ਪੰਚਾਇਤਾਂ ਆਪੋ-ਆਪਣੇ ਪਿੰਡ 'ਚ ਵਿਕਾਸ ਕਰਵਾਉਣ ਦੇ ਮਿੱਥੇ ਟੀਚੇ ਤੋਂ ਵੀ ਖੁੰਝ ਜਾਂਦੀਆਂ ਹਨ। ਉਪਰੋਕਤ ਫੈਸਲੇ ਨਾਲ ਜਿਥੇ ਪੰਚਾਇਤਾਂ ਨੂੰ ਸਰਕਾਰੀ ਅਧਿਕਾਰੀਆਂ ਦੀ ਗੁਲਾਮੀ ਤੋਂ ਛੁਟਕਾਰਾ ਮਿਲ ਜਾਵੇਗਾ, ਉਥੇ ਪੰਚਾਇਤਾਂ ਆਈ ਗਰਾਂਟ ਨੂੰ ਮਰਜ਼ੀ ਨਾਲ ਵਰਤ ਸਕਣ ਦੇ ਸਮਰੱਥ ਵੀ ਹੋ ਜਾਣਗੀਆਂ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਜ਼ਿਲ੍ਹਾ ਲੁਧਿਆਣਾ।


ਸਾਦਾ ਜੀਵਨ

ਸਿਆਣਿਆਂ ਦਾ ਵਿਚਾਰ ਹੈ ਕਿ ਸਾਦਾ ਖਾਣਾ, ਪਹਿਨਣਾ ਤੇ ਰਹਿਣ-ਸਹਿਣ ਅਤੇ ਉੱਚੀ ਤੇ ਨਿਰਮਲ ਵਿਚਾਰਧਾਰਾ ਇਕ ਚੰਗੇ ਤੇ ਖੁਸ਼ਹਾਲ ਜੀਵਨ ਦਾ ਆਧਾਰ ਤੇ ਸੁਚੱਜੀ ਜੀਵਨ ਜਾਚ ਹੈ। ਭੋਜਨ ਹਮੇਸ਼ਾ ਸਾਦਾ ਖਾਣ ਦੀ ਕੋਸ਼ਿਸ਼ ਕਰੋ। ਕੱਪੜੇ ਮੌਸਮ ਅਨੁਸਾਰ ਗਰਮੀ, ਠੰਢ ਤੇ ਮੱਛਰ ਤੋਂ ਬਚਣ ਲਈ ਤੇ ਸਰੀਰ ਢਕਣ ਲਈ ਪਹਿਨੋ। ਫੋਕੇ ਪ੍ਰਦਰਸ਼ਨ ਕਰਦਿਆਂ ਪੈਸੇ ਦੀ ਬਰਬਾਦੀ ਤੋਂ ਬਚੋ ਤੇ ਸਰੀਰ ਨੂੰ ਕਸ਼ਟ ਨਾ ਦਿਓ।
ਮਕਾਨ ਦੀ ਉਸਾਰੀ ਮੀਂਹ-ਹਨੇਰੀ, ਜੰਗਲੀ ਜਾਨਵਰਾਂ ਜਾਂ ਚੋਰਾਂ ਤੋਂ ਬਚਣ ਲਈ ਤੇ ਸਿਰ ਢਕਣ ਲਈ ਕਰੋ ਨਾ ਕਿ ਬੇਲੋੜੀ ਉਸਾਰੀ ਕਰਕੇ ਪੈਸੇ ਦੀ ਬਰਬਾਦੀ ਕਰੋ। ਆਪਣੇ ਵਿਚਾਰ ਉੱਚੇ ਰੱਖੋ, ਕਹਿਣੀ ਤੇ ਕਥਨੀ ਦੇ ਧਾਰਨੀ ਬਣੋ। ਵਿਵਹਾਰ ਤੇ ਵਿਹਾਰ ਨੂੰ ਸੁਚੱਜਾ ਬਣਾਉਣ ਦੀ ਕੋਸ਼ਿਸ਼ ਕਰੋ। ਫੋਕਾ ਪ੍ਰਦਰਸ਼ਨ ਮਨੁੱਖ ਦਾ ਆਪਣੇ-ਆਪ ਦਾ ਹੀ ਨੁਕਸਾਨ ਕਰਦਾ ਹੈ। ਸੌ ਸਾਦਾ ਜੀਵਨ ਜੀਓ।


-ਭਾਈ ਕੁਲਵਿੰਦਰ ਸਿੰਘ
ਪਿੰਡ ਬਿਹਾਲਾ, ਜ਼ਿਲ੍ਹਾ ਹੁਸ਼ਿਆਰਪੁਰ।
ਮੋਬਾਈਲ : 98722-35945.


ਕਦਰਾਂ-ਕੀਮਤਾਂ
ਕਦਰਾਂ-ਕੀਮਤਾਂ ਮਨੁੱਖ ਨੂੰ ਸਿਸ਼ਟਾਚਾਰੀ ਮਨੁੱਖ ਦੀ ਪਦਵੀ ਪ੍ਰਦਾਨ ਕਰਦੀਆਂ ਹਨ। ਇਹ ਮਨੁੱਖ ਨੂੰ ਦੇਸ਼ ਤੇ ਸਮਾਜ ਦਾ ਇਮਾਨਦਾਰ ਤੇ ਵਫਾਦਾਰ ਨਾਗਰਿਕ ਬਣਾਉਂਦੀਆਂ ਹਨ। ਕਦਰਾਂ-ਕੀਮਤਾਂ ਹੀ ਮਨੁੱਖੀ ਵਿਕਾਸ ਦਾ ਧੁਰਾ ਹਨ ਜੋ ਮਨੁੱਖ ਨੂੰ ਚੰਗੇ ਕੰਮ ਕਰਨ ਲਈ ਅਤੇ ਲੋਕ ਭਲਾਈ ਲਈ ਪ੍ਰੇਰਦੀਆਂ ਹਨ। ਪਰ ਦੁੱਖ ਦੀ ਗੱਲ ਹੈ ਕਿ ਕਦਰਾਂ-ਕੀਮਤਾਂ ਸਮਾਜ ਵਿਚੋਂ ਦਿਨ-ਪ੍ਰਤੀਦਿਨ ਘਟ ਰਹੀਆਂ ਹਨ। ਸਮਾਜ ਵਿਚ ਸਵਾਰਥਪੁਣਾ ਵਧਦਾ ਜਾ ਰਿਹਾ ਹੈ। ਪ੍ਰੇਮ-ਪਿਆਰ, ਭਾਈਚਾਰਾ ਖਤਮ ਹੋ ਰਿਹਾ ਹੈ। ਅਧਿਆਪਕ ਅਤੇ ਸਮਾਜ ਸੇਵੀ ਸੰਸਥਾਵਾਂ ਸਮਾਜ ਵਿਚ ਕਦਰਾਂ-ਕੀਮਤਾਂ ਨੂੰ ਉਜਾਗਰ ਕਰਨ ਲਈ ਅਹਿਮ ਭੂਮਿਕਾ ਨਿਭਾਅ ਸਕਦੀਆਂ ਹਨ। ਜੇ ਅਸੀਂ ਸਮਾਜ ਵਿਚ ਕਦਰਾਂ-ਕੀਮਤਾਂ ਅਤੇ ਨੈਤਿਕਤਾ ਮੁੜ ਸੁਰਜੀਤ ਕਰਨਾ ਚਾਹੁੰਦੇ ਹਾਂ ਤਾਂ ਸਕੂਲਾਂ ਵਿਚ ਪ੍ਰਾਇਮਰੀ ਪੱਧਰ ਤੋਂ ਹੀ ਅਧਿਆਪਕਾਂ ਦੁਆਰਾ ਵਿਦਿਅਕ, ਸਮਾਜਿਕ, ਸੱਭਿਆਚਾਰਕ ਅਤੇ ਨੈਤਿਕ ਕਦਰਾਂ-ਕੀਮਤਾਂ ਦਾ ਵਾਤਾਵਰਨ ਸਿਰਜਣ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ।


-ਰਾਜਵੰਤ ਸਿੰਘ ਰਾਜੂ
ਗੁਰੂ ਨਾਨਕ ਆਟੋ ਸਪੇਅਰਜ਼, ਰਾਏਕੋਟ।


ਡਿਪਟੀ ਪ੍ਰੀਮੀਅਰ ਦਾ ਅਸਤੀਫ਼ਾ

ਕੁਝ ਦਿਨ ਪਹਿਲਾਂ ਖ਼ਬਰ ਸੀ ਕਿ ਕੈਨੇਡਾ ਵਿਚ ਸਸਕੈਚਵਨ ਦੇ ਡਿਪਟੀ ਪ੍ਰੀਮੀਅਰ ਡਾਨ ਮੈਕਮੋਰਿਸ ਦਾ ਸ਼ਰਾਬ ਪੀ ਕੇ ਗੱਡੀ ਚਲਾਉਣ ਦੇ ਜੁਰਮ ਵਿਚ ਉਥੋਂ ਦੀ ਪੁਲਿਸ ਨੇ ਚਲਾਨ ਕੱਟ ਦਿੱਤਾ ਅਤੇ ਉਕਤ ਡਿਪਟੀ ਪ੍ਰੀਮੀਅਰ ਵੱਲੋਂ ਆਪਣੇ 'ਤੇ ਲੱਗੇ ਦੋਸ਼ਾਂ ਨੂੰ ਪ੍ਰਵਾਨ ਕਰਦਿਆਂ ਬੜੀ ਦਿਆਨਤਦਾਰੀ ਨਾਲ ਇਹ ਆਖਦਿਆਂ ਕੈਬਨਿਟ ਤੋਂ ਅਸਤੀਫ਼ਾ ਦੇ ਦਿੱਤਾ ਕਿ 'ਮੇਰੇ ਕੋਲ ਆਪਣੇ ਪਰਿਵਾਰ, ਸਾਥੀਆਂ ਤੇ ਰਾਜ ਦੇ ਲੋਕਾਂ ਕੋਲੋਂ ਮੁਆਫ਼ੀ ਮੰਗਣ ਲਈ ਸ਼ਬਦ ਨਹੀਂ ਹਨ। ਮੇਰੇ ਵੱਲੋਂ ਕੀਤੇ ਗੁਨਾਹ ਨੂੰ ਪ੍ਰਵਾਨ ਨਹੀਂ ਕੀਤਾ ਜਾ ਸਕਦਾ।' ਅਖ਼ਬਾਰ 'ਚ ਉਸ ਦੀ ਤਸਵੀਰ ਤੋਂ ਵੀ ਸਾਫ਼ ਝਲਕਦਾ ਸੀ ਕਿ ਉਸ ਨੂੰ ਆਪਣੇ ਕੀਤੇ 'ਤੇ ਪਛਤਾਵਾ ਹੈ। ਪਰ ਸਾਡੇ ਮੁਲਕ 'ਚ ਇਸ ਦੇ ਉਲਟ ਹੈ।
ਇਥੇ ਤਾਂ ਅਨੇਕਾਂ ਨੇਤਾ ਵੱਡੇ ਤੋਂ ਵੱਡਾ ਦੁਖਾਂਤ ਵਾਪਰ ਜਾਣ ਦੇ ਬਾਵਜੂਦ ਵੀ ਬੜੀ ਬੇਸ਼ਰਮੀ ਨਾਲ ਕੁਰਸੀਆਂ ਨੂੰ ਚਿੰਬੜੇ ਰਹਿੰਦੇ ਨੇ। ਉਕਤ ਘਟਨਾਕ੍ਰਮ ਸਾਡੇ ਮੰਤਰੀਆਂ ਤੇ ਹਰ ਕਿਸੇ ਲਈ ਸਿੱਖਿਆਦਾਇਕ ਹੈ, ਕਿਉਂਕਿ ਬਿਨਾਂ ਝਿਜਕ ਖਿੜੇ ਮੱਥੇ ਆਪਣੀ ਗ਼ਲਤੀ ਨੂੰ ਮੰਨ ਲੈਣ ਨਾਲ ਇਨਸਾਨ ਦਾ ਕੱਦ ਸਮਾਜ ਵਿਚ ਨੀਵਾਂ ਨਹੀਂ ਸਗੋਂ ਉੱਚਾ ਹੁੰਦਾ ਹੈ। ਬਸ਼ਰਤੇ ਕਿ ਗ਼ਲਤੀ ਮੁਆਫ਼ੀ ਯੋਗ ਹੋਵੇ।
ਬੇਸ਼ੱਕ ਡਾਨ ਮੈਕਮੋਰਿਸ ਨੇ ਗ਼ਲਤੀ ਕੀਤੀ ਪਰ ਉਸ ਵੱਲੋਂ ਆਪਣੀ ਗ਼ਲਤੀ 'ਤੇ ਪਛਤਾਵਾ ਕਰਦਿਆਂ ਅਹੁਦੇ ਤੋਂ ਅਸਤੀਫ਼ਾ ਦੇਣ ਸਦਕਾ ਉਸ ਦੀ ਸ਼ਲਾਘਾ ਕਰਨੀ ਬਣਦੀ ਹੈ।


-ਯਸ਼ ਪੱਤੋ
ਪਿੰਡ ਤੇ ਡਾਕ: ਪੱਤੋ ਹੀਰਾ ਸਿੰਘ (ਮੋਗਾ)
ਮੋਬਾਈਲ : 98153-12959.

9-9-2016

 ਸ਼ਰਮ ਦੀ ਗੱਲ

ਪਿਛਲੇ ਦਿਨੀਂ 'ਅਜੀਤ' ਵਿਚ ਇਕ ਬਹੁਤ ਹੀ ਦੁਖਦਾਈ ਖ਼ਬਰ ਪੜ੍ਹੀ ਕਿ ਭੁਵਨੇਸ਼ਵਰ ਦੇ ਇਕ ਪਛੜੇ ਇਲਾਕੇ ਵਿਚ ਇਕ ਵਿਅਕਤੀ ਸਰਕਾਰੀ ਹਸਪਤਾਲ ਵਿਚ ਟੀ.ਬੀ. ਨਾਲ ਮਰੀ ਆਪਣੀ ਪਤਨੀ ਦੀ ਲਾਸ਼ ਮੋਢੇ 'ਤੇ ਰੱਖ 10 ਕਿਲੋਮੀਟਰ ਤੱਕ ਚਲਿਆ ਗਿਆ। ਅਜਿਹਾ ਉਸ ਨੂੰ ਇਸ ਕਰਕੇ ਕਰਨਾ ਪਿਆ ਕਿ ਉਸ ਕੋਲ ਹਸਪਤਾਲ ਤੋਂ ਆਪਣੇ 60 ਕਿਲੋਮੀਟਰ ਦੂਰ ਪਿੰਡ ਤੱਕ ਕੋਈ ਸਾਧਨ ਲੈ ਕੇ ਜਾਣ ਦਾ ਕਿਰਾਇਆ ਨਹੀਂ ਸੀ। ਪ੍ਰਸ਼ਾਸਨ ਦੀਆਂ ਵਾਰ-ਵਾਰ ਮਿੰਨਤਾਂ ਕਰਨ ਦੇ ਬਾਵਜੂਦ ਜਦ ਪੱਲੇ ਖੈਰ ਨਾ ਪਈ ਤਾਂ ਇੰਜ ਗਰੀਬ ਤੇ ਮਜਬੂਰ ਵਿਅਕਤੀ ਆਪਣੀ ਲੜਕੀ ਨੂੰ ਨਾਲ ਲੈ ਕੇ ਪੈਦਲ ਹੀ ਤੁਰ ਪਿਆ, ਹੋਰ ਕਰਦਾ ਵੀ ਕੀ? ਕੀ ਇਹ ਭਾਰਤ ਦੀ ਤਰੱਕੀ ਦੇ ਦਮਗਜੇ ਮਾਰਨ ਵਾਲਿਆਂ ਦੇ ਮੂੰਹ 'ਤੇ ਚਪੇੜ ਨਹੀਂ? ਕਿੰਨੇ ਦੁੱਖ ਦੀ ਗੱਲ ਹੈ ਕਿ ਸਾਡੇ ਪ੍ਰਧਾਨ ਮੰਤਰੀ ਸਾਹਿਬ ਹੋਰਨਾਂ ਗ਼ਰੀਬ ਦੇਸ਼ਾਂ ਨੂੰ ਕਰੋੜਾਂ-ਅਰਬਾਂ ਡਾਲਰਾਂ ਦੀ ਮਦਦ ਦੇ ਰਹੇ ਹਨ ਜਦ ਕਿ ਕਰੋੜਾਂ ਭਾਰਤ ਵਾਸੀ ਮੁਢਲੀਆਂ ਲੋੜਾਂ ਲਈ ਵੀ ਤਰਸ ਰਹੇ ਹਨ। ਕੀ ਅਜਿਹੇ ਮਜਬੂਰ ਭਾਰਤ ਵਾਸੀਆਂ ਲਈ ਭਾਰਤ ਦੀ ਆਜ਼ਾਦੀ ਜਾਂ ਪ੍ਰਧਾਨ ਮੰਤਰੀ ਦੀ 'ਮਨ ਕੀ ਬਾਤ' ਦਾ ਕੋਈ ਮਤਲਬ ਹੈ? ਕੀ ਪ੍ਰਸ਼ਾਸਨ ਦੀ ਕੋਈ ਜ਼ਿੰਮੇਵਾਰੀ ਨਹੀਂ? ਤੁਹਾਡੀ ਡਿਊਟੀ ਸਿਰਫ ਤਨਖਾਹਾਂ ਲੈਣੀਆਂ ਹੀ ਹਨ?

-ਪ੍ਰੀਤ ਸਿੰਘ ਸੰਦਲ (ਕਵੀਸ਼ਰ)
ਪਿੰਡ ਮਕਸੂਦੜਾ, ਤਹਿ: ਪਾਇਲ (ਲੁਧਿਆਣਾ)।

ਰੁੱਖਾਂ ਦੀ ਸੰਭਾਲ

ਪੰਜਾਬ ਵਿਚ ਹਰ ਸਾਲ ਗਰਮੀ ਦੇ ਮਹੀਨਿਆਂ ਜੂਨ-ਜੁਲਾਈ ਵਿਚ ਵੱਖ-ਵੱਖ ਪੰਚਾਇਤਾਂ, ਖੇਡ ਕਲੱਬਾਂ, ਵਿਦਿਅਕ ਅਦਾਰਿਆਂ ਅਤੇ ਹੋਰ ਅਨੇਕਾਂ ਸਮਾਜ-ਸੇਵੀ ਸੰਸਥਾਵਾਂ ਵੱਲੋਂ ਪੰਜਾਬ ਨੂੰ ਮੁੜ ਹਰਿਆ-ਭਰਿਆ ਕਰਨ ਦੇ ਮਕਸਦ ਨਾਲ ਅਨੇਕਾਂ ਨਵੇਂ ਬੂਟੇ ਲਗਾਏ ਜਾਂਦੇ ਹਨ ਜੋ ਕਿ ਇਕ ਵਧੀਆ ਉਪਰਾਲਾ ਹੈ। ਪਰ ਹੁਣ ਜੇਕਰ ਇਸ ਦਾ ਦੂਜਾ ਪੱਖ ਦੇਖਿਆ ਜਾਵੇ ਤਾਂ ਜ਼ਿਆਦਾਤਰ ਲੋਕਾਂ ਵੱਲੋਂ ਇਹ ਬੂਟੇ ਲਗਾਉਣ ਦੀਆਂ ਫੋਟੋਆਂ ਖਿੱਚ ਕੇ ਤਾਂ ਅਖ਼ਬਾਰਾਂ ਵਿਚ ਛਪਵਾ ਲਈਆਂ ਜਾਂਦੀਆਂ ਹਨ ਪਰ ਬਾਅਦ ਵਿਚ ਉਨ੍ਹਾਂ ਦੀ ਸਾਂਭ-ਸੰਭਾਲ ਕਰਨ ਲਈ ਕੋਈ ਠੋਸ ਉਪਰਾਲੇ ਨਹੀਂ ਕੀਤੇ ਜਾਂਦੇ, ਜਿਸ ਕਾਰਨ ਜ਼ਿਆਦਾਤਰ ਬੂਟੇ ਜਵਾਨ ਹੋਣ ਤੋਂ ਪਹਿਲਾਂ-ਪਹਿਲਾਂ ਹੀ ਸੁੱਕ ਸੜ ਜਾਂਦੇ ਹਨ। ਸੋ, ਸਾਨੂੰ ਸਭ ਨੂੰ ਜਿਥੇ ਵੱਧ ਤੋਂ ਵੱਧ ਦਰੱਖਤ ਲਗਾਉਣ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ, ਉਥੇ ਉਸ ਤੋਂ ਵੀ ਵੱਧ ਉਨ੍ਹਾਂ ਦੀ ਸਾਂਭ-ਸੰਭਾਲ ਲਈ ਉਪਰਾਲੇ ਕਰਨੇ ਚਾਹੀਦੇ ਹਨ। ਇਹ ਸਭ ਨਾਲ ਹੀ ਸਾਡੇ ਪੰਜਾਬ ਨੂੰ ਮੁੜ ਹਰਿਆ-ਭਰਿਆ ਹੋਣ ਵਿਚ ਦੇਰ ਨਹੀਂ ਲੱਗੇਗੀ।

-ਰਾਜਾ ਗਿੱਲ (ਚੜਿੱਕ)
ਗਿੱਲ ਸੀਮੈਂਟ ਐਂਡ ਹਾਰਡਵੇਅਰ ਸਟੋਰ, ਚੜਿੱਕ (ਮੋਗਾ)।

ਫੈਸ਼ਨ ਦਾ ਬੋਲਬਾਲਾ

ਵਰਤਮਾਨ ਸਮੇਂ 'ਚ ਜ਼ਿੰਦਗੀ ਦੇ ਹਰ ਖੇਤਰ ਵਿਚ ਬਹੁਤ ਬਦਲਾਅ ਆਏ ਹਨ। ਫੈਸ਼ਨ ਭਰੀ ਜ਼ਿੰਦਗੀ ਦੀ ਰਫ਼ਤਾਰ ਬਹੁਤ ਤੇਜ਼ ਹੋ ਕੇ ਮਹਿੰਗਾਈ ਦੇ ਪੱਧਰ ਵੱਲ ਜਾ ਰਹੀ ਹੈ। ਹਰ ਵਿਅਕਤੀ ਮਹਿੰਗਾਈ ਦੀ ਤ੍ਰਾਸਦੀ ਨਾਲ ਜੀਵਨ ਬਸਰ ਕਰ ਰਿਹਾ ਹੈ ਪਰ ਮਨੁੱਖ ਦੇ ਜੀਵਨ ਵਿਚ ਨਿੱਤ ਬਦਲਦੇ ਫੈਸ਼ਨ ਨੇ ਬਹੁਤ ਪ੍ਰਭਾਵ ਪਾਇਆ ਹੈ। ਆਧੁਨਿਕ ਤਕਨੀਕੀ ਸਮੇਂ 'ਚ ਸੰਚਾਰਕ ਸਾਧਨ ਬਹੁਤ ਹੀ ਵਿਕਸਤ ਹੋ ਗਏ ਹਨ। ਸਾਰੀਆਂ ਕੰਪਨੀਆਂ ਆਪਣੇ ਸਮਾਨ/ਉਤਪਾਦਾਂ ਨੂੰ ਇਸ ਢੰਗ ਨਾਲ ਪੇਸ਼ ਕਰਦੀਆਂ ਹਨ ਕਿ ਉਹ ਲੋਕਾਂ ਦੀ ਖਿੱਚ ਦਾ ਕੇਂਦਰ ਬਣ ਜਾਂਦੇ ਹਨ। ਜਿਹੜੇ ਲੋਕ ਨਿੱਤ ਨਵੇਂ ਬਦਲਦੇ ਫੈਸ਼ਨ ਦਾ ਵਿਰੋਧ ਕਰਦੇ ਹਨ, ਉਹ ਵੀ ਕਿਤੇ ਨਾ ਕਿਤੇ ਇਸ ਫੈਸ਼ਨ ਦਾ ਸ਼ਿਕਾਰ ਹੋਏ ਵੇਖੇ ਜਾ ਸਕਦੇ ਹਨ। ਹਰ ਮਨੁੱਖ ਭੇਡਚਾਲ 'ਚ ਫਸਿਆ ਲੋੜੋਂ ਤੇ ਹੈਸੀਅਤ ਤੋਂ ਵੱਧ ਖਰਚਾ ਕਰਕੇ ਵੀ ਨਵੇਂ ਫੈਸ਼ਨ ਦੀਆਂ ਵਸਤਾਂ ਖਰੀਦ ਰਿਹਾ ਹੈ। ਇਸੇ ਕਾਰਨ ਕਿਹਾ ਜਾ ਸਕਦਾ ਹੈ ਕਿ ਫੈਸ਼ਨ ਤਾਂ ਅਜੋਕੇ ਦੌਰ ਦਾ ਪਛਤਾਵਾ ਹੀ ਹੈ। ਜੇਕਰ ਇਸ ਪ੍ਰਤੀ ਡੂੰਘੀ 'ਤੇ ਸੁਚੱਜੀ ਸੋਚ ਰੱਖੀ ਜਾਵੇ ਤਾਂ ਸਪੱਸ਼ਟ ਹੋ ਜਾਵੇਗਾ ਕਿ ਇਸ ਫੈਸ਼ਨ ਦੇ ਜ਼ਰੀਏ ਆਰਥਿਕ ਲੁੱਟ ਕੀਤੀ ਜਾਂਦੀ ਹੈ। ਇਸ ਫੈਸ਼ਨ ਦੇ ਦੌਰ 'ਚ ਸੁਚੇਤ ਤੇ ਸੰਤੁਲਿਤ ਸੋਚ ਅਪਣਾ ਕੇ ਹੀ ਆਰਥਿਕਤਾ ਦੀ ਲੁੱਟ ਤੋਂ ਬਚਿਆ ਜਾ ਸਕਦਾ ਹੈ।

-ਕਮਲਜੀਤ ਸਿੰਘ
ਪਿੰਡ ਮੱਲ੍ਹੀਆਂ (ਕਰਤਾਰਪੁਰ)।

8-9-2016

 ਰੁੱਖਾਂ ਵਿਹੂਣੀ ਜੀ.ਟੀ. ਰੋਡ

ਸੰਸਾਰ ਪ੍ਰਸਿੱਧ ਖਾਲਸਾ ਕਾਲਜ ਅਤੇ ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਅੰਮ੍ਰਿਤਸਰ ਦੇ ਸਾਹਮਣਿਉਂ ਲੰਘਦੀ ਜੀ.ਟੀ. ਰੋਡ ਨੂੰ ਚੌੜਿਆਂ ਕਰਦੇ ਸਮੇਂ ਇਸ ਸੜਕ ਦੇ ਕਿਨਾਰਿਆਂ ਉੱਤੇ ਲੱਗੇ ਸੈਂਕੜੇ ਸਾਲ ਪੁਰਾਣੇ ਪਿੱਪਲ, ਬੋਹੜ ਤੇ ਟਾਹਲੀਆਂ ਆਦਿ ਦੇ ਰੁੱਖਾਂ ਨੂੰ ਸਰਕਾਰ ਵੱਲੋਂ ਕਟਵਾ ਦਿੱਤਾ ਗਿਆ ਸੀ। ਰੁੱਖਾਂ ਵਿਹੂਣੀ ਸੜਕ ਉੱਤੇ ਚੱਲਣ ਵਾਲੀ ਭਾਰੀ ਟ੍ਰੈਫਿਕ ਨੇ ਕਾਲੇ ਧੂੰਏਂ ਅਤੇ ਘੱਟੇ-ਮਿੱਟੀ ਦੇ ਰਲਗੱਡ ਪ੍ਰਦੂਸ਼ਣ ਨਾਲ ਲੋਕਾਂ ਦਾ ਸੜਕ ਉੱਤੇ ਚੱਲਣਾ ਮੁਸ਼ਕਿਲ ਬਣਾ ਦਿੱਤਾ ਹੈ।
ਲੋਕ ਆਪਣੇ ਨੱਕ ਮੂੰਹ ਕੱਪੜੇ ਨਾਲ ਢਕ ਕੇ ਸਫ਼ਰ ਕਰਦੇ ਹਨ। ਪ੍ਰੰਤੂ ਸ਼ਹਿਰ ਦੀ ਪੁਲਿਸ ਨੱਕ ਮੂੰਹ ਢਕਣ ਵਾਲਿਆਂ ਦੇ ਚਾਲਾਨ ਕੱਟਦੀ ਹੈ। ਦੂਸਰੇ ਪਾਸੇ, 'ਪਹਿਲਾਂ ਨਾਲੋਂ ਦਸ ਗੁਣਾਂ' ਰੁੱਖ ਲਗਾਉਣ ਵਾਲੀ ਮੌਜੂਦਾ ਰਾਜ ਸਰਕਾਰ ਨਵੇਂ ਰੁੱਖ ਲਗਾਉਣ ਤੋਂ ਪਾਸਾ ਵੱਟੀ ਬੈਠੀ ਹੈ। ਹਜ਼ਾਰਾਂ ਰੁੱਖਾਂ ਨੂੰ ਕੱਟ ਕੇ ਸਵੱਛ ਵਾਤਾਵਰਨ ਬਰਬਾਦ ਕਰਨਾ ਅਤੇ ਫਿਰ ਨਵੇਂ ਰੁੱਖ ਲਗਾਉਣ ਦੀ ਥਾਂ ਸਿਰਫ ਅਖ਼ਬਾਰੀ ਬਿਆਨਬਾਜ਼ੀ ਰਾਹੀਂ ਜਨਤਾ ਨੂੰ ਗੁੰਮਰਾਹ ਕਰਨਾ ਆਖਰ ਕਿਸ ਤਰ੍ਹਾਂ ਦਾ ਵਿਕਾਸ ਹੈ ਅਤੇ ਕਿਸ ਤਰ੍ਹਾਂ ਨਾਲ ਰਾਜ ਨਹੀਂ ਸੇਵਾ ਹੈ?

-ਇੰਜੀ: ਕੁਲਦੀਪ ਸਿੰਘ
ਅੰਮ੍ਰਿਤਸਰ।

ਵਧ ਰਹੀ ਅਪਰਾਧਕ ਬਿਰਤੀ

ਰੋਜ਼ਾਨਾ ਹੀ ਅਸੀਂ ਅਖ਼ਬਾਰਾਂ ਵਿਚ ਚੋਰੀ, ਮਾਰ-ਕੁਟਾਈ, ਕਤਲ ਜਿਹੀਆਂ ਘਿਨੌਣੀਆਂ ਖ਼ਬਰਾਂ ਪੜ੍ਹਦੇ ਹਾਂ, ਜਿਸ ਤੋਂ ਇਹ ਸਿੱਧ ਹੁੰਦਾ ਹੈ ਕਿ ਸਾਡੇ ਸਮਾਜ ਵਿਚ ਅਪਰਾਧਕ ਪ੍ਰਵਿਰਤੀ ਦਿਨੋ-ਦਿਨ ਵਧਦੀ ਜਾ ਰਹੀ ਹੈ। ਅੱਜ ਪੈਸੇ ਖਾਤਰ ਪੁੱਤਰ ਪਿਤਾ ਦਾ ਕਤਲ ਕਰਨ ਤੋਂ ਵੀ ਗੁਰੇਜ਼ ਨਹੀਂ ਕਰਦਾ।
ਸਾਡੀਆਂ ਸਮਾਜਿਕ ਕਦਰਾਂ-ਕੀਮਤਾਂ ਦਾ ਪੂਰੀ ਤਰ੍ਹਾਂ ਘਾਣ ਹੋ ਚੁੱਕਾ ਹੈ, ਜਿਸ ਦੇ ਲਈ ਕਈ ਕਾਰਨ ਜ਼ਿੰਮੇਵਾਰ ਹਨ। ਇਸ ਦਾ ਸਭ ਤੋਂ ਵੱਡਾ ਕਾਰਨ ਹੈ ਬੇਰੁਜ਼ਗਾਰੀ। ਰੁਜ਼ਗਾਰ ਨੌਜਵਾਨਾਂ ਨੂੰ ਮਿਲ ਨਹੀਂ ਰਿਹਾ, ਪੜ੍ਹੇ-ਲਿਖੇ ਨੌਜਵਾਨ ਨਿਰਾਸ਼ਾ ਦਾ ਸ਼ਿਕਾਰ ਹੋ ਰਹੇ ਹਨ। ਆਪਣੀਆਂ ਲੋੜਾਂ ਦੀ ਪੂਰਤੀ ਅਤੇ ਨਿਰਾਸ਼ਾ ਕਾਰਨ ਉਹ ਅਪਰਾਧ ਕਰਦੇ ਹਨ। ਸਾਡੇ ਸਮਾਜ ਵਿਚ ਨਸ਼ਿਆਂ ਦਾ ਰੁਝਾਨ ਵੀ ਬਹੁਤ ਵਧ ਗਿਆ ਹੈ। ਨਸ਼ੇੜੀ ਇਨਸਾਨ ਨੂੰ ਸਹੀ ਗ਼ਲਤ ਦੀ ਪਛਾਣ ਨਹੀ ਰਹਿੰਦੀ। ਨਸ਼ਿਆਂ ਦੀ ਪੂਰਤੀ ਲਈ ਵੀ ਨੌਜਵਾਨ ਚੋਰੀ ਜਿਹੇ ਘਟੀਆ ਕੰਮ ਕਰਦੇ ਹਨ। ਇਸੇ ਤਰ੍ਹਾਂ ਅਨਪੜ੍ਹਤਾ ਤੇ ਗਰੀਬੀ ਵੀ ਅਪਰਾਧਕ ਪ੍ਰਵਿਰਤੀ ਨੂੰ ਹੀ ਜਨਮ ਦਿੰਦੇ ਹਨ।

-ਜਸਪ੍ਰੀਤ ਕੌਰ 'ਸੰਘਾ'
ਪਿੰਡ ਤਨੂੰਲੀ (ਹੁਸ਼ਿਆਰਪੁਰ)।

ਸੰਗਤ ਦਰਸ਼ਨ

'ਤੁਹਾਡੀ ਸਰਕਾਰ ਤੁਹਾਡੇ ਦੁਆਰ' ਦੇ ਸਿਧਾਂਤ ਅਨੁਸਾਰ ਪੰਜਾਬ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਨੇ ਸਮੁੱਚੇ ਪੰਜਾਬ ਵਿਚ ਸੰਗਤ ਦਰਸ਼ਨ ਦਾ ਰਿਵਾਜ ਚਲਾਇਆ ਹੋਇਆ ਹੈ। ਸੰਗਤ ਦਰਸ਼ਨ ਪ੍ਰੋਗਰਾਮ ਜ਼ਰੀਏ ਚਲਦੀ-ਫਿਰਦੀ ਸਰਕਾਰ ਲੋਕਾਂ ਦੇ ਦੁਆਰ 'ਤੇ ਜਾ ਕੇ ਇਨ੍ਹਾਂ ਦੀਆਂ ਭਾਵਨਾਵਾਂ ਅਨੁਸਾਰ ਮਸਲੇ ਹੱਲ ਕਰਦੀ ਹੈ। ਖ਼ਾਸ ਤਵੱਜੋਂ ਵਿਕਾਸ ਦੇ ਕੰਮਾਂ ਲਈ ਦਿੱਤੀ ਜਾਂਦੀ ਹੈ। ਪਹਿਲਾਂ ਤੋਂ ਹੋਣ ਵਾਲੇ ਕੰਮਾਂ ਦਾ ਐਸਟੀਮੇਟ ਸੰਗਤ ਦਰਸ਼ਨ ਵਿਚ ਮੁੱਖ ਮੰਤਰੀ ਦੇ ਸਾਹਮਣੇ ਪੇਸ਼ ਹੋ ਜਾਂਦਾ ਹੈ ਦੂਜੇ ਬੰਨੇ ਪੰਚਾਇਤ ਆਪਣੇ ਦੁੱਖੜੇ ਸੁਣਾਉਂਦੀ ਹੈ। ਐਸਟੀਮੇਟ ਨੂੰ ਮੱਦੇਨਜ਼ਰ ਰੱਖ ਕੇ ਪੰਚਾਇਤ ਨੂੰ ਹੋਣ ਵਾਲੇ ਕੰਮਾਂ ਲਈ ਬਿਨਾਂ ਕਿਸੇ ਭੇਦਭਾਵ ਪਾਰਦਰਸ਼ਤਾ ਨਾਲ ਗਰਾਂਟ ਜਾਰੀ ਕੀਤੀ ਜਾਂਦੀ ਹੈ। ਇਹ ਪ੍ਰੋਗਰਾਮ ਸਰਕਾਰ ਅਤੇ ਲੋਕਾਂ ਵਿਚਕਾਰ ਕੜੀ ਦੀ ਭੂਮਿਕਾ ਨਿਭਾਉਂਦੇ ਹਨ।
ਮੁੱਖ ਮੰਤਰੀ ਸਾਹਿਬ ਨੂੰ ਵੀ ਲੋਕਾਂ ਦੀਆਂ ਜ਼ਮੀਨੀ ਔਕੜਾਂ ਨੂੰ ਸਮਝਣ ਵਿਚ ਸੌਖ ਰਹਿੰਦੀ ਹੈ। ਇਹ ਪ੍ਰੋਗਰਾਮ ਵਿਕਾਸ ਨੂੰ ਲੀਹ 'ਤੇ ਪਾਉਣ ਲਈ ਨਿਵੇਕਲਾ ਰਾਹ ਹੈ। ਜਿਨ੍ਹਾਂ ਇਲਾਕਿਆਂ ਵਿਚ ਸੰਗਤ ਦਰਸ਼ਨ ਪ੍ਰੋਗਰਾਮ ਹੋਏ, ਉਨ੍ਹਾਂ ਦੀਆਂ ਪੰਚਾਇਤਾਂ ਲਈ ਸੰਗਤ ਦਰਸ਼ਨ ਪ੍ਰੋਗਰਾਮ ਵਰਦਾਨ ਸਿੱਧ ਹੋਏ। ਪੰਚਾਇਤਾਂ ਦੇ ਵਿਕਾਸ ਨੂੰ ਹੁਲਾਰਾ ਦੇਣ ਅਤੇ ਗਤੀਸ਼ੀਲ ਰੱਖਣ ਲਈ ਸੰਗਤ ਦਰਸ਼ਨ ਨਵੀਆਂ ਲੀਹਾਂ ਪਾ ਰਹੇ ਹਨ। ਜਿਵੇਂ ਕਿ ਸੰਗਤ ਦਰਸ਼ਨ ਦੇ ਨਾਂਅ ਤੋਂ ਹੀ ਸਪੱਸ਼ਟ ਹੈ ਸੰਗਤ ਦੀ ਮੰਗ ਅਨੁਸਾਰ ਅਤੇ ਸੰਗਤ ਦੀ ਸ਼ਿਕਾਇਤ ਦਾ ਬਿਨਾਂ ਰਾਜਸੀ ਭੇਦ-ਭਾਵ ਦੇ ਮੌਕੇ 'ਤੇ ਨਿਪਟਾਰਾ ਕਰਨਾ, ਇਸ ਪ੍ਰੋਗਰਾਮ ਦਾ ਮੁੱਖ ਪਹਿਲੂ ਹੈ।

-ਸੁਖਪਾਲ ਸਿੰਘ ਗਿੱਲ
ਅਬਿਆਣਾ ਕਲਾਂ।

5-09-2016

 ਬੇਰੁਜ਼ਗਾਰੀ ਦੀ ਸਮੱਸਿਆ

ਬੇਰੁਜ਼ਗਾਰੀ ਦੀ ਸਮੱਸਿਆ ਦਿਨੋ-ਦਿਨ ਕੋਹੜ ਦੀ ਤਰ੍ਹਾਂ ਸਮਾਜ ਨੂੰ ਅੰਦਰੋ-ਅੰਦਰੀ ਖੋਖਲਾ ਕਰਦੀ ਜਾ ਰਹੀ ਹੈ। ਆਧੁਨਿਕ ਸਿੱਖਿਆ ਪ੍ਰਣਾਲੀ ਬੇਰੁਜ਼ਗਾਰੀ ਦਾ ਅਹਿਮ ਹਿੱਸਾ ਅਤੇ ਕਾਰਨ ਹੈ। ਅੱਜ ਦਾ ਵਿਦਿਆਰਥੀ ਜੋ ਕੱਲ੍ਹ ਦਾ ਭਵਿੱਖ ਹੈ, ਉਨ੍ਹਾਂ ਨੂੰ ਉੱਚੀਆਂ ਡਿਗਰੀਆਂ ਲੈਣ ਦੇ ਬਾਵਜੂਦ ਆਪਣਾ ਭਵਿੱਖ ਧੁੰਦਲਾ ਨਜ਼ਰ ਆ ਰਿਹਾ ਹੈ। ਪ੍ਰਾਈਵੇਟ ਅਦਾਰੇ ਇਨ੍ਹਾਂ ਪੜ੍ਹੇ-ਲਿਖੇ ਨੌਜਵਾਨਾਂ ਦਾ ਰੱਜ ਕੇ ਸ਼ੋਸ਼ਣ ਕਰਦੇ ਹਨ। ਮਾਂ-ਬਾਪ ਸੋਚਦੇ ਹਨ ਕਿ ਬੱਚਿਆਂ ਨੂੰ ਉਚੇਰੀ ਸਿੱਖਿਆ ਦਿਵਾ ਕੇ ਉੱਚ ਨੌਕਰੀ 'ਤੇ ਲਗਵਾ ਦੇਣਗੇ ਅਤੇ ਬੁਢਾਪੇ ਵਿਚ ਸਾਡਾ ਸਹਾਰਾ ਬਣਨਗੇ। ਪਰ ਇਹ ਨੌਕਰੀ ਤੋਂ ਹੀਣੇ ਨੌਜਵਾਨ ਆਪਣੇ ਮਾਂ-ਬਾਪ ਵਿਚੋਂ ਹੀ ਸਹਾਰਾ ਖੋਜਦੇ ਹਨ। ਇਥੋਂ ਤੱਕ ਕਿ ਅਨਪੜ੍ਹ ਮਜ਼ਦੂਰ ਵੀ ਇਕ ਪੜ੍ਹੇ-ਲਿਖੇ ਨਾਗਰਿਕ ਨਾਲੋਂ ਜ਼ਿਆਦਾ ਕਮਾਈ ਕਰ ਲੈਂਦਾ ਹੈ। ਡਿਗਰੀਆਂ ਹੋਣ ਦੇ ਬਾਵਜੂਦ ਨੌਕਰੀ ਨਾ ਮਿਲਣ ਕਰਕੇ ਅਜਿਹੇ ਨੌਜਵਾਨ ਨਸ਼ੇ, ਡਕੈਤੀਆਂ, ਚੋਰੀਆਂ ਆਦਿ ਬੁਰਾਈਆਂ ਵੱਲ ਰੁਖ਼ ਕਰ ਲੈਂਦੇ ਹਨ। ਮੇਰੇ ਮਾਂ-ਬਾਪ ਨੇ ਉਚੇਰੀ ਵਿਦਿਆ ਦਿਵਾਈ ਤੇ ਮੈਂ ਡਬਲ ਐਮ.ਏ. (ਇੰਗਲਿਸ਼ ਤੇ ਹਿੰਦੀ) ਬੀ.ਐੱਡ ਕਰਕੇ ਬੇਰੁਜ਼ਗਾਰੀ ਦੀ ਲਾਈਨ ਵਿਚ ਲੱਗ ਗਈ। ਨੌਕਰੀ ਦੀ ਉਡੀਕ ਕਰਦਿਆਂ ਮੇਰੀ ਨੌਕਰੀ ਦੀ ਉਮਰ ਹੱਦ ਟੱਪ ਗਈ। ਸਰਕਾਰ ਨੇ ਹੁਣ ਵੋਕੇਸ਼ਨਲ ਸਿੱਖਿਆ ਪ੍ਰਣਾਲੀ ਖੋਲ੍ਹ ਕੇ ਨੌਜਵਾਨਾਂ ਨੂੰ ਆਤਮ-ਨਿਰਭਰ ਬਣਾਉਣ ਦਾ ਯਤਨ ਕੀਤਾ ਹੈ। ਸਰਕਾਰ ਨੂੰ ਅਜਿਹੇ ਹੋਰ ਕੋਰਸ ਸ਼ੁਰੂ ਕਰਕੇ ਬੇਰੁਜ਼ਗਾਰੀ ਨੂੰ ਕਾਬੂ ਕਰਨ ਦਾ ਯਤਨ ਕਰਨਾ ਚਾਹੀਦਾ ਹੈ।

-ਨੀਸ਼ੂ ਬਾਲਾ
ਮੋਬਾਈਲ : 94174-88042
.

ਮੁਲਾਜ਼ਮਾਂ ਦੇ ਮਸਲੇ

ਆਮ ਤੌਰ 'ਤੇ ਦੇਖਿਆ ਗਿਆ ਹੈ ਕਿ ਹਰੇਕ ਸਰਕਾਰ ਦੇ ਜਦੋਂ ਪਿਛਲੇ ਦੋ-ਢਾਈ ਸਾਲ ਰਹਿ ਜਾਂਦੇ ਹਨ ਤਾਂ ਖਾਸ ਕਰਕੇ ਇਹ ਪਿਛਲਾ ਸਮਾਂ ਧਰਨਿਆਂ-ਮੁਜ਼ਾਹਰਿਆਂ ਦਾ ਸਮਾਂ ਕਿਹਾ ਜਾ ਸਕਦਾ ਹੈ। ਮੁਲਾਜ਼ਮਾਂ ਦੇ ਪੁਰਖ ਵਰਗ ਤੋਂ ਇਲਾਵਾ ਇਸਤਰੀ ਵਰਗ ਨੂੰ ਵੀ ਧਰਨਿਆਂ ਲਈ ਮਜਬੂਰ ਹੋਣਾ ਪੈਂਦਾ ਹੈ। ਖਾਸ ਕਰ ਆਂਗਨਵਾੜੀ ਵਰਕਰ ਅਤੇ ਆਸ਼ਾ ਵਰਕਰਾਂ ਵਿਚ ਨਿਰੋਲ ਇਸਤਰੀਆਂ ਹੋਣ ਕਰਕੇ ਜਦੋਂ ਇਹ ਧਰਨੇ ਪ੍ਰਦਰਸ਼ਨ ਕਰਦੀਆਂ ਹਨ ਤਾਂ ਪਿੱਛੇ ਨਿੱਕੇ-ਨਿੱਕੇ ਬੱਚਿਆਂ ਦਾ ਬੁਰਾ ਹਾਲ ਹੋ ਜਾਂਦਾ ਹੈ। ਸੋ, ਸਰਕਾਰ ਨੂੰ ਇਨ੍ਹਾਂ ਦੇ ਮੰਗਾਂ/ਮਸਲਿਆਂ ਨੂੰ ਸੰਜੀਦਾ ਢੰਗ ਨਾਲ ਹੱਲ ਕਰਨਾ ਚਾਹੀਦਾ ਹੈ।

-ਕੇਵਲ ਸਿੰਘ ਬਾਠਾਂ
ਮੋਬਾਈਲ : 98557-44211
.

ਤੰਤਰ-ਮੰਤਰ ਦੀਆਂ ਕਿਤਾਬਾਂ

ਜੇਕਰ ਅੰਧ-ਵਿਸ਼ਵਾਸ ਵਿਰੋਧੀ ਕਿਤਾਬਾਂ ਪ੍ਰਾਪਤ ਕਰਨੀਆਂ ਹੋਣ ਤਾਂ ਕਾਫ਼ੀ ਭੱਜ-ਦੌੜ ਕਰਨੀ ਪੈਂਦੀ ਹੈ ਭਾਵ ਕਿ ਕਾਫੀ ਮੁਸ਼ੱਕਤ ਤੋਂ ਬਾਅਦ ਦੋ-ਚਾਰ ਕਿਤਾਬਾਂ ਮਿਲਦੀਆਂ ਹਨ। ਪਰ ਇਸ ਦੇ ਉਲਟ ਤੰਤਰ-ਵਿਦਿਆ ਨਾਲ ਸਬੰਧਤ ਕਿਤਾਬਾਂ ਬੜੀ ਆਸਾਨੀ ਨਾਲ ਦੁਕਾਨਾਂ ਤੋਂ ਮਿਲ ਜਾਂਦੀਆਂ ਹਨ। ਜਿੰਨੀ ਵੱਡੀ ਮਾਤਰਾ ਵਿਚ ਦੁਕਾਨਾਂ ਤੋਂ ਇਹ ਪੁਸਤਕਾਂ ਮਿਲ ਜਾਂਦੀਆਂ ਹਨ, ਓਨੀ ਹੀ ਵੱਡੀ ਮਾਤਰਾ 'ਚ ਨਰ-ਸੰਘਾਰ ਤੇ ਬਲੀ ਨਾਲ ਸਬੰਧਤ ਖ਼ਬਰਾਂ ਅਖ਼ਬਾਰਾਂ ਵਿਚ ਪੜ੍ਹਨ ਨੂੰ ਮਿਲਦੀਆਂ ਹਨ। ਮਿਸਾਲ ਵਜੋਂ ਭੂਤ ਕੱਢਣ ਲਈ ਔਰਤਾਂ ਨਾਲ ਹੁੰਦਾ ਹੈ ਬੁਰਾ ਸਲੂਕ, ਜਦ ਅਜਿਹੀਆਂ ਖਬਰਾਂ ਅਖ਼ਬਾਰਾਂ 'ਚ ਪੜ੍ਹਨ ਨੂੰ ਮਿਲਦੀਆਂ ਹਨ ਤਾਂ ਇਸ 'ਤੇ ਅਜਿਹੀ ਹੀ ਟਿੱਪਣੀ ਕੀਤੀ ਜਾ ਸਕਦੀ ਹੈ। ਫਿਰ ਕਹਿੰਦੇ ਹਨ ਦੇਸ਼ ਤਰੱਕੀ ਨਹੀਂ ਕਰਦਾ। ਤਰੱਕੀ ਖੇਹ ਤੇ ਮਿੱਟੀ ਕਰਨੀ ਹੈ। ਦੇਸ਼ ਵਾਸੀਆਂ ਦੀ ਸੋਚ ਤਾਂ ਇੰਨੀ ਗਿਰੀ ਹੋਈ ਹੈ। ਅਮਰੀਕਾ ਚੰਦਰਮਾ 'ਤੇ ਜਾਣ ਨੂੰ ਸੋਚ ਰਿਹਾ ਹੈ ਅਤੇ ਭਾਰਤ ਵਾਲੇ ਅਜੀਬ ਤਰੀਕਿਆਂ ਨਾਲ ਭੂਤ ਕਢਵਾ ਰਹੇ ਹਨ। ਇਕ ਹੋਰ ਖ਼ਬਰ 'ਲਾਂਬੜਾ ਦੇ ਪਿੰਡ 'ਚ ਗੁਆਂਢੀ ਦੀ ਅਲਮਾਰੀ 'ਚੋਂ ਮਿਲੀ ਬੱਚੇ ਦੀ ਲਾਸ਼', ਅਜਿਹੀਆਂ ਕਾਰਵਾਈਆਂ ਕਰਨ ਵਾਲੇ ਤੇ ਤੰਤਰ-ਵਿੱਦਿਆ ਰਾਹੀਂ ਲੋਕਾਂ ਨੂੰ ਪੁੱਠੇ ਕੰਮਾਂ ਲਈ ਪ੍ਰੇਰਿਤ ਕਰਨ ਵਾਲੇ ਸਾਧ, ਬਾਬੇ, ਤੰਤਰ-ਮੰਤਰ ਦੀਆਂ ਕਿਤਾਬਾਂ ਦੀ ਤਰ੍ਹਾਂ ਹਰ ਪਿੰਡ, ਕਸਬੇ ਤੇ ਸ਼ਹਿਰ ਵਿਚ ਆਸਾਨੀ ਨਾਲ ਮਿਲ ਜਾਂਦੇ ਹਨ। ਆਓ, ਵਿਚਾਰ ਕਰੀਏ, ਸਰਕਾਰ ਵੀ ਵਿਚਾਰ ਕਰੇ।

-ਪ੍ਰਿੰ: ਗੁਰਬਚਨ ਸਿੰਘ ਮਾਨਸ
ਮੋਬਾਈਲ : 98147-64344.

31-08-2016

 ਆਮ ਕਿ ਖ਼ਾਸ

ਆਗਾਮੀ ਚੋਣਾਂ ਨੂੰ ਮੱਦੇਨਜ਼ਰ ਰੱਖਦੇ ਹੋਏ, ਅਜੋਕੇ ਰਾਜਨੀਤਕ ਨੇਤਾ ਆਪਣੀ ਹੋਂਦ ਬਣਾਉਣ ਵਾਸਤੇ ਜਾਂ ਟਿਕਟ ਦੀ ਪ੍ਰਾਪਤੀ ਲਈ ਅਨੇਕਾਂ ਹੱਥ-ਪਲਾਕੀਆਂ ਮਾਰ ਰਹੇ ਹਨ। ਪੁਰਾਣੀਆਂ ਰਾਜਨੀਤਕ ਪਾਰਟੀਆਂ ਤੋਂ ਇਲਾਵਾ ਨਵੀਂ ਹੋਂਦ 'ਚ ਆਈ ਪਾਰਟੀ ਆਮ ਆਦਮੀ ਪਾਰਟੀ, ਜੋ ਕਿ 'ਆਪ' ਦੇ ਨਾਂਅ ਨਾਲ ਜਾਣੀ ਜਾਂਦੀ ਹੈ, ਭਲਾ ਕੋਈ ਗ਼ੌਰ ਕਰੇ ਕਿ ਇਸ ਪਾਰਟੀ ਵਿਚ ਆਮ ਲੋਕ ਕਿੰਨੇ ਹਨ ਤੇ ਖ਼ਾਸ ਲੋਕਾਂ ਦਾ ਗੜ੍ਹ ਕਿੰਨਾ ਹੈ? ਸਿਰਫ ਰਾਜਨੀਤਕ ਗਤੀਵਿਧੀਆਂ ਦੀ ਹੋਂਦ ਸਥਾਪਿਤ ਕਰਨ ਦੇ ਪ੍ਰਭਾਵ ਹੇਠ ਸਭ ਖ਼ਾਸ ਲੋਕ ਭਾਵ ਕਿ ਜਿਹੜੇ ਸਾਧਾਰਨ ਮਨੁੱਖ ਦੀ ਪਰਿਭਾਸ਼ਾ ਤੋਂ ਵੀ ਅਣਜਾਣ ਹਨ, ਉਹ ਇਸ ਪਾਰਟੀ 'ਚ ਆਪਣਾ ਅਧਿਕਾਰ ਜਮਾਈ ਬੈਠੇ ਹਨ। ਇਸ ਤੋਂ ਇਲਾਵਾ ਕੁਝ ਰਾਜਨੀਤਕ ਸਮੀਕਰਨਾਂ ਬਦਲਣ ਦੇ ਪ੍ਰਭਾਵ ਨਾਲ ਦਿਨ ਪ੍ਰਤੀ ਦਿਨ ਸ਼ਾਮਿਲ ਵੀ ਹੋ ਰਹੇ ਹਨ। ਪਰ ਇਕ ਆਮ ਇਨਸਾਨ ਨੂੰ ਜਾਪਦਾ ਹੈ ਕਿ 'ਆਮ ਆਦਮੀ ਪਾਰਟੀ' ਵੀ ਹੁਣ ਖ਼ਾਸ ਆਦਮੀ ਪਾਰਟੀ ਵਾਂਗ ਹੀ ਪ੍ਰਸਿੱਧ ਸ਼ਖ਼ਸੀਅਤਾਂ ਨੂੰ ਅੱਗੇ ਲਿਆ ਰਹੀ ਹੈ, ਨਾ ਕਿ ਇਕ ਸਾਧਾਰਨ ਇਨਸਾਨ ਨੂੰ। ਕਈ ਵਾਰ ਤਾਂ ਭੁਲੇਖਾ ਹੀ ਪੈਂਦਾ ਹੈ ਕਿ ਇਹ ਪਾਰਟੀ ਆਮ ਹੈ ਕਿ ਖ਼ਾਸ।

-ਕਮਲਜੀਤ ਸਿੰਘ
ਪਿੰਡ ਮੱਲ੍ਹੀਆਂ (ਕਰਤਾਰਪੁਰ)।
ਫ ਫ ਫ

ਰੁੱਖ ਬਚਾਓ

ਦੁੱਖ ਦੀ ਗੱਲ ਹੈ ਕਿ ਪੰਜਾਬ ਵਿਚ ਜੰਗਲਾਂ ਹੇਠ ਰਕਬਾ ਸਿਰਫ 3 ਫ਼ੀਸਦੀ ਰਹਿ ਗਿਆ ਹੈ। ਏਨਾ ਕੁ ਹੀ ਪੂਰੇ ਪੰਜਾਬ ਵਿਚ ਰੁੱਖਾਂ ਹੇਠ ਹੋਵੇਗਾ। ਅਖੌਤੀ ਵਿਕਾਸ ਦੇ ਨਾਂਅ 'ਤੇ ਰੁੱਖਾਂ ਨੂੰ ਬੜੀ ਬੇਰਹਿਮੀ ਨਾਲ ਕੱਟਿਆ-ਵੱਢਿਆ ਜਾ ਰਿਹਾ ਹੈ। ਇਕ ਸਮਾਂ ਸੀ ਜਦੋਂ ਹਰ ਕਿਸਾਨ ਦੀ ਮੋਟਰ 'ਤੇ 10-12 ਰੁੱਖ ਖੜ੍ਹੇ ਆਮ ਦੇਖੇ ਜਾਂਦੇ ਸਨ। ਇਸ ਤੋਂ ਇਲਾਵਾ ਰਸਤਿਆਂ ਦੇ ਦੋਵੇਂ ਪਾਸੇ ਹਰੇ-ਭਰੇ ਦਰੱਖਤ ਆਮ ਲਹਿਰਾਉਂਦੇ ਹੁੰਦੇ ਸੀ। ਪਰ ਅੱਜ ਅਜਿਹਾ ਦੇਖਣ ਨੂੰ ਬਹੁਤ ਘੱਟ ਮਿਲਦਾ ਹੈ। ਸਪੱਸ਼ਟ ਹੈ ਕਿ ਅੱਜ ਦਾ ਮਨੁੱਖ ਸਵਾਰਥੀ ਹੋ ਕੇ ਰਹਿ ਗਿਆ ਹੈ। ਜੋ ਇਸ ਕੁਦਰਤੀ ਦਾਤ ਨੂੰ ਖ਼ਤਮ ਕਰਨ 'ਤੇ ਤੁਲਿਆ ਨਜ਼ਰ ਆਉਂਦਾ ਹੈ। ਅੱਜ ਪੰਜਾਬ ਵਿਚ ਜੰਗਲਾਂ ਹੇਠ ਰਕਬੇ ਦਾ ਘਟਣਾ ਤੇ ਦੂਜੇ ਪਾਸੇ ਪੰਜਾਬ ਦੀ ਆਬਾਦੀ ਦਾ ਵਧਣਾ, ਇਨਸਾਫ਼ ਪਸੰਦ ਲੋਕਾਂ ਲਈ ਚਿੰਤਾ ਵਾਲੀ ਗੱਲ ਹੈ। ਅੱਜ ਲੋੜ ਹੈ ਗੁਰੂਆਂ ਦੀ ਸੋਚ ਦੇ ਧਾਰਨੀ ਬਣ ਕੇ ਵੱਧ ਤੋਂ ਵੱਧ ਰੁੱਖ ਲਗਾ ਕੇ ਧਰਤੀ ਦੀ ਹਰਿਆਲੀ ਨੂੰ ਬੜਾਵਾ ਦਿੱਤਾ ਜਾਵੇ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਜ਼ਿਲ੍ਹਾ ਲੁਧਿਆਣਾ।
ਫ ਫ ਫ

ਔਰਤ ਅਸੁਰੱਖਿਅਤ ਕਿਉਂ?

ਔਰਤ ਕੁਦਰਤ ਦੀ ਰਚੀ ਸਭ ਤੋਂ ਸੁੰਦਰ ਰਚਨਾ ਹੈ। ਮੋਹ, ਮਮਤਾ, ਪਿਆਰ ਤੇ ਤਿਆਗ ਦੀ ਮੂਰਤ। ਸਾਡੇ ਗੁਰੂਆਂ ਨੇ ਔਰਤ ਨੂੰ ਜਗ ਜਨਣੀ ਦਾ ਦਰਜਾ ਦਿੱਤਾ ਪਰ ਅਫ਼ਸੋਸ ਇਸ ਮਰਦ ਪ੍ਰਧਾਨ ਸਮਾਜ ਵਿਚ ਔਰਤ ਨੂੰ ਉਹ ਦਰਜਾ ਨਹੀਂ ਮਿਲ ਸਕਿਆ, ਜਿਸ ਦੀ ਉਹ ਹੱਕਦਾਰ ਹੈ। ਔਰਤ ਅੱਜ ਆਪਣੇ ਘਰ ਵਿਚ ਹੀ ਸੁਰੱਖਿਅਤ ਨਹੀਂ ਹੈ। ਜਬਰ ਜਨਾਹ, ਭਰੂਣ ਹੱਤਿਆ, ਘਰੇਲੂ ਹਿੰਸਾ, ਦਹੇਜ ਖ਼ਾਤਰ ਲੜਕੀ ਦਾ ਕਤਲ ਜਾਂ ਫਿਰ ਲੜਕੀਆਂ 'ਤੇ ਹੁੰਦੇ ਤੇਜ਼ਾਬੀ ਹਮਲੇ ਆਦਿ ਖ਼ਬਰਾਂ ਤਾਂ ਅਸੀਂ ਰੋਜ਼ ਹੀ ਪੜ੍ਹਦੇ ਹਾਂ ਜੋ ਇਹ ਸਿੱਧ ਕਰਦੀਆਂ ਹਨ ਕਿ ਔਰਤ ਅੱਜ ਵੀ ਸੁਰੱਖਿਅਤ ਨਹੀਂ ਹੈ। ਭਾਵੇਂ ਅੱਜ ਅਸੀਂ 21ਵੀਂ ਸਦੀ ਵਿਚ ਪ੍ਰਵੇਸ਼ ਕਰ ਚੁੱਕੇ ਹਾਂ ਪਰ ਔਰਤ ਪ੍ਰਤੀ ਸਾਡੀ ਰੂੜ੍ਹੀਵਾਦੀ ਸੋਚ ਅੱਜ ਵੀ ਉਹੀ ਹੈ। ਇਸੇ ਲਈ ਤਾਂ ਅੱਜ ਵੀ ਧੀਆਂ ਨੂੰ ਕੁੱਖ ਵਿਚ ਹੀ ਮਾਰਿਆ ਜਾਂਦਾ ਹੈ। ਰੋਜ਼ਾਨਾ ਪਤਾ ਨਹੀਂ ਕਿੰਨੀਆਂ ਮਾਸੂਮ ਧੀਆਂ ਮਰਦਾਂ ਦੀ ਹਵਸ ਦਾ ਸ਼ਿਕਾਰ ਹੁੰਦੀਆਂ ਹਨ। ਪਤਾ ਨਹੀਂ ਕਿੰਨੀਆਂ ਮਾਸੂਮ ਜਾਨਾਂ ਦਾਜ ਦੀ ਇਸ ਅੱਗ ਵਿਚ ਸੜਦੀਆਂ ਹਨ। ਔਰਤ ਨੂੰ ਅੱਜ ਵੀ ਆਪਣੇ ਹੱਕਾਂ, ਆਪਣੀਆਂ ਖਵਾਹਿਸ਼ਾਂ ਖ਼ਾਤਰ ਆਵਾਜ਼ ਉਠਾਉਣ ਦਾ ਅਧਿਕਾਰ ਨਹੀਂ ਹੈ। ਅਸਲ ਵਿਚ ਔਰਤ ਦੀ ਸਹਿਣਸ਼ੀਲਤਾ ਨੂੰ ਸਮਾਜ ਨੇ ਉਸ ਦੀ ਕਮਜ਼ੋਰੀ ਸਮਝ ਲਿਆ ਹੈ। ਅੱਜ ਲੋੜ ਹੈ ਕਿ ਔਰਤ ਖ਼ੁਦ ਆਪਣੇ ਉੱਤੇ ਹੁੰਦੇ ਅੱਤਿਆਚਾਰ ਖਿਲਾਫ਼ ਆਵਾਜ਼ ਉਠਾਏ, ਆਪਣੇ ਵਜੂਦ ਦੀ ਲੜਾਈ ਖ਼ੁਦ ਲੜੇ ਤਾਂ ਹੀ ਇਸ ਮਰਦ ਪ੍ਰਧਾਨ ਸਮਾਜ ਵਿਚ ਉਸ ਨੂੰ ਉਸ ਦਾ ਹੱਕ ਮਿਲ ਸਕੇਗਾ।

-ਜਸਪ੍ਰੀਤ ਕੌਰ 'ਸੰਘਾ'
ਪਿੰਡ ਤਨੂੰਲੀ (ਹੁਸ਼ਿਆਰਪੁਰ)।
ਫ ਫ ਫ

ਅਸ਼ਲੀਲਤਾ ਨਹੀਂ ਅਸਲੀਅਤ ਲਿਖੋ

ਅੱਜਕਲ੍ਹ ਦੇ ਪੰਜਾਬੀ ਗੀਤਾਂ ਨੂੰ ਪਰਿਵਾਰ ਵਿਚ ਬੈਠ ਕੇ ਸੁਣਨਾ-ਵੇਖਣਾ ਬਹੁਤ ਮੁਸ਼ਕਿਲ ਹੈ। ਇਹ ਸਾਡੀ ਗਾਇਕੀ-ਗੀਤਕਾਰ ਕਿਧਰ ਜਾ ਰਹੇ ਹਨ, ਸਿਰਫ ਪੈਸੇ ਕਮਾਉਣ ਦੀ ਹੋੜ ਜਾਂ ਨਾਂਅ ਕਮਾਉਣ ਦੀ ਹੋੜ ਨੇ ਕੁਝ ਨਹੀਂ ਕਰਨਾ। ਪੰਜਾਬੀ ਗੀਤ ਵੀ ਸੈਂਸਰ ਬੋਰਡ ਤੋਂ ਪਾਸ ਹੋਣੇ ਚਾਹੀਦੇ ਹਨ, ਇਨ੍ਹਾਂ ਦਾ ਮਿਆਰ ਵੀ ਪਰਖਣਾ ਚਾਹੀਦਾ ਹੈ। ਗੀਤਾਂ ਨੂੰ ਅਸਲੀਅਤ ਦਾ ਗਹਿਣਾ ਪਹਿਨਾਓ, ਅਸ਼ਲੀਲਤਾ ਦਾ ਨਹੀਂ। ਬਾਕੀ ਇਸ ਅੱਤਿਆਚਾਰ ਲਈ ਕਈ ਸਰੋਤੇ ਵੀ ਦੋਸ਼ੀ ਹਨ, ਕਿਉਂਕਿ ਉਨ੍ਹਾਂ ਦੀ ਫਰਮਾਇਸ਼ ਵੀ ਕਈ ਵਾਰੀ ਅਜਿਹੀ ਹੁੰਦੀ ਹੈ। ਬਾਕੀ ਸੈਂਸਰ ਬੋਰਡ ਬਣ ਜਾਵੇ ਤਾਂ ਚੰਗਾ ਹੀ ਹੋਵੇਗਾ।

-ਦਰਸੀ ਗੋਇਲ
ਬਾਘਾ ਪੁਰਾਣਾ।
ਫ ਫ ਫ

29-08-2016

 ਧਰਮਾਂ ਦਾ ਸਤਿਕਾਰ

ਭਾਰਤ ਇਕ ਸਰਬ ਸਾਂਝਾ ਦੇਸ਼ ਹੈ। ਭਾਵੇਂ ਜਾਤਾਂ-ਪਾਤਾਂ ਨੂੰ ਮਿਟਾਉਣ ਲਈ ਸਮੇਂ-ਸਮੇਂ ਦੀਆਂ ਸਰਕਾਰਾਂ ਉਪਰਾਲੇ ਕਰਦੀਆਂ ਰਹਿੰਦੀਆਂ ਹਨ। ਪ੍ਰੰਤੂ ਭਾਰਤ ਵਿਚ ਅਨੇਕਾਂ ਜਾਤੀਆਂ ਦੇ ਲੋਕ ਅਨੇਕਾਂ ਹੀ ਧਰਮਾਂ ਨਾਲ ਜੁੜੇ ਹੋਏ ਹਨ। ਪਿਛਲੇ ਦਿਨੀਂ ਸਾਹਮਣੇ ਆਈਆਂ ਧਾਰਮਿਕ ਗ੍ਰੰਥਾਂ ਦੀ ਬੇਅਦਬੀ ਦੀ ਘਟਨਾਵਾਂ ਬਹੁਤ ਹੀ ਮੰਦਭਾਗੀਆਂ ਹਨ। ਧਰਮ ਕੋਈ ਵੀ ਹੋਵੇ, ਮੰਨਣ ਵਾਲੇ ਨੂੰ ਜਾਨ ਤੋਂ ਵੱਧ ਪਿਆਰਾ ਹੁੰਦਾ ਹੈ। ਸੋ, ਸਾਨੂੰ ਸਾਰੇ ਧਰਮਾਂ ਦਾ, ਜਿਹੜੇ ਸਿੱਧੇ ਰਾਹ 'ਤੇ ਚੱਲਣ ਦਾ ਸੰਦੇਸ਼ ਦਿੰਦੇ ਹਨ, ਦਾ ਹਮੇਸ਼ਾ ਸਤਿਕਾਰ ਕਰਨਾ ਚਾਹੀਦਾ ਹੈ ਅਤੇ ਸਾਰੀ ਮਾਨਵਤਾ ਨੂੰ ਚਾਹੀਦਾ ਹੈ ਕਿ ਜਿਸ ਕਿਸੇ ਵੀ ਧਰਮ ਦਾ ਅਪਮਾਨ ਹੁੰਦਾ ਹੈ, ਉਸ ਵਿਰੁੱਧ ਇਕੱਠੇ ਹੋ ਕੇ ਆਪਣੀ ਆਵਾਜ਼ ਲਾਮਬੰਦ ਕਰਨੀ ਚਾਹੀਦੀ ਹੈ। ਇਸੇ ਵਿਚ ਹੀ ਸਮੁੱਚੀ ਲੋਕਾਈ ਦਾ ਭਲਾ ਹੈ।

-ਕੇਵਲ ਸਿੰਘ ਬਾਠਾਂ
ਮੋਬਾਈਲ : 98557-44211.

ਮਰੀਜ਼ਾਂ 'ਤੇ ਜ਼ੁਲਮ

ਡਾਕਟਰਾਂ ਨੂੰ ਕਦੇ ਦੂਜਾ ਰੱਬ ਕਿਹਾ ਜਾਂਦਾ ਸੀ। ਇਖਲਾਕਹੀਣੇ, ਲਾਲਚ ਦੇ ਮਾਰੇ ਕੁਝ ਗ਼ੈਰ-ਸੰਜੀਦਾ ਡਾਕਟਰਾਂ ਨੇ ਇਸ ਧਾਰਨਾ ਨੂੰ ਬਿਲਕੁਲ ਗ਼ਲਤ ਸਿੱਧ ਕਰ ਦਿੱਤਾ ਹੈ। ਆਪਣੇ ਕਮਿਸ਼ਨ ਖਾਤਰ ਲਾਚਾਰ ਮਰੀਜ਼ਾਂ ਦੇ ਮਹਿੰਗੇ ਅਤੇ ਗ਼ੈਰ-ਜ਼ਰੂਰੀ ਟੈਸਟ ਕਰਵਾਉਣੇ ਤਾਂ ਛੱਡੋ, ਹੁਣ ਤਾਂ ਮਰੀਜ਼ਾਂ ਦੇ ਗੁਰਦੇ ਕੱਢ ਕੇ ਵੇਚਣ ਦੀਆਂ ਖ਼ਬਰਾਂ ਵੀ ਆਮ ਹੋ ਗਈਆਂ ਨੇ। ਵੱਡੇ ਹਸਪਤਾਲਾਂ ਵਾਲੇ ਡਾਕਟਰਾਂ ਤੋਂ ਤਾਂ ਮਰੀਜ਼ ਇਉਂ ਡਰਦੈ, ਜਿਵੇਂ ਬੱਕਰਾ ਕਸਾਈ ਤੋਂ। ਸਰਕਾਰੀ ਹਸਪਤਾਲਾਂ ਦੀ ਹਾਲਤ ਤਾਂ ਬਹੁਤੀ ਬੁਰੀ ਹੈ। ਅੱਵਲ ਤਾਂ ਡਾਕਟਰ ਤੁਹਾਨੂੰ ਸੀਟ 'ਤੇ ਮਿਲਣਗੇ ਹੀ ਨਹੀਂ, ਜੇਕਰ ਮਿਲ ਵੀ ਜਾਣ ਤਾਂ ਉਨ੍ਹਾਂ ਦੀ ਬੋਲਚਾਲ ਮਰੀਜ਼ ਨਾਲ ਇਸ ਤਰ੍ਹਾਂ ਹੁੰਦੀ ਹੈ, ਜਿਵੇਂ ਉਹ ਮਰੀਜ਼ ਉਪਰ ਕੋਈ ਅਹਿਸਾਨ ਕਰ ਰਹੇ ਹੋਣ।
ਸਮਝ ਨਹੀਂ ਆਉਂਦੀ, ਜੇਕਰ ਮਰੀਜ਼ਾਂ ਨੇ ਟੈਸਟ ਵੀ ਬਾਹਰੋਂ ਕਰਵਾਉਣੇ ਨੇ, ਦਵਾਈ ਵੀ ਬਾਹਰੋਂ ਲੈਣੀ ਹੈ ਤਾਂ ਇਨ੍ਹਾਂ ਸਰਕਾਰੀ ਹਸਪਤਾਲਾਂ ਦਾ ਕੀ ਫਾਇਦਾ। ਕੀ ਇਹ ਗ਼ਰੀਬ ਤੇ ਮਜਬੂਰ ਮਰੀਜ਼ਾਂ ਦੀ ਆਤਮਾ ਤੇ ਜ਼ੁਲਮ ਕਰਨ ਦੇ ਤੁਲ ਨਹੀਂ।

-ਪ੍ਰੀਤ ਸਿੰਘ ਸੰਦਲ
ਪਿੰਡ ਮਕਸੂਦੜਾ, ਤਹਿਸੀਲ ਪਾਇਲ, ਜ਼ਿਲ੍ਹਾ ਲੁਧਿਆਣਾ।

ਸਿੱਖਿਆ ਮੰਤਰੀ ਨੂੰ ਸੁਝਾਅ

ਸਿੱਖਿਆ ਮੰਤਰੀ ਡਾ: ਦਲਜੀਤ ਸਿੰਘ ਚੀਮਾ ਵੱਲੋਂ ਬੋਰਡ ਪ੍ਰੀਖਿਆ 10ਵੀਂ ਤੇ 12ਵੀਂ ਵਿਚ ਪਹਿਲੇ ਤਿੰਨ ਸਥਾਨਾਂ 'ਤੇ ਆਉਣ ਵਾਲੇ ਵਿਦਿਆਰਥੀਆਂ ਅਤੇ ਮੈਰਿਟ ਲਿਸਟ ਵਿਚ ਆਉਣ ਵਾਲੇ ਵਿਦਿਆਰਥੀਆਂ ਨੂੰ ਪਹਿਲੀ ਵਾਰ ਸਨਮਾਨਿਤ ਕਰਨ ਦੀ ਖ਼ਬਰ ਪੜ੍ਹੀ ਤਾਂ ਬਹੁਤ ਖੁਸ਼ੀ ਹੋਈ। ਪਰ ਮੈਂ ਆਪ ਜੀ ਦਾ ਧਿਆਨ ਮੈਰੀਟੋਰੀਅਸ ਸਕੂਲਾਂ ਲਈ ਹੋਈ ਦਾਖਲਾ ਪ੍ਰੀਖਿਆ ਵੱਲ ਦਿਵਾਉਣਾ ਚਾਹੁੰਦੀ ਹਾਂ ਕਿ ਇਸ ਪ੍ਰੀਖਿਆ ਵਿਚ 6016 ਵਿਦਿਆਰਥੀ ਬੈਠੇ ਸਨ, ਜਿਸ ਵਿਚੋਂ 2988 ਵਿਦਿਆਰਥੀ ਫੇਲ੍ਹ ਹੋਏ। ਹਾਲਾਂਕਿ ਇਨ੍ਹਾਂ ਫੇਲ੍ਹ ਵਿਦਿਆਰਥੀਆਂ ਨੇ 10ਵੀਂ ਦੀ ਪ੍ਰੀਖਿਆ ਵਿਚ 80 ਫ਼ੀਸਦੀ ਤੋਂ ਵੱਧ ਅੰਕ ਪ੍ਰਾਪਤ ਕੀਤੇ ਹਨ ਅਤੇ ਇਹੀ ਵਿਦਿਆਰਥੀ ਇਸ ਦਾਖਲਾ ਪ੍ਰੀਖਿਆ ਵਿਚ 33 ਫ਼ੀਸਦੀ ਤੋਂ ਵੱਧ ਅੰਕ ਪ੍ਰਾਪਤ ਨਹੀਂ ਕਰ ਸਕੇ। ਸ਼ਾਇਦ ਇਹ ਵੀ ਹੋ ਸਕਦਾ ਹੈ ਕਿ ਇਸ ਪ੍ਰੀਖਿਆ ਵਿਚੋਂ ਫੇਲ੍ਹ ਹੋਏ ਵਿਦਿਆਰਥੀ ਬੋਰਡ ਪ੍ਰੀਖਿਆ ਦੀ ਮੈਰਿਟ ਲਿਸਟ ਵਿਚ ਆਏ ਹੋਣ। ਮੇਰਾ ਆਪ ਜੀ ਨੂੰ ਸੁਝਾਅ ਹੈ ਕਿ ਮੈਰੀਟੋਰੀਅਸ ਸਕੂਲਾਂ ਲਈ ਹੋਈ ਦਾਖਲਾ ਪ੍ਰੀਖਿਆ ਵਾਂਗ ਹੀ ਬੋਰਡ ਪ੍ਰੀਖਿਆ ਲਈ ਜਾਵੇ ਤਾਂ ਜੋ ਯੋਗ ਵਿਦਿਆਰਥੀਆਂ ਨਾਲ ਇਨਸਾਫ਼ ਹੋ ਸਕੇ। ਆਸ ਹੈ ਕਿ ਆਪ ਅਤੇ ਹੋਰ ਸਿੱਖਿਆ ਅਧਿਕਾਰੀ ਇਸ ਗੱਲ ਵੱਲ ਵਿਸ਼ੇਸ਼ ਧਿਆਨ ਦਿਓਗੇ।

-ਸਤਵਿੰਦਰ ਕੌਰ
ਸੰਤ ਕਰਮ ਸਿੰਘ ਅਕੈਡਮੀ, ਰੂਪਨਗਰ। ਪਿੰਡ ਖੇੜੀ ਸਲਾਬਤਪੁਰ।
ਮੋਬਾਈਲ : 94178-62115.

24-08-2016

 ਖੇਡ ਸੱਭਿਆਚਾਰ......

'ਅਜੀਤ' ਵਿਚ ਜਤਿੰਦਰ ਸਾਬੀ ਦਾ ਲਿਖਿਆ ਲੇਖ 'ਉਲੰਪਿਕ ਤਗਮਿਆਂ ਲਈ ਲੋੜ ਹੈ ਖੇਡ ਸੱਭਿਆਚਾਰ ਦੀ' ਪੜ੍ਹਿਆ। ਖੇਡ ਚਿੰਤਕ ਨੇ ਆਪਣੀ ਰਚਨਾ ਵਿਚ ਚੀਨ ਦੀ ਪ੍ਰੈੱਸ ਦਾ ਹਵਾਲਾ ਦੇ ਕੇ ਭਾਰਤ ਦੀ ਕਾਰਗੁਜ਼ਾਰੀ ਨਾਲ ਸਬੰਧਤ ਬਹੁਤ ਸਾਰੇ ਪਹਿਲੂ ਸਾਹਮਣੇ ਲਿਆਂਦੇ ਹਨ। ਚੀਨ ਦੀ ਪ੍ਰੈੱਸ ਨੇ ਤਾਂ ਇਹ ਵੀ ਲਿਖਿਆ ਹੈ ਕਿ ਸਵਾ ਸੌ ਕਰੋੜ ਆਬਾਦੀ ਵਾਲਾ ਦੇਸ਼ ਸਵਾ ਮੈਡਲ ਨੂੰ ਤਰਸਿਆ। ਅਸੀਂ ਚੀਨ ਦੀ ਪ੍ਰੈੱਸ ਦਾ ਗੁੱਸਾ ਮਨਾ ਰਹੇ ਹਾਂ ਪਰ ਗੱਲ ਤਾਂ ਸੱਚੀ ਹੀ ਹੈ। ਸਾਡੇ ਦੇਸ਼ ਦੀ ਪ੍ਰੈੱਸ ਤੇ ਜਬਰ ਜਨਾਹਾਂ, ਸੜਕ ਦੁਰਘਟਨਾਵਾਂ, ਪਾਰਲੀਮੈਂਟ ਵਿਚ ਧੱਕੇ-ਮੁੱਕੇ ਤੇ ਹੋਰ ਸਭ ਕੁਝ ਜੋ ਸਮਾਜ ਵਿਚ ਮਾੜਾ ਵਾਪਰ ਰਿਹਾ ਹੈ, ਬਾਰੇ ਹੀ ਲਿਖਦੀ ਹੈ। ਚਲੋ 'ਅਜੀਤ' ਅਖ਼ਬਾਰ ਨੇ ਇਕ ਪਹਿਲ ਤਾਂ ਕੀਤੀ ਹੈ। ਜ਼ਰੂਰਤ ਤਾਂ ਇਹ ਹੈ ਕਿ ਸਾਰੀ ਪ੍ਰੈੱਸ ਇਸ ਪ੍ਰਦਰਸ਼ਨ ਸਬੰਧੀ ਚਿੰਤਨ ਕਰੇ। ਕੀ ਅਸੀਂ ਸਵਾ ਸੌ ਕਰੋੜ ਆਬਾਦੀ ਵਿਚੋਂ ਇਕ ਸੌ ਅਜਿਹੇ ਖਿਡਾਰੀ ਵੀ ਪੈਦਾ ਨਹੀਂ ਕਰ ਸਕਦੇ ਜੋ ਅੰਤਰਰਾਸ਼ਟਰੀ ਪੱਧਰ 'ਤੇ ਸਾਡਾ ਸਿਰ ਉੱਚਾ ਕਰ ਸਕਣ। ਇਸ ਤੋਂ ਪਹਿਲਾਂ ਕਿ ਅਸੀਂ ਕੁਝ ਨਵਾਂ ਕਰੀਏ, ਪਹਿਲਾਂ ਮੌਜੂਦਾ ਖੇਡਾਂ ਦੌਰਾਨ ਦੇਸ਼ ਦੀ ਪ੍ਰਤੀਨਿਧਤਾ ਕਰਨ ਵਾਲੇ ਸਾਰੇ ਖਿਡਾਰੀਆਂ ਨੂੰ ਸੁਣਿਆ ਜਾਵੇ ਅਤੇ ਉਨ੍ਹਾਂ ਦੀਆਂ ਸਮੱਸਿਆਵਾਂ ਸੁਣ ਕੇ ਉਨ੍ਹਾਂ ਵੱਲੋਂ ਦਿੱਤੇ ਸੁਝਾਵਾਂ ਅਨੁਸਾਰ ਕੰਮ ਕੀਤੇ ਜਾਣ ਤਾਂ ਜੋ ਨਵੀਂ ਨੀਤੀ ਬਣਾ ਕੇ ਅਗਲੀਆਂ ਖੇਡਾਂ ਲਈ ਹੁਣ ਤੋਂ ਤਿਆਰੀ ਆਰੰਭ ਕਰ ਲਈਏ। ਪਾਰਲੀਮੈਂਟ ਵੱਲੋਂ ਵਿਸ਼ੇਸ਼ ਇਜਲਾਸ ਬੁਲਾਇਆ ਜਾਵੇ। ਨਰਸਿੰਘ ਯਾਦਵ ਨਾਲ ਹੋਏ ਵਰਤਾਰੇ ਦੀ ਬਾਰੀਕੀ ਨਾਲ ਜਾਂਚ ਕਰਾਈ ਜਾਏ। ਦੀਪਾ ਕਰਮਾਕਰ ਨਾਲ ਉਸ ਦਾ ਫਿਜ਼ੀਓਥਰੈਪਿਸਟ ਕਿਉਂ ਨਹੀਂ ਜਾ ਸਕਿਆ? ਪਤਾ ਕਰਾਇਆ ਜਾਵੇ। ਸਾਕਸ਼ੀ ਮਲਿਕ ਜੇਕਰ ਏਨੀ ਵਧੀਆ ਕਾਰਗੁਜ਼ਾਰੀ ਕਰ ਰਹੀ ਸੀ ਤਾਂ ਉਸ ਨੂੰ ਪਹਿਲਾਂ ਤਰੱਕੀ ਕਿਉਂ ਨਹੀਂ ਦਿੱਤੀ ਗਈ? ਕਿੱਟ ਦੀ ਘਾਟ ਕਰਕੇ ਹਾਕੀ ਖਿਡਾਰੀ ਉਦਘਾਟਨ ਸਮਾਰੋਹ ਵਿਚ ਕਿਉਂ ਭਾਗ ਨਹੀਂ ਲੈ ਸਕੇ? ਦੇਸ਼ ਦੇ ਖੇਡ ਮੰਤਰੀ ਜੀ ਰੀਓ ਵਿਚ ਖਿਡਾਰੀਆਂ ਦੀ ਹੌਸਲਾ ਅਫ਼ਜ਼ਾਈ ਲਈ ਗਏ ਸਨ ਜਾਂ ਨਿਯਮਾਂ ਦੀ ਉਲੰਘਣਾ ਕਰਕੇ ਨਵੀਆਂ ਸਮੱਸਿਆਵਾਂ ਪੈਦਾ ਕਰਨ ਲਈ? ਅਨਿਲ ਵਿਜ ਹਰਿਆਣਾ ਦੇ ਖਿਡਾਰੀਆਂ ਨੂੰ ਕੀ ਹੱਲਾਸ਼ੇਰੀ ਲਈ ਗਏ ਸਨ ਜਾਂ ਦੇਸ਼ ਦੇ ਖਿਡਾਰੀਆਂ ਲਈ? ਕੀ ਸਵਾ ਸੌ ਕਰੋੜ ਆਬਾਦੀ ਦੇ ਦੇਸ਼ ਕੋਲ ਇਕ ਵੀ ਅਜਿਹਾ ਮੈਡੀਕਲ ਅਫਸਰ ਨਹੀਂ ਜੋ ਖਿਡਾਰੀਆਂ ਦੀਆਂ ਤਕਲੀਫ਼ਾਂ, ਲੋੜਾਂ ਅਨੁਸਾਰ ਮੈਡੀਕਲ ਸਹੂਲਤਾਂ ਦੇ ਸਕਦਾ ਹੋਵੇ? ਅੱਜ ਲੋੜ ਹੈ ਆਪਣੀਆਂ ਗ਼ਲਤੀਆਂ ਨੂੰ ਘੋਖਣ ਦੀ। ਭਵਿੱਖ ਵਾਸਤੇ ਹਰ ਈਵੈਂਟ ਲਈ 10-10 ਖਿਡਾਰੀਆਂ ਦੀ ਚੋਣ ਕਰਕੇ ਉਨ੍ਹਾਂ ਦੀ ਸਿਖਲਾਈ, ਖੁਰਾਕ ਆਦਿ ਸਬੰਧੀ ਮੁਕੰਮਲ ਕੰਮ ਹੁਣ ਤੋਂ ਹੀ ਆਰੰਭ ਦੇਣਾ ਚਾਹੀਦਾ ਹੈ।

-ਨਰਿੰਦਰ ਸਿੰਘ
ਸੂਬਾਈ ਸਕੱਤਰ, ਭਾਰਤ ਸਕਾਊਟਸ ਐਂਡ ਗਾਈਡਸ, ਪੰਜਾਬ।

22-08-2016

 ਧਰਨੇ ਕਿ ਪ੍ਰੇਸ਼ਾਨੀਆਂ

ਵੋਟਾਂ ਆ ਰਹੀਆਂ ਹਨ, ਸਰਕਾਰੀ ਮੁਲਾਜ਼ਮ ਜਾਂ ਆਮ ਜਥੇਬੰਦੀਆਂ ਸਰਕਾਰ ਤੋਂ ਮੰਗਾਂ ਮਨਵਾਉਣ ਲਈ ਧਰਨੇ, ਪ੍ਰਦਰਸ਼ਨ, ਰੋਸ ਰੈਲੀਆਂ ਕਰ ਰਹੀਆਂ ਹਨ, ਉਨ੍ਹਾਂ ਨੂੰ ਵੀ ਪਤਾ ਹੈ ਕਿ ਵੋਟਾਂ ਆ ਰਹੀਆਂ ਹਨ, ਮੰਗਾਂ ਮੰਨੀਆਂ ਜਾ ਸਕਦੀਆਂ ਹਨ, ਲੋਹਾ ਗਰਮ ਹੈ, ਹਥੋੜਾ ਮਾਰ ਦਿਓ।
ਪਰ ਧਰਨੇ ਅਤੇ ਜਾਮ ਕਰਕੇ ਆਮ ਜਨਤਾ ਨੂੰ ਜੋ ਪ੍ਰੇਸ਼ਾਨੀ ਹੁੰਦੀ ਹੈ, ਜਨਤਾ ਵੀ ਜਾਣਦੀ ਹੈ, ਇਹ ਧਰਨੇ ਦੇਣ ਵਾਲੇ ਵੀ ਤੇ ਸਰਕਾਰ ਵੀ। ਪਰ ਇਸ ਦਾ ਹੱਲ ਕੱਢਣਾ ਚਾਹੀਦਾ ਹੈ ਕਿਉਂਕਿ ਜਾਮ ਦੌਰਾਨ ਕਈ ਕੀਮਤੀ ਜਾਨਾਂ ਚਲੀਆਂ ਜਾਂਦੀਆਂ ਹਨ, ਮਰੀਜ਼ ਰਾਹ ਵਿਚ ਹੀ ਤੜਫ-ਤੜਫ ਕੇ ਪੂਰਾ ਹੋ ਜਾਂਦਾ ਹੈ। ਜੇਕਰ ਧਰਨੇ ਦੇਣੇ ਹੀ ਹਨ, ਰੋਸ ਪ੍ਰਗਟਾਵਾ ਕਰਨਾ ਹੈ ਤਾਂ ਸਰਕਾਰੀ ਅਧਿਕਾਰੀਆਂ ਜਾਂ ਹੁਕਮਰਾਨਾਂ ਦੀਆਂ ਕੋਠੀਆਂ ਅੱਗੇ ਜਾ ਕੇ ਕੀਤਾ ਜਾ ਸਕਦਾ ਹੈ।
ਮਤਲਬ ਇਹੀ ਹੈ ਕਿ ਕੰਮ ਇਸ ਤਰ੍ਹਾਂ ਕਰੋ ਕਿ ਸੱਪ ਵੀ ਮਰ ਜਾਵੇ, ਲਾਠੀ ਵੀ ਨਾ ਟੁੱਟੇ, ਰੋਸ ਵੀ ਪ੍ਰਗਟ ਕਰੋ ਪਰ ਆਮ ਜਨਤਾ ਨੂੰ ਵੀ ਪ੍ਰੇਸ਼ਾਨੀ ਨਾ ਹੋਵੇ। ਜੇਕਰ ਅਜਿਹਾ ਹੋ ਜਾਵੇ ਤਾਂ ਸਭ ਦਾ ਭਲਾ ਹੈ, ਸ਼ਾਇਦ ਪੰਜਾਬ ਵੀ ਕੈਲੇਫੋਰਨੀਆਂ ਬਣ ਜਾਵੇ।

-ਦਰਸ਼ੀ ਗੋਇਲ
ਬਾਘਾ ਪੁਰਾਣਾ।
ਮੋਬਾਈਲ : 97817-02324.

ਘਰ ਦਾ ਸੁਪਨਾ

ਅੱਜ ਦੇ ਦੌਰ ਵਿਚ ਵਧਦੀ ਹੋਈ ਮਹਿੰਗਾਈ ਕਾਰਨ ਆਪਣਾ ਖੁਦ ਦਾ ਘਰ ਬਣਾਉਣ ਦਾ ਸੁਪਨਾ ਹੁਣ ਸੁਪਨਾ ਹੀ ਬਣ ਕੇ ਰਹਿ ਗਿਆ ਹੈ। ਰੋਜ਼ਮਰ੍ਹਾ ਦੀ ਹਰ ਚੀਜ਼ ਏਨੀ ਮਹਿੰਗੀ ਹੋ ਚੁੱਕੀ ਹੈ ਕਿ ਇਨਸਾਨ ਦਾ ਘਰ ਬਣਾਉਣ ਦਾ ਸੁਪਨਾ ਹੁਣ ਮੁਸ਼ਕਿਲ ਹੀ ਨਹੀਂ ਨਾਮੁਮਕਿਨ ਹੋ ਚੁੱਕਾ ਹੈ। ਘਰ ਬਣਾਉਣ ਦੀਆਂ ਚੀਜ਼ਾਂ ਜਿਵੇਂਕਿ ਸੀਮੈਂਟ, ਰੇਤ, ਬਜਰੀ, ਲੇਬਰ, ਪਲਾਟ ਦੀਆਂ ਕੀਮਤਾਂ ਹਰ ਚੀਜ਼ ਆਮ ਆਦਮੀ ਦੀ ਪਹੁੰਚ ਤੋਂ ਦੂਰ ਹੋ ਚੁੱਕੀ ਹੈ। ਜੇਕਰ ਮਹਿੰਗਾਈ ਇੰਜ ਹੀ ਵਧਦੀ ਰਹੀ ਤਾਂ ਮਕਾਨ ਬਣਾਉਣਾ ਬਹੁਤ ਮੁਸ਼ਕਿਲ ਹੋ ਜਾਵੇਗਾ। ਸਰਕਾਰ ਨੂੰ ਇਸ ਪਾਸੇ ਸੋਚ ਕੇ ਕੁਝ ਕਰਨਾ ਚਾਹੀਦਾ ਹੈ, ਤਾਂ ਜੋ ਹਰ ਕਿਸੇ ਨੂੰ ਆਪਣਾ ਘਰ ਮਿਲ ਸਕੇ।

-ਅਵਤਾਰ ਸਿੰਘ ਕੈਂਥ
ਪਿੰਡ ਝੋਰੜਾਂ, ਜ਼ਿਲ੍ਹਾ ਲੁਧਿਆਣਾ।

ਨਸ਼ਿਆਂ ਦਾ ਦਰਿਆ

ਪੰਜ ਪਾਣੀਆਂ ਦੀ ਧਰਤੀ ਪੰਜਾਬ ਵਿਚ ਅੱਜ ਇਕ ਹੋਰ ਦਰਿਆ ਵਗ ਰਿਹਾ ਹੈ ਤੇ ਉਹ ਹੈ ਨਸ਼ਿਆਂ ਦਾ ਦਰਿਆ। ਜਿਸ ਨੇ ਪੰਜਾਬ ਦੀ ਜਵਾਨੀ ਨੂੰ ਨਿਗਲ ਲਿਆ ਹੈ। ਪਿੰਡਾਂ ਵੱਲ ਨਜ਼ਰ ਮਾਰੀਏ ਤਾਂ ਕੋਈ ਵਿਰਲਾ ਕਰਮਾਂ ਵਾਲਾ ਘਰ ਹੀ ਹੋਵੇਗਾ, ਜਿਸ ਘਰ ਕੋਈ ਵੀ ਨਸ਼ੇ ਨਾ ਕਰਦਾ ਹੋਵੇ। ਪਿੰਡਾਂ ਦੇ ਪਿੰਡ ਨਸ਼ਿਆਂ ਦੀ ਭੇਟ ਚੜ੍ਹ ਚੁੱਕੇ ਹਨ, ਇਹੀ ਹਾਲ ਸ਼ਹਿਰਾਂ ਦਾ ਹੈ। ਉਹ ਨੌਜਵਾਨ ਜੋ ਦੇਸ਼ ਦਾ ਭਵਿੱਖ ਹਨ, ਜਿਨ੍ਹਾਂ ਕੱਲ੍ਹ ਨੂੰ ਦੇਸ਼ ਦੀ ਵਾਗਡੋਰ ਸੰਭਾਲਣੀ ਹੈ, ਬੁੱਢੇ ਮਾਪਿਆਂ ਦਾ ਸਹਾਰਾ ਬਣਨਾ ਹੈ। ਅੱਜ ਉਨ੍ਹਾਂ ਨੂੰ ਖੁਦ ਨੂੰ ਸਹਾਰੇ ਦੀ ਜ਼ਰੂਰਤ ਹੈ। ਨਸ਼ੇ ਜਿਥੇ ਇਕ ਪਾਸੇ ਇਨ੍ਹਾਂ ਨੌਜਵਾਨਾਂ ਨੂੰ ਆਰਥਿਕ ਪੱਖੋਂ ਕੰਗਾਲ ਕਰ ਰਹੇ ਹਨ, ਉਥੇ ਹੀ ਸਿਹਤ ਪੱਖੋਂ ਵੀ ਇਨ੍ਹਾਂ ਨੂੰ ਖੋਖਲਾ ਕਰ ਰਹੇ ਹਨ। ਦੁੱਧ, ਮੱਖਣਾਂ ਨਾਲ ਪਾਲੇ ਸਰੀਰ ਚਰਸ, ਗਾਂਜਾ, ਸ਼ਰਾਬ, ਹੈਰੋਇਨ, ਸਮੈਕ, ਚਿੱਟਾ, ਤੰਬਾਕੂ ਨਾ ਜਾਣੇ ਹੋਰ ਕਿੰਨੀ ਤਰ੍ਹਾਂ ਦੇ ਨਸ਼ਿਆਂ ਨਾਲ ਖੋਖਲੇ ਹੋ ਚੁੱਕੇ ਹਨ। ਕਿਹਾ ਜਾਂਦਾ ਹੈ ਕਿ ਜੇ ਕਿਸੇ ਕੌਮ ਨੂੰ ਖਤਮ ਕਰਨਾ ਹੋਵੇ ਤਾਂ ਉਸ ਦੀ ਜਵਾਨੀ ਨੂੰ ਖਤਮ ਕਰ ਦਿੱਤਾ ਜਾਵੇ ਤੇ ਇਹੀ ਸਭ ਕੁਝ ਅੱਜ ਪੰਜਾਬੀਆਂ ਨਾਲ ਹੋ ਰਿਹਾ ਹੈ। ਨਸ਼ਿਆਂ ਦੇ ਕੋਹੜ ਨੂੰ ਪੰਜਾਬ ਵਿਚੋਂ ਖਤਮ ਕਰਨ ਵਿਚ ਪੰਜਾਬ ਸਰਕਾਰ ਪੂਰੀ ਤਰ੍ਹਾਂ ਅਸਫ਼ਲ ਰਹੀ ਹੈ।

-ਜਸਪ੍ਰੀਤ ਕੌਰ 'ਸੰਘਾ'
ਪਿੰਡ ਤਨੂੰਲੀ, ਜ਼ਿਲ੍ਹਾ ਹੁਸ਼ਿਆਰਪੁਰ।

20-08-2016

 ਪੰਜਾਬੀਆਂ ਦੀ ਸਾਂਝ

'ਅਜੀਤ' ਨੇ ਪੰਜਾਬ ਅਤੇ ਪੰਜਾਬੀਅਤ ਦੇ ਅਲੰਬਰਦਾਰ ਵਜੋਂ ਫ਼ਰਜ਼ ਨਿਭਾਉਂਦਿਆਂ ਲਹਿੰਦੇ ਪੰਜਾਬ ਦੇ ਦਾਨਿਸ਼ਵਰ ਅਤੇ ਪੰਜਾਬੀ ਪ੍ਰੇਮੀ ਡਾ: ਤਾਹਿਰ ਮਹਿਮੂਦ ਸਾਹਿਬ ਦੇ ਬਹੁਤ ਹੀ ਦਿਲਟੁੰਬਵੇਂ ਲੇਖ ਨੂੰ ਸੰਪਾਦਕੀ ਪੰਨੇ 'ਤੇ ਛਾਪ ਕੇ ਪੰਜਾਬੀਅਤ ਨੂੰ ਸ਼ੁਕਰ ਗੁਜ਼ਾਰ ਕੀਤਾ ਹੈ। ਡਾ: ਮਹਿਮੂਦ ਹੋਰਾਂ ਨੇ ਜੋ ਦਿਲ ਦੀ ਗਹਿਰਾਈ ਵਿਚੋਂ ਦੁੱਖ ਅਤੇ ਵੇਦਨਾ ਪ੍ਰਗਟ ਕੀਤੀ ਹੈ ਅਤੇ ਪੰਜਾਬ 'ਚ ਵਾਪਰੀ ਵੱਡੀ ਤ੍ਰਾਸਦੀ 'ਤੇ ਹੰਝੂ ਕੇਰੇ ਹਨ ਉਹ ਦੁਖੀ ਦਿਲ ਦੀ ਸੱਚੀ ਆਵਾਜ਼ ਹੈ ਤੇ ਹਰ ਪਾਠਕ ਦੀ ਅੱਖ ਗਿੱਲੀ ਹੀ ਨਹੀਂ ਹੋ ਜਾਂਦੀ, ਸਗੋਂ ਹੰਝੂਆਂ ਦੀ ਝੜੀ ਲੱਗ ਜਾਂਦੀ ਹੈ। ਡਾ: ਮਹਿਮੂਦ ਸਾਹਿਬ ਦੇ ਸ਼ੁਕਰਾਨੇ ਵਜੋਂ ਕੁਝ ਸਤਰਾਂ ਅਰਜ਼ ਕਰਦਾ ਹਾਂ -
ਉਹ ਪਰਲੇ ਪਾਰ ਦਿਆ ਬੇਲੀਆ, ਉਹ ਡੂੰਘੇ ਪਿਆਰ ਦੇ ਖੇਲ੍ਹੀਆ
ਜਾ ਦੇਈਂ ਸੁਨੇਹਾ ਹੀਰ ਨੂੰ, ਉਹ ਨਾ ਕੋਸੇ ਤਕਦੀਰ ਨੂੰ
ਵੰਡਾਂ ਨਹੀਂ ਪਿਆਰ ਜੇ ਵੰਡਿਆ, ਪਿਆਰ ਦਾ ਸਮਾਂ ਅਜੇ ਨਹੀਂ ਹੰਢਿਆ
ਹੇਕਾਂ ਲਾ ਕੇ ਗਾ ਰਿਹਾ ਐਧਰ ਪੰਜਾਬ, ਹੱਦਾਂ ਦੇ ਵੀ ਪਾਰ ਹੈ ਉਸ ਦਾ ਰਾਜ
ਉਹਦੀ ਕਬਰ 'ਤੇ ਜਾ ਪੜ੍ਹ ਦੇਈਂ ਸਾਡੀ ਚਿੱਠੀ
ਆਪੇ ਸੁਣ ਕੇ ਰੀਝ ਜਾਊ ਉਹ ਬੋਲੀ ਮਿੱਠੀ
ਪੰਜਾਬ ਤਾਂ ਹੁਣ ਦੁਨੀਆ ਦੇ ਕੋਨੇ-ਕੋਨੇ ਵਿਚ ਵਸਦਾ ਹੈ। ਸਾਰੇ ਪੰਜਾਬੀ ਵਿਦੇਸ਼ਾਂ ਵਿਚ ਏਨੇ ਨੇੜੇ ਹੁੰਦੇ ਹਨ ਕਿ ਹੱਦ ਨਹੀਂ, ਇਕੋ ਮਾਂ ਜਾਏ ਜੋ ਹੋਏ। ਕਿਸੇ ਵਿਦੇਸ਼ੀ ਨੇ ਕਿਸੇ ਪੰਜਾਬੀ ਨੂੰ ਪੁੱਛਿਆ ਸੀ-'ਤੁਹਾਡਾ ਪੰਜਾਬ ਕਿੱਥੇ ਹੈ?' ਤਾਂ ਉਸ ਨੇ ਜਵਾਬ ਦਿੱਤਾ ਸੀ -
ਮੇਰੇ ਪੰਜਾਬ ਦੇ ਸਦਾ ਨਕਸ਼ੇ ਬਦਲੇ, ਪੰਜਾਬੀ ਦੀਆਂ ਸਰਹੱਦਾਂ ਚੰਚਲ
ਸਤਿਲੁਜ ਦਾ ਸਤਿ, ਬਿਆਸ ਦੀ ਬੀਰਤਾ
ਰਾਵੀ ਦਾ ਰੋਹ ਤੇ ਜਿਹਲਮ ਦਾ ਜਲਾਲ
ਜਿੱਥੇ ਪੰਜਾਬੀ ਉਥੇ ਪੰਜਾਬ, ਜਿੱਥੇ ਇਹ ਗੁਣ ਉਥੇ ਪੰਜਾਬ।

-ਰਾਜਿੰਦਰ ਸਿੰਘ
236, ਡਿਫੈਂਸ ਕਾਲੋਨੀ ਜਲੰਧਰ
rajinder rahi@yahoo.com

ਪਾਣੀ ਦਾ ਸੰਕਟ

ਪਾਣੀ ਦਾ ਸੰਕਟ ਖ਼ਤਰਨਾਕ ਰੂਪ ਧਾਰਨ ਕਰਦਾ ਜਾ ਰਿਹਾ ਹੈ। ਦਿੱਲੀ ਸਮੇਤ ਭਾਰਤ ਦੇ ਕਈ ਸੂਬੇ ਪਾਣੀ ਦੀ ਜ਼ਬਰਦਸਤ ਥੁੜ੍ਹ ਨਾਲ ਜੂਝ ਰਹੇ ਹਨ। ਪਹਿਲਾਂ ਸੁਣੀਂਦਾ ਸੀ ਕਿ ਕੱਸੀਆਂ, ਸੂਇਆਂ ਦਾ ਪਾਣੀ, ਖੇਤਾਂ ਨੂੰ ਲਾਉਣ ਦੀ ਵਾਰੀ ਕਰਕੇ ਪਿੰਡਾਂ ਵਿਚ ਕਤਲ ਹੋ ਜਾਂਦੇ ਸੀ। ਹੁਣ ਤਾਂ ਪੀਣ ਵਾਲੇ ਪਾਣੀ ਕਰਕੇ ਕਤਲ ਹੋਣ ਦੀਆਂ ਖ਼ਬਰਾਂ ਵੀ ਆਉਣ ਲੱਗ ਪਈਆਂ ਹਨ। ਵਿਦਵਾਨਾਂ ਦਾ ਉਹ ਕਥਨ ਸੱਚ ਹੁੰਦਾ ਪ੍ਰਤੀਤ ਹੋ ਰਿਹਾ ਕਿ ਜੇਕਰ ਅਗਲਾ ਸੰਸਾਰ ਯੁੱਧ ਹੋਇਆ ਤਾਂ ਉਸ ਦਾ ਕਾਰਨ ਪਾਣੀ ਦੀ ਪ੍ਰਾਪਤੀ ਹੋਵੇਗੀ। ਪੰਜਾਬ ਕੋਲ ਕੁਦਰਤੀ ਸੋਮਾ ਪਾਣੀ ਹੀ ਹੈ। ਪਰ ਅਸੀਂ ਬੇਕਦਰੇ ਹੋ ਕੇ ਬੇਰਹਿਮੀ ਨਾਲ ਪਾਣੀ ਦੀ ਦੁਰਵਰਤੋਂ ਕਰ ਰਹੇ ਹਾਂ। ਇਸ ਦਾ ਖਮਿਆਜਾ ਸਾਡੀਆਂ ਆਉਣ ਵਾਲੀਆਂ ਪੁਸ਼ਤਾਂ ਨੂੰ ਭੁਗਤਣਾ ਪਵੇਗਾ। ਹੁਣ ਸੰਭਲਣ ਦਾ ਵੇਲਾ ਹੈ, ਜੇਕਰ ਪਾਣੀ ਦੀ ਸੰਭਾਲ ਪ੍ਰਤੀ ਅਸੀਂ ਹੁਣ ਵੀ ਸੁਚੇਤ ਨਾ ਹੋਏ ਤਾਂ ਉਹ ਖ਼ਬਰਾਂ ਵੀ ਸੱਚ ਹੋ ਸਕਦੀਆਂ ਨੇ, ਜਿਨ੍ਹਾਂ ਵਿਚ ਲਿਖਿਆ ਹੈ ਕਿ ਪੰਜਾਬ ਦੀ ਧਰਤੀ ਲਗਾਤਾਰ ਬੰਜਰ ਹੋਣ ਵੱਲ ਵਧ ਰਹੀ ਹੈ।

-ਪ੍ਰੀਤ ਸਿੰਘ ਸੰਦਲ
ਪਿੰਡ ਮਕਸੂਦੜਾ, ਤਹਿ: ਪਾਇਲ (ਲੁਧਿਆਣਾ)।

17-08-2016

 ਪੰਜਾਬੀਆਂ ਦੀ ਸਾਂਝ
'ਅਜੀਤ' ਨੇ ਪੰਜਾਬ ਅਤੇ ਪੰਜਾਬੀਅਤ ਦੇ ਅਲੰਬਰਦਾਰ ਵਜੋਂ ਫ਼ਰਜ਼ ਨਿਭਾਉਂਦਿਆਂ ਲਹਿੰਦੇ ਪੰਜਾਬ ਦੇ ਦਾਨਿਸ਼ਵਰ ਅਤੇ ਪੰਜਾਬੀ ਪ੍ਰੇਮੀ ਡਾ: ਤਾਹਿਰ ਮਹਿਮੂਦ ਸਾਹਿਬ ਦੇ ਬਹੁਤ ਹੀ ਦਿਲਟੁੰਬਵੇਂ ਲੇਖ ਨੂੰ ਸੰਪਾਦਕੀ ਪੰਨੇ 'ਤੇ ਛਾਪ ਕੇ ਪੰਜਾਬੀਅਤ ਨੂੰ ਸ਼ੁਕਰ ਗੁਜ਼ਾਰ ਕੀਤਾ ਹੈ। ਡਾ: ਮਹਿਮੂਦ ਹੋਰਾਂ ਨੇ ਜੋ ਦਿਲ ਦੀ ਗਹਿਰਾਈ ਵਿਚੋਂ ਦੁੱਖ ਅਤੇ ਵੇਦਨਾ ਪ੍ਰਗਟ ਕੀਤੀ ਹੈ ਅਤੇ ਪੰਜਾਬ 'ਚ ਵਾਪਰੀ ਵੱਡੀ ਤ੍ਰਾਸਦੀ 'ਤੇ ਹੰਝੂ ਕੇਰੇ ਹਨ ਉਹ ਦੁਖੀ ਦਿਲ ਦੀ ਸੱਚੀ ਆਵਾਜ਼ ਹੈ ਤੇ ਹਰ ਪਾਠਕ ਦੀ ਅੱਖ ਗਿੱਲੀ ਹੀ ਨਹੀਂ ਹੋ ਜਾਂਦੀ, ਸਗੋਂ ਹੰਝੂਆਂ ਦੀ ਝੜੀ ਲੱਗ ਜਾਂਦੀ ਹੈ। ਡਾ: ਮਹਿਮੂਦ ਸਾਹਿਬ ਦੇ ਸ਼ੁਕਰਾਨੇ ਵਜੋਂ ਕੁਝ ਸਤਰਾਂ ਅਰਜ਼ ਕਰਦਾ ਹਾਂ -
ਉਹ ਪਰਲੇ ਪਾਰ ਦਿਆ ਬੇਲੀਆ, ਉਹ ਡੂੰਘੇ ਪਿਆਰ ਦੇ ਖੇਲ੍ਹੀਆ
ਜਾ ਦੇਈਂ ਸੁਨੇਹਾ ਹੀਰ ਨੂੰ, ਉਹ ਨਾ ਕੋਸੇ ਤਕਦੀਰ ਨੂੰ
ਵੰਡਾਂ ਨਹੀਂ ਪਿਆਰ ਜੇ ਵੰਡਿਆ, ਪਿਆਰ ਦਾ ਸਮਾਂ ਅਜੇ ਨਹੀਂ ਹੰਢਿਆ
ਹੇਕਾਂ ਲਾ ਕੇ ਗਾ ਰਿਹਾ ਐਧਰ ਪੰਜਾਬ, ਹੱਦਾਂ ਦੇ ਵੀ ਪਾਰ ਹੈ ਉਸ ਦਾ ਰਾਜ
ਉਹਦੀ ਕਬਰ 'ਤੇ ਜਾ ਪੜ੍ਹ ਦੇਈਂ ਸਾਡੀ ਚਿੱਠੀ
ਆਪੇ ਸੁਣ ਕੇ ਰੀਝ ਜਾਊ ਉਹ ਬੋਲੀ ਮਿੱਠੀ
ਪੰਜਾਬ ਤਾਂ ਹੁਣ ਦੁਨੀਆ ਦੇ ਕੋਨੇ-ਕੋਨੇ ਵਿਚ ਵਸਦਾ ਹੈ। ਸਾਰੇ ਪੰਜਾਬੀ ਵਿਦੇਸ਼ਾਂ ਵਿਚ ਏਨੇ ਨੇੜੇ ਹੁੰਦੇ ਹਨ ਕਿ ਹੱਦ ਨਹੀਂ, ਇਕੋ ਮਾਂ ਜਾਏ ਜੋ ਹੋਏ। ਕਿਸੇ ਵਿਦੇਸ਼ੀ ਨੇ ਕਿਸੇ ਪੰਜਾਬੀ ਨੂੰ ਪੁੱਛਿਆ ਸੀ-'ਤੁਹਾਡਾ ਪੰਜਾਬ ਕਿੱਥੇ ਹੈ?' ਤਾਂ ਉਸ ਨੇ ਜਵਾਬ ਦਿੱਤਾ ਸੀ -
ਮੇਰੇ ਪੰਜਾਬ ਦੇ ਸਦਾ ਨਕਸ਼ੇ ਬਦਲੇ, ਪੰਜਾਬੀ ਦੀਆਂ ਸਰਹੱਦਾਂ ਚੰਚਲ
ਸਤਿਲੁਜ ਦਾ ਸਤਿ, ਬਿਆਸ ਦੀ ਬੀਰਤਾ
ਰਾਵੀ ਦਾ ਰੋਹ ਤੇ ਜਿਹਲਮ ਦਾ ਜਲਾਲ
ਜਿੱਥੇ ਪੰਜਾਬੀ ਉਥੇ ਪੰਜਾਬ, ਜਿੱਥੇ ਇਹ ਗੁਣ ਉਥੇ ਪੰਜਾਬ।


-ਰਾਜਿੰਦਰ ਸਿੰਘ
236, ਡਿਫੈਂਸ ਕਾਲੋਨੀ ਜਲੰਧਰ
rajinder rahi@yahoo.com


ਪਾਣੀ ਦਾ ਸੰਕਟ

ਪਾਣੀ ਦਾ ਸੰਕਟ ਖ਼ਤਰਨਾਕ ਰੂਪ ਧਾਰਨ ਕਰਦਾ ਜਾ ਰਿਹਾ ਹੈ। ਦਿੱਲੀ ਸਮੇਤ ਭਾਰਤ ਦੇ ਕਈ ਸੂਬੇ ਪਾਣੀ ਦੀ ਜ਼ਬਰਦਸਤ ਥੁੜ੍ਹ ਨਾਲ ਜੂਝ ਰਹੇ ਹਨ। ਪਹਿਲਾਂ ਸੁਣੀਂਦਾ ਸੀ ਕਿ ਕੱਸੀਆਂ, ਸੂਇਆਂ ਦਾ ਪਾਣੀ, ਖੇਤਾਂ ਨੂੰ ਲਾਉਣ ਦੀ ਵਾਰੀ ਕਰਕੇ ਪਿੰਡਾਂ ਵਿਚ ਕਤਲ ਹੋ ਜਾਂਦੇ ਸੀ। ਹੁਣ ਤਾਂ ਪੀਣ ਵਾਲੇ ਪਾਣੀ ਕਰਕੇ ਕਤਲ ਹੋਣ ਦੀਆਂ ਖ਼ਬਰਾਂ ਵੀ ਆਉਣ ਲੱਗ ਪਈਆਂ ਹਨ। ਵਿਦਵਾਨਾਂ ਦਾ ਉਹ ਕਥਨ ਸੱਚ ਹੁੰਦਾ ਪ੍ਰਤੀਤ ਹੋ ਰਿਹਾ ਕਿ ਜੇਕਰ ਅਗਲਾ ਸੰਸਾਰ ਯੁੱਧ ਹੋਇਆ ਤਾਂ ਉਸ ਦਾ ਕਾਰਨ ਪਾਣੀ ਦੀ ਪ੍ਰਾਪਤੀ ਹੋਵੇਗੀ। ਪੰਜਾਬ ਕੋਲ ਕੁਦਰਤੀ ਸੋਮਾ ਪਾਣੀ ਹੀ ਹੈ। ਪਰ ਅਸੀਂ ਬੇਕਦਰੇ ਹੋ ਕੇ ਬੇਰਹਿਮੀ ਨਾਲ ਪਾਣੀ ਦੀ ਦੁਰਵਰਤੋਂ ਕਰ ਰਹੇ ਹਾਂ। ਇਸ ਦਾ ਖਮਿਆਜਾ ਸਾਡੀਆਂ ਆਉਣ ਵਾਲੀਆਂ ਪੁਸ਼ਤਾਂ ਨੂੰ ਭੁਗਤਣਾ ਪਵੇਗਾ। ਹੁਣ ਸੰਭਲਣ ਦਾ ਵੇਲਾ ਹੈ, ਜੇਕਰ ਪਾਣੀ ਦੀ ਸੰਭਾਲ ਪ੍ਰਤੀ ਅਸੀਂ ਹੁਣ ਵੀ ਸੁਚੇਤ ਨਾ ਹੋਏ ਤਾਂ ਉਹ ਖ਼ਬਰਾਂ ਵੀ ਸੱਚ ਹੋ ਸਕਦੀਆਂ ਨੇ, ਜਿਨ੍ਹਾਂ ਵਿਚ ਲਿਖਿਆ ਹੈ ਕਿ ਪੰਜਾਬ ਦੀ ਧਰਤੀ ਲਗਾਤਾਰ ਬੰਜਰ ਹੋਣ ਵੱਲ ਵਧ ਰਹੀ ਹੈ।


-ਪ੍ਰੀਤ ਸਿੰਘ ਸੰਦਲ
ਪਿੰਡ ਮਕਸੂਦੜਾ, ਤਹਿ: ਪਾਇਲ (ਲੁਧਿਆਣਾ)।

11-08-2016

 ਕਿਰਤ ਦਾ ਮਹੱਤਵ
ਹੱਥੀਂ ਕੰਮ ਕਰਕੇ ਕਮਾਈ ਹੋਈ ਦੌਲਤ ਨੂੰ ਹੱਕ ਹਲਾਲ ਦੀ ਕਮਾਈ ਕਿਹਾ ਜਾਂਦਾ ਹੈ। ਅੱਜ ਦੇ ਜ਼ਮਾਨੇ ਵਿਚ ਹੱਥੀਂ ਕੰਮ ਕਰਕੇ ਖਾਣ ਨੂੰ ਲੋਕ ਤਰਜੀਹ ਨਹੀਂ ਦੇ ਰਹੇ। ਨਵੀਂ ਪੀੜ੍ਹੀ ਚਾਹੁੰਦੀ ਹੈ ਕਿ ਬਿਨਾਂ ਪਸੀਨਾ ਵਹਾਇਆਂ ਰਾਤੋ-ਰਾਤ ਅਮੀਰ ਹੋਇਆ ਜਾਵੇ। ਇਸੇ ਵਿਚੋਂ ਹੀ ਜੁਰਮ ਪੈਦਾ ਹੁੰਦਾ ਹੈ। ਮਿਹਨਤ ਨਾਲ ਕਮਾਈ ਰੋਟੀ ਦਾ ਆਪਣਾ ਵੱਖਰਾ ਹੀ ਸਵਾਦ ਹੁੰਦਾ ਹੈ। ਅਸੀਂ ਪੰਜਾਬੀ ਲੋਕ ਕਿਰਤ ਨੂੰ ਆਪਣੇ ਜੀਵਨ ਵਿਚੋਂ ਮਨਫ਼ੀ ਕਰੀ ਬੈਠੇ ਹਾਂ। ਬਾਬੇ ਨਾਨਕ ਹੋਰਾਂ ਨੇ ਵੀ ਭਾਈ ਲਾਲੋ ਦੀ ਰੁੱਖੀ-ਸੁੱਕੀ ਰੋਟੀ ਨੂੰ ਭਾਗੋ ਦੇ ਸ਼ਾਹੀ ਪਕਵਾਨਾਂ ਤੋਂ ਉੱਤਮ ਦੱਸਿਆ ਸੀ। ਅਧਿਆਪਕ, ਇੰਜੀਨੀਅਰ, ਡਾਕਟਰ, ਪੁਲਿਸ ਅਫਸਰ ਜੇ ਆਪਣੀ ਡਿਊਟੀ ਲੋਕਾਂ ਨੂੰ ਸਮਰਪਤ ਹੋ ਕੇ ਤਨਦੇਹੀ ਨਾਲ ਕਰਦੇ ਹਨ ਤਾਂ ਉਸ ਨੂੰ ਵੀ ਸੱਚੀ ਸੁੱਚੀ ਕਿਰਤ ਹੀ ਸਮਝਿਆ ਜਾਂਦਾ ਹੈ। ਹੱਥੀਂ ਕੀਤੀ ਕਮਾਈ ਵਿਚੋਂ ਲੋੜਵੰਦ ਦੀ ਸਹਾਇਤਾ ਕਰਨ ਨਾਲ ਅਥਾਹ ਖੁਸ਼ੀ ਮਿਲਦੀ ਹੈ। ਲੁੱਟ-ਖਸੁੱਟ ਜਾਂ ਹੇਰਾ-ਫੇਰੀ ਨਾਲ ਕੀਤਾ ਦਾਨ ਅਜਿਹੇ ਦਾਨੀ ਨੂੰ ਰਾਸ ਨਹੀਂ ਆ ਸਕਦਾ। ਮਿਹਨਤ ਜਾਂ ਕਿਰਤ ਕਰਨ ਵਾਲਾ ਵਿਅਕਤੀ ਡਾਕਟਰਾਂ, ਹਕੀਮਾਂ ਦੇ ਚੱਕਰਾਂ 'ਚੋਂ ਬਚਿਆ ਰਹਿੰਦਾ ਹੈ। ਕਿਰਤੀ ਲੋਕ ਬਾਂਹ ਸਰ੍ਹਾਣੇ ਰੱਖ ਕੇ ਰਾਤ ਨੂੰ ਪੂਰੀ ਨੀਂਦ ਲੈਂਦੇ ਹਨ। ਇਸ ਦੇ ਉਲਟ ਵਿਹਲੜ ਲੋਕ ਨੀਂਦ ਦੀਆਂ ਗੋਲੀਆਂ ਖਾ ਕੇ ਵੀ ਰਾਤਾਂ ਅਵਾਜ਼ਾਰੀ ਨਾਲ ਕੱਟਦੇ ਹਨ। ਆਓ, ਸਾਰੇ ਸੱਚੀ ਸੁੱਚੀ ਕਿਰਤ ਨੂੰ ਸਮਰਪਤ ਹੋਈਏ, ਨਹੀਂ ਤਾਂ ਅਜੋਕੀ ਭੱਜ-ਦੌੜ ਮਨੁੱਖਤਾ ਨੂੰ ਨਿਗਲ ਜਾਵੇਗੀ।


-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।


ਸਿਆਸੀ ਸ਼ਬਦਾਵਲੀ

ਜਿਵੇਂ-ਜਿਵੇਂ ਚੋਣਾਂ ਨਜ਼ਦੀਕ ਆ ਰਹੀਆਂ ਹਨ, ਉਵੇਂ-ਉਵੇਂ ਹੀ ਰਾਜਨੀਤਕ ਲੀਡਰ ਅਤੇ ਨੇਤਾ ਗਰਮ ਹੁੰਦੇ ਜਾ ਰਹੇ ਹਨ। ਇਨ੍ਹਾਂ ਲੀਡਰਾਂ ਦੀ ਗਰਮੀ ਏਨੀ ਵਧ ਜਾਂਦੀ ਹੈ ਕਿ ਪੜ੍ਹੇ-ਲਿਖੇ ਅਤੇ ਸੂਝਵਾਨ ਹੋਣ 'ਤੇ ਵੀ ਏਨੀ ਗਰਮੀ ਖਾ ਜਾਂਦੇ ਹਨ ਕਿ ਆਪਣੀ ਹੋਸ਼ ਭੁਲਾ ਜਾਂਦੇ ਹਨ ਅਤੇ ਇਕ-ਦੂਜੇ ਪ੍ਰਤੀ ਭੱਦੀ ਸ਼ਬਦਾਵਲੀ ਦੀ ਵਰਤੋਂ ਕਰਦੇ ਹਨ। ਇਸ ਨਾਲ ਮਾਹੌਲ ਖਰਾਬ ਹੁੰਦਾ ਹੈ। ਸਾਡੇ ਲੀਡਰਾਂ ਨੂੰ ਸੁਚੇਤ ਅਤੇ ਸੰਜਮ ਤੋਂ ਕੰਮ ਲੈਣਾ ਚਾਹੀਦਾ ਹੈ ਅਤੇ ਇਕ-ਦੂਜੇ ਪ੍ਰਤੀ ਪਿਆਰ ਅਤੇ ਮੇਲ-ਮਿਲਾਪ ਦੀ ਸ਼ਬਦਾਵਲੀ ਦੀ ਵਰਤੋਂ ਕਰਨੀ ਚਾਹੀਦੀ ਹੈ, ਜਿਸ ਤੋਂ ਲੋਕਾਂ ਤੇ ਦੇਸ਼ ਨੂੰ ਚੰਗੀ ਸੇਧ ਮਿਲ ਸਕੇ ਅਤੇ ਭਾਰਤ ਦੀ ਸਿਆਸਤ ਨੂੰ ਗੰਧਲਾ ਹੋਣ ਤੋਂ ਬਚਾਇਆ ਜਾ ਸਕੇ।


-ਹਰਿੰਦਰ ਸਿੰਘ ਗਰਚਾ
ਆਤਮ ਨਗਰ, ਜਗਰਾਉਂ।

10-08-2016

 ਮਾਂ-ਬੋਲੀ ਦਾ ਮਹੱਤਵ
ਸਾਡੀ ਆਪਣੀ ਮਾਂ-ਬੋਲੀ ਸਾਡੇ ਲਈ ਮਹੱਤਵ ਰੱਖਦੀ ਹੈ। ਸੰਸਾਰ ਵਿਚ ਸ਼ਾਇਦ ਹੀ ਅਜਿਹਾ ਦੇਸ਼ ਜਾਂ ਇਲਾਕਾ ਹੋਵੇ, ਜਿਥੋਂ ਦੇ ਲੋਕ ਆਪਣੀ ਮਾਂ-ਬੋਲੀ ਨੂੰ ਪਿਆਰ ਨਾ ਕਰਦੇ ਹੋਣ। ਇਹ ਪਿਆਰ ਇਕ ਕੁਦਰਤੀ ਗੱਲ ਹੈ। ਕਿਉਂਕਿ ਬੱਚੇ ਦਾ ਮਾਂ-ਬੋਲੀ ਨਾਲ ਸ਼ੁਰੂ ਤੋਂ ਹੀ ਲਗਾਅ ਹੁੰਦਾ ਹੈ। ਇਸ ਵਿਚ ਦੱਸੀ ਗੱਲ ਉਸ ਦੀ ਛੇਤੀ ਸਮਝ ਆ ਜਾਂਦੀ ਹੈ। ਆਪਣੀ ਮਾਂ-ਬੋਲੀ ਵਿਚ ਬੋਲਣ ਲਈ ਉਚੇਚ ਕੋਸ਼ਿਸ਼ ਦੀ ਲੋੜ ਨਹੀਂ ਪੈਂਦੀ, ਭਾਵ ਇਹ ਸਹਿਜ-ਸੁਭਾਵਿਕ ਆ ਜਾਂਦੀ ਹੈ। ਸੰਗੀਤ ਦੀਆਂ ਸੁਰਾਂ ਭਾਵੇਂ ਕਿਸੇ ਵੀ ਦੇਸ਼ ਦੀਆਂ ਹੋਣ, ਮਨ ਨੂੰ ਖਿੱਚਦੀਆਂ ਹਨ, ਇਸ ਲਈ ਅਸੀਂ ਪੰਜਾਬੀ ਦੀਆਂ ਕਹਾਣੀਆਂ, ਕਵਿਤਾਵਾਂ, ਲੋਕ ਗੀਤ ਅਤੇ ਹੋਰ ਰਚਨਾਵਾਂ ਆਨੰਦ ਲੈ ਕੇ ਪੜ੍ਹਦੇ ਅਤੇ ਸੁਣਦੇ ਹਾਂ। ਬੰਗਾਲੀ ਲੋਕ ਆਪਣੀ ਮਾਂ-ਬੋਲੀ ਨੂੰ ਬਹੁਤ ਪਿਆਰ ਕਰਦੇ ਹਨ। ਇਸ ਦੇ ਉਲਟ ਪੰਜਾਬੀ ਥੋੜ੍ਹੀ-ਮੋਟੀ ਅੰਗਰੇਜ਼ੀ ਪੜ੍ਹ ਕੇ ਪੂਰੇ ਅੰਗਰੇਜ਼ ਬਣਨ ਦੀ ਕੋਸ਼ਿਸ਼ ਕਰਦੇ ਹਨ। ਕਈ ਲੋਕ ਕਹਿੰਦੇ ਹਨ ਕਿ ਪੰਜਾਬੀ ਗਵਾਰਾਂ ਤੇ ਪੇਂਡੂਆਂ ਦੀ ਬੋਲੀ ਹੈ ਪਰ ਇਹ ਚੰਗੀ ਗੱਲ ਨਹੀਂ। ਜੇ ਅਜਿਹਾ ਹੁੰਦਾ ਤਾਂ ਪੰਜਾਬੀ ਬੋਲਣ ਵਾਲੇ ਹੋਰਨਾਂ ਦੇਸ਼ਾਂ ਵਿਚ ਜਾ ਕੇ ਤਰੱਕੀ ਨਾ ਕਰਦੇ। ਇਹ ਵੀ ਗੱਲ ਗ਼ਲਤ ਹੈ ਕਿ ਪੰਜਾਬੀ ਸਿੱਖਾਂ ਦੀ ਬੋਲੀ ਹੈ। ਪਾਕਿਸਤਾਨ ਵਿਚ ਵੀ ਤਾਂ ਲੋਕ ਪੰਜਾਬੀ ਬੋਲਦੇ ਹਨ। ਜੇਕਰ ਇਹ ਪੰਜਾਬੀਆਂ ਦੀ ਬੋਲੀ ਹੁੰਦੀ ਤਾਂ ਸ਼ਾਹ ਹੁਸੈਨ, ਵਾਰਿਸ ਸ਼ਾਹ ਆਦਿ ਵਰਗੇ ਸਾਹਿਤਕਾਰ ਸਾਹਿਤ ਕਿੱਦਾਂ ਰਚ ਦਿੰਦੇ। ਇਸ ਲਈ ਮੁੱਕਦੀ ਗੱਲ ਇਹ ਹੈ ਕਿ ਜੇਕਰ ਅਸੀਂ ਹੋਰਨਾਂ ਸੂਬਿਆਂ ਤੇ ਇਲਾਕਿਆਂ ਦੀ ਬੋਲੀ ਨੂੰ ਮਹੱਤਵ ਦਿੰਦੇ ਹਾਂ ਤਾਂ ਸਾਨੂੰ ਆਪਣੀ ਮਾਂ-ਬੋਲੀ ਦਾ ਵੀ ਸਤਿਕਾਰ ਕਰਨਾ ਚਾਹੀਦੀ ਹੈ। ਭਾਵ ਸਾਨੂੰ ਹੋਰਨਾਂ ਸੂਬਿਆਂ ਦੀ ਮਾਂ-ਬੋਲੀ ਦਾ ਵੀ ਸਤਿਕਾਰ ਕਰਨਾ ਚਾਹੀਦਾ ਹੈ ਤੇ ਆਪਣੀ ਮਾਂ-ਬੋਲੀ ਨੂੰ ਵੀ ਨਹੀਂ ਭੁੱਲਣਾ ਚਾਹੀਦਾ।


-ਰਮਨਦੀਪ ਕੌਰ
ਖਿੜਕੀਆਂ ਵਾਲਾ, ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ।


ਵਿਵਸਥਾ ਠੀਕ ਕਰੋ
ਸਰਕਾਰੀ ਸਕੂਲਾਂ ਦੇ ਨਤੀਜੇ ਮਾੜੇ ਕਿਉਂ ਆ ਰਹੇ ਹਨ, ਸਰਕਾਰ ਨੂੰ ਹੋਰ ਤਾਂ ਕੋਈ ਦਿਸਦਾ ਨਹੀਂ, ਬੱਸ ਅਧਿਆਪਕਾਂ ਨੂੰ ਖਿੱਚ ਲੈਂਦੀ ਹੈ, ਅਧਿਆਪਕ ਵੀ ਕੀ ਕਰਨ, ਜਦੋਂ ਅੱਠਵੀਂ ਤੱਕ ਤਾਂ ਸਾਰੇ ਪਾਸ ਹੀ ਹਨ, ਇਨਸਾਨ ਨੂੰ ਇਨਸਾਨ ਬਣਾਉਣ ਲਈ 'ਡਰ' ਜ਼ਰੂਰੀ ਹੈ। ਜੇ ਬੱਚਿਆਂ ਨੂੰ ਪਤਾ ਹੀ ਹੈ ਕਿ ਉਹ ਪਾਸ ਹੀ ਹਨ ਤਾਂ ਉਨ੍ਹਾਂ ਦਾ ਪੜ੍ਹਨ ਨੂੰ ਵੀ ਜੀਅ ਨਹੀਂ ਕਰਨਾ, ਕਿਉਂਕਿ ਸਾਡੇ ਸਮਾਜ 'ਚ ਡਰ ਅੱਗੇ ਹੀ ਭੂਤ ਨੱਚਦੇ ਹਨ। ਪੜ੍ਹਾਈ ਦਾ ਵਿਕਾਸ ਕਰੋ, ਵਿਨਾਸ਼ ਨਾ ਕਰੋ, ਚਾਹੀਦਾ ਤਾਂ ਇਹ ਸੀ ਕਿ ਪੰਜਵੀਂ ਵੀ ਬੋਰਡ 'ਚ ਸ਼ਾਮਿਲ ਕੀਤੀ ਜਾਵੇ ਪਰ ਸਾਡੇ ਆਧੁਨਿਕ ਮੰਤਰੀਆਂ ਨੇ ਅੱਠਵੀਂ ਦਾ ਬੋਰਡ ਵੀ ਤੋੜ ਦਿੱਤਾ। ਸਰਕਾਰ ਨੇ ਬੋਰਡ ਤੋੜਨਾ, ਬਹੁਤੇ ਵਿਦਿਆਰਥੀਆਂ ਨੇ ਬਸਤਾ ਰੋੜ੍ਹਤਾ ਤੇ ਧਿਆਨ 'ਵੱਟਸਐਪ' 'ਚ ਜੋੜਤਾ। ਅਜੇ ਵੀ ਡੁੱਲ੍ਹੇ ਬੇਰਾਂ ਦਾ ਕੁਝ ਵਿਗੜਿਆ ਨਹੀਂ, ਪੰਜਵੀਂ-ਅੱਠਵੀਂ ਦੇ ਪੇਪਰ ਬੋਰਡ ਰਾਹੀਂ ਲਏ ਜਾਣ, ਤਾਂ ਹੀ ਸਾਡੀ ਪੜ੍ਹਾਈ ਦਾ ਮਿਆਰ ਉੱਚਾ ਹੋਵੇਗਾ, ਅਧਿਆਪਕਾਂ ਦਾ ਮਨੋਬਲ ਵੀ ਉੱਚਾ ਹੋਵੇਗਾ, ਸਰਕਾਰੀ ਸਕੂਲਾਂ ਦਾ ਪੱਧਰ ਵੀ ਉੱਚਾ ਹੋਵੇਗਾ, ਹੁਣ ਸਰਕਾਰ ਨੂੰ ਉੱਚ ਪੱਧਰੀ ਸਿਆਣਪ ਦਿਖਾ ਕੇ ਸੋਚਣਾ ਚਾਹੀਦਾ ਹੈ।


-ਦਰਸ਼ੀ ਗੋਇਲ
ਪ੍ਰਧਾਨ ਏਕਤਾ ਕਲੱਬ, ਬਾਘਾ ਪੁਰਾਣਾ।

9-8-2016

 ਬੇਰੁਜ਼ਗਾਰੀ

ਅੱਜਕਲ੍ਹ ਬੇਰੁਜ਼ਗਾਰੀ ਏਨੀ ਵਧ ਗਈ ਹੈ ਕਿ ਕਿਸੇ ਮਹਿਕਮੇ ਵਿਚ ਇਸ ਦੀ ਪੂਰਤੀ ਨਹੀਂ ਕੀਤੀ ਜਾ ਰਹੀ। ਬੇਰੁਜ਼ਗਾਰ ਸੜਕਾਂ 'ਤੇ ਰੁਲ੍ਹ ਰਿਹਾ ਹੈ। ਬੱਚੇ ਏਨੇ ਪੜ੍ਹ ਲਿਖ ਕੇ ਵੀ ਸੜਕਾਂ 'ਤੇ ਫਿਰ ਰਹੇ ਹਨ। ਕੋਈ ਸੁਣਨ ਵਾਲਾ ਨਹੀਂ। ਜੇ ਥੋੜ੍ਹੀ-ਬਹੁਤ ਪੂਰਤੀ ਨਾਲੋਂ-ਨਾਲ ਹੁੰਦੀ ਰਹੇ ਤਾਂ ਸਮੱਸਿਆ ਇਕਸਾਰ ਰਹਿੰਦੀ ਹੈ। ਜੇ ਕਰਨਾ ਹੀ ਕੁਝ ਨਹੀਂ ਤਾਂ ਫਿਰ ਬੇਚੈਨੀ ਵਧਣੀ ਹੀ ਵਧਣੀ ਹੈ। ਇਸ ਕਰਕੇ ਬੱਚੇ ਵਿਹੜੇ ਫਿਰਦੇ ਹੋਏ ਲੁੱਟਾਂ-ਖੋਹਾਂ ਕਰ ਰਹੇ ਹਨ। ਇਕ ਗੱਲ ਇਥੇ ਲਿਖਣਯੋਗ ਹੈ ਕਿ ਇਕ ਘਰ ਵਿਚ ਮਾਂ-ਬਾਪ, ਲੜਕਾ-ਲੜਕੀ ਨੌਕਰੀ ਕਰ ਰਹੇ ਹਨ ਤਾਂ ਇਕ ਘਰ ਵਿਚ ਇਕ ਨੂੰ ਵੀ ਨੌਕਰੀ ਨਹੀਂ ਮਿਲ ਰਹੀ। ਇਸ ਦੀ ਪੜਚੋਲ ਕਰਕੇ ਨੌਕਰੀਆਂ ਦੇ ਕੇ ਕਾਫੀ ਹੱਦ ਤੱਕ ਸਮੱਸਿਆ ਹੱਲ ਹੋ ਸਕਦੀ ਹੈ।

-ਹਰਜਿੰਦਰਪਾਲ ਸਿੰਘ ਬਾਜਵਾ
536, ਗਲੀ 5-ਬੀ, ਵਿਜੇ ਨਗਰ, ਹੁਸ਼ਿਆਰਪੁਰ।

ਮੰਗਤਿਆਂ ਦੀ ਵਧਦੀ ਗਿਣਤੀ

ਇਕ ਸਰਵੇ ਮੁਤਾਬਿਕ ਭਾਰਤ ਵਿਚ ਕਰੀਬ-ਕਰੀਬ ਇਕ ਲੱਖ ਮੰਗਤੇ ਇਸ ਵੇਲੇ ਭੀਖ ਮੰਗ ਕੇ ਗੁਜ਼ਾਰਾ ਕਰ ਰਹੇ ਹਨ। ਬਹੁਤੇ ਜਾਣਬੁੱਝ ਕੇ ਵਿਹਲੇ ਰਹਿ ਕੇ, ਨਸ਼ਿਆਂ ਦੀ ਪੂਰਤੀ ਲਈ, ਆਦਤਨ ਅਤੇ ਝੁੱਗੀਆਂ ਝੌਂਪੜੀਆਂ ਵਿਚ ਰਹਿਣ ਵਾਲੇ ਲੋਕ ਇਸ ਨੂੰ ਆਸਾਨ ਸਮਝ ਕੇ ਆਪਣਾ ਗੁਜ਼ਾਰਾ ਚਲਾਉਂਦੇ ਹਨ। ਇਨ੍ਹਾਂ ਵੱਲੋਂ ਮੰਗਣ ਦੇ ਕਈ ਤਰੀਕੇ ਇਜ਼ਾਦ ਕੀਤੇ ਗਏ ਹਨ। ਕੋਈ ਹੱਥ ਪੈਰ ਕਟਾ ਕੇ ਕੋਈ ਬੱਚਿਆਂ ਦੇ ਨਾਂਅ 'ਤੇ ਕੋਈ ਹੋਰ ਢੰਗ ਅਪਣਾ ਕੇ ਆਪਣਾ ਬੁੱਤਾ ਸਾਰਦੇ ਹਨ। ਇਸ ਤਬਕੇ ਨੂੰ ਸਿਖਿਅਤ ਕਰਨ, ਲੋੜ ਮੁਤਾਬਿਕ ਕੌਂਸਲਿੰਗ ਅਤੇ ਰੁਜ਼ਗਾਰ ਮੁਹੱਈਆ ਕਰਵਾਉਣਾ ਸਰਕਾਰਾਂ ਦਾ ਪਹਿਲਾ ਕਦਮ ਹੋਣਾ ਚਾਹੀਦਾ ਹੈ। ਇਹ ਲੋਕ ਮਰੀ ਹੋਈ ਜਮੀਰ ਅਧੀਨ ਜ਼ਿੰਦਗੀ ਬਤੀਤ ਕਰਦੇ ਹਨ, ਕਦੇ ਵੀ ਇਸ ਤੋਂ ਉੱਪਰ ਉੱਠਣ ਦੀ ਕੋਸ਼ਿਸ਼ ਵੀ ਨਹੀਂ ਕਰਦੇ। ਸਮਾਜ-ਸੇਵੀ ਸੰਸਥਾਵਾਂ ਅਤੇ ਸਰਕਾਰਾਂ ਨੂੰ ਇਨ੍ਹਾਂ ਵੱਲ ਵਿਸ਼ੇਸ਼ ਧਿਆਨ ਦੀ ਲੋੜ ਹੈ। ਨਹੀਂ ਤਾਂ ਆਉਂਦੇ ਕੁਝ ਸਾਲਾਂ ਵਿਚ ਇਨ੍ਹਾਂ ਦੀ ਗਿਣਤੀ ਲੱਖਾਂ ਕਰੋੜਾਂ ਵਿਚ ਪਹੁੰਚ ਜਾਣੀ ਹੈ।

-ਅਸ਼ਵਨੀ ਕੁਮਾਰ ਪੰਡੋਰੀ
ਸ.ਸ.ਸ.ਸ. ਝੜੌਲੀ (ਗੁਰਦਾਸਪੁਰ)।

ਜੈਵਿਕ ਖੇਤੀ ਲਾਹੇਵੰਦ ਤਰੀਕਾ

ਕਈ ਜ਼ਿਲ੍ਹਿਆਂ 'ਚੋਂ ਆ ਰਹੀਆਂ ਤਾਜ਼ਾ ਰਿਪੋਰਟਾਂ ਤੋਂ ਪਤਾ ਚੱਲਿਆ ਕਿ ਸਾਡੀ ਧਰਤੀ ਮਾਂ ਨੂੰ ਪਿਆਰ ਕਰਨ ਵਾਲੇ ਸਾਡੇ ਦੇਸ਼ ਵਿਚ ਕੁਝ ਅਜਿਹੇ ਹੀਰੇ ਕਿਸਾਨ ਪੁੱਤ ਵੀ ਹਨ, ਜੋ ਆਪਣੀ ਧਰਤੀ ਮਾਂ ਨੂੰ ਜ਼ਹਿਰੀਲੀ ਹੋਣ ਤੋਂ ਰੋਕਣ ਲਈ ਰਸਾਇਣਕ ਖੇਤੀ ਦੀ ਬਜਾਏ 'ਜੈਵਿਕ ਖੇਤੀ' ਯਾਨੀ 'ਕੁਦਰਤੀ ਖੇਤੀ' ਨੂੰ ਤਰਜੀਹ ਦੇ ਰਹੇ ਨੇ, ਜੋ ਮਹਿੰਗੀਆਂ ਰੇਹਾਂ-ਸਪਰੇਆਂ ਕਰਨ ਵਾਲੇ ਕਿਸਾਨਾਂ ਲਈ ਇਕ ਮਿਸਾਲ ਵਜੋਂ ਉੱਭਰ ਕੇ ਸਾਹਮਣੇ ਆਏ ਹਨ। ਜਿਹੜੇ ਲਾਈਲੱਗ ਕਿਸਾਨ ਰਸਾਇਣਕ ਖੇਤੀ ਅਪਣਾ ਕੇ ਮਹਿੰਗੇ ਕੀਟਨਾਸ਼ਕ ਤੇ ਮਹਿੰਗੀਆਂ ਰੇਹਾਂ-ਸਪਰੇਆਂ ਖਰੀਦ ਕੇ ਕੰਪਨੀਆਂ ਅਤੇ ਡੀਲਰਾਂ ਦੀਆਂ ਤਿਜੌਰੀਆਂ ਭਰ ਰਹੇ ਹਨ ਤੇ ਧਰਤੀ ਦੀ ਹਿੱਕ 'ਤੇ ਜ਼ਹਿਰਾਂ ਦਾ ਛਿੜਕਾਅ ਕਰ ਰਹੇ ਹਨ। ਉਨ੍ਹਾਂ ਕਿਸਾਨ ਭਰਾਵਾਂ ਨੂੰ ਜੈਵਿਕ ਖੇਤੀ ਅਪਣਾਉਣ ਵਾਲੇ ਕਿਸਾਨਾਂ ਤੋਂ ਕੁਝ ਪ੍ਰੇਰਨਾ ਲੈਣੀ ਚਾਹੀਦੀ ਹੈ ਤਾਂ ਜੋ ਦੂਸ਼ਿਤ ਪਾਣੀ, ਖ਼ਤਰਨਾਕ ਬਿਮਾਰੀਆਂ, ਮਹਿੰਗਾਈ ਅਤੇ ਖ਼ੁਦਕੁਸ਼ੀਆਂ ਵਰਗੀਆਂ ਭੈੜੀਆਂ ਅਲਾਮਤਾਂ ਨੂੰ ਕੁਝ ਠੱਲ੍ਹ ਪੈ ਸਕੇ ਤੇ ਦੇਸ਼ ਦੀ ਲੀਹੋਂ ਲੱਥੀ ਕਿਸਾਨੀ ਨੂੰ ਲੀਹ 'ਤੇ ਲਿਆਉਣ ਲਈ ਅਤੇ ਸਮੁੱਚੇ ਦੇਸ਼ ਨੂੰ ਸਦੀਆਂ ਤਾਈਂ ਹਰਿਆ-ਭਰਿਆ ਰੱਖਣ ਲਈ ਜੈਵਿਕ ਖੇਤੀ ਲਾਹੇਵੰਦ ਤਰੀਕਾ ਹੈ। ਇਸ ਲਈ ਕਿਸਾਨ ਭਰਾਵਾਂ ਨੂੰ ਇਕੋ ਅਰਜ਼ੋਈ ਹੈ ਕਿ ਕੁਦਰਤੀ ਖੇਤੀ ਨੂੰ ਅਪਣਾਉਣ ਲਈ ਤੁਹਾਡੇ ਹੰਭਲੇ ਦੀ ਲੋੜ ਹੈ, ਨਹੀਂ ਤਾਂ ਸਾਡੀ ਇਹ ਉਪਜਾਊ ਧਰਤੀ ਆਉਣ ਵਾਲੀਆਂ ਨਸਲਾਂ ਨੂੰ ਅੰਨ ਦੀ ਥਾਂ ਜ਼ਹਿਰਾਂ ਪਰੋਸ ਕੇ ਦੇਵੇਗੀ।

-ਤਰਸੇਮ ਮਹਿਤੋ
ਪਿੰਡ ਬਈਏਵਾਲ (ਸੰਗਰੂਰ)।

8-08-2016

 ਲੋਕ ਸਭਾ 'ਚ ਚਰਚਾ

ਪਿਛਲੇ ਦਿਨੀਂ ਲੋਕ ਸਭਾ 'ਚ ਮਹਿੰਗਾਈ ਦੇ ਮੁੱਦੇ 'ਤੇ ਵੱਡੀ ਪੱਧਰ 'ਤੇ ਚਰਚਾ ਹੋਈ। ਅਸੀਂ ਚਾਹੁੰਦੇ ਹਾਂ ਕਿ ਮਹਿੰਗਾਈ ਦੇ ਮੁੱਦੇ 'ਤੇ ਚਰਚਾ ਵਾਰ-ਵਾਰ ਹੋਣੀ ਚਾਹੀਦੀ ਹੈ। ਕਿਉਂਕਿ ਪਿਛਲੇ ਲੰਮੇ ਸਮੇਂ ਤੋਂ ਖੁਰਾਕੀ ਵਸਤਾਂ ਦੀਆਂ ਕੀਮਤਾਂ ਅਮਰਵੇਲ ਵਾਂਗ ਵਧਦੀਆਂ ਹੀ ਜਾ ਰਹੀਆਂ ਹਨ। ਸਰਕਾਰਾਂ ਅਕਸਰ ਹੀ ਮਹਿੰਗਾਈ ਨੂੰ ਰੋਕਣ ਲਈ ਕੁਝ ਪ੍ਰਭਾਵੀ ਕਦਮ ਚੁੱਕਣ ਦੀ ਬਜਾਏ ਇਸ ਨੂੰ ਮੌਸਮ ਦੀ ਕਰੋਪੀ ਨਾਲ ਜੋੜ ਕੇ ਪੱਲਾ ਝਾੜ ਲੈਂਦੀਆਂ ਹਨ। ਅੱਜ ਦੇਸ਼ ਦੀ 85 ਫੀਸਦੀ ਜਨਤਾ ਮਹਿੰਗਾਈ ਦੀ ਚੱਕੀ ਵਿਚ ਪਿਸ ਰਹੀ ਹੈ। ਵੱਡੀ ਗਿਣਤੀ ਗੁਰਬਤ ਭਰਿਆ ਜੀਵਨ ਜਿਉਣ ਲਈ ਮਜਬੂਰ ਹੈ। ਇਹ ਵੀ ਸੱਚ ਹੈ ਕਿ ਆਮ ਨਾਗਰਿਕ ਨੂੰ ਦੋ ਵਕਤ ਦੀ ਰੋਟੀ ਦੀ ਚਿੰਤਾ 24 ਘੰਟੇ ਘੇਰੀ ਰੱਖਦੀ ਹੈ। ਮਹਿੰਗਾਈ ਅੱਗੇ ਗੋਡੇ ਟੇਕਦੀ ਜਾ ਰਹੀ ਜਨਤਾ ਦੀ ਬਾਂਹ ਫੜਨੀ ਅੱਜ ਜ਼ਰੂਰੀ ਹੋ ਗਈ ਹੈ। ਅਫ਼ਸੋਸ ਇਸ ਗੱਲ ਦਾ ਹੈ ਕਿ ਪਹਿਲੀ ਤੇ ਅੱਜ ਦੀ ਸਰਕਾਰ ਨੇ ਬਹੁਤਾ ਧਿਆਨ ਉਦਯੋਗਾਂ ਤੇ ਉਦਯੋਗਪਤੀਆਂ ਵੱਲ ਹੀ ਦਿੱਤਾ ਹੈ ਜਾਂ ਦਿੱਤਾ ਜਾ ਰਿਹਾ ਹੈ ਪਰ ਸੋਚਣ ਵਾਲੀ ਗੱਲ ਹੈ ਕਿ ਨਿਰਾ ਉਦਯੋਗੀਕਰਨ ਹੀ ਇਕ ਅਰਬ 27 ਕਰੋੜ ਲੋਕਾਂ ਦੀਆਂ ਲੋੜਾਂ ਪੂਰੀਆਂ ਨਹੀਂ ਕਰ ਸਕਦਾ। ਇਸ ਤਰ੍ਹਾਂ ਤਾਂ ਅਮੀਰ ਤੇ ਗਰੀਬ 'ਚ ਪਾੜਾ ਹੀ ਵਧਦਾ ਹੈ। ਮਹਿੰਗਾਈ, ਗਰੀਬੀ ਤੇ ਬੇਰੁਜ਼ਗਾਰੀ ਵਰਗੀ ਸਮੱਸਿਆ ਮੂੰਹ ਅੱਡੀ ਖੜ੍ਹੀ ਹੈ। ਲੋੜ ਹੈ ਸਮੁੱਚੇ ਦੇਸ਼ ਵਾਸੀਆਂ ਨੂੰ ਵਿਕਾਸ ਨਾਲ ਜੋੜਿਆ ਜਾਵੇ ਤੇ ਮਹਿੰਗਾਈ ਦੇ ਚੁੰਗਲ 'ਚੋਂ ਕੱਢਿਆ ਜਾਵੇ, ਨਾ ਕਿ ਜਨਤਾ ਨੂੰ ਮੁਢਲੀਆਂ ਲੋੜਾਂ 'ਚ ਹੀ ਉਲਝਾ ਕੇ ਰੱਖਿਆ ਜਾਵੇ।

-ਬੰਤ ਘੁਡਾਣੀ,
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ (ਲੁਧਿਆਣਾ)।

ਰੁੱਖ ਲਗਾਓ

ਰੁੱਖ ਹੀ ਮਨੁੱਖ ਦੇ ਸਹੀ ਜਿਊਣ ਦਾ ਸਾਧਨ ਹਨ। ਸਾਡੀ ਰੋਜ਼ਮਰ੍ਹਾ ਦੀਆਂ ਜ਼ਰੂਰਤਾਂ ਰੁੱਖ ਹੀ ਪੂਰੀਆਂ ਕਰਦੇ ਹਨ। ਰੁੱਖ ਮਨੁੱਖ ਦੇ ਜਨਮ ਤੋਂ ਲੈ ਕੇ ਮਰਨ ਤੱਕ ਨਾਲ-ਨਾਲ ਚਲਦੇ ਹਨ। ਜੇਕਰ ਰੁੱਖ ਜ਼ਿਆਦਾ ਹੋਣਗੇ ਤਾਂ ਵਰਖਾ ਵੀ ਸਮੇਂ ਸਿਰ ਹੋਵੇਗੀ ਤੇ ਪਾਣੀ ਦੀ ਵੀ ਪੂਰਤੀ ਹੋਵੇਗੀ। ਹੁਣ ਵੀ ਵੇਲਾ ਹੈ, ਅਜੇ ਕੁਝ ਨਹੀਂ ਵਿਗੜਿਆ। ਹਰ ਮਨੁੱਖ ਆਪਣੀ ਨਿੱਜੀ ਜ਼ਿੰਮੇਵਾਰੀ ਸਮਝੇ ਤੇ ਰੁੱਖ ਲਗਾਵੇ ਤਾਂ ਸਾਡੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਢੰਗ ਨਾਲ ਆਪਣਾ ਜੀਵਨ ਬਤੀਤ ਕਰ ਸਕਣਗੀਆਂ। ਇਹ ਮੌਸਮ ਰੁੱਖ ਲਗਾਉਣ ਦਾ ਹੈ, ਬਰਸਾਤ 'ਚ ਲਾਏ ਰੁੱਖ ਜ਼ਮੀਨ 'ਚ ਸਿੱਲ੍ਹ ਹੋਣ ਕਰਕੇ ਛੇਤੀ ਜੜ੍ਹ ਫੜ ਲੈਂਦੇ ਹਨ। ਜਿਥੇ ਅਸੀਂ ਉਤਸ਼ਾਹ ਨਾਲ ਰੁੱਖ ਲਾਉਂਦੇ ਹਾਂ, ਉਥੇ ਨਾਲ ਦੀ ਨਾਲ ਸਾਨੂੰ ਇਨ੍ਹਾਂ ਦੀ ਸਾਂਭ-ਸੰਭਾਲ ਦਾ ਵੀ ਖਾਸ ਖਿਆਲ ਰੱਖਣਾ ਚਾਹੀਦਾ ਹੈ।

-ਤਿਲਕ ਰਾਜ ਰਾਜੂ,
ਬਸੀ ਗੁਲਾਮ ਹੁਸੈਨ, ਹੁਸ਼ਿਆਰਪੁਰ-146021. ਮੋਬਾ: 93650-42793

ਆਜ਼ਾਦ ਦੇਸ਼ ਦੇ ਗੁਲਾਮ ਵਾਸੀ

ਸਾਡੇ ਦੇਸ਼ ਨੂੰ ਆਜ਼ਾਦ ਹੋਇਆਂ ਅੱਜ ਕਈ ਸਾਲ ਬੀਤ ਗਏ ਹਨ ਪਰ ਕੀ ਅਸੀਂ ਆਜ਼ਾਦ ਹਾਂ? ਨਹੀਂ, ਸੱਚ ਤਾਂ ਇਹ ਹੈ ਕਿ ਅਸੀਂ ਅੱਜ ਵੀ ਗੁਲਾਮ ਹਾਂ। ਬਸ ਗੁਲਾਮੀ ਦੀ ਪਰਿਭਾਸ਼ਾ ਬਦਲੀ ਹੈ। ਅਸੀਂ ਅੱਜ ਵੀ ਗੁਲਾਮ ਹਾਂ ਆਪਣੀ ਸੌੜੀ ਮਾਨਸਿਕਤਾ ਦੇ। ਜਿਸ ਦੇਸ਼ ਵਿਚ ਰੋਜ਼ ਧਰਮ ਦੇ ਨਾਂਅ 'ਤੇ, ਜਾਤ ਦੇ ਨਾਂਅ 'ਤੇ ਖੂਨ-ਖਰਾਬਾ ਹੋਵੇ, ਰੋਜ਼ ਮਾਸੂਮ ਧੀਆਂ-ਭੈਣਾਂ ਦੀ ਇੱਜ਼ਤ ਤਾਰ-ਤਾਰ ਕੀਤੀ ਜਾਵੇ, ਗਰੀਬੀ, ਰਿਸ਼ਵਤਖੋਰੀ, ਭ੍ਰਿਸ਼ਟਾਚਾਰ ਜਿਸ ਦੇਸ਼ ਦੇ ਸੂਤਰਧਾਰ ਹੋਣ, ਕੀ ਉਹ ਦੇਸ਼ ਆਜ਼ਾਦ ਹੋ ਸਕਦਾ ਹੈ? ਸੱਚ ਤਾਂ ਇਹੀ ਹੈ ਕਿ ਸਾਡੀ ਗੁਲਾਮੀ ਦਾ ਰੂਪ ਬਦਲ ਗਿਆ ਹੈ। ਪਹਿਲਾਂ ਅਸੀਂ ਅੰਗਰੇਜ਼ਾਂ ਦੇ ਗੁਲਾਮ ਸੀ, ਹੁਣ ਅਸੀਂ ਆਪਣੇ ਹੀ ਸੌੜੇ ਰੀਤੀ-ਰਿਵਾਜਾਂ, ਸੌੜੀ ਸੋਚ ਤੇ ਝੂਠੀ ਮਾਣ-ਮਰਿਆਦਾ ਦੇ ਗੁਲਾਮ ਬਣ ਗਏ ਹਾਂ। ਅਸੀਂ ਉਸ ਦਿਨ ਆਜ਼ਾਦ ਹੋਵਾਂਗੇ, ਜਦੋਂ ਅਨਪੜ੍ਹਤਾ, ਗਰੀਬੀ, ਭੁੱਖਮਰੀ, ਭ੍ਰਿਸ਼ਟਾਚਾਰ, ਭੇਦ-ਭਾਵ ਜਿਹੇ ਦੁਸ਼ਮਣਾਂ ਨੂੰ ਖਤਮ ਕਰਕੇ ਸਰਬ ਸਾਂਝੀਵਾਲਤਾ ਦਾ ਸੰਦੇਸ਼ ਦੇਣਗੇ। ਜਿਸ ਦਿਨ ਸਾਡੀਆਂ ਧੀਆਂ-ਭੈਣਾਂ ਇਸ ਸਮਾਜ ਵਿਚ ਸੁਰੱਖਿਅਤ ਹੋਣਗੀਆਂ ਅਤੇ ਇਨਸਾਨੀਅਤ ਹੀ ਸਭ ਦੀ ਪਹਿਚਾਣ ਹੋਵੇਗੀ।

-ਜਸਪ੍ਰੀਤ ਕੌਰ ਸੰਘਾ,
ਪਿੰਡ ਤਨੂੰਲੀ (ਹੁਸ਼ਿਆਰਪੁਰ)। ਮੋਬਾ: 99150-33176

ਸਮਾਜ ਤੇ ਅਪਰਾਧ

ਅੱਜਕਲ੍ਹ ਅਖ਼ਬਾਰਾਂ, ਟੀ. ਵੀ., ਫਿਲਮਾਂ ਅਤੇ ਆਮ ਜਨ-ਜੀਵਨ ਵਿਚ ਬਹੁਤ ਸਾਰੇ ਅਪਰਾਧ ਦੇਖਣ, ਸੁਣਨ ਅਤੇ ਪੜ੍ਹਨ ਲਈ ਮਿਲਦੇ ਹਨ। ਸਮਾਜ ਵਿਚੋਂ ਅਪਰਾਧਾਂ ਨੂੰ ਘੱਟ ਕਰਨ ਲਈ ਪਹਿਲਾਂ ਅਗਿਆਨਤਾ ਨੂੰ ਖਤਮ ਕਰਨਾ ਪਵੇਗਾ। ਅਗਿਆਨਤਾ ਨੂੰ ਖਤਮ ਕਰਨ ਲਈ ਸਰਕਾਰੀ ਅਤੇ ਗ਼ੈਰ-ਸਰਕਾਰੀ ਏਜੰਸੀਆਂ, ਮੀਡੀਆ ਅਤੇ ਸਾਨੂੰ ਸਾਰਿਆਂ ਨੂੰ ਕੋਸ਼ਿਸ਼ ਕਰਨੀ ਪਵੇਗੀ, ਤਾਂ ਕਿ ਸਮਾਜ ਵਿਚੋਂ ਅਪਰਾਧੀਕਰਨ ਰੋਕਿਆ ਜਾ ਸਕੇ। ਫਿਲਮਾਂ ਵਿਚ ਅਤੇ ਟੀ. ਵੀ. ਸੀਰੀਅਲਾਂ ਵਿਚ ਅਪਰਾਧੀਆਂ ਨੂੰ ਅਪਰਾਧ ਕਰਦੇ ਹੋਏ ਤਾਂ ਦਿਖਾਇਆ ਜਾਂਦਾ ਹੈ ਪਰ ਅਪਰਾਧ ਕਰਨ ਪਿੱਛੋਂ ਉਸ ਦੇ ਨਤੀਜੇ ਭਾਵ ਉਸ ਦੀ ਸਜ਼ਾ ਜਾਂ ਹੁੰਦੀ ਬੁਰੀ ਹਾਲਤ ਬਾਰੇ ਨਹੀਂ ਦਿਖਾਇਆ ਜਾਂਦਾ। ਇਹ ਵਿਖਾਉਣਾ ਲਾਜ਼ਮੀ ਹੈ ਤਾਂ ਕਿ ਫਿਲਮਾਂ ਅਤੇ ਟੀ. ਵੀ. ਸੀਰੀਅਲ ਦੇਖਣ ਵਾਲੇ ਲੋਕ ਸਬਕ ਸਿੱਖ ਸਕਣ ਅਤੇ ਅਪਰਾਧੀਕਰਨ ਨੂੰ ਠੱਲ੍ਹ ਪੈ ਸਕੇ।

-ਅਵਤਾਰ ਸਿੰਘ ਕੈਂਥ,
ਪਿੰਡ ਝੋਰੜਾਂ (ਲੁਧਿਆਣਾ)।

ਤਿੰਨ ਵੱਡੀਆਂ ਸਮੱਸਿਆਵਾਂ

ਪੁਰਾਣੇ ਸਮਿਆਂ ਵਿਚ ਲੋਕ ਰੇਡੀਓ ਨੂੰ ਹੀ ਹੌਲੀ ਆਵਾਜ਼ ਵਿਚ ਸੁਣਦੇ ਸਨ ਅਤੇ ਵਿਆਹਾਂ-ਸ਼ਾਦੀਆਂ ਦੇ ਮੌਕੇ 'ਤੇ ਵੀ ਜ਼ਿਆਦਾ ਸ਼ੋਰ-ਸ਼ਰਾਬਾ ਨਹੀਂ ਕੀਤਾ ਜਾਂਦਾ ਸੀ ਪਰ ਹੁਣ ਜ਼ਮਾਨਾ ਬਦਲ ਗਿਆ ਹੈ। ਅਜੋਕੇ ਸਮੇਂ ਵਿਚ ਲੋਕ ਵਿਆਹਾਂ-ਸ਼ਾਦੀਆਂ ਦੇ ਮੌਕੇ 'ਤੇ ਉੱਚੀ ਸਪੀਕਰ ਲਗਾ ਕੇ ਸ਼ੋਰ ਪ੍ਰਦੂਸ਼ਣ ਪੈਦਾ ਕਰਦੇ ਹਨ। ਅੱਜ ਦੇ ਨੌਜਵਾਨ ਗੱਡੀਆਂ-ਕਾਰਾਂ ਵਿਚ ਉੱਚੀ ਗਾਣੇ ਲਗਾਉਂਦੇ ਹਨ ਅਤੇ ਹਾਰਨਾਂ ਵੀ ਵਜਾਉਂਦੇ ਹਨ। ਘਰਾਂ ਵਿਚ ਨੌਜਵਾਨ ਉੱਚੀ ਆਵਾਜ਼ ਵਿਚ ਗਾਣੇ ਸੁਣਦੇ ਹਨ, ਭਾਵੇਂ ਘਰ ਵਿਚ ਕੋਈ ਬਜ਼ੁਰਗ ਬਿਮਾਰ ਪਿਆ ਹੋਵੇ, ਉਨ੍ਹਾਂ ਨੂੰ ਕੋਈ ਫਰਕ ਨਹੀਂ ਪੈਂਦਾ। ਇਸ ਤੋਂ ਬਾਅਦ ਦੂਜੀ ਸਮੱਸਿਆ ਹੈ ਹਵਾ ਪ੍ਰਦੂਸ਼ਣ। ਫੈਕਟਰੀਆਂ ਦਾ ਧੂੰਆਂ ਹਵਾ ਵਿਚ ਮਿਲ ਕੇ ਉਸ ਨੂੰ ਪ੍ਰਦੂਸ਼ਿਤ ਕਰਦਾ ਹੈ। ਲੋਕ ਆਪਣੇ ਘਰਾਂ ਦਾ ਕੂੜਾ-ਕਰਕਟ ਖੁੱਲ੍ਹੇ ਵਿਚ ਜਲਾਉਂਦੇ ਹਨ ਅਤੇ ਹਵਾ ਨੂੰ ਪ੍ਰਦੂਸ਼ਿਤ ਕਰਦੇ ਹਨ। ਟ੍ਰੈਫਿਕ ਸਮੇਂ ਵਾਹਨਾਂ ਵਿਚੋਂ ਨਿਕਲਦਾ ਧੂੰਆਂ ਵੀ ਹਵਾ ਨੂੰ ਪ੍ਰਦੂਸ਼ਿਤ ਕਰਨ ਵਾਲਾ ਮੁੱਖ ਕਾਰਨ ਹੈ। ਤੀਜੀ ਸਮੱਸਿਆ ਹੈ ਪਾਣੀ ਦਾ ਪ੍ਰਦੂਸ਼ਣ। ਫੈਕਟਰੀਆਂ ਵਿਚੋਂ ਨਿਕਲਣ ਵਾਲੇ ਵਾਧੂ ਪਦਾਰਥ ਨਦੀਆਂ ਦੇ ਪਾਣੀ ਵਿਚ ਮਿਲ ਕੇ ਉਸ ਨੂੰ ਪ੍ਰਦੂਸ਼ਿਤ ਕਰਦੇ ਹਨ। ਜੇਕਰ ਅਸੀਂ ਚਾਹੀਏ ਤਾਂ ਅਸੀਂ ਇਨ੍ਹਾਂ ਸਮੱਸਿਆਵਾਂ 'ਤੇ ਰੋਕ ਲਗਾ ਸਕਦੇ ਹਾਂ। ਬਾਹਰਲੇ ਦੇਸ਼ਾਂ ਵਿਚ ਜਾ ਕੇ ਅਸੀਂ ਜੋ ਢੰਗ ਅਪਣਾਉਂਦੇ ਹਾਂ, ਉਹ ਆਪਣੇ ਇਥੇ ਵੀ ਅਪਣਾ ਸਕਦੇ ਹਾਂ। ਇਸੇ ਤਰ੍ਹਾਂ ਹੀ ਸਾਡਾ ਸੂਬਾ ਹੀ ਨਹੀਂ, ਬਲਕਿ ਸਾਡਾ ਦੇਸ਼ ਵੀ ਸਫ਼ਾਈ ਵਾਲਾ ਦੇਸ਼ ਕਹਾਏਗਾ।

-ਮਮਤਾ,
ਜਨ-ਸੰਚਾਰ ਵਿਭਾਗ, ਐੱਚ. ਐੱਮ. ਵੀ., ਜਲੰਧਰ।

 

5-8-2016

ਖ਼ੁਦਕੁਸ਼ੀਆਂ ਵਿਚ ਵਾਧਾ ਕਿਉਂ?

ਅੱਜਕਲ੍ਹ ਹਰ ਰੋਜ਼ ਅਖ਼ਬਾਰਾਂ ਵਿਚ ਖ਼ੁਦਕੁਸ਼ੀਆਂ ਦੀਆਂ ਖ਼ਬਰਾਂ ਪੜ੍ਹਨ ਨੂੰ ਮਿਲ ਰਹੀਆਂ ਹਨ। ਖ਼ੁਦਕੁਸ਼ੀ ਦਾ ਮਤਲਬ ਆਪਣੀ ਜ਼ਿੰਦਗੀ ਤੋਂ ਹਾਰ ਜਾਣਾ ਹੈ। ਅਸੀਂ ਜ਼ਿੰਦਗੀ ਨੂੰ ਜਿੱਤਣਾ ਹੈ, ਹਾਰਨਾ ਨਹੀਂ। ਜ਼ਿੰਦਗੀ ਵਿਚ ਆਉਣ ਵਾਲੀਆਂ ਹਰ ਮੁਸ਼ਕਿਲਾਂ ਦਾ ਹਮੇਸ਼ਾ ਡਟ ਕੇ ਸਾਹਮਣਾ ਕਰਨਾ ਚਾਹੀਦਾ ਹੈ। ਮਾਪਿਆਂ ਨੂੰ ਆਪਣੇ ਬੱਚਿਆਂ ਦੇ ਨਾਲ ਖੜ੍ਹੇ ਹੋਣਾ ਚਾਹੀਦਾ ਹੈ। ਉਨ੍ਹਾਂ ਨੂੰ ਅੱਗੇ ਵਧਣ ਦਾ ਹੌਸਲਾ ਦੇਣਾ ਚਾਹੀਦਾ ਹੈ। ਚੰਗਾ ਜਾਂ ਬੁਰਾ ਸਮਾਂ ਤਾਂ ਚਲਦਾ ਹੀ ਰਹਿੰਦਾ ਹੈ। ਥੋੜ੍ਹਾ ਸਬਰ ਕਰਨਾ ਹੀ ਔਖਾ ਹੁੰਦਾ ਹੈ। ਜਿੱਤ ਜਾਂ ਹਾਰ ਤਾਂ ਜ਼ਿੰਦਗੀ ਦਾ ਇਕ ਹਿੱਸਾ ਹਨ। ਨੌਕਰੀਆਂ ਜਾਂ ਪੈਸਾ ਤਾਂ ਆ ਹੀ ਜਾਂਦਾ ਹੈ, ਪਰ ਇਸ ਦੁਨੀਆ ਤੋਂ ਗਿਆ ਬੰਦਾ ਕਦੀ ਵਾਪਸ ਨਹੀਂ ਆਉਂਦਾ। ਸੋ, ਹਰ ਕਦਮ ਸੋਚ ਕੇ ਚੱਲੋ।

-ਹਰਿੰਦਰ ਸਿੰਘ ਗਰਚਾ
ਆਤਮ ਨਗਰ, ਜਗਰਾਉਂ।

ਮਸਲਾ ਰਾਖਵੇਂਕਰਨ ਦਾ

ਸਰਕਾਰੀ ਵਿਭਾਗਾਂ ਵਿਚ ਨੌਕਰੀਆਂ ਦੇ ਰਾਖਵੇਂਕਰਨ ਦਾ ਮਸਲਾ ਅੱਜਕਲ੍ਹ ਖੂਬ ਭਖ ਰਿਹਾ ਹੈ। ਪਿਛਲੇ ਦਿਨੀਂ ਇਸੇ ਸਬੰਧ ਵਿਚ ਹੋਏ ਪ੍ਰਦਰਸ਼ਨਾਂ 'ਚ ਬਹੁਤ ਭੰਨ-ਤੋੜ ਹੋਈ ਅਤੇ ਸ਼ਰਮਨਾਕ ਹੱਦ ਤੱਕ ਮੁਜ਼ਾਹਰੇ ਕੀਤੇ ਗਏ। ਇਨ੍ਹਾਂ ਪ੍ਰਦਰਸ਼ਨਾਂ ਵਿਚ ਲੋਕਾਂ ਨੂੰ ਕਈ ਤਰ੍ਹਾਂ ਦੀਆਂ ਮੁਸ਼ਕਿਲਾਂ ਦਾ ਸਾਹਮਣਾ ਵੀ ਕਰਨਾ ਪਿਆ। ਹੁਣ ਸਮਾਂ ਆ ਗਿਆ ਹੈ ਕਿ ਮਾਣਯੋਗ ਸੁਪਰੀਮ ਕੋਰਟ ਇਹ ਮਾਮਲਾ ਆਪਣੇ ਹੱਥ ਵਿਚ ਲੈ ਕੇ ਇਸ ਦਾ ਸਥਾਈ ਹੱਲ ਕਰੇ ਤਾਂ ਜੋ ਦੇਸ਼ ਵਿਚ ਅਮਨ-ਚੈਨ ਦੀ ਸਥਿਤੀ ਪੈਦਾ ਹੋ ਸਕੇ। ਰਾਖਵੇਂਕਰਨ ਦਾ ਆਧਾਰ ਆਰਥਿਕਤਾ ਹੋਣਾ ਚਾਹੀਦਾ ਹੈ ਤਾਂ ਜੋ ਇਸ ਹੱਕ ਦਾ ਲਾਭ ਗ਼ਰੀਬੀ ਰੇਖਾ ਤੋਂ ਥੱਲੇ ਰਹਿ ਰਹੇ ਲੋਕ ਉਠਾ ਸਕਣ।

-ਮਾ: ਮਹਿੰਦਰ ਸਿੰਘ ਬਾਜਵਾ
ਮਸੀਤਾਂ, ਜ਼ਿਲ੍ਹਾ ਕਪੂਰਥਲਾ।

ਵਧਦੇ ਸੜਕ ਹਾਦਸੇ

ਸੜਕਾਂ ਉੱਤੇ ਆਵਾਜਾਈ ਦਿਨ-ਬ-ਦਿਨ ਵਧਦੀ ਜਾ ਰਹੀ ਹੈ। ਸੜਕਾਂ ਉੱਤੇ ਬੰਦਿਆਂ ਤੇ ਮਾਲ ਦੀ ਢੋਆ-ਢੁਆਈ ਕਰਦੇ ਟਰੱਕਾਂ, ਬੱਸਾਂ, ਕਾਰਾਂ ਆਦਿ ਦਾ ਤਾਂਤਾ ਲੱਗਿਆ ਰਹਿੰਦਾ ਹੈ। ਕੰਮਾਂਕਾਰਾਂ ਆਦਿ ਦੇ ਵਧਣ ਕਾਰਨ ਲੋਕਾਂ ਵਿਚ ਕਾਹਲ ਵਧ ਗਈ ਹੈ ਅਤੇ ਠਰ੍ਹੰਮਾ ਘਟ ਗਿਆ ਹੈ। ਦੁਰਘਟਨਾ ਦਾ ਇਕ ਕਾਰਨ ਹਰ ਇਕ ਦਾ ਤੇਜ਼ ਸਪੀਡ ਨਾਲ ਚਲਣਾ ਹੈ। ਬਹੁਤ ਸਾਰੀਆਂ ਦੁਰਘਟਨਾਵਾਂ ਡਰਾਈਵਰਾਂ ਦੀ ਲਾਪਰਵਾਹੀ ਤੇ ਸ਼ਰਾਬ ਪੀ ਕੇ ਗੱਡੀ ਚਲਾਉਣ ਕਰਕੇ ਹੁੰਦੀਆਂ ਹਨ। ਉਨ੍ਹਾਂ ਦੁਆਰਾ ਵਰਤੀ ਸਾਵਧਾਨੀ ਨਾਲ ਹੀ ਇਸ ਸਮੱਸਿਆ ਨੂੰ ਨਜਿੱਠਿਆ ਜਾ ਸਕਦਾ ਹੈ। ਦੁਰਘਟਨਾਵਾਂ ਤੋਂ ਬਚਣ ਲਈ ਸਾਨੂੰ ਕਾਹਲੀ ਨਹੀਂ ਕਰਨੀ ਚਾਹੀਦੀ। ਜੇਕਰ ਸੜਕਾਂ 'ਤੇ ਆਵਾਜਾਈ ਸਮੇਂ ਆਪਣਾ ਤੇ ਦੂਜਿਆਂ ਦਾ ਖਿਆਲ ਰੱਖਿਆ ਜਾਵੇ ਤਾਂ ਦੁਰਘਟਨਾਵਾਂ ਟਲ ਸਕਦੀਆਂ ਹਨ।

-ਅਵਤਾਰ ਸਿੰਘ ਕੈਂਥ
ਪਿੰਡ ਝੋਰੜਾਂ, ਜ਼ਿਲ੍ਹਾ ਲੁਧਿਆਣਾ।

3-8-2016

 ਪੰਜਾਬੀ ਅਧਿਆਪਕਾਂ ਨਾਲ ਧੱਕਾ ਕਿਉਂ?
ਪੰਜਾਬੀ ਅਧਿਆਪਕ ਜੋ ਆਪਣੀ ਮਾਂ-ਬੋਲੀ ਨੂੰ ਪਿਆਰ ਕਰਦੇ ਹਨ, ਅੱਜ ਆਪਣੇ ਹੀ ਵਿਭਾਗ ਦੁਆਰਾ ਲਿਤਾੜੇ ਜਾ ਰਹੇ ਹਨ। ਪਹਿਲੀ ਵਾਰ ਜਦੋਂ 2012 ਵਿਚ ਪੰਜਾਬੀ ਵਿਸ਼ੇ ਦੇ 381 ਲੈਕਚਰਾਰ ਪਦਉਨਤ ਕੀਤੇ ਗਏ ਤਾਂ ਉਦੋਂ ਮਾਤ ਭਾਸ਼ਾ ਦੇ ਕੇਵਲ 55 ਅਧਿਆਪਕ ਹੀ ਲੈਕਚਰਾਰ ਪਦਉਨਤ ਹੋਏ। ਐਸ.ਐਸ.-177, ਗਣਿਤ 69, ਸਾਇੰਸ 67, ਡੀ.ਪੀ. 11 ਅਤੇ ਹਿੰਦੀ ਵਿਸ਼ੇ ਦੇ 2 ਅਧਿਆਪਕ ਕੁੱਲ 326 ਲੈਕਚਰਾਰ ਗ਼ੈਰ-ਪੰਜਾਬੀ ਵਿਸ਼ਿਆਂ ਦੇ ਪਦਉਨਤ ਹੋ ਗਏ। ਫਿਰ 2014 ਵਿਚ ਪੰਜਾਬੀ ਲੈਕਚਰਾਰਾਂ ਦੀਆਂ 371 ਪਦਉਨਤੀਆਂ ਵਿਚ ਮਾਂ-ਬੋਲੀ ਦੇ ਕੇਵਲ 58 ਅਧਿਆਪਕ ਹੀ ਪ੍ਰਮੋਟ ਹੋ ਸਕੇ ਜਦਕਿ ਐਸ.ਐਸ. 154, ਗਣਿਤ 67, ਸਾਇੰਸ 78, ਡੀ.ਪੀ.ਆਈ. 8 ਅਤੇ ਹਿੰਦੀ 6 ਅਧਿਆਪਕ ਅਰਥਾਤ 313 ਅਧਿਆਪਕ ਗ਼ੈਰ ਪੰਜਾਬੀ ਵਿਸ਼ਿਆਂ ਦੇ ਪੰਜਾਬੀ ਲੈਕਚਰਾਰ ਬਣ ਗਏ। ਹਾਲ ਹੀ ਵਿਚ 3 ਜੁਲਾਈ, 2016 ਨੂੰ 520 ਪੰਜਾਬੀ ਪਦਉਨਤ ਪੰਜਾਬੀ ਲੈਕਚਰਾਰਾਂ ਵਿਚ 373 ਸ਼ੁੱਧ ਪੰਜਾਬੀ ਵਿਸ਼ੇ ਦੇ ਹਨ। ਪ੍ਰੰਤੂ ਇਸ ਵਾਰ ਵੀ ਐਸ.ਐਸ. 72, ਸਾਇੰਸ 24, ਗਣਿਤ 43, ਹਿੰਦੀ 7 ਅਤੇ ਅੰਗਰੇਜ਼ੀ-1, ਕੁੱਲ 147 ਲੈਕਚਰਾਰ ਗ਼ੈਰ-ਪੰਜਾਬੀ ਵਿਸ਼ਿਆਂ ਦੇ ਪ੍ਰਮੋਟ ਹੋਏ ਹਨ। ਬੜੀ ਹੈਰਾਨੀ ਦੀ ਗੱਲ ਹੈ ਕਿ ਪਿਛਲੇ 4 ਸਾਲਾਂ ਦੌਰਾਨ ਪੰਜਾਬੀ ਲੈਕਚਰਾਰਾਂ ਦੀਆਂ ਕੁੱਲ 1272 ਪਦਉਨਤੀਆਂ ਵਿਚ ਪਹਿਲੀ ਜਮਾਤ ਤੋਂ ਐਮ.ਏ. ਤੱਕ ਪੰਜਾਬੀ ਮਾਂ-ਬੋਲੀ ਨੂੰ ਵਿਸ਼ੇ ਵਜੋਂ ਪੜ੍ਹਨ ਵਾਲੇ ਕੇਵਲ 486 ਪੰਜਾਬੀ ਲੈਕਚਰਾਰ ਹੀ ਪਦਉਨਤ ਹੋਏ ਹਨ ਜੋ ਕੇਵਲ 38.20 ਫ਼ੀਸਦੀ ਹੀ ਬਣਦੇ ਹਨ, ਜਦਕਿ ਗ਼ੈਰ-ਪੰਜਾਬੀ ਵਿਸ਼ਿਆਂ ਦੇ ਨਕਲੀ ਲੈਕਚਰਾਰਾਂ ਦੀ ਗਿਣਤੀ 786 ਹੈ, ਜੋ 61.79 ਫ਼ੀਸਦੀ ਬਣਦੇ ਹਨ, ਜਿਨ੍ਹਾਂ ਨੇ ਪੰਜਾਬੀ ਵਿਸ਼ਾ ਕੇਵਲ ਦਸਵੀਂ ਤੱਕ ਹੀ ਪੜ੍ਹਿਆ ਸੀ ਅਤੇ ਪ੍ਰੋਫੈਸ਼ਨਲ ਡਿਗਰੀ ਬੀ ਐੱਡ ਵਿਚ ਵੀ ਉਨ੍ਹਾਂ ਨੇ ਪੰਜਾਬੀ ਨੂੰ ਟੀਚਿੰਗ ਵਿਸ਼ੇ ਵਜੋਂ ਨਹੀਂ ਪੜ੍ਹਿਆ। ਉਪਰੋਕਤ ਪੰਜਾਬੀ ਲੈਕਚਰਾਰ ਵਿਸ਼ਾ ਮਾਹਿਰ ਨਹੀਂ ਹੋ ਸਕਦੇ ਅਤੇ ਨਾ ਹੀ ਉਹ ਵਿਦਿਆਰਥੀਆਂ ਨਾਲ ਨਿਆਂ ਕਰ ਸਕਦੇ ਹਨ। ਫਿਰ ਨਤੀਜੇ ਵਧੀਆ ਹੋਣ ਦੀ ਆਸ ਕਿਵੇਂ ਰੱਖੀ ਜਾ ਸਕਦੀ ਹੈ। ਜੇਕਰ ਅਸੀਂ ਸਿੱਖਿਆ ਅਧਿਕਾਰ ਕਾਨੂੰਨ 2009 ਨੂੰ ਚੈਲਿੰਜ ਕਰ ਸਕਦੇ ਹਾਂ ਜੋ ਬੱਚਿਆਂ ਦਾ ਨੁਕਸਾਨ ਕਰ ਰਿਹਾ ਹੈ ਤਾਂ ਫਿਰ ਇਸ ਨਿਯਮ ਨੂੰ ਕਿਉਂ ਨਹੀਂ? 20 ਸਾਲ ਤੱਕ ਮੈਥ, ਸਾਇੰਸ, ਹਿੰਦੀ, ਅੰਗਰੇਜ਼ੀ, ਸਰੀਰਕ ਸਿੱਖਿਆ ਪੜ੍ਹਾਉਣ ਵਾਲੇ ਨੂੰ ਜੇ ਤੁਸੀਂ ਉਸ ਦੀ ਸੇਵਾ ਦਾ ਲਾਭ ਦੇਣਾ ਚਾਹੁੰਦੇ ਹੋ ਤਾਂ ਇਹ ਉਸ ਦੇ ਵਿਸ਼ੇ ਵਿਚ ਹੀ ਹੋਵੇ ਨਾ ਕਿ ਉਸ ਨੂੰ ਪੰਜਾਬੀ ਲੈਕਚਰਾਰ ਬਣਾ ਦੇਵੋ। ਵਿਸ਼ੇ ਦਾ ਮਾਹਿਰ ਅਧਿਆਪਕ ਹੀ ਵਿਸ਼ੇ ਨਾਲ ਇਨਸਾਫ਼ ਕਰ ਸਕਦਾ ਹੈ, ਦੂਜਾ ਵਿਸ਼ਾ ਮਾਹਿਰ ਨਹੀਂ। ਮੇਰੀ ਬੇਨਤੀ ਹੈ ਕਿ ਪੰਜਾਬੀ ਅਧਿਆਪਕ ਦਾ ਮਾਣ-ਸਤਿਕਾਰ ਕਾਇਮ ਰੱਖਿਆ ਜਾਵੇ। ਸਿੱਖਿਆ ਵਿਭਾਗ ਵਿਚਾਲੇ ਇਹੋ ਜਿਹੇ ਪੁਰਾਣੇ ਨਿਯਮ ਤੁਰੰਤ ਬਦਲੇ ਜਾਣ।


-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀ ਖ਼ਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।


ਦਲਿਤਾਂ 'ਤੇ ਹਮਲੇ

ਪਿਛਲੇ ਸਮੇਂ 'ਤੇ ਨਿਗ੍ਹਾ ਮਾਰੀ ਜਾਵੇ ਤਾਂ ਪਿਛਲੇ ਅਤੇ ਅੱਜ ਦੇ ਸਮੇਂ ਵਿਚ ਕੋਈ ਜ਼ਿਆਦਾ ਫਰਕ ਨਜ਼ਰ ਨਹੀਂ ਆਉਂਦਾ। ਦਲਿਤਾਂ 'ਤੇ ਪਹਿਲਾਂ ਦੀ ਤਰ੍ਹਾਂ ਹੀ ਹਮਲੇ ਹੋਣਾ ਇਸ ਗੱਲ ਦੀ ਗਵਾਹੀ ਭਰਦਾ ਹੈ। ਪਰ ਗੱਲ ਸਮਝ ਤੋਂ ਬਾਹਰ ਲਗਦੀ ਹੈ ਕਿ ਊਚ-ਨੀਚ, ਛੂਆ-ਛਾਤ ਦਾ ਪਾੜਾ ਕਿਹੜੀ ਸਦੀ ਵਿਚ ਖਤਮ ਹੋਊ। ਭਾਵੇਂ ਕੇਂਦਰ ਸਰਕਾਰਾਂ ਅਤੇ ਰਾਜ ਸਰਕਾਰਾਂ ਇਸ ਛੂਆ-ਛਾਤ ਦੀ ਬਿਮਾਰੀ ਨੂੰ ਜੜ੍ਹੋਂ ਪੁੱਟਣ ਦਾ ਸੰਕਲਪ ਲੈਂਦੀਆਂ ਹਨ ਪ੍ਰੰਤੂ ਇਸ ਬਿਮਾਰੀ ਦਾ ਇਲਾਜ ਹੋਣਾ ਅਜੇ ਬਾਕੀ ਹੈ। ਅੱਜ ਦਾ ਯੁੱਗ ਬਹੁਤ ਹੀ ਪੜ੍ਹਿਆ-ਲਿਖਿਆ ਯੁੱਗ ਹੈ। ਸੋ, ਸਾਨੂੰ ਜਾਤਾਂ-ਪਾਤਾਂ ਦਾ ਵਿਤਕਰਾ ਹਮੇਸ਼ਾ-ਹਮੇਸ਼ਾ ਲਈ ਖਤਮ ਕਰਨ ਦਾ ਪ੍ਰਣ ਲੈਣਾ ਚਾਹੀਦਾ ਹੈ ਅਤੇ ਸਾਰੀ ਹੀ ਅਵਾਮ ਦਾ ਇਹ ਮੁਢਲਾ ਫਰਜ਼ ਬਣਦਾ ਹੈ ਕਿ ਜਿਥੇ ਕਿਤੇ ਵੀ ਦਲਿਤ ਪਰਿਵਾਰ ਨਾਲ ਜ਼ਬਰਦਸਤੀ ਜਾਂ ਧੱਕੇਸ਼ਾਹੀ ਹੁੰਦੀ ਹੈ, ਉਸ ਵਿਰੁੱਧ ਸਾਨੂੰ ਪੱਥਰ ਦੀ ਚਟਾਨ ਵਾਂਗ ਦਲਿਤ ਪਰਿਵਾਰ ਨਾਲ ਖੜ੍ਹ ਕੇ ਉਸ ਦਾ ਡਟ ਕੇ ਸਾਥ ਦੇਣਾ ਚਾਹੀਦਾ ਹੈ। ਇਸ ਵਿਚ ਹੀ ਕੁੱਲ ਦੁਨੀਆ ਦਾ ਭਲਾ ਹੈ।


-ਕੇਵਲ ਸਿੰਘ ਬਾਠਾਂ
ਮੋਬਾਈਲ : 81950-84314.

29-7-2016

 ਦੋਸ਼ਪੂਰਨ ਸਿੱਖਿਆ

ਸਿੱਖਿਆ ਮਨੁੱਖ ਦਾ ਤੀਜਾ ਨੇਤਰ ਹੈ, ਵਿੱਦਿਆ ਤੋਂ ਬਿਨਾਂ ਮਨੁੱਖ ਪਸ਼ੂ ਸਮਾਨ ਹੈ। ਸਾਡੇ ਦੇਸ਼ ਵਿਚ ਸਿੱਖਿਆ ਪ੍ਰਾਪਤੀ ਲਈ ਅਨੇਕਾਂ ਪ੍ਰਾਈਵੇਟ, ਸਰਕਾਰੀ ਸਕੂਲ, ਕਾਲਜ, ਯੂਨੀਵਰਸਿਟੀਆਂ ਹਨ, ਜਿਹੜੀਆਂ ਹਰੇਕ ਸਾਲ ਲੱਖਾਂ ਵਿਦਿਆਰਥੀਆਂ ਨੂੰ ਤਕਨੀਕੀ ਸਿੱਖਿਆ ਦੇ ਕੇ ਸਰਬਪੱਖੀ ਵਿਕਾਸ ਕਰਕੇ ਸੰਪੂਰਨ ਮਨੁੱਖ ਬਣਾਉਣ ਲਈ ਯਤਨਸ਼ੀਲ ਹਨ। ਪ੍ਰੰਤੂ ਵਿਹਾਰਕ ਸਥਿਤੀ ਚਿੰਤਾਜਨਕ ਹੈ, ਵਿਦਿਆਰਥੀ ਤਕਨੀਕੀ ਤੇ ਉੱਚੀ ਵਿੱਦਿਆ ਪ੍ਰਾਪਤੀ ਦੇ ਬਾਵਜੂਦ ਜ਼ਿੰਦਗੀ ਦੇ ਮੈਦਾਨ ਵਿਚ ਘੱਟ ਹੀ ਸਫਲ ਹੁੰਦੇ ਹਨ। ਅਜਿਹਾ ਕਿਉਂ? ਮੇਰੀ ਸੋਚ ਅਨੁਸਾਰ ਸਿੱਖਿਆ ਅਜੇ ਅਧੂਰੀ ਤੇ ਦੋਸ਼ਪੂਰਨ ਹੈ। ਸੰਪੂਰਨ ਸਿੱਖਿਆ ਲਈ ਅਧਿਆਤਮਕ ਗਿਆਨ, ਛੁਪੇ ਗੁਣਾਂ ਦਾ ਗਿਆਨ, ਲੀਡਰਸ਼ਿਪ ਗੁਣਾਂ ਦਾ ਵਿਕਾਸ, ਵਪਾਰਕ ਸੂਝਬੂਝ, ਚੰਗਾ ਵਿਵਹਾਰ ਬਣਨਾ ਜ਼ਰੂਰੀ ਹੈ। ਅਫ਼ਸੋਸ ਦੀ ਗੱਲ ਹੈ ਕਿ ਉਪਰੋਕਤ ਗਿਆਨ ਤੇ ਗੁਣ ਪੈਦਾ ਕਰਨ ਵਾਲੇ ਸਿਲੇਬਸ ਸਾਡੀ ਵਿੱਦਿਆ ਪ੍ਰਣਾਲੀ ਵਿਚ ਨਾਂ-ਮਾਤਰ ਹੀ ਹੈ। ਸਾਡੇ ਕੋਲ ਇਸ ਸਿਲੇਬਸ ਦਾ ਮੁਫ਼ਤ ਪ੍ਰਬੰਧ ਹੈ।

-ਭਾਈ ਕੁਲਵਿੰਦਰ ਸਿੰਘ
ਪਿੰਡ ਬਿਹਾਲਾ, ਜ਼ਿਲ੍ਹਾ ਹੁਸ਼ਿਆਰਪੁਰ।

ਸੜਕ ਦੁਰਘਟਨਾਵਾਂ

ਵਧਦੀ ਜਨਸੰਖਿਆ ਕਾਰਨ ਸੜਕਾਂ ਉੱਪਰ ਆਵਾਜਾਈ ਦਿਨੋ-ਦਿਨ ਵਧ ਰਹੀ ਹੈ, ਜਿਸ ਕਾਰਨ ਹਰ ਰੋਜ਼ ਸੜਕ ਦੁਰਘਟਨਾਵਾਂ ਵਿਚ ਤੇਜ਼ੀ ਨਾਲ ਵਾਧਾ ਹੋ ਰਿਹਾ ਹੈ। ਅੱਜ ਦੀ ਤੇਜ਼ ਰਫ਼ਤਾਰ ਜ਼ਿੰਦਗੀ ਵਿਚ ਹਰੇਕ ਵਿਅਕਤੀ ਅੱਗੇ ਲੰਘਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਇਸ ਦਾ ਨਤੀਜਾ ਇਹ ਹੁੰਦਾ ਹੈ ਕਿ ਕਈ ਲੋਕ ਬੇਵਕਤੀ ਮੌਤ ਮਰ ਜਾਂਦੇ ਹਨ। ਉਨ੍ਹਾਂ ਦਾ ਜੀਵਨ ਮਿੰਟਾਂ ਵਿਚ ਤਬਾਹ ਹੋ ਜਾਂਦਾ ਹੈ। ਹਰੇਕ ਵਿਅਕਤੀ ਦਾ ਫ਼ਰਜ਼ ਹੈ ਟ੍ਰੈਫਿਕ ਨਿਯਮਾਂ ਦਾ ਠੀਕ ਢੰਗ ਨਾਲ ਪਾਲਣ ਕਰੇ। ਕਿਉਂਕਿ ਬਚਾਅ ਵਿਚ ਹੀ ਬਚਾਅ ਹੁੰਦਾ ਹੈ। ਹਰੇਕ ਵਿਅਕਤੀ ਨੂੰ ਇਹ ਗੱਲ ਕਦੇ ਵੀ ਨਹੀਂ ਭੁਲਾਉਣੀ ਚਾਹੀਦੀ ਤੇਜ਼ ਰਫ਼ਤਾਰੀ ਮੌਤ ਦੀ ਤਿਆਰੀ। ਸਰਕਾਰ ਨੂੰ ਚਾਹੀਦਾ ਹੈ ਕਿ ਇਨ੍ਹਾਂ ਸੜਕ ਦੁਰਘਟਨਾਵਾਂ ਨੂੰ ਰੋਕਣ ਲਈ ਠੋਸ ਕਦਮ ਉਠਾਏ ਜਾਣ।

-ਰਾਜਵੀਰ ਕੌਰ
ਪਿੰਡ ਰਾਜਪੁਰ ਭਾਈਆਂ, ਜ਼ਿਲ੍ਹਾ ਹੁਸ਼ਿਆਰਪੁਰ।

ਵਧਦੀ ਆਬਾਦੀ ਦਾ ਬੋਝ

ਸਾਲ-ਦਰ-ਸਾਲ ਆਬਾਦੀ ਦਾ ਬੋਝ ਵਧ ਰਿਹਾ ਹੈ। ਉਸੇ ਹਿਸਾਬ ਨਾਲ ਕੁਦਰਤੀ ਸਾਧਨਾਂ ਦੀ ਵਰਤੋਂ ਵੀ ਲਗਾਤਾਰ ਵਧ ਰਹੀ ਹੈ, ਜਿਵੇਂ ਕਿ ਹਵਾ, ਪਾਣੀ, ਜ਼ਮੀਨ, ਪੇੜ-ਪੌਦੇ, ਤੇਲ, ਗੈਸ ਆਦਿ ਦੀ ਵਰਤੋਂ ਲਗਾਤਾਰ ਵਧ ਰਹੀ ਹੈ। ਕਹਿੰਦੇ ਹਨ 25 ਸਾਲਾਂ ਵਿਚ ਦੁਨੀਆ ਦੀ ਆਬਾਦੀ ਵਿਚ ਕਰੀਬ ਇਕ ਤਿਹਾਈ ਦਾ ਵਾਧਾ ਹੋਇਆ ਹੈ। ਜੇ ਇਹੀ ਹਾਲ ਰਿਹਾ ਤਾਂ ਆਉਣ ਵਾਲੇ ਸਮੇਂ ਵਿਚ ਬਹੁਤ ਮੁਸ਼ਕਿਲ ਹੋ ਜਾਏਗੀ।

-ਸੁੁਿਰੰਦਰ ਸਿੰਘ
ਗਰਚਾ ਨਰਸਰੀ, ਧਨੌਲਾ ਰੋਡ, ਬਰਨਾਲਾ।

28/07/2016

 ਪ੍ਰੇਸ਼ਾਨੀ ਦਾ ਕਾਰਨ ਬਣਦੀਆਂ ਹਨ ਰੋਸ ਰੈਲੀਆਂ
ਜਿਵੇਂ-ਜਿਵੇਂ ਪੰਜਾਬ ਵਿਚ ਚੋਣਾਂ ਦਾ ਸਮਾਂ ਨਜ਼ਦੀਕ ਆ ਰਿਹਾ ਹੈ, ਵੱਖ-ਵੱਖ ਜਥੇਬੰਦੀਆਂ ਨੇ ਆਪਣੀਆਂ ਮੰਗਾਂ ਮੰਨਵਾਉਣ ਲਈ ਰੋਸ ਰੈਲੀਆਂ, ਹੜਤਾਲਾਂ ਦਾ ਸਿਲਸਿਲਾ ਤੇਜ਼ ਕਰ ਦਿੱਤਾ ਹੈ। ਸਰਕਾਰ 'ਤੇ ਜ਼ੋਰ ਪਾਉਣ ਲਈ ਜਥੇਬੰਦੀਆਂ ਹਰ ਸ਼ਹਿਰ, ਕਸਬੇ ਵਿਚ ਧੜਾ-ਧੜ ਰੈਲੀਆਂ ਕਰ ਰਹੀਆਂ ਹਨ। ਇਨ੍ਹਾਂ ਰੋਸ ਰੈਲੀਆਂ ਦੌਰਾਨ ਆਮ ਤੌਰ 'ਤੇ ਜਥੇਬੰਦੀਆਂ ਸੜਕਾਂ 'ਤੇ ਰੋਸ ਮਾਰਚ ਕਰਦੀਆਂ ਹਨ। ਕਈ ਵਾਰ ਜਾਮ ਵੀ ਲਗਾ ਦਿੱਤੇ ਜਾਂਦੇ ਹਨ, ਜਿਸ ਨਾਲ ਆਮ ਲੋਕਾਂ ਨੂੰ ਭਾਰੀ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਗਰਮੀ ਦੇ ਮੌਸਮ ਵਿਚ ਤਾਂ ਹਾਲਤ ਹੋਰ ਵੀ ਖਰਾਬ ਹੋ ਜਾਂਦੀ ਹੈ। ਖ਼ਾਸ ਕਰ ਬਜ਼ੁਰਗ, ਬੱਚੇ ਅਤੇ ਮਰੀਜ਼ਾਂ ਨੂੰ ਵੀ ਇਸ ਦਾ ਖਮਿਆਜਾ ਭੁਗਤਣਾ ਪੈਂਦਾ ਹੈ। ਜੇਕਰ ਜਥੇਬੰਦੀਆਂ ਨੂੰ ਸਵਾਲ ਕੀਤਾ ਜਾਂਦਾ ਹੈ ਕਿ ਉਹ ਇਸ ਤਰ੍ਹਾਂ ਕਿਉਂ ਕਰਦੇ ਹਨ ਤਾਂ ਜਵਾਬ ਮਿਲਦਾ ਹੈ ਕਿ ਜਦੋਂ ਤੱਕ ਉਹ ਸੜਕਾਂ ਉੱਤੇ ਨਹੀਂ ਉੱਤਰਦੇ ਸਰਕਾਰ ਉਨ੍ਹਾਂ ਦੀਆਂ ਜਾਇਜ਼ ਮੰਗਾਂ ਵੱਲ ਵੀ ਧਿਆਨ ਨਹੀਂ ਦਿੰਦੀ। ਅਜਿਹੀਆਂ ਰੋਸ ਰੈਲੀਆਂ ਦੌਰਾਨ ਕਈ ਵਾਰ ਰਾਹੀਗਰਾਂ ਅਤੇ ਜਥੇਬੰਦੀਆਂ ਵਿਚ ਹਿੰਸਕ ਟਕਰਾਅ ਦੀਆਂ ਖ਼ਬਰਾਂ ਵੀ ਸਾਹਮਣੇ ਆਈਆਂ ਹਨ। ਜਿੱਥੇ ਜਥੇਬੰਦੀਆਂ ਦੀ ਇਹ ਜ਼ਿੰਮੇਵਾਰੀ ਬਣਦੀ ਹੈ ਕਿ ਉਹ ਰੋਸ ਰੈਲੀਆਂ ਦੌਰਾਨ ਆਮ ਲੋਕਾਂ ਦੀਆਂ ਸਮੱਸਿਆਵਾਂ ਵਿਚ ਵਾਧਾ ਨਾ ਕਰਨ, ਉੱਥੇ ਹੀ ਸਰਕਾਰਾਂ ਦਾ ਵੀ ਇਹ ਫ਼ਰਜ਼ ਹੈ ਕਿ ਉਹ ਇਨ੍ਹਾਂ ਜਥੇਬੰਦੀਆਂ ਦੀਆਂ ਜਾਇਜ਼ ਮੰਗਾਂ 'ਤੇ ਸਮੇਂ ਸਿਰ ਅਤੇ ਹਮਦਰਦੀ ਨਾਲ ਵਿਚਾਰ ਕਰਨ।


-ਰਣਜੀਤ ਸਿੰਘ ਸੈਣੀ
ਖ਼ਾਲਸਾ ਸਕੂਲ, ਸ੍ਰੀ ਅਨੰਦਪੁਰ ਸਾਹਿਬ।

 


ਮੋਹ ਦੇ ਰਿਸ਼ਤੇ
ਮਨੁੱਖੀ ਜ਼ਿੰਦਗੀ ਦੇ ਫੁੱਲਾਂ ਵਿਚੋਂ ਜਦੋਂ ਤੱਕ ਸਵਾਰਥ ਪੂਰਤੀ/ਜ਼ਰੂਰਤਾਂ ਪੂਰੀਆਂ ਕਰਨ ਦੀਆਂ ਖੁਸ਼ਬੋਆਂ ਆਉਂਦੀਆਂ ਰਹਿਣਗੀਆਂ, ਉਦੋਂ ਤੱਕ ਖੂਨ ਦੇ ਰਿਸ਼ਤਿਆਂ ਦੇ ਭੌਰੇ ਨੇੜੇ-ਤੇੜੇ ਮੰਡਰਾਉਂਦੇ ਰਹਿਣਗੇ। ਜਿਉਂ ਹੀ ਜ਼ਿੰਦਗੀ ਸਵਾਰਥ ਪੂਰਨ ਕਰਨ ਤੋਂ ਬੇਵੱਸ ਹੋਈ, ਉਦੋਂ ਹੀ ਖੂਨ ਦੇ ਰਿਸ਼ਤਿਆਂ ਦੇ ਭੌਰੇ ਉਡਾਰੀਆਂ ਮਾਰ ਜਾਂਦੇ ਹਨ। ਜਿਨ੍ਹਾਂ ਰਿਸ਼ਤਿਆਂ ਨੂੰ ਮਨੁੱਖ ਖੂਨ ਨਾਲ ਸਿੰਜਦੈ, ਮੌਕਾ ਆਉਣ 'ਤੇ ਬੁਢਾਪਾ ਆਉਣ 'ਤੇ ਉਹੀ ਰਿਸ਼ਤੇ ਮੂੰਹ ਵਿਚ ਪਾਣੀ ਦੀ ਚਮਚਾ ਪਾਉਣ ਤੋਂ ਵੀ ਅੱਖਾਂ ਫੇਰ ਲੈਣਗੇ।
ਇਹ ਕੌੜੀ ਸਚਾਈ ਹੈ ਕਿ ਅੱਜ ਰਿਸ਼ਤਿਆਂ ਵਿਚ ਮੋਹ ਨਹੀਂ ਰਿਹਾ। ਰਿਸ਼ਤਿਆਂ ਦਾ ਖੂਨ ਲਾਲ ਤੋਂ ਸਫੈਦ ਨਹੀਂ ਬਲਕਿ ਕਾਲਾ ਹੋ ਗਿਐ? ਇਕ ਹੌਲਨਾਕ ਘਟਨਾ ਦਾ ਜ਼ਿਕਰ ਕਰਨਾ ਬਣਦਾਂ'ਮੌਤ ਦੇ ਬਿਸਤਰੇ 'ਤੇ ਪਈ ਮਾਂ ਕੋਲ ਬੈਠੇ ਆਪਣੇ ਬੱਚੇ ਵੱਲੋਂ ਪਰੰਪਰਾ ਮੁਤਾਬਿਕ ਮੂੰਹ 'ਚ ਪਾਣੀ ਪਾਉਣ ਤੋਂ ਇਨਕਾਰ ਕਰਨਾ ਸਗੋਂ ਇਹ ਕਹਿਣਾ ਕਿ ਇਸ ਨੇ ਸਾਡਾ ਕੀਤਾ ਹੀ ਕੀ ਹੈ? ਅਸੀਂ ਜੋ ਕੁਝ ਬਣਾਇਆ, ਆਪਣੇ ਹੱਥੀਂ ਬਣਾਇਆ।'
ਸਮਾਜ ਵਿਚ ਵਾਪਰਦੀਆਂ ਅਜਿਹੀਆਂ ਹੌਲਨਾਕ ਘਟਨਾਵਾਂ ਸੱਚੀ-ਮੁੱਚੀ ਦਿਲ ਨੂੰ ਬੇਚੈਨ ਕਰਦੀਆਂ ਹਨ। ਅੱਜ ਸੰਵੇਦਨਾਵਾਂ ਤੋਂ ਕੋਰੇ ਰਿਸ਼ਤੇ ਬਿਮਾਰੀ ਜਾਂ ਬੁਢਾਪੇ ਦੀ ਹਾਲਤ ਵਿਚ ਆਪਣੇ ਖੂਨ ਦੇ ਰਿਸ਼ਤਿਆਂ ਦੀ ਮੌਤ ਦਾ ਇੰਤਜ਼ਾਰ ਕਰਦੇ ਆਮ ਦੇਖੇ ਜਾ ਸਕਦੇ ਹਨ। ਕਿਸੇ ਕੋਲ ਕਿਸੇ ਲਈ ਵਕਤ ਨਹੀਂ ਰਿਹਾ। ਇਨਸਾਨ, ਸਮਾਜ ਤੇਜ਼ੀ ਨਾਲ ਤਬਾਹੀ ਵੱਲ ਵਧ ਰਿਹੈ। ਅੱਜ ਦਾ ਯੁੱਗ ਟੁੱਟ-ਭੱਜ ਦਾ ਯੁੱਗ ਬਣ ਗਿਐ। ਅਸੀਂ ਆਪਣੇ ਪਵਿੱਤਰ ਗ੍ਰੰਥਾਂ ਦਾ ਫਲਸਫ਼ਾ ਭੁੱਲ ਚੁੱਕੇ ਹਾਂਂਸਾਡਾ ਮਾਣਮੱਤਾ ਵਿਰਸਾ, ਸਾਡਾ ਸੱਭਿਆਚਾਰ ਤਾਂ ਸਾਨੂੰ 'ਸਾਰੀ ਧਰਤੀ ਹੀ ਪਰਿਵਾਰ ਹੈ' ਦੀ ਸਿੱਖਿਆ ਦਿੰਦੈ। ...ਫਿਰ ਅਸੀਂ ਏਨਾ ਬੇਰਹਿਮ ਕਿਉਂ ਹੋ ਗਏ ਹਾਂ? ਸਾਡੇ ਰਿਸ਼ਤਿਆਂ 'ਚੋਂ ਮੋਹ ਦੀ ਭਾਵਨਾ ਕਿਉਂ ਮਰ ਚੁੱਕੀ ਹੈ? ਇਸ ਦਾ ਜਵਾਬ ਸਾਨੂੰ ਇਕ ਦਿਨ ਲੱਭਣਾ ਹੋਵੇਗਾ।


ਂਤਲਵਿੰਦਰ ਸ਼ਾਸਤਰੀ
ਮਲੇਰਕੋਟਲਾ (ਸੰਗਰੂਰ)।


ਅਪਰਾਧ ਦਾ ਬੋਲਬਾਲਾ

ਜਨਗਣਨਾ ਰਿਪੋਰਟ ਵਿਚ ਪੰਜਾਬ ਦੇ ਪਿੰਡਾਂ ਦੀ 31.86 ਫ਼ੀਸਦੀ ਆਬਾਦੀ ਕੋਰੀ ਅਨਪੜ੍ਹ ਹੈ। ਭ੍ਰਿਸ਼ਟਾਚਾਰ, ਬੇਇਮਾਨੀ, ਨਸ਼ਾਖੋਰੀ, ਬੇਰੁਜ਼ਗਾਰੀ ਅਤੇ ਆਰਥਿਕ ਮੰਦਹਾਲੀ ਮੁੱਖ ਮੁੱਦੇ ਹਨ। ਕਤਲ, ਲੁੱਟ-ਖੋਹ, ਜਬਰ-ਜਨਾਹ, ਚੋਰੀਆਂ, ਏ.ਟੀ.ਐਮ. ਪੁੱਟਣ ਜਾਂ ਫਿਰ ਠੱਗੀ ਮਾਰਨ ਦੀਆਂ ਵਾਰਦਾਤਾਂ ਆਏ ਦਿਨ ਵਾਪਰਦੀਆਂ ਹਨ। ਗੈਂਗਸਟਰਾਂ ਦਾ ਗੁੰਡਾ ਰਾਜ ਦਿਨ-ਦਿਹਾੜੇ ਸ਼ਰੇਆਮ ਕਤਲ ਦੀਆਂ ਵਾਰਦਾਤਾਂ ਕਰਦਾ ਹੈ। ਗੈਂਗਸਟਰਾਂ ਦੀ ਆਪਸੀ ਲੜਾਈ ਵਿਚ ਵੀ ਸ਼ਰੇਆਮ ਦਿਨ-ਦਿਹਾੜੇ ਗੋਲੀਆਂ ਚਲਦੀਆਂ ਹਨ, ਕਤਲ ਹੁੰਦੇ ਹਨ। ਪੰਜਾਬ ਵਿਚ ਗੈਂਗਸਟਰਾਂ ਦਾ ਗੁੰਡਾ ਰਾਜ ਅਮਨ ਸ਼ਾਂਤੀ ਨੂੰ ਪੂਰੀ ਤਰ੍ਹਾਂ ਲਾਂਬੂ ਲਾ ਰਿਹਾ ਹੈ। ਨਿਕੰਮੇ ਪੁਲਿਸ ਪ੍ਰਬੰਧਾਂ ਕਾਰਨ ਗੈਂਗਸਟਰਾਂ ਦੇ ਹੌਸਲੇ ਬੁਲੰਦ ਹੋ ਰਹੇ ਹਨ। ਸਿਆਸੀ ਆਗੂਆਂ ਦੀ ਸ਼ਹਿ 'ਤੇ ਗੈਂਗਸਟਰਾਂ ਦੇ ਹੌਸਲੇ ਬੁਲੰਦ ਹੋ ਰਹੇ ਹਨ। ਪੰਜਾਬ ਵਿਚ ਕਾਨੂੰਨ ਵਿਵਸਥਾ ਚਰਮਰਾ ਗਈ ਹੈ। ਸਖ਼ਤ ਕਾਨੂੰਨ ਨਾ ਹੋਣ ਕਰਕੇ ਮਾੜੇ ਅਨਸਰਾਂ ਦੁਆਰਾ ਅਪਰਾਧ ਵਧ ਰਹੇ ਹਨ।


-ਹਰਜਿੰਦਰ ਪਾਲ ਸਿੰਘ
ਜਵੱਦੀ ਕਲਾਂ, ਲੁਧਿਆਣਾ।


ਇਨਸਾਫ਼ ਕਿਉਂ ਨਹੀਂ?
ਪਿਛਲੇ ਦਿਨੀਂ ਇਕ ਦੁਖਦਾਇਕ ਖ਼ਬਰ ਪੜ੍ਹਨ ਨੂੰ ਮਿਲੀ, ਜਿਸ ਵਿਚ ਇਕ 26 ਸਾਲਾ ਤੇਜ਼ਾਬ ਪੀੜਤਾ ਲੜਕੀ ਇਨਸਾਫ਼ ਨਾ ਮਿਲਣ ਕਾਰਨ ਦੇਸ਼ ਦੇ ਰਾਸ਼ਟਰਪਤੀ ਕੋਲੋਂ ਇੱਛਾ ਮੌਤ ਦੀ ਮੰਗ ਕਰ ਰਹੀ ਹੈ। ਇਹ ਮੰਗ ਅੱਜ ਆਜ਼ਾਦ ਦੇਸ਼ ਦੇ ਹੁਕਮਰਾਨਾਂ ਤੇ ਕਾਨੂੰਨ ਦੇ ਰਖਵਾਲਿਆਂ ਦੇ ਮੂੰਹ 'ਤੇ ਕਰਾਰੀ ਚਪੇੜ ਤੋਂ ਰਤਾ ਵੀ ਘੱਟ ਨਹੀਂ ਹੈ। ਇਨਸਾਫ਼ ਮਿਲਣ ਦੀ ਮੁੱਕ ਚੁੱਕੀ ਆਸ ਤੇ ਆਰਥਿਕ ਪੱਖ ਤੋਂ ਬੁਰੀ ਤਰ੍ਹਾਂ ਟੁੱਟ ਚੁੱਕੀ ਲੜਕੀ ਦੀ ਵਿਥਿਆ ਹਿਰਦੇ ਵਲੂੰਧਰਨ ਤੋਂ ਘੱਟ ਨਹੀਂ ਹੈ। ਪੀੜਤ ਲੜਕੀ ਦਾ ਸਵਾਲ ਹੈ ਕਿ ਆਖਰ ਉਸ ਨੂੰ ਕਿਹੜੇ ਜੁਰਮ ਦੀ ਸਜ਼ਾ ਮਿਲ ਰਹੀ ਹੈ। ਉਪਰੋਂ ਘਟਨਾ ਨਾਲ ਸਬੰਧਤ ਦੋਸ਼ੀ ਜ਼ਮਾਨਤਾਂ ਲੈ ਕੇ ਬਾਹਰ ਆ ਗਏ ਹਨ, ਜਦੋਂ ਕਿ ਲੜਕੀ ਉਮਰ ਭਰ ਲਈ ਨਕਾਰਾ ਹੋ ਕੇ ਰਹਿ ਗਈ ਹੈ। ਪੀੜਤਾ ਨੇ ਰਾਸ਼ਟਰਪਤੀ ਨੂੰ ਭੇਜੇ ਪੱਤਰ ਦੀਆਂ ਕਾਪੀਆਂ ਦੇਸ਼ ਦੇ ਪ੍ਰਧਾਨ ਮੰਤਰੀ, ਪੰਜਾਬ ਦੇ ਮੁੱਖ ਮੰਤਰੀ, ਦਿੱਲੀ ਦੇ ਮੰਤਰੀ ਤੋਂ ਇਲਾਵਾ ਦੇਸ਼ ਦੀ ਸੁਪਰੀਮ ਕੋਰਟ ਤੇ ਪੰਜਾਬ-ਹਰਿਆਣਾ ਹਾਈ ਕੋਰਟ ਨੂੰ ਵੀ ਭੇਜੀਆਂ ਹਨ। ਹੁਣ ਦੇਖਣ ਵਾਲੀ ਗੱਲ ਇਹ ਹੋਵੇਗੀ ਕਿ ਕੀ ਪੀੜਤ ਲੜਕੀ ਨੂੰ ਇੱਛਾ ਮੌਤ ਲਈ ਆਗਿਆ ਮਿਲਦੀ ਹੈ ਜਾਂ ਫਿਰ ਉਸ ਨੂੰ ਇਨਸਾਫ਼, ਜਿਸ ਦੀ ਉਹ ਹੱਕਦਾਰ ਹੈ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

27-7-2016


ਕਿਸਾਨੀ ਦਾ ਸੰਕਟ
ਅੱਜ ਕਿਸਾਨੀ ਪੂਰੀ ਤਰ੍ਹਾਂ ਮਰਨ ਕਿਨਾਰੇ ਹੈ। ਖੇਤੀਬਾੜੀ ਦਾ ਧੰਦਾ ਲਾਹੇਵੰਦ ਨਾ ਹੋ ਕੇ ਫਾਹੇਵੰਦ ਹੋ ਗਿਆ ਹੈ। ਰੋਜ਼ਾਨਾ ਅਖ਼ਬਾਰੀ ਅੰਕੜਿਆਂ ਮੁਤਾਬਿਕ 3 ਤੋਂ 5 ਕਿਸਾਨ ਮੌਤ ਲਾੜੀ ਨੂੰ ਗਲੇ ਲਾ ਰਿਹਾ ਹੈ। ਇਸ ਪਿੱਛੇ ਜਿਥੇ 70 ਫ਼ੀਸਦੀ ਸਰਕਾਰੀ ਗ਼ਲਤ ਨੀਤੀਆਂ ਜਾਂ ਮਾਰੂ ਨੀਤੀਆਂ ਦੋਸ਼ੀ ਹਨ, ਉਥੇ 30 ਫ਼ੀਸਦੀ ਦੇ ਕਿਸਾਨ ਖ਼ੁਦ ਵੀ ਦੋਸ਼ੀ ਹਨ, ਕਿਉਂਕਿ ਕਿਸਾਨੀ ਪਰਿਵਾਰ ਗੀਤਾਂ, ਫ਼ਿਲਮਾਂ ਦੇ ਪਿੱਛੇ ਲੱਗ ਕੇ ਆਪਣਾ ਜੀਵਨ ਢਾਲਦੇ ਹਨ। ਫਿਰ ਦੁਸ਼ਵਾਰੀਆਂ, ਕਰਜ਼ਿਆਂ ਤੋਂ ਸਿਵਾਏ ਉਨ੍ਹਾਂ ਦੇ ਪੱਲੇ ਕੁਝ ਵੀ ਨਹੀਂ ਪੈ ਰਿਹਾ। ਦਿਨੋਂ-ਦਿਨ ਜ਼ਿਦੋ-ਜ਼ਿਦੀ ਖੇਤਾਂ ਦੇ ਮਾਮਲੇ ਵਧਾਉਣੇ ਵੀ ਇਕ ਮੁੱਖ ਕਾਰਨ ਹੈ। ਕਿਸਾਨੀ ਨੂੰ ਘਾਟੇ ਵੱਲ ਲਿਜਾਣ ਲਈ ਜ਼ਿਮੀਂਦਾਰਾਂ ਨੂੰ ਵੀ ਆਪਣੀ ਚਾਦਰ ਵੇਖ ਕੇ ਪੈਰ ਪਸਾਰਨੇ ਚਾਹੀਦੇ ਹਨ। ਵਿਆਹਾਂ, ਸ਼ਾਦੀਆਂ, ਮਾਮਲੇ ਵਧਾਉਣੇ, ਰੀਸੋ-ਰੀਸੀ ਖਰਚੇ ਵਧਾਉਣੇ ਵੀ ਕਰਜ਼ਿਆਂ ਦੀ ਮਾਰ ਹੇਠ ਆਉਣ ਦੇ ਕਾਰਨ ਹਨ। ਲੋੜ ਹੈ ਕਿਸਾਨੀ ਨੂੰ ਸਹਾਇਕ ਧੰਦੇ ਵਜੋਂ ਅਪਣਾਉਣ ਦੀ, ਕਿਉਂਕਿ ਅੱਜ ਕਿਸਾਨੀ ਦੀ ਹਾਲਤ ਖੂਹ ਦੀ ਮਿੱਟੀ ਖੂਹ ਨੂੰ ਲੱਗਣ ਵਾਲੀ ਗੱਲ ਹੈ। ਸਰਕਾਰਾਂ ਨੂੰ ਚਾਹੀਦਾ ਹੈ, ਜੇ ਦੇਸ਼ ਬਚਾਉਣਾ ਹੈ ਤਾਂ ਕਿਸਾਨੀ ਨੂੰ ਪਹਿਲ ਦੇ ਆਧਾਰ 'ਤੇ ਬਚਾਉਣ।


-ਮਨਜੀਤ ਸਿੰਘ ਭਾਮ
ਮੋ: 94784-00012.


ਪੰਜਾਬੀ ਸੰਗੀਤ ਅਰਸ਼ ਤੋਂ ਫਰਸ਼ ਵੱਲ
ਪੰਜਾਬੀ ਸੰਗੀਤ ਪੰਜਾਬੀ ਸੱਭਿਆਚਾਰ ਦੀ ਜਿੰਦ-ਜਾਨ ਹੈ। ਗੁਰਦਾਸ ਮਾਨ, ਯਮਲਾ ਜੱਟ, ਕੁਲਦੀਪ ਮਾਣਕ, ਸੁਰਿੰਦਰ ਕੌਰ ਜਿਹੇ ਕਲਾਕਾਰਾਂ ਨੇ ਪੰਜਾਬੀ ਸੰਗੀਤ ਨੂੰ ਫਰਸ਼ ਤੋਂ ਅਰਸ਼ ਤੱਕ ਪਹੁੰਚਾਇਆ ਹੈ। ਪੰਜਾਬੀ ਸੰਗੀਤ ਪੰਜਾਬੀਆਂ ਲਈ ਰੂਹ ਦੀ ਖੁਰਾਕ ਹੈ। ਪਰ ਅਜੋਕੇ ਸਮੇਂ ਵਿਚ ਪੰਜਾਬੀ ਸੰਗੀਤ ਨਿਘਾਰ ਵੱਲ ਜਾ ਰਿਹਾ ਹੈ। ਅੱਜ ਦੇ ਗਾਇਕ ਜੋ ਕੁਝ ਗਾ ਰਹੇ ਹਨ, ਜੋ ਕੁਝ ਦਿਖਾ ਰਹੇ ਹਨ, ਉਸ ਨੂੰ ਇਨਸਾਨ ਪਰਿਵਾਰ ਵਿਚ ਬੈਠ ਕੇ ਤਾਂ ਕੀ ਇਕੱਲਾ ਬੈਠ ਕੇ ਵੀ ਨਹੀਂ ਸੁਣ ਸਕਦਾ ਤੇ ਨਾ ਹੀ ਦੇਖ ਸਕਦਾ ਹੈ। ਗਾਇਕੀ ਦੇ ਨਾਂਅ 'ਤੇ ਜੋ ਨੰਗੇਜ਼ ਦਰਸ਼ਕਾਂ ਅੱਗੇ ਪੇਸ਼ ਕੀਤਾ ਜਾ ਰਿਹਾ ਹੈ, ਉਹ ਬਹੁਤ ਹੀ ਸ਼ਰਮਨਾਕ ਹੈ। ਧੀਆਂ, ਭੈਣਾਂ ਦੀ ਤੁਲਨਾ ਬੱਸਾਂ, ਬੋਤਲਾਂ ਨਾਲ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਲਈ ਪੁਰਜ਼ਾ, ਯੈਕਣ ਆਦਿ ਸ਼ਬਦਾਂ ਦੀ ਵਰਤੋਂ ਕੀਤੀ ਜਾ ਰਹੀ ਹੈ। ਨਸ਼ਿਆਂ ਤੇ ਹਥਿਆਰਾਂ ਨੂੰ ਬੜਾਵਾ ਦਿੱਤਾ ਜਾ ਰਿਹਾ ਹੈ। ਜੋ ਸਰਦਾਰੀ ਸਾਡੇ ਬਜ਼ੁਰਗਾਂ ਨੇ ਅਨੇਕਾਂ ਕੁਰਬਾਨੀਆਂ ਦੇ ਕੇ ਲਈ ਹੈ, ਉਸ ਦੀ ਤਾਂ ਪਰਿਭਾਸ਼ਾ ਹੀ ਬਦਲ ਦਿੱਤੀ ਹੈ ਅੱਜ ਦੇ ਗਾਇਕਾਂ ਨੇ। ਅੱਜ ਲੋੜ ਹੈ ਹਰ ਗਾਇਕ, ਗੀਤਕਾਰ, ਸੰਗੀਤਕਾਰ ਨੂੰ ਪੰਜਾਬੀ ਸੰਗੀਤ ਪ੍ਰਤੀ ਬਣਦੀ ਆਪਣੀ ਜ਼ਿੰਮੇਵਾਰੀ ਸਮਝਣ ਤੇ ਨਿਭਾਉਣ ਦੀ। ਦਰਸ਼ਕਾਂ ਨੂੰ ਵੀ ਚਾਹੀਦਾ ਹੈ ਕਿ ਉਹ ਘਟੀਆ ਗੀਤਾਂ ਦਾ ਵਿਰੋਧ ਕਰਨ।


-ਜਸਪ੍ਰੀਤ ਕੌਰ 'ਸੰਘਾ'
ਪਿੰਡ ਤਨੂੰਲੀ, ਜ਼ਿਲ੍ਹਾ ਹੁਸ਼ਿਆਰਪੁਰ।

26-07-2016

 ਪਾਣੀ ਬਚਾਈਏ

ਅੱਜ ਭਰੂਣ ਹੱਤਿਆ ਦੇ ਵਿਰੋਧ ਵਾਂਗ ਪਾਣੀ ਬਚਾਉਣ ਦੇ ਨਾਅਰਿਆਂ ਦੀ ਵੀ ਭਰਮਾਰ ਹੈ। ਇਸ ਵਿਸ਼ੇ 'ਤੇ ਲੈਕਚਰ ਹਰ ਕੋਈ ਦੇ ਰਿਹਾ ਹੈ, ਜਦੋਂ ਕਿ ਅਸਲੀਅਤ ਇਹ ਹੈ ਕਿ ਲਗਦੈ ਜਿਵੇਂ ਅਸੀਂ ਸਾਰੇ ਪਾਣੀ ਦੀ ਦੁਰਵਰਤੋਂ ਦਾ ਕੋਈ ਰਿਕਾਰਡ ਬਣਾ ਰਹੇ ਹੋਈਏ। ਪੰਜਾਬ ਅਤੇ ਹਰਿਆਣਾ ਦੇ ਜ਼ਿਆਦਾਤਰ ਬਲਾਕਾਂ ਦਾ ਪਾਣੀ ਲਗਪਗ ਖ਼ਤਮ ਹੋਣ ਦੀ ਸਥਿਤੀ ਵਿਚ ਹੈ, ਜਿਹੜਾ ਰਹਿ ਗਿਆ ਹੈ, ਉਹ ਵੀ ਪੀਣ ਯੋਗ ਨਹੀਂ। ਫਿਰ ਵੀ ਆਲਮ ਇਹ ਹੈ ਕਿ ਅਸੀਂ ਗੱਡੀਆਂ ਧੋਣ, ਡੰਗਰਾਂ ਨੂੰ ਨੁਹਾਉਣ ਜਾਂ ਬਗੀਚੀ ਨੂੰ ਸਿੰਜਣ ਲਈ ਸਿੱਧਾ ਸਬਮਰਸੀਬਲ ਪੰਪ ਹੀ ਖੋਲ੍ਹ ਦਿੰਦੇ ਹਾਂ। ਟੁੱਲੂ ਪੰਪ ਚਲਾ ਕੇ ਭੁੱਲ ਹੀ ਜਾਂਦੇ ਹਾਂ, ਅੱਧਾ-ਅੱਧਾ ਘੰਟਾ ਟੈਂਕੀ ਭਰ ਕੇ ਡੁੱਲ੍ਹਦੀ ਰਹਿੰਦੀ ਹੈ। ਖੇਤੀਬਾੜੀ ਵਿਭਾਗ ਦਾ ਪੂਰਾ ਜ਼ੋਰ ਲੱਗਿਆ ਪਿਆ ਹੈ ਕਿ ਝੋਨੇ ਦੀ ਫ਼ਸਲ ਦੀ ਸਿੱਧੀ ਬਿਜਾਈ ਕਰੋ ਪਰ ਮੰਨਦਾ ਕੌਣ ਹੈ? ਜੇਕਰ ਜਿਊਣਾ ਹੈ ਤਾਂ ਪਾਣੀ ਤਾਂ ਬਚਾਉਣਾ ਹੀ ਪਵੇਗਾ।

-ਪ੍ਰੀਤ ਸਿੰਘ ਸੰਦਲ
ਪਿੰਡ ਮਕਸੂਦੜਾ, ਤਹਿ: ਪਾਇਲ (ਲੁਧਿਆਣਾ)।

ਪੰਜਾਬੀ ਗਾਣਿਆਂ ਬਾਰੇ ਸੈਂਸਰ ਬੋਰਡ ਬਣੇ

ਅੱਜਕਲ੍ਹ ਦੇ ਪੰਜਾਬੀ ਗਾਣਿਆਂ ਵਿਚ ਲੱਚਰਤਾ ਬਹੁਤ ਹੀ ਵਧ ਗਈ ਹੈ। ਵੱਡੀ ਗਿਣਤੀ 'ਚ ਪੰਜਾਬੀ ਗਾਣੇ ਪਰਿਵਾਰ ਵਿਚ ਬੈਠ ਕੇ ਨਹੀਂ ਸੁਣੇ ਜਾ ਸਕਦੇ। ਇਨ੍ਹਾਂ ਗਾਣਿਆਂ ਵਿਚ ਦੋਹਰੇ ਅਰਥਾਂ ਵਾਲੇ ਸ਼ਬਦ ਹੁੰਦੇ ਹਨ ਅਤੇ ਇਨ੍ਹਾਂ ਦਾ ਫ਼ਿਲਮਾਂਕਣ ਬਹੁਤ ਹੀ ਅਸ਼ਲੀਲ ਹੁੰਦਾ ਹੈ। ਚਾਹੀਦਾ ਤਾਂ ਇਹ ਹੈ ਕਿ ਪੰਜਾਬੀ ਗਾਣਿਆਂ ਸਬੰਧੀ ਵੀ ਸੈਂਸਰ ਬੋਰਡ ਬਣਾਇਆ ਜਾਵੇ, ਜਿਸ ਵਿਚ ਹਰ ਗੀਤ ਤੇ ਗਾਣਾ ਸੈਂਸਰ ਕਰਕੇ ਪਾਸ ਕੀਤਾ ਜਾਵੇ। ਇਸ ਤਰ੍ਹਾਂ ਕਰਨ ਨਾਲ ਪੰਜਾਬੀ ਗਾਣਿਆਂ ਵਿਚ ਆਏ ਲੱਚਰਤਾ ਦੇ ਹੜ੍ਹ ਨੂੰ ਬੰਨ੍ਹ ਪੈ ਸਕੇਗਾ। ਪੰਜਾਬ ਸਰਕਾਰ ਨੂੰ ਜਲਦੀ ਤੋਂ ਜਲਦੀ ਪੰਜਾਬੀ ਗਾਣਿਆਂ ਸਬੰਧੀ ਸੈਂਸਰ ਬੋਰਡ ਬਣਾਉਣਾ ਚਾਹੀਦਾ ਹੈ, ਤਾਂ ਕਿ ਪੰਜਾਬੀ ਗਾਣਿਆਂ ਰਾਹੀਂ ਫੈਲਾਈ ਜਾ ਰਹੀ ਲੱਚਰਤਾ ਨੂੰ ਠੱਲ੍ਹ ਪਾਈ ਜਾ ਸਕੇ।

-ਜਗਮੋਹਨ ਸਿੰਘ ਲੱਕੀ
ਲੱਕੀ ਨਿਵਾਸ, 61 ਏ, ਵਿਦਿਆ ਨਗਰ, ਪਟਿਆਲਾ।

ਰੁੱਖ ਲਾਉਣੇ ਵੀ ਜ਼ਰੂਰੀ ਹਨ...

ਬਰਸਾਤ ਦਾ ਮੌਸਮ ਹੈ। ਕੁਝ ਦਰਦ ਰੱਖਦੀਆਂ ਸੰਸਥਾਵਾਂ ਰੁੱਖ ਲਾਉਣ ਦੀਆਂ ਮੁਹਿੰਮਾਂ ਸ਼ੁਰੂ ਕਰਨ ਵਾਲੀਆਂ ਹਨ। ਕਿਸੇ ਨੇਤਾ ਨੂੰ ਸੱਦ ਕੇ, ਕਿਸੇ ਪ੍ਰੈੱਸ ਫੋਟੋਗ੍ਰਾਫਰ ਨੂੰ ਸੱਦ ਕੇ ਨੇਤਾ ਹੱਥੋਂ ਬੂਟਾ ਲਗਵਾਇਆ, ਫੁਹਾਰੇ ਨਾਲ ਪਾਣੀ ਪਾਇਆ ਤੇ ਚਾਹ ਪਾਣੀ ਪੀ ਅਹੁ ਗਏ ਅਹੁ ਗਏ। ਪਿੱਛੇ ਰਹਿ ਗਿਆ ਵਿਚਾਰਾ ਬੂਟਾ ਪਾਣੀ ਖੁਣੋਂ ਸਹਿਕਦਾ। ਇਕ ਜਾਗਰੂਕ ਮੁਹਿੰਮ ਉਸਾਰਨ ਦੀ ਲੋੜ ਹੈ, ਜਿਸ ਜਗ੍ਹਾ ਬੂਟੇ ਲਗਦੇ ਹਨ, ਚਾਹੇ ਸਕੂਲ ਹੋਵੇ, ਸੜਕਾਂ ਹੋਣ ਜਾਂ ਹੋਰ ਸਾਂਝੀਆਂ ਥਾਵਾਂ, ਆਲੇ-ਦੁਆਲੇ ਦੇ ਲੋਕਾਂ ਨੂੰ ਰੁੱਖਾਂ ਦੀ ਮਹੱਤਤਾ ਬਾਰੇ ਦੱਸਦੇ ਹੋਏ ਉਨ੍ਹਾਂ ਦਾ ਫ਼ਰਜ਼ ਦੱਸਦੇ ਹੋਏ, ਰੁੱਖਾਂ ਨੂੰ ਪਾਣੀ ਦੀ ਲੋੜ, ਗੋਡੀ ਕਰਨਾ, ਆਵਾਰਾ ਪਸ਼ੂਆਂ ਤੋਂ ਬਚਾਉਣਾ ਪਰਮ ਧਰਮ ਸਮਝਦੇ ਹੋਏ ਦੱਸਣਾ ਜ਼ਰੂਰੀ ਹੈ। ਰੁੱਖ ਹੋਣਗੇ ਤਾਂ ਜੀਵਨ ਹੋਵੇਗਾ। ਧਰਤੀ 'ਤੇ ਹਰਿਆਲੀ, ਜੀਵਨ ਵਿਚ ਖੁਸ਼ਹਾਲੀ।

-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।

21-07-2016

ਪੰਜਾਬ ਤੇਰਾ ਕੌਣ ਬੇਲੀ!
ਇਸ ਵਕਤ ਪੰਜਾਬ ਕਈ ਸਮੱਸਿਆਵਾਂ ਦਾ ਝੰਬਿਆ ਹੋਇਆ ਬਲਦੀ ਦੇ ਬੂਥੇ ਆਇਆ ਹੋਇਆ ਹੈ। ਭਾਰਤ ਨੂੰ ਰਜਾਉਣ ਵਾਲਾ ਪੰਜਾਬੀ ਕਿਸਾਨ ਆਪ ਭੁੱਖਾ ਮਰਨ ਦੀ ਹਾਲਤ ਤੱਕ ਪਹੁੰਚ ਗਿਆ ਹੈ। ਖੇਤ ਮਜ਼ਦੂਰਾਂ ਦਾ ਹਾਲ ਹੋਰ ਵੀ ਮਾੜਾ ਹੈ। ਖੇਤੀ ਦਾ ਧੰਦਾ ਹੁਣ ਲਾਹੇਵੰਦ ਨਹੀਂ ਰਿਹਾ। ਚਾਹੁੰਦਾ ਹੋਇਆ ਵੀ ਕਿਸਾਨ ਖੇਤੀ ਨਹੀਂ ਛੱਡ ਸਕਦਾ। ਵਕਤ ਦੀਆਂ ਮਾਰਾਂ ਦੇ ਪੈਰੋਂ ਹਿਲਾਏ ਕਿਸਾਨਾਂ ਨੂੰ ਸਮਝ ਨਹੀਂ ਆ ਰਹੀ ਕਿ ਉਹ ਕਰਨ ਤਾਂ ਕੀ ਕਰਨ? ਸਰਕਾਰ ਕਣਕ-ਝੋਨੇ ਦੇ ਫ਼ਸਲੀ ਚੱਕਰ ਤੋਂ ਬਾਹਰ ਆਉਣ ਦਾ ਹੋਕਾ ਦੇ ਕੇ ਚੁੱਪ ਕਰ ਜਾਂਦੀ ਹੈ। ਕਿਸਾਨ ਹੌਸਲਾ ਕਰਕੇ ਜੇਕਰ ਕੋਈ ਹੋਰ ਫ਼ਸਲ ਬੀਜਦਾ ਵੀ ਤਾਂ ਉਹਦਾ ਖਰੀਦਦਾਰ ਕੋਈ ਨਹੀਂ ਮਿਲਦਾ। ਪਿਛਲੇ ਦਿਨੀਂ ਮੰਡੀਆਂ ਵਿਚ ਮੂੰਗੀ ਦਾ ਕੀ ਹਾਲ ਹੋਇਆ ਸਭ ਨੂੰ ਪਤਾ।
ਪੰਜਾਬ ਦੇ ਦੌਰੇ 'ਤੇ ਆਏ ਜੇਤਲੀ ਸਾਹਿਬ ਕਿਸਾਨਾਂ ਨੂੰ ਇਕੱਲੀ ਖੇਤੀ 'ਤੇ ਨਿਰਭਰ ਨਾ ਰਹਿ ਕੇ ਸਨਅਤ ਵੱਲ ਆਉਣ ਦੀ ਸਲਾਹ ਦੇ ਕੇ ਚਲੇ ਗਏ। ਜੱਗ ਜਾਣਦਾ ਹੈ ਕਿ ਕੇਂਦਰ ਸਰਕਾਰ ਨੇ ਹਿਮਾਚਲ ਪ੍ਰਦੇਸ਼ ਅਤੇ ਹੋਰ ਪਹਾੜੀ ਰਾਜਾਂ ਵਿਚ ਸਨਅਤਾਂ ਲਗਾਉਣ ਲਈ ਰਿਆਇਤਾਂ ਦੇ ਗੱਫੇ ਦੇ ਰੱਖੇ ਨੇ। ਨਵੀਆਂ ਤਾਂ ਨਵੀਆਂ, ਸਗੋਂ ਪੁਰਾਣੀਆਂ ਸਨਅਤਾਂ ਵੀ ਪੰਜਾਬ ਵਿਚੋਂ ਬਾਹਰ ਜਾ ਰਹੀਆਂ ਹਨ। ਅਜੇ ਤੱਕ ਕੇਂਦਰ ਨੇ ਕਿਸਾਨਾਂ ਦੀ ਕਣਕ ਦੇ ਪੈਸੇ, ਟਰਾਂਸਪੋਰਟਰਾਂ ਦੀ ਢੁਆਈ ਦੇ ਪੈਸੇ, ਵੱਖ-ਵੱਖ ਕੇਂਦਰੀ ਸਕੀਮਾਂ ਦੀ ਸਬਸਿਡੀ ਦੇ ਪੈਸੇ ਪੰਜਾਬ ਸਰਕਾਰ ਨੂੰ ਨਹੀਂ ਦਿੱਤੇ। ਲਗਦਾ ਹੈ ਇਸ ਸਮੇਂ ਪੰਜਾਬ ਦੀ ਬਾਂਹ ਫੜਨ ਵਾਲਾ ਕੋਈ ਨਹੀਂ। ਭਾਰਤ ਦੀ ਆਜ਼ਾਦੀ ਲਈ ਪ੍ਰਾਣਾਂ ਦੀ ਅਹੂਤੀ ਦੇਣ ਵਾਲੇ ਪੰਜਾਬੀਆਂ ਨੂੰ ਵੀ ਇਹ ਗੱਲ ਦੁੱਖ ਪਹੁੰਚਾਉਂਦੀ ਹੋਵੇਗੀ।


-ਪ੍ਰੀਤ ਸਿੰਘ ਸੰਦਲ
ਪਿੰਡ ਮਕਸੂਦੜਾ, ਤਹਿ: ਪਾਇਲ (ਲੁਧਿਆਣਾ)।


ਸਹੂਲਤ ਕਿ ਪ੍ਰੇਸ਼ਾਨੀ
ਸਰਕਾਰ ਵੱਲੋਂ ਟੀ. ਵੀ. ਚੈਨਲਾਂ 'ਤੇ ਇਹ ਪ੍ਰਚਾਰ ਕੀਤਾ ਜਾ ਰਿਹਾ ਹੈ ਕਿ ਉਨ੍ਹਾਂ ਨੇ ਲੋਕਾਂ ਦੀ ਸੁਵਿਧਾ ਲਈ ਬਿਜਲੀ ਸਬੰਧੀ ਸ਼ਿਕਾਇਤ ਲਈ ਇਕ ਨੰਬਰ 1912 ਸਥਾਪਤ ਕੀਤਾ ਹੈ। ਪਟਿਆਲੇ ਵਿਚ ਹਰੇਕ ਜ਼ੋਨ ਦੇ ਵੱਖੋ-ਵੱਖ 4-5 ਸ਼ਿਕਾਇਤ ਕੇਂਦਰ ਸਨ ਪਰ ਹੁਣ ਸਾਰੇ ਪਟਿਆਲੇ ਦਾ ਸ਼ਿਕਾਇਤ ਕੇਂਦਰ ਇਕ ਨੰਬਰ 'ਤੇ ਕਰ ਦਿੱਤਾ ਗਿਆ ਹੈ। ਉਪਰੋਕਤ ਨੰਬਰਾਂ 'ਤੇ ਟੈਲੀਫੋਨ ਬਿਜ਼ੀ ਹੀ ਰਹਿੰਦੇ ਹਨ ਕਿਉਂਕਿ ਸ਼ਿਕਾਇਤਕਰਤਾ ਜ਼ਿਆਦਾ ਹੁੰਦੇ ਹਨ।
ਮੈਂ ਬਜ਼ੁਰਗ ਨਾਗਰਿਕ ਹਾਂ ਰਾਤ ਬਿਜਲੀ ਦੀ ਸ਼ਿਕਾਇਤ ਕਰਨ ਲਈ ਅੱਧੇ ਘੰਟੇ ਤੋਂ ਵੱਧ ਸਮਾਂ ਟੈਲੀਫੋਨ ਕਰਦਾ ਰਿਹਾ ਪਰ ਹਮੇਸ਼ਾ ਫੋਨ ਰੁੱਝਾ ਹੀ ਹੁੰਦਾ ਸੀ। ਜੇ ਇਹ ਨੰਬਰ ਮਿਲ ਵੀ ਜਾਵੇ ਤਾਂ ਉਹ ਸ਼ਿਕਾਇਤ ਨੂੰ ਅੱਗੇ ਤੋਂ ਅੱਗੇ ਦਰਜ ਕਰਵਾਉਂਦੇ ਹਨ। ਸ਼ਿਕਾਇਤਕਰਤਾ ਨੂੰ ਇਹ ਪਤਾ ਹੀ ਨਹੀਂ ਚਲਦਾ ਕਿ ਸ਼ਿਕਾਇਤ ਦਾ ਕੀ ਬਣਿਆ। ਸਮਝ ਨਹੀਂ ਆਉਂਦੀ ਕਿ ਇਹ ਸੁਵਿਧਾਵਾਂ ਹਨ ਜਾਂ ਪ੍ਰੇਸ਼ਾਨੀਆਂ। ਚਾਹੀਦਾ ਤਾਂ ਇਹ ਹੈ ਕਿ ਵੱਧ ਤੋਂ ਵੱਧ ਸ਼ਿਕਾਇਤ ਸੈਂਟਰ ਖੋਲ੍ਹੇ ਜਾਣ ਤਾਂ ਕਿ ਲੋਕ ਆਸਾਨੀ ਨਾਲ ਆਪਣੀ ਸ਼ਿਕਾਇਤ ਦਰਜ ਕਰਵਾ ਸਕਣ। ਕਿਰਪਾ ਕਰਕੇ ਸਰਕਾਰ ਇਸ ਪਾਸੇ ਧਿਆਨ ਦੇ ਕੇ ਲੋਕਾਂ ਨੂੰ ਪ੍ਰੇਸ਼ਾਨੀ ਤੋਂ ਬਚਾਏ।


-ਸਤਿੰਦਰਵੀਰ ਸਿੰਘ
144/5, ਮੁਹੱਲਾ ਖਰਾਦੀਆਂ, ਪੁਲਿਸ ਡਵੀਜ਼ਨ ਨੰ: 2 ਦੇ ਪਿੱਛੇ, ਪਟਿਆਲਾ।



ਰੁੱਖ ਲਗਾਓ, ਵਾਤਾਵਰਨ ਬਚਾਓ
ਅੱਜ ਦੇ ਪਦਾਰਥਵਾਦੀ ਯੁੱਗ ਵਿਚ ਮਨੁੱਖ ਏਨਾ ਸਵਾਰਥੀ ਹੋ ਚੁੱਕਾ ਹੈ ਕਿ ਉਹ ਆਪਣੇ ਫਾਈਦੇ ਲਈ ਰੁੱਖਾਂ ਨੂੰ ਹੀ ਲਗਾਤਾਰ ਖ਼ਤਮ ਕਰ ਰਿਹਾ ਹੈ। ਰੁੱਖ ਜੋ ਸਾਡੀ ਖਾਤਰ ਤੇਜ਼ ਧੁੱਪਾਂ, ਝੱਖੜਾਂ ਨੂੰ ਜਰਦੇ ਹਨ ਪਰ ਸਾਨੂੰ ਹਮੇਸ਼ਾ ਠੰਢੀਆਂ ਛਾਵਾਂ ਹੀ ਦਿੰਦੇ ਹਨ। ਰੁੱਖਾਂ ਤੋਂ ਹੀ ਮਨੁੱਖ ਨੂੰ ਫੁੱਲ, ਫਲ, ਲੱਕੜ ਪ੍ਰਾਪਤ ਹੁੰਦੀ ਹੈ। ਮਨੁੱਖ ਅੱਜ ਉਨ੍ਹਾਂ ਰੁੱਖਾਂ ਦਾ ਹੀ ਦੁਸ਼ਮਣ ਬਣਿਆ ਹੋਇਆ ਹੈ। ਕਿਤੇ ਸ਼ਹਿਰੀਕਰਨ ਦੇ ਪ੍ਰਭਾਵ ਹੇਠ, ਕਿਤੇ ਫੈਕਟਰੀਆਂ ਲਗਾਉਣ ਲਈ, ਕਿਤੇ ਸੜਕਾਂ ਚੌੜੀਆਂ ਕਰਨ ਲਈ ਲਗਾਤਾਰ ਰੁੱਖਾਂ ਦੀ ਕਟਾਈ ਹੋ ਰਹੀ ਹੈ। ਰੁੱਖਾਂ ਦੀ ਇਸ ਤਰ੍ਹਾਂ ਲਗਾਤਾਰ ਕਟਾਈ ਕਰਕੇ ਅਸੀਂ ਕੁਦਰਤ ਨਾਲ ਛੇੜਛਾੜ ਕਰ ਰਹੇ ਹਾਂ ਅਤੇ ਵਿਨਾਸ਼ ਨੂੰ ਸੱਦਾ ਦੇ ਰਹੇ ਹਾਂ। ਸੋ, ਹਰ ਮਨੁੱਖ ਦਾ ਫ਼ਰਜ਼ ਬਣਦਾ ਹੈ ਕਿ ਉਹ ਆਪਣੇ ਜੀਵਨ ਵਿਚ ਘੱਟੋ-ਘੱਟ ਇਕ ਰੁੱਖ ਜ਼ਰੂਰ ਲਗਾਏ ਤੇ ਉਸ ਦੀ ਸੰਭਾਲ ਕਰਕੇ ਵਾਤਾਵਰਨ ਨੂੰ ਸੁੰਦਰ ਬਣਾਉਣ ਵਿਚ ਆਪਣਾ ਯੋਗਦਾਨ ਪਾਵੇ।


-ਜਸਪ੍ਰੀਤ ਕੌਰ 'ਸੰਘਾ'
ਪਿੰਡ ਤਨੂੰਲੀ, ਜ਼ਿਲ੍ਹਾ ਹੁਸ਼ਿਆਰਪੁਰ।



ਸਖ਼ਤ ਕਾਨੂੰਨ ਦੀ ਲੋੜ
ਪੰਜਾਬ ਵਿਚ ਸ਼ਰਾਬ ਦੇ ਠੇਕੇਦਾਰ ਕਾਨੂੰਨ ਦੀ ਖੁੱਲ੍ਹੇਆਮ ਦੁਰਵਰਤੋਂ ਕਰਦੇ ਹਨ। ਪਿੰਡਾਂ ਵਿਚ ਸ਼ਰਾਬ ਦੇ ਸ਼ਰੇਆਮ ਨਜਾਇਜ਼ ਠੇਕੇ ਖੁੱਲ੍ਹੇ ਮਿਲਦੇ ਹਨ, ਜਿਨ੍ਹਾਂ ਨੂੰ ਬੰਦ ਕਰਵਾਉਣਾ ਕਾਨੂੰਨ ਦੇ ਵਸ ਤੋਂ ਬਾਹਰ ਹੈ। ਸ਼ਹਿਰਾਂ ਵਿਚ ਸ਼ਰਾਬ ਦੇ ਠੇਕੇ ਖੁੱਲ੍ਹਣ ਦਾ ਸਮਾਂ ਸਵੇਰੇ 9 ਵਜੋਂ ਤੋਂ ਰਾਤ ਦੇ 11 ਵਜੇ ਤੱਕ ਹੈ। ਪਰ ਸ਼ਰਾਬ ਦੇ ਠੇਕੇਦਾਰ ਸਵੇਰੇ ਛੇ ਵਜੇ ਠੇਕੇ ਖੋਲ੍ਹ ਕੇ ਕਾਨੂੰਨ ਦੀਆਂ ਧੱਜੀਆਂ ਉਡਾਉਂਦੇ ਹਨ। ਸਹੀ ਮਾਅਨੇ ਵਿਚ ਸ਼ਰਾਬ ਦੇ ਠੇਕੇ ਖੁੱਲ੍ਹਣ ਦਾ ਸਮਾਂ ਦੁਪਹਿਰ ਦੋ ਵਜੇ ਤੋਂ ਰਾਤ ਦੇ ਬਾਰਾਂ ਵਜੇ ਤੱਕ ਹੋਣਾ ਚਾਹੀਦਾ ਹੈ। ਸ਼ਟਰ ਵਿਚ ਚੋਰ ਮੋਰੀ ਵੀ ਸ਼ਰੇਆਮ ਕਾਨੂੰਨ ਦੀਆਂ ਧੱਜੀਆਂ ਉਡਾਉਂਦੀ ਹੈ। ਇਸ ਨੂੰ ਬੰਦ ਕਰਨਾ ਚਾਹੀਦਾ ਹੈ। ਬੋਰਡ ਦਾ ਆਕਾਰ ਵੀ ਕਾਨੂੰਨ ਮੁਤਾਬਿਕ ਲੱਗਣਾ ਚਾਹੀਦਾ ਹੈ। ਸ਼ਰਾਬ ਦੀ ਰੇਟ ਲਿਸਟ ਅਤੇ ਖੁੱਲ੍ਹਣ ਤੇ ਬੰਦ ਹੋਣ ਦਾ ਸਮਾਂ ਵੀ ਲਿਖਣਾ ਚਾਹੀਦਾ ਹੈ। ਪੱਕਾ ਬਿੱਲ ਦੇਣ ਦਾ ਵੀ ਕਾਨੂੰਨ ਬਣਾਉਣਾ ਚਾਹੀਦਾ ਹੈ, ਤਾਂ ਜੋ ਨਕਲੀ ਜਾਂ ਮਿਲਾਵਟੀ ਸ਼ਰਾਬ ਦੀ ਵਰਤੋਂ ਘੱਟ ਹੋ ਸਕੇ।


-ਹਰਜਿੰਦਰ ਪਾਲ ਸਿੰਘ
ਜਵੱਦੀ ਕਲਾਂ, ਲੁਧਿਆਣਾ।


 

ਪ੍ਰੀਖਿਆ ਕੇਂਦਰ ਦੂਰ-ਦੁਰੇਡੇ ਕਿਉਂ?
ਸਿੱਖਿਆ ਵਿਭਾਗ, ਪੰਜਾਬ ਦੁਆਰਾ ਮਾਸਟਰ ਕਾਡਰ ਵਿਚ ਸਮਾਜਿਕ ਸਿੱਖਿਆ, ਸਾਇੰਸ, ਅੰਗਰੇਜ਼ੀ, ਹਿੰਦੀ, ਸੰਸਕ੍ਰਿਤ, ਪੰਜਾਬੀ, ਹਿਸਾਬ ਵਿਸ਼ਿਆਂ ਲਈ 6050 ਅਸਾਮੀਆਂ ਲਈ 20 ਨਵੰਬਰ, 2015 ਨੂੰ ਵਿਗਿਆਪਨ ਦਿੱਤਾ ਗਿਆ ਸੀ, ਜਿਸ ਦੀ ਲਿਖਤੀ ਪ੍ਰੀਖਿਆ ਮਿਤੀ 29.7.2016 ਤੋਂ 31.7.2016 ਤੱਕ ਲਈ ਜਾ ਰਹੀ ਹੈ। ਇਹ ਲਿਖਤੀ ਪ੍ਰੀਖਿਆ ਲਈ ਵੱਖ-ਵੱਖ ਸ਼ਹਿਰਾਂ ਵਿਚ ਪ੍ਰੀਖਿਆ ਕੇਂਦਰ ਬਣਾਏ ਗਏ ਹਨ, ਜਿਨ੍ਹਾਂ ਵਿਚ ਅੰਮ੍ਰਿਤਸਰ, ਬਠਿੰਡਾ, ਲੁਧਿਆਣਾ, ਮੋਹਾਲੀ ਆਦਿ ਸ਼ਹਿਰ ਸ਼ਾਮਿਲ ਹਨ। ਸਿੱਖਿਆ ਵਿਭਾਗ ਦੁਆਰਾ ਅੰਮ੍ਰਿਤਸਰ, ਗੁਰਦਾਸਪੁਰ ਦੇ ਵਸਨੀਕ ਉਮੀਦਵਾਰਾਂ ਦੇ ਪ੍ਰੀਖਿਆ ਕੇਂਦਰ ਮੋਹਾਲੀ ਬਣਾਏ ਗਏ ਹਨ, ਜਦ ਕਿ ਮੋਹਾਲੀ ਦੇ ਵਸਨੀਕ ਉਮੀਦਵਾਰਾਂ ਦੇ ਪ੍ਰੀਖਿਆ ਕੇਂਦਰ ਅੰਮ੍ਰਿਤਸਰ ਵਿਖੇ ਬਣਾਏ ਗਏ। ਇਸੇ ਤਰ੍ਹਾਂ ਹੀ ਬਾਕੀ ਸ਼ਹਿਰਾਂ ਦੇ ਉਮੀਦਵਾਰਾਂ ਲਈ ਦੂਰ-ਦੁਰਾਡੇ ਦੇ ਪ੍ਰੀਖਿਆ ਕੇਂਦਰ ਬਣਾਏ ਗਏ ਹਨ। ਸਾਰੇ ਹੀ ਉਮੀਦਵਾਰਾਂ ਨੂੰ ਪੰਜਾਬ ਦੇ ਇਕ ਕੋਨੇ ਤੋਂ ਦੂਜੇ ਕੋਨੇ ਵਿਚ ਪ੍ਰੀਖਿਆ ਕੇਂਦਰ ਅਲਾਟ ਕੀਤੇ ਗਏ ਹਨ, ਜੋ ਕਿ 250 ਤੋਂ 300 ਕਿਲੋਮੀਟਰ ਦੂਰ ਹਨ, ਜੋ ਕਿ ਉਨ੍ਹਾਂ ਨਾਲ ਬਹੁਤ ਹੀ ਜ਼ਿਆਦਾ ਬੇਇਨਸਾਫ਼ੀ ਹੈ। ਪ੍ਰੀਖਿਆ ਕੇਂਦਰ ਦੂਰ ਹੋਣ ਕਾਰਨ ਉਮੀਦਵਾਰਾਂ ਦਾ ਜ਼ਿਆਦਾਤਰ ਸਮਾਂ ਸਫ਼ਰ ਵਿਚ ਹੀ ਲੰਘ ਜਾਂਦਾ ਹੈ, ਜਿਸ ਦਾ ਅਸਰ ਉਨ੍ਹਾਂ ਦੀ ਪ੍ਰੀਖਿਆ 'ਤੇ ਵੀ ਪੈਂਦਾ ਹੈ।
ਬਹੁਤ ਸਾਰੇ ਉਮੀਦਵਾਰਾਂ ਨੇ ਦੋ-ਦੋ ਵਿਸ਼ਿਆਂ ਲਈ ਅਪਲਾਈ ਕੀਤਾ ਹੈ ਅਤੇ ਉਨ੍ਹਾਂ ਨੂੰ ਪ੍ਰੀਖਿਆ ਦੇਣ ਲਈ 2 ਦਿਨ ਪ੍ਰੀਖਿਆ ਕੇਂਦਰ ਵਾਲੇ ਸ਼ਹਿਰ ਵਿਚ ਹੀ ਰਹਿਣਾ ਪਏਗਾ। ਪ੍ਰੀਖਿਆ ਕੇਂਦਰ ਘਰ ਤੋਂ ਦੂਰ ਹੋਣ ਕਾਰਨ ਉਮੀਦਵਾਰ ਵਾਪਸ ਘਰ ਵੀ ਨਹੀਂ ਜਾ ਸਕੇਗਾ ਅਤੇ ਸਵੇਰੇ 9 ਵਜੇ ਪੇਪਰ ਹੋਣ ਕਾਰਨ ਉਸ ਨੂੰ ਇਕ ਦਿਨ ਪਹਿਲਾਂ ਹੀ ਪ੍ਰੀਖਿਆ ਕੇਂਦਰ ਵਾਲੇ ਸ਼ਹਿਰ ਵਿਚ ਪਹੁੰਚਣਾ ਪਏਗਾ। ਸਿੱਖਿਆ ਵਿਭਾਗ ਨੂੰ ਚਾਹੀਦਾ ਹੈ ਕਿ ਉਮੀਦਵਾਰਾਂ ਲਈ ਨੇੜੇ ਦੇ ਸ਼ਹਿਰਾਂ ਵਿਚ ਪ੍ਰੀਖਿਆ ਕੇਂਦਰ ਅਲਾਟ ਕੀਤੇ ਜਾਣ ਤਾਂ ਜੋ ਉਹ ਪੇਪਰ ਵੀ ਆਸਾਨੀ ਨਾਲ ਦੇ ਸਕਣ ਅਤੇ ਉਨ੍ਹਾਂ ਦੇ ਬੱਚਿਆਂ ਨੂੰ ਵੀ ਪ੍ਰੇਸ਼ਾਨੀ ਦਾ ਸਾਹਮਣਾ ਨਾ ਕਰਨਾ ਪਏ।


-ਰਾਜਬੀਰ ਸਿੰਘ, ਕਮਲੇਸ਼ ਰਾਣੀ, ਅਮਰ ਸਿੰਘ।

19-07-2016


ਬਹੁਤਾ ਸੁਣੀਏ, ਬੋਲੀਏ ਘੱਟ
ਸਮਾਜ ਵਿਚ ਦੋ ਤਰ੍ਹਾਂ ਦੇ ਮਨੁੱਖ ਹੁੰਦੇ ਹਨ ਚੁੱਪ ਭਾਵ ਘੱਟ ਬੋਲਣ ਵਾਲੇ ਅਤੇ ਬੜਬੋਲੇ। ਚੁੱਪ ਦਾ ਅਰਥ ਹੈ ਢੁਕਵੇਂ ਤੇ ਅਰਥ ਭਰਪੂਰ ਸ਼ਬਦਾਂ ਦੀ ਵਰਤੋਂ। ਘੱਟ ਬੋਲਣਾ, ਮਨੁੱਖ ਦੀ ਆਤਮਿਕ ਪਛਾਣ ਅਤੇ ਡੂੰਘਾਈ ਨੂੰ ਦਰਸਾਉਂਦਾ ਹੈ। ਦੂਜੇ ਪਾਸੇ ਬੜਬੋਲੇ ਭਾਵ ਜ਼ਿਆਦਾ ਬੋਲਣ ਵਾਲੇ ਮੂੰਹਫੱਟ ਲੋਕਾਂ ਦੀ ਗੱਲ ਵਜ਼ਨਦਾਰ ਨਾ ਹੋਣ ਕਰਕੇ ਉਨ੍ਹਾਂ ਦਾ ਲੋਕਾਂ ਵਿਚ ਬਹੁਤਾ ਪ੍ਰਭਾਵ ਨਹੀਂ ਕਬੂਲਿਆ ਜਾਂਦਾ।
ਬੜਬੋਲਾ ਆਦਮੀ ਆਪਣੀ ਗੱਲ ਨੂੰ ਅਸਰਦਾਰ ਬਣਾਉਣ ਲਈ ਉੱਚੀ ਆਵਾਜ਼ ਵਿਚ ਗੱਲ ਨੂੰ ਵਾਰ-ਵਾਰ ਦੁਹਰਾਉਂਦਾ ਹੈ। ਦੁਹਰਾਓ ਅਤੇ ਉੱਚੀ ਆਵਾਜ਼ ਵਿਚ ਗੱਲ ਕਰਨ ਵਾਲੇ ਆਦਮੀ ਦੀ ਦਲੀਲ ਕਮਜ਼ੋਰ ਅਤੇ ਖੋਖਲੀ ਹੁੰਦੀ ਹੈ। ਬੌਧਿਕ ਪੱਖੋਂ ਊਣੇ ਵਿਅਕਤੀ ਸ਼ੋਰ ਤੇ ਭੀੜ ਦਾ ਸਹਾਰਾ ਲੈਂਦੇ ਹਨ। ਚੁੱਪ, ਮਨੁੱਖ ਨੂੰ ਸੁੱਘੜ ਅਤੇ ਜ਼ਿੰਮੇਵਾਰ ਬਣਾਉਂਦੀ ਹੈ। ਪੰਛੀ ਅਤੇ ਜਾਨਵਰ ਕੁਦਰਤ ਨਾਲ ਇਕਮਿਕ ਹੋਣ ਕਰਕੇ ਕੁਦਰਤ ਦੇ ਵਧੇਰੇ ਨੇੜੇ ਹਨ, ਜਿਸ ਕਰਕੇ ਇਹ ਸਿਰਫ ਉਦੋਂ ਬੋਲਦੇ ਹਨ, ਜਦੋਂ ਉਨ੍ਹਾਂ ਨੂੰ ਵਿਸ਼ੇਸ਼ ਲੋੜ ਹੋਵੇ, ਪਰ ਮਨੁੱਖ ਬੇਲੋੜਾ ਅਤੇ ਫਜ਼ੂਲ ਬੋਲਦਾ ਹੈ। ਦੋ ਕੰਨ, ਦੋ ਅੱਖਾਂ ਤੇ ਇਕ ਮੂੰਹ ਇਸੇ ਲਈ ਹਰ ਮਨੁੱਖ ਦੇ ਪਾਸ ਹੈ ਕਿ ਉਹ ਸੁਣੇ ਜ਼ਿਆਦਾ, ਵੇਖੇ ਜ਼ਿਆਦਾ ਪਰ ਬੋਲੇ ਘੱਟ।


-ਗੁਰਬਚਨ ਸਿੰਘ ਲਾਲੀ
ਲੇਖਕ ਮੰਚ, ਪੱਟੀ।


ਸਮਾਜ ਦੀ ਸਿਹਤ
ਪਿਛਲੇ ਦਿਨੀਂ ਯੋਗਾ ਦਿਵਸ ਮਨਾਇਆ ਗਿਆ, ਜਿਸ ਵਿਚ ਬਹੁਤ ਸਾਰੇ ਲੋਕਾਂ ਨੇ ਹਿੱਸਾ ਲਿਆ। ਦੇਸ਼ ਦੀਆਂ ਪ੍ਰਮੁੱਖ ਸ਼ਖ਼ਸੀਅਤਾਂ ਨੇ ਲੋਕਾਂ ਨੂੰ ਯੋਗਾ ਕਰਨ ਵੱਲ ਆਕਰਸ਼ਿਤ ਕਰਨ ਲਈ ਯਤਨ ਕੀਤਾ। ਨਾਲ ਇਸ ਦੇ ਫਾਇਦੇ ਦੱਸਦਿਆਂ ਸਿਹਤ ਲਈ ਸਸਤੀ ਸਹੂਲਤ ਪ੍ਰਚਾਰਿਆ। ਯੋਗਾ ਕਰਨਾ ਮਾੜੀ ਗੱਲ ਨਹੀਂ, ਸਰੀਰ ਨੂੰ ਫਿੱਟ ਰੱਖਣ ਲਈ ਅਤੇ ਬਿਮਾਰੀਆਂ ਤੋਂ ਬਚਾਉਣ ਲਈ ਵਰਜਿਸ਼ ਕਰਨੀ ਜ਼ਰੂਰੀ ਹੈ ਪਰ ਜੋ ਰਾਜਨੀਤਕ ਨੇਤਾ ਸਾਡੀ ਸਿਹਤ ਦਾ ਫ਼ਿਕਰ ਕਰਦੇ ਹੋਏ ਯੋਗਾ ਕਰਨ ਲਈ ਸਾਨੂੰ ਪ੍ਰੇਰਿਤ ਕਰ ਰਹੇ ਹਨ, ਉਨ੍ਹਾਂ ਦਾ ਇਕ ਜ਼ਰੂਰੀ ਫਰਜ਼ ਵੀ ਬਣਦਾ ਹੈ।
ਜੇਕਰ ਧਿਆਨ ਦਿੱਤਾ ਜਾਵੇ, ਕੁਸ਼ਲ ਪ੍ਰਬੰਧ ਤੋਂ ਬਗੈਰ ਤਰਾਹ-ਤਰਾਹ ਕਰਦੀ ਕਿਸਾਨੀ ਤੇ ਜਵਾਨੀ ਆਪ ਦਾ ਧਿਆਨ ਮੰਗਦੀ ਹੈ, ਸਿਰਫ ਵਾਅਦਿਆਂ ਅਤੇ ਲਾਰਿਆਂ ਨਾਲ ਜਨਤਾ ਦੇ ਅੱਛੇ ਦਿਨ ਨਹੀਂ ਆਉਣੇ। ਪਹਿਲਾਂ ਸਮਾਜ ਨੂੰ ਨਸ਼ਾ ਮੁਕਤ ਤੇ ਭ੍ਰਿਸ਼ਟਾਚਾਰ ਮੁਕਤ ਕੀਤਾ ਜਾਵੇ ਤਾਂ ਕਿ ਲੋਕ ਤਣਾਅ ਮੁਕਤ ਹੋ ਕੇ ਇਸ (ਯੋਗਾ) ਨੂੰ ਅਪਣਾ ਸਕਣ। ਜਦੋਂ ਤੱਕ ਮਨੁੱਖਤਾ ਮਾਨਸਿਕ ਤੌਰ 'ਤੇ ਤਿਆਰ ਨਹੀਂ, ਉਦੋਂ ਤੱਕ ਯੋਗਾ ਕਰਨ ਦੀਆਂ ਸੌਖੀਆਂ ਕਿਰਿਆਵਾਂ ਵੀ ਔਖੀਆਂ ਲੱਗਣੀਆਂ।


-ਡਾ: ਜਗਸੀਰ ਸਿੰਘ
ਪਿੰਡ ਹਿੰਮਤਪੁਰਾ, ਤਹਿ: ਨਿ: ਸਿ: ਵਾਲਾ, ਜ਼ਿਲ੍ਹਾ ਮੋਗਾ।

17-7-2016

 ਜਾਂਚ ਦਰ ਜਾਂਚ

1984 'ਚ ਹੋਏ ਯੋਜਨਾਬੱਧ ਸਿੱਖ ਕਤਲੇਆਮ ਨੂੰ ਵਾਪਰਿਆਂ 32 ਸਾਲ ਹੋ ਚੱਲੇ ਹਨ। ਪਿਛਲੇ ਦਿਨੀਂ ਦੇਸ਼ ਦੇ ਗ੍ਰਹਿ ਮੰਤਰਾਲੇ ਨੇ ਮੁੜ ਵਿਸ਼ੇਸ਼ ਜਾਂਚ ਟੀਮ ਬਣਾਈ ਹੈ। ਅਖੇ ਇਹ ਜਾਂਚ ਟੀਮ ਉਨ੍ਹਾਂ ਕੇਸਾਂ ਦੀ ਮੁੜ ਜਾਂਚ ਕਰੇਗੀ, ਜਿਹੜੇ ਕੇਸਾਂ ਦੀਆਂ ਫਾਈਲਾਂ ਬੰਦ ਹੋ ਚੁੱਕੀਆਂ ਹਨ। ਏਨਾ ਵੱਡਾ ਕਤਲੇਆਮ ਹੋਇਆ ਹੋਵੇ, ਜਿਸ ਵਿਚ 3325 ਲੋਕ ਮਾਰੇ ਗਏ ਹੋਣ। ਧੀਆਂ ਦੀ ਇੱਜ਼ਤ ਲੁੱਟੀ ਗਈ ਹੋਵੇ। ਬਾਰੇ ਜਾਂਚ-ਦਰ-ਜਾਂਚ ਟੀਮਾਂ ਬਣਾ ਕੇ ਪਿਛਲੇ ਲੰਮੇ ਸਮੇਂ ਤੋਂ ਇਨਸਾਫ਼ ਦੀ ਆਸ ਲਾਈ ਬੈਠੀ ਸਿੱਖ ਕੌਮ ਨਾਲ ਮਜ਼ਾਕ ਨਹੀਂ ਤਾਂ ਹੋਰ ਕੀ ਹੈ? ਸਮੇਂ-ਸਮੇਂ 'ਤੇ ਬਣੀਆਂ ਜਾਂਚ ਟੀਮਾਂ ਅੱਜ ਤੱਕ ਦੋਸ਼ੀਆਂ ਨੂੰ ਹੀ ਨਹੀਂ ਲੱਭ ਸਕੀਆਂ। ਦੋਸ਼ੀਆਂ ਨੂੰ ਸਜ਼ਾਵਾਂ ਦੇਣੀਆਂ ਤਾਂ ਦੂਰ ਦੀ ਗੱਲ ਹੈ। ਇਕ ਤਾਂ ਘੱਟ ਗਿਣਤੀ ਦਾ ਹੋਇਆ ਵੱਡੀ ਪੱਧਰ ਤੇ ਕਤਲੇਆਮ ਤੇ ਦੂਜਾ 32 ਸਾਲ ਗੁਜ਼ਰ ਜਾਣ 'ਤੇ ਵੀ ਦੋਸ਼ੀਆਂ ਨੂੰ ਸਜ਼ਾਵਾਂ ਨਾ ਮਿਲਣਾ ਦੇਸ਼ ਦੇ ਮੱਥੇ 'ਤੇ ਵੱਡਾ ਕਲੰਕ ਹੈ। ਇਸ ਕਲੰਕ ਨੂੰ ਧੋਣ ਲਈ ਜਾਂਚ ਟੀਮਾਂ ਦੀ ਨਹੀਂ ਸਗੋਂ ਦੋਸ਼ੀਆਂ ਨੂੰ ਸਜ਼ਾਵਾਂ ਦੇਣ ਦੀ ਲੋੜ ਹੈ। ਪਿਛਲੇ 32 ਸਾਲਾਂ ਤੋਂ ਇਸ ਕਤਲੇਆਮ 'ਤੇ ਸਿਆਸਤ ਕਰਦੀਆਂ ਆ ਰਹੀਆਂ ਸਿਆਸੀ ਪਾਰਟੀਆਂ ਹੁਣ ਇਕ ਮਤ ਹੋ ਕੇ ਸਿੱਖ ਕੌਮ ਨੂੰ ਇਨਸਾਫ਼ ਦਿਵਾਉਣ। ਨਹੀਂ ਤਾਂ ਦੇਸ਼ ਦੀ ਜਨਤਾ ਦਾ ਬਚਿਆ-ਖੁਸਿਆ ਵਿਸ਼ਵਾਸ ਵੀ ਸਿਆਸੀ ਪਾਰਟੀਆਂ ਤੋਂ ਉਠ ਜਾਵੇਗਾ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

ਗੈਂਗਸਟਰਾਂ ਦਾ ਅੰਤ ਮਾੜਾ

ਅੱਜਕਲ੍ਹ ਵਿਹਲੀ ਮੁੰਡ੍ਹੀਰ ਵਿਚ ਇਹ ਬਹੁਤ ਹੀ ਰੁਝਾਨ ਬਣ ਗਿਆ ਹੈ, ਗੈਂਗਸਟਰ ਵਿਚ ਭਰਤੀ ਹੋਣ ਦਾ। ਇਸ ਵਿਚ ਕੋਈ ਸ਼ੱਕ ਨਹੀਂ ਗੈਂਗਸਟਰਾਂ ਦੇ ਆਗੂ ਵੱਡੇ ਘਰਾਂ ਦੇ ਵਿਗੜੇ ਅਮੀਰਜ਼ਾਦੇ ਹੁੰਦੇ ਹਨ। ਉਨ੍ਹਾਂ ਨੂੰ ਆਪਣੇ ਘਰਦਿਆਂ ਦੀ ਪੂਰੀ ਮਾਇਕ ਮਦਦ ਹੁੰਦੀ ਹੈ। ਉਨ੍ਹਾਂ ਵੱਲ ਵੇਖ ਕੇ ਗਰੀਬੀ ਨਾਲ ਲੜਦਿਆਂ ਦੇ ਮਨ ਵੀ ਲਾਲਚਵੱਸ ਹੋ ਕੇ ਉਨ੍ਹਾਂ ਦੀਆਂ ਪੈੜਾਂ 'ਤੇ ਚੱਲ ਕੇ ਆਪਣੀ ਜ਼ਿੰਦਗੀ ਨੂੰ ਮੌਤ ਦੇ ਮੂੰਹ ਵਿਚ ਪਾ ਲੈਂਦੇ ਹਨ, ਥੋੜ੍ਹੇ ਦਿਨ ਉਨ੍ਹਾਂ ਦੀ ਮਜਬੂਰੀ ਦਾ ਫਾਇਦਾ ਉਠਾ ਕੇ ਅਮੀਰਜ਼ਾਦੇ ਪਹਿਲਾਂ ਉਨ੍ਹਾਂ ਦਾ ਖਰਚਾ ਚੁੱਕ ਲੈਂਦੇ ਹਨ, ਨਸ਼ਿਆਂ ਆਦਿ 'ਤੇ ਲਾ ਦਿੰਦੇ ਹਨ, ਫਿਰ ਉਨ੍ਹਾਂ ਤੋਂ ਉਨ੍ਹਾਂ ਦੀ ਮਰਜ਼ੀ ਦੇ ਉਲਟ ਕੰਮ ਕਰਵਾ ਕੇ ਗ਼ਲਤ ਰਸਤਿਆਂ ਦੇ ਪਾਂਧੀ ਬਣਾ ਦਿੰਦੇ ਹਨ, ਇਨ੍ਹਾਂ ਲੋਕਾਂ ਨੂੰ ਇਹ ਗੱਲ ਸਮਝ ਲੈਣੀ ਚਾਹੀਦੀ ਹੈ ਕਿ ਦੂਸਰਿਆਂ ਦੇ ਰਾਹ ਵਿਚ ਰੋੜਾ ਬਣਨ ਵਾਲਿਆਂ ਨੂੰ ਆਪਣੀ ਠੋਕਰ ਖਾਣੀ ਪੈਂਦੀ ਹੈ। ਅੱਤ ਦਾ ਅੰਤ ਮਾੜਾ ਹੀ ਹੁੰਦਾ ਹੈ। ਦੂਸਰਿਆਂ ਦੇ ਘਰਾਂ ਦੇ ਚਿਰਾਗ ਬੁਝਾਉਣ ਵਾਲਿਆਂ ਦੇ ਆਪਣੇ ਘਰ ਕਦੇ ਅੱਗ ਨਹੀਂ ਬਲਦੀ। ਗੈਂਗਸਟਰ ਦਾ ਅੰਤ ਕੁੱਤੇ ਦੀ ਮੌਤ ਹੈ।

-ਮਨਜੀਤ ਸਿੰਘ ਭਾਮ
ਹੁਸ਼ਿਆਰਪੁਰ। ਮੋ: 94784-00012.

ਵਿਗੜਿਆ ਰਸੋਈ ਦਾ ਬਜਟ

ਪਿਛਲੇ ਚਾਰ-ਪੰਜ ਮਹੀਨਿਆਂ ਵਿਚ ਮਹਿੰਗਾਈ ਨੇ ਲੋਕਾਂ ਦਾ ਕਚੂੰਮਰ ਹੀ ਕੱਢ ਕੇ ਰੱਖ ਦਿੱਤਾ ਹੈ। ਇਨ੍ਹਾਂ ਦਿਨਾਂ ਵਿਚ ਦਾਲਾਂ ਦੇ ਭਾਅ ਆਸਮਾਨ ਨੂੰ ਛੂਹ ਰਹੇ ਹਨ ਅਤੇ ਖੰਡ ਦੀਆਂ ਕੀਮਤਾਂ ਵਿਚ ਕਾਫ਼ੀ ਤੇਜ਼ੀ ਆਈ ਹੈ। ਜੇ ਮਹਿੰਗਾਈ ਦਾ ਇਹੀ ਹਾਲ ਰਿਹਾ ਤਾਂ ਆਮ ਆਦਮੀ ਲਈ ਦਾਲ-ਰੋਟੀ ਤਾਂ ਸੁਪਨੇ ਵਾਲੀ ਗੱਲ ਹੋ ਜਾਵੇਗੀ। ਸਰਕਾਰ ਆਮ ਜਨਤਾ ਵੱਲ ਦੇਖਦੇ ਹੋਏ ਮਹਿੰਗਾਈ ਘੱਟ ਕਰਨ ਦਾ ਉਪਰਾਲਾ ਕਰੇ ਤਾਂ ਜੋ ਲੋਕ ਦੋ ਵਕਤ ਦੀ ਰੋਟੀ ਆਸਾਨੀ ਨਾਲ ਖਾ ਸਕਣ।
-ਸੇਵਾ ਰਾਮ ਸਿੰਗਲਾ
ਮੇਨ ਅਜੀਤ ਰੋਡ, ਬਠਿੰਡਾ।
ਪੰਜਾਬੀ ਦਾ ਸਤਿਕਾਰ
ਅੱਜ ਬਹੁਤ ਹੀ ਦੁੱਖ ਦੀ ਗੱਲ ਹੈ ਕਿ ਅਸੀਂ ਮਾਂ ਬੋਲੀ ਪੰਜਾਬੀ ਤੋਂ ਦੂਰ ਹੁੰਦੇ ਜਾ ਰਹੇ ਹਾਂ ਅਤੇ ਪੰਜਾਬੀ ਬੋਲਣ ਵਿਚ ਝਿਜਕ ਮਹਿਸੂਸ ਕਰਦੇ ਹਾਂ ਜੋ ਕਿ ਸਾਡੇ ਲਈ ਬਹੁਤ ਸ਼ਰਮਵਾਲੀ ਗੱਲ ਹੈ। ਅਸੀਂ ਪੰਜਾਬੀ ਬੋਲਣ ਵਾਲੇ ਨੂੰ ਦੇਸੀ ਸਮਝਦੇ ਹਾਂ। ਸਾਡੇ ਉਪਰ ਹੋਰ ਭਾਸ਼ਾਵਾਂ ਭਾਰੂ ਹਨ। ਅੱਜ ਹਰ ਜਗ੍ਹਾ ਦਫਤਰਾਂ, ਬੈਂਕਾਂ, ਸਕੂਲਾਂ ਅਤੇ ਹੋਰ ਵਿਭਾਗਾਂ ਵਿਚ ਅੰਗਰੇਜ਼ੀ ਦਾ ਬੋਲਬਾਲਾ ਹੈ। ਹੋਰ ਤਾਂ ਹੋਰ ਪੰਜਾਬੀ ਗੀਤਾਂ ਵਿਚ ਵੀ ਅੰਗਰੇਜ਼ੀ ਭਾਰੂ ਹੈ। ਸਾਨੂੰ ਪੰਜਾਬੀ ਹੋਣ 'ਤੇ ਅਤੇ ਪੰਜਾਬੀ ਬੋਲਣ 'ਤੇ ਮਾਣ ਹੋਣਾ ਚਾਹੀਦਾ ਹੈ। ਸਰਕਾਰਾਂ ਨੂੰ ਵੀ ਚਾਹੀਦਾ ਹੈ ਕਿ ਉਹ ਸਾਰੇ ਵਿਭਾਗਾਂ ਦਾ ਸਾਰਾ ਕੰਮ ਕਾਜ ਪੰਜਾਬੀ ਵਿਚ ਹੋਣਾ ਲਾਜ਼ਮੀ ਬਣਾਉਣ। ਸਾਨੂੰ ਇਸ ਕਥਨ 'ਤੇ ਪ੍ਰਪੱਕ ਰਹਿਣਾ ਚਾਹੀਦਾ ਹੈ। ਪੰਜਾਬੀ ਪੜ੍ਹੋ, ਪੰਜਾਬੀ ਲਿਖੋ, ਪੰਜਾਬੀ ਬੋਲੋ।

-ਮਨਦੀਪ ਸਿੰਘ
ਪਿੰਡ ਸ਼ਹਿਣਾ, ਜ਼ਿਲ੍ਹਾ ਬਰਨਾਲਾ।
ਮੋਬਾਈਲ: 95927-81264.

ਅਵਾਰਾ ਕੁੱਤੇ

ਅਜੋਕੇ ਦੌਰ ਵਿਚ ਹਰ ਤੀਜਾ ਮਨੁੱਖ ਬਿਮਾਰੀਆਂ ਦਾ ਸ਼ਿਕਾਰ ਹੈ। ਡਾਕਟਰ ਵੀ ਹਰ ਇਕ ਮਰੀਜ਼ ਨੂੰ ਸੈਰ ਕਰਨ ਦੀ ਸਲਾਹ ਦਿੰਦੇ ਹਨ ਪਰ ਕੋਈ ਸਵੇਰੇ-ਸ਼ਾਮ ਕਿਵੇਂ ਸੈਰ ਕਰੇ? ਕਿਉਂਕਿ ਹਰ ਗਲੀ ਮੁਹੱਲੇ ਵਿਚ ਅਵਾਰਾ ਕੁੱਤਿਆਂ ਦੇ ਟੋਲੇ ਘੁੰਮਦੇ ਹਨ। ਆਏ ਦਿਨ ਅਖ਼ਬਾਰ ਦੀਆਂ ਸੁਰਖੀਆਂ ਬਣਦੀਆਂ ਹਨ, ਇਨ੍ਹਾਂ ਦੀਆਂ ਮਾਸੂਮਾਂ ਨੂੰ ਵੱਢ ਖਾਣ ਦੀਆਂ ਖ਼ਬਰਾਂ, ਕਿੰਨੇ ਬੱਚੇ ਇਨ੍ਹਾਂ ਦੇ ਵੱਢਣ ਨਾਲ ਮੌਤ ਦੇ ਮੂੰਹ ਵਿਚ ਜਾ ਪਏ ਹਨ। ਕਿੰਨੇ ਮਨੁੱਖਾਂ ਨੂੰ ਪਾੜ ਸੁੱਟਿਆ ਹੈ। ਕਿਸਾਨ ਵਿਚਾਰੇ ਰਾਤਾਂ ਨੂੰ ਜਾਗ ਕੇ ਫ਼ਸਲਾਂ ਨੂੰ ਪਾਣੀ ਲਾਉਣ ਜਾਂਦੇ ਇਨ੍ਹਾਂ ਦਾ ਸ਼ਿਕਾਰ ਹੋ ਜਾਂਦੇ ਹਨ। ਔਰਤਾਂ ਅੰਮ੍ਰਿਤ ਵੇਲੇ ਗੁਰੂ ਘਰ ਜਾਣ ਤੋਂ ਡਰਦੀਆਂ ਨੇ ਇਨ੍ਹਾਂ ਅਵਾਰਾ ਕੁੱਤਿਆਂ ਤੋਂ। ਪਰ ਇਨ੍ਹਾਂ ਦੀ ਆਬਾਦੀ ਦਿਨੋ-ਦਿਨ ਵਧ ਰਹੀ ਹੈ। ਕਿੰਨੀ ਹੀ ਵਾਰੀ ਅਖ਼ਬਾਰਾਂ ਵਿਚ ਇਹ ਮਸਲੇ ਉਠੇ ਨੇ ਇਨ੍ਹਾਂ ਕੁੱਤਿਆਂ ਦਾ ਕੋਈ ਸਥਾਈ ਹੱਲ ਕੱਢਿਆ ਜਾਵੇ। ਪਰ ਸਰਕਾਰ ਨੇ ਕੰਨ 'ਤੇ ਜੂੰ ਤੱਕ ਨਹੀਂ ਸਰਕਦੀ। ਕੀ ਕਦੇ ਇਸ ਮਸਲੇ ਦਾ ਹੱਲ ਨਿਕਲੇਗਾ ਜਾਂ ਸਰਕਾਰ ਲਈ ਮਨੁੱਖਾਂ ਨਾਲੋਂ ਕੁੱਤਿਆਂ ਦੀ ਜ਼ਿੰਦਗੀ ਜ਼ਿਆਦਾ ਪਿਆਰੀ ਹੈ?

-ਸਤਵਿੰਦਰ ਸਿੰਘ ਗਿੱਲ
ਪਿੰਡ ਮੁੱਲਾਂਪੁਰ, ਜ਼ਿਲ੍ਹਾ ਲੁਧਿਆਣਾ।
ਮੋਬਾਈਲ : 98141-25694.

 

10-7-2016

 ਚੰਗੀ ਮਿਸਾਲ


ਇਕ ਅਨੋਖੀ ਖੁਸ਼ਖਬਰੀ 'ਅਜੀਤ' ਵਿਚ ਪੜ੍ਹਨ ਨੂੰ ਮਿਲੀ। ਜਗਰਾਉਂ ਹਲਕੇ ਦੇ ਵਿਧਾਇਕ ਸ੍ਰੀ ਐਸ.ਆਰ. ਕਲੇਰ ਵੱਲੋਂ ਕਰਵਾਏ ਜਾ ਰਹੇ ਵਿਕਾਸ ਦੇ ਕੰਮਾਂ ਦੀ ਇਲਾਕੇ ਦੀ ਵਿਰੋਧੀ ਧਿਰ ਭਾਵ ਕਾਂਗਰਸ ਪਾਰਟੀ ਦੇ ਆਗੂਆਂ, ਕੌਂਸਲਰਾਂ ਤੇ ਹੋਰ ਪਤਵੰਤਿਆਂ ਨੇ ਸ਼ਲਾਘਾ ਕੀਤੀ, ਧੰਨਵਾਦ ਕੀਤਾ ਤੇ ਵਿਕਾਸ ਦੇ ਕੰਮਾਂ ਵਿਚ ਸਹਿਯੋਗ ਕਰਨ ਦਾ ਵਾਅਦਾ ਕੀਤਾ। ਇਹ ਇਕ ਅਦਭੁਤ ਮਿਸਾਲ ਕਾਇਮ ਕੀਤੀ ਗਈ ਹੈ। ਲੋਕ ਭਲਾਈ ਕਾਰਜਾਂ ਵਿਚ ਇਕਜੁਟ ਹੋਣਾ ਉੱਤਮ ਨੀਤੀ ਹੈ। ਇਸ ਮੀਟਿੰਗ ਦੀ ਇਲਾਕੇ ਦੇ ਲੋਕ ਬੜੀ ਪ੍ਰਸੰਸਾ ਕਰ ਰਹੇ ਹਨ।
ਆਮ ਤੌਰ 'ਤੇ ਦੇਖਿਆ-ਸੁਣਿਆ ਜਾਂਦਾ ਹੈ ਕਿ ਸਮੇਂ ਦੀ ਸਰਕਾਰ ਵੱਲੋਂ ਕਿੰਨਾ ਵੀ ਚੰਗਾ ਤੇ ਲਾਭਦਾਇਕ ਮਤਾ ਪੇਸ਼ ਕੀਤਾ ਜਾਵੇ, ਵਿਰੋਧੀ ਧਿਰ ਨੇ ਰੌਲਾ-ਰੱਪਾ ਪਾ ਕੇ ਵਿਰੋਧ ਕਰਨਾ ਹੀ ਕਰਨਾ ਹੁੰਦਾ ਹੈ। ਕਾਸ਼! ਦੇਸ਼, ਕੌਮ ਤੇ ਲੋਕਾਂ ਦੇ ਭਲੇ ਲਈ ਕੀਤੇ ਜਾ ਰਹੇ ਯਤਨਾਂ ਵਿਚ ਪੰਚਾਇਤ, ਕੌਂਸਲ, ਨਿਗਮ, ਵਿਧਾਨ ਸਭਾ ਤੇ ਲੋਕ ਸਭਾ ਵਿਚ ਵੀ ਸਹਿਯੋਗ ਕੀਤਾ ਜਾਵੇ।

-ਮਾ: ਮਹਿੰਦਰ ਸਿੰਘ ਸਿੱਧੂ
ਸਿੱਧਵਾਂ ਕਲਾਂ। ਮੋਬਾਈਲ : 98720-86101.

ਖੇਤੀ ਸਬਸਿਡੀਆਂ ਦੀ ਗੱਲ


ਬਲਵੀਰ ਸਿੰਘ ਰਾਜੇਵਾਲ ਨੇ ਕੇਂਦਰ ਸਰਕਾਰ ਦੀਆਂ ਖੇਤੀ ਨੀਤੀਆਂ ਦਾ ਠੀਕ ਵਿਸ਼ਲੇਸ਼ਣ ਕੀਤਾ ਹੈ ਪਰ ਇਕ ਵਿਸ਼ੇ 'ਤੇ ਉਨ੍ਹਾਂ ਦੀ ਰਾਇ ਠੀਕ ਨਹੀਂ ਲਗਦੀ। ਮੇਰੀ ਰਾਇ ਮੁਤਾਬਿਕ ਰਸਾਇਣਕ ਖਾਦਾਂ ਦੀ ਸਬਸਿਡੀ, ਜੋ ਕਿ ਹਜ਼ਾਰਾਂ ਕਰੋੜ ਹੈ, ਸਿੱਧੀ ਕਿਸਾਨ ਨੂੰ ਦੇਣ ਵਿੱਚ ਕਿਸਾਨ, ਖੇਤੀ, ਜ਼ਮੀਨ ਅਤੇ ਦੇਸ਼ ਨੂੰ ਲਾਹਾ ਪਹੁੰਚੇਗਾ। ਅੱਜ ਇਸ ਸਬਸਿਡੀ ਦਾ ਲੈਣ-ਦੇਣ ਰਸਾਇਣ ਮੰਤਰਾਲੇ ਅਤੇ ਇੰਡਸਟਰੀ ਵਿਚਕਾਰ ਹੁੰਦਾ ਹੈ। ਇਹ ਸਬਸਿਡੀ ਇੰਡਸਟਰੀ ਦੀ ਮੰਗ 'ਤੇ ਨਿਰਧਾਰਤ ਹੁੰਦੀ ਹੈ। ਕਿਸਾਨ ਦੇ ਨਾਂਅ 'ਤੇ ਇਸ ਸਬਸਿਡੀ ਦਾ ਕੀ ਹੁੰਦਾ ਹੈ, ਰੱਬ ਹੀ ਜਾਣੇ। ਅੱਜ ਕੰਪਿਊਟਰ ਦੇ ਯੁੱਗ ਵਿਚ ਕਿਸੇ ਵੀ ਸਬਸਿਡੀ ਦੀ ਠੀਕ ਵੰਡ ਔਖਾ ਕੰਮ ਨਹੀਂ। ਇਹ ਅਸੀਂ ਗੈਸ ਸਬਸਿਡੀ ਦੇ ਮਾਮਲੇ 'ਚ ਦੇਖ ਹੀ ਲਿਆ ਹੈ। ਜਿਸ ਨਾਲ ਦੇਸ਼ ਦੇ 14000 ਕਰੋੜ ਰੁਪਏ ਪ੍ਰਤੀ ਸਾਲ ਬਚੇ ਵੀ ਹਨ, ਹਜ਼ਾਰਾਂ ਗਰੀਬਾਂ ਨੂੰ ਨਵੇਂ ਗੈਸ ਕੁਨੈਕਸ਼ਨ ਵੀ ਮਿਲ ਰਹੇ ਹਨ ਅਤੇ ਗੈਸ ਦੀਆਂ ਕੀਮਤਾਂ ਵੀ ਪਹਿਲਾਂ ਨਾਲੋਂ ਘਟੀਆਂ ਹਨ। ਉਮੀਦ ਹੈ ਉਸੇ ਤਰ੍ਹਾਂ ਖਾਦਾਂ ਦੀ ਜਿੰਨੀ ਕੀਮਤ ਅੱਜ ਇੰਡਸਟਰੀ ਵਿਖਾਉਂਦੀ ਹੈ, ਇਸ ਤੋਂ ਕਿਤੇ ਘੱਟ ਕੀਮਤ 'ਤੇ ਵਿਕਣਗੀਆਂ। ਇਸ ਸਬਸਿਡੀ ਨਾਲ ਇੰਡਸਟਰੀ ਆਪਣੀਆਂ ਕਮਜ਼ੋਰੀਆਂ ਵੀ ਛਿਪਾਉਂਦੀ ਹੈ।
ਦੂਸਰਾ ਖਾਦਾਂ ਦਾ ਅਸਲੀ ਮੁੱਲ਼ ਕਿਸਾਨ ਨੂੰ ਪਤਾ ਹੋਣਾ ਬਹੁਤ ਜ਼ਰੂਰੀ ਹੈ, ਕਿਉਂਕਿ ਸਾਰੀਆਂ ਖਾਦਾਂ ਖ਼ਤਮ ਹੋਣ ਵਾਲੇ ਕੁਦਰਤੀ ਸੋਮਿਆਂ ਤੋਂ ਬਣਦੀਆਂ ਹਨ। ਇਨ੍ਹਾਂ ਦੀ ਸਹੀ ਵਰਤੋਂ ਨਾਲ ਹੀ ਇਨ੍ਹਾਂ ਨੂੰ ਦੇਰ ਤੱਕ ਵਰਤ ਸਕਦੇ ਹਾਂ। ਅੱਜ ਬਹੁਤ ਸਾਰੇ ਕਿਸਾਨ ਰੂੜੀ ਦੀ ਖਾਦ ਨੂੰ ਤਰਜੀਹ ਨਹੀਂ ਦਿੰਦੇ, ਜੋ ਮਿੱਟੀ ਦੀ ਸਿਹਤ ਵਾਸਤੇ ਬਹੁਤ ਜ਼ਰੂਰੀ ਹੈ।
ਤੀਸਰਾ ਮਿੱਟੀ ਸਿਹਤ ਕਾਰਡ ਦਾ ਕੋਈ ਫਾਇਦਾ ਨਹੀਂ। ਕਿਹੜਾ ਕਿਸਾਨ ਹੈ, ਜਿਸ ਨੂੰ ਆਪਣੀ ਮਿੱਟੀ ਦੀ ਸਿਹਤ ਦਾ ਪਤਾ ਨਹੀਂ। ਸਿਹਤ ਦਾ ਠੀਕ ਹੋਣਾ ਸਮੇਂ 'ਤੇ ਨਿਰਭਰ ਹੈ, ਅੱਜ ਸਿਹਤ ਠੀਕ ਹੈ ਕਲ੍ਹ ਖਰਾਬ ਹੋ ਸਕਦੀ ਹੈ। ਸਿਹਤ ਸਥਿਰ ਰਹਿਣ ਵਾਲੀ ਚੀਜ਼ ਨਹੀਂ। ਜਦੋਂ ਹੀ ਕਿਸੇ ਕਿਸਾਨ ਨੂੰ ਉਸ ਦੇ ਖੇਤ ਵਿਚ ਕੋਈ ਸਮੱਸਿਆ ਨਜ਼ਰ ਆਉਂਦੀ ਹੈ ਉਹ ਨੇੜੇ ਦੀ ਖੇਤੀ ਯੂਨੀਵਰਸਿਟੀ ਜਾਂ ਮਿੱਟੀ ਟੈਸਟ ਲੈਬਾਟਰੀ ਵਿਚ ਜਾ ਕੇ ਆਪਣੀ ਸਮੱਸਿਆ ਦਾ ਹੱਲ ਕਰ ਲੈਂਦੇ ਹਨ। ਮਿੱਟੀ ਵਿਭਾਗ ਪੀ. ਏ. ਯੂ. ਵਿਚ ਸਾਨੂੰ ਕਦੇ ਵੀ ਇਹ ਮਹਿਸੂਸ ਨਹੀਂ ਹੋਇਆ ਕਿ ਬਹੁਤ ਜ਼ਿਆਦਾ ਸੈਂਪਲ ਆ ਗਏ, ਜੋ ਅਸੀਂ ਟੈਸਟ ਨਹੀਂ ਕਰ ਸਕਦੇ। ਲੋੜ ਹੈ ਇਹੀ ਪੈਸਾ ਦੇ ਕੇ ਇਨ੍ਹਾਂ ਪ੍ਰਯੋਗਸ਼ਾਲਾਵਾਂ ਨੂੰ ਸੁਚੱਜੇ ਢੰਗ ਨਾਲ ਚਲਾਇਆ ਜਾਵੇ ਅਤੇ ਕਿਸਾਨ ਦੀ ਮਦਦ ਕੀਤੀ ਜਾਵੇ।

-ਡਾ: ਬਿੱਕਰ ਸਿੰਘ ਸਿੱਧੂ
ਸਾਬਕਾ ਪ੍ਰੋਫੈਸਰ ਮਿੱਟੀ ਵਿਭਾਗ, ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ, ਲੁਧਿਆਣਾ।

7-07-2016

ਰੁੱਖ ਲਗਾਓ
ਅੱਜ ਸਾਡੇ ਦੇਸ਼ ਨੂੰ ਹੀ ਨਹੀਂ, ਬਲਕਿ ਪੂਰੇ ਵਿਸ਼ਵ ਨੂੰ ਸ਼ੁੱਧ ਵਾਤਾਵਰਨ ਦੀ ਲੋੜ ਹੈ। ਜਿਸ ਤਰ੍ਹਾਂ ਦਿੱਲੀ ਵਰਗੇ ਵਿਕਸਤ ਸ਼ਹਿਰ ਪ੍ਰਦੂਸ਼ਿਤ ਵਾਤਾਵਰਨ ਦਾ ਭਿਆਨਕ ਨਤੀਜਾ ਭੁਗਤ ਰਹੇ ਨੇ, ਇਸ ਦਾ ਇਕ ਬਹੁਤ ਵੱਡਾ ਕਾਰਨ ਰੁੱਖਾਂ ਦੀ ਹੋ ਰਹੀ ਅੰਧਾਧੁੰਦ ਕਟਾਈ ਹੈ। ਆਓ ਪ੍ਰਣ ਕਰੀਏ ਕਿ ਵੱਧ ਤੋਂ ਵੱਧ ਰੁੱਖ ਲਗਾਈਏ ਤਾਂ ਕਿ ਸਾਡਾ ਵਾਤਾਵਰਨ ਸ਼ੁੱਧ ਹੋ ਸਕੇ ਤੇ ਸਾਡੀ ਧਰਤੀ ਹਰੀ-ਭਰੀ ਹੋ ਜਾਵੇ। ਜਿਸ ਤਰ੍ਹਾਂ ਇਨਸਾਨ ਆਪਣਾ ਜਨਮ ਦਿਨ ਮਨਾਉਂਦੇ ਹਨ, ਕਈ ਲੋਕ ਆਪਣੀ ਵਿਆਹ ਦੀ ਸਾਲਗਿਰਾਹ ਤੇ ਕੁਝ ਲੋਕ ਦਿਨ-ਤਿਉਹਾਰ।
ਜੇ ਅਸੀਂ ਇਨ੍ਹਾਂ ਦਿਨਾਂ 'ਤੇ ਇਕ-ਇਕ ਰੁੱਖ ਲਗਾਈਏ। ਜਿਥੇ ਇਹ ਰੁੱਖ ਤੁਹਾਡੀਆਂ ਯਾਦਾਂ ਨੂੰ ਸੰਭਾਲ ਕੇ ਰੱਖਣਗੇ, ਉਥੇ ਇਹ ਰੁੱਖ ਸਾਨੂੰ ਸ਼ੁੱਧ ਹਵਾ ਅਤੇ ਧਰਤੀ ਨੂੰ ਹਰਾ-ਭਰਾ ਵੀ ਰੱਖਣਗੇ। ਇੰਜ ਕਰਨ ਨਾਲ ਅਸੀਂ ਵਾਤਾਵਰਨ ਦੀ ਸ਼ੁੱਧਤਾ ਵਿਚ ਇਕ ਵਡਮੁੱਲਾ ਯੋਗਦਾਨ ਪਾ ਸਕਦੇ ਹਾਂ। ਜੇ ਸਾਡੀ ਧਰਤੀ 'ਤੇ ਜ਼ਿਆਦਾ ਰੁੱਖ ਹੋਣਗੇ ਤਾਂ ਸਾਡਾ ਜੀਵਨ ਵੀ ਬਿਮਾਰੀਆਂ ਰਹਿਤ ਤੇ ਖੁਸ਼ਹਾਲ ਹੋਵੇਗਾ। ਆਓ, ਅਸੀਂ ਸ਼ੁੱਧ ਹਵਾ ਦੇ ਲਈ ਵੱਧ ਤੋਂ ਵੱਧ ਰੁੱਖ ਲਗਾਈਏ।


-ਗੁਰਦੀਪ ਸਿੰਘ
ਪਿੰਡ ਬਾਹਮਣੀਆਂ, ਜਲੰਧਰ।


ਕੁਰਾਹੇ ਪਈ ਗਾਇਕੀ ਤੇ ਗੀਤਕਾਰੀ

ਇਹ ਗੱਲ ਸੌ ਫ਼ੀਸਦੀ ਸਹੀ ਹੈ ਕਿ ਕਿਸੇ ਇਲਾਕੇ ਦੇ ਗੀਤ ਸੁਣ ਕੇ ਉਸ ਇਲਾਕੇ ਦੇ ਸੱਭਿਆਚਾਰ ਅਤੇ ਕਦਰਾਂ-ਕੀਮਤਾਂ ਦਾ ਅੰਦਾਜ਼ਾ ਸਹਿਜੇ ਹੀ ਲਗਾਇਆ ਜਾ ਸਕਦਾ ਹੈ। ਸੋਚ ਕੇ ਰੂਹ ਕੰਬਦੀ ਹੈ ਕਿ ਕਿਸੇ ਹੋਰ ਖਿੱਤੇ ਦਾ ਵਿਦਵਾਨ ਸਾਡੀ ਅਜੋਕੀ ਗਾਇਕੀ ਤੇ ਗੀਤਕਾਰੀ ਤੋਂ ਪੰਜਾਬ ਬਾਰੇ ਕੀ ਅੰਦਾਜ਼ਾ ਲਾਉਂਦਾ ਹੋਵੇਗਾ।
ਮੌਜੂਦਾ ਸਮੇਂ ਦੇ ਗੀਤ ਯਥਾਰਥ ਤੋਂ ਕੋਹਾਂ ਦੂਰ ਨੇ। ਨਸ਼ਿਆਂ ਅਤੇ ਫ਼ਸਲਾਂ ਉੱਪਰ ਹੋ ਰਹੇ ਅਣਕਿਆਸੇ ਖਰਚ ਨੇ ਜੱਟਾਂ ਦੀ ਮੱਤ ਮਾਰੀ ਪਈ ਹੈ। ਜਾਨ ਹੂਲ ਕੇ ਪਾਲੀ ਫ਼ਸਲ ਨੂੰ ਵੇਚਣ ਲਈ ਵੀ ਧਰਨੇ ਲਗਾਉਣੇ ਪੈਂਦੇ ਨੇ। ਪਤਾ ਨਹੀਂ ਕਿਉਂ ਅਜੋਕੇ ਗਾਇਕਾਂ, ਗੀਤਕਾਰਾਂ ਨੂੰ ਮੱਲੋਮੱਲੀ ਪੈਂਦੀਆਂ ਬਿੱਜਾਂ ਦਾ ਮਾਰਿਆ, ਖ਼ੁਦਕੁਸ਼ੀਆਂ ਕਰਨ ਲਈ ਮਜਬੂਰ ਜੱਟ ਕਿਉਂ ਨਹੀਂ ਦਿਸ ਰਿਹਾ। ਇਨ੍ਹਾਂ ਦੇ ਗੀਤਾਂ ਵਿਚਲਾ ਜੱਟ ਰਾਜੇ ਮਹਾਰਾਜਿਆਂ ਤੋਂ ਘੱਟ ਨਹੀਂ। ਬੇਸ਼ਰਮੀ ਦੀਆਂ ਹੱਦਾਂ ਪਾਰ ਕਰ ਚੁੱਕੇ ਇਨ੍ਹਾਂ ਗਾਇਕਾਂ ਦੇ ਗੀਤ ਸੁਣ ਕੇ ਲਗਦਾ ਹੈ ਕਿ ਪੰਜਾਬ ਵਿਚ ਸ਼ਰਮ, ਮੜ੍ਹਕ, ਅਣਖ ਨਾਂਅ ਦੀ ਕੋਈ ਚੀਜ਼ ਹੀ ਨਹੀਂ।
ਇੰਜ ਲਗਦਾ ਹੈ ਕਿ ਪੰਜਾਬ ਦੇ ਸਾਰੇ ਕਾਲਜ ਅਤੇ ਚੰਡੀਗੜ੍ਹ, ਆਸ਼ਕੀ ਅਤੇ ਬਦਮਾਸ਼ੀ ਦੇ ਮਨਜ਼ੂਰਸ਼ੁਦਾ ਅੱਡੇ ਹਨ। ਆਪਣੇ ਗੀਤਾਂ ਵਾਂਗ ਖ਼ਤਰਨਾਕ ਨਾਵਾਂ ਅਤੇ ਸ਼ਕਲਾਂ ਵਾਲੇ ਇਨ੍ਹਾਂ 'ਮਹਾਨ ਗਵੱਈਆਂ' ਨੂੰ ਸੈਂਸਰ ਬੋਰਡ ਜਾਂ ਕੋਈ ਹੋਰ ਸੰਸਥਾ ਰੋਕਣ ਦਾ ਜੇਰਾ ਨਹੀਂ ਕਰ ਰਹੀ। ਹੋਰ ਤਾਂ ਹੋਰ ਸਰਕਾਰ ਪਤਾ ਨਹੀਂ ਕਿਹੜੀ ਗੱਲੋਂ ਚੁੱਪ ਹੈ?


-ਪ੍ਰੀਤ ਸਿੰਘ ਸੰਦਲ
ਪਿੰਡ ਮਕਸੂਦੜਾ, ਤਹਿ: ਪਾਇਲ (ਲੁਧਿਆਣਾ)।


ਸਰਕਾਰ ਧਿਆਨ ਦੇਵੇ
ਪੰਜਾਬ ਵਿਚ ਬਹੁਤ ਸਾਰੇ ਬੇਰੁਜ਼ਗਾਰ ਈ.ਟੀ.ਟੀ. ਟੈਟ ਪਾਸ ਅਤੇ ਬੀ.ਐੱਡ ਟੈਟ ਪਾਸ (ਦੋਵੇਂ ਟੈਸਟ ਪਾਸ) ਕਰੀ ਫਿਰਦੇ ਹਨ। ਇਹ ਬੱਚੇ ਨੌਕਰੀ ਦੀ ਉਡੀਕ ਵਿਚ ਓਵਰਏਜ ਹੋ ਰਹੇ ਹਨ ਜਦੋਂਕਿ ਪੰਜਾਬ ਦੇ ਸਕੂਲਾਂ ਵਿਚ ਅਧਿਆਪਕਾਂ ਦੀਆਂ ਹਜ਼ਾਰਾਂ ਆਸਾਮੀਆਂ ਖਾਲੀ ਹਨ ਜੋ ਕੱਢੀਆਂ ਆਸਾਮੀਆਂ ਵਿਚ ਵਾਧਾ ਕਰਕੇ ਬੇਰੁਜ਼ਗਾਰ ਟੈਟ ਪਾਸ ਨੂੰ ਛੇਤੀ ਤੋਂ ਛੇਤੀ ਨੌਕਰੀ ਦਿੱਤੀ ਜਾਵੇ। ਬਠਿੰਡੇ ਵਿਚ ਬੇਰੁਜ਼ਗਾਰਾਂ ਨੇ ਆਪਣੇ ਹੱਕ ਲਈ ਮਰਨ ਵਰਤ ਰੱਖਿਆ ਹੋਇਆ ਹੈ, ਕੀ ਸਰਕਾਰ ਸੁੱਤੀ ਪਈ ਹੈ।


-ਗੁਰਪ੍ਰੀਤ ਕੌਰ ਨਾਭਾ
ਸੰਗਤਪੁਰਾ ਮੁਹੱਲਾ ਗਲੀ ਨੰ: 2, ਘਰ ਨੰ: 42, ਪਟਿਆਲਾ ਗੇਟ ਨਾਭਾ, ਜ਼ਿਲ੍ਹਾ ਪਟਿਆਲਾ।
ਮੋ: 98140-81600.

3-07-2016

 ਦੰਗਿਆਂ ਦਾ ਸੰਤਾਪ
ਪਿਛਲੇ ਦਿਨੀਂ ਉੱਘੇ ਕਾਲਮਨਵੀਸ ਕੁਲਦੀਪ ਨਈਅਰ ਵੱਲੋਂ 84 ਦੇ ਦੰਗਿਆਂ ਤੇ ਗੁਜਰਾਤ ਦੰਗਿਆਂ ਨੂੰ ਮੁੱਖ ਰੱਖ ਕੇ ਕਾਂਗਰਸ ਤੇ ਭਾਰਤੀ ਜਨਤਾ ਪਾਰਟੀ ਦੀ ਨੀਯਤ ਖੋਟੀ ਬਾਰੇ ਲਿਖਿਆ ਦੇਸ਼ ਦੀ ਆਜ਼ਾਦੀ ਵਿਚ 97 ਫ਼ੀਸਦੀ ਯੋਗਦਾਨ ਪਾਉਣ ਵਾਲੀ ਸਿੱਖ ਕੌਮ ਨੂੰ ਆਪਣੇ ਹੀ ਦੇਸ਼ 'ਚ ਬੇਗਾਨਗੀ ਦਾ ਅਹਿਸਾਸ ਕਰਵਾਇਆ ਗਿਆ। ਨਈਅਰ ਨੇ ਦੋਵਾਂ ਪਾਰਟੀਆਂ ਦੀਆਂ ਗ਼ਲਤ ਨੀਤੀਆਂ ਅਪਨਾ ਕੇ ਖ਼ੂਨ-ਖਰਾਬਾ ਕਰਕੇ ਮੁੜ ਗ਼ਲਤੀ ਦਾ ਅਹਿਸਾਸ ਨਾ ਕਰਕੇ ਹੈਂਕੜਬਾਜ਼ ਹੋਣ ਦਾ ਸਬੂਤ ਦੇ ਕੇ ਆਪਣੇ-ਆਪ ਨੂੰ ਜਰਵਾਣੇ ਹੋਣ ਬਾਰੇ ਦੋਵਾਂ ਪਾਰਟੀਆਂ ਬਾਰੇ ਖੁੱਲ੍ਹ ਕੇ ਲਿਖਿਆ ਇਸ ਦੇਸ਼ ਵਿਚ ਜਿੱਡਾ ਵੱਡਾ ਘਪਲੇਬਾਜ਼ ਓਡਾ ਤਕੜਾ ਲੀਡਰ, ਜਿੱਡੀ ਤਕੜੀ ਗੱਪ ਮਾਰਨ ਦਾ ਮਾਹਿਰ ਓਡਾ ਤਕੜਾ ਪਾਰਟੀ ਤੇ ਸਮਾਜ ਵਿਚ ਰੁਤਬਾ। ਜੇਕਰ 84 ਦੰਗਿਆਂ ਤੇ ਗੁਜਰਾਤ ਦੰਗਿਆਂ ਦੇ ਅਸਲ ਦੋਸ਼ੀਆਂ ਨੂੰ ਮੌਕੇ 'ਤੇ ਹੀ ਸਜ਼ਾਵਾਂ ਮਿਲ ਜਾਂਦੀਆਂ ਤਾਂ ਦੋਵੇਂ ਕੌਮਾਂ ਵਿਚ ਬੇਗਾਨਗੀ ਦੀ ਭਾਵਨਾ ਇੰਨੀ ਵਧਣੀ ਨਹੀਂ ਸੀ। ਅਜੀਤ ਉਸਾਰੂ ਤੇ ਸੱਚ ਦੀ ਚੋਟ 'ਤੇ ਲੇਖ ਲਿਖਣ ਛਾਪਣ ਲਈ ਵਧਾਈ ਦਾ ਪਾਤਰ।


-ਮਨਜੀਤ ਸਿੰਘ ਭਾਮ
ਮੋਬਾਈਲ : 94784-00012.


ਅਪਲਾਈ ਕਰਨ ਦੀ ਮਿਤੀ ਵਧਾਈ ਜਾਵੇ
ਪਿਛਲੇ ਦਿਨੀਂ ਪੰਜਾਬ ਸਰਕਾਰ ਵੱਲੋਂ ਪੰਜਾਬ ਪੁਲਿਸ ਦੀ ਭਰਤੀ ਲਈ ਆਰੰਭੀ ਪ੍ਰਕਿਰਿਆ ਲਈ ਨੌਜਵਾਨਾਂ ਵਿਚ ਜਿਥੇ ਭਾਰੀ ਉਤਸ਼ਾਹ ਦੇਖਣ ਨੂੰ ਮਿਲਿਆ, ਉਥੇ ਨਾਲ ਹੀ ਕਈ ਕਾਰਨਾਂ ਕਰਕੇ ਇਸ ਅਸਾਮੀ ਲਈ ਅਪਲਾਈ ਕਰਨ ਤੋਂ ਵਾਂਝੇ ਰਹਿ ਗਏ ਨੌਜਵਾਨ ਡਾਢੇ ਨਿਰਾਸ਼ ਹਨ। ਅਪਲਾਈ ਕਰਨ ਤੋਂ ਵਾਂਝੇ ਰਹਿ ਗਏ ਨੌਜਵਾਨਾਂ ਦਾ ਆਪਣਾ ਕੋਈ ਕਸੂਰ ਨਹੀਂ ਹੈ, ਬਲਕਿ ਅਜਿਹਾ ਇਨ੍ਹੀਂ ਦਿਨੀਂ ਚੱਲੀ ਮਨਿਸਟਰੀਅਲ ਕਾਮਿਆਂ ਦੀ ਹੜਤਾਲ ਅਤੇ ਬੇਹੱਦ ਬਿਜੀ ਹੋਈ ਵੈਬਸਾਈਟ ਹੈ। ਦਫਤਰੀ ਕਾਮਿਆਂ ਦੀ ਹੜਤਾਲ ਕਾਰਨ ਬਹੁਤ ਸਾਰੇ ਉਮੀਦਵਾਰ ਅਪਲਾਈ ਕਰਨ ਲਈ ਲੋੜੀਂਦੇ ਕਾਗਜ਼ਾਤ ਤਿਆਰ ਨਾ ਕਰ ਸਕੇ ਅਤੇ ਦੂਜੇ ਪਾਸੇ ਬਹੁਤ ਸਾਰੇ ਖਾਸ ਕਰਕੇ ਪੇਂਡੂ ਖੇਤਰਾਂ ਦੇ ਅਜਿਹੇ ਉਮੀਦਵਾਰ ਵੀ ਹਨ ਜੋ ਅਪਲਾਈ ਕਰਨ ਵਾਲੀ ਵੈਬਸਾਈਟ ਦੇ ਜ਼ਿਆਦਾ ਬਿਜੀ ਹੋਣ ਕਾਰਨ ਪੰਜਾਬ ਪੁਲਿਸ ਵਿਚ ਭਰਤੀ ਹੋਣ ਦਾ ਆਪਣਾ ਸੁਪਨਾ ਸਾਕਾਰ ਨਹੀਂ ਕਰ ਸਕੇ। ਅਪਲਾਈ ਕਰਨ ਤੋਂ ਵਾਂਝੇ ਰਹਿ ਗਏ ਬਹੁਤ ਸਾਰੇ ਨੌਜਵਾਨ ਮੁੰਡੇ-ਕੁੜੀਆਂ ਨੇ ਸਰੀਰਕ ਟੈਸਟ ਦੀ ਪੂਰੀ ਤਿਆਰੀ ਕੀਤੀ ਹੋਈ ਹੈ। ਭਰਤੀ ਦਾ ਸੁਨਹਿਰੀ ਮੌਕਾ ਹੱਥੋਂ ਖੁਸਦਾ ਵੇਖ ਨਿਰਾਸ਼ਾ ਦੇ ਆਲਮ ਵਿਚ ਡੁੱਬੇ ਇਨ੍ਹਾਂ ਨੌਜਵਾਨਾਂ ਨੂੰ ਹੋਰ ਮੌਕਾ ਦਿੰਦਿਆਂ ਅਪਲਾਈ ਕਰਨ ਦੀ ਮਿਤੀ ਵਿਚ ਵਾਧਾ ਕਰਨ ਦੀ ਜ਼ਰੂਰਤ ਹੈ।


-ਬਿੰਦਰ ਸਿੰਘ ਖੁੱਡੀ ਕਲਾਂ
ਮੋਬਾਈਲ : 98786-05965.


ਦਰਦ ਵਿਛੋੜੇ ਦਾ

ਸਿਆਣਿਆਂ ਦਾ ਕਥਨ ਹੈ ਕਿ ਵਿਛੋੜੇ ਦਾ ਦਰਦ ਬਹੁਤ ਵੱਡਾ ਹੋਇਆ ਕਰਦਾ ਹੈ, ਜਦੋਂ ਕਿਸੇ ਵਿਅਕਤੀ ਦਾ ਕੋਈ ਨਜ਼ਦੀਕੀ ਰਿਸ਼ਤੇਦਾਰ, ਪਰਿਵਾਰ ਦਾ ਮੈਂਬਰ ਜਾਂ ਸੱਜਣ-ਮਿੱਤਰ ਸਦੀਵੀ ਵਿਛੋੜਾ ਦੇ ਜਾਵੇ ਜਾਂ ਫਿਰ ਇਕ ਜਾਂ ਦੂਸਰੇ ਕਾਰਨ ਕਰਕੇ ਦੂਰ-ਦੁਰਾਡੇ ਘਰ ਤੋਂ ਚਲਾ ਜਾਵੇ ਤਾਂ ਉਸ ਵਿਅਕਤੀ ਦਾ ਹਿਰਦਾ ਵਿਛੋੜੇ ਦੇ ਦਰਦ ਕਾਰਨ ਦੁਖੀ ਅਤੇ ਪ੍ਰੇਸ਼ਾਨ ਹੋ ਜਾਂਦਾ ਹੈ। ਹਾਲਾਂਕਿ ਉਸ ਨੂੰ ਇਹ ਭਲੀ-ਭਾਂਤ ਪਤਾ ਹੁੰਦਾ ਹੈ ਕਿ ਜਿਹੜਾ ਵਿਅਕਤੀ ਇਸ ਫਾਨੀ ਦੁਨੀਆ ਤੋਂ ਚਲਾ ਗਿਆ ਹੈ, ਉਸ ਨੇ ਵਾਪਸ ਨਹੀਂ ਆਉਣਾ ਅਤੇ ਜਿਹੜਾ ਦੂਰ-ਦੁਰਾਡੇ ਗਿਆ ਹੈ, ਉਸ ਨੇ ਦੇਰ-ਸਵੇਰ ਵਾਪਸ ਆ ਜਾਣਾ ਹੈ ਪਰ ਇਸ ਦੇ ਬਾਵਜੂਦ ਉਸ ਵਿਅਕਤੀ ਦਾ ਹਿਰਦਾ ਦੁੱਖ ਅਤੇ ਗਮ ਨਾਲ ਭਰ ਜਾਂਦਾ ਹੈ। ਇਸ ਤੋਂ ਇਲਾਵਾ ਕਿ ਦਰਦ ਵਿਛੋੜਾ ਹੁੰਦਾ ਹੈ ਕਿਸੇ ਆਪਣੇ ਨਜ਼ਦੀਕੀ ਦੇ ਬਗੈਰ ਦੱਸੇ ਘਰੋਂ ਚਲੇ ਜਾਣ/ਲਾਪਤਾ ਹੋਣ ਕਰਕੇ, ਜੋ ਡਾਢਾ ਦੁਖਦਾਈ ਅਤੇ ਪ੍ਰੇਸ਼ਾਨੀ ਵਾਲਾ ਹੁੰਦਾ ਹੈ ਕਿਉਂਕਿ ਲਾਪਤਾ ਹੋਣ ਵਾਲੇ ਵਿਅਕਤੀ ਦੇ ਜਿਊਂਦਾ ਹੋਣ ਜਾਂ ਨਾ ਹੋਣ ਸਬੰਧੀ ਕੋਈ ਸੂਚਨਾ ਨਹੀਂ ਹੁੰਦੀ। ਸੋ, ਵਿਛੋੜੇ ਦਾ ਦਰਦ ਹੰਢਾਅ ਰਹੇ ਵਿਅਕਤੀਆਂ ਨਾਲ ਹਮਦਰਦੀ ਭਰੇ ਸ਼ਬਦਾਂ ਦੀ ਸਾਂਝ ਕਰਨ ਅਤੇ ਹੌਸਲਾ-ਦਿਲਾਸਾ ਦੇਣ ਨਾਲ ਉਨ੍ਹਾਂ ਦੇ ਦੁੱਖ-ਦਰਦ ਨੂੰ ਜੇ ਖਤਮ ਨਹੀਂ ਕੀਤਾ ਜਾ ਸਕਦਾ ਤਾਂ ਘਟਾਇਆ ਜ਼ਰੂਰ ਜਾ ਸਕਦਾ ਹੈ।


-ਜਗਤਾਰ ਸਿੰਘ ਝੋਜੜ
ਜ਼ਿਲ੍ਹਾ ਕਚਹਿਰੀਆਂ, ਹੁਸ਼ਿਆਰਪੁਰ।

1-7-2016

 ਇਕ ਪੱਤਰ ਪਾਕਿਸਤਾਨ ਤੋਂ

ਰਮਜ਼ਾਨ ਦੇ ਰੋਜ਼ੇ ਤੇ ਇਸ ਰਹਿਮਤਾਂ ਵਾਲੇ ਮਹੀਨੇ ਦਾ ਤੁਹਾਨੂੰ ਸਲਾਮ! ਹਮਦਰਦ ਸਾਹਿਬ ਮੁਸਲਮਾਨਾਂ ਦੇ ਰੋਜ਼ੇ ਚੱਲ ਰਹੇ ਹਨ। ਗਰਮੀ ਵੀ ਆਪਣੀ ਸਿਖ਼ਰ 'ਤੇ ਪਹੁੰਚੀ ਹੋਈ ਹੈ। ਪਾਕਿਸਤਾਨ 'ਚ ਬਿਜਲੀ ਵੀ ਬਹੁਤ ਬੰਦ ਹੁੰਦੀ ਹੈ। ਦਿਨ ਮੁਸ਼ਕਿਲ ਤੇ ਰਾਤਾਂ ਵੀ ਔਖੀਆਂ ਹੁੰਦੀਆਂ ਹਨ। ਪਸੀਨਾ ਹੈ ਕਿ ਸੁੱਕਣ ਦਾ ਨਾਂਅ ਹੀ ਨਹੀਂ ਲੈਂਦਾ। ਪਰ ਦਿਲ ਵਿਚ ਫਿਰ ਵੀ ਤੁਹਾਡੀਆਂ ਯਾਦਾਂ ਦੀ ਬਹਾਰ ਹੈ। ਚੜ੍ਹਦਾ ਤੇ ਲਹਿੰਦਾ ਪੰਜਾਬ ਦਰਅਸਲ ਇਕ ਹੈ। ਦੋਵਾਂ ਪਾਸਿਆਂ ਦੇ ਪੰਜਾਬੀ ਵੀ ਇਕ ਹਨ। ਲੰਮੀ ਜੁਦਾਈ ਪਈ ਹੋਈ ਹੈ ਪੰਜਾਬੀਆਂ ਵਿਚਕਾਰ। ਪਰ ਇਕ ਦਿਨ ਇਹ ਮੁੱਕ ਜਾਣੀ ਹੈ। ਦੇਰ ਜ਼ਰੂਰ ਹੈ ਪਰ ਹਨੇਰ ਨਹੀਂ। ਪਾਕਿਸਤਾਨੀ ਹਿੰਦੁਸਤਾਨੀ ਕੌਮ ਮੇਲ-ਮਿਲਾਪ, ਦੋਸਤੀ ਦੇ ਖਾਹਿਸ਼ਮੰਦ ਹਨ ਪਰ ਸਰਕਾਰਾਂ ਕਿਉਂ ਨਹੀਂ?

-ਡਾ: ਤਾਹਿਰ ਮਹਿਮੂਦ
-ਖ਼ਾਲਸਾ ਹਾਊਸ, ਚੱਕ ਨੰ: 97/ਆਰਬੀ ਜੌਹਲ, ਤਹਿ: ਜੜਾਂਵਾਲਾ, ਜ਼ਿਲ੍ਹਾ ਫ਼ੈਸਲਾਬਾਦ, ਪਾਕਿਸਤਾਨ।

ਪਾਣੀ ਦਾ ਸੰਕਟ

'ਅਜੀਤ' ਨੇ ਪੰਜਾਬ ਵਿਚ ਘਟ ਰਹੇ ਪਾਣੀ 'ਤੇ ਚਿੰਤਾ ਭਰੇ ਲੇਖ ਪ੍ਰਕਾਸ਼ਿਤ ਕਰਕੇ ਆਉਣ ਵਾਲੀ ਆਫ਼ਤ ਬਾਰੇ ਲੋਕਾਂ ਨੂੰ ਸੁਚੇਤ ਕੀਤਾ ਹੈ। ਇਕ-ਦੂਜੇ ਤੋਂ ਅੱਗੇ ਵਧਣ ਦਾ ਝੱਸ, ਦਿਨੋ-ਦਿਨ ਵਧ ਰਿਹਾ ਕਰਜ਼ਾ ਤੇ ਸਰਕਾਰਾਂ ਦੀਆਂ ਕਿਸਾਨ-ਮਾਰੂ ਨੀਤੀਆਂ ਕਾਰਨ ਮਜਬੂਰ ਪੰਜਾਬੀ ਕਿਸਾਨ ਰਵਾਇਤੀ ਫ਼ਸਲੀ ਚੱਕਰ ਨਹੀਂ ਤਿਆਗ ਸਕਦਾ। ਸਰਕਾਰ ਬਾਕੀ ਫ਼ਸਲਾਂ ਦਾ ਚੰਗਾ ਮੁੱਲ ਤੈਅ ਕਰੇ ਤਾਂ ਕਿ ਕਿਸਾਨ ਝੋਨੇ ਦਾ ਖਹਿੜਾ ਛੱਡ ਸਕੇ। ਜੰਗਲਾਂ ਦੀ ਕਟਾਈ, ਨਵੇਂ ਰੁੱਖ ਨਾ ਲਗਾਉਣਾ, ਵੱਧ ਆਬਾਦੀ ਤੇ ਸਰਮਾਏਦਾਰੀ ਦੇ ਰੁਝਾਨ ਆਦਿ ਸਭ ਕੁਦਰਤੀ ਸੋਮਿਆਂ ਦੇ ਦੁਸ਼ਮਣ ਬਣ ਬੈਠੇ ਹਨ। ਕੁਦਰਤ ਨਾਲ ਛੇੜਛਾੜ ਕਦੀ ਵੀ ਮਨੁੱਖ ਦੇ ਹਿਤ ਵਿਚ ਨਹੀਂ ਜਾਵੇਗੀ। ਸਾਰੇ ਜੀਵ-ਜੰਤੂਆਂ, ਫ਼ਸਲਾਂ ਦਾ ਜੀਵਨਦਾਤਾ ਪਾਣੀ ਅੱਜ ਆਪ ਜਿਊਣ ਲਈ ਤਰਲੇ ਲੈ ਰਿਹਾ ਪ੍ਰਤੀਤ ਹੁੰਦਾ ਹੈ। ਰੱਬ ਕਰੇ, ਕਿਸੇ ਵੀ ਤਰ੍ਹਾਂ ਇਹ ਹਸਦੀ-ਵਸਦੀ ਪੰਜਾਬ ਦੀ ਧਰੀ ਪਾਣੀ ਬਾਝੋਂ ਰੇਗਿਸਤਾਨ ਨਾ ਬਣ ਜਾਵੇ।

-ਰਾਜਵੰਤ ਸਿੰਘ ਰਾਜੂ
ਗੁਰੂ ਨਾਨਕ ਆਟੋ ਸਪੇਅਰਜ਼, ਰਾਏਕੋਟ।

ਘਰ ਦਾ ਸੁਪਨਾ

ਅੱਜ ਦੇ ਦੌਰ ਵਿਚ ਵਧਦੀ ਹੋਈ ਮਹਿੰਗਾਈ ਕਾਰਨ ਆਪਣਾ ਖ਼ੁਦ ਦਾ ਘਰ ਬਣਾਉਣ ਦਾ ਸੁਪਨਾ ਹੁਣ ਸੁਪਨਾ ਹੀ ਬਣ ਕੇ ਰਹਿ ਗਿਆ ਹੈ। ਰੋਜ਼ਮਰ੍ਹਾ ਦੀ ਹਰ ਚੀਜ਼ ਏਨੀ ਮਹਿੰਗੀ ਹੋ ਚੁੱਕੀ ਹੈ ਕਿ ਇਨਸਾਨ ਦਾ ਘਰ ਬਣਾਉਣ ਦਾ ਸੁਪਨਾ ਹੁਣ ਮੁਸ਼ਕਿਲ ਹੀ ਨਹੀਂ ਨਾਮੁਮਕਿਨ ਹੋ ਚੁੱਕਾ ਹੈ। ਘਰ ਬਣਾਉਣ ਦੀਆਂ ਚੀਜ਼ਾਂ ਜਿਵੇਂ ਸੀਮੈਂਟ, ਰੇਤ, ਬਜਰੀ, ਲੇਬਰ, ਪਲਾਟ ਦੀਆਂ ਕੀਮਤਾਂ ਹਰ ਚੀਜ਼ ਆਮ ਆਦਮੀ ਦੀ ਪਹੁੰਚ ਤੋਂ ਦੂਰ ਹੋ ਚੁੱਕੀ ਹੈ। ਜੇਕਰ ਮਹਿੰਗਾਈ ਇੰਜ ਹੀ ਵਧਦੀ ਰਹੀ ਤਾਂ ਮਕਾਨ ਬਣਾਉਣਾ ਬਹੁਤ ਮੁਸ਼ਕਿਲ ਹੋ ਜਾਵੇਗਾ। ਸਰਕਾਰ ਨੂੰ ਸੋਚ ਕੇ ਕੁਝ ਕਰਨਾ ਚਾਹੀਦਾ ਹੈ ਤਾਂ ਜੋ ਹਰ ਕਿਸੇ ਨੂੰ ਆਪਣਾ ਘਰ ਮਿਲ ਸਕੇ।

-ਸੁਰਿੰਦਰ ਸਿੰਘ
ਗਰਚਾ ਨਰਸਰੀ, ਧਨੌਲਾ ਰੋਡ, ਬਰਨਾਲਾ।

26-06-2016


ਜਲ ਸੰਕਟ

ਸਾਡੇ ਦੇਸ਼ 'ਚ ਦਿਨੋਂ-ਦਿਨ ਜਲ ਸੰਕਟ ਤੇਜ਼ੀ ਨਾਲ ਵਧ ਰਿਹਾ ਹੈ। ਜੋ ਸਾਡੇ ਤੇ ਸਾਡੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਚਿੰਤਾ ਦਾ ਵਿਸ਼ਾ ਬਣ ਗਿਆ ਹੈ। ਕੇਂਦਰੀ ਭੂ-ਜਲ ਬੋਰਡ ਨੇ ਆਪਣੇ ਅੰਕੜਿਆਂ 'ਚ ਸਰਵੇ ਦੀ ਰਿਪੋਰਟ ਮੁਤਾਬਿਕ ਖੁਲਾਸਾ ਕਰਦਿਆਂ ਕਿਹਾ ਕਿ 2001 'ਚ 1951 ਦੇ ਮੁਕਾਬਲੇ ਧਰਤੀ 'ਚ ਅੱਧਾ ਪਾਣੀ ਰਹਿ ਗਿਆ ਹੈ ਤੇ 2050 ਤੱਕ ਪਾਣੀ ਦੀ ਉਪਲਬੱਧਤਾ ਘੱਟ ਕੇ 25 ਫ਼ੀਸਦੀ ਹੀ ਰਹਿ ਜਾਵੇਗੀ। ਇਸ ਸੰਕਟ ਨਾਲ ਨਜਿੱਠਣ ਲਈ ਸਮੁੱਚੇ ਦੇਸ਼ ਵਾਸੀਆਂ ਨੂੰ ਪਾਣੀ ਦੀ ਹੋ ਰਹੀ ਦੁਰਵਰਤੋਂ ਨੂੰ ਰੋਕਣਾ ਪਵੇਗਾ ਅਤੇ ਕੁਦਰਤ ਦੇ ਇਸ ਅਨਮੋਲ ਖਜ਼ਾਨੇ ਨੂੰ ਬਚਾਉਣ ਲਈ ਵੱਧ ਤੋਂ ਵੱਧ ਉਪਰਾਲੇ ਕਰਨੇ ਪੈਣਗੇ, ਨਹੀਂ ਤਾਂ ਸਾਡਾ ਸੋਹਣਾ ਹਰਿਆ-ਭਰਿਆ ਦੇਸ਼ ਸੋਕੇ ਦੇ ਸ਼ਿਕਾਰ ਵਿਚ ਜਕੜਿਆ ਜਾਵੇਗਾ। ਕਿਸਾਨ ਵੀਰਾਂ ਨੂੰ ਵੀ ਹੱਥ ਜੋੜ ਕੇ ਅਰਜੋਈ ਕਰਦੇ ਹਾਂ ਕਿ ਝੋਨੇ ਦੀ ਖੇਤੀ ਦਾ ਖਹਿੜਾ ਛੱਡ ਕੇ ਵਿਭਿੰਨਤਾ ਖੇਤੀ ਨੂੰ ਤਰਜੀਹ ਦਿੱਤੀ ਜਾਵੇ।


-ਤਰਸੇਮ ਮਹਿਤੋ
ਪਿੰਡ ਬਈਏਵਾਲ (ਸੰਗਰੂਰ)। ਮੋਬਾਈਲ : 95019-36536.


ਅਵਾਰਾ ਕੁੱਤਿਆਂ ਦਾ ਕਹਿਰ
ਤਕਰੀਬਨ ਪਿਛਲੇ ਤਿੰਨ ਦਹਾਕਿਆਂ ਤੋਂ ਭਾਵ ਕਿ ਜਦੋਂ ਤੋਂ ਗਿਰਝਾਂ ਪੰਜਾਬ ਵਿਚੋਂ ਖ਼ਤਮ ਹੋਈਆਂ ਹਨ। ਅਵਾਰਾ ਕੁੱਤਿਆਂ ਨੂੰ ਸਰਕਾਰ ਨੇ ਮਾਰਨ ਤੋਂ ਮਨ੍ਹਾਂ ਕੀਤਾ ਹੋਇਆ ਹੈ ਅਤੇ ਇਨ੍ਹਾਂ ਦੀ ਗਿਣਤੀ ਵਿਚ ਦਿਨ ਪ੍ਰਤੀ ਦਿਨ ਬੇਸ਼ੁਮਾਰ ਵਾਧਾ ਹੋਇਆ ਹੈ ਅਤੇ ਇਨ੍ਹਾਂ ਅਵਾਰਾ ਕੁੱਤਿਆਂ ਦੇ ਮੂੰਹ ਲੱਗੇ ਮੁਰਦਾ ਜਾਨਵਰ ਹੁਣ ਬੱਚਿਆਂ, ਮਨੁੱਖਾਂ ਜਾਂ ਪਾਲਤੂ ਜਾਨਵਰਾਂ ਨੂੰ ਆਪਣੀ ਹਵਸ ਦਾ ਸ਼ਿਕਾਰ ਬਣਾਉਣ ਲੱਗ ਪਏ ਹਨ। ਹਰ ਰੋਜ਼ ਅਖ਼ਬਾਰਾਂ ਵਿਚ ਅਵਾਰਾ ਕੁੱਤਿਆਂ ਦੀਆਂ ਜਾਨਲੇਵਾ ਘਟਨਾਵਾਂ ਬਾਰੇ ਪੜ੍ਹਦੇ ਸੁਣਦੇ ਹਾਂ। ਪ੍ਰੰਤੂ ਬੜੇ ਅਫਸੋਸ ਦੀ ਗੱਲ ਹੈ ਕਿ ਸਰਕਾਰ ਨੇ ਇਸ ਪ੍ਰਤੀ ਬਿਲਕੁਲ ਚੁੱਪੀ ਵੱਟੀ ਹੋਈ ਹੈ। ਹਰ ਰੋਜ਼ ਮਾਸਾਹਾਰੀ ਅਵਾਰਾ ਕੁੱਤਿਆਂ ਦੇ ਕਹਿਰ ਨਾਲ ਕੀਮਤੀ ਜਾਨਾਂ ਜਾ ਰਹੀਆਂ ਹਨ। ਮੇਰਾ ਇਸ ਸਮੇਂ ਦੀ ਸਰਕਾਰ ਨੂੰ ਛੋਟਾ ਜਿਹਾ ਸੁਝਾਅ ਹੈ ਕਿ ਜੇਕਰ ਪਿੰਡ ਵਿਚੋਂ ਘੱਟੋ-ਘੱਟ 50 ਫ਼ੀਸਦੀ ਅਵਾਰਾ ਕੁੱਤਿਆਂ ਨੂੰ ਮਾਰਨ ਦੀ ਮੁਹਿੰਮ ਵਿੱਢੀ ਜਾਵੇ ਤਾਂ ਕਿਸੇ ਹੱਦ ਤੱਕ ਇਨ੍ਹਾਂ ਦੇ ਕਹਿਰ ਤੋਂ ਆਮ ਮਨੁੱਖ ਨੂੰ ਨਿਜ਼ਾਤ ਮਿਲ ਸਕਦੀ ਹੈ ਅਤੇ ਹਰ ਰੋਜ਼ ਜਾ ਰਹੀਆਂ ਕੀਮਤੀ ਜਾਨਾਂ ਨੂੰ ਬਚਾਇਆ ਜਾ ਸਕਦਾ ਹੈ।


-ਕੇਵਲ ਸਿੰਘ ਬਾਠਾਂ
ਮੋਬਾਈਲ : 98557-44211.


ਯਾਦ 'ਤੇ ਸਿਆਸਤ

ਬਾਬਾ ਬੰਦਾ ਸਿੰਘ ਬਹਾਦਰ ਦੀ ਸ਼ਹਾਦਤ ਦੇ 300ਵੇਂ ਸਾਲ ਦੇ ਮੌਕੇ 'ਤੇ ਦਿੱਲੀ ਵਿਖੇ ਆਲੀਸ਼ਾਨ ਪਾਰਕ ਵਿਚ ਲਾਏ ਜਾਣ ਵਾਲੇ ਉਨ੍ਹਾਂ ਦੇ ਬੁੱਤ ਦਾ ਮਾਮਲਾ ਅਕਾਲੀ ਦਲ ਅਤੇ ਆਮ ਆਦਮੀ ਪਾਰਟੀ ਦੀ ਆਪਸੀ ਖਹਿਬਾਜ਼ੀ ਦੀ ਭੇਟ ਚੜ੍ਹ ਗਿਆ। ਭਾਵੇਂ ਆਮ ਆਦਮੀ ਪਾਰਟੀ, ਅਦਾਲਤੀ ਹੁਕਮਾਂ ਅੱਗੇ, ਆਪਣੇ-ਆਪ ਨੂੰ ਮਜਬੂਰ ਦੱਸ ਰਹੀ ਹੈ। ਕਾਰਨ ਭਾਵੇਂ ਜਿਹੜੇ ਵੀ ਹੋਣ ਪਰ ਅਜਿਹਾ ਹੋਣਾ ਨਹੀਂ ਚਾਹੀਦਾ ਸੀ। ਸਿੱਖ ਕੌਮ ਦੇ ਪਹਿਲੇ ਸ਼ਾਸਕ, ਬਾਬਾ ਬੰਦਾ ਸਿੰਘ ਬਹਾਦਰ ਦੀ ਦੇਸ਼ ਅਤੇ ਕੌਮ ਨੂੰ ਮਹਾਨ ਦੇਣ ਹੈ। ਭਾਵੇਂ ਦਿੱਲੀ ਸਰਕਾਰ ਨੇ ਬਾਰਾਪੁਲਾ ਫਲਾਈ ਓਵਰ ਦਾ ਨਾਂਅ ਇਸ ਮਹਾਨ ਸ਼ਹੀਦ ਦੇ ਨਾਂਅ ਉੱਪਰ ਰੱਖ ਕੇ ਆਪਣੇ ਇਰਾਦੇ ਨੇਕ ਹੋਣ ਦਾ ਪ੍ਰਗਟਾਵਾ ਕੀਤਾ ਹੈ ਪਰ ਦਿੱਲੀ ਵਿਚ ਉਨ੍ਹਾਂ ਦੀ ਯਾਦਗਾਰ ਨਾ ਬਣਨ ਦੇਣ ਨੇ, ਉਨ੍ਹਾਂ ਲੱਖਾਂ ਹਿਰਦਿਆਂ ਨੂੰ ਵਲੂੰਧਰਿਆ ਹੈ, ਜਿਹੜੇ ਸ਼ਹੀਦਾਂ ਨੂੰ ਸਰਬ ਸਾਂਝੇ ਮੰਨਦੇ ਹਨ। ਸਾਰੀਆਂ ਰਾਜਨੀਤਕ ਪਾਰਟੀਆਂ ਨੂੰ ਚਾਹੀਦਾ ਹੈ ਕਿ ਘੱਟੋ-ਘੱਟ ਸ਼ਹੀਦਾਂ ਦੇ ਨਾਂਅ 'ਤੇ ਤਾਂ ਸਿਆਸਤ ਨਾ ਖੇਡੀ ਜਾਵੇ। ਹਰੇਕ ਕੰਮ ਨੂੰ ਵੋਟਾਂ ਵਾਲੀ ਐਨਕ ਨਾਲ ਨਹੀਂ ਦੇਖਣਾ ਚਾਹੀਦਾ। ਪੰਜਾਬੀ ਦੀ ਕਹਾਵਤ ਹੈ ਕਿ 'ਇਕ ਘਰ ਤਾਂ ਡੈਣ ਵੀ ਛੱਡ ਦਿੰਦੀ ਐ।'


-ਪ੍ਰੀਤ ਸਿੰਘ ਸੰਦਲ (ਕਵੀਸ਼ਰ)
ਪਿੰਡ ਮਕਸੂਦੜਾ, ਤਹਿਸੀਲ ਪਾਇਲ, ਜ਼ਿਲ੍ਹਾ ਲੁਧਿਆਣਾ।

20-06-2016


ਰੁੱਖਾਂ ਪ੍ਰਤੀ ਪਹਿਲਕਦਮੀ
ਨਹਿਰਾਂ ਅਤੇ ਸੜਕਾਂ ਚੌੜੀਆਂ ਕਰਨ ਦੀ ਆੜ 'ਚ ਰੁੱਖਾਂ ਦੀ ਅੰਧਾਧੁੰਦ ਕਟਾਈ ਖ਼ਤਰੇ ਦੀ ਨਿਸ਼ਾਨੀ ਹੈ। ਐਨ.ਜੀ.ਟੀ. ਨੇ ਭਾਵੇਂ ਪੰਜਾਬ ਸਰਕਾਰ ਨੂੰ ਨਿਰਦੇਸ਼ ਦਿੱਤੇ ਨੇ ਕਿ ਪ੍ਰਵਾਨਗੀ ਤੋਂ ਬਿਨਾਂ ਰੁੱਖਾਂ ਦੀ ਕਟਾਈ ਨਹੀਂ। ਪਰ ਕਣਕ ਦੀ ਕਟਾਈ ਤੋਂ ਬਾਅਦ ਖੇਤ ਵਿਹਲੇ ਹੋਣ ਕਰਕੇ ਖੇਤਾਂ ਵਿਚ ਖੜ੍ਹੇ ਇੱਕਾ-ਦੁੱਕਾ ਦਰੱਖਤਾਂ 'ਤੇ ਵੀ ਕੁਹਾੜਾ ਚਲਦਾ ਵੇਖਿਆ ਗਿਆ, ਕਿਉਂਕਿ ਕਿਸਾਨਾਂ ਦੀ ਸੋਚ ਹੈ ਕਿ ਦਰੱਖਤਾਂ ਦੀ ਛਾਂ ਫ਼ਸਲਾਂ ਨੂੰ ਮਾਰ ਕਰਦੀ ਹੈ। ਅਸੀਂ ਇਸ ਗੱਲ ਨੂੰ ਅੱਖੋਂ ਓਹਲੇ ਕਿਉਂ ਕਰਦੇ ਹਾਂ ਕਿ ਇਨ੍ਹਾਂ ਦਰੱਖਤਾਂ ਕਰਕੇ ਹੀ ਆਕਸੀਜਨ ਅਤੇ ਵਰਖਾ ਦੀ ਆਮਦ ਹੈ। ਇਨ੍ਹਾਂ ਰੁੱਖਾਂ ਦੀ ਬਦੌਲਤ ਹੀ ਅਸੀਂ ਜੀ ਰਹੇ ਹਾਂ।
ਇਹ ਰੁੱਖ ਹੀ ਅੱਜ ਸਾਡੇ ਇਕ ਸੱਚੇ ਮਿੱਤਰ ਹਨ ਜੋ ਆਪਣਾ ਤਨ ਧੁੱਪਾਂ ਵਿਚ ਸੇਕ ਕੇ ਸਾਨੂੰ ਸਾਫ਼ ਜਲਵਾਯੂ, ਠੰਢੀਆਂ ਛਾਵਾਂ ਪ੍ਰਦਾਨ ਕਰ ਰਹੇ ਹਨ ਜਦਕਿ ਮਨੁੱਖ ਤਾਂ ਏਨਾ ਖੁਦਗਰਜ਼ ਹੋ ਗਿਆ ਹੈ ਕਿ ਉਹ ਦੂਸਰੇ ਦੇ ਕੰਮ ਆਉਣ ਨੂੰ ਆਪਣਾ ਸਮਾਂ ਖਰਾਬ ਕਰਨਾ ਸਮਝਦਾ ਹੈ। ਇਕ ਪਾਸੇ ਅਸੀਂ ਪਾਣੀ ਦੇ ਬਚਾਓ ਪ੍ਰਤੀ ਗੰਭੀਰਤਾ ਨਹੀਂ ਲੈ ਰਹੇ, ਦੂਜੇ ਪਾਸੇ ਰੁੱਖਾਂ ਦੀ ਬਰਬਾਦੀ। ਕਲਪਨਾ ਕਰਕੇ ਦੇਖੋ ਪਾਣੀ ਅਤੇ ਰੁੱਖਾਂ ਬਿਨਾਂ ਸਾਡਾ ਭਵਿੱਖ ਕੀ ਹੋਵੇਗਾ? ਸਾਨੂੰ ਇਸ ਆਉਣ ਵਾਲੇ ਬਰਸਾਤ ਦੇ ਮੌਸਮ ਵਿਚ ਵੱਧ ਤੋਂ ਵੱਧ ਰੁੱਖ ਲਾ ਕੇ ਇਨ੍ਹਾਂ ਕੁਦਰਤੀ ਸਰੋਤਾਂ ਨੂੰ ਬਚਾਉਣ ਹਿਤ ਪਹਿਲਕਦਮੀ ਕਰਕੇ ਆਪਣਾ ਯੋਗਦਾਨ ਪਾਉਣਾ ਚਾਹੀਦਾ ਹੈ। ਇਸ ਵਿਚ ਹੀ ਸਾਡੀ ਸਭ ਦੀ ਭਲਾਈ ਹੈ।


-ਜਸਬੀਰ ਦੱਧਾਹੂਰ
ਪਿੰਡ ਤੇ ਡਾਕ: ਦੱਧਾਹੂਰ, ਤਹਿਸੀਲ ਰਾਏਕੋਟ, ਜ਼ਿਲ੍ਹਾ ਲੁਧਿਆਣਾ।


ਵਧ ਰਹੀ ਹਿੰਸਾ
ਅਜੋਕੀ ਨੌਜਵਾਨ ਪੀੜ੍ਹੀ ਬੇਰੁਜ਼ਗਾਰੀ ਦੀ ਅੱਗ ਵਿਚ ਸੜ ਰਹੀ ਹੈ। ਪੜ੍ਹ-ਲਿਖ ਕੇ ਨਾ ਘਰ ਦੇ ਨਾ ਘਾਟ ਦੇ ਰਹਿ ਕੇ ਗ਼ਲਤ ਪਾਸੇ ਲੱਗ ਕੇ ਗੈਂਗਸਟਰ ਬਣ ਕੇ ਗ਼ਲਤ ਕੰਮਾਂ ਨੂੰ ਅੰਜਾਮ ਦੇ ਰਹੇ ਹਨ। ਸਰਕਾਰਾਂ ਨੂੰ ਵੀ ਚਾਹੀਦਾ ਹੈ ਕਿ ਐਵੇਂ ਹੀ ਅਸਲੇ ਵੰਡ ਕੇ ਨੌਜਵਾਨ ਪੀੜ੍ਹੀ ਵਿਚ ਗ਼ਲਤ ਪਿਰਤ ਪਾ ਦਿੱਤੀ ਹੈ। ਰੋਜ਼ਾਨਾ ਹੀ ਕੋਈ ਨਾ ਕੋਈ ਮਾਰੂ ਖ਼ਬਰ ਦਿਲ ਦਹਿਲਾਉਣ ਵਾਲੀ ਪੜ੍ਹਨ ਨੂੰ ਮਿਲ ਜਾਂਦੀ ਹੈ। ਦਿਨੋ-ਦਿਨ ਵਧ ਰਹੀ ਹਿੰਸਾ ਆਉਣ ਵਾਲੇ ਸਮੇਂ ਲਈ ਘਾਤਕ ਤੇ ਮਾਰੂ ਨਿਸ਼ਾਨੀ ਹੈ।
ਸਰਕਾਰਾਂ ਨੂੰ ਵੀ ਚਾਹੀਦਾ ਹੈ ਕਿ ਨੌਜਵਾਨਾਂ ਲਈ ਰੁਜ਼ਗਾਰ ਦੇ ਮੌਕੇ ਪਹਿਲ ਦੇ ਆਧਾਰ 'ਤੇ ਬਣਾਵੇ ਤਾਂ ਜੋ ਵਿਹਲਾ ਮਨ ਸ਼ੈਤਾਨ ਦਾ ਘਰ ਨਾ ਬਣ ਸਕੇ। ਲੀਡਰਾਂ ਨੂੰ ਗੈਂਗਸਟਰਾਂ ਦੀ ਪੁਸ਼ਤਪਨਾਹੀ ਨਹੀਂ ਕਰਨੀ ਚਾਹੀਦੀ ਤੇ ਉਸਾਰੂ ਸੋਚ ਦੀ ਸੰਪਾਦਕੀ ਲਈ ਅਜੀਤ ਅਖ਼ਬਾਰ ਦੀ ਧੰਨਵਾਦ ਦੀ ਪਾਤਰ ਹੈ।


-ਮਨਜੀਤ ਸਿੰਘ ਭਾਮ
ਹੁਸ਼ਿਆਰਪੁਰ। ਮੋ: 94784-00012.


ਮਾੜੇ ਗੀਤ
ਪਿਛਲੇ ਸਮੇਂ ਤੋਂ ਪੰਜਾਬੀ ਗੀਤਾਂ ਵਿਚ ਨਸ਼ਿਆਂ, ਮਾਰਧਾੜ ਤੇ ਲੱਚਰ ਫਿਲਮਾਂਕਣਾਂ ਦੇ ਦ੍ਰਿਸ਼ਾਂ ਦਾ ਰੁਝਾਨ ਵਧਦਾ ਹੀ ਜਾ ਰਿਹਾ ਹੈ। ਇਸ ਦੇ ਉਲਟ ਪੰਜਾਬੀ ਸੱਭਿਆਚਾਰ ਦੀ ਝਲਕ ਪੇਸ਼ ਕਰਦੇ ਗੀਤਾਂ ਦੀ ਗਿਣਤੀ ਦਿਨੋ-ਦਿਨ ਘਟਦੀ ਜਾ ਰਹੀ ਹੈ। ਜੋ ਪੰਜਾਬੀ ਸੱਭਿਆਚਾਰ ਨੂੰ ਦਿਲੋਂ ਪਿਆਰ ਕਰਨ ਵਾਲਿਆਂ ਲਈ ਵੱਡੀ ਚਿੰਤਾ ਦੀ ਗੱਲ ਹੈ। ਪੈਸੇ ਦੇ ਜ਼ੋਰ ਨਾਲ ਅੱਗੇ ਆ ਰਹੇ ਅਖੌਤੀ ਕਲਾਕਾਰ ਜਿਥੇ ਪੰਜਾਬੀ ਪਰਿਵਾਰਾਂ ਦੀ ਸੁਹਜਮਈ ਸੋਚ ਨੂੰ ਬਦ ਤੋਂ ਬਦਤਰ ਕਰ ਰਹੇ ਹਨ, ਉਥੇ ਉਹ ਪੰਜਾਬ ਦੀ ਜਵਾਨੀ ਨੂੰ ਕੁਰਾਹੇ ਵੀ ਪਾ ਰਹੇ ਹਨ। ਅਜਿਹਾ ਕਰਕੇ ਇਹ ਲੋਕ ਪੰਜਾਬ ਨਾਲ ਵੱਡਾ ਧ੍ਰੋਹ ਕਮਾ ਰਹੇ ਹਨ। ਪੰਜਾਬ, ਪੰਜਾਬੀ ਅਤੇ ਪੰਜਾਬੀਅਤ ਨੂੰ ਦਿਲੋਂ ਪਿਆਰ ਕਰਨ ਵਾਲੇ ਬਾਦਲ ਸਰਕਾਰ ਤੋਂ ਉਮੀਦ ਰੱਖਦੇ ਹਨ ਕਿ ਉਹ ਅਮਰਵੇਲ ਵਾਂਗ ਵਧਦੇ ਜਾ ਰਹੇ ਇਸ ਮਾੜੇ ਰੁਝਾਨ ਨੂੰ ਰੋਕਣ ਲਈ ਪੂਰੀ ਗੰਭੀਰਤਾ ਨਾਲ ਪੇਸ਼ ਆਵੇਗੀ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਜ਼ਿਲ੍ਹਾ ਲੁਧਿਆਣਾ।

 

13-06-2016

ਸਰਕਾਰੀ ਸਕੂਲਾਂ ਵਿਚ ਵਿਦਿਆਰਥੀਆਂ ਦੀ ਘਟਦੀ ਗਿਣਤੀ
ਸਰਕਾਰੀ ਸਕੂਲਾਂ ਵਿਚ ਵਿਦਿਆਰਥੀਆਂ ਦੀ ਘਟ ਰਹੀ ਗਿਣਤੀ ਅੱਜ ਚਿੰਤਾ ਦਾ ਵਿਸ਼ਾ ਬਣ ਚੁੱਕੀ ਹੈ। ਉੱਚ ਵਰਗ ਤੇ ਮੱਧ ਵਰਗ ਤਾਂ ਆਪਣੇ ਬੱਚੇ ਨੂੰ ਸਰਕਾਰੀ ਸਕੂਲਾਂ ਵਿਚ ਭੇਜਣਾ ਹੀ ਨਹੀਂ ਚਾਹੁੰਦੇ। ਸਰਕਾਰੀ ਸਕੂਲ ਪ੍ਰਤੀ ਜਨਤਾ ਵਿਚ ਇਹ ਅਵਿਸ਼ਵਾਸ ਚਿੰਤਾ ਦਾ ਵਿਸ਼ਾ ਹੈ। ਭਾਵੇਂ ਪੰਜਾਬ ਸਰਕਾਰ ਵੱਲੋਂ ਸਰਕਾਰੀ ਸਕੂਲਾਂ ਵਿਚ ਬੱਚਿਆਂ ਨੂੰ ਕਾਫੀ ਸਹੂਲਤਾਂ ਦਿੱਤੀਆਂ ਜਾ ਰਹੀਆਂ ਹਨ ਪਰ ਇਸ ਦੇ ਬਾਵਜੂਦ ਮਾਪੇ ਆਪਣੇ ਬੱਚਿਆਂ ਨੂੰ ਪ੍ਰਾਈਵੇਟ ਸਕੂਲ ਵਿਚ ਪੜ੍ਹਾਉਣ ਨੂੰ ਹੀ ਤਰਜੀਹ ਦੇ ਰਹੇ ਹਨ। ਖ਼ੁਦ ਸਰਕਾਰੀ ਅਧਿਆਪਕਾਂ ਦੇ ਬੱਚੇ ਸਰਕਾਰੀ ਸਕੂਲਾਂ ਵਿਚ ਨਾ ਪੜ੍ਹ ਕੇ ਪ੍ਰਾਈਵੇਟ ਸਕੂਲਾਂ ਵਿਚ ਪੜ੍ਹਾਈ ਕਰ ਰਹੇ ਹਨ। ਅਜਿਹੇ ਵਿਚ ਉਹ ਦੂਸਰਿਆਂ ਨੂੰ ਸਰਕਾਰੀ ਸਕੂਲ ਵਿਚ ਪੜ੍ਹਾਈ ਕਰਨ ਲਈ ਕਿਵੇਂ ਪ੍ਰੇਰਿਤ ਕਰ ਸਕਣਗੇ। ਅਧਿਆਪਕਾਂ ਨੂੰ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ ਕਿ ਉਹ ਬੱਚਿਆਂ ਤੇ ਉਨ੍ਹਾਂ ਦੇ ਮਾਪਿਆਂ ਦਾ ਵਿਸ਼ਵਾਸ ਮੁੜ ਤੋਂ ਜਿੱਤ ਸਕਣ ਤੇ ਪ੍ਰਾਈਵੇਟ ਸਕੂਲਾਂ ਦੇ ਮੁਕਾਬਲੇ ਸਰਕਾਰੀ ਸਕੂਲਾਂ ਵਿਚ ਜੋ ਕਮੀਆਂ ਹਨ, ਸਰਕਾਰ ਉਨ੍ਹਾਂ ਨੂੰ ਪਹਿਲ ਦੇ ਆਧਾਰ 'ਤੇ ਦੂਰ ਕਰੇ।


-ਜਸਪ੍ਰੀਤ ਕੌਰ 'ਸੰਘਾ'
ਪਿੰਡ ਤਨੂੰਲੀ, ਜ਼ਿਲ੍ਹਾ ਹੁਸ਼ਿਆਰਪੁਰ।


ਕਰਮਚਾਰੀਆਂ ਦੀ ਕਾਰਗੁਜ਼ਾਰੀ ਕਿਵੇਂ ਸੁਧਰੇ?
ਪਿਛਲੇ ਦਿਨੀਂ ਪੰਜਾਬ ਸਰਕਾਰ ਨੇ ਰਾਜ ਦੇ ਅਧਿਕਾਰੀ ਅਤੇ ਕਰਮਚਾਰੀ 'ਤੇ ਸ਼ਨੀਵਾਰ ਅਤੇ ਐਤਵਾਰ ਦੋਵੇਂ ਦਿਨ ਦੀ ਗਜ਼ਟਿਡ ਛੁੱਟੀ ਹੋਣ ਕਾਰਨ ਹੁਣ ਦਫ਼ਤਰਾਂ ਵਿਚ ਬੈਠ ਕੇ ਕੰਮ ਕਰਨ 'ਤੇ ਪਾਬੰਦੀ ਲਾ ਦਿੱਤੀ ਹੈ। ਸਰਕਾਰ ਦੀ ਰਾਏ ਹੈ ਕਿ ਇਨ੍ਹਾਂ ਦੋਵੇਂ ਦਿਨਾਂ ਵਿਚ ਜੋ ਕੰਮ ਕਰਮਚਾਰੀਆਂ ਵੱਲੋਂ ਸਰਕਾਰੀ ਦਫ਼ਤਰਾਂ ਵਿਚ ਬੈਠ ਕੇ ਕੀਤਾ ਜਾਂਦਾ ਹੈ ਕਿ ਨਿੱਜੀ ਸਵਾਰਥ ਦੇ ਹਿਤਾਂ ਲਈ ਹੁੰਦਾ ਹੈ। ਇਸ ਨਾਲ ਇਥੇ ਦੋ ਪਹਿਲੂ ਬਣਦੇ ਹਨ, ਇਕ ਤਾਂ ਮੁਲਾਜ਼ਮਾਂ ਦੀ ਘਾਟ ਏਨੀ ਹੈ ਕਿ ਕਰਮਚਾਰੀਆਂ ਤੋਂ ਉਨ੍ਹਾਂ ਦੇ ਵਿੱਤ ਤੋਂ ਜ਼ਿਆਦਾ ਕੰਮ ਲਿਆ ਜਾਂਦਾ ਹੈ। ਦੂਸਰਾ ਬਾਕੀ ਦਿਨਾਂ ਵਿਚ ਇਹ ਅਧਿਕਾਰੀ ਜਾਂ ਕਰਮਚਾਰੀ ਆਪਣੀ ਡਿਊਟੀ ਪ੍ਰਤੀ ਲਾਪਰਵਾਹੀ ਵਰਤਦੇ ਹਨ। ਦੂਸਰਾ ਕਾਰਨ ਜ਼ਿਆਦਾ ਠੋਸ ਲਗਦਾ ਹੈ।
ਸਰਕਾਰ ਦੀ ਇਸ ਪਾਬੰਦੀ ਨਾਲ ਕੁਝ ਨਹੀਂ ਹੋਣਾ, ਜੇਕਰ ਸਰਕਾਰ ਜਾਂ ਅਫਸਰਸ਼ਾਹੀ ਚਾਹੇ ਤਾਂ ਕੰਮ ਨੂੰ ਪੰਜ ਦਿਨਾਂ ਦੇ ਹਫ਼ਤੇ ਵਿਚ ਹੀ ਪਾਰਦਰਸ਼ੀ ਢੰਗ ਨਾਲ ਕਰਵਾ ਸਕਦੀ ਹੈ। ਕਰਮਚਾਰੀਆਂ ਦੇ ਕੰਮ ਦੀ ਰੋਜ਼ਾਨਾ ਚੈਕਿੰਗ ਹੋਵੇ। ਸਵੇਰ ਮੌਕੇ ਜਿਸ ਨੰਬਰ ਤੋਂ ਕੰਮ ਸ਼ੁਰੂ ਹੁੰਦਾ ਹੈ ਅਤੇ ਸ਼ਾਮ ਨੂੰ ਜਿਥੇ ਖ਼ਤਮ ਹੁੰਦਾ ਹੈ, ਉਥੇ ਉੱਚ ਅਧਿਕਾਰੀ ਦੇ ਦਸਤਖ਼ਤ ਹੋਣ ਅਤੇ ਉਸ ਦੀ ਕਾਪੀ ਸਕੈਨ ਕਰਕੇ ਕੰਪਿਊਟਰ ਵਿਚ ਸਮਾਂ ਤੇ ਮਿਤੀ ਲਿਖ ਕੇ ਪਾਈ ਜਾਵੇ। ਇਹ ਸਭ ਕੁਝ ਤਾਂ ਹੀ ਸੰਭਵ ਹੈ ਜੇਕਰ ਸਰਕਾਰ ਅਤੇ ਅਫਸਰਸ਼ਾਹੀ ਦੀ ਨੀਯਤ ਸਾਫ਼ ਹੋਵੇ, ਮਨ ਅੰਦਰ ਕੰਮ ਕਰਨ ਦੀ ਲਗਨ ਹੋਵੇ, ਕੋਈ ਨਿੱਜ ਸਵਾਰਥ ਨਾ ਹੋਵੇ।


-ਇੰਦਰਜੀਤ ਸਿੰਘ ਕੰਗ
ਕੋਟਲਾ ਸਮਸ਼ਪੁਰ (ਸਮਰਾਲਾ), ਜ਼ਿਲ੍ਹਾ ਲੁਧਿਆਣਾ।


ਨਿੱਜੀ ਸਕੂਲ
ਪੰਜਾਬ ਅੰਦਰ ਚੱਲ ਰਹੀਆਂ ਕਈ ਨਿੱਜੀ ਵਿਦਿਅਕ ਸੰਸਥਾਵਾਂ ਦੇ ਮਾਲਕ ਚੰਗੀਆਂ ਵਿੱਦਿਆ ਅਤੇ ਚੰਗੀਆਂ ਸਹੂਲਤਾਂ ਦਾ ਹੋਕਾ ਦੇ ਕੇ ਲੋਕਾਂ ਦੀ ਲੁੱਟ-ਖਸੁੱਟ ਕਰ ਰਹੇ ਹਨ। ਇਸ਼ਤਿਹਾਰਾਂ ਅਤੇ ਪੋਸਟਰਾਂ ਰਾਹੀਂ ਹਰ ਗਲੀ ਮੁਹੱਲੇ ਦੀਆਂ ਕੰਧਾਂ ਕਾਲੀਆਂ ਕੀਤੀਆਂ ਹਨ। ਜੇਕਰ ਸਕੂਲਾਂ ਵਿਚ ਜਾ ਕੇ ਵੇਖਿਆ ਜਾਵੇ ਤਾਂ ਹਕੀਕਤ ਕੁਝ ਹੋਰ ਹੈ। ਇਨ੍ਹਾਂ ਸਕੂਲਾਂ ਵਿਚ ਪੀਣ ਵਾਲੇ ਪਾਣੀ ਦਾ ਪ੍ਰਬੰਧ, ਮੈਡੀਕਲ ਅਤੇ ਟਰਾਂਸਪੋਰਟ ਸਹੂਲਤਾਂ ਭਗਵਾਨ ਭਰੋਸੇ ਹਨ। ਇਸ ਤੋਂ ਇਲਾਵਾ ਇਹ ਲੋਕ ਅਧਿਆਪਕਾਂ ਦਾ ਵੀ ਸ਼ੋਸ਼ਣ ਕਰ ਰਹੇ ਹਨ। ਬੱਚਿਆਂ ਤੋਂ ਭਾਰੀ ਫੀਸਾਂ ਵਸੂਲ ਕੇ ਨਿਗੂਣੀਆਂ ਤਨਖਾਹ ਦੇ ਰਹੇ ਹਨ।
ਸਰਕਾਰ ਗੱਲਾਂਬਾਤਾਂ ਨਾਲ ਚੰਗੀ ਸਿੱਖਿਆ ਦਾ ਢਿੰਡੋਰਾ ਪਿੱਟਣ ਨਾਲੋਂ ਸਾਊ ਸਿੱਖਿਆ ਦੇਣ ਲਈ ਅਤੇ ਲੁੱਟ-ਖਸੁੱਟ ਰੋਕਣ ਲਈ ਇਨ੍ਹਾਂ ਸਕੂਲਾਂ ਉੱਪਰ ਕੰਟਰੋਲ ਕਰੇ ਤਾਂ ਜੋ ਸਿੱਖਿਆ ਆਮ ਲੋਕਾਂ ਤੱਕ ਪਹੁੰਚ ਸਕੇ। ਸਾਰੇ ਨਿੱਜੀ ਸਕੂਲਾਂ ਦੇ ਕੰਟਰੋਲ ਲਈ ਇਕ ਅਥਾਰਿਟੀ ਬਣਾਈ ਜਾਵੇ।


-ਚੰਨਦੀਪ ਸਿੰਘ 'ਬੁਤਾਲਾ'
ਅੰਮ੍ਰਿਤਸਰ।

 

12-06-2016


ਸੜਕਾਂ ਦੀ ਹਾਲਤ

ਪੰਜਾਬ ਦੀਆਂ ਮਾੜੀਆਂ ਸੜਕਾਂ, ਡੂੰਘੇ ਟੋਏ ਮਾੜੇ ਸਿਸਟਮ ਦੀ ਦੇਣ ਹੈ। ਚੰਡੀਗੜ੍ਹ ਦੀਆਂ ਸੜਕਾਂ 8-10 ਸਾਲ ਨਹੀਂ ਟੁੱਟਦੀਆਂ ਪਰ ਪੰਜਾਬ ਵਿਚ ਬਣਨ ਵਾਲੀਆਂ ਸੜਕਾਂ ਦੀ ਗਾਰੰਟੀ ਇਕ ਸਾਲ ਦੀ ਵੀ ਨਹੀਂ ਹੈ। 'ਹਿੱਸਾ ਪੱਤੀ' ਅਤੇ 'ਸੇਵਾ' ਲੁੱਟ ਦੇ ਰਿਵਾਜ ਨੇ ਸੜਕਾਂ ਦੇ ਘਪਲੇ ਕਰਨ ਵਾਲਿਆਂ ਦੇ ਹੌਸਲੇ ਬੁਲੰਦ ਕਰ ਰੱਖੇ ਹਨ। ਲੁੱਕ ਵਿਚ ਡੀਜ਼ਲ ਮਿਲਾ ਕੇ ਪਤਲੀ ਕਰ ਲਈ ਜਾਂਦੀ ਹੈ। ਪਤਲੀ ਲੁੱਕ ਜ਼ਿਆਦਾ ਬਜਰੀ ਨੂੰ ਸਮੋ ਲੈਂਦੀ ਹੈ। ਮਿਸਾਲ ਵਜੋਂ ਨਵੀਂ ਸੜਕ ਬਣਾਉਣ ਸਮੇਂ ਪੱਥਰ ਦੀ ਤਹਿ ਦੀ ਮੋਟਾਈ ਘੱਟ ਰੱਖੀ ਜਾਂਦੀ ਹੈ। ਉਸ ਤੋਂ ਪਿਛੋਂ ਲੁੱਕ ਵਾਲੀ ਬੱਜਰੀ (ਪ੍ਰੀਮਿਕਸ) ਪਾਈ ਜਾਂਦੀ ਹੈ। ਜੇ ਬਜਰੀ ਚਾਰ ਇੰਚ ਮੋਟੀ ਪਾਉਣੀ ਤੈਅ ਹੋਈ ਹੈ ਤਾਂ ਉਹ ਤਿੰਨ ਇੰਚ ਹੀ ਪਾਉਣੀ ਹੈ। ਕਿਉਂਕਿ ਨਿਗਰਾਨਾਂ ਦਾ ਕੋਈ ਡਰ ਨਹੀਂ। ਸਾਰਿਆਂ ਨੂੰ ਰਿਸ਼ਵਤ ਦੀ ਹਿੱਸਾ-ਪੱਤੀ ਦਿੱਤੀ ਜਾਂਦੀ ਹੈ। ਸੜਕਾਂ ਦੇ ਟੈਂਡਰ ਪਾਸ ਕਰਵਾਉਣ ਲਈ ਵੀ ਸਬੰਧਤ ਅਫਸਰਾਂ ਦੀ ਸੇਵਾ ਕਰਨੀ ਪੈਂਦੀ ਹੈ। ਰਿਸ਼ਵਤਖੋਰ ਅਫਸਰਾਂ ਕਰਕੇ ਪੰਜਾਬ ਵਿਚ ਘਟੀਆ ਸੜਕਾਂ ਬਣ ਰਹੀਆਂ ਹਨ।


-ਹਰਜਿੰਦਰ ਪਾਲ ਸਿੰਘ
ਜਵੱਦੀ ਕਲਾਂ, ਲੁਧਿਆਣਾ।
ਮੋਬਾਈਲ : 96538-35033.


ਡੁੱਬਣ ਦੀਆਂ ਘਟਨਾਵਾਂ
ਬੱਚਿਆਂ ਦੇ ਨਹਾਉਣ ਸਮੇਂ ਡੁੱਬਣ ਦੀਆਂ ਖ਼ਬਰਾਂ ਨੇ ਬਹੁਤ ਹੀ ਦੁਖੀ ਕੀਤਾ ਹੈ। ਡੁੱਬਣ ਦੀਆਂ ਜ਼ਿਆਦਾ ਘਟਨਾਵਾਂ ਬੱਚਿਆਂ ਦੀਆਂ ਹੀ ਹੁੰਦੀਆਂ ਹਨ, ਜੋ ਤਰਨਾ ਨਹੀਂ ਜਾਣਦੇ ਹੁੰਦੇ। ਬਿਨਾਂ ਸੋਚੇ-ਸਮਝੇ ਗਰਮੀ ਤੋਂ ਨਿਜਾਤ ਪਾਉਣ ਲਈ ਬੱਚੇ ਡੂੰਘੇ ਪਾਣੀਆਂ 'ਚ ਛਾਲਾਂ ਮਾਰ ਦਿੰਦੇ ਹਨ।
ਕਈ ਵਾਰ ਤਾਂ ਆਪਣੇ ਸਾਥੀਆਂ ਨੂੰ ਡੁੱਬਣ ਤੋਂ ਬਚਾਉਂਦਿਆਂ ਆਪ ਵੀ ਮੌਤ ਦੇ ਸ਼ਿਕਾਰ ਹੋ ਜਾਂਦੇ ਹਨ। ਬੱਚੇ ਤਾਂ ਇਕ ਵਾਰ ਮਰਦੇ ਹਨ ਪਰ ਉਨ੍ਹਾਂ ਦੇ ਪਿਛਲੇ ਉਨ੍ਹਾਂ ਨੂੰ ਯਾਦ ਕਰਕੇ ਦਿਨ ਵਿਚ ਪਤਾ ਨਹੀਂ ਕਿੰਨੀ ਕੁ ਵਾਰ ਮਰਦੇ ਹਨ। ਮਾਂ-ਬਾਪ ਅਤੇ ਸਕੂਲ ਅਧਿਆਪਕਾਂ ਵੱਲੋਂ ਬੱਚਿਆਂ ਨੂੰ ਹਦਾਇਤਾਂ ਕੀਤੀਆਂ ਜਾਣ ਕਿ ਉਹ ਨਹਾਉਂਦੇ ਸਮੇਂ ਡੂੰਘੇ ਪਾਣੀਆਂ ਵਿਚ ਨਾ ਜਾਣ। ਦਰਿਆਵਾਂ ਕੰਢੇ ਨਹਾਉਣ ਵਾਲੀਆਂ ਥਾਵਾਂ 'ਤੇ ਚਿਤਾਵਨੀਆਂ ਦੇ ਬੋਰਡ ਲਗਾਏ ਜਾਣ। ਜੋ ਬੱਚੇ ਤਰਨਾ ਨਹੀਂ ਜਾਣਦੇ, ਉਹ ਡੂੰਘੇ ਪਾਣੀਆਂ ਵਿਚ ਨਾ ਜਾਣ। ਪ੍ਰਸ਼ਾਸਨ ਅਤੇ ਪੁਲਿਸ ਨੂੰ ਵੀ ਚਾਹੀਦਾ ਹੈ ਕਿ ਉਹ ਅਜਿਹੀਆਂ ਘਟਨਾਵਾਂ ਨੂੰ ਘਟਾਉਣ ਵਿਚ ਮਦਦ ਕਰਨ। ਜਾਨਾਂ ਬਹੁਤ ਕੀਮਤੀ ਹਨ।


-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।


ਸੜਕ ਹਾਦਸੇ
ਨਿਤ ਦਿਨ ਹੁੰਦੇ ਸੜਕ ਹਾਦਸੇ ਜਿਥੇ ਨਸ਼ਿਆਂ ਜਾਂ ਗ਼ਲਤ ਡਰਾਈਵਿੰਗ ਕਾਰਨ ਵਾਪਰ ਰਹੇ ਹਨ, ਉਥੇ ਇਨ੍ਹਾਂ ਹਾਦਸਿਆਂ ਨੂੰ ਸੜਕਾਂ ਦੇ ਕਿਨਾਰਿਆਂ 'ਤੇ ਖੜ੍ਹੇ ਰੁੱਖਾਂ ਦਾ ਸੜਕਾਂ ਵੱਲ ਨੂੰ ਝੁਕਿਆ ਹੋਣਾ ਵੀ ਇਕ ਵੱਡਾ ਕਾਰਨ ਮੰਨਿਆ ਜਾ ਰਿਹਾ ਹੈ। ਦੋਵਾਂ ਪਾਸਿਆਂ ਤੋਂ ਸੜਕਾਂ ਵੱਲ ਨੂੰ ਝੁਕੇ ਹੋਏ ਰੁੱਖ ਆਮ ਕਰਕੇ ਲਿੰਕ ਤੇ ਮੇਨ ਸੜਕਾਂ 'ਤੇ ਦੇਖੇ ਜਾ ਸਕਦੇ ਹਨ। ਅੱਜ ਦੀ ਤੇਜ਼-ਤਰਾਰ ਜ਼ਿੰਦਗੀ ਵਿਚ ਇਹ ਝੁਕੇ ਹੋਏ ਰੁੱਖ ਰਾਹਗੀਰਾਂ ਲਈ ਵੱਡੀ ਸਿਰਦਰਦੀ ਬਣੇ ਹੋਏ ਹਨ। ਇਸ ਤੋਂ ਬਿਲਕੁਲ ਸੁੱਕ ਚੁੱਕੇ ਦਰੱਖਤ ਵੀ ਕਈ ਘਟਨਾਵਾਂ ਦਾ ਕਾਰਨ ਬਣ ਚੁੱਕੇ ਹਨ। ਸੋ, ਸਬੰਧਤ ਮਹਿਕਮੇ ਨੂੰ ਇਸ ਪਾਸੇ ਤੁਰੰਤ ਧਿਆਨ ਦੇਣਾ ਚਾਹੀਦਾ ਹੈ, ਤਾਂ ਜੋ ਸੜਕ ਹਾਦਸਿਆਂ ਨੂੰ ਨੱਥ ਪਾਈ ਜਾ ਸਕੇ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਜ਼ਿਲ੍ਹਾ ਲੁਧਿਆਣਾ।

02-06-2016


ਲੋਕਾਂ ਦੇ ਸਹਿਯੋਗ ਤੋਂ ਬਿਨਾਂ ਸਫਲ ਨਹੀ ਹੋ ਸਕਦੀ ਪੁਲਿਸ

ਪਿੰਡਾਂ ਵਿਚ ਪੁਲਿਸ ਦਾ ਜੋ ਕਿਰਦਾਰ ਹੈ ਉਹ ਬਹੁਤ ਹੀ ਮਾੜਾ ਹੈ। ਕੋਈ ਗਰੀਬ ਇਨਸਾਫ਼ ਲਈ ਦਰਖ਼ਾਸਤ ਦੇਣ ਜਾਵੇ ਤਾਂ ਪੁਲਿਸ ਚੌਕੀਆਂ ਜਾਂ ਥਾਣਿਆਂ ਵਿਚ ਤਾਂ ਪਹਿਲਾ ਪੁਲਿਸ ਕਰਮਚਾਰੀ ਚਾਹ-ਪਾਣੀ ਦੀ ਮੰਗ ਕਰਦਾ ਹੈ। ਪਿਛਲੇ ਦਿਨੀਂ ਇਕਬਾਲ ਸਿੰਘ ਲਾਲਪੁਰਾ ਦੇ ਲੇਖ ਵਿਚ ਦੱਸਿਆ ਗਿਆ ਸੀ ਕਿ ਅਪਰਾਧੀਆ ਦੀ ਗਿਣਤੀ 2 ਫ਼ੀਸਦੀ ਹੈ ਪਰ 98 ਫ਼ੀਸਦੀ ਲੋਕ ਪੁਲਿਸ ਤੇ ਅਪਰਾਧੀਆਂ ਦੀ ਦਹਿਸ਼ਤ ਵਿਚ ਜੀਅ ਰਹੇ ਹਨ। ਪੰਜਾਬ ਦੀ ਪੁਲਿਸ ਦਾ ਕੋਈ ਉੱਚ ਅਧਿਕਾਰੀ ਪਬਲਿਕ ਮੀਟਿੰਗ ਪਿੰਡ ਵਿਚ ਕਰਦਾ ਹੈ ਤਾਂ ਉਸ ਮੀਟਿੰਗ ਵਿਚ ਪੁਲਿਸ ਦੇ ਨਜ਼ਦੀਕ ਰਹਿਣ ਵਾਲੇ ਲੋਕ ਹੁੰਦੇ ਜਾਂ ਫਿਰ ਸੱਤਾਧਾਰੀ ਪਾਰਟੀ ਦੇ ਆਗੂ ਹੁੰਦੇ ਹਨ, ਜਿਨ੍ਹਾਂ ਨੇ ਪਿੰਡ ਦੇ ਲੋਕਾਂ ਨੂੰ ਫੜਾਉਣਾ ਜਾਂ ਛੁਡਾਉਣ ਹੁੰਦਾ ਹੈ। ਪਿੰਡਾਂ ਦੀਆਂ ਚੌਕੀਆਂ ਵਿਚ ਲੱਗੇ ਥਾਣੇਦਾਰ ਨੂੰ ਚਾਹੀਦਾ ਹੈ ਕਿ ਉਹ ਹਰੇਕ ਪਾਰਟੀ ਨੂੰ ਸੱਦਾ-ਪੱਤਰ ਦੇਵੇ ਤਾਂ ਹੀ ਲੋਕਾਂ ਦਾ ਸਹਿਯੋਗ ਪੁਲਿਸ ਲੈ ਸਕਦੀ ਹੈ। ਇਸ ਕਰਕੇ ਪੰਜਾਬ ਵਿਚ ਵਿਰੋਧੀ ਪਾਰਟੀ ਪੁਲਿਸ ਦਾ ਘਿਰਾਉ ਕਰਦੀ ਹੈ। ਪੰਜਾਬ ਪੁਲਿਸ ਦੇ ਉੱਚ ਅਧਿਕਾਰੀਆਂ ਨੂੰ ਚਾਹੀਦਾ ਹੈ ਕਿ ਉਹ ਕਾਨੂੰਨ ਅਨੁਸਾਰ ਕੰਮ ਕਰਨ ਤਾਂ ਕਿ ਲੋਕਾਂ ਦਾ ਭਰਪੂਰ ਸਹਿਯੋਗ ਪੁਲਿਸ ਨੂੰ ਮਿਲੇ।


-ਮਾ: ਜਗੀਰ ਸਿੰਘ ਸਠਿਆਲਾ
ਅੰਮ੍ਰਿਤਸਰ।


ਸ਼ਰਮਨਾਕ
ਪਿਛਲੇ ਦਿਨੀਂ ਇਕ ਲੇਖ 'ਚ ਪੜ੍ਹਿਆ ਕਿ ਮਹਾਤਮਾ ਗਾਂਧੀ ਦੇ ਪੋਤੇ ਕੰਨੂ ਭਾਈ ਅਤੇ ਉਨ੍ਹਾਂ ਦੀ ਪਤਨੀ ਦੇ ਇਕ ਆਮ ਜਿਹੇ ਬਿਰਧ ਆਸ਼ਰਮ ਵਿਚ ਰਹਿਣ ਦੀ ਗੱਲ ਸੁਣ ਕੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਜੀ ਨੇ ਇਕ ਕੇਂਦਰੀ ਮੰਤਰੀ ਨੂੰ ਉਨ੍ਹਾਂ ਦਾ ਹਾਲ-ਚਾਲ ਪੁੱਛਣ ਲਈ ਭੇਜਿਆ। ਜੇਕਰ ਰਾਸ਼ਟਰਪਿਤਾ ਕਹੇ ਜਾਂਦੇ ਮਹਾਤਮਾ ਗਾਂਧੀ ਵਰਗੇ ਨਾਇਕਾਂ ਦੇ ਪਰਿਵਾਰਕ ਮੈਂਬਰਾਂ ਦਾ ਬੁਢਾਪਾ ਬਿਰਧ-ਆਸ਼ਰਮਾਂ ਵਿਚ ਰੁਲਣ ਲਈ ਮਜਬੂਰ ਹੈ ਤਾਂ ਸਾਡੇ ਮਹਾਨ ਦੇਸ਼ ਲਈ ਇਸ ਤੋਂ ਸ਼ਰਮਨਾਕ ਗੱਲ ਹੋਰ ਕੀ ਹੋ ਸਕਦੀ ਹੈ? ਜਿਨ੍ਹਾਂ ਦੇਸ਼ ਭਗਤਾਂ ਨੇ ਦੇਸ਼ ਦੀ ਆਜ਼ਾਦੀ ਲਈ ਬਲਿਦਾਨ ਦਿੱਤਾ, ਉਨ੍ਹਾਂ ਦੇ ਗਰੀਬ ਪਰਿਵਾਰਾਂ ਦੀ ਮਦਦ ਲਈ ਸਮਾਜ ਸੇਵੀ ਸੰਸਥਾਵਾਂ ਨੂੰ ਅੱਗੇ ਆਉਣਾ ਚਾਹੀਦਾ ਹੈ ਤਾਂ ਕਿ ਕੰਨੂ ਭਾਈ ਵਰਗੇ ਗਰੀਬ ਪਰਿਵਾਰਾਂ ਨੂੰ ਭਾਰਤੀ ਹੋਣ 'ਤੇ ਕੁਝ ਮਾਣ ਮਹਿਸੂਸ ਹੋ ਸਕੇ।


-ਲੱਖੀ ਗਿੱਲ ਧਨਾਨਸੂ
ਜ਼ਿਲ੍ਹਾ ਲੁਧਿਆਣਾ।


ਬਚਾਅ ਲਓ ਪਾਣੀ

ਹਾਲ ਹੀ ਵਿਚ ਜਲ ਦਿਵਸ ਮਨਾਇਆ ਗਿਆ। ਇਹ ਗੱਲ ਕਿਸੇ ਤੋਂ ਛੁਪੀ ਨਹੀਂ ਕਿ ਪੂਰੇ ਵਿਸ਼ਵ ਨੂੰ ਜਲ ਸੰਕਟ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਸਰਕਾਰਾਂ ਜਲ ਦਿਵਸ ਤਾਂ ਮਨਾਉਂਦੀਆਂ ਹਨ ਪਰ ਜਲ ਬੱਚਤ ਕਰਨਾ ਭੁੱਲ ਜਾਂਦੀਆਂ ਹਨ। ਪਾਣੀ ਦੀ ਬੱਚਤ ਲਈ ਲੋਕ ਖ਼ੁਦ ਜਾਗਰੂਕ ਹੋਣ ਤੇ ਪਾਣੀ ਦੀ ਅਹਿਮੀਅਤ ਨੂੰ ਸਮਝਦੇ ਹੋਏ ਪਾਣੀ ਦੀ ਬੱਚਤ ਬਾਰੇ ਸੋਚਣ, ਤਦ ਹੀ ਪਾਣੀ ਬਚ ਸਕੇਗਾ ਤੇ ਤਦ ਹੀ ਮਨੁੱਖੀ ਜੀਵਨ ਬਚ ਪਾਏਗਾ।


-ਸੇਵਾ ਰਾਮ ਸਿੰਗਲਾ
ਸਮਾਜ ਸੇਵਕ, ਮੇਨ ਅਜੀਤ ਰੋਡ, ਬਠਿੰਡਾ।


ਖ਼ੁਦਕੁਸ਼ੀਆਂ ਦਾ ਦੌਰ
ਅਖ਼ਬਾਰ ਦੇ ਪੰਨੇ ਪਲਟਦਿਆਂ ਜੋ ਖ਼ਬਰ ਹਰ ਰੋਜ਼ ਪੜ੍ਹਨ ਨੂੰ ਮਿਲਦੀ ਹੈ, ਉਹ ਹੈ ਕਰਜ਼ਈ ਕਿਸਾਨਾਂ ਵੱਲੋਂ ਕੀਤੀਆਂ ਜਾ ਰਹੀਆਂ ਖ਼ੁਦਕੁਸ਼ੀਆਂ ਦੀ ਖ਼ਬਰ। ਮਨ ਵਲੂੰਧਰਿਆ ਜਾਂਦਾ ਹੈ ਅਜਿਹੀਆਂ ਖ਼ਬਰਾਂ ਪੜ੍ਹ ਕੇ। ਦੇਸ਼ ਦਾ ਅੰਨਦਾਤਾ ਅੱਜ ਕਿਹੋ ਜਿਹੇ ਮਾੜੇ ਹਾਲਾਤ ਵਿਚੋਂ ਗੁਜ਼ਰ ਰਿਹਾ ਹੈ। ਇਸ ਕਰਜ਼ੇ ਦੇ ਬੋਝ ਨੇ ਹੋਰ ਕਿੰਨੇ ਘਰ ਤਬਾਹ ਕਰਨੇ ਹਨ? ਇਹ ਕਰਜ਼ੇ ਦਾ ਦੈਂਤ ਪੰਜਾਬ ਦੀ ਕਿਰਸਾਨੀ ਨੂੰ ਨਿਗਲਦਾ ਜਾ ਰਿਹਾ ਹੈ ਪਰ ਸਾਡੀਆਂ ਸਰਕਾਰਾਂ ਅਜੇ ਵੀ ਕੁੰਭਕਰਨੀ ਨੀਂਦ ਹੀ ਸੁੱਤੀਆਂ ਹੋਈਆਂ ਹਨ। ਆਖਰ ਹੋਰ ਕਿੰਨੇ ਮਾਪਿਆਂ ਤੋਂ ਉਨ੍ਹਾਂ ਦੇ ਬੁਢਾਪੇ ਦਾ ਸਹਾਰਾ, ਕਿੰਨੀਆਂ ਸੁਹਾਗਣਾਂ ਤੇ ਕਿੰਨੇ ਹੋਰ ਮਾਸੂਮ ਬੱਚਿਆਂ ਦੇ ਸਿਰ ਤੋਂ ਉਨ੍ਹਾਂ ਦੇ ਪਿਤਾ ਦਾ ਸਾਇਆ ਖੋਹਣਾ ਹੈ ਇਸ ਨੇ। ਅੱਜ ਲੋੜ ਹੈ ਸਾਡੀਆਂ ਸਰਕਾਰਾਂ ਤੇ ਸਮਾਜਿਕ ਜਥੇਬੰਦੀਆਂ ਨੂੰ ਇਨ੍ਹਾਂ ਗਰੀਬ ਕਿਸਾਨਾਂ ਦੀ ਬਾਂਹ ਫੜਨ ਦੀ ਤਾਂ ਜੋ ਉਨ੍ਹਾਂ ਨੂੰ ਕਰਜ਼ੇ ਦੇ ਇਸ ਮੱਕੜਜਾਲ ਵਿਚੋਂ ਕੱਢਿਆ ਜਾ ਸਕੇ।


-ਜਸਪ੍ਰੀਤ ਕੌਰ 'ਸੰਘਾ'
ਪਿੰਡ ਤਨੂੰਲੀ, ਜ਼ਿਲ੍ਹਾ ਹੁਸ਼ਿਆਰਪੁਰ।

 

24-05-2016

ਖੂਬਸੂਰਤ ਕਨੇਰਾਂ ਨਾ ਉਜਾੜੋ

ਸ਼ਾਇਦ ਇਹ ਮਨੁੱਖ ਦੀ ਫ਼ਿਤਰਤ ਹੀ ਬਣਦੀ ਜਾ ਰਹੀ ਹੈ ਕਿ ਉਹ ਆਪਣਾ ਕੰਮ ਆਸਾਨ ਕਰਨ ਲਈ ਆਪਣੀ ਡਿਊਟੀ ਤੇ ਲੋਕਾਂ ਪ੍ਰਤੀ ਬਣਦੀ ਆਪਣੀ ਜ਼ਿੰਮੇਵਾਰੀ ਨੂੰ ਭੁੱਲ ਜਾਂਦਾ ਹੈ। ਚਾਹੇ ਵਾਤਾਵਰਨ ਨੂੰ ਦੂਸ਼ਿਤ ਕਰਨ ਦਾ ਮਸਲਾ ਹੀ ਕਿਉਂ ਨਾ ਹੋਵੇ। ਨੈਸ਼ਨਲ ਹਾਈਵੇਅ ਉੱਪਰ ਬਣੇ ਡੀਵਾਈਡਰਾਂ ਉੱਪਰ ਲੱਗੇ ਕਨੇਰ ਦੇ ਰੰਗ-ਬਰੰਗੇ ਫੁੱਲਾਂ ਦੇ ਬੂਟੇ ਸ਼ਾਇਦ ਅੱਜ ਅਜਿਹੀ ਸੋਚ ਦਾ ਹੀ ਸ਼ਿਕਾਰ ਹੋ ਗਏ ਹਨ। ਉਂਜ ਤਾਂ ਪੰਜਾਬ ਵਿਚ ਹਰ 70-80 ਕਿਲੋਮੀਟਰ ਦੀ ਵਿੱਥ ਉੱਪਰ ਲੱਗੇ ਟੋਲ ਪਲਾਜ਼ੇ ਲੋਕਾਂ ਤੋਂ ਜਜੀਆਂ ਟੈਕਸ ਵਸੂਲ ਰਹੇ ਹਨ। ਹਾਈਵੇਅ ਟਰਾਂਸਪੋਰਟ ਤੋਂ ਟੈਕਸ ਲੈਣ ਵਾਲਿਆਂ ਦੀ ਇਹ ਡਿਊਟੀ ਵੀ ਬਣਦੀ ਹੈ ਕਿ ਹਾਈਵੇਅ ਉੱਪਰ ਲੱਗੇ ਇਨ੍ਹਾਂ ਖੂਬਸੂਰਤ ਪੌਦਿਆਂ ਦੀ ਹਿਫ਼ਾਜ਼ਤ ਵੀ ਕਰਨ ਪ੍ਰੰਤੂ ਪੌਦਿਆਂ ਦੀ ਸਾਫ਼-ਸਫ਼ਾਈ ਕਰਨ ਵਾਲੇ ਕਰਮਚਾਰੀ ਆਪਣਾ ਕੰਮ ਆਸਾਨ ਕਰਨ ਲਈ ਘਾਹ-ਫੂਸ ਨੂੰ ਅੱਗ ਲਗਾ ਦਿੰਦੇ ਹਨ, ਜਿਸ ਨਾਲ ਸਾਰੇ ਹਰੇ-ਭਰੇ ਬੂਟੇ ਝੁਲਸ ਕੇ ਰਹਿ ਗਏ ਹਨ। ਘਾਹ-ਫੂਸ ਤੋਂ ਬਣੀ ਕਾਲੀ ਸਵਾਹ ਚਲਦੇ ਵਾਹਨਾਂ ਨਾਲ ਉੱਡ ਕੇ ਲੋਕਾਂ ਦੇ ਸਿਰਾਂ ਉੱਪਰ ਪੈਂਦੀ ਹੈ। ਸ਼ਹਿਰ ਨੂੰ ਜਾਣ ਵਾਲਾ ਹਰ ਸ਼ਖ਼ਸ ਹੀ ਇਸ ਨਾਲ ਪ੍ਰੇਸ਼ਾਨ ਹੁੰਦਾ ਹੈ। ਸ਼ਰੇਆਮ ਨੈਸ਼ਨਲ ਹਾਈਵੇਅ ਉੱਪਰ ਅੱਗਾਂ ਲਾਉਣ ਵਾਲੇ ਇਹ ਲੋਕ ਸਰਕਾਰ ਨੂੰ ਨਜ਼ਰ ਕਿਉਂ ਨਹੀਂ ਆਉਂਦੇ।

-ਕੇ.ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀ ਖਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

ਪ੍ਰਦੂਸ਼ਣ ਦਾ ਦੈਂਤ

ਵਿਸ਼ਵ ਸਿਹਤ ਸੰਗਠਨ ਵੱਲੋਂ ਦਰਸਾਏ ਗਏ ਅੰਕੜਿਆਂ ਮੁਤਾਬਿਕ ਦੁਨੀਆ ਦੇ 20 ਵੱਡੇ ਪ੍ਰਦੂਸ਼ਿਤ ਸ਼ਹਿਰਾਂ ਵਿਚ ਭਾਰਤ ਦੇ ਵੀ 10-11 ਸ਼ਹਿਰ ਅਤੇ ਪੰਜਾਬ ਦੇ 4 ਸ਼ਹਿਰ ਸ਼ਾਮਿਲ ਹਨ। ਸਾਨੂੰ ਪ੍ਰਦੂਸ਼ਣ ਰੋਕਣ ਅਤੇ ਘੱਟ ਕਰਨ ਦੇ ਤਰੀਕਿਆਂ 'ਤੇ ਡੂੰਘਾਈ ਨਾਲ ਸੋਚ-ਵਿਚਾਰ ਕਰਨੀ ਪਵੇਗੀ। ਵਧ ਰਹੀਆਂ ਫੈਕਟਰੀਆਂ ਅਤੇ ਉਨ੍ਹਾਂ ਦਾ ਧੂੰਆਂ, ਵਧ ਰਹੀਆਂ ਗੱਡੀਆਂ (ਟਰੱਕ, ਬੱਸ, ਕਾਰ, ਸਕੂਟਰ) ਆਦਿ ਅਤੇ ਵਧ ਰਹੀ ਵਸੋਂ ਇਸ ਦਾ ਮੁੱਖ ਕਾਰਨ ਹਨ। ਵੱਡੇ ਸ਼ਹਿਰਾਂ ਵਿਚ ਵਸੋਂ ਦਾ ਵਧਣਾ ਅਤੇ ਮਨੁੱਖੀ ਸੋਮਿਆਂ ਦੀ ਘਾਟ ਮਨੁੱਖਤਾ ਨੂੰ ਪ੍ਰਦੂਸ਼ਣ ਵੱਲ ਧਕੇਲ ਰਹੇ ਹਨ। ਹਵਾ ਅਤੇ ਪਾਣੀ ਦਾ ਪ੍ਰਦੂਸ਼ਤ ਹੋਣਾ ਸਭ ਤੋਂ ਵੱਧ ਖ਼ਤਰਨਾਕ ਹੈ। ਫੈਕਟਰੀਆਂ ਵਿਚ ਵਾਟਰ ਟਰੀਟਮੈਂਟ ਪਲਾਂਟ ਅਤੇ ਧੂੰਆਂ ਰਹਿਤ ਚਿਮਨੀਆਂ ਲਗਾਉਣ ਦੀ ਲੋੜ ਹੈ। ਚਿੱਟਾ ਧੂੰਆਂ ਛੱਡ ਰਹੀਆਂ ਗੱਡੀਆਂ ਨੂੰ ਕੰਡਮ ਕਰਨ ਦੀ ਲੋੜ ਹੈ। ਮਨੁੱਖੀ ਆਬਾਦੀ ਨੂੰ ਸਫ਼ਾਈ ਵੱਲ ਜਾਣ ਦੀ ਲੋੜ ਹੈ।

-ਡੀ.ਡੀ. ਧਵਨ
1160, ਅਰਬਨ ਅਸਟੇਟ-1, ਜਲੰਧਰ।

ਕੌਮਾਂਤਰੀ ਉਡਾਣਾਂ

ਅਸੀਂ ਚਾਹੁੰਦੇ ਹਾਂ ਕਿ ਅੰਮ੍ਰਿਤਸਰ ਦੇ ਗੁਰੂ ਰਾਮਦਾਸ ਹਵਾਈ ਅੱਡੇ ਤੋਂ ਕੌਮਾਂਤਰੀ ਉਡਾਣਾਂ ਸ਼ੁਰੂ ਕੀਤੀਆਂ ਜਾਣ। ਸਾਰੇ ਪੰਜਾਬੀਆਂ ਨੂੰ ਵਿਦੇਸ਼ ਜਾਣ ਵਾਸਤੇ ਪਹਿਲਾਂ ਦਿੱਲੀ ਹਵਾਈ ਅੱਡੇ 'ਤੇ ਜਾਣਾ ਪੈਂਦਾ ਹੈ। ਅੰਮ੍ਰਿਤਸਰ ਹਵਾਈ ਅੱਡੇ ਤੋਂ ਕੌਮਾਂਤਰੀ ਉਡਾਣਾਂ ਸ਼ੁਰੂ ਕਰਨ ਦੀ ਪੰਜਾਬੀਆਂ ਦੀ ਜਾਇਜ਼ ਮੰਗ ਪੂਰੀ ਕੀਤੀ ਜਾਵੇ।

-ਕਰਮਜੀਤ ਸਿੰਘ ਫਿਲੀਪੀਨਜ਼
ਮਨੀਲਾ।

23-05-2016

ਪੌਲੀਥੀਨ 'ਤੇ ਪਾਬੰਦੀ
ਪੰਜਾਬ ਸਰਕਾਰ ਨੇ ਸੂਬੇ ਵਿਚ ਪੌਲੀਥੀਨ ਦੀ ਵਰਤੋਂ 'ਤੇ ਪਾਬੰਦੀ ਲਾਗੂ ਕਰ ਦਿੱਤੀ ਹੈ। ਇਸ ਦੀ ਲੋੜ ਵੀ ਸੀ ਕਿਉਂਕਿ ਪੌਲੀਥੀਨ ਵਿਚ ਕਈ ਤਰ੍ਹਾਂ ਦੇ ਘਾਤਕ ਤੱਤ ਹੁੰਦੇ ਹਨ, ਜੋ ਇਨ੍ਹਾਂ ਵਿਚ ਪਾਈਆਂ ਜਾਣ ਵਾਲੀਆਂ ਖੁਰਾਕੀ ਵਸਤਾਂ ਵਿਚ ਰਲ ਕੇ ਮਨੁੱਖੀ ਸਿਹਤ 'ਤੇ ਉਲਟ ਪ੍ਰਭਾਵ ਪਾਉਂਦੇ ਹਨ। ਇਸ ਤੋਂ ਇਲਾਵਾ ਪੌਲੀਥੀਨ ਦਾ ਕੂੜਾ ਜਿਥੇ ਵਾਤਾਵਰਨ ਨੂੰ ਪ੍ਰਦੂਸ਼ਿਤ ਕਰਦਾ ਹੈ, ਉਥੇ ਪਸ਼ੂਆਂ ਵੱਲੋਂ ਖਾਧੇ ਜਾਣ ਦੀ ਸੂਰਤ ਵਿਚ ਇਹ ਉਨ੍ਹਾਂ ਦੀ ਮੌਤ ਦਾ ਕਾਰਨ ਵੀ ਬਣਦਾ ਹੈ। ਪੌਲੀਥੀਨ ਦਾ ਕੂੜਾ ਸੈਂਕੜੇ ਵਰ੍ਹਿਆਂ ਤੱਕ ਖਤਮ ਨਹੀਂ ਹੁੰਦਾ ਅਤੇ ਨਾ ਹੀ ਨਸ਼ਟ ਹੁੰਦਾ ਹੈ। ਸ਼ਹਿਰਾਂ ਵਿਚ ਇਹ ਸੀਵਰੇਜ ਪ੍ਰਣਾਲੀ ਲਈ ਵੀ ਵੱਡੀ ਸਮੱਸਿਆ ਖੜ੍ਹੀ ਕਰਦਾ ਹੈ। ਇਸ ਤਰ੍ਹਾਂ ਪੌਲੀਥੀਨ ਇਸ ਧਰਤੀ 'ਤੇ ਵਾਤਾਵਰਨ ਅਤੇ ਮਨੁੱਖ ਦੋਵਾਂ ਲਈ ਹੀ ਇਕ ਵੱਡਾ ਖਤਰਾ ਹੈ।

-ਰਾਜਵੰਤ ਸਿੰਘ ਰਾਜੂ
ਗੁਰੂ ਨਾਨਕ ਆਟੋ ਸਪੇਅਰਜ਼, ਰਾਏਕੋਟ।

ਕੀ ਸਜ਼ਾ ਹੋਵੇਗੀ?
ਅੱਜਕਲ੍ਹ ਅਗਸਤਾ ਵੈਸਟਲੈਂਡ ਹੈਲੀਕਾਪਟਰ ਘਪਲੇ ਬਾਰੇ ਚਰਚਾ ਜ਼ੋਰਾਂ 'ਤੇ ਹੈ। ਐਚ.ਡੀ. ਡਬਲਿਊ. ਪਣਡੁੱਬੀ ਤੇ ਬੋਫੋਰਜ਼ ਤੋਪਾਂ ਦੇ ਸੌਦੇ ਤੋਂ ਬਾਅਦ ਘੁਟਾਲੇ ਪੂਰੀ ਤਰ੍ਹਾਂ ਲੋਕਾਂ ਦੇ ਧਿਆਨ ਵਿਚ ਆਉਣੇ ਸ਼ੁਰੂ ਹੋਏ ਸਨ ਪ੍ਰੰਤੂ ਕੋਈ ਕਾਰਵਾਈ ਸਿਰੇ ਨਹੀਂ ਚੜ੍ਹੀ। ਫਿਰ ਤਾਂ ਜਿਵੇਂ ਰਿਵਾਜ ਹੀ ਪੈ ਗਿਆ। ਠੱਗੀ, ਦਲਾਲੀ, ਸ਼ੇਅਰ ਘਪਲਾ, ਖੰਡ ਅਤੇ ਯੂਰੀਆ ਖਾਦ ਅਖ਼ਬਾਰਾਂ ਦੀਆਂ ਸੁਰਖੀਆਂ ਬਣੇ ਪਰ ਠੁੱਸ ਹੋ ਗਏ। ਬਿਹਾਰ ਵਿਚ ਪਸ਼ੂਆਂ ਦਾ ਚਾਰਾ ਫੰਡ ਹੜੱਪ ਕੀਤਾ ਗਿਆ। ਕਾਮਨਵੈਲਥ ਖੇਡਾਂ ਵਿਚ ਗਰੀਬ ਲੋਕਾਂ ਦਾ ਪੈਸਾ ਪਾਣੀ ਵਾਂਗ ਵਹਾਇਆ ਗਿਆ। ਦਿੱਲੀ ਤੇ ਕੇਂਦਰ ਸਰਕਾਰ ਨੇ ਚੁੱਪ ਧਾਰ ਲਈ। 2-ਜੀ ਘੁਟਾਲਾ, ਆਦਰਸ਼ ਹਾਊਸਿੰਗ ਖੱਟੇ ਵਿਚ ਪਾ ਦਿੱਤੇ ਗਏ। ਕੋਲਾ ਦਲਾਲੀ ਦਾ ਕੋਲਾ ਮੰਤਰੀ ਨੂੰ ਪਤਾ ਹੀ ਨਹੀਂ ਲੱਗਿਆ।
ਅਸਚਰਜਤਾ ਇਹ ਹੈ ਕਿ ਹੁਣ ਤੱਕ ਅਪਰਾਧੀ ਹੈ ਹੀ ਕੋਈ ਨਹੀਂ। ਕੋਈ ਮੁਜਰਮ ਹੋਵੇ ਤਾਂ ਹੀ ਮਜ਼ਾ ਮਿਲੇ। ਹੁਣ ਦੇਸ਼-ਵਿਦੇਸ਼ ਵਿਚ ਬੈਠੇ ਲੋਕਾਂ ਦੀ ਨਜ਼ਰ ਹੈਲੀਕਾਪਟਰ ਘੋਟਾਲੇ ਦੇ ਫ਼ੈਸਲੇ 'ਤੇ ਲੱਗੀ ਹੋਈ ਹੈ।

-ਮਾ: ਮਹਿੰਦਰ ਸਿੰਘ ਸਿੱਧੂ
ਸਿੱਧਵਾਂ ਕਲਾਂ, ਜ਼ਿਲ੍ਹਾ ਹੁਸ਼ਿਆਰਪੁਰ।
ਮੋਬਾਈਲ : 98720-86101.

19-05-2016

 ਸਿਆਸੀ ਲੀਡਰਾਂ ਦੀ ਡੱਡੂ ਟਪੂਸੀ
ਦੇਸ਼ ਦਾ ਢਾਂਚਾ ਸਹੀ ਤਰੀਕੇ ਨਾਲ ਚਲਾਉਣ ਲਈ ਬਹੁਤ ਹੀ ਸੂਝ-ਬੂਝ ਵਾਲੇ ਨੇਕ ਇਨਸਾਨਾਂ ਦੀ ਜ਼ਰੂਰਤ ਹੁੰਦੀ ਹੈ। ਸੂਝ-ਬੂਝ ਰੱਖਣ ਵਾਲੇ ਲੋਕ ਦੇਸ਼ ਨੂੰ ਸਹੀ ਦਿਸ਼ਾ ਵੱਲ ਲਿਜਾਣ ਦੀ ਕੋਸ਼ਿਸ਼ ਕਰਿਆ ਕਰਦੇ ਹਨ। ਪ੍ਰੰਤੂ ਕੁਰਸੀ ਦੀ ਦੌੜ ਨੇ ਇਹ ਤਾਣਾ-ਬਾਣਾ ਕੁਝ ਹੋਰ ਹੀ ਬਣਾ ਕੇ ਰੱਖ ਦਿੱਤਾ ਹੈ। ਜਿਹੜੀ ਰਾਜਨੀਤਕ ਪਾਰਟੀ ਦਾ ਲੋਕਾਂ ਵਿਚ ਜ਼ੋਰ ਜ਼ਿਆਦਾ ਨਜ਼ਰ ਆਉਂਦਾ ਹੈ, ਕੁਰਸੀ ਦੇ ਚਾਹਵਾਨ ਰਾਜਸੀ ਲੀਡਰ ਆਪਣੀ ਪਾਰਟੀ ਨੂੰ ਅਲਵਿਦਾ ਕਹਿ ਕੇ ਜ਼ਿਆਦਾ ਪ੍ਰਭਾਵ ਵਾਲੀ ਪਾਰਟੀ ਵਿਚ ਡੱਡੂ ਟਪੂਸੀ ਲਗਾ ਜਾਂਦੇ ਹਨ। ਸੋ, ਸਿਆਸੀ ਲੀਡਰਾਂ ਨੂੰ ਰਾਜਸੀ ਕੁਰਸੀ ਦੀ ਖਾਤਰ ਡੱਡੂ ਟਪੂਸੀਆਂ ਨਹੀਂ ਲਾਉਣੀਆਂ ਚਾਹੀਦੀਆਂ, ਸਗੋਂ ਆਪਣੀ ਹੀ ਸੋਚ ਮੁਤਾਬਿਕ ਸੱਚੇ ਦਿਲ ਨਾਲ ਆਮ ਲੋਕਾਂ ਦੀ ਸੇਵਾ ਕਰਨੀ ਚਾਹੀਦੀ ਹੈ।


-ਕੇਵਲ ਸਿੰਘ ਬਾਠਾਂ
ਮੋ: 98557-44211.


ਮਾਰੂ ਸਿੱਟਿਆਂ ਤੋਂ ਬਚੋ
ਅੱਜ ਹਰੇਕ ਦੇਸ਼ ਆਪਣੀ ਪ੍ਰਮਾਣੂ ਸ਼ਕਤੀ ਰਾਹੀਂ ਦੂਸਰੇ ਦੇਸ਼ਾਂ 'ਤੇ ਦਬਾਅ ਬਣਾਉਣ ਲਈ ਲੱਗੀ ਦੌੜ ਵਿਚ ਲੱਗਾ ਹੋਇਆ ਹੈ। ਅੱਜ ਦੁਨੀਆ ਦੇ ਸਾਰੇ ਦੇਸ਼ ਮੰਦਹਾਲੀ ਦੀ ਹਾਲਤ ਵਿਚੋਂ ਗੁਜ਼ਰ ਰਹੇ ਹਨ। ਹਰੇਕ ਦੇਸ਼ ਵਿਚ ਲੋਕਾਂ ਦੀ ਹਾਲਤ ਤਰਸਯੋਗ ਹੈ। ਕੋਈ ਵੀ ਰੁਜ਼ਗਾਰ ਦੇ ਮੌਕੇ ਘੱਟ ਤੇ ਆਪਣੇ-ਆਪਣੇ ਬਾਹੂਬਲ ਨੂੰ ਵੱਡਾ ਦਰਸਾਉਣ ਵਿਚ ਲੱਗਾ ਹੋਇਆ ਹੈ। ਦੂਸਰਿਆਂ ਦੇ ਘਰਾਂ 'ਤੇ ਪੱਥਰ ਮਾਰਨ ਵਾਲੇ ਆਪ ਕਦੇ ਵੀ ਮਹਿਫ਼ੂਜ਼ ਨਹੀਂ ਰਹਿ ਸਕਦੇ। ਦੂਸਰੇ ਦੇ ਚੁੱਲ੍ਹਿਆਂ ਵਿਚ ਫੂਕਾਂ ਮਾਰਨ ਵਾਲਿਆਂ ਦੇ ਘਰ ਕਦੇ ਵੀ ਦੀਵੇ ਨਹੀਂ ਜਗਦੇ। ਇਸ ਲੱਗੀ ਹੋੜ ਤੋਂ ਹਰੇਕ ਦੇਸ਼ ਨੂੰ ਪਿੱਛੇ ਹਟ ਕੇ ਰੁਜ਼ਗਾਰ ਦੇ ਮੌਕੇ ਆਪਣੀ ਜਨਤਾ ਨੂੰ ਦੇਣੇ ਚਾਹੀਦੇ ਹਨ। ਇਸ ਵਿਚ ਹੀ ਸਰਬੱਤ ਦਾ ਭਲਾ ਹੈ।


-ਮਨਜੀਤ ਸਿੰਘ ਭਾਮ
ਹੁਸ਼ਿਆਰਪੁਰ।


ਚੋਣਾਂ ਦੀ ਤਿਆਰੀ
ਪੰਜਾਬ ਵਿਚ ਚੋਣਾਂ ਦਾ ਸਮਾਂ ਨੇੜੇ ਆ ਚੁੱਕਾ ਹੈ। ਹਰ ਪਾਰਟੀ ਦੇ ਵਰਕਰ ਪੱਬਾਂ ਭਾਰ ਹੋ ਚੁੱਕੇ ਹਨ। ਚੋਣਾਂ ਵਿਚ ਜਿੱਤ ਪ੍ਰਾਪਤ ਕਰਨ ਲਈ ਵੱਖ-ਵੱਖ ਪਾਰਟੀਆਂ ਵੱਲੋਂ ਆਪੋ-ਆਪਣਾ ਪ੍ਰਦਰਸ਼ਨ ਕਰਨਾ ਆਰੰਭ ਕਰ ਦਿੱਤਾ ਗਿਆ ਹੈ। ਹੁਣ ਤੋਂ ਹੀ ਪੰਜਾਬ ਦੇ ਨੌਜਵਾਨਾਂ ਨੂੰ ਆਪਣੀ ਪਾਰਟੀ ਦੇ ਹੱਕ 'ਚ ਤੋਰਨ ਲਈ ਹਰ ਪਾਰਟੀ ਦੇ ਵਰਕਰ ਦਾ ਪੂਰਾ ਜ਼ੋਰ ਲੱਗਣਾ ਸ਼ੁਰੂ ਹੋ ਚੁੱਕਾ ਹੈ। ਪਰ ਨੌਜਵਾਨਾਂ ਨੂੰ ਸੁਚੇਤ ਹੋਣ ਦੀ ਲੋੜ ਹੈ ਕਿ ਅਸੀਂ ਕਿਸ ਪਾਰਟੀ ਨਾਲ ਤੁਰਨਾ ਹੈ, ਉਸ ਪਾਰਟੀ ਨਾਲ ਜੋ ਸਾਨੂੰ ਨਸ਼ਿਆਂ ਦਾ ਲਾਲਚ ਦੇ ਕੇ ਸਾਡੀਆਂ ਵੋਟਾਂ ਬਟੋਰ ਕੇ ਪੰਜਾਬ ਨੂੰ ਬਰਬਾਦੀ ਵੱਲ ਲਿਜਾਣਾ ਚਾਹੁੰਦੀ ਹੈ ਜਾਂ ਫਿਰ ਉਸ ਪਾਰਟੀ ਨਾਲ ਜੋ ਪੰਜਾਬ ਦੀ ਚੜ੍ਹਦੀ ਕਲਾ ਲਈ ਸਦਾ ਕੰਮ ਕਰਨਾ ਚਾਹੁੰਦੀ ਹੈ। ਅਖ਼ਬਾਰਾਂ ਵਿਚ ਆਪਣੇ ਲੇਖ ਪ੍ਰਕਾਸ਼ਿਤ ਕਰਵਾਉਣ ਵਾਲੇ ਲੇਖਕ ਸੱਜਣ ਵੀ ਨੌਜਵਾਨਾਂ ਲਈ ਵੋਟਾਂ ਪ੍ਰਤੀ ਜਾਣਕਾਰੀ ਭਰਪੂਰ ਲੇਖ ਲਿਖਣ ਕਿਉਂਕਿ ਅਖ਼ਬਾਰ ਨੌਜਵਾਨਾਂ ਲਈ ਸੋਨੇ 'ਤੇ ਸੁਹਾਗਾ ਵਾਲੀ ਕਹਾਵਤ 'ਤੇ ਪੂਰੇ ਉਤਰਦੇ ਹਨ।


-ਸੁਖਵਿੰਦਰ ਕਲੇਰ ਬੱਸੀਆਂ
ਪਿੰਡ ਤੇ ਡਾਕ: ਬੱਸੀਆਂ, ਜ਼ਿਲ੍ਹਾ ਲੁਧਿਆਣਾ।

16-5-2016

 ਜਲ ਸੰਕਟ
ਸਾਡੇ ਦੇਸ਼ 'ਚ ਦਿਨੋ-ਦਿਨ ਜਲ ਸੰਕਟ ਬੜੀ ਤੇਜ਼ੀ ਨਾਲ ਵਧ ਰਿਹਾ ਹੈ। ਜੋ ਸਾਡੇ ਤੇ ਸਾਡੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਚਿੰਤਾ ਦਾ ਵਿਸ਼ਾ ਬਣ ਗਿਆ ਹੈ। ਕੇਂਦਰੀ ਭੂ-ਜਲ ਬੋਰਡ ਨੇ ਆਪਣੇ ਅੰਕੜਿਆਂ 'ਚ ਸਰਵੇ ਦੀ ਰਿਪੋਰਟ 'ਚ ਖੁਲਾਸਾ ਕੀਤਾ ਹੈ, ਕਿ 2001 'ਚ 1951 ਦੇ ਮੁਕਾਬਲੇ ਧਰਤੀ 'ਚ ਅੱਧਾ ਪਾਣੀ ਰਹਿ ਗਿਆ ਹੈ ਤੇ 2050 ਤੱਕ ਜਾਣੀ 34 ਕੁ ਸਾਲਾਂ 'ਚ ਪਾਣੀ ਦੀ ਉਪਲਬੱਧਤਾ ਘਟ ਕੇ 25 ਫ਼ੀਸਦੀ ਹੀ ਰਹਿ ਜਾਵੇਗੀ। ਇਸ ਸੰਕਟ ਨਾਲ ਨਜਿੱਠਣ ਲਈ ਸਮੁੱਚੇ ਦੇਸ਼ ਵਾਸੀਆਂ ਨੂੰ ਪਾਣੀ ਦੀ ਹੋ ਰਹੀ ਦੁਰਵਰਤੋਂ ਨੂੰ ਰੋਕਣਾ ਪਵੇਗਾ ਅਤੇ ਕੁਦਰਤ ਦੇ ਇਸ ਅਨਮੋਲ ਖਜ਼ਾਨੇ ਨੂੰ ਬਚਾਉਣ ਲਈ ਵੱਧ ਤੋਂ ਵੱਧ ਉਪਰਾਲੇ ਕਰਨੇ ਪੈਣਗੇ। ਨਹੀਂ ਤਾਂ ਸਾਡਾ ਸੋਹਣਾ ਹਰਿਆ-ਭਰਿਆ ਦੇਸ਼ ਸੋਕੇ ਦਾ ਸ਼ਿਕਾਰ ਹੋ ਜਾਵੇਗਾ। ਕਿਸਾਨ ਵੀਰਾਂ ਨੂੰ ਵੀ ਹੱਥ ਜੋੜ ਕੇ ਬੇਨਤੀ ਹੈ ਕਿ ਝੋਨੇ ਦੀ ਖੇਤੀ ਦਾ ਖਹਿੜਾ ਛੱਡ ਕੇ ਖੇਤੀ ਵਿਭਿੰਨਤਾ ਨੂੰ ਤਰਜੀਹ ਦਿੱਤੀ ਜਾਵੇ।


-ਤਰਸੇਮ ਮਹਿਤੋ
ਪਿੰਡ ਬਈਏਵਾਲ (ਸੰਗਰੂਰ)।
ਮੋਬਾਈਲ : 95019-36536.


ਨਿੱਜੀ ਸਕੂਲਾਂ ਦੀ ਫੀਸ

ਅੱਜ ਪੰਜਾਬ ਵਿਦਿਆ ਦੇ ਨਾਂਅ 'ਤੇ ਬਹੁਤੇ ਨਿੱਜੀ ਸਕੂਲਾਂ ਵੱਲੋਂ ਵਿਦਿਆਰਥੀਆਂ ਦੇ ਮਾਪਿਆਂ ਕੋਲੋਂ ਵੱਡੀਆਂ ਫੀਸਾਂ ਤੇ ਸਾਲਾਨਾ ਫੰਡ ਜਬਰੀ ਵਸੂਲਣ ਦੀਆਂ ਖ਼ਬਰਾਂ ਪੜ੍ਹਨ ਨੂੰ ਮਿਲ ਰਹੀਆਂ ਹਨ ਜੋ ਸਿੱਖਿਆ ਨਿਯਮਾਂ ਦੀ ਉਲੰਘਣਾ ਤੋਂ ਘੱਟ ਨਹੀਂ ਹੈ। ਨਿੱਜੀ ਸਕੂਲਾਂ ਦੀਆਂ ਮਨਮਾਨੀਆਂ ਇਸ ਕਦਰ ਵਧ ਗਈਆਂ ਹਨ ਕਿ ਉਹ ਨਿੱਜੀ ਪ੍ਰਕਾਸ਼ਕਾਂ ਕੋਲੋਂ ਪੁਸਤਕਾਂ 'ਤੇ ਮਰਜ਼ੀ ਦੇ ਰੇਟ, ਬੱਸਾਂ ਦੇ ਵਾਧੂ ਕਿਰਾਏ, ਵਿਦਿਅਕ ਟੂਰ ਦੇ ਨਾਂਅ 'ਤੇ ਵਾਧੂ ਫੀਸਾਂ, ਮਰਜ਼ੀ ਦੀਆਂ ਟਿਊਸ਼ਨ ਫੀਸਾਂ, ਵਾਧੂ ਕਲਾਸ ਫੀਸਾਂ, ਬੱਚਿਆਂ ਤੋਂ ਹੋਈ ਛੋਟੀ ਗ਼ਲਤੀ ਦੇ ਨਾਂਅ 'ਤੇ ਵੱਡੇ ਜੁਰਮਾਨੇ ਵਸੂਲਣੇ ਅਤੇ ਇਨ੍ਹਾਂ ਨਿੱਜੀ ਸਕੂਲਾਂ 'ਚ ਪੰਜਾਬੀ ਵਿਚ ਗੱਲ ਕਰਨ 'ਤੇ ਵੀ ਬੱਚੇ ਨੂੰ ਜਿਥੇ ਸਰੀਰਕ ਕਸਟ ਦਿੱਤੇ ਜਾਂਦੇ ਹਨ ਉਥੇ ਜੁਰਮਾਨੇ ਦੇ ਨਾਂਅ 'ਤੇ ਵੱਡੀਆਂ ਰਕਮਾਂ ਵੀ ਬਟੋਰ ਲਈਆਂ ਜਾਂਦੀਆਂ ਹਨ। ਇਹ ਸਾਰਾ ਵਰਤਾਰਾ ਸਿੱਖਿਆ ਨਿਯਮਾਂ ਦੀ ਘੋਰ ਉਲੰਘਣਾ ਨਹੀਂ ਹੈ ਤਾਂ ਹੋਰ ਕੀ ਹੈ?
ਹਰ ਸਾਲ ਬੱਚਿਆਂ ਦੇ ਦਾਖਲੇ ਨਿੱਜੀ ਸਕੂਲਾਂ 'ਚ ਵੱਡੀ ਗਿਣਤੀ 'ਚ ਹੋਣਾ ਹੀ ਨਿੱਜੀ ਸਕੂਲਾਂ ਨੂੰ ਮਨਮਾਨੀਆਂ ਕਰਨ ਲਈ ਉਕਸਾਉਂਦਾ ਹੈ। ਅਸੀਂ ਪੰਜਾਬ ਸਰਕਾਰ ਨੂੰ ਬੇਨਤੀ ਕਰਦੇ ਹਾਂ ਕਿ ਸਰਕਾਰੀ ਸਕੂਲਾਂ ਦੀ ਹਾਲਤ ਸੁਧਾਰੇ ਤੇ ਖਾਲੀ ਅਸਾਮੀਆਂ ਤੁਰੰਤ ਭਰੇ। ਅਜਿਹਾ ਕਰਕੇ ਜਿਥੇ ਸਰਕਾਰੀ ਸਕੂਲਾਂ 'ਚ ਬੱਚਿਆਂ ਦੀ ਗਿਣਤੀ ਵਧਾਈ ਜਾ ਸਕਦੀ ਹੈ, ਉਥੇ ਨਿੱਜੀ ਸਕੂਲਾਂ ਦੀਆਂ ਆਪ-ਹੁਦਰੀਆਂ ਨੂੰ ਵੀ ਰੋਕਿਆ ਜਾ ਸਕਦਾ ਹੈ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਜ਼ਿਲ੍ਹਾ ਲੁਧਿਆਣਾ।

04-5-2016

 ਕੋਹਿਨੂਰ ਹੀਰਾ

ਐਤਵਾਰ ਦੇ 'ਅਜੀਤ' ਵਿਚ ਕੋਹਿਨੂਰ ਨੂੰ ਮੁੱਖ ਰੱਖ ਕੇ ਲਿਖੇ ਦੋ ਲੇਖ ਪੜ੍ਹਨ ਨੂੰ ਮਿਲੇ। ਇਹ ਹੀਰਾ ਮਹਾਰਾਜਾ ਰਣਜੀਤ ਸਿੰਘ ਨੂੰ ਸ਼ਾਹ ਸੁਜਾਹ ਨੇ ਆਪਣੀ ਜਾਨ ਦੀ ਹਿਫ਼ਾਜ਼ਤ ਬਦਲੇ ਭੇਟ ਕੀਤਾ ਸੀ। ਇਸ ਗੱਲ ਦੀ ਪ੍ਰੋੜ੍ਹਤਾ ਇਤਿਹਾਸ ਦੇ ਵਰਕੇ ਕਰਦੇ ਹਨ। ਅਗਰ ਇਹ ਹੀਰਾ ਮਹਾਰਾਜਾ ਦਲੀਪ ਸਿੰਘ ਨੇ ਅੰਗਰੇਜ਼ਾਂ ਨੂੰ ਤੋਹਫ਼ੇ ਵਜੋਂ ਦਿੱਤਾ ਹੁੰਦਾ ਤਾਂ ਉਨ੍ਹਾਂ ਅੰਗਰੇਜ਼ਾਂ ਦਾ ਨਾਂਅ ਵੀ ਕਿਤੇ ਨਾ ਕਿਤੇ ਲਿਖਿਆ ਮਿਲ ਹੀ ਜਾਂਦਾ ਪਰ ਅੱਜ ਤੱਕ ਅਜਿਹੀ ਕੋਈ ਲਿਖਤ ਸਾਹਮਣੇ ਨਹੀਂ ਆਈ। ਜੇ ਮਹਾਰਾਜਾ ਦਲੀਪ ਸਿੰਘ ਨੇ ਹੀਰਾ ਤੋਹਫ਼ੇ ਵਜੋਂ ਦਿੱਤਾ ਹੁੰਦਾ ਤਾਂ ਉਸ ਉੱਤੇ ਏਨੀਆਂ ਪਾਬੰਦੀਆਂ ਨਾ ਲਗਦੀਆਂ। ਅੰਗਰੇਜ਼ਾਂ ਨੇ ਕੋਹਿਨੂਰ ਲੁੱਟਿਆ। ਕਿਸੇ ਬੱਚੇ ਦੁਆਲੇ ਝੁਰਮੁਟ ਪਾ ਕੇ ਉਸ ਨੂੰ ਵਰਗਲਾ ਕੇ ਕੋਈ ਚੀਜ਼ ਲੈ ਲੈਣੀ ਤੋਹਫ਼ਾ ਨਹੀਂ ਹੁੰਦਾ, ਕਮੀਨੀ ਲੁੱਟ ਹੁੰਦੀ ਹੈ। ਉਹ ਗੱਲ ਵੱਖਰੀ ਹੈ ਕਿ ਉਹ ਹੀਰਾ ਕਿਸੇ ਵੀ ਹਾਲਤ ਵਿਚ ਉਹ ਨਹੀਂ ਦੇਣਗੇ। ਕਿਉਂਕਿ ਗੋਰੇ ਉਸ ਹੀਰੇ ਤੋਂ ਅਜੇ ਤੱਕ ਮੋਟੀ ਕਮਾਈ ਕਰ ਰਹੇ ਹਨ। ਜਿਸ ਟਾਵਰ ਆਫ ਲੰਡਨ ਵਿਚ ਉਹ ਤਾਜ ਪਿਆ ਹੈ, ਉਸ ਨੂੰ ਦੇਖਣ ਜਾਣ ਲਈ 25 ਪੌਂਡ ਦਾਖਲਾ ਫ਼ੀਸ ਹੈ। ਉਸ ਤਾਜ ਦੀ ਸ਼ੋਭਾ ਕੋਹਿਨੂਰ ਹੀਰੇ ਕਰਕੇ ਹੀ ਹੈ।

-ਭੁਪਿੰਦਰ ਉਸਤਾਦ।

ਗੁਣਾਂ ਦੀ ਸਾਂਝ ਕਰੋ

ਪੰਜਾਬ ਦੀ ਆਵਾਜ਼ 'ਅਜੀਤ' ਨੇ ਆਪਣੇ ਵਿਸਾਖੀ ਅੰਕ ਵਿਚ ਖ਼ਬਰ ਛਾਪੀ ਹੈ ਕਿ ਕੈਨੇਡੀਅਨ ਸਰਕਾਰ ਨੇ ਸਿੱਖ ਸੰਗਤਾਂ ਨਾਲ ਮਿਲ ਕੇ ਕੈਨੇਡਾ ਦੀ ਪਾਰਲੀਮੈਂਟ ਅੰਦਰ ਵਿਸਾਖੀ ਦਾ ਪੁਰਬ ਬੜੇ ਹਰਸੋ ਹੁਲਾਸ ਨਾਲ ਮਨਾਇਆ ਹੈ। ਪਾਰਲੀਮੈਂਟ ਵਿਚ ਜੁੜੇ ਇਕੱਠ ਨੂੰ ਸੰਬੋਧਨ ਕਰਦਿਆਂ ਪ੍ਰਧਾਨ ਮੰਤਰੀ ਮਿਸਟਰ ਟਰੂਡੋ ਨੇ ਇਕ ਰਹੱਸਮਈ ਖੁਲਾਸਾ ਕਰਦਿਆਂ ਦੱਸਿਆ ਹੈ ਕਿ ਦੇਸ਼ ਵਿਚ ਚੋਣਾਂ ਸਮੇਂ ਦੇਸ਼ ਦੀ ਜਨਤਾ ਉਮੀਦਵਾਰਾਂ ਦੇ ਗੁਣਾਂ ਦੀ ਪਛਾਣ ਕਰਕੇ ਉਨ੍ਹਾਂ ਨੂੰ ਚੁਣਦੀ ਹੈ। ਕੈਨੇਡਾ ਵਿਚ ਧਰਮਾਂ, ਜਾਤਾਂ ਤੇ ਦੇਸ਼ਾਂ ਦਾ ਕੋਈ ਵਿਤਕਰਾ ਨਹੀਂ ਕੀਤਾ ਜਾਂਦਾ ਅਤੇ ਨਾ ਹੀ ਕਿਸੇ ਲਾਲਚ ਜਾਂ ਦਬਾਅ ਹੇਠ ਉਮੀਦਵਾਰ ਚੁਣੇ ਜਾਂਦੇ ਹਨ।
ਇਹੀ ਕਾਰਨ ਹੈ ਕਿ ਚੰਗੇ ਗੁਣਾਂ ਦੇ ਧਾਰਨੀ ਹੋਣ ਕਾਰਨ ਪੰਜਾਬੀ ਮੂਲ ਦੇ 13 ਮੈਂਬਰ ਪਾਰਲੀਮੈਂਟ ਚੁਣੇ ਗਏ ਹਨ। ਜੇਕਰ ਅਜੋਕੇ ਦੌਰ ਵਿਚ ਕੈਨੇਡਾ ਸੰਸਾਰ ਦਾ ਇਕ ਅਤਿ ਵਿਕਸਤ, ਖੁਸ਼ਹਾਲ ਅਤੇ ਭ੍ਰਿਸ਼ਟਾਚਾਰ-ਮੁਕਤ ਦੇਸ਼ ਬਣਿਆ ਹੈ ਤਾਂ ਇਸ ਵਿਚ ਦੇਸ਼ ਦੇ ਚੁਣੇ ਹੋਏ ਗੁਣਵਾਨ ਲੀਡਰਾਂ ਦਾ ਹੀ ਵੱਡਾ ਯੋਗਦਾਨ ਹੈ। ਇਸ ਸਮੇਂ ਕੈਨੇਡਾ ਵਿਚ ਪੰਜ ਲੱਖ ਤੋਂ ਵੱਧ ਪੰਜਾਬੀ ਲੋਕ ਵਸੇ ਹੋਏ ਹਨ। ਆਓ, ਅਸੀਂ ਪੰਜਾਬ ਵਾਸੀ, ਆਪਣੇ ਕੈਨੇਡੀਅਨ ਭਰਾਵਾਂ ਦੀ ਰੀਸ ਕਰਕੇ ਸੰਨ 2017 ਦੀਆਂ ਪੰਜਾਬ ਵਿਧਾਨ ਸਭਾ ਦੀਆਂ ਚੋਣਾਂ ਦੌਰਾਨ ਸਿਰਫ ਚੰਗੇ ਗੁਣਾਂ ਵਾਲੇ ਇਮਾਨਦਾਰ ਉਮੀਦਵਾਰਾਂ ਨੂੰ ਚੁਣ ਕੇ ਪੰਜਾਬ ਵਿਧਾਨ ਸਭਾ ਗਠਿਤ ਕਰੀਏ। ਇਹ ਪੰਜਾਬ ਦੀ ਬੜੀ ਵੱਡੀ ਸੇਵਾ ਹੋਵੇਗੀ।

-ਇੰਜੀ: ਕੁਲਦੀਪ ਸਿੰਘ ਲੁੱਧਰ
4724 ਗੁਰੂ ਨਾਨਕ ਵਾੜਾ, ਅੰਮ੍ਰਿਤਸਰ।

29-4-2016

 ਕੋਹਿਨੂਰ ਹੀਰਾ ਤੇ ਨਾਦਰਸ਼ਾਹ

ਕੋਹਿਨੂਰ ਹੀਰੇ ਬਾਰੇ ਅੱਜਕਲ੍ਹ ਭਾਰਤ ਵਿਚ ਚਰਚਾ ਗਰਮ ਹੈ। ਇਸ ਸਬੰਧ ਵਿਚ ਪਿਛਲੇ ਦਿਨੀਂ ਇਕ ਲੇਖ ਪ੍ਰਸਿੱਧ ਪੱਤਰਕਾਰ ਸ੍ਰੀ ਕੁਲਦੀਪ ਨਈਅਰ ਦਾ 27 ਅਪ੍ਰੈਲ ਦੇ 'ਅਜੀਤ' ਵਿਚ ਛਪਿਆ ਸੀ। ਇਸ ਵਿਚ ਕੋਹਿਨੂਰ ਹੀਰੇ ਦਾ ਜ਼ਿਕਰ ਕਰਦਿਆਂ ਉਨ੍ਹਾਂ ਇਕ ਵੱਡੀ ਗ਼ਲਤ-ਬਿਆਨੀ ਕਰ ਦਿੱਤੀ ਹੈ। ਉਨ੍ਹਾਂ ਨੇ ਲਿਖਿਆ ਹੈ, 'ਸਾਡੇ ਸ਼ਾਸਕਾਂ ਵਿਚੋਂ ਇਕ ਅਹਿਮਦ ਸ਼ਾਹ ਅਬਦਾਲੀ ਨੇ ਨਾਦਰ ਸ਼ਾਹ ਨਾਲ ਜ਼ਬਰਦਸਤੀ ਪਗੜੀ ਵਟਾਈ ਸੀ, ਕਿਉਂਕਿ ਉਸ ਨੂੰ ਪਤਾ ਲੱਗਾ ਸੀ ਕਿ ਨਾਦਰਸ਼ਾਹ ਨੇ ਪਗੜੀ ਵਿਚ ਕੋਹਿਨੂਰ ਲੁਕਾਇਆ ਹੋਇਆ ਹੈ।' ਇਹ ਘਟਨਾ 1739 ਈ: ਦੀ ਹੈ। ਉਸ ਵੇਲੇ ਦਿੱਲੀ ਦਾ ਮੁਗਲ ਬਾਦਸ਼ਾਹ ਮੁਹੰਮਦ ਸ਼ਾਹ ਸੀ। ਉਹ ਮਹਾਂ ਅੱਯਾਸ਼ ਸੀ, ਇਸ ਕਰਕੇ ਉਸ ਨੂੰ 'ਮੁਹੰਮਦ ਸ਼ਾਹ ਰੰਗੀਲਾ' ਆਖਿਆ ਜਾਂਦਾ ਸੀ। ਅਹਿਮਦ ਸ਼ਾਹ ਅਬਦਾਲੀ ਉਦੋਂ ਤੱਕ ਦੇਸ਼-ਵਿਦੇਸ਼ ਵਿਚ ਕਿਤੇ ਵੀ ਪ੍ਰਗਟ ਨਹੀਂ ਹੋਇਆ ਸੀ। ਇਹ ਯਾਦ ਰੱਖਿਆ ਜਾਏ, ਨਾਦਰ ਸ਼ਾਹ ਈਰਾਨੀ ਸੀ। ਅਹਿਮਦ ਸ਼ਾਹ ਅਬਦਾਲੀ ਅਫਗ਼ਾਨ (ਪਠਾਣ) ਸੀ। ਜਦੋਂ ਨਾਦਰ ਸ਼ਾਹ 1747 ਵਿਚ ਕਤਲ ਹੋ ਗਿਆ ਤਾਂ ਅਬਦਾਲੀ ਅਫ਼ਗਾਨਿਸਤਾਨ ਦਾ ਬਾਦਸ਼ਾਹ ਬਣਿਆ ਤੇ ਉਸ ਨੇ ਅਗਲੇ 20 ਸਾਲਾਂ ਵਿਚ (1748 ਤੋਂ 1768 ਤੱਕ) ਭਾਰਤ ਉੱਤੇ ਵੀ ਹਮਲੇ ਕੀਤੇ ਸਨ। 1739 ਈ: ਵਿਚ ਨਾਦਰਸ਼ਾਹ ਨੇ ਆਪਣੇ ਹਮਲੇ ਵਿਚ ਕਰਨਾਲ ਦੀ ਲੜਾਈ ਵਿਚ ਮੁਹੰਮਦ ਸ਼ਾਹ ਰੰਗੀਲੇ ਨੂੰ ਹਰਾਇਆ ਸੀ। ਦਿੱਲੀ ਪਹੁੰਚ ਕੇ ਮੁਹੰਮਦ ਸ਼ਾਹ ਦਾ ਖਜ਼ਾਨਾ ਹਥਿਆ ਲਿਆ ਸੀ। ਮੋਰ ਦੀ ਸ਼ਕਲ ਵਰਗਾ ਸ਼ਾਹੀ ਤਖ਼ਤ (ਤਖ਼ਤੇ ਤਾਊਸ) ਵੀ ਲੈ ਗਿਆ। ਦਿੱਲੀ ਦੇ ਸ਼ਹਿਰੀ ਵੀ ਲੁੱਟੇ। ਉਹ ਕੋਹਿਨੂਰ ਹੀਰਾ ਵੀ ਲੈਣਾ ਚਾਹੁੰਦਾ ਸੀ ਪਰ ਮੁਹੰਮਦ ਸ਼ਾਹ ਨੇ ਇਹ ਹੀਰਾ ਆਪਣੀ ਪਗੜੀ ਵਿਚ ਲੁਕਾਇਆ ਹੋਇਆ ਸੀ। ਕਿਉਂਕਿ ਨਾਦਰ ਸ਼ਾਹ ਨੇ ਮੁਹੰਮਦ ਸ਼ਾਹ ਨੂੰ ਹਰਾਉਣ ਤੋਂ ਬਾਅਦ ਵੀ ਦਿੱਲੀ ਦੀ 'ਗੱਦੀ' ਮੁਹੰਮਦ ਸ਼ਾਹ ਪਾਸ ਹੀ ਰਹਿਣ ਦਿੱਤੀ, ਇਸ ਕਰਕੇ ਨਾਦਰ ਸ਼ਾਹ ਨੇ ਮੁਹੰਮਦ ਸ਼ਾਹ ਨਾਲ ਦੋਸਤੀ ਵਧਾਉਣ ਲਈ ਪਗੜੀਆਂ ਵਟਾ ਲੈਣ ਦੀ ਰਸਮ ਕੀਤੀ। ਆਪਣੀ ਪਗੜੀ ਉਸ ਦੇ ਸਿਰ ਉਤੇ ਰੱਖ ਦਿੱਤੀ ਤੇ ਉਸ ਦੀ ਪਗੜੀ ਆਪਣੇ ਸਿਰ ਉਤੇ ਰੱਖ ਲਈ। ਇੰਜ ਨਾਦਰ ਸ਼ਾਹ ਕੋਹਿਨੂਰ ਹੀਰਾ ਈਰਾਨ ਲੈ ਗਿਆ ਸੀ।

-ਪਿਆਰਾ ਸਿੰਘ ਭੋਗਲ
ਮੋ: 98720-42611

26-04-2016

 ਕਲਾਕਾਰ ਅਤੇ ਸਿਆਸਤ
ਜਿਉਂ-ਜਿਉਂ ਚੋਣਾਂ ਦਾ ਦੌਰ ਨੇੜੇ ਆਉਂਦਾ ਹੈ, ਤਿਉਂ-ਤਿਉਂ ਰਾਜਨੀਤਕ ਆਗੂ ਲੋਕਾਂ ਨੂੰ ਲੁਭਾਉਣ ਦੀਆਂ ਕੋਸ਼ਿਸ਼ਾਂ ਸ਼ੁਰੂ ਕਰ ਦਿੰਦੇ ਹਨ ਤੇ ਫਿਰ ਕੀ ਕਲਾਕਾਰ ਤੇ ਕੀ ਬਾਬੇ? ਹਰ ਪਾਰਟੀ ਦੀ ਇਹ ਪਹਿਲ-ਕਦਮੀ ਹੁੰਦੀ ਹੈ ਕਿ ਲੋਕਾਂ ਦੇ ਚਹੇਤੇ ਨੂੰ ਪਾਰਟੀ ਵਿਚ ਸ਼ਾਮਿਲ ਕੀਤਾ ਜਾਵੇ ਪਰ ਇਹ ਜ਼ਰੂਰੀ ਨਹੀਂ ਕਿ ਇਕ ਖੇਤਰ 'ਚ ਕਾਮਯਾਬ ਬੰਦਾ ਦੂਜੇ ਖੇਤਰ ਵਿਚ ਵੀ ਕਾਮਯਾਬ ਹੋ ਸਕੇ। ਰਾਜਨੀਤਕ ਪਾਰਟੀਆਂ ਦਾ ਕੰਮ ਤਾਂ ਭੀੜ ਇਕੱਠੀ ਕਰਨਾ ਹੁੰਦਾ ਹੈ, ਜਿਸ ਦਾ ਲਾਹਾ ਉਹ ਕਲਾਕਾਰਾਂ ਦੇ ਮਨੋਰੰਜਨ ਤੋਂ ਲੈਦੇ ਹਨ ਪਰ ਕਈ ਇਸ ਦਾਮਤਲਬ ਇਹ ਸਮਝ ਲੈਂਦੇ ਹਨ ਕਿ ਸ਼ਾਇਦ ਉਹ ਭੀੜ ਉਨ੍ਹਾਂ ਦੀ ਹੀ ਬਦੌਲਤ ਹੈ, ਜਿਸ ਕਾਰਨ ਉਹ ਆਪਣੇ ਕਿੱਤੇ ਨੂੰ ਛੱਡ ਰਾਜਸੀ ਲਾਹਾ ਲੈਣ ਬਾਰੇ ਸੋਚਣ ਲੱਗ ਜਾਂਦੇ ਹਨ। ਅੱਜ ਪੰਜਾਬ ਦੀ ਗੱਲ ਕਰੀਏ ਤਾਂ ਕਈ ਨਾਮਵਰ ਗਾਇਕ ਪਾਰਟੀਬਾਜ਼ੀ 'ਚ ਸ਼ਾਮਿਲ ਹੋ ਕੇ ਲੋਕਾਂ ਦੀ ਸੇਵਾ ਕਰਨ ਦੀ ਗੱਲ ਕਰ ਰਹੇ ਹਨ, ਪਰ ਕੀ ਸਾਹਿਤਕ ਗਤੀਵਿਧੀਆਂ, ਨਾਟਕਾਂ ਜਾਂ ਗੀਤ ਸੰਗੀਤ ਦੇ ਨਾਲ ਲੋਕਾਂ ਨੂੰ ਜਾਗਰੂਕ ਨਹੀਂ ਕੀਤਾ ਜਾ ਸਕਦਾ। ਪਰ ਜੇਕਰ ਕਲਾਕਾਰ ਮਨ ਬਣਾ ਕੇ ਸਿਆਸਤ ਵਿਚ ਆ ਹੀ ਜਾਂਦੇ ਹਨ ਤਾਂ ਇਕ ਪਾਰਟੀ ਨਾਲ ਰਹਿ ਕੇ ਆਪਣਾ ਵਜੂਦ ਕਾਇਮ ਰੱਖਣ ਨਾ ਕਿ ਅਹੁਦਿਆਂ ਦੀ ਲਾਲਸਾ ਪਿੱਛੇ ਲੋਕਾਂ ਦੇ ਵਿਚ ਆਪਣੇ ਵਿਸ਼ਵਾਸ ਤੇ ਵਜੂਦ ਨੂੰ ਵੀ ਖਤਮ ਕਰ ਲੈਣ।


-ਪਰਮਜੀਤ ਸਿੰਘ
ਵੀ.ਆਈ.ਪੀ. ਰੋਡ, ਸ੍ਰੀ ਅਨੰਦਪੁਰ ਸਾਹਿਬ।


ਪੰਜਾਬ ਦੀ ਵਿਰਾਸਤ
ਪੰਜਾਬ ਸਰਕਾਰ ਤੇ ਪੁਰਾਤਤਵ ਵਿਭਾਗ ਵੱਲੋਂ ਸਦੀਆਂ ਪੁਰਾਣੀਆਂ ਪੰਜਾਬ ਦੀਆਂ ਇਤਿਹਾਸਕ ਵਿਰਾਸਤਾਂ ਜੋ ਸਾਂਭ-ਸੰਭਾਲ ਖੁਣੋਂ ਖੰਡਰ ਬਣਦੀਆਂ ਜਾ ਰਹੀਆਂ ਹਨ ਜਾਂ ਬਹੁਤੀਆਂ ਖੰਡਰ ਬਣ ਚੁੱਕੀਆਂ ਹਨ, ਵਿਚ ਮੁੜ ਜਾਨ ਪਾਉਣ ਲਈ ਜੋ ਕਾਰਜ ਕੀਤੇ ਜਾ ਰਹੇ ਹਨ, ਉਹ ਬੇਹੱਦ ਸ਼ਲਾਘਾਯੋਗ ਹਨ। ਪੂਰੇ ਪੰਜਾਬ ਵਿਚ ਇਸ ਤਰ੍ਹਾਂ ਦੇ ਅਸਥਾਨਾਂ ਦੀ ਨਿਸ਼ਾਨਦੇਹੀ ਕਰਕੇ ਤੇ ਉਨ੍ਹਾਂ ਨੂੰ ਮੁੜ ਸੁਰਜੀਤ ਕਰਕੇ ਆਉਣ ਵਾਲੀਆਂ ਪੀੜ੍ਹੀਆਂ ਲਈ ਜੋ ਇਤਿਹਾਸ ਸੰਭਾਲਣ ਦਾ ਯਤਨ ਕੀਤਾ ਜਾ ਰਿਹਾ ਹੈ, ਵੱਡੇ ਉੱਦਮ ਤੋਂ ਘੱਟ ਨਹੀਂ ਹੈ। ਇਸ ਮਹਾਨ ਕਾਰਜ ਲਈ ਪੰਜਾਬ ਸਰਕਾਰ ਤੇ ਪੁਰਾਤਤਵ ਵਿਭਾਗ ਵਧਾਈ ਦੇ ਪਾਤਰ ਹਨ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।


ਸੜਕ ਹਾਦਸੇ ਬਨਾਮ ਨਿਯਮ

ਰੋਜ਼ਾਨਾ ਹੀ ਸੜਕ ਹਾਦਸਿਆਂ ਦੌਰਾਨ ਕਈ ਘਰ ਉੱਜੜ ਰਹੇ ਹਨ। ਲੋਕ ਅਪਾਹਜ ਹੋ ਰਹੇ ਹਨ। ਇਨ੍ਹਾਂ ਸੜਕ ਹਾਦਸਿਆਂ ਦੇ ਕਈ ਕਾਰਨ ਹੋ ਸਕਦੇ ਹਨ ਪ੍ਰੰਤੂ ਜੇਕਰ ਅਸੀਂ ਸੜਕ ਨਿਯਮਾਂ ਦੀ ਪੂਰੀ ਤਰ੍ਹਾਂ ਪਾਲਣਾ ਕਰੀਏ ਤਾਂ ਇਨ੍ਹਾਂ ਸੜਕ ਹਾਦਸਿਆਂ ਨੂੰ ਰੋਕਿਆ ਜਾ ਸਕਦਾ ਹੈ। ਸਾਨੂੰ ਇਕ-ਦੂਸਰੇ ਉਪਰ ਇਲਜ਼ਾਮ ਲਾਉਣ ਦੀ ਥਾਂ ਆਪਣੇ-ਆਪ ਨੂੰ ਦਰੁਸਤ ਕਰਨ ਦੀ ਲੋੜ ਹੈ। ਸਾਨੂੰ ਸੜਕ ਹਾਦਸਿਆਂ ਪ੍ਰਤੀ ਸੁਚੇਤ ਹੋਣ ਦੀ ਲੋੜ ਹੈ।


-ਬਿਕਰਮਜੀਤ ਸਿੰਘ ਬੱਲ
ਸਠਿਆਲਾ (ਅੰਮ੍ਰਿਤਸਰ)

 

25-04-2016

ਲੀਡਰਾਂ ਦੀ ਸੇਵਾਮੁਕਤੀ
ਮਸ਼ਹੂਰ ਅਖਾਣ ਹੈ ਕਿ ਇਕ ਤੰਦਰੁਸਤ ਸਰੀਰ ਵਿਚ ਇਕ ਤੰਦਰੁਸਤ ਮਨ ਹੁੰਦਾ ਹੈ। ਤੰਦਰੁਸਤ ਲੋਕ ਹੀ ਸਮਾਜ ਅਤੇ ਦੇਸ਼ ਦਾ ਕੁਝ ਸਵਾਰ ਸਕਦੇ ਹਨ। ਸਰਕਾਰੀ ਕਰਮਚਾਰੀਆਂ ਦੀ ਤੰਦਰੁਸਤੀ ਦਾ ਖਿਆਲ ਰੱਖ ਕੇ ਉਨ੍ਹਾਂ ਨੂੰ 58 ਸਾਲ ਉਮਰ ਪੁਗਣ ਉਤੇ ਸੇਵਾਮੁਕਤ ਕਰ ਦਿੱਤਾ ਜਾਂਦਾ ਹੈ। ਪ੍ਰੰਤੂ ਸਰਕਾਰੀ ਕਰਮਚਾਰੀਆਂ ਵਾਲੀ ਸਰਕਾਰ ਚਲਾਉਣ ਵਾਲੇ ਲੀਡਰਾਂ ਦੀ ਸੇਵਾਮੁਕਤੀ ਦੀ ਕੋਈ ਹੱਦ ਨੀਯਤ ਨਹੀਂ ਹੈ। ਇਸੇ ਲਈ ਉਹ ਅੱਸੀ ਜਾਂ ਨੱਬੇ ਸਾਲਾਂ ਦੀ ਉਮਰ ਵਿਚ ਜਿਊਂਦੇ ਰਹਿਣ ਤੱਕ ਗੱਦੀਆਂ ਦਾ ਤਿਆਗ ਨਹੀਂ ਕਰਦੇ। ਬੁਢਾਪਾ ਵਧਣ ਦੇ ਨਾਲ-ਨਾਲ ਲਾਲਚ ਵੀ ਵਧਦਾ ਜਾਂਦਾ ਹੈ। ਫਿਰ ਉਹ ਖਾਹਸ਼ ਪਾਲ ਬੈਠਦੇ ਹਨ ਕਿ ਉਹ ਆਖਰੀ ਸਾਹ ਲੈਣ ਤੋਂ ਪਹਿਲਾਂ ਆਪਣੇ ਪੁੱਤਰ ਨੂੰ ਪ੍ਰਧਾਨ ਮੰਤਰੀ, ਮੁੱਖ ਮੰਤਰੀ ਜਾਂ ਮੰਤਰੀ ਅਹੁਦਾ ਗ੍ਰਹਿਣ ਕਰਵਾ ਦੇਣ। ਉਹ ਭੁੱਲ ਜਾਂਦੇ ਹਨ ਕਿ ਦੇਸ਼ ਵਿਚ ਲੋਕ ਰਾਜ ਦੇ ਹੁੰਦਿਆਂ, ਮੰਤਰੀ ਦਾ ਪੁੱਤਰ ਮੰਤਰੀ ਬਣਾਉਣ ਨਾਲ ਮੁੜ ਤੋਂ ਰਜਵਾੜਾਸ਼ਾਹੀ ਦਾ ਦੌਰ ਸ਼ੁਰੂ ਹੋ ਸਕਦਾ ਹੈ।
ਸੋ, ਇਨਸਾਫ਼ ਦਾ ਤਕਾਜ਼ਾ ਇਹੀ ਹੈ ਕਿ 65 ਸਾਲਾਂ ਦੀ ਉਮਰ ਪੁੱਗਣ ਉਤੇ ਹਰੇਕ ਲੀਡਰ ਨੂੰ ਸਤਿਕਾਰ ਸਹਿਤ ਸੇਵਾਮੁਕਤ ਕਰਨ ਦਾ ਕਾਨੂੰਨ ਪਾਸ ਕਰ ਦਿੱਤਾ ਜਾਵੇ। ਅਜਿਹਾ ਕਾਨੂੰਨ ਦੇਸ਼ ਵਿਚ ਇਕ ਕੁਸ਼ਲ ਰਾਜ ਪ੍ਰਬੰਧ ਦੀ ਠੋਸ ਨੀਂਹ ਸਾਬਤ ਹੋਵੇਗਾ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
ਗੁਰੂ ਨਾਨਕ ਵਾੜਾ, ਅੰਮ੍ਰਿਤਸਰ।

ਪਹਾੜੇ ਯਾਦ ਕਰਵਾਉਣਾ...
ਸਰਕਾਰੀ ਪ੍ਰਾਇਮਰੀ ਸਕੂਲਾਂ ਵਿਚ ਬੱਚਿਆਂ ਨੂੰ ਪਹਾੜੇ ਯਾਦ ਕਰਨ ਦਾ ਟੀਚਾ ਦਿੱਤਾ ਜਾਂਦਾ ਹੈ। ਜਮਾਤ ਅਨੁਸਾਰ ਬੱਚਿਆਂ ਨੂੰ ਪਹਾੜੇ ਰਟਣ ਲਈ ਕਿਹਾ ਜਾਂਦਾ ਹੈ। ਚੌਥੀ ਅਤੇ ਪੰਜਵੀਂ ਜਮਾਤ ਨੂੰ 20 ਤੱਕ ਪਹਾੜੇ ਰਟਣ ਦਾ ਟੀਚਾ ਹੈ। ਜੇ ਬੱਚਾ ਟੈਸਟਿੰਗ ਦੌਰਾਨ ਤੋਤੇ ਵਾਂਗ ਪਹਾੜੇ ਬੋਲ ਜਾਏ ਤਾਂ ਉਸ ਦਾ ਟੀਚਾ ਪਾਰ ਹੋ ਜਾਂਦਾ ਹੈ, ਤੇ ਕਿਤੇ ਅਟਕ ਜਾਏ ਤਾਂ ਟੀਚਾ ਪਾਰ ਨਹੀਂ ਗਿਣਿਆ ਜਾਂਦਾ। ਇਹ ਹੈ ਸਰਕਾਰੀ ਪ੍ਰਾਇਮਰੀ ਸਕੂਲਾਂ ਦੀ ਸਚਾਈ। ਪਰ ਮੇਰਾ ਸਵਾਲ ਇਹ ਹੈ ਕਿ ਕੀ ਬੱਚਿਆਂ ਨੂੰ ਪਹਾੜੇ ਤੋਤੇ ਵਾਂਗ ਰਟਾਉਣਾ ਜ਼ਰੂਰੀ ਹੈ?
ਬੱਚਿਆਂ ਨੂੰ ਪਹਾੜੇ ਤੋਤੇ ਵਾਂਗ ਬੋਲਣੇ ਨਹੀਂ, ਖੁਦ ਆਪਣੇ-ਆਪ ਬਣਾਉਣੇ ਆਉਣੇ ਚਾਹੀਦੇ ਹਨ। ਬੱਚਿਆਂ ਨੇ ਇਨ੍ਹਾਂ ਪਹਾੜਿਆਂ ਦੀ ਵਰਤੋਂ ਅਸਲ ਜ਼ਿੰਦਗੀ ਵਿਚ ਕਿਵੇਂ ਕਰਨੀ ਹੈ, ਇਹ ਇਨ੍ਹਾਂ ਨੂੰ ਆਉਣਾ ਚਾਹੀਦਾ ਹੈ। ਜਦ ਬੱਚਿਆਂ ਨੂੰ ਪਹਾੜੇ ਬਣਾਉਣੇ ਆ ਗਏ, ਉਨ੍ਹਾਂ ਦੀ ਵਰਤੋਂ ਆ ਗਈ, ਫਿਰ ਉਹ ਪਹਾੜਿਆਂ ਦੀ ਵਰਤੋਂ ਕਰਦੇ-ਕਰਦੇ, ਜਿੰਨੀ ਕੁ ਉਸ ਨੂੰ ਜ਼ਰੂਰਤ ਹੋਵੇਗੀ, ਉਨੇ ਕੁ ਪਹਾੜੇ ਉਸ ਨੂੰ ਆਪਣੇ-ਆਪ ਹੀ ਆ ਜਾਵਣਗੇ।
ਮੈਨੂੰ ਇਕ ਗੱਲ ਸਮਝ ਨਹੀਂ ਆਉਂਦੀ ਕਿ ਅੱਜ ਵੀ ਆਪਾਂ ਬੱਚਿਆਂ ਨੂੰ ਇਕ ਕਲੈਰੀਕਲ ਪੜ੍ਹਾਈ ਹੀ ਕਿਉਂ ਦਿੰਦੇ ਹਾਂ। ਉਸ ਤੋਂ ਪਹਾੜੇ ਰਟਾਉਣੇ, ਨਾਂਅ ਅਤੇ ਮਿਤੀਆਂ ਰਟਾਉਣੀਆਂ, ਇਹ ਸਭ ਚੀਜ਼ਾਂ ਮਹਾਂਮੂਰਖ ਤੋਤੇ ਹੀ ਪੈਦਾ ਕਰਨਗੀਆਂ, ਇਨਸਾਨ ਨਹੀਂ। ਅੰਗਰੇਜ਼ਾਂ ਨੇ ਕਲੈਰੀਕਲ ਸਿੱਖਿਆ ਭਾਰਤ ਵਿਚ ਸ਼ੁਰੂ ਕੀਤੀ ਸੀ, ਕਿਉਂਕਿ ਉਨ੍ਹਾਂ ਨੂੰ ਆਪਣੇ ਲਈ ਕਲਰਕ ਚਾਹੀਦੇ ਸਨ, ਉਹੀ ਸਿੱਖਿਆ ਅੱਜ ਵੀ ਚੱਲ ਰਹੀ ਹੈ। ਭਾਵੇਂ ਲੱਖਾਂ ਸੁਧਾਰ ਸਿੱਖਿਆ ਵਿਚ ਕੀਤੇ ਜਾ ਰਹੇ ਹਨ, ਪਰ ਅੱਜ ਵੀ ਸਿੱਖਿਆ ਦੇ ਮੁੱਢ ਵਿਚ ਕਲੈਰੀਕਲ ਸਿੱਖਿਆ ਦਾ ਅਕਸ ਦਿਖਦਾ ਹੈ।

-ਅਮਨਪ੍ਰੀਤ ਸਿੰਘ
ਵਟਸਅੱਪ : 094655-54088.

18-04-2016

 ਪੰਜਾਬ ਦੀ ਵਿੱਦਿਆ ਦਾ ਮਿਆਰ
ਅਸਟ੍ਰੇਲੀਅਨ ਹਾਈ ਕਮਿਸ਼ਨ ਵੱਲੋਂ ਪੰਜਾਬ ਦੀ ਵਿੱਦਿਆ ਦੇ ਮਿਆਰ ਨੂੰ ਉੱਚ ਪਾਏਦਾਰ ਨਾ ਮੰਨਣਾ ਅਤੇ ਮੈਰਿਟ ਵਿਚ ਆ ਰਹੇ ਬੱਚਿਆਂ ਨੂੰ ਨਲਾਇਕ ਦੱਸਣਾ ਇੱਕ ਬਹੁਤ ਹੀ ਗੰਭੀਰ ਅਤੇ ਕਲੰਕਿਤ ਕਰਨ ਵਾਲਾ ਮੁੱਦਾ ਹੈ। ਇਸ ਵਿਚ ਕੋਈ ਅਤਿ-ਕਥਨੀ ਨਹੀਂ ਹੈ ਕਿ ਪੰਜਾਬ ਦੀ ਵਿੱਦਿਆ ਦਾ ਮਿਆਰ ਸੁੱਚਮੁੱਚ ਹੀ ਬਹੁਤ ਵਿਗੜ ਚੁੱਕਿਆ ਹੈ, ਇਸ ਲਈ ਅਸਟ੍ਰੇਲੀਅਨ ਹਾਈ ਕਮਿਸ਼ਨ ਵੱਲੋਂ ਉਠਾਈ ਉਂਗਲੀ ਨੂੰ ਦੋਸ਼ ਨਹੀਂ ਦਿੱਤਾ ਜਾ ਸਕਦਾ। ਪੰਜਾਬ ਦੀ ਵਿੱਦਿਆ ਦੇ ਮਿਆਰ ਸਬੰਧੀ ਵਿੱਦਿਆ ਦੇ ਹਿਤੈਸ਼ੀ ਅਤੇ ਬੁੱਧੀਜੀਵੀ ਕਦੋਂ ਦੇ ਰੌਲਾ ਪਾਉਂਦੇ ਆ ਰਹੇ ਹਨ। ਪ੍ਰੰਤੂ ਕਿਸੇ ਨੇ ਵੀ ਇਸ ਦਰਦ ਨੂੰ ਸਮਝਣ ਦੀ ਕੋਸ਼ਿਸ਼ ਨਹੀਂ ਕੀਤੀ ਅਤੇ ਨਾ ਹੀ ਸਮੇਂ ਦੀਆਂ ਸਰਕਾਰਾਂ ਦੇ ਕੰਨਾਂ ਤੇ ਕਦੇ ਜੂੰ ਸਰਕੀ। ਮੌਜੂਦਾ ਸਰਕਾਰਾਂ ਅਤੇ ਆਮ ਲੋਕਾਂ ਨੂੰ ਡੂੰਘੀ ਨੀਂਦ ਵਿਚੋਂ ਜਾਗਣ ਦੀ ਜ਼ਰੂਰਤ ਹੈ, ਜੇਕਰ ਹਾਲਾਤ ਇਸੇ ਤਰ੍ਹਾਂ ਹੀ ਰਹੇ ਤਾਂ ਬਾਹਰਲੇ ਦੇਸ਼ ਪੰਜਾਬ ਦੀ ਮਾੜੀ ਵਿੱਦਿਆ ਪ੍ਰਣਾਲੀ ਸਬੰਧੀ ਦੋਸ਼ ਤਾਂ ਲਗਾਉਣਗੇ ਹੀ, ਇਸ ਦੇ ਨਾਲ ਆਉਣ ਵਾਲੇ ਸਮੇਂ ਵਿਚ ਉਹ ਪੰਜਾਬ ਦੀ ਨੌਜਵਾਨੀ ਦੇ 'ਡੋਪ' ਟੈਸਟ ਕਰਵਾਉਣੇ ਵੀ ਲਾਜ਼ਮੀ ਕਰ ਦੇਣੇ ਹਨ।

-ਇੰਦਰਜੀਤ ਸਿੰਘ ਕੰਗ
ਕੋਟਲਾ ਸਮਸ਼ਪੁਰ (ਸਮਰਾਲਾ), ਜ਼ਿਲ੍ਹਾ ਲੁਧਿਆਣਾ।
ਮੋਬਾ: 98558-82722

ਚੀਨ ਦੀ ਭੈੜੀ ਸੋਚ
ਸਮੁੱਚੇ ਏਸ਼ੀਆ ਤੋਂ ਬਾਅਦ ਹੁਣ ਜਦ ਅੱਤਵਾਦ ਯੂਰਪ ਵਿਚ ਵੀ ਆਪਣੇ ਪੈਰ ਪਸਾਰ ਰਿਹਾ ਹੈ ਤਾਂ ਉਦੋਂ ਚੀਨ ਵਰਗੇ ਦੇਸ਼ ਦੀ ਘਟੀਆ ਸੋਚ ਵਿਸ਼ਵ ਪੱਧਰੀ ਅੱਤਵਾਦ ਨੂੰ ਸਹਾਇਤਾ ਕਰ ਰਹੀ ਹੈ। ਯੂ.ਐਨ.ਓ. ਦੀ ਸਥਾਈ ਮੈਂਬਰ ਹਾਸਲ ਚੀਨ ਵਰਗਾ ਦੇਸ਼ ਪਾਕਿਸਤਾਨੀ ਅੱਤਵਾਦੀ ਮਸੂਦ ਅਜ਼ਹਰ ਨੂੰ ਬੇਕਸੂਰ ਸਾਬਤ ਕਰਨ ਲਈ ਉਸ ਦੀ ਪਿੱਠ ਥਾਪੜ ਰਿਹਾ ਹੈ। ਸੰਯੁਕਤ ਰਾਸ਼ਟਰ ਸੁਰੱਖਿਆ ਪ੍ਰੀਸ਼ਦ ਵਿਚ ਚੀਨ ਦੇ ਸਥਾਈ ਪ੍ਰਤੀਨਿਧੀ ਲੀਊਜੀਏਯੀ ਸ਼ਰੇਆਮ ਪਾਕਿਸਤਾਨੀ ਸਮਰਥਕ ਬਣ ਕੇ ਦੁਨੀਆ ਨੂੰ ਕੀ ਸੁਨੇਹਾ ਦੇ ਰਹੇ ਹਨ। ਇਕ ਪਾਸੇ ਤਾਂ ਚੀਨ ਭਾਰਤੀ ਬਾਜ਼ਾਰਾਂ ਵਿਚ ਵਿਸ਼ਵ ਵਪਾਰ ਸੰਸਥਾ ਦੀਆਂ ਸ਼ਰਤਾਂ ਅਨੁਸਾਰ ਆਪਣਾ ਘਟੀਆ ਤੋਂ ਘਟੀਆ ਸਮਾਨ ਵੇਚ ਕੇ ਵੱਧ ਤੋਂ ਵੱਧ ਲਾਭ ਕਮਾ ਰਿਹਾ ਹੈ, ਤਾਂ ਦੂਜੇ ਪਾਸੇ ਪਾਕਿਸਤਾਨ ਦੀਆਂ ਅੱਤਵਾਦੀ ਸਰਗਰਮੀਆਂ ਨੂੰ ਪ੍ਰਫੁਲਤ ਕਰਕੇ ਸਾਡੀ ਪਿੱਠ ਵਿਚ ਛੁਰਾ ਮਾਰ ਰਿਹਾ ਹੈ। ਭਾਰਤ ਸਰਕਾਰ ਅਤੇ ਹਰ ਸੱਚੇ ਭਾਰਤੀ ਨੂੰ ਚੀਨ ਦੀ ਇਸ ਦੋਗਲੀ ਨੀਤੀ ਦਾ ਵਿਰੋਧ ਕਰਕੇ ਚੀਨੀ ਸਮਾਨ ਦਾ ਬਾਈਕਾਟ ਕਰਨਾ ਚਾਹੀਦਾ ਹੈ। ਯੂ.ਐਨ.ਓ. ਵਿਚ ਸਥਾਈ ਮੈਂਬਰ ਦੇਸ਼ਾਂ ਨੂੰ ਚੀਨ ਦੀ ਇਸ ਭੈੜੀ ਸੋਚ ਨੂੰ ਸਮਝ ਕੇ ਉਸ ਦੀ ਨਿਖੇਧੀ ਕਰਨੀ ਚਾਹੀਦੀ ਹੈ।

-ਮਾ: ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀ ਖਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

ਸ਼ਲਾਘਾਯੋਗ ਫ਼ੈਸਲਾ
ਸੰਨ 1991 ਦੇ ਕਾਲੇ ਦੌਰ ਵਿਚ ਯੂ.ਪੀ. ਪੁਲਿਸ ਵੱਲੋਂ ਗਿਆਰਾਂ ਸਿੱਖ ਤੀਰਥ ਯਾਤਰੀਆਂ ਨੂੰ ਅੱਤਵਾਦੀ ਦੱਸ ਕੇ ਫਰਜ਼ੀ ਮੁਕਾਬਲੇ ਵਿਚ ਮਾਰ ਦਿੱਤਾ ਸੀ। ਆਖਰ ਸੀ.ਬੀ.ਆਈ. ਦੀ ਇਕ ਵਿਸ਼ੇਸ਼ ਅਦਾਲਤ ਨੇ 25 ਸਾਲ ਦੇ ਇਕ ਲੰਮੇ ਅਰਸੇ ਬਾਅਦ 47 ਪੁਲਿਸ ਮੁਲਾਜ਼ਮਾਂ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਹੈ। ਇਹ ਅਦਾਲਤ ਦਾ ਇਕ ਸ਼ਲਾਘਾਯੋਗ ਫ਼ੈਸਲਾ ਹੈ। ਇਸ ਨਾਲ ਪੂਰੀ ਸਿੱਖ ਕੌਮ ਦਾ ਦੇਸ਼ ਦੀ ਨਿਆਂ-ਪ੍ਰਣਾਲੀ ਵਿਚ ਵਿਸ਼ਵਾਸ ਵਧਿਆ ਹੈ। ਹੁਣ ਪੂਰੀ ਕੌਮ ਨੂੰ ਇਨਸਾਫ਼ ਦੀ ਆਸ ਜਾਗੀ ਹੈ। 1984 ਵਿਚ ਸਿੱਖ ਨਸਲਕੁਸ਼ੀ ਕਰਾਉਣ ਵਾਲੇ ਸਿਆਸੀ ਆਕਾਵਾਂ ਨੂੰ ਵੀ ਜਲਦ ਜੇਲ੍ਹ ਦੀਆਂ ਸਲਾਖਾਂ ਪਿੱਛੇ ਡੱਕ ਦਿੱਤਾ ਜਾਵੇਗਾ। ਕਿਉਂਕਿ ਸਾਡੀ ਆਜ਼ਾਦ ਭਾਰਤ ਦੀ ਨਿਆਂ-ਪ੍ਰਣਾਲੀ ਵਿਚ ਦੰਗਾਕਾਰੀਆਂ ਲਈ ਕੋਈ ਸੁਰੱਖਿਅਤ ਲਾਂਘਾ ਨਹੀਂ ਹੈ।

-ਲੱਖੀ ਗਿੱਲ ਧਨਾਨਸੂ
ਮੋਬਾਈਲ : 88726-60007.

15-4-2016

 ਸਿਆਸੀ ਰੰਗਤ ਨਾ ਦਿਓ

ਪੰਜਾਬ ਵਿਚ ਵੱਖ-ਵੱਖ ਇਤਿਹਾਸਕ ਦਿਹਾੜਿਆਂ ਨੂੰ ਸ਼ਰਧਾ ਭਾਵਨਾ ਨਾਲ ਮਨਾਇਆ ਜਾਂਦਾ ਹੈ। ਇਸੇ ਤਰ੍ਹਾਂ ਦੇਸ਼ ਅਤੇ ਕੌਮ ਲਈ ਸ਼ਹੀਦ ਹੋਏ ਆਜ਼ਾਦੀ ਦੇ ਪਰਵਾਨਿਆਂ ਦੀ ਯਾਦ ਵਿਚ ਵੀ ਸਮਾਗਮ ਹੁੰਦੇ ਰਹਿੰਦੇ ਹਨ। ਅੱਜਕਲ੍ਹ ਇਕ ਵੱਖਰੇ ਤਰ੍ਹਾਂ ਦਾ ਰੁਝਾਨ ਵੇਖਣ ਨੂੰ ਮਿਲਦਾ ਹੈ ਕਿ ਵੱਖ-ਵੱਖ ਪਾਰਟੀਆਂ ਸਿਆਸਤ ਨੂੰ ਕਿਸੇ ਖਾਸ ਦਿਵਸ ਜਾਂ ਸਮਾਗਮ ਨਾਲ ਰਲਗੱਡ ਕਰਕੇ ਲਾਹਾ ਲੈਣ ਦੀ ਤਾਕ ਵਿਚ ਰਹਿੰਦੀਆਂ ਹਨ। ਜਿਸ ਦਿਨ ਦੇ ਮਹੱਤਵ ਨੂੰ ਸਮਝਣ ਲਈ, ਸੇਧ ਲੈਣ ਲਈ ਸਾਨੂੰ ਇਕੱਠੇ ਹੋਣਾ ਚਾਹੀਦਾ ਹੈ, ਉਸ ਪੱਖ ਨੂੰ ਲਾਂਭੇ ਕਰਕੇ ਇਕ ਵੱਖਰਾ ਹੀ ਪ੍ਰੋਗਰਾਮ ਉਲੀਕਣ ਦੀ ਕੋਸ਼ਿਸ਼ ਕੀਤੀ ਜਾਂਦੀ ਹੈ। ਹਰ ਕੋਈ ਪਾਰਟੀ ਲੋਕਾਂ ਦੇ ਇਕੱਠ ਨੂੰ ਰੈਲੀ ਦੀ ਸ਼ਕਲ ਵਿਚ ਤਬਦੀਲ ਕਰਕੇ ਆਪਣਾ ਪ੍ਰਭਾਵ ਬਣਾਉਣ ਦੀ ਕੋਸ਼ਿਸ਼ ਕਰਦੀ ਰਹਿੰਦੀ ਹੈ। ਰਾਜਨੀਤਕ ਪਾਰਟੀਆਂ ਵੱਲੋਂ ਜ਼ਿੱਦ ਕੇ ਰੈਲੀਆਂ ਦਾ ਐਲਾਨ ਕੀਤਾ ਜਾਂਦਾ ਹੈ, ਜਿਸ ਨਾਲ ਪੁਲਿਸ ਮੁਲਾਜ਼ਮਾਂ ਅਤੇ ਸਰਕਾਰੀ ਅਫਸਰਾਂ ਨੂੰ ਵੀ ਭਾਰੀ ਦਿੱਕਤ ਆਉਂਦੀ ਹੈ। ਹਰ ਇਕ ਪਿੰਡ ਵਿਚੋਂ ਟਰਾਲੀਆਂ ਭਰਨ ਦਾ ਫੁਰਮਾਨ ਕੀਤਾ ਜਾਂਦਾ ਹੈ। ਕਈ ਵਾਰ ਤਾਂ ਟ੍ਰੈਫਿਕ ਏਨਾ ਜ਼ਿਆਦਾ ਹੋ ਜਾਂਦਾ ਹੈ ਕਿ ਆਮ ਰਾਹਗੀਰਾਂ ਨੂੰ ਵੀ ਮੁਸੀਬਤਾਂ ਦਾ ਸਾਹਮਣਾ ਕਰਨਾ ਪੈ ਜਾਂਦਾ ਹੈ। ਕਈ ਵਾਰੀ ਸ਼ਹੀਦਾਂ ਦੇ ਦਿਹਾੜਿਆਂ 'ਤੇ ਕੀਤੀਆਂ ਜਾਂਦੀਆਂ ਰੈਲੀਆਂ ਵਿਚ ਰਾਜਨੀਤਕ ਪਾਰਟੀਆਂ ਸ਼ਹੀਦਾਂ ਦੀ ਸੋਚ 'ਤੇ ਚੱਲਣ ਦਾ ਹੋਕਾ ਦਿੰਦੀਆਂ ਹਨ, ਨਾਅਰੇ ਲਾਏ ਜਾਂਦੇ ਹਨ, ਵੱਖ-ਵੱਖ ਪ੍ਰਣ ਲਏ ਜਾਂਦੇ ਹਨ ਪਰ ਅਗਲੇ ਦਿਨ ਅਖ਼ਬਾਰ ਦੀ ਸੁਰਖੀ ਵਿਚ ਆਉਣ ਤੋਂ ਬਾਅਦ ਸਭ ਭੁੱਲ-ਭੁਲਾ ਦਿੱਤਾ ਜਾਂਦਾ ਹੈ। ਠੀਕ ਇਵੇਂ ਹੀ ਕਿਸੇ ਧਾਰਮਿਕ ਦਿਹਾੜੇ ਮੌਕੇ ਕੀਤੀਆਂ ਗਈਆਂ ਸਿਆਸੀ ਕਾਨਫ਼ਰੰਸਾਂ ਲੋਕਾਂ ਦੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਂਦੀਆਂ ਹਨ। ਸਾਡੇ ਸਿਆਸਤਦਾਨਾਂ ਨੂੰ ਵੀ ਚਾਹੀਦਾ ਹੈ ਕਿ ਇਕ-ਦੂਜੇ ਵਿਰੁੱਧ ਭੰਡੀ ਪ੍ਰਚਾਰ ਕਰਕੇ ਖ਼ਾਸ ਦਿਹਾੜਿਆਂ ਨੂੰ ਸਿਆਸੀ ਰੰਗਤ ਨਾ ਦਿੱਤੀ ਜਾਵੇ, ਸਗੋਂ ਇਤਿਹਾਸਕ ਦਿਹਾੜਿਆਂ ਦੇ ਮਹੱਤਵ ਸਬੰਧੀ ਲੋਕਾਂ ਨੂੰ ਜਾਣਕਾਰੀ ਦਿੱਤੀ ਜਾਵੇ। ਕਿਤੇ ਨਾ ਕਿਤੇ ਇਹ ਨਾਂਹ-ਪੱਖੀ ਰੁਝਾਨ ਸਾਡੇ ਪੁਰਖਿਆਂ ਦੇ ਪਾਏ ਪੂਰਨਿਆਂ 'ਤੇ ਚੱਲਣ ਦੇ ਮਹੱਤਵ ਨੂੰ ਖੋਰਾ ਜ਼ਰੂਰ ਲਾਵੇਗਾ।

-ਅਰਸ਼ ਸਿੱਧੂ
ਅਲਫੂ ਕੇ (ਫਿਰੋਜ਼ਪੁਰ)।

ਉਮਰ ਹੱਦ ਵਧਾਉਣ ਬਾਰੇ

ਪੰਜਾਬ ਸਰਕਾਰ ਦੇ ਵੱਖ-ਵੱਖ ਮਹਿਕਮਿਆਂ ਵਿਚ ਨਿਕਲਦੀਆਂ/ਨਿਕਲ ਰਹੀਆਂ ਨੌਕਰੀਆਂ ਵਿਚ ਵੱਡੀ ਗਿਣਤੀ ਵਿਚ ਨੌਕਰੀ ਲਈ ਬਿਨੈ ਪੱਤਰ ਦੇਣ ਦੇ ਚਾਹਵਾਨ ਆਪਣੀ ਉਮਰ ਹੱਦ ਟੱਪ ਜਾਣ ਕਾਰਨ ਨੌਕਰੀ ਲਈ ਅਪਲਾਈ ਨਹੀਂ ਕਰ ਸਕਦੇ। ਡਿਗਰੀ ਅਤੇ ਡਿਪਲੋਮਾ ਹੋਲਡਰ ਆਪਣੇ ਇਸ ਹੱਕ ਤੋਂ ਵਾਂਝੇ ਹਨ। ਤਕਨੀਕੀ ਨੌਕਰੀਆਂ ਤੋਂ ਇਲਾਵਾ ਬਹੁਤ ਸਾਰੇ ਦੂਸਰੀਆਂ ਨੌਕਰੀਆਂ ਵਿਚ ਵੀ ਉਮਰ ਹੱਦ ਪਾਰ ਕਰ ਜਾਣ ਕਰਕੇ ਅਪਲਾਈ ਨਹੀਂ ਕਰ ਸਕਦੇ। ਪਿਛਲੇ ਅਕਾਲੀ-ਭਾਜਪਾ ਦੇ ਕਾਰਜਕਾਲ ਦੌਰਾਨ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਅਤੇ ਉਪ ਮੁੱਖ ਮੰਤਰੀ ਸ: ਸੁਖਬੀਰ ਸਿੰਘ ਬਾਦਲ ਵੱਲੋਂ ਕਾਫੀ ਲੰਮੇ ਸਮੇਂ ਤੋਂ ਨੌਕਰੀਆਂ 'ਤੇ ਰੋਕ ਲੱਗੇ ਹੋਣ ਕਾਰਨ ਬੇਰੁਜ਼ਗਾਰਾਂ ਨੂੰ ਰਾਹਤ ਦਿੰਦਿਆਂ ਉਪਰੋਕਤ ਉਮਰ 37 ਸਾਲ ਤੋਂ ਵਧਾ ਕੇ 38 ਸਾਲ ਕਰ ਦਿੱਤੀ ਗਈ ਸੀ, ਜੋ ਕਿ ਹੁਣ ਫਿਰ ਪੰਜਾਬ ਸਰਕਾਰ ਨੇ ਵੱਖ-ਵੱਖ ਮਹਿਕਮਿਆਂ ਨੂੰ ਇਕ ਨੋਟੀਫਿਕੇਸ਼ਨ ਜਾਰੀ ਕਰਕੇ ਉਪਰੋਕਤ ਉਮਰ ਘਟਾ ਕੇ 38 ਸਾਲ ਤੋਂ ਫਿਰ 37 ਸਾਲ ਕਰ ਦਿੱਤੀ ਹੈ। ਪੰਜਾਬ ਭਰ ਦੇ ਸਮੂਹ ਬੇਰੁਜ਼ਗਾਰ ਉਮੀਦਵਾਰਾਂ ਦੀ ਪੰਜਾਬ ਸਰਕਾਰ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਅਤੇ ਉਪ ਮੁੱਖ ਮੰਤਰੀ ਸ: ਸੁਖਬੀਰ ਸਿੰਘ ਬਾਦਲ ਤੋਂ ਪੁਰਜ਼ੋਰ ਮੰਗ ਹੈ ਕਿ ਨੌਕਰੀਆਂ ਲਈ ਉਮਰ ਵਧਾ ਕੇ 38 ਸਾਲ ਕੀਤੀ ਜਾਵੇ ਜਾਂ ਫਿਰ ਹਰਿਆਣਾ ਸਰਕਾਰ ਦੇ ਪੈਟਰਨ ਅਨੁਸਾਰ 42 ਸਾਲ ਕੀਤੀ ਜਾਵੇ।

-ਕੁਲਦੀਪ ਸਿੰਘ ਅਬਦਾਲ
ਮੋ: 97812-08405

13-04-2016

 ਸ਼ਲਾਘਾਯੋਗ ਫ਼ੈਸਲਾ

ਪਿਛਲੇ ਦਿਨੀਂ ਮਾਣਯੋਗ ਸੁਪਰੀਮ ਕੋਰਟ ਨੇ ਦੇਸ਼ ਦੀ ਸੰਸਦ ਨੂੰ ਸੁਝਾਅ ਦਿੱਤਾ ਹੈ ਕਿ ਨਾਬਾਲਗਾਂ ਨਾਲ ਭਾਵ ਛੋਟੀਆਂ-ਛੋਟੀਆਂ ਬਾਲੜੀਆਂ ਨਾਲ ਜਬਰ-ਜਨਾਹ ਕਰਨ ਵਾਲਿਆਂ ਨੂੰ ਮਿਸਾਲੀ ਸਜ਼ਾਵਾਂ ਦਿੱਤੀਆਂ ਜਾਣੀਆਂ ਚਾਹੀਦੀਆਂ ਹਨ। ਅੱਜ ਸਮੁੱਚਾ ਦੇਸ਼ ਜਾਣਦਾ ਹੈ ਕਿ ਬਾਲੜੀਆਂ ਨਾਲ ਜਬਰ-ਜਨਾਹ ਦੀਆਂ ਘਟਨਾਵਾਂ ਵਿਚ ਵੱਡਾ ਵਾਧਾ ਹੋਇਆ ਹੈ। ਨਾਮਰਦ ਬਣਾਉਣ ਦੀ ਸਜ਼ਾ ਨਾਲ ਹੀ ਇਸ ਤਰ੍ਹਾਂ ਦੀ ਮਾਨਸਿਕਤਾ ਵਾਲਿਆਂ ਨੂੰ ਵੱਡਾ ਸੰਦੇਸ਼ ਦਿੱਤਾ ਜਾ ਸਕਦਾ ਹੈ। ਅੱਜ ਦੇਸ਼ ਦੇ ਮੀਡੀਏ ਦਾ ਕੋਈ ਵੀ ਅਜਿਹਾ ਦਿਨ ਨਹੀਂ ਹੈ, ਜਿਸ ਦਿਨ ਉਹ ਜਬਰ-ਜਨਾਹ ਦੀ ਖ਼ਬਰ ਤੋਂ ਸੱਖਣਾ ਹੋਵੇ। ਬੇਹੱਦ ਹਿਰਦੇਵੇਦਕ ਗੱਲ ਇਹ ਹੈ ਕਿ ਜਬਰ-ਜਨਾਹ ਦੀਆਂ ਸ਼ਿਕਾਰ ਹੋਣ ਵਾਲੀਆਂ ਬਾਲੜੀਆਂ ਦੀ ਉਮਰ ਏਨੀ ਥੋੜ੍ਹੀ ਹੁੰਦੀ ਹੈ ਕਿ ਉਹ ਘਟਨਾ ਮੌਕੇ ਜਾਂ ਤਾਂ ਮੌਤ ਦੇ ਮੂੰਹ ਜਾ ਪੈਂਦੀਆਂ ਹਨ ਜਾਂ ਫਿਰ ਬਚ ਜਾਣ 'ਤੇ ਸਾਰੀ ਉਮਰ ਲਈ ਮਾਨਸਿਕ ਰੋਗ ਦਾ ਸ਼ਿਕਾਰ ਹੋ ਕੇ ਰਹਿ ਜਾਂਦੀਆਂ ਹਨ। ਜਬਰ-ਜਨਾਹ ਵਰਗੇ ਅਪਰਾਧ ਨੂੰ ਰੋਕਣ ਲਈ ਭਾਵੇਂ ਸਖ਼ਤ ਕਾਨੂੰਨ ਬਣਾਏ ਗਏ, ਦੋਸ਼ੀਆਂ ਨੂੰ ਤੁਰੰਤ ਸਜ਼ਾ ਦਾ ਭਾਗੀ ਬਣਾਉਣ ਲਈ ਫਾਸਟ ਟਰੈਕ ਅਦਾਲਤਾਂ ਵੀ ਹੋਂਦ ਵਿਚ ਆਈਆਂ, ਦੋਸ਼ੀਆਂ ਨੂੰ ਤੁਰੰਤ ਜੇਲ੍ਹਾਂ ਵਿਚ ਵੀ ਡੱਕਿਆ ਗਿਆ। ਇਸ ਸਭ ਕੁਝ ਦੇ ਬਾਵਜੂਦ ਅਪਰਾਧ ਘਟੇ ਨਹੀਂ ਹਨ, ਸਗੋਂ ਵਧੇ ਹਨ। ਲਗਦਾ ਹੈ ਅਜੇ ਉਹ ਮਿਸਾਲੀ ਸਜ਼ਾ ਨਹੀਂ ਮਿਲੀ, ਜੋ ਇਸ ਤਰ੍ਹਾਂ ਦੀ ਮਾਨਸਿਕਤਾ ਵਾਲਿਆਂ ਲਈ ਸਬਕ ਹੋਵੇ। ਹੁਣ ਸਮਾਂ ਆ ਗਿਆ ਲਗਦਾ ਹੈ ਕਿ ਇਸ ਤਰ੍ਹਾਂ ਦੇ ਅਪਰਾਧੀਆਂ ਨੂੰ ਨਾਮਰਦ ਬਣਾਇਆ ਜਾਵੇ। ਜੇ ਅੱਜ ਅਜਿਹਾ ਨਹੀਂ ਕੀਤਾ ਜਾਂਦਾ ਤਾਂ ਜਿਥੇ ਇਸ ਤਰ੍ਹਾਂ ਦੇ ਅਪਰਾਧ ਵਧਣਗੇ, ਉਥੇ ਬਾਲੜੀਆਂ ਦੀ ਕੁਰਲਾਹਟ ਸਾਡੇ ਕੰਨਾਂ ਨੂੰ ਚੀਰਦੀ ਰਹੇਗੀ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

ਐਸ.ਵਾਈ.ਐਲ. ਦਾ ਮਸਲਾ

ਪਿਛਲੇ ਕਾਫੀ ਸਮੇਂ ਤੋਂ ਐਸ.ਵਾਈ.ਐਲ. ਨਹਿਰ ਜੋ ਕਿ ਹਰਿਆਣਾ ਨੂੰ ਪਾਣੀ ਦੇਣ ਲਈ ਸ਼ੁਰੂ ਕੀਤੀ ਗਈ ਸੀ, ਦਾ ਮਸਲਾ ਹਰੇਕ ਸਰਕਾਰ ਦੀ ਗਲੇ ਦੀ ਹੱਡੀ ਬਣਿਆ ਰਹਿੰਦਾ ਸੀ ਪ੍ਰੰਤੂ ਮੌਜੂਦਾ ਪੰਜਾਬ ਸਰਕਾਰ ਨੇ ਇਸ ਨੂੰ ਪੂਰਿਆਂ ਕਰਨ ਲਈ ਭਾਵੇਂ ਕਿ ਹਰਿਆਣਾ ਨੂੰ ਪਾਣੀ ਦੇਣ ਤੋਂ ਕੋਰੀ ਨਾਂਹ ਕਰ ਦਿੱਤੀ ਹੈ, ਜੋ ਕਿ ਬਹੁਤ ਹੀ ਸ਼ਲਾਘਾਯੋਗ ਕਦਮ ਹੈ। ਕਿਉਂਕਿ ਪੰਜਾਬ ਵਿਚ ਤਾਂ ਪਹਿਲਾਂ ਹੀ ਪਾਣੀ ਦਾ ਪੱਧਰ ਦਿਨੋਂ-ਦਿਨ ਨੀਵਾਂ ਹੁੰਦਾ ਜਾ ਰਿਹਾ ਹੈ, ਜਿਸ ਕਰਕੇ ਆਉਣ ਵਾਲੇ ਸਮੇਂ ਵਿਚ ਪੰਜਾਬ ਨੂੰ ਵੀ ਪਾਣੀ ਦੇ ਸੰਕਟ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਮਾਣਯੋਗ ਸੁਪਰੀਮ ਕੋਰਟ ਨੇ ਇਸ ਮਾਮਲੇ ਵਿਚ ਛੇੜਛਾੜ ਕਰਨ ਤੋਂ ਮਨ੍ਹਾ ਕਰ ਦਿੱਤਾ ਹੈ, ਜੋ ਕਿ ਸਾਨੂੰ ਮਾਣਯੋਗ ਸੁਪਰੀਮ ਕੋਰਟ ਦੇ ਆਦੇਸ਼ਾਂ ਦੀ ਪਾਲਣਾ ਕਰਨੀ ਚਾਹੀਦੀ ਹੈ ਅਤੇ ਪੰਜਾਬ ਸਰਕਾਰ ਵੱਲੋਂ ਲਏ ਸਟੈਂਡ ਦੀ ਸਾਨੂੰ ਸਾਰਿਆਂ ਨੂੰ ਸ਼ਲਾਘਾ ਕਰਨੀ ਬਣਦੀ ਹੈ ਕਿਉਂਕਿ ਜਦੋਂ ਪੰਜਾਬ ਕੋਲ ਕੋਈ ਵਾਧੂ ਪਾਣੀ ਹੈ ਹੀ ਨਹੀਂ ਤਾਂ ਫਿਰ ਹੋਰ ਸੂਬੇ ਨੂੰ ਪਾਣੀ ਦੇਣ ਦਾ ਮਤਲਬ ਨਹੀਂ।

-ਕੇਵਲ ਸਿੰਘ ਬਾਠਾਂ
ਅਮਰਗੜ੍ਹ, ਸੰਗਰੂਰ।

12-04-2016

 ਪਾਣੀ ਹੈ ਤਾਂ ਪ੍ਰਾਣੀ ਹੈ

ਪਾਣੀ ਹੈ ਤਾਂ ਪ੍ਰਾਣੀ ਹੈ, ਨਹੀਂ ਤਾਂ ਖ਼ਤਮ ਕਹਾਣੀ ਹੈ, ਦੇ ਵਿਸ਼ੇ ਉੱਤੇ ਸੰਤ ਸੀਚੇਵਾਲ ਜੀ ਨੇ ਸਾਰੀਆਂ ਰਾਜਨੀਤਕ ਪਾਰਟੀਆਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਦਰਿਆਵਾਂ, ਨਹਿਰਾਂ, ਤਾਲਾਬਾਂ ਅਤੇ ਧਰਤੀ ਹੇਠਲੇ ਪਾਣੀਆਂ ਨੂੰ ਪਲੀਤ ਹੋਣੋਂ ਬਚਾਉਣ ਲਈ ਆਪਣਾ ਚੋਣ ਮੁੱਦਾ ਬਣਾ ਕੇ ਮੈਦਾਨ ਵਿਚ ਨਿਤਰਣ। ਪਾਣੀਆਂ ਦੇ ਮਾਹਰ ਇੰਜੀਨੀਅਰ ਕਿਰਪਾਲ ਸਿੰਘ ਦਰਦੀ ਨੇ ਹੈਰਾਨੀਜਨਕ ਭੇਤ ਖੋਲ੍ਹਦਿਆਂ ਦੱਸਿਆ ਹੈ ਕਿ ਪੰਜਾਬ ਵਿਚ ਝੋਨੇ ਦੀ ਇਕ ਫ਼ਸਲ ਪਾਲਣ ਲਈ ਭਾਖੜਾ ਡੈਮ ਦੀਆਂ ਪੰਜਾਂ ਝੀਲਾਂ ਦੇ ਬਰਾਬਰ ਦਾ ਪਾਣੀ ਹਰ ਸਾਲ ਵਰਤਿਆ ਜਾਂਦਾ ਹੈ। ਧਰਤੀ ਹੇਠਲੇ ਪਾਣੀ ਦੀ ਟਿਊਬਵੈੱਲਾਂ ਵੱਲੋਂ ਕੀਤੀ ਜਾ ਰਹੀ ਏਡੀ ਵੱਡੀ ਦੁਰਵਰਤੋਂ ਕਾਰਨ ਧਰਤੀ ਹੇਠਲਾ ਪਾਣੀ 300 ਫੁੱਟ ਤੋਂ 400 ਫੁੱਟ ਤੱਕ ਨੀਵਾਂ ਜਾ ਚੁੱਕਾ ਹੈ। ਜੇ ਪਾਣੀ ਦੀ ਦੁਰਵਰਤੋਂ ਨਾ ਰੋਕੀ ਗਈ ਤਾਂ ਪਾਣੀ ਮਨੁੱਖੀ ਪਹੁੰਚ ਤੋਂ ਦੂਰ ਜਾ ਕੇ ਪੀਣ ਵਾਲੇ ਪਾਣੀ ਦਾ ਸੰਕਟ ਪੈਦਾ ਕਰ ਸਕਦਾ ਹੈ, ਧਰਤੀ ਬੰਜਰ ਬਣ ਸਕਦੀ ਹੈ ਅਤੇ ਪੰਜਾਬ ਵਿਚੋਂ ਲੋਕਾਂ ਦੀ ਹਿਜਰਤ ਹੋ ਸਕਦੀ ਹੈ। ਉਨ੍ਹਾਂ ਨੇ ਪਾਣੀ ਬਚਾਉਣ ਲਈ ਝੋਨੇ ਦੀ ਥਾਂ ਘੱਟ ਪਾਣੀ ਲੈਣ ਵਾਲੀਆਂ ਫਸਲਾਂ ਬੀਜਣ ਦੀ ਸਲਾਹ ਦਿੱਤੀ ਹੈ। ਦੋਵਾਂ ਲੇਖਕਾਂ ਦੇ 'ਅਜੀਤ' ਵਿਚ ਛਪੇ ਲੇਖ ਪੜ੍ਹਨ ਤੇ ਵਿਚਾਰਨਯੋਗ ਹਨ।

-ਇੰਜ: ਕੁਲਦੀਪ ਸਿੰਘ ਲੁੱਧਰ
4724 ਗੁਰੂ ਨਾਨਕ ਵਾੜਾ, ਖਾਲਸਾ ਕਾਲਜ, ਅੰਮ੍ਰਿਤਸਰ।87

ਡੀ.ਜੇ. ਦਾ ਸ਼ੋਰ

ਸੰਗੀਤ ਮਨੁੱਖ ਦੇ ਅੰਗ-ਸੰਗ ਰਿਹਾ ਹੈ। ਇਹ ਸਰੀਰਕ ਥਕੇਵਾਂ ਲਾਹ ਕੇ ਰੂਹ ਨੂੰ ਸਕੂਨ ਬਖਸ਼ਦਾ ਹੈ। ਇਸ ਵਿਚ ਅਨੌਖੀ ਮਸਤੀ ਅਤੇ ਖੁਸ਼ੀ ਹੈ। ਪਰ ਅਜੋਕਾ ਗੀਤ-ਸੰਗੀਤ ਪੁਰਾਤਨ ਸਮੇਂ ਵਾਂਗ ਨਹੀਂ ਰਿਹਾ। ਅੱਜਕਲ੍ਹ ਇਹ ਕੰਨ ਪਾੜਵਾਂ ਸ਼ੋਰ ਹੈ। ਖੁਸ਼ੀ ਦੇ ਸਮੇਂ ਉੱਤੇ ਚੱਲਣ ਵਾਲੇ ਡੀ.ਜੇ. ਇਸ ਦੀ ਵਿਗੜੀ ਹੋਈ ਪਰਿਭਾਸ਼ਾ ਹਨ। ਇਨ੍ਹਾਂ ਦਾ ਕੰਨ ਪਾੜਵਾਂ ਸ਼ੋਰ ਦਿਲ ਦੇ ਮਰੀਜ਼ਾਂ ਲਈ, ਛੋਟੇ ਬੱਚਿਆਂ ਲਈ, ਗਰਭਵਤੀ ਔਰਤਾਂ ਲਈ ਬੇਹੱਦ ਘਾਤਕ ਹੈ। ਪਿੰਡ ਜਾਂ ਸ਼ਹਿਰ ਦੇ ਇਕ ਘਰ ਵਿਚ ਖੁਸ਼ੀ ਦਾ ਸਮਾਗਮ ਹੁੰਦਾ ਹੈ ਪ੍ਰੰਤੂ ਆਲੇ-ਦੁਆਲੇ ਦੇ ਰਹਿਣ ਵਾਲੇ ਲੋਕਾਂ ਦਾ ਡੀ.ਜੇ. ਚੱਲਣ ਕਾਰਨ ਲਗਪਗ ਅੱਧੀ ਰਾਤ ਤੱਕ ਜਾਗਣਾ ਲਾਜ਼ਮੀ ਹੋ ਜਾਂਦਾ ਹੈ। ਨਵੀਂ ਪੀੜ੍ਹੀ ਵਿਚ ਡੀ.ਜੇ. ਦੇ ਗੀਤਾਂ 'ਤੇ ਨੱਚਣਾ, ਅਸਲ੍ਹੇ ਦੇ ਫਾਇਰ ਕਰਨੇ ਅਤੇ ਝਗੜਾ ਕਰਨਾ ਆਮ ਗੱਲ ਹੋ ਚੁੱਕੀ ਹੈ। ਕਈ ਪਿੰਡਾਂ ਦੀ ਪੰਚਾਇਤਾਂ ਵੱਲੋਂ ਡੀ.ਜੇ. ਚਲਾਉਣ ਦੀ ਮਨਾਹੀ ਕੀਤੀ ਹੋਈ ਹੈ ਅਤੇ ਜੁਰਮਾਨੇ ਰੱਖੇ ਹੋਏ ਹਨ। ਪਰ ਅਸੀਂ ਪੰਜਾਬੀ ਲੋਕ ਕਾਨੂੰਨ ਦੀ ਉਲੰਘਣਾ ਕਰਨ ਦੇ ਬਹੁਤ ਆਦੀ ਹੋ ਚੁੱਕੇ ਹਾਂ। ਇਸ ਵਰਤਾਰੇ ਨੂੰ ਠੱਲ੍ਹਣ ਲਈ ਸੂਝਵਾਨ ਨਾਗਰਿਕਾਂ ਨੂੰ ਅੱਗੇ ਆਉਣਾ ਚਾਹੀਦਾ ਹੈ। ਡੀ.ਜੇ. ਮੁਕਤ ਵਿਆਹ ਕਰਨ ਲਈ ਪਹਿਲ ਕਰਨੀ ਚਾਹੀਦੀ ਹੈ। ਕਾਸ਼! ਸਾਨੂੰ ਸਮਾਂ ਰਹਿੰਦੇ ਹੀ ਸਮਝ ਆ ਜਾਵੇ।

-ਅਮਨਦੀਪ ਸਿੰਘ ਬਖ਼ਤਗੜ੍ਹ
ਪਿੰਡ ਤੇ ਡਾਕ: ਬਖ਼ਤਗੜ੍ਹ (ਬਰਨਾਲਾ)।

 

03-04-2016

 ਮਹਿਬੂਬ ਜਾਂ ਮਾਬੂਦ
ਪਿਛਲੇ ਦਿਨਾਂ ਤੋਂ ਭਾਰਤ ਮਾਤਾ ਦੀ ਜੈ ਦਾ ਨਾਅਰਾ ਲਾਉਣ ਸਬੰਧੀ ਇਕ ਵਿਵਾਦ ਛਿੜਿਆ ਹੋਇਆ ਹੈ। ਭਾਰਤ ਮਾਂ (ਹਿੰਦ) ਦੀ ਜੈ ਬੋਲਣ ਦਾ ਭਾਵ ਮਾਂ ਲਈ ਨੇਕ ਖਵਾਸ਼ਿਆਤ ਹੈ। (ਮਾਂ ਲਈ ਸ਼ੁਭ ਕਾਮਨਾਵਾਂ ਹੈ) ਮਾਂ ਤੇਰੀ ਹਰ ਖੇਤਰ ਵਿਚ ਜਿੱਤ ਹੋਵੇ। ਜਿਸ ਵਰਗ ਸਬੰਧੀ ਵਿਵਾਦ ਛਿੜਿਆ ਹੈ, ਉਸ ਨੇ ਭਾਰਤ ਦੀ ਜੈ ਲਈ ਫਾਂਸੀ ਦੇ ਰੱਸਿਆਂ ਨੂੰ ਚੁੰਮਿਆ ਅਤੇ ਖ਼ੂਨ ਦੀ ਹੋਲੀ ਵੀ ਖੇਡੀ। ਮੌਲਾਨਾ ਹਜ਼ਰਤ ਮਗਨੀ ਕਾਲੇ ਪਾਣੀ ਦੀ ਜੇਲ੍ਹ ਕੱਟਦੇ ਰਹੇ, ਸੁਰਾਜ਼-ਉਲ-ਦੌਲਾ ਅੰਗਰੇਜ਼ੀ ਸਰਕਾਰ ਵਿਰੁੱਧ ਲੜਦੇ ਹੋਏ ਪਲਾਸੀ ਦੀ ਲੜਾਈ ਵਿਚ ਮਾਂ ਭਾਰਤ ਦੇ ਕੰਮ ਆਏ। 1761 ਵਿਚ ਮਜਨੂ ਸ਼ਾਹ ਮਸਤਾਨਾ ਬੰਗਾਲੀ ਅੰਗਰੇਜ਼ੀ ਕੌਮ ਦੇ ਨਾਲ ਟੱਕਰ ਲੈਂਦੇ ਹੋਏ ਮਾਤਾ ਦੀ ਜੈ ਜੈ ਕਾਰ ਕਰਦੇ ਹੋਏ ਸ਼ਹੀਦ ਹੋਏ। 1764 ਈ: ਵਿਚ ਨਵਾਬ ਰਹਿਮਤ ਖ਼ਾਨ ਅਤੇ ਉਨ੍ਹਾਂ ਦੇ ਸਾਥੀ ਅੰਗਰੇਜ਼ਾਂ ਨਾਲ ਲੜਦੇ ਰਹੇ। 1799 ਈ: ਵਿਚ ਟੀਪੂ ਸੁਲਤਾਨ ਨੇ ਮਾਂ ਭਾਰਤ ਦੀ ਆਜ਼ਾਦੀ ਹਿਤ ਅੰਗਰੇਜ਼ਾਂ ਦੀ ਜ਼ਾਲਮ ਕੌਮ ਨਾਲ ਭਿੜਦੇ ਹੋਏ ਸ਼ਹਾਦਤ ਦਾ ਜਾਮ ਪੀਤਾ। 1826 ਤੋਂ ਲੈ ਕੇ 1835 ਵਿਚ ਸਈਦ ਅਹਿਮਦ ਸ਼ਹੀਦ ਬਰੇਲਵੀ, 1831 ਵਿਚ ਸ਼ਾਹ ਅਸਮਤ ਉੱਲਾ ਤੇ ਉਨ੍ਹਾਂ ਦੇ ਬਹੁਤ ਸਾਰੇ ਸਾਥੀ ਬਾਲਾ ਕੋੜ ਦੀਆਂ ਪਹਾੜੀਆਂ ਵਿਚ ਮਾਦਰੇ ਵਤਨ ਲਈ ਖ਼ੂਨ ਦੀ ਹੋਲੀ ਖੇਡ ਗਏ। ਇਤਿਹਾਸ ਦੇ ਸੀਨੇ ਵਿਚ ਦੱਬੇ ਸ਼ਾਹ ਵਲੀ ਉੱਲ ਦੇਹਲਵੀ ਇਨ੍ਹਾਂ ਦੇ ਪੁੱਤਰ ਅਬਦੁਲ ਅਜ਼ੀਜ਼ ਸਈਦ ਅਹਿਮਦ ਸ਼ਹੀਲ ਨੇ 1857 ਦੀ ਆਜ਼ਾਦੀ ਦੀ ਪਹਿਲੀ ਲੜਾਈ ਲਈ ਰਾਹ ਸੁਖਾਲਾ ਕੀਤਾ। ਅੱਜ ਇਨ੍ਹਾਂ ਸ਼ਹੀਦਾਂ ਨੂੰ ਕੌਣ ਯਾਦ ਕਰਦਾ ਹੈ? ਬੜੇ ਅਫਸੋਸ ਨਾਲ ਕਹਿਣਾ ਪੈਂਦਾ ਹੈ ਕਿ ਮਹਾਤਮਾ ਗਾਂਧੀ ਦੀ ਡਾਂਡੀ ਯਾਤਰਾ ਅਤੇ ਨਾ ਮਿਲਵਰਤਨ ਅੰਦੋਲਨ ਜਿਹੀਆਂ ਲਹਿਰਾਂ ਵਿਚ ਭਾਰਤ ਦੇ ਹਰ ਧਰਮ ਦੇ ਦੇਸ਼ ਭਰਾਵਾਂ ਨੇ ਹਿੱਸਾ ਲਿਆ ਪਰ ਕੁਝ ਕੱਟੜਪੰਥੀ ਲੋਕਾਂ ਨੇ ਇਨ੍ਹਾਂ ਅੰਦੋਲਨਾਂ ਦਾ ਬਾਈਕਾਟ ਕੀਤਾ। ਪਰ ਉਹ ਅੱਜ ਦੇਸ਼ ਭਗਤ ਹੋਣ ਦੀ ਫੀਤੀ ਲਾਈ ਫਿਰਦੇ ਹਨ। ਮਾਦਰੇ ਵਤਨ ਭਾਵ ਮਾਂ ਨੂੰ ਕੁਰਾਨੇ ਪਾਕ ਵਿਚ 75 ਫ਼ੀਸਦੀ ਹਕੂਕ ਪੁੱਤਰ ਵੱਲੋਂ ਦੇਣ ਦਾ ਐਲਾਨ ਕੀਤਾ ਹੈ। ਹਦੀਸ ਕੁਰਾਨ ਇਸ ਚੀਜ਼ ਦੀ ਗਵਾਹੀ ਦਿੰਦਾ ਹੈ ਕਿ ਮਾਂ ਦੇ ਕਦਮਾਂ ਤਲੇ ਜੰਨਤ ਹੈ ਅਤੇ ਬਾਪ ਜੰਨਤ ਦਾ ਦਰਵਾਜ਼ਾ ਹੈ। ਮਾਦਰੇ ਵਤਨ ਲਈ ਭਾਰਤ ਮਾਤਾ ਦੀ ਜੈ ਜਾਂ ਨੇਕ ਖਵਾਸ਼ਿਆਤ 'ਤੇ ਕਿਸੇ ਨੂੰ ਵੀ ਇਤਰਾਜ਼ ਨਹੀਂ ਹੋਣਾ ਚਾਹੀਦਾ। ਪਰ ਹਾਂ (ਹੱਕ ਤੇ ਸੱਚ ਇਹ ਹੈ ਕਿ ਮਾਦਰੇ ਵਤਨ ਸਾਨੂੰ ਮਹਿਬੂਬ (ਪਿਆਰੀ) ਹੈ। ਇਹ ਮਾਬੂਦ (ਸਜਦਾ ਕਰਨ ਯੋਗ) ਨਹੀਂ ਹੈ। ਸਜਦਾ ਕਰਨ ਦਾ ਹੱਕ ਕੇਵਲ ਇਕ ਹੀ ਈਸ਼ਵਰ ਨੂੰ ਹੈ। ਇਹ ਉਹ ਤੌਹੀਦ ਹੈ ਜਿਸ ਦਾ ਨਾਅਰਾ ਬਾਬਾ ਨਾਨਕ ਤੇ ਸਾਰੇ ਸੂਫ਼ੀ ਫ਼ਕੀਰਾਂ, ਵਲੀ ਅੱਲ੍ਹਾ ਤੇ ਪੈਗੰਬਰਾਂ ਨੇ ਲਾਇਆ। ਸਜਦਾ ਕਰਨ ਦਾ ਅਧਿਕਾਰ ਕੇਵਲ ਕਾਦਿਰ ਨੂੰ ਹੈ। ਕੁਦਰਤ ਨੂੰ ਪਿਆਰ ਕਰਨ ਦਾ ਹੱਕ ਹੈ। ਖਲਕ ਦੇ ਮਾਲਕ ਨੂੰ ਅਸੀਂ ਸਜਦਾ ਕਰਦੇ ਹਾਂ, ਉਸ ਦੀ ਬਣਾਈ ਹੋਈ ਖਲਕਤ ਨੂੰ ਪਿਆਰ ਅਤੇ ਮੁਹੱਬਤ ਦਿੰਦੇ ਹਾਂ। ਪਰਵਰਦਿਗਾਰ ਆਲਮ ਕੇਵਲ ਇਕ ਹੈ। ਉਹੀ ਕੁੱਲੇ ਸ਼ਾਇਨੇ ਕਦੀਰ ਹੈ (ਨਿਰੰਕਾਰ ਅਕਾਲ ਪੁਰਖ) ਹੈ, ਉਸ ਦੀ ਕੁਦਰਤ ਨੇ ਸਾਰੇ ਆਲਮ ਜਾਂ ਬ੍ਰਹਿਮੰਡ ਨੂੰ ਆਪਣੇ ਦਾਇਰੇ ਅੰਦਰ ਸਮੇਟਿਆ ਹੋਇਆ ਹੈ। ਉਸ ਨੂੰ ਅਸੀਂ ਸਜਦਾ ਕਰਦੇ ਹਾਂ ਉਹੀ ਬਸ ਇਕੋ ਇਕ ਉਹ ਸਾਡਾ ਮਾਬੂਦ ਹੈ। ਮਾਦਰੇ ਵਤਨ ਸਾਨੂੰ ਮਹਿਬੂਬ ਹੈ। ਇਹ ਮਾਬੂਦ ਨਹੀਂ ਹੋ ਸਕਦੀ।


-ਡਾ: ਮੁਹੰਮਦ ਸ਼ਮੀ ਅਨਸਾਰੀ
ਪੀਰਾਂ ਵਾਲਾ ਗੇਟ, ਪੀਰ ਬਨ੍ਹਾਂ ਬਨੋਈ ਰੋਡ, ਸੁਨਾਮ।
ਮੋਬਾਈਲ : 92178-43100.

27-03-2016

 ਪੰਜਾਬ ਦੇ ਪਾਣੀਆਂ ਦਾ ਮੁੱਦਾ
ਪੰਜਾਬ ਸੂਬੇ ਦਾ ਨਾਂਅ ਹੀ ਪੰਜ-ਆਬ ਤੋਂ ਪਿਆ ਹੈ, ਜੇਕਰ ਕੇਂਦਰ ਦੀਆਂ ਨੀਤੀਆਂ ਨੂੰ ਮੰਨਿਆ ਗਿਆ ਤਾਂ ਪੰਜਾਬ ਮਾਰੂਥਲ ਬਣ ਕੇ ਤਬਾਹੀ ਦੇ ਕੰਢੇ 'ਤੇ ਖੜ੍ਹ ਜਾਵੇਗਾ ਤੇ ਮਾਲਵਾ ਤਾਂ ਪੂਰੀ ਤਰ੍ਹਾਂ ਪ੍ਰਭਾਵਿਤ ਹੋ ਜਾਵੇਗਾ। ਕਿਸੇ ਵੀ ਸਿਆਸੀ ਪਾਰਟੀ ਨੂੰ ਪਾਣੀ ਦੇ ਮੁੱਦੇ 'ਤੇ ਸਿਆਸਤ ਨਹੀਂ ਕਰਨੀ ਚਾਹੀਦੀ, ਜਿਸ ਤਰ੍ਹਾਂ ਪਹਿਲਾਂ ਕੈਪਟਨ ਅਮਰਿੰਦਰ ਸਿੰਘ ਦੀ ਸਰਕਾਰ ਸਮੇਂ ਅਕਾਲੀ ਦਲ ਨੇ ਵਿਰੋਧੀ ਧਿਰ ਵਜੋਂ ਸਾਰਥਿਕ ਭੂਮਿਕਾ ਨਿਭਾਅ ਕੇ ਪਾਣੀਆਂ ਦੀ ਰਾਖੀ ਲਈ ਰੋਲ ਅਦਾ ਕੀਤਾ ਸੀ, ਹੁਣ ਬਾਕੀਆਂ ਪਾਰਟੀਆਂ ਨੂੰ ਸਾਥ ਦੇਣਾ ਚਾਹੀਦਾ ਹੈ। ਸਰਕਾਰ ਨੂੰ ਵੀ ਅਵੇਸਲਾਪੁਣਾ ਛੱਡ ਕੇ ਡਟ ਕੇ ਕੇਸ ਦੀ ਪੈਰਵਾਈ ਵੱਲ ਧਿਆਨ ਦੇਣਾ ਚਾਹੀਦਾ ਹੈ। ਜੇਕਰ ਪਾਣੀਆਂ ਦੀ ਲੜਾਈ ਹਾਰ ਗਏ ਤਾਂ ਪਛਤਾਵੇ ਤੇ ਬਰਬਾਦੀ ਤੋਂ ਬਿਨਾਂ ਪੱਲੇ ਕੁਝ ਵੀ ਨਹੀਂ ਪੈਣਾ।


-ਮਨਜੀਤ ਸਿੰਘ ਭਾਮ
ਸੂਬਾ ਪ੍ਰਧਾਨ, ਮਨੁੱਖੀ ਅਧਿਕਾਰ ਸੰਗਠਨ ਪੰਜਾਬ।

ਪ੍ਰਵਾਸ ਕਿਉਂ?
ਧੋਖੇਬਾਜ਼ ਟਰੈਵਲ ਏਜੰਟਾਂ ਨੂੰ ਵੱਡੀਆਂ ਰਕਮਾਂ ਦੇ ਕੇ ਅਤੇ ਆਪਣੇ ਪਰਿਵਾਰਾਂ ਨੂੰ ਇਕੱਲਿਆਂ ਛੱਡ ਕੇ ਆਖਰ ਕਿਉਂ ਨੌਜਵਾਨਾਂ ਵਿਚ ਵਿਦੇਸ਼ ਜਾਣ ਦੀ ਹੋੜ ਲੱਗੀ ਹੋਈ ਹੈ? ਇਹ ਇਕ ਵੱਡਾ ਸਵਾਲ ਹੈ। ਸ਼ਾਇਦ ਇਸ ਦਾ ਸਭ ਤੋਂ ਵੱਡਾ ਕਾਰਨ ਸਰਕਾਰਾਂ ਦੀਆਂ ਗ਼ਲਤ ਨੀਤੀਆਂ ਅਤੇ ਸਾਡੀਆਂ ਆਪਣੀਆਂ ਬੇਲੋੜੀਆਂ ਵਧੀਆ ਹੋਈਆਂ ਖਾਹਿਸ਼ਾਂ ਹੀ ਹਨ। ਸਰਕਾਰਾਂ ਨੂੰ ਚਾਹੀਦਾ ਹੈ ਕਿ ਉਹ ਦੇਸ਼ ਵਿਚ ਹੀ ਰੁਜ਼ਗਾਰ ਦੇ ਮੌਕੇ ਪੈਦਾ ਕਰਨ ਤੇ ਹਰ ਮਿਹਨਤਕਸ਼ ਨੂੰ ਉਸ ਦੀ ਮਿਹਨਤ ਦਾ ਪੂਰਾ ਹੱਕ ਦੇਣ। ਨੌਜਵਾਨ ਵੀ ਆਪਣੇ ਦੇਸ਼ ਵਿਚ ਹੱਥੀਂ ਕੰਮ ਕਰਨ ਨੂੰ ਪਹਿਲ ਦੇਣ, ਕੋਈ ਵੀ ਕੰਮ ਕਰਨ ਤੋਂ ਝਿਜਕਣ ਨਾ, ਜਿਸ ਤਰ੍ਹਾਂ ਵਿਦੇਸ਼ਾਂਵਿਚ ਜਾ ਕੇ ਹਰ ਕੰਮ ਕਰਨ ਨੂੰ ਤਰਜੀਹ ਦਿੱਤੀ ਜਾਂਦੀ ਹੈ। ਸਾਨੂੰ ਸੰਜਮ ਵਾਲਾ ਜੀਵਨ ਜਿਊਣਾ ਚਾਹੀਦਾ ਹੈ ਅਤੇ ਫੋਕੀ ਦਿਖਾਵੇ ਵਾਲੀ ਜ਼ਿੰਦਗੀ ਤੋਂ ਪ੍ਰਹੇਜ਼ ਕਰਨਾ ਚਾਹੀਦਾ ਹੈ। ਇਸ ਤਰ੍ਹਾਂ ਹੀ ਇਨ੍ਹਾਂ ਭਿਆਨਕ ਹਾਦਸਿਆਂ ਨੂੰ ਵਾਪਰਨ ਤੋਂ ਰੋਕਿਆ ਜਾ ਸਕਦਾ ਹੈ।


ਸੁਖਵਿੰਦਰ ਕੌਰ ਢੱਟ
ਪਿੰਡ ਤੇ ਡਾਕ: ਢੱਟ, (ਮੁੱਲਾਂਪੁਰ) ਜ਼ਿਲ੍ਹਾ ਲੁਧਿਆਣਾ।


ਸਬਰ ਸੰਤੋਖ

ਅੱਜ ਦਾ ਮਨੁੱਖ ਕਿੰਨੀ ਤਰੱਕੀ ਕਰ ਗਿਆ ਹੈ। ਕਿੰਨੀਆਂ ਸੁਖ ਸਹੂਲਤਾਂ ਮਾਣਨ ਨੂੰ ਮਿਲ ਰਹੀਆਂ ਹਨ। ਪਿੰਡਾਂ ਵਿਚ ਵੀ ਸ਼ਹਿਰਾਂ ਵਰਗੀਆਂ ਸੁੱਖ ਸਹੂਲਤਾਂ ਮਿਲ ਰਹੀਆਂ ਹਨ ਪਰ ਮਨੁੱਖ ਵਿਚੋਂ ਸਬਰ ਸੰਤੋਖ ਨਾਂਅ ਦੀ ਚੀਜ਼ ਗਾਇਬ ਹੋ ਗਈ ਹੈ। ਪੁਰਾਣੇ ਸਮਿਆਂ ਵਿਚ ਲੋਕ ਇਕ-ਦੂਜੇ ਨੂੰ ਮਿਲਦੇ 'ਰੱਬ ਦਾ ਦਿੱਤਾ ਸਭ ਕੁਝ ਹੈ' ਪਰਮਾਤਮਾ ਦੀ ਬੜੀ ਮਿਹਰ ਹੈ, ਕਿਸੇ ਚੀਜ਼ ਦੀ ਥੁੜ੍ਹ ਨਹੀਂ' ਆਦਿ ਸ਼ਬਦ ਇਕ-ਦੂਜੇ ਨੂੰ ਸੰਬੋਧਨ ਹੋ ਕੇ ਕਹੇ ਜਾਂਦੇ ਸਨ। ਸਮਾਜ ਵਿਚ ਹੋ ਰਹੀ ਉਥਲ-ਪੁਥਲ ਨੇ ਸਬਰ ਸੰਤੋਖ ਜੀਵਨ ਵਿਚੋਂ ਖਤਮ ਕਰ ਦਿੱਤਾ ਹੈ। ਪੈਸਿਆਂ ਦੀ ਦੌੜ ਵਿਚ ਲੋਕ ਆਪਣਿਆਂ ਨੂੰ ਠਿੱਬੀਆਂ ਲਾਉਣੋਂ ਬਾਜ਼ ਨਹੀਂ ਆਉਂਦੇ। ਭਰਾਵਾਂ-ਭਰਾਵਾਂ 'ਚੋਂ ਪਿਆਰ ਖਤਮ ਹੋ ਗਿਆ ਹੈ। ਸਬਰ ਸੰਤੋਖ ਖਤਮ ਹੁੰਦਿਆਂ ਹੀ ਅੱਜ ਦੇ ਮਨੁੱਖ ਦੀ ਜ਼ਿੰਦਗੀ ਨਰਕ ਤੋਂ ਘੱਟ ਨਹੀਂ। ਗੁਰਬਾਣੀ ਦਾ ਕਥਨ ਹੈ ਕਿ ਸਬਰ ਸੰਤੋਖ ਤੋਂ ਬਿਨਾਂ ਰੱਜਿਆ ਮਨੁੱਖ ਵੀ ਭੁੱਖਾ ਦਿਖਾਈ ਦਿੰਦਾ ਹੈ। ਸਬਰ ਸੰਤੋਖ ਅੱਜ ਦੇ ਸਮੇਂ ਦੀ ਮੁੱਖ ਲੋੜ ਹੈ। ਨਹੀਂ ਤਾਂ ਹਾਓਕੇ ਲੈ ਕੇ ਕਿੰਨਾ ਕੁ ਚਿਰ ਜੀਵਾਂਗੇ?

-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।

24-03-2016

 ਚੰਡੀਗੜ੍ਹ ਹਵਾਈ ਅੱਡਾ
ਸਾਡੇ ਪੰਜਾਬ ਦੀਆਂ ਵੱਖ-ਵੱਖ ਪਾਰਟੀਆਂ ਦੇ ਆਗੂ ਚੰਡੀਗੜ੍ਹ ਹਵਾਈ ਅੱਡੇ ਦੇ ਨਾਂਅ ਨੂੰ ਲੈ ਕੇ ਤਾਂ ਬੜੇ ਜ਼ੋਰ-ਸ਼ੋਰ ਨਾਲ ਬਿਆਨ ਦਿੰਦੇ ਰਹੇ ਹਨ ਪਰ ਇਨ੍ਹਾਂ ਵਿਚੋਂ ਕੋਈ ਵੀ ਇਥੋਂ ਕੌਮਾਂਤਰੀ ਉਡਾਣਾਂ ਸ਼ੁਰੂ ਕਰਵਾਉਣ ਲਈ ਚਾਰਾਜੋਈ ਨਹੀਂ ਕਰ ਰਿਹਾ। ਇਥੋਂ ਕੌਮਾਂਤਰੀ ਉਡਾਣਾਂ ਸ਼ੁਰੂ ਹੋਣੀਆਂ ਪੰਜਾਬੀਆਂ ਦੀ ਇਕ ਬੇਹੱਦ ਜ਼ਰੂਰੀ ਲੋੜ ਹੈ। ਪੰਜਾਬ ਦੇ ਸੰਸਦ ਮੈਂਬਰ ਵੀ ਇਸ ਸਬੰਧੀ ਕੋਈ ਆਵਾਜ਼ ਨਹੀਂ ਉਠਾ ਰਹੇ। ਕੇਂਦਰ ਸਰਕਾਰ ਨੂੰ ਵੀ ਇਸ ਪਾਸੇ ਧਿਆਨ ਦੇ ਕੇ ਤੁਰੰਤ ਚੰਡੀਗੜ੍ਹ ਤੋਂ ਕੌਮਾਂਤਰੀ ਉਡਾਣਾਂ ਸ਼ੁਰੂ ਕਰਨੀਆਂ ਚਾਹੀਦੀਆਂ ਹਨ।


-ਐਨ.ਐਸ. ਬੱਗਾ
200, ਗਰੀਨ ਪਾਰਕ, ਜਲੰਧਰ।


ਸਬਜ਼ਬਾਗ
ਅੱਤਵਾਦ ਸਾਰੇ ਸੰਸਾਰ ਦੀ ਇਕ ਵੱਡੀ ਤ੍ਰਾਸਦੀ ਬਣਦਾ ਜਾ ਰਿਹਾ ਹੈ। ਕੱਟੜਤਾ ਨੂੰ ਅੰਧਵਿਸ਼ਵਾਸ ਤੇ ਰੂੜ੍ਹੀਵਾਦੀ ਸੋਚ ਕਹਿ ਲਈਏ ਤਾਂ ਕੋਈ ਅੱਤਕਥਨੀ ਨਹੀਂ ਹੈ। ਸਾਡੇ ਧਾਰਮਿਕ ਆਗੂ ਬਾਬੇ, ਤਾਂਤਰਿਕ ਤੇ ਚਾਤੁਰ ਲੋਕ ਵਹਿਮਾਂ-ਭਰਮਾਂ ਨੂੰ ਫੈਲਾਉਂਦੇ ਹਨ। ਬਹੁਗਿਣਤੀ ਭਾਰਤਵਾਸੀ ਇਸ ਕੋੜ੍ਹ ਦਾ ਸ਼ਿਕਾਰ ਹਨ। ਸਾਡੇ ਕਾਨੂੰਨਸਾਜ਼ ਵੀ ਕਈ ਪੱਖਾਂ ਤੋਂ ਇਸ ਦੀ ਪ੍ਰੋੜ੍ਹਤਾ ਕਰਕੇ ਸਿਆਸਤ ਖੇਡਦੇ ਹਨ। ਗ਼ੈਰ-ਵਿਗਿਆਨਕ ਦਸਤੂਰ ਤਬਾਹੀ ਵੱਲ ਲਿਜਾ ਰਹੇ ਹਨ। ਆਮ ਲੋਕ ਕਈ ਪ੍ਰਕਾਰ ਦੇ ਦੁਖਾਂਤ ਭੋਗ ਰਹੇ ਹਨ। 99 ਫ਼ੀਸਦੀ ਰਾਜ ਨੇਤਾ ਸਬਜ਼ਬਾਗ ਦਿਖਾਓ ਤੇ ਵੋਟ ਬੈਂਕ ਬਣਾਓ ਦੇ ਫਾਰਮੂਲੇ 'ਤੇ ਹੀ ਚਲਦੇ ਹਨ।


-ਮਾ: ਮਹਿੰਦਰ ਸਿੰਘ ਸਿੱਧੂ
ਸਿੱਧਵਾਂ ਕਲਾਂ, ਜ਼ਿਲ੍ਹਾ ਲੁਧਿਆਣਾ।


ਸਿਆਸੀ ਮਾਹੌਲ ਭਖਿਆ
ਜਿਵੇਂ-ਜਿਵੇਂ ਪੰਜਾਬ ਵਿਚ ਵਿਧਾਨ ਸਭਾ ਚੋਣਾਂ ਦਾ ਸਮਾਂ ਨੇੜੇ ਆ ਰਿਹਾ ਹੈ, ਉਵੇਂ-ਉਵੇਂ ਹੀ ਪੰਜਾਬ ਦਾ ਸਿਆਸੀ ਮਾਹੌਲ ਵੀ ਭਖਦਾ ਜਾ ਰਿਹਾ ਹੈ। ਅੱਜ ਪੰਜਾਬ ਦੀਆਂ ਤਕਰੀਬਨ ਸਾਰੀਆਂ ਹੀ ਸਿਆਸੀ ਧਿਰਾਂ ਸਰਗਰਮ ਹੋ ਗਈਆਂ ਜਾਪ ਰਹੀਆਂ ਹਨ। ਰੈਲੀਆਂ-ਕਾਨਫ਼ਰੰਸਾਂ ਵਿਚ ਵੱਡੇ-ਵੱਡੇ ਇਕੱਠ ਵਿਖਾਏ ਜਾਣ ਲਈ ਅੱਡੀ ਚੋਟੀ ਦੇ ਜ਼ੋਰ ਲਗਦੇ ਆਮ ਵੇਖਣ ਨੂੰ ਮਿਲ ਰਹੇ ਹਨ। ਅੱਜ ਭਾਵੇਂ ਪੰਜਾਬ ਦੀ ਜਨਤਾ ਬੇਹੱਦ ਸਿਆਣੀ ਹੋ ਗਈ ਹੈ ਪਰ ਫਿਰ ਵੀ ਸਿਆਸਤਦਾਨਾਂ ਵੱਲੋਂ ਲੱਛੇਦਾਰ ਭਾਸ਼ਣਾਂ ਰਾਹੀਂ ਉਹੀ ਸਬਜ਼ਬਾਗ ਵਿਖਾਏ ਜਾ ਰਹੇ ਹਨ ਜੋ ਅੱਜ ਤੋਂ ਚਾਰ ਸਾਲ ਪਹਿਲਾਂ ਜਾਂ ਇਸ ਤੋਂ ਵੀ ਪਹਿਲਾਂ ਸੁਣਨ ਨੂੰ ਮਿਲਦੇ ਰਹੇ ਹਨ। ਕਈ ਸਿਆਸਤਦਾਨ ਤਾਂ ਮਿਆਰ ਤੋਂ ਗਿਰੀ ਸ਼ਬਦਾਵਲੀ ਵਰਤਣ 'ਤੇ ਉਤਾਰੂ ਹੋ ਗਏ ਹਨ। ਇਸ ਤਰ੍ਹਾਂ ਕਰਕੇ ਭਾਵੇਂ ਉਹ ਆਪਣਾ ਹੀ ਕੱਦ ਛੋਟਾ ਕਰ ਰਹੇ ਹਨ। ਅੱਜ ਇਸ ਗੱਲ ਤੋਂ ਮੁਨਕਰ ਨਹੀਂ ਹੋਇਆ ਜਾ ਸਕਦਾ ਕਿ ਪੰਜਾਬ ਦੀਆਂ ਤਿੰਨੋਂ ਪ੍ਰਮੁੱਖ ਪਾਰਟੀਆਂ ਅਕਾਲੀ ਦਲ, ਕਾਂਗਰਸ ਤੇ ਆਪ ਸ਼ਸ਼ੋਪੰਜ 'ਚ ਹਨ ਕਿ ਆਖਰ ਪੰਜਾਬ ਦੀ ਜਨਤਾ ਕਿਸ ਪਾਰਟੀ ਨੂੰ ਪੰਜਾਬ ਦੀ ਵਾਗਡੋਰ ਸੌਂਪਦੀ ਹੈ। ਭਾਵੇਂ ਵਿਧਾਨ ਸਭਾ ਚੋਣਾਂ 'ਚ ਇਕ ਸਾਲ ਦਾ ਸਮਾਂ ਪਿਆ ਹੈ ਪਰ ਵੱਡੇ ਆਗੂਆਂ ਦਾ ਇਕ ਪਾਰਟੀ 'ਚੋਂ ਦੂਜੀ ਪਾਰਟੀ 'ਚ ਜਾਣ ਨਾਲ ਸਿਆਸੀ ਮਾਹੌਲ ਪੂਰੀ ਤਰ੍ਹਾਂ ਭਖ ਗਿਆ ਹੈ। ਪੰਜਾਬ ਦੀ ਸਿਆਸਤ 'ਚ ਦਿਲਚਸਪੀ ਲੈਣ ਵਾਲੇ ਲੋਕ ਸਿਆਸੀ ਸਰਗਰਮੀਆਂ ਤੋਂ ਅੱਜ ਪੂਰਾ-ਪੂਰਾ ਲੁਤਫ਼ ਲੈ ਰਹੇ ਹਨ।


-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

23-03-2016

ਸ਼ਹੀਦ-ਏ-ਆਜ਼ਮ

ਸ਼ਹੀਦ ਕੌਮ ਦਾ ਅਮੁੱਲ ਸਰਮਾਇਆ ਹੁੰਦੇ ਹਨ, ਇਨ੍ਹਾਂ ਮਹਾਨ ਸ਼ਹੀਦਾਂ ਦੀਆਂ ਪੈੜਾਂ 'ਤੇ ਚੱਲ ਕੇ ਹੀ ਦੇਸ਼ ਦੀ ਨੁਹਾਰ ਬਦਲੀ ਜਾ ਸਕਦੀ ਹੈ। ਇਨ੍ਹਾਂ ਸ਼ਹੀਦਾਂ ਵਿਚੋਂ ਹੀ ਇਕ ਵਿਲੱਖਣ ਨਾਂਅ ਹੈ ਸ਼ਹੀਦ ਭਗਤ ਸਿੰਘ, ਜਿਸ ਦੀ ਸੋਚ ਚੜ੍ਹਦੀ ਉਮਰੇ ਹੀ ਦੇਸ਼ ਨੂੰ ਸਮਰਪਿਤ ਹੋ ਗਈ। ਜਿਸ ਦਾ ਮਹਾਨ ਵਿਚਾਰ ਸੀ, ਇਕ ਅਖੰਡ ਰਾਸ਼ਟਰ ਦੀ ਉੱਨਤੀ ਲਈ ਦੇਸ਼ ਦੇ ਨੌਜਵਾਨਾਂ ਵਿਚ ਦੇਸ਼ ਭਗਤੀ ਦਾ ਜਜ਼ਬਾ ਪੈਦਾ ਕਰਨਾ ਜ਼ਰੂਰੀ ਹੈ। ਇਸ ਮਹਾਨ ਆਜ਼ਾਦੀ ਪਰਵਾਨੇ ਦੀ ਬਦੌਲਤ ਹੀ ਅਸੀਂ ਲੰਮੇ ਸਮੇਂ ਦੀ 'ਗੋਰੀ ਚਮੜੀ' ਦੀ ਗੁਲਾਮੀ ਤੋਂ ਮੁਕਤ ਹੋਏ। ਪਰ ਅੱਜ 'ਵਕਤ ਦੇ ਕੈਨਵਸ' ਤੋਂ ਉਸ ਮਹਾਨ ਸਪੂਤ ਦੀ ਤਸਵੀਰ ਕਿਤੇ ਧੁੰਦਲੀ ਤਾਂ ਨਹੀਂ ਹੋ ਰਹੀ, ਕਿਤੇ ਉਸ ਦੇ ਬਣਾਏ ਰਾਹ ਤੋਂ ਅਸੀਂ ਕੁਰਾਹੇ ਤਾਂ ਨਹੀਂ ਪੈ ਰਹੇ। ਸਾਡੇ ਜ਼ਿਹਨ 'ਚ ਉਸ ਦੀ ਸੋਚ ਉੱਡ ਤਾਂ ਨਹੀਂ ਰਹੀ। ਉਸ ਦੀ ਸ਼ਹਾਦਤ 'ਯੰਗ ਬਲੱਡ' ਲਈ ਇਕ ਵੰਗਾਰ ਹੀ ਤਾਂ ਹੈ। ਸਾਡੇ ਲਈ ਉਸ ਦੀ ਕੀਤੀ ਲਾਸਾਨੀ ਕੁਰਬਾਨੀ ਅਜਾਈਂ ਨਾ ਜਾਏ। ਉਸ ਵਾਂਗ ਹੀ ਸਾਡੇ ਨੌਜਵਾਨਾਂ ਦੀ ਸੋਚ ਦੇਸ਼ ਨੂੰ ਸਮਰਪਿਤ ਹੋਵੇ ਨਾ ਕਿ ਚਿੱਟੇ ਦੇ ਸਮੁੰਦਰ 'ਚ ਡੁੱਬ ਕਿਸੇ ਵਿਦੇਸ਼ੀ ਦੇ ਮੁੜ ਗੁਲਾਮ ਹੋ ਜਾਈਏ। ਕੇਵਲ ਆਪਣੇ ਵਹੀਕਲਾਂ 'ਤੇ ਉਸ ਦੀ 'ਖਾੜਕੂ ਛਵੀ' ਵਾਲੀ ਤਸਵੀਰ ਲਟਕਾ ਕੇ ਮਹਾਨ ਨਹੀਂ ਬਣਿਆ ਜਾ ਸਕਦਾ, ਬਲਕਿ ਉਸ ਦੇ ਪੂਰਨਿਆਂ 'ਤੇ ਚੱਲ ਕੇ ਹੀ ਮਹਾਨ ਅਖਵਾਇਆ ਜਾ ਸਕਦਾ ਹੈ।


-ਜਸਬੀਰ ਦੱਧਾਹੂਰ

ਪਿੰਡ ਤੇ ਡਾਕ: ਦੱਧਾਹੂਰ, ਤਹਿ: ਰਾਇਕੋਟ, ਜ਼ਿਲ੍ਹਾ ਲੁਧਿਆਣਾ।


ਆਬਾਦੀ ਘਟਾਓ ਪਾਣੀ ਬਚਾਓ

ਧਰਤੀ ਉੱਤੇ ਪੈਦਾ ਹੋਣ ਵਾਲੇ ਹਰੇਕ ਜੀਵ ਦੀ ਪਿਆਸ ਬੁਝਾਉਣ ਅਤੇ ਖੇਤੀਬਾੜੀ ਨੂੰ ਬਚਾਉਣ ਲਈ ਦੇਸ਼ ਦੀ 125 ਕਰੋੜ ਤੋਂ ਟੱਪ ਚੁੱਕੀ ਆਬਾਦੀ ਨੂੰ ਦੇਸ਼ ਵੰਡ ਵੇਲੇ ਦੀ ਕੁੱਲ 35 ਕਰੋੜ ਆਬਾਦੀ ਦੇ ਨੇੜੇ-ਤੇੜੇ ਲਿਆਉਣ ਦੀ ਲੋੜ ਹੈ। ਦੇਸ਼ ਦੀ ਬੇਹਿਸਾਬੀ ਵਧੀ ਆਬਾਦੀ ਨੇ ਅਨਾਜ ਦੀ ਮੰਗ ਵਧਾਈ ਹੈ। ਅਨਾਜ ਦੀ ਵਧੀ ਹੋਈ ਮੰਗ ਨੂੰ ਪੂਰਾ ਕਰਨ ਲਈ ਦੇਸ਼ ਵਿਚਲੇ ਬਹੁਤੇ ਜੰਗਲਾਂ ਨੂੰ ਕੱਟਣਾ ਪਿਆ ਹੈ। ਜੰਗਲਾਂ ਦੀ ਕਟਾਈ ਹੋਣ ਨਾਲ ਬਾਰਸ਼ਾਂ ਦੀ ਕਮੀ ਹੋਣ ਦੇ ਨਾਲ ਧਰਤੀ ਹੇਠਲੇ ਪਾਣੀ ਦਾ ਪੱਧਰ ਵੀ ਨੀਵਾਂ ਚਲਾ ਗਿਆ ਹੈ। ਜਿਨ੍ਹਾਂ ਰਾਜਾਂ ਕੋਲ ਦਰਿਆ ਹਨ, ਉਹ ਦੂਜੇ ਰਾਜਾਂ ਨੂੰ ਪਾਣੀ ਦੇਣ ਤੋਂ ਸੰਕੋਚ ਕਰਦੇ ਹਨ। ਅਜੋਕੇ ਸਮੇਂ ਦਰਿਆਈ ਪਾਣੀਆਂ ਦੇ ਮੁੱਦੇ ਉੱਤੇ ਪੰਜਾਬ ਤੇ ਹਰਿਆਣਾ ਦੇ ਰਾਜਾਂ ਵਿਚ ਸਿਰ ਧੜ ਦੀ ਬਾਜ਼ੀ ਲੱਗੀ ਹੋਈ ਹੈ। ਦੇਸ਼ ਦੀ ਅਸਲ ਸਮੱਸਿਆ ਦੇਸ਼ ਦੀ ਵਧੀ ਹੋਈ ਆਬਾਦੀ ਹੈ। ਸਿਆਸਤ ਨੂੰ ਵਪਾਰ ਬਣਾਈ ਬੈਠੇ ਅਜੋਕੇ ਲੀਡਰਾਂ ਨੂੰ ਗੱਦੀਦਾਰ ਬਣਾਉਣ ਲਈ ਅਨਪੜ੍ਹ ਤੇ ਗ਼ੈਰ-ਜਾਗਰੂਕ ਵੋਟਰਾਂ ਦੀ ਲੋੜ ਹੈ। ਸੋ, ਦੇਸ਼ ਦੀ ਵਧ ਰਹੀ ਆਬਾਦੀ ਨੂੰ ਕਾਬੂ ਹੇਠ ਰੱਖਣ ਲਈ ਉਹ ਕਦੇ ਸੰਜੀਦਾ ਨਹੀਂ ਹੋਏ। ਧਰਤੀ ਦੀ ਅਨਾਜ ਪੈਦਾ ਕਰਨ ਅਤੇ ਧਰਤੀ ਹੇਠਲੇ ਪਾਣੀ ਦੀ ਵੀ ਇਕ ਸੀਮਾ ਹੈ। ਸੋ, ਆਬਾਦੀ ਘਟਾਉਣ ਤੇ ਪਾਣੀ ਬਚਾਉਣ ਲਈ ਕੇਂਦਰੀ ਤੇ ਰਾਜ ਸਰਕਾਰਾਂ ਨੂੰ ਬਹੁਤ ਛੇਤੀ ਲੋੜੀਂਦੇ ਪ੍ਰਬੰਧ ਕਰਨੇ ਚਾਹੀਦੇ ਹਨ।


-ਇੰਜ: ਕੁਲਦੀਪ ਸਿੰਘ ਲੁੱਧਰ
ਗੁਰੂ ਨਾਨਕ ਵਾੜਾ, ਅੰਮ੍ਰਿਤਸਰ।

 

21-3-2016

 ਖਾਨਾ ਕਾਸ਼ਤ ਦਾ ਸਵਾਲ
1980 ਤੋਂ ਪਹਿਲਾਂ ਖੇਤੀ ਵਾਲੀਆਂ ਜ਼ਮੀਨਾਂ ਦੀ ਖਰੀਦੋ-ਫਰੋਖਤ ਖਾਨਾ ਕਾਸ਼ਤ ਵਿਚ ਹੋ ਜਾਂਦੀ ਸੀ ਪ੍ਰੰਤੂ 1980 ਤੋਂ ਸਰਕਾਰ ਨੇ ਖਾਨਾ ਕਾਸ਼ਤ ਵਿਚ ਜ਼ਮੀਨ ਖਰੀਦਣ ਅਤੇ ਵੇਚਣ ਨੂੰ ਰੋਕ ਲਗਾ ਦਿੱਤੀ ਸੀ। ਇਸ ਸਮੇਂ ਦੌਰਾਨ ਪੰਜਾਬ ਦੇ ਬਹੁਤ ਸਾਰੇ ਕਿਸਾਨਾਂ ਨੇ ਜ਼ਮੀਨਾਂ ਖਾਨਾ ਕਾਸ਼ਤ ਵਿਚ ਖਰੀਦੀਆਂ। ਖਾਨਾ ਕਾਸ਼ਤ ਤੋਂ ਖਾਨਾ ਮਾਲਕੀ ਵਿਚ ਤਬਦੀਲ ਹੋਣ ਦੀ ਪ੍ਰਕਿਰਿਆ ਬਹੁਤ ਕਠਿਨ ਤੇ ਪੇਚੀਦਾ ਹੋਣ ਕਰਕੇ ਉਸ ਸਮੇਂ ਤੋਂ ਹੀ ਇਹ ਸਾਰੀਆਂ ਜ਼ਮੀਨਾਂ ਖਾਨਾ ਕਾਸ਼ਤ ਵਿਚ ਹੀ ਚੱਲੀਆਂ ਆ ਰਹੀਆਂ ਹਨ। ਹੁਣ ਸਮਾਂ ਹੈ ਮਾਲ ਮੰਤਰੀ ਸਾਹਿਬ ਆਪਣੇ ਉੱਚ ਅਧਿਕਾਰੀਆਂ ਅਤੇ ਕਿਸਾਨ ਆਗੂਆਂ ਨਾਲ ਵਿਚਾਰ-ਵਟਾਂਦਰਾ ਕਰਕੇ, ਕੋਈ ਢੁਕਵਾਂ ਹੱਲ ਕੱਢ ਕੇ ਉਪਰੋਕਤ ਖਰੀਦੀਆਂ ਜ਼ਮੀਨਾਂ ਨੂੰ ਮਾਲਕੀ ਵਾਲੇ ਖਾਨੇ ਵਿਚ ਤਬਦੀਲ ਕਰਵਾਉਣ। ਇਸ ਤਰ੍ਹਾਂ ਹਜ਼ਾਰਾਂ ਹੀ ਕਿਸਾਨ ਰਿਣੀ ਹੋਣਗੇ।

-ਗੁਰਦੇਵ ਸਿੰਘ ਈਸਬ ਬੁੱਚਾ
ਮੋਬਾਈਲ : 98154-45264.

ਭਰੂਣ ਹੱਤਿਆ
ਸਾਡੇ ਸਮਾਜ ਵਿਚ ਭਰੂਣ ਹੱਤਿਆ ਦੇ ਖਿਲਾਫ਼ ਬਹੁਤ ਕੁਝ ਕੀਤਾ ਜਾਂਦਾ ਹੈ। ਪਰ ਇਸ ਦਾ ਕੋਈ ਖਾਸ ਨਤੀਜਾ ਨਜ਼ਰ ਨਹੀਂ ਆਉਂਦਾ ਕਿਉਂਕਿ ਆਜ਼ਾਦ ਭਾਰਤ ਵਿਚ ਔਰਤ ਜਾਤ ਅਸੁਰੱਖਿਅਤ ਹੈ। ਜੇਕਰ ਸੰਸਾਰ ਵਿਚ ਔਰਤ ਜਾਤ (ਧੀ) ਦੀ ਗਿਣਤੀ ਘਟ ਜਾਵੇ ਤੇ ਇਕ ਦਿਨ ਅਜਿਹਾ ਆ ਜਾਵੇਗਾ ਕਿ ਔਰਤ ਜਾਤ ਇਸ ਧਰਤੀ 'ਤੇ ਨਾ ਰਹੇ ਅਤੇ ਨਾ ਹੀ ਔਰਤ ਦੀ ਇੱਜ਼ਤ ਨੂੰ ਖਤਰਾ ਹੋਵੇ। ਧੀ ਜਦ ਗਰਭ ਅੰਦਰ ਹੁੰਦੀ ਹੈ ਤਾਂ ਉਸ ਨੂੰ ਜਾਨ ਗਵਾਉਣ ਦਾ ਖਤਰਾ ਹੁੰਦਾ ਹੈ। ਪਰ ਜਦ ਉਹ ਕਲਯੁਗ ਵਿਚ ਜਨਮ ਲੈਂਦੀ ਹੈ ਤਾਂ ਉਸ ਨੂੰ ਇੱਜ਼ਤ ਗਵਾਉਣ ਦਾ ਖਤਰਾ ਹੁੰਦਾ ਹੈ। ਲੋੜ ਹੈ ਧੀਆਂ ਲਈ ਸੁਰੱਖਿਅਤ ਮਾਹੌਲ ਸਿਰਜਣ ਦੀ।

-ਸਿਮਰਨਜੀਤ ਕੌਰ
ਮੋਬਾਈਲ : 84279-20841.

ਚੁਣੌਤੀਆਂ ਭਰਿਆ ਸਮਾਂ
ਪੰਜਾਬ ਦੇ ਲੋਕ ਦੋਵਾਂ ਰਵਾਇਤੀ ਪਾਰਟੀਆਂ ਤੋਂ ਅੱਕ ਚੁੱਕੇ ਹਨ। ਤੀਸਰਾ ਬਦਲ ਲੱਭ ਨਹੀਂ ਰਿਹਾ। ਦੋਵੇਂ ਪਾਰਟੀਆਂ ਆਮ ਆਦਮੀ ਪਾਰਟੀ ਤੋਂ ਡਰੀਆਂ ਹੋਈਆਂ ਹਨ। ਅਰਵਿੰਦ ਕੇਜਰੀਵਾਲ ਵੀ ਪੰਜਾਬ ਦੇ ਲੋਕਾਂ ਦੀ ਨਬਜ਼ ਜਾਂਚ ਰਹੇ ਹਨ। ਪੰਜਾਬ ਦੇ ਦੌਰੇ ਵਿਚ ਉਨ੍ਹਾਂ ਪਰਿਵਾਰਾਂ ਨੂੰ ਮਿਲੇ ਜਿਨ੍ਹਾਂ ਦੀਆਂ ਫ਼ਸਲਾਂ ਤਬਾਹ ਹੋਈਆਂ। ਉਨ੍ਹਾਂ ਪਰਿਵਾਰਾਂ ਨੂੰ ਵੀ ਮਿਲੇ ਜਿਨ੍ਹਾਂ ਆਤਮ-ਹੱਤਿਆ ਕੀਤੀ। ਉਨ੍ਹਾਂ ਨੂੰ 10-10 ਲੱਖ ਦਾ ਮੁਆਵਜ਼ਾ ਦਿੱਤਾ ਜਾਏਗਾ। ਪਰ ਸਵਾਲ ਪੈਦਾ ਹੁੰਦਾ ਹੈ ਕਿ ਪੰਜਾਬ ਦੇ ਲੋਕਾਂ ਦੀਆਂ ਖੁਦਕੁਸ਼ੀਆਂ ਤੇ ਦੁੱਖਾਂ ਨੂੰ ਦੂਰ ਹੋਣ ਦੇ ਕਾਰਨ ਦੂਰ ਨਹੀਂ ਕੀਤੇ ਜਾਂਦੇ, ਓਨਾ ਚਿਰ ਹਾਲਾਤ ਸਾਜ਼ਗਾਰ ਨਹੀਂ ਹੋ ਸਕਦੇ। ਅਸੀਂ ਕਹਿੰਦੇ ਹਾਂ ਪਹਿਲਾਂ ਦਿੱਲੀ ਦੀ ਹਾਲਤ ਠੀਕ ਕਰਕੇ ਵਿਖਾਓ, ਪੰਜਾਬ ਦੀ ਪ੍ਰਤੀਨਿਧਤਾ ਕਿਸ ਪ੍ਰਕਾਰ ਕਰਨੀ ਚਾਹੁੰਦੇ ਹੋ? ਪੰਜਾਬ ਦਾ ਪੌਣ-ਪਾਣੀ ਕਿਵੇਂ ਸਾਫ਼ ਹੋਵੇਗਾ? ਪਾਣੀ ਦੀ ਸਤ੍ਹਾ ਕਿਵੇਂ ਡਿੱਗਣੋਂ ਬਚੇਗੀ। ਕੈਂਸਰ ਦੀ ਰੋਕਥਾਮ ਕਿਵੇਂ ਹੋਵੇਗੀ? ਇਹ ਹਾਲਾਤ ਨਾ ਸੁਧਰੇ ਤਾਂ ਸੂਬਾ ਨਰਕ ਬਣ ਜਾਵੇਗਾ। ਆਉਣ ਵਾਲਾ ਸਮਾਂ ਚੁਣੌਤੀਆਂ ਭਰਿਆ ਹੈ। ਇਕ ਗੱਲ ਰਾਖਵੇਂਕਰਨ ਦੀ ਹੁੰਦੀ ਹੈ। ਜੋ ਖ਼ੁਸ਼ਹਾਲ ਹੈ ਉਸ ਨੂੰ ਰਾਖਵਾਂਕਰਨ ਦਾ ਫਾਇਦਾ ਨਹੀਂ ਉਠਾਉਣਾ ਚਾਹੀਦਾ। ਭਾਜਪਾ ਪੰਜਾਬ ਦੇ ਪਾਣੀਆਂ ਦੇ ਬਾਰੇ ਚੁੱਪ ਹੈ। ਖੁੱਲ੍ਹ ਕੇ ਕਿਉਂ ਨਹੀਂ ਬੋਲਦੀ।

-ਇਕਬਾਲ ਸਿੰਘ ਸਾਹਨੀ
ਮੋਬਾਈਲ : 99156-04031.

3-6-2015

 ਪੰਜਾਬ ਸਰਕਾਰ ਸਿੱਖਿਆ ਸਬੰਧੀ ਜ਼ਿੰਮੇਵਾਰੀ ਨਿਭਾਏ
ਪਿਛਲੇ ਦਿਨੀਂ 'ਅਜੀਤ' 'ਚ ਸ੍ਰੀ ਸਤਨਾਮ ਸਿੰਘ ਮਾਣਕ ਜੀ ਦਾ 'ਪੰਜਾਬ ਸਰਕਾਰ ਸਿੱਖਿਆ ਸਬੰਧੀ ਜ਼ਿੰਮੇਵਾਰੀ ਨਿਭਾਏ' ਸਿਰਲੇਖ ਅਧੀਨ ਲੇਖ ਪੜ੍ਹਿਆ। ਲੇਖਕ ਨੇ ਸਮੇਂ ਦੀਆਂ ਸਰਕਾਰਾਂ ਦੀ ਬੇਰੁਖ਼ੀ ਕਾਰਨ ਅਤਿ ਤਰਸਯੋਗ ਹਾਲਤ ਅਖ਼ਤਿਆਰ ਕਰ ਚੁੱਕੀ ਪੰਜਾਬ ਦੀ ਸਰਕਾਰੀ ਸਕੂਲੀ ਸਿੱਖਿਆ ਬਾਰੇ ਬੜੀ ਬੇਬਾਕੀ ਨਾਲ ਵਿਸਥਾਰਪੂਰਨ ਜਾਣਕਾਰੀ ਦਿੱਤੀ ਹੈ। ਲੇਖਕ ਸੱਚ ਲਿਖਣ ਲਈ ਪ੍ਰਸੰਸਾ ਅਤੇ ਵਧਾਈ ਦਾ ਪਾਤਰ ਹੈ। ਅਸੀਂ ਪੰਜਾਬ ਦੀ ਬਾਦਲ ਹਕੂਮਤ ਨੂੰ ਅਪੀਲ ਕਰਦੇ ਹਾਂ ਕਿ ਸਰਕਾਰੀ ਸਕੂਲਾਂ ਦਾ ਪੱਧਰ ਉੱਚਾ ਚੁੱਕੇ ਜਾਣ ਦੇ ਝੂਠੇ ਤੇ ਫੋਕੇ ਦਮਗਜ਼ੇ ਮਾਰਦੇ ਰਹਿਣ ਦੀ ਥਾਂ ਉਹ ਹਕੀਕਤ 'ਚ ਉਕਤ ਸਕੂਲਾਂ ਦੀ ਹਾਲਤ ਸੁਧਾਰਨ ਦੇ ਇਮਾਨਦਾਰੀ ਨਾਲ ਉਪਰਾਲੇ ਕਰੇ ਤਾਂ ਜੋ ਸਰਕਾਰੀ ਸਕੂਲੀ ਸਿੱਖਿਆ ਦਾ ਬੇੜਾ ਗਰਕ ਹੋਣੋਂ ਬਚਾਇਆ ਜਾ ਸਕੇ।

-ਯਸ਼ ਪੱਤੋ
ਪਿੰਡ ਤੇ ਡਾਕ : ਪੱਤੋ ਹੀਰਾ ਸਿੰਘ (ਮੋਗਾ)।

ਪਿਆਸੇ ਪੰਛੀ
ਇਨ੍ਹੀਂ ਦਿਨੀਂ ਗਰਮੀ ਦਾ ਮੌਸਮ ਜ਼ੋਰ ਫੜਦਾ ਜਾ ਰਿਹਾ ਹੈ। ਮਨੁੱਖਤਾ ਦੀ ਪਿਆਸ ਬੁਝਾਉਣ ਲਈ ਥਾਂ-ਥਾਂ ਪਾਣੀ ਦੀਆਂ ਛਬੀਲਾਂ ਲਾਈਆਂ ਜਾ ਰਹੀਆਂ ਹਨ। ਪੁਰਾਣੇ ਸਮਿਆਂ 'ਚ ਘੜਿਆਂ 'ਚ ਪਾਣੀ ਭਰ ਕੇ ਕਈ ਸੂਝਵਾਨ ਸੋਚ ਦੇ ਬੰਦੇ ਪਾਣੀ ਦੇ ਪੌਹ ਲਾਉਂਦੇ ਤਾਂ ਕਿ ਰਾਹੀ ਪਾਂਧੀ ਆਪਣੀ ਪਿਆਸ ਮਿਟਾ ਸਕਣ ਪਰ ਇਸ ਦੇ ਨਾਲ ਸਾਨੂੰ ਕੁਦਰਤ ਦੁਆਰਾ ਰਚੇ ਪੰਛੀਆਂ ਵੱਲ ਵੀ ਧਿਆਨ ਦੇਣ ਦੀ ਲੋੜ ਹੈ। ਕਈ ਪਿੰਡਾਂ ਵਿਚ ਲੱਕੜ ਦੇ ਆਲ੍ਹਣੇ ਖੰਭਿਆਂ ਤੇ ਟੰਗੇ ਹੋਏ ਹਨ ਜੋ ਕਿ ਸ਼ਲਾਘਾਯੋਗ ਕਦਮ ਹੈ। ਗਰਮੀ ਦੇ ਮੌਸਮ ਨੂੰ ਦੇਖਦੇ ਹੋਏ ਸਾਨੂੰ ਆਪਣੇ ਘਰਾਂ ਦੀਆਂ ਕੰਧਾਂ, ਛੱਤਾਂ ਜਾਂ ਬੂਹਿਆਂ ਅੱਗੇ ਮਿੱਟੀ ਦੇ ਬਣੇ ਬਰਤਨਾਂ 'ਚ ਪਾਣੀ ਭਰ ਕੇ ਰੱਖਣਾ ਚਾਹੀਦਾ ਹੈ। ਜੇਕਰ ਸਰਕਾਰੀ ਦਫ਼ਤਰਾਂ ਅੱਗੇ ਵੀ ਇਹ ਸਭ ਕੁਝ ਹੋਵੇ ਤਾਂ ਹੋਰ ਵੀ ਬਿਹਤਰ ਹੈ। ਇਸ ਪਾਣੀ ਨਾਲ ਸਾਡੇ ਆਪਣੇ ਹੀ ਮਿੱਤਰ ਪੰਛੀ, ਜੀਵ, ਜੰਤੂ ਪਾਣੀ ਪੀ ਕੇ ਆਪਣੀ ਤਿਖੜੀ ਤੇਹ ਮਿਟਾ ਸਕਣ, ਕਿਉਂਕਿ ਪਹਿਲਾਂ ਹੀ ਟਾਵਰਾਂ ਨੇ ਪੰਛੀਆਂ ਦੀਆਂ ਕਈ ਨਸਲਾਂ ਖੁੱਡੇ ਲਾਈਨ ਲਾ ਦਿੱਤੀਆਂ ਅਤੇ ਰਹਿੰਦੀਆਂ ਨੂੰ ਪਾਣੀ ਖੁਣੋਂ ਬਚਾਉਣ ਦਾ ਨਿਮਾਣਾ ਜਿਹਾ ਇਹ ਯਤਨ ਕਰੀਏ। ਆਓ! ਫਿਰ ਕੁਦਰਤ ਦੁਆਰਾ ਬਣਾਏ ਗਏ ਇਸ ਤਾਣੇ-ਬਾਣੇ ਵਿਚ ਥੋੜ੍ਹਾ ਜਿਹਾ ਧਿਆਨ ਦੇਣ ਦਾ ਯਤਨ ਕਰੀਏ। ਕੀ ਤੁਸੀਂ ਇਹ ਮੰਨਣ ਲਈ ਤਿਆਰ ਹੋ, ਜੇ ਹਾਂ ਤਾਂ ਬਿਨਾਂ ਕੁਝ ਖਰਚੇ ਇਸ ਨੇਕਦਿਲੀ ਕੰਮ ਨੂੰ ਤਰਜੀਹ ਦੇਣ ਲਈ ਯਤਨਸ਼ੀਲ ਹੋਈਏ।

-ਜਸਬੀਰ ਦੱਧਾਹੂਰ
ਪਿੰਡ ਤੇ ਡਾਕ: ਦੱਧਾਹੂਰ, ਤਹਿ: ਰਾਏਕੋਟ, ਜ਼ਿਲ੍ਹਾ ਲੁਧਿਆਣਾ।

ਫ਼ਿਰਕੂ ਟਿੱਪਣੀਆਂ
ਭਾਰਤ ਵਿਚ ਬਹੁਤ ਸਾਰੇ ਧਾਰਮਿਕ ਆਗੂ ਜਿਨ੍ਹਾਂ ਦਾ ਸਿਆਸਤ ਵਿਚ ਵੀ ਪੂਰਾ ਬੋਲਬਾਲਾ ਹੈ। ਪਰ ਕਈ ਅਜਿਹੇ ਘਟੀਆਂ ਤੇ ਫ਼ਿਰਕੂ ਬਿਆਨ ਦੇ ਕੇ ਭਾਰਤੀ ਸੰਵਿਧਾਨ, ਕਾਨੂੰਨ, ਏਕਤਾ, ਅਖੰਡਤਾ ਤੇ ਅਸੂਲਾਂ ਦੀਆਂ ਧੱਜੀਆਂ ਉਡਾ ਰਹੇ ਹਨ। ਚਾਹੀਦਾ ਤਾਂ ਇਹ ਹੈ ਕਿ ਅਜਿਹੇ ਆਗੂ ਅਮਨ, ਸ਼ਾਂਤੀ ਤੇ ਇਕਸੁਰਤਾ ਦਾ ਸੰਦੇਸ਼ ਦੇਣ ਪ੍ਰੰਤੂ ਇਹ ਜਨਤਾ ਨੂੰ ਧਰਮ ਤੇ ਜਾਤੀਆਂ ਦੀਆਂ ਵੰਡੀਆਂ 'ਚ ਪਾ ਕੇ ਖਾਨਾਜੰਗੀ ਵੱਲ ਉਕਸਾ ਰਹੇ ਹਨ। ਬੀਬੀ ਹੁਮਰਾ ਕੁਰੈਸ਼ੀ ਨੇ 'ਅਜੀਤ' ਦੇ ਸੰਪਾਦਕੀ ਸਫ਼ੇ 'ਤੇ ਆਪਣੇ ਲੇਖ 'ਦੇਸ਼ ਲਈ ਘਾਤਕ ਹਨ ਫ਼ਿਰਕੂ ਅਨਸਰਾਂ ਦੀਆਂ ਟਿੱਪਣੀਆਂ' ਦੁਆਰਾ ਕਈ ਜ਼ਿੰਮੇਵਾਰ ਵਿਅਕਤੀਆਂ ਦੀ ਇਨਸਾਨੀਅਤ ਤੋਂ ਕੋਹਾਂ ਦੂਰ ਨੀਵੀਂ ਪੱਧਰ ਦੀ ਬਿਆਨਬਾਜ਼ੀ ਦੀ ਯਾਦ ਤਾਜ਼ਾ ਕਰ ਦਿੱਤੀ ਹੈ। ਜਿਹੜੇ ਲੋਕਾਂ ਨੂੰ ਹਰ ਪ੍ਰਕਾਰ ਦੀਆਂ ਸਹੂਲਤਾਂ ਮੁਫ਼ਤ ਮਿਲੀਆਂ ਹੋਣ, ਉਨ੍ਹਾਂ ਨੂੰ ਕੀ ਪਤਾ ਕਿ ਭਾਰਤ ਵਿਚ ਕਰੋੜਾਂ ਲੋਕ ਗ਼ਰੀਬੀ, ਬੇਰੁਜ਼ਗਾਰੀ ਤੇ ਭੁੱਖਮਰੀ ਦਾ ਸ਼ਿਕਾਰ ਹਨ। ਕਿੱਥੇ ਹੈ ਸਮਾਨਤਾ ਦਾ ਅਧਿਕਾਰ?

-ਮਾ: ਮਹਿੰਦਰ ਸਿੰਘ ਸਿੱਧੂ
ਸਿੱਧਵਾਂ ਕਲਾਂ ਜ਼ਿਲ੍ਹਾ ਲੁਧਿਆਣਾ।

ਤਿੜਕਦੇ ਰਿਸ਼ਤੇ
ਅੱਜ ਰਿਸ਼ਤੇ ਨਾਤੇ ਤਿੜਕਣ ਦਾ ਅਸਰ ਸਾਂਝੇ ਪਰਿਵਾਰ ਉੱਤੇ ਸਿੱਧੇ ਤੌਰ 'ਤੇ ਪਿਆ ਹੈ, ਜਿਸ ਕਰਕੇ ਪਰਿਵਾਰ ਖੇਰੂੰ-ਖੇਰੂੰ ਹੋ ਗਏ ਹਨ। ਇਸ ਨਾਲ ਸਮਾਜ ਵਿਚ ਸੁਰੱਖਿਆ ਦੀ ਭਾਵਨਾ ਘਟ ਗਈ ਹੈ। ਸਮਾਜ ਵਿਚ ਫੈਲੀ ਗਰੀਬੀ, ਬੇਰੁਜ਼ਗਾਰੀ ਅਤੇ ਸਮਾਜਿਕ ਅਸੁਰੱਖਿਆ ਨੇ ਰਿਸ਼ਤੇ ਨਾਤੇ ਤਿੜਕਣ ਲਾ ਦਿੱਤੇ ਹਨ, ਜੋ ਅੱਜ ਸਹਿਕਦੇ ਨਜ਼ਰੀ ਪੈਂਦੇ ਹਨ। ਕੁਦਰਤ ਦਾ ਨਿਯਮ ਹੈ ਜਿਹਾ ਬੀਜੋਗੇ ਤੇਹਾ ਕੱਟੋਗੇ। ਜੇ ਅਸੀਂ ਖ਼ੁਦ ਰਿਸ਼ਤੇ ਨਾਤਿਆਂ ਦਾ ਸਤਿਕਾਰ ਨਹੀਂ ਕਰਦੇ ਤਾਂ ਸਾਨੂੰ ਵੀ ਸਤਿਕਾਰ ਨਹੀਂ ਮਿਲੇਗਾ। ਰਿਸ਼ਤੇ ਨਾਤਿਆਂ ਦੇ ਤਿੜਕਦੇ ਮਾਹੌਲ ਵਿਚ ਅਸੀਂ ਜੰਗਲੀ ਜੀਵਨ ਜੀਅ ਰਹੇ ਹਾਂ। ਭਵਿੱਖ ਦੇ ਹਿੰਸਾਤਮਕ ਅਤੇ ਅਰਾਜਕਤਾ ਵਾਲੇ ਮਾਹੌਲ ਤੋਂ ਬਚਣ ਲਈ ਸਮੇਂ ਦੀ ਮੁੱਖ ਲੋੜ ਇਹ ਹੈ ਕਿ ਆਪਣੇ ਬੱਚਿਆਂ ਦਾ ਸੱਭਿਅਕ ਤਰੀਕੇ ਨਾਲ ਸਮਾਜੀਕਰਨ ਕਰੀਏ ਤਾਂ ਜੋ ਰਿਸ਼ਤੇ ਨਾਤਿਆਂ ਨੂੰ ਮੁੜ ਸੁਰਜੀਤ ਕਰੀਏ ਜਿਸ ਨਾਲ ਸਮਾਜ ਵਿਚ ਖੁਸ਼ੀਆਂ ਖੇੜਿਆਂ ਦਾ ਵਾਸਾ ਹੋਵੇਗਾ।

-ਸੁਖਪਾਲ ਸਿੰਘ ਗਿੱਲ
ਅਬਿਆਣਾ ਕਲਾਂ।

ਮਾਪਿਆਂ ਦਾ ਸਤਿਕਾਰ
ਅਸਲੀ ਸਵਰਗ ਮਾਂ-ਪਿਉ ਦੇ ਚਰਨਾਂ ਵਿਚ ਹੈ। ਕਿਉਂਕਿ ਉਨ੍ਹਾਂ ਦੇ ਹਿਰਦੇ ਵਿਚ ਆਪਣੇ ਪੁੱਤਰ ਲਈ ਅੰਤਾਂ ਦਾ ਮੋਹ, ਮਮਤਾ ਤੇ ਪਿਆਰ ਹੁੰਦਾ ਹੈ। ਤਾਂਈਓ ਤਾਂ ਮਾਂ ਆਪਣੇ ਪੁੱਤ ਦੇ ਲੱਗੇ ਕੰਡੇ ਦੀ ਚੀਸ਼ ਨਹੀ ਝੱਲ ਸਕਦੀ। ਮੇਰੀ ਸਾਰੇ ਮਾਵਾਂ ਦੇ ਪੁੱਤਰਾਂ ਨੂੰ ਹੱਥ ਜੋੜ ਕੇ ਬੇਨਤੀ ਹੈ ਕਿ ਸਰਬਣ ਪੁੱਤ ਬਣ ਕੇ ਆਪਣੇ ਮਾਤਾ-ਪਿਤਾ ਦਾ ਸਤਿਕਾਰ ਕਰੋ। ਕਿਉਂਕਿ ਮਾਂ-ਬਾਪ ਦੇ ਚਰਨਾਂ ਵਿਚ ਸਵਰਗ ਹੁੰਦਾ ਹੈ, ਜਿਸ ਨੂੰ ਦੇਖਿਆ ਨਹੀਂ ਜਾਂਦਾ, ਸਗੋਂ ਮਹਿਸੂਸ ਕੀਤਾ ਜਾਂਦਾ ਹੈ। ਇਸ ਕਰਕੇ ਬਚਪਨ ਵਿਚ ਲਾਡ-ਲੁਡਾਉਣ ਵਾਲੇ ਮਾਪੇ, ਪੰਜਾਹ ਸਾਲ ਦੀ ਉਮਰ ਤੋਂ ਬਾਅਦ ਆਪਣੇ ਤੋਂ ਵੀ ਲਾਡ-ਪਿਆਰ ਅਤੇ ਆਦਰ ਦੀ ਉਮੀਦ ਰੱਖਦੇ ਹਨ। ਇਸ ਲਈ ਸਭ ਨੂੰ ਆਪਣੇ ਮਾਪਿਆਂ ਦਾ ਸਤਿਕਾਰ ਕਰਨਾ ਚਾਹੀਦਾ ਹੈ।

-ਤਰਸੇਮ ਮਹਿਤੋ
ਪਿੰਡ- ਬਈਏਵਾਲ (ਸੰਗਰੂਰ)।

ਲੱਚਰ ਗਾਇਕੀ
ਅੱਜ ਦੀ ਲੱਚਰ ਗਾਇਕੀ ਨੇ ਨੌਜਵਾਨ ਵਰਗ ਦੇ ਇਕ ਵੱਡੇ ਹਿੱਸੇ ਨੂੰ ਆਪਣੇ ਕਲਾਵੇ ਵਿਚ ਲੈ ਲਿਆ ਹੈ। ਇਸ ਲੱਚਰਤਾ ਦੇ ਕਲਾਵੇ ਵਿਚ ਆਇਆ ਨੌਜਵਾਨ ਮਾੜੀ ਮਾਨਸਿਕਤਾ ਦਾ ਸ਼ਿਕਾਰ ਹੋ ਕੇ ਉਸਾਰੂ ਗੀਤਾਂ ਤੋਂ ਕੰਨੀ ਕਤਰਾਉਂਦਾ ਨਜ਼ਰ ਆ ਰਿਹਾ ਹੈ। ਜੋ ਸਾਡੇ ਉੱਚੇ-ਸੁੱਚੇ ਤੇ ਅਮੀਰ ਸੱਭਿਆਚਾਰ ਲਈ ਵੱਡੇ ਦੁੱਖ ਵਾਲੀ ਗੱਲ ਹੈ। ਅੱਜ ਗਿਣਤੀ ਦੇ ਕਲਾਕਾਰਾਂ ਨੇ ਫੋਕੀ ਸ਼ੁਹਰਤ ਦੇ ਚੱਕਰ ਵਿਚ ਪੰਜਾਬੀ ਦੀ ਮਹਾਨਤਾ ਨੂੰ ਮਿੱਟੀ ਵਿਚ ਰੋਲ ਕੇ ਪੰਜਾਬੀ ਪਰਿਵਾਰਾਂ ਦੀ ਸੁਹਜਮਈ ਸੋਚ ਨੂੰ ਬਦ ਤੋਂ ਬਦਤਰ ਬਣਾ ਕੇ ਰੱਖ ਦਿੱਤਾ ਹੈ। ਰੰਗ ਬਿਰੰਗੀਆਂ ਪੈਂਟਾਂ-ਸ਼ਰਟਾਂ ਜਿਹੀਆਂ ਪਾ ਕੇ ਤੇ ਸਿਰਾਂ ਦੇ ਟੇਢੇ-ਮੇਢੇ ਜਿਹੇ ਪਟੇ ਕਰਵਾ ਕੇ ਅਤੇ ਮਾਰ-ਧਾੜ ਤੋਂ ਇਲਾਵਾ ਕਾਮੁਕ ਭਰੇ ਦ੍ਰਿਸ਼ ਦਿਖਾ ਕੇ ਪਤਾ ਨਹੀਂ ਇਹ ਅਖੌਤੀ ਕਲਾਕਾਰ ਕਿਹੜੇ ਸੱਭਿਆਚਾਰ ਦੀ ਸੇਵਾ ਕਰ ਰਹੇ ਹਨ? ਪੈਸੇ ਦੇ ਜ਼ੋਰ ਨਾਲ ਅੱਗੇ ਆਉਣ ਵਾਲਿਓ ਮਸ਼ਹੂਰ ਨਹੀਂ ਮਹਾਨ ਬਣੋ ਤਾਂ ਕਿ ਤੁਹਾਡੀ ਜ਼ਮੀਰ ਨੂੰ ਕੁਝ ਸਕੂਨ ਮਿਲ ਸਕੇ। ਅੱਜ ਇਸ ਮਾੜੇ ਰੁਝਾਨ ਨੂੰ ਰੋਕਣ ਲਈ ਜਿੱਥੇ ਸੈਂਸਰ ਬੋਰਡ ਨੂੰ ਆਪਣੀ ਬਣਦੀ ਜ਼ਿੰਮੇਵਾਰੀ ਨਿਭਾਉਣੀ ਚਾਹੀਦੀ ਹੈ, ਉਥੇ ਧਾਰਮਿਕ, ਸਮਾਜਿਕ ਤੇ ਹੋਰ ਅਗਾਂਹਵਧੂ ਸੋਚ ਰੱਖਣ ਵਾਲਿਆਂ ਲੋਕਾਂ ਨੂੰ ਅੱਗੇ ਆਉਣਾ ਹੀ ਪਵੇਗਾ। ਨਹੀਂ ਤਾਂ ਇਹ ਗਿਣਤੀ ਦੇ ਅਖੌਤੀ ਕਲਾਕਾਰ, ਨੌਜਵਾਨ ਵਰਗ ਨੂੰ ਕੁਰਾਹੇ ਪਾਉਂਦੇ ਰਹਿਣਗੇ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਜ਼ਿਲ੍ਹਾ ਲੁਧਿਆਣਾ।

29-5-2015

 ਕੇਂਦਰ ਵੱਲੋਂ ਦਿੱਲੀ ਸਰਕਾਰ ਨੂੰ ਜਾਰੀ ਕੀਤਾ ਨੋਟੀਫਿਕੇਸ਼ਨ ਸੰਵਿਧਾਨ ਦੀ ਉਲੰਘਣਾ
ਦਿੱਲੀ ਸਰਕਾਰ ਤੇ ਉਪ ਰਾਜਪਾਲ ਨਜੀਬ ਜੰਗ ਵਿਚਕਾਰ ਅਧਿਕਾਰਾਂ ਨੂੰ ਲੈ ਕੇ ਛਿੜੇ ਵਿਵਾਦ ਨੂੰ ਦੇਖਦੇ ਹੋਏ ਕੇਂਦਰ ਸਰਕਾਰ ਵੱਲੋਂ ਦਿੱਲੀ ਸਰਕਾਰ ਨੂੰ ਜਾਰੀ ਕੀਤਾ ਗਿਆ ਨੋਟੀਫਿਕੇਸ਼ਨ ਸੰਵਿਧਾਨ ਦੀ ਉਲੰਘਣਾ ਹੈ। ਲੋਕਤੰਤਰ ਦੀ ਹੱਤਿਆ ਹੈ। ਭਾਜਪਾ ਅਗਵਾਈ ਵਾਲੀ ਸਰਕਾਰ ਦਾ ਕੀ ਅਜਿਹਾ ਵਿਕਾਸ ਕਰਨ ਦੀ ਮਨਸ਼ਾ ਹੈ? ਜੋ ਅਕਸਰ ਵਿਕਾਸ ਕਰਨ ਦਾ ਰੌਲਾ ਪਾਉਂਦੀ ਹੈ। ਇਹ ਲੋਕ ਵਿਕਸਿਤ ਦੇਸ਼ਾਂ ਦੇ ਲੋਕਤੰਤਰਿਕ ਪ੍ਰਬੰਧ ਅੱਗੇ ਕਿਵੇਂ ਟਿੱਕ ਸਕਣਗੇ? ਕੀ ਅਜਿਹੇ ਵਿਵਾਦ ਸਾਨੂੰ ਇਜਾਜ਼ਤ ਦੇਣਗੇ ਕੀ ਅਸੀਂ ਭਾਰਤੀ ਹੋਣ 'ਤੇ ਮਾਣ ਮਹਿਸੂਸ ਕਰ ਸਕੀਏ?

ਦਰਸ਼ਨ ਸਿੰਘ ਧਾਲੀਵਾਲ
ਕੈਨੇਡਾ।
darshan1840@gmail.com

22-5-2015

 ਅਧਿਆਪਕ ਯੋਗਤਾ ਇਮਤਿਹਾਨ

ਅਧਿਆਪਕ ਯੋਗਤਾ ਟੈਸਟ ਨੇ ਬੇਰੁਜ਼ਗਾਰ ਅਧਿਆਪਕਾਂ ਦੇ ਦਿਲ ਨੂੰ ਗਹਿਰੀ ਠੇਸ ਪਹੁੰਚਾਈ ਹੈ। ਪਹਿਲਾਂ ਨੌਜਵਾਨ ਲੜਕੇ-ਲੜਕੀਆਂ, ਬੀ.ਐੱਡ. ਜਾਂ ਈ.ਟੀ.ਟੀ. ਕਰਕੇ ਆਪਣੇ ਸੁਨਹਿਰੇ ਭਵਿੱਖ ਦਾ ਸੁਪਨਾ ਸਿਰਜਦੇ ਸਨ। ਪਰ ਸਰਕਾਰਾਂ ਦੀ ਇਸ ਗਿਣੀ-ਮਿਥੀ ਸਾਜ਼ਿਸ਼ ਨੇ ਸਾਥੋਂ ਇਸ ਸੁਪਨੇ ਦਾ ਅਧਿਕਾਰ ਵੀ ਲਗਭਗ ਖੋਹ ਹੀ ਲਿਆ ਹੈ। ਸਰਕਾਰਾਂ ਵੱਲੋਂ ਲਿਆ ਜਾਂਦਾ ਇਹ ਯੋਗਤਾ ਟੈਸਟ, ਬੇਰੁਜ਼ਗਾਰਾਂ ਨਾਲ ਮਖੌਲ ਹੈ। ਇਹ ਟੈਸਟ ਅਧਿਆਪਕਾਂ ਦੀ ਯੋਗਤਾ ਪਰਖਣ ਦਾ ਕੋਈ ਸਾਧਨ ਨਹੀਂ, ਸਗੋਂ ਨੌਕਰੀ ਵੱਲੋਂ ਅੰਗੂਠਾ ਦਿਖਾਉਣ ਦਾ ਇਕ ਜ਼ਰੀਆ ਹੈ। ਜਿਵੇਂ ਅਧਿਆਪਕਾਂ ਨੇ ਬੱਚਿਆਂ ਦਾ ਭਵਿੱਖ ਸਿਰਜਣਾ ਹੁੰਦਾ ਹੈ। ਇਸੇ ਤਰ੍ਹਾਂ ਲੀਡਰਾਂ ਨੇ ਦੇਸ਼ ਦਾ ਭਵਿੱਖ ਤੈਅ ਕਰਨਾ ਹੁੰਦਾ ਹੈ। ਕੀ ਲੀਡਰਾਂ ਲਈ ਅਜਿਹਾ ਕੋਈ ਯੋਗਤਾ ਟੈਸਟ ਜ਼ਰੂਰੀ ਨਹੀਂ ਹੋਣਾ ਚਾਹੀਦਾ? ਜੇਕਰ ਲੀਡਰਾਂ ਦਾ ਕੋਈ ਅਜਿਹਾ ਯੋਗਤਾ ਟੈਸਟ ਹੋਵੇ ਤਾਂ ਕਿੰਨੇ ਕੁ ਲੀਡਰ ਇਸ ਯੋਗਤਾ ਟੈਸਟ ਨੂੰ ਪਾਸ ਕਰਨਗੇ। ਅਧਿਆਪਕ ਯੋਗਤਾ ਟੈਸਟ ਇਕ ਅਜਿਹਾ ਟੈਸਟ ਹੈ, ਜਿਸ ਨੂੰ ਪਾਸ ਕਰਨਾ, ਟੇਢੀ ਖੀਰ ਹੈ, ਕਿਉਂਕਿ ਇਸ ਟੈਸਟ ਦਾ ਸਿਲੇਬਸ ਹੀ ਨਿਰਧਾਰਤ ਨਹੀਂ। ਆਪਣੇ ਪਿਆਰੇ 'ਅਜੀਤ' ਰਾਹੀਂ ਅਸੀਂ ਸਰਕਾਰ ਨੂੰ ਬੇਨਤੀ ਕਰਦੇ ਹਾਂ ਕਿ ਅਗਲੇ ਟੈਸਟ ਤੋਂ ਪਹਿਲਾਂ ਸਾਨੂੰ ਇਸ ਟੈਸਟ ਦੇ ਸਿਲੇਬਸ ਬਾਰੇ ਦੱਸਿਆ ਜਾਵੇ।

-ਕੁਲਵਿੰਦਰ ਕੌਰ ਸੰਦਲ
ਮਕਸੂਦੜਾ (ਲੁਧਿਆਣਾ)।

ਫ ਫ ਫ

ਅਜੋਕਾ ਮਨੁੱਖ ਕਾਹਲੀ ਦਾ ਸ਼ਿਕਾਰ

ਅਜੋਕਾ ਮਨੁੱਖ ਸਭ ਕੁਝ ਹਾਸਲ ਕਰਨ ਵਾਸਤੇ ਹਮੇਸ਼ਾ ਹੀ ਕਾਹਲਾ ਹੁੰਦਾ ਹੈ। ਜਿਉਂ-ਜਿਉਂ ਤਰੱਕੀ ਦੀ ਰਫ਼ਤਾਰ ਤੇਜ਼ ਹੁੰਦੀ ਗਈ ਹੈ, ਤਿਉਂ ਹੀ ਮਨੁੱਖ ਨੂੰ ਕਾਹਲੀ ਦੀ ਬਿਮਾਰੀ ਲੱਗ ਗਈ। ਕਾਹਲੀ ਦੀ ਇਸ ਬਿਮਾਰੀ ਦਾ ਸ਼ਿਕਾਰ ਮਨੁੱਖ ਆਪਣੇ-ਆਪ ਨੂੰ ਵੀ ਚੰਗੀ ਤਰ੍ਹਾਂ ਨਹੀਂ ਪਛਾਣ ਸਕਿਆ। ਅੱਜ ਹਰ ਸਮੇਂ ਮਨੁੱਖ ਕਾਹਲਾ ਹੀ ਰਹਿੰਦਾ ਹੈ। ਖਾਣ-ਪੀਣ ਸਮੇਂ ਵੀ ਕਾਹਲੀ, ਸੌਣ ਅਤੇ ਜਾਗਣ ਦੀ ਕਾਹਲੀ, ਜਾਣ ਤੇ ਆਉਣ ਦੀ ਕਾਹਲੀ, ਕਹਿਣ ਅਤੇ ਸੁਣਨ ਦੀ ਕਾਹਲੀ ਹੋਰ ਤਾਂ ਹੋਰ ਜੰਮਣ ਅਤੇ ਮਰਨ ਸਮੇਂ ਵੀ ਕਾਹਲੀ ਰਹਿੰਦੀ ਹੈ। ਕਹਿੰਦੇ ਨੇ ਕਿ ਕਾਹਲੀ ਅੱਗੇ ਟੋਏ ਹੁੰਦੇ ਹਨ ਪਰ ਅਜੋਕਾ ਮਨੁੱਖ ਇਨ੍ਹਾਂ ਟੋਇਆਂ ਨੂੰ ਟੱਪਣ ਦੀ ਵੀ ਕਾਹਲੀ ਕਰਦਾ ਹੈ।

-ਸੰਤੋਖ ਸਿੰਘ ਸੋਖਾ
ਕੰਧੋਲਾ, ਚਮਕੌਰ ਸਾਹਿਬ (ਰੋਪੜ)।

ਫ ਫ ਫ

ਕਿਸਾਨ ਬਨਾਮ ਸਰਕਾਰ

ਪਿਛਲੇ ਦਿਨੀਂ 'ਅਜੀਤ' ਵਿਚ ਛਪਿਆ ਕੁਲਦੀਪ ਨਈਅਰ ਦਾ ਲੇਖ ਬਹੁਤ ਵਧੀਆ ਲੱਗਾ। ਉਨ੍ਹਾਂ ਨੇ ਐਨ.ਜੀ.ਓ. ਅਤੇ ਕਿਸਾਨਾਂ ਦੇ ਜੋ ਪੱਖ ਨੂੰ ਉਭਾਰਿਆ, ਉਹ ਬਿਲਕੁਲ ਸਾਰਥਕ ਹੈ। ਜਿਥੇ ਸਰਕਾਰ ਚੁੱਪ ਹੋ ਜਾਂਦੀ ਹੈ, ਉਥੇ ਐਨ.ਜੀ.ਓ. ਹੀ ਆਮ ਜਨਤਾ ਦੇ ਪੱਖ ਵਿਚ ਉਤਰਦੇ ਹਨ। ਸਰਕਾਰ ਕੋਲ ਤਾਂ ਨਿੱਤ-ਦਿਨ ਨਵੇਂ ਮੁੱਦੇ ਉੱਠਦੇ ਹਨ ਤੇ ਪੈਸੇ ਦੇ ਕੇ ਦਬਾਅ ਦਿੱਤੇ ਜਾਂਦੇ ਹਨ। ਜਿਸ ਤਰ੍ਹਾਂ ਬੱਚੇ ਨੂੰ ਖਿਡੌਣਾ ਦੇ ਕੇ ਚੁੱਪ ਕਰਵਾ ਦਿੱਤਾ ਜਾਂਦਾ ਹੈ। ਰਾਜਸਥਾਨ ਦੇ ਕਿਸਾਨ ਵੱਲੋਂ ਕੀਤੀ ਖ਼ੁਦਕੁਸ਼ੀ 'ਤੇ ਅਫ਼ਸੋਸ ਪ੍ਰਗਟ ਕਰਕੇ ਅਤੇ 10 ਲੱਖ ਦੀ ਪਰਿਵਾਰ ਨੂੰ ਮਾਲੀ ਸਹਾਇਤਾ ਦੇ ਕੇ ਮੁੱਦਾ ਦਬਾਅ ਦਿੱਤਾ ਗਿਆ। ਕੀ ਉਸ 10 ਲੱਖ ਨਾਲ ਕਿਸਾਨ ਦੇ ਸਾਰੇ ਪਰਿਵਾਰ ਦਾ ਗੁਜ਼ਾਰਾ ਹੋ ਜਾਵੇਗਾ? ਸਮਾਜ ਗਿਰਾਵਟ ਵੱਲ ਜਾ ਰਿਹਾ ਹੈ। ਭਾਰਤ ਨੂੰ ਜਿੰਨੀ ਤਰੱਕੀ ਕਰਨੀ ਚਾਹੀਦੀ ਸੀ, ਉਹ ਉਸ ਦੇ ਨੇੜੇ ਵੀ ਨਹੀਂ। 5-5 ਸਾਲਾਂ ਦੀ ਗੁਲਾਮੀ ਪਤਨ ਵੱਲ ਲੈ ਕੇ ਜਾ ਰਹੀ ਹੈ। ਕਥਨ ਸਭ ਦੇ ਸਾਹਮਣੇ ਹਨ ਪਰ ਉਨ੍ਹਾਂ ਕਾਰਨਾਂ ਵਿਰੁੱਧ ਬੁਲੰਦ ਹੋਈਆਂ ਆਵਾਜ਼ਾਂ ਕਿਸ ਤਰ੍ਹਾਂ ਦੱਬ ਜਾਂਦੀਆਂ ਹਨ ਜਾਂ ਦਬਾਅ ਦਿੱਤੀਆਂ ਜਾਂਦੀਆਂ ਹਨ, ਇਸ ਤੋਂ ਅਸੀਂ ਭਲੀ-ਭਾਂਤ ਵਾਕਫ਼ ਹਾਂ।

-ਕੰਵਲ ਭੱਟੀ
ਬੂਥਗੜ੍ਹ (ਖੰਨਾ)।

ਫ ਫ ਫ

ਲੁੱਟਾਂ-ਖੋਹਾਂ

ਪੰਜ ਪਾਣੀਆਂ ਦੀ ਧਰਤੀ ਵਜੋਂ ਜਾਣੇ ਜਾਂਦੇ ਪੰਜਾਬ ਵਿਚ ਅੱਜ ਨਸ਼ਿਆਂ ਦਾ ਛੇਵਾਂ ਦਰਿਆ ਛੱਲਾਂ ਮਾਰ ਰਿਹਾ ਹੈ। ਆਏ ਦਿਨ ਬੇਸ਼ੁਮਾਰ ਨੌਜਵਾਨ ਨਸ਼ਿਆਂ ਦੇ ਇਸ ਦਰਿਆ ਵਿਚ ਡੁੱਬਦੇ ਨਜ਼ਰ ਆ ਰਹੇ ਹਨ। ਨਸ਼ੇ ਦੇ ਆਦੀ ਹੋਏ ਨਸ਼ੇੜੀਆਂ ਨੂੰ ਜਦੋਂ ਨਸ਼ੇ ਦੀ ਪੂਰਤੀ ਲਈ ਘਰੋਂ ਪੈਸਾ-ਧੇਲਾ ਨਹੀਂ ਮਿਲਦਾ ਤਾਂ ਇਹ ਆਪਣੀ ਲਲਕ ਪੂਰੀ ਕਰਨ ਲਈ ਸੁੰਨਸਾਨ ਰਸਤਿਆਂ ਵਿਚ ਖੜ੍ਹ ਕੇ ਆਉਂਦੇ ਜਾਂਦੇ ਰਾਹਗੀਰਾਂ ਨੂੰ ਆਪਣੀ ਲੁੱਟ ਦਾ ਸ਼ਿਕਾਰ ਬਣਾਉਂਦੇ ਹਨ। ਨਸ਼ੇ ਵਿਚ ਟੁੰਨ ਹੋਏ ਇਹ ਨਸ਼ੇੜੀ ਕਈ ਵਾਰ ਤਾਂ ਰਾਹਗੀਰਾਂ ਨੂੰ ਕੁੱਟਣ ਦੇ ਨਾਲ-ਨਾਲ ਭਿਆਨਕ ਰੂਪ ਵਿਚ ਜ਼ਖਮੀ ਕਰਨ ਤੋਂ ਵੀ ਗੁਰੇਜ਼ ਨਹੀਂ ਕਰਦੇ। ਸੋ, ਅੱਜ ਜਿਥੇ ਪੁਲਿਸ ਨੂੰ ਅਜਿਹੇ ਅਨਸਰਾਂ ਖਿਲਾਫ਼ ਸਖ਼ਤ ਰੁਖ਼ ਅਖ਼ਤਿਆਰ ਕਰਨਾ ਚਾਹੀਦਾ ਹੈ, ਉਥੇ ਲੋਕਾਂ ਨੂੰ ਵੀ ਰਾਹਾਂ ਵਿਚ ਖੜ੍ਹਦੇ ਅਣਪਛਾਤੇ ਲੋਕਾਂ ਦੀ ਸੂਚਨਾ ਤੁਰੰਤ ਪੁਲਿਸ ਕਰਮਚਾਰੀਆਂ ਨੂੰ ਦੇਣੀ ਚਾਹੀਦੀ ਹੈ ਤਾਂ ਜੋ ਕਿਸੇ ਅਣਹੋਣੀ ਘਟਨਾ ਨੂੰ ਸਮਾਂ ਰਹਿੰਦਿਆਂ ਹੀ ਰੋਕਿਆ ਜਾ ਸਕੇ।

-ਰਾਜਾ ਗਿੱਲ (ਚੜਿੱਕ)
ਮੋ: 94654-11585.

ਫ ਫ ਫ

ਖੱਬੀ ਲਹਿਰ ਬਾਰੇ

ਪਿਛਲੇ ਦਿਨੀਂ 'ਅਜੀਤ' ਵਿਚ ਮੰਗਤ ਰਾਮ ਪਾਸਲਾ ਹੁਰਾਂ ਦਾ ਲੇਖ 'ਖੱਬੀ ਲਹਿਰ ਨੂੰ ਮੁੜ ਪ੍ਰਭਾਵੀ ਕਿਵੇਂ ਬਣਾਇਆ ਜਾਵੇ' ਪੜ੍ਹਿਆ। ਲੇਖਕ ਨੇ ਬਹੁਤ ਵਧੀਆ ਪੱਖਾਂ ਨੂੰ ਸਾਡੇ ਸਾਹਮਣੇ ਰੱਖਿਆ ਹੈ ਪਰ ਇਥੇ ਮੈਂ ਵੀ ਇਕ ਗੱਲ ਸਪੱਸ਼ਟ ਕਰ ਦੇਣਾ ਚਾਹੁੰਦਾ ਹਾਂ ਕਿ ਖੱਬੇ ਪੱਖੀ ਲਹਿਰ ਨੂੰ ਸਭ ਤੋਂ ਵੱਡੀ ਢਾਹ ਅਖੌਤੀ ਕਾਮਰੇਡੀ ਲੀਡਰਾਂ ਕਰਕੇ ਪਈ ਹੈ। ਇਨ੍ਹਾਂ ਲੀਡਰਾਂ ਦੀਆਂ ਦੋਗਲੀਆਂ ਗੱਲਾਂ/ਭਾਸ਼ਣਾਂ ਕਰਕੇ ਹੀ ਲੋਕਾਂ ਦਾ ਵਿਸ਼ਵਾਸ ਇਸ ਲੋਕ/ਮਜ਼ਦੂਰ ਪੱਖੀ ਲਹਿਰ ਤੋਂ ਟੁੱਟਿਆ। ਇਨ੍ਹਾਂ ਅਖੌਤੀ ਲੀਡਰਾਂ ਨੇ ਆਪਣੇ ਭਾਸ਼ਣਾਂ ਵਿਚ ਤਾਂ ਪੂੰਜੀਵਾਦੀ ਪ੍ਰਬੰਧ/ਕਾਰਪੋਰੇਟ ਪ੍ਰਣਾਲੀ ਨੂੰ ਭੰਡਿਆ ਹੈ ਪਰ ਆਪ ਆਪਣੇ ਨਿੱਜੀ ਹਿਤਾਂ ਲਈ ਇਨ੍ਹਾਂ ਕਾਰਪੋਰੇਟ ਘਰਾਣਿਆਂ ਨਾਲ ਹੀ ਹੱਥ ਮਿਲਾਇਆ ਹੈ। ਕਈ ਅਖੌਤੀ ਲੀਡਰ ਆਪਣੇ ਭਾਸ਼ਣਾਂ ਵਿਚ ਅਮਰੀਕਾ ਵਰਗੇ ਦੇਸ਼ਾਂ ਅਤੇ ਉਥੇ ਦੀਆਂ ਬਹੁਰਾਸ਼ਟਰੀ ਕੰਪਨੀਆਂ ਦਾ ਵਿਰੋਧ ਕਰਦੇ ਹਨ ਪ੍ਰੰਤੂ ਆਪਣੇ ਬੱਚਿਆਂ ਨੂੰ ਪੜ੍ਹਨ ਲਈ ਅਮਰੀਕਾ ਭੇਜਦੇ ਹਨ। ਜਿਥੇ ਉਹ ਇਨ੍ਹਾਂ ਬਹੁਰਾਸ਼ਟਰੀ ਕੰਪਨੀਆਂ ਵਿਚ ਹੀ ਕੰਮ ਕਰਦੇ ਸਨ, ਜਿਸ ਦੀ ਜਾਇਜ਼ਤਾ ਇਹ ਕਈ ਤਰੀਕਿਆਂ ਨਾਲ ਸਹੀ ਵੀ ਸਿੱਧ ਕਰ ਦਿੰਦੇ ਹਨ। ਪ੍ਰੰਤੂ ਇਕ ਆਮ ਪੇਂਡੂ/ਮਜ਼ਦੂਰ ਵਿਅਕਤੀ ਜਦੋਂ ਇਨ੍ਹਾਂ ਲੀਡਰਾਂ ਦੇ ਭਾਸ਼ਣਾਂ ਵਿਚ ਅਤੇ ਇਨ੍ਹਾਂ ਦੀ ਕਰਨੀ ਵਿਚ ਫ਼ਰਕ ਦੇਖੇਗਾ ਤਾਂ ਉਸ ਦੇ ਮਨ ਵਿਚ ਇਸ ਲਹਿਰ ਪ੍ਰਤੀ ਸਮਰਥਨ ਦੀ ਭਾਵਨਾ ਨਹੀਂ ਆ ਸਕਣੀ। ਪੁਰਾਣੇ ਸਮਿਆਂ ਵਿਚ ਮਜ਼ਦੂਰਾਂ ਦੇ ਲੀਡਰ ਆਪ ਮਜ਼ਦੂਰ ਹੀ ਸਨ ਪ੍ਰੰਤੂ ਇਹ ਅਖੌਤੀ ਲੀਡਰ ਹਨ, ਜਿਨ੍ਹਾਂ ਨੇ ਇਸ ਮਹਾਨ ਮਜ਼ਦੂਰ ਪੱਖੀ ਲਹਿਰ ਨੂੰ ਬਹੁਤ ਭਾਰੀ ਢਾਹ ਲਾਈ ਹੈ।

-ਰਾਕੇਸ਼ ਸ਼ਰਮਾ
ਪਿੰਡ ਕਾਲੋਮਾਜਰਾ, ਡਾਕ: ਜਾਸਲਾ, ਤਹਿ: ਰਾਜਪੁਰਾ, ਪਟਿਆਲਾ।

ਫ ਫ ਫ

ਭਾਰਤ ਦੀ ਨਾਰੀ

ਦੇਸ਼ ਵਿਚ ਲਗਾਤਾਰ ਜਬਰ-ਜਨਾਹ ਦੀਆਂ ਘਟਨਾਵਾਂ ਵਾਪਰਨੀਆਂ ਚਿੰਤਾ ਦਾ ਵਿਸ਼ਾ ਹਨ। ਦਰਿੰਦਿਆਂ ਵੱਲੋਂ ਪਹਿਲਾਂ ਲੜਕੀ ਨੂੰ ਅਗਵਾ ਕਰਨਾ ਫਿਰ ਜਬਰ ਜਨਾਹ ਤੋਂ ਬਾਅਦ ਉਸ ਦੀ ਹੱਤਿਆ ਕਰ ਦੇਣੀ ਕਿੱਥੋਂ ਤੱਕ ਜਾਇਜ਼ ਹੈ? ਸਰਕਾਰ ਸਮੇਂ-ਸਮੇਂ 'ਤੇ ਜੋ ਲੜਕੀਆਂ ਦੇ ਹੱਕ ਵਿਚ ਮੁਹਿੰਮ ਚਲਾਉਂਦੀ ਆ ਰਹੀ ਹੈ, ਉਹ ਸਰਕਾਰ ਦਾ ਸਲਾਹੁਣਯੋਗ ਉਪਰਾਲਾ ਹੈ ਪਰ ਸਮਾਜ ਦੇ ਵੈਰੀਆਂ ਨੇ ਔਰਤ ਦਾ ਤਮਾਸ਼ਾ ਬਣਾ ਕੇ ਰੱਖਿਆ ਹੋਇਆ ਹੈ। ਕਿਤੇ ਔਰਤ 'ਤੇ ਤੇਜ਼ਾਬ ਪਾ ਕੇ ਉਸ ਨੂੰ ਬਦਸੂਰਤ ਕਰ ਦਿੱਤਾ ਜਾਂਦਾ ਹੈ, ਕਿਧਰੇ ਉਸ ਨਾਲ ਜਬਰ ਜਨਾਹ ਤੋਂ ਬਾਅਦ ਅੱਗ ਲਾ ਕੇ ਸਾੜ ਦਿੱਤਾ ਜਾਂਦਾ ਹੈ। ਜੇਕਰ ਅਜਿਹੇ ਪਾਪੀਆਂ ਨੂੰ ਸਖ਼ਤ ਸਜ਼ਾਵਾਂ ਮਿਲਣ ਤਾਂ ਅਜਿਹੀਆਂ ਸ਼ਰਮਨਾਕ ਵਾਪਰ ਰਹੀਆਂ ਘਟਨਾਵਾਂ ਨੂੰ ਠੱਲ੍ਹ ਪੈ ਸਕਦੀ ਹੈ। ਜੱਗ ਜਣਨੀ ਨਾਲ ਅੱਜ ਜੋ ਕੁਝ ਹੋ ਰਿਹਾ ਹੈ, ਉਹ ਸਹਿਣਯੋਗ ਨਹੀਂ ਹੈ। ਭਾਰਤ ਦੀ ਨਾਰੀ ਸੁਰੱਖਿਅਤ ਕਿਉਂ ਨਹੀਂ ਹੈ, ਨਾਰੀ ਦੀ ਸੁਰੱਖਿਆ ਲਈ ਸਰਕਾਰ ਨੂੰ ਠੋਸ ਉਪਰਾਲੇ ਕਰਨੇ ਚਾਹੀਦੇ ਹਨ। ਇਹ ਗੱਲ ਆਮ ਪੜ੍ਹਨ-ਸੁਣਨ ਵਿਚ ਆਉਂਦੀ ਹੈ ਕਿ ਅੱਜ ਦੇ ਯੁੱਗ ਵਿਚ ਮਰਦ ਮੁਕਾਬਲੇ ਔਰਤ ਨੂੰ ਕਿਸੇ ਪੱਖੋਂ ਘੱਟ ਨਹੀਂ ਸਮਝਣਾ ਚਾਹੀਦਾ, ਇਹ ਗੱਲ ਬਿਲਕੁਲ ਦਰੁਸਤ ਹੈ ਪਰ ਅਖ਼ਬਾਰਾਂ ਦੀਆਂ ਖ਼ਬਰਾਂ ਪੜ੍ਹ ਕੇ ਜਾਣਕਾਰੀ ਸਹਿਜੇ ਹੀ ਮਿਲ ਜਾਂਦੀ ਹੈ ਕਿ ਕਿਵੇਂ ਔਰਤ ਨੂੰ ਸ਼ੈਤਾਨ ਸੋਚ ਦੇ ਮਾਲਕਾਂ ਵੱਲੋਂ ਤੰਗ ਪ੍ਰੇਸ਼ਾਨ ਕੀਤਾ ਜਾਂਦਾ ਹੈ। ਭੀੜ-ਭੜੱਕੇ ਵਾਲੀਆਂ ਥਾਵਾਂ ਤੋਂ ਔਰਤ ਨੂੰ ਮਜਬੂਰਨ ਗੁਜ਼ਰਨਾ ਪੈਂਦਾ ਹੈ ਪਰ ਔਰਤ ਦੀ ਦੁਰਦਸ਼ਾ ਤਰਸਯੋਗ ਹੁੰਦੀ ਹੈ। ਸੋ ਅਜਿਹੀਆਂ ਹਰਕਤਾਂ ਕਰਨ ਵਾਲਿਆਂ ਨੂੰ ਸਖ਼ਤ ਸਜ਼ਾਵਾਂ ਮਿਲਣੀਆਂ ਚਾਹੀਦੀ ਹਨ ਤਾਂ ਕਿ ਮਹਾਨ ਭਾਰਤ ਦੀ ਨਾਰੀ ਸੁਰੱਖਿਅਤ ਰਹਿ ਕੇ ਆਪਣੀ ਜ਼ਿੰਦਗੀ ਦੇ ਦਿਨ ਖੁਸ਼ੀਆਂ ਖੇੜਿਆਂ ਨਾਲ ਗੁਜ਼ਾਰੇ।

-ਸੁਖਵਿੰਦਰ ਕਲੇਰ ਬੱਸੀਆਂ
ਪਿੰਡ ਤੇ ਡਾਕ: ਬੱਸੀਆਂ, ਜ਼ਿਲ੍ਹਾ ਲੁਧਿਆਣਾ।

15-5-2015

 ਨਿਰਾਸ਼ ਹੋਇਆ ਪੰਜਾਬ

ਕਿਸਾਨ ਤੇ ਵਪਾਰੀ ਦਾ ਅਟੁੱਟ ਰਿਸ਼ਤਾ ਸੰਪੂਰਨ ਸਮਾਜ ਨੂੰ ਗਤੀਸ਼ੀਲਤਾ ਪ੍ਰਦਾਨ ਕਰਦਾ ਹੈ। ਇਸ ਵੇਲੇ ਪੰਜਾਬ 'ਚ ਸਿਆਸੀ ਗਠਜੋੜ ਵੀ ਇਨ੍ਹਾਂ ਦੋਵਾਂ ਵਰਗਾਂ ਦੀ ਨੁਮਾਇੰਦਗੀ ਕਰ ਰਿਹਾ ਹੈ। ਜੇ ਇਕ ਪਾਰਟੀ ਨੂੰ ਪੇਂਡੂ ਵੋਟਰਾਂ ਦਾ ਸਹਾਰਾ ਹੈ ਤਾਂ ਦੂਜੀ ਧਿਰ ਆਪਣੇ ਆਪ ਨੂੰ ਸ਼ਹਿਰੀ ਵਰਗ ਦਾ ਪ੍ਰਤੀਨਿਧੀ ਸਮਝਦੀ ਹੈ। ਇਸ ਕਰਕੇ ਜਿਸ ਤਰ੍ਹਾਂ ਦੇ ਸਮੀਕਰਨ ਇਸ ਸਮੇਂ ਪੰਜਾਬ 'ਚ ਹਨ ਤੇ ਕੇਂਦਰ ਵਿਚ ਵੀ ਇਨ੍ਹਾਂ ਦੀ ਆਪਣੀ ਸਰਕਾਰ ਹੈ ਤਾਂ ਪੰਜਾਬ ਦੀਆਂ ਤਾਂ ਪੰਜੇ ਉਂਗਲਾਂ ਘਿਓ 'ਚ ਹੋਣੀਆਂ ਚਾਹੀਦੀਆਂ ਹਨ। ਪਰ ਹਲਾਤ ਬਿਲਕੁਲ ਇਸ ਦੇ ਉਲਟ ਹਨ। ਪੰਜਾਬ ਦਾ ਵਪਾਰੀ ਵੀ ਦੁਖੀ ਹੈ ਤੇ ਕਿਸਾਨ ਦੀ ਮਿਹਨਤ ਵੀ ਮੰਡੀਆ 'ਚ ਰੁਲ ਰਹੀ ਹੈ। ਪੰਜਾਬ ਬਾਰੇ ਤਾਂ ਇਹੀ ਕਿਹਾ ਜਾ ਸਕਦਾ ਹੈ ਕਿ ਇਸ ਨੇ ਤਾਂ ਬਹੁਤ ਹੀ ਜ਼ੋਰ ਨਾਲ ਇਹ ਪ੍ਰਚਾਰ ਕੀਤਾ ਸੀ ਕਿ ਕੇਂਦਰ ਵਿਚ ਆਪਣੀ ਸਰਕਾਰ ਬਣ ਜਾਵੇਗੀ ਤਾਂ ਇਸ ਦੇ ਵਾਰੇ ਨਿਆਰੇ ਹੋ ਜਾਣਗੇ। ਲੋਕ ਵੀ ਬਹੁਤ ਉਮੀਦ ਲਾਈ ਬੈਠੇ ਸਨ ਜਦ ਕਿ ਹੋਇਆ ਉਲਟ ਹੀ ਹੈ। ਪੰਜਾਬ ਵਿਚ ਵਪਾਰੀ ਦੁਖੀ ਤੇ ਕਿਸਾਨ ਵੀ ਦੁਖੀ ਹੈ ਤੇ ਹੁਣ ਲਗਦਾ ਹੈ ਕਿ ਆਪਣੇ ਆਪ ਨੂੰ ਕਿਸਾਨਾਂ ਵਪਾਰੀਆਂ ਦੇ ਹਮਾਇਤੀ ਕਹਿਣ ਵਾਲੇ ਕਿਧਰੇ ਗਾਇਬ ਹੋ ਚੁੱਕੇ ਹਨ।

-ਵਿਵੇਕ
ਮਾਨਵਤਾ ਭਵਨ, ਕੋਟ ਈਸੇ ਖਾਂ (ਮੋਗਾ)।

ਫ ਫ ਫ

ਅਨਾਜ ਦੀ ਬਰਬਾਦੀ

ਇਹ ਬਹੁਤ ਹੀ ਸਿਤਮਜ਼ਰੀਫ਼ੀ ਵਾਲੀ ਗੱਲ ਹੈ ਕਿ ਇਕ ਪਾਸੇ ਤਾਂ ਨੀਲੀ ਛੱਤ ਹੇਠ ਪਿਆ ਲੱਖਾਂ ਟਨ ਅਨਾਜ ਖਰਾਬ ਹੋ ਰਿਹਾ ਹੈ ਅਤੇ ਦੂਜੇ ਪਾਸੇ ਦੇਸ਼ ਵਿਚ ਕਰੋੜਾਂ ਲੋਕ ਭੁੱਖਮਰੀ ਦਾ ਸ਼ਿਕਾਰ ਹਨ। ਇਕ ਸਮੇਂ ਸੁਪਰੀਮ ਕੋਰਟ ਨੇ ਕੇਂਦਰੀ ਅਤੇ ਰਾਜ ਸਰਕਾਰਾਂ ਨੂੰ ਇਹ ਵੀ ਕਿਹਾ ਸੀ ਕਿ ਜੇਕਰ ਉਨ੍ਹਾਂ ਕੋਲ ਵਾਧੂ ਅਨਾਜ ਹੈ ਤਾਂ ਉਸ ਨੂੰ ਗਰੀਬਾਂ ਵਿਚ ਮੁਫ਼ਤ ਵੰਡ ਦਿੱਤਾ ਜਾਣਾ ਚਾਹੀਦਾ ਹੈ। ਜੇਕਰ ਦੇਸ਼ ਦੇ ਕਿਸਾਨਾਂ ਵੱਲੋਂ ਖੂਨ-ਪਸੀਨਾ ਵਹਾਅ ਕੇ ਪੈਦਾ ਕੀਤਾ ਗਿਆ ਅਨਾਜ ਇਸੇ ਤਰ੍ਹਾਂ ਰੁਲ ਕੇ ਬਰਬਾਦ ਹੁੰਦਾ ਰਿਹਾ ਤਾਂ ਦੇਸ਼ ਦੀ ਅਨਾਜ ਸੁਰੱਖਿਆ ਹੀ ਖ਼ਤਰੇ ਵਿਚ ਪੈ ਜਾਵੇਗੀ। ਕੇਂਦਰੀ ਸਰਕਾਰ ਅਤੇ ਵੱਖ-ਵੱਖ ਰਾਜਾਂ ਦੀਆਂ ਸਬੰਧਤ ਸਰਕਾਰਾਂ ਨੂੰ ਅਨਾਜ ਦੀ ਸਾਂਭ-ਸੰਭਾਲ ਨੂੰ ਤਰਜੀਹੀ ਆਧਾਰ 'ਤੇ ਲੈਣਾ ਚਾਹੀਦਾ ਹੈ। ਵੱਖ-ਵੱਖ ਅਨਾਜ ਪੈਦਾ ਕਰਨ ਵਾਲੇ ਰਾਜਾਂ ਵਿਚ ਲੋੜੀਂਦੀ ਮਾਤਰਾ ਵਿਚ ਸਟੋਰਾਂ ਦੀ ਉਸਾਰੀ ਕੀਤੀ ਜਾਣੀ ਚਾਹੀਦੀ ਹੈ।

-ਰਾਜਵੰਤ ਸਿੰਘ ਰਾਜੂ
ਗੁਰੂ ਨਾਨਕ ਆਟੋ ਸਪੇਅਰਜ਼, ਰਾਏਕੋਟ।

ਫ ਫ ਫ

ਆਸ਼ਾਵਾਦੀ ਨਜ਼ਰੀਆ

ਮਨੁੱਖ ਆਪਣੀ ਜ਼ਿੰਦਗੀ ਦੇ ਟੀਚੇ ਪੂਰੇ ਕਰ ਸਕਦਾ ਹੈ ਜੇ ਉਸ ਦੀ ਸੋਚ ਉਸਾਰੂ ਹੈ। ਭਾਵ ਮਨੁੱਖ ਆਸ਼ਾਵਾਦੀ ਹੋਏਗਾ ਤਾਂ ਹੀ ਆਪਣੀਆਂ ਆਸਾਂ ਪੂਰੀਆਂ ਕਰ ਸਕੇਗਾ। ਜੇਕਰ ਨਿਰਾਸ਼ਾਵਾਦੀ ਬਿਰਤੀ ਦਾ ਮਾਲਕ ਹੋਏਗਾ ਤਾਂ ਨਿਰਾਸ਼ਾ ਹੀ ਪੱਲੇ ਪੈਂਦੀ ਹੈ। ਕਿਸੇ ਨੇ ਸੱਚ ਹੀ ਕਿਹਾ ਹੈ 'ਹਿੰਮਤੇ ਮਰਦਾਂ, ਮਦਦੇ ਖੁਦਾਅ'। ਭਾਵ ਮਾਲਕ ਅਕਾਲ ਪੁਰਖ ਨੇ ਰੋਟੀ ਤਾਂ ਸਾਨੂੰ ਦੇਣੀ ਹੈ ਪਰ ਨਿਵਾਲਾ ਆਪਣੇ ਹੱਥਾਂ ਨਾਲ ਹੀ ਮੂੰਹ ਵਿਚ ਪਾਇਆ ਜਾਂਦਾ ਹੈ। ਮਨੁੱਖ ਨੂੰ ਆਪਣੀ ਜ਼ਿੰਦਗੀ ਦੇ ਹਰ ਪੜਾਅ ਭਾਵੇਂ ਬਚਪਨ, ਜਵਾਨੀ ਜਾਂ ਬਿਰਧ ਅਵਸਥਾ ਹੋਵੇ, ਸਦਾ ਹੀ ਚੜ੍ਹਦੀ ਕਲਾ ਵਿਚ ਰਹਿਣਾ ਚਾਹੀਦਾ ਹੈ। ਹਿੰਮਤ ਪੂਰੀ ਹੋਵੇ ਤਾਂ ਕੰਮ ਨੂੰ ਹੱਥ ਪਾਉਣ ਤੋਂ ਪਹਿਲਾਂ ਹੀ 20-30 ਫ਼ੀਸਦੀ ਕੰਮ ਸ਼ੁਰੂ ਹੋ ਗਿਆ ਹੁੰਦਾ ਹੈ। ਇਸ ਲਈ ਸਦਾ ਹੀ ਸਾਨੂੰ ਹਾਂ-ਪੱਖੀ ਸੋਚ ਰੱਖ ਕੇ ਜਿਊਣਾ ਚਾਹੀਦਾ ਹੈ।

-ਕਰਮਜੀਤ ਸਿੰਘ ਧਾਰੀਵਾਲ
ਨਵੀਂ ਆਬਾਦੀ, ਜੀ.ਟੀ. ਰੋਡ, ਧਾਰੀਵਾਲ (ਗੁਰਦਾਸਪੁਰ)।

ਫ ਫ ਫ

ਪਾਣੀ ਦਾ ਡਿਗਦਾ ਪੱਧਰ

ਪਾਣੀ ਦੀ ਸਮੱਸਿਆ ਇਕੱਲੇ ਕਿਸਾਨ ਵਰਗ ਨਾਲ ਸਬੰਧਤ ਨਹੀਂ ਹੈ। ਸਾਰੇ ਪੰਜਾਬੀਆਂ ਨੂੰ ਇਸ ਖ਼ਤਰਨਾਕ ਚੁਣੌਤੀ ਵੱਲ ਗਹਿਰਾ ਧਿਆਨ ਦੇਣ ਦੀ ਲੋੜ ਹੈ। ਹਰ ਸਾਲ ਲਗਭਗ ਦੋ ਫੁੱਟ ਪਾਣੀ ਹੇਠਾਂ ਚਲਿਆ ਜਾਣਾ ਧਰਤੀ ਹੇਠਲੇ ਜਲ ਭੰਡਾਰ ਦੇ ਘਟਦੇ ਅਤੇ ਖ਼ਤਮ ਹੋ ਰਹੇ ਜਲ ਭੰਡਾਰ ਲਈ ਖ਼ਤਰੇ ਦੀ ਘੰਟੀ ਹੈ। ਜੇਕਰ ਅਸੀਂ ਸਮੂਹ ਪੰਜਾਬੀ ਇਸ ਸਮੱਸਿਆ ਅਰਥਾਤ ਪਾਣੀ ਦੀ ਬੱਚਤ ਲਈ ਸਾਵਧਾਨ ਨਹੀਂ ਹੋਵਾਂਗੇ ਤਾਂ ਨਿਕਟ ਭਵਿੱਖ ਵਿਚ ਪੰਜਾਬ ਵੀ ਰਾਜਸਥਾਨ ਵਾਂਗ ਮਾਰੂਥਲ ਦਾ ਰੂਪ ਅਖ਼ਤਿਆਰ ਕਰ ਜਾਵੇਗਾ। ਕੁਦਰਤ ਦੀ ਇਸ ਅਮੋਲਕ ਦਾਤ ਨਾਲ ਹੀ ਸਮੁੱਚੀ ਕਾਇਨਾਤ, ਬਨਸਪਤੀ, ਜੀਵ-ਜੰਤੂਆਂ, ਪਸ਼ੂਆਂ, ਮਨੁੱਖਾਂ ਆਦਿ ਦਾ ਭਲਾ ਹੈ। ਸੋ, ਇਸ ਦੀ ਸਾਂਭ-ਸੰਭਾਲ ਕਰਨੀ ਸਾਡਾ ਮੁਢਲਾ ਫਰਜ਼ ਹੈ। ਇਸ ਨੂੰ ਪੂਰੀ ਤਨ, ਮਨ ਅਤੇ ਧਨ ਦੀ ਸਮਰੱਥਾ ਨਾਲ ਸਮੂਹਿਕ ਉਪਰਾਲੇ ਨਾਲ ਸੰਭਾਲਣ ਦੀ ਫੌਰੀ ਲੋੜ ਹੈ।

-ਮਨਿੰਦਰ ਸਿੰਘ
ਧਨੌਲਾ ਰੋਡ, ਬਰਨਾਲਾ।

ਜੰਗਲ ਰਾਜ

ਪੰਜਾਬ ਦੀ ਧਰਤੀ ਪੀਰਾਂ, ਫ਼ਕੀਰਾਂ, ਗੁਰੂਆਂ, ਭਗਤਾਂ ਅਤੇ ਸੂਰਮਿਆਂ ਦੀ ਧਰਤੀ ਹੈ ਅਤੇ ਖ਼ਾਸ ਕਰਕੇ ਪੰਜਾਬ ਵਿਚ ਕੋਈ ਵੀ ਕੁਕਰਮ ਪੰਜਾਬ ਦੀ ਇਨਸਾਨੀਅਤ ਨੂੰ ਸੋਭਾ ਨਹੀਂ ਦਿੰਦਾ। ਜਦੋਂ ਵੀ ਇਸ ਧਰਤੀ 'ਤੇ ਬਲਾਤਕਾਰ ਜਾਂ ਕੋਈ ਹੋਰ ਧੱਕੇਸ਼ਾਹੀਆਂ ਹੁੰਦੀਆਂ ਹਨ ਤਾਂ ਜਿਹੜੇ ਆਪਣੇ-ਆਪ ਨੂੰ ਪੰਜਾਬ ਦਾ ਪੁੱਤਰ ਹੋਣ ਦਾ ਮਾਣ ਮਹਿਸੂਸ ਕਰਦੇ ਹਨ, ਉਨ੍ਹਾਂ ਦਾ ਸਿਰ ਸ਼ਰਮ ਨਾਲ ਝੁਕ ਜਾਂਦਾ ਹੈ। ਪਰ ਸਾਡੀ ਪੰਜਾਬ ਸਰਕਾਰ ਨੂੰ ਨਿਮਰਤਾ ਹਿਤ ਬੇਨਤੀ ਹੈ ਕਿ ਪੰਜਾਬ ਨੂੰ ਜੰਗਲ ਰਾਜ ਹੋਣ ਤੋਂ ਬਚਾਇਆ ਜਾਵੇ ਤਾਂ ਜੋ ਗੁਰੂਆਂ ਦੀ ਧਰਤੀ 'ਤੇ ਵਸਦਾ ਹਰੇਕ ਪੰਜਾਬੀ ਸੁਖ ਦਾ ਸਾਹ ਲੈਂਦਾ ਰਹੇ। ਆਮ ਅਵਾਮ ਨੂੰ ਵੀ ਧਾਰਮਿਕ ਅਤੇ ਰਾਜਨੀਤਕ ਵਿਚਾਰਾਂ ਤੋਂ ਉੱਪਰ ਉੱਠ ਕੇ ਗੁੰਡਾਗਰਦੀ ਅਤੇ ਧੱਕੇਸ਼ਾਹੀਆਂ ਦੇ ਵਿਰੁੱਧ ਖੜ੍ਹੇ ਹੋਣਾ ਚਾਹੀਦਾ ਹੈ। ਜੇ ਸਰਕਾਰ ਗੁੰਡਾਗਰਦੀ ਅਤੇ ਧੱਕੇਸ਼ਾਹੀਆਂ ਨੂੰ ਨੱਥ ਪਾਉਂਦੀ ਹੈ ਤਾਂ ਸਾਨੂੰ ਸਰਕਾਰ ਦੀ ਵੀ ਖੁੱਲ੍ਹ ਕੇ ਮਦਦ ਕਰਨੀ ਅਤੇ ਸਾਥ ਦੇਣਾ ਚਾਹੀਦਾ ਹੈ।

-ਕੇਵਲ ਸਿੰਘ ਬਾਠਾਂ
ਅਮਰਗੜ੍ਹ, ਸੰਗਰੂਰ।

11-5-2015

 ਬਾਪੂ ਗਾਂਧੀ ਦਾ ਅੰਤਿਮ ਸੰਸਕਾਰ

ਮਹਾਤਮਾ ਗਾਂਧੀ ਕੋਲ ਸਿਰਫ਼ ਲੰਗੋਟੀ, ਸੋਟੀ, ਵੀ ਚੱਪਲ, ਘੜੀ, ਐਨਕ, ਬੱਕਰੀ ਤੇ ਚਰਖਾ ਹੀ ਸੀ। ਉਹ ਬਹੁਤ ਹੀ ਘੱਟ ਖਰਚ ਕਰਦੇ ਸਨ। ਪਰ ਉਨ੍ਹਾਂ ਦੀ ਮੌਤ ਬਾਰੇ ਇਕ ਲੇਖ ਉਨ੍ਹਾਂ ਦੇ ਪੋਤੇ ਗੋਪਾਲ ਕਿਸ਼ਨ ਗਾਂਧੀ ਨੇ 20 ਅਪ੍ਰੈਲ, 15 ਦੀ ਅੰਗਰੇਜ਼ੀ ਅਖ਼ਬਾਰ 'ਹਿੰਦੁਸਤਾਨ ਟਾਈਮਜ਼' ਵਿਚ ਲਿਖਿਆ, ਜਿਸ ਵਿਚ ਦੱਸਿਆ ਹੈ ਕਿ ਬਾਪੂ ਦੇ ਸੰਸਕਾਰ 'ਤੇ 15 ਮਣ ਸੰਦਲ ਦੀ ਲੱਕੜੀ, ਚਾਰ ਮਣ ਦੇਸੀ ਘਿਓ, 2 ਮਣ ਖੁਸ਼ਬੂਦਾਰ ਸਮੱਗਰੀ, ਇਕ ਮਣ ਨਾਰੀਅਲ ਅਤੇ 15 ਸੇਰ ਕਪੂਰ ਖਰਚ ਕੀਤਾ ਗਿਆ। ਹੋਰ ਇਹ ਕਿ ਉਨ੍ਹਾਂ ਦੀ ਦੇਹ ਨੂੰ ਨੇਵੀ ਦੀ ਤੋਪ ਗੱਡੀ 'ਤੇ ਰੱਖ ਕੇ ਲਿਜਾਇਆ ਗਿਆ ਤੇ ਸਮਾਧੀ ਦਾ ਨਾਂਅ ਵੀ ਰਾਜ ਘਾਟ ਰੱਖਿਆ ਗਿਆ। ਜਦਕਿ ਬਾਪੂ ਬੇਹੱਦ ਸ਼ਾਂਤੀ ਪਸੰਦ ਸਨ ਤੇ ਰਾਜ ਕਰਨ ਵਿਚ ਨਹੀਂ ਸੇਵਾ ਕਰਨ ਵਿਚ ਵਿਸ਼ਵਾਸ ਰੱਖਦੇ ਸਨ।
ਇਹ ਇਕ ਮਿਸਾਲ ਹੈ ਕਿ ਸਰਕਾਰ ਨੇ ਬਾਪੂ ਗਾਂਧੀ ਨੂੰ ਵੀ ਕਿਸ ਤਰ੍ਹਾਂ ਆਪਣੇ ਸਿਆਸੀ ਲਾਹੇ ਲਈ ਵਰਤਿਆ।

-ਰਘਬੀਰ ਸਿੰਘ ਚੀਮਾ
ਪਿੰਡ ਤੇ ਡਾਕ: ਚੀਮਾ ਖੁੱਡੀ, ਜ਼ਿਲ੍ਹਾ ਗੁਰਦਾਸਪੁਰ।

ਗੁਲਾਮ ਔਰਤ

ਤਕਰੀਬਨ ਇਕ ਸਦੀ ਪਹਿਲਾਂ ਭਾਰਤ ਵਿਚ ਵੀ ਔਰਤ ਦੀ ਦਸ਼ਾ ਬਹੁਤ ਹੀ ਤਰਸਯੋਗ ਸੀ ਅਤੇ ਅੱਜ ਜਦੋਂ ਮਨੁੱਖ ਚੰਦਰਮਾ 'ਤੇ ਵੀ ਪੈਰ ਪਸਾਰ ਰਿਹਾ ਹੈ। ਬਾਹਰਲੇ ਕਈ ਮੁਲਕਾਂ ਵਿਚ ਅੱਜ ਵੀ ਔਰਤ ਨੂੰ ਆਜ਼ਾਦੀ ਨਹੀਂ ਦਿੱਤੀ ਜਾਂਦੀ ਅਤੇ ਔਰਤ 'ਤੇ ਕਈ ਤਰ੍ਹਾਂ ਦੀਆਂ ਪਾਬੰਦੀਆਂ ਲਾਈਆਂ ਜਾਂਦੀਆਂ ਹਨ। ਇਹ ਔਰਤਾਂ ਗੁਲਾਮੀ ਦਾ ਜੀਵਨ ਬਤੀਤ ਕਰ ਰਹੀਆਂ ਹਨ। ਭਾਰਤ ਅਤੇ ਯੂਰਪੀਨ ਦੇਸ਼ਾਂ ਵਿਚ ਤਕਰੀਬਨ ਔਰਤ ਸਮਾਜ ਨੂੰ ਮਰਦ ਸਮਾਜ ਦੇ ਬਰਾਬਰ ਮੰਨਿਆ ਗਿਆ ਹੈ। ਇਥੋਂ ਤੱਕ ਕਿ ਸਾਡੇ ਦੇਸ਼ ਵਿਚ ਪਾਇਲਟ ਤੱਕ ਵੀ ਔਰਤ ਦਾ ਹੋਣਾ ਬੜੇ ਮਾਣ ਵਾਲੀ ਗੱਲ ਹੈ। ਸੋ, ਸਾਨੂੰ ਸਾਰਿਆਂ ਨੂੰ ਰਲ ਕੇ ਔਰਤ ਦੀ ਗੁਲਾਮੀ ਵਿਰੁੱਧ ਆਪਣੀ ਆਵਾਜ਼ ਬੁਲੰਦ ਕਰਨੀ ਚਾਹੀਦੀ ਹੈ ਕਿਉਂਕਿ ਅੱਜ ਦੀ ਨਾਰੀ ਵੀ ਪੁਰਸ਼ਾਂ ਵਾਲੇ ਸਾਰੇ ਕੰਮ ਕਰਨ ਦੀ ਸਮਰੱਥਾ ਰੱਖਦੀ ਹੈ।

-ਜਸਪ੍ਰੀਤ ਕੌਰ ਵਿਰਦੀ
ਸ਼ੰਕਰ, ਲੁਧਿਆਣਾ।

ਸਰਕਾਰੀ ਸਕੂਲਾਂ ਵਿਚ ਬੱਚਿਆਂ ਦੀ ਗਿਣਤੀ

ਅੱਜ ਰੋਜ਼ਾਨਾ ਅਖ਼ਬਾਰਾਂ ਭਰੀਆਂ ਆ ਰਹੀਆਂ ਹਨ ਕਿ ਸਰਕਾਰੀ ਸਕੂਲਾਂ ਵਿਚ ਬੱਚਿਆਂ ਦੀ ਗਿਣਤੀ ਘੱਟ ਹੋ ਰਹੀ ਹੈ। ਸਿੱਖਿਆ ਮੰਤਰੀ ਸਾਹਿਬ ਨੇ ਤਾਂ 10 ਤੋਂ ਘੱਟ ਗਿਣਤੀ ਵਾਲੇ ਸਕੂਲਾਂ ਦੀ ਤਾਂ ਮੀਟਿੰਗ ਵੀ ਰੱਖੀ ਹੋਈ ਹੈ। ਬਹੁਤ ਉਪਰਾਲੇ ਕੀਤੇ ਜਾ ਰਹੇ ਹਨ ਪਰ ਪੰਜਾਬੀ ਵਿਚ ਇਕ ਕਹਾਵਤ ਆਮ ਹੈ ਕਿ ਪਾਣੀ ਨੂੰ ਜਿੰਨਾ ਮਰਜ਼ੀ ਰਿੜਕ ਲਓ, ਨਿਕਲਣਾ ਵਿਚੋਂ ਕੁਝ ਵੀ ਨਹੀਂ। ਸਾਰੇ ਉਪਰਾਲੇ ਇਹ ਕਹਾਵਤ ਹੀ ਸਾਬਤ ਹੋ ਰਹੇ ਹਨ। ਸਾਰੇ ਪ੍ਰਤੱਖ ਵੇਖ ਰਹੇ ਹਨ ਪਰ ਕੁਝ ਅਜਿਹੇ ਉਪਰਾਲੇ ਵੀ ਹਨ ਜਿਨ੍ਹਾਂ ਦੇ ਲਾਗੂ ਕੀਤਿਆਂ ਬੱਚੇ ਜ਼ਰੂਰ ਵਧ ਸਕਦੇ ਹਨ, ਜਿਵੇਂ ਸਰਕਾਰੀ ਸਕੂਲ ਦੀਆਂ ਇਮਾਰਤਾਂ ਨੂੰ ਪ੍ਰਾਈਵੇਟ ਸਕੂਲ ਦੇ ਮੁਕਾਬਲੇ ਖੜ੍ਹਾ ਕੀਤਾ ਜਾਵੇ। ਸਾਰੇ ਸਰਕਾਰੀ ਕਰਮਚਾਰੀ ਆਪਣੇ ਬੱਚਿਆਂ ਨੂੰ ਘੱਟੋ-ਘੱਟ ਦਸਵੀਂ ਤੱਕ ਸਰਕਾਰੀ ਸਕੂਲਾਂ ਵਿਚ ਪੜ੍ਹਾਉਣ। ਸਰਕਾਰੀ ਸਕੂਲਾਂ ਵਿਚ ਪੰਜਾਬੀ ਦੇ ਨਾਲ-ਨਾਲ ਅੰਗਰੇਜ਼ੀ ਮਾਧਿਅਮ ਵੀ ਦਿੱਤਾ ਜਾਵੇ। ਇਕ ਪ੍ਰਾਇਮਰੀ ਸਕੂਲ ਵਿਚ ਇਕ ਸਫ਼ਾਈ ਕਰਮਚਾਰੀ ਹੋਵੇ ਜੋ ਗੇਟ-ਕੀਪਰ ਦਾ ਵੀ ਕੰਮ ਕਰੇ। ਹਰੇਕ ਸਕੂਲ ਨੂੰ ਘੱਟੋ-ਘੱਟ ਤਿੰਨ ਮੁਲਾਜ਼ਮ ਪੱਕੇ ਦਿੱਤੇ ਜਾਣ। ਅਧਿਆਪਕਾਂ 'ਤੇ ਸਿਰਫ ਪੜ੍ਹਾਈ ਦਾ ਹੀ ਕੰਮ ਪਾਇਆ ਜਾਵੇ, ਹੋਰ ਕੰਮ ਘਟਾਏ ਜਾਣ। ਪੰਜਾਬ ਸਰਕਾਰ ਨੂੰ ਬੇਨਤੀ ਹੈ ਕਿ ਜੇਕਰ ਉਪਰੋਕਤ ਕੰਮ ਕੀਤੇ ਜਾਣ ਤਾਂ ਨਿਸਚਿਤ ਹੀ ਸਾਨੂੰ ਬੱਚੇ ਲੱਭਣ ਦੀ ਲੋੜ ਨਹੀਂ ਪਵੇਗੀ, ਸਗੋਂ ਮੋਟੇ-ਮੋਟੇ ਬੈਨਰ ਲਾਉਣੇ ਪੈਣਗੇ ਕਿ ਸੀਟਾਂ ਭਰ ਗਈਆਂ ਹਨ, ਦਾਖਲਾ ਬੰਦ ਹੈ।

-ਮਾ: ਕਰਮਜੀਤ ਸਿੰਘ ਧਾਰੀਵਾਲ
ਨਵੀਂ ਆਬਾਦੀ, ਜੀ.ਟੀ. ਰੋਡ ਧਾਰੀਵਾਲ, ਗੁਰਦਾਸਪੁਰ।

ਧੀਆਂ ਸਾਡਾ ਮਾਣ

ਬਿਨਾਂ ਸ਼ੱਕ ਸਾਡੀਆਂ ਧੀਆਂ ਸਾਡਾ ਮਾਣ ਹਨ। ਸਮਾਜ ਵਿਚ ਧੀਆਂ ਆਪਣਾ ਹੱਕ ਅਤੇ ਅਧਿਕਾਰ ਰੱਖਦੀਆਂ ਹਨ। ਪਰ ਜਿਹੜੀ ਧੀ ਆਪਣੇ ਫ਼ਰਜ਼ ਤੋਂ ਪਾਸਾ ਵੱਟਦੀ ਹੈ, ਉਸ ਨੂੰ ਵੇਖ ਕੇ ਦੁੱਖ ਹੁੰਦਾ ਹੈ। ਚੁੰਨੀ ਸਾਡੀ ਅਣਖ, ਅਦਬ ਅਤੇ ਸਤਿਕਾਰ ਦੀ ਪ੍ਰਤੀਕ ਹੈ। ਪਰ ਜਿਨ੍ਹਾਂ ਧੀਆਂ ਦੇ ਸਿਰ 'ਤੇ ਚੁੰਨੀ ਨਹੀਂ, ਉਨ੍ਹਾਂ ਨੂੰ ਵੇਖ ਕੇ ਇੰਜ ਲਗਦਾ ਹੈ ਕਿ ਆਪਣਾ ਵਿਰਸਾ ਅਤੇ ਸੱਭਿਆਚਾਰ ਧੀਆਂ ਨੂੰ ਮੁਆਫ਼ਕ ਨਹੀਂ ਆ ਰਿਹਾ। ਇਹ ਗੱਲ ਪੰਜਾਬੀਅਤ ਦੇ ਵਿਰਸੇ ਵਿਚੋਂ ਅਤੀਤ ਤੋਂ ਪ੍ਰਤੱਖ ਹੈ ਕਿ ਜਿਸ ਧੀ ਦੇ ਸਿਰ ਚੁੰਨੀ ਹੈ, ਉਸ ਨੇ ਹਮੇਸ਼ਾ ਘਰ ਪਰਿਵਾਰ ਅਤੇ ਸਮਾਜ ਵਿਚ ਆਪਣੇ ਵਿਰਸੇ ਸੱਭਿਆਚਾਰ ਨੂੰ ਸਾਂਭ ਕੇ ਰੱਖਿਆ। ਜਿਸ ਨੇ ਵਿਰਸਾ ਅਤੇ ਸੱਭਿਆਚਾਰ ਵਿਸਾਰ ਦਿੱਤਾ ਤਾਂ ਉਹ ਸਮਝੋ ਕੁਰਾਹੇ ਪੈ ਗਿਆ। ਸਮੇਂ ਦੀ ਝੁੱਲੀ ਹਨੇਰੀ ਨੇ ਪੱਛਮੀ ਸੱਭਿਅਤਾ ਦਾ ਪ੍ਰਭਾਵ ਸਾਡੇ ਵਿਰਸੇ ਅਤੇ ਸੱਭਿਆਚਾਰ ਉਤੇ ਪਾ ਦਿੱਤਾ ਹੈ ਪਰ ਫਿਰ ਵੀ ਬਹੁਤੀ ਧੀਆਂ ਨੇ ਆਪਣਾ ਵਿਰਸਾ ਸਾਂਭਿਆ ਹੋਇਆ ਹੈ।

-ਸੁਖਪਾਲ ਸਿੰਘ ਗਿੱਲ
ਅਬਿਆਣਾ ਕਲਾਂ।

ਅਵਾਰਾ ਕੁੱਤਿਆਂ ਦੀ ਦਹਿਸ਼ਤ

'ਅਜੀਤ' ਵਿਚ ਪਿਛਲੇ ਦਿਨੀਂ ਸੰਪਾਦਕੀ ਲੇਖ 'ਮੇਨਕਾ ਗਾਂਧੀ ਅਤੇ ਅਵਾਰਾ ਕੁੱਤੇ' ਪੰਜਾਬ ਵਿਚ ਫੈਲੇ ਅਵਾਰਾ ਕੁੱਤਿਆਂ ਦੇ ਦਹਿਸ਼ਤ ਦੀ ਸਹੀ ਤਸਵੀਰ ਸੀ। ਅਵਾਰਾ ਕੁੱਤਿਆਂ ਦੀ ਦਹਿਸ਼ਤ ਇਸ ਕਦਰ ਹੈ ਕਿ ਬੱਚੇ ਤਾਂ ਬੱਚੇ, ਸਗੋਂ ਨੌਜਵਾਨ ਵੀ ਰਾਤ-ਬਰਾਤੇ ਕਿਧਰੇ ਜਾਣ ਤੋਂ ਝਿਜਕਦੇ ਹਨ। ਰਾਤਾਂ ਨੂੰ ਕੰਮਾਂ ਤੋਂ ਮੁੜਨ ਕਾਮੇ, ਹੱਡਾ ਰੋੜੀ ਵਾਲੇ ਰਸਤੇ ਪਿੰਡਾਂ ਨੂੰ ਆਉਣ ਦੀ ਬਜਾਏ, ਦੋ-ਦੋ, ਤਿੰਨ-ਤਿੰਨ ਕਿਲੋਮੀਟਰ ਦਾ ਗੇੜ ਪਾ ਕੇ ਘਰਾਂ ਨੂੰ ਆਉਂਦੇ ਹਨ। ਲੋਕ ਮਨਾਂ ਵਿਚ ਅਜਿਹਾ ਸਹਿਮ ਤਾਂ ਅੱਤਵਾਦ ਦੇ ਦੌਰ ਵੇਲੇ ਵੀ ਨਹੀਂ ਸੀ। ਸਰਕਾਰੀ ਅੰਕੜਿਆਂ ਅਨੁਸਾਰ ਅਵਾਰਾ ਕੁੱਤਿਆਂ ਦਾ ਸ਼ਿਕਾਰ ਹੋ ਕੇ ਹਰ ਸਾਲ ਤਕਰੀਬਨ 30 ਹਜ਼ਾਰ ਲੋਕ ਮਰਦੇ ਹਨ, ਜਦ ਕਿ ਅਸਲੀਅਤ ਇਸ ਤੋਂ ਕਿਤੇ ਜ਼ਿਆਦਾ ਭਿਆਨਕ ਹੈ। ਪਹਿਲਾਂ ਅਵਾਰਾ ਕੁੱਤਿਆਂ ਨੂੰ ਮਾਰ ਕੇ ਇਨ੍ਹਾਂ ਦੀ ਗਿਣਤੀ ਦਾ ਤਵਾਜ਼ਨ ਠੀਕ ਰੱਖਿਆ ਜਾਂਦਾ ਸੀ। ਪ੍ਰੰਤੂ ਕੇਂਦਰੀ ਮੰਤਰੀ ਮੇਨਕਾ ਗਾਂਧੀ ਦੀ ਪਹਿਲ 'ਤੇ ਕਈ ਸਾਲ ਪਹਿਲਾਂ ਅਵਾਰਾ ਕੁੱਤਿਆਂ ਨੂੰ ਮਾਰਨ 'ਤੇ ਰੋਕ ਲਗਾ ਦਿੱਤੀ ਗਈ। ਹੁਣ ਕੁੱਤਿਆਂ (ਅਵਾਰਾ) ਦੀ ਨਸਬੰਦੀ ਦੇ ਬਣਾਏ ਜਾ ਰਹੇ ਪ੍ਰੋਗਰਾਮ ਦੇ ਰਾਹ ਵਿਚ ਮੇਨਕਾ ਗਾਂਧੀ ਵੱਲੋਂ ਅੜਿੱਕੇ ਡਾਹੇ ਜਾ ਰਹੇ ਹਨ। ਮੇਨਕਾ ਗਾਂਧੀ ਨੂੰ ਕੁੱਤਿਆਂ ਦੇ ਨਾਲ-ਨਾਲ ਉਨ੍ਹਾਂ ਲੋਕਾਂ ਦਾ ਵੀ ਫ਼ਿਕਰ ਕਰਨਾ ਚਾਹੀਦਾ ਹੈ, ਜਿਹੜੇ ਕੁੱਤਿਆਂ ਦੇ ਹਮਲਿਆਂ ਦਾ ਸ਼ਿਕਾਰ ਹੋ ਰਹੇ ਹਨ। ਸਾਨੂੰ ਸਮੂਹਿਕ ਰੂਪ ਵਿਚ ਵੀ ਮੇਨਕਾ ਗਾਂਧੀ ਵਿਰੁੱਧ ਆਵਾਜ਼ ਬੁਲੰਦ ਕਰਨੀ ਚਾਹੀਦੀ ਹੈ ਤਾਂ ਕਿ ਉਸ ਦੇ ਹੱਠ ਕਰਕੇ ਆਮ ਲੋਕ ਮੌਤ ਦੇ ਮੂੰਹ ਵਿਚ ਨਾ ਜਾਈ ਜਾਣ।

-ਪ੍ਰੀਤ ਸਿੰਘ ਸੰਦਲ (ਕਵੀਸ਼ਰ)
ਪਿੰਡ ਮਕਸੂਦੜਾ (ਲੁਧਿਆਣਾ)।

ਕਿਸਾਨ ਦੀ ਮਿਹਨਤ

ਦੇਸ਼ ਦਾ ਅੰਨਦਾਤਾ ਆਪਣੀ ਫਸਲ ਨੂੰ ਪੁੱਤਰਾਂ ਵਾਂਗ ਪਾਲ ਕੇ ਪੂਰੀ ਇਮਾਨਦਾਰੀ ਨਾਲ ਮੰਡੀ ਵਿਚ ਲੈ ਕੇ ਆਉਂਦਾ ਹੈ। ਫਿਰ ਉਸ ਦੁਆਰਾ ਕੀਤੀ ਮਿਹਨਤ 'ਤੇ ਸ਼ੱਕ ਕਿਸ ਗੱਲ ਦੀ ਰਹਿ ਜਾਂਦੀ ਹੈ? ਕੀ ਉਸ ਵੱਲੋਂ ਤਿਆਰ ਕੀਤੇ ਅਨਾਜ ਵਿਚ ਕਿਸੇ ਤਰ੍ਹਾਂ ਦੀ ਕਮੀ ਰਹਿ ਜਾਂਦੀ ਹੈ? ਜੇਕਰ ਨਹੀਂ ਤਾਂ ਉਸ ਦੀ ਏਨੀ ਖੱਜਲ-ਖੁਆਰੀ ਕਿਉਂ ਹੋ ਰਹੀ ਹੈ? ਕਿਸਾਨ ਆਪ ਕੋਈ ਚੀਜ਼ ਬਾਜ਼ਾਰ ਵਿਚੋਂ ਖਰੀਦਦਾ ਹੈ, ਉਹ ਵਿਚਾਰਾ ਸਿਰਫ ਚੀਜ਼ ਦਾ ਰੇਟ ਹੀ ਦੇਖਦਾ ਹੈ, ਉਸ ਚੀਜ਼ ਸਬੰਧੀ ਕਿਸੇ ਤਰ੍ਹਾਂ ਦਾ ਕਿੰਤੂ-ਪ੍ਰੰਤੂ ਕਰੇ ਬਿਨਾਂ ਚੀਜ਼ ਖਰੀਦ ਲੈਂਦਾ ਹੈ। ਜੇਕਰ ਕਿਸਾਨ ਚੀਜ਼ ਖਰੀਦਣ ਲੱਗਿਆਂ ਕਿਸੇ ਤਰ੍ਹਾਂ ਦਾ ਕਿੰਤੂ-ਪ੍ਰੰਤੂ ਨਹੀਂ ਕਰਦਾ, ਫਿਰ ਮੰਡੀਆਂ ਵਿਚ ਹਰ ਛੇ ਮਹੀਨੇ ਬਾਅਦ ਉਸ ਦੀ ਖੱਜਲ-ਖੁਆਰੀ ਕਿਉਂ ਹੁੰਦੀ ਹੈ? ਦੇਸ਼ ਵਿਚ ਅੰਨ ਦਾ ਭੰਡਾਰ ਪੈਦਾ ਕਰਨ ਵਾਲਾ ਆਪ ਖ਼ੁਦਕੁਸ਼ੀਆਂ ਦੇ ਰਾਹ ਕਿਉਂ ਪੈ ਰਿਹਾ ਹੈ? ਅਜਿਹਾ ਕਦੋਂ ਤੱਕ ਹੁੰਦਾ ਰਹੇਗਾ? ਉਦੋਂ ਤੱਕ ਜਦੋਂ ਤੱਕ ਦੇਸ਼ ਦੀ ਜਨਤਾ ਭੁੱਖ ਨਾਲ ਮਰ ਨਹੀਂ ਜਾਂਦੀ ਜਾਂ ਫਿਰ ਉਦੋਂ ਤੱਕ ਕਿ ਜਦ ਕਿਸਾਨ ਖ਼ੁਦ ਖ਼ਤਮ ਹੋ ਗਿਆ ਹੈ? ਕਿਸਾਨ ਦੀ ਅਜੋਕੀ ਹਾਲਤ ਏ.ਸੀ. 'ਚ ਬੈਠਣ ਵਾਲੇ ਕੀ ਜਾਣਦੇ ਹਨ। ਜੇਕਰ ਕਿਸਾਨ ਦਾ ਸਾਥ ਸਰਕਾਰਾਂ ਹੀ ਛੱਡ ਦੇਣਗੀਆਂ ਫਿਰ ਤਾਂ ਦੇਸ਼ ਦਾ ਰੱਬ ਹੀ ਰਾਖਾ ਹੈ। ਮਿਹਨਤ ਕਰਨ ਵਾਲਿਆਂ ਦੀ ਹਾਲਤ ਏਨੀ ਤਰਸਯੋਗ ਨਾ ਹੋਣ ਦਿਓ, ਕਿਉਂਕਿ ਇਨ੍ਹਾਂ ਸਹਾਰੇ ਹੀ ਦੇਸ਼ ਤਰੱਕੀ ਦੇ ਰਾਹ 'ਤੇ ਹੈ।

-ਸੁਖਵਿੰਦਰ ਕਲੇਰ ਬੱਸੀਆਂ
ਪਿੰਡ ਤੇ ਡਾਕ: ਬੱਸੀਆਂ, ਜ਼ਿਲ੍ਹਾ ਲੁਧਿਆਣਾ।

23-4-2015

 ਬੱਸ ਕਿਰਾਏ ਵਿਚ ਵਾਧਾ ਕਿਉਂ?

ਪਿਛਲੇ ਦਿਨੀਂ ਅਖ਼ਬਾਰਾਂ ਵਿਚ ਦੋ ਖ਼ਬਰਾਂ ਪ੍ਰਮੁੱਖਤਾ ਨਾਲ ਛਪੀਆਂ ਹਨ। ਇਕ ਤਾਂ ਇਹ ਹੈ ਕਿ ਡੀਜ਼ਲ ਦੀਆਂ ਕੀਮਤਾਂ ਵਿਚ ਇਕ ਰੁਪਏ 21 ਪੈਸੇ ਪ੍ਰਤੀ ਲਿਟਰ ਕਮੀ ਹੋਈ। ਦੂਜੀ ਇਹ ਕਿ ਪੰਜਾਬ ਸਰਕਾਰ ਵੱਲੋਂ ਬੱਸ ਕਿਰਾਏ ਵਿਚ 3 ਤੋਂ 6 ਪੈਸੇ ਪ੍ਰਤੀ ਕਿਲੋਮੀਟਰ ਵਾਧਾ ਕੀਤਾ ਗਿਆ। ਸਮਝ ਨਹੀਂ ਆਉਂਦੀ ਕਿ ਇਹ ਵਾਧਾ ਕਿਉਂ ਕੀਤਾ ਗਿਆ, ਜਦੋਂ ਕਿ ਪਿਛਲੇ ਇਕ ਸਾਲ ਦੇ ਮੁਕਾਬਲੇ ਡੀਜ਼ਲ ਦੀਆਂ ਕੀਮਤਾਂ ਘਟੀਆਂ ਹਨ। ਪੰਜਾਬ ਵਿਚ ਬੱਸ ਕਿਰਾਇਆ ਪਹਿਲਾਂ ਹੀ ਗੁਆਂਢੀ ਸੂਬਿਆਂ ਨਾਲੋਂ ਜ਼ਿਆਦਾ ਹੈ। ਇਸ ਕਰਕੇ ਲੋਕ ਤਾਂ ਉਮੀਦ ਕਰ ਰਹੇ ਸਨ ਕਿ ਸਰਕਾਰ ਬੱਸ ਕਿਰਾਇਆ ਘਟਾ ਕੇ ਗਰੀਬਾਂ ਨੂੰ ਤੋਹਫ਼ਾ ਦੇਵੇਗੀ, ਪ੍ਰੰਤੂ ਹੋਇਆ ਇਸ ਤੋਂ ਬਿਲਕੁਲ ਉਲਟ। ਬੱਸ ਕਿਰਾਏ ਵਿਚ ਕੀਤੇ ਇਸ ਵਾਧੇ ਨੂੰ ਸਰਕਾਰ ਭਾਵੇਂ ਮਾਮੂਲੀ ਹੀ ਕਹੇ ਪਰ ਇਹ ਗ਼ਰੀਬ ਵਰਗ ਨਾਲ ਸਰਾਸਰ ਧੱਕਾ ਹੈ। ਕਿਉਂਕਿ ਬੱਸਾਂ ਵਿਚ ਜ਼ਿਆਦਾ ਗਰੀਬ ਵਰਗ ਹੀ ਸਫ਼ਰ ਕਰਦਾ ਹੈ। ਨਿੱਤ ਵਧਦੀ ਮਹਿੰਗਾਈ ਨੇ ਗਰੀਬਾਂ ਦਾ ਜਿਊਣਾ ਪਹਿਲਾਂ ਹੀ ਮੁਹਾਲ ਕਰ ਰੱਖਿਆ ਹੈ, ਉਤੋਂ ਇਹ ਬੱਸ ਕਿਰਾਏ 'ਚ ਵਾਧਾ ਉਨ੍ਹਾਂ ਦੇ ਜ਼ਖਮਾਂ 'ਤੇ ਲੂਣ ਦਾ ਕੰਮ ਕਰੇਗਾ।

-ਪ੍ਰੀਤ ਸਿੰਘ ਸੰਦਲ
ਪਿੰਡ ਮਕਸੂਦੜਾ (ਲੁਧਿਆਣਾ)।

ਫ ਫ ਫ

ਜੁਰਮ ਸਬੰਧੀ ਫ਼ਿਲਮ

ਪਿਛਲੇ ਦਿਨੀਂ ਪੜ੍ਹਿਆ ਕਿ ਸਲਮਾਨ ਖਾਨ ਨੇ ਕਾਲਾ ਹਿਰਨ ਮਾਰ ਕੇ ਜੋ ਕੁਝ ਦਿਨ ਜੇਲ੍ਹ 'ਚ ਕੈਦੀ ਨੰ: 210 ਬਣ ਕੇ ਗੁਜ਼ਾਰੇ, ਉਸ 'ਤੇ ਨਿਰਦੇਸ਼ਕ ਰਣਜੀਤ ਵੱਲੋਂ ਫ਼ਿਲਮ ਬਣ ਰਹੀ ਹੈ। ਗੱਲ ਕਿੱਧਰ ਨੂੰ ਗਈ ਕੁਦਰਤ ਦੀਆਂ ਚੀਜ਼ਾਂ ਨਸ਼ਟ ਕਰੋ ਫ਼ਿਲਮ ਬਣਾਓ, ਪੈਸਾ, ਮਸ਼ਹੂਰੀ ਖੱਟੋ। ਇਹ ਫ਼ਿਲਮ ਸਮਾਜ ਨੂੰ ਕੀ ਸੇਧ ਦਿੰਦੀ ਹੈ। ਉਸ ਤੋਂ ਬਾਅਦ ਸਲਮਾਨ ਨੇ ਜੋ ਫੁੱਟਪਾਥ 'ਤੇ ਪਏ ਗਰੀਬ ਬੇਘਰਾਂ ਨੂੰ ਦਰੜ੍ਹਿਆ, ਉਸ 'ਤੇ ਫ਼ਿਲਮ ਬਣੇਗੀ। ਫ਼ਿਲਮ ਬਣਾਉਣ ਵਾਲਿਆਂ ਨੇ ਕਦੀ ਜਤਿਨ ਦਾਸ ਵਰਗੇ ਮਹਾਨ ਸ਼ਹੀਦ ਜਿਸ ਨੇ ਆਜ਼ਾਦੀ ਲਈ ਜੇਲ੍ਹ 'ਚ 29 ਦਿਨ ਭੁੱਖ ਹੜਤਾਲ ਰੱਖੀ ਤੇ ਭੁੱਖ ਨਾਲ ਸ਼ਹੀਦ ਹੋ ਗਿਆ ਸੀ, ਬਾਰੇ ਕਦੀ ਨਹੀਂ ਸੋਚਿਆ। ਮੇਨਕਾ ਗਾਂਧੀ, ਸਮੂਹ ਵਾਤਾਵਰਨ ਪ੍ਰੇਮੀਆਂ ਨੂੰ ਇਸ ਵਿਰੁੱਧ ਸਖ਼ਤ ਸਟੈਂਡ ਲੈਣਾ ਪਵੇਗਾ। ਸੈਂਸਰ ਬੋਰਡ ਨੂੰ ਵੀ ਚਾਹੀਦਾ ਹੈ ਕਿ ਉਹ ਅਜਿਹੀਆਂ ਕੁਦਰਤ ਦੀ ਵਿਨਾਸ਼ਤਾ ਅਤੇ ਜੁਰਮਾਂ ਨੂੰ ਹੁਲਾਰਾ ਦੇਣ ਵਾਲੀਆਂ ਫ਼ਿਲਮਾਂ 'ਤੇ ਰੋਕ ਲਾਵੇ।

-ਇੰਸ: ਗੁਰਸਵਿੰਦਰ ਸਿੰਘ ਬਿਲਾਸਪੁਰ
ਸਿਵਲ ਹਸਪਤਾਲ, ਲੁਹਾਰਾ (ਮੋਗਾ)।

ਫ ਫ ਫ

ਅਧਿਆਪਕ ਬਨਾਮ ਬੱਚੇ

ਸਕੂਲ 'ਚ ਦਾਖਲਾ ਲੈਣ ਲਈ ਕਈ ਬੱਚੇ ਤਾਂ ਸਹਿਜ-ਸੁਭਾਅ ਖੁਸ਼ੀ-ਖੁਸ਼ੀ ਸਕੂਲ ਆਉਂਦੇ ਹਨ ਪਰ ਕਈ ਡਰ, ਤਣਾਅ, ਰੋ-ਧੋ ਕੇ ਸਕੂਲ ਆਉਂਦੇ ਹਨ। ਪ੍ਰਾਈਵੇਟ ਸਕੂਲਾਂ ਵਿਚ ਤਾਂ ਢਾਈ ਤੋਂ 3 ਸਾਲ ਦੀ ਉਮਰ ਵਿਚ ਹੀ ਦਾਖਲਾ ਹੋ ਜਾਂਦਾ ਹੈ, ਉਥੇ ਬੱਚੇ ਲਈ 'ਪਲੇਅ ਵੇਅ' ਢੰਗ ਰਾਹੀਂ ਖਿਡੌਣਿਆਂ, ਝੂਲਿਆਂ ਰਾਹੀਂ ਅਗਾਜ਼ ਪੜ੍ਹਾਈ ਦਾ ਹੁੰਦਾ ਹੈ। ਪਰ ਸਰਕਾਰੀ ਸਕੂਲਾਂ ਵਿਚ ਭਾਵੇਂ 'ਜੋੜੋ ਗਿਆਨ' 'ਪਲੇਅ ਵੇਅ' ਦਾ ਹੀ ਰੂਪ ਹੈ ਪਰ ਬਹੁਤ ਕੁਝ ਕਰਨਾ ਇਸ ਵਿਚ ਬਾਕੀ ਹੈ। ਮਿਥੇ ਟੀਚੇ ਦਾ ਡੰਡਾ ਅਧਿਆਪਕਾਂ ਸਿਰ ਹੋਣ ਕਰਕੇ ਉਹ ਸਿੱਧਾ ਪੜ੍ਹਾਈ ਤੋਂ ਸ਼ੁਰੂ ਕਰ ਦਿੰਦੇ ਹਨ। ਜਿਹੜੀ ਗੱਲ ਅਧਿਆਪਕਾਂ ਦੁਆਰਾ ਹੋ ਸਕਦੀ ਹੈ, ਉਹ ਹੈ ਉਨ੍ਹਾਂ ਦਾ 'ਵਰਤਾਓ'। ਪਿਆਰ, ਹਲੀਮੀ, ਦੋਸਤਾਨਾ, ਮਾਂ ਵਾਂਗ ਵਤੀਰਾ ਪਹਿਲਾਂ ਇਨ੍ਹਾਂ ਬੱਚਿਆਂ ਲਈ ਠਹਿਰਾਅ ਦਾ ਕੰਮ ਕਰਦਾ ਹੈ। ਪੜ੍ਹਾਈ ਤਾਂ ਬਾਅਦ ਦੀ ਗੱਲ ਹੈ। ਅਧਿਆਪਕ ਮਾਂ ਤੋਂ ਬਾਅਦ 'ਬੱਚੇ ਦੀ ਮਾਂ' ਹੈ। ਘੱਟੋ-ਘੱਟ ਅਧਿਆਪਕ ਨੂੰ ਚਾਹੀਦਾ ਹੈ ਕਿ 2-3 ਮਹੀਨੇ ਬੱਚੇ ਨਾਲ ਮਾਨਸਿਕਤਾ ਬੱਚੇ ਵਾਲੀ ਰੱਖੀ ਜਾਵੇ। ਉਸ ਦਾ ਮਨ ਲਗਾਇਆ ਜਾਵੇ। ਉਹ ਸਕੂਲ ਡਰ ਜਾਂ ਹਊਆ ਸਮਝ ਕੇ ਨਾ ਆਵੇ, ਸਗੋਂ ਅਜਿਹਾ ਸੋਚੇ ਕਿ ਸਕੂਲ ਉਸ ਦਾ ਘਰ ਹੈ।

-ਗੁਰਲਵਦੀਪ ਸਿੰਘ
ਈ.ਟੀ.ਟੀ. ਅਧਿਆਪਕ, ਸਰਕਾਰੀ ਐਲੀਮੈਂਟਰੀ ਸਕੂਲ, ਕੋਟ ਧਰਮ ਚੰਦ ਕਲਾਂ (ਤਰਨ ਤਾਰਨ)।

ਫ ਫ ਫ

ਫਜ਼ੂਲ-ਖਰਚੀ

ਸਾਡੇ ਸਮਾਜ ਵਿਚ ਲੋਕ ਦਿਖਾਵੇ ਲਈ ਕੀਤਾ ਗਿਆ ਅੰਨਾ ਖਰਚ ਖ਼ੁਦਕੁਸ਼ੀ ਨੂੰ ਦਾਅਵਤ ਦਿੰਦਾ ਹੈ। ਵੱਡੇ ਲੋਕਾਂ ਦੇ ਵਿਆਹ-ਸ਼ਾਦੀਆਂ 'ਤੇ ਲੋਕ ਦਿਖਾਵੇ ਲਈ ਵਧਾਏ ਖਰਚ ਉਨ੍ਹਾਂ ਲਈ ਤਾਂ ਮਨੋਰੰਜਨ ਤੇ ਸ਼ੌਕ ਹਨ ਪਰ ਗ਼ਰੀਬ ਲਈ ਅੱਜ ਦੀ ਮਹਿੰਗਾਈ ਦੇ ਯੁੱਗ ਵਿਚ ਦੋ ਡੰਗ ਦੀ ਰੋਟੀ ਹੀ ਮਸਾਂ ਪੂਰੀ ਹੁੰਦੀ ਹੈ। ਕਿਸਾਨ ਕਰਜ਼ੇ ਚੁੱਕ-ਚੁੱਕ ਕੇ ਇਨ੍ਹਾਂ ਖਰਚਿਆਂ ਨੂੰ ਪੂਰ ਚੜ੍ਹਾਉਂਦੇ ਹਨ ਤੇ ਜਦ ਉਹ ਕਰਜ਼ੇ ਲਾਹੁਣ ਤੋਂ ਅਸਮਰੱਥ ਹੋ ਜਾਂਦੇ ਹਨ ਤਾਂ ਅੰਤ ਮੌਤ ਨੂੰ ਗਲੇ ਲਾਉਣ ਤੋਂ ਇਲਾਵਾ ਹੋਰ ਕੋਈ ਚਾਰਾ ਨਹੀਂ ਰਹਿ ਜਾਂਦਾ। ਸਾਨੂੰ ਸਮਾਜ ਮੁਤਾਬਿਕ ਨਹੀਂ ਸਗੋਂ ਆਪਣੇ ਮੁਤਾਬਿਕ ਖਰਚ ਕਰਨਾ ਚਾਹੀਦਾ ਹੈ। ਆਮ ਕਿਹਾ ਜਾਂਦਾ ਹੈ ਕਿ 'ਚਾਦਰ ਦੇਖ ਕੇ ਪੈਰ ਪਸਾਰਨੇ ਚਾਹੀਦੇ ਹਨ' ਤਾਂ ਜੋ ਫਾਲਤੂ ਖਰਚ ਨੂੰ ਰੋਕ ਕੇ ਆਮ ਆਦਮੀ ਦੀ ਸਲਾਮਤੀ ਮੰਗ ਸਕੀਏ।


-ਮੇਜਰ ਸਿੰਘ ਸੁਖਾਣਾਂ
ਮਾਲੇਰਕੋਟਲਾ ਰੋਡ, ਰਾਏਕੋਟ।

ਰਾਖਵੇਂਕਰਨ ਦੀ ਨੀਤੀ

ਵੱਖ-ਵੱਖ ਧਰਮਾਂ-ਜਾਤਾਂ ਦਾ ਸਮੂਹ ਮੇਰਾ ਭਾਰਤ ਮਹਾਨ ਅੱਜ ਆਜ਼ਾਦੀ ਪ੍ਰਾਪਤੀ ਦੇ 68 ਸਾਲਾਂ ਬਾਅਦ ਵੀ ਰਾਖਵੇਂਕਰਨ ਦਾ ਸੰਤਾਪ ਹੰਢਾਅ ਰਿਹਾ ਹੈ। ਦੇਸ਼ ਨੂੰ ਆਜ਼ਾਦੀ ਮਿਲੀ ਤਾਂ ਇਹ ਮਹਿਸੂਸ ਕੀਤਾ ਗਿਆ ਸੀ ਕਿ ਕੁਝ ਕਮਜ਼ੋਰ ਵਰਗਾਂ ਨੂੰ 1960 ਤੱਕ ਰਾਖਵੇਂਕਰਨ ਦਾ ਮੌਕਾ ਦੇ ਕੇ ਸਮਾਜ ਵਿਚ ਬਰਾਬਰਤਾ ਦਾ ਅਹਿਸਾਸ ਕਰਵਾਇਆ ਜਾਏਗਾ। ਇਸ ਤਹਿਤ ਹੀ ਅਨੁਸੂਚਿਤ ਜਾਤੀ ਨੂੰ 25 ਫ਼ੀਸਦੀ ਰਾਖਵਾਂਕਰਨ ਦਿੱਤਾ ਗਿਆ ਸੀ। ਭਾਵੇਂ ਇਸ ਜਾਤੀ ਦੇ ਲੋਕਾਂ ਦੀ ਆਰਥਿਕ ਹਾਲਤ ਤੇ ਸਮਾਜਿਕ ਰੁਤਬਾ 1960 ਤੱਕ ਕਾਫੀ ਸੁਧਰ ਗਿਆ ਸੀ ਪ੍ਰੰਤੂ ਦੇਸ਼ ਦੀ ਉਸ ਵੇਲੇ ਦੀ ਸਭ ਤੋਂ ਵੱਡੀ ਰਾਜਨੀਤਕ ਪਾਰਟੀ ਨੇ ਪੂਰੇ ਦੇਸ਼ ਵਿਚ ਅਨੁਸੂਚਿਤ ਜਾਤੀ ਦੇ ਲੋਕਾਂ ਦੀ ਬਹੁਮਤ ਗਿਣਤੀ ਨੂੰ ਦੇਖਦੇ ਹੋਏ ਇਸ ਨੂੰ ਆਪਣੇ ਵੋਟ ਬੈਂਕ ਦਾ ਹਿੱਸਾ ਬਣਾ ਕੇ ਹਰ 10 ਸਾਲ ਲਈ ਵਧਾਉਣਾ ਸ਼ੁਰੂ ਕਰ ਦਿੱਤਾ, ਜੋ ਅੱਜ ਤੱਕ ਜਾਰੀ ਹੈ। ਅੱਜ ਜਾਟ ਰਾਖਵਾਂਕਰਨ ਦਾ ਮੁੱਦਾ ਫਿਰ ਸਿਆਸਤ ਦੇ ਗਲਿਆਰਿਆਂ ਵਿਚ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ। ਸੁਪਰੀਮ ਕੋਰਟ ਦੇ ਫ਼ੈਸਲੇ ਦੇ ਬਾਵਜੂਦ ਰਾਜਨੀਤਕ ਲੋਕ ਸਿਆਸੀ ਪੱਤਾ ਇਸ ਲਈ ਖੇਡ ਰਹੇ ਹਨ ਕਿ ਦੇਸ਼ ਦੇ 9 ਰਾਜਾਂ ਵਿਚ ਜਾਟਾਂ ਦੀ ਗਿਣਤੀ ਵਧੇਰੇ ਹੈ। ਦੇਸ਼ ਦੇ ਮੱਧ ਵਰਗੀ ਲੋਕ ਗਰੀਬੀ ਦੀ ਚੱਕੀ ਵਿਚ ਪਿਸ ਰਹੇ ਹਨ। ਰਾਖਵਾਂਕਰਨ ਆਰਥਿਕ ਆਧਾਰ 'ਤੇ ਹੋਣਾ ਚਾਹੀਦਾ ਹੈ, ਜਾਤ ਆਧਾਰਿਤ ਨਹੀਂ। ਦੇਸ਼ ਨਿਰਮਾਣ ਦੀ ਗੱਲ ਕਰਨ ਵਾਲੇ ਲੋਕਾਂ ਨੂੰ ਅਜਿਹੇ ਹੱਥਕੰਡੇ ਨਹੀਂ ਅਪਣਾਉਣੇ ਚਾਹੀਦੇ, ਜਿਸ ਨਾਲ ਜਾਤਾਂ ਅਤੇ ਧਰਮਾਂ ਵਿਚ ਦੂਰੀਆਂ ਵਧ ਜਾਣ। ਅਜਿਹੀਆਂ ਸਿਆਸੀ ਸਰਗਰਮੀਆਂ ਨਾਲ ਭਾਰਤ ਵਿਚ ਕਦੀ ਅੱਛੇ ਦਿਨ ਨਹੀਂ ਆਉਣਗੇ।

-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀ ਖਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

17-4-2015

 ਸ਼ਹੀਦਾਂ ਦੇ ਸੁਪਨੇ

ਸ਼ਹੀਦ-ਏ-ਆਜ਼ਮ ਸ: ਭਗਤ ਸਿੰਘ, ਰਾਜਗੁਰੂ, ਸੁਖਦੇਵ ਤੇ ਸੈਂਕੜੇ ਹੀ ਆਜ਼ਾਦੀ ਪਸੰਦ ਪਰਵਾਨਿਆਂ ਨੇ ਕੁਰਬਾਨੀਆਂ ਦੇ ਕੇ ਦੇਸ਼ ਆਜ਼ਾਦ ਕਰਵਾਇਆ ਸੀ ਪਰ ਦੁੱਖ ਇਸ ਗੱਲ ਦਾ ਹੈ ਕਿ ਅੱਜ ਤੱਕ ਸ਼ਹੀਦਾਂ ਦੇ ਸੁਪਨਿਆਂ ਦਾ ਸਮਾਜ ਨਹੀਂ ਸਿਰਜਿਆ ਜਾ ਸਕਿਆ। ਸ਼ਹੀਦਾਂ ਦਾ ਸੁਪਨਾ ਸੀ ਕਿ ਹਰ ਦੇਸ਼ ਵਾਸੀ ਨੂੰ ਪੂਰਾ ਮਾਣ-ਸਤਿਕਾਰ ਮਿਲੇ, ਊਚ-ਨੀਚ ਤੇ ਜਾਤ-ਪਾਤ ਨੂੰ ਕੋਈ ਥਾਂ ਨਾ ਹੋਵੇ, ਸਭ ਇਕ ਬਰਾਬਰ ਹੋਣ, ਸਭ ਲਈ ਰੁਜ਼ਗਾਰ ਹੋਵੇ, ਚੰਗੀਆਂ ਸਿਹਤ ਸਹੂਲਤਾਂ ਹੋਣ, ਉਸਾਰੂ ਸਿੱਖਿਆ, ਭ੍ਰਿਸ਼ਟਾਚਾਰ ਮੁਕਤ ਸ਼ਾਸਨ, ਸਮਾਜਿਕ ਸਮਾਨਤਾ ਨੂੰ ਪਹਿਲ ਦਿੱਤੀ ਜਾਵੇ। ਪਰ ਆਜ਼ਾਦੀ ਤੋਂ ਬਾਅਦ ਅੱਜ ਤੱਕ ਹਰ ਸਰਕਾਰੀ ਤੇ ਗ਼ੈਰ-ਸਰਕਾਰੀ ਮਹਿਕਮੇ ਵਿਚ ਭ੍ਰਿਸ਼ਟਾਚਾਰ ਦਾ ਬੋਲਬਾਲਾ ਹੈ, ਉਸ ਤੋਂ ਸਪੱਸ਼ਟ ਹੈ ਕਿ ਸ਼ਹੀਦਾਂ ਦੇ ਸੁਪਨੇ ਸਾਕਾਰ ਹੋਣੇ ਅਜੇ ਦੂਰ ਦੀ ਗੱਲ ਹੈ।

-ਬੰਤ ਘੁਡਾਣੀ
ਪਿੰਡ ਤੇ ਡਾਕ: ਘੁਡਾਣੀ ਕਲਾਂ, ਲੁਧਿਆਣਾ।

ਫ ਫ ਫ

ਸ਼ੁਕਰਾਨਾ

ਅਜੋਕਾ ਮਨੁੱਖ ਬੜਾ ਸਵਾਰਥੀ ਹੋ ਰਿਹਾ ਹੈ। ਹਰ ਵਕਤ ਝੋਲੀ ਅੱਡ ਕੇ ਹੀ ਰੱਖਦਾ ਹੈ। ਕਿਸੇ ਦੂਜੇ ਤੋਂ ਹਮੇਸ਼ਾ ਹੀ ਕੁਝ ਨਾ ਕੁਝ ਖੋਹਣ ਵਾਸਤੇ ਨਜ਼ਰ ਟਿਕਾਈ ਰੱਖਦਾ ਹੈ। ਕਦਰਾਂ-ਕੀਮਤਾਂ ਨੂੰ ਛਿੱਕੇ 'ਤੇ ਟੰਗ ਕੇ ਆਪਣੀ ਭੁੱਖ ਨੂੰ ਪੂਰਾ ਕਰਨ ਵਾਸਤੇ ਹਰ ਯਤਨ ਕਰਦਾ ਹੈ। ਕਾਮ, ਕ੍ਰੋਧ, ਲੋਭ, ਮੋਹ ਅਤੇ ਹੰਕਾਰ ਵਿਚ ਪੂਰੀ ਤਰ੍ਹਾਂ ਫਸਿਆ ਅੱਜ ਦਾ ਮਨੁੱਖ ਪਰਮਾਤਮਾ ਦੁਆਰਾ ਸਿਰਜੀ ਇਸ ਕੁਦਰਤ ਤੋਂ ਸਭ ਲੈ ਕੇ ਵੀ ਸ਼ੁਕਰਾਨਾ ਨਹੀਂ ਕਰਦਾ।

-ਸੰਤੋਖ ਸਿੰਘ ਸੋਖਾ
ਕੰਧੋਲਾ, ਚਮਕੌਰ ਸਾਹਿਬ (ਰੋਪੜ)।

ਫ ਫ ਫ

ਜਲ ਹੀ ਜੀਵਨ ਹੈ

ਪਾਣੀ ਹਰ ਤਰ੍ਹਾਂ ਦੀ ਜ਼ਿੰਦਗੀ ਲਈ ਬਹੁਤ ਜ਼ਰੂਰੀ ਤੱਤ ਹੈ, ਜਿਸ ਤੋਂ ਬਿਨਾਂ ਜਿਊਂਦੇ ਰਹਿਣਾ ਅਸੰਭਵ ਹੈ। ਪੰਜਾਬ ਵਿਚ ਧਰਤੀ ਹੇਠਲੇ ਪਾਣੀ ਦਾ ਲਗਾਤਾਰ ਡਿਗਦਾ ਪੱਧਰ, ਪ੍ਰਦੂਸ਼ਿਤ ਵਾਤਾਵਰਨ ਅਤੇ ਰੁੱਖਾਂ ਦੀ ਘਾਟ ਸਭ ਲੋਕਾਂ ਅਤੇ ਵਿਚਾਰਵਾਨਾਂ ਲਈ ਇਕ ਗੰਭੀਰ ਅਤੇ ਚਿੰਤਾਜਨਕ ਵਿਸ਼ਾ ਬਣਿਆ ਹੋਇਆ ਹੈ। ਧਰਤੀ ਹੇਠਲੇ ਪਾਣੀ ਦੇ ਲਗਾਤਾਰ ਡਿਗਦੇ ਪੱਧਰ ਲਈ ਪੰਜਾਬ ਵਿਚ ਰੁਟੀਨ ਵਿਚ ਹੋ ਰਹੀ ਝੋਨੇ ਦੀ ਕਾਸ਼ਤ ਜ਼ਿੰਮੇਵਾਰ ਹੈ। ਪੰਜਾਬ ਨੂੰ ਹਰਿਆ-ਭਰਿਆ ਰੱਖਣ ਲਈ ਪਾਣੀ ਜਿਹੇ ਕੁਦਰਤੀ ਸੋਮੇ ਨੂੰ ਸੰਭਾਲਣ ਦੀ ਜ਼ਰੂਰਤ ਹੈ। ਇਸ ਲਈ ਸਭ ਨੂੰ ਮਿਲ ਕੇ ਸਮੂਹਿਕ ਯਤਨ ਕਰਨੇ ਪੈਣਗੇ ਅਤੇ ਝੋਨੇ ਦੀ ਥਾਂ ਹੋਰ ਫਸਲਾਂ ਦਾ ਬਦਲ ਲੱਭਣਾ ਪਵੇਗਾ। ਫਸਲੀ ਚੱਕਰ ਦੇ ਵਿਭਿੰਨੀਕਰਨ ਲਈ ਪੰਜਾਬ ਸਰਕਾਰ ਦੁਆਰਾ ਕਈ ਪ੍ਰੋਗਰਾਮ ਉਲੀਕੇ ਜਾ ਰਹੇ ਹਨ। ਕੁਦਰਤੀ ਵਾਤਾਵਰਨ ਦੀ ਸੰਭਾਲ ਲਈ ਸਰਕਾਰ, ਕਿਸਾਨਾਂ ਅਤੇ ਖੇਤੀ ਮਾਹਰਾਂ ਵਿਚ ਆਪਸੀ ਤਾਲਮੇਲ ਜ਼ਰੂਰੀ ਹੈ। ਕੱਚੀਆਂ ਥਾਵਾਂ ਦਿਨ-ਪ੍ਰਤੀਦਿਨ ਘਟ ਰਹੀਆਂ ਹਨ, ਜਿਸ ਕਾਰਨ ਪਾਣੀ ਰਿਸਣ ਦੀ ਮਾਤਰਾ ਵੀ ਘਟ ਗਈ ਹੈ। ਧਰਤੀ ਹੇਠਲੇ ਪਾਣੀ ਦਾ ਜਲ ਪੱਧਰ ਵਧਾਉਣ ਲਈ ਜ਼ਰੂਰੀ ਹੈ ਕਿ ਮੀਂਹ ਦੇ ਪਾਣੀ ਨੂੰ ਵੱਧ ਤੋਂ ਵੱਧ ਧਰਤੀ ਹੇਠ ਭੇਜਿਆ ਜਾਵੇ। ਇਸ ਲਈ ਛੱਪੜ ਮੁੱਖ ਭੂਮਿਕਾ ਨਿਭਾਅ ਸਕਦੇ ਹਨ। ਆਓ ਵੀਰੋ, 'ਪਾਣੀ ਪਿਤਾ' ਦੀ ਬਰਬਾਦੀ ਨੂੰ ਰੋਕਣ ਦਾ ਕੋਈ ਯਤਨ ਕੀਤਾ ਜਾਵੇ।

-ਰਾਜਵੰਤ ਸਿੰਘ ਰਾਜੂ
ਗੁਰੂ ਨਾਨਕ ਆਟੋ ਸਪੇਅਰਜ਼, ਰਾਏਕੋਟ।

ਫ ਫ ਫ

ਸਰਕਾਰੀ ਸਕੂਲਾਂ 'ਚ ਪੜ੍ਹਾਓ ਬੱਚੇ

ਸਰਕਾਰੀ ਸਕੂਲਾਂ ਵਿਚ ਹੁਣ ਜ਼ਿਆਦਾਤਰ ਉਹੀ ਬੱਚੇ ਪੜ੍ਹ ਰਹੇ ਹਨ, ਜੋ ਨਿੱਜੀ ਸਕੂਲਾਂ ਦੇ ਭਾਰੀ ਖਰਚੇ ਨਹੀਂ ਚੁੱਕ ਸਕਦੇ। ਹਰ ਇਕ ਮਾਂ-ਬਾਪ ਦੀ ਕੋਸ਼ਿਸ਼ ਹੈ ਕਿ ਆਪਣੇ ਬੱਚੇ ਵਧੀਆ ਸਕੂਲ ਵਿਚ ਭੇਜੇ। ਇਕ ਹੋੜ ਜਿਹੀ ਮਚੀ ਹੋਈ ਹੈ। ਆਪਣੀ ਆਰਥਿਕ ਹੈਸੀਅਤ ਤੋਂ ਵੀ ਵਧ ਕੇ ਮਹਿੰਗੇ ਸਕੂਲ ਲੱਭੇ ਜਾ ਰਹੇ ਹਨ। ਬੱਚਿਆਂ ਨੂੰ ਵਧੀਆ ਸਿੱਖਿਆ ਦੇਣ ਦੇ ਨਾਂਅ 'ਤੇ ਬੱਚਿਆਂ ਦੇ ਮਾਂ-ਬਾਪ ਤੋਂ ਨਿਯਮਾਂ ਦੇ ਉਲਟ ਜ਼ਿਆਦਾ ਫੀਸ ਅਤੇ ਫੰਡ ਵਸੂਲ ਕੀਤੇ ਜਾਂਦੇ ਹਨ। ਪ੍ਰਸ਼ਾਸਨ ਵੀ ਇਨ੍ਹਾਂ ਪ੍ਰਾਈਵੇਟ ਸਕੂਲਾਂ ਵੱਲੋਂ ਨਾਜਾਇਜ਼ ਵਸੂਲੇ ਜਾ ਰਹੇ ਫੰਡਾਂ ਉੱਪਰ ਕੋਈ ਗੌਰ ਨਹੀਂ ਕਰਦਾ ਅਤੇ ਪੜ੍ਹਾਈ ਦੇ ਨਾਂਅ 'ਤੇ 'ਬਿਜ਼ਨਸ' ਦੀਆਂ ਇਹ ਦੁਕਾਨਾਂ ਚਲਦੀਆਂ ਰਹਿੰਦੀਆਂ ਹਨ। ਨਿੱਜੀ ਸਕੂਲਾਂ ਨੇ ਮਾਂ-ਬਾਪ ਦੀਆਂ ਜੇਬਾਂ 'ਚੋਂ ਪੈਸੇ ਕਢਵਾਉਣ ਲਈ ਕਈ ਤਰੀਕੇ ਅਪਣਾ ਲਏ ਹਨ।
ਦੂਸਰੇ ਪਾਸੇ ਸਰਕਾਰੀ ਸਕੂਲਾਂ ਵਿਚ ਪਹਿਲੀ ਤੋਂ ਦਸਵੀਂ ਤੱਕ ਮੁਫ਼ਤ ਕਿਤਾਬਾਂ ਵੰਡੀਆਂ ਜਾਂਦੀਆਂ ਹਨ। ਪਹਿਲੀ ਤੋਂ ਅੱਠਵੀਂ ਤੱਕ ਕੋਈ ਸਰਕਾਰੀ ਫੀਸ ਜਾਂ ਫੰਡ ਨਹੀਂ ਲਏ ਜਾਂਦੇ। ਪਹਿਲੀ ਤੋਂ ਅੱਠਵੀਂ ਕਲਾਸ ਤੱਕ ਵਰਦੀਆਂ ਵੀ ਮੁਫ਼ਤ ਦਿੱਤੀਆਂ ਜਾਂਦੀਆਂ ਹਨ। ਪਹਿਲੀ ਤੋਂ ਅੱਠਵੀਂ ਤੱਕ ਵਧੀਆ ਪੌਸ਼ਟਿਕ ਤੱਤਾਂ ਵਾਲਾ ਖਾਣਾ ਵੀ ਅੱਧੀ ਛੁੱਟੀ ਵੇਲੇ ਦਿੱਤਾ ਜਾਂਦਾ ਹੈ। ਅਧਿਆਪਕਾਂ ਦੀ ਕਮੀ ਦੇ ਬਾਵਜੂਦ ਸਰਕਾਰੀ ਸਕੂਲਾਂ ਦੇ ਨਤੀਜੇ ਵੀ ਵਧੀਆ ਆਉਂਦੇ ਹਨ। ਲੋਕਾਂ ਨੂੰ ਰੀਸ ਵਿਚੋਂ ਨਿਕਲਣਾ ਪੈਣਾ ਹੈ ਤੇ ਸਰਕਾਰੀ ਸਕੂਲਾਂ ਵੱਲ ਮੁੜਨਾ ਪੈਣਾ ਹੈ, ਫਿਰ ਹੀ ਨਿੱਜੀ ਸਕੂਲਾਂ ਦੀ ਲੁੱਟ ਤੋਂ ਛੁਟਕਾਰਾ ਪਾਇਆ ਜਾ ਸਕਦਾ ਹੈ। ਸਰਕਾਰ ਨੂੰ ਸਰਕਾਰੀ ਸਕੂਲਾਂ ਦਾ ਮਿਆਰ ਹੋਰ ਉੱਪਰ ਚੁੱਕਣ ਲਈ ਹਰ ਸੰਭਵ ਉਪਰਾਲੇ ਕਰਨੇ ਚਾਹੀਦੇ ਹਨ।

-ਅਮਰਾ 'ਪੰਚ' ਪੱਤੋ
ਪਿੰਡ ਤੇ ਡਾਕ: ਪੱਤੋ ਹੀਰਾ ਸਿੰਘ (ਮੋਗਾ)।

ਫ ਫ ਫ

ਵਾਤਾਵਰਨ ਦੀ ਸੁਰੱਖਿਆ

ਕੁਝ ਅਰਸੇ ਤੋਂ ਮੌਸਮ 'ਚ ਬੜੇ ਤੇਜ਼ੀ ਨਾਲ ਬਦਲਾਅ ਆ ਰਹੇ ਹਨ। ਮੌਸਮ ਦੇ ਇਸ ਬਦਲੇ ਹੋਏ ਮਿਜ਼ਾਜ਼ ਲਈ ਮਨੁੱਖ ਖ਼ੁਦ ਹੀ ਜ਼ਿੰਮੇਵਾਰ ਹੈ। ਅਸੀਂ ਆਪਣੇ ਵਾਤਾਵਰਨ ਦੀ ਸੰਭਾਲ ਪ੍ਰਤੀ ਬਿਲਕੁਲ ਹੀ ਸੰਜੀਦਾ ਨਹੀਂ ਹਾਂ। ਅਸੀਂ ਸਮਝਦੇ ਹਾਂ ਕਿ ਵਾਤਾਵਰਨ ਨੂੰ ਬਚਾ ਕੇ ਰੱਖਣਾ ਸਿਰਫ ਸਰਕਾਰਾਂ ਦਾ ਹੀ ਕੰਮ ਹੈ। ਸਰਕਾਰਾਂ ਵੀ ਵਾਤਾਵਰਨ ਨੂੰ ਸੁਰੱਖਿਅਤ ਰੱਖਣ ਲਈ ਮੁਹਿੰਮ ਚਲਾਉਂਦੀਆਂ ਹਨ ਪਰ ਸਮਾਂ ਬੀਤਣ ਨਾਲ ਅਜਿਹੀਆਂ ਮੁਹਿੰਮਾਂ ਵੀ ਦਮ ਤੋੜ ਜਾਂਦੀਆਂ ਹਨ। ਇਸ ਮਾਮਲੇ 'ਚ ਕਿਸੇ ਦੀ ਵੀ ਕੋਈ ਜਵਾਬਦੇਹੀ ਨਹੀਂ ਹੈ। ਅਸੀਂ ਸਿਰਫ ਇਕ ਪੌਦਾ ਲਗਾ ਕੇ ਆਪਣੇ-ਆਪ 'ਤੇ ਫ਼ਖ਼ਰ ਮਹਿਸੂਸ ਕਰਦੇ ਹੋਏ ਆਪਣੇ-ਆਪ ਨੂੰ ਜ਼ਿੰਮੇਵਾਰ ਨਾਗਰਿਕ ਸਮਝਣ ਦਾ ਭਰਮ ਪਾਲ ਲੈਂਦੇ ਹਾਂ। ਅਸੀਂ ਕਦੇ ਦੁਬਾਰਾ ਉਸ ਪੌਦੇ ਨੂੰ ਨਹੀਂ ਦੇਖਦੇ ਕਿ ਉਹ ਹੈ ਵੀ ਕਿ ਮੁਰਝਾ ਗਿਆ ਹੈ। ਅਸੀਂ ਭਾਰਤੀ ਸੁਵਿਧਾਪ੍ਰਸਤ ਜੀਵਨ ਜਿਊਣ ਦੇ ਆਦੀ ਹੋ ਗਏ ਹਾਂ ਪਰ ਅਸੀਂ ਇਹ ਭੁੱਲ ਗਏ ਹਾਂ ਕਿ ਤੰਦਰੁਸਤ ਅਤੇ ਸੁਖੀ ਜੀਵਨ ਲਈ ਸਾਫ਼ ਅਤੇ ਨਿਰਮਲ ਵਾਤਾਵਰਨ ਦੀ ਬਹੁਤ ਲੋੜ ਹੈ। ਸਾਨੂੰ ਕੁਦਰਤ ਨਾਲ ਸੰਤੁਲਨ ਕਾਇਮ ਕਰਨਾ ਪਏਗਾ ਨਹੀਂ ਤਾਂ ਮਨੁੱਖੀ ਜੀਵਨ ਖ਼ਤਰੇ 'ਚ ਪੈ ਜਾਏਗਾ। ਜੇ ਅਸੀਂ ਮੌਸਮ 'ਚ ਹੋਣ ਵਾਲੇ ਭਿਅੰਕਰ ਬਦਲਾਵਾਂ ਤੋਂ ਬਚਣਾ ਹੈ ਤਾਂ ਸਾਨੂੰ ਵਾਤਾਵਰਨ ਨੂੰ ਬਚਾਉਣ ਲਈ ਸੁਚੇਤ ਹੋਣਾ ਪਵੇਗਾ। ਸਾਨੂੰ ਜੰਗਲਾਂ ਅਤੇ ਦਰੱਖਤਾਂ ਦੀ ਰੱਖਿਆ ਕਰਨੀ ਪਏਗੀ। ਸਾਨੂੰ ਵਾਤਾਵਰਨ ਦੀ ਸੁਰੱਖਿਆ ਦੀ ਜ਼ਿੰਮੇਵਾਰੀ ਸਿਰਫ ਵਾਤਾਵਰਨ ਪ੍ਰੇਮੀਆਂ ਜਾਂ ਸੰਸਥਾਵਾਂ 'ਤੇ ਹੀ ਨਹੀਂ ਛੱਡ ਦੇਣੀ ਚਾਹੀਦੀ ਸਗੋਂ ਚੰਗੇ ਅਤੇ ਖੁਸ਼ਹਾਲ ਜੀਵਨ ਲਈ ਖ਼ੁਦ ਵਾਤਾਵਰਨ ਨੂੰ ਬਚਾਉਣ ਦੇ ਯਤਨ ਕਰਨੇ ਚਾਹੀਦੇ ਹਨ।

-ਸੰਦੀਪ ਆਰੀਆ
ਬੀ-774, ਆਰੀਆ ਨਗਰ, ਫਾਜ਼ਿਲਕਾ।

10-4-2015

 ਅੰਮ੍ਰਿਤਸਰ ਸਿਫ਼ਤੀ ਦਾ ਘਰ...?

ਅਕਸਰ ਹੀ ਸਾਨੂੰ ਸਭ ਨੂੰ ਪੜ੍ਹਨ-ਸੁਣਨ ਨੂੰ ਮਿਲਦਾ ਹੈ ਕਿ 'ਅੰਮ੍ਰਿਤਸਰ-ਸਿਫ਼ਤੀ ਦਾ ਘਰ'। ਕੋਈ ਵੇਲਾ ਸੀ ਜਦੋਂ ਸੱਚੀ-ਮੁੱਚੀਂ ਹੀ ਇਹ ਕਥਨ ਅੰਮ੍ਰਿਤਸਰ ਬਾਰੇ ਢੁਕਦਾ ਸੀ ਪਰ ਅਜੋਕੇ ਦੌਰ ਵਿਚ ਇਸ ਸ਼ਹਿਰ ਦੀ ਇਤਿਹਾਸਕ ਤੇ ਧਾਰਮਿਕ ਪੱਖੋਂ ਤਾਂ ਸਿਫ਼ਤ ਕੀਤੀ ਜਾ ਸਕਦੀ ਹੈ ਪਰ ਦਿੱਖ ਪੱਖੋਂ ਇਹ ਪ੍ਰਦੂਸ਼ਿਤ ਤੇ ਦੂਸ਼ਿਤ ਸ਼ਹਿਰ ਵਜੋਂ ਹੀ ਨਜ਼ਰੀਂ ਪੈਂਦਾ ਹੈ। ਜਦੋਂ ਹੀ ਤੁਹਾਡੀ ਬੱਸ ਜਾਂ ਕੋਈ ਹੋਰ ਨਿੱਜੀ ਸਾਧਨ ਬੱਸ ਅੱਡੇ ਵਿਚ ਦਾਖ਼ਲ ਹੋਣ ਜਾਂ ਅੱਡੇ ਦੇ ਅੱਗੋਂ ਦੀ ਲੰਘਣ ਲਈ ਜੱਦੋ-ਜਹਿਦ ਕਰਦਾ ਹੈ ਤਾਂ ਬੱਸ ਅੱਡੇ ਮੂਹਰਲੀ ਸੜਕ, ਉੱਚੀਆਂ-ਨੀਵੀਆਂ, ਨਿੱਕੀਆਂ-ਨਿੱਕੀਆਂ ਪਹਾੜੀਆਂ ਦਾ ਭੁਲੇਖਾ ਪਾਉਂਦੀ ਹੈ। ਤੁਹਾਡਾ ਸਾਧਨ ਕਦੀ ਖੱਬੇ ਪਾਸੇ ਤੋਂ ਨੀਵਾਂ ਹੁੰਦਾ ਹੈ ਤੇ ਕਦੀ ਸੱਜੇ ਪਾਸੇ ਤੋਂ ਭਾਵ ਖੱਡੇਨੁਮਾ ਸੜਕ ਸਵਾਰੀਆਂ ਦਾ ਹਾਜ਼ਮਾ ਦਰੁਸਤ ਕਰ ਦਿੰਦੀ ਹੈ। ਹਵਾ ਦਾ ਪ੍ਰਦੂਸ਼ਣ ਵੀ ਦਿਨੋ-ਦਿਨ ਵਧ ਰਿਹਾ ਹੈ।

-ਪ੍ਰਿੰ: ਗੁਰਬਚਨ ਸਿੰਘ ਲਾਲੀ
ਲੇਖਕ ਮੰਚ ਪੱਟੀ।

ਫ ਫ ਫ

ਵਧਦੇ ਸੜਕ ਹਾਦਸੇ

ਅਖ਼ਬਾਰਾਂ ਦੀਆਂ ਸੁਰਖੀਆਂ 'ਚ ਨਿੱਤ ਹਾਦਸਿਆਂ ਦੀ ਖ਼ਬਰ ਸੁਣ ਸਭ ਦੁਖੀ ਤਾਂ ਹੁੰਦੇ ਹਨ ਪਰ ਕੁਝ ਚਿਰ ਲਈ ਤੇ ਆਪਣੇ-ਆਪ ਉੱਤੇ ਇਸ ਦਾ ਕੋਈ ਅਮਲ ਨਹੀਂ ਕਰਦਾ। ਇਕ-ਦੂਜੇ ਤੋਂ ਅੱਗੇ ਲੰਘਣ ਲਈ ਸੜਕ 'ਤੇ ਮੁਕਾਬਲੇ ਹੁੰਦੇ ਨਿੱਤ ਵੇਖੇ ਜਾ ਸਕਦੇ ਹਨ ਪਰ ਇਸ ਮੁਕਾਬਲੇ ਨੂੰ ਰੋਕਣ ਦਾ ਉਪਰਾਲਾ ਕੋਈ ਨਹੀਂ ਕਰਦਾ। ਹਾਦਸਾ ਭਾਵੇਂ ਕਿਤੇ ਵੀ ਹੋਵੇ, ਇਹ ਇਕ ਚਿਤਾਵਨੀ ਹੁੰਦੀ ਹੈ, ਸੁਧਾਰ ਕਰਨ ਲਈ ਸੋਚ-ਵਿਚਾਰ ਕਰਨ ਲਈ ਤੇ ਅਜਿਹਾ ਮੁੜ ਨਾ ਵਾਪਰਨ ਦਾ ਹੱਲ ਲੱਭਣ ਲਈ। ਲੋਕਾਂ ਵੱਲੋਂ ਸੜਕਾਂ 'ਤੇ ਲਾਪ੍ਰਵਾਹੀ, ਕਾਹਲੀ, ਨਸ਼ੇ ਅਤੇ ਉਨੀਂਦਰੇ ਵਿਚ ਟ੍ਰੈਫਿਕ ਨਿਯਮਾਂ ਨੂੰ ਤੋੜ ਕੇ ਅਤੇ ਗੁੱਸੇ ਵਿਚ ਗੱਡੀ ਚਲਾਈ ਜਾਂਦੀ ਹੈ। ਸਭ ਤੋਂ ਵੱਡਾ ਕਾਰਨ ਹੈ ਮੋਬਾਈਲ ਫੋਨ, ਕਿਉਂਕਿ ਫੋਨ ਕਦੇ ਵੀ ਆ ਸਕਦਾ ਹੈ ਅਤੇ ਚਾਲਕ ਵੀ ਗੱਡੀ ਰੋਕ ਕੇ ਸੁਣਨ ਦੀ ਬਜਾਏ ਚਲਾਉਂਦੇ ਸਮੇਂ ਹੀ ਸੁਣਦੇ ਹਨ, ਜਿਸ ਕਾਰਨ ਧਿਆਨ ਭਟਕਦਾ ਹੈ। ਬੇਸ਼ਕੀਮਤੀ ਜਾਨਾਂ ਇਨ੍ਹਾਂ ਹਾਦਸਿਆਂ ਦੀ ਭੇਟ ਚੜ੍ਹ ਜਾਂਦੀਆਂ ਹਨ। ਹਜ਼ਾਰਾਂ ਘਰਾਂ ਦੇ ਚਿਰਾਗ ਸਦਾ ਲਈ ਬੁਝ ਜਾਂਦੇ ਹਨ। ਆਓ, ਅਸੀਂ ਸਾਰੇ ਰਲ ਕੇ ਇਸ ਪਾਸੇ ਹੰਭਲਾ ਮਾਰੀਏ ਤੇ ਸਾਡੇ ਦੇਸ਼ ਨੂੰ ਇਨ੍ਹਾਂ ਦੁਰਘਟਨਾਵਾਂ ਤੋਂ ਮੁਕਤੀ ਦਿਵਾਈਏ।

-ਰਾਜਵੰਤ ਸਿੰਘ ਰਾਜੂ
ਗੁਰੂ ਨਾਨਕ ਆਟੋ ਸਪੇਅਰਜ਼, ਰਾਏਕੋਟ।

ਫ ਫ ਫ

ਨਵੀਂ ਦਿਸ਼ਾ

ਅੱਜ ਪੰਜਾਬ ਦੀ ਆਵਾਜ਼ 'ਅਜੀਤ' ਅਖ਼ਬਾਰ ਪੱਤਰਕਾਰੀ ਦੇ ਖੇਤਰ ਵਿਚ ਆਪਣੀ ਵਿਲੱਖਣਤਾ ਸਦਕਾ ਨਿੱਤ ਨਵੀਂ ਦਿਸ਼ਾ ਹਾਸਲ ਕਰ ਰਿਹਾ ਹੈ, ਜੋ ਕਿ ਸਮੂਹ ਪੰਜਾਬੀਆਂ ਵਾਸਤੇ ਬੜੇ ਫ਼ਖਰ ਵਾਲੀ ਗੱਲ ਹੈ। ਲੱਖਾਂ ਪਾਠਕਾਂ ਦੇ ਚਹੇਤੇ 'ਅਜੀਤ' ਨੇ ਵੱਡੀ ਗਿਣਤੀ ਵਿਚ ਮਿਲਦੇ ਪਾਠਕਾਂ ਦੇ ਵਿਚਾਰਾਂ ਨੂੰ ਵੱਖਰੇ ਤੌਰ 'ਤੇ ਇਕ ਸਫ਼ੇ ਵਿਚ ਸੋਮਵਾਰ ਨੂੰ 'ਲੋਕ ਮੰਚ' ਕਾਲਮ ਤਹਿਤ ਰੰਗਦਾਰ ਛਾਪਣ ਦਾ ਬਹੁਤ ਹੀ ਸਲਾਹੁਣਯੋਗ ਸਿਲਸਿਲਾ ਸ਼ੁਰੂ ਕੀਤਾ ਹੈ। ਭਾਸ਼ਾਈ ਅਖ਼ਬਾਰਾਂ ਵਿਚੋਂ 'ਅਜੀਤ' ਹੀ ਅਜਿਹਾ ਇਕੋ-ਇਕ ਅਖ਼ਬਾਰ ਹੈ, ਜਿਸ ਨੇ ਅਜਿਹੀ ਪਹਿਲ ਕੀਤੀ ਹੈ। ਅੰਤ ਵਿਚ ਪੰਜਾਬ, ਪੰਜਾਬੀ ਅਤੇ ਪੰਜਾਬੀਅਤ ਦੀ ਸੇਵਾ ਲਈ ਬਹੁਤ-ਬਹੁਤ ਸ਼ੁਕਰਗੁਜ਼ਾਰ ਹਾਂ।

-ਜਸਕਰਨ ਸਿੰਘ
ਦਸਮੇਸ਼ ਨਗਰ, ਲੁਧਿਆਣਾ।

ਫ ਫ ਫ

ਸਿੱਖਿਆ ਬੋਰਡ ਦੇ ਧਿਆਨ ਹਿਤ

31 ਮਾਰਚ ਨੂੰ ਸਿੱਖਿਆ ਬੋਰਡ ਦੀ ਹਦਾਇਤ ਮੁਤਾਬਿਕ ਸਰਕਾਰੀ ਸਕੂਲਾਂ ਨੇ ਆਪਣਾ ਨਤੀਜਾ ਐਲਾਨ ਕਰਨਾ ਸੀ ਅਤੇ ਇਸੇ ਦਿਨ ਮਾਪੇ-ਟੀਚਰ ਮੀਟਿੰਗ ਵੀ ਰੱਖੀ ਜਾਣੀ ਸੀ। ਪਰ ਸਾਡੇ ਸਿੱਖਿਆ ਬੋਰਡ ਨੇ ਦੂਹਰਾ ਹੁਕਮ ਜਾਰੀ ਕਰਕੇ 31 ਮਾਰਚ ਨੂੰ ਹੀ ਦਸਵੀਂ ਕਲਾਸ ਦਾ ਪੇਪਰ ਰੱਖ ਦਿੱਤਾ। ਜ਼ਿਆਦਾਤਰ ਟੀਚਰਾਂ ਦੀ ਡਿਊਟੀ ਪ੍ਰੀਖਿਆ ਕੇਂਦਰਾਂ ਵਿਚ ਲੱਗੀ ਹੋਣ ਕਰਕੇ ਮਾਪੇ ਅਤੇ ਬੱਚਿਆਂ ਨੂੰ ਨਤੀਜਾ ਪ੍ਰਾਪਤ ਕਰਨ ਲਈ ਕਾਫੀ ਦਿੱਕਤ ਮਹਿਸੂਸ ਹੋਈ। ਉਮੀਦ ਹੈ ਕਿ ਸਿੱਖਿਆ ਬੋਰਡ ਅੱਗੇ ਤੋਂ 31 ਮਾਰਚ ਵਾਲੇ ਦਿਨ ਸਾਰੇ ਅਧਿਆਪਕਾਂ ਨੂੰ ਆਪਣੇ ਸਕੂਲ ਦਾ ਸਾਲਾਨਾ ਨਤੀਜਾ ਦੇਣ ਦਾ ਮੌਕਾ ਜ਼ਰੂਰ ਦੇਵੇਗਾ।

-ਲਖਵਿੰਦਰ ਸਿੰਘ ਧਨਾਨਸੂ
ਪਿੰਡ ਤੇ ਡਾਕ: ਧਨਾਨਸੂ, ਜ਼ਿਲ੍ਹਾ ਲੁਧਿਆਣਾ।

ਫ ਫ ਫ

ਰਾਖਵਾਂਕਰਨ ਬਨਾਮ ਜਾਤੀਵਾਦ

ਭਾਰਤੀ ਸੰਵਿਧਾਨ ਦੇ ਨਿਰਮਾਤਾ ਡਾ: ਭੀਮ ਰਾਉ ਅੰਬੇਡਕਰ ਨੇ ਦਲਿਤਾਂ ਅਤੇ ਹੋਰ ਪਛੜੇ ਵਰਗਾਂ ਲਈ ਰਾਖਵੇਂਕਰਨ ਦੀ ਨੀਤੀ ਅਪਣਾਈ ਹੈ। ਇਹ ਨੀਤੀ ਸਦਾ ਲਈ ਨਹੀਂ ਸੀ ਸਗੋਂ ਕੁਝ ਸਮੇਂ ਤੱਕ ਸੀ। ਪਰ ਲੋਕਤੰਤਰ ਦੇਸ਼ ਵਿਚ ਸੱਤਾ ਦੀ ਕੁਰਸੀ 'ਤੇ ਬੈਠਣ ਅਤੇ ਵੋਟ ਬੈਂਕ ਨੂੰ ਪੱਕੇ ਕਰਨ ਲਈ ਸਾਡੇ ਸਿਆਸਤਦਾਨਾਂ ਨੇ ਜਾਤੀਵਾਦ ਨੂੰ ਹੋਰ ਬੜ੍ਹਾਵਾ ਦਿੱਤਾ ਹੈ। ਮਾਣਯੋਗ ਸੁਪਰੀਮ ਕੋਰਟ ਵੱਲੋਂ ਜਾਟ ਰਾਖਵੇਂਕਰਨ ਨੂੰ ਰੱਦ ਕਰ ਦਿੱਤਾ ਗਿਆ ਹੈ। ਇਸ ਫ਼ੈਸਲੇ ਨਾਲ ਸਮੁੱਚੇ ਰੂਪ ਵਿਚ ਵੀ ਰਾਖਵੇਂਕਰਨ ਬਾਰੇ ਵਿਚ ਵਿਚਾਰ-ਚਰਚਾ ਵੱਡੀ ਪੱਧਰ 'ਤੇ ਛਿੜੇਗੀ। ਜਿਥੇ 65 ਸਾਲ ਤੋਂ ਜਾਰੀ ਰਾਖਵੇਂਕਰਨ ਦੇ ਲਾਭਾਂ ਤੇ ਨੁਕਸਾਨਾਂ ਸਬੰਧੀ ਸਮੁੱਚੇ ਰੂਪ ਵਿਚ ਮੁੜ ਵਿਚਾਰ ਕੀਤੇ ਜਾਣ ਦੀ ਜ਼ਰੂਰਤ ਹੈ, ਉਥੇ ਰਾਖਵੇਂਕਰਨ ਦੇ ਆਧਾਰ ਨੂੰ ਵੀ ਨਵੇਂ ਸਿਰੇ ਤੋਂ ਸਪੱਸ਼ਟ ਕੀਤੇ ਜਾਣ ਦੀ ਜ਼ਰੂਰਤ ਹੈ। ਰਾਖਵਾਂਕਰਨ ਸਮਾਜਿਕ ਨਾ-ਬਰਾਬਰੀ ਨੂੰ ਜਨਮ ਦੇ ਰਿਹਾ ਹੈ। ਰਾਖਵਾਂਕਰਨ ਜਨਰਲ ਵਰਗ ਦੇ ਉਮੀਦਵਾਰਾਂ ਦੀ ਯੋਗਤਾ ਦਾ ਘਾਣ ਕਰ ਰਿਹਾ ਹੈ। ਜਾਤੀ ਆਧਾਰਿਤ ਰਾਖਵਾਂਕਰਨ ਬੰਦ ਹੋਣਾ ਚਾਹੀਦਾ ਹੈ। ਸੋ, ਹੁਣ ਸਮਾਂ ਆ ਗਿਆ ਹੈ ਕਿ ਕਿਸੇ ਤਰ੍ਹਾਂ ਦੇ ਵੀ ਰਾਖਵੇਂਕਰਨ ਦਾ ਆਧਾਰ ਲੋਕਾਂ ਦੀ ਆਰਥਿਕਤਾ ਬਣਾਇਆ ਜਾਏ ਤਾਂ ਜੋ ਹਰ ਜਾਤ-ਬਰਾਦਰੀ ਅਤੇ ਧਰਮ ਨਾਲ ਸਬੰਧਤ ਗਰੀਬੀ ਦੀ ਰੇਖਾ ਤੋਂ ਹੇਠਾਂ ਰਹਿ ਕੇ ਜੀਵਨ ਬਸਰ ਕਰ ਰਹੇ ਕਰੋੜਾਂ ਲੋਕਾਂ ਨੂੰ ਇਸ ਦਾ ਲਾਭ ਮਿਲ ਸਕੇ।

-ਮਾਸਟਰ ਜਸਪਿੰਦਰ ਸਿੰਘ ਗਿੱਲ
ਪਿੰਡ ਉਬੋਕੇ, ਤਹਿ: ਪੱਟੀ (ਤਰਨ ਤਾਰਨ)।

6-4-2015

 ਬਹਾਦਰ ਕੁੜੀਆਂ
ਰੋਜ਼ਾਨਾ ਹੀ ਜਬਰ-ਜਨਾਹ ਦੀਆਂ ਘਟਨਾਵਾਂ ਦੀਆਂ ਖ਼ਬਰਾਂ ਅਖ਼ਬਾਰਾਂ ਵਿਚ ਪੜ੍ਹਨ ਨੂੰ ਮਿਲਦੀਆਂ ਹਨ। ਜਿਨ੍ਹਾਂ ਨੂੰ ਪੜ੍ਹ ਕੇ ਮਨ ਬਹੁਤ ਦੁਖੀ ਹੁੰਦਾ ਹੈ ਅਤੇ ਹਰੇਕ ਧੀ ਦੇ ਮਾਪੇ ਕੁੜੀ ਨੂੰ ਬਾਹਰ ਤੋਰ ਕੇ ਰਾਜ਼ੀ ਨਹੀਂ ਹੁੰਦੇ ਕਿਉਂਕਿ ਸਮਾਂ ਹੀ ਏਨਾ ਡਰਾਉਣਾ ਅਤੇ ਭਿਆਨਕ ਆ ਗਿਆ ਹੈ ਕਿ ਗੁੰਡਾਗਰਦੀ ਕਰਨ ਵਾਲੇ ਭੋਰਾ ਵੀ ਖੌਫ਼ ਨਹੀਂ ਖਾਂਦੇ। ਇਕੱਲੇ ਪੰਜਾਬ ਵਿਚ ਹੀ ਨਹੀਂ ਸਗੋਂ ਸਾਰੇ ਭਾਰਤ ਵਿਚ ਜਬਰ-ਜਨਾਹ ਦੀਆਂ ਘਟਨਾਵਾਂ ਅਕਸਰ ਵਾਪਰਦੀਆਂ ਹਨ।
ਪਿਛਲੇ ਕੁਝ ਸਮੇਂ ਵਿਚ ਭਾਵੇਂ ਸਰਕਾਰ ਨੇ ਕਈ ਠੋਸ ਕਾਨੂੰਨ ਬਣਾਏ ਹਨ ਅਤੇ ਇਹੋ ਜਿਹੇ ਅਨਸਰਾਂ ਦੇ ਨੱਕ ਵਿਚ ਨਕੇਲ ਪਾਉਣ ਦਾ ਯਤਨ ਕੀਤਾ ਹੈ। ਪ੍ਰੰਤੂ ਬੇਖੌਫ਼ ਚਿਹਰੇ ਅਜੇ ਵੀ ਅਜਿਹਾ ਕਰਨ ਵਿਚ ਢਿਲ ਨਹੀਂ ਕਰਦੇ ਅਤੇ ਕਈ ਜਗ੍ਹਾ 'ਤੇ ਕੁੜੀਆਂ ਨੇ ਗੁੰਡਿਆਂ ਵਿਰੁੱਧ ਮੁਕਾਬਲਾ ਵੀ ਕੀਤਾ ਹੈ। ਅਜਿਹੀਆਂ ਕੁੜੀਆਂ ਸਲਾਹੁਣਯੋਗ ਹਨ ਅਤੇ ਖ਼ਾਸ ਕਰਕੇ ਘਰੋਂ ਬਾਹਰ ਕੰਮ ਕਰਨ ਵਾਲੀਆਂ ਕੁੜੀਆਂ ਨੂੰ ਹਮੇਸ਼ਾ ਅਜਿਹੇ ਮਾੜੇ ਅਨਸਰਾਂ ਵਿਰੁੱਧ ਬਹਾਦਰੀ ਨਾਲ ਪੇਸ਼ ਆਉਣਾ ਚਾਹੀਦਾ ਹੈ ਅਤੇ ਪ੍ਰਸ਼ਾਸਨ ਨੂੰ ਵੀ ਇਸ ਪ੍ਰਤੀ ਠੋਸ ਰੁਖ਼ ਅਪਣਾਉਣ ਦੀ ਲੋੜ ਹੈ।

-ਜਸਪ੍ਰੀਤ ਕੌਰ ਬੇਦੀ
ਸ਼ੰਕਰ, ਲੁਧਿਆਣਾ।

ਅਵਾਰਾ ਜਾਨਵਰਾਂ ਦਾ ਖੌਫ਼
ਕੁਝ ਸਮੇਂ ਤੋਂ ਦੇਖਦੇ ਆ ਰਹੇ ਹਾਂ ਕਿ ਅਵਾਰਾ ਜਾਨਵਰਾਂ ਦੀ ਤਾਦਾਦ ਦਿਨ ਪਰ ਦਿਨ ਵਧਦੀ ਜਾ ਰਹੀ ਹੈ। ਜਿਸ ਵੀ ਰਸਤੇ ਤੋਂ ਲੰਘੋ ਅਵਾਰਾ ਕੁੱਤੇ, ਪਸ਼ੂ ਆਮ ਦੇਖਣ ਨੂੰ ਮਿਲਦੇ ਹਨ। ਸਕੂਟਰ, ਸਾਈਕਲ 'ਤੇ ਚਲਦਿਆਂ ਕੁੱਤੇ ਪਿੱਛੇ ਪੈਂਦੇ ਹਨ, ਡਰ ਕੇ ਇਨਸਾਨ ਡਿਗ ਜਾਂਦੇ ਹਨ, ਗੰਭੀਰ ਸੱਟਾਂ ਲਗਦੀਆਂ ਹਨ ਤੇ ਮੌਤ ਵੀ ਹੋ ਜਾਂਦੀ ਹੈ। ਬੱਚੇ ਕੀ ਵੱਡੇ ਵੀ ਇਕੱਲੇ ਕਿਤੇ ਜਾ ਨਹੀਂ ਸਕਦੇ। 10-10 ਕੁੱਤਿਆਂ ਦੇ ਇਕੱਠੇ ਝੁੰਡ ਫਿਰਦੇ ਹਨ। ਕਈ ਥਾਵਾਂ ਤੋਂ ਇਨਸਾਨਾਂ ਨੂੰ ਖਾਣ ਦੀਆਂ ਘਟਨਾਵਾਂ ਸੁਣਨ ਨੂੰ ਤੇ ਅਖ਼ਬਾਰਾਂ ਵਿਚੋਂ ਪੜ੍ਹਨ ਨੂੰ ਮਿਲਦੀਆਂ ਹਨ। ਭੂਸਰੇ ਸਾਂਢ ਵੀ ਇਨਸਾਨਾਂ ਦੇ ਪਿੱਛੇ ਪੈਂਦੇ ਹਨ।
ਸ਼ਰੇਆਮ ਸੜਕਾਂ ਦੇ ਵਿਚਾਲੇ ਬੈਠੇ ਹਨ। ਜਿਸ ਕਾਰਨ ਟ੍ਰੈਫਿਕ ਜਾਮ ਹੋ ਜਾਂਦਾ ਹੈ। ਕਈ ਲੋਕ ਇਨ੍ਹਾਂ ਕਰਕੇ ਦੁਰਘਟਨਾਵਾਂ ਦਾ ਸ਼ਿਕਾਰ ਹੋ ਜਾਂਦੇ ਹਨ। ਉਨ੍ਹਾਂ ਨੂੰ ਆਪਣੀ ਜਾਨ ਤੋਂ ਹੱਥ ਧੋਣੇ ਪੈਂਦੇ ਹਨ। ਪ੍ਰਸ਼ਾਸਨ ਸੁੱਤਾ ਪਿਆ ਹੈ, ਉਨ੍ਹਾਂ ਨੂੰ ਲੋਕਾਂ ਦੀ ਜਾਨ-ਮਾਲ ਦੀ ਕੋਈ ਪ੍ਰਵਾਹ ਵੀ ਨਹੀਂ। ਕਾਨੂੰਨ ਬਣਾਉਣ ਵਾਲੇ ਚੁੱਪ ਬੈਠੇ ਹਨ ਕਿਉਂਕਿ ਉਨ੍ਹਾਂ ਨੂੰ ਇਨ੍ਹਾਂ ਚੀਜ਼ਾਂ ਵਿਚੋਂ ਵਿਚਰਨਾ ਨਹੀਂ ਪੈਂਦਾ। ਹਾਦਸਾਗ੍ਰਸਤ ਤਾਂ ਆਮ ਪਬਲਿਕ ਹੋ ਰਹੀ ਹੈ। ਸਰਕਾਰਾਂ ਨੂੰ ਚਾਹੀਦਾ ਹੈ ਕਿ ਸਖ਼ਤ ਤੋ ਸਖ਼ਤ ਕਾਨੂੰਨ ਬਣਾਵੇ ਜਾਂ ਇਨ੍ਹਾਂ ਅਵਾਰਾ ਜਾਨਵਰਾਂ ਦੀ ਸਾਂਭ-ਸੰਭਾਲ ਵਾਸਤੇ ਕੋਈ ਕਦਮ ਚੁੱਕੇ ਤਾਂ ਜੋ ਮਨੁੱਖੀ ਜ਼ਿੰਦਗੀਆਂ ਬਚ ਸਕਣ।

-ਕਰਮਜੀਤ ਕੌਰ ਸੋਹੀ
ਅਰਬਨ ਅਸਟੇਟ, ਪਟਿਆਲਾ।

108 ਐਂਬੂਲੈਂਸ ਬਾਰੇ
ਦੂਸਰੇ ਰਾਜਾਂ ਵਾਂਗ ਪੰਜਾਬ ਸਰਕਾਰ ਨੇ ਵੀ ਗਰੀਬ ਮਰੀਜ਼ਾਂ ਦੀ ਸਹਾਇਤਾ ਲਈ 108 ਨੰਬਰ ਐਂਬੂਲੈਂਸ ਚਲਾਈ ਹੋਈ ਹੈ। ਜਿਹੜਾ ਗਰੀਬ ਪਰਿਵਾਰ ਅਜਿਹੇ ਨਾਜ਼ੁਕ ਸਮੇਂ ਵਿਚ ਪਿੰਡ ਵਿਚੋਂ ਕੋਈ ਗੱਡੀ ਆਦਿ ਦਾ ਮੌਕੇ 'ਤੇ ਪ੍ਰਬੰਧ ਨਹੀਂ ਕਰ ਸਕਦਾ, ਸਰਕਾਰ ਵੱਲੋਂ ਮਿੰਟੋ-ਮਿੰਟੀ ਗੱਡੀ ਦਾ ਬੰਦੋਬਸਤ ਕੀਤਾ ਜਾਂਦਾ ਹੈ ਅਤੇ ਜਣੇਪੇ ਵਾਲੀਆਂ ਔਰਤਾਂ ਨੂੰ ਵੀ ਇਸ ਰਾਹੀਂ ਨੇੜਲੇ ਹਸਪਤਾਲਾਂ ਵਿਚ ਭਰਤੀ ਕਰਵਾਇਆ ਜਾਂਦਾ ਹੈ।
ਪ੍ਰੰਤੂ ਬੜੇ ਅਫਸੋਸ ਦੀ ਗੱਲ ਹੈ ਕਿ ਜਦੋਂ ਕਿਸੇ ਜਣੇਪੇ ਵਾਲੀ ਔਰਤ ਨੂੰ ਕਿਸੇ ਸਰਕਾਰੀ ਹਸਪਤਾਲ ਵਿਚੋਂ ਪੀ.ਜੀ.ਆਈ. ਵਰਗੇ ਹਸਪਤਾਲ ਵਿਚ ਰੈਫਰ ਕੀਤਾ ਜਾਂਦਾ ਹੈ ਤਾਂ ਉਸ ਵੇਲੇ ਗਰੀਬ ਪਰਿਵਾਰਾਂ ਦੇ ਮਰੀਜ਼ਾਂ ਨੂੰ ਕਾਫ਼ੀ ਮੁਸ਼ਕਿਲ ਦਾ ਸਾਹਮਣਾ ਕਰਨਾ ਪੈਂਦਾ ਹੈ ਅਤੇ ਪੀ.ਜੀ.ਆਈ. ਤੱਕ ਕਿਰਾਇਆ ਆਪਣੀ ਜੇਬ ਵਿਚੋਂ ਦੇਣਾ ਪੈਂਦਾ ਹੈ। ਸੋ, ਸਾਡੀ ਸਰਕਾਰ ਨੂੰ ਅਪੀਲ ਹੈ ਕਿ ਪੀ.ਜੀ.ਆਈ. ਤੱਕ ਵੀ 108 ਐਂਬੂਲੈਂਸ ਨੂੰ ਭੇਜਣ ਦਾ ਪ੍ਰਬੰਧ ਕੀਤਾ ਜਾਵੇ ਤਾਂ ਜੋ ਆਮ ਗਰੀਬ ਪਰਿਵਾਰਾਂ ਨੂੰ ਕੋਈ ਦੁੱਖ ਤਕਲੀਫ਼ ਦਾ ਸਾਹਮਣਾ ਨਾ ਕਰਨਾ ਪਵੇ।

-ਕੇਵਲ ਸਿੰਘ ਬਾਠਾਂ
ਅਮਰਗੜ੍ਹ, ਸੰਗਰੂਰ।

ਔਰਤਾਂ ਦੀ ਡਿਊਟੀ...
ਪੰਜਾਬ ਸਰਕਾਰ ਵੱਲੋਂ ਔਰਤਾਂ ਦੀ ਭਲਾਈ ਲਈ ਵਿਧਾਨ ਸਭਾ ਵਿਚ ਪਾਸ ਕੀਤਾ ਗਿਆ ਬਿਲ 'ਔਰਤਾਂ ਨੂੰ ਰਾਤ ਦੀ ਡਿਊਟੀ ਦਾ ਹੱਕ' ਸਹੀ ਅਰਥਾਂ 'ਚ ਇਕ ਬਹੁਤ ਹੀ ਸ਼ਲਾਘਾਯੋਗ ਕਦਮ ਹੈ। ਇਸ ਨਾਲ ਔਰਤਾਂ ਨੂੰ ਮਰਦਾਂ ਦੇ ਬਰਾਬਰ ਕੰਮਕਾਜ ਮਿਲਣਗੇ ਤੇ ਉਹ ਰਾਤ ਨੂੰ ਵੀ ਆਪਣੀ ਮਿਹਨਤ ਦੇ ਨਾਲ ਆਪਣੇ ਕਾਰ-ਵਿਹਾਰ ਕਰ ਸਕਣਗੇ। ਪਰ ਇਸ ਦੇ ਨਾਲ ਹੀ ਸਰਕਾਰ ਨੂੰ ਉਨ੍ਹਾਂ ਦੀ ਸੁਰੱਖਿਆ ਵੀ ਯਕੀਨੀ ਬਣਾਉਣੀ ਚਾਹੀਦੀ ਹੈ ਕਿਉਂਕਿ ਅਜੋਕੇ ਸਮੇਂ ਵਿਚ ਅਜਿਹੇ ਫੈਸਲੇ ਲਾਜ਼ਮੀ ਹਨ। ਅੱਜ ਵੀ ਲੋਕ ਸਭਾ ਦੇ 545 ਮੈਂਬਰਾਂ ਵਿਚੋਂ ਔਰਤਾਂ ਦੀ ਸੰਖਿਆ ਕੇਵਲ 61 ਹੀ ਹੈ। ਇਸ ਫ਼ੈਸਲੇ ਦੇ ਨਾਲ ਮਰਦ ਪ੍ਰਧਾਨ ਸਮਾਜ ਵਿਚ ਔਰਤ ਤੇ ਮਰਦ ਵਿਚ ਪੈ ਰਿਹਾ ਫਾਸਲਾ ਦੂਰ ਹੋਵੇਗਾ ਤੇ ਔਰਤ ਪ੍ਰਤੀ ਨਜ਼ਰੀਆ ਤਬਦੀਲ ਹੋ ਕੇ ਉਨ੍ਹਾਂ ਦੀ ਹਿੱਸੇਦਾਰੀ ਯਕੀਨੀ ਬਣੇਗੀ।

-ਪਰਮਜੀਤ ਸਿੰਘ
ਅਨੰਦਪੁਰ ਸਾਹਿਬ।

ਪੈਦਲ ਤੁਰਨਾ
ਜਿਉਂ-ਜਿਉਂ ਇਨਸਾਨ ਅਤੇ ਵਿਗਿਆਨ ਨੇ ਤਰੱਕੀ ਕੀਤੀ ਹੈ। ਤਿਉਂ-ਤਿਉਂ ਹੀ ਅੱਜ ਦੇ ਆਦਮੀ ਦੀ ਜੀਵਨ-ਸ਼ੈਲੀ ਬਦਲਦੀ ਜਾ ਰਹੀ ਹੈ। ਸਹੂਲਤਾਂ ਦੇ ਪਸਾਰ ਕਾਰਨ ਬੇਸ਼ੱਕ ਅੱਜ ਦੇ ਇਨਸਾਨ ਦੀ ਜ਼ਿੰਦਗੀ ਸੁਖਾਲੀ ਹੋਈ ਹੈ ਪ੍ਰੰਤੂ ਸਿਹਤ ਪੱਖੋਂ ਆਇਆ ਨਿਗਾਰ ਵੀ ਸਾਫ਼ ਦਿਖਾਈ ਦੇ ਰਿਹਾ ਹੈ। ਅੱਜ ਹਰ ਤੀਸਰਾ ਵਿਅਕਤੀ ਕਿਸੇ ਨਾ ਕਿਸੇ ਤਕਲੀਫ਼ ਨਾਲ ਘਿਰਿਆ ਹੋਇਆ ਹੈ। ਜ਼ਿਆਦਾਤਰ ਵਿਕਾਰ ਬੇ-ਲੋੜਾ ਮੋਟਾਪਾ ਅਤੇ ਪੇਟ ਦੀਆਂ ਅਲਾਮਤਾਂ ਹਨ। ਜੇਕਰ ਗਹੁ ਨਾਲ ਵਾਚਿਆ ਜਾਵੇ ਤਾਂ ਇਸ ਦਾ ਇਕ ਵੱਡਾ ਕਾਰਨ ਇਨਸਾਨ ਦਾ ਘੱਟ ਪੈਦਲ ਤੁਰਨਾ ਵੀ ਹੈ। ਹਰ ਛੋਟੇ-ਮੋਟੇ ਕੰਮ ਜਾਂ ਸਫ਼ਰ ਲਈ ਸਾਧਨਾਂ ਦੀ ਵਰਤੋਂ ਨੇ ਇਨਸਾਨੀ ਸਿਹਤ ਵਿਚ ਖ਼ਲਲ ਪੈਦਾ ਕੀਤਾ ਹੈ। ਸੋ, ਚੰਗਾ ਹੋਵੇ ਜੇਕਰ ਅੱਜ ਹਰ ਆਦਮੀ ਰੋਜ਼ਮਰ੍ਹਾ ਦੀ ਜ਼ਿੰਦਗੀ ਵਿਚ ਕੁਝ ਪਲ ਕੱਢ ਕੇ ਪੈਦਲ ਤੁਰੇ। ਜੇਕਰ ਅਜਿਹਾ ਹੋਵੇ ਤਾਂ ਨਤੀਜਾ ਆਪਣੇ-ਆਪ ਸਾਹਮਣੇ ਆਵੇਗਾ।

-ਧਰਮਿੰਦਰ ਸ਼ਾਹਿਦ ਖੰਨਾ
580, ਗਲੀ ਨੰ: 10, ਕ੍ਰਿਸ਼ਨਾ ਨਗਰ, ਖੰਨਾ-141401 (ਲੁਧਿਆਣਾ)।

ਮੇਲੇ ਤੇ ਨੌਜਵਾਨ
ਜਦੋਂ ਵੀ ਪੰਜਾਬ ਵਿਚ ਕੋਈ ਮਸ਼ਹੂਰ ਮੇਲਾ ਲਗਦਾ ਹੈ ਤਾਂ ਮੱਛਰੀ ਹੋਈ ਵਿਹਲੜ ਮੁੰਡ੍ਹੀਰ ਮੋਟਰਸਾਈਕਲਾਂ 'ਤੇ ਉਧਰ ਨੂੰ ਹੀ ਚਾਲੇ ਪਾ ਦਿੰਦੀ ਹੈ। ਘਰ ਵਿਚ ਕੰਮ ਕਰਨ ਦੀ ਬਜਾਏ ਪਿਓ ਦੇ ਗਲ 'ਚ 'ਗੂਠਾ ਦੇ ਕੇ ਪੈਸੇ ਲੈਂਦੇ ਹਨ। ਮੋਟਰਸਾਈਕਲਾਂ 'ਤੇ ਝੰਡੀਆਂ ਲਾ ਕੇ ਅਤੇ ਸਾਈਕਲਾਂ 'ਤੇ ਡੈੱਕ ਲਾ ਕੇ ਤੁਰ ਪੈਂਦੇ ਹਨ। ਇਨ੍ਹਾਂ ਨੌਜਵਾਨਾਂ ਨੂੰ ਮੇਲਿਆਂ ਦੀ ਧਾਰਮਿਕ ਮਹੱਤਤਾ ਬਾਰੇ ਪਤਾ ਤੱਕ ਨਹੀਂ ਹੁੰਦਾ। ਧਾਰਮਿਕ ਮੇਲਿਆਂ ਵਿਚ ਜਾਣ ਦਾ ਮਤਲਬ ਇਹ ਹੁੰਦਾ ਹੈ ਕਿ ਆਪਣੇ ਵਿਰਸੇ ਤੋਂ ਜਾਣੂ ਹੋਣਾ ਪਰ ਨਸ਼ਿਆਂ ਨਾਲ ਡੱਕ ਕੇ ਮੇਲਿਆਂ ਵਿਚ ਜਾ ਕੇ ਜੋ ਗੁਲ ਖਿਲਾਉਂਦੇ ਹਨ ਉਹ ਸਭ ਦੇ ਸਾਹਮਣੇ ਹੈ। ਧਾਰਮਿਕ ਜਗ੍ਹਾ ਕਰਕੇ ਅਧਿਕਾਰੀ ਵੀ ਚੈਕਿੰਗ ਘੱਟ ਹੀ ਕਰਦੇ ਹਨ, ਪਰ ਜਦੋਂ ਇਹ ਆਪਣੀਆਂ ਘਟੀਆ ਹਰਕਤਾਂ ਕਰਕੇ ਫੜੇ ਜਾਂਦੇ ਹਨ ਤਾਂ ਵਿਤਕਰੇ ਦਾ ਦੋਸ਼ ਲਾਉਂਦੇ ਹਨ।
ਮੇਲਿਆਂ ਵਿਚ ਲੜਾਈ-ਝਗੜੇ ਤੇ ਛੇੜ-ਛਾੜ ਦੀਆਂ ਘਟਨਾਵਾਂ ਵਿਚ ਲਗਾਤਾਰ ਵਾਧਾ ਹੋ ਰਿਹਾ ਹੈ। ਕਈ ਮੋਟਰਸਾਈਕਲ ਸਵਾਰ ਟ੍ਰੈਫਿਕ ਕਾਨੂੰਨਾਂ ਦੀ ਉਲੰਘਣਾ ਕਰਦੇ ਹੋਏ ਹਾਦਸਿਆਂ ਕਾਰਨ ਮੌਤ ਦੇ ਮੂੰਹ ਵਿਚ ਜਾ ਪੈਂਦੇ ਹਨ। ਮਾਪਿਆਂ ਨੂੰ ਚਾਹੀਦਾ ਹੈ ਕਿ ਆਪਣੇ ਨੌਜਵਾਨ ਪੁੱਤਰਾਂ ਨੂੰ ਚੰਗੇ ਇਤਿਹਾਸ ਦੀ ਜਾਣਕਾਰੀ ਦੇਣ ਤਾਂ ਕਿ ਨੌਜਵਾਨ ਸਮਾਜ ਦੀ ਸੇਵਾ ਕਰਨ। ਨੌਜਵਾਨਾਂ ਨੂੰ ਵੀ ਚੰਗੇ ਸਾਥੀਆਂ ਨਾਲ ਰਹਿਣ ਦੀ ਆਦਤ ਪਾਉਣੀ ਚਾਹੀਦੀ ਹੈ।

-ਪ੍ਰਸ਼ੋਤਮ ਪੱਤੋ
ਪਿੰਡ ਤੇ ਡਾਕ: ਪੱਤੋ ਹੀਰਾ, ਜ਼ਿਲ੍ਹਾ ਮੋਗਾ।

30-5-2015

 ਕਿਤਾਬਾਂ ਤੋਂ ਦੂਰ ਨਾ ਜਾਓ
ਅੱਜ ਤੋਂ ਕੁਝ ਕੁ ਸਾਲ ਪਹਿਲਾਂ ਅਜਿਹਾ ਸਮਾਂ ਸੀ ਜਦੋਂ ਨੌਜਵਾਨ ਆਪਣਾ ਕਾਫ਼ੀ ਸਮਾਂ ਆਪਣੀ ਕਿਤਾਬਾਂ ਵਾਲੀ ਪੜ੍ਹਾਈ ਵਿਚ ਲਗਾਉਂਦਾ ਸੀ। ਪਰ ਅੱਜ ਦਾ ਨੌਜਵਾਨ ਇਸ ਤੋਂ ਬਿਲਕੁਲ ਉਲਟ ਹੈ। ਉਹ ਸੌਣ ਵੇਲੇ ਵੀ ਹੱਥਾਂ ਵਿਚ ਮੋਬਾਈਲ ਰੱਖਦਾ ਹੈ ਅਤੇ ਜਦੋਂ ਸਵੇਰੇ ਅੱਖਾਂ ਖੋਲ੍ਹਦਾ ਹੈ ਤਾਂ ਉਹ ਸਭ ਤੋਂ ਪਹਿਲਾਂ ਮੋਬਾਈਲ ਹੀ ਚੁੱਕਦਾ ਹੈ। ਨੌਜਵਾਨ ਕਿਤਾਬਾਂ ਦੀ ਜਗ੍ਹਾ ਹੁਣ ਮੋਬਾਈਲਾਂ ਦੀ ਪੜ੍ਹਾਈ ਕਰ ਰਹੇ ਹਨ। ਨੌਜਵਾਨਾਂ ਨੂੰ ਸਿਰਫ਼ ਕੰਪਿਊਟਰ ਅਤੇ ਮੋਬਾਈਲਾਂ ਦਾ ਤਜਰਬਾ ਤਾਂ ਜ਼ਰੂਰ ਹੋ ਰਿਹਾ ਹੈ, ਪਰ ਉਨ੍ਹਾਂ ਨੂੰ ਸਮਾਜਿਕ ਰਿਸ਼ਤਿਆਂ ਦਾ ਤਜਰਬਾ ਤੇ ਸਮਾਜ ਵਿਚ ਕਿਸ ਤਰ੍ਹਾਂ ਵਿਚਰਨਾ ਹੈ, ਇਸ ਦਾ ਖਿਆਲ ਬਿਲਕੁਲ ਨਹੀਂ। ਨੌਜਵਾਨਾਂ ਨੂੰ ਸਮਾਜ ਦੀ ਕੋਈ ਪ੍ਰਵਾਹ ਨਹੀਂ। ਉਨ੍ਹਾਂ ਨੂੰ ਨਹੀਂ ਪਤਾ ਕਿ ਸਮਾਜ ਅਤੇ ਸੱਭਿਆਚਾਰ ਤੋਂ ਟੁੱਟਿਆ ਹੋਇਆ ਆਦਮੀ ਕੱਖਾਂ ਦਾ ਵੀ ਨਹੀਂ ਰਹਿੰਦਾ।
ਅੱਜ ਨੌਜਵਾਨ ਅਖ਼ਬਾਰਾਂ ਅਤੇ ਸਾਹਿਤ ਦੀਆਂ ਕਿਤਾਬਾਂ ਪੜ੍ਹਨ ਲਈ ਬਿਲਕੁਲ ਵੀ ਸਮਾਂ ਨਹੀਂ ਕੱਢ ਰਿਹਾ। ਜਦੋਂ ਤੱਕ ਉਨ੍ਹਾਂ ਨੂੰ ਸਮਾਜਿਕ ਗਿਆਨ ਪ੍ਰਾਪਤ ਨਹੀਂ ਹੁੰਦਾ, ਉਦੋਂ ਤੱਕ ਉਹ ਅਗਿਆਨਤਾ ਦੇ ਹਨੇਰੇ ਵਿਚੋਂ ਸ਼ਾਇਦ ਨਹੀਂ ਨਿਕਲ ਸਕਦੇ। ਕੰਪਿਊਟਰ ਤੇ ਮੋਬਾਈਲ ਦਾ ਗਿਆਨ ਮਾੜਾ ਨਹੀਂ, ਪਰ ਨਾਲ-ਨਾਲ ਉਨ੍ਹਾਂ ਨੂੰ ਚੰਗੀਆਂ ਕਿਤਾਬਾਂ ਪੜ੍ਹਨ ਵੱਲ ਵੀ ਧਿਆਨ ਦੇਣਾ ਚਾਹੀਦਾ ਹੈ। ਚੰਗੀਆਂ ਸਾਹਿਤ ਦੀਆਂ ਕਿਤਾਬਾਂ ਪੜ੍ਹਨ ਨਾਲ ਨੌਜਵਾਨ ਸਹੀ ਰਸਤੇ ਵੱਲ ਜਾ ਸਕਦਾ ਹੈ।

-ਪ੍ਰਸ਼ੋਤਮ ਪੱਤੋ
ਪਿੰਡ ਤੇ ਡਾਕ: ਪੱਤੋ ਹੀਰਾ ਸਿੰਘ, ਜ਼ਿਲ੍ਹਾ ਮੋਗਾ।

ਪ੍ਰਮਾਣੂ ਊਰਜਾ
ਕਿਸੇ ਦੇਸ਼ ਦੀ ਤਰੱਕੀ ਦੀ ਰਫ਼ਤਾਰ ਬਹੁਤ ਹੱਦ ਤੱਕ ਉਸ ਦੇਸ਼ ਦੀ ਊਰਜਾ ਸ਼ਕਤੀ 'ਤੇ ਨਿਰਭਰ ਕਰਦੀ ਹੈ। ਊਰਜਾ ਉਤਪਾਦਨ ਦੇ ਵੱਖ-ਵੱਖ ਤਰੀਕੇ ਹਨ, ਸਾਧਨ ਹਨ। ਭਾਰਤ ਸਰਕਾਰ ਵੱਲੋਂ ਪ੍ਰਮਾਣੂ ਪਲਾਂਟਾਂ ਬਾਰੇ ਵਿਖਾਈ ਜਾ ਰਹੀ ਪਹਿਲਕਦਮੀ ਕਿੰਨੀ ਕੁ ਜਾਇਜ਼ ਹੈ, ਇਸ ਬਾਰੇ ਵਿਚਾਰਨਾ ਬੜਾ ਜ਼ਰੂਰੀ ਹੈ। ਪਿਛਲੇ ਸਾਲਾਂ ਵਿਚ ਜਾਪਾਨ ਵਿਚ ਫੁਕੂਸ਼ੀਮਾ ਪ੍ਰਮਾਣੂ ਪਲਾਂਟਾਂ ਤੋਂ ਨਿਕਲਣ ਵਾਲੀਆਂ ਹਾਨੀਕਾਰਕ ਵਿਕਿਰਨਾਂ ਤੋਂ ਬਚਾਅ ਵਾਸਤੇ ਜਾਪਾਨ ਤਾਂ ਕੁਝ ਹੱਦ ਤੱਕ ਪ੍ਰਬੰਧ ਕਰ ਗਿਆ ਪਰ ਭਾਰਤ ਵਰਗੇ ਦੇਸ਼ ਕੋਲ ਕੋਈ ਅਜਿਹਾ ਪ੍ਰਬੰਧ ਨਹੀਂ ਜਿਸ ਨਾਲ ਭਵਿੱਖੀ ਮੁਸ਼ਕਿਲਾਂ ਤੋਂ ਬਚਿਆ ਜਾ ਸਕਦਾ ਹੋਵੇ। ਜਿਥੇ ਜਾਪਾਨ ਵਿਚ ਵਾਪਰੇ ਦੁਖਾਂਤ ਤੋਂ ਬਾਅਦ ਪ੍ਰਮਾਣੂ ਊਰਜਾ ਦੇ ਉਤਪਾਦਨ ਦਾ ਵਿਸ਼ਾ ਅਜੇ ਵਿਵਾਦਾਂ ਭਰਪੂਰ ਹੈ, ਉਥੇ ਅਮਰੀਕਾ ਵਿਚ ਪਿਛਲੇ 15 ਸਾਲਾਂ ਤੋਂ ਕੋਈ ਪ੍ਰਮਾਣੂ ਪਲਾਂਟ ਨਹੀਂ ਲੱਗਾ। ਉਹ ਇਸ ਲਈ ਕਿ ਉਥੋਂ ਦੇ ਲੋਕ ਪ੍ਰਮਾਣੂ ਊਰਜਾ ਉਤਪਾਦਨ ਦੇ ਭਾਰੀ ਵਿਰੋਧ ਵਿਚ ਹਨ। ਅਮਰੀਕਾ ਵਰਗੀ ਸਥਿਤੀ ਹੋਰ ਦੇਸ਼ਾਂ ਵਿਚ ਵੀ ਹੈ। ਜਿਵੇਂ ਫਰਾਂਸ, ਰੂਸ, ਜਾਪਾਨ ਆਦਿ। ਭਾਰਤ ਪ੍ਰਮਾਣੂ ਊਰਜਾ ਉਤਪਾਦਨ ਨੂੰ ਊਰਜਾ ਦਾ ਸਸਤਾ ਸਾਧਨ ਮਹਿਸੂਸ ਕਰਦਾ ਹੋਵੇ ਪਰ ਫਰਾਂਸ ਦੇ ਪ੍ਰਮਾਣੂ ਊਰਜਾ ਪਲਾਂਟਾਂ ਦੇ ਪ੍ਰਬੰਧ ਨੂੰ ਚਲਾ ਰਹੀਆਂ ਕੰਪਨੀਆਂ ਦੇ ਘਾਟੇ ਪ੍ਰਤੀ ਦਿੱਤੇ ਜਾ ਰਹੇ ਬਿਆਨਾਂ ਤੋਂ ਇਸ ਦੇ ਸਸਤਾ ਹੋਣ ਦਾ ਭੁਲੇਖਾ ਵੀ ਦੂਰ ਹੋਰ ਜਾਂਦਾ ਹੈ। ਅਸਲੀਅਤ ਤੋਂ ਅੱਖਾਂ ਮੀਟ ਲੈਣਾ ਕਿੰਨੀ ਕੁ ਚੰਗੀ ਗੱਲ ਹੈ, ਇਹ ਵਿਚਾਰ ਜਨਤਾ ਨੂੰ ਕਰਨਾ ਚਾਹੀਦਾ ਹੈ।

-ਗੁਰਮੀਤ ਸਿੰਘ ਬਾਜਵਾ
ਗਿਆਨ ਸਾਗਰ ਕਾਲਜ, ਕਲਾਨੌਰ, ਗੁਰਦਾਸਪੁਰ।

26-3-2014

 ਚੁੰਬਕੀ ਰੇਡੀਏਸ਼ਨ
ਵਿਸ਼ਵ ਸ