ਤਾਜਾ ਖ਼ਬਰਾਂ


ਨਾਗਾਲੈਂਡ ਤੋਂ ਕੇ.ਐੱਲ ਚਿਸ਼ੀ ਹੋਣਗੇ ਕਾਂਗਰਸ ਦੇ ਲੋਕ ਸਭਾ ਉਮੀਦਵਾਰ
. . .  27 minutes ago
ਕੋਹਿਮਾ, 21 - ਨਾਗਾਲੈਂਡ ਕਾਂਗਰਸ ਦੇ ਪ੍ਰਧਾਨ ਕੇ ਥੈਰੀ ਨੇ ਅੱਜ ਐਲਾਨ ਕੀਤਾ ਕਿ ਸਾਬਕਾ ਮੁੱਖ ਮੰਤਰੀ ਕੇ.ਐੱਲ ਚਿਸ਼ੀ ਨਾਗਾਲੈਂਡ ਤੋਂ ਕਾਂਗਰਸ ਦੇ ਲੋਕ ਸਭਾ ਉਮੀਦਵਾਰ ਹੋਣਗੇ।
ਪ੍ਰੇਸ਼ਾਨੀ ਕਾਰਨ ਸ਼ਾਦੀਸ਼ੁਦਾ ਨੌਜਵਾਨ ਨੇ ਨਹਿਰ ’ਚ ਮਾਰੀ ਛਾਲ
. . .  about 1 hour ago
ਸੁਲਤਾਨਵਿੰਡ, 21 ਮਾਰਚ (ਗੁਰਨਾਮ ਸਿੰਘ ਬੁੱਟਰ)-ਸੁਲਤਾਨਵਿੰਡ ਦੀ ਅੱਪਰ ਦੁਆਬ ਨਹਿਰ ’ਚ ਘਰ ਪ੍ਰੇਸ਼ਾਨੀ ਤੇ ਚੱਲਦਿਆਂ ਇਕ ਸ਼ਾਦੀਸ਼ੁਦਾ ਨੋਜਵਾਨ ਵੱਲੋਂ ਨਹਿਰ ’ਚ ਛਾਲ ਮਾਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ ।ਇਸ ਦੀ ...
ਹੋਲੇ ਮਹੱਲੇ ਦੀ ਸੰਪੂਰਨਤਾ 'ਤੇ ਐੱਸ.ਜੀ.ਪੀ.ਸੀ ਨੇ ਸਜਾਇਆ ਮਹੱਲਾ
. . .  about 2 hours ago
ਸ੍ਰੀ ਅਨੰਦਪੁਰ ਸਾਹਿਬ, 21 ਮਾਰਚ (ਕਰਨੈਲ ਸਿੰਘ, ਜੇ ਐੱਸ ਨਿੱਕੂਵਾਲ) - ਸਿੱਖ ਪੰਥ ਦੇ ਨਿਆਰੇਪਣ ਦੇ ਪ੍ਰਤੀਕ ਕੌਮੀ ਤਿਉਹਾਰ ਹੋਲਾ ਮਹੱਲਾ ਦੀ ਸੰਪੂਰਨਤਾ 'ਤੇ ਅੱਜ ਤਖ਼ਤ ਸ੍ਰੀ ਕੇਸਗੜ੍ਹ ਸਾਹਿਬ...
ਭਾਜਪਾ ਵੱਲੋਂ 182 ਉਮੀਦਵਾਰਾਂ ਦੀ ਪਹਿਲੀ ਸੂਚੀ ਦਾ ਐਲਾਨ
. . .  about 2 hours ago
ਨਵੀਂ ਦਿੱਲੀ, 21 ਮਾਰਚ - ਕੇਂਦਰੀ ਮੰਤਰੀ ਜੇ.ਪੀ ਨੱਢਾ ਨੇ ਅੱਜ ਪ੍ਰੈੱਸ ਵਾਰਤਾ ਦੌਰਾਨ ਲੋਕ ਸਭਾ ਚੋਣਾਂ ਲਈ ਭਾਰਤੀ ਜਨਤਾ ਪਾਰਟੀ ਦੇ 182 ਉਮੀਦਵਾਰਾਂ ਦਾ ਐਲਾਨ ਕੀਤਾ। ਪ੍ਰਧਾਨ ਮੰਤਰੀ...
ਸੁਰੱਖਿਆ ਬਲਾਂ ਨੇ ਇੱਕ ਅੱਤਵਾਦੀ ਕੀਤਾ ਢੇਰ
. . .  about 2 hours ago
ਸ੍ਰੀਨਗਰ, 21 ਮਾਰਚ - ਜੰਮੂ ਕਸ਼ਮੀਰ ਦੇ ਬਾਂਦੀਪੋਰਾ 'ਚ ਸੁਰੱਖਿਆ ਬਲਾਂ ਨੇ ਮੁੱਠਭੇੜ ਦੌਰਾਨ ਇੱਕ ਅੱਤਵਾਦੀ ਨੂੰ ਢੇਰ ਕਰ...
15 ਹਜ਼ਾਰ ਰੁਪਏ ਰਿਸ਼ਵਤ ਦੇ ਮਾਮਲੇ 'ਚ ਏ.ਐੱਸ.ਆਈ ਗ੍ਰਿਫ਼ਤਾਰ
. . .  about 3 hours ago
ਨਵਾਂਸ਼ਹਿਰ, 21 ਮਾਰਚ - ਵਿਜੀਲੈਂਸ ਬਿਊਰੋ ਜਲੰਧਰ ਦੀ ਟੀਮ ਨੇ ਥਾਣਾ ਰਾਹੋਂ ਵਿਖੇ ਤਾਇਨਾਤ ਏ.ਐਸ.ਆਈ ਬਲਵਿੰਦਰ ਸਿੰਘ ਨੂੰ 15 ਹਾਜ਼ਰ ਰੁਪਏ ਰਿਸ਼ਵਤ ਲੈਣ ਦੇ ਮਾਮਲੇ ਚ...
ਕਮਿਊਨਿਸਟ ਆਗੂ ਤੇ ਸਾਬਕਾ ਵਿਧਾਇਕ ਬਲਵੰਤ ਸਿੰਘ ਦਾ ਦੇਹਾਂਤ
. . .  about 3 hours ago
ਚੰਡੀਗੜ੍ਹ, 21 ਮਾਰਚ - ਕਮਿਊਨਿਸਟ ਆਗੂ ਤੇ ਸਾਬਕਾ ਵਿਧਾਇਕ ਬਲਵੰਤ ਸਿੰਘ ਦਾ ਸੰਖੇਪ ਬਿਮਾਰੀ ਤੋਂ ਬਾਅਦ ਦੇਹਾਂਤ ਹੋ ਗਿਆ ਹੈ। 92 ਸਾਲਾਂ ਬਲਵੰਤ ਸਿੰਘ ਸੀ.ਪੀ.ਆਈ (ਐਮ) ਦੇ ਜਨਰਲ ਸਕੱਤਰ...
ਸਕੂਲ ਪ੍ਰਿੰਸੀਪਲ ਦੀ ਹਿਰਾਸਤ 'ਚ ਹੋਈ ਮੌਤ ਖ਼ਿਲਾਫ਼ ਵਪਾਰੀਆਂ ਵੱਲੋਂ ਪ੍ਰਦਰਸ਼ਨ
. . .  about 3 hours ago
ਸ੍ਰੀਨਗਰ, 21 ਮਾਰਚ - - ਇੱਕ ਨਿੱਜੀ ਸਕੂਲ ਦੇ ਪ੍ਰਿੰਸੀਪਲ ਦੀ ਪੁਲਿਸ ਹਿਰਾਸਤ 'ਚ ਹੋਈ ਮੌਤ ਦੇ ਵਿਰੋਧ ਵਿਚ ਸ੍ਰੀਨਗਰ ਵਿਖੇ ਵਪਾਰੀਆਂ ਨੇ ਪ੍ਰਦਰਸ਼ਨ ਕੀਤਾ। ਇਸ ਮੌਕੇ ਪ੍ਰਦਰਸ਼ਨਕਾਰੀਆਂ ਨੇ ਦੋਸ਼ੀਆਂ ਖ਼ਿਲਾਫ਼...
ਬੀਜੂ ਜਨਤਾ ਦਲ ਰਾਜ ਸਭਾ ਮੈਂਬਰ ਦਾ ਪੁੱਤਰ ਭਾਜਪਾ 'ਚ ਸ਼ਾਮਲ
. . .  about 4 hours ago
ਭੁਵਨੇਸ਼ਵਰ, 21 ਮਾਰਚ - ਭੁਵਨੇਸ਼ਵਰ ਤੋਂ ਰਾਜ ਸਭਾ ਮੈਂਬਰ ਪ੍ਰਸ਼ਾਂਤ ਨੰਦਾ ਦੇ ਬੇਟਾ ਰਿਸ਼ਵ ਨੰਦਾ ਅੱਜ ਕੇਂਦਰੀ ਮੰਤਰੀ ਧਰਮਿੰਦਰ ਪ੍ਰਧਾਨ ਦੀ ਹਾਜ਼ਰੀ ਵਿਚ ਭਾਜਪਾ ਵਿਚ ਸ਼ਾਮਲ...
ਬੇਟੇ ਦੀ ਉਮੀਦਵਾਰੀ ਦਾ ਵਿਰੋਧ ਕਰਨ ਵਾਲੇ ਕਾਂਗਰਸੀਆਂ ਤੋਂ ਨਹੀ ਮੰਗਾਂਗਾ ਸਮਰਥਨ - ਕੁਮਾਰ ਸਵਾਮੀ
. . .  about 4 hours ago
ਬੈਂਗਲੁਰੂ, 21 ਮਾਰਚ - ਕਰਨਾਟਕ ਦੇ ਮੁੱਖ ਮੰਤਰੀ ਐੱਚ.ਡੀ.ਕੁਮਾਰ ਸਵਾਮੀ ਦਾ ਕਹਿਣਾ ਹੈ ਕਿ ਉਹ ਆਪਣੇ ਬੇਟੇ ਨਿਖਿਲ ਕੁਮਾਰ ਸਵਾਮੀ ਦੀ ਲੋਕ ਸਭਾ ਚੋਣਾਂ ਲਈ ਉਮੀਦਵਾਰੀ ਦਾ ਵਿਰੋਧ ਕਰਨ...
ਹੋਰ ਖ਼ਬਰਾਂ..
ਜਲੰਧਰ : ਮੰਗਲਵਾਰ 8 ਅੱਸੂ ਨਾਨਕਸ਼ਾਹੀ ਸੰਮਤ 546
ਵਿਚਾਰ ਪ੍ਰਵਾਹ: ਲੋਕਤੰਤਰ ਦੀ ਪਛਾਣ ਜਾਇਦਾਦ ਅਤੇ ਦਬਦਬੇ ਵਾਲਿਆਂ ਨੂੰ ਨਹੀਂ, ਸਗੋਂ ਸਾਧਨਹੀਣ ਵਿਅਕਤੀ ਨੂੰ ਹਕੂਮਤ ਦੇਣ ਵਿਚ ਹੈ। -ਅਰਸਤੂ

ਤੁਹਾਡੇ ਖ਼ਤ

17-9-2013

 ਵਾਤਾਵਰਨ ਵਿਰੋਧੀ ਫ਼ੈਸਲਾ ਵਾਪਸ ਲਿਆ ਜਾਏ
ਸ੍ਰੀਮਾਨ ਜੀਓ,
ਆਪ ਜੀ ਨੂੰ ਨਿਮਰਤਾ ਸਹਿਤ ਬੇਨਤੀ ਹੈ ਕਿ ਪੰਜਾਬ ਸਰਕਾਰ ਦੇ ਮੰਤਰੀ ਮੰਡਲ ਵੱਲੋਂ ਮਿਤੀ 09.08.2013 ਨੂੰ ਇਕ ਅਹਿਮ ਫ਼ੈਸਲਾ ਲੈਂਦੇ ਹੋਏ ਪੰਜਾਬ ਦੀਆਂ ਰੱਖਾਂ ਦੁਆਲੇ ਦਾ ਰਾਖਵਾਂ ਖੇਤਰ (ਈਕੋ ਸੈਂਸਟਿਵ ਜ਼ੋਨ) 10 ਕਿਲੋਮੀਟਰ ਤੋਂ ਘਟਾ ਕੇ 100 ਮੀਟਰ ਕਰਨ ਦਾ ਫ਼ੈਸਲਾ ਲਿਆ ਗਿਆ ਹੈ।
ਇਹ ਇਕ ਬਹੁਤ ਹੀ ਹੈਰਾਨੀਜਨਕ ਅਤੇ ਸਮੁੱਚੇ ਪੰਜਾਬ ਦੀ ਬਚੀ ਹੋਈ ਵਾਤਾਵਰਣਿਕ ਪ੍ਰਣਾਲੀ, ਜੋ ਕਿ ਪਹਿਲਾਂ ਹੀ ਆਖਰੀ ਸਾਹਾਂ 'ਤੇ ਹੈ, ਨੂੰ ਖ਼ਤਮ ਕਰਨ ਦਾ ਫ਼ੈਸਲਾ ਹੈ। ਅਜਿਹਾ ਮੈਨੂੰ ਜਾਪਦਾ ਹੈ। ਇਸ ਸਬੰਧੀ ਹੇਠ ਲਿਖੇ ਨੁਕਤੇ ਧਿਆਨ ਦੇਣ ਯੋਗ ਹਨ।
1. ਗਰੈਂਡ ਟਰੰਕ ਰੋਡ ਜਾਂ ਜਰਨੈਲੀ ਸੜਕ ਨੂੰ ਚੌੜਾ ਕਰਨ ਦੇ ਮੰਤਵ ਨਾਲ ਇਸ ਦੇ ਆਲੇ-ਦੁਆਲੇ ਸਾਰੇ ਦੇ ਸਾਰੇ ਰੁੱਖਾਂ ਦਾ ਮੁਕੰਮਲ ਸਫਾਇਆ ਕੀਤਾ ਜਾ ਚੁੱਕਾ ਹੈ।
2. 'ਸ਼ਡਿਊਲ ਰੋਡ' ਦੇ ਨਾਂਅ 'ਤੇ ਰਾਜ ਦੀਆਂ ਅੰਦਰੂਨੀ ਸੜਕਾਂ ਨੂੰ ਚੌੜਾ ਕਰਨ ਦੇ ਮੰਤਵ ਨਾਲ ਆਲੇ-ਦੁਆਲੇ ਦੇ ਸਮੁੱਚੇ ਰੁੱਖਾਂ ਨੂੰ ਕੱਟਿਆ ਜਾ ਚੁੱਕਾ ਹੈ।
3. ਵਾਤਾਵਰਨ ਪੱਖੋਂ ਪੰਜਾਬ ਦੇ ਬਹੁਤ ਹੀ ਅਮੀਰ, ਅਹਿਮ ਅਤੇ ਸੰਵੇਦਨਸ਼ੀਲ ਇਲਾਕੇ ਸ਼ਿਵਾਲਿਕ ਦੀਆਂ ਪਹਾੜੀਆਂ ਨੂੰ ਰੇਤਾ, ਬਜਰੀ, ਮਿੱਟੀ ਆਦਿ ਪ੍ਰਾਪਤ ਕਰਨ, ਉਦਯੋਗ ਲਗਾਉਣ ਜਾਂ ਐਸ਼-ਓ-ਆਰਾਮ ਲਈ ਕਾਲੋਨੀਆਂ ਕੱਟਣ ਦੇ ਨਾਂਅ ਉੱਪਰ ਪੱਧਰਾ ਕੀਤਾ ਜਾ ਰਿਹਾ ਹੈ।
4. ਦਰਿਆਵਾਂ ਨਾਲ ਲਗਦੀਆਂ ਜ਼ਮੀਨਾਂ ਉੱਪਰ ਧਾਰਮਿਕ ਅਸਥਾਨਾਂ, ਗਊਸ਼ਾਲਾਵਾਂ ਬਣਾਉਣ ਦੇ ਮੰਤਵ ਹੇਠ ਕਬਜ਼ਾ ਕੀਤਾ ਜਾ ਰਿਹਾ ਹੈ।
5. ਖੇਤਾਂ ਵਿਚ ਖੜ੍ਹੇ ਰੁੱਖ ਜਾਂ ਬਰਮਾਂ ਉੱਪਰ ਲੱਗੇ ਰੁੱਖਾਂ ਨੂੰ ਛਾਂ ਆਦਿ ਹੋਣ ਦੇ ਕਾਰਨ ਫ਼ਸਲ ਘੱਟ ਪੈਦਾ ਹੋਣ ਦਾ ਹਵਾਲਾ ਦੇ ਕੇ ਲਗਭਗ ਸਾਫ਼ ਕੀਤਾ ਜਾ ਚੁੱਕਾ ਹੈ।
ਅਜਿਹੀ ਸਥਿਤੀ ਵਿਚ ਬਹੁਤ ਸਾਰੇ ਜੀਵਾਂ (ਜਿਨ੍ਹਾਂ ਵਿਚ ਪੰਛੀਆਂ ਅਤੇ ਹੋਰ ਜਾਨਵਰਾਂ ਦੀਆਂ ਕਿਸਮਾਂ ਸ਼ਾਮਿਲ ਹਨ) ਸਦਾ ਲਈ ਮਨੁੱਖੀ ਵਸੋਂ ਤੋਂ ਦੂਰ ਜਾਂ ਅਲੋਪ ਹੋ ਚੁੱਕੀਆਂ ਹਨ। ਪੰਜਾਬ ਦੀਆਂ ਸਾਰੀਆਂ ਰੱਖਾਂ ਦਾ ਘੇਰਾ ਜੇਕਰ 10 ਕਿਲੋਮੀਟਰ ਤੋਂ ਘਟਾ ਕੇ 100 ਮੀਟਰ ਕਰਕੇ ਮਨੁੱਖ ਵੱਲੋਂ ਲਾਲਚ ਤੇ ਲਾਲਸਾਵਾਂ (ਪ੍ਰਤੱਖ ਰੂਪ ਵਿਚ ਇਹੀ ਕਾਰਨ ਹੈ) ਅਧੀਨ ਧਰਤੀ ਦੇ ਹੋਰ ਜੀਵਾਂ ਜੋ ਕਿ ਮਨੁੱਖੀ ਰਹਿਮ ਉੱਪਰ ਅੱਜ ਆਪਣਾ ਜੀਵਨ ਬਤੀਤ ਕਰ ਰਹੇ ਹਨ, ਦੀ ਜ਼ਮੀਨ ਉੱਪਰ ਕਬਜ਼ਾ ਕੀਤਾ ਜਾਂਦਾ ਹੈ ਤਾਂ ਇਹ ਨਿਸਚਿਤ ਰੂਪ ਵਿਚ ਮਨੁੱਖ ਲਈ ਆਪਾ ਘਾਤਕ ਫ਼ੈਸਲਾ ਹੋਵੇਗਾ। ਅਜਿਹਾ ਕਰਨ ਨਾਲ ਮਨੁੱਖੀ ਦਖ਼ਲ-ਅੰਦਾਜ਼ੀ ਰੱਖਾਂ ਤੱਕ ਵਧ ਜਾਵੇਗੀ ਅਤੇ ਉਸ ਵਿਚ ਵਿਚਰਦੇ ਜੀਵਾਂ ਦਾ ਰਹਿਣਾ ਮੁਹਾਲ ਹੋ ਜਾਵੇਗਾ। ਉਨ੍ਹਾਂ ਦੀ ਖੁਰਾਕ ਅਤੇ ਪ੍ਰਜਨਣ ਸ਼ਕਤੀ ਉੱਪਰ ਬੇਹੱਦ ਮਾਰੂ ਅਸਰ ਪੈਣ ਦੀ ਆਸ਼ੰਕਾ ਹੈ। ਰਹਿੰਦਾ-ਖੂੰਹਦਾ ਰੁੱਖਾਂ ਨਾਲ ਕੁਝ ਕੁ ਢਕਿਆ ਖੇਤਰ ਵੀ ਹਰਿਆਲੀ ਤੋਂ ਮਹਿਰੂਮ ਹੋ ਜਾਵੇਗਾ। ਅਜਿਹਾ ਕਰਨਾ ਸਮੁੱਚੇ ਪੰਜਾਬ ਦੇ ਵਾਤਾਵਰਣਿਕ ਪ੍ਰਬੰਧ ਨੂੰ ਤਬਾਹ ਕਰਨ ਦੇ ਤੁਲ ਹੈ।
ਮੇਰੀ ਆਪ ਜੀ ਨੂੰ ਨਿਮਰਤਾ ਸਹਿਤ ਬੇਨਤੀ ਹੈ ਕਿ ਆਪ ਜੀ ਰੌਸ਼ਨ-ਬੁੱਧ ਦੇ ਮਾਲਕ ਹੋ। ਆਪ ਪੰਜਾਬ ਸਰਕਾਰ ਦੇ ਫ਼ੈਸਲੇ ਨਾਲ ਵਾਤਾਵਰਨ ਅਤੇ ਜੀਵ-ਜੰਤੂਆਂ ਉੱਪਰ ਪੈਣ ਵਾਲੇ ਵਿਗਾੜਾਂ ਪ੍ਰਤੀ ਸਰਕਾਰ ਦੇ ਨੁਮਾਇੰਦਿਆਂ ਅਤੇ ਨਾਗਰਿਕਾਂ ਨੂੰ ਜਾਗਰੂਕ ਕਰਨ ਲਈ ਉਚਿਤ ਕਦਮ ਉਠਾਓ, ਤਾਂ ਜੋ ਅਸੀਂ ਆਪਣੇ ਵਾਤਾਵਰਨ ਅਤੇ ਆਲੇ-ਦੁਆਲੇ ਦੇ ਜੀਵ-ਜੰਤੂਆਂ ਨੂੰ ਬਚਾਉਣ ਲਈ ਇਕ ਨਿੱਕਾ ਜਿਹਾ ਉਪਰਾਲਾ ਕਰ ਸਕੀਏ।

ਹੁੰਗਾਰੇ ਦੀ ਆਸ ਵਿਚ
-ਜਗਜੀਤ ਸਿੰਘ ਮਾਨ
ਵਾਤਾਵਰਨ ਪ੍ਰੇਮੀ
ਮੋ: 94631-40554
E. mail : pnpp30@yahoo.com

31-7-2014

 ਘਿਨਾਉਣੇ ਅਪਰਾਧਾਂ ਖਿਲਾਫ਼ ਇਕਜੁੱਟ ਹੋਣ ਦਾ ਸਮਾਂ

ਮੈਂ ਯੂ. ਐਸ. ਫੌਜ ਲਈ ਕੰਮ ਕਰਦਾ ਹਾਂ। ਜਦੋਂ ਇਥੋਂ ਦੇ ਲੋਕ ਇਹ ਪੁੱਛਦੇ ਹਨ ਕਿ ਭਾਰਤ ਵਿਚ ਇੰਨੇ ਜਬਰ-ਜਨਾਹ ਕਿਉਂ ਹੋ ਰਹੇ ਹਨ ਤੇ ਭਾਰਤੀ ਸਰਕਾਰ ਕਿਉਂ ਨਹੀਂ ਕੁਝ ਕਰ ਰਹੀ ਤਾਂ ਸ਼ਰਮ ਨਾਲ ਸਿਰ ਝੁਕ ਜਾਂਦਾ ਹੈ ਅਤੇ ਇਹ ਸਾਡੇ ਲਈ ਕਿੰਨੀ ਸ਼ਰਮ ਵਾਲੀ ਗੱਲ ਹੈ। ਇਸ ਲਈ ਇਹ ਹੁਣ ਸਾਡੇ ਸਾਰਿਆਂ ਲਈ ਇਕ ਜ਼ਿੰਮੇਵਾਰੀ ਬਣ ਚੁੱਕੀ ਹੈ ਕਿ ਅਸੀਂ ਅਜਿਹੇ ਘਿਨਾਉਣੇ ਅਪਰਾਧਾਂ ਦਾ ਖਾਤਮਾ ਕਰੀਏ।

ਦਲਜੀਤ ਸਿੰਘ
Email : daljitsingh708@gmail.com

3-1-2014

 ਪੰਜਾਬੀ ਦਾ ਹੱਕ

ਅੰਗਰੇਜ਼ਾਂ ਵੱਲੋਂ ਭਾਰਤ ਦੀ ਵੰਡ ਦੌਰਾਨ ਲੱਖਾਂ ਪੰਜਾਬੀਆਂ ਦੇ ਜਾਨੀ ਤੇ ਮਾਲੀ ਨੁਕਸਾਨ ਤੋਂ ਬਾਅਦ ਭਾਰਤ ਦੇ ਨਾਲ ਜੁੜਿਆ ਪੰਜਾਬ ਕਾਫੀ ਜੱਦੋ-ਜਹਿਦ ਕਰਨ ਤੋਂ ਬਾਅਦ ਭਾਸ਼ਾ 'ਤੇ ਆਧਾਰਿਤ ਸੂਬਾ ਬਣਿਆ ਪ੍ਰੰਤੂ ਇਸ ਦੇ ਅੰਗ ਕੱਟ ਕੇ ਹਰਿਆਣਾ ਤੇ ਹਿਮਾਚਲ ਬਣਾ ਦਿੱਤੇ ਗਏ ਅਤੇ ਪੰਜਾਬੀ ਬੋਲਦੇ ਇਲਾਕਿਆਂ ਸਬੰਧੀ ਇਨਸਾਫ਼ ਨਾ ਕਰਕੇ ਕਈ ਪੰਜਾਬੀ ਬੋਲਦੇ ਇਲਾਕੇ ਪੰਜਾਬ ਤੋਂ ਬਾਹਰ ਕਰ ਦਿੱਤੇ ਗਏ। ਪੰਜਾਬੀ ਸੂਬੇ ਦੇ ਬਨਣ ਦੇ ਬਾਵਜੂਦ ਵੀ ਇਕ ਦੀ ਮਾਂ-ਬੋਲੀ ਪੰਜਾਬੀ ਨੂੰ ਸਰਕਾਰੇ-ਦਰਬਾਰੇ ਬਣਦਾ ਮਾਣ ਸਤਿਕਾਰ ਨਹੀਂ ਕੀਤਾ ਗਿਆ। ਬੇਸ਼ੱਕ ਮੌਜੂਦਾ ਸਰਕਾਰ ਨੇ ਆਪਣੇ ਪਿਛਲੇ ਕਾਰਜਕਾਲ ਦੌਰਾਨ ਪੰਜਾਬੀ ਭਾਸ਼ਾ ਸਰਕਾਰੀ ਦਫ਼ਤਰਾਂ ਵਿਚ ਲਾਜ਼ਮੀ ਕੀਤੀ ਹੈ, ਪ੍ਰੰਤੂ ਅਫਸਰਸ਼ਾਹੀ ਨੂੰ ਪਤਾ ਨਹੀਂ ਪੰਜਾਬੀ ਨਾਲ ਕੀ ਵੈਰ ਹੈ ਤੇ ਅੰਗਰੇਜ਼ੀ ਨਾਲ ਹੇਜ਼ ਹੈ ਕਿ ਉਹ ਪੰਜਾਬੀ ਨੂੰ ਸਰਕਾਰੀ ਭਾਸ਼ਾ ਬਣਨ ਤੋਂ ਰੋਕਣ ਲਈ ਹਰ ਤਰ੍ਹਾਂ ਦੇ ਹਰਬੇ ਵਰਤਦੀ ਆ ਰਹੀ ਹੈ।

-ਬੱਬੀ ਪੱਤੋ
ਪਿੰਡ ਤੇ ਡਾਕ: ਪੱਤੋ ਹੀਰਾ ਸਿੰਘ (ਮੋਗਾ)।

ਤੇਜ਼ਾਬੀ ਹਮਲੇ

ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਦੇ ਫ਼ੈਸਲੇ ਅਨੁਸਾਰ, ਤੇਜ਼ਾਬੀ ਹਮਲਿਆਂ ਤੋਂ ਪੀੜਤਾਂ ਲਈ ਮੁਫ਼ਤ ਇਲਾਜ ਦਾ ਐਲਾਨ ਕਰ ਦਿੱਤਾ। ਪਰ ਇਹ ਵਕਤੀ ਇਲਾਜ ਹੈ, ਸਮੱਸਿਆ ਦਾ ਇਲਾਜ ਨਹੀਂ। ਅਸਲ ਮੁੱਦਾ ਤਾਂ ਦੋਸ਼ੀਆਂ ਨੂੰ ਸਖ਼ਤ ਤੋਂ ਸਖ਼ਤ ਸਜ਼ਾਵਾਂ ਦੇਣ ਦਾ ਹੈ। ਤੇਜ਼ਾਬ ਪੀੜਤਾਂ ਦੇ ਸਰੀਰਕ, ਮਾਨਸਿਕ, ਬੌਧਿਕ, ਸਮਾਜਿਕ ਪੱਧਰਾਂ ਨੂੰ ਬਹੁਤ ਜ਼ਿਆਦਾ ਸੱਟ ਵੱਜਦੀ ਹੈ। ਉਨ੍ਹਾਂ ਦਾ ਸਵੈਮਾਨ, ਇੱਜ਼ਤ, ਹੌਸਲਾ ਸਦਾ ਲਈ ਖ਼ਤਮ ਹੋ ਜਾਂਦਾ। ਜਿੰਨਾ ਚਿਰ ਸਖ਼ਤ ਸਜ਼ਾਵਾਂ ਤੈਅ ਨਹੀਂ ਹੁੰਦੀਆਂ ਤੇਜ਼ਾਬੀ ਘਟਨਾਵਾਂ ਨਹੀਂ ਰੁਕਣਗੀਆਂ। ਸਖ਼ਤ ਸਜ਼ਾਵਾਂ ਹੀ ਇਨ੍ਹਾਂ ਘਟਨਾਵਾਂ ਦਾ ਅਸਲ ਇਲਾਜ ਹਨ। ਨਹੀਂ ਤਾਂ ਉਹ ਦਿਨ ਦੂਰ ਨਹੀਂ, ਸਾਨੂੰ ਬਿਰਧ, ਅਨਾਥ, ਵਿਧਵਾ ਆਸ਼ਰਮ ਦੀ ਤਰ੍ਹਾਂ ਤੇਜ਼ਾਬੀ ਆਸ਼ਰਮ ਬਣਾਉਣੇ ਪੈਣਗੇ।

-ਭੁਪਿੰਦਰ ਸਿੰਘ 'ਜੈਤੋ'
ਸਰਕਾਰੀ ਪ੍ਰਾਇਮਰੀ ਸਕੂਲ, ਰਾਮੇਆਣਾ (ਫਰੀਦਕੋਟ)।

'ਭਾਗ ਸਿਰਜਣੇ ਪੈਂਦੇ...'

ਪਿਛਲੇ ਦਿਨੀਂ 'ਅਜੀਤ' ਦੇ ਸੰਪਾਦਕੀ ਸਫ਼ੇ 'ਤੇ ਲੇਖਿਕਾ ਬੱਬੂ ਤੀਰ ਦਾ ਕਾਲਮ 'ਭਾਗ ਸਿਰਜਣੇ ਪੈਂਦੇ ਨੇ, ਲਕੀਰਾਂ 'ਚੋਂ ਨਹੀਂ ਲੱਭਦੇ' ਪੜ੍ਹਨ ਨੂੰ ਮਿਲਿਆ। ਲੇਖਿਕਾ ਨੇ ਆਪਣੇ ਲੇਖ ਵਿਚ ਠੁੱਕਦਾਰ ਬੋਲੀ ਰਾਹੀਂ ਮਨੁੱਖੀ ਜ਼ਿੰਦਗੀ ਵਿਚ ਆਉਣ ਵਾਲੇ ਚੰਗੇ-ਮਾੜੇ ਸਮੇਂ ਦਾ ਡਟ ਕੇ ਮੁਕਾਬਲਾ ਕਰਨ ਦੀ ਸਿੱਖਿਆ ਦਿੱਤੀ। ਇਸ ਤੋਂ ਇਲਾਵਾ ਡਾ: ਬਰਜਿੰਦਰ ਸਿੰਘ ਹਮਦਰਦ ਦੀ ਭ੍ਰਿਸ਼ਟਾਚਾਰ ਬਾਰੇ ਸੰਪਾਦਕੀ ਵੀ ਕਾਬਲ-ਏ-ਤਾਰੀਫ਼ ਲੱਗੀ।

-ਜਸਵਿਨ
ਕਮਲ ਕਾਲੋਨੀ, ਸਮਰਾਲਾ, ਜ਼ਿਲ੍ਹਾ ਲੁਧਿਆਣਾ।

ਕਾਲਾ ਕਾਰੋਬਾਰ

ਨਸ਼ਿਆਂ ਨੇ ਸਾਡੀ ਸਰੂ ਵਰਗੀ ਜਵਾਨੀ ਨੂੰ ਅਣਆਈ ਮੌਤ ਦੇ ਮੂੰਹ ਧੱਕ ਦਿੱਤਾ ਹੈ। ਸੱਚਮੁੱਚ ਹੁਣ ਪੰਜਾਬੀਆਂ ਦੇ ਜਾਗਣ ਅਤੇ ਆਪਣੀ ਨੌਜਵਾਨ ਪੀੜ੍ਹੀ ਨੂੰ ਬਚਾਉਣ ਲਈ ਡਟਣ ਦਾ ਸਮਾਂ ਹੈ। ਨਸ਼ਿਆਂ ਦੇ ਸੌਦਾਗਰਾਂ ਵਿਰੁੱਧ ਲਾਮਬੰਦ ਹੋ ਕੇ ਇਸ ਮਕੜਜਾਲ ਨੂੰ ਤੋੜਿਆ ਜਾ ਸਕਦਾ ਹੈ। ਇਸ ਕਾਲੇ ਕਾਰੋਬਾਰ ਵਿਚ ਸ਼ਾਮਿਲ ਪ੍ਰਭਾਵਸ਼ਾਲੀ ਵਿਅਕਤੀਆਂ ਨੂੰ ਲੋਕ ਕਚਹਿਰੀ ਵਿਚ ਨੰਗਿਆਂ ਕਰਨ ਦੀ ਜ਼ਰੂਰਤ ਹੈ। ਚੰਗੇ ਪੁਲਿਸ ਅਧਿਕਾਰੀਆਂ ਨੂੰ ਥਾਪੜਾ ਦੇਣ ਦੀ ਲੋੜ ਹੈ। ਇਸ ਮੁਹਿੰਮ ਵਿਚ ਹਰ ਜਾਗਰੂਕ ਪੰਜਾਬੀ ਨੂੰ ਆਪਣਾ ਬਣਦਾ ਯੋਗਦਾਨ ਪਾਉਣਾ ਚਾਹੀਦਾ ਹੈ।

-ਨਵਪ੍ਰੀਤ ਕੌਰ ਢਿੱਲੋਂ
ਦੀਪਗੜ੍ਹ (ਬਰਨਾਲਾ)।

ਅੰਧ-ਵਿਸ਼ਵਾਸ

ਵਿਗਿਆਨਕ ਯੁੱਗ ਵਿਚ ਚਾਹੇ ਮਨੁੱਖ ਹਰ ਖੇਤਰ ਵਿਚ ਮੱਲਾਂ ਮਾਰ ਰਿਹਾ ਹੈ ਪਰ ਅਜੇ ਵੀ ਉਹ ਆਪਣੇ-ਆਪ ਨੂੰ ਵਹਿਮਾਂ-ਭਰਮਾਂ ਵਿਚੋਂ ਬਾਹਰ ਨਹੀਂ ਕੱਢ ਸਕਿਆ। ਵਿਆਹ ਹੋਵੇ ਜਾਂ ਕੋਈ ਕੰਮ, ਅੱਜ ਵੀ ਮਹੂਰਤ ਦੇਖੇ ਬਿਨਾਂ ਨਹੀਂ ਕੀਤਾ ਜਾਂਦਾ। ਵਿਗਿਆਨ ਜੋ ਕਹਿੰਦਾ ਹੈ, ਉਹ ਸਾਬਤ ਵੀ ਕਰਦਾ ਹੈ, ਅੰਧ-ਵਿਸ਼ਵਾਸ ਅਟਕਲਪੱਚੂ ਤੋਂ ਸਿਵਾ ਕੁਝ ਨਹੀਂ। ਅਜੋਕੇ ਸਮੇਂ ਵਿਚ ਬਹੁਤੇ ਲੋਕ ਵਹਿਮਾਂ-ਭਰਮਾਂ ਵਿਚ ਪੈ ਕੇ ਆਪਣੀਆਂ ਸਮੱਸਿਆਵਾਂ ਦੇ ਹੱਲ ਲਈ ਤਾਂਤਰਿਕਾਂ ਕੋਲ ਵੀ ਜਾਂਦੇ ਹਨ, ਜੋ ਇਨ੍ਹਾਂ ਦੀ ਆਰਥਿਕ ਤੇ ਮਾਨਸਿਕ ਲੁੱਟ ਸ਼ਰੇਆਮ ਕਰਦੇ ਹਨ। ਤਾਂਤਰਿਕਾਂ ਦੇ ਹੱਥੇ ਚੜ੍ਹ ਕੇ ਜਾਨੀ-ਮਾਲੀ ਨੁਕਸਾਨ ਕਰਵਾਉਣ ਤੋਂ ਬਿਨਾਂ ਅਜਿਹੇ ਕਈ ਵਿਸ਼ਵਾਸ ਜੋ ਹੁਣ ਪੂਰੀ ਤਰ੍ਹਾਂ ਗ਼ੈਰ-ਵਿਗਿਆਨਕ ਸਾਬਤ ਹੋ ਚੁੱਕੇ ਹਨ, ਨੂੰ ਅਪਣਾ ਕੇ ਹਰ ਰੋਜ਼ ਹਾਦਸਿਆਂ ਅਤੇ ਬਿਮਾਰੀਆਂ ਤੋਂ ਗ੍ਰਸਤ ਲੋਕ ਜਾਨਾਂ ਗੁਆ ਰਹੇ ਹਨ। ਭਾਵੇਂ ਕਿ ਭਾਰਤ ਦੇ ਅੰਧ-ਵਿਸ਼ਵਾਸੀ ਸਮਾਜ ਨੂੰ ਆਧੁਨਿਕ ਲੀਹਾਂ 'ਤੇ ਚੱਲਣਾ ਬੜਾ ਵੱਡਾ ਕਾਰਜ ਹੈ ਪਰ ਅੱਜ ਲੋੜ ਹੈ ਸਮੇਂ ਨੂੰ ਪਛਾਣਨ ਦੀ, ਉਸ ਦੀ ਰਫ਼ਤਾਰ ਨਾਲ ਚੱਲਣ ਦੀ। ਉਸ ਨਾਲ ਸਾਡੀ ਤਰੱਕੀ ਹੈ, ਨਾ ਕਿ ਵਹਿਮਾਂ-ਭਰਮਾਂ ਵਿਚ ਪੈ ਕੇ ਆਪਣੀ ਜ਼ਿੰਦਗੀ ਬਿਤਾਉਣ ਦੀ, ਸਾਡੇ ਸਮਾਜ ਨੂੰ ਤਰੱਕੀ ਦੀਆਂ ਲੀਹਾਂ 'ਤੇ ਲਿਜਾਣ ਲਈ ਇਨ੍ਹਾਂ ਵਹਿਮਾਂ-ਭਰਮਾਂ ਦੇ ਚੱਕਰਵਿਊ ਵਿਚੋਂ ਨਿਕਲ ਕੇ ਯੋਜਨਾਬੱਧ ਤਰੀਕੇ ਨਾਲ ਜ਼ਿੰਦਗੀ ਜਿਊਣ ਦੀ ਲੋੜ ਹੈ। ਆਓ, ਅੰਧ-ਵਿਸ਼ਵਾਸਾਂ ਦੇ ਅੰਨ੍ਹੇ ਖੂਹ ਵਿਚੋਂ ਬਾਹਰ ਨਿਕਲ ਕੇ ਗਿਆਨ ਦੀ ਰੌਸ਼ਨ ਦੁਨੀਆ 'ਚ ਕਦਮ ਧਰੀਏ।

-ਰਾਜਵੰਤ ਸਿੰਘ ਰਾਜੂ
ਨੇੜੇ ਗੁਰੂ ਨਾਨਕ ਆਟੋ ਸਪੇਅਰਜ਼, ਲੁਧਿਆਣਾ ਰੋਡ, ਰਾਏਕੋਟ।

28-9-2013

 ਇਨਸਾਫ਼ ਤੋਂ ਉਮੀਦ
ਦਿੱਲੀ ਵਿਚ 16 ਦਸੰਬਰ ਨੂੰ 23 ਸਾਲਾ ਲੜਕੀ ਦਾਮਨੀ ਨਾਲ ਸਮੂਹਿਕ ਜਬਰ-ਜਨਾਹ ਕਰਨ ਵਾਲੇ ਚਾਰ ਦੋਸ਼ੀਆਂ ਨੂੰ ਪਿਛਲੇ ਦਿਨੀਂ ਦਿੱਲੀ ਸਾਕੇਤ ਅਦਾਲਤ ਨੇ ਫਾਂਸੀ ਦੀ ਸਜ਼ਾ ਸੁਣਾ ਦਿੱਤੀ। ਪੂਰਾ ਦੇਸ਼ ਹੀ ਇਹ ਚਾਹੁੰਦਾ ਸੀ ਕਿ ਇਨ੍ਹਾਂ ਅਪਰਾਧੀਆਂ ਨੂੰ ਫਾਂਸੀ ਦੀ ਸਜ਼ਾ ਹੀ ਹੋਣੀ ਚਾਹੀਦੀ ਹੈ ਇਨ੍ਹਾਂ ਅਪਰਾਧੀਆਂ ਨੂੰ ਮਿਲੀ ਫਾਂਸੀ ਦੀ ਸਜ਼ਾ ਨਾਲ ਉਮੀਦ ਹੈ ਕਿ ਹੁਣ ਬਲਾਤਕਾਰ ਨੂੰ ਠੱਲ੍ਹ ਪੈ ਜਾਵੇਗੀ।

-ਸੁਖਦੀਪ 'ਸੁੱਖਾ' ਪੰਚ
ਪਿੰਡ ਸੁਖਾਣਾ, ਜ਼ਿਲ੍ਹਾ ਲੁਧਿਆਣਾ।

23-9-2013

 ਹਾਅ ਦਾ ਨਾਅਰਾ
'ਅਜੀਤ' ਦੇ ਸੰਪਾਦਕੀ ਸਫ਼ੇ 'ਤੇ ਪੰਜਾਬੀ ਮਾਂ-ਬੋਲੀ ਲਈ ਹਾਅ ਦਾ ਨਾਅਰਾ ਮਾਰਦਾ ਲੇਖ 'ਚੰਡੀਗੜ੍ਹ ਵਿਚ ਪੰਜਾਬੀ' ਪੜ੍ਹਿਆ। ਚੰਡੀਗੜ੍ਹ ਤਾਂ ਕੀ ਪੂਰੇ ਪੰਜਾਬ ਦੇ ਮੁੱਖ ਤੇ ਹੋਰ ਸ਼ਹਿਰਾਂ 'ਚ ਪੰਜਾਬੀ ਲਈ ਬਹੁਤ ਹੀ ਘੱਟ ਸ਼ੁੱਭ ਸ਼ਗਨ ਹੈ, ਜਿਸ ਨੂੰ ਅਸੀਂ ਸਾਰੇ ਪੰਜਾਬੀ ਤੱਕਦੇ ਵੀ ਹਾਂ। ਨਾ ਤਾਂ ਪੰਜਾਬ ਦਾ ਵਾਸੀ ਤੇ ਨਾ ਹੀ ਪੰਜਾਬੀ ਪ੍ਰੋ: ਧਰੈਨਵੱਰ ਨੇ ਸਾਡੇ ਮੂੰਹ 'ਤੇ ਚੰਗੀ ਚਪੇੜ ਮਾਰੀ ਹੈ। ਇਕ ਗ਼ੈਰ-ਪੰਜਾਬੀ ਬੰਦਾ ਪੰਜਾਬੀ ਪੜ੍ਹ ਕੇ ਗੁਰਬਾਣੀ ਸਮਝ ਕੇ ਪੰਜਾਬੀ ਮਾਂ-ਬੋਲੀ ਦਾ ਝੰਡਾ ਉੱਚਾ ਚੁੱਕਣ ਲਈ ਯਤਨਸ਼ੀਲ ਹੈ ਪਰ ਅਸੀਂ ਪੰਜਾਬੀ ਖ਼ੁਦ ਹੀ ਪੰਜਾਬੀ ਤੋਂ ਮੂੰਹ ਮੋੜ ਰਹੇ ਹਾਂ, ਜਿਸ ਦਾ ਨਤੀਜਾ ਅਸੀਂ ਭੁਗਤ ਵੀ ਰਹੇ ਹਾਂ ਤੇ ਅੱਗੇ ਭੁਗਤਾਂਗੇ ਵੀ। ਪ੍ਰੋ: ਸਾਹਿਬ ਨਾਲ ਮੇਰੀ ਮੁਲਾਕਾਤ ਵੀ ਹੋਈ ਹੈ, ਉਹ ਪੰਜਾਬੀ ਤੇ ਪੰਜਾਬੀਅਤ ਦੇ ਸ਼ੈਦਾਈ ਹਨ ਤੇ ਪੰਜਾਬ ਵਾਸੀਆਂ 'ਤੇ ਹੈਰਾਨ ਵੀ ਹਨ। ਉਹ ਪੰਜਾਬੀ ਗੀਤਾਂ 'ਚ ਲੱਚਰਤਾ ਤੇ ਖਾਸ ਕਰ ਸ਼ਰਾਬ ਤੋਂ ਬਹੁਤ ਚਿੰਤਤ ਹਨ। ਮੈਂ ਸਾਰੇ ਹੀ ਪੰਜਾਬ ਵਾਸੀਆਂ ਨੂੰ ਬੇਨਤੀ ਕਰਦਾ ਹਾਂ ਕਿ ਆਪਾਂ ਬੇਗਾਨੇ ਤੋਂ ਹੀ ਸਿੱਖ ਲਈਏ ਕਿ ਕਿਵੇਂ ਪੰਜਾਬੀ ਮਾਂ-ਬੋਲੀ ਪ੍ਰਤੀ ਪਿਆਰ ਦਿਖਾਉਣਾ ਹੈ ਤੇ ਪੰਜਾਬੀ ਨੂੰ ਹੋਰ ਵੀ ਚੜ੍ਹਦੀ ਕਲਾ 'ਚ ਲਿਜਾ ਕੇ ਸੰਵਾਰਨਾ ਹੈ।

-ਬਲਬੀਰ ਸਿੰਘ ਬੱਬੀ
ਪਿੰਡ ਤੱਖਰਾਂ (ਲੁਧਿਆਣਾ)।

ਆਨ-ਲਾਈਨ ਜ਼ਮਾਨਾ
ਅੱਜ ਦੇ ਸਮੇਂ ਵਿਚ ਇੰਟਰਨੈੱਟ ਦਾ ਬੋਲਬਾਲਾ ਕਾਫੀ ਵਧ ਗਿਆ ਹੈ। ਇਸ ਦੇ ਕਾਫੀ ਫਾਇਦੇ ਵੀ ਹਨ ਤੇ ਨੁਕਸਾਨ ਵੀ। ਜੇ ਵੇਖਿਆ ਜਾਵੇ ਤਾਂ ਫਾਇਦੇ ਵੱਧ ਹਨ ਤੇ ਨੁਕਸਾਨ ਆਪਣੇ ਹੱਥ ਵਿਚ ਹੀ ਹੈ। ਜੇਕਰ ਸਹੀ ਢੰਗ ਨਾਲ ਇਸ ਦੀ ਵਰਤੋਂ ਕੀਤੀ ਜਾਏ ਤਾਂ ਅਸੀਂ ਕਾਫੀ ਚੀਜ਼ਾਂ ਦਾ ਗਿਆਨ ਘਰ ਵਿਚ ਜਾਂ ਆਪਣੇ ਦਫ਼ਤਰ ਵਿਚ ਵਿਹਲੇ ਸਮੇਂ ਵਰਤੋਂ ਕਰਕੇ ਹਾਸਲ ਕਰ ਸਕਦੇ ਹਾਂ। ਇੰਟਰਨੈੱਟ ਦੁਆਰਾ ਅੱਜਕਲ੍ਹ ਸਭ ਕੁਝ ਸੌਖਾਲਾ ਹੋ ਗਿਆ ਹੈ। ਹੁਣ ਅਸੀਂ ਇੰਟਰਨੈੱਟ ਦੁਆਰਾ ਬਿਜਲੀ ਬਿੱਲ, ਸਕੂਲ ਫੀਸਾਂ, ਰੇਲਵੇ ਟਿਕਟ, ਅਸਾਮੀਆਂ ਆਦਿ ਭਰ ਸਕਦੇ ਹਾਂ।

-ਅਜੈ ਕੁਮਾਰ
ਮੌੜ ਮੰਡੀ, ਬਠਿੰਡਾ।
bba.ajay@gmail.com

ਕਾਨੂੰਨ 'ਚ ਸੋਧ ਦੀ ਲੋੜ
ਦਿੱਲੀ ਦੇ ਜਬਰ-ਜਨਾਹ ਦੇ ਮਾਮਲੇ ਵਿਚ ਅਦਾਲਤ ਵੱਲੋਂ ਨਾਬਾਲਿਗ ਦੋਸ਼ੀ ਬਾਰੇ ਜੋ ਫ਼ੈਸਲਾ ਦਿੱਤਾ ਗਿਆ ਸੀ, ਮੈਂ ਉਸ ਨਾਲ ਸਹਿਮਤ ਨਹੀਂ ਹਾਂ। ਇਸ ਨਾਲ ਅਜਿਹੇ ਦੋਸ਼ੀਆਂ ਨੂੰ ਹੋਰ ਹੌਸਲਾ ਮਿਲੇਗਾ ਕਿ ਕੋਈ ਵੀ ਨਾਬਾਲਿਗ ਜੋ ਭਾਵੇਂ 17 ਸਾਲ ਤੋਂ ਵਧੇਰੇ ਉਮਰ ਦਾ ਵੀ ਹੋਵੇ, ਕੁਝ ਵੀ ਕਰ ਸਕਦਾ ਹੈ ਅਤੇ ਸਜ਼ਾ ਤਾਂ ਤਿੰਨ ਸਾਲ ਹੀ ਮਿਲਣੀ ਹੈ। ਇਸ ਸਬੰਧੀ ਕਾਨੂੰਨ 'ਚ ਸੋਧ ਹੋਣੀ ਚਾਹੀਦੀ ਹੈ। ਨਾਬਾਲਿਗਾਂ ਦੀ ਉਮਰ ਹੱਦ ਘਟਾਈ ਜਾਣੀ ਚਾਹੀਦੀ ਹੈ।

-ਪਲਵਿੰਦਰ ਸਿੰਘ
ਗੁਰਦਾਸਪੁਰ।
palwinder_dhariwal@yahoo.com

ਪੰਜਾਬ ਨੂੰ ਸੰਭਾਲੋ
ਪੰਜਾਬ ਨੂੰ ਕਦੇ ਸੋਨੇ ਦੀ ਚਿੜੀ ਦੇ ਨਾਂਅ ਨਾਲ ਪੁਕਾਰਿਆ ਜਾਂਦਾ ਸੀ। ਪਰ ਅੱਜ ਇਸ ਸੋਨੇ ਦੀ ਚਿੜੀ ਨੂੰ ਸਾਡੇ ਆਪਣੇ ਹੀ ਲੁੱਟਣ ਲੱਗੇ ਹੋਏ ਹਨ। ਜਿਸ ਨਾਲ ਪੰਜਾਬ ਦੀ ਆਰਥਿਕ ਦਸ਼ਾ ਦਿਨੋ-ਦਿਨ ਵਿਗੜਦੀ ਜਾ ਰਹੀ ਹੈ। ਪੰਜਾਬ ਸਿਰ ਕਰਜੇ ਦਾ ਬੋਝ ਦਿਨੋ-ਦਿਨ ਵਧਦਾ ਜਾ ਰਿਹਾ ਹੈ। ਇਥੇ ਬੇਰੁਜ਼ਗਾਰੀ ਕਰਕੇ ਲੁੱਟਾਂ-ਖੋਹਾਂ ਅਤੇ ਨਸ਼ੇ ਦਾ ਰੁਝਾਨ ਲਗਾਤਾਰ ਵਧ ਰਿਹਾ ਹੈ। ਜਿਸ ਨੂੰ ਠੱਲ੍ਹ ਪਾਉਣ ਦੀ ਲੋੜ ਹੈ।

-ਬਲਵੰਤ ਸਿੰਘ ਗਿਆਸਪੁਰਾ
ਮੋਬਾਈਲ : 94174-70951.

14-9-2013

 ਪੰਜਾਬ ਦੀ ਵਿੱਤੀ ਹਾਲਤ
ਪਿਛਲੇ ਦਿਨੀਂ ਬਰਜਿੰਦਰ ਸਿੰਘ ਹਮਦਰਦ ਜੀ ਨੇ ਆਪਣੀ ਸੰਪਾਦਕੀ ਵਿਚ ਪੰਜਾਬ ਦੀ ਆਰਥਿਕ ਸਥਿਤੀ ਦੀ ਸਹੀ ਤਸਵੀਰ ਪੇਸ਼ ਕੀਤੀ ਹੈ। ਜਿਥੇ ਇਸ ਵਿਗੜ ਰਹੀ ਆਰਥਿਕ ਹਾਲਤ ਦੀ ਮੀਡੀਏ ਵਿਚ ਚਰਚਾ ਹੋ ਰਹੀ ਹੈ, ਉਥੇ ਵਿਰੋਧੀ ਪਾਰਟੀਆਂ ਦੇ ਹੱਥ ਇਕ ਮੁੱਦਾ ਵੀ ਲੱਗ ਗਿਆ ਹੈ। ਸਚਾਈ ਹੈ ਕਿ ਸਰਕਾਰ ਦੀ ਆਮਦਨੀ ਨਾਲੋਂ ਖਰਚ ਕਾਫੀ ਵਧ ਗਿਆ ਹੈ। ਸਰਕਾਰ ਨੂੰ ਮੁਲਾਜ਼ਮਾਂ ਦੀਆਂ ਤਨਖਾਹਾਂ ਦੇਣ ਦੇ ਲਾਲੇ ਪਏ ਹਨ। ਕਈ-ਕਈ ਮਹੀਨੇ ਤਨਖਾਹਾਂ ਲੇਟ ਹੋਣ ਕਰਕੇ ਮੁਲਾਜ਼ਮਾਂ ਅਤੇ ਪੈਨਸ਼ਨਰਾਂ ਨੂੰ ਮਜਬੂਰਨ ਸਰਕਾਰ ਵਿਰੁੱਧ ਧਰਨੇ ਅਤੇ ਮੁਜ਼ਾਹਰੇ ਕਰਨੇ ਪੈ ਰਹੇ ਹਨ। ਪੰਜਾਬ ਦੇ ਵਿੱਤ ਮੰਤਰੀ ਪੰਜਾਬ ਦੇ ਮੁਲਾਜ਼ਮਾਂ ਅਤੇ ਪੈਨਸ਼ਨਰਾਂ ਦੀ ਬਕਾਇਆ ਹੋਈ ਪਈ 8 ਫ਼ੀਸਦੀ ਮਹਿੰਗਾਈ ਭੱਤੇ ਦੀ ਕਿਸ਼ਤ (ਜਨਵਰੀ 2013 ਤੋਂ) ਭੁੱਲ ਗਏ ਲਗਦੇ ਹਨ ਜਦੋਂ ਕਿ ਕੇਂਦਰ ਸਰਕਾਰ ਜੁਲਾਈ 2013 ਤੋਂ ਮਹਿੰਗਾਈ ਭੱਤੇ ਦੀ 10 ਫ਼ੀਸਦੀ ਕਿਸ਼ਤ ਦਾ ਬਹੁਤ ਛੇਤੀ ਐਲਾਨ ਕਰਨ ਜਾ ਰਹੀ ਹੈ। ਸੋ, ਸਰਕਾਰ ਨੂੰ ਸਰਮਾਏਦਾਰੀ ਤੋਂ ਟੈਕਸ ਦੀ ਅਦਾਇਗੀ ਸਖ਼ਤੀ ਨਾਲ ਕਰਨੀ ਪਏਗੀ। ਵਪਾਰੀ ਅਤੇ ਦੁਕਾਨਦਾਰ ਬਿਨਾਂ ਬਿੱਲ ਦਿੱਤਿਆਂ ਆਪਣਾ ਸਾਮਾਨ ਵੇਚੀ ਜਾ ਰਹੇ ਹਨ ਅਤੇ ਸਰਕਾਰ ਨੂੰ ਕਰੋੜਾਂ ਰੁਪਏ ਦਾ ਚੂਨਾ ਲੱਗ ਰਿਹਾ ਹੈ। ਜਨਤਾ ਜਾਗਰੂਕਤਾ ਦੀ ਘਾਟ ਕਾਰਨ ਬਿੱਲ ਮੰਗਣ ਤੋਂ ਸੰਕੋਚ ਕਰਦੇ ਹਨ।

-ਜਗਤਾਰ ਸਿੰਘ 'ਰੁਲਦੂਵਾਲਾ'
ਹੈਲਥ ਇੰਸਪੈਕਟਰ ਅਮਰਗੜ੍ਹ (ਸੰਗਰੂਰ)।

ਔਰਤ ਮਹਿਫੂਜ਼ ਨਹੀਂ
ਭਾਰਤ ਵਿਚ ਔਰਤਾਂ ਨਾਲ ਵਾਪਰ ਰਹੀਆਂ ਸਮੂਹਿਕ ਦੁਰਾਚਾਰ ਦੀਆਂ ਘਟਨਾਵਾਂ ਰੁਕਣ ਦਾ ਨਾਂਅ ਨਹੀਂ ਲੈ ਰਹੀਆਂ। ਜੀਵਨ ਦਾ ਕੋਈ ਅਜਿਹਾ ਖੇਤਰ ਨਹੀਂ, ਜਿਸ ਵਿਚ ਔਰਤ ਦਾ ਬਰਾਬਰ ਦਾ ਯੋਗਦਾਨ ਨਾ ਹੋਵੇ। ਸਾਡਾ ਸੰਵਿਧਾਨ ਵੀ ਔਰਤ ਨੂੰ ਮਰਦ ਦੇ ਬਰਾਬਰ ਅਧਿਕਾਰ ਦਿੰਦਾ ਹੈ। ਔਰਤ ਨਾਲ ਵਾਪਰ ਰਹੀਆਂ ਹਿੰਸਾਤਮਕ ਘਟਨਾਵਾਂ, ਦੁਰਾਚਾਰ ਦੀਆਂ ਘਟਨਾਵਾਂ ਤੇ ਦਹੇਜ ਖਾਤਰ ਸਾੜਨ ਦੀਆਂ ਘਟਨਾਵਾਂ ਨੇ ਜਿਥੇ ਔਰਤ ਦੀ ਆਜ਼ਾਦੀ 'ਤੇ ਪਾਬੰਦੀ ਲਗਾਈ ਹੈ, ਉਥੇ ਉਸ ਦੇ ਅੰਦਰ ਸਹਿਮ ਵੀ ਭਰ ਦਿੱਤਾ ਹੈ। ਅੱਜ ਸਰਕਾਰ ਨੇ ਔਰਤ ਦੀ ਸੁਰੱਖਿਆ ਲਈ ਸਖ਼ਤ ਕਾਨੂੰਨ ਬਣਾਏ ਹਨ ਪਰ ਹਰ ਸ਼ਹਿਰ ਵਿਚ ਦੁਰਾਚਾਰ ਦੀਆਂ ਘਟਨਾਵਾਂ ਜਿਉਂ ਦੀ ਤਿਉਂ ਵਾਪਰ ਰਹੀਆਂ ਹਨ। ਹੁਣ ਸ਼ਹਿਰਾਂ, ਜਨਤਕ ਥਾਵਾਂ, ਬੱਸ ਅੱਡਿਆਂ, ਸਰਕਾਰੀ ਦਫ਼ਤਰਾਂ ਅਤੇ ਸਿੱਖਿਆ ਸੰਸਥਾਵਾਂ ਆਦਿ ਵਿਚ ਕਿਤੇ ਵੀ ਔਰਤ ਮਹਿਫੂਜ਼ ਨਹੀਂ। ਸਕੂਲਾਂ ਵਿਚ ਵਿਦਿਆਰਥੀਆਂ ਨੂੰ ਨੈਤਿਕ ਸਿੱਖਿਆ ਦੇਣ ਦੇ ਨਾਲ-ਨਾਲ ਆਪਣੇ ਅਮੀਰ ਸੱਭਿਆਚਾਰਕ ਵਿਰਸੇ ਤੋਂ ਵੀ ਜਾਣੂ ਕਰਵਾਉਣਾ ਚਾਹੀਦਾ ਹੈ। ਪੁਲਿਸ ਪ੍ਰਸ਼ਾਸਨ ਨੂੰ ਔਰਤਾਂ ਦੀ ਸੁਰੱਖਿਆ ਯਕੀਨੀ ਬਣਾਉਣੀ ਚਾਹੀਦੀ ਹੈ।

-ਨਵਤੇਜ ਸਿੰਘ ਮੱਲ੍ਹੀ
ਪਿੰਡ ਭਾਗੋਕਾਵਾਂ, ਡਾਕ: ਮਗਰਮੂਦੀਆਂ, ਜ਼ਿਲ੍ਹਾ ਗੁਰਦਾਸਪੁਰ।

ਬਿਮਾਰ ਮਾਨਸਿਕਤਾ
ਪਿਛਲੇ ਦਿਨੀਂ ਤਰਕਸ਼ੀਲ ਆਗੂ ਦਾਭੋਲਕਰ ਦਾ ਕੀਤਾ ਗਿਆ ਕਤਲ ਆਦਰਸ਼ਵਾਦੀ ਸਮਾਜ ਦਾ ਕਤਲ ਹੈ। ਅੱਜ ਵੀ ਅਸੀਂ ਬਿਮਾਰ ਮਾਨਸਿਕਤਾ ਨੂੰ ਲੈ ਕੇ ਚੱਲ ਰਹੇ ਹਾਂ। ਅਸੀਂ ਹੱਥ 'ਤੇ ਹੱਥ ਧਰੀ ਬੈਠੇ ਆਪਣੀ ਗਰੀਬੀ ਨੂੰ 'ਬਦਰੂਹਾਂ' ਦਾ ਸਰਾਪ ਮੰਨਦੇ ਹਾਂ। ਇਥੇ ਸਾਡੀ ਉੱਚ-ਵਿੱਦਿਆ ਕੋਈ ਮਾਅਨੇ ਨਹੀਂ ਰੱਖਦੀ। ਅੱਜ ਜਦੋਂ ਪੜ੍ਹਿਆ-ਲਿਖਿਆ ਵਰਗ ਵੀ ਮੋਟੇ-ਮੋਟੇ ਰੰਗ-ਬਰੰਗੇ ਪੱਥਰਾਂ ਵਾਲੀਆਂ 'ਕੀਮਤੀ' ਮੁੰਦਰੀਆਂ ਪਾਈ ਬੈਠਾ ਚੰਗੇਰੇ ਭਵਿੱਖ ਨੂੰ ਬੁਣਦਾ ਹੈ ਤਾਂ ਆਮ ਆਦਮੀ ਦਾ ਕੀ ਹਾਲ ਹੋਵੇਗਾ? ਕਦ ਤੱਕ ਅਸੀਂ ਝੂਠੇ ਚਮਤਕਾਰਾਂ ਮਗਰ ਲੱਗੇ ਰਹਾਂਗੇ? ਮਨੁੱਖਾਂ ਤੇ ਜਾਨਵਰਾਂ ਦੀਆਂ ਬਲੀਆਂ ਦੇ ਕੇ ਅਸੀਂ ਕਿਸ ਸਮਾਜ ਦੀ ਸਿਰਜਣਾ ਕਰ ਰਹੇ ਹਾਂ? ਆਓ, ਅਸੀਂ ਸਾਰੇ ਰਲਮਿਲ ਕੇ ਸਿਹਤਮੰਦ ਸਮਾਜ ਦੀ ਸਿਰਜਣਾ ਕਰਦੇ ਹੋਏ ਬਿਮਾਰ ਜਾਂ ਵਿੱਤੀ ਸਮੱਸਿਆਵਾਂ ਦੇ ਸ਼ਿਕਾਰ ਭੋਲੇ-ਭਾਲੇ ਵਿਅਕਤੀਆਂ ਨੂੰ ਸ਼ੋਸ਼ਣ ਤੋਂ ਬਚਾਈਏ।

-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।

23-7-13

 ਨਸ਼ਾ ਬਨਾਮ ਪੰਜਾਬ

ਅਜੋਕੇ ਸਮੇਂ ਪੰਜਾਬ ਵਿਚ ਨਸ਼ਿਆਂ ਦੀ ਵਰਤੋਂ, ਵਿਕਰੀ, ਵਪਾਰ ਤੇ ਸਿਆਸੀ ਸਰਪ੍ਰਸਤੀ ਦੀ ਅਖ਼ਬਾਰੀ ਤੇ ਸਮਾਜਿਕ ਚਰਚਾ ਪੂਰੇ ਜ਼ੋਰਾਂ ਉਪਰ ਹੈ। ਪੰਜਾਬ ਦੀ ਵੱਡੀ ਬਦਕਿਸਮਤੀ ਇਹ ਹੈ ਕਿ ਪੰਜਾਬ ਦੀ ਮੁੱਢੋਂ ਅਗਵਾਈ ਕਰਨ ਵਾਲੀਆਂ ਧਾਰਮਿਕ ਤੇ ਸਮਾਜਿਕ ਜਥੇਬੰਦੀਆਂ ਦੇ ਅਜੋਕੇ ਆਗੂ ਆਪਣੇ ਸਿਆਸੀ ਆਕਾਵਾਂ ਤੋਂ ਡਰ ਕੇ ਆਪਣੇ ਫਰਜ਼ ਭੁਲਾ ਬੈਠੇ ਹਨ। ਸੋ, ਇਕ ਬੇਨਤੀ ਹੈ, ਇਕ ਅਪੀਲ ਹੈ, ਸਮੂਹ ਪੰਜਾਬੀਆਂ ਦੇ ਨਾਂਅ, 'ਛੱਡ ਦਿਓ ਪੰਜਾਬੀਓ, ਮਾਰੂ ਨਸ਼ਿਆਂ ਨੂੰ, ਮੁੜ ਆਓ, ਦੁੱਧ ਦਹੀਂ ਘੀ ਮੱਖਣ ਲੱਸੀ ਦੀ ਨਰੋਈ ਖੁਰਾਕ ਵੱਲ। ਜੇਕਰ 'ਆਪਣਾ ਪੰਜਾਬ' ਬਚਾਉਣਾ ਹੈ ਤਾਂ।'

-ਇੰਜ. ਕੁਲਦੀਪ ਸਿੰਘ ਲੁੱਧਰ
4724, ਗੁਰੂ ਨਾਨਕਵਾੜਾ, ਖ਼ਾਲਸਾ ਕਾਲਜ, ਅੰਮ੍ਰਿਤਸਰ।

ਮਾਪਿਆਂ ਦਾ ਸਤਿਕਾਰ

ਫੋਕੀ ਤਰੱਕੀ ਤੇ ਝੂਠੀ ਐਸ਼ੋਇਸ਼ਰਤ ਵਿਚ ਮਨੁੱਖ ਆਪਣੇ ਮਾਪਿਆਂ ਦਾ ਸਤਿਕਾਰ ਕਰਨਾ ਭੁੱਲ ਬੈਠਾ ਹੈ। ਜਿਸ ਦੇ ਸਿੱਟੇ ਵਜੋਂ ਮਾਪੇ ਆਪਣਾ ਦਰਦ ਬਿਆਨ ਕਰਦੇ ਹਨ ਤੇ ਕਦੀ ਕੁਝ ਨਹੀਂ ਬੋਲਦੇ ਤੇ ਝੱਲ ਲੈਂਦੇ ਹਨ। ਪਰ ਇਹ ਸੋਚਣਾ ਹੋਵੇਗਾ ਕਿ ਅਜਿਹਾ ਕਿਉਂ ਹੋ ਰਿਹਾ ਹੈ। ਅੱਜ ਹਰ ਜੋੜਾ ਵਿਆਹ ਤੋਂ ਬਾਅਦ ਅਲੱਗ ਹੋਣ ਲਈ ਸੋਚਦਾ ਹੈ ਕਿ ਸਾਨੂੰ ਪੂਰੀ ਆਜ਼ਾਦੀ ਹੋਵੇ, ਕੋਈ ਕੁਝ ਨਾ ਕਹੇ, ਪਰ ਕੀ ਇਹ ਸਹੀ ਹੈ। ਅਜੋਕੀ ਪੀੜ੍ਹੀ ਨੂੰ ਚਾਹੀਦਾ ਹੈ ਕਿ ਉਹ ਉਨ੍ਹਾਂ ਮਾਪਿਆਂ ਬਾਰੇ ਸੋਚਣ ਕਿ ਉਨ੍ਹਾਂ ਨੇ ਉਨ੍ਹਾਂ ਨੂੰ ਕਿਵੇਂ ਪਾਲਿਆ, ਪੜ੍ਹਾਇਆ ਤੇ ਇਸ ਯੋਗ ਬਣਾਇਆ ਕਿ ਉਹ ਆਪਣੇ ਪੈਰਾਂ 'ਤੇ ਖੜ੍ਹੇ ਹੋ ਸਕਣ। ਪਰ ਅੱਜ ਹਰ ਤੀਜੇ ਜਾਂ ਚੌਥੇ ਘਰ ਦੀ ਅਜਿਹੀ ਹੀ ਦਾਸਤਾਨ ਹੈ। ਮਾਪੇ ਉਹ ਬੋਹੜ ਹਨ, ਜਿਨ੍ਹਾਂ ਦੀ ਛਾਵੇਂ ਬੈਠ ਅਸੀਂ ਠੰਢੀ ਛਾਂ ਦਾ ਆਨੰਦ ਮਾਣਨਾ ਹੈ। ਇਕ ਮਾਂ ਵੀਹ ਸਾਲਾਂ ਵਿਚ ਆਪਣੇ ਪੁੱਤਰ ਨੂੰ ਪਾਲਦੀ ਤੇ ਵੱਡਾ ਕਰਦੀ ਹੈ ਪਰ ਉਸ ਦੀ ਘਰ ਵਾਲੀ ਵੀਹ ਮਿੰਟਾਂ ਵਿਚ ਉਸ ਨੂੰ ਆਪਣੇ ਵੱਲ ਝੁਕਾ ਲੈਂਦੀ ਹੈ। ਸੋ, ਅੱਜ ਲੋੜ ਹੈ ਸਰਵਣ ਦੀ ਤਰ੍ਹਾਂ ਆਪਣੇ ਮਾਪਿਆਂ ਦੀ ਸੇਵਾ ਕਰਨ ਦੀ।

-ਜਸਦੀਪ ਸਿੰਘ ਖੰਨਾ
ਮੋਬਾਈਲ : 94630-57786.

ਭਾਰਤੀ ਹਾਕੀ

ਭਾਰਤੀ ਹਾਕੀ ਮੌਜੂਦਾ ਸਮੇਂ ਔਖੀਆਂ ਰਾਹਾਂ ਤੋਂ ਦੀ ਗੁਜ਼ਰ ਰਹੀ ਹੈ। ਕੋਚ ਮਾਈਕਲ ਨੌਬਸ ਨੂੰ ਸਮੇਂ ਤੋਂ ਪਹਿਲਾਂ ਬਰਖਾਸਤ ਕਰਨ ਨੂੰ ਭਾਵੇਂ ਕਈ ਪ੍ਰਮੁੱਖ ਖੇਡ ਹਸਤੀਆਂ ਨੇ ਚੰਗਾ ਮੰਨਿਆ ਹੈ ਪਰ ਇਕਦਮ ਕੋਚ ਪਦ ਤੋਂ ਹਟਾਉਣ ਨਾਲ ਵੀ ਸਥਿਤੀ ਸੰਭਲਣ ਵਾਲੀ ਨਹੀਂ। ਹੁਣ ਹਾਲੈਂਡ ਦੇ ਰੌਲੈਂਡ ਅਲੈਟਮੈਨ ਦਾ ਭਾਰਤੀ ਹਾਕੀ ਦੀ ਵਾਗ ਡੋਰ ਸੰਭਾਲਣਾ ਵੀ ਚੁਣੌਤੀ ਭਰਿਆ ਕਾਰਜ ਹੈ ਕਿਉਂਕਿ ਭਾਰਤੀ ਹਾਕੀ ਪ੍ਰੇਮੀ ਲਗਾਤਾਰ ਹਾਕੀ 'ਚ ਸੁਧਾਰ ਚਾਹੁੰਦੇ ਨੇ। ਇਹ ਤਾਂ ਆਉਣ ਵਾਲਾ ਸਮਾਂ ਹੀ ਦੱਸੇਗਾ ਕਿ ਭਾਰਤੀ ਹਾਕੀ ਦਾ ਪ੍ਰਦਰਸ਼ਨ ਕੀ ਰੰਗ ਲਿਆਏਗਾ। ਫਿਲਹਾਲ ਅਜੇ ਉਡੀਕ ਕਰਨੀ ਹੋਵੇਗੀ। ਇਥੇ ਜ਼ਿਕਰਯੋਗ ਹੈ ਕਿ ਭਾਰਤੀ ਹਾਕੀ ਮੈਚਾਂ ਦਾ ਪ੍ਰਦਰਸ਼ਨ ਕ੍ਰਿਕਟ ਵਾਂਗ ਆਮ ਚੈਨਲਾਂ 'ਤੇ ਕਿਉਂ ਨਹੀਂ ਹੁੰਦਾ। ਜੇਕਰ ਹਾਕੀ ਪ੍ਰਸਾਰਨ ਆਮ ਚੈਨਲਾਂ 'ਤੇ ਅਤੇ ਮੀਡੀਆ ਜ਼ੋਰ-ਸ਼ੋਰ ਨਾਲ ਭਾਰਤੀ ਹਾਕੀ ਨਾਲ ਖੜ੍ਹੇ ਤਾਂ ਨਤੀਜੇ ਜ਼ਰੂਰ ਲੋਕਾਂ ਦੀ ਆਸ ਮੁਤਾਬਿਕ ਹੋਣਗੇ ਕਿਉਂਕਿ ਹਾਕੀ ਦਾ ਘੱਟ ਪ੍ਰਚਾਰ ਵੀ ਇਸ ਦੀ ਤਰੱਕੀ ਦੇ ਰਾਹ ਵਿਚ ਰੋੜਾ ਹੈ।

-ਜਸਬੀਰ ਦੱਧਾਹੂਰ
ਪਿੰਡ ਤੇ ਡਾਕ: ਦੱਧਾਹੂਰ, ਤਹਿ: ਰਾਏਕੋਟ, ਜ਼ਿਲ੍ਹਾ ਲੁਧਿਆਣਾ।

 

29-6-2013

 ਲੋਕ ਸੰਘਰਸ਼
ਅੱਜ ਦੇਸ਼ ਦੇ ਆਦਿਵਾਸੀ, ਕਿਸਾਨ, ਮਜ਼ਦੂਰ ਅਤੇ ਦੇਹਾਤੀ ਲੋਕਾਂ ਦਾ ਸੰਘਰਸ਼ ਹਾਸ਼ੀਏ 'ਤੇ ਹੈ। ਗਰੀਬ ਦੀ ਆਵਾਜ਼ ਇਸ ਦੌਰ 'ਚ ਵੀ ਸੱਤਾ ਦੇ ਗਲਿਆਰਿਆਂ 'ਚ ਅਣਸੁਣੀ ਰਹੀ ਹੈ। ਅੱਜ ਬਹੁਤੀਆਂ ਰਾਜਨੀਤਕ ਪਾਰਟੀਆਂ ਆਪਣੇ ਅਸੂਲਾਂ ਤੋਂ ਭਟਕ ਗਈਆਂ ਹਨ। ਕਿਸੇ ਵੀ ਤਰ੍ਹਾਂ ਸੱਤਾ 'ਚ ਬਣੇ ਰਹਿਣਾ ਹੀ ਉਨ੍ਹਾਂ ਦਾ ਮਕਸਦ ਬਣ ਗਿਆ ਹੈ। ਲੋਕਾਂ ਦਾ ਗੁੱਸਾ ਜਿਊਣ ਦਾ ਹੱਕ ਮੰਗ ਰਿਹਾ ਹੈ। ਸੱਤਾਧਾਰੀਆਂ ਨੂੰ ਇਹ ਬਰਦਾਸ਼ਤ ਨਹੀਂ ਹੈ, ਉਹ ਗੁੱਸੇ 'ਚ ਉੱਠੇ ਹੱਕਾਂ ਨੂੰ ਚਿੜ੍ਹਾਉਣ ਅਤੇ ਜ਼ਿਆਦਾ ਗੁੱਸਾ ਦਿਵਾਉਣ। ਸਚਾਈ ਇਹ ਹੈ ਕਿ ਹੁਕਮਰਾਨ ਰਾਜਨੀਤਕ ਦਲ ਆਮ ਆਦਮੀ ਦੇ ਦੁੱਖ ਦਾ ਰੋਣਾ ਰੋ ਕੇ ਆਪਣੀ ਕੁਰਸੀ ਨੂੰ ਮਜ਼ਬੂਤ ਕਰਦੇ ਰਹਿੰਦੇ ਹਨ। ਸੰਘਰਸ਼ ਦੇਸ਼ ਵਿਚ ਵਿਵਸਥਾ 'ਚ ਬਦਲਾਅ ਦਾ ਸੁਪਨਾ ਤਾਂ ਜਗਾ ਰਹੇ ਹਨ ਪ੍ਰੰਤੂ ਵਿਦਵਾਨ ਮੰਨ ਚੁੱਕੇ ਹਨ ਕਿ ਜੇਕਰ ਨੇਤਾਵਾਂ ਦੀ ਚੋਰ ਜਮਾਤ 'ਚੋਂ ਲਗਭਗ ਸਭ ਨੂੰ ਦਸਤਾਵੇਜ਼ੀ ਚੋਰ ਸਾਬਤ ਕਰ ਦਿੱਤਾ ਜਾਵੇ, ਜੋ ਕਿ ਸੰਭਵ ਹੈ ਤਾਂ ਚੋਰ ਵਿਵਸਥਾ ਆਪਣੇ-ਆਪ ਬਦਲ ਜਾਵੇਗੀ। ਹਾਕਮ ਭੁਲੇਖੇ ਵਿਚ ਹੈ ਕਿ ਲੋਕਾਂ ਦਾ ਗੁੱਸਾ ਸ਼ਾਂਤ ਹੋ ਜਾਵੇਗਾ। ਪਰ ਅੱਜ ਲੋਕਾਂ ਦਾ ਗੁੱਸਾ ਸੜਕਾਂ 'ਤੇ ਉਤਰ ਆਇਆ, ਸਰਕਾਰ ਤੇ ਹੁਕਮਰਾਨ ਪਾਰਟੀਆਂ ਨੂੰ ਇਸ ਨੂੰ ਸਮਝਣਾ ਚਾਹੀਦਾ ਹੈ।

-ਪ੍ਰਸ਼ੋਤਮ ਪੱਤੋ
ਪਿੰਡ ਤੇ ਡਾਕ: ਪੱਤੋ ਹੀਰਾ ਸਿੰਘ (ਮੋਗਾ)।

ਔਰਤਾਂ ਲਈ ਰਾਖਵਾਂਕਰਨ
ਪੰਚਾਇਤਾਂ ਅੰਦਰ ਔਰਤਾਂ ਲਈ 33 ਫ਼ੀਸਦੀ ਰਾਖਵਾਂਕਰਨ ਕੀਤਾ ਗਿਆ ਹੈ। ਸੰਵਿਧਾਨ ਮੁਤਾਬਿਕ ਸਾਰੇ ਪੰਚਾਇਤੀ ਅਦਾਰਿਆਂ ਵਿਚ ਔਰਤ ਵਰਗ ਲਈ ਤੀਜਾ ਹਿੱਸਾ ਰਾਖਵਾਂ ਹੈ। ਕਹਿਣ ਨੂੰ ਤਾਂ ਅਜਿਹਾ ਔਰਤਾਂ ਨੂੰ ਬਰਾਬਰ ਦਾ ਦਰਜਾ ਦੇ ਕੇ ਮਜ਼ਬੂਤ ਜਮਹੂਰੀ ਢਾਂਚੇ ਦੀ ਸਿਰਜਣਾ ਲਈ ਕੀਤਾ ਗਿਆ ਹੈ ਪਰ ਅਸਲੀਅਤ ਕੁਝ ਵੱਖਰਾ ਹੀ ਬਿਆਨ ਕਰਦੀ ਹੈ। ਪੰਚ, ਸਰਪੰਚ ਹੋਣ ਜਾਂ ਫਿਰ ਬਲਾਕ ਸੰਮਤੀ ਜਾਂ ਜ਼ਿਲ੍ਹਾ ਪ੍ਰੀਸ਼ਦ ਮੈਂਬਰ ਔਰਤਾਂ, 99 ਫ਼ੀਸਦੀ ਤੋਂ ਜ਼ਿਆਦਾ ਉਨ੍ਹਾਂ ਦੇ ਅਧਿਕਾਰਾਂ ਦੀ ਵਰਤੋਂ ਉਨ੍ਹਾਂ ਦੇ ਪਤੀਆਂ ਜਾਂ ਹੋਰ ਪਰਿਵਾਰਕ ਮੈਂਬਰਾਂ ਦੁਆਰਾ ਕੀਤੀ ਜਾਂਦੀ ਹੈ। ਇਸ ਤੋਂ ਸਾਡੇ ਮਰਦ ਪ੍ਰਧਾਨ ਸਮਾਜ ਅੰਦਰ ਔਰਤਾਂ ਦੀ ਨਾ-ਬਰਾਬਰੀ ਵਾਲੀ ਸਥਿਤੀ ਦੀ ਤਸਵੀਰ ਰੂਪਮਾਨ ਹੁੰਦੀ ਹੈ। ਸਮੇਂ ਦੀ ਲੋੜ ਹੈ ਕਿ ਔਰਤਾਂ ਨੂੰ ਸਹੀ ਅਰਥਾਂ ਵਿਚ ਚੁਣੇ ਹੋਏ ਪੰਚਾਇਤੀ ਅਦਾਰਿਆਂ ਅੰਦਰ ਆਜ਼ਾਦਾਨਾ ਤੌਰ 'ਤੇ ਕੰਮ ਕਰਨ ਦਿੱਤਾ ਜਾਵੇ।

-ਮਹਿੰਦਰ ਕੌਰ ਢਿੱਲੋਂ
ਪ੍ਰਿੰ: ਦਸਮੇਸ਼ ਪਬਲਿਕ ਸੀ: ਸੈ: ਸਕੂਲ, ਬਿਲਾਸਪੁਰ (ਮੋਗਾ)।

ਉਚੇਰੀ ਸਿੱਖਿਆ
ਕੁਝ ਦਿਨ ਪਹਿਲਾਂ ਇਕ ਮੈਗਜ਼ੀਨ ਵੱਲੋਂ ਇਕ ਸੂਚੀ ਜਾਰੀ ਕੀਤੀ ਗਈ ਹੈ, ਜਿਸ ਵਿਚ ਵਿਸ਼ਵ ਦੀਆਂ ਉਨ੍ਹਾਂ ਸੌ ਯੂਨੀਵਰਸਿਟੀਆਂ ਦਾ ਨਾਂਅ ਹੈ, ਜੋ ਪੂਰੇ ਵਿਸ਼ਵ ਵਿਚ ਆਪਣੀ ਉਚੇਰੀ ਸਿੱਖਿਆ, ਅਨੁਸ਼ਾਸਨ ਅਤੇ ਵਿਦਿਆਰਥੀਆਂ ਦੀ ਪੜ੍ਹਾਈ ਖ਼ਤਮ ਹੋਣ ਤੋਂ ਬਾਅਦ ਕੈਰੀਅਰ ਲਈ ਦਿਸ਼ਾ-ਨਿਰਦੇਸ਼ ਦੇਣ ਲਈ ਪ੍ਰਸਿੱਧ ਹਨ। ਬੜੇ ਦੁੱਖ ਨਾਲ ਕਹਿਣਾ ਪੈ ਰਿਹਾ ਹੈ ਕਿ ਇਨ੍ਹਾਂ ਸੌ ਯੂਨੀਵਰਸਿਟੀਆਂ ਵਿਚ ਭਾਰਤ ਦਾ ਕਿਧਰੇ ਵੀ ਨਾਂਅ ਨਹੀਂ ਹੈ। ਭਾਰਤ ਦੇ ਹਰੇਕ ਰਾਜ ਵਿਚ ਹੀ ਨਿੱਜੀ ਜਾਂ ਪ੍ਰਾਈਵੇਟ ਯੂਨੀਵਰਸਿਟੀਆਂ ਖੁੱਲ੍ਹ ਰਹੀਆਂ ਹਨ, ਜਿਨ੍ਹਾਂ ਦਾ ਮੁੱਖ ਮਕਸਦ ਵੱਧ ਤੋਂ ਵੱਧ ਆਰਥਿਕ ਲਾਭ ਪ੍ਰਾਪਤ ਕਰਨਾ ਹੀ ਹੈ। ਇਹ ਯੂਨੀਵਰਸਿਟੀਆਂ ਵਿਦਿਆਰਥੀਆਂ ਤੋਂ ਮੋਟੀਆਂ ਫੀਸਾਂ ਵਸੂਲਦੀਆਂ ਹਨ। ਸਿੱਖਿਆ ਦੀ ਗੁਣਵੱਤਾ ਇਨ੍ਹਾਂ ਵਿਚ ਨਹੀਂ ਹੈ। ਸਰਕਾਰਾਂ ਨੂੰ ਚਾਹੀਦਾ ਹੈ ਕਿ ਅਜਿਹੀਆਂ ਯੂਨੀਵਰਸਿਟੀਆਂ ਵਿਚ ਦਿੱਤੀ ਜਾ ਰਹੀ ਸਿੱਖਿਆ ਦੀ ਪੂਰੀ ਜਾਂਚ-ਪੜਤਾਲ ਕਰੇ। ਸਰਕਾਰੀ ਯੂਨੀਵਰਸਿਟੀਆਂ ਦਾ ਵੀ ਇਹ ਫਰਜ਼ ਬਣਦਾ ਹੈ ਕਿ ਪੂਰੀ ਤਨਦੇਹੀ ਨਾਲ ਉੱਚ ਪੱਧਰ ਦੀ ਸਿੱਖਿਆ ਹੀ ਵਿਦਿਆਰਥੀਆਂ ਨੂੰ ਮੁਹੱਈਆ ਕਰਵਾਈ ਜਾਵੇ ਤਾਂ ਜੋ ਭਾਰਤ ਦਾ ਨਾਂਅ ਵੀ ਇਸ ਸੂਚੀ ਵਿਚ ਸ਼ਾਮਿਲ ਹੋ ਸਕੇ।

-ਪ੍ਰਮੋਦ ਕੁਮਾਰ
ਲੈਕਚਰਾਰ, ਸਰਕਾਰੀ ਸੀਨੀ: ਸੈ: ਸਕੂਲ, ਕੱਟੂ (ਬਰਨਾਲਾ)।

2-4-2013

 ਬੁਰਾਈ ਦੀ ਰੋਕਥਾਮ

ਅਜੋਕੇ ਸਮੇਂ ਦੇਸ਼ ਅੰਦਰ ਨਾਰੀ ਨਾਲ ਜਿਸਮਾਨੀ ਛੇੜਛਾੜ ਅਤੇ ਬਲਾਤਕਾਰ ਦੀਆਂ ਘਟਨਾਵਾਂ ਤੇਜ਼ੀ ਨਾਲ ਵਧ ਰਹੀਆਂ ਹਨ ਜੋ ਕਿ ਸਾਡੇ ਸਭ ਲਈ ਗਹਿਰੀ ਚਿੰਤਾ ਦਾ ਵਿਸ਼ਾ ਹੈ। ਕਿਸੇ ਵੀ ਬੁਰਾਈ ਦੇ ਵਧਣ ਦੇ ਕਾਰਨਾਂ ਦਾ ਪਤਾ ਲਗਾਏ ਬਿਨਾਂ ਉਸ ਦੀ ਰੋਕਥਾਮ ਕਰਨਾ ਸੰਭਵ ਨਹੀਂ ਹੋਇਆ ਕਰਦਾ। ਕਹਿੰਦੇ ਨੇ ਇਕ ਬੁਰਾਈ ਦੂਸਰੀ ਬੁਰਾਈ ਨੂੰ ਜਨਮ ਦਿੰਦੀ ਹੈ। ਜੇਕਰ ਕੋਈ ਵਿਅਕਤੀ ਨਸ਼ੇ ਕਰਦਾ ਹੈ ਤਾਂ ਉਹ ਆਪਣੇ ਨਸ਼ੇ ਦੀ ਪੂਰਤੀ ਲਈ ਚੋਰੀ, ਡਾਕੇ ਅਤੇ ਕਿਸੇ ਦਾ ਕਤਲ ਕਰਨ ਤੱਕ ਵੀ ਜਾ ਸਕਦਾ ਹੈ। ਇਕ ਵਿਦਵਾਨ ਦਾ ਕਥਨ ਹੈ ਕਿ ਕਿਸੇ ਬੁਰਾਈ ਦੇ ਖਿਲਾਫ਼ ਤਿੰਨ ਪੱਖਾਂ ਤੋਂ ਲੜਿਆ ਜਾ ਸਕਦਾ ਹੈ। ਪਹਿਲਾ ਉਸ ਦੇ ਖਿਲਾਫ਼ ਸੰਘਰਸ਼ ਕੀਤਾ ਜਾਵੇ, ਦੂਸਰਾ ਉਸ ਦੇ ਖਿਲਾਫ਼ ਆਵਾਜ਼ ਬੁਲੰਦ ਕੀਤੀ ਜਾਵੇ ਅਤੇ ਤੀਸਰਾ ਉਸ ਦੇ ਖਿਲਾਫ਼ ਮਨ ਹੀ ਮਨ ਨਫ਼ਰਤ ਕੀਤੀ ਜਾਵੇ। ਜੇਕਰ ਅਸੀਂ ਕਿਸੇ ਬੁਰਾਈ ਦੇ ਖਿਲਾਫ਼ ਸੰਘਰਸ਼ ਨਹੀਂ ਕਰ ਸਕਦੇ, ਆਵਾਜ਼ ਵੀ ਬੁਲੰਦ ਨਹੀਂ ਕਰ ਸਕਦੇ ਤਾਂ ਘੱਟੋ-ਘੱਟ ਉਸ ਪ੍ਰਤੀ ਨਫ਼ਰਤ ਤਾਂ ਕਰ ਹੀ ਸਕਦੇ ਹਾਂ। ਲੋਕ-ਮਨਾਂ ਅੰਦਰ ਕਿਸੇ ਬੁਰਾਈ ਲਈ ਨਫ਼ਰਤ ਪੈਦਾ ਕਰ ਦੇਣਾ ਵੀ ਉਸ ਬੁਰਾਈ ਨੂੰ ਘਟਾਉਣ ਵਿਚ ਸਹਾਈ ਹੋ ਸਕਦਾ ਹੈ।

-ਜਗਤਾਰ ਸਿੰਘ ਝੋਜੜ
ਜ਼ਿਲ੍ਹਾ ਕਚਹਿਰੀਆਂ, ਹੁਸ਼ਿਆਰਪੁਰ।

ਵਿਰਾਸਤੀ ਇਮਾਰਤਾਂ ਦੀ ਹੋਂਦ

ਪਟਿਆਲਾ ਨਿਵਾਸੀਆਂ ਤੋਂ ਬਿੜਕ ਲੱਗੀ ਹੈ ਕਿ ਸਾਡੀ ਮੌਜੂਦਾ ਸਰਕਾਰ ਪਟਿਆਲਾ ਵਿਖੇ ਸਥਿਤ ਤਕਰੀਬਨ 130 ਸਾਲ ਪੁਰਾਣੀ ਬਾਰਾਦਰੀ ਇਮਾਰਤ ਅਤੇ 109 ਸਾਲ ਪੁਰਾਣੀ ਕੇਂਦਰੀ ਜੇਲ ਆਦਿ ਨੂੰ ਵੇਚਣ ਦੀਆਂ ਸਕੀਮਾਂ ਘੜ ਕੇ ਵਿਰਾਸਤੀ ਹੋਂਦ ਨੂੰ ਖ਼ਤਮ ਕਰਨ ਦੀਆਂ ਯੋਜਨਾਵਾਂ ਉਲੀਕ ਰਹੀ ਹੈ। ਜੇ ਇਹ ਗੱਲ ਸਹੀ ਹੈ ਤਾਂ ਇਹ ਪੰਜਾਬ ਸਰਕਾਰ ਲਈ ਸ਼ੋਭਾ ਵਾਲੀ ਗੱਲ ਨਹੀਂ ਕਿਉਂਕਿ ਅਜਿਹੀਆਂ ਇਮਾਰਤਾਂ ਹਰ ਹਾਲ ਵਿਚ ਸੰਭਾਲੀਆਂ ਜਾਣੀਆਂ ਚਾਹੀਦੀਆਂ ਹਨ। ਸ਼ਾਹੀ ਸ਼ਹਿਰ ਪਟਿਆਲੇ ਤੋਂ ਇਲਾਵਾ ਅਜਿਹੀਆਂ ਸ਼ਾਹੀ ਇਮਾਰਤਾਂ ਫਰੀਦਕੋਟ, ਨਾਭਾ, ਬਠਿੰਡਾ, ਕਪੂਰਥਲਾ, ਬੱਸੀਆਂ (ਲੁਧਿਆਣਾ), ਬਡਰੁੱਖਾਂ (ਸੰਗਰੂਰ) ਆਦਿ ਹੋਰ ਅਨੇਕਾਂ ਪਿੰਡਾਂ, ਕਸਬਿਆਂ ਅਤੇ ਜ਼ਿਲ੍ਹਿਆਂ ਵਿਚ ਸਾਂਭ-ਸੰਭਾਲ ਪੱਖੋਂ ਜ਼ਿੰਦਗੀ ਨਾਲ ਜੂਝ ਰਹੀਆਂ ਹਨ ਜੋ ਕਿਸੇ ਵੇਲੇ ਕਦੇ ਵੀ ਦਮ ਤੋੜ ਸਕਦੀਆਂ ਹਨ। ਇਨ੍ਹਾਂ ਦੀ ਸਾਂਭ-ਸੰਭਾਲ ਨੂੰ ਤਰਜੀਹ ਦੇ ਕੇ ਸਮੂਹ ਪੰਜਾਬੀਆਂ ਦਾ ਦਿਲ ਜਿੱਤਣਾ ਚਾਹੀਦਾ ਹੈ।

-ਤਰਸੇਮ ਮਹਿਤੋ
ਪਿੰਡ ਬਈਏਵਾਲ (ਸੰਗਰੂਰ)।

ਪਾਣੀ ਦੀ ਸੰਭਾਲ

ਜ਼ਿੰਦਗੀ ਵਿਚ ਪਾਣੀ ਸਭ ਲਈ ਬੇਹੱਦ ਜ਼ਰੂਰੀ ਹੈ। ਪਾਣੀ ਤੋਂ ਬਿਨਾਂ ਜੀਵਨ ਸੰਭਵ ਨਹੀਂ। ਪਰ ਪੰਜਾਬ ਜੋ ਕਦੇ ਪੰਜ ਦਰਿਆਵਾਂ ਦੀ ਧਰਤੀ ਸੀ, ਅੱਜ ਪਾਣੀ ਲਈ ਤਰਸ ਰਿਹਾ ਹੈ। ਸ਼ੁੱਧ ਪਾਣੀ ਬਹੁਤ ਡੂੰਘਾ ਹੋ ਗਿਆ ਹੈ। ਡੂੰਘੇ ਬੋਰ ਕਰਾਉਣਾ ਹਰੇਕ ਲਈ ਸੰਭਵ ਨਹੀਂ। ਪਰ ਅਫ਼ਸੋਸ ਅਸੀਂ ਅਜੇ ਵੀ ਪਾਣੀ ਦੀ ਸੰਭਾਲ ਪ੍ਰਤੀ ਜਾਗਰੂਕ ਨਹੀਂ ਹਾਂ। ਪਾਣੀ ਅੱਜ ਪਿੰਡਾਂ ਦੀਆਂ ਸੱਥਾਂ 'ਤੇ ਲੱਗੀਆਂ ਟੂਟੀਆਂ, ਘਰਾਂ ਵਿਚੋਂ ਪਾਣੀ ਦੀਆਂ ਟੈਂਕੀਆਂ 'ਚੋਂ ਓਵਰ ਫਲੋ ਹੋ ਰਿਹਾ ਹੈ। ਗੱਡੀਆਂ ਧੋਣ ਲਈ ਪਾਣੀ ਦੀ ਵਰਤੋਂ, ਹੋਰ ਵੀ ਲੋੜ ਤੋਂ ਬਿਨਾਂ ਪਾਣੀ ਦੀ ਵਰਤੋਂ ਹੋ ਰਹੀ ਹੈ। ਕਿੰਨੀ ਹੈਰਾਨੀ ਵਾਲੀ ਗੱਲ ਹੈ ਕਿ ਪੰਜ ਦਰਿਆਵਾਂ ਦੀ ਧਰਤੀ 'ਤੇ ਬੰਦ ਬੋਤਲਾਂ ਵਿਚ ਪਾਣੀ ਮਿਲ ਰਿਹਾ ਹੈ। ਕੀ ਹਾਲ ਹੋਵੇਗਾ ਆਉਣ ਵਾਲੀ ਗਰਮੀਆਂ ਵਿਚ। ਸ਼ੁੱਧ ਪਾਣੀ ਨੂੰ ਬਰਬਾਦ ਨਾ ਕਰੋ। ਇਸ ਦੀ ਸੰਭਾਲ ਕਰੋ। ਸਰਕਾਰ ਨੂੰ ਚਾਹੀਦਾ ਹੈ ਟੂਟੀਆਂ 'ਤੇ ਵੀ ਬਿਜਲੀ ਮੀਟਰਾਂ ਦੀ ਤਰ੍ਹਾਂ ਮੀਟਰ ਲਗਾਏ ਜਾਣ ਤਾਂ ਜੋ ਹਰੇਕ ਪਾਣੀ ਵਰਤਣ ਸਮੇਂ ਸੋਚੇ। ਪਾਣੀ ਦੀ ਸ਼ੁੱਧਤਾ ਲਈ ਵਾਟਰ ਟਰੀਟਮੈਂਟ ਪਲਾਂਟ ਲਗਾਏ ਜਾਣ ਤਾਂ ਕਿ ਪਾਣੀ ਦੀ ਦੁਬਾਰਾ ਵਰਤੋਂ ਅਮਲ ਵਿਚ ਲਿਆਂਦੀ ਜਾ ਸਕੇ।

-ਜਸਦੀਪ ਸਿੰਘ ਖੰਨਾ
ਕ੍ਰਿਸ਼ਨਾ ਨਗਰ, ਖੰਨਾ।

23-9-2014

 ਬੇਰੁਜ਼ਗਾਰੀ
ਪੰਜਾਬ ਵਿਚ ਬੇਰੁਜ਼ਗਾਰੀ ਦੇ ਅੰਕੜੇ ਦਿਨੋਂ-ਦਿਨ ਵਧ ਰਹੇ ਹਨ। ਬੇਰੁਜ਼ਗਾਰੀ ਕਾਰਨ ਨੌਜਵਾਨ ਗ਼ਲਤ ਪਾਸੇ ਵੱਲ ਭਾਰੂ ਹੋ ਰਹੇ ਹਨ। ਹੁਣ ਕੰਮ ਕਰਨ ਲਈ ਦਿਹਾੜੀ ਵੀ ਸਿਫ਼ਾਰਸ਼ ਨਾਲ ਮਿਲਦੀ ਹੈ। ਆਧੁਨਿਕ ਤਕਨਾਲੋਜੀ ਤੇ ਕੰਪਿਊਟਰ ਨੇ ਮਨੁੱਖ ਵਿਹਲਾ ਕਰ ਦਿੱਤਾ ਹੈ। ਨੁਕਸਦਾਰ ਵਿੱਦਿਆ ਪ੍ਰਣਾਲੀ ਤੇ ਟੀ.ਵੀ. ਚੈਨਲਾਂ ਦੀ ਮਾੜੀ ਕਿਸਮ ਦੀ ਪੇਸ਼ਕਾਰੀ ਨੇ ਨੌਜਵਾਨਾਂ ਨੂੰ ਨਸ਼ਿਆਂ, ਲੁੱਟਾਂ-ਖੋਹਾਂ ਤੇ ਘਟੀਆ ਆਚਰਨ ਦੇ ਰਾਹ ਤੋਰਨ ਵਿਚ ਅਹਿਮ ਯੋਗਦਾਨ ਪਾਇਆ ਹੈ। ਅੱਜ ਦੀ ਸਾਡੀ ਵਿੱਦਿਆ ਪ੍ਰਣਾਲੀ ਵਿਚ ਸਿਰਫ ਬੱਚੇ ਦੀ ਯਾਦ ਸ਼ਕਤੀ ਹੀ ਪਰਖੀ ਜਾ ਰਹੀ ਹੈ। ਯਾਦ ਤਾਂ ਅਤੀਤ, ਭੂਤਕਾਲ ਵਿਚ ਵਾਪਰੀਆਂ ਘਟਨਾਵਾਂ ਨੂੰ ਹੀ ਕੀਤਾ ਜਾ ਸਕਦਾ ਹੈ। ਭਵਿੱਖ ਬਾਰੇ ਬੱਚਾ ਕੀ ਯਾਦ ਕਰੇਗਾ? ਕਹਿਣ ਤੋਂ ਭਾਵ ਕਿ ਬੱਚੇ ਦੀ ਯਾਦ ਸ਼ਕਤੀ ਦਾ ਸਬੰਧ ਤਾਂ ਅਤੀਤ ਨਾਲ ਅਤੇ ਬੁੱਧੀ ਦਾ ਸਬੰਧ ਭਵਿੱਖ ਨਾਲ ਹੈ ਪਰ ਸਾਡਾ ਸਕੂਲੀ ਸਿਲੇਬਸ ਬੱਚਿਆਂ ਦਾ ਬੌਧਿਕ ਵਿਕਾਸ ਕਰਨ ਤੇ ਉਨ੍ਹਾਂ ਨੂੰ ਭਵਿੱਖ ਲਈ ਕੁਝ ਨਵਾਂ ਕਰ ਸਕਣ ਦੇ ਸਮਰੱਥ ਬਣਾਉਣ ਵਾਲਾ ਹੋਵੇ।

-ਸੁਖਵਿੰਦਰ ਸਿੰਘ ਕਲੇਰ
ਪਿੰਡ ਤੇ ਡਾਕ: ਬੱਸੀਆਂ, ਜ਼ਿਲ੍ਹਾ ਲੁਧਿਆਣਾ।

ਭਰੂਣ ਹੱਤਿਆ ਦਾ ਰੁਝਾਨ
ਪੰਜਾਬ ਵਿਚ ਭਰੂਣ ਹੱਤਿਆ ਦਾ ਵਰਤਾਰਾ ਤੇਜ਼ੀ ਨਾਲ ਵਧ ਰਿਹਾ ਹੈ, ਜਿਸ ਕਾਰਨ ਕੁੜੀਆਂ ਦੀ ਗਿਣਤੀ ਘਟ ਰਹੀ ਹੈ। ਭਰੂਣ ਹੱਤਿਆ ਕੁਦਰਤ ਦੇ ਖਿਲਾਫ਼ ਹੈ। 2011 ਦੀ ਜਨਗਣਨਾ ਮੁਤਾਬਿਕ ਪੰਜਾਬ ਵਿਚ ਹਜ਼ਾਰ ਮੁੰਡਿਆਂ ਮਗਰ 893 ਕੁੜੀਆਂ ਹਨ। ਦਾਜ, ਬਲਾਤਕਾਰ, ਕੁੜੀਆਂ ਨਾਲ ਵਧ ਰਹੇ ਛੇੜਛਾੜ ਆਦਿ ਭਰੂਣ ਹੱਤਿਆ ਲਈ ਜ਼ਿੰਮੇਵਾਰ ਹਨ। ਵਿਆਹੀਆਂ ਔਰਤਾਂ ਨੂੰ ਅਣਜੰਮੀਆਂ ਵਿਰੁੱਧ ਹੋ ਰਹੇ ਇਸ ਅਪਰਾਧ ਖਿਲਾਫ਼ ਆਵਾਜ਼ ਬੁਲੰਦ ਕਰਨੀ ਚਾਹੀਦੀ ਹੈ। ਪੰਜਾਬ ਨੂੰ ਕੇਰਲਾ ਵਰਗੇ ਸੂਬੇ ਤੋਂ ਪ੍ਰੇਰਨਾ ਲੈਣੀ ਚਾਹੀਦੀ ਹੈ, ਜਿਥੇ 1000 ਮੁੰਡਿਆਂ ਪਿਛੇ 1084 ਕੁੜੀਆਂ ਹਨ। ਪੰਜਾਬ ਸਰਕਾਰ ਨੂੰ ਭਰੂਣ ਹੱਤਿਆ ਨੂੰ ਰੋਕਣ ਲਈ ਠੋਸ ਉਪਰਾਲੇ ਕਰਨੇ ਚਾਹੀਦੇ ਹਨ।

-ਦਿਲਪ੍ਰੀਤ ਸਿੰਘ
ਪਿੰਡ ਪੱਤੋ ਹੀਰਾ ਸਿੰਘ, ਮੋਗਾ।

ਅੱਜ ਦਾ ਭਾਰਤ
ਜੇਕਰ ਅੱਜ ਅਸੀਂ ਅਖ਼ਬਾਰਾਂ 'ਤੇ ਝਾਤੀ ਮਾਰੀਏ ਤਾਂ ਹਰ ਰੋਜ਼ ਕਿਤੇ ਨਾ ਕਿਤੇ ਜਬਰ-ਜਨਾਹ ਦੀਆਂ ਖ਼ਬਰਾਂ ਪੜ੍ਹਨ ਨੂੰ ਮਿਲ ਜਾਂਦੀਆਂ ਹਨ। ਇਸ ਦੇ ਪਿੱਛੇ ਕੀ ਕਾਰਨ ਹੈ? ਇਸ ਵਿਚ ਸ਼ਾਇਦ ਕਮੀ ਕਿਤੇ ਮਾਪਿਆਂ ਦੀ ਤੇ ਸਮਾਜ ਦੀ ਵੀ ਹੈ। ਜੇਕਰ ਘਰ ਵਿਚ ਪਹਿਲਾਂ ਤੋਂ ਹੀ ਬੱਚੇ ਨੂੰ ਔਰਤ ਦੀ ਇੱਜ਼ਤ ਮਾਂ-ਭੈਣ ਦੇ ਰਿਸ਼ਤੇ ਪ੍ਰਤੀ ਆਦਰ ਬਾਰੇ ਸਿਖਾਇਆ ਜਾਵੇ ਤਾਂ ਸ਼ਾਇਦ ਇਸ ਦਾ ਕੁਝ ਅਸਰ ਤਾਂ ਹੋਵੇਗਾ ਹੀ। ਦੂਜਾ ਸਮਾਜ ਕਈ ਵਾਰੀ ਧਾਰਮਿਕ ਗੁਰੂਆਂ ਦੇ ਚਰਨਾਂ ਵਿਚ ਜਾ ਕੇ ਸ਼ਾਂਤੀ ਦੀ ਤਲਾਸ਼ ਕਰਦਾ ਹੈ। ਲੋਕਾਂ ਦਾ ਬਹੁਤ ਹੀ ਵੱਡਾ ਹਿੱਸਾ ਹੈ, ਜੋ ਇਨ੍ਹਾਂ ਗੁਰੂਆਂ ਦੇ ਕਹੇ ਤੋਂ ਆਪਣਾ ਜੀਵਨ ਵਾਰਨ ਲਈ ਤਿਆਰ ਹੋ ਜਾਂਦਾ ਹੈ ਪਰ ਜਦੋਂ ਉਹੀ ਗੁਰੂ ਆਪਣੀਆਂ ਕਾਲੀਆਂ ਕਰਤੂਤਾਂ ਕਾਰਨ ਸੁਰਖੀਆਂ ਵਿਚ ਆਉਂਦੇ ਹਨ ਤਾਂ ਲੋਕਾਂ ਦੇ ਮਨਾਂ 'ਤੇ ਕੀ ਬੀਤਦੀ ਹੈ, ਉਹ ਹੀ ਜਾਣਦੇ ਹਨ। ਕਈ ਵਾਰੀ ਅਸੀਂ ਵੇਖਿਆ ਹੈ ਕਿ ਲੋਕ ਜਨਤਕ ਸੰਪਤੀ ਦੀ ਭੰਨ-ਤੋੜ ਜਾਂ ਸਾੜ-ਫੂਕ ਕਰਨ ਲੱਗੇ ਜ਼ਰਾ ਇਹ ਨਹੀਂ ਸੋਚਦੇ ਕਿ ਇਹ ਸੰਪਤੀ ਸਾਡੀ ਸਹੂਲਤ ਦੇ ਲਈ ਹੈ ਅਤੇ ਸਾਡੇ ਹੀ ਦਿੱਤੇ ਟੈਕਸਾਂ ਨਾਲ ਬਣਾਈ ਜਾਂਦੀ ਹੈ। ਅੱਜ ਸਾਨੂੰ ਲੋੜ ਹੈ ਹਰ ਵਤੀਰੇ ਪ੍ਰਤੀ ਸੋਚ ਬਦਲਣ ਦੀ। ਆਪਣੇ ਗੁਰੂਆਂ, ਪੀਰਾਂ-ਫਕੀਰਾਂ ਦੇ ਦਿੱਤੇ ਸੁਨੇਹੇ 'ਤੇ ਚੱਲਣ ਦੀ ਕਿ ਹਰ ਔਰਤ ਨੂੰ ਮਾਂ-ਭੈਣ ਸਮਝਿਆ ਜਾਵੇ। ਨੌਜਵਾਨ ਪੀੜ੍ਹੀ ਨੂੰ ਗ਼ਲਤ ਰਸਤੇ ਪਾਉਣ ਦੀ ਬਜਾਏ ਸਿੱਧੇ ਰਸਤੇ ਪਾਉਣ ਦੀ, ਆਪਣਾ ਚੰਗਾ-ਮਾੜਾ ਸੋਚਣ ਦੀ, ਨਸ਼ਿਆਂ ਦੇ ਸਮੁੰਦਰ ਵਿਚ ਨਾ ਪੈਣ ਤੇ ਤੰਦਰੁਸਤੀ ਤੇ ਸਾਦਗੀ ਵਾਲਾ ਜੀਵਨ ਜਿਊਣ ਦੀ ਤਾਂ ਕਿ ਭਾਰਤ ਹੋਰ ਬੁਲੰਦੀਆਂ ਨੂੰ ਛੂਹ ਸਕੇ।

-ਨਰੇਸ਼ ਰਾਣੀ
ਸ.ਹ.ਸ. ਦਸਗਰਾਈਂ (ਰੋਪੜ)।

19-8-2014

 ਤੰਬਾਕੂਨੋਸ਼ੀ 'ਤੇ ਰੋਕ ਲੱਗੇ

ਤੰਬਾਕੂ ਸੇਵਨ ਬਹੁਤ ਸਾਰੀਆਂ ਬਿਮਾਰੀਆਂ ਦਾ ਕਾਰਨ ਹੈ। ਲੱਖਾਂ ਲੋਕ ਇਸ ਦੇ ਕਾਰਨ ਮੌਤ ਦਾ ਸ਼ਿਕਾਰ ਹੋ ਰਹੇ ਹਨ। ਤੰਬਾਕੂ ਕੰਪਨੀਆਂ 'ਤੰਬਾਕੂ ਦਾ ਸੇਵਨ ਸਿਹਤ ਲਈ ਹਾਨੀਕਾਰਕ ਹੈ' ਲਿਖ ਕੇ ਆਪਣੀ ਜ਼ਿੰਮੇਵਾਰੀ ਤੋਂ ਮੁਕਤ ਹੋ ਜਾਂਦੀਆਂ ਹਨ। ਇਹ ਕਾਫੀ ਨਹੀਂ ਹੈ। ਅਨਪੜ੍ਹਾਂ ਦੀ ਗੱਲ ਤਾਂ ਛੱਡੋ, ਪੜ੍ਹੇ-ਲਿਖੇ ਲੋਕ ਵੀ ਇਸ ਗੱਲ ਨੂੰ ਨਹੀਂ ਸਮਝਦੇ। ਸੋ, ਹੁਣ ਵੀ ਵੇਲਾ ਹੈ ਸਮਝਣ ਦਾ ਤੇ ਤੰਬਾਕੂਨੋਸ਼ੀ ਨੂੰ ਰੋਕਣ ਦਾ।

-ਸੇਵਾ ਰਾਮ ਸਿੰਗਲਾ
ਮੇਨ ਅਜੀਤ ਰੋਡ, ਬਠਿੰਡਾ।

ਜਨ-ਧਨ ਯੋਜਨਾ

ਪ੍ਰਧਾਨ ਮੰਤਰੀ ਸ੍ਰੀ ਨਰਿੰਦਰ ਮੋਦੀ ਵੱਲੋਂ ਆਪਣੀ ਸਰਕਾਰ ਦੇ ਤਿੰਨ ਮਹੀਨੇ ਪੂਰੇ ਕਰਨ ਦੇ ਨਾਲ ਹੀ ਜਨ-ਧਨ ਯੋਜਨਾ ਦੀ ਜੋ ਸ਼ੁਰੂਆਤ ਕੀਤੀ ਗਈ ਹੈ, ਉਸ ਦੀ ਪ੍ਰਸੰਸਾ ਕਰਨੀ ਬਣਦੀ ਹੈ। ਪਹਿਲੇ ਹੀ ਦਿਨ ਇਸ ਯੋਜਨਾ ਅਧੀਨ ਬੈਂਕਾਂ 'ਚ ਡੇਢ ਕਰੋੜ ਖਾਤੇ ਖੋਲ੍ਹੇ ਗਏ ਹਨ। ਬਿਨਾਂ ਸ਼ੱਕ ਭਾਰਤੀ ਇਤਿਹਾਸ 'ਚ ਏਨੀ ਵਿਸ਼ਾਲ ਪੱਧਰ 'ਤੇ ਬੈਂਕਾਂ ਨਾਲ ਸਬੰਧਤ ਕਾਰਵਾਈ ਪਹਿਲਾਂ ਨਹੀਂ ਦੇਖੀ ਗਈ। ਇਸ ਯੋਜਨਾ ਤਹਿਤ ਦੇਸ਼ ਦੇ ਹਰੇਕ ਪਰਿਵਾਰ ਦੇ ਮੁਖੀ ਅਤੇ ਇਕ ਔਰਤ ਮੈਂਬਰਾਂ ਦਾ ਖਾਤਾ ਬੈਂਕ 'ਚ ਹੋਣਾ ਯਕੀਨੀ ਬਣਾਇਆ ਜਾਏਗਾ। ਹਰ ਬੈਂਕ ਕਾਰਡ ਵਾਲੇ ਦਾ ਇਕ ਲੱਖ ਰੁਪਏ ਤੱਕ ਦਾ ਦੁਰਘਟਨਾ ਬੀਮਾ ਕੀਤਾ ਜਾਵੇਗਾ। ਇਕ ਸਾਲ 'ਚ ਜੇਕਰ ਸਾਢੇ ਸੱਤ ਕਰੋੜ ਲੋਕਾਂ ਨੂੰ ਇਸ ਯੋਜਨਾ ਅਧੀਨ ਲਿਆਉਣ ਦਾ ਟੀਚਾ ਪ੍ਰਾਪਤ ਕਰ ਲਿਆ ਜਾਂਦਾ ਹੈ ਤਾਂ ਇਹ ਸਰਕਾਰ ਦੀ ਬਹੁਤ ਵੱਡੀ ਸਫਲਤਾ ਹੋਵੇਗੀ।

-ਓਮ ਪ੍ਰਕਾਸ਼
ਰੇਲਵੇ ਰੋਡ, ਸਰਹੰਦ, ਫ਼ਤਹਿਗੜ੍ਹ ਸਾਹਿਬ।

ਪੋਲੀਥੀਨ ਦੇ ਲਿਫ਼ਾਫ਼ੇ

ਪਿਛਲੇ ਕੁਝ ਸਾਲ ਪਹਿਲਾਂ ਪੰਜਾਬ ਸਰਕਾਰ ਵੱਲੋਂ ਹਲਕੇ ਪੋਲੀਥੀਨ ਦੇ ਲਿਫਾਫਿਆਂ 'ਤੇ ਪਾਬੰਦੀ ਲਗਾ ਕੇ ਇਸ ਵਿਰੁੱਧ ਇਕ ਕਾਨੂੰਨ ਬਣਾਇਆ ਗਿਆ ਸੀ ਜੋ ਕਿ ਇਕ ਫਲਾਪ ਕਾਨੂੰਨ ਸਾਬਤ ਹੋਇਆ ਹੈ। ਪੋਲੀਥੀਨ ਦੇ ਲਿਫਾਫਿਆਂ ਨੂੰ ਵਰਤੋਂ ਤੋਂ ਬਾਅਦ ਆਮ ਤੌਰ 'ਤੇ ਜਲਾ ਦਿੱਤਾ ਜਾਂਦਾ ਹੈ, ਜਿਸ ਦਾ ਵਾਤਾਵਰਨ ਅਤੇ ਸਿਹਤ 'ਤੇ ਮਾੜਾ ਅਸਰ ਪੈਂਦਾ ਹੈ। ਮੈਨੂੰ ਸਰਕਾਰ ਕੋਲੋਂ ਤਾਂ ਕੋਈ ਉਮੀਦ ਨਹੀਂ, ਪਰ ਲੋਕਾਂ ਨੂੰ ਅਪੀਲ ਹੈ ਕਿ ਸਬਜ਼ੀ ਆਦਿ ਖਰੀਦਣ ਜਾਣ ਤੋਂ ਪਹਿਲਾਂ ਘਰੋਂ ਆਪਣੇ ਨਾਲ ਕੋਈ ਝੋਲਾ ਵਗੈਰਾ ਲੇ ਕੇ ਜਾਣ।

-ਜਸਵੀਰ ਸਿੰਘ
ਪਿੰਡ ਛੰਦੜਾਂ, ਲੁਧਿਆਣਾ।

ਸੋਸ਼ਲ ਮੀਡੀਆ 'ਚ ਸਿਆਸੀ ਹਸਤੀਆਂ

ਅਜੋਕੇ ਸਮੇਂ ਵਿਚ ਸੋਸ਼ਲ ਮੀਡੀਆ ਹਰ ਵਰਗ ਦੀ ਜ਼ਰੂਰਤ ਬਣ ਕੇ ਰਹਿ ਗਿਆ ਹੈ। ਬੱਚੇ, ਨੌਜਵਾਨ, ਬੁੱਢੇ ਸਭ ਕਿਸੇ ਨਾ ਕਿਸੇ ਰੂਪ ਵਿਚ ਇਸ ਦਾ ਇਸਤੇਮਾਲ ਕਰਦੇ ਹਨ। ਪੰਜਾਬ ਦੀਆਂ ਨਾਮੀ ਰਾਜਨੀਤਕ ਸ਼ਖ਼ਸੀਅਤਾਂ ਵੀ ਇਸ ਦੇ ਅਸਰ ਹੇਠ ਹਨ। ਆਮ ਆਦਮੀ ਪਾਰਟੀ ਦੇ ਲੋਕ ਸਭਾ ਮੈਂਬਰ ਭਗਵੰਤ ਮਾਨ ਦੀ ਸੰਗਰੂਰ ਤੋਂ ਵੱਡੀ ਜਿੱਤ ਵਿਚ ਸੋਸ਼ਲ ਮੀਡੀਆ ਦਾ ਬਹੁਤ ਵੱਡਾ ਹੱਥ ਰਿਹਾ ਹੈ। ਉਨ੍ਹਾਂ ਦੁਆਰਾ ਆਪਣੇ ਫੇਸਬੁੱਕ ਪੇਜ 'ਤੇ ਭੇਜੀਆਂ ਜਾਂਦੀਆਂ ਫੋਟੋਆਂ ਤੇ ਵੀਡੀਓ ਲੋਕਾਂ ਦੁਆਰਾ ਬਹੁਤ ਪਸੰਦ ਕੀਤੀਆਂ ਜਾਂਦੀਆਂ ਹਨ। ਪੰਜਾਬ ਦੇ ਉਪ ਮੁੱਖ ਮੰਤਰੀ ਸ: ਸੁਖਬੀਰ ਸਿੰਘ ਬਾਦਲ ਵੀ ਆਪਣੇ ਫੇਸਬੁੱਕ ਪੇਜ 'ਤੇ ਕੁਝ ਨਾ ਕੁਝ ਸ਼ੇਅਰ ਕਰਦੇ ਰਹਿੰਦੇ ਹਨ। ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਅਤੇ ਅੰਮ੍ਰਿਤਸਰ ਤੋਂ ਲੋਕ ਸਭਾ ਮੈਂਬਰ ਕੈਪਟਨ ਅਮਰਿੰਦਰ ਸਿੰਘ ਦੇ ਵੀ ਫੇਸਬੁੱਕ 'ਤੇ ਬਹੁਤ ਫੈਨਸ ਹਨ। ਇਸ ਮਾਮਲੇ ਵਿਚ ਉਨ੍ਹਾਂ ਦੀ ਧਰਮ ਪਤਨੀ ਅਤੇ ਪਟਿਆਲਾ ਤੋਂ ਵਿਧਾਨ ਸਭਾ ਮੈਂਬਰ ਸ੍ਰੀਮਤੀ ਪਰਨੀਤ ਕੌਰ ਵੀ ਪਿੱਛੇ ਨਹੀਂ ਹਨ। ਪੰਜਾਬ ਦੇ ਹੋਰ ਵੀ ਸਾਰੇ ਨਾਮੀ ਲੀਡਰਾਂ ਵੱਲੋਂ ਗੁਰਪੁਰਬਾਂ ਅਤੇ ਤਿਉਹਾਰਾਂ ਦੀ ਵਧਾਈ ਤੋਂ ਲੈ ਕੇ ਸ਼ੋਕ-ਸੰਦੇਸ਼ ਵੀ ਫੇਸਬੁੱਕ ਪੇਜ ਰਾਹੀਂ ਦਿੱਤੇ ਜਾਂਦੇ ਹਨ। ਹਾਲਾਂ ਕਿ ਪੰਜਾਬ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਇਸ ਮਾਮਲੇ ਵਿਚ ਪਛੜ ਗਏ ਲਗਦੇ ਹਨ, ਕਿਉਂਕਿ ਉਨ੍ਹਾਂ ਦਾ ਕੋਈ ਫੇਸਬੁੱਕ ਪੇਜ ਨਹੀਂ ਹੈ। ਅਸੀਂ ਉਮੀਦ ਕਰਦੇ ਹਾਂ ਕਿ ਆਉਣ ਵਾਲੇ ਦਿਨਾਂ ਵਿਚ ਉਹ ਵੀ ਫੇਸਬੁੱਕ 'ਤੇ ਨਜ਼ਰ ਆਉਣਗੇ ਅਤੇ ਆਮ ਜਨਤਾ ਨਾਲ ਆਪਣੇ ਯਾਦਗਾਰੀ ਪਲ ਸਾਂਝੇ ਕਰਨਗੇ ਅਤੇ ਰਾਬਤਾ ਕਾਇਮ ਰੱਖਣਗੇ।

-ਗੁਰਕੀਰਤਪਾਲ ਸਿੰਘ ਖਰੌੜ
31/19 ਆਨੰਦ ਨਗਰ ਬੀ, ਪਟਿਆਲਾ।

ਭਾਨ ਦੀ ਕਮੀ

ਅੱਜਕਲ੍ਹ ਬਾਜ਼ਾਰ ਵਿਚ ਭਾਨ ਦੀ ਬੜੀ ਹੀ ਕਮੀ ਆਈ ਹੋਈ ਹੈ। ਇਕ ਰੁਪਈਆ, ਦੋ ਰੁਪਏ ਅਤੇ ਪੰਜ ਦੇ ਸਿੱਕੇ ਅਤੇ ਨੋਟ ਤਾਂ ਬਾਜ਼ਾਰ ਵਿਚ ਵੇਖਣ ਨੂੰ ਵੀ ਨਹੀਂ ਮਿਲ ਰਹੇ। ਹਰੇਕ ਦੁਕਾਨਦਾਰ ਜਾਂ ਰੇਹੜੀ ਵਾਲਾ ਰੁਪਈਆ, ਦੋ ਰੁਪਏ ਜਾਂ ਪੰਜ ਰੁਪਏ ਮੋੜਨ ਦੀ ਬਜਾਏ ਟਾਫੀਆਂ, ਬਿਸਕੁਟ ਆਦਿ ਸਾਮਾਨ ਗਾਹਕ ਨੂੰ ਦੇ ਦਿੰਦਾ ਹੈ। ਰੋਜ਼ ਦੇ ਗਾਹਕ ਨੂੰ ਨਿੱਤ ਹੀ ਅਣਚਾਹੀਆਂ ਚੀਜ਼ਾਂ ਬਚੇ ਹੋਏ ਪੈਸਿਆਂ ਦੇ ਬਦਲੇ ਲੈਣੀਆਂ ਪੈਂਦੀਆਂ ਹਨ। ਸਰਕਾਰੀ ਕੰਮਾਂ 'ਚ ਤਾਂ ਦੋ-ਚਾਰ, ਪੰਜ ਰੁਪਏ ਛੱਡਣੇ ਹੀ ਪੈ ਜਾਂਦੇ ਹਨ। ਭਾਨ ਦੀ ਕਮੀ ਕਰਕੇ ਬੱਚੇ ਵੀ ਦਿਨ ਵਿਚ ਕਿੰਨੀ ਵਾਰ ਦਸ-ਦਸ ਕਰਕੇ ਕਾਫੀ ਪੈਸੇ ਖਰਚ ਦਿੰਦੇ ਹਨ, ਜਿਸ ਕਰਕੇ ਕਾਫੀ ਰੁਪਏ ਦਿਨ ਵਿਚ ਨਾਜਾਇਜ਼ ਹੀ ਚਲੇ ਜਾਂਦੇ ਹਨ। ਅੱਜ ਦੇ ਮਹਿੰਗਾਈ ਦੇ ਜ਼ਮਾਨੇ ਵਿਚ ਇਹ ਇਕ ਬਹੁਤ ਹੀ ਧਿਆਨਦੇਣ ਯੋਗ ਮੁੱਦਾ ਹੈ। ਇਸ ਲਈ ਮੇਰੀ ਭਾਰਤੀ ਰਿਜ਼ਰਵ ਬੈਂਕ ਅੱਗੇ ਬੇਨਤੀ ਹੈ ਕਿ ਉਹ ਇਸ ਮਸਲੇ ਵੱਲ ਧਿਆਨ ਦਿੰਦੇ ਹੋਏ ਰੁਪਈਆ, ਦੋ ਰੁਪਏ ਅਤੇ ਪੰਜ ਦੇ ਨੋਟ ਅਤੇ ਸਿੱਕੇ ਬਣਾਉਣ ਵੱਲ ਵੀ ਧਿਆਨ ਦੇਵੇ।

-ਬਲਵੰਤ ਸਿੰਘ ਗਿਆਸਪੁਰਾ
ਮੋ: 9888747151

18-9-2014

 ਮੋਬਾਈਲ ਦੀ ਗ਼ੁਲਾਮੀ
ਅੱਜ ਤੋਂ ਕੁਝ ਵਰ੍ਹੇ ਪਹਿਲਾਂ ਜਦੋਂ ਮੋਬਾਈਲ ਫੋਨ ਸਾਡੇ ਹੱਥਾਂ ਵਿਚ ਆਏ ਸਨ ਤਾਂ ਹਰ ਕੋਈ ਇਸ ਦੇ ਗੁਣ ਗਾਉਂਦਾ ਨਹੀਂ ਸੀ ਥੱਕਦਾ। ਅਸੀਂ ਮੋਬਾਈਲ ਫੋਨ ਦੇ ਜ਼ਰੀਏ ਆਪਣੇ ਦੂਰ-ਦੁਰਾਡੇ ਬੈਠੇ ਕਿਸੇ ਵੀ ਦੋਸਤ-ਮਿੱਤਰ ਜਾਂ ਰਿਸ਼ਤੇਦਾਰ ਨਾਲ ਮਿੰਟਾਂ-ਸਕਿੰਟਾਂ ਵਿਚ ਗੱਲ ਕਰ ਸਕਦੇ ਸਾਂ ਜਾਂ ਆਪਣਾ ਕੋਈ ਸੁਨੇਹਾ ਲਿਖ ਕੇ ਵੀ ਭੇਜ ਸਕਦੇ ਸਾਂ। ਇਸ ਤਰ੍ਹਾਂ ਮੋਬਾਈਲ ਫੋਨ ਨਾਲ ਸਾਡੇ ਕੀਮਤੀ ਸਮੇਂ ਦੀ ਬਹੁਤ ਬੱਚਤ ਹੁੰਦੀ ਸੀ। ਪਰ ਹੁਣ ਜੇਕਰ ਦੇਖਿਆ ਜਾਵੇ ਤਾਂ ਅੱਜ ਜ਼ਿਆਦਾਤਰ ਨੌਜਵਾਨ ਪੀੜ੍ਹੀ ਇਕ ਮੋਬਾਈਲ ਫੋਨ ਦੀ ਗ਼ੁਲਾਮ ਹੋਈ ਨਜ਼ਰ ਆ ਰਹੀ ਹੈ। ਅੱਜ ਮਹਿੰਗੇ ਭਾਅ ਦੇ ਮੋਬਾਈਲ ਫੋਨ ਉਨ੍ਹਾਂ ਦੇ ਹੱਥਾਂ ਦੇ ਸ਼ਿੰਗਾਰ ਬਣ ਗਏ ਹਨ। ਇਨ੍ਹਾਂ ਵਿਚ ਡਾਊਨਲੋਡ ਕੀਤੀ ਸਮੱਗਰੀ ਨੂੰ ਦੇਖ ਕੇ ਆਮ ਲੋਕ ਸ਼ਰਮਸ਼ਾਰ ਹੋ ਜਾਣ। ਜੇਕਰ ਆਸੇ-ਪਾਸੇ ਕਿਤੇ ਵੀ ਨਜ਼ਰ ਮਾਰੀ ਜਾਵੇ ਤਾਂ ਬਹੁਤ ਸਾਰੇ ਨੌਜਵਾਨ ਮੁੰਡੇ-ਕੁੜੀਆਂ ਉੱਠਦੇ-ਬੈਠਦੇ, ਤੁਰਦੇ-ਫਿਰਦੇ ਅਤੇ ਡਰਾਈਵਿੰਗ ਕਰਦੇ ਹੋਏ ਵੀ ਇਨ੍ਹਾਂ ਮੋਬਾਈਲ ਫੋਨਾਂ ਵਿਚ ਖੁੱਭੇ ਨਜ਼ਰ ਆਉਂਦੇ ਹਨ। ਇਹ ਸਭ ਨਾਲ ਉਨ੍ਹਾਂ ਦੇ ਪੈਸੇ, ਸਮੇਂ ਅਤੇ ਸਿਹਤ ਦੀ ਬਰਬਾਦੀ ਹੋ ਰਹੀ ਹੈ। ਸੋ, ਜਿਥੇ ਨੌਜਵਾਨ ਪੀੜ੍ਹੀ ਨੂੰ ਇਸ ਦੀ ਦੁਰਵਰਤੋਂ ਕਰਨ ਤੋਂ ਗੁਰੇਜ਼ ਕਰਨਾ ਚਾਹੀਦਾ ਹੈ, ਉਤੇ ਮਾਪਿਆਂ ਨੂੰ ਵੀ ਆਪਣੇ ਬੱਚਿਆਂ ਪ੍ਰਤੀ ਅਵੇਸਲਾਪਣ ਤਿਆਗ ਕੇ ਹਮੇਸ਼ਾ ਸੁਚੇਤ ਰਹਿਣਾ ਚਾਹੀਦਾ ਹੈ।

-ਰਾਜਾ ਗਿੱਲ (ਚੜਿੱਕ)
ਮੋ: 94654-11585

ਮਹਿੰਗਾਈ
ਅੱਜ ਭਾਰਤ ਵਾਸੀ ਮਹਿੰਗਾਈ ਦੀ ਮਾਰ ਹੇਠ ਦਬ ਚੁੱਕੇ ਹਨ। ਮਹਿੰਗਾਈ ਨੇ ਜਨਤਾ ਦਾ ਲੱਕ ਤੋੜ ਦਿੱਤਾ ਹੈ। ਹਰ ਪਾਰਟੀ ਦੇ ਵੱਡੇ-ਛੋਟੇ ਲੀਡਰ ਚੋਣਾਂ ਹੋਣ ਤੋਂ ਪਹਿਲਾਂ ਬਹੁਤ ਵਾਅਦੇ ਕਰਦੇ ਹਨ ਕਿ ਪਿਛਲੀ ਸਰਕਾਰ ਨੇ ਮਹਿੰਗਾਈ ਨੂੰ ਕੋਈ ਨੱਥ ਨਹੀਂ ਪਾਈ। ਹੁਣ ਸਾਡੀ ਸਰਕਾਰ ਬਣਾਓ, ਸਾਡੀ ਸਰਕਾਰ ਸੱਤਾ ਵਿਚ ਆਉਂਦਿਆਂ ਹੀ ਸਭ ਤੋਂ ਪਹਿਲਾਂ ਮਹਿੰਗਾਈ ਘਟਾਏਗੀ ਅਤੇ ਉਸ ਤੋਂ ਬਾਅਦ ਦੇਸ਼ ਵਿਚੋਂ ਬੇਰੁਜ਼ਗਾਰੀ ਖ਼ਤਮ ਕਰਨ ਲਈ ਵਿਸ਼ੇਸ਼ ਉਪਰਾਲੇ ਕਰੇਗੀ। ਸਰਕਾਰ ਕਿਸੇ ਵੀ ਪਾਰਟੀ ਦੀ ਬਣ ਜਾਵੇ, ਉਹ ਜਨਤਾ ਨਾਲ ਕੀਤੇ ਵਾਅਦੇ ਪੂਰੇ ਨਹੀਂ ਕਰਦੀ। ਪੰਜ ਸਾਲ ਲੋਕ ਊਠ ਦੇ ਬੁੱਲ੍ਹ ਨੂੰ ਹੁਣ ਡਿੱਗਿਆ, ਹੁਣ ਡਿੱਗਿਆ ਕਰਦਿਆਂ ਲੰਘਾਅ ਲੈਂਦੇ ਹਨ ਅਤੇ ਇਸੇ ਤਰ੍ਹਾਂ ਜਨਤਾ ਅਗਲੀ ਪਾਰਟੀ ਦੀ ਸਰਕਾਰ ਬਣਾ ਲੈਂਦੀ ਹੈ ਅੱਗੋਂ ਉਸ ਸਰਕਾਰ ਦਾ ਬਹਾਂ-ਕੁਹਾੜੀ ਵੀ ਉਹੀ ਹੁੰਦਾ ਹੈ। ਪਾਰਟੀਆਂ ਜਨਤਾ ਦੀ ਸੋਚ ਨਾਲ ਖਿਲਵਾੜ ਕਰਦੀਆਂ ਹਨ। ਸਭ ਪਾਰਟੀਆਂ ਧਨਾਢ ਤੇ ਗ਼ਰੀਬ ਨੂੰ ਇਕੋ ਰੱਸੇ ਲੰਘਾਅ ਕੇ ਅਗਲੇ ਪੰਜ ਸਾਲਾਂ ਲਈ ਰਾਹ ਪੱਧਰਾ ਕਰਨ ਦੀ ਕੋਸ਼ਿਸ਼ ਵਿਚ ਲੱਗੀਆਂ ਰਹਿੰਦੀਆਂ ਹਨ। ਗ਼ਰੀਬੀ ਰੇਖਾ ਤੋਂ ਹੇਠ ਜਿਊ ਰਹੇ ਮਹਾਨ ਭਾਰਤ ਦੇ ਵਾਸੀ ਅੱਜ ਖ਼ੁਦਕੁਸ਼ੀਆਂ ਕਰ ਰਹੇ ਹਨ। ਆਪਣਾ ਖੂਨ ਡੋਲ੍ਹ ਕੇ ਭਾਰਤ ਨੂੰ ਆਜ਼ਾਦ ਕਰਵਾਉਣ ਵਾਲੇ ਸ਼ਹੀਦਾਂ ਦੀ ਸਮਾਧੀ 'ਤੇ ਫੁੱਲ ਚੜ੍ਹਾਉਣ ਵਾਲੇ ਨੇਤਾ ਉਨ੍ਹਾਂ ਸ਼ਹੀਦਾਂ ਦੇ ਸੁਪਨਿਆਂ 'ਤੇ ਕਿੰਨੇ ਕੁ ਖਰੇ ਉੱਤਰਦੇ ਹਨ, ਇਹ ਅਸੀਂ ਸਭ ਜਾਣਦੇ ਹੀ ਹਾਂ।

-ਸੁਖਵਿੰਦਰ ਕਲੇਰ ਬੱਸੀਆਂ
ਪਿੰਡ ਤੇ ਡਾਕ: ਬੱਸੀਆਂ,
ਜ਼ਿਲ੍ਹਾ ਲੁਧਿਆਣਾ।

ਗ਼ਰੀਬੀ
ਸੰਯੁਕਤ ਰਾਸ਼ਟਰ ਸੰਘ ਦੀ ਇਕ ਤਾਜ਼ਾ ਰਿਪੋਰਟ ਆਈ ਹੈ ਕਿ ਦੁਨੀਆ ਦੇ ਬੇਹੱਦ ਗ਼ਰੀਬ ਲੋਕਾਂ ਵਿਚੋਂ ਇਕ ਤਿਹਾਈ ਭਾਰਤ ਵਿਚ ਰਹਿੰਦੇ ਹਨ। ਪੰਜ ਸਾਲ ਤੋਂ ਘੱਟ ਉਮਰ ਦੇ ਮੌਤ ਦੇ ਮਾਮਲੇ ਵੀ ਵੱਧ ਹਨ। ਇਸ ਲਈ ਕੌਣ ਜ਼ਿੰਮੇਵਾਰ ਹੈ? ਆਜ਼ਾਦੀ ਦੇ 67 ਸਾਲ ਬਾਅਦ ਵੀ ਇਹ ਹਾਲਾਤ ਹਨ, ਇਸ ਲਈ ਕੌਣ ਦੋਸ਼ੀ ਹੈ? ਏਨਾ ਪੈਸਾ ਖਰਚਣ ਤੇ ਤਮਾਮ ਕੋਸ਼ਿਸ਼ਾਂ ਦੇ ਬਾਵਜੂਦ ਗ਼ਰੀਬੀ ਦੂਰ ਨਹੀਂ ਕੀਤੀ ਜਾ ਸਕੀ। ਸਿਹਤ ਸਹੂਲਤਾਂ ਵਿਚ ਅਸੀਂ ਪਛੜੇ ਹੋਏ ਹਾਂ। ਜ਼ਰੂਰਤ ਹੈ ਇਸ ਪਾਸੇ ਸੁਹਿਰਦਤਾ ਨਾਲ ਕੰਮ ਕਰਨ ਦੀ।

-ਸੇਵਾ ਰਾਮ ਬਰੇਟਾ
ਮੇਨ ਅਜੀਤ ਰੋਡ, ਬਠਿੰਡਾ।

17-9-2014

 ਹਾਕੀ ਨੂੰ ਸੰਭਾਲੋ
ਕੌਣ ਭੁਲਾ ਸਕਦਾ ਹੈ ਹਾਕੀ ਦੇ ਸ਼ਾਹ-ਅਸਵਾਰ ਮੇਜਰ ਧਿਆਨ ਚੰਦ ਦੀਆਂ ਹਾਕੀ ਜਗਤ ਵਿਚ ਕੀਤੀਆਂ 'ਰੌਸ਼ਨ ਪੈੜਾਂ' ਨੂੰ। 29 ਅਗਸਤ ਉਸ ਦੇ ਜਨਮ ਦਿਨ ਨੂੰ ਕੌਮੀ ਖੇਡ ਦਿਵਸ ਵਜੋਂ ਮਨਾਉਣ ਦਾ ਨਿਰਣਾ ਬਹੁਤ ਹੀ ਸ਼ਲਾਘਾਯੋਗ ਹੈ। ਉਸ ਦੀ ਹਾਕੀ ਨੇ ਜੋ ਅੰਗਿਆਰ ਉਗਲੇ, ਉਹ ਕਿਸੇ ਤੋਂ ਭੁੱਲੇ-ਵਿਸਰੇ ਨਹੀਂ। 'ਹਾਕੀ ਦਾ ਜਾਦੂਗਰ' ਦਾ ਰੁਤਬਾ ਉਸ ਨੂੰ ਸੌਖਿਆਂ ਹੀ ਨਹੀਂ ਮਿਲਿਆ ਪਰ ਅਫ਼ਸੋਸ ਅਸੀਂ ਕ੍ਰਿਕਟ ਦੇ ਜਨੂੰਨ ਵਿਚ ਹਾਕੀ ਨਾਲ ਨਿਆਂ ਨਹੀਂ ਕੀਤਾ। ਸਾਡੇ ਬੱਚੇ ਅਜੋਕੀਆਂ ਸੁਖਾਵੀਆਂ ਸਹੂਲਤਾਂ ਵਿਚ ਹਾਕੀ ਮੈਦਾਨਾਂ ਵਿਚ ਪਸੀਨਾ ਵਹਾਉਣਾ ਬਿਹਤਰ ਨਹੀਂ ਸਮਝਦੇ। ਭੁੱਲ ਬੈਠੇ ਕਿ ਹਾਕੀ ਸਾਡੀ ਕੌਮੀ ਖੇਡ ਹੈ। ਜਦੋਂ ਤੋਂ ਟੀ.ਵੀ. 'ਤੇ ਕ੍ਰਿਕਟ ਦੀ ਹਨੇਰੀ ਝੁੱਲੀ, ਸਾਡੀ ਹਾਕੀ ਆਪਣਾ ਵਕਾਰ ਗੁਆ ਬੈਠੀ, ਜਿਸ ਨੂੰ ਸੁਰਜੀਤ ਕਰਨ ਲਈ ਅਸੀਂ ਅੱਜ ਤੱਕ ਤਰਸ ਰਹੇ ਹਾਂ। ਫਿਰ ਆਓ! ਹਾਕੀ ਨੂੰ ਪਿਆਰਨ ਵਾਲੇ ਸੁਝਵਾਨ ਹਾਕੀ ਪ੍ਰੇਮੀਓ, ਅਸੀਂ ਆਪਣੇ ਤੌਰ 'ਤੇ ਹਾਕੀ ਪ੍ਰਤੀ ਵਫ਼ਾਦਾਰ ਹੋਈਏ। ਵੱਖ-ਵੱਖ ਸਰਕਾਰੀ ਸਕੂਲ, ਕਾਲਜ ਆਪਣੀ ਹਾਕੀ ਪ੍ਰਤੀ ਜ਼ਿੰਮੇਵਾਰੀ ਪਛਾਣਨ, ਮੇਜਰ ਧਿਆਨ ਚੰਦ ਦੇ ਜੀਵਨ ਤੋਂ ਬੱਚਿਆਂ ਨੂੰ ਜਾਣ ਕਰਵਾਉਣ।

-ਜਸਬੀਰ ਦੱਧਾਹੂਰ
ਪਿੰਡ ਤੇ ਡਾਕ: ਦੱਧਾਹੂਰ, ਤਹਿ: ਰਾਏਕੋਟ (ਲੁਧਿਆਣਾ)।

ਟੌਹੜਾ ਜੀ ਦਾ ਲਾਕਰ
ਪ੍ਰਸਿੱਧ ਲੇਖਕ ਗੁਲਜ਼ਾਰ ਸਿੰਘ ਸੰਧੂ ਦੇ ਕਾਲਮ 'ਨਿੱਕ-ਸੁੱਕ' ਵਿਚ ਪਿਛਲੇ ਦਿਨੀਂ ਮਰਹੂਮ ਜਥੇਦਾਰ ਸਵ: ਗੁਰਚਰਨ ਸਿੰਘ ਟੌਹੜਾ ਦੇ ਬੈਂਕ ਵਿਚਲੇ ਲਾਕਰ ਬਾਰੇ ਦਿਲਚਸਪ ਤੇ ਜਾਣਕਾਰੀ ਭਰਪੂਰ ਗੱਲਾਂ ਦਾ ਪਤਾ ਲੱਗਾ। ਪਹਿਲੋਂ ਵੀ ਟੌਹੜਾ ਜੀ ਦੀਆਂ ਵੱਡੇ-ਵੱਡੇ ਕਈ ਅਹੁਦਿਆਂ 'ਤੇ ਰਹਿ ਕੇ ਇਮਾਨਦਾਰੀ ਦੀਆਂ ਗੱਲਾਂ ਸੁਣਦੇ ਸਾਂ ਤੇ ਇਸ ਵਿਚ ਕੋਈ ਸ਼ੱਕ ਵੀ ਨਹੀਂ ਕਿ ਉਹ ਧਾਰਮਿਕ ਸ਼ਖ਼ਸੀਅਤ ਵਾਕਈ ਬਹੁਤ ਇਮਾਨਦਾਰ ਸੀ। ਧਾਰਮਿਕ ਤੇ ਸਿਆਸੀ ਜ਼ਿੰਦਗੀ ਵਿਚ ਉਹ ਮਾਇਆ ਤੋਂ ਨਿਰਲੇਪ ਹੀ ਰਹੇ, ਕਰਨ ਨੂੰ ਤਾਂ ਉਹ ਵੀ ਬੜਾ ਕੁਝ ਕਰ ਸਕਦੇ ਸਨ। ਸੁਣਿਆ ਹੈ ਕਿ ਉਨ੍ਹਾਂ ਨੇ ਅੰਤਿਮ ਸਮੇਂ ਤੱਕ ਆਪਣਾ ਘਰ ਵੀ ਬਹੁਤ ਹੀ ਸਾਦਾ ਰੱਖਿਆ। ਪਰ ਦੂਜੇ ਪਾਸੇ ਸਾਡੇ ਅੱਜ ਦੇ ਛੋਟੇ ਤੋਂ ਲੈ ਕੇ ਵੱਡੇ ਸਿਆਸੀ ਤੇ ਧਾਰਮਿਕ ਲੀਡਰ ਹਨ ਜੋ ਹਰ ਸਮੇਂ ਕਿਸੇ ਨਾ ਕਿਸੇ ਪਾਸਿਉਂ ਪੈਸੇ ਦਾ ਜੁਗਾੜ ਕਰਨ ਵਿਚ ਹੀ ਲੱਗੇ ਰਹਿੰਦੇ ਹਨ ਤੇ ਅੱਜ ਆਲੀਸ਼ਾਨ ਮਕਾਨਾਂ-ਕੋਠੀਆਂ ਤੇ ਮਹਿੰਗੀਆਂ ਗੱਡੀਆਂ 'ਚ ਘੁੰਮਣ ਤੋਂ ਇਲਾਵਾ ਬੜਾ ਕੁਝ ਬਣਾਈ ਬੈਠੇ ਹਨ। ਪੈਸੇ ਖਾਤਰ ਜਾਇਜ਼ ਤੇ ਨਾਜਾਇਜ਼ ਕੰਮ ਵੀ ਸਾਡੇ ਸਾਹਮਣੇ ਉਜਾਗਰ ਹੋਏ ਹਨ, ਖ਼ਾਸ ਕਰ ਧਾਰਮਿਕ ਆਗੂਆਂ ਦੇ। ਅੱਜ ਸਭ ਨੂੰ ਹੀ ਟੌਹੜਾ ਜੀ ਦੇ ਵਿਸ਼ੇਸ਼ ਲਾਕਰ ਵੱਲ ਤੱਕ ਕੇ ਉਨ੍ਹਾਂ ਤੋਂ ਪ੍ਰੇਰਨਾ ਲੈਣੀ ਚਾਹੀਦੀ ਹੈ।

-ਬਲਬੀਰ ਸਿੰਘ ਬੱਬੀ
ਪਿੰਡ ਤੱਖਰਾਂ (ਲੁਧਿਆਣਾ)।

ਵਾਅਦੇ ਪੂਰੇ ਕੀਤੇ ਜਾਣ
ਭਾਰਤ ਵਿਚ ਨੇਤਾਵਾਂ ਦੇ ਵੋਟਾਂ ਵੇਲੇ ਹੋਰ ਅਤੇ ਵੋਟਾਂ ਦੇ ਬਾਅਦ ਹੋਰ ਵਾਅਦੇ ਹੁੰਦੇ ਹਨ। ਹੁਣ ਕੇਂਦਰ ਵਿਚ ਨਰਿੰਦਰ ਮੋਦੀ ਦੀ ਸਰਕਾਰ ਆ ਗਈ ਹੈ, ਜਿਸ ਪਾਸ ਆਪਣਾ ਬਹੁਮਤ ਵੀ ਹੈ। ਸਰਕਾਰ ਨੂੰ ਚਾਹੀਦਾ ਹੈ ਕਿ ਸਾਬਕਾ ਫ਼ੌਜੀਆਂ ਨਾਲ ਕੀਤੇ ਗਏ ਇਕ ਰੈਂਕ ਇਕ ਪੈਨਸ਼ਨ ਦੇ ਵਾਅਦੇ ਨੂੰ ਜਲਦੀ ਪੂਰਾ ਕਰੇ। ਪਰ ਜੋ ਹੁਣ ਮੌਜੂਦਾ ਸਮੇਂ 2006 ਤੋਂ ਪਹਿਲਾਂ ਪੈਨਸ਼ਨ ਆਏ ਹਨ ਅਤੇ 2006 ਤੋਂ ਬਾਅਦ ਆਏ ਹਨ। ਉਨ੍ਹਾਂ 'ਚ ਬਹੁਤ ਜ਼ਿਆਦਾ ਅੰਤਰ ਹੈ, ਜਿਸ ਤਰ੍ਹਾਂ ਕਿ 2014 ਸਿਪਾਹੀ ਰੈਂਕ ਦਾ 8349 ਰੁਪਏ ਪੈਨਸ਼ਨ ਲੈ ਰਿਹਾ ਹੈ। ਸੋ, ਸਾਡੀ ਸੁੱਤੀ ਪਈ ਸਰਕਾਰ ਨੂੰ ਅਰਜ਼ ਹੈ ਕਿ ਇਸ ਸਕੀਮ ਨੂੰ ਜਲਦੀ ਲਾਗੂ ਕਰੇ।

-ਨਾਇਕ (ਐਕਸ) ਜਗਰੂਪ ਸਿੰਘ ਖੋਖਰ
ਪਿੰਡ ਤੇ ਡਾਕ: ਭਾਈਰੂਪਾ।

15-9-2014

 ਵਿਤਕਰਾ ਬੰਦ ਕੀਤਾ ਜਾਵੇ
ਸੰਨ 1995 ਵਿਚ ਉਸ ਸਮੇਂ ਦੀ ਸਰਕਾਰ ਨੇ ਇਕ ਕਾਨੂੰਨ ਬਣਾਇਆ ਕਿ 40 ਫ਼ੀਸਦੀ ਤੋਂ ਵੱਧ ਅੰਗਹੀਣ ਵਿਅਕਤੀਆਂ ਨੂੰ ਬਰਾਬਰ ਸਹੂਲਤਾਂ ਦਿੱਤੀਆਂ ਜਾਣਗੀਆਂ। ਇਹ ਕਾਨੂੰਨ ਫਰਵਰੀ 1996 ਵਿਚ ਰਾਸ਼ਟਰਪਤੀ ਦੇ ਹਸਤਾਖਰ ਹੋਣ ਤੋਂ ਬਾਅਦ ਲਾਗੂ ਕਰ ਦਿੱਤਾ ਗਿਆ। ਪਰ ਜਲਦ ਹੀ (ਫਰਵਰੀ 1997 ਵਿਚ) ਬਾਦਲ ਸਰਕਾਰ ਆ ਜਾਣ ਕਰਕੇ ਇਹ ਕਾਨੂੰਨ ਫਾਈਲਾਂ ਦਾ ਸ਼ਿੰਗਾਰ ਬਣ ਕੇ ਰਹਿ ਗਿਆ।
ਫਰਵਰੀ, 2002 ਦੀਆਂ ਵਿਧਾਨ ਸਭਾ ਦੀਆਂ ਚੋਣਾਂ ਨੂੰ ਦੇਖਦੇ ਹੋਏ ਇਸ ਤੋਂ ਪਹਿਲਾਂ ਪਹਿਲਾਂ ਹੀ ਫਰਵਰੀ 2001 ਵਿਚ ਅੰਗਹੀਣ ਵਿਅਕਤੀਆਂ ਨੂੰ ਸਹੂਲਤਾਂ ਦੇਣ ਵਾਲੇ ਕਾਨੂੰਨ ਨੂੰ ਹੀ ਤੋੜ ਮਰੋੜ ਕੇ ਅੰਗਹੀਣ ਕਰ ਦਿੱਤਾ ਭਾਵ ਇਨ੍ਹਾਂ ਵਿਅਕਤੀਆਂ ਨੂੰ ਦੋ ਹਿੱਸਿਆਂ ਵਿਚ ਵੰਡ ਕੇ ਸਿਰਫ਼ ਨੇਤਰਹੀਣ ਮੁਲਾਜ਼ਮਾਂ ਨੂੰ ਬਾਕੀਆਂ ਤੋਂ ਦੋ ਸਾਲ ਵੱਧ ਨੌਕਰੀ ਕਰਨ ਦੀ (60 ਸਾਲ ਤੱਕ) ਸਹੂਲਤ ਦੇ ਦਿੱਤੀ ਜਦਕਿ ਬਾਕੀ ਸਾਰਿਆਂ ਦੀ ਸੇਵਾ ਮੁਕਤੀ ਦੀ ਉਮਰ 58 ਸਾਲ ਹੀ ਰੱਖੀ ਗਈ।
ਕੁਝ ਮੁਲਾਜ਼ਮਾਂ ਨੇ ਬਾਦਲ ਸਰਕਾਰ ਦੇ ਸਹੂਲਤਾਂ ਵੰਡਣ ਵਾਲੇ ਇਸ ਨੋਟੀਫਿਕੇਸ਼ਨ ਨੂੰ ਮਾਨਯੋਗ ਹਾਈਕੋਰਟ ਵਿਚ ਸੰਨ 2010 ਵਿਚ ਚੁਣੌਤੀ ਦਿੱਤੀ, ਮਾਨਯੋਗ ਹਾਈਕੋਰਟ ਨੇ ਨਵੇਂ ਅਤੇ ਪੁਰਾਣੇ ਨੋਟੀਫਿਕੇਸ਼ਨ ਦੀ ਪੂਰੀ ਤਰ੍ਹਾਂ ਜਾਂਚ ਕਰਨ ਤੋਂ ਬਾਅਦ ਸਰਕਾਰ ਨੂੰ ਹੁਕਮ ਕੀਤਾ ਕਿ ਸਾਰੇ ਅੰਗਹੀਣ ਮੁਲਾਜ਼ਮਾਂ ਦੀ ਸੇਵਾ ਨਵਿਰਤੀ ਦੀ ਉਮਰ ਨੇਤਰਹੀਣ ਮੁਲਾਜ਼ਮਾਂ ਦੇ ਬਰਾਬਰ ਭਾਵ 60 ਸਾਲ ਕੀਤੀ ਜਾਵੇ ਪਰ ਅਜਿਹਾ ਨਹੀਂ ਹੋਇਆ ਸਗੋਂ ਸਰਕਾਰ ਨੇ ਸੁਪਰੀਮ ਕੋਰਟ ਵਿਚ ਅਪੀਲ ਕਰ ਦਿੱਤੀ। ਇਸ ਸਮੇਂ ਭਾਵੇਂ ਸਰਕਾਰ ਸਾਰੇ ਮੁਲਾਜ਼ਮਾਂ ਨੂੰ ਆਪਸ਼ਨ ਦੇ ਆਧਾਰ 'ਤੇ ਦੋ ਸਾਲ ਵੱਧ ਨੌਕਰੀ ਕਰਨ ਦਾ ਮੌਕਾ ਦੇ ਰਹੀ ਹੈ ਪਰ ਅੰਗਹੀਣ ਮੁਲਾਜ਼ਮਾਂ ਨੂੰ ਨੇਤਰਹੀਣਾਂ ਦੀ ਤਰ੍ਹਾਂ ਦੋ ਸਾਲ ਦੇਣ ਨੂੰ ਤਿਆਰ ਨਹੀਂ। ਸਰਕਾਰ ਵੱਲੋਂ ਅੰਗਹੀਣ ਭੱਤਾ ਦਿੱਤਾ ਜਾਂਦਾ ਹੈ ਉਹ ਸਿਰਫ਼ ਕਲਰਕਾਂ ਨੂੰ ਦਿੱਤਾ ਜਾਂਦਾ ਹੈ, ਬਾਕੀਆਂ ਨੂੰ ਨਹੀਂ। ਉਹ ਵੀ ਰਿਟਾਇਰ ਹੋਣ 'ਤੇ ਬੰਦ ਕਰ ਦਿੱਤਾ ਜਾਂਦਾ ਹੈ। ਕੀ ਉਹ ਮੁਲਾਜ਼ਮ ਰਿਟਾਇਰ ਹੋ ਕੇ ਅੰਗਹੀਣ ਨਹੀਂ ਰਹਿੰਦਾ? ਸਰਕਾਰ ਨੂੰ ਚਾਹੀਦਾ ਹੈ ਕਿ ਇਹ ਵਿਤਕਰਾ ਬੰਦ ਕੀਤਾ ਜਾਵੇ।

-ਕਸ਼ਮੀਰਾ ਸਿੰਘ ਬੂਥਗੜ੍ਹ
ਹੁਸ਼ਿਆਰਪੁਰ। ਮੋਬਾਈਲ : 94636-73232.

ਸਿਹਤ ਸਹੂਲਤਾਂ ਦਾ ਸਵਾਲ
ਸੰਵਿਧਾਨ ਦੁਆਰਾ ਦੇਸ਼ ਦੇ ਨਾਗਰਿਕਾਂ ਲਈ ਦਿੱਤੇ ਗਏ ਅਧਿਕਾਰ ਅਤੇ ਫਰਜ਼ ਭੁਲਾਏ ਨਹੀਂ ਜਾ ਸਕਦੇ। ਦੇਸ਼ ਦੀ ਆਜ਼ਾਦੀ ਪ੍ਰਾਪਤੀ ਦੇ ਬਾਅਦ ਹੌਲੀ-ਹੌਲੀ ਦੇਸ਼ ਭਗਤੀ ਦਾ ਜਜ਼ਬਾ ਖਤਮ ਹੋਣ ਲੱਗਾ। ਦੇਸ਼ ਸੇਵਾ ਦੀ ਬਜਾਏ ਆਪਣਿਆਂ ਦੀ ਸੇਵਾ ਦੇਸ਼ ਦੇ ਸਿਆਸਤਦਾਨਾਂ ਦਾ ਨਜ਼ਰੀਆ ਬਣ ਗਿਆ। ਹਰ ਪੇਸ਼ੇ ਵਿਚ ਉੱਚ ਅਹੁਦਿਆਂ ਲਈ ਰਿਸ਼ਵਤ ਸਮਾਜ ਦਾ ਇਕ ਹਿੱਸਾ ਬਣ ਗਈ। ਬਹੁਤ ਹੀ ਪਵਿੱਤਰ ਪੇਸ਼ਾ ਡਾਕਟਰੀ ਵੀ ਅਛੂਤਾ ਨਾ ਰਿਹਾ। ਡਾਕਟਰ ਨੂੰ ਭਗਵਾਨ ਦਾ ਰੂਪ ਮੰਨਿਆ ਗਿਆ ਹੈ ਪ੍ਰੰਤੂ ਅੱਜ ਦੇ ਬਹੁਤੇ ਡਾਕਟਰ ਇਹ ਰੁਤਬਾ ਗਵਾ ਬੈਠਏ ਹਨ। ਲੋਕਾਂ ਦੀ ਸਿਹਤ ਨਾਲ ਖਿਲਵਾੜ ਹੋ ਰਿਹਾ ਹੈ। ਗਰੀਬ ਤੇ ਅਨਪੜ੍ਹ ਜਨਤਾ ਬਿਨਾਂ ਇਲਾਜ ਤੋਂ ਦਮ ਤੋੜ ਰਹੀ ਹੈ। ਪਿਛੇ ਜਿਹੇ ਇਕ ਟੀ.ਵੀ. ਚੈਨਲ ਨੇ ਸਟਿੰਗ ਆਪ੍ਰੇਸ਼ਨ ਕਰਕੇ ਇਹ ਦੱਸ ਦਿੱਤਾ ਸੀ ਕਿ ਦਿੱਲੀ ਵਿਚ ਚੋਟੀ ਦੇ ਡਾਕਟਰ ਕੰਪਨੀਆਂ ਪਾਸੋਂ 5000 ਰੁਪਏ ਤੇ ਲੈਪਟਾਪ ਸ਼ਰੇਆਮ ਰਿਸ਼ਵਤ ਮੰਗ ਰਹੇ ਸਨ। ਆਜ਼ਾਦੀ ਦੇ 68 ਸਾਲਾਂ ਬਾਅਦ ਵੀ ਸਿਹਤ ਸਹੂਲਤਾਂ ਸਾਧਾਰਨ ਨਾਗਰਿਕ ਤੋਂ ਬਹੁਤ ਦੂਰ ਹਨ ਕਿ ਦੇਸ਼ ਦਾ ਨਵਾਂ ਨਿਜ਼ਾਮ ਇਸ ਪਵਿੱਤਰ ਪੇਸ਼ੇ ਵਿਚ ਫੈਲੇ ਭ੍ਰਿਸ਼ਟਾਚਾਰ ਨੂੰ ਦੂਰ ਕਰਨ ਲਈ ਕੁਝ ਕਰ ਸਕੇਗਾ ਤਾਂ ਜੋ ਹਰ ਭਾਰਤੀ ਦੇ ਅੱਛੇ ਦਿਨ ਵਾਪਸ ਆ ਜਾਣ।

-ਕੇ. ਐਸ. ਅਮਰ
ਮੋਬਾਈਲ : 94175-87207.

ਅਧਿਆਪਕਾਂ ਦਾ ਸਨਮਾਨ
ਅਧਿਆਪਕ ਕੌਮ ਦੇ ਉਸਰੱਈਏ ਹੁੰਦੇ ਹਨ। ਅੱਜ ਜੋ ਸਾਡੇ ਦੇਸ਼ ਦੀ ਸੇਵਾ ਵਿਚ ਜੁਟੇ ਫ਼ੌਜੀ ਅਫਸਰ, ਯੂਨੀਵਰਸਿਟੀਆਂ ਵਿਚ ਉੱਚ ਸਿੱਖਿਆ ਦਿੰਦੇ ਅਧਿਆਪਕ, ਵੱਖ-ਵੱਖ ਖੇਤਰਾਂ ਵਿਚ ਆਪਣੀ ਅਹਿਮ ਭੂਮਿਕਾ ਨਿਭਾਉਂਦੇ ਲੋਕ, ਆਦਰਸ਼ ਅਧਿਆਪਕਾਂ ਦੀ ਹੀ ਦੇਣ ਹਨ। ਅਧਿਆਪਕ ਦਾ ਦਰਜਾ ਸਮਾਜ ਵਿਚ ਸਭ ਤੋਂ ਉੱਚਾ ਗਿਣਿਆ ਜਾਂਦਾ ਹੈ। ਜੇ ਅੱਜ ਵਿਦਿਆਰਥੀਆਂ ਵਿਚ ਪਹਿਲਾਂ ਵਾਲੀ ਅਧਿਆਪਕਾਂ ਪ੍ਰਤੀ ਸਨਮਾਨ ਦੀ ਸਥਿਤੀ ਨਹੀਂ ਹੈ ਤਾਂ ਇਹ ਸੋਚਣ ਵਾਲੀ ਗੱਲ ਹੈ। ਅੱਜ ਦੇ ਅਧਿਆਪਕਾਂ ਨੂੰ ਵੀ ਸਨਮਾਨਿਤ ਅਧਿਆਪਕਾਂ ਦੇ ਜੀਵਨ ਤੋਂ ਪ੍ਰੇਰਨਾ ਲੈ ਕੇ ਸਮਾਜ ਨੂੰ ਆਪਣੀ ਵਿਦਵਤਾ ਰਾਹੀਂ ਹੋਰ ਸੁੰਦਰ ਬਣਾਉਣ ਦੇ ਯਤਨ ਕਰਨੇ ਚਾਹੀਦੇ ਹਨ। ਪਿੰਡਾਂ ਦੇ ਲੋਕਾਂ ਨੂੰ ਵੀ ਚਾਹੀਦਾ ਹੈ ਕਿ ਉਹ ਆਪਣੀ ਪੱਧਰ 'ਤੇ ਚੰਗੇ ਅਧਿਆਪਕਾਂ ਦਾ ਇਸ ਦਿਵਸ 'ਤੇ ਸਨਮਾਨ ਕਰਨ।

-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।

ਪੁਸਤਕ ਸੱਭਿਆਚਾਰ
ਟੈਲੀਵਿਜ਼ਨ 'ਤੇ ਇੰਟਰਨੈੱਟ ਜਿਹੇ ਵਸੀਲਿਆਂ ਨੇ ਸਾਡੀ ਨੌਜਵਾਨ ਪੀੜ੍ਹੀ ਨੂੰ ਅਨੇਕਾਂ ਮਾਰੂ ਬੁਰਾਈਆਂ ਵੱਲ ਧਕੇਲ ਦਿੱਤਾ ਹੈ। ਅਜਿਹੇ ਖਤਰਨਾਕ ਮੋੜ 'ਤੇ ਨੌਜਵਾਨ ਵਰਗ ਨੂੰ ਉਸਾਰੂ ਸੇਧ ਦੇਣ ਅਤੇ ਉਨ੍ਹਾਂ ਵਿਚ ਨਰੋਈਆਂ ਕਦਰਾਂ-ਕੀਮਤਾਂ ਦੀ ਸੋਝੀ ਪੈਦਾ ਕਰਨ ਲਈ ਉਨ੍ਹਾਂ ਦਾ ਚੰਗੀਆਂ ਕਿਤਾਬਾਂ ਨਾਲ ਲਗਾਓ ਪੈਦਾ ਕਰਨਾ ਅਜੋਕੇ ਸਮੇਂ 'ਚ ਬੇਹੱਦ ਜ਼ਰੂਰੀ ਹੈ। ਸਾਹਿਤਕ ਜਾਂ ਚੰਗੀਆਂ ਪੁਸਤਕਾਂ ਮਨੁੱਖ ਦੀ ਜ਼ਿੰਦਗੀ ਦਾ ਰਾਹ ਦਸੇਰਾ ਬਣਦੀਆਂ ਹਨ। ਸੋ, ਪੁਸਤਕ ਸੱਭਿਆਚਾਰ ਨੂੰ ਵਿਕਸਤ ਕਰਨਾ ਸਮੇਂ ਦੀ ਵੱਡੀ ਲੋੜ ਹੈ। ਉਸਾਰੂ ਸਾਹਿਤ ਪੜ੍ਹਨ ਨਾਲ ਜਿਥੇ ਬੱਚਿਆਂ, ਨੌਜਵਾਨਾਂ ਦਾ ਚੰਗਾ ਚਰਿੱਤਰ ਨਿਰਮਾਣ ਹੋ ਸਕਦਾ ਹੈ, ਉਥੇ ਚੰਗੇ ਤੇ ਨਰੋਏ ਸਮਾਜ ਦੀ ਸਿਰਜਣਾ ਵੀ ਹੋਵੇਗੀ। ਲੇਖਕਾਂ, ਸਾਹਿਤਕਾਰਾਂ, ਅਧਿਆਪਕਾਂ ਤੇ ਸਮਾਜ ਪ੍ਰਤੀ ਚਿੰਤਤ ਲੋਕਾਂ ਨੂੰ ਨੌਜਵਾਨ ਵਰਗ ਨੂੰ ਉਸਾਰੂ ਸਾਹਿਤ ਪੜ੍ਹਨ ਲਈ ਰੁਚਿਤ ਕਰਨ ਲਈ ਵੱਡੇ ਯਤਨ ਕਰਨੇ ਚਾਹੀਦੇ ਹਨ।

-ਯਸ਼ ਪੱਤੋ
ਪਿੰਡ ਪੱਤੋ ਹੀਰਾ ਸਿੰਘ (ਮੋਗਾ)।

12-9-2014

 ਵਿਤਕਰਾ ਕਿਉਂ?

ਪੰਜਾਬ ਸਰਕਾਰ ਵੱਲੋਂ ਰੈਗੂਲਰ ਸਰਵਿਸ ਕਰਨ ਵਾਲੀਆਂ ਮਹਿਲਾ ਕਰਮਚਾਰੀਆਂ ਨੂੰ 6 ਮਹੀਨੇ ਦੀ ਤਨਖਾਹ ਸਮੇਤ ਪ੍ਰਸੂਤਾ ਛੁੱਟੀ ਦਿੱਤੀ ਜਾਂਦੀ ਹੈ ਪਰ ਠੇਕਾ ਭਰਤੀ ਅਧੀਨ ਕੰਮ ਕਰਨ ਵਾਲੀਆਂ ਮਹਿਲਾ ਕਰਮਚਾਰੀਆਂ ਨਾਲ ਵਿਤਕਰਾ ਕਰਦੇ ਮਾਂ ਬਣਨ ਸਮੇਂ ਸਰਵਿਸ ਦੌਰਾਨ ਮਿਲਣ ਵਾਲੀਆਂ ਸਹੂਲਤਾਂ ਵਿਚ ਵੀ ਫ਼ਰਕ ਰੱਖਿਆ ਜਾ ਰਿਹਾ ਹੈ। ਸਰਵ ਸਿੱਖਿਆ ਅਭਿਆਨ/ਰਮਸਾ ਅਧੀਨ ਕੰਮ ਕਰਨ ਵਾਲੀਆਂ ਦਫ਼ਤਰੀ ਮਹਿਲਾ ਕਰਮਚਾਰੀਆਂ, ਅਧਿਆਪਕਾਵਾਂ, ਸਿੱਖਿਆ ਪ੍ਰੋਵਾਈਡਰ, ਮਿਡ-ਡੇ-ਮੀਲ ਸਕੀਮ ਅਧੀਨ ਕੰਮ ਕਰਨ ਵਾਲੀਆਂ ਮਹਿਲਾ ਕਰਮਚਾਰੀਆਂ ਅਤੇ ਕੰਪਿਊਟਰ ਅਧਿਆਪਕਾਵਾਂ ਨੂੰ ਸਿਰਫ 3 ਮਹੀਨੇ ਦੀ ਪ੍ਰਸੂਤਾ ਛੁੱਟੀ ਦਿੱਤੀ ਜਾ ਰਹੀ ਹੈ। ਰੈਗੂਲਰ ਅਤੇ ਠੇਕਾ ਭਰਤੀ ਦੇ ਨਾਂਅ 'ਤੇ ਮਾਵਾਂ ਅਤੇ ਉਨ੍ਹਾਂ ਦੇ ਬੱਚਿਆਂ ਨਾਲ ਵਿਤਕਰਾ ਕਿਉਂ? ਇਥੇ ਇਹ ਵੀ ਜ਼ਿਕਰਯੋਗ ਹੈ ਕਿ ਪਿੱਛੇ ਜਿਹੇ ਸਰਵ ਸਿੱਖਿਆ ਅਧੀਨ ਕੰਮ ਕਰਦੀ ਇਕ ਅਧਿਆਪਕਾ ਨੇ ਆਪਣੇ ਵਕੀਲ ਰਾਹੀਂ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਵਿਚ ਪੰਜਾਬ ਸਰਕਾਰ ਅਤੇ ਹੋਰਨਾਂ ਖਿਲਾਫ਼ ਇਸ ਸਬੰਧੀ ਪਟੀਸ਼ਨ ਦਾਇਰ ਕੀਤੀ ਸੀ। ਅਧਿਆਪਕਾ ਵੱਲੋਂ ਆਪਣੀ ਪ੍ਰਸੂਤਾ ਛੁੱਟੀ ਵਿਚ ਵਾਧੇ ਦੀ ਮੰਗ ਕੀਤੀ ਗਈ ਸੀ, ਜਿਸ ਨੂੰ ਵਿਭਾਗ ਵੱਲੋਂ ਇਹ ਕਹਿ ਕੇ ਖਾਰਜ ਕਰ ਦਿੱਤਾ ਗਿਆ ਸੀ ਕਿ ਸਰਵ ਸਿੱਖਿਆ ਅਭਿਆਨ ਅਧੀਨ ਨਿਯੁਕਤ ਹੋਏ ਮੁਲਾਜ਼ਮਾਂ ਤੇ ਪੰਜਾਬ ਸਿਵਲ ਸਰਵਿਸਿਜ਼ ਨਿਯਮ ਲਾਗੂ ਨਹੀਂ ਹੁੰਦੇ। ਅਦਾਲਤ ਨੇ ਇਸ ਵਿਤਕਰੇ ਦਾ ਗੰਭੀਰ ਨੋਟਿਸ ਲੈਂਦਿਆਂ ਕਿਹਾ ਸੀ ਕਿ ਸਰਵ ਸਿੱਖਿਆ ਅਭਿਆਨ ਅਥਾਰਟੀ ਵੀ ਪੰਜਾਬ ਸਰਕਾਰ ਅਧੀਨ ਹੀ ਕੰਮ ਕਰਦੀ ਹੈ। ਇਸ ਲਈ ਮਹਿਲਾ ਮੁਲਾਜ਼ਮਾਂ ਨੂੰ 6 ਮਹੀਨੇ ਦੀ ਪ੍ਰਸੂਤਾ ਛੁੱਟੀ ਦਿੱਤੀ ਜਾਵੇ। ਪਰ ਵਿਭਾਗ ਵੱਲੋਂ ਸਿਰਫ ਪਟੀਸ਼ਨ ਕਰਤਾ ਨੂੰ ਹੀ 6 ਮਹੀਨੇ ਦੀ ਛੁੱਟੀ ਦਿੱਤੀ ਗਈ। ਪੰਜਾਬ ਸਰਕਾਰ ਨੂੰ ਚਾਹੀਦਾ ਹੈ ਕਿ ਉਹ ਇਨ੍ਹਾਂ ਸਾਰੇ ਠੇਕਾ ਭਰਤੀ ਅਧੀਨ ਕੰਮ ਕਰਨ ਵਾਲੀਆਂ ਮਹਿਲਾ ਕਰਮਚਾਰੀਆਂ ਨੂੰ ਬਿਨਾਂ ਕਿਸੇ ਵਿਤਕਰੇ ਦੇ ਰੈਗੂਲਰ ਮਹਿਲਾ ਕਰਮਚਾਰੀਆਂ ਵਾਂਗ 6 ਮਹੀਨੇ ਦੀ ਪ੍ਰਸੂਤਾ ਛੁੱਟੀ ਦੇਵੇ।

-ਹਰਮੀਤ ਕੌਰ ਸੈਣੀ
harmeetsaini76@gmail.com

ਲੋਕਤੰਤਰੀ ਰਵਾਇਤਾਂ

ਵਿਰੋਧ ਲੋਕਤੰਤਰ ਦਾ ਧੁਰਾ ਹੈ। ਬਿਨਾਂ ਵਿਰੋਧੀ ਪੱਖ ਤੋਂ ਲੋਕਰਾਜ ਦੀ ਕਲਪਨਾ ਵੀ ਨਹੀਂ ਕੀਤੀ ਜਾ ਸਕਦੀ, ਕਿਉਂਕਿ ਬਿਨਾਂ ਇਸ ਦੇ ਲੋਕਤੰਤਰ ਤਾਨਾਸ਼ਾਹੀ ਤੋਂ ਵੀ ਭੈੜਾ ਹੋ ਜਾਵੇਗਾ। ਇਸ ਲਈ ਹਰਿਆਣਾ ਤੇ ਝਾਰਖੰਡ ਵਿਚ ਸਰਕਾਰੀ ਸਮਾਰੋਹ ਦੇ ਮੌਕੇ ਪ੍ਰਧਾਨ ਮੰਤਰੀ ਦੀ ਮੌਜੂਦਗੀ 'ਚ ਵਿਰੋਧੀ ਧਿਰ ਦੇ ਮੁੱਖ ਮੰਤਰੀਆਂ ਪ੍ਰਤੀ ਹੂਟਿੰਗ ਕਰਨੀ ਕਿਸੇ ਵੀ ਤਰ੍ਹਾਂ ਜਾਇਜ਼ ਨਹੀਂ ਹੋ ਸਕਦੀ। ਸਗੋਂ ਅਜਿਹੇ ਮੌਕੇઠ'ਤੇ ਵਿਰੋਧੀ ਪਾਰਟੀਆਂ ਨੂੰ ਵਧ ਸਨਮਾਨ ਦੇ ਕੇ ਲੋਕਤੰਤਰ ਦੀ ਪਰੰਪਰਾ ਨੂੰ ਮਜ਼ਬੂਤੀ ਦੇਣੀ ਚਾਹੀਦੀ ਹੈ। ਭਾਰਤ ਵਿਚ ਲੋਕਤੰਤਰ ਦੀ ਵੇਲ ਵੱਧ-ਫੁੱਲ ਰਹੀ ਹੈ, ਕਿਉਕਿ ਇਥੇ ਮਜ਼ਬੂਤ ਤੇ ਪਰਪੱਕ ਵਿਰੋਧੀ ਧਿਰ ਹਮੇਸ਼ਾ ਲੋਕ ਭਾਵਨਾਵਾਂ ਦੀ ਕਦਰ ਕਰਦੀ ਰਹੀ ਹੈ। ਇਹ ਤਾਂ ਭਾਰਤ ਦੇ ਲੋਕਾਂ ਦੀ ਖੁਸ਼ਕਿਸਮਤੀ ਹੈ ਕਿ ਇਥੇ ਸਾਡੇ ਲੋਕਰਾਜ ਦੀ ਇਕ ਵਧੀਆ ਤੇ ਪੱਕੀ ਇਮਾਰਤ ਤਿਆਰ ਹੋ ਚੁੱਕੀ ਹੈ, ਜਿਸ ਦੀਆਂ ਜੜ੍ਹਾਂ 'ਚ ਲੋਕਾਂ ਦਾ ਖੂਨ-ਪਸੀਨਾ ਲੱਗਾ ਹੈ ਤੇ ਇਸ ਦਾ ਸਾਰਾ ਖਾਕਾ ਸਾਡੇ ਸ਼ਹੀਦਾਂ ਨੇ ਤਿਆਰ ਕੀਤਾ ਸੀ। ਇਸ ਲਈ ਇਸ ਦੀ ਰਾਖੀ ਕਰਨੀ ਸਾਡਾ ਸਭ ਦਾ ਫ਼ਰਜ਼ ਹੈ। ਹੁਣ ਜੋ ਇਸ ਵੇਲੇ ਸੱਤਾ ਉੱਪਰ ਹਨ, ਇਨ੍ਹਾਂ ਲੋਕਾਂ ਨੇ ਹੀ ਪਹਿਲਾਂ ਦੇਸ਼ ਵਿਚ ਸ਼ਾਨਦਾਰ ਵਿਰੋਧੀ ਧਿਰ ਦੀਆ ਰਵਾਇਤਾਂ ਕਾਇਮ ਕੀਤੀਆਂ ਸਨ ਤੇ ਹੁਣ ਇਨ੍ਹਾਂ ਦੀ ਹੀ ਜ਼ਿੰਮੇਵਾਰੀ ਹੈ ਕਿ ਇਸ ਰਵਾਇਤ ਦੀ ਰੱਖਿਆ ਵੀ ਕੀਤੀ ਜਾਵੇ।

-ਵਿਵੇਕ
ਕੋਟ ਈਸੇ ਖਾਂ (ਮੋਗਾ)।

ਮੰਦਭਾਗਾ ਕਾਰਾ

ਬਿਨਾਂ ਸ਼ੱਕ ਲੋਕਤੰਤਰੀ ਸਰਕਾਰ ਲੋਕਾਂ ਦੀ, ਲੋਕਾਂ ਲਈ, ਲੋਕਾਂ ਦੁਆਰਾ ਚੁਣੀ ਸਰਕਾਰ ਹੁੰਦੀ ਹੈ। ਲੋਕਤੰਤਰੀ ਦੇਸ਼ਾਂ ਵਿਚ ਲੋਕਾਂ ਨੂੰ ਆਪਣੇ ਵਿਚਾਰ, ਆਪਣਾ ਰੋਸ ਪ੍ਰਗਟ ਕਰਨ ਦਾ ਅਧਿਕਾਰ ਪ੍ਰਾਪਤ ਹੁੰਦਾ ਹੈ। ਪਰ ਪਿਛਲੇ ਦਿਨੀਂ ਖੰਨਾ ਨੇੜੇ ਈਸੜੂ ਵਿਖੇ ਗੋਆ ਦੇ ਮਹਾਨ ਸ਼ਹੀਦ ਸ: ਕਰਨੈਲ ਸਿੰਘ ਈਸੜੂ ਦੇ ਸ਼ਰਧਾਂਜਲੀ ਸਮਾਗਮ 'ਚ ਇਕ ਨੌਜਵਾਨ ਵੱਲੋਂ ਸਟੇਜ 'ਤੇ ਲੋਕਾਂ ਨੂੰ ਸੰਬੋਧਨ ਕਰ ਰਹੇ ਪੰਜਾਬ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਵੱਲ ਜੁੱਤੀ ਸੁੱਟਣਾ ਬੇਹੱਦ ਮੰਦਭਾਗਾ ਕਾਰਾ ਹੈ। ਇਸ ਦੀ ਜਿੰਨੀ ਵੀ ਨਿੰਦਾ ਕੀਤੀ ਜਾਵੇ, ਥੋੜ੍ਹੀ ਹੈ। ਇਸ ਕਾਰੇ ਦਾ ਮੁੱਖ ਕਾਰਨ ਭਾਵੇਂ ਨੌਜਵਾਨ ਵੱਲੋਂ ਸਰਕਾਰ ਦੀਆਂ ਗ਼ਲਤ ਨੀਤੀਆਂ ਤੇ ਵਾਅਦਿਆਂ-ਦਾਅਵਿਆਂ ਦਾ ਵਫ਼ਾ ਨਾ ਹੋਣ ਪ੍ਰਤੀ ਡਾਢਾ ਰੋਸ ਸੀ। ਪਰ ਇਸ ਰੋਸ ਨੂੰ ਹੋਰ ਤਰੀਕਿਆਂ ਨਾਲ ਵੀ ਪ੍ਰਗਟ ਕੀਤਾ ਜਾ ਸਕਦਾ ਸੀ। ਪੰਜਾਬ ਗੁਰੂਆਂ, ਪੀਰਾਂ, ਪੈਗੰਬਰਾਂ ਦੀ ਧਰਤੀ ਹੈ। ਇਸ ਧਰਤੀ 'ਤੇ ਅਜਿਹਾ ਕਾਰਨਾਮਾ ਹੋਣਾ ਬੇਹੱਦ ਸ਼ਰਮਨਾਕ ਹੈ।

-ਰਾਜੇਸ਼ ਛਾਬੜਾ
ਪਿੰਡ ਤੇ ਡਾਕ: ਧਿਆਨਪੁਰ (ਬਟਾਲਾ)।

11-9-2014

 ਰੁਜ਼ਗਾਰ ਦਫ਼ਤਰ
ਅਕਸਰ ਹੀ ਅਸੀਂ ਆਖ ਦਿੰਦੇ ਹਾਂ ਕਿ ਦਸਵੀਂ ਜਾਂ ਬਾਰ੍ਹਵੀਂ ਪਾਸ ਵਿਦਿਆਰਥੀ ਰੁਜ਼ਗਾਰ ਦਫ਼ਤਰਾਂ ਵਿਚ ਆਪਣਾ ਨਾਂਅ ਦਰਜ ਕਰਵਾ ਦਿਓ, ਨੌਕਰੀ ਮਿਲ ਜਾਵੇਗੀ, ਕਿੰਨੀ ਹਾਸੋਹੀਣੀ ਗੱਲ ਜਾਪਦੀ ਹੈ। ਹੁਣ ਰੁਜ਼ਗਾਰ ਦਫ਼ਤਰਾਂ ਵਿਚ ਨਾਂਅ ਦਰਜ ਕਰਾਉਣਾ ਖੂਹ 'ਚ ਇੱਟ ਸੁੱਟਣ ਬਰਾਬਰ ਹੈ ਕਿਉਂਕਿ ਰੁਜ਼ਗਾਰ ਦੇਣਾ ਤਾਂ ਦੂਰ, ਯੋਗ ਉਮੀਦਵਾਰਾਂ ਨੂੰ ਬੇਕਾਰੀ ਭੱਤਾ ਵੀ ਨਹੀਂ ਮਿਲਦਾ। ਕੀ ਫਾਇਦਾ ਅਜਿਹੇ ਦਫ਼ਤਰਾਂ ਦਾ, ਜਿਥੇ ਸਰਟੀਫਿਕੇਟਾਂ ਦੀਆਂ ਫੋਟੋ ਕਾਪੀਆਂ ਦੇ ਅੰਬਾਰ ਲੱਗੇ ਹੋਣ। ਉਮੀਦਵਾਰ ਆਪਣਾ ਕਾਰਡ ਆਏ ਸਾਲ ਰੀਨਿਊ ਕਰਵਾ ਕੇ ਇਨ੍ਹਾਂ ਦਫ਼ਤਰਾਂ 'ਚੋਂ ਰੁਜ਼ਗਾਰ ਭਾਲਦੇ ਦਾੜ੍ਹੀਆਂ ਚਿੱਟੀਆਂ ਕਰ ਬੈਠੇ ਪਰ ਸਰਕਾਰ ਦੇ ਕੰਨ 'ਤੇ ਜੂੰ ਨਹੀਂ ਸਰਕੀ। ਸਰਕਾਰ ਘੱਟੋ-ਘੱਟ ਇਨ੍ਹਾਂ ਫੋਟੋ ਕਾਪੀਆਂ ਨੂੰ ਛਾਂਟੀ ਕਰ ਦਫ਼ਤਰ ਤਾਂ ਖਾਲੀ ਕਰ ਦੇਵੇ ਤਾਂ ਕਿ ਆਏ ਸਾਲ ਗੇੜੇ ਮਾਰ ਟਾਈਮ ਖਰਾਬ ਕਰਨ ਨਾਲੋਂ ਕੋਈ ਹੋਰ ਵਸੀਲਾ ਕਰਨ। ਬੇਰੁਜ਼ਗਾਰੀ ਦੀ ਵਧਦੀ ਗਿਣਤੀ ਅੱਗੇ ਰੁਜ਼ਗਾਰ ਦਫ਼ਤਰਾਂ ਦੀ ਕੋਈ ਅਹਿਮ ਭੂਮਿਕਾ ਨਹੀਂ ਜਾਪਦੀ। ਸਰਕਾਰ ਨੂੰ ਇਸ ਬੇਰੁਜ਼ਗਾਰੀ ਨਾਲ ਨਜਿੱਠਣ ਲਈ ਕੋਈ ਪੁਖਤਾ ਇੰਤਜ਼ਾਮ ਕਰਕੇ ਤਿੰਨ ਸਾਲ ਤੋਂ ਵੱਧ ਨਾਂਅ ਦਰਜ ਉਮੀਦਵਾਰਾਂ ਨੂੰ ਠੋਸ ਜਵਾਬ ਦੇ ਕੇ ਦਫ਼ਤਰੀ ਚੱਕਰਾਂ ਤੋਂ ਨਿਜਾਤ ਦਿਵਾਉਣੀ ਚਾਹੀਦੀ ਹੈ।

-ਜਸਬੀਰ ਦੱਧਾਹੂਰ
ਪਿੰਡ ਤੇ ਡਾਕ: ਦੱਧਾਹੂਰ, ਤਹਿ: ਰਾਏਕੋਟ, ਜ਼ਿਲ੍ਹਾ ਲੁਧਿਆਣਾ।

ਸ਼ਾਂਤੀ ਬਨਾਮ ਕ੍ਰੋਧ
ਸਿਆਣਿਆਂ ਦੇ ਕਥਨ ਅਨੁਸਾਰ ਕਿ ਜਿਸ ਘਰ ਦੇ ਪਰਿਵਾਰਕ ਮੈਂਬਰ ਸਹਿਣਸ਼ੀਲਤਾ ਨੂੰ ਮੁੱਖ ਰੱਖ ਕੇ ਏਕਤਾ ਦੇ ਬਲਬੂਤੇ 'ਤੇ ਮਿਲਜੁਲ ਕੇ ਰਹਿੰਦੇ ਹਨ, ਉਸ ਘਰ ਵਿਚ ਹਮੇਸ਼ਾ ਸ਼ਾਂਤੀ ਪਸਰੀ ਰਹਿੰਦੀ ਹੈ ਅਤੇ ਉਸ ਘਰ ਦੇ ਪਰਿਵਾਰਕ ਮੈਂਬਰ ਖੁਸ਼ੀਆਂ ਦੇ ਸਮੁੰਦਰ ਵਿਚ ਡੁਬਕੀਆਂ ਲਗਾਉਂਦੇ ਹੋਏ ਦਿਨ ਬਤੀਤ ਕਰਦੇ ਹਨ। ਜਿਥੇ ਕੁਦਰਤ ਵੱਲੋਂ ਮਨੁੱਖ ਨੂੰ ਸ਼ਾਂਤੀ ਦੀ ਬਖਸ਼ਿਸ਼ ਹੋਈ, ਉਥੇ ਕ੍ਰੋਧ ਵੀ ਕੁਦਰਤ ਦੀ ਹੀ ਦੇਣ ਹੈ। ਪਰ ਭੰਗ ਹੋ ਚੁੱਕੀ ਸ਼ਾਂਤੀ ਦਾ ਨਾਂਅ ਕ੍ਰੋਧ ਹੈ ਭਾਵ ਜਦੋਂ ਸ਼ਾਂਤੀ ਭੰਗ ਹੋ ਗਈ ਤਾਂ ਕ੍ਰੋਧ ਜਨਮ ਲੈ ਲੈਂਦਾ ਹੈ। ਕ੍ਰੋਧ ਗੁਆ ਕੇ ਹੀ ਇਨਸਾਨ ਸ਼ਾਂਤੀ ਪਾ ਸਕਦਾ ਹੈ ਅਤੇ ਕ੍ਰੋਧ ਦਾ ਅਤਿ ਹੋਣ 'ਤੇ ਹੀ ਸ਼ਾਂਤੀ ਜਨਮ ਲੈਂਦੀ ਹੈ। ਭਾਵੇਂ ਅੱਜ ਇਨਸਾਨ ਬਹੁਤ ਮਤਲਬੀ ਅਤੇ ਮੌਕਾਪ੍ਰਸਤ ਹੋ ਗਿਆ ਹੈ ਅਤੇ ਆਪਣੇ ਨਿੱਜ ਨਾਲ ਜੁੜ ਗਿਆ ਹੈ ਪਰ ਸਾਡੇ ਸਾਰਿਆਂ ਦੇ ਵਡੇਰਿਆਂ ਨੇ ਦੇਸ਼ ਦੀ ਸ਼ਾਂਤੀ ਲਈ ਆਪਣਾ ਬਹੁਤ ਕੁਝ ਗੁਆਇਆ ਹੈ ਨਾ ਕਿ ਖ਼ੁਦਗਰਜ਼ ਸੋਚਾਂ ਲਈ।

-ਸੁਖਵਿੰਦਰ ਕਲੇਰ ਬੱਸੀਆਂ
ਪਿੰਡ ਤੇ ਡਾਕ: ਬੱਸੀਆਂ, ਜ਼ਿਲ੍ਹਾ ਲੁਧਿਆਣਾ।

ਐਮ.ਪੀ. ਬਨਾਮ ਟੀ.ਈ.ਟੀ. ਟੈਸਟ
ਕੇਂਦਰ ਵਿਚ ਕਾਂਗਰਸ ਸਰਕਾਰ ਨੇ ਵਿੱਦਿਆ ਦਾ ਚਾਨਣ ਵੰਡਣ ਵਾਲਿਆਂ ਲਈ ਇਕ ਮਤਾ ਪਾਸ ਕਰਕੇ ਲੱਖਾਂ ਅਧਿਆਪਕਾਂ ਨੂੰ ਬੇਰੁਜ਼ਗਾਰ ਕਰਨ ਦਾ ਕੱਢਿਆ ਰਾਹ ਆਖਰ ਉਨ੍ਹਾਂ ਉੱਪਰ ਹੀ ਭਾਰੂ ਹੋ ਗਿਆ। ਇਹ ਸੀ ਟੀਚਰ ਇਲੀਜੀਬਿਲਟੀ ਟੈਸਟ। ਪਿਛਲੇ ਦਿਨੀਂ ਇਸ ਟੈਸਟ ਅਧੀਨ 1 ਲੱਖ 25 ਹਜ਼ਾਰ ਦੇ ਕਰੀਬ ਅਧਿਆਪਕਾਂ ਨੇ ਪੰਜ-ਪੰਜ ਸੌ ਰੁਪਏ ਫੀਸ ਦੇ ਕੇ ਇਹ ਟੈਸਟ ਦਿੱਤਾ ਪਰ ਪਾਸ ਹੋਏ 782 ਦੇ ਕਰੀਬ। ਹੁਣ ਜਨਤਾ ਨੇ ਚੋਣਾਂ ਵਿਚ ਐਮ.ਪੀ. ਇਲੀਜੀਬਿਲਟੀ ਟੈਸਟ ਦਾ ਨਤੀਜਾ ਉਨ੍ਹਾਂ ਨੂੰ ਦਿਖਾ ਕੇ ਆਪਣੇ ਉੱਪਰ ਹੋਏ ਜ਼ੁਲਮ ਦਾ ਮੁੱਲ ਮੋੜ ਦਿੱਤਾ ਹੈ ਅਤੇ ਸਰਕਾਰਾਂ ਨੂੰ ਜਨਤਾ ਦਾ ਖਿਆਲ ਰੱਖਣ ਦਾ ਅਹਿਸਾਸ ਕਰਵਾ ਦਿੱਤਾ ਹੈ।

-ਕਿਸ਼ੋਰ ਚੰਦ ਰਿਖੀ
ਰਈਆ (ਅੰਮ੍ਰਿਤਸਰ)।

10-9-2014

 ਧੜੇਬੰਦੀਆਂ
ਆਪਸੀ ਭਾਈਚਾਰਕ ਸਾਂਝ ਵਾਲਾ ਪੰਜਾਬ ਅੱਜ ਉਹ ਪੰਜਾਬ ਨਹੀਂ ਰਿਹਾ। ਪੰਜਾਬ ਦਾ ਸ਼ਾਇਦ ਹੀ ਕੋਈ ਅਜਿਹਾ ਪਿੰਡ ਹੋਵੇ ਜੋ ਧੜੇਬੰਦੀ ਦਾ ਸ਼ਿਕਾਰ ਨਾ ਹੋਵੇ। ਪਿੰਡਾਂ ਵਿਚ ਲੋਕਾਂ ਵੱਲੋਂ ਅਕਾਲੀ, ਕਾਂਗਰਸੀ, ਆਪ, ਪੀ.ਪੀ.ਪੀ. ਅਤੇ ਹੋਰ ਪਤਾ ਨਹੀਂ ਕੀ-ਕੀ ਪਾਰਟੀਆਂ ਦੇ ਨਾਂਅ 'ਤੇ ਬੇਸ਼ੁਮਾਰ ਧੜੇ ਬਣਾ ਰੱਖੇ ਹਨ। ਇਨ੍ਹਾਂ ਧੜਿਆਂ ਵਿਚ ਹੁੰਦੀ ਰਹਿੰਦੀ ਖਹਿਬਾਜ਼ੀ ਪਿੰਡਾਂ 'ਚ ਵਿਕਾਸ ਵਿਚ ਖੜੌਤ ਪੈਦਾ ਕਰਦੀ ਹੈ। ਸੋ, ਅੱਜ ਲੋੜ ਹੈ ਜਿਥੇ ਪਿੰਡਾਂ ਵਿਚ ਪੰਚਾਇਤਾਂ ਨੂੰ ਪਿੰਡ ਦੇ ਸਮੁੱਚੇ ਅਤੇ ਨਿਰਪੱਖ ਵਿਕਾਸ ਨੂੰ ਤਰਜੀਹ ਦੇਣੀ ਚਾਹੀਦੀ ਹੈ, ਉਥੇ ਸਾਨੂੰ ਸਭ ਨੂੰ ਧੜੇਬੰਦੀਆਂ ਤੋਂ ਉੱਪਰ ਉੱਠ ਕੇ ਪੰਚਾਇਤ ਦੁਆਰਾ ਕੀਤੇ ਜਾ ਰਹੇ ਕੰਮਾਂ ਵਿਚ ਸਹਿਯੋਗ ਦੇਣਾ ਚਾਹੀਦਾ ਹੈ ਤਾਂ ਜੋ ਸਰਕਾਰ ਦੁਆਰਾ ਦਿੱਤੀਆਂ ਜਾ ਰਹੀਆਂ ਗਰਾਂਟਾਂ ਨਾਲ ਸਾਡਾ ਕੁਝ ਸਵਾਰਿਆ ਜਾ ਸਕੇ।

-ਰਾਜਾ ਗਿੱਲ (ਚੜਿੱਕ)
ਮੋ: 94654-11585

ਪਿੰਡਾਂ ਦੀ ਸਥਿਤੀ
ਦੇਸ਼ ਨੂੰ ਆਜ਼ਾਦ ਹੋਇਆਂ 67 ਕੁ ਸਾਲ ਤੋਂ ਵੱਧ ਸਮਾਂ ਹੋ ਗਿਆ ਹੈ ਪਰ ਦੇਸ਼ ਦੀ ਰੀੜ੍ਹ ਦੀ ਹੱਡੀ ਵਜੋਂ ਜਾਣੇ ਜਾਂਦੇ ਪਿੰਡਾਂ ਦਾ ਬਹੁਤਾ ਸੁਧਾਰ ਨਹੀਂ ਹੋਇਆ। ਦੇਸ਼ ਦੀ 70 ਫ਼ੀਸਦੀ ਤੋਂ ਵੱਧ ਆਬਾਦੀ ਪਿੰਡਾਂ 'ਚ ਹੈ ਪਰ ਪਿੰਡਾਂ ਦੀ ਤਰੱਕੀ ਸ਼ਹਿਰਾਂ ਦੇ ਮੁਕਾਬਲੇ ਬਹੁਤ ਘੱਟ ਹੋਈ ਹੈ ਜਦ ਕਿ ਦੇਸ਼ ਦੀ ਆਰਥਿਕਤਾ ਬਹੁਤੀ ਪਿੰਡਾਂ ਉਤੇ ਹੀ ਨਿਰਭਰ ਕਰਦੀ ਹੈ। ਪਿੰਡਾਂ ਵਿਚ ਲੋਕਾਂ ਤੱਕ ਪਹੁੰਚ ਕਰਨਾ ਲੀਡਰ ਜਾਂ ਸਰਕਾਰਾਂ ਬਹੁਤਾ ਫਰਜ਼ ਨਹੀਂ ਸਮਝਦੀਆਂ। ਉਹ ਗਰੀਬਾਂ ਦੀ ਗਰੀਬੀ ਦਾ ਫਾਇਦਾ ਵੋਟਾਂ ਖਰੀਦ ਕੇ ਜਾਂ ਰਿਸ਼ਤੇ-ਨਾਤਿਆਂ ਦਾ ਵਾਸਤਾ ਪਾ ਕੇ ਜਾਂ ਕੋਈ ਲਾਲਚ ਤੇ ਨਸ਼ੇ ਵਗੈਰਾ ਦੇ ਕੇ ਵੋਟਾਂ ਖਰੀਦ ਲੈਂਦੇ ਹਨ ਪਰ ਉਨ੍ਹਾਂ ਦੀ ਤਰੱਕੀ ਜਾਂ ਵਿਕਾਸ ਦਾ ਬਹੁਤਾ ਸੋਚਦੇ ਨਹੀਂ ਹਨ। ਜੇਕਰ ਸਰਕਾਰਾਂ ਕੋਈ ਪਿੰਡ ਨੂੰ ਉੱਚਾ ਚੁੱਕਣ ਲਈ ਕੋਈ ਨੀਤੀਆਂ ਬਣਾਉਂਦੀਆਂ ਵੀ ਹਨ ਤਾਂ ਉਹ ਧੜੇਬੰਦੀ ਦੀ ਭੇਟ ਚੜ੍ਹ ਜਾਂਦੀਆਂ ਹਨ। ਪਿੰਡਾਂ ਵਿਚ ਰਹਿਣ-ਸਹਿਣ, ਸਿਹਤ ਅਤੇ ਸਿੱਖਿਆ ਦੇ ਖੇਤਰ ਵਿਚ ਗੰਭੀਰ ਸਮੱਸਿਆਵਾਂ ਹਨ। ਗਰੀਬੀ, ਅਨਪੜ੍ਹਤਾ ਅਤੇ ਸਿਹਤ ਸਹੂਲਤਾਂ ਦੀ ਬਹੁਤ ਘਾਟ ਹੈ। ਸਰਕਾਰ ਨੂੰ ਇਸ ਪਾਸੇ ਧਿਆਨ ਦੇਣਾ ਚਾਹੀਦਾ ਹੈ।

-ਗੁਰਮੇਲ ਸਿੰਘ ਗਿੱਲ
ਗੇਹਲੜਾਂ, ਜਲੰਧਰ।

ਵਧਦੇ ਰੇਲ ਹਾਦਸੇ ਚਿੰਤਾ ਦਾ ਵਿਸ਼ਾ
ਪੰਜਾਬ ਤੋਂ ਲੈ ਕੇ ਪੂਰੇ ਭਾਰਤ ਵਿਚ ਸੜਕ ਹਾਦਸਿਆਂ ਵਾਂਗ ਹੀ ਰੇਲ ਹਾਦਸੇ ਵਾਪਰਦੇ ਹਨ। ਵਧੇਰੇ ਕਾਹਲ, ਸੰਜਮ ਦੀ ਘਾਟ ਅਤੇ ਗ਼ੈਰ-ਜ਼ਿੰਮੇਵਾਰੀ ਭਰਿਆ ਵਤੀਰਾ ਵੀ ਰੇਲ ਹਾਦਸਿਆਂ ਲਈ ਜ਼ਿੰਮੇਵਾਰ ਆਖਿਆ ਜਾ ਸਕਦਾ ਹੈ। ਬਹੁਤ ਸਾਰੇ ਲੋਕ ਰੇਲਵੇ ਲਾਈਨ ਪਾਰ ਕਰਨ ਲੱਗਿਆਂ (ਜਿਥੇ ਫਾਟਕ ਨਹੀਂ ਹਨ) ਇਧਰ-ਉਧਰ ਦੇਖਣਾ ਜ਼ਰੂਰੀ ਨਹੀਂ ਸਮਝਦੇ। ਬਿਨਾਂ ਜਾਨ ਦੀ ਪਰਵਾਹ ਕੀਤਿਆਂ ਲਾਪਰਵਾਹੀ ਨਾਲ ਜਲਦਬਾਜ਼ੀ ਵਿਚ ਫਾਟਕ ਪਾਰ ਕਰਦੇ ਹਨ ਅਤੇ ਇਹੀ ਜਲਦਬਾਜ਼ੀ ਹਾਦਸਿਆਂ ਦਾ ਕਾਰਨ ਬਣਦੀ ਹੈ। ਰੇਲ ਹਾਦਸਿਆਂ ਨੂੰ ਮੱਦੇਨਜ਼ਰ ਰੱਖਦਿਆਂ ਲੋਕਾਂ ਵੱਲੋਂ ਵਾਰ-ਵਾਰ ਮਾਨਵ ਰਹਿਤ ਥਾਵਾਂ 'ਤੇ ਰੇਲਵੇ ਫਾਟਕ ਬਣਾਉਣ ਦੀ ਮੰਗ ਸਰਕਾਰ ਤੋਂ ਕੀਤੀ ਜਾਂਦੀ ਹੈ ਪਰ ਜਦੋਂ ਤੱਕ ਅਸੀਂ ਆਪਣੇ ਫਰਜ਼ਾਂ ਅਤੇ ਨਿਯਮਾਂ ਤੋਂ ਜਾਗਰੂਕ ਨਹੀਂ ਹੁੰਦੇ, ਤਦ ਤੱਕ ਇਨ੍ਹਾਂ ਹਾਦਸਿਆਂ ਦੀ ਗਿਣਤੀ ਘੱਟ ਨਹੀਂ ਕੀਤੀ ਜਾ ਸਕਦੀ, ਕਿਉਂਕਿ ਇਹ ਹਾਦਸੇ ਜਿਥੇ ਫਾਟਕ ਬਣਾਏ ਗਏ ਹਨ, ਉਥੇ ਵੀ ਓਨੀ ਹੀ ਤਾਦਾਦ ਵਿਚ ਵਾਪਰਦੇ ਹਨ। ਸਰਕਾਰ ਨੂੰ ਹਰ ਲਾਂਘੇ 'ਤੇ ਰੇਲਵੇ ਫਾਟਕ ਉਸਾਰਨੇ ਚਾਹੀਦੇ ਹਨ ਅਤੇ ਨਾਲ ਜੇਕਰ ਕੋਈ ਵਿਅਕਤੀ ਬੰਦ ਫਾਟਕ ਪਾਰ ਕਰਨ ਦੀ ਕੋਸ਼ਿਸ਼ ਕਰਦਾ ਹੈ ਤਾਂ ਉਸ ਦੇ ਖਿਲਾਫ਼ ਸਖ਼ਤ ਸਜ਼ਾ ਦਾ ਪ੍ਰਬੰਧ ਕਰਨਾ ਚਾਹੀਦਾ ਹੈ ਤਾਂ ਜੋ ਰੇਲ ਹਾਦਸਿਆਂ ਵਿਚ ਅਜਾਈਂ ਜਾ ਰਹੀਆਂ ਜਾਨਾਂ ਨੂੰ ਬਚਾਇਆ ਜਾ ਸਕੇ।

-ਨਵਤੇਜ ਸਿੰਘ ਮੱਲ੍ਹੀ
ਪਿੰਡ ਭਾਗੋਕਾਵਾਂ, ਜ਼ਿਲ੍ਹਾ ਗੁਰਦਾਸਪੁਰ।

9-9-2014

 ਕੌਂਸਲਰ ਬਨਾਮ ਵਿਕਾਸ
ਪਿੰਡਾਂ ਵਿਚ ਪੰਚਾਇਤਾਂ ਚੁਣੀਆਂ ਜਾਂਦੀਆਂ ਹਨ। ਛੋਟੇ ਸ਼ਹਿਰਾਂ ਵਿਚ ਕਮੇਟੀਆਂ ਤੇ ਵੱਡੇ ਸ਼ਹਿਰਾਂ ਵਿਚ ਕਾਰਪੋਰੇਸ਼ਨਾਂ। ਚੋਣ ਵਾਲੇ ਦਿਨ ਤੋਂ ਪਹਿਲਾਂ ਚੋਣ ਪ੍ਰਚਾਰ ਸ਼ੁਰੂ ਹੋ ਜਾਂਦਾ ਹੈ। ਵਿਕਾਸ ਦੇ ਵਾਅਦੇ ਕੀਤੇ ਜਾਂਦੇ ਹਨ। ਅੰਨ੍ਹੀ ਸ਼ਰਾਬ ਵੋਟਰਾਂ ਵਿਚ ਸ਼ਰੇਆਮ ਵੰਡੀ ਜਾਂਦੀ ਹੈ। ਪੈਸੇ ਵੰਡੇ ਜਾਂਦੇ ਹਨ। ਘਰ-ਘਰ ਜਾ ਕੇ ਉਮੀਦਵਾਰ, ਵੋਟ ਪਾਉਣ ਬਾਰੇ ਬੇਨਤੀਆਂ ਕਰਦੇ ਹਨ ਅਤੇ ਵੋਟਰ ਸਭ ਨੂੰ ਖੁਸ਼ ਕਰਕੇ ਤੋਰ ਦਿੰਦੇ ਹਨ। ਕੁਝ ਲੋਕ ਚੋਣ ਪ੍ਰਚਾਰ ਤੋਂ ਪਾਸਾ ਵੱਟ ਲੈਂਦੇ ਹਨ। ਫਿਰ ਸਰਕਾਰ ਨੂੰ ਦੋਸ਼ ਕੀ ਦਈਏ ਅਤੇ ਵਿਕਾਸ ਦੀ ਉਮੀਦ ਕਿਵੇਂ ਰੱਖ ਸਕਦੇ ਹਾਂ।
ਵੋਟਾਂ ਪੈਣ ਉਪਰੰਤ ਇਕ ਉਮੀਦਵਾਰ ਜਿੱਤ ਗਿਆ ਤੇ ਬਾਕੀ ਹਾਰ ਗਏ। ਹਾਰਨ ਵਾਲੇ ਉਮੀਦਵਾਰ ਆਪਣੇ ਘਰੀਂ ਜਾ ਬੈਠੇ। ਜਿੱਤਣ ਵਾਲੇ ਉਮੀਦਵਾਰ ਢੋਲ-ਢਮੱਕੇ ਨਾਲ ਜਲੂਸ ਕੱਢਦੇ ਤੇ ਘਰ-ਘਰ ਜਾ ਕੇ ਲੋਕਾਂ ਦਾ ਧੰਨਵਾਦ ਕਰਦੇ ਹਨ। ਇਹ ਜੋ ਪੇਸ਼ਗੀ ਲੱਖਾਂ ਰੁਪਏ ਵੰਡੇ। ਕੀ ਇਹ ਰਿਸ਼ਵਤ ਨਹੀਂ ਹੈ? ਹੁਣ ਵਿਕਾਸ ਦੇ ਨਾਂਅ 'ਤੇ ਇਨ੍ਹਾਂ ਨੂੰ ਭਾਰੀ ਰਕਮਾਂ ਗਰਾਂਟਾਂ ਦੇ ਰੂਪ ਵਿਚ ਮਿਲਣੀਆਂ ਹਨ। ਇਨ੍ਹਾਂ ਗਰਾਂਟਾਂ ਵਿਚੋਂ ਇਹ ਪਹਿਲਾਂ ਆਪਣੇ ਪੈਸੇ ਪੂਰੇ ਕਰਨਗੇ। ਠੇਕੇਦਾਰਾਂ ਤੇ ਅਫ਼ਸਰਾਂ ਨੂੰ ਵੀ ਖੁਸ਼ ਕਰਨਗੇ। ਜੇ ਕੁਝ ਬਚ ਗਿਆ ਤਾਂ ਆਪਣੇ ਚਹੇਤਿਆਂ ਦੀਆਂ ਅੱਖਾਂ ਪੂੰਝ ਦੇਣਗੇ। ਕੀ ਇਸ ਤਰ੍ਹਾਂ ਵਿਕਾਸ ਹੋ ਸਕਦਾ ਹੈ, ਜੇ ਹੋ ਸਕਦਾ ਹੈ ਤਾਂ ਪਿਛਲੇ 10-15 ਸਾਲਾਂ ਵਿਚ ਕਿਉਂ ਨਹੀਂ ਹੋਇਆ? ਸੀਵਰੇਜ ਬੰਦ, ਵਾਟਰ ਸਪਲਾਈ ਦਾ ਮੰਦਾ ਹਾਲ ਅਤੇ ਸੜਕਾਂ ਟੁੱਟੀਆਂ।

ਨਿਰਮਲ ਸਿੰਘ ਸੈਣੀ
ਜਲੰਧਰ।
94637-08632

ਧਰਮ ਅਤੇ ਇਨਸਾਨ
ਪਿਛਲੇ ਦਿਨੀਂ ਸੰਪਾਦਕੀ ਪੰਨੇ 'ਤੇ 'ਅਨੇਕਤਾ ਵਿਚ ਏਕਤਾ ਹੀ ਹੈ ਭਾਰਤ ਦੀ ਪਛਾਣ' ਸਿਰਲੇਖ ਹੇਠ ਸੰਪਾਦਕੀ ਪੜ੍ਹੀ। ਸੰਪਾਦਕ ਬਰਜਿੰਦਰ ਸਿੰਘ ਹਮਦਰਦ ਵੱਲੋਂ ਸਮੇਂ ਦੀ ਮੰਗ ਨੂੰ ਦੇਖਦੇ ਹੋਏ ਬੜੇ ਹੀ ਢੁਕਵੇਂ ਵਿਸ਼ੇ ਦੀ ਚੋਣ ਕੀਤੀ ਹੈ। ਅਸਲ ਵਿਚ ਰਾਜਨੀਤਕ ਲਾਹੇ ਲਈ ਲੀਡਰ ਲੋਕ ਧਰਮਾਂ ਨਾਲ ਸਬੰਧਤ ਬਿਆਨ ਦੇ ਕੇ ਭਾਰਤ ਵਾਸੀਆਂ ਵਿਚ ਲੜਾਈਆਂ ਦੇ ਬੀਜ ਬੀਜ ਦਿੰਦੇ ਹਨ। ਅਸਲੀਅਤ ਇਹ ਹੈ ਕਿ ਹੁਣ ਤੱਕ ਪੈਦਾ ਹੋਏ ਧਰਮਾਂ ਵਿਚ ਕਿਸੇ ਧਰਮ ਨੇ ਵੀ ਦੂਜੇ ਧਰਮ ਦਾ ਅਪਮਾਨ ਕਰਨ ਲਈ ਕੁਝ ਨਹੀਂ ਕਿਹਾ ਹੈ ਪਰ ਹੁਣ ਤੱਕ ਧਰਮਾਂ ਦੇ ਨਾਂਅ ਉਪਰ ਜਿੰਨਾ ਮਨੁੱਖਤਾ ਦਾ ਘਾਣ ਹੋਇਆ ਹੈ, ਓਨਾ ਨੁਕਸਾਨ ਹੋਰਨਾਂ ਕਾਰਨਾਂ ਕਰਕੇ ਨਹੀਂ ਹੋਇਆ ਹੈ।

-ਮਾਲਵਿੰਦਰ ਤਿਉਣਾ ਪੁਜਾਰੀਆਂ
ਮੁਲਤਾਨੀਆਂ ਰੋਡ, ਬਠਿੰਡਾ।

ਇਤਿਹਾਸਕ ਬੇਰੀਆਂ
ਪਿਛਲੇ ਦਿਨੀਂ ਖ਼ਬਰ ਪੜ੍ਹੀ ਕਿ ਸ੍ਰੀ ਹਰਿਮੰਦਰ ਸਾਹਿਬ ਵਿਚਲੀਆਂ ਇਤਿਹਾਸਕ ਬੇਰੀਆਂ 'ਤੇ ਮੁੜ ਭਰਵਾਂ ਬੂਰ ਆ ਗਿਆ ਹੈ। ਇਨ੍ਹਾਂ ਪੁਰਾਤਨ ਬੇਰੀਆਂ 'ਤੇ ਭਰਪੂਰ ਬੂਰ ਆਉਣਾ ਕੁਦਰਤੀ ਕ੍ਰਿਸ਼ਮੇ ਤੋਂ ਘੱਟ ਨਹੀਂ ਅਤੇ ਐਨੀ ਬਿਰਧ ਅਵਸਥਾ ਵਿਚ ਇਨ੍ਹਾਂ ਇਤਿਹਾਸਕ ਬੇਰੀਆਂ ਤੇ ਹਰਿਆਲੀ ਦਾ ਆਉਣਾ ਬਹੁਤ ਹੀ ਖੁਸ਼ੀ ਵਾਲੀ ਗੱਲ ਹੈ। ਖੇਤੀਬਾੜੀ ਵਿਭਾਗ ਅਤੇ ਵਣ ਵਿਭਾਗ ਵੀ ਵਧਾਈ ਦਾ ਪਾਤਰ ਹੈ, ਜਿਨ੍ਹਾਂ ਨੇ ਅਨੇਕ ਯਤਨਾਂ ਨਾਲ ਇਨ੍ਹਾਂ ਮਹਾਨ ਬੇਰੀਆਂ ਦੀ ਦੇਖ-ਰੇਖ ਕਰਕੇ ਇਕ ਮਹੱਤਵਪੂਰਨ ਰੋਲ ਅਦਾ ਕੀਤਾ ਹੈ। ਪਰਮਾਤਮਾ ਅੱਗੇ ਇਹੀ ਦੁਆ ਹੈ ਕਿ ਇਨ੍ਹਾਂ ਇਤਿਹਾਸਕ ਬੇਰੀਆਂ ਦੀ ਉਮਰ ਲੰਮੇਰੀ ਕਰੇ। ਸਾਡੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਵੀ ਇਨ੍ਹਾਂ ਇਤਿਹਾਸਕ ਬੇਰੀਆਂ ਦੇ ਦਰਸ਼ਨ ਕਰਦੀਆਂ ਰਹਿਣ।

-ਕੇਵਲ ਸਿੰਘ ਬਾਠਾਂ
ਅਮਰਗੜ੍ਹ (ਸੰਗਰੂਰ)।

6-9-2014

 ਦੁਰਘਟਨਾਵਾਂ ਤੋਂ ਬਚਾਓ

ਸੜਕਾਂ ਉੱਤੇ ਆਵਾਜਾਈ ਦਿਨ-ਬ-ਦਿਨ ਵਧਦੀ ਜਾ ਰਹੀ ਹੈ। ਸੜਕਾਂ ਉੱਤੇ ਬੰਦਿਆਂ ਤੇ ਮਾਲ ਦੀ ਢੋਆ-ਢੁਆਈ ਕਰਦੇ ਟਰੱਕਾਂ, ਬੱਸਾਂ, ਕਾਰਾਂ ਆਦਿ ਦਾ ਤਾਂਤਾ ਲੱਗਿਆ ਰਹਿੰਦਾ ਹੈ। ਕੰਮਾਂ-ਕਾਰਾਂ ਦੇ ਵਧਣ ਕਾਰਨ ਲੋਕਾਂ ਵਿਚ ਕਾਹਲ ਵਧ ਗਈ ਹੈ ਤੇ ਠਰ੍ਹੰਮਾ ਘਟ ਗਿਆ ਹੈ। ਇਨ੍ਹਾਂ ਦੁਰਘਟਨਾਵਾਂ ਲਈ ਸੜਕਾਂ ਉੱਤੇ ਚੱਲਣ ਵਾਲੇ ਸਾਰੇ ਹੀ ਜ਼ਿੰਮੇਵਾਰ ਹਨ। ਦੁਰਘਟਨਾਵਾਂ ਦਾ ਇਕ ਕਾਰਨ ਹਰ ਇਕ ਦਾ ਤੇਜ਼ ਸਪੀਡ ਨਾਲ ਚੱਲਣਾ ਹੈ। ਤੇਜ਼ ਭਜਦੀ ਗੱਡੀ ਔਖੀ ਰੁਕਦੀ ਹੈ ਤੇ ਮੁੜਨ ਵੇਲੇ ਉਲਟ ਜਾਂਦੀ ਹੈ। ਬਹੁਤ ਸਾਰੀਆਂ ਦੁਰਘਟਨਾਵਾਂ ਡਰਾਈਵਰਾਂ ਦੀ ਲਾਪਰਵਾਹੀ ਸ਼ਰਾਬ ਪੀ ਕੇ ਗੱਡੀ ਚਲਾਉਣ ਕਰਕੇ ਹੁੰਦੀਆਂ ਹਨ। ਦੁਰਘਟਨਾਵਾਂ ਨੂੰ ਰੋਕਣ ਦੇ ਉਪਾਅ ਵੀ ਸੜਕ ਉਤੇ ਚੱਲਣ ਵਾਲਿਆਂ ਦੇ ਕੋਲ ਹੀ ਹਨ। ਦੁਰਘਟਨਾਵਾਂ ਤੋਂ ਬਚਣ ਲਈ ਸਾਨੂੰ ਕਾਹਲੀ ਨਹੀਂ ਕਰਨੀ ਚਾਹੀਦੀ। ਜੇਕਰ ਸੜਕਾਂ 'ਤੇ ਆਵਾਜਾਈ ਸਮੇਂ ਆਪਣਾ ਤੇ ਦੂਜਿਆਂ ਦਾ ਖਿਆਲ ਰੱਖਿਆ ਜਾਵੇ ਤਾਂ ਦੁਰਘਟਨਾਵਾਂ ਟਲ ਸਕਦੀਆਂ ਹਨ।

-ਸੁਰਿੰਦਰ ਸਿੰਘ ਬਰਨਾਲਾ
ਸਲੇਮਟਾਬਰੀ, ਲੁਧਿਆਣਾ।

ਦਲਿਤ ਔਰਤਾਂ ਦੀ ਸੁਰੱਖਿਆ

ਜਿਥੇ ਅੱਜ ਸਾਰਾ ਮੁਲਕ ਔਰਤਾਂ ਦੀ ਤਰੱਕੀ ਦੀ ਹਾਮੀ ਭਰਦਾ ਹੈ ਕਿ ਅੱਜ ਹਰ ਖੇਤਰ ਵਿਚ ਔਰਤ ਮਰਦ ਨਾਲੋਂ ਅੱਗੇ ਹੈ ਤਾਂ ਇਸ ਵਿਚ ਕੋਈ ਅਤਿਕਥਨੀ ਨਹੀਂ ਹੈ ਪ੍ਰੰਤੂ ਦੁਖਦਾਈ ਗੱਲ ਤਾਂ ਇਹ ਹੈ ਕਿ ਜਿਥੇ ਅਸੀਂ ਆਪਣੀ ਆਜ਼ਾਦੀ ਦੇ 68ਵੇਂ ਵਰ੍ਹੇ ਵਿਚ ਦਾਖ਼ਲ ਹੋ ਗਏ ਹਾਂ, ਉਥੇ ਇਹ ਗੱਲ ਬੜੇ ਦੁੱਖ ਨਾਲ ਕਹਿਣੀ ਪੈਂਦੀ ਹੈ ਕਿ ਬਲਾਤਕਾਰ ਅਤੇ ਹੋਰ ਕਈ ਜਿੱਲਣਾਂ ਉਚੇਚੇ ਤੌਰ 'ਤੇ ਦਲਿਤ ਭੈਣਾਂ ਨਾਲ ਬਾਰਮਬਾਰ ਵਾਪਰ ਰਹੀਆਂ ਹਨ। ਆਏ ਦਿਨ ਕੋਈ ਨਾ ਕੋਈ ਖ਼ਬਰ ਅਜਿਹੀ ਸੁਣਨ ਨੂੰ ਮਿਲਦੀ ਹੈ ਕਿ ਇਸ ਵਿਚ ਜ਼ਿਆਦਾਤਰ ਦਲਿਤ ਬੱਚੀਆਂ ਅਤੇ ਭੈਣਾਂ ਨੂੰ ਸ਼ਿਕਾਰ ਬਣਾਇਆ ਜਾਂਦਾ ਹੈ। ਅਜਿਹਾ ਵਾਰ-ਵਾਰ ਕਿਉਂ ਵਾਪਰਦਾ ਹੈ? ਕੀ ਇਹ ਸਮਾਜ ਦਾ ਅੰਗ ਨਹੀਂ ਹਨ? ਕੀ ਇਨ੍ਹਾਂ ਨੂੰ ਆਪਣੀ ਆਜ਼ਾਦੀ ਮਾਣਨ ਦਾ ਹੱਕ ਨਹੀਂ ਹੈ? ਕਿਉਂ ਮਨੁੱਖ ਦੀ ਸੋਚ ਅਤੇ ਨਜ਼ਰ ਇਨ੍ਹਾਂ ਪ੍ਰਤੀ ਇੱਜ਼ਤ ਵਾਲੀ ਨਹੀਂ? ਸੋ, ਆਓ ਸਭ ਰਲਕੇ ਇਹ ਤਹੱਈਆ ਕਰੀਏ ਅਤੇ ਆਪਣੀਆਂ ਦਲਿਤ ਭੈਣਾਂ ਪ੍ਰਤੀ ਫ਼ਿਕਰਮੰਦ ਹੋਈਏ।

-ਧਰਮਿੰਦਰ 'ਸ਼ਾਹਿਦ' ਖੰਨਾ
580, ਗਲੀ ਨੰ: 10, ਕ੍ਰਿਸ਼ਨਾ ਨਗਰ, ਖੰਨਾ।

ਜੀਵਨ ਦਾ ਆਧਾਰ ਰੁੱਖ

ਜਿਉਂ-ਜਿਉਂ ਮਨੁੱਖ ਪੌਦਿਆਂ ਨਾਲੋਂ ਟੁੱਟ ਰਿਹਾ ਹੈ, ਕਈਆਂ ਬਿਮਾਰੀਆਂ ਦਾ ਸ਼ਿਕਾਰ ਹੋਈ ਜਾ ਰਿਹਾ ਹੈ। ਪੌਦੇ ਧਰਤੀ ਦੇ ਵਾਤਾਵਰਨ ਨੂੰ ਸਾਵਾਂ ਰੱਖਦੇ ਹਨ, ਕੁਦਰਤੀ ਖੁਰਾਕ ਵੀ ਹਨ। ਆਉਣ ਵਾਲੀਆਂ ਪੀੜ੍ਹੀਆਂ ਨੂੰ ਪੌਦਿਆਂ ਪ੍ਰਤੀ ਕਿਸ ਨੇ ਜਾਗਰੂਕ ਕਰਨਾ ਹੈ? 'ਅਜੀਤ' ਦੀ ਹਰਿਆਵਲ ਲਹਿਰ ਵੀ ਇਸੇ ਕੜੀ ਦਾ ਹਿੱਸਾ ਹੈ। ਅੱਜ ਦੇ ਬੱਚੇ ਕੀ ਖਾ ਰਹੇ ਹਨ? ਪੀਜ਼ੇ, ਬਰਗਰ, ਨਿਊਡਲ, ਕੁਰਕੁਰੇ ਆਦਿ ਹੋਰ ਵੀ ਕਈ ਕੁਝ ਗੰਦ ਰੂਪੀ ਜ਼ਹਿਰ ਦੁਕਾਨਾਂ ਦੇ ਬਾਹਰ ਇਸ ਤਰ੍ਹਾਂ ਵਿਖਾਇਆ ਜਾ ਰਿਹਾ ਹੈ ਕਿ ਬੱਚੇ ਬਦੋਬਦੀ ਇਨ੍ਹਾਂ ਵੱਲ ਖਿੱਚੇ ਜਾਂਦੇ ਹਨ। ਸਕੂਲਾਂ ਦੀਆਂ ਕੰਟੀਨਾਂ ਵੱਲ ਵੀ ਝਾਤੀ ਮਾਰੋ। ਕੋਈ ਵੀ ਡੂੰਘੀ ਸੋਚ ਦਾ ਧਾਰਨੀ ਨਹੀਂ ਜਾਪ ਰਿਹਾ। ਲੋੜ ਹੈ ਨਵੀਂ ਪੀੜ੍ਹੀ ਨੂੰ ਡਾਕਟਰ ਹੋਰਾਂ ਦੇ ਲੇਖ ਵੱਲ ਝਾਤੀ ਮਾਰਨ ਦੀ। ਅੱਜ ਘਰਾਂ ਵਿਚ ਜੋ ਥੋੜ੍ਹੀ ਕੱਚੀ ਥਾਂ ਬਚਦੀ ਹੈ, ਫੁੱਲ, ਬੂਟਿਆਂ ਦੇ ਨਾਲ-ਨਾਲ ਹਰੀਆਂ ਸਬਜ਼ੀਆਂ ਬੀਜਣ ਦੀ ਆਦਤ ਪਾਉਣੀ ਚਾਹੀਦੀ ਹੈ। ਘਰਾਂ ਵਿਚ ਉਗਾਈਆਂ ਕੀਟ ਨਾਸ਼ਕਾਂ ਤੋਂ ਬਚੀਆਂ ਸਬਜ਼ੀਆਂ ਸਵਾਦੀ ਹੋਣ ਦੇ ਨਾਲ-ਨਾਲ ਚੰਗੀ ਤੇ ਨਰੋਈ ਖੁਰਾਕ ਦਾ ਹਿੱਸਾ ਬਣਦੀਆਂ ਹਨ। ਬਹੁਤ ਦੁੱਖ ਹੁੰਦਾ ਹੈ ਜਦੋਂ ਚੰਗਾ ਭਲਾ ਕਿਸਾਨ ਹੱਥ ਵਿਚ ਝੋਲਾ ਫੜੀ ਬਾਜ਼ਾਰ ਵਿਚ ਸਬਜ਼ੀ ਖਰੀਦਣ ਜਾਂਦਾ ਹੈ। ਆਉਣ ਵਾਲੀ ਪੀੜ੍ਹੀ ਨੂੰ ਬਾਜ਼ਾਰੂ ਜ਼ਹਿਰਾਂ ਤੋਂ ਬਚਾਓ, ਪੌਦਿਆਂ ਨਾਲ ਜੋੜੋ ਤਾਂ ਹੀ ਸਾਡੀ ਧਰਤੀ ਤੇ ਮਨੁੱਖੀ ਸਿਹਤ ਨੂੰ ਬਚਾਇਆ ਜਾ ਸਕਦਾ ਹੈ। ਪੌਦਿਆਂ ਨਾਲ ਜੁੜੇ ਰਹਿਣ ਨਾਲ ਕੈਂਸਰ ਤੇ ਹੋਰ ਬਿਮਾਰੀਆਂ 'ਤੇ ਕਾਬੂ ਪਾਇਆ ਜਾ ਸਕਦਾ ਹੈ। ਅਜਿਹੇ ਲੇਖ ਦੇਣ ਲਈ 'ਅਜੀਤ' ਅਦਾਰਾ ਵਧਾਈ ਦਾ ਪਾਤਰ ਹੈ।

-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।

3-9-2014

 ਪਾਣੀ ਦਾ ਡਿਗਦਾ ਪੱਧਰ
ਪਾਣੀ ਦੀ ਸਮੱਸਿਆ ਇਕੱਲੇ ਕਿਸਾਨ ਵਰਗ ਨਾਲ ਸਬੰਧਤ ਨਹੀਂ ਹੈ। ਸਾਰੇ ਪੰਜਾਬੀਆਂ ਨੂੰ ਇਸ ਖ਼ਤਰਨਾਕ ਚੁਣੌਤੀ ਵੱਲ ਗਹਿਰਾ ਧਿਆਨ ਦੇਣ ਦੀ ਲੋੜ ਹੈ। ਹਰ ਸਾਲ ਲਗਭਗ ਦੋ ਫੁੱਟ ਪਾਣੀ ਹੇਠਾਂ ਚਲਿਆ ਜਾਣਾ ਧਰਤੀ ਹੇਠਲੇ ਜਲ ਭੰਡਾਰ ਦੇ ਘਟਦੇ ਅਤੇ ਖ਼ਤਮ ਹੋ ਰਹੇ ਜਲ ਭੰਡਾਰ ਲਈ ਖ਼ਤਰੇ ਦੀ ਘੰਟੀ ਹੈ। ਜੇਕਰ ਅਸੀਂ ਸਮੂਹ ਪੰਜਾਬੀ ਇਸ ਸਮੱਸਿਆ ਅਰਥਾਤ ਪਾਣੀ ਦੀ ਬੱਚਤ ਲਈ ਸਾਵਧਾਨ ਨਹੀਂ ਹੋਵਾਂਗੇ ਤਾਂ ਨਿਕਟ ਭਵਿੱਖ ਵਿਚ ਪੰਜਾਬ ਵੀ ਰਾਜਸਥਾਨ ਵਾਂਗ ਮਾਰੂਥਲ ਦਾ ਰੂਪ ਅਖ਼ਤਿਆਰ ਕਰ ਜਾਵੇਗਾ। ਕੁਦਰਤ ਦੀ ਇਸ ਅਮਲੋਕ ਦਾਤ ਨਾਲ ਹੀ ਸਮੁੱਚੀ ਕਾਇਨਾਤ, ਬਨਸਪਤੀ, ਜੀਵ-ਜੰਤੂਆਂ, ਪਸ਼ੂਆਂ, ਮਨੁੱਖਾਂ ਆਦਿ ਦਾ ਭਲਾ ਹੈ। ਸੋ, ਇਸ ਦੀ ਸਾਂਭ-ਸੰਭਾਲ ਕਰਨੀ ਸਾਡਾ ਮੁਢਲਾ ਫਰਜ਼ ਹੈ। ਇਸ ਨੂੰ ਪੂਰੀ ਤਨ, ਮਨ ਅਤੇ ਧਨ ਦੀ ਸਮਰੱਥਾ ਨਾਲ ਸਮੂਹਿਕ ਉਪਰਲੇ ਨਾਲ ਸੰਭਾਲਣ ਦੀ ਫੌਰੀ ਲੋੜ ਹੈ।

-ਅਮਰਜੀਤ ਸਿੰਘ
ਧਨੌਲਾ ਰੋਡ, ਬਰਨਾਲਾ।

ਯੋਜਨਾ ਕਮਿਸ਼ਨ ਭੰਗ ਕਰਨ ਦਾ ਫ਼ੈਸਲਾ ਮੰਦਭਾਗਾ
ਕੇਂਦਰ ਸਰਕਾਰ ਵੱਲੋਂ ਯੋਜਨਾ ਕਮਿਸ਼ਨ ਨੂੰ ਭੰਗ ਕਰਨ ਦਾ ਜੋ ਫ਼ੈਸਲਾ ਕੀਤਾ ਗਿਆ ਹੈ, ਉਸ ਨੂੰ ਲੋਕ ਹਿਤ ਵਿਚ ਨਹੀਂ ਕਿਹਾ ਜਾ ਸਕਦਾ। ਇਸ ਸੰਸਥਾ ਨੇ ਬਹੁਤ ਲੰਮਾ ਸਮਾਂ ਵੱਡੀ ਆਬਾਦੀ ਅਤੇ ਖੇਤਰੀ ਭਿੰਨਤਾਵਾਂ ਵਾਲੇ ਇਸ ਵਿਸ਼ਾਲ ਲੋਕਤੰਤਰ ਦੇ ਅਰਥਚਾਰੇ ਦਾ ਨਿਰੂਪਣ ਕੀਤਾ ਹੈ ਅਤੇ ਇਸ ਦੀ ਤਰੱਕੀ ਵਿਚ ਅਹਿਮ ਭੂਮਿਕਾ ਨਿਭਾਈ ਹੈ। ਕੁਝ ਵੀ ਹੋਵੇ, ਅੱਜ ਦੇ ਭਾਰਤ ਨੂੰ ਪੰਜਾਹ ਸਾਲ ਪਹਿਲਾਂ ਦੇ ਭਾਰਤ ਨਾਲੋਂ ਕਾਫੀ ਅੱਗੇ ਮੰਨਣਾ ਪਵੇਗਾ। ਦੇਸ਼ ਦੇ ਸਾਂਝੇ ਅਰਥਚਾਰੇ ਦੇ ਮਾਡਲ ਨੂੰ ਬਰਕਰਾਰ ਰੱਖਣ ਲਈ ਯੋਜਨਾ ਕਮਿਸ਼ਨ ਵਰਗੀ ਸੰਸਥਾ ਦੀ ਬਹੁਤ ਜ਼ਰੂਰਤ ਹੈ। ਇਹ ਵੱਖਰਾ ਵਿਸ਼ਾ ਹੈ ਕਿ ਜਿਹੜੀ ਸਰਕਾਰ ਆਉਂਦੀ ਹੈ, ਉਹ ਆਪਣੀ ਪਸੰਦ ਦੇ ਅਹੁਦੇਦਾਰ ਲਗਾ ਲੈਂਦੀ ਹੈ। ਦੇਸ਼ ਦੀ ਤਰੱਕੀ ਲਈ ਕਿਸੇ ਪਬਲਿਕ-ਪ੍ਰਾਈਵੇਟ ਭਾਈਵਾਲੀ ਵਾਲੀ ਕਿਸੇ ਸੰਸਥਾ ਦਾ ਗਠਨ ਯੋਜਨਾ ਕਮਿਸ਼ਨ ਦੇ ਇਕ ਅੰਗ ਵਜੋਂ ਹੀ ਕੀਤਾ ਜਾਣਾ ਚਾਹੀਦਾ ਹੈ।

-ਜਗਜੋਤ ਸਿੰਘ
6/2 ਆਦਰਸ਼ ਨਗਰ, ਬਠਿੰਡਾ।

ਤੰਬਾਕੂਨੋਸ਼ੀ ਰੋਕਣ ਲਈ
ਪੰਜਾਬ ਸਰਕਾਰ ਵੱਲੋਂ ਸਾਰੇ ਰਾਜ ਨੂੰ ਤੰਬਾਕੂ ਰਹਿਤ ਸੂਬਾ ਬਣਾਉਣ ਦੀ ਲਹਿਰ ਚਲਾਈ ਗਈ ਹੈ। ਇਹ ਬਹੁਤ ਹੀ ਸ਼ਲਾਘਾਯੋਗ ਫ਼ੈਸਲਾ ਹੈ। ਬਹੁਤ ਸਾਰੇ ਜ਼ਿਲ੍ਹੇ ਤੰਬਾਕੂ ਰਹਿਤ ਐਲਾਨੇ ਵੀ ਗਏ ਹਨ। ਪਰ ਅਜੇ ਵੀ ਜਨਤਕ ਥਾਵਾਂ ਜਿਵੇਂ ਸਕੂਲ, ਹਸਪਤਾਲ, ਐਸ.ਡੀ.ਐਮ. ਕੋਰਟ ਦੇ ਬਾਹਰ ਤੰਬਾਕੂ ਦੀ ਵਰਤੋਂ ਦਾ ਦ੍ਰਿਸ਼ ਵੇਖਿਆ ਜਾ ਸਕਦਾ ਹੈ। ਸਾਰੇ ਪੰਜਾਬ ਵਿਚ ਤੰਬਾਕੂ ਦੀ ਵਰਤੋਂ ਜਾਰੀ ਹੈ। ਇਕ ਪੁਰਾਣਾ ਮੁਹਾਵਰਾ ਹੈ ਕਿ ਚੋਰ ਨੂੰ ਨਾ ਮਾਰੋ, ਉਸ ਦੀ ਮਾਂ ਨੂੰ ਮਾਰੋ। ਤੰਬਾਕੂ ਵੇਚਣ ਵਾਲੀਆਂ ਕੰਪਨੀਆਂ ਤੰਬਾਕੂ ਨੂੰ ਕਈ ਆਕਰਸ਼ਕ ਰੂਪਾਂ ਵਿਚ ਵੇਚ ਰਹੀਆਂ ਹਨ। ਇਹ ਕੰਪਨੀਆਂ ਬੰਦ ਕਰਨੀਆਂ ਚਾਹੀਦੀਆਂ ਹਨ। ਤੰਬਾਕੂ ਇਕ ਖ਼ਤਰਨਾਕ ਨਸ਼ਾ ਹੈ, ਜਿਸ ਨੂੰ ਪੀਣ ਜਾਂ ਖਾਣ ਨਾਲ 40 ਖ਼ਤਰਨਾਕ ਰਸਾਇਣ ਮਨੁੱਖ ਦੇ ਅੰਦਰ ਚਲੇ ਜਾਂਦੇ ਹਨ, ਜਿਨ੍ਹਾਂ ਵਿਚ ਨਿਕੋਟੀਨ, ਕਾਰਬਨ ਮੋਨੋਆਕਸਾਈਡ, ਐਲਜੀਨ, ਤਾਰ, ਪਾਇਰੀਡੀਨ ਅਤੇ ਕਾਰਬੋਲਿਕ ਐਸਿਡ ਅਤੀ ਖ਼ਤਰਨਾਕ ਅਤੇ ਮਨੁੱਖ ਲਈ ਜਾਨਲੇਵਾ ਸਾਬਤ ਹੁੰਦੇ ਹਨ। ਤੰਬਾਕੂ ਸਿਹਤ ਲਈ ਖ਼ਤਰਨਾਕ ਹੈ। ਇਹ ਗਲੇ ਅਤੇ ਪੇਟ ਦੀਆਂ ਬਿਮਾਰੀਆਂ ਦਾ ਕਾਰਨ ਬਣਦਾ ਹੈ, ਇਸ ਨੂੰ ਪੀਣ ਨਾਲ ਸਾਹ ਨਲੀ ਦੀ ਝਿੱਲੀ ਵਿਚ ਛੇਕ ਹੋ ਜਾਂਦੇ ਹਨ, ਜੋ ਟੀ.ਬੀ. ਦਾ ਕਾਰਨ ਬਣਦੇ ਹਨ, ਇਸ ਨੂੰ ਪੀਣ ਨਾਲ ਕੈਂਸਰ ਵਰਗੀਆਂ ਭਿਆਨਕ ਬਿਮਾਰੀਆਂ ਹੋ ਜਾਂਦੀਆਂ ਹਨ। ਸ਼ਾਇਦ ਇਸ ਨੂੰ ਪੀਣ ਵਾਲੇ ਲੋਕ ਇਹ ਨਹੀਂ ਜਾਣਦੇ ਕਿ ਉਹ ਕਿੰਨਾ ਖ਼ਤਰਨਾਕ ਨਸ਼ਾ ਕਰ ਰਹੇ ਹਨ। ਅਗਰ ਸਰਕਾਰਾਂ ਲੋਕਾਂ ਦੀ ਸਿਹਤ ਪ੍ਰਤੀ ਏਨੀਆਂ ਗੰਭੀਰ ਹਨ ਤਾਂ ਫਿਰ ਇਸ ਦੀ ਪੈਦਾਵਾਰ 'ਤੇ ਪਾਬੰਦੀ ਕਿਉਂ ਨਹੀਂ? ਜ਼ਹਿਰ ਵੰਡ ਕੇ ਕਮਾਇਆ ਪੈਸਾ ਕਿਸ ਕੰਮ ਦਾ।

-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀਖਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

ਨਿੱਜੀ ਸਕੂਲਾਂ ਵਿਚ ਪੰਜਾਬੀ ਦੀ ਦੁਰਦਸ਼ਾ
ਅੰਗਰੇਜ਼ੀ ਭਾਸ਼ਾ ਸਿਖਾਉਣ ਦੇ ਨਾਂਅ 'ਤੇ ਨਿੱਜੀ ਸਕੂਲਾਂ ਦੁਆਰਾ ਆਪਣੀਆਂ ਸੰਸਥਾਵਾਂ ਵਿਚ ਪੰਜਾਬੀ ਭਾਸ਼ਾ ਬੋਲਣ ਉੱਪਰ ਪਾਬੰਦੀ ਲਗਾ ਕੇ ਹਿੰਦੀ ਭਾਸ਼ਾ ਦੀ ਵਰਤੋਂ ਕਰਵਾਉਣਾ ਇਕ ਖ਼ਤਰੇ ਦੀ ਘੰਟੀ ਹੈ। ਇਸ ਪ੍ਰਕਾਰ ਅੱਜ ਦੇ ਵਿਦਿਆਰਥੀ ਆਪਣੀ ਮਾਂ-ਬੋਲੀ ਪੰਜਾਬੀ ਤੋਂ ਹੀ ਦੂਰ ਹੁੰਦੇ ਜਾ ਰਹੇ ਹਨ। ਇਸ ਤੋਂ ਤਾਂ ਇਹੀ ਸੰਕੇਤ ਮਿਲਦਾ ਹੈ ਕਿ ਭਵਿੱਖ ਵਿਚ ਪੰਜਾਬ ਵਿਚੋਂ ਪੰਜਾਬੀ ਲਿਖਣ ਅਤੇ ਬੋਲਣ ਵਾਲੇ ਵਿਰਲੇ ਹੀ ਮਿਲਣਗੇ। ਪਹਿਲਾਂ ਤਾਂ ਸਿਰਫ ਸ਼ਹਿਰਾਂ ਵਿਚ ਹੀ ਹਿੰਦੀ ਦੀ ਵਰਤੋਂ ਕਰਨ ਵਾਲੇ ਸਕੂਲ ਸਨ ਪਰ ਹੁਣ ਇਹ ਰੁਝਾਨ ਪਿੰਡਾਂ ਵਿਚ ਵੀ ਪਹੁੰਚ ਗਿਆ ਹੈ। ਭਾਵੇਂ ਪੰਜਾਬ ਸਰਕਾਰ ਨੇ ਪੰਜਾਬੀ ਭਾਸ਼ਾ ਨੂੰ ਦਫ਼ਤਰੀ ਭਾਸ਼ਾ ਬਣਾਇਆ ਹੈ, ਪ੍ਰੰਤੂ ਇਸ ਭਾਸ਼ਾ ਦੇ ਨਿਰਾਦਰ ਦੇ ਵਿਸ਼ੇ ਵਿਚ ਨਾ ਤਾ ਸਾਡੀ ਸੂਬਾ ਸਰਕਾਰ ਗੰਭੀਰ ਹੈ, ਜਨਤਕ ਜਥੇਬੰਦੀਆਂ। ਸਮੇਂ ਦੀ ਲੋੜ ਹੈ ਕਿ ਸਿੱਖਿਆ ਵਿਭਾਗ ਕੋਈ ਅਜਿਹੀ ਠੋਸ ਨੀਤੀ ਬਣਾਵੇ, ਜਿਸ ਵਿਚ ਸਾਰੇ ਸਕੂਲ, ਭਾਵੇਂ ਉਹ ਸੀ.ਬੀ.ਐਸ.ਈ. ਬੋਰਡ ਦੇ ਹੋਣ ਜਾਂ ਫਿਰ ਕਿਸੇ ਹੋਰ ਬੋਰਡ ਨਾਲ ਸਬੰਧਤ ਹੋਣ, ਕੋਈ ਵੀ ਅਜਿਹੀ ਨੀਤੀ ਨਾ ਬਣਾ ਸਕਣ, ਜਿਸ ਨਾਲ ਸਾਡੇ ਬੱਚੇ ਸਾਡੀ ਅਗਲੀ ਪੀੜ੍ਹੀ ਆਪਣੀ ਮਾਤ ਭਾਸ਼ਾ ਤੋਂ ਹੀ ਵਾਂਝੇ ਹੋ ਜਾਣ।

-ਵਰਿੰਦਰ ਸਿੰਘ ਗਰੇਵਾਲ
ਪਿੰਡ ਤੇ ਡਾਕ: ਗੁੱਜਰਵਾਲ,
ਜ਼ਿਲ੍ਹਾ ਲੁਧਿਆਣਾ।

2-9-2014

 ਪੱਛਮੀ ਮੁਲਕਾਂ ਦੀ ਵਿਵਸਥਾ
ਪੱਛਮੀ ਮੁਲਕਾਂ ਦੇ ਲੋਕ ਬੱਚਿਆਂ ਨੂੰ ਆਪਣੀ ਜਾਇਦਾਦ ਨਹੀਂ ਸਮਝਦੇ, ਸਗੋਂ ਉਨ੍ਹਾਂ ਨੂੰ ਇਕ ਆਜ਼ਾਦ ਸ਼ਖ਼ਸੀਅਤ ਬਣਾਉਣ ਵਿਚ ਪੂਰਾ ਯੋਗਦਾਨ ਪਾਉਂਦੇ ਹਨ ਤਾਂ ਕਿ ਉਹ ਆਪਣੀ ਮਨਮਰਜ਼ੀ ਦੀ ਪੜ੍ਹਾਈ ਕਰਕੇ ਆਪਣੇ ਪੈਰਾਂ 'ਤੇ ਖੜ੍ਹੇ ਹੋ ਸਕਣ। ਜੋ ਸਹੂਲਤਾਂ ਇਨ੍ਹਾਂ ਮੁਲਕਾਂ ਵਿਚ ਮਿਲਦੀਆਂ ਹਨ ਅਤੇ ਉਹ ਵੀ ਉੱਚ ਪੱਧਰ ਦੀਆਂ ਤੇ ਫਿਰ ਮੁਫ਼ਤ, ਸਾਡੇ ਮੁਲਕਾਂ ਵਿਚ ਕਈ ਗੁਣਾ ਜ਼ਿਆਦਾ ਪੈਸੇ ਖਰਚ ਕੇ ਵੀ ਦੁਰਲੱਭ ਹਨ। ਵਿਹਲੇ ਰਹਿਣ, ਬਿਮਾਰ ਹੋਣ ਜਾਂ ਅਪੰਗਤਾ ਅਤੇ ਬੱਚਿਆਂ ਲਈ ਮਿਲਦੇ ਸਰਕਾਰੀ ਭੱਤੇ ਇਕ ਬਹਿਸ਼ਤੀ ਮਿਸਾਲ ਹਨ। ਸਿਰ ਲੁਕੋਣ ਲਈ ਘਰ, ਬੱਸਾਂ, ਰੇਲ ਗੱਡੀਆਂ ਉਨ੍ਹਾਂ ਲਈ ਮੁਫ਼ਤ ਜਿਨ੍ਹਾਂ ਨੂੰ ਉਮਰ ਦੇ ਲਿਹਾਜ਼ ਨਾਲ ਜ਼ਰੂਰਤ ਹੋਵੇ। ਬਿਮਾਰ ਹੋਣ 'ਤੇ ਇਲਾਜ ਮੁਫ਼ਤ ਕੀਤੇ ਜਾਂਦੇ ਹਨ ਅਤੇ ਇਥੇ ਇਹ ਵਿਤਕਰਾ ਨਹੀਂ ਕੀਤਾ ਜਾਂਦਾ ਕਿ ਕੋਈ ਅਮੀਰ ਹੈ ਜਾਂ ਗ਼ਰੀਬ, ਹਰ ਇਕ ਨੂੰ ਬਰਾਬਰਤਾ ਦੀ ਸਹੂਲਤ ਮਿਲਦੀ ਹੈ।

-ਸੁਰਿੰਦਰ ਸਿੰਘ ਬਰਨਾਲਾ
ਸਲੇਮਟਾਬਰੀ, ਲੁਧਿਆਣਾ।

ਸਰਕਾਰੀ ਲਾਪ੍ਰਵਾਹੀ
ਤਕਰੀਬਨ ਇਕ ਮਹੀਨੇ ਤੋਂ ਉੱਪਰ ਸਮਾਂ ਹੋ ਚੁੱਕਾ ਹੈ ਕਿ ਪੰਜਾਬ ਐਗਰੀਕਲਚਰ, ਪੈਸਟਸ ਡਿਸੀਜ਼ਜ ਐਂਡ ਨੌਕਸੀਅਸ ਵੀਡ ਐਕਟ 1949 ਤਹਿਤ ਸ: ਪ੍ਰਕਾਸ਼ ਸਿੰਘ ਬਾਦਲ ਦੇ ਦਫ਼ਤਰ ਵਿਚੋਂ ਐਲਾਨ ਕੀਤਾ ਗਿਆ ਸੀ ਕਿ ਜਿਸ ਵਿਅਕਤੀ ਦੀ ਜ਼ਮੀਨ ਵਿਚ ਜਾਂ ਘਰ ਅੱਗੇ ਕਾਂਗਰਸ ਘਾਹ ਵੇਖਿਆ ਗਿਆ, ਉਸ ਨੂੰ ਸਜ਼ਾ, ਜੁਰਮਾਨਾ ਕਰਕੇ ਅੰਦਰ ਕੀਤਾ ਜਾਏਗਾ। ਇਹ ਕਾਂਗਰਸ ਘਾਹ ਜਿਉਂ ਦਾ ਤਿਉਂ ਖੜ੍ਹਾ ਹੈ, ਬਰਸਾਤ ਪੈਣ ਕਰਕੇ ਦੁੱਗਣਾ ਹੋ ਗਿਆ ਹੈ ਪਰ ਲੋਕਾਂ ਨੇ ਬਾਦਲ ਸਾਹਿਬ ਦੀ ਕੋਈ ਪ੍ਰਵਾਹ ਨਹੀਂ ਕੀਤੀ। ਅਫ਼ਸੋਸ ਹੈ ਜਿਨ੍ਹਾਂ ਪਿੰਡਾਂ ਵਿਚ ਮਨਰੇਗਾ ਸਕੀਮ ਚਲਦੀ ਹੈ, ਉਨ੍ਹਾਂ ਪਿੰਡਾਂ ਵਿਚ ਇਹ ਗਾਜਰਘਾਹ ਖੜ੍ਹਾ ਹੈ, ਮਨਰੇਗਾ ਦੀ ਪੂਰੀ ਤਰ੍ਹਾਂ ਦੁਰਵਰਤੋਂ ਹੋ ਰਹੀ ਹੈ। ਇਸ ਤੋਂ ਇਲਾਵਾ ਕਈ ਥਾਈਂ ਕਿਸਾਨਾਂ ਨੇ ਸੜਕਾਂ ਦੇ ਕਿਨਾਰੇ ਵਾਹ ਕੇ ਖੇਤ ਵਿਚ ਰਲਾ ਲਏ ਹਨ। ਲੋਕਾਂ ਦਾ ਲੰਘਣਾ ਬਹੁਤ ਮੁਸ਼ਕਿਲ ਹੈ। ਸੜਕਾਂ ਪਹਿਲਾਂ ਹੀ ਛੋਟੀਆਂ ਹਨ। ਪਰ ਸਰਕਾਰ ਜ਼ਬਰਦਸਤ ਲਾਪ੍ਰਵਾਹੀ ਵਿਖਾ ਰਹੀ ਹੈ।

-ਭੁਪਿੰਦਰ ਸਿੰਘ ਬਾਠ
ਪਿੰਡ ਪੰਜੋਲੀ ਕਲਾਂ (ਫ਼ਤਹਿਗੜ੍ਹ ਸਾਹਿਬ)।

ਗੁੱਸੇਖੋਰ ਜਵਾਨੀ
ਸਿਆਣਿਆਂ ਦਾ ਕਥਨ ਹੈ ਜਦੋਂ ਕਿਸੇ ਮਨੁੱਖ ਨੂੰ ਗੁੱਸਾ ਆਉਂਦਾ ਹੈ ਤਾਂ ਉਸ ਦੀ ਅਕਲ ਬਿਲਕੁਲ ਖਤਮ ਹੋ ਜਾਂਦੀ ਹੈ ਅਤੇ ਉਹ ਇਸ ਗੁੱਸੇ ਵਿਚ ਅੰਨ੍ਹਾ ਹੋਇਆ ਕਈ ਵਾਰ ਅਜਿਹੇ ਕਦਮ ਚੁੱਕ ਬੈਠਦਾ ਹੈ, ਜਿਸ ਨਾਲ ਸਾਰੀ ਜ਼ਿੰਦਗੀ ਪਛਤਾਵੇ ਤੋਂ ਇਲਾਵਾ ਉਸ ਦੇ ਪੱਲੇ ਕੱਖ ਨਹੀਂ ਬਚਦਾ। ਅੱਜ ਦੀ ਜਵਾਨੀ ਸਹਿਣਸ਼ੀਲਤਾ ਦੀ ਘਾਟ ਕਾਰਨ ਲਗਾਤਾਰ ਗੁੱਸੇਖੋਰ ਬਣਦੀ ਜਾ ਰਹੀ ਹੈ। ਨਿੱਕੀਆਂ-ਨਿੱਕੀਆਂ ਗੱਲਾਂ ਤੋਂ ਅੱਗ-ਬਬੂਲੇ ਹੋ ਕੇ ਇਕ-ਦੂਜੇ ਦਾ ਕਤਲ ਕਰਨਾ ਲੋਕਾਂ ਲਈ ਜਿਵੇਂ ਖੇਡ ਹੀ ਬਣਦਾ ਜਾ ਰਿਹਾ ਹੈ। ਭਰਾ ਹੱਥੋਂ ਭਰਾ ਦਾ ਕਤਲ, ਪੁੱਤਰ ਹੱਥੋਂ ਪਿਉ ਦਾ ਕਤਲ, ਪਤੀ ਵੱਲੋਂ ਪਤਨੀ ਦੀ ਹੱਤਿਆ ਅਤੇ ਪਤਨੀ ਵੱਲੋਂ ਪਤੀ ਦੀ ਹੱਤਿਆ ਵਰਗੀਆਂ ਦਿਲ ਕੰਬਾਊ ਖ਼ਬਰਾਂ ਰੋਜ਼ਾਨਾ ਅਖ਼ਬਾਰਾਂ ਦੀਆਂ ਸੁਰਖੀਆਂ ਬਣਨੀਆਂ ਆਮ ਹੋ ਗਈਆਂ ਹਨ। ਸੋ, ਅੱਜ ਲੋੜ ਹੈ ਨਿੱਕੇ-ਨਿੱਕੇ ਗੁੱਸੇ-ਗਿਲਿਆਂ ਨੂੰ ਸਹਿਣਸ਼ੀਲਤਾ ਅਤੇ ਠਰੰਮੇ ਨਾਲ ਵੱਡੇ ਗੁੱਸੇ ਗਿਲਿਆਂ ਵਿਚ ਤਬਦੀਲ ਹੋਣ ਤੋਂ ਰੋਕਿਆ ਜਾਵੇ ਤਾਂ ਜੋ ਬਾਅਦ ਵਿਚ ਸਾਰੀ ਜ਼ਿੰਦਗੀ ਦੇ ਪਛਤਾਵੇ ਤੋਂ ਬਚਿਆ ਜਾ ਸਕੇ।

-ਰਾਜਾ ਗਿੱਲ (ਚੜਿੱਕ)
ਮੋ: 94654-11585

1-9-2014

 ਔਰਤਾਂ ਦਾ ਸਤਿਕਾਰ
ਮੈਂ ਦੁਬਈ 'ਚ ਦੇਖਿਆ ਹੈ ਕਿ ਇਥੇ ਔਰਤਾਂ ਨੂੰ ਬਹੁਤ ਜ਼ਿਆਦਾ ਸਤਿਕਾਰ ਦਿੱਤਾ ਜਾਂਦਾ ਹੈ। ਦੂਜੇ ਪਾਸੇ ਭਾਰਤ 'ਚ ਜਬਰ-ਜਨਾਹ ਦੀਆਂ ਘਟਨਾਵਾਂ ਦਾ ਦੌਰ ਏਨਾ ਚਲ ਰਿਹਾ ਹੈ ਕਿ ਜਾਪਦਾ ਹੈ ਕਿ ਆਉਣ ਵਾਲੇ 50 ਸਾਲਾਂ ਤੱਕ ਭਾਰਤ ਨਰਕ ਬਣ ਜਾਵੇਗਾ, ਕਿਉਂਕਿ ਘਰ ਉਦੋਂ ਹੀ ਸੋਹਣਾ ਲਗਦਾ ਹੈ ਜਦੋਂ ਘਰ 'ਚ ਖੁਸ਼ੀਆਂ ਹੀ ਹੋਣ। ਸਰਕਾਰ ਵੱਲੋਂ ਵੀ ਅਜਿਹੇ ਕੋਈ ਉਪਰਾਲੇ ਨਹੀਂ ਕੀਤੇ ਜਾ ਰਹੇ ਜਿਨ੍ਹਾਂ ਨਾਲ ਸਥਿਤੀਆਂ ਸੁਧਰ ਸਕਣ।

-ਸਰਬਜੀਤ ਸਿੰਘ
ਸੰਯੁਕਤ ਅਰਬ ਅਮੀਰਾਤ
sarbjitvirdi98@gmail.com

ਧੰਨਵਾਦ
ਮੈਂ ਰੋਜ਼ਾਨਾ 'ਅਜੀਤ' ਅਖ਼ਬਾਰ ਪੜ੍ਹਦਾ ਹਾਂ। ਇਸ ਰਾਹੀਂ ਮੈਨੂੰ ਆਪਣੇ ਪੰਜਾਬ ਵਿਚ ਰੋਜ਼ਾਨਾ ਵਾਪਰਨ ਵਾਲੀਆਂ ਸਾਰੀਆਂ ਚੰਗੀਆਂ-ਮਾੜੀਆਂ ਗੱਲਾਂ ਦੀ ਜਾਣਕਾਰੀ ਮਿਲ ਜਾਂਦੀ ਹੈ। ਬਾਹਰ ਬੈਠੇ ਪ੍ਰਵਾਸੀਆਂ ਲਈ ਇਹ ਵਧੀਆ ਗੱਲ ਹੈ, ਅਸੀਂ ਉਸੇ ਦਿਨ ਆਪਣੇ ਵਤਨ ਦੀਆਂ ਸਰਗਰਮੀਆਂ ਬਾਰੇ ਜਾਣ ਲੈਂਦੇ ਹਾਂ। ਤੁਹਾਡਾ ਧੰਨਵਾਦ।

-ਪੂਰਨ ਚੰਦ ਭੋਲੂ
ਦੋਹਾ ਕਤਰ।
bholu2399@gmail.com

ਟ੍ਰੈਫਿਕ ਸਮੱਸਿਆ ਬਾਰੇ
ਪਿਛਲੇ ਦਿਨੀਂ ਆਵਾਜਾਈ ਸਬੰਧੀ ਸੰਪਾਦਕੀ ਲੇਖ ਪੜ੍ਹਿਆ। ਤੁਸੀਂ ਬਹੁਤ ਸਟੀਕ ਸੁਝਾਅ ਦਿੱਤੇ ਹਨ। ਇਸ ਸਬੰਧੀ ਠੋਸ ਕਦਮ ਚੁੱਕਣ ਦੀ ਲੋੜ ਹੈ। ਸੜਕਾਂ ਦੇ ਸੁਧਾਰ ਤੋਂ ਇਲਾਵਾ ਹੋਰ ਬਹੁਤ ਕੁਝ ਕੀਤੇ ਜਾਣ ਦੀ ਲੋੜ ਹੈ। ਮੈਂ ਜਦੋਂ ਵੀ ਪੰਜਾਬ ਜਾਂਦਾ ਹਾਂ, ਦਿੱਲੀ ਉਤਰਦੇ ਸਾਰ ਹੀ ਸੜਕ ਦਾ ਸਫ਼ਰ ਭੈਅ-ਭੀਤ ਕਰ ਦਿੰਦਾ ਹੈ, ਕਿਉਂਕਿ ਜੀ. ਟੀ. ਰੋਡ 'ਤੇ ਸ਼ਾਇਦ ਹੀ ਕੋਈ ਅਜਿਹਾ ਦਿਨ ਹੁੰਦਾ ਹੋਵੇਗਾ ਜਿਸ ਦਿਨ ਕੋਈ ਦੁਰਘਟਨਾ ਨਾ ਵਾਪਰਦੀ ਹੋਵੇ। ਅਸਲ ਵਿਚ ਸਾਡੇ ਭਾਰਤ 'ਚ ਆਵਾਜਾਈ ਦੇ ਨਿਯਮ ਸਿਰਫ਼ ਕਿਤਾਬਾਂ ਵਿਚ ਹੀ ਹੁੰਦੇ ਹਨ। ਹਰ ਕੋਈ ਦੂਜੇ ਤੋਂ ਅੱਗੇ ਲੰਘਣ ਦੀ ਹੋੜ ਵਿਚ ਹੁੰਦਾ ਹੈ। ਨਿਯਮ ਜਿੰਨੇ ਮਰਜ਼ੀ ਬਣਾ ਲਵੋ, ਕੋਈ ਇਨ੍ਹਾਂ ਦੀ ਪਾਲਣਾ ਨਹੀਂ ਕਰਦਾ।
ਜਦੋਂ ਤੱਕ ਆਮ ਆਦਮੀ ਖ਼ੁਦ ਸੜਕ ਸੁਰੱਖਿਆ ਬਾਰੇ ਜ਼ਿੰਮੇਵਾਰੀ ਨਹੀਂ ਸਮਝੇਗਾ, ਉਦੋਂ ਤੱਕ ਇਹ ਦੁਰਘਟਨਾਵਾਂ ਹੁੰਦੀਆਂ ਹੀ ਰਹਿਣਗੀਆਂ। ਸਰਕਾਰ ਨੂੰ ਵੀ ਇਸ ਪਾਸੇ ਉਚੇਚਾ ਧਿਆਨ ਦੇਣਾ ਚਾਹੀਦਾ ਹੈ, ਜਿਵੇਂ ਕਿ ਭਾਰਤ ਵਿਚ ਡਰਾਈਵਿੰਗ ਲਾਈਸੈਂਸ ਕਈ ਵਾਰ ਅਜਿਹੇ ਲੋਕਾਂ ਨੂੰ ਵੀ ਮਿਲ ਜਾਂਦਾ ਹੈ, ਜੋ ਇਸ ਦੇ ਹੱਕਦਾਰ ਨਹੀਂ ਹੁੰਦੇ। ਵਧਦੇ ਟ੍ਰੈਫਿਕ ਮੁਤਾਬਿਕ ਸੜਕਾਂ ਨੂੰ ਵੀ ਵਿਸਥਾਰ ਦਿੱਤੇ ਜਾਣ ਦੀ ਲੋੜ ਹੈ।

-ਪਰਮਪਾਲ ਸਿੰਘ
ਬਰਤਾਨੀਆ।
paligandhi@gmail.com

ਹਵਾਈ ਉਡਾਣਾਂ
ਚੰਡੀਗੜ੍ਹ ਦੇ ਹਵਾਈ ਅੱਡੇ ਬਾਰੇ ਖ਼ਬਰ ਪੜ੍ਹ ਕੇ ਬਹੁਤ ਖੁਸ਼ੀ ਹੋਈ। ਬੜੀ ਵਧੀਆ ਗੱਲ ਹੈ ਕਿ ਇਥੇ ਅੰਤਰਰਾਸ਼ਟਰੀ ਉਡਾਣਾਂ ਆਉਣਗੀਆਂ। ਅੰਮ੍ਰਿਤਸਰ ਲਈ ਵੀ ਸਿੰਗਾਪੁਰ ਤੋਂ ਜਾਂ ਹਾਂਗਕਾਂਗ ਤੋਂ ਸਿੱਧੀਆਂ ਉਡਾਣਾਂ ਹੋਣੀਆਂ ਚਾਹੀਦੀਆਂ ਹਨ, ਤਾਂ ਕਿ ਪੰਜਾਬੀ ਵੀਰਾਂ ਨੂੰ ਕੋਈ ਮੁਸ਼ਕਿਲ ਨਾ ਆਵੇ। ਕੇਂਦਰੀ ਵਿੱਤ ਮੰਤਰੀ ਅਰੁਣ ਜੇਤਲੀ ਦਾ ਇਸ ਉਪਰਾਲੇ ਲਈ ਬਹੁਤ ਧੰਨਵਾਦ, ਉਨ੍ਹਾਂ ਨੇ ਸਾਰੇ ਪੰਜਾਬੀਆਂ ਲਈ ਇਹ ਬਹੁਤ ਵਧੀਆ ਕੰਮ ਕੀਤਾ ਹੈ।

-ਰਾਜਾ
ਮਨੀਲਾ
karmjitsingh@yahoo.com

29-8-2014

 ਵਧ ਰਿਹਾ ਗਰਮੀ ਦਾ ਪ੍ਰਭਾਵ

ਅੱਜਕਲ੍ਹ ਲੋਕਾਂ ਨੇ ਆਪਣੇ ਕਮਰੇ ਭਾਵੇਂ ਠੰਢੇ ਕਰ ਲਏ ਹਨ ਏ. ਸੀ. ਵਗੈਰਾ ਦੀ ਮਦਦ ਨਾਲ ਪਰ ਪੂਰੇ ਇਲਾਕੇ 'ਚ ਗਰਮੀ ਵਧ ਗਈ ਹੈ, ਜਿਸ ਨਾਲ ਬੇਜ਼ੁਬਾਨੇ ਪੰਛੀਆਂ ਦੀ ਮੌਤ ਹੋ ਰਹੀ ਹੈ। ਅੱਜ ਆਪਣੇ ਵਾਹਨਾਂ ਵਿਚ ਏ. ਸੀ. ਦਾ ਪ੍ਰਯੋਗ ਕਰ ਰਹੇ ਹਾਂ, ਜਿਸ ਦੇ ਫਲਸਰੂਪ ਘਰਾਂ ਦਾ, ਦਫ਼ਤਰਾਂ ਦਾ, ਵਾਹਨਾਂ ਦਾ ਤਾਪ, ਬਾਹਰ ਵਾਤਾਵਰਨ ਵਿਚ ਸ਼ਮੂਲੀਅਤ ਕਰ ਰਿਹਾ ਹੈ। ਵੱਡੇ-ਵੱਡੇ ਗਲੇਸ਼ੀਅਰ ਵੀ ਆਪਣਾ ਰਕਬਾ ਘਟਾ ਰਹੇ ਹਨ ਭਾਵ ਪਿਘਲ ਰਹੇ ਹਨ, ਜਿਸ ਦੇ ਬੇਹੱਦ ਘਾਤਕ ਸਿੱਟੇ ਨਿਕਲ ਸਕਦੇ ਹਨ। ਵੇਖਣ ਵਿਚ ਆ ਰਿਹਾ ਹੈ ਕਿ ਲੋਕ ਏ.ਸੀ. ਘੱਟ ਤਾਪਮਾਨ 'ਤੇ ਚਲਾਉਂਦੇ ਹਨ, ਜਿਸ ਨਾਲ ਵਾਤਾਵਰਨ ਦੀ ਇਕਸਾਰਤਾ ਭੰਗ ਕਰਦਾ ਹੈ। ਸੋ, ਸਾਨੂੰ ਸਾਰਿਆਂ ਨੂੰ ਆਪਣੇ ਏ.ਸੀ. 25-30 ਡਿਗਰੀ ਤਾਪਮਾਨ ਦੇ ਵਿਚ ਚਲਾਉਣੇ ਚਾਹੀਦੇ ਹਨ ਤਾਂ ਜੋ ਵਾਤਾਵਰਨ, ਸਿਹਤ ਤੇ ਬਿਜਲੀ ਖਰਚ, ਤਿੰਨਾਂ ਨੂੰ ਸਹੀ ਰੱਖਿਆ ਜਾ ਸਕੇ।

-ਕਰਮਜੀਤ ਸਿੰਘ ਧਾਰੀਵਾਲ
ਨਵੀਂ ਆਬਾਦੀ, ਜੀ.ਟੀ. ਰੋਡ, ਧਾਰੀਵਾਲ।

28-8-2014

 ਆਲ ਇੰਡੀਆ ਗੁਰਦੁਆਰਾ ਐਕਟ
ਹਰਿਆਣਾ ਵਿਚ ਵੱਖਰੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੂੰ ਲੈ ਕੇ ਜੋ ਵਿਵਾਦ ਖੜ੍ਹਾ ਹੋਇਆ ਹੈ, ਉਹ ਸਮੁੱਚੇ ਸਿੱਖ ਪੰਥ ਲਈ ਮੰਦਭਾਗਾ ਹੈ। ਕਿੰਨੀ ਹੈਰਾਨੀ ਭਰੀ ਗੱਲ ਹੈ ਕਿ ਗੁਰਦੁਆਰਿਆਂ ਲਈ ਸਿੱਖਾਂ ਦੀ ਆਪਸੀ ਲੜਾਈ ਗੁਰਦੁਆਰਿਆਂ ਦੀ 'ਸੇਵਾ ਸੰਭਾਲ' ਲਈ ਨਹੀਂ, ਸਗੋਂ ਗੁਰਦੁਆਰਿਆਂ 'ਤੇ ਕਬਜ਼ੇ ਦੀ ਲੜਾਈ ਦਾ ਰੂਪ ਧਾਰਨ ਕਰ ਗਈ ਹੈ। ਗੁਰਦੁਆਰਿਆਂ 'ਤੇ ਕਬਜ਼ੇ ਦੀ ਲੜਾਈ ਦਾ ਅਸਲ ਕਾਰਨ ਸਿਰਫ ਗੁਰਦੁਆਰਿਆਂ ਪ੍ਰਤੀ ਸ਼ਰਧਾ ਜਾਂ ਸਿਰਫ ਗੁਰਦੁਆਰਿਆਂ ਦਾ ਪੈਸਾ ਹੀ ਨਹੀਂ, ਸਗੋਂ ਇਹ ਲੜਾਈ ਗੁਰਦੁਆਰਿਆਂ 'ਤੇ ਕਬਜ਼ਾ ਕਰਕੇ ਰਾਜ ਸੱਤਾ ਵਿਚ ਹਿੱਸਾ ਲੈਣ ਅਤੇ ਰਾਜਨੀਤੀ ਵਿਚ ਸਥਾਪਿਤ ਹੋਣ ਦੀ ਵੀ ਹੈ।
ਇਸ ਸਾਰੇ ਮਸਲੇ ਦੇ ਹੱਲ ਲਈ ਪੁਰਾਣੇ ਆਲ ਇੰਡੀਆ ਗੁਰਦੁਆਰਾ ਐਕਟ ਦੇ ਖਰੜੇ ਨੂੰ ਮੁੜ ਵਿਚਾਰ ਕੇ ਉਸ ਵਿਚ ਨਵੇਂ ਵਕਤ ਅਤੇ ਨਵੇਂ ਹਾਲਾਤਾਂ ਅਨੁਸਾਰ ਸੋਧਾਂ ਕਰਕੇ ਅਕਾਲੀ ਦਲ ਦੀ ਰਾਜਾਂ ਨੂੰ ਵੱਧ ਅਧਿਕਾਰ ਦੇਣ ਦੀ ਸੋਚ ਦੇ ਆਧਾਰ 'ਤੇ ਦੇਸ਼ ਦੇ ਹਰ ਰਾਜ ਵਿਚ ਸਥਾਨਕ ਗੁਰਦੁਆਰਿਆਂ ਦੇ ਪ੍ਰਬੰਧ ਲਈ ਰਾਜ ਕਮੇਟੀਆਂ ਬਣਾ ਕੇ ਉਨ੍ਹਾਂ ਨੂੰ ਹੱਕ ਸੌਂਪ ਦਿੱਤੇ ਜਾਣ ਅਤੇ ਇਹ ਸਾਰੇ ਇਕ ਸਾਂਝੀ ਕਮੇਟੀ ਅਧੀਨ ਹੋਣ।

-ਜਸਪਿੰਦਰ ਸਿੰਘ ਗਿੱਲ
ਪਿੰਡ ਉਬੋਕੇ, ਤਹਿ: ਪੱਟੀ (ਤਰਨ ਤਾਰਨ)।

ਚਿਹਰੇ ਦੀ ਮੁਸਕਾਨ
ਮੁਸਕਾਨ ਕੁਦਰਤ ਵੱਲੋਂ ਦਿੱਤਾ ਮਨੁੱਖ ਨੂੰ ਅਮੁੱਲ ਤੋਹਫ਼ਾ ਹੈ। ਜਦੋਂ ਅਸੀਂ ਕਿਸੇ ਨੂੰ ਮਿਲਦੇ ਹਾਂ ਤਾਂ ਚਿਹਰੇ ਦੀ ਮੁਸਕਾਨ ਤੋਂ ਪਤਾ ਲੱਗ ਜਾਂਦਾ ਹੈ ਕਿ ਮਿਲਣ ਵਾਲਾ ਸਾਨੂੰ ਕਿੰਨਾ ਕੁ ਦਿਲੋਂ ਚਾਹੁੰਦਾ ਹੈ ਜਾਂ ਹੱਥ ਮਿਲਾਉਣਾ ਸਿਰਫ ਖਾਨਾਪੂਰਤੀ ਹੈ। ਜਿਥੋਂ ਤੱਕ ਹੋ ਸਕੇ ਬਨਾਉਟੀ ਮੁਸਕਾਨ ਤੋਂ ਬਚੋ। ਚਿਹਰੇ ਦੀ ਮੁਸਕਾਨ ਤੋਂ ਹੀ ਤੁਹਾਡੇ ਸੁਭਾਅ, ਸਲੀਕੇ, ਸਹਿਜ ਗੁਣਾਂ ਦਾ ਅਨੁਮਾਨ ਵੀ ਲੱਗ ਜਾਂਦਾ ਹੈ। ਮੁਸਕਾਨ ਇਕ ਕੁਦਰਤੀ ਸ਼ਿੰਗਾਰ ਹੈ, ਜੋ ਸਾਡੇ ਚਿਹਰੇ ਨੂੰ ਬਿਨਾਂ ਕੁਝ ਖਰਚਿਆਂ ਚਾਰ ਚੰਨ ਲਾ ਦਿੰਦਾ ਹੈ। ਯਾਦ ਰਹੇ ਮੁਸਕਾਨ ਤੁਹਾਡੀ ਸ਼ਖ਼ਸੀਅਤ ਦੀ ਪਛਾਣ ਹੈ। ਇਕ ਵਾਰ ਹੱਸਦੇ ਚਿਹਰੇ ਨਾਲ ਇਸ ਕਾਇਨਾਤ ਨੂੰ ਨਿਹਾਰਨ ਦੀ ਕੋਸ਼ਿਸ਼ ਕਰੋ, ਫਿਰ ਇਹ ਪ੍ਰਕਿਰਤੀ, ਬ੍ਰਹਿਮੰਡ ਵੀ ਤੁਹਾਡੇ ਨਾਲ ਹੱਸਦੇ ਹੋਣਗੇ। ਇਥੇ ਵਰਨਣਯੋਗ ਹੈ ਕਿ ਅੱਜ ਦੀ ਤੇਜ਼ ਅਤੇ ਥੱਕੀ-ਟੁੱਟੀ ਜ਼ਿੰਦਗੀ ਵਿਚ ਹੱਸਣਾ ਸਭ ਤੋਂ ਔਖਾ ਹੈ। ਇਸ ਲਈ ਆਪਣੀ ਮੁਸਕਾਨ ਨੂੰ ਫਿੱਕਾ ਨਾ ਹੋਣ ਦਿਓ। ਮੁਸਕਾਨ ਅਤੇ ਨਿਮਰਤਾ ਇਨਸਾਨੀ ਜ਼ਿੰਦਗੀ ਦੇ ਦੋ ਅਹਿਮ ਗਹਿਣੇ ਹਨ।

-ਜਸਬੀਰ ਦੱਧਾਹੂਰ
ਪਿੰਡ ਤੇ ਡਾਕ: ਦੱਧਾਹੂਰ, ਤਹਿ: ਰਾਏਕੋਟ, ਜ਼ਿਲ੍ਹਾ ਲੁਧਿਆਣਾ।

ਨਾ ਧੀਆਂ ਨਾ ਤੀਆਂ
ਵਿਗਿਆਨਕ ਤਰੱਕੀ ਨੇ ਸਾਡਾ ਕੱਦ ਭਾਵੇਂ ਬਹੁਤ ਉੱਚਾ ਕਰ ਦਿੱਤਾ ਹੈ ਪਰ ਰਿਸ਼ਤਿਆਂ-ਨਾਤਿਆਂ ਦੇ ਮੁਕਾਬਲੇ ਅਸੀਂ ਬੌਣੇ ਜਿਹੇ ਜਾਪਦੇ ਹਾਂ। ਤਰੱਕੀ ਕਰਕੇ ਚੰਦ 'ਤੇ ਪਹੁੰਚ ਗਏ ਪਰ ਗੁਆਂਢੀ ਨੂੰ ਜਾਣਦੇ ਨਹੀਂ। ਇਸ ਵਾਰ ਸਾਵਣ ਮਹੀਨੇ 'ਚ ਤੁਸੀਂ ਵੇਖਿਆ ਹੋਵੇਗਾ ਕਿ ਕਿੰਨੀਆਂ ਕੁ ਤੀਆਂ ਲੱਗੀਆਂ ਤੇ ਕੁੜੀਆਂ ਨੇ ਕਿੰਨੇ ਕੁ ਚਾਅ ਮਨਾਏ? ਅਸੀਂ ਮੂੰਹੋਂ ਭਾਵੇਂ ਨਾ ਬੋਲੀਏ ਪਰ ਜਾਣਦੇ ਜ਼ਰੂਰ ਹਾਂ, ਕਿਉਂਕਿ ਅਸੀਂ ਹੀ ਕਸੂਰਵਾਰ ਹਾਂ ਧੀਆਂ ਦੇ ਤੇ ਤੀਆਂ ਦੇ, ਕਿਉਂਕਿ ਜਦ ਸਾਡੀ ਕੁੱਖੋਂ ਧੀਆਂ ਮੁੱਕ ਗਈਆਂ ਤਾਂ ਤੀਆਂ ਵੀ ਮੁੱਕ ਗਈਆਂ। ਹੁਣ ਸਾਵਣ ਮਹੀਨਾ ਇਕ ਵਿਧਵਾ ਬਣ ਕੇ ਰਹਿ ਗਿਆ। ਹੁਣ ਅਸਲੀ ਤੀਆਂ ਦੀ ਥਾਂ ਬਨਾਉਟੀ ਤੀਆਂ ਲਾਈਆਂ ਜਾਂਦੀਆਂ ਨੇ। ਸਾਲ ਦੇ 12 ਮਹੀਨਿਆਂ ਵਿਚੋਂ ਸਾਵਣ ਦਾ ਮਹੀਨਾ ਕੁੜੀਆਂ-ਚਿੜੀਆਂ ਲਈ ਬਹੁਤ ਮਹੱਤਵ ਰੱਖਦਾ ਹੈ, ਕਿਉਂਕਿ ਇਕ-ਦੂਜੇ ਤੋਂ ਵਿਛੜੀਆਂ ਸਹੇਲੀਆਂ ਇਸ ਮਹੀਨੇ ਮਿਲਦੀਆਂ ਨੇ ਤੇ ਦੁੱਖ-ਸੁੱਖ ਕਰਦੀਆਂ ਨੇ। ਜੇ ਅਸੀਂ ਇਹ ਰਿਸ਼ਤੇ-ਨਾਤੇ ਤੋੜ ਰਹੇ ਹਾਂ ਤਾਂ ਰੱਬ ਦੀ ਨਾਰਾਜ਼ਗੀ ਵੀ ਵਧ ਰਹੀ ਹੈ। ਵੇਖ ਲਵੋ ਸਾਵਣ ਮਹੀਨਾ ਸੁੱਕਾ ਹੀ ਲੰਘ ਗਿਆ ਰੱਬ ਨੇ ਵੀ ਮੀਂਹ ਨਹੀਂ ਪਾਇਆ।

-ਗੁਰਪ੍ਰੀਤ ਸਿੰਘ ਮਾਨ
ਪਿੰਡ ਤੇ ਡਾਕ: ਮੌੜ (ਫਰੀਦਕੋਟ)।

ਨਸ਼ਾ ਛੁਡਾਊ ਮੁਹਿੰਮ
ਲੋਕ ਸਭਾ 2014 ਦੀਆਂ ਹੋਈਆਂ ਵੋਟਾਂ ਦਾ ਇਕ ਫਾਇਦਾ ਇਹ ਵੀ ਹੋਇਆ ਕਿ ਪੰਜਾਬ ਵਿਚ ਨਸ਼ਿਆਂ ਦਾ ਛੇਵਾਂ ਦਰਿਆ ਜੋ ਨਿਰਵਿਘਨ ਵਗ ਰਿਹਾ ਸੀ, ਉਸ ਨੂੰ ਠੱਲ੍ਹ ਜ਼ਰੂਰ ਪੈ ਰਹੀ ਹੈ। ਬੇਸ਼ੱਕ ਇਹ ਕਾਰਵਾਈ ਕੁਝ ਸਮਾਂ ਲੇਟ ਹੋ ਗਈ ਹੈ, ਕਿਉਂਕਿ ਹੁਣ ਤੱਕ ਨਸ਼ਿਆਂ ਦੇ ਕਾਰਨ ਕਈਆਂ ਦੇ ਘਰ ਉੱਜੜ ਚੁੱਕੇ ਹਨ। ਚਲੋ, ਫਿਰ ਵੀ ਦੇਰ ਆਏ ਦਰੁਸਤ ਆਏ। ਇਕ ਗੱਲ ਜੋ ਚੰਗੀ ਲੱਗੀ ਕਿ ਨਸ਼ਈ ਖ਼ੁਦ ਹੀ ਹਸਪਤਾਲਾਂ ਵਿਚ ਜਾ ਕੇ ਆਪਣੇ ਨਸ਼ੇ ਛੱਡਣ ਦੀ ਫਰਿਆਦ ਕਰ ਰਹੇ ਹਨ। ਹਸਪਤਾਲਾਂ ਵਿਚ ਨਸ਼ਾ ਛੱਡਣ ਵਾਲੀ ਦਵਾਈ ਦਾ ਨਾ ਮਿਲਣਾ (ਖ਼ਤਮ ਹੋਣਾ) ਕਾਫੀ ਮੰਦਭਾਗਾ ਹੈ। ਪੰਜਾਬ ਸਰਕਾਰ ਨੂੰ ਚਾਹੀਦਾ ਹੈ ਕਿ ਇਸ ਮੁਹਿੰਮ ਨੂੰ ਸਿਖਰ ਤੱਕ ਪਹੁੰਚਾਉਣ ਲਈ ਸਰਕਾਰੀ ਹਸਪਤਾਲਾਂ ਵਿਚ ਦਵਾਈਆਂ ਅਤੇ ਰਹਿਣ-ਸਹਿਣ ਦਾ ਪੂਰਾ ਪ੍ਰਬੰਧ ਕੀਤਾ ਜਾਵੇ। ਸਰਹੱਦੋਂ ਪਾਰ ਤੋਂ ਆਉਂਦੇ ਨਸ਼ੇ 'ਤੇ ਵੀ ਕਰੜੀ ਨਿਗ੍ਹਾ ਰੱਖੀ ਜਾਵੇ, ਤਾਂ ਜੋ ਸਾਡੀ ਨੌਜਵਾਨ ਪੀੜ੍ਹੀ ਇਸ ਨਸ਼ਿਆਂ ਰੂਪੀ ਦਲਦਲ 'ਚੋਂ ਨਿਕਲ ਕੇ ਆਪਣੀ ਨਵੀਂ ਜ਼ਿੰਦਗੀ ਦੀ ਸ਼ੁਰੂਆਤ ਕਰ ਸਕੇ।

-ਬਲਵੰਤ ਸਿੰਘ ਗਿਆਸਪੁਰਾ
ਮੋ: 98887-47151

27-8-2014

 ਸਫ਼ਾਈ
ਅਕਸਰ ਵੇਖਣ ਵਿਚ ਆਉਂਦਾ ਹੈ ਕਿ ਜ਼ਮੀਨਾਂ ਦੇ ਕਿਨਾਰਿਆਂ 'ਤੇ, ਜਿਥੋਂ ਪੈਲੀ ਸੜਕ ਨਾਲ ਲਗਦੀ ਹੈ, ਬਿਲਕੁਲ ਨਾਲ-ਨਾਲ ਭੰਗ ਬਹੁਤ ਉੱਗੀ ਹੁੰਦੀ ਹੈ। ਇਸ ਦਾ ਸਾਥ ਕਾਂਗਰਸੀ ਬੂਟੀ ਵੀ ਬਰਾਬਰ ਦਿੰਦੀ ਹੈ। ਸਾਨੂੰ ਆਪਣੀਆਂ ਪੈਲੀਆਂ ਵਿਚਲੇ ਨਦੀਨ ਤਾਂ ਨਹੀਂ ਭੁੱਲਦੇ ਪਰ ਕਿਨਾਰਿਆਂ 'ਤੇ ਭੰਗ ਜ਼ਰੂਰ ਭੁੱਲ ਜਾਂਦੀ ਹੈ। ਪਿੰਡਾਂ ਦੇ ਰਾਹ ਛੋਟੇ ਹੁੰਦੇ ਹਨ। ਪਰ ਅੱਜਕਲ੍ਹ ਕਾਰਾਂ ਦੀ ਗਿਣਤੀ ਪਹਿਲਾਂ ਨਾਲੋਂ ਬਹੁਤ ਵੱਧ ਚੁੱਕੀ ਹੈ। ਸੋ, ਹਰ ਮੋੜ 'ਤੇ ਮੋਟਰਸਾਈਕਲਾਂ ਤੇ ਸਾਈਕਲਾਂ ਵਾਲਿਆਂ ਨੂੰ ਖ਼ਤਰਾ ਬਣਿਆ ਰਹਿੰਦਾ ਹੈ। ਸਗੋਂ ਹਰ ਵਾਹਨ ਹੀ ਖ਼ਤਰਨਾਕ ਬਣ ਜਾਂਦਾ ਹੈ। ਕੁਝ ਦਿਖਾਈ ਨਹੀਂ ਦਿੰਦਾ। ਇਹ ਇਕ ਤਰ੍ਹਾਂ ਦੀ ਸੱਪਾਂ ਲਈ ਵੀ ਲੁਕਣਗਾਹ ਦਾ ਕੰਮ ਕਰ ਰਹੀ ਹੈ। ਸਿਹਤ ਨਾਲ ਤਾਂ ਖਿਲਵਾੜ ਕਰਦੀ ਹੀ ਹੈ। ਇਸ ਲਈ ਸਾਡਾ ਸਾਰਿਆਂ ਦਾ ਨਿੱਜੀ ਫ਼ਰਜ਼ ਬਣਦਾ ਹੈ ਕਿ ਅਸੀਂ ਆਪਣੀ-ਆਪਣੀ ਜ਼ਮੀਨ ਦੀ ਸਫ਼ਾਈ ਰੱਖੀਏ, ਭਾਵੇਂ ਦਵਾਈ ਪਾ ਕੇ ਭੰਗ ਸਾੜੀਏ ਭਾਵੇਂ ਵੱਢ ਦੇਈਏ।

-ਕਰਮਜੀਤ ਸਿੰਘ ਧਾਰੀਵਾਲ
ਨਵੀਂ ਆਬਾਦੀ, ਜੀ.ਟੀ. ਰੋਡ, ਧਾਰੀਵਾਲ।

ਸਕੂਲ ਬੱਸਾਂ ਬਾਰੇ
ਨਿੱਜੀ ਸਕੂਲਾਂ ਦੀਆਂ ਬੱਸਾਂ ਵਿਚ ਸਮਰੱਥਾ ਤੋਂ ਵੱਧ ਬੱਚੇ ਬਿਠਾਉਣੇ ਕਾਨੂੰਨ ਦੇ ਦਾਇਰੇ ਤੋਂ ਬਾਹਰ ਹੈ। ਅਖ਼ਬਾਰਾਂ ਵਿਚ ਛਪਦੀਆਂ ਖ਼ਬਰਾਂ ਤੋਂ ਅਕਸਰ ਪਤਾ ਲਗਦਾ ਹੈ ਕਿ ਜੋ ਬੱਸ ਹਾਦਸੇ ਦਾ ਸ਼ਿਕਾਰ ਹੋਈ ਹੈ, ਉਸ ਵਿਚ ਬੱਚੇ ਬੱਸ ਦੀ ਸਮਰੱਥਾ ਤੋਂ ਵੱਧ ਸਵਾਰ ਸਨ। ਕੀ ਇਹ ਸਕੂਲ ਮੁਖੀਆਂ ਦੀ ਮਜਬੂਰੀ ਹੈ ਕਿ ਉਨ੍ਹਾਂ ਨੂੰ ਆਪਣੇ ਸਕੂਲ ਚਲਾਉਣ ਲਈ ਅਜਿਹਾ ਕਰਨਾ ਪੈ ਰਿਹਾ ਹੈ ਜਾਂ ਫਿਰ ਬੱਚਿਆਂ ਦੇ ਮਾਪਿਆਂ ਦੀ ਮਜਬੂਰੀ ਹੈ ਕਿ ਉਹ ਆਪਣੇ ਬੱਚਿਆਂ ਦੀ ਸਕੂਲ ਬੱਸ ਦਾ ਕਿਰਾਇਆ ਨਹੀਂ ਚੁਕਾ ਸਕਦੇ? ਜੇਕਰ ਇਕ ਬੱਸ ਪੰਜਾਹ ਬੱਚੇ ਲਿਜਾਣ ਦੇ ਸਮਰੱਥ ਹੈ ਤਾਂ ਸਕੂਲਾਂ ਵਾਲਿਆਂ ਦੀ ਅੱਸੀ ਬੱਚੇ ਲਿਜਾਣ ਦੀ ਮਜਬੂਰੀ ਬਣ ਜਾਂਦੀ ਹੈ ਕਿਉਂਕਿ ਪੰਜਾਹ ਬੱਚਿਆਂ ਦੇ ਕਿਰਾਏ ਨਾਲ ਉਨ੍ਹਾਂ ਦੇ ਬੱਸ ਖਰਚੇ ਪੂਰੇ ਨਹੀਂ ਹੁੰਦੇ। ਜੇਕਰ ਸੂਬਾ ਸਰਕਾਰ ਚਾਹੇ ਕਿ ਬੱਚੇ ਸਕੂਲ ਬੱਸ ਵਿਚ ਸੀਟਾਂ 'ਤੇ ਬੈਠ ਕੇ ਜਾਣ-ਆਉਣ ਤਾਂ ਸਰਕਾਰਾਂ ਨੂੰ ਇਨ੍ਹਾਂ ਬੱਸਾਂ ਦੇ ਟੈਕਸ ਮਾਫ ਕਰ ਦੇਣੇ ਚਾਹੀਦੇ ਹਨ। ਭਾਵ ਜਿਹੜਾ ਕਿਰਾਏ ਦਾ ਵਾਧੂ ਭਾਰ ਬੱਚਿਆਂ ਦੇ ਮਾਪਿਆਂ ਨੂੰ ਝੱਲਣਾ ਪੈਂਦਾ ਹੈ। ਸੂਬਾ ਸਰਕਾਰਾਂ ਟੈਕਸ ਮਾਫ ਕਰਕੇ ਆਪਣੇ ਜਿੰਮੇ ਲੈਣ ਫਿਰ ਹੀ ਮਜਬੂਰ ਸਕੂਲ ਮੁਖੀ ਅਤੇ ਮਜਬੂਰ ਬੱਚਿਆਂ ਦੇ ਮਾਪੇ ਸੁੱਖ ਦਾ ਸਾਹ ਲੈ ਸਕਦੇ ਹਨ।

-ਸੁਖਵਿੰਦਰ ਕਲੇਰ ਬੱਸੀਆਂ
ਪਿੰਡ ਤੇ ਡਾਕ: ਬੱਸੀਆਂ, ਜ਼ਿਲ੍ਹਾ ਲੁਧਿਆਣਾ।

ਅਜੋਕਾ ਭਾਰਤ
ਭਾਰਤ 68 ਸਾਲ ਦੀ 'ਆਜ਼ਾਦੀ' ਤੋਂ ਬਾਅਦ ਵੀ ਸਿੱਖਿਆ ਦੇ ਖੇਤਰ ਵਿਚ ਦੁਨੀਆ ਦੇ ਵਿਕਸਿਤ ਦੇਸ਼ਾਂ ਨਾਲੋਂ ਕਿਤੇ ਪਛੜਿਆ ਹੋਇਆ ਹੈ। ਭਾਰਤ ਦੇ 80 ਫ਼ੀਸਦੀ ਲੋਕ 20 ਰੁਪਏ ਦਿਹਾੜੀ ਨਾਲ ਗੁਜ਼ਾਰਾ ਕਰਨ ਲਈ ਮਜਬੂਰ ਹਨ। ਅਜਿਹੀ ਹਾਲਤ 'ਚ ਜਦੋਂ ਲੋਕਾਂ ਦਾ ਢਿੱਡ ਹੀ ਨਾ ਭਰਦਾ ਹੋਵੇ ਤਾਂ ਉਹ ਆਪਣੇ ਬੱਚਿਆਂ ਨੂੰ ਵਿੱਦਿਆ ਕਿਵੇਂ ਦਿਵਾ ਸਕਦੇ ਹਨ? ਸਿਰਫ 4 ਫ਼ੀਸਦੀ ਪੇਂਡੂ ਬੱਚੇ ਹੀ ਯੂਨੀਵਰਸਿਟੀਆਂ ਤੱਕ ਪਹੁੰਚਦੇ ਹਨ। ਪੰਜਾਬ 'ਚ ਸਰਕਾਰੀ ਸਕੂਲਾਂ ਦੀ ਹਾਲਤ ਵੀ ਚਿੰਤਾਜਨਕ ਹੈ। 'ਸਿੱਖਿਆ ਦਾ ਅਧਿਕਾਰ ਕਾਨੂੰਨ', 'ਸਰਵ ਸਿੱਖਿਆ ਅਭਿਆਨ' ਵੀ ਮਹਿਜ ਕਾਗਜ਼ੀ ਖਾਨਾਪੂਰਤੀ ਹੈ।

-ਰਣਦੀਪ ਸੰਗਤਪੁਰਾ
ਲਹਿਰਾਗਾਗਾ।

26-8-2014

 ਇਹ ਸ਼ੋਭਾ ਨਹੀਂ ਦਿੰਦਾ
ਬਾਲੀਵੁੱਡ ਸਟਾਰ ਆਮਿਰ ਖ਼ਾਨ ਦੀ ਰਿਲੀਜ਼ ਹੋਣ ਵਾਲੀ ਫਿਲਮ ਪੀ. ਕੇ. ਦੀ ਪ੍ਰਮੋਸ਼ਨ ਦੇ ਲਈ ਜਾਰੀ ਕੀਤੀ ਨਗਨ ਤਸਵੀਰ ਸਮਾਜ ਦੇ ਲਈ ਸਹੀ ਨਹੀਂ, ਫਿਲਮ ਸਟਾਰ ਸਮਾਜ ਦੇ ਲਈ ਆਦਰਸ਼ ਹੁੰਦੇ ਹਨ, ਸਿਰਫ਼ ਪੈਸੇ ਤੇ ਪ੍ਰਮੋਸ਼ਨ ਦੇ ਲਈ ਅਜਿਹਾ ਕਰਨਾ ਸਹੀ ਨਹੀਂ ਹੈ, ਇਹ ਸ਼ਰਮਨਾਕ ਹੈ, ਉਨ੍ਹਾਂ ਦੇ ਅਜਿਹਾ ਕਰਨ ਨਾਲ ਲੋਕਾਂ ਦੇ ਦਿਲਾਂ ਨੂੰ ਠੇਸ ਪਹੁੰਚੀ ਹੈ। ਆਮਿਰ ਖ਼ਾਨ ਸੱਤਿਆਮੇਵ ਜਯਤੇ ਰਾਹੀਂ ਲੋਕਾਂ ਦੀਆਂ ਗੰਭੀਰ ਸਮੱਸਿਆਵਾਂ ਨੂੰ ਪੇਸ਼ ਕਰਕੇ ਉਨ੍ਹਾਂ ਦਾ ਹੱਲ ਕਰਨ ਦੀ ਕੋਸ਼ਿਸ਼ ਕਰਦੇ ਸੀ ਅਤੇ ਉਥੇ ਹੀ ਦੂਸਰੀ ਤਰਫ਼ ਨਗਨ ਤਸਵੀਰ ਜਾਰੀ ਕੀਤੇ, ਉਨ੍ਹਾਂ ਨੂੰ ਆਪਣੇ ਫੈਸਲੇ 'ਤੇ ਦੁਬਾਰਾ ਸੋਚਣਾ ਚਾਹੀਦਾ ਹੈ।

-ਸੇਵਾ ਰਾਮ ਬਰੇਟਾ
ਸਮਾਜ ਸੇਵਕ, ਬਠਿੰਡਾ।

ਸੰਪਤੀ ਨੁਕਸਾਨ ਰੋਕੂ ਬਿੱਲ
ਪਿਛਲੇ ਦਿਨੀਂ ਸਾਡੀ ਸੂਬਾ ਸਰਕਾਰ ਵੱਲੋਂ ਪੰਜਾਬ ਵਿਧਾਨ ਸਭਾ 'ਚ 'ਸੰਪਤੀ ਨੁਕਸਾਨ ਰੋਕੂ ਬਿੱਲ' ਪਾਸ ਕੀਤਾ ਗਿਆ ਹੈ। ਇਸ ਬਿੱਲ ਤਹਿਤ ਬਣਨ ਵਾਲੇ ਕਾਨੂੰਨ ਮੁਤਾਬਿਕ ਜੇ ਕੋਈ ਵਿਅਕਤੀ ਜਾਂ ਵਿਅਕਤੀਆਂ ਦਾ ਸਮੂਹ ਕਿਸੇ ਸਰਕਾਰੀ ਜਾਂ ਗ਼ੈਰ-ਸਰਕਾਰੀ ਸੰਪਤੀ ਨੂੰ ਨੁਕਸਾਨ ਪਹੁੰਚਾਉਂਦਾ ਹੈ ਤਾਂ ਉਸ ਨੂੰ ਦੋ ਸਾਲ ਤੱਕ ਕੈਦ ਅਤੇ ਤਿੰਨ ਲੱਖ ਰੁਪਏ ਜੁਰਮਾਨਾ ਹੋ ਸਕਦਾ ਹੈ। ਉਂਜ ਦੇਖਣ ਨੂੰ ਤਾਂ ਇਹ ਕਾਨੂੰਨ ਦੇਸ਼ ਜਾਂ ਸੂਬੇ ਦੇ ਹਿੱਤ 'ਚ ਜਾਪਦਾ ਹੈ। ਪਰ ਅਸਲ ਵਿਚ ਸਾਡੀਆਂ ਸਰਕਾਰਾਂ ਇਸ ਕਾਨੂੰਨ ਨੂੰ ਲਾਗੂ ਕਰਕੇ, ਸਰਕਾਰਾਂ ਪਾਸੋਂ ਆਪਣੀਆਂ ਹੱਕੀ ਮੰਗਾਂ ਮਨਵਾਉਣ ਲਈ ਸੰਘਰਸ਼ ਕਰ ਰਹੇ ਲੋਕਾਂ ਦੀ 'ਲੋਕ-ਆਵਾਜ਼' ਨੂੰ ਟੇਢੇ ਢੰਗ ਨਾਲ ਕੁਚਲਣਾ ਚਾਹੁੰਦੀਆਂ ਹਨ। ਆਉਣ ਵਾਲੇ ਸਮੇਂ 'ਚ ਇਸ ਕਾਲੇ ਕਾਨੂੰਨ ਦੇ ਬੜੇ ਮਾੜੇ ਨਤੀਜੇ ਨਿਕਲਣਗੇ। ਕੁਝ ਕੁ ਜਾਗਰੂਕ ਲੋਕਾਂ ਜਾਂ ਜਥੇਬੰਦੀਆਂ ਵੱਲੋਂ ਇਸ ਲੋਕ-ਮਾਰੂ ਕਾਨੂੰਨ ਦੀ ਵਿਰੋਧਤਾ ਕੀਤੀ ਜਾ ਰਹੀ ਹੈ। ਸਾਨੂੰ ਸਾਰਿਆਂ ਨੂੰ ਹੀ ਲਾਮਬੰਦ ਹੋ ਕੇ ਇਸ ਨੂੰ ਵਾਪਸ ਕਰਵਾਉਣ ਲਈ ਆਵਾਜ਼ ਬੁਲੰਦ ਕਰਨੀ ਚਾਹੀਦੀ ਹੈ।

-ਯਸ਼ ਪੱਤੋ
ਪਿੰਡ ਪੱਤੋ ਹੀਰਾ ਸਿੰਘ, ਜ਼ਿਲ੍ਹਾ ਮੋਗਾ।

'ਟੈੱਟ' ਪਾਸ ਬੇਰੁਜ਼ਗਾਰ ਕਿਉਂ?
ਸਾਲ 2011 ਤੋਂ ਸ਼ੁਰੂ ਕੀਤੀ ਇਸ ਪ੍ਰੀਖਿਆ ਰਾਹੀਂ ਪਿਛਲੇ ਤਿੰਨ ਸਾਲਾਂ 'ਚ ਪੰਜਾਬ ਸਰਕਾਰ ਨੇ ਸਿਰਫ਼ 1872 ਉਮੀਦਵਾਰਾਂ ਨੂੰ ਨੌਕਰੀ ਦਿੱਤੀ ਹੈ ਜਦੋਂ ਕਿ ਹੁਣ ਤੱਕ ਟੈੱਟ ਪਾਸ 18000 ਦੇ ਕਰੀਬ ਬੇਰੁਜ਼ਗਾਰੀ ਦੁਆਰਾ ਝੰਬੇ ਹੋਏ ਅਧਿਆਪਕ ਆਪਣਾ ਹੱਕ ਪ੍ਰਾਪਤ ਕਰਨ ਲਈ ਸੜਕਾਂ 'ਤੇ ਸੰਘਰਸ਼ ਕਰ ਰਹੇ ਹਨ। ਜੇਕਰ ਸਰਕਾਰ ਨੇ ਟੈੱਟ ਪਾਸ ਅਧਿਆਪਕਾਂ ਨੂੰ ਨੌਕਰੀ ਨਹੀਂ ਦੇਣੀ ਤਾਂ ਫਿਰ ਇਸ ਪ੍ਰੀਖਿਆ ਦਾ ਕੀ ਮਹੱਤਵ ਹੈ? ਚਾਹੀਦਾ ਇਹ ਹੈ ਕਿ ਜਿਹੜੇ ਉਮੀਦਵਾਰ ਟੈੱਟ ਦੀ ਪ੍ਰੀਖਿਆ ਪਾਸ ਕਰ ਚੁੱਕੇ ਹਨ ਪਹਿਲਾਂ ਉਨ੍ਹਾਂ ਨੂੰ ਨੌਕਰੀ ਦਿੱਤੀ ਜਾਵੇ ਅਤੇ ਉਸ ਤੋਂ ਬਾਅਦ ਕੋਈ ਨਵਾਂ ਟੈਸਟ ਲਿਆ ਜਾਵੇ। ਕੀ ਸਰਕਾਰ ਇਹ ਸਮਝਦੀ ਹੈ ਕਿ ਈ.ਟੀ.ਟੀ. ਅਤੇ ਬੀ.ਐੱਡ ਵਰਗੇ ਕੋਰਸ ਕਰਕੇ ਵੀ ਕੋਈ ਉਮੀਦਵਾਰ ਟੈੱਟ ਦੀ ਪ੍ਰੀਖਿਆ ਪਾਸ ਕੀਤੇ ਬਿਨਾਂ ਅਧਿਆਪਕ ਬਣਨ ਦੇ ਯੋਗ ਨਹੀਂ ਹੁੰਦਾ? ਜੇਕਰ ਅਜਿਹਾ ਹੈ ਤਾਂ ਫਿਰ ਸਰਕਾਰ ਈ.ਟੀ.ਟੀ. ਅਤੇ ਬੀ.ਐੱਡ ਦੇ ਕੋਰਸ ਬੰਦ ਕਰ ਦੇਵੇ। ਇਸ ਮਹਿੰਗਾਈ ਦੇ ਦੌਰ 'ਚ ਸਰਕਾਰ ਨੂੰ ਬੇਰੁਜ਼ਗਾਰ ਨੌਜਵਾਨਾਂ ਦਾ ਦਰਦ ਮਹਿਸੂਸ ਕਰਦੇ ਹੋਏ ਬਿਨਾਂ ਹੋਰ ਦੇਰ ਕੀਤੇ ਉਨ੍ਹਾਂ ਨੂੰ ਨੌਕਰੀਆਂ ਦੇਣੀਆਂ ਚਾਹੀਦੀਆਂ ਹਨ ਅਤੇ ਆਪਣੇ ਸੰਕਲਪ 'ਰਾਜ ਨਹੀਂ ਸੇਵਾ' ਦੀ ਲਾਜ ਰੱਖਣੀ ਚਾਹੀਦੀ ਹੈ।

-ਸੰਦੀਪ ਆਰੀਆ
ਬੀ-774, ਆਰੀਆ ਨਗਰ, ਫ਼ਾਜ਼ਿਲਕਾ।

ਪਾਣੀ ਦਾ ਡਿਗਦਾ ਪੱਧਰ
ਪਾਣੀ ਦੀ ਸਮੱਸਿਆ ਇਕੱਲੇ ਕਿਸਾਨ ਵਰਗ ਨਾਲ ਸਬੰਧਤ ਨਹੀਂ ਹੈ। ਸਾਰੇ ਪੰਜਾਬੀਆਂ ਨੂੰ ਇਸ ਖ਼ਤਰਨਾਕ ਚੁਣੌਤੀ ਵੱਲ ਗਹਿਰਾ ਧਿਆਨ ਦੇਣ ਦੀ ਲੋੜ ਹੈ। ਹਰ ਸਾਲ ਲਗਭਗ ਦੋ ਫੁੱਟ ਪਾਣੀ ਹੇਠਾਂ ਚਲਿਆ ਜਾਣਾ ਧਰਤੀ ਹੇਠਲੇ ਜਲ ਭੰਡਾਰ ਦੇ ਘਟਦੇ ਅਤੇ ਖ਼ਤਮ ਹੋ ਰਹੇ ਜਲ-ਭੰਡਾਰ ਲਈ ਖ਼ਤਰੇ ਦੀ ਘੰਟੀ ਹੈ। ਜੇਕਰ ਅਸੀਂ ਸਮੂਹ ਪੰਜਾਬੀ ਇਸ ਸਮੱਸਿਆ ਅਰਥਾਤ ਪਾਣੀ ਦੀ ਬੱਚਤ ਲਈ ਸਾਵਧਾਨ ਨਹੀਂ ਹੋਵਾਂਗੇ ਤਾਂ ਨਿਕਟ ਭਵਿੱਖ ਵਿਚ ਪੰਜਾਬ ਵੀ ਰਾਜਸਥਾਨ ਵਾਂਗ ਮਾਰੂਥਲ ਦਾ ਰੂਪ ਅਖ਼ਤਿਆਰ ਕਰ ਜਾਵੇਗਾ। ਕੁਦਰਤ ਦੀ ਇਸ ਅਮੋਲਕ ਦਾਤ ਨਾਲ ਹੀ ਸਮੁੱਚੀ ਕਾਇਨਾਤ, ਬਨਸਪਤੀ, ਜੀਵ-ਜੰਤੂਆਂ, ਪਸ਼ੂਆਂ, ਮਨੁੱਖਾਂ ਆਦਿ ਦਾ ਭਲਾ ਹੈ। ਸੋ, ਇਸ ਦੀ ਸਾਂਭ-ਸੰਭਾਲ ਕਰਨੀ ਸਾਡਾ ਮੁਢਲਾ ਫਰਜ਼ ਹੈ। ਇਸ ਨੂੰ ਪੂਰੀ ਤਨ, ਮਨ ਅਤੇ ਧਨ ਦੀ ਸਮਰੱਥਾ ਨਾਲ ਸਮੂਹਿਕ ਉਪਰਾਲੇ ਨਾਲ ਸੰਭਾਲਣ ਦੀ ਫੌਰੀ ਲੋੜ ਹੈ।

-ਜਸਕਰਨ ਸਿੰਘ
ਦਸਮੇਸ਼ ਨਗਰ, ਲੁਧਿਆਣਾ।

ਸ਼ਰਧਾ ਬਨਾਮ ਸਿਆਸਤ
ਹਰਿਆਣਾ ਵਿਖੇ ਵੱਖਰੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਬਣਾਉਣ ਦਾ ਕਾਨੂੰਨ ਪਾਸ ਹੋ ਜਾਣ ਤੋਂ ਬਾਅਦ ਜੋ ਸਥਿਤੀ ਪੈਦਾ ਹੋਈ, ਛੋਟੀਆਂ-ਮੋਟੀਆਂ ਗੱਲਾਂ ਨੂੰ ਛੱਡ ਕੇ ਇਹ ਸਭ ਸਿਆਸੀ ਖੇਡ ਹੈ। ਲੋਕਾਂ ਨੂੰ ਗੁੰਮਰਾਹ ਕਰਕੇ ਲੜਾਉਣ ਵਾਲੇ ਆਗੂਆਂ ਦਾ ਸਵਾਰਥ ਹੈ। ਕਿਉਂਕਿ ਲੋਕਾਂ ਨੂੰ ਭੜਕਾਉਣ ਤੋਂ ਪਹਿਲਾਂ ਹੀ ਇਨ੍ਹਾਂ ਨੇ ਅਹੁਦੇ ਸੰਭਾਲੇ ਹੁੰਦੇ ਹਨ। ਇਹ ਲੜਾਈ ਕੇਵਲ ਚੌਧਰ, ਕੁਰਸੀ, ਅਹੁਦਾ, ਪ੍ਰਸਿੱਧੀ ਤੇ ਗੋਲਕ ਦੀ ਹੈ। ਸੇਵਾ-ਸੰਭਾਲ ਤਾਂ ਸ਼ਰਧਾ ਤੇ ਨਿਮਰਤਾ ਨਾਲ ਹੁੰਦੀ ਹੈ, ਹਉਮੈ ਨਾਲ ਨਹੀਂ। ਪੂਜਾ ਅਸਥਾਨ 'ਤੇ 'ਕਬਜ਼ਾ' ਕਿੰਨਾ ਬੇਹੂਦਾ ਸ਼ਬਦ ਹੈ। 'ਧਰਮ ਬਿਨਾਂ ਸਭ ਦਲੇ ਮਲੇ ਹੈਂ' ਵਾਲੀ ਸਥਿਤੀ ਪ੍ਰਤੱਖ ਨਜ਼ਰ ਆਉਂਦੀ ਸੀ।

-ਮਾ: ਮਹਿੰਦਰ ਸਿੰਘ ਸਿੱਧੂ
ਸਿੱਧਵਾਂ ਕਲਾਂ, ਜ਼ਿਲ੍ਹਾ ਲੁਧਿਆਣਾ।

25-8-2014

 ਅਜੀਤ ਹਰਿਆਵਲ ਲਹਿਰ
ਇਹ ਪੜ੍ਹਕੇ ਬੜਾ ਉਤਸ਼ਾਹ ਅਤੇ ਖੁਸ਼ੀ ਹੋਈ ਹੈ ਕਿ 'ਅਜੀਤ ਹਰਿਆਵਲ ਲਹਿਰ' ਦਾ ਚੌਥਾ ਪੜਾਅ ਸ਼ੁਰੂ ਹੋ ਗਿਆ ਹੈ। ਮਨੁੱਖ ਕੁਦਰਤ ਨਾਲ ਛੇੜ-ਛਾੜ ਕਰਨ ਤੋਂ ਬਾਜ਼ ਨਹੀਂ ਆ ਰਿਹਾ ਹੈ। ਗੁਰਬਾਣੀ ਵਿਚ ਵੀ ਧਰਤੀ ਨੂੰ ਮਾਂ ਦਾ ਦਰਜਾ ਦਿੱਤਾ ਗਿਆ ਹੈ। ਸਾਨੂੰ ਵੀ ਇਸ ਦਾ ਹਾਰ-ਸ਼ਿੰਗਾਰ ਕਰਨ ਵਿਚ ਬਹੁਮੁੱਲਾ ਯੋਗਦਾਨ ਪਾਉਣਾ ਚਾਹੀਦਾ ਹੈ। ਮੌਸਮ ਦੇ ਮੁਤਾਬਿਕ ਬੂਟੇ ਲਾਉਣੇ ਚਾਹੀਦੇ ਹਨ। ਲੋੜ ਹੈ ਰੁੱਖਾਂ ਦੀ ਅਹਿਮੀਅਤ ਸਮਝਣ ਦੀ। ਰੁੱਖ ਸਾਨੂੰ ਆਕਸੀਜਨ ਦਿੰਦੇ ਹਨ। ਇਸੇ ਤਾਜ਼ੀ ਹਵਾ ਕਾਰਨ ਅਸੀਂ ਜੀਵਤ ਹਾਂ। ਆਓ! ਆਪਾਂ ਸਾਰੇ ਮਿਲ ਕੇ ਹੰਭਲਾ ਮਾਰੀਏ, ਧਰਤੀ ਨੂੰ ਰੁੱਖਾਂ ਦੀ ਚਾਦਰ ਨਾਲ ਭਰ ਦੇਈਏ। ਮੇਰੇ ਵੱਲੋਂ 'ਅਜੀਤ' ਦੇ ਸਮੂਹ ਪਾਠਕਾਂ ਨੂੰ ਬੇਨਤੀ ਹੈ ਕਿ ਆਓ ਆਪਾਂ ਸਾਰੇ ਚੌਗਿਰਦੇ ਨੂੰ ਖੂਬਸੂਰਤ ਅਤੇ ਹਰਿਆ-ਭਰਿਆ ਬਣਾ ਕੇ ਪੰਜਾਬ ਦੇ ਰੁੱਖੇ ਅਤੇ ਖੁਸ਼ਕ ਮੁਹਾਂਦਰੇ ਨੂੰ ਖੁਸ਼ੀ ਅਤੇ ਖੁਸ਼ਹਾਲੀ ਪ੍ਰਦਾਨ ਕਰੀਏ। ਆਓ, ਅਸੀਂ ਸਭ ਰਲ ਕੇ ਇਸ ਵਣ ਮਹਾਂਉਤਸਵ ਤੇ ਹਰਿਆਵਲ ਲਹਿਰ ਨੂੰ ਹੋਰ ਕਾਮਯਾਬ ਬਣਾਈਏ ਤੇ ਸਾਡੀ ਬੰਜਰ ਹੋ ਰਹੀ ਧਰਤ ਨੂੰ ਮੁੜ ਤੋਂ ਰੁੱਖਾਂ ਨਾਲ ਸ਼ਿੰਗਾਰ ਦੇਈਏ।

-ਰਾਜਵੰਤ ਸਿੰਘ ਰਾਜੂ
ਗੁਰੂ ਨਾਨਕ ਆਟੋ ਸਪੇਅਰਜ਼, ਰਾਏਕੋਟ।

ਪਾਣੀ ਦੀ ਸੰਭਾਲ
ਪੰਜਾਬ ਸਰਕਾਰ ਨੇ ਹਰੇਕ ਘਰ ਵਿਚ ਸ਼ੁੱਧ ਅਤੇ ਸਾਫ਼ ਪਾਣੀ ਮੁਹੱਈਆ ਕਰਨ ਦਾ ਉਪਰਾਲਾ ਕੀਤਾ ਹੈ, ਜੋ ਕਿ ਇਕ ਸ਼ਲਾਘਾਯੋਗ ਕਦਮ ਹੈ। ਪਰ ਬੜੀ ਹੈਰਾਨੀ ਦੀ ਗੱਲ ਹੈ ਕਿ ਘਰਾਂ ਨੂੰ ਸਪਲਾਈ ਹੁੰਦੇ ਪਾਣੀ ਦੀ ਅਸੀਂ ਰੋਜ਼ ਹੀ ਬਰਬਾਦੀ ਕਰਦੇ ਰਹਿੰਦੇ ਹਾਂ। ਪਾਣੀ ਵਰਤਣ ਤੋਂ ਬਾਅਦ ਅਸੀਂ ਟੂਟੀਆਂ ਖੁੱਲ੍ਹੀਆਂ ਰੱਖੀ ਰੱਖਦੇ ਹਾਂ ਅਤੇ ਇਹ ਪਿਤਾ ਸਮਾਨ ਪਾਣੀ ਹਮੇਸ਼ਾ ਗੰਦੀਆਂ ਨਾਲੀਆਂ ਵਿਚ ਰੋਜ਼ ਹੀ ਸਵੇਰੇ-ਸ਼ਾਮ ਮਿਲਦਾ ਆਮ ਦੇਖਿਆ ਜਾ ਸਕਦਾ ਹੈ। ਪਾਣੀ ਦਾ ਪੱਧਰ ਦਿਨ-ਪ੍ਰਤੀ ਦਿਨ ਨੀਵਾਂ ਹੁੰਦਾ ਜਾ ਰਿਹਾ ਹੈ। ਜੇ ਅਸੀਂ ਪਾਣੀ ਦੀ ਸਹੀ ਸੰਭਾਲ ਨਾ ਕੀਤੀ ਤਾਂ ਉਹ ਦਿਨ ਦੂਰ ਨਹੀਂ ਕਿਤੇ ਸਾਨੂੰ ਪਾਣੀ ਦੀ ਇਕ-ਇਕ ਬੂੰਦ ਨੂੰ ਤਰਸਣਾ ਪਵੇ। ਜਲ ਸਪਲਾਈ ਦੇ ਮਹਿਕਮੇ ਨੂੰ ਪਾਣੀ ਦੀ ਸੰਭਾਲ ਬਾਰੇ ਲੋਕਾਂ ਨੂੰ ਵੱਧ ਤੋਂ ਵੱਧ ਜਾਗਰੂਕ ਕਰਨ ਦੀ ਲੋੜ ਹੈ ਅਤੇ ਕੋਈ ਠੋਸ ਰਣਨੀਤੀ ਬਣਾਉਣ ਦੀ ਸਮੇਂ ਦੀ ਮੁੱਖ ਲੋੜ ਹੈ ਅਤੇ ਸਾਡੇ ਸਾਰਿਆਂ ਦਾ ਇਸ ਪ੍ਰਤੀ ਫ਼ਰਜ਼ ਵੀ ਬਣਦਾ ਹੈ ਕਿ ਅਸੀਂ ਪਾਣੀ ਦੀ ਸੰਭਾਲ ਅਤੇ ਸਤਿਕਾਰ ਕਰੀਏ। ਸਾਰੇ ਲੋਕਾਂ ਨੂੰ ਇਸ ਪ੍ਰਤੀ ਸੁਚੇਤ ਹੋਣ ਦੀ ਲੋੜ ਹੈ।

-ਕੇਵਲ ਸਿੰਘ ਬਾਠਾਂ
ਮੋਬਾਈਲ : 98557-44211.

...ਧੀ ਪੰਜਾਬ ਦੀ
ਪਿਛਲੇ ਦਿਨੀਂ ਰੋਜ਼ਾਨਾ 'ਅਜੀਤ' ਵਿਚ ਸੁਨਾਮ ਤੋਂ ਇਹ ਖ਼ਬਰ ਪੜ੍ਹਕੇ ਬੜਾ ਦੁੱਖ ਹੋਇਆ ਕਿ ਰਾਸ਼ਟਰੀ ਪੱਧਰ ਦੀ ਹਾਕੀ ਖਿਡਾਰਨ ਰਾਜਵਿੰਦਰ ਕੌਰ ਆਰਥਿਕ ਤੰਗੀ ਕਰਕੇ ਬੀ. ਏ. ਭਾਗ ਦੂਜਾ ਵਿਚ ਦਾਖਲਾ ਨਾ ਲੈ ਸਕੀ ਤੇ ਉਸ ਨੇ ਦੁਖੀ ਹੋ ਕੇ ਆਤਮ-ਹੱਤਿਆ ਕਰ ਲਈ। ਸਾਡੇ ਸਮਾਜ ਵਿਚ ਇਹ ਕੋਈ ਪਹਿਲੀ ਆਤਮ-ਹੱਤਿਆ ਨਹੀਂ ਹੈ। ਸੱਚੀ ਗੱਲ ਤਾਂ ਇਹ ਹੈ ਕਿ ਸਾਡੇ ਸਮਾਜ ਵਿਚ ਅੱਜ ਖਿਡਾਰੀਆਂ ਅਤੇ ਕਲਾਕਾਰਾਂ ਦੀ ਬਹੁਤੀ ਪੁੱਛ ਪ੍ਰਤੀਤ ਨਹੀਂ ਰਹੀ। ਕੁਝ ਇਕ ਨੂੰ ਛੱਡ ਕੇ ਉਨ੍ਹਾਂ ਨੂੰ ਬਣਦਾ ਹੱਕ ਅਤੇ ਮਾਣ-ਸਨਮਾਨ ਨਹੀਂ ਮਿਲ ਰਿਹਾ। ਬਾਦਲ ਸਰਕਾਰ ਸਟੇਜਾਂ ਉਪਰੋਂ ਵੱਡੇ-ਵੱਡੇ ਦਾਅਵੇ ਕਰਦੀ ਹੈ, ਬੀ. ਏ. ਤੱਕ ਲੜਕੀਆਂ ਲਈ ਵਿੱਦਿਆ ਮੁਫ਼ਤ ਹੋਵੇਗੀ ਆਦਿ। ਭਾਵੇਂ ਕਿ ਆਪਣੀ ਮਰਜ਼ੀ ਹੋਵੇ ਤਾਂ ਕਬੱਡੀ ਕੱਪਾਂ ਤੇ ਲੋਕਾਂ ਦੀ ਭੀੜ ਇਕੱਠੀ ਕਰਨ ਲਈ ਫਿਲਮੀ ਹੀਰੋਇਨਾਂ ਨੂੰ ਕੁਝ ਮਿੰਟਾਂ ਦੇ ਡਾਂਸ ਪ੍ਰੋਗਰਾਮ ਲਈ ਕਰੋੜਾਂ ਰੁਪਏ ਦਿੱਤੇ ਜਾਂਦੇ ਹਨ। ਪੰਜਾਬ ਸਰਕਾਰ ਨੂੰ ਚਾਹੀਦਾ ਹੈ ਕਿ ਖਿਡਾਰੀਆਂ ਅਤੇ ਹੋਰ ਖੇਤਰ ਵਿਚ ਵਿਚਰ ਰਹੇ ਕਲਾਕਾਰਾਂ ਨੂੰ ਉਨ੍ਹਾਂ ਦੀ ਯੋਗਤਾ ਅਨੁਸਾਰ ਸਰਕਾਰੀ ਨੌਕਰੀਆਂ ਵਿਚ ਯੋਗ ਸਥਾਨ ਅਤੇ ਹੋਰ ਬੁਨਿਆਦੀ ਸਹੂਲਤਾਂ ਦੇਵੇ, ਕਿਉਂਕਿ ਖਿਡਾਰੀ, ਲਿਖਾਰੀ ਅਤੇ ਕਲਾਕਾਰ ਸਮਾਜ ਦੇ ਅਨਮੋਲ ਹੀਰੇ ਹੁੰਦੇ ਹਨ।

-ਮਾ: ਜਸਪਿੰਦਰ ਸਿੰਘ ਗਿੱਲ
ਪਿੰਡ ਉਬੋਕੇ, ਤਹਿ: ਪੱਟੀ (ਤਰਨ ਤਾਰਨ)।

22-8-2014

 ਬਦਲਦੇ ਸੰਸਕਾਰ

ਸਾਡਾ ਦੇਸ਼ ਭਾਰਤ ਇਕ ਸੰਸਕਾਰੀ ਦੇਸ਼ ਮੰਨਿਆ ਜਾਂਦਾ ਹੈ। ਹਰ ਰਾਜ ਦਾ ਆਪਣਾ ਸੱਭਿਆਚਾਰ ਅਤੇ ਸੰਸਕਾਰ ਹਨ ਪ੍ਰੰਤੂ ਅੱਜਕਲ੍ਹ ਜੋ ਕੁਝ ਵੀ ਹੋ ਰਿਹਾ ਹੈ, ਉਸ ਦੀ ਕੁਝ ਵੀ ਸਮਝ ਨਹੀਂ ਆਉਂਦੀ। ਸਾਡੀ ਸਾਰੀ ਨੌਜਵਾਨ ਪੀੜ੍ਹੀ ਪੱਛਮੀ ਸੱਭਿਆਚਾਰ ਦੇ ਪਿੱਛੇ ਪਾਗਲ ਪੰਜਾਬ ਵਿਚ ਉਸ ਦਾ ਪ੍ਰਭਾਵ ਦੇਖਿਆ ਜਾ ਸਕਦਾ ਹੈ? ਕਿਸੇ ਵੀ ਸੱਭਿਆਚਾਰ ਦੀਆਂ ਚੰਗੀਆਂ ਚੀਜ਼ਾਂ ਅਪਣਾਉਣਾ ਮਾੜੀ ਗੱਲ ਨਹੀਂ ਪ੍ਰੰਤੂ ਜੋ ਕੁਝ ਵੀ ਹੋ ਰਿਹਾ ਹੈ, ਅਸੀਂ ਸਭ ਉਸ ਤੋਂ ਜਾਣੂ ਹਾਂ। ਹੁਣ ਮੇਰਾ ਪ੍ਰਸ਼ਨ ਹਰ ਇਕ ਲਈ ਹੈ, ਖਾਸ ਕਰਕੇ ਔਰਤਾਂ ਨੂੰ ਕਿ ਅੱਜਕਲ੍ਹ ਟੀ.ਵੀ. ਚੈਨਲਾਂ ਉੱਪਰ ਹਰ ਪਾਸੇ ਸੰਨੀ ਲਿਓਨ ਨਾਂਅ ਦੀ ਅਭਿਨੇਤਰੀ ਨਜ਼ਰ ਆਉਂਦੀ ਹੈ। ਸਭ ਨੂੰ ਉਸ ਬਾਰੇ ਪਤਾ ਹੈ। ਉਸ ਨੂੰ ਇਸ ਤਰ੍ਹਾਂ ਟੀ.ਵੀ. ਉੱਪਰ ਦਿਖਾ ਕੇ ਕੀ ਅਸੀਂ ਉਸ ਨੂੰ ਆਪਣਾ ਰੋਲ ਮਾਡਲ ਬਣਾਉਣਾ ਚਾਹੁੰਦੇ ਹਾਂ।
ਹੈਰਾਨਗੀ ਇਸ ਗੱਲ ਦੀ ਹੈ ਕਿ ਕਿਸੇ ਵੂਮੈਨ ਸੰਸਥਾ ਜਾਂ ਕਿਸੇ ਵੀ ਸੰਸਥਾ ਵੱਲੋਂ ਆਵਾਜ਼ ਕਿਉਂ ਨਹੀਂ ਉਠਾਈ ਗਈ। ਹਾਲੇ ਵੀ ਸਮਾਂ ਹੈ ਅਜਿਹੇ ਵਰਤਾਰੇ ਨੂੰ ਰੋਕਿਆ ਜਾਵੇ। ਅਜਿਹਾ ਨਾ ਹੋਵੇ ਕਿ ਫਿਰ ਪਛਤਾਉਣ ਤੋਂ ਇਲਾਵਾ ਸਾਡੇ ਪੱਲੇ ਕੁਝ ਵੀ ਨਾ ਪਵੇ।

-ਹਰਿੰਦਰਜੀਤ ਸਿੰਘ ਬੋਪਾਰਾਏ
ਨਾਭਾ।

24 ਘੰਟੇ ਬਿਜਲੀ ਸਪਲਾਈ!

ਅਕਸਰ ਸਰਕਾਰ ਦੁਆਰਾ ਪਿੰਡਾਂ ਨੂੰ 24 ਘੰਟੇ ਨਿਰਵਿਘਨ ਬਿਜਲੀ ਦੇਣ ਦੀ ਗੱਲ ਕੀਤੀ ਜਾਂਦੀ ਹੈ। ਬਿਜਲੀ ਦੇ ਵਧੇਰੇ ਉਤਪਾਦਨ ਲਈ ਕਈ ਨਵੇਂ ਪ੍ਰਾਜੈਕਟ ਲਗਾਏ ਗਏ ਹਨ ਅਤੇ ਕਈ ਪ੍ਰਾਜੈਕਟਾਂ ਤੋਂ ਬਿਜਲੀ ਦਾ ਉਤਪਾਦਨ ਵੀ ਸ਼ੁਰੂ ਹੋਇਆ ਹੈ ਪਰ ਫਿਰ ਵੀ ਪੇਂਡੂ ਖੇਤਰਾਂ ਨੂੰ ਅਤਿ ਦੀ ਗਰਮੀ ਵਿਚ ਕੇਵਲ 8 ਤੋਂ 10 ਘੰਟੇ ਬਿਜਲੀ ਮਿਲਦੀ ਹੈ। 24 ਘੰਟੇ ਬਿਜਲੀ ਸਪਲਾਈ ਲੋਕਾਂ ਲਈ ਕਿਸੇ ਅਧੂਰੇ ਸੁਪਨੇ ਵਰਗੀ ਹੈ। ਬਿਜਲੀ ਦੀ ਘਾਟ ਅਤੇ ਕੱਟ ਲੱਗਣ ਕਾਰਨ ਸਭ ਤੋਂ ਵੱਧ ਪ੍ਰੇਸ਼ਾਨੀ ਬੱਚਿਆਂ, ਬਜ਼ੁਰਗਾਂ ਅਤੇ ਔਰਤਾਂ ਨੂੰ ਹੁੰਦੀ ਹੈ। ਨਿਰਵਿਘਨ ਬਿਜਲੀ ਦੀ ਸਪਲਾਈ ਲਈ ਬਿਜਲੀ ਮਹਿਕਮੇ ਦੀ ਕਾਰਗੁਜ਼ਾਰੀ ਨਿੰਦਣਯੋਗ ਹੈ। ਲੋਕਾਂ ਵਿਚ ਰੋਸ ਪਾਇਆ ਜਾਂਦਾ ਹੈ ਕਿ ਉਹ ਮਹੀਨੇ ਪਿੱਛੋਂ ਬਿੱਲ ਤਾਂ ਹਜ਼ਾਰਾਂ ਰੁਪਏ ਭਰਦੇ ਹਨ ਪਰ ਲੋੜ ਅਨੁਸਾਰ ਬਿਜਲੀ ਨਹੀਂ ਮਿਲਦੀ।
ਦਰਅਸਲ ਬਿਜਲੀ ਮਹਿਕਮਾ ਪ੍ਰਾਈਵੇਟ ਕੰਪਨੀਆਂ ਦੇ ਹੱਥ ਹੋਣ ਕਾਰਨ ਸਰਕਾਰੀ ਮੁਲਾਜ਼ਮ ਨਾਮਾਤਰ ਹੀ ਰਹਿ ਗਏ ਹਨ। ਕਿਉਂਕਿ ਪਾਵਰਕਾਮ ਦੁਆਰਾ ਬਹੁਤ ਘੱਟ ਮੁਲਾਜ਼ਮ ਰੱਖੇ ਗਏ ਹਨ, ਜਿਸ ਕਾਰਨ ਬਿਜਲੀ ਨਿਰਵਿਘਨ ਨਹੀਂ ਮਿਲਦੀ। ਟੁੱਟੀਆਂ ਅਤੇ ਢਿੱਲੀਆਂ ਤਾਰਾਂ, ਡਿੱਗੇ ਹੋਏ ਖੰਭੇ ਮਹਿਕਮੇ ਦੀ ਕਾਰਗੁਜ਼ਾਰੀ 'ਤੇ ਪ੍ਰਸ਼ਨ ਚਿੰਨ੍ਹ ਲਾਉਂਦੇ ਹਨ। ਜ਼ਿਆਦਾਤਰ ਅਧਿਕਾਰੀ ਦਫ਼ਤਰ ਵਿਚ ਹਾਜ਼ਰ ਨਹੀਂ ਮਿਲਦੇ ਅਤੇ ਜੇਕਰ ਮਿਲਦੇ ਹਨ ਤਾਂ ਉਹ ਲੋਕਾਂ ਦੀ ਸ਼ਿਕਾਇਤ ਸੁਣਨ ਨਾਲੋਂ ਫੋਨ ਅਤੇ ਅਖ਼ਬਾਰ ਨੂੰ ਵਧੇਰੇ ਤਰਜੀਹ ਦਿੰਦੇ ਹਨ। ਇਕ ਸਾਧਾਰਨ ਹਵਾ ਦੇ ਚੱਲਣ ਨਾਲ ਹੀ ਸਪਲਾਈ ਏਨੀ ਪ੍ਰਭਾਵਿਤ ਹੁੰਦੀ ਹੈ ਕਿ ਲੋਕਾਂ ਨੂੰ ਚਾਰ ਦਿਨ ਹਨੇਰੇ ਅਤੇ ਗਰਮੀ ਵਿਚ ਕੱਟਣੇ ਪੈਂਦੇ ਹਨ। ਮਹਿਕਮੇ ਨੂੰ ਆਪਣੇ ਫ਼ਰਜ਼ਾਂ ਪ੍ਰਤੀ ਸੁਚੇਤ ਹੋ ਕੇ ਲੋਕਾਂ ਦੀਆਂ ਸਮੱਸਿਆਵਾਂ ਸਮਝਦਿਆਂ ਆਪਣੀ ਕਾਰਜਸ਼ੈਲੀ ਦਰੁਸਤ ਕਰਨੀ ਚਾਹੀਦੀ ਹੈ।

-ਨਵਤੇਜ ਸਿੰਘ ਮੱਲ੍ਹੀ
ਮੋ: 88721-58240

ਚੁਗਲਖ਼ੋਰ

ਪੰਜਾਬ ਦੇ ਤਕਰੀਬਨ ਹਰ ਪਿੰਡ ਵਿਚ ਹਰ ਤਰ੍ਹਾਂ ਦੇ ਲੋਕ ਮਿਲ ਜਾਂਦੇ ਹਨ, ਜਿਨ੍ਹਾਂ ਵਿਚ ਮਿਹਨਤੀ, ਵਿਹਲੜ, ਖਰਚੀਲੇ, ਕੰਜੂਸ, ਨਸ਼ੇੜੀ, ਸ਼ੌਕੀਨ, ਲੜਾਕੂ, ਸਾਊ ਆਦਿ ਸ਼ਾਮਿਲ ਹੁੰਦੇ ਹਨ ਪਰ ਪਿੰਡਾਂ ਵਿਚ ਇਕ ਅਜਿਹਾ ਪਾਤਰ ਵੀ ਪਾਇਆ ਜਾਂਦਾ ਹੈ, ਜਿਸ ਨੂੰ ਸਮਾਜ ਵਿਚ ਚੁਗਲੀਖੋਰ ਦੇ ਨਾਂਅ ਨਾਲ ਜਾਣਿਆ ਜਾਂਦਾ ਹੈ। ਇਸ ਪਾਤਰ ਦਾ ਮੁੱਖ ਕੰਮ ਲੋਕਾਂ ਦੀਆਂ ਵਿੜਕਾਂ ਲੈ ਕੇ ਇਧਰ ਦੀ ਉਧਰ ਅਤੇ ਉਧਰ ਦੀ ਇਧਰ ਗੱਲ ਵਧਾ-ਚੜ੍ਹਾ ਕੇ ਦੱਸਣੀ ਹੁੰਦੀ ਹੈ। ਚੁਗਲਖੋਰ ਨੇ ਹਮੇਸ਼ਾ ਆਪਣੇ ਬਾਰੇ ਘੱਟ ਅਤੇ ਦੂਸਰਿਆਂ ਬਾਰੇ ਵੱਧ ਸੋਚਣਾ ਹੁੰਦਾ ਹੈ। ਕਿਸੇ ਦੇ ਘਰ ਕੌਣ ਆਉਂਦਾ ਜਾਂਦਾ ਹੈ, ਕਿਸੇ ਦੇ ਲੜਕੇ ਜਾਂ ਲੜਕੀ ਦੇ ਰਿਸ਼ਤੇ ਦੀ ਗੱਲ ਕਿੱਥੇ ਚੱਲਦੀ ਹੈ, ਗੁਆਂਢੀਆਂ ਨੇ ਗੱਡੀ ਖਰੀਦਣ ਲਈ ਪੈਸਾ ਕਿੱਥੋਂ ਲਿਆਂਦਾ ਹੈ ਆਦਿ ਗੱਲਾਂ ਇਨ੍ਹਾਂ ਦੀ ਜ਼ਿੰਦਗੀ ਦਾ ਮੁੱਖ ਹਿੱਸਾ ਹੁੰਦੀਆਂ ਹਨ।
ਇਸ ਤੋਂ ਇਲਾਵਾ ਇਕ-ਦੂਸਰੇ ਕੋਲ ਝੂਠੀਆਂ ਗੱਲਾਂ ਕਰਕੇ ਉਨ੍ਹਾਂ ਵਿਚ ਲੜਾਈ ਝਗੜਾ ਅਤੇ ਤਕਰਾਰ ਪੈਦਾ ਕਰਨ ਵਿਚ ਵੀ ਇਨ੍ਹਾਂ ਦਾ ਮੁੱਖ ਯੋਗਦਾਨ ਹੁੰਦਾ ਹੈ। ਸੋ, ਜਿੰਨਾ ਹੋ ਸਕੇ, ਅਜਿਹੇ ਲੋਕਾਂ ਤੋਂ ਹਮੇਸ਼ਾ ਦੂਰੀ ਬਣਾਈ ਰੱਖਣੀ ਚਾਹੀਦੀ ਹੈ ਅਤੇ ਇਨ੍ਹਾਂ ਦੀ ਦੱਸੀ ਹੋਈ ਕਿਸੇ ਝੂਠੀ ਗੱਲ ਦੀ ਬਿਨਾਂ ਜਾਂਚ-ਪੜਤਾਲ ਕੀਤੇ ਕਿਸੇ ਨਾਲ ਰੋਸਾ ਜਾਂ ਲੜਾਈ ਝਗੜਾ ਕਰਨਾ ਠੀਕ ਗੱਲ ਨਹੀਂ ਹੈ।

-ਰਾਜਾ ਗਿੱਲ (ਚੜਿੱਕ)
ਮੋ: 94654-11585

21-8-2014

 ਹਰਿਆਵਲ ਲਹਿਰ ਦਾ ਸਾਥ ਦੇਈਏ
ਇਹ ਸਚਾਈ ਹੈ ਕਿ ਜਿਸ ਮਨੁੱਖ ਨੇ ਆਪਣੀ ਜ਼ਿੰਦਗੀ ਵਿਚ ਰੁੱਖ ਤੇ ਪਾਣੀ ਦੀ ਸੇਵਾ ਕੀਤੀ, ਉਹ ਆਪਣੀ ਜ਼ਿੰਦਗੀ ਦੇ ਫ਼ਰਜ਼ਾਂ ਪ੍ਰਤੀ ਸੱਚਾ ਹੋ ਨਿੱਬੜਿਆ ਹੈ। 'ਅਦਾਰਾ ਅਜੀਤ' ਮਨੁੱਖ ਦੀ ਹੋਂਦ ਨੂੰ ਬਚਾਉਣ ਲਈ ਰੁੱਖ ਲਗਾਉਣ ਦੀ ਪਿਰਤ ਪਾ ਕੇ ਆਪਣੇ ਫ਼ਰਜ਼ਾਂ ਦੀ ਪੂਰਤੀ ਕਰ ਰਿਹਾ ਹੈ। ਕਾਬਲੇ ਤਾਰੀਫ਼ ਤਰੀਕੇ ਨਾਲ ਪੰਜਾਬ ਦੀ ਜਨਤਾ ਨੂੰ ਆਪਣੇ ਮਗਰ ਲਾ ਪੰਜਾਬ, ਪੰਜਾਬੀ ਤੇ ਪੰਜਾਬੀਅਤ ਦੀ ਰਾਖੀ ਕਰਨ ਦੇ ਨਾਲ-ਨਾਲ ਇਕ ਵੱਡੀ ਮੁਹਿੰਮ ਰੁੱਖ ਲਗਾਉਣ ਲਈ ਵੀ ਤਨਦੇਹੀ ਨਾਲ ਮੈਦਾਨ ਵਿਚ ਆ ਡਟਿਆ ਹੈ। ਪੰਜਾਬ ਵਾਸੀਆਂ ਨੇ ਆਪਣੇ ਸਮਾਜ ਤੇ ਵਾਤਾਵਰਨ ਨੂੰ ਅਤੇ ਆਉਣ ਵਾਲੀਆਂ ਨਸਲਾਂ ਨੂੰ ਜੇਕਰ ਬਚਾਉਣਾ ਹੈ ਤਾਂ ਸੱਚੇ ਮਨੋਂ 'ਹਰ ਮਨੁੱਖ ਲਾਵੇ ਰੁੱਖ' ਦੇ ਕਥਨ 'ਤੇ ਚਲਦਿਆਂ 'ਅਦਾਰਾ ਅਜੀਤ' ਵੱਲੋਂ ਤੋਰੀ 'ਹਰਿਆਵਲ ਲਹਿਰ' ਦਾ ਸਾਥ ਦੇਵੇ, ਤਾਂ ਕਿ ਪੰਜਾਬ ਵਾਸੀ ਮੁੜ ਤੋਂ ਰੰਗਲੀ ਧਰਤੀ ਦੇ ਪਹਿਰੇਦਾਰ ਬਣਨ ਅਤੇ ਬਿਮਾਰੀਆਂ ਦੇ ਆਗੋਸ਼ ਤੋਂ ਲਾਂਭੇ ਹੋ ਜਾਣ।

-ਮੁਹੰਮਦ ਇਕਬਾਲ ਪਾਲੀ
ਪਿੰਡ ਫਲੌਂਡ ਕਲਾਂ, ਮਾਲੇਰਕੋਟਲਾ।

ਚੰਗੇ ਦਿਨਾਂ ਦੀ ਆਸ
ਹਰ ਕੋਈ ਇਕ-ਦੂਜੇ ਨੂੰ ਕਹਿ ਰਿਹਾ ਹੈ ਯਾਰ! ਚੰਗੇ ਦਿਨ ਕਦੋਂ ਆਉਣਗੇ? ਸਮੱਸਿਆਵਾਂ ਮੂੰਹ ਅੱਡੀ ਖੜ੍ਹੀਆਂ ਹਨ। ਹੱਥ 'ਤੇ ਹੱਥ ਧਰੀ ਬੈਠੇ ਅਸੀਂ ਸਾਰੇ ਕਿੰਨਾ ਕੁ ਚਿਰ ਸਰਕਾਰਾਂ ਵੱਲ ਵੇਖਾਂਗੇ? ਕੁਝ ਤਾਂ ਆਪ ਹੰਭਲਾ ਮਾਰੀਏ। ਇਕ ਪਿੰਡ ਦੀ ਰਸਤੇ ਦੀ ਪੁਲੀ ਟੁੱਟ ਗਈ, ਲੋਕਾਂ ਨੇ ਥੋੜ੍ਹੇ-ਥੋੜ੍ਹੇ ਪੈਸੇ ਇਕੱਠੇ ਕੀਤੇ, ਪੁਲੀ ਬਣਾ ਲਈ, ਲੋਕ ਚੱਜ ਨਾਲ ਲੰਘਣ ਲੱਗ ਪਏ, ਚਿੱਕੜ ਗਾਰਾ ਖ਼ਤਮ। ਇਕ ਪਿੰਡ ਦੀ ਮਾਤਾ ਦੁਪਹਿਰੇ ਸਕੂਲ ਵਿਚ ਜਾਂਦੀ ਹੈ, ਚੌਲਾਂ 'ਚੋਂ ਕੰਕਰ ਚੁਣ, ਦਾਲ ਸਾਫ਼ ਕਰ ਬੱਚਿਆਂ ਲਈ ਸਾਫ਼-ਸੁਥਰਾ ਖਾਣਾ ਤਿਆਰ ਕਰਦੀ ਹੈ। ਬੱਚੇ ਵੀ ਖੁਸ਼ ਤੇ ਅਧਿਆਪਕ ਵੀ। ਪਿੰਡ ਦਾ ਸ਼ਮਸ਼ਾਨਘਾਟ ਦੱਬ-ਕਹੀ ਨਾਲ ਭਰਿਆ ਹੈ, ਧੁੱਪ ਤੇ ਮੀਂਹ-ਕਣੀ ਲਈ ਛੋਟਾ ਬਰਾਂਡਾ ਨਹੀਂ, ਕੀ ਅਸੀਂ ਇਹ ਛੋਟੀਆਂ-ਛੋਟੀਆਂ ਗੱਲਾਂ ਲਈ ਵੀ ਸਰਕਾਰਾਂ ਵੱਲ ਵੇਖੀਏ? ਪਿੰਡਾਂ-ਸ਼ਹਿਰਾਂ 'ਚ ਛੋਟੀਆਂ-ਛੋਟੀਆਂ ਕਈ ਸਮੱਸਿਆਵਾਂ ਹਨ, ਜੋ ਅਸੀਂ ਥੋੜ੍ਹਾ-ਥੋੜ੍ਹਾ ਯੋਗਦਾਨ ਪਾ ਕੇ ਹੱਲ ਕਰ ਸਕਦੇ ਹਾਂ। ਬੜੇ ਅਫ਼ਸੋਸ ਦੀ ਗੱਲ ਹੈ ਕਿ ਕਈ ਫਜ਼ੂਲ ਖਰਚੀਆਂ ਵਿਚ ਰੁੱਝੇ, ਨਿੱਕੇ-ਨਿੱਕੇ ਕੰਮਾਂ ਲਈ ਅਸੀਂ ਕਈ-ਕਈ ਮਹੀਨੇ ਲੀਡਰਾਂ ਅਤੇ ਅਧਿਕਾਰੀਆਂ ਵੱਲ ਪੈਸੇ ਖਰਚ ਕਰ ਚੱਕਰ ਲਾਈ ਰੱਖਦੇ ਹਾਂ, ਕੁਝ ਨਾ ਕੁਝ ਤਾਂ ਸੋਚਣਾ ਪਵੇਗਾ।

-ਜਗਤਾਰ ਗਿੱਲ
ਬੱਲ ਸਚੰਦਰ, ਅੰਮ੍ਰਿਤਸਰ।

ਅਧਿਆਪਕਾਂ ਦੀ ਲੋੜ
ਅੱਜ ਰਾਜ ਦੇ ਪ੍ਰਾਇਮਰੀ ਸਕੂਲਾਂ ਵਿਚ ਅਧਿਆਪਕਾਂ ਦੀ ਬਹੁਤ ਘਾਟ ਰੜਕ ਰਹੀ ਹੈ। ਇਸ ਵਿਚ ਤੀਹਾਂ ਬੱਚਿਆਂ ਪਿੱਛੇ ਇਕ ਅਧਿਆਪਕ ਵਾਲੀ ਨੀਤੀ ਬਾਖੂਬੀ ਰੋਲ ਨਿਭਾਅ ਰਹੀ ਹੈ। ਹੁਣ ਸਿੱਖਿਆ ਵਿਭਾਗ ਨੂੰ ਨੀਤੀ ਬਦਲਣੀ ਚਾਹੀਦੀ ਹੈ, ਕਿਉਂਕਿ ਉਪਰੋਕਤ ਨੀਤੀ ਅਤੇ ਘੱਟੋ-ਘੱਟ ਦੋ ਅਧਿਆਪਕਾਂ ਦੀ ਨੀਤੀ ਦੇ ਫਲਸਰੂਪ ਲੋਕ ਆਪਣੇ ਬੱਚੇ ਸਰਕਾਰੀ ਸਕੂਲਾਂ 'ਚੋਂ ਹਟਾ ਰਹੇ ਹਨ ਜਾਂ ਹਟਾ ਲਏ ਹਨ। ਇਹ ਹਾਲਤ ਖ਼ਾਸ ਕਰਕੇ ਪ੍ਰਾਇਮਰੀ ਪੱਧਰ ਤੱਕ ਜ਼ਿਆਦਾ ਹੈ, ਪਰ ਹਾਈ ਸਕੂਲ ਵਿਚ ਕੁਝ ਬਿਹਤਰ ਹੈ। ਹੁਣ ਵਿਭਾਗ ਨੂੰ ਵੀਹਾਂ ਬੱਚਿਆਂ ਪਿੱਛੇ ਇਕ ਅਧਿਆਪਕ ਅਤੇ ਸਕੂਲੇ ਘੱਟੋ-ਘੱਟ ਤਿੰਨ ਅਧਿਆਪਕ ਰੱਖਣ ਦੀ ਲੋੜ ਹੈ ਤਾਂ ਕਿ ਇਕ ਅਧਿਆਪਕ ਆਈਆਂ ਹੋਈਆਂ ਡਾਕਾਂ ਅਤੇ ਮਿਡ ਡੇ ਮੀਲ ਨੂੰ ਚਲਾਏ ਜਦ ਕਿ ਬਾਕੀ ਦੋ ਅਧਿਆਪਕ ਪੰਜ ਜਮਾਤਾਂ ਨੂੰ ਪੜ੍ਹਾਉਣ ਦਾ ਕੰਮ ਕਰਨ।

-ਮਾਸਟਰ ਕਰਮਜੀਤ ਸਿੰਘ ਧਾਰੀਵਾਲ
ਨਵੀਂ ਆਬਾਦੀ, ਜੀ.ਟੀ. ਰੋਡ, ਧਾਰੀਵਾਲ (ਗੁਰਦਾਸਪੁਰ)।

ਸਰੀਰ ਦਾਨ ਦਾ ਮਹੱਤਵ
ਮਨੁੱਖ ਕੁਦਰਤ ਦੀ ਸਭ ਤੋਂ ਉੱਤਮ ਰਚਨਾ ਹੈ। ਮਨੁੱਖ ਦੇ ਜਨਮ ਦੀ ਸ਼ੁਰੂਆਤ ਤੋਂ ਹੀ ਮਨੁੱਖੀ ਸਰੀਰ ਉਸ ਦਾ ਅੰਤ ਤੱਕ ਸਾਥ ਨਿਭਾਉਂਦਾ ਹੈ। ਦੂਸਰੇ ਸ਼ਬਦਾਂ ਵਿਚ ਅਸੀਂ ਕਹਿ ਸਕਦੇ ਹਾਂ ਕਿ ਜੇਕਰ ਅਸੀਂ ਸਰੀਰ ਦੀ ਦੇਖਭਾਲ ਠੀਕ ਢੰਗ ਨਾਲ ਕਰਦੇ ਹਾਂ ਤਾਂ ਇਹ ਸਾਡਾ ਸਭ ਤੋਂ ਵਧ ਕੇ ਵਫ਼ਾਦਾਰ ਸਾਥੀ ਹੈ। ਆਮ ਮਨੁੱਖੀ ਧਾਰਨਾ ਹੈ ਕਿ ਮਨੁੱਖ ਦੀ ਮੌਤ ਤੋਂ ਬਾਅਦ ਉਸ ਦਾ ਸਰੀਰ ਬੇਕਾਰ ਹੋ ਜਾਂਦਾ ਹੈ ਪਰ ਅੱਜ ਦਾ ਆਧੁਨਿਕ ਵਿਗਿਆਨ ਤੇ ਮੈਡੀਕਲ ਸਾਇੰਸ ਇਸ ਤੱਥ ਨੂੰ ਝੁਠਲਾਉਂਦੇ ਹਨ। ਸਾਇੰਸ ਅਨੁਸਾਰ ਜੇਕਰ ਮਨੁੱਖ ਆਪਣੇ ਸਰੀਰ ਨੂੰ ਮਰਨ ਤੋਂ ਬਾਅਦ ਮੈਡੀਕਲ ਸਾਇੰਸ ਨੂੰ ਦੇ ਦੇਵੇ ਤਾਂ ਉਸ ਸਰੀਰ ਦੇ ਕਈ ਅੰਗ ਜਿਊਂਦੇ ਮਨੁੱਖਾਂ ਦੇ ਕੰਮ ਆ ਕੇ ਉਨ੍ਹਾਂ ਦੀ ਜ਼ਿੰਦਗੀ ਵਿਚ ਵਾਧਾ ਵੀ ਕਰ ਸਕਦੇ ਹਨ ਅਤੇ ਮਰਨ ਵਾਲਾ ਮਨੁੱਖ ਇਸ ਢੰਗ ਨਾਲ ਮਨੁੱਖਤਾ ਦੀ ਭਲਾਈ ਲਈ ਆਪਣਾ ਬਹੁਤ ਵੱਡਾ ਵੱਡਮੁੱਲਾ ਯੋਗਦਾਨ ਵੀ ਪਾ ਸਕਦਾ ਹੈ। ਅੱਜ ਅਨੇਕਾਂ ਹੀ ਮਨੁੱਖ ਅੰਗਾਂ ਦੀ ਕਮੀ ਕਰਕੇ ਸਮੇਂ ਤੋਂ ਪਹਿਲਾਂ ਹੀ ਸੰਸਾਰ ਨੂੰ ਛੱਡ ਕੇ ਚਲੇ ਜਾਂਦੇ ਹਨ ਤਾਂ ਅਜਿਹੀ ਹਾਲਤ ਵਿਚ ਸਹਿਜੇ ਹੀ ਅੰਦਾਜ਼ਾ ਲਾਇਆ ਜਾ ਸਕਦਾ ਹੈ ਕਿ ਕੁਦਰਤੀ ਮੌਤ ਮਰਨ ਤੋਂ ਬਾਅਦ ਦਾਨ ਹੋਇਆ ਸਰੀਰ ਕਿੰਨੇ ਸਾਰੇ ਮਨੁੱਖਾਂ ਦਾ ਭਲਾ ਕਰ ਸਕਦਾ ਹੈ। 'ਸਰੀਰ ਦਾਨ' ਦੀ ਘੋਸ਼ਣਾ ਕਈ ਮੰਨੀਆਂ ਪ੍ਰਮੰਨੀਆਂ ਹਸਤੀਆਂ ਵੀ ਕਰ ਚੁੱਕੀਆਂ ਹਨ। ਸਰਕਾਰ ਨੂੰ ਅਜਿਹੇ ਉੱਦਮ ਕਰਨ ਵਾਲੇ ਵਿਅਕਤੀਆਂ ਨੂੰ ਜ਼ਰੂਰ ਹੀ ਬਣਦਾ ਮਾਣ-ਸਤਿਕਾਰ ਦੇਣਾ ਚਾਹੀਦਾ ਹੈ।

-ਜੀਵਨ ਕੁਮਾਰ
ਪਿੰਡ ਤੇ ਡਾਕ: ਹਰਸਾ ਮਾਨਸਰ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

20-8-2014

 'ਅਜੀਤ ਹਰਿਆਵਲ ਲਹਿਰ'
ਸਾਰੇ ਸੰਸਾਰ ਵਿਚ ਉਦਯੋਗੀਕਰਨ ਦੀ ਦੌੜ ਤੇਜ਼ੀ ਨਾਲ ਵਧ ਰਹੀ ਹੈ, ਜਿਸ ਨਾਲ ਰੁੱਖਾਂ ਦੀ ਕਟਾਈ ਵੱਡੀ ਗਿਣਤੀ ਵਿਚ ਕੀਤੀ ਜਾ ਰਹੀ ਹੈ, ਜਿਸ ਦਾ ਮਾੜਾ ਪ੍ਰਭਾਵ ਸਾਡੇ ਵਾਤਾਵਰਨ 'ਤੇ ਪੈ ਰਿਹਾ ਹੈ। ਵਾਤਾਵਰਨ ਦੀ ਸੰਭਾਲ ਲਈ ਬਹੁਤ ਕੁਝ ਕਰਨ ਦੀ ਲੋੜ ਹੈ। 'ਅਜੀਤ ਪ੍ਰਕਾਸ਼ਨ ਸਮੂਹ' ਜਲੰਧਰ ਵੱਲੋਂ 'ਅਜੀਤ ਹਰਿਆਵਲ ਲਹਿਰ' ਤਹਿਤ ਲੱਖਾਂ ਦੀ ਗਿਣਤੀ ਨਾਲ ਬੂਟੇ ਲਗਾ ਕੇ ਆਪਣਾ ਬਣਦਾ ਯੋਗਦਾਨ ਪਾਇਆ ਗਿਆ ਹੈ। ਇਸ ਲਹਿਰ ਰਾਹੀਂ ਲੋਕਾਂ ਵਿਚ ਵੀ ਜਾਗਰੂਕਤਾ ਆਈ ਹੈ, ਜਿਸ ਕਾਰਨ ਬਹੁਤ ਸਾਰੇ ਲੋਕ ਆਪਣੇ ਬੱਚਿਆਂ ਦੇ ਜਨਮ ਦਿਨ ਵੀ ਬੂਟੇ ਲਗਾ ਕੇ ਮਨਾਉਂਦੇ ਹਨ। ਇਹ ਜਾਗਰੂਕਤਾ ਸਿਰਫ 'ਅਜੀਤ ਹਰਿਆਵਲ ਲਹਿਰ' ਕਰਕੇ ਹੀ ਆਈ ਹੈ। ਵੱਧ ਤੋਂ ਵੱਧ ਬੂਟੇ ਲਗਾ ਕੇ ਅਤੇ ਉਨ੍ਹਾਂ ਦੀ ਸਾਂਭ-ਸੰਭਾਲ ਕਰਨਾ ਸਾਡੀ ਸਾਂਝੀ ਜ਼ਿੰਮੇਵਾਰੀ ਹੈ। ਵਾਤਾਵਰਨ ਪ੍ਰਦੂਸ਼ਿਤ ਹੋਣ ਕਰਕੇ ਹੀ ਕਈ ਪੰਛੀਆਂ ਅਤੇ ਜੀਵਾਂ ਦੀਆਂ ਜਾਤੀਆਂ ਖ਼ਤਮ ਹੋ ਚੁੱਕੀਆਂ ਹਨ। ਧਰਤੀ ਹੇਠਲਾ ਪਾਣੀ ਖ਼ਤਮ ਹੁੰਦਾ ਜਾ ਰਿਹਾ ਹੈ। ਵਾਤਾਵਰਨ ਦੂਸ਼ਿਤ ਹੋਣ ਦਾ ਹੀ ਨਤੀਜਾ ਹੈ ਕਿ ਅਸੀਂ ਲੋਕ ਤਰ੍ਹਾਂ-ਤਰ੍ਹਾਂ ਦੀਆਂ ਬਿਮਾਰੀਆਂ ਦੀ ਜਕੜ ਵਿਚ ਆਏ ਹੋਏ ਹਾਂ। ਹਰੇਕ ਵਿਅਕਤੀ ਦਾ ਫ਼ਰਜ਼ ਬਣਦਾ ਹੈ ਕਿ ਉਹ 'ਅਜੀਤ ਹਰਿਆਵਲ ਲਹਿਰ' ਵਿਚ ਆਪਣਾ ਬਣਦਾ ਯੋਗਦਾਨ ਪਾ ਕੇ ਵਾਤਾਵਰਨ ਨੂੰ ਗੰਧਲਾ ਹੋਣ ਤੋਂ ਬਚਾਉਣ ਲਈ ਸਹਿਯੋਗ ਕਰੇ।

-ਵਾਸਦੇਵ ਪਰਦੇਸੀ
ਸ਼ਹੀਦ ਭਗਤ ਸਿੰਘ ਨਗਰ।

ਪੰਜਾਬੀ ਨੌਜਵਾਨ
ਅਜੋਕੇ ਵਿਗਿਆਨਕ ਯੁੱਗ ਅੰਦਰ ਮਨੁੱਖ ਦੀ ਜ਼ਿੰਦਗੀ ਬਹੁਤ ਸੁਖਾਲੀ ਹੋ ਗਈ ਹੈ। ਉਸ ਨੇ ਵਿਗਿਆਨਕ ਦ੍ਰਿਸ਼ਟੀਕੋਣ ਨਾਲ ਬਹੁਤ ਸਾਰੀਆਂ ਸਮੱਸਿਆਵਾਂ 'ਤੇ ਕਾਬੂ ਪਾ ਲਿਆ ਹੈ। ਉਸ ਨੂੰ ਹੁਣ ਆਪਣੀਆਂ ਲੋੜਾਂ ਦੀ ਪੂਰਤੀ ਲਈ ਕੋਈ ਵਿਸ਼ੇਸ਼ ਯਤਨ ਨਹੀਂ ਕਰਨੇ ਪੈਂਦੇ। ਤਕਨਾਲੋਜੀ ਦੇ ਖੇਤਰ ਵਿਚ ਮਨੁੱਖ ਨੇ ਬੇਮਿਸਾਲ ਤਰੱਕੀ ਕੀਤੀ ਹੈ। ਪ੍ਰੰਤੂ ਕਿਤੇ ਨਾ ਕਿਤੇ ਵਿਗਿਆਨ ਅਤੇ ਤਕਨਾਲੋਜੀ ਦੀ ਮਾਰ ਪੜ੍ਹੀ-ਲਿਖੀ ਨੌਜਵਾਨ ਪੀੜ੍ਹੀ ਨੂੰ ਬਰਬਾਦ ਕਰ ਰਹੀ ਹੈ। ਉਹ ਨਵੀਂ ਤਕਨਾਲੋਜੀ ਦਾ ਗੁਲਾਮ ਬਣ ਕੇ ਰਹਿ ਗਿਆ ਹੈ। ਜੇ ਘਰ ਵਿਚ ਇਕ ਦਿਨ ਇੰਟਰਨੈੱਟ ਨਾ ਚੱਲੇ ਤਾਂ ਉਹ ਖਫ਼ਾ ਹੋ ਜਾਂਦਾ ਹੈ। ਮੋਬਾਈਲ ਤੇ ਨੈੱਟ 24 ਘੰਟੇ ਉਸ ਦਾ ਪਿੱਛਾ ਕਰਦਾ ਹੈ। ਇੰਟਰਨੈੱਟ ਤੋਂ ਬਿਨਾਂ ਅੱਜ ਉਹ ਆਪਣੇ-ਆਪ ਨੂੰ ਅਧੂਰਾ ਸਮਝਦਾ ਹੈ। ਉਸ ਦੀ ਮਾਨਸਿਕ ਤੇ ਸਰੀਰਕ ਸਿਹਤ ਡਾਵਾਂਡੋਲ ਹੋ ਰਹੀ ਹੈ। ਅੱਖਾਂ ਖਰਾਬ ਹੋ ਰਹੀਆਂ ਹਨ ਅਤੇ ਹਾਜ਼ਮਾ ਦਰੁਸਤ ਨਹੀਂ ਰਿਹਾ। ਸਿੱਖਿਆ ਦਾ ਮਾਟੋ ਹੈ ਵਿਦਿਆਰਥੀ ਦਾ ਸਰਬਪੱਖੀ ਵਿਕਾਸ ਪ੍ਰੰਤੂ ਗਰੈਜੂਏਟ ਅਤੇ ਪੋਸਟ-ਗਰੈਜੂਏਟ ਵਿਦਿਆਰਥੀ ਸਿਰਫ ਕਿਤਾਬੀ ਗਿਆਨ ਤੱਕ ਸੀਮਤ ਹੋ ਕੇ ਰਹਿ ਗਿਆ ਹੈ। ਸਿਹਤ ਉਸ ਲਈ ਸੈਕੰਡਰੀ ਵਿਸ਼ਾ ਬਣ ਕੇ ਰਹਿ ਗਈ ਹੈ। ਦੂਜੇ ਪਾਸੇ ਪੰਜਾਬੀ ਨੌਜਵਾਨਾਂ ਦਾ ਇਕ ਅਜਿਹਾ ਵਰਗ ਵੀ ਹੈ, ਜੋ ਆਪਣੀ ਅੱਲ੍ਹੜ ਉਮਰ ਵਿਚ ਪੜ੍ਹਨ ਦੀ ਬਜਾਏ ਨਸ਼ਿਆਂ ਦਾ ਗੁਲਾਮ ਹੋ ਕੇ ਰਹਿ ਗਿਆ। ਅੱਜ ਸਮੇਂ ਦੀ ਜ਼ਰੂਰਤ ਹੈ ਕਿ ਹਰ ਪੰਜਾਬੀ ਨੌਜਵਾਨ ਆਪਣੀ ਵਿਰਾਸਤ, ਆਪਣੇ ਸੱਭਿਆਚਾਰਕ ਪਿਛੋਕੜ ਨੂੰ ਦੇਖਦੇ ਹੋਏ ਆਧੁਨਿਕ ਤਕਨਾਲੋਜੀ ਅਤੇ ਨਸ਼ਿਆਂ ਦੇ ਮੱਕੜਜਾਲ ਵਿਚੋਂ ਨਿਕਲ ਕੇ ਅਸਲ ਪੰਜਾਬੀ ਹੋਣ ਦਾ ਆਪਣਾ ਫ਼ਰਜ਼ ਪਛਾਣੇ।

-ਕੇ. ਐਸ. ਅਮਰ
ਪਿੰਡ ਤੇ ਡਾਕ: ਕੋਟਲੀਖ਼ਾਸ, ਤਹਿ: ਮੁਕੇਰੀਆਂ (ਹੁਸ਼ਿਆਰਪੁਰ)।

ਔਰਤ
ਔਰਤ ਕਮਜ਼ੋਰ ਨਹੀਂ ਹੈ। ਨਾਰੀ ਨੂੰ ਕਦੇ ਵੀ ਖ਼ੁਦ ਨੂੰ ਘੱਟ ਜਾਂ ਕਮਜ਼ੋਰ ਨਹੀਂ ਸਮਝਣਾ ਚਾਹੀਦਾ। ਜਗਤ ਜਣਨੀ ਵਿਚ ਜਿੰਨੀ ਸਹਿਣਸ਼ੀਲਤਾ ਅਤੇ ਯੋਗਤਾ ਹੈ, ਉਸ ਨਾਲ ਹਰ ਖੇਤਰ ਵਿਚ ਸਫ਼ਲਤਾ ਪਾਈ ਜਾ ਸਕਦੀ ਹੈ। ਜ਼ਰੂਰਤ ਹੈ ਨਕਾਰਾਤਮਕ ਸੋਚ ਤਿਆਗ ਕੇ ਸਕਾਰਾਤਮਕ ਸੋਚ ਅਪਣਾਉਣ ਦੀ। ਨਾਰੀ ਕਮਜ਼ੋਰ ਨਹੀਂ ਹੈ।

-ਸੇਵਾ ਰਾਮ ਬਰੇਟਾ
ਮੇਨ ਧੋਬੀਆਣਾ ਰੋਡ, ਪ੍ਰੀਤ ਨਗਰ, ਬਠਿੰਡਾ।






Website & Contents Copyright © Sadhu Singh Hamdard Trust, 2002-2018.
Ajit Newspapers & Broadcasts are Copyright © Sadhu Singh Hamdard Trust.
The Ajit logo is Copyright © Sadhu Singh Hamdard Trust, 1984.
All rights reserved. Copyright materials belonging to the Trust may not in whole or in part be produced, reproduced, published, rebroadcast, modified, translated, converted, performed, adapted,communicated by electromagnetic or optical means or exhibited without the prior written consent of the Trust. Powered by REFLEX